CLOSE WINDOW

D2687
བོད་ཡིག

/ //paN+Di ta de ba pu N+ya ma ti dang / lo tsA ba dge slong chos kyi bzang pos bsgyur ba'o/ /[ ]@##/ /rgya gar skad du/ badzra bi dA ra Na nA ma d+hA ra Ni phaT la kra ma b+hA Sha br-it+ti pra dI paM nA ma/bod skad du/ rdo rje rnam par 'joms pa'i gzungs zhes bya ba'i rim par phye ba'i rgya cher 'grel ba gsal ba'i sgron me zhes bya ba/ bcom ldan 'das dpal phyag na rdo rje la phyag 'tshal lo/ /khro bo'i rgyal po rdo rje rnam par 'joms pa la phyag 'tshal lo/ /nyes pa kun dang rnam bral zhing //sems can kun la phan bzhed pa/ /rtag tu dngos po kun bdag gyur/ /rdo rje bsnams la phyag 'tshal lo/ /tshig dang yi ge shin tu nyung ba la/ /rab tu don rdzogs rdo rje rnam 'joms gzungs/ /de rtogs deng sang skye bo dga' tsam srid/ / de bas de don bdag gis rab bshad 'dod/ /gzu lums ras chod rang dgar brtsams pa ma yin te/ /bde gshegs bka' dang bla ma'i gdams ngag la brten nas/ de'i don rim par phye nas gsal sgron gyi/ /de don rgya cher rab tu bshad par 'dod/ /de la rdo rje rnam par 'joms pa'i gzungs kyi don rgya cher bshad par bya ste/de yang chos thams cad spros pa dang bral ba yin pa la/ /ma rig pa'i ling tog gis bsgribs nas de ma rtogs pas/ khams gsum 'khor bar 'khor nas nyon mongs pa brgyad khri bzhi stong 'phel te/ de spang ba'i gnyen po dang / chos thams cad spros pa dang bral bar bya ba de rtogs pa'i thabs su/chos kyi phung po brgyad khri bzhi stong gsungs te/ de yang bsdu na mtshan nyid kyi theg pa dang / gsang sngags kyi theg pa'o/ /de yang mtshan nyid kyi theg pa la ni mdo'i ming gis btags la/ gsang sngags kyi theg pa la ni rgyud kyi ming gis btags so//mtshan nyid kyi theg pa la mdo sde ru 'dogs pa'i rgyu mtshan ni dngos po'i gnas lugs 'ga' zhig gtan la 'bebs pa'i mtshan nyid mdor bsdus nas bstan du rung bas na yang mdo sde zhes bya la/ gnyen po rnams 'gal bar spong ba'i sgo nas mdo sde zhes bya'o/ / rgyun chags phyir na rgyud ces bya/ /'khor ba rgyud du 'dod pa yin/ /zhes gsungs so/ /yang mkha' 'gro ma sgyu ma bde mchog las kyang / rgyud ces bya ba rab 'brel te/ de yang rnam pa gsum yin te/ /gzhi dang thabs dang 'bras bu'o/ /de bzhin 'bras bu'i bsdu ba med/ /ces gsungs te/'dir yang rgyud rnam gsum du shes par bya ste/ sbyang bar bya ba rgyu'i rgyud dang / sbyangs pa 'bras bu'i rgyud dang / sbyong bar byed pa thabs kyi rgyud do/ /rgyu'i rgyud ni khams gsum gyi sems can thams cad la bde bar gshegs pa'i snying pos khyab pas de rnams so/ /'bras bu'i rgyud ni bla na med pa'i byang chub kyi 'bras bu thob pa de rnams so//thabs kyi rgyud ni sems can gyi khams dang dbang po dang / bag la nyal sna tshogs pa yod pas/ bcom ldan 'das kyis rgyud sde bzhi gsungs te/ de yang bya ba'i rgyud dang / spyod pa'i rgyud dang / rnal 'byor gyi rgyud dang /rnal 'byor bla na med pa'i rgyud do/ /bya ba'i rgyud la spyi dang bye brag gi rgyud las bye brag gi rgyud do/ /de la sku ta thA'i rigs kyi rgyud dang / /gsung pad+ma'i rigs kyi rgyud dang / thugs rdo rje'i rigs kyi rgyud las/ 'di thugs rdo rje rigs kyi rgyud do/ /de yang spyi dang bye brag las/ 'di bye brag gi rgyud do//de la 'di ni rdo rje khro bo rigs kyi rgyud do/ /rdo rje rigs kyi khro bo'i rgyud 'dis ni rtogs pa yin pa la/ gzungs kyi ming gis btags so/ /de ni spyi'i rnam par gzhag pa'o/ /de yang rang dang gzhan gyi don bstan pa'i sgo nas/ mtshan gyi don phun sum tshogs pa bstan pa dang /rgyud rgyas par bshad pa'o/ /de la dang po bshad de/ rdo rje zhes bya ba ni rang gi don phun sum tshogs pa ste/ chos kyi sku stong pa nyid do/ /rnam par 'joms pa zhes bya ba ni/ mdzad pa bzhi'i sgo nas 'gro ba sems can gyi don byed pa'o/ /gzungs zhes bya ba ni gnyi ga'i don phun sum tshogs pa ste/stong nyid snying rje'i snying po can no/ /chos kyi sku stong pa nyid la rdo rjer 'dogs pa'i rgyu mtshan dang / dgos pa ci'i phyir zhe na/ stong pa nyid la rdo rjer 'dogs pa'i rgyu mtshan ni/ 'dus byas rdzas kyi rdo rje pha lam dang chos mthun pa rnams yod do/ /rdo rje pha lam la mi chod pa bya ba nas/ma pham pa bya ba'i bar du chos bdun yod pa de bzhin du/ chos kyi sku stong pa nyid la mi chod pa bya ba nas/ thams cad du ma pham pa bya ba'i bar du chos bdun yod do/ /'o na rin po che rdo rje pha lam de la ji ltar sa yis mi chod ce na/ 'byung ba chen po sa yis bcad pa dang gtub par mi nus pas na//mi chod pa zhes gsungs so/ /sa dag gcad par mi nus par 'dug ste/ rdo rje pha lam de la 'byung ba chen po chu yis sprul pa la sogs pa gnod par bya bar mi nus sam zhe na/ ma yin te/ des gnod par mi nus pas na mi shigs pa zhes gsungs so/ /de gnyis kyis kyang gnod par bya bar mi nus par 'dug ste/'byung ba mes thal ba'am/ sol bar bsreg par mi nus sam zhe na/ ma yin te/ des bsreg par mi nus bas na bden pa zhes gsungs te/ de gsum gyis kyang gnod par bya bar mi nus par 'dug ste/ rlung spu gri lta bus kyang gzhig par mi nus sam zhe na/des gzhig par mi nus/ zhes gsungs so/ /de bzhin da ltar gnod par bya bar mi nus par 'dug ste/ lo'am bskal par lon nas gnod par bya bar mi nus sam zhe na/ ma yin te/ de bzhin dus da ltar gnod par bya bar mi nus pa bzhin du/dus sam gnas skabs thams cad du mi 'gyur bas na brten zhes gsungs so/ /'o na rdo rje pha lam de la tshur la dang / gang gis kyang mi gnod par 'dug ste/ rdo rje pha lam de mthu ji tsam dang ldan zhe na/ dper na thog dang 'dra ste dngos po thams cad 'bigs par byed pas na/thams cad du thogs pa med pa zhes gsungs so/ /de la tshur la gnod par mi 'gro'am zhe na/ ma yin te/ rdo rje rin po che pha lam des/ phar mi thams cad 'joms par nus la/ rang la tshur gnod par mi nus pas na/ thams cad du ma pham pa zhes gsungs so/ / dper na rdo rje pha lam la gzhan gyis gnod par bya bar mi nus pa de bzhin du/ stong pa nyid kyi rdo rje de la skye ba la sogs pa'i sdug bsngal gyis mi gnod pas na/ mi chod pa la sogs pa gsungs so/ /'dus byas kyi dngos po 'di la skye ba snga ma nas 'di ru skyes/ 'di nas phyi mar skye bas/skye ba'i sdug bsngal gyis bar du chod cing 'dug pas na/ stong pa nyid la skye ba med pas/ skye ba'i sdug bsngal gyis bar du mi chod pas na/ mi chod pa zhes gsungs so/ /'dus byas kyi dngos po 'di la rnam pa gzhan nas gzhan du 'gyur ba yod pas/ rgas pa'i sdug bsngal gyis bar du chod cing 'dug pa la/stong pa nyid de las rnam pa gzhan nas gzhan du 'gyur ba med pas/ rgas pa'i sdug bsngal gyis bar du mi chod pas na/ mi shigs pa zhes gsungs so/ /'dus byas kyi dngos po de nyid mtshams sbyor ba'i tshe/ skye gnas kyi dang por ming dang gzugs grub nas tha mar ma shi'i bar du sdug bsngal rnam pa gsum mam/brgyad la sogs pas gdungs pas na/ gnas pa'i sdug bsngal gyis bar du chod cing 'dug pa la/ chos kyi sku stong pa nyid la gzugs kyi dngos por grub pa med pas/ sdug bsngal rnam pa gsum dang brgyad la sogs pas gcod par mi nus pas na bden pa zhes gsungs so//'dus byas kyi dngos po 'di tha ma shi nas rgyun chad de 'gro bas 'chi ba'i dus na gnad gcod pa'i tshor ba'i sdug bsngal yod pas 'chi ba'i sdug bsngal gyis chod cing 'dug pa las/ chos kyi sku stong pa nyid la skye ba med pas tha ma 'gags te rgyun chad pa med pas 'chi ba'i sdug bsngal gyis bar du mi chod pas na sra ba zhes gsungs so//'o na stong pa nyid de la dus da ltar sdug bsngal rnam pa bzhi po des mi gnod par 'dug pa la/ lo'am bskal pa kho nas gnod par mi nus sam zhe na/ma yin te/ dus da ltar mi gnod pa bzhin du/ dus dang gnas skabs thams cad du gnod par mi nus pas na/ brtan pa zhes gsungs so/ /'o na stong pa nyid de la/ sdug bsngal rnam pa bzhi po de dag gis kyang gnod par mi nus par 'dug ste/ chos kyi sku stong pa nyid de mthu ji tsam dang ldan zhe na/thams cad du thogs pa med pa zhes gsungs te/ stong pa nyid kyi ye shes des ni/ /bdag dang gzhan yang 'jig par byed/ /'khor ba dang mya ngan las 'das pa yang 'jig par byed/ /gzung ba dang 'dzin pa yang 'jig par byed/ /dngos po las mngon par zhen pa thams cad 'jig par byed pas na/thams cad du thogs pa med pa zhes gsungs so/ /de la tshur la gnod par mi nus sam zhe na/ ma yin te/ des na ma pham pa zhes gsungs te/ chos kyi sku stong pa nyid de la tshur la gang gis kyang gnod par mi nus la/phar la thams cad 'joms pas na ma pham pa zhes gsungs so/ /des na stong pa nyid de rin po che'i rdo rje pha lam dang chos mthun pas na/ stong pa nyid la rdo rje zhes btags so/ /stong pa nyid la rdo rjer btags pa'i dgos pa ni/ stong pa nyid de la yang yon tan de tsho dang ldan par shes par bya ba'i dgos pa'o//de ltar shes pa de thob par bya ba'i don du gzhan dag sgrub pa dang / /sgom pa la 'jug par 'gyur ba'i dgos pa'o/ /des na stong pa nyid la rdo rje zhes gsungs so/ /rnam par 'joms pa zhes pa ni/ gzugs sku rnam pa gnyis kyis mdzad pa bzhi bstan nas 'gro ba sems can gyi don byed pas na rnam par 'joms pa zhes gsungs so//'o na rnam par 'joms pa ni mngon spyod kyi ming gi rnam grangs yin na/ mdzad pa rnam pa bzhi la rnam par 'joms pa'i ming gis ston pa ci'i phyir zhe na/ de ni rgyud 'di nas ston pa'i mdzad pa bzhi po 'di ni/rgyud gzhan nas bshad pa'i mtshan nyid ma yin te/ 'di nas bstan pa ni drag po'i las rnams dang dbye ba yin te/ drag po'i sgo nas zhi ba dang dbang dang rgyas par 'gyur ro/ /des na mdzad pa rnam pa bzhi'i rnam par 'joms pa zhes gsungs pa mi 'gal lo//gzungs la gnyis te/ rig sngags kyi gzungs dang / gsang sngags kyi gzungs las/ 'di ni gsang sngags kyi gzungs zhes bya'o/ /de la yang gsum ste/ ngo bo dang nges tshig dang / /dbye ba'o/ /gzungs kyi ngo bo ni rang dang gzhan gyi don phun sum tshogs pa stong pa nyid dang snying rje dbyer med pa ste//stong pa nyid snying rje'i snying po can no/ /tha ma gnyis ni sgo mtha' yas pa'i gzungs 'grel las/ gzungs ni rnam gsum gang phyir gzungs/ /don dang tshig dang gnyi ga'i gzungs/ /legs pa las ni nyams pa las/ /'dzin par byed pa de phyir gzungs//zhes gsungs so/ /dbye ba ni gsum ste/ don dang tshig dang gnyi ga'i gzungs so/ /don gyi gzungs ni dkon mchog gsum la phyag 'tshal lo zhes bya ba nas/ bdud rtsi 'khyil pas bsdus shig pa'i bar du'o/ /rgyas par 'di'i 'grel pa gzhan las gsal lo//tshig gi gzungs ni/ na mo rat+na tra yA ya bya ba nas/ a mr-i te hUM phaT bya ba'i bar du'o/ /gnyi ga'i gzungs ni/ ming don gcig tu bsres nas/ sgra dang don du sprel nas 'dzin pa'o/ /yang a la sogs pa'i dbyangs yig la ni don gyi gzungs zhes bya la/ka la sogs pa'i gsal byed la ni tshig gi gzungs zhes bya'o/ /a dang ka gnyi ga tha mi dad pa la ni gnyi ga'i gzungs zhes bya'o/ /nges pa'i tshig ni legs pa las ni nyams pas na/ 'dzin par byed pas de'i phyir gzungs/ /zhes gsungs pas/ thar pa dang mtho ris thob par byed pa'i rgyu/gsang sngags kyi dam tshig dang / /nyan thos kyi 'dul 'khrims dang / /byang chub sems dpa'i smon 'jug gi sems dpa'o/ /de tsho las nyams na ngan 'gror 'gro ba ste/ 'di'i cho ga phun sum tshogs pa byas te/ khrus byas la dam tshig nyams pa la sogs pa slar gsos te/de ru 'gro ru mi ster bas na/ 'dzin par byed pa zhes gsungs so/ /yang na don tshig mang po 'dzin pas gzungs so/ /rdo rje rtse mo las dge ba'i chos thams cad kyi rten pa byed pas na yang gzungs so/ /yang na mi brjed pa'i don gyis na gzungs zhes bya'o/ /sangs rgyas dang byang chub sems dpa' thams cad la phyag 'tshal lo zhes pa ni/sangs zhes bya ba ni/ nyon mongs pa dang / shes bya'i sgrib pa mtha' dag spangs nas/ ma rig pa'i gnyid las sangs pas na sangs zhes bya'o/ /dper na skyes bu gnyid las sangs pa bzhin no/ /rgyas zhes bya ba ni/ shes bya mtha' dag la ye shes rgyas pas na rgyas zhes gsungs so/ /dper na ku mu da rgyas pa lta bu'o/ /spangs pa dang ye shes phun sum tshogs pa'o/ /nyes pa'i skyon thams cad byang shing legs pa'i yon tan thams cad kyi ngo bor chub pas na byang chub bo/ /'gro ba'i don la sems pas na sems so//bdud dang mu stegs thams cad tshar gcod pas na dpa' ba'o/ /yang bde ba gnyis kyi don la yang nas yang du bya zhing bden pa gnyis kyi don la chub pas na byang chub bo/ /bden pa gnyis kyi don la yang nas yang du sems pas na sems dpa' zhes bya'o/ / de'i don la sran tshugs pas na dpa' zhes bya'o/ /yang na byang chub sems dpa' thams cad ces pa/ nyon mongs pa'i sgrib pa dang / shes bya'i sgrib pa spangs pas na byang zhes bya la/ ye shes kyis chos kyi dbyings rtogs pas na chub ces bya'o/ /sems zhes