CLOSE WINDOW

D2688
བོད་ཡིག

/shrad+d+hA ka ra warma dang / bod kyi lo tsA ba mkhas pa chen po rin chen bzang pos rgya dpe dang gtugs nas bcos pa'o/ /[ ]@##/ /rgya gar skad du/ sa man+ta mu kha pra be sha rasmi bi ma loSh+NI Sha pra b+hA sar+b+ba ta thA ga tA hr-i da ya sa ma ya bi lo ki te nA ma d+hA ra Ni saM br-it+ti/bod skad du/ kun nas sgor 'jug pa'i 'od zer gtsug tor dri ma med par snang ba de bzhin gshegs pa thams cad kyi snying po dang dam tshig la rnam par blta ba zhes bya ba'i gzungs kyi rnam par bshad pa/ byang chub sems dpa' sems dpa' chen po thugs rje chen po dang ldan pa 'phags pa spyan ras gzigs dbang phyug la phyag 'tshal lo//dbu'i gtsug tor 'od zer gyis/ /rmongs pa'i dri ma sel mdzad rgyal/ /gzungs kyi rgyan dang ldan pa'i sku/ /thugs rje mnga' la phyag 'tshal nas/ /lung dang bla ma'i man ngag las/ /gzungs la rtogs pa skyes pas 'dir//shes rab gzungs dang bral rnams la/ /brtse bas gzungs kyi rnam 'grel bshad/ /log rtog can rnams tha dad du/ /rtsod pa'i dus su rtsod mod kyang / /rtsod med thub pa'i bka' sde rnams/ /rtsod pa bcad phyir gzigs mo 'tshal/ /yang dag bka' rnams ma mthong zhing //nges pa'i lam la mi mos pa'i/ /lam log lam gol zhugs pa rnams/ /lam mchog rdo rje theg pa'i gzhung / /seng+ge'i nga ro grag pa la/ /smod cing thag ring 'bros par 'gyur/ /dgrol dka' rmongs pa de dag la/ /brgyud pa las byung gdams ngag spa//thub pa'i bstan rtsa dge slong yin/ /dam chos tshul bzhin spyod pa yi/ /dge slong de ni shin tu dkon/ /rtags dang cha lugs tsam bzung nas/ /rdo rje theg pa smod byed pa'i/ /rtog ges gzhung 'di smad mi bya/ /sngags gzhung la la chud mod kyang / /log spyad dam tshig mi bsrung la//sngags gzhung gsang bar bya dgos na/ /byis pa gzhan lta smos ci dgos/ /dad med rnam g.yeng le lo can/ /bag med sems rtsub ser sna che/ /g.yo sgyu 'dod sred gnyid brkam che/ /byas gzo snying rje shes rab chung / /bar chad 'di dag dang ldan na/ / gzungs 'di 'grub par mi 'gyur ro/ /dad ldan dpa' brtan brtson 'grus can/ /gtong phod ngag 'jam dul bag che/ /drad des gsal la chags pa chung / /blo ldan drin gzo 'tshe ba bral/ /nad dang nga rgyal the tshom med/ /des ni myur du 'grub par 'gyur/ /de lta bu'i yon tan dang ldan pa'i gang zag la rtogs pa 'di'i don bshad par bya'o//de yang / mdo don smra bar 'dod rnams kyis/ /bsdus pa dgos pa'i don bcas dang / /tshig don bcas dang brgal lan bcas/ /mtshams sbyar bcas pas bsnyad par bya/ /zhes pa'i tshul gyis rtogs pa 'di'i bsdus pa'i don rnam pa bdun te/gleng gzhi dang / gleng ba slang ba dang / rten dang / shes par bya ba'i yul dang / nyams su blang ba'i thabs dang / bsgrub par bya ba'i dngos po dang / thob pa'i 'bras bu'o/ /de la gleng gzhi la gnyis te/ thun mong dang / khyad par ro/ /dang po ni sdud pa po rang nyid la yid ches par bya ba'i phyir thams cad du smos so//gnyis pa ni don gyi gnas skabs brda sprad pa'i phyir zhus lan gyi tshul du gsungs so/ /de gnyis car yang rang la ldog pa gcod cing don la dran pa bskyed pa ste/ gzhung 'byung ba'i rgyu'o/ /gleng bslang ba ni don nyid gzhan gyi spyod yul du ji ltar 'gyur ba zhus len gyi tshul gyis bsdus nas bkod pa ste gzhung 'byung ba'i rkyen no//rten gyi gang zag ni bsgrub tu rung ba dang / nges par 'grub pa'i rigs so/ /shes par bya ba'i yul ni don dam dang kun rdzob bo/ /kun rdzob la gnyis te/ kun nas nyon mongs pa dang /rnam par byang ba'o/ /rnam par byang ba ni gnyis te/ byang chub sems dpa' rnams kyi shes rab dang snying rje'o/ /de ni shes rab kyis 'khor bar mi ltung ba dang / snying rjes mya ngan las 'das par mi bzhugs pa'o/ /dang po ni lhag pa shes rab ste don gyi gzungs so//gnyis pa ni 'jug ldog la rmongs pa'i sems can rnams la snying rje chen po 'byung ba'i phyir tshig gi gzungs so/ /bsgrub par bya ba'i dngos po ni sngags dang rgyud dang phyag rgya'i tshul lo/ /thob par bya ba'i 'bras bu ni thun mong gi dngos grub dang mchog gi dngos grub bo//de dag ni bsdus pa'i don to/ /dgos pa'i don ni yang dag pa'i lam gyi gol sa gcad pa'o/ /dran pa dang shes rab kun nas sgo dbyings rnam par dag pa la 'jug pa dang / 'od zer khyad par gyi dpyod pa rtog pa'i dra ba sel ba de dag yang dag pa'i lam mo/ /gol sa ni ma rtogs pa dang /log par rtogs pa dang / the tshom mo/ /don 'di la zhugs na skyon gsum po dang bral bar 'gyur ro/ /de ltar na de la rim gyis sbyangs pa'i mthus sgrib pa gnyis dang bral nas don yang dag par bde blag tu rnyed pa ni dgos pa'i dgos pa'o/ /da ni tshig gi don brjod de//de la brgal lan dang mtshams sbyar ba ni shugs kyis 'ong ngo / /de nas zhes pa ni dbang du bya ba dang mtshams sbyar ba dang bkra shis pa'i don to/ /de la byang chub sems dpa' sgrib pa rnam sel gyi rgyud dga' ldan gyi gnas su gsungs pa 'das ma thag tu yang sum cu rtsa gsum pa'i lha'i don du 'di nyid gsungs pa ni/de nas te de dang mtshams sbyar ba'o/ /ni brgal ba 'di kho na gsungs pa'i phyir dbang du bya'i de nas so/ /a tha kha lu zhes kye'am legs so'i sgra yod pas bkra shis pa'i de nas so/ /bcom ldan 'das ni rdo rje lta bu'i ting nge 'dzin gyis lhan cig skyes pa'i ma rig pa bcom pas nyon mongs pa gtan mi skye ste/nyon mongs pa'i bdud bcom pa'o/ /rgyu nyon mongs pa med na 'bras bu dngos po la mngon par zhen pa med pas lha'i bu'i bdud bcom pa'o/ /dngos po'i mngon zhen med pas bag chags kyi mtshams mi sbyor te des phung po'i bdud bcom pa'o//sdug bsngal gyi phung po zad na rnam rtog gi khar mi ltung bas skye shi dang bral bas 'chi bdag gi bdud bcom mo/ /ldan ba ni/ dbang phyug dang ni gzugs bzang dang / /dpal dang grags dang ye shes dang / /brtson 'grus phun sum tshogs ldan pa//drug ni skal dang ldan zhes bshad/ /ces te/ dbang phyug ni sgrib pa thams cad kyi dbang du ma gyur pa'i rang dbang chen po dang ldan pa'o/ /gzugs bzang ni mtshan dang dpe byad do/ /dpal ni bsod nams dang ye shes kyi tshogs te/ gzhan gyis bsten bya min pas so/ / grags pa ni tshangs pa'i 'jig rten la thug gi bar du bcom ldan 'das bde bar gshegs pa 'jig rten mkhyen pa skyes bu 'dul ba'i kha lo bsgyur ba bla na med pa lha dang mi rnams kyi ston pa sangs rgyas so zhes pa la sogs pa du ma grags te yon tan no/ /ye shes ni shes bya ji snyed pa dang / ji lta ba lag mthil gyi skyu ru ra ltar mkhyen pa'o/ /brtson 'grus ni sku gsung thugs kyi mdzad pa rgyun mi 'chad pa ste/ thugs rje'o/ /de la dbang phyug dang ye shes ni chos kyi sku'o/ /gzugs bzang ni longs spyod rdzogs pa'i sku'o/ /dpal dang grags pa ni sprul pa'i sku'o/ /brtson 'grus ni gsum ka'o//yang na phyir mi ldog pa 'khor lo'i mdo las/ nam mkha' 'dra ba'i chos rnams ni/ /lus can dag la rab ston kyang / /de la bsnyel ba mi mnga' bas/ /de phyir bcom ldan 'das zhes bya/ /zhes gsungs so/ skye ba gcig gis thogs pa'i byang chub sems dpa' chen pos rgyun mi 'chad par lha'i bu rnams la chos kyi dga' ba'i ro myong bar mdzad pas dga' ldan gyi lha'i gnas zhes bya ste/gnas phun sum tshogs pa'o/ /gnas 'di smos pas ni rtogs pa 'di'i sgor zhugs pa'i rigs kyi bu dang rigs kyi bu mo rnams kyang ji srid chos dga' ba chen po'i rigs rgyun mi 'chad par myong bar 'gyur ba'i don to//'khor gsungs pa byang chub ni rnam par dkar ba'i lam rgyu dang 'bras bur bcas pa'o/ /de la sems dpa' ni byang chub sems dpa'o/ /de nyid nyan thos dang rang rgyal la yang yod pas 'dir chen po gsungs so//de la che ba rnam pa bdun dang ldan pas byang chub sems dpa' chen po'o/ /de la chos chen po ni rig pa mtshog dang dbang bskur ba'i rgyud chen po dang / ta thA saM gra ha la sogs pa'i gzhung rgya chen po rnams la dbang mdzad pa'i phyir ro/ /sems bskyed pa chen po ni bde bar gshegs pa rigs lnga dang go 'phang mnyam pa la dbang sgyur ba thob pas so//mos pa chen po ni don zab pa dang rgya che ba la mos pa'o/ /bsam pa rgya che ba la mos pa ni sems can thams cad la phan pa dang / bde ba skyed pa'i phyir ro/ /tshogs chen po ni bsod nams dang ye shes kyi tshogs rgyun mi 'chad pas so//dus chen po ni 'khor ba ji srid par gzhan don la 'jug par zhal gyis bzhes pas so/ /thob pa chen po ni yang dag par rdzogs pa'i sangs rgyas phyag rgya chen po'i sku'o/ /lta ba dang rtogs pa gcig cing mchog gcig pa dang 'dun pa gcig pas spang bya spang ba bar chad med pa'i phyir dge 'dun no//de ni yon tan no/ /grangs ni rtsod par 'gyur ba'i phyir ma gsungs mod kyi byang chub sems dpa' sgrib pa rnam sel gyi rgyud du gsungs pa dang / byang chub sems dpa' chen po rdo rje'i rigs bye ba phrag brgyad cu dang /rin po che'i rigs dang / pad+ma'i rigs dang / las kyi rigs dang / bde bar gshegs pa'i rigs dang / de lta bu la sogs pa mu mtha' yas so zhes gsungs so/ /zhabs 'bring pa lha'i tshogs zhes pa ni chos che bar byed cing bstan pa rgyas par byed pa'i phyir ston pa'i zhabs su 'brang ba'o//de la chos la mos pa bskyed pa'i 'khor ni tshangs pa'o/ /rgol ba tshar gcod par byed pa'i 'khor ni khyab 'jug go/ /bstan pa 'dzin par byed pa'i 'khor ni dbang phyug chen po'o/ /sogs kyis ni phul du byung ba'i sbyin bdag gi 'khor brgya byin dang /gdul bya bzod pa'i 'bras bu tshim par byed pa'i 'khor mtshe ma'i lha dang / rdzu 'phrul sna tshogs pa la dbang sgyur ba 'phrul dga'i lha dang / 'dod pa la gcig tu zhen pa dang bral ba'i 'khor gzhan 'phrul dbang byed pa'i lha dang / 'dod pa la lhag par chags pa dang bral ba gzugs khams kyi lha rnams dang /rigs gnas ston par byed pa sum cu rtsa gsum pa'i lha'i 'khor dang / chos 'dzin pa'i gang zag skyong bar byed pa'i 'khor rgyal po chen po 'khor dang bcas pa'o/ /thabs cig pa ni gsum ste/ sdud pa'i 'khor phyag na rdo rje dang spobs pa gcig tu sbyar ba'o//nyan pa'i 'khor ni gus pa dang dbyer mi phyed pa'o/ /gdul bya'i dus la mi ldog pas thabs cig pa'o/ /bzhugs zhes pa yang gsum ste/ sku'i bzhugs pa ni 'chag pa dang / bzhengs pa dang / seng ge lta bur gzims pa zhes pa'o/ / gsung gi bzhugs pa ni/ gsung gcig gis ni gsungs mod kyang / du ma nyid du so sor go/ /zhes dbang po rab 'bring tha ma rgyun mi 'chad pa'i tshul gyis gsung dbyung ngo / /thugs kyi bzhugs pa ni gnyis te/ 'jig rten pa dang mthun pa'i thugs bskyed nas ting nge 'dzin gang la zhugs na grog sbur la sogs pa yan chad kyis kyang bcom ldan 'das kyi thugs rig par mdzad pa ni nang du yang dag 'jog gis bzhugs pa'o//snyoms par 'jug pa la gsum ste/ lha'i tshul dang mthun par bsam gtan bzhis snyoms par 'jug pa dang / tshad med pa bzhis tshangs pa'i snyoms par 'jug pa dang / rnam thar gsum gyis 'phags pa'i snyoms par 'jug pa'o/ /te zhes pas bzhugs pa nyid ni 'das pa bstan to/ /'khor mang po tshogs pa ni mi mthun pa yod na gnyen po 'byung ba'i phyir bar du gcod pa'i 'khor te bdud kyang shes par bya'o//des na gdul bya'i 'khor ro/ /de nas bcom ldan 'das dga' ldan gyi gnas de na chos gsungs pa'i dus su 'dod pa dang gzugs kyi lha'i bu thams cad tshogs te bcom ldan 'das kyi rdzu 'phrul gyi lam byin gyis brlabs pa'o/ /des na gzungs kyi dbang phyug rgyal pos zhus pa'i mdor ji skad gsungs pa ltar dga' ldan gyi lha'i gnas nor bu rin po che'i khang sgrom chen po sprul nas/lha'i gnas thams cad nas rin po che'i them skas du ma brten te/ sku'i 'od zer rigs mi mthun pa bye ba phrag brgyad cu re re mngon par 'dus byas nas stong gsum gyi stong chen po'i rab 'byams kyi 'jig rten gyi khams thams cad kyi lha tshogs rnams 'dir lhags par gyur to zhes bya ba'i bar du'o//der gsungs pa'i chos ni pha rol tu phyin pa drug gi don gyi rgyas pa'i gsang sngags 'di kho na'o//de la pha rol tu phyin pa drug ni 'di lta ste/ sbyin pa'i pha rol tu phyin pa ni gang byang chub sems pa'i chos nyid la gnas pa'i byang chub sems dpa' byang chub kyi sems la brten nas snying rje sngon du btang ba'i sems kyis bdog pa thams cad yongs su gtong ba la lus dang ngag dang yid kyi las te de ltar byas na sbyin pa'i pha rol tu phyin pa'i mtshan nyid ni rigs dang /smon lam dang / bsam pa dang / dngos po dang / ngo bo nyid kyis bstan par rig par bya'o/ /'di lta ste byang chub sems dpa'i chos nyid ni rigs so/ /byang chub kyi sems ni smon lam mo//snying rje sngon du gtong ba'i sems ni bsam pa'o/ /bdog pa thams cad yongs su gtong ba ni dngos po'o/ /lus dang ngag dang yid kyi las ni ngo bo nyid do/ /de bzhin du shes rab kyi pha rol tu phyin pa'i bar yang de bzhin du rig par bya'o/ / 'di ni bye brag yin te/ tshul khrims dang bzod pa dang / brtson 'grus kyi pha rol tu phyin pa rnams la ni sdom pa thams cad yang dag par len pa dang rjes su bsrung ba dang / gnod par byed pa dang du len pa dang / sdug bsngal ji mi snyam par 'dzin pa dang / dge ba'i chos thams cad yang dag par sgrub pa la lus dang ngag dang yid kyi las so zhes go rims bzhin du brjod par bya'o//bsam gtan gyi pha rol tu phyin pa la ni lus dang ngag dang yid kyi las kyi rnam pa thams cad dbang 'byor ba dang sems kyi gnas rnam pa thams cad dang ldan no/ / shes rab kyi pha rol tu phyin pa la ni lus dang ngag dang yid kyi las kyi rnam pa thams cad dbang 'byor pa la gang rnam pa thams cad du chos rab tu rnam par 'byed pa'o zhes brjod par bya'o/ /lhag ma thams cad ni sbyin pa'i rang bzhin du rig par bya'o/ /gang sbyin pa ni thams cad mkhyen pa nyid las brtsams pa dang /thams cad mkhyen pa nyid du 'gyur ba dang / thams cad mkhyen pa nyid du 'dzin pa dang / thams cad mkhyen pa nyid kyi bya ba byed pa ste/ de ni sbyin pa'i pha rol tu phyin pa nyid ces bya'o/ /tshig bzhi po de dag ni go rims bzhin du rtsom pa dang bag chags dang lus dang rgyu mthun par reg par bya'o//de la rtsom pa ni thams cad mkhyen pa nyid las brtsams te 'byung ba dang / 'byung ba der yongs su bsngo ba'i phyir ro/ /sbyin pa de rgyud la bag chags su bsgo ste de phyi ma las thams cad mkhyen pa nyid du 'gyur ro/ /gang gi tshe de nyid yongs su rdzogs par gyur pa de'i tshe chos kyi sku yongs su 'grub pa'i tshul gyis thams cad mkhyen pa nyid yongs su 'dzin to//de'i 'og tu longs spyod rdzogs pa dang sprul pa'i sku rgyu mthun pa'i sgo nas thams cad mkhyen pa'i bya ba byed do/ /shes rab kyi pha rol tu phyin pa'i bar la yang de bzhin du rig par bya'o//go rim gyi 'og ma 'og ma la brten pa'i phyir te/ sbyin ba'i pha rol tu phyin pas ni nang dang phyi'i dngos po thams cad yongs su gtong bar goms pas lus dang srog la mi lta ba'i byang chub sems dpa' longs spyod kyi phung po chen po yang spangs nas tshul khrims yang dag par 'dzin par byed do//tshul khrims rjes su bsrung ba ni gshe yang slar gshe bar mi byed de zhes bya ba la sogs pa rnams kyis bzod par 'gyur ro/ /grang ba la sogs pa bzod pa ni de'i gzhi la sbyor ba mi nyams pas brtson 'grus brtsams pa yin no//brtson 'grus brtsams pa ni sbyor ba mtha'i 'bras bu thob pas bsam gtan sgrub pa'o/ /bsam gtan phun sum tshogs te sems mnyam par gzhag pa ni yang dag pa ji lta ba bzhin du shes pas 'jig rten las 'das pa'i shes rab 'thob bo/ /yang gong ma gong ma ni gzhi yin pa'i phyir ro//tshul khrims ni sbyin pa'i gzhi yin no/ /de bzhin du shes rab ni bsam gtan gyi gzhi yin pa'i bar du'o/ /'di ltar tshul khrims dang ldan pa'i sbyin pas phan btags pa'i tshul khrims kyis gnod pa mi byed pa'i phyir sbyin pa rnam par dag par 'gyur/de ltar byang chub sems dpa'i len pa po so so de rnam par 'tshe ba dang bral bar yo byad kyis bde bar sbyor bas tshul khrims kyi stobs kyis sbyin pa rnam par dag par rig par bya'o/ /de ltar bzod pa dang ldan pa ni gzhan gnod pa byed pa dag gis bslab pa'i gzhi mi 'dral ba tshul khrims rnam par dag go//brtson 'grus brtsams pas spro ba'i stobs kyis ched du 'khor ba khas blangs pa ni sems can gyi log par sgrub pa'i sdug bsngal bde blag tu bzod pas bzod pa rnam par dag go/ /bsam gtan ni bde ba dang bcas pa dang yid bde ba dang bcas par dge ba'i chos thams cad la sbyor ba brtson 'grus rnam par dag go//shes rab dang ldan pa'i chos rnam pa mang po la rnam par bltas nas nang du zhi bar byed pa ni ting nge 'dzin rnam par 'phel bas bsam gtan rnam par dag ste/ shes rab med la bsam gtan med//ces pa'i tshigs su bcad pa las gsungs pa'i phyir ro/ /ji ltar rags pa'i rim gyis kyang go rims bzhin du rig par bya'o/ /sbyin pa ni thams cad kyi nang na rags te de'i phyir thog mar rnam par gzhag go/ /de'i 'og tu bzod pa la sogs pas tshul khrims rags so//de bzhin du shes rab pas bsam gtan rags pa'i bar du'o/ /shes rab ni thams cad kyi nang na phra ste de'i phyir thams cad kyi tha mar bzhag go/ /nges pa'i tshig ni sbyin pa la sogs pa'i pha rol tu phyin pa zhes bya zhe na/ sbyin pa chen po dang /skyon med pa dang / dri ma med pa ni sbyin pa'i pha rol tu phyin pa zhes bya'o/ /de la sbyin pa chen po ni nang dang phyi'i dngos po thams cad sbyin pa dang yun ring du sbyin pa'i phyir ro/ /skyon med pa ni gnod pas kun tu tshol ba la sogs pa rnam par spangs pa'i phyir ro/ / ji skad du 'phags pa blo gros mi zad pas bstan pa'i mdo las sbyin pa mi zad pa las brtsams te bstan la/ btsun pa sha ra twa ti'i bu byang chub sems dpa' rnams kyi sbyin pa yang mi zad pa ste/ de ci'i phyir zhe na/ tshad med pa'i phyir ro/ /btsun pa sha ra dwa ti'i bu byang chub sems dpa' rnams kyi sbyin pa yongs su sbyang ba yang tshad med pa ste/tshe dang / spobs pa dang / bde ba dang / stobs dang / kha dog nye bar brtag pa'i phyir zas 'dod pa rnams la ni zas sbyin no/ /nyon mongs pa'i sred pa bsal ba'i phyir btung ba 'dod pa rnams la ni btung ba sbyin no//bde ba dang 'byor pa'i dngos po thams cad bsdus pa'i phyir bzhon pa 'dod pa rnams la ni bzhon pa sbyin no/ /ngo tsha shes pa dang khrel yod pa dang / mdog gser gyi kha dog yongs su sbyang ba'i phyir gos 'dod pa rnams la gos yongs su sbyin ba'o/ /de bzhin gshegs pa'i lha'i spyan yongs su rdzogs par bya ba'i phyir mar me 'dod pa rnams la ni mar me yongs su sbyin pa'o//de bzhin gshegs pa'i lha'i snyan yongs su dang bar bya ba'i phyir sil snyan 'dod pa rnams la ni sil snyan yongs su sbyin pa'o/ /tshul khrims dang thos pa dang ting nge 'dzin gyi dris byug pa'i phyir spos dang byug pa 'dod pa rnams la ni spos dang byug pa sbyin pa'o//gzungs dang spobs pa dang byang chub kyi yan lag gi me tog thob par bya ba'i phyir phreng ba 'dod pa rnams la ni phreng ba sbyin par bya'o/ /lus kyi dri yid du 'ong ba thob par bya ba'i phyir phye ma 'dod pa rnams la phye ma sbyin pa'o//skyes bu chen po'i mtshan ro bro ba mchog tu yongs su rdzogs par bya ba'i phyir ro bro ba thams cad 'dod pa rnams la ro bro ba thams cad sbyin pa'o/ /sems can thams cad kyi gnas dang skyabs dang / mgon dang dpung gnyen bya ba'i phyir gnas 'dod pa rnams la gnas sbyin par bya'o//sgrib pa thams cad rab tu spangs pa dang tshangs pa'i gnas pa de bzhin gshegs pa'i gzims cha thob par bya ba'i phyir mal cha 'dod pa rnams la mal cha sbyin par byed do/ /stong gsum gyi stong chen po'i sa thams cad kyi byang chub kyi snying po rdo rje'i gdan thob par bya ba'i phyir stan 'dod pa rnams la stan sbyin par byed do//byang chub kyi yo byad thams cad bkang ba'i phyir yo byad 'dod pa rnams la yo byad sbyin pa'o/ /mi rga mi 'chi ba'i bdud rtsis yongs su bkang ba'i phyir sman 'dod pa rnams la sman sbyin pa'o//rang dbang dang rang nyams dang rang byung gi ye shes bskang ba'i phyir byang chub sems dpa' rnams kyi bran pho dang bran mo yongs su btang ba'i sbyin pa'o zhes rgya cher 'byung ba lta bu'o/ /dri ma med pa ni mi mthun pa'i phyogs bag chags dang bcas pa spangs pa'i phyir ro//dam pa rnam pa 'di gsum gyis sbyin pa'i pha rol tu phyin pa zhes brjod pa yin te/ dam pa rnam gsum ni 'dris pa dang bcas pa'i ngo bo nyid dam pa dang thabs dam pa dang 'bras bu dam pa'o/ /'dris pa dam pa ni yun ring po nas sbyin par rig par bya'o//shes rab kyi pha rol tu phyin pa'i bar du yang de bzhin du rig par bya'o/ /tshul khrims kyi pha rol tu phyin pa skyon med pa ni bdag tu sgro 'dogs pa rnam par spangs pa'i phyir te ci rigs su de mi zad par blta bar bya'o/ /yang dam pa rnam pa bcu gnyis dang ldan pa'i phyir pha rol tu phyin pa zhes bya'o//dam pa rnam pa bcu gnyis la rgya che ba dam pa ni 'jig rten gyi phun sum tshogs pa thams cad mi 'dod pa dang mchog tu gyur pa'i phyir ro/ /yun ring po dam pa ni bskal pa grangs med pa gsum du yongs su bsgoms pa'i phyir ro/ /ched du bya ba dam pa ni sems can gyi don bya ba'i ched kyi phyir ro//zad mi shes pa dam pa ni byang chub chen por yongs su bsngos bas gdung bar mi 'gyur ba'i phyir ro/ /rgyun mi 'chad pa dam pa ni bdag dang gzhan mnyam pa nyid du mos pa'i phyir ro/ /sems can thams cad la sbyin pa la sogs pa pha rol tu phyin pa rnams yongs su rdzogs par bya ba'i phyir ro//tshigs med pa dam pa ni gzhan gyi sbyin pa la sogs pa la rjes su yi rang ba tsam gyis pha rol tu phyin pa yongs su rdzogs par bya ba'i phyir ro/ /dbang 'byor pa dam pa ni nam mkha' mdzod kyi ting nge 'dzin la sogs pas sbyin pa la sogs pa yongs su rdzogs pa'i phyir ro//yongs su gzung ba dam pa ni rnam par mi rtog pa'i ye shes kyis yongs su gzung ba'i phyir ro/ /rtsom pa dam pa ni mos pa spyod pa'i sa la bzod pa cher gyur pa la'o/ /thob pa dam pa ni sa dang po la'o/ /rgyu mthun pa dam pa ni de ma yin pa gzhan brgyad po dag la'o//'grub pa dam pa ni sa bcu pa dang / de bzhin gshegs pa'i sa la byang chub sems dpa' 'grub pa dang sangs rgyas 'grub pa'i phyir ro/ /yang dam pa rnams kyis spyad pa dang bgrod pa'i phyir pha rol tu phyin pa rnams te/ sangs rgyas dang byang chub sems dpa' rnams kyis spyad pa dang bgrod ces pa'i tha tshig go/ /yang shes bya'i pha rol tu son pas pha rol tu phyin pa ste/ sangs rgyas nyid la gnas zhes pa'i tha tshig go/ /yang bdag dang gzhan mchog tu gnod pa las sgrol bar byed pa'i pha rol tu phyin pa rnams te/bdag dang gzhan sdug bsngal gyi rgya mtsho las bzla bar byed ces pa'i tha tshig go/ /'di ni re zhig thun mong gi nges tshig go/ /so sor nges pa'i tshig ni sbyin bdag gi dbul ba sel ba dang / len pa po rnams kyi gdung ba sel ba'i phyir sbyin pa'o/ / dbang po zhi ba thob pa dang 'gro ba bzang por sbyor ba dang / gsal ba'i gnas yin pas tshul khrims te/ go rims bzhin du dbang po rnams kyi sgo sdom par byed pa dang bde 'gror 'gro ba'i rgyur gyur pa dang 'gyod pa med pa la sogs pa'i rim gyis mya ngan las 'das pa'i bar gyi gnas yin pa'i phyir ro//khro ba'i na tsha sel ba dang rma 'byin pa'i sems 'ongs pa sel ba dang / /zhi ba brjod pa'i bzod pa'o/ /rma 'byin pa sems pa ni gang gis gnod pa byed pa rnams la lan du gnod pa ste de 'ongs pa 'dis 'bral bar byed pa ni sel bar rig par bya'o//rma 'byin pa ni 'di dag las shar gnyer ba yod pas rma 'byin pa can te de dag bdag la mi 'jigs pa sgrogs pas bde ba ni bde ba sgrogs par rig par bya'o/ /sel ba 'phel bar spyod pas brtson 'grus te de sel ba'i phyir spyod pa ni yang dag par spong ba gnyis kyis mi dge ba'i chos dang bral bar byed pa'o//'phel ba'i phyir spyod pa ni yang dag par spong ba gnyis kyis dge ba'i chos yang dag par sgrub pa'o/ /'dzin pa dang sdom pa dang 'dul ba dang thob par byed pas bsam gtan te/ de la 'dzin pa ni dmigs pa la sems 'dzin pa'o/ /sdom pa ni rnam par g.yeng ba las sems yang dag par sdom pa'o//'dul ba ni kun nas dkris pa rnams rnam par gnon pa'o/ /thob par byed pa ni dbang 'byor pa thob par byed par rig par bya'o/ /gzhan gyis smras pa shes pa dang so so rang gis shes pa dang / rnam par shes pa dang / zhi ba thob pa dang / rab tu zhi ba thob pa dang / yon tan mchog tu sbyin pas shes rab ste de la gzhan gyi smras pa las byung ba'i tshul bzhin yid la byed pa dang mtshungs par ldan pa'i shes rab bo/ /so so rang gis shes pa ni 'jig rten las 'das pa'o/ / rnam par shes pa ni 'jig rten las 'das pa'i rjes las thob pa'o/ /zhi ba thob par bya ba'i phyir shes pa ni bsgom pa'i lam la gnyen por gyur pa'o/ /yon tan mchog tu phyin par bya ba'i phyir shes pa ni yon tan khyad par can mngon par sgrub pa'i shes rab tu rig par bya'o/ /bsgom pa ni rnam pa lnga ste/phung po la gnas pa nas dbang 'byor pa la gnas pa'i bar du'o/ /'dir tshigs su bcad pa/ phung po gnas pa bsgom pa ste/ /yid la byed pa bsam pa yin/ /thabs dang dbang 'byor de bzhin te/ /de dag thams cad brjod pa yin/ /ji skad du/ rgyu dang rnam smin smon lam dang //so sor rtog pa phung po 'dra/ /zhes bshad pa lta bu'o/ /de la phung po la rnam pa bzhi ste/ de la rgyu la gnas pa ni shes rab kyi stobs kyis pha rol tu phyin pa rnams la nan tan gyis goms par byed pa'o/ /rnam par smin pa la gnas pa ni gang phun sum tshogs pa'i stobs kyis so//smon lam la gnas pa ni gang sngon gyi smon lam gyi stobs kyis so/ /so sor rtog pa'i stobs kyis gnas pa ni shes rab kyi stobs kyis pha rol tu phyin pa rnams la nan tan gyis goms par byed pa'o/ /yid la byed pa la gnas pa ni bzhi ste/ mos pa yid la byed pa bsgom pa ni gang la pha rol tu phyin pa thams cad dang ldan pa'i mdo sde la mos pa bsgom pa'o/ /ro myong ba yid la byed pas bsgom pa ni pha rol tu phyin pa thob pa rnams la yon tan mthong ba'i tshul gyis ro myang bar byed pa'o/ /rjes su yi rang ba yid la byed pas bsgom pa ni 'jig rten gyi khams thams cad kyi sems can thams cad kyi sbyin pa la sogs pa la rjes su yi rang ba'o//mngon par dga' ba yid la byed pas bsgom pa ni bdag dang sems can thams cad kyi ma 'ongs ba'i pha rol tu phyin pa'i khyad par la mngon par dga' ba'o/ /bsam pa la gnas pa ni pha rol tu phyin pa'i bsgom pa rnam pa drug ste/mi ngoms