CLOSE WINDOW

D2680
བོད་ཡིག

/[ ]@##/ /rgya gar skad du/ Ar+ya badzra bi dA ra Na nA ma d+hA ra NI TI kA rat+na b+ha swa ra nA ma/ bod skad du/ 'phags pa rdo rje rnam par 'joms pa zhes bya ba'i gzungs kyi rgya cher 'grel pa rin po che gsal ba zhes bya ba/ rdo rje rnam par 'joms pa la phyag 'tshal lo//'phags pa 'jam dpal gsung gi dbang phyug la phyag 'tshal lo/ /don dam dbyings nyid mnyam med chos sku mchog tu gsang ba'i bdag /sangs rgyas byang chub sems dpa' la sogs bskyed mdzad rdo rje'i sku/ /sna tshogs don rnams 'byor pa sku gsum ye shes bdag gyur pa'i//'jam dpal gsung gi dbang phyug la ni spyi bos rab tu 'dud/ /rdo rjes thams cad 'joms mdzad cing / /khyad par gdug pa kun 'dul phyir/ /rdo rje'i skur gnas rnam 'joms dang / /bla ma gzhon nu'i snga la bstod/ /sangs rgyas kun gyis gsungs pa yi//don grub rdo rje rnam 'joms ni/ /bla ma lhas ni byin brlabs nas/ /'jam dpal go chas gsol btab bshad/ /sangs rgyas mchog gis chos gsungs pa/ /mdo sde mngon pa 'dul ba dang / /rig pa 'dzin pa'i sde bzhir gnas/ /de yang bzhi ste bya ba'i rgyud//spyi dang bye brag de la gnyis/ /rtog pa bdag ni las su bshad/ /rigs gsum phye la rdo rje ste/ /mi bskyod phyag rdor bdud rtsi dang / /mA ma kI dang lu gu rgyud/ /de dag don ston rdo rje ni/ /rnam par 'joms gzungs gsungs pa ni/ /log pa'i snying po gdul phyir dang //ma 'ongs pa la phan phyir gsungs/ /'di ni rtsa ba'i rgyud chen te/ /rdo rje lhun po'i ri rab zom/ /rgyud do cog ni brgya rtsa brgyad/ /de yi dang por 'di gsungs pas/ /rtsa ba'i bshad par rab tu grags/ rgyud chen de yi don rnams kun/ /mdor bsdus zab mor ston pas na//mdo sder bde bar gshegs pas gsungs/ /de yi don rnams mdor bsdu na/ /sngon byung sangs rgyas 'phrul pa dang / /rjes 'jug mngon rtogs man ngag go/ /dang po la ni rnam bzhi ste/ /rgyu dang rkyen dang 'bras bu dang / /de yi mjug ni bsdu bar 'dod/ /dang po lnga yin gnyis pa la//gnyis te de dag gnyis gnyis gsungs/ /gsum pa gsum ste dang po la/ /gnyis gnyis dag tu shes par bya/ /bzhi pa gnyis bsdus dang po gnyis/ /gnyis pa bzhi ru shes par bya/ /dang po gnyis pa man ngag bzhin/ /dbang po rab 'bring tha ma la//bshad pa rnam pa gsum bya'o/ /dgos pa rnam pa gnyis su bstan/ /tshig don brgal lan mtshams sbyar ba/ /rnam pa lngar ni 'dir shes bya/ /de la lha dang sngags dbyer med pas rig pa 'dzin pa'i sde snod de/ de yang rig pa 'dzin pa'i sde snod gsal ba'o zhes gsungs pa dang /sngags nyid lha ste de nyid sngags/ /zhes gsungs so/ /de lta bu de la mdo sder yang grags te/ /don nyid mdor ston mdo sde zhes pa dang / /gsang sngags mdo sde'i tshul du ngas bshad nyon/ /zhes gsungs so/ /de bshad par bya ba ni lnga ste/ brjod par bya ba ni stong pa nyid kyi don rdo rje rnam par 'joms pa'i thabs dang bcas pa'o/ /rjod par byed pa ni gzhung gi tshogs so/ /de'i dgos pa ni rgyal po log pa'i snying po dang / /gdon ma rungs pa 'dul ba dang / ma 'ongs pa'i skye bo byang chub la gnas par bya'o/ /dgos pa'i yang dgos pa ni de dag kyang dngos grub rnam pa gnyis thob par byed pa'o//'brel ba ni brjod bya rjod byed dag thabs dang thabs las byung ba ste/ de yang / thabs dang thabs byung ji lta bu/ /zhes gsungs so/ /da ni rgyud kyi don nyid bshad par bya ste/ de yang shes rab dang ldan pa la mtshan nyid bstan pas go la/de yang phan pa'i phyir mjug nas drang bar bya ste/ rdo rje rnam par 'joms pa zhes bya ba'i gzungs zhes smos te/ de la rdo rje ni mi phyed cing mi shigs pa'i phyir na rdo rje ste/ stong pa nyid kyi ye shes so/ /de nyid lha dang gzungs la gdags par bya ste/ de yang rdo rje zhes brjod pas/rnam pa kun mchog ldan pa yi/ /stong pa nyid la rdo rjer brjod/ ces pa dang / lha dang sngags ni rdo rjer 'dus/ zhes gsungs so/ /des ni bdag gi don grub par byed pa ste 'og gnas ston to/ /rnam pa ni dngos po ma lus pa ste/ de yang 'byung po la sogs pa dang / rnam par rtog pa'o/ /de dag sngags dang rdo rje'i tshig bla dgas kyi gnyis su med pa'i ye shes kyis 'joms pa ni med cing brlag par mdzad pa'o/ /de yang / 'joms phyir ye shes brjod pa yin/ /zhes so/ /des ni gzhan don 'grub par byed pa yin te/ de yang 'chad par 'gyur ro//yang rdo rje rnam par 'dzin pa zhes bya ste/ don dang rnam pa'i sgo nas brjod do/ /gnyis ka'i don sgrub pa ni gzungs te de yang nyams pa las 'dzin cing mi brjed la don thams cad 'grub pas na'o/ /de yang gnyis te/ don ni brjod par bya bas 'byung po dang 'khor ba las skyob la/tshig gis kyang de dag 'byung ba'o/ /de yang / nyams pa las ni skyob pas gzungs/ /de yang don dang tshig tu 'dus/ /zhes gsungs so zhes bya ba ni ming ste 'di zhes pa'o/ /'di dag gis ni gzhung gi don ma lus pa ston par byed pas/ gsungs pa dang mi 'gal ba yin no//ma 'ongs pa dag gis ni rdo rje rnam par 'joms pa nan tan du byas pas bdag dang gzhan gyi don rdzogs par byed do zhes shes par bya'o/ /de ltar mtshan brjod nas/ da ni rdo rje'i mdo'i don bstan