CLOSE WINDOW

D2671
བོད་ཡིག

rgya cher bshad pa slob dpon sangs rgyas gsang bas mdzad pa rdzogs so// //rgya gar gyi mkhan po bid+yA ka ra pra b+hA dang / zhu chen gyi lo tsA ba ban+de dpal brtsegs kyis bsgyur cing zhus te gtan la phab/ /[ ]@##/ /rgya gar skad du/ Ar+ya su bA hu pa ri pr-i ts+tsha nA ma tan+t+ra piN+DAr+tha/bod skad du/ 'phags pa dpung bzangs kyis zhus pa'i rgyud kyi bsdus pa'i don/ sangs rgyas dang byang chub sems dpa' thams cad la phyag 'tshal lo/ /mdo sde 'di las ni sangs rgyas dang byang chub sems dpa' dang / 'jig rten pa'i lha'i bye brag rnams kyis rig sngags dang /gsang sngags bshad pa gang yin pa de dag rigs gsum po de bzhin gshegs pa dang / pad+ma dang rdo rje dang / de bzhin du gzhan yang nor chen dang / lngas rtsen dang 'jig rten pa'i rigs su yang dag par bsdus par ston to/ /de dag gi rigs dang / rig sngags dang / gsang sngags dang / las kyi dbye ba dang mnyes par bya ba'i thabs kha cig tu ni rgyas par spros la/ de las gzhan du ni cung zad tsam du bstan pa dang / gzhan dag tu ni ma gsungs so snyam du dgongs nas/ bcom ldan 'das rdo rje 'chang gis rig sngags thams cad kyis mnyes par bya ba'i thabs su gyur pa/'jug pa dang / sbyor ba dang / sgrub pa dang / grub pa'i spyod pa bstan pa rnams dpung bzangs kyis zhus pa'i gsang sngags kyi mdo sde'i le'u bcu gcig po 'dir gtan la dbab pa bstan to/ /de la le'u dang po ni don bdun gyis bshad par bstan la/ tshig dang po'i don ni 'di lta ste mdo sde dang /de 'chang ba dang / zhu ba dang / 'brel pa dang / brjod par bya ba dang / dgos pa dang / dgos pa'i yang dgos pa rnams kyis bstan to/ /gnod sbyin bdag po nyi ma stong gi gzi/ /snying rjes rtse gcig yid gyur zhes bya ba nas brtsams te/ de phyir myur du rtse gcig yid byos dang /gsang sngags mdo sde'i tshul bzhin ngas bshad do/ /zhes bya ba'i bar gang gsungs pa'o/ /de bzhin du zlos pa dang / sgrub pa dang / mi sgrub pa rnams kyis kyang thun mong gi bslab pa la 'jug pa bstan pa ni don gnyis pa ste/ gsang sngags bzlas brjod gang dag ngas gsungs pa//de yi brtul zhugs dang por ngas bshad do/ /zhes bya ba la sogs pa nas/ dge ba bcu dag gi/ chos kyi lam la gnas par byas na legs/ /zhes bya ba'i bar gsungs pa'o/ /de bzhin du dam tshig gi dkyil 'khor rnams dang / gdon la sogs pa'i dkyil 'khor du zhugs pa'i phan yon gsungs pa ni don gsum pa ste/ lha dang lha min sha khrag za 'thung ba/ /mtshan mor rgyu ba mi bzad 'jig rten na/ /sems can rnams la gnod pa byed cing rgyu/ /zhes bya ba la sogs pa nas/ de las gang yang rung ba'i dkyil 'khor ni/gcig tsam zhig kyang dad pas blta bar bya/ /zhes bya ba'i bar du gang gsungs pa'o/ /sgrub pa pos khyad par du dge ba'i chos yang dag par sdud pa dang / sems can gyi don bya ba dang / so sor thar pa'i sdom pa'i tshul khrims la gnas par bya ba bstan pa dang /de'i phan yon bstan pa ni don bzhi pa ste/ gnod sbyin tshogs dang mtshan mo rgyu ba dag /sa bla'i zhes bya ba la sogs pa nas/ de bzhin tshul khrims brten nas chos dkar mchog/ /snying rje'i chus brlan pas ni rnam par skye/ /zhes bya ba'i bar gang gsungs pa'o/ /so sor thar pa dang sems can gyi don bya ba'i bslab pa'i thabs ni don lnga pa ste/rgyal ba ngas gsungs so sor thar pa yi/ tshul khrims rnam dag 'dul ba ma lus las/ /zhes bya ba la sogs pa'o/ /de bzhin du dge ba'i chos yang dag par bsdu ba'i thabs ni don drug pa ste/ /zlos pas skyon mdo sde bklag par bya//zhes bya ba la sogs pa'o/ /de bzhin du grogs po'i mtshan nyid bstan pa ni don bdun pa ste/ nam yang 'khor lo gcig pa'i shing rta ni/ /zhes bya ba la sogs pa gang gsungs pa'o// //de bzhin du le'u gnyis pa la don bcu ste/de la gsang sngags mnyes par bya ba'i don ni dang po ste/ rang sangs rgyas dang bde gshegs nyid skyes dang / /rgyal ba sngon chad gang na bzhugs bzhugs pa'i/ /zhes bya ba la sogs pa nas/ der ni sa brkos sbyangs nas gnas brtsigs pa/ /zhes bya ba la sogs pa'i bar gang gsungs pa'o//de bzhin du lha bzhag pa'i don ni gnyis pa ste/ dri gtsang khang pa de yi phyogs gcig tu/ /rgyal ba lam mchog rnam par ston pa yi/ /zhes bya ba la sogs pa nas/ de yi spyan sngar dngos grub brtsam par bya/ /zhes bya ba'i bar gang gsungs pa'o/ /sgrub pa dang rjes su mthun pa'i cha lugs bstan pa ni don gsum pa ste/de'i phyir/ gtsug phud gzhag ste skra ni bregs nas su/ /zhes bya ba la sogs pa gsungs so/ /de bzhin du slong mo pa'i lhung bzed kyi mtshan nyid bstan pa ni don bzhi pa ste/ ji skad du/ ku ba'am lcags sam 'jim pa las byas pa//zhes bya ba la sogs pa gsungs so/ /sgrub pa po slong mo dang rjes su mthun pa'i yul du gnas pa'i bya ba ni don lnga pa ste/ de bstan pa'i phyir/ bza' btung mod cing dmangs rigs mang ba dang / /mgron la mchod byed legs par gnas pa'i grong /zhes bya ba la sogs pa nas/ de ni sdig pa rnam par bsal ba dang / /bsod nams ma lus yongs su bzung bas 'dag /ces bya ba'i bar du'o/ /zas la ma chags par bya ba dang / zas kyi tshod zin par bya ba bstan pa ni don drug pa ste/ ji ltar rma ni gso dang bsal ba'i phyir//nad pa la ni sman pas sbyin pa ltar/ de bzhin 'dir yang bkres pa'i sdug bsngal dag /ces bya ba dang / bza' bar gsungs zhes bya ba la sogs pa nas/ lus ni chu shing bzhin du rig bya ste/ /bza' btung sogs la sems ni chags mi bya/ /zhes bya ba'i bar du'o//slong mo byed pa'i dus na spyod lam bcos par bstan pa ni don bdun pa ste de'i phyir/ /dbang po drug po yul la 'phro ba dag /bde gshegs gsungs pa'i shes pas bsrung bar bya/ /lhung bzed de dag las gcig thogs nas su/ /gnya' shing gang du blta zhing zhes bya ba nas/de bzhin gang na rol mo byed pa rnams/ /der ni skyes bu nam yang 'gro mi bya/ /zhes bya ba la sogs pa'i bar du'o/ /zas bza' ba'i rim pa dang / /dus nges par bstan pa ni don brgyad pa ste/ gang gi phyir/ bsod snyoms ci rnyed khyer te 'ongs nas kyang / /zhes bya ba la sogs pa gang gsungs pa'o//dus gsum du bzlas brjod bya ba dang / dus gsum du khrus bya ba dang / /mchod pa bstan pa ni don dgu pa ste/ de'i phyir/ dus su zos nas dus gsum khrus bya ste/ /zhes bya ba nas/ spra ba arka bil ba bri ha ti/ /ku sha dri ngan yid du mi 'ong spang / / zhes bya ba la sogs pa gsungs so/ /sgrub pa pos sangs rgyas rjes su dran pa la sogs pa rjes su dran pa drug la dmigs pa'i dus bstan pa ni don bcu pa ste/ 'greng dang 'dug dang ma log nyal ba dang / /'gro 'phres za klog bzlas brjod byed pa na/ /rjes su dran drug so so'i yon tan dag /rig par bcas te rjes su dran par bya/ /zhes gang gsungs pa'o// //le'u gsum pa la sgrub pa po'i de kho na nyid la dmigs pa ni don dang po ste de'i phyir/ 'dod chags la sogs nyon mongs tshogs ldan pa'i/ sems ni 'khor ba yin par kun du brjod/ /nyon mongs rnam grol shel dang zla 'dra ba//srid pa'i rgya mtsho mthar ni yongs su grags/ /zhes bya ba la sogs pa gsungs pa'o/ /bgrang phreng gi mtshan nyid bstan pa ni don gnyis pa ste/ de'i phyir/ pu tra dzi dang dung shel du drAk+Sha/ /zhes bya ba la sogs pa gsungs pa'o/ /bzlas brjod kyi dus su lus dang /ngag dang / yid bsdams pa ni don gsum pa ste/ de bstan pa'i phyir/ 'dug nas dbang po yang dag bsdams pa dang / /lus ni drang zhing brtan par bzhag nas su/ /phyis ni ma mchu shin tu mdzes par yang / /bsgul zhing gsang sngags ci dgar bzlas brjod bya//zhes gsungs pa'o/ /bzlas brjod kyi nyes pa sems mi brtan pa dang / gnyid la sogs pa dang / de bzhin bzlas brjod la gnod pa yul rgyu ba la sogs pa'i rnam par rtog pa rab tu dgag pa ni don bzhi pa ste de bstan pa'i phyir/ sems ni glog dang sprin dang rlung dang mtshungs/rgya mtsho chen po yi ni rlabs dang 'dra/ /sgyu can 'dod dgur yul la mngon dga' ba/ /g.yo zhing 'phyan pa zhes bya ba la sogs pa nas/ gnyen la dga' ba'i sems ni rnam rtog gis/ /bzlog nas dge la brtson dang ldan par gzhag /ces bya ba la sogs pa'i bar gang gsungs pa'o//thub par bya ba bstan pa ni don lnga pa ste/ dang por zlos nas bzlas brjod zin bar du/ /bram ze rgyal rigs rje'u rigs zhing pa dang / /bud med ma ning khye'u