pa'i bsam pa dang / yangs pa'i bsam pa dang / dga' ba'i bsam pa dang / phan 'dogs pa'i bsam pa dang / gos pa med pa'i bsam pa dang / dge ba'i bsam pa'o/ /de la byang chub sems dpa' sbyin pa la mi ngoms pa'i bsam pa ni byang chub sems dpa' gcig cig gang+gA'i klung gi bye ma snyed kyi 'jig rten gyi khams rin po che sna bdun gyis yongs su gang ba dang lus gang+gA'i klung gcig la sbyin par byed ces so//de bzhin du skad cig re re la gang+gA'i klung gi bye ma snyed kyi bskal par sbyin par byed cing sems can gcig la ji lta ba bzhin du sems can gyi khams ji snyed pa bla na med pa yang dag par rdzogs pa'i byang chub la yongs su smin par byed la/rnam grangs 'dis de la sbyin pas mi ngoms pa nyid ni byang chub sems dpa' sems dpa' nyid de/ rnam pa 'di lta bu'i bsam pa gang yin pa 'di ni sbyin pa la byang chub sems dpa'i bsam pa mi ngoms pa yin no//byang chub kyi snying po la 'dug gi bar du byang chub sems dpa' rnams rnam pa de lta bur sbyin pa gcig nas gcig tu brgyud pa skad cig tsam yang nyams par mi byed cing rgyun mi gcod de/rnam pa 'di lta bu'i bsam pa gang yin pa 'di ni sbyin pa la byang chub sems dpa'i yangs pa'i bsam pa'o/ /de ltar sbyin pas sems can de dag rjes su 'dzin pa'i byang chub sems dpa' ni shin tu dga' ba yin gyi sbyin pa des yongs su gzung ba'i sems can de dag ni de lta ma yin te/rnam pa 'di lta bu'i bsam pa gang yin pa 'di ni sbyin pa la byang chub sems dpa'i dga' ba'i bsam pa'o/ /gang dag la de ltar sbyin pas phan 'dogs pa'i sems can de dag ni bdag la phan 'dogs par byang chub sems dpa' mthong gi bdag gis ni ma yin te/de dag ni bla na med pa yang dag par rdzogs pa'i byang chub brtan pa'i phyir ro/ /rnam pa 'di lta bu'i bsam pa gang yin pa de 'di ni sbyin pa la byang chub sems dpa' phan 'dogs pa'i bsam pa'o/ /byang chub sems dpa' ni sems can rnams la de ltar sbyin pa las byung ba'i bsod nams yangs pa mngon par 'du byas kyang lan du phan 'dogs pa'am rnam par smin pa mi 'dod de rnam pa 'di lta bu'i bsam pa gang yin pa 'di ni sbyin pa'i pha rol tu phyin pa bsgom pa la byang chub sems dpa'i gos pa med pa'i bsam pa'o//byang chub sems dpa'i sbyin pa'i phung po spangs pa'i rnam par smin pa de lta bu'ang sems can rnams kyi yin par mngon par dga' bar byed kyi bdag la ni de lta ma yin te/sems can thams cad dang thun mong du byas te/ bla na med pa yang dag par rdzogs pa'i byang chub tu yongs su bsngo'o/ /rnam pa 'di lta bu'i bsam pa gang yin pa 'di ni sbyin pa'i pha rol tu phyin pa bsgom pa dang byang chub sems dpa'i dge ba'i bsam pa'o//de la tshul khrims kyi pha rol tu phyin pa bsgom pa nas shes rab kyi pha rol tu phyin pa bsgom pa'i bar la byang chub sems dpa' mi ngoms pa'i bsam pa ni gang byang chub sems dpa' lus gang+gA'i klung gi bye ma snyed du gyur zhing de'i tshe'i tshad bskal pa gang+gA'i klung gi bye ma snyed du gyur la/rgyun du yo byad thams cad kyis phongs par gyur cing stong gsum gyi stong chen po'i 'jig rten gyi khams mes rab tu gang ba na spyod lam bzhi byed kyang / skad cig gcig la tshul khrims kyi pha rol tu phyin pa nas skad cig gcig la shes rab kyi pha rol tu phyin pa'i bar la bsgom zhing rnam grangs 'dis tshul khrims kyi phung po ji snyed pa dang /shes rab kyi phung po ji snyed pa gang gis bla na med pa yang dag par rdzogs pa'i byang chub mngon par rdzogs par 'tshang rgya ba'i tshul khrims kyi phung po nas shes rab kyi phung po de bsgom yang byang chub sems dpa' de mi ngoms pa'o//byang chub sems dpa' byang chub kyi snying po la 'dug gi bar du tshul khrims kyi pha rol tu phyin pa bsgom pa nas shes rab kyi pha rol tu phyin pa bsgom pa'i bar du bsgom la byang chub sems dpa' yangs pa'i bsam pa'o//tshul khrims kyi pha rol tu phyin pa bsgom pa nas shes rab kyi pha rol tu phyin pa bsgom pa des sems can rjes su 'dzin pa'i byang chub sems dpa' ni rab tu dga' ba yin gyi rjes su gzung ba'i sems can de dag ni de ltar ma yin te/rnam pa de lta bu'i bsam pa gang yin pa 'di ni tshul khrims kyi pha rol tu phyin pa bsgom pa nas shes rab kyi pha rol tu phyin pa'i bar du bsgom pa ni byang chub sems dpa' dga' ba'i bsam pa'o/ /tshul khrims kyi pha rol tu phyin pa bsgom pa nas shes rab kyi pha rol tu phyin pa'i bar du bsgoms nas gang dag la phan 'dogs pa'i sems can de dag ni bdag la shin tu phan 'dogs par byang chub sems dpa' mthong gi bdag ni ma yin te/de dag bla na med pa yang dag par rdzogs pa'i byang chub tu ston pa'i phyir ro/ /rnam pa 'di lta bu'i bsam pa gang yang yin pa 'di ni tshul khrims kyi pha rol tu phyin pa bsgom pa nas shes rab kyi pha rol tu phyin pa'i bar du bsgom pa la byang chub sems dpa' phan 'dogs pa'i bsam pa'o//de la byang chub sems dpa' ni de ltar tshul khrims kyi pha rol tu phyin pa las byung ba nas shes rab kyi pha rol tu phyin pa'i bar las byung ba'i bsod nams mang po mngon par 'du byas kyang de la lan du phan 'dogs pa'am rnam par smin pa la 'dod pa med de/'di lta bu'i bsam pa gang yin pa 'di ni tshul khrims kyi pha rol tu phyin pa bsgom pa nas shes rab kyi bar gyi bsgom pa la gos pa med pa'i bsam pa'o//de la byang chub sems dpa'i tshul khrims kyi pha rol tu phyin pa'i bsgom pa las byung ba nas shes rab kyi bar gyi bsod nams kyi phung po'i rnam par smin pa'i 'bras bu yang sems can rnams kyi yin par mngon par dga' bar byed kyi bdag la ni ma yin te/sems can thams cad dang thun mong du byas te bla na med pa yang dag par rdzogs pa'i byang chub tu yongs su bsngo ba'o/ /rnam pa 'di lta bu'i bsam pa gang yin pa 'di ni tshul khrims kyi pha rol tu phyin pa bsgom pa nas shes rab kyi pha rol tu phyin pa'i bar du bsgom pa la byang chub sems dpa'i dge ba'i bsam pa'o//thabs la gnas te pha rol tu phyin pa bsgom pa gang zhe na/ rnam pa gsum ste/ so sor rtog pa'i phyir rnam par mi rtog pa'i ye shes kyi 'khor gsum yongs su dag pa ste thabs de ni yid la byed pa thams cad mngon par grub pa'i phyir ro//dbang 'byor pa la gnas te pha rol tu phyin pa bsgom pa ni rnam pa gsum ste/ lus la dbang 'byor ba dang / spyod pa la dbang 'byor pa dang / bshad pa la dbang 'byor pa'o/ /lus la dbang 'byor pa ni de bzhin gshegs pa'i sku gnyis su blta bar bya ste/rang bzhin dang longs spyod rdzogs pa'o/ /de la spyod pa la dbang 'byor pa ni sprul pa'i skur blta bar bya ste/ des sems can thams cad la spyod pa kun du ston pa'o/ /bshad pa la dbang 'byor ba ni pha rol tu phyin pa drug rnam pa thams cad du bshad pa la thogs pa med pa'o//rab tu dbye ba ni rton pa bco brgyad kyis pha rol tu phyin pa drug rab tu dbye bar blta'o/ /rton pa bco brgyad ni lus rton pa dang sems rton pa dang / dge ba rton pa dang / bde 'gro rton pa dang / byang chub rton pa dang / snying rje rton pa dang /sems can yongs su mi gtong bar rton pa dang / dman pa'i sems yongs su 'dor bar rton pa dang / mi skye ba'i chos la bzod pa rton pa dang / dge ba'i rtsa ba sbyor ba la rton pa dang / dge ba'i rtsa ba yang dag par sgrub pa rton pa dang / dge ba'i rtsa ba mi zad par rton pa dang /dge ba'i rtsa ba la yongs su mi skyo bar rton pa dang / bsam pa'i don thams cad 'byor par rton pa dang / tshogs sdud par rton pa dang / sa la 'jug pa rton pa dang / sangs rgyas kyi chos yang dag par sgrub pa rton pa dang / sangs rgyas kyi sgrub pa rton pa ste sbyin pa la sogs pa rnam pa gsum tha dad pas gsum gsum gyis go rims bzhin du bsdus par rig par bya'o//de la sbyin pa rnam pa gsum ni zang zing gi sbyin pa dang / mi 'jigs pa'i sbyin pa dang / chos kyi sbyin pa'o/ /tshul khrims la rnam pa gsum ste sdom pa'i tshul khrims dang /dge ba chos sdud pa'i tshul khrims dang / sems can don byed pa'i tshul khrims so/ /bzod pa rnam pa gsum ni gnod pa byed pa la ji mi snyam pa'i bzod pa dang / sdug bsngal dang du len pa'i bzod pa dang / chos la nges par sems pa'i bzod pa'o//brtson 'grus rnam pa gsum ni go cha'i brtson 'grus dang / sbyor ba'i brtson 'grus dang / sems can don bya ba'i brtson 'grus so/ /bsam gtan rnam pa gsum ni mthong ba'i chos la bde bar gnas par 'gyur ba'i bsam gtan dang / mngon par shes pa mngon par gsal ba'i bsam gtan dang /sems can gyi don bya ba'i bsam gtan no/ /shes rab rnam pa gsum ni kun rdzob la dmigs pa dang / don dam pa la dmigs pa dang / sems can gyi don la dmigs pa'o/ /de la zang zing gi sbyin pa ni lus la rton pa te bza' ba dang btung ba la sogs pa'i yo byad rnams kyis len pa po la phan 'dogs pa'i phyir ro//mi 'jigs pa sbyin pa ni sems la rton pa ste/ yid mi bde ba'i bye brag dang bral bar byas bas sems kyi dbugs nye bar sgrub pa'i phyir ro/ /gzhan yang de bzhin du sbyar bar bya'o//dman pa'i sems ni byang chub sems dpa' 'khor ba'i sdug bsngal gyis yongs su skyo bas nyan thos dang rang sangs rgyas kyi sems te/ de yongs su 'dor ba rton pa ni sdug bsngal dang du len pa'i bzod par rig par bya'o/ /dge ba'i rtsa ba mi zad pa ni sems can thams cad kyi don bya ba lhag par byed pas 'khor ba ji srid pa phung po lhag ma med pa'i mya ngan las 'das pa'i dbyings su yang yongs su mi gtong bas te/de rton pa ni sems can gyi don bya ba'i brtson 'grus su rig par bya'o/ /tshogs sdud pa ni thob pa la brten nas gdul bya rnams mnyam par gzhag par bya ba dang /sems mnyam par gzhag par bya ba'i phyir gdams pa dang / rjes su bstan pa rab tu sbyin pa de rton pa ni sems can gyi don bya ba'i bsam gtan no/ /sa la 'jug pa ni chos la mos pa sngon du btang ba'i bshad pa gang gis tshogs yongs su rdzogs par byas nas rab tu dga' ba'i sa la 'jug pa ste de ston par ni kun rdzob kyi bden pa la dmigs pa'o//lhag ma ni legs par sbyar ba'i phyir sbyar bar ma byas so/ /rab tu dbye ba ni sbyin ba bdun te/ rtsa ba'i sbyin pa ni rigs kyi gnas skabs pa'i byang chub sems dpa'i sbyin pa'i pha rol tu phyin pa ste rigs tsam la brten nas sbyin pa'i phyir ro//blangs pa'i sbyin pa ni sems bskyed pa'i gnas skabs pa ste smon lam yang dag par blangs pa la brten nas sbyin ba'i phyir ro/ /rjes su 'dzin pa'i sbyin pa ni bdag dang gzhan don sgrub pa'i gnas skabs pa'o//'dzin pa nges pa med pa'i sbyin pa ni de kho na'i don la yongs su rtogs pa gnas skabs pa'i ste/ sbyin bdag la gnas pa rnam par rtog pa la mngon par zhen pa'i 'dzin pa med pa'i phyir ro/ /yongs su 'dzin pa med pa'i sbyin pa ni mthun pa'i gnas skabs pa ni/pha rol gyi yo byad yongs su 'dzin pa med pa'i nam mkha' mdzod la sogs pa'i ting nge 'dzin rnams kyis nam mkha' las lag pa brkyang nas ji ltar 'dod pa bzhin du rin po che la sogs pa'i char 'bebs pa'i phyir ro/ /so sor rig pa'i sbyin pa ni yongs su smin pa'i gnas skabs pa ste/'dul ba ji lta ba bzhin du mthun par bya ba'i phyir ro/ /sbyin pa chen po'i chen po ni byang chub mchog gi gnas skabs pa'i ste bla na med pa'i phyir ro/ /de bzhin du shes rab kyi bar du ci rigs su sbyar bar rig par bya'o//bsdus pa ni sbyin pa la sogs pas byang chub sems dpa'i sas bsdus pa'i phyir te de la pha rol tu phyin pa rnams kyi rigs bsdus pa 'di ni dpe tsam mo/ /sbyin pa'i pha rol tu phyin pa la sogs pa ni rigs kyis bsdus par shes par bya'o/ /sems bskyed pa bsdus pa ni khyad par du 'phags pa'i sems bskyed pas bsdus pa'i phyir ro//sems bskyed pa ni rnam pa gnyis te/ khyad par can ma yin pa dang / khyad par du 'phags pa'o/ /de la khyad par can ma yin pa ni/ kye ma'o bdag bla na med pa yang dag par rdzogs pa'i byang chub mngon par rdzogs par 'tshang rgya bar shog cig snyam pa'o//khyad par du 'phags pa ni de ltar sbyin pa'i pha rol tu phyin pa yongs su rdzogs par shog shig snyam pa nas shes rab kyi pha rol tu phyin pa'i bar du'o/ /khyad par du 'phags pa'i sems bskyed pa 'di ni pha rol tu phyin pa rnams bsdus par rig par bya ste/de dag gi rgyu yin pa'i phyir ro/ /bdag dang gzhan gyi don bsdus pa gang sbyin pa'i phung po yongs su rdzogs pa 'di dag ni bdag gi don to/ gang gzhan la yo byad nye bar bsgrubs pas rjes su 'dzin pa 'di ni gzhan gyi don to/ /lhag ma rnams kyis bsdus pa yang de bzhin du rig par bya'o//don dam pa chos kyi dbyings las brtsams pa ni de bzhin nyid kyi sbyin pa la sogs pa spyi'i mtshan nyid yin pa'i phyir ro/ /ye shes kyi tshogs bsag pa ni thams cad mkhyen pa'i snod du bsgrub pa'i phyir ro/ /ye shes yongs su 'dzin pa las brtsams pa ni thams cad mkhyen pa nyid yongs su bsgrub pa'i phyir ro//ye shes kyi rjes su 'dzin pa las brtsams pa ni lnga po dag shes rab kyi pha rol tu phyin pa'i rjes su mthun pa'i phyir ro/ /ye shes kyi mtshan nyid las brtsams pa ni shes rab kyi pha rol tu phyin pa yang dag pa'i ye shes kyi ngo bo nyid yin pa'i phyir ro//de ltar na de bzhin nyid dang yang dag pa'i ye shes kyi ngo bo nyid de ni dam pa ni sbyin pa la sogs pas bsdus par rig par bya'o/ /dpe brjod pa 'dis bsdus pa lhag ma rnams bstan par bya'o/ /mi mthun pa'i phyogs ser sna dang 'chal pa'i tshul khrims dang khro ba dang le lo dang rnam par g.yeng ba dang 'chal pa'i shes rab ste/sbyin pa la sogs pa'i go rims bzhin no/ /pha rol tu phyin pa rnams kyis bsdus pa'i phyir sbyin pa'i chos ji snyed pa de dag gi mi mthun pa'i phyogs gang yin pa dang /shes bya'i sgrib pa de yang dag pa'i mi mthun pa'i phyogs su rig par bya'o/ /phan yon ni 'bras bu rnam pa lnga'i skabs su dpag tu med par rig par bya'o/ /de yang bsdus na 'di dag gi rang gi mi mthun pa'i phyogs spang ba bral ba'i 'bras bu dang / mthong ba'i chos la bdag gzhan rjes su 'dzin pa skyes bu byed pa'i 'bras bu dang /phyi ma la gong nas gong du khyad par du 'phags pa mchog dam pa 'byung ba'i rgyu mthun pa'i 'bras bu dang / byang chub chen po dbang gi 'bras bu dang / longs spyod chen po dang bde 'gror 'gro ba dang kho na med pa dang /dbye ba med pa dang mi bde ba med pa dang yid bde ba mang ba dang / sems can la dbang ba dang lus la gnod pa med pa dang dbang che bar grags pa ni go rims bzhin du sbyin pa la sogs pa'i rnam par smin par rig par bya'o/ /gcig la gcig rnam par nges pa ni rnam pa gsum ste/sbyor ba las gyur pa dang / dbye ba las gyur pa dang / rab tu phye nas bstan pa las gyur ba'o/ /de la sbyor ba las gyur pa ni sbyin pa la sogs pa thams cad 'dus par dmigs te 'di lta ste nang dang phyi'i dngos po yongs su gtong ba'i sbyin pa la sbyor ba'o//de la gang yongs su gtong ba de ni sbyin pa'i pha rol tu phyin pa'o/ /de la byams pa'i sems dang ldan pa ni gang gzhan la kun nas mnar sems dang gnod pa dang rnam par 'tshe ba sdom pa de ni tshul khrims kyi pha rol tu phyin pa'o/ /de nyid la gang nye bar bskor ba dang phongs pa dang skyo ba la ji mi snyam pa de ni bzod pa'i pha rol tu phyin pa'o//de nyid la gang phyir zhing sems spro ba de ni brtson 'grus kyi pha rol tu phyin pa'o/ /de nyid la gang sems rtse gcig pa ste dge ba las phyi rol tu mi 'phro ba de ni bsam gtan gyi pha rol tu phyin pa'o/ / de nyid la rgyu dang 'bras bu ji lta ba bzhin du legs par gzung ba dang lta ba mchog tu 'dzin pa med pa de ni shes rab kyi pha rol tu phyin pa'o/ /de bzhin du shes rab kyi pha rol tu phyin pa'i bar la yang ci rigs su sbyar bar bya ste/ mi 'jigs pa sbyin pa ni thams cad du sbyin pa yin pa'i phyir ro//de rab tu dbye ba las gyur pa ni ngo bo nyid kyis rab tu dbye ba dang / rjes su sbyor bas rab tu dbye ba dang / bskyed pas rab tu dbye ba'o/ /de la sogs pa'i ngo bo nyid ni rnam par gtong ba dang sdom pa dang ji mi snyam pa dang mngon par spro ba dang sems gnas pa dang rab tu rnam par dbye ba ste go rims bzhin no//de la sbyin pa la sogs pa la sbyor ba ni de la gnas pa'i pha rol tu phyin pa rnams rjes su 'jug pa ste snga ma bzhin no/ /de la sbyin pa la sogs pa'i rjes su sbyor ba ni 'dzin du 'jug pa dang / bsngags pa brjod pa dang / rab tu dga' ba'o//de la sbyin pa la sogs pa bskyed pa ni gzhan gyi sems kyi rgyud la 'jog pa'o/ /de la sbyin pa'i pha rol tu phyin pa ni zang zing gi sbyin pa'o/ /de ma yin pa'i gzhan lnga ni mi 'jigs pa'i sbyin pa'o/ /thams cad ni dam pa'i chos kyi sbyin pa ste gzhan gyi sems rgyud la bskyed pa'i phyir ro//de las rab tu phye nas bstan pa las gyur pa ni gcig nas rtogs pa la sogs pa ste/ 'di lta ste sbyin pa'i pha rol tu phyin pa gang yin pa de tshul khrims kyi pha rol tu phyin pa yang de yin nam/ tshul khrims kyi pha rol tu phyin pa gang yin pa sbyin pa'i pha rol tu phyin pa yang de yin nam zhe na/tshig 'og ma dang sbyor ba ste/ tshul khrims kyi pha rol tu phyin pa gang yin pa sbyin pa'i pha rol tu phyin pa yang de'o/ /sbyin pa'i pha rol tu phyin pa yin la tshul khrims kyi pha rol tu phyin pa ma yin pa yang yod de/ tshul khrims kyi pha rol tu phyin pas ma zin pa'i sbyin pa'i pha rol tu phyin pa'o//de bzhin du shes rab kyi pha rol tu phyin pa'i bar du sbyin pa'i pha rol tu phyin pa'i tshig 'og ma dang sbyor ba rnams dang sbyar bar bya'o/ /sbyin pa gang yin pa de thams cad sbyin pa'i pha rol tu phyin pa yin nam pha rol tu phyin pa de thams cad sbyin pa yin nam zhe na/mu gsum du 'gyur te sbyin pa yin la pha rol tu phyin pa ma yin pa ni byang chub chen por yongs su ma bsngos pa'i sbyin pa'o/ /sbyin pa ma yin pa la pha rol tu phyin pa yin pa yang yod de bshad pa ma gtogs pa'i chos rnams so/ /de bzhin du shes rab kyi pha rol tu phyin pa'i bar la brtsams te re re la mu gsum gsum du sbyar bar bya'o//sbyin pa kun du spyod pa gang yin pa de dag thams cad sbyin pa'i pha rol tu phyin pa'i rgyu las byung ba'i bsod nams bskyed dam zhe na mu bzhir 'gyur te/ mu dang po ni byang chub chen por yongs su ma bsngos pa'i sbyin pa spyod pa'o//mu gnyis pa ni sbyin pa'i pha rol tu phyin pa la yang dag par 'dzin du 'jug pa dang / bsngags pa brjod pa dang / yid rab tu dga' bas so/ /mu gsum pa ni byang chub chen por yongs su bsngos pa'i sbyin pas so//mu bzhi ba ni rnam pa 'di dag ma rtogs pa'o/ /de bzhin du shes rab kyi pha rol tu phyin pa'i bar las brtsams te re re la yang mu bzhi bzhir sbyar bar bya'o/ /pha rol tu phyin pa de dag kyang bsdu ba'i dngos po bzhi yin te sbyin pa de nyid do/ /tshul khrims dang bzod pa ni ngag snyan pa'o//brtson 'grus dang bsam gtan ni don mthun pa'o/ /shes rab ni don dpyod pa'o/ /sdom pa gsum yang yin te/ dang po bzhi sdom pa'i tshul khrims dang / bsam gtan ni sems can don byed do/ /shes rab ni dge ba'i chos sdud do/ /bslab pa gsum yang de nyid do//byang chub kyi phyogs kyi chos sum cu rtsa bdun yang de nyid yin te lam gnyis kyi skabs su bshad do/ /lam gnyis kyang tshogs lam dang sbyor lam ni 'jig rten pa'o/ /mthong lam dang sgom lam ni 'jig rten las 'das pa yin te/ de dag rgyas par phye ste bstan pa ni thabs nyams su blang ba'i rim pa'o//de ltar thabs kyi khyad par dang theg pa 'og ma las khyad par dgus 'phags te gang zhe na dmigs pa'i khyad par ni shes bya ji snyed pa dang ji lta ba la dmigs pa'o/ /nye bar bstan pa'i khyad par ni bskal ba grangs med par bsod nams dang ye shes kyi tshogs rdzogs par byed pa'o//rab tu rtogs pa'i khyad par ni so sor rang gis rig pa'i ye shes kyis gang zag dang chos bdag med par rtogs pa'o/ /khas len pa'i khyad par ni bdag dang sems can thams cad mnyam pa nyid du khas len pa'o//nges par 'byung ba'i khyad par ni sa bcu dag gis nges par 'byung ba'o/ /yongs su 'dzin pa'i khyad par ni mi gnas pa'i mya ngan las 'das par yongs su 'dzin pa'o/ /gnas dang g.yog 'khor gyi khyad par ni sangs rgyas kyi zhing yongs su sbyang ba dang gdul bya nye bar sdud pa'o//btsun pa nye bar skyes pa'i khyad par ni sangs rgyas kyi gdung ris su skyes pa'o/ /skye ba'i khyad par ni smon lam gyi dbang gis srid pa thams cad du skye ba'o/ /drug po de dag dang ldan pa'i chos kyang rnam pa gnyis su bshad de/ sgrub pa'i chos dang / 'bras bu'i chos so//sgrub pa'i chos ni 'phags pa'i lam yan lag brgyad pa ste de nyid 'dir yongs su shes pa'o/ /'dus byas dang 'dus ma byas kyi bye brag gis 'bras bu'i chos kyang rnam pa gnyis su'o/ /de la 'dus byas ni dge sbyong gi 'bras bu bzhi ste rnam par grol ba'i lam gyi rang bzhin no//'dus ma byas ni nyon mongs pa spangs pa'i mtshan nyid mya ngan las 'das pa'o/ /bstan bcos las ni 'dus byas dang 'dus ma byas kyi rang bzhin dge sbyong gi 'bras bur rnam par gzhag mod kyi 'on kyang mya ngan las 'das par logs shig tu bshad pas ba lang dang /glang zhes bya ba'i tshul du 'dus byas nyid du gzung ngo / /yang na yongs su dag pa'i de bzhin nyid gang yin pa 'dir mya ngan las 'das par 'dod de de la nyon mongs pa'i phyir ro/ /'bras bu 'di brjod pa ni nyan thos dang rang sangs rgyas rnams lam 'di nyid kyi gang zag dang chos la bdag med pa'i tshul du bsgrubs na 'bras bu rnyed par 'gyur ro zhes go rims bzhin du bstan pa'i phyir ro//de yang de kho na ma nor ba'i rang bzhin rtogs pa ni yang dag pa'i lta ba'o/ /de nyid la tshul bzhin du rtog cing dpyod pa ni yang dag pa'i rtog pa'o//de yang gzhan dag la ma nor ba'i rang bzhin du 'chad cing brdzun la sogs pa'i nyes pa spangs pa'i tshig ni yang dag pa'i ngag go/ /de nas srog gcod pa la sogs pa'i nyes pa spangs shing lus kyi las yongs su dag pa ni yang dag pa'i mtha'o//de nas tshul 'chos pa dang gzhogs slong la sogs pa log par 'tsho ba'i nyes pa spangs shing yongs su dag pa'i lus dang ngag gi las yongs su spyod pa ni yang dag pa'i 'tsho ba'o/ /nyes pa lhag ma rnams spangs pa'i phyir mngon par spro ba ni yang dag pa'i rtsol ba'o//de kho na nyid mi brjed pa ni yang dag pa'i dran pa'o/ /gong nas gong du yon tan gyi khyad par rnams mngon par bsgrub pa'i phyir rtag tu mnyam par gzhag pa ni yang dag pa'i ting nge 'dzin to/ /lam la snyoms par zhugs pa las yang dag pa'i lta ba la sogs pa ji ltar 'byung na rgyu gang gis 'phags pa'i lam yan lag brgyad par 'gyur zhe na/'di la nges pa med de 'jig rten las 'das pa'i lam gyi gnas skabs na rnal 'byor pa de lta bu'i so so rang gis rig pa'i de kho na myong bar yang 'gyur zhing gnas gyur par yang thob pa la/de las langs pa'i tshe na yang dag pa'i ngag la sogs pa la 'jug ste log pa'i ngag la sogs pa la ni mi 'jug go/ /des na rgyu la 'bras bur btags te yang dag pa'i lta ba la sogs pa yan lag brgyad ni rnam par dag pa'i rgyur gyur pas de lam yan lag brgyad pa zhes bya ste/de'i tshe na de'i tshig kyang mi smra la gos la sogs pa yang mi tshol bas de'i gnas skabs na yan lag brgyad mi 'byung ste 'gal ba'i phyir ro/ /de la yang dag pa'i lta ba ni yongs su gcod pa'i yan lag ste/ des ji ltar myong ba'i de kho na nges par 'dzin pa'i phyir ro//yang dag pa'i rtog pa ni gzhan go bar byed pa'i yan lag ste/ de ji ltar rtogs pa'i de kho na rnam par gzhag nas tshig tu 'don pa'i phyir ro/ /yang dag pa'i ngag dang / las kyi mtha' dang 'tsho ba ni gzhan yid ches par byed pa'i yan lag ste/de dag go rims bzhin du rnal 'byor gyi lta ba dang / tshul khrims dang yo byad bsnyungs pa rnam par dag pa gzhan yid ches par 'gyur te/ 'dri ba'i lan yang dag par ldon pas yang dag pa'i ngag gi lta ba rnam par dag par yid ches so/ /yang dag pa'i las kyi mtha' bya ba ma yin pa mi byed pa'i tshul khrims rnam par dag par ro//yang dag pa'i 'tsho bas gos la sogs pa chos bzhin tshol bas yo byad bsnyungs par rnam par dag par ro/ /'di dag ni go rims bzhin ngag dang lus dang / gnyis ka'i las kyi rang bzhin no//yang dag pa'i rtsol ba ni nyan thos dang byang chub sems dpa' gnyi ga'i nyon mongs pa'i sgrib pa rnam par sbyong bas sgrib pa rnam par sbyong ba'i yan lag go/ /yang dag pa'i dran pa ni bying ba dang rgod pa dang nye ba'i nyon mongs pa'i sgrib pa rnam par sbyong ba'i yan lag ste/ dran pa nye bar gzhag pas yang dag pa'i mtshan mar rtog pas bying ba dang rgod pa la sogs pa'i skabs med pa'i phyir ro/ /yang dag pa'i ting nge 'dzin ni yon tan gyi khyad par mngon par bsgrub pa la sgrib pa rnam par sbyong ba'i yan lag ste/ des mngon par shes pa la sogs pa yon tan mngon par bsgrub pa'i phyir ro//ston par mdzad do zhes pa ni dbang po rnon pos mgo smos pas go ba dang / rtul pos shin tu rgyas pas kyang rtogs par dka' bas 'bring po'i dbang du byas pa'i phyir ro/ /ldem por dgongs pa bzhi dang bzhis chos thams cad ston to/ / de ni gzhug pa la ldem por dgongs pa dang / mtshan nyid la ldem por dgongs pa dang / gnyen po la ldem por dgongs pa dang / bsgyur ba la ldem por dgongs pa dang / mnyam pa nyid la dgongs pa dang / don gzhan la dgongs pa dang / dus gzhan la dgongs pa dang gang zag gzhan la dgongs pa'o//da ni ma 'ongs pa'i slob dpon dang slob ma chos la 'jug pa'i tshul sbyar ba'i phyir chos la 'jug pa'i tshul gsungs pa/ nyin mtshan du bsam pa ni thos pa'i don bsam pa nyid do/ /rjes su dpyad pa ni thos pa'o/ /bsgom pa ni bsam pa'i don bsgom pa nyid do//dga' ba chen po ni shes rab gsum la bar chad dang bral ba'o/ /da ni shes rab rnam pa gsum dang bral ba'i 'jig rten gyi dngos po thams cad mi rtag cing slu ba dang bcas par gsungs pa/ de nas lha'i 'khor de nyid kyi nang nas zhes bya ba la sogs pa'o//yang dag pa'i lam la 'dren pa po dgos par bstan pa'i phyir/ /de nas gnas mchog de na zhes pa la sogs pa gsungs so/ /nyam nga ba ma rtogs na yang dag pa la yid mi ches par bstan pa'i phyir de nas lha'i bu la sogs pa gsungs so/ /lam thams cad kyi gzhi skyabs su 'gro ba yin par bstan pa'i phyir de nas lha'i bu nor bu'i snying po dri ma med pa de brgyal ba sangs te zhes pa la sogs pa gsungs so//skyabs su song ba'i slob ma la dbugs dbyung ba'i phyir phan yon bshad pa ni lha'i dbang po la sogs pas gsungs so//de dag ni don gyi sgo nas gleng