CLOSE WINDOW

D2679
བོད་ཡིག

@##/ /rgya gar skad du/ /badzra bi dA ra nA ma d+hA ra Ni byA khyA na badzrA lo ka nA ma/ bod skad du/ rdo rje rnam par 'joms pa zhes bya ba'i gzungs kyi rnam par bshad pa rdo rje sgron ma zhes bya ba/ ma rungs pa thams cad 'dul ba'i rgyal po la phyag 'tshal lo/ /sku gsung thugs kyi snang ba'i rnam 'phrul gyis//bdud tshogs rab 'dul mdzad la phyag 'tshal nas/ /'gro ba'i nyon mongs bgegs tshogs zhi ba'i phyir/ /rdo rje rnam 'joms gzungs ni ci nus dbye/ /'di skad bdag gis zhes bya ba la sogs pa 'di dag gis brjod par bya ba la sogs pa ni thog mar smra dgos so zhe na/de ni rigs pa kho na yin te 'di ni mdo yin pa'i phyir ro/ /rdo rje rnam par 'joms pa zhes bya ba'i gzungs zhes bya ba ni mdo yin la/ 'di skad ces bya ba la sogs pa ni 'di la gdul bya rnams 'dun par bya ba'i phyir gzungs so/ /de rnams la rdo rje rnam par 'joms pa'i rang bzhin bstan par bya ba'i phyir sangs rgyas kyi mthu zhes bya ba nas brtsams te/snyoms par zhugs so zhes bya ba'i bar du ni byin gyis brlabs pa dang / rjes su mthun pa'i ting nge 'dzin bstan to/ /de nas lag na rdo rje zhes bya ba nas brtsams te/rdo rje khro bo las byung ba zhes bya ba'i bar gyis ni byin gyi brlabs kyis rdo rje rnam par 'joms pa'i rang bzhin gyi dkyil 'khor sprul pa bstan to/ /rdo rje snying pos smras te zhes bya ba nas brtsams te/ thams cad du ma pham pa zhes pa'i bar gyis ni dkyil 'khor gyi rang bzhin bstan to//sems can thams cad skrag par byed pa zhes bya ba nas brtsams te/ gdon thams cad rlag par byed pa zhes bya ba'i bar gyis mi mthun pa'i phyogs tshar gcad pa bstan to/ /gdon thams cad las thar bar byed pa zhes bya ba nas brtsams te/ sems can thams cad srung ba zhes bya ba'i bar gyis ni bstan pa la zhugs pa rnams la phan gdags pa bstan to//zhi ba zhes bya ba nas brtsams te/ rmugs par byed pa zhes bya ba'i bar gyis ni las rnam pa gsum mdor bsdus nas bstan to/ /gsang sngags kyi mthu chen po 'di zhes bya ba nas brtsams te/rab tu smras so zhes bya ba'i bar gyis ni gsang sngags 'byung ba'i rgyu bstan to/ /de dag gis ni mtshan nyid kyis bsdus pa'i don bstan to/ /na mo rat+na tra yA ya zhes bya ba nas brtsams te/ se nA pa tA ye zhes bya ba'i bar gyis ni gsang sngags gsungs pa'i thog mar dkon mchog gsum dang /phyag na rdo rje la phyag btsal ba bstan to/ /tad+ya thA zhes bya ba nas brtsams te/ su badzrA ya swAhA zhes bya ba'i bar gyis ni bcom ldan 'das rnam par 'joms pa'i chos kyi dbyings kyi ye shes kyi rang bzhin bskul ba bstan to/ /he phu l+lu zhes bya ba nas brtsams te/mA ra Na zhes bya ba'i bar gyis ni de kho na nyid kyi ye shes bzhi bskul ba bstan to/ /badzra bi dA ra Na ya swAhA zhes bya ba nas brtsams te/ kI li kI la ya zhes bya ba'i bar gyis ni de kho na nyid kyi rgyu'i rang bzhin bskul ba bstan to/ /tsu ru tsu ru zhes bya ba nas brtsams to//badzra pra b+hany+dza nA ya swAhA/ zhes bya ba'i bar gyis ni khro bo bzhi'i snying po'i sgo nas bskul ba bstan to/ /ma tis+tha ra badzra zhes bya ba nas brtsams te/ a mu ka mA ra ya phaT ces bya ba'i bar gyis ni de dag nyid kyi gsung gi sgo nas phrin las mdzod cig ces bskul ba bstan to/na maH sa man+ta badzra NAM zhes bya ba nas brtsams te/ badzra ad+ku sha dz+wA lA ya swAhA/ /zhes bya ba'i bar gyis ni khro bo rnams kyi sku gsung thugs dag gis bcol ba'i phrin las mdzod cig ces bskul ba bstan to/ /na mo rat+na tra yA ya zhes pa nas brtsams te/ b+hin+da b+hin+da badzra hUM phaT ces bya ba'i bar gyis ni bcom ldan 'das kyi snying po'i sgo nas bskul ba bstan to//na maHtsaN+Da badzra kro d+hA ya zhes bya ba nas brtsams te/ a mr-i te hUM zhes bya ba'i bar gyis ni de kho na nyid kyi nye ba'i snying po'i sgo nas bskul ba bstan to/ /de dag gis ni phrin las la bskul ba'i bsdus pa'i don bstan to//sdig pa thams cad byang byas nas/ /zhes bya ba nas brtsams te/ dpal kun gyis ni legs par brgyan/ /zhes bya ba'i bar gyis ni gzungs 'di'i dkyil 'khor sgrub pa bstan to/ /sems can dbang po nyams pa dang / /zhes bya ba nas brtsams te/ rmi lam sdig pa mthong na yang / /zhes bya ba'i bar gyis ni ji lta ba bzhin du bsgrubs pas tshe 'di dag dang gzhan la gnod par gyur pa'i mi mthun pa'i phyogs 'di lta bu dag yod na yang spang bar 'gyur ro zhes bya bar bstan to/ /des ni rab bkrus gtsang ma yin/ /zhes bya ba nas brtsams te/mdo sde 'di ni nyan byed na/ /zhes bya ba'i bar gyis ni mdo sde 'di nyan pa'i thabs bstan to/ /mdo sde 'di yi gzi brjid kyis/ /zhes bya ba nas brtsams te/ sdig pa kun las rnam par thar/ /zhes bya ba'i bar gyis ni mnyan pa'i phan yon bstan to/ /nor bu yungs kar dUr ba dang //zhes bya ba nas brtsams te/ gtsang ma'i gos kyis dkris shing dgang / zhes bya ba'i bar gyis ni khrus byas pa'i yan lag gi gtso bor bum pa'i cho ga bstan to/ /lan grangs nyi shu rtsa gcig gam/ /zhes bya ba nas brtsams te/rgyal po rtag tu khrus kyis shig /ces bya ba'i bar gyis ni mdo bklag pa'i grangs bstan pa'i sgo nas khrus bya ba'i cho ga bstan to/ /de dag gis ni phan yon gyi bsdus pa'i don bstan to/ /de lta bu'i mtshan nyid kyi ye shes dang ldan pa'i bcom ldan 'das ni brjod par bya ba yin la/gzhung 'di ni rjod par byed pa yin no/ /mdo sde bshad pa'i sgo dang ldan pa'i nyan pa pos don ji lta ba bzhin du khong du chud pa ni dgos pa yin no/ /khong du chud pa'i gang zag gis 'bras bu rnam pa gnyis mngon du gyur pa ni dgos pa'i dgos pa yin no/ / 'di dag gi don 'brel ba ni don gyis shes par bya ste/ 'di ltar/ bstan bcos dang ni dgos pa'i don/ /'brel pa bzhi ni gnyis la gnas/ /de bstan 'dus pa de yi phyir/ /dgos las logs shig ma bstan to/ /zhes bshad pa lta bu'o/ /rdo rje rnam par 'joms pa'i gzungs kyi bsdus pa'i don bstan to// //de ltar bsdus pa'i don bstan nas da ni tshig gi don bshad par bya ste/ 'di ltar mdo don smra bar 'dod pa yis/ /dgos pa bsdus pa'i don bcas dang / /tshig don bcas dang mtshams sbyar bcas/ /brgal lan bcas pas bsnyad par bya/zhes bstan pas so/ /'di skad du/ gzhung 'di ji lta bu zhig /nyan pa po su zhig gis thos pa na/ /dus ni gang zhig gi tshe/ /ston pa ni su zhig /gnas ni gang du bstan zhe na/ rtog pa de dag bsal ba'i phyir lcang lo can na bzhugs pa'i sa bcu'i dbang phyug rdo rje 'dzin pas 'di skad ces bya ba la sogs pa gsungs te/'di skad ces bya ba ni bcom ldan 'das kyis gsungs pa'i don la/ 'di la cung zad kyang lhag pa dang chad par gyur pa med do zhes bya ba'i don to/ /bdag gis zhes bya ba ni bdag nyid kyis bcom ldan 'das las mngon sum du thos kyis brgyud pas ni ma yin no zhes bya ba'o//thos pa zhes bya ba ni bdag gis rna ba'i rnam par shes pas thos pa yin gyi rtog pa la sogs pas ni ma yin no zhes bya ba'o/ /dus gcig na zhes bya ba ni bcom ldan 'das kyis nam gyi gung thun la bdud kyi dpung gi tshogs chen po 'dul bar gyur na'o zhes bya ba'o//yang na bdag nyid thos pa mang ba'am tshad ma'i skyes bu yin par yang bstan to/ /bcom ldan 'das zhes bya ba ni bdud bzhi bcom pa dang ldan pa ni bcom ldan 'das te/ shAkya thub pa zhes grags pa'i rab tu byung ba'i cha lugs can no//'di ltar bcom pa'i phyir na/ bcom ldan 'das zhes bstan pa'i phyir ro/ /rdo rje la bzhugs te zhes bya ba ni byang