CLOSE WINDOW

D2675
བོད་ཡིག

/ //paN+Di ta dA na shI las rang 'gyur du mdzad pa la bod kyi ban+de rnams kyis legs par zhus so/ /dge ba'i 'byung gnas zhes bya ba bla ma shAkya shrI'i bla ma yin gsungs/ / @##/ /rgya gar skad du/ Ar+ya nI lAM ba ra d+ha ra badzra pA Ni bi d+hi rnA ma d+hA ra Ni TI kA/ bod skad du/ 'phags pa lag na rdo rje gos sngon po can gyi cho ga zhes bya ba'i gzungs kyi 'grel pa/ dkon mchog gsum la phyag 'tshal lo/ /gnod sbyin gyi sde dpon chen po lag na rdo rje gos sngon po can la phyag 'tshal lo//gang zhig nyon mongs skyon gyis ma gos rin chen ltar gsal ri rab lta bur brjid/ /'gro la rim par ston phyir sprul pa rang byung stong gsum sreg par mdzad pa nyid/ /gdod nas mi rtog chos nyid ngang las snying rje'i stobs kyis zhe sdang chen por gsal/ /sangs rgyas kun gyi gsang ba'i mdzod gyur rdo rje 'dzin pa de la phyag btsal nas//phyi dang nang gi sdug bsngal zhi mdzad rgyud rgyal gsang ba zab mo'i don/ /bla ma brgyud pa'i stobs las rang byung bdud rtsi'i 'od zer nges par rab rnyed nas/ /gang ming thog mar lag na rdo rje'i gzungs zhes kun la grags par gyur pa yi//'grel 'di bdag nyid rnyed sogs phyir min 'gro la phan phyir gsal bar bshad par bya/ /de la dang po mtshan gyi don bstan pa'i phyir/ gnod sbyin gyi sde dpon chen po lag na rdo rje gos sngon po can zhes bya ba smos so/ /de ni thugs rje'i cho 'phrul sprul pa'i sku gnod sbyin gyi gzugs brnyan klu'i snying po phyag na rdo rje'i ngo bo ste mthu stobs kyi bdag nyid can no//de la gnod sbyin zhes bya ba ni ri rab kyi tha ma lcags ris yongs su bskor ba'i rtse na gnod sbyin gos sngon can dag gnas pa de dang rtags mthun par bstan pa'o/ /sde dpon chen po ni de lta bu'i rigs gnod sbyin rnams las don ye shes chen pos 'phags pa ste gzhan 'dul ba'o//lag na rdo rje zhes bya ba ni mkhyen pa lnga'i ye shes kyi rdo rje ste nyon mongs pa lnga 'joms pa'o/ /gos sngon po can zhes bya ba ni lus kyi rgyan yin te/ des 'gro ba rnams mos pa bskyed pa'am/ rngam zhing 'khor 'dul ba'i so so'i rtags bstan pa'o//sangs rgyas gang gA'i klung bye ba phrag 'bum gyi bye ma snyed kyis rjes su gnang ba zhes pa ni sprul pa'i sku dang mtshungs pa las de dag thams cad kyis gsang ba'i bdag por dbang bskur zhing bstan pa gtad pa'am/ de dag gi sprul pa nyid yin pa'i phyir gnang ba'o//mche ba ni ye shes dang nyon mongs pa las skyes pa'o/ /gtsigs pa zhes pa ni de lta bu dang mthun pa'i ste / dug can rnam par 'dul bas gdug pa 'dul ba'o/ /'tsham pa zhes pa ni nyon mongs pa'i mche ba can dang 'tsham par ston pa'o/ /mig me mdag gi phung po 'dra ba zhes pa ni spyan gyi gzigs stangs te /spyan rtsa dmar zhing khros pa'i lta stangs kyis lta ba'i dug can 'dul bar byed pa'o/ /dbugs me lce ltar 'bar ba zhes pa ni dbugs tsha zhing rtsub pas kha rlangs kyi dug can 'dul bar byed pa'o/ /'jigs pa'i nga ro can zhes pa ni ha ha dang hUM hUM dang phaT phaT kyi sgras gdug pa'i tshogs kyi nga rgyal 'joms shing skrag par byed