CLOSE WINDOW

D2669
བོད་ཡིག

/skye shi sdug bsngal rtsa ba chod/ /ces bya'o/ /gong ma dang dgongs pa mi gcig pa cung zad bris pa'o//[ ]@##/ /rgya gar skad du/ kro d+ha bi dza ya kalpa gu h+ya tan+t+ra s+ya TI kA/ /bod skad du/ khro bo rnam par rgyal ba'i rtog pa gsang ba'i rgyud kyi rgya cher bshad pa/bcom ldan 'das ngag gi dbang po la phyag 'tshal lo/ /bcom ldan 'das khro bo rnam par rgyal ba'i rgyud stong phrag bcu gnyis bzhugs pa las ma 'ongs pa'i sems can rnams kyi don du slob dpon pra ti war+Na tsan+d+ras rgyud chen po stong phrag bcu gnyis kyi nang nas btus te/ sh+lau ka sum stong pa gcig kyang mdzad/ khro bo rnam par rgyal ba'i rgyud kyi cho ga sh+lau ka stong bzhugs pa 'di las slob dpon pra ti war+Na tsan+d+ras btus nas mdzad pa ste/ de yang rgyud gang gi nang nas btus nas mdzad ce na/ slob dpon 'chad pa dag mi mthun te/ kha cig na re khro bo rnam par rgyal ba'i rgyud slob dpon pra ti war+Na tsan+d+ra nyid kyis btus te mdzad pa sh+lau ka sum stong bzhugs pa'i nang nas btus te/rgyud 'di mdzad do zhes kyang 'chad/ kha cig na re many+dzu shrI'i tan+t+ra sh+lau ka khri drug stong bzhugs pa'i nang nas rgyud 'di mdzad do zhes kyang 'chad de/de la many+dzu shrI tan+t+ra'i nang nas spyir khro bo'i cho ga dag ni 'byung na/ khro bo rnam par rgyal ba'i cho ga'i tshig 'di dang mthun pa kho nar mi 'byung ste/ de bas na rgyud chen po dang sh+lau ka sum stong pa'i nang nas btus te/ rgyud 'di mdzad par shes par bya'o/ /rgyud kyi ming nyid kyang khro bo rnam par rgyal ba'i rgyud ces bya ste/ci'i phyir zhe na/ khro bos ma rungs pa rnams btul nas de las rnam par rgyal bas na/ rgyud kyi ming khro bo rnam par rgyal ba'i rgyud ces bya ste/ rgyud kri ya'i rgyud du gtogs so/ /rigs ni de bzhin gshegs pa'i rigs kyi nang du gtogs so//de la dang po rgyud kyi gleng gzhi bstan dgos te/ de yang gnas gtsang ma rigs kyi gzhal med khang gi nang na/ bcom ldan 'das shAkya thub pa 'khor dang bcas pa bzhugs so/ /de'i tshe na bcom ldan 'das shAkya thub pa me tog rab tu 'byed pa zhes bya ba'i ting nge 'dzin la snyoms par zhugs so//snyoms par zhugs ma thag tu bcom ldan 'das kyi smin mtshams kyi mdzod spu nas 'od zer byung bas/ lho phyogs kyi ngos chu bo gang gA'i bye ma snyed kyi 'jig rten gyi khams kyi pha rol na 'jig rten gyi khams me tog can zhes bya ba na bcom ldan 'das me tog kun du rgyas pa'i dbang po dang /'phags pa 'jam dpal la sogs pa 'khor dang bcas pa bzhugs pa'i thad du phyin nas/ 'phags pa 'jam dpal gyis bcom ldan 'das me tog kun du rgyas pa'i dbang po la zhus pa/bcom ldan 'das 'od zer 'di gang nas byung / su'i lags/ ci'i slad du 'di byung zhes zhus pa dang / bka' stsal pa/ 'jam dpal gzhon nur gyur pa nyon cig /'di nas byang phyogs logs su chu bo gang gA'i klung gi bye ma snyed kyi 'jig rten gyi khams 'das pa'i pha rol na mi mjed kyi 'jig rten gyi khams zhes bya ba na/bcom ldan 'das shAkya thub pa bzhugs pa'i 'od zer yin te/ /'od zer 'dis khyod mi mjed kyi khams su bcom ldan 'das shAkya thub pa des 'gugs pa'i bskul ma yin no zhes bka' stsal pa dang / slar yang gsol pa/ de bzhin du mi mjed kyi 'jig rten gyi khams bcom ldan 'das shAkya thub pa'i zhing der mchi bar 'tshal lo zhes zhus pa las/bka' stsal pa/ legs so legs so zhes nas/ 'phags pa 'jam dpal mi mjed kyi 'jig rten gyi khams kyi bcom ldan 'das shAkya thub pa'i spyan sngar phyin nas/bcom ldan 'das shAkya thub pas bka' stsal pa/ rigs kyi bu rang gi gsang sngags kyi spyod pa rjes su dran par gyis shig ces bka' stsal pa dang / de'i tshe 'phags pa 'jam dpal gyis thams cad zil gyis gnon pa zhes bya ba'i ting nge 'dzin la snyoms par zhugs so//snyoms par zhugs ma thag tu khro bo gshin rje gshed ces bya ba byung ste/ ma rungs pa thams cad btul nas slar log ste/ zhus pa/ bcom ldan 'das khro bo'i rgyud chen po 'chad par 'tshal na/ bdag byin gyis brlab tu gsol zhes nas/ de nas khro bo rnam par rgyal ba'i skur gyur nas khro bo rnam par rgyal ba'i rgyud chen po stong phrag bcu gnyis bshad do//de la rgyud chen po stong phrag bcu gnyis pa gsungs pa yang rtsa ba lnga rnams kyi rgyas par bshad do/ /de yang gang zhe na/ de yang rtsa ba'i cho ga rgyas pa dang / cho ga rgyas pa'i phyi ma dang cho ga rgyas pa'i phyi ma'i yang phyi ma dang /cho ga rgyas pa'i phyi ma'i phyi ma bye brag dang / cho ga rgyas pa'i phyi ma'i phyi ma'i gsang ba'i cho ga dang / 'di lngas rgyas par bshad pa las lnga po de rnams la brten nas yongs su sdud par mdzad pa'i byang chub sems dpa' rnams kyi skabs ni mi mthun pa yang zhig tu phye nas le'u stong phrag bcu gnyis por gsungs pa de bsdus so//de la slob dpon pra ti war+Na tsan+d+ras rgyud chen po stong phrag bcu gnyis po gsungs pa'i nang nas rtsa ba lnga 'byung ba'i cho ga rtsa ba lnga bo nyi tshe tsam zhig dang / de'i nang nas le'u'am/ skabs nyi shu rtsa gcig btus nas rgyud 'di mdzad do zhes pa'o//khro bo rnam par rgyal ba'i rgyud sh+lau ka stong bzhugs pa 'di la rtsa ba lnga po'i bshad pa'i nang nas rtsa ba'i cho ga rgyas pa'i nang du gtogs pa'i skabs sam/ le'u rgyud 'byung ba zhes bya ba de dang por bshad do/ /de bas na dang po rgyud 'byung ba zhes bya ba'i le'u 'am/ skabs ston pa de yang sa bcad rnam pa dgus bshad do/ /dgu gang zhe na/ rang gi mthu nye bar bstan pa dgur byas te/ lha rnams gzud pa dang / bstod pa sngar byas nas gsol ba 'debs pa dang / zhu bar gyur pa dang / zhu ba dang / zhu ba po'i len 'debs pa dang / snying po mthu che bar bstan pa dang /rang gi cho ga rgyas par bstan pa dang / lha rnams kyi cho ga rgyas par bshad pa dang / byang chub sems dpa' rnams kyis byin gyis rlob par bstan pa dang / rnam pa 'di dgus bshad do/ /de la de nas 'jam dpal dbyangs kyi ni zhes pa ni/ de bzhin du ni 'jig rten pa'i//lha rnams kun gyis 'dud par byed/ /ces pa'i bar du rang gi mthu nye bar bstan pa rgyur byas te lha rnams gzud ces bya ba'i don ston to/ /de la de nas 'jam pa'i dbyangs kyi ni zhes bya ba la/ de nas zhes bya ba ni rgyud 'di'i rtsa ba'am/ phyi mo stong phrag bcu gnyis bzhugs pa'i nang nas gong du skabs mi 'dra ba mang po gsungs pa'i de ma thag 'das pa'i 'phro yin pas na/de nas zhes kyang bya/ go skabs 'byed pa'am/ bkra shis pa'am/ tshig gi rgyan la yang de nas zhes bya/ rnam pa gcig tu khro bo ma rungs pa thams cad btul nas/ de'i 'og tu rgyud 'di dag bshad pas na/ yang de nas zhes bya ba/ dbyangs kyi sgra ni skad kyi gdangs la bya ste/ 'phags pa 'jam dpal gyi gsung gi gdangs de thams cad kyi yid du 'ong zhing snyan pa la bya ste/ yon tan gyi sgo nas mtshan du gsol ba'i 'phags pa 'jam dpal de ting nge 'dzin gang la bzhugs na/khro bo 'byung bar byed pa'i ting nge 'dzin de la snyoms par zhugs so/ /snyoms par zhugs ma thag tu khro bo byung ste/gsungs pa/ khro bo 'di ming gshin rje gshed ces bya ba ste/ de la khro bo la yang rnam pa gnyis te/ nyon mongs pas dkris pas 'dod chags dang /zhe sdang gti mug las byung ba'i khro bo dang / ma rungs pa rnams 'dul ba'i phyir sngon gyi smon lam dang thugs rje chen po'i dbang gis khro bo'i tshul du bstan nas byung ba ste/ de la 'dir ni sngon gyi smon lam dang / thugs rje'i dbang gis khro bor sprul te byung ba la bya'o//'phags pa 'jam dpal gyi khro bo yang many+dzu ra ba dang / shang mu ka la sogs pa grangs med par byung ba de dag la mi bya zhing de dag la gol du dogs pa'i phyir khro bo'i ming smos pa te/ khro bo 'di'i ming gshin rje'i gshed ces bya ba 'byung ngo zhes pa'o/ /de la gshin rje'i gshed ces bya ba'i sgra ni tshig thang log tu na dka' bzlog ces kyang ste/sems can rnams tshe dang / longs spyod dang bral nas mthar med par byed pas de dag gdul ba'i phyir de dang rjes su mthun pa'i cha lugs su gtso bo'i tshul 'dzin par sprul te bstan pa na gshin rje gshed ces bya'o//khro bo gshin rje gshed de'i phyag mtshan dang / yul yang gsungs pa/ mtshon cha me lce 'bar bas 'khrugs/ /zhes bstan te/ phyag mtshan yang tri shU la dang / ral gri la sogs pa bstan pa yang me lce bzhin du 'bar ba can la/ khro bo nyid kyang 'bar ba'i nang na bzhugs pas ma rungs pa rnams tshar gcod pa'i tshul du khros pa la bya'o//'khrugs pa ni khros pa la bya'o/ /de yang ci 'dra ba'i tshul zhig tu khros she na/ gsungs pa/ drag la mthu rtsal drag ldan pa/ /zhes pas bstan te/ de la drag pa zhes pa ni khro bo de rlung dang me'i dkyil 'khor nas 'byung bas na drag po'o//khro bo des pha rol po ma rungs pa rnams tshar gcod cing 'dul nus pa'i mthu dang ldan pas na mthu rtsal drag po zhes bya'o/ /de mthong nas ni khro bo gzhan/ /thams cad kyi ni lag cha shor/ /zhes pa ni khro bo de'i mthu rtsal chen po'i yon tan bstan pa ste/ 'jig rten las 'das pa'i khro bo gzhan rnams kyis khro bo gshin rje gshed po mthong nas/thams cad skrag sdangs te brgyal nas lag cha shor to zhes pa de yang sems can 'dul ba'i don gshin rje'i gshed mthu che bar bstan pa'i phyir ro/ /de bzhin du ni 'jig rten pa'i/ /lha rnams lus kyis 'dud par byed/ /ces pa ni de la de bzhin zhes bya ba'i don ni gong du 'jig rten las 'das pa'i lha khro bo gzhan rnams skrag nas brgyal te/lag cha shor ba de bzhin du 'jig rten pa'i lha rnams kyang skrag ste sdangs nas thams cad gnas nas 'dus te/ phyag btsal nas bstan pa la skyabs su dong ngo zhes bya ba'i tha tshig go//gzhan yang thal mo sbyar byas te/ /zhes pa nas/ gzi brjid 'bar bar phyogs khyab pa/ /khams gsum 'khrugs par mdzad pa mthong / /zhes pa'i bar du bstod pa sngar byas nas gsol ba 'debs pa zhes pa'i don to/ /gzhan yang thal mo sbyar byas te/ /skrag nas bstod pa mang po byed/ / ces bya ba la/ de la gzhan yang zhes bya ba ni gong du lha rnams thams cad 'dud cing phyag 'tshal bar ma zad kyi/ /lha de dag skrag nas thal mo sbyar te khro bo de la bstod pa mang po byed do zhes pa'o/ /de yang ji skad bstod pa ni rtsa ba'i rgyud stong phrag bcu gnyis pa las gsungs te/ rgyud 'dir ni/ rgyud mang du dogs nas slob dpon gyis ma gsungs so//bstod pa de yang tshig ci 'dra ba zhig gis bstod ce na/ de yang rang gi don phun sum tshogs pa dang / gzhan gyi don phun sum tshogs pa'i sgo nas khro bo de la bstod ces pa'i don to/ /lha rnams de yi gzi brjid kyis//gzir bzhin du ni rab smras pa/ /zhes bya ba ni 'jig rten pa'i lha de rnams kyang khro bo de'i gzi brjid kyis gzir bzhin du gsal ba zhes pa ste/ de yang gang zhe na gsungs pa zhes pa'i don to/ /bcom ldan bdag cag sangs rgyas dang / /chos dang dge 'dun la skyabs mchi/ / zhes bya ba la sogs pa gzhan ni 'jal par byas/ rab tu mi bzad 'jigs pa'i gzugs/ /gzi brjid 'bar bas phyogs khyab pas/ /khams gsum 'khrugs par mdzad pa mthong / /zhes bya ba ni khro bo'i gzugs kyi bye brag la bya ste/ de lta bu'i gzugs de brtul zhes bya ba'am mdzad par mthong zhes bya ba'i don to//gang tshe lha dang lha min rnams/ /zhes bya ba nas/ khro bo slar yang zhi bar 'gyur/ /zhes pa'i bar du zhi bar gyur to zhes pa'i don to/ /de yang lha dang lha min la sogs pa ma rungs pa rnams btul nas/ skrag nas dkon mchog gsum la skyabs su song bas//'phags pa 'jam dpal gyi khro bo de yang slar zhi bar gyur ro zhes pa'i don to/ /gshin rje gshed ces bya ba'i khro bo chen po zhi ba dang zhes pa nas/ bdag cag the tshom chen po mchis/ /zhes bya ba'i bar du ni zhu ba zhes bya ba'i don to/ /de la gzhan ni tshig gnyer gyis 'jal bar byas/khyod kyis brtson 'grus mchog 'tshal bas/ /ji lta bur ni mnyes par bgyid/ /ji ltar yang ni dang bar 'gyur/ /zhes pa ni/ khyod lta bu drag cing mthu rtsal che ba/ dngos grub rab 'bring rnam gsum stsol cing bla na med pa'i go 'phang mchog 'tshal ba'i sgrub pa pos thabs ji ltar bgyi na/lha mnyes par 'gyur ba dang / ji ltar ni byin gyis rlob cing lha mngon du phyogs par 'gyur ba'i sgrub pa'i thabs de 'tshal te/ bdag cag the tshom chen po mchis/ /zhes pa ni zhu ba'i don to/ /khro bos lha rnams tshig gsan nas/ /gshin rje gshed kyis bka' stsal pa//zhes bya ba nas/ gshin rje gshed po khro bo yi/ /gtso bo'i snying po de gzung ngo / /zhes bya ba'i bar du zhus pa'i lan 'debs zhes bya ba'i don ston to/ /de la/ khro bos lha rnams tshig gsan nas/ /gshin rje gshed kyis bka' stsal nas/ /zhes pa ni/gong du lha rnams kyis zhus pa'i tshig khro bos gsan nas/ slar bka' lan stsol pa'o/ /gzi brjid chen po khyed rnams kun/ /zhes bya ba ni de ltar lha ma srin ma rungs pa de dag bka' nyan pas khro bo zhi bar gyur to/ /slar bka' lan 'debs pa'i tshe dang por lha ma srin de dag gis yon tan gyi sgo nas bos pa'i tshig tu/kye gzi brjid chen po khyed rnams kun/ /zhes bos so/ /gang tshe gsum la skyabs song ba/ /de yi tshe ni mi bzad pa/ /khro bo yid la gnas par gyis/ /zhes pa nas/ sems can kun la snying brtse'i phyir/ /nga yi yid ni zhi bar gyur/ /zhes bya ba'i bar du gong du/khyod kyi brtson 'grus mchog 'tshal bas/ /ji lta bur na mnyes par bgyis/ /zhes zhus pa'i lan 'debs pa'i tshig ste/ dkon mchog gsum la skyabs su song ba rnams kyis de'i tshe/ nga'i sku gzugs 'bar zhing mi bzad pa'i khro bo de sems la sgom par gyis shig ces pa'o//de yang ci'i phyir zhe na/ dkon mchog yun ring du gnas par bya ba dang / de'i bka' srung ba dang / /sdug bsngal can gyi sems can thams cad bla na med pa'i byang chub tu bsgral bar bya ba'i phyir rol/ /nga yi yid ni zhi 'gyur gyis/ bya ba ni don de lta bu'i phyir na nga'i yid zhi bar 'gyur zhes gong du sbyar/'og tu yang sbyar bar shes par bya'o/ /khyed rnams skyabs su dong ba dang / /byang chub sems dang ldan pa yis/ /zhes bya ba nas/ nga yi snying po yid las byung / /lha rnams kun gyis gzung bar gyis/ /zhes bya ba'i bar du/ji ltar yang ni dang bar 'gyur/ /zhes zhus pa'i lan 'debs pa'i tshig ste/ de la khyed rnams skyabs dong ste/ byang chub kyi sems dang ldan pa rnams kyis dngos grub rab 'bring rnam pa gsum dang / bla na med pa'i go 'phang mchog man chad bsgrub pa'i mchog tu gyur pa'i yi ge 'bru bcu bdun po khro bo'i thugs ka nas byung ba de lha rnams kun gyis bzung bar gyis shig ces bya ba'o//gshin rje gshed po bdag nyid kyis/ /snying po rab tu gsungs pas na/ /zhes bya ba nas/ gshin rje gshed po khro bo yi/ /gtso bo'i snying po de bzung ngo //zhes bya ba'i bar du ni snying po mthu che bar bstan pa'i don ston te/ gzhan ni dkyus nyid kyis 'jal bar bas/ /yan lag kun nas spu langs nas/ /zhes pa ni snying po 'bru bcu bdun po gsungs pas/ lha rnams kun dga' mgu rangs nas yan lag gi ba spu rnams g.yos shing langs so zhes so//gshin rje gshed po khro bo yi/ /gtso bo'i snying po de bzung ngo / /zhes pa ni/ gshin rje'i gshed po'i khro bo rnams kyi nang nas gtso bo de'i snying po lhas mnos so zhes pa'o/ /des ni mkhan po dang slob ma'i tshul bstan pa'o/ / skabs 'dir snying po mthu che bar bstan pa'i don ston pa 'di gang du sngar bshad pa ltar zhus pa'i lan 'debs pa zhes pa'i don gyi nang du gcig tu bsdus na yang mi rung ba med la/ snying po mthu che bar bstan pa'i don gcig gis skabs 'dir sa bcad de bshad na/ yang nyes pa med pas de gnyis ka yang rung bar gzung ngo //de nas dam chos bsrung ba'i phyir/ /khro bo rnam par rgyal ba yi/ /rtog pa 'di ni de dag la/ /gshin rje gshed kyis rgyas par gsungs/ /zhes bya ba ni rang gi cho ga rgyas par bshad pa'i zhes bya ba'i don te/ de la dam chos bsrung zhing bskyang ba'i phyir khro bo rnam par rgyal ba'i rgyud stong phrag bcu gnyis po lha de rnams la cho ga rgyas par bsdus so zhes pa'o//de nas khro bo rnam rgyal gyi/ /rtog pa khro bo nyid kyis gsungs/ /zhes pa nas/ dkon mchog gsum ni bsrung ba'i phyir/ /so so yi ni rtog pa bshad/ /ces pa'i bar du lha rnams kyi cho ga rgyas par bshad pa bstan pa zhes bya ba'i don ston te//de la khro bo rnam par rgyal ba'i rgyud chen po khro bo nyid kyis gsungs pa ste/ snying rje dang byang chub sems dang ldan pa'i lha rnams kyis thos nas yid rab tu dga' bar gyur te/ lha de dag gis kyang drin lan lan gyis glan pa'i tshul gyis so so rtog pa dag gi cho ga smras so zhes pa'o//ci'i phyir/ so so rang rang gi rtog pa dag smras she na/ de yang dkon mchog gsum bsrung ba'i phyir te/ de la 'jig rten pa'i lha so so'i snying po la sogs pa'i cho ga rgyas par khro bo rnam par rgyal ba'i rgyud du smras pa na/khro bo'i rgyud de ni mu stegs can gyis mthong ba na rang rang gi lha gtso bo'i sngags dang phyag rgya dang / de bsgrub pa'i cho ga rgyas par gsungs pa na/ de dag kyang bstan pa la 'jug par 'gyur te/ de nyid kyi dkon mchog gsum bsrung bar 'gyur ba dang / dkon mchog gsum gyi rten 'jig pa zhig na/lha de dag phyag rgya dang sngags la sogs pa'i cho ga sbyar ba las/ pha rol po ma rungs pa de dag rnams thul bar 'gyur ba'i phyir yang dkon mchog gsum bsrung bar 'gyur ba dang / de dag gi don du 'jig rten pa'i lha so so rang rang gi cho ga rgyas pa dag kyang khro bo rnam par rgyal ba'i rgyud chen por smras shing bshad do zhes pa'o//de dag gi ni rtsa ba'i rgyud/ /khro bo nyid kyis rab gsungs pa/ /zhes pa nas/ snying rje de bzhin rgyas pa dang / /rnam pa mang por byin gyis rlobs/ /zhes bya ba'i bar du byang chub sems dpa' rnams kyis byin gyis brlabs pa'i don te/de la bdag gi rtsa ba'i rgyud ces bya ba ni 'jig rten pa'i lha de dag rtsa ba'i rgyud du gyur pa'i khro bo rnam par rgyal ba'i rgyud 'di nyid la bya'o/ /ci'i phyir de dag gi rtsa ba'i rgyud du gyur pa zhes bya zhe na/ dang por lha de rnams btul nas so so'i snying po dang / phyag rgya la sogs pa'i cho ga'i rtog pa rnams lha so sos phul zhing smras te/khro bo'i rgyud du bshad pas na khro bo rnam par rgyal ba'i rgyud nyid lha de dag gi rtsa ba'i rgyud ces bya'o/ /lha de dag gi rtog pa ni dngos ni rgyud chen po las 'byung ste le'u stong pa 'di las mi 'byung ngo / /khro bo rnam rgyal zhes bya 'di/ / 'jig rten 'das dang 'jig rten pas/ /khros pa zhes pa ni/ khro bo rnam par rgyal ba'i rgyud chen po de/ byang chub sems dpa' sa la gnas pa dang / phyag na rdo rje la sogs pa dang / 'jig rten pa'i lha ma srin mthu bo che rnams khro bo'i 'khor na bzhugs pa rnams kyis sngon yang khro bo rnams phyag byas shing khro bo de'i zhal nas/ji skad gsungs pa bzhin du phyin ci ma log par thos nas kyang zhes pa ste/ de gsungs pa/ sngon ni phyag byas khro bo yi/ /zhal nas ji bzhin thos nas kyang / /zhes gsungs so/ /khro bo nyid kyis gsungs pa'i rgyud dang /byang chub sems 'di rtogs rnams kyis/ /snying rjes de bzhin rgyas pa dang / rnam pa mang pos byin gyis brlabs/ /zhes pa ni khro bo rnam par rgyal ba'i rgyud chen po gsungs pa dang / /yang khro bo'i cho ga rgyas pa dang / rnam pa tha dad pa mang por bshad pa bzhin du/sems can gyi don du 'gyur bar 'khor byang chub sems dpa' rnams kyis kyang de bzhin du byin gyis brlabs so/ /rgyud 'byung ba zhes bya ba'i skabs dang po la/ de ltar bsdus pa'i don rnam pa dgur phye ste bstan pa bshad zin to/ /da ni yi dags phal po che'i skabs la la bsdus pa'i don rnam pa bco lngas bshad pa la/mgo gleng ba dang / sa brtag pa dang / sa sbyang ba dang / thig gdab pa'i rim pa dang / phyag rgya la sogs pa dgod pa dang / las kyi bye brag gis dkyil 'khor gyi tshad nges par bya ba dang / mchod pa'i yo byad bsogs pa dang / phyag rgya la sogs pa bsam pa dang /spyan drangs pa sngar byas nas dad pa'i lha'i rang bzhin bsgom pa dang / mchod pa dang slob ma sngar btsud nas phyag rgya dang / dam tshig bstan pa dang / sngar dbang bskur nas gsang sngags sbyin pa dang / bla ma la mchod pa dang / slar mchod pa byas nas lha slar btang ba dang /de la mchod pa'o/ /de nas khro bo rnam par rgyal/ /'jam dpal khro bos bshad pa yi/ /zhes pa nas/ 'jig rten gsum por 'khrug par mdzad/ /yi dags mang po zhes bya ba'i/ /zhes bya ba'i bar du mgo gleng ba'i zhes bya ba'i don ston te/ de la yang gnyis te/ spyir gleng ba dang / bye brag tu gleng ba rnam pa gnyis so/ /de la dang po spyir gleng ba ston te/ de nas khro bo rnam par rgyal/ /'jam dpal khro bos bshad pa yi/ /rtog pa rmad du byung ba'i mchog /mdor na rab tu bshad par bya/ /zhes bya ba ni/ spyir gleng ba zhes bya ba bstan te/ de la khro bo rnam par rgyal ba'i rgyud 'phags pa 'jam dpal khro bos bshad pa 'di ni rtog pa rmad du byung ba'i mchog ces bya ste/ ci'i phyir rmad du byung ba zhes bya zhe na/ sngags dang phyag rgya dang / rdzas dag tu sbyor ba byas pa la dngos grub rab 'bring rnam gsum dang / las rnam bzhi dang /sgyu ma la sogs pa'i las ngo mtshar gyi ya mtshan dag ston pas rmad du byung ba zhes bya'o/ /de la 'jig rten pa'i lha so so'i snying po dang phyag rgya la sogs pa sbyor ba byas pa las kyang rmad du byung ba'i ya mtshan dag ston par byed/ de dag las kyang khyad par du bstan pas na mchog ces bya'o//ma 'ongs pa'i sems can spyod pa dman zhing blo zhan pa rnams la khro bo rnam par rgyal ba'i rgyud chen po stong phrag bcu gnyis po dang / sh+lo ka stong phrag bzhugs pa zab cing rgya che ba ste/ shes rab rnam gsum gyi sgo nas de dag spyod par mi nus pas de nas mdo nyung ngur btus nas/sems can spro zhing de la 'jug par 'gyur ba'i don du khro bo rnam par rgyal ba'i rgyud kyi cho ga nyi tshe tsam zhig mdor bsdus nas bshad do zhes pa'o/ /de la 'di yi dkyil 'khor ni/ /zhes bya ba nas/ yi dags mang po zhes bya'o/ /zhes bya ba'i bar du bye brag tu gleng ba zhes bya ba'i don to//de la 'di yi dkyil 'khor ni/ /zhes bya ba ni 'di zhes bya ba ni rgyud 'di nyid kyi dkyil 'khor la bya ba'am/ yang na khro bo rnam par rgyal ba'i dkyil 'khor zhes bya ba'i don to/ /dkyil 'khor de yang ji lta bu zhig ce na/ gsungs pa/ dngos grub thams cad sbyin mdzad pa/ /zhes pa ste/ 'o na dkyil 'khor de bris pa tsam gyis dngos grub stsol bar 'gyur ram zhe na/ ma yin te ji skad du gsungs pa bzhin du dkyil 'khor bris nas de ltar spyan drangs te tshul bzhin bsgrubs na dngos grub stsol bar 'gyur ba la bya'o/ / der yang ma zad de/ 'jig rten gsum po 'khrug par mdzad/ /ces pa ste/ dngos grub bsgrub pa'i tshe sa 'og gi 'jig rten dang / /mi'i 'jig rten dang / lha'i 'jig rten dang / 'jig rten gsum po dag kyang 'khrug par mdzad do zhes pa ste/ de dag ni dkyil 'khor gyi yon tan no//yi dags mang po zhes bya ba'i/ /zhes bya ba ni dkyil 'khor de yi dags mang po'i dkyil 'khor zhes bya ste/ de la ci'i phyir yi dags mang po zhes bya zhe na/ dkyil 'khor 'dir yi dags mang po 'byung bas na yi dags mang po smos te/ dkyil 'khor nyid du yang be con phyag rgya 'dri ba ni nyung yi dags ni mang du 'dri bas na nyung ngu'i bzlas pa mang po smos te/de bas na yi dags mang po'i dkyil 'khor zhes bya'o/ /yi dags des kyang sems can 'dul ba'i dbang gi slad du ye shes kyi sprul ba yin par bshad do/ /thams cad du ni dkyil 'khor 'di//gnas ni gang du 'grub 'gyur ba/ /zhes bya ba nas/ gang du yid ni dga' bar yang / /der ni dkyil 'khor rab tu bya/ /zhes bya ba'i bar du sa brtag pa'i don bstan te/ de la/ thams cad du ni dkyil 'khor 'di/ /gnas 'di gang du 'grub 'gyur ba/ / zhes pa ni dus thams cad du dkyil 'khor gnas gang du byas na 'grub par 'gyur ba'i dkyil 'khor gyi gnas de sngags pas thog ma nyid du sa brtag par bya'o zhes pa ste/ de bas na gsungs pa/ sngags pas thog ma nyid du ni/ /de yi gnas ni brtag par bya/ /zhes gsungs so/ / de la thams cad du ni zhes pa dus thams cad du zhes bya ba ste/ dngos grub bsgrub pa'i gnas thams cad la bya'o/ /de la shing gcig ces bya ba ni shing rigs che ba a shwa t+tha la sogs pa dang / bod na shug pa dag la bya ste/ de lta bu'i shing gcig tu skyes pa la bya ste/ de yang shing skam po dang /bkra mi shis pa'i skyon med pa shing gzhan gyi lo ma dang ma 'dres pa snga dro shing gzhan gyi grib mas ma phog pa'i shing gcig 'gred lo ma mang po mgo zlum por skyes pa la bya'o/ /bzhi mdo dang zhes pa ni/ rgyun lugs kyi lam po che bzhin rgya gram du yod pa la bya'o/ / mu gnyis dang zhes pa ni/ chu rlung 'bab pa'i pha rol tshu rol gyi 'gram gnyis las gang yang rung ba'i 'gram du bsgrub pa la bya'o/ /rnam pa gcig tu na chu bo gnyis 'bab pa'i bar gyi mdo la bya ste/ de yang g.yas g.yon nas 'bab pa'i 'gram dang nye ba'i bar gyi mdor gnas te bsgrub par bya'o zhes pa'o//thibs po stong pa lam srang rnying / /zhes pa ni nags tshal stug po mi la sogs pas mi thar ba tsam gyi tshod kyi nags tshal la bya ste/ thibs po la yang bya ste der gnas te/ bsgrub pa dang / de lta bu'i gnas na yang mi dag med par gnas pa la bya'o/ / sngon gyi lam srang rnying ba'i bzhi mdo de dag du yang bsgrub cing gnas pa la bya'o/ /lha chen gyi ni gnas kyang rung / /zhes pa ni/ ma hA de ba'i rten gyi gnas kyang rung / /sngon mchod pa'i rten rnying pa dag kyang rung ba'i gnas su bsgrub cing gnas par bya'o/ /khyad par du yang yul gtsang mar//gang du yid ni dga' bar yang / /zhes bya ba la gnas ming gis bshad pa rnams la khyad par du yul sme bag med pa'i yul gtsang ma gang du sngags pa yid dga' zhing dad pa'i gnas der dkyil 'khor bri'o zhes pa'o/ /de nas rig 'dzin nan tan gyis/ /sa ni rab tu sbyang byas te//zhes pa nas/ ba yi lnga dang ldan pa yi/ /ba yi lci bas byug par bya/ /zhes pa'i bar du sa sbyang ba zhes bya ba'i don ston to/ /de nas rig 'dzin nan tan gyis sa zhes bya ba ni sngags pa des sa gzhi ba tshwa med pa dang ma gas pa dang / thag thug dang / lbang lbung med cing mnyam pa dang / sdong du ma la sogs pa'i zug rngu med pa'i gnas bzang po dag tu ji skad du gsungs pa bzhin du sa brkos te slar sa mnyan bzang pos blugs pa la sogs pa tshul bzhin du bya'o zhes pa'o/ /kha dog snum pa lhag par bzang / /zhes bya ba ni maN+Dal gyi sa gzhi bsnyams te/shar dang byang mtho bar byas pa'i sa gzhi de lta bu'i kha dog sdug cing mdzes par byas na lhag par bzang ngo zhes pa'o/ /ba yi lnga dang ldan pa yi/ /ba yi lci bas byug par bya/ /zhes pa ni/ ba ser mo'i lci ba gsher ba btsir ba'i khu ba dang / 'o ma dang / gcin dang / mar dang / zho dang / 'di rnams lnga cha bsnyams te/ ba'i lci ba dang bsres pas maN+Dal la byug par bya'o zhes pa'o/ /ci rigs par ni byug par bya/ /slob dpon gyis ni khrus byas la/ /zhes bya ba nas/ nye ba yi ni mdzes byed kyang / /mdzes byed dang ni 'dra bar bya//zhes bya bas thig gdab pa'i rim pa'i don ston to/ /de la/ ci rigs par ni byugs nas kyang / /slob dpon gyis ni khrus byas la/ /smyung ba byas te mnyam bzhag nas/ /khro bo'i srung ba byin gyis brlab/ /ces bya ba ni de la ci rigs par ni zhes bya ba 'og nas 'byung ba'i tshig gis dkyil 'khor nub mo bri zhes 'byung ba la yang sbyar te/de yang dus tshad med de gang du bri yang rung ngo / /de la slob dpon nyid kyis khrus byas la/ dkyil 'khor bri zhing slob ma dkyil 'khor du 'dzud pa'i tshe na zhag gcig smyung bar 'dug nas 'dod/ chags dang zhe sdang gti mug la sogs te/ de'i phyi rol gyi yul la rtog pa mi btang bar sems rtse gcig par mnyam par bzhag nas khro bo chen po'i skur bsgyur te/ yan lag lnga la sogs pa'i sngags kyis kyang sku'i yan lag rnams su byin gyis brlab bo zhes pas so/ /yi dgas phal zhes bya ba yi//dkyil 'khor gsang mchog nub mo bri/ /zhes bya ba ni/ yi dags mang po'i dkyil 'khor gsang ba'i mchog de dus gang du bri zhe na/ nub mo bri zhes pa'o/ /ci'i phyir nub mo bri zhe na/ thams cad kyis mthong bar mi bya ba'i phyir yang nub mo bri ba dang /byang chub sems dpa' rnams kyi nub mo lhag par byin gyis rlob pa'i phyir nub mo bri'o zhes pa'o/ /zar ma'i ras sam ras bal lam/ thig skud sum sgril mdzes pa yis/ /zhes bya ba ni dkyil 'khor thig skud smos pa ste/ de yang rgyu gang las bya zhe na/zar ma'i ras sam ras bal gyi skud pa sum sgril du byas la thig skud bya'o zhes pa'o/ /grwa bzhi dang ni sgo bzhi par/ /mkhas pas dkyil 'khor thig gdab bya/ /zhes bya ba ni/ gru bzhi pa sgo bzhi yod par dkyil 'khor thig gdab par bya'o zhes pa ste/de yang ji ltar thig gdab par bya zhe na/ gsungs pa/ thog mar shar dang byang nas ni/ /lho dang nub kyi bar du'o/ /zhes gsungs pa 'di ni dkyil 'khor gyi thig 'debs pa'i tshe slob ma 'dug pa'i gnas bstan pa ste/ de yang gnas gang du 'dug par bya zhe na/ shar dang byang gi mtshams su ste/a sha nar slob ma 'dug par bya ba dang / lho dang nub kyi mtshams te bden bral phyogs su slob ma 'dug par bya ba ste/ ngos gnyis su slob ma 'dug ste thig gdab par bya'o/ /'o na slob dpon gnas gang du 'dug par bya zhe na/ shar dang lho yi mtshams dang ni//nub dang byang gi mtshams dag tu/ /zhes pa ni slob dpon de shar dang lho'i mtshams su ste/ me'i phyogs su 'dug par bya ba dang / nub dang byang gi mtshams su ste/ rlung gi phyogs su 'dug par bya ste/ dkyil 'khor gyi thig gdab bo zhes gsungs so/ /de ltar slob dpon dang slob ma'i gnas nges par gsungs pa las/slob dpon gyi gnas gud du 'dug par mi bya'o zhes pa'o/ /de ltar slob dpon dang slob ma gnas so sor 'chad par gsungs nas/ de nas phyogs dang mtshams kyi thig gdab par bya bar gsungs par shes par bya'o/ /de yang gsungs pa/ thig skud de ni phyogs mtshams gnas/de nas kyang ni drang bar bya/ /zhes gsungs te/ de bas na phyogs bzhir rgya gram du thig gnyis gdab pa dang / mtshams bzhi nas thig gnyis gdab par bya ba ste/ de ltar rgya gram du sngar thig btab nas de'i 'og tu dkyil 'khor che chung tshad dang gnas 'gras 'grus med par thig gdab pa'i phyir/thig gi tshad byas nas gru bzhi por gdab par bya ste/ de bas na gsungs pa/ thig gis rab tu tshad byas te/ /gru bzhi por ni thig gdab bo/ /zhes gsungs so/ /thig gdab pa'i thabs 'di ni seng ge lta 'og yan man bsnor te dkrugs nas bsdus te/thig gdab pa'i rim pa 'di ltar bya'o zhes bya ba la/ slob dpon kha cig 'chad pa yod de de ltar yang bya'o/ /yang kha cig 'di ltar yang 'chad pa yod de/ de la/ thog mar shar dang byang nas ni/ /lho dang nub kyi bar du'o/ /zhes pa ni dang por thig gdab pa'i go rims bstan pa ste/de la dang po shar phyogs ngos kyi thig gdab bo/ /de nas lho phyogs ngos kyi thig gdab/ de nas nub phyogs ngos kyi thig gdab po zhes pa'o/ /de nas de'i 'og tu phyogs bzhi'i thig gnyis gdab pa dang / mtshams bzhir thig gnyis gdab par bya ste/ de bas na gsungs pa/thig skud de ni phyogs mtshams nas/ /de nas kyang ni drang bar bya/ /zhes gsungs pas so/ /shar dang lho yi mtshams dang ni/ /nub dang byang gi mtshams dag tu/ /zhes bya ba de ltar thig 'debs pa'i tshe slob dpon gnas gang du 'dug par bya ba'i gnas bstan pa ste/shar dang lho'i mtshams te me lha'i phyogs su 'dug pa dang / nub dang byang gi mtshams te rlung gi phyogs su slob dpon 'dug la thig gdab par bya'o zhes pa'o/ /slob ma'i gnas ni 'chad pa med de/ bskor zhing 'debs par zad do/ /dkyil 'khor che chung med pa dang /ya yo dang 'gras 'grus med par thig gis tshad byas te/ de ltar thig ma 'grus par gdab par bya'o zhes pa ste/ de bas na gsungs pa/ thig gis rab tu tshad byas te/ /gru bzhi por ni thig gdab po/ /zhes gsungs so/ /de la kha cig bshad pa/ thog mar shar dang byang nas ni//lho dang nub kyi bar du'o/ /zhes pa ni/ spyir thig ji ltar gdab pa'i rtsis mgo ste/ thog mar shar gyi ngos thig gdab/ de nas lho'i ngos kyi thig gdab/ de nas nub kyi ngos kyi thig gdab pa ste/ de ltar thig gdab po dgos pa yang gsungs pa/ thig skud de ni phyogs mtshams nas/ /de bzhin du ni drang bar bya/ /shar dang lho yi mtshams dag tu/ /thig gis rab tu tshad byas te/ /gru bzhi por ni thig gdab po/ /zhes gsungs te/ de la shar lho'i mtshams su 'dug pa dang / nub byang gi mtshams rlung gi phyogs su 'dug pa dang /shar phyogs dang byang phyogs kyi ngos thig sngar gdab pa'o/ /lho dang nub gnyis su smos su zin kyang gong du smos pa'i spyi'i rtsis mgo gdab par mngon pas lho dang nub gnyis kyang thig gdab par bya'o/ /thig gdab pa'i thabs dag ni gong du gnas pa dag dang mthun par zad do//dkyil 'khor gyi ngos gcig gi tshad ji tsam yod pa las dgu char bgos la/ de'i cha gcig sgor bgos/ sgo de'i phyed kyi tshad kyis sgo khyud kyi mar 'dren pa dang / thad kar 'dren pa dag gi tshad kyang de dang 'dra bar bya'o zhes pa'o/ /rim pa gcig pa mdzes pa la//zhes bya ba nas/ lhag ma rnams ni bcad par bya/ /zhes pa'i bar du ni de ltar gong du dkyil 'khor thig gdab pa de yang rim pa gcig pa sgo bzhi btod pa la lho phyogs kyi sgo phye la/ sgo lhag ma gsum po rnams bcad pa'o/ /de la lho phyogs kyi sgo dbye ba yang slob ma rnams de nas bzung ba'i phyir sgo dbye ste/lho phyogs kyi sgo tshon gyis bcad la sngags dang phyag rgyas phye ste/ slob ma bcug kyang rung / yang na tshon mi 'byed par sgo phye la bya ste/ de gnyi ga ltar sgo phye yang rung ste/ slob ma gzung bar bya'o/ /gong du smos pa'i las brgyad pa gang byed kyang rung ste/ lho phyogs kyi sgor 'dug la las bya'o/ /dkyil 'khor dang ni 'tsham pa yi/ /dbus su pad+ma 'dri bar bya/ /pad+mo dang ni phyogs bzhi'i sgo/ /the tshom med par mnyam par bya/ /zhes pa ni ya yo 'gras 'grus med par dkyil 'khor de re'u mig dgur bgos la/dbus kyi re'u mig la pad+ma 'dab brgyad pa bri'o zhes pa'o/ /de ltar re'u mig dgur bgos pa'i ngos bzhi dbus cha gcig gi tshad du bya'o//dbus kyi pad+mo de dang phyogs bzhi sgo byang thad sgor khar drang du 'bab par 'gras 'grus dang / ya yo med par mnyam par bya'o zhes pa'o/ /mdzes byed sgo yi phyed du bya//'gram pa 'dab ma'i tshad dang mnyam/ /nye ba yi ni mdzes byed kyang / /mdzes byed kyang ni 'dra bar bya'o/ /zhes pa ni de ltar dkyil 'khor gru bzhi la sgo bzhi btod pa sgo khyud bcad pa dang bcas par byas la/ /sgo gtod pa ni kha drang du sgo'i byang thad kyis ma 'grus pa de'i sa stong pa la mdzes byed ces bya'o//ci'i phyir mdzes byed ces bya zhe na/ sgo'i sa stong pa des dkyil 'khor mdzes par byed pa'am/ dkyil 'khor kyi rgyan du gyur pas na mdzes byed ces bya'o/ /mdzes byed de'i tshad ji tsam du bya zhe na/ sgo'i phyed du bya zhes gsungs te/sgo'i phyed kyi cha gcig gi zhing gis mdzes byed kyang de tsam du bya'o zhes pa'o/ /'gram pa ni sgo khyud du mar 'dren pa la bya'o/ /'dab ma ni pad+ma'i 'dab ma ste/ sgo khyud kyi 'gram pa gnyis dang pad+ma gcig zhing mnyam par bya ste/ sgo khyud du thad kar drangs pa dang / sgo khyud du bya bar mar drangs pa gnyis kyi tshad kyang sgo phyed du zhes pa'o//de bas na gsungs pa/ 'gram pa 'dab ma'i tshad dang mnyam/ /zhes gsungs pa/ rta babs la nye bar mdzes byed ces bya ste/ de'i tshad ni ji tsam du bya zhe na/ de yang sgo'i byang thad du mdzes byed de'i tshad dang mnyam par bya'o//rta babs kyi rgyan du chu srin gyis brgyan par bya ste/ rgyan de dag kyang sgo dbab pa'i tshad dang mnyam par chu srin gyi rgyan rnams kyi rta babs kyis brgyan par bya'o/ /de bas na gsungs pa/ nye ba yi ni mdzes byed kyang / /mdzes byed dang ni 'dra bar bya/ /zhes gsungs so//cho ga bzhin du dkyil 'khor de/ /kun du thig ni gdab nas kyang / /zhes gsungs pa nas/ dur khrod thal bas dngar te bri/ /de phyir yi dags phal chen yin/ /zhes bya ba'i bar du phyag rgya la sogs pa'i dgod pa'i don ston te/ de la/ cho ga bzhin du dkyil 'khor de/ / kun du thig ni btab nas kyang / /zhes pa ni/ slob dpon nyid khrus bya ba dang lha'i skur bsgyur ba la sogs pa cho ga bzhin du byas pas dkyil 'khor de gong du smos pa'i tshul du thig btab nas su zhes bya'o/ /de nas/ de 'og sngags pas dur khrod kyi/ /thal ba gcig pus dkyil 'khor bri//zhes pa ste/ de bas na gsungs pa/ phyi nas tshul bzhin rig 'dzin gyis/ /dur khrod thal bas bri ba ni/ /zhes gsungs te/ de la dur khrod kyi thal ba ni mi ro bsregs pa'i thal ba la bya'o/ /rtag tu shar byang la sogs pa/ /gru bzhi'i nang ni de dag tu/ /mkhas pas be con phyag rgya bri//zhes pa ni bsgrub pa'am las gang byed kyang rung ste/ las de dag byed pa'i tshe rtag tu dkyil 'khor de'i nang gi shar byang gi mtshams dang / shar lho la sogs pa'i mtshams la nang rol gyi grwa bzhir sngags pas be con gyi phyag rgya bzhi dur khrod kyi thal bas bri bar bya ste/de yang ji lta bu bzhi bri zhe na/ dbyug pa'i mgo la skyu ru ra'i 'bras bu rgyas pa/ shun pa shus pa lta bu'i sul can zlum pos brgyan pa'i steng na mi'i thod pa can gyi dbyug pa bzhi chad zungs can pad+ma'i steng na bzhugs pa bzhi char yang kha nang du bltas par bri'o/ / dbyug pa 'di bzhi yang AR+Ya many+dzU shrI ya mAn+ta ka'i phyag rgya ste/ de ltar bris nas bsgrub pa'am las byed pa'i tshe phyogs bzhi nas byin gyis brlab cing gdon bgegs kyis mi tshugs pa'i phyir ro/ /phyogs kyi sgor ni yi dags gzhag /ces pa ni phyogs kyi sgo bzhir yi dags re re ste bzhi bri'o zhes pa ste/de dag kun kyang kha nang du bltas par bri'o/ /gzhan yang yi dags lnga pa ni/ /pad+ma'i steng du bsam par bya/ /zhes pa ni gong du sgo'i yi dags bzhi po ma gtogs pa'i yi dags lnga pa de'i dbus kyi pad+ma 'dab ma brgyad pa'i steng du bsam par bya'o zhes pa ste yi dags de yang glo g.yon pa pad+ma la phab pa ste/mgo shar du bstan pa/ gdong lho phyogs su lta bar bri'o/ /de la bsam pa ni ri mo bris la byas pas na/ bsam pa gcig pu mi bya bar dur khrod du thal bas phyi'i ri mo yang bya'o zhes pa ste/ phyag rgya'i mtshan ma kun la de bzhin du sbyar bar bya'o//de bzhin phyi sgo'i nang dag tu/ /phyogs rnams de dag thams cad du/ /zhes pa ni gong du yi dags bri ba der yang ma zad de/ de bzhin du dkyil 'khor du sgo'i nang be con bzhi'i bar bar du phyogs bzhi'i gnas su de dag thams cad du be con la thug thug tu mi ro mgo med pa dang /yi dags gnyis spel zhing dur khrod kyi thal bas ji tsam shong shong du dngar te bri'o zhes pa ste/ de bas na gsungs pa/ /mi ro mgo med yi dags rnams/ /dur khrod thal pas dngar te bri/ /zhes gsungs so/ /dkyil 'khor de'i ming yang de'i phyir na yi dgas phal bo che'i dkyil 'khor yin zhes pa ste/de bas gsungs pa ste/ de'i phyir yi dags phal chen yin/ /zhes gsungs so/ /khru gang la sogs rim pa nas/ /khru brgyad pa yi rim pa ste/ /de las lhag par yongs ma gsungs/ /zhes pa ste/ khru brgyad pa ni dngos grub kun//sbyin byed mchog tu shes par bya/ /zhes bya ba'i phyir du las kyi bye brag gi dkyil 'khor gyi tshad nges par bya zhes pa'i don te/ de la/ khru gang la sogs rim pa nas/ /khru brgyad pa yi bar du ste/ /dgu pa'i dkyil 'khor yang mi bri/ /zhes pa ni 'og nas 'byung ba'i las rnams la dkyil 'khor so sor bya ba'i tshad kyang khru gang nas khru gsum pa la sogs pa yan chad bri bar bya ste/de las lhag par yang mi bri zhes pa'o/ /rtag tu bdag nyid mchod pa ni/ /khru gang bar ni bri bar bya/ /zhes pa ni/ bdag sngon du sngar bsnyen pa'i tshe'am mchod pa dag byed 'dod pa'i tshe gong du bshad pa bzhin du dkyil 'khor bris la/ngos bzhi la ngos gcig gi tshad khru gang bar bri zhes pa'o/ /las rnams so so la dkyil 'khor gyi tshad mi mthun par gsungs pa yang / las gces pa'i rim pas sam/ che rim gyi dkyil 'khor gyi tshad kyang de bzhin du shes par bya'o//zhi ba dang ni rgyas pa dang / /mi skyong bsgrub pa khru dor bya/ /zhes pa ni zhi ba dang / rgyas pa dang / rgyal po dbang du bya ba'i phyir/ de dag bsgrub pa'i dkyil 'khor gru bzhi ngos gcig gi tshad la khru do bar bya'o zhes pa'o//khru do man chad khru brgyad yan chad gang yang rung ste/ /gcig gi nang du slob ma rnams gzud par bya'o/ /de ltar yang gang yang rung mod kyi/ khru brgyad pa'i dkyil 'khor nyid du slob ma rnams gzud par bstan to/ /sems can kun gyi bskrad pa dang / /de bzhin bzhi la khru gsum pa//zhes bya ba de lha 'dre dang mi la sogs pa rnams gnas nas bskrad par bya ba dang / gnas de nas gtan med par bya ba'am/ phung bar bya ba'i phyir dkyil 'khor khru gsum par bya'o zhes pa'o/ /khru bzhi dbang dang dgug pa la/ /las rnams kyi ni mchog tu gsungs/ / zhes bya ba ni dbang du bya ba dang / dgug pa'i phyir dkyil 'khor gru bzhi par bri ba ni las rnams kyi mchog tu gsungs zhes bya'o/ /khru lnga nad dang mi nad dang / dgra rnams med par gsad pa'i mchog/ /ces bya ba ni/ nad phran tshegs dang / mi nad chen po klung ba byung ba dang /dgra rnams med par gsad par bya ba'i phyir dkyil 'khor khru lnga par bya ba ni mchog ces bya'o/ /khru drug bgegs rnams thams cad dang / /gdon bgegs nges par zlog par byed/ /ces bya ba ni/ gdon bgegs rnams nges pa bzlog par bya ba'i phyir/ dkyil 'khor khru drug par bri bar bya zhes pa'o//khru bdun pa ni lha yi rnams/ /dbang du dgug pa'i las rnams byed/ /ces bya ba ni 'jig rten pa'i lha rnams dgug pa dang / dbang du bya ba'i phyir dkyil 'khor khru bdun par bya'o zhes pa'o/ /khru brgyad pa ni dngos grub kun/ /sbyin byed mchog tu shes par bya'o//zhes pa ni dngos grub rab 'bring rnam pa gsum la sogs pa kun sbyin par byed pa'i mchog tu gyur pa ni dkyil 'khor khru brgyad par bri'o zhes pa'o/ /las 'di rnams so sor byed pa'i tshe/ dang por dkyil 'khor lan cig bris nas las de grub grub tu gzhag pa'am/yang na ri mo de mi mngon zhing rnying par gyur na skabs skabs su brje bar bya ba ni spyi'i rgyud dang sbyar zhing gar legs par bya'o/ /de ltar ci rigs bris nas ni/ /de nas gtsang mas nye reg bya/ /zhes pa nas/ gtor ma nya dang sha la sogs/ /sbyar thug la sogs lhag ma dbul//zhes bya ba'i bar du mchod pa'i yo byad la sogs pa zhes bya ba'i don to/ /de ltar/ ci rigs par ni bris nas ni/ /de nas gtsang mas nye reg bya/ /zhes pa ni de ltar gong du smos pa'i dkyil 'khor rnams las gang yang rung ba cig ci rigs par bris nas/ de'i 'og tu phyi nang bcas par gtsang ma'i slob dpon de yang sngags dang phyag rgyas nye reg bya ste/'og nas 'byung ba'i mchod pa'i yo byad kyi tshogs rnams bsags par bya'o zhes pa'o/ /mchod pa'i yo byad de dag kyang dkyil 'khor bris pa'i 'og tu gdod 'phral la btsal zhing bsogs pa la mi bya'o//mchod pa'i yo byad la sogs pa 'di dag kyang dkyil 'khor ma bris pa'i sngon rol nas btsal zhing bsogs pa la bya'o/ /chu yi phyir ni chu yi snod/ /chus ni rab tu dgang bar bya/ /zhes pa ni slob ma dbang bskur ba'i bum pa chu dang / ar+g+ha dang bsang gtor bya ba la sogs pa ste/ji tsam du chu'i snod du bya ba de dag so so gang rigs pa snod gtsang ma'i snod du dri'i chu la sogs pas rab tu dgang bar bya'o zhes pa'o/ /de bzhin me tog don du yang / /me tog sdu gu dri zhim dang / /me tog phreng bas snod mchog gzhan/ /legs par gang zhing mdzes par bya//zhes pa ni/ me tog gi don du me tog kha dog sdug cing dri zhim pa'i sil mas mchod pa dang / slob ma dbang bskur ba la dgos pa'i phyir me tog de lta bu las me tog gi phreng ba byas pa dag /gong du smos pa'i mchod yon gyi snod las gzhan pa rin po che la sogs pa las byas pa'i snod mchog gi nang du mdzes shing sdug par legs par dgang bar bya'o zhes pa'o//gong du bshad pa'i dkyil 'khor dang las kyi khyad par las me tog rigs phye ba med de/ me tog 'di lta bu zhig ni dkyil 'khor thams cad la mchod pa'i tshe dbul bar bya'o//dri yi snod du tsan+dan mchog /tsan+dan dkar po dmar po blang / /zhes pa ni dri'i snod du tsan+dan te/ de yang dri chung zhing ngan pa dang / rul pa la sogs pa skyon med pa tsan+dan bzang po mchog ces smos te/ des ni tsan+dan gyi mtshan nyid bstan to/ /tsan+dan dkar po dang dmar po gnyis blang zhing bsogs par bya'o//de yang tsan+dan dkar po ni zhi ba dang / rgyas pa dag gi tshe sbyar/ dmar po ni dbang dang drag shul spyod pa dag la sbyar bar bya'o/ /a ka ru dang sbyar ba yi/ /gu gul bdug pa'ang de bzhin no/ /zhes pa ni a ka ru dang gu gul du sbyar ba'i bdug pa'ang de bzhin du dbul bar bya'o zhes pa'o//mar me mar gyi mar me dang / /zhes pa ni de la mar me gang gis bya zhe na/ mar gyi mar me dang zhes pa ste/ de yang ba mar las mar me bya'o zhes pa ste/ mkhas pas snying po 'jam pa'o/ /zhes pa ni snying po de yang 'jar 'jur med cing thag thug med par ras gtsang ma las byas pa snying po de yang 'jam zhing mnyen pa dang /legs par bkal bar sngags pas bya'o zhes pa ni/ drag po yi ni las dag la/ /mi yi tshil gyis bya bar bshad/ /ces bya ba ni drag shul spyod pa'i me mar gyi snying po dang dur khrod kyi ras la bya'o//drag shul spyod pa'i las la mar me yang mi'i tshil bu bzhu bas mar me bya'o zhes pa'o/ /dbang la til mar bya bar bshad/ /gtor ma nya dang sha la sogs/ /sbyar thug la sogs khyad par dbul/ /zhes pa ni/ gong du bshad pa'i las gang byed kyang rung ste/mchod pa'i bshos dag dang / gtor ma la sogs pa bya ste/ de la gtor ma zhes bya ba ni lha bshos la yang bya/ gtor ma dngos la bya bas na/ da 'dir yang lha bshos su 'byor pa dkyil 'khor du dbul ba dang / phye zan gyi gtor ma yang bya'o//nya dang sha la sogs pa ni sha dang nya btsos pa dang / ma btsos pa dag las mchod par dbul gtor ma yang bya'o/ /de la sogs pa'i tshig gis ni/ bshos dang gtor ma dang / sha dang sbyar thug med du mi rung ba la gtsor smos su zad do/ /de las gzhan pa'i 'byor pa'i gtor ma yang bya'o//sbyar te dbul zhing gtor ma yang bya bar bshad do/ /'bras dang mon sran gre'u dang / til dang / gsum bzhi'o ma las blangs pa'i sbyar thug yang khyad dam lhag par yang dbul bar bya'o zhes pa ste/ de bas na/ sbyar thug la sogs lhag par dbul//zhes bya ba gsungs so/ /de ltar de ni tshogs sogs nas/ /de nas rig sngags 'chang ba yi/ /zhes bya ba nas/ de'i 'og tu rang gi sngags rnams kyi/ /byin gyis rlob tu gzhug par bya/ /zhes bya ba'i bar du phyag rgya la sogs pa bsam pa zhes bya ba'i don to/ /de la/de ltar der ni tshogs bsags nas/ /zhes bya ba la gong ma dang 'phro sbyar ba'i tshig ste/ gong du smos shing bshad pa ltar dkyil 'khor de'i nye 'khor du mchod pa'i yo byad kyi tshogs rnams bsogs nas zhes pa'o/ /byang chub sems la dmigs nas ni/ /zhes pa ni byang chub sems dang ldan par byas nas zhes bya ba'i don to//ri mo yi ni las rnams dag /gal te 'dri bar mi nus na/ /zhes pa ni gong du bshad pa'i dkyil 'khor der dbus kyi yi dags dag sgo bzhi'i yi dags dang / /be con gyi nang gi phyogs bzhi'i mgon med pa'i lus dang / yi dgas spel zhing bri bar bshad pa rnams ri mo dag ma shes te bri bar ma nus na phyag rgya bkod la bsam par bya ba'i thabs bshad do//de la bsam par bya na dang por dkyil 'khor thig gdab pa dang / sgo bzhi gdod pa dang / dbus su pad+ma 'dab ma brgyad bri ba la sogs pa'i cho ga snga ma bzhin du bya ste/sngags pa nyid lho phyogs kyi sgor 'dug ste/ phyogs bcur sangs rgyas dang byang chub sems dpa' rnams bzhugs pa la phyag 'tshal te/ byang chub kyi sems dang ldan par byas te/ yi dags dgod pa rnams 'og nas 'byung ba'i tshul du sems kyis bsam par bya'o zhes pa'o//yi dags phal chen dbus dag tu/ /pad+ma sngar bris gang yin la/ /zhes bya ba ni dkyil 'khor de'i ming yi dags phal chen zhes bya ba'i dkyil 'khor gyi dbus su pad+ma 'dab ma brgyad pa sngar bris pa gang yin pa de'i steng du sngags pas yi dags yid kyis bsam par bya'o zhes pa ste/de bas na gsungs pa/ de yi steng du yi dags ni/ /mkhas pas yid kyis bsam par bya'o/ /zhes gsungs so/ /de la dbus kyi yi dags ni glo g.yon pa 'og tu [(]gcug [,]bcug [)]la/ mgo shar phyogs su bstan te kha lho phyogs su lta ba'i tshul du bsam mo//de ltar yid kyis bsams pa 'ba' zhig gis mi chog ste/ dbus kyi yi dags kyi sngags 'og nas 'byung bas yi dags de'i snying gar gsal bar bsams la/ bdag gis kyang sngags brjod de yi dags bsam par bya'o/ /de ltar byas na yi dags nyid der 'ongs pa dang 'dra bar 'gyur ro zhes pa ste/de bas na gsungs pa/ yi dags kyi ni sngags mchog gis/ /bsam pa dag ni byas nas kyang / /zhes gsungs so/ /grwa'i dbyug pa skyu ru ra 'dra ba'i yid kyis brgyan pa'i mi'i thod pa can bzhi bsam pa'i sngags/'og nas 'byung ba rnams dbyug pa thod pa can bsams pa'i steng du gsal bar yang bsam zhing / sngags de dag kyang bdag gis brjod cing bsams na/ phyag rgya'i mtshan ma dbyug pa thod pa can de yang dag par gnas par 'gyur zhing byin gyis rlob par 'gyur ro zhes te/de bas na gsungs pa/ grwa yi dbyug pa bzhi po yang / /sngags nyid kyis ni bsam par bya/ /zhes gsungs so/ /dbus kyi yi dags dang grwa'i dbyug pa bzhi po dag dngos su ri mo 'dri nus te bris na yang bris pa de snying ga dang / steng du gong du bshad pa bzhin du so so'i sngags bsam zhing /bdag gis kyang sngags brjod de bsam par bya'o zhes pa ste/ de bas na gsungs pa/ gal te 'dri bar nus na ni/ /sngags nyid steng du gzhag par bya/ /zhes gsungs so/ /de yang dag par gnas par bya ba'i phyir de ltar bya'o zhes pa'o//sgo bzhir yi dags bzhi po yang / /gal te dngos su 'dri nus na/ /yi dags dngos der 'ong zhing gnas par 'gyur ba dang / byin gyis rlob par byed pa'i so so'i sngags bzhi po 'og nas 'byung bas yi dags de dag so so'i snying khar yang bsam/ bdag gis sngags/ brjod de bsams na yi dags de dag kyang yang dag par gnas par 'gyur ro zhes pa ste/ de bas na gsungs pa/ sgo yi yi dags bzhi po yang / /dbus su 'dri bar ma nus na/ /de bzhin yi dags 'dzin sngags gyis/ /byin gyis rlob par byed par gsungs/ /zhes bya'o//sgo'i yi dags dngos su 'dri nus su zin kyang so so'i sngags kyis byin gyis brlab par bya'o/ /da ni spyan drangs pa sngar byas nas/ /dad pa lha'i rang bzhin bsgom pa zhes bya ba bstan pa'i phyir/ de ltar cho ga bzhin bsams nas/ /zhes pa nas/ kha cig dag ni mche ba gtsigs//zhes pa'i bar du gsungs pa ste/ /de ltar cho ga bzhi bsams nas/ /zhes pa ni/ dkyil 'khor bri ba'i yi dags dngos su 'dri nus sam mi nus kyang rung ste/ /sngags brjod de bsams zhes pa ste/ dkyil 'khor gyi cho ga bzhin bris nas zhes pa'i tha tshig go//mjug tu khro bo gshin rje gshed/ /ces bya ba la sogs pa ni ri mo la sogs pa'i 'og tu khro bo nyid kyi sngags kyi le'u gsungs pa'i spyan drang ba'i sngags brjod de/ pad+ma'i snying por bzhugs su gsol zhes pa'o/ /yang na mjug tu zhes pa ni rig sngags 'chang dang por khro bo nyid du bsgoms nas yan lag lnga pa'i sngags kyis bsrung ba'i 'og tu zhes pa'o//dad pa'i lha'i rang bzhin bsgom pa yang mdog dang / mtshan ma dang / zhal gyi dbyibs kyi dbye ba dang / gsungs te go sla bas ma bshad do/ /de la khyad par ni kha cig bzhad pa zhes pa rtsa ba'i zhal te/gad rgyangs chen po sgrogs pa'o/ /kha cig zhi zhes pa ste steng gi zhal te rang bzhin tha mal gnas pa'o/ /kha cig 'jigs par bgrad ces pa g.yas pa dang po ste zhal gyi dbyibs phyir bgrad pa'o//de'i gnyis pa'i zhal gdangs pa'o/ /ljags rkyong ba ni g.yon dang po'o/ /mche ba gtsigs pa ni g.yon gnyis pa'o/ /de ltar snying po legs par ni/ /zhes pa nas/ me tog gis ni bkang ste gzhug /ces pa'i bar du mchod pa zhes pa ston te sngags kyis spyan drangs pa mchod yon/zhabs bsil/ dri dang sbyar ba'i chus ya mAn+ta ka'i sar brjod pa'i cho gas zhabs bsil dbul lo/ /de nas dkyil 'khor dbus su yi dags kyi spyi bor dbus kyi yi dags dgug pa'i sngags brjod de/ me tog dmar po gtor te bzhugs su gsol lo//de nas sngags kyi le'u gsungs pa'i mchod pa'i sngags rnams kyi dri la sogs pa dbul zhes pa'i tha tshig go/ /rang gi snying po'i sngags kyis kyang / /zhes pa nas/ me tog dag gis dgod par bya/ /zhes pa'i bar du ni bsrung ba'i cho ga dag bstan te/skabs 'di tshig lhag ma dag gis sngar gyi don bstan to/ /de ltar ci rigs mchod nas kyang / /zhes pa'i 'brel ba