bya ba ni/ ye shes chen pos chos kyi dbyings la sems pa dang /thugs rje chen pos 'gro ba'i don la sems pas na sems shes bya'o/ /dpa' ba ni bla na med pa'i byang chub sgrub cing sems can gyi don bya ba la phyir mi ldog cing sran tshugs pas na dpa' ba'o/ /thams cad ces bya ba ni rgyu dang 'bras bur bcas pa'i byang chub sems dpa' thams cad do//phyag 'tshal zhes pa ni lus ngag yid gsum dang bas so/ /lo zhes bya ba ni shis pa brjod pa'o/ /des ni rang dang gzhan gyi don phun sum tshogs pa bstan pa'i sgo nas mtshan gyi don bshad zin to// //da ni rgyud rgyas par bshad par bya ste/ de la yang gnyis te/ rgyud 'byung ba'i gleng gzhi phun sum tshogs pa dang bcas te bstan pa dang /rgyud dngos bstan pa'o/ /dang po la gnyis te rkyen gleng slong ba dang / gleng gzhi dngos so/ /de yang 'di skad bdag gis thos pa zhes pas ni/ rkyen gleng slong ba bstan to/ /dus gcig na bcom ldan 'das rdo rje la bzhugs te/ gleng gzhi dngos bstan to/ /bcom ldan 'das rtswa mchog gi grong khyer du mya ngan las 'da' kar/'khor rnams kyis zhus pa/ bcom ldan 'das sku mya ngan las 'das na/ nged kyi ston pa ni sus byed/ gnas ni su la 'cha'/ mu stegs kyi ston pa drug ni sus 'dul/ sde snod bsdus pa'i dbur ni ji skad bya zhes zhus pas/ gsungs pa/ khyed kyi ston pa ni so sor thar pa 'di nyid kyis kyis shig ces gsungs te/ de yang / da ni mya ngan 'das gyur na/ /'di ni khyed kyi ston pa zhes/ /rab byung nyid kyis gus bcas par/ /nan tan dge 'dun tshogs mdun bstod/ /ces gsungs so/ /gnas ni dran pa dang shes bzhin la chos shig ces gsungs so/ /mu stegs kyi ston pa drug ni rang zhir 'gro'o gsung ngo //sde snod bsdus pa'i dbur ni 'di skad bdag gis thos pa dus gcig na/ bcom ldan 'das ga ge mo na bzhugs te/ 'khor 'di dang thabs cig tu bzhugs te zhes kyis shig /ces mya ngan las 'das pa'i mdo las gsungs so/ /rgyud kyi rgyur 'gro ba'i rgyu mtshan ni/'di skad bdag gis thos pa bya bas/ 'od srungs la sogs pa'i 'khor rnams la/ rnam par rtog pa rnam pa lnga skyes te/ dri ba lnga zhus te/ 'di skad bdag gis thos zer ba/ dus gang gi tshe thos/ /ston pa gang la thos/ /gnas gang du thos/ 'khor gang dang lhan cig tu thos/ brjod bya phun sum tshogs pa gang la thos/ brjod ces dris so/ /de'i lan du gleng gzhi byung ngo / /da ni tshig gi don bshad de/ 'di skad ces pa ni nges par byas nas rang dang gzhan rjes su mthun pa'i shes pas/ nges par bzung ba'i rgyud kyi don ma lus par nges par ston pa la/ gcig tu nges par byas nas phyin ci ma log par smra ba'o/ /bdag gis thos zhes bya ba ni/ bdag nyid kyis mngon sum du thos pa ste/bcom ldan 'das las bdag nyid kyis ming dang don dang gzhung 'di dag thos kyi bdag gis rang dgar byas pa ni ma yin te/ bcom ldan 'das kyis gsungs pa kho na ltar bsdus pa yin par shes so/ /de ltar shes pas shugs la rang dgar byas la bkag go//de ltar bsdus nas 'dug pas bsgrubs na 'bras bu yang 'byung la/ dngos po'i gnas lugs kyang ston par shes nas gang zag rnams 'jug par 'gyur ro/ /yang na bdag gis thos zhes pas/ bdag rang gi mos pa'i dbang gis thos kyi/ gzhan gyis ni gzhung gzhan du yang yin te/'chad par 'gyur ba'i 'khor bstan pas so/ /'di ni gzhan dang ldan pa rnam par gcod pa spangs pa yin no/ /slob dpon ma khol gyis kyang / /gsung gcig gis kyang bstan mod kyang / /du ma nyid du rtogs mdzad par/ /bdag la nye bar ston no zhes//skye bo kun gyis shes par 'gyur/ /zhes gsungs so/ /bcom ldan 'das la gsung gi che ba mang po yod par bstan te/ gsung gcig la yang du mar snang ba'o/ /yang na bdag gis thos zhes pa/ /'chad par 'gyur ba'i bcom ldan 'das las/ 'jig rten dbang phyug la sogs pa las gcig nas gcig tu brgyud nas thos pa yang ma yin te/ dngos su bcom ldan 'das las phyag na rdo rje nyid kyis thos zhes bya bar shes so/ /de ltar shes pas shugs las brgyud nas thos pa bkag go/ /thos pa zhes bya ba ni/ bdag nyid nyan pa'i dus na byang chub sems dpa' nyid du bstan la sdud pa'i dus nas sangs rgyas nyid yin no//'di ni bzlas nas bstan pas shin tu yang tshad ma yin no zhes bstan pa yin no/ /mngon sum du thos pa la yang 'di ltar shes par bya ste/ slob dpon med par 'di'i bya ba mi bya'o zhes yang dag par gsungs par shes par bya'o//de ltar bstan nas gang gi tshe/ gang las gang du gang dang lhan cig thos pa de dang / de'i rim pa bzhin bstan pa'i phyir/ dus gcig na zhes bya ba bstan te/ 'di shin tu dkon pa nyid dang / bdag nyid mang du thos pa nyid du sgrub par byed do//yang na dus gcig na zhes pa chos dang sbyar na/ dus gcig gi tshe na bdag gis 'di thos byas nas/ 'di lta bu'i phyin ci ma log pa'i ngo mtshar che ba'i chos ni dus gzhan gyi tshe bstan pa mi srid pa'i phyir ro zhes pas yang nas yang du 'byung bar dka' bar shes so//shugs las lan gcig las lan gnyis sam gsum du gsungs pa bkag go/ /yang na dus gcig na zhes pa gang zag dang sbyar na dus gang gi tshe bdag gis 'di thos kyis/ gzhan gyi tshe gzhan dang gzhan pa'i mdo thos so zhes mang du thos pa nyid du bstan te/ston pas kyang lan gcig las ma gsungs par 'dug la/ nyan pa'i 'khor gyis kyang lan gcig las ma thos par 'dug pa la/ gzungs 'di bsdus nas 'dug pas gang zag 'di ni mi brjed pa'i gzungs thob pa dang ldan pa'i gang zag /cig tu 'dug par shes so//de ltar shes pas gang zag 'di ni gzungs thob pa dang ldan pa gcig tu 'dug pas/ bcom ldan 'das kyis gsungs pa kho na ltar bsdus pa yod pas/ bsgrubs na nus pa yang 'byung la/ dngos po gnas lugs kyang yin par shes nas gang zag rnams 'jug par 'gyur ro//shugs las lan gnyis gsum du thos pa bkag go/ /da ni gleng gzhi dngos rgyud kyi rgyu ru 'gro ba bstan te/ de la gleng gzhi phun sum tshogs pa ni/ dus dang ston pa dang / gnas dang / 'khor dang / chos phun sum tshogs pa'o/ /rgyud gsungs pa de yang dus khyad par du 'phags pa cig yod na gsung /med na mi gsung bas na/ dus phun sum tshogs pa rgyud 'byung ba'i rgyur gsungs so/ /gang gi tshe gsungs na bdud btul ba'i dus na gsungs so/ /des na dus gcig na zhes gsungs so/ /de yod kyang 'chad pa po'i ston pa khyad par can cig yod na gsung /med na mi gsung bas na ston pa phun sum tshogs pa rgyud 'byung ba'i rgyur gsungs so/ /gang las zhes dris na bcom ldan 'das las zhes gsungs te/ bcom zhes pa ni bdud bzhi bcom ste/ de yang / nyon mongs bdud sogs 'joms pa dang //bcom pa'i phyir na bcom par bshad/ /nyon mongs shes rab dang 'brel bas/ /de bas shes rab bcom par bshad/ /ces gsungs so/ /bdud bzhi ni phung po dang / 'chi bdag dang / lha'i bu dang / nyon mongs pa'i bdud do/ /de bcom pa'o/ /bdud bzhi bcom pa la lugs gnyis te gzugs sku dang /chos sku'o/ /dang po nyon mongs pa'i bdud bcom pa ni/ spang bya nyon mongs pa dang shes bya'i sgrib pa mtha' dag spangs pa'o/ /phung po'i bdud bcom pa ni zag bcas kyi phung po mi len pa tsam mo/ /lha'i bu'i bdud bcom pa ni rdo rje gdan gyi spo la bdud btul ba'o//'chi bdag gi bdud bcom pa ni 'jig rten pa rtag tu re ba sun 'don pa'i don du/ lo brgyad cu tham pa la sku mya ngan las 'das pa la bram ze su ka tos skye ba 'phyi nas/ dkar po'i chos ma shes nas/ des me tog ut+pa la lnga phul nas/ mya ngan las mi 'da' bar gsol ba btab pas/lo gnyis de'i ngor bzhugs nas/ brgyad cu rtsa gnyis la mya ngan las 'das te/ tshe la dbang thob pas 'chi bdag gi bdud bcom mo/ /chos skus bdud bcom pa ni/ lha'i bu'i bdud dang / nyon mongs pa'i bdud bcom pa 'dra'o/ / phung po'i bdud bcom pa ni zag bcas kyi dngos po thams cad 'gags pa'o/ /chos sku la 'gag pa med pas 'chi bdag gi bdud bcom pa'o/ /ldan zhes pa ni/ dbang phyug dang ni gzugs bzang dang / /dpal dang grags dang ye shes dang / /brtson 'grus phun sum tshogs pa ste//drug po de la ldan zhes bya/ /dbang phyug ces pa ni/ chos kyi dbyings kyi ye shes la bya ste/ dag pa'i khams dang / ma dag pa'i khams gnyis las/ ma dag pa'i khams ni so so'i skye bo'i chos nyid de/ de la dmigs nas bsgoms na thun mong dang / thun mong ma yin pa'i yon tan skyed pa la dbang byed pas dbang phyug ces bya'o//dag pa'i khams zhes bya ba ni phyug po nor la dbang byed pa bzhin de bzhin gshegs pa'i rgyud la ldan pa'i yon tan la dbang sbyor ba'i tshul du dbang byed pas na dbang phyug ces bya'o/ /gzugs bzang zhes pa ni/me long lta bu'i ye shes la bya ste/ /'bras bu'i ming rgyu la btags nas/ /gzugs bzang zhes bya'o/ /gzugs bzang ba ni mtshan sum cu rtsa gnyis dang / dpe byad bzang po brgyad cus 'gro ba sems can rnams la mos pa ji lta ba bzhin du/ sangs rgyas kyi sku nges par bstan par mdzad pa ste/kha cig gis de bzhin gshegs pa la kha dog sngon por mthong / /kha cig gis kha dog ser por mthong / 'gro ba gang la gang 'dul ba de dang der snang ba de ni me long lta bu'i ye shes kyi dbang gis byung bas na/ de la gzugs bzang zhes bya'o/ /de la gzugs bzang zhes btags pa'i dgos pa ni/sems can la mtshan sum cu rtsa gnyis dang / dpe byad bzang po brgyad cur snang ba de ni me long lta bu'i ye shes kyi dbang gis 'byung bar shes par dgongs so/ /dpal dang grags dang zhes bya ba ni nyon mongs pa can gyi yid gnas gyur pa mnyam pa nyid kyi ye shes la bya ba ste/byang chub sems dpa' sa dang po mthong nas chos thams cad la bdag med par rtogs pa'i dus su/ bdag dang sems can thams cad la mnyam pa nyid kyi shes pa thob nas/ bdag sdug bsngal las thar bar 'dod cing bde ba 'dod pa de bzhin du/sems can thams cad kyi sdug bsngal bsal la/ bde ba la dgod pas na bde ba dang phan pa skyed par byed pa'i rgyu yin pas na dpal zhes bya'o/ /bdag dang gzhan mnyam por byed pas skyes bu 'di 'dra ba'i 'jig rten gyi khams na med do zhes phyogs bcur snyan pa chen po dang /grags pa phun sum tshogs pa 'byung bas na 'di la grags zhes brjod do/ /'bras bu'i ming rgyu la btags so/ /ye shes zhes bya ba ni so sor rtog pa'i ye shes so/ /brtson 'grus phun sum tshogs pa zhes bya ba ni bya ba grub pa'i ye shes la bya ste/ 'jig rten gyi khams thams cad du sprul pa rnam pa sna tshogs pa dpag tu med pa bsam gyis mi khyab pas sems can gyi don mdzad de/des na/ byang thang chen po'i me dang 'dra/ /gsung ngo / /de drug gi skal ba dang ldan pas so/ /'das zhes pa ni 'khor ba dang mya ngan las 'das nas mi gnas pa'i mya ngan las 'das pa chen pos chos kyi sku thugs su chud pa dang /snying rje chen pos sems can la chags pas phung po lhag med du mya ngan las mi 'da'o/ /shes rab chen pos sems can gyi don byed cing 'khor ba na gnas kyang de'i nyes pas mi gos te/ dper na pad+ma 'dam la gnas kyang de yis mi gos pa dang 'dra'o//de gnyis yod kyang gnas khyad par du 'phags pa cig yod na gsung med na mi gsung pa na/ de de'i rgyu ru gsungs so/ /gnas gang du thos zhes 'dri na/ rdo rje la bzhugs te/ zhes gsungs so/ /de nas gnas ni rdo rje'i gdan byang chub kyi shing drung ngo //de gsum ka yod kyang rgyud bshad pa'i snod du rung ba cig med na mi gsung ngo / /yod na gsung bas na/ de de'i rgyu ru gsung ngo / /gang dang lhan cig thos zhes 'dri na/ bdag gis thos zhes gsung ngo / /'khor ni bdud btul ba'i dus kyi tshe na yod pa'i phyag na rdo rje la sogs pa/phyogs bcu'i byang chub sems dpa' rnams dang / lha ma srin sde brgyad la sogs pa'o/ /de bzhi ka yod kyang chos phun sum tshogs pa/ thog mar dge ba/ bar du dge ba/ tha mar dge ba/ /don bzang po/ /tshig 'bru bzang po/ /ma 'dres pa/ yongs su dag pa/yongs su byang ba/ yongs su rdzogs pa/ gsal ba/ tshangs par spyod pa la sogs pa cig yod na gsung / med na mi gsung bas na de'i rgyu ru gsungs so/ /gleng gzhi gsungs pa'i dgos pa ni/ phyi rabs kyi gang zag rnams 'jug par 'gyur ba'i dgos pa'o/ / rgyud 'byung ba'i rgyu gleng gzhi phun sum tshogs pa rkyen gleng slong ba dang bcas pa bshad zin to// //da ni rgyud dngos ston te/ de la bzhi ste/ bsnyen sgrub rnam pa gnyis kyi sngon du 'gro ba'i cho ga yan lag drug gis bdag nyid ltar ji ltar bskyed pa'i tshul bstan pa dang / bsnyen sgrub gang gi don du bya ba'i gdul bya bstan pa dang / bsnyen pa'i dus su mchog tu sgra la gnas pa'i bsam gtan la bcom ldan 'das dgyes pas/ sgra la gnas pa'i bsam gtan bya bar bstan pa dang / sgrub pa'i dus su bum pa'i mtshan nyid bzlas brjod bya ba'i grangs nges pas khrus bya ba'i gang zag nye bar mtshon te bstan pa'o//de'i dang po las dpyod dmigs drug yod de skabs skabs su ngo sprad do/ /gsang sngags spyi'i rnam par gzhag pa cig bshad de/ bsam gtan phyi ma las/ lha yi sku yi gnas de la/ dang po kho nar mchod nas ni//rnal 