pa'o//de dag ni dpal gnod sbyin gyi rgyal po'i sku drag po'i rang bzhin bstan pa ste/ de ltar bsgom pa'o/ /lag pa dang rkang pa klu nor rgyas kyi bus brgyan pa zhes pa ni nor rgyas kyi bu mthus bkug ste/dug dang nga rgyal phrogs nas rgyan du byas pa'o/ /klu nag po se ral khar thogs pa zhes pa ni tshangs pa nyid la yod pa'i rtags su gyur pa de dang mthun par ma dros pa nag po'i mthu phrogs te/ rgyan du byas pas grib ma'i dug can 'dul bar byed pa'o/ /klu dga' bo dang nye dga' bo 'bar bas rna cha byas pa zhes pa ni ngag gi dug can gyi dug phrogs te dbang du bsdus nas thal mo sbyar te ngag snyan par bstod cing snyan gyi rgyan du byas pa'o//sbrul gdug pa 'bar ba rin po che'i cod pan thogs pa zhes pa ni stobs kyi rgyu bkug ste/ dug dang phral nas mthong ba'i dug can dbang du bsdus te/de bzhin gshegs pa'i rang bzhin gyi rgyan dang mthun par byas pa'o/ /sbrul gdug pa 'bar ba za zhes pa ni 'jog po bkug ste dug dang bcas te gsol bas dran pa'i dug can 'dul bar byed pa ste/ de dag gi gdul bya la de ltar ston cing klu rigs bzhi dbang du bsdu ba dang /nor dang dngos grub rim pas bsgrub pa'o/ /bzhin rgyas pa zhes pa ni sgra gcan 'dzin la sogs pa'i nga rgyal phrogs te 'dul bar byed pa'o/ /smin ma dpral bar bsdus pa zhes bya ba ni shin tu khros pa'i cha byad kyis spyir gnod sbyin dang / srin po dang /khyad par du klu khro bo dag 'dul bar mdzad pa'o/ /ya sos ma mchu mnan pa zhes pa ni zhal gyi bye brag ste/ rngam par bstan pa'o/ /gshin rje'i cha byad can zhes pa la/ gshin rje'i cha byad ni gnag pa dang / mtshon cha sna tshogs 'dzin pa dang / mi'i rgyu ma'i phreng ba do shal du 'phyang ba/ma he la zhon pa/ 'chi bdag mos 'gul nas 'khyud pa ste/ de dang 'dra bar bstan pa'o/ /lce glog ltar 'gyu ba zhes pa ni ha ha zhes sgrogs shing lce yang dang yang du 'gyur pa ste/ des ni glog dang thog la sogs pa'i 'jigs pa rnam par 'jig par byed pa'o//gsus po che sbrul za ba zhes pa ni log 'dren glang po che'i gdong pa can gyi nga rgyal 'joms pa'o/ /sbrul za ba zhes pa ni nam mkha' lding gi dregs pa 'joms pa'o/ /lag pa brdabs pa'i sgras 'jigs par byed pa zhes pa ni khyab 'jug la sogs pa dregs pa can thams cad skrag cing dngang par byed pa'o//klu'i rgyal po 'dab bzangs ska rags su bcings pa zhes pa ni gang gi tshe 'dab bzangs la 'khyil pa bdun yod pa de la nam mkha' lding gis drangs pa'i tshe 'khyil pa phyed dang gnyis kyis ri rab kyi rtser sleb la 'khyil pa phyed dang drug rgya mtshor lus pa de mthus bkug ste ska rags su bcings pas 'khres cig las ma byung ba ste/sku bongs kyi tshad de dang ldan pa'o/ /a la la zhes sgrogs par byed pa ni drag po'i nga ro ste/ gdug pa can rnams skrag par byed cing zil gyis mnan par byed pa'o/ /rgya mtsho'i zabs su dpag tshad brgyad khri bzhi stong yod pas zhabs kyi pus mor phyin pa zhes pa ni sa 'og sa bla sa stengs khyab par byed pa'i rgyu bstan pa ste/de'i tshad kyi sku bstan pa ni 'bum phrag gnyis su shes par bya'o/ /de bas na dbang po