CLOSE WINDOW

D2663a
བོད་ཡིག

@#/ /rgya gar skad du/ bai ro tsa nA b+hi saM bo d+hi tan+t+ra sad br-it+ti nA ma/ bod skad du/ rnam par snang mdzad mngon par rdzogs pa byang chub pa'i rgyud kyi tshig 'grel zhes bya ba/ bcom ldan 'das kyis thog ma thams cad mkhyen pa'i ye shes brnyes nas/ thams cad mkhyen pa'i ye shes des 'dul ba'i 'gro ba rnam pa gnyis su gzigs te/dmigs pa dang bcas pa la mos pa gtso bor gyur pa dang / zab cing rgya che ba la mos pa gtso bor gyur pa'o/ /'dul ba'i 'gro ba de rnams la yang spyod pa rnam pa gnyis te/ pha rol tu phyin pa'i sgo nas 'jug cing spyod pa dang / sngags kyi sgo nas 'jug cing spyod pa'o//de la pha rol tu phyin pa'i sgo nas 'jug cing spyod pa la yang rnam pa gnyis te/ dmigs pa dang bcas pa la mos pa gtso bor gyur pa dang / zab cing rgya che ba la mos pa gtso bor gyur pa ste/ de la pha rol tu phyin pa'i sgo nas 'jug cing spyod pa'i gdul ba'i 'gro ba dmigs pa dang bcas pa la mos pa gtso bor gyur pa rnams kyi don du 'dul ba dang /mdo sde dang / mngon pa'i chos rnams dang / de bzhin du gzhan yang theg pa chen po'i mdo sde khyim bdag dpa' bo la sogs pa bstan to/ /de bzhin du zab cing rgya che la mos pa'i 'dul ba'i 'gro ba rnams kyi don du zab cing rgya che ba'i mdo sde sdong po bkod pa dang /sa bcu dang ting nge 'dzin gyi rgyal po la sogs pa rnams bstan to/ /de bzhin du sngags kyi sgo nas 'jug cing spyod pa'i gdul ba'i 'gro ba rnams la yang rnam pa gnyis te/ dmigs pa bcas pa la mos pa gtso bor gyur pa dang / zab cing rgya che ba la mos pa gtso bor gyur pa ste/de la dmigs pa dang bcas pa la mos pa gtso bor gyur pa rnams kyi don du/ 'phags pa legs par grub pa'i rgyud dang / rig 'dzin gyi sde snod la sogs pa bya ba'i rgyud rnams bstan to/ /de bzhin du zab cing rgya che bas 'dul ba'i 'gro ba rnams kyi don du 'phags pa de kho na nyid bsdus pa'i rgyud la sogs pa bstan te/dmigs pa dang bcas pa la gtso bor gyur pa zhes pa yang zab cing rgya che ba la ma mos shing mi spyod pa ma yin mod kyi/ dmigs pa dang bcas pa la spyod par mos pa'i shas che ba la bya'o/ /zab cing rgya che ba la mos pa gtso bor gyur pa rnams la yang dmigs pa dang bcas pa'i spyod pa ma yin mod kyi/zab cing rgya che ba la spyod pa'i shas che ba ste/ de lta bu yin par ni gsal por 'phags pa de nyid bsdus pa la sogs pa nang gi rnal 'byor gtso bor gyur pa ma yin mod kyi/ phyi'i spyod pa rnams kyang med pa ma yin no//de bzhin du bya ba'i rgyud rnams kyang phyi'i spyod pa gtso bor gyur pa yin mod kyi/ nang gi spyod pa yang med pa ma yin te/ rig 'dzin gyi sde snod la sogs par rnam par thar pa'i sgo rnam pa gsum la gzhol ba la sogs pa gsungs pa dang / de bzhin du pha rol tu phyin pa'i sgo nas 'jug cing spyod pa rnams la yang ji ltar rigs par sbyar bar shes par bya'o//de bzhin du rnam par snang mdzad mngon par rdzogs par byang chub pa rnam par sprul pa byin gyis rlob pa'i rgyud 'di yang thabs dang shes rab gtso bor gyur pa rnal 'byor gyi rgyud yin mod kyi/ bya ba la mos pa'i gdul bya'i 'gro ba rnams gzung ba'i phyir bya ba'i rgyud kyi rjes su mthun pa'i spyod pa dag kyang bstan pas bya ba'i rgyud dam/gnyis ka'i rgyud lta bur so sor brtags shing grags so/ /de la bcom ldan 'das kyi rgyud 'di yang gdul ba'i 'gro ba rab dang 'bring dang tha ma ste rnam pa gsum gyi don du bstan te/mgo smos pas go ba dang / don rnam par phye bas go ba dang / tshig lhur len pa'i gdul ba'i 'gro ba rnams so/ /de la mgo smos pas go ba ni shes rab mchog tu rno zhing thos pa mang ba dang ldan pas rgyud 'di'i mtshan don dang rjes su mthun pa rnam par snang mdzad mngon par rdzogs par byang chub pa rnam par sprul pa byin gyis rlob pa zhes bya ba'i mtshan tsam thos pas rgyud 'di'i don thams cad go bar 'gyur te/rnam par snang mdzad ces bya ba'i tshig gis bcom ldan 'das rnam par snang mdzad longs spyod rdzogs pa'i sku bsod nams dang ye shes kyi tshogs yongs su rdzogs pa thams cad mkhyen pa'i rang bzhin du shes so//mngon par rdzogs par byang chub pa zhes pa la mngon par byang chub pa ni rang gi sems yang dag pa ji lta ba bzhin du shes pa ste/ de yang chos thams cad stong pa nyid nam mkha' lta bu'i mtshan nyid du thugs su chud pa'o//rnam par sprul pa zhes bya ba'i tshig gis kyang de ltar mngon par rdzogs par byang chub pa nyid kyi tshe na/ sngon gyi smon lam gyi shugs kyis chos nyid kyis thob pa lhun gyis grub pa nyid du sku mi zad pa'i rgyan gyis sus kyang zil gyis mi non pa nyid du khams gsum thams cad du khyab pa longs spyod rdzogs pa dang sprul pa'i sku la sogs pas ji ltar snod du gyur pa'i sems can gang gis 'dul ba'i skus don mdzad pa ste/sangs rgyas kyi skus 'dul ba'i sems can rnams la sangs rgyas kyi skur ston pa nas nyan thos dang rang sangs rgyas dang brgya byin dang tshangs pa la sogs pa'i gzugs kyis 'dul ba'i sems can rnams la de rnams kyi tshul bstan cing don mdzad pa dang /de bzhin du gsung mi zad pa'i rgyan gyis kyang khams gsum thams cad du sangs rgyas kyi gsung dam pas khyab par chos ston pa dang / de bzhin du thugs mi zad pa'i rgyan gyis kyang rnam pa dang bcas pa'i yid las byung ba'i dbang chen dang chu'i dkyil 'khor la sogs pa'i rnam par bstan par go ba'o//de bzhin du byin gyis rlob pa zhes bya ba'i tshig gis kyang de ltar rnam par sprul pa sku gsung thugs mi zad pa'i rgyan gyis khams gsum thams cad du khyab par bstan pa de ni kun du bzang po la sogs pa'i byang chub sems dpa'i yongs su dag pa rnams kyi spyod yul du gyur gyi/gdul ba'i 'gro ba 'og ma rnams kyi spyod yul du ma gyur pas/ sku la sogs pa mi zad pa'i rgyan de nyid gdul ba'i 'gro ba de rnams kyi don du rgyud 'dir dkyil 'khor dang sngags dang phyag rgya'i sgo nas lus ngag yid kyi mtshan mar gyur pa bstan pa ste/byin gyis rlob pa zhes pa ni dkyil 'khor dang sngags dang phyag rgya'i sgo nas lus ngag yid gsum gyi cha lugs dang rang bzhin du lhag par gzhag ces pa'i don to/ /de ltar rnam par snang mdzad mngon par rdzogs par byang chub pa rnam par sprul pa byin gyis rlob pa zhes pa don dang rjes su mthun pa'i mtshan tsam gyis mgo smos pas go ba'i gdul bya rnams kyis don 'di lta bur go ste/de dag gi don du rgyud 'di'i mtshan tsam smos par shes par bya'o/ /de ltar shes pa 'ba' zhig ma yin gyi/ gzhan yang rgyud 'di'i 'brel pa dang /brjod par bya ba bstan pa dang dgos pa yang bstan par shes par bya ste/ rgyud 'di ni bcom ldan 'das rnam par snang mdzad kyi rang bzhin gyi dkyil 'khor sku mi zad pa la sogs pa'i rgyud dang 'brel par blta ste/ rang bzhin gyi dkyil 'khor 'di ni rgyud 'di'i rgyu yin la rgyud 'di ni de'i 'bras bur shes par bya ste de ni 'brel pa'o//de bzhin du rgyud 'dir dkyil 'khor dang sngags dang phyag rgya'i sgo nas lus dang ngag dang yid ji lta ba bzhin du bstan pas rang bzhin gyi dkyil 'khor gyi tshul ji lta bu yin pa rgyud 'dis mtshon par shes par bya ste/ de bas na rgyud 'di ni rjod par byed pa dang /bcom ldan 'das kyi rang bzhin gyi dkyil 'khor ni brjod par bya ba'o/ /de la dgos pa ni rgyud 'dir ji skad du bshad pa'i rim gyis sgrub pa'i spyod pas rang gi lhag pa'i lha mnyes par byas nas lha dang mi'i longs spyod dang / ral gri dang rig 'dzin la sogs pa mngon par mtho ba'i mtshan nyid thob pa ni dngos dang brgyud nas bcom ldan 'das rnam par snang mdzad kyi mkhyen rab dam pas bla na med pa'i thams cad mkhyen par gyur pa ni dgos pa de'i yang dgos par shes par bya'o//don rnam par phye bas go ba'i gdul ba rnams kyis ni/ don de dang rjes su mthun pa'i mtshan tsam smos pas rgyud kyi don shes par mi nus te/de bas na de dag gi don du rgyud kyi don rnams rnam par phye ste bshad pa ni rnam par snang mdzad kyi rgyud dang / rang bzhin dang 'bras bu dang de'i mngon par byang chub pa'i rgyu dang rang bzhin dang 'bras bu la sogs pa bshad pa ste/ de la rnam par snang mdzad kyi rgyu bshad pa ni/'jig rten pa'i sems kyi rim pa brgyad la sogs pa dang / mos pas spyod pa la sogs pa 'jig rten las 'das pa'i sa'i rim pas kun du sangs rgyas pa'i sa'i bar du ni rnam par snang mdzad kyi rgyu bshad pa'o/ /rang bzhin bshad pa yang bcom ldan 'das rnam par snang mdzad kyi sku rnam pa bzhi'i mtshan nyid ni/bcom ldan 'das rnam par snang mdzad kyi rang bzhin bshad pa ste/ gang gi phyir rgyud 'dir sprul pa'i sku rnam pa gnyis su brtags nas sku bzhir bshad pa yin no/ /lus dang ngag dang yid mi zad pa'i rgyan rnam par sprul pas khams gsum thams cad khyab pa/ sems can dang sems can ma yin pa'i lus la sogs par snod du gyur pa ji ltar snang ba de ni de'i 'bras bu bshad pa'o//mngon par byang chub pa'i rgyu yang rgyu ni byang chub kyi sems so/ /rtsa ba ni snying rje chen po'o/ /mthar thug pa ni thabs so zhes pa la sogs pa'o/ /rang bzhin yang de la byang chub gang zhe na/ gang rang gi sems yang dag pa ji lta ba bzhin du yongs su shes pa ste zhes pa la sogs pa ji skad du gsungs pa'o//de bzhin du de'i rnam par sprul pa dang / byin gyis rlob pa dag kyang bshad par bya ste zhib tu ni bsdus pa'i don nyid du bshad pas 'dir ma smos so/ /tshig lhur len pa'i gdul ba'i 'gro ba rnams kyis de ltar rgyu dang rang bzhin dang 'bras bu la sogs pa rnam par phye ste/bshad kyang tshig dang don rnams zhib tu mi go ste/ de bas na de dag gi don du tshig re re nas spros shing rgyas par bshad pa'i phyir/ bcom ldan 'das de bzhin gshegs pa byin gyis rlob pa zhes pa la sogs pa rgyud 'di'i thog ma nas mjug gi bar du spros te bshad pa yin no//de la bcom ldan 'das de bzhin gshegs pa byin gyis rlob pa rdo rje chen po rgya che ba la sogs pa rgyud 'di thams cad kyis bcom ldan 'das rnam par snang mdzad kyi phun sum tshogs pa rnam pa bcu gcig bstan pa 'di lta ste/ spong ba phun sum tshogs pa dang /gnas phun sum tshogs pa dang / 'khor phun sum tshogs pa dang / ston pa phun sum tshogs pa dang / mthu phun sum tshogs pa dang / gzhan kyi don gyi thabs phun sum tshogs pa dang / bcom ldan 'das rnam par snang mdzad kyi rgyu phun sum tshogs pa dang / rang bzhin phun sum tshogs pa dang /byang chub kyi rgyu phun sum tshogs pa dang / rang bzhin phun sum tshogs pa dang / byang chub kyi rnam par sprul pa byin gyis rlob pa phun sum tshogs pa'o/ /de la bcom ldan 'das zhes pa'i tshig gis spong ba phun sum tshogs pa ste/ nyon mongs pa dang shes bya'i sgrib pa thams cad spangs pa'i mtshan nyid do/ / gnas phun sum tshogs pa ni yon tan rnam pa brgyad dang ldan pa ste/ de la 'dir gnas phun sum tshogs pa brgyad ni 'di lta ste/ de bzhin gshegs pa thams cad lhag par gnas pa phun sum tshogs pa dang / sra zhing rgya che ba phun sum tshogs pa dang / byang chub chen po thugs su chud pa'i gnas phun sum tshogs pa dang /rdo rje 'dzin pa'i byang chub sems dpa' chen po rnams mngon par 'du ba phun sum tshogs pa dang / snga khang gi rtse mo rgya che ba phun sum tshogs pa dang / kha dog phun sum tshogs pa dang / dbyibs phun sum tshogs pa dang / gdan phun sum tshogs pa rnams so/ /de la de bzhin gshegs pa byin gyis rlob pa zhes pa'i tshig gis de bzhin gshegs pa thams cad lhag par gnas pa phun sum tshogs pa bstan to//rdo rje chen po rgya che ba/ /zhes pa'i tshig gis sra zhing rgya che ba phun sum tshogs pa'o/ /chos kyi dbyings kyi pho brang zhes pas ni byang chub chen po thugs su chud pa'i gnas phun sum tshogs pa'o//rdo rje 'dzin thams cad 'du ba/ /zhes pas ni rdo rje 'dzin pa'i byang chub sems dpa' rnams mngon par 'du ba phun sum tshogs pa'o/ /de bzhin gshegs pa'i mos pas rnam par rol pa mtha' dang dbus med cing rtse mo mtho ba zhes pas ni snga khang gi rtse mo rgya che ba phun sum tshogs pa'o//rin po che'i rgyal pos shin tu legs par brgyan pa 'byung ba zhes pas ni kha dog phun sum tshogs pa'o/ /khang bzangs chen po rin po che'i rgyal po'i zhes pas ni dbyibs phun sum tshogs pa'o/ /byang chub sems dpa'i lus kyi seng ge'i khri la bzhugs zhes pas ni gdan phun sum tshogs pa ste/ de dag ni phun sum tshogs pa rnam pa brgyad dang ldan pa ste gnyis pa'o/ /'khor phun sum tshogs pa ni rdo rje 'dzin nam mkha' dri ma med pa zhes pa nas kun du bzang po dang / byams pa dang / 'jam dpal dang sgrib pa thams cad rnam par sel ba zhes pa la sogs pas rig par bya ste de dag gis bskor zhing mdun du byas pa'o//ston pa phun sum tshogs pa ni lung dang rtogs pa'i chos ston pa ste/ de yang de bzhin gshegs pa'i nyi ma dus gsum las 'das par byin gyis brlabs nas/ sku dang gsung dang thugs mnyam pa nyid kyi gzhi zhes bya ba'i chos kyi sgo'i chos ston to zhes pa'i tshig gis so//mthu phun sum tshogs pa ni 'jig rten dang 'jig rten las 'das pa'i rnal 'byor pa'i gtso bo rnams kyis ma thob pa'i rnal 'byor gyi sprul pa thob pa ste skabs der/ de nas byang chub sems dpa' kun du bzang po la sogs pa de dag dang /gsang ba pa'i bdag po la sogs pa rdo rje 'dzin pa de dag bcom ldan 'das rnam par snang mdzad kyi byin gyi rlabs kyis sku mnyam pa nyid bkod pa mi zad pa'i mdzod rnam par bsgyings pa la zhugs so//de bzhin du gsung dang thugs mnyam pa nyid bkod pa mi zad pa'i mdzod rnam par bsgyings pa la zhugs te zhes bya ba gsungs so//gzhan gyi don gyi thabs phun sum tshogs pa ni skabs de thams cad du yang bcom ldan 'das rnam par snang mdzad kyi sku'i phrin las thams cad dang / gsung gi phrin las thams cad dang / thugs kyi phrin las thams cad sems can gyi khams thams cad la kun du gsang sngags kyi tshul gyi tshig dag gis chos ston par mthong ba zhes pa nas de bzhin du thams cad mkhyen pa'i ye shes kyang lha dang bcas pa'i 'jig rten rab tu sim par bgyid pa lags na zhes bya ba'i bar gyis gsungs so//gzhan yang rgyud 'dir bshad pa thams cad kyis ji ltar rigs par bcom ldan 'das rnam par snang mdzad rgyu phun sum tshogs pa dang /rang bzhin phun sum tshogs pa dang / de'i byang chub kyi rgyu phun sum tshogs pa dang / rang bzhin phun sum tshogs pa dang / byang chub kyi rnam par sprul pa byin gyis rlob pa'i rang bzhin phun sum tshogs pa ste/ sngar bshad zin pas 'dir ma bshad do//de lta bas na bcom ldan 'das rnam par snang mdzad kyi phun sum tshogs pa rnam pa bcu gcig gis ni rgyu 'di thams cad bsdus par blta'o/ /mdo sde dang rgyud gzhan dag tu 'di skad bdag gis thos pa 'byung la/ rgyud 'dir ma smos pa ni ston pa dang dus dang gnas nges pa dang nyan pa dang sdud par mdzad pa'i byang chub sems dpa' kun du bzang po dang /phyag na rdo rje la sogs pa rtogs pa gtso bor gyur pa'i phyir 'di skad bdag gis thos pa ma smos te/ rgyud 'di bshad pa yang bcom ldan 'das rnam par snang mdzad longs spyod rdzogs pa'i sku mngon par byang chub pa'i sku'i byin gyi rlabs kyis byang chub kyi snying por rtag tu bzhugs pas bshad de/dus dang gnas de nyid na nges par bzhugs pas dus gcig gi tshe zhes pa ma smos so/ /nyan pa po yang kun du bzang po la sogs pa de rnams thos pa snying por gyur pa ma yin gyi/ rtogs pa gtso bor gyur pas 'di skad bdag gis thos zhes ma smos so//mdo sde dang gzhung gzhan dag tu smos pa ni bcom ldan 'das longs spyod rdzogs pa'i sku dus dang gnas ma nges pa na yang bzhugs te/ bar bar ni 'og min gyi gnas na bzhugs shing chos 'chad/ res 'ga' ni ri rab kyi rtse mo na bzhugs shing chos 'chad pa dang /de bzhin du sprul pa yang res 'ga' ni rgyal po'i khab na bzhugs/ res 'ga' ni mnyan du yod pa la sogs pa'i gnas na bzhugs shing chos 'chad pa de de ltar gnas dang dus ma nges pas dus gcig gi tshe na zhes smos la/ nyan pa po yang 'phags pa nyan thos la sogs pa thos pa snying por gyur pa ste/rtogs pa gtso bor gyur pa ma yin pas na 'di skad bdag gis thos pa zhes ma smos so/ /bcom ldan 'das rnam par snang mdzad kyi phun sum tshogs pa rnam pa bcu gcig kyang rnam pa bzhir bsdus te/ bzhi gang zhe na/ skyes bu dang gnas dang 'khor dang dgos pa'o//de la bcom ldan 'das zhes pa ni nyon mongs pa dang shes bya'i sgrib pa bag chags yan chad dpyis phyin par shes rab kyis bshig ste med par byas pa ni bcom pa'o/ /gnyis su na bdud rnams bcom pa la yang bya ste/ mdor na nyon mongs pa dang shes bya'i sgrib pa spangs pa yang mngon par byang chub pa'i sku la bya ste/des ni skyes bu'i che ba'i bdag nyid bstan pa ste/ skyes bu'i che ba bstan pa de yang chos nyan pa'i sems can chos kyi rjes su 'brang ba dang / dad pa'i rjes su 'brang ba rnam pa gnyis las chos kyi rjes su 'brang ba ni 'chad pa'i skyes bu la mi rtog par chos bzang ngan rtog pas der zad la/dad pa'i rjes su 'brang ba ni 'chad pa'i skyes bu btsan pas de 'di la yid ches pa'i phyir dgos pa'i dgos par gyur pa'i skyes bu btsan pa de bstan to/ /gnas phun sum tshogs pa yang dad pa'i rjes su 'brang ba'i 'gro ba gzung ba'i phyir te/gnas de lta bu na bzhugs pas bcom ldan 'das kyi che ba'am btsun pa bstan pas so/ /'khor phun sum tshogs pa yang gcig pur mi bzhugs kyi 'khor de lta bus bskor cing bzhugs so zhes pas bcom ldan 'das kyi che ba'am btsun par bstan pa yin no/ /de'i skyes bu btsan par bstan pa na/dad pas rjes su 'brang ba'i 'gro ba dogs pa med par skyes bu de lta bu la mnyam par spro bas dad pa'i rjes su 'brang ba'i sems can gzung pa'i phyir bstan to/ /gnas bshad pa yang rnam pa gsum gyi phyir te skyes bu btsan pa dang / gnas de lta bu'i yon tan sgrub pa pos rjes su dran par byas na 'grub pa'i phyir dang /sangs rgyas dang byang chub sems dpas bcags pa'i gnas de mchod rten du 'gyur ba'i phyir ro/ /skyes bu btsan pa ni gong du bshad zin to/ /'khor phun sum tshogs pa yang rnam pa gsum ste/ skyes bu btsan pa dang de lta bu'i byang chub sems dpa' dang rdo rje 'dzin pa nam mkha' dri ma med pa la sogs pa chos nyan pa dang 'dzin pa'i mchog tu bstan pa dang /nyan pa'i mchog de dag bzhugs pas sdud par mdzad pa'i byang chub sems dpa'i dbang du gyur par bstan pa'o/ /skyes bu ni sngar bshad zin to/ /dgos pa ni rgyud 'dir rnam par snang mdzad mngon par byang chub pa'i rgyud dang /rang bzhin dbang chen dang chu la sogs pa'i dkyil 'khor sgrub pa dang / las bshad pa'i rim pa bzhin du bsgrubs nas mngon par mtho ba dang nges par legs pa'i bde ba thob par dgongs pa'i phyir ro/ /de ltar phun sum tshogs pa rnam pa bcu gcig po bzhi po 'dir bsdus so//de la bcom ldan 'das de bzhin gshegs pa byin gyis rlob pa zhes pa ni 'das pa dang ma 'ongs pa dang da ltar gyi de bzhin gshegs pa thams cad byang chub kyi snying po na gnas pa la bya ste/ byin gyis rlob pa zhes pa'i tshig ni gnas pa'i don to/ /skabs 'dir byang chub kyi snying po na 'das pa dang ma 'ongs pa dang da ltar gyi sangs rgyas thams cad gnas pas sangs rgyas mang po gnas par 'gyur ba'i dogs pa bsal ba la sogs pa ni bsdus pa'i don nyid du zhib tu bshad pas 'dir ma smos so//rdo rje chen po ni rdo rje de nyid phal pa ma yin gyi mchog gam dam pa la chen po zhes bya'o/ /rgya che ba ni rdo rje dang ldan pa'i khang pa de ni yangs shing rgya che ba'am rdo rje de dag nyid grangs mang ba la bya'o//chos kyi dbyings kyi pho brang zhes bya ba ni de la chos ni phung po dang khams dang skye mched do/ /dbyings ni rang bzhin te phung po la sogs pa'i chos kun rdzob pa'i mtshan nyid rigs pas brtag mi bzod pa ste/ stong pa nyid ni de dag gi rang bzhin te/ stong pa'i rang bzhin khong du chud pa ni pho brang ngam 'byung ba zhes bya'o/ /rdo rje 'dzin thams cad 'du ba zhes pa de la rdo rje ni yang dag pa ma yin pa'i lta ba 'joms pa'i shes rab ste/ shes rab de dang ldan pa'i byang chub sems dpa' ni rdo rje 'dzin pa'o/ /'du ba'i tshig ni gnas phun sum tshogs pa'i skabs su bshad zin to//rdo rje 'dzin ma yin pa'i byang chub sems dpa' yang der mi 'du ba ni ma yin mod kyi/ 'dir sngags bshad pa'i skabs yin pas rdo rje 'dzin pa gtso bor smos so/ /rdo rje 'dzin pa yang rnam pa gsum gyi phyir 'dzin te/ so so'i rnam par thar pa'i sgo ston pa dang /rig pa'i brtul zhugs dang mchod pa'i yan lag tu 'gyur ba'i phyir 'dzin pa'o/ /pha rol tu phyin pa las byung ba'i byang chub sems dpa' rnams kyi phyag rgya ut+pal dang pad+mo la sogs pa 'dzin pa yang so so'i rnam par thar pa'i ston par rig par bya'o/ /de bzhin gshegs pa'i mos pas rnam par rol pa zhes pa byang chub sems dpa'i spyad pa spyod pa na de lta bu'i gnas la sogs par mos shing smon pa las ji ltar smon pa bzhin du thob nas spyod pa ni rol pa'o//mtha' dang dbus med cing rtse mo mtho ba zhes pa ni mtha' gnyis dmigs su med pas na dbus kyang dmigs su med pa'o/ /rtse mo mtho ba ni de bzhin gshegs pa'i dbu'i gtsug tor dang 'dra ste rtse mo ltar mi snang ba la bya'o//rin po che'i rgyal pos shin tu legs par brgyan pa 'byung ba zhes pa ni kha dog phun sum tshogs pa ste snga khang de nyid rin po ches spras pa la bya'o/ /khang bzangs chen po rin po che'i rgyal po'i nang na zhes pa ni dbyibs bshad pa'o//byang chub sems dpa'i lus kyi seng ge'i khri la bzhugs zhes pa ni sngon gyi smon lam gyis seng ge'i lus su gyur cing seng ge'i khri byed pa'am/ byang chub sems dpa'i lus nyid kyis bcom ldan 'das kyi gdan du byed de seng ge'i bya ba byed pa la bya'o/ /bcom ldan 'das gnas de lta bu na bzhugs pa yang 'khor byang chub sems dpa' rdo rje 'dzin nam mkha' dri ma med pa la sogs pa 'di rnams dang bzhugs te/byang chub sems dpa' rnams kyang don dang rjes su mthun pa'i mtshan can sha stag gzhung las 'byung bas bskor zhing mdun gyis bltas pa la chos 'chad do//'di lta ste/ de bzhin gshegs pa'i nyi ma dus gsum las 'das par byin gyis brlabs nas sku dang gsung