bslang ba'o/ /da ni tshig gi sgo nas gleng bslang ba'i phyir de nas lha'i dbang po brgya byin gyis dman pa'i tshig gis zhes pa la sogs pa gsungs so/ /lha'i dbang po zhes pa la sogs pa ni lha'i bu la sogs pa'i le lo'i 'gyod pa bsal ba'i phyir las rgyu 'bras kyi 'brel pa gsungs pa'o//de nas lha'i dbang po brgya byin gyis lha'i bu nor bu'i snying po dri ma med pa'i gtam ngan thos nas zhes bya ba la sogs pas ni rjes 'jug gi nyams su blang ba zhus pa nas kyis bstan to/ /gus pa'i rtsol ba dang bral na yang dag pa'i lam rnyed par mi 'gyur ba'i phyir de nas lha'i dbang po la sogs pas chos la gus pa bstan to//zhus pa'i don ni rgyas pa dang bsdus pa'o/ /dang po ni don nges par thob pa dang / don la bar chad bsal ba dang / lus can thams cad 'jug tu rung bar byin gyis brlab tu gsol ba dang /khyad par gyi rkyen bsal ba dang / shin tu bag tsha ba'i 'bras bu gnyis dang bral bar mdzad pa dang / 'khor ba las bsgral ba dang / rang gi don dang / gzhan gyi don dang / thun mong gi don yod par gsol ba gdab pa ste/ re ba 'phel bar mdzad du gsol zhes pa la sogs pa'i tshig bcu gcig dang rim par sbyar ro//bsdus pa la gnyis te/ mthong ba'i chos kyi don dang / lan grangs gzhan gyi'o/ /ma 'ongs pa'i ston pa nga lo bde ba la sbyar ba'i phyir bcom ldan 'das kyis gsungs pa'i tshul ni/shAkya thub pa sngon du mi brjod par bcom ldan 'das sngon du gsungs pa ni bdud bcom pa dang dbang phyug gi yon tan drug dang ldan pa de ni mu stegs pa la sogs pa gzhan la med pa dang / phyi rabs kyang rang gi bla ma'i gnas la sogs pa yon tan sngon du btang nas brjod pa la gzhug pa'i phyir ro//shAkya ni rigs la mngon par zhen pa rnams 'jug pa'i rigs smos te/ rgyal rigs phyogs gcig gi ming ngo / /thub pa dang rgyal ba dang 'dren pa la sogs pa ni sangs rgyas kyi yon tan gyi ming gi rnam grangs so/ /thugs su chud pa ni gnyis te/rang don du dang / gzhan don du bshad par gsol ba btab par ro/ /rnam pa kun du ni yul dang dus dang gnas skabs so/ /rnam par gzigs pa ni phan pa dang bde ba'o/ /ting nge 'dzin ni zhi gnas dang lhag mthong ste/ stong pa dang ye shes su mnyam par gyur pa'o//snyoms par zhugs pa ni de nyid mngon sum du byas pa'o/ /mdor na dbyings dang rig pa dbyer med pa ni ting nge 'dzin te chos kyi sku yin la/ snyoms par zhugs pa ni de nyams su myong ba ste longs sku'o/ /gal te sangs rgyas ni rtag tu mnyam par gzhag pa ma yin nam ci'i phyir skabs 'di kho na mnyam par gzhag ces smos/yang na shAkya thub pa sprul pa'i sku yin pas rtag tu mnyam par gzhag pa mi mnga' ba yin nam zhe na/ ma yin te/ gdul bya nyid la de ltar snang ba dang ma 'ongs pa ni 'chad pa po bsams bzhin du smra bar bya'o zhes gdams pa'o//zhugs ma thag pa ni gzhan cis kyang bar mchod par snod gnyis dang 'tsham par 'byung ba ste de yang zab pa dang rgya che ba thugs su chud pa pha rol tu phyin pa drug gi mtshan nyid la mos pa dang / gting dpag dka' ba thugs su chud pa rdo rje theg pa la zhugs pa'o/ /de re re la'ang zhugs pa dang zhugs pa bstan pa'o//dang po ni mos pa spyod pa la sogs pa la gsung gi sgo nas 'byung ngo / /gnyis pa sa chen po la rab tu bzhugs pa rnams la 'od zer gyi sgo nas so/ /rnam pa kun du zhes bya ba ni ye shes kyi sku la brten nas rig pa'i gnas lnga'i snang ba rgya chen pos khyab pas gdul bya tshim par mdzad do//de la sgra rig pa ni byA ka ra Na ste don gsal bar byed do/ /gtan tshigs rig pa ni tshad ma ste rgol ba tshar gcod do/ /gso ba rig pas ni lus gnas par byed do/ /bzo rig pas ni 'tsho ba mi nyams pa dang yid skyo ba med par byed do/ / rtogs pa rig pas lam goms na nyon mongs pa bcom zhing ye shes skyed par byed do/ /lam de yang dbang po rab 'bring tha ma'i bye brag gis tshar gcad pa dang rjes su bzung ba'i bye brag gis rnam pa tha dad do/ /dbu'i gtsug tor ni 'byung gnas so/ /lha rnams rdo rje theg pa la gus par gzud pa'i phyir ro//phyogs bcu kun du snang bar byas pa ni gnyis te/ kun rdzob tu stong pa nyid mi rtog pa'i ye shes kyi 'od zer gyis ni phyogs bcu'i sangs rgyas kyi zhing du sa bcu'i byang chub sems dpa' la sogs pa gang yang mi gsal ba med par byas so/ / don dam pa'i sngags kyi phreng bas ni gdul dka' ba gang yang mi 'dul ba med par byas so/ /gdugs lta bu ni char dang tshad pa las skyob pa ltar 'khor ba'i chu las skyob par 'gyur ba dang / phyin ci log gi gdung ba sel bar 'gyur bas sngags rnams kyang gdugs kyi tshul du snang ba'o//'dzum pa mdzad pa ni 'khor spobs pa bskyed pa dang chos 'di rnyed par dka' ba dang thabs chen po thob pa nyid kyi phyir ro/ /gzigs pa ni byams pa chen po dang snying rje chen pos gdul bya la gzigs pa'o/ /bka' stsal pa ni thog ma dang bar dang tha mar dge ba'i tshul gyis so//da ni gdams ngag gi snod du rung bar bya ba'i phyir sems bskyed pa gsungs so/ /de la spro ba bskyed pa'i yan lag tu rtogs pa 'di'i mtshan gsungs pa/ kun nas sgor 'jug pa ni rnam par snang mdzad chen po'i zhal nas gsungs pa'i sngags dang rgyud dang phyag rgya'o/ /'jug pa ni thos pa dang sgrub pa'o//sngags 'di nyid bcom ldan 'das kyi dbu'i gtsug tor nas 'od zer gyi tshul du byung ste/ gdul bya tshim par bya ba'i phyir ro/ /dri ma med pa ni phrin las kyi ming ste/ 'dir zhugs pa tsam gyis bskal pa du ma'i sgrib pa thams cad sel bar byed pas so/ / snang ba ni dbang po rab 'bring tha ma thams cad kyi spyod yul du gyur pa'o/ /de bzhin gshegs pa thams cad ni rigs lnga'o/ /de bzhin ni zhi ba'am mya ngan las 'das pa ste mi slu bas de bzhin kho na'o/ /de khong du chud pa ni gshegs pa'o/ /de khong du chud cing rtogs na mngon par rdzogs par sangs rgyas pa'i phyir ro zhes kun la sbyar ro//yang de bzhin ni rnam thar sgo gsum mo/ /yang na bden pa bzhi'o/ /yang na bden pa dang stong pa dang nye bar zhi ba dang shes rab po/ /yang na sangs rgyas kyi chos thams cad do/ /de dag thugs su chud pas zhes kun la sbyar ro/ /yang na de bzhin ni pha rol tu phyin pa drug go//des sangs rgyas su gshegs pa'o/ /yang na sa bcu'o/ /yang na 'phags pa'i lam yan lag brgyad do/ /yang na tshogs gnyis so/ /yang na brtson 'grus chen po'o/ /yang na de bzhin ni bskal pa grangs med pa gsum du rta dang glang po la sogs pa dang / bu dang bu mo la sogs pa dang /mgo dang sha rus rkang lag du ma btang yang gtan pa med pas nor lha dang dbang phyug dang / tshangs pa dang / ser skya dang / gzigs zan dang / rkang mig dang / 'phel ba dang / rgyal dpog gi bu la sogs par mi 'ong ste de kho na ltar sangs rgyas su gshegs pa'o//yang na thugs rje dang byams pas gzhan don gyi smon lam bzhin no/ /de ltar sangs rgyas pa'o/ /yang na bsam gtan bzhi la brten nas skyes pa rdo rje lta bu'i ting nge 'dzin gyis srid rtse'i nyon mongs pa spangs nas phyir mi log pa ste mu stegs pas spong mi shes pas 'khor bar phyir ldog pa lta bu ma yin pa de bzhin no//des mya ngan las 'das pa'i grong khyer du gshegs pa'o/ /yang na snga rabs 'das pa rnams kyang skal ba dang ldan pa rnams mya ngan las 'das pa'i lam ji lta ba bzhin bzhag nas rang mya ngan las 'das pa ltar 'dir yang de bzhin mdzad dam gshegs pas so//yang na las dang nyon mongs pa dang / shes bya'i sgrib pa spong ba la mu stegs byed pa dag gis mi nus pa'o/ /des na mya ngan las 'das pa'o/ /yang na gsum po de spangs nas las dang nyon mongs pa'i dbang gis mi skye ste thogs pa med pa'i ye shes la dbang nas mya ngan las 'das pa'o//yang na phung po de rnam rtog dang spros par bcas pa spangs nas de dag slar mi 'byung bas mya ngan las 'das pa'o/ /yang na de bzhin nyid thob pa med par thob pa'o/ /yang na de bzhin nyid rtogs pa'o/ /yang na de bzhin nyid gsung bas te sa stengs sgrogs zhes pa dang 'dra'o//yang na 'khor ba dang mya ngan las 'das pa bden pa gnyis su bsdus nas thugs su chud pas dmigs bcas dang dmigs med kyi tshul du gnas pas de gsungs pa'o/ /yang na de bzhin nyid ngar 'dzin pa dang bdag 'dzin pa dang sgrib pa dang rnam rtog dang spros pa ste/'khor ba'i sdug bsngal gyi rgyu drungs phyung nas yon tan rin chen mi zad pa'i gter bla na med pa bsam gyis mi khyab pa rmad du byung ba la lus nye bar sgrub pa mdzad nas gzhan don 'di bya zhes rtog tshom med par 'khor ba ji srid du smon lam gyi shugs kyis dga' ldan gyi gnas na bzhugs pa dang /lhums su 'pho 'jug gnas pa dang / bltams pa dang / gzhon nu rol pa dang / btsun mo'i 'khor dang / mngon par 'byung ba dang / dka' ba spyod pa dang / byang chub snying por gshegs pa dang / bdud 'dul ba dang /mngon par byang chub pa dang / chos kyi 'khor lo bskor ba dang / yongs su mya ngan las 'das pa la sogs pa mdzad pa gzhal du med pa la 'jug bzhin skye 'gag med pa'i mya ngan las 'das pa chos kyi skur gshegs pa'o/ /yang na phyir mi ldog pa'i 'khor lo las/ ji ltar byis pas rnam brtags pa/ /de dag byang chub mi rnyed de/ /chos kun btsal na rnyed med pa/ /rtogs pas de bzhin gshegs zhes bya/ /zhes so/ /snying po ni oM dang hUM bzhi'i hUM dang po gsum ni de dag gi sku byin gyis brlab pa'i sngags so/ /aM baM saM dzaM zhes yi ge bzhi po ni rig pa'i lha mo dang byang chub sems dpa' thams cad kyi snying po'o//dam tshig la rnam par blta ba ni gong nas gong du rtogs pa 'phel bar byed pa ste rig sngags kyi ngo bo nyid do/ /don gyi gzungs ni shes rab dang snying rje dbyer med pa yin te/ tshig gi gzungs kyis kyang de la sbyor bar byed do//yang dag pa'i don ngo shes shing de la 'jug pa'i bar du gcod pa las skyob pas so/ /'di yang man+tha tra nAr+tha man+t+ra'i sgras rang don ma lus pa thob cing gzhan don shugs kyis 'byung ba dang / man dz+nyA na ma mi tra na ar+tha man+t+ra dkyil 'khor la sogs pa'i ngo bo tsam du yod pa dang /a nu a ba bo d+ha na tra na ar+tha man+t+ra ste thams cad gnyis su med par rtogs par 'gyur ba'o/ /don gsum po de gang gis mtshon pa ni phyag rgya ste gsang sngags so/ /de ltar na rig sngags dang gzungs sngags dang gsang sngags gsum dang ldan pa ni rtogs pa 'di'i ngo bo nyid do//gang+gA'i klung la sogs pas ni sngags la ji ltar yi rang ba ltar sngags la zhugs par sems bskyed ma thag gi byang chub sems dpa' la yang yi rang zhing bsngags pa brjod do/ /mthong ba ni sngags bzhugs pa'i sa cha dang sku gdung mchod rten la sogs pa'o/ / thos pa ni brjod pa'o/ /sdig pa dang sgrib pa ni rgyu ste de'i 'bras bu nad dang gnod pa byed pa ste/ mthong ba'i chos so/ /ngan song gsum spong ste ma 'ongs pa'i dus so/ /sdig pa dang sgrib pa 'jig pa dang / mnyam par mi skye bar byed pa'i gzhan don te thos pa dang ma thos pas so/ / da ni phan yon dpe lnga'i sgo nas 'jug pa'i go rims kyi khyad par gsungs pa/ dad pa'i mes las kyi sgrib pa mtha' dag sel ba dang / snying rje'i chu rgyun gyis nyon mongs pa'i nad sel ba dang / thos pa'i shes rab kyis lta ba ngan pa'i dri ma'i tshogs sel ba dang / bsam pa'i nyi mas ma rig pa'i mun pa mtha' dag sel ba dang /bsgom pa'i shes rab kyis ye shes kyi chu rgyun chen por 'jug pa ste dper na la sogs pa dang rim pa bzhin sbyar ro/ /mi rnams tshe bzlog pa ni khyad par gyi las so/ /nyon cig ces snod zhabs rdol ba ltar brjed ngas pa dang / snod kha bub ltar don mi rtogs pa dang /snod mi gtsang ba ltar don legs par mi 'dzin pa spong zhes gus pa la sbyar ro/ /de la sngags ni namaHzhes pa na sa b+ha ya ha ra Ni zhes pa yan chad rtsa ba ste thun mong gi sngags so/ /hUM hUM hUM mr-i t+ya daN+Da d+ha re zhes pa nas gzungs kyi sngags so/ /sarba ta thA ga toSh+NI Sha bi lo ki te swAhA/zhes pa nas rig pa'i sngags so/ /rjes su ston cig ces pa ni bla ma dang slob ma'i 'brel pa lung nod pa'i cho ga'o/ /yun ring po la sogs pa ni de'i phan yon te phan pa ni 'khor los sgyur ba'i rgyal po la sogs pa mi dang / rgyal chen bzhi nas tshangs pa'i 'jig rten la thug pa'i lha'o//bde ba ni byang chub chen po'o/ /kun nas la sogs pas tsha tsha gcig pa'i cho ga bshad do/ /de nas nyi ma shar ba la sogs pas ni lung nod pa dang cho ga la 'jug pa thams cad kyi thun mong dang dngos gzhi'o/ /mchod rten brgya rtsa brgyad la sogs pas tsha tsha brgya pa'i cho ga'o//oM na maHs+t+rai ya d+hi la sogs pa 'di ni gsang sngags so/ /sngags gong 'og gnyis 'brel pa ni don gyi gzhung gcig tu bsgrub pa'o/ /de yang 'di ltar yin te/ dang por na maHsarba ta thA ga tA nAM zhes de bzhin gshegs pa thams cad la phyag 'tshal zhes gsungs pa ni sngags 'di phyogs bcu dus gsum gyi de bzhin gshegs pa thams cad kyi snying po yin pas so//oM ni yi ge'i shugs kyis dang por bkra shis don gyi phyir phyag 'tshal zhes bya ste/ 'jig rten dang 'jig rten las 'das pa'i bkra shis pa'i mnga' thams cad kyi gtso bo yin pa'i phyir ro//des yi ge thams cad byin gyis brlabs nas sngags su gyur par gdon mi za ba'i phyir/ dang por gdags dgos pa kho na'o/ /de la sngags 'di'i yon tan gyi che ba'i dpe ni/ yi ge'i sgo nas brjod pa gnyis kho na ste/ ma hA tsin+t+ra ma Ni dz+wA la na yid bzhin gyi nor bu 'bar ba chen po zhes pa ste//de ni rang dang gzhan gyi don rgyun mi chad pa 'byung ba dang ldan pa'i dpe'o/ /des ni ye shes bstan to/ /sA ga ra gam+b+hI ra zhes pas rgya mtsho zab mo zhes pa ste rig sngags 'dir 'jug pa'i gang zag gi rigs la go rims med/ lus can thams cad 'jug tu rung ba dang bskal ba du ma'i mi dge ba'i dri ma dag par byed pa dag 'dir zhugs pa la byang chub kyi myu gu myur du bskyed pa'i don no//des ni thugs rje'o/ /yon tan de lta bu dang ldan pa'i sngags kyi lugs la gsol ba gdab pa yang gnyis te/ skye ba 'di dang skye ba du ma'i don du'o//dang po la dgu ste/ A kAR+Sha ya A kAR+Sha ya zhes pas sngags 'di thos pa dang mthong ba tsam gyis lam 'di la drongs shig drongs shig ces pa dang po'o/ /gnyis pa ni/ A yun+d+har yA yun+d+ha ra zhes pa ste/ zhugs pa'i gang zag rnams tshe zung cig tshe zung cig pa'o//gsum pa ni yon tan dang longs spyod dang ldan dgos pas san+d+ha ra san+d+ha ra zhes te lus dang sems kyi rgyan shin tu zung shig shin tu zung shig ces pa'o/ /bzhi pa ni tshe ring na yang lus can gyi gnod pa thams cad bsal ba'i phyir/ k+Sha na k+Sha Na/ k+Shi Ni k+Shi Ni/ k+Shu N+ya k+Shu N+ya/ zhes te srungs shig srungs shig /skyobs shig skyobs shig /tshos shig tshos shig /ces pa'o/ /lnga pa ni gnod pa med pa yang lam log pa la 'jug pa bsal ba'i phyir/ sarba ta thA ga tA sa ma ye tiSh+Tha tiSh+Tha zhes pa ste/ de bzhin gshegs pa thams cad kyi dam tshig la zhog zhog ces pa'o//drug pa ni bdag gzhan gyi brtson 'grus bskyed pa'i phyir/ /ma hA b+hu ba na sA ga ra saM sho d+ha ya ma ma sarba satwa sh+tsa zhes te/ bdag dang sems can thams cad sa chen po dang / rgya mtsho ltar sbyongs zhes pa'o/ /'dis ni smon pa'i sems gzhi chen po lta bu dang 'jug pa'i sems rgya mtsho lta bu bskyed ces skul ba'o//bdun pa ni rang don la dmigs pa bskyed pa'i phyir/ b+ha ga wa te sarba pA paM bi ma le dza ya dza ya/ dza ya lab+d+he zhes te/ bcom ldan 'das ma sdig pa'i dri ma thams cad las grol zhing rgyal zhing rgyal bas bdag rgyal ba mdzod ces bya bas sems bskyed pa'i mthu la dmigs pa'o//brgyad pa gzhan don la dmigs pa ni/ s+phuT s+phuT/ s+phoT ya s+phoT ya/ zhes pa ste sol sol/ nges par sol nges par sol/ /zhes bya bas kun nas ldang ba dang bag la nyal ba thams cad sol zhes bya'o/ / dgu pa ni rang gzhan gnyis ka'i ste/ b+hi ga ta/ A wa ra Na b+ha ya ha re Na zhes te rnam par 'gal ba'i sgrib pas 'jigs pa 'phrogs zhes bya bas brtson 'grus kyi phan yon bstan to/ /da ni skye ba du ma'i don du gsol ba gdab par bya ba ni gnyis kho na ste/ dmigs pa'i gzhi dang de las byung ba'i phrin las so//dmigs pa'i gzhi la drug kho na ste/ sa bon la dmigs pa dang / sku la dmigs pa dang / phyag rgyal dmigs pa dang / rgyan la dmigs pa dang / lha la dmigs pa dang / sngags la dmigs pa'o/ /de la sa bon la dmigs pa ni hUM ste/dus gsum gyi sangs rgyas thams cad kyi sa bon yin pas gsum mo/ /hUM yig gis 'bras bu ye shes lnga mtshon nus pa'i phyir ro/ /de'i phrin las ni mr-i t+yu daN+Da d+ha re a b+ha ya bra te zhes pas 'chi bdag gi dbyug pas mi 'jigs pa stsol zhes te mtshan mo nyal ba'am 'gro ba la sogs pa dang thun dang thun mtshams su lus ngag yid gsum gyi gnas su pad+ma dang zla ba'i dkyil 'khor la gnas pa'i hUM yig kha dog gsum la dmigs pas dus ma yin par 'chi ba las skyob pa'o//sku la dmigs pa ni uSh+NI Sha bya ba lo ki te/ sa man+ta mu khe/sa man+ta bya ba lo ki te/ ma hA mA ye/ ma hA pA sha d+ha re/ a mo g+ha bi ma le zhes pas gtsug tor rnam par gzigs ma/ kun nas sgor 'jug ma/ kun nas rnam par gzigs ma/ sgyu ma chen mo/ zhags pa chen mo 'chang ma/ don yod ma'i dri ma bral ma zhes te dang po ni 'byung khungs kyi ming ngo //gnyis pa ni ngo bo nyid kyi ming ngo / /gsum pa ni yon tan gyi ming ngo / /bzhi pa ni rang bzhin gyi ming ngo / /lnga pa ni rtags kyi ming ngo / /drug pa phrin las kyi ming ngo / /gang gis spyi bo'i steng du sgyu ma chen mo dkar mo zhal gcig phyag bzhi ma/ g.yas na rin po che/ g.yon na zhags pa/ lhag ma mda' gzhu bkang ba dmigs te bzhi'o/ /de'i phrin las ni/ A kAR+Sha ya A kAR+Sha ya/ yang dag pa'i ye shes khug shig khug shig pa'o/ /A kaD+D+hA ya A kaD+D+hA ya/ yon tan drongs shig yon tan drongs shig pa'o/ /b+ha ra b+ha ra/byang chub sems kyis khong shig khong shig pa'o/ /gang gis bkang na saM b+ha ra saM b+ha ra zhes pa sdom pa dang mchog gi sdom pa ste dbang po rgyas pa dang khams rgyas par byed pa'i tshad med pa'i sgo'o/ /phyag rgya la dmigs pa ni b+hU Shi te b+hU dze ma hA mu dra lo ki te zhes ba phyag rgya chen pos phyag brgyan nas kun du gzigs ma zhes te/thabs dang shes rab mtshon pa'i mda' dang gzhu rin chen rdo las byas pa bkang ba'i tshul du byas pa thams cad kyi sna la phyogs thams cad du dmigs so/ /de'i phrin las ni dza ya dza ya zhes pa rgyal zhing rgyal ba zhes te bdud las so/ /sid+d+hi sid+d+hi/grub cing grub pa zhes pa zhi ba la sogs pa'i las so/ /bo d+ha ni bo d+ha ni zhes te rtogs shing rtogs pa zhes pa rig pa'i gnas so/ /saM bo d+ha ni saM bo d+ha ni/ zhes te legs par rtogs shing legs par rtogs pa zhes pas ral gri'i rig pa 'dzin pa la sogs pa nyi shu rtsa bzhi'o/ / sho d+ha ni sho d+ha ni zhes te sbyong zhing sbyong ba zhes pas nyon mongs pa dang shes bya'i sgrib pa thos pa'i shes rab kyis sbyongs shig pa'o/ /saM sho d+ha ni saM sho d+ha ni/ zhes pas legs par sbyongs legs par sbyongs zhes te bsam pa'i shes rab kyis mngon du rgyu dang bag la nyal sol zhes pa'o/ / bi sho d+ha ni bi shod+ha ni zhes pa rnam par sbyongs rnam par sbyongs zhes te bsgom pa'i shes rab kyis lta ba'i dri ma dang ting nge 'dzin gyi dri ma gtan phyung zhes pa'o/ /ha ra ha ra ma ma sarba pA paM zhes pas bdag gi sdig pa thams cad phrogs shig phrogs shig ces te/ rgyu la log par spyod pa dang 'bras bu la log par spyod pa'i gzhung dang phrol zhes pa'o//rgyan la dmigs pa ni/ sarba ta thA ga tA ku la b+hu dze sa ma ya niSh+ke pra sar tu/ zhes pa de bzhin gshegs pa thams cad kyi phyag rgya ltar dam tshig la so sor rtog cing zhes te bkra shis kyi rdzas la sogs pa'am sangs rgyas kyi rgyan gang yang rung ba cig la dmigs pa'i gzhi'o//de'i phrin las ni/ ma ma pu N+yaM/ zhes pa bsod nams 'phel bar 'dod pas spyi bo'i steng du rin po che'i gdugs dkar po la sngags kyi phreng bas bskor la bzla'o/ /bi nA sha druM pA paM/ zhes pas sdig pa bcom par 'dod pas rang gi mdzod spu'i nang du nor bu rin po che la sngags kyi phreng ba bkod de bzlas so//sarba ke la bi sha ha re zhes nyon mongs pa'i dug thams cad 'phrog 'dod pas rang gi sna rtser dpal be'u'i ri mo sngon po bkod de bzlas pa bya'o/ /ma ni bi shud d+he sho d+ha ya bi ma le/ yid rnam par dag cing byang nas dri ma dang bral bar 'dod na spyi bor zla ba'i steng du bum pa gang ba las chu rgyun byung bas lus tshim par gyur par bsams te brjod do//bi ka si ta pad+me kA ya bAg tsit+ta b+hu dze ShaT pA ra mi tA pa ri pU ra Ni/ zhes pas phyag na pad+ma rgyas pa ltar lus ngag yid pha rol tu phyin pa drug gis gang bar 'dod pas ni phyogs dus kyi sangs rgyas thams cad dang bdag rgyang ring ba yang ma yin nye ba yang ma yin par dmigs te gsol ba 'debs pa'i tshul du brjod do//da ni lha la dmigs pa ni sangs rgyas dang byang chub sems dpa' dang rig pa'i lha mo dang khro bo thams cad kyang 'dir ni rig pa'i lha mo nyid du blta'o//de la chos thams cad kyi rang bzhin bsdus na bcu bdun nyid du 'gyur bas 'dir yang lha bcu bdun kho na gsungs so/ /rang bzhin sems bcu bdun ni rnam par shes pa'i tshogs brgyad dang / 'byung ba bzhi dang / nam mkha' dang / gzugs dang / tshor ba dang / 'du shes dang / 'du byed de des na lha bcu bdun no/ /phyis ni rigs du ma nyid du 'gyur ro/ /lha de dag gi ming bshad pa/ sarba ta thA ga toSh+NI Sha bi lo ki te swAhA/ zhes pas de bzhin gshegs pa thams cad kyi gtsug tor rnam par gzigs ma zhes pas rnam par snang mdzad kyi rang bzhin no//sarba ta thA ga tA gu h+ya a d+hiSh+ThA na a d+hiSh+Thi te swAhA/ de bzhin gshegs pa thams cad gsang ba'i byin gyi rlabs kyis byin gyis brlabs ma zhes rdo rje 'chang gi rang bzhin no/ /A yurda de swA hA/ tshe 'dzin ma spyan ma'i rang bzhin no/ /bu N+ya da di swA hA/ bsod nams 'dzin ma mA ma kI'i rang bzhin no/ /pu N+ya bi lo ki te swA hA/ bsod nams rnam par gzigs ma na bza' dkar mo'i rang bzhin no/ /pu N+ya A ba lo ki te swA hA/ zhes pa bsod nams spyan ras gzigs ma ste sgrol ma'i rang bzhin no/ /mr-i t+yu daN+Di swA hA/ 'chi bdag rnam par 'joms ma ste/sgrib pa rnam sel gyi rang bzhin no/ /yA ma dan+ti swA hA/ gshin rje 'joms ma ste 'jam dpal gyi rang bzhin no/ /ya ma dU te swA hA/ gshin rje dbyug pa ma ste phyag na rdo rje'i rang bzhin no/ /saM ha ra Ni swA hA/ shin tu rol ma ste byams pa'i rang bzhin no/ /saM ba ra Ni swA hA/bde mchog ma ste spyan ras gzigs dbang phyug gi rang bzhin no/ /san d+ha ra Ni swA hA/ bde 'dzin ma ste nam mkha'i snying po'i rang bzhin no/ /pra te sa ra Ni swA hA/ so so 'brang ma ste/ kun du bzang po'i rang bzhin no/ /dzo ba ti swA hA/ mdangs ldan ma ste sa'i snying po'i rang bzhin no//te dzo ba ti swAhA/ gzi brjid ldan ma ste rin chen 'byung gnas kyi ngo bo zla ba rnam par snang mdzad kyi rang bzhin no/ /dza ya ba ti swA hA/ /rgyal ldan ma ste snang ba mtha' yas kyi ngo bo nyi ma rnam par snang mdzad kyi rang bzhin no/ /sarba ta thA ga tA mu dra a d+hiSh+ThA na a d+hiSh+Thi te swA hA/de bzhin gshegs pa thams cad kyi phyag rgya'i byin gyi rlabs kyis byin gyis brlabs pa zhes pa ste/ mi bskyod pa'i rang bzhin no/ /de dag ni dmigs pa'i gzhi'i lha'o/ /de dag gi phrin las ni swA hA/ zhes pa thams cad kyis kyang bsreg pa dang / zhi ba dang / dag pa dang / rtogs pa dang / byang ba'i sgra yod de/ dang po ni sdig pa mi dge ba'i tshogs kyi nags tshal lo/ /gnyis pa ni las ngan pa sna tshogs pa'o/ /gsum pa ni nyon mongs pa'i sgrib pa dang shes bya'i sgrib pa'o/ /bzhi pa ni yang dag pa'i lta ba la sogs pa'o/ /lnga pa ni ma rig pa'i bag la nyal thams cad do//da ni sngags la dmigs pa ni/ oM na maHs+t+rai ya d+h+we sarba ta thA ga tA hr-i da ya zhes te de bzhin gshegs pa thams cad kyi snying po la phyag 'tshal lo zhes pas ming ngo / /dngos gang zhe na/ gar+b+he dz+wA la dz+wA la d+harma d+hA tu gar+b+he saM ha ra/ zhes snying po 'bar zhing 'bar bas chos kyi dbyings kyi snying por bskyod cig ces pas chos kyi sku mtshon te dam pa'i sngags so//de'i phrin las ni ma ma A yuHsaM sho d+ha ya zhes skye ba 'dir bdag gi tshe dag par ro/ /ma ma sarba pA paM skye ba du mar bdag gi sdig pa thams cad dag par ro/ /rgyu chos kyi sku de la 'tsham pa'i rkyen gsungs pa/sarba ta thA ga toSh+NI Sha bi ma la de bzhin gshegs pa thams cad kyi gtsug tor dri ma med pa zhes pas dmigs pa dang bcas pa'i sngags so/ /de'i phrin las bi shud d+he zhes pa rnam par dag pa ni las dang nyon mongs pa'i sgrib pa'o/ /hUM hUM hUM hUM/ zhes pa ni ye shes bzhi'i ngo bo nyid do//aM baM saM dzaMHzhes pa rigs bzhi'i ngo bo nyid do/ /de dag ni brdar gyur pa'i sngags so/ /sngags de dag phyir 'brel pa ni brjod pa dang bcas pa'i sngags so/ /de'i phrin las ni lhag pa'i shes rab 'phel ba dang / bar du gcod pa dang bral ba ste swA hA zhes pa'i sgras grub po//kun nas sgor 'jug pa la sogs pa ni spyir phan yon thun mong pa'o/ /de yang 'og nas rgyas par bshad do/ /lam gyi bye brag bshad pa la gnyis te/ dang po lha'i 'jug tshul dang / mi 'jug pa'i tshul lo/ /de nas lha'i dbang po la sogs pas lha'i 'jug pa'i tshul lo//byas ma thag la sogs pas nyams su blangs pa'i phan yon te pha rol tu phyin pa drug gi phan yon no/ /de nas lha'i bu la sogs pas ni rjes su yi rang ba'i bstod pa dang mchod pa'o/ /de nas rgyal po chen po bzhi la sogs pas ni sngon du gsungs pa'i las rgyu 'bras kyi 'brel pa de nyid do//zhus len gyi tshul gyis rgyas par te ma 'ongs pa'i skye bo las la yid ches par bya ba'i phyir ro/ /zhu ba po de dag gi nang nas lag na rdo rje la bos pa ni/ lag na rdo rje 'di dus gsum gyi sangs rgyas thams cad kyi bstan pa'i mdzod 'dzin pa ste/dpal phyag na rdo rje dbang bskur ba'i rgyud las/ dpal phyag na rdo rje ni sangs rgyas kyi gzugs kyi sku'i rjes su 'brang ba dang chos kyi sku bsrung ba po zhes te chos kyi sku ni byang chub sems dpa'i yul ma yin par bstan pa'i chos so/ /rgyal po yul 'khor skyong gis zhus pa las ni dpal phyag na rdo rje ni theg pa thams cad kyi bdag por khas blangs par gsungs so//kun du bzang po dang phyag na rdo rje la sogs pa ni/ ming gi rnam grangs te/ sangs rgyas thams cad kyi thugs yang dag pa'i ye shes las byung