dang nyi ma phrag pa la khur ba zhes smos te/ lta ba log pa thams cad 'joms pa'i rtags su brgya byin phrag pa g.yas pa'i steng du gzhag pa dang / de lta bu'i sku de thugs rje chen pos kun du khyab pa'i rtags su phrag pa g.yon pa la nyi ma gzhag pa'o/ /klu thams cad rlag par byed pa zhes pa ni klu rigs bzhi'i dug phrogs te/ stobs rnam par 'joms shing ma rungs pa sel bar byed pa'o/ /gad rgyangs chen po sgrogs pas kun du 'khrug par byed pa zhes pa ni gad rgyangs ni ha ha ste/ de'i nga ro drag pos bgegs dang log 'dren thams cad kyi snying kun nas 'khrug par byas te spa bkong ba'o/ /gshin rje'i gzugs can zhes pa ni ya ma zhes bya ba skrag par byed pa'o//khams gsum pa 'jigs par byed pa zhes bya ba ni de lta bu'i sku de snying rje'i rang bzhin can yin yang gdug pa 'dul ba'i thabs su de ltar bstan pas khams gsum pa de lta bu la 'jigs pas skyabs su 'dong bar 'gyur ba'o/ /klu thams cad 'ching bar byed pa la phyag 'tshal lo zhes pa ni klu rigs bzhi la sogs pa'i dug phrogs te stobs 'joms shing ma rungs pa rlag par byed pa'o//de lta bu'i sku de la kun nas 'dud cing mchod pa ni de skad smos pa yin no/ /de ltar mtshan nyid bstan nas gsang ba'i gsang sngags bstan pa'i phyir/de nas sangs rgyas bcom ldan 'das gang gA'i klung gi bye ma snyed kyis gsungs pa'i rig sngags 'di gsungs so zhes smos pa la/ de nas zhes pa ni don dang rtags bstan nas zhes pa'o/ /sangs rgyas bcom ldan 'das gang gA'i klung gi bye ma snyed kyis gsungs pa zhes pa ni 'das pa dang ma 'ongs pa dang da ltar byung ba'i sangs rgyas thams cad kyis gsungs pa dang /gsung pa dang / gsung bar 'gyur ba'i rig sngags 'di nyid mchog yin pas ni sgrub pa po rnams kyis 'di brjod par bya'o zhes pa'o/ /rig sngags 'di gsungs so zhes pa ni gong gi thun mong ma yin pa'i sku de dmigs la/gang gis bzlas brjod byed kyang gsal ba dang ldan pas/ rig sngags kyi sbyor ba la 'jug par bya'o zhes bya ba'i don to/ rig sngags de dag kyang gang zhe na/ tad+ya thA zhes pa nas rA dz+nyA pa ya ti swA hA zhes pa'i bar du'o//de dag gsal bar byed pa ni tad+ya thA ni bshad pa'i ltas te 'di lta ste zhes pa'o/ /b+ho b+ho zhes pa ni bod pa'o/ /wAn zhes pa ni bcom ldan 'das so/ /nA ga zhes pa ni klu'o/ /a d+hi zhes pa ni lhag par ro / /pa ta ye zhes pa ni brgyad kyi bdag po'o / /i da na zhes pa ni rgyan no//gang gi rgyan yin zhe na/ nang gi rgyan yin zhes pa bshad pa'i phyir/ nI lAM ba ra d+ha ra sha rI raM zhes pa ni gos sngon po can gyi sku'o/ /gang gi phyir sku ma rtogs par sngags 'byung mi srid pas sngags dang sku gnyis su med pa'o / /badzra pA Ni hri da ya zhes pa ni phyag na rdo rje'i snying po ste/gang gis brjod pas bsgrub bya mngon du byed pa'o/ /yaHsa mA ti krA mA ti zhes pa ni sgrub pa po'i bka' 'dor zhing 'da' bar byed na zhes pa'o/ /ut+pA da na zhes pa ni yul gzhan du skrod par byed pa'o/ /b+ha bi Sh+ya ni shin tu gdug pa can zhes pa'o/ /snying po de dag gang zhe na tad+ya thA zhes smos te/'di lta ste zhes pa'o/ /bud+d+ha bud+d+ha bi bud+d+ha zhes pa ni phyag na rdo rje la bos pa'o/ /ma hI prAp+ta zhes pa ni ma 'gor cig ces pa'o/ /ha ra ha ra zhes pa ni gdug pa can gyi stobs phrogs shig pa'o/ /gdug pa can de gang zhe na/ nA gA nAM zhes smos te/ klu rnams kyi zhes tshig gi 'brel pa'o//pra ha ra pra ha ra zhes pa ni 'od zer las byung ba'i khro bo rnams kyis rgyob cig pa'o/ /gang la brdeg ce na/ nA gA nAM zhes smos te/ klu la sogs pa'i stobs 'joms pa'o/ /ts+tshin+da ts+tshin+da zhes pa ni chod cig pa'o/ /gang gcod ce na/ nA ga hri da yA ni zhes smos te/klu'i snying rnams so/ /b+hin+da b+hin+da zhes pa ni choms shig pa'o/ /gang gzhom zhe na/ nA ga da mA ni zhes smos te/ klu 'khyil pa rnams choms shig pa'o/ /bi ShI r+yan+tu nA ga sha rI ra Ni zhes pa ni dug gis myos pa'i klu'i lus shin tu choms shig pa'o/ /bi s+ho Ta ya zhes pa ni gzi brjid kyi stobs choms shig pa'o//gang gis zhe na/ nA ga nA ya nA ni zhes smos te/ klu'i mig rnams so/ /sngags kyi mthu gzhan yang bstan pa'i phyir/ tad+ya thA zhes pa ni 'chad par 'gyur ba'i sngags kyis sku la bskul ba'o/ /gang gis bskul na hUM phaT ces pas thugs bskul ba'o//nA ga bi d+ha ra Na ya zhes pa ni klu rnams zungs shig pa'o/ /hUM gis dbang du bsdus nas phaT kyis dug nyams par gyis shig pa'o/ /nA got+sA dA nA ya phaT ces pa ni gal te shin tu gdug pa'i dug gis zin pa mi gtong na gdug pa can rnams skrod pa dang rengs par byed pa'o//nI lAM ba sa nA ya phaT ces pa ni las dang mthun pa'i gos sngon po can mngon spyod kyis shig pa'o/ /a pra ti ha ta ba la pa rA kra ma ya phaT ces pa ni gang gi phyir khyod kyi thogs pa med pa'i stobs dang mthu gzhan gyis mi thub pas gdug pa'i stobs nyams par gyis shig pa'o//kri tAn+tA ya phaT ces pa ni srul po'i stobs phrogs shig pa'o/ /kri tAn+ta rU pA ya phaT ces pa ni lus srul po'i stobs phrogs shig pa'o/ /ro Sha Na ya phaT ces pa ni gtum po'i stobs phrogs shig pa'o/ /trA sa na ya phaT ces pa ni lha ma yin gyi gdon med par gyis shig pa'o/ / kum+b+haN+Do t+sA da nA ya phaT ces pa ni smyo byed kyis byas pa'i stobs phrogs shig pa'o//pre ta pi shA tsa bi nA sha ka rA ya phaT ces pa ni yi dwags dang sha za'i tshogs skrod par byed pa'o/ /yak+Sha a basmA ra bi nA sha ka rA ya phaT ces pa ni gnod sbyin dang brjed byed kyi tshogs skrod par byed pa'o/ /ha sa ha sa zhes pa ni bzhad pa tsam gyis so//d+ha ra d+ha ra zhes pa ni dran pa tsam gyis so/ /mA ra ya mA ra ya zhes pa ni gdug pa can rnams gsod par byed pa'o/ /nA sha ya nA sha ya zhes pa ni gdug pa can rnams rengs par byed pa'o/ /sarba big+h+nAn bi nA sha ka rA ya phaT ces pa ni gnod sbyin la sogs pa'i bgegs thams cad dbang du bsdus shing stobs phrogs nas skrod par byed pa'o//sarba sha trUM saM g+ha bi nA sha ka rA ya phaT ces pa ni dge 'dun gyi dgra thams cad stobs phrogs te rlag par byed pa'o/ /nI lAM ba ra d+ha ra badzra pA Ni rAdz+nyA pa ya ti swA hA zhes pa ni dus gsum gyi de bzhin gshegs pa thams cad kyi dbang bskur ba ni phyag na