bu mo dang / /sngags pa zhes bya ba la sogs pa gsungs pa'o/ /bzlas brjod byas pa la sogs pa las byung ba'i bsod nams yongs su bsngo bar bstan pa ni don drug pa ste/de'i phyir/ me tog dri snod mar me phul ba dang / /tshul khrims brtson 'grus dka' thub byas pa yis/ /dge ba de kun bla na med pa yi/ /sangs rgyas byang chub bla med mchog tu bsngo/ /zhes bya ba la sogs pa gsungs so//lus dang ngag dang / yid kyi gnas ngan len du gyur pa'i 'jig rten gyi chos brgyad po gang yin pa dang / stangs dang / mchongs pa byed pa la sogs pa rab tu dgag pa ni don bdun pa ste/ de'i phyir/ grags dang ma grags rnyed dang ma rnyed dang / bde dang sdug bsngal zhes bya ba la sogs pa nas/le lo dang ni g.yo sgyu rnam par spangs/ /zhes bya ba la sogs pa'i bar gsungs pa'o/ /kha zas ma gnang ma spang ba dang / gsang sngags mnyes par 'gyur ba dang / rjes su mthun pa'i kha zas dkar po bstan pa ni don brgyad pa ste/ ji skad du/ /sha chang ke'u dang btsong dang sgog rdog dang //zhes bya ba la sogs pa nas/ lha min bu mo'i 'khrul 'khor 'joms pa'i tshe/ /'bru mar tshigs ma'i kha zas mchog tu bsngags/ /zhes bya ba'i bar gsungs pa'o/ /ji skad bstan pa'i dus su nyal ba'i rim pa bstan pa ni don dgu pa ste/ ji skad du/de ltar bzlas brjod byed pa'i sgrub pa pos/ nyin gcig bzhin du byas nas zhes bya ba la sogs pa gang gsungs pa'o// //de nas le'u bzhi pa la rdo rje rnams kyi mtshan nyid bstan pa ni don dang po ste/ ji skad du/ sgrub pa pos ni nges par bcang ba yi/ /rdo rje gang yin de dag bshad par bya//zhes bya ba la sogs pa nas/ de las gcig kyang rnyed par ma gyur na/ /khu tshur bcangs nas rtse gcig sems kyis bzlas/ /zhes bya ba'i bar du gsungs pa'o/ /sgrub pa'i rdzas rnams kyi grangs bstan pa ni don gnyis pa ste/ de'i phyir/ ldong ros gi wang ral gyi any+dza na/zhes bya ba la sogs pa'o/ /bgegs kyi rigs rnams kyi grangs bstan pa ni don gsum pa ste/ de'i phyir/ bgegs dang log 'dren grub par mi dga' ba/ /rig pa'i tshogs rnams kyi ni mdun nas rgyu/ /zhes bya ba la sogs pa nas/ sgrub pa po ni 'byor bar mi dga' ba//brtse med rang rang rigs la bgegs kyang byed/ ces bya ba'i bar du'o/ /bgegs rnams bgegs byed pa na lha la phul ba'i dri la sogs pa mchod pa'i yo byad rnams 'phrog pa dang / glags rnyed nas sgrub pa po'i lus la 'jug par byed do/ /de la rgyu gang gis yo byad rnams 'phrog par byed par dang /yo byad rnams phrogs pa'i nyes pa gang yin pa de bstan pa ni don bzhi pa ste/ de'i phyir/ rang gi gsang sngags gzugs su rnam sprul nas/ /phreng ba dang ni gtor ma mngon du len/ /lha yis log 'dren gyis byas de mthong nas/ / khros shing 'khrugs nas phyir yang phyogs par 'gyur/ /zhes bya ba'o/ /bgegs rnams dang po nas mi 'byung bar bya ba dang / zhi bar bya ba'i thabs bstan pa ni don lnga pa ste/ /de'i phyir/ sngon chad sems ni rmongs dang 'jungs pa yi/ /lha yis log 'dren bgegs kyi lugs 'di gtong //zhes bya ba la sogs pa nas/ bzlas brjod zin nas legs par bsrung byas te/ /dkyil 'khor mang byas sgrub la 'jug par bya/ /zhes bya ba'i bar du'o/ /spyir bgegs thams cad sgrub pa po'i rgyud la 'byung ba'i rgyu bstan pa ni don drug pa ste/ de'i phyir/ gzhan du mchod pa'i cho ga med pa dang / /bzlas brjod sbyin sreg cho ga bral pa'am/ gang zhig rtag tu sems ni 'di ltar sems/ /rig pa gang zhig bdag gis bzlas bar bya/ /yul dang rgyal sogs gtam la chags pa de'i/ /lus la thogs pa med par rab tu 'jug /ces bya ba la sogs pa nas/ sbyin sreg byed pa na yang bgegs gzhan 'jug /ces bya ba'i bar du'o/ /de bzhin du spyir bgegs thams cad sgrub pa po'i rgyud la 'dod chags skyed par 'gyur ba bstan pa ni don bdun pa ste/ de'i phyir/ ji ltar nyi zer me shel la bab pa'i//rkyen gyis ma bsgribs me ni 'byung ba ltar/ /de bzhin bgegs kyang lus la zhugs gyur na/ /'dod chags me chen kun du skyed par byed/ /ces gsungs pa'o/ /bgegs rnams khyad par 'byung ba'i rgyu dang / de dag kyang sgrub pa po'i rgyud las khyad par du byed pa gang yin pa bstan pa ni don brgyad pa ste/ji skad du/ g.yo zhing 'gul ba zhes ni bya ba yi/ /bgegs ni chu dang skyes bu 'khru tshe 'dzin/ /bkres shing lus la snyom zhing gnyid kyang che/ /de bzhin lus lci mchog tu 'khru bar 'gyur/ /zhes bya ba la sogs pa nas/ /me tog 'bul tshe me tog cher dgod pa//rang gi glags rnyed mod la lus la 'jug /rims dang cham pa ru shing na ba dang / /grogs po dag dang rnam par bral bar byed/ /ces bya ba'i bar du gsungs pa'o/ /de bzhin du gzhan yang spyir na 'di ni bgegs thams cad skyon med par byed pa de bstan pa ni don dgu pa ste/ji skad du/ bgegs kyis brlams pa phyogs na lam min lam du mthong / /spyod pa sna tshogs byed cing 'dod chags rnams kyis gdungs/ /glo bur smra zhing klog la don med kun du 'phyen/ /zhes pa la sogs pa nas/ khron skam thod pa rus gang phung po dang //lcags dang rdo phung mi gtsang khong rul dang / /kha bzhin bsgyur zhing ral gri mdung thogs pa/ /rmi lam 'di rnams rmis pa'i ming yang brlams/ /zhes bya ba'i bar du gsungs so/ /bgegs thams cad thog ma nyid nas mi 'byung bar bya ba'i rgyu bstan pa ni don bcu pa ste/de'i phyir/ bgegs dang log 'dren rnam par gzhig pa'i phyir/ /bdud rtsi thab sbyor drag shul thabs la sbyar/ /sngags pa de yi gsang sngags la zhugs pa/ /bgegs dang log 'dren rnams kyis yong mi tshugs/ /zhes gsungs pa'o/ /sgrub pa po'i rgyud la bgegs 'byung ba dang /gzhan yang skyes pa dang bud med la sogs pa bgegs kyis zin pa dang / /ma zin pa rnams kyi sdig pa nye bar zhi bar bya ba dang / dbang thang la sogs pa bskyed pa'i phyir/ de dag dbang bskur ba'i dkyil 'khor du dbang bskur bar bstan pa dang / de'i cho ga bstan pa ni don bcu gcig pa ste/ ji skad du/ phyugs lhas shing gcig lha yi khang pa'am/ /lam gyi gzhi mdo'am khang stong nags tshal du/ /dkyil 'khor gru bzhi lham pa khru bzhi'i tshad/ /tshon rtsi rnam pa sna tshogs rnams kyis bri/ /zhes bya ba la sogs pa nas/sgrub pa po yi mi ni 'ba' zhig la/ /bgegs rnams gzhig phyir phan par ma zad kyi/ /rgyal po'i 'khor dang bud med bu pho dang / bu mo dag dang rol mo mkhan rnams dang / zhes bya ba la sogs pa le'u lnga pa gsungs pa'i bar du'o// //de la le'u lnga pa la bgegs kyis zin pa las thar pa'i sngags bstan pa ni don dang po ste/de'i phyir/ bgegs kyis bsod nams ma lus zad byed pas/ /de'i phyir mi yis gsang sngags grub mi 'gyur/ /ji ltar zla ba sprin las rnam grol ltar/ /de bzhin bgegs las grol ba rnam par gsal/ / zhes gsungs pa'o/ /bzlas brjod dang mchod pa dang / sdig pa zad pa la sogs pa'i tshogs dang ldan pa la ltos nas gsang sngags kyi 'bras bu thob par 'gyur gyi gcig pus ni ma yin te/ 'di ltar dngos po thams cad tshogs pa la skye'i/ rgyu gcig pus 'grub pa ni cung zad kyang yod pa ma yin no zhes bstan pa ni don gnyis pa ste/de'i phyir/ sa dang chu dang dus dang rnam bral ba'i/ /snod gnas 'bras bu la ni myu gu med/ /ces bya ba la sogs pa gsungs so/ /gsang sngags kyi 'bras bu'i tshogs bstan pa ni don gsum pa ste/ de'i phyir/ cho ga nyams shing yi ge gug skyed med//mchod pa med cing mi gtsang bzlas brjod byas/ /gug skyed yi ge lhag par gyur pa yis/ /gsang sngags dngos grub rgya cher mi ster ro/ /zhes bya ba la sogs pa nas/ /ji tsam sdig pa mang po'i rab gang zhing / /ji tsam las dkar bsod nams ma bsags dang //ji srid cho ga med par bzlas byas pa/ /de srid sngags pas dngos grub mi thob bo/ /zhes pa'i bar du gsungs pa'o/ /bag med pas chog nyams bzhin du bzlas pa dang / zlos pa'i bar bcad nas rig pa gzhan bzlas pa dang / bsnyen pa yongs su rdzogs nas bzlas pa btang na/gsang sngags 'bum lhag par bzlas pa dang / sbyin sreg bya ba de bstan pa ni don bzhi pa ste/ de'i phyir/ cho ga nyams sam bar bcad sngags gzhan bzlas/ /bzlas pa btang ngam gzhan la byin gyur na/ /dus gsum mchod pa la ni brtson byas nas//slar yang 'bum bzlas bsgrub la 'jug par bya/ /zhes bya ba la sogs pa nas/ de ltar byas na dngos grub myur du thob/ /ces bya ba'i bar du gsungs pa'o/ /gzhan gyi gsang sngags kyis rang gi gsang sngags