chub kyi shing dang ldan pa'i rdo rje'i gdan la sgo bzhi la sogs pas brgyan pa'i gzhal yas khang phun sum tshogs pa'i dbus na rdo rje'i skyil mo krung bdud 'dul ba'i phyag rgyas bzhugs so//yang na byams pa chen po'i ting nge 'dzin la snyoms par zhugs pa la bya ste/ byams pa chen pos bdud kyi stobs dag bcom/ /zhes bstan pas so/ /'di la 'khor gzhan ni med do snyam na bden te/ bcom ldan 'das kyi nye gnas su gyur pa 'phags pa kun dga' bo la sogs pa med pa kho na yin te de'i dus na ma byung ba'i phyir ro//'on kyang bskal pa bzang po'i byang chub sems dpa' la sogs pa rnams ni don gyis yod par shes par bya ste/ de lta ma yin na bdag cag gi lung dang 'gal bar 'gyur ba'i phyir ro//yang na dkyil 'khor gyi yan lag tu gyur pa'i rigs pa'i khro bo rnams kyis yin par shes par bya'o/ /'di skad ston te/ gnas pa la sogs pa ma bstan na gzhan dag gzhung 'di las som nyir 'gyur ro snyam du dgongs pa ste/ 'di ltar/ ston pa dang ni 'khor dbang po/ /zhes bstan pa yin pas so/ /de dag gis ni gdul bya 'dun par bya ba'i phyir phun sum tshogs pa rnams dang ldan pa'i gleng gzhi gsungs pa yin no/ /de ltar 'dun par bya ba'i 'og tu ci zhig bstan zhe na/ de'i rang bzhin bstan pa'i phyir sangs rgyas kyi mthus zhes bya ba la sogs pa gsungs te/sangs rgyas zhes bya ba ni khyad par du gyur pa'i zag pa zad pa dang ldan pa'i skyes bu chen po ste/ 'di ltar/ ma rig gnyid las sangs phyir dang / /shes bya la yang blo rgyas pas/ /sangs rgyas pad+ma'i 'dab ltar rgyas//zhes bshad pas so/ /mthu zhes bya ba ni de dag gi byin gyi rlabs kyis te/ khab len gyis lcags 'dren pa lta bu'o/ /lag na rdo rje zhes bya ba kun du bzang po nyid do/ /lus thams cad ces bya ba ni bsags pa'i phyir na lus te phyag na rdo rje'i tshogs bsags pa las byung ba'i lus kyi cha shas rnams so//rdo rjer byin gyis brlabs nas zhes bya ba ni rin po che'i rdo rje ltar bdag nyid kyis ye shes kyi rang bzhin du bskrun pa'o/ /rdo rje'i ting nge 'dzin la snyoms par zhugs so zhes bya ba ni mi rtog pa'i ye shes la gnas bzhin du rjes la thob pa'i ye shes kyis sgyu ma'i skur dkyil 'khor sprul pa dang /rgyud bshad pa la dbang thob par bya'o snyam pa'i ting nge 'dzin thugs rtse gcig par bzhugs pa ste/ 'di ltar rnam par mi rtog pa'i ye shes kyis ni chos thams cad nam mkha'i dkyil dang 'dra bar mthong la/rjes las thob pa'i ye shes kyis ni sgyu ma lta bur mthong ngo zhes gsungs pas so/ /'di skad ston te/ bcom ldan 'das mngon par rdzogs par 'tshang rgya ba'i bar du gcod pa'i phyir bdud kyi tshogs mang po sa'i steng dang bar snang la lhags par gyur pa na/ de bzhin gshegs pa rnams kyis phyag na rdo rje la byin gyis brlabs nas bka' stsal pa/rigs kyi bu khyod kyis lus ma rungs pa'i khro bor bsgyur te bdud 'di dag thul cig /de skad ces gsungs pa dang / phyag na rdo rje bdag nyid kyi lus khro bo'i rgyal po chen po rdo rje rnam par 'joms pa sku mdog ljang sngon zhal 'byes pa/smin ma khro gnyer can/ ral pa dmar ser/ zhal gcig pa/ spyan gsum pa/ phyag gnyis pa/ g.yas pa rdo rje thugs kar gsor ba/ phyag g.yon pa bkur brten pa/ zhabs g.yon pa rdo rje'i gdan la brkyang pa/rab tu brjid pa'i 'gying bag dang ldan pa/ dar dang lwa ba'i stod g.yogs dang smad g.yogs mnabs pa/ sbrul gyis brgyan pa/ me'i tshogs chen po 'bar ba lta bu'i nang na gnas pa/ ma rungs pa thams cad 'dul ba'i skur dkyil 'khor gyi dbus su sprul par gyur te/de'i rjes thogs la ci zhig mdzad ce na/ de nas zhes bya ba la sogs pas 'khor gyi khro bo sprul pa gsungs so/ /de nas zhes bya ba ni de ma thag pa ste/ gtso bo'i ting nge 'dzin la snyoms par zhugs pa'i rjes thogs la'o/ /lag na rdo rje zhes bya ba ni gang gi lag na rdo rje gnas pa de la de skad ces bya ste/lag na rdzas thogs pa ltar ye shes nye ba na gnas pa'i rtags can no/ /sangs rgyas kyi mthu dang zhes bya ba ni bcom ldan 'das nyag gcig gi byin gyis brlabs kyis dkyil 'khor sprul pa'i nus pa bskyed pa'o/ /sangs rgyas kyi byin gyi rlabs dang zhes bya ba ni phyogs bcu'i de bzhin gshegs pa thams cad kyi byin gyi rlabs dang ngo //byang chub sems dpa' thams cad kyi byin gyi rlabs kyis zhes pa ni sa chen po la gnas pa'i byang chub sems dpa' rnams kyi nus pa ci yod par byin gyis brlabs pa'o/ / yang na byang chub sems dpa' zhes bya ba ni/ bdud rtsi thob phyir lam ni ma yin chad/ /lam ngan spongs la lam la mnos shig ces/ /lta ngan sems can rnams la go bar byed/ /rgyu des byang chub sems dpa' zhes bshad do/ /zhes gsungs pa'i tshul gyis yin no//rdo rje khro bo las byung ba'i zhes bya ba ni rang nyid kyi sku las mtshams bzhir phyung bar gyur pa'o/ /'di skad ston te/ sangs rgyas dang byang chub sems dpa' thams cad kyi byin gyi rlabs kyis phyag na rdo rje'i sku dang gsung dang thugs byin gyis brlabs te dkyil 'khor sprul pa'i nus pa bskyed nas bdag nyid kyis kyang dkyil 'khor sprul pa'i ting nge 'dzin la snyoms par zhugs so//khro bo rdo rje gtum po zhes bya ba sku mdog smug nag zhal gyi bzhin khro gnyer can/ g.yas pa'i phyag gis rdo rje rtse gcig pa 'dzin pa/ phyag g.yon pa thugs kar sdigs mdzub bsgreng ba/thugs ka nas phyung nas dbang ldan gyi phyogs su gzhag go/ /de nas khro bo rdo rje kI li kI la ya zhes bya ba sku mdog ljang nag /dpral bar khro gnyer rab tu bsnyer ba/ g.yas pa'i phyag gis rdo rje rtse gcig pa 'dzin pa/ thugs ka nas phyung nas me'i mtshams su gzhag go/ /de nas khro bo rdo rje be con zhes bya ba/ sku mdog mthing nag g.yas pa'i phyag gis gshin rje'i be con bsnams pa/ thugs ka nas phyung nas bden bral gyi mtshams su gzhag go/ /de nas khro bo rdo rje tho ba zhes bya ba sku mdog nag po g.yas pa'i phyag gis rdo rje tho ba bsnams pa thugs ka nas phyung nas rlung lha'i mtshams su gzhag go//lhag ma ni snga ma bzhin no/ /'di dag ni rtogs par bya ba'i don yin no snyam du dgongs so/ /de ltar rang bzhin gyi dkyil 'khor sprul pa bstan nas/ de'i rang bzhin ji lta bu zhig yin zhe na/de bstan par bzhed nas rdo rje snying pos smras te zhes bya ba la sogs pa gsungs te/ ye shes kyi thugs mnga' bas na/ rdo rje snying po ste phyag na rdo rje nyid do/ /smras te zhes bya ba ni sangs rgyas dang byang chub sems dpa' thams cad kyi byin gyis brlabs nas 'og nas byung ba rnams gong du brjod pa'o//'di skad du gal te phyag na rdo rje nyid kyis bshad pa yin na ni gang du bdag gis thos pa zhes smras pa dang 'gal lo zhe na/ de ni byin gyis brlabs pa ni 'gal ba med do/ /sangs rgyas kyi mthus tshe dang ldan pa shA ri'i bus smras so zhes bya ba lta bu'o//de ltar na yang gcig nyid yin no zhe na ma yin te sngar ni de bzhin gshegs pa'i byin gyis brlabs nas bshad pa yin la/ phyis ni bshad pa'i gzhung bsdus pa yin no/ /de lta na yang skyon yin no zhe na/ thams cad la thal bar 'gyur ro/ /spros pas chog go//da ni dkyus ma nyid la 'jug par bya ste/ mi chod pa zhes bya ba ni ye shes yin te/ bdud la sogs pas bar du gcad par mi nus pas so/ /mi shigs pa zhes bya ba ni mi rtog pa'i ye shes de nyid mtshan ma'i rnam par rtog pas bshig par mi nus pa'o//bden pa zhes bya ba ni brtags pa'i dngos po dang bral ba'o/ /sra ba zhes bya ba ni nyon mongs pa'i gsos mi mnga' ba'o/ /brtan pa zhes bya ba ni ye shes kyi rang