dang thugs mnyam pa nyid kyi gzhi zhes bya ba'i chos kyi sgo'i chos ston to zhes pa chos kyang rnam pa gnyis te/rtogs pa'i chos dang lung gi chos so/ /de la rtogs pa'i chos kyang rnam pa gnyis te/don dam pa dang kun rdzob pa'o/ /don dam pa ni de bzhin nyid kyi mtshan nyid stong pa'i rang bzhin no/ /kun rdzob kyi chos ni de bzhin gshegs pa'i sku dang gsung dang thugs mi zad pa'i rgyan gyis khams gsum khyab par ston pa'o/ /lung gi chos ni mdo sde dang tshigs su bcad pa la sogs pa gsung rab yan lag bcu gnyis so//de rnams las gang bshad ce na/ skabs 'dir lung gi chos rgyud 'di nyid bshad pa ste/ de yang gang zhe na/ sku dang gsung dang thugs mnyam pa nyid kyi gzhi zhes bya ba'i chos kyi sgo'i chos ston to zhes gsungs te/ de la sku dang gsung dang thugs mnyam pa nyid ces pa mnyam pa gsum gyis rig par bya ste/bcom ldan 'das kyi sku dang gsung dang thugs kyi 'khor los sems can gyi lus dang ngag dang yid ji snyed pa de snyed du khyab pas mnyam pa nyid do/ /gnyis su na bcom ldan 'das kyi sku dang gsung dang thugs kyi 'khor los sems can gyi don du sbyor ba na/ de bzhin gshegs pa'i sku'i 'khor los gsung dang thugs kyi bya ba yang byed/ gsung gi 'khor los kyang sku dang thugs kyi bya ba yang byed/ thugs kyi 'khor los kyang sku dang gsung gi bya ba yang byed de/ de ltar mtshungs par byed pas na mnyam pa nyid do/ /gsum du na de bzhin gshegs pa'i sku la sogs pa dang /sems can gyi lus dang ngag dang yid stong pa nyid kyi rang bzhin du dbyer med cing ro gcig pas na mnyam pa nyid do/ /chos kyi sgo zhes pa ni de lta bu'i sku dang gsung thugs mnyam pa nyid kyi gzhi de bshad pas rtogs pa'i chos la 'jug par gyur pa'i sgo yin pas sgo zhes gsungs so/ /de bzhin du lung gi chos gzhan rnams kyang rtogs pa'i chos la 'jug pa'i sgo lta bur rig par bya'o//de la chos 'chad pa yang sku bzhi gang gis 'chad ce na/ chos kyi sku dang byang chub kyi snying po na bzhugs pa'i sku ni mi g.yo ba nyid tshig tu brjod pa las 'das pas na tshig gis chos mi 'chad de/ de'i byin rlabs kyis longs spyod rdzogs pa dang sprul pa'i skus 'chad do//de la skabs 'dir yang bcom ldan 'das rnam par snang mdzad longs spyod rdzogs pa'i skus sku dang gsung dang thugs mnyam pa nyid kyi gzhi zhes bya ba'i chos kyi sgo 'chad de/ de yang 'di lta ste/ de bzhin gshegs pa'i nyi ma dus gsum las 'das par byin gyis brlabs nas 'chad de/chos kyi sku de nyi ma lta bur snang ba'i rang bzhin yin pas na de bzhin gshegs pa'i nyi ma zhes bya la/ chos kyi sku nyi ma dang zla ba la sogs pa'i dus las 'das te/ de bas na dus gsum las 'das pa zhes gsungs pa yin no/ /dus gsum las 'das pa ni 'das pa'i dus dang / da ltar gyi dus dang ma 'ongs pa'i dus las 'das pa'o//de dag gis ni ston pa phun sum tshogs pa bshad pa yin no/ /mthu phun sum tshogs pa bshad pa ni gzhung las de nas byang chub sems dpa' kun du bzang po la sogs pa de dag dang / gsang ba pa'i bdag po la sogs pa rdo rje 'dzin de dag ces pa nas gsang sngags kyi tshul gyi tshig rnam par dag pa'i tshig dag gis chos ston pa dag kyang mthong ngo zhes pa'i bar du 'byung ba ste/de la bcom ldan 'das rnam par snang mdzad kyi byin gyi rlabs kyis sku mnyam pa nyid bkod pa mi zad pa'i mdzod rnam par bsgyings pa la zhugs so zhes pa de la kun du bzang po la sogs pa'i byang chub sems dpa' rnams sa bcu la sogs pa rab tu thob pa na rang gi ting nge 'dzin dang rnam par thar pa'i sgo nas mthu dang rdzu 'phrul 'byin pa dang /sangs rgyas kyi zhing rnam par brgyan pa la sogs pa byas pas mgu zhing de las gzhan pa'i bya ba med do snyam pa'i blo skye ba la/ bcom ldan 'das rnam par snang mdzad kyi dpal be'u'i 'od mchog bkye bas byang chub sems dpa' de rnams kyi gtsug tu phog ste/de'i byin gyi rlabs kyis kun du bzang po la sogs pa byang chub sems dpa' de rnams bcom ldan 'das rnam par snang mdzad kyi sku mnyam pa nyid bkod pa mi zad pa'i mdzod rnam par bsgyings pa la zhugs so/ /de bzhin du gsung dang thugs mnyam pa nyid bkod pa mi zad pa'i mdzod rnam par bsgyings pa la yang zhugs te/de la mnyam pa nyid ni gong du bshad pa rnam pa gsum mo/ /bkod pa ni skabs 'dir rnam pa sna tshogs su blta'o/ /mi zad pa ni chos kyi sku'i byin gyi rlabs kyis sku la sogs pa de dag nam 'khor ba yod kyi bar du gnas pa'o//mdzod ni bcom ldan 'das rnam par snang mdzad kyi sku de nyid la bya ste/ sku de las ji ltar 'dul ba dang rjes su mthun pa'i sku la sogs pa'i 'khor lo zad mi shes pa 'byung ba'i phyir la/ sku la sogs pa'i 'khor lo de dag nyid sus kyang zil gyis mi non par rang gi bya ba la 'jug pas ni rnam par bsgyings pa'o//'on kyang bcom ldan 'das rnam par snang mdzad kyi sku'am gsung ngam thugs la ni 'jug pa'am ldog pa yang mi dmigs so zhes pa la 'ga' zhig rtog pa skye ste/ gdul bya'i 'gro ba ni rnam pa bzhi ste/ shes bya dang nyon mongs pa'i sgrib pa spangs pa'i rnam par rtog pa dar la tsam gyis bsgribs pa'i lhag ma lus pa'i byang chub sems dpa' rnams dang /mos pa rnam par dag pa spyod pa'i sa mngon du byas pa rnams dang / nyan thos dang rang sangs rgyas nyon mongs pa'i sgrib pa spangs la/ shes bya'i sgrib pa ma spangs pa phyogs gcig pa rnams dang /nyon mongs pa dang shes bya'i sgrib pa ma spangs pa'i 'gro ba sna tshogs pa rnams so/ /de bas na bcom ldan 'das kyi sku la 'jug pa dang ldog pa mi dmigs te/ rnam par mi rtog na yongs su dag pa'i byang chub sems dpa' rnams kyi spyod yul du 'gyur gyi/ 'og ma rnams kyi spyod yul du 'gyur ram mi 'gyur snyam du dogs pa skyen/de'i lan ni bcom ldan 'das mngon par byang chub pa nyid kyi tshe na rnam par mi rtog par sngon gyi smon lam gyi shugs dang / chos nyid kyi lhun gyis grub pa nyid du longs spyod rdzogs pa'i sku dang sprul pa'i skus ji ltar snod du gyur pa'i sems can gyi don thams cad du mdzad de/de bas na gzhung las thams cad du yang bcom ldan 'das rnam par snang mdzad kyi sku'i phrin las thams cad dang / gsung gi phrin las thams cad dang / thugs kyi phrin las thams cad sems can gyi khams thams cad la kun du gsang sngags kyi tshul gyi tshig 'di dag gis chos ston par mthong zhes gsungs pa yin te/de la mthong ba ni byang chub sems dpa' kun du bzang po la sogs pa'i spyod yul du gyur pa ste/ de yang rnam pa thams cad du mthong ba ni ma yin mod kyi/ rang gi mthu dang spyod yul shas che chung gis bcom ldan 'das kyi sku la sogs pa'i 'khor lo mthong ba'am rtogs pa la bya ste/rnam pa thams cad du rtogs shing mthong na de bzhin gshegs pa dang bye brag med par gyur pa'i phyir ro/ /des na 'phags pa kun du bzang po la sogs pa de rnams nyid bshad pa'i chos su 'jug pa'i zhar la sngags rgyud dang rtog pa la sogs pa'i chos kyi bdag nyid rnams la zhugs nas bshad pa'i chos kyi rim par bsdu bar mdzad pas ji ltar rjes su rtogs pa de bstan par yang gsungs pa yin te/thams cad du yang bcom ldan 'das rnam par snang mdzad kyi sku'i phrin las thams cad dang / gsung gi phrin las thams cad dang thugs kyi phrin las thams cad sems can gyi khams thams cad la kun du gsang sngags bshad par bya ba ste/thams cad du zhes pa la dus zhes khong nas dbyung ngo / /des na tshig gi don ni 'di lta ste/ sa dang pha rol tu phyin pa rdzogs pa'i dus dbang byang chub thob pa'i dus su shes pa'o/ /de ci 'dra ba zhig gis she na/ bcom ldan 'das rnam par snang mdzad kyi sku'i phrin las thams cad dang /gsung gi phrin las thams cad dang / thugs kyi phrin las thams cad ces gsungs pa yin te/ de la 'dir sku'i phrin las la sogs pa'i tshig gis bcom ldan 'das kyi sa dang pha rol tu phyin pa rdzogs par byed pa dang / de bzhin du byang chub thob pa'i rgyur gyur pa sku dang gsung dang thugs kyi bya ba ste nan tan no//des bcom ldan 'das kyis ye shes la mthu'i khyad par bsags pa gang yin pa de la phrin las zhes brjod do/ /de lta bu'i mthu'i mtshan nyid las kyi dkyil 'khor gyi lha'i gzugs su gyur pa'i spyod pa ste/ sems can gyi khams thams cad la kun du gsang sngags kyi tshul gyi tshig dag gis chos ston par mthong zhes gsungs pa yin no//de la sems can gyi khams thams cad la zhes pa ni/ 'jig rten gyi khams rab 'byam na 'gro ba rigs drug tu gtogs pa'i sems can las dang nyon mongs pa'i dbang gis tshe thob pa rnams la zhes dgongs so/ /kun du zhes pa ni 'jig rten gyi khams rab 'byam thams cad du shes par bya'o//gsang sngags kyi tshul gyi tshig dag gis chos ston pa zhes pa de la shes pa dang skyob par ldan pa'i phyir sangs rgyas dang byang chub sems dpa' rnams ni sngags su gsungs la/ de dag gi rnam par thar pa'i sgo la sogs pa'i tshig rnams dang / der byin gyis brlab pa'i yi ge dang tshig rnams kyang sngags kyi tshig tu gsungs so//sngags de rnams kyi rgyu dang rang bzhin dang 'bras bu thob pa'i thabs lam ni tshul te/ de go zhing rtogs par byed pa'i chos kyi tshig go/ /de nyid la sngags kyi tshig ces kyang gsungs so/ /bcom ldan 'das kyi phrin las sngags la sogs pa'i lhar snang bar gyur pa de rnams kyis gsang sngags kyi tshul gyi mtshan nyid bshad pa'i chos ston par kun du bzang po la sogs pa'i byang chub sems dpa' de rnams kyis mthong ngo zhes pa'o//'dis ni don rnam pa gsum gsungs pa yin te/ de bzhin gshegs pa'i sku la sogs pa'i phrin las rnams kyi las kyi dkyil 'khor gyi lha'i gzugs su gyur pa dang /de yang ji ltar snod du gyur pa'i gdul bya'i 'gro ba 'dul nus pas rjes su mthun pa dang / de ston pa'i chos sngags kyi tshig tu'o/ /don 'di yang bcom ldan 'das kyis rgyud 'dir gzhung 'di gsal bar bstan te/ de gsungs pa/bcom ldan 'das kyi rang gi sku la sogs pa las kyi lha'i gzugs su gyur pa'i phyir de bzhin gshegs pa'i thogs pa med pa'i stobs bcu'i mos pa las du ma'i kha dog dang dbyibs su bkod pa'i bdag gi ngo bo bskal pa bye ba khrag khrig brgya stong dpag tu med par sbyin pa dang / tshul khrims dang /bzod pa dang / brtson 'grus dang / bsam gtan dang shes rab kyi pha rol tu phyin pa'i bsod nams las grub pa'i lus 'byung ngo zhes pa la sogs pa'o/ /de yang bcom ldan 'das kyi sku la sogs pa'i las rnams lha la sogs pa'i gzugs su gyur pa de ni ci yang rung ba ma yin gyi/ sems can 'dul nus par snang ba'i rang bzhin kho na ste/gang gsungs pa/ bcom ldan 'das snyoms par zhugs ma thag tu de nas de nyid kyi tshe/ sems can gyi khams ma lus pa nges par 'byung bar byed pa'i sgo spu'i bu ga thams cad nas bsam pa ji lta ba bzhin las dang tshe dang rnam par smin pa'i 'bras bu za ba dang zar 'jug pa'i gzugs dang /kha dog dang / dbyibs dang / nga ro dang / 'gro ba dang / spyod pa dang nges pa'i tshig brjod pa sems can thams cad so so so sor yang dag par mgu bar byed pa chos kyi dbyings kyis rnam par bskyed pa'i sku rnams byung bar gyur to/ /byung nas kyang nam mkha' dang mnyam pa'i 'jig rten gyi khams rab 'byam rnams su sgra dbyangs gcig gis chos kyi dbyings khyab par rnam par rig par byed pa/de bzhin gshegs pa 'byung bar 'gyur ba'i tshigs su bcad pa 'di sgrogs par gyur to zhes pa la sogs pa dang / de bzhin du de dag gis bshad pa'i tshig sngags la sogs par bya ba'i phyir dang /der byin gyis brlab pa'i phyir gsungs pa/ ji ltar na de bzhin gshegs pa rnams gsang sngags kyi tshul yig 'bru dag tu byin gyis brlab ce na/ gsang ba pa'i bdag po de la de bzhin gshegs pa rnams kyis bskal pa bye ba khrag khrig brgya stong du mar yang dag par bsgrub pa'i bden pa'i tshig gang yin pa dang /'phags pa'i bden pa bzhi dang / dran pa nye bar gzhag pa bzhi dang / rdzu 'phrul gyi rkang pa bzhi dang / de bzhin gshegs pa'i stobs bcu dang / pha rol tu phyin pa drug dang / byang chub kyi yan lag rin po che bdun dang / tshangs pa'i gnas pa bzhi dang / sangs rgyas kyi chos ma 'dres pa bco brgyad gang dag yin pa dang /gsang ba pa'i bdag po mdor na de bzhin gshegs pa rnams kyi thams cad mkhyen pa'i ye shes gang yin pa de thams cad de bzhin gshegs pa rnams nyid bsod nams dang ye shes kyi stobs dang / sngon gyi smon lam mkhyen pa'i stobs dang / chos kyi dbyings kyi byin gyis brlabs nas sems can rnams la skal ba ji lta ba bzhin du gsang sngags kyi cho ga yang dag par rab tu ston to zhes pa la sogs pa'o//de la chos kyi sku rtog pa thams cad rab tu med par gnas pa las ji ltar na de bzhin gshegs pa de lta bu'i sngags kyi lha tshogs 'byung bar 'gyur zhes 'ga' zhig smra na de'i phyir bcom ldan 'das kyis 'di gsungs te/lus kyi bye brag ji snyed pa/ /brjod pa las ni mang du 'gyur/ /de bzhin sngags kyi mgon po yi/ /bye brag dag kyang grangs med gsungs/ /ji ltar yid bzhin nor bu ni/ /dpal ldan 'dod pa'i don sgrub pa/ /de bzhin 'jig rten sgron ma yi/ /sku yang don rnams thams cad sgrub//gsang ba pa'i bdag po chos kyi dbyings rnam par mi rtog pa ji ltar dgos pa thams cad mngon par sgrub ce na/ gsang ba pa'i bdag po 'di lta ste/ dper na nam mkha'i khams ni sems can yang ma yin/ srog kyang ma yin/ shed las skyes pa yang ma yin/ byed pa po yang ma yin/tshor ba po yang ma yin/ gzung ba yang ma yin/ 'dzin pa yang ma yin zhing rtog pa dang rnam par rtog pa thams cad dang bral mod kyi/ 'on kyang sems can gyi khams ma lus pa rnam par 'gro ba dang 'ong ba la sogs pa thams cad byed de/ 'di la ni dogs pa med do/ / de bzhin rnam par mi rtog pa'i/ /thams cad mkhyen pa gnas med 'di/ /'gro ba rnams kyi phyi dang nang / /thams cad nges pa nyid du sgrub/ /ces so/ /gsung 'di la yang bcom ldan 'das kyi dgongs pa 'di lta bu yin par khong du chud de/ de bzhin gshegs pa chos kyi sku la rnam par gnas pa la rnam par rtog pa med kyang sngon gyi smon lam gyi shugs kyis lha'i lus la sogs pa thams cad du rab tu snang na/de la rnam par rtog pa'i go skabs ga la yod ces so/ /sems can las kyi tshe rnam par bskyed pa rnams zhes pa nas/ rnam par dag pa'i tshig dag gis chos ston pa dag kyang mthong ngo zhes pa'i bar bshad par bya ste/de la rdo rje 'dzin pa dang / kun du bzang po dang / phyag na pad+mo'i lus dang 'dra ba zhes pa ni bcom ldan 'das rnam par snang mdzad mngon par rdzogs par byang chub pa'i byin gyi rlabs sems can las kyi tshe bskyed pa rnams dang / las kyi tshe bkag ba rnams yang srid pa'i myu gu mngon par bskyed pa'i phyir chos 'chad do//de la las kyis rnam par bskyed pa ni/ mos pas spyod pa'i sa gnas pa na sems gsum sbyong ba dang sa bcu la sogs pa'i yon tan ji lta bu yin pa de nges par shes shing de la mos pas nyon mongs pa kun nas mi ldang bar rnam par mnan te/ sems sbyang ba la sogs pa'i dge ba'i las kyi dbang gis ji ltar smon pa bzhin du brgya byin dang tshangs pa la sogs pa gang 'dod par skye ba ni las kyi tshe rnam par skyed pa yin la/de yang sems dang po bskyed pa nas sa bcu pa'i bar du'o/ /de la sems dang po bskyed pa ni sa dang po rab tu dga' ba la bya'o/ / las kyi tshe bkag pa ni 'phags pa nyan thos nyon mongs pa'i sgrib pa spangs pa rnams phung po lhag ma med pa'i mya ngan las 'das pa'i tshe/ pad+mo dam pa'i snying po la bskal pa brgyad cur gnas nas/ tshe 'gog par byed pa de la byang chub sems dpa' de rnams kyi tshe 'gog pa de las bzlog ste/yang srid pa'i myu gu bskyed nas sa bcu la 'jug pa dang rdzogs par bya ba'i phyir chos 'chad do/ /'di nyid la yongs su rdzogs par bya ba zhes pa ni/ sngags kyi tshig rnam par dag pa 'di nyid kyis zhes bya bar dgongs te/ sngags kyi tshig rnam par dag pa zhes pa ni phyag na pad+mo dang phyag na rdo rje la sogs pa'i sras su gyur pa'i sems can rnams dang /las kyi tshe bkag pa'i sems can rnams ni sems can phal ba bzhin du nyon mongs pa'i dbang du mi 'gro la/ de rnams la chos bshad pa yang sa dang po nas brtsams nas sa bcu rdzogs par bya ba'i phyir rnam par dkar ba'i chos sha stag yin pas sngags kyi tshig rnam par dag pa'o//gzhung las/ de nas yang bcom ldan 'das gsang ba pa'i bdag po phyag na rdo rje 'khor 'dus pa de nyid na 'dug pas/ bcom ldan 'das la 'di skad ces gsol to zhes pa nas/ bcom ldan 'das ye shes 'di'i rgyu ni gang /rtsa ba ni gang / mthar thug pa ni gang lags zhes pa'i bar du 'byung ba la/ bcom ldan 'das kyi sku dang gsung dang thugs kyi phrin las las byung ba thams cad mkhyen pa'i ye shes de sems can rnams la rnam par phye ste tshul sna tshogs dang / thabs sna tshogs kyis bshad pa de dag ji ltar mthong ba bcom ldan 'das la slar bzlas nas thams cad mkhyen pa'i ye shes de'i rgyu dang rtsa ba dang mthar thug pa dris pa yin gyi/ji ltar zhes pa dang 'og nas 'byung ba'i tshig rnams ni dri ba ma yin te/ de rnams bdag gis ji ltar rtogs pa rnams gsol nas/thams cad mkhyen pa'i ye shes kyi rgyu dang rtsa ba dang mthar thug pa dri ba'i spyir smos pa'o/ /de la bcom ldan 'das dang de bzhin gshegs pa ni gong du bshad la/ dgra bcom pa ni nyon mongs pa'i dgra bcom pa'am mchod par 'os pa'o/ /yang dag par rdzogs pa'i sangs rgyas rnams kyis thams cad mkhyen pa'i ye shes brnyes nas zhes pa ni snying po byang chub na yang dag par bzhugs pa'o//rnam pa thams cad mkhyen pa'i ye shes ni kun rdzob dang don dam pa rnam pa gnyis te/ kun rdzob ni stobs bcu dang mi 'jigs pa bzhi dang sangs rgyas kyi chos ma 'dres bco brgyad la sogs pa rnam pa thams cad mkhyen pa'o//don dam pa ni stong pa nyid du mkhyen pa'o/ /rnam par phye ste zhes pa ni so sor bshags pa'i don te thams cad mkhyen par ro gcig tu gyur cing rdzogs pa'i mtshan nyid ni 'og nas 'chad do/ /mi dang lhar skye ba la sogs pa 'jig rten pa'i dge ba bcu grub pa dang /nyan thos la sogs pa thams cad kyang thams cad mkhyen pa'i cha'o/ /ji ltar zhe na/ 'jig rten pa'i bsod nams kyang thams cad mkhyen par 'gyur ba'i brgyud pa'i rgyu ste/ thams cad mkhyen pa'i cha shas yod pas na rgyur 'gyur la/ gzhan yang dngos dang brgyud pa nas brgyud pa'i rang bzhin yin par rig par bya'o//byang chub sems dpa'i spyad pa spyod pa na dge ba'i tshogs rnams thams cad mkhyen pa'i ye shes la bsags pa de lhun gyis grub pa nyid du sems can rnams la rnam par phye ba ni tshul la sogs pa sna tshogs su bstan pa ste/ de la tshul sna tshogs zhes pa ni/kha cig la ni nyan thos kyi theg pa'i tshul zhes pa nas mngon par shes pa lnga'i tshul gyi bar te/ de rnams so so'i rnam par grol ba'i lam la bya'o/ /bsam pa sna tshogs shes pa ni kha cig la ni lhar skye bar bya ba zhes pa nas mi'am ci'i bar du skye bar bya ba'i phyir chos ston zhes pa'i bar te/de rnams su skye bar 'dod pa'i bsam pa dang rjes su mthun par chos 'chad pa la bya'o/ /thabs sna tshogs kyi tshul gyis chos ston zhes pa ni/ de la sems can la la sangs rgyas kyis gdul bar bya ba dag gis ni sangs rgyas kyi gzugs su mthong zhes pa nas spyod lam rnam pa sna tshogs su bzhugs par mthong la zhes pa'i bar te/tshul sna tshogs dang bsam pa sna tshogs 'chad pa yang thabs yin mod kyi/ de dag nyid sangs rgyas la sogs pa'i skus sems can de dag gi rang rang gi skad kyi tshul du smra zhing / so so'i spyod lam du rnam par gnas par ston pas na thabs kyi yang thabs su blta'o//spyod lam rnam pa sna tshogs su zhes pa ni sangs rgyas dang nyan thos la sogs pas 'dul ba'i sems can de dag gi spyod lam dang rjes su mthun pa'i gzugs su 'gyur zhing ston pa la bya'o/ /thams cad mkhyen pa'i ye shes de yang 'di ltar/ de bzhin gshegs pa'i rnam par grol ba'i ror ro gcig pa legs so zhes pa ni de ltar tshul sna tshogs dang /bsam pa dang thabs sna tshogs kyi sgo nas rnam pa tha dad pa du mar spros pa yang thun mong du de bzhin gshegs pa'i rnam par grol ba nyon mongs pa dang shes bya'i sgrib pa spangs pa/ rtog pa'i bag chags kyi gnas las shin tu 'das pa'i mtshan nyid du ro gcig tu 'gyur ba ni/dper na bu ram shing rnam pa mang po'i khu ba las bu ram du byas na bu ram shing de rnams kyi so so'i ror dbyer med de ro gcig pa dang 'dra'o/ /bcom ldan 'das 'di lta ste dper bgyi na/ nam mkha'i khams ni rtog pa dang rnam par rtog pa thams cad dang bral ba ste zhes pa nas lha dang bcas pa'i 'jig rten rab tu sim par bgyid pa lags zhes pa'i bar gyis ni thams cad mkhyen pa'i ye shes de'i rang bzhin phun sum tshogs pa dang mngon par mtho ba'i gzhan gyi don phun sum tshogs pa dang spong ba phun sum tshogs pa dang /nges par legs pa thob pa'i gzhan gyi don phun sum tshogs pa thob par dpe dag gis bstan te/dpe dag gis thams cad mkhyen pa'i ye shes de sngon gyi smon lam gyi shugs kyis lhun gyis grub pa nyid du rnam par mi rtog mi dpyod par tshul sna tshogs la sogs pa'i sgo nas sems can gyi don byed par yang bstan to/ /de la nam mkha'i dpes ni rang bzhin phun sum tshogs pa bstan te/nam mkha' ji ltar rtog pa dang dpyod pa'i bag chags kyi gnas med pa de bzhin du thams cad mkhyen pa'i ye shes de la rtog pa dang rnam par rtog pa med de/ rnam par rtog pa dang rnam par dpyod pa med ces pa'i don to/ /de la de ltar thams cad mkhyen pa'i ye shes rnam par mi rtog cing sems pa med pa yin na/sems pa med par ji ltar lus la sogs pa'i rgyun 'byung zhing sems can gyi don byed snyam du dogs pa la sa'i dpes rnam par mi rtog bzhin du mngon par mtho ba'i gzhan gyi don phun sum tshogs pa byed par bstan te/ de la sa ni rtog pa dang rnam par rtog pa med bzhin du rtsa ba dang 'bras bu dang /me tog la sogs pas sems can thams cad kyi gsos su 'gyur bar byed do/ /de bzhin du thams cad mkhyen pa'i ye shes de yang rtog pa dang rnam par rtog pa med bzhin du sngags kyi lha la sogs pa'i sgor ston te/ sems can rnams kyis kyang sngags kyi lha la sogs pa bsnyen cing bzlas pa la sogs pa'i sgo nas mnyes par byas pas mngon par mtho ba'i