'byor gnas bcas shes rab can/ /bde gshegs mdun du bsams na ni/ /phyi nas yan lag rnam par grol/ /mi 'byed 'byed pa rnam par spangs/ /phra ba mi g.yo gsal ba ste/ /blo yi spyod pa mdun na gnas/ /bdag nyid 'di 'dra bzhag nas ni//gsang sngags rnam par shes pas bsgos/ /bsdams nas ting nge 'dzin la gnas/ /srog dang rtsol ba rab tu bsdus/ /gnyid spangs nas ni rnam par bsam/ /zhes gsungs so/ /de yang / lha yi drung nas mchod nas ni/ /bya ba'i bar tshig rkang gnyis kyis tshogs bsags pa bstan to//rnal 'byor bya ba bsams nas ni/ /tshig rkang gnyis kyis ni/ 'dug thabs dang gsol ba btab ste/ phyi nas bya ba nas bzhag nas ni bya ba'i bar gyis tshig rkang lnga las mi rtogs pa'i lha bsgom pa bstan to/ /gsang sngags rnam par shes pas bsgos//zhes pa ni bdag dang lha'i de kho na nyid bsre ba dang / lha'i gzhi bsgom pa bstan to/ /bsdams nas ting nge 'dzin la gnas/ /zhes pa nas/ rnam par bsam bya ba'i tshig rkang pa gsum gyis ni ting nge 'dzin gyi lha bsgom pa bstan to/ /sangs rgyas gsang sngags ni de de ltar gsal bar bsam gtan phyi ma'i TI kar gsung ngo //gzungs 'di dang sbyar na/ bcom ldan 'das bya ba nas/ byin gyis brlabs nas zhes pas lha drug sgom pa'i sngon du gsol ba btab pa bstan to/ /rdo rje'i ting nge 'dzin la snyoms par zhugs so zhes pas rnam bar mi rtog pa'i lha bsgom pa bstan to//de nas lag na rdo rje zhes pa nas/ rdo rje khro bo las byung ba zhes pas stong pa nyid las sdang ba'i thabs bstan to/ /rdo rje snying pos zhes pa nas/ lag na rdo rjes rab tu smras zhes pas lha drug gi yon tan bstan to/ /na mo rat+na tra yA ya bya ba nas/a mr-i te hUM phaT ces bya ba'i bar du/ sgra'i lha dang yi ge'i lha bstan to/ /sdig pa thams cad byang byas nas/ /bya ba nas/ dpal kun gyis ni legs par brgyan/ /bya bas gzugs kyi lha bsgom pa bstan to/ /phyag rgya ting nge 'dzin gyi lha ni spyi'i rgyud las shes par bya'o/ / de las gzungs 'di'i mngon rtogs kyi rim pa nyams su blang ba ni dang por phyi nang gi khrus rnam pa gnyis byas la/ ku sha'i steng du stan bde ba la nye bar 'dug ste/ de'i char gtogs pa 'thor 'thung dang nye reg byas la/ bdag nyid skad cig gis lha gang rung du bskyed la/ mig gnyis su raM las nyi ma'i dkyil 'khor re bsams la/de'i steng du hUM las ye shes kyi 'od zer can re re bsams la/ de las 'od zer 'phros pas bgegs thams cad bsregs par bsams la/ ngag tu hUM ring brjod cing bgegs thams cad bskrad cing mtshams bcad pa dang /nang gi khrus byang chub mchog tu sems bskyed pa la sogs pa byas la/ bdag nyid lha'i sku phyag rgya chen por bsgom par bya'o/ /de yang dang por kr-i ya don gyi lha drug bsgom par bya ste/ de la dang por bdag nyid las kyi rdo rje sems dpa' 'am/ yang na tha mal pa'i lus sam/lha gang rung cig tu mos pa byas la/ mdun gyi nam mkha' la bcom ldan 'das shAkya thub pa bdud btul nas sa gnon gyi phyag rgya can/ seng ge'i khri la bzhugs pa cig tu skad cig gis bsams la/ bcom ldan 'das kyis bdag gi lus rdo rjer byin gyis brlab tu gsol zhes brjod pas/des kyang bdag nyid kyi lus stong par byin gyis brlabs par bsams te/ dngos po thams cad gzung ba med pa/ 'dzin pa med pa/ spros pa thams cad dang bral ba nam mkha' lta bur bsam mo/ /de nas stong pa nyid zhi ba phyogs gcig pa 'ba' zhig gis 'gro ba'i don bya bar mi nus pa dang /nyan thos dang rang rgyal ba'i byang chub dang khyad par med par song ste dogs nas/ bcom ldan 'das dang byang chub sems dpa'i 'od zer ram phyag gis reg nas mngon sum du bslang ngam/ yang na de gnyis ting nge 'dzin la zhugs pa'i dbang gis/bdag nyid stong pa nyid las bslang ngo / /gal te skur bslang ngam zhe na/ ma yin te/ stong pa nyid kyi sems rtse gcig pa'i rnam pa ma dor ba la/ stong pa nyid kyi sems dpyod pa dang bcas pa cig tu bslang ngo / /ji ltar dpyod na bdag gi de kho na nyid ni/ gzung ba med pa/ 'dzin pa med pa/ spros pa thams cad dang bral bar 'dug na/ lha'i de kho na nyid ji ltar 'dug par dpyad pas/ lha'i de kho na nyid de yang don dam par spros pa thams cad dang bral bar 'dug par shes so/ /de ltar shes pas stong pa nyid kyi rnam pa la dbye ba med las gcig cing tha mi dad pa med pa yin/de med tsam na bdag dang lha'i de kho na nyid de yang gcig cing tha mi dad par 'dug /de ltar 'dug tsa na bdag gi de kho na nyid gang yin pa de lha'i de kho na nyid yin la/ lha'i de kho na nyid gang yin pa de bdag gi de kho na nyid yin par shes so/ /de shes pas rang dang lha'i de kho na nyid gcig cing tha mi dad par ro gcig tu gyur par bsam mo//gcig cing tha mi dad par bsams pa de las yon tan gang thob na/ lha'i de kho na nyid la rang gi phun sum tshogs pa rdo rje'i chos bdun dang / gzhan gyi phun sum tshogs pa de mdzad pa rnam pa bzhi yod pa de dag gi de kho na nyid la bsgos nas ldan par bsam mo//bdag dang lha'i de kho na nyid gcig tu bsres pas dgos pa gnyis 'byung ste/ bdag dang lha ru tha dad pa'i 'du shes kyang 'gog la/ bdag nyid kyi lus sems byin rlabs can cig tu byas te gzhag go/ /rnam par mi rtog pa'i lha sgom pa rdzogs so// //da ni sgra'i lha bsgom par bya ste/ bdag nyid kyi sems stong pa nyid la gnas pa'i rjes/ skad cig ma gnyis pa la/ dper na nam mkha' stong pa la glo bur du 'brug gi sgra rnam pa drag po grag pa ltar bsams te/ rang gi sems nyid na mo rat+na tra yA ya/bya ba nas a mr-i te hUM phaT bya ba'i bar du sgra'i rnam par grag par bsam mo/ /sgra'i lha bsgom pa rdzogs so// //de nas rang gi sems yi ge'i rnam par gsal bar snang ba la/ kun rdzob byang chub sems zla ba'i dkyil 'khor cig chags par bsam mo/ / dper na gser phye ma dngul chu la chags pa bzhin no/ /de yang phyi nas bltas na nang gsal ba/ nang nas bltas na phyi gsal ba'i gzugs brnyan gyi rnam par blta'o/ /yi ge'i lha bsgom pa rdzogs so// //de nas zla ba'i steng du gzungs las 'od zer 'phros pas/ de'i sna la bcom ldan 'das rdo rje rnam par 'joms pa dpag tu med pa/nam mkha'i mtha' gtugs pa khengs pa byung ste/ mdzad pa rnam pa bzhi'i sgo nas 'gro ba rigs drug gi sems can rnams kyi gnas su 'phros pas/ so so'i las kyi sdig sgrib sbyangs/ sdug bsngal med par byas te thar pa dang thams cad mkhyen pa la bkod/phyogs bcu'i sangs rgyas dang / byang chub sems dpa' rnams la mchod pa'i sprin chen pos mchod/ thugs dam gyi rgyud bskul/ bsod nams dang ye shes kyi tshogs gnyis bsags nas slar tshur 'dus nas zla ba'i steng gi gzungs la thim/gzungs zla ba dang bcas pa yongs su gyur pa las bdag nyid bcom ldan 'das dpal rdo rje rnam par 'joms pa/ zhal gcig pa/ phyag gnyis pa/ sku mdog sngon po/ /phyag g.yas kyis rdo rje rgya gram las rwa phyogs gcig med pa bsnams pa thugs kar 'dzin pa/g.yon pa rdo rje khu tshur dkur bsten pa/ cung zad khro ba la sgeg cing 'gying bag dang bcas pa/ dbu rgyan rtse phran dang / rgyan thams cad kyis brgyan pa/ rin po che'i khri stengs na rgyal po rol pa'i tshul du bzhugs par bsgom mo/ /gzungs kyi lha bsgom pa rdzogs so// //de nas lag pa gnyis thal mo sbyar te/ srin lag gnyis nang du bcug la/ gung mo gnyis bsgreng la/ mdzub mo gnyis gung mo'i rgyab tu nas gang tsam gyis ma 'byar bar byas la/ mthe bong gnyis dang mthe'u chung gnyis bsgreng ste/ khro bo'i rdo rje rtse lnga pa ltar byas la/oM badzra dz+wa lA ya twa zhes brjod cing / snying ga dang / lkog ma dang / spyi bo dang / dpung pa g.yas g.yon du gtugs te byin gyis brlab bo/ /de ltar byas nas/ sngar kun brtags kyi lha yin pa la/ des gzhan dbang gi lha rgyu rkyen las grub pa'i lha dngos gcig tu bsam mo//phyag rgya'i lha rdzogs so// //de nas sku mdog dang phyag mtshan gsal bar yang dang yang du bsgom pa ni/ ting nge 'dzin gyi lha'o/ /ting nge 'dzin gyi lha bsgom pa rdzogs so// //de ltar na kr-i ya lus kyi lha drug bsgom pa rdzogs so// //yang na 'di ltar bya ste/ phyag rgya zhes bya ba ni/ mtshan ma yang zer la/ lag pa'i 'du byed la yang phyag rgya zer te/ de ltar gnyis su yod pa las/ 'di'i skabs su mtshan ma'i dbang du byas nas phyag rgya'i lha lnga la gnyis pa'i skabs su bsgom par bya ste/ bdag dang lha'i de kho na nyid bsre ba yan chad 'dra'o/ /bdag dang lha'i de kho na nyid bsres pa'i rjes la/ bdag nyid kyi sems don dam par byang chub kyi sems las/ kun rdzob byang chub kyi sems zla ba'i dkyil 'khor du bsam mo/ /de'i steng du yi ge hUM mthing gcig bsam/ de las 'od zer 'phros 'dus pa las/khro bo rdo rje rtse lnga pa rtse mo gyes pa nag po zhig tu bsam mo/ /de'i lte ba la zla ba'i dkyil 'khor gyi steng du gzungs rings sam/ yang snying ngam/ rigs kyi snying po bkod la/ de nas bdag nyid kyi sems sgra'i rnam par grag par bsams te/ nam mkha' la na mo rat+na tra yA ya bya ba nas/ a mr-i te hUM phaT bya ba'i bar du/ sgra'i rnam par grag par bsam mo/ /sgra'i lha bsgom pa rdzogs so// //de'i rjes la bdag nyid kyi sems de'i lte ba'i steng na gzungs sngags yi ge'i rnam par gsal bar snang ba ni yi ge'i lha'o//gzungs kyi lha gong dang 'dra'o/ /bar 'dir yang / phyag rgya gnas lngar byin gyis brlab/ /gsung ngo / /de ltar byas pas/ lha bdun du zhe na ma yin te phyag rgyar ngo bo gcig pa'i phyir ro/ /rnam par rtog pa'i lha yang snga ma dang 'dra'o/ /phyag rgya dang ting nge 'dzin gyi lha ni/spyi'i rgyud las kha bskangs pa las/ bye brag gi rgyud 'di nas ni ma bshad do/ /kr-i ya'i don gyi lugs rdzogs so// //yang 'di ltar bya ste/ 'di ni shin tu yang legs te/ bla ma yang gsung / rang gi 'dod pa dang yang mthun par 'dug pas na/ des na 'di ltar bsgom par bya ste/bcom ldan 'das skad cig gis mdun gyi nam mkhar bsams te/ rang yi dam lha gang yin pa de'i lus su byin gyis rlob par gsol ba gdab par bya'o/ /de la gsol ba gdab pa ni 'di yin te/ bcom ldan 'das bdag gi lus lha gang yang rung par byin gyis brlab tu gsol byas la/snying ga dang ngag dang / mig dang / dpral ba dang / spyi bor a dang / b+hi dang / ra dang / hUM dang / khaM ste/ dpa' bo 'bru lngar byin gyis brlab par bya'o/ /yang na oM AHhUM gsum gyis byin gyis brlab par byas nas/ bdag nyid kyi lus dang lha ru dbyer mi phyed pa cig tu bsam mo//yang na rdo rje lus can nam/ mi chod pa la sogs pa'i yon tan dang ldan par bsam mo/ /byin rlabs dang po ni bya ba'i rgyud kyi lugs so/ /de ltar byas nas bdag nyid lha gang yang rung ba'i thugs kar zla ba'i dkyil 'khor cig bsam/de'i steng du hUM mthing nag cig bsam/ de las 'od zer 'phros 'dus pa las/ khro bo'i rdo rje rtse lnga pa gdengs pa nag po cig tu bsam mo/ /de'i lte ba la zla ba'i steng du sa bon gyi yi ge bkod la/ khro bo'i rdo rje de la dmigs pa rtse gcig tu sems gtad de cung zhig mnyam par gzhag pa de ni rdo rje'i ting nge 'dzin to//de nas rdo rje'i ting nge 'dzin la snyoms par zhugs so zhes gsungs so/ /'o na gal te bdag nyid lha gzhan zhig tu bsgoms nas/ mdun du lha gzhan zhig bsgoms nas bzlas brjod byed pa mi 'gal lam zhe na/ de ni 'gal ba med de/mi g.yo ba'i rtog pa las kyang bdag nyid khro bo mi g.yo bar bsgoms la/ mdun du shAkya thub pa bsgoms la/ de gnyis kyi thugs kar yi ge 'bru bcu pa'i sngags bkod la bzlas brjod bya'o zhes gsungs pa dang / ngan song sbyong ba'i rgyud las kyang bdag nyid yi ge ba las shAkya thub par bsgoms la/mdun du ngan song yongs su sbyong ba'i gzi brjid kyi rgyal po bsgoms la/ de'i thugs kar zla ba'i dkyil 'khor la sho d+ha na la sogs pa'i sngags bsams la/ 'od zer 'phro 'dus bzlas brjod bya'o zhes gsungs pa dang /gces pa bsdus pa las kyang cho ga 'di bzhin du rdzogs par bya bar mi bden na yang / rang gi lha nyid kyi ting nge 'dzin bsgyur ba las dgongs pa mnyam par bya ste/ mchod rten dang mchod pa'i yo byad la sogs pa thams cad/ rang bzhin gyis chos kyi dbyings kyi rnam par dgongs te/mchod rten la yang cho ga rgyas par bya ba dang 'gal ba med do zhes gsungs pa dang 'dra bar 'gal ba med do/ /de ltar bdag gi cho ga yan lag drug gis lhar bskyed pa rdzogs nas/ gzhal yas khang bskyed pa dang bum pa'i nang du gdan bskyed pa dang / ye shes sems dpa' spyan drang ba dang /de nas lha'i phyi nas 'ongs pa'i bgegs dang kI li kI lA'i sngags kyis bskrad pa dang / rig pas mnyes par bya ba'i phyir dam tshig gi phyag rgya bstan pa dang / gdan bstan pa dang / bye brag tu spyan drangs pa ma 'khrul bar bya ba'i phyir nyid kyi rtsa ba'i phyag rgya bstan pa dang /de nas mchod pa rnams rim pa bzhin du dbul ba dang / de nas bgegs dang phyogs skyong la gtor ma byin nas/ de nas bzlas pa byas te/ bsnyen pa'i dus su sgra la gnas