bcad dam/ bcings sam/ man na par gyur pa na yang /dngos grub 'dod pas tshim par bya ba'i sbyor ba bstan pa ni don lnga pa ste/ ji skad du/ gzhan gyi gsang sngags kyis ni gsang sngags gang / /zhes bya ba la sogs pa nas/ zhag bcur bkru// des na zhag bdun byas pas gsang sngags dag /bcings pa dang ni mnan las grol bar 'gyur//zhes bya ba'i bar du gsungs pa'o/ /ji skad gsungs pa'i cho gas gsang sngags bsnyen cing sgrub pa'i sbyor ba'i rnam pa thams cad kyis bsgrubs te ma grub na/ rig pa de nyid la drag po'i sbyor ba'i rnam par byang bar bstan pa ni/ don drug pa ste/de bstan pa'i phyir/ mchod pa la sogs cho gar ldan yang ni/ /ci ste gsang sngags 'bras bu mi ster na/ /de'i gzugs dug dang ske tshes byugs nas su/ /kI li kI la 'gro lding la sogs pa'i/ /sngags kyis de la yungs mar tshwa sbyar bas/ /zhes bya ba la sogs pa'i bar du gsungs pa'o//bde bar gshegs pa'i gsang sngags rnams ni 'dod chags zhe sdang spangs pa yin na/ de ji ltar gzhan gyi gsang sngags la gnod par byed/ de dag kyang gnod pa thams cad dang bral ba yin na/ gzhan gyi gsang sngags kyang ji ltar gnas par bya zhes bya ba'i klan ka yongs su spang ba ni don bdun pa ste/de'i phyir/ sngon gyi sngags lugs 'chad pas bstan mod kyi/ /ji ltar rgya mtsho dus las mi 'da' ltar/ /sngags kyis gzhan gyi gsang sngags mi mnan cing / /bcing dang gcad pa nam yang mi bya'o/ /zhes bya ba la sogs pa nas//de bzhin sngags pas gang yang rung ba'i sngags/ /bzlas nas gzhan gyi gsang sngags mnan mi bya/ /zhes bya ba'i bar du gsungs pa'o/ /sgrub pa pos gsang sngags gcad pa dang / gnon gyi las dang dbye ba la sogs pa'i las phran tshigs rnams mi bya bar dgag pa ni don brgyad pa ste/ji skad du/ gsang sngags bcad dang gnan par mi bya zhing / /zhes bya ba la sogs pa nas/ rgya mo sa mda' rnyi dang mdzol bu yis/ /sems can gnod par nam yang mi bya'o/ /zhes bya ba'i bar du gsungs pa'o/ /'jig rten dang 'jig rten las 'das pa'i gsang sngags rnams sgrub pa'i yan lag la sogs pa'i grangs nges par bstan pa ni don dgu pa ste/de'i phyir/ dngos grub phyir ni rnam pa bcur gsungs te/ /sngags pa dang ni rang sngags g.yog dang rdzas/ /brtson 'grus phyogs dang sa gzhi dus dang ni//yan lag rdzog pa'i lha dang sems stobs so/ /zhes bya ba la sogs pa nas/ /gug skyed klad kor tsheg tshang zur phyin la/ /gsang sngags dag cing shin tu cho gar bcas/ /sangs rgyas byang chub sems dpa' bsten pa yis/ /gnas su bzlas na yid 'ong dngos grub thob//ces bya ba'i bar du gsungs pa'o/ /sgrub pa tha ma la 'jug pa'i sgrub pa pos kyang lus dang / dag dang / yid kyi brtson 'grus chung bar mi bya ba de bstan pa ni don bcu pa ste/ ji skad du/ ji ltar ri dgas rgyal po bkres pa dag /mthu stobs chen pos glang chen gsod pa dang //de bzhin spyang ku phag dang ri dgas dang / /zhes bya ba la sogs pa nas/ de bzhin sngags pa seng ge'i tshul gyis su/ /rab dang 'bring dang tha ma'i las rnams la/ /brtson 'grus chen po dang ni ldan pa dang / 'bad pa mchog rnams kyis kyang bsten par bya//zhes bya ba'i bar du gsungs pa'o/ /sems g.yeng ba'i rgyu rnams dang / /bzlas brjod kyi skyon rnams spangs pa ni don bcu gcig pa ste/ de'i phyir/ rdza rnga'i sgra dang dung dang rnga sgra dang / /shin tu 'jigs byed skye bo'i sgra dang ni/ sems ni g.yeng zhing zhes bya ba la sogs pa nas/bzlas brjod byed tshe mi myur mi dal zhing / /sgra cher mi 'byung ha cang chung ba'ang min/ /smra bzhin ma yin gzhan du g.yeng bzhin min/ gug skyed klad kor tsheg rnams nyams par min/ /zhes bya ba'i bar du gsungs pa'o/ /gsang sngags kyi bzlas brjod phyag dang bcas par bya ba'i phan yon dang //bzlas brjod byed pa'i tshe/ gsang sngags kyi yi ge'am/ lha nyid kyi gzugs la gsal bar bstan pa ni don bcu gnyis pa ste/ de'i phyir/ ji ltar chu klung nyin mtshan rtag tu ni/ /rgyun mi 'chad par 'bab par 'gyur ba ltar//de bzhin phyag bcas bzlas dang brtul zhugs kyi/ /bsod nams lus can la ni 'phel bar 'gyur/ /le lo 'dod chags mi dge bcas pa'i sems/ /gang dang gang du g.yeng zhing rgyu ba dag /de dang de nas myur du bzlog nas ni/ /gsang sngags yi ge mchog la legs par sbyar//zhes bya ba gsungs so/ /sems kyi brten pa ji lta bur byas nas bzlas brjod bya ba de bstan pa ni don du cu gsum pa ste/ de'i phyir/ sna rtser blta zhing rnam par rtog pa spong / /nam zhig bskyod kyang rnam par mi g.yo ba/ /de tshe dmigs la gnas pa thob pa ste//sems ni las su rung bar gyur par nges/ /rtse gcig sems dang ldan pa'i mi la ni/ /yid las byung ba'i dga' ba rab tu skye/ /dga' bas lus ni shin tu sbyangs pa thob/ /lus sbyongs pas ni bde ba'i skal ldan 'gyur/ /lus bde rtse gcig sems dang ting 'dzin gyis//de tshe bzlas brjod dogs pa med par 'grub/ /ces gsungs pa'o/ /sgrub pa pos sems mnyam par gzhag ste/ bzlas brjod byas pa'i phan yon dang / sems mnyam par gzhag pa'i phan yon mngon par mtho ba dang / nges par legs par 'bras bu dang bcas pa gzhan 'byung bar bstan pa ni don bcu bzhi pa bstan pa ste/de'i phyir/ tshe rabs gzhan du gang dang gang byas pa'i/ sdig pa ma lus bzlas brjod byas pas 'byang / /bzlas pas sdig pa ma lus byang gyur na/ /dang ba'i yid kyis dngos grub thob par 'gyur//zhes bya ba la sogs pa gsungs pa'o/ /sems mnyam par gzhag pa'i 'bras bu rnam par byang ba rgyas par bstan nas/ mngon par thob pa'i 'bras bu'i phan yon yang dag par ston te/ gsang sngags dngos grub kun dang thun mong ba/ bde ba chung zhing sdug bsngal brgya dang 'brel//nyon mongs dug bcas rnam par 'jig 'gyur ba/ /dang pa'i sems kyis thob par gyur pa yin/ /zhes bya ba gsungs pa'o/ /sgrub pa po dbang phyug dang byed pa po la sogs pa 'jig rten pa'i lta ba dgag pa ni don bco lnga pa ste/de'i phyir/ 'dod rgyal las kyang ma byung dus las min/ /rang bzhin dbang phyug las kyang byung ma yin/ /zhes bya ba la sogs pa nas/ de ltar mthong ba lta ba bzang po yin/ /gang zhig gzhan gyur de ni lta ngan gsungs/ /zhes bya ba'i bar du gsungs pa'o/ /sgrub pa pos kyang bzlas brjod khyad par can la sogs pa goms par byas pas dang por gsang sngags nye bar 'gyur ro//de'i 'og tu bzlas brjod la sogs pa nyid kyis bsnyen pa byas na dngos grub nye bar 'gyur te/ nye bar gyur pa de dag gi mtshan nyid bstan pa ni don bcu drug pa'o/ / de la gsang sngags nye ba'i don gyi dbang du byas nas/ de ltar zlos pa'i gsang sngags nye gyur na/ /mtshan mo nyal na rmi lam 'di dag mthong / /khang bzangs ljon shing rgyal mtshan seng ge rta/ /ri bo shing rta sgra ldan sprin dang klu/ /zhes bya ba la sogs pa nas/ /zla ba gcig dang zla phyed nyin zhag dang //skad cig gis kyang phyi phyir nye bar 'gyur/ /zhes bya ba'i bar du gsungs pa'o// //le'u drug pa la dngos grub 'grub par 'gyur ba'i mtshan nyid bstan pa ni don dang po ste/ dngos grub nyen zlos la dga' ba dang / /sems ni sdig la nam yang 'jug mi 'gyur//bkres skom tsha grang rlung dang ngal ba yi/ /sdug bsngal drag pos nyen kyang g.yo mi 'gyur/ /zhes bya ba la sogs pa nas/ /gang tshe mkha' la lha dang gnod sbyin dang / /dri za lha yi bu mo'i lus dang sgra/ /mis ni dga' ba'i yid kyis mthong thos na/de tshe shin tu nye bar gyur pa yin/ /zhes bya ba'i bar du'o/ /de ltar bdag nyid la dngos grub nye bar gyur par rig pa dang / nyin zhag gcig gam gnyis sam/ gsum du smyung ba byas nas/ sgrub pa la 'jug par bya ba de bstan pa ni don gnyis pa ste/ de ni/ lus ni dri med dag par rig pa dang //zhes bya ba la sogs pas bstan to/ /smyung bar bya ba'i rgyu bstan pa ni don gsum pa ste/ gsung de dpung bzangs kyis thos slar gsol ba/ /zas kyis mi 'dag ces ni sngar gsungs na/ /mchod 'os khyod kyis lus ngag bgyi phyir yang / /ci slad smyung ba mi bzad bgyi bar gsungs//zhes bya ba nas/ dri ma zad nas mi yi lus dag ni/ /rang gi 'byor phyir sgrub la bde bar 'jug /ces bya ba'i bar dag go/ /sgrub pa po'i 'dod chags la sogs par rab tu zhi bar bya ba'i phyir mi gtsang ba bsgom pa bstan pa dang / sgrub par ba dang /'bring dang / tha ma rnams sgrub pa'i tshes grangs nges par bstan pa ni don bzhi pa ste/ de'i phyir/ 'dod chags kyis ni gdungs par gyur na yang / /lus kyi yan lag 'di dag thams cad la/ /dran pa rtse gcig mngon du byas nas ni/ /ye shes mig gis so sor rnam par brtag /ces bya ba la sogs pa nas/ /yar gyi tshes brgyad dam ni bcu bzhi'am/ yang na bco lnga la ni bzlas brjod bya/ /zhes bya ba'i bar du gsungs pa'o/ /sgrub pa la 'jug pa'i yo byad bstan pa ni don lnga pa ste/ lha yi gnas kyis dag bstar ba'i phyir/ sa dang lci bar bsres la sogs pas byug /ces bya ba la sogs pa nas/ sbyin blugs brgya phrag bcur yang bsreg par bya/ /zhes bya ba'i bar du'o/ /de bzhin du rdzas las byung ba'i dngos grub dang / /rdzas ma yin pa las byung ba'i dngos grub kyi mtshan ma ci rigs su bstan pa dang / de nyid kyi 'bras bu 'byung bar bstan pa ni don drug pa ste/de'i phyir/ dro dang dud 'thul me bzhin 'bar ba dang / rim bzhin bzlog nas byung na'ang 'grub par gsungs/ dro bas 'gro ba thams cad dbang 'gyur te/ /dud pa 'thul bas lus ni snang bar 'gyur/ /'bar bas mkha' la shin tu 'gro 'gyur te//zhes bya ba la sogs pa nas/ gsang sngags gzugs ni mngon du mthong na 'grub/ /ces bya ba'i bar du gsungs pa'o/ /sgrub pa'i dus na mchod yon dbul ba'i cho ga dang / mchog bslang bar bstan pa dang / de bzhin du mchog thob nas kyang lha nyid slar gshegs su gsol par bstan pa ni don bdun pa ste/de'i phyir/ me tog ma nyams dbyig dang chur bsres shing / /bstod dang bcas pa mchod pa rgyun bsrings nas/ /rtse gcig yid kyis mgo btud phyag byas te/ /dad dang 'bad pa'i rjes mthun mchog slong ngo / / mchog thob nas ni dga' bas phyag byas te/ /dad pas bstod cing mchod yon phul nas su/ /gsang sngags brjod nas slar yang gshegs su gsol/ /gsang sngags kun la tshul ni 'di yin no/ /zhes gsungs so/ /ro langs sgrub pa po'i mtshan nyid dang / ro langs bslang ba'i mtshan nyid dang /ro langs 'grub pa'i gnas bstan pa dang / ro langs pa'i dngos grub pa'i dkyil 'khor rnams kha bstan pa dang / ro'i lus byi dor bya ba dang / mchod pa rnam pa lnga'i yo byad kyi cho ga dang / gsang sngags bzlas brjod bya ba'i cho ga dang / ro langs pa la bgegs byung ba rab tu zhi bar bya ba dang /dngos grub bslang ba ni don brgyad pa ste/ de'i phyir/ sems stobs mchog dang yang dag ldan pa des/ /'dir ni shin tu 'jigs pa'i yid kyang bya/ /sems stobs chung ba'i mi la sha za yis/ /glags mthong nas ni 'phung bar byed par 'gyur//zhes bya ba la sogs pa nas/ gang zhig gsang sngags cho ga zhib mo las/ /mthong ba'i dngos grub de ni thogs med nges/ /zhes bya ba 'dir rgyas par sbyar ro/ /ro langs bslang ba'i gsang sngags kyi dngos grub kyi grangs bstan pa dang / sems stobs med pa'i sgrub pa po ro langs slong ba'i nyes pa bstan pa ni don dgu pa ste/de'i phyir/ gter gyi phyogs dang phug tu 'gro ba dang / /ral gyi any+dza na bzhon mngag gzhug dang / /'byung kun gser bsgyur rtsi dang bcud kyis len/ /mkha' la 'gro ba'i dngos grub rab tu ster/ / bsrung ba'i stobs med sngags kyi stobs med dang / /dka' thub stobs med sems stobs med pa yi/ /blo zhan gang zhig ro langs dngos grub tshol/ /de ni mtshan mo rgyu ba rnams kyis bsad/ /ces gsungs pa'o// //le'u bdun pa la sha chen po btsong ba'i cho ga bstan pa ni don dang po ste/ji skad du/ mi gang mi yi sha ni 'tshong 'dod des/ /mar gyi ngo la dur khrod song nas su/ /zhes bya ba la sogs pa nas/ sha yi cho ga ngas gsungs de dag ni/ /gsang sngags ma bzlas pa yis bsten mi bya/ /rigs mchog gtsug tor stobs chen la sogs pas/ dur khrod du ni bsrung bar ngas gsungs so/ /zhes bya ba'i bar du gsungs pa'o/ /de bzhin du dbab pa dang / bskrad par bya ba dang / ma dag gzhom pa dang / grong dang grong khyer du gnod pa byed pa 'byung bar bya ba dang / sha za dang / srin po dang / sa bla dang / gnod sbyin dang / ma mo dang /drag po la sogs pa'i lha rnams la mi'i sha dang / de bzhin du ba lang dang / ma he'i sha la sogs pa sha'i sbyin sreg gi cho ga bya bar bstan pa ni don gnyis pa ste/ de'i phyir/ gsang sngags drag po gang zhig sha za ba/ /de la dur khrod mi sha sbyin sreg bya/ /zhes bya ba la sogs pa nas//mi yi sha ni rnyed par ma gyur na/ /ba lang sha ni sbyin sreg de bzhin shis/ /ma he'i sha'am khyi sha mar bsres pa/ /tshes grangs dag la smyung byas sbyin sreg bya/ /zhes bya ba'i bar du gsungs pa'o/ /de bzhin du 'jig rten dang 'jig rten las 'das pa'i rgyud du gsungs pa'i gnod sbyin mo'i gsang sngags rnams kyi mchog la sogs pa'i dbye ba bstan pa dang /spyi'i mchod pa'i yo byad kyi mtshan nyid bstan pa ni don gsum pa ste/ ji skad du/ gnod sbyin mo yi cho ga zhib mor ni/ /gsang sngags mnyes byas grub pa'i de rnams ster/ /ma dang sgyug mo sru mo grogs mo dang //bu mo chung ma mna' mar grub par 'gyur/ /ma dang sgyug mo sru mo gang yin de/ /yid bzhin rin chen bzhin du grub pa mchog/ /yid 'ong grogs mo bu mo grub pa 'bring / /chung ma mna' ma grub pa tha mar bsgrags/ /dus gsum du ni me tog phreng ba dri//mar ram 'bru mar mar me tsan+dan dang / /a kar dri zhim bdug pas mchod pa dang / /gtor ma sna tshogs rtag tu mtshan mo sbyin/ /zhes gsungs pa'o/ /gnod sbyin mo mngon du phyogs par gyur pa'i mtshan ma bstan pa ni don bzhi pa ste/ de'i phyir/ /gnod sbyin mo ni dga' nas mngon phyogs nas//rnyed pa rnyed cing sa bon 'byung bar byed/ /'dod chags zil gyis non pa'i bud med dag /gnod pa byed tshe 'gro bar mi bya zhing / /rnyed pa mang nyung la yang 'dod mi bskyed/ /sngags las mtshan mo khrus ni dag byas nas/ /brtson 'grus rab tu bskyed de bsgrub par bya//sngags pa sems rmongs pa dag gzhan du ni/ /brtsams na phung bar yang ni 'gyur ba nyid/ /ces bya ba gsungs so/ /de bzhin du sha za mo'i gnod sbyin dang / klu sgrub pa'i cho ga sgrub pa ni don lnga pa ste/ de'i phyir/ sha za'i gnod sbyin ma la'ang de bzhin te//de las cho ga lhag pa 'di rnams bya/ /sha chang la phug tshod ma cung peng dang / /nas chan ma sha'i chan dang 'bras chan nya/ /zhes bya ba la sogs pa nas/ phreng ba me tog byug pa sngon po dag /ji rnyed brang gis 'gro ba rnams la dbul/ /zhes bya ba'i bar du gsungs pa'o//gsal bar ston pa dbab pa'i phyir/ /mthe bong dang me long la sogs pa bzhi rnams bstan pa ni don drug pa ste/ de'i phyir/ mthe bong me long ral gri chu dang shel/ /mar me sa gzhi lcags dang nam mkha' dang / /lha gzugs lhung bzed nor bu me 'bar ba/'di la gsal bar ston pa rtag tu 'byung / /zhes bya ba gsungs so/ /gsal bar ston pa rnams phebs pa'i grub pa bstan pa ni don bdun pa ste/ ji skad du/ 'das pa dang ni ma 'ongs da ltar byung / /mtho ris sa steng dus dang mi ldan yang / /lha dang lha mi dge dang mi dge ba'i//las rnams thams cad gsal bar ston par rtogs/ /zhes bya ba gsungs so/ /gsal bar ston pa rnams mi 'bab pa'i nyes pa gang yin pa dang / mthe bong la sogs pa la babs na yang bden par mi stan pa dang / log par ston pa dang / cung zad tsam ston par byed pa de bstan pa ni don brgyad pa ste/ ji skad du/ cho ga nyams pa'am yang na phyed bzlas sam/ yi ge chad dam yi ge lhag pa'am/ /bzlas brjod ma byas dad pa med pa dang / /mchod pa med cing sa gzhi mi gtsang dang / /sprin gyi tshogs kyis nyi zer bsgribs pa dang //byis pa yan lag nyams shing lhag pa dang / /de lta bu la mi yi gsal ston pa/ /'bab par mi 'gyur dgos pa yong mi ston/ /zhes bya ba gsungs so/ /gsal bar ston pa thams cad dbab pa'i cho ga gang yin pa de bstan pa ni don dgu pa ste/ ji skad du/gsal ston dbab phyir sngon du cho ga bzhin/ /bzlas shing tshes grangs bzang la sngags pa yang / /smyung byas dgongs kar sa dang lci ba yis/ /ba ko tsam gyis sa gzhi legs par byug /byug spos dang ni bdug spos me tog dang / /lha bshos mar me dag kyang phul nas su//byis pa gzhon nu sta gon gnas par bya/ /de nas nang par cho ga 'di kun bya/ /khrus byas lus la gos dkar gtsang bgos te/ /shar phyogs kha bltas ku sha'i stan steng du/ /'dug nas gsang sngags rjes su dran par bya/ /me long thal ba gtsang mas lan bdun nam//brgyad dam yang na bcur ni phyis nas su/ /rtse gcig sems kyis gsang sngags zlos bzhin du/ /byis