ni/ me tog cho ga bzhin phul nas/zhes pa'i tshig dang 'brel par shes par bya'o/ /de nas mar me rab 'bar ba/ /phyogs brgyad du yang dgod par bya//zhes pa ni sngar gyi dkyil 'khor gyi phyogs mtshams su mar me 'bar ba brgyad bkod par bya ba de bdug pa'i rjes la dbul lo zhes pa'i tha tshig go/ /de nas gtor ma dbul te/ 'byung po gtor ma khro bo la/ /zhes pa'i gong du sngar bshad pa'o/ /khro bo la phul nas zhes pa dkyil 'khor gyi dbus kyi khro bo la 'byung po'i gtor ma phul nas so/yi dags phal chen gyis zhes pa la sogs pa ni grwa'i dbyug pa bzhi la gtor ma dbul ba dang / dkyil 'khor gyi phyogs bzhir yi dags kyi phreng ba bkod pa la gtor ma dbul ba'o//khro bo gtso bo la phyogs te/ /de nas yang ni bdug pa dbul/ /zhes pa ni/ gong du smos pa'i dkyil 'khor rnams las gang yang rung ba cig tu be con la sogs pa'i mtshan ma'i phyag rgya dag bris shing mchod pa'i yo byad la sogs pas kyang / de ltar mchod pa'i dkyil 'khor de yang khro bo rnams kyi bdag po gtso bo'i dkyil 'khor de la slob ma rnams dal du gzhug pa'i phyir/dang por sna 'dren du lha la rgyab kyis ma phyogs par dang por thad kar sngon du bltas nas bdug pa dbul bar bya/ zhes pa'i don to/ / de yi phyi rol chu bcas snod/ /ces bya ba ni dkyil 'khor gyi phyi rol bdag gi g.yon rol du dri'i chu dang ldan pa'i mchod yon gyi snod me tog dang ldan pa yang gzhag par bya'o zhes pa'i don to/ /me tog gis ni bkang ste bzhag /ces pa la rnam pa gcig tu mchod pa bya ba'i phyir/ me tog gis snod bkang ba yang gzhag par bya'o zhes pa'i tha tshig go/ /'di man chad ni slob ma sngar bcug nas phyag rgya dang dam tshig bstan pa zhes bya ba'i don to/ /cho gas khrus byas smyung ba yi/ /zhes bya ba la sogs pa ni cho ga bzhin du khrus byas shing / smyung ba byas pa'i slob ma gcig dkyil 'khor gyi drung du bkug nas/de nas khro bo'i yan lag sngags rnams kyis slob ma de dag gnas lnga la sogs pa bsams te/slob ma de gzi byin du bya'o zhes pa'i tha tshig go/ /khro bo yi ni snying po yis/ /zhes bya ba la sogs pa ni de ltar slob ma bsrungs shing gzi byin can du byas pa'i 'og tu snying po 'bru bcu bdun pa'am/'bru bdun pa gang yang rung ba cig brjod nas/ lag pa gnyis thal mo sbyor te dam tshig gi phyag rgya 'ching du bcug nas dkyil 'khor du 'jug pa'i me tog lag tu sbyin no/ /slob ma der dar ram ras dmar pos mig dgab par bya'o//dkon mchog gsum ni dran byas te/ /slob dpon gyis ni gzhug par bya/ /zhes bya ba slob dpon gyis slob ma de dkyil 'khor du 'dzud pa'i tshe slob ma de dag dkon mchog gsum gyi mtshan yang brjod du bcug la/ de dag gi yon tan yang rjes su dran par byed par bcug ste/dkyil 'khor du gzhug par bya'o zhes pa'i tha tshig go/ /rang gi snying pos me tog nyid/ /dkyil 'khor la ni dor du gzhug /ces bya ba ni dkyil 'khor du dor ba'i sngags kyang yi ge bcu bdun po brjod du bcug nas me tog dor du gzhug go zhes bya ba'i don to//de nas dbyug pa zhes bya yi/ /zhes bya ba la sogs pa ni de ltar dkyil 'khor du bcug zin nas/ de'i 'og tu mig phye ste slob dpon gyis dbyug pa'i phyag rgya slob ma la bstan par bya'o/ /dkon mchog gsum ni nam yang mi btang ngo //snod ma yin pa dang / phyi rol pa rnams la gsang ba lta bu dam tshig slob ma la sbyin par bya'o/ /da ni sngar dbang bskur nas gsang sngags sbyin pa zhes pa'i don ston to/ /khro bo gtso bo'i sngags kyis ni/ /zhes bya ba la sogs pa ni de'i 'og tu slob dpon nyid kyis slob ma la dbang bskur bar bya ste/de yang sngags gang gis dbang bskur bya zhe na/ khro bo gtso bo'i sngags yi ge bcu bdun pas dbang bskur bar bya'o/ /yo byad ci 'dra ba dag gis dbang bskur bar bya zhe na/ dri'i chu'i bum pa me tog gis brgyan pa dang / me tog gi phreng ba dag gis dbang bskur bar bya'o//ci'i phyir dbang bskur bar bya zhe na/ 'grub par 'gyur bar bya ba'i phyir dbang bskur te/ dngos su bsgrub pa'i dbang bskur ba la yang bya mod kyi/ skabs 'dir ni dam tshig gi dbang bskur bar bya'o/ /khro bo'i snying pos cho ga bzhin du de ltar dbang bskur nas/de'i 'og tu rig pa'i dbang bskur bar bya'o/ /de yang slob ma dag la me tog dang / bdug pa dag gis kyang mchod do/ /slob ma'i lag pa mi stongs shing / bkra shis par bya ba'i phyir me tog gi phreng ba lag tu byin nas/ rig pa'i dbang ji skad du gsungs pa'i tshul du sbyin par bya'o//de yang yi ge 'bru bcu bdun gyi sngags sbyin pa la bya'o/ /da ni bla ma la mchod pa zhes bya ba'i don ston to/ /khro bo yi ni snying po mchog /'di ni 'og ma'i tshig 'og ma dang 'phro sbyor ba tsam du smos par zad do/ /de nas de ltar mnos nas ni//zhes bya ba la sogs pa ni slob ma gong du smos pa ltar rig pa'i dbang bskur te/ de'i 'og tu slob ma des bla ma la phyag byas nas bdag gis nyams kyis ci nus ci 'byor pa'i mchod yon dbul zhing mchod par bya'o zhes bya ba'i tha tshig go/ /sngags pas bla ma mchod byas na//dngos grub thob 'gyur gzhan du min/ /zhes bya ba ste/ de ltar bla ma la mchod pa byas nas ni de'i dgos pa bstan te/ slob mas slob dpon la sbyin pa'i sgo nas mchod pa byas na dngos grub thob par 'gyur gyi/ /de ltar ma byas na dngos grub mi thob pa'o zhes pa'o//slob ma snying po byin nas kyang / /zhes bya ba la sogs pa ni de ltar slob dpon gyis slob ma de rig pa'i dbang bskur nas/ de'i 'og tu slob dpon gyis me tog dang me tog gi phreng ba dang / tsan+dan dang / bdug pa la sogs pa'i mchod pa'i yo byad rnams kyis dkyil 'khor gyi lha mchod nas dri'i chus me tog la sogs pa dang ldan pa'i mchod yon slob dpon gyis dkyil 'khor gyi phyi rol du sngar bzhag pa'i snod de blangs te mchod yon til dang /'o ma dang / ga bur dang / me tog tu ldan pa dbul bar bya'o/ / sngags dang phyag rgyas slar yang btang / /zhes bya ba'i don to/ /btang nas de yi 'og tu ni/ /dkyil 'khor du yang mchod yon dbul/ /zhes bya ba la sogs pa ni slar btang ba'i 'og tu gshin rje'i dbyug pa dang / yi dags kyi phyag rgya'i mtshan ma la yang mchod yon dbul zhes bya ba'i don to//rgya chen sa yi dkyil 'khor ni/ /zhes bya ba la sogs pa ni dkyil 'khor yangs pa rgya chen po 'di'i steng na mnyam pa med pa dngos grub 'dod pa'i rig sngags 'chang gis tshul de ltar rtag tu mchod pa legs par bya'o zhes pa'o/ /de ltar mchod pa bya ba yang dkyil 'khor de nyid du mchod pa de ltar bya ba dang /gong du mchod pa'i dkyil 'khor 'byung ba de'i sngon du bsnyen pa byed pa'i tshe bris te mchod pa dang / skabs skabs su mchod pa'i dkyil 'khor de'i steng du mchod pa bya'o zhes pa'o/ /gong du rgyud 'byung ba zhes bya ba'i skabs su gtogs par skabs gnyis pa rdzogs so// //da ni gong du smos pa yi dags phal po che dang / phreng pa'am de'i yan lag tu gtogs pa'i sngags rnams 'byung ngo / /de nas gzhan yang sngags 'byung ste/ zhes bya ba ni gong ma las gzhan pa'i skabs 'byung ba la bya'o/ /dbus kyi yi dags kyi'o zhes bya ba ni dkyil 'khor gyi dbus ma yi dags dgug pa'i sngags kyang yin te/ yi dags kyi mgor me tog dor ba'i sngags nyid do/ /yi dags gdong za ba'o/ /'di ni grwa'i be con bzhi'i sngags so zhes pa ni yi dags kyi mgor me 'bar ba can no//oM pre to la ka ya hUM phaT ces pa ni yi dags gsal ba'i sngags so/ /oM pre ta b+hi ba ma na ha ka hUM phaT ces pa ni yi dags 'jigs pa gsod pa'i sngags so/ /oM pre ta dz+wa la hUM phaT ces pa ni yi dags so//k+Shi phra phre tot+ka ta hUM phaT ces pa ni myur ba'i yi dags phal po che'i sngags so/ /yi dags phreng ba'i zhes pa na/ yi dags phreng ba mi sdug ba gsang ba srin bya gdon bsrung ba'i cho ga la dga' ba zhes bya ba'i don to/ /de dag ni yi dags kyi dkyil 'khor gyi sngags kyi tshogs so zhes pa ni dbus kyi yi dags kyi sngags dang be con bzhi'i sngags la sogs te yi dags kyi dkyil 'khor gyi sngags thams cad do//sngags rnams 'byung ngo zhes pa ni yi ge 'bru bcu bdun po dang / /mtshog ma la sogs pa'i sngags 'byung ba la bya'o//kro d+ha ba ra bi ra zhes pa ni khro bo'i mchog dpa' bo zhes bya'o/ /swa sa ma ye na A gats+tsha A gats+tsha/ zhes pa ni/ rang gi dam tshig gis gshegs su gsol zhes bya'o/ /oM AHhUM snying po'i/ /i daM phre ta a sa nan/ yi dags kyi gdan dang / yi dags phal chen 'di bsrung du gsol bsrung du gsol zhes pa'o//oM a kro te ka ya mAn+ta ka /khro bo gcig tu gshin rje gshed po zhes pa'o/ /ha na ma tha b+hany+dza hUM phaT/ rgyob cig /chom cig sregs shig ces pa'o/ /'di ni khro bo'i rgyal po gang gi rtog pa yin pa 'di'i sngags yi ge bcu bdun pa'o zhes pa ni yi ge 'bru grangs lhag chad du 'gyur du dogs pa'i phyir yi ge 'bru grangs kyi tshad nges pa smos so//oM AHhUM zhes pa ni khro bo nyid kyi snying po 'bru gsum pa'i sngags so/ /oM ka la hUM phaT ces pa la sogs pa ni snying ga dang /mtshog ma dang / spyi gtsug dang mtshon cha la sogs pa'i sngags yan lag lnga pa'i sdud pa'i tshig go zhes pa'o/ /oM dz+wa la dz+wa la ni zhes pa ni nu mjing gnyis su bsams pas go bgos par 'gyur ro/ /oM be bas swa zhes pa ni lag mthil gnyis su bsam zhes pa'o//oM swa ya mi sha bya ba ha ri ya swA hA zhes pa ni dbus kyi khro bo chen po la sme gtor dbul ba'i sngags so/ /gtor ma sngar bshad pa'i nya dang sha la sogs pa dang sbyar thug gi gtor ma yang sngar bshad pa la bya'o/ /oM di ba byan na b+h+yo dza ni zhes pa ni/ grwa bzhi'i be con bzhi la lha bshos dbul ba'i sngags so//sme gtor la sogs te/ gtor ma phra mo dag la sngags kyis gdab pa yang sngags 'dis bya'o/ /dbul ba'i sngags so zhes pa ni lha bshos te/ sngar bshad pa yang bya'o/ /la li ni zhes pa ni dkyil 'khor kyi nang gi phyogs bzhir yi dags phreng bar bkod pa rnams la gtor ma dbul ba'i sngags so//gsum pa'o zhes pa ni 'di yan chad le'u 'am skabs gsum pa rdzogs pa la bya'o// //da ni gsang ba'i mchod par gtogs pa'i skabs sam/ le'u 'chad de gsang ba'i mchod par gtogs pa la don rnam pa bcu gnyis kyis bstan te/gleng bslang ba sngar byas nas phyag rgya bcing ba'i rim pa dang / phyag rgya'i mtshan ma dang phyag rgya bcing ba'i nges pa dang / phyag rgya bcing ba'i gsang sngags dang / phyag rgya 'di phan yon dang ri mo bri ba'i phyag rgya'i mtshan nyid dang /ri mo bri ba'i nges pa dang / phyag rgya bsgrub pa'i dkyil 'khor dang / gsang ba'i mchod pa dang / sngon du bsnyen pa'i cho ga dang / /gsang ba'i mchod pa'i sgo nas lam mang po bsgrub pa dang / phyi'i mchod pa'i sgo nas mjug bsdu zhing phan yon smos pa'o/ / de dag kyang rim bzhin du sbyar te bshad do/ /gsang ba'i mchod pa'i le'u 'am/ skabs su gtogs na/ dang por be con gyi phyag rgya bshad pa 'byung ba'i phyir gsang ba'i mchod pa'i zhar la be con gyi phyag rgya sngar bshad pa de nyid dang por bshad nas de'i rjes la gsang ba'i mchod pa bshad de skabs sam/le'u 'dir gsang ba'i mchod pa gtsor bshad pa'i phyir ro/ /da ni gleng bslang ba sngon du byas nas phyag rgya bcing ba'i rim pa zhes bya ba'i don bstan to/ /de nas zhes pa ni de ma thag tu 'das pa'i tshig bshad zin nas de las gzhan pa'i tshig gam don 'chad pa la bya zhes pa'o//gzhan yang 'jam pa'i dbyangs kyis ni/ /zhes pa ni khro bo nyid 'jam dbyangs yin te tha mi dad ces pa'o/ /khro bo dpa' bo gcig pu ni/ /zhes pa la khro bo nyag gcig 'khor ram lha phal pa gzhan dang ma 'dres shing btsan par bzhugs pa la bya'o//tshad med gzi brjid bdag nyid che/ /gzi brjid tshad med pa ni tshad med mthu stobs che ba la bya'o/ /de yi phyag rgya bshad par bya/ /zhes pa ni yon tan de lta bu dang ldan pa'i bdag nyid chen po khro bo de phyag rgya bshad par bya'o zhes pa'o/ / dkon mchog gsum gyi dam tshig ni/ /zhes pa ni dkon mchog gsum yang de las mi 'da' ba'am/ de'i bka' 'am des byin gyis brlabs pas na khro bo nyid kyang byin gyis rlob cing de las 'da' bar mi mdzad do/ /phyag rgya de yang thabs dang go rims ji ltar byas te bcing zhe na/dang por sngar thal mo sbyar te/ dbul bar bzhag ste lha la mngon par bstan nas/ oM na mo bud+d+ha d+harma saM g+ha b+h+yaH zhes pa'i sngags brjod de dgrol lo/ /de'i 'og tu phyag rgya bcing bar bya ste/ sngar byas nas zhes bya ba'i tshig des lag pa mdun du bzhag la phyag rgya bcing ba yang bya ste/lag pa g.yas pa bdag gi snying ga'i thad kar bzhag la 'og nas 'byung ba'i cho ga bzhin du phyag rgya bcing bar bya'o/ /phyag rgya bcing ba'i mtshan nyid bstan pa yang / rig 'dzin dag gis rtag par ni/ /zhes pa nas/ bzang po bcing zhes pa'i bar gyis bstan to//rig 'dzin dag gis rtag par ni/ /zhes pa ni rig pa 'dzin pa'i sngags pa dag gis be con gyi phyag rgya bsgrub pa'am/ be con gyi phyag rgya las byed pa de dag gis rtag par bcing ste/ bsgrub cing las bya'o/ /mtho bong legs par sbas pa ni//zhes pa ni nang du bcug ste sbas pa zhes pa'o/ /rab tu bsdams pa bzang po bcing / /zhes pa ni rab tu bsdams pa bcing zhes pa de yang gang zhe na lhod lhod po mi bya bar bsdam mo/ /de nyid yon tan dang ldan pa'i phyir bzang po zhes pa'i tha tshig go/ /da ni phyag rgya bcing ba'i nges pa bshad pa yang //cho ga zhes pa be con rgya/ /zhes pa nas/ gzhan du nam yang mi 'ching ngo / /zhes pa'i bar gyis bstan/ cho ga zhes pa be con rgya/ /zhes pa la sogs pa ni sngags pas be con gyi phyag rgya de ltar bcings pa'i sngags gang dang sbyar te bcing bar bya zhe na/ snying po 'bru gsum po'am/rtsa ba'i sngags 'bru bcu bdun po'am/ de gnyis gang rung bzhig brjod cing / be con gyi phyag rgya de bcing bar mi bya'o/ /yang na de gnyis ma gtogs par logs shig tu sngags pas be con gyi phyag rgya'i gsang sngags 'og nas 'byung ba bzhin brjod cing phyag rgya bcing bar bya'o//sngags de ma gtogs par gzhan gang gis kyang be con gyi phyag rgya de bcing bar mi bya'o zhes pa'i tha tshig go/ /da ni phyag rgya bcing ba'i gsang sngags bshad de/ de yang oM zhes pa nas phaT ces pa'i bar gyis bstan to/ /na ma sarba ta thA ga to zhes pa ni/de bzhin gshegs pa thams cad kyi khro bo rnam par rgyal ba'i yi dags kyi mgo bo'i rtse la me 'bar ba zhes bya ba'i don to/ /da ni phyag rgya'i phan yon bshad pa yang / phyag rgya gcig pur gyur pa 'di/ /zhes pa nas/ bdud rnams thams cad zhi bar byed//ces pa'i bar gyis bstan to/ /phyag rgya gcig pur gyur pa ni/ /zhes pa ni phyag rgya grangs nyung du gcig pu yin pa la mi bya'o/ /be con gyi phyag rgya thams cad kyi gtso bo'am/ mchog gam btsan par gyur pa gcig pu la bya'o zhes bya ba'i don to/ /khro bo'i snying po sngags 'bar byed//ces pa ni phyag rgya de dang ldan na khro bo nyid dang snying po 'bru gsum pa dang rtsa ba'i sngags yi ge 'bru bcu bdun pa yang gzi byin dang ldan zhing mthu can du gyur te las gang brtsams pa byed nus par 'gyur ro/ /yang rnam pa gcig tu phyag rgya de dang ldan par byas nas khro bo'i snying po dag 'bru gsum po'i byin can dang ldan pa mthu can du gyur pa la bya'o//mtshon cha ma lus pa yi gtso/ /zhes pa ni phyag rgya des mtshon cha'i phyag rgya thams cad kyi las thams cad kyang des mdzad pas na mtshon cha'i phyag rgya thams cad kyi gtso bo'am/mchog dam par gyur pa ni be con phyag rgya'o/ /yang gcig tu na mtshon cha ma lus par gdengs par byed pa'am/ 'debs par byed pa zhes kyang drang du rung ste/ be con gyi phyag rgya des mtshon cha'i phyag rgya rnams 'debs pa lta bu dang / gdengs pa lta bu'am/ 'phen pa lta bur 'gyur ba'i phyir ro/ /bdud rnams thams cad zhi bar byed/ /ces pa ni nad dang bgegs la sogs par zhi bar byed pa'i tha tshig go/ /da ni ri mo bri ba'i phyag rgya'i mtshan ma nyid bshad pa yang / ji ltar dkyil 'khor du bri ba/ /zhes pa nas/ rang gi dkyil 'khor du bri'o/ /zhes bya ba'i bar gyis bstan to/ /ji ltar dkyil 'khor du bri ba/ /zhes pa be con gyi phyag rgya de dag dkyil 'khor du ji ltar bri bar bya ba de'i cho ga bshad par bya'o zhes pa'o/ /be con dbyug pa lta bu'i tshul/ /zhes bya ba la sogs pa ni rgya gar skad du daN+Da zhes bya ste/ mdung shing dang dbyug pa tha mal la sogs pa la yang daN+Da zhes bya ste/daN+Da de ni gzhan la mi bya'i dbyug pa lta bu'i rtse yid kyis phra la dbus sbom pa la 'jug kyang yid kyis zlum pa la phra ba tshang zungs can du byas pa la be con zhes bya'o/ /be con gyi mgor mi thod bri'o/ / yi dags mang po rtag tu bri/ /zhes pa ni be con gyi mi mgo can gyi ri mo bri ba'i nges pa bshad de/ de yang phyag rgya gang du bri zhe na/ gong du sngar bshad pa'i yi dags phal po che'i dkyil 'khor du rtag tu bri bar bya zhes pa'o/ /de las gzhan du nams kyang min/ /zhes bya ba ni yi dags phal po che'i dkyil 'khor du ma gtogs pa gzhan gang yang be con gyi phyag rgya ste bri bar mi bya'o//rig 'dzin gyi ni cho ga bzhin/ /rgya 'di dur khrod thal bas so/ /zhes pa ni sngags pas cho ga bzhin du be con gyi phyag rgya bsgrub pa ni mi ro bsregs pa'i thal bas bri bar bya'o//yang na 'di nyid logs shig tu/ /zhes pa la sogs pas ni yang na be con gyi phyag rgya de'i yi dags phal po che'i dkyil 'khor las logs shig tu nam gyi tshe sgrub par 'dod pa'i sgrub pa pos be con gyi phyag rgya sgrub par 'dod pas bsgrub pa'i dkyil 'khor gyi be con gyi phyag rgya bris te bsgrub par bya'o//de nas phyag rgya bsgrub pa'i dkyil 'khor bshad pa yang / de nas phyag rgya bsgrub pa yi/ /zhes pa nas/ phye ste de nas mchod pa bya'o/ /zhes pa'i bar gyis bstan to/ /de nas phyag rgya bsgrub pa yi/ /dkyil 'khor 'dir ni bshad par bya//zhes pa ni be con gyi phyag rgya bsgrub pa'i dkyil 'khor bshad par bya'o/ /gru bzhi snga ma bzhin du ste/ /zhes pa sngar bshad pa'i dkyil 'khor rnams las gru bzhi gang yang rung ba cig bya'o/ /yi dags phal chen 'dir yang bri/ /zhes pa ni sgrub pa'i dkyil 'khor 'di'i skabs su grwa bzhi dang phyogs bzhi rnams su be con gyi phyag rgya bri bar bya ste/yi dags phal chen ma bris kyang / /be con gyi phyag rgya bsgrub pa'i dkyil 'khor 'di'i rtsa ba'i phyi mor gyur pa yi dags phal po che'i dkyil 'khor yin pas na be con gyi phyag rgya bsgrub pa'i dkyil 'khor la yang ming 'di skad ces bya ste/dkyil 'khor de 'dir bri'o zhes pa'o/ /de yi dbus su be con gzhag /ces pa ni be con gyi phyag rgya dngos su rdzas la byas te gzhag go/ /dkyil 'khor gyi dbus su pad+ma 'dab ma brgyad pa gcig dur khrod kyi thal bas bris la de'i snying po'i dbus su be con mi thod can mgo byang du chad zungs bdag la bltas par bri'o//phyogs brgyad rnams su'ang de bzhin no/ /zhes pa ni phyogs mtshams brgyad dang dbus su snying po la be con gyi phyag rgya dgu bris pas na/ be con gyi phyag rgya'i dkyil 'khor zhes bya ste/de lta bu'i tshul du gnas pas bsgrub par bya'o/ /be con gyi phyag rgya de dag kyang pad+mo'i gdan la bzhugs par bri'o/ /de bzhin du ni lho phyogs sgo/ /phye ste de nas mchod par bya/ /zhes pa ni de dkyil 'khor de ltar bris la sgo lhag ma rnams bcad de lho phyogs sgo phye ba'i logs nas/phyi nang gi mchod pa bya zhes pa'i tha tshig go/ /da ni gsang ba'i mchod pa bshad pa yang / phyag rgya'i sngags ni ma lus pa/ /zhes pa nas/ 'di las thams cad 'grub par bya'o/ /zhes pa'i bar gyis bstan/ phyag rgya'i sngags ni ma lus pa//zhes bya ba la sogs pa ni be con gyi phyag rgya'i sngags thams cad khro bo'i rgyal po'i sngags kyi bar du bcug ste/ de lta bu'i tshul gyis bzlas brjod byas na lha rnams mnyes par 'gyur te 'grub pas na de nyid mchod par 'gyur ba yin no/ /da ni gsang ba'i mchod pa bshad de/mchod pa rnam pa gnyis te phyi dang nang gi'o/ /de la phyi'i mchod pa ni thams cad kyi spyod yul du gyur pa'o/ /nang gi mchod pa thams cad kyi spyod yul du mi 'gyur bas de nyid las gsang ba'i mchod pa zhes bya ste/ sngags rim par 'gyur ba nyid las mchod pa'i rim gyis so zhes bya ba smos so//oM na mo bud+d+ha bya ba dang / hUM phaT hUM zhes pa ni khro bo'i rgyal po'i sngags so/ /'di dag kyang be con gyi phyag rgya'i sngags dkyus ma nyid yin te spel zin to/ /be con gyi phyag rgya'i sngags dkyus ma nyid yin te/ 'di dag ni khro bo'i rgyal po'i sngags yi ge 'bru gsum po'i bar du be con gyi phyag rgya'i sngags bcug ste bzlas so//'di ni khro bo rnam par rgyal ba'i gong du bcug pa'i be con gyi phyag rgya'i sngags so zhes pa ni 'di ni khro bo'i rgyal po'i sngags kyi bar du be con gyi phyag rgya'i sngags bcug ste/bzlas brjod bya ba'i gsang sngags yin no/ /'di las thams cad bsgrub par bya'o zhes pa ni/ sngags 'di'i 'og nas 'byung ba'i las rnam bzhi la sogs pa bsgrub par bya'o/ /da ni sngon du bsnyen pa'i tshe'i cho ga bshad pa yang / de nas dngos grub kun gyi mchog /ces pa nas/ hUM dang ldan pas bskul ba gzhan/ /zhes pa'i bar gyis bstan to/ /de nas dngos grub kun gyi mchog /ces pa ni/ dngos grub bsgrub pa'i mchog tu gsungs pa ni/ sngon du bsnyen pa byed pa'o/ /khro bo'i gtso bo'i de kho na/ /zhes pa ni khro bo'i rgyal po de kho na nyid mchod pa'i gsang ba'i mchod pa dang ldan pas be con gyi phyag rgya bsgrub pa'i dkyil 'khor du bsnyen pa bya'o zhes pa'o//bsnyen pa'i sngags khro bo'i rgyal po'i bar du bcug pa'i be con gyi phyag rgya'i sngags nyid kyis bya'o/ /gsang ba'i mchod pa dang ldan pa'i zhes bya ba la sogs pa ni sngon du bsnyen pa byas la sngon du bsnyen pa de yang thabs ji ltar bya zhe na/sngar gong du bshad pa'i gnas dben pa cig tu tsan+dan dmar pos pad+ma 'dab ma brgyad pa cig bris la/ 'dab ma'i rtse mo brgyad du be con mi'i thod pa can brgyad bris la ri mo mi shes na de ltar sems kyis bsam mo//be con khro bo'i bar bcug bri/ /zhes pa ni pad+ma'i rtse mo'i brgyad par be con brgyad pa bri ba dang / dbus su be con gcig ste be con dgu bri ba ni be con gyi mgo la mi thod bris pa'i steng du yi ge hUM bsam pa'ang bri'o/ /'bar du bcug gam sreg ces bya/ /zhes kyang drang du rung ste/dngos su na yi ge hUM thod pa'i steng du bri zhing bsam par bya'o/ /dbus su dgu pa gzhag nas ni/ /zhes bya ba la sogs pa ni dbus su be con gyi phyag rgya bri ba ni go rims bstan te/ de la dang po dbus kyi snying po la be con gyi phyag rgya dgu pa gcig bri/ de'i 'og tu shar phyogs nas lho phyogs logs su lha khang bskor ba'i tshul du bskor nas/phyag rgya de nyid bsams kyang rung ri mo bris kyang rung ste/ me tog re re blangs te de las sa bon hUM gis btab ste/ be con gyi phyag rgya'i gnas su dor zhing / be con gyi phyag rgya rnams me tog gis dgod par bya'o//be con kun gyi sa bon hUM/ /yi dags spyi bor gzhag par bya/ /zhes pa ni be con dgu char gyi sa bon yi ge hUM yin te/ sa bon 'di be con rnams kyi mgo la mi thod yod par bsam par bya'o/ /sa bon ni thams cad skyed par byed pas ni hUM 'di las kyang lha'i skur bsgyur ba dang /dngos grub rnam gsum la sogs pa mthar bla na med pa'i byang chub man chad 'grub par byed pa yin na sa bon zhes pa'o/ /khro bo'i rgyal po'i bar du gzhug pa'i sngags 'byung ba/ ci'i phyir bar du gzhug pa dang / bar du gzhug pa'i phan yon rnams smos te/thog mar oM dang ldan byas te/ /zhes pa ni khro bo'i rgyal po'i sngags 'bru gsum pa las be con gyi sngags kyi mgo la oM dang por smos pa ni mthu can nam gzi byin can du 'gyur ba yin pa'i phyir khro bo'i rgyal po'i sngags oM dang por smos so//oM na mo mchod par 'gyur zhes pa ni be con gyi sngags dkyus ma nyid yin te/ sngags 'dis ni 'phags pa mnyes pa'am mchod par 'gyur ro/ /a ni khro bo rnam rgyal gyi/ /zhes pa a 'di ni khro bo rnam par rgyal ba'i sngags yin te/ bar dang por 'byung ba'i a la bya ste/'dis ni khro bo'i rgyal po'i sa bon la skul bar byed pa'am/ spyan thabs su gzigs pa'am/ bka' nan mdzad pa'i sa bon gyi dam tshig yin par bshad do/ /yang a de ni rgyal po lta bu'i bka' stsal pa'am spyan thams cad su gzigs pa'o/ /a de mi 'da' bar mdzad pa yang yin no//oM na mo bud+d+ha d+ha rmA saM ge b+h+yaH/ /sangs rgyas kun gyis mngon par bstod/ /ces pa khro bo'i rgyal po'i sngags oM dang a gnyis kyi bar na sngags 'di 'byung ba ni be con gyi phyag rgya'i sngags nyid yin te/ sngags 'dis ni sangs rgyas kun bsnyen nas legs so zhes bya ba la sogs pas bstod par mdzad do//be con rnams ni thams cad kyang / /zhes pa be con bya ba rnam pa mang du 'dren te/ yi ge phreng ba la yang be con zhes bya be con gyi phyag rgya nyid la yang be con zhes bya ste/ 'di'i skabs su ni be con gyi phyag rgya'i sngags nyid la bya'o//rang gi dam tshig bskul bar ldan/ /zhes pa hUM ni be con gyi sngags kyis bskul ba'am gzhan 'debs pa'o/ /be con gyi sngags nyid gyi don khro bo chen po'i gzi brjid 'bar ba can zhes pa dag kyang 'byung ba la bya'o/ /thams cad rang gi dam tshig ldan//zhes pa be con gyi sngags te rkyang pa ma yin te rang gi dam tshig hUM dang yang ldan no/ /de ltar ldan pa de rdo rje dang / pad+ma'i sngags sam zhe na/ ma yin te/ de bzhin gshegs pa'i rigs las byung / /zhes smos so/ /be con gyi sngags rnams la khro bo'i rgyal po'i dam tshig gi sngags a ldan par byas na de ni de bzhin gshegs pa'i rigs las byung ba'i gsang sngags yin no//bskul ba'i tshig dang rab ldan zhing / /zhes pa be con gyi sngags de khro bo'i snying pos skul bar byed pa hUM dang ldan na be con gyi phyag rgya nyid kyi sngags bskul ba'i tshig dang ldan par 'byung ba nyid la bya ste/de yang sarba ta thA ga to kro d+ha bi dzA ya ag+ne ra la sogs pa'i sngags 'byung ba nyid la bya ste/ de yang khyod ni de bzhin gshegs pa thams cad kyi khro bo'i rgyal po yi dags kyi mgo la me 'bar ba can zhes bya ba la sogs pa'i bskul ba'i tshig dang ldan pa 'byung ba'i tha tshig go//khro bo'i lta bas brtags pa dang / /zhes pa khro bo rgyal po'i sngags a de khro bo dang sa bon hUM la gzigs pa'am/ de mdzad pa'i spyan thabs 'dra bar bzhugs pa de ltar bshad pa bzhin du de dang ldan par bya'o/ /de ltar bshad pa ci mngon zhe na/'og nas 'byung ba bzhin du byas na mngon no/ /kha cig na re/ a dang po ldan te khro bo'i lta ba dang yang ldan par bya ba yin zer ro/ /rang rang bskul mas bskul nas ni/ /zhes pa las rnam bzhi la sogs pa'i bskul tshig la bya'o/ /khro bo'i rgyal po'i sngags dang be con phyag rgya'i sngags de ltar spel ba dang ldan zhing las rnam bzhi la sogs pa'i bskul ba'i cho ga dang yang ldan par bya ba zhes pa'i tha tshig go//de ma thag tu 'grub par 'gyur/ /zhes pa be con gyi phyag rgya'i sngags zlos pa'i tshe na yang don de lta bu yid la mngon du byas te bzlas na las myur du 'grub po//a 'di khro bo rnam rgyal gyis/ /khro bo lta bas bltas pa'o/ /zhes pa be con gyi sngags dag pa'o/ /a 'di ni khro bo rnam par rgyal bas lta ba yin no/ /gong ma bshad pa khro bo'i lta bas brtags te/ a de dang ldan pas na a de spyan thabs su mdzad pas na/rang gi dam tshig dang ldan pas/ /zhes pa gong gi hUM thung du shos ni rang gi be con gyi phyag rgya'i sngags la skul bar byed pa yin pas dam tshig dang ldan pa zhes bya'o/ /hUM dang ldan pas bskul ba gzhan/ /zhes pa be con gyi sngags kyi mjug gi hUM ring po shos ni gong ma'i hUM thung du shos la bskul ba gzhan par zhes pa'o//zhi ba rgyas pa dbang dang dgug /ces pa nas gsang ba'i mchod par grags zhes pa'i bar du ni gsang ba'i mchod pa'i sgo nas las mang po bsgrub pa'i zhes bya ba bshad do/ /zhi ba la sogs pa'i las 'di dag be con gyi sngags la lta ba dang /bskul mar ldan na las 'di dag byed do/ /dbye ba yi ni bskrad pa rnams/ /zhes dben byas shing bskrad pa'o/ /gsang ba'i mchod pa'i sbyor ba yis/ /bdag gis mdor ni bshad par bya/ /zhes pa be con can gyi sngags dang /khro bo'i sngags spel te bzlas na las drug pa 'di dag gsang ba'i mchod pa'i cho ga dang ldan par bsgrubs na de dag 'grub par 'gyur ba de sh+lau ka sum stong las mdo tsam zhig bshad par bya'o/ /sngags 'di dag ni sngar yang spel ba bshad na yang ci'i phyir bshad ce na/las drug po de dag byed na so so'i bskul ba'i tshig gi khyad par mi 'dra ba rnams bshad dgos pa'i phyir sngar gong du bshad mod kyi/sngags de dag spel zhing bar du gzhug pa'i dgos pa tsam zhig bshad do/ /de yi thog mar yi ge oM/ /zhes pa be con gyi phyag rgya'i sngags kyi thog ma la yi ge oM yod pa ni khro bo'i rgyal po'i sngags te mthu can nam gzi byin can du 'gyur ro//de nas gzhan pa'i sngags spel byed/ /ces pa/ na mo bud+d+ha/ d+harmA/ saM ge b+h+yaH/ zhes pa ni sngags spel zhing rgyas par byed pa'o/ /de bzhin gshegs pa'i dam tshig nyid//gsum pa yin par yongs su bsgrags/ /zhes pa bar gyi a gnyis las dang po'i shos ni gong du sngags rnam gnyis las 'das pa gtogs pa de dang gsum ste/ de bzhin gshegs pa'i dam tshig gi sngags yin par bstan to/ /su yang mi 'da' ba'o/ / sngags kyis bskul pa'i tshig dag 'dir/ /zhes pa khro bo chen po 'bar ba zhes bya ba dag 'byung ba'i be con gyi sngags la bya'o/ /dngos grub ster ba bzhi pa ste/ sarba ta thA ga ta zhes pa/ de nas sngags kyi rang dngos so/ /zhes pa bar gyi a gnyis la be con gyi phyag rgya'i sngags la/sarba ta thA ga ta kro d+ha b+hi dza ya zhes pa la sogs pas bskul nas/ dngos grub ster bar mdzad par gtogs par gzhag pa'o/ /de'i 'og tu 'di la sogs pa'i sngags gong ma rnams ni be con gyi phyag rgya nyid kyi sngags so/ /mjug gi hUM ni khro bo yi//sngags ni 'phel bar byed par bshad/ /ces pa mjug gi hUM thung du shos ni sngags rnams 'phel zhing rgyas pa dang gzi can du byed do/ /de las gzhan ni khyad par du/ /rang gi bskul ba'i tshig gis byed/ /ces pa la hUM thung du shos ni de las gzhan pa la mjug gi hUM ring po shos kyi ni dbang dang zhi rgyas la sogs pa'i las 'og nas 'byung ba rnams kyi bskul ba'i tshig dang ldan par byas na/sngags rnams 'phel zhing rgyas pa dang / gzi can du 'gyur ro zhes pa'i tha tshig go/ /dbang gi ngo bo smos pa ni/ /zhes pa ni dbang du bya ba lha la sogs pa'i gang dang gang de'i ming nas brjod de de'i bskul tshig dang /mtha' mar swA hA mthar sbyar te bzlas te zhes pa'o/ /phaT byung na be con gyi sngags nyams par 'gyur bas mi 'byung bar hUM ring po'i 'og tu so so'i bskul tshig bcug ste nges par bya'o//mi mthun par bshad pa ni 'og ma ltar mi rung ngo / /gong du smos pa'i be con gyi phyag rgya'i sngags kyi mjug la hUM gnyis kyi bar na phaT yod pa ni drag shul gyi yin pas zhi ba dang / rgyas pa dang / dbang gi las rnams la ni mi sbyor ro/ /de ltar ma sbyor na yang be con gyi sngags bcad pa'i kha ma bskongs pa'i skyon du mi 'gyur zhes zer ro//zhi ba'i phyir ni bskul ba nyid/ /mjug tu bau ShaT btags par bya/ /zhes pa su la bya ba'i ming hUM gi 'og tu bcug la de nas bskul ba'i tshig gzhug go/ /de bas na drag shul la sogs pa gang la sbyar ba la 'byung ba de bzhin du sbyor te las bya'o//de bzhin gshegs pa'i rigs las byung / /zhes bya ba la sogs pa ni rgyas pa ni rgyas pa rnam pa gnyis te/ 'jig rten dang 'jig rten las 'das pa'i rgyas pa'o/ /de la 'jig rten las 'das pa'i rgyas pa bsgrub par 'dod pas/sa dang pha rol tu phyin pa dang mthar bla na med pa'i sangs rgyas su bsgrub pa man chad dang / 'byor pa phun sum tshogs pa de las gong ma med pa'i rgyas pa ni/ de bzhin gshegs pa'i rigs las byung ba ste/ de bsgrub par 'dod pas sngags 'di bzlas so//rgyas pa'i phyir ni sngon bzhin du/ /zhes pa 'di ni 'jig rten pa'i rgyas pa'o/ /rgyas phyir bskul ba'i thog ma dang / /zhes pa g.yul las rgyal bar byed 'dod dam/ shags las rgyal bar byed par 'dod na zhes pa'o/ /khro bo hUM ni tha mar sbyar/ /zhes pa la sogs pa ni drag po'i tshig tu zad do//gsang ba'i mchod pa'i cho gar grags/ /zhes pa ni gong du bshad pa'i tshul de lta bu dag gi gsang ba'i mchod par grags pa yin no/ /da ni phyi'i mchod pa'i sgo nas mjug sdud cing phan yon smos pa zhes pa bshad de/ de ltar mchod pa'i rim pa der//be con dag ni byas par 'gyur/ /zhes smos te/ 'di ni gong du smos pa rnams kyi mjug sdud pa rnams kyi tshig ste/ de ltar ni be con gyi phyag rgya maN+Dal der gsang ba'i mchod pa'i rim pa de byas par rdzogs par 'gyur ba yin no zhes mjug sdud de/ be con gyi maN+Dal dag gis rdzogs so//gsang ba'i mchod pa'i sbyor ba yis/ /zhes pa la sogs pa ni gsang ba'i sbyor ba dang / ldan pa des na ji ltar 'dod pa las dang / byed ces pa dang sbyar te/ de bzhin du phyi'i mchod pa me tog la sogs pa las so so'i kha dog dang ro tsam gyis na mchod pa sbyar bas las byed do//bzlas pa byed kyang 'grub par 'gyur/ /zhes pa la sogs pa ni bzlas pa'i grangs dang / /dus chad pa bzhin du ma bzlas kyang gsang ba'i mchod pa dang ldan na/ 'phral la byas kyang 'grub par 'gyur ro/ /bsnyen pa la mi bya'i/ 'phral kyi las la bya'o//ji skad bshad pa'i tshul dag dang / /zhes pa la sogs pa ni dbang du bya ba la sogs pa'i las de rnams ji skad bshad pa'i tshul bzhin du gsang ba'i mchod pa'i sbyor ba de 'dra ba dang ldan pa des ni/ tshes grangs dang / skar ma dang / nad kyi dus dang smyung ba dag kyang mi dgos par bsgrub pa des shes par bya'o//phyag rgya'i dkyil 'khor legs byas pa/ /zhes pa la sogs pa sgrub pa po de gsang ba'i mchod pa'i cho ga yang zhes be con gyi dkyil 'khor du legs par dbang bskur bas khrus la sogs pa ma byas pa dang /ci 'dod dgu rang nyams su spyod ces pa'i don to/ /ci yang rung bar gtor ma dang / /zhes pa lha bshos dang gtor ma mchod pa'i yo byad 'di rung 'di mi rung 'dam ka med do/ /gang gis zhes pa bsgrub pa gang gis bsgrub pa'i tshig dang ldan pa'i so so'i las bya'o zhes pa'i/ /mchod pa byed pa zhes pa sngags dang gsum kas mchod do zhes bya'o//byang chub ces pa bsgrub pa'o/ /zhes pa'o/ /rab tu gus pa'i zla ba drug gis zhes pa de 'dra ba'i tshul du zla ba drug tu gus pa'i sems kyis bzlas pa bya ba'i don to/ /de ni ci 'dod dgos pa rnyed/ /ces bya dbang du bya ba'i las la sogs pa 'di dag byed pa'i cho ga gong du smos pa'i las kyi dkyil 'khor de rnams las gang yang rung ba bsgrub pa'i dkyil 'khor de bris pa las bsgrub pa ni be con gyi dkyil 'khor du dbang bskur ba'i sgrub pa pos las kyi dkyil 'khor ma byas kyang bskur ba'i tshig dang ldan par so so'i las bya'o//bzhi pa'i las bshad pa rdzogs so// //da ni be con gyi phyag rgyar gtogs pa'i spyi'i rgyud las sgrub thabs gong ma las 'byung ba'i cho ga de dag 'dir bsgrub par bya'o/ /bsgrub pa la rnam pa gnyis te/ bsgrub pa sngags spel ba dang / sngags ma spel bar tha mal bar bsgrub pa'o/ /de la dang por ni sngags ma spel bar tha mal bar bsgrub par bya'o/ /de la dkyil 'khor gyi cho ga bshad de/ /de nas be con phyag rgya yi/ /zhes pa nas/ sngags des bsrungs te dbul bar bya//zhes pa'i bar gyis de la dkyil 'khor gyi cho ga bshad do zhes pa bstan to/ /de yi dkyil 'khor gnyis pa gzhan/ /zhes pa la sogs pa ni be con gyi phyag rgya'i dkyil 'khor gong ma las gzhan pa'i dkyil 'khor gnyis pa de bshad do//dkyil na yi dags zhes bya la/ be con gyi phyag rgya bsgrub pa'i dkyil 'khor de'i ming yang dkyil na yi dags zhes bya ba'i dkyil 'khor ro/ /sgrub pa mtshan mo dur khrod du/ /zhes sgrub pa pos mtshan mo dur khrod kyi gnas su dur khrod kyi thal ba sngar smos pa'i bsgrub pa'i dkyil 'khor bri'o//sgo gzhan bcad la lho phyogs kyi sgo phye ste bsgrub pa dang mchod pa dag bya'o/ /dur khrod dag gi thal ba yis/ /gru bzhi pa la sgo bzhi par/ /zhes pa dur khrod rnam pa gnyis te/ ro bsregs pa'i dur khrod dang / ro ma bsregs pa'i dur khrod de/de lta bu'i gnas su phyin te/ nyi ma ma nub par dkyil 'khor bris la/ nyi ma nub nas bsgrub pa la 'jug par bya'o/ /mi ro dang thod pa 'di dag kyang phyag rgya'i mtshan ma yin par shes par bya'o/ /mi ro ro smad dag dang ldan/ /zhes pa dkyil 'khor gyi dbus su pad+ma 'dab ma brgyad pa bris la de'i dbus su mi ro mgo med pa'i ro stod shar phyogs su bstan pa rkang pa nub phyogs su 'dug par gzhag par bya'o//mi ro la yang thal bas ri mo bya'o/ /bla re rnga yab me long dril/ /zhes pa zla ba dang zla ba phyed pa la bya'o//me tog phreng bas mdzes par byas/ /zhes pa la sogs pa ni dkyil 'khor de nyid lha rdzas zhes bya ste/ bzang po zhes bya ba'i don to/ /dkyil 'khor bzang po'i nang rim gyis/ phyogs bzhir mgo lus tshang ba'i yi dags gcig la gcig 'brel bar chur 'khor bar bri'o//nang gi ngos bzhi dang grwa bzhir yi dags thod pa brgyad bri ste/ des dkyil 'khor bris pa'i 'og tu dbus kyi yi dags kyi dur khrod kyi thal bas be con gyi chad zungs kyis bdag la lta bar bri'o/ /dkyil 'khor gyi cho ga de dag kyang sngar bsnyen par byed pa'i tshe ni cho ga 'di bzhin du dur khrod kyi thal bas bri'o//bsgrub pa'i tshe ni dkyil 'khor du dur khrod kyi thal bas bris la yi dags dang / thod pa rnams rnyed na cho ga bzhin du dngos su gzhag go/ /be con gyi phyag rgya yang gser dngul dang / zangs dang / lcags dang /seng ldeng las legs par byas pa dongs su gzhag la bsgrub po/ /dkyil na yi dags zhes bya ba'i/ /zhes bya ba la sogs pa ni yi dags lte ba zhes bya ba'i dkyil 'khor thams cad 'grub par byed pa'i dkyil 'khor der khro bo'i rnal 'byor dang ldan pas mchod pa bya'o zhes 'og nas 'byung ba'i tshig dang sbyar ro//khro bo gtso bo'i phyag rgya yis/ /mchod pa ji skad gsungs pa byas/ /zhes pa sgrub pa po'i bdag nyid khro bo'i rnal 'byor dang ldan pas dkyil na yi dags zhes bya'o/ /dkyil 'khor de la mchod pa ji skad gsungs pa dag gis mchod par bya'o//mchod pa la sogs pa bsnyen pa sngar byas nas da ni yo byad la sogs pa zhes bya ba bshad do/ /sme gtor thams cad sbyin nas ni/ /zhes pa sha khrag la sogs pa'i sme gtor gyis dkyil 'khor kho ra khor yug phab ste/ mchod par bya'o/ / btsang ma'i cho ga bgos nas kyang / /zhes pa sgrub pa pos phyi nang gi gtsang sbra dang ldan pa des khro bo'i skur bsgyur la cho ga la sogs pa'i sngags kyis kyang cho ga bzhin du bsrungs la sgrub pa pos sngar bsnyen pa 'bum bya'o/ /bsnyen pa bya ba'i sngags kyang be con gyi phyag rgya'i sngags khro bo'i rgyal po'i bar du bcug ste/sngags spel ba ma yin pa sngar gong du phyag rgya bcing ba'i skabs su be con gyi phyag rgya'i sngags ma spel ba de nyid bzlas par bya'o/ /bsnyen ba'i sa ni gang yang rung ba'i gnas dben pa gcig tu bya'o/ /byas nas 'di dag brtsam par bya/ /zhes pa sngar bsnyen pa 'bum byas nas/de'i 'og tu yo byad 'di dag la sogs pa bya'o/ /shis pa'i thod pas bkab nas ni/ /zhes pa la sogs pa ni rigs mthon po'i thod pa ma chag pa/ ma gas pa/ dung gi mdog 'dra ba phyi byad byas la bkra shis pa'i thod pa khrag gis bkang ba dang mi sha dag kyang bsag par bya'o//phyugs chen dag gi tshil bu las/ /zhes pa la sogs pa ni mi'i tshil bzhu ba'i mar me dag kyang dkyil 'khor gyi phyi rim gyi phyogs bzhi dang mtshams bzhir bkod pa byas te/ de yang rtsa ba'i sngags kyis btab ste/ dbul bar bya'o//cho ga zhes pa de lta bur/ /zhes pa nas/ mi 'grub pa mi las rnams kyang / /zhes pa la sogs pa'i bar gyis sgrub pa pos bsgrub pa'i mtshan nyid dang ldan zhing / sngags pa sgrub pa'i cho ga de ltar brtsams nas grogs dang ldan pas bsgrub pa 'jug pa zhes bya ba bshad do//byas nas bsgrub la 'jug par bya/ /dpal ldan gos ni dmar po gyon/ /zhes pa sgrub pa pos ras sam dar la sogs pa dmar po'i gos gyon pa'i dbang du bya ba'i don to/ /tsan+dan dmar po bskus nas ni/ /zhes pa sgrub pa pos khrus byas nas/ lus la tsan+dan dmar pos bsku'o/ /cung zad dag kyang mi byed par sgrub pa pos dngos grub bsgrub pa'i las gzhan ci yang mi byed par ro/ /mar gyi brgyad la gcig pus so/ /zhes mar gyi tshes nyi shu gsum gyi nub mo mtshan gcig dkyil 'khor gyi mdun du bsgrub po/ /tshes grangs kyi drag po dang sbyar ro//dpa' la sems drag mthu dang ldan pa yis/ /grogs ni gsum dang ldan par bsgrub par bya/ /zhes pa grogs po gsum dang ldan par bsgrub par bya ste/ grogs po'i mtshan nyid kyang 'di dag grogs por gzung ngo / /blo dang ldan pa sems drag cing / / dbang po bsdams pa'i sgrub pa po/ /zhes ba sgrub pa po dag mtshan nyid 'di 'dra ba dang ldan zhing sems yul la spro bar bsdams pa/ yi dags kyi ni dkyil 'khor du/ /sgrub pa la ni 'jug par bya/ /grogs po gsum gyi mtshan nyid de 'dra ba dang / sgrub pa po nyid kyi mtshan nyid de lta bu dang ldan pas yi dags lte ba zhes bya ba'i dkyil 'khor du sgrub pa la 'jug par bya'o zhes pa'o//de nas mtshan mo phyag rgya bcing / /zhes pa la sogs pa ni bsgrub pa'i mtshan mo khro bo'i rnal 'byor dang ldan par byas nas/ stan gyi steng du dang po skyil mo krung du 'dug pa la mi g.yo mi 'gul brtan par 'dug pa las be con gyi phyag rgya'i sngags lhag chad du mi 'gyur bar bzlas//legs par bzlas so/ /rgyal na phyag rgya 'grub par 'gyur/ /zhes pa be con gyi phyag rgya 'grub par 'gyur ro/ / mi 'grub pa yi las rnams kyang / /zhes pa be con gyi phyag rgya grub zin phan chad bsgrub par dka' ba'i las rnams kyang / de phan chad thogs pa med par grub par 'gyur ro/ /de nas thogs pa med par byed/ /ces pa nas/ de nas bzlas brjod 'bum byas na/ /zhes pa'i bar gyis 'di man chad bsgrubs nas las mang po bya bar bshad do//de nas thogs pa med par byed/ /'jam dpal dbyangs kyi khro bo yis/ /zhes pa khro bo'i rnal 'byor dang yang ldan la so so'i las kyi tshig dang ldan par byas te/ las byas na the tshom med par 'grub par 'gyur ro//ha na bi s+pho Ta b+ha ny+dza b+hany+dza/ zhes bskul ba'i tha mar hUM brjod cing zhes pa rgya gar gyi yi ge la hUM/ bskul ba'i tshig gi mgor bzhag par drang du'ang rung / bskul tshig gi tha mar bzhag pa skad du drang du'ang rung ste/ kha cig gis ni bskul tshig mjug tu phyung ngo //kha cig gis ni bskul ba'i thog mar hUM phyung ngo / /g.yon brkyang ba yi tshul gnas la/ /zhes pa phyag rgya bsgrub pa des khro bo'i rnal 'byor dang ldan pas khros pas rkang pa g.yon brkyang la/ g.yas pas bskum par bya ba ni las 'og ma la yang sbyar bar bya'o//khros pas ri rtse bgrod dka' dang / /zhes pa la sogs pa ni rnal 'byor pa ri'i rtse sus kyang ma mthong ba bgrod dka' ba rnams dang / mkhar yang bya zhes pa'o/ /pu shu'i khang pa dang rab dag /skad cig bdag gis rnyil bar byed/ /ces pa de lta bu gcig gnyis ma yin na mang po yod pa rnams kyang thang cig gis rnyil bar byed do//da ra bi s+pho Ta b+ha ny+dza b+hany+dza/ zhes pa 'di dag ri'am/ ra ba'am/ gang la bya ba de be con gyi sngags kyi mjug la smos pa de'i mjug tu bskul tshig gzhug ste kun la yang de dang 'gre'o/ /lha ma yin gyi sgo/de bzhin gzhan dang sa dag kyang / /zhes pa de bzhin du gnas pa gang yang rung ba dang / sa dag kyang sngags pa ji ltar 'dod pa bzhin du 'gas par byed do/ /bskul nas tha mar hUM brjod na/ /zhes pa la sogs pa ni be con gyi phyag rgya'i sngags tha mal pa'i dkyil na yang hUM 'byung la bskul pa'i tshig gi skabs 'dir yang hUM 'byung ba dang sbyar ba dang sbyar na/so so'i las su sbyor ba'i tshe na hUM gnyis dgos pa dang 'dra zhe na/ hUM zhes bya ba ni sngags la bya ste/ sngags kyi mjug tu bskul tshig gzhug /ces pa'i don to/ /mdor na hUM gcig brjod nas de'i tha mar bskul ba'i tshig gzhug par zad do zhes bshad de hUM gcig tu zad do//kha cig na re de ltar ma yin te/ hUM gnyis dgos te hUM gcig bskul ba'i dang por gzhag /hUM gcig ni bskul ba'i tshig mjug sdud du gzhug go zhes bshad do/ /ri mo la ni gnas pa bzhin//nges par myur du gnon par 'gyur/ /zhes pa ni ri mo la bris bzhin du pha rol po'i sde rnams gnon par 'gyur ro/ /dpung rnams 'khrug par 'gyur ba la/ khros na ngo mtshar ci zhig che/ /zhes pa pha rol po'i sde 'khrug par 'gyur nas so so dgyes par byed do//phyag rgya bsgrub pa'i rnal 'byor pas las de dag byas na dngos grub thob par las de dag ngo mtshar ci zhig che/ cho ga 'di ni glang po'i 'don/ /zhes glang po che myos pa gnon pa'o/ /dpung dag rab tu 'chi bar 'gyur/ /zhes pa pha rol po'i dpung rnams zhes pa'o//gal te de ni ma grub na/ /zhes pa ste gong du bshad pa sngags ma spel bas las 'grub par ma gyur na zhes pa'i don/ 'di ni sngon du bsnyen pa ni/ /zhes pa la sogs pa ni gong du bshad pa de ltar sngags ma spel ba'i tshul gyis las rnams bsgrubs te/ ma grub par gyur na sngags pas legs par las rnams bsgrub par bya ba de 'chad de/de la sngags pa 'di'i sngon du bsnyen pa bya ba yang sngar bshad pa bzhin du dkyil 'khor bris la sngags spel ba 'di nyid sngon du bsnyen pa 'bum bya'o/ /de nas bsnyen pa byas nas sngags pa des bsgrub pa la 'jug go//bsgrub ba'i dkyil 'khor 'di nyid do/ /de ltar bya ba nas bsgrub pa zhes bya ba bshad do/ /spogs na mgo nas bsnyen pa brtsam/ /de tshe de bzhin gshegs pa yi/ /snga ma'i dam tshig bskul ba bzhin/ /gong ma bshad pa ltar las ma grub na de'i tshe de bzhin gshegs pa'i sngags kyi bar du gzhug cing bskul ba snga ma 'dra ba'i tshul gyis bya na zhes bya ba'i don to//de nas slar yang sngags rnams la/ /thogs pa med par de bzhin sbyar/ /zhes pa gong ma ltar byas te/ ma grub na sngags rnams kyi bar du gzhug pa dang bskul ba'i tshig gzhug pa la thogs pa med pa de bzhin du sbyar bar bya'o//phyag 'tshal ba dang kun du ldan/ /zhes pa phyag btsal ba'i sngags la bya ste/ de yang na mo bud+d+ha/ d+harma/ saM g+ha la bya'o/ /de yi thog mar oM bzhag la/ /zhes pa phyag btsal ba'i mgo la oM bzhag go//oM zhes bya ba gzhan yang gzhag/ /ces pa phyag 'tshal ba'i gzhug la oM zhes bya ba gong ma las gzhan pa'i oM gzhag pa la bya'o/ /AHzhes bya ba gnyis pa'i zhes pa de ltar/ AHbzhag pa ma gtogs par de'i 'og tu AHzhes bya ba bzhag go/ / de yi dam tshig mjug tu hUM/ /ces pa de ltar AHbzhag pa'i 'og tu hUM bzhag go/ /'di ni khro bo'i rgyal po'i rnam par rgyal ba'i yi ge 'bru gsum po de ste 'di ni drag po'i tshul gyi yi ge 'bru gsum pa'o/ /bzhag ste de nas tshig rnams kun/ /de ltar kro d+ha bi dza ya ag+ni/ tshig rnams gzhan ni brjod par bya/ /zhes pa de ltar bzhag pa'i 'og tu sarba ta thA ga ta zhes pa la sogs pa mjug gi /sngags shi ra zhes bya ba la thug gi bar gyi sngags rnams tshang bar bzhag go/ /de nas de yi tha mar hUM/ /zhes pa de ltar bzhag pa'i 'og tu hUM gzhag go/ / de bzhin tshig gi tha ma oM/ /zhes pa de ltar hUM bzhag pa'i oM bzhag go/ /tha mar AHbzhag de yi mthar/ /zhes pa de ltar oM bzhag pa'i 'og tu AHbzhag go/ /de ni zhi ba'i tshul gyi yi ge 'bru gsum ba'o/ /hUM dang sa ti lan gnyis bsgom/ /zhes pa de ltar AHbzhag pa'i 'og tu hUM bzhag go//de ltar hUM bzhag pa'i 'og tu si ta sa ti zhes bya ba bzhag la brjod ces bya ba'i don to/ /pra phud ta zhes bya ba lan gnyis bsgom zhes pa 'di ltar si ti zhes bya ba'i 'og tu pra bud ta zhes bya ba'o/ /de nas de bzhin gshegs pa yi//zhes bya ba la sogs pa ni de bzhin gshegs pas bskul ma mdzad cing bka' stsol ba ni yi ge AHste/ de yang khro bo'i rgyal po yi ge 'bru gsum po drag shul du bsrungs pa'i 'og tu bzhag la bzlas na/ de bzhin gshegs pas khro bo la bskul bar mdzad pa yin no zhes bshad do//kha cig na re de ltar gong du sngags spel ba nyid de bzhin gshegs pa'i bka' stsal pas ni gong ma'i 'jug sdud pa'i tshig tu zad do zhes kyang kha cig 'chad do/ /de nas bzlas brjod 'bum byas nas/ /zhes pa de ltar spel ba gong du bsnyen pa 'bum byas nas zhes bya ba ste/tshig gnyis slar bzlas te gsungs par zad do/ /khro bo chen po de yis ni/ /zhes pa de'i 'og tu sngags pa khro bo'i rgyal po chen po'i rnal 'byor dang ldan pa ji skad gsungs pa'i las ma grub pa de dag la bya'o/ /ji skad bskul ba thams cad kyis/ma grub na ni nges par bya/ /zhes pa'i bar gyis 'di man chad nas las mang po bya ba bstan pa'o/ /ji skad bskul ba thams cad kyis/ /zhes pa la sogs pa ni bskul pa'i tshig ji skad bcug ste de las bya zhe na/ sngags 'di nyid kyi mjug las sarba bud+d+ha zhes 'byung ba'i 'og tu che ge mo zhig ba sha ma swA hA/che ge mo zhig shIn+taM ku ru bau ShaT ces bya ba la sogs pa ji skad bskul ba rnams kyis las thams cad 'grub par bya'o/ /bka' bzhin byed de gzhan du min/ /de ltar byas na de bzhin du/ /'gyur gyi gzhan du mi 'gyur ro//gang gis sngon du bsnyen byas pa/ /zhes bya ba la sogs pa ni sngags gang gis spel ba'i sngags pa 'di bsnyen pa 'bum byas la/ de nas sngags pa des sngags spel ba de nyid kyi mjug la las so so'i bskul tshig dang ldan pa'i cho ga dang ldan pas 'dis sngar ma grub pa'i las rnams the tshom med par bya'o zhes pa'i don to//da ni mtshan nyid yongs su rdzogs par byas nas nyes pa'i dmigs su 'gyur ba zhes bya ba bshad do/ /gzhan du sngags ni gzir byas na/ /zhes pa la sogs pa ni gong du bsnyen pa ma byas par thog mar sngags spel ba 'dis las byas sam/yang na sngags spel ba tha mal bas sngar yod las ma bsgrubs par thal byung du sngags spel ba 'dis byas na sngags pa nyid 'chi bar 'gyur ro/ /khyad par du'ang dpa' bo ni/ /khro bo gtso bo snying po 'di/ /zhes pa sngags pa de lta bur sngags spel 'di bzlas te/las byas par gyur na khyad par du nyes pa de lta bu 'byung ngo / /phyag rgya 'di dag gzir byas na/ /'gro ba ma lus 'khrug par 'gyur/ /zhes pa gzir zhes bya ba ni khro bo'i rgyal po'i sngags kyi bar du be con gyi sngags bcug ste bzlas pa bya'o/ /'di ni gang la bzlas pa yi//de yi mod la srog kyang 'phrog /ces pa'i bar gyis ni/ da ni phyag rgya'i mthus yon tan zhes pa bshad do/ /'di ni gang la bzlas pa yis/ /zhes pa la sogs pa ni sngags spel ba 'di nyid yul gang du bzlas te las byas na/ the tshom med par 'jig rten dang 'jig rten las 'das pa de dag kun gyi lus kyang zhig cing 'ching bar 'gyur ro zhes pa'i tha tshig go//phyag rgya 'dis ni gzir na ni/ /zhes pa la sogs pa ni gzhan yang sngags spel ba 'di bzlas na ni/ /kho ra khor yug tshun chad kyi sngags gzhan gyi yod pa de dag kyang mthu stobs chung zhing med par byed do//der yang ma zad de dgra rnams dregs pa yang med par byed do/ /'byung po zhes pa ste 'dre dang gzhan yang yi dags skrag par byed do/ /dga' bar byed ces pa khro bo'i rgyal po chen po yang mnyes par 'gyur ro/ /mthu yang skyed ces pa mthu byin yang skyed par byed do//yi dags ro langs yi dags ni/ /zhes pa ro langs kyi gtor ma dang / yi dags kyi grogs kun la yang zhes pa'o/ /de bzhin zhes pa gong ma bzhin du'o/ /byad dang gnod pa bskrad pa yang / /zhes pa byad stems la byas par zad do//rgyal po dag ni skrag pa zhes pa'o/ /'jig par byed ces pa bskul ba'i tshig dang ldan par bzlas pas na de dag kun 'jig par byed do/ /bgegs rnams thams cad zhi bar byed/ /'tshe ba thams cad med par byed/ /ces pa la sogs pa ni nang du sdug bsngal thams cad kyis phongs pa med par byed pa la yang be con gyi phyag rgya sngags dang bcas pa de dag la drag por bsgrags so//skye bo dag la zhes pa/ be con gyi phyag rgya'i sngags dang ldan pas bstan la zhes bya'o/ /gshin rje gshed po sbyor na ni/ / zhes pa khro bo'i rgyal po'i sbyor ba dang ldan pa byas na zhes pa'o/ /'phrog ces pa bstan pa de'i tshe'o/ /mdor na snying po phyag rgya yi/ /zhes pa nas/ snying po dag gis sbyar bar bya/ /zhes pa'i bar gyis da ni mjug bsdu ba bshad do/ /mdor na snying po phyag rgya yi/ /zhes pa gong ma'i don bsdu ba'o//rtog pa rang gi dam tshig ldan/ /khro bo'i zhal nas gsungs pa 'di/ /zhes pa 'di gsal bo 'di be con dang khro bo'i sngags dang ldan par zhal nas gsungs pa 'di zhes pa'o/ /gsang ba zhes pa snod ma yin pa dang dam tshig med pa la zhes pa'i don te/ gcig pu'i zhes pa 'khor med pa'o zhes pa'o/ /be con dang zhes pas/ phyag rgya dang zhes pa'o/ /snying po dag ces pa snying po 'bru gsum po zhes pa'o/ /lnga pa'i bshad pa zin to// //da ni ro langs mar gtogs pa'i le'u 'di la snying stobs can gyis bsgrub pa dang / snying stobs can 'bring gis bsgrub pa 'bring dang /snying stobs can ma yin pa thams cad