par bya ba ni 'di skad ces bya ba la sogs pa gsungs te/ de yang sngon gyi dbang du byas nas rdo rje'i mdo 'byung ba'i rgyu yin la/ma 'ongs pa la ni 'bras bur yang 'gyur ro/ /de yang ma tshang ba med pa'i phun sum tshogs pa lngar 'gyur te/ de la 'di skad bdag gis thos pa zhes bya bas sdud pa po bstan te/ sngon mthong zhing rjes su gnang ba'i bka' yin pas 'gal ba med do//de la ji ltar thos she na/ de la 'di skad thos zhes pa ni gzhung 'di'i don dang tshig ma lus pa la 'jug par byed de nye bar mngon sum dang ma bcos pa ste/ sgro skur dang bral ba'o/ /sus thos zhes pa ni bdag gis thos pa ni sdud pa po yang phyag na rdo rje nyid kyis mdzad pa ste/bdag gsang ba thams cad 'dzin pa'i phyag na rdo rjes bcom ldan 'das la rna bas mngon sum du sgra don gyi rnam par thos te/ brgyud pa ma yin pa'o/ /da ni dus phun sum tshogs pa ston te/ de yang dus ji tsam na thos she na/ dus gcig na thos te mi 'da' bas dus de kun tshogs pa'o//des ni dkon par bstan pa'o/ /yang na dus ni skad cig ma ste/ shes rab che bar ston to/ /gang las thos she na/ bcom ldan 'das las thos te zhes gsungs te/ des ni ston pa phun sum tshogs pa ni bde bar gshegs pa la sogs pa'i yon tan dpag tu med pa dang ldan pa'i bcom ldan 'das shAkya thub pa bdud bzhi bcom zhing /yon tan drug dang ldan pa'i ston pa mchog tu gyur pa las thos par ston to/ /'o na 'di ni bcom ldan 'das kyis ma gsungs la rdo rje rnam par 'joms pas smras pa na bcom ldan 'das las thos pa zhes pa 'di ji ltar rung zhe na/'di ni bcom ldan 'das nyid kyis gsungs pa yin te/ khro bo gnyis pa nyid de nyid kyi ngo bo yin pa dang / de la de'i nus pa zhugs pa yin pas 'gal ba med de mdo gzhan bzhin no/ /gang du thos she na/gnas phun sum tshogs pa ni rdo rje la bzhugs pa las thos pa ste/ de yang don ni gnyis su med pa'i ye shes yin la/ rnam pa ni rdo rje rin po che'i gnas ri rab kyi byang shar nas rdo rje lhun po ri rab kyi zom zhes bya ba'i sa phyogs la sogs pa'i rdo rjer gtams par thos pa'o//rdo rje gdan ni ma yin te rdo rje gdan du sngags gsungs pa ni med de/ de yang bsam gyis mi khyab pa'i mdo las/ shA ri'i bu de bzhin gshegs pa thams cad ni dang po rdo rje gdan la mngon par rdzogs par sangs rgyas pa yin yang der chos gsungs par ni mi 'gyur ro//de ci'i phyir zhe na/ der ni bdud 'dul ba las sems can gzhan 'dul ba'i don du ni ma yin te/ rdo rje snying po de da lta'i sems can rnams kyis ma rtogs pa'i phyir ro/ /zhes gsungs pa'i lung dang 'gal ba'i phyir ro/ /der bzhugs pa ni gnas shing brten par ston te mdzad pa rnam pa gsum gyis rdo rje'i skyil krung du rdo rje dang seng ge'i gdan la bzhugs so//de ni bzhi pa'i don las gsum pa ste chos ston pa'i don du'o/ /'khor gang dang lhan cig tu thos she na/ phyag na rdo rje zhes pa thog mar drangs nas bsten to/ /de yang ma smos kyang rgyal po lta bu ste de'i dus na 'khor phyag na rdo rje la sogs pa'i rdo rje ming can du grags pa'i byang chub sems dpa' dpag tu med pa dang /shA ri'i bu la sogs pa nyan thos dpag tu med pa dang / 'od srungs la sogs pa'i dgra bcom pa dang / gzhan yang lha la sogs pa grangs med pa dang /lhan cig tu thos par ston te/ rdo rje lhun po ri rab kyi zom gyi mdo bzhin no/ /de dag gis ni rdo rje'i mdo 'di rgyud dang mdo gzhan las khyad par du 'phags par bstan to/ /'dis ni 'di skad bstan par 'gyur te/ ma 'ongs pa'i gang zag dag rig sngags kyi sgo'i spyod pa spyad par 'dod pa dbang dang dam tshig thob cing yon tan dang ldan pas 'khor bzang po dang lhan cig tu gnas legs par dus bzang po la gnas te/yo byad dang ldan pas maN+Dal byas la 'og nas 'byung ba'i bum pa bcas pa ste bsgrub par bya'o zhes pa'o//de yang / sngags pas gnas bzang gnas te dus dang ldan/ /'khor dang 'byor pa rten dang ldan pas bsgrub/ /ces gsungs so/ /de ltar rdo rje'i mdo las 'byung ba'i rgyu bshad nas/ da ni de'i rkyen gleng bslang pa bstan pa ni de nas sangs rgyas kyis mthus zhes bya ba la sogs pa gsungs te/des ni 'khor gyi gtso bo ting nge 'dzin la gnas pa'i gling bslang gi rgyu ru gyur pa'o/ /de yang dus der bcom ldan 'das kyis 'khor rnams la chos gsungs pa ni thog mar dge ba la sogs pa ste/ 'dzam bu'i gling na rgyal po gzugs can snying po'i bu ma skyes dgra zhes kyang grags/log pa'i snying po skyes tsam na rkang pa la lcags kyi sdig pa'i gzugs can des kha nas mA ra ya 'don cing ma dang pha bsad de 'khor mi dge ba bcu la btsud pas mi ma yin pa thams cad 'khrugs pas nad la sogs pa sna tshogs byung ngo /des sems can thams cad sdug bsngal nas skyabs so so las 'dod zhing smra'o/ /de rgyal po bzhis gzigs nas bcom ldan 'das la bskyabs pas cang mi gsung bar phyag na rdo rje la bskul te rdo rje gsor zhing khas blangs te rdo rje rnam par 'joms pa 'khor grangs med pa bcas te/des sngags gsungs pas 'byung po dang log pa'i snying po btul te 'di la zhugs pas byang chub thob par mdo nas bshad do/ /de yang bram ze ni ma yin no/ /de la sangs rgyas ni nyon mongs pa'i gnyid las sad cing / ye shes pad+ma ltar gyur pa ste/spangs pa dang ye shes phun sum tshogs pa'o/ /de ni shAkya thub par bstan te des bskul ba'o/ /de'i mthu ni nus pa ste de'i stobs kyis nus pa dang ldan pa'o/ /gang zhe na/ lag na rdo rje zhugs so zhes bya bar 'brel pa'o/ /don gnyis su med pa'i ye shes 'chang ba yin la/rnam pa ni sangs rgyas thams cad kyis byin gyis brlabs shing / gsang ba gsum ston pa drag po'i rdo rje thogs pa ste/ 'khor gyi gtso bo gnod sbyin khro bo 'jigs pa mthu stobs dang ldan pa sangs rgyas thams cad kyi bstan pa 'dzin par grags pa 'di'o//gang ltar zhe na lus thams cad rdo rjer byin gyis brlabs nas zhes pa'o/ /de yang lus ni spyi bo la sogs pa'o/ /thams cad ces pa ngag dang yid kyang ngo / /rdo rje ni de dag dang stong pa nyid dang thogs pa med cing nus pa dang ldan par byin gyis brlabs pa ni bsgyur ba ste nus pa can du'o//des ni khro bor gyur par bstan to/ /des ni ma 'ongs pa'i rnal 'byor pas srung ba'i 'khor lo bya'o zhes pa'i tha tshig go /gang la zhe na/ rdo rje'i ting nge 'dzin la ste gnyis su med pa'i ye shes dang thogs pa med pa la rtse gcig par snyoms par zhugs pa ni mnyam par gzhag pa'o//mdor na stong pa nyid las thugs kyi sprul pa rdo rje rnam par 'joms pa gdon par thugs rtse gcig par dgongs pa ste/ khyad par du bstan pa'i phyir ro/ /thugs kyi sprul pa dngos pos bstan pa'i phyir ro/ /de nas zhes bya ba la sogs pa gsungs te/smras so zhes bya bar 'brel to/ /de la de nas ni 'das ma thag pa'o/ /lag na rdo rje ni bshad do/ /sangs rgyas shAkya thub pa la sogs pa thams cad kyi mthu ni nus pa'o/ /byin gyis brlabs pa ni rang bzhin gyi shugs kyis so/ /gzhan yang byang chub sems dpa' ste de yang don dam pa'i 'bras bu gnyis su med pa la smon pa dang 'jug pas gnas pa'o//de yang / byang chub nam mkha'i mtshan nyid de/ /kun du rtog pa thams cad spangs/ /de la sems dpa' gang yin pa/ /byang chub sems dpa' zhes bshad do/ /zhes bya ba dang /byang chub ni don dam pa'o/ /sems dpa' ni kun rdzob ces gsungs so/ /de yang sems dpa' chen po zhes sbyar ro/ /thams cad ni ma lus pa ste rdo rje spyan ras gzigs la sogs pa'o/ /de dag gis kyang byin gyis brlabs te/ des ni ting nge 'dzin gzhan las khyad par du 'phags pa bstan to//lag na rdo rje'i thugs gnyis su med pa'i khro bo gdug pa'i tshul dgu dang ldan par 'byung ba ni rdo rje khro bo'o/ /las byung ba ni des sprul ba ste bzhi pa'o/ /gang byung zhe na rdo rje snying po ste rdo rje rnam par 'joms pa'i khro bo rdo rje bsnams pa ni lha dang sngags thams cad kyi 'byung gnas su gyur pa'o//des rab tu smras pa ni myur bar rab tu sngags gsungs pa ste gsum pa'o/ /'o na 'di ni phyag na rdo rje dang rdo rje rnam par 'joms pas smras pas bcom ldan 'das kyi bka' ma yin zhe na/ 'di ni bcom ldan 'das kyi bka' nyid yin te/bcom ldan 'das kyis byin gyis brlabs pa'i phyir dang / tha mi dad pa'i phyir te/ dper na mdo gzhan bzhin no/ /de dag ni phyag na rdo rjes rdo rje rnam par 'joms pa 'khor bcas 'og nas sprul te mdun na gnas pa la bka' bsgos na/ des rdo rje rnam 'joms sngags kyis 'byung po 'dul bar byed pa gsungs pa'o//phyag na rdo rjes smras pa ni ma yin te/ rgyud dang 'gal ba'i phyir ro/ /'dis ni 'di skad ces ston te/ rnal 'byor pas khrus la sogs pa byas te/ khro bo mi 'chi ba dang gnod pa med par byas te/ stan la gnas nas srung ba byas la tshogs bsags te/rdo rje gdan la gnas pas byin gyis brlab par gsol te sangs rgyas dang byang chub sems dpa' zhugs pas stong pa nyid la sogs pa'i byang chub pa'i lha drug gis bdag phyag na rdo rjer bya ba dang / mdun du bum pa lha drug 'khor dang bcas pa bsam pa dang /spyan drang ba dang / mchod pa la sogs pa rgyud la brten pa sgrub thabs bzhin du bya'o zhes pa'i don to/ /de yang rgyud las/ dang po khrus byas rnal 'byor pas/ /rdo rje gdan la gnas nas ni/ /mchod dang gsol bas lha drug bsgom/ /stong dang yi ge sgra gzugs dang /phyag rgya mtshan ma drug yin te/ /bum par bskyed sogs rdzogs byas la/ nor bu spyod lam sngags bzlas te/ sha la sogs pa bdun spong ngo / /zhes gsungs so// //de ltar gleng ba slang ba'i rgyu bstan nas/ da ni gleng bslang ba dngos bstan pa'i phyir/mi chod pa zhes bya ba la sogs pa gsungs so/ /de yang 'di rnams ni rdo rje rnam par 'joms pa'i sngags kyi yon tan 'di lta bu zhes tshig tu gsungs pa dngos te/ de la yang gnyis las bdag gi don phun sum tshogs pa ni rdo rje'i tshig bdun gyis ston to//de la stong pa nyid dang sngags dang ting nge 'dzin rdo rje ste phyi rol gyi rdo rje rin po che la chos bdun yod pa dang 'dra bar 'di la 'byung bas dum bur mi chod cing snying po yod pa'o/ /de la chus phye mar mi shigs shing mi phyed pa'o/ /bden pa ni gnas pa ste mes thal bar mi 'gyur ba'o//sra ba ni gzhig par dka' ba ste rlung gis gtor du med pa'o/ /tshig de dag gis rdo rje ye shes de la skye ba la sogs pa bzhi dang / mtha' bzhi