mtshan nyid mi dang lha'i longs spyod la sogs pa thob par 'gyur ro//me'i dpes ni spong ba phun sum tshogs pa bstan te/ ji ltar mes rtsi shing la sogs pa thams cad bsregs kyang sreg par 'gyur ba'i mthu mi zad do//de bzhin du thams cad mkhyen pa'i ye shes de yang mi shes pa'i bud shing thams cad sreg ste/ rgyu'i tshe byang chub sems dpa'i spyod pa sa dang pha rol tu phyin pa la sogs pa'i rim gyis mi shes pa la sogs pa nyon mongs pa mi mthun pa'i phyogs rnams sel zhing med par byed pa ni bud shing sreg pa'o//gnyis su na 'bras bu'i tshe thams cad mkhyen pa nyid ni mi shes pa med pa'i mtshan nyid yin pas na mi shes pa'i bud shing sreg pa'i rang bzhin no/ /des gong ma'i spong ba phun sum tshogs pa de nyid kyang des bag chags thams cad ma lus par spong ngo / / zhes rlung gi dpe 'og mas bstan te/ de bas na rlung gi khams ni rdul thams cad sel bar bgyid pa lags so zhes gsungs so/ /de la rdul ni phra ba'i mtshan nyid de/ de bzhin du thams cad mkhyen pa'i ye shes kyis mi shes pa'i bag chags phra mo'i mthar thug pa spangs pa la bya'o/ /chu'i dpes ni nges par legs pa'i gzhan gyi don phun sum tshogs pa bstan te/ji ltar chu des tsha ba la sogs pas gdungs pa'i sems can gyi lus sim par byed pa de bzhin du thams cad mkhyen pa'i ye shes de yang sems can thams cad kyi sdug bsngal dang / 'dod chags la sogs pa'i nyon mongs pa rnams kyis gdungs pa zhi bar byed pa nges par legs pa'i mtshan nyid mya ngan las 'das pa la sbyor zhing rdzogs par byed pas na/lha dang bcas pa'i 'jig rten rab tu sim par bgyid pa lags zhes pa'o/ /de dag ni thams cad mkhyen pa'i tshul sngon chad bcom ldan 'das kyis bka' stsal pa las/ phyag na rdo rje bdag nyid kyis 'di ltar rtogs so zhes gsol ba ste bdag nyid kyis rtogs par bstan pa yang chos gsung ba po spro ba bskyed pa'i phyir yin no//de dag gi rang bzhin de ltar rtogs mod kyi de dag gi rgyu gtso bo'i rgyu dang / rgyu'i rgyu dang mthar phyin par byed pa'i rgyu gang lags zhes dris pa ni 'di'i rgyu ni gang / rtsa ba ni gang / mthar thug pa ni gang lags zhes bya ba yin no//de la 'phags pa phyag na rdo rjes tshul sna tshogs la sogs pa dang de bzhin gshegs pa'i rnam par grol ba'i ror ro gcig par rtogs pa de ci rtogs pa'i shes rab kyis sam/ thos pa'i shes rab kyis shes/ gal te rtogs pa'i shes rab kyis shes na ni de bzhin gshegs pa dang khyad par med la/thos pa'i shes rab kyis shes na yang sems can tha mal pa dang 'dra bar 'gyur ro snyam du dogs na/ lan ni shes rab de gnyi gas shes pa la nyes pa med de/ bcom ldan 'das kyi sku mi zad pa'i rgyan la sogs pa la 'jug pa na rang gi mthu dang 'tsham pa'i spyod yul gyis shes kyi/bcom ldan 'das ltar rnam pa thams cad du shes pa ni ma yin pas khyad par med par mi 'gyur la thos pa yang rtogs pa gtso bor gyur pa yin gyi/ sems can tha mal pa ltar thos pa tsam gtso bor gyur pa ma yin pas sems can tha mal pa dang khyad par med par mi 'gyur ro/ /gnyis su na rtogs pa'i shes rab kyis rnam pa thams cad du shes na yang nyes pa med de bcom ldan 'das kyi byin gyi rlabs kyis pha rol gyi sems shes pa bzhin du thams cad mkhyen pa'i ye shes kyi spyod yul rnam pa thams cad du shes par 'gyur ro//de la bcom ldan 'das la phyag na rdo rjes thams cad mkhyen pa'i ye shes de'i rgyu dang rtsa ba dang mthar thug pa dris pa la legs so zhes bya ba'i tshig lan gsum gsungs pa las snga ma ni don bzang po dris pas mnyes shing bstod pa'i tshig yin la/gnyis pa ni dri ba'i tshig de nyid legs pa la bya zhing / tha ma gcig ni phyag na rdo rje la bya ste/ de lta bu'i don bzang po 'dri zhing sems can la phan gdags pa'i phyir dris pa legs so zhes gsungs pa'o//shin tu legs par nyon la yid la zung shig ces bya bas ni snod bzhi las bzlog par gsungs te/ nyon cig ces pa ni snod kha sbub pa las bzlog pa'o/ /legs par zhes pa ni snod glo rdol can las bzlog pa'o//shin tu zhes pa ni snod mi gtsang ba las bzlog pa'o/ /yid la zung shig ces pas ni snod zhabs rdol las bzlog pa'o/ /rgyu ni byang chub kyi sems so/ /rtsa ba ni snying rje chen po'o/ /mthar thug pa ni thabs so zhes pa de la byang chub kyi sems la yang rnam pa gnyis te/ byang chub kyi phyir sems pa dang /byang chub kyi rang bzhin gyi sems so/ /byang chub kyi phyir sems pa ni smon pa dang 'jug pa'i sems dag kyang yin mod kyi skabs 'dir dang po'i byang chub kyi sems la bya ste/ sa dang po'i sems de mngon par byang chub pa'i snying por sbyor ba'i phyir ro/ /byang chub kyi rang bzhin gyi sems kyang 'di lta ste/sa dang po'i byang chub kyi sems de ni chos thams cad mnyam pa nyid du rtogs pa'i rang bzhin yin pas mngon par byang chub pa'i sems dang rang bzhin gcig pa'i phyir ro/ /de lta bu'i byang chub kyi sems ni thams cad mkhyen pa'i ye shes kyi rgyu'i gtso bor rig par bya'o/ /snying rje ni rtsa ba ste/sems can sdug bsngal bas gdungs pa las bral ba'i phyir snying rje'i sgo nas smon lam la sogs pa'i byang chub kyi sems skye ste/ de bas na snying rje de byang chub kyi sems kyi rtsa bar gyur pas na rgyu'i yang rgyur blta'o/ /gnyis su na thams cad mkhyen pa'i ye shes bstan par gnas par byed pa'i phyir rtsa ba zhes bya ste/thugs rje'i gzungs kyis lhag ma lus pa'i mya ngan las mi 'da' bar dus thams cad du mi gnas pa'i mya ngan las 'das par gnas shing kun rdzob dang don dam pa'i ye shes brten pa ste sdong po'i rtsa ba ltar brten par byed pas na thams cad mkhyen pa'i ye shes kyi rtsa ba'o/ /mthar thug pa ni thabs so zhes pa la/thabs ni sbyin pa'i pha rol tu phyin pa la sogs pa ste/ thams cad mkhyen pa'i ye shes rdzogs par sbyor ba'i mthar thug par de dag gis ston pas na mthar thug par blta'o/ /de la thams cad mkhyen pa'i rgyu byang chub kyi sems so zhes bya na/ byang chub nyid gang yin mi shes pa bstan pa'i phyir/gsang ba pa'i bdag po de la byang chub gang zhe na zhes bya ba nas 'di lta ste nam mkha'i mtshan nyid do zhes bya ba'i bar du gsungs pa yin no/ /gong du byang chub kyi sems thams cad mkhyen pa'i ye shes kyi rgyur bshad pa de'i byang chub kyi rang bzhin bshad pa la bya'o/ /gsang ba pa'i bdag po de la byang chub gang zhe na/gang gi rang gi sems yang dag pa ji lta ba bzhin du yongs su shes pa ste zhes pa la gang zhe na zhes pa ni nyan thos dang rang sangs rgyas dang theg pa chen po'i byang chub rnams las gang yin zhes pa la mi bya'i byang chub de ci 'dra ba zhig yin zhes pa la bya'o/ /rang gi sems yang dag pa ji lta ba bzhin du yongs su shes pa ni sbyor ba'i sems kyis bum pa la sogs pa'i rnam par mthong ba de sems kyi skad cig ma phyi mas bum pa la sogs pa'i rnam pa de yang dag pa ma yin par sun phyung nas de ltar gzung ba'i cha sun phyung ste med na 'dzin pa'i cha yang yod pa ma yin te/de ltar gzung ba dang 'dzin pa'i rang bzhin dang bral ba yongs su dag pa rnam pa med pa rang bzhin gyis dag par shes pa ni rang gi sems yang dag pa ji lta ba bzhin du yongs su shes pa'o//de bzhin du gzhung gzhan las kyang / ye shes bzhi las mnyam pa nyid kyi ye shes ni byang chub tu bshad/ me long lta bu'i ye shes dang so sor rtog pa dang /bya ba nan tan gyi ye shes ni thams cad mkhyen pa'i ye shes su bshad par rig par bya'o/ /de la yang bla na med pa yang dag par rdzogs pa'i byang chub po zhes pa la bla na med pa ni byang chub de'i gong na de las lhag pa'i byang chub gzhan med pa'o/ /yang dag par byang chub pa ni phyin ci ma log par byang chub pa la bya ste/nyan thos dang rang sangs rgyas dag ni nyon mongs pa'i sgrib pa spangs kyang shes bya'i sgrib pa ma spangs pas phyogs gcig phyin ci log pa ni ma yin gyi/ nyon mongs pa dang shes bya'i sgrib pa gnyis ka spangs pas yang dag par byang chub pa'o/ /rdzogs par byang chub pa ni kun tu byang chub pa zhes bya ste shes bya dang nyon mongs pa'i sgrib pa'i bag chags kyi mthar thug pa ma lus par spangs pas na kun du byang chub pa zhes bya'o//gnyis su na rang gi sems yang dag pa ji lta ba bzhin du yongs su shes pa ni kun rdzob dang don dam pa'i chos rnams rnam pa thams cad du stong par shes pa la bya'o/ /gsang ba pa'i bdag po de la chos ni rdul tsam yang med cing mi dmigs so zhes pa ni/byang chub de la phung po dang khams dang skye mched dang / gzung ba dang 'dzin pa'i chos kyi rang bzhin bag chags tsam yang med pas byang chub de nyid 'dzin pa'i rang bzhin du med cing dmigs su med do zhes pa ni dmigs pa'i yul ma yin pas gzung ba'i rang bzhin yang med do//de ci'i phyir zhe na/ byang chub de ni nam mkha'i mtshan nyid de/ /zhes pa ni de la nam mkha'i mtshan nyid ni rtag pa dang mi 'gyur ba dang stong pa la sogs pa'i mtshan nyid kyang yin mod kyi/ skabs 'dir gzung ba dang 'dzin pa rang bzhin med pa la bya ste/ de bas na de bstan pa'i phyir de la byang chub par byed pa yang med la/byang chub par bya ba 'ga' yang med do zhes gsungs te/ byang chub par byed pa ni 'dzin pa'o/ /byang chub bar bya ba ni gzung ba ste/ byang chub de la gzung ba dang 'dzin pa gang yang med pa'i phyir ro/ / de ci'i phyir zhe na/ byang chub la mtshan nyid med pa'i phyir te zhes pa ni byang chub de sngon po dang ser po la sogs pa'i kha dog dang dbyibs la sogs pa'i rnam pa'i mtshan ma med pa'i phyir ro/ /chos thams cad kyang mtshan nyid med ces pa la sogs pa la sems yang dag pa ji lta ba bzhin du yongs su shes pa de byang chub po zhes bshad na/sems las gzhan pa'i chos de dag yang dag pa ji lta ba bzhin du shes pa ma yin nam zhe na/ ji ltar sems yang dag pa ji lta ba bzhin du yongs su shes shing mtshan nyid med pa la sogs par bshad pa bzhin du chos thams cad kyang mtshan nyid med de nam mkha' bzhin zhes pa'o//yang na chos thams cad mtshan nyid med pa nam mkha'i mtshan nyid de nyid byang chub mtshan nyid med pa'o zhes bshad do/ /de la chos ni sems las gzhan pa'i phung po la sogs pa'o/ /'di lta ste nam mkha'i mtshan nyid do zhes pa ni nam mkha' la mtshan nyid med pa'i phyir ro//de nas bcom ldan 'das la phyag na rdo rjes 'di skad ces gsol to/ /bcom ldan 'das thams cad mkhyen pa nyid ni gang nas yongs su btsal bar bgyi/ gang gis ni byang chub mngon par rdzogs par sangs rgyas par bgyi lags zhes pa nas/ gsang ba pa'i bdag po 'di ni byang chub sems dpa'i byang chub kyi sems rnam par dag pa'i sgo zhes bya ba'i chos snang ba'i sgo chos snang ba'i tshul dang po ste zhes pa'i bar du thams cad mkhyen pa'i ye shes dang /byang chub mngon par rdzogs par bya ba'i phyir 'jug pa'i thabs dris pa dang / de gnyis rang gi sems las btsal ba'i thabs bstan pa la bya'o//de la thams cad mkhyen pa gang nas btsal ba dang / gang gis byang chub mngon par rdzogs par 'tshang rgya zhes pa ni de la ji ltar 'jug ces dris pa'o/ /byang chub dang thams cad mkhyen pa nyid ni rang gi sems las yongs su btsal bar bya'o zhes pa ni nam rang gi sems nyid gzung ba dang 'dzin pa'i rang bzhin gyi rnam par rtog pa 'phro ba'i bag chags spangs te rnam par dag pa na/rang bzhin gyis 'od gsal ba so so rang gis rig pa mi g.yo ba ye shes kyi snang ba'i mtshan nyid byang chub dang thams cad mkhyen pa'i rang bzhin du 'gyur zhes pa'i don to/ /sems la ji ltar brtags pas don de shes par 'gyur zhe na/de la rtog pa'i gang zag kyang rnam pa gnyis te/ dbang po las 'das pa'i ye shes dang ldan pa sangs rgyas dang byang chub sems dpa' dang / 'og ma'i lta ba can 'gro ba tha dad pa rnams so/ /de la 'gro ba tha dad pas brtags pa ni de'i nang na yang med phyi rol na yang med gnyis ka'i bar na yang mi dmigs so zhes gsungs te/phyi ni gzung ba/ nang ni 'dzin pa/ bar ni de gnyis ka'i bar de na yang sems mi dmigs so zhes pa'o/ /dbang po las 'das pa'i ye shes dang ldan pa rnams kyis kyang sems kha dog dang / dbyibs dang / khams dang / rgyud dang /gnas pa ste rnam pa lnga'i dngos por mi dmigs te de bas na sngon por ma yin zhes pa nas lus la ma yin yid la mi gnas so zhes pa'i bar du gsungs te/ ma gzigs zhes pa ni 'das pa dang / mi dmigs zhes pa ni da ltar gyi dus na yang ma gzigs pa'o/ /gzigs par mi 'gyur zhes pa ni ma 'ongs pa'i dus na yang gzigs par mi 'gyur ba'o//sngon por ma yin zhes pa nas shel gyi kha dog tu ma yin zhes pa'i bar du ni sems de kha dog gi rnam par mthong ba'i yul ma yin pa la bya'o/ /thung ngur ma yin zhes pa nas/ skyes par ma yin ma ning du ma yin no zhes pa'i bar du dbyibs kyi rnam par mthong ba ma yin pa la bya'o//'dod pa'i khams kyi rang bzhin ma yin/ gzugs kyi khams kyi rang bzhin ma yin/ gzugs med pa'i khams kyi rang bzhin ma yin zhes pa ni khams kyi rnam par mthong ba med pa la bya'o/ /lha dang klu dang gnod sbyin dang zhes pa nas/ sems can ris mthun pa'i rang bzhin yang ma yin no zhes pa'i bar du rgyud kyi mthong ba med pa la bya'o//sems de ni mig la mi gnas zhes pa nas yid la mi gnas so zhes pa'i bar du dbang po drug la sems gnas par mthong ba med pa la bya'o/ /kha dog dang dbyibs la sogs pa de rnams kyi rnam par snang ba na sems de gzung ba dang 'dzin pa'i rang bzhin dang ma bral bas dri ma dang bcas pa yin te/de ltar dri ma dang bcas pas na thams cad mkhyen pa'i ye shes ma yin no/ /de bas na dri ma de dag thams cad yongs su dag pa'i sems de ni thams cad mkhyen pa ste de'i phyir/ de ci'i phyir zhe na/ sems de ni nam mkha'i mtshan nyid de zhes gsungs te/nam mkha'i mtshan nyid ni rtog pa dang rnam par rtog pa spangs pa ste nam mkha'i mtshan nyid de dang 'dra bas na/ de'i phyir rtog pa dang rnam par rtog pa thams cad dang bral ba'o zhes gsungs pa yin te/ rnam par rtog pa dang rnam par dpyod pa spangs pa zhes pa'i don to//de ltar na sems ni nam mkha'i mtshan nyid dang 'dra ba'i phyir byang chub kyang de nyid yin te/ nam mkha'i rang bzhin gang yin pa de ni sems kyi rang bzhin no/ /sems kyi rang bzhin gang yin pa de ni byang chub kyi rang bzhin te zhes gsungs pa yin no/ /de ltar sems dang byang chub rnams gzung ba dang 'dzin pa'i rang bzhin gnyis su med de/gsang ba pa'i bdag po de ltar na sems dang nam mkha'i dbyings dang byang chub 'di ni gnyis su med de gnyis su byar med do zhes gsungs pa yin no/ /de yang snying rje'i rtsa ba can thabs kyi pha rol tu phyin pas yongs su gzung ba ste zhes pa ni de lta bu'i sems kyi rang bzhin gzung ba dang 'dzin pa'i bag chags kyang med pa/byang chub dang thams cad mkhyen pa'i mtshan nyid de'i rtsa ba ni snying rje ste brtan par byed pa'o/ /de la sbyor bar byed pa'i thabs ni pha rol tu phyin pa ste yongs su gzung ba ni thams cad mkhyen pa'i ye shes de skyong ba'i rgyur shes par bya'o//gsang ba pa'i bdag po de bas na rnam grangs 'dis kyang zhes pa nas rig par bya'o zhes pa'i bar ni gong du byang chub gang zhe na/ gang rang gi sems yang dag pa ji lta ba bzhin du yongs su shes pa'o zhes pa dang / byang chub dang thams cad mkhyen pa nyid ni rang gi sems las yongs su btsal bar bya'o zhes gsungs pa dang /sems de ni rang bzhin gyis yongs su dag pa yin te zhes pa la sogs pa gsungs pa de rnam grangs gcig ste/ gnyis ka yang byang chub dang thams cad mkhyen pa'i rgyu ston pa'i tshig gi rnam grangs su rig par bya'o/ / sangs rgyas bcom ldan 'das kyis rtogs pa'i chos dang lung gi chos byang chub sems dpa'i 'khor la gang dang gang bshad pa rnams ni tshig la sogs pa'i sgo tha dad kyang byang chub kyi sems rnam par dag pa dang / rang gi sems yongs su shes par bya ba'i don rnam pa gnyis kyi phyir te gzhan gyi phyir du ni ma yin no//de bas na byang chub sems dpa'i 'khor gyi nang du chos gang dang gang ston pa de dag thams cad ni byang chub kyi sems yongs su dag par bya ba dang / sems yongs su shes par bya ba'i phyir yin par rig par bya'o zhes gsungs pa yin no/ /de la byang chub kyi sems rnam par dag pa ni byang chub sems dpa'i sa dang po thob pa'i byang chub kyi sems de gzung ba dang 'dzin pa las rnam par grol ba'i phyir dag pa'o//sems yongs su shes pa ni gang sems kyi ngo bo shes pa de'i rgyus sa dang po thob par byed pa mos pas spyod pa'i dus kyi sems bskyed pa de la bya ste de dag gi phyir chos bshad ces pa'i don te/byang chub kyi sems nyid la sbyor bar byed pa'o/ /de ltar sems yongs su gzung bar bya ba yang kha dog la sogs pa'i rnam par shes par bya ba ma yin gyi/ rnam pa'i rang bzhin thams cad las 'das pa'i rang bzhin du ste/ byang chub ni gzung ba dang 'dzin pa'i cha dang bral ba rnam par dag pa tsam gyi rang bzhin du yang ma yin te/ ji tsam du mtshan mar gyur pa de dag thams cad du rang gi sems de shes par mi bya zhing btsal du mi rnyed par 'di lta ste/ rnam par ram/ kha dog tu'am zhes pa nas rnam pa thams cad kyi bar du yongs su btsal kyang mi dmigs pa yin te zhes pa'i bar gyis gsungs te/kha dog dang dbyibs la sogs pa'i rnam pa de dag re re nas smos pa yang gang dang gang la chags pa'i gnas rnams la rig pa'i gzhung gis brtags na dngos po yod pa ma yin te/ kha dog dang gzugs la sogs pa de dag brtag pa yang kha dog dang gzugs la sogs pa de dag sems la tha mi dad de/sems kyi snang ba yin na ni sems nyid kyang gzugs can du 'gyur la/ ji tsam du gzugs dang ldan pa de dag thams cad ni rdul phran gyi chas gzhig na yod par mi 'gyur ro/ /kha dog la sogs pa de dag sems las tha dad na yang de dag rdul phran gyi chas gzhig na yod par ma grub pas gzugs med na gzugs kyi rnam par skye ba'i rnam par shes pa mi skye ste yod pa ma yin no//de bzhin du tshor ba la sogs pa gzhan yang phyi rol gyi yul sun phyung ste dmigs su med pas na/yul med par sems dang sems las byung ba mi srid pas mi dmigs so/ /gsang ba pa'i bdag po 'di ni byang chub sems dpa'i byang chub kyi sems rnam par dag pa'i sgo zhes bya ba'i chos snang ba'i tshul dang po ste zhes pa ni/ mos pas spyod pa'i sa na sems de lta bu'i tshul du yongs su shes pa de ni sa dang po'i byang chub kyi sems dang /mngon par byang chub pa dang thams cad mkhyen pa ste rnam pa gsum gyi rgyur bshad pa yin no/ /de la sa dang po'i byang chub kyi sems rnam par dag pa'i mtshan nyid la 'jug pa'i sgo yin pas byang chub kyi sems rnam par dag pa'i sgo zhes gsungs so//chos snang ba'i sgo zhes bya ba la chos ni mya ngan las 'das pa gzung ba dang 'dzin pa dang bral ba ste/ snang ba ni mkhyen zhes pa'i don te snying po byang chub nyid yin la/ de 'thob pa'i rgyu'am sgo yang sems yin zhes pa'o/ /chos snang ba'i tshul zhes pa la chos ni mya ngan las 'das pa ste skad cig ma dang po la mnyam pa nyid kyi ye shes kyi mtshan nyid mngon par byang chub nas skad cig ma gnyis pa la me long lta bu dang /so sor rtog pa dang / bya ba nan tan gyi ye shes thams cad mkhyen pa'i mtshan nyid thob ste kun rdzob dang don dam pa'i tshul du thams cad mkhyen pa'o//dang po zhes pa ni skad cig ma dang po la byang chub thob pa la bya'o/ /gang la gnas na byang chub sems dpa' rnams tshegs chung ngus sgom pa thams cad spong ba'i ting nge 'dzin 'thob cing zhes pa la sogs pa ni de lta bur rang gi sems yang dag pa ji lta ba bzhin du yongs su shes pa la gnas pa'i rjes su bsngags pa gsungs pa yin te/gang la gnas na byang chub sems dpa' rnams zhes pa ni rang gi sems gzung ba dang 'dzin pa la sogs pa'i rnam par mi mthong bas gnas pa la bya ste/ de ltar gzung ba dang 'dzin pa'i rang bzhin du ma mthong ba'i sems ni rnam par dag pa ste/de ltar sems rnam par dag na lhun gyis grub pa nyid du nyon mongs pa'i sgrib pa dang las kyi sgrib pa dang / skye ba'i sgrib pa la sogs pa thams cad spong ba'i gnyen por gyur pa'i ting nge 'dzin rab tu 'thob par 'gyur te/ de bas na tshegs chung ngus sgrib pa thams cad spong ba'i ting nge 'dzin 'thob cing zhes gsungs pa yin no//de lta bu'i sems rnam par dag pa la rab tu gnas par gyur na sgrib pa thams cad bsal bas sangs rgyas thams cad la mngon sum du chos nyan zhing bsnyen bkur byed pa dang mngon par shes pa lnga thob pa ste lha'i mig gis lam ring po na 'dug pa'i gzugs kyang ri dang rtsig pa la sogs pa la thogs pa med par mthong la/lha'i rnabs lam ring po na 'dug pa'i sgra yang ri dang rtsig pa la sogs pas mi sgrib par thos shing / gzhan gyi sems 'dod chags dang bcas pa'am 'dod chags dang bral ba la sogs pa shes pa dang /tshe rabs snga ma la yang ci byed pa dang gnas gang du gnas pa rjes su dran zhing rdzu 'phrul gyi rkang pa la sogs pa 'thob pa'o/ /mtha' yas pa'i mi dang lha la sogs pa'i tshig shes pa'i gzugs kyis mtha' yas pa'i bya la sogs pa'i dbyangs kyi nga ro las don ston pa'i gzungs dang 'brug gi sgra dang /sems can ma yin pa'i sgra sa g.yo ba dang chu la sogs pa mtha' yas pa'i sgra las sgra de dag gis don ci ston pa rtogs pa'i gzungs thob ste/ sems can gyi bsam pa rjes su shes par 'gyur ro/ /de bzhin gshegs pa thams cad kyis byin gyis brlabs pas khams gsum du 'khor ba na yang thob pa'i chos las nyams par mi 'gyur ba dang /ma thob pa yang thob par 'gyur zhing 'khor ba ji srid bar sems can gyi don bya ba dag la yongs su skyo bar mi 'gyur ro/ /de'i phyir sangs rgyas thams cad dang lhan cig 'grogs pa 'thob par 'gyur/mngon par shes pa lnga dag kyang 'thob par 'gyur/ skad dang sgra dang dbyangs mtha' yas pa'i gzungs kyang 'thob par 'gyur/ sems can gyi bsam pa rjes su shes pa dang / de bzhin gshegs pa thams cad kyis byin gyis brlabs pas 'khor ba na yongs su mi nyams pa'i chos can du 'gyur/sems can gyi don bya ba dag la yongs su skyo bar mi 'gyur ro zhes gsungs pa yin no/ /'dus ma byas pa'i tshul khrims la rab tu gnas pa zhes pa ni stong pa nyid rab