bsgrub pa dang / las bsgrub pa dang rnam pa bzhi'o/ /de la snying stobs can gyis bsgrub pa la bcu ste/ skabs dbye ba sngar byas te phyag rgya'i mtshan nyid bshad pa dang / phyag rgya sbyar ba'i nges pa dang /dkyil 'khor gyi cho ga dang / mchod pa'i cho ga dang / me'i cho ga sngar byas nas sbyin sreg bya ba dang / dngos grub bshad pa dang / snying stobs can ma yin pas bsgrubs na nyes dmigs smos pa dang / snying stobs can gyis bsgrubs pa'i phan yon sngags pa dang / sngags pa dad pa dang / snying stobs can gyis sgrub pa'i phan yon mjug bsdu ba'o/ /snying stobs can ma yin pa'i sgrub pa 'bring la yang dbang dang rim pa nod pa dang / sngon du bsnyen pa bya ba dang / dngos grub bsgrub pa dang / las la sbyar ba dang bzhi'o/ /snying stobs can ma yin pa tha mas bsgrub pa la yang dkyil 'khor bri ba dang /snying po'i phyag rgya sbyar ba dang / sngon du bsnyen pa'i cho ga dang / las la sbyar ba rnam pa bzhi'o/ /las sgrub pa la yang rnam pa bcu bzhis bshad do/ /de la so so'i dmigs kyis bshad par bya'o/ /de nas yi ge bcu bdun po zhes pa nas/gang la rtag tu rag lus pa'i/ /zhes pa'i skabs dbye ba sngar byas te bya ba bstan pa'o/ /de nas yi ge bcu bdun pa zhes pa la sogs pa ni rtog pa 'di'i rtsa ba sngags yi ge bcu bdun yin te/ de'i phyag rgyar gtogs pas be con yang sngar bshad zin nas/de las gzhan pa'i de'i phyag rgyar gtogs pa ro langs zhes bya ba yang gzhan du byas la mod la ni zhes pa slar thar par bya ba'i cho ga de ltar ma byas na 'chi bar 'gyur zhes pa'o/ /gnod pa byed pa thams cad la/ /zhes pa dkon mchog gsum la gnod pa byed pa'o//'di bshad do zhes pa de lta bu'i phyir cho ga 'di dag sbyar bar bya ba bshad do zhes pa'o/ /gal te byas na bdag nyid 'chi/ /zhes pa sngags brgya la'am gal te de lta bu la byas par gyur na/ sngags pa bdag nyid dam tshig las 'gal bar 'chi bar 'gyur ro zhes pa'o//'di man chod ni dka' bar bya ba'i cho ga bshad do/ /bskrad par bya ba'i cho ga yang / /khro bo nyid kyis ji skad du/ /gsungs pa dag ni bshad par bya/ /zhes pa dgar bar bya ba'i cho ga khro bos ji skad gsungs pa de 'dir bshad par bya'o zhes pa'o//seng lding las byas phur bu ni/ /zhes pa phur bu'i las bya ba la/ zhi ba dang rgyas pa dang / drag po dag srid du sor brgyad par byas te/ zhi ba'i las byed pa'i tshe phur bu bya ba yang zlum po la mgo yang zlum por bya'o/ /rgyas pa'i las byed pa'i tshe phur bu yang gru bzhi la mgo yang gru bzhi bya'o//drag po'i las byed pa'i tshe phur bu yang zur gsum la mgo yang zur gsum rgya mdud can du bya'o/ /phur bu de dag gi mgo'i steng du 'khor lo dang pad+ma rdo rje dag bri bar bya'o zhes bya ba ni las kyi rim pa bzhin no/ /sor brgyad tsam du byas pa la//zhes pa srid sor brgyad bya ba/ zur gsum pa la mgo yang zur gsum rgya mdud can byas pa'i mgo'i steng du rdo rje bris pa de lta bu'i phur bu la bya'o zhes pa'i don to/ /dur khrod thal ba zhes pa mi ro bsregs pa'i thal bas phur bu la gdab par bya'o zhes pa'o/ /pags pa dag gis dkri bar bya//zhes pa de lta bu'i pags pa'i ras sam/ dngos pos phur bu de nyid dkri bar bya zhes pa'o/ /sgrub pa po dag mtshan phur bu de skud pa dmar pos bcings nas ni zhes pa ni/ dgar bsgrub pa'i sngags pas de'i mtshan mo ras dkar pos phur bu de'i mgrin par bcing bar bya'o zhes pa'o//de nas ro langs phyag rgya ni/ /zhes pa la sogs pa ni de nas ro langs phyag rgya bcings la ro langs sngags kyang bzlas la/ bskul pa'i tshig che ge mo zhig u tsa ta ya zhes bya ba dang / ldan par mtshan mo stong rtsa brgyad du bzlas so/ /de ltar zlos par byed pa'i tshe yi dags phal po che'i dkyil 'khor du bris nas bzlas pa bya'o//de nas sngags pa gang dgar ba'i las byed par 'dod nas gang du dgar bar bya ba'i sgo gar ma tshor bar phur bus gdab par bya'o/ /lha 'dre dang / gdon dang / yi dags la sogs pa dgar na yang lha 'dre la sogs pa gang dgar bar bya ba'i gnas de nyid du phur bu btab pas dgar bar 'gyur ro zhes bya ba'i tha tshig go//'di ni skrod pa'i mchog 'gyur ro/ /zhes pa 'di ni dgar bar bya ba'i cho ga'i nang na mchog tu gsungs pa zhes pa'o/ /'o na dang brgya byin stobs ldan pa'i/ /zhes pa'i cho ga de ltar byas na/brgya byin 'dra ba'i mthu dang ldan pa'i 'dra ba yang dgar ba'i sgrub pa de ltar byas na gnas de nas bskrad par 'gyur ro zhes pa'o/ /'di man chad ni gcig la gcig bsad par 'gyur ba zhes bya ba'i cho ga bshad do/ /de nas gzhan yang gcig la gcig /ces pa/ dkon mchog gsum la gnod byed par//zhes pa mi 'di lta bu la cho ga 'di bya'o zhes pa'o/ /rig nas ji ltar 'dod pa ni/ /zhes pa la sogs pa 'di dkon mchog gsum la gnod par byed par rig nas gnod par byed pa'o/ /mi dag gi phyogs 'khrug par bya bsngags pas ji skad gsungs pa bzhin te bya'o zhes pa'o//bar hi tA zhes ba tA ma la'i lo ma 'dra ba bzang po zhes pa'o/ /ru tsi ra bzang po la bya ste de nyid srin gyis ma zos pa bzang po la bya'o zhes pa'o/ /ba dra da ni zhes pa bzang po la bya/ rtsa ba sbyin po cig yod ces pa'o/ /ke shi ni zhes pa ke shi ni yang bzang ba la bya'o zhes so//yang dag byang chub bzhugs bzhugs pa/ /zhes pa la sogs pa ni sman de rnams 'phags pa rnams kyi byin gyis brlabs pa la bya ste/ de bas na mthu che ba'i sman 'di rnams la gang yang rung ba cig blangs nas zhes pa ste/ lo ma'am gang yang rung ngo zhes pa'o//lo ma rlung gis btab par sbyar/ /zhes pa rlung ngam tshub mas bskor ba'i lo ma blangs te cha bsnyams te sbyar zhes so/ /b+ha la ta ga da zhes pa shing thog nag po zhes bya'o/ /'di dag btags te phye mar byas/ /zhes pa/ 'di dag cha snyams te btags te phye mar byas zhes pa'o//mi yi tshil gyis sbrus nas su/ /zhes pa mi'i tshil gyis sbra sbrur byas te/ ha cang sla ba yang ma yin par dud pa 'byung tsam bya ba ste/ bdug pa bsreg tu rung tsam du byas te/ mi thod kyi nang du bzhag ste/ yi dags phal po che'i dkyil 'khor bris nas/ de stong rtsa brgyad du bzlas so//de ltar bzlas pa de'i bdug pa'i ming 'khrug par byed ces bya ste/ gcig la gcig 'thab par bya ba gong gi bdug pa bdugs te/ bsgrub bar bya ba gang gis bsnams pas dri mnam pa tshor ba de dag na phan tshun 'khrug par 'gyur ro zhes pa'i tha tshig go//grong khyer zhes pa ni yul gru dang zhes pa'o/ /dpung pa zhes pa pha rol po'i dpung ngo zhes pa'o/ /phan tshun gnod par byed pa yi/ /zhes pa de lta bu dag bya ba'i phyir bdug pa 'di dag sbyar bar bya'o zhes pa'i tha tshig go/ /'di man chad mig 'phrul gyi cho ga bshad de/ de nas gzhan yang mig 'phrul gyis//zhes pa la sogs pa'o/ /de nas gzhan yang mig 'phrul gyis/ /zhes pa pha rol po'i dpung slu bar byed pas na mig 'phrul lo/ /dur khrod dag gi thal ba yis/ /mig 'phrul dngos grub 'grub par 'gyur/ /zhes pa dur khrod thal ba'i rdzas kyis mig 'phrul gyi dngos grub dag 'grub par 'gyur ro zhes pa'o//mi thod bzang po thal ba dang / /zhes pa la sogs pa mig 'phrul bya ba'i cho ga de yang / mi thod legs pa ma gas pa bzang po'i nang du dur khrod kyi thal bas blugs te skyo ma ska ba tsam du sbyar ro//ri bong gi khrag byugs te sbyar nas de nas yi dags phal po che'i dkyil 'khor ji skad gsungs pa bzhin du bris nas/ dkyil 'khor de'i dbus su thod pa gzhag par bya'o zhes pa'i tha tshig go/ /de yi nang du ro langs ma/ /mchod pa chen po byas nas ni/ /zhes pa dkyil 'khor de'i nang du ro langs ma spyan drangs te de la me tog dang /bdug pa la sogs pa'i mchod pas mchod par bya'o/ /de yang lho phyogs sgo dag tu/ /zhes pa la sogs pa ni lho phyogs kyi sgor rgyas pa'i thab khung brkos te/ me bus nas bsgrub pa'i rdzas thod pa'i nang na bsgrub pa las mar bzhus pa las gzar bu chung dus bcus pa blugs te/de lta bu lan brgya rtsa brgyad dam stong rtsa brgyad kyi bar du bsreg par bya'o/ /de ltar bya ba ni rdzas gzengs bstod cing / gzi byin dang ldan par 'gyur ba la bya'o/ /kha cig na re mar gyi sbyin sreg kun sbyin tsam du phul te/de'i 'og tu thod pa'i nang nas thal ba dang / khrag sbyar ba'i rdzas de zad zad par sbyin sreg byas pa'i thal ba de yang thod pa'i nang du bzhag ste/ stong rtsa brgyad du bzlas brjod bya'o zhes pa'i tha tshig go/ /de nas thal ba zhes pa thod pa'i nang du bzhag pa'i khrag dang /sbyar ba'i thal ba sbyin sreg tu byas pa'i thal ba stong rtsa brgyad ces pa bzlas pa'i mthus mkhas pa sngags pa zhes pa'o/ /thal ba des ni byed par 'gyur/ /zhes pa 'chad pa ma mthun pa rnam pa gnyis kyis thal ba zhes pa'o/ /'di man chad ji ltar bya ba'i thabs bshad pa'o//me tog dkar la thal zhes pa la sogs pa la/ me tog dkar la thal zhes pa me tog dkar po gang yang rung zhes pa'o/ /nam mkhar gtor zhes pa thal ba skam pos bskus te zhes so/ /me tog ser po la bskus te zhes pa gang yang rung zhes pa'o/ / 'dod chags zhes pa 'phags pa nyan thos zhes so/ /nyid kyi gnas bcas sangs rgyas kun/ /zhes pa nyid kyi gzhal med khang dang bcas par sangs rgyas 'khor dang bcas pa kun ston par byed do zhes pa'o/ /me tog dmar po zhes pa ni gang yang rung ste zhes pa'o/ /lha rnams kun kyang snga ma bzhin//zhes pa la sogs pa tshangs pa dang / brgya byin la sogs pa 'jig rten gyi lha gang 'dod pa yid la bsams te/ /me tog gtor na 'jig rten gyi lha de dag ston par byed pa'o/ /yid kyi bsam pa ni kun la sbyar zhes pa'o/ /me tog sngon zhes pa gang yang rung ngo //gnod sbyin pho mo gang yang rung / /yi dags mkha' 'gro grul bum dang / /zhes pa me tog sngon po la snga ma bzhin du thal bas bskus te nam mkha' la gtor na gnod sbyin dang srin po dag snga ma bzhin du ston par byed pa'o zhes so/ /kha cig na re yi dags la sogs pa gzugs kyang cho ga des sbyar na snang bar 'gyur ro//mig 'phrul slad du bsdu bar bya/ /zhes pa la sogs pa mig 'phrul de dag kyang chu la lan bdun bzlas pa'i chus gyen du gtor ba las mi 'phrul de dag gdon mi za bar slar bsdus par 'gyur ro/ /yang na khu tshur gyis slar bsdu bar bya'o//khwa yi 'dab ma bdun dag la/ /zhes pa la sogs pa kha'i 'dab ma bdun blangs nas mi'i rus pa rkang pa'i rje ngar ram lag ngar yu ba'ang rung bar bam bur sbams nas bcing bar bya ba ni rma bya'i mjug ma dang 'dra'o zhes so/ /de dag thams cad ces bya'o/ /khwa'i 'dab ma bam bur sbams te'o//de dag 'phrul bsam ci 'dod par/ /zhes pa la sogs pa 'og nas 'byung ba'i mig 'phrul rnams las gang 'dod pas yid kyis bsams te/ mig 'phrul la lta ba tshogs kyi nang du bdag gi klad pa g.yas logs su bskor na 'di 'dra ba gang dang gang 'dod de dag ston par byed do zhes pa'o//g.yul dag 'khrug cing 'ching ba dang / /zhes pa nang 'khrug pa byung na gcig gis gcig gsod par byed ces pa'o/ /ltad mo chen po mchog rnams ni/ /zhes pa gzhan yang 'di 'dra ba dag ston par byed do//rab tu sbyar bas ston par 'gyur/ /zhes pa de lta bu la sogs pa'i mig 'phrul khwa'i 'dab ma'i cho ga sngar bshad pa de ltar sbyar ba tsam gyis ston par byed pa'o zhes pa'o/ /khu tshur bcangs pas de bzhin du/ /zhes pa mig 'phrul de dag slar bsdu ba na yang lag pa g.yas pa'i sor mo rnams kyis byab pa'i tshul du bya zhing khur tshur bcangs pas slar bsdu bar bya'o zhes pa'o//de yi 'og kyang ston pa dang / /zhes pa 'og gi lha ma yin rnams kyang ston par byed do/ /khwa'i 'dab ma'i cho ga des gzhan yang mig 'phrul 'di 'dra ba dag ston par byed do zhes pa'o/ / 'dus pa zhes pa 'gro ba mang po 'dus pa dag kyang ston zhes pa'o/ /gyen du 'gro dang de bzhin 'khrug /ces pa de dag kyang nam mkha' la gyen du 'gro ba dang / de nang 'khrug pa dag kyang ston par 'gyur ro zhes pa'o/ /mjug ma dag dang thal ba yis/ /zhes pa mi'i rus pa la khwa'i 'dab ma bam bur sbams pa la thal bas bskus pas gzhan yang mig 'phrul gang dang gang ston par 'dod pa de dag nges par byed par 'gyur ro zhes pa'o//khur tshur bcangs pas de bzhin sdud/ /ces pa mig 'phrul de ltar bstan nas slar yang bsdu ba ni sngar bshad pa bzhin bya'o zhes pa'o//de ltar mig 'phrul mdor bsdus pa/ /ji skad gsungs pa bshad pa yin/ /zhes pa rgyud chen po'i nang nas mig 'phrul phal po che bshad pa las ji skad gsungs pa mdor byas nas 'dir bshad pa yin no zhes pa'i tha tshig go/ /'di man chad zhi ba'i las bshad do//de nas zhi ba'i las rnams kyang / /zhes pa nas bstan te/ mdor bsdus nas ni bshad par bya/ /zhes pa rgyud chen po las gsungs pa de mdor bsdus nas ni rgyud 'di bshad do zhes pa'i tha tshig go/ /ro langs de yi ngo bo nyid/ /zhi ba'i phyir ni tshul bzhin bzlas/ /zhes pa ro langs kyi sngags ma spel zhing bskul pa'i tshig ma bcug par ro langs kyi sngags zhi ba'i rang bzhin du gsungs pa de'i tshul bzhin du bzlas so//bdag gam 'on te gzhan yang rung / /zhes pa bdag gam gzhan zhi ba la yang rung ste zhes so/ /bsgrub bya zhi ba'i tshig smos te/ /zhes pa che ge mo zhig shAn+tiM ku ru swA hA zhes smos te/stong rtsa brgyad bzlas par bya ba ni yi dags phal po che'i dkyil 'khor bris nas bzlas so zhes pa'o/ /me tog dkar po bzang po ni/ /zhes pa sri shing sna ma'i me tog kyang rung zhes pa'o/ /bsrung zhing yid du 'ong ba dag /ces pa me tog dkar po de yon tan 'di lta bu dang ldan pa la bya zhes pa'o//chus btab nas zhes pa me tog dkar po de la zhes pa'o/ /rgya mtshor zhes pa chu bo'i klung gang yang rung ba'o zhes pa'o/ /zhugs nas re re nas bzlas shing / /brgya rtsa brgyad ni dor bar bya/ /zhes pa rked pa man chod chur zhugs nas me tog re re zhing sngags re re bzlas/de'i mdun du lha mo be ta lI bzhugs pa la mchod pa bya zhing / bskul tshig dang ldan pas sngags brjod nas me tog gtor bar bya'o/ /me tog kyang brgya rtsa brgyad dgos so/ /'on tam zhes pa cho ga de ltar byas pa dang zhes pa'o/ /rgyal po zhes pa yul phyogs chen po zhes pa'o//grong ngam zhes pa grong khyer gcig pa zhes pa'o/ /grong khyer dag ces pa mang po zhes pa'o/ /zhi ba'i las byas pa de yis/ /zhi bar 'gyur bar gdon mi za/ /zhes pa zhi ba'i cho ga las de ltar byas pa des the tshom med par zhi bar 'gyur zhes bya ba'i tha tshig go//'di man chad rgyas pa'i las bshad do/ /de nas rgyas pa'i las rnams kyang / /tshul bzhin du ni bshad par bya/ /zhes pa nas bstan te/ mchod rten mchod pa sna tshogs pas/ /byas nas de yi mdun 'dug ste/ /zhes pa rgyas pa'i las byed par 'dod pa'i sngags pa des thog mar mchod rten la mchod pa sna tshogs pas mchod pa byas nas/sngags pa des mchod rten de'i mdun du 'dug ste/ ro langs ma'i phyag rgya'i bzlas brjod bya'o zhes pa'o/ /rdzogs sangs rgyas kyis mchod pa bzlas/ /zhes pa ro langs kyi lha mo de sangs rgyas rnams kyis kyang phu dud dang /rim gro dang / bkur sti byas la bzlas pa bya'o zhes pa'i don to/ /gal te mchod rten ring bsrel can/ /yin na de ma thag tu 'gyur/ /zhes pa gal te mchod rten ring bsrel can gyi mdun du rgyas pa'i las byas te/ bzlas brjod byas na mi thogs par cho ga rgyas pa'i las 'grub par 'gyur zhes pa'o//sgrub pa'i ming smos bzlas na ni/ /skyes pa'am bud med rgyas par 'gyur/ /zhes pa cho ga ltar bzlas pa gang yang rgyas par bya ba'i mi de ming gi bskul tshig dang ldan par bzlas na de dag rgyas par 'gyur zhes pa'o/ / dam chos mchod rten mdun du ni/ /zhes pa/ pradz+nyA pA ra mi ta'i glegs bam yang rung / mchod rten yang rung ste/ de gnyis gcig la mdun zhes pa'o/ /cho ga bzhin du khri bzlas te/ /zhes pa la sogs pa de ltar sngar bsgrub pa khri byas nas de'i 'og tu mchod rten gyi mdun du ji srid rgyas par 'gyur gyi bar de srid du bzlas brjod bya'o zhes pa'o//de bzhin gshegs pa'i mchod pa dag /ces pa la sogs pa rgyas pa'i las byed 'dod pa'i sngags pa des/ mchod rten dag la dang por de bzhin gshegs pa'i mchod par 'os pa gdugs dang / rgyal mtshan dang /bla re dang / me tog bdug spos la sogs pa mchod pa rgya chen po dag mchod par bya'o zhes pa'o/ /ring bsrel can la cho ga bzhin/ /zhes pa khyad par du mchod rten ring bsrel can gyi drung du rgyas pa'i las bya ba'i cho ga de bshad par bya zhes so/ /thog mar mchod rten drung du ni/ /zhes pa dang po mchod rten ring bsrel can gyi drung du sngags pa des dkyil 'khor gyi tshad kyang gru bzhi pa cig bya'o zhes pa'o//de nas der ni me tog dag /shin tu yid 'ong dgram par bya/ /zhes pa dkyil 'khor byas pa de'i steng du/ me tog sbu gu dri zhim po yid du 'ong ba dag dgram par bya'o zhes pa'o//me mar rab tu 'bar ba brgyad/ /ces pa phyogs bzhi mtshams brgyad du bdag gis mar me kha brgyad dbul bar bya'o zhes pa'o/ /mkhas pas de la dbul bar bya/ /zhes pa sngags pas mchod rten dang / be ta lI gnyis la dbul bar bya zhes pa'o/ /shin tu yid 'ong chu dang bcas//zhes pa nya phyis dang / dung phor dag gi nang du dri chu bzang po yid du 'ong ba dang bcas pa dag dbul lo/ /sna tshogs pa yi bshos phul nas/ /zhes pa rgyas pa'i las byed pa'i tshe bshos ci dang ci dbul ba spyi rgyud dag las ji skad 'byung ba bzhin du dbul lo zhe sar bcas zhes pa phu dud dang /rim gror bcas pa zhes pa'o/ /mchod rten la ni mngon phyogs te/ /zhes pa rgyab kyis ma 'bab par mngon du bltas te zhes pa'o/ /zhi dang rgyas phyir bzlas pa bya/ /zhes pa zhi ba dang / rgyas pa'i las bya ba'i phyir tshul de ltar bzlas par bya'o/ / las spyi'i mtshan nyid gcig pas rgyas pa'i tshul bzhin du zhi ba'i las byas na yang zhi bar 'gyur ro zhes pa'o/ /de ltar nyin mtshan phyed na ni/ /zhes pa tshul de ltar nyin lan gsum mtshan lan gsum ste/ lan drug du cho ga byas te nyin mtshan phyed nas zhi ba dang rgyas pa'i las 'grub par 'gyur ro zhes bya ba'i tha tshig go//'di man chad ni dga' bar 'gyur ba bshad do/ /gzhan yang sgrub pa po la ni/ /zhes pa nas bstan te/ nges par 'gyur ba bshad par bya/ /sgrub pa po la gdon mi za bar dga' bar 'gyur ba'i cho ga de bshad par bya'o zhes pa'o/ /ji ltar ma la bu sdug pa//de 'dir de bzhin gzhan du min/ /zhes pa ji ltar ma'i snying du bu sdug pa de bzhin du cho ga 'di byas na/ 'jig rten thams cad bdag la dga' bar 'gyur gyi gzhan du ni mi 'gyur ro zhes pa'o/ /nges par bdag gi khrag dang sbyar/ /zhes pa tshad che chung ji tsam yang rung ba dang bdag gi khrag dang lan mang du sbyar te thod par bcug la bsgrubs te/grub nas dpral bar thig le byas na bu sdug bzhin du dga' bar 'gyur ro zhes pa'o/ /lan grangs mang du sbyar nas kyang / /zhes pa de ltar sbyar ba yang lan cig sbyar te skams nas yang lan cig sbyar te/de ltar sbyar ba'i bar zhag de tsam gyis chod par bya'o/ /yang na nyin gcig la lan bdun tshang bar byas kyang rung ngo / /lan grangs nyi shu rtsa gcig cig car yang rung ngo zhes so/ /gzhag ces pa de ltar byas pa'i rdzas thod par gzhug go zhes so/ / zla ba la ni mig bltas shing / /btang gi bar du legs par bzlas/ /zhes pa kha cig bshad pa ni zla ba ni mig blta zhing bzlas so zhes pa'o/ /kha cig gi gzhung las ni zla ba sgra gcan gyis zin pa la blta zhing nam zhig btang gi bar du bzlas so zhe'o/ /de nas rgyal po 'khor du 'gro/ /zhes pa rgyal po'i pho brang nang du 'gro zhes pa'o//mdor bsdus zhes pa rgyud chen po las zhes so/ /rgyu dang mi rgyu 'jig rten dag /ces pa sems can rnams dang chu dang ri la sogs pa'i lha rnams la bya ste/ rten pa'i gnas kyi rgyu mi 'gro ba la gnas pa'i lha rnams ni rgyu dang mi rgyu zhes pa'o/ /mtho ba yis ni zhes pa lha dang mi de dag gis zhes so//dga' bar 'gyur zhes pa sngags pa la zhes pa'o/ /'di ni zhes pa cho ga 'di zhes pa'o/ /gsungs pa dag ces rgyud chen po las zhes so/ /'di man chad dgug pa'i cho ga bshad pa'o zhes pa'o/ /bud med bu mo shi ba'i skra/ / zhes pa ni spyi'i ming yin te/ bud med kyi mi rung gi /bu mo gzhon nu gtsang ma'i skra las bya zhes pa'o/ /mar gyi brgyad la nan tan du/ /zhes pa bud med gzhon nu gtsang ma'i skra tshes nyi shu gsum la blangs la nan tan du srid du khru gang tsam sboms su mthe'u chung sum sgril 'jar 'jur dang sban sbun med pa'i lig ri dang 'dra ba'i legs par bkal ba'o//de yang gzung la rag pa ltar zhags pa mig can du bya'o zhes pa'o/ /zla ba gzas zin par 'gyur ba'i bar du nyin re bzlas zhes pa de nas zla ba gzas zin par 'gyur ba'i bar du nyin re zhing yang dus gsum du bzlas so zhes bya ba'i don to//zla ba gzas zin gyur pa dang / /zhes pa nam zla ba gzas zin pa'i dus kyi nub mo dkyil 'khor bri'o zhes pa'o/ /chu 'gram zhes pa gnas gtsang ma dag tu ni zhes pa'o/ /dkyil 'khor der bris mchod pa byas/ /zhes pa sngar bshad pa bzhin du mchod pa bya'o zhes so//ro langs khro bo ldan pa las/ /zhes pa ro langs khro bo dang ldan pa'i sngags mang po dang / be ta lI la mchod pa dbul lo zhes bya ba'i don to/ /gtor ma rgya cher byas nas ni/ /zhes pa sngar yi dags phal po che'i skabs su bshad pa bzhin du mchod pa de dag gis mchod par bya zhing dkyil 'khor nang du dbul zhes pa'o//'byung po la'o zhes pa dbab bo zhes pa'o/ /de nas de la lag gis mnan/ /zhes pa de thod pa de lag pa g.yas pas mnan zhes bya'o/ /zla ba bltas bzlas par bya/ /zhes pa bshad pa rnam nyis mi mthun te/gcig ni zla ba la mi blta bar bzlas zhes so/ /g.yo'i bar zhes bsgrub pa'i zhags pa g.yon pa'am zhes pa'o/ /'phar na ni zhes pa thod pa'i nang nas zhags pa 'phar bar gyur na zhes so/ /grub pa na ni grub ces bya/ /zhes pa grub par bya'o zhes pa ni de'i tshe zhes bsgrub pa de'i tshe zhags pa blangs nas zhes pa'o//'jig rten lha rnams skad cig gis/ /zhes pa la sogs pa 'jig rten pa'i lha gang bsdam ste yid la bsams na 'grub pa'i zhags pa des drangs pa'i tshul du byas te drangs nas skad cig gis khugs par 'gyur ro zhes pa'i tha tshig go//sngags pas yid kyis bsam pa'am/ /sngags pa'i tshig gis kyang zhes pa'o/ /gang dang gang 'dod legs par byed/ /ces pa sgrub pa po ci 'dod pa de la des legs par byed do/ /sogs zhes pa tshangs pa dag go/ /de'i bka' bzhin zhes pa sgrub pa po de'i zhes so//nges par byed ces pa gdon mi za bar zhes so/ /skad cig gis ni nam mkha' las/ /zhes pa la sogs pa rdzu 'phrul dang ldan pa'i 'jig rten gyi lha dag nam mkha' la zhags pa des drangs na/ thang cig gis khugs par 'gyur te/ bdag gang 'dod pa'i mchog dbul bar byed do zhes pa'i tha tshig go/ /gnod sbyin mo zhes pa glu mkhan mo zhes so/ /bdag gi drung du zhes pa grub pa de'i drung du zhes pa'o/ /yid du 'ong ba'i las rnams byed/ /ces pa grub pa bdag gi yid du gang 'thad cing mos pa'i las rnams byed ces pa'o//dman pa dag ces pa smad pa zhes pa'o/ /bsten par bya zhes pa the tshom med par bya'o zhes so/ /'dod pas gdungs pa mi chos min/ /zhes pa 'dod pas gdungs na lha'i bu mo dag bkug la de dang lhan cig bsten par bya'i mi'i bud med ni ci ltar gdungs kyang bsten par mi bya'o//rga dang mya ngan gyis gdungs dman/ /zhes pa mi'i bud med ci'i phyir bsten par mi bya zhe na/ rnam grangs 'di lta bu'i phyir bsten par mi bya'o/ /ser sna can 'dod chen cher zhes so/ /nad dang 'tshe bas sma phab pa/ /zhes so/ / der yang ma zad de 'di lta bu dag yod pa'i phyir/ gcin dang rdul dang dri ma can/ /zhes pa'o/ /mi yi bud med rtag tu spang / /zhes pa rnam grangs de lta bu'i phyir na/ mi'i bud med dus thams cad du spang bar bya'o/ /'on te sems dpa' chen po de/ /zhes pa la sogs pa chen po 'grub pa dang yon tan dang ldan pa'i bdag nyid chen po zhig yin de grub pa de'i tshe 'dod pa la chags pa ma yin pa zhig na lha'i longs spyod dang ldan yang lha'i longs spyod kyi nang na dge ba'o zhes pa'o//gnod sbyin bkug pa'i tshogs rnams kyis kyang bskor ba'o zhes so/ /rang gi gzhal yas khang bzangs na//zhes pa gnod sbyin dang / lha dang / rang rang gi zhes so/ /gdug cing grub pa de gang du 'dod par 'gro zhes pa'o/ /lha rnams kyis sgrub pa po de la rab tu dbul lo zhes pa'o/ /ra sa ya na du ma zhes pa ni bcud kyis len mang po zhes pa'o/ /dpag bsam shing gi 'bras bu yang //zhes pa ci 'dod pa 'byung bar 'gyur ba lha'i longs spyod mnyam par ldan par 'gyur ba'i 'bras bu the tshom med par 'thob par 'gyur ro/ /rig pa 'dzin pa kun gyi mchog /ces pa'o/ /dngos grub gong du smos pa'i 'di 'dra ba thob par 'gyur zhes pa'o//'gul tam g.yos par bshad pa dag /ces pa dngos grub kyi las gong du bshad pa dag zhags pa g.yos pas 'gul bar 'gyur bas dngos grub thob par 'gyur pa bshad pa de dag ces pa'i tha tshig go/ /gal te 'grub par ma gyur na/ /zhes pa zhags pa 'grub par ma gyur na zhes so//ma grub pa'i zhags pas kyang zhes pa de ltar sgrub pa'i zhags pas ma grub kyang zhes so/ /yid la 'dod pa zhes pa/ yid la gang 'dod pa de bsams nas zhes so/ /de ni de la phyogs nas bzlas/ /zhes pa bsgrub pa de ni gang dgug par bya ba de la kha bltas te/de la phyogs sam zhags pa de la bltas nas bzlas par bya'o/ /bsgrub bya'i ming dang tshig dang bcas/ /zhes pa che ge mo zhig A kaR+Sha ya A kaR+Sha ya swA hA hrI zhes de ltar sbyar te bzlas so/ /nam mkha' ni gang dgug par bya ba de bzhin du zhes pa'o/ / bdag gi drung du zhes pa bsgrub pa'i drung du thang cig gis zhes pa'o/ /mi dbang zhes pa rgyal po'o/ /ba lang dang ni shing rta'am/ /zhes pa nor dang ldan pa zhes so/ /de bzhin 'dod pa'i rdzas dag kyang / /zhes pa bdag gang 'dod pa'i rdzas zhes so/ /mthong ngam yang na thos kyang rung / / zhes pa rdzas de dag ma mthong ngam ma thos kyang rung ste/ che ge mo zhig A kaR+Sha ya zhes pa'i tshig dang ldan pas sngags brjod na 'gugs par 'gyur ro/ /yul gzhan dag na gnas pa ni/ /zhes pa nye 'khor na mi 'dug ste/ gong du smos pa dang 'dra zhes pa'o/ /dam tshig dag gis bskul na ni//zhes pa bskul ba'i tshig dang ldan pa'i sngags nyid kyis bskul na khugs par 'gyur ro/ /gang dang gang dgug pa de dag gdon mi za bar khugs par 'gyur ro/ /grub pa dang ni ma grub pa/ /khro bo rnam rgyal rtog 'di la/ /zhes pa gong du smos pa'i las 'di dag ni zhags pa'i las gang grub pa dang ma grub pa dag khro bo rnam par rgyal ba'i rtog pa 'di las zhes pa'o//khro bos gsungs pa'i las kyis zhes pa be ta lI yis lha dang mi gnyis 'gugs pa'i cho ga gsungs pa'o/ /ro langs rtog pa 'di dag ni/ /zhes pa ro langs kyi le'ur gtogs pa 'di dag ni tshul bzhin rim gyis bshad pa yin no//ro langs zhes bya ba'i sgra ni lha nyid ro'i nang du gshegs pa las ro langs par gyur pas na/ ro langs zhes bya'o/ /ro langs kyi rtog par gtogs pa ste/ drug pa'i bshad pa rdzogs so// // brtul zhugs kyi le'u 'di rnam pa brgyad kyis bshad de/ de yang dang po skabs dbye ba dang / sngon du bsnyen pa'i grangs dang / cho ga bshad pa dang / /sku gsum gyi mtshan nyid dang / ri mo'i gzugs kyi mtshan nyid dang / bzlas brjod kyi cho ga'i mtshan nyid dang / brtul zhugs dang brtul zhugs spyad zin pa'i bsgrub pa la 'jug pa rnams bshad do//'di ni zhes pa gong du gsungs pa'i cho ga'o/ /rig pa 'dzin pa rnams la ni/ /zhes pa sngags pa rnams la zhes so/ /dngos grub zhi ba mchog ster ba/ /tshul bzhin mdor bsdus bshad pa bzhin//zhes pa dngos grub mchog gsol bar mdzad pa'i cho ga 'di rgyud chen po las tshul bzhin du mdor bsdus nas bshad pa yin no zhes pa'i don te 'phro sbyar ba'i tshig tu zad do/ /'di man chad brtul zhugs su gtogs pa'i le'u ste de don brgyad kyis bstan pa'i de la/ dang po skabs dbye ba zhes bya ba'i don bshad do//de nas khro bo'i gtso bo yi/ /zhes pa nas/ bstan te khro bo'i gtso bo yi/ /zhes pa/ kro d+ha bi dza ya nyid la/ /zhes so/ /rtog par rmad du byung ba'i mchog /ces pa yang mtshan phal po che 'byung ba la bya'o/ /khro bo'i pad+mo'i zhal nas byung ba de yang dag par rgyas par bshad par bya'o zhes pa'i don to//'di man chad sngon du bsnyen pa'i grangs zhes bya ba bshad do/ /sngags kyi grangs ni bcu bdun po/ /zhes bya ba nas bstan to/ /bcu bdun po zhes pa la rtsa ba'i sngags yi ge bcu bdun po nyid do/ /thos pa tsam gyi mod la yang / /zhes pa lha ma yin rnams so//rmongs par 'gyur ba zhes pa 'thom par 'gyur ro zhes pa'o/ /'jam dpal dbyangs kyis rab bskul ba/ /zhes pa de ltar rmongs par 'gyur ba yang / /'jam dpal gyi mthus bskul bar de ltar 'gyur ba'o/ /khro bo de nyid 'bar ba de'i/ /zhes pa kro d+ha bi dza ya nyid la bya ste/de nyid 'bar ba dang bcas pa de'i cho ga 'dir legs par bzlas pa'i grangs bshad par bya'o zhes so/ /thog mar drug 'bum bzlas pa ni/ /zhes pa gong du rtsa ba'i sngags yi ge bcu bdun po drug 'bum bsnyen pa byas nas/ de'i 'og tu sku gzugs bri bar bya ste/'di ni sku gzugs bri ba'i sngon du bsnyen pa'o/ /de nas bu don cho ga yis/ /phyis kyang sum 'bum bzlas par bya/ /zhes pa de ltar sku gzugs bris pa'i 'og tu sku gzugs kyi spyan sngar sum 'bum bzlas par bya'o/ /de bzhin ri rtser 'bum bzlas na/ /'grub par 'gyur te gzhan du med//ces pa de nas de bzhin du ri rtser 'bum bzlas par bya ste/ de ltar 'bum phrag bcu bzlas pas dngos grub gang 'dod pa 'grub par 'gyur te the tshom med do/ /phyis ni mkhas pas ci 'dod par/ /zhes pa cho ga de ltar bzlas pa'i 'og tu sngags pas dngos grub gang dang gang 'dod pa'i dngos grub bsgrub pa la 'jug par bya'o//cho ga mdor bshad par bya zhes pa bsgrub pa la phan pa'i phyir kro d+ha bi dza'i sngon du bsnyen pa byed pa'i bsgom pa'i cho ga la sogs pa'i rim pa mdor bshad par bya'o zhes pa'i don to/ /gcig pu dpa' bo'i khro bo nyid//ces pa 'khor med pa'am/ grangs nyung ba la mi bya'i/ /khro bo'i yon tan la bya'o/ /bdun rnams zhes pa khro bo'i yon tan bshad do/ /khrus kyi cho ga nyin re bya/ /zhes pa la sogs pa khrus byas pa la yang rnam pa gnyis te/ phyi nang gi khrus su nyin gcig kyang dus gsum du khrus byas te/sa phung dang / chu la bgegs bsal ba'i phyir rtsa ba'i sngags brjod la spyi'i cho ga dang sbyar la khrus bya'o/ /khrus byas nas kyang bsrung ba dag bya'o/ /phyag rgya dang sngags dag gis bsrung / /baM gi sa bon las byung ba'i/ /zhes pa bdag nyid dang po yi ge hUM gi sgo nas bshig ste/stong bar bsams nas 'og gi rlung gi dkyil 'khor bsam/ de nas de'i steng du me'i dkyil 'khor bsam/ de nas de'i steng du chu'i dkyil 'khor bsam/ de'i steng du yi ge baM las bskyed pa'i yid kyi pad+mo'i steng du nyi ma'i dkyil 'khor gyi steng du sa bon hUM las byung ba'i be con bsgoms pas/de nas de las rim gyis khro bo'i bskur bsgyur te/ de las skur bsgyur zin pa'i 'og tu khro bo'i sku la sngags 'di rnams so sor bkod pas bsrung ba dang / byin gyis rlob par 'gyur ro/ /yi ge 'di kun kyang nyi ma'i dkyil 'khor la bsam mo//yid kyi pad+ma'i gdan la 'dug /ces pa kro d+ha bi dza ya dang be ta lIr skur bsgoms nas cho ga la bya'o/ /de la khyad par du sku'i cha lugs dang / pho mo'i bye brag tsam zhig yod do zhes pa'o/ /brtag par bya ste bsgom mo/ /brtags nas kyang bsgom zhes so//yi ge oM zhes pa skur bsgyur ba la zhes so/ /mig gnyis la yi ge a zhes pa dbu drug yod pa'i spyan gnyis po la yi ge a bsam mo/ /gnyis ni mig la bltas te de skad ces bya'o/ /dngos ni lha'i skur bsgyur nas spyan gsum la a dgod/sngags ni yi ge bcu bdun po/ /zhes pa de ltar byas pa'i 'og tu rtsa ba'i sngags bzlas shing khro bo'i rgyal po yang dran par bya'o/ /dran nas zhes pa ting nge 'dzin gyis so/ /rang gi lus la sngar bzhag pa/ /snying gar snying po gzhag par bya/ /zhes pa sngar khro bo'i skur bsgyur ba'i snying po hUM de dag lhar bsgyur ba'i snying gar yang gzhag par bya'o//de nas khro bo'i mtshog ma yis/ /zhes pa de nas khro bo'i mtshog ma'i sngags kyis bdag gi mtshog mar yang bsam par bya ba ni bdag gi lag gis mtshog mar reg par byas nas mtshog ma'i sngags dgod par bya'o//phyis ni gtsug tu gzhag par bya/ /zhes pa sngar mtshog ma'i sngags bkod nas de'i 'og tu spyi gtsug gi sngags kyang bdag gi spyi gtsug sngar gzhag pa bzhin du dgod par bya'o/ /de nas lus la cho ga yang / /zhes pa cho ga'i sngags kyis gnas lngar dgod pa ni bdag gi lag pas gnas gnas su reg par bya zhing sngags dgod do//mtshon cha'i sngags lag mthil gnyis su dgod de/ phyag mang po kun la yang bsam zhes bya'o/ /rang gi dam tshig ldan pa'i rgya/ /zhes pa rang gi dam tshig ldan pa'i phyag rgya sngar bcings nas/ de'i 'og tu ro langs kyi phyag rgya bcing bar bya ste/de yang thal mo sbyar ba spyi bor bzhag ste/ na mo bud+d+ha/ d+harma/ saM g+ha bya ba'i sngags brjod pa ni/ rang gi dam tshig sngar bstan nas/ /zhes pa'i don to/ /de'i 'og tu ro langs kyi phyag rgya dag bcing bar bya'o zhes pa kha cig 'chad do/ / sngags dang phyag rgya ldan par bcing bar bya'o/ /rang gi dam tshig dang ldan pa'i phyag rgya zhes bya ste/ de yang be con gyi phyag rgya dang / be ta lI'i phyag rgya gnyis cho ga bzhin du bcing bar bya'o zhes pa'o/ /khro bo'i gtso bo ro langs ma/ /zhes pa ro langs kyi phyag rgya de yang rang gi snying gar bcing bar bya'o//de nas gnas lngar gtugs te dgrol lo/ /de bzhin be con phyag rgya yang / /zhes pa la sogs pa be con gyi phyag rgya las mtshon cha'i phyag rgya thams cad kyi 'byung ba phyag rgya de thams cad kyi rtsa ba'am gnas su gyur pa ni be con gyi phyag rgya la bya'o/ / phyag rgya de yang lag pa g.yas pas bcing bar bya'o/ /be con gyi phyag rgya 'dis las thams cad bya'o/ /khro bo'i sku gzugs la mchod pa bya ba dag la 'jug par bya'o/ /mchod pa bya ba la yang sngar bshad pa dang / da 'dir bshad pa'i mchod pa'i rdzas dag gis mchod par bya'o//gzugs de la de ltar mchod par byas pas na/ yid la gang 'dod pa'i dngos grub thams cad gang stsol bar mdzad do/ /de ltar mchod pa bya ba yang gang du bya zhe na gsungs pa/ yi dags phal po che'i dkyil 'khor du mchod pa bya ba dang / gzhan du yang rin po che'am/shing dag la sogs pa la gzugs sam ri mo la phyi'i mchod pa 'byor na bya'o/ /gzugs de dag la yang yid kyis mchod ba rgya chen po dag bya'o/ /dri zhim dang zhes pa me tog gi yon tan te mchod pa'i rdzas la mchod par bya'o/ /spos chu dag gi sa la'am//zhes pa la sogs pa gur gum dang / tsan+dan bsres pa dag gi chus sa la dkyil 'khor byas te mchod dam yang na gzugs dag la/ de dag gis gtor bas mchod pa bya'o zhes pa'i tha tshig go/ /'di man chad sku gzugs kyi mtshan nyid bshad do//sku gzugs mtshan nyid bshad par bya/ /zhes pa 'dod pa thams cad kyi don bsgrub pa'i sku gzugs kyi mtshan nyid de/ de ltar sku gzugs dag la mchod par bya ba'i mtshan nyid bshad par bya'o zhes pa'o/ /sngar bsnyen cho ga bzhin byas nas/ /zhes pa sngar bshad pa bzhin du sngon du bsnyen pa'i cho ga bzhin du byas nas de'i 'og tu bzo bo mkhas pa la sku gzugs byed du gzhug go//bzo bo yang khrims 'dzin du bcug la/ /khrus byas la 'jug par bya'o/ /rgyu gang las gzugs bya ba'i rgyu de las spyan drangs te/ byin gyis rlob bar gsol ba gdab po zhes so//gser ram zhes pa sku gzugs kyi rgyu dag la bya'o/ /mching bu shel dang rin chen dang / /zhes pa in+d+ra nI la ma gtogs pa'i rin chen rnams la bya'o/ /rgyal srid 'dod pas gser las byas/ /zhes pa rgyu gang dang gang dag las gzugs byas na/las de dag 'grub par bshad do/ /longs spyod 'dod pas dngul la bya/ /zhes pa pha rol po gzhan zhes so/ /'khar bas byas zhes pa zhi zhes so/ /mching bu rnam pa sna tshogs pa/ /zhes pa mching bu mi 'dra ba rnam pa sna tshogs pa gang yang rung ba las zhes so//rin chen las byas zhes pa rig pa 'dzin pa thob pa'i las zhes pa'o/ /sa 'og ces pa a ru ra zhes pa'o/ /dngos grub thams cad grub par bya ba'i phyir sku gzugs che chung gi tshad rnams bshad par bya'o zhes pa ni/ gser la sor brgyad tsam du bya//zhes pa zhabs yan chad dbu man chad kyi bar du tshad la bya ste/ sor mo'i sor la bya zhes pa'o/ /mchod na zhes pa mchod cing bsgrubs na zhes so/ /mi g.yo zhes pa brtan pa'o/ /ra gan gyi'am/ zangs kyi tshad las sor gnyis lhag par bya zhes pa'o/ / mching bu las ni sor brgyad shes/ /zhes pa mching bu gang yang rung ba la byas pa'i tshad ces so/ /shel ni sor grangs bcu gnyis so/ /zhes pa in+d+ra nI la ma gtogs pa rin po che gang yang rung ba la bya'o/ /de ltar ji skad gsungs pa'i tshad kyi sku gzugs 'dod pa thams cad gsol bar mdzad pa de dag ces so//dngos grub 'dod pa'i sngags pas legs par bsgrub cing mchod par bya'o/ /yan lag ma nyams gsal la bzang / /zhes pa sku gzugs de dag gi spyi'i mtshan nyid 'dra ba byas te kun la sbyar ro/ /brtag pa bzo bo mkhas pas byas//zhes pa bzo bo mkhas pa byed du gzhug go/ /mtshan nyid snga ma dag dang ldan/ /zhes pa sku gzugs de dag kyang yi dags phal po che'i skabs su gzugs bshad pa'i mtshan nyid dang ldan par bya zhes ji ltar bya ba'i thabs bstan pa'o/ /mtshon cha bzang pos rgyas par byas//zhes pa phyag na mtshon cha bzang po dag gis rgyas par bya'o/ /yi dags la bcings zhal yang drug /ces pa yi dags kyi steng na bzhugs te/ yi dags brkyang bskum de dag nyid la bya'o/ /spyan gsum 'jigs par zhes pa dbu ma dang gsum/ khro bo'i spyan du bya zhes pa'o//mi mgo yi dags mgo bo rnams/ /zhes pa mi mgo bo can dang ldan pa'i yi dags phreng ba rnams se ral khar thogs pa'o/ /na bza' stag lpags sham thabs so/ /zhes pa'o/ /snga ma'i tshul du yongs rdzogs par/ /zhes pa sku gzugs kyi mtshan nyid sngar bshad pa'i tshul du zhes so//sngags pas bzo bo byed du gzhug /ces pa de lta bu'i sku gzugs dag sngags pas bzo mkhas pa dag byed du gzhug /de yan chad ni kham las byung ba'i rdzas las sku gzugs bya'o zhes pa'i tha tshig go/ /'di man chad ni shing las bya ba bshad do//yang na shing gi snying po la/ /zhes pa yang shing gi snying po dag las kyang sku gzugs bya ste/ de la shing gi snying po zhes bya ba ni shing spyi la bya ste/ shing yon tan ldan pa mtshan ma bzang po la bya ba'i don to/ /byas nas rtag par mchod par 'gyur/ /zhes pa shing mchog tu bzang po las sku gzugs byas nas rtag tu mchod cing bsgrub par bya'o//de nas shing las byas pa yi/ /sku gzugs tshul bzhin bshad par bya/ /zhes pa de nas shing las byas pa'i sku gzugs tshul bzhin du bshad par bya'o/ /gtsang ma 'dod pa kun ster ba/ / zhes pa shing las byas pa de dag gtsang ma 'dod pa thams cad ster bar mdzad pa'i sku gzugs de yang gong ma bzhin du sbyar bar bya'o/ /rig 'dzin kun gyi mchog 'dod na/ /zhes pa rig 'dzin gyi rgyal por 'dod na zhes so/ /tsan+dan zhes pa dkar po zhes so/ /ra tsa arka'i zhes pa shing gi ming ngo //byas pa'ang zhes pa sku gzugs byas pa yang 'dod pa'i don rnams ster zhes so/ /sar pa zhes pa ni/ rnying pa ma yin zhes pa'o/ /de bzhin tA la shing dag las/ /zhes pa a ti mug ta ka'i shing la bya zhes pa'o/ /de bzhin klu rnams 'gugs par byed//ces pa 'di rnams kyang 'gugs na/ gzhan lta ci smos zhes so/ /sngar bsnyen pa la sogs ma byas par/ /zhes pa bsgrub pa'i sngon du bsnyen pa'o/ /'di ni sku gzugs mtshan nyid dag /bzang po rgyas par gsungs pa bzhin/ /zhes pa sku gzugs che chung gi tshad 'di bzhin du sngags pas mi bsgom du mi rung zhes bya ba med de ji tsam 'dod pa'i tshul du bsgom mo//'di man chad ri mo'i sku gzugs kyi mtshan nyid bshad do/ /ri mo'i mtshan nyid bshad par bya/ /zhes bya ba/ ras dag la ri mo bris pa tsam mtshan nyid bshad par bya'o//mi ro'i gos bzang bkrus nas ni/ /zhes pa la sogs pa mi ro la g.yogs pa'i ras bzang po bkrus te sngags pas khru gang gi tshad du byas pa'i ras la zhes pa'o/ /tshon gyi kha dog kun med par/ /ri bong khrag gis bri bar bya/ /zhes pa tshon rtsi gzhan med par ma 'dres pa dang /ri bong gi khrag dang btsag gis bri bar bya'o/ /yang na de yi sku gzugs ni/ /snga ma bzhin du btsag gis bri/ /zhes pa yang khro bo'i gzugs ni ri bong gi khrag las bris pa bzhin du btsag gis bri bar bya'o/ /ri mo 'di yang tshul 'di bzhin du bri bar bya ba ste/ zhal drug dbu yang gyen du brdzes/ /zhes pa dbu skra kham pa gyen du byas pa'o/ /smin ma ser zhing spyan yang ser/ /zhes pa ser por bya ba 'di dag tshon ser por kha dog cung zad gcig pas bya'o/ /spyan ni zlum po gsum dang ldan/ /zhes pa/ khro bo'i spyan ni tshul du bri/ / zhes pa'o/ /g.yas pa'i phyag ni mchog sbyin dang tri shUl dang ral gri dang dgra sta dang be con dang lcags kyu bsnams pa'o/ /khros pa'i phyag g.yon bsdigs par mdzad/ /ces pa'i phyag g.yon pa drug la sdigs mdzub dang mdung dang mda' chen po dang dbyug tho dang thod pa dang zhags pa ste phyag mtshan 'di rnams thogs zhes bya ba'i tha tshig go//g.yon pa'i zhal zhes ba zhal gdangs pa'i tshad dam zhes pa'o/ /mkhas pas ri mo bri bar bya/ /zhes pa sngags pas de lta bu'i tshul du ri mo bri bar bya'o/ /mkhas pas ri mo de ltar glo gnyis dag tu yang / /zhes pa ri mo sku gzugs de'i glo pha rol tshu rol gnyis su yang /phyag rgya'i gzugs kyi lha gnyis bri bar bya'o/ /g.yas su skyes pa khro bo'i gzugs/ /zhes pa dbus kyi sku gzugs las g.yas rol du zhes pa'o/ /bsdigs shing zhal ni khro gnyer can/ /zhes pa phyag g.yon pa khro bo'i mdzub mo bsdigs pa brang du 'dzin zhes pa'o//zhal dang spyan ni khros pa'i tshul/ /zhes pa khro bo de lta bu'i tshul du pad+ma'i steng na bzhugs par bri zhes pa'o/ /g.yon du ro langs ma bri ba/ /zhes pa dbus su sku gzugs las g.yon rol du lha mo be ta lI bri bar bya'o zhes so/ / 'bar ba'i kha la gzi mdangs che/ /zhes pa me tog 'bar ba'i 'od gzi brjid che zhes so/ /gtum mo du gul gos gyon ma/ /zhes pa gso ma 'dra ba'i shing shun pa can las du gul gyi ras byed de sle'u ras dkar po 'dra ba'i kha dog cig yod do/ /yang na shing shun gyi ras kha dog dkar po cig yod do//des stod g.yogs dang /smad g.yogs byas pa'i ras las kyang du gul gyi ras byed de/ de ni tshon rtsi dkar pos bri ba'i rigs so/ /gzi byin rab tu sdigs par byed/ /ces pa phyag g.yas pa khro bo'i khu tshur gyis bsdigs pa brang du 'dzin pa g.yas brkyang ba'i tshul du bzhugs pa bri ste/sku mdog nyi tshe dmar po bri/ /khros pa'i tshul zhes pa khro bo'i mig ces pa'o/ /bde gshegs sras kyi bka' nod ma/ /zhes pa/ bka' bzhin du byed pa sku gzugs gnyis ka khro bo la bltas par bri/ /de yang bka' bzhin byed pa'i tshul du bri ste pad+ma'i steng na bzhugs par bri'o zhes so//gsang ba'i phyag rgya ri mo 'di/ /zhes pa snod ma yin pa la gsang ba'i sku gzugs 'di gnyis ri bong gi khrag gam btsag gis bri bar bya'o/ /dben pa'i gnas su gzhag par bya/ /zhes pa mi mi 'du ba'i phyogs su dben par gzhag go/ / cho ga shes pas be con rgya/ /sku gzugs la ni bzlas par bya/ /zhes pa skyes bu khro bo'i gzugs de la be con gyi phyag rgya dang ldan pa'i sngags bzlas na be con gyi phyag rgya 'grub par 'gyur ro/ /yang na ro langs phyag rgya ni/ /zhes pa ro langs kyi lha mo'i gzugs la bzlas na/ ro langs kyi phyag rgya 'grub par 'gyur ro//dben zhing 'du 'dzi med par ni/ /bzhag nas nyin re mchod par bya/ /zhes sku gzugs de yang mi mi 'du ba'i gnas su nyin re zhing rtag tu mchod pa dus gsum du bya'o zhes so/ /yang na phyag rgya'i dkyil 'khor du/ /zhes pa yang na yi dags phal po che'i dkyil 'khor du zhes so//mnyam gzhag dngos grub 'dod pa yi/ /zhes pa sems rtse gcig tu bzhugs pas zhes so/ /mchod pa dang ni bzlas pa bya/ /zhes pa ri mo'i sku gzugs de la zhes pa'o/ /bdag gi phyag rgya bsgrub pa la/ /zhes pa la sogs pa phyag rgya de gnyis gang bsgrub pa la bdag gis phyag rgya bsgrub pa zhes bya ste/phyag rgya de bsgrub pa ri mo'i tshul du bshad pa yin no/ /'di man chad khro bo'i rgyal po gcig pu bri ba'i cho ga bshad par bya'o/ /ri mo ras bzang bkrus nas ni/ /khru gang tshad du byas pa la/ /zhes pa mi shi ma thag tu khrus byas te/ras yug gcig gis ro la g.yogs pa de bkrus la/ ras de khru gang tshad du bcad la zhes so/ /tshon rtsi spyin med bzang pos bri/ /zhes pa spyin med pa'i tshon rtsi bzang pos ri mo bri bar bya'o/ /spyin ni nag po 'dra ba yis/ /zhes pa sku mdog sngon por bri zhes pa'o//snga ma bzhin du bri bar bya/ /zhes pa la sogs pa cha lugs dang / phyag mtshan sngar bshad pa bzhin du bris te/ de ni ri mo sku gzugs bris pa yang sngar bshad pa bzhin du thog mar bsnyen pa drug 'bum byas nas de'i 'og tu ri mo bri bar bya'o/ /nyin re rtag tu mchod nas kyang //zhes pa nyin re zhing dus gsum du mchod pa bya zhes so/ /rab tu dben par bzhag nas kyang / /zhes pa mi dag mi 'du ba dben pa'i gnas su phyogs su bzhag nas de'i mdun du bzlas par bya zhes pa'o/ /'di man chad bzlas brjod kyi cho ga'i mtshan nyid bshad do/ /de ltar bzlas brjod bya ba'i thabs bshad de/ri mo bkram nas mchod pa byas te/ /zhes pa mdun du ri mo bkram nas mchod pa byas nas zhes pa'o/ /ku sha'i stan la zlos pa po 'dug nas ni zhes pa'o/ /mnyam par gzhag ces pa sems rtse gcig tu zhes so/ /mgo ni rma bya bzhin bkug ste/ /zhes pa lus drang por bsrang ste mgrin pa yid tsam bkug la zhes so//rtse gcig sems kyis bzlas byas te/ /zhes pa dus gsum du zlos pa'i tshe mtshan nyid de dang sbyar zhes so/ /de ltar 'bum phrag gsum bzlas nas/ /bsnyen pa bya ba'i 'og tu ni/ /zhes pa de ltar ri mo bris pa'i 'og tu ri mo'i mdun du sum 'bum bzlas te bsnyen pa byas pa'i 'og tu zhes pa'o//de nas ri khar gnas bcas te/ /zhes pa de ltar bzlas pa'i 'og tu ri'i rtse mor gnas bcas te zas mi bza' bar bsnyen pa 'bum bya'o/ /de ltar 'bum phrag bcu'i bzlas pa bya'o/ /'di man chad brtul zhugs kyi cho ga bshad de/dngos grub mchog dag 'dod pa yis/ /zhes de ltar bzlas pa byas pa'i 'og tu khro bo'i rgyal po'i dngos grub mchog 'dod pa'i sgrub pa pos de'i 'og tu khro bo'i brtul zhugs spyad par bya'o zhes pa'o/ /rtog pa las gsungs mi 'dod na/ /zhes pa rtog pa las gsungs pa'i dngos grub mchog mi 'dod pa'i sgrub pa pos ni sngar gsungs pa'i tshul du sngon du bsnyen pa 'bum phrag bcur bzlas nas/rtog pa 'di las gsungs pa'i dngos grub 'bring dang / tha ma bsgrub par gsungs zhes so/ /'bring dang tha ma'i dngos grub dag /ces pa 'og nas bshad pa'i gzhung dang sbyar na bsnyen pa sum 'bum bzlas te 'byung ba bzlas pa bya'o//brtul zhugs med kyang legs par ni/ /bsgrub na dngos grub thob par 'gyur/ /zhes pa dngos grub 'bring dang / tha ma gnyis ni khro bo'i brtul zhugs ma spyad kyang sngon du bsnyen pa byas nas cho ga bzhin du bsgrubs na dngos grub thob par 'gyur ro//brtul zhugs des ni mchog kyang 'grub/ /ces pa khro bo'i brtul zhugs spyad pa'i sgrub pa pos ni dngos grub mchog thob par 'gyur ro zhes so/ /'di man chad dpa' bo'i brtul zhugs spyad pa bstan te/ lam mi bzur dang mi smra ba/ / zhes pa bgrod dka' ba dang / mi bde ba'i lam nas 'gro ba'i tshe/ mi dang / rta dang / glang po che la sogs pa gang yang rung ba cig lam du phrad na/ bdag khro bo'i rnal 'byor dang ldan pas bdag lam mi bzur bar mi 'byol la de'i tshe mi smra bar bya'o zhes so/ /slong mo za zhing dbang po bsdams//zhes pa slong mo'i zas za zhing 'gro ba'i tshe yang yul la mi g.yeng bar dbang po bsdam mo zhes pa'o/ /seng ldeng dbyug pa 'dom gang pa/ /zhes pa seng ldeng las bzhogs pa tha lam pa sra ba bzang po sdu gu 'dom gang pa bdag gi lag tu thogs so/ / de ni dpa' bo'i rkyen du yongs kyis srid pa'i phyir ro/ /'gro ba'i tshe rtsa ba'i sngags bzlas so/ /bgrod dka' ba yi lam nas 'gro/ /zhes pa lam thams cad tha lam dang lam po che dang thang bu sa bde ba dag la 'gro bar mi bya ste/ /gal te de dag tu song na bdag gam pha rol po rnams ma rung bar 'gyur bas ni mi dag mi 'du ba dang bgrod dka' ba nas 'gro ste/brgya la mi dang / rta dang / glang po che dang / gang yang rung ba dang phrad par gyur na lam mi bzur bar drang thad du 'gro ba'o zhes so/ /brtul zhugs dag ces pa khro bo'i rgyal po zhes so/ /khro bo'i gzugs kyis zla drug tu/ /zhes pa khro bo'i sbyor ba dang ldan pa'i gzugs kyis zla ba drug tu sgrub pa po gang gis yang dag par spyod na sgrub pa po des ni mchog kyang thob po zhes so//'di man chad brtul zhugs spyad zin nas bsgrub pa la 'jug pa zhes bshad do/ /de nas bsgrub pa la 'jug na/ /zhes pa de ltar sngags pas sngar brtul zhugs spyad nas de'i 'og tu bsgrub pa la zhugs te/bsgrub na the tshom med par dngos grub dam pa thob par 'gyur ro/ /de ltar spyad pa de'i dngos grub dam pa myur du 'grub po zhes pa'o/ /bsgrub pa la ni bdud kyi ris/ /zhes pa sngags pa brtul zhugs spyod pa'i tshe dag na bgegs 'di dag 'byung ngo zhes so//gzugs dag dang zhes pa lha mo bzang mo zhes so/ /de bzhin gzhan gyis lus su ni/ /zhes pa gzhan 'dra ba'i gzugs su ston zhes pa'o/ /dbang po bsdams la 'tshe bar byed/ /ces pa brtul zhugs spyod pa'i sngags pa des zhes so/ / de dag lhan cig smra mi bya/ /zhes pa de lta bu'i gzugs su ston pa de dag dang cung zad tsam yang chags pa mi skyed do/ /byang chub sems dang mnyam ldan pas/ /zhes pa brtul zhugs spyad pa'i bdag nyid byang chub sems dang ldan par byas nas khro bo de'i sngags brjod par bya'o/ / spyod cing de ltar 'gro ba na/zhes so/ /gzhan yang shin tu ngo mtshar ba/ /zhes pa gzhan yang shin du ngo mtshar che ba'i gzugs dag ces pa'o/ /bde gshegs bsam pa mthong na ni/ /zhes pa brtul zhugs gang spyod pa'i zhes so/ /de dag gis ni 'jigs mi bya/ /zhes pa bgegs de dag gis zhes so//gnod cing skrag par byed na ni/ /zhes pa brtul zhugs spyod pa de dag nyid la/ bgegs de dag gis zhes pa'o/ /bde gshegs kyi ni bka' gcog pa/ /zhes pa de ltar bgegs byed pa nyid bka' gcog pa yin na zhes pa'o/ /khro bo bdag nyid ni rnam par 'jig ces pa bgegs nyid ces so//bde gshegs bsam pa yid bsgoms pa'i/ /zhes pa byang chub kyi sems zhes pa'o/ /dpa' bo dpa' bo gzhan du min/ /zhes pa sems can dpa' bos brtul zhugs 'di spyad par bya'i ngan song phal pa gzhan gyis ni spyad par mi bya'o//bsgrub pa'i mchog rnams 'dod pa yis/ /zhes pa la sogs pa dngos grub mchog 'dod pa'i sgrub pa pos khro bo'i brtul zhugs gsungs pa 'di nan tan gyis khro bo'i brtul zhugs spyad la brtan par bsgrub par bya'o/ /khro bo'i brtul zhugs su gtogs pa bdun pa'o//bdun pa'i bshad pa zin to// //'di man chad rtsa ba'i rtog par gtogs pa'i le'u 'chad do/ /de la dang por sngon du bsnyen pa dang / brtul zhugs ma spyad par bzlas pa dang / /mchod pa 'ba' zhig byas pas dngos grub 'bring dang tha ma gnyis 'grub par 'gyur ba de bshad/rtsa ba'i rtog par gtogs pa'i le'u 'di dngos grub gsum 'byung ste/ 'bring dang tha ma gnyis ni sngon du bsnyen pa dang brtul zhugs ma spyad par bzlas brjod dang mchod pa 'ba' zhig byas pas 'grub/ dngos grub mchog rnams la ni sngon du bsnyen pa brtul zhugs spyod pas 'grub ste/de yang dngos grub rnam pa bco lnga'o/ /lha'i mtshon cha'i dngos grub dang / ro langs kyi dngos grub dang / an dza na la sogs pa'i mig bskul ba'i dngos grub dang / mi ro'i gos bsgrub pa dang / gnod sbyin mo'i dngos grub dang / sha za mo sgrub pa'i dngos grub dang / klu'i bu mo'i dngos grub dang / lha ma yin gyi bu mo'i dngos grub dang / sha chen po btsong ba dang / ba dan la bsgrub pa dang / thal ba la bsgrub pa dang / snag tsha la bsgrub pa dang / btsag la bsgrub pa dang / sor gdub la bsgrub pa dang /yungs kar la bsgrub pa 'di rnams kyis bshad do/ /ji skad gsungs pa'i gzugs rnams ni/ /zhes pa gong du bshad pa'i sku gzugs rnams zhes so/ /me tog ji skad gsungs de bzhin/ /zhes pa 'og nas gsungs pa'i mchod pa'i me tog ces so/ / rtag tu gang du mchod byed na/ /zhes pa la sogs pa sngags pa gang zhig mchod pa byed na lha'i brtul zhugs gong du bshad pa de dang / sku gzugs kyi spyan sngar sum 'bum bzlas pa dang / ri rtser 'bum bzlas pa zhes bya ba'i bsnyen pa de bya mi dgos so/ /dran pa tsam ni 'ba' zhig gis//zhes pa dus gsum du mchod pa byed pa dang / bzlas pa byed pa'i sgo nas gang dang gang bsgrub par 'dod pa de dag nyid bzlas pa mchod pa byed pa 'ba' zhig gis zhes so/ /rgyal srid sbyin pa'i gzugs la ni/ /zhes pa nas/ gser gyi