dang bral bar shes par bya'o/ /des na mtshan ma'i dngos po dang / /gdon thams cad la thogs pa med pa ste gcod cing 'joms la bems po ma yin pa'o//de'i phyir mi 'gyur bar gnas pas brtan pa zhes sbyar ro/ /tshur la tshugs sam zhe na/ thams cad du ma pham pa ste rang la nyams pa med cing ma bcom la rgyal bas so/ /de yang / sra brtan snying ldan khong stong med/ /mi phyed mi shigs mi 'tshig pas//rdo rje zhes ni brjod pa'o/ /zhes gsungs so/ /de dag gis ni sngon byung ba rgyal po log pa'i snying po la sogs pas nyams su blangs nas bdag gi don chos sku rdo rje lta bu'i ting nge 'dzin dang / longs spyod rdzogs pa'i sku rdo rje lta bu grub pa'o/ /ma 'ongs pas ni sngon du bsnyen pa rdzogs pas bdag don 'grub par shes par bya'o zhes bstan to//bdag gi don grub nas gzhan gyi don med dam zhe na/ sems can thams cad skrag par byed pa zhes bya ba la sogs pa bco lngas sprul pa'i sku rdo rje lta bus gzhan gyi don 'grub par ston to//de yang bsdu na las bzhi'o/ /de yang / bde gshegs las ni sna tshogs pa/ /bsdu na zhi sogs las bzhi'o/ /mngon spyod brgyad du rnam par grags/ /tshar gcad dang ni rjes gzung ngo / /zhes gsungs so/ /de la sems kyi kun gzhi srog dang bcas shing yid kyi rnam par shes pa dang ldan pa ste skye gnas bzhis bsdus pa 'gro ba rigs drug po thams cad do//de dag skrag par byed pa ni lus sems 'jig cing dngangs te drag po tshar gcod par byed pa'i rig sngags 'di smras so zhes bya bar sbyar ro/ /'jil ba ni lus sems spa bkong nas 'gul mi nus pa'o//de yang gsang sngags dang lha 'dis byed pa'o/ /de yang drag po'o/ /rig pa ni lha ste de'i sngags ni nus pa can de shes nas skyob pa'o/ /de yang gzhan thams cad kyi sbyar ba ste de dag gcod pa ni nus pa'i rgyun med par byed pa'o/ /de yang drag po'o//gnon par byed pa ni nus pa med cing zil gyis mnan nas mi g.yo ba ste/ sgyu ma mkhan bzang po'i sgyu ma bzhin no/ /de ni dbang ngo / /zhi ba'i las ni las thams cad 'joms par byed pa ste pha rol gyi sbyor ba ngan pa byad stems la sogs pa dang gos pa'i nang la ste sngon gyi las kyi sgrib pa thams cad do//de dag par byed cing bzlog pa'o/ /gzhan ni pha rol te 'byung po sems can no/ /de dag gi las ni nad la sogs pa dang sgrib pa ste 'jig pa ni brlag par mdzad pa'o/ /gdon ni gnod par byed pa ste lha la sogs pa bco brgyad pa la sogs pa thams cad do//de dag brlag pa ni thal bar byed pa ste drag po'o/ /thar pa ni sngar bzung ba las grol ba'o/ /de ni zhi ba'o/ /gzhan yang dbang ni 'byung po ste sems can thams cad de khams gsum du 'byung bas so/ /de dag 'gugs pa ni 'dren pa ste dbang du byas nas bstan pa la gnas par byed pa'o//rig sngags ni 'jig rten pa dang 'jig rten las 'das pa'o/ /las ni ma lus pa ste zhi ba la sogs pa thams cad 'dis myur du byed du 'jug pa ste las la 'dzud pa'o/ /de yang dbang ngo / /sngar ma grub pa ni mngon du ma gyur pa ste lha rnam pa gnyis kyi dngos grub po//de dag 'dis grub par byed pa ni mngon sum du gyur pa'o/ /sngar grub zin pa ni 'bras bu de yang par chad kyis mi khyer bar byed cing don yod pa chud mi za ba'o/ /'dod pa ni yid kyis mngon par 'dod cing don du gnyer ba ste nor la sogs pa phun sum tshogs pa thams cad do//de dag 'dis sbyin pa 'di las byung zhing ster ba'o/ /de dag ni rgyas pa'o/ /srung ba ni nad dang gdon la sogs pa sngar ma 'ongs pa dag phyis mi 'ong bar byed cing sdom pa'o/ /de yang zhi ba'o/ /mjug bsdu ba ni zhi ba ste nad la sogs pa thams cad med par byed pa'o//rgyas pa ni tshe la sogs pa ma lus pa thams cad 'phel bar byed pa ste/ de gnyis dang dbang ni rjes su gzung ba'o/ /gzhan thams cad ni tshar gcod pa'o/ /drag po'i las 'byung po dang sems can gang dag sangs rgyas kyi bstan pa la ma dad pa de dag rengs par byed pa ni mi g.yo ba ste ngag dang lus so//rmugs pa ni sems rmongs pa ste ci yang mi shes par byed pa'o/ /gsum pa'i sgra dang 'og gi tshig ni re re la sbyar ro/ /yang na tshig de rnams ni man ngag gis 'og gi sngags re re la sbyar bar bya'o zhes bstan pa'o//de lta bu 'di rdo rje rnam par 'joms pas khro bo'i tshig tu smras so zhes sbyar te brjod pa'o/ /gang gis brjod ce na lag na rdo rje ste 'dir rdo rje rnam par 'joms pa la bya'i/ phyag na rdo rje dngos ma yin no/ /gang gis na shAkya thub pa la sogs pa'i nus pas byin gyis brlabs pa ni sangs rgyas kyi mthu ste/de yang / rgyal ba'i nyan thos pa dag ji snyed chos ston dang / /zhes pa la sogs pa dang / yang ston cing 'chad pa rnams ni sangs rgyas kyi mthu'o zhes bstan pa'i phyir ro/ /gang lta bu zhe na/ gsang sngags te sba zhing dman pa la mi bstan pas nus pa khyad par du 'phags pa'o zhes bya ba'i tha tshig go//nus pa gzhan las khyad par du 'phags shing phul du byung ba'i 'og gi rdo rje'i sngags ni mthu chen po 'di zhes pa ste de dag smras pa'o/ /de dag gis ni sngon gyi 'khor la yon tan ni gzhan don thams cad 'grub par bstan la ma 'ongs pa la ni sngon du bsnyen pa rdzogs pas sgrub thabs