bas tha mi dad par gsungs so//de nyid 'dus pa las kyang de kho na ltar gsungs so/ /de'i phyir bstan pa'i bdag po yin pas so/ /de'i tshe de'i dus na la sogs pas ni las rgyu 'bras tha dad du mi 'gyur bar gsungs so/ /dran pa nye bar gzhag pa'i mdo las kyang / lus can rnams kyi las rnams ni//bskal pa brgyar yang chud mi za/ /tshogs shin dus la bab pa na/ /'bras bu nyid du smin par 'gyur/ /zhes bcom ldan 'das kyis gsungs so/ /sdom pa gsum gyis bsdams zhes pa ni lha dang mi thun mong du gsungs te rgya che ba dang gting dpag dka' ba'i theg pa gsum mi nyams pa'i tshul gyis bslab bya gang yang mi spong bas rim pa bzhin bsrung ba'o//de nas lha'i 'khor la sogs pas ni byin gyi rlabs kyi khyad par la ched du brjod pa'o/ /phyir mi ldog pa ni mi skye ba'i chos la bzod pa thob pa'o/ /da ni mi rnams kyi 'jug pa'i tshul zhus pa dang lan gyi tshul gyis gsungs so//de nas bcom ldan 'das la sogs pa che ba'i yon tan gyi sgo nas bstod pa yin te/ rgyal po zhes pas ni sngags 'di rgyal ba'i sras thams cad kyi 'byung khungs yin pas gsungs so/ /mthu chen po ni spang bya thams cad spong ba'i phyir ro//phan yon che ba ni thob bya thams cad thob pa'i phyir te/ de dag gis ni thar pa thob pa'i thabs zhus pa'o/ /phan pa ni nad dang gnod pa bsal ba'o/ /bde ba ni tshe dang longs spyod do/ /dmyal ba dang dud 'gro ni spang bya spong ba'i khyad par ro/ /de dag gis ni mtho ris thob pa'i thabs zhus so//lan gsungs pa la/ bcom ldan 'das la sogs pa ni nyan par gdams pa'o/ /bshad pa'i don mdor bstan pa la rig sngags kyi rgyal mo ni man+t+ra'o/ /ring bsrel gyi snying po ni tan+t+ra'o/ /mchod rten ni yan+ta'o/ /de nas gang+gA la sogs pas las sbyor thams cad phan yon gyi tshul du mdor bstan pa las dge ba'i rtsa ba bskyed pa ni maN+Dal zlum po byas nas sku gdung ngam ring bsrel bzhugs te gnas bdun du bsgrub bya'i ming tsam bcug nas brjod pa ste/gzhan sngags kyi sbyor ba med pa'o/ /bsod nams 'phel ba ni dkyil 'khor dpal be'u lta bur byas nas ma ma puSh+TiM ku ru zhes sbyar ro//las dang nyon mongs pa'i sgrib pa sbyang ba la ni dkyil 'khor mche ba lta bu byas nas sarba pA paM rak+Sha ku ru zhes spel lo/ /ngan song gsum gyi 'jigs pa bsal ba la ni dkyil 'khor pad+ma rgyas pa lta bu byas nas sarba durga ti pa ri sho d+ha ya zhes bya ba sbyar bar bya'o//tshe ring bar 'dod na dkyil 'khor nor bu rin po che lta bur byas te ma ma A yus+thA na ku ru zhes sbyar ro/ /bde ba can du skye bar 'dod na dkyil 'khor gdugs kyi rnam pa ltar byas te/ ma ma su lo ka pra ba ta ku ru zhes sbyar ro/ /bu bslang ba'i dkyil 'khor bum pa lta bu byas te me pu tra b+ha ban+tu zhes sbyar ro//shi ba la phan gdags pa yang rdzus te skye ba'i phyir dkyil 'khor pad+ma can du bya'o/ /dran pa nyams pa gso ba la dkyil 'khor zla ba rgyas pa ltar byas nas dur sa t+ya a pa na ya zhes sbyar ro/ / 'jigs pa bsal bar 'dod na ma ma a b+ha yaM ka ri zhes sbyar zhing dkyil 'khor mchod rten lta bu bya'o/ /bsam pa yongs su rdzogs 'phral gyi rkyen dang bral ba ste/ rmi lam ngan pa la dur swa p+ni a pa na ya dang / ltas ngan pa la ni du rmi taM a pa na ya zhes pa dang / A kA la mr-i t+yu pra sha ma Na zhes dus ma yin par 'chi ba bzlog pa dang /tsit+ta byA ku la ni sems g.yeng ba'o/ /dz+wa ra saM byA d+hi a pa na ya na da sol cig pa la sogs pa sbyor ba dang bcas pa brjod cing dkyil 'khor gru bzhi par byas nas 'dod pa'i las de dag grub bo/ /da ni cho ga'i tshul brjod de/ khrus byas la zhes pa la sogs pa cho ga la 'jug pa'i snga rol du chu gtsang ma'am sman dang sbyar ba'i chu la sngags thung ba brjod cing gdong la sogs pa bkru bar bya'o//de'i dus su rig pa'i lha mo spyan ma dang mA ma kI dang gos dkar mo dang sgrol ma rnams kyi sngags kyi phreng ba brjod cing bdag la khrus byed par yang bsam mo//gzungs kyi snying po 'di nyid dam rten cing 'brel par 'byung ba'i sngags la sogs pas byin gyis brlabs pa'i gos sar pa gyon par bya ba'am/ oM a mi ka pa ri shud+d+he sho d+ha ya sa ma te na d+hi ri d+hi ri/ shud+d+he shod+d+ha ya/ ma hA pad+me hUM swA hA/ ba'i rnam lnga la stong bzlas te gos dang snod spyad dang zas kyi rgyu la gtor gnas khang la chag chag gdab bo//bza' nyes dang bgo nyes la sogs pa kun sel to/ /yang tsan+dan dang gla ba'i chu la sogs pa la oM shrI ma hA kA ru Na pad+ma a mo g+ha a mo g+ha a pra ti ha ta badzra a d+hiSh+ThA na b+hu ru b+ha naM d+ha ri swA hA/ zhes pas gnas khang la sogs pa dang phyogs thams cad dri zhim por bya'o//spos kyis dkyil 'khor gru bzhi par bya zhes bya ba ni oM badzra b+hU mi hUM zhes brko ba'am/ 'chad par 'gyur ba'i cho gas sa brko ba dang / oM badzrA sa nA ya hUM chu blangs nas/ oM badzra go ma ye hUM zhes gci ba dang bsres nas 'jim pa bya ba dang dkyil 'khor 'dom gang pa la sogs pa ci 'dad par brtsigs nas oM badzra re khe hUM zhes pas ba'i rnam lnga tsan+dan gyi chu dang bsres nas g.yas skor du byug go//oM su re khe sarba ta thA ga tA a d+hiSh+Than+tu swA hA/ zhes lag pa'i rgyab tu me tog bzhag la oM sarba big+h+naM u ra ya hUM zhes maN+Dal gyi dbus su dor nas/oM sarba su bi shud+d+ha d+harmA NAM swA hA/ zhes lag pa bkrus te/ oM AHhUM hoHswAhA/ zhes me tog de spyi bor bzhag go/ /de nas 'chad par 'gyur ba'i cho gas thig gang 'dod pa'i tshul du gdab bo/ /tshon sna ma lus pas bri bar bya'o//de yang / oM aM baM saM dzaM hUM zhes pa dkar po dang ser po dang dmar po dang ljang gu dang nag po dang sngon po rnams rnam par snang mdzad dang rin chen 'byung ldan dang snang ba mtha' yas dang don yod grub pa dang rdo rje sems dpa' dang mi bskyod par bsams nas ye shes kyi lha dang gnyis su med par byas nas mchod pa dang bstod pa la sogs pas mnyes par byas nas snying po 'ba' zhig brgya rtsa brgyad brjod do//yang de dag dang 'khor lo dang rin po che dang pad+ma dang ral gri dang rdo rje dag gi phyag rgyar gyur par mos la rin po che'i phyag rgya de dag gi rtsig par bsam zhing bri bar bya ste/rten cing 'brel par 'byung ba'i sngags brjod cing dbang ldan nas g.yas skor du bri bar bya'o/ /de'i 'og tu dkyil 'khor de'i sa phyogs su ba dan nyi shu rtsa bzhi kha dog tha dad bri'o/ /bla re ni sngon po'o/ /yol ba ni dmar po'o/ / g.yer kha'i phreng ba dang srang bu'i ra ba dang gdugs dang rgyal mtshan dang sil snyan dang mda' yab dang ral gri dang me long dang rma bya'i sgro'i chun po sbyang bar bya'o/ /snying po'i rig sngags gro ga la bri bar bya'o zhes pa la/ gzungs sngags yi ge'i tshul du bri ba ni/ /ras saM shing shun gro ga'am//tA la'i lo ma sar pa'am/ /gur gum gi wang gla rtsi la/ /gser 'dab gtsug gi rtsa ba'am/ /gser gyi sdong po sar pa yis/ /gzungs sngags phreng ba ma nyams pa/ /skar ma mgo rgyal lha mtshams la/ /shar du bltas nas bri bar bya/ /zhes pa'i tshul gyis lag pa g.yas pa ni 'phags pa 'jam dpal du bsam mo//g.yon pa ni kun du bzang por bsam mo/ /bri gzhi ni phyogs bcu'i zhing khams su bsam mo/ /smyu gu ni phyag na rdo rjer bsam mo/ /snag tsha ni yi ge a'i rnam par bsam mo/ /bri ba'i dus su 'jam dpal dang kun du bzang pos drang ba'i don dang nges pa'i don gyi chos kyi 'khor lo rgyun mi 'chad par gsungs pa de phyag na rdo rjes phyogs bcu'i zhing thams cad du yi ge'i tshul du sgrogs shing bkram pas skad tha dad yi ge'i dbyibs dang kha dog tha dad du snang bar mos te shar ram byang du bltas pas dus tshod bzang po la lhag pa'i bsam pa ma 'khrugs pas bri bar bya'o//'dod chags kyi sems dang bcas pas ma yin no/ /de bzhin du zhe sdang dang nga rgyal dang phrag dog dang ser sna dang rgyags pa dang bag med pa dang rnam par g.yeng bar byed pa dang lta ba ngan pa dang bcas pas ma yin no//de ni yi ge'i tshul lo/ /yang na rin po che'am rdo 'am rwa 'am shing gi khams las yi ge phreng ba khol du brkos nas sa 'jam po'i 'jim pa shin tu legs pa la sprad de ji tsam 'dod pa'i grangs su byed pa 'di sku phyag rgya'i tshul du bkod pa'o//yang na rdo ba'am rin po che la sogs pa la thub pa'i sku'i mtha' skor du sngags kyi phreng ba zlum po'i tshul du bkod de khol du brkos nas 'jim pa dang sprod par bya'o/ /de'i grangs ji tsam 'dod pa byas pa ni sku'i tshul du'o/ /sngags de dag gos dmar pos dkris te mgo'i phyogs gsal bar bya ste sa phyogs gtsang mar gzhag go//de ni yi ge bri ba'i rim pa'o/ /mchod rten lnga gdab par bya'o zhes bya ba ni mtshon pa ste brgya rtsa brgyad dam nyi shu rtsa lnga'am dgu'am lnga'am gcig la sogs pa'o/ /de la sAts+tsha'i cho ga ni/ /skyon bral rab tu 'jam pa'i sa//dri bzangs chu yis 'jim pa la/ /rgya 'bur gsal ba'i sAts+tsha ni/ /bde bar gshegs pa'i mchod rten no/ /zhes pa'i tshul gyis gyo mo dang sol ba dang rdo dang gseg ma dang rtswa la sogs pa'i skyon thams cad dang bral ba bkra shis pa'i phyogs nas blangs te tsan+dan la sogs pa dri zhim po'i chus blangs te legs par brdung zhing 'thas pa dang 'dres par bya'o//de yang / oM na maHsarba bud+d+ha a d+hiSh+Thi te b+hU mi rak+Sha rak+Sha hUM phaT swA hA/ zhes pas bgegs bsal lo/ /lag pa'i sor mo sa la reg nas/ /oM na maHsa man+ta bud d+hA nAM sarba a d+hiSh+ThA na rat+na b+hU mi ye hUM phaT swA hA/zhes rin po che'i sa gzhir bsam mo/ /oM AHbadzra kha na kha na hUM phaT swA hA/ zhes brko zhing brkos pa thams cad yi ge a'i ngo bor bsam mo/ /oM na maHsarba ta thA ga te b+h+yo/ /a d+hiSh+ThA na a d+hiSh+Thi te/ a ma la bi ma la ni rma le bi shud+d+ha swA hA/ zhes byang chub sems kyi chu tsan+dan la sogs pa dri zhim pos bran no//oM na maHsarba bud+d+ha bo d+hi sa twe b+h+yaH a d+hiTh+ThA na a d+hiTh+Thi te/ sarba satwa bi kalpa ha na ha na hUM phaT swA hA/ zhes rdo rje dbyug pas brdung zhing bsre bar bya'o/ /oM na maHsa man+ta du b+d+hA nAM/ a pra ti ha ta shA sa nA ma badzra AHyu Shi swA hA/ zhes 'jim pa'i gong bu gcig tu byas nas/ na maHsarba ta thA ga te b+h+yo/ oM badzra pra mar+d+ha na ya sarba pra mar+d+ha na ya hUM phaT ces brjod pas 'jim pa'i gong bu de nyid trAM las rin po che'i ri bor gyur par bsam mo/ /na ma s+t+rai ya d+h+wi kA nAM/ na maHsarba ta thA ga te b+h+yo/ /tad+ya thA/ oM suk+Sh+mai suk+Sh+mai ya nu ga ta/shan+te dan+te nir ku le/ ya sha ya sho ba ti te jo ba ti/ sarba bud+d+ha a d+hiSh+ThA na a d+hiSh+Thi te hUM phaT/ 'di ni sgrib pa rnam sel gyi rgyud las sngags 'di bye ma'am 'jim pa'i gong bu la nyi shu rtsa gcig bzlas nas sAts+tsha byas nas mchod rten de'i rdul phra rab re re la'ang mchod rten re rer 'gyur la rdul phra rab de nyid kyi grangs tsam gyi lha dang mi'i go 'phang thob par 'gyur ro//gang du skyes pa de'i skye ba yang dag par 'gyur ro/ /myur du sangs rgyas rnam par snang mdzad dang mtshungs pa'i sku thob par 'gyur ro/ /zhes te 'jim pa'i gong bu de nyid pad+ma dang zla ba'i steng du oM las rnam par snang mdzad gang chen mtsho ri rab bye ba'i tshad kyi sku ba spu'i gseb thams cad rnam par snang mdzad la sogs pa phyogs kyi rigs kyi skus gang bar bsam mo//oM badzra b+he bA d+ha ye swA hA/ zhes 'jim pa bcad pa'i tshe rnam par snang mdzad chen po'i ba spu'i gseb nas sku re re spyan drang par bsam mo//oM rat+no b+ha ban+te hUM zhes 'bi 'bi byas la sku rin po che'i na bza' lcib mas blangs par bsam zhing / oM d+harma d+hA tu gar+b+he swA hA/ zhes snying po bcug pas thugs bskyed par bsam mo//oM a ra dze bi ra dze swA hA/ /zhes mar gyi snum gyis byug pa ni/ lha'i tshogs kyis dri'i char phab par bsam mo/ /oM badzra b+he d+he swA hA/ zhes 'jim pa bcad pa'o/ /oM d+ha rmA ta ro d+b+ha be ye swA hA/ zhes bskol phor du bcug pa'i tshe chos 'byung du zhugs par bsam mo//oM badzra mung+ga ra A ko Ta hUM phaT ces brdung ba'i tshe ming gi yi ge phreng ba du ma dang bcas par bsam zhing sprul pa du ma'i steng du gyur par bsam la/ oM sarba ta thA ga ta sam+b+ho ga kA ya swA hA/ zhes bskol phor nas drangs pa'i tshe longs spyod rdzogs pa'i skur bsam/oM sarba ta thA ga tA ni rma na kA ya swA hA/ phyung ma thag tu sprul pa'i skur bsam mo/ /oM d+ha rma rat+no rat+na saM b+ha be swA hA/ zhes pas sku de ba spu'i gseb thams cad skus gang bar bsam mo/ /de yang sku re re pho brang ye shes kyi snying po can mthong na dga' ba'i mchod rten du bzhugs par bsams nas//oM AHyu She swA hA/ zhes srog shing gzugs so/ /oM pra mar+d+ha na ye swA hA/ zhes 'khor lo bzhag nas/ oM pa taM kA lam ba swA hA/ zhes cod pan gdags so//oM sa ra ra ta swA hA/ zhes pas ba dan dbul lo/ /oM dum bi ra duM baM swA hA/ zhes chu srin rgyal mtshan dbul lo/ /oM pra ma Na ye swA hA/ zhes gdugs dbul lo/ /oM rat+na mA la b+hI zhes pas phreng ba gdags la/ oM na ma she ya da bug d+ha pra ti sha ga ta ti b+he/ta thA ga to ar+ha te b+h+yaHsamyak+saM bud+d+ha ya/ tad+ya thA/ oM su su ye swA hA/ zhes bla re dbul lo/ /oM d+ha r+m+mA da mi le dza le swA hA/ zhes gdan la bzhugs so/ /oM badzra d+hA tu ad+hIk+Sha d+he hUM zhes brten par gsol ba gdab po/ /de'i 'og tu rten 'brel gyi sngags brjod dri bzang po'i chus bsangs te me tog la sogs pas rgyas par mchod do//de nas gzungs gang du bzhugs pa de brjod cing bskor ba gsum mam nyi shu rtsa gcig la sogs pa bya'o/ /sAts+tsha bya ba'i rim pa'o/ /bum pa gang ba lnga gzhag go/ /zhes bya ba yang mtshon pa ste bum pa nyi shu rtsa lnga'am bcu'am drug gam yang na gcig go//de yang / gser dngul zangs sam shing dag gam/ /sa rdo las byas lto ba che/ /zhabs phra ske ring mchu 'phyang ba/ /gser ram bkrus pa'i bum pa ni/ /lha yi grangs sam rigs bdag gi/ /tshad rnams ci 'byor bkod par bya//yid 'ong gtsang ma'i chus bkang nas/ /byi ru gser dngul mu tig dang / /nor bu rma med rin chen lnga/ /seng gr-i byA gr-i gir ka rni/ /pa to ha sa de ba sman/ /gro nas 'bras kyi so ba til/ /mon sran gre'u 'bru lnga'o/ /tsan+dan ga pur gur gum dang //dzA ti a ka ru dri lnga/ /lan tshwa bu ram sbrang dang mar/ /brag zhun 'byung ba'i snying po lnga/ /bum pa bzang po'i gter yin te/ /mi nyams gos dang lo mas ni/ /mgrin pa dang ni dbu rgyan bya/ /'jig rten 'jig rten 'das pa yi/ /dpal 'byor 'dod pas 'di mchod do//zhes byang chub sems dpa' sgrib pa rnam sel gyi rtog par gsungs so/ /de la thugs rje chen po'i brlan gyi phyir chu dang ba'o/ /mya ngan las 'das pa'i sa bon sogs pa'i phyir 'bru lnga'o/ /chos kyi sku'i gdung rgyun mi bcad pa'i phyir rin po che lnga'o//nyon mongs pa'i gdung ba sel ba'i phyir sman lnga'o/ /gdul bya byang chub kyi lam gyi bsrung ba bskyed pa'i phyir dri lnga'o/ /'khor ba ma stongs kyi bar du gzugs kyi sku rgyun mi 'chad pa'i phyir 'byung ba'i snying po lnga'o/ /chos kyi gsung la nyams pa med pa'i phyir mgrin pa gos bzang gis bcing ba'o//'gro ba'i bsam pa yid bzhin du skong ba'i phyir kha rgyan no/ /lam ngan pa dman pa'i gang zag gis rtogs dka' ba dang dbang po rnon po la rgya che ba dang chos nyid zab mo rtogs par rigs pa'i spyod yul ma yin pa dang rtogs na phyi nang gnyis su med pa'i rtags su bum pa zhabs phra zhing lto che ba dang ske ba phra ba dang mchu 'phyang ba'o//gal te bum pa lnga la sogs pa yin na rigs kyi phyag rgya yang dgod par bya'o/ /bum pa de dag la yang rma bya'i gdugs dang cod pan dang rgyal mtshan dang ba dan la sogs pa'i rgyan gyis spras te bkod do//gra bzhir pog phor bzhi zhes pa yang ma chag pa dang ma gas pa'i snod du tu ru ska ni byang shar du bsreg go a ga ru ni shar lhor ro/ /tsan+dan ni lho nub tu'o/ /gu gul ni nub byang du'o/ / snod bzhi ni mtshon pa tsam ste spos dang me tog tha dad pa dang yon chab dang mar me dang byug pa dang zhal zas dang sku gdung gi grangs dang sbyar nas dgod do/ /de yang cho ga rgyas pa dang bsdus pa kun mtshon par shes par bya'o/ /de re zhig sAts+tsha brgya pa'i dbang du byas na rang nyid lhag pa'i bsam pa dang ldan pas thams cad du sngon gyi nyin par skyabs su 'gro ba byas nas sdom pa bzung ste maN+Dal phul nas mchod de sangs rgyas dang byang chub sems dpa' thams cad mdun gyi nam mkha' la dmigs te dbang por byas nas tshigs bcad 'dis gsol ba gdab bo//oM badzra/ rdo rje'i rigs dang rin chen rigs/ /pad+ma'i rigs dang las kyi rigs/ /bde gshegs rigs tshogs ma lus pa'am/ /sangs rgyas byang chub sems dpa' dang / /nyan thos rang rgyal rdzu 'phrul can/ /brjod mi lang sogs tshogs bcas dang //ded dpon 'jig rten skyong ba'i tshogs/ /kun nas bdag la dgongs su gsol/ /bdag kyang yongs su dag pa dang / /'gro ba nyon mongs gnas bsgral phyir/ /cho ga bzang po 'di'i sgo nas/ /yid bzhin nor 'dra sgrub byed na/ / bdag la yongs su bskyab pa dang / /sems can rnams la thugs brtse'i phyir/ /ye shes can gyi gzigs nas kyang / /nye bar byin gyis brlab tu gsol/ /swA hA zhes lan gsum la sogs pa brjod de shar phyogs su kha bltas te gzungs nyi shu rtsa gcig brjod la nyal lo//gal te rmi lam dang ltas ngan na rigs pa'i khro bo gang yang rung ba'i sngags mang du brjod de gtor ma dang mchod pa dbul zhing tshim par bya'o/ /lhag par yang yi dags la gtor ma mang du sbyin no/ /de ni cho ga thams cad kyi sngon du 'gro ba dang po'o//de nas sAts+tsha brgya pa'i dbang du byas na dkyil 'khor gru bzhi sgo bzhi pa dbus kyi pho brang re mig brgya par byas te de yang le tshe'am pad+ma'i khor yug gam sku gdung mchod rten bzhi bsdus pa'i gzugs su byas la cho ga dang ldan pa'i sAts+tsha re re rgyan dang bcas pa le tshe re re la me tog steng du gzhag /sgo'i nang rol du zung re gzhag go/ /lha snam gyi zur bzhir bum pa gang ba bzhi gzhag go/ /shar du dkyil 'khor khru gang ba bdun gyi steng du sku gdung ring bsrel dang bcas pa khri'u'i steng du gzhag go/ /de'i drung du bum pa gang ba cho ga dang bcas pa gzhag go//me tog gi snod dang spos snod dang byug pa dang mar me dang zhal zas rnams re re la'ang brgya rtsa brgyad dkyil 'khor gyi mtha' nas bskor ro/ /dgu pa'am lnga pa la sogs pa la ni rdo rje rgya gram mam pad+ma bris te gzhal yas khang yod dam med kyang rung ngo //bum pa dang sAts+tsha dang sku gdung thams cad kyang nang du tshud par bya'o/ /shar du shes rab kyi pha rol tu phyin pa bklag go/ /lhor stobs po che bklag go/ /nub du rma bya chen mo'o/ /byang du mdo sde'i dbang po gser 'od dam pa'i mdo bklag go/ /shar phyogs su 'byung po thams cad la gtor ma sbyin no//lho phyogs nas dad pa ldan pas ma mo rnams la gtor ma sbyin no/ /nub phyogs nas klu la sbyin no/ /byang phyogs nas 'jig rten skyong ba rnams la gtor ma sbyin no/ /de la smon lam gsol ba'i tshigs su gcad pa ni 'di dag yin te/shar phyogs su snying po'i sngags dang bcas ba brjod de/ tshangs pa brgya byin dbang phyug che/ /khyab 'jug lha klu gnod sbyin sogs/ ded dpon brgyad po 'khor bcas dang / /'phrog ma bu dang bcas rnams dang / /'byung po'i tshogs rnams kun nyon cig /bdag gis khrus dang me tog dang / /spos dang mar me byug pa dang / /zhal zas tshogs rnams khyed la 'bul/ /khyed kyi dpal dang brtson 'grus dang / /gzi brjid dbang phyug stobs kyis ni/ /nad dang gnod pa bsal nas kyang / /che ge'am bdag la bkra shis mdzod//shar phyogs su sems can thams cad bde legs su gyur cig swA hA/ lho phyogs su yang de bzhin du brjod de/ de bzhin du nub dang byang du'ang brjod do/ /de dag ni sngon du 'gro ba'i cho ga gnyis pa'o/ /de nas bsgrub bya dang sgrub pa po rnams gos sar pa gyon cing khrus byas nas kha byang du bltas te yungs kar dang nas la sogs pa'i 'bru sna tshogs kyis bdag gi lag pa g.yon pas bskor zhing kham phor gyi tsan+dan me'i nang du dor ro//de nas tshigs su bcad pa 'di brjod la kham phor sgor bskur ro/ /gang dag sangs rgyas rang sangs rgyas//'phags pa nyan thos thams cad dang / /tshangs pa brgya byin dbang phyug che/ /khyab 'jug dbang phyug klu dbang po/ /gzhan yang 'jig rten skyong ba rnams/ /rang rang 'khor dang bcas pa dang / /'phrog ma bu dang bcas pa dang //gzhan yang 'byung po mthu chen rnams/ /de dag kun gyi mthu dang dpal/ /brtson 'grus gzi brjid byin gyis brlabs/ /ro langs la sogs gdon rnams kyis/ /nad dang gnod pa chad 'gyur cig /rdo rjes rin chen phug pa dang / /me yis bud shing sreg byed dang //rlung gis sprin rnams 'thor ba dang / /nyi mas 'dam sogs skems pa dang / /seng ges ri dgas kun skrag ltar/ /sngags dang phyag rgya bden pa'i mthus/ /ro langs 'byung po'i tshogs rnams dang / /byad stems thams cad tshig par shog /de nas sgrub pa po dang bsgrub bya thams cad kyi mgo la me tog gi phreng ba gdags shing /lus dri zhim pos byug par bya'o/ /de dag ni sngon du 'gro ba'i cho ga gsum pa'o/ /yid bzhin gyi nor bu 'di gnyis kyang lan brgya rtsa brgyad bzlas brjod bya'o/ /snying po'i sngags brjod cing dkyil 'khor la bskor ba brgya rtsa brgyad bya'o zhes pa ni gong du gsungs pa'i rig sngags kyi rgyal mo 'di gnyis dus gcig tu dran par bya'o//zhes pa la sogs pa tshig gsum dang 'brel te dran par bya'o/ /zhes pa'i don 'di ltar shes par bya'o/ /sAts+tsha ni thams cad du rnam par snang mdzad sangs rgyas kyi sku kho nar bsams te/sAts+tsha re re la yang rnam par snang mdzad re rer bsams la de'i ba spu'i gseb thams cad rnam par snang mdzad kyis gang ba'o/ /de nas sAts+tsha'i grangs kyi rnam par snang mdzad bye ba brgya phrag go/ /de la 'dir gzungs yi ge'i tshul du klog na bum pa ni a las zla ba'i dkyil 'khor du bsams nas de'i steng du a las gzungs kyi phreng ba dkar pos bskor ba'am yang na phyogs bzhir aM baM saM dzaHzhes dmigs te g.yeng ba la sogs pa'i skyon spangs nas gzungs ring thung gnyis spel ba brgya rtsa brgyad brjod do//de'i tshe sngags dang zla ba'i 'od kyis ye shes kyi 'od zer dang 'jig rten gyi bdud rtsi thams cad bsdus nas zla ba dang yi ge thams cad la thim par bsam mo/ /de nas gzungs thung 'ba' zhig gdon zhing bskor ba brgya rtsa brgyad bya'o/ / de'i tshe sngags dang yi ge'i 'od kyis bdag dang sems can thams cad kyi sdig pa dag par bsam mo/ /de nas yi ge dang sngags bdud rtsir zhu bar bsam mo/ /bskor ba'i dus su ni sku gdung gi lha'i grangs brjod kyis mi lang ba bum pa'i nang du yi ge'am phyag rgya'am lha gcig pu'i sku'i 'od kyis bdag dang 'gro ba thams cad kyi sgrib pa bsal ba dang nad sbyang ba dang dbang bskur bar bsam mo//nad kyis btab pa la sogs pa brgyad po ni gong gi las sbyor gyi bye brag ste sngon du bshad pa'i sngags kyi sbyor ba dang bcas pa'i chus bkru zhing dbang po'i sgo lnga rma bya'i sgros bya ba pa'o//de yang khrus bya ba'i rim pa ni 'di yin te bum pa bdud rtsi'i chur bsams te/ rol mo sil snyan du mar bcas/ /'dod pa 'dzum zhing yon bcas pas/ /nyams dga'i tshul du gsol ba gdab/ /oM byang chub rdo rje sangs rgyas la//mchog chen ji ltar stsal ba ltar/ /bdag la bsrung ba'i don gyi phyir/ /sngags kyi chu yis byin brlab stsol/ /gsum brjod phyag 'tshal bskor ba bya/ /yon ni/ bsrung la ras sogs kha dog dkar/ /tshe bsring sogs la ser mo'i rdzas/ / shi ba slu ba ngur smrig mdog /bu slong sogs la dmar po ste/ /gnod pa bzlog pa sngon pos bya/ /las kun la ni ljang gu shis/ /ser sna med par yon phul nas/ /blo ldan slob dpon phyag gis ni/ /yal gas bum pa blang bar bya/ /'gro na lhag pa'i sems btang nas/ /'gying dang bcas pas khrus gsol lo//zhes pa'i tshul gyis dang por bkra shis brjod cing smon lam du yang bsngos nas bden pa'i byin rlabs 'di brjod do/ /ston mchog dam pa lha mis mchod 'os pa/ /sangs rgyas phyag 'tshal deng 'dir bde legs shog /zhi ba chags bral lha mis mchod 'os pa//chos la phyag 'tshal deng 'dir bde legs shog /tshogs kyi dam pa lha mis mchod 'os pa/ /dge 'dun phyag 'tshal deng 'dir bde legs shog /'jig rten 'di'am yang na 'das pa yi/ /mtho ris dag la rin chen mchog yod pa/ /de bzhin gshegs pa lha yi lhar gyur te//mi mchog 'di dang gang yang mtshungs pa med/ /de phyir sangs rgyas rin chen mchog tu gsungs/ /bden pa des ni deng 'dir bde legs shog /zag pa chags bral bdud rtsi 'dus ma byas/ /mkhyen ldan shAkya thub kyis ni rab dbye mdzad/ /'chi med dam chos zhi ba 'du byed bral//chos 'di dag dang mtshungs pa gang yang med/ /de phyir dam chos rin chen mchog tu gsungs/ /bden pa des ni deng 'dir bde legs shog /gang 'dod de la tshul bzhin mchog ston pa/ /ston pa bla med rtag bsgrub rnal 'byor gzhi/ /rdo rje lta bu gnyis med lam gsal bas//ting 'dzin 'di dang mtshungs pa 'ga' yang med/ /de phyir dam chos rin chen mchog tu gsungs/ /bden pa de yis deng 'dir bde legs shog /gang zag chen po brgyad po rab bsngags shing / gang zag zung bzhir brjod pa 'di dag ni/ /drang srong chen po gang zag mtshungs pa med//bde bar gshegs pas sbyin pa'i gnas zhes gsungs/ /de phyir dge 'dun rin chen mchog tu gsungs/ /bden pa de yis deng 'dir bde legs shog /gang dag brtan pa'i yid kyis rab brtson zhing / /gau ta ma'i bstan la rab zhugs nas//dam chos thos mang bdud rtsi mchog rnyed de/ /mun pa bsal nas mya ngan 'das thob pa/ /de phyir dge 'dun rin chen mchog tu gsungs/ /bden pa de yis deng 'dir bde legs shog /lus sam ngag gam de bzhin yid kyis kyang / /'jig tshogs lta dang tshul khrims brtul zhugs dang //the tshom dang ni nyon mongs gsum po dag /cig car spangs te 'phags pa'i bden pa mthong / /de phyir dge 'dun rin chen mchog tu gsungs/ /bden pa de yis deng 'dir bde legs shog /lus sam ngag gam 'on te yid kyis kyang //sdig pa rnam bcu nam yang mi byed la/ /glo bur byas kyang mi 'chab myur du bshags/ /de ltar log lta de dag 'dzin mi byed/ /de phyir dge 'dun rin chen mchog tu gsungs/ /bden pa de yis deng 'dir bde legs shog /ci ltar dbang po'i sdong po sar btsugs pa//phyogs bzhi'i rlung rnams kyis ni mi bskyod ltar/ /'phags pa'i lam gyi dam pa 'thob pa yis/ /'phags pa'i dge 'dun rnam rtog gis mi g.yo/ /de