CLOSE WINDOW

D2668
བོད་ཡིག

'phags pa 'jam dpal gsang ba'i rgyud kyi dkyil 'khor gyi cho ga /slob dpon don yod pa'i zhabs kyis mdzad pa rdzogs so/ /[ ]@##/ /rgya gar skad du/ b+ha ga wAM many+dzu shrI g+ho Sha s+ya kro d+ha ya mAn+ta ka ho ma bi d+hiH/ bod skad du/ bcom ldan 'das 'jam dpal dbyangs kyi khro bo gshin rje gshed po'i sbyin sreg gi cho ga /byang chub sems dpa' 'jam dpal dbyangs la phyag 'tshal lo/ /de la du ma dang rdzas so sor bya ba ni spyir gsal lo/ /de la zhi ba la ni thab khung zlum po rgyar khru gang la zabs su de'i phyed par byas te/dkar por bsgyur ro/ /rgyas pa la de'i nyis 'gyur du bya ste/ dbyibs gru bzhi ser por bya'o/ /de gnyis kyi mu ran yang zhi ba la sor bzhi'i 'phang la rgyas pa la nyis 'gyur ro/ /dbang dang drag po'i sor bcu'i rgya dang lnga'i zabs su bya'o/ /kha khyer dang mu ran ni 'phang du sor gsum du mtshungs so/kha dog dmar nag dang sngon po la dbyibs ni zla ba phyed pa dang / gru gsum yin no/ /thams cad kyi nang du pad+ma 'dab ma brgyad pa lte ba ser por bya'o/ /lte bar yi dags 'dzin pa dang / /'dab ma dmar po la mtshams kyi bzhir be con no/ /kha khyer la zhi ba la 'khor lo//rgyas pa la ni rin chen/ dbang la pad+ma 'dab rgyas/ drag po la rtse gsum mo/ /mu ran la yi dags phreng bar mtshungs so/ /de'i phyi rol gru bzhi sgo bzhir/ yi dags so so bar sbrel te/ dkyil 'khor gyi las bzhin no/ /thab khung brtsegs nas nang ku sha rtse mo yang phyogs so so bar bstan la bud shing so so bas bris pa'i dbyibs bzhin brtsig go//de nas rdzas so so ba yang g.yas su gzhag par bya/ /mchod pa so so g.yon du gzhag /mdun du mar so so ba dang / yon chu dang gzar bu rnam gzhag go/ /de nas sngags pas gos so so ba gon te//rgyan yang de bzhin no/ /stan so so ba la kha yang zhi ba shar/ rgyas pa lho/ /dbang nub/ drag po byang du bltas te/ sgrub thabs kyi gzhung la 'jug par bya'o/ /bstod pa yan chad rdzogs pa dang / lha gtang ba'i cho ga bya ste/ las dang mthun pa'i me bus la spar te/rgyun gyi me'am rgyu las brtag /dngul phor rgyu yi snod kyis bla/ /gser snod dge zhing bkra shis par/ /rgyal rigs me'am rgyu las brtag /rje'u rigs smad 'tshong rgyu las brtag /zangs sogs dbang la blang bar bya/ /gdol ba'i me'am dur khrod me/ /lcags dang thod par blang bar bya//bdud rtsi 'khyil pa'i bsang ba dang / /yi dags bkod nas mtshon chas bsrungs/ /dkar po lo ma'i shing bzang la/ /mtho gang tshad du mnyam byas pa'i/ /yam sreg shing des zhi ba spar/ /u du ma bA ra byang chub shing / /nyis 'gyur gyis ni rgyas par spar//mya ngan med stsogs seng ldeng bzang / /sor gsum tshad du dbang drag mtshungs/ /drag po dur khrod tsher ma yi/ /yam sreg shing bu mar spar bya/ /de yang rlung ring phyogs bltas te/ oM ba ya be/ sa ma ya s+t+waM/ raM dz+wa la raM zhes rlung yab dang ldan par