sku gzugs la zhes pa'o//tsan+dan gur kum a ka ru/ /zhes pa de ltar kun byug pa'i tshe yang byug spos kyi sngags kyis brjod cing bsku bar bya'o/ /'di gsum gyi lde gu la byug spos kyi sngags kyis gdab bo zhes so/ /ci rigs par ni byugs nas kyang / /zhes dbu dang spyan dag tu mi bsku bar gzhan ni ci rigs par bsku'o//rig mdzes zhes pa pad+ma dkar po zhes so/ /ke sar ni me tog ces so/ /mchod gnas dus gsum du zhes so/ /bdug pa mar bcas pa'i zhes pa mar dang gu gul du bcas pa'i bdug pa zhes pa'o/ /de ltar byas na khyim pa dang / /zhes pa rab tu byung bas byas pa lta smos kyang ci dgos zhes so//khro bo'i rgyal po'i/ de las sems ni brgya brjod de/ /zhes pa dus gsum du rtsa ba'i sngags zhes pa'o/ /ci 'byor pa yi mchod pa'i bshos/ /zhes pa spyi'i gzhung su si ti ka ra'i nang nas 'byung ba'i bshos ci 'byor pas zhes pa'o/ /de yi spyan sngar dbul bar bya//zhes pa khro bo'i sku gzugs de'i spyan sngar zhes so/ /sngar bsnyen la sogs med kyang sla/ /zhes pa brtul zhugs byas te sku gzugs spyan sngar sum 'bum du bzlas pa dang / ri'i rtser 'bum bzlas zhes bya ba mi dgos zhes pa'o/ /de ltar sbyor ba zla ba drug gis zhes pa tshul de ltar nyin re dus gsum du rgyun du byed pa'i zla ba drug gi bar du byas na/rkun po dang / dgra dang / rgol ba med pa'i rgyal srid kyang the tshom med par thob par 'gyur ro/ /'di ni dngos grub 'bring ngo / /nyin gcig bzhin du mchod pa thob par 'gyur/ /zhes pa gong du bshad pa'i tshul de ltar mchod cing bzlas pa byas kyang rgyal srid ma grub par gyur na/nyin gcig bzhin mchod cing bzlas na yul thob par 'gyur ro/ /'di dag dngos grub tha ma'o/ /las 'di gdon mi za bar ni/ /zhes pa tshul de ltar byas pa'i las de nas gdon mi za bar zhes bya'o/ /rnyed par 'gyur zhes pa gser gyi dong tse 'bum zhes pa'o//longs spyod sbyin pa'i gzugs la ni/ /zhes pa dngul gyi sku gzugs la zhes so/ /tsan+dan gur kum a ka rus/ /zhes pa 'di gsum gyi 'de gus sngags pas sku gzugs la legs par bskus nas ni zhes pa'o/ /me tog dkar po'i phreng bas rab tu mchod//ces pa'o/ /me tog dkar po'i phreng ba yis/ /zhes pa yon tan dang ldan pa'i me tog dkar po gang yang rung ba zhes pa'o/ /dus gsum du nyin gcig bzhin du mchod pa byas nas zhes pa'o/ /mar dang ldan pa'i gu gul lam/ /zhes pa mar dang gu gul sbyar ba'i bdug pas zhes pa'o//kun du ra'i ce pog dkar pos bdug pa'ang dbul/ /zhes so/ /me tog a ti mug ta ka/ /zhes pa tshul de ltar zla ba drug gi bar du mchod pa dang / bzlas pa byas nas de'i 'og tu mjug tu me tog a ti mug ta ka re re la sngags lan re re bskul tshig dang ldan par bzlas pa'i me tog 'bum sku gzugs de la dbul bar bya'o//de yi mjug tu 'byung 'gyur te/ /zhes pa de ltar cho ga byas pa'i 'og tu longs spyod ces so/ /'di la dpyad pa dgos pa med/ /ces pa cho ga 'di ltar byas na dpyad cing the tshom med/ /the tshom mi dgos par longs spyod thob par 'gyur zhes pa'o//nad sel ba yi gzugs la ni/ /zhes pa 'khar ba'i sku gzugs la zhes pa'o/ /tsan+dan dmar po'i 'di gus bskus nas kyang zhes pa'o/ /thang shing gi ni bdug pa dag /phul nas me tog gtsang ma dag /ces pa ji snyed pa'i me tog gtsang ma yon tan ldan pas cho ga 'di ltar dus gsum du mchod par bya'o//bdug pa'am thang shing gi thang chu las bdug par bya'o/ /la la na re thang shing nyid chu thags su btags pa'i phye ma las bdug par bya'o zhes so/ /mchod pa byas nas ci 'byor pa'i/ /zhes pa la sogs de ltar nyin re zhing dus gsum du zla ba drug gi bar du bzlas pa dang /mchod pa byas nas de'i mjug tu bdag gam gzhan gyi nad chen po zhi ba dang nad med par gyur cig pa'i tshul du bskul tshig dang ldan pas zla ba gcig gi bar du byas na su yang rung nad chen po de byang bar 'gyur ro zhes pa'o/ /'dod dgu sbyin pa'i gzugs la ni//zhes pa zangs dang ra gan gyi sku gzugs dag la zhes so/ /de ltar yang ni mchod byas na/ /zhes pa la sogs pa las gang dang gang du bsgrub pa la mchod pa gang dang gang gis mchod par rig pa de dag gong du sngar bshad pa'i tshul bzhin du so sor mchod pas nyin re dus gsum du mchod cing bzlas pa zla ba drug gi bar du bya'o//sngags bzlas brjod byed pas sngags pa gang dang gang bya ba de dang de'i bskul tshig bcug la las bsgrubs na zhi ba dang / rgyas pa la sogs pa las gang bsgrubs pa de 'grub par 'gyur zhes pa'i tha tshig go/ / sngags pa'i yid dang mthun pa'i 'dod pa'i don/ de yang de ltar yang dag bsgrub/ /ces pa de yang gong du bshad pa'i tshul bzhin du bsgrub po zhes so/ /sku gzugs rab tu mchod byas nas/ zhes pa gnas gang yang rung bar sku gzugs la mchod pa bya zhing bzlas pa zla ba drug gi bar du bya'o//sku gzugs nyin gcig bzhin du ni/ /dus gsum du zhes pa'o/ /de ltar kun du rab mchod nas/ /zhes pa zla ba drug gi nang tshun chad du khro bo'i sngags zhes pa'o/ /sngags pa blo dang ldan pas mchod pa dang bzlas pa dang kun byas na zhes pa'o/ /bsgrub pa nyid ni ma thob kyang / / zhes pa dngos grub 'bring zhes pa'o/ /dngos grub phra mo thob par 'gyur/ /zhes pa zhi ba dang / rgyas pa dag gis las nus pa'i dngos grub thob par 'gyur ro zhes pa'i tha tshig go/ /'di man chad dngos grub mchog bsgrub pa bshad de/ /de la dngos grub mchog ni sngon du bsnyen pa dang / brtul zhugs spyad pas 'grub ste/ de yang dngos grub rnam pa bco lnga'o/ /de la dang po lha'i mtshon cha zhes pa'i dngos grub bshad do/ /yang na khro bo'am phyag rgya rung / /zhes pa khro bo'i rgyal po'i ri mo dang / phyag rgya'i gzugs kyi ri mo gnyis dang / /ri mo gsum las gang yang rung ba cig ces pa'o//lha yi brtul zhugs des kyang bsgrub/ /ces pa lha'i brtul zhugs spyad pas dngos grub mchog bsgrub par bya'o zhes pa'o/ /de nas gzhan yang brtul zhugs kyis/ /zhes pa brtul zhugs spyad pa gang dngos grub mchog bsgrub par 'dod pa de'i cho ga rgyud chen po las mdor bsdus nas bshad par bya'o zhes pa'i don to//'di man chad mtshon cha'i dngos grub 'chad de/ de nas khro bo'i gtso bo yi/ /zhes pa nas bstan te/ de nas khro bo'i gtso bo yi/ /zhes pa khro bo'i rgyal po de'i phyag rgya'i mtshon char gtogs pa'i tri shUl de bsgrub na zhes pa'o//tri shUl shin tu gsal bsgrub na/ /zhes pa dngos grub bsgrub pa'i rdzas mtshan nyid dang ldan pa skyon med pa la bya'o zhes pa'o/ /ur mo'i lcags las byas pa yi/ /zhes pa pu sha ra lo hi zhes bya ba ste/ lcags zhun ma las byas pa'am/ lcags khung nas byung ba'i pu sha ra lo hi las byas te dper na ze smug gu'am ru shal lta bu/lcags khung nas byung ba'i pu sha ra lo hi'i lcags las bya'o/ /tri shUl sor ni bcu gsum pa/ /rno la bzang zhing rab legs pa/ /zhes pa tri shUl de yang rtse mo dang yu ba'i bar srid du sor bcu phyin par bya'o/ /rtse gsum gdengs po dang gnyis te sor brgyad tsam du bya'o zhes so//ri'i rtse zhes pa gnas so/ /ri mo bzang po de bris nas/ /zhes pa ri mo'i sku gzugs gang yang rung ba cig ces pa'o/ /rno la bzang zhes pa tri shUl de la yang thog mar dang por tri shU la'i mtshan nyid bshad pa bzhin byas nas ri'i rtse zhes pa bsgrub pa'i gnas der 'dug ces pa'o//de nas mchod pa rgya chen dang / /zhes pa sngar yi dags phal po che'i dkyil 'khor du mchod pa bshad pa bzhin du rgyas par bya zhes pa'o/ /phyogs kyi gtor ma kun du bya/ /zhes pa dkyil 'khor gyi phyi rim du dgod/ phyi rol phyogs su yang gtor ro/ /zhes so/ /tri shUl me tog dkyil 'khor la/ /gzhan nas me tog dag gis mchod/ /ces pa yi dags phal po che'i dkyil 'khor gyi dbus su me tog bkram pa de'i steng du tri shUl bzhag la/ tri shUl yang me tog gis mchod do zhes pa'o/ /tsan+dan dmar pos kun bskus shing //zhes pa/ tri shUl tsan+dan dmar po'i 'de gus zhes so/ /me tog dag gis thams cad brgyan/ /zhes pa me tog gi phreng bas brgyan zhes so/ /cho ga bzhin du lag gis bzung / /zhes pa tri shU la'i yu ba lag pa g.yas pas bzung zhes pa'o/ /sgrub pa po//ri mo la ni mngon phyogs 'dug /ces pa'o/ /khro bo'i mchog gi sngags dag gis/ /tri shU la ni mkhas pas bzlas/ /zhes pa sgrub pa pos lha gang bsgom par zad do/ /khro bo'i rgyal po bsgom na rtsa ba'i yi ge bcu bdun pa bzlas so/ /be ta lI bsgom na khro bo'i rgyal po ro langs kyi bka' brgyan pa'i sngags mang po bzlas so//be con phyag rgya'i gzugs bsgom na/ be con gyi phyag rgya'i sngags bzlas so/ /zhes pa'o/ /de yi nyes pa sbyang ba'i phyir/ /tri shU las nyes pa dang skyon sbyang ba'i phyir zhes pa'o/ /brgya rtsa brgyad du bzlas nas su/ /zhes pa bdag nyid lha gang bsgom pa'i sngags kyis zhes pa'o//khro bo mchog gi sngags dag gis/ /zhes pa la sogs pa dkyil 'khor gyi mdun du rgyas pa'i zhugs thab byas nas/ thab der me sbar te gzar bu chung ngus mar khu bcus shing / tri shUl la gtugs nas sbyin sreg bya'o//tshul de ltar sbyin sreg stong bya ba yang / sgrub pa'i rdzas tri shU la de gzengs bstod cing byin dang ldan par byin gyis brlab pa'i phyir ro/ /bdug sreg sbyin sreg stong byas nas/ /zhes pa kha cig ni sgrub pa'i rdzas la mi bdug par sbyin sreg bya ba bshad do/ /lag pas bsgreng ste bzung nas su//zhes pa de'i 'og tu tri shU la lag pa g.yon pas bzung nas bsgreng ste zhes pa'o/ /dpa' zhing brtan pa'i tshul 'dug nas/ /zhes pa la sogs pa mi 'jigs pa'i tshul du 'dug nas zhes bya ba'i don to/ /kha cig ni bsgreng ste sgrub par bshad/ tri shU la me 'bar ba byung gi bar du sgrub pa pos bzlas brjod bya'o//tri shU la zhes pa de 'bar bar gyur na zhes so/ /sgrub pa po de nas gyen du 'phar bar 'gyur zhes pa'o/ /sngags kyi mthu yis mig gsum la/ /zhes pa sgrub pa po'i mthus ni sgrub pa po'i lus lha'i sku 'di 'dra bar 'gyur ro/ /rig 'dzin gzhan rnams thams cad kyang //zhes pa rig 'dzin gyi rgyal por gyur pa la bya'o zhes so/ /de la zhes pa grub pa de la zhes so/ /dbang phyug ces pa longs spyod ces pa'o/ /'dod pa'i gzugs can yin bzhin myur/ /zhes pa bdag nyid gang 'dod pa'i gzugs su bsgyur la yid la bsam pa tsam du mgyogs par 'gyur ro//du ba 'byung zhes pa tri shU la du ba byung na zhes pa'o/ /de nas sgrub pa po de lus mi snang bar 'gyur zhes so/ /'on te tri shUl de ni tsha gyur na/ /zhes pa'o/ /dpung dang ldan zhes pa dmag gi dpung dag la bya zhes pa'o/ / g.yul ngo chen po la sogs par/ /'jigs shing skrag pa skyed par byed/ /ces pa gdan de lta bu dag tu bdag song nas dmag gi dpung dang / lha ma yin dang / g.yul ngo chen po'i gnas de dag thams cad 'jigs shing skrag par byed do zhes pa'o/ /de ltar dang po sgrub pa'i mchog ces bsgrub pa po dngos grub mchog bsgrub pa de ltar dang po'i tshul bzhin du bshad pa yin no//'og nas 'byung ba dang sbyar ro/ /ral gri sgrub pa dag bshad de/ /ur mo'i lcags las byas pa'i zhes pa sngar bshad pa'i lcags las byas pa'i ral gri zhes pa'o/ /srid du ral gri sor ni bcu gnyis pa//zhes pa'o/ /legs par byas shing 'phan med pa/ /zhes pa mtshan nyid dang ldan pa ste skyon med pa zhes pa'o/ /mchod pa la sogs sngon bzhin du/ /zhes pa yi dags phal po che'i dkyil 'khor dur khrod thal bas bri ba dang / maN+Dal gyi steng du me tog bkram pa'i steng du ral gri bzhag nas mchod pa bya ba la sogs pa sngar bshad pa bzhin no zhes pa'o//bdug pa'i sbyin sreg byas nas su/ /zhes pa dkyil 'khor gyi mdun du rgyas pa'i thab tu bsgrub pa'i rdzas gzengs bstod pa'i phyir snga ma bzhin du sbyin sreg bya'o/ /bzung ste zhes pa lag pa g.yas par bzung zhes so//'bar ba 'byin zhes pa ral gri las zhes pa'o/ /sgrub pa pos 'bar ba de ni mthong nas su zhes pa'o/ /rig 'dzin mchog tu de 'gyur ro/ /zhes pa rig 'dzin gyi rgyal por 'gyur ro/ /du ba 'byung zhes pa ral gri zhes pa'o/ /sgrub pa po de nas mi snang 'gyur zhes pa'o//ral gri de tsha bar gyur pa na de bzhin du/ /stobs chen rkang pa 'gyogs par 'gyur/ /zhes pa'o/ /lo brgya zhes pa lha'i lo zhes pa'o/ /dpyad mi dgos zhes pa the tshom med do zhes pa'o/ /gal te 'di las ma bsten nas/ /zhes pa dngos grub bsgrub pa 'di la zhes pa'o//dngos grub thob par ma gyur na/ /zhes dngos grub gsum las 'ga' yang thob par ma gyur na zhes so/ /ral gri brtson 'grus mchog ldan pas/ /zhes pa ral gri mthu dang ldan te zhes so/ /myur zhing mi ngal nyon mi mongs/ /zhes pa bdag nyid mi ngal nyon mi mongs par lo stong dag thub par 'gyur ro zhes so//da ni be con bsgrub pa bshad/ /shing ko phyi dang ca ra'i be con nam/ /zhes pa'o/ /be con yang na seng ldeng dag las bya/ /zhes pa'o/ /gshin rje'i be con lta bu bzang / /zhes pa gshin rje'i be con gyi mtshan nyid lta bur byas zhes pa'o/ /be con gyi srid du sor ni bzhi bcu rtsa gnyis pa'o//de nas blo can dur khrod du/ /zhes pa bsgrub pa'i gnas dur khrod du bya ste zhes pa'o/ /gtor ma sme gtor zhes pa'o/ /cho ga rgya cher byas zhes pa dkyil 'khor ri mo dgos par bshad do/ /be con mchog la sngon bzhin du/ /zhes pa sgrub pa'i rdzas be con gzengs bstod pa'i phyir sbyin sreg bya ba dag ni sngar bshad pa bzhin du bya'o//sgrub pa po gos ni dmar po dag ni bgos zhes pa'o/ /me tog dmar po dang thal bas brgyan zhes pa 'di dag gis lus brgyan cing / /thal bas bsku'o zhes pa'o/ /be con ni bsreg gzhir gzhag ces pa/ be con ri mo bsregs pa'i sa gzhir gzhag go//yu ba nas lag pa g.yas pas bzung zhes pa'i/ /be con lag na 'gul ba'i bar/ /zhes pa be con 'gul 'gul du bzlas brjod bya'o/ /de nas drag po'i khro bo'i bdag /ces pa de nas be con de grub na/ sgrub pa po de 'di 'dra bar 'gyur ro//'gro bar 'gyur zhes pa nam mkha' la 'gro zhes pa'o/ /kha dog 'dra zhes pa sngon po'i mdog la bya zhes pa'o/ /gal te khro bo de 'dod na/ /zhes pa khro bo des pha rol po gsod par 'dod na/ be con gyis lha rnams kyang gsod na gzhan lta ci smos zhes pa'o/ /da ni dgra sta bsgrub pa bshad do//dgra sta de ni sor drug pa/ /zhes pa dgra sta de nyid kyi srid du sor drug pa zhes pa'o/ /cho ga snga ma bzhin bsgrubs na/ /zhes pa dkyil 'khor bri ba dang mchod pa bya ba dang / rdzas gzengs bstod pa'i phyir sbyin sreg dang / bzung ba'i thabs dang / thams cad cho ga sngar bshad pa bzhin no//dngos grub de dag de yis thob/ /ces pa dngos grub rnam gsum sgrub pa pos thob ces pa'o/ /de nas gzhan yang lcags kyu'am mchog ces pa lcags kyu las dngos grub mchog 'grub par 'gyur bas na mchog ces pa'o/ /ur mo'i zhes pa sngar bshad pa'i lcags las zhes pa'o//lcags kyu'i zhes pa ni lcags kyu che chung gi srid du sor bzhi'i tshad du ste zhes pa'o/ /de'i yu ba yang lcags kyu de'i yu ba zhes pa'o/ /yu ba'i srid du mnyam pa'i sor ni bco brgyad pa zhes pa sbom phra med pa lcags kyu tsam gyi sbom du bya'o zhes pa'o//nub mo mchod pa gtor ma bya/ /ri yi rtse la 'dug nas su/ /zhes pa ri'i rtse mor dkyil 'khor bris la der mchod pa dang / gtor ma dag sngar bshad pa bzhin du bya zhes pa'o/ /lcags kyu chen po bsgrub par bya/ /zhes pa yon tan che bas na zhes pas so/ /ser skya zhes pa'i kha dog ces pa'o//bdug pa'i sbyin sreg byas nas su/ /zhes pa lcags kyu la reg par bya zhing sbyin sreg bsgrub pa'i rdzas gzengs bstod pa'i phyir sbyin sreg sngar bshad pa bzhin du bya zhes pa'o/ /bzung ste bzlas pa zhes pa lag pa g.yas pas bzung ste zhes pa'o/ /de nas de ni thogs pa yis//zhes pa 'bar bar gyur te thogs pas zhes pa'o/ /gyen du 'phar zhes pa nam mkha' la 'gro bar 'gyur zhes pa'o/ /bsgrub pa'i sngags pa de'i bka' yang rab tu nyan par 'gyur zhes pa'o/ /lcags kyu mchog ces pa yon tan la bya ste zhes pa'o//du ba 'byung bar 'gyur na ni/ /zhes pa sgrub pa po de'i mthu stobs kyang che la lus mi snang bar 'gyur zhing 'di'i grib ma yang mi snang bar 'gyur ro zhes so/ /sngags pa bye ba gsum du gson/ /zhes pa sngags pa de'i tshe bye ba phrag gsum du 'tsho'i zhes so/ / grub pa de la gnod sbyin rig 'dzin rnams kyis mchod ces so/ /bde ba zhes pa longs spyod kun dang rab tu ldan zhes pa'o/ /'dod par 'gro zhing stobs kyang che/ /zhes pa 'dod dgur 'gro zhing mthu stobs kyang che'o zhes pa'o/ /gal te lcags kyu de ni cher gyur na/ /zhes pa'o/ nang par bkra shis byas nas su/ /lcags kyu bzang po de thogs nas/ /zhes pa nub gcig sgrub pa po las dngos grub rnam gsum las gang 'grub kyang rung ste/ sgrub pa'i tshe nang bar bdag nyid khrus byas nas mchod pa yang bya/ /lus bsrung ba yang byas la 'grub pa'i rdzas de dag thogs par bya'o//grub pa kun la 'di bzhin sbyar ro zhes so/ /bzlas nas brgya byin la sogs pa'i/ /zhes pa la sogs pa lcags kyu lag pa g.yas kyis thogs nas/ brgya byin la sogs pa lha rnams 'gugs par 'dod na sngags yi ge bcu bdun pa mjug na phaT ces bya ba'i gong du hUM zhes bya ba'i 'og tu che ge mo zhig A kaR+Sha ya phaT ces bya ba la sogs pa'i tshul du bskul tshig bcug ste bzlas so zhes pa'o//sogs pa zhes bya ba 'og nas 'byung ba la bya ste/ lha rnams zhes pa tshul de ltar byas nas bkug na gdon mi za bar khugs zhes pa'i don to/ / yi dags zhes bya ba 'dre la bya'o zhes pa'o/ /ro langs kyi rigs kyi 'dre rnams dang zhes pa'o/ /ji ltar 'dod par byed du 'jug /ces pa bdag gi 'dod pa'i las rnams byed du gzhug go zhes pa'o/ /khu ba zhes pa gser sgyur rtsi zhes pa'o/ /ras ya na dang / zhes pa bong rdo la sogs pa la bsgrubs na/gser la sogs par 'gyur ba'i khu ba'am/ dngul chu 'dra ba'i sbyor sman rnams rdzas dag tu sgyur du rung ba yang dbul bar byed ces pa'o/ /gzhan yang sgrub pa'i rdzas rnams dang / /zhes so/ /gzhan yang / sngags pa yid la gang 'dod pa/ /zhes pa'o/ /de dag thams cad de la ni//zhes pa khu bar sa yan la sogs pa grub pa de sngags pa de la ni zhes pa'o/ /lha dang gnod sbyin tshogs la sogs/ /zhes pa lha de dag gis ji snyed pa sngags pa de la dbul bar byed do zhes so/ /de yi bka' ni thams cad kyang / /zhes pa sngags pa sgrub pa po de'i dka' zhes so//'jigs pas nges par nyan par 'gyur/ /zhes pa sngags pa des lha dang gnod sbyin la sogs pa rnams shes pa'o/ /ngo mtshar kun gyis brgyan pa yi/ /zhes pa lha dang gnod sbyin la sogs pa rnams so so'i chas ngo mtshar can gyis brgyan cing zhes pa'o/ /bdag gis bzhon pas yongs bskor zhing //zhes pa lha dang gnod sbyin la sogs pa de dag rang rang gi bzhon pa la zhon te rang rang gi 'khor rnams kyis kyang so so'i gnas bskor cing zhes pa'o/ /ngo mtshar kun dang rab ldan pa/ /zhes lha de dag so so rang rang gi longs spyod ces pa'o/ /'jig rten ma lus ston par byed//ces pa khams gsum dag kyang ston par byed do zhes so/ /rdzu 'phrul longs spyod yon tan gyis/ /zhes pa lha dang gnod sbyin de dag gis zhes pa'o/ /dga' bar byed ces pa 'grub pa'i sngags pas de la zhes pa'o/ /ji srid lcags kyu 'chang ba'i mi/ /zhes pa ji srid grub pa'i lcags kyu lag na 'chang ba de la zhes so//de yi dka' yis nges pa ru/ /zhes pa lcags kyu lag na thogs te bcing ba'i bka' zhes pa'o/ /gnod sbyin mo dag rang rang gis/ /zhes pa/ gnod sbyin mo rang rang gi longs spyod dang 'dod pa'i longs spyod kyang nye bar sbyor ro zhes so//de ste las kyi skyon dag gis/ /zhes pa sngon gyi las kyis sgrub zhes pa'o/ /lcags kyu de/ tsha ba tsam du ma gyur na/ /zhes pa grub par ma gyur pa'i lcags kyu de zhes so/ /lcags kyu de nyid 'dir bzung ste/ /zhes pa sgrub pa pos mtshan gcig tu lag pa g.yas kyis bzung ste zhes pa'o//nang bar dben par 'dug nas ni/ /zhes pa sgrub pa de ma grub pa'i nang mi la bya zhes pa'o/ /nu mo ngag gi ming bcug ste/ /zhes pa rtsa ba'i sngags kyi mjug tu che ge mo zhig A kar+Sha ya zhes pa'i bskul tshig bcug ste bzlas so/ /'di la maN+Dal bri mi dgos so//de nas cho ga des myur du 'ong bar 'gyur zhes pa'o/ /me tog 'bras bu de bzhin grub/ /ces pa gzhan yang 'di dag 'gugs par byed do zhes so/ /ma grub na yang rtag pa ru/ /zhes pa dngos grub rnam gsum zhes pa'o/ /de ltar lcags kyu dam pa 'di/ /zhes pa lcags kyu des dngos grub dam pa 'grub cing yon tan che bas na/dam pa'i lcags kyu dngos grub ces pa bshad zin to/ /'di man chad thod pa la dngos grub bsgrub pa bshad de/ thod pa'i dngos grub gang yin pa/ /zhes pa nas bstan te/ sgrub pa gang dag bshad pa ni/lag pa g.yas pas gzung bar bya/ /zhes pa sngar bshad pa dngos grub bsgrub pa'i rdzas de dag ni lag pa g.yas pas bzung ste bsgrub par bya'o/ /ci'i phyir zhe na/ mtshon cha de dag phyag g.yas pa na bsnams pas sgrub pa'i tshe na yang lag pa g.yas kyis bzung ste bsgrub pa zhes pa'o//thod pa la sogs pa zhes pa shak+ti dang tho mar dag bsdu zhes pa'o/ /lag pa g.yas pas bzung bsgrubs na/ /zhes pa phyag g.yon pas bsnams pa'i phyir sgrub pa'i tshe yang rdzas de dag lag pa g.yon pas bzung ste bsgrubs na ji ltar bshad pa bzhin du dngos grub thob par 'gyur ro zhes bya ba'i tha tshig go//shing la legs par bya ba ni/ /zhes pa hoM gzar byed pa'i tshe shing gi mtshan nyid 'di la bya'o/ /thod pa'i sor ni nyi shu la/ /zhes pa gdong gi zheng gi tshad ces pa'o/ /mnyam la rab tu legs par byas/ /zhes pa che chung med cing thag thug med pa zhes pa'o//nyes pa thams cad rnam spangs pa/ /zhes pa mdzer pa la sogs pa'i shing skyon de dag ces pa'o/ /ri yi rtse mor 'dug nas su/ /mchod dang gtor ma'i rim pa byas/ /zhes pa ri'i rtse mor dkyil 'khor bris la der mchod pa dang / gtor ma la sogs pa cho ga bzhin du bya zhes pa'o//bdug pa'i sbyin sreg byas nas su/ /zhes pa rdzas gzengs bstod pa'i phyir sbyin sreg bya'o/ /sngags kyi bsrung bas mthu bskyed do/ /zhes pa la sogs pa sgrub pa'i rdzas la sngags kyis mthu bskyed do/ /de'i phyir sngags kyis bsrung bsgrub pa'i rdzas kun la sbyar ro//thod pa lag pa g.yon pas bzung / /zhes pa grub pa'i tshe na lhung bzed 'dzin pa'i thabs su lag pa g.yon pas zhags pas bzung nas lag pa g.yas pas thod pa'i steng nas kha dag pa pa'i tshul du bkab la phang bar blangs te sgrub po zhes pa'i don to/ /du ba'am tsha bar 'byung gi bar//zhes pa de ltar dngos grub rnam gsum 'byung gi bar du rtsa ba'i sngags bzlas par bya zhes pa'o/ /de la rnam par dpyad mi dgos/ /zhes pa/ de ltar gyur pa the tshom med/ /ces pa'o/ /'on te de 'dir ma grub na/ /zhes pa thod pa de de ltar bsgrubs pa las skabs 'dir ma grub na zhes pa'o//de nas sa la mi bzhag par/ /zhes pa thod pa de zhes pa'o/ /sngags pa des de'i thod pa de blangs nas zhes pa'o/ /shing gi khri la zhes pa/ /a ni khri'u'i steng du gzhag /ces pa'o/ /ras kyis zhes pa ni mi dag gis ma mthong bar ras dkar po du ma gcig gis g.yog go//yid la ci 'dod ces pa la zan la sogs pa gang yang rung ba'i kha zas 'byung bar 'gyur ba'i thabs 'di ltar byas na kha zas 'di dag 'byung bar 'gyur ro zhes pa'o/ /lag gis bzung zhes pa thod pa lag pa g.yon pas bzung / /stong rtsa brgyad ces pa rtsa ba'i sngags sgrub pa po la nyin re zhing zhes pa nyin ri mi 'chad par thod pa de las gang yang rung ba'i bza' ba 'dod pa de dag 'byung bar 'gyur ro zhes so//bya nar bcas pa nges pa ru/ /zhes pa zan dang mar du bcas pa'am/ zan dang tshod mar bcas pa zhes pa'o/ /bdud rtsi zas ni sbyin par bya//zhes pa de yang bsti stang dang gus pa'i sems kyis sbyin zhes pa'o/ /tshul bzhin byin pa'i 'og tu ni/ /zhes pa sems can la de ltar sbyin pa'i 'og tu sgrub pa po bdag nyid khrus byas gtsang [(]sgra [,]sbra [)] byas te tshul bzhin du bzlas pa'o/ /thod pa bsgrub pa bshad pa 'di/ /lag pa g.yon pas gzung bar bya//zhes pa thod pa phyag g.yon na bsnams pas lag pa g.yon pas bzung ste bsgrub par bya'o/ /'di man chad shak+ti sgrub pa bshad de/ shak+ti rnon po zhes pa mdung thung zhes pa'o/ /legs byas pa zhes pa mtshan nyid dang ldan pa'o/ /bshol ba med par bsgrub par bya//ur mo lcags las byas pa'i mchog /ces pa sngar bshad pa lta bu'i lcags la bya zhes pa'o/ /bkra shis sor ni nyi shu gnyis/ /zhes pa ci srid du sor sum cu gnyis shak+ti rtse la ni srid du sor bzhi sngar gsungs pa ste/ bshad pa'i cho ga bzhin du chu 'gram gtsang mar dkyil 'khor bris la gzengs bstod pa dang /bsrung ba dang / /mchod pa la sogs pa tshul bzhin du byas te mtshan mo bsgrub po/ /tshul de ltar bsgrubs na dngos grub rnam gsum las gcig 'grub ces bya ba'i tha tshig go/ /'di man chad mda' bo che bsgrub pa bshad de/ to ma ra ya mkhas pas bsgrub/ /ces pa gong du ji skad bshad pa'i tshul bzhin du to ma ra sgrub pa ni sngags pas mda' bo che bsgrub ces pa'o/ /ur mo'i lcags las byas pa'i mchog /ces pa sngar bshad pa lta bu'i lcags la bya zhes pa'o/ /rab tu rno ba snga ma bzhin/ /zhes pa to ma ra ya mtshan nyid ldan pa bzang po la bya'o//tshad ni shak+ti 'dra'o zhes pa'o/ /bdug pa'i sbyin sreg byas nas su/ /zhes pa gzengs bstod pa'i sbyin sreg kyang bya'o/ /tsan+dan dmar pos gdab par bya/ /zhes pa to ma ra tsan+dan dmar po'i 'de gus byug go zhes pa'o/ / ri yi rtse mor gnas nas ni/ /zhes pa zhib tu sngar bshad pa'i tshul du bsgrub po zhes pa'o/ /grub na 'bras bu snga ma bzhin/ /zhes pa dngos grub rnam gsum las 'gyur ba snga ma bzhin no/ /'di man chad sdigs mdzub bshad pa/ lag pa g.yon pa'i mdzub mo ni/ / zhes pa lag pa g.yas pa'i chang ba'i nang du sbas la snying ga tsam du bya'o zhes pa'o/ /cho ga snga ma bzhin byas na/ /zhes pa cho ga sngar bshad pa'i tshul bzhin du bsgrub po/ zla ba gza' yis zin pa'i tshe/ /zhes pa dus dang sbyar te dngos grub bsgrub pa 'di'i thad kar 'jug par bya'o//stan gcig la ni legs 'dug nas/ /zhes pa mi g.yo mi 'khrug pa 'dug pa'i don du'o/ /gdon mi za bar zhes pa the tshom med par zhes so/ /mdzub mo de ni tsha bar 'gyur yang srid ces pa'o/ /rig 'dzin go 'phang thob par 'gyur/ /zhes pa rig 'dzin du 'gyur ro zhes pa'o//mdzub mo 'grub par ma gyur na/ /zhes pa dngos grub rnam gsum zhes pa'o/ /dngos grub nyams kyang nges par ni/ /zhes pa grub par ma gyur kyang / las rnams tshogs ni byed par 'gyur/ /zhes pa'o/ /khros nas de yis bsdigs na ni/ /zhes pa pha rol la mdzub mo de yis bsdigs na/mi de ji ltar 'dod pa ru/ /de ma thag tu 'gyel bar 'gyur/ /zhes bya ba'i don to/ /de ni lag pa g.yas pa yis/ /ji srid 'dod pa slong bar byed/ /ces pa sngags dang bcas par lag pa g.yas pas blang ngo zhes pa'o/ /bsdigs par nus zhes pa mdzub mo des zhes pa'o//ljon shing dang ni nags tshal rnams/ /zhes pa shing gsher ba zhes pa'o/ /de nas de ni mdzub mo des/ /zhes pa tshul de ltar bsgrubs pa de yis ring po mi thogs par rnyil bar byed ces pa'i don to/ /kun sbyin pa'i zhes pa gong du bshad pa rnams zhes pa'o//bsgrub pa mchog ces pa/ mdzub mo'i dngos grub mchog ces so/ /da ni zhags pa bsgrub pa bshad de/ shi ba'i skra las zhags pa ni/ /zhes pa skyes pa'am bud med gang yang rung ba'i skra las zhags pa bya zhes pa kha cig gis bshad nas sngar bshad pa dang sbyar na/bu mo'i skra las bya bar rigs so/ /mi gcig shi ba'i skra las ci langs pa'i zhags pa bya'o/ /sbom zhing yid du 'ong ba dang / /zhes pa 'jar 'jur dang phra sbom med pa'i mthe bong tsam mam/ mdzub mo tsam du bya'o/ /cho ga snga ma bzhin byas na/ /zhes pa sngar byas zhags pa bzhin du bsgrub po//de nas dngos grub thob ces pa zhags pa de yis dngos grub rnam gsum thob po zhes pa'i tha tshig go/ /'di man chad gaN+DI'i bsgrub pa bstan te/ shing ni rab tu bzang po las/ /zhes pa a shwat+tha la sogs pa la bya zhes pa'o/ /gaN+DI sor ni bcu drug bya//zhes pa bong tshad la bya ste/ dbyug to la yang yin zhes pa'o/ /legs par bzhogs shing legs bris pa/ /zhes pa mgo mjug gnyis su ri mo dag bri zhes pa'o/ /bzang po yid du 'ong byas nas/ /gser bzang po khyim bdag gis bkri//zhes pa'o/ /de yi rtse la nor bu ni/ /zhes pa gaN+DI de'i rtse mor zhes pa'i cho ga sngon du bshad pa bzhin zhes zhib tu bshad pa'i cho ga bzhin du bsgrub po zhes pa'o/ /nub sgrub ces pa mtshan gcig tu bsgrub po/ /snga ma bzhin du grub rnams su/ /zhes pa rig 'dzin gyi rgyal por 'gyur ro zhes pa'o//'dod gzugs can zhes pa 'dod dgur sgyur ba'i gzugs can du yang 'gyur ro zhes pa'o/ /du ba tsha la sogs pas kyang / /zhes pa/ dngos grub rnam gsum nyid la bya/ /zhes pa'o/ /de yi 'bras bu sngon bzhin du/ /zhes pa sngar bshad pa bzhin du thob bo//de ltar mdo ru bshad pa yin/ /zhes pa 'di yan chad lha'i mtshon cha zhes bya ba bshad do/ /'di man chad ro langs kyi dngos grub bshad do/ /de las rtog las 'byung ba yi/ /zhes pa nas bstan te/ dngos grub gzhan yang bshad par bya/ /zhes pa rgyud chen po las 'byung ba'i dngos grub gzhan yang bshad par bya'o zhes so//de ltar khro bo'i mchog gis ni/ /nyid kyi mdo ru bshad pa'o/ /zhes pa de yang AR+Ya many+dzu shrI ya mAn+ta ka nyid kyis ji ltar mdor bshad pa'i dngos grub de dag bshad par bya'o/ /yi dags mang po zhes bya ba'i//dkyil 'khor thog mar bris nas su/ /zhes pa/ yi dags phal po che'i dkyil 'khor de/ dur khrod thal bas dang por bri bar bya'o/ /rma med pa yi ro blangs nas/ /zhes pa nad kyis shi ba dang rul ba dang / mtshon gyis bsad pa ma yin pa ma god pa ma nyams pa'i ro sar pa blang ngo zhes mkhas pas shes pa sngags pas ro de khrus byas zhes pa'o//legs par brgyan zhes pa me tog phreng bas brgyan zhes pa'o/ /mi ro de la/ me tog spos kyis mchod nas su/ /zhes pa'o/ /gtor ma sbyin zhes pa sha dang khrag tu bcas pa'i gtor ma sbyin zhes pa'o//las ni dur khrod dag tu bya/ /zhes pa dkyil 'khor de yang dur khrod du bri'o zhes pa'o/ /'di ni gzhan du yong mi bya/ /zhes pa gnas 'di las gzhan du dkyil 'khor mi bri zhes pa'o/ /me tog bkram pa'i gnas mal du/ /de ni lho phyogs mgo bstan bzhag /ces pa dkyil 'khor gyi lho phyogs kyi sgo kar mal thabs su me tog bkram pa de'i steng du mi ro de mgo lho phyogs su bstan/ rkang pa gnyis dkyil 'khor logs su byang phyogs su bstan te bzhag go zhes pa'o/ /thod pa bzang po zas mchog gis/ /zhes pa kha cig bshad pa ni 'bras bzang po btsos pa'i nang du blugs pa yin no zhes bshad pa yin no//'bras dang 'o ma bcas pa'i zas mchog btsos pa dag gis mi'i thod pa bkang ba de blangs nas zhes pa'o/ /zas mchog de yi nang du yang / /tshil chen dag gis blugs par bya/ /zhes pa mi'i thod par blugs pa'i zas mchog de'i nang du yang mi'i tshil bzhu ba dag gis blugs par bya'o zhes pa'o//mkhas pas de dag de yi tshe/ /zhes pa sngags pas zas mchog sbyar ba de dag bsgrub pa'i tshe/ gzar bu mi ro'i khar blugs la/ /zhes pa seng ldeng gi gzar bu chung ngus zas mchog bzhag pa de las bcus shing mi ro de'i khar blugs so//de yang khro bo'i sngags bzlas shing mi ro'i khar sbyin lugs brgya bya'o/ /de yi lce yang dbyung bar 'gyur/ mi ro de yang lce 'byung bar 'gyur ro zhes pa'o/ /de nas mtshon gyis bcad par bya/ /zhes pa lce de'i rtsa ba nas mtshon ral gris bcad par bya'o//lce ni rtsa bar bcad pa las/ /zhes pa ral gri de dag gis blangs nas grogs po du yod pa la re re sbyin no zhes so/ /sgrub pa po yis blangs nas su/ /zhes pa de ltar grogs po rnams la yang ral gri re re sbyin pa'i 'og tu sgrub pa pos bdag gi ral gri gcig blangs nas de ma thag tu 'grub par 'gyur ro//grogs po ral gri byin pa de rnams dang sgrub pa po bdag nyid kyang rig 'dzin thams cad kyi rgyal por 'gyur ro/ /grogs po de dang rnam bcas par/ /zhes pa ral gri sbyin pa'i grogs po de rnams dang sgrub pa po bdag nyid dang bcas te/bskul ba bdun du gnas par 'gyur ro zhes pa'i tha tshig go/ /yang na mkhas pas zhes bsngags pas zhes pa'o/ /dkyil 'khor de ni bri bar bya/ /zhes pa snga ma bzhin du dkyil 'khor de dur khrod du bri zhes pa'o//mchod pa ji skad gsungs pa bya/ /zhes pa gong du bshad pa bzhin du bya zhes pa'o/ /skyes bu nad med 'byin pa yi/ /zhes pa nad kyis ma btab par shi ba'i zhes pa'o/ /rma med pa yi ro blangs nas/ /zhes pa ro sar pa ma nyams pa zhes pa'o/ /brgyan zhes gong du bshad pa bzhin du zhes pa'o//dkyil 'khor de yi sgor bzhag ste/ /zhes pa dkyil 'khor gyi lho phyogs kyi sgo snga ma bzhin du bzhag nas zhes so/ /de yi snying gar de 'dug nas/ /zhes pa g.yon brkyang pa'i tshul du 'dug nas zhes pa'o/ /yi ge bcu bdun de bzlas nas//zhes pa lha 'og nas dngos grub 'byung ba kun la sngags 'di bzlas so/ /ar+g+ha legs par dbul bar bya/ /zhes pa bdag gi lus las bcad pa'i khrag dang sha bsres pa'i ar+g+ha mi ro de la dbul bar bya'o/ /de'i mgo la zhes pa mi ro de'i zhes so/ /sngags pa'i lag pa g.yon gyis zhes pa'o//de nas bdag nyid chen po de'i/ /zhes pa mthu dang ldan pa'i mi ro de'i kha nas myur du 'byung bar 'gyur zhes pa ldong ros de 'dra ba zhes pa'o/ /sgrub pa po des de blangs nas/ /zhes pa sngags pas ldong ros des/ yan lag thams cad bskus nas ni/ /zhes sgrub pa po'i lus zhes pa'o//grogs po rnams la'ang de bzhin sbyin/ /zhes pa ldong ros grogs rnams la'ang sbyin no/ /de ma thag tu de dag kun/ /zhes pa bskus ma thag tu de dag kun kyang btso ma'i gser gyi mchog tu 'gyur zhes pa rig 'dzin kyi rgyal por 'gyur zhes pa'o//las rnams thams cad 'grub par ni/ /zhes pa grub pa'i rdzas rnams las 'grub par 'gyur na/ bgor rung dang mi rung ba rnams la ji ltar spyad pa'i mtshan nyid bshad do/ /dkon mchog gsum la cha gcig dbul/ /zhes pa ral gri mang po dang ldong ros lta bu dag gis rdzas bgor rung bar gyur na grub pa'i rdzas la cha gcig dkon mchog gsum la bsngos te dbul/de'i 'og ma cha gcig sgrub pa po bdag nyid bskur ro/ /de la cha gcig grogs po rnams la sbyin no zhes pa'o/ /byin nas 'di la nam mkhar 'phar/ /zhes pa de ltar cha gsum po so sor bgos nas de'i 'og tu sgrub pa pos bdag nyid grub pa'i rdzas de dag thogs nas nam mkhar 'phar bar 'gyur ro zhes bya'o//rdzas gcig gyur pa gyur pa las/ /cho ga gzhan ni bshad par bya/ /zhes pa de la rdzas bgor mi rung ba'i ral gri lta bu gcig pu zhig grub par gyur na gong ma las gzhan pa'i cho ga dang /dpyad na sgrub pa po bdag nyid bskur bar bya ba de bshad do/ /rdzas gcig grub par gyur na ni/ /zhes pa la sogs pa dngos grub pa'i rdzas bgor mi rung ba gang yang rung ba gcig grub par gyur na/ rdzas de dag bgor med par dang por dkon mchog gsum la phyag 'tshal nas/ dkon mchog gsum la cho ga bzhin lus dbul bar bya'o/ /de yi gong du rdzas de blang / /zhes pa la sogs pa de ltar lus phul ba'i 'og tu bgor mi rung ba'i grub pa'i rdzas de bdag gis blang bar bya'o//grogs po rnams la gces rigs su grub pa'i rdzas mi ro gser du 'gyur ba'i rdzas la so sor ci rigs par sbyin no/ /bsgrub pa'i rdzas de lta bu med par gyur na bdag gis nor rdzas ci bdog pa'i las grogs rnams la sbyin no/ /de'i 'og tu grub pa'i rdzas de bdag gis khyer na grub par 'gyur te/nam mkha' la 'phar ro zhes pa'i tha tshig go/ /phyi nas cho ga 'di dag spyad/ /ces pa gang yang rung ba'i grub pa'i rdzas de cha gsum la sogs pa'i tshul du so sor bgos te de'i 'og tu grub pa'i rdzas de bdag gis spyad do/ / de ltar ma byas grub na yang / /zhes pa gang yang rung ba'i grub pa'i rdzas de bgo ba la sogs pa'i tshul du de ltar ma byas na yang dam tshig nyams pas de yi rdzas de phrog par 'gyur zhes pa'o/ /de bas dngos grub mchog rnams la/ /kun du ji skad bshad bzhin bya/ /zhes pa 'di skabs su dngos grub rnam pa gsum char dngos grub mchog go//'bring dang tha ma dngos grub ni lugs ma'i dngos grub kyi skabs su sngar bshad pa yin no/ /de bas na dngos grub rnams grub pa'i rdzas rnams la ji skad bshad pa bzhin du bgo ba la sogs pa la bya'o zhes bya ba'i tha tshig go//'di man chad an dza la sogs pas mig bsku ba'i dngos grub bshad do/ /de nas gzhan yang an dza na/ /zhes pa nas bstan te/ de nas gzhan yang an dza na/ /zhes pa an dza na mig sman la bya ste/ sngon po gcig yod ces pa'o//bzang po bsgrub pa bshad bzhin pa/ /zhes pa an dza na 'grub pa khro bo chen pos bshad pa bzhin zhes pa'o/ /sgrub pa'i dgos pa thams cad 'grub par 'gyur zhes pa'o/ /sgrub pa de zhag gsum bsgrub par byas nas su zhes pa'o/ /dur khrod dag tu dkyil 'khor bya/ / zhes pa dur khrod kyi gnas su yi dags phal po che'i dkyil 'khor bri zhes so/ /de nas cho ga snga ma bzhin/ /zhes pa sngar bshad pa'i cho ga bzhin no zhes so/ /thal bas bdag nyid bsrung bar bya/ /zhes pa dur khrod kyi thal ba la sngags kyis btab ste bdag gis lus la gtor te bsrung ngo zhes pa'o//de yis bdag nyid byugs nas su/ /zhes pa thal ba de yis sngags pa'i lus la thal ba skam pos gtor ba la bya zhes pa'o/ /grogs po mchog ldan dpa' ba des/ /zhes pa sgrub pa po'i grogs mchog dang ldan pa'i sgrub pa po nyid sems dpa'o zhes pa'o//gsal shing gis ni mgo la bzhag /ces pa gsal shing gsad pa'i mi ro'i mgo bo bcad pa dkyil 'khor gyi sgo'i mdun du bzhag pa de'i steng du an dza na bzang po bzhag pa'o/ /shi ba'i gos kyis g.yogs nas su/ /zhes pa ras kyis an dza na dang mgo gnyis ka g.yogs nas zhes pa'o//lag pa g.yon pas bzung ste bzlas byas pa/ /zhes pa'o/ /sngags pa blo can gyis ni ji srid bzlas/ /zhes pa'o/ /de yang mig dag bskus nas ni/ /zhes pa an dza na grub pa de skam thags su cung zhig bdar te des mig bsku'o//de bzhin du ldang ros dang yang sbyar zhes pa'o/ /du ba 'byung na mig bskus pas/ lus ni mi snang bar 'gyur bar bshad ces pa'o/ /tsha bar gyur na mig bskus na bltas pa yis/ 'gro ba dag ni gsod par 'gyur/ /zhes pa'o/ /slar yang legs par gso ba ni//zhes pa mig bskus sam phyis pa yis sos par 'gyur zhes pa'o/ /'di la grub par ma gyur na'ang / /zhes pa an dza na de de ltar dngos grub rnam pa gsum las 'ga' yang grub par ma gyur na/ mig dag legs par bskus nas ni/bltas pas 'gro ba dbang du 'gyur/ /zhes pa'o/ /pus mo btsugs shing mgo bo dud/ /ces pa de lta bu'i tshul du dbang du 'gyur ro zhes pa'o/ /'di man chad ni gi wang bsgrub pa bstan te/ an dza na yi rtog pa bzhin/ /zhes pa nas bstan te/ an dza na yi rtog pa bzhin/ /zhes pa/ an dza na ji ltar bsgrub pa bzhin du sngags pas gi wang tshul de dang 'dra bar bsgrub po/ /dngos grub dag kyang de bzhin bstan/ /zhes pa gi wang las dngos grub rnam pa gsum du yang an dza na'i dngos grub rnam gsum bzhin du 'gyur ro//gi wang ma grub par gyur na yang mig gi bskus na/ ma grub 'gro ba dbang du 'gyur/ /zhes pa'o/ /'di man chad li khri dang ba bla ldong ros kyi bsgrub pa bshad de/ /li khri dang zhes pa nas bstan te/ li khri dang ni ba bla dang / /zhes pa li khri la sogs pa'i bsgrub pa'i cho ga yang an dza na'i tshul bzhin du bsgrub par bya'o zhes pa'i don to//sngags pa mkhas pa dag gis bsgrub par bya zhes pa'i tha tshig go/ /'di man chad ro'i gos la bsgrub pa bshad de/ shi ba'i gos kyang cho ga bzhin/ /zhes pa nas bstan te/mi shi ma thag tu khrus byas nas ras kyis ro bkab ste/ dur khrod du bskyal nas ro la rdzas yod pa de ro bskyal ba'i mi rnams kyis khyer ba la sogs pa dag gis nyo bar bya'o/ /bsgrub pa gzhan dang zhes pa gong ma las gzhan zhes pa'o/ /khro bo nyid kyis gsungs pa'i sngags//mdor na rab tu bshad par bya'o/ /zhes pa khro bos gsungs pa'i sngags bzlas pas mi ro'i gos te sgrub pa'i cho ga mdor bshad par bya'o zhes pa'o/ /dur khrod dag tu dkyil 'khor bri/ /zhes pa dur khrod kyi gnas su yi dags phal po che'i dkyil 'khor dur khrod kyi thal bas bri zhes pa'o//mchod pa dang ni gtor ma bya/ /zhes pa sngar bshad pa bzhin du bya zhes pa'o/ /shi ba'i gos ni bgos nas su/ /zhes pa shi ba'i gos ras de sngags pas zhes pa'o/ /cho ga shes pas mtshan mo bzlas/ /zhes pa cho ga shes pa'i sngags pas mtshan mo bsgrub po//de nas gos de dang bcas par shes par ras de dang bdag gi lus dang zhes pa'o/ /bdag nyid kyi lus/ 'bar zhing 'bar bas yongs bskor nas/ /zhes pa phan tshun nye 'khor gyis bskor yang zhes pa'o/ /legs par 'bar zhes pa de lta bu'i mtshan ma byung nas zhes so//sgrub pa po de/ gad mor rab tu dgod pa'i sgra/ /'jig rten skrag par byed pa sbyin/ /zhes bya ba'i don to/ /rtag tu 'dod lha'i gzugs dang ldan/ /zhes pa 'dod pa'i gzugs dang 'dra ba bzang po zhes pa'o/ /bdag gis lus la/ de bzhin du ba byung na yang //zhes pa'o/ /gdon mi za bar mi snang ba'i/ /mchog tu 'gyur bar rab tu bshad/ /ces pa lus mi snang ba rnams kyis rgyal por 'gyur ro zhes pa'o/ /de ltar 'grub par ma gyur na'ang / /zhes pa dngos grub rnam gsum las gcig tsam yang 'grub par ma gyur na/rkang pa mgyogs shing stobs chen 'gyur/ /zhes pa'o/ /sgrub pa pos/ gang rnams mthong zhing gang gis de/ /pha rol pos grub pa de/ mthong bas de dag bran bzhin 'gyur/ /zhes pa'o/ /'di man chad gnod sbyin mo bsgrub pa bshad de/ gal te 'di la gnas bzhin du//zhes pa nas bstan te/ mi'i gnod sbyin mo bsgrub pa bstan zhes pa'o/ /'ba' ta'i shing drung nyams dga' bar/ /zhes pa shing n+ya gro d+ha'i drung du sngags pa nyams dga' bar zhes pa'o/ /de'i tshe dkyil 'khor bris nas su/ /zhes pa dngos grub bsgrub pa'i tshe/yi dags phal bo che'i dkyil 'khor bris nas sgrub pa po nyid/ skra bshig gos kyang med par byas/ /zhes pa'o/ /zas mchog legs par btsos nas ni/ /lhung bzed bzang po yongs bkang nas/ /zhes pa 'bras dang 'o ma sbyar ba legs par btsos pa'i zas 'di lhung bzed bzang po bkang nas 'bras dang /sA lu zho dang sbyar bas lhung bzed nas zhes pa'o/ /de nas chang bu bdun phyung ste/ /zhes pa nas lhung bzed kyi nang du blugs pa'i zas mchog de la zhes so/ /sngags kyis lan bdun btab nas su/ /zhes pa/ chang bu de sngags lan re btab nas su/lha yi bzang mo'i 'di bshos pa zhes byas nas zhes pa'o/ /de ni rgyab tu 'dor zhes pa bdag gis rgyab tu 'dor zhes pa'o/ /de nas chang bu gzhan yang bdun/ /sngags kyis btab nas bza' bar bya/ /zhes pa de'i 'og tu zas mchog de las chang bu bdun byung ste/sngags kyis btab nas bdag nyid bza' bar bya'o/ /grub pa gnod sbyin kun gyi rje/ /zhes pa gnod sbyin mo rnams kyi nang na rgyal mo de yang / 'khor rnams mang pos kun bskor nas/ /zhes bya ba'i don to/ /de ni de nas 'ong bar 'gyur/ /zhes pa lha'i bzang mo de'o zhes pa'o//de nas kha bkrus de la ni/ /zhes pa 'ongs nas bdag nyid kyi kha lag bkrus te/ lha'i bzang mo de la/ spos dang me tog mchog ldan pa'i/ /chu yi ar+g+ha dbul bar bya/ /zhes pa 'di ltar ldan pa'i chu'i mchod yon dbul bar bya'o zhes pa'i don to//legs 'ongs me tog dag kyang dbul/ /zhes pa legs par brjod nas me tog dag gis kyang mchod par bya'o/ /de nas nyams dga' stan bzang ba/ /zhes pa za 'ug la sogs pa nyams dga' ba'i stan bzang po bting ba'i steng du me tog bkram pa dang ldan pa'i steng na bzang po phul nas zhes pa'o//de ni khyod kyis bdag 'grub ste/ /zhes pa lha'i bzang mos bka' stsal ba/ bka' bzhin byed pa de bzhin du/ /gzhan du mi 'gyur de bzhin du/ /zhes pa tshig 'di skad ces sgrub pa po la smra bar bya'o zhes so//bka' stsol cig ces de la smra/ /sgrub po pos ni rnam pa gcig tu gsol ba gdab po/ /ma'am yang na sring mo'am/ /mdza' mo'am yang na chung mar 'gyur/ /zhes pa'o/ /grub pa'i rdzas ni mang po dag /ma zhes smras na mi 'gyur bar/ /zhes pa ldong ros la sogs pa grub pa'i rdzas mang po rnams ni mar gsol ba gdab ste/bzung ba de ltar te/ de las gung du mi rung ba/ /the tshom med par 'gyur ro zhes pa'o/ /'bras bu dang zhes pa sring mor bzung na zhes pa ste/ yid du 'ong ba gzhan rnams dang / /zhes pa gang dang gang 'dod pa gzhan rnams zhes pa'o//myur du chung ma sdug par yang ni byas na/ dpag tshad brgya nas khrid de 'ong / /zhes pa'o/ /de la chung mar smras zhes pa chung mar bzung na zhes pa'o/ /rnam par mdzes zhes pa lha'i bzang mo zhes pa'o/ /dga' bar byed ces pa srung ma nges par byed ces pa'o/ /des ma 'dod pa dag par zhes pa bdag gang 'dod ces pa'o//sgrub pa ji srid 'dod par sbyor ro zhes pa lha'i bzang mo de sbyor ro zhes pa'i tha tshig go/ /'di man chad sha za mo sgrub ba'i dngos grub bshad de/ gal te mngal gnas ma skyes pa'i/ /zhes pa sha za mo rdzus te skyes pa la bya zhes so//sha za mo ngag sgrub 'dod na/ /zhes pa 'dre mo la bya ste/ zas su sha za ba la bya zhes pa'o/ /sgrub pa po la de yi las/ /zhes pa sha za ba de'i dngos grub kyi las de dag 'dir ni bshad par bya zhes pa'o/ /gtsang mar dkyil 'khor bri bar bya/ /zhes pa sa sbyang zhing phyag dar byas par yi dags phal po che'i dkyil 'khor bri bar bya zhes pa'o//mchod pa chen po byas nas su/ /zhes pa snga ma bzhin du bya zhes pa'o/ /gtor ma las kyang sngon bzhin bya/ /zhes pa'i dkyil 'khor gyi mdun du sgo'i kha drang du hom bya'o/ /der ni dur khrod shing dag gis//zhes pa dur khrod kyi mgal dum zhes pa'o/ /sngags pas me ni rab sbar nas/ /zhes pa rgyas pa'i thab tu bya'o/ /der ni gzegs ma'i sbyin sreg rnams/ /zhes pa 'bras grus pa'i bcag 'phro dang dum bu grugs pa la bya ste/ de la pho tshums kyis blang zhing sngags dang sbyar zhing bsreg go//mi 'jigs mdun du ar+g+ha dbul/ /zhes pa sha za mo de la khrag dang bcas pa'i ar+g+ha dbul zhes pa'o/ /de yi 'og tu de la ni/ /zhes pa ar+g+ha dbul ba'i 'og tu sgrub pa de la/ bdag nyid gzugs ni bzang bar ston//zhes pa sha za mo de la tha mal pa'i gzugs bzang bar ston zhes pa'o/ /de yi ming ni ka rang gi/ /zhes pa la sogs pa sngags kyi mjug la bi sha tsa ka rang gi ni zhes bya ba bcug ste/ hom byas nas gdon mi za bar khugs par 'gyur te/ langs nas sgrub pa pos gang bsams pa'i 'dod pa'i nor de rnams ring po mi thogs par gdon mi za bar dbul bar byed ces pa'o//ka rang ga ni zhes bya ba sha za mo'i ming zhes so/ /sha za mo ni kun gyi mchog /ces pa sha za mo'i gtso mo'i rgyal mo zhes pa'o/ /sgrub pa po ni sems dpa' zhing / / zhes pa sgrub pa po'i mtshan nyid 'di lta bu ldan pa la bya'o/ /de ni don rnams thams cad bsgrub/ /ces pa sha za mo de don thams cad grub par byed do/ /de lta min na myur bar ni/ /sgrub pa po yang gsod par byed/ /ces sgrub pa po mtshan nyid de lta bu dang mi ldan na sha za des sgrub pa po de dag gsod par byed do zhes pa'i tha tshig go//'di man chad ni klu'i bu mo bsgrub pa'i dngos grub bshad de/ de ste klu yi bu mo dag /ces pa nas bstan te/ de la rig 'dzin la la dag /ces pa sngags pa la la zhig klu'i bu mo bsgrub par 'dod na/ de sgrub pa'i cho ga bshad do//pad+mo dkar po'i mtsho 'gram du/ /zhes pa pad+mo dkar po'i mtsho yang yod pa'i pad+ma dmar po dkar po dang 'dres pa'i mtsho yang yod pas de dag tu mi bya bar pad+ma dkar po'i mtsho 'gram du bya'o/ /mkhas pas gtor ma'ang cho ga bzhin/ /zhes pa zhi ba'i gtor ma spyi rgyud nas 'byung ba bzhin du bya zhes pa'o//u dum bA ra'i yam shing gis/ /zhes pa u dum bA ra'i yam sreg gi shing gi rigs su gtogs pa'i shing gis me sbar ro zhes pa'o/ /thog mar me ni rab sbar nas/ /zhes pa rgyas pa'i thab khung du bya'o/ /mkhas pas stong rtsa brgyad du bsreg /ces pa gzar bu chung ngus sngags dang sbyar te bsreg ces pa'o/ /sgrub pa po ni gang 'dod pa/ /zhes pa klu'i bu mos sgrub pa po la gang 'dod pa the tshom med par ster bar 'gyur ro zhes pa'o/ /de'i tshe sngags pa lha min gyi/ /zhes pa 'di man chad ni lha ma yin gyi bu mo sgrub par bshad de//las 'di dag gis nges par sgrub/ /ces pa cho ga 'og nas 'byung ba dag gis lha ma yin gyi bu mo sgrub po zhes so/ /snga ma bzhin bris nas zhes pa lha ma yin gyi phug tu yi dags phal po che'i dkyil 'khor bri'o zhes pa'o//zhugs thab rgyas pa'i thab tu ni/ /pri yang ku yi shing las me sbar nas/ /zhes pa'o/ /yungs kar dkar po gur kum la/ /zhes pa gzar bu chung dun gyis sbyin sreg bya/ /yang na phogs gsum blang zhing sngags dang sbyar te stong rtsa brgyad du sbyin sreg bya'o zhes pa'o//bde ba'i lam nas 'jug par byed/ /ces pa nyon mongs pa'i lam ma yin par khrid par byed ces so/ /ldan par ni zhes pa longs spyod ces pa'o/ /de nas de ni dga' bar byed/ /ces pa lha ma yin gyi gnas de na sgrub pa po de dga' bar byed do/ /'di man chad sha chen po btsong ba'i dngos grub sgrub pa bshad de/sha chen ni mi sha la zhes pa'o/ /dpa' ba'i sems kyis mi sha blang / /zhes pa/ chu gris mi ro sar pa mtshan nyid dang ldan pa'i sha las sna dgu dang bzang dgu gdams te bcad la zhib pa'am/ skon bu bzang po'i nang du gzhug go//g.yas na sha chen skyon med gzung / /zhes pa mtshan nyid dang ldan pa'i mi ro sar pa'i sha skyon med pa gzung bar bya'o/ /dur khrod ces pa dur khrod chen po ro ldan zhes par sgrub pa pos so/ /sha 'tshong ba yi sgra sgrogs so/ /zhes pa skabs su 'di skad kyi sgra bsgrag par bya'o//tshig ces pa bsgrub pa po de'i tshig ces pa'o/ /srin po zhes pa srin po ngan phe'u phal ba zhes pa'o/ /sha chen de la sngags kyis bsrung ngo / /yi dags phro mo kha cig gis/ /thos nas rab tu 'jigs par 'gyur/ /zhes pa sgrub pa po de'i sgra thos nas 'bros par yang 'gyur ro zhes bya ba'i don to//gang gzhan lhag pa'i sems yod cing / /zhes pa yi dags gong ma las lhag pa'i zhes pa'o/ /dang por dur khrod zhing skyong ba'i/ /zhes pa dur khrod de nas dngos grub 'bum 'byung zhing stsol bar mdzad pas na zhing skyong ba zhes pa'o/ /stobs po che zhes pa yi dags phal po che zhes pa yi dags phal lo//sgrub pa po zhes pa sha btsong ba zhes so/ /de nas sems dpa' drag po der/ /zhes pa sgrub pa po sems drag po des zhes pa'o/ /de dag zhing skyong de dag ni/ /zhi ba'i gzugs su gnas nas su/ /zhes pa de nas mthu dang ldan pa'i drag po chen po de dag so so'i cha lugs tha mal bar zhi ba'i tshul du gnas zhes so//stobs chen khyod kyis sha chen 'di/ /zhes ba zhing skyong ba de dag gis/ sgrub pa po la smra bar byed/ /ces pa'o/ /'dod pa'i don ni rab bsgrub phyir/ /zhes pa bdag gang 'dod pa'i don bsgrub par bya ba'i phyir//yang na an dza dag dang / yang / rdzas ni gang dag 'dod pa de/ /zhes pa an dza na la sogs pa sgrub pa'i rdzas gang 'dod pa de sha sbyin par byos shig ces zhing skyong ba de dag la smra bar bya'o/ /sgrub pa pos kyang smra bar bya/ /zhes pa de las lhag pa'i tshig gzhan smra bar mi bya ba'o zhes pa'o//sems ni dpa' bar shes nas ni/ /sbyin par byed cing gzhan la min/ /zhes pa zhing skyong de dag gis sgrub pa po'i sems dpa' bar shes nas grub pa'i rdzas byin par byed kyi sgrub pa po sems mi dpa' ba phal gzhan las mi 'grub po zhes pa'i tha tshig go//'di man chad ba dan sgrub pa zhes bya ba bshad de/ de nas gzhan yang 'di yi las/ /zhes pa/ khro bo'i rgyal po'i las gzhan yang / /dpung rnams mnan par bya ba gang / /zhes pa mi g.yo bar nges pa'i bya ba gang zhes pa ni/ khro bo mchog gis gsungs pa ni/ / zhes pa khro bo'i rgyal pos gsungs pa de/ de dag 'dir ni bshad par bya/ /zhes pa'o/ /de ni mthing ka legs bya ba/ /zhes pa ras kha dog ces pa'o/ /srid du sor bcu drug gi tshad du bya/ /zhes pa ji tsam ran par bya zhes pa'o/ /btags te de nas bsgrangs nas su/ / zhes pa 'phan 'dra bar gdags pa la bya zhes pa'o/ /dur khrod du ni mtshan mo bsgrub/ /ces pa yi dags phal po che'i dkyil 'khor bris nas bsgrub ces pa'i tha tshig go/ /g.yon pas thogs te zhes pa'o/ /ba dan lag na thogs nas ni/ /zhes pa ming gis gsal bar ma byung ba rnams ni lag pa g.yas pas thogs pa srid pa'i phyir ro//de tshe dgra ni dpung 'khrug cing / /ces pa bdag la 'khrugs te rngam pa zhes pa'o/ /the tshom med ces pa mi g.yo bar zhes pa'o/ /lag na mtshon cha thogs nas ni/ /zhes pa ming gi mtshon cha thogs shing /bdag la rgol zhing gnod par byed pa gzhan dag gis kyang bdag mthong ba yin zhes pa'o/ /rgol zhing gnod par byed pa de dag thams cad mthong ma thag tu sgrub pa pos/ mnan te ri bzhin mi g.yor 'gyur/ /zhes pa mi g.yo zhing 'gul mi nus par nges par byed do zhes pa'i don to//myos pa dang zhes pa glang po che'i rgyal po zhes pa'o/ /rkang thang 'khrugs pa ma bcas pa'i/ /zhes pa bdag la 'khrugs te rngam pa dag la'o/ /sgrub pa pos mthong ba tsam gyis nyid kyis su/ rengs shing mi g.yo ba bzhin du snang bar 'gyur ro zhes pa'i tha tshig go//'di man chad thal ba