phyir dge 'dun rin chen mchog tu gsungs/ /bden pa des ni deng 'dir bde legs shog / shes rab shin tu zab cing brtan pa yis/ /'phags pa'i bden rnams yang dag rab bsgoms nas/ /lus kyi sbyin pa yid la byas pas ni/ /de dag 'jigs pa brgyad dang phrad mi 'gyur/ /de phyir dge 'dun rin chen mchog tu gsungs/ /bden pa des ni deng 'dir bde legs shog / ji ltar rlung gis me ni rab gtor na/ /lag tu blangs te bgrang du med pa ltar/ /sangs rgyas sras rnams kun du sbyor ba yis/ /rab sngags 'jig tshogs bstan du med par 'gro/ /de phyir dge 'dun rin chen mchog tu gsungs/ /bden pa des ni ding 'dir bde legs shog /bla ma mkhan po pha ma grogs po dang //yon bdag gnyen bshes chos kyi rgyal po dang / /sems can gang dag 'gro dang mi 'gro ba/ /de dag thams cad deng 'dir bde legs shog /ces brjod nas bum pa'i chu las nyungs zad blangs te mdun du sangs rgyas dang byang chub sems dpa'i tshogs bsams la yon chab kyi tshul du mchod do//oM na maHsarba bu d+d+ha bo d+hi satwe b+h+yaHsaM sho d+ha ni swA hA/ de bzhin du 'phags pa nyan thos dang rang sangs rgyas thams cad la yang mchod pa bya ste/ oM na maHsarba a haM shra ba ka b+h+ye kA ya wAka tsit+ta saM sho d+ha ni swA hA/ de nas 'jig rten skyong ba rnams mchod par bya ste/bdud rtsi ye shes chu bor ni/ /bden pa'i mthu yis byin brlabs pa/ /rnam dag sngags kyi chu rgyun gyis/ /'jig rten bag chags dag gyur cig /oM sarba sa di ba lo ka phri tha ka saM sho d+ha ya swA hA/ zhes lan gsum brjod do/ /de nas gang zhig khrus bya ba de gos dang rgyan sar pas brgyan te//sdig pa bshags pa dang skyabs su 'gro ba dang / sems bskyed pa dang sdom pa 'dzin du bcug la khrus byas nas me tog phreng ba mgo la gdags so/ /de bzhin du dang por gzungs 'di gnyis brjod de rma bya'i sgro'am ku sha'i chun pos nad dam sdig pa la sogs pa bya ba lan bdun nam nyi shu rtsa gcig la sogs pa bya'o//de'i 'og tu spyan ma la sogs pa rig pa'i lha mo bzhi'i sngags kyis mgo nas khrus bya'o/ /de nas rig pa'i lha mo gzhan thams cad dang / byang chub sems dpa'i sngags gang dag brjod nus pas yan lag thams cad khrus bya'o//de la 'di yang brjod par bya'o/ /ji ltar bltams pa tsam gyi tshe/ /lha rnams kyis ni khrus gsol ltar/ /lha yi chu ni dag pa yis/ /de ring 'dir yang sku khrus gsol/ /de ma thag phyag 'tshal nas ldang bar bya'o//de'i lhag mar gyur pa'i bum pa'i chus phyugs lhas dang / rta dang glang po'i bres dang / zhing dang gtsug lag khang dang / mkhar dang khyim dang ra ba dang / lam srang la sogs pa thams cad du gtor ro/ /sAts+tsha dang sku gdung la sogs pa ni/dben pa'i sa phyogs su bzhugs so/ /rdul tshon ni ci bde bar dor ro/ /bum pa'i yo byad dang dkyil 'khor gyi rgyan la sogs pa thams cad ni/ gang rdo rje slob dpon mkhas pas dge ba'i ched du longs spyod kyi tha mal par ni 'gal tshabs che'o//zas kyi lhag mas ni yi dags la gtor ma sbyin no/ /de'i rjes su ni kun du bzang po'i smon lam bdun nam nyi shu rtsa gcig kho na g.yeng ba med par bklag go/ /de dag gis ni gzungs yi ge'i tshul du bklag pa dang po ste/ gzhan la rgya cher skabs 'dir shes par bya'o//yang na/ 'di lta bu bum pa dang pad+ma dang zla ba'i steng du a yig dkar po de'i steng du nyi ma la aM yig de gnyis char hUM bzhis bskor te/ re re la so sor sngags phreng kha dog sna tshogs pa 'khor bar bsams la de'i 'od zer gyis rang bzhin gyi sngags thams cad bkug cing de nyid du thim par bsams te bzlas pa bya'o//bskor ba'i dus su yi ge dang sngags kyi 'od kyis ye shes kyi 'od zer dang 'jig rten gyi bdud rtsi thams cad der thim zhing / de'i 'od zer gyis bdag dang 'gro ba thams cad kyi nad dang 'tshe ba thams cad sel bar bsams la bya'o//lhag ma ni sngon ltar shes par bya'o/ /yang na/ bum pa pad+ma dkar po'i steng du zla ba dang nyi ma kha sbyar ba'i bar du a dang aM las phyogs bzhir hUM bzhi dang mtshams su aM baM saM dzaMHbskor te de la yang so sor sngags kyis bskor bar bsams la/sngags brjod pas yi ge dang sngags kyi 'od zer gyis rang bzhin gyi sngags bkug cing der thim pa dang / bskor ba'i dus su ye shes kyi 'od zer dang 'jig rten gyi bdud rtsi bsdus nas der thim ste/ 'od kyis bdag dang 'gro ba thams cad kyi nad dang 'tshe ba dang /sdig pa thams cad zad par bsam mo/ /lhag ma cho ga sngon ltar shes par bya'o/ /da ni gzungs phyag rgya la dmigs nas bklag pa ni/ bum pa pad+ma dang zla ba'i steng du a las skyes pa rin po che cha gcig pa a yig dkar po la sngags kyis bskor ba kho na la dmigs pa gtad de brjod la phyag rgya dang sngags de'i 'od kyis rang bzhin gyis grub pa'i ye shes kyi 'od zer dang 'jig rten gyi bdud rtsi thams cad der bsdus par bsam mo//bskor ba'i dus su ni de dag gi 'od zer gyis bdag dang sems can thams cad kyi nad dang 'tshe ba dang sdig pa zad par byas par bsam mo//yang na pad+ma dang zla ba'i steng du a yig las rin po che cha gsum pa yi ge dang sngags bsams la brjod pas sngags dang phyag rgya'i 'od zer gyis rang bzhin gyi sngags dang phyag rgya bstim zhing brjod de bskor ba'i dus su sngags dang phyag rgya'i 'od zer gyis ye shes kyi 'od zer dang 'jig rten gyi bdud rtsi thams cad bsdu zhing der thim pas de'i 'od kyis bdag dang 'gro ba thams cad kyi nad dang 'tshe ba dang sdig pa'i tshogs thams cad zad par yang bsam mo//cho ga lhag ma thams cad sngon ltar shes par bya'o//yang na bum pa dang pad+ma zla ba'i steng du a yig la rin po che cha bzhi pa 'od kyi phreng ba dang bcas pa yi ge dang sngags kyi phyag rgyas btab pa bsams te/ sngags dang phyag rgya de'i 'od zer gyis rang bzhin grub pa'i ye shes bdud rtsi bstim nas brjod pas bdag gi lus ngag yid kyi sgo gang bar bsams te bskor ba'i dus su sems can thams cad kyi lus ngag yid kyi sgo dag par bsam mo//lhag ma cho ga thams cad sngar ltar ro/ /sku la dmigs nas gzungs bklag pa'i tshul du ni bum pa dang pad+ma zla ba'i steng du a yig ser po las bcom ldan 'das byang chub chen pos gsil byed dang par bu 'chang ba gser btso ma'i mdog can 'dzum pa'i mdangs kyis rin po che'i khri la bzhugs pa bsams te/de'i snying gar zla ba la a yig sngags kyis bskor ba bsams te rang bzhin gyis byang chub chen po dang tha mi dad par byas nas sngags brjod pa'i tshe dus gsum gyi de bzhin gshegs pa dang lha mo dang byang chub sems dpas bum pa du ma dus gsum gyi ye shes kyi chus gang ba du ma thogs nas dbang bskur bas de'i dbu la sangs rgyas mi bskyod pa bsam pa dang sku du ma yang gzhug par bya'o//de nas bskor ba'i dus su sku de las byung ba'i lha mo'i tshogs kyis bdag la dbang bskur te bdag gi 'od zer gyis 'gro ba thams cad yongs su dag par bsam mo//de nas rang bzhin gyi lha thams cad gshegs te/ sku de 'od du zhu bar dmigs te khrus bya'o/ /lhag ma cho ga thams cad sngon ltar ro/ /yang na pad+ma dang zla ba'i dbus su bdud 'dul ba'i phyag rgya dang ldan pa'i byang chub chen po bsam pa'am yang na chos 'chad pa'i phyag rgya dang ldan pa bsams te cho ga thams cad sngon ltar shes par bya'o//sku dkyil 'khor 'khor lo la dmigs nas gzungs bklag pa ni/ oM swa b+hA ba shud+haHsarba d+harmaHswa b+hA ba shud+d+hou0f85haM/zhes brjod pas bum pa mi dmigs pa'i ngang las yi ge b+hU~M las spos kyi khang pa rim pa gsum rin po che'i rgyan thams cad kyis brgyan cing twa ra Na la sogs pas mdzes pa dra ba dang dra ba phyed pa dang / dar dpyangs dang dril bu dang zla phyed rdo rje dang kra ma shiR+Sha dang dar bu kan la sogs pa gzhal yas khang gi rgyan du mas legs par spras pa rtse mo gcig tu bsdus pa'o//paM las pad+ma dang a las zla ba'i steng du lha thams cad bsam par bya'o/ /de'ang byang chub sems dpa' sgrib pa rnam sel gyi rgyud las ji skad gsungs pa ltar te/ rin chen rab bkod gzhal yas ni//spos kyis brgyan pa'i khang pa ru/ /rab zhi sna tshogs rgyan ldan pa'i/ /dkyil 'khor lha yi tshogs rnams bsgom/ /AHlas byung ba'i bcom ldan 'das/ /thub pa'i nyi ma bye ba'i 'od/ /ngur smrig gos can gser mdog sku/ /chos 'chad phyag rgya ldan pa ni//zhal bzhi phyag brgyad zhabs bzhi pa/ /sems dpa'i skyil krung bzhugs nas ni/ /'gro la thugs rje'i gzigs pa po/ /dkyil 'khor dbus su bsgom par bya/ /de yi mdun du gsang sgrub mo/ /gur skyes dkar mo bsil yab 'chang / /gtso bo'i g.yas su a yig las//tshe 'dzin ma ste gser mdog can/ /dkar mo bum pa 'chang ba ni/ /'gying pa'i tshul du bzhugs pa'o/ /gtso bo'i g.yon du b+h+rUM yig las/ /bsod nams ldan ma dkar mo ni/ /skyabs sbyin pad+ma dkar po 'chang / /sgeg pa'i spyan dang ldan pa'o//rgyab tu phyag rgya bstan pa ni/ /yuM skyes dmar po phreng ba 'chang / /shar gyi 'dab mar suM yig las/ /bsod nams gzigs ma dkar gsal mo/ /g.yas kyis legs so g.yon pas ni/ /mar me 'od rab gsal ba 'chang / /lhor ni pu r+Na rnam gzigs ma//ser mo glegs bam 'chad ba'o/ /nub tu shin tu go cha mo/ /saM skyes dmar mo pad+ma 'chang / /byang du yang dag 'chang byed mo/ /saM skyes ljang gu ut+pal 'chang / /byang shar praM yig las skyes pa'i/ /so so 'brang ma ljang ser mo/ /lag g.yas skyabs kyi phyag rgya dang //g.yon pa lcags kyu 'chang ba'o/ /shar lhor aM las mdangs ldan mo/ /ku mu ta 'dzin ser skya mo/ /lho nub paM las gzi ldan mo/ /dmar ser me long 'chang ba'o/ /nub byang dzaM las rgyas ldan ma/ /ljang gu 'bras kyi snye ma 'chang / /de kun zhi ba'i cha byad can//zhal gcig phyag gnyis ldan pa la/ /rin chen sna tshogs kyis spras pa/ /bzhengs te me tog 'thor ba'o/ /shar sgo laM las skyes pa yi/ /'chi 'joms dkar mo lcags kyu 'chang / /lho sgor gshin rje 'joms pa ni/ /yaM skyes sngo nag dbyug pa 'chang / /nub sgor gshin rje sdom byed ma//yaM skyes dmar mo lcags sgrog 'chang / /byang sgor saM skyes legs skyong ma/ /rdo rje zhags 'dzin dUr ba'i mdog /de kun khro mo'i cha byad la/ /zhal gcig phyag gnyis brkyang bskum can/ /rin chen rgyan dang sbrul gyis spras/ /spyan gsum skra ser mche ba gtsigs//dkyil 'khor de yi rgyab tu ni/ /phyag rgya kha dog tha dad pa'i/ /sangs rgyas stong rnams bsam bya ba/ /chos gos gsum dang ldan pa ste/ /kun kyang pad+ma zla ba la/ /sems dpa' yi ni skyil krung gis/ /'gro la thugs rje cher gzigs nas/ / 'dzum pa'i mdangs kyis bzhugs pa'o/ /dkyil 'khor de'i rgyab tu ni/ /byang chub sems tshogs nyan thos bcas/ /ded dpon 'khor dang bcas pa rnams/ /mdog dbyibs gos rgyan tha dad can/ /thal mo sbyar ba byas nas kyang / /dam chos gleng slong rgyas byed tshul//pus mo'i lha nga sar btsugs nas/ /pad+ma'i stan la bzhugs pa'o/ /zhes gsungs pa'i tshul du bsgoms nas bdag gi snying ga'i sa bon gyi 'od kyis rang bzhin gyi dkyil 'khor spyan drangs nas mchod de/ dzaHhUM baM hoHzhes bsres nas tha mi dad par bsam mo/ /yang rtsa ba'i dkyil 'khor gyi dbu la pad+ma dang zla ba la oM yig dkar po'o//mgrin par pad+ma dmar po la gnas pa'i yi ge aHdmar po dang snying gar nyi ma la gnas pa'i hUM yig sngon po bsam par bya'o/ /de nas gzungs kyi phreng ba bklags pa'i tshe lha thams cad snying gar rang gi sa bon dang sngags kyi phreng ba'i 'od zer gyis rang bzhin gyi 'od zer dang 'jig rten gyi bdud rtsi thams cad bsdus te lha thams cad la so sor thim par yang bsam mo//lhag ma thams cad sngon gyi cho gas shes par bya'o/ /yang na dkyil 'khor du lha mo brgyad bsam ste/ shar du la las tshe 'dzin ma/ /dkar mo rdo rje dril bu 'chang //lhor ni baM las rnam rgyal ma/ /ser mo gos bzang rnga yab 'chang / /nub tu saM las bde sbyin ma/ /dmar mo u dum+WA ra 'dzin/ /byang du dzaM las 'bar byed ma/ /ljang gu ut+pal sngon po 'chang / /hUM las skyes pa'i khro mo bzhi/ /sgo bzhir mkhas pas dgod par bya/ / shar du gshin rje 'joms ma ni/ /dkar mo tho ba 'chang ba'o/ /lhor ni gshin rje dbyug pa mo/ /ser mo rin chen dbyug tho 'dzin/ /nub tu 'chi bdag 'dul ba mo/ /dmar mo pad+ma'i phreng ba can/ /byang du gshin rje drag sel mo/ /sngon mo chu srin 'dzin pa mo/ /zhes pa byang chub sems dpa' sgrib pa rnam sel gyi rgyud du gsungs te/lha dgur bsgom pa rtsa ba'i 'khor lo yin te gtso bo ni sngon ltar ro/ /gzhan yang sangs rgyas dang byang chub sems dpa' dang nyan thos dang sde dpon thams cad sngon ltar shes par bya'o/ /yang na 'di ltar sngar mos na/ /shar du aM las lcags kyu ma//dkar mo lcags kyu phreng ba 'chang / /lhor ni baM las zhags pa mo/ /ser mo zhags pa rnga yab 'chang / /nub tu yaM las lcags sgrog ma/ /dmar mo lcags sgrog ril ba 'chang / /byang du dzaM las 'bebs byed ma/ /ljang gu dril bu sil phreng 'chang / /zhes rgyud du gsungs pa'i lha mo bzhis gtso bo la bskor ba'o//gzhan yang sangs rgyas dang byang chub sems dpa'i tshogs la sogs pa mi dgos so/ /de ltar rgyas bsdus gang bsgom yang rang bzhin gyi lha dang tha mi dad par byas nas mchod par bya'o/ /de nas bzlas pa'i dus su lha so so'i snying gar sngags kyi 'od kyis sangs rgyas thams cad bsdus nas dbang bskur rigs tha dad kyis dbu brgyan par blta'o//bskor ba'i dus su cho ga lhag ma sngon ltar shes par bya'o/ /gzhan yang rig sngags yi ge'i tshul du bklag pa ni bum par pad+ma dkar po'i steng du zla ba la gnas pa'i hUM sngon po la sngags kyi phreng bas bskor ba'am yang na dbus kyi phyogs su hUM kha dog bzhir bsam/mtshams bzhir aM baM saM dzaM bzhi kha dog bzhi dang yi ge dgu po re re yang sngags kyi phreng ba kha dog tha dad pas bskor pa la dmigs nas brjod par bya'o/ /cho ga lhag ma sngon ltar shes par bya'o//gzhan yang rig sngags phyag rgya la dmigs nas bklag pa ni bum pa b+h+rUM las rin po che'i mchod rten sgo gcig pa dkar po'i nang du pad+ma dang zla ba la hUM las rdo rje dkar po rtse lnga pa sngags kyi phreng ba dang bcas pa dmigs la sngon ltar brjod do//yang na bum pa mchod rten gyi nang der pad+ma dang zla ba'i steng du 'khor lo ser po rtsibs bzhi pa'i steng du rdo rje dkar po rtse lnga pa bsams te 'khor lo'i rtsibs la/ aM baM saM dzaM bzhi bsam mo/ /rdo rje'i lte ba la hUM bsam mo/ /de re re la sngags kyi phreng bas so sor bskor bar dmigs te bklag par bya'o//yang na de nyid ltar bsams pa las rdo rje'i steng du gdugs dkar po sngags kyi phreng ba dang bcas pa la dmigs pa gtad de bklag go/ /cho ga lhag ma sngon ltar ro// //rig sngags sku la dmigs nas brjod pa ni/ bum pa la mchod rten sngon ltar dmigs pa las pad+ma dang zla ba'i steng du a las dang po'i sangs rgyas dkar por dmigs te bklag par bya'o//de yang chos 'chad pa'i phyag rgya can nam yang na snying gar thal mo sbyar ba'am yang na rdo rje dril bu 'dzin pa'o/ /dkyil 'khor 'khor lor mos kyang dang por sangs rgyas la bskor ba'i lha'i tshogs gang 'dod pa gong ltar ro//gal te bum pa la brten te gsang sngags kyi tshul du klog na yang de ltar tshul gsum kho na'o/ /gsang sngags yi ge'i tshul du bklag na bum pa dang pad+ma zla ba la oM yig dkar po la sngags phreng dkar pos bskor ba la dmigs nas bklag par bya'o//yang na oM yig la aM baM saM dzaM gyis bskor ba'i yi ge lnga'am/ yang na hUM bzhis bskor ba'i yi ge lnga'am/ yang na aM la sogs pa yi ge dgu la sngags kyi phreng ba dkar pos bskor nas gsal ba'i rnam pa la dmigs te/ brjod pa'o//gsang sngags phyag rgya la dmigs pa yang bum pa mchod rten du sngar ltar bsams nas de'i nang du pad+ma dang zla ba'i steng du 'khor lor o dang bcas pa la yi ge'i tshogs kyis bskor ba'am/ yang na rigs lnga'i phyag rgya la de ltar bsam pa'am/ yang na yum bzhi'i phyag rgya dang dgu la brten pa'i sa bon dang sngags su bcas pa'i dmigs pa gtad nas brjod par bya'o//gsang sngags kyi tshul sku la brten nas brjod pa ni bum pa mchod rten du dmigs te rnam par snang mdzad dkar po zhal gcig phyag gnyis pa byang chub mchog gi phyag rgya can nam/ yang na zhal gcig phyag bzhi pa phyag gnyis byang chub mchog gi phyag rgya can/ phyag gnyis chos 'chad pa'i phyag rgya can bya'o/ /yang na zhal bzhi phyag brgyad pa zhabs kyang brgyad de byang chub mchog gi phyag rgya dang sems dpa'i skyil krung can no/ /de ltar sku sngags dang bcas pa la dmigs nas brjod pa ni sku dpa' bo gcig pu la dmigs pa gsum mo//gsang sngags kyi tshul dkyil 'khor la dmigs pa ni bum pa b+h+rUM las gzhal yas khang gru bzhi sgo bzhi pa pad+ma dang zla bas brgyan pa'i steng du gong gi lha tshogs gang 'dod pa rnam par snang mdzad la bskor ba dmigs te/brjod par bya'o/ /mchod rten gyi dkyil 'khor mchod par bya'o zhes pa ni bka' drin rjes su dran pa'i mchod pa ste/ dkyil 'khor yang mchod cing dge 'dun gyi ston mo dang tha na byis pa dang dud 'gro yan chad la sbyin gtor ci 'byor pa bya'o/ /cho ga de dag gi phan yon gsungs pa/cho ga 'di lan cig byas na la sogs pa ste go sla'o/ /'dir bzlas brjod kyi cho ga bzhin du la sogs pa ni rgyun du bzlas pa phan yon dang bcas pa gsungs so/ /de la rgyun du bzlas pa'i cho ga ni 'di yin te/ sngon gyi dran zhes dang sbyar nas dran zhes bya ba ni gnyis te/ bag yod pa'i gnas dran pa dang / ting nge 'dzin gyi gnas dran pa'o/ /de la bag yod pa'i gnas ni gzungs sngags rin po che 'di brjod pa yang lus ma gus pa dang ngag ma gus pa dang bral bar bya ste/ ra ro ba dang rnam par g.yeng ba dang bya ba gzhan gyis g.yeng ba dang chu dang bshang ba 'dor ba dang zas za ba dang 'chag pa dang nyal ba dang 'phres pa dang gtam gyis bar chod pa la sogs pa gang yang med pa dal ba dang dga' ba dang rangs pa'i tshul gyis ting nge 'dzin gyi don dran pa ni dang por kha la sogs pa khrus byas la gsum la skyabs su 'gro ba byas nas skyil krung legs par stan bde ba la gnas te thal mo snying gar sbyar sngags tshar gcig brjod nas phreng ba bgrang zhing bdun la sogs pa ci nus pa'i grangs ma nor bar sngags yi ge lhag chad med pa la dmigs te/ha cang dal ba dang myur ba spangs te gsal zhing phyed par chad lhag med par gzhan gyi gtam la sogs pas bar mchod par bzla'o//de'i rjes su smon lam sh+loka gcig la sogs pas dge ba bsngo bar bya'o/ /sangs rgyas byang chub sems dpa' dang / /nyan thos rang rgyal 'jig rten skyong / /mthu dang bden pa'i byin rlabs kyis/ /'dod pa thams cad 'grub par shog / ces so/ /yang na dang por skyabs su 'gro ba byas nas byang chub tu sems bskyed de sdom pa gzung ba nas rdo rje thal mo dang po kha'i thad du sbyar/ de nas snying gar sbyar la snying gar pad+ma dang zla ba la a yig dkar po la dmigs te sngags de la bzlas pa'i 'od zer gyis bdag gi sdig pa dag par bsam zhing sngags dal ba dang myur ba dang mi gsal ba'i skyon dang bral bas 'byes shing gdangs snyan pos lhag chad med par bklag cing gzhan gyi gtam la sogs pa'i bar chad spangs nas bzlas pa bya'o//sngags tshar gnyis pa nas ni phreng ba bgrang zhing grangs ma nor bar byas te nyi shu rtsa gcig la sogs ci nus pa bklag par bya'o//de nas bdag dang gzhan gyi don du sh+lo ka gnyis la sogs pas dge ba bsngo bar bya'o/ /sangs rgyas byang chub sems dpa' dang / /nyan thos rang rgyal 'phags tshogs dang / /'jig rten skyong ba mthu chen rnams/ /kun nas bdag la dgongs su gsol//mthu stobs bden pa'i byin rlabs kyis/ /'jig rten pa rnams skyid pa dang / /'byung po thams cad bde ba dang / /chos rnams dus su ston par shog /ces so/ /yang na khrus byas dri zhim po dang ldan pas/ /dang por 'gro ba la tshad med pa bzhi bsgoms nas skyabs su 'gro ba dang sems bskyed pa dang sdom pa gzung ba byas nas/spyi bo dang mgrin pa dang snying gar rdo rje thal mo sbyar zhing sngags lan gsum brjod la snying gar pad+ma dang zla ba'i steng du a yig dkar po sngags phreng dkar pos bskor ba la dmigs te/ de la sgra grag par bsam zhing phreng ba blangs nas myur ba dang dal ba dang mi gsal ba dang 'dres pa'i skyon dang bral bas/snyan pa'i gdangs kyis lhag chad med par g.yeng ba'i rnam par rtog pa dang / gzhan gyi tshig bar chad la sogs pa'i skyon dang bral bas/ brgya rtsa brgyad la sogs pa ci rigs par ma nor bar bklag par bya'o//de nas ni bdag dang gzhan skye ba 'dir sdug bsngal mi bskyed pa dang skye ba gzhan du bde ba dang myur du byang chub thob pa'i smon lam tshigs su bcad pa gsum la sogs pas legs par bsngo zhing rdo rje sems dpa'i yi ge brgya pa lan gsum la sogs pa brjod par bya'o/ /sangs rgyas byang chub sems dpa' dang //'phags pa nyan thos rang rgyal dang / /'jig rten skyong ba mthu chen dang / /sngags kyi bden pa'i byin rlabs kyis/ /bdag dang sems can thams cad kyi/ /nad med tshe ring dpal 'byor dang / /bde skyid nyams dga' thob pa dang / /sems kyi g.yeng ba bral nas kyang //zab mo'i chos la longs spyod cing / /gzhan don byed la brtson pa yi/ /thugs rje'i rgyun dang mi 'bral bar/ /bde ba'i zhing mchog rol par shog /ces bya ba thugs rje mi bshol pa'i rgyud du gsungs pas de ltar spyad par bya'o/ /de gsum ni sngags la dmigs pa kho na ste/byang chub sems dpa' sgrib pa rnam par sel ba'i rgyud las/ khams dang dbang po'i bye brag gis/ /sngags brjod dmigs pa tha dad de/ /sgra gsal tsam la rtog pa dang / /snying po yi ge la dmigs dang / /sngags phreng la ni dmigs pa rnams/ /shes rab kyis ni ci bder sbyar//dmigs dang bcas par brjod pa ni/ /nad sel dug sel shes rab 'phel/ /tshe ring dpal 'byor thob pa dang / /byang chub myur du thob par 'gyur/ /de phyir brtson pas rtse gcig tu/ /bklags la shin tu brtson par bya/ /zhes bcom ldan 'das kyis gsungs so//'dir smras pa/ myur dal mi gsal 'dres dang 'khrugs/ /lhag chad nga ro ngan spangs nas/ /sems g.yeng rmugs par mi bya zhing / /gtam gzhan sbyor ba rab dor te/ /lha'am yi ge'am phyag rgya 'am/ /mchod rten bum pa'am 'od zer sogs/ /bsgrub bya la sogs gang yin la//sems rtse gcig pas snyan par brjod/ /ces bar skabs kyi tshigs su bcad pa'o/ /da ni phyag rgya la dmigs pa gsum brjod de/ yang na dang por gdong la sogs pa khrus byas nas kha dri zhim par byas te/ tshad med pa bsgom pa la sogs pa sngon du 'gro bas thal mo snying gar sbyar nas sngags lan cig brjod do//de nas phreng ba blangs nas brjod pa'i tshe sngags kyi mthus mdun gyi nam mkha' la rin po che cha gsum pa zhig byung zhing yang nas yang du bdag gi mdzod spur thim par bsam par bya'o/ /de ltar myur ba dang dal ba dang mi gsal ba dang 'dres pa dang 'khrugs pa dang lhag pa dang chad pa dang nga ro ngan pa spangs nas g.yeng ba spangs la sems rtse gcig pas snyan pa'i sgras brjod par bya'o//de bzhin du gzhan gyi gtam la sogs pas bar ma chod par bya'o/ /de ltar bden pa'i byin rlabs kyis bdag nyid kyi lus sems yid bzhin gyi nor bu rin po che 'bar ba ltar 'gyur bar yang bsam par bya'o//de nas dge ba'i smon lam sh+lo ka gcig la sogs pa yang brjod do/ /yang na dang po gdong la sogs pa dag par byas nas kha dang lus sman dri zhim pos byugs la 'gro ba la snying rje lhag pa'i bsam pas dmigs nas skyabs su 'gro ba dang sems bskyed pa dang sdom pa gzung ba byas la kha dang snying gar thal mo sbyar nas sngags tshar gnyis bklags la phreng ba bzung nas 'di bsam/mdun du yid bzhin gyi nor bu rin po che 'bar ba sngon po 'od dkar po 'phro ba cha gsum dang ldan pa pad+ma'i steng na yod par bsams la/de'i 'od zer gyis bdag gi lus dang ngag dang yid kyi sgo dag par bsam zhing myur ba dang dal ba dang mi gsal ba dang ma 'dres pa dang 'khrugs pa dang lhag pa dang chad pa dang nga ro ngan pa spangs nas gzhan gyi gtam la sogs pa bar chad thams cad bral bar byas la/ g.yeng ba dang rmugs pa med par sems rtse gcig pa'i sems dang ldan zhing snyan pa'i sngags kyis nyi shu rtsa gcig la sogs pa ci nus pa bklag par bya'o//de'i dge ba'i byin gyi rlabs kyis rang gi lus ngag yid gsum 'gro ba'i don byed pa'i mthu khyad par can dang ldan par gyur par yang bsam par bya'o//de nas rang dang gzhan don du dge ba'i smon lam tshigs su bcad pa gnyis la sogs pa ci rigs par bklags te rin po che pad+ma dang bcas pa dag gi mgrin pa'i nang du thim nas snying gar zhugs par bsam par bya'o/ /yang na dang por gdong la sogs pa dag par byas nas kha dang yan lag dri zhim pos byugs te/spyi bo dang / mgrin pa dang / snying gar thal mo sbyar zhing sngags tshar gsum brjod la/ mdun gyi nam mkha' la pad+ma'i steng yid bzhin gyi nor bu rin po che cha gsum pa 'od kha dog sna tshogs dang ldan pa rab tu 'phro ba de'i nang nas a yig la sngags dkar pos bskor ba bsams nas phreng ba blangs te sngags brjod pa'i tshe rin po che'i 'od dang sngags kyi 'od zer gyis bdag gi lus ngag yid gsum gyi sgrib pa yang bsal te gzhan khams gsum pa thams cad kyi sgrib pa yang bsal bar bsam par bya'o//de ltar myur ba dang dal ba dang mi gsal ba dang 'dres pa dang 'khrugs pa dang lhag pa dang chad pa dang nga ro ngan pa spangs te/ gzhan gyi gtam la sogs pas bar ma chod par g.yeng ba dang rmugs pa med cing sems rtse gcig pa dang ldan pas bsnyen pa'i sngags kyis brgya rtsa brgyad la sogs pa ci rigs par bzlas te/de'i dge ba'i byin gyi rlabs kyis bdag gi lus ngag yid gsum yid bzhin gyi nor bu rin po che 'bar ba ltar gyur nas gzhan gyi don la thogs pa med pa'i mthu dang ldan par bsams la/ mdun gyi pad+ma dang nor bu rin po che yang bdag gi spyi gtsug tu thim nas lus thams cad du khyab ste snying gar gnas par bsam mo//de nas bdag dang gzhan skye ba 'dir sdug bsngal med pa dang / skye ba gzhan du bde ba dang / byang chub myur du thob par bya ba'i phyir dge ba'i don du smon lam gyi tshigs su bcad pa gsum la la sogs pas legs par bsngos la/rdo rje sems dpa'i yi ge brgya pa yang lan gsum la sogs pa ci nus par dal gyis bklags nas ldang bar bya'o/ /de ltar phyag rgya la dmigs pa ni gsum kho na ste/ byang chub sems dpa' sgrib pa rnam par sel ba'i rgyud chen po las kyang rags pa la 'jug gang zag dang //rten pa dag ni goms pa yi/ /khams dang dbang po'i bye brag gis/ /phyag rgya la ni dmigs pa yang / /brjod pa tha dad gsum yin