pa'i bsam gtan bya'o/ /sgrub pa'i dus su bzlas brjod dmigs pa gsum dang /yan lag bzhis bya'o/ /de yang nor bu lag pa g.yas pas blangs la/ snyim par bcug la/ bdud rtsi thab sbyor ba'i sngags bzlas la/ de'i 'og tu yum gyi sngags bzlas so/ /nor bu re re nas drang zhing mgo mjug tu yang phyag bya'o/ /rang gi snying ga na gnas pa'i zla ba'i dkyil 'khor dang /lha'i thugs ka'i zla ba'i dkyil 'khor la/ rang gis bzlas par bya'o/ /sngags kyi yi ge rim pa bzhin du bkod nas/ mngon sum dang 'dra bar bltas te/ /rdo rje'i tshig gam/ shu bu'i sbyor bas/ /ha cang mi myur mi dal bar sngags kyi yi ge brjod cing bzlas brjod bya'o//de yang rtsa ba'i rgyud las 'di skad ces/ /blo la skyon med byas nas su/ /sngags kyi yi ge dag pa la/ /mnyam par gzhag pas rtse gcig tu/ /bzlas brjod dus gsum dag tu bya/ /zhes gsungs so/ /de la 'di ni tshig yin te/ /so dang mchu ni legs sbyar te/lce rtse ha cang mi bskyod par/ /sgra spangs pa ni rdo rje'i tshig /cho ga kun la sbyar bar bya'o/ /shu bu'i bzlas brjod ni/ /'di ltar bdag nyid sngags kyi yi ge 'don pa na/ drung na 'dug pa sus kyang mi thos tsam du bya'o/ /rtog pa ngan pa rnams bsal te/ / yid kyis gsang sngags mtshan nyid ni/ /yang nas yang du mngon bsams te/ /mkhas pas bzlas brjod brtsam par bya/ /bzlas brjod byed tshe mi dal mi myur zhing / /sgra che ma yin ha cang chung ba'ang min/ /smra bzhin ma yin gzhan du yengs bzhin min/ /gug skyed klad kor tsheg drag nyams par min//tshul ni de ltar byas na yon tan ni/ /bzlas brjod me la tshul khrims rlung gis spar/ /brtson 'grus chen po'i me lces bskal pa'i sdig dpung bsreg /bskal pa grangs med 'das pa'i sngon rol nas/ /mtshams med lnga la sogs te mi dge bcu spyad pa'i//sdig pa gang yin bzlas brjod byas pas 'byang bar byed/ /ces 'byung ngo / /gsang sngags dngos su bdag nyid 'don kyang / /lha'i skus 'don par bsam mo/ /bzlas brjod tshar re zhing spro bsdus sems can gyi don byed cing bzlas so/ /yang na rdo rje'i lte ba'i sa bon las//'od zer kha dog lnga dang lha'i sku dpag tu med cing bsam gyis mi khyab par spros pas/ bgegs dang log 'dren thams cad dang / mngon par zhen pa thams cad bsregs par bsam zhing lha'i sku de tsho'i zhal nas gsang sngags 'don tsam na/ de rnams kyi rna bar rgyob rgyob sod sod zer bar thos par bsam mo/ /de ltar bzlas brjod zin nas/ bstod pa'i rgyal po gang yang rung bas bstod do/ /de nas khrus la sogs pa khrus kyi cho ga las shes par bya'o/ /de nas ye shes sems dpa' gshegs su gsol/ rang lha'i nga rgyal gyis gnas par bya'o//spyi rgyud thams cad bsgom pa'i lugs rdzogs so// //spyi'i rgyud kyi rnam par gzhag pa dang / mngon rtogs lam gyi rim pa rdzogs so// //dang por bdag nyid chos drug gis lhar bskyed pa'i sngon du ji ltar byin gyis brlabs pa'i gsol ba gdab pa'i thabs bstan pa ni/bcom ldan 'das zhes pa ni/ mtshan gyi don gyi skabs su bshad pa dang 'dra'o/ /rdo rje la bzhugs zhes pa ni/ de gshegs pa'i gnas de la rdo rje zhes pa ni/ dper na rdo rje pha lam la/ 'byung ba chen po lngas gnod par bya bar mi nus pa de bzhin du de la me bdun chu gcig gis bshigs par mi nus pas na/rdo rje zhes gsungs so/ /rdo rje la bzhugs te zhes bya ba ni/ kr-i ya spyi'i rgyud las bzhugs tshul gsum ste/ bkra shis pa'i skyil krung dang / pad+ma'i skyil krung dang / rdo rje'i skyil krung dang gsum las 'di ni rdo rje'i skyil krung du bzhugs pa'o//yang na rdo rje la bzhugs te zhes bya ba ni/ bzhugs pa rnam pa bzhi ste/ spyod lam gyis bzhugs pa dang / 'chad pas bzhugs pa dang / snyoms par 'jug pas bzhugs pa dang / nang du yang dag 'jog gis bzhugs pa'o//sku'i phrin las su bgrangs pa gang yang rung ste/ de dag thams cad ni spyod lam gyis bzhugs pa'o/ /gsung gi phrin las gang ci yang rung ba de dag thams cad ni chos 'chad pas bzhugs pa'o/ /thugs kyi phrin las gang ci yang rung ba de dag thams cad ni de dag las bzhugs pa gnyis te/rtag tu mnyam par bzhugs pa'i phyir ting nge 'dzin dang / snyoms par 'jug pa'i bzhugs pa'o/ /nang du yang dag 'jog gis bzhugs pa ni/ thugs rje chen pos 'jig rten la gzigs pa dang / lha la sogs pa 'ong ba ni nang du yang dag 'jog gis bzhugs pa'o zhes pa ni gdan de la bzhugs te/gzungs 'dis bdud btul nas chos kyi 'khor lo bskor ba la sogs pa byed ces pa'i don to/ /bdud ji ltar btul na/ bcom ldan 'das kyis srod la bdud btul nas/ phyag g.yas pa lan gnyis su mnyam gzhag gi phyag rgyab shig ste/lan cig bdud kyi dmag byung ste/ phyag spyi bo la bskor bas ral gri me chen po mched/ rab tu mched kun tu mched pa cig tu bdud rnams kyis mthong ste bdud kyi dmag pham par byas so/ /lan cig bdud kyis ngan smras byas nas/ khyod yang dag par sangs rgyas ma yin zhing /brdzun po'i sangs rgyas yin te/ sangs rgyas pa la bskal ba grangs med pa gsum gyi bar du tshogs rnam pa gnyis kyang bsags dgos la/ sa bcu yang mthar phyin dgos so zer ro/ /de ltar byas so gsungs pas/ 'o na khyod la che bzhi dang / dpang po su yod zer/de'i tshe nga la che bzhi dang dpang po sa chen po 'di yod ces gsungs te/ phyag g.yas pas lan cig brdabs pas/ sa gseb nas sa'i lha mo sku lte ba yan chad 'thon te/ bcom ldan 'das mad do/ /bde bar gshegs pa mad do/ /brdzun gyi sangs rgyas ma yin te/ yang dag pa'i sangs rgyas yin te/ sa chen po 'di'i steng du tshogs rnam pa gnyis kyang bsags so/ /bskal pa grangs med pa gsum gyi bar du'o/ /sa bcu yang rim gyis bgrod de/ mthar phyin par byas zer ro/ /des na bcom ldan 'das sa gnon gyi phyag rgya can cig bsam mo/ / sangs rgyas kyi mthus zhes pa ni/ byin gyi rlabs kyis so/ /lag na rdo rje zhes pa ni/ lag na rdo rje thogs pas na lag na rdo rje'o/ /de yang ye shes rnam pa lnga gsang ba'i thig les 'dzin pas na lag na rdo rjer bshad do/ /yang na lag na rdo rje zhes bya ba ni/ kun tu bzang po la gsang ba dang /ming gi dbang bskur ba'i don du/ lho phyogs kyi grong khyer chen po ru/ rin po che sna tshogs las grub pa'i gzhal yas khang chen po cig mngon par sprul te/ bcom ldan 'das rdo rje 'chang chen pos/ phyogs bcu'i de bzhin gshegs pa thams cad dang thabs cig tu mos te/phyogs bcu'i de bzhin gshegs pa'i ye shes thams cad gcig tu bsdus te/ ye shes kyi rdo rje rtse lnga pa gcig tu byin gyis brlabs te/ kun tu bzang po'i lag tu gtad pa tsam gyis gsang ba'i dbang thob ste/ de bzhin gshegs pa'i sku gsung thugs kyi gsang ba dpag tu med cing /bsam gyis mi khyab pa bstan mi dgos par dus gcig tu skad cig la rtogs pas gsang ba'i dbang thob po/ /de'i mod la brgya byin la sogs pa'i gnas su/ byang chub sems dpa' kun tu bzang po ni phyag na rdo rjer gyur to zhes bya ba'i sgra byung ste/de'i mod la de rnams kyis kyang / mchod pa'i tshogs chen po khyer nas 'ongs te/ mchod pa chen pos mchod do/ /des ni ming gi dbang thob pa'i rtags su lag tu rdo rje gtad pas kyang lag na rdo rje zhes bshad do/ /lus thams cad ces bya ba ni/ de'i dus na'o//da ltar ni sgrub pa po'am las kyi lha rdo rje sems dpa' 'am/ yi dam gyi lha gang yang rung ba rdo rjer byin gyis brlabs nas zhes pa ni stong pa nyid du byin gyis brlabs nas/ rnam par mi rtog pa'i lha bsgom mo zhes pa'i don to/ /des ni cho ga yan lag drug gis bdag nyid lhar bskyed pa'i sngon du ji ltar byin gyis rlob pa'i gsol ba gdab pa'i thabs bstan pa'o//da ni bdag gi de kho na nyid rnam par mi rtog pa'i lha bsgom pa'i zhar la 'byung ba ldang ba'i thabs dang bcas pa bstan te/ de yang rdo rje'i ting nge 'dzin la snyoms par zhugs so zhes gsungs te/zhes pa ni chos kyi sku stong pa nyid do/ /ting nge 'dzin zhes bya ba ni/ stong pa nyid kyi dmigs pa sems rtse gcig tu yang nas yang du gtod par byed pas ting nge 'dzin to/ /rdo rje'i ting nge 'dzin zhes gsungs pa ni/ stong pa nyid kyi ting nge 'dzin de la mngon par zhen pas/ dbyer mi phyed pas rdo rje'i ting nge 'dzin to/ /yang na stong pa nyid dang bdag nyid kyi yang dbyer med pas na yang rdo rje'i ting nge 'dzin to/ /de yang rdo rje'i ting nge 'dzin zhes bya ba ni/ bshad lugs dang po dang gnyis pa'i skabs su ni/ rnam par mi rtog pa'i lha bsgom pa la bya'o/ / bshad lugs tha ma'i skabs su rang lha gang rung du bskyed pa'i thugs kar zla ba'i dkyil 'khor gyi steng du/ hUM yig bltas te de 'phro 'du las khro bo'i rdo rje rtse lnga pa lte ba la hUM gis mtshan pa cig bsams la/ de la dmigs pa rtse gcig tu yang nas yang du sems gtad nas/ cung zhig mnyam par gzhag pa ni rdo rje'i ting nge 'dzin to/ /snyoms par zhugs so zhes bya ba ni stong pa nyid sgom pa'i gnas skabs na/ bying rgod kyi rnyog ma dang bral nas 'dod chags la sogs pa'i nyon mongs rnams mi 'byung bar rgya mtsho chen po ltar dang ste/ ma snyoms pa med de/snyoms par gnas so/ /de nas rdo rje'i ting nge 'dzin la snyoms par zhugs so zhes dgongs so/ /de nas zhes pa ni/ stong pa nyid bsgoms pa'i rjes de nas zhes pa'o/ /lag na rdo rje zhes pa ni/ gong dang mthun no/ /sangs rgyas kyi mthus zhes pa ni/ dngos su 'od zer ram/phyag gis reg pa'am/ se gol gyi brdas blang ba'o/ /sangs rgyas dang byang chub sems dpa' thams cad kyi byin gyi rlabs kyis zhes pa ni/ de gnyis ting nge 'dzin la snyoms par zhugs pa'i dbang ngam stobs kyis/ bdag nyid ting nge 'dzin las bslang ba'o/ /dper na sa bcu'i byang chub sems dpa' stong pa nyid kyi bde ba la chags pas/sems can gyi don bya bar mi nus pas/ phyogs bcu'i de bzhin gshegs pa rnams kyi 'od zer gyis bskul nas/ stong pa nyid las bslang nas sems can gyi don byed du bcug pa bzhin no/ /rdo rje khro bo zhes pa ni/ stong pa nyid kyi ting nge 'dzin la rdo rje khro bo zhes btags nas bshad do/ /'o na stong pa nyid de la rdo rje khro bo zhes btags pa ci'i phyir zhe na/ de ni de dang chos mthun pa yod de/ 'dogs pa'i rgyu mtshan ni 'dra ba rgyu mtshan du byas nas/ chos kyi sku stong pa nyid la rdo rje khro bo zhes bshad do/ / yang na khro bo rdo rje dngos la khro bo zhes bshad do/ /de yang dper na rdo rje rin po che pha lam des phar la ni rin po che thams cad 'bigs shing 'joms la tshur la ni gnod par mi nus pa dang / khro bo rdo rje gshin rje gshed la sogs pas kyang phar la ni dngos po dang mtshan ma'i rnam par rtog pa thams cad 'jig cing 'joms/tshur la ni gang gis kyang gnod par mi 'gyur ba bzhin du chos kyi sku stong pa nyid des kyang phar la dngos po dang / mtshan mar 'dzin pa'i mtha' dang bdag dang gzhan gyi mtha' dang / rtag pa dang chad pa'i mtha' dang / gzung ba dang 'dzin pa'i mtha' dang /yod pa dang med pa'i mtha' thams cad 'jig cing 'joms la/ tshur la ni gang chos kyi stong pa nyid la gang gis kyang bshig cing 'joms par mi nus pas na rdo rje khro bo zhes bshad do/ /de yang bshad lugs dang po'i skabs su/ stong pa nyid kyi ting nge 'dzin la rdo rje khro bo zhes bshad do//bar ba'i skabs su thugs mtshan rdo rje khro bo zhes bshad do/ /bshad lugs tha ma'i skabs su ni/ bdag nyid thugs kar yi ge hUM gi spro bsdu las/ khro bo'i rdo rje rtse gcig pa bsams la/ rdo rje khro bo zhes bshad do/ /las byung ba zhes pa ni dang po'i skabs su/de kho na nyid bsre ba la sogs pa ste/ snga ma'i stong pa nyid la mnyam par gzhag pa'i sems las/ stong pa nyid spyod pa dang bcas pa'i sems bdag dang lha'i de kho na nyid bsre ba'i sems phyi ma byung ba'o/ /bar ba'i skabs su sgra'i lha bsgom pa la sogs pa byung ba'o//tha ma'i skabs su bdag nyid kyis rdo rje'i ting nge 'dzin la snyoms par zhugs pas nye bar len pa'i rgyu byas nas/ sangs rgyas dang byang chub sems dpa'i byin gyi rlabs kyis lhan cig byed pa'i rkyen byas te khro bo rdo rje lte ba'i yi ge las/ 'od zer kha dog sna lnga pa dang / lha'i sku dpag tu med cing bsam gyis mi khyab pa nam mkha'i khams khengs pa byung ngo / /byung nas ci mdzad ce na 'phags pa mchod pa dang / sems can gyi don byed do/ /des na bdag gi de kho na nyid rnam par mi rtog pa'i lha bsgom pa/ ldang ba'i thabs dang bcas pa bshad zin to// //da ni lha drug gi yon tan rang dang gzhan gyi don phun sum tshogs pa bstan pa'i rjes la/ bdag dang lha'i de kho na nyid bsres pa las/ lha drug gi yon tan phun sum tshogs pa gang thob pa bstan te/ yon tan ni gnyis te rang gi don phun sum tshogs pa rdo rje'i chos bdun dang /gzhan gyi don phun sum tshogs pa mdzad pa rnam pa bzhi bstan pa'o/ /de yang rdo rje snying pos rab tu smras te zhes pa ni/ stong pa nyid dang snying rje dbyer med pa la bya ste/ rdo rje ni stong pa nyid do/ /snying po ni snying rje chen pos sems can