bzhin de nyid gzhan du mi 'dor ba'o/ /thams cad du thogs pa med pa zhes bya ba ni shes bya rnam pa gnyis la thogs pa med pa'o//thams cad du ma pham pa zhes bya ba ni thugs rje chen po'i ye shes kyis khyab pa'o/ /'di skad du ston te gang du dkyil 'khor sprul pa yang byin gyi rlabs yin pa ltar/ de dag gis rdo rje snying po bskul nas rang bzhin bstan pa yang 'di yin no zhes bya ba'i don to//ye shes kyi rang bzhin de lta bu zhig yin na ci mi mthun pa'i phyogs tshar gcod pa yang byed dam zhe na/ de lta ma yin no zhes bstan par bya ba'i phyir/ sems can thams cad skrag par byed pa zhes bya ba la sogs pa gsungs te/ sems can thams cad ces bya ba la sems dang ldan pas na sems can te/dga' rab dbang phyug la sogs pa'i bdud rnams so/ /skrag par byed pa zhes bya ba ni de dag dngangs shing 'dar bar byed pa'o/ /sems can thams cad 'jil bar byed pa zhes bya ba ni bdud kyi ris su gyur pa rnams 'jigs shing 'byer bar byed pa'o//rig sngags thams cad gcod par byed pa zhes bya ba ni bdud la sogs pas sbyar ba'i rig sngags ngan pa rnams kyi mthu nyams par byed pa'o/ /rig sngags thams cad gnon par byed pa zhes bya ba ni byad stems la sogs pa'i sbyor ba'i nus pa med par byed pa'o//las thams cad 'joms par byed pa zhes bya ba ni sman dang rdzas la sogs pa'i sbyor ba las byung ba'i mthus ngan pa rnams nyams par byed pa'o/ /gzhan gyi las thams cad 'jig par byed pa zhes bya ba ni gcig gis gcig gi dpung byas nas sbyor ba'i rig sngags la sogs pa'i mthu nyams par byed pa'o//gdon thams cad rlag par byed pa zhes bya ba ni gang dag gis ji ltar byas kyang rung ba'i las ngan pa rnams bcom nas med par byed pa'o/ /'di skad ston te bya ba'i rgyud kyi gzungs 'di 'dzin pa'i gang zag gis kyang gsang sngags dag dang /dkyil 'khor gyi mthu yang de lta bu yin par shes par bya'o zhes bya ba'i don to/ /tshar gcod pa ni de lta bu yin na/ dkar po'i chos dang ldan pa rnams la phan 'dogs par yang byed dam zhe na/ byed pa yin no zhes bstan par bya ba'i phyir gdon thams cad las thar bar byed pa zhes bya ba ni 'ga' zhig lha'i gdon la sogs pa de'i nang du khrid cing de dag bdag gir byas pa las phrogs te/ rang bzhin du gnas par byed pa'o/ /'byung po thams cad 'gugs par byed pa zhes bya ba ni 'ga' zhig la sha za ba la sogs pas gnod par byed de gzhan du byed pa rnams de dag tshar gcad par bya ba'i phyir bdag gi mdun du 'dren par byed pa'o//rig sngags kyi las thams cad byed du 'jug pa zhes bya ba ni lha la sogs pas bdag dang gzhan la gnod pa mi byed pa'i thog tu rig sngags la sogs pa'i sbyor ba de dag la phan 'dogs su 'jug pa'o//ma grub pa rnams grub par byed pa zhes bya ba ni gang gis zhi ba la sogs pa bsgrubs pa las 'bras bu ma byung ba rnams kyi 'bras bu 'byin par byed pa'o/ /grub pa rnams chud mi za bar byed pa zhes bya ba ni 'bras bu thob pa rnams slar nyams par mi byed pa'o//'dod pa thams cad rab tu sbyin pa zhes bya ba ni gnod sbyin mo la sogs pa dbang du byas nas gter la sogs pa 'grub pa'o/ /yang na 'di nyid las grub pa brgyad la sogs pa 'byung ba'o//sems can thams cad srung ba zhes bya ba ni de dag ngan song gi g.yang sa la sogs pa las bzlog nas skyong bar byed pa'o/ /'di skad ston te rgyud 'di la mos shing dbang thob pa'i sngags pas kyang bsgrubs na gsang sngags 'di las de lta bu'i las kyi 'gro ba la phan gdags pa 'thob par 'gyur ro zhes bya ba'i don to//de ltar phan gdags pa la sogs pa 'grub na mdor na las ci zhig 'grub par 'gyur zhe na/ rgyud 'dir las rnams ni zhi ba la sogs pa gsum yin te/ 'di ltar rgyud las/ zhi ba dang ni rgyas pa dang / /de bzhin drag shul spyod pa ste//mdor na las ni rnam gsum du/ /gsang sngags kun las bsgrags pa yin/ /zhes gsungs pas so/ /de dag 'grub par 'gyur ro zhes bstan par bya ba'i phyir/ zhi ba la sogs pa gsungs te/ zhi ba zhes bya ba ni gang gis sdig pa la sogs pa med par byed pa'o/ / rgyas pa zhes bya ba ni gang gis longs spyod la sogs pa 'phel ba'o/ /sems can thams cad rengs par byed pa zhes bya ba ni gdug pa can dag gis 'bad rtsol med par byed pa'o/ /rmugs par byed pa zhes bya ba ni gang gis dran pa nyams par byed pa'o/ /'di skad ston te 'ga' zhig lam yin pa la sogs pa'i gnod pa byung na sgrub pa po bdag gis sa phyogs dkar po dag tu gos la sogs pa dkar po bgos te/yo byad rnams dkar po ba sogs nas 'di dag nyid dang ldan pas zhi ba'i yid kyis zhi ba'i las byas na zhi ba chen po 'grub par 'gyur ro/ / 'ga' zhig tshe la sogs pa 'phel bar 'dod na gos la sogs pa ser po gyon te yo byad rnams ser po bsogs nas rgyas pa'i las byas na rgyas pa 'grub po/ /'ga' zhig sha za ba la sogs pa la drag po'i las byed par 'dod na phyogs nag po dag tu gos la sogs pa nag po gyon te/yo byad rnams nag po bsogs nas sdang ba'i yid kyis mngon spyod kyi las byas na rengs pa la sogs pa 'grub par 'gyur ro zhes bya ba'i don to/ /'di ltar bya ba'i rgyud 'dir rigs du zhig tu 'gyur zhe na/ rigs gsum yin te/ de bzhin gshegs pa'i rigs la sogs pa'o//'di nyid gang gi rigs yin zhe na/ 'di ni rdo rje'i rigs yin te drag shul gyi las bstan pa'i phyir ro/ /de la yang rgyud las/ bde bar gshegs pas zhi ba bya/ /rgyas la pad+ma'i rigs skyes kyis/ /rdo rje rigs gsung gsang sngags kyis/ /drag shul spyod pa'i las rnams bya//zhes gsungs pa las/ de ltar na sngar bstan pa dang 'gal lo zhe na/ rigs re res kyang las gsum gsum byed pas 'gal ba med de/ /de ltar rgyud las/ /mkhas pas rigs ni gsum char la/ /rab la sogs pa bstan pa dang / /zhi ba la sogs bye brag gis/ / las ni rnam pa gsum du bya'o/ /zhes bstan pas so/ /de ltar na 'gal lo zhe na/ 'di ni don gyi gtso bo las dgongs pa yin te/ de yang rgyud nyid las/ gleng gzhi'i dbang du mdzad nas ni/ /gsang sngags gang dag gsungs gyur pa/ de nyid de la gtso bor bstan//lhag ma gzhan du shes par bya/ /zhes gsungs pa yin no/ /de tsam gyis kyang yid mgu bar ma gyur na/ /khyed nyid kyis nyes pa yin gyi kho bo la ni skyon med do/ /shin tu spros pas chog go/ /da ni dkyus ma nyid la 'jug par bya ste/ de lta bu'i stobs dang ldan pa'i gsang sngags de dag gang zhig gis mthus su zhig gis bstan zhe na/de'i phyir gsang sngags kyi mthu chen po zhes bya ba la sogs pa gsungs te/ gsang sngags kyi zhes bya ba ni dam pa ma yin pa dag la sbas pa'i yid skyob par byed pa ste/ 'di ltar rgyud las/ yid kyis skyob par 'gyur bas na/sngags kyi bdag nyid ces brjod do/ /zhes gsungs pa'o/ /mthu chen po 'di zhes bya ba ni las mang po dang ldan pa'i nus pa'o/ /sangs rgyas kyi mthus zhes bya ba ni sngar bstan pa lta bu'o/ /lag na rdo rjes rab tu smras so zhes bya ba ni byang chub sems dpa'i khyad par 'ga' zhig la ming gi dbang bskur ba can des don ji lta bu zhig tu brjod pas so//'di skad ston te/ gong du bstan pa'i yon tan rnams dang yang dag par ldan pa'i gsang sngags 'di dag kyang sangs rgyas kyi byin gyi rlabs kyis phyag na rdo rjes bshad pa yin gyi rang dgar smras pa ma yin te/gzhan du na zlos pa'i skyon du yang 'gyur ro zhes bya ba'i don to/ /gsang ba'i bdag pos de ltar mthu dang ldan pa'i gsang sngags gsungs pas na thog mar su zhig la phyag 'tshal zhe na/ de bstan par bya ba'i phyir na mo rat+na tra yA ya zhes bya ba la sogs