bsgrub pa zhes bya ba bshad/ de nas gzhan yang dur khrod kyis/ /zhes pa nas bstan te/ sbyor ba bkra shis dge ba dag /ces rdzas dngos grub dur khrod las phyung ste/ bkra shis pa ma yin gyi 'on kyang de bsgrub pa'i tshe/khro bo'i sbyor ba dang ldan la grub nas kyang sems can mang po'i don sna tshogs byed pas na yang sbyor ba bkra shis pa zhes bya'o/ /sbyor ba dge ba'i rgyud chen po las/ /mtshan mo 'bar ba bltas nas su/ /zhes pa mi shi ma thag tu dur khrod du bskyal nas der bsregs pa bltas nas bdag nyid skra bshig gos kyang med par byas zhes pa'o//bzlas pa dag kyang bskor zhing bya/ /zhes pa ro bsregs pa'i mi ro de la khro bo'i sngags zlos shing g.yas phyogs nas bskor te bzlas pa byas nas/ me mdag shi shi'i bar du bya//ro bsregs pa'i me shi ba der zhes pa'o/ /lan cig thal ba spar gang la/ /zhes pa thal ba sngar spar gang lan cig blang ngo / /thal ba de yang / lag pa g.yon gyis blangs nas su/ /zhes pa'o/ /mkhas pas khyim du 'gro bar bya/ /zhes pa sngags pas khang pa stong par 'gro//yang na lha khang stong par 'gro/ /zhes pa la ma hA de ba la sogs pa 'jig rten pa'i lha khang stong pa'i gnas su 'gro bar bya'o/ /phyir yang lta bar yong mi bya/ /zhes pa de ltar gnas de dag tu 'gro ba'i tshe sngar thal ba blangs pa'i gnas su phyir yang mi lta bar bya'o zhes pa'o//yang thal ba de zhes pa gnas der yang zhes pa'o/ /nam langs bar du bzlas pa bya/ /zhes pa kham phor gyi nang du zhes pa'o/ /sngags kyis thal ba de ni bsrungs nas su zhes pa'o/ /kham phor sar pa'i snod du gzhag par bya/ /zhes pa'o/ thal ba de ni dgra yi dpung dag gnas pa'i phyir zhes pa'o//dgra'i dpung la/ thal ba de ni gtor byas na/ dgra'i mtshon cha thams cad 'khrugs pa dang zhes pa'o/ /thal ba de ni bsrungs nas su/ /zhes pa dgra la thal ba de/ lan cig gtor ba tsam gyis kyang / /zhes ba'o/ /lus rnams mi 'gul gdon mi za//zhes pa dgra'i dpung gi lus rnams zhes pa'o/ /'di ni mtshon rnams gnon pa dang / /zhes pa thabs 'di ltar dpung gi lag nas mtshon cha thogs pa dag mi g.yo ba gnon pa'am rengs par 'gyur ro zhes pa'o/ /dpung yang gnon byed dge ba'o//zhes pa dkon mchog gsum la gnod pa rnams gnon par byed pas dge ba'o/ /de bzhin nyid kyis log pa dang / /zhes pa pha rol po'i dpung rnams thams cad do/ /myos par byed pa sbyar ba yang / /rlung phyogs dag tu sbyar ba'am/ /zhes pa pha rol po'i dpung gi rlung phyogs su 'dug la thal ba de gtor ba rlung gis khyer te/pha rol po'i dpung rnams la reg par bya'o/ /yang na bsnyen te byas kyang rung / /zhes pa pha rol po'i dpung gi drung du bsnyen te thal bas gtor ro/ /bgrod dka'i dgra ni mtshon 'khrug la/ /zhes pa thub par dka' ba'i dgra de dag mtshon cha thogs te rngam nas 'byung ba dag las byas nas 'gro ba mi 'gul 'gyur zhes pa thal bas gtor na pha rol po'i dpung rnams mi g.yo mi 'gul bar 'gyur ro zhes pa'i thag tshig go//'di man chad snag tsha sbyar ba bsgrub pa bshad de/ 'gro ba dbang byed sbyor ba na//zhes pa nas bstan te/ gong ma las/ rnam pa gzhan dag bshad pa ni/ /zhes pa'o/ /dur khrod dkyil 'khor bris zhes pa yi dags phal po che'i dkyil 'khor bris zhes pa'o/ /mchod pa zhes pa sngar bshad pa bzhin du bya zhes pa'o/ /mi yi tshil gyi snum dag las/ / zhes pa mi'i tshil bu bzhu ba thod pa'i nang du blugs te/ steng nas kyang thog ba gcig gis bkab ste mar me bus la de'i dud pa bsag go/ /snying po ni dur khrod kyi ras la bya'o/ /mkhas pa dag gis snag tsha sbyar/ /zhes pa snag tsha sbyar ba'i thabs 'dra bar mar me dud pa sbyor ro zhes pa'o//du ba'i snag tshas mig bskus na/ /zhes pa ka la sha zhes bya ba mig bsku ba'i thur ma des mig bsku'o zhes pa'o/ /gang mthong ba de sngags pa de'i dbang du 'gyur zhes pa'o/ /dang por ci bgyi zhes par 'gyur/ /zhes pa dbang du gyur pa de dag kyang dang por sngags pa la ci bgyi zhes pa'i tha tshig go//'di man chad btsag bsgrub pa zhes bya ba bstan te/ btsag gi sbyor ba'i dngos grub kyang / /zhes pa gser gyi btsag ces bya ste/ btsag yug snam bzang po la bya bar 'byung ngo / /dge ba dag ni da bshad do/ /zhes pa 'grub pa'i 'bras bu thob pa la bya ste gong du bshad pa dang 'dra'o//yug snam btsag ni dge ba dag /ces pa btsag yug snam bzang po 'de gu gcig mi shi ba de'i khyim nas phyung ste/ bsreg pa'i gnas su khyer te de'i tshe'am yang na bsreg pa nyid kyi tshe/ mi ro'i khar khyer du bcug nas/ /de nas mi ro mes phyed tshig phyed ma tshig tsam gyi tshe mtshan mo grogs med par gcig pu mi ro'i kha nas btsag rdog de blang bar bya'o//mtshan mo blang zhes pa 'di dang sbyar na de dag bdag nyid kyis bsreg pa khas blang dgos so/ /blangs nas lha yi khang stong du/ /zhes pa 'jig rten pa'i lha khang stong pa zhes pa'o//sngags pa mkhas pa dag gis bzlas par bya/ /zhes pa ras dmar po'i nang du bzhag la bsgrub po/ /bya zhes pa bsgrub par bya'o zhes pa'o/ /de nas 'dug cing zhes pa 'jig rten pa'i lha khang de na 'dug ces pa'o/ /de la bzlas zhes pa btsag rdog la bzlas zhes pa'o//mchod cing zhes pa sgrub pa po'i rdzas zhes pa'o/ /de nas gang yang rung ba'i ming / /de nas bdag gi sngags sar skyang nul bzang po rab tu byas pa'i steng du btsag rdog des gang dgug par bya ba'i ming bri bar bya'o/ /de yi ming nas sgrub pa pos//bskul nas dogs pa med par yang / /zhes pa de'i ming nas bskul zhing khro bo'i sngags dang ldan par bskul na the tshom med par gang dgug par bya ba de myur du khugs par 'gyur ro zhes pa'o/ /'di man chad sor gdub bsgrub pa bshad de/ cho ga bzhin du gsungs pa dag /ces pa khro bo'i rgyal po'i rgyud chen las zhes pa'o/ /mi ro khyer te 'gro ba na/ /zhes pa mi shi ba'i ro bsreg pa'i gnas su khyer te 'gro ba'i tshe na zhes pa'o/ /de'i khar zhes pa ro de'i khar zhes pa'o/ /der song nas ni gzhug par bya/ /zhes pa mi ro bsregs pa khyer te 'gro ba'i sar bdag song nas sor gdub mi ro'i khar gzhug go zhes pa'o//mkhas pas gcig pu khro bo'i sngags/ /zhes pa sngags pa de grogs med pa gcig pu zhes pa'o/ /zlos pa byed pa 'dug pa na/ /zhes pa mi ro bsregs pa'i drung du na zhes pa'o/ /ro yi kha ru 'dug pa ni//zhes pa mi ro de'i sngar khar bcug pa'i sor gdub lag pa g.yon pas blang zhes pa'o/ /nam langs bar du bzlas pa byas/ /zhes pa ro bsregs pa'i gnas de nyid du bzlas pa bya'o/ /sngags pa mkhas pa yis ni gzhug par bya/ /zhes pa'o zhes pa sgrub pa po'i de'i las byed pa tsam du ma zad kyi/phyi bzhin du'ang 'brang bar 'gyur zhes pa'o/ /'di man chad ni yungs kar bsgrub pa bshad de/ de nas gzhan yang yungs kar dag /ces pa nas bstan te/ shin tu ngo mtshar dang ldan pa/ /de kun de yi las byed 'gyur/ / zhes pa yungs kar grub pa ni ngo mtshar ya mtshan dag ston nus pa la bya'o zhes pa'o/ /khro bo nyid kyis ji lta bar/ /sgrub pa'i sbyor ba gsungs pa bshad/ /ces pa khro bo nyid kyis rgyud chen po las ji skad gsungs pa de bshad par bya'o/ /sid+d+ha'i shing zhes pa shing gi ming zhes pa'o//bzang po sor ni brgyad par bya/ /zhes pa dbang dang zhing gi tshad ces pa'o/ /yungs kar dkar zhes pa dkar po nyi tshe zhes pa'o/ /dngos grub mchog ni ster ba blugs/ /zhes pa yungs kar de gab tse'i nang gang bar blugs zhes pa'o/ /nyi ma re re bzlas pa yis//zla ba gzas zin bar du bya/ /zhes pa de la lo gcig gam/ zla ba drug tsam gyi sngon nas nyi ma re re dus gsum du rgyun mi 'chad par nam zla ba gzas zin dus bzlas so zhes pa ste/ 'di yang spyi rgyud las gsungs pa'i mtshan ma 'ga' zhig byung byung du bzlas so/ / de nas 'dod pa bsgrub par bya'o/ /dkyil 'khor zhes pa la de nas zla ba gzas zin pa'i dgongs ka yi dags phal po che'i dkyil 'khor bris nas/ dkyil 'khor mdun du bsgrub bo/ /yungs kar tseg tseg zer gyi bar du bzlas so zhes pa'o/ /de tshe yungs kar grub de dag /ces pa yungs kar la sgra de dag byung nas zhes pa'o//blangs nas gang yang rung ba ru/ /zhes pa sngags dang ldan pas yungs kar de gtor na des zhes pa'o/ /de'i yungs kar des mi nus ci yang med ces pa'o/ /ri mthong zhes pa rin po che'i rnam pa mang po dag ces pa'o//phyi ma zhes pa rmeg med par byed ces pa'o/ /sprin 'gog ba'ang zhes pa sprin rnam par bya ba dang zhes pa'o/ /rig 'dzin zhes pa/ sngags pa bdag gis sbyar na ni/ /zhes pa'o/ /glo bur dag tu thogs med byed/ /ces pa thogs pa med par glo bur du yang las de dag byed do zhes pa'o//gsungs dang ma gsungs pa dag kyang / /zhes pa gong nas gsungs pa'i las dang rtags 'og nas bshad pa'i las dag kyang sngags pa rang gi blos brtags pa'i las de dag thams cad kyang zhes pa'o/ /gtor ma tsam gyis thogs med byed/ / ces pa gtor ma tsam gyis thags thogs med par las de dag byed par ro/ /de la sogs pa sna tshogs pa/ /zhes pa de la sogs pa'i dngos grub sna tshogs gong du bshad pa rnams zhes pa'o/ /dpa' bo brtul zhugs spyod pa yis/ /zhes dpa' bo brtul zhugs spyod pa'o//sngags pa yis/ snga ma bzhin du mchog rnams dang / /zhes pa gong du bshad pa'i dngos grub mchog rnams zhes pa'o/ /'bring dag kyang ni bsgrub par bya/ /zhes pa dngos grub mchog gi 'bras bu dang / tha ma'i dngos grub dag kyang bsgrub par bya'o/ /de dag kyang brtul zhugs ni med par byas na 'bras bu med ces pa dpa' bo brtul zhugs ma spyad par dngos grub kyang bsgrubs kyang 'grub par mi 'gyur ro//'bras bu me dar 'gyur ro zhes so/ /phyag rgya gnyis kyi gnyis rnams ni/ /zhes pa phyag rgya'i lha gnyis gang bsgoms kyang rung ste/de dag gsum spyan drangs te mdun du bsam zhing bsgom mo/ /gang dag 'dir ni bshad pa rnams/ /zhes pa la sogs pa 'dir ni gong du bshad pa rnams kyi las de slar dgrol bar bshad de gser dngul la sogs te/ rin po che'i lha'i sku gzugs rnams kyis 'bring dang tha ma'i dngos grub bsgrub pa dang /las rnams sgrub pa ji skad bshad pa bzhin du be ta lI dang / be con phyag rgya'i gzugs gnyis la yang brtul zhugs ma spyod par yang bzlas brjod mchod pa 'ba' zhig byas pas kyang dngos grub 'bring dang tha ma dag 'grub par 'gyur ro//'di'i skabs su byug spos kyi 'de gus gzugs la bsku bar mi bya ste/ mchod par bya ba tsam nyid du zad do zhes pa'o/ /ji skad bzlas pas 'thob par byed/ /ces pa la sogs pa de bas na sngon du bsnyen pa dang bzlas brjod byas pa dang / mchod pa 'ba' zhig byas pas lugs kyi sku gzugs skabs kyi dngos grub 'bring dang tha ma dag 'grub par 'gyur ro zhes pa'o/ /rtag tu bde gshegs sems dpa' de/ /zhes pa byang chub kyi sems dang ldan par de zhes pa'o/ /nyin re zlos pa'i sbyor ba yis/ /zhes pa nyin gcig kyang dus gsum rtag tu zlos pa'i sbyor zhes pa'o//rtag tu brtul zhugs ma byas pa/ /zhes pa dpa' bo brtul zhugs zhes pa'o/ /'dod pa'i don zhes pa bdag nyid 'dod pa'i don zhes pa'o/ /brtul zhugs kyis 'grub pa zhes pa gong ma'i 'phro sbyor ba'i tshig ste/mjug sdud pa zhes pa'o/ /khro bo mchog gis ci gsungs pa/ /zhes pa rtsa ba'i rgyud chen po las bshad pa yin zhes pa'o/ /brgyad pa'o/ /brgyad pa'i bshad pa rdzogs so// //rtog pa phyi ma 'di la don rnam pa lngas bshad do/ /de la skabs dbye ba dang /sngon du bsnyen pa'i cho ga dang / /mchod pa sngar byas pa'i las rnams bshad pa dang / de bzhin gshegs pa'i dam tshig sngar byas nas zhi ba la sogs pa'i las bya ba dang / dpal la sogs pa sgrub pa'o/ /de yang dang po skabs dbye ba zhes bya ba bshad de/de yang rtog pa phyi ma yi/ /zhes pa khro bo'i rgyal po de'i rtog pa bshad de/ phyi ma zhes bya ba ni sngar gong du bshad pa 'chad cing ma chud pa rnams 'di man chad du bshad pas ni rtog pa phyi ma zhes bya ste/ mdor na gong ma'i las rnams kyi mjug sdud pa thun bu thu ba zhes bya ba'i tha tshig go//ji ltar brtul zhugs med kyang rung / /zhes pa rig pa phyi ma'i cho ga 'og nas 'byung ba 'di rnams la ni brtul zhugs spyad mi dgos zhes pa'o/ /de'i phyir khro bo bdag nyid kyis/ /zhes pa brtul zhugs dag spyad mi dgos pa de'i phyir/gsungs pa de yi cho ga brjod/ /zhes pa bshad pa zhes bya ba'i don to/ /bcu bdun pa zhes pa rtsa ba'i sngags so/ /rtsa ba'i sngags la/ khro bo zhes ni gang brjod pa/ /zhes pa'o/ /'di man chad ni sngon du bsnyen pa bya ba'i cho ga bshad de/ de la thog mar sngon bzhin du//zhes pa la sogs pa 'di'i skabs su sku gzugs bri ba ni sngon du bsnyen pa sngar bshad pa dag bya mi dgos par bshad do/ /de'i ri mo'i sku gzugs dang por sngar bshad pa'i mtshan nyid bzhin du bri bar bya'o/ /de ltar ri mo'i mdun du sngar bshad pa bzhin du mchod par bya'o/ / yang na sngags pas brdungs sam blugs pa'i sku gzugs byas kyang rung ste/ bzo bo byed du gzhug go zhes pa'o/ /mkhas pas brgyad 'bum bzlas par bya/ /zhes pa brdungs sam ri mo'i sku gzugs gang yang rung ba byed du bcug nas zin pa'i 'og tu sku gzugs kyi spyan sngar mchod pa chen po byas la dus gsum du brgyad 'bum tshang bar sngon du bsnyen pa bya'o//rtsa ba'i sngags bzlas so zhes pa'i don to/ /'di man chad mchod pa sngar byas nas las rnams sgrub pa zhes bya ba bstan pa'i phyir/ de yi thog mar dkon mchog ni/ /zhes pa la sogs pa smos te/de'i thog mar dkon mchog ni/ /zhes pa de ltar brgyad 'bum bzlas pa byas pa'i 'og tu sangs rgyas dang chos la mchod pa chen po byas shing dge 'dun la mchod ston bya zhing mchod de/ de ltar dkon mchog gsum la mchod pa'i 'og tu khro bo'i rgyal po la khyad par du mchod pa ji skad bshad pa bzhin du mchod par bya'o zhes pa'i don to//'on kyang 'grub ste de yi tshe/ /zhes pa cho ga de ltar byas pas 'grub par 'gyur te/ de'i tshe na las 'di dag byed nus par 'gyur ro zhes pa'o/ /'byung po'i gdon dang zhes pa 'byung bo'i gdon la yang bya'o/ / 'byung po dang gdon zhes so sor yang bshad ces so/ /dug rnams dang zhes pa la sogs pa'i las rnams sgrub pa po gang dang gang 'dod pa'i las rnams yid la bsams pa tsam gyis las de dag 'grub par 'gyur ro zhes bya ba'i don to/ /yid la zhes pa 'gro ba dang mi 'gro ba'i zhes pa'o/ / de yid bsams pa'i las kyang zhes pa 'byung po la sogs pa dang dug dang nad kyis btab pa'i las gang du bshad pa'i las rnams kyang khe dang / bkur sti dang / rnyed pa 'thob par bya ba'i phyir ni las de dag spyad par mi bya ste/ gzhan du na dkon mchog gsum gyi don dam ched du las de dag bya'o zhes pa'o//dug la sogs pa gang brjod pa/ /las rnams kyi ni tshig gis bya/ /zhes pa 'byung po las gdon dag gis las gong du bshad pa rnams grub pa des tshig gis bsgo ba tsam gyis las de dag 'grub par 'gyur ro/ /gzhan du yengs pa'i tshig gis kyang //zhes pa'i sgrub pa po de gung du dge ba'am/ las la yengs la de'i tshig gis kyang zhes pa'o/ /bdag nyid ji ltar 'dod bzhin du/ /zhes pa bsgo ba tsam gyis kyang 'grub ste/ ji ltar 'dod pa'i las rnams 'grub par 'gyur zhes pa'o//da bdug pa yi sems can rnams/ /zhes pa grub pa'i des de bzhin/ /tshar bcad pa dang phan 'dogs nus zhes pa'o/ /gang gi nag pos zin pa yis/ /las rnams kyang ni byed 'gyur ba/ /zhes pa ka la na ta zhes pa dus kyis zin pa la yang bya/ nag pos zin pa la yang bya'o//de la dus kyis zin pa la rnam pa gnyis te/ nyi ma'i gung la zin pa dang / 'chi ba'i dus kyi tshe na zin pa'o/ /dus der zin phan chad 'tsho mi srid de dag tu tshogs kyang mi slon no/ /dngos grub sbrul gyis zin pa la bya ste/ sbrul gyi dug des zin pa las slar gso ba'i las rnams kyang las 'di dag gis bya'o zhes bya ba'i don to//lcag gam zhes pa zin pa de la zhu'am/ yang rkang pa yis zhes pa zin pa de rkang pas mnan pa'am zhes pa'o/ /sos bar 'gyur zhes pa nad de dag las thar bar 'gyur ro zhes pa'o/ /de ltar kun du yid kyis sam//zhes pa de ltar las thams cad la yid kyis bya ba'am/ yang na tshig gi bsgo bas las de dag thams cad bya'o/ /ji ltar khros pa med pa yang / /zhes pa ched du brtab pa dang khros pa'i tshul med par yang phran tshegs kyi las rnams tshig gis kyang brjod pa tsam gyis 'grub par 'gyur te/de yang yid la khro bo dran pa 'ba' zhig gis zhes pa'o/ /phran tshegs las brjod 'grub 'gyur te/ /dran pa tsam ni 'ba' zhig gis/ /zhes pa phran tshegs kyi las bshad pa de rnams 'grub par 'gyur te/ de yang las gang 'dod pa de yid la bsams pa tsam 'ba' zhig gis sgrub pa po de'i las de yang 'grub par 'gyur ro//de nas snod la dbab pa yi/ /zhes pa byis pa gzhon nu ma khrus byas te/ gtsang ma khro bo gshegs su rung bar de la bya ba la snod ces bya'o/ /las gzhan du ni rab tu bya/ /zhes pa gong ma las gzhan pa'i las zhes pa'o//gzhon nu mtshan dang ldan gyur cing / /zhes pa spyi'i mtshan nyid bzang po dang ldan pa la bya'o/ /snod la dbab pa'i byis pa gzhon nu'i mtshan nyid 'di 'dra ba dang ldan pa la bya'o/ /yan lag tshang zhes pa gzhon nu de bzhes pa'o/ /bkrus te brgyan zhes pa gos dang me tog gis so//ba las byung ba'i lnga yang blud/ /ces pa sngags kyis btab ste gzhon nu de la blud ces pa'o/ /de yi 'og tu smyung byas te/ /zhes pa la sogs pa de lta bas na cho ga de ltar byas te/ zhag gcig gi sngon rol nas gzhon nu de smyung ba byed du bcug la/sang nang par lta bu gzhon nu de khrus byas la/ tsan+dan dkar po dang / gur gum du sbyar ba'i byug spos kyi ri lus byugs la gos bzang po dang me tog la sogs pa'i rgyan sdug gu bzang pos brgyan par bya'o/ /de ltar mchod pa byas pa ni/ /zhes pa de ltar gzhon nu de la mchod pa byas nas zhes pa'o//khro bo la yang mchod pa byas nas zhes par sbyar ro/ /gzhon nu de shar phyogs su kha bstan te zhes pa'o/ /cho ga bzhin du zhes pa ku sha'i stan la gzhon nu de bzhag la zhes pa'o/ /de yi lag pa gnyis kar yang / /zhes pa gzhon nu de lag pa gnyis snyim pa zed du bcug la me tog bzang po la tsan+dan dkar pos gtor ba'i me tog snyim par sbyin no zhes pa'o//a ga ru nag po'i bdug pa sbyin/des ni myur du sngags brjod de/ /zhes pa gzhon nu de la a ga ru nag po'i bdug pas bdug go//de ltar byas pa'i 'og tu bar gzhan gyis mchod par myur du sngags pa de rtsa ba'i sngags b+hany+dza hUM zhes pa dang / phaT ces bya ba'i bar du che ge mo zhig gr-i ha de sha hUM phaT bzlas shing gang ba ces pa'o/ /sgrub pas cho ga 'di yis ni/ /zhes pa sgrub pa pos gong du gsungs pa'i cho ga snod la dbab pa'i cho ga byas te snod la dbab pa'i las bya'o zhes pa'o//snod la dbab gyur de nas ni/ /dge dang mi dge dri bar bya/ /zhes pa gzhon nu de la 'bab par 'gyur te/ lha 'dre gang 'bab pa'i mtshan ma de brtags pa ni spyi'i gzhung sbyar zhing las bya'o zhes pa'o/ / de ltar byung dang zhes snga ma nas 'das phyi ma snod de ma phyung de ltar sdod de smra bar byed de/ sems can chen po 'di gyis la/ /zhes pa'o/ /'di ni min zhes zlog par byed/ /ces pa mi rung gis ma byed cig ces zlog par byed ces pa'o/ /tshang bar byed ces pa lhag chad skang bar byed ces pa'o//de nas khro bo mchog de la/ /zhes pa gang 'dri ba rnams bris zin nas de'i 'og tu khro bo'i rgyal po de la ar+g+ha dbul zhes pa'i don to/ /me tog ldan pa'i ar+g+ha dbul/ /zhes pa de yang snod nyid khro bo'i rgyal po yin pas snod nas ar+g+ha dbul bar bya'o/ /de nas bde gshegs bstan pa yis//dam tshig dag ces pa de'i 'og tu de bzhin gshegs pas gsungs pa'i dam tshig gi sngags yi ge bcu bdun pa brjod par bya'o/ /de'i 'og tu ga dza ga dza zhes brjod par bya'o/ /khro bo'i rgyal po de/ de btang nas ni sa la 'gyel//zhes pa'o/ /bzhud par 'gyur zhes pa khro bo'i rgyal po de yang zhes pa'o/ /de nas snod ni bslang nas su/ /zhes pa gzhon nu sa la 'gyel pa de bslang nas khrus bya'o/ /zan za bar bcug ces pa gzhon nu de kha zas zos nas kyang zhes pa'o/ /mchod pa byas zhes pa kha zas kyis mchod ces pa'o//slar btang ngo zhes pa ji skad bshad pa'i cho ga rnams kyis zhes pa'o/ /snod la dbab par byas nas ni/ /zhes pa la sogs pa gzhon nu la sngar phab nas/ 'og nas 'byung ba'i las rnams las gang dang gang byas na las de dag grub par 'gyur ba'i las zin pa de nas las de bya bar rung na gdod las bya'o//nad pa la sngags gdab pa la sogs pa sngags kyi cho ga bya'o/ /cho ga la yang cho ga 'di sbyar bar bya'o/ /rgyal po dbang du byed par 'dod na/ /de tshe ri mo'i spyan snga ru/ /zhes pa dbang du bya ba'i tshe ri mo'i spyan sngar skyang nul bya ste bstar ba'i steng du dur khrod kyi thal ba skam po de'i phye mas rgyal po de'i sku gzugs bris la sngags dang phyag rgyas bkug ste/gcig tu byas pa de'i snying gar skyil mo krung du 'dug ste yid kyis ma yengs par khri bya'o/ /'dir yang der sngags bzlas pa'i bskul tshig kyang 'di ltar bcug ste bzlas so//de yi ming ni cho ga bzhin/ /zhes pa la sogs pa rtsa ba'i sngags kyi mtha' b+hany+dza hUM zhes bya ba'i ming bcug ste/ ma sha ma na ya swA hA/ zhes brjod do/ /phaT kyi skyin par yang swA hA byin te bzlas pa'o//'di ni khro bos dbang du bya ba'i sbyor ba bshad/ de nas mdza' sdug skye bo btang / /zhes pa la sogs pa de nas rgyal po de dbang du 'gyur te/ dbang du byas nas kyang rgyal po de rang gi sna chen dang phal pa dag la mi phyogs par rgyal po nyid nor dag gis the tshom med par bran bzhin du legs par byed do zhes pa'o//de bzhin bzlas pa khri byas na/ /bram ze dag kyang dbang du 'gyur/ /zhes pa gong du bshad pa'i cho ga bzhin du byas nas bskul tshig dang ldan par bzlas pa khri byas na bram ze dbang du 'gyur ro/ /bram ze dag kyang bdag kyang smrang 'don pa gzhan yang 'don du 'jug pa la sogs pa'i cho ga drug dang ldan pas bram ze'o//de bzhin rigs gsum la yang cho ga bzhi dang gnyis dang / gcig dang ldan par spyod pa dang ldan pa'i rigs 'og ma gsum mo/ /dmangs rigs lta bu ni phan chad na yang zhang blon tshong pa yi ge pa dag la bya ste/'di dang sbyar na bod yul na rgyal po man chad kun kyang dmangs rigs su nye'o/ /rje'u rigs dmangs rigs ma lus pa/ /zhes pa rgyal rigs kyang zhes 'byung ste/ phal pa ma lus pa thams cad la bya zhes pa'o//drug stong dag gis nges par 'gyur/ /zhes pa bskul tshig dang ldan pa dag drug stong du bzlas na the tshom med par dbang du 'gyur ro/ /bud med rnams dang bu mo la/ /zhes pa sngar bshad pa'i cho ga bzhin du zhes pa'o/ /de nas gcig gi gzugs brnyan ni//zhes pa mdza' bo gnyis las gang yang rung ba'i gzugs bri'o/ /snying ga ru zhes pa snga ma bzhin du bya zhes pa'o/ /rkang pa gcig bzhag tsog pur 'dug /ces pa rkang pa g.yon pas snying gar mnan nas sngags pa nyid kyang cog tsog por 'dug go zhes pa'o//de yi ming mthar sbyar nas zhes pa rtsa ba'i sngags kyi mjug tu zhes pa/ khro bo gshin rje gshed bzlas pas/ /zhes pa rtsa ba'i sngags la bya'o/ /'di la sngar 'gyur phaT ces bya/ /zhes pa rtsa ba'i sngags kyi mjug tu gzhug par bya'o/ /de ltar sdang bar bya ba 'di//zhes pa de ltar sdang bar bya ba 'di la 'bum bzlas par bya'o/ /de nas sems can rab 'jug par/ /zhes pa dkon mchog gsum la gnod pa byed pa'o/ /dgra yi gzugs brnyan ming smos na/ /dur khrod thal bas bris nas su/ /zhes pa sngar bshad pa bzhin du dgra'i gzugs dur khrod kyi thal ba skam pos bri bar bya'o//de ltar gzugs brnyan bri ba'i tshe yang dgra de'i ming nas smos shing bri'o/ /de nas seng ldeng phur bu la/ /zhes pa phur bu zur gsum pa zhes so/ /de yi snying gar btab nas su/ /zhes pa dgra'i gzugs brnyan/ de'i snying gar gdab ces pa'o/ /rtsa ba'i sngags kyi tha mar ming bcug ste zhes pa'o/ /che ge mo zhig sod cig ces/ /zhes pa la sogs pa rtsa ba'i sngags b+hany+dza hUM zhes pa'i 'og tu che ge mo zhig g+ha ta ya hUM phaT ces bya ba'i tshul du bskul tshig bcug ste khri bzlas te'o//gal te de ltar bzlas byas na/ /bya ba ni cho ga de yis zhes pa'o/ /'di la rnam par dpyad mi dgos/ /zhes pa 'di la 'grub mi 'grub the tshom za mi dgos so zhes bya ba'i tha tshig go/ /rtag tu bde gshegs bsam par bya/ /zhes pa sngags pa rtag tu byang chub sems dang ldan pa la bya'o//bsam pa gdug par yong mi bya/ /zhes pa gong du bshad pa lta bu'i khro bo la yang mi bya'o/ /de yi snying la sdug bsngal dang / /bskyed nas gdul ba ma gtogs te/ /zhes pa 'o na de dag yang mi bya'am zhe na ma yin te/ dkon mchog gsum la gnod pa de gdul ba'i phyir cho ga drag po de dag bya ba ni ma gtogs te/de lta bu dag la re zhig nad la sogs pa'i sdug bsngal 'dul ba'i phyir drag po bya'o zhes so/ /zhi ba dag gi cho ga yis/ /de nas zhi ba dge bar bya/ /zhes pa de ltar drag shul spyad pa'i las gong du bshad pa rnams kyi cho ga de lta bu sngar brtul nas phyis zhi ba'i cho ga bya'o//zhi ba'i cho ga bya na yang thal ba'i gzugs brnyan de phyis la phur bu yang phyung ste 'o mas bkru'o/ /zhi ba'i bskul tshig dang ldan par sngags brgya rtsa brgyad tsam du bzlas pa bya'o zhes pa'i tha tshig go/ /mngon par spyod pa spang mi bya/ /zhes pa sngags pas drag shul spyod pa'i las de spong mi bya'o zhes pa'i tha tshig go//sems can rnams la brtse ba'i phyir/ /bde gshegs bsam pas bya bar bstan/ /sems can sdig pa che ba rnams la snying rje skyed pa ni bdag nyid ngan song song yang bla'i/ sems can sdig po che de mi btang ngo zhes snying rje chen po bskyed cing byang chub kyi sems dang ldan par byas nas sems can ma rungs pa de lta bu dag gi phyir drag shul spyod pa'i las bya bar bstan to//de bzhin gshegs pas ci gsungs pa'i/ /zhes pa de bzhin gshegs pas ji skad gsungs pa'i dngos grub rnams zhes pa'o//de bzhin dngos grub med pa yi/ /zhes pa yon tan la bya zhes pa'o/ /dngos grub 'dod pa thob 'dod na/ /zhes pa sgrub pa pos dngos grub de dag thob par 'dod na de ltar drag shul spyod pa'i las mi bya'o zhes so/ / bde gshegs bsam pa gang med pa/ /zhes byang chub kyi sems dang mi ldan na/ dngos grub thob par mi 'gyur ro/ /thob na yang nyams par 'gyur ro/ /de ni dngos grub nyams par 'gyur/ /zhes pa'o/ /mdor na byang chub sems med par/ /zhes pa la sogs par byang chub sems dang mi ldan na/brtul zhugs dang bcas pa'i dngos grub mchog ji skad gsungs pa rnams 'grub par mi 'gyur ro zhes pa'o/ /gang zhig bde gshegs sems ldan pa/ /zhes pa sgrub pa po gang zhig byang chub sems dang ldan na zhes pa'o/ / brtul zhugs bzang po med pa dang / /zhes pa lha'i brtul zhugs dang zhes pa'o/ /de bzhin du gzugs la sogs pa med kyang / dngos grub mchog rnams 'dis thob cing zhes pa ri mo dang lugs ma dag med kyang khrus la sogs phyi rol gyi yo byad rnams ma byas shing ma spyad kyang dngos grub mchog rnams sgrub pa po de lta bu dang ldan pas thob par 'gyur ro zhes pa'o//nyon mongs med par ci 'dod par/ /zhes pa dka' ba dag ma spyad par zhes pa'o/ /'dod pa thams cad rnyed par 'gyur/ /zhes pa sngags pa de lta bu des rnyed par 'gyur zhes pa'o//sngags pa gang zhig bde gshegs bsam ldan zhing / /zhes pa byang chub kyi sems dang ldan zhing zhes pa'o/ /blo ni ma rmongs brtan pa yis/ /zhes pa sems mi 'gyur zhing brtan pa'i sngags pa de lta bu 'di 'dra ba'i yon tan dang ldan pa'i bla na med pa'i de bzhin gshegs pa thams cad la phyag bya zhing byang chub kyi sems dang ldan pa'i sgrub pa pos dngos grub mchog rnams bsgrubs na thob par 'gyur ro zhes pa'o//de ltar shes nas de yi tshe/ /zhes pa tshul de ltar shes nas de'i tshe zhes pa'o/ /bde gshegs lam mchog bstan par bya//zhes pa byang chub kyi sems de bstan par bya zhes pa'o/ /nyon mongs sdug bsngal 'jig 'gyur ba/ /zhes pa 'jig rten pa'i dngos grub dang mtshan ma la zhen pa dag ces pa'o/ /de ltar sems can gdul ba yi/ /las rnams ji skad gsungs pa yis//zhes pa la sogs pa de ltar sems can ma rungs pa rnams gdul ba'i re zhig 'dul bar gsungs pa'i las bya ba'i cho ga rnams kyang nyes pa phran tshegs kyi phyir sbyar bar mi bya'o/ /dkon mchog bsrung ba'i don du las de dag la sbyar bar bya'o//de bas na nyes pa phran tshegs dang zhes 'khon byung ba dang la sogs pa tsam gyi phyir drag shul spyad pa'i las de dag sbyar bar yang yang mi bya'o/ /'di dag gang yang rung bar ni/ /zhes pa las 'di dag gnas gang yang rung bar dgar zhes pa'o/ /de bzhin 'dod pa byed pa la//zhes pa cho ga bzhin sngags pas ji skad gsungs pa bzhin du bshad par bya'o zhes pa'o/ /der ni dur khrod thal ba yis/ /mkhas pas dgra yi gzugs brnyan bris/ /zhes pa sngar gong du bshad pa bzhin du thal phyes dgra dgar ba gang yin pa de'i gzugs brnyan de khro bo'i spyan sngar bri'o//de steng rkang gnyis 'dug nas su/ /zhes pa gzugs brnyan bris pa de'i steng du rkang pa gnyis kyis mnan te tsog pur 'dug pa la bya'o/ /sku gzugs kyi spyan sngar gang dgar bar bya ba'i dgra de'i ming bcug ste u tsa ta ya zhes bya ba'i rtsa ba'i sngags kyi mjug tu hUM phaT ces bya'o//gdon mi za bar bskrad par 'gyur/ /zhes pa the tshom med par bskrad par 'gyur ro/ /yang thal ba de nyid kyis zhes pa dur khrod kyi thal ba de nyid kyis so/ /dgra yi gzugs brnyan bris nas su/ /sngar bshad pa bzhin du zhes pa'o//de yi snying gar rkang g.yon gyis/ /zhes pa gzugs brnyan de'i sgrub pa po yis zhes pa'o/ /gdon mi za bar brdzis nas su/ /zhes pa the tshom med par zhes pa'o/ /nyi ma la ni kha bltas la/ /zhes pa nyi ma 'char kar nyi ma la kha bltas nas rtsa ba'i sngags kyi mjug tu b+hany+dza hUM zhes bya ba'i 'og tu che ge mo zhig la ta pra dz+wa re gr-i ha na hUM zhes bzlas so zhes pa'o//cho ga snga ma bzhin bya'o/ /zhi bar ma byas na/ de ltar ma byas zhag bdun gyis/ /gdon mi za bar 'chi bar 'gyur/ /zhes pa'o/ /de la sogs pa'i las rnams ni/ / zhes pa de la sogs pa drag shul gyi las rnams zhes pa'o/ /bde gshegs sems dpa' spang mi bya/ /zhes pa byang chub kyi sems dang ldan pas so/ /'o na ci zhe na/ sems can rnams ni thams cad la/ /zhi ba dang ni rgyas pa bya/ /zhes pa'i don to/ /ci'i phyir zhe na/ byang chub sems kyi bdag nyid can/ /ring por mi thogs 'grub par 'gyur/ /zhes pa byang chub sems kyi bdag nyid can gyi sngags pas las byas na zhi ba dang rgyas pa dag myur du 'grub par 'gyur ro zhes bya ba'i tha tshig go/ /'di man chad de bzhin gshegs pa'i dam tshig sngar bshad nas zhi ba la sogs pa'i las bya ba bshad pa'i phyir/de nas sems can thams cad ni/ /zhes pa la sogs pa smos te/ /bde phyir zhi ba'i las rnams ni/ /zhes pa bde ba la dgod pa'i don du zhi ba bya zhes pa'o/ /ji skad gsungs pa bshad par bya/ / zhes khro bos ji skad gsungs pa de dag 'dir bshad par bya'o zhes bya ba'i don to/ /mchod rten 'gram gyi dkyil 'khor du/ /zhes pa/ yi dags phal bo che'i dkyil 'khor du mchod pa gtsang ma tshul bzhin du mchod par bya'o/ /yang dang yang du phyag byas nas//zhes pa dus gsum dag tu dge ba la'o/ /nyin par dang ni mtshan mo yang / /zhes pa srod dang tho rangs kyi dge ba la yang bya zhes pa'i don to/ /dkon mchog gsum la de brten nas/ /zhes pa lhag par mos shing der phyogs pas brten zhes pa'o/ /bde bar gshegs pa'i bsam pa bya//zhes pa byang chub kyi sems dang ldan par bya zhes pa'o/ /'di yis sems can thams cad ni/ /shin tu sdug bsngal bder gyur cig /ces pa phyag bya ba de dang / nyin mtshan gyi dge ba spyad pa la sogs pas 'di sems can thams cad sdug bsngal dang bral bar bde bar gyur cig ces yongs su bsngo bar bya'o//'di dag ni sngon du spyad pa'i dge ba'i tshe bya'o zhes pa'o/ /de yi dngos grub cung zad gang / /zhes pa de ltar dge ba spyod pa de yis phra mo dag kyang thob par 'gyur zhes pa'o/ /mkhas pa dag gis phan par bya//zhes pa de ltar yi dam du bca' bar bya'o zhes pa'o/ /mkhas pas mchod rten las byas shing / /zhes pa 'dzab las 'byung kar dge ba 'di dag bya'o zhes pa'o/ /dge ba chung ngu zin kyang skabs 'di dag tu/ dngos grub mchog ni thob 'dod pa'i/ /sgrub pa po des dge ba de dag gis kyang sems can thams cad 'jig rten dang 'jig rten las 'das pa'i bde ba phun sum tshogs par bsngo ba ni/rtag tu sems can rnams la bsngo'o zhes pa'i don to/ /'di ltar de ni byang chub sems/ /chos kyi don du yul du gyur/ /zhes pa tshul de ltar spyod pa de ni byang chub kyi sems dang ldan par byas te/sgrub pa po des chos nyid khong du chud cing rtogs zhes pa'i don to/ /byang chub sems rnams nyer bstan pa'i/ /mtshan nyid rab tu bstan pa yin/ /zhes pa sngon byang chub sems dpa' rnams kyis kyang spyad cing nye bar bstan pa'i byang chub sems kyi mtshan nyid de ltar bstan te/de ltar blo gros bstan byas nas/ /zhes pa sgrub pa pos zhes pa'o/ /dge ba dag ni spel bar bya/ /zhes pa gong du bshad pa'i tshul de ltar dge ba rgya cher spel lo zhes pa'o/ /sems can rnams la yongs su bsngo//zhes pa bdag gi dge ba cung zad ci spyad pa thams cad kyang sems can gyi don gyi phyir bsngo zhes pa'o/ /sngags pas bde gshegs sems ldan gang / /zhes pa byang chub sems dang ldan pa'i sngags pa gang gis gong du bshad pa'i tshul de lta bur dus thams cad du sems can rnams kyi don gyi phyir zhes pa'o//zhi ba dang ni rgyas pa 'phel/ /zhes pa zhi ba dang ni rgyas pa 'phel bar 'gyur ro zhes pa'o/ /thog mar dkon mchog gsum po la/ /gdod nas bshad do zhes pa'o/ /dkar po mchog gis mchod par bya//zhes pa yon tan dang ldan pa'i me tog dkar pos mchod ces pa'o/ /mchod pa byas nas 'di dag tu/ /zhes pa skabs 'dir las bya ba'i bzlas brjod cho ga bzhin du bya'o/ /bde zhing stan la bde bar 'dug /ces pa sems nyams par mi 'gyur ba dang nyams par mi 'gyur ba la bya zhes pa'o//rab tu dang zhing bde gshegs sems/ /zhes pa sems rab tu dang zhing byang chub sems dang ldan par zhes pa'o/ /de ming smos shing zhir 'gyur zhes/ /zhes pa gang zhi bar bya ba de'i ming smos shing shIn+tiM ku ru swA hA/ zhes pa'o/ / khro bo'i tshig gis mtha' sbyar te/ /zhes pa rtsa ba'i sngags la b+hany+dza hUM zhes bya ba'i 'og tu sbyar te/ tha mar bau Sha Ta bcug ste bzlas so zhes pa'o/ /gang yang rung ba cig la ni/ /zhes pa gang rung ba cig zhi bar bya ba la zhes pa'o/ /de ltar tshul de ltar bzlas zhes pa'o/ / yul zhes pa ljongs gcig la bya'o/ /yul gyi phyogs dag ces pa yul phyogs gcig pa zhes pa'o/ /rgyal po dag la nyis 'gyur bya/ /zhes pa de dag nyis stong du bya zhes pa'o/ /'di dag zhi bar bya ba'i phyir/ /ba lang dag la stong du bzlas/ /zhes pa'o/ /ra lug dang ni ma he la//'di dag zhi bar bya ba'i phyir/ /rtag par stong du bzlas par gsungs/ /zhes pa'o/ /yang na lus can thams cad la/ /zhes sems can thams cad la zhes pa'o/ /byang chub sems dang ldan pa la/ /zhi ba'i mchog tu nges par 'gyur/ / zhes byang chub kyi sems dang ldan pa'i sngags pas zhi ba'i las de dag byas na/ zhi ba'i mchog tu 'gyur bar the tshom med do zhes bya ba'i tha tshig go/ /da ni rgyas pa'i las bshad pa'i phyir/ /de bzhin du ni rgyas 'gyur ba/ /zhes pa la sogs pa smos te/ de bzhin du ni rgyas 'gyur ba//zhes pa la sogs pa cho ga 'di bya ba'i rim pa ni mdun gyi snod kyi nang na 'o ma yod pa la 'o ma'i rgya mtsho chen por byin gyis brlab po/ /chu lha spyan drangs pa'i kun sbyin ni/ /ba ru Na 'khor dang bcas pa nyid kyi phyag rgya dang sngags kyis spyan drangs nas/ mchod pa la sogs pa dang /bsang gtor bya ba dag tshul bzhin du byas nas dang por mngar gsum gyis dgang blugs tshul bzhin du gsum mam bdun du dbul lo/ /de'i 'og tu me tog las kyang grangs de dag dang 'dra ba dbul lo/ /de nas bsang gtor byas te chu lha nub phyogs su bzhugs su gsol lo//chu'i kun sbyin dang me tog dag sbyin pa'i tshe/ chu lha ba ru Na spyan drangs te 'di ltar bya ba pad+ma byU ha zhes bya ba'i rgyud las 'byung ngo / /de'i 'og tu 'o ma'i rgya mtsho chen po de'i dbus su pad+ma chen po bsams te/ de'i dbus su khro bo bsams te/spyan drangs te khro bo de la dang por mngar gsum gyi dgang blugs phul te/ de'i 'og tu me tog rnams tshul bzhin du dbul lo zhes bshad do/ /kha dog ni las rnam bzhi sbyar ro/ /spyan sngar zhes pa mdun du ri mo bri snod du dbul zhes pa me tog go/ / rgyas pa la yang me tog dkar po yon tan ldan pa bzang po tsan+dan dkar po'i 'di gus bsgos pa'i me tog ste khro bo'i spyan sngar gser dang dngul dang zangs kyi snod gang 'byor bar 'o ma blugs pa'i steng du me tog re re la sngags lan re re sbyar te/ sngags brjod cing 'o mas bkang ba'i snod du blugs so//stong gis rab tu rgyas par 'gyur/ /snying la rab tu dga' 'gyur ba'i/ /zhes pa'i tshul de ltar me tog stong phul na gang rgyas par bya ba de rgyas par 'gyur ro/ /snying la rab tu dga' ba'i tshul gyis rgyas par 'gyur ba'i rgyas pa'i las byed 'dod na zhes pa'o//gang yang rung ba de yi ming / /zhes pa gang rgyas par bya ba de'i ming smos pa ni/ cho ga bzhin du mtha' mar sbyar/ /zhes pa de puSh+TiM ku ru bau ShaT ces sbyar/ rtsa ba'i sngags kyi hUM zhes pa'i 'og tu sbyar ba bskul tshig gzhug pa'i thabs ni tshul de bzhin du las gnyis ka la 'dra bar sbyor ro zhes pa'i don to//me tog yid du 'ong ba rnams/ /'o mar blugs par byas pa gang / /zhes pa gsum pa ni zhes bya ste me tog gi ming yid du 'ong ba'i me tog la stong snga ma bzhin du 'o mas bkang ba'i snod kyi nang du dbul lo/ /tshul de ltar byas na rgyas par 'gyur ro//yang spyir me tog dkar po'am/ /ser po yid du 'ong ba bzang po yon tan dang ldan pa dbul bar bya ste/ me tog tsam gyis khyad par gyi sgo nas rgyas pa'i las gnyis su yang bshad pa yang rung ba de gnyis su gcig tu yang rung ngo zhes bya ba'i don to//da ni dpal la sogs pa sgrub pa bshad pa'i phyir/ de nas gzhan yang dpal 'dod na/ /zhes pa la sogs pa smos so/ /de nas gzhan yang dpal 'dod na/ /zhes pa la sogs pa la rgyal po dang longs spyod sgrub 'dod na sngar bshad pa bzhin du sku gzugs bkram la me tog yid du 'ong ba zhes bya ba'i me tog tsan+dan dkar pos gtor te bsgos pa'i me tog gis mchod do//spyir me tog yid du 'ong ba bzang po la yang bya zhes pa'o/ /bdug pa dag gi sngags kyis dbul/ /zhes pa bdug pa'i sngags kyis zhes pa'o/ /nyin re de ltar byas nas su//zhes pa dus gsum du tshul de ltar mchod pa byas nas mchod pa de lta bu'i bzlas pa bya'o zhes so/ /mtha' ma dag tu sbyar nas su/ /de nas nA ma swA hAr ldan/ /zhes pa rtsa ba'i sngags b+hany+dza hUM zhes bya ba'i 'og tu shrI ri phra ma me saM pra pa yats+tsha nA ma swA hA/ zhes bya ba'i tshul du bskul tshig bcug ste sngon du bsnyen pa khri bya'o zhes pa'o//de nas rgya mtshor 'bab pa'i chu klung gi nang du song nas ni/ lte ba nub par chur 'dug nas/ /zhes pa de nas bsgrubs te rgya mtshor 'bab pa'i chu klung du song nas bdag nyid khrus byas te sbyor ba byas te sbyor ba byas nas lte ba nub tsam du chur zhugs te 'greng pa la bya zhes pa'o//me tog puN+Da rI ka dang / /zhes pa pad+ma dkar po zhes pa'o/ /tsan+dan dkar pos bskus nas su/ /zhes pa gtor te bsgos te zhes pa'o/ /bzlas shing bzlas shing chur dbul ba/ /blo dang ldan pas 'bum byas nas//zhes pa mdun du lha spyan drangs te de la me tog dbul lo/ /lan cig gis ma rdzogs na dus gsum du yang dbul lo/ /me tog pad+ma dkar po yang sngags brjod cing dbul lo/ /de yi mjug tu dpal chen thob/ /ces pa rgyal rigs can la rgyal po thob par mos pa zhig gis de ltar byas na rgyal po thob po//longs spyod thob par 'dod na/ /mchod pa byas nas bsnyen pa khri byas pa la sogs pa sngar bshad pa bzhin du byas nas chu klung gi nang du zhugs te/ pad+mo dbul ba chu klung gi nang du pad+mo dmar po 'bum dbul lo//de lta bu zin pa'i 'og tu cho ga de ltar byas na the tshom med par thob par 'gyur ro/ /rtsa ba'i sngags b+hany+dza hUM zhes bya ba'i 'og tu hi ma me pra yats+tsha nA ma swA hA zhes bzlas so zhes bya ba'i don to/ /cho ga 'di dag 'di nyid kyis/ /zhes pa sngar bshad pa bzhin du bya zhes pa'o/ / bzlas shing bzlas shing snga ma bzhin/ /zhes pa snga ma bzhin du chu klung du dbul lo zhes pa'o/ /cho ga gsungs pa bzhin gnas pa'i/ /sngags pa nges par de yi mthar/ /zhes pa ji skad gsungs pa'i tshul bzhin gnas pa'i sngags pas cho ga de zin pa'i 'og tu de nas the tshom med par byed na/rang 'bum thob par 'gyur ro/ /rtsa ba'i sngags hU~M zhes bya ba'i 'og tu da ni rmA me pra yats+tsha na swA hA zhes bzlas so zhes so/ /'di la rnam par dpyad mi bya/ /zhes pa 'grub pa'am mi 'grub ces the tshom mi bya'o zhes pa'o/ /de steng de yi snga ma bzhin/ / zhes pa cho ga snga ma bzhin du a ti mug ta ka'i me tog ces so/ /'bum ni dbul bar byas nas su/ /zhes pa chu klung du dbul bar bya zhes pa'o/ /gdon mi za bar gnod sbyin ma/ /zhes pa the tshom med par de'i dbang du 'gyur zhes pa'o/ /cho ga gang 'dis sgrub pa pos/ /nor chen dag kyang 'thob par 'gyur//zhes pa cho ga 'di byas pas gnod sbyin mo dbang du 'gyur bar ma zad kyi nor chen dag kyang thob po/ /snga ma bzhin du yak+Sha ni ma me pA shaM ku ru nA ma swA hA zhes bzlas so/ /de ste snga ma bshad pa bzhin/ /zhes pa/ cho ga snga ma bzhin du bya/ /zhes pa'o/ /me tog dzA ti bzang po ni//zhes pa sri shing sna ma'i me tog ces pa'o/ /tsan+dan zhes pa dkar po tsan+dan gyis bskus pa rnams zhes pa'o/ /chu yi nang du phul na ni/ /zhes pa snga ma bzhin du dbul zhes pa'o/ /sa yi steng na 'dod pa thob/ /ces pa sa'i steng na gang 'dod pa'i tshul de ltar sgrub pa na thob par 'gyur zhes bya ba'i don to//yang na pad+ma dkar po ni/ /zhes pa sngar bshad pa bzhin du sngon du bsnyen pa khri byas/ de'i 'og tu cho ga 'di brtsams te/ snga ma bzhin du rgyas pa'i zhugs thab brkos te byas la der me lha gnyer te kun sbyin dbul ba dang /pad+ma nyid yang gsum mam bdun dbul lo/ /de nas me lha bsangs nas shar lho'i mtshams su bzhag la lha spyan drangs te kun sbyin sreg la sogs pa dbul ba byas nas/ de'i 'og tu gzod pad+ma dkar po mngar gsum la sbags pa 'bum dbul lo/ /cho ga 'di ltar sbyar bar bya ba 'og nas 'byung ba kun la yang sbyar ro zhes pa'i tha tshig go//mngar gsum zhes pa 'o ma sbrang rtsi mar zhes so/ /me 'bar nang du legs par bsreg /zhes pa tshul bzhin du sbyin sreg bya ba la sogs pa cho ga des na lha mo bzang mo zhig mthong bar 'gyur ro zhes pa'o//de yis de la 'dod mchog dang / /nor dag kyang ni ster bar 'gyur/ /zhes pa lha mo de yis sgrub pa po de la 'dod pa'i mchog stsol ba dang nor dag kyang sogs par mdzad do zhes pa'o/ /blo dang ldan pa'i zas kyi mchog /ces pa 'o ma dang 'bras sA lu sbyar ba'i zas kyi nang du mar dang sbrang rtsi blugs la bya'o zhes pa'o//zhag bdun du ni gzar bu yis/ /zhes pa zas de las zhag bdun du gzar bu chung dus sbyin sreg 'bum bya'o/ /yang na 'bru rnams thams cad kyis/ /zhes pa yang na 'bru sna lnga la sogs pa 'bru thams cad la bya'o//sbyin sreg don rnams thams cad sgrub/ /ces pa 'bru'i sbyin sreg byas pas gang 'dod pa'i nor thams cad 'grub par 'gyur ro zhes pa'o/ /sbyin sreg tshig 'bum byas pa yis/ /zhes pa/ 'bru rnams las gang yang rung ba sna gcig gis zhes pa'o//de dag nyid kyis mi zad 'gyur/ /zhes pa 'bru gang sbyin sreg byas pa de nyid mi zad par 'gyur ba la bya/ don de nor 'grub pa la yang bya zhes pa'o/ /bil ba mar la zhes pa/ bil ba'i 'bras bu mer bsregs pa 'bar ba la zhes pa/gzar bu chung dus/ bsregs nas sa yi bdag po las/ nor chen dag ni thob par 'gyur/ /zhes pa'o/ /dUr ba 'jag ma ma grugs pas/ /zhes pa la sogs pa bod yul na yod par grags pa la bya ba skad du bshad de/ rtswa dUr ba'i 'jag ma skam po ma yin pa/ rlon pa las ma chag pa ma grugs pa ma god pa bzang po las ring thung ji tsam yang rung ba las/ 'o ma las sbrags shing sbyin sreg 'bum byas na tshe ring por 'gyur ro/ /snga ma bzhin du rtsa ba'i sngags kyi mjug la A yu brta ya nA ma swA hA zhes bzlas na tshe ring bar 'gyur ro zhes pa'o//rgya skyegs shing gi me dag la/ /de bzhin lan re mar gyi hom/ /zhes pa dus gsum du 'bum byas na tshe ring ba dang yid gzhungs pa dang grags pa chen po la sogs pa thob par 'gyur zhes bya ba'i don to/ /de bzhin zas rnams kun bsregs nas/ /zhes pa/ 'bras sna mang po yod pa de dag la zas rnams kun zhes bya'o/ /gzar bu chung dus sbyin sreg bya'o zhes pa'o/ /dgu pa'i bshad pa rdzogs so// //phyi ma'i yang phyi ma rtog pa 'di la rnam pa lnga bshad do/ /gleng bslang ba dang / sngon du bsnyen pa'i cho ga dang / ri mo'i sku gzugs kyi cho ga dang /sgrub pa la 'jug pa dang / bsgrubs nas sbyin sreg bya ba'o/ /de la dang po gleng bslang ba bshad de/ de nas rtog pa thams cad kyi/ /phyi ma'i phyi ma zhes bya ba/ /zhes pa gong du bshad pa rnams kyis cho ga gong du ma bshad pa rnams le'u 'di las bshad pas phyi ma zhes bya'o//sbyor bar bcas pas rgyas pa yi/ /rtog pa 'di ni bshad par bya/ /zhes pa de yang sbyor ba thabs dang bcas par rgya cher 'grel cing bshad pa'i rtog pa de dang de 'dir bshad ces pa'o/ /'di dag ni sngar gong du bshad pa'i 'phro sbyor ba'i tshig go/ /de bzhin bsnyen pa sngon du rdzogs//zhes pa phyi'i yo byad rnams zhes pa'o/ /rtog pa dag ni 'di ltar zin/ /zhes pa cho ga de dag gi rtog pa dag ni sngar bshad zin to/ /sngags mchog dag ni gang gsungs pa/ /zhes pa rgyud chen po las gsungs zhes pa'o/ /da ni sngon du bsnyen pa zhes bya ba'i cho ga bshad de de'i phyir/de yi las ni cho ga bshad/ /ces pa gsungs te/ thog mar oM bzhag cho ga bzhin/ /zhes pa oM thog mar bzhag pa ni yongs kyis srid de bkra shis pa dang gzi byin dang ldan pa'am phyag 'tshal ba'i don to/ /ri mo'i spyan sngar 'dug nas su/ /zhes pa mdun du ri mo'i sku gzugs bkram pa'i spyan sngar 'dug nas 'bum phrag bcur bzlas pa bya zhes pa'o//da ni ri mo'i sku gzugs kyi cho ga bshad de/ de'i phyir/ de nas de yi ri mo mchog /ces pa smos so/ /gang gis dngos grub rab thob pa/ /zhes pa ri mo'i sku gzugs gang gis dngos grub rab tu thob pa zhes pa de/tshul bzhin du ni rab tu bshad/ /ces pa'o/ /ras ni sar pa khru gang tsam/ /zhes pa ched du btags pa'i ras zhes pa'o/ /zhal gcig po la mdangs gsal ba/ /zhes pa mog mog ma yin pa gsal bar bya zhes pa'o/ /ma he la ni bcibs par bya//zhes pa g.yon brkyang ba'i tshul du bzhugs par zhes pa'o/ /stag lpags zhes pa smad g.yogs byas/ /zhes pa'o/ /'khrug cing 'jigs pa zhes pa bdud dang bgegs kyi sde 'jigs pa bri zhes pa'o/ /gang du yang zhes pa gsung 'byin 'byin lta bu'i tshul du bya'o zhes pa'o//yan lag thams cad yongs rdzogs pa/ /zhes pa sku gzugs de zhes pa'o/ /de nas de la mkhas pa yis/ /mchod pa'i yan lag mchog gis mchod/ /ces pa de ltar gzugs bris zin nas sngags pas sngar bshad pa'i yo byad rnams mchod par bya'o//ri mo'i sku gzugs kyi spyan sngar gzugs pa'i bsnyen pa 'bum phrag bcu bya'o zhes pa'i tha tshig go/ /da ni bsgrub pa la 'jug pa zhes bya ba bshad pa yang / sngags pa brtul zhugs brtan pa yis/ /zhes smos te/ sngags pa brtul zhugs brtan pa yis//de yi 'og tu brag phug zhugs/ /zhes pa ji skad gsungs pa'i tshul bzhin du mi 'gyur bar brtan par gnas par bya'o/ /sngar bsnyen pa 'bum phrag bcu byas pa'i 'og tu sngags pa de brag phug tu gnas par bya'o zhes pa'o/ /kha zas zhes pa smyung ba bya/ /ri rab ri ni ji tsam par//zhes pa bdag gnas pa'i ri g.yo bar 'gyur gyi bar du bzlas zhes pa'o/ /yang na ri mo bzhad kyi bar du bzlas zhes pa'o/ /yang na ri mo 'bar gyi bar du bzlas zhes pa'o/ /bzlas na de'i tshe dngos grub thob/ /ces pa de ltar mtshan ma byung byung du bzlas na dngos grub 'thob po zhes bya ba'i don to//de ltar lha 'di bzlas pa yi/ /zhes pa la sogs pa'i ri mo'i lha'i sku gzugs 'di la dngos grub kyi mtshan ma byung ba dang bstan pa de dag yin no/ /mtshan ma de dag byung nas rig 'dzin du 'gyur ro/ /de ltar rig 'dzin grub nas 'bras bu'i don thams cad sgrub nus par 'gyur ro//de yang yid la gang 'dod pa bsams pa tsam gyis de dag thams cad ring por mi thogs par 'grub par 'gyur ro zhes pa'o/ /khros nas yang 'gas par 'gyur/ /zhes pa la sogs pa'i las 'di dag kyang de bzhin du byed nus par 'gyur ro zhes bya ba'i tha tshig go//chu dag ces pa chu klung dag skems zhes pa'o/ /de la sogs pa'i las rnams ni/ /zhes pa/ de la sogs pa'i ya mtshan las/ /ngo mtshar chen po gzhan dag kyang byed de/ ya mtshan chen po thams cad dang / /zhes pa'o/ /sems can rnams ni thams cad la//zhes pa la sogs pa yi dags phal po che'i dkyil 'khor dang rtsa ba'i rtog pa la sogs pa'i cho ga sngar gsungs pa de dag gi dngos grub dang las rnams 'byung ba yang ji skad gsungs pa'i cho ga bzhin du bsgrubs na yang 'grub par 'gyur ro zhes bya ba'i don to/ /da ni bsgrubs nas sbyin pa zhes bya ba bshad de/de'i phyir bsgrubs nas sems can thams cad la zhes gsungs te/ 'bras bu mchog rnams bsgrub par bya/ /zhes pa gong du bshad pa'i dngos grub grub pa'i 'bras bu sems can thams cad la sbyin par bya'o zhes pa'i don to/ /grub pa'i mthu ni gang yod pa//zhes pa dngos grub grub pa'i mthu gang yod pa de dag thams cad ces pa'o/ /bde gshegs bsam pas de dag kun/ /zhes pa la sogs pa byang chub kyi sems dang ldan pas mthu grub pa de dag kun kyang ser sna med pa'i sems kyis skye bo phongs pa rnams la sbyin zhing so so'i las re ba yongs su bskang bar bya'o zhes pa'i tha tshig go//snying rje can gyis bdag gi lus/ /zhes pa bdag gi lus kyang sbyin par bya'o zhes pa'o/ /dri ma med par bsgrubs nas su/ /dge ba 'di yis sems can kun/ /bde gshegs sems can ldan bde bar 'gyur//zhes pa skyon med pa'i sbyin pa sngon du bshad pa bzhin spyad pa'i dge ba 'di yis de ltar dge ba spyad pa sems can thams cad la bsngo'o/ /byang chub sems dang ldan zhing bde bar gyur cig ces pa'i don to/ /re ba thams cad yongs rdzogs shing / /zhes pa 'jig rten dang 'jig rten las 'das pa'i dge ba 'dod pa phun sum tshogs pa'i longs spyod dang ldan par gyur cig ces pa'i don to//dge ba kun gyi snod gyur ces/ /zhes pa de dag dang yang ldan zhing dge ba spyod pa'i skabs dang ldan pa'o/ /yid kyis yongs su bsngo bar bya//zhes pa spyod pa'i skal ba can du gyur cig ces pa'o/ /gang zhig de ltar sngags grub kyang / /zhes pa phal cher sngags grub na sbyin pa'i dge ba de ltar mi spyod pa ste/ 'ga' zhig sngags grub nas kyang sbyin pa'i dge ba dag de ltar spyad pa des skyon med pa'i sbyin pa ni/ dri ma med pa'i byang chub sems zhes pa'i don to//dge ba rtag tu spyod pa'i de/ /zhes pa sbyin pa'i dge ba dag spyod pa zhes pa'o/ /dngos grub rtog las gang gsungs pa/ /zhes pa rtog pa dag las dngos grub gang gsungs pa de bzhin gshegs pa'i zhal nas byung ba de zhes bya ba'i don to//thams cad de la nye bar gnas/ /zhes pa dngos grub thams cad kyang sngags pa grub pa de lta bu la 'grub par 'gyur bas ni nye bar gnas zhes bya'o/ /sngags pa sgrub pa po yi rdzu 'phrul gyi/ /yon tan kun dang ldan par 'gyur/ /zhes bya ba'i don to/ /rgya cher bstan zhes pa de ltar rgya cher bstan to zhes pa'o//rtog pa thams cad 'dus pa'o/ /zhes pa de dag ni rtog pa thams cad 'dus pa yin no zhes pa'i don to/ /'jam dpal gshin rje gshed kyi rtog par gtogs pa bcu pa'i 'grel pa zhes pa rdzogs so// //dur khrod gnas kyi dkyil 'khor du gtogs pa'i le'u 'di la don rnam pa bdun gyis bshad do//de la snying po khyad pa can bstan pa dang / dkyil 'khor gyi cho ga dang / mchod pa sngar byas nas slob ma bzung ba la sogs pa'i las bya ba dang / lha slar gshegs su gsol ba la sogs pa'i las bya ba dang / phyag rgya'i mtshan nyid dang / dkyil 'khor du dgod pa'i sngags kyi le'u dang / mchod pa'i cho ga rnams kyis bstan to/ /de la snying po'i khyad par bstan pa'i phyir/ /'jam pa'i dbyangs kyi khro bo yi/ /zhes gsungs te/ 'jam pa'i dbyangs kyi khro bo yi/ /zhes pa hUM ring po 'bru gcig po sngar bshad zin te zhes 'phro sbyor ba'i tshig tu zad do zhes pa'o//de nas gzhan yang de yi ni/ /zhes pa 'jam pa'i dbyangs de'i gzhan yang rtog pa bsdus zhes bya ba'i don to/ /rtog pa bsdus pa rgya cher bshad/ /gshin rje rab tu 'joms pa 'di/ /zhes pa rtsa ba'i rtog pa las gsungs pa'i dngos grub dang /las rnams le'u 'dir mdor bsdus nas yi ge 'bru gcig pa'i sgo