pa gzhon nu nub tu kha ltas pas/ /lha yi mig gis bltas na 'das pa dang / /da ltar dang ni ma 'ongs mthong bar 'gyur/ /me long zhes bya'i cho ga mtha' dag ni/ / ral gri gsal bar ston la sbyar bar bya/ /mthe bong rgya skyegs khu bas bskus nas su/ /'bru mar dri zhim dag gis gdab par bya/ /bum pa gtsang ma chus bkang mi yor bzhag /sa ltar lhung bzed nor bu chu yis dgang / /sku gzugs la ni me tog byug spos dbul/ /de nas byis pa gzhon nus blta bar bya//zhes gsungs so/ /gsal bar ston pa dbab pa'i dgos pa bstan pa ni don bcu pa ste/ ji skad du/ gsal bar ston dang rmi lam la sogs las/ /dngos grub brtags te de nas bzlas brjod bya/ /zhes bya ba gsungs so/ /de bzhin du gal te rgyu zhig la gsal par ston pa phebs kyang /mchod pa nyams pa la sogs pa'i nyes pas sgrub pa la sogs pa gtan la phebs par ma gyur na/ /de'i tshe sngar rig sngags mi gdug pa cho ga bzhin du bzlas brjod byas nas/ khye'u dang bu mo la phab ste/ dngos grub la sogs pa gtan la dbab par dri ba de ni don bcu gcig pa ste/ji skad du/ gal te yid ni ches par ma gyur na/ /des na rig sngags mi gdug bzlas brjod bya/ /zhes bya ba la sogs pa nas/ snga ma bzhin du gsang sngags cho ga dag /dam tshig ji bzhin ma lus sbyar na ni//bdag gi yid dang mthun pa'i dngos grub thob/ /sngags pa yun ring nyon mongs mi 'gyur ro/ /zhes bya ba'i bar du gsungs so// //de bzhin du le'u brgyad pa 'dir ni/ /thar pa 'dod pa rnams kho nas/ 'phags pa'i lam yan lag brgyad pa la sogs pa'i bslab pa'i mtshan nyid 'jug pa dang ldog pa'i bslab pa la bdag nyid mngon par brtson par bya bar ma zad kyi gsang sngags sgrub pas kyang 'jug cing goms par bya dgos so zhes gsungs par bstan pa ni don dang po ste/de'i phyir/ sangs rgyas kyis gsungs yan lag brgyad lam ni/yang dag 'tsho dang las mtha' zhes bya ba la sogs pa nas/ yul sa'i gtam dang mi dbang brten pa dang / /dmag dang gyad dang na chung gtam dag dang / /sgrung ldebs dang ni sngon gyi lo rgyus gtam/ /'dod chags dang ni smad 'tshong gtam mi bya/ /zhes bya ba'i bar du gsungs pa'o//de bzhin du sgrub pa po ni rnam pa gnyis te/ la la ni gnas gcig kho nar sngar bsnyen pa yongs su rdzogs par bya ba'i bsam pas mchod yon phul te/ sngon du bsnyen pa'i bzlas brjod rtsom par byed do/ /gzhan dag ni dgun dang dpyid zla brgyad la gnas ma nges pa nyid du sngar bsnyen pa'i bzlas brjod byed cing /dbyar zla ba gsum ni gnas gcig tu sngar bsnyen pa'i bzlas brjod rdzogs par bya ste sgrub par byed do/ /de dag kyang bsod snyoms la 'gro ba la ma gtogs par zlos pa'i gnas las/ gzhan grong dang grong khyer la sogs par 'phyen du 'gro ba dgag par bstan pa de ni don gnyis ba ste/ de'i phyir/ sngags pa gsang sngags bzlas pa mnos pa ni/ /grong dang grong khyer khyim dang gtsug lag khang / /mchod rten dang ni bsti gnas dka' thub gnas/ /kun dga' lu ma rdzing bur 'gro mi bya//sngar bshad pa yi gnas rnams ma rnyed na/ /lha khang stong pa dag gam shing drung ngam/ /ri dang chu bo chu klung 'bab chu dang / /nags tshal stong pa dang ni yul stong dang / /gnas gang rung bar sngags pas gnas shing bzlas/ /zhes bya ba rgyas par gsungs pa dang /yang na gnas ni nges par ma byas na/ /zla ba brgyad po 'di yi dus dag tu/ /gnas 'di gang yang rung ba cig tu bstan/ /zhes bya ba rgya cher gsungs so/ /sgrub pa pos bsnyen pa yongs su rdzogs kyang dbyar gyi dus su sgrub pa dgag pa dang / ma grub kyi bar du bzlas brjod yongs su mi btang ba dang /bsgrub pa'i dus su dbang bskur ba'i dkyil 'khor du dbang bskur pa dang / bdag nyid bsrung bar bya ba de bstan pa ni don gsum pa ste/ de'i phyir/ sngags pa dbyar ni sgrub la mi 'jug par/ bzlas brjod kyis ni dus kyang 'das par bya//dbyar 'das nas ni gsang sngags gzi bskyed pas/ /bdag nyid bsrung byas sgrub la 'jug par bya/ /zhes bya ba gsungs so/ /de bzhin du zhi ba la sogs pa'i cho ga'i las kyi khyad par gyis sbyin sreg gi thab la sogs pa'i mtshan nyid bstan pa ni don bzhi pa ste/de'i phyir/ me thab zlum po gru gsum gru bzhi dang / /pad+ma lta bur byas te dbyibs legs shing / /zhes bya ba la sogs pa nas/ /zlum por dbang thang bskyed dang nor dgug dang / spyan drang zhi ba'i cho ga bya bar shis/ /gru gsum du ni dgar bskrad bsad pa dang //gshed byed la sogs drag po rnams kyang bya/ /gru bzhi por ni klu dang gsang ba po'i/ /lus gzhig pa dang bsreg par bya ba yin/ /pad+ma'i dbyings su bud med bu mo grong / /yul 'thob pa'am don kun sgrub par shis/ /zhes bya ba'i bar du gsungs pa'o/ /de ltar sngar bsnyen pa'i sbyin sreg gi cho ga gsungs pa de'i phyir/me thab bstar bar bstan pa ni don lnga pa ste/ ji skad du/ me thab lci ba gtsang mas byugs nas kyang / /zhes bya ba la sogs pa nas/ rlung yab kyis ni me yang sbar byas nas/ /zhes bya ba'i bar du gsungs pa'o//de la sngar bsnyen pa'i dus kyi sbyin sreg kyang rnam pa gnyis su 'dod de/ de la gcig ni bgegs rnams zhi bar bya ba'i phyir bdud rtsi thab sbyor gyis bya ba dang / de las gzhan pa'i ni rang gi lha gzi brjid bskyed pa'i ched yin par bstan pa ni don drug pa ste/ ji skad du/ sangs rgyas rnams la phyag byas khro bo ni/ /bdud rtsi 'khyil pas ma nyams pad+ma'am/ /ma grugs til nag las ni bdun nam brgyad/ /bcu'am nyi shur mel sbyin sreg bya/ /zhes bya ba la sogs pa nas/ mar dang sbrang rtsi 'o ma la btags nas/ /rang gi gsang sngags 'grub phyir sbyin sreg bya//zhes bya ba'i bar du gsungs pa'o/ /de bzhin du sbyin sreg thams cad kyi me 'bar ba'i kha dog dang / dbyibs dang / sgra la sogs pas ltas bzang ngan bstan pa ni don bdun pa ste/ de'i phyir/ me yi mtshan nyid nye bar brtag pa ni/ /me stag du ba me lce sgra rnams kyis//'grub pa dang ni mi 'grub thams cad kyang / /sngags kyis byin rlabs me ni ston par byed/ /du ba med cing gser gyi mdog ltar dngas/ /me lce rab tu che la g.yas su 'khyil/ /zhes bya ba la sogs pa nas/ me lce 'phro bas sbyin sreg byed pa tshig /mi ro'i dri nga dngos grub med par ston/ /zhes bya ba'i bar du gsungs so/ /sgrub pa po gsang sngags mnyes par bya ba'i spyod pa ma bslabs pas/ sngar gsang sngags bsnyen pa'i bzlas brjod la sogs pa rdzogs par byas kyang / rang gi lha nyid kyis skabs der lus la gnod pa la sogs par 'byung bar mdzad pa bstan pa ni don brgyad pa ste/ji skad du/ ji ltar ral gri'i so la 'dzin pa'i mi/ /legs par ma bzung lag pa gcod pa ltar/ de bzhin sngags kyang legs par ma bzlas na/ /'bras bu med pa'am yang na phung bar 'gyur//mi ni tshul khrims gtsang sbra mi ldan yang / /gsang sngags lha ni nam yang gnod mi mdzad/ /lha yi 'khor du gyur pa gang yin rnams/ /mi la glags skabs mthong nas phung bar byed/ /ces bya bas bstan to/ /gtor ma'i las ni dang po sngon du bsnyen pa rtsom pa'i tshe//sa dang ril sogs pa la gnas pa'i gdon srin po dang / sha za dang / klu la sogs pa rnams dang / dbang po la sogs pa phyogs skyong bcu rnams la gtor ma mang zhing rgya che ba bsgrims te dbul bar bya ba dang / sngon du bsnyen pa byed pa'i nyi ma nyid la/ gzhan rnams la yang ci 'byor pa dbul ba dang /de bzhin du sgrub pa la brtson pa'i tshe/ rgya che zhing mang ba'i gtor ma'i bya ba dang / grub nas kyang ci 'byor pa'i gtor ma nyin gcig bzhin du dbul ba'i las bya ba de bstan pa ni don dgu pa ste/ de'i phyir/ lha dang lha min gnod sbyin lto 'phye grul//nam mkha' lding dang 'dab bzangs lus srul po/ /dri za srin po gdon gyi rigs rnams dang / /gang dag sa la gnas pa'i rdzu 'phrul can/ /bu smad g.yog 'khor tshogs dang bcas rnams la/ bdag gi pus mo sa la btsugs nas su/ /thal mo sbyar nas khyed la gsol 'debs kyis//gnas nas phan gdags phyir ni 'dir spyon cig /ces bya ba la sogs nas/ de ltar gang zhig mtshan mo rgyu ba la/ /gtor ma gtong ba'i las rnams byed pa de'i/ /dngos grub myur zhing shin tu bgegs kyang med/ /yid du 'ong ba'i 'dod pa 'ang thob par 'gyur//zhes bya ba'i bar du gsungs pa'o// //de bzhin du le'u dgu pa la mtshams med pa dang / mtshams med pa la nye ba dang / dam pa'i chos kyi glegs bam chud gson cing spong ba dang / so so'i skye bo rnams kyi