rdo rje gsang sngags kyi sku ste/sgrub pa pos nye bar bsdus pa'o/ / de ltar gsang sngags kyi rim pa bshad nas/ phra mo'i las kyi rim pa bstan par bya ba'i phyir/ de'i cho ga la gnod sbyin gyi gdon gyis zin pa la ni chu la sngags kyis btab nas gtor na btang bar 'gyur ro zhes pa la/gnod sbyin gyis zin pa'i rtags ni bzhin 'jigs pa dang / kha zas lhag par za ba dang / kha btsog smra ba dang / gzhan la brdeg pa dang / nga ro mi snyan pa sgrogs pa dang / nad kyi zug rngu drag po'o/ /de la thog mar maN+Dal byas/ / te 'khor lo rtsibs brgyad kyi thig btab la/ rtsibs la gnod sbyin gyi sa bon bri/ rtsibs mchan du 'khor lo nyid kyi sa bon bri'o / /de la bu mo lo brgyad lon pa la tsan+dan dang / ga pur dang / gur kum dang / dzA ti dang / gla rtsi lnga ni dri lnga ste/ chu gtsang ma dang sbyar la bu mo khrus byas nas dkon mchog gsum dang maN+Dal gyi lha la phyag byas te/bsnyen gnas kyi sdom pa 'dzin du bcug la/ rin po che'i snod thogs pas byang phyogs nas nyi ma'i rtse la chu blangs te/ snod de nyid many+dzi'i steng du gzhag ku shas kha brgyan la/ dar sngon pos mgul pa bcings shing maN+Dal gyi dbus su bkod la/skud pa sngon pos mgul pa nas btags te/ sgrub pa po'i g.yon gyi srin lag la dkris la/ g.yas par yungs kar blugs te rig sngags re re rdzogs pa dang / yungs kar re re bum par bstim mo/ /de ltar yungs kar 'bru re re la khro bo rdo rjes mtshon pa grangs med pas khyab par bsam mo//bdag nyid gnod sbyin gos sngon po can du bsgoms la khar chu blugs te/ nad pa'i lus la kha phrus btab pa dang / khro bo rdo rje'i mtshon cha can dag gis gnod sbyin gyi gdon phral te song bar bsam mo/ /de nas gdon dengs pa dang bum pas nad pa'am rang la dbang bskur bar bya'o//de nas maN+Dal bsdus te yungs kar dang maN+Dal gyi sa bsres pa thogs te/ bdag nyid bdud rtsi 'khyil pa'i ting nge 'dzin du zhugs la phyogs mtshams brgyad du gtor zhing mtshams bcad pa de ni gnod sbyin gyis zin pa'i cho gar bstan to// klu bzlog par 'dod na smyug shad kyi lcug ma'am bal po se'u'i lcug mas bya'o zhes pa ni/ thog mar nad pa'i nad brtag par bya ste/ klu'i nad spyir mang na yang / nad pa klu la dga' ba dang / nub mo na ba dang / yan lag na ba dang / nad ga nur lci ba dang /snying mi dga' ba dang / 'khrul zhing dran pa mi gsal ba dang / yan lag 'khums pa dang / lus lci mig dmar/ sna 'gag /lus dri mi zhim pa rnams klu'i nad yin no/ /gal te mdze gso bar 'dod na yang klu'i nad yin min rtogs par byas te gso'o/ /de smyag shad kyi lcug ma dang /bal po se'u'i lcug ma khye'u lo brgyad pa'i gnas lngar 'bru lngas bsrungs te/ nub phyogs nas lcug ma mtshar bu'i thems kyis gcad la/ lcug ma bdun brngas pa dang / dngul gzhong chus bkang ba'i nang du lcug ma bcug ste gzhag /'khar gzhong cig gi nang du zan la pad+ma 'dab ma drug pa cig byas la/de'i steng du ba su ta rigs drug dgod pa ni gcig la bu mo dang khye'u dgod/ gcig la sbrul kha dog 'dres pa sbrul mgo bdun pa dgod/ gcig la nya dang sbal pa dang lcong