tu rtogs pa la gnas pas stong pa nyid kyi ngang tshul du gyur pa yin gyi sems can don byed kyang tshul khrims dang /dge ba'i tshul khrims dang / sdom pa la sogs pa kun rdzob kyi tshul khrims la ni mi bya'o/ /log par lta ba rnam par spangs ba ni mu stegs la sogs pa'i lta ba rnams dang bral ba la bya la/ yang dag par lta ba rtogs pa khong du chud pa ni de ltar log pa'i lta ba spangs pas yang dag pa'i lta ba rtogs pa zhes bya'o//gsang ba pa'i bdag po gzhan yang sgrib pa thams cad spong ba'i ting nge 'dzin 'di la gnas pa'i byang chub sems dpa' zhes pa ni de lta bu'i ting nge 'dzin sngar thob nas thos pa tsam du ma zad kyi ting nge 'dzin nyid dang ldan par gnas pa la bya'o//mos pa'i stobs bskyed pas tshegs chung ngus sangs rgyas kyi chos thams cad yongs su rdzogs par byed de zhes pa ni/ gzung ba dang 'dzin pa rab tu spang ba rang bzhin gyis 'od gsal ba'i sems byang chub kyi mtshan nyid de lta bu lhag par mos pa'i mthu bsags pas sangs rgyas kyi chos rtogs pa dang lung gi mtshan nyid dang pha rol tu phyin pa la sogs pa dang /sku'i 'khor lo la sogs pa'i chos rnams ma bsgrubs kyang thob par 'gyur ba'o/ /gsang ba pa'i bdag po mdor na rigs kyi bu 'am/ rigs kyi bu mo de ni yon tan dpag tu med pa dang ldan par 'gyur ro zhes pa ni de lta bu'i ting nge 'dzin dang ldan pa'i rigs kyi bu'am rigs kyi bu mo de dag gi yon tan so so nas brjod na skal bar yang mi rdzogs te/ brjod kyis mi lang bas tshad 'di tsam mo zhes gzung du med de/ mdor na yon tan dpag tu med pa dang ldan no zhes gsungs pa yin no//de nas yang bcom ldan 'das la phyag na rdo rjes 'di skad ces zhus pa zhes pa nas/ thub pa chen pos bstan du gsol/ zhes pa'i bar gyis ni gong du thams cad mkhyen pa'i ye shes kyi rgyu dang / byang chub kyi sems kyi mtshan nyid zhib du bshad de/byang chub kyi sems de lta bu la gnas pa'i ting nge 'dzin thob pa'i yon tan gyi tshad kyang yon tan dpag tu med pa dang ldan pa zhes gsungs nas/ de lta bu'i byang chub kyi sems ji ltar skye bar 'gyur ba dang / byang chub kyi sems de'i mtshan nyid ci 'dra bar shes par bya ba la sogs pa dris pa ste de yang ji lta bu snyam na/bcom ldan 'das ji ltar byang chub tu sems skyes pa zhes bgyi ba lags zhes pa la sogs pa ste spyir na skyes pa dang skye ba zhes bya ba gnyis te/ de la skye ba zhes bya ba ni ming tsam ste bu mngal du zhugs pa lta bu'o/ /skyes zhes bya ba ni skyes par btags pa'i don te dper na bu btsas pa dngos lta bu'o//de bas na byang chub kyi sems skye ba tsam dris pa ma yin gyi/ sa dang po'i sems byang chub kyi mtshan nyid du yongs su rdzogs par skyes pa dris pa la bya'o/ /byang chub tu zhes pa ni bla na med pa'i byang chub kyi phyir skye ba la bya ste/de yang sa dang po'i sems kyi mtshan nyid bla na med pa'i byang chub dang rang bzhin gcig pa'o/ /sa gong ma la sogs pas rim gyis rdzogs par byed pa yang rang bzhin de las tha dad pa ma yin gyi/ rang bzhin de nyid las mi mthun pa dang gnyen po la sogs pa ldog pa'i sgo nas ming gzhan du btags pa tsam du zad de/dper na gser nyid las rgyan la sogs par byas na rang bzhin gcig kyang ming gi rnam grangs mang por thogs pa dang 'dra'o/ /de bas na byang chub kyi rang bzhin sa dang po'i byang chub kyi sems de la bya ba yin gyi/ smon pa dang 'jug pa'i sems kyang byang chub kyi phyir sems pa yin mod kyi/sa dang po'i byang chub kyi sems ltar bla na med pa'i byang chub dang rang bzhin mi gcig pas de dag la ni mi bya'o/ /yang rnam pa gcig tu na lan bka' stsal pa nas dang po'i mtshan nyid kyi byang chub gsungs pas na gzhan ma yin par mngon no/ /byang chub 'byung ba'i sems skyes pa'i//mtshan nyid ji ltar 'tshal bar bgyi/ /zhes pa ni sa dang po'i byang chub kyi sems de las bla na med pa'i byang chub 'byung bas de ni byang chub 'byung ba zhes bya ste/ byang chub 'byung ba'i sems de skye ba'i mtshan nyid bsod nams chen po'i snying po nas nam mkha' bzhin du tshad med pa la sogs pa la dris pa la bya'o//sems mkhyen pa ni rnams kyi mchog /dpa' chen ye shes las byung ba/ /zhes pa ni bcom ldan 'das la yon tan gyi sgo nas bstod pa ste bcom ldan 'das ni 'jig rten dang / nyan thos dang rang sangs rgyas rnams kyi sems mkhyen pa'i mchog yin pa'i phyir dang /longs spyod rdzogs pa'i sku de thams cad mkhyen pa'i ye shes de las byung bas na ye shes las byung ba zhes gsungs so/ /ji snyed cig las 'das nas ni /skye bar 'gyur ba bstan du gsol/ /zhes pa ni 'jig rten pa'i sems grangs du zhig 'das nas byang chub kyi sems de skye zhes dris pa ste/sems brgya drug cu po las 'das nas skye ba la bya ste/ sems skyes zhes pa ma yin gyi skye ba tsam la bya'o/ /mgon pos sems kyi mtshan nyid dang / /dus kyang rgya cher bshad du gsol/ /zhes pa ni sems brgya drug cu po de dag gi mtshan nyid 'dod chags kyi sems dang /zhe sdang gi sems dang zhes pa la sogs pa dang / sems brgya drug cu po de dag las 'das nas kyang bskal pa la sogs pa ji srid cig na byang chub kyi sems de skye bar 'gyur zhes dus dris pa'o/ /de dag bsod nams ci 'dra dang / /spyod pa ci 'drar 'gyur ba dang //zhes pa ni de lta bu'i byang chub kyi sems skyes pa de'i bsod nams ji lta bu dang / spyod pa ci 'dra ba zhig spyad pas na byang chub kyi sems de thob ces pa'o/ /sems la sems kyi khyad par yang / /thub pa chen pos bstan du gsol/ /zhes pa ni sems can dbang po rnon pos chos la bdag med par rtogs nas 'jug pa dang /'phags pa nyan thos la sogs pa dbang po rtul po rgyun du zhugs pa la sogs pa'i sa brgyad bsgoms nas 'jug pa'i khyad par dris pa la bya'o/ /de la sems zhes bya ba ni byang chub kyi sems spyi la bya'o/ /bcom ldan rnam snang mdzad chen gyis/ /zhes pa nas/byang chub phyir ni dang por 'dod/ /ces pa'i bar gyis gong du phyag na rdo rjes dris pa'i lan bka' stsal pa ste/ bu zhes pa ni phyag na rdo rje chos kyi dbyings las skyes pas na bcom ldan 'das kyi sras so/ /cher 'byung zhes pa ni sems rgyud kyi mtshan nyid de/ sems kyi rgyud de las byang chub dang thams cad mkhyen pa'i ye shes chen po 'byung ba'i phyir ro//legs so zhes pa ni de lta bu'i don bzang po dris pa nyid legs pa dang / phyag na rdo rje dga' ba skyed pa'i phyir gsungs so/ /theg pa chen po'i go 'phang mchog /ces pa ni sems kyi rgyud de theg pa gsum gyi nang na mchog ste dam pa'o/ /sems kyi rgyud kyi mtshan nyid ni//zhes pa ni yon tan gyi khyad par de lta bu dang ldan pa'i sems kyi mtshan nyid bshad kyis nyon cig ces sbyar ro/ /rdzogs sangs rgyas kyi gsang ba'i mchog /ces pa ni de lta bu'i sems rnam par dag pa thams cad mkhyen pa dang mngon par byang chub pa'i rang bzhin de sems can phal cher gyi spyod yul ma yin pa dang /snod ma yin pa la mi bstan pa'i phyir gsang ba zhes bya'o/ /rtog ge kun gyis mi shes pa/ /zhes pa ni stong pa'i mtshan nyid kyi sems de mngon sum dang rjes su dpag pa'i rigs pa'i sgo nas ji lta ba bzhin du mi rtogs pa'o/ /yid gcig bsdus la mnyen par gyis/ /zhes pa ni ma yengs par nyon cig pa'o//sems ni brgya rtsa drug cu las/ /'das nas skye bar 'gyur zhes sbyar te/ 'jig rten pa'i sems brgya drug cu las 'das nas chos la bdag med par rtogs te mos pas spyod pa'i sa la sems gsum rnam par bsgom pa dang / pha rol tu phyin pa rnams rnam par spyod pa dang / bsdu ba'i dngos po rnam pa bzhi byas nas mos pas spyod pa'i sa las 'phar te/sa rab tu dga' ba'i sems ye shes kyi sa la zhugs pa la bya ste/ ji snyed cig las 'das nas ni/ skye bar 'gyur zhes dris pa'i lan no/ /bsod nams ches zhes pa ni pha rol tu phyin pa la sogs pa'i bsod nams chen po'i rgyu las skyes pa'o/ / snying po ni phyin ci ma log par yongs su grub pa ste/ dper na tsan+dan dang seng ldeng gi snying po ltar mchog dam pa la bya'o/ /byang chub nyid kyi phyir byang chub 'byung ba zhes sbyar te/ bla na med pa'i byang chub thob pa'i phyir na byang chub kyi sems de las sems 'byung ba la bya'o/ /nam mkha' lta bur dpag med cing / /zhes pa ni byang chub kyi sems de'i yon tan la sogs pa tshad bzung zhing dpag tu med pa'am rnam pa med pas 'di tsam mo zhes tshad gzung du med de nam mkha' dang 'dra ba la bya'o//gos pa med par ji bzhin gnas/ /zhes pa ni de lta bu'i sems nam mkha'i mtshan nyid la glo bur gyi nyon mongs pa'i bag chags kyis ma gos pa ste/ / de ltar glo bur gyi nyon mongs pa'i mtshan ma'i dbang du ma gyur pas shin tu rnam par dag pa'i rang bzhin du gnas pa la bya'o/ /chos kun gyis ni mi bsgul te/ /dpag med ye shes kyis bsgrubs pa/ /zhes pa ni byang chub kyi sems de tshad med pa'i ye shes las byung ba la bya'o/ /yang dag rdzogs sangs rgyas ston pa//zhes pa ni sangs rgyas dang byang chub sems dpa' la mchod pa byas pa dang / sa dang pha rol tu phyin pa la sogs pa spyad pa las byung ste/ de'i spyod pa ci 'drar 'gyur ba dang zhes dris pa'i lan no/ /byang chub phyir ni dang por 'dod/ /ces pa ni sa dang po'i byang chub kyi sems la bya ste/ de rnams ni byang chub kyi sems kyi rgyu dang rang bzhin bshad pa'o//gsang ba pa'i bdag po de la/ 'khor ba thog ma med pa nas/ /byis pa so so'i skye bo rnams/ /zhes pa nas/ 'jig pas stong nyid shes par bya/ /zhes pa'i bar gyis bcom ldan 'das rnam par snang mdzad kyi rgyu bshad pa yin te rgyu de yang rnam pa gnyis so/ / de la 'jig rten pa'i sems brgya drug cu la sogs pa ni rnam par snang mdzad kyi nye bar len pa'i rgyu'o/ /gzhan sa dang pha rol tu phyin pa ni lhan cig byed pa'i rgyu'o/ /de lta bas na so so'i skye bo la yang rnam pa gnyis te/ 'jig rten pa'i gzhung lugs shes pa dang mi shes pa'o/ /de la byis pa ni ngan par smra ba dang / ngan par byed pa dang /ngan par sems pa ste/ de dag ni rang gi gzhung lugs kyang mi shes pa'o/ /de las gzhan pa ni rang rang gi gzhung lugs shes pa 'phags pa'i lam thob pa la bya ste/ de dag 'khor ba na sdug bsngal gsum gyis gdungs nas gdungs pa de las thar pa'i phyir bdag dang bdag gir brtags pa de dag la brten nas sbyin pa la sogs pa byas te thar bar re ba'o//bdag dang bdag gi ba la mngon par chags nas bdag tu 'dzin pa grangs med pa la rtog pa de dag kyang bdag ces pa'i rang bzhin ci 'dra ba ma dpyad par chags pa skye ba ni rang rang gi gzhung lugs mi shes pa'i byis pa rnams so/ /rang rang gi gzhung lugs shes pa de rnams kyang so so'i bdag tu brtags pa de la brten pa ni gzhan dag ni dus las byung ba dang zhes pa nas brjod par bya ba dang /brjod par bya ba ma yin par rtog ste zhes pa'i bar du'o/ /de dag ni 'jig rten pa rnams kyi so so'i bdag tu brtags pa ste/ ji skad du smos pa'i bdag dang bdag gi ngo bo de dag gis bdag cag 'gro ba rnams bskyed de/ / de dag nyid kyis 'jig par yang byed par rtog go/ /gsang ba pa'i bdag po bdag gi khyad par de lta bu la sogs pa zhes pa ni gong du smos pa'i bdag gi dngos po rnams la bya'o/ /thar pa 'dod pas zhes pa de lta bur bdag tu brtags pa nyid la brten nas thar ba re ba'o/ /rnal 'byor 'dod pa'i rnal 'byor pa dag gis zhes pa ni 'jig rten pa'i tshul du lus ngag yid gsum yul la 'jug pa las 'gog pa dang /dngos po gang la dmigs pa de la sems rtse gcig tu dmigs pa 'dzag pa ni rnal 'byor te/ lus ngag yid gsum yul la mi 'jug par 'gog pa'i rnal 'byor 'dod pa rnams kyis de lta bu'i bdag rnams rab tu rtog pa la bya'o//byis pa so so'i skye bo phyugs dang mtshungs pa rnams zhes pa ni rang gi gzhung lugs mi shes pa la bya ste/ byugs dang mtshungs pa zhes pa ni ngan par smra ba dang / ngan par sems pa dang / ngan par byed pa'i dpe ste phyugs ni za pa dang / g.yem pa dang 'jigs pa las bsam pa gzhan med de/ byis pa rnams kyang de lta bu'i mtshan nyid dang ldan pas phyugs dang mtshungs zhes pa'o/ /brgya lam na res 'ga' zhig la zhes pa de lta bu'i byis pa phyugs dang mtshungs pa 'khor ba na 'khyams pa na chos kyi 'du shes 'byung ba ni dkon pa'i mchog ste/ chos kyi 'du shes skye ba yang smyung bar gnas nas bsod nams su 'gyur ba la bya ste/smyung bar gnas pa de tsam gyis sems mgu ste smyung bar gnas pa nyid la yang du yang du dus dus su sgom par byed de/ de bas na smyung bar gnas pa la gnas par bya'o zhes de tsam zhig sems la byas nas mgu ba bskyed cing phyi phyir de nyid la goms par byed de zhes gsungs pa yin no/ / gsang ba pa'i bdag po de ni dge ba'i las skye ba'i sa bon lta bu ste/ sems dang po'o zhes pa ni sems bdun pa'i tshe tshul khrims bsrungs pa'i dge ba 'byung ba'i sa bon du gyur pa la bya'o/ /de la 'ga' zhig smyung bar gnas pa ni brtul zhugs kyi mtshan nyid de nyon mongs pa'i phyogs gcig yin na ji ltar dge ba'i sa bon du 'gyur snyam du dogs pa skye ba la/dogs pa bsal ba ni smyung bar byas pa'i 'og tu mchod pa dang sbyin pa'i sems 'byung ba ste/ smyung ba de ni sbyin pa la sogs pa'i dge ba'i de ma thag pa'i rkyen byed pas nyes pa med do/ /sbyin pa la sogs pa de dag kyang zag pa dang bcas pa'i dge ba la bya'o//de'i rgyu nyid kyis sbyin pa sbyin par byed de zhes sbyar te/ mtshan ma dang bcas pa'i nyi ma zhes pa smyung bar byad pa de nyid la goms par byed pa'i rgyus zla ba dang skar ma dang nyi ma la sogs pa bzang po'i nyin par pha ma la sogs pa'i gnyen rnams la sbyin par byed pa ni tshul khrims bsrungs pa'i dge ba las 'byung ba'i myu gur blta'o//de nas gzhan yang sbyin pa de nyid mi shes pa dag la yang sbyin par byed ces pa ni sbyin pa ste ma la goms pa'i mthus gnyen ma yin pa gzhan la yang sbyin pa ste/ de yang dge ba bcu'i las 'byung ba'i sdong bu lta bur blta'o/ /de nas gzhan yang sbyin pa de nyid snod du rung ba yongs su tshol zhing sbyin par byed de zhes pa ni pha dang ma dang /mkhan po dang slob dpon dang bram ze rig byed bzhi po rdzogs par shes pa la sbyin na de dag ni sbyin gnas te/ bsod nams mtha' med par 'gyur bas sbyin pa'i snod do snyam nas sbyin par byed pa de yang dge ba'i las 'byung ba'i rgyu ste lo ma lta bur blta'o//de nas gzhan yang sbyin pa de nyid bla ma'am rol mo mkhan dag la dga' bzhin du sbyin par byed de zhes pa de ni sbyin pa de ni snga ma las rgya che ste/ snod la yang mi rtog par bla ma dang rol mo mkhan la sogs pa la sems dga' bar sbyin pas dngos po la ma chags par sbyin pa ste/de yang dge ba'i las 'byung ba'i rgyu ste me tog lta bur blta'o/ /de nas gzhan yang sbyin pa de nyid yid dga' ba dag la sbyin par byed de zhes pa ni zas 'dod pa la zas/ gos 'dod pa la gos la sogs pa ci 'dod pa rnams sbyin pa la bya ste//de yang dge ba'i las 'byung ba'i 'bras bur blta'o/ /de nas gsang ba pa'i bdag po/ gzhan yang mtho ris su skye bar bya ba'i phyir tshul khrims bsrung ste zhes pa ni de lta bu'i sbyin pa rnams byas nas lus kyi las gsum dang / ngag gi las bzhi dang / yid kyi las gsum gyi sgo nas mi dge ba 'byung ba spong ba'i mtshan nyid kyi tshul khrims bsrungs nas de'i 'bras bu mngon par mtho ba'i mtshan nyid lha la sogs pa'i longs spyod mtho ris su skye ba'i phyir te longs spyod de nyid gsos su 'gyur ba la bya'o//de nas yang gsang ba pa'i bdag po/ gzhan yang sems de lta bu nyid kyis 'khor bar rgyu ba ni dge ba'i bshes gnyen la la zhig las tshig 'di skad thos te zhes pa de lta bur sbyin pa byed cing tshul khrims bsrung ba la mkhan po 'jig rten pa'i gzhung lugs shes pa 'ga' zhig gis dge ba'i bshes gnyen byas te/rang gi ston pa'i lha la brten du bcug pa ste/ / dge ba'i bshes gnyen des kyang lha rnams kyi rang bzhin bstan pa ni/ lha 'di dag ni lha chen te/ /thams cad la ni bde ba ster/ /de la khyod kyis gus mchod dang / /thams cad grub pa nyid du 'gyur/ /zhes pa nas/ de bzhin lha dang drang srong mchog /rig byed rig byed skyes bu yin/ /zhes pa'i bar du'o//mkhas pa'i mchod pa gyis shig ces/ /zhes pa ni de ltar gong du ming gis smos pa'i lha de rnams gang la dad pa la ston pa dang mchod pa'i gnas su byas na lha de rnams kyis bde ba ster ba dang bsam pa thams cad 'grub par byed do zhes bsten pa'o/ /de las de 'dra'i tshig thos nas//yid ni yang dag mgu gyur te/ /de'i tshe rab tu gus ldan pas/ /de dag la ni nan tan byed/ /ces pa ni de ltar dge ba'i bshes gnyen gyis lha rnams bstan pa thos nas byis pa de la yid mgu ba skyes te/ de nas lha de dag la brten pa dang mchod pa nan tan byed cing lha de rnams la rab tu dad pa dang ldan par 'gyur ba'o//gsang ba pa'i bdag po 'di ni byis pa so so'i skye bo 'khor ba ni kun du 'khyams pa rnams kyi dbugs phyin pa'i mchog yin te/ 'di ni stobs su gyur pa ste sems brgyad par rgyal ba rnams kyis bshad do zhes pa ni de lta bu'i byis pa so so'i skye bo tha dad pa rnams 'khor ba na skyabs dang mgon med par 'khyams pa las dge ba'i bshes gnyen rnams kyis skyabs dang mgon de dag bstan pas byis pa de rnams kyis skyabs dang mgon rnyed de dbugs phyin pa ni brtan por gyur pas dge ba'i stobs su gyur pa'o zhes pa'o//de nas gsang ba'i bdag po gzhan yang khyad par rtogs pa ji skad du yongs su grags pa'i khyad par de dang de dag la khyad par du gnas pa rnams la 'ba' zhig pa nyid kyi don du blo skye shing de yang yod do zhes stong pa nyid kho na la dngos por sems te/ sngar bdag gi ngo bo smos pa rnams dang ston pa'i lha rnams kyi rang bzhin ji skad smos pa bzhin du shes nas bdag tu brtags pa dang lha de rnams la brten te/lha de rnams kyis bstan pa'i gzhung gis las dang nyon mongs pa spangs nas dag pa'i bdag tu rtog pa yin te/ dag pa de yang stong pa nyid mya ngan las 'das pa yin no snyam pa'i blo skye ba ste/stong pa nyid la bde ba dang sdug bsngal myong bar byed pa'i rang bzhin gyi bdag ces pa'i dngos po nyungs 'bru tsam mam/ spu'i nyag ma la sogs pa tsam du yod par rtog ste de dag ni byis pa so so'i skye bo rnams kyis bdag dang lha rnams la brten nas rang gi rnam par grol ba tshol ba ste/rnam par grol bar tshol ba'i bde ba de yang bcom ldan 'das rnam par snang mdzad kyi brgyud pa'i rgyur blta'o/ /dbang phyug chen po dang tshangs pa la sogs pa'i lha de rnams kyang spyir sems can rnam pa gnyis te/ las las skyes pa dang / ye shes kyi sems can no//de la skabs 'dir ni lha de rnams kyang byis pa so so'i skye bo 'khyams pa rnams la so so'i mya ngan las 'das pa'i lam ston pa ste/ lam de ston pa yang bcom ldan 'das rnam par snang mdzad kyis mkhyen nas thob pa'i rgyur sbyor ba yin pas dbang po dang brgya byin la sogs pa'i lha de rnams bcom ldan 'das rnam par snang mdzad kyi sku las sprul pa'i ye shes kyi sems can du blta'o//gsang ba ba'i bdag po/ /de dag gis ni stong pa nyid rab tu mi shes so zhes pa ni stong pa nyid la 'ba' zhig pa zhes bya ba'i bdag gi ngo bor brtags pas stong par mi 'gyur te/ji tsam du dngos por brtags pa de tsam du yod pa'i mtha' 'dzin pas stong pa nyid shes par mi 'gyur ro zhes pa'o/ /de bas na stong pa nyid ni dngos po can yang ma yin/ dngos po med pa yang ma yin/ yod pa yang ma yin med pa yang ma yin gnyis ka yang ma yin te/ de la rtog pa'am mi rtog pa yang med na de la ji ltar stong pa zhes btags par bya zhes stong pa'i mtshan nyid phyin ci ma log par gsungs pa yin no//de la dngos po yang ma yin zhes pa ni byis pa rnams kyis ji ltar bdag tu brtags pa'i dngos po ma yin pa'o/ /dngos po med pa yang ma yin zhes pa ni de lta bu yod pa'i dngos po spangs pa'i gzhan zhig kyang ma yin pa'o//yod pa yang ma yin zhes pa ni stong pa nyid la de lta bu'i dngos po med pa'o/ /med pa yang ma yin zhes pa ni stong pa nyid kyi rang bzhin du med pa ma yin pa'o/ /gnyis ka yang ma yin zhes pa ni yod med gnyis las gzhan na yang med pa'o/ / de la rtog pa'am mi rtog pa yang med na/ de la ji ltar stong pa zhes btags par bya zhes pa ni de ltar yod pa dang med pa ma yin pas stong pa nyid la dngos por gdag tu med ces pa'o/ /don 'di nyid tshigs su bcad pas gsungs pa/ gang dag stong nyid mi shes pa/ /de dag mya ngan 'das mi shes//de phyir dngos dang dngos med pa/ /'jig pas stong nyid shes par bya/ /zhes pa ste/ gang dag stong nyid mi shes pa/ /zhes pa ni stong pa nyid la dngos por brtags pa na stong pa nyid kyi rang bzhin phyin ci ma log par mi shes pa ste/ de dag gis ni chos kyi dbyings zhi ba mya ngan las 'das pa rnams kyang shes par mi nus pa la bya'o//stong pa nyid ji ltar shes par bya zhe na/ dngos po dang dngos po med pas bsdus pa'i dngos po dang bral bas shes par nus te/ de bas na dngos dang dngos med pa/ 'jig pas zhes gsungs pa yin no/ /de nas yang bcom ldan 'das la phyag na rdo rjes gsol ba btab pa/bcom ldan 'das sems kyi khyad par de dag bshad du gsol zhes pa ni sngar sems kyi khyad par brgya drug cu las 'das nas byang chub kyi sems skye'o zhes gsungs na/ sems kyi khyad par de rnams kyi mtshan nyid ji lta bu yin pa bshad du gsol zhes pa la bya'o//de skad ces gsol pa zhes pa nas/ nyon cig ces pa'i bar du gsol ba'i len bshad par gnang ba'o/ /de dag bshad pa yang gsang pa'i bdag po/ /de la sems ni 'dod chags kyi sems dang / 'dod chags dang bral ba'i sems dang zhes pa nas bu ga lta bu'i sems dang skye bar gyur pa'i sems so zhes pa'i bar ro//sems de rnams bshad pa yang ming dang / mtshan nyid dang spong ba dang lam gyi sgo nas bshad par shes par bya la/ sems de rnams kyi rang bzhin yang rnam pa bzhi ste/ nyon mongs pa can dang / dge ba dang / mi dge ba dang / / lung du ma bstan pa'o/ /de la sems de rnams las 'da' bar bya ba yang spyir na sngags kyi sgo nas spyod pa la rnam pa gnyis te/ grub pa dang / dam tshig can no/ /de la grub pa ni mos bas spyod pa'i sa nas yid kyi rang bzhin gyi lus kyis gang du 'dod par 'phar bas rim pa dang bskal pa'i tshigs