dge ba'i gzhir gyur pa dge slong la sogs pa gsad na/des ni phung po 'di la dngos grub mi thob par bstan pa ni don dang po ste/ de'i phyir/ gang gis dgra bcom pha ma gsod pa dang / /mthun pa'i dge 'dun dbyen ni byed pa dang / de bzhin gshegs la gnod pa'i sems kyis su/ /nam zhig mi dag sku mtshal 'byin byed pa//shin tu mi bzad pa yi las 'di rnams/ /zhes bya ba nas/ 'di dag ngas ni khyod la mdor bshad do/ /zhes bya ba'i bar du gsungs so/ /byang chub tu sems bskyed pas 'jig rten pa'i lha rnams la phyag byas pa'i nyes pa bstan pa dang / de bzhin du byang chub tu sems bskyed pa nyid sems can mtha' dag gi rgyu nyid du gyur pa dang /dkon mchog gsum la skyabs su 'gro ba'i rgyu nyid du gyur pa de bstan pa ni don gnyis pa ste/ de'i phyir/ gang zhig byang chub sems ni blangs pa las/ /zhes pa nas/ dkon mchog gsum gyi rgyud du snying nas skyes//zhes bya ba'i bar du gsungs so/ /sgrub pa po rang gi lus dang ngag dang yid kyis nyes par spyod pa yongs su ma spangs na dam tshig las 'das pa'i phyir/ dngos grub 'byung bar mi 'gyur ba de bstan pa ni don gsum pa ste/ de'i phyir/ gang zhig mi bzad las byed thub pa gsod//ces bya ba nas/ de yi sngags kyang mi zlos mdo mi bklag /ces bya ba'i bar du gsungs so/ /sgrub pa po rnams kyis skyabs ci yod par phyag bya ba'i gnas rnams la lhar phyag bya ba dang / byang chub sems dpa' dang / nyan thos dang / rang sangs rgyas rnams la phyag bya bar bstan pa dang /de bzhin du byang chub sems dpa' rab tu byung ba'i gzugs can rnams la yang phyag bya ba'i rigs par bsgrub pa ni don bzhi pa ste/ de'i phyir/ bde bar gshegs pa kun gyis bstan pa yi/ /zhes bya ba nas/ gang gi rang bzhin chags dang rnam bral yang //gdul bya'i don phyir khro la khro ba dang / 'dod chags can la chags can ltar ston pa/ byang chub mchog gnas de la phyag 'tshal lo/ /gang zhig las dang rnam smin mkhyen pa yis/ /'gro ba kun dang ji ltar mthun pa yi/ / gsang sngags gzugs kyi rjes su 'dzin mdzad pa/ /sngags kyi rnam 'dren de la phyag 'tshal lo/ /zhes bya ba'i bar du gsungs pa'o// //le'u bcu pa la sgrub pa'i gsang sngags dang phyag rgya gang yin pa de dag 'phags pa dpung bzangs kyi gsang sngags kyi mdo'i tshul 'dir/rig sngags dang gsang sngags kyi dbye bas bsdu bar bstan pa'i don ni dang po ste/ de la re zhig de bzhin gshegs pa'i rigs bsdu ba'i dbang du byas nas/ lha dang lha min mi la phan gdags phyir/ /gsang sngags rig sngags rnam pa sna tshogs ni/ / 'bum phrag lnga dang bye ba phrag gsum dang / /rig 'dzin sde snod bshad par rgyal bas gsungs/ /zhes bya ba gsungs so/ /de bzhin du rdo rje rigs kyi gsang sngags bsdu ba'i dbang du byas nas/ ngas ni gsang ba pa rnams gzhom pa dang / /dbul ba'i sdug bsngal bsal bar bya ba'i phyir//dkyil 'khor bcas shing phyag rgyar ldan pa yis/ /gsang sngags bye ba phrag bdun rab tu bshad/ /ces bya ba la sogs pa gsungs pa'o/ /pad+ma'i rigs kyi dbang du byas nas/ spyan ras gzigs kyis gsang sngags bye ba phrag /gsum dang de bzhin 'bum phrag lnga rnams bshad//ces rgyas par gsungs so/ /lngas rtsen gyi rigs kyi dbang du byas nas/ lngas rtsen gyis ni stong phrag nyi shu ste/ /de yi chung mas de yi phyed bshad do/ /zhes gsungs so/ /nor gyi rigs kyi dbang du byas nas/ /nor gyi bdag pos stong phrag sum cu ste//gang po pha yis kyang ni 'bum bshad do/ /lha dang lha min la sogs rgyal ba la/ /dad pa rnams kyis gsang sngags mtha' yas bshad/ /kha cig nga yi rigs su gtogs pa ste/ /kha cig kyang ni pad+mo'i rigs su gtogs/ /kha cig nor gyi rigs su gtogs pa yin/gzhan yang kha cig gnas med rnam par 'khyam/ /nor spyod ces bya nor gyi rigs su gsungs/ /nga ni rdo rje rigs zhes rab tu bstan/ /spyan ras gzigs dbang pad+ma'i rigs yin te/ /rigs bzhi pa ni 'dir yang lngas rtsen no/ /gsang sngags mdo sde ngas bshad gang yin pa//bzhi po 'dir ni rnam par sbyar bar bya/ /gang gzhan la la 'di na gnas med par/ /bde bar gshegs la brten zhing yongs 'khyam pa/ /mdo sde 'dir ni de dag thams cad kyang / /'byor pa 'dod pa'i mis ni rnam par sbyar/ /lam 'di nyid du zhugs pa'i sngags pa ni//yid dang mthun pa'i dngos grub thob par 'gyur/ /zhes bya ba gsungs so/ /de bzhin du de bzhin gshegs pa'i rigs kyi gsang sngags la dang por/ gsang sngags kyi mgo la dkon mchog gsum sngar brjod nas/ gsang sngags 'don pa dang /pad+ma dang / rdo rje dang / nor bu bzang po'i rigs la/ so so'i rigs kyi bdag po la phyag 'tshal ba thog mar brjod de/ bzlas brjod bya ba de bstan pa ni don gnyis pa ste/ de'i phyir/ srid pa gsum na rgyal ba dkon mchog ste/ /zhes bya ba la sogs pa nas/ nor gyi rigs dang pad+ma'i rigs la yang / /rang gi gsang sngags bdag por ldan par bya/ /zhes bya ba'i bar du gsungs pa'o/ /de bzhin du bzlas brjod dang / sbyin sreg dang / mchod pa'i tshe/ gsang sngags zlos pa kha cig rdo rje thogs su mi gnang ba yin pas/ de lta bu'i rdo rje thogs pa'i nyes pa gang yin pa de bstan pa ni/don gsum pa ste/ de'i phyir/ bde bar gshegs min nyan thos lam zhugs dang / /rang rgyal rnams kyi lam la zhugs pa dang / /dad pa med cing tshul 'chos 'jungs pa yis/ /nga yi rdo rje yang ni bcang mi bya/ /gang zhig theg pa mchog la sdang ba dang //bdud kyis bshad pa yin zhes zer ba dang / /rmongs pa nga la gnod sbyin zhes smra dang / byang chub sems dpa' la ni mi 'dud pa'i/ /dge slong dge slong ma dang dge bsnyen dang / /dge bsnyen ma dang 'jig rten pa rnams kyis/ /nga yi rigs kyi gsang sngags bzlas brjod na//myur du de yi lus ni zhig par 'gyur/ /gang zhig nga rigs rjes su 'brang ba'i gdon/ /'byung po gnod sbyin klu dang sha za yis/ /nga yi sngags bzlas rdo rje thogs pa dag /mthong na khros nas phung bar byed par 'gyur/ /zhes bya ba gsungs so//de bzhin du gsang sngags grub pa po rnams kyi dam tshig dang / /'dul ba dang spyod pa gsungs pa bshad pa ste/ de la yan lag kha cig nyams su len ma nus kyang / kha cig nyams su mi blang du mi rung pa gang yin pa de bstan pa ni don bzhi pa ste/ de'i phyir/ gang zhig theg mchog rgya chen klog pa dang / /de la dad cing de nyid 'chad par spro/ /brtson 'grus che zhing byang chub sems brtan pa/ /de la nga yi gsang sngags mchog sbyin mdzad/ /ces bya ba gsungs so/ /de ltar 'dis ni de bzhin gshegs pa la sogs pa rigs kyi bdag po rnams kyis gsang sngags dang /rig sngags rnams gsungs pa'i bar rnams 'bum dang / bye ba la sogs par de dag bsdus te/ rgyas par bstan pa dang / de ltar mnyes par bya ba'i cho ga yang / spros pa dang bcas par bstan par khong du chud par bya'o/ /de ni 'jig rten las 'das pa'i gsang sngags kyi cho ga'i zhar la/drag po la sogs pa'i 'jig rten gyi lha khyad par can rnams kyis/ rig sngags dang gsang sngags dang / rang rang gi gsang sngags kyi rgyud dang / cho ga zhi ba mo bshad pa dang de dag gi grangs zhar la bstan par bya ba dang /sangs rgyas kyi dkyil 'khor gyi slob dpon rnams mang du thos par bstan pa'i don ni lnga pa ste/ de'i phyir/ drag po yis ni bye ba phrag bcu bshad/ /nor lha'i bus ni stong phrag sum cu ste/ tshangs pa yis ni stong phrag drug cu nyid/ /nyi mas kyang ni 'bum phrag gsum bshad do//nam mkha' lding gis stong phrag bco brgyad de/ zhes bya ba la sogs pa nas/ rang sngags mdo sde'i rjes 'brangs dad bskyed nas/ ma bsgrims bzhin du the tshom med par 'grub/ de las bzlog na dngos grub mi thob la/ /sdug bsngal mang po yang ni thob par 'gyur/zhes bya ba'i bar du gsungs pa'o// //le'u bcu gcig par 'dir ni gsang sngags smra ba dang / bcud kyis len la sogs pa brtag pa brgyad kyi ming bshad pa dang / bstan pa de rnams kyi dngos grub rab dang / 'bring dang / tha ma'i bye brag bstan pa'i don dang /gsang sngags smra ba'i yon tan gong ma'i yang gong mar brjod par bstan pa ni don dang po ste/ de la bcud kyis len dang gter dang phug 'gro dang / /nor sgyur 'byung khungs sngags dang gser sgyur rtsi/ /rin thang med pa'i rin chen nor sbyin te/ brgyad po bstan pa yongs su bsgrags pa yin//zhes bya ba gsungs so/ /bstan pa de dag rab la sogs par dbye ba'i dbang du