nas rgyas par bshad pa'o/ /zhal ni hUM zhes bya bar bshad/ /ces pa zhal drug pa las hUM byung bas na zhal nyid hUM yin te hUM nyid khro bo yin par bshad do/ / hUM zhes bya ba mchog rig bya/ /zhes pa hUM de nyid khro bo yin par bshad par bya'o/ /de yi dkyil 'khor gzhan yin te//zhes pa 'jam dbyangs kyi khro bo dkyil 'khor sngar gong du bshad pa las gzhan pa'i dkyil 'khor 'og nas 'byung ba la bya'o/ /'og nas 'byung ba'i dkyil 'khor de bris nas bsgrubs na dkyil 'khor de las dngos grub kun 'grub par shes par bya'o zhes pa'i don to//dur khrod gnas zhes bya ba ste zhes pa dkyil 'khor de'i nang du dur khrod gnas pas na yang dur khrod gnas zhes bya ste/ de ltar dkyil 'khor de la ming de skad ces bya ste/ mi ro de nyid la dur khrod ces bya ba'i phyir zhes bya ba'i don to/ /dur khrod gnas pa'i gang yin pa'o/ /zhes pa de la dur khrod gnas zhes ci'i phyir zhe na/ maN+Dal gyi gnas su dur khrod du bris na yang dur khrod gnas zhes bya ba'i don to/ /khru brgyad pa la sgo bzhi pa/ /zhes pa ngos bzhi ngos gcig gi tshad ces pa'o//yang na gru bzhi pa yang rung / /zhes pa phyogs bzhir yang ngos bzhi pa'i ngos gcig gi tshad ces bya'o/ /dur khrod gnas pa bzang po ste/ /zhes pa dkyil 'khor nyid kyi yon tan la bya ba'i don to/ /dur khrod thal bas bri bar bya/ /zhes pa dkyil 'khor de yang dur khrod kyi thal bas bri bar bya'o zhes pa'o//de yi dbus su yi dags bri/ /yi dags phreng ba dag gis brgyan/ /zhes pa dkyil 'khor de'i dbus su pad+ma 'dab ma brgyad pa gcig thal bas bris pa de'i steng du mi ro gcig bri'o/ /dkyil 'khor de'i nang rol gyi ngos bzhir mi ro gnyis gnyis tsam bri'o//yi dags 'di dag thams cad kyang phyag rgya yin pas na kun kyang pad+ma'i steng du bzhag go zhes pa'i don to/ /sgor ni yi dags ro smad bzhag /ces sgo bzhir mi ro re re bri ba ni mgo med pa'i ro la bya'o/ /mtha' ma dag tu mgo bo bzhag /ces pa dkyil 'khor de'i nang rol gyi ngos bzhir mi ro gnyis gnyis tsam bris pa'i bar du mi'i mgo bo bri bar bya'o/ /tshul de ltar 'dri nus na ni sngags pas de dag thams cad dur khrod thal bas bri'o zhes pa'i don to/ /grwa bzhir shU la bzhi rnams dang / thod pa dag kyang bri bar bya//zhes pa 'dir shU la zhes pa ni tri shU la bya'o/ /grwa bzhir shU la rtse gsum pa re re bzhi yis nang rol nas kha phyir bltas pa bri ste/ shU la re re'i glo pha rol tshu rol du thod pa re re ste gnyis gnyis bri'o/ /de ltar shU la bris pa'i tshe rtsa ba dag tu thod pa re re bzhi bri zhes pa kha cig 'chad do//gal te 'dri bar mi nus na/ /mkhas pas de dag thal bas bri/ /zhes pa la sogs pa tshul de ltar ri mo 'dri bar mi nus na sa gzhi skyang nul gyis byugs te/ sa bstar ba bzang po la tsan+dan dmar po'i 'de gus bskus nas thig tsam btab kyang rung ngo //dkyil 'khor tshad kyang gong du gsungs pa dang sbyar zhes pa'o/ /dur khrod gnas su dang por ni/ /zhes pa dkyil 'khor dang por yi dags la sogs pa'i sngags rnams gnas su dgod pa'o/ /sngags pas yi ge dgod par bya/ / zhes pa yi ge rnams so sor bkod zin nas dkyil 'khor der khro bo'i rgyal po spyan drangs te mchod pa bya'o zhes pa'i tha tshig go/ /'di man chad mchod pa sngar byas nas slob ma bzung ba la sogs pa'i las zhes bya ba bshad de/ 'jigs pa'i zhal ni 'bar ba drug /ces gsungs te/de yang khro bo'i rgyal po de ni ci 'dra ba zhig ce na/ de bzhin zhabs kyang drug dang ldan/ /zhes pa la sogs pa bzhin zhes par bya'o/ /gzig lpags ni smad g.yogs zhes so/ /mtshon cha bzang po du ma bsnams/ /zhes pa ri mo 'dri ba'i skabs 'og nas kyang 'byung ngo zhes pa'o//yi dags steng du mchod pa bya/ /zhes pa de lta bu'i lha de dkyil 'khor gyi dbus su mi ro bris pa'i steng du spyan drangs te mchod pa bya'o zhes pa'i don to/ /'o ma'i 'bras thug gtor mar dbul/ /zhes pa lha bshos dbul ba'i don to/ /mar me dag ni mar las bya//zhes pa mar me brgyad dang bcu drug tu sbyar zhes pa'o/ /sa bon yi ge gcig pa 'di/ /zhes pa/ oM AHhU~M swA hA/ zhes bzlas par rigs so zhes kha cig 'chad do/ /de nas stong du bzlas pa bya/ /de yi 'og tu mkhas pa yis/ /zhes pa de ltar sngar mchod pa dang /bzlas brjod byas nas de'i 'og tu sngags pas dkyil 'khor du slob ma gzung bar bya'o zhes pa'o/ /dur khrod gnas su zhes pa dkyil 'khor gyi ming zhes pa'o/ /hUM gi zhal ni zlos shing gzung / /ces pa dkyil 'khor du me tog gtor ba'i sngags kyang 'di nyid do//slob dpon gyis hUM zhes bya ba bzlas shing slob ma gzung bar bya zhes pa'i don to/ /btsud nas de yi snying gar ni/ /zhes pa slob ma dkyil 'khor du btsud nas de'i 'og tu slob ma'i snying gar snying po hU~M zhes pa bsams la lha'i skur bsgyur te/ hUM zhes pa gzhag par bya zhes pa'i don to//de nas shU la'am phyag rgya ni/ /ras kyis g.yogs te bcing bar bya/ /zhes pa shU la'i phyag rgya ni bdag gis kyang bcing / slob mas kyang 'ching du gzhug go/ /me tog dkyil 'khor du dor du gzhug go/ /'di ni dkyil 'khor du gzhug pa'i phyag rgya'o/ /phyag rgya 'di bcing ba'i tshe gzhan gyis ma mthong bar ras kyis g.yogs la phyag rgya bcing bar bya'o zhes pa'i tha tshig go//slob ma dag la legs bstan na/ /de yang mchod pa byed du gzhug /ces pa de nas gdong gi ras phye la dkyil 'khor bstan nas slob ma de dkyil 'khor la mchod pa byed du gzhug go zhes bya ba'i don to//de nas gshin rje rab 'joms pa'i/ /zhes pa la sogs pa de nas de'i 'og tu slob ma de la dbang rnam pa bzhi las rig pa'i dbang bskur bar bya'o/ /dbang bskur ba'i bum pa la yang snying po 'bru gcig pa bzlas so/ /de yi ge 'bru gsum sbyin pa bzlas so zhes pa/oM AHhUM zhes bya ba'i yi ge 'bru gcig po slob ma la tshul bzhin du sbyin par bya ba'i rig pa'i dbang bskur bar bya'o zhes pa'i tha tshig go/ /'di man chad ni lha slar gshegs su gsol ba la sogs pa'i las bshad de/ de nas mchod pa yang byas nas zhes pa nas bstan te/de nas mchod pa yang byas nas/ /zhes pa la sogs pa de nas yang dkyil 'khor du mchod pa byas nas khro bo slar gshegs su gsol lo/ /shU la'i phyag rgya bcings nas su/ /de bzhin rtag par gshegs su gsol/ /zhes pa de ltar gshegs su gsol ba dang thabs gang gis gshegs su gsol zhe na/shU la'i phyag rgya bcings nas mthe bong phyir bskyed pas slar gshegs su gsol/ /khro bo spyan drangs pa yang shU la'i phyag rgya bcings te/ mthe bong gnyis nang du g.yab cing sngags dang ldan pas spyan drang bar bya'o zhes pa'i don to//khro bo spyan drangs pa dag kyang / shU la'i phyag rgya ldan par bya/ /zhes pa khro bo spyan drangs pa dang slar gshegs su gsol ba'i mdzub mo gnyis nang du g.yab par 'os te de ltar bya ba yang shU la'i phyag rgya bcings te bya'o zhes kha cig 'chad do//'di man chad phyag rgya'i mtshan nyid bshad do/ /dkon mchog gsum la phyag btsal nas/ /zhes pa thog mar lag pa gnyis thal mo sbyar te dpral bar bzhag la/ oM na mo bud+d+ha d+harma saM g+he b+h+yaH zhes pa brjod nas de'i 'og tu shU la'i phyag rgya bcing bar bya'o/ /de ni dam tshig sngar byas nas gdong phyag rgya bcing zhes bya ba'i don to//'di man chad ni phyag rgya'i mtshan nyid ces bya ba bshad do/ /shU la rab tu bstan par bya/ /zhes pa nas bstan te/ mkhas pas zhes pa sngags pas zhes pa'o/ /sor mo phan tshun bsnol nas su/ /zhes pa lag pa'i rgyab tu bsnol zhes pa'o//gung mor sor mo mchog gnyis ni/ /zhes pa rtse sprad de bsgreng ba dbus nas gyen du bsgreng ste bzhag ces pa'i don to/ /srin lag gnyis ni nang du bzhag /mdzub mo gnyis kyi drung du bzhag /ces pa srin lag gnyis nang du bzhag pa yang mdzub mo dang gung mo gnyis kyi bar bar du bzhag pa'i skad du kha cig gis gsungs so//bsnol mar nang du bcug ste pha rol tshu rol rtsa ba la gtang la bzhag go/ /de ltar de gnyis bsgreng nas su/ /zhes pa mdzub mo gnyis kyang gung mo bsgreng ba'i so so'i ngos la sbyar ba la yang bsgreng ngo zhes pa'o//lhag ma rnams ni nges par sba/ /zhes pa mthe bo mthe'u chung gnyis kyang bsnol mar nang du gzhug go/ /'di yi las rnams thams cad ni/ /zhes pa phyag rgya 'dis bdag bsrung ba dang / gzhan bsrung ba la sogs pa'i las thams cad bya ba'i tha tshig go/ /'di man chad ni dkyil 'khor du dgod pa'i sngags kyi le'u bshad de//de nas gzhan yang bshad pa bzhin/ /zhes pa nas bstan te/ oM hU~M laM laM ha zhes pa dkyil 'khor gyi nang gi phyogs bzhir yi dags dgod pa'i sngags so/ /oM hUM dring dza zhes pa sgo bzhin yi dags kyi ro smad yod pa'i sngags so//oM hUM ha zhes pa dkyil 'khor gyi nang gi phyogs bzhir yi dags phreng ba bkod pa'i bar bar du mgo bzhag pa'i sngags so/ /oM hU~M hrIH Sh+T+rir kha shU la bzhi char gyi'o zhes pa dkyil 'khor mtha' bzhir tri shU la bzhi bzhag pa'i sngags so/ / oM hU~M tri ha zhes tri shU la'i rtsa ba'i grwa bzhir thod pa bzhi bri ba'i sngags so/ /tri shU la'i g.yas g.yon du thod pa re re gnyis gnyis bzhag pa rnams kyi sngags so/ /lho phyogs kyi ni sgo phye nas/ /lhag ma gzhan ni gcad par bya/ /zhes pa lho phyogs sgo ni phye ste/ /sgo lhag ma gsum ni bcad do//dur khrod ces pa dkyil 'khor la yang bya'o/ /rtag tu bri ba'i sngags zhes pa'o/ /sngags 'di rnams kyis rab sbyar na/ /zhes pa sngags de rnams kyis dkyil 'khor der sbyar nas/ dur khrod kyi ni gnas su 'gyur/ /zhes pa sngar bshad pa bzhin du dur khrod kyi gnas kyi dkyil 'khor du 'gyur ro zhes pa'i don to//tsan+dan dmar pos bskus pa yi/ /zhes pa yang na tsan+dan dmar pos bskus pa'i sa gzhi khru gang tsam gyi tshad du dkyil 'khor bris kyang rung zhes pa'i don to/ /sa gzhi khru gang tsam la ni/ /zhes pa ngos gcig tshad du bya zhes pa'o//dkyil 'khor gyi tshad dang gnas ni ji lta bur yang gang yang rung zhes pa'i don to/ /dkyil 'khor dag ni bris nas su/ /de nas cho ga zhes pa yis/ /zhes pa de ltar dkyil 'khor bris pa nas de'i 'og tu lha spyan drangs pa la sogs pa bya'o zhes pa'i tha tshig go//'di man chad ni mchod pa'i cho ga zhes bya ba bshad de/ sngags kyi mchod pa rim bzhin bshad/ /ces pa 'og nas 'byung ba bzhin bya zhes pa'o/ /spyan drangs pa'o zhes pa shU la'i phyag rgya dang sbyar te lha spyan drangs pa'o/ /oM hUM swA hA zhes pa/ oM hUM swA hA zhes bzlas so//swA hA ni zhi ba dang / rgyas pa la sbyar bar zad ces kha cig kyang 'chad de/ sngags 'dis khro bo bzhugs su gsol lo/ /khro bo nyid kyi snying po 'bru gcig pa'i sngags yin te/ bzlas pa'i tshe 'di bzhin du bzlas so/ /gong ma'i le'u las yang tshul 'di bzhin du bzlas so//khyad par du ni hUM ring thung tsam zhig yod do zhes pa'i don to/ /khro bo rnam par rgyal ba'i 'jam dpal gyi rtsa ba'i rtog pa phyi ma'i phyi ma las zhes pa dur khrod gnas kyi dkyil 'khor 'dir sngags kyi le'u sngags bshad pa rnams yi dags phal po che'i dkyil 'khor du sngags ma gsungs pa rnams sam der ma tshang ba rnams kyang sngags 'di rnams kyis sbyar bar bya'o//bsgom pa'i yan lag gang du yang sngags dgos pa rnams kyang le'u ltag 'og tu de bzhin du sbyar ro zhes pa'i don to/ /rtog pa ste dang po'o zhes pa dur khrod gnas kyi dkyil 'khor gnas su gtogs pa'i nang nas le'u 'di dang po'o zhes bya ba'i don to// //sku gzugs de'i spyan sngar ji skad gsungs pa'i bzlas pa'i cho ga'i las rnams kyi bzlas brjod bya'o zhes bya ba'i tha tshig go/ /dur khrod gnas kyi dkyil 'khor du gtogs pa'i ri mo'i sku gzugs kyi mtshan nyid bshad pa'i le'u 'di la don rnam pa gsum gyis bstan te/ri mo'i sku gzugs kyi mtshan nyid dang / bzlas brjod bya ba'i mtshan nyid dang sngags rnams bstan pa'o/ /de la dang por ri mo'i sku gzugs kyi mtshan nyid bshad pa'i phyir/ de nas 'di ni ri mo'i mchog /ces bya ba la sogs pa smos so/ /bzlas pa'i las ni rab tu bya/ /zhes bya ba la de ltar sku gzugs bris nas de nas zhes pa/ khro bo 'di yi mchog tu 'gyur/ /zhes pa'o/ /ras phran khru gang tsam du ni/ /zhes pa ched du btags pa'o/ /bzang po sar pa bkrus pa la//zhes pa thag thug can ma yin par phra mor byas pa'i don to/ /na bzar gsol zhes pa smad g.yogs byas pa'o/ /tshul bzhin yi dags steng du bzhugs/ /zhes pa g.yon brkyang pa'i tshul du bzhugs pa'o/ /shU la ral gri 'khor lo dang / /dgra s+t+wa mchog sbyin pa yi phyag /ces pa 'di'i skabs su shU la zhes bya ba ni tri shU la la bya ste rtse gsum la drang por 'dug pa'o/ /kha cig gis rtse gsum la kha gdengs por 'dug pa yin zhes bshad do/ /lcags mda' be con rdo rje dang / /zhes pa nang yang zhes bya ste lcags dang shing las phyed phyed ba'i mda' byas te/'di ni mi las bya'o/ /mda' dang mde'u lcags dang sgro yan chad kun lcags las byas pa'o/ /'ga' 'ang zhags pa zhes pa dbyug to'am mtho ba la yang bya'o zhes pa'o/ /shak+ti zhes pa mdung thung zhes pa'o/ /ba ti sa dang de bzhin sdigs/ /zhes pa la gcig ni rtse gdengs por yin par bshad do//kha cig ni bre ba'i so 'dra ba rtse gsum drang por 'dug pa yin no zhes 'chad do/ /bung ba zhes ba sngon po bris nas de yang sba zhes pa gnas dben par bzhag pa'i don to/ /'di man chad bzlas brjod bya ba'i cho ga bshad de/ yid du 'ong ba'i gnas dag tu//zhes pa la sogs pa smos so/ /bzhag nas bzlas pa dag kyang bya/ /zhes pa ri mo'i sku gzugs de yang / gnas yid du 'ong ba'i gnas dben par bzhag nas bzlas brjod bya'o zhes pa'o/ /bzlas pa'i cho ga 'dir bshad do/ /zhes pa khrus la sogs pa yang bzlas pa'i yan lag tu gtogs pa'i phyir zhes pa'i don to//rig pa 'dzin pa'i sngags pas rtag pa ru khrus bya'o/ /'bar ba'i sngags kyis khrus bya'o/ /zhes pa mthu che ba gzi brjid can gyis khrus byas te/ sngags nyid 'og nas 'byung ngo zhes pa'o/ /bdud rtsi 'byung ba'i sngags kyis ni//zhes 'og nas 'byung ba zhes pa'o/ /thog mar kha ni bkrus nas su/ /zhes pa khrus byas pa'i 'og tu nye reg gi phyag rgya dang ldan pa'i tshul bzhin du kha bkru'o/ /de'i 'og tu shU la'i phyag rgya dang ldan pa'i tshul bzhin du bsrung zhes pa'o/ /de nas bsrung ba legs par bya//zhes pa de'i 'og tu shU la'i phyag rgya dang ldan pas bsrung bar bya ba'i sngags kyang 'og nas 'byung ngo / /de yi 'og tu cho ga bzhin/ /zhes pa de'i 'og tu 'dzab sar 'gro bar byas te/ de'i sngags kyang 'og nas 'byung ngo / /mkhas pas khro bo'i khang par 'jug / ces pa'i don to/ /zhugs nas ku sha'i las bya'o/ /zhes pa 'dzab sa'i khang pa'i nang du zhugs nas/ stan bzang de la sngags pa 'dug nas su/ /zhes pa'i don to/ /de nas cho ga sngon gsungs pa/ /zhes pa gong du bshad ba'i mchod pa'i yo byad rnams kyis mchod par bya'o//sngags pa'i lag pa gnyis ni tsan+dan dris bskus pas zhes pa'i don to/ /sngags kyi nor bu blangs nas su/ /nyes pa'i skyon rnams sbyang ba'i phyir/ /zhes pa sngags kyi nor bu blangs pa'i sngags 'og nas 'byung ba brjod cing sngags kyi nor bu blang ngo / /nor bu'i skyon sbyang zhes pa'i don to//khro bo bdud rtsi lan gsum bzlas/ /zhes pa khyor ba'i nang du bcug ste bzlas pa'i sngags 'og nas 'byung ngo zhes pa'i don to/ /mngon par phyogs 'dug bzlas par bya/ /zhes pa sngags pas bzlas zhes pa'o/ /sems rab dang zhing rtse gcig yid/ /sems mi g.yeng bar bya ba'i don to//yid ni mi skyo bar du bya/ /zhes pa dus gsum du bzlas pa de yid la skyo ba'i mtshams kyis bzung ste bzlas par bya'o zhes pa'i don to/ /bzlas pa'i mthar zhes pa bzlas brjod zin pa'i mthar khro bo slar gshegs su gsol lo/ /shU la'i rgya bcings gshegs su gsol//zhes pa shU la'i phyag rgya dang slar gshegs su gsol ba'i sngags rnams sbyar te slar gshegs su gsol lo/ /de ltar legs par nyin re zhing / /yi ge gnyis pa'i sngags 'di ni/ /rnam pa kun du cho ga bzhin/ /zhes pa gong du bshad pa de ltar legs par nyin re bzhin dus gsum du yi ge gcig pa'i sngags 'di bzlas pa'i dus thams cad du cho ga bzhin du bzlas par bya'o//gang zhig bye ba gcig zlos pa/ /zhes pa 'bum phrag brgyar bzlas pa bya'o/ /de yi dngos grub dam pa thob/ /ces pa de ltar sngags bzlas pa byas nas de'i 'og tu bsgrubs na dngos grub mchog 'thob bo zhes pa'i tha tshig go//'di man chad ni sngags rnams bstan te/ de nas gzhan yang ci bstan pa/ /zhes pa la sogs pa khro bo chen po nyid kyis gsungs pa'i rgyud chen po las ji skad bsten pa'i sngags rnams bsgrub la phan pa'i phyir bshad do/ / oM hUM di ba ta te tsa swA hA zhes pa khrus byed pa'i tshe chu la gdab pa dang / sa la gdab pa dang / sngags kyi chus lus la gtor bar bya ba'i sngags so/ /oM hUM a mr-i ta sra ba bA ma ba zhes nye reg gi phyag rgya sbyar te/ khar lan gsum du sbyar te/ khar lan gsum du chu btung ba dang / kha lan gsum du phyi ba'i sngags so/ /oM hUM sarba to zhes pa shU la'i phyag rgya dang sbyar te bdag nyid bsrung ngo / /oM nA ma sarba ta thA ga to zhes pa shU la'i phyag rgya dang sbyar te khrus bya ba'i tshe dang / bsrung ba'i tshe mtshams bcad pa'i sngags so/ /ra ba'i sngags so/ /zhes pa rdo rje 'bar ba bsam zhes pa'i don to//hU~M hU~M hU~M hU~M hU~M hU~M/ zhes pa shU la'i phyag rgya dang sbyar te gnas lngar gtug cing bdag bsrung dang pha rol yang bsrung ba'i sngags so/ /oM hU~M si ti kA la ma tha na phaT/ ces pa 'dzab sar nang du 'gro ba'i tshe sngags 'di zlos shing 'gro bar bya'o/ / sngags 'di chu la zlos shing chur gtor zhing 'gro bar bya'o zhes pa'i don to/ /oM hU~M rak+Sha rak+Sha man swA hA zhes pa bdag nyid kyi stan la gdab pa'i sngags so/ /oM hUM sid+d+hi d+ha hUM dza dza zhes pa sngags 'di bzlas shing sngags kyi nor bu blang ngo zhes so/ / oM d+h+ri kro ta a mr-i ta zhes pa snyim pa bsnol ba'i nang du nor bu bcug ste/ sngags 'di bzlas so/ /bzlas pa'i cho gar gtogs pa ste/ /zhes pa dur khrod gnas kyi dkyil 'khor le'ur gtogs pa las gnyis pa'o// //brtul zhugs su gtogs pa'i le'ur 'di la don rnam pa bzhis bstan te//de la sngon du bsnyen pa byas nas brtul zhugs spyod pa dang / brtul zhugs ma nus na sngon du bsnyen pa lhag par byas te bsgrub pa dang / spyir bstan pa dang / dngos grub mchog dang 'bring mi 'dod na dngos grub phal bsgrub pa bstan pa'o/ /de la dang por sngon du bsnyen pa byas nas brtul zhugs spyad pa zhes bya ba bshad pa'o//'di yi sngon du bsnyen pa ni/ /bye ba gcig tu nges par bshad/ /ces khro bo'i rgyal po 'di'i sngon du bsnyen pa bya ba ni sngar bshad pa bzhin du 'bum phrag brgya bya'o/ /khro bo brtul zhugs phyis spyod pa na zhes pa de ltar bsnyen pa byas pa'i 'og tu khro bo'i brtul zhugs spyad na dngos grub mchog thob po zhes pa'i don to//shing las byas pa'i thod pa ni/ /zhes pa thang shing las byas pa'i thod pa zhes pa'o/ /nyi shu rtsa drug sor tshad byas/ /zhes pa thod pa'i kha shing gi tshad bya zhes pa'o//mkhas pas tri shU la rnon po ni/ /sngags pas tri shUl rnon po legs pa zhes pa'o/ /lag pa g.yas pas tri shU la bzung / /g.yon du thod pa bzung zhes pa'o/ /gzig lpags zhes pa smad g.yogs zhes pa'o/ /lus ni thal ba dag gis bsku//zhes pa thal bas byug par bya ba'i don to/ /rus pa dag gi phreng ba yis/ /zhes pa mi rus dag gis lha'i rgyan bzhin du gdags so/ /rgyan du byas nas brtul zhugs spyad/ /ces pa tshul de ltar de brtul zhugs spyad do zhes pa'i don to/ /sngags pa de gad mo sgra chen dag kyang 'byin zhes pa'o//dur khrod dam ni shing gcig gam/ /ri'am yang na tshal yang rung / /zhes pa sngags pa de lta bu de grong du 'gro zhing der gnas par mi bya ste/ /ming gis smos pa'i gnas 'di dag tu gnas par bya'o/ /mkhas pas zhes pa sngags pas zhes pa'o/ /lci ba za zhes pa zas su lci ba za ba'o//blo ldan grong du yong mi 'jug /ces pa sngags pa de grong du 'gro zhing der yang gnas par mi bya'o/ /mnyam par gzhag ces pa sems rtse gcig tu gnas zhes pa'o/ /tshig mi smra zhes pa gzhan gang yang mi smra'o/ /gtsang zhing tshangs par spyod la dul//zhes phyi nang gi khyim pa zhig yin na mi tshangs par mi spyad ces pa'i don to/ /rtag tu bde gshegs sems dang ldan/ /zhes pa byang chub sems dang ldan zhes pa'o/ /byang chub sems dang kun ldan zhing / /zhes pa gong ma nyid kyi 'grel pa gshin rjes rab tu 'joms pa 'di zhes pa de ltar spyad na dngos grub mchog 'grub par 'gyur gyi mi 'grub par mi 'gyur ro zhes pa'i don to//dus thams cad du byang chub kyi sems ldan par bya zhing khro bo'i brtul zhugs gang gsungs pa yang spyod cing rtag tu dus gsum du zlos pa byed pa ni dngos grub mchog thob par 'gyur ro zhes pa'i don to//'di man chad ni brtul zhugs ma grub na bsnyen pa lhag par bya ste/ /sgrub pa zhes bya ba bshad do/ /gang tshe 'di yi brtul zhugs ni/ /bsnyen pa bya bar mi nus na/ /zhes bya ba gong du bshad pa bzhin du brtul zhugs spyod mi nus na/ gnas gang yang rung bar gnas shing zas su lci ba za zhing 'bum phrag brgyad bzlas pa'i bsnyen pa bya'o zhes pa'i don to//de nas bzlas pa'i tha mar yang / /mkhas pas mchod pa rgya cher bya/ /zhes pa de ltar sngon du bsnyen pa byas pa'i bzlas pa zin nas/ tha mar yang sngags pas sku gzugs de la mchod pa rgya chen po bya'o//de nas me tog dzA ti stong / /ri mo dag la phog par dbul/ /zhes pa dri shing sna ma'i me tog la bya ste/ sngags bzlas shing sku gzugs pa phog par dbul lo/ /rig pa 'dzin zhes pa sngags pas zhes pa'o/ /de yis phog par phul na ni//zhes pa sri shing sna ma'i me tog phul zhes pa'o/ /gang tshe rab tu 'bar 'gyur ba/ /zhes pa ri mo'i sku gzugs 'bar bar gyur na zhes pa'i don to/ /de'i tshe ri mo de yis ni/ /zhes pa ri mo'i sku gzugs 'bar bar gyur pa de'i mthus ni sngags pa nyid nam mkha' la 'phar bar gdon mi za bar zhes pa'i don to//mchog tu gyur te thog mar 'gro/ /zhes pa rig 'dzin gyi rgyal por 'gyur zhes pa'i don to/ /'on te phog par phul ba na/ /zhes pa me tog snga ma de nyid kyis sku gzugs la phul zhes pa'i don to/ /gzugs de rab tu g.yo bar gyur na ni//zhes pa'o/ /rtog la ji skad gsungs pa yi/ /zhes pa ji skad gsungs pa'i dngos grub 'bring / lus mi snang ba 'thob par 'gyur ro zhes pa'i don to/ /de la dngos grub 'bring du sgrub pa po de la 'gyur zhes pa'i don to/ /de ste rab tu mi g.yo bar ri mo rang bzhin du 'dug pa/dngos grub tha ma thob par 'gyur/ /zhes pa de ltar byas pa las kyang sku gzugs mi 'gul zhing mi g.yo bar gyur te/ sku gzugs tha mal par 'dug na cho ga de ltar byas pa'i dngos grub tha ma rkang mgyogs tsam du 'gyur ro/ /de lta bu'i 'bras bu rnam pa gsum gsum bshad ces pa de ltar dngos grub rab 'bring tha ma gsum du bshad do zhes bya ba'i tha tshig go//'di man chad ni spyir bsnyen pa zhes bya ba bshad do/ /lus ni nyon mongs spyad pa las/ /dngos grub rnam gsum thob par 'gyur/ /zhes pa gong du bshad pa'i brtul zhugs dag ma yin par spyir yang lus nyon mongs pa'i dka' thub spyad pa las dngos grub rnam gsum thob par 'gyur ro zhes pa'i don to//brtul zhugs smyung bar 'dug la 'bad/ /ces pa lus la nyon mongs par bya ba'i dka' thub de dag kyang gang zhe na/ 'di dag go yang na chu'am//rlung dag bza' zhes pa chu 'ba' zhig btung ba'am rlung chen rngub cing bza' bar bya'o/ /ci la'ang ma chags phyugs gcin btung / /zhes pa 'dod pa'i longs spyod la sogs te/ gang la yang chags par mi bya'o/ /phyugs gcin zhes pa phyugs gcin 'ba' zhig btung zhes pa'o//byang chub sems dang kun ldan na/ /zhes pa de ltar dka' thub spyod pa dang ldan zhing byang chub kyi sems dang yang ldan na/ de'i tshe dngos grub dam pa 'thob ces pa'i don to/ /rig pa mchog kun bsgrub pa la/ /zhes pa khro bo'i rgyal po la bya ste/de'i sngags sgrub pa la bya zhes pa'i don to/ /'di dag spyir na bstan pa yis/ /zhes pa cho ga de ltar spyad na dngos grub rnam gsum thob par 'gyur ro zhes spyir bstan pa yin no zhes bya ba'i don to/ /'di man chad dngos grub mchog 'bring mi 'dod na/ dngos grub phal pa sgrub pa bstan te/gang tshe dngos grub mchog rnams dang / /'bring yang gal te mi 'dod na/ /longs spyod rtag tu 'dod na ni/ /zhes pa la 'og nas 'byung ba'i longs spyod dag ni dngos grub phal pa 'dod na zhes pa'i don to/ /de tshe rtag tu bzlas par bya/ /zhes pa dus gsum du bzlas pa rgyun du bya'o/zhes pa'o/ /'di yi cho ga gzhan dag kyang / /de nas mdor ni bshad par bya/ /zhes pa dngos grub phal pa sgrub pa'i cho ga gzhan dag kyang mdor bshad par bya'o zhes pa'o/ /sa gzhi rab tu mdangs dga' ba/ /zhes pa nyams dga' ba'i sa gzhi bzang po la bya'o zhes pa'o//der ni tsan+dan dmar po yis/ /zhes pa de'i steng du tsan+dan dmar po'i 'de gus bsku bar bya'o zhes pa'i don to/ /mkhas pas bya zhes sngags pas bya'o/ /de yang bzang po khru gang tsam/ /zhes pa de ltar yid kyi dkyil 'khor bya ba de yang che chung gi tshad khru gang tsam du bya'o//rab tu mnyam zhing yid du 'ong / /zhes pa dkyil 'khor gyi yon tan la bya'o/ /gshin rjes rab tu 'joms pa gang / /zhes pa la sogs pa gshin rje rab tu 'joms zhes bya ba'i dkyil 'khor dur khrod gnas zhes bya ba gang gsungs pa de dag gi sngags rnams kyis me tog la bsngags te/so so'i gnas gnas su bkod pas dkyil 'khor de byas nas zhes bya ba'i don to/ /de yi 'og na sngags rig pas/ /zhes pa de ltar yid kyis dkyil 'khor legs par bkod nas de'i 'og tu sngags pas ji skad gsungs pa'i las dag gis zhes pa mchod pa bya ba'i las dag gis ci 'byor pa dang //ci nus par khro bo'i rgyal po'i gtso bo la mchod par bya zhes pa'i don to/ /nyi ma re re cho ga bzhin/ /bzlas pa dag kyang stong du bya/ /zhes pa nyi ma re re zhing dus gsum du zlos pa yang dus gcig gi tshes grangs stong stong du bzlas brjod byas pa'i dus gsum char yang mchod pa'i cho ga dang dkyil 'khor tshul de ltar bkod nas bzlas pa bya'o//de ltar rtag tu byas pa yis/ /zhes pa tshul de ltar rtag tu byas pas bdag nyid gang 'dod pa'i 'bras bu thob par 'gyur ro zhes pa'i don to//gdon mi za zhes pa the tshom med par dga' bar 'gyur/ /de'i zhes pa sngags pa de'i dgra yang med par 'gyur ba'i don to/ /nad med rang gis zhes pa'o/ /sa'i dbang po dang zhes pa rgyal po dang zhes pa'o/ /g.yo dang mi g.yo 'jig rten rnams//zhes lha klu la sogs pa ri dang mtsho la sogs pa mi g.yo ba la gnas pa'i lha klu rnams zhes pa'i don to/ /byang chub sems ldan pa de ni/ /zhes pa sngags pa byang chub kyi sems dang ldan pa de'i dbang du gyur pa gdon mi za zhes pa'i don to/ /rig pa'i brtul zhugs su gtogs pa ste/gsum pa'i bshad pa rdzogs so// //rtsa ba'i rtog par sdud par gtogs pa'i le'u 'di la don rnam pa gnyis kyis ston to/ /de la skabs dbye ba dang / dngos grub dang las thams cad sbyar bar bya'o/ /de la rtsa ba'i rtog pa sdud par gtogs pa zhes bya ba ci'i phyir bya zhe na/sngar bshad pa'i rtsa ba'i rtog pa thams cad kyi dngos grub dang las rnams le'u 'dir sdud par gyur pas na yang le'u 'di la rtsa ba'i rtog pa sdud par gtogs pa'i le'u zhes bya'o/ /de la dang po skabs dbye ba zhes bya ba bshad de/de nas gzhan yang brtul zhugs kyis/ /bsgrub pa'i las rnams bshad par bya/ /zhes pa khro bo'i brtul zhugs spyad pas 'grub par 'gyur ba'i las rnams bshad do/ /dngos grub mchog rnams thams cad kyi/ /zhes pa dngos grub mchog rnams thams cad khro bo'i brtul zhugs spyad pas bsgrub par bya'o//brtul zhugs med pas mi 'grub ste/ /zhes pa khro bo'i brtul zhugs med par phal cher dngos grub mchog rnams mi 'grub ste/ brtul zhugs spyad pa byas nas su/ /dngos grub mchog rnams legs par 'grub/ / ces pa khro bo'i brtul zhugs sngar spyad nas de'i 'og tu dngos grub mchog rnams 'grub po zhes pa'i don to/ /mkhas pas gzhan yang ma yin no/ /zhes pa brtul zhugs ma spyad par dngos grub mchog rnams bsgrub kyang 'grub par mi 'gyur ro zhes pa'i don to/ /'di man chad ni dngos grub dang las thams cad la sbyar ba zhes bya ba bstan to//ji skad bstan pa'i mtshon cha rnams/ /rtsa ba'i rtog pa'i cho ga bzhin/ /zhes pa sngar rtsa ba'i rtog pa rnams las ral gri dang / be con dang / /dgra sta dang / shUl la sogs pa'i lha'i mtshon cha rnams sgrub pa'i sbyor ba sngar gsungs pa rnams bzhin du 'dis bsgrubs na/de bzhin du 'grub par 'gyur ro zhes so/ /de la 'di ni rtag pa ru/ /dur khrod gnas pa'i dkyil 'khor ni/ /zhes pa de la rtsa ba'i rtog pa las khyad par du 'dir ral gri la sogs pa bsgrub pa'i tshe/ dur khrod kyi gnas su dkyil 'khor bris la sgrub po zhes pa'i don to//dngos grub mchog rnams rab sbyin pa'i/ /zhes pa dkyil 'khor gyi yon tan la bya'o/ /bye brag tu ni logs shig gsungs/ /zhes pa ral gri la sogs pa'i dngos grub bsgrub pa'i tshe/ rtsa ba'i rtog pa las bye brag tu 'dir dur khrod kyi dkyil 'khor bris te bsgrub par gsungs so//ral gri sa 'og ro langs dang / /zhes pa rtsa ba'i rtog pa las gsungs pa'i dngos grub 'di dag gis zhes pa'o/ /gzhan yang las dag ci 'dod dang / /zhes pa mi ro'i ras bsgrub pa dag ces pa'o//bud med dam pa spyad bsgrub pa/ /zhes pa 'dod pa'i phyir bsgrub ces pa'o/ /rtsa ba'i rtog pa cho ga yis/ /zhes pa sngar rtsa ba'i rtog pa'i le'u las dngos grub sgrub pa'i mtshan nyid bshad pa'i rnam grangs 'di rnams rtsa ba'i rtog pa las gsang ba'i cho ga bzhin du 'di yang skabs su yang bsgrub par bya'o//de las rtsa ba'i rtog pa las khyad par du na 'di'i skabs su dngos grub de dag bsgrub pa'i tshe/ khro bo'i rgyal po'i yi ge bcu gcig pa'i snying po sgrub par gsungs so/ /de nas ji skad bstan pa kun/ /ma smos pa yang bsgrub pa bya//zhes pa de bas na rtsa ba'i rtog pa las dngos grub bshad pa rnams las/ ming gis smos pa 'di rnams ma gtogs par dngos grub 'byung ba rnams kyang tshul bzhin du bsgrub par bya'o/ /'jam dpal khro bo'i snying po 'di/ /hUM zhes bya ba rgyas pa ste/ /zhes pa hUM zhes bya ba'i snying po 'bru gcig pa'i cho ga rgyas pa'i yi ge ste/hUM 'di ni rtsa ba'i rtog pa sdud par yongs su grags/ /yi ge hUM rtsa ba'i rtog pa gsungs pa/ dngos grub thams cad bsgrub pa'i phyir/ /zhes bya ba'i don to/ /'di ni rtsa ba'i rtog pa yi/ /bsdus pa'i yongs su bsgrags pa'o//zhes pa sngar rtsa ba'i rtog par gtogs pa'i dngos grub rnams las le'u 'dir mdor bsdus nas yi ge 'bru gcig pa'i sgo nas de rgyas par bshad par bya'o/ /rtsa ba'i rtog pa las gsungs pa'i dngos grub las rnams le'u 'dir mdor bsdus nas bshad pa dang /dngos grub de dag kyang yi ge 'bru gcig pos dngos grub sgrub cing las sbyar rung bar rgyas par bshad pa'o/ /rtsa ba'i rtog par gtogs pa ste bzhi pa'o/ /bzhi pa'i bshad pa rdzogs so// //phyi ma'i phyi ma rtog pa lnga pa 'di la don rnam pa lngas ston te/de la mtshams sbyor ba dang / sngags bstan pa dang / sngags kyi mthu bstan pa dang / sngon du bsnyen pa byas nas sgrub pa dang / sbyor ba bstan pa'o/ /de la dang po 'di la mtshams sbyor ba zhes bya ba bshad do/ /rtog pa mdo ru bsdus pa dang / rgyas pa dag tu bshad pa dang //zhes pa rtsa ba'i rtog par gsungs pa'i dngos grub rnams dang / las dang le'u 'dir bsdus nas yi ge 'bru gcig pa'i sgo nas de dag rgyas par bshad par bya'o/ /rtsa ba'i rtog pa las gsungs pa'i dngos grub dang las rnams le'u 'dir mdor bsdus te bshad pa dang //dngos grub de dag kyang yi ge 'bru gcig pos dngos grub ci las byar rung bas rgyas par bshad pa'o/ /brtul zhugs dang ni nges pa yis/ /zhes pa bsdam par byas te smyung ba byas pa la bya'o/ /sgrub pa ci bstan bshad pa yin//zhes pa tshul de dag gis sgrub pa la de yan chad kyis bshad zin to/ /de nas khro bo gzi chen gyis/ /zhal drug hUM zhes bya ba'i sngags/ /zhes bya ba la sogs pa khro bo chen po gzi byin chen po'i zhal drug nas hUM drug 'byung ba'i hUM zhes bya ba'i sngags dngos grub ji ltar bsgrub pa rnams bshad pa yin no zhes gong ma dang tshig gi 'phro sbyar ro//hU~M gi sngags de sngon du bsnyen pa byas nas de'i 'og tu bzlas pa tsam gyis las de dag 'grub par 'gyur ro/ /gsang ba de mdor bshad par bya'o zhes pa'o/ /brtul zhugs spyad dang brtul zhugs dka'//de dag 'di la yod med de/ /zhes brtul zhugs spyad pa dang / khyad par gyi brtul zhugs dga' ba de dag hUM zhes bya ba'i sngags kyis las sgrub pa 'di dag la dka' thub dang brtul zhugs spyad mi dgos so zhes pa'i don to/ /lan cig klags pa tsam gyis kyang //las rnams thams cad byed par 'gyur/ /zhes pa gong du bsnyen pa byas nas de'i 'og tu las byas pa 'grub par 'gyur ba la bya'o zhes pa'o/ /'di man chad sngags bstan pa zhes bya ba bshad de/ oM na ma zhes bya ba rnams bstan te/ oM na maH zhes pa nas swA hA/zhes pa'i bar gyi sngags ni zhal re re nas hUM drug drug 'byung ba dang sbyar ro/ /'og nas sbyor ba bstan pa'i skabs nas las rnams 'byung ba'i bskul tshig re re'i hUM drug gi skabs skabs su bcug ste/ che ge mo zhig gis ri rnams khos shig g.yos par gyur cig ces pa'i so so'i tshig kyang bcug ste sngags rim gyis bzlas so//yi ge bzhi bcu rtsa gsum 'di/ /khro bos klags pa tsam gyis 'grub/ /ces pa'i yi ge bzhi bcu rtsa gsum 'byung ste bgrang bar bya ba'i lugs lags so/ /hUM gi sngags nyid khro bo'i rang bzhin te 'grub par 'gyur ba na sngar bshad zin to//sangs rgyas kun gyis mngon par bstod/ /ces pa hUM gi sngags kyi yon tan la bya'o zhes pa'i don to/ /de ni rtag par bzlas pa ni/ /zhes pa hUM gi sngags te rtag par bzlas par byas na dngos grub stsol bar mdzad do/ /'di man chad ni sngags kyi mthu bstan pa zhes bya ba bshad do//dngos grub thams cad ster bar bshad/ /ces pa nas bstan te/ dur khrod gnas su rtag par ni/ /rtag tu zlos pa'i cho ga yis/ /zhes pa de ltar rtag tu bzlas pa bya ba yang sngar bshad pa'i dur khrod kyi dkyil 'khor snga ma'i tshul bzhin du dkyil 'khor bris sam bsams te/dkyil 'khor 'dir rtag tu bzlas pa bya zhes pa'i don to/ /lha dang lha min dri za dang / /zhes pa de ltar bzlas pa byas pa de'i mthus/ /de yi gzis ni 'byer bar 'gyur/ /zhes pa sngags de'i gzi byin dang mthus zhes pa'o//'gro dang mi 'gro 'jig rten na/ /de la dka' ba cung zad med/ /ces pa snod kyi 'jig rten dang / g.yo ba'i 'jig rten te bcud kyi 'jig rten la bya'o/ /hUM gi sngags de las bya ba la zhes pa'o/ /zhal drug hUM zhes bya ba'i sngags/ /zhes bya ba la sogs pa sngon du bsnyen pa byas pa'i 'og nas hUM gi sngags de dag dang /shU la'i phyag rgya dang ldan par sbyar na rgyud 'di'i cho ga'i las rnams 'grub par 'gyur ro zhes pa'i don to/ /'di man chad ni sngon du bsnyen pa byas nas sgrub pa zhes bya ba bshad de/ dur khrod gnas su cho ga bzhin/ /zhes pa sngon du bsnyen pa bya ba yang dur khrod kyi dkyil 'khor gyi cho ga bzhin du bris sam bsams te/ dkyil 'khor des sngon du bsnyen pa bya'o/ /thog ma nyid du chig 'bum bya/ /zhes pa hUM gi sngags de thog mar bsnyen pa 'bum bzlas par bya zhes pa'i don to//de nas rtag pa'i cho ga bshad/ /ces pa de ltar sngon du bsnyen pa byas nas de phan chad kyang yal bar mi 'dor bar dus gsum du bzlas par bya'o/ /rtag par spyod pa'i cho ga yis/ /de nas chig 'bum bzlas nas kyang / /zhes pa de ltar rtag par bzlas pa spyod pa'i cho gas sngon du bsnyen pa 'bum byas pa'i 'og tu yang 'bum bzlas te sbyor ba nyid 'bum sngon du bsnyen pa bya'o//kha cig gis bshad pa ni 'di ni sngar bsnyen pa bya ba zlos bur bshad par zad de bsnyen pa'i chig 'bum bya bar nges so zhes bshad do/ /ji skad gsungs pa'i las rnams kyis//de yi 'og tu sgrub la 'jug /ces pa de ltar bsnyen pa byas pa'i 'og tu sngar rtsa ba'i rtog pa las gsungs pa'i las dang / 'og nas 'byung ba'i las rnams sgrub pa la 'jug pa'o zhes bya ba'i don to/ /rtsa ba'i rtog pa'i cho ga yis/ /de nas thams cad bsgrub par bya//zhes pa rtsa ba'i rtog pa las gsungs pa'i las thams cad kyang rtsa ba'i rtog pa'i cho ga bzhin du las thams cad bsgrub par bya'o/ /'di la dka' ba ci yang med/ /ces pa hUM gi sngags de las bya ba 'di la dka' ba med do/ /cho ga bzang po ci gsungs pa'i//zhes pa'o/ /rtog pa de bzhin bdag gis bshad/ /ces pa 'og nas 'byung ba la bya'o/ /zhal drug hUM zhes bya ba 'di/ /zhes pa zhal drug nas hUM zhes bya ba re re 'byung bas zhal drug tu bshad do zhes pa'o/ /'di man chad ni sbyor ba bstan pa zhes bya ba bshad do//khro bo'i zhal nas mdo ru ni/ /cho ga bzang po zhes bya ba la sogs pa smos so/ /hU~M gi mthar ni bskul bar bya/ /zhes pa la sogs pa hUM drug gi 'og ya ma pra ma zhes bya ba'i gong gi bar der tra zhes bya ba'i bskul tshig bcug ste/ /yi ge bzhi bcu rtsa gsum ril gyis bzlas te/shU la'i phyag rgya dang ldan par sngags brjod pas las bya ste tshul 'di bzhin du sbyar te/ las bya ba las gang dang gang byas pas de dang de bzhin du 'grub par 'gyur ro/ /hUM ni bskul ba'i tshig gi brdas 'dzin tsam du zad pas 'di'i hUM nyid dkyus su gzhug mi dgos te/ hUM drug gi mjug la so so'i bskul ba'i tshig gzhug par zad de/ 'og ma kun la 'di sbyar ro zhes pa'i don to/ /hUM tshig rig sngags thams cad dang / /zhes pa pha rol po'i rig sngags bcad pa dang zhes pa'o/ /ri bkas par bya ba dang sa g.yo bar bya'i tshig gzhug mi dgos te/so so'i bskul ba'i tshig yi ge 'bru re re po dang bsam pa'i khyad par tsam gyis las rnams bya'o zhes kha cig 'chad do/ /mtshon cha rnams ni mchod par bshad/ /ces pa pha rol gyi mtshon cha rnams ni gcod do/ /shU la'i phyag rgya dang ldan par/ /hUM kha rtag par rab sbyar na/ / zhes pa shU la'i phyag rgya ni las 'di dag thams cad la sbyar bar bya'o/ /gdug pa rnams ni za dang 'chi/ /dgra yi dpung dag rab tu 'jig /ces pa gdug pa rnams za ba dang / dgra'i dpung rnams 'chi bar 'gyur ro/ /hUM thar mtshon cha kun 'phen tshe/ /zhes pa pha rol po'i dpung la mtshon cha 'phen pa'i tshe sngags 'di brjod na pha rol po'i sde'i lha ma yin rnams 'jig par byed cing pha rol po'i mtshon las thar bar 'gyur ro//rmongs pa zhes pa 'thom par 'gyur/ /zhes pa'o/ /hU~M dag rab tu sbyar na ni/ /zhes pa pha rol po'i sde'i nang na gcig la gcig mtshon cha 'khrugs par byed do//slar yang thar bar byed pa yin/ /zhes pa gong ma de dag slar yang thar bar 'gyur ro zhes pa'i don to/ /gnon par byed pa'i mchog yin no/ /zhes pa mi g.yo bar 'gyur te nges par gyur te zhes pa'o/ /hU~M mu rab tu sbyar na ni/ /zhes pa rgya gar gyi yi ge gnyis las gcig la ni ma zhes 'byung /gcig la ni sa zhes 'byung ngo / /mnan pa rtag tu thar bar byed/ /ces pa gong du rengs par byed pa de dag las thar bar byed do zhes pa'o/ /lha dang lha min gzhan yang 'gugs/ /zhes pa sems can gzhan zhes pa'o/ /dngos grub phra mo thams cad la//zhes pa sbyor ba bstan pa de dag thams cad ni dngos grub phra mo'o zhes pa'o/ /hU~M ba kun du dbang byed pa/ /zhes pa snga ma bzhin du sbyar na zhes pa'o/ /tha mar rab bzhag bsdu bar byed/ /ces pa snga ma bzhin du sbyar nas zhes pa'o/ /ma dang sbyar na gsod bar byed/ / ces pa snga ma bzhin du sbyar nas zhes pa'o/ /zhi dang sbyar la 'ba' zhig go/ /zhes pa zhi ba dang rgyas pa la sogs pa'i las rnam pa bzhi dag la ni yi ge bzhi bcu rtsa gsum pa'i sngags bzlas pa che ge mo zhig shAn+tiM ku ru bo ShaT ces bya ba'i tshul du bskul tshig bcug ste de la bya'o//de dag gi bskul tshig kyang hUM drug gi 'og tu gzhug gam swA hA'i 'og tu'am de gnyis gcig tu bcug ste las bya'o zhes pa'i don to/ /de la sogs pa gzhan rnams kyang zhes pa de la sogs pa'i rtsa ba'i rtog pa las gsungs pa'i las gzhan rnams kyang rtsa ba'i rtog pa las gsungs pa bzhin du 'dir yang sbyar bar bya zhes pa'o//yi ge gcig pa'i cho ga bzhin/ /'jam dpal khro bo gtso bo yis/ /zhes pa 'jam dpal gyi rtog pa gang yi ge 'bru gcig pa gsang ba gzhan dag bshad zin to/ /khro bo gshin rje'i rgyal po zhal drug hUM zhes bya ba las byung ba'i rtog par gtogs pa ste zhes pa dur khrod gnas kyi dkyil 'khor du gtogs pa'i le'u lnga pa 'di yan chad du rdzogs te/'di yang sngar rtsa ba'i rtog par gsungs pa'i dngos grub dang las rnams 'dir bsdus nas yi ge hUM gcig gi sgo nas rgyas par bshad do/ / lnga pa'i bshad pa rdzogs so// //don grub kyi rtog pa 'di la don rnam pa lngas bshad de/ de la skabs dbye ba dang / dkyil 'khor byas pa'i cho ga dang / dkyil 'khor gyi las dang / lha bstan pa dang / spyan drang ba byas nas slob ma bzung ba la sogs pa las bya'o//de la dang po skabs dbye ba zhes bya ba bstan to/ /de nas rtog pa rab rgyas pa/ /zhes pa la sogs pa las dang / dngos grub dag le'u 'dir rgyas par bshad pas na rab tu rgyas zhes bya'o/ /sngar gong du gtogs pa'i phyi ma'i yang phyi ma zhes bya ba'i le'u bcu pa dang 'phro sbyor ba'i le'u bcu gcig pa dang 'di man chad bshad do//don bsgrub pa'i le'u 'dir sngar gsungs pa'i rtog pa rnams kyi nang nas ma bshad pa yang 'dir bshad pa dang / rtog pa snga ma rnams las kyang 'di mchog tu gyur cing don thams cad 'grub par byed pas na yang dngos grub ces bya ste/de bshad par bya'o zhes pa'i don to/ /'di man chad ni dkyil 'khor bri ba'i cho ga bshad de/ de nas rig 'dzin dpal ldan pas/ /zhes pa sngags pa mtshan nyid kyi yon tan dang ldan pa zhes pa'o/ /las rnams thams cad 'grub pa'i phyir/ /zhes pa la sogs pa 'og nas bshad pa'i las thams cad 'grub par bya ba'i phyir sems rtse gcig tu byang chub kyi sems dang ldan par byas nas thog mar dkyil 'khor bri bar bya'o//de ltar thog mar dkyil 'khor bri bar bya ba na/ gnas gang du dkyil 'khor bri bar bya zhe na gsungs pa/bgrod dka' ba la bya ste/ mi dag mi 'grul ba'i gnas so/ /gcong rong dur khrod du yang rung / /zhes pa dur khrod rnam gnyis lta bu la bya'o/ /de nas der ni zhal zhal byas/ /zhes pa gnas de dag tu 'og nas bshad pa'i tshul bzhin du sbyangs te/ slar sa brnyan bzang po blugs nas bcags te/de'i steng du ba'i lci bas skyang nul bya ba dag go/ /me tog sil ma dag gis brgyan/ /zhes pa de ltar skyang nul byas te/ sa gtor ba'i steng du zhes pa'o/ /dpa' bo gcig pa'i sngags 'bar ba/ /zhes pa yi ge bcu gcig pa'i sngags 'og nas 'byung ba la bya'o//me lce 'phro bas khrus byas pa/ /sa dang skyu ru ra la sogs pa zhes pa sngags 'di mthu dang gzi la bya ste/ sngags des khrus bya ba'i 'dag rtsi dang skyu ru ra dag la btab ste 'dag rtsi'i chal de dag de ltar sngags kyis bsangs nas chal des khrus bya'o//rig khrus khrus byas gtsang ma yis/ /zhes pa de ltar khrus byas pa'i sngags pa phyi nang gi gtsang sbra dang ldan zhes pa'o/ /de nas sngags de thams cad kyis/ /zhes pa la sogs pa de ltar khrus byas pa'i 'og tu bdag gi lus la 'og nas 'byung ba bzhin du yi ge bcu gcig pa dkong nas bdag nyid khro bo'i skur bsgyur nas bdag gi lus la sngags dgod ces bya ba yang spyi bor oM bsam/AHmig tu bsam/ hUM snying gar bsam zhing dgod pa'o/ /skur bsgyur ba'i snying po ni yi ge hUM gis so/ / phyag dang zang zing yongs spangs la/ /zhes pa la sogs pa lugs kyi yi ge las rnam gnyis ltar bshad du rung ste/ dkyil 'khor gyi sa gzhi de nyid kyi gyo mo dang skra shad dang phub ma la sogs pa'i skyon med par brkos nas bsal te/ sngar sa bzang pos bkang nas bcags te lci ba'i skyang nul byugs te sa gzhi bzang po bstar ba la yang bya'o//rnam pa gcig tu na dkyil 'khor de lta bur bgegs zhi bar bya ba'i cho ga de lta bu byed pa'i tshe sngags pa de 'dod pa'i yon tan la sogs pa zang zing la chags pa'i sems spangs nas las de dag bya'o zhes pa'i tha tshig go//rang sngags zlos shing blta bar bya/ /zhes pa phyogs bcur blta ba dang / yi ge gcig pa bzlas zhes pa'o/ /gcig pu yi ge bcu gcig pa dpa' bo'i sngags zlos shing zhes pa'o/ /dkyil 'khor bzang po gru bzhi par/ /dur khrod thal bas bri bar bya//zhes pa dkyil 'khor tshad gong du bshad pa bzhin du khru brgyad pa'am/ khru bzhi pa'am/ khru gang yang rung ba'am/ /yang na 'og nas 'byung ba'i las dang sbyar te/ de yang gru bzhi por dur khrod kyi dkyil 'khor gyi tshad ci tsam gyis bya bar 'byung ba dang sbyar te/ de yang gru bzhi por dur khrod kyi thal bas bri'o zhes pa'i don to//nub phyogs zhes pa 'di'i skabs su ni nub phyogs su sgo btod sgo lhag ma bcad ces pa'o/ /de yi dbus su pad+mo bri/ /zhes pa dkyil 'khor gyi dbus su pad+mo bri ba ni 'og nas lha bstan pa bshad pa dang sbyar ro/ /be con phyag rgya rtse 'bar ba//grwa bzhi dag tu bri bar bya/ /'di ni be con mang po yin/ /zhes pa be con gyi mgo thod pa can la de nyid 'bar ba'i be con gyi phyag rgya bzhi dkyil 'khor gyi grwa bzhir re re pad+mo'i steng du bris pa 'di ni be con mang po'i dkyil 'khor zhes bya'o/ /shU la can ni shU la mang / /zhes pa dkyil 'khor grwa bzhi'i pad+mo'i steng du shU la re re bris pa ni shU la mang po zhes bya ba'i dkyil 'khor ro//shak+ti rnams kyis yongs bskor ba/ /de bzhin shak+ti mang zhes bya/ /zhes pa dkyil 'khor gyi grwa bzhir shak+ti bzhi pad+mo'i steng du snga ma bzhin du bris pa ni shak+ti mang po zhes bya ba'i dkyil 'khor bri//shak+ti nges par byin gyis brlab pa'i sngags ni mtshon cha'i sngags kyis dgod par bya'o/ /de bzhin mi thod mang po yin/ /zhes pa dkyil 'khor gyi grwa bzhir thod pa bzhi snga ma bzhin du bris nas thod pa mang po zhes bya ba'i dkyil 'khor ro/ /mi ror ldan pa'i mi ro mang / /zhes pa la sogs pa'i dkyil 'khor gyi grwa bzhir mi ro re re ste bzhi bri ba ni mi ro mang po'i dkyil 'khor ro//dkyil 'khor gyi grwa bzhir mgo med pa'i mi ro mi sdug pa bzhi snga ma bzhin du bri ba dang / dkyil 'khor gyi nang gi ngos bzhir yi dags rangs pa dang / srin po'i gzugs lto ba che ba/skra gyen du lhugs par 'dug cing gzugs mi sdug pa dag gis spel zhing bris pa'i dkyil 'khor 'di ni dur khrod mang po zhes bya ba'i dkyil 'khor zhes bya'o/ /phyogs bcu kun na 'jigs pa can/ /zhes pa dkyil 'khor gyi phyogs bzhi dang / mtshams bzhi dang /bla 'og rnams su mi ro mgo med pa'i mi sdug pa dang / yi dags 'bar ba dang / srin po ldan par bris pa ni phyogs bcu'i 'jigs pa can zhes bya'o/ /gshin rje gshed po dpa' bo yi/ /dkyil 'khor rnam pa drug du bshad/ /ces pa dkyil 'khor drug car gyi mtshan ma nges par byin gyis brlab pa dgod par bya ba ni le'u ste/'og nas sngags kyi le'u gnyis 'byung ba la brtags te/ gang rigs mthun mthun du sbyar te/ de dag gi sngags kyis byin gyis brlab par bya'o/ /de ltar dkyil 'khor rnam pa drug tu bshad do/ /da ni dkyil 'khor gyi las so so'i bya ba bshad do//de la be con mang po ni/ /zhes pa de la dang por be con mang po'i dkyil 'khor gyis ni dngos grub phra mo ster zhes pa'o/ /shU la mang po srin po rnams/ /'joms par rab tu bsgrags pa yin/ /zhes pa shU la mang po'i dkyil 'khor gyis ni srin po 'bar ba rnams 'joms par mdzad do//de bzhin du shak+ti mang po ni/ /zhes pa shak+ti mang po'i dkyil 'khor gyis ni bgegs rnams thams cad tshar bcad pa'o/ /thod pa mang po zhes bya ba/ 'khrul 'khor thams cad rab tu 'jig /ces pa thod pa mang po'i dkyil 'khor gyis ni lha ma yin gyi 'khrul 'khor 'jig par mdzad do zhes pa'i don to//mi ro mang po zhes bya ba/ /zhes pa mi ro mang po'i dkyil 'khor gyis ni ro langs thams cad bsgrub pa'o/ /dur khrod mang por rab grags pa/ /zhes pa dur khrod mang po'i dkyil 'khor gyis ni dngos grub thams cad rab tu sbyin pa'o//'di man chad lha bstan pa zhes bya ba bshad do/ /de la pad+mo'i dbus su ni/ /zhes pa lha bstan pa zhes bya ba bshad do/ /de la pad+mo'i dbus su ni zhes pa sngar dkyil 'khor gyi dbus su pad+mo bris pa de'i dbus su zhes pa'o/ / cho ga bzhin du bzhugs par bsam/ /zhes pa spyan drangs te pad+mo'i dbus su bzhugs zhes pa'o/ /in+d+ra nI la zhes pa ni mthing ga 'tsher ba'i mdog ces pa'o/ /'jigs 'jigs lta la 'jigs pa'i gdon/ /zhes pa khro bo nyid pha rol 'jigs pa'i gzugs can nam yang gdon zhes pa'i don to//dril bu dang zhes pa g.yer ka'i dril bu la bya'o/ /thod pa skam po zhes pa'o/ /mi mgo rlon dang mi rus dang / zhes pa khrag dang / skra dang bcas pa dang / rje ngar dang / dpung pa dang / lag pa rnams las gcig bsnams zhes pa'o/ / 'jigs pa'i mi ro dbyug to 'bar/ /zhes pa khrag dang bcas pa'i daN+Da 'bar zhes pa'i don to/ /'bar zhes pa me lce kha gsum tsam du 'bar ba'i me lce bsnams so/ /shi ba'i ro yi steng na bzhugs/ /zhes pa maN+Dal gyi dbus su pad+mo bris pa de'i dbus su mi ro bris pa la ro'i steng du lha bzhugs par bya'o zhes pa'i don to//'jigs pa'i mtshon cha gdengs 'jigs lta/ /zhes pa mtshon cha'i phyag mtshan kun 'jigs zhes pa'i don to/ /dur khrod na ni rtag tu bzhugs/ /zhes pa lha nyid dkyil 'khor de lta bu'i tshul du rtag tu zhugs pa zhes pa'i don to//thams cad 'joms zhes pa lha de'i yon tan la bya'o/ /lha rnams kun gyis phyag byas shing / /zhes pa 'jig rten pa'i lha rnams zhes pa'o/ /khro bo thams cad legs par 'dud/ /ces pa/ 'jig rten pa yi khro bos 'dud/ /ces pa'i don to/ /sku ni rab tu 'bar ba can//zhes pa sku me lce 'bar ba can no zhes pa'i don to/ /'khrug pas dkrugs shing rab tu zab/ /ces pa lha de nyid la bya/ spyir na khro bo'i tshul du pha rol po la sbyar zhes pa'o/ /stag lpags na bza' bsnams par dgyes/ /zhes pa de nyid kyi tshul lam nyams sus kyang mi rtogs pa'o//rjes su 'brangs shing phyag rgya byas pa'o/ /zhes pa khro bo de'i rjes su 'brangs shing khro bo de la phyag byas zhes pa'o/ /khro bo gshin rje gshed dran bya/ /zhes pa de lta bu'i khro bo chen po 'di dran par bya'o/ /bdag gis dran byas nas zhes pa snying pos de lta bu'i lha spyan drang bar bya'o zhes pa'o//'di man chad ni spyan drang bar byas nas slob ma gzud pa la sogs pa'i las bya'o zhes pa bstan pa bshad de/ /spyan drangs na lha de lta bu drang zhes pa'o/ /tsan+dan gyis bskus zhes pa dkar pos bskus zhes pa'o/ /rim pa bzhin du mchod nas ni/ /slob ma khro bo'i sngags dag dang //sangs rgyas spyan gyi sngags dag gis/ /zhes pa me tog la sogs pas rim pa bzhin du mchod nas slob ma la bdud rtsi 'khyil ba'i sngags kyis bsngags pa'i tshul gyis bsang ba dang / sangs rgyas spyan gyis kyang bsrung ngo / /gong du dkyil 'khor drug bshad pa las be con gyi phyag rgya'i dkyil 'khor bris na be con gyi phyag rgya bcings pas me tog dor bar bya'o//yang na shU la'i phyag rgya'i dkyil 'khor bris nas/ shU la'i phyag rgya bcings la me tog dor bar bya'o/ /ming gis smos pa'i dkyil 'khor 'di rnams las ma gtogs par gzhan zhig bris na be con gyi phyag rgya'am shU la'i phyag rgya gnyis las gang yang rung ba cig bcings te me tog dbul bar bya'o//dkyil 'khor drug car du yang de ltar shes par bya'o/ /btsud nas me tog dor du gzhug /ces pa sngags yi ge bcu gcig pa brjod nas me tog dkyil 'khor du dor du gzhug go zhes pa'i don to//de nas rig 'dzin dpal dang ldan/ /zhes pa sngags pas slob ma rnams bsrung ba'i phyir yang sngags bzlas nas slob ma dang / slob dpon gyis dkyil 'khor la mchod pa 'di dag la sogs pas mchod par bya'o/ /mchod pa byas nas slob ma la//zhes pa'i don to/ /de nas sangs rgyas spyan yang bzlas/ /zhes pa kha cig gis bshad pa ni de ltar mchod pa byas pa'i 'og tu me tog la bud+d+ha lo tsa na dang khro bo'i sngags bzlas pas btab la slob ma'i lag tu sbyin te/ de ni de bzhin gshegs pa dang / /rdo rje'i rigs kyis byin gyis brlab pa'i phyir ro//de nas dbang rnam bzhi las gcig sbyin no/ /'di'i skabs su rig pa'i dbang bskur bar bya'o/ /dbang bskur ba 'di dag kyang spyi'i cho ga dang sbyar te bya'o zhes pa'i don to/ /lha khyod bdag gis mnos zhes pa slob mas de skad smra bar bya'o/ /de nas sngags rig cho ga bzhin//zhes pa'i de'i 'og tu slob mas bla ma slob dpon la phyag bya'o/ /cho ga bzhin du dbang bskur bas/ /zhes pa'i spyi'i cho ga dang sbyar te/ dbang bskur ba la bya zhes bya ba'i don to/ /khro bo gshin rje gshed po bzlas/ /zhes pa de yan chad khro bo'i bzlas brjod rgyun du bya'o/ /gshin rje gshed du gtogs par bcu gcig pa'i bshad pa rdzogs so// //gsang ba'i phyi ma'i yang phyi mar gtogs pa 'di la don rnam pa bcus ston te/ de la ri mo'i sku gzugs kyi cho ga dang / sngon du bsnyen pa byas nas sgrub pa la 'jug pa'i gleng bslang ba dang / sngags bstan pa