no/ /don gyis dag par byed pa dang / /snying po'i tshul du sbyor ba dang / /rang bzhin nyid du byin brlabs nas/ / gang gis yang dang yang brjod na/ /phyag rgya rten gyi byin rlabs dang / /sngags kyi mthu ni sgrub pa la/ /nad dang gdon dang dug rnams dang / /'jigs pa brgyad po sel bar byed/ /bdag nyid tshe ring dpal 'phel zhing / /longs spyod rgyas te dbang po rgyas/ /'gro ba rnams kyang dad par 'gyur//zhes bcom ldan 'das kyis gsungs so/ /sku la dmigs pa ni dang po khrus byas te kha dang yan lag dri zhim pas bsgos nas thal mo snying gar sbyar nas sngags lan cig brjod de/ mdun du byang chub chen po'i sku pad+ma dang zla ba la gnas pa gser btso ma'i mdog can rin po che'i khri la bzhugs pa/gsil byed dang par bu 'chang ba/ shin tu 'dzum bzhin par bzhugs pas bdag gi sngags brjod pa'i dbang po byed par bsams la phreng ba blangs la myur ba dang dal ba dang mi gsal ba dang 'dres pa dang 'khrugs pa dang lhag pa dang chad pa dang nga ro ngan pa dag spangs nas gzhan gyi gtam la sogs pas bar ma chod par g.yeng ba dang rmugs pa med cing sems rtse gcig pa dang ldan pas snyan pa'i sngags kyis bdun la sogs pa ci rigs par bzlas te/de'i dge ba'i byin rlabs kyis bdag gi sdig pa thams cad dag par yang dang yang du bsam par bya'o//de nas rang grol ba dag pa'i don du dge ba'i smon lam sh+lo ka gcig la sogs pa brjod par bya'o/ /yang na dang por khrus dang gtsang sbra dang ldan zhing kha dang yan lag thams cad dri zhim pos byugs nas rdo rje thal mo spyi bo dang mgrin pa dang / snying gar sbyar nas sngags tshar re re legs par brjod nas mdun du pad+ma dang zla ba la dmigs pa'i byang chub chen po gong gi mtshan nyid can bdud 'dul ba'i phyag rgya mdzad pa des bdag la chos 'chad par bsams la/phreng ba blangs la myur ba la sogs pa'i skyon spangs te/ sngags snyan pas nyi shu rtsa gcig la sogs pa ci rigs par brjod nas bden pa de'i byin gyi rlabs kyis bdag gi sdig pa thams cad dag cing lus ngag yid gsum gyi sgo nas gzhan gyi don byed pa la thogs pa med pa dang ldan par gyur par yang dang yang du bsam par bya'o//de nas bdag dang gzhan gyi don du dge ba'i smon lam tshigs su bcad pa gnyis la sogs pa ci rigs par bklags te/bcom ldan 'das gdan dang bcas pa bdag gi mgrin pa'i gnas su bzhugs nas snying gar thim ste skyil krung gis gnas par bsam mo/ /yang na gdong la sogs pa dag par byas nas kha dang yan lag thams cad dri zhim pos byugs te/spyi bo dang mgrin pa dang snying gar thal mo sbyar te/ sngags tshar re re brjod nas mdun du pad+ma dang zla ba la bzhugs pa'i byang chub chen po chos 'chad pa'i phyag rgya can mtshan nyid thams cad gong ltar bsams nas phreng ba blangs te sngags brjod pa'i tshe sku'i ba spu'i gseb thams cad dang /zhabs long bu la sogs pa thams cad nas 'od zer kha dog sna lnga la grangs bye ba phrag drug cu byung nas bdag gi lus ngag yid gsum gyi sgo thams cad dag par byas par bsam mo/ /de ltar g.yeng ba dang rmugs pa dang / gzhan gyi gtam la sogs pa'i bar chad thams cad dang bral ba dang myur ba dang ngal ba dang mi gsal ba dang 'dres pa dang 'khrugs pa dang lhag pa dang chad pa dang nga ro ngan pa spangs te//ngag snyan pos brgya rtsa brgyad la sogs pa ci rigs par brjod par bya'o/ /bden pa de'i byin rlabs kyis bdag dang sems can thams cad kyi sdig pa thams cad dag cing bdag gi lus kyi 'od kyis 'gro ba thams cad kyi sdig pa thams cad bsal bar bsam par bya'o//de nas bcom ldan 'das gdan dang bcas pa bdag gi spyi bo nas snying gar zhugs te dgyes shing 'dzum pa'i mdangs dang ldan pas skyil krung gis bzhugs par bsams la de'i bden pa'i byin gyi rlabs kyis bdag dang 'gro ba thams cad skye ba'i sdug bsngal mtha' dag dang bral ba dang /skye ba gzhan du bde ba khyad par can dang ldan pa dang byang chub myur du thob par bya ba'i dge ba'i smon lam tshigs su bcad pa gsum la sogs pas legs par bsngos la rdo rje sems dpa'i yi ge brgya pa yang lan gsum la sogs pa ci rigs su dal gyis bklags nas ldang bar bya'o//de ltar sku la dmigs pa gsum kho na ste/ byang chub sems dpa' sgrib pa rnam par sel ba'i rgyud chen po las//gtso bo shAkya seng ge'i sku/ /'od zer 'bum phrag mtha' yas can/ /mtshan dang dpe byad rab rgyas la/ /'dren pa 'gro ba'i mgon gcig pu/ /khams dang dbang po'i bye brag gis/ /mdzad pa'i rnam pa tha dad par/ / gdul bya'i don du rab tu snang / /bdag gis gang mos de dang der/ /dmigs te sngags brjod mthu yis ni/ /'gro ba'i nad sel sman pa che/ /tshe 'phel longs spyod rab tu 'phel/ /dbul phongs mya ngan 'jigs pa med/ /zhing khams thams cad rab sbyong zhing / /'gro ba'i don la rab brtson pa//ded dpon chen po skyabs kyi mchog /rab grags sku ni thob par 'gyur/ /zhes bcom ldan 'das kyis gsungs so/ /de ltar sngags kyi sbyor ba'i gzungs sngags su sgrub pa'i phyogs brjod nas/ da ni rigs sngags su sgrub pa'i phyogs brjod par bya'o//'di yang sngags dang phyag rgya dang sku la dmigs pa ste/ de dag dbang po'i bye brag gis gsum gsum brjod par bya'o/ /de yang sngags la dmigs pa ni khrus dang gtsang sbra dang skyabs su 'gro ba dang sems bskyed pa dang sdom pa gzung ba sngon ltar byas nas snying gar thal mo sbyar nas sngags tshar gcig brjod nas bdag gi snying gar pad+ma dang zla ba la gnas pa'i hUM yig dkar po sngags kyis bskor ba bsams la/phreng ba blangs la bdun la sogs pa brjod pa'i tshe hUM yig gi 'od kyis bdag gi lus ngag yid kyi sgrib pa dag par bsam mo/ /g.yeng ba la sogs pa'i skyon ni rnam pa bcu gcig dang bral bas snyan pa'i sgras bklag par bya'o//brjod pa de'i bden pa'i byin rlabs kyis 'gro ba thams cad gzungs kyi phreng ba 'di kho na dang bdag la yang dag par bsams la de las byung ba'i dge bas bdag sdug bsngal thams cad dang bral bar bya ba'i smon lam sh+lo ka gcig la sogs pas bsngo bar bya'o//yang na dang por khrus dang gtsang sbra la sogs pa dang ldan pa dang 'gro ba la tshad med pa bsgom pa dang skyabs su 'gro ba dang sems bskyed pa dang sdom pa gzung ba byas nas snying ga dang mgrin par thal mo sbyar bar byas nas tshar re re brjod de/phreng ba blangs nas bdag gi snying ga dang mgrin par pad+ma dang zla ba la hUM yig dkar po sngags kyi phreng ba dang bcas pa bsams nas brjod pa'i tshe sngags kyi 'od kyis bdag dang khams gsum pa'i sgrib pa thams cad dag par bsam mo/ /de ltar g.yeng ba la sogs pa'i skyon bcu gcig dang bral bas nyi shu rtsa gcig la sogs pa ci rigs par bklags nas de'i bden pa'i byin gyi rlabs kyis bdag gi bsam pa'i rgyud 'gro ba tshim pa'i chos kyi char chen po'i gzhir gyur par bsams la/bdag dang gzhan gyi don du bsngo ba sh+lo ka gnyis la sogs pa smon lam yang btab nas ldang bar bya'o//yang na dang po khrus dang gtsang sbra dang ldan pas tshad med pa bzhis 'gro ba la bltas nas skyabs su 'gro ba dang / sems bskyed pa dang / sdom pa bzung nas gnas gsum du thal mo sbyar zhing brjod nas bdag gi gnas gsum du pad+ma dang zla ba la hUM yig dkar po sngags phreng gis bskor ba la dmigs te/g.yeng ba la sogs pa'i skyon bcu gcig dang bral zhing snyan pa'i ngag [(]kyis [,]gis [)]brjod de/ sngags kyi 'od zer kha dog lnga'i tshul du 'phro bas 'gro ba ma lus pa'i nad dang gnod pa dang nyon mongs pa lnga la sogs pa zad par byas par bsam zhing rgyun ni 'chad pa'am brgya rtsa brgyad la sogs pa bklag par bya'o//de'i byin rlabs kyis bdag gi lus sgyu ma lta bur gyur nas sngags kyi rang bzhin du gyur par bsams la/ bdag dang sems can thams cad nad dang gnod pa thams cad dang bral ba dang /skye ba thams cad du gnod pa med cing bde ba dang byang chub thob par bya ba'i don du dge ba'i smon lam tshigs su bcad pa gsum la sogs pas bsngo bar bya'o/ /de ltar de dag ni rig sngags yi ge'i tshul du 'don pa ste sgrib pa thams cad rnam par sel pa'i rgyud las//rig sngags yi ge'i ngo bo nyid/ /khams dang dbang po'i bye brag gis/ /tha dad du mar gnas mod kyang / /don ni sngags kyi rang bzhin dngos/ /gang gis de shes 'don pa la/ /tshe 'dir gnod pa kun bral nas/ /bde ba'i rgyu dang ma bral bar/ / bde ba can du myur du skye/ /zhes bya ba la sogs pa rgyas par bcom ldan 'das kyis gsungs so/ /yang na rig sngags phyag rgya'i tshul du brjod na khrus la sogs pa gtsang sbra dang / tshad med pa bsgom pa dang / skyabs su 'gro ba dang / byang chub tu sems bskyed pa dang / sdom pa gzung ba la sogs pa sngon ltar byas snying gar thal mo sbyar nas sngags brjod de/bdag gi snying gar pad+ma dang zla ba la gnas pa'i rdo rje dkar po rtse lnga pa as mtshan pa sngags kyi phreng ba dang bcas pa dmigs te/ g.yeng ba la sogs pa'i skyon bcu gcig dang bral bas bdun la sogs pa ci rigs par brjod pa'i tshe rdo rje sngags dang bcas pa de'i 'od zer gyis bdag gi lus ngag yid gsum gyi sgo dag par byas shing de'i byin rlabs kyis bdag rdo rje'i rang bzhin du gyur par bsam par bya'o//de nas dge ba'i smon lam sh+lo ka gcig la sogs pa brjod nas ci rigs par ldang bar bya'o//yang na khrus dang gtsang sbra dang tshad med pa bsgom pa dang skyabs su 'gro ba dang sems bskyed pa dang sdom pa gzung ba sngon ltar byas nas/ snying ga dang mgrin par rdo rje thal mo sbyar nas sngags brjod pas bdag gi snying ga dang mgrin par pad+ma dang zla ba la gnas pa'i rdo rje dkar po rtse lnga pa aM yig la sngags phreng gis bskor ba dang bcas pa dmigs la/g.yeng ba la sogs pa'i skyon dang bral bas nyi shu rtsa gcig la sogs pa ci rigs su brjod pa'i tshe rdo rje dang sngags kyi 'od kyis bdag dang 'gro ba thams cad kyi sdig pa'i tshogs sbyongs shing ji srid 'khor ba'i skye rga na 'chi'i chu bo 'joms par byed cing rdo rje'i lus su gyur nas bstan pa'i rang bzhin du byin gyis brlabs par bsam par bya'o//de nas bdag dang 'gro ba thams cad sdig pa thams cad zad pa la sogs pa'i phyir dge ba'i smon lam tshigs su bcad pa gnyis la sogs pa ci rigs par bsngos nas ldang bar bya'o//yang na khrus dang gtsang sbra dang tshad med pa bsgom pa dang skyabs su 'gro ba sngon ltar byas te/ sems bskyed pa dang sdom pa gzung ba sngon ltar byas nas rdo rje thal mo gnas gsum du sbyar te/ sngags tshar gsum du brjod nas gnas gsum du pad+ma dang zla ba la gnas pa'i rdo rje dkar po rtse lnga pa a yig la sngags kyis bskor bar bsams nas/ g.yeng ba la sogs pa'i skyon rnams spangs nas/ brgya rtsa brgyad la sogs pa ci rigs par brjod pa'i sngags rdo rje'i 'od kyis bdag dang 'gro ba thams cad la reg pa tsam gyis nad dang gnod pa thams cad bsal zhing /sdig pa thams cad dag par byas nas/ byang chub kyi sems rgya cher 'phel bar bsam par bya'o/ /de'i bden pa'i byin gyi rlabs kyis 'gro ba thams cad chos spyod pa rgyun mi 'chad par bsam mo//de nas bdag dang 'gro ba thams cad skye ba nas skye bar sdug bsngal thams cad dang bral ba dang / bde ba khyad par can dang ldan pa dang / byang chub myur du thob par bya ba'i phyir/ smon lam tshigs su bcad pa gsum la sogs pas dge ba bsngos te/rdo rje sems dpa'i yi ge brgya pa yang lan gsum la sogs pa brjod do/ /de ltar rig sngags phyag rgya'i tshul gsum pa de ni byang chub sems dpa' sgrib pa rnam sel gyi rgyud las gsungs te/ gang zhig yid mnyam 'jog pa ni/ /rdo rje'i mtshan ma sngags bcas la//sgo gsum gang dang gang du dmigs/ /de dang der ni blo gtad nas/ /brjod pas nad sel tshe ring zhing / /dpal 'phel longs spyod chen por 'gyur/ /blo 'phel rig pa chen po'i sa/ /skyes bu des ni myur thar 'gyur/ /zhes bcom ldan 'das kyis gsungs so//rig sngags sku la dmigs pa ni khrus dang gtsang sbra dang skyabs 'gro dang sems bskyed la sogs pa gong ltar byas nas rang gi snying gar thal mo sbyar te tshar gcig brjod nas rang gi snying gar pad+ma dang zla ba la gnas pa'i dang po'i sangs rgyas rdo rje dang dril bu 'dzin pa dkar po sems dpa'i skyil krung gis bzhugs par bsams la/de'i 'od zer dang mtshan dang dpe byad kyis rgyas pa la blo gtad nas g.yeng ba la sogs pa'i skyon dang bral bas snyan cing grims pa'i tshul gyis tshar bdun la sogs pa bklags nas bden pa de'i byin rlabs kyis bdag gi lus dang po sangs rgyas su brtan par gyur par bsam par bya'o//smon lam sh+lo ka gcig la sogs pa yang gdab par bya'o/ /yang na khrus la sogs pa sngon ltar byas la snying ga dang mgrin pa'i gnas su thal mo sbyar te tshar re brjod pas dang po'i sangs rgyas bsams te/ de dag gi 'od zer dang gzi brjid kyis bdag gi lus ngag yid gsum sbyangs shing dang po'i sangs rgyas kyi skur bsgrubs te/g.yeng ba la sogs pa'i skyon dang bral bas nyi shu rtsa gcig la sogs pa bklag go/ /bden pa de'i mthus bdag gzhan don byed pa'i nus pa thogs pa med pa dang ldan par yang bsam mo//de nas sh+lo ka gnyis la sogs pas smon lam dge ba'i phyir bsngo bar bya'o/ /yang na gnas gsum du thal mo sbyar te tshar re brjod pas bdag gi gnas gsum du pad+ma dang zla ba la gnas pa'i dang po'i sangs rgyas bsams la/ de dag gi mtshan dang dpe byad dang gzi brjid kyi mthus bdag dang 'gro ba thams cad kyi sdig pa thams cad dag par bsam zhing g.yeng ba la sogs pa'i skyon dang bral bas brgya rtsa brgyad la sogs pa ci rigs par bklags nas/de'i bden pa'i byin gyi rlabs kyis 'gro ba thams cad kyi sdig pa'i tshogs bdag gi lus kyi 'od kyis kyang sel bar gyur par bsam mo//de nas bdag dang gzhan gyi don du tshigs su bcad pa gsum la sogs pas smon lam gyi bsngo ba brjod par byas la/ yi ge brgya pa tshar gsum la sogs pa brjod nas ci bde bas gnas par bya'o/ /de ltar rig sngags kyi sku la dmigs nas brjod pa ste/gsum po 'di yang byang chub sems dpa' sgrib pa rnam par sel ba'i rgyud las gsungs te/ lus ngag yid kyi sgo nas sam/ yang na gcig gam gnyis kyang rung / /dang po'i sangs rgyas skur gsal la/ /blo gtad ma g.yengs sems kyis bklag /nad dang gdon dang 'jigs brgyad sogs/ /'tshe ba rnams dang bral nas kyang / /tshe ring shes rab chen po ste/ /'khor ba'i 'ching ba las grol 'gyur/ /zhes gsungs so/ /de ltar rig sngags kyi tshul du bklags pa brjod nas/ da ni gsang sngags kyi tshul du bklag pa bshad par bya ste/ de la gsang sngags kyi tshul yi ge la dmigs nas brjod pa ni/ khrus la sogs pa thams cad sngon ltar byas nas snying gar thal mo sbyar te tshar gcig brjod pa'i mthus bdag gi snying gar pad+ma dang zla ba la aM dkar po sngags phreng 'od zer lnga dang ldan pa dmigs la/de'i 'od kyis bdag sngags kyi rang bzhin du bsgrub par bsam zhing g.yeng ba la sogs pa'i skyon spangs nas tshar bdun la sogs pa ci rigs par brjod de/ de'i bden pa'i byin gyi rlabs kyis bdag sngags bsgrub pa la nus pa thogs pa med pa dang ldan par gyur par bsams te/dge ba'i smon lam tshigs su bcad pa gcig la sogs pa ci rigs par brjod par bya'o/ /yang na khrus la sogs pa sngon ltar byas la/ snying ga dang mgrin par thal mo sbyar te sngags tshar re re brjod pas bdag gi snying ga dang mgrin par pad+ma dang zla ba la gnas pa'i oM yig dkar po la sngags phreng 'od zer kha dog sna tshogs pa bsams nas/de'i 'od kyis bdag gi sdig pa thams cad dag par bsam zhing g.yeng ba la sogs pa'i rtog pa dang bral bas nyi shu rtsa gcig la sogs pa ci rigs par brjod nas/de'i bden pa'i byin gyi rlabs kyis bdag gzhan gyi don byed pa la nus pa thogs pa med pa dang ldan par gyur pa yang yang bsam par bya'o/ /rang dang gzhan gyi don du sh+lo ka gnyis la sogs pa'i smon lam gyi dge ba bsngo bar bya'o//yang na khrus la sogs pa yan lag thams cad sngon ltar byas nas gnas gsum du thal mo sbyar te tshar gsum brjod nas gnas gsum du pad+ma dang zla ba la oM yig dkar po sngags kyi phreng ba kha dog sna tshogs pas bskor bar bsams la/ phreng ba blangs la g.yeng ba la sogs pa'i skyon dang bral bas brgya rtsa brgyad la sogs pa brjod pas bdag gi sdig pa thams cad zad cing sngags kyi 'od zer gyis 'gro ba thams cad kyi sdig pa thams cad zad par yang bsams nas/de'i bden pa'i byin rlabs kyis 'gro ba thams cad chos don du gnyer ba rgyun mi 'chad pa dang ldan par gyur nas bstan par shin tu rgyas par bsam mo//de nas dge ba'i smon lam sh+lo ka gsum la sogs pa brjod nas yi ge brgya pa brjod de ldang bar bya'o/ /de ltar gsang sngags yi ge'i tshul du bklag pa yang byang chub sems dpa' sgrib pa rnam sel gyi rgyud las/gsung gi dam tshig phyag rgya can/ /gsang ba'i yi ge'i tshul du brjod/ /gnas gsum dag tu rgyas btab bsam/ /yang na gcig gam gnyis kyang rung / /brtan par dmigs nas brjod pa yis/ /nad sel sdig spong tshe ring zhing / /'jigs med blo brtan longs spyod 'phel//gsang sngags longs spyod bdag por 'gyur/ /zhes bcom ldan 'das kyis gsungs so/ /gsang sngags phyag rgya la dmigs nas bklag pa ni khrus la sogs pa thams cad sngon ltar byas nas snying gar thal mo sbyar nas sngags brjod pas snying ga nyid du pad+ma dang zla ba la gnas pa'i 'khor lo rtsibs bzhi pa oM yig sngags dang bcas pa bsams te/phreng ba blangs nas g.yeng ba la sogs pa'i rtog pa thams cad spangs te brjod pas bdag chos kyi 'khor lo'i bdag por gyur par bsams la bdun la sogs pa ci rigs brjod par bya'o/ /de'i byin rlabs kyis bdag chos kyi 'khor lo bskor bar gsol ba la thogs pa med par gyur par yang bsam mo//de nas dge ba'i smon lam tshigs su bcad pa gcig la sogs pa ci rigs pas bsngo bar byas la/ rdo rje sems dpa'i yi ge brgya pa lan gsum la sogs pa brjod nas ci bde bar spyad par bya'o//yang na khrus la sogs pa thams cad sngon ltar byas nas snying ga dang mgrin par thal mo sbyar te/ tshar re re brjod pas pad+ma dang zla ba la gnas pa'i 'khor lo rtsibs brgyad pa AM yig ser po dang bcas pa sngags kyis bskor bar bsams la/ g.yeng ba la sogs pa'i rtog pa spangs nas phreng ba blangs te nyi shu rtsa gcig la sogs pa ci rigs pa brjod de bdag dang 'gro ba thams cad kyi sdig pa zad par byas par bsams la/'di'i bden pa'i byin rlabs kyis bdag gis 'gro ba'i don du chos kyi 'khor lo rgyun mi 'chad pa bskor bar bsam mo/ / de nas rang bzhin gyi don du smon lam tshigs su bcad pa gnyis la gnyis la bsngo bar bya'o/ /yang khrus la sogs pa thams cad sngon ltar byas nas/ gnas gsum du thal mo sbyar te tshar re re brjod de/ gnas gsum du pad+ma dang zla ba'i steng du 'khor lo rtsibs bcu drug pa dkar po oM yig dang sngags phreng du bcas pa bsams nas g.yeng ba la sogs pa thams cad spangs te/brgya rtsa brgyad la sogs pa brjod pa'i tshe/ 'khor lo dang sngags phreng la sogs pa'i 'od kyis bdag dang 'gro ba thams cad chos kyi 'khor lo dang ldan par gyur par bsam par bya'o/ / bden ba'i byin rlabs kyis zhing khams thams cad du chos kyi 'khor lo rgyun mi 'chad par gyur par bsam mo/ /de nas tshigs su bcad pa gsum la sogs pa ci rigs par brjod nas yi ge brgya pa yang brjod de langs nas ci bde bar spyad do/ /de ltar gsang sngags phyag rgya'i tshul du 'don pa gsum po ni byang chub sems dpa' sgrib pa rnam par sel ba'i rgyud las/bskal pa stong phrag bsags pa yi/ /sdig dang gang zhig ldan pas kyang / /gnas gsum pa'am gnyis sam gcig /phyag rgyas btab nas sngags brjod na/ /chos kyi char chen babs pa ni//sdig pa'i dri ma kun bkrus te/ /nad med tshe ring dpal 'phel zhing / /lha mi kun gyi mchod chen 'thob/ /gang gis yid mnyam gzhag nas ni/ /phyag rgya sngags dang bcas dran la/ /'jigs dang 'tshe ba kun med de/ /chos kyi 'khor lo bskor bar 'gyur//zhes gsungs so/ /gsang sngags sku la dmigs pa ni khrus la sogs pa sngon ltar byas nas/ rang gi snying gar thal mo sbyar te tshar gcig brjod pas snying gar pad+ma dang zla ba la gnas pa'i rnam par snang mdzad zhal gcig phyag gnyis pa dkar po byang chub mchog gi phyag rgya can sems dpa'i skyil krung gis bzhugs par bsams la/g.yeng ba la sogs pa'i skyon dang bral bas bdun la sogs pa brjod pa'i tshe sku de'i mtshan dang dpe byad dang gzi brjid thams cad rang la 'bar bar bsam mo/ /de'i bden pa'i byin rlabs kyis bdag rnam par snang mdzad kyis byin gyis brlabs par mos la/tshigs su bcad pa gcig la sogs pas smon lam dag pa'i phyir bsngo bar bya'o/ /yang na khrus la sogs pa sngon ltar rgyas par byas nas snying ga dang mgrin par thal mo sbyar te/ sngags tshar re re brjod pas snying ga dang mgrin par pad+ma dang zla ba la gnas pa'i rnam par snang mdzad zhal bzhi phyag bzhi zhabs gnyis sems dpa'i skyil krung gis bzhugs pa/phyag dang po gnyis chos kyi 'khor lo dang chos 'chad pa'i phyag rgya can gnyis kyis byang chub mchog gi phyag rgya can gangs kyi ri bo 'dra ba la rgyan thams cad kyis brgyan par bsams la/sku de la dmigs pa gtad nas g.yeng ba la sogs pa'i rtog pa thams cad dang bral bas nyi shu rtsa gcig la sogs pa brjod pas sku de'i 'od zer gyis bdag dang gzhan gyi sdig pa thams cad zad par yang yang bsam par byas nas/ de'i bden pa'i byin rlabs kyis 'gro ba thams cad sangs rgyas rnam par snang mdzad kyi sku la shin tu dad par gyur par yang bsam mo//de nas tshigs su bcad pa gnyis la sogs pas dge ba'i smon lam bsngo bar bya'o/ /yang na khrus la sogs pa sngar ltar rgyas par byas nas/ gnas gsum du rdo rje thal mo sbyar nas sngags tshar re brjod nas gnas gsum du pad+ma dang zla ba la bzhugs pa'i sangs rgyas rnam par snang mdzad dkar po/ /zhal bzhi phyag brgyad zhabs brgyad/ byang chub mchog gi phyag rgya dang sems dpa'i skyil krung gis bzhugs pa/ rin po che'i na bza' dang rgyan du mas brgyan cing 'dzum pa'i mdangs dang ldan pa bsams la/g.yeng ba la sogs pa'i skyon dang bral bas brgya rtsa brgyad la sogs pa brjod pa'i tshe sku de dag kun gyi mtshan dang dpe byad kyi 'od kyis bdag dang 'gro ba thams cad longs spyod rdzogs pa'i sku'i cha byad du byas par bsam/de'i byin rlabs kyis 'gro ba thams cad rnam par snang mdzad kyi sku mngon du gyur bar bsams la bdag gzhan gyi don du smon lam dge ba'i don du bsngo bar bya'o/ /gsang sngags kyi tshul sku la dmigs pa 'di gsum yang / byang chub sems dpa' sgrib pa rnam par sel ba'i rgyud las gsungs te/sangs rgyas thub pa rnam snang mdzad/ /'od 'phro nyi ma 'bum gzi can/ /mtshan dpe du mas spras pa'i sku/ /phyag gnyis pa'am phyag bzhi'am/ /yang na phyag brgyad pa yang rung / /rang gi lus ngag yid gnas na/ / bsams nas de dang de dag tu/ /dmigs pa gtad nas sngags brjod pas/ /nad dang sdug bsngal tsha ba dang / /'jigs dang phongs dang dbul ba dang / /tshe la gnod byed la sogs pa'i/ /gdon dang bar chad thams cad sel/ /yang dang yang du goms pas ni/ /go 'phang rig 'dzin gnas thob 'gyur//rig sngags byang chub sems dpa' yang / /skye ba du mas dpag nas kyang / /sangs rgyas zhing khams sbyangs byas te/ /dag pa'i zhing rnams rnam 'phrul gyi/ /sku yi 'du byed du mas ni/ /gdul bya tshim par mdzad par 'gyur/ /zhes so/ / rmi lam lta bur kun du shes so zhes pa dngos grub kyi rtags tha ma rmi lam du 'byung ba yang shes par bya'o/ /tshes brgyad la sogs pa'i dus khyad par can du bsgrub pa phan yon dang bcas pa'o/ /bye ma la lan nyi shu rtsa gcig bzlas brjod byas nas la sogs pa ni shi ba la phan gdags pa'i cho ga'o//de yang shi ba la gnyis te/ rnying pa dang / sar pa'o/ /dang po la ro med pa dang / ro yod pa'o/ /de la ro med pa ni ming dang bcas pa'i sngags brjod cing bden pa dang smon lam gdab pa'o/ /ro'i rus pa'am gos la sogs pa yod pa la ni yungs kar dang bye ma la sngags brjod cing gtor pa'o//sar pa la ni bdun tshigs bya'o/ /bdun tshigs su bya ba la 'di ltar rten ro yod pa dang med pa'o/ /gal te ro yod na dang por cho ga tshul bzhin du byas pa'i bum pa'i chu snga nas yod dam 'phral du bsgrubs kyang rung ste/spos lnga dang bcas pas ro la snying po'i sngags brjod cing ro khrus bya'o/ /de nas gro ga'am ras la sogs pa'i gzhi la gur gum dang gi wang gis snying po'i sngags bris la ro'i snying gar gdags so/ /sarba ta thA ga ta sUr+ya gu h+ya ad+hiSh+ThA na a d+hiSh+Thi te swA hA/ zhes gsang gnas su'o//A yurdat+te swA hA/ rkang bol g.yas la'o/ /pu N+yun dat+ti swA hA/ rkang bol g.yon la'o/ /puN+yum bi lo ki te swA hA/ pus mo g.yas su'o/ /puN+yum A ba lo ki te swA hA/ pus mo g.yon pa la'o/ /mr-i t+yu daN+Di swA hA/ dpyi g.yas su'o/ /yA ma da N+Di swA hA/dpyi g.yon par ro/ /ya ma dU te swA hA/ lte bar ro/ /saM g+ha ra Ni swA hA/ /nu ma g.yas su'o/ /saM b+ha ra Ni swA hA/ nu ma g.yon du'o/ /san d+hA ra Ni swA hA/ mgrin par ro/ /pra ti sa ra Ni swA hA/ lag ngar g.yas par ro/ /oM dzo bi ta swA hA/ lag ngar g.yon du'o/ /te dzo ba ti swA hA/dbung ba g.yas su'o/ /dza ya ba ti swA hA/ dpung pa g.yon la'o/ /sarba ta thA ga ta mu dra a d+hiSh+ThA na a d+hiSh+Thi te swA hA/ dpral bar ro/ /yang sngags ring thung gnyis ka spyi bor gdags so/ /mig g.yas su aM hUM/ g.yon par baM hUM/ rna ba g.yas su saM hUM/ g.yon pa dzaM hUM/ sngags thams cad yig 'bru gsal bar bri'o/ /rgyan du ma yang ro la gdags so/ /gal te ro med na yang shing stag ma la shi ba'i gzugs bris nas yi ge de ltar dgod do/ /de nas ro yod na snod kyi nang du gzhag par bya ste/ rdo'am sa 'am shing ngam 'byor na zangs sam dngul lam gser las brdungs la bya'o//de yang rab tu byung ba la dkar po mchod rten gyi dbyibs so/ /dge bsnyen la ni pad+ma dmar po kha sbyar gyi gzugs so/ /rgyal po la ni sngon po gtsug tor lta bu'o/ /blon po la ni dmar skya za ma tog lta bu'o/ /tha mal pa pho la ni ser skya gdan khri lta bu'o//mo la sngo skya bil ba'i 'bras bu lta bu'o/ /byis ba la ni lhung bzed ltar dmar ser byas nas phyogs thams cad du rlung mi thar bar 'jam zhing dbyibs legs par bzos nas de'i kha nas nang du bzhag ste/ dri bzang po du ma bsgos pa'i ras dkar pos dkris nas ro'i kha ni lhor bstan mgo ni nub tu bstan nas cung zad bslangs te rab tu dben pa'i sa phyogs su gzhag go//ro'i spyi bo'am snying ga nas gzungs thag srad bu dmar po zhig