pa gsungs te/'dir ni thun mong dang thun mong ma yin pa'i dkon mchog gsum la phyag 'tshal lo/ /na ma sh+tsaN+Ta badzra pA Na yi/ mahA yak+Sha senA pa ta ye zhes bya ba ni bsam pa thams cad rdzogs par byed pa'i gnod sbyin gyi sde dpon chen po thugs drag po dang ldan pa'i phyag na rdo rje la phyag 'tshal lo//'di skad ston te/ sgrub pa po rnams kyis kyang bsod nams 'phel ba dang las rnams 'grub par byed pa'i gsang sngags brjod pa'i thog mar 'di ltar phyag btsal bar bya'o zhes bya ba'i don to/ /de ltar phyag 'tshal nas ci zhig mdzad ce na/ bcom ldan 'das nyid kyis chos kyi dbyings kyi rang bzhin la bskul ba bstan pa'i phyir/tad+ya thA zhes bya ba la sogs pa gsungs te/ tad+ya thA zhes bya ba ni 'og ma 'dren par byed pa'i tshig go/ /oM tra Ta tra Ta zhes bya ba ni chos kyi dbyings kyi ye shes las byung ba'i sprul pas bdag dang gzhan gyi nyon mongs pa la sogs pa rnams mthar mdzod cig pa'o//tro Ta ya tro Ta ya zhes bya ba ni shin tu sol cig pa'o/ /s+phu Ta s+phu Ta zhes bya ba ni spor cig pa'o/ /s+phoT ya s+phoT ya zhes bya ba ni shin tu spor cig pa'o/ /g+hur+Na g+hur+Na zhes bya ba ni thar par mdzod cig pa'o/ /g+hur+NA pa ya g+hu r+NA pa ya zhes bya ba ni bsreg tu ma btub pa rnams gzhan du shin tu 'byer bar mdzod cig pa'o//lan gnyis su brjod pa ni shin tu yang don du gnyer bar bya ba yin pa na'o/ /yang na gcig gis ni gtso bo la bskul ba yin la gnyis pas ni 'khor du gyur pa la bskul ba'o/ /sarba satA ni/ bo d+ha ya bo d+ha ya/zhes bya ba ni sems can thams cad khyad par can gyi sems la gnas par mdzod cig pa'o/ /saM bo d+ha ya saM bo d+ha ya zhes bya ba ni shin tu gnas par mdzod cig pa'o/ /b+h+ra ma b+h+ra ma zhes bya ba ni phyung shig pa'o/ /saM b+h+ra ma ya saM b+h+ra ma ya zhes bya ba ni shin tu phyung shig pa'o/ / sarba b+hU ta ni/ ku Ta ku Ta zhes bya ba ni gnod pa rnams dum bur mdzod cig pa'o/ /saM ku Ta ya saM ku Ta ya zhes bya ba ni shin tu dum bur mdzod cig pa'o/ /sarba sha trUM nAM g+ha Ta g+ha Ta zhes bya ba ni brtse ba med pa rnams gnas gzhan du phyin par mdzod cig pa'o/ /saM g+ha Ta ya saM g+ha Ta ya zhes bya ba ni shin tu phyin par mdzod cig pa'o//sarba bid+yAM badzra badzra zhes bya ba ni las de dag kyang rig pa can khyod kyi ye shes kyi rdo rjes mdzod cig pa'o/ /s+phoT ya badzra badzra zhes bya ba ni ye shes kyis gtor cig pa'o/ /ka Ta badzra badzra zhes bya ba ni ye shes kyis bsad par mdzod cig pa'o/ /ma Ta badzra badzra zhes bya ba ni ye shes kyis dum bur mdzod cig pa'o//ma tha badzra badzra zhes bya ba ni ye shes kyis phug cig pa'o/ /aT+Ta ha sanI la badzra badzra zhes bya ba ni khyod kyi ye shes kyi rdo rje sngon po phyag na bsnams pas dbyung ba dang bcad pa'i phrin las mdzod cig pa'o//su badzrA ya swA hA/ zhes bya ba ni gong du bstan pa'i las thams cad kyang chos kyi dbyings rnam par dag pa'i ye shes kyis legs par mdzod cig pa'o/ /'di skad ston te 'ga' zhig gis bcom ldan 'das rdo rje rnam par 'joms pa mdun du bsams te/ de nyid kyis chos kyi dbyings kyi ye shes la dmigs nas gsang sngags de dag bzlas nas gang la bya ba'i las sna tshogs pa 'grub par 'gyur ro zhes bya ba'i don to//de ltar chos kyi dbyings kyi ye shes la bskul ba bstan nas/ ye shes bzhi la spyir bskul ba bstan pa'i phyir/ he phul+lu zhes bya ba la sogs pa gsungs te/he phul+lu/ ni ru phul+lu zhes bya ba ni me long lta bu'i ye shes la sogs pa las sprul pa'i khro bo rnams kyis sdug bsngal chen po'i rgyu rnams gcod cig pa'o/ /gr-ih+Na ku lu zhes bya ba ni gzhom par mdzod cig pa'o/ /mi li tsu lu/ ku ru ku lu zhes bya ba ni dag par mdzod cig pa'o//badzra bi dza yA ya swA hA/ zhes bya ba ni rnam par rgyal ba'i ye shes kyi rdo rjes zhi bar mdzod cig pa'o/ /kI li kI l+la ya swA hA zhes bya ba ni ye shes kyi phur bus zhi ba'i las mdzod cig pa'o/ /ka Ta ka Ta zhes bya ba ni spa bkong bar mdzod cig pa'o/ /ma Ta ma Ta zhes bya ba ni 'gro ba rnams mya ngan las 'das pa'i bde ba chen po la sbyor cig pa'o//ra Ta ra Ta zhes bya ba ni sdug bsngal rnams mi 'phel bar mdzod cig pa'o/ /moT Na pra mo Ta NA ya swA hA zhes bya ba ni mi mthun pa'i phyogs rnams las bsgral bar mdzod cig pa'o/ /tsa ra Ni tsa ra zhes bya ba ni dpal phun sum tshogs pa la sbyor cig pa'o//ha ra ha ra zhes bya ba ni nyon mongs pa la sogs pa rnams phrogs shig pa'o/ /sa ra sa ra zhes bya ba ni phul du byung ba'i blo skyed cig pa'o/ /mA ra ya zhes bya ba ni mdor na ye shes bzhi'i rang bzhin gyis bar du gcod pa rnams zhi bar mdzod cig pa'o//'di skad ston te bcom ldan 'das kyi ye shes bzhi la dmigs nas bzlas brjod la sogs pa byas pas de bzhin du 'grub par 'gyur ro zhes bya ba'i don to/ /de ltar thugs kyi rang bzhin ye shes la bskul ba bstan nas/ khro bo rnams kyi sku'i rang bzhin la bskul ba bstan par bya ba'i phyir/badzra bi dA ra swA hA zhes bya ba la sogs pa gsungs te/ badzra bi dA ra swA hA zhes bya ba ni bcom ldan 'das rdo rje rnam par 'joms pa'i sku'i rang bzhin gyis sems can rnams kyi bag chags ngan pa'i dri ma rnams zhi zhing med par mdzod cig ces bskul ba'o//ts+tshin+da ts+tshin+da ma hA kI li kI lA ya swA hA zhes bya ba ni mthar phyin par mdzod cig pa'o/ /b+hin+da b+hin+da zhes bya ba ni phye mar rlogs shig pa'o/ /mahA kI li kI lA ya swA hA zhes bya ba ni khyed kyi sku'i phur bu chen pos nyon mongs pa la sogs pa rnams zhi bar mdzod cig pa'o/ / ban+d+ha ban+d+ha zhes bya ba ni ma rungs pa rnams chings shig pa'o/ /kro d+ha kI li kI lA ya swA hA zhes bya ba ni khros shing 'khrugs pa'i phur bus las ngan pa rnams med par mdzod cig pa'o/ /'di skad ston te/ bcom ldan 'das kyi sku la dmigs nas bskul ba byas na snga ma ltar 'grub par 'gyur ro zhes bya ba'i don to//de ltar 'khor gyi sku'i rang bzhin la bskul ba bstan nas khro bo bzhi'i snying po'i sgo nas bskul ba bstan par bya ba'i phyir tsu ru tsu ru zhes bya ba la sogs pa gsungs te/ tsu ru tsu ru tsaN+Da kA li kI lA ya swA hA zhes bya ba ni khro bo chen po rdo rje gtum po'i phur bus bgegs rnams zhi bar mdzod cig pa'o//trA sa ya trA sa ya badzra kI li kI lA ya swA hA zhes bya ba ni khro bo chen po kI li kI la ya'i phur bus bgegs rnams skrag par mdzod cig pa'o/ /ha ra ha ra badzra bi dA rA ya swA hA zhes bya ba ni khro bo chen po rdo rje be con gyi phur bus bgegs rnams 'dar bar mdzod cig pa'o//pra ha ra pra ha ra badzra pra b+ha ny+dza nA ye swA hA zhes bya ba ni khro bo chen po rdo rje tho ba'i phur bus bgegs rnams med par mdzod cig pa'o/ /'di skad ston te bsnyen pa la sogs pa byed pa'i dus su gzungs rdzogs par bzlas par mi nus na khro bo bzhi'i snying po'i bzlas par bya ba ni 'di dag yin no zhes bya ba'i don to//de ltar snying po'i sgo nas bskul ba bstan nas/ de dag gsung gi sgo nas bskul ba bstan pa'i phyir/ ma ti s+thi ra badzra zhes bya ba la sogs pa gsungs te/ ma ti s+thi ra badzra zhes bya ba ni blo gros phul du byung ba rnams kyi sems rdo rje ltar brtan zhing mi g.yo bar mdzod cig pa'o//su tis+thi ra badzra zhes bya ba ni legs par brtan par mdzod cig pa'o/ /pra ti s+thi ra badzra zhes bya ba ni rab tu brtan par mdzod cig pa'o/ /ma hA badzra zhes bya ba ni chen po rnams kyi tshul du brtan par