dang /gnas sngar bstan nas bzlas pa'i mtshan nyid sngar bstan pa dang / sgrub pa la 'jug pa dang / grub nas las rnams sgrub pa dang / ma grub pa'i las bya ba dang / rtog pa phyi ma dang / rtog pa phyi ma'i yang phyi ma dang / phyag rgya'i mtshan nyid do/ /gsang ba'i phyi mar gtogs pa'i le'u 'di ni gong du sngar bshad pa'i phyi ma'i yang phyi ma zhes bya ba'i sngar gsungs pa rnams kyi ma chud pa rnams rgyas par bshad pa'o//de la ri mo'i sku gzugs kyi cho ga zhes bya ba dang por bshad do/ /de nas gzhan yang gshin rje yi/ /bshad pa'i sngags ni mnos nas su/ /mi yi ro gos blangs nas su//zhes pa ras blangs pa de la khro bo de'i sku gzugs bri zhes pa'o/ /bzang po khru gang zhes pa ras bzang po khru gang tshad du bya zhes pa'o/ /gang tshe sngags pa bdag nyid kyis/ /zhes pa sngags pa bdag nyid ri mo 'dri mi shes pa de'i tshe/ bzo bo smyung bye byas pa ni/ / zhes pa ri mo bzo bo smyung ba byed du bcug la khrims mnos par 'drir gzhug go/ /shi ba'i ro yi steng na bzhugs/ /zhes pa 'dod pa'i khams kyi lha'i bu'i bdud kyi ro'i steng na bzhugs zhes bshad de/ mdor na mi ro'i steng na bzhugs pa bri'o/ /'jigs pa gnon zhes pa pha rol po rnams gnon zhes pa'o//'jigs 'jigs lta zhes pa khro bo nyid kyis kyang lta zhes pa'o/ /kha cig bshad ces pa zhal dbu ma'i steng ma la'o/ /ljags 'dril kha cig mche ba gtsigs/ /zhes pa g.yas pa'i zhal dang po'o/ /kha cig zhal gdangs pa g.yon dang po'o//kha cig khros zhes pa g.yas pa'i zhal gnyis pa'o/ /kha cig 'jigs pa zhes pa g.yon gnyis pa'o/ /ji skad gsungs pa'i mtshon cha rnams/ /zhes pa sngar don grub kyi rtog par bshad pa'i mtshon cha rnams phyag na bsnams pa'o/ /dben zhing 'du 'dzi med pa ru//zhes pa gnas 'di lta bur ri mo mkhan mkhas pas 'drir gzhug go/ /'di man chad sngon du bsnyen pa byas nas sgrub pa la 'jug pa gleng bslang ba zhes bya ba bshad de/ de ltar bris na sngags mkhan de zhes pa la sogs pa smos te/ ri mo bris nas de nyid kyis/ / zhes pa de'i 'og tu sgrub pa la 'jug pa'i tshe yang ri mo nyid kyang mdun du bkram ste bsgrub par bya'o zhes pa'i don to/ /de ltar gong du bshad pa'i tshul bzhin du bris nas mdun du bkram ste/ ri mo de la mngon du phyogs nas tshul bzhin du bsnyen pa 'bum bya'o/ /'di man chad ni sngags bstan pa zhes bya ba bshad de/gshin rje gshed po 'di yi sngags/ /zhes bya ba la sogs pa smos te/ gshin rje gshed po 'di yi sngags/ /zhes pa drag po gang yin de bshad do zhes pa khro bo de'i mthu rtsal che ba'i sngags de yang 'bru lhag chad du 'gyur ba dang / lhag 'og gi go rims shor du dogs pa'i phyir 'bru re re nas bshad do/ /oM ni de yi dang po yin/ /zhes pa khro bo de'i sngags kyi dang por oM 'byung ngo / /de bzhin phaT ni lhag ma ste/ /zhes pa 'bru bcu las lhag pa la'o/ /mi mnyam sngags ni bcu gcig pa'o/ /zhes pa yi ge 'bru de nyid zung du 'brel ba ma yin te//yan gar byung ba'i tha tshig go/ /'jam dpal gyi ni khro bo mchog /ces pa de nyid mthu stobs sam/ /yon tan gzhan las che bar gyur pa'o/ /rtog pa phyi ma'i yang phyi ma ste/ /sangs rgyas kun gyis mngon bstod pas/ /zhes pa rtog pa phyi ma'i yang phyi mar gsungs pa'i sngags 'di ni sangs rgyas kun gyis kyang bstod pa'o//sngags de de ltar mnos nas su/ /zhes pa sngar gong du bshad pa'i tshul de ltar mnos nas zhes bya ba'i don to/ /go cha bgos nas bzlas byas nas/ /zhes pa brtson 'grus [(]gyi [,]kyi [)]go cha bgos nas bzlas pa byas na/rig 'dzin go 'phang thob par 'gyur/ /zhes pa'i don to/ /oM a kro te ka ya mAn+ta ka hU~M phaT/ /ces pa yi ge 'bru bcu gcig pa'i sngags so/ /sngags 'di las bya ba'i bskul tshig ni hUM phaT gnyis kyi bar du bcug ste las bya'o/ /oM a m-i ta kuN+Da li zhes pa slob ma pa sang ba bsrung ba'i sngags so//'di man chad ni gnas sngar bstan nas bzlas pa'i tshul mtshan nyid bstan pa zhes bya ba bshad do/ /de nas gzhan yang bzlas pa yi/ /gnas ngag ji ltar yin pa bshad/ /ces bya ba la bzlas pa'i gnas ni ji skad gsungs pa yin pa de bshad par bya'o//tshang tshing pad+ma'i mtsho 'gram du/ /zhes pa nags tshal stug po bgrod dka' ba'i gnas la bya'o/ /gshin rje gshed po ni zhes pa lha'i sku'i tshul du bya ba'o/ /ku sha zhes pa bzlas pa'i mtshan nyid 'di dag go/ /ri mo la ni phyogs 'dug pa/ / zhes pa mdun du ri mo'i sku gzugs bris pa la phyogs par bya ste'o/ /ru rak+sha yi phreng ba thogs/ /zhes pa sngags kyi nor bu zhes pa'o/ /sngags pas rtag tu bzlas pa byas/ /zhes pa mtshan nyid de ltar bzlas pa bya'o/ /myur ba dang ni bul ba dang / /zhes pa zur mi phyin pa'i skyon dang bar chad pa'i skyon no//de bzhin yi ge 'dres par ni/ /zhes pa go rims 'chol bar te/ nam yang smra bar yong mi bya/ /zhes pa de lta bu'i skyon gyi tshul du sngags bzlas pa yang mi bya'o/ /bzlas pa'i mtshan nyid 'di dag go/ /rtag tu rab tu gsal bar smra/ /zhes pa myur ba'ang ma yin bul ba yang ma yin/'chol ba yang ma yin par drag dal snyoms par zur phyin par gsal bar sngags bzlas par bya'o/ /yid snyoms nas zhes pa de ltar bzlas pa byed pa'i tshe bsdam zhes pa'o/ /bu don la ni sems bzhag ste/ /zhes pa sems rtse gcig tu sems shing zhes pa'o//skyo ba med pa'i sems kyis ni/ /zhes pa mi skyo ba'i bar gyis sngags kyi rim pa bzhin du bzlas so/ /'bum gcig bzlas pa'i tha mar ni/ /bsgrub par bya ba bshad kyis nyon/ /zhes pa de ltar sngar bsnyen pa 'bum byas nas de'i 'og tu bsgrub pa la 'jug pa bstan to//mtsho yi 'gram du dkyil 'khor ni/ /zhes pa chu klung dag la yang bya'o/ /dur khrod mang po bri bar bya/ /zhes pa dur khrod ces bya ba'i le'u dur khrod mang po'i dkyil 'khor 'byung ba de 'dir 'dri bar bya'o/ /de yi nang du ri mo bkram/ /zhes pa mdun du ri mo bris pa bkram zhes pa'o//sems dpa' mtshan mo bzhugs nas ni/ /bsgrub pa la 'jug go zhes pa'i don to/ /sems kyis kyang ma rmongs par zhes pa sngags kyi cho ga rnams shes par bya ba la ma rmongs pa zhes pa'o/ /gu gul bdug pa de yis bsreg /ces pa de ltar nub mo sgrub pa'i tshe/gu gul bdug pas bsreg go/ /zlos shing me tog dzA ti stong / /zhes pa sngags zlos shing / sri shing sna ma'i me tog stong mdun gyi ri mo'i thugs kar phog par bya zhing dbul lo/ /ri mo la bzhugs khro bo'i spyan/ /zhes pa ri mo dang gcig tu byas pa'i khro bo'i spyan dang bcas pa zhes bya ba'i don to//g.yo'am yang na 'gul yang rung / /zhes pa ril gyis g.yo'am cha'am phyogs 'ga' 'gul pa'o/ /de nas lha de 'grub gyur nas/ /gang 'dod pa yi las rnams byed/ /ces pa ri mo'i sku gzugs de la mtshan ma 'di lta bu byung ba la grub pa zhes bya ste/des ni gang 'dod pa'i las rnams de bzhin du byed nus par 'gyur ro/ /de ste grub par ma gyur na/ /gzhan yang tshig 'bum bzlas par bya/ /zhes pa ste mtshan ma de lta bu dag byung bar ma gyur na yang lan cig spogs te bsnyen pa 'bum bya'o//de nas de yi tha mar sgrub/ /ces pa de'i 'og tu mtshan gcig snga ma bzhin du sgrub po/ /des kyang ma grub gsum pa la/ /mtshams med lnga rnams byed pa yang / /gdon mi za bar 'grub par 'gyur/ /zhes pa de ltar bsgrubs te ma grub par gyur na lan gsum du bsgrubs te/yang dang por bsnyen pa 'bum byas la de'i 'og tu mtshan gcig snga ma bzhin du bsgrubs te/ de ltar bsgrubs na mtshams med pa lnga byas pa'i sems can gyis kyang 'grub par 'gyur te/ the tshom med par las rnams de bzhin du nus par 'gyur ro zhes pa'i tha tshig go//'di man chad ni de ltar gong du bshad pa ltar bsgrubs te grub par gyur na/ grub pa des las rnams bya ba na de bzhin du 'grub par 'gyur ba'i las bshad do/ /grub pa'i las rnams gang dag 'dir/ /zhes pa la sogs pa smos te/ de dag phyin chad snyoms par ni//zhes pa de ltar grub zin phan chad las rnams byed par 'gyur ro zhes pa'i don to/ /dpung rnams rengs par byed ces pa'o/ /stong ngam yang na 'bum yang rung / /zhes pa pha rol po'i dpung ngo / /gnon pa rengs pa zhes pa'o/ /rmongs pa 'thom pa zhes pa'o//de ma thag tu 'bebs par byed/ /ces pa snod la dbab pa'i las de nus par 'gyur pa'o/ /pha rol dpung dag rab tu 'khrug par byed/ /ces pa nang 'khrug dag byed do/ /rmongs par nus zhes pa sems can dag rmongs nus zhes so/ /sprin yang legs par gnon par nus//zhes pa sprin mi g.yo bar gnas shing 'dug nus par byed nus so/ /char pa dag kyang 'bebs par byed/ /ces pa dus kyi char mi 'bab pa dag kyang 'bebs nus so/ /de ni nag pos zin pa yang / /mthong ba'am sbyin pa tsam gyis grub/ /ces pa ka la du hUM zhes bya ste/dus su zin pa la yang bya ste/ sbrul gyis nyi ma'i gung dang 'chi ba'i dus kyi tshe zin pa yang sngags pas mthong ba'am yang na sngags mkhan gyis spring ba tsam gyis sos par 'gyur ro zhes pa'i don to/ /de ni sbyor ba tsam gyis su/ /zhes pa sngags pa des sbyor ba tsam gyis sa'i 'og kyang 'khrugs par byed ces pa'o//de bzhin lha dang mi rnams la/ /gnod pa chen po 'byung bar byed/ /ces pa gnod pa chen po 'byung ba dang sbyar na yang de bzhin du byed nus par 'gyur ro zhes pa'i don to/ /phyis 'byung ba dag gang yang med/ /ces pa mdor na dus gsum gyi las gang yang byed mi nus pa med do//'di man chad ni ma grub pa'i las bshad de/ lha de grub par ma gyur kyang / /zhes bya ba la sogs pa smos so/ /lha de grub par ma gyur kyang / /zhes pa snga ma bzhin du bsgrubs kyang ma grub par gyur na yang las 'di dag byed nus par 'gyur ro//mthong ba tsam zhes pa sngags pas so/ /tshig gis kyang zhes pa bsgo ba tsam gyis so/ /dug dang rims dang gdon la sogs/ /zhes pa 'gro ba dang mi 'gro ba'i dug la bya'o/ /bdug pa dang zhes pa bdug pa'i sbyor bas so/ /sbyor ba yis zhes pa 'di dag sngar gong du bshad pa'i las de dag rnams zhes pa'o//las rnams 'di dag thams cad ni/ /bzlas pa brgya byas bsgrub par bya/ /zhes ming gis smos pa'i las de dag gang byed kyang rung ste las de dag la sngags brgya rtsa brgyad bzlas pas las de dag 'grub par 'gyur ro zhes pa'i don to//song ste bsgrub pa byas nas su/ /bgegs rnams kun gyis mi 'jigs par/ /zhes pa gter gang la yod pa'i gnas su song ste bdag nyid bsrung ba dang / mtshams bcad de bsrung ba byas na bgegs dang 'byung pos mi 'jigs pas zhes pa'o//nor de bzlas pa stong byas pas/ /bdag gi khyim nas len pa bzhin/ /zhes pa gter chen po las bzlas pa stong byas pas bdag gi khyim nas nor blang ba bzhin du yod do zhes pa'i don to/ /phra mo rnams la brgya yis 'thob/ /ces pa gter phra mo rnams la bzlas pa brgya yis 'thob po//hom dang bzlas pa ma byas kyang / /zhes pa lha rnams skrag par bya ba ni/ hom dang bzlas pa ma byas par yang khro bo'i mtshan brjod pa tsam gyis ring por mi thogs par lha rnams skrag par 'gyur bar the tshom med do/ /ma rungs par ni bya ba yang / / zhes pa gang yang rung bar gzugs byas pa la sngar bshad pa lta bu'o/ /dngos grub rnams zhes pa de lta bu la sogs pa'i las bya'o zhes pa'i don to/ /bltas pa rnam pa du ma yang / /rtog pa gzhan gyi cho ga yis/ /ring por mi thogs bsgrub par nus/ /zhes pa gang la bya ba de dag la bltas te bsam pa'i khyad par tsam gyis kyang /las de dag 'grub par 'gyur la/ rtog pa gzhan gyi cho ga las/ de dag ji ltar sgrub par 'byung ba'i cho ga bzhin du bsgrubs na/ /de bzhin du 'grub po/ /rmongs pa dang zhes pa la long ba dang zhes pa'o/ /skyo zhing slar yang g.yo ba dang //zhes pa gnas nas skyo zhing 'gro 'dod pa'o/ /nor 'gugs de bzhin mnod pa dang / /zhes pa slar yang gnas de nyid du 'ong 'dod lta bu'o/ /skye bo dag gis 'gugs pa dang / /zhes pa pha rol po rengs par bya'o/ /yul du 'tshe zhing 'jigs pa dang //zhes pa lo tog la sogs pa la gnod pa'o/ /'khrug dang zhes pa pha rol po 'khrug ces pa'o/ /bru ba nyid ces pa bkres pa'o/ /gang dag gzhan dag de 'dod pa/ /sngags pa gshin rje gshed dran pas/ /zhes pa de la sogs pa'i las de dag byed 'dod pas sngags pa khro bo chen po'i sbyor ba byas pas las de dag thams cad byed par 'gyur ro zhes pa'i don to//'di man chad ni rtog pa phyi ma zhes bya ba bshad do/ /de nas rtog pa phyi ma 'di/ /ji lta yin pa de bshad do/ /zhes pa le'u 'di nyid du gtogs pa phyi ma'i phyi ma bshad pa la bya ste/de yang ji skad gsungs pa'i de bzhin du bshad par bya'o/ /sngon du bsnyen pa byas pa'i 'og tu lha ma yin gyi phug sgor song ste/ sgrub pa po'i ri mo'i sku gzugs mdun du bkram nas smyung ba byas te stan la 'dug ces pa'i don to/ /khri yi grangs tsam bzlas byas na/ / zhes pa/ dkyil 'khor bri ba dur khrod mang / /sngar bshad mtshan gcig gis sngags bzlas zhes pa'o/ /de nas bud med gzugs mchog ldan/ /zhes pa de nas lha ma yin gyi bu mo sgor 'byung ngo zhes pa'o/ /sgrub pa po de'i mdun du ni/ /zhes pa 'ongs nas lha ma yin gyi phug tu gshegs shing dga' bar byed do//de dag grogs po yid gcugs nas/ /zhes pa la sogs pa grogs po dang lhan cig tu de'i tshe/ lha ma yin gyi bu mos sngags pa la bsgo ba khyod kyis 'di dang 'di byar rung gis de bzhin du byar mi rung gis ma byed cig bsgo ba lta bu'am/yang na cho ga de ltar bsgrubs pas na dam tshig gis lha ma yin gyi bu mo'i gnas su 'jug par byed do zhes pa'i don to/ /yang na gang 'dod pa'i lha yi/ /zhes pa la sogs pa gnas gang yang rung ba'i gnas gtsang mar lci ba'i skyang nul byas te sa bstar ba'i bsang po byas la mdun du sa gzhi bstar ba bzang por byas par sre nas gang 'dod pa'i ming bri'o//btsag gam ldong ros kyis kyang 'drir rung zhes pa'o/ /mi skyo bar du 'bum bzlas na/ /zhes pa gnod sbyin la sogs pa gang 'gugs pa 'ong bar 'gyur zhes pa'o/ /sgrub par ji srid 'dod par ni//zhes pa sgrub pa po ji srid 'dod pa de dag gi las rnams byed par 'gyur ro/ /lha rnams dag ni thams cad dang / /zhes pa 'dir ni mjug sdud pa'i tshig go/ /gnod sbyin la sogs bsgrub pa spangs/ /zhes pa sha za dang dri za mo dag ces pa'o/ /phyi ma'i phyi ma zhes bya ba snga ma rnams kyis ni rtsa ba'i rtog par gsungs pa rnams kyi mjug sdud thun bu thu ba yin par bshad do//gsang ba phyi mar gtogs pa'i le'u 'di na gong du bshad pa'i phyi ma'i phyi ma zhes bya ba gsungs pa rnams kyi mjug sdud pa dang thun bu thu ba yin no/ /mdor na sngar gong du gsungs pa rnams kyi cho ga rgyas par bshad pa la bya'o//'di man chad le'u 'dir gtogs pa'i rtog pa phyi ma'i yang phyi ma 'di la zhes bya ba bshad do/ /de 'dir rtog pa phyi ma yi/ /phyi ma dag kyang bshad par bya/ /zhes bya la sogs pa'o/ /ri'i mchog dag gi rtse mo la//zhes pa ri btsan po bzang po'i mchog gi rtse mo la zhes pa'o/ /yi dags mang po'i dkyil 'khor bri/ /zhes pa don grub ces bya ba'i le'u ru gsungs pa'i nang nas yi dags mang po zhes bya ba'i dkyil 'khor 'byung ste bri bar bya'o/ /thams cad sha yi gtor ma bya//zhes pa thams cad kyi gtor ma dkyil 'khor du dbul bar bya'o/ /grogs po sems ni dpa' ba dang / /yon tan ldan pa bzo bo dang / /zhes pa mtshan nyid kyi yon tan dang ldan pa la bya'o/ /mi ro'i gos la sngon bris pa'i/ /ri mo gzhag nas de nas su/ /zhes pa la sogs pa dkyil 'khor de'i dbus su mi ro'i ras de'i steng du ri mo'i gzugs sngar bris pa de bkram la de nas bdag gi lus la yan lag la sogs pa dang /de dag gi yang yan lag tu gtogs pa thams cad las mi rus sbom phra khab tsam gyi rnon po byas pas yan lag de dag gi khrag cha shas kyis phyung nas mi thod kyi nang du gzhag la/de nas mi ro de'i bar gyi bdag gam/ /grogs po gnyis las gang bzo bo gcig gis ri mo bris zin pa de'i skra'i pir gyis gzugs de'i yan lag dang / nying lag thams cad un mi lan zhes bya ba'i tshul du ri mo bri bar bya ste/mdor na bye brag gam khyad par can du bri bar bya'o zhes pa'i don to/ /de nas de yi lus dag dang / /ming kyang rab tu gsal bar bya/ /zhes pa de nas ri mo'i de'i sku gzugs kyi yan lag dag tu sngags pa dag las byed pa'i tshe lus dag la tsan+dan dang / khrag dag gis ji ltar bsku bar grags pa de lta bu'i tshul du sku gzugs la yang bri ba yin par shes par bya ste/khro bo'i spyan dag kyang dmar por bri'o zhes pa'i don to/ /de la bgegs kyang mang du 'byung / /zhes pa de ltar byas pa de la'o/ /der ni dpa' bos spyad par gsungs/ /zhes pa cho ga 'di ni sgrub pa po sems stobs can gyis bsgrub po//dpa' bo dag gi las kyang bya/ /zhes pa de ltar byed cing sgrub pa nyid dpa' bo'i las yin par bshad pa'i rigs so/ /sha chen po'i bcings pa'i las kyang de dag gis bya'o/ /de yi 'og tu bzo bo la/ /zhes pa de ltar ri mo 'dri ba'i grogs po bzang po de la dpa' bo dag gis yon yang dbul//zhes pa rin thang med pa'i yon dbul pa la bya'o/ /de nyid yongs su rdzogs par ni/ /zhes pa ri mo'i de'i sku gzugs kyi yan lag dang / nying lag thams cad du bye brag gam/ khyad par can du bya ba de yongs su rdzogs par gyur gyi bar du tshul bzhin du bri'o//de ltar bris pa'i 'og tu gnas de nyid du mdun du bkram ste mtshan gcig bsgrub po/ /ri mo'i sku gzugs de yang na dgod dam/ g.yo yang rung ba'i mtshan ma de dag byung na zhes pa'o/ /de nas dngos grub thob par bshad/ /ces pa de ltar mtshan ma byung ba'i ri mo de/sku gzugs de yis dngos grub thob par 'gyur zhes pa'o/ /mtshan ma nyi ma bzhin du 'bar/ /zhes pa sgrub pa po de'i 'bar zhes pa'o/ /sgrub pa de la lha rnams kyang / /zhes pa de ltar bsgrub pa'i sgrub pa po de la gdon mi za bar phyag 'tshal bar 'gyur zhes pa'i don to//kun du bkur ba rgyal por 'gyur/ /zhes pa rig 'dzin gyi rgyal por 'gyur zhes pa'o/ /yang na cho ga shes pa yis/ /zhes sgrub pa pos zhes pa'o/ /ri mo zhi ba sngon bzhin du/ /blangs te bsregs pa'i steng du gzhag /de nas bsregs pa der 'dug nas//gcig pu ral gri blangs nas su/ /zhes pa khrag dang skra'i pir gyis ma bris pa'i ri mo'i sku gzugs la bya ste/ sku gzugs de blangs la mi ro bsregs pa'i mdun gyi nam mkha' la bris te gzhag go/ /mi ro bsregs pa'i gnas der sngags pa nyid kyang 'dug nas grogs med pas sgrub pa'i ral gri blangs nas bsgrub ces pa'o//mtshan mo gshin rje gshed bzlas pa/ /zhes pa mtshan mo bsgrub ces pa'o/ /'bar bar 'gyur gyi bar du'am/ /zhes pa ri mo'i sku gzugs la dngos grub rnam gsum ma byung gi bar du bzlas brjod bya'o//ral gri mchog de bya ba yang / /zhes pa de ltar sgrub pa'i ral gri'i tshad gsungs so/ /srid du sor ni sum cu rtsa gnyis kyis zhes pa'o/ /yan lag thams cad yongs rdzogs pa/ /zhes pa la sbom phra med pa zhes pa'o/ /sgrub cing sgra yi so'i do can//zhes pa ral gri rnon po'i so la bya'o/ /de ltar rtog pa phyi ma yang / /zhes pa mjug sdud pa'i tshig la bya'o/ /'di man chad phyag rgya'i mtshan nyid bshad do/ /de nas gzhan yang phyag rgya ni/ /rab tu 'bar ba gcig pu bshad/ /ces pa gcig ces bya ba ni mchog dam pa la bya ste/de yang gzi brjid dang ldan pa de bshad do zhes pa'o/ /gang gis 'grub par 'gyur pa yi/ /zhes pa be con gyi phyag rgya 'grub par 'gyur pa la bya'o/ /lag pa g.yas pa'i sor mo yis/ /zhes pa sngar bshad pa dang 'dra'o/ /mthe bong sbas te gyen du bsgreng bar byas pa'i phyag rgya de zhes pa de mthe bong nang du bcug ste bcings la gyen du bsgreng ba'o//lha nyid kyi ni sngags ldan par//be con gyi phyag rgya 'di la yang las thams cad dang sbyar bar bya ste/ las kun la bcing bar bya zhes pa yi ge bcu gcig pa'i sngags dang ldan par phyag rgya bcing bar bya'o//spyan drang ba dang / mchod pa dang zhes pa mdzub mos nang du g.yab pas spyan drang zhes pa'o/ /gshegs su gsol ba dang / /zhes pa mdzub mos phyir g.yab pas gshegs su gsol zhes pa'i don to/ /'jam dpal gshin rje gshed rgyal po'i rtog pa phyi ma'i yang phyi ma gsang ba'i bshad pa rdzogs so// //rab tu gsang bar gtogs pa'i le'u 'di'i don rnam pa dgus bstan pa'o/ /de sngags thog mar bstan nas dngos grub gleng ba dang / zhu ba zhus pa dang / zhus pa'i lan bstan pa dang / bsam gtan pa dang /dkyil 'khor bstan pa dang / mchod pa bstan pa dang / sa bon dgod pa bstan pa dang / sngags spel ba bstan pa dang / mjug sdud pa rnams kyis bstan pa'o/ /sngags thog mar bstan pa'o/ /sngags thog mar bstan nas dngos grub gleng ba zhes bya ba dang por bshad de/oM a kro te ka ya mAn+ta ka hUM hUM hUM phaT phaT phaT swA hA/ zhes pa bcu gcig pa'i sngags dang sngags 'di 'dra ste/ sngags 'dis yi ge bcu gcig pa'i dngos grub dang las thams cad 'dir 'grub tu rung ngo / /sngags gzhan no zhes pa yi ge bcu gcig pa las gzhan no zhes bya ba'i don to//oM AHhU~M/ snying po zhes pa'o/ /'di yang gzhan no zhes pa gong ma las gzhan zhes pa'o/ /yi ge bcu gcig rgyal po yis/ /zhes pa yi ge bcu gcig pa'i mgor sngags 'di bzlas na/ dngos grub dang las 'di dag 'di bzhin du 'grub par 'gyur ro//de la rab tu gsang ba zhes ci'i phyir bya zhe na/ sngags kyi rgyud 'di dag nyan thos dang rang sangs rgyas la sogs pa dang / phyi rol pa rnams la yang gsang ba dang sngags pa nyid la yang gsang ste dka' thub spyad mi dgos par rnal 'byor bya ba 'ba' zhig gis 'grub par 'gyur ba'i chog 'di sngar thog mar bstan na sngags pa dka' thub dag mi spyod cing cho ga can gyis sgrub cing las bya ba rnams la dad cing mos pa dang /'jug par mi 'gyur ba'i phyir 'dir dka' thub spyad pa dang / cho ga phal po che sgrub cing las su bya ba rnams sngar bstan cing bshad nas de'i 'og tu dka' thub dang cho ga dag bya mi dgos par sems nyid kyis rnal 'byor du byas pa tsam gyis thams cad 'grub par 'gyur ba'i cho ga 'og nas 'byung ba 'di bshad pas na/de lta bu dag gi phyir gsang ba zhes bya'o/ /'di man chad zhu ba zhus pa zhes bya ba bshad do//khro bo rnam par rgyal ba yi/ /rtsa ba dang ni phyi ma dang / /zhes pa gong du bshad pa rnams kyi rtog pa'o/ /rtog pa ma lus rgyas pa dag /ces pa gong du rgyas par bshad pa de dag ces pa'o/ /lha de rnams kyis legs mthong nas/ /zhes pa dang por bshad pa lha'i 'khor du 'dus pa rnams la bya'o//'jig rten 'jig rten 'das pa kun/ /thal mo rab tu sbyar nas su/ /zhes pa lha kun gyi sa 'og nas 'byung ba'i the tshom zhu ba'i phyir thal mo sbyar nas khro bo'i rgyal po la zhus pa zhes pa'i don to/ /gshin rje gshed la 'di skad smras/ bcom ldan khyod kyis rtog pa 'di/ /sgrub pa rnams la phan pa'i phyir/ /rab tu ngo mtshar bshad lags te/ /zhes pa las dang dngos grub dang ngo mtshar che ba sngar gong du bshad pa rnams zhes pa'o/ /ji skad bshad pa'i smyung ba yis/ /zhes pa la sogs pa bzlas brjod dang sbyin sreg la sogs pa ji skad gong du bshad pa'i cho ga rnams kyi tshul de bzhin du spyad pas khro bo kI li kI la la sogs pa 'ga' zhig gis bsgrub na dka' thub la sogs pa spyod pa de'i rgyus gang gi tshe mnyes par 'gyur ba de'i tshe sgrub pa po la dngos grub stsol bar mdzad na/khro bo'i rgyal po'i khyod dang bye brag dang /khyad par ci mchis par 'gyur zhes dris pa'i don gong du sngar bshad pa'i spyad pa'i cho ga rnams la bya'o/ /phyi'i cho ga dka' thub la sogs pa rnams ma spyad par yang sems kyi rnal 'byor tsam gyis dbang nyid du dngos grub thob par 'gyur ba de'i cho ga khyod kyis gsungs zhes bya ba'i tha tshig go//bcom ldan 'das kyi rtog pa dang / /zhes pa khro bo chen po khyad par gyur pa ci zhig mchis zhes pa khro bo gzhan las khyad ci mchis zhes pa'o/ /'di man chad zhus pa'i lan bstan pa zhes bya ba bshad do/ /lha mchog de dag thams cad kyis//phyag 'tshal de skad smras pa dang / /khro bo drag tu bzhad pa yis/ /zhes pa khro bo bzhad pa'i sgra gsungs pa'o/ /lha yi tshogs rnams 'jigs rmongs pa/ /zhes pa bzhad pa chen bos lha rnams thams cad skrag pa dang rmongs par gyur pa'o/ /ma 'jigs ma 'jigs zhes gsungs pa'i//zhes pa 'di skad bka' stsal pa nyid phan pa'i tshig gis lha rnams dbugs phyung zhes bya'o/ /khyed rnams kyis ni gang smras pa/ /zhes pa lha rnams nga la gang zhus pa rnams zhes pa'o/ /sgrub pa dag ni med par yang / /zhes pa phyi'i cho ga spyod pa'i cho ga rnams ni dngos grub 'grub par 'gyur ba'i rgyu ste/de sgrub mi dgos zhes bya'o/ /sbyin sreg dang dka' thub la sogs te phyi'i spyod pa'i cho ga rnams med par yang / sbyor ba shes pas 'grub 'gyur ba/ /zhes pa nang gi sbyor ba ni byang chub sems so/ /phyi'i sbyor ba ni kun rdzob byang chub kyi sems de lha'i sku bsgoms pa'o//de yang 'og nas zhib tu bshad do/ /phyi nang gi sbyor ba zhes pas 'grub par 'gyur ba de bshad par byas/ lha rnams kyis mnyan par gyis zhes pa'i don to/ /bde gshegs dngos grub gcig pu las/ /zhes pa spyir ni bla na med pa'i byang chub sgrub pa'i dngos grub gcig pur zad pas de las sgrub tu med mod kyi 'on kyang byang chub sems kyis zin pa'i dngos grub tha dad pa rnam pa mang po sgrub pa'i thabs dag bshad cing bstan pa rnams ni sems can gyi skal ba dang /dad pa dang / /bsod nams kyi tshad dang / las dang rnam par smin pa tha dad pa mi 'dra ba rnams 'dul ba'i dbang dang dngos grub tha dad pa rnam pa mang po dag gsungs so/ /de nas ting 'dzin tshul las ni/ /mtshan ma de dang dngos grub ste/ /zhes pa dka' thub dang / brtul zhugs dang smyung la sogs pa'i cho ga dag spyod pa'i sgo nas zhugs te 'grub ste/sems can rnams kyis ting nge 'dzin gyi tshul du bsgoms pas las kyang mtshan ma de dag 'byung bar 'gyur zhing dngos grub dag kyang thob par 'gyur ro zhes pa'i don to/ /'di man chad bsam gtan pa zhes bya ba bshad de/ thog ma byang chub rtsa ba brtan/ /zhes pa sangs rgyas rnams kyang sngon byang chub kyi sems 'di la brten te/ de'i sgo nas mngon par sangs rgyas pa'o/ /mngon par sangs rgyas su bsgrub 'dod pa de yang byang chub kyi sems rtsa bar 'gyur ba de la brten nas bla na med par 'gyur ba'o zhes pa'i don to//shes rab de lta bu yang bsgom/ /zhes pa byang chub kyi sems bsgom zhes bya ba'i don to/ /de yang lhag mthong dang zhi gnas dang 'brel bar bsgom mo/ /sems kyang rnam par mi rtog pas/ /bde gshegs dngos grub de dag thob/ /ces pa zhi gnas kyi tshul du rnam par mi rtog pa'i ting nge 'dzin bsgoms na/bla na med pa'i byang chub kyi dngos grub dag thob par 'gyur ro/ /sngar stong pa nyid mi dmigs pa'i ting nge 'dzin bsgoms nas de'i rjes su 'byung ba'i dkyil 'khor bsam de'i steng du pad+ma'i dkyil 'khor bsams te/de'i steng du bdag gi snying ga tsam du nyi ma'i dkyil 'khor bsams te/ de'i steng du sa bon hUM bsams pa las rim gyis be con las lha'i skur rdzogs pa bsgom mo/ /de'i gzugs su bsgyur ba byas so/ /zhes pa de ltar rnam par mi rtog pa'i ting nge 'dzin bsgom pa las langs nas/kun rdzob tu byang chub kyi sems lha'i skur bsgyur ba bstan to/ /sa bon mtshon cha mang por ldan/ /zhes pa sa bon hUM las lha'i sku'i mtshon cha'i phyag rgya thams cad 'byung ngo / /phyag mtshan gyi mtshon cha rnams dang ldan par bsgoms zhes pa'i don to/ / khro bo nga yi zhal du bsgyur/ /zhes pa khro bo nga'i zhal du bsgyur ro/ /dril bu gsil ba'i sgra yang 'byin/ /zhes pa a la la zhes pa ljags 'dril ba'i tshul du sgra 'byin no/ /khro bo zhal ni babs par ldan/ /zhes pa de lta bu'i tshul du bsgom pa yang / ro yod pa'am/ nyams pa dang ldan pas bsgom mo//nga yi gzi dang mthu ldan byas/ /zhes pa gzi brjid dang / mthu dang / khro bo'i rgyal po'i tshul ltar bsgom par bya'o/ /kun du dga' ba'i snying por ldan/ /zhes pa yi ge hUM gi sgo nas lha'i skur gyur cing nges 'byor ba phun sum tshogs par 'byung bas na yi ge hUM las kun du dga' ba zhes kyang bya ste/snying po de thugs kar bsam mo zhes bshad de/ gang gi yid la gang bsgom pa/ /de la nga yis thugs dgyes pa/ /zhes pa su'i yid la gong du bshad pa'i tshul bzhin du bsgom pa de la khro bo'i rgyal po dgyes zhes pa'o/ / ji lta ba'am gang yang rung / /zhes pa la sogs pa cho gar spyod pa rnams de ltar bsgoms pa de'i mdun nam rgyab bam phyogs gang nas kyang skyob cing stong pas na sngags pas las kun byed par 'gyur te/ de bzhin du 'grub par 'gyur ro zhes pa'i don to/ /gang dag nga yi phyag lnga bcu//zhes pa phyag g.yas g.yon la phyag nyi shu rtsa lnga lnga ste/ spyir phyag lnga bcu par bsgom mo/ /be con gdengs pas bsdigs par mdzad/ /ces pa 'di ni mtshon cha tsam du zad de gong du smos pa'i phyag rgya'i mtshan ma rnams kyi steng du ci rigs pa'i mtshon cha rnams kyis mnan te/spyir phyag rgya'i mtshon cha rnams lnga bcu tshang bar phyag na bsnams pa la bya'o/ /khro gnyer bsnyer ba'i lta ba can/ /zhes pa dpral ba'i gnyer ma nyid de dang ldan par byas la khro bo'i lta ba yang bya'o/ /'jigs pa'i sbrul gyis ro stod dkris/ /zhes pa sbrul chen pos se ral kha la sogs pa'i tshul du rgyan du byas pa'o//zhal gcig spyan yang gsum mnyam pa/ /zhes pa dbu gcig la spyan yang gsum zhes pa'o/ /'brug gi sgra dbyangs sgra sgrogs pa/ /zhes pa 'brug gi sgra sgrogs pa'i tshul du'o/ /stag lpags zhes pa sham thabs so//phyag lnga bcu na bsnams pa'i phyag mtshan rnams/ /mtshon cha'i phyogs rnams 'bar zhing 'khrugs/ /zhes pa'o/ /spyan dang gtsug phud rtsa dmar ser/ /zhes pa gtsug phud de lta bu la bya zhes pa'o/ /zhal gnyis gdangs shing tsham ngam mdzad/ / ces pa g.yon brkyang ba'i tshul du gdangs pa de nyid tsham ngam mdzad pa'o/ /sa yi steng du za za lta/ /zhes pa 'di 'dra ba'i gzugs can du gnas so/ /bcibs pa ma he la bcibs pa/ /zhes pa 'og nas bshad pa 'dra ba'i ma he la bcibs so/ /sems pa'am ri mo la bris pa la sogs pa de lta bu'i gzugs yid la sems pa'am yang na ri mo'i sku gzugs bris shing sgrub pa po mos shing 'dug pas gzugs de mdun du bsams pa la'am/ri mo'i sku gzugs mdun du bkram pa la mchod pa bya'o/ /tshul de ltar byed pa de la ring por mi thogs par khro bo de dgyes nas sgrub pa po la 'phrogs par 'gyur ro//ji ltar 'dod pa'i don rnams ni/ /zhes pa de ltar gyur na bdag gang 'dod pa'i don rnams the tshom med par 'grub par 'gyur ro/ /gdon mi za bar sgrub par byed/ /ces pa the tshom med par 'grub par 'gyur ro//rnam par gnod pa zhes pa bdud dang / mu stegs dang / log 'dren rnams gnod pa'i gzugs zhes pa'o/ /gzugs de ni zhes pa de lta bu'i ri mo'i gzugs de bdud las rgyal ba yin par bsgrags so/ /de yang gzugs de'i yon tan la bya zhes pa'i don to//thog mar bdag gi dam tshig sbyin/ /zhes pa thog mar khro bo'i rgyal po'i gzugs 'dri bar 'dod na dang por bzo bo ri mo mkhan dam tshig can du bya ba'i phyir dkyil 'khor du gzhug gam/ yang na de bzhin gshegs pa'i dam tshig lag pa gnyis thal mo sbyar nas sngags oM na mo bud+d+ha d+ha rma saM g+he b+h+yaH zhes bya ba brjod cing dam tshig bstan pas ri mo mkhan la byin te dam tshig can du 'gyur te/de nas ri mo 'dri ru gzhug go/ /bsrung mchog tshul bzhin byas nas su/ /zhes pa ri mo mkhan la sngags dang phyag rgyas bsrungs te/ de la sngags man zhes bya ba'i skyin par oM 'am yang na ma zhes bya ba bzlas pas bsrung ngo zhes bya ba'i don to//ras ni sor bcu'i sor tshad la/ /zhes pa ras ched du btags pa'i srid du sor bcu'i tshad du phyin pa gru bzhi pa la bri'o/ /sngags pa bzo bo yon tan can/ /zhes pa ri mo mkhan yon tan can la sngags pas 'dir gzhug go//yid ni brtan par bya ba'i phyir/ dben pa'i gnas su mi mngon par/ /zhes pa ri mo'i sku gzugs de ltar bri bar yang sems goms par bya ba'i rten tsam gyi phyir bri'o/ /de ltar bri ba yang dben pa'i gnas su sus kyang mi mthong bar bri'o/ / tshon rtsi dge ba bzang po yis/ /zhes pa sbyin med pa la bya/ /ri mo thog mar bri bar bya/ /zhes pa tshul de ltar ri mo'i sku gzugs thog mar bri bar bya'o/ /bris zin nas ni bde bar gzhag /ces pa'o/ /nga yi gzugs su gyur par byas/ /zhes pa ri mo'i sku gzugs ci 'dra ba bri bar bshad de sngar de gong du bshad pa dang 'dra'o//khro bo'i zhal ni babs par byas/ /zhes pa byin can du bzhugs pa'i tshul du bri bar bya zhes pa'o/ /nga yi gzi dang zhes pa khro bo bzhin du bri zhes pa'o/ /kun du dga' ba'i snying por ldan/ /zhes pa mdun gyi gzugs de'i thugs kar snying po bsam zhes pa'o//gal te dam tshig mi ldan pa'i/ /zhes pa dam tshig med pa'i sems can gyis mthong na/ myur du rnam par rmongs par 'gyur/ /zhes pa myos pa 'thom pa mi dran par 'gyur ro zhes pa'i don to/ /de bas rnam pa thams cad du/ /zhes pa ri mo mkhan bzo bos so//bsrung ba drag po kun du bya/ /zhes pa sngags pas sngags dang phyag rgya mtshams bcad pa dang bsrung ba byas zhes pa'o/ /rnam pa gzhan du bzhag gyur tam/ /zhes pa gnas gzhan du'o/ /gang du mchod pa ma byas na/ /zhes pa gzugs de la mchod pa ma byas na'o//myur du 'jigs pa skyed par 'gyur/ /zhes pa khyim mes tshig pa'am dgra'am nad kyis 'debs par 'gyur ro/ /ri mo la gnas pa yi gzugs/ /de ltar rtag tu bsgom byas shing / /de bsgyur de yi yid du 'gyur/ /zhes pa spyod lam rnam bzhir las rnam bzhis goms par byed pa gzugs ci 'dra ba de bzhin du rtag tu goms par bsgom zhing bdag lus lha'i skur bsgyur te de'i thugs dang bdag gi yid gcig tu bsgom mo//de ltar lha'i sku dang bdag gi lus bye brag med par bsgom mo/ /bdag gi lus lha'i skur bsgyur ba nyid gsal bar bsgoms te/gong ma nyid gsal bar bsgom pa la bya'o/ /ji srid yang dag goms pa'i phyir/ /kun du mdun na gnas pa ru/ /zhes pa de ltar yang dag par bsgoms pas goms pa'i mthus dus thams cad du mngon sum du 'dra bar gnas pa mthong gi bar du bsgom zhes pa'i don to//gang tshe mthong bar gyur pa na/ /de tshe ri mo med par yang / /zhes pa der bsgom pa goms par gyur pa de'i tshe ri mo la rtog par yang / rtag tu sbyor ba byas nas ni/ /zhes pa sku'i tshul ji lta ba bzhin du dus kun du sbyor ba byas na zhes pa'o/ /sbyor ba nyid kyis rtag pa ru//zhes pa de ltar sbyor ba byas pa nyid kyis rtag par 'gyur ba zhes pa'o/ /khro bo kun du sbyor na ni/ /zhes pa sngags dang ldan par sbyar na sngags yi ge bcu gcig pa'am le'u 'di nyid kyi mgo la 'byung ba dang sbyar ro zhes pa'o/ /yang na bdag nyid de 'dra bar//zhes pa la sogs pa yang na ri mo'i sku gzugs med par gong du ji ltar bshad pa'i lha yin par de ni bdag go/ /bdag ji ltar yin pa 'di ni lha'o/ /zhes pa de ltar tha dad du dbyer med par gcig tu bsgom par bya'o/ /kha cig gis yi ge skabs dang sbyar te shU la'am be con gyi phyag rgya gnyis las gcig gis mdun gyi lha dang bdag 'dres par byas te bsgom dgos so//lha 'di ltar bsgom pa'i tshe na phyag rgya shU la'am be con gyi phyag rgya gcig bcings te thams cad du bya ba'am sbyor ba rigs so zhes bshad do/ /de nas de yis dngos gnas pas//zhes pa lha'i rang bzhin du gnas pas zhes pa'o/ /yid la cung zad gang bsam pa'i/ /dgos pa goms par byas nas ni/ /zhes pa bdag gang 'dod pa'i dgos pa bsgrubs na/ de nyid 'bras bu yod par 'gyur/ /zhes pa gang bsgrubs pa 'grub par 'gyur ro zhes pa'i don to//gang phyir khro bo bsgom pa yin/ /zhes pa de lta bu'i phyir ro/ /khro bo yong ye bsgoms na ni/ /zhes pa thams cad du bsgoms na zhes pa'o/ /bzlas pa la sogs med par yang / /dngos grub dam pa thob par 'gyur/ / zhes pa dka' thub dang brtul zhugs dang smyung ba dag med par yang dngos grub dam pa thob par 'gyur zhes pa'i don to/ /'di man chad dkyil 'khor bstan pa zhes bya ba bstan te/ bsgrub pa rnams la dam tshig ni/ /zhes pa 'og nas 'byung ba'i dkyil 'khor 'di dang bsgrub pa'i dbang dang dam tshig gis dbang bskur bar bya'o//gal te sbyin par byas na yang / /zhes pa sngar bshad pa'i cho ga bzhin sbyar bar bya'o/ /thog mar spos chus gdab par bya/ /zhes pa dris chus bsang zhing gdab po/ /kun du zlum pos zhes bya ba'i/ /dkyil 'khor 'di ni logs shig tu//zhes pa'i gong du dkyil 'khor bshad pa rnams las logs shig tu 'dir mthun par dkyil 'khor nyid kyang zlum por bris la dkyil 'khor gyi ming nyid kyang zlum po zhes bya ba'i dkyil 'khor de bri bar bya'o/ /kun du zlum po bri bar bya/ / zhes pa dkyil 'khor gyi dbyibs nyid kyang zlum por bri ba la bya'o/ /tshon rtsi nag po zhes pa dud pa dang sol ba bsres sam yang na sol ba gcig pus bya'o/ /nub phyogs sgo btod khru do tsam/ /zhes pa nub phyogs 'ba' zhig tu sgo dag btod cing dkyil 'khor zlum po che chung gi tshad ni kha zheng dang khru do bar bya'o//de yi dbus su mchog bri ba/ /zhes pa dkyil 'khor de'i dbus su zhes pa'o/ /'gying zhing ldem bag can gyi lus/ /zhes pa ma he'i lus 'di 'dra bar bri bar bya'o/ /char sprin dang zhes pa smug nag tu bya'o/ /'jam zhing mnyam la dpal dang ldan//zhes pa yon tan 'di 'dra ba dang ldan par bri'o/ /gser gyi dril bu'i sgra dang ldan/ /g.yag rnga'i bsil yab g.yob pa can/ /zhes pa 'di 'dra bar bri bar bya'o/ /dril bu btags pa dag rwa las btags pa'i tshul du rna drung pha rol tshu rol du sbyar ba'i thabs su ri mo bris te 'di bzhin du bsam mo//ma he chen po dam pa bri/ /dkyil 'khor dam pa bris te zhes pa yon tan la bya zhes te/ smug nag gi tshul du bris te de lta bu'i tshul du ma he bri'o/ /ma he de'i mgo byang phyogs su lta bar bri'o/ /ma he'i sa bon yi ge ma'o/ /ma he'i mgo lhor lta bar bri bar zhes kyang bshad do//bsrung ba'i cho ga bzhin byas nas/ /zhes pa bdag dang gzhan bsrung ba dang / mtshams bcad pa dag bya ba'i don to/ /da ni mchod pa bstan pa zhes bya ba bstan pa'i phyir/ sngags shes pa yis mchod bya ba/ /zhes pa la sogs pa smos so/ /sngags shes pa yis mchod bya ba//zhes pa de ltar dkyil 'khor bris nas der mchod par bya ba bshad do/ /cho ga bzhin du 'dir bshad do/ /zhes pa mchod pa bya ba yang cho ga bzhin du bshad par bya'o/ /spyan drangs gdan dang dgag pa dang / /zhes pa 'di dag kyang 'og nas bshad pa dang sbyar ro//ar+g+ha gtor ma lha bshos ar+g+ha zhes pa'o/ /mchod pa zhes pa me tog yin no/ /mar me bdug par bstan pa dang / /zhes pa dang por spyan drangs nas/ tha mar mchod pa bya ste slar gshegs su gsol ba'i bar du bya ba de dag thams cad mchod pa yin no zhes pa'o//gzugs dgod pa dag thog ma ru/ /zhes pa 'dir lha'i gzugs dgod pa de dag kyang dang por sa bon gyis dgod par bya ba de tshul bzhin du bshad par bya'o/ /'di man chad ni sa bon dgod pa bstan pa zhes bshad de/ de la dang por thams cad kyi/ /sa bon khro bo'i gzugs yin te//zhes pa mtshon cha thams cad kyi sa bon yang yi ge hU~M nyid yin la hU~M nyid kyang khro bo'i gzugs kyi yi ge'o/ /de nyid phal cher rab tu grags/ /zhes pa yi ge hU~M nyid mtshon cha phal po cher 'byung ba'o/ /gcig tu phal cher du ma'i mchog ces pa hU~M nyid la mtshon cha du ma'i mchog bya'o//de nyid der ni brtag bya ba/ /zhes pa hU~M de nyid sngar bshad pa'i ma he'i steng du bsam par bya zhes pa'o/ /rtag tu mtshon cha 'bar bar byed/ /ces pa hU~M gi rang bzhin la bya'o/ /de yi gzugs 'dir bya ba la/ /sa bon gyis su bskul ba'i zhal//zhes pa sa bon gyis hU~M bskul bas hU~M nyid zhal du bsgyur ro/ /dril bu'i sa bon drug rnams kyi/ /sgra rnams de bzhin sgrogs par brtag /ces pa a la la zhes pa'i tshul du ljags 'dril zhing sgra 'byin pa'i tshul du bsam mo/ /'di ni khro bo'i zhal yin gsungs//zhes pa de lta bur 'di ni khro bo'i zhal yin no/ /de ni thog ma nyid kyi gzugs/ /zhes pa de lta bu'i sku de ni gces pa'am/ /dkon par bstan pa ste thog ma nyid kyi gzugs zhes bya'o/ /gang zhig dran pa tsam gyis ni/ /zhes pa sgrub pa po gang zhig gis sku de dran pa tsam gyis ni/bdud dang gdug pa'i gdon la sogs/ /mthu rtsal gnon pa nyams nas su/ /zhes pa bdud de dag gi mthu rtsal nyams pa'i don to/ /da ni sngags spel ba zhes bya ba bstan pa'i phyir/ /zung shig ces pa'i tshig gnyis ldan/ /zhes pa la sogs pa smos so//zhal yang gdangs te 'bar ba can/ /zhes pa lha de gra sa gra sa zhes bya ba'i sngags kyi tshig gnyis dang ldan pa'i rang bzhin can du bsam mo/ /zhal gcig po zhes so/ /snying po dga' bar rnam par gzhag/ /ces pa thugs kar yi ge hUM bsam mo/ /hU~M de'i mtshan nyid mtshon cha 'bebs pa'i mthu rtsal can zhes pa'o//sngags kyi dngos po shes na ni/ /zhes pa khro bo'i rgyal po de sa bon hU~M las 'byung bar sngags kyi dngos por shes na/ sngags pas dngos grub thob par 'gyur/ /zhes pa'i don to/ /mtshon cha 'phangs pa tsam gyis ni//de yis kun du bsrung bar bya/ /zhes pa mtshon cha'i phyag rgya bcings pa tsam mam/ yang na mtshon cha'i phyag rgya dngos gdengs pa tsam gyis bsrung bar bya'o/ /sa bon dgod pa tshul bzhin du/ /bdag gi lus la sbyar bar bya/ /zhes pa bdag gi lus lha'i skur bsgyur ba las sa bon dgod pa tshul bzhin du bya'o//gzugs ni gzugs la bzhag nas su/ /zhes pa mdun du lha'i gzugs ci 'dra bar bsams pa de bzhin du/ bdag kyang de 'dra ba'i gzugs su bsgom mo/ /mtshon cha'i de nyid lag na thogs/ /zhes pa mdun gyi lha ci lta bu bzhin du bdag lhar bsgyur ba'i phyag rgya mtshon cha de dag thogs par bsgom mo//sa bon rnams kyang khar bzhag ste/ /hUM lcer bsams pa las zhal du gyur cing / drug gis ljags 'dril ba'i tshul du sgra 'byin zhes pa'o/ /rkang pa nyid kyang tsham ngam bya/ /zhes pa g.yon brkyang ba'i tshul du gnas pa nyid la bya/de nas kun du khros nas su/ /rang gi sa bon dgod par bya/ /zhes pa sa bon rnams de ltar bzhag pa yang bdag nyid khro bor bsgyur nas/ de nas dgod par bya'o zhes bshad do/ /thog mar bdag la ma yengs par/ /zhes pa sems rtse gcig par bsam zhes pa'o//bsrung ba de ltar byas nas su/ /dkyil 'khor de ni spyan drangs te/ /de nas mdun du mchod pa bya/ /zhes pa gong du bshad pa'i tshul de ltar bsgom pa nyid bsrung ba'o/ /de ltar byas pa'i 'og tu gdod lha spyan drangs nas lha'i mdun du 'og nas bshad pa rnams kyis mchod par bya'o//sngags kyi snying po tha ma la/ /zhes pa dang por spyan drangs te/ oM AHhU~M A gats+tsha ya A gats+tsha ya zhes bya bas spyan drang ngo / /tshur gshegs pa yi tshig gnyis dang / /rtag tu ldan par byas na ni/ /zhes pa spyan drang ba'i cho ga thams cad du tshig 'di skad ces bya bar sbyar ro//spyan drang ba dag bya bar bshad/ /ces pa snying pos skur bskyed de mdun du bsams pa la yang spyan drangs pa ci dgos she na/ sems can rtog pa can gyi don du spyan drang bar bya'o/ /me tog gi gdan 'di la zhes pa de ltar me tog 'dor ba'i tshe sngags 'di brjod de/oM AHhU~M i daM A sa naM a d+hi tiSh+Tha zhes brjod cing gdan gyi steng du bzhugs su gsol lo/ /bzhugs su gsol zhes rtag tu bya/ /zhes pa bzhugs su gsol ba'i don to/ /me tog gcig gis dbus kyi ma he'i gdan la gtor ro//de lta bur ni spyan drangs pa/ /me tog dag gis snga ma bzhin/ /bzhugs shig ces pa'i tshig gnyis byas/ /cho ga bzhin du bzhugs su gsol/ /zhes pa de ltar spyan drangs pa ste/ de gdan gyi steng du bzhugs su gsol nas de'i 'og tu yang me tog gcig snga ma bzhin du sku gzugs kyi steng du dor te/oM AHhU~M tiSh+Tha zhes pa'i tshig gnyis brjod de/ sngags mkhan gyis 'dzab bam/ las ma zin pa dang re ba ma bskangs kyi bar du gud du mi bzhud par rtag par gnas 'dir bzhugs su gsol zhes pa'i don to/ /khro bo'i rgyal po de la ni//dgag par bya ba bstan pa yi/ /zhes pa tshul de ltar bya ba de nyid lha gud du mi gshegs par bya ba bstan pa yin no/ /gong du dgag pa bshad pa'i 'phro sbyor ba'i tshig go/ /me tog sngags kyis btab pa yis/ /de ltar dgag pa byas nas su/ /zhes pa'o/ /ar+g+ha 'di ni bzhes shig ces//tshig 'di mjug tu brjod nas su/ /zhes pa de'i 'og tu mchod yon dbul ba'i tshe/ sngags 'di brjod cing dbul lo/ /oM AHhU~M i daM ar+g+ha nA ma ya tat+t+wa na gr-ih+Na zhes brjod/ /mchod yon dbul bar bya'o/ /spos chu sme gtor sbyar ba yi/ /zhes pa la sogs pa yi ge 'bru gsum pa'i mjug tu 'di bzhin pa'i tshig bcug ste dbul bar bya'o//spos chu bzang pos btab pa yis/ /zhes pa me tog dri zhim po dang ldan pa la bya'o/ /bzhes su gsol zhes brjod nas su/ /zhes pa me tog gi sngags 'di brjod cing dbul lo/ /oM AHhU~M i daM puSh+pa nA ma ya tat+t+wa na gr-i h+Na zhes brjod cing dbul lo zhes so//sngags pas rtag tu tshig mjug la/ /ces pa yi ge 'bru gsum gyi tshig go/ /gtor ma bdag gis phul ba 'di/ /bzhes su gsol zhes brjod nas su/ /zhes lha bshos dbul ba'i sngags 'di brjod cing dbul lo//oM AHhU~M ba li nai wi t+ya nA ma ya tat+t+wa na gr-i h+Na zhes brjod cing dbul lo/ /gtor ma sna tshogs dbul bar bya/ /mar me bdag gis dbul bar bya/ /bzhes su gsol zhes mjug tu brjod/ /ces pa mar me dbul ba'i sngags 'di brjod cing dbul lo/ /oM AH hU~M i daM dI pa nA ma ya tat+t+wa na gr-ih+Na zhes brjod cing dbul lo zhes pa'i don to//bdug pa bdag gis phul ba 'di/ /bzhes su gsol zhes mjug tu brjod/ /ces pa bdug pa dbul ba'i tshe yang / /oM AHhU~M i daM d+hU ba nA ma ya tat+ta na gr-i h+Na zhes brjod cing dbul lo/ /bdug pa thang chu rnam pa lnga//sngags kyis btab ste dbul bar bya/ /zhes pa sra rtsi pog phor lce pog ga pur thang chu dang lnga la bya'o/ /thang chu rnam pa bdun ni snga ma'i steng du gnad sa ra dang / gu gul dang bdun no/ /kha cig gis bshad pa'i thang chu rnam pa lnga la ga pur dang / sa ra la dang ni nir+ya la dang de ba ti nir+ya la dang /sa la ki nir+ya sa dang / sa la nir+ya sa dang lnga'o zhes pa'i don to/ /dkyil 'khor dag gam ri mo la/ /zhes pa la sogs pa dkyil 'khor der ri mo'i sku gzugs bkram pa de la gong du bshad pa'i tshul du yan lag la bkod pa dag kyang byas pa'i dkyil 'khor de slob ma dam tshig can la bstan na dkyil 'khor de mthong ba tsam gyis dam tshig can du 'gyur ro//dkyil 'khor du 'jug pa'i phyag rgya ni be con gyi phyag rgya bya'o/ /dam tshig can la bstan na ni/ /zhes pa sngar bshad pa'i dkyil 'khor du zhugs pa la bya'o//sngags pa dam tshig can du 'gyur/ /zhes pa'o/ /sgrub pa po ni ma yengs par/ /zhes pa rtse gcig tu sngags brjod ces pa'o/ /sngags brjod slar yang gshegs su gsol/ /zhes pa oM AHhU~M gats+tsha gats+tsha bya zhing gshegs su gsol lo/ /me tog snyim pa bkang nas ni//phyag btsal slar yang gshegs su gsol/ /zhes pa me tog snyim pa bkang ba thogs shing gong ma'i sngags brjod do/ /phyag btsal nas slar yang gshegs su gsol lo/ /dkyil 'khor dag gam ri mo la/ /zhes pa lha 'di rtag tu bsgom pa nar ma la yang mchod pa'i tshul du de ltar sbyar ro//rtag par mchod pa'i cho ga 'di/ /zhes pa bsgom pa'i tshe yang rtag tu mchod pa 'di dag bya'o/ /da ni mjug bsdu ba zhes bya ba bstan pa'i phyir/ bzlas pa dang ni ho ma dag dang / /zhes pa la sogs pa smos so//rtag tu khro bor 'du shes pa/ /zhes pa dus thams cad du khro bo'i nga rgyal du bya'o/ /rtsa ba'i rtog pa las gsang ba'i rtog par gtogs pa ste dang po'o/ /dang po'i bshad pa rdzogs so// //gsang bar gtogs pa'i le'u gnyis pa 'di la don rnam pa lngas bstan te/ de la sa bon dgod par byas nas sbyar ba'i go rims dang / ma shes na nyes dmigs su 'gyur ba bstan pa dang / spyi'i sa bon dgod pa'i rim pa dang / /tsham ngam dang / 'khor lo'i phan yon bsngags pa'o/ /'khor lo dang sbyar te dang po dang / tha ma dang / 'og ma dang / tha ma dag tu sbyar te/'og ma yang de bzhin du drug gis tha ma mu dang drug /'og ma'i dang po mu gnyis su sbyar te bya'o/ /'khor lo bzlas pa la 'og ma lta bu 'bru gnyis las drug gi dang po dang / drug gi 'og mar sbyar/ de ltar rim bzhin du sbyar la dang po dang sbyar ba tha ma ste/yi ge bzhi bzhi pa tha mal pa de nyid yang ltag 'og bsnor te bkod pa de de ltar rnam pa gsum gyi las bya'o/ /ma mai mA mA/ mu mU/ /mu mu/ mI mA/ mai ma/ yi ge zung zhes pa dang po'i yi ge 'bru drug tu zung du sbyar ba ste sngags tha mal pas sgrub pa'i don to/ /zung dang zhes pa bsnol ba'i yi ge ste//'og ma'i yi ge 'bru drug po zung du sbyar ba'o/ /ya bral bye brag gis zhes pa sngags gong ma'i 'bru drug tu byas pa dang / sngags 'og ma 'bru drug po yang zung du sbyar la/ zung de yang bsnol bar bya'o/ /thog ma tha ma zung gcig tu/ /zhes pa yi ge thog ma'i 'bru drug po dang /yi ge tha ma'i 'bru drug po gnyis las rim bzhin du re re sbyar na zung de nyid ltag 'og bsnol lo zhes pa'i don to/ /khro bo zhes bya sa bon ni/ /zhes pa khro bo zhes bya ba'i sa bon 'khor lo'i lte ba la sa bon bzhag pa de dag de dbang la sogs pa'i las so sor sbyar bar bya'o zhes kyang bshad du rung ngo //rgya gar gyi yi ge las kha cig gis bshad pa las gsal bar 'di skad du 'byung ste/ sa bon zhes bya dkyil 'khor du gzhag /khro bo dag ni so so ru/ /zhes 'byung bas zhes pa'i don to/ /dkyil du bzhag ste so so ru//zhes pa oM ni 'khor lo'i dkyil lte ba la bzhag go/ /AHni rtsibs kyi dang po'i gnas la bzhag go/ /hU~M dang la drug ni rtsibs gnyis dang gnas la bzhag go/ /ma ma dag ni rtsibs gsum pa'i gnas la bzhag go/ /dbang dang zhes pa yi ge kha dog dmar por bsam mo//'khon pa dang bsad pa zhes pa las 'di dag byed pa'i tshe yi ge kha dog sngon por bsam mo/ /de bzhin bskrad dang zhi ba dang / /zhes pa ming gis smos pa'i las 'di drug sngags pa tha mal pa zung du spel bas sgrub pa dang / des ma grub na sngags bzlog pa'am bsnol ba'i tshul gyis las de dag byas na myur du 'grub par 'gyur ba ni/zung dang bsnol bas myur du 'grub/ /ces pa'o/ /yi ge kha dog ser por bsam pa yang / yang na rgyas par bya ba'i phyir/ /zhes pa yi ge kha dog ser por bsam mo/ /da ni dang por tha mal pa'i tshul gyis dbang la sogs pa'i las drug bya ba bshad pa'i phyir/zung shig tshig gnyis tha mar bzhag /ces pa la sogs pa smos so/ /zung dang bul bas myur du 'grub/ /ces pa ni yi ge zung gis las tha mal par bya ba dang / yi ge zung bsnol bas las drug po de dag myur du 'grub par 'gyur ba la bya'o/ /zung shig tshig cha gnyis zhes pa gra sa gra sa bya ba gnyis gzhag go//che ge mo zhes pa dbang du bya'o zhes pa 'di ni dbang du bya ba'i las so/ /hU~M gzhag ces pa ni pin+dar+tha'i nang nas slob dpon gyi lung las 'byung ste de bas na mtshon cha dang bcas pa'i sa bon gzhag pa'i rigs so/ /bsgrub par bya ba'i gzugs byas nas//zhes pa grog mkhar las byas pas gzugs zhes bya'o/ /de la rkang pas brdzi ba ni/ /zhes pa brkyang bskum gyis gnas pa'i tshul gyis brdzi bar bya zhes pa'o/ /rkang pa skyo ba'i bar du tshad kyis bzlas so/ /de yi dbang du myur du 'gyur/ /zhes pa de ltar sgrub pa po de'i dbang du myur du 'grub ces pa'i don to//da ni 'khon par bya ba bshad de/ /gcig pu de la spos nas su/ /zhes pa la sogs pa smos so/ /gcig pu de la spos nas su/ /zhes pa la sngar las bshad pa'i go rims la bya ste/ las drug po de dag ni go rims bzhin du mi sgrub tu mi rung ba med do//de las gang 'dod pa bya'o/ /sa bon gnyis pa'i gnas la ni/ /zhes pa tsakra'i mig lnga ma gtogs pa dang / gnyis pa dmigs las byas pa'i gnas la ni zhes pa'o/ /gnas nas gdong yang bsgyur nas su/ / zhes pa de'i sngags bzlas te zhes pa'i don to/ /lha'i zhal yang snga ma'i tshul las khro bo'i skur bsgyur ro zhes pa'i don to/ /bsgrag par bya ba cung zad med/ /ces pa snga ma'i swA hA mi gzhug pa'i don la bya ste/ de ltar swA hA mi gzhug na/ hUM gzhug par rigs na slob dpon gyis pir dar ta'i lung las swA hA gzhug par 'byung ngo //bsgrub par bya ba gnyis ka yi/ /zhes pa mdza' bo gnyis kyang gzugs bya'o zhes pa'o/ /gzugs ni 'jim pa las byas te/ /zhes pa grog mkhar gyis las bya zhes pa'o/ /gcig tu dpa' ba'i nyams ldan par/ / zhes pa khro bo'i ting nge 'dzin gyi nyams dang ldan par bya'o/ /gnyis ka la yang rkang pas mnan/ /zhes pa gzugs byas pa gnyis ka'i steng du brkyang bskum gyi tshul du rkang pas mnan zhes pa'o/ /sngags mkhan de la gnas pa yis/ /zhes pa sngags nyid khro bo'i ting nge 'dzin dang /sngags la yang gnas shing 'jim pa'i gzugs kyi steng du yang gnas pa yis zhes pa'o/ /mel tshe thun de phyed tsam gyi/ /zhes pa bzhi mthun gyi thun phyed la bya'o/ /de nas sgrub par 'dod pa bzhin/ /zhes pa mdza' bo gnyis dbye bar bya ba de gnyis phan tshun dgar gyur pa zhes pa'o//khro bo rim bzhi bsgoms pas ni/ /zhes pa khro bo nyid tshul bzhin du bsgom par byas pa'o/ /lan cig byas pa tsam gyis 'gyur/ /zhes de lta bu'i tshul du lan cig mel tshe thun phyed tsam gyis 'grub par 'gyur zhes