byas nas/ /sngags dang phug tu 'gro dang bcud kyis len/ /sdig pa spong bar byed pas mchog tu bstan/ /rin chen dang ni gter dang 'byung khungs 'bring /gser sgyur rtsi dang nor sgyur tha ma'o/ /zhes bya ba gsungs so/ /de dag sgrub pa la 'jug pa rnams mchog la sogs par dbye ba ni 'di yin te/ mi ni sems stobs ldan zhing chos la brtson/ /dka' thub kyis phyug dang por bstan pa'i snod/ /rdul shas che ba la ni 'bring por gsungs//tham la ni mun pa can gyis bstan/ /gang zhig mchog tu bstan pa de ston pa/ /des ni tha mar bstan pa rnam par spangs/ /gal te nor la sred cing sdug bsngal gyis/ /gdungs na 'bring po la ni bstan par bya/ /zhes bya ba gsungs so/ /da ni bstan pa 'di rnams kyi dngos grub dang mthun pa'i dka' thub dang /gsang sngags kyi bzlas brjod la sogs pa'i thabs bstan pa ni/ /lha yi bde ba dang ni 'byor pa dang / /tshe dang stobs gzugs phun sum tshogs pa dang / /thos mang mdangs bzangs gcig pu yid gzhungs dang / dbang thang tshe kun dka' thub stobs kyis thob/ /chags dang rnam bral dge la dga' ba dang / rtag tu dkon mchog gsum la gzhol ba dang / /sdig pa spangs zhing bzlas brjod ldan pa yis/ /mi la lha rdzas dngos grub ring ba med/ /ces bya ba gsungs so/ /da ni bstan pa de rnams kyi nang na/gsang sngags bstan pa mchog yin pa dang / sdug bsngal sel bar bstan pa ni/ rdo rje mtshon me gnam lcags mthu 'dra yi/ /gsang sngags mi yi 'jig rten mchog sbyin mdzad/ /'jig rten 'di dang pha rol nyid na yang / sdug bsngal sel zhing sdig 'joms gzhan med do//gang zhig dpag bsam ljon pa'i shing lta bur/ /la lar dngos grub la lar bsod nams dang / /gzhan la gzugs stobs tshe dang bde ba gang / /yid mthun 'bras bu 'dod pa'i mi la stsol/ /gsang sngags sna tshogs gzugs su rnam sprul nas/gang zhig sdug bsngal gang zhig 'jigs skrag pa'am/ /rgyal po chom rkun thog gis 'jigs skrag pa'i/ /'gro ba'i tshogs chen mtha' dag skyob mdzad pa/ /zhes bya ba gsungs so/ /gzhan yang gsang sngags sgrub pa rnam pa gnyis te/ ji skad du gsungs pa'i gsang sngags sgrub pa po'i 'jug pa'i spyod pa dang / sbyor ba'i spyod pa dang / dngos grub sgrub pa po'i spyod pa dang / sgrub pa'i spyod pa bslabs nas khyim nas byung ste/ ji skad du gsungs pa'i gnas rnams su 'jug nas/ gsang sngags mnyes par byed pa gang yin pa de'i don du mnyes par bya ba'i rim pa bstan pa ni 'di dag thams cad yin no//gang yang ji skad gsungs pa'i 'jug pa la sogs pa'i spyod pa bslabs nas khyim na gnas shing yul la sogs pa 'dod pa la longs spyod cing ji skad gsungs pa'i gsang sngags mnyes par bya ba'i rjes su 'jug cing nyin gcig bzhin du bzlas brjod la sogs pa ci nus su byed pa gang yin pa de rnams kyang yun ring zhig lon nas/tshe 'di'am tshe rabs gzhan du de mnyes par byas pa las byung ba'i bsod nams kyi bag chags brtas na/ tshe rabs gzhan la grub par 'gyur ba de bstan pa ni don gnyis pa ste/de'i phyir/ gang zhig yul dang khyim la brten kyang rung / /dka' thub ma nyams rtse gcig sems kyis ni/ /nyin gcig bzhin du cung zad sngags zlos pa/ /de yi gsang sngags dus shig na ni 'grub/ /ces bya ba gsungs so/ / da ni sgrub pa po rnam gnyis kyis bzlas brjod goms par bya ba'i phyir/ sngar bsnyen pa'i bzlas brjod ji skad bstan pa'i grangs las lhag par 'bum phrag gcig bsgrims nas/ bzlas brjod byas nas sngar bsnyen pa ji skad gsungs pa bzhin du lhur blang bar bstan pa ni don gsum pa ste/de'i phyir/ cho ga bzhin du dang por 'bum bzlas nas/ /de nas gsang sngags sgrub la 'jug par bya/ /des na dngos grub myur du 'thob 'gyur la/ /gsang sngags cho gas yun ring nyon mi mongs/ /zhes gsungs so/ /de bzhin du sgrub pa po'i khrus kyi cho ga gtan la dbab pa dang /nye rig gi cho ga bstan pa ni don bzhi pa ste/ de'i phyir/ lus la sa yis dril phyis byas nas su/ /chu chen rnyog ma med par zhugs nas kyang / /ji tsam 'dod pa'i bar du khrus byas te/ /byung nas shar ram byang du kha bltas la/ /chu yis lag pa rkang pa bkrus nas ni//pus mo'i phyi rol du ni bstan byas te/ /bar du lag gzhag tsog tsog por 'dug nas/ /sgra med dbu ba med pas nye reg bya/ /lan gsum bar du chu ni 'thungs nas kyang / /mchu la lan gnyis yongs su phyi bar bya/ /zhes bya ba gsungs so/ /de bzhin du so la chags pa'i lhag ma yod par tshor ba dang /rang sbrid pa byung na kha 'khru ba'i cho ga bya ba dang / de bzhin du skyes pa dang bud med kyi lus la reg pa dgag pa bstan pa dang / bag med pas de dag rnams kyis reg par gyur na khrus bya dgos pa bstan pa ni don lnga pa ste/de'i phyir/ so la chags pa lce yis reg pa dang / /sbrid pa byung na kha yang bkru bar bya/ /rab byung skyes pa bud med gzhon nu dang / /gzhon nu ma dang rgan po bram ze rnams/ /de la sngags pas nam yang reg mi bya/ /sngags pas de dag rnams la mi bsam mo//brgya la de dag rnams la reg gyur tam/ /sgrub pas de dag rnams la reg gyur na/ /slar yang khrus dang 'thor 'thung byas nas su/ /de nas phyir yang zlos la 'jug par bya/ /zhes bya ba gsungs so/ /gtsang sbra dang bzlas brjod dang / mchod pa la sogs pa ji skad gsungs pa bzhin byas na/myur du gsang sngags kyi byin gyis rlob par mdzad do zhes bstan pa ni don drug pa ste/ de'i phyir/ gtsang sbra la dang zlos dga' snying rje can/ /rtag tu len pa las ni log pa dang / /slong mo'i zas za lha yi las brtson pa//de yi lus la gsang sngags 'jug par 'gyur/ /zhes bya ba gsungs so/ /de bzhin du sgrub pa po'i rnam pa thams cad du mi bslang bar bstan pa ni don bdun pa ste/ de'i phyir/ 'ga' yis bud med gos dang nor rnams dang / /bzhon pa rgyan dang byug pa bza' btud dang //mal stan rnams ni mang nyung byin gyur na/ /de las sgrub la gnas pas mi bslang ngo / /zhes bya ba gsungs so/ /de bzhin du sgrub pa po'i phyi rol che chung gi gtsang sbra bstan pa ni don brgyad pa ste/ de'i phyir/ sa phung bshang sgor lnga ste mtshan la gsum//g.yon la gsum ste lag pa gnyis la bdun/ /yang na sa dang chu yis ji srid du/ /dri ma dri bral de srid bar du bya/ /zhes gsungs so/ /de bzhin du tshul khrims dang ldan pa'i sgrub pa pos bzlas brjod byas pas sdig pa 'byang ba'i rgyur 'gyur ba dang / thog ma med pa'i dus nas bsags pa'i sdig pa rnams kyang bzlas brjod byas pas 'byang bar 'gyur ro zhes bstan pa ni don dgu pa ste/ de'i phyir/ sos ka nags me mched pa'i me lce yis/ /ma bsgrims bzhin du tshang tshing kun bsregs ltar/ /bzlas brjod me la tshul khrims rlung gis sbar//brtson 'grus chen po'i me lces sdig pa bsreg /ji ltar gangs la nyi ma'i 'od zer gyis/ /gdungs na gzi brjid mi bzod 'ju ba bzhin/ /tshul khrims nyi ma'i 'od zer bzlas brjod kyis/ /gdungs na sdig pa'i gangs kyang zad par 'gyur//mun nag smag la mar me phyung ba yis/ /mun nag ma lus sel bar byed pa ltar/ /tshe rabs stong nas gnas pa'i sdig pa'i mun/ /bzlas brjod mar mes myur du sel bar byed/ /ces bya ba gsungs so/ /de bzhin du ji ltar gsungs pa'i cho ga bzhin du/sngar bsnyen pa byas nas bsgrubs kyang gsang sngags kyi 'bras bu ma thob na/ de'i tshe sdig pa ma lus pa zad par bya ba'i phyir/ mchod rten 'bum gdab par bstan pa ni don bcu pa ste/ de'i phyir/ ci ste sbyin sreg dang ni bzlas brjod kyis/ /gsang sngags bsgrubs kyang dngos grub ma thob na//'jim pa las ni mchod rten 'bum gdab pa'am/ yang na chu 'gram bye ma dag la gdab/ /des ni de yi sdig pa srid gzhan la/ /byas pa de ni gang yin zad gyur na/ /des na gsang sngags mthu yis 'di nyid du/ /mthong ba'i chos la bsod nams 'bras bu thob//ces bya ba'i bar du gsungs so/ /de bzhin du sngar sbyang gi nad du 'dug pa'i sa bon gyi dpe bstan pas/ /gsang sngags bzlas brjod la sogs pa'i tshogs pa la brten nas gsang sngags kyi 'bras bu 'byung gi /gsang sngags kyi lha la sogs pa 'ba' zhig las ni ma yin pas de'i phyir de'i tshogs bstan pa ni don bcu gcig pa ste/de'i phyir/ gsang sngags rtsa ba dang por tshul khrims te/ /de nas brtson 'grus dang ni bzod pa dang / /rgyal ba la ni dad dang byang chub sems/ /gsang sngags dang ni le lo med pa'o//zhes bya bar rgya cher sbyar ro/ /sngar bsnyen pa rdzogs nas/ sngags pas rang