btags la sgrom gyi nub phyogs su drang bar bya'o/ /sgrom de'i steng du gdugs khra bo zhig dbub par bya'o//sgrom gyi phyogs bzhir rin po che sna bdun la sogs pa mkho ba'i yo byad du ma 'dra 'bag tu byas nas dgod par bya'o/ /gzhan yol ba ni dkar po'am yang na dmar pos bskor bar bya'o/ /gzhan yang ba dan dang rgyal mtshan dang bla re dang lhub lhub dang lda ldi dang chun 'phyang du ma yang ci 'byor ba bri bar bya'o//gzhan yang 'bras chan dang thug pa dang khur ba dang zan dron dang 'bras dang khre dang ci tse dang gro dang mon sran dang rgya sran dang nas la sogs pa'i 'bru thams cad las kha zas legs par bshams nas snod mdzes pa du ma'i nang du bzhag go//gzhan yang yon cha ba dang bdug spos dang me tog dang phreng ba dang mar me dang byug pa dang zhal zas dang 'dzam bu ti ba dang bu ram dang ka ra shing thog sna tshogs dang sha btsos dang nya sha dang tshod ma du ma yang phyogs re rer dgram mo/ /sil snyan gyi phreng ba yang bri bar bya'o//gal te ma 'byor pa thams cad ni rdo la sogs pa'i snod rgyan med do/ /'byor pa 'bring gis rgyan yod pa'o/ /rab kyis ni rin po che las byas pa'am rin po che'i phra btab pa'o/ /da ni cho ga yang gang zag gcig gis gzungs sngags tsam brjod cing maN+Dal la me tog bkram nas bum pa gcig dang sAts+tsha gcig byas te 'og nas 'chad pa'i ting nge 'dzin dang ldan par bya'o//'byor pa 'bring gis maN+Dal khru gang bar me tog bkram nas sAts+tsha lnga dang bum pa lnga dang gzungs dang pha rol tu phyin pa'i mdo phran gcig bklag cing 'og nas 'byung ba'i ting nge 'dzin dang bden pa brjod pa dang smon lam gdab par bya'o//thun mtshams zhag grangs ni mthun no/ /'byor pa rab kyis ni ro dang ro'i snod brgyan cing ro bcug nas/ ro'i lho phyogs su sa legs par bstar ba'i dkyil 'khor gru bzhi nas bcu drug gi bar du ci rigs par bya ste/khru bzhi pa mtho gang nas khru gang gi bar du brtsig par bya'o/ /de la mkhas pas thig 'di ltar gdab po/ /tshangs thig zur ngos legs btab nas/ /zur bzhi lo ma gdab par bya/ /cha chen bzhi ru 'gyur ba yin/ /de nas gsum gsum bgos nas ni//cha chen bcu gnyis 'gyur ba yin/ /de nas gnyis su bgos nas ni/ /cha chen nyi shu bzhi ru 'gyur/ /de nas cha phran bgos nas ni/ /tshangs pa'i thig gi ngos gnyis kyi/ /cha chen dang po'i phyed du bgo/ /phyi yi cha phyed de bzhin bgo/ /cha chen gnyis pa'ang phyed du bgo/ / nang gi cha phyed de bzhin bgo/ /cha chen gsum pa'i mtha' la gcig /cha chen bzhi pa'i phyi nang gi/ /cha re btab cing lnga pa phyed/ /cha chen drug pa lha snam 'gyur/ /cha chen bdun pa phyi nang gi/ /cha re gdab cing dbus gnyis bzhag /cha chen brgyad pa phyed du bgo/ /cha chen dgu pa bzhi ru bgo//cha chen bcu pa phyi nang gi/ /cha re gdab cing dbus gnyis gzhag /cha chen bcu gcig phyed du bgo/ /cha chen bcu gnyis khor yug 'gyur/ /phyogs gsum du'ang de bzhin no/ /sgo gcig byed na tshangs thig dang / /phyogs gcig zur thig gdab byas nas/tshangs pa'i thig gi ngos gnyis su/ /cha chen lnga lngar bgo byas nas/ /cha chen bcu ru 'gyur ba yin/ /de nas gnyis su bgo byas nas/ /cha chen nyi shur 'gyur ba yin/ /de nas cha phran bgo bar bya/ /tshangs pa'i thig gi ngos gnyis kyi/ /cha chen dang po phyed du bgo//phyi yi cha phyed de bzhin bgo/ /cha chen gnyis ni phyed du bgo/ /nang gi cha phyed de bzhin bgo/ /cha chen gsum pa'i mthar cha gcig /cha chen bzhi pa lha snam 'gyur/ /cha chen lnga pa phyi nang gi/ /cha re gdab cing dbus gnyis gzhag /cha chen drug pa phyed du bgo /cha chen bdun pa bzhi ru bgo//cha chen brgyad pa phyi nang gi/ /cha re gdab cing dbus gnyis gzhag /cha chen dgu pa phyed du bgo /de la bskor ba rim gnyis bya/ /gsum pa mtha' yi cha phran skor/ /cha chen bcu pa khor yug 'gyur/ /sgo gsum pa sogs byed 'dod na//phyi nang dkyil 'khor gang yin pa'i/ /tshad kyi rim pas bya ba ni/ /cha phran dbri dang bsnan par bya/ de nas blo dang ldan bas tshon sna ma lus pas/ dkyil 'khor gru bzhi pa rim pa gnyis sam yang na rim pa gcig kho na bri'o/ /der sngon du bshad pa'i dkyil 'khor lha gang mos pa dgod par bya'o//gal te rim pa gnyis bris na bar khyams la 'jig rten skyong ba bcu dgod par bya'o/ /de yang / brgya byin dkar po rdo rje 'chang / /me lha dmar po me thab 'chang / /gshin rje sngon po ben con 'chang / /bden bral sngo skya ral gri 'chang / / chu bdag dkar po zhags pa 'chang / /rlung lha ljang ser ba dan 'dzin/ /gdod sbyin ljang sngon dbyug pa 'chang / /dbang phyug ljang skya rtse gsum 'dzin/ /sa bdag mo ni bum ljang ser/ /nyi zla tshangs pa dkar ser ni/ /'od 'phro 'khor lo 'dzin pa'o/ /lha de dag gi sngags sam phyag rgya'am sku dgod par bya'o//gzhan yang gong du bshad pa'i mchod pa'i yo byad thams cad dkyil 'khor gyi mtha' nas bskor bar bya'o/ /yol ba ni dmar po'o/ /bla re ni sngon po'o/ /de nas sngon gyi cho gas dkyil 'khor bsgom pa ste/ rang bzhin gyi dkyil 'khor dang gnyis su med par byas nas mchod bstod nas tshig 'dis gsol ba gdab po//dkyil 'khor gtso bo la sogs pa'i/ /sangs rgyas byang chub sems dpa' rnams/ /kun nas bdag la dgongs su gsol/ /bdag ming 'di zhes bya ba yis/ /tshe 'das 'di zhes bya ba yi//don du dkyil 'khor 'di bzhengs na/ /yo byad ci 'byor pa dag gis/ /gus pas khyod la mchod byed na/ /snying brtser dgongs nas bzhes su gsol/ /de nas 'jig rten skyong ba la mchod cing gtor ma phul nas tshe 'das pa'i don du cho ga byed pa la bar du gcod pa sol cig ces gsol ba gdab po//de nas rdo rje gnod sbyin la sogs pa'i khro bo chen po rnams la yang mchod pa dang gtor ma phul te/ de bzhin du gsol ba gdab po/ /dkyil 'khor de dang 'brel par lho phyogs su ni sAts+tsha brgya rtsa brgyad bkod pa'i dkyil 'khor dang 'brel par gzungs kyi cho gas sngags brjod do//shar phyogs su ni shes rab kyi pha rol tu phyin pa bklag go/ /nub phyogs su ni theg pa chen po'i mdo sna tshogs pa ji snyed ci nus pa bklag go/ /byang phyogs su ni mya ngan las 'das pa'i mdo bklag go/ /de'i tshe slob dpon la sogs pa thams cad kyis rang gi lhag pa'i lhar bsgoms nas mdun du gtsug tor dri ma med pa'i lha'i dkyil 'khor dmigs nas bklag pa dang sngags brjod de bdag gi snying ga'i sa bon gyi 'od kyis mdun gyi dkyil 'khor gyi lha bskul nas lha'i thugs ka'i 'od zer gyis khams gsum thams cad khyab nas khyad par du bsgrub bya la phog pas sngon gyi rnam par smin pa'i lus gsal bar bltas nas bsgrub bya de'i bshang lam du yi ge du nag po cig bsam mo//yi ge du de'i 'od kyis sa 'og stong phrag nyi shu zhabs su gsal bar byas nas bsgrub bya de'i dbang po'i spyod yul du dmyal khams bcu drug gsal bar bya bar bsam mo//de nas bsgrub bya de shin tu 'gyod cing 'dar nas mya ngan gyis gdungs te sngon du spyad pa'i sdig pa'i las thams cad dran nas 'gyod cing smre sngags 'don cing bshags par bsams la/ skabs 'dir las kyi slob dpon gyis ro de la khrus byas bden pa'i tshigs bcad kyis dug bsal par bya'o//de la tshigs bcad 'di yang brjod do/ /'jig rten 'di'am 'jig rten la sogs pa gong du smos pa'i tshigs su bcad pa rnams ci rigs par bsgyur cing brjod par bya'o/ /skabs der bsgrub bya thal mo sbyar nas gsum la skyabs su 'gro zhing phyag 'tshal bar bsams shing gnyen 'dun zhig gis tshul kho na ltar bya'o//slob dpon gyis kyang sngags a mog+ha bi ma le A kaR+Sha ya zhes pa'i skabs su a mo g+ha'i skabs su bsgrub bya'i ming bcug nas brjod do/ / des dkyil 'khor gyi lha rnams kyi thugs ka'i sngags kyi 'od zer gyis bsgrub bya'i bshang sgo'i yi ge du nag po la phog pas rked pa yan chad ni sdig pa'i gzugs rked pa man chad ni mi'i gzugs shig bud nas gzugs de nyid de 'dra ba du mar gyur nas dmyal ba bcu drug gi gnas khang khengs par song bar bsam mo//lus 'di ni lha dang sngags kyi 'od zer gyis sbyangs bas sngon gyi gzugs byad las shin tu mdangs bzang bar bsam mo/ /aM baM saM dzaM che ge mo na ra ka s+ya sarba karma pa ri shod+ha ya swA hA/ zhes rgyun du brjod do/ /thun mtshams su ni slob dpon nyid kyis dkyil 'khor la phyag 'tshal nas thal mo sbyar te sngags tshar brgyad bklag pa'i tshe ni che ge mo mok+Sha tha la prap+ta kurban+tu swA hA/zhes brjod nas smon lam 'di yang gdab par bya'o/ /'di zhes bya ba rigs kyi bu/ dkon mchog gsum la bdag skyabs mchi//sangs rgyas dam chos dge 'dun dang / /rig sngags gsang sngags gzungs sngags dang / /snying po phyag rgya'i bden pa dang / /gzhan yang bden pa'i byin rlabs kyis/ /dmyal ba'i sdug bsngal myur zhi nas/ /bde ba'i zhing du myur skye shog /ces lan gsum brjod//gzhan yang smon lam du ma yang brjod do/ /de nas lcags snod kyi nang du du ba med ba'i me la til nag po bsreg cing oM che ge mo sarba pA paM da ha na sarba bi sho d+ha ni swA hA zhes brgya rtsa brgyad bsreg go/ /de nas bum pa'i chus khrus byas yungs kar dang bye ma la dri ma med pa'i snying po brgya rtsa brgyad brjod nas ro'am ro'i snod brab par bya'o//de'i 'og tu sil snyan du ma dkrol zhing bkra shis kyi tshigs su bcad pa du ma brjod do/ /de nas dkon mchog gi mchod pa dang dge slong dang ston pa dang nang du yang dag 'jog la ston mo drang ngo / /de'i 'og tu byis pa dang dud 'gro la yang ci rigs pa'i zas sbyin te de thams cad la/na maHsarba ta thA ga ta a ba lo ki te oM saM b+ha ra saM b+ha ra hUM zhes lag pa g.yas pas mchog stsol ba'i phyag rgya dang bcas par bdun brjod de stsal to/ /de nas sngags 'di tshar gsum brjod do/ /oM badzra satwa sa ma ya/ma nu pA la ya/ badzra sa twa twe no pa/ tiSh+Tha dr-i D+ho me b+ha ba/ su toSh+yo me b+ha ba/ a nu rak+to me b+ha ba/ su po Sh+yo me b+ha ba/ sarba sid+him+me pra yats+tsha/ sarba karma su tsa me/ tsit+taM shri yaHku ru hUM/ ha ha ha ha hoHb+ha ga wAn/ sarba ta thA ga ta badzra mA me muny+tsa bidzrA b+ha ba ma hA sa ma ya satwa AH /de ltar sngags 'don pa dang gsung rab bklag pa rgyun mi chad par bya ste/ sdom pa dang ldan pa'am skabs su sdom pa blangs kyang rung ldan par byas nas gsum mam bzhi la sogs pa'i bar du mi tshig gis bar mchod par bya'o/ /'di ni zhag bdun phrag dang po dmyal ba'i 'jig rten dag pa 'jig rten dbang phyug gi ting nge 'dzin zhes bya'o//tshigs gnyis pa la ni bsgrub bya'i lte bar yi ge trAM sngon po bsams la pa ri shod+ha ya swA hA zhes pa dang bcas pa'i sngags brjod pa'i tshe lha dang sngags kyi 'od zer gyis bsgrub bya'i lus la phog pas bsgrub bya'i lte ba'i trAM yig las dud 'gro sna tshogs mgo yod pa ste/mgo bye ba la yan lag bye ba dang ldan pa ste/ sked pa yan chad sbal pa sngo nag rked pa man chad mi sngo nag zhig bud nas gzugs de 'dra ba du mar gyur te mtha'i rgya mtsho'i nang du song bas rgya mtsho khengs shing der yang 'gyod pa drag pos gnas so//lus 'di ni sngon gyi bas gzugs bzang por gyur par bsam mo/ /bden pa brjod pa dang smon lam gyi skabs thams cad du dud 'gro'i 'jigs pa dang bral bar gyur cig ces brjod par bya'o/ /lhag ma thams cad sngon ltar ro/ /'di ni zhag bdun phrag gnyis la byol song gi 'jig rten dag pa 'phags pa 'jam dpal gyi ting nge 'dzin zhes bya'o//tshigs gsum pa la ni bsgrub bya'i gsang gnas su yi ge pre ser po bsams la/ lha dang sngags kyi 'od zer gyis bsgrub bya'i lus la phog nas gnas gsum gyi sgrib pa thams cad yi ge pre la bsdus nas de las mi'i gzugs shin tu rid cing yan lag dang ske rab tu phra ba/gsus pa che ba/ mdog ser skya/ kha gdangs pa bud nas sa 'og dpag tshad lnga brgya'i zhabs su gzugs du mar gyur nas sa 'og sa stengs thams cad khyab par gyur cing sngon gyi las la yang 'gyod par bsam mo//pre ta sarba karma A ba ra Na pa ri sho d+ha ya swA hA dang bcas pa brjod cing bden pa brjod pa dang smon lam gyi skabs su yang ming 'di zhes bya ba yi dags kyi 'jig rten las thar bar gyur cig ces brjod do/ /lhag ma thams cad sngon ltar ro/ /'di ni zhag bdun phrag gsum pa'i yi dgas kyi 'jig rten dag pa 'phags pa kun du bzang po'i ting nge 'dzin zhes bya'o//tshigs bzhi pa la bsgrub bya'i kha'i nang du suM yig ljang gu bsam mo/ /lha dang sngags kyi 'od zer gyis bsgrub bya'i lus la phog nas lus ngag yid gsum gyi sgrib pa thams cad suM yig la bsdus nas lha ma yin gyi gzugs ni ljang sngon skra ser ba mche ba bzhi pa mig dmar ser zur gsum pa/spu mang zhing rtsub pa/ sen mo ring zhing lce 'dril ba bud nas lus du mar gyur te/ ri rab kyi rtse dang ri bdun gyi ngos dang 'dzam bu'i gling khyab par rgyu zhing sngon gyi las ngan pa thams cad la 'gyod par bsam mo//de'i tshe rnam smin gyi lus 'di nyid skrag nas skyabs su 'gro ba dang dge bsnyen gyi sdom pa bzung nas sngon gyi bas gzugs byad bzang por gyur par bsam mo/ /che ge mo A yuHsarba A ba ra Na pa ri sho d+ha ya swA hA brjod cing bden pa brjod pa dang smon lam gyi skabs su lha ma yin gyi 'jigs pa las thar bar gyur cig ces yang dang yang brjod par bya'o//'di ni zhag bdun phrag bzhi pa lha ma yin gyi 'jig rten dag pa sa'i snying po'i ting nge 'dzin zhes bya'o/ /tshigs lnga pa la bsgrub bya'i snying gar Ni yig ser skya bsam mo/ /lha dang sngags kyi 'od zer gyis lus ngag yid gsum sgrib pa Ni la bsdus pas mi'i gzugs ser skya bud de lus snga ma las mar me las mar me chad pa ltar ro//lus de sngon gyi las la 'gyod cing 'dzam bu'i gling khyad par nyul bar bsam mo/ /rnam smin gyi lus snga ma ni gzugs byad bzang bar gyur nas 'od zer gyis reg pa'i mthus gsum la skyabs su 'gro ba dang /so sor thar pa'i sdom pa dang byang chub tu sems bskyed par bsams nas gang nye dus lan brjod cing sdom pa gsum gzung bar bya'o/ /che ge mo sarba ma nu Sh+ya A ba ra Na pa ri shod+ha ya swA hA zhes brjod cing bden pa brjod pa dang smon lam gyi skabs su mi'i gnas kyi sdug bsngal zad par gyur cig ces brjod par bya'o//'di ni zhag bdun phrag lnga pa mi'i 'jig rten dag pa nam mkha'i snying po'i ting nge 'dzin zhes bya'o/ /tshigs drug pa'i bsgrub bya'i spyi bor yi ge a dkar po bsams nas lha dang sngags kyi 'od zer gyis lus dang ngag dang yid kyi sgrib pa sbyangs nas yi ge a la bsdus pas pad+ma dang zla ba la gnas pa'i lha'i bu shin tu dkar zhing dal bar gyur te mgon po byams pa la sogs pa'i byang chub sems dpa'i sdom pa stsal cing shes rab kyi pha rol tu phyin pa gsung bar bsam mo//rnam par smin pa 'dis kyang byang chub sems dpa'i sdom pa dang / gsang sngags kyi dam tshig gnod par bsam mo/ /bden pa brjod pa dang smon lam gyi skabs su yang 'dod pa'i lha rnam par g.yeng ba'i 'jigs pa las thar bar gyur cig ces brjod do//che ge mo sarba de ba A ba ra Na pa ri sho d+ha ya swa hA zhes pa la sogs pa lhag ma sngar ltar ro/ /'di ni zhag bdun phrag drug pa lha'i 'jig rten pa 'phags pa byams pa'i ting nge 'dzin zhes bya'o/ /tshigs bdun pa la bsgrub bya'i mdzod spur yi ge oM dkar po bsam mo//lha dang sngags kyi 'od zer gyi rtse mor lha'i bu dang lha'i bu mo bum pa thogs pa du ma byung bas bsgrub bya'i spyi bo nas dbang bskur nas sgrib pa dag pas spyi bor sangs rgyas rnam par snang mdzad bzhugs par bsam zhing 'og min gyi rnam par snang mdzad 'khor dang bcas pa'i sku'i 'od zer gyis bsgrub bya rnam par snang mdzad dang bcas pa la phog pa tsam gyis bsgrub bya'i snying gar zla ba'i dkyil 'khor gdugs lta bu'i rnam par gyur nas/A li dang kA li'i phreng ba dkar po gsal bar dmigs so/ /de nas sangs rgyas thams cad kyis oM sarba ta thA ga ta bo d+hi tsit+ta pra ti bya d+haM nAM ka ro mi zhes phyogs bcu na bsgrags pa'i de ma thag tu zla ba'i dkyil 'khor gang ba'i steng du hUM yig dkar po'i 'od kyis sprul shun pa brjes pa ltar khog pa 'dir gzhag nas/khog pa'i nang nas rnam smin gyi lus dang 'dra ba zhig 'od zer gyis khrid nas pad+ma'i gnas chen po'i drung du 'khod pa'i tshe phyogs bcu'i sangs rgyas kyis oM sarba ta thA ga ta yas+thA a haM zhes gsungs pa tsam gyis snying ga'i zla ba'i steng du rdo rje dkar po rtse lnga pa'i rnam par snang ngo //de'i shar phyogs kyi 'jig rten gyi khams du ma nas byon pa'i sangs rgyas thams cad byon nas/kye rdo rje dbyings zhes brjod cing rin po che'i bum pa'i bdud rtsi'i chu du mas dbang bskur bar bsam mo/ /lho phyogs pa thams cad kyis rin po cha'i dbu rgyan gzhag par bsam mo/ /nub phyogs pa thams cad kyis lag tu rdo rje gtad pa dang / byang phyogs pas dril bu gtad pa dang /zhing 'di nyid kyi rnam par snang mdzad chen pos me tog gi phreng ba dbu la bzhag pa'i de ma thag tu sku mdog dkar po/ /zhal bzhi phyag brgyad/ byang chub mchog gi phyag rgya can zhabs bzhi sems dpa'i skyil mo krung du bzhugs par gyur nas phyogs bcu'i sangs rgyas thams cad kyang rnam par snang mdzad chen po zhes brjod par bsam mo//bden pa dang smon lam brjod pa thams cad kyi mthar yang shes bya'i sgrib pa thams cad las grol bar gyur cig ces brjod cing sngags kyi mthar yang sarba saM skA ra pa ri shud+d+ha swA hA/ zhes brjod do//'di thun mtshams thams cad du rig pa'i dbang bskur zhing zhag bdun gyi mthar rdo rje slob dpon gyi dbang bskur nas sangs rgyas kyi zhing du yang dang po'i sangs rgyas zhes mtshan btags par bsam mo/ /tshigs tha ma gsum po 'di dag gi tshe lam sbyang ba dang lam bstan pa thun mtshams thams cad du bya'o//de ltar tshigs bdun phrag gi rjes su sbyin sreg bya ste/ de yang lha'i grong khyer du bsams nas/ bsreg rdzas kyi mchod pa'am/ yang na thab tu lha'i dkyil 'khor bsams nas ro la zhal zas su byin gyis brlabs nas bsregs te thal bar gyur pa dang rus pa'i thal ba de brdungs nas sngon ltar sats+tsha'i cho ga 'bi 'bi'i nang du bcug nas tsha tsha bya'o//tsha tsha de dag kyang sngon gyi cho gas byas pa'i mchod rten gyi nang du'am yang na chu bo chen po'i 'gram du gzhag go/ /ro bsreg pa'i cho ga yang gzhan du shes par bya'o//'di ltar cho ga 'di'i dkyil 'khor gyi rdul tshon gyis ra bar gtor na phyugs nad med par byed do/ /yang thog dang tshad mang dang nyal sar gtor na mig nad la sogs pa sel to/ /zhing la gtor na 'bu dang rtsa dang sad dang ser ba dang myags pa dang bskams pa thams cad med par byed do//'di ni zhag bdun phrag bdun pa 'jig rten dang 'jig rten las 'das pa dag pa sgrib pa rnam sel gyi ting nge 'dzin zhes bya'o/ /de ltar bdun tshigs kyi tshul de yang byang chub sems dpa' sgrib pa rnam sel gyi rgyud las gsungs te/ dge bas ngan 'gro las grol zhing / /shes rab kyis ni byang chub thob//phun sum tshogs gang sngon byas nas/ /de bzhin nyid rtogs sangs rgyas 'gyur/ /lam rgyu bzang zhing gson tshe la/ /dge spyod shin tu drag pa ni/ /mtho ris sam ni thar par nges/ /de la bar do ma mchis so/ /lam rgyud dman zhing tshe 'dir yang / /ngan spyod shin tu mang po rnams//lha mi dman dang ngan 'gror nges/ /de nyid nam yang bar do med/ /las rgyu sna tshogs snang mod kyang / /dge la spro zhing mi dge spang / /cung zad spyod pa'i ming gang de/ /bar do de la yod mod kyang / /bdun phrag gcig sogs bdun gyi mtha'/ /de las lhag par mi gnas lags//mi yi zhag bdun bar do'i tshe/ /de yi bar do yud tsam bdun/ /shi ba'i rjes su dge spyod na/ /bar do bde zhing skye ba yang / /bzang po de ma thag tu 'gro/ /skye ba gzhan du bde spyod 'gyur/ /shi ba'i rjes su ngan spyod na/ /bar do sdug bsngal skye gzhan du//dman par skye zhing ngan spyod 'gyur/ /brtse ba can gyis shin tu spang / /zhes gsungs pa dang / yang de nyid las/ yid bzhin nor 'dra'i gzungs 'di ni/ /dpal dang 'byor pa kun byed de/ /shi ba'i don du brjod pa'am/ /yang na zhag grangs bdun phrag bdun/ /dkyil 'khor chen po'i lha mchod phyir//bum pa tsha tsha dang 'brel cig /'gro gnas sdig pa kun sel bya/ /sngags dang lha yi gzi brjid kyis/ /mi dge'i las rnams 'gro gzugs su/ /rnam smin lus la byung nas kyang / /rang rig gnas su song bar dmigs/ /'gro ba drug gi dug bsal nas//mthar ni thar pa'i lam gzhag phyir/ /'dren pa'i 'od kyis rab bskul te/ /sangs rgyas zhing du bzhag nas kyang / /thub rnams de la dbang bskur mdzad/ /rnam dag sangs rgyas skur gyur nas/ /mtshan yang che ge rnam snang mdzad/ /ces pa la sogs pa rgya cher gsungs so//gzhan yang mchod rten rmang zhabs su shi ba po'i bar du gcod pa thams cad kyi ming bris nas rdza sar pa'i bum par bcug la bzhag go/ /mchod rten dang tsha tsha'i chu ji srid pa ni shi ba po'i ro'am rus pa'am gos bkrus pa'i chus bya'o/ /bum pa'i nang gi steng gi khri la yang shi ba po'i rten bzhag go//yang na tsha tsha'i dus su shes rab kyi pha rol tu phyin pa'i mdo bklags pa'i drung du rus pa gzungs sngags kyi chus khrus byas nas snying po bris pa dkris te tsha tsha'i nang du gzhug go/ /de nas tsha tsha brgya rtsa brgyad re re zhing dkyil 'khor bris nas bum pa gang ba dang bcas pa mchod cing gzungs sngags brjod do//de'i tshe dkyil 'khor pa'i lha thams cad kyis bsgrub bya de dbang bskur bar bsam mo/ /gzungs kyi cho ga tshar ba dang bsgrub bya'i rten de la khrus bya'o/ /rus pa'am/ gos sam/ gzugs brnyan stong khrus kyis dag par byas par 'gyur ro//cho ga'i tshul de dang ldan pa'i tsha tsha stong gis ni bsgrub bya de lha'i dbang por 'gyur ro/ /khris ni mtha' bral gyi bdag por 'gyur ro/ /'bum gyis ni dga' ldan gyi bdag por 'gyur ro/ /sa yas ni 'phrul dga'i bdag por 'gyur ro/ /bye bas ni gzhan 'phrul dbang byed kyi bdag por 'gyur ro//de'i 'og tu gzungs kyi sgo 'bum phrag la mnga' brnyes par 'gyur ro/ /ting nge 'dzin gyi sgo 'bum phrag thob par 'gyur ro/ /zhing 'bum phrag mtha' yas pa sbyong bar 'gyur ro/ /cho ga lhag ma ni sngar ltar bya'o/ / shi ba la phan gdags pa'i rim pa'o// //gcan gzan dang la sogs pa ni rgyu de phan gdags pa'o/ /kun nas sgor 'jug pa la sogs pas ni bzlas pa'i grangs gsungs te/ lan stong ni shi ba la phan gdags pa'i bzlas brjod kyi grangs so/ /khri ni 'chi ba slu ba'i tshes brgyad nas nya'i bar du dge slong la sogs pa gang zag bcus byed pa'i grangs so//'bum ni bsnyen pa'i bzlas brjod kyi grangs so/ /'bum bris te mchod rten gyi nang du bcug ces pa ni snying po 'ba' zhig gur gum dang gi wang dang tsan+dan la sogs pas sngon bzhin bris nas tsha tsha'i nang du bcug pa'o//'bum tshang nas mchod rten chen po cig gi nang du bcug ste shing bu bsgreng zhing rgyan btags nas mchod do zhes pa ni 'bum gter chen po'i ring bsrel lo/ /de la mchod rten gyi rim pa ni/ ri'am thang ngam ljongs gang dag /dur khrod la sogs spangs pa yi//yid 'ong gnas su rgyal ba yi/ /sku gdung mchod rten brtsig par bya/ /yang na sa'am rdo dag la/ /mkhas pas tshul bzhin brko bar bya/ /sa'am rdo'am shing dag gam/ /yang na tshogs pas brtsig par bya/ /de la sangs rgyas kyi mchod rten ni khri 'phang bcu gsum yan chad//sum cu rtsa gnyis man chad do/ /rang sangs rgyas kyi dgu yan chad bcu gcig man chad de/ char kheb dang tog kyang med do/ /dgra bcom pa'i khri 'phang bzhi yan chad do/ /'khor lo lnga pa'o/ /rgyun du zhugs pa nas phyir mi 'ong ba'i bar gyi khri 'phang gsum kho na'o//'khor lo bdun pa'o/ /so so'i skye bo'i khri 'phang gnyis 'khor lo bzhi'o/ /de las sangs rgyas kyi sku gdung cha brgyad du bgos pa'i mchod rten chen po brgyad ni grong khyer ser skyar rgyal po zas gtsang gis yon bdag byas nas dpal lha las babs pa'i mchod rten brtsigs so//yul ma ga d+hA dbus 'gyur tshal du rgyal po ma skyes dgras yon bdag byas nas byang chub chen po'i mchod rten brtsigs so/ /grong khyer rtsa mchog tu gyad rnams kyis yon bdag byas nas cho 'phrul chen po'i mchod rten brtsigs so/ /yul bA rA Na sI ru ser skya'i rgyal po tshangs byin gyis yon bdag byas nas dpal chos kyi 'khor lo'i mchod rten brtsigs so//yul yangs pa can du rgyal po li tsa byi gzhon nus yon bdag byas nas dpal ka ni ka'i mchod rten brtsigs so/ /yul mnyan yod du rgyal po gsal rgyal gyis yon bdag byas nas dpal bkra shis sgo mangs brtsigs so//yul chad ger rgyal po 'dun 'dzin ta las yon bdag byas nas dpal 'od can gyi mchod rten brtsigs so/ /yul ti ka tsa shir rgyal po in+d+ra ba mis yon bdag byas nas mchod rten pad+ma can brtsigs so/ /slan chad kyang de dag gi rjes su 'brangs te brtsig par bya'o//de la byang chub chen po'i mchod rten gyi tshul du brtsigs na/ sku gdung gi rmang yod na rmang rten ji ltar mtho ba bzang po rten med na bang rim dang po'i sum cha'i tshad do/ /de'i steng du dge bcu ni phyir bskyed pa dang rngams bang rim dang po'i rngams phyed do//gnam 'phang phyi la bang rim dang po'i ngos tshad do/ /de yan chad srog shing ste bang rim dang po'i gzhi gsum kyi tshad do/ /bang rim bzhi 'phang mnyam mo/ /bang rim rngams kyi phyir tshad khri 'phang ngo / /bum rten khri 'phang gi phyed tshad do/ /bum pa ni bang rim dang po'i sum gnyis kyi tshad do//stod kyi sked ni bang rim gsum pa dang mnyam mo/ /bre rten gyi rgya ni bang rim bzhi pa'i lnga cha gcig go/ /bre ni bang rim bzhi ba'i bzhi cha gcig go/ /de gnyis ka'i 'phang ni bang rim gyi sum gnyis dang bang rim gyi phyed do/ /bang rim bzhi pa'i shar dang lhor gsal khung bang rim nyid kyi brgyad cha'o//srog shing gi rtsa ba bang rim bzhi pa la reg go/ /'khor lo bcu gsum gyi 'phang du bang rim dang po'i bzhi gsum gyi tshad do/ /'khor lo dang po ni bre'i zur bzhi la slebs so/ /de bzhi chas 'khor ba'i tshad ni 'khor lo bcu gsum pa'o/ / bcu gcig po yang de'i rim gyis gzhol ba'o/ /rtseg par thams cad ni ci mdzes su bya'o/ /thugs rjes mdo gzungs 'phang lo chung ba dang mnyam mo/ /de'i rmad du rngams kyi gzhi gsum ni 'jam po nyid stod du bzhi cha gcig ni phreng ba'i sul bcu drug pa'o/ /de'i steng du 'khor lo bcu gsum pa nyid kyi shing gi phyed tshad yar rtse phra ba bang rim nyid kyi 'phang phyed do//yang srog shing 'phang du bre phyed tsam steng du zla ba'i rtse mo gdugs dang mnyam srog shing la bskor te rtse mo bgrad do/ /gdugs ni 'khor lo bdun pa dang mnyam mo/ /gdugs