bzhin byas pas de dag 'grub par 'gyur ro zhes pa'o//'di skad ston te de ltar mchod pa la sogs pa rdzogs nas sngags kyi nor bu bzung ste/ sngags kyi gnas dang ldan pas rdo rje'i tshig dang khro bo'i ngag du bzlas pas bdag dang gzhan gyi don sgrub pa'i spro bsdu bya ste/de yang bsnyen pa dang las sbyor gyi dus su sgrib pa la sogs pa med pa'i sbyor bas spyod lam bya'o zhes pa'i don to/ /de ltar rgyu dang rkyen rnam pa gnyis bstan nas/ da ni de'i 'bras bu gang bstan par bya ba'i chos phun sum tshogs pa rdo rje'i rgyud dngos rdo rje'i sngags zab mo sngar gyi yon tan can de bstan pa'i phyir/na mo zhes bya ba la sogs pa gsungs so/ /de la de dag gis ngag gi don rtogs sla ba'i phyir brjod par bya ste/ sngon byung ba la ni rdo rje'i sngags 'di dag bkra shis pa bdag po la mchod pa brjod nas rnam par 'joms pa'i rdo rje gsungs pas 'byung po thams cad la rnam pa bzhis tshar gcad pa dang /rjes su bzung bas sangs rgyas la skyabs su 'dod pa la sogs pa'i tshul gyis dkyil 'khor du btsud de nad la sogs pa zhi bas mi dag sangs rgyas la sogs pa la dad de/rgyal po log pa'i snying po yang gnas der 'od zer la zhon te 'ongs nas/ de bzhin du byas pas bkra shis la thar pa la gnas so/ /de yang 'og nas rgyal po zhes pas so/ /bskrad pa dang / las bzhi dang / khro bo bzhi dang / bcu bskul ba dang / gtso bo la sogs pa drug po bskul ba'i tshul gyis so/ /ma 'ongs pa'i sgrub pa pos ni sngon du bsnyen pa la sogs pa bsrung pa dang / bsnyen pa la sngags tshig gsum gang yang rung ba bzlas pa dang / las sbyor la gnyis su bya ba dang / las sgrub na gtso bo dang 'brel pa dang 'khor dang gnyi ga dang 'brel pa gsum gyis zhi ba la sogs pa'i las kyis lha dang rdzas dang bsam pa dang / phyogs dang dus dang sngags dang 'khor lo dang ting nge 'dzin dang bya bas sgrub pa ni sgrub pa'i thabs bzhin du shes par bya'o zhes bya ba'i don to//de yang / rnal 'byor bsnyen pa gsum du bya/ /las la gnyis te las la gsum/ /gtso dang 'khor dang 'dul ba ni/ /las bzhi sngags sogs dbye bar bya/ /zhes 'di'i bshad pa'i rgyud las gsungs so/ /da ni gzhung nyid la 'jug par bya ste/ de la dang po bkra shis pa'i don rnam pa gnyis kyis phyag bya ba ni/na mo rat+na tra yA ya zhes ba la sogs pas gtso bo gsum la 'dud pa'o/ /de dag ni sngags kun la shes par bya'o/ /'bru ni don nyams pa'i phyir bshad par mi bya ste rang nyid kyi sgras shes par byas la don yid la dran par bya'o//de nas tshar gcod cing bsrung ba'i sngags ni tad+ya thA oM la sogs pa ste nye bar bstan pa'o/ /de yang dang po dang tha mar ye shes dang drag po dang shis pa bzhi 'jug pa can te de bzhin du shes par bya'o/ /da ni gzungs la gsum las dang po rgyas pa ste de yang gtso bo'i sngags ni sarba bid+yA badzra badzra zhes pa la sogs pa ste bstod cing bod pa'o//ma 'ongs pas ni 'di la sngags gdags par shes par bya'o/ /gtso bo'i las dang 'brel pa ni man ngag bzhin du zhi ba'i sngags ni he phu lu zhes pa la sogs pa ste snga ma bzhin no//tsa ra ni tsa ra la sogs pa ni rgyas pa'i'o/ /kI li kI lA ya la sogs pa ni dbang gi'o/ /mA ra ya la sogs pa ni bsad pa'o/ /tshin+da tshin+da la sogs pa ni rig sngags bcad pa'o/ /b+hin+da la sogs pa ni rig sngags mnan pa'o/ /de bzhin du skrag par byed pa la sogs pa la yang man ngag bzhin du sbyar ro//da ni 'khor gyi sngags bstan pa ni/ tsu ru zhes pa la sogs pa ste/ snga ma bzhin du byas pa ni rdo rje phur pa'i sngags so/ /trA sa ya la sogs pa ni rdo rje be con gyi'o/ /ha ra la sogs pa ni rdo rje tho bo'i'o/ /pra ha ra la sogs pa ni rdo rje gtum po'i'o//de dag la bstod cing skul bar byed pa ni e h+ye la sogs pa'i sngags btags te bzlas par bya'o/ /de dag dang 'brel pa'i las sngags la zhi ba'i sngags ni ma ti s+thir badzra zhes bya ba la sogs pa'o/ /rgyas pa'i sngags ni d+ha ra d+ha ra zhes pa la sogs pa'o//dbang gi sngags ni na maHsa mAn+ta zhes pa la sogs pa'o/ /gsod pa'i sngags ni a mu kaM mA ra ya phaT ces pa'o/ /rig sngags bcad pa'i sngags ni mahA ba le zhes pa la sogs pa'o/ /rig sngags mnan pa ni da ha zhes pa la sogs pa ste/ 'dir yang thams cad snga ma bzhin du byas pas las kun 'grub par 'gyur te sbyar ba gsum shes par bya'o//de yang rdo rje'i gsang sngags 'di yin te/ las kun thogs pa med par 'grub/ /ces gsungs so/ /'dir man ngag gis gtso bo yab yum gyi sngags ni dang po oM dang tha ma'i yan lag bor la dzra la la sogs pa'i na byin te ya hUM phaT swA hA zhes pa bya'o//steng dang 'og kyang de bzhin du byas la 'khor gyi rgyas pa'i sku la la zhi ba la ma bor te phyag 'tshal ba na byin te rgyas pa'i d+ha ra'i ra la i byin la gtso bo'i rig pa 'phrog la gnyis su bya'o/ /yang na 'di ltar yang yin te/thams cad snga ma bzhin la bskrad pa'i sha la saM gyi stong phrogs te byin la gtso bo zhi ba'i ku ru gnyis kyis u phyi ma la e byin te 'khor gyi lha'i ma hA dang dbang gi sa man gyi na bsang ba'i ya gsos la e byin pa ni gcig ste/ de gnyis