kyang med do//dam tshig can la yang rnam pa gnyis te/ dbang po rtul po dang rnon po'o/ /de la dbang po rtul po ni thog mar 'jig rten pa'i lam stong pa nyid 'ba' zhig par blo skyes pa las 'phar nas gang zag la bdag med par rtogs te sems 'di rnams kyang sdug bsngal ba nyid dang /mi rtag pa nyid dang / stong pa nyid dang / bdag med par rtogs te/ spong ba goms par byed na 'jig rten pa'i lam nas brtsams te bskal pa gsum gyi bar du gang zag la bdag med par bsgoms te/ de nas phung po la yod do snyam pa'i blo skye ba de yang sun phyung nas phung po la sogs pa sgyu ma dang smig rgyu lta bur chos la bdag med par rtogs te/sems gsum sgom pa dang pha rol tu phyin pa la sogs pa rnam par spyod pa'i mtshan nyid mos pas spyod pa'i sa la 'jug go/ /dbang po rnon po ni thog ma nyid nas gang zag dang chos gnyi ga la bdag med par rtogs pas sems de rnams kyang sgyu ma dang smig rgyu'i tshul gyis spong zhing sems gsum po sgom pa dang /pha rol tu phyin pa rnams rnam par spyod pa'i rim gyis mos pas spyod pa'i sa de bskal pa gcig gis rdzogs nas bskal pa de'i bzhi cha gcig gis ye shes kyi sa la 'jug go//mos pas spyod pa'i sa la zhugs nas ni dbang po rno rtul gnyis ka yang mos pas spyod pa'i sa de bskal pa gcig gis rdzogs par byed pa dang / ye shes kyi sa la bskal pa bzhi cha gcig gis 'jug par 'dra'o/ /sems kyi dngos po drug cu rnams las brgya drug cur 'phel ba yang sgrib pa'i cha phra rags gsum du phye ste gsum po de rnams re re zhing yang gsum gsum du phye bas rnam pa dgur blta'o//de la sgrib pa chen po'i chen po la sems gcig spong la chen po'i 'bring po la ni gnyis spong / chen po'i chung ngu la ni gsum spong / 'bring gi chen po la ni bzhi spong / 'bring gi 'bring la ni lnga spong / 'bring gi chung ngu la ni drug spong / chung ngu'i chen po la bdun spong / chung ngu'i 'bring la brgyad spong / 'og nas 'byung ba'i tshul gyis de ltar sems brgya drug cu mos pas spyod pa'i sa nas bskyod cing mos pas spyod pa'i sa de rdzogs par byed do/ /de la dgu po rnams kyi tha ma chung ngu'i yang chung ngu ni mos pas spyod pa'i sa nas 'phar nas spong ste ye shes kyi sa la 'jug par shes par bya'o//de la 'dod chags kyi sems gang zhe na chags pa can chos kun du bsten pa'o zhes pa ni 'dod chags dang ldan pa'i sems la bya ste/ de yang dge ba dang / mi dge ba dang /nyon mongs pa can dang / lung du ma bsten pa'i chos rnam pa bzhi las ji ltar rigs par chags nas bsnyen pa la shes par bya ste/ lha la sogs pa la dad cing mchod par bya ba la zhen nas mchod pa la sogs pa'i las de dag byed pa ni chags pa can chos kun du bsten pa zhes bya ste dge ba'o//de bzhin du bud med la sogs pa la zhen nas de'i bya ba byed pa ni chags pa can chos bsten pa ste nyon mongs pa can gyi sems so/ /ma byin par len pa dang brdzun du smra ba la chos su zhen nas de dag gi bya ba byed pa ni chags pa can chos bsten pa ste mi dge ba'i sems so/ / bzo la sogs pa'i chos la zhen nas de dag gi bya ba byed pa ni chags pa can chos bsten pa ste lung du ma bstan pa'o/ /de ltar tshul 'dis sems gzhan rnams la yang ji ltar rigs par dge ba dang mi dge ba dang / nyon mongs pa can dang lung ma bstan par sbyar bar bya'o/ /'dod chags dang bral ba'i sems gang zhe na/'dod chags dang bral ba'i chos kun du bsten pa'o zhes pa ni gong du smos pa'i chos rnam pa bzhi la ma chags pa'am ma mos kyang chos nyid kyi spyod pa'am/ gzhan gyi dbang du mi spyod bzhin du de dag gi bya ba byed pa ni 'dod chags dang bral ba'i chos kun du bsten pa'o/ / zhe sdang gi sems gang zhe na/ sdang bas chos kun du bsten pa'o zhes pa ni zhe sdang dang ldan pa'i sems te gong du smos pa'i tshul gyis dge ba dang mi dge ba la sogs par rig par bya'o/ /byams pa'i sems gang zhe na/ byams pa dang ldan pa'i chos kun du bsten pa'o zhes pa ni byams pa dang ldan pa'i sems te dge ba dang mi dge ba la sogs pa ni snga ma bzhin no//gti mug gi sems gang zhe na gang mi dpyod par chos bsten pa'o zhes pa ni gti mug dang ldan pa'i sems so/ /shes rab kyi sems gang zhe na/ khyad par las khyad par gzhan rtogs par bya ste chos bsten pa'o zhes pa ni shes rab dang ldan pa'i sems te khyad par las zhes pa ni shes rab ma thob pa las shes rab thob pa la bya'o//khyad par gzhan zhes pa ni shes rab de thob pa las shes rab mchog khyad par du rtogs pa la bya'o/ /gtan la phab pa'i sems gang zhe na/ bka' dang bla ma'i tshig bzhin byed pa nyid do zhes pa ni/rgyal po la sogs pa'i bka' dang / slob dpon la sogs pa'i lung mi byar mi rung ste/ nges par bya ba'i chos de byed pa'o/ /the tshom gyi sems gang zhe na/ ji ltar yongs su gzung ba nges pa dag la som nyi bsten pa dag go zhes pa ni the tshom dang ldan pa'i sems te sngar phyin ci ma log par zin pa la phyis bdag nyid kyis the tshom bslang ste dogs pa skye bar byed pa ni de'i chos la brten pa'o zhes bya'o//mun par 'gyur ba'i sems gang zhe na som nyi med pa la som nyir shes pa'o zhes pa ni mun pa lta bu'i sems te ji ltar mun pa'i nang na bum pa la sogs pa yod kyang gsal bar mi snang bas yod dam med the tshom za ba ste/de bzhin du dngos po phyin ci ma log pa la ma rig pa'i mun pas bsgribs pas the tshom skye ba'i sems ni mun pa dang 'dra'o/ /snang bar gyur pa'i sems gang zhe na/ som nyi med pa la som nyi med par bsten pa'o zhes pa ni snang ba'i rang bzhin du gyur pa'i sems te ji ltar nam mkha' snang ba la rdzas kyi dngos po gsal bar snang ba bzhin du snang ba'i rang bzhin gyi gzugs de yang des shes par bya ba'i dngos po the tshom med bzhin du spyod pa ni som nyi med par chos bsten pa'o//sdud pa'i sems gang zhe na/ du ma gcig tu byed pa'o zhes pa ni sdud pa'i rang bzhin gyi sems te phung po dang khams dang skye mched la sogs pa rang gi mtshan nyid so so ba las stong pa dang bdag med pa la sogs pa spyi'i mtshan nyid gcig tu sdud pa'o/ /'thab pa'i sems gang zhe na/phan tshun rtsod pa nyid do zhes pa ni 'thab mo can gyi sems te/ mi mthun pa'i mu re re gzung zhing rtsod pa'i chos re re bsten pa'o/ /rtsod pa'i gang zhe na gang bdag nyid dang bdag nyid du rtsod pa'o zhes pa ni rtsod pa'i rang bzhin gyi sems te gzhan dang phan tshun du mi mthun pa'i phyogs gzung zhing mi rtsod par bdag rang gi sems la sun 'byin pa'am dpyod pa lta bu'o//mi rtsod pa'i sems gang zhe na/ mnyam pas mtshungs par blta ba'o zhes pa ni rtsod pa med pa'i rang bzhin gyi sems te dngos po gang yang rung ba la gzhan dang lta ba mthun pas mtshungs par spyod de rtsod pa med pa'i chos bsten par byed pa'o//lha'i sems gang zhe na/ yid kyis bdag nyid la rlom sems su byed pa'o zhes pa ni lha lta bu'i sems sam/ lha'i phyir sems pa ste/ lha lta bur sems pa ni ji ltar lha rnams bdag ni lha yin no snyam du sems pa bzhin du sems de yang bdag nyid gang yin pa de yin no snyam du sems pa'o//lha'i phyir sems pa ni bdag gis lhar 'gyur bar bya'o snyam du sems pa'o/ /lha ma yin gyi sems gang zhe na gang 'khor ba nyid la smod pa'o zhes pa ni lha ma yin lta bu'i sems te/ de ltar lha ma yin de la sogs pa'i dngos po thams cad la smod par byed pa de bzhin du sems de yang 'khor ba la smod par byed pa'i chos bsten pa'o//klu'i sems gang zhe na/ gang longs spyod chen po nyid du bya ba'i phyir sems pa'o zhes pa ni klu lta bu'i sems te ji ltar klu phyug po la mgo mang po yod de/ mgo mang po longs spyod che bar shes pa de bzhin du sems de yang longs spyod chen po la spyod pa'i chos bstan pa'o//de la klu'i mgo mang po longs spyod kyi dper ji ltar 'gyur zhe na/ rgya gar skad du longs spyod la b+ho ga/ /klu'i mgo la yang b+ho ga zhes bya ste/ skad kyang mthun la don du yang klu mgo mang po de phyug pas longs spyod chen po la longs spyod do//de bzhin du sems de yang longs spyod chen po'i chos la bsten par byed pas klu lta bu'i sems zhes bya'o/ /mi'i sems gang yin zhe na/ de nyid kyi don du sems pa'o zhes pa ni mi'i longs spyod 'dod pa'i yon tan gyi chos la bsten par byed pa'o//bud med kyi sems gang zhe na/ 'dod pa kho na'i phyir chos bsten pa'o zhes pa ni bud med lta bu'i sems te/ bud med ni 'dod chags kyi yul du gyur pa'i chos rnams 'thob par bya ba'i phyir chos de dag gi bya ba byed de/ de bzhin du sems de yang 'dod pa'i yul rnams thob par bya ba'i phyir chos de dag la bsten par byed do//dbang phyug gi sems gang zhe na/ gang bdag gis thams cad bsam mo snyam du rlom sems su byed pa'o zhes pa ni dbang phyug lta bu'i sems te/ dbang phyug ni 'jig rten thams cad kyi skye ba dang 'jig pa ni bdag gis byas so bar sems so//de bzhin sems de yang bdag gis ma byas pa rnams kyang bdag gis byas so ba'i chos bsten par byed pa'o/ /dbang phyug ni lha chen po la bya'o/ /tshong pa'i sems gang zhe na gang bsdu ba byas te rnam par spel nas phyis bstan pa'o zhes pa ni tshong pa lta bu'i sems te/tshong pa ni 'tshong zhing nyo ba'i chos rnams rin chung ba'i dus na kun bsdus nas nam rin che ba na de dag thams cad slar spel zhing 'tshong bar byed do/ /de bzhin du sems de yang sngar phung po dang khams dang skye mched kyi chos rnams mi rtag pa dang / sdug bsngal la sogs pa'i chos kyis de rnams nyid ji ltar rigs par spong ba'i chos bsten par byed pa'o//zhing pa'i sems gang zhe na/ gang thos pa rnam pa du ma tshol zhing phyis bsten pa'o zhes pa ni zhing pa lta bu'i sems te/ sngar zhing thog rnams bsdus nas phyis zhing thog de rnams nyid la bza' ba dang btung ba la sogs pa'i bya ba byed do//de bzhin du sems de yang sngar chos rnams mang du thos par byas te bsags nas phyis ji ltar thos pa'i chos de rnams sems pa dang bsgom pa la sogs pa'i chos bsten par byed pa'o/ /chu bo'i sems gang zhe na/ gang mtha' gnyis la mi ltos shing bsten pa'o zhes pa ni chu bo lta bu'i sems te/chu bo ni mtha' gnyis mi mtho bar dbus kyi gzhung bzhin las 'bab pa'o/ /de bzhin du sems de yang rtag pa dang chad pa'i mtha' gnyis spong par byed pa'i chos bsten pa'o/ /yang na chu bo mtha' gnyis la ltos shing 'bab pa de bzhin du/ sems de yang rtag pa dang chad pa'i mtha' bzung zhing de'i chos bsten par byed pa la yang bya'o/ /lteng ka'i sems gang zhe na/ gang srid pas bsten pa'o zhes pa ni lteng ka lta bu'i sems te/ lteng ka de ni gzhan las 'bab pa'i chu rnams pa sogs la bdag las gar yang mi 'dzag ste/de bzhin du sems de yang gzhan gyi thams cad ni sdud la/ bdag las gang ci yang mi gtong ba'i chos bsten pa'o/ /khron pa'i sems gang zhe na/ gang mi zab pa la zab par sems pa'o zhes pa ni khron pa lta bu'i sems te/ khron pa chus gang ba ni mi zab kyang gting dpag tu mi mngon pas zab pa dang 'dra ste/de bzhin du sems de yang zab mo'i blo ma yin pa la zab snyam du sems pa'i chos bsten pa'o/ /kun du bsrung ba'i sems gang zhe na/ 'di nyid bden gyi gzhan ni gti mug snyam du sems pa'o zhes pa ni bsrung bar gyur pa'i sems te/ bdag gis ji ltar thos shing zin pa de nyid ma nor ba'o snyam nas brtan par bzung ste gzhan gyis zin cing rtogs pa de ma yin pa snyam du chos bsten pa'o/ /ser sna'i sems gang zhe na/ bdag nyid bsten cing gzhan la mi ster ba'o zhes pa ni ser sna can gyi sems la bya ste ji ltar grags pa'o//byi ba'i sems gang zhe na/ gang mchod pa la ltos te bsten pa'o zhes pa ni byi ba lta bu'i sems te byi ba la sogs pa 'dzin pa na mchod zhing 'dzin te/ de bzhin du sems de yang 'phags pa'i lam la sogs pa thob par byed pa ni 'jug pa'i dus las 'phar ba ste/ / rim pa des 'phar ba'o/ /khyi'i sems gang zhe na gang chung ngus kyang mgu bar 'gyur ba'o zhes pa ni khyi lta bu'i sems te/ khyi ni chung ngus kyang mgu ba'o/ /de bzhin du sems de yang gang yang rung ba'i dngos po chung ngus mgu bar byed pa'i chos bsten par byed pa'o/ /nam mkha' lding gi sems gang zhe na/gang phyogs 'dzin pas chos la brten pa'o zhes pa ni nam mkha' lding lta bu'i sems te/ nam mkha' lding ni klu la sogs pa 'dzin pa na 'dab mas rdob cing 'dzin te/ de bzhin du sems de yang gang bdag gi yin pa de'i phyogs 'dzin pa'i chos bsten par byed do//nam mkha' lding gi 'dab mas rdob cing sbrul 'dzin pa de ji ltar phyogs 'dzin pa'i dper 'gyur zhe na/ rgya gar skad du 'dab ma la pak+Sha zhes bya/ phyogs la yang pak+Sha zhes bya ste/ de ltar skad gcig la don du yang nam mkha' lding gis klu de bdag gir byed pa'i phyir 'dzin la/phyogs su gyur pa yang bdag gir bya ba'i dngos po'i don la phyogs 'dzin pas mthun no/ /byi ba'i sems gang zhe na/ bcings pa thams cad bcad pa'i phyir sems pa'o zhes pa ni byi ba lta bu'i sems te byi ba ni bcings pa thams cad gcod cing grol bar byed pa'o//de bzhin du sems de yang 'dod chags dang zhe sdang dang gti mug gi chings ma dgrol ba'i chos bsten par byed pa'o/ /glu'i sems gang zhe na/ bdag gi dbyangs sgra sna tshogs kyi glus sems can rnams gzud par bya'o snyam pa'o zhes pa ni glu lta bu'i sems te/ ji ltar glu des sems can rnams dga' zhing 'du ba de bzhin du sems de yang bdag gis gang dang rjes su mthun pa'i sgra skad kyi dbyangs mang pos sems can rnams gang la dad pa la gzung ngo snyam pa'i chos bsten par byed pa'o//gar gyi sems gang zhe na/ bdag gis rdzu 'phrul sna tshogs kyis gzhan dag yang dag par 'dzin du gzhug go snyam du sems pa'o zhes pa ni gar bya ba'i sems te/gar zhes bya'i tshig ni lus g.yo ba'i don yin la/ gar gcig pur ma zad nam mkha' la 'gro ba la sogs pa'i lus kyi rdzu 'phrul thams cad kyang lus g.yo ba yin te/ de lta bas na lus kyi rdzu 'phrul de dag gis sems can rnams rdzu 'phrul sna tshogs sbyor bar byed pa'i chos bsten pa'o//sil snyan gyi sems gang zhe na/ bdag gis chos kyi rnga brdung ngo snyam pa'o zhes pa ni sil snyan gyi phyir sems pa ste/ chos rnga bsgrags shing 'chad par bya ba'i chos bsten par byed pa'i sems so//khyim gyi sems gang zhe na/ bdag gis lus kun du bsrung ba'i phyir bsten pa'o zhes pa ni khyim lta bu'i sems te/ khyim ni rdzas la sogs pa chud mi za bar bzung zhing skyong bar byed de/ de bzhin du sems de yang bdag gi lus bsrung ba'i chos bsten par byed pa'o//seng ge'i sems gang zhe na gang thams cad zil gyis gnon pas bsten pa'o zhes pa ni seng ge lta bu'i sems te/ seng ge ni bdag gi sgyu rtsal gyis byol song thams cad zil gyis gnon pa de bzhin du sems de yang bdag gis yang shes shing grags pa'i phyogs kyis gzhan rnams zil gyis gnon pa'i chos bsten pa'o//'ug pa'i sems gang zhe na/ gang mtshan mo sems pa'o zhes pa ni 'ug pa lta bu'i sems te/ 'ug pa ni bdag gi zas tshol ba la sogs pa bya ba thams cad mtshan mo byed do/ /de bzhin du sems de yang bdag gi bya ba rnams mtshan mo byed pa'i chos bsten pa'o//bya rog gi sems gang zhe na/ gang thams cad du skrag pas sems pa'o zhes pa ni bya rog lta bu'i sems te bya rog ni kun gyis 'jigs shing brtabs bzhin du rang gi bya ba byed do/ /de bzhin du sems de yang gang gis dngos po spyad pa thams cad la bag tsha zhing brtabs pa'i chos bsten par byed pa'o//srin po'i sems gang zhe na/ gang dge ba dang mi dge ba rnams sgrub pa'o zhes pa ni srin po lta bu'i sems te/ srin po ni sngon dge ba la sogs pa spyad pa'i rgyus bdag mthu dang ldan par gyur la/ mthu des gsod pa la sogs pa mi dge ba'i chos rnams spyad de sems de yang de lta bu'i chos bsten par byed pa'o//tsher ma'i sems gang zhe na/ gang thams cad du 'gyod pa sems pa'o zhes pa ni tsher ma lta bu'i sems te/ tsher ma ni 'dzugs shing gnod par byed pa'o/ /de bzhin du sems de yang byas pa'i dngos po la 'gyod pa skye ste 'gyod pa de nyid yang dang yang du yid la byed cing zug rngur gyur pa'i chos bsten pa'o//sa 'og gi sems gang zhe na/ sa 'og gi don du sems pa'o zhes pa ni sa 'og gi phyir sems pa ste sa 'og tu song nas de'i bya ba byed pa'i chos bsten pa'o/ /rlung gi sems gang zhe na/ gang thams cad du thams cad sgrub pa'o zhes pa ni rlung lta bu'i sems te/rlung ni res 'ga' me'i nang du zhugs/ res 'ga' chu la sogs pa'i nang du zhugs pa de bzhin du/ sems de yang res 'ga' dge ba'i nang du zhugs nas dkrugs te mi dge bar byed/ res 'ga' ni mi dge ba'i nang du zhugs te dge bar byed de/ mdor na kun gyi nang du 'jug la kun la yang mi gnas par byed pa'i chos bsten par byed pa'o/ /chu'i sems gang zhe na/ gang mi dge ba'i sems thams cad bkru ba'i phyir bsten pa'o/ /me'i sems gang zhe na/ gang dka' thub nyid kyis gdung bar byed pa'o zhes pa ni me lta bu'i sems te/me ni rang gi tsha bas gdung bar byed de de bzhin du sems de yang rang gi dka' thub kyis lus dang sems gdungs shing sma 'bab par byed pa'i chos bsten pa'o/ /me dka' thub kyi dper ji ltar 'gyur zhe na/ rgya gar skad du tsha ba la ta pa zhes bya/ dka' thub la yang ta pa zhes bya ste skad mthun pas dper bya'o//'dam gyi sems gang zhe na gang bdag gi nyes pas gzhan la skud pa'o zhes pa ni 'dam lta bu'i sems te 'dam ni bdag gi ngo bo ngan pa de gzhan la bsgos nas chags par byed do/ /de bzhin du sems de yang rang gi nyes pa gzhan la gos par byed pa'i chos bstan par byed pa'o//rnyog pa'i sems gang zhe na/ gang pha rol gyi nyes pa 'dzin pas sems la rnyog pa skyes pa'o zhes pa ni rnyog pa lta bu'i sems te/ gzhan gyi nyes pas bdag gi sems 'khrugs par byed pa'o/ /tshon rtsi'i sems gang zhe na/ gang de la chags pa nyid du bsten pa'o zhes pa ni tshon rtsi lta bu'i sems te/tshon dkar po'am dmar po la sogs pa'i kha dog ni gang la bskus pa de tshon de nyid kyi rang bzhin du 'gyur te/ de bzhin du sems de yang dngos po gang bsams pa de la zhen nas ji ltar bsams pa de'i rang bzhin du 'gyur ba'i chos bsten pa'o/ /shing leb kyi sems gang zhe na/gang dge ba gzhan spong bas bsten pa'o zhes pa ni shing leb lta bu'i sems te/ shing leb ni mtshon la sogs pa gzhan rnams kyis mi phigs par skyob pa'i bya ba byed do/ /de bzhin du sems de yang dge ba gcig spyad pas dge ba gzhan sgrib par byed pa'i chos bsten par byed pa'o//nor ba'i sems gang zhe na/ gzhan gzung zhing gzhan kho nar sems pa'o zhes pa ni nor ba'i rang bzhin gyi sems te gang gi dngos po zin te nor nas gzhan yin snyam du sems pa'o/ /dug gi sems gang zhe na/ gang shin tu dngos po med pa nyid sems pa'o zhes pa ni dug lta bu'i sems te/dug ni gang gis zin na shi ste med par 'gyur ba'o/ /de bzhin du sems de yang gang lta ba la sogs pa'i nyon mongs rnams spangs nas slar mi skye bas med par byed pa'o/ /zhags pa'i sems gang zhen gang thams cad du bdag nyid bcings shing 'dug pa'o zhes pa ni zhags pa lta bu'i sems te/zhags pa ni 'ching ba'i bya ba byed do/ /de bzhin du sems de yang bdag nyid 'ching bar byed pa'i chos bsten par byed pa'o/ /lcags sgrog gi sems gang zhe na/ gang rkang pa gnyis la 'dug ste sems pa'o zhes pa ni lcags sgrog lta bu'i sems te lcags sgrog ni rkang pa gnyis 'dzin par byed de/de bzhin du sems de yang yod pa dang med pa'i tshig gi mtha' gnyis 'dzin pa'i chos bsten pa'o/ /de lcags sgrog gis rkang pa gnyis 'dzin pa sems kyis mtha' gnyis su 'dzin pa'i dper ji ltar 'gyur zhe na/rgya gar skad du rkang pa la pA da zhes bya/ tshig la yang pA da zhes bya ste mthun no/ /sprin gyi sems gang zhe na/ gang chu dag la sems pa'o zhes pa ni sprin lta bu'i sems te/ sprin ni chu 'du zhing chu'i bya ba byed de de bzhin du sems de yang chu'i bya ba byed pa'i chos bsten pa'o//zhing gi sems gang zhe na rang gi lus nyid yongs su sbyong bar byed pa'o zhes pa ni zhing lta bu'i sems te/ zhing ni 'bru la sogs pa skye bar bya ba'i phyir rmos pa la sogs pa'i byi dor gyi las byed do/ /de bzhin du sems de yang bdag gi lus bzang por bya ba'i phyir khrus dang byug pa dang /rgyan la sogs pas bdag gi lus brgyan par byed pa'i chos bsten pa'o/ /lan tshwa'i sems gang zhe na/ gang zhig gang gis sems par byed pa de la yang sems par byed pa'o zhes pa ni lan tshwa lta bu'i sems te/ bum pa la sogs pa'i snod kyi nang du lan tshwa gzhan na snod de yang lan tshwas zos nas byang ste rdol pa dang lan tshwa'i ror 'gyur ro//de bzhin du sems des kyang gang gi dngos po la dmigs shing rtog la/ rtog pa'i sems de nyid kyis skad cig ma phyi ma'i cha la rtog pa des sun phyung nas med par byed pa'i chos bsten par byed pa'o//spu gri'i sems gang zhe na/ gang rab tu byung ba tsam la bsten pa'o zhes pa ni spu gri lta bu'i sems te/ spu gri ni rab tu byung ba'i skra 'dreg pa tsam gyi bya ba byed de/ rab tu byung ba las gzhan nan tan ni mi byed do/ /de bzhin du sems de yang rab tu byung te/skra bregs nas rab tu byung ba tsam la gnas kyi rab tu byung ba'i bslab pa'i nan tan tshul khrims bsrung pa la sogs pa mi byed pa'o/ /ri rab lta bu'i sems gang zhe na/ gang mtho bar gyur nas sems pa'o zhes pa ni ri rab lta bu'i sems te/ ri rab ni dpag tshad stong phrag brgyad bcur gyen du mtho zhing 'phags te/de bzhin du sems de yang bdag gi yon tan gyis kun nas 'phags so snyam nas 'gying zhing che bar byed pa'i chos bsten par byed do/ /rgya mtsho lta bu'i sems gang zhe na/ gang rang gi lus nyid la mchog tu 'dzin cing 'dug pa'o zhes pa ni rgya mtsho lta bu'i sems te/rgya mtsho ni rang gi rlabs kyis bdag nyid la rlob cing reg par byed pa'o/ /de bzhin du sems de yang bdag nyid kyi lus la mi rtag pa dang stong pa la sogs par rtog go/ /phug lta bu'i sems gang zhe na/ gang sngar nges par gyur pa la gyis de nyid kyis 'gyur bar bsten pa'o zhes pa ni phug lta bu'i sems te/phug ni sgo na chung ngur nges pa las phug gi nang ni sgo las rnam pa du mar che bar 'gyur ro/ /de bzhin du sems de yang sngar bdag nyid tshul khrims