bya'o/ / de nas me de bsangs la/ bdag dam tshig sems dpa'i skur bskyed pa 'jig rten pa nyid du bya'o/ /de nas me'i dbus su paM las pad+ma 'dab ma brgyad pa ge sar la nyi ma/ dbang drag la zla ba/ zhi rgyas la nyi mar bsam mo/ /de nas mi 'jigs pa'i phyag rgya la mthe bong gis srin lag la mnan te/e h+ye hi ma hA b+hU ta de ba r-i Shi ta/ ag+na ye bA ba ka /A gats+tsha A gats+tsha/ zhes pas mdun gyi nam mkha' la byon par bsam mo/ /de nas bsang gtor/ oM hUM dzi na dzig/ /zhes gtor ro/ /zhal bsil ba/ ag+na ye/ pA pa ka ma hA pra te dza swA hA/ de nas gdan dbul te/ag+na ye ma hA te dza/ sar+b+ba kA ma sA d+ha na/ sa twa ar+tha A di ti ye swA hA/ me tog thab tu gtor te gdan bshams pa la bzhugs par brtag go/ /de nas mar la gzar bu lan bdun nam gsum du dbul lo/ /na mas+sa man+ta bud+d+ha a g+na ye pA pa ka raM raM swA hA/ de bzhin du rgyas pa la ni ma he na tra zhes sbyar ro//dbang la ni ma ma ra zhes sbyar ro/ /drag po la ni kro d+ha ni zhes sbyar ro/ /de ltar me 'bar ba'i dgang blugs phul te/ me 'bar ba dang ku sha dgram ste/ zhi ba la shar nas/ rgyas pa la lho nas/ dbang la nub nas/ drag po la byang nas dgram par bya'o/ /zhi rgyas rtsa ba dang bcas te byas/ dbang drag phyed mar gtub pa'i rtse mos bskor ro/ /oM i me ka sha/ /shu pa dib bya/ pu ta pra ma hA/ pa ping tri na/ rat+na trA ya/ ra ta hi ti ni/ pra d+hi pi dzi dang / gar pa b+ha gar pa b+ha ban+du swA hA/ de nas phur pa bzhi yang sgo bzhir gzugs/ /mda' bzhi yang gra bzhir btsugs la/tshon skud bre zhing bdud rtsi 'khyil pa'i sngags brjod do/ /des ni bgegs thams cad bcings par 'gyur ro/ /de nas mchod pa so so ba dbul bar bya'o/ /de nas sngar yam sreg shing gi tshad kyi rigs kyi yam shing dbul lo/ /zhi ba la mar dkar po/ /rgyas pa la mar ser po//dbang la shing mar/ drag po la mi tshil bzhu ba'am tsha ba'i mar ro/ /de nas til dang / yungs kar dang / de nas zho dang / /'bras chan dang / de nas ku sha/ de nas dU ra ba/de nas nas/ de nas gro/ de nas 'bru/ de nas sran ma/ 'bras ma grugs pa/ de nas star ga dang /snying zho sha dang / gla gor zho sha dang / shing thog la sogs pa rnams dang / sngags gcig gam so so yang rung ste 'bul lo/ /de la gcig ni/ oM ag+na ye pA paM shAn+tiM ku ru swA hA/ puSh+TiM ku ru oM/ /ba shaM ku ru baM/mA ra ya hUM phaT/ so so ba/ badzra ya dzA ya swA hA/yam shing / oM ag+ni swA hA/ mar ro/ sarba pA paM da ha na badzrA ya swA hA/ til dang nyungs kar/ sar+b+ba saM pa de swA hA/ zho dang zan/ a pra ti ha ta badzrA a swA hA/ ku sha/ badzra A yu She swA hA/ dUr ba'i'o/ /ma hA be+e gA ya swA hA/ nas so/ /badzra g+hasma rA ya swA hA/ gro/ badzra bi dzA ya swA hA/ 'bru dag go/ /ma hA ba lA ya swA hA/ sran ma'o/ /badzra puSh+TA ya swA hA/ 'bras ma grugs pa'o/ /ma hA shri pa ya pa ye swA hA/ star ga dang / gla gor zho sha dang / dza' ti pha la dang / shing thog btogs te zhal nyid du dbul te/ dang por oM dang tha mar swA hA bzhag ste mchod/ de nas mar ro/ /de nas 'bar ba'i rang bzhin du gyur par bsgom mo/ /'jig rten pa'i me lha mchod pa'i rim pa dang po'o/ /phyogs skyong la mchod na yang de'i snying gar rdzogs par bkod la bsang gtor dang / zhal bsil byas te/ de nas mchod pa lngas mchod de/ de nas yam shing nas mar dang rim pa bzhin mchod do//tha mar mar gyis mchod de/ in+d+ra ye la sogs pas mchod do/ /de nas thab bsangs la/ be con gyis g.yab cing / na mo bud+d+ha b+h+yaH/ na mo d+harma b+h+yaH/ saM g+he b+h+yaH/ oM kro d+ha bi ra bi ra sa ma ye/ A gad dza A gad dza/ oM AHhUM i daM pre to A sa naM kri pra pre tod+ka te ni swA hA/oM AH hUM zhes sku bsang ngo / /oM ai ka bi ya mAn+ta ka bi sa ra swA hA/ zhabs bsil lo/ /na mas+sar+b+ba ta thA ga te b+h+yaH pre ta mu ka kha da kha da swA hA/ gdan phul la thab tu bzhugs su gsol lo/ /de nas mar gyi dgang blugs dbul lo/ /de nas mchod pa lnga dbul lo//de nas yam shing / de nas mar/ de bzhin du shing thog yan chad dbul lo/ /oM a kro te ka ya mAn+ta ka ha na ma tha b+hany+dza hUM phaT/ oM shAn+tiM ku ru oM/ /zhi ba'o/ /swA hA puSh+TiM ku ru swA hA/ rgyas pa'o/ /ho ba shaM ku ru ho/ /dbang ngo / /phaT mA ra ya phaT/ drag po'o/ /sngags de gcig pus dbul lo/ /sngags rang gi so so ba yang rung ngo / /tha mar yang mar gyi dgang blugs dbul lo/ /de nas mchod pa lnga dang bstod pa bya ste/ dngos grub gsol la gshegs su gsol te/ bsang gtor dang / zhabs bsil te/ gats+tsha zhes btang ngo //de nas yang 'jig rten pa'i sngon bzhin du bsams la sngon bzhin rdzas lhag mchod do/ /tha mar mar gyi dgang blugs la las bskul zhing lan mang du dbul lo/ /de nas mchod pa lngas mchod do/ /bstod pa yang brjod la de nas 'dod pa'i don la gsol ba btab nas bsang gtor byas nas zhal bsil la/gshegs su gsol lo/ /de nas rdzas bsdu'o/ /tshe bsring bar 'dod na/ rgyas pa'i thab khung du dUr ba'i sngags kyis dUr ba'i mar la bsnyug cing lan grangs mang du sbyin sreg bya'o/ /'bru 'phel bar 'dod na 'bru'i sbyin sreg bya'o/ /de la sogs pa rtog pa dgu pa nas 'byung ba'i tshul du gang 'dod pa'i sbyin sreg rdzas gang shis pas bya'o//de la gsad par 'dod pa'i sbyin sreg ni bsgrub par bya ba'i rjes dang / dri ma dang / dur khrod kyi sol ba la gzugs byas te snying gar ming rus bcug nas sgrub thabs kyi mjug tu dgra bo bkug la ling ga la gzhug pa dang /phur pas gdab pa dang / gtubs te tsher ma dang / tsha bas rjes su bsrel la/ yungs mar gyis kyang bsgos nas yam shing dang / /mar gyi steng la bsreg go/ /bskrad par 'dod na bya rog gi shes bya'o/ / dbye bar 'dod na bya rog dang / 'ug pa'i sgros bya'o/ /de la stsogs pa las dang sbyar ro/ /sdig pa sbyang bar 'dod na/ til 'ba' zhig gis