gang yang rung bas dam tshig bstan cing bstan par bya ba yin no//zhes bla mas bstan to/ /yang na de rnams ni sems can thams cad skrag par byed pa zhes pa la sogs pa dang rim pa bzhin du sbyar bar bya'o zhes dgongs so/ /da ni snying po bsdus pa bstan pa'i phyir/ na mo zhes bya ba la sogs pa gsungs te snga ma bzhin du shes par bya'o//de ltar lha lnga po'i 'khor na gnas pa'i thugs kyi khro bo bcu sngon ni bskul la/ ma 'ongs pa las bzhi 'grub pa yin pas de bshad pa ni/ ha ra ni hUM mdzad bskul ba ste drag po'o/ /ma tha ni rnam par rgyal ba bskul ba ste de yang drag po'o//d+hu na ni dbyug sngon can de dbang ngo / /da ha ni gshin rje mthar byed de de yang dbang ngo / /pa tsa ni mi g.yo ba ste drag po'o/ /d+hA ra ni rta mchog ste zhi ba'o/ /dA ra ya ni gzhan gyis mi thub pa ste rgyas pa'o/ /dA ru Na ni bdud rtsi 'khyil pa ste zhi ba'o/ / ts+tshin+da ni khams gsum las rnam par rgyal ba ste rig sngags gcad pa'o/ /b+hin+da ni stobs po che'i sngags te des rig sngags mnan pa 'grub pa'o/ /de dag gis bya ba kun snga ma bzhin du sbyar bas las thams cad 'grub par 'gyur ro/ /da ni lha rnams kyi yang snying shin tu yang bsdus pa gsungs pa ni na ma zhes pa la sogs pa ste de yang gtso bo rnam gnyis la mchod cing de'i snying po'o//hu lu ni rdo rje kI la ya'i ste byas pa'o/ /tiSh+Tha ni rdo rje be con gyi zhi ba'i'o/ /ban+d+hA ni rdo rje tho ba ste dbang gi'o/ /ha na ni rdo rje gtum po ste drag bo'i'o//a mr-i te ni pho nya dang mngag pa yab yum khro bo mi 'chi ba dang / lu gu rgyud ma'i sngags te khrus dang bskrad pa la shes par bya ste de dag gis kyang de bzhin du 'gyur ro/ /'di skad ston te sngon du bsnyen pa la ni gsum po gang yang rung ba bzlas la sgrub pa las la sbyar ba ni gnyis su med par shes par bya ste las sgrub pa la ni man ngag bzhin du sbyar ro//de yang bsnyen pa gsum ste sgrub pa gnyis/ /las sgrub so sor shes par bya/ /zhes gsungs so/ /da ni de dag gi mjug bsdu ba'i cho ga phan yon dang bcas pa phun sum tshogs pa bstan te/ de yang sdug bsngal thams cad bral bar byed pa'i phan yon ni//sdig pa thams cad byang byas nas/ zhes bya la sogs pa gsungs te/ de dag gi sngon byung du rgyal po log pa'i snying po la sogs pa'i 'khor rnams the tshom skyes pa la de dag brod pa bskyed pa'i phyir gsungs la/ ma 'ongs pa la ni sgrub pa'i phan yon du sbyar ro//de la sdig pa ni sgrib pas na sdig pa ste srog gcod pa la sogs pa mi dge ba bcu'i las so/ /thams cad ni de dag dang nye ba ma lus pa'o/ /'dis de dag byang bar byas pa ni dag par byed pa'o/ /gzhan yang der ma zad de lus ngag yid gsum zug rngus gzir bas na sdug bsngal te 'gyur ba la sogs pa gsum mam brgyad do//med par byed pa ni sel bar byed pa'o/ /de nas sems can zhes bya ba la sogs par 'brel te/ sems can gang dag sngon gyi las dang rkyen dang 'byung pos mig la sogs pa'i dbang po drug nyams pa ni long ba la sogs pa ste/de la sngags 'dis bkrus nas nyams pa las sos te thar zhes par 'brel to/ /de bzhin du tshe ni 'tsho ba ste de zad pa ni dus la bab pa ste de yang ring bar 'gyur ro/ /tshe nyams pa ni rkyen gyi tshe tshad las thung bar gyur pa ste de yang tshad du 'tsho'o//phun sum tshogs pa ni ma tshang ba med pa ste nor la sogs pa yin la/ de dag ma tshogs pa'i byur ni min pa ste des sems can gang la chags pa ni gang la byung zhing gnas pa yang phun sum tshogs par 'gyur ro/ /lha rnams ni mthu dang rdzu 'phrul la sogs pa dang ldan pa'i 'jig rten pa dang 'jig rten las 'das pa'i lha ste/de dag bsgrubs kyang 'phangs nas 'grub par mi ster ba ni rgyab kyis te phyogs pa ni ring ba'o/ /de yang nye bar byed do/ /bdag dang yid gcugs shing yid du 'ong ba ni mdza' sdug ste so sor gnas pas skye bo ste bden pa ma mthong ba'o//de sdang ba ni byams pa dang bral ba ste de yang byams pa'o/ /bran ni 'khor bzang po'o/ /bza' mi ni chung ma la sogs pa'o/ /sogs pa ni ma lus pa'i nye ba'o/ /de dag 'byung pos gtses pa ni skrag cing bcom pa ste de yang mi 'tshe ba'o//yang na/ bram ze la sogs gtses pa dang //zhes glegs bam la la na gnas te/ 'jig rten na bram ze dang rgyal po dang rje'u dang dmangs kyis bdag gtses pa las thar ba'o/ /yang na bdag gis bram ze dang dge slong la sogs pa nus pa can dang zhing dag pas gtses pa yang nus pa bzlog la sdig pa 'dag par 'gyur ro//yang na bram zes khyer ba zhes pa ste gza' skar ngan pa la shi ba yang cho gas phan no/ /bdag dang gzhan gnyis ni phan tshun te de dag mi mthun pa ni sems mi gcugs shing ngag dang lus 'thab pa ste mthun par 'gyur ro//sngar longs spyod che ba la phyis byin pa yin pas nor te gser la sogs pa'o/ /'grib pa ni bri pa'o/ /des rgyud la sdug bsngal bskyed pas gnod pa'o/ /mya ngan ngal dang gnod pa ni gdungs pas dub pa ste de la gdon gyis tshugs par sla'o//yang na dang zhes sbyar te dub pas gnod pa dang phal par gnod pa thams cad do/ /gzhan yang skrag cing bag tsha ba ni 'jigs pa ste rgyal po'i