dang / yon tan dang ldan pa nges par gnas pa las tshul khrims dang yon tan de nyid kyis dregs nas de'i gzhis nga rgyal byed cing 'gyur ba'o//de la skye ba gyur pa'i sems gang zhe na/ gang gi sems gang kho na dang skyes pa de kho na dang lhan cig 'gro ba'o zhes pa ni skye bar gyur pa'i rang bzhin gyi sems te/ sngon dge ba dang mi dge ba gang yang rung ba la spyad pa'i bag chags yod pas gang du skyes na yang bag chags de nyid dang lhan cig tu skye'o//yang na sngon gyi dge ba dang mi dge ba'i las gang yang rung ba'i rnam par smin pa'i 'bras bu mi 'dra ba'i skye ba rnyed nas de lta bu dang lhan cig tu skye ba ste/ dper na tshe rabs snga ma la srog gcod pa goms shing mang du byas pas tshe phyi ma la nad mang zhing tshe thung bar 'gyur ba ste de bzhin du dge ba la yang ji ltar rigs par sbyar bar bya'o//'jig rten pa'i sems brgya drug cu bskal pa gsum gyis 'das nas 'jig rten las 'das pa'i sems skye ste zhes pa la/ 'jig rten las 'das pa'i sems kyang rnam pa gnyis te/gang zag la bdag med par rtogs pa'i sems zag pa med pa rnam pa dang bcas pa'i sems dang chos la bdag med par rtogs pa'i sems zag pa med pa rnam pa med pa rang bzhin gyis 'od gsal ba ste/ de la skabs 'dir 'jig rten las 'das pa'i shes pa ni gang zag rnams kyis shes par nus sam zhe na/de ni rtog ge pa de dag gis ni mi nus te de bas na/ rtog ge kun gyis shes par dka'/ /zhes gsungs pa yin no/ /sangs rgyas rnams kyis sngon bstan pa'o/ /zhes pa ni de ltar rtog ge pa rnams kyis kyang shes par mi nus na sus shes par nus she na/rtog ge pa rnams kyi spyod yul ma yin gyi/ /sangs rgyas bcom ldan 'das rnams kyis mkhyen te gsungs pa'o zhes pa'o/ /sangs rgyas rnams kyis sngon zhes pa ni da ltar 'ba' zhig gis bshad pa ma yin gyi/ sngon gyi sangs rgyas rnams kyis kyang tshul 'di ltar mkhyen nas bshad pa'o zhes pa ste sangs rgyas bcom ldan 'das rnams mkhyen pa gcig par bstan pa'o//de ci'i phyir zhe na/ bsod nams dang ye shes kyi tshogs dang / chos kyi sku dang 'gro ba'i don mdzad par gcig pas mnyam pa nyid kyi phyir ro//nyes pa thams cad rnam spangs pa/ /zhes pa ni de ltar zab cing zhi ba'i gang zag la bdag med par rtogs de nyon mongs pa nye ba'i nyon mongs pa dang bral ba'o zhes pa'o/ /gsang ba pa'i bdag po/ de la 'jig rten las 'das pa'i sems la gnas pa rnams la yang phung po la yod do snyam pa'i blo nye bar skye'o zhes pa ni de ltar gang zag la bdag med pa rnam pa dang bcas pa zab cing zhi ba 'jig rten las 'das pa'i sems la gnas pa na gong du smos pa'i tshul gyis phung po tsam zhig yod par rtog gi/gang zag la ni bdag med par rtogs te de ni bskal pa gsum gyis rdzogs par 'gyur ro//phung po dag la 'dod chags dang bral ba bskyed pa zhes pa nas rnal 'byor pa dag bskal pa gcig gis 'da' bar byed do zhes pa'i bar ni de ltar phung po la spyir brtags te/ brtags pa na de la dngos po yod do snyam du blo skyes pa de phung po so sor phye ste sun phyung ba na gzugs kyi phung po ni dbu ba rdos pa 'dra ste ji ltar dbu ba la so sor gzhigs na dbu ba la snying po med pa bzhin du phung po de yang bshig ste so sor brtags na kha dog dang dbyibs la sogs pa chos so so ba rnams kyi rang gi mtshan nyid tsam du zad kyi phung po zhes bya ba'i dngos po gang yang med par shes so//de bzhin du tshor ba ni chu'i chu bur dang 'dra ste/ byung ma thag tu zhig cing med par 'gyur ba mi rtag pas 'dug pa'i gnas med pa la phung por brtags pa'i dngos po gang yang med par shes so/ /de bzhin du rnam par shes pa'i phung po yang so sor gshig na rnam par shes pa ni sgyu ma dang 'dra ste/ji ltar sgyu ma'i bal glang la sogs te/ de dag la bal glang yod pa ma yin gyi/ de dag gi rang bzhin ni sman dang shing bu la sogs par zad do/ /rnam par shes pa'i phung po yang de dang 'dra ste/ phung por brtags pa'o//dngos po yod pa ma yin gyi de ni rnam par shes pa'i rang bzhin tsam du zad do/ /'du shes kyi phung po yang so sor gzhigs na smig rgyu dang 'dra ste ji ltar skom pas gdungs pa'i skyes bus smig rgyu la chur mthong mod kyi/ de la chu'i dngos po yod pa ma yin te/ smig rgyu'i rang bzhin tsam du zad do//'du shes kyi phung po yang de dang 'dra ste/ 'du shes kyi phung por brtags pa'i dngos po yod pa ma yin pa ma yin gyi/ de ni mtshan mar 'dzin pa'i rang bzhin tsam du zad do/ /de bzhin du 'du byed kyi phung po yang chu shing gi snying po dang 'dra ste/ kun du grags pas 'dir ma smos so//de ltar phung po de yang dbu bal sogs pa'i dpes sun phyung nas phung por brtags pa'i dngos po yod par mi 'gyur te so so'i mtshan nyid du zad do/ /de ltar phung por yod par ma grub na khams dang skye mched rnams kyang dngos po las gzhan ma yin pas khams dang skye mched du brtags pa'i dngos po yod po ma yin gyi de rnams chos so so ba'i rang bzhin tsam du zad do//gzung ba dang 'dzin pa yang ste/ gzugs kyi phung po ni gzung ba'i dngos por brtags/ tshor ba la sogs pa phung po bzhi ni 'dzin par brtags pa'i dngos po yod pa ma yin te/ chos so so ba'i rang bzhin tsam du zad do//de ltar phung po la 'dod chags dang bral ba'i sems bskyed nas dbu ba la sogs pa'i rang bzhin du bshig cing bsgoms pas phung po la yod do snyam pa'i phung por 'dzin pa'i blo skyes pa de las kyang grol bar 'gyur te de bas na nam phung po dag la 'dod chags dang bral ba bskyed pa de'i tshe dbu ba dang chu'i chu bur dang /sgyu ma dang smig rgyu dang mtshungs par bsgoms pas rnam par grol bar 'gyur te zhes gsungs pa yin no/ /de ltar phung po las rnam par grol nas phung po la sogs par brtags pa'i mtshan nyid chos rnams kyi ngo bo'i rang bzhin tsam 'ba' zhig yod par rtog pa gzhung las gsungs pa 'di lta ste/phung po dang khams dang skye mched dang gzung ba dang 'dzin pa rnam par spangs pa chos nyid kyi rang gi ngo bo zhi ba'i dbyings rtogs par 'gyur ro zhes pa ste/ de la phung po dang khams dang skye mched dang //gzung ba dang 'dzin pa rnam par spangs pa zhes pa ni gong du phung po la sogs par brtags pa'i dngos po sun phyung ba'i tshul gyis chos nyid kyi rang gi ngo bo sngon po la sogs pa'i rnam pa la brtags pa'i dngos por yod pa ma yin pas rnam par spangs pa'o/ /de bas na gzung ba dang 'dzin pa rnam par spangs pa zhes pa yang gzugs kyi phung po la gzung bar brtags pa dang /tshor ba la sogs pa'i phung po bzhi la 'dzin pa'i dngos por rnam par brtags pa de rnam par spangs pa la bya'i/ chos la bdag med par rtog pa'i mtshan nyid gzung ba dang 'dzin pa'i rnam par spangs pa la ni mi bya'o//chos nyid kyi rang gi ngo bo zhes pa de la chos ni phung po la sogs pa'o/ /de rnams kyi ngo bo chos nyid kyi rang gi ngo bo ste/ de yang sngon po dang dmar po la sogs pa'i rang bzhin rnams so/ /de ltar sngon po dang dmar po la sogs pa'i rang bzhin tsam 'ba' zhig yod kyi phung po la sogs pa'i dngos por brtags pa'i dngos po med par rtog pa ni zhi ba'i dbyings rtogs pa zhes bya ste/zhi ba zhes pa ni sems kyi rgyud de la phung po la sogs par brtags pa'i 'khrul pa med pas zhi ba'o/ /dbyings ni rang bzhin no/ /rtogs pa ni de lta bu'i tshul du khong du chud pa'o//gsang ba pa'i bdag po/ /'jig rten las 'das pa'i sems phyin ci log dang / phyin ci ma log pa'i sems kyis khyad par brgyad dang 'brel pa/ las dang nyon mongs pa'i dra ba dang bral ba 'di ni rnal 'byor pa dag bskal pa gcig gis 'da' bar byed do zhes pa ni phung por brtags pa'i dngos po yod par 'dzin pa las grol nas chos rnams kyi so so'i rang bzhin tsam 'ba' zhig yod par rtog pa'i sems zhi ba de/phung po la dngos po med pa nas brtsams te chos rnams kyi so so'i rang bzhin sngon po la sogs pa 'ba' zhig tu zad par rtog pa la zhugs nas bskal pa gcig gis sems de nyid las 'das te chos la bdag med par rtogs pa mos pas spyod pa'i sa la 'jug par 'gyur ro//de la 'jig rten las 'das pa'i sems phyin ci log dang phyin ci ma log pa'i khyad par brgyad dang zhes pa ni rgyun du zhugs pa la zhugs pa nas dgra bcom pa'i bar gyi sems brgyad la bya ste/sems de dag phyin ci log dang phyin ci ma log pa yang phung po la sogs par brtags pa'i dngos po yod par 'dzin pas phyin ci log pa'o/ /nyon mongs spangs pas phyin ci ma log pa'o/ / nyon mongs pa'i bag chags dang bcas pas na log pa'o/ /'brel pa zhes pa ni phung po la bdag med par rtogs pa'i sems zhi ba de phung po la yod par 'dzin pa'i sems kyi rim pa brgyad po des bskyed pa la bya ste de lta bas na/ 'jig rten las 'das pa'i sems de phyin ci log dang phyin ci ma log pa'i sems kyi khyad par brgyad dang 'brel pa zhes gsungs so//de dag ni sngags kyi spyad pa spyod pa'i byang chub sems dpa' dbang po rtul po rnams gang zag la bdag med par rtogs pa'i rim gyis sems brgya drug cu la sogs pa'i nyon mongs pa rnam spong ba'i rim pa'o//da ni sngags kyi sgor spyad pa spyod pa'i byang chub sems dpa' theg pa chen pos bgrod pa gzhan gyi dring mi 'jog pa shes rab rnon po rnams chos dang gang zag gnyis ka la bdag med par sgom zhing mos pas spyod pa'i sa la 'jug pa'i rim pa bshad de/ de yang gsang ba pa'i bdag po theg pa chen pos bgrod pa gzhan gyi dring mi 'jog pa rnams la chos la bdag med pa'i sems skye'o zhes pa ni byang chub sems dpa' theg pa chen po la zhugs pa thos pa rab tu mang shing shes rab mchog tu rno ba gzhan gyi dring mi 'jog par rang gi blos chos rnams sgyu ma dang smig rgyu la sogs pa'i mtshan nyid du shes nas chos la bdag med par rtogs par 'gyur ba la bya'o//de la gang zag la bdag med par rtogs pa'i rim pa bskal pa gsum gyis 'da' bar bya ba dang / gang zag la bdag med kyang phung po tsam yod par 'du shes pa yang bskal pa gcig gis spang par bya dgos na/de dag gi bya ba ma byas par ji ltar chos la bdag med pa rtogs par 'gyur zhe na/ lan ni/ de ci'i phyir zhe na/ 'di ltar de dag sngon spyad pa spyod cing phung po'i gnas rnam par 'jig pa na ngo bo nyid yongs su shes pa'i phyir sgyu ma dang / smig rgyu dang / gzugs brnyan dang / brag ca dang / mgal me'i 'khor lo dang / dri za'i grong khyer lta bu'i 'du shes skyes so zhes pa ni sngon spyad pa spyod cing phung po'i gnas rnam par bshig nas sgyu ma dang smig rgyu zhes pa ni dang por dad pas rtsol zhing 'jug pa'i spyod pa spyad pa na phung po'i rang bzhin sgyu ma la sogs pa lta bur shes shing goms par byas pas gang zag la bdag med par rtogs pa'i rim pa ma spyad kyang chos la bdag med par rtogs par 'gyur ro zhes pa'o//de la sgyu ma zhes pa ni chos rnams la sgyu ma lta bur 'du shes skyes te sgyu ma'i bal glang dang rta la sogs pa rdo dang shing la sogs pa las byas kyang rdo shing rnams su mi mngon par bal glang dang rta la sogs pa'i gzugs su snang mod kyi yang dag par na bal glang dang rta la sogs pa'i dngos po yod pa ma min te rdo shing la sogs pa tsam du zad do//de bzhin du phung po la sogs pa'i chos rnams snang yang rnam par shes par 'khrul pa'i dbang gis snang ste/yang dag par na chos kyi ngo bo sgyu ma'i bal glang dang 'dra ste snang du zin kyang yod pa ma yin no/ /rnam par shes pa de ni rdo dang shing la sogs pa dang 'dra ste mi mngon yang gzugs la sogs par snang ba'i chos rnams ni yod pa ma yin gyi rnam par shes pa 'khrul pa'i rnam pa tsam du zad do//de bzhin du smig rgyu yang 'brog dgon pa na skyes bu skom gyis gdungs pas smig rgyu la chur mthong ste chu'i dngos po yod pa ma yin na smig rgyu tsam du zad do/ /de bzhin du phung po la sogs pa'i chos rnams sang yang yod pa ni ma yin kyi rnam par shes pa 'khrul pa'i rnam pa tsam du zad do//de bzhin du gzugs brnyan dang / brag ca dang / mgal me bskor ba dang / dri za'i grong khyer rnams kyang gong du sgyu ma la sogs pa bshad pa'i tshul du rig par bya ste/ mdor na phung po la sogs pa'i chos rnams snang ba ni rnam par shes pa 'khrul pa'i snang ba tsam du zad do//rmi lam na gzugs la sogs pa'i yul med na yang gzugs la sogs par mthong ba de dag gi bya ba byed mod kyi/ rmi lam gyi tshe na gzugs la sogs pa med par gsal bar mngon te/ de dag thams cad rnam par shes pa'i dbang gis gyur pa tsam du zad do snyam nas de ltar mos pas spyod pa'i sa la zhugs nas phung po la sogs pa'i chos rnams la bdag med par rtogs pa ni sgyu ma la sogs pa nas dri za'i grong khyer la sogs pa lta bu'i 'du shes skyes te/chos rnams ni yang dag par yod pa ma yin mod kyi rnam par shes pa tsam yod par 'dzin te/de lta bur chos la bdag med par rtogs pa mos pas spyod pa'i sa de la yang de lta bur chos rnams sgyu ma dang smig rgyu la sogs pa'i tshul du 'jig cing 'jug pa'i sems dang / chos rnams de lta bur bshig nas de'i ting nge 'dzin rnam par mi rtog pa la gnas pa'i sems dang /de nas snying rje'i dbang gis pha rol tu phyin pa la sogs pa rnam par spyod cing sa bcu la sogs pa'i yon tan thos pa dang bsam pa dang bsgom pa'i shes rab kyis shes nas de dag la rab tu mos par byed cing 'jug pa dang gnas pa dang ldang ba'i sems de gsum rnam par bsgoms pas sa dang pha rol tu phyin pa'i yon tan la sogs pa rnams yongs su me shes pa ni yongs su mi shes shing mngon du ma byas pa mnyan pa dang bsams pa dang bsgoms pa'i shes rab kyis chos la bdag med par rtogs shing rnam par shes pa tsam yod par 'dzin pa de ni mos pas spyod pa'i sa'i mtshan nyid de mos pas spyod pa'i sa de bskal pa gcig gis rdzogs par 'gyur ro//de nas bskal pa'i bzhi cha gcig gis mos pas spyod pa'i sa de nas 'phar te/ ye shes kyi sa de la 'jug pa'i rim pa gsungs pa/ gsang ba pa'i bdag po de'i phyir de dag gi sems kyi dbang du byas pas chos la bdag med pa nyid kyang spang bar bya ba ste/rang gi sems ni gzod ma nas ma skyes pa'o/ /de ci'i phyir zhe na/ gsang ba pa'i bdag po ngo bo nyid yongs su shes pa'i phyir sems la sngon gyi mtha' dang phyi ma'i mtha' mi dmigs te rnal 'byor pa dag 'di yang bskal pa gnyis kyis 'da' bar byed do zhes pa'o//de la de dag gi sems kyi dbang du byas pas chos la bdag med pa nyid kyang spang bar bya ba ste rang gi sems ni gzod ma nas ma skyes pa'o zhes pa ni sngar chos la bdag med par rtogs te rnam par shes pa 'ba' zhig gzung ba dang 'dzin pa'i rnam pa yod par sems pa de yang rang gi dbang du gyur pas rnam par shes pa de gzod ma nas ma skyes par rtogs pas rnam par shes pa tsam du yod par 'du shes pa de yang spangs pas chos la bdag med pa nyid kyang spangs so//ci'i phyir rnam par shes pa tsam du 'du shes pa de spangs pas chos la bdag med pa spangs zhes bya zhe na phung po la sogs pa rnams bdag med par rtogs pa'i rgyus rnam par shes pa tsam du yod par 'du shes skyes te/de bas na rnam par shes pa tsam yod par 'du shes pa de spangs na chos la bdag med pa nyid spangs pa yin te 'bras bu la rgyus btags pa'o//rnam par shes pa tsam yod par 'du shes pa de yang ji ltar spong zhe na/ de ci'i phyir zhe na gsang ba pa'i bdag po/ /ngo bo nyid yongs su shes pa'i phyir sems la sngon gyi mtha' dang phyi ma'i mtha' mi dmigs te zhes gsungs pa yin te//de ltar rang gi sems de thog ma gang nas skyes pa'i mtha' btsal na mtha' de mi rnyed la/ de ltar thog ma'i mtha' med pas tha ma 'gag pa'i mtha' yang rnyed par mi 'gyur te thog ma dang tha ma'i mtha' mi rnyed do/ /de ltar thog ma'i mtha' med pas sems de ma skyes par mngon te de ltar thog ma nas ma skyes na gzung ba dang 'dzin pa'i rnam par snang ba'i shes pa de gang na ci zhig yod snyam nas rnam par shes pa tsam yod par 'du shes pa de spangs pas chos la bdag med pa yang spangs zhes bya'o//de lta bu'i tshul du sgom zhing chos la bdag med pa spong pa yang bskal pa gnyis kyis yongs su rdzogs par 'gyur ro//da ni rab tu dga' ba'i sa byang chub kyi sems skye ba'i rim pa bshad par bya ste/ de yang gsang ba pa'i bdag po gzhan yang byang chub sems dpa' gsang sngags kyi sgo nas byang chub sems dpa' spyad pa spyod pa bskal pa bye ba khrig khrig brgya stong dpag tu med par bsod nams dang ye shes kyi tshogs dpag tu med pa bsags pa zhes pa nas shin tu ngo bo nyid med pa'i sems skye ste/gsang ba pa'i bdag po 'di ni byang chub kyi sems dang po'o zhes rgyal ba rnams kyis gsungs so zhes pa'i bar gyis sa dang po'i byang chub kyi sems de'i rgyu phun sum tshogs pa dang /rang bzhin phun sum tshogs pa dang / mtshan nyid phun sum tshogs pa dang / mtshan nyid de'i sgrub pa phun sum tshogs pa rnams bshad par rig par bya ste de la rgyu phun sum tshogs pa ni bskal pa bye ba khrag khrig brgya stong dpag tu med par bsod nams dang ye shes kyi tshogs dpag tu med pa bsags pa zhes bya'o//rang bzhin phun sum tshogs pa ni shes rab dang thabs dpag tu med pas yongs su gzung ba zhes pa nas dbang po dang nye ba'i dbang po la sogs pas phyag byas pa zhes pa'i bar te/ rang bzhin phun sum tshogs pa des spong ba phun sum tshogs pa dang mthu phun sum tshogs pa yang bsdus te spong ba phun sum tshogs pa ni shes rab dang thabs dpag tu med pas yongs su gzung ba zhes dang /nyan thos dang rang sangs rgyas thams cad kyis las yang dag par 'das pa zhes pa'o/ /mthu phun sum tshogs pa ni lha dang lha ma yin du bcas pa'i 'jig rten gyis phyag byas pa zhes dang /brgya byin dang tshangs pa dang dbang po dang nye ba'i dbang po la sogs pas phyag byas pa zhes pa'o/ /mtshan nyid phun sum tshogs pa ni shin tu ngo bo nyid med pa'i sems skye zhes pa'o/ /mtshan nyid de'i sgrub pa phun sum tshogs pa ni 'di lta ste/stong pa nyid kyi ngo bo rdzas med pa zhes pa nas mig dang rna ba dang sna dang lce dang lus dang yid dang bral ba zhes pa'i bar ro/ /de la bskal pa bye ba khrag khrig brgya stong dpag tu med par bsod nams dang ye shes kyi tshogs dpag tu med pa bsags pa zhes pa la/bskal pa bye ba ni 'bum phrag brgya la bya'o/ /brgya stong ni bskal pa bye ba khrig phrag 'bum la bya ste dpag tu med ces pa ni bskal pa bye ba phrag 'bum de yang tshad kyis gzhal du med grangs kyis bgrang du med par sems dang po bskyed pa'am/ gang zag la bdag med par bsgom pa nas brtsams te/bsod nams dang ye shes kyi tshogs bsags pa'i rgyus/ sa dang po rab tu dga' ba'i sems shin tu dga' ba'i ngo bo nyid med pa'i mtshan nyid yongs su rdzogs par 'gyur ro/ /shes rab dang thabs dpag tu med pas yongs su gzung ba zhes pa/shes rab ni chos thams cad kyi rang bzhin kun chub par byed pa yin la/ thabs ni snying rje chen po'i dbang gis sems can rnams yongs su smin pa dang grol bar byed pa ste/ dpag tu med pa ni shes rab dang thabs de dag nyid 'di tsam zhes dpag tu med do/ / de ltar shes rab kyis chos thams cad rang bzhin med par rtogs pas nyon mongs pa la sogs pa spangs pa dang thabs kyis sems can smin cing grol bar byas pas ngan song la sogs pa spangs pa'i yon tan dang ldan pas de'i spong ba phun sum tshogs pa'o/ /yongs su gzung ba zhes pa ni byang chub kyi sems de de lta bu'i shes rab dang thabs dpag tu med pa spong pa phun sum tshogs pa des yongs su gzung ba la bya'o//nyan thos dang rang sangs rgyas thams cad kyis las shin tu 'das pa dang zhes pa yang de lta bu'i shes rab dang dpag tu med pa dang ldan pas nyan thos dang rang sangs rgyas kyi lta ba las 'das te 'phags pa'am de dag gi spyod yul ma yin pa la bya ste/de yang spong ba phun sum tshogs pa'o/ /lha dang lha ma yin du bcas pa'i 'jig rten gyis phyag byas pa/ brgya byin dang tshangs pa dang dbang po dang nye ba'i dbang po la sogs pas phyag byas pa zhes pa ni de lta bu'i 'jig rten gyi dbang po la sogs pa sems can mthu chen rnams kyis mchod cing phyag byas pa'i mthu dang ldan pas mthu phun sum tshogs pa'o//byang chub kyi sems de la gzugs med na ji ltar de dag gis phyag bya zhe na gzugs med kyang de'i yon tan dang rdzu 'phrul chen po dag thos nas 'dud cing phyag 'tshal bar 'gyur ro//yang na de lta bu'i sems dang ldan pa'i byang chub sems dpa' la phyag 'tshal ba la yang bya'o/ /'di lta ste stong pa nyid kyi ngo bo nyid ces pa ni byang chub kyi sems de gzung ba dang 'dzin pa'i rang bzhin med de/nam mkha' dang 'dra bas stong pa'i rang bzhin no/ /rdzas med pa zhes pa ni de ltar stong pa'i rang bzhin yin pas rdul phra mo la sogs pa'i rdzas kyi rang bzhin ma yin pa'o/ /mtshan nyid med pa zhes pa ni mu stegs can la sogs pas brtags pa'i bdag la sogs pa khams gsum thams cad skye ba dang 'jig pa'i rgyur gyur pa'i mtshan nyid ma yin pa'o//mtshan ma med pa zhes pa ni byang chub kyi sems de la sngon po dang ser po la sogs pa'i rnam pa'i mtshan ma med pa'o/ /spros pa thams cad las 'das pa zhes pa ni spros pa ni rnam par rtog pa la bya ste rnam par rtog pa med pa'o//nam mkha' ltar dpag tu med pa zhes pa ni de ltar rnam par rtog pa med pas na nam mkha' dang 'dra ste/ nam mkha' ni tshad 'di tsam zhes dpag tu med do/ /de bzhin du byang chub kyi sems de'i yon tan yang tshad gzung du med do//chos thams cad kyi go skabs su gyur pa zhes pa las chos thams cad ni 'dus byas kyi chos la bya ste/ 'dus byas kyi chos de rnams rdul phran gyi phyogs cha la sogs par bshig gam/ sgyu ma dang smig rgyu la sogs pa'i tshul du bshig na stong pa nyid kyi rang bzhin du 'gyur te/de dang byang chub kyi sems ro gcig pas chos de dag thams cad kyi go skabs su gyur pa'o/ /gnyis su chos thams cad ces bya ba ni stobs bcu dang / mi 'jigs pa bzhi dang ma 'dres pa bco brgyad la sogs pa sangs rgyas bcom ldan 'das kyi yon tan gyi chos rnams byang chub kyi sems de la gnas pas na chos thams cad kyi go skabs su gyur pa'o 'dus byas dang 'dus ma byas kyi khams dang bral ba zhes pa la/'dus byas dang bral ba ni sa dang po'i sems thob pa'i mi mthun