mdzod cig pa'o//a pra ti ha ta badzra zhes bya ba ni rab tu g.yo ba med pa'i ye shes kyi rdo rje legs par gsol cig pa'o/ /a mo g+ha badzra zhes bya ba ni ye shes chen po'i phrin las rnams don yod par mdzod cig pa'o/ /e hi badzra zhes bya ba ni ye shes kyi rdo rje dang ldan pa gdul bya'i rgyud las gshegs shig pa'o//shI g+h+raM badzrA ya zhes bya ba ni byon nas kyang myur du zhi ba'i las grub par mdzod cig pa'o/ /d+ha ra d+ha ra zhes bya ba ni 'byung po rnams zungs shig pa'o/ /d+hi ri d+hi ri zhes bya ba ni bzung zin pa rnams thogs shig pa'o/ /d+hu ru d+hu ru zhes bya ba ni btags pa rnams mi 'chor bar mdzod cig pa'o//sarba badzra ku laM A brtA ya zhes bya ba ni rdo rje'i rigs thams cad kyis zhi ba dang ldan pa'i byin gyi rlabs mdzod cig pa'o/ /a mu kaM mA ra ya phaT ces bya ba ni bar du gcod pa rnams bzlog pa dang gzhom pa'i las mdzod cig pa'o/ /'di skad ston te de dag gi gsung gi rang bzhin la dmigs nas bsgrubs na yang snga ma ltar 'grub par 'gyur ro zhes bya ba ston to//de ltar gsung gi sgo nas bsgrub pa bstan nas sku dang gsung dang thugs la spyir bskul ba bstan par bya ba'i phyir/ na maHsa man+ta badzra NAM zhes bya ba ni rdo rje'i rang bzhin gyis bdag kun nas phyag 'tshal ba'i gnas su mdzod cig pa'o//sarba bA le A ba rtA ya ma hA ba le zhes bya ba ni stobs chen po dang ldan pa thams cad kyis bstod cing dgyes pa'i gnas su mdzod cig pa'o/ /ka ta be ta ta le a tsa le zhes bya ba ni ye shes kyi mche ba chen pos bgegs rnams la thob la mi g.yo bar mdzod cig pa'o//maN+Da la ma ye/ a ti badzra zhes bya ba ni ye shes mchog dang ldan pa rnams kyis dkyil 'khor skyong ba rnams bdag la 'go bar mdzod cig pa'o/ /ma hA ba le be+e ga ra Na zhes bya ba ni stobs chen po dang bcas pa rnams kyis bar chod rnams myur du med par mdzod cig pa'o//a dzi te dz+wa la dz+wa zhes bya ba ni ye shes chen po'i me 'bar bar mdzod cig pa'o/ /ti Ti ti Ti piM ga le zhes bya ba ni rab tu 'bar bar bsdus pas gnod pa rnams las srungs shig pa'o/ /da ha da ha te dzo ba ti zhes bya ba ni gzi brjid ldan pa'i mes bsreg par mdzod cig pa'o//ti li ti li zhes bya ba ni bcad par mdzod cig pa'o/ /ban+d+ha ban+d+ha zhes bya ba ni sregs shig pa'o/ /ma hA bA le badzra aM ku sha dz+wA lA ya swA hA zhes bya ba ni rdo rje'i lus 'bar ba dang ldan pa'i stobs chen pos bgegs rnams zhi zhing med par mdzod cig pa'o/ /'di skad ston te/khro bo rnams kyi sku gsung thugs la spyir dmigs nas bzlas par byas na yang de bzhin du 'gyur ro zhes bya ba'i don to/ /de ltar sku gsung thugs kyi phrin las la sbyor zhing bskul ba bstan nas/ bcom ldan 'das kyi snying po'i sgo nas bskul ba bstan par bya ba'i phyir/na mo rat+na tra yA ya zhes bya ba la sogs pa gsungs te/ de dag ni sngar bshad pa lta bu'o/ /oM zhes bya ba ni rab tu bsngags pa'i don te/ bkra shis pa'i don to/ /ha ra ha ra badzra zhes bya ba ni gdug pa can rnams kyi srog ye shes kyi rdo rjes phrogs shig pa'o/ /ma tha ma tha badzra zhes bya ba ni ye shes kyi rdo rjes de dag la brdeg par mdzod cig pa'o//da ha da ha badzra zhes bya ba ni ye shes kyi rdo rjes sregs shig pa'o/ /pa tsa pa tsa badzra zhes bya ba ni ye shes kyi rdo rjes de dag choms shig pa'o/ /d+ha ra d+ha ra badzra zhes bya ba ni gnod pa can 'bros pa rnams zungs shig pa'o//d+hA ra ya d+hA ra ya badzra zhes bya ba ni ye shes can khyed kyi 'khor rnams kyang 'dzin du chug cig pa'o/ /dA ru Na dA ru Na badzra zhes bya ba ni drag tu zung zhig pa'o/ /tshin+da tshin+da badzra zhes bya ba ni bzung zin pa rnams rdo rjes chod cig pa'o/ /b+hin+da b+hin+da badzra hUM phaT ces bya ba ni ye shes kyi rang bzhin gyi thugs kyis khos shig pa'o//'di skad ston te bsnyen pa la sogs pa byed pa'i dus su bcom ldan 'das la dmigs nas bzlas pa byas na snga ma ltar 'grub par 'gyur ro zhes bya ba'i don to/ /de ltar dbus kyi gtso bo'i snying po'i sgo nas bskul ba bstan nas/ nye ba'i snying po'i sgo nas bskul ba bstan pa'i phyir/ na maHtsaN+Da badzra kro d+hA ya zhes bya ba ni dngos grub kyi mchog sgrub pa'i phyir rdo rje khro bo drag po la phyag 'tshal lo zhes bya ba'o/ /hu lu hu lu zhes bya ba ni dngos grub kyi bgegs su gyur pa rnams bdag gi mdun du drag tu khug cig pa'o//tiSh+Tha tiSh+Tha zhes bya ba ni drangs pa rnams bdag gi mdun du gnas par mdzod cig pa'o/ /ban+d+ha ban+d+ha zhes bya ba ni gnas pa rnams chings shig pa'o/ /ha na ha na zhes bya ba ni bcings pa rnams la rdegs shig pa'o/ /a mr-i te hUM phaT ces bya ba ni las de dag thams cad kyang mthar phyin cing phyir mi ldog pa'i sa la bzhag nas 'chi ba med pa'i gnas la sbyor bar mdzod cig pa'o//'di skad ston te/ sgrub pa 'di la gnas pa'i rnal 'byor pas kyang dad pas bcom ldan 'das la dmigs nas nye ba'i snying po 'di bzlas na/ji ltar bsams pa de bzhin du 'grub par 'gyur ro zhes bya ba'i don to/ /de ltar rang rang gi phrin las bskul ba bstan nas dkyil 'khor sgrub pa bstan par bya ba'i phyir/ sdig pa thams cad byang byas nas/ /zhes bya ba la sogs pa gsungs te/ sdig pa thams cad ces bya ba ni mtshams med pa lnga po la sogs pa ngan song du skye bar 'gyur ba'i rgyu dang rkyen rnam pa gnyis so//byang byas nas zhes bya ba ni de dag spangs shing dag par byas pa'i 'og tu'o/ /sdug bsngal thams cad med par byed/ /ces bya ba ni de dag gi 'bras bur gyur pa sdug bsngal gsum la sogs pa med par 'gyur ba'o//'di skad ston te sdig pa spong ba'i gzhi'i rgyu ni rnam pa gnyis te/ lta ba rnam par dag pa dang / spyod pa rnam par dag pa'o/ /de la nyan thos bye brag tu smra ba la sogs pa 'dod pa yang dag pa ni btags pa kho na yin te/tshad ma nyid kyis ma grub pa'i phyir ro/ /nang gi yin par smra ba rnams kyi ltar na/ yang na 'thad pa ma yin te phul du byung ba'i sgrub par byed pa med pas so/ /'o na gang zhe na/ khyad par du 'phags pa'i lam dbu ma'i gzhung kho na la gnas pa yin te/ bden pa gnyis kyi tshul las ma 'das shing mi 'gal bar gnas pa'i phyir ro//ci de kho nar zad dam zhe na rgyas par ni shes rab kyi mig dang ldan pa rnams kyi rjes su 'brangs nas shes par bya'i/ kho bo lta bu la ni don zab pa dag ston pa'i nus pa yod re skan/ de yang 'gal ba yin no zhe na bden te/ de dag ni bla ma'i man ngag gis bshad pa yin no//de ni lta ba rnam par dag pa yin no/ /'di ltar/ stong nyid bsgoms pas grol 'gyur gyi/ /sgom pa lhag ma de don yin/ /zhes bshad pa lta bu'o/ /spyod pa ni gsum ste/ bden pa dang / pha rol tu phyin pa dang / gsang sngags kyi spyod pa la brten pa yin no//de dag gi nang nas mchog tu gyur pa gzhi gsang sngags kyi spyod pa yin te/ 'di ltar/ rdzogs pa'i sangs rgyas gang 'das dang / /de bzhin gang dag ma byon dang / /da ltar byung ba'i rdzogs sangs rgyas/ /de dag kun gyi gsang sngags kyi/ /cho ga bzang po 'di mkhyen nas//dpa' bos byang chub shing drung du/ /thams cad mkhyen pa tshad med brnyes/ /gsang sngags spyod pa mnyam med de/ /skyob pa shAkya seng ge yis/ /bdud sde shin tu mi bzad pa'i/ /dpung chen dag kyang de yis bcom/ /zhes rgyud las gsungs pa yin no//de gsal bar bstan par bya ba'i phyir/ /rgyud do cog gi rtsa ba ste/ /zhes bya ba la sogs pa gsungs te rgyud do cog gi zhes bya ba ni thub pa chen po'i sku rnam pa