chad pa la sogs pa brgyad do/ /phongs pa ni snga nas dbul ba'o/ /gzhan yang gdug cing 'dzin pas gza' ste pa ba sangs la sogs pas gnod cing de dag ngan pa la bab pa'o//rgyu skar ni nam mkha' la so sor 'thor nas rgyu ba ste smin drug la sogs pa'o/ /de dag la khrus byas te bzlog pas zhi bar 'gyur ro/ /byad stems zhes pa ni rig sngags ngan pa'i 'khrul 'khor gyis ming bcug ste gsod par 'dod pa'o//mi bzad pa'i gdon ni nad la sogs pa tshabs cher 'debs pa ste rdzu 'phrul che ba'i lha la sogs pa'o/ /de dag gis nyen pas ni btab pa'o/ /mya ngan ni lus ngag yid gsum gdungs pa'i khyad par te des phung po ngal te gnyid log pa'am/dngos su 'byung po byung ba'o/ /de'i stobs kyis gnyid log pas sems rmongs te yid kyi rnam shes rgyu bas rmi lam ste/ der sdig pa mthong bas ni ngan pa ste btson ra la sogs pa'o/ /yang zhes pa bzlas pa ste kun la sbyar ro/ /yang na dang zhes pa so sor sbyar ro//de dag thams cad kyang 'di'i sgo nas sel cing de dag las thar bar 'gyur ro zhes sbyar ro/ /de dag gi rgyud las 'byung ba thams cad sel ba'o/ /da ni rgyud la bde ba thams cad ldan par byed pa gsungs pa ni/ /rgyud do cog gi rtsa ba ste/ /zhes pa blang ngo //de yang sngon 'byung du ni 'brel cing rgyun chags pas rgyud de rgyud do/ /cog ni ma lus pa'o/ /rtsa ba ni gzhan la ma ltos shing gzhan skyed par byed pa ste/ de ni rdo rje lhun po ri rab zom gyi rgyud ces bya ba le'u brgya dang brgyad pa'i le'u dang por 'di gsungs la/ des 'di bshad pa'o/ /rgyud de bdag gis mthong ngo / /ma 'ongs pa la ni bdag gi yon tan ma lus pa ni rgyud do cog yin la de las 'byung bas rtsa ba'o/ /yang na chos thams cad kyi rtsa ba rdo rje lta bu'i ting nge 'dzin yin pas so/ /la la dag rgyud thams cad kyi rtsa ba dbang bskur ba ste/de yang chu la rag las pas zhes 'chad de ma yin no/ /gzhan yang dpal kun te bsten par 'os shing yon tan che ba ste/ 'byor pa dang bu la sogs pa'am tshogs gnyis so/ /des legs par brgyan pa ni de dag yongs su rdzogs shing tshang ba 'di'i sgo nas byed pa yin no//de nas/ tshe dang bsod nams 'phel bar 'gyur/ zhes par sbyar te bsod nams ni grags pa dang longs spyod de yid bde zhing lus ngag rgyas par byed pa'o/ /sdig pa kun ni gong du bstan pa'o/ /de la thar ba ni grol ba ste/ mngon par mtho ba dang nges par legs pa thams cad thob par 'gyur ba'o zhes dgongs so//de dag ni spyi'i bya ba'i cho ga'i phan yon no/ /yang na las de dag la bya ba so sor sbyar bar shes par bya'o/ /de ltar phan yon 'byung ba bshad nas da ni cho ga bshad par bya ba'i phyir/ des ni zhes bya ba la sogs pa gsungs te/de yang sgrub pa po dang bsgrub bya dag sta gon la gnas pa'o/ /'di dag gis ni 'das pa la 'di ltar gyis shig ces gdams la ma 'ongs pa la cho ga bya ba dngos yin no/ /de la sgrub pa po dang bsgrub bya/ des ni rab bkrus gtsang ma yin/ /zhes gsungs te/ phyi'i khrus ni chu dang sas legs par bkrus pas dri ma dag par bya ba ste lan gsum du'o//gtsang ma'i gos ni gzhan du longs ma spyad pa'i gos sar pa lan gsum du brje'o/ /de bzhin du zas dkar gsum bza' ba dang / zhag gcig smyung bar gnas par byas la'o/ /nang gi khrus ni/ gang dag yid dge sems dang zhing / zhes pa ste lus dang ngag dang yid gsum gyis mi dge ba bcu mi byed par sdom pa la/ sems dang ba ni dad pa'o/ /de dag gis ni rten gyi gang zag dang sta gon la gnas pa bstan to/ /de nas sa blang ba la sogs pa cho ga dang sgrub thabs las byung ba bzhin du dkyil 'khor 'byor pa'i bye brag gis bris la rdzas bkod de bsgrub par bya'o//zhes bya ba'i bar du'o/ /de yang dang po sta gon gnas pa yis/ /sa yi cho ga rdzogs byas te/ /'byor pa dkyil 'khor bri byas la/ rten la brten de bsgrub par bya/ /zhes gsungs so//de'i 'og du khrus la sogs pa sngon du song bas lha bskyed pa ni mdo sde zhes bya ba la sogs pa'o/ /de yang sngon byung la ni mdo sde zab mo sangs rgyas kyi gsungs pa 'di mnyan par bya ba dang / de'i phan yon bstan pa la rjes su 'jug pa ni lha bskyed pa dang sngags bzlas pa'i thabs su 'gyur ro zhes dgongs pa'o//de la mdo sde ni rgyud dang gcig pa ste don zab mo sder ston la tshig gi mdo tsam du gsungs pas so/ /yang na gnas dang ston pa la sogs pa gsungs pa'o/ /de yang / gnas rnams dang ni mtshan nyid dang / chos don smos phyir mdo sde'o/ /zhes pa dang / tshig nyung ba la don rgyas pa'i/ /mdo sde dam pa blta bar bya/ /zhes gsungs so/ /don du bya na gzungs sngags thams cad dang bcas pa ste dam pa ni mchog go/ /mnyan par bya ba ni gdams pa ste sangs rgyas dang bla ma la rna bas thos shing shes par bya ba'o//de nyid gzhan gyis rtogs par dka' bas/ zab mo sangs rgyas spyod yul te/ sangs rgyas kyis gsungs pa'o/ /yang na chos nyid stong pa'i lha la sogs pa drug po zab cing des sangs rgyas kyi sku ste spyod yul du bskyed pa'o/ /des ni bsnyen pa sgra la gnas pa'i bsam gtan gyi sngags bzlas pa yang shes par bya'o zhes bya ba'i don to//nyan byed na ni thos na'o/ /gzi brjid ni 'od