mo dgod/ gcig la rtsangs ma mgo dgu dgod/ gcig la ba glang dgod/gcig la sbrul nor bu rin po ches brgyan pa dgod/ de'i mtha' ma shing gis bskor la gzhag go/ /de nas smyag shad dang bal po se'u'i lcug ma dril te/ skud pas gsum du bcings te/ de la rma bya'i mdongs gsum btsugs la bdag nyid gos sngon po can du gsal bas lcug ma dang rma bya'i dril ba lag tu thogs te/nad pa sngon du bzhag la nad pa la byab cing pad+ma dang klu la dbab/ de nas dug de des khyer bar bsams la/ klu rnams zla ba'i gdan la 'dug par bsams pa'i 'og tu yaM las rlung gi dkyil 'khor bsgoms te/gzungs kyi phreng ba'i mjug tu nA ga s+pha ra Na phaT ces brjod pas klu rnams rang gi gnas gang yin par rlung gis bskyod nas skad cig gis phyin par bsam mo/ /de lta bu gcig gis kyang phan par nus na mang du byas na smos su med do/ /de ni klu'i nad gso ba'i cho ga'o/ / yi dwags dang brjed byed rnams la ni skud pas bya'o zhes pa ni/ brjed byed kyi rtags ni dran pa nyams pa dang / rkang lag sprug pa dang / mi smra ba dang / kha chu 'dzag pa dang / me dang chu dang g.yang la mchod ba dang / gnyid mang ba la sogs pa'o/ /de la skud pa dkar po la mdud pa brgya byas te /mdud pa re re la sngags re re bzlas la/ skud pa'i mtha' gnyis dbus dang gsum du zangs kyi phur pa sor gnyis pa la sngags lan nyi shu rtsa gcig bzlas pas mtshan te/ nad pa'i sker gdags so/ /rim pa ni snga ma bzhin no/ / rims nad med par bya ba dang /gzhogs phyed na ba dang / yi ga 'chus pa la ni skud pa sngon pos bya'o zhes pa ni/ ras bal gyi skud pa me tog sngon pos kha bsgyur te/ sngags tshig rnams shog bu la bris te/ skud pa dang bcas mgul pa'am gang na bar btags na 'tsho bar 'gyur ro//byis pa gdon gyis nyen pa dang / nad kyi 'jigs pa thams cad la skud pa sngon pos bya'o zhes pa ni/ ras bal gyi skud pa me tog sngon pos kha bsgyur te/ mdud pa brgya rtsa brgyad dam nyi shu rtsa gcig tu mdud de/ mdud pa re re zhing sngags re re rdzogs pa dang bsrung bya'i mgul lam ga shar btags nas ting nge 'dzin gyis gdon gyis nyen pa'i lus rdo rje'i dra bar bsgoms na bsrung ba'i mchog tu 'gyur ro//chom rkun bzlog par 'dod na sas bya'o zhes pa ni rnal 'byor pa rang gi chag gang brkos pa'i gting nas sa rlon pa blangs te/gu gul nag pos bdugs la sngags re re zhing yungs kar re re sa la bsnun par bya'o/ /de ltar sngags stong rtsa brgyad rdzogs pa dang / sa de kham pa'i ga'u srubs med par blugs la / par bu'i dkyil du bug pa smyug ma tsam cig phug ste/ de'i nang du yungs kar stong la sngags stong thim pa dang /shing kha d+hi ra'i sdong pos bsregs nas nang gi sa dang yungs kar tshig cing mdog 'gyur bar byas nas/ de'i nang nas phyung la snod kyi nang du blugs la jag rkun byung ba'i dus su gtor na log par 'gyur ro/ / khyad par du rkun po la nor rdzas gang yin pa la sngags khros pa'i shugs kyis btab na rkun po ldog par 'gyur ro// dug la ni rtsa ku shas byab par bya'o zhes pa ni/ gang dug gis zin pa de drug dang dbral bar 'dod pa rtswa ku sha bdag