la chags nas mya ngan las 'das pa'i mtha' la mi gnas pa'o//yang na snying po zhes bya ba ni/ rim pa du ma'i nang na 'dug pa la yang zer la/ 'bras bur gyur pa la yang zer la/ mchog tu gyur pa la yang zer ba las/ 'dir ni mchog tu gyur pas na snying po zhes gsungs te/ ji ltar mchog tu gyur na/ zhi bas mi thul ba'i 'gro ba rnams la/khro bo'i skur sprul nas kyang 'dul bar byed do/ /de yang rgyud las/ shin tu khro zhing gtum pa la/ /zhi bas phan par mi 'gyur te/ /shes rab thabs kyi rnal 'byor las/ /khro bor de bzhin gshegs kun mdzad/ /ces gsungs so/ /yang na mchog tu gyur pa ni/rig sngags dang gsang sngags gzhan kho na las mchog tu gyur te/ gsang sngags kyi mthu chen po 'dis ni rig sngags la sogs pa gzhan thams cad gcad pa dang / mnan par yang nus la rig sngags la sogs pa gzhan gyis gcad pa la sogs pa byas pa las kyang grol bar byed pa dang /bdag nyid la rig sngags gzhan gyis gcad pa la sogs pa bya bar mi nus pas na yang / mchog tu gyur pa'o/ /'o na rdo rje snying pos smras so/ /mi gsung bar smras te gsungs pa 'gal lam zhe na/ te zhes ni sgra rnam pa gnyis la 'jug pa las/'dir tshig gi lhag ma lus pa'i sgra yin te/ tshig gi lhag ma gang yin zhe na/ tshig gi lhag ma ni yon tan phun sum tshogs pa rnam pa gnyis ston pa'i sgra'o/ /yon tan rnam pa gnyis pa ni/ rang gi don phun sum tshogs pa rdo rje'i chos bdun dang / gzhan gyi don phun sum tshogs pa mdzad pa rnam bzhi'o//rdo rje'i chos bdun ni mi chod par bya ba nas/ thams cad du ma pham pa bya ba'i bar du'o/ /mdzad pa rnam pa bzhi ni/ drag po dang / dbang dang / rgyas pa dang / zhi ba'o/ /de'i dang po drag po'i mdzad pa ni/ sems can thams cad skrag par byed pa dang /bya ba nas/ gdon thams cad rlag par byed pa bya ba'i bar du tshig rkang brgyad kyis bstan to/ /dbang gi mdzad pa ni 'byung po thams cad 'gugs par byed pa/ rig sngags kyi las thams cad byed du 'jug pa zhes pa'i tshig rkang gnyis bstan to/ /rgyas pa'i mdzad pa ni/ma grub pa thams cad grub par byed pa bya ba nas/ rgyas pa bya ba'i tshig rkang pa bzhis bstan to/ /zhi ba'i mdzad pa ni/ sems can thams cad srung pa/ zhi bar bya ba'i bar du tshig rkang gnyis kyis bstan to/ /rmugs par byed pa dang /rengs par byed pa gnyis ni snga ma'i brgal lan gyi sgo nas bshad pa yin no/ /yang na rgol te/ gsang sngags spyi'i rgyud kyi lugs kyis rnam par mi rtog pa'i lha bsgoms pa'i rjes la/ sgra'i lha bsgom pa la sogs pa ston pa yin na/ gzungs 'di'i nang du rnam par mi rtog pa'i lha bsgoms pa'i rjes la/sgra'i lha sgom pa mi ston par/ lha drug gi yon tan phun sum tshogs pa gsungs pa ci las dgongs she na/ de ltar gsungs pa'i dgongs pa ni/ rnam par mi rtog pa'i lha de yon tan phun sum tshogs pa gnyis dang ldan bzhin du sgra'i lha/ na mo rat+na tra yA ya/bya ba la sogs pa gzhan yang yon tan phun sum tshogs pa gnyis dang ldan par shes par bya ba'i don du rnam par mi rtog pa'i lha bsgoms pa'i rjes la/ lha drug gi yon tan phun sum tshogs pa rnam pa gnyis gsungs kyi sgra'i lha/ na mo rat+na tra yA ya/ bya ba la sogs pa lha gzhan bsgom pa la sogs pa ni/de la dgongs pa'o/ /yang na bdag dang lha'i de kho na nyid bsres pa las/ lha drug la yon tan gnyis dang ldan pa de'i bdag gi de kho na nyid la ldan par shes par bya ba'i don du/ rnam par mi rtog pa'i lha bsgoms pa'i rjes la/ lha drug gi rang dang gzhan gyi yon tan rnam pa gnyis gsungs kyi/sgra'i lha la sogs pa ma gsungs pa ni/ de la dgongs pa'o/ /de la rdo rje'i chos bdun ni/ mi chod pa bya ba nas/ ma pham pa bya ba'i bar du/ tshig rkang bdun gyis bstan te/ chos kyi sku stong pa nyid de la skye ba'i sdug bsngal gyis mi gnod pas na/mi chod pa zhes gsungs so/ /rgas pa'i sdug bsngal gyis mi gnod pas na mi shigs pa zhes gsungs so/ /na ba'i sdug bsngal gyis mi gnod pas na/ bden pa zhes gsungs so/ /'chi ba'i sdug bsngal gyis mi gnod pas na sra ba zhes gsungs so/ / chos kyi sku stong pa nyid de la dus dang / gnas skabs thams cad 'khor ba dang / sdug bsngal gyis mi gnod pas na/ brtan pa zhes gsungs so/ /mtshan ma'am dngos po thams cad 'joms pas na/ thams cad du thogs pa med pa zhes gsungs so/ /chos kyi sku stong pa nyid de la 'khor ba'i sdug bsngal gyis mi gnod pa la/dngos por lta ba'i mtshan ma thams cad 'joms pas thams cad du ma pham pa zhes gsungs so/ /des ni rang gi don phun sum tshogs pa rdo rje'i chos bdun bshad zin to/ /da ni gzhan gyi don phun sum tshogs pa bzhi'i mtshan nyid bshad par bya ste/de yang dang po drag po'i mtshan nyid bshad de/ sems can thams cad ces pa ni rgya gar gyi sgra las drangs nas/ sarba ma nu shA zhes bya ba ste/ snod kyi 'jig rten ji tsam khyab pa thams cad/ bcud kyi 'jig rten gyis kyang khyab pas skye 'gro srog gis bsdus pa'i sems can thams cad la bya'o//skrag par byed pa zhes bya ba ni/ gsang sngags bdag med kyi don ston pa 'di bsgrags pas/ sems can thams cad 'jigs pa dang / bag tsha ba dang / spu zing zhes bya ba dang / yid mi dga' ba la sogs pa byas pa'i sgo nas sangs rgyas kyi bstan pa la 'dzud do//dper na bdud rnams bstan pa la 'dzud pa'i don du/ bcom ldan 'das kyis phyag na rdo rje la bka' bsgos te/ bcom ldan 'das dang phyag na rdo rje ri rab ri'i rtse mo khong bu brtsegs pa'i nang du/ phyed krung du bzhugs pa'i zhabs g.yas pa'i mthe bong dang /smin mtshams gnyis nas/ khro bo shin tu khro zhing gtum pa gsum sprul te/ bdud kyi khang par gtang ste/ khro bo de gsum gyis ba spu'i bu ga nas 'od zer bkye ste/ de rnams kyi khang par me rab tu 'bar kun tu 'bar/ shin tu 'bar bar byas nas/ de rnams kyi lus shin tu nyam smad par byas nas/sdug bsngal chen po dang ldan par byas pas/ de rnams na re rgyu dang rkyen med par gzhal med khang 'di dag mi g.yo na/ 'di su'i rdzu 'phrul dang / cho 'phrul yin/ bdag cag gis blta gor ma chag snyam ste/ bltas pas lha'i bu de rnams la mngon par shes pa yod pas gau ta mas khang bu brtsegs pa'i gzungs gsungs pa'i cho 'phrul yin par mthong ste/gau ta ma thugs rje chen po dang ldan pa yin/ de la skyabs tshol du 'dong zer te/ gau ta ma'i drung du 'dong zer nas/ gau ta ma'i drung du phyin te/ thugs rje chen po dang ldan pa bdag bskyab tu gsol byas pas/ngas bskyab par mi nus pas phyag na rdo rje la skyabs su song zhig gsungs pa dang / de rnams kyis de'i drung du phyin te/ bdag cag bskyab tu gsol byas pas/ ngas bskyab par mi nus pas/ ngas sprul pa'i khro bo gsum yod pas/de'i drung du song shig gsungs pa dang / de gsum gyi drung du phyin pa dang / bdag cag la bskyab tu gsol zhes zhus pa dang / ngas bskyab par ga la nus kyis/ dkon mchog gsum la skyabs su song shig /sangs rgyas kyi bstan pa la bar du gcod pa mi byed par khas long shig /byang chub tu sems bskyed cig /sdug bsngal las thar par 'gyur ro/ /byas pa dang / de rnams kyis mgrin gcig tu dkon mchog gsum la skyabs su 'gro ba yang byas/ sangs rgyas kyi bstan pa la bar chad mi byed par khas blangs so/ /byang chub tu yang sems bskyed do//de ltar byas pas sdug bsngal las thar ro/ /de ltar byas pa'i sgo nas bstan pa la btsud pa bzhin du/ sems can thams cad skrag par byed pa'i sgo nas/ sems can gyi don byed do/ /yang na gsang sngags kyi mthu chen po 'di'i las sngags dang sbyar te/drag po'i las la sbyor bas na/ sems can thams cad skrag cing 'jigs pa dang / sngangs par gyur te/ dper na gcan gzan gyi rgyal pos sgra bsgrags pas/ gcan gzan phra mo thams cad skrag par byed pa lta bu'o/ /sems can thams cad 'jil bar byed pa zhes pa ni/bdag nyid la rgyal po'i chad pa dang / bdud dang log 'dren gyi gnod pa byed du 'ong ba'i sbyor ba brtsams pa thams cad rtse 'jil bar byed pa'o/ /yang na gsang sngags kyi mthu chen po 'di'i las sngags dang sbyar te/ drag po'i las sbyor byas na/ rgyal po'i chad pa la sogs pa dang /bdud dang mu stegs kyi don la bya bar sems pa'i shes pa thams cad phyir nur nas/ shes pa rtse 'jil bar 'gyur ba ste/ dper na de bzhin gshegs pa'i 'od kyis lha rnams kyi 'od mog mog por byas te/ rtse 'jil ba lta bu'am/ 'khor los sgyur ba'i rgyal pos dmag gi dpung 'joms pa lta bu'o//rig sngags thams cad ces pa ni/ lha mo'i sku mdog dang / gzugs dang / dbyibs kyi lha dang / de'i ston pa'i sgra dang / phyag rgya la sogs pa'o/ /gcod par byed pa zhes pa ni/ de sbyin sreg gi sgo nas gcod par byed pa ste/ de yang gzhan gyi rig sngags gro ga'am shing shun la bris te/thab khung gru gsum mtha' ma zlum po byas la/ de'i nang du tsher ma can gyi shing la me btang la/ me lha shin tu khro ba cig spyan drangs te/ de la gzhan gyi rig sngags la sogs pa phul la/ de'i thugs kar lha'i pho brang bcas la/me lha'i kha na mar la brgyud nas lha la phul te/ gzhan gyi rig sngags dbul po'i ral gris gtubs te/ dug chur bcug nas me ru bsreg cing / oM badzra dz+wA lA na yA che ge mo'i rig sngags ts+tshin+da ts+tshin+da mA ra ya hUM phaT/ ces brjod cing me'i nang du bsreg go/ /de ltar lan nyi shu rtsa gcig gam/lan brgya rtsa brgyad du sbyin sreg gi las byas na/ gzhan gyi rig sngags gcod par 'gyur ro/ /yang na gsang sngags kyi mthu chen po 'di'i las sngags dang sbyar te/ drag po'i las sbyin sreg byas na/ gang gcad par bya ba'i 'dod pa de thams cad nye bar grub par 'gyur te dper na/skyes bus mtshon rnon po la legs par ma bzung ba lta bu'o/ /rig sngags thams cad ces pa ni/ gong dang 'dra'o/ /gnod par byed ba zhes pa ni/ rig sngags mnan par bya ba'i don te/ /de yang rig sngags gro ga la sogs pa la ldong ros kyis bris te/ dril la skud pa ser pos dkris te/rdo leb gnyis la rdo rje rgya gram re re bris la/ de gnyis kyi bar du bcug la/ ri rab lcog brgyad dang bcas pa cig gis mnan zhing sngags kyi mjug la/ che ge mo'i rig sngags staM b+ha ya staM b+ha ya nan hUM phaT/ ces brjod cing mnan na/ rig sngags thams cad mnan par 'gyur ro//de gnyis ni mtshon pa tsam yin te/ bcings pa dang / gdab par yang bya'o gsung ngo / /rig sngags bcing bar 'dod na/ bu mo gzhon nu ma dam tshig dang ldan pa/ grong ba'i chos kyis ma phog pa cig la/ tshon sna lnga'i skud pa 'khal du bcug la/gcig tu bsgrims te/ rdo rje'i mdud pa brgyab cing / gzhan gyi rig sngags bris pa de ru gzhug cing / sngags kyi mjug tu che ge mo'i rig sngags ban+d+ha ban+d+ha hUM phaT ces brjod cing / mdud pa'i bar du bcug pas rig sngags thams cad bcings par 'gyur ro/ / phur bus gdab par 'dod na gzhan gyi rig sngags kyi gzugs spra tshil la byas te/ de'i snying ga la sogs pa'i gnas rnams su phur bus gzugs te/ sngags kyi mjug la che ge mo lha'i gzugs kI li kI lA ya hUM phaT ces brjod cing snying gar btsugs na rig sngags thams cad phur bus btab par 'gyur ro//rig sngags ni nye bar mtshon pa tsam du zad de/ 'jig rten dang 'jig rten las 'das pa'i rig sngags dang / gsang sngags dang / sgrub pa po'i ngag dang lha'i gzugs la sogs pa thams cad la yang gcad pa la sogs pa bya gsung ngo / / yang na gsang sngags kyi mthu chen po 'di'i las sngags dang sbyar te mnan pa'i las byas na/ gang mnan par 'dod pa de thams cad nye bar mnan par 'gyur te/ dper na ri rab lta bu'o/ /las thams cad ces pa ni phrin las rnam pa bzhi'o/ /'joms par byed pa zhes pa ni/ gsang sngags la yod pa'i yon tan gyis bdag la gnod pa byed du 'ong ba rnams 'jig par byed do/ /yang na gsang sngags kyi mthu chen po 'di'i las sngags dang sbyar te drag po'i las sbyor byas na/ mi ma yin gyi gnod pa gang 'joms par 'dod pa de thams cad nges par 'joms par byed pa ste/dper na chom rkun gyi rtsar blta bu'o/ /gzhan gyi las thams cad 'jig par byed pa zhes pa ni/ sgrub pa po la yod pa'i yon tan gyis/ /bskrad pa tsam dang rdo rjes byabs pa tsam gyis/ bdag nyid bcing pa la sogs pa thams cad kyis mi tshugs pas na/ gzhan gyi las thams cad 'jig par byed pa zhes gsungs so/ /yang na gsang sngags kyi mthu chen po 'di'i/ las sngags dang sbyar te drag po'i las sbyor byas na sgrub pa po gzhan gyi las thams cad 'jig par 'gyur te/ dper na 'dam bu'i khyim la glang po ches 'jig par 'gyur ba lta bu'o//gdon thams cad ces pa ni/ gdon chen po bco brgyad la sogs pa'o/ /rlag par byed pa zhes pa ni bdag nyid la gnod par byed du 'ong ba thams cad 'dis 'joms par byed pa'o/ /yang na gsang sngags kyi mthu chen po 'di las sngags dang sbyar te/ drag po'i las sbyor byas na bi nA ya ka la sogs pa'i gdon thams cad la gsad pa'i las byas na/nges par lus ngag rdul phran bzhin du brlag par 'gyur te/ dper na grong khyer