pa'i gnyen por gyur pas de rnams dang bral ba'o//'dus ma byas dang bral ba ni nyon mongs pa dang shes bya'i sgrib pa'i bag chags ma spangs pas mya ngan las 'das pa'i khams la mi gnas pa'o/ /mig dang rna ba dang sna dang lce dang lus dang yid dang bral ba zhes pa ni mig la sogs pa'i rnam par shes pa ltar mig la sogs pas rgyu byas nas skyed pa ma yin pas de rnams dang bral ba'o//shin tu ngo bo nyid med pa'i sems zhes pa ni de ltar gong du smos pa'i chos rnams gang dang yang mi ldan pas de rnams kyi rnam pa'am rang bzhin med pa ste/ de bas na shin tu ngo bo nyid med pa'i sems so//skye ste zhes pa ni de ltar ngo bo nyid med pa'i sems kyi mtshan nyid de gong du smos pa'i bskal pa snyed du bsod nams dang ye shes kyi tshogs bsags pa'i rgyus sa dang po'i yon tan rnams sdogs nas bla na med pa'i byang chub kyi phyir sems de skye bar rig par bya'o/ /de dag nyon mongs las las grol//las dang nyon mongs ldan pa'ang yin/ /de dag 'jig rten sbyin gnas te/ /de dag rtag mchod ri mor bya/ /zhes pa la/ nyon mongs las las grol zhes pa ni ngan song la sogs pa'i las dang sa dang po'i mi mthun pa'i phyogs dang bral ba'o/ / las dang nyon mongs ldan pa'ang yin/ /zhes pa la gong ma rnams thob par byed pa'i las dang de dag las sgrib pa'i nyon mongs pa dang ldan pa'o/ /de dag 'jig rten sbyin gnas te/ /zhes pa ni/ de lta bu'i sems dang ldan pa'i byang chub sems dpa' nor dang 'bru dang rin po che la sogs pa yon dbul ba'i snod du gyur pa'o//mchod ces pa ni dri dang me tog la sogs pas mchod pa'i gnas so/ /ri mor bya zhes pa ni phyag bya zhing thal mo sbyar ba dang / bsu zhing bskyal ba la sogs pa'i bkur sti'i gnas so//de la rtag mchod ni de lta bu'i byang chub sems dpa' la 'jig rten pa rnams kyis mchod pa dang bkur sti la sogs pa bya'o/ /da ni nyon mongs pas spyod pa'i sa'i mtshan nyid dang yon tan yang bshad de gsang ba pa'i bdag po gzhan yang / mos pa yis ni spyod pa'i sa//zhes pa nas/ blo ldan bskal ba gcig gis ni/ /sa las yang dag 'da' bar 'gyur/ /zhes pa'i bar ro/ /de la mos pa yis ni zhes pa mnyan pa dang / bsams pa dang / bsgoms pa'i shes rab kyis sa dang pha rol tu phyin pa la sogs pa sangs rgyas kyi yon tan rnams shes na de nyid yin gyi gzhan ni ma yin no snyam du de la shin tu mos pa skye ba'o//de la/ sems gsum rnam par sgom pa ste/ /zhes pa ni 'jug pa dang / gnas pa dang / ldang ba'i sems te de dag rnam par sgom pa'i thabs ni sngar chos la bdag med pa'i skabs su bshad zin to//mos pas spyod pa zhes pa ni chos de la mos pa tsam ma yin gyi/ de rnams kyi yon tan goms par bya ba la nan tan byed pa ste/ de bas na/ pha rol phyin rnams spyod pa dang / /bsdu ba dag ni bzhi po yis/ /zhes gsungs pa yin no/ /de la/ pha rol phyin rnams spyod pa dang //zhes pa ni sa dang po nas brtsams te bcu pa'i bar du sa re re la phyin pa la sogs pa'i pha rol tu phyin pa re re spyod de/ bdag ji ltar pha rol tu phyin pa la spyod pa de bzhin du/ sems can gzhan rnams kyang bsdu ba rnam pa bzhi'i sgo nas bsdus te spyod du 'jug go/ /de la rab tu dga' ba'i yon tan sems dga' bzhin du chos dang zang zing gis sbyin pa'i pha rol tu phyin pa spyod pa ste/mos pas spyod pa'i sa la gnas pa na bdag kyang spyod la/ sems can gzhan rnams kyang bsdu ba rnam pa bzhi'i sgo nas bsdus te spyod du 'jug go/ /sa gnyis pa dri ma med pa la tshul khrims kyi pha rol tu phyin pa dri ma med pa la spyod pa yang /mos pas spyod pa'i tshe bdag kyang spyod la gzhan rnams kyang spyod du 'jug go/ /sa gsum pa 'od byed pa la mi skye ba'i chos la bzod de/ bzod pa'i pha rol tu phyin pa spyod pa yang mos pas spyod pa'i tshe bdag kyang spyod la gzhan yang spyod du 'jug go//sa bzhi pa 'od 'phro ba can la ye shes kyi 'od 'phro bas brtson 'grus kyi pha rol tu phyin pa spyod pa dang / sa lnga pa sbyang dka' ba la bdud la sogs pas shin tu rgyal bar dka' ba'i bsam gtan kyi pha rol tu phyin pa spyod pa dang / sa drug pa mngon du gyur pa shes rab mngon du gyur pas shes rab kyi pha rol tu phyin pa spyod pa dang /sa bdun pa ring du song ba la sems can rnams smin pa dang grol bar byed pa'i thabs kyi pha rol tu phyin pa dang / sa brgyad pa mi g.yo ba la smon lam gyi dbang thob nas sa gong ma rnams thob pa'i phyir smon lam gyi pha rol tu phyin pa spyod pa dang /sa dgu pa legs pa'i blo gros la stobs kyi pha rol tu phyin pa spyod pa dang / sa bcu pa chos kyi sprin la phyogs bcu'i de bzhin gshegs pa rnams la mngon sum du ye shes kyi chos 'dri zhing / spyod yul du gyur pa'i ye shes kyi pha rol tu phyin pa spyod pa rnams mos pas spyod pa'i tshe nyid na bdag kyang spyod pa la goms par byed la sems can gzhan rnams kyang bsdu ba rnams bzhi'i sgo nas bsdus te spyod du 'jug pa'o//bsdu ba rnam pa bzhi zhes pa ni sbyin pa dang snyan par smra ba dang / don spyod pa dang /don mthun pa'i sgo nas pha rol tu phyin pa rnams la spyod du 'jug pa'o/ /sa de rnams kyi mtshan nyid dang yon tan rgya cher ni sa bcu pa'i mdo sde la sogs par shes par bya'o/ /mos pa'i sa ni mtshungs pa med/ /ces pa ni mos pas spyod pa'i sa de 'jig rten phal pa rnams dad mi mnyam pa'o//dpag tu med cing zhes pa de'i yon tan gyi spyi grangs kyis gzhal ba las 'das pa'o/ /bsam mi khyab ces pa ni sems kyis bsams shing dpag pa las 'das pa'o/ /dpag med ye shes 'byung ba zhes pa ni mos pas spyod pa'i sa de la bya ste/ dpag med ni thams cad mkhyen pa'i ye shes so/ / sems bcu dag gis thob par 'gyur/ /zhes pa ni pha rol tu phyin pa bcu po spyod pa'i sems kyi rim pas so/ /ngas gang cung zad brjod pa ni/ /thams cad 'di yis thob par 'gyur/ /zhes pa ni stobs bcu dang mi 'jigs pa bzhi dang ma 'dres pa bco brgyad la sogs pa'i chos gang cung zad bcom ldan 'das kyis gsungs pa de thams cad ni mos pas spyod pa des 'thob par 'gyur ro//de phyir thams cad mkhyen pa'i sa/ /mos pa zhes ni bya bar bshad/ /ces pa ni de ltar de bzhin gshegs pa'i chos thams cad mos pas 'thob pas na mos pas spyod pa'i sa de thams cad mkhyen pa'i sa de'i rgyu ste de bas na rgyu la 'bras bur btags te/mos pa zhes ni bya bar bshad/ /ces gsungs pa yin no/ /blo ldan bskal pa gcig gis ni/ /sa las yang dag 'da' bar 'gyur/ /zhes pa ni shes rab can gyis mos pas spyod pa'i sa de bskal pa gcig gis yongs su rdzogs par 'gyur zhes pa'o//'di yi yang ni bzhi cha yis/ /mos pa'i sa las 'da' bar 'gyur/ /zhes pa ni bskal pa de'i bzhi cha gcig gis mos pas spyod pa'i chos bdag med par chud pa'i sa de las 'phar te ye shes kyi sa la 'jug pa'i stegs su gyur pa'i chos la bdag med pa yang spangs nas rang gi sems gzod ma nas ma skyes shing ma byung bar bsgom par zhugs pa la bya'o//mos pas spyod pa'i sa'i rim pa dang / yon tan de dag sngar mos pas spyod pa'i sa bdag med pa la 'jug pa'i skabs su mi bshad par rab tu dga' ba'i sa bshad pa'i 'og tu ci'i phyir bshad ce na/rab tu dga' ba'i sa ni mos pas spyod pa'i sa'i 'bras bu ste/ de ltar 'bras bu de ci 'dra bshes nas de'i rgyu gang yin pa de gdod brtag par bya ste/ de bas na mos pas spyod pa'i sa de'i rjes su bshad do/ /de dag gis ni rnam par snang mdzad kyi rgyu sbyin pa la sogs pa sems brgyad po bshad pa dang /so so'i bdag tu brtag pa la brten nas 'ba' zhig pa'i blo skye ba bshad pa dang / de nas 'jig rten las 'das pa'i sems skyes te/bdag tu brtags pa rnams med par rtogs nas phung po tsam du 'dzin pa gang zag la bdag med par rtogs pa bshad pa dang /phung po tsam po de la yang dbu ba dang chu'i chu bur la sogs pa'i tshul du bshig nas chos rnams so so'i rang bzhin sngon po la sogs pa tsam du zad par rtogs pa bshad pa dang / chos la bdag med par rtogs nas rang gi sems gzod ma nas ma skyes pa stong pa nyid du rtogs par bshad pa dang /sa dang po'i sems kyi rang bzhin stong pa nyid kyi rang bzhin de yang ngo bo nyid med par mnyam pa nyid du rtogs pa rnams rgya cher bshad do/ /da ni 'dir de rnams nyid dbugs pa'i sgo nas mdor bsdus te phyag na rdo rjes gsol pa dang bcom ldan 'das rnam par snang mdzad kyis kyang mdor bsdus te gsungs pa de bshad par bya ste/de rnams lan gnyis su 'das te bshad ci dgos she na/ sngar bshad pas gsal bar ma go na phyis bzlas te bshad pas gsal zhing brtan par 'gyur ba'i phyir te/ de bas na phal cher yang sngar rgya cher bshad pa de ma go na phyis mdor bsdus te bshad pas go ba yang yod la/sngar tshig rkyang bas bshad pa de ma go ba la phyis tshigs su bshad de go ba yang srid pa'i phyir ro/ /mdo sde la sogs pa gzhan dag nas kyang sngar spros te bshad pa'i don de nyid tshigs su bcad pas bsdus te bshad pa de dag srid de/de bas na 'dir yang sngar rgyas par bshad pa'i don de nyid phyis bsdus te bshad do/ /de yang de nas bcom ldan 'das la phyag na rdo rjes 'di skad ces gsol to zhes pa nas/ mchog skyes de dag dbugs phyin 'gyur/ /zhes pa'i bar du phyag na rdo rjes gsol ba'i tshig ste/mgon po khyab bdag khyod kyis ni/ /sems kyi mtshan nyid bstan lags na/ /zhes pa ni sngar sems rnams kyi mtshan nyid bshad pa de dbugs dbyung ba rnam pa dus thob par 'gyur zhes zhus pa'o/ /dbugs 'byin rnam pa du thob nas//zhes pa la phyi nas dbugs dbyung ba zhes pa ni/ ji ltar 'jig rten na grags pa lam 'phrang 'jigs pa'i sa nas rkun po la sogs pa'i 'tshe ba las thar na dbugs dbyung ba zhes bya ba de bzhin du/ 'dir yang 'khor ba'i dgon pa na rnam par 'khyams pa'i sems can las dang nyon mongs pa'i rkun pos 'tshe ba'i 'jigs pa las thar ba na dbugs dbyung ba zhes bya'o//de las thar na gzhan dbugs dbyung bar bya ba'i sa med de dbugs dbyung ba gcig tu zad na/ ci'i phyir dbugs dbyung ba dus thob ces mang po'i tshig tu smos she na/ ji ltar 'jig rten pa rnams 'jigs pa gcig la thar nas 'jigs pa de las dbugs phyung mod kyi/de las gzhan pa'i 'jigs pa rnams las ma thar na dbugs ma phyung ba'o/ /de bzhin du 'dir yang mi dge ba gang mi mthun pa gegs su gyur pa de las thar te dbugs phyung yang de las gzhan pa'i gegs su gyur pa rnams ma thar na de la dbugs ma phyung ba zhes bya ste/de bas na dbugs dbyung rnam pa dus zhes smos so/ /mchog skyes ni sras rnams te/ mchog ni chos kyi dbyings te de bzhin nyid yin la de las skyes pa ni byang chub sems dpa' ste/ de dag dbugs phyin par gyur pa'o//de skad gsol nas bcom ldan 'das/ /rnam par snang mdzad chen po yis/ /de tshe phyag na rdo rje la/ /yid bsdus de ni nyon zhes gsungs/ /zhes pa nas stong pa nyid kyi ngo bo nyid med do zhes stong pa'i ye shes skyes pa de'i tshe chos thams cad kyi ngo bo nyid mnyam pa nyid kyis dbugs phyin pa yin no zhes pa'i bar du phyag na rdo rjes gsol pa rnams kyi lan bcom ldan 'das rnam par snang mdzad kyis bka' stsal pa yin no//yid bsdus de ni nyon zhes pa ni snod rnam pa bzhi'i gnyen por gsungs pa ste sngar bshad do/ /nam byis pa so so'i skye bo de dag mi dge ba'i las spangs te dge ba'i las byed pa de'i tshe dge bas dbugs phyin pa yin no zhes pa ni byis pa phyugs dang 'dra ba rnams 'khor ba na 'khyams pa las 'khor ba las skyo ste bsod nams kyi 'du shes skyes na smyung bar 'dug cing sbyin pa la sogs pa byed pa ni dge bas dbugs phyin pa zhes bya'o//de la dge ba zhes pa ni dbugs dbyung ba gzhan yang dge ba yin na/ci'i phyir 'ba' zhig la dge ba zhes bya zhe na/ gzhan yang dge ba yin mod kyi 'on kyang gzhan rnams la so so'i ming yod pas 'di la dge ba zhes bya'o/ /nam bdag gi kho na nyid yang dag pa ji lta ba bzhin rab tu shes pa de'i tshe bdag la brten nas dbugs phyin pa yin no zhes pa ni/sbyin pa la sogs pa'i sems brgyad spyod pa na dge ba'i bshes gnyen dang phrad de 'jig rten pa rnams kyis bdag tu brtags pa'i dngos po ji lta bu nyid du shes nas/ bdag la brten zhing 'jig rten pa'i las rnams goms par byed pa ni bdag la brten nas dbugs phyin pa zhes bya'o//bdag gi de kho na nyid yang dag pa ji lta ba bzhin du rab tu shes pa zhes pa ni/ stong pa nyid kyi rang bzhin du shes rab kyis ji lta ba bzhin shes pa la ni mi bya'i 'jig rten pa'i gzhung bzhin du bdag gis ngo bor brtags pa de phyin ci ma log par shes pa la bya'o//nam phung po yongs su gzung ba byas te/ rang gi ngo bo la rnam par dpyad nas bdag la brten pa yongs su gtong ba de'i tshe bdag med pas dbugs phyin pa yin no zhes pa ni/ gang zag gi bdag med par rtogs la phung por brtags pa yod par 'dzin pa de ni bdag med pas dbugs phyin pa zhes bya'o//nam phung po rnams spangs nas chos kyi dmigs pa la gnas pa de'i tshe chos kyis dbugs phyin pa yin no zhes pa ni/ phung por brtags pa yod par 'dzin pa de ni dbu ba dang chu bur la sogs pa'i tshul du bshig na/ phung por brtags pa'i dngos po yod pa ma yin gyi chos rnams so so'i mtshan nyid tsam 'ba' zhig yod par rtogs pa ni chos kyi dbugs phyin pa zhes bya'o//nam chos rnams spangs mi skye ba la gnas pa de'i tshe chos la bdag med pas dbugs phyin pa yin no zhes pa ni/ phung po la sogs pa'i chos rnams sgyu ma dang smig rgyu'i tshul du bshig na yod pa ma yin te/rnam par shes pa tsam du zad par rtogs la rnam par shes pa de nyid kyang thog ma dang tha ma'i mtha' rnyed de rang bzhin med pa gzod ma nas ma skyes par rtogs pa de ni chos la bdag med pas dbugs phyin pa zhes bya'o//nam phung po dang / khams dang / skye mched thams cad dang / gzung ba dang / 'dzin pa dang / bdag dang / srog la sogs pa dang / chos dang / mi skye ba dag kyang stong pa nyid kyi ngo bo nyid kyi yang ngo bo nyid med do zhes stong pa'i ye shes skyes pa de'i tshe chos thams cad kyi ngo bo nyid mnyam pa nyid kyis dbugs phyin pa yin no zhes pa ni/phung po la sogs pa'i chos rnams bdag med par rtogs te rnam par shes pa tsam du zad par shes pa dang /rnam par shes pa de yang gzod ma nas ma skyes par rtogs te stong pa nyid kyi rang bzhin du shes pa'i stong pa'i rang bzhin de yang ngo bo nyid med par rtogs pa ni stong pa sa dang po'i sems kyi mtshan nyid stong pa'i yang stong pa ste mnyam pa nyid kyis dbugs phyin pa zhes bya'o//de rnams ni bcom ldan 'das rnam par snang mdzad kyi rgyu phun sum tshogs pa bshad pa la bya ste/ rgyu phun sum tshogs pa bshad pa yang de 'ba' zhig tu ma zad kyi gzhan yang rgyu'i gnas skabs nas 'byung ba/ byang chub nam mkha'i mtshan nyid de//rtog pa thams cad spangs pa yin/ /gang zhig de rtogs 'dod pa des/ /byang chub sems dpa' zhes bya'o/ /zhes pa ste bla na med pa'i byang chub de rtogs par 'dod pa de ni/ sa dang po man chad rnams 'ba' zhig la mi bya'i/ sa bcu dang kun du bzang po'i sa la gnas pa'i byang chub sems dpa' yang bla na med pa'i byang chub rtogs par 'dod pa ste/de bas na byang chub sems dpa' de rnams kyi spyod pa yang bcom ldan 'das rnam par snang mdzad kyi rgyur rig par bya'o/ /da ni 'di dpyad par bya ste/sngags rnams kyi spyi'i mtshan nyid ni byang chub kyi sems so zhes gzhung las gsungs na/ byang chub kyi sems ni/ phung po dang / khams dang / skye mched dang / gzung ba dang / 'dzin pa dang / las dang / bya ba'i rnam pa dang bral ba stong pa nyid kyi rang bzhin du yang ngo bo nyid med pa yin la/sngags ni sangs rgyas dang / byang chub sems dpa' rnams dang / de ston par byed pa'i sgra dang yig 'bru rnams te/ de rnams kyang mchog dang / 'bring dang / tha ma'i tha grub pa dang / zhi ba dang /rgyas pa dang / mngon spyod la sogs pa'i las rnams kyi bya ba byed de/ de ltar mi mthun na de rnams ji ltar rig par bya zhe na/ de'i phyir de ni/ gsang ba pa'i bdag po/ de'i tshe byang chub sems dpa' gsang sngags kyi sgo nas byang chub sems dpa'i spyad pa spyod pa bzhi bcus rten cing 'brel bar 'byung ba rnams bsgoms te gsang sngags kyi tshul rtogs par khong du chud par 'gyur ro zhes gsungs pa ste/yod kyang kun rdzob kyi chos rnams ni rigs pas brtag mi bzod de/ don dam par na stong pa'i rang bzhin yin mod kyi 'on kyang kun rdzob tu so so'i rgyu dang 'bras bu nges pa'i bya ba rnams kyang byed par 'gyur te med ces byar mi rung ngo //de ltar stong pa'i rang bzhin las kun rdzob tu yod par snang ba ni sgyu ma la sogs pa dang 'dra'o/ /de bzhin du sngags kyi rang bzhin byang chub kyi sems de yang don dam par stong pa yin mod kyi chos kyi dbyings kyi byin gyi rlabs dang /sgrub pa po'i sbyor ba'i mthus grub pa'i 'bras bu rnam pa sna tshogs kun rdzob tu snang zhing myong bar 'gyur te/ de rnams kyang sgyu ma la sogs pa'i dpes bshad pa ni/ 'di lta ste/ sgyu ma dang / smig rgyu dang / rmi lam dang zhes pa la sogs pa nas/gsang ba pa'i bdag po gzhan yang / /ji ltar 'ga' zhig bdag nyid kyi/ /lag na mgal me thogs nas ni/ /bskor na 'khor lo ltar snang ba/ /de bzhin stong pa dag las 'byung / /zhes pa'i bar du'o/ /de la sgyu ma gang zhe na/ 'di lta ste/ sman dang sngags kyis sbyor ba byed pa dag gi sbyor ba las dngos po rnam pa tha dad pa sna tshogs mig dang yid 'phrog pa sngon ma mthong ba dag kyang ston te/ de dag ni phan tshun phyogs bcur 'gro ba dang 'ong ba med do/ /de ci'i phyir zhe na/ sgyu ma ni rang bzhin gyis stong pa'i phyir te/de bzhin du gsang sngags sbyor ba byed pa dag gi sbyor ba las thams cad 'byung ngo zhes pa ni/ ji ltar sgyu ma mkhan kyis rngo gsang sngags dang sman gyi sbyor ba las ba lang dang rta la sogs nga'i dngos po rnam pa mang pos yid dang mi chags par byed par snang ste/ de rnams kyang ba glang rta la sogs pa'i rang bzhin du yod pa ma yin pas na phyogs bcur 'gro ba dang 'ong ba med de/ 'on kyang de dag ba glang la sogs pa'i bya ba yang byed do/ /de bzhin du sngags kyi rang bzhin byang chub kyi sems de stong pa nyid yin kyang sbyor ba las sngags kyi dngos grub kyi sbyor ba sbyar na rab dang 'bring la sogs pa'i grub pa'i 'bras bu rig 'dzin dang /nam mkha' la 'gro ba dang mi snang bar 'gro ba la sogs pa rnam pa sna tshogs su snang zhing myong bar byed do/ /gsang ba pa'i bdag po gzhan yang / smig rgyu ni rang bzhin kyis stong pa ste de yang 'du shes kyis tha snyad tsam du 'dogs shing tha snyad sgrub par byed do//de bzhin du 'du shes 'di yang gsang sngags so zhes tha snyad du 'dogs shing tha snyad kyang sgrub par byed do zhes pa ni/ de ltar sngags kyi 'bras bu sgyu ma dang 'dra na sngags kyi dngos po ci zhig ce na/ smig rgyu lta bu ste/ji ltar 'brog dgon par smig rgyu la mi'am/ ri dwags rnams kyis chur 'du shes te/ de na chu yod pa ma yin yang smig rgyu de'i rnam pa'i rnam par shes pa bskyed cing skom pa yang chus ngoms pa'i bya ba byed de de bzhin du sngags de yang dngos po yod pa ma yin pas 'du shes tsam du zad mod kyi/'on kyang sngags kyi dngos grub kyi 'bras bu bskrun pa'i bya ba byed do/ /de bzhin du yang / gsang ba pa'i bdag po gzhan yang / rmi lam na bdag nyid nyin gcig dang / thang cig dang / skad cig dang / yud tsam dang / lo la sogs par 'dug cing bde ba dang sdug bsngal rnam pa mang po myong bar mthong la/sad na ci yang mi mthong ba de bzhin du gsang sngags kyi tshul 'di yang rmi lam lta bur khong du chud par bya'o zhes pa ni/ sngar sngags bsgrubs pa'i 'bras bu'i dpe sgyu ma las blangs pa de sgyu ma ni yun ring du 'dug pa ma yin gyi skad cig yud tsam dag tu zad la sngags kyi 'bras bu ni bskal ba la sogs par yun ring du 'dug na ji ltar dper rung zhe na/rmi lam gyi dpes yun ring du gnas par bstan pa ste/ ji ltar rmi lam na yul gyi dngos po med par skad cig dang / nyi ma dang / zhag dang / lo la sogs par yul rnams spyod cing bde ba dang sdug bsngal rnam pa mang po myong zhing rigs par mthong ste de las sad na dngos po gang yang med do//de ltar yang cis mngon zhe na/ ting nge 'dzin gyi rgyal po'i mdo las kyang gsungs pa/ ji ltar bu mo gzhon nu'i rmi lam na/ /bu pho byung zhing shi ba de mthong nas//byung na dga' zhing shi na mi dga' ltar/ /zhes pa ste de ltar rmi lam na yun ring por srid do/ /de bzhin du sngags bsgrubs pa'i 'bras bu yang rang bzhin med pa las rnal 'byor pas bsgrubs na grub pa'i 'bras bu rnam pa sna tshogs tshe rabs dang bskal pa la sogs par gnas par 'gyur ro//gsang ba pa'i bdag po gzhan yang / gsang sngags kyi dngos grub 'byung ba ni gzugs brnyan lta bur 'gyur bar rig par bya ste zhes pa ni/ de ltar sngags grub pa de rnams dngos po med par yang rten cing 'brel par 'byung ba las byung na sgrub pa po thams cad kyis grub pa ci'i phyir mi 'thob ce na/ji ltar gzugs brnyan de rdo dang shing gzhan las mi 'byung gi/ me long gi dkyil 'khor dag pa las 'byung bar 'gyur ro/ /de bzhin du sngags kyi grub pa de yang sgrub pa po thams cad la mi 'byung gi/ gang byang chub kyi sems bsgoms shing rgyud dag par gyur pa de la 'byung bar bstan pa'o//gsang ba pa'i bdag po gzhan yang / grub pa'i grub gnas ni dri za'i grong khyer lta bur blta'o zhes pa ni/ ji ltar dri za rnams kyi grong khyer dri za de rnams kyis gang du bsams pa der grong thal byung du 'byung bar 'gyur te/de bzhin du gsang sngags grub pa de yang bdag nyid kyi lus rig 'dzin la sogs par grub pa'i phyir bsgrubs kyi gzhan gyi phyir ma bsgrubs kyang nam rig 'dzin la sogs pa grub na lha'i gzhal med khang dpag bsam gyi shing dang / grib ma dang / shel gyi brag las bdud rtsi'i chu 'bab pa dang /rin po che'i gsing ma la sogs pa'i gnas rnams bsams pa tsam gyis 'grub par 'gyur ba bstan pa'o/ /gsang ba pa'i bdag po gzhan yang gsang sngags kyi sgra ni brag ca lta bur rig par bya ste/ dper na sgra la brten nas brag ca 'byung ba ltar gsang sngags kyi tshul 'di yang de dang 'dra bar rig par bya'o zhes pa ni/ji ltar sgra'i rkyen gyis brag ca 'byung bas dngos po yod pa ma