bya'o/ /de la sogs pa spyir shes par bya'o/ /zhi ba la dam tshig dang ye shes kyi me lha dkar po'o/ /rgyas pa la ser po/ /dbang la dmar po//drag po la sngon por bsgom mo/ /mchod rdzas dang / sngags kyi 'od zer dang / kha dog so so la'o/ /bsam pa yang zhi ba ni byams pa'o/ /rgyas pa ni rgyas par bya ba'i sems sam/ mthon po'i rnam pas 'jug pa'o/ /dbang la ni dga' chags sam zhen pas 'jug pa'o//drag po la ni ma rangs pa dang / yid skyo ba dang khro sems so/ /las ni zhi ba la ni 'od zer dkar po 'phros pas de dag gis gang la bya ba'i nad dang / sdug bsngal la stsogs pa drangs shing bsdus nas rgya mtsho chen por dor bar bsam mo/ /rgyas pa la 'od zer ser po 'phro ba de dag gang gi lus la zhugs pa de nyid kyis dpal la sogs pa de dag rgyas par bsam mo//dbang la 'od zer de dag dmar por 'phros te gang dbang du bya ba'i lus sems kyi rgyud bkang zhing nyams shing myos pa de dag drangs nas rkang pa'i drung du ltung ste skyabs su dong bar bsam mo//drag po la 'od zer sngo nag dug ha la ha la ltar mkhregs shing dngos po shin tu sra ba dag kyang reg pa tsam gyis thal ba'i mthar byed pa 'phros nas/ gang la bya ba la khyab par gyur te/ skad cig tsam gyis thul gyis bsregs te thal bar gyur par bsam mo/ /yon chu yang zhi ba la 'o ma'i nang du mngar gsum dang me tog dkar po'o//dbang la chang ngo / /drag po la chang dang skyur ba'i khu ba dang tsha ba rnam par sbyar bar bya'o/ /bsang gtor ni chu gtsang ma dang / yungs kar dang / dri bzang por sbyar la me tog so so ba'i kha dog bcug pas bya'o/ /me'i kha dog gi yi ge dgod pa yang raM dkar po dang /ser po dang / dmar po dang / sngon po'o/ /dgang gzar blugs gzar la yang chos kyi yi ge 'bru/ oM swA AH hUM rnams kha dog so sor dgod do/ /rgyu yang so so la bya'o/ /me lha'i rtsa ba'i lha'i sku ni dmar ser ro/ /zhi ba'i dus su pA paM ka dkar po zhal gcig phyag bzhi pa/g.yas dang po dbyug tho/ /gnyis pa mi 'jigs pa'i phyag rgya/ g.yon dang po phreng ba/ gnyis pa ril ba'am/ gun d+he'o/ /rgyas pa la ser po phyag gnyis ni snga ma bzhin no/ /dbang la 'dod pa'i me tog dmar po zhes bya ba g.yas dang po na lcags kyu gnyis pa na zhags pa'o//bsad pa la rlung zhes bya ba sngon po/ /g.yas pa na be con/ gnyis pa na me thab/ dam tshig gi me lha nyid de ltar bskyed do/ /'jig rten las 'das pa'i skabs su khro bo ya mAn+ta ka de nyid zhi ba la dkar po/ /phyag dang po gnyis bum pa dkar po nas bdud rtsi'i chu rgyun dkar po gtong ba'o//rgyas pa la bum pa ser po nas chu rgyun ser po/ /dbang la dang po skyo zhags/ drag po la rtsal ba nyid bzhin du shes par bya'o/ /yam shing dang sreg shing yang rgyu dang tshad gcig par bya'o/ /de ni cho ga snga ma'i thun du bstan pa'o//'jam pa'i dbyangs kyi sprul pa yi/ /khro bo gtso bo de kho na/ /yi dags phal chen dkyil 'khor du/ /rig