chen po la me shor ba lta bu'o/ /gdon thams cad ces pa ni grong gi tshe'o/ /thar bar byed ces pa ni/ gang zag 'ga' zhig la gdon de tshos brlabs pa yin na/'di'i bsnyen pa sngon du song bas 'di'i dkyil 'khor byas te/ phyag na rdo rje'i sku gzugs kyi drung du khrus kyi cho ga 'di byas te/ bskrad pa tsam dang / rdo rje byabs pa tsam gyis thar bar 'gyur ro/ /yang na gsang sngags kyi mthu chen po 'di'i/las sngags dang sbyar te/ drag po'i las sbyor byas na/ bskrad pa tsam dang / rdo rjes byabs pa'i las byas na gang gdon gyis zin pa de las nges par thar bar 'gyur te/ dper na btson ra dang / khri mon dang / lcags sgrog dang / shing sgrog las thar pa bzhin no/ /de tshos ni drag po'i mtshan nyid bshad zin to// //da ni dbang gi mtshan nyid bshad de/ 'byung po thams cad ces pa ni tshogs bdag glang po che'i sna can la sogs pa'o/ /thams cad ces pa ni mang po yod pas na thams cad do/ /'gugs par byed pa zhes pa ni/ dbang du bya ba'i don te/ bdag nyid nag po chen po 'gugs par 'dod na/ bdag nyid mtshan mo dur khrod du song ste/ 'bras thug po che'i gtor ma bya ste/ khyi'i sha khrag dang / ra'i sha khrag dang / dam rdzas rnams bsags te/ bdag nyid lha'i nga rgyal dang ldan par byas te/ gsang sngags kyi mjug la de'i srog snying btags te bgrangs na/de nyid a ci bya zer nas bdag nyid kyi drung du 'ong bar 'gyur ro/ /des de la khyod 'di khyer zo la/ sangs rgyas kyi bstan pa bshig pa/ dkon mchog gsum gyi dbu 'phang smod pa/ dam nyams pa'i che ge mo zhes bya ba 'di/ dkon mchog gsum gyi kha thabs su ma btang bar/dus 'di tsam las mi 'da' bar tshe'i 'du byed skul cig ces bsgo'o/ /des de'i bka' mnyan nas bran bzhin du las byed par 'gyur ro/ /de bzhin du dpal lha mo la sogs pa la yang / gtor ma dang / dam rdzas dang / srog gi snying po la sogs pa la drangs pa yang las byed par 'gyur ro//yang na gsang sngags kyi mthu chen po 'di'i las sngags dang sbyar te/ dgug pa'i las sbyor byas na nye bar lha dang / klu dang / rgyal po'i bu mo la sogs pa la yang nye bar khugs par 'gyur ba ste/ dper na 'khor los sgyur ba'i rgyal po sbyin bdag gi drung du skye bo slang mo pa rnams 'du ba lta bu'o//bkug nas ci byed ce na/ rig sngags kyi las thams cad ces pa'i phrin las rnams bstan to/ /byed du 'jug pa zhes pa ni/ bdag nyid kyi sgra la gnod sbyin dang srin po rnams kyang bran bzhin du bsgo ba ltar ngag nyan te/rang dbang med par las byed par 'gyur te/ gsad pa dang 'gugs pa la sogs pa byed du 'jug pa'o/ /yang na gsang sngags kyi mthu chen po 'di las sngags dang sbyar te/ dbang du bya ba'i las sbyor byas na/ de rnams kyis dbang du bya ba'i las thams cad nges par byed par 'gyur te/dper na 'khor los sgyur ba'i rgyal po btang snyoms su 'dug cing / bka' thob pa'i blon po las kun byed pa lta bu'o/ /des ni dbang gi mtshan nyid bshad zin to// //da ni rgyas pa'i mtshan nyid bshad par bya ste/ ma grub pa rnams zhes pa ni bdag nyid kyi yi dam gyi lha la sogs pa bsgrubs pas/gzhan gyi rig sngags bcad pa la sogs pa byas pas ma grub pa'o/ /grub par byed ces pa ni gzhan gyi rig sngags kyis bdag gi rig sngags la sogs pa gcad pa la sogs pa byas pa yin na/ bdag nyid kyi rig sngags la sogs pa/gro ga'am/ shin shun nam/ ras la gur gum mam/ gi wang gis bris te/ 'di'i bsnyen pa sngon du song bas/ 'di'i dkyil 'khor byas te/ phyag na rdo rje'i sku gzugs sngon du bzhag ste/ de la mar khu'am/ 'o mas khrus zhag bdun du nyin lan gsum mtshan lan gsum khrus byas na/rig sngags la sogs pas bcad pa la sogs pa byas pa las thar par 'gyur ro/ /de ltar byas nas bsgrubs nas ma grub na/ bdag nyid kyi lha la phur bus btab pa yin pas na/ de'i cho ga ni sa gtsang ma la lha'i sku mdog dang / phyag mtshan la sogs pa byas la/ 'di'i dkyil 'khor byas la/ phyag na rdo rje'i gzugs kyi mdun du bzhag ste/ mar khu'am/ 'o mas khrus zhag bdun du nyin lan gsum mtshan lan gsum du byas na/ phur pa btab pa las grol bar 'gyur ro/ /de byas na bsgrubs kyang ma grub na/bdag nyid kyi ngag bcing ba la sogs pa byas pa yin pas/ sgrub pa po bdag nyid kyi ngag bcings na/ 'di'i bsnyen pa sngon du song bas 'di'i dkyil 'khor byas te/ phyag na rdo rje'i sku gzugs kyi mdun du bdag nyid la khrus 'di byas pas/ bdag nyid kyi ngag bcing ba la sogs pa byas pa las grol bar 'gyur ro//gzhan gyis bdag nyid kyi rig sngags bcad pa la sogs pa byas kyang / de ltar byas nas bsgrubs na 'grub par 'gyur ro/ /yang na gsang sngags kyi mthu chen po 'di las sngags dang sbyar te rgyas pa'i las sbyor byas na/ gang ma grub pa rnams nges par 'grub par 'gyur te/ dper na 'khor los sgyur ba'i rgyal po'i skyes bu brgyad pa lta bu'o/ /grub pa rnams chud mi za bar byed pa zhes pa ni/ bdag nyid kyi lha 'ga' zhig bsgrubs pas grub pa'i sgo nas/ dngos grub ster bar byed pa ste/ mi ma yin pa la sogs pas dngos grub 'phrog tu 'ong ba la'ang /khrus kyi cho ga 'di byas pas 'phrog par mi nus so/ /des na grub pa rnams chud mi za bar byed pa zhes gsungs so/ /yang na gsang sngags kyi mthu chen po 'di las sngags dang sbyar te/ rgyas pa'i las sbyor byas na/ gang bsgrubs pa rnams chud mi za bar byed pa ste/dper na 'gro ba bzang mo lta bu'o/ /de ltar byas pas ci 'byung zhe na/ 'dod pa thams cad rab tu sbyin pa zhes gsungs te/ 'dod pa thams cad ces pa ni bdag nyid kyi bsam pa la ci dang ci 'dod pa'o/ /sbyin pa zhes pa ni thun mong dang thun mong ma yin pa'i dngos grub ster bar byed do//yang na gsang sngags kyi mthu chen po 'di las sngags dang sbyar te/ rgyas pa'i las sbyor byas na/ yid la ci dang ci 'dod pa thams cad 'byung bar 'gyur te/ dper na yid bzhin gyi nor bu rin po che lta bu'o/ /rgyas pa zhes pa ni/ 'jig rten pa dang 'jig rten las 'das pa'i phun sum tshogs pa thams cad rgyas pa'o/ /yang na gsang sngags kyi mthu chen po 'di las sngags dang sbyar te/ rgyas pa'i las sbyor byas na/ tshe dang ye shes dang / longs spyod dang / bsod nams mnyes par rgyas par 'gyur te/ dper na lha'i dri rgyas pa lta bu'o//des ni rgyas pa'i mtshan nyid bshad zin to// //da ni zhi ba'i mtshan nyid bshad par bya ste/ sems can thams cad ces pa ni/ 'gro ba rigs lnga'o/ /srung ba zhes pa ni/ de dag la mi ma yin pa 'ga' zhig gnod pa byed du 'ong ba la/ rdo rje rnam par 'joms pa 'di'i bsnyen pa sngon du song bas/dkyil 'khor byas te/ khrus dang / byab pa dang / bskrad pa dang / srung ba la sogs pa byas nas/ de la mi ma yin la sogs pas gnod pa bya bar mi nus so/ /des ni sems can thams cad srung ba zhes gsungs so/ /yang na gsang sngags kyi mthu chen po 'di las sngags dang sbyar te/zhi ba'i las sbyor dbang bskur ba dang / byab pa dang / srung ba byas na gang zag la gdon gyis mi tshugs par 'gyur te/ dper na rtsi ma g+hi'i nus pa'i mthu lta bu'o/ /zhi ba zhes pa ni/ de dag la mi ma yin pa la sogs pas gnod pa byas nas/lus sems sdug bsngal bar gyur kyang 'di'i dkyil 'khor byas la/ khrus kyi cho ga byas pas/ phyi nang gi bgegs thams cad nye bar zhi bar 'gyur ro/ /yang na gsang sngags kyi mthu chen po 'di las sngags dang sbyar te/ zhi ba'i las sbyor khrus dang /byab pa dang / srung ba dang / bskrad pa'i las byas na/ gang zag gi gdon dang / nyon mongs pa nges par zhi bar 'gyur te/ dper na tsha ba'i rims la sogs pa la/ ga pur la sogs pa'i bsil sman stsal ba lta bu'o/ /zhi ba'i mtshan nyid bshad zin to// // da ni mdzad pa rnam pa gnyis snga ma'i brgal lan du bstan pa ni/ de yang dang po'o/ /'o na 'di dag thams cad 'joms par byed na/ de la gzhan gyi rig sngags dang / gsang sngags la sogs pas/ /gnod par bya bar mi nus sam zhe na/ ma yin te/ gzhan gyi rig sngags dang / gsang sngags kyi sgo nas/ lus kyi gnod pa byed du 'ong ba'i lus kyi kun tu sbyor ba nges par byed do/ /ngag gis gyis la shog zer ba'i ngag gi kun du spyod pa rengs par byed do/ /'o na sems can la dbang thob pas gnod par bya bar mi nus sam zhe na/ sems rmugs par byed do/ / rmugs par byed na/ de'i sems nus pa khyad par can du mi 'byung ngo / /lus dang ngag rengs par byed pas na/ sems can thams cad rengs par byed pa zhes gsungs so/ /yang gsang sngags kyi mthu chen po 'di las sngags dang sbyar te rengs par byed pa'i las sbyor byas na/ nges par rengs par 'gyur ba ste/dper na mi thub pa nang du phrad pa lta bu'o/ /de la ngag rengs par bya bar 'dod pas/ pha rol po'i gzugs spra tshil la byas te/ kha tsher mas bkang ste/ ngag bcing ba'i cho ga byas na/ pha rol po'i ngag rengs nas smra ba la lan mi thebs par 'gyur ro/ /pha rol po'i lus rengs par 'dod na/rnal 'byor pa'i 'dug sa gang yin pa'i sar rang gi chag gang brkos pa'i gting nas/ sa rlon pa blangs nas gu gul nag pos bdugs la/ sngags re re la yungs kar re re bsnun par bya'o/ /de ltar sngags stong rtsa brgyad rdzogs pa dang / sa de kham phor srubs med pa'i nang du blugs la/phur bu'i dkyil du bcug la smyug ma shong tsam cig bcug la/ de'i nang du yungs kar stong la sngags de them pa dang / de shing gdug pa can gyis bskor la bsreg go/ /nang gis dang yungs kar tshig cing mdog 'gyur ba dang / de phyung ste snod gtsang ma'i nang du blugs la/jag pa dang chom rkun byung ba'i dus su/ rkang pa'i 'og gi sa dang bsres nas gtor na/ de rnams rengs shing ldongs par 'gyur ro/ /sems rmongs par byed pas na rmugs par byed pa zhes gsungs so/ /yang na gsang sngags kyi mthu chen po 'di las sngags dang sbyar te/rmugs par bya ba'i las sbyor byas na/ nges par myos par 'gyur te/ dper na rims nad chen pos btab pa lta bu'o/ /de la de'i dran pa nyams par 'dod na/ pha rol po'i ling+ga byas te/ d+ha du ra'i khu ba dang / dug sna tshogs dang /chang gis kha phru btab pa na yid dran pa nyams par 'gyur ro/ /gsang sngags kyi zhes pa'i ngo bo ni/ lha'i gzugs dang / phyag rgya dang / tshig dang / yi ge dang / sgra dang / rnam pa dang bcas pa'o/ /gsang sngags kyi nges pa'i tshig dang / bcom ldan 'das nyid kyis mdzad pa ni/'dis nyon mongs pa rnams 'joms pa dang / phun sum tshogs pa 'thob pa'am/ dngos po yang dag pa ji lta ba bzhin du rig pas na rig pa ste/ lha rnam pa drug gi rang bzhin la yang gsang sngags zhes bya'o/ /yang na rgya gar gyi sgra las drangs na/ man+t+ra zhes bya ste/ shes pa dang / skyob pa'i don gyis ni/ gsang sngags zhes bya'o/ /yang na zhes pa dang ldan pas na'am gsang ste brjod pa'i phyir gsang sngags te/ gsang sngags ni chos gsang ba nyid kyis grub par shes par bya'o/ /rgya gar gyi yul na dngos grub 'phrog pa'i cho ga yod de/ bsgrub par bya ba'i lha de'i phyag rgya dang / gsang sngags mi shes na 'phrog tu mi tshugs pas na gsang ngo / /mthu chen po 'di zhes pa ni/ gang gzungs rings stong pa nyid kyi snying por byung ba 'dis/ bdag gi don yang sgrub par nus la/ gzhan gyi don yang bya bar nus pas na mthu chen po'o//yang na gang zag pha rol po rjes su bzung ste/ gso ba thun mong ma yin pa'i las sgrub pa la/ gang zag pha rol po tshar bcad pa de bsad pa thun mong ma yin pa'i las kyang grub pas na yang mthu chen po 'di zhes gsungs so/ /'on te gang su'i mthus smras na/ sangs rgyas kyi mthus smras so zhes gsungs so//sangs rgyas zhes pa ni gong du bshad zin to/ /'o na de gang gis smras na/ lag na rdo rjes rab tu smras so zhes gsungs so/ /lag na rdo rje zhes pa yang gong du bshad zin to/ /'o na gang smras she na/ gsang sngags kyi mthu chen po 'di rab tu smras so zhes gsungs so//gsang sngags zhes pa'ang gong du bshad zin to/ /'o na yon tan du dang ldan pa cig smras she na/ bdag dang gzhan gyi phun sum tshogs pa'i yon tan rnam pa gnyis dang ldan pa cig smras so/ /de yang bshad zin to/ /des ni lha drug gi yon tan phun sum tshogs pa bshad zin to// //da ni sgra dang yi ge'i mtshan nyid bshad de/ na mo rat+na tra yA ya zhes pa nas a mr-i te hUM phaT ces pa'i bar gyis sgra dang yi ge'i lha gnyis ka bstan to/ /sngags don rnam par dbye ba ni 'dir yang ma bshad de/ de'i don mi 'chad pa ni/ nus pa chung bar 'gyur ba'i phyir dang //slob dpon bi ma la mi tras mdzad pa'i sngags don rnam par 'byed pa'i 'grel pa las shes par bya'o/ /des ni sgra dang yi ge gcig tu bsdus te bshad zin to// //da ni 'od zer spro bsdu las gzugs kyi lha bskyed pa'i mtshan nyid bshad par bya ste/ de yang sdig pa thams cad byang byas nas/zhes bya ba la sogs pa gsungs te/ de yang sdig pa zhes pa ni rgya gar gyi sgra las drangs na pA paM ka las drangs na sdig pa zhes bya ste/ sdig pa'i ngo bo ni mi mdzes par 