pa'i don to/ /da ni bsad pa'i las bshad pa'i phyir//sa bon gnyis pa de las kyang / /zhes pa la sogs pa smos so/ /sa bon gnyis pa de las kyang / /zhes pa dbang dang 'khon par bya ba'i sa bon gnyis pa'i gnas de las ldang ba'o/ /drag po'i rtsal gyis spos nas su/ /zhes pa sngags pa de khyad par du 'di lta bu'i tshul du bsgom mo//gnas te gsum pa la gnas te/ /zhes pa 'khor lo'i mig gsum pa la bya'o/ /g.yo ba'i gnon pas mnan pa ni/ /zhes pa tsham ngam gyi tshul du bsgyur bar bya ste 'og ma gnyis kyis bshad do/ /kha dang brla dang rgyab dang bsgyur/ / zhes pa kha gcus te rkang pa brkyang bskum byas kyang rgyab kyis bsgyur bar bya'o/ /dril bu dkrol ba'i sgra sgrogs shing / /zhes pa la drug gis ljags 'dril ba'i tshul du sgra 'byin pa'o/ /zung zhig tshig gnyis tha mar gzhag/ /ces pa gra sa gra sa zhes bya ba'i tshig gnyis gzhag ces pa'o//che ge mo zhes bya ba'i sgra/ /zhes pa/ a mu ka ste gang la bya ba'i mi de'i ming gzhug go/ /sod ces bya ba'i sgra yang brjod/ /ces pas mA ra ya bya'o/ /sa bon mtshon cha 'dir gzhag pa/ /zhes pa hU~M gzhag par bya ba ste/ de'i rjes thogs su phaT gzhag par rigs zhes bshad de//khro bo'i lcags kyi shU las gcod/ /ces pa phan chad na mi gsod pa'i gsal shing rtse gcig pa byed pa de 'dir lcags las gsal shing byas pa ni khro bo yin te de dag dgra bo'i gzugs sol ba las byas pa de'i rkub nas gyen du btsugs te khar phyung la gzugs te/de lta bu'i tshul gyis gzhig par bya ba ni gcod pa'o zhes bya'o/ /dur khrod sol bas dgra bo yi/ /zhes pa de yang dur khrod sol ba zhib tu btags pa las gzugs bya'o/ /phan tshun mngon du phyogs byas nas/ /zhes pa lag pa gnyis kyi thal mo gnyis zhes pa'o//lag pa gnyis phan tshun drud par bya zhes pa lag pa'i thal mo gnyis stong par byas te/ drud ces pa ste dgra'i gzugs gsal shing dang 'dra bar lcags las byas pas gzugs bshig pa de lag pa gnyis kyis drug par bya'o/ /de ltar byas na myur ba ru//tshe ring ba dang ldan pa yang / /dgra de ring por mi thogs par/ /zhes par tshul de ltar byas na ring po mi thogs par dbang dang 'khon pa dang / /bsad pa dag la gzugs brnyan byas pa gang la bya ba de nyid bkug la der bsams te de las bya'o zhes pa'i don to//shing ni bcad pa bzhin du 'gyel/ /zhes pa 'di dang 'dra ste/ 'chi ba'i las 'di yang mel tshe phyed tsam gyis 'grub bo/ /gsum pa las ni 'phos nas su/ /zhes pa snga ma'i gnas bor te zhes pa'i don to/ /da ni bskrad par bya ba'i las bshad pa'i phyir khro bo'i rgyal po'i gnas zhes pa la sogs pa smos te/bzhi pa de la sgrub pa 'dug /ces pa 'khor lo'i mig bzhi pa la sngags pa 'dug par bya'o/ /drag shul can gyi lus su gnas/ /zhes pa rtsal che ba dang ldan pa'i skur bsgyur ba'o/ /zung shig tshig gnyis tha mar gzhag / ces pa sngags rnams kyi tha mar gra sa gra sa zhes bya ba'i tshig gnyis gzhag par bya'o/ /skrod cig ces pa'i tshig gi mthar/ /zhes pa u tsa ta ya mthar zhes so/ /yi ge ha ni phul ba bzhag /ces pa de'i 'og tu yi ge ha tsheg drag po gnyis kyis phul ba gzhag go/ /sa bon bstan pa bkod pa las//bskrad par bya ba tha dad pa'o/ /zhes gra sa gra sa a mu ka u tsa ta ya ha zhes bya ba bskrad pa'i sa bon bkod pa 'di ni gong du bsad pa'i las bshad pa las tha dad pa ste 'di ni bskrad pa'i las so/ /dgra yi phyir ni rings pa ru/ /mel tse thun gcig tsam du bsgom/ /zhes pa dgra bskrad pa'i phyir myur du bzhi thun gyi thun gcig tsam du bsgom zhes pa'o//dgra de'i gzugs brnyan byas nas su/ /zhes pa'o/ /sbyor ba shes pas ma yengs par/ /zhes pa sngags pa sems rtse gcig tu byas pa la bzlas brjod bya'o/ /zlos pa bdag nyid de steng 'dug / ces pa sngags bzlas brjod byed pa dang / /gzugs bsnyen byed pa de'i steng du/ /g.yon brkyang ba'i tshul du 'dug go/ /'khor gyi skye bo myur spangs nas/ /zhes pa bskrad par bya ba'i dgra bo de/ de las gzhan pa'i gnas su 'gro/ /zhes pa dgra bo de gnas de las gzhan du 'gro zhes pa'o//de dag zhi bar bya 'dod na/ /zhes pa 'khon pa dang bskrad pa dang gsad par bya ba'i las de dag slar zhi bar bya 'dod dam/ yang na tha mal par zhi bar 'dod na sngags pa/ sgrub pa po ni mchog gis su/ /snying rje zhi bar bya ba yi/ /zhes pa de ltar zhi bar byed pa'i tshe lhag par snying rje bskyed par bya'o//cho ga tshul bzhin 'dir bshad do/ /zhes zhi ba dang rgyas par byed pa'i tshe skyil mo krung du 'dug par bshad do/ /kha cig na re/ 'greng ste zhi rgyas bya bar rigs/ /zhes bshad do/ /khro bo'i 'khor lo'i gnas lnga la/ /zhes pa tsakra'i mig lnga pa la sngags pa 'dug par bya'o//sgrub pa po rim bzhin 'dug ces pa bshad pa'i tshul du bya zhes pa'o/ /de nas yid ni bder gyur nas/ /rkang pa mnyam zhing gdong yang mnyam/ /zhes pa sems bde bar gnas nas snga ma'i brkyang bskum yang btang nas rkang pa tha mal par mnyam par gzhag pa dang zhal khros pa yang mi khro bar zhi ba'i mnyam par bsgom pa ni tshul tha mal par 'dug ces pa'o//zung shig tshig gnyis tha mar gzhag /ces pa gra sa gra sa gnyis la bya'o/ /sngon bzhin che ge mo zhes bya/ /zhes pa snga ma bzhin du gang zhi bar bya ba'i ming gzhug go//rab tu zhi bar gyur ces brjod/ /ces pa shAn+tiM ku ru zhes sbyar ro/ /de yi mjug tu zhi bar 'gyur/ /ring por mi thogs gdon mi za/ /zhes pa 'khon pa dang / bskrad pa dang / /bsad pa dang gsum las zhi bar bya dgos te/ de dag gi phyir zhi bar byed na snga ma'i gzugs de'i sngar 'o mas bkru ba la gdod zhi bar bya'o//sngon bzhin khro bo'i 'khor lo yi/ /drug pa'i gnas la song nas su/ /zhes pa snga ma bzhin du tsakra'i mig drug pa la sngags pa bdag 'dug la snga ma de dag gi phyir yang rgyas par byed na/ rkang pa dal bus gnon pa yis/ /zhes pa zhi ba'i tshul dang 'dra'o/ /gcig pu dpa' bo'i tshul 'dug nas/ /zhes pa mthu stobs dang / /gzi byin can gyi tshul du skur bsgyur ba la bya'o/ /zung shig ces pa tshig gnyis gzhag /ces gra sa gra sa la bya'o/ /rgyas par 'dod pas dga' bzhin du//zhes ba rgyas par byed 'dod pas sems dga' zhing mos pa dang ldan pas bsgrub ces pa'o/ /mel tshe thun gcig rtag tu bzlas/ /zhes pa mel tshe thun gcig gis rgyas pa 'grub bo/ /khro bo'i 'khor lo la ni gnas//zhes pa khro bo'i tsakra'i mig drug pa la sngags pa 'dug pa la bya/ sku yi tshul du bsgyur byas pas/ /lha'i skur bsgyur ro zhes pa'o/ /mel tshe thun gcig byas pas ni/ /zhes pa la de ltar mel tshe thun gcig tu bzlas na/ 'khor lo'i nang na khro bo'i sngags bkod pa de'i mthu 'grub ces pa'o//gang gsungs pa ni myur du 'gyur/ /zhes pa skabs 'dir rgyas pa gsungs pas na rgyas pa 'grub bo/ /phyis kyang rim gyis 'di la gnas/ /zhes pa gong ma bzhin du rim gyis bsgrubs te las rnams grub par ma gyur na/phyis kyang sngags bzlog pa'am bsnol ba'i tshul du 'di la gnas te las rnams bsgrub bo/ /logs shig khro bo'i 'khor lo'i bkas/ /zhes pa gong ma bzhin du rim gyis sgrub pa las 'di bzhin no/ /sngags bzlog pa 'khor lo'i rtsibs la bkod pa'i tshig bkod pa 'di khro bo'i bka'o//rkang pa'i tsham ngam de bzhin byas/ /zhes pa gang la bya ba'i dngos po de lag pa'am/ der zhen pa'i las sems kyis gtad pa'i tshul du byed pa yang a ga she zhes bya ste/ 'og nas bshad pa dang sbyar na rkang pa gnyis kyi bar gung mo'i mtho gang yod par bya'o//gdong yang dal bas bsgyur nas su/ /zhes pa rim gyis dal bus tha mal pa'i sku'i tshul du bsgyur ba'o/ /dang po sa bon gang yin pa/ /zhes pa dang po'i yi ge 'bru drug las ma ma zung du byas pa'i sa bon gang yin pa dang / gong ma'i yi ge drug zung du sbyar ba mu mU rgyas pa la sbyar ba'i sa bon gang yin pa de 'dir zung ltag 'og bsnol nas dbang gi las la sbyar ro//zung ltag 'og bsnol ba ni 'di ltar bya'o/ /mu mU/ ma ma zhes bya'o/ /de yi mtha' dang lhan cig tu/ /zhes pa gong ma'i yi ge / 'bru drug po'i mtha' la rgyas par bya ba'i sngags 'byung ba de dbang la yang sbyar bar bya ba sngar bshad pa dang 'dra'o/ /kha cig gis bshad pa 'og ma'i yi ge 'bru drug po'i dbang po la mU 'byung ba de sbyar ba yang rgyas pa la yang sbyar bar rig par bya zhes bshad de/ ltag 'og gnyis kyi mthar yi ge mu mu 'byung ba gang sbyar ba yang don du gcig par zad de 'dra'o zhes pa'i don to//me dang 'dra bar 'bar ba de/ /zhes pa zung ltag 'og bsnol ba'i zung gong ma de 'bru gnyis po la tsheg drag pos phul bas 'og ma'i zung tha mal pa la bskul bas gzi byin can du byas pa zhes pa'i don to//sngon gyi las ni grub 'dod na/ /zhes pa sngar bshad pa bzhin du rim gyis bsgrubs pa las ma grub par gyur te/ las de dag 'grub par 'dod na shin tu legs par sbyar bar bya'o zhes pa tshul de ltar legs par sbyar te 'dis ni dbang gi las bshad de//de yan chad dbang gi las bshad zin to/ /de nas zung mas bskul ba la'ang / /zhes pa de yang zung mas bskul ba zhes bya ste/ yi ge 'og ma drug po drag por phul ba'i zung mas gong ma'i yi ge 'bru drug po'i zung ma tha mal pa la bskul bar bya ste mu mu ma ma zhes kyang byar rung ngo //gcig tu'ang rung bar bshad ces pa gong du bshad pa zung mas bsgrub pa la bya bar zad do/ /so so'am yang na phral te 'og ma'i yi ge 'bru drug pa'i dang po la mu dang / dang po'i yi ge'i 'bru drug po'i/ thog ma las ma byung ba dang sbyar ba'i tshul 'dra bar sa thams cad sbyar te las la sbyar du yang rung ngo //'di 'dra ba'i las la sbyar ro zhes pa'i don to/ /da ni 'khon pa'i las bshad pa'i phyir/ khro bo yi ni 'khor lo'i mthu/ /zhes pa la sogs pa smos so/ /khro bo yi ni 'khor lo'i mthu/ /zhes pa 'khor lo'i rtsibs brgyad kyi sngags la bya'o//brgyad pa dag la myur bar gnas/ /zhes pa rtsibs brgyad pa'i sngags la gnas pa ste/ le lo dang snyom las med par zhes pa'o/ /rim pa snga ma'i tshul gyis ni/ /zhes pa gong ma'i yi ge 'bru drug po tha mal pa'i zung ma la 'og ma'i yi ge 'bru drug po drag pos phul ba'i zung mas bye brag phye ste bskul ba la bya'o zhes pa'o//sa bon zung mas phye ba dang / /brgyad po 'byed pas bsgrubs pa la/ /zhes pa gong ma yi ge 'bru drug po tha mal zung ma la 'og ma'i yi ge 'bru drug po drag pos phul ba'i tshul du zung mas bskul ba'i tshul du ltag 'og tu bsnur te phye ba de rtsibs brgyad pa dbye bar bya ba bsgrub pa la sbyar bar bya'o//mdza' ba myur du bzlog pa'i phyir/ /zhes pa mdza' bo gnyis myur du dbye ba'i phyir/ cho ga bzhin du rim par sbyar/ /zhes pa gong du bshad pa'i tshul bzhin du sbyar bar bya'o//rim pa snga ma'i tshul bzhin du/ /zhes pa yi ge dgod pa'i rim pa tshul bzhin bya'o/ /khro bo'i 'khor lor gnas zhes pa 'khor lo'i rtsibs dgu pa'i sngags la gnas par bya'o/ /'jig par 'gyur te/ 'chi bar zhes bya'o//lha rnams kyis ni sbas pa yang / /zhes pa bsad par bya ba de lhas bsrungs pa zhig yin na yang ngo / /gshed po'i drung du khrid par 'gyur/ /zhes pa gshin rje'i drung du khrid par 'gyur zhes gshin rje'i drung du 'gro bar byed de 'chi bar 'gyur zhes bya ba'i don to//khro bo yi ni 'khor lo'i gnas/ /zhes pa rtsibs bcu pa'i gnas pa'o/ /de yi sa bon gyis kyang phye/ /zhes pa bskrad par bya ba'i sa bon gyis phye zhes pa'o/ /sngon gyi sa bon 'bar ba/ /zhes pa snga ma bzhin du zung gnyis ltag 'og bsnol ba'i zung gong mas 'og ma bskul bas mthu can du gyur pa'i don to//snga ma bzhin du rim gyis bzlas/ /zhes pa 'khor lo'i rtsibs kyi sngags rnams rim gyis bzlas pa'o/ /sngar bshad pa yi las bsgrub po/ /zhes pa bskrad pa'i las bsgrub pa'o/ /'khor lo'i rim pa bcu gcig po//zhes pa rtsibs bcu gcig pa'i sngags la'o/ /gang yin pa ni de bzung nas/ /sngags pa des zhes pa'o/ /sngar bshad pa bzhin du bskul ba dang zhes pa sa bon ltag 'og bsnol zhing dgod pa dang / bskul ba dag kyang snga ma dang 'dra bar bya'o/ /snga ma'i las ni byed par 'gyur//zhes pa zhi ba'i las tha mal par sngar bsgrubs te/ ma grub pa de zhi ba dag la gang gsungs pa zhes pa zhi ba dang rgyas pa gnyis spyi'i las kyi mtshan nyid gcig par yang bshad do/ /rgyas pa dag la'ang de bzhin bya/ /zhes pa la zhi ba dag gi las bya ba bzhin du rgyas pa dag gi las kyang 'og nas 'byung ba bzhin du bya'o//bcu gnyis pa la gnas su zhes pa rtsibs bcu gnyis pa'i gnas la'o/ /de yi sa bon bskul ba byas/ /zhes pa rgyas pa'i sngags kyang snga ma bzhin du bya zhes pa'o/ /bdag gi mthu rtsal gnon pa brtag pa la zhes pa lha'i sku bsgoms pas rgyas pa'i las bya'o//sa bon zung mar sbyar ba yis/ /zhes pa yi ge gong ma'i 'bru drug po'i zung ma tha mal pa dang / 'og ma'i 'bru drug po drag por phul ba zung du byas pa de nyid zung ltag 'og bsnol te sbyar bas bya'o/ /sa bon mthu ni 'bar ba can//zhes pa gong ma'i yi ge drug po'i zung tha mal ba'i gong du 'og ma'i yi ge 'bru drug drag tu phul ba'i zung ma gzhag pas/ /tha mal pa'i zung ma bskul bas gzi brjid can dang mthu can du 'gyur ba'i don to/ /'khor lo bkod pa'i las rnams ni/ /sngar gsungs pa dag grub phyir bya//zhes pa rtsibs bcu gnyis pa la sngags bkod pa'i las rnams las drug po rnams tha mal par bsgrubs te/ ma grub par gyur na gdod phyi mi'i bzlog pa'i sngags kyi cho ga 'di las de dag 'grub par bya ba'i phyir sbyar ba'i tha tshig go/ /de ltar khro bo'i 'khor lo ni/ / zhes pa 'di ni khro bo'i rgyal po nyid kyi 'khor lo yi/ /cho gar bcas pa rgyas pa dag /ces pa 'khor lo'i rtsibs la sngags bris pa dang / las drug po de dag byed pa'i tshe na stang stabs dang / gzugs brnyan bya ba la sogs pa'o/ /gsang ba bskul mar bcas pa yis//zhes pa zung ltag 'og bsnol ba pa las bya ba tha ma'i bskul ba'i tshig la yang bya'o/ /sa bon zung ma bskul ba'i gang / /zhes pa dang po'i yi ge 'bru drug po'i zung ma tha ma'i skul bar byed pa nyid gang yin pa de ni/ /'og ma'i yi ge 'bru drug po drag por bskul bas zung mas skul bar byed pa'o//gnyis pa rab tu bsgrags pa yang / /de 'dir sa bon gnyis pa yis/ /zhes pa 'og ma'i yi ge 'bru drug po drag tu phul ba'i zung gnyis gnyis su byas te sbyar ba ni gnyis pa'o/ /myur du 'grub par 'gyur ba bshad//ces pa de ltar 'dir 'og ma'i yi ge 'bru drug po drag tu phul ba'i zung mas gong ma'i yi ge zung ma la bskul bas las rnams sbyar na ring por mi thogs par 'grub par bshad do/ /tha ma'i sa bon thams cad la/ /phul bas tshig gnyis rtag tu sbyar/ /zhes pa 'og ma'i yi ge 'bru drug po drag tu phul ba'i tshe tsheg drag gnyis gnyis sbyar ro//de ltar tsheg drag po gnyis phul ba yang 'og nas bshad de/ de la gong ma'i yi ge 'bru drug po'i zung ma dang / 'og ma'i yi ge 'bru drug po'i zung ma gnyis ltag 'og bsnol ba'i zung ma gong ma shos kyi yi ge 'bru gnyis po de'i zung mar mi bya bar tsheg drag po gnyis gnyis kyi sa bcad pas na yang cher 'gyur ba'i don to//zung ma zung ma'i tshig 'di la/ /zhes pa Ar+ya shI len+d+ra'i rgya gar gyi yi ge las 'di skad du 'byung ba ste/ bsgyur ba 'di ni gong ma'i 'bru drug po'i zung dang yi ge ma'i yi ge 'bru drug po'i zung du byas pa de ltag 'og bsnol ba'i gong zung de/zung ma yin par bya ba'i don te/ gong ma'i zung ni yi ge 'bru gnyis tsheg drag po'i gnyis gnyis kyis drag tu phul bas na gong ma'i zung de zung ma yin pa'i tshig tu 'gyur ro/ /tha ma dag la ma yin no//zhes de ltar zung gnyis po de ltar ltag 'og bsnol zin pa'i 'og ma'i zung tsheg drag po mi gzhug ces pa'o/ /zung ma zung ma'i tshig 'di la/ /zhes pa la sogs pa 'di yang don du na zung gnyis gnyis po de ltag 'og bsnol zin pa'i gong ma'i zung la tsheg drag po gnyis gnyis kyis drag tu phul te bsnol ba'i 'og ma'i zung la tsheg drag pos ma dbul zhes pa'i don to//mdza' ma'i rgya gar gyi yi ge las tshig 'di skad du 'byung ste bsgyur ba ni 'di'o/ /de bas na rgya gar gyi yi ge gsum char gyis mthun par 'byung bas na/ gcig kho na ltar 'jug bgrang ste ma bshad kyi/sngar bsgyur ba'i dkyus pas kyang / ma bcos par so so ru bzhag go/ /rgya gar gyi yi ge gnyis las ci 'byung ba yang 'phral du bsgyur nas bshad pa yin no/ /khro bo'i rgyal po'i dngos grub thob/ /ces pa las drug pa'i dngos grub thob par 'gyur ba'i don to//zhi ba dang rgyas pa dang / /byed pa'i tshe bskul ba'i tshig ka ra la ba da na zhes bya ba dag gzhug par mi rigs so zhe na/ slob dpon chen po pra ti war+Na tsan+d+ra'i pin+dar+tha'i nang nas thams cad la sbyar bar bya ba lung las 'byung ngo / /dbang la yi ge kha dog dmar por bya bar bshad pa dang /'khon pa dang / bskrad pa dang / /bsad pa gsum 'dra ste/ sngags kyi yi ge kha dog sngon por bsam pa dang / /zhi ba dang rgyas pa kha dog ser po dang / dkar por bshad pa'i las drug po de dag so sor 'byed pa'i tshe/ /yid la sngags kyi 'bru nyid mi bsam par sngags brjod pa'i tshe/sngags kyi yi ge'i kha dog de 'dra bar so sor bsams te las bya'o/ /yang na nyi ma'i dkyil 'khor dang zla ba'i dkyil 'khor dag la sngags de dag phreng ba so so'i kha dog bzhin du bkod pa las so so'i las la bzlas brjod byar yang rung ngo / / zhi rgyas dag la chu'i dkyil 'khor dang / dbang chen gyi dkyil 'khor la sbyar bar rigs na/ de'i skabs su las rnam bzhi dag byed na nyi ma dang zla ba la spyi'i rgyud dang mthun par so so'i kha dog tshang bar ma gsungs pas 'dir ji skad gsungs pa bzhin du khro bo sngon pa'i rang bzhin du gnas pas las thams cad bsgrub po//yang na spyi'i rgyud dang sbyar te kha dog so sor tshang bar sbyar te las byar rung ngo / /da ni mi shes na nyes dmigs su 'gyur ba bstan pa'i phyir/ khro bo'i 'khor lo'i gsang ba 'di/ /zhes pa la sogs pa smos so/ /mi shes par ni gang sbyor ba//zhes pa 'khor lo'i mtshan nyid mi shes pa yang / de 'di dngos grub mi thob kyi/ /zhes pa/ ma shes bzhin du mun sprul du byed pa de rgyud 'di las mi 'thob bo zhes bshad de/ myur du smyo ba thob par 'gyur/ /zhes pa mi shes bzhin du sbyor ba 'dir zhes pa'o//da ni spyi'i sa bon dgod pa'i go rims bshad do/ /ma mai/ mA mai/ mu mU/ drug rnams kyi zhes pa'o/ /gong du bshad pa rnams kyi mjug sdud pa'i tshig ste/ de la dang po yi ge drug po rnams go rims bzhin du zung du byas pa rnams kyis ni dbang la sogs pa'i las drug po 'di dag bsgrub po//de ltar zung mar bya ba ni gong du bshad pa'i don to/ /bskrad dang zhi dang rgyas pa'i mtha'/ /zhes pa mjug rgyas pa'i mtha' bar la thug pa'i las drug po de dag sngags pas de ltar spyad ba dang / 'grub par bya ste/ mkhas pa dag gis bsgrub par bya//zhes pa'i don to/ /de dag nyid las bzlog pa yis/ /zhes pa gong ma'i yi ge 'bru drug po zung du byas pa dang / 'og ma'i yi ge 'bru drug po zung du byas te drag po'i tshig gis phul nas zung ltag 'og bsnol te bkod pa ni gong ma'i yi ge 'bru gnyis pos 'og ma'i yi ge zung bskul bas las rnams myur du 'grub pa'i don to//de ltar yi ge bzlog pa las bya ba 'di yang sngar rim bzhin yi ge tha mal ba'i zung gis las drug po de dag ma grub par gyur na gdod yi ge bzlog pa'i tshul 'di las drug po sngar bsgrubs te ma grub pa'i las rnams bya'o//gyi na myur du 'grub ces te/ sngar dang po ni yi ge bzlog pas las drug po dag bsgrub par mi bya'o/ /zung ma las sngar bsgrubs te/ ma grub na gdod yi ge bzlog pa 'dis bsgrub par bya'i/ sngar dang por yi ge bzlog pa 'dis las bsgrub par mi bya ba ni ma grub na ste gzhan du min zhes pa'i don to//de la mu mu mI mI mai mA zhes 'og ma'i yi ge 'bru drug po 'di zung du byas pa dang / gong ma'i yi ge 'bru drug zung du sbyar ba gnyis zung ltag 'og bsnol te bzlog pa'i yi ge 'dis/ mjug tu rgyas pa'i mtha' bar la thug pa'i las drug po de dag bzlog pa 'dis bsgrub par bya'o//'khor lo rtsibs kyi gnas rnams ni/ /zhes pa 'khor lo'i rtsibs bcu gnyis pa'i gnas kyi mig mig rnams su dam tshig dang snying po AHdang hUM dgod pa dang / yi ge tha mal zung dang zung ltag 'og bsnol ba rnams dgod pa de dag rtsibs kyi gnas kyi mig mig rnams su sbyar te dgod do//de bzhin 'khor lo'i nang du yang / /khro bo'i sku mchog sa bon ni/ /zhes pa 'khor lo'i rtsibs gnyis pa bar ma/ khro bo'i sa bon yi ge hUM bzhag nas de'i mjug thogs nyid du khro bo'i sngags kyi snying po la drug dgod par bya'o//bzhag nas tshig gi tha mar yang / /zhes pa rgya gar gyi yi ge kha cig las hUM gi drung du ma ma zhes bya ba'i sngags bris la la drug ma mi'i gnas su bzhag la de nas bskul ba'i tshig gzhug pa'i skad du 'byung ba yang yod de/ 'di mi rigs te pra ti war+Na tsan+d+ra'i pin+dar+tha'i lung las sngar bshad pa bzhin du 'byung bas de ltar bya ba'i rigs zhes bshad do//khro bo'i dril bu 'khrol ba dgod/ /'khor lo'i mu ran bar dag tu/ /zhes pa phyi'i mu ran gyi rim gcig bya ba rigs pa 'dra ste kha gsum du byas pa'i 'khor lo'i rtsibs bcu gnyis pa'i gnas kyi mig tu tha ma'i nang du sngags ma ma 'dra ba lta bur zung du re re dgod pa'i mjug thogs su bskul ba'i gra sa gra sa ka ra la ba dan la sogs pa bskul ba'i tshig bcug la bya'o//zung shig ces pa gra sa gra sa dgod pa'o/ /'khor lo rtsibs bcu gnyis pa'i gnas kyi mig mig rnams su dang por AHdang hUM dang /ma ma zung du byas pa dgod pa'i sngags rnams la gnas par bya ste/ mkhas pas 'khor lo'i mig gi nang / /sa bon dgod pa rnams la gnas/ /zhes pa'i don to/ /khro bo 'khor lo'i bsgrags pa ni/ /zhes pa 'di ni khro bo'i 'khor lo bshad do//bshad pa'i tshul gyi tshe bzhi/ /shes nas ji skad bshad pa yi/ /dngos grub rnams ni thob par 'gyur/ /zhes pa 'khor lo'i sngags bkod pa'i mtshan nyid gong du bshad pa'i don kun shes te bsgrub po/ /ji skad bshad pa bzhin shes te bsgrubs na//ji skad bshad pa'i las drug po dag gi dngos grub rnams thob par 'gyur ro zhes pa'i don to/ /da ni tsham ngam bshad de/ /dngos grub tshul bzhin thob 'gyur ba/ /zhes bya ba la sogs pa smos so/ /de'i sbyor ba'ang bshad par bya/ /thog mar phyag rgya bcings nas su//zhes pa sngags rnams bsnol ba'am/ bzlog pa'i las drug pa ji skad bshad pa'i tshul bzhin du bsgrub par 'gyur ba'i tsham ngam ste/ sngags de'i sbyor ba yang bshad par bya'o zhes so/ /tsham ngam 'di drug byed pa'i dang por be con gyi phyag rgya bcings te/gdod de'i 'og tu tsham ngam sbyor ba bya'o/ /tsham ngam stang stabs sam/ 'phen stangs sam thabs sam gang la gzas pa'i tshul yang a shes pa zhes bya ba 'di dag kyang sngags bsnol ba'am bzlog pa'i las drug la tsham ngam 'di drug la rim bzhin du sbyar te/las bsgrubs na ji skad bshad pa'i las drug po de dag 'grub par 'gyur ro/ /rim bzhin du tha mal par ma bsgrubs pa'i las drug po las ni a shog 'di dag khro bo'i tshul yin pas na mi sbyor ro/ /de bas na bsnol ba'i las drug po la sbyor te/ sku las su ni sku bsgyur te//zhes pa dang por de bzhin gshegs pa'i dam tshig gi phyag rgya rnams bcings te/ de'i 'og tu dngos po stong par bsgom pa dang nyi ma'i dkyil 'khor la snying po hUM bsam pa ni sku'o/ /hUM de las rim gyis skur bsgyur ro zhes pa'i don to/ /las rnams tshul bzhin mthong ba yis//zhes pa sngags bsnol ba'am bzlog pa'i las drug shes pa'o/ /sbyor ba dag ni legs par byas/ /zhes pa tsham ngam gyi sbyor ba de dag legs par bya'o zhes pa'o/ /gdong dang kha mig rkang pa mnyam/ /zhes pa gdong dang kha dang / mig dang / rkang pa dag tha mal pa'i tshul du bsgyur cing bsgom mo//rkang pa gnyis kyi bar du gung mo mtho gang bya'o/ /snying yang de bzhin rab tu dga'/ /zhes bsgrub pa'i sems der bya'o/ /gang dbang du bya ba la bya'o/ /gang la bya ba'i dngos po de la gzas pa'am zhes pa'i lung dang man ngag sems kyis gtad pa la ya a ga she zhes bya'o//tshul 'di ltar gnas te las byed pa yang tsham ngam zhes bya'o/ /dbang du bya ba'i sngags gsung ba zhes 'khor lo'i rtsibs kyi gnas las dbang du bya ba'i sngags gsungs pa de sems rtse gcig pas bsgrub po/ /dbang du byed pa'i tshe yang lag pa g.yas pa be con gyi phyag rgya bcings te phyar la/lag pa g.yon pas khro bo'i mdzub mo brang du bsgreng ste las bya'o/ /las zin pa'i 'og tu lag pa gnyis gar thabs su sbyar te/ lte ba khung gi thad kar dkrol lo/ /de bzhin du 'khon pa dang / bsad pa gnyi ga yang btang ste zin pa'i rjes la gar thabs su ni 'khon pa'i ni g.yon pa'i lte zur du dgrol lo//bsad pa ni g.yas pa'i lte zur du dgrol lo/ /'di dag ni slob dpon gyi lung ngo / /phyag rgya bcings te las bya ba ni snga ma bzhin 'bad par bya'o/ /rkang pa ya gcig thur du bzhag /ces pa rkang pa gnyis snga ma bzhin bzhag pa las rkang pa g.yas pa'i rtse mos la btsugs te bteg go/ /gdong dang nu mjing gcus te mnan/ /zhes pa/ gdong dang nu mjing g.yon phyogs su gcus te gnas pa la bya'o/ /kha dang mig ni ya gcig btsums/ /zhes g.yon la sogs pa kha phyed btsums pa'i tshul du byas pa dang /g.yon pa'i mig kyang btsums pa la bya'o/ /tsham ngam gnon pa chen pos bya/ /zhes pa mthu rtsal dang ldan pa dpa' bo chen po'i tshul du gnas par bya'o/ /be con la ni mig gnyis blta/ /zhes pa 'khon par bya ba 'di la khro bo'i mdzub mo dang be con gyi phyag rgya bcings te/las bya ba ni snga ma bzhin no/ /mig g.yas phye bas be con gyi phyag rgya bcings pa la blta bar bya'o/ /bsgrub par bya sgrub pa la 'bad/ /ces pa 'khon par bya ba la sems rtse gcig tu gtad pas 'bad ces pa'o//gang dbye bar 'dod pa gnyis zhes pa dbye bar 'dod pa gnyis phan tshun dbye bar 'dod pa las 'bad cing brtson par bya ba ste/ de dag dbye ba brtsam par bya/ /zhes pa'o/ /rkang pa gnyis pa bteg pa yi/ /zhes pa rkang pa g.yas pa gyen du bteg nas tsham ngam byas pa slar yang bzhag ces pa gdangs ba'i tshul du tsham dam byas pa des slar sa la gzhag par bya ba ni g.yas brkyang ba'i tshul du gnas par bya'o//phyag rgya bcings nas su/ khros par lta zhing yid kyang khros/ /zhes pa bzhin yang khro gnyer can du bya'o/ /khro bo'i mdzub mo dang be con gyi phyag rgya gnyis bcings te sbyar la bza'o//khro bo'i lta ba yang bya zhing yid kyang khro bor bya'o/ /rab tu dpa' ba sren dang bcas/ /rtsal gyis gnon par rab tu 'dul/ /zhes pa mthu rtsal chen po dang / dpa' bo cis kyang mi bzlog pa'i sren dang bcas pa'i tshul du gnas par bya'o//sngags sngon bzhin du sngags tshul gnas/ /gang 'dod pa ni gzhom par bya/ /zhes pa sngar bshad pa bzhin du khro bo'i sku yang bsgyur zhing 'khor lo'i rtsibs kyi gnas gsum po'i sngags pa yang tshul bzhin du gnas te sgrub pa pos gang 'dod pa de gsad par bya'o zhes pa'o//drag shul can brkyang ste bzhag ces pa g.yon brkyang pa'i tshul du gnas par bya'o/ /bzur te 'dug pa'i tshul du gnas/ /zhes pa g.yas logs su bzur ba'i tshul du gnas par bya'o/ /gdong yang g.yon par bsgyur bar bya/ /zhes pa g.yas logs su gdong yang gcus te gnas par bya'o//mdzub mo bsgrengs te gdongs pa dang / /zhes pa brang du bsgreng zhes pa'o/ /g.yas pa be con gyi phyag rgya dag gis bsdigs zhes pa'o/ /de nas rkang pa mnyam par gzhag /ces pa rkang pa gnyis kyi bar du gung mo mtho gang gi bar du gzhag go//yan lag g.yas pa mtho bar bya/ /zhes pa lag pa g.yas pa be con gyi phyag rgya bcings te/ mtho bar phyar la dpung bstod do/ /dpal dang ldan zhing zhes sngags pa'i yon tan la bya'o/ /g.yon pa smad ces pa g.yon logs kyi dpung pa smad do/ /zhi bar 'dod na zhi bar 'gyur//zhes tshul de ltar gnas pas zhi bar las bsgrubs pas zhi bar 'gyur ro/ /phyed ni dma' bar bkug ste gnas/ /zhes pa rkang pa g.yas tsham ngam byed pa nyid cung zad tsam pa bkug pa'i tshul du gnas pa ni phyed dma' bar bkug pa ste de ni tsham ngam mo/ /rkang pa g.yas pa tsham ngam byed//ces pa g.yas logs dma' bar bya zhes pa'o/ /sngags tshul gnas pas bsgrubs na ni/ /zhes pa sngags bsnol ba'i 'khor lo rtsibs drug pa'i gnas la sngags bris pa la gnas te zhes pa'o/ /rgyas par 'dod na thob par 'gyur/ /zhes pa tshul 'di ltar gnas pas rgyas pa'i las byan rgyas par 'gyur ro zhes pa'o//slar yang de bzhin shes bya ba/ /bzlog ste bya yi gzhan du min/ /zhes pa 'di ni tshig gi rgyan tsam du zad de sngags bsnol ba'am/ bzlog pa'i las drug po la tsham ngam 'di drug rim bzhin du sbyar bar bya'o/ / gzhan la ni mi sbyor ro/ /tshigs bcad gong ma dang sbyar na snga ma'i las tha mal ba drug po la sbyar ba skad du bshad do/ /tsham ngam 'di dag drag po la sbyar bar rigs zhes kha cig 'chad do/ /bsgrub pa bdag nyid chen po yi/ /zhes pa bsgrub pa'i yon tan dang ldan pa de'i zhi bar 'gyur zhes pa'o//tsham ngam rigs drug gsungs pa zhes pa las drug la go rims bzhin du tsham ngam drug gsungs pa/ dang po'i ming ni legs par phyogs/ /zhes pa dbang gi las kyi tsham ngam dang por gsungs pa de'i ming ni legs par phyogs zhes bya ste gang dbang du bya ba de bdag la phyogs shing dga' bar bya ba bsgrub pa'i phyir tsham ngam de'i ming yang de skad ces bya ste/tsham ngam 'di drug char gyi ming las kyi don dang / rjes su mthun pa'i mtshan nyid can sha stag go/ /de yi 'og ma rgyab kyis phyogs/ /zhes pa 'khon par bya ba'i tsham ngam gyi ming khro bo can zhes pa gsad pa'i tsham ngam gyi ming ngo //bzhi pa'i mdzub mo bsgreng ba yin/ /zhes pa bskrad par bya ba'i tsham ngam gyi ming ngo / /lnga pa la ni stobs zhes bya/ /zhes pa zhi bar bya ba'i tsham ngam gyi ming ngo / /drug pa stobs po che zhes bya/ /zhes pa rgyas par bya ba'i tsham ngam gyi ming ngo / / 'di rnams tsham ngam drug tu bsgrags/ /zhes pa 'di ni tsham ngam drug tu bsgrags pa yin no/ /da ni 'khor lo'i phan yon bsngags/ /zhes bshad pa'i phyir/ /tshang ngam gdangs pa byas pa yin/ /zhes pa la sogs pa smos so/ /tsham ngam dgangs pa byas pa yis/ / dgra bo'i 'khor rnams g.yen spyo ba/ /zhes pa gang la bya ba'i don de la gzas pa'am zhen pa'am lus dang sems kyis gtad pa'i tshul lta bu la yang a gshe zhes bya ste/ /de lta bu'i tshul gyis byas pa yis/ /zhes pa'o/ /'khor lo'i cho ga la goms par byed pas zhes pa 'khor lor gsungs pa'i sngags rnams las zhes pa'o//rab tu gsang ba'i rgyud 'di dkon/ /zhes pa rgyud 'di nyid la bya'o/ /khro bo rnam par rgyal ba 'di/ /zhes pa khro bo chen po nyid bya'o/ /gsang ba'i rtog pa bzang po 'di/ /kun du dngos grub kun sbyin pa//zhes pa dka' thub dang brtul zhugs dang / khrus dang bzlas brjod la sogs pa bya mi dgos par sems kyi rnal 'byor byas pa tsam gyis dngos grub kun stsol bar mdzad pa'i gsang ba'i rtog pa de bas so/ /'khor lo 'di ni shin tu dkon/ /zhes pa 'khor lo gsum pa'i las 'di ni hom dang bzlas pa yong mi dgos zhes pa'o//bsam gtan pa'ang mi dgos te/ /zhes pa bsam gtan lhur byas pas/ gang la 'khor lo 'ba' zhig yod/ /gang gsungs pa yi dngos nas ni/ /zhes pa 'khor lor gsungs pa'i las gang bsgrub pa'i sngags la gnas na ring por mi thogs par de 'grub po zhes pa'i don to//de bas 'di ni gsad byas nas/ /zhes pa 'khor lo 'di ni gsang byas na/ /thams cad sgrub pa'i sgrub pa pos/ /zhes pa las drug 'grub ces pa'o/ /khro bo rnam par rgyal ba 'jam dpal gyi rtsa ba'i rtog pa las/gsang ba'i rtog pa gnyis pa'i bshad pa rdzogs so// //gong du sngar yi ge bcu bdun pa dang bcu gsum pa dang yi ge bzhi bcu rtsa gsum pa dang bcu gcig po dang 'khor lor gsungs pa'i sngags la sogs pa'i las bshad nas gsad pa'i rtog par gtogs pa'i le'u gsum pa 'dir yang gong du sngar bshad pa rnams las tha dad du gyur pa'i yi ge 'bru gsum la las mang po sgrub pa de 'chad de/de yang don gyi dbye ba rnam pa bzhis bstan te/ de la gleng bslang ba'i zhes bya ba dang / gsang sngags bstan pa'i mtshan nyid dang /sngon du bsnyen pa bya ba'i cho ga dang / sngon du bsnyen pa byas nas phyir las mang po bya ba rnams kyis bstan to/ /da ni gleng bslang ba'i zhes bya ba bshad pa'i phyir khro bo'i rgyal po'i dngos grub 'di gsungs so/ /khro bo'i rgyal po'i dngos grub ni/ /zhes pa khro bo'i rgyal po chen po las mang po sna tshogs pa 'og nas 'byung ba rnams kyang yi ge 'bru gsum pa'i mthus thogs pa med par 'grub par 'gyur ba de yang yi ge 'bru gsum pas bsgrubs na sngar gong du bshad pa rnams las tha dad pa zhes bya ste/sngags pa bsgrub par 'dod na/ dang po sngags pa'i cho ga'i mchog de tshul bzhin du sngar spyad/de'i 'og nas bshad pa'i las mang po de dag bsgrubs na/ de bzhin du 'grub par 'gyur zhes so/ /rab tu gsang ba'i sngags 'di ni/ /btung ba gang rnams sngar gsungs pa/ /re zhig de yi mtshan nyid 'di/ / gzhan dag 'dir ni bshad par bya/ /zhes pa yi ge 'bru gsum po dang 'brel bar bya ba grangs su gtogs pa'i yi ge bcu bdun po'i sngags dang bcu gsum po'i sngags dang / bzhi bcu rtsa gsum po la sogs pa'i sngags rnams btus te gang gsungs pa/ rnams kyi de'i mtshan nyid kyi gong ma las gzhan pa dag bshad par bya'o zhes pa'i don to//da ni gsang sngags bdun pa zhes pa bshad pa'i phyir/ de yi las ni gang gsungs pa/ /zhes pa la sogs pa smos so/ /de yi las ni gang gsungs pa/ /gang dag phyis kyang bsgrag 'gyur ba/ / dpa' bo gcig pu 'ba' zhig gis/ /zhes pa yi ge 'bru gsum po'i grangs su gtogs pa'i yi ge 'bru gsum po'i las sngar gong du gsungs pa rnams 'og nas las mang po bshad pa rnams so/ /dpa' bo zhes pa sngags kyi yon tan te/ de yang sngags gzhan dang ma 'dres pa'i yi ge 'bru gsum po'o//thams cad de nyid de gzhan min/ /zhes pa yi ge 'bru gsum po de yang sbyor ba'am rdzogs pa nyid yin te ma tshang ba'am nyams pa ni ma yin no/ /thams cad du yang bshad pa yin/ /zhes pa yi ge 'bru gsum po de yang 'byor pa'am rdzogs par bshad par bya'o zhes pa'i don to//sngags de las rnams kun byed pa'o/ /zhes pa yi ge 'bru gsum po'i sngags de'i 'og nas 'byung ba'i las mang po kun byed pa'o/ /rgyud las dngos grub gang gsungs pa/ /zhes pa rgyud 'di las dngos grub gang gsungs pa zhes pa'o/ /dpa' bo gcig pu'i mthus kyang 'grub//ces pa yi ge gzhan du ma 'brel pa'i yi ge 'bru gsum po gcig pu'i mthus 'grub po/ /da ni gsang sngags btu ba'i mtshan nyid bshad de/ oM ni de yi thog ma ste/ /bde bar gshegs pa'i dam tshig yin/ /zhes pa yi ge 'bru gsum po de'i thog ma zhes bya ba'i don de 'bru gsum po de'i thog ma la/oM 'byung ba ni dam tshig yin no/ /thog ma yi ni gnyis pa yin/ /drag po'i tshig gis phul ba'i lus/ /zhes pa dang po'i oM gtogs par gnyis pa yang drag po'i tshig gnyis phul ba'i AHgzhag go zhes pa'o//sngags kyi yi ge phreng bkod la/ /sngags rnams thams cad gsal byed pas/ /zhes pa AHde'i mthu dang gzi byin ltag 'og gi sngags phreng ba bkod pa'i tshul du gnas pa'i sngags thams cad mthu can du 'gyur zhing yongs su rdzogs pa dang / gsal bar ston pa yin zhes pa'o//khro bo'i rgyal po'i snying po ni/ /gsum po de nas sbyar bar bya/ /zhes pa gong ma'i gnyis po gtogs par gsum par sbyar te de ltar yi ge 'bru gsum mo/ /de nas khro bo'i rgyal po yi/ /sku ni de yi 'og tu brtag /ces spyi bor yi ge oM/ /mgrin par yi ge AH snying gar yi ge hUM bsam pa las khro bo'i skur bskyed de bsgom mo zhes bshad do//sngags pas sngags rnams kun gyi mtshan/ /zhes pa yi ge 'bru gsum pa'i sngags kyi mtshan nyid de ltar shes par bya'o zhes pa'i don to/ /da ni sngon du bsnyen pa bya ba'i cho ga bshad pa'i phyir/ thogs pa med pa'i sngags rnams ni//zhes pa la sogs pa smos so/ /bdag nyid chen po thams cad kyis/ /zhes pa sngags kyi yon tan te yi ge 'bru gsum pa'o/ /bsrung ba la sogs pa'i las rnams kun zhes pa bskrad pa dang / mtshams bcad pa dag bya zhes pa'o/ /go rims bshad pa bzhin du bya//zhes pa 'og nas 'byung ba'i go rims bzhin du las bya'o/ /thams cad bdag nyid chen po 'dis/ /zhes pa sngags kyi yon tan la bya ste/yi ge 'bru gsum po be con gyi phyag rgya dang ldan pas/ bsrung ba dag ni byas nas su/ /zhes pa'o/ /sngon gyi tshul bzhin rab dben par/ /ri mo yi ni mchog bzhag nas//zhes pa sngon du bshad pa'i phyag lnga bcu po'i ri mo'i sku gzugs nyid de/ de yang cho ga bzhin du bris nas rgyun 'grul med pa'i gnas dben pa'i ri mo mchog ste bzhag nas ji skad du sngar gsungs pa'i cho ga'i mchod pas mchod par bya'o/ /nyin re me tog phreng ba la/ /zhes pa ma le'i phreng ba sku la gsol zhing mchod do//lan bdun bzlas pa rnams kyis mchod/ /ces pa 'bru gsum po'i sngags kyis me tog phreng ba la bzlas la mchod ces pa'o/ /me tog dmar po kha 'bus pa/ /zhes pa kha 'bus ma khad la bya'o/ /ri mo la ni phog par dbul/ /zhes pa yi ge 'bru gsum po zlos shing dbul zhes pa'o//cho ga 'di yis dus gsum du/ /zhes pa cho ga de lta bus nyin gcig kyang dus gsum du zla ba gcig tu byas na ni/ khro bo mngon sum mnyes gyur nas/ /zhes pa nyid thor ma yin par bdag gis mnyes par gyur nas rmi lam du ni dngos grub bdag la stsol cig bka' stsal to//rmi lam du ni dngos grub ster/ /zhes pa'o/ /cho ga 'di ltar sngar byas na/ /gang 'dod pa yi dgos pa dag /de tshe gdon mi za bar 'grub/ /ces pa gong du smos pa lta bu'i cho ga 'di sngar spyad nas/ de'i 'og tu gang 'dod pa'i las rnams bsgrubs na the tshom med par 'grub par 'gyur ro//de dag ni gong du bsnyen pa bya ba'i cho ga mchog bshad pa'o/ /da ni gong du bsnyen pa byas nas phyis las mang po zhes bya ba bshad de/ /da ni cho ga mchog bshad do/ /zhes pa'o/ /da ni gong du bsnyen par bya ba'i cho ga bshad do/ /de ltar zla gcig mnyes byas nas//zhes pa sngar bshad pa'i cho ga bzhin du byas nas zhes pa'o/ /sngags pas las rnams gang bya ba/ /de yi cho ga mdor bsdus nas/ /zhes pa rgyud chen po las bsdus nas de ni legs par bshad par bya zhes pa'o/ /gnas dang 'gro dang sbyar ba yis/ /zhes pa 'bras bu'i rtsa ba la sogs pa'i dug go//sbyar zhes pa ni ched du sbyar ba'i dug go ces pa'o/ /dug ni rnam pa gsum dag dang / /zhes 'di dag las kyang sos par byed nus so/ /bdag gis byas pa'i phyag rgya sngags/ /zhes pa bdag gis phyag rgya dang sngags la sogs pa'i sbyor ba byas pa de dag gzhan gyis mi shes shing mi 'gyur bar bstan par bya ba'i phyir sngags lan cig brjod pa tsam gyis bsrung ngo //yid la bsams pa tsam gyis kyang / /zhes pa ltag 'og gnyi ga'i las byed do/ /gzhan dag gis kyang gcod par byed/ /ces pa pha rol po'i rig sngags bdag la gnod par byed pa yang gcod par byed do//bzhi pa'i rims la sogs pa yang / /zhes pa lnga pa drug pa bdun pa'i rims la sogs pa dag ces pa'o/ /ma dang byis pa'i gdon rnams drag /ces pa ma bdun byi to ta ma la'i nang nas byis pa la gnod pa'i ming gis smos pa lta bu zhi bar byed do//bdag dgar phab nas dgos pa'i don/ /zhes pa gdon de dag kyang gang la dbab pa'i mi de'i spyi bor thal ba'am/ sa gtor zhing sngags brjod de phab dgos pa'i don rnams dri bar bya zhing sngags pa ci 'dod pa'i don rnams bsgo ba de bzhin du byed do/ /yid la bsams pa de las thar//zhes pa de ltar phab nas slar btang ba yang yid la bsams pa tsam gyis thar bar yang 'gyur zhes pa'o/ /rdo la lan gsum bzlas pa'i tshe/ /zhes pa chu las rgal ba'i tshe/ /chu'i nang du bor na chu srin kum+b+hi la sogs pa zhes pa chu'i nang gi bgegs rnams chu las bsal ba mchog tu 'gyur zhes pa chu'i bgegs rnams zhes pa'o//lam la rkun po 'jigs pa med/ /ces pa lam du zhugs te 'gro ba'i tshe 'jigs pa med ces pa'o/ /sngags kyis spyi gtsug bcings nas ni/ /zhes pa lag pa g.yas pas bdag gi spyi gtsug mdud pa dor zhing sngags brjod de/de ltar byas nas yang rgyal po khros pa yang bdag gi dbang du 'gyur na ma khros pa lta ci smos te/ rgyal po khros pa'ang myur bar rab tu zhes pa'i don to/ /yid la dran zhing bzlas byas na/ /zhes pa sngags bzlas zhes pa'o/ /mi bde nyam thag gyur pa la//sngags ni myur dran brjod par bya/ /zhes pa 'phral du myur du nyam thag pa ni bstud pa byung ba la'o/ /myur ba'i tshig ni gnyi gar sbyar/ /zhes pa'o/ /sprin dag mnan par bya ba'am/ /zhes pa sprin gyes pa dgag par bya ba la'o/ /'dod bzhin myur du slar yang bzlog /ces pa ji ltar 'dod pa bzhin du myur du char yang gcod par byed do//dbyig pa'i phyag rgya grub par byed/ /ces pa de yang be con gyi phyag rgya'o/ /yid kyis sprin rnams brdab par bya/ /zhes pa sprin gang 'khrug cing 'thab pa las lcags dang / ser ba dbab pa'i sprin dag las sems kyis/ /bsdigs pa'am dral bar bya zhing bsam zhing las bya'o//myur du rnam par gdags par bya/ /zhes pa gnam lcags dang ser ba bcad cing med par bya ba'i don to/ /rnam pa de nyid ces pa gong du bshad pa de dag gis zhes pa'o/ /sbyor ba mkhas pas ci 'dod par/ /zhes pa sbyor ba mkhas pa'i sngags mkhan dag gis bdag nyid ji ltar 'dod pa'i sbyor ba dag gis char pa dag gcad par bya ba ni/char pa dag kyang gcad par bya/ /zhes pa'o/ /gos ni sngon po bgos nas su/ /zhes pa yo byad thams cad char sprin gyi kha dog dang sbyar ro/ /kho ra khor yug bsrung byas nas/ /zhes pa sngags dang phyag rgyas mtshams bcad de zhes pa'o//med pa tsam du chur 'dug ste/ /zhes pa sngags pa nyid 'dug ces pa'o/ /nyin gsum legs par bzlas par bya'o/ /zhes pa nyi ma gsum dus gsum du bzlas zhes pa'o/ /brgya byin gyis ni sprin bsdus nas/ /zhes pa brgya byin gyis klu la bka' stsal nas sprin bsdus te char 'bebs so//nyi ma la ni mngon phyogs nas/ /zhes pa sgrub pa po ni kha nyi ma la bltas te nyin re bzhin rtag tu bzlas byas na zhes pa/ nyin gcig kyang dus gsum du bzlas zhes pa'o/ /nad rnying de nas med par 'gyur/ /zhes pa nad rnying gcong chen dag zhi bar zhes pa'o//rgyal po'am de'i chung ma'ang rung / /zhes pa rgyal po'i btsun mo yungs kar dkar po bzang po las zhes pa yungs kar btags pa las so/ /gang gi ming smos nyin bdun du/ /zhes pa rgyal po'i btsun mo gang dbang du bya ba de'i ming ngo / /de ni tshe gang 'dis zhes pa/gang dbang du bya ba de bran bzhin du ni dbang du 'gyur zhes pa'o/ /dmangs rigs dag ni dbang du 'gyur/ /zhes pa dbang du bya ba kun 'dra ste snga ma bzhin du gzugs brnyan byas pa gzugs kyi steng du 'dug nas sngags bzlas so/ /bzlas na rje'u rigs 'dod pa bzhin/ / zhes pa snga ma bzhin du bzlas zhes pa'o/ /zhag gsum zhes pa smyung bar gnas pa'o/ /bzlas pa cho ga bzhin bshad na/ /zhes pa rgyal po dang btsun mo dbang du bya ba'i cho ga bzhin du byas te las byas nas sngags pa 'dod pa bzhin du gang dbang du bya ba de bdag gi dbang du 'gyur ro//'bru dang phub ma thams cad las/ /zhes pa 'bru sna lnga la sogs pa'i 'bru thams cad dang 'bru de dag gi phub ma thams cad dang bsres te btags pa las gzugs bya'o/ /mdza' bo gnyis 'khon par rab tu sdang bar byas par 'gyur zhes pa'i don to/ /rgyal rigs dang zhes pa zhag gsum 'grub ces pa'o//bram ze'i zhes pa zhig bzhi smyung ba bya zhes pa'o/ /de ltar ji skad gsungs pa yi/ /las kyi bya yis gzhan du min/ /zhes pa de ltar cho ga ji skad gsungs pa bzhin du dbang gi las bya'i cho ga gzhan gyis mi bya'o/ /gang yang rung ba'i gzugs brnyan ni//zhes pa/ bsad pa dag ni gzugs brnyan bya zhes pa'o/ /snga ma bzhin du dben par bri/ /zhes pas/ bstar ba'i steng du gzugs brnyan bri/ /rgyun 'grul med pa'i sar zhes pa'o/ /de nas seng ldeng phur bu la/ /zhes pa phur bu zur rdo rjes mtshan pa sor brgyad pa'o//sngags kyis stong du bzlas byas na/ /zhes pa 'bru gsum pa'i sngags kyis btab ces pa'o/ /de yi lus la phur bus gdab/ /ces pa bsad par bya ba'i gzugs brnyan la gdab ces so/ /'di la khros par byas nas su/ /zhes pa bsad par bya ba yang khros zhes so//de nas de yi snying khar 'dug /ces pa sngags pas mchog phur gzugs brnyan de'i snying khar 'dug par bya'o/ /phur bus btab ste bzlas pa bya/ /zhes pa gzugs brnyan phur bus btab pa de yang phur bus gdab ces pa'o/ /de nyid lag pas bzung nas su/ / zhes pa phur bu lag gi sa bzung ste/ /dus gsum nyin gsum bzlas byas na/ /zhes pa nyi ma gsum dus gsum du bzlas na/ dgra la gang du btab pa der zhes pa dgra bo'i gzugs brnyan la phur bus gang du btab pa der/ gzer thabs drag pos btab nas su/ /zhes pa gnas de nyid du gzer thabs 'gyur zhes pa'o//'gul mi phod par sa la ltung / /zhes pa dgra de yang sa la 'gyel bar 'gyur te/ zhag bdun na gdon mi za bar 'chi bar 'gyur ro/ /ma mo'i gnas su song nas ni/ /zhes pa phan chad ni ma mo bdun gyi mchod pa'i rten yod pa der song nas/ g.yas pa be con gyi phyag rgya bcings zhes pa'o//g.yon pa'i [(]mdzum[,]mdzub [)] mo yis zhes pa brang du bsgreng nas bzung zhes pa'o/ /dgra la bsdigs shing nyi ma nub kyi bar zhes pa'o/ /khros shing dgra yi ming smos bzlas/ /zhes pa nam langs nas nyi ma nub kyi bar du bzlas so/ /de nas dgra bo ma gdon gyis//zhes pa rnams rbad pas dgra bo de ma'i gdon gyis zin nas/ zin nas spyod pa sna tshogs pa/ /'chi bar 'gyur ba dag ni byed/ /ces pa chur mchod pa dang / mer mchong ba la sogs pa'i smyo bla can te/ bab col du gyur nas/ srog dang bral bar 'gyur ro/ /de nas bsgrub pa zhi ba yi//cho gas de las zhi bar bya/ /zhes pa de nas de slar zhi ba'i cho ga bya ste de yang gzugs brnyan snga ma de nyid spyi'i gzhung las 'byung ba bzhin du 'o mas bkru ba la sogs pa'i zhi ba'i cho ga bya'o/ /ma mo rnams kyi mdun 'dug nas/ /zhes pa ma mo bdun gyi rten gyi drung du 'dug nas zhes pa'o//zhi ba'i cho ga mkhas pa yis/ /zhes pa zhi bar byas nas so/ /nyin gcig tu ni bzlas byas na/ /zhes pa nyin gcig dus gsum du bzlas zhes so/ /nyi ma la ni mngon phyogs nas/ /zhes pa sgrub pa po kha nyi ma la bltas te/ lag pa g.yas pas bdag gi mgo byug cing zhes pa'o//dgra bo ming smos mnan nas su/ /zhes pa gong du bshad pa bzhin dgra'i gzugs brnyan bris te/ de'i steng du mnan pa'am yang na khro bo mthu rtsal gyis dgra bo de mnan pa'i tshul du yang bya'o/ /nyi ma nub tu bzlas byas nas/ /zhes pa nang par nam langs nas nub kyi bar du bzlas pas zhes pa'o//de ni klad pa na gyur pa/ /zhes pa dgra bo de/ de nas zhi bar byas nas ni/ /nyi ma la ni thal sbyar bzlas/ de nas zhes pa de nas slar zhi bar bya na/ /sgrub pa po nyid nyi ma la kha bltas shing thal mo sbyar te bzlas pa byas na zhi bar 'gyur ro/ /sa steng rkang pa gcig gis 'dug /ces pa rkang pa g.yon pa 'ba' zhig sa la bzhag g.yas pa bskum mo/ /lag pa g.yas pas be con gyi phyag rgya bcings te sbyar bar bya'o/ /nyin par lag pas gyen du brkyang / /zhes pa nyin zhag gcig tu bya ste/ /de yang nang par nam langs nas/nyi ma shar gyi bar du bya'o/ /mi dga' khros shing bzlas bya ba/ /zhes sgrub pa po mang po gnas gcig tu 'dug /mi 'dod pa'i sems dang ldan par byas nas bzlas pa bya zhes pa'o/ /nyi ma nub kar de nas dgra/ /zhes pa de ltar bzlas pa byas pa'i dgongs mo mi dga' ba dang myos par 'gyur te zhes pa gang bskrad par bya ba'i dgra de/gnyen dang mdza' bo rnams bor nas/ /zhes pa'i don to/ /de las gzhan pa'i gnas su 'gro/ /zhes pa snga ma'i gnas de las gzhan du 'gro bar byed pa'o/ /de la 'dir ni zhi ba'am/ /zhes pa de dag slar zhi ba'am/ 'on te rgyas par bya 'dod na//zhes pa rgyas par byed 'dod na spyi'i las kyi mtshan nyid gcig pa las 'di ltar bya'o/ /bde zhing brtan la ma yengs par/ /zhes pa/ sgrub pa po'i lus sems kyi 'gyur ba med par rtse gcig tu bya zhes pa'o/ /'o ma 'thung zhes pa zas su zhi bar 'gyur gyi bar zhes pa nam zhi ba'am rgyas par 'gyur gyi bar du bzlas so//de ltar 'di ni sna tshogs pa'i/ /sbyor bcas rgyas pa bshad pa yin/ /zhes pa de ltar rtog pa 'dir sbyor ba dang bcas pa'i las rnams sna tshogs mang po'i cho ga rgyas par bshad pa yin no/ /rtog pa'i cho ga bzhin du ni/ /zhes pa le'u 'dir phyag rgya dang /sngags dang / lha'i sbyor bas rgyud 'di nyid las gsungs pa'i las dang / rgyud gzhan las 'byung ba'i las rnams kyang rgyud de dag gi cho ga bzhin bsgrubs na 'grub par 'gyur ro zhes bya ba'i don to/ /gsang bar gtogs pa gsum pa'i bshad pa rdzogs so// //gsang bar gtogs pa'i le'u bzhi pa 'di la don rnam pa drug gis bstan te/de la dang por skabs dbye ba zhes bya ba'i don bshad de/ de nas gzhan yang bzang po 'di/ /zhes pa gong du gsungs pa las gzhan pa 'og nas 'byung ba ste/ tsan+d+ri zhes bya ba ste tshig dang / don 'byung ba bzang po la bya'o//'og nas las sna tshogs pa 'byung ba'o/ /he le'i 'khor lo rgyas pa ni/ /zhes pa/ he zhes bya ba ni gnas gang du 'gro bar lan mang du mi zlos par lan gcig gis phyin zhes te myur ba'i don to/ /de las bzang po'i gzhan med pa/ /zhes pa he le'i 'khor lo de las gzhan med pas bla na med ces bya ba'i don to//da ni sa bon sngar byas nas gsang ba'i sngags 'byung ba bstan pa zhes bshad de/ dang po he zhes gang gsungs pa/ /zhes pa byA ka ra Na'i gzhung gis yi ge gug skyed dang bcas par med de/ /yi ge gang yin pa'i gzhung nyid pas yi ge ha zhes pa gang du gsungs pa ste/'greng bu dang / gu gu dag ma gtogs so/ /bskul ba'i sa bon thams cad pa'o/ /zhes pa yi ge ha de dag gis bskul ba'i sa bon thams cad pa yin pas na de yang yi ge thams cad kyi sa bon yin te/ /oM dang AHdang hUM la sogs pa'i sa bon yin te/ des thams cad bskul bas las thams cad byed pas na/ bskul ba'i sa bon thams cad pa'o/ /de ni len dang 'dzin pa ste/ de ltar blangs nas kyang las sbyor ba'i he dag la bya ste/ de ni las byed pa la dbang bskur ba'i phyir blangs pa'o/ /las la myur du 'grub pa'o/ /zhes pa bra bud de zhes bya ste/bskul ba la yang bya/ mkhas pa la yang bya ste/ des bskul ba ni las rnams myur du 'grub pa dang / he he de ni mkhas pas las la sbyar bar bya'o zhes bya bar yang bshad do/ /de bas thog mar bskul ba dang / /zhes pa/ de bas na thog ma'i yi ge he he dag gis bskul ba dang ldan par 'khor lor sngags bkod pa dag gis las la sbyar ba zhes bya ba'i don to//khro bo'i rgyal po yis zhes pa khro bo'i sngags rnams 'byung ba ni 'jam dpal gyi sngags te/ de'i sprul pa yin pa'i phyir ro/ /de'i sngags ha rnams 'byung ba ni thogs pa med pa'i yi ge ste/las rnams myur du 'grub par byed pa'o/ /he la 'khor lo rim bzhin bstan/ /ces pa gug skyed pa gtogs pa'i ha 'di bcu gnyis thogs pa med pa ste/ sngags 'dis ni las myur du 'grub par byed do/ /go rims bzhin du 'bru bcu gnyis zung du sbyar na/ zung drug tu gyur pas 'khor lo'i rtsibs kyi gnas phyed las mched pas na de ltar sbyar du mi rung ste/go rims bzhin du zung 'dra ba gnyis su sbyar na/ zung bcu gnyis su 'gyur bas de ltar sbyar bar rigs so/ /'o na las tha dad pa mi 'dra ba bcu gnyis 'byung ba la sngags 'dra ba zung re rer sbyar ba 'di 'gal ba'i skyon du mi 'gyur ram zhe na mi 'gyur te/he he dag zung du sbyar ba'i sngags 'di yis ni/ khro bo'i bskul bar mdzad pa'i yon tan no/ /las bcu gnyis po de dag dngos khro bo bcu gnyis kyi so sor mdzad pa ni/ /sngags 'dra bar bkod pa'i skyon du mi 'gyur ro//he he/ ha ha zhes pa zla ba ni/ hi hi gnyis ring po 'dra bar 'os so/ hi hi zhes pa 'di gnyis dang / /drug pa'i zung du 'os so/ /khro chen tshig gi thog mar bcas/ /zhes pa he he zung du drug sbyar ba'i sngags bcu gnyis po de dag kyang gang du dgod par bya zhe na/ ma hA kro d+ha zhes pa khro bo'i sngags zlos pa'i dang po'i mgo la dgod par bya'o zhes so//zung gcig ces pa'i tshig gnyis po/ /zhes pa he he dag khro bo chen po'i tshig gi thog mar zhes 'byung ba/ khro bo chen po'i tshig de dag 'khor lo'i rtsibs kyi gnas kyi mig gang du bri ba de bshad do/ /zung drug 'khor lo'i mtha' mar bkod//ces pa 'khor lo zung drug ya phral na/ rtsibs bcu gnyis te/ gra sa gra sa zhes bya ba'i tshig gnyis po 'di dag 'khor lo'i/ rtsibs bcu gnyis pa'i mthar dgod par bya ba yang / gang du dgod par bya zhe na/ 'khor lo'i rtsibs bcu gnyis pa'i so so'i gnas gnas kyi mtha' la mu ran gyi nang rol mtha'i mig rnams su dgod par bya'o//mu ran rtsibs kyi mig rnams su/ /sngags las 'byung ba re re'o/ /don rnams thams cad grub par byed/ /ces pa yi ge he la bya ste de yang sngags kyi rang bzhin las byung ba'i yi ge 'bru gnyis pa'i zung re re'o//'khor lo'i rtsibs bcu gnyis po'i gnas kyi mig tu bris pa de ni/ las 'di dag thams cad 'grub par 'gyur ro/ /bcu gnyis dag tu gsungs pa'i sngags/ zhes pa yi ge he he drug la bcu gnyis zung // //