pa'i brtul zhugs spyod byin nas/ /gtsang ba'i gnas su nyer 'dug nas/ /dang po'i bsnyen pa brtsam par bya/ /thun bzhi'i dus su bzlas pa dang / /mchod pa'i cho ga dag byas shing //byang chub sems dang ldan pa yis/ /'bum drug tshad du bzlas pa bya/ /de nas bu don cho ga yis/ /sku gzugs legs par bsgrubs nas kyang / /rab tu gnas pa'i las byas nas/ /de yi spyan sngar sum 'bum bzlas//de nas smyung dang ldan pa yis/ / ri yi rtse mor 'bum gcig bzlas/ /dngos grub 'bring gi bsnyen par bshad/ /rgyal srid la sogs dngos grub 'bring / /de nas sngags pas nags tshal song / /ri khar gnas rnyed snyoms 'jug spyod/ /seng ldeng dbyug pa 'dom gang tsam/ /'phan med pa ni rtag tu bcang / / rkang pas bgrod dka' bgrod pa dang / /rgyal po la sogs phyag mi byed/ /khro bo'i rnal 'byor nga rgyal ches/ /'jigs gnas ma lus 'chi ba rnams/ /mi smra mi 'dri 'jigs ma spyod/ /sngags kyi don ni bcu bdun po/ /lha dang mi phyed rtag bzlas pa/ /thun bzhir sngon bzhin mchod pa dang //bsnyen pa'i tshul du bzlas brjod bya'o/ /dngos grub mchog rnams thob 'dod na/ /sngags pas de ltar brtul zhugs spyod/ /byang chub sems dang rab ldan pas/ /gtsang sbra smyung ba dbang po bsdams/ /brtags pa'i zas la rol bya'o/ / sngags pa brtul zhugs mi 'dod na/ /thog mar sku gzugs cho ga bya/ /spyan dbye cho ga byas pa la/ /brgyad 'bum cho ga bzlas par bya/ /dngos grub phran tshegs las dag ni/ /dug la stsogs pa bzhi stsogs bsgrub/ /'di ni dngos grub rnam pa gsum/ / bsgrub pa'i cho ga gsum du bstan/ /mkhas pas byang chub sems brten cing / /snying rje gzhan don spyod pa dang / /khro bo'i che ba yangs pa dag /dngos grub rnam gsum thogs med pa/ /brtul zhugs la stsogs med par 'grub/ /bcom ldan 'das khro bo chen po rnam par rgyal ba'i sbyin sreg gi cho ga'i rim pa dang /dngos grub kyi tshul nges par bstan pa zhes bya ba/ slob dpon don yod zhabs kyis mdzad pa rdzogs so// //sbyin sreg gi mchod pa la 'di skad do/ /dad pa dang ni dam tshig gis/ /tshur gshegs tshur gshegs dkon mchog gsum/ /gshin rje gshed dang be ta li//gshin rje'i lha tshogs 'khor dang bcas/ /byang chub sems dang mnyam sbyor ba'i/ /dug gsum sreg rdzas mchod par bzhes/ /bdag gis lhag pa'i bsam pa rnams/ /dus 'dir grub par mdzad du gsol/ /mi la sogs pa'i bdud bgegs dang //zhe sdang byed pa gang yang rung / /'phral du mod la bsgral ba dang / /dbang po yan lag de bdag la/ /ji ltar drag rdal stangs tshul gyis/ /bcol ba'i las rnams grub par mdzod/ /sbyin sreg gong ma dang cho ga mi gcig bris pa tsam/ /hUM thugs rje dbang gi dkyil 'khor du//shes rab 'bar ba'i me byung bas/ /zhes pa la sogs brjod la btang / /me 'bar ba dang 'di yang btang / /hUM 'bar ba chen po dur khrod me/ /rab tu smug cing dur khrod 'phro/ /'jigs byed chen po khro bo'i me/ /gdug pa'i snying la 'bar bar mdzod/