'jug pa'o/ /nges pa'i tshig ni ci phyir sdig pa zhe na/ rnam par smin pa yid du mi 'ong ba 'byin par byed pas na sdig pa'o//yang na sdig pa zhes bya ba ni/ lus la sogs pa las byung ba mi 'dod pa'i bag chags sems la yod par bya'o zhes gsungs so/ /yang na sdig pa zhes bya ba ni/ sdug bsngal gcig nas gcig tu brgyud de/ rab tu byung ba nyid kyis shin tu 'joms pa nyid yin pa'i phyir na/sdig pa zhes gsungs so/ /yang na sdig pa thams cad ces pa ni/ sems can gyi nyon mongs pa thams cad do/ /byang byas nas zhes pa ni zla ba'i dkyil 'khor gyi gzugs kyi steng gi gzugs las 'od zer dang / lha'i sku bsam gyis mi khyab cing /dpag tu med pa 'phros pas sems can thams cad kyi sdig sgrib sbyangs nas/ thar pa dang thams cad mkhyen pa la bkod pa'o/ /dper na me yis rtswa bsreg pa/ /rlung gis thal ba myur du ded/ /de bzhin tshe rabs snga ma la/ /bsags pa'i sdig pa thams cad bsregs//dper na char pa bab gyur te/ /ri las 'bab chu 'bab pa yis/ /sa yi steng gi phyag dar dang / nyal nyil thams cad 'ded par 'gyur/ /de bzhin gzungs 'di mthong ba dang / /thos pa tsam gyis sdig pa 'byang / /zhes gsungs so/ /sdug bsngal zhes bya ba'i ngo bo ni/lus dang sems la gnod pa'i mtshan nyid bkres pa dang / skom pa dang / bsad pa dang / yid mi bde ba la sogs pa'i rang bzhin no/ /nges pa'i tshig ni ci'i phyir na sdug bsngal/ lus sems ngal zhing dub bas na sdug bsngal lo/ /thams cad ces pa ni sdug bsngal gsum mam/brgyad la sogs pa la bya'o/ /sdug bsngal gsum ni sdug bsngal gyi sdug bsngal dang / 'gyur ba'i sdug bsngal dang / 'du byed kyi sdug bsngal lo/ /sdug bsngal brgyad ni/ /skye ba'i sdug bsngal dang / rgas pa'i sdug bsngal dang / na ba'i sdug bsngal dang /'chi ba'i sdug bsngal dang / dgra sdang ba dang phrad kyis dogs pa'i sdug bsngal dang / gnyen byams pa dang bral gyis dogs pa'i sdug bsngal dang / 'dod pa btsal gyis mi rnyed pa'i sdug bsngal dang / yod pa brlag gis dogs pa'i sdug bsngal lo/ / med par byed ces pa ni/ rgyu nyon mongs pa med pas/ 'bras bu sdug bsngal mi 'byung ngo / /rgyud do cog gi rtsa ba ste/ /dpal kun gyis ni legs par brgyan/ /'od zer dang lha'i sku 'phros pa tshur btus pa'i don to/ /rgyud do cog ces pa ni/ /'od zer dang lha'i sku'i rgyud thams cad kyis nam mkha'i khams gang bas na/rgyud do cog gsungs so/ /kyi zhes pa ni drug pa 'brel pa ston par byed pa'i sgra skyes bu'i'o/ /rtsa ba zhes pa ni zla ba'i steng gi gzungs rings so/ /ste zhes pa ni lhag ma lus pa'i tshig ste/ yang 'od zer dang lha'i sku slar la tshur 'dus pa'o//des na/ rgyud do cog gi rtswa ba ste/ /zhes gsungs so/ /dpal kun zhes pa ni/ 'od zer dang lha'i sku yis sems can gyi don byas pa dang / 'phags pa mchod pas bsod nams dang / ye shes kyi tshogs bsags pa'o/ /gyis zhes pa ni drug pa 'brel par byed pa'i sgra'o//legs par brgyan zhes pa ni zla ba'i steng na gzugs tshogs gnyis kyi yon tan dang ldan pa'am/ mdzes par byed pa ni/ dpal kun gyis ni legs par brgyan/ /zhes gsungs so/ /des ni 'od zer spro bsdu las/ /gzugs kyi lha bskyed pa bstan te/ bshad zin to//yang rgol te gsang sngags spyi'i rgyud kyi lugs kyis/ lha'i sku bsgoms pas skyon/ bzlas brjod bya ba ston pa yin pa la/ gzungs 'di'i nang du lha'i sku bsgoms pa'i rjes la/ bzlas brjod bya ba mi ston par/ 'od zer spro bsdu dang / bzlas brjod dang / bsnyen sgrub gang gi don du bya ba'i gang zag ston pa ci las dgongs she na/de ltar gzungs kyi dgongs pa ni/ 'od zer spro bsdu yang sems can dbang po nyams pa la sogs pa'i gang zag 'di dag gi don du byas pa'i phyir dang / 'od zer spro bsdu dang / bsnyen grub bya ba yang gang zag 'di rnams kyi don du byed pa yin pa'i phyir na/lha'i sku bsgom pa gsungs pa'i rjes la/ lha'i sku bsgoms nas/ 'od zer spro bsdu dang bzlas brjod dang / bsnyen sgrub gang gi don du bya ba'i gang zag bstan gyi/ bzlas brjod bya ba dang / bsnyen sgrub bya ba ma gsungs pa ni/ de la dgongs pa'o/ / yang na tshig tshogs chung bar bya ba'i phyir ro/ /da ni 'od zer spro bsdu gang gi don du bya ba'i gdul bya bshad par bya ste/ 'o na/ sdig pa thams cad byang byas nas/ /sdug bsngal thams cad med par byed/ /ces gsungs te/ gang gi sdig pa byang bar byas nas/ sdug bsngal med par byed ce na//sems can dbang po nyams pa dang / /bya ba la sogs pa de dag gi sdig pa byang nas/ sdug bsngal med par byed do/ /sems can zhes pa ni 'gro ba rigs drug thams cad do/ /dbang po zhes pa ni mig la sogs pa'i dbang po drug dang / dad pa la sogs pa'i dbang po lnga'o/ / nyams pa zhes pa ni/ gdon chen po brgyad la sogs pas byin gyis brlabs pa'o/ /de la dbang po drug nyams pa ni/ mig tu ling tog zhugs pa dang / /rna ba 'on pa la sogs pa'o/ /'og ma lnga nyams pa ni sngar dad pa che ba la/ phyis chung bar song ba dang sngar brtson 'grus che ba la phyis chung ngur song ba dang sngar dran pa gsal pa la phyis brjed par song ba dang /sngar ting nge 'dzin bzang po yod pa la phyis ngan par song ba dang / sngar shes rab rnon po las/ /phyis shes rab rtul tu song ba'o/ /de tsho thams cad kyang gdon gyis byas par dpung bzangs dang /rig pa mchog las gsungs so/ /de tsho gang nyams kyang 'di'i bsnyen pa sngon du song bas/ 'di'i dkyil 'khor byas te khrus dang / byab pa dang / bskrad pa dang / srung ba la sogs pa byas na grol bar 'gyur ro/ /bsnyen sgrub rnam pa gnyis ni 'di dag thams cad la sbyar bar bya'o//tshe zad pa dang / zhes pa ni/ sngon gyi rnam smin gyis tshe zad pa la cho ga 'di byas te/ bskrad pa dang / rdo rjes bya ba tsam gyis/ de'i tshe yongs su zad pa las kyang rnam par 'phel te/ ring du bde bar 'tsho bar 'gyur ro/ /tshe nyams dang zhes pa ni/ sngon gyi rnam smin gyis tshe ma zad kyang 'phral gyi rkyen gyis srog gi bar chad du 'gyur ba la yang /'di'i cho ga byas na tshe'i bar chad dang / dus ma yin par 'chi ba brgyad rnam pa thams cad du mi 'byung ngo / /'byung bar mi 'gyur ro/ /dper na skam por 'gre ldog nya/ /chu dang bral bas 'chi sgor 'gro/ /la las slar yang chu bor na//de na gnas shing yang rtse'o/ /de bzhin dran pa tsam gyis kyang / mi rnams tshe ni zlog par byed/ /ces gsungs so/ /phun sum tshogs pa ni/ bkra shis pa'am/ bsam pa thams cad yid bzhin du grub pa ste/ de las bzlog pa ste/ phun sum tshogs min zhes gsungs so//gang chags dang zhes pa ni/ gang zag de'i rgyud la bkra mi shis pa thams cad dang ldan pa'o/ /lha rnams zhes pa ni/ 'jig rten pa'i lha dang / ye shes kyi lha mang po yod pas na lha rnams zhes gsungs so/ /rgyab kyis phyogs pa dang zhes pa ni/ bdag nyid kyi sku gsung thugs kyi dam tshig nyams pa'i dbang gis/lha gnyis po de ma rjes te/ bdag la mgon skyabs dang / dpung gnyen mi byed pa dang / skyabs byin la sogs pa mi byed pa'o/ /'jig rten pa'i lha rgyab kyis phyogs pa ni/ /'phangs pa ste bdag gi stong grogs mi byed pa'o/ /'jig rten las 'das pa'i lha rgyab kyis phyogs pa ni//dbang bskur ba'i dus su/ slob dpon gyi sngags dang / phyag rgya dang / ting nge 'dzin gyis ye shes sems dpa' bstims nas gzhan pa bdag nyid kyis dam tshig nyams pa'i dbang gis snying ga dral te gshegs pa'o/ /de ltar gyur na yang /bdag nyid la khrus kyi cho ga 'di byas pas/ dam tshig nyams pa las bskongs te/ byin gyis rlob pa la sogs pa byed par 'gyur ro/ /'jig rten pa'i lha ring du 'phangs kyang khugs te/ dpung gnyen la sogs pa byed par 'gyur ro/ /mdza' ba'i skye bo zhes pa ni/phebs par smra ba'am/ yid bcugs pa la sogs pa byed pa'o/ /sdug pa'i skye bo phebs par smra ba la sogs pa ma yin gyi phan tshun gcig la gcig yid du 'ong ba dang / snying du sdug pa'o/ /sdang ba zhes pa ni/ bdag nyid kyis nyes pa ci yang ma byas par/ de gnyis bdag la sdang bar gyur pa yang gdon gyi byas par rig pa mchog gi rgyud las gsungs so//bran sogs zhes pa ni rang gi 'khor dang g.yog la sogs pa'o/ /gza' la sogs zhes pa ni/ rang gi bu dang chung ma la sogs pa'o/ /gtses pa dang zhes pa ni/ de la de tsho gnod pa byed pa'o//phan tshun mthun pa ma yin dang / zhes pa ni/ skye bo nang phan tshun gnod pa dang / rnam par rtsod pa'o/ /rtsod pa ni gcig dang shags 'gyed pa'o/ /rnam par rtsod pa ni/ g.yul bshams nas 'thab pa'o/ /nor 'gribs pas ni gnod pa dang / /zhes pa ni/ bdag nyid sngar phyug pa las/phyis dbul por gyur pa'am/ tshong byas kyang legs par mi 'ong ba dang / so nams byas kyang 'bras bu la sogs pa mang po mi 'byung ba'o/ /mya ngan las byung ba'i gnod pa zhes bya ba ni/ dper na rgan mo cig gi bu gcig pa shi ste/ yid la bu'i kha dog dang /dbyibs kyi rnam pa yid la byas shing / ngag tu bu bu zhes brjod pas/ bu la sems zin nas bu shi ba'i gzugs mig sngar byung bas/ nga'i bu khyer ba'i 'dre byung ngo zer ba'i log pa'i shes pa la brten nas/ gdon la sogs pa 'jug go/ /ngal ba las byung ba'i gnod pa dang zhes pa ni/bdag nyid kyi lus dang sems dub par gyur nas yid 'khrul nas/ 'dre la sogs pas khyer ba yin nam snyam pa'i log pa'i shes pa la brten nas/ gdon la sogs pa 'jug par 'gyur ro/ /'jigs pa dang ni zhes pa ni/ sbrul dang glang po che'i 'jigs pa la sogs pa brgyad yod do//yang na dmyal ba'i 'jig rten mtha' yas pa dang / yi dags kyi 'jig rten mtha' yas pa dang / dud 'gro'i 'jig rten mtha' yas pa dang / gshin rje'i 'jig rten mtha' yas pa dang / bgrod dka' ba'i 'jig rten mtha' yas pa dang /skye ba'i 'jigs pa mtha' yas pa dang / na ba'i 'jigs pa mtha' yas pa dang / 'chi ba'i 'jigs pa mtha' yas pa'o/ /phongs pa dang zhes pa ni/ bdag nyid dang po nas dbul bar gyur pa'o/ /gza' dang zhes pa ni gza' chen po rA hu la la sogs pa brgyad do//rgyu skar zhes pa ni smin drug la sogs pa nyi shu rtsa brgyad do/ /gza' skar ngan pa la na ba dang / shi ba dang / skyes pa la sogs pa byung na/ yang 'di'i cho ga byas na nges par zhi bar 'gyur ro/ /byad stems dang zhes pa ni/ 'khrul 'khor la sogs par bdag gi ming rus la sogs pa bcug pa'am/mi bzad gdon gyis zhes pa ni lha'i gdon la sogs pa gdon chen po bco brgyad las dge slong dang / rgyal po la 'dzin pa'i srin po'i gdon la sogs pa'i gdon chen po bzhi'o/ /nyen pa zhes pa ni/ sems can gyi lus sam/ sems la zhugs pa'o//mya ngan ngal nas byung ba yi/ /rmi lam sdig pa mthong na yang / /zhes pa ni/ gang gi rang gi rmi lam du byung ba ste/ rmi ltas ngan pa sum cu rtsa gnyis po gang byung yang 'di'i cho ga byas na bzlog go/ /sdig pa mthong na yang zhes pa bkra mi shis pa'i mtshan ma la sogs pa mthong ba'o//de tsho gang byung yang bzlas brjod byas pa'i sgo nas/ 'od zer spro bsdu dang / khrus kyi cho ga byas pas/ de dag thams cad las grol bar 'gyur ro/ /des ni bsnyen sgrub gang gi don du bya ba'i gdul bya bstan to/ /da ni bsnyen pa'i dus na sgra la gnas pa'i bsam gtan bstan te/de la gsum/ sbyor ba'i cho ga sngon du bya ba dang / sgra la gnas pa'i bsam gtan dngos dang / de bya ba'i phan yon no/ /dang po ni/ de ni rab bkrus gtsang ma yin/ /bya ba dang / gang dag yid dge sems dang zhing / /gtsang ma'i gos kyis rab brgyan te/ /bya ba'i tshig rkang gsum gyis so//mdo sde dam pa mnyan par bya/ /zab mo sangs rgyas spyod yul ba/ /mdo sde 'di ni nyan byed na/ /zhes pa'i tshig rkang gsum gyis ni dngos gzhi bstan to/ /mdo sde 'di yi gzi brjid kyis/ /zhes pa nas/ sdig pa kun las rnam par thar/ /zhes pa'i tshig rkang bdun gyi phan yon bstan to//sngon du bya ba ni/ de yang su sid+d+hi ka ra las/ /lus dang ngag gi gtsang sbra dang / /gsum pa yid kyi gtsang sbra ste/ /bzhi pa bden par smra ba'o/ /lnga pa phyi yi gtsang sbrar bshad/ /ces gsungs so/ /des ni zhes pas ni sgrub pa po bstan to/rab bkrus zhes pa ni/ /phyi'i gtsang sbra ste/ sa dang chu'i khrus dang / 'thor 'thung nye reg gi bar du'o/ /gtsang ma zhes pa ni/ /mi gtsang ba dag pa'i gnas skabs so/ /yid ces pa ni/ dag par byas nas sgra la gnas pa'i bsam gtan bya ba'i don to/ /'dis mtshon te/ cho ga yan lag drug gis lha bskyed pa'i sngon du yang / khrus dang gtsang sbra la sogs pa bya'o/ /gang dag yid dge zhes pa ni yid ches pa'i dad pas kun nas bslangs nas/ lus ngag yid gsum gyi sgo nas sdig pa mi dge ba mi byed pa'o/ /sems dang zhing zhes pa ni/ dad pa rnam pa gsum las dang ba'i dad pa ste/bdag nyid kyi sems nyon mongs pa'i rnyog ma dang mi ldan pa'o/ /gtsang ma'i gos zhes pa ni sngags pas thang gos dkar la shin tu 'jam pa la/ dus gsum du bkru ba dang / yang gu gul gyi dud pas bdug cing sngags bzlas so/ /yang na bsang gtor bya'o//de yang su sid+d+hi ka