gi lha mnyes par bya ba'i don du sbyin sreg bya ba de bstan pa ni don bcu gnyis pa ste/ de'i phyir/ dang por bzlas brjod phal cher byas nas su/ /de yi 'og tu 'dir ni sbyin sreg bya//sbyin sreg gis ni gsang sngags mchog myur stsol/ /yid du 'ong ba'i 'dod pa'ang sbyin par mdzad/ /ces bya ba gsungs so/ /de bzhin du gang gis mi'i chung ma bkug pa dang / gnod sbyin gyi bu mo gsang sngags kyi dbang gis bkug ste/ 'dod par longs spyod pa de la//pha rol gyi bud med longs spyad pa'i phyir 'dod pas log par g.yem pa la sogs pa byas pa'i nyes pa gang yin pa de yongs su spang ba ni don bcu gsum pa ste/ de'i phyir/ gang gis dpag tshad brgya yi pha rol nas/ /gsang sngags mthu yis bud med bkug kyang de/bud med ma yin gnod sbyin bu mo ste/ /de gzugs cha byad kyis ni sngags pa bsten/ /'dod pa'i don phyir bsgrub pa gang yin de/ /grub na'ang gnod sbyin bu mo sbyin par byed/ /ces bya ba la sogs pa nas/ gzhan gyi chung mar yid la bsams nas su//'dod pa sten par byed pa gang yin de/ /mi shes yid kyis gzhan gyi chung ma la/ /'dod pa spyad pas sdig pa mang du thob/ /ces bya ba'i bar du gsungs so/ /de bzhin du 'jig rten pa'i gsang sngags lha dang klu dang gnod sbyin la sogs pas ji ltar khong du chud pa bzhin du smras pa de yang /sangs rgyas dang byang chub sems dpa' dang / nyan thos dang / rang sangs rgyas rnams kyis byin gyis brlab pa'i phyir/ de rnams kyi dngos grub rab dang 'bring dang / tha ma'i mtshan nyid ji lta ba bzhin bstan pa de ni don bcu bzhi pa ste/de'i phyir/ rgyal ba la dad gzhan la phan brtson pa'i/ /lha dang lha min gnod sbyin dri za dang / /grub par bcas pas sngags bshad gang yin pa/ /zhes bya ba la sogs pa nas/ de dag 'bras bu'ang rab dang 'bring dang ni/ /tha mar dbye bas rnam pa gsum du bstan//zhes bya ba la sogs pa rgya cher sbyar ro/ /de bzhin du 'jig rten dang 'jig rten las 'das pa'i rig sngags dang / gsang sngags kyi rgyud dang cho ga zhib mor dug gi las kyi dbye ba bshad pa'i ming bsdus nas bstan pa ni don bco lnga pa ste/ de'i phyir/bya ba dang khu tshur thal lcag skra drang dang / /rna bar bzlas dang dbab dang bskrad pa dang / /zhes bya ba la sogs pa nas/ dung gi sgras ni bslang bar bya ba ste/ /rnam pa 'di dag dug gi las su bshad/ /ces bya ba'i bar du rgyas par gsungs so/ /de bzhin du sbrul gyi rigs kyi bye brag bstan pa ni don bcu drug pa ste/de'i phyir/ sa yi steng na sbrul ni brgyad cu dag /gzhan la gnod par byed cing rnam par 'khyam/ /de dag rnams las nyi shu gdengs ka can/ /'khyil pa drug dang dug med bcu gnyis dang / /de bzhin sbrul ni khro bo bcu gsum ste/sum cu gang yin de ni rigs su gtogs/ /sbal pa go d+ha sdig pa kha brgyad dang / /rnam par dbye na rab tu mang po yod/ /ces bya ba gsungs so/ /de bzhin du mi la sogs pa'i lus la sbrul de dag dug gtong ba'i sbyor ba bstan pa ni don bcu bdun pa ste/ de'i phyir/ gcin rtug kha chu reg dang mthong ba dang / /mche ba btsugs pa las ni dug kyang gtong / /de las dug gi rgyu la mkhas pa yis/ /rab 'bring tha ma gsum du rnam par dbye/ /zhes bya ba gsungs so/ /de dag las mi la sogs pa la za bar byed pa'i rgyu bstan pa ni don bco brgyad pa ste/de'i phyir/ dug mod khro bo'i dbang gyur skrag pa dang / /de bzhin dngangs pa'am bkres pa'i kha zas phyir/ /sha khon yod pa'am gshin rjes bsgo ba'am/ /lus la brdzis nas de dag za bar byed/ /ces bya ba la sogs pa gsungs so/ /de la mi la sogs pa la sbrul de dag gis ji ltar mche bas btab nas dug gtong bar byed pa dang de dag gis mche bas btab pa'i mtshan nyid bstan pa ni don bcu dgu pa ste/de'i phyir/ zos pa de yang rnam pa bzhir 'gyur te/ /mche bas zin dang sos bcad btab pa'o/ /gang du mche ba gcig gis khrag phyung rjes//de ni dug chung bas ni zin par bshad/ /gang du mche ba gnyis kyis btab nas su/ /khrag dag phyung bar gyur pa zos pa'o/ /gal te mche ba gsum gyis sha bcad pa/ /de ni bcad par gyur pa yin zhes bstan/ /gang du mche ba bzhi yis btab nas su//sbrul gyi lus ni bzlog par gyur pa de/ /btab nas zos pa yin zhes bshad pa ste/ /de ni sman rnams kyis kyang bzlog par dka'/ /zhes bya ba gsungs so/ /de la gsang sngags kyi rgyud thams cad las rnam pa gnyis kyis dug gso bar bstan pa las/ de gnyis las kyang sngags kyis gso ba gtsor bstan pa ni don nyi shu pa ste/ de'i phyir/ me yi rang bzhin gnad du 'phan pa'i dug /mtshon dang me dang 'dra zhing mtshungs pa dag /ji ltar sngags kyis rab tu zhi 'gyur ba/ /de bzhin sman gyis zhi bar mi nus so/ /zhes bya ba la sogs pa nas/dug gi mthu stobs shes nas rab bsgrims te/ /gsang sngags cho ga bzhin du bzlas sgrub na/ /sbyor ba 'dis ni dug kyang 'phrog par byed/ /ba lang khyu na seng ge ji lta bar/ /dug can sbrul dang don med lhan cig rtsa/ /zhes bya ba'i bar du gsungs so//de bzhin du gdon gyis zin pas gso ba'i dbang du byas nas/ /gdon rnams kyi dbye ba bstan pa ni don nyi shu gcig pa ste de'i phyir/ lha dang lha min gnod sbyin grub pa dang / /dri za 'byung po mtshun dang gsang ba dang / /yi dags sha za dag dang lus srul po//smyo byed mdangs 'phrog pa dang grib gnon dag /sa yi steng na gdon ni sna tshogs pa/ /mi sha tshil yang za zhing khrag kyang 'thung / /zhes bya ba gsungs so/ /mi la sogs pa de dag gi glags skabs bstan pa ni don nyi shu gnyis pa ste/ de'i phyir/ mya ngan 'dod gdungs khro bas nyam thag pa'i//glags skabs rnyed nas lus la 'jug par byed/ /ces bya ba gsungs so/ /gdon gyis zin pa rnams kyi spyod pa bstan pa ni don nyi shu gsum pa ste/ de'i phyir/ de dag rnams kyis zin pa'i mi 'phyan cing / /glu len gar byed dgod dang khro ba dang //dga' zhing rngam pa che la smra 'dod dang / /spyod pa sna tshogs byed pa'i lha rnams dang / /lha min ltar 'chos skye bo bzhad gad byed/ /ces bya ba gsungs so/ /mi la sogs pa rnam pa gsum gyi phyir 'dzin par bstan pa ni don nyi shu bzhi pa ste/ de'i phyir/ gtor ma 'dod pa'am rtsed mo byed 'dod pas/ /gsad pa'i don du lus la 'bebs shing 'jug /ces bya ba gsungs so/ /gdon gyis zin pa rnams thar bar bya ba'i thabs su gyur pa gsang sngags rnams dang / de'i las byed pa rnams kyi ming bstan pa ni don nyi shu lnga pa ste/de'i phyir/ gsang ba pa rnams gzhig phyir rigs kyi mchog /mthu chen mchog sbyin rdo rje lcags kyu'am/ /gzhan yang nga yi rigs las byung rig pa'am/ /khro bo bdud rtsi thab sbyor la sogs pas so/ /zhes bya ba la sogs pa nas/ 'byung po'i rig sngags 'dir ni kun mthong dang //gdon gyi spyod pa ma lus shes nas su/ /phyi nas gdon rnams dogs med 'dul na ni/ /gdon gyis mi 'jigs slar yang tshugs pa med/ /ces bya ba gsungs so/ /de bzhin du sangs rgyas dang byang chub sems dpa' dang / rang sangs rgyas dang /nyan thos la mngon par dad pa rnams kyis gsang sngags bshad pa gang yin pa de dag la/ 'jig rten pa'i lhas smras pa'i gsang sngags rnams kyi mthus mi thub par bstan pa ni don nyi shu drug pa ste/ de'i phyir/ rig gsum 'phel dang srid gsum mthar phyin pa'i//zhes bya ba la sogs pa nas/ 'jig rten lha tshogs rnams kyis bsngags pa yi/ /gsang sngags mthu yis de la bskyod du med/ /ces bya ba'i bar du gsungs so/ /gsang sngags kyi mdo sde 'di bshad pa rdzogs par bstan pa ni don nyi shu bdun pa ste/ de'i phyir/rdo rje 'chang gi gsung thos lha rnams dang / /tshangs pa lha min gnod sbyin grub pa dang / rig 'dzin klu dang gnod sbyin dri za dang / /gsang ba pa dang mtshun dang 'byung po rnams/ /dad pas zhabs la spyi bos phyag 'tshal te/ /gus pas thal mo sbyar nas tshig gsol pa//zhes bya ba la sogs pa nas/ gzhal med khang du mngon du zhugs nas kyang / /ji ltar 'ongs pa nam mkha'i lam nas dong / /zhes bya ba'i bar du rgyas par sbyar ro/ /de bzhin du lha rnams dang nas/ phyag na rdo rjes yang / dpung bzangs la bstan pa ni don nyi shu brgyad pa ste/de'i phyir/ lha rnams kun gyis mdo 'di shes zin gyis/ /khyod kyis 'jig rten 'dir ni grags par gyis/ /zhes bya ba la sogs pa gsungs so/ /'phags pa dpung bzangs kyis zhus pa'i rgyud kyi bsdus pa'i don slob dpon sangs rgyas gsang bas mdzad pa rdzogs so/ /