gnyis bskul te byung pa'o/ /de ston pa'i gzhung las kyang 'di skad ces bya ste ma lus pa'o/ /rtsa ba ste zhes bya ba ni zhi ba la sogs pa'i las thams cad ston pas so//dpal kun gyis ni legs par brgyan/ /zhes bya ba ni bsod nams dang ye shes kyi chogs mtha' dag 'byung zhing skye ba'i gzhi dang gnas su gyur par dkyil 'khor la sogs pa ston pas so/ /'di skad ston te/ tshul khrims kyi sdom pa blangs te/ /dad pas byang chub tu sems bskyed nas/ slob dpon du dbang bskur ba thob pa'i rnal 'byor pa gzhan dag gis lan gnyis sam gsum du gsol ba btab bam ma btab kyang rung bar thun mong gi rgyud dag las byung ba'i cho gas bsnyen pa dang sa'i cho ga la sogs pa bya ste/'di ltar rgyud las/ /de nas gzhan yang rgyud kun las/ dkyil 'khor ji ltar rgyas bshad pa'i/ /cho ga lhag ma lus pa dag /'dir ni lhag par rab tu bshad/ /ces gsungs pa dang / gzhan yang / gang dag du ni rang nyid kyis/ /las kyi cho ga rnams med pa//der ni spyi yi rgyud dag las/ /gsungs pa'i cho ga mkhas pas bsten/ /zhes bshad pas na 'gal ba med do/ /de nas rgyud las gsungs pa'i sta gon gyi cho ga bya ste/ dus mtshams dag las smyung byas na/ /nub gcig gam ni nub gsum du/ /gtsang zhing gos dkar gtsang bgos te//zla bas sta gon gnas par bya/ /dus mtshams min yang dgos yod na/ /yar gyi ngo yi tshes bzang la/ /zhi ba mchog gi gsang sngags kyis/ /sta gon gnas par rab tu bya/ /skyu ru ra sogs khrus rtsi dang / /dri zhim spos kyis khrus byas te/ / nye reg byas te srod la ni/ /gsang sngags spyan drangs mchod pa bya/ /de nas lhag par mngon bsngags pa'i/ /mchod yon cho ga bzhin du dbul/ /de nas tsan+dan dkar po dang / /sna ma'i me tog kha 'bus dang / ma li ta yi phreng ba dang / /bdug pas bdug pa'i mchod pa bya//gtor ma mang zhing bzang ba dag /zho dang bcas shing dbul bar bya/ /de nas mar gyi sbyin sreg ni/ /tshul bzhin brgya rtsa brgyad byas te/ /gsang sngags las dang rjes mthun par/ /sardza ra yi sreg blugs dbul/ /bu mos bkal pa'i srad bu la/ /mdud pa bdun bor lan bdun bsngags//dpung pa g.yon pa la bcings nas/ /ku sha'i lo ma bting pa la/ /de nyid kyis ni glos phab ste/ /bka' lung gsol ba btab nas ni/ /rang gi lha yi tshul 'dra bar/ /sems kyis legs par bsam byas te/ /yid la gsang sngags 'don bzhin du//ku sha sar pa khres kyi sngas/ /me tog spos kyis bklubs pa la/ /ji ltar bde bar nyal bar bya/ /gal te gnyid log rmi lam na/ /brtan par rtogs pa'i lha mthong na/ /so sor rig pa'i gzungs dag gam/ /dkon mchog gsum la gcig tsam mam/ /de dag la ni mchod la sogs//rgyal sras rdzu 'phrul chen po'am/ /'khor ni rnam pa bzhi rnams sam/ /bdag nyid cho ga spyod pa'am/ /yang na gos kyis spud pa'am/ /mthong na dngos grub nye 'gyur bas/ /sgrub pa pos ni shes par bya/ /ri dang glang po 'bab chu dang / /rgya mtsho dang ni 'bras bu'i shing //ngang mo la sogs bya rnams dang / /seng ge la sogs ri dgas tshogs/ /khyu mchog bkra shis rta la sogs/ /bu mo bzang mos brgyan pa dang / bum pa bzang pos bkra shis pa/ /rnam pa sna tshogs g.yas phyogs na'o/ /nor dang gos rnams rnyed pa dang //de la sogs pa rnam dag pa'i/ /rmi lam bzang po mthong na ni/ blo can grub par shes par bya/ /zho dang 'bras yos 'o ma mar/ /me tog 'bras bu'i rtsa ba dang / /yang na grub pa'i rdzas kyang rung / /rmi lam dag na rnyed pa dang / de 'dra'i rnam pa mthong gyur na/ /rig sngags grub par gsungs pas na//des na blo dang ldan pa yis/ /bsnyen pa sgrub pa'i las rnams brtsam/ /gal te sngags kyis nor bu'am/ /sgrub pa'i rdzas rnams thob na ni/ /de nas bsnyen pa'am sgrub pa yi/ /las rnams myur du brtsam par bya/ /gos dang khrus dang rgyan dag gis//bdag nyid brgyan par mthong na ni/ /de tshe bsnyen pa'am sgrub pa yi/ /las rnams rab tu brtsam par bya/ /rang gi rig sngags tshul bzhin du/ /mchod pa byas nas rigs yum gyi/ /sna ma'i me tog brgyad dag dang / /ras zung dag gis mchod par bya/ / tsan+dan gyi ni bdug spos kyis/ /lan brgya nyid du bdugs nas ni/ /de nas lha nyid rmi lam du/ /ci rigs par ni bka' lan gsol/ /u shi ra yi gzugs brnyan bzhin/ /grog mkhar sa yi snod du gzhag /mchod cing yongs su tshim byas nas/ /lan brgya dag tu mngon bsngags te/de ni 'o ma'i nang du'am/ /yang na sbrang rtsi'i nang du gzhag /dus gsum dag tu legs mchod nas/ /srod du yang ni gsol ba gdab/ /rnam pa 'di dag nyid kyis kyang / /yongs su dgyes pa bskyed gyur na/ /de lta bya'am mi bya ba/ /lha nyid bka' lan gsol bar mdzad//smyung byas 'dod pa'i dus mtshams la/ /rig sngags cho ga bzhin mchod de/ tha chungs rnam pa bdun dag dang / /shing gi snying po dam pa lngas/ /sbyin sreg brgya rtsa brgyad byas pa'am/ /yang na bzlas brjod grangs dag gis/ /byas na rig sngags nyid kyis ni//myur ba nyid du bka' stsal to/ /de ltar rig pa sta gon gnas/ /des ni myur du 'grub par 'gyur/ /sta gon gnas pa'i cho ga 'di/ /rgyas par rab tu grags pa yin/ /'di dag ni thun mong gi cho ga yin pas na 'dir bstan pa la 'gal ba med do/ /sta gon du gnas pa'i cho ga gsang ba'i rim par phye ba'o//de nas nang par sngar langs nas khrus la sogs pa byas te dkyil 'khor byugs la thig gdab par bya'o/ /de yang sgo bzhi dang / kha khyer dang / dra ba dang / dra ba phyed pa dang / nyi ma dang / zla ba dang / rnga yab shin tu mdzes pa dang / phyi'i khor yug la rdo rje'i phreng ba 'bar ba chen po dang bcas pa dang /nang gi khyams dang / rab chung ngu dang / sna tshogs pad+ma rnams kyi thig gdab po/ /de nas tshon rtsi byin gyis brlabs la/ bri ba ni gzhal yas khang rim pa lngar byas te/ phyi rol nas brtsams nas dkar po dang / / dmar po dang / ser po dang / ljang gu dang / nag po'i nang du ste go rims bzhin no/ /phyogs kyi kha dog gi nges pa yang 'di nyid yin no/ /dbus su sna tshogs pad+ma 'dab ma brgyad pa bri'o/ /rdo rje'i ra ba ni nag po'o/ /khyams kyi sa gzhi ni dmar po'o/ /rin po che'i pha gu ni ser po'o/ /mu tig ha ra ni nag po'o//rta babs ni kha dog sna tshogs pa'o/ /bcu gcig rdo rje dkar po'o/ /chos kyi 'khor lo ser po'o/ /ri dgas ni nag po bri'o/ /pad+ma'i dbus su gtso bo'i phyag mtshan rdo rje rtse dgu ba bri bar bya'o/ /dbang ldan nas bzung ste mtshams bzhir ni rdo rje kha gyes pa dang / rdo rje rtse gcig pa dang /be con rdo rjes mtshan pa dang / rdo rje tho pa rnams go rims bzhin du'o/ /khyams la ni bkra shis kyi lha mo rnams dang 'jig rten skyong ba rnams kyi mtshan ma bri'o/ /de ltar bris nas bum pa la sogs pa'i rdzas rnams bkod nas khrus byas te gnas la sogs bskyed de/lha rnams ji lta ba bzhin spyan drangs nas phyag rgya rnams bstan par bya'o/ /de la dang po ni rigs kyi snying po'i phyag rgya'o/ /gnyis pa ni lha so so'i'o/ /gsum pa ni rigs kyi yum gyi'o/ /bzhi pa ni dam tshig chen po'i phyag rgya'o/ /de la rigs kyi snying po'i phyag rgya ni lag pa phan tshun du khu tshur bcangs te/g.yas pa'i mthe bong bstan pa'o/ /sngags ni badzra d+h+r-i ka swAhA zhes bya ba'o/ /lha so so'i phyag rgya ni/ rdo rje rnam par 'joms pa'i phyag rgya ni lag pa gnyis thal mo khong stong du sbyar la srin lag gnyis nang du bcug ste/ phan tshun bsnol ba'i rtse mo mdzub mo'i drung du cung zad dbyung bar byas nas/gung mo gnyis pa'i phyi rol nas mdzub mo gnyis bkug la bar nas gang tsam