ra las/ sngags pas thang gos mi spang zhing / /dkar la shin tu 'jam po de/ /nyin gcig bzhin du bsang bar bya/ /zhes gsungs so/ /rab brgyan te zhes pa ni/ sngags gos kyis sngags pa shin tu mdzes par byas pa'o/ /sgra la gnas pa'i bsam gtan gyi sbyor ba'i cho ga'i sngon du bya ba bshad zin to// //da ni sgra la gnas pa'i bsam gtan gyi dngos gzhi'i cho ga dngos bstan te/ mdo sde zhes pa ni/ mtshan nyid mdor bsdus nas bstan du rung ba dang / gnyen po rnam par 'gal ba'i sgo nas spong bas na mdo sde'o/ /dam zhes pa ni/bskyed rim gsum ka bya bar 'thad pas na/ dam pa zhes gsungs so/ /yang na mtshan nyid kyi theg pa las mchog tu gyur pas na/ dam pa zhes bya'o/ /ji ltar mchog tu gyur nas mtshan nyid kyi theg pas khrus dang gtsang sbra dang / dka' thub la sogs pa'i sgo nas dngos grub bsgrubs kyang tshe 'di la mkha' spyod kyi dngos grub la sogs pa mi thob la/gzungs 'dis ni tshe 'di la mkha' spyod la sogs pa'i dngos grub thob par 'gyur bas na/ dam pa zhes gsungs so/ /mnyan par bya zhes pa ni ngag gi brjod bya rjod byed kyi tshig spangs te/ bdag nyid kyi sems sgra spyi'i rnam par snang ba'o/ /zab mo zhes pa ni/ sgrub pa po'i sgra la gnas pa'i bsam gtan byed pa de/ tha mal pa'i so so'i skye bos mi rtogs pas na zab mo zhes pa'o/ /'o na sgra la gnas pa'i bsam gtan te sus rtogs she na/ sangs rgyas spyod yul ba zhes pa gsungs te/sangs rgyas nyag gcig kho na'i spyod yul yin pas des mkhyen to/ /mdo sde 'di ni nyan byed na/ /zhes pa ni sgra la gnas pa'i bsam gtan 'di byed na zhes pa'i don to/ /sgra la gnas pa'i bsam gtan gyi mtshan nyid bshad zin to// //da ni sgra la gnas pa'i bsam gtan gyi phan yon bshad par bya ste/mdo sde 'di yi gzi brjid kyis/ /zhes pa ni sgra la gnas pa'i bsam gtan gyi phan yon gyis zhes pa'i don to/ /srog chags dag ni thams cad kyi/ /zhes pa ni 'gro ba'i ris lnga'o/ /mi bzad pa yi nad rnams kun/ /zhes pa ni mdze'i nad la sogs pa'o//de dag thams cad zhi bar blta/ /zhes pa ni mi bzad pa'i nad chen po las thar bar byed ces pa'i don to/ /tshe dang bsod nams 'phel bar 'gyur/ /zhes pa ni sngon gyi rnam par smin pa las tshe slar nur te ring por thub pa'o/ /dper na bcud len gyi sman sbyor lta bu'o/ bsod nams 'phel bar 'gyur zhes pa ni/ bdag gi phun sum tshogs pa thams cad rgyas par 'gyur ba'o/ /dper na rigs kyi bu'am rigs kyi bu mo gang la la shes rab kyi pha rol tu phyin pa 'di glegs bam du 'dri'am/ bris nas 'dzin tam/ 'chang ngam/ klog gam/ kun chub par byed pa la sogs pa byas nas/me tog la sogs pas mchod pa dang / rim gro la sogs pa byas na/ de dang de'i bsod nams 'phel bar 'gyur ba lta bu'am/ sa chen po la sa bon btab nas rgyu rkyen tshogs par gyur nas/ rnam par 'phel par 'gyur ba lta bu'o/ /sdig pa kun las rnam par thar/zhes pa ni yid du mi 'ong ba thams cad mi 'byung ba'o/ /yang na mi dge ba bcu dang / las kyi sgrib pa gdon mi za bar myong bar 'gyur ba thams cad spangs pa'o/ /dper na mi dge ba bcu spangs nas/ dge ba bcu spyod pa'i gang zag lta bu'o/ /sgra la gnas pa'i bsam gtan bya bar 'dod na/bsam gtan phyi ma las kyang / gsang sngags la gnas dngos grub ster/ /sgra gnas rnal 'byor ster bar dran/ /sgra mthar thar pa ster ba nyid/ /'di dag de nyid gsum pa yin/ /zhes gsungs so/ /sgra la gnas pa'i bsam gtan ni/ / bdag nyid lhar bskyed pa mi dmigs par bsams la bde ba'i rjes la/ bdag nyid kyi sems stong pa nyid kyi ngang las/ nam mkha' las zla ba'i dkyil 'khor gyi steng na/ gzungs sngags la sogs pa dkar sha re yod par bsams la/ yi ge de'i 'od zer me 'bar ba lta bur bsams te/phyi nas de tsho yang mi dmigs par bsams le/ bdag nyid kyi sems na mo rat+na tra yA ya bya ba nas/ a mr-i te hUM phaT bya ba'i bar du yi ge'i rang sgra sgrogs pa de yang dper na dril bu'i sgra dang 'dra bar rgyun mi 'chad par bdag nyid kyi sems sgra spyi yi rnam par grag par bsam mo//de ni sgra la gnas pa'i bsam gtan no/ /de mi byed na dmigs pa gsum gyis bya ba'am/ yan lag bzhis bya ste/ dmigs pa gsum ni/ sgra dang sems dang gzhi la gzhol/ /gsang sngags yi ge bzhi la gnas/ /zhes bsam gtan phyi ma las gsungs so//gsang sngags kyi yi ge dang / de'i gdan zla ba'i dkyil 'khor dang / de bzhin gshegs pa'i sku'o/ /dang po ni gzugs la dmigs/ de nas zla ba'i dkyil 'khor la dmigs/ de nas bcom ldan 'das la dmigs so/ /yan lag bzhi ni/ bcom ldan 'das bum pa'i nang na bzhugs pa dang /bdag nyid lha ru bskyed pa dang / de gnyis kyi thugs ka na zla ba'i dkyil 'khor re re yod pa dang / de'i steng na gzungs rings sam/ yang snying ngam/ rigs kyi snying po gang rung gnas par bsam mo/ /'o na lha ni gnyis su bshad la/ sngags dang / zla ba gnyis gnyis su mi 'chad pa ci'i phyir zhe na/ nang du bsdus tsam na gsum las med pas de ru yang 'dra gsung ngo / /yang na gsang sngags dang bzlas pa gnyis ni rigs mi mthun yang rnam par bcad pa'i ldog pa mtshungs la lha ni mi mtshungs pa yang srid pas na lha la gsum du bshad pa/sngags dang zla ba gnyis la rigs 'dra bas re rer ma bshad do/ /bzlas brjod byed pa'i zlos lugs ni gnyis te/ rdo rje'i tshig gam/ shu bu'i sbyor bas ha cang mi dal mi myur bar sngags kyi yi ge brjod cing bzlas brjod bya'o/ /de gnyis kyi grangs ni gtso 'khor yod na gtso bo la 'bum phrag gcig /'khor rnams la khri phrag re re bya'o/ /yi ge'i grangs kyis byed na/ bco lnga man chad kyi yi ge re re zhing 'bum phrag re re bya'o/ /bcu drug yan chad nas/ sum cu rtsa gnyis man chad la ni 'bum phrag gsum bya'o/ /de yan chad la ni 'bum phrag gsum bya'o gsung ngo //'dir ni bcom ldan 'das rdo rje rnam par 'joms pa/ sgra la gnas pa'i bsam gtan la mchog tu brnyes pa/ /bsnyen pa'i dus su de bya'o/ /bum pa la byed na gcig bya'o/ /bsnyen pa dang sgrub pa'i bar du bzlas brjod byed pa ni gnyis ka'i shes par bya'o//da ni sgrub pa'i cho ga bstan te/ 'o na sgrub pa'i lugs kyis dkyil 'khor gyi cho ga dgos pa yin na bye brag gi rgyud 'di ru dkyil 'khor gyi cho ga mi ston pa ci'i slad du zhe na/ bum pa'i cho ga ni dkyil 'khor la rag las pa yin pas/ de bstan pas dkyil 'khor yang shugs kyis shes pa yin no//bum pa'i cho ga dkyil 'khor la rag las par ni dpung bzangs kyi rgyud las gsungs te/ dkyil 'khor khor yug bum pa gzhag par bya/ /zhes gsungs pa dang / bum pa brgyad yod na bum pa sgo bzhi'i logs su gzhag pa dang / bcu gnyis yod na zur bzhir yang gzhag gsung ngo //gsang ba spyi rgyud las kyang / grwa dang sgo ni ma lus par/ bum pa dag kyang bzhag nas ni/ /bar sgo chen po gnyis gnyis shig /khyad par du ni gzhag par bya/ /bum pa gcig ni phyi sgo yi/ /drung du mngon par gzhag par bya/ /zhes gsungs so//'o na 'di ru dkyil 'khor bstan la/ bum pa'i cho ga spyi rgyud du kha mi bskang ba ci'i phyir zhe na/ de ni mi 'dra ste/ dkyil 'khor gyi cho ga dang bri ba tsam du khyad med la/ bum pa'i cho ga la ni bye brag yod pas/ rdo rje rnam par 'joms pa'i bum pa'i rdzas thun mong ma yin pa dgos te/yungs kar dang / rtswa dUr ba dang / rdo rje pha lam dang / me tog dmar po'i phreng ba rnams so/ /des na dkyil 'khor gyi cho ga la ni khyad par med pas 'dir ma gsungs te/ rdo rje rigs kyi spyi rgyud las shes par bya'o/ /bum pa'i cho ga la ni bye brag yod pas 'dir gsungs so//des na dkyil 'khor 'dir ma bstan pa la 'gal ba med do/ /da ni sgrub pa'i dub na bum pa'i mtshan nyid bzlas brjod kyi grangs nges par khrus bya ba dang bcas pa bstan pa la gsum ste/ bum pa rdzas dang bcas pa'i mtshan nyid bstan pa dang / de la bzlas brjod ji ltar bya ba'i grangs bstan pa dang /gdul bya nye bar mtshon pa dang bcas par bstan pa'o/ /de la dang por bum pa'i mtshan nyid bshad de/ nor bu zhes pa ni spyi'i ming du smos te/ bye brag du ma phyi ba dang / in+d+ra nI la dang / pad+ma rA ga la sogs pa'o/ /yungs kar zhes pa ni/bum pa'i kha chod pa'i don du gser la sogs pa'i snod gtsang ma'i nang du/ yungs kar blugs pa'i snod gtsang ma 'jog pa'i don to/ /yungs kar de rnams kyang rdo rje rtse gcig par bsam pa'am/ yang na khro bo re re bsam mo/ /dUr ba zhes ba ni ma gul chings kyis bcings pa'i sna la mdud pa brgyab pa dang /ba'i lci bas rgyas btab pa'i tshul du glan la de'i steng du rtswa dUr ba nyag ma bdun btsugs te/ bgegs la sogs pa mi 'jug pa'i don du'o/ /rin chen zhes pa ni/ /rin po che lnga ste/ nor bu rin po che dang / byi ru dang /gser sa le sbram dang / mu tig dang / shel lo/ /rma med ces pa ni gas chag med cing rgyan gyi bya ba byed nus pa'o/ /tsan+dan zhes pa ni dri lnga ste tsan+dan dang / ga pur dang / gur kum dang / dzA ti pha la dang / gla rtsi yang bla ma na re gzhug gsung / /kr-i ya las ni/ srog chags yan lag 'byung mi shis/ /zhes gsungs so/ /klu gnod na gla rtsi bcug na nus pa 'byung gsung ngo / /bcas zhes pa ni/ sman lnga dang / 'bru lnga dang / snying po lnga bsdus te/ sman lnga ni/ bya kri dang / seng kri dang / gi ri kar+Ni ka dang / ha sa dang / ha sa de ba'o/ / 'bru lnga ni/ 'bras kyi so ba dang / mon sran gre'u dang / nas dang / gro dang / til dang lnga'o/ /snying po lnga ni/ /sa'i snying po til dang / chu'i snying po lan tshwa dang / rtsi thog gi snying po mar dang / shing thog gi snying po bu ram dang / me tog gi snying po sbrang rtsi'o/ /shel dang zhes pa ni dngos so/ / rdo rje zhes pa ni/ rin po che pha lam mo/ /de med na shel kun nas lci ma gzhog zur brgyad pa cig gzhug gsung ngo / /me tog ces pa ni me tog dmar po dri zhim po la phreng ba byas la bum pa'i mgul la brgyan par bya'o/ /chu yis zhes pa ni blangs pa'i chu gtsang ma srog chags med pas dgang ba'o//dri zhim po'i chu yang blug go/ /gser ram yang na ni/ dngul gyi bum pa zhes pa ni bum pa'i rgyu bstan pa'o/ /tshad la sogs pa ni khrus kyi cho gar shes par bya'o/ /dag ces pa ni zangs la sogs pa bstan to/ /kyang zhes pa ni bsdu ba'i don to/ /dbul po rnams kyis mi rnyed pas//rdza la sogs pa'i bum pa so btang ba'i nyes pa nag por ri med pa dang / dkyil 'khor gzhan du longs ma spyad pa la bya'o/ /gtsang ma'i gos kyis dkri shing zhes pa ni mgul pa dkri ba ste/ ras kha tshar dang phun tshar ma nyams pa/ gzhan du longs ma spyad pa/ mi gtsang bas ma sbags pa'i ras dkar po'o//bo d+hi satwa sa ni/ 'di'i 'grel pa phyi ma las srog chags kyi rgyu las ma byung ba las gtsang ma zhes bya'o zhes bshad do/ /zhes pa ni rdzas de rnams kyi bum pa'i nang dag tu'o/ /des ni rgyu dang / rdzas dang mtshan nyid bstan to/ /da ni sgrub pa'i dus kyi bzlas brjod bya ba'i grangs kyi tshad bstan pa ni/gzungs rings nyi shu rtsa gcig bya/ /yang snying ngam/ rigs kyi snying po brgya rtsa brgyad zlos pas na/ lan grangs nyi shu rtsa gcig gam/ yang na lan grangs brgya rtsa brgyad/ /ces gsungs so/ /thun mtshams su'am/ bum pa re re la grangs 'di tsam re re bya'o/ /des ni bzlas brjod bya ba bstan to/ /da ni gdul bya nye bar mtshon pa bstan te/ rdo rje rnam 'joms bzlas na ni/ /bzlas brjod byas pa'i 'og tu khrus kyi gang zag bstan pa'i don to/ /rgyal po zhes bya ba'i rigs bye brag tu shes par bya'o/ / rtag tu zhes pa ni/ dus thams cad du'am/ nyin dang mtshan thams cad du'o/ /rgyal po zhes bya ba ni khrus bya ba'i gang zag mtshon pa tsam du zad de/ rigs byin po gsum la yang bya'o/ /'o na rigs bzhi ka la byed na/ 'dir rgyal po gcig tu smos pa ci'i slad du zhe na/ de ni gtso bo tsam smos pa yin te/de bden thams cad bde bar 'gyur/ /de sdug bsngal na thams cad sdug bsngal bar 'gyur ro/ /de'i phyir/ gtso bo tsam smos so zhes gsungs so/ /des ni rdo rje rnam par 'joms pa'i don ma lus par rgyas par bshad pa'o/ /rdo rje rnam par 'joms pa'i 'grel pa 'di byas pas//de ring bdag gis dge ba gang zhig thob 'gyur ba/ /zla 'od gsal dang mu tig do shal dri med dkar po 'dra ba des/ /nyon mongs mi shes sgrib pa'i glo bur gyur pa spang phyir sems can byang chub yid gyur cig /yang dag rtogs pa'i gtam 'di ye shes rdo rjes smras pas sems can rnams kyis nyon/rdo rje rnam par 'joms pa'i gzungs zhes bya ba'i rim par phye ba rgya cher 'grel pa gsal ba'i sgron me zhes bya ba slob dpon ye shes rdo rjes mdzad pa rdzogs so// //dbang phyug dam pa'i mnga' bdag rgyal po chen po dpal lha btsan po'i bka' lung gis/rgya gar gyi mkhan po chen po theg pa chen po gsang sngags la mkhas pa/ slob dpon bud+d+ha gu h+ya dang / bod kyi zhu chen gyi lo tsA ba ban+de ska ba dpal brtsegs rak+Shi tas bsgyur cing zhus te gtan la phab pa las/ slad kyi rgya gar gyi mkhan po chen po/