gis bzung ste/ mdun du sol ba dang rdo rgyus la sbrul gyi gzugs cig byas la nad pa'i lus las dug de ku shas byab ste phreng ba'i sngags kyi zhabs la khaM khaM zhes brjod cing gzugs de la phab pas 'gul bar bsam shing gzugs kyi snying gar hrIH las 'di 'od byung bas nad de bsdus nas de nyid hrIH la thim par bsam de nas gzugs de gnas mthon por phyung la rlung la bskur te/nam mkha' la khyer bar bsam mo/ /de ni dug dbyung ba'i cho ga ste/ shin tu rtse gcig dang ldan pas bya'o/ / nor 'dod na zhag gcig smyung bar 'dug ste/ pog gis bdugs na rmi lam du dge ba dang mi dge ba'i don thams cad ston cing gser gyi dong tshe bdun stong sbyin par byed do zhes pa ni/bdag nyid gos sngon po can du bsgoms la mdun du 'phags pa dzaM b+ha la bsams la mchod do/ /de yang smyung bar gnas pa'i nang par nyi ma'i rtse la chu khyor ba brgya rtsa brgyad sngags 'dis dbul lo/ /oM dzam+b+ha la dza len+d+rA ya swA hA/zhes pa'o/ /rgyun du phreng ba'i sngags 'di kho na brjod par bya'o/ /de ltar zhag bdun zhing zhag re re smyung bar gnas te/ ga pur dang dzA ti pha la dang / gla rtsi dang / gur kum la sogs pa dri sna tshogs kyis gos sngon po can gyi gzugs brnyan dang / mchod rten la sogs pa'i mdun du 'dug pa dang /'phags pa gos sngon po can yang dag par mchod cing yid la byed pas rnam thos sras la bdag dkon mchog gsum la mchod pa'i nor slong ngo zhes brjod de nyal bar bya'o/ /rmi lam na gser gyi dong tshe nyid mthong ba'am/ rnyed pa'am / gzhan gyis bdag la phyin pa'am/ mang po la longs spyod pa ni grub pa'i mtshan ma ste/ gang dag sa'i dkyil 'khor 'di na las dang po pa'i bsod nams las grub pa'i gnod sbyin pho mo rnams kyis bdag la gter ster ba dang / sa la gnas pa'i gter dag ston par 'gyur ro//rmi lam du dong tshe bdun stong mthong na the tshom med do/ /sgo lcags dbye bar 'dod na yungs kar gyis bya'o zhes pa ni/ bram ze'i rigs kyi thod par yungs kar blugs te phreng ba'i sngags brjod cing bsgrub pa la sogs pa / stong ngam khri la sogs pa thim pa dang yungs kar byin gyis brlabs la/sgo lcags 'byed pa'i dus su yang phreng ba'i sngags brjod cing lde khung du yungs kar bdun nam nyi shu rtsa gcig bsgyur bas phyed par 'gyur ro/ / rgyas btab pa dgrol bar 'dod na thal bas bya'o zhes pa ni/ ba'i lci ba la sogs pa rnam pa lnga sa dang sbyar la zhi ba'i hom khung du byas te/tsan+dan dmar po'i me btang la me tog sngon po'i nang du mngar gsum gyi ri lu bag phyer gtums te bcug la/ me tog dang phreng ba'i sngags bzlas te/ stong ngam khri thim par bsregs pa'i thal bas gtor ram bskus na grol bar 'gyur ro// 'jigs pa thams cad las bsrung ba ni mar rnying pa'am thal ba'am yungs kar gyis bya'o zhes pa ni mar lo du ma lon pa ga'u'i nang du bcug ste/ steng na bu ga byas pa la chu btang ste/ phreng ba'i sngags stong ngam khri thim pa dang phyag na rdo rje yang dag par mchod do//gzungs kyi bum pa dang ldan pa'i chus lus bkrus te/ ga'u'i mar gyis bskus na 'jigs pa thams cad las thar bar 'gyur ro/ /yang na ga'u'i bu ga na mar yungs kar re re zhing phreng ba'i sngags re re brjod cing / de re re yang khro chung re rer gyur par bsams la/de stong ngam khri la sogs pa them pa dang / spyi bo la sogs par phur pa byas te btags na yang 'jigs pa thams cad las thar bar 'gyur ro/ /thal ba la ni zhi ba'i sbyin sreg byas pa'i thal ba ste/ mar rnying pa dang lhan cig tu gzungs sngags 'bum bzlas te byug pa'am/yang na yungs kar dang ldan pa'i byug pa'am/ gdags pa byas na yang thar bar 'gyur ro/ / bdag bsrung ba ni yid kyis sam chus bya'o zhes pa ni/ ting nge 'dzin gsal ba dang / bzlas pa rdzogs pa ni dmigs pa tsam gyis so/ /yang na chu la bsngags te steng 'og la sogs par gtor zhing btung bar bya'o// gzhan bsrung ba ni skud pa sngon pos bya'o zhes pa ni gong du bshad pa dang sbyar bar bya'o/ /las de dag thams cad la sngags bzlas pa ni lan gsum mam/ bdun nam/ bcu bzhi'am/ nyi shu rtsa gcig gam/ brgya rtsa brgyad brjod par bya'o zhes pa ni gong du bsnyen pa rdzogs pa'i rnal 'byor pas las la sbyor ba'i dus su rig pa brjod pa'i grangs kyi tshad do//de ltar byas na 'grub par 'gyur ro zhes pa ni gong du bstan pa'i las tshogs de dag ltar ro/ /mchod rten sku gdung dang ldan pa'i mdun du me tog sngon pos mchod do zhes pa ni mchod rten bde bar gshegs pa'i gdung dang ldan pa'i rtsar phyag na rdo rje sgrub thabs las 'byung ba bzhin mchod de me tog sngon po gur kum gyi chur bcug ste/nyi ma re re la dus gsum du nyi shu rtsa gcig tu mchod par bya'o/ /sngags stong bzlas brjod byas na 'grub par 'gyur ro zhes pa ni tha ma'i tshad bstan pa ste/ji srid skyo bar ma gyur gyi bar du brjod par bya'o/ /gzhan yang lder so dang / ras ris la sogs pa phyag na rdo rje'i sku gzugs kyi mdun du ji skad bshad pa'i sgrub thabs bzhin du yang dag par mchod de mnyes par byas nas phreng ba'i sngags 'bum mam bye ba la sogs pa'i sbyor ba sngon du song bas ni 'grub par mi 'gyur ba gang yang yod par mi 'gyur ro//sems can 'dod pa tha dad rnams la gzigs nas ni/ /bde bar gshegs pas byang chub lam ni sna tshogs gsungs/ / snyigs ma'i dus kyi sems can brtson 'grus blo zhan rnams/ /'jug bya'i don du de nyid sgron ma 'di brtsams te/ /bla ma la gus dad ldan snying rje shes rab ldan/ /theg chen thabs mkhas tshad med snying rje'i sems bskyed pa/ /dbang rnams rdzogs shing rjes su gnang thob dam tshig can/de la dpa' bos gnang dbang brgyud de bstan par bya/ bla ma mnyes byas brtse bas bdud rtsi'i 'od zer thob/ /ji srid mnyes byas gzhan don lhag lhas gnang ba byin/ /rang nyams stobs kyis sgrub po rdzas gzung rgyud don bris/ /ngal ba'i dge bas dngos grub rnam gnyis thob par shog /'phags pa lag na rdo rje gos sngon po can gyi cho ga zhes bya ba'i gzungs kyi 'grel pa de kho na nyid gsal bar byed pa'i sgron ma zhes bya ba slob dpon klu grub kyis mdzad pa rdzogs so// //rgya gar gyi mkhas pa dI paM kA ra shrI dz+nyA na dang bod kyi lo tsA ba rgya brtson seng ges shrI na len+d+ra'i sgo 'gram du bsgyur ba'o/