gyis ma reg par byas te/ mthe bong gnyis dang mthe'u chung gnyis gzhibs pa'o/ /sngags ni gong du bstan pa'o/ /yang na oM badzra dz+wa lA ya swAhA zhes bya'o/ /rdo rje gtum pa'i phyag rgya ni lag pa g.yon pa'i mdzub mo gnyis ka'i logs su gzhag la g.yas pa'i sor mo gsum rdo rje ltar byas pa'o//sngags ni/ oM tsu ru tsu ru tsaN+Da li/ kI li kI lA ya swAhA/ zhes bya'o/ /rdo rje kI li kI lA ya'i phyag rgya ni lag pa gnyis kyi khu tshur bcangs la cung zad bsnol ba'i tshul du bcug ste/mthe bong gnyis gyen du gshibs nas bsgreng ba'o/ /sngags ni oM trA sa ya trA sa ya badzra kI li kI lA ya swAhA zhes bya ba'o/ /rdo rje be con gyi phyag rgya ni phyag 'tshal ba'i thal mo sbyar ba las mthe bong gnyis bsgrengs te/ tshigs bkug nas/ srin lag gi mdun du gzugs par bya ste/sngags ni oM ha ra ha ra badzra d+ha rA ya swAhA zhes bya ba'o/ /rdo rje tho ba'i phyag rgya ni lag pa gnyis khu tshur bcangs la mthe bong gnyis bsgreng / mthe'u chung gnyis nang du gzhug go/ /sngags ni oM pra ha ra pra ha ra badzra pra b+hany+dza nA ya swAhA/ zhes bya ba'o/ /rdo rje'i rigs kyi yum gyi phyag rgya ni phyag 'tshal ba'i thal mo las mdzub mo gnyis dang srin lag gnyis lag pa'i nang du bcug pa'o//sngags ni oM ku laM d+ha ri ban+d+ha ban+d+ha swAhA zhes bya ba'o/ /dam tshig chen po'i phyag rgya ni srin lag gi tshigs bar ma mthe bos mnan mthe'u chung dang gung mo gnyis gshibs te bsgreng /mdzub mo gnyis gung mo'i tshigs gsum par bcug pa'o/ /sngags ni oM shaM ka re ma hA sa ma ye swAhA zhes bya'o/ /de nas 'jig rten skyong ba bkug nas rang rang gi phyag rgya bstan te/ thams cad la mchod pa la sogs pa byas nas gtor ma sbyin te/ sbyin sreg byas la/man ngag ji lta ba bzhin du dkyil 'khor rnams kyi bzlas brjod bya'o/ /dkyil 'khor gyi cho ga rim par phye ba'o/ /de nas rgyud las gsungs pa'i rigs gzung ba'i cho ga bya ste/ slob ma dkyil 'khor phyag byas nas/ khyad par du ni yon phul te/ /bla ma'i kha nas mngon sum du//rig sngags yongs su gzung bar bya/ /snyim pa me tog gis bkang nas/ /gus shing rim gro bskyed bya ste/ /bla mas thog mar lan gsum bzlas/ /rang gis lan gsum bzlas te mchod/ /de nas yi ge mang po'i sngags/ /gi wang gis ni shog shog la/ /ji skad bstan pa mngon bris te//de nas ci bder kha ton bslab/ /bla mas ji ltar mgu ba las/ /dus mtshams dag gam tshes gzhan la/ /rig sngags dag nas byin pa dag /cho ga bzhin du gus par nod/ /slob ma legs par mnos pa de/ /ring por mi thogs 'grub par 'gyur/ / ma bsnyen par yang de la ni/ /rtag tu de la nye bar gnas/ /yang na gser la sogs pa yi/ /bum pa gsar zhing gtsang la bzang / /skyon kun rnam par nges pa la/ /bkra shis ngo mtshar dag kyang byas/ /de la spos chu 'ba' zhig med/ /khyad par du ni bshams byas nas/ / gtsang mar byas te nub gcig gam/ /nub gsum du ni smyung byas te/ /srod la rab tu brtsam bya ste/ /cho ga 'di dag spyad par bya/ /gsang sngags rig sngags gdams pa dag /gro ga la sogs shog shog la/ /gi wang gis ni mnyam bris te/ /shog shog rnams ni lhan cig gzhug /rig sngags rgyal pos legs par ni/ /dri dang me tog bdug mchog ste/ /de bzhin lha bshos mar me dang / sbyin sreg las kyis mchod par bya/ /de ni cho ga 'di dag gis/ /nub gzhan sta gon gnas pa la/ /bden pa dang ni dam tshig gis/ /khyad par du ni gsol ba gdab//lan brgyar bsngags nas yang dang yang / /bdug spos kyis ni rab bdugs te/ /dri zhim khrus byas gtsang byas nas/ /phyag byas yid la bsams nas su/ /gsang byed bcas pa'i lag pa yis/ /de las gcig ni dbyung bar bya/ /de shes nas ni phyag 'tshal te/ / gus pas spyi bo'i steng du gzhag /shes rab can gyis bsngags te sgrub/ /de nyid de las myur du sgrub/ /shes rab can gyis gzhan mi sgrub/ /sgrub na yang ni 'chi bar 'gyur/ /gang zhig grub nas byin pa dang / /cho ga bzhin du de ma nos na/ /sgrub pa po yi lha yin te/ /de la de ni 'grub par shes//rig sngags yid kyis gsol btab nas/ /lan brgyar yongs su bzlas brjod de/ /'dir ni khyer cig khyer cig ces/ /me tog dri zhim dag gis brgyan/ /bcom ldan 'di la bsnyen pa dang / /'di la rab tu 'go bar mdzod/ /bcom ldan bdag gis bzung lags kyis//bdag la 'go bar mdzod ces bya/ /slob dpon dang ni slob ma yis/ /rig sngags sbyin zhing yongs bzung ba'i/ /cho ga 'di ltar byas nas ni/ /lha nyid rab tu 'grub par 'gyur/ /mkhas pas rig sngags grub pa kun/ /grub pa nyid du shes par bya/ /rnam pa de lta'i rdzas dag kyang //tshul bzhin thob ste bsnyen mi dgos/ /zlos pa grub pa po dag gis/ /rig sngags tshul bzhin bzlas pa yis/ /bsnyen pa tshad byas gang yin pa/ /de yang ma bsnyen 'grub par 'gyur/ /dngos grub phyir ni gsang sngags yin/ /me tog 'bras bu rtsa ba dang / /rdo gu gos dang gser dang zho//'bras dang nor bu bu mo dang / /mal cha rnams dang lham dag dang / /rgyan gyi rnam pa thams cad dang / /sgrub pa'i yo byad rnams dang ni/ /glang po ba lang rta la sogs/ /bkur sti rnam pa du ma dang / /bdag gi bdog pa thams cad dbul/ /gus par thal sbyar phyag 'tshal te//bdag nyid kyang ni dbul bar bya/ /de ltar cho ga shes pa yis/ /rnam pa sna tshogs ci rigs par/ /bla ma la ni yon dbul te/ de nas gsang sngags nod par bya/ /rig sngags yongs su gzung ba'i rim par phye ba'o// //'di dag kyang mkhas pa rnams kyis rtogs par bya ba'i don yin no//shin tu spros pas chog go/ /da ni dkyus ma nyid la 'jug par bya'o/ /de ltar bsgrubs pas cir 'gyur zhe na/ /tshe 'di dang gzhan dag la gnod par 'gyur ba 'di lta bu dag yod par 'gyur ro zhes bstan par bya ba'i phyir/ sems can dbang po nyams pa dang / zhes bya ba la sogs pa gsungs te/ sems can ni sngar bshad par zad do/ /dbang po nyams pa dang zhes bya ba ni mig la sogs pa'i dbang po la skyon byung ba'o/ /tshe zad pa dang zhes bya ba ni srog gi dbang po gnas pa'i rgyun chad pa'o/ /tshe nyams dang zhes bya ba ni de nyid nyams dmas par gyur pa'o//phun sum tshogs min gang chags dang / /zhes bya ba ni bkra shis pa ma yin pa'i dngos po rnams nye bar gnas pa'o/ /lha rnams rgyab kyis phyogs pa dang / zhes bya ba ni sngon gyi dus na bdag dang gzhan srung ba'i rgyal po bzhi la sogs pa rnams bdag cag la skyabs mi byed pa'o//mdza' sdug skye bo sdang ba dang / /zhes bya ba ni bdag gi bu la sogs pa nye dur gyur pa mdza' zhing yid gcugs pa rnams la rgyal po la sogs pas 'tshe zhing gnod pa'o/ /bram ze la sogs gtses pa dang / zhes bya ba ni 'khor du gtogs pa'i zho shas 'tsho ba rnams la gzhan dag gis gtses par gyur pa'o//phan tshun mthun pa ma yin dang / /zhes bya ba ni de dag phan tshun zhe 'gras pa'o/ /nor 'grib pas ni gnod pa dang / /zhes bya ba ni bdag dang gzhan gyi bdog pa rnams nyams par gyur pa'o/ /mya ngan ngal dang gnod pa dang / zhes bya ba ni mya ngan zhes bya ba ni sems mi bde ba'o//ngal dang zhes bya ba ni de nyid kyi lus rab tu sdug bsngal bar gyur pa'o/ /gnod pa dang zhes bya ba ni rgyu de gnyis kyis sha za la sogs pa'i gzugs rmi lam du snang ba'o/ /'jigs pa dang ni phongs pa dang / zhes bya ba ni 'jigs pa zhes bya ba ni rgyu med par spu zing zhes byed pa'o//yang na rgyal po'i chad pa la sogs pa'o/ /phongs pa zhes bya ba ni nor nyams pa'i snga ltas byung bas bdag nyid dogs pa skyes pa'o/ /gza' dang rgyu skar byad stems dang / zhes bya ba la/ gza' dang zhes bya ba ni nyi ma la sogs pa'i gnod pa'o/ /rgyu skar zhes bya ba ni smin drug la sogs pa'i gnod pa'o//byad stems zhes bya ba ni drang srong gi dmod pa la sogs pa'o/ /mi bzad gdon gyis nyen pa dang / zhes bya ba ni srin po la sogs pa mthu chen po dang ldan pa'i ma rungs pa rnams kyis gzung ba'o/ /mya ngan ngal las byung ba yi/ /zhes bya ba ni lus dang sems gdungs par gyur pa las byung ba'o//rmi lam sdig pa mthong na yang / zhes bya ba ni thabs 'dis de dag rnams spong bar 'gyur ro zhes bya ba ni lhag ma'o/ /'di skad ston te gong du bshad pa dang 'og nas 'byung ba'i cho ga rnams tshul bzhin du bsgrubs na 'gro ba rnams kyi dbang po nyams par gyur pa la sogs pa gnod pa rnams byung bar gyur na yang nges par grol bar 'gyur ro zhes bya ba'i don to//phan yon de lta bu dag dang ldan par ston par byed pa'i mdo 'di thog mar mnyan dgos pa yin nam zhe na/ de ni dgos pa kho na yin te/dkyil 'khor du 'jug pa'i yan lag yin pa'i phyir ro/ /de la thog ma nyid du mdo sde 'di mnyan pa'i thabs bstan par bya ba'i phyir/ de ni rab bkrus gtsang ma yin/ /zhes bya ba la sogs pa gsungs te/ de ni zhes bya ba ni dkyil 'khor du 'jug par 'dod pas so/ / rab bkrus gtsang ma yin zhes bya ba ni/ gdong la sogs pa dag par byas te/ spos la sogs pa dri zhim pos byugs pa'o/ /mdo sde dam pa mnyan par bya/ zhes bya ba ni phan yon mtha' yas pa dang ldan pa'i gzungs 'di mnyan zhing bklag par bya'o/ /'di la 'ga' zhig 'di snyam du sems te dkyil 'khor du ma zhugs pa la rgyud bshad pa ni nyes par 'gyur ro zhe na/ma yin te 'di gzhung tsam bstan pa la ni nyes pa med par shes par bya'o/ /de lta na yang skyon yin no snyam du sems na thams cad yang de ltar 'gyur ro/ /gzhan du yang spros pas chog go//da ni dkyus ma nyid la 'jug par bya ste/ gang dag yid dge sems dang zhing / zhes bya ba la gang dag ces bya ba ni gang yang rung ba'o/ /yid dge zhes bya ba ni 'tshe ba med pa'i sems dang ldan pa'o/ /sems dang zhing zhes bya ba ni dad pa dang ldan pa'o/ / yang na snga ma ni dad pa gnyis dang ldan pa yang yin la phyi ma ni dang ba'i dad pa dang ldan pa la bya'o/ /gtsang ma'i gos kyis rab brgyan te/ zhes bya ba ni du gu la'i ras la sogs pa smad pa ma yin pa'i gos bgos pa'o/ /zab mo sangs rgyas spyod yul ba/ zhes bya ba la zab mo zhes bya ba ni tshig dang don gzhan dag gis rtogs par mi nus pa'o//sangs rgyas spyod yul ba zhes bya ba ni de bzhin gshegs pa nyag gcig gi spyod yul du gyur pa'o/ /mdo sde 'di ni nyan byed na/ zhes bya ba ni de lta bur gyur pa'i mdo sde 'di nyan cing klog par byed na zhes bya ba'o/ /'di skad ston te gong du bstan pa'i mi mthun pa'i phyogs rnams spang bar 'dod pa'i gang zag gis spyod lam 'di lta bu dag dang ldan par bya ste/gzungs 'di mnyan pa la sogs pa bya ba'i don to/ /de ltar mnyan pa las phan yon ci zhig 'gyur zhe na/ gzhan dag kyang thob par 'gyur ro zhes bya ba'i phyir/mdo sde 'di yi gzi brjid kyis/ /zhes bya ba la sogs pa/ srog chags dag ni thams cad kyi/ zhes bya ba gang gi ched du bya ba thams cad kyi'o/ /mi bzad pa yi nad rnams kyang / zhes bya ba ni 'brum bu me dbal nag po la sogs pa shin tu sdug cing spang bar dka' ba'i nad chen po spong ngo //de dag thams cad zhi bar blta/ /zhes bya ba ni de lta bu dag kyang zad cing dengs par 'gyur bar shes par bya'o/ /tshe dang bsod nams 'phel bar 'gyur/ zhes bya ba ni tshe 'di la'o/ /sdig pa kun las rnam par thar/ /zhes bya ba ni tshe rabs gzhan gyi'o//'di bstan te mnyan pa las kyang phan yon 'di lta bu dag 'byung na gzhan du dkyil 'khor du zhugs shing sgrub pa byas pa la lta smos kyang ci dgos snyam du dgongs pa'o/ /de ltar mnyan pa'i phan yon bstan nas sgrub pa'i yan lag gi gtso bo bum pa'i cho ga bstan pa'i phyir/nor bu yungs kar dUr ba dang / /zhes bya ba la sogs pa gsungs te/ nor bu zhes bya ba ni nor bu rin po che la sogs pa'o/ /yungs kar zhes bya ba ni rgyal po'i yungs kar ro/ /dUr ba zhes bya ba ni rtswa'i khyad par 'ga' zhig go/ /rin chen rma med ces bya ba ni gas pa la sogs pa'i skyon med pa'i rin chen sna lnga dag go/tsan+dan bcas zhes bya ba ni gor shiR+Sha la sogs pa dri zhim po dag dang ldan pa'o/ /shel dang zhes bya ba ni gong du bstan pa'i nye bar mtshon pa'o/ /rdo rje me tog dang zhes bya ba ni byin gyis brlabs pa'i me tog go/ /chu yis zhes bya ba la dgang zhes bya bar sbyar ro//gser ram zhes bya ba la bum pa zhes bya ba ni lhag ma'o/ /yang na ni zhes bya ba ni rnam grangs gzhan ston pa'i tshig go/ /dngul gyi bum pa dag kyang rung / /zhes bya ba ni zangs la sogs pa las byas pa dag kyang rung gsung ngo / /gtsang ma'i gos kyis dkris shing dgang //zhes bya ba ni bum pa'i mgul par ras gtsang ma kha tshar ma nyams pas dkri bar bya'o/ /'di skad ston te/ gang gi don du bya ba de nyid kyi nus pa dang sbyar nas gser la sogs pa'i bum pa lto ba che ba/ mgrin pa mtho ba kha gyed pa/ mchu 'phyang ba dag par bkrus la mgul pa ras kyis bcings te/'bras bu dang ldan pa'i shing gis kha brgyan par bya'o/ /gser la sogs pa rin po che sna lnga dang / 'bras so ba la sogs pa 'bru sna lnga dang / bya kr-i la sogs pa sman sna lnga dang / bu ram la sogs pa'i snying po lnga dang / yang dri zhim po'i chu la sogs pa dang bcas pa bcug la lung ji lta ba bzhin bsnyen pa byas na sngar bshad pa ltar 'gyur ro//zhes pa'i don to/ /da ni bzlas pa'i grangs bstan pa'i sgo nas gang zhig la khrus bya ba de bstan par bya ba'i phyir/ lan grangs nyi shu rtsa gcig gam/ /zhes bya ba la sogs pa gsungs te/de dag ni go bar sla'o/ /rgyal po rtag tu khrus gyis shig /ces bya ba ni yan lag gi mchog mgo yin pas so/ /yang na rgyal po nyid la bya ste de yang nye bar mtshon pa tsam du zad do/ /'di skad ston te thog mar bsnyen pa nas brtsams te/ dkyil 'khor du 'jug pa'i bar du gzungs 'di nyid ci nus par bklags shing bzlas nas gzod khrus kyi cho ga bya'o zhes pa'i don to//da ni cung zad mdo'i mtshan gyi don la 'jug par bya ste/ rdo rje zhes bya ba la rdo rje zhes bya ba ni stong pa nyid dang ldan pa'i ye shes so/ / de las byung ba rnams la yang de skad ces bya ste/ stong pa nyid ni rdo rjer bshad/ /ces gsungs pas so/ /rnam par zhes bya ba ni gong du bstan pa'i khyad par rnams so/ /de dag 'joms pa ni zhi zhing rlag par byed pa'o/ /yang na ye shes de nyid kyis gzhan rnam par 'joms pa'o//gzungs zhes bya ba ni sgrub pa po rnams kyis bsten cing dran par bya ba yin pas na'o/ /rdzogs so zhes bya ba ni mthar thug pa nyid do zhes bya ba'i don to/ /'di'i mtshan bstan pas don rtogs par nus pa'i gang zag la nges par bstan pa'o/ /snyan cing 'jam pa'i tshig dag thob par gyur pa na//'gro rnams sems ni rab tu dga' bar 'gyur ba ltar/ /bdag gis legs par sbyar ba'i rnam 'grel 'di thos na/ /mkhas pa rnams kyi yid ni shin tu dga' bar gyis/ /rdo rje rnam 'joms gzungs 'di'i bshad pa ni/ / rdo rje sgron ma zhes bya sbyar ba las/ /bdag gis zla 'dra'i dge ba gang thob pa/ /des ni 'gro ba nyon mongs nyer zhi shog /rdo rje rnam par 'joms pa'i gzungs kyi rnam par bshad pa rdo rje sgron ma zhes bya ba/ gsang sngags mtha' dag la mnga' brnyes pa'i slob dpon chen po pad+ma 'byung gnas kyis mdzad pa'o/