zer te dpal gang yin pa'o/ /yang na lha drug po'i don ni mdo sde yin la de nyan pa ni sgom pa'o/ /da ni bzlas pa'i bsam gtan ni nor bu'i phreng ba dang ldan pas mdo sde'i lha rnams kyi thugs ka na gnas pa'i zla ba dang /rdo rje dang sngags so/ /de'i 'od zer gyi spro bsdu ni gzi brjid do/ /des ji ltar bsams na srog chags te rlung nang na gnas pa 'tsho ba'o/ /mi bzad pa'i nad ni 'tsho bar dka' ba'i mdze ste 'byung ba las gyur pa dang / klu'i gdon no/ /kyang zhes pa ni mi mthun pa'i rkyen te de yang zhi na gnas gzhan smos ci dgos zhes pa'i don to/ /zhi bar blta ni zhi bar 'gyur ba'o/ /yang na zhi bar blta ni sngags bzlas so/ /de ni khro bo'i ngag tu las sbyor gyi sngags bzlas par bstan to/ /da ni rten gang la brten te sgrub pa ni gser ram yang na ni zhes bya ba la sogs pa gsungs te//bsnyen pa la bum pa gcig /las la lnga'o/ /de'i rgyu ni rin po che gser ni rab bo/ /yang na ni zhes phyogs gzhan ston pa ste dngul ni 'bring ngo / /kyang rung zhes pa ni bsdu ba ste zangs ni tha ma'o/ /de ltar ma 'byor nas las bum pa dmar po nag po ra ri med par bya'o//de yang / bum pa pad+ma dmar po'i mdog 'dra zhing / /zhes pa la sogs pa gsungs so/ /des ni bum pa'i rgyu bstan to/ /'di dag ni sngon gyi dus dang rjes kyi dus 'dra ba'o/ /da ni snying po dang rgyan ni chu yis dgang zhes pa la sogs pas ston te/de yang 'dir chu bo chen po'i chu dang 'o mas nang dgang ba ste bkru ba dang bsang bas bya'o/ /'dir chu yi gser ram zhes bya bar 'dod de 'di ni rmongs pas mi shes par blta'o/ /de nas gzhan du longs ma spyad pa'i ras kyi gtsang mas thor cog gsum gyi tshul du dkri'o//der snying po ni nor bu ste yid du 'ong ba'i mu tig mig med pa dang / yungs kar te sgrub pa'i rdzas bgegs bskrad pa snod dam par blugs te steng du gzhag go/ /dUr ba ni ram pa ste/ bkra shis pas lo ma dang bcas pa dang / ku sha dang rma bya'i sgro bdun bdun bum pa'i khar gzugs so//dkon pas na rin chen te de dag rma med pa ni ma spyad cing ma rnyings pa'i sar pa'o/ /yang na mig med pa ste gser la sogs pa lnga dang / tsan+dan ni dri dang ldan pa dkar po ste/ de la sogs pa dri lnga dang bcas pa ni lhan cig don te til la sogs pa 'bru lnga dang /ha sa de ba la sogs pa sman lnga dang / bu ram la sogs pa snying po lnga gsang ba spyi rgyud bzhin du blugs par bya'o/ /der yang shel dang / rdo rje pha lam dang me tog sngon po bcug la de'i phreng bas kha la brgyan no/ /de'i khar ni bkra shis pa'i shing mya ngan med pa la sogs pa 'bras bu can gyis brgyan la/rdo rje gzhag ste bkra shis pa'i thag pas btags te las la sngar gzhug go/ /de dag ni bsnyen pa la yang shes par bya'o/ /de yang rin po che la sogs pa'i yon tan shes par bya ste/ lha'i mtshan ma ni dgod pa ma yin par shes par bya'o//de nas bzlas pa'i grangs bstan pa'i phyir lan grangs zhes pa la sogs pa gsungs te/ yang nas yang du bskyar bas lan grangs te gzungs rings ni nyi shu rtsa gcig la/ snying po dang yang snying ni brgya rtsa brgyad du bzlas so/ /su ni byed pa gsum pa'i gsum pa ste de nas khrus bya zhes pa'o//'di skad ston te 'das pa la ni grangs des chog pa yin la/ ma 'ongs pa la ni sngon du bsnyen pa 'bum rdzogs nas las la bsam gtan dang ldan pas shes par bya'o zhes pa'i tha tshig go/ /las la sbyar ba dngos bstan pa'i phyir rgyal po zhes gsungs te/sngon byung ba la ni lha'am mi che bas rgyal po ste log pa'i snying po'o/ /de ni 'khor nye ba'i gdul bya la dgongs pa ste 'khor gzhan yang bkag pa ni ma yin no/ /rjes 'jug la ni rgyal po bsod nams che bas smos te/ rgyal po la sogs pa thams cad ces sbyar ro//rtag tu ni dus gsum du'o/ /bum pa'i chu des khrus gyis shig dang zhes gdams pa'o/ /de ltar byas na gong gi phan yon thob par 'gyur ro zhes sbyar ro/ /des na rnal 'byor pa dus gsum du bkru la/ bsgrub bya la ni ma zhi bar du khrus bya ba dang /bya ba'i rgyud yin par bstan to/ /de yang / rten mchog dag dang ldan byas nas/ /mkhas pa gang la bkru byas na/ /mngon mtho nges legs 'byung bar 'gyur/ zhes gsungs so/ /de dag gis ni 'di skad bstan par 'gyur te/ sngon du bsnyen pa rdzogs nas sta gon la gnas pas sa'i cho gas dkyil 'khor 'byor pa'i bye brag gis bris te bum pa dgod cing lhar bskyed la sngags dang ting nge 'dzin dang ldan pas bzlas te khrus kyi man ngag bzhin bya ba dang /bsrung ba dang bkru ba la sogs pa byas te 'byor pa chung bas dpa' bo gcig pa bstan par bya'o zhes dgongs so//rdzogs pa ni yang dag par thob pa ste rgyud chen po nas phyung zhes pa'o/ /'di ltar rdo rje'i gdams ngag 'di/ /nga yis sngon du don mthong gis/ /the tshom med par sgrubs shig dang / /dpag med bsam pa rdzogs par byed/ lha dang bla mas bskul ba'i phyir//'grel pa dri ma med pa 'di/ /sangs rgyas gsang bas byas pa ste/ /'di yis kun kyang de grol shog /'phags pa rdo rje rnam par 'joms pa'i 'grel pa rin po che gsal ba zhes bya ba/ bya ba'i rgyud kyi grub pa sangs rgyas gsang bas mdzad pa rdzogs so/