khebs 'khor lo drug pa dang mnyam mo//za ra tshags ni bre'i 'phang dang mnyam mo/ /yang srog shing 'phang du bre'i sum cha'i tshad kyi steng du nyi ma zla ba las khyad yud tsam mo/ /nyi ma'i steng du tog gi ut+pa la ser po'i tog bu 'dra ste ci mdzes nyi ma dang zla ba dang tog pa thams cad kyi zur la bya mi chags par bya ba'i phyir lcags kyi thur ma rnon po gzer bar bya'o//tog ni ser po nyi ma ni dmar po/ /zla ba ni dkar po/ gdugs khebs ni dkar po'o/ /gdugs ni sngon po/ /gdugs kyi phyogs bzhir rigs bzhi'i phyag rgya bri'o/ /thugs rje'i phul ni dmar po'o/ /thugs rje nyid dang shes bcu ni ser po'o//'khor lo thams cad dang srog shing dmar po'o/ /mchod rten kyang dkar po'o/ /dge bcu yang ser po'o/ /rmang dang rmang rten ljang gu'o/ /mchod rten brtsig pa'i rim pa'o/ /da ni mchod rten gyi bum rten gyi steng du sngon nas gdung ma bzhi rgya gram du bri bar bya'o/ /de ji ltar 'tsham pa'i dkyil 'khor bzhengs par bya ste/dkyil 'khor gyi tshad dang mnyam pa'i zheng gi gzhi bri'o/ /de'i steng du rdo leb bam so btang ba'i so phag legs par gzhib bo/ /de'i steng du bkra shis pa'i sa rtswa muny+dza gtubs pa dang / bsres pa'i dri bzang po'i chus sbrus nas gro phye dang shing bal bskol bas bsre bar bya'o//rgya ji tsam yod pa'i bcu drug gam brgyad kyi cha ni 'phangs su bya'o/ /gnyer ma dang sgo 'bur med pa'i gru bzhi par bya'o/ /de nas thig gdab par bya ste/ dkyil 'khor chen po bkod pa'i rgyud las skyon med ras bal 'jam po ni/ /shin tu gtsang ba'i bu mos ni//shar du bltas nas dgu bsgril du/ /sngags 'di brjod cing bkal bar bya/ /oM a n+yo n+ya a nu ga ta/ sarba d+ha rmA spar spar sarba d+harmA a t+yan+ta a nu pra biSh+Ta sarba d+ha rmA hUM/ shar nub lho byang tshangs thig gdab/ /tshangs dang ngos dang gru chad gdab/ /nang gi phyed kyang phyed tshad gdab//rgyab tu phyed phyed tshad btab nas/ /lnga pa phyi nas cha re gdab/ /drug pa dbus dkar rgyab ma bkas/ /bzhi rgyab phyogs bzhir dbus cha bzhi/ /re re yang ni bzhi bzhir bgo/ /des ni sgo yi dkyil 'khor ro/ /pho brang ci bder bsgrub par bya'o/ /de'i rgyab tu cha gnyis kyang //phyed cha re rer bskor ba ni/ /pad+ma rdo rje 'od phreng dang / /mchod pa dgod pa'i sa gzhi ste/ /zhes pa'i tshul gyis thig btab nas sa tshon bkye bas gru bzhi sgo bzhi rta babs dang dra shar dang zla mdzes dang ba dan la sogs pa'i dkyil 'khor gyi yon tan thams cad dang ldan pa bri'o//phyi rol du ra ba rim pa gsum ni sna tshogs pad+ma dang rdo rje sngon po'i phreng ba dang dmar ser me 'od 'bar ba thams cad du zlum po drang ba'o/ dkyil 'khor de la lha'i rten dgod par bya ste/ sku'am tsa ga li'am phyag rgya'am ming yig kyang rung ste/ tshon ma lus pas bris nas dgod par bya'o//de yang byang chub sems dpa' sgrib pa rnam par sel ba'i rgyud las/ phung po lnga dang bco brgyad khams/ /'byung bzhir bcas pa'i lus kyis ni/ /dkyil 'khor chen po 'di bltas na/ /mi de myur du grol bar 'gyur/ /zhes so/ /de nas lus dkyil 'khor ci lta ba gzugs brnyan gyi dkyil 'khor la'ang lha nyi shu rtsa bdun du nges so//de'ang gzungs kyi dkyil 'khor ni rnam par snang mdzad la sogs pa gtso bo yab yum la lha mo nyi shu rtsa drug gis bskor ba'o/ /rig sngags kyi dkyil 'khor lha mo dang byang chub sems dpa'o//gsang sngags kyi dkyil 'khor la lha mo dang byang chub sems dpa' dang khro bo/ /'on kyang nyi shu rtsa bdun de dag kyang phyogs dang kha dog gi bye brag gis lha re re yang bzhi bzhir 'gyur la de ltar na rigs 'dus pa'i lha brgya rtsa brgyad do/ /de nyi shu rtsa lngar 'du zhing dgu dang lnga dang gcig kho nar yang nges so//de brgya rtsa brgyad kyi dbang du byas nas dbus su rnam par snang mdzad chen po zhal bzhi phyag brgyad zhabs brgyad pa yum dang bcas pa'o/ /g.yas su nyi ma rnam par snang mdzad do/ /g.yon du zla ba rnam par snang mdzad/ shar du ming skyod pa la rigs bzhi dang spyan ma la sogs pa bzhi dang /gzugs rdo rje la sogs pa bzhi dang / lA skye la sogs pa bzhis bskor ba'o/ /de kho na bzhin du lho dang nub dang byang du yang shes par bya'o/ /de ni dbus kyi pho brang ngo / /de yang sgrib pa rnam par sel ba'i rgyud las/ thabs dang shes rab rang bzhin gyi//dkyil 'khor gtso bo rnam snang mdzad/ /mdog skya byang chub mchog gi rgya/ /zhal bzhi pa la phyag brgyad do/ /rig pa kun gyi 'byung gnas mchog /zla ba nyi ma rnam snang mdzad/ /nyi ma zla ba 'chang ba'o/ /phyogs bzhi pho brang dbus su ni/ /rdo rje rin chen pad+ma'i rigs//las kyi rigs rnams so sor yang / /rang rig sangs rgyas sras po dang / /spyan ma bdag mo gos dkar sgrol/ /gzugs sgra dri ro lha mo dang / /sgeg mo gar phreng glu ma rnams/ /phyogs mdog rigs kyi phyag rgya can/ /g.yon pa rang rtags phyag rgya 'chang //ldem bag zhi ba'i tshul du bsam/ /zhes pa dang / yang / byang chub sems dpa' sum cu gnyis/ /lha yi snam bur dgod par bya/ /rig pa'i lha mo khro mo che/ /mos pas sgo la dgod par bya/ /zhes gsungs so/ /de yi rgyab tu lha rnams la/ /bskal bzang sems dpa' bcu drug go//sgo bzhir lha mo bzhi'am khro bo bzhi dbus kyi gtso bo la yang gzungs kyi tshul du sgrub pa la lha mo bzhi'o/ /rig sngags dang gsang sngags kyi tshul du sgrub pa la rigs bzhi nyid do/ /yang dbus su rigs lnga mtshams su spyan ma la sogs pa bzhi dang pho brang gi dbus su gzugs rdo rje la sogs pa bzhi dang /sgo bzhir lcags kyu ma la sogs pa bzhi'am yang na khro mo bzhi'o/ /sgo'i nang gi lha rnams la byams pa la sogs pa byang chub sems dpa' zung re ste brgyad do/ /rten de dag bkod nas dkyil 'khor yol ba dmar po dang bla re sngon pos bya'o//cod pan dang ba dan dang rgyal mtshan dang gdugs la sogs pa ngos re re yang brgyad brgyad mngon par 'du bya ste legs par dgod/ de'i steng du khri bcas nas yon gyi bdag po gang de'i gos la sogs pa dang gzugs brnyan gzhag par bya'o//de ni dkyil 'khor gyi rim pa'o/ /da ni dkyil 'khor de la mchod par bya ste/ lha'i grangs kyi mchod pas dkyil 'khor de yongs su bskor nas sgrub pa po phyogs bzhir bzhugs te ji ltar bkod pa'i dkyil 'khor rin po che sna tshogs kyi gzhal yas khang par lha'i tshogs dang bcas pa skad cig gis dmigs nas rang bzhin gyis lha bcug ste/nam mkhar zla ba'i dkyil 'khor la gnas pa'i oM yig las 'phrul pa'i lha mo'i tshogs kyis mchod par bsam zhing / gzhung gzhan du gsungs pa'i tshigs bcad dang sngags du mas mchod cing bstod par bya'o//sil snyan du ma'i tshogs dkrol zhing bkra shis kyi glu du ma dang smon lam du ma brjod par bya'o/ /de la bkra shis ni/ rmi ngan 'jigs dang sdig pa thams cad 'jig byed pa/ /tshe dang 'byor dang stobs dang bde ba rnam 'phel ba/ /khyed kyi bkra shis thams cad 'grub par byed 'di dag /rab tu brjod kyis de phyir mi rnam bsgrims te nyon/ /rnam par snang mdzad ye shes dam pa mtsho chen ldan/ /zla ba nyi 'dra'i sku mnga' srid pa'i mthar phyin/ dgongs pa mtha' dag rdzogs pa'i bkra shis gang lags pa/ /bkra shis des kyang deng 'dir zhi byed legs gyur cig /mi 'khrugs rgyal po srid dang gti mug rnam spyod pa/ /mgon po yon tan thams cad rdzogs pa'i bkra shis gang yin dang / /dge ba nyams sems rdzogs pa'i bkra shis gang lags pa/ /bkra shis des kyang deng 'dir zhi byed legs gyur cig /sangs rgyas yon tan kun gyi rgyan gyis brgyan mdzad cing //yang dag sbyin mdzad 'gro ba'i don la mi slu ba'i/ /rin chen 'byung zhes bya'i bkra shis gang lags pa/ /bkra shis des kyang deng 'dir zhi byed legs gyur cig /bsam gtan ting 'dzin dam pa pha rol phyin pa'i gnas//ye shes pad+ma'i steng bzhugs dpag med tshe ldan pa/ /tshe grangs med par byin gyis brlabs pa'i bkra shis gang lags pa/ /bkra shis des kyang deng 'dir zhi byed legs gyur cig /sems can rnams kyi don la thugs ni rab tu dgongs mdzad de//'gro ba mtha' dag 'ching bas bcings las grol mdzad pa/ /thub mchog don yod grub pa'i bkra shis gang lags pa/ /bkra shis des kyang deng 'dir zhi byed legs gyur cig /sangs rgyas pad+ma rgyas pa'i 'dab 'dra'i spyan mnga' ba/ /gser gyi mdog can 'gro ba'i rtsa lag gcig pu dang //chos dang dge 'dun lha dang lha min gyis bstod pa/ /bkra shis rnam par spel phyir rtag tu dran par byed/ /bdud stobs rab tu 'joms pa'i bkra shis gang yin dang / /rnam snang mdzad dang thams cad skyob dang rnam par gzigs/ /kun du mchod cing rgyas par gyur pa gzi chen mchog /bkra shis rnam par spel phyir rtag tu dran par byed/ /pad+ma'i bla dang shAkya thub dang thub chen dang / /ye shes dbang phyug spyan legs pa dang zla zhal dang / /'brug gi sgra dang rnga sgra lta bur dbyangs snyan pa/ /bkra shis rnam par spel phyir rtag tu dran par byed//'od zer rgyal mtshan dang ni gser thub 'od srungs dang / /mar me mdzad dang shin tu brjid par gshegs pa dang / /'dren pa gtsug tor can dang 'od tog dpag med 'od/ /bkra shis rnam par spel phyir rtag tu dran par byed/ /pad+ma mdzes dang ye shes stobs dang zla 'od dang //nyi ma'i zhal dang dgra las rgyal dang bltams pa dang / /yon tan 'byung gnas dpal gyi gzi brjid 'jig rten gtso/ /bkra shis rnam par spel phyir rtag tu dran par byed/ /mi 'khrugs pa ni rdo rje'i gdan la bzhugs pa dang / /'dren pa mchog sbyin rin chen tog tu byas pa dang //rnam par sel dang lag na rin chen rgyal po mchog /bkra shis rnam par spel phyir rtag tu dran par byed/ /'jig rten dbang phyug rtag tu rgyal dbang gtsug tor can/ /ston zla dri med lta bur zhal ras mdzes pa dang / /nam mkha'i snying po dang ni sa yi snying po dag /bkra shis rnam par spel phyir rtag tu dran par byed/ /'jam dpal gtsug phud shin tu mdzes par rab brgyan pa/ /gzhon nu'i gzugs ni gser mchog 'od dang ldan pa dang / /rtag tu rgyal bar dka' ba lag na rdo rje dpal/ /bkra shis rnam par spel phyir rtag tu dran par byed//byams pa shin tu rmad du byung ba'i gzugs mnga' ba/ /lcang lo 'khril mnga' mchod rten gtsug tor gnas pa dang / /kun du bzang dang nor bzangs dang ni sgra gcan 'dzin/ /bkra shis rnam par spel phyir rtag tu dran par byed/ /skul byed ma dang sgrol ma khro gnyer 'gro phan dang //de bzhin shes rab la sogs pha rol phyin drug dang / /rma bya dang ni 'phags ma gzhan gyis mi thub dag /bkra shis rnam par spel phyir rtag tu dran par byed/ /gtsug tor las byung gsang sngags rjes 'dzin bcas pa dang / /phyir bzlog ma dang bsil ba'i tshal ni rgyal las 'khrungs//lha mo ri khrod lo ma can dang bcas pa rnams/ /bkra shis rnam par spel phyir rtag tu dran par byed/ /don yod grub dang stong chen rab tu 'joms ma dang / /grong khyer wA rA Na sI zhes byar grags pa dang / /bad sa'i snying po gcig dang ku sha'i gyad ldan pa//bkra shis rnam par spel phyir rtag tu dran par byed/ /rdo rje lcags kyu dang ni gtsug 'phyang 'od po che/ /de bzhin bgegs 'joms 'phags pa bdud rtsi thab sbyor dang / /zla 'od de yang gzhon nu'i gzugs dang ldan pa ni/ /bkra shis rnam par spel phyir rtag tu dran par byed//gshin rje gshed po 'jigs kun rab tu 'joms mdzad dang / /pad+ma mthar byed gnod mdzes de bzhin 'khor lo can/ /gzhan gyis mi thub dbyug sngon bsnams par mdzad pa dag /bkra shis rnam par spel phyir rtag tu dran par byed/ /'phags pa mi g.yo bgegs rigs rab tu 'joms pa dang //phun sum tshogs byed rmugs 'dzin ut+pal mdog can dang / /glang chen ko rlon stag lpags dag gis brgyan gyur pa/ /bkra shis rnam par spel phyir rtag tu dran par byed/ /'phags pa shA ri'i bu dang mau dgal 'od srungs dang / / nor bu 'dzin dang ma 'gags nye ba 'khor dang bcas/ /rab 'byor dang ni lus 'phags ri bo kun dga' bo/ /bkra shis rnam par spel phyir rtag tu dran par byed/ /stobs chen bgegs kyi rigs ni rab tu 'joms pa dang / /'od zer ldan dang cha byad rab tu 'tsher ba dang //dug sel sbrul gdug rab tu rgyags pa 'jig byed pa/ /bkra shis rnam par spel phyir rtag tu dran par byed/ /'phrog ma rna cha rnam pa sna tshogs g.yo 'gul ba/ /bu pho lnga brgya dag gis brgyan par gyur de dang / /gnod sbyin bdag po lnga rtsen dang ni pad+ma'i mig /bkra shis rnam par spel phyir rtag tu dran par byed//ha la ha la sems can kun la phan mdzad dang / /rin chen sgrol mar grags dang nor gyi rgyun mchog dang / /gnod sbyin bdag po rnam thos sras po'i dpal thob pa/ /bkra shis rnam par spel phyir rtag tu dran par byed/ /thams cad sgrol ba sbyin phod dam pa gzi chen dang //byams pa'i stobs ni gtong ba'i stobs chen ldan pa dang / /sprin gyi tog dang ldan pa'i bu ni gang yin pa/ /bkra shis rnam par spel phyir rtag tu dran par byed/ /rab tu dga' ba la sogs sa bcu de dag dang / /dpa' bas byin pa de dang gtsug na nor bu dang //rgyal po dam pa zas gtsang dang ni ka pi na/ /bkra shis rnam par spel phyir rtag tu dran par byed/ /lum+ba'i tshal ni bung ba lang long 'phur lding zhing / /me tog 'bras bu rnam pa sna tshogs rnams kyis brgyan/ /rma bya dang ni khu byug mang po'i sgra 'byin pa/ /bkra shis rnam par spel phyir rtag tu dran par byed//btsun mo sgyu 'phrul dang ni de bzhin gau ta mi/ /shAkya'i bu mo rdzu 'phrul chen mo grags 'dzin dang / /nai rany+dza na bsod nams ldan pa 'bab chur bcas/ /bkra shis rnam par spel phyir rtag tu dran par byed/ /'jig rten dbang phyug pad+ma bung ba'i khyu lding dang / / 'jam dpal ut+pal sngon po yid du 'ong ba dang / /mgon po byams pa yi ni klu shing me tog bsnams/ /bkra shis rnam par spel phyir rtag tu dran par byed/ /don yod grub pas legs bsnams ral gri mchog dang ni/ /mi bskyod rdo rje'i rdo rje nyid dang gzhan yang ni/ /skyob pa thams cad kyi ni phyag mtshan ma lus pa//bkra shis rnam par spel phyir rtag tu dran par byed/ /yid bzhin nor bu 'dod 'jo'i ba dang bcas pa dang / /dpag bsam gyi ni shing dang bum pa bzang po dang / /rgyal ba kun gyis nges par bstan pa'i byang chub shing / /bkra shis rnam par spel phyir rtag tu dran par byed//lam 'jug dus dang nor dang 'bru rnams sdud pa dang / /nang par dus sam yang na zhi ba'i las byed tshe/ /dga' ston kun na 'jug dang dgos pa sgrub pa dang / /ming mtshan 'di dag mi yis rab tu bsgrims te nyon/ /rgyal ba dag dang rgyal ba'i sras kyi mtshan 'di ma lus par//lha la gus bzhin nyin cig bzhin du nang par su brjod pa/ /de ni dmyal ba yi dags gnas su mi skye nad med cing / /dpal dang bsod nams nor dang bkra shis rnam par 'phel/ /che ba'i che mchog dkon mchog bla na med/ /chos rje nyi ma rgyal ba'i byin rlabs kyis//bdud dang bgegs rigs gnod pa'i dgra zhi ste/ /rtag tu dpal gnas nyin mtshan bkra shis shog /'byung po gang dag deng 'dir lhags gyur te/ /sa'am 'on te bar snang 'khod pa dag /skye dgu rnams la rtag tu byams byed cing / nyin dang mtshan du chos kyang spyod par shog /rgyal ba dgra rgyal bden pa'i byin rlabs kyis/ /bden pa 'di gsungs de la sdig med cing / /lhar bcas lha min gyis rtag mchod 'os pa'i/ /bden pa 'dis ni deng 'dir bde legs shog /phyogs bzhi nas snyan pa brjod par bya'o/ /smon lam ni/ oM bde gshegs rigs dang rdo rje'i rigs//rin chen pad+mo las kyi rigs/ /sna tshogs rigs kyi rgyal ba dang / /rdzas kyi tshogs rnams bdag la dgongs/ /thog med las kyi srid rgyun nas/ /bsags pa'i dge ba ci snyed dang / /gzungs sngags 'di yi mthu dang ni/ /rig sngags phyag rgya'i bden pa dang //gsang sngags 'di yi byin rlabs kyis/ /zag med ye shes snang ba'i rgyan/ /nam mkha'i mtha' dang mnyam pa ste/ /myur ba nyid du skye bar shog /mig dang rna ba'i mngon shes dang / /gzhan gyi sems don shes pa dang / /snga phyi skye gnas shes ba dang //rdzu 'phrul du ma bsgyur ba yang / /da lta nyid du thob par shog /chu stengs 'gro dang rigs myur phyin/ /mig sman bum pa gter dang ni/ /ral gri bzung nas mkha' la 'gro/ /mi snang bsgyur lus thob par shog /sa 'og 'gro dang gter mthong dang //bcud rnams rnyed cing ring 'tsho dang / /gzhan lus dbang po bsgyur ba dang / /mdog bzang na rga med thob shog /zhi rgyas dbang dang mngon spyod kyis/ /'gro don sna tshogs ci 'dod pa/ /rang rang skal ba ji bzhin du/ /thogs pa med par byed par shog /gal te le lo'i rkyen gyis gol gyur nas//'bras bu dam pa myur du ma rnyed kyang / /bde 'gro mtho ris lha dbang dam pa dang / /chos ldan yul dbus mi lus thob par shog /de nas bla med byang chub ma thob par/ /las kyi 'khor los srid gsum gar skyes kyang / /lus dang srog ni yal bar gyur kyang rung //bla med byang chub sems ni mi gtong shog /bla med byang chub ma thob bar du ni/ /lus dang srog la chags pa med par yang / /bag yod mgo la me 'bar ji bzhin du/ /brtson 'grus chen po rgyun mi 'chad par shog /bdag dang gzhan don byang chub sgrub pa la//bar chad med cing brtson pa ma gtogs pa/ /'jig rten dag na sems ni skad cig kyang / /bdag gis don med g.yeng bar ma gyur cig /tshe rabs kun du dam chos spyod pa la/ /mi dge gzhan gyi dbang du ma gyur cig /tshe la nad kyi bar chad med pa dang / /skyes ma thag tu chos dang phrad par shog//dge bshes dam pa rnams dang mi 'bral zhing / /rnal 'byor brtson pa'i grogs dang 'grogs pa dang / /skyon bral sems dang spyod pa mthun pa yis/ /'jig rten dman pa'i gnas la chags ma gyur/ /byang chub rang bzhin byang chub thob pa'i rgyu/ / shes rab che dang snying rje che la sogs/ /bdag cag tshe rabs kun du mi 'bral zhing / /rnam thar mang po'i sgor ni 'jug par shog /rgyal srid mtho ris sdug dang gnyen bshes dang / /'dod pa'i yon tan lnga po thams cad dang / /thabs la mkhas pa'i spyod yul ma gtogs pa/ /shes rab mchog gis gang la'ang chags ma gyur//gzhan don 'khor ba rnams su spyod pa na/ /bsdu ba'i dngos dang pha rol phyin la sogs/ /thabs la mkhas pa'i spyod pa sna tshogs kyis/ /'gro ba rnams su byang chub spyod par shog /de bzhin du gzhan yang smon lam gdab par bya'o/ /de ni dkyil 'khor mchod pa'i rim pa'o//de nas mchod rten yang dang yang du dri zhim po'i chu ba'i lci ba dang bcas pas byugs te/ /sngon ltar thig btab la lha'i pho brang thams cad dang sgo la sogs pa thams cad kyi ris su bris nas pad+ma dang zla ba'i steng du me tog tshom bu lha grangs su bzhag nas/ zhing khams bye ba phrag brgya dkyil 'khor gyi khang pa brjod kyis mi lang bar khengs par bsams nas tsha tsha re re zhing dkyil 'khor re re ru bsams nas/ tshom bu lha grangs su bzhag nas brgya'am stong ngam khri'am 'bum mam sa ya'i bar du gzhug par bya'o/ /mchod rten gcig gi nang du bye ba las lhag par gzhug par mi bya'o//de nas sku gdung gi nang gi khri'am thams cad du phyung ste/ sgo thams cad bcad nas legs par zhal byug bya'o/ /'di ni tsha tsha gzhug pa'i rim pa'o/ /de'i 'og tu mchod rten gyi ngos thams cad du thur ma mang du btsugs nas de la me tog phreng ba dang ba dan la sogs pas phreng ba'i tshul du brgyan par bya'o//mchod rten gyi phyogs bzhir mchod pa'i dkyil 'khor bzhi byas te/ yon chab la sogs pa'i mchod pa'i bye brag dngos su bshams pa dang / 'dod pa'i yon tan gyi tshogs dang nor bu dang 'khor lo dang rta dang glang po che dang /btsun mo dang / blon po dang / dmag mi la sogs pa ni bcos pa'i tshul du byas nas tshigs su bcad pa'i dbyangs dang sngags su bcas pas dbul bar bya'o/ /phyogs bzhir mdo bzhi bklag par bya'o/ /de'i 'og tu snying po nyi tshe brjod cing bskor ba brgya rtsa brgyad bya ste/ bkra shis brjod la smon lam gdab par bya'o//de yang mchod rten ni mchod rten chen po rin po che'i snying po nam mkha' ma lus pa khyab pa kha dog sna tshogs pa gru bzhi sgo bzhi pa rin po che du ma las grub pa 'od kyi snang ba dang ldan pa bsam mo/ /tsha tsha re re yang gzhal yas khang re rer bsams te bum pa'i nang du ji ltar bkod pa'i dkyil 'khor gyi lha rnams dang grangs mnyam par bsams nas khrus byas nas rang bzhin gyi lha dang gnyis su med par byas nas na bza' dang rgyan phreng la sogs pa thams cad dbul bar bya'o//de ni mchod rten mchod pa'o//mchod rten thams cad 'bar bar 'gyur ro/ /bdag kyang 'bar bar 'gyur ro zhes pa'i tshig 'di ni sngon du gsungs pa'i rmi lam lta bur kun du shes so zhes bya ba'i tshig dang 'brel te rmi lam du byung ba ni rjes su spyod pa'i rtags te/ las dang po bsam du brjod na sngags kyi mthu bya ba dang bya ba ma yin pa rmi lam du shes par bya'o//tshig gnyis pa 'di mngon du gyur pa'i rtags so/ /de la mchod rten 'bar ba ni sngags dang rdzas kyi mthus drod thob pa'o/ /bdag 'bar ba ni ting nge 'dzin gyi mthus/ /rdzu 'phrul dang mngon par shes pa thob pa'o/ /de la rtags kyi rim pa ni gang yang gzungs kyi cho ga la 'jug pa'am zhugs pa'i tshe rmi lam du yid du 'ong ba'i tshal dang /khang bzangs dang / khye'u dang bu mo'am/ dge slong ngam/ dge 'dun la sogs pa lhan cig dga' ba'am/ ga zha'am/ chos nyan pa'am/ khri la sogs pa'i steng du gnas pa'am/gru'am zam gzings la sogs pa bsgral bar rmi na 'dod pa 'grub po/ /skyugs pa'am khrag 'byung ba'am/ khrus byas pa la sogs pa rmi na sdig pa zad do/ /mchod rten nam tsha tsha la dri zhim po bro na lha gnas drug tu skye bar nges so/ /gal te dri cung zad bro ba yang longs spyod dang ldan pa'i mir skye'o//sgra grag na gzugs khams kyi lhar skye'o/ /'od byung na rig 'dzin mchog thob par 'gyur ro/ /de dang de la sogs pa yon tan mtha' yas te sgrib pa rnam par sel ba'i rgyud du shes par bya'o/ /gang 'jig rten 'dir thob par 'gyur ba'i yon tan rnams ni rdzas dang yo byad tshang zhing ma nyams pa dang /dus tshod bzang po dang / sbyor ba bzang po dang / tshul bsdams pas thob par 'gyur ro/ /ma 'ongs pa'i dus kyi 'bras bu bzang po ji snyed pa ni dad pa dang / snying rje mchog dang ldan pa dang / lhag pa'i shes rab kyis thob par 'gyur ro//de ni ltas kyi rim pa'o/ /nges par 'phral du la sogs pa ni phan par gsungs so/ /nges par 'phral du phyir mi ldog pa ni zhi ba la sogs pa'i las grub na gzhan gyi don spyod pa la thogs pa med pa'o/ /sa bcu la gnas pa ni ral gri la sogs pa rig pa 'dzin pa'i gnas brgyad thob pa'o//lung bstan pa thob pa ni mngon par shes pa drug thob pa'o/ /bla na med pa yang dag par rdzogs pa'i byang chub tu mngon par rdzogs par 'tshang rgya ba ni phyag rgya chen po'i sku thob pa'o/ /da ni sngon byung rjes 'jug gnyis pos mtshams sbyar bas gzhung bsdu ba ni de nas la sogs pa gsungs te/mthu chen po ni gong du gsungs pa'i phan yon thams cad bskyed pa la gdon mi za ba'o/ /yon tan grangs med pa'i 'byung khungs yin pa'i phyir dpe nor bu rin po che lta bu'o/ /nyan thos la sogs pas mthong bar dka' ba 'di'i don gyi sgra dang tshad ma'i spyod yul ma yin pas thob par dka' ba'o//gzung bar bgyi'o zhes pa ni bstan pa'i don la nus pa med pa'o/ /rgyas par bgyi'o zhes pas sngags kyi ngo bo bzung ste skye ba med na 'gag pa gtan med/ ma 'gags pa'i chos la dbang po rab 'bring thams cad rgyun mi 'chad par longs spyod par 'gyur ba'o//sems can thams cad la bsgrag par bgyi'o zhes pa ni/ snod du ma gyur pa gang yang med ces bya ba'o/ /dper na gla rtsi bcug pa'i snod dri zhim por 'gyur ba ltar sngags 'chad pa po yang byin gyi rlabs kyi sgo du ma dang ldan par 'gyur bas sems can chen po zhes bya'o//phyi bzhin 'brang zhes pa ni dper na mi'i mig gang gi spyod yul la srin bu la sogs pa la rgyang ring ngo / /de bzhin du byang chub sems dpa' chen po'i spyod yul du khams gsum thams cad la nye ba dang ring ba mi mnga'o/ /bsrung ba dang ni gnas dang lus dang longs spyod do//bskyab pa ni 'khor ba'i rgya mtsho las so/ /sba ba ni bdud kyi 'ching ba las so/ /bskyang ba ni lam log pa las so/ /bu bzhin zhes pa ni tshad med pas gzigs pa rgyun mi gcod pa'o/ /bcom ldan 'das kyis bka' stsal pa la sogs pa ni dam bca' rjes su gdams pa gsungs te/phyag na rdo rje yang bdag ltar 'gro ba la dgongs pa'i phyir grogs po zhes bos so/ /legs so dang pos ni kun rdzob tu tha dad par mkhyen pa ste chos 'dzin pa ni bskyang ba legs so/ /legs so gnyis pa ni don dam par tha mi dad par mkhyen pa ste chos bskyang ba legs so//khyod kyis de ltar gyis shig ces pa ni rang don rdzogs par mdzad ces pa'o/ /ngas khyed la gtad do zhes pas gzhan don yang rdzogs par gyis shig ces pa'o/ /dper na phas bu la nor gtad pa yang tsha bo la sogs pa phyis 'byung ba'i gzhi shugs kyis 'byung ba dang 'dra bar gang zag snod ldan rnams byin gyis rlobs la brgyud pa rgyun ma chad par mdzod ces pa'i don to//phan yon la sogs pa gang brda phrad par sla ba ni ma bkral lo/ /sgrib pa rnam sel la sogs pa/ /sems dpa' bcu drug rtog pa dang / / so sor 'brang dang stong 'joms sogs/ /rig pa'i lha mo'i rgyud rnams dang / /kr-i ya'i rigs bsdus la sogs dang / /rnal 'byor pa mchog la sogs dang / /dang po sangs rgyas la sogs dang / /gzungs 'di'i cho ga rgyas gsungs kyang / /le lo can rnams spro bskyed phyir//shin tu bsdus nas bshad pa la/ /tshul bzhin gzhung nas gsungs pa ltar/ /phan yon thams cad thob par 'gyur/ /gang gi lcags kyu bzung nas nya ra yis /klu yi phyugs rnams 'bum phrag bton pa ltar/ /bdag dge kun slong 'gro rnams byang chub kyi/ / rin chen gling thob mdzad phyir bris pa las/ /skye 'gyur dge bas gzungs don la 'jug cing / /'gro kun dri med yid bzhin nor thob shog /kun nas sgor 'jug pa'i 'od zer gtsug tor dri ma med par snang ba/ de bzhin gshegs pa thams cad kyi snying po dang / dam tshig la rnam par blta ba zhes bya ba'i gzungs kyi rnam par bshad pa/slob dpon chen po dngos grub thob pa lhan cig skyes pa'i rol pas mdzad pa rdzogs so// //gsang sngags rig 'dzin sde snod la/ /mkha' ltar shes rab dang ba ni/ /nyi ma lta bur ma rmongs pa'i/ / mkhas pa dza ya de ba la/ /lang so ban+de tshul brtsegs kyis/ /gus bcas mang du gsol btab nas/ /spu rgyal bod las khyad par du/ /nad med sa gtsang mdo khams su/ /yid bzhin nor 'dra'i gzungs mchog gi/ /'grel pa dpag bsam shing 'dra 'di/ /bsgyur ba'i dge bas dad ldan rnams/