yin yang sgrar 'byung ba de bzhin du gsang sngags kyi sgra yang sngags kyi rang bzhin gyis stong mod kyi/ sgrub pa'i rkyen gyis sgra de 'byung ba ni dper na brag ca dang 'dra bar bstan pa'o//gsang ba pa'i bdag po gzhan yang / zla ba shar na chu'i nang du gzugs brnyan mthong nas chu zla zhes brjod pa de bzhin du/ sngags pa de nyid kyang chu zla bzhin du rig sngags 'chang zhes brjod do zhes pa ni/ zla ba shar ba'i gzugs brnyan chu'i nang du 'byung pa de ni zla ba'i rang bzhin de las mi gzhan no//de bzhin du sngags grub pa'i rig 'dzin de yang rig 'dzin gyi lus bzang po la sogs pa ni sgrub pa'i gzugs de las gzhan ma yin te/ gzugs de nyid las 'gyur mod kyi/ 'on kyang rig 'dzin zhes brjod do zhes pa'o/ /gsang ba pa'i bdag po gzhan yang /ji ltar char pa bab pa na/ /chu yi chu bur rnams 'byung ba/ /de bzhin gsang sngags grub pa yi/ /sprul pa rnam pa sna tshogs 'dod/ /ces pa ni sngags gcig pu las grub pa'i 'bras bu rnam pa mang por ji ltar 'gyur zhe na/ chu'i chu bur gyi dpes sngags de gcig pu yin yang grub pa'i 'bras bu rnam pa mang po 'byung bar bstan pa ste/ji ltar char pa bab pa na chu gcig pu de las chu'i chu bur che phra la sogs pa rnam pa mang po 'byung ba de bzhin du sngags gcig pu las kyang grub pa'i 'bras bu rnam pa du ma 'byung ngo / /gsang ba pa'i bdag po gzhan yang /sems can med cing srog dang ni/ /byed pa po yang med pa ste/ /dngos po thams cad stong nyid la/ /'khrul pa kho na snang bar zad/ /ces pa ni/ de ltar sngags kyi rang bzhin stong pa nyid de sems can nam srog gam byed pa'i mkhan po med de/ stong pa nyid yin kyang grub pa'i 'bras bu la sogs pa kun du snang ba ni 'khrul pa snang bar bstan pa'o//gsang ba pa'i bdag po gzhan yang / ji ltar 'ga' zhig bdag nyid kyi/ /lag na mgal me thogs nas ni/ /bskor na 'khor lo ltar snang ba/ /de bzhin stong pa dag las 'byung / /zhes pa ni 'khrul pa la snang ba'i dpe'o//gsang ba pa'i bdag po/ 'di ni theg pa chen po'i gzhi/ /zhes pa nas/ ye shes sna tshogs cher 'byung ba/ /nor gyi dbyig 'di shes na ni/ /kun gyi sems kyi bye brag kyang / /ji bzhin yang dag rab tu shes/ /zhes pa'i bar du sa dang po'i byang chub kyi sems mnyam pa nyid rtogs/ pa de'i rjes su sngags pa bshad pa ste/ theg pa chen po'i gzhi zhes pa ni byang chub kyi sems de ji lta ba bzhin du shes pa ste/ theg pa chen po ni byang chub sems dpa'i lam 'bras bu dang bcas pa'o/ /byang chub kyi sems de shes na 'jig rten pa'i sems brgyad nas sa rab tu dga' ba'i bar gyi rim pa de rnams rab tu shes pas na de'i gnas so zhes pa'o//mi mnyam pa dang mnyam pa'i gzhi/ /zhes pa la mi mnyam pa ni nam mkha' ste nam mkha' la mtha' med pas gang dang yang mi mnyam la de dang mnyam pa ni chos kyi dbyings stong pa nyid de/ stong pa nyid kyi rang bzhin de shes pa ni mi mnyam pa dang mnyam pa'i gnas so//nges pa'i gzhi zhes pa ni chos rnams stong pa nyid kyi rang bzhin du phyin ci ma log par nges par shes pa'o/ /yang dag par rdzogs pa'i sangs rgyas kyi gzhi zhes pa ni sa dang po'i byang chub kyi sems chos thams cad mnyam pa nyid du rtogs pa de bla na med pa'i byang chub dang tha mi dad de ro gcig pas na yang dag par rdzogs pa'i sangs rgyas so zhes pa'o//mthar gyis theg pa chen po la 'dzeg pa'i gzhi ste zhes pa ni/ bcom ldan 'das rnam par snang mdzad kyi rgyu 'jig rten pa dang 'jig rten las 'das pa'i sems 'og ma rnams kyang sa dang po'i byang chub kyi sems 'di'i nang du 'dus la sa dang po nas kun du bzang po'i sa man chad kyi sems kyang 'di las tha mi dad pa'i phyir de rnams kyi gnas su gyur pas na mthar gyis theg pa chen po la 'dzeg pa'i gzhi zhes pa'o//ye shes sna tshogs cher 'byung ba/ /nor gyi dbyig 'di shes na ni/ /kun gyi sems kyi bye brag kyang / /ji bzhin yang dag rab tu shes//zhes pa ni sa dang po'i byang chub kyi sems de thams cad mkhyen pa'i ye shes 'byung ba'i gtso bo yin pas ye shes nas tshogs che 'byung ba yin la/ de legs par shes na rnam par snang mdzad kyi rgyu dang /'jig rten dang 'jig rten las 'das pa'i sems kyi khyad par thams cad rab tu shes par gyur pa bstan pa'o//bcom ldan 'das rnam par snang mdzad chen po mngon par rdzogs par byang chub pa rnam par sprul pa byin gyis rlob pa las sems kyi khyad par rim par phye ba dang po'o// //da ni bcom ldan 'das rnam par snang mdzad kyis thams cad mkhyen pa'i ye shes brnyes nas thams cad mkhyen pa'i ye shes des mtha' yas pa'i sems can gyi khams rnams tshul sna tshogs dang bsam pa sna tshogs dang thabs sna tshogs kyis bla na med par bsgral ba'i phyir sngon gyi smon lam gyi shugs kyis lhun gyis grub pa nyid du sku mnyam pa nyid mi zad pa'i rgyan gyi 'khor los khams gsum thams cad du khyab par mdzad pa/bcom ldan 'das kyi rang bzhin gyi dkyil 'khor de byang chub sems dpa' sems dpa' chen po 'phags pa kun du bzang po dang / phyag na rdo rje la sogs pa'i yongs su dag pa rnams kyis mngon sum du mthong zhing spyod yul du 'gyur na/'gro ba 'og ma rnams kyis bcom ldan 'das kyi sku la sogs pa'i 'khor lo de spyod yul du ma gyur te/ sems can de rnams kyi don du sku la sogs pa'i 'khor lo de rnams dkyil 'khor dang sngags dang phyag rgya la sogs par byin gyis brlab par bcom ldan 'das la phyag na rdo rjes gsol ba 'chad de/gsol ba de yang de nas yang bcom ldan 'das la gsang ba pa'i bdag po phyag na rdo rjes 'di skad ces gsol to zhes pa nas/bcom ldan 'das gsang sngags spyod pa'i tshul snying rje chen po'i snying po 'byung ba dkyil 'khor gyi rgyal po chen po yongs su rdzogs par bgyi pa'i slad du bshad du gsol/de ni ma 'ongs pa'i dus na sems can mang po dag gi don dang phan pa dang bde bar 'gyur lags so zhes pa'i bar du ste/ bcom ldan 'das nyid kyis mngon par rdzogs par sangs rgyas nas chos kyi dbyings bsam gyis mi khyab pa sems kyi sa las 'das pa de thugs su chud nas sems can rnams so so'i dad pa dang rjes su mthun la/so so'i bsam pa yongs su rdzogs par byed pa'i sku la sogs pa'i 'khor los sems can gyi khams thams cad du khyab par rnam par sprul pa phyag na rdo rjes ji ltar mthong zhing rtogs pa de bcom ldan 'das la slar bzlas te gsol ba yin no//de ltar slar gsol ba yang ston pas ci bshad pa rnams nyan pa pos khong du chud pa'i tshul gyis slar mnyan na ston pa po spro ba dang skabs 'og ma dang mtshams sbyar ba la yang bde ba'i phyir ro/ /ngo mtshar lags so zhes pa ni de ltar stong pa nyid brjod pa dang rtogs pa las 'das pa thugs su chud kyang sku la sogs pa'i rgyan gyis tshul sna tshogs dang bsam pa sna tshogs dang thabs sna tshogs kyis sprul pa de ngo mtshar che'o//bcom ldan 'das nyid kyis mngon par rdzogs par sangs rgyas pa'i zhes pa ni chos kyi dbyings bsam gyis mi khyab pa de gzhan las mnyan nas thugs su chud pa ma yin kyi bcom ldan 'das nyid kyi thugs su chud pa la bya'o//bcom ldan 'das kyang gsang sngags kyi spyod pa'i tshul snying rje chen po snying po 'byung ba'i dkyil 'khor gyi rgyal po chen po yongs su rdzogs par bgyi ba'i slad du bshad du gsol de ni ma 'ongs pa'i dus na sems can mang po dag gi don dang phan pa dang bde bar 'gyur lags so zhes pa ni rang bzhin gyi dkyil 'khor sku la sogs pa'i 'khor lo de bdag cag gis rtogs shing spyod yul du gyur na yang ma 'ongs pa'i 'gro ba rnams kyi don du sku la sogs pa'i 'khor lo de rnams dkyil 'khor dang sngags dang phyag rgya'i sgo nas 'gro ba de rnams kyi spyod yul du 'gyur bar byin gyis brlab tu gsol ba'o//snying rje chen po 'byung ba zhes pa ni dkyil 'khor de snying rje chen po las 'byung ba la bya'o/ /dkyil 'khor zhes pa ni 'og nas gzhung nyid las 'chad do//rgyal po zhes pa ni de las gzhan pa'i byang chub sems dpa' la sogs pa'i dkyil 'khor kun kyang dkyil 'khor chen po 'di'i nang du 'dus pas na rgyal po zhes bya'o/ /yongs su rdzogs par bgyi ba'i slad du zhes pa ni dkyil 'khor gyi sgo nas sgrub cing lha mnyes par bya'i spyod pa rnam pa bcu drug gis lha mnyes par bya ba yang sgrub pa'i sgo nas bzlas pa'i yan lag bzhi dang rang gi sems yongs su sbyang ba la sogs pa'i spyod pas lha mnyes par byas te/rig 'dzin la sogs pa'i grub pa thob nas rim gyis sangs rgyas su 'grub pa dang / rang gi sems yongs su sbyangs pas mngon par shes pa dang pha rol tu phyin pa la sogs pa'i spyod pa rdzogs nas thams cad mkhyen pa'i ye shes rnyed par gyur pa ni dkyil 'khor yongs su rdzogs pa'o//ma 'ongs pa'i dus na sems can mang po dag gi don dang phan pa dang bde bar 'gyur ba'i phyir gsang sngags spyod pa'i tshul de bshad du gsol zhes sbyar te ma 'ongs pa'i sems can de rnams kyis dkyil 'khor yongs su sdogs pa'i mtshan nyid can thams cad mkhyen pa'i ye shes de thob par bya ba'i phyir dkyil 'khor de bshad du gsol zhes pa ste don dang zhes pa ni/thams cad mkhyen pa'i ye shes thob pa'i don gyi phyir ro//phan pa dang zhes pa ni tshe phyi ma la phan pa'i phyir ro/ /bde bar 'gyur zhes pa ni tshe 'di la bde ba'i phyir ro/ /yang na don dang zhes pa ni phan pa dang bde pa'i don la bya'o/ /gsang sngags spyod pa'i tshul zhes pa la gsang sngags kyi spyod pa ni dkyil 'khor dang bsgrub pa la sogs pa'o/ /de dag nyid tshul te tshul zhes pa ni rgya gar skad kyi gzhung dang sbyar na 'gro ba'am thob pa la bya ste gsang sngags kyi spyod pa des bla na med pa'i sangs rgyas su 'gro ba'am thob pa de bshad du gsol zhes pa'o//de nas bcom ldan 'das rnam par snang mdzad kyi thams cad dang ldan pa'i 'khor gyi dkyil nag pa zhes pa la ni ni nges pa a 'thom pa'am 'gro ba'o//'khor la gzigs nas zhes pa ni byang chub sems dpa'i 'khor de dag gi nang na g.yeng ba yod dam med pa dang / nyan pa po snod du ma gyur pa yod dam med brtags pa'i phyir gzigs pa la bya'o/ /bcom ldan 'das rnam par snang mdzad kyi byang chub sems dpa'i 'khor ni yongs su dag pa sha stag yin na ci'i phyir g.yeng ba dang snod du ma gyur pa srid ce na/de'i dgongs pa ni 'di yin te/ bcom ldan 'das kyis 'khor byang chub sems dpa' de rnams la g.yeng pa dang snod du ma gyur pa med mod kyi/ ma 'ongs pa'i dus na nyan pa rnams la de lta bu srid pas de dag la brtag pa'i tshul bstan pa'i phyir ro//lag na rdo rje dkyil 'khor spyad pa'i tshul bstan pa'i chos kyi rnam grangs thams cad mkhyen pa'i ye shes yongs su rdzogs par byed pa nyon cig ces pa ni dkyil 'khor gyi sgo nas lha mnyes par bya ba'i spyod pa rnam pa bcu drug bshad pa dang /de bzhin du rim gyis grub pa'i sgo nas lha mnyes par bya ba'i spyod pa bzlas pa yan lag bzhi dang rang gi sems yongs su sbyang bar byas pas lha mnyes par 'gyur te/ rig 'dzin la sogs pa'i grub pa mngon du thob nas rim gyis thams cad mkhyen pa'i ye shes yongs su rdzogs par gyur pas na thams cad mkhyen pa'i ye shes yongs su rdzog pa'i dkyil 'khor zhes bya'o//dkyil 'khor spyad pa zhes pa ni dkyil 'khor bri ba la sogs pa spyod pa rnam pa bcu drug la sogs pa'o/ /tshul ni sngar bshad do/ /chos kyi rnam grangs zhes pa ni don gyi dngos po gcig la tshig mang po'i sgo nas don gyi dmigs bstan pa la bya ste thams cad mkhyen pa'i ye shes thob par bya ba ni pha rol tu phyin pa la sogs pa'i sgo nas kyang 'gyur/sngags spyad pa'i sgo nas kyang 'gyur te/ de yang skabs 'dir sngags kyi ste/ de bas na dkyil 'khor spyad pa'i tshul bstan pa'i chos kyi rnam grangs zhes bya'o//de nas bcom ldan 'das rnam par snang mdzad chos kyi dbyings kyi dgongs pa ma rdzogs shing sems can gyi khams ma lus pa bsgral bar dam bca' ba mdzad pas zhes pa byung nas kyang phyogs bcu kun du bskor te slar log nas bcom ldan 'das kyi sku'i nang rang gi gnas rnams su zhugs so zhes pa'i bar du ma 'ongs pa'i 'gro ba rnams kyi don du snying rje chen po 'byung ba'i dkyil 'khor bri ba'i phyir rang bzhin gyi dkyil 'khor 'byung ba'i ting nge 'dzin bstan pa la bya ste/ting nge 'dzin bstan pa yang snying rje chen po 'byung ba'i dkyil 'khor bri ba'i slob dpon gyis ting nge 'dzin 'di lta bu mngon du byas te/de nas sa tshon gyis sku'i cha lugs la sogs pa'i dkyil 'khor bri ba'i tshul bstan pa'o/ /de la bcom ldan 'das rnam par snang mdzad chos kyi dbyings kyi dgos pa ma rdzogs zhes pa chos kyi dbyings ni/ stong pa nyid dang /de bzhin nyid dang / yang dag pa'i mtha' ste/ de'i dgos pa ni sku la sogs pa mi zad pa'i rgyan gyis sems can gyi khams thams cad kun du khyab par bstan nas sems can de rnams bla na med pa'i byang chub tu bsgral ba la bya ste/ sems can de rnams kyang da dung ma lus par ma bsgral bas dgos pa ma rdzogs zhes bya'o//sems can gyi khams ma lus pa bsgral bar dam bca' pa mdzad pas zhes pa ni/ de ltar chos kyi dgos pa de ma rdzogs pa yang rdzogs shing zad pa ma yin gyi bcom ldan 'das sngon byang chub sems dpa'i spyad pa spyod pa na thugs kyi yi dam mdzad pa ni/bdag gis byang chub thob nas sems can ma lus pa yang bsgral bar bya'o zhes pa'o/ /de bas na sems can gyi khams ma lus pa bsgral bar dam bca' ba mdzad ces so/ /de bzhin gshegs pa thams cad dang thabs cig yang dag par mol nas zhes pa ni/'das pa dang ma 'ongs pa dang da ltar bzhugs pa'i sangs rgyas thams cad tshogs dang chos kyi sku dang 'gro ba'i don mdzad pas mnyam pa nyid de/ de bas na sangs rgyas thams cad gsung gcig tu 'chad par bstan pa'o/ /gnyis su na de bzhin gshegs pa thams cad dang thabs cig yang dag par mol nas zhes pa ni/chos kyi dbyings de bzhin nyid mngon du byas nas zhes pa'o/ /yang na de bzhin gshegs pa thams cad dang thabs cig mol nas zhes pa ni/ ma 'ongs pa'i 'gro ba nga rgyal can rnams nga rgyal gcag pa dang zhu gtug mi byed pa rnams bla ma dang grogs po la dri zhing zhu gtug byed pa la brtson pa bskyed pa'i phyir te/de bzhin gshegs pa thams cad mkhyen pa yang gzhan dang bka' gros mdzad cing chos ston na/ bdag cag chod lta ci zhig snyam nas gzhan la 'dri ba la brtson par 'gyur ro/ /snying rje chen po'i snying po 'byung ba zhes bya ba'i ting nge 'dzin la snyoms par zhugs so zhes pa ni/ting nge 'dzin de las snying rje chen po'i snying po 'byung ba'am/ snying rje chen po las ting nge 'dzin 'byung ba la bya'o/ /bcom ldan 'das snyoms par zhugs ma thag tu sku'i yan lag thams cad nas de bzhin gshegs pa'i sku sems dang po bskyed pa nas bzung ste/sa bcu'i bar du sems can la phan pa'i don mdzad pa rnams byung ngo / /byung nas kyang phyogs bcu kun du bskor te slar log nas bcom ldan 'das kyi sku'i nang rang gi gnas rnams su zhugs so zhes pa ni bcom ldan 'das ting nge 'dzin du zhugs pa de'i tshe ba spu'i bu ga re re nas kyang de bzhin gshegs pa'i sku 'dra ba rnam par sprul pa byung ste sems can gyi don byed pa ni sa dang po nas brtsams nas sa bcu yongs su rdzogs par 'gyur ba'i phyir ro//de dag slar bcom ldan 'das kyi sku la so so'i gnas su zhugs pa yang ting nge 'dzin brtan pa'i mthus pa spu'i bu ga gang nas byung ba de nyid du slar ma 'khrul bar zhugs pa'o//de nas yang bcom ldan 'das kyis byang chub sems dpa' phyag na rdo rje la 'di skad ces bka' stsal to/ /lag na rdo rje dkyil 'khor rnam par dgod pa nyon cig ces pa ni/ting nge 'dzin de las bzhengs nas phyag na rdo rje la dkyil 'khor bshad pa la bya ste/ dkyil 'khor bri ba bshad pa de yang rgyu dang rang bzhin dang 'bras bu rnam pa gsum du blta ste/ de la rgyu ni slob dpon no/ /rang bzhin ni dkyil 'khor sa bcad cing bri ba la sogs pa'o//'bras bu ni slob ma 'jug cing dbang bskur ba la sogs pa'o/ /de la dkyil 'khor bri ba'i rgyu'i gtso bo ni slob dpon yin te/ de bas na slob dpon gyi mtshan nyid thog mar bshad do/ /slob dpon gyi mtshan nyid bshad pa yang slob dpon du 'jug pa'i yon tan gyi mtshan nyid dang /slob dpon du grub pa'i yon tan gyi mtshan nyid dang de'i rab tu dbye ba'i mtshan nyid do/ /de la slob dpon du 'jug pa'i mtshan nyid ni yid byang chub kyi sems la zhugs pa la sogs pa'o/ /slob dpon du grub pa'i mtshan nyid ni dkyil 'khor 'dri ba'i las byed par gnang zhing dbang bskur ba zhes bya'o//rab tu dbye ba'i mtshan nyid ni/ /byang chub sems la rnam par gnas/ /zhes pa'o/ /de dag kyang lus kyi yon tan dang ngag gi yon tan dang yid kyi yon tan gsum ste/ ji ltar rigs par sbyar bar bya'o/ /yid byang chub kyi sems la zhugs pa zhes pa ni/ phung po dang khams dang skye mched la sogs pa'i chos rnams stong par 'jig pa dang 'jug pa dang ldan pa'o/ /shes rab dang ldan pa zhes pa la shes rab rnam pa gnyis te/ rang bzhin gyis shes rab rno ba dang thos pa dang bsam pa la sogs pa'i shes rab ste/ de dag gang yang rung ba dang ldan pa'o/ / snying rje can zhes pa snying rje ni sems can sdug bsngal las 'don par 'dod pa ste/ de yang rang bzhin gyi snying rje can dang mngon par 'dus byas pa'i snying rje ste de dag dang ldan pa'o/ /sgyu rtsal dag la mkhas pa zhes pa ni spyir 'jig rten gyi dgra thabs la sogs pa rnam pa mang mod kyi skabs 'dir ni dkyil 'khor bri ba dang mchod pa'i yan lag rnams la mkhas pa la bya'o//shes rab kyi pha rol tu phyin pa'i tshul la rtag tu mkhas pa zhes pa ni don dam pa dang kun rdzob rnam pa gnyis kyi tshul gyis mkhas pa ste/ don dam par ni shes rab kyi pha rol tu phyin pa'i tshul chos thams cad gzod ma nas ma byung ma skyes pa stong pa nyid kyi rang bzhin du bsgom pa la mkhas pa'o//kun rdzob tu ni de ltar stong pa nyid bsgom pa las langs nas sbyin pa la sogs pa'i pha rol tu phyin pa rnams spyad nas de la yang mi chags par 'khor gsum yongs su dag pa'i tshul du sbyor ba la mkhas pa'o//theg pa gsum gyi khyad par shes pa zhes pa ni nyan thos kyi theg pa gang zag la bdag med par rtogs nas phung po dang khams la sogs pa la mi rtag pa dang sdug bsngal ba dang bdag med par rtogs pa dang / rang sangs rgyas kyi theg pa phung po la sogs pa de rnams kyang rten cing 'brel par 'byung ba'i rang bzhin du rtogs pa dang /theg pa chen po chos thams cad gzod ma nas ma byung ma skyes par rtog pa rnams kyi mtshan nyid bye brag tu 'byed mkhas pa la bya'o/ /de la cir theg pa gcig la gsum du dbye ci yod ce na theg pa nyid gsum du dbye ba la ni mi bya'o//nyan thos dang rang sangs rgyas rnams kyi so so'i ji ltar rtogs pa'i mtshan nyid 'byed mkhas pa la bya'o/ /gsang sngags kyi de kho na nyid kyi don la mkhas zhes pa ni sngags rnams kyi spyi'i de kho na nyid kyi mtshan nyid ni byang chub kyi sems te/ de la mkhas pa dang / sngags dang / yi ge sa bon dang / ting nge 'dzin rnams la mkhas pa ste/ sngags la mkhas pa ni sngags kyi tshig rnams bskul ba dang phyag rgya'i rang bzhin 'byed mkhas pa'o/ /yi ge sa bon la mkhas pa ni lha rnams so so'i sa bon snying po gang yin pa dang / de rnams kyi ting nge 'dzin gyi sgo dang /las gang yin pa la mkhas pa'o/ /ting nge 'dzin la mkhas pa ni ting nge 'dzin du zhugs pa las dbang chen dang chu la sogs pa'i dkyil 'khor bkod cing de rnams kyi las sgrub pa la mkhas pa'o/ /bsam pa shes pa ni slob ma rnams kyi bsam pa shes pa ste de yang gzhan gyi sems shes pa'i tshul gyis shes pa la ni mi bya'i//sngags kyi cha brtag pa'i tshul gyis slob ma rnams kyi spyod pa dang tshul la brtags nas lha zhi ba dang khro bo rnams gang bsnyen par 'os pa dang / grub pa rab 'bring gsum las gang bsgrub par 'os pa la sogs pa'i tshul la mkhas pa'o//sangs rgyas dang byang chub sems dpa'i rnams la dad pa zhes pa ni de rnams kyi yon tan bshad pa la yid ches pa'o/ /dkyil 'khor bri ba'i las byed par gnang zhing dbang bskur ba zhes pa la dbang bskur ba ni dbang bskur ba'i dkyil 'khor du dri dang me tog dang sman dang rin po che la sogs pas brgyan pa'i bum par chu blugs te dbang bskur ba la bya'o//gnang ba ni de ltar dbang bskur nas khyod kyis dkyil 'khor bri ba dang sgrub pa la spyod par gyis shig ces tshig gis gnang ba'o/ /de la gnang zhing dbang bskur ba zhes pa dbang ma bskur bar ni gnang ba mi 'thob ste/gnang ba smos pas dbang bskur ba ma smos kyang zhar la go bar 'gyur na gnyis ka ci'i phyir smos she na/ gdon sel ba la sogs pa'i las phran tshegs la dbang ma bskur kyang byos shig pa'i gnang ba thob pa srid de/ de bas na gnang ba thob cing dbang bskur ba zhes smos so/ / brtan pa ni shes pa dang longs spyod la sogs pa dang ldan pa yang de dag gis dregs par mi 'gyur la de dag dang mi ldan na yang zhum par mi 'gyur ba'o/ /sbyor ba la mkhas zhes pa ni sgrub pa dang zhi ba la sogs pa'i las kyi sbyor ba la mkhas pa'o/ /byang chub sems la rnam par gnas/ / zhes pa ni stong pa nyid rnam par mi rtog pa'i ting nge 'dzin la gnas nus pa'o/ /gsang ba pa'i bdag po slob dpon de lta bu rgyal ba'i sras yin te/ sangs rgyas dang byang chub sems dpa' rnams kyis rab tu bsngags so zhes pa la slob dpon de lta bu ni gong du smos pa'i yon tan rnams dang ldan pa'o//rgyal ba'i sras zhes pa ni rgyal ba'i bdag nyid las skyes pa ste rgyal ba ni sangs rgyas bcom ldan 'das yin la/ de'i bdag nyid ni chos kyi dbyings te/ chos kyi dbyings stong pa nyid la mos pa las byung ba ni rgyal ba'i bdag nyid las skyes pa zhes bya'o/ /sangs rgyas dang byang chub sems dpa' rnams kyis rab tu bsngags so zhes pa ni de lta bu'i yon tan dang ldan pa'i slob dpon de ni sangs rgyas dang byang chub sems dpa' rnams kyis rab tu bsngags so//de lta bu'i slob dpon de sangs rgyas dang byang chub sems dpa' rnams kyis rab tu bsngags na/ mi bsngags pa'i slob dpon yang yod dam zhe na yod de sangs rgyas dang byang chub sems dpa' rnams kyis rab tu bsngags so zhes pa'i tshig des slob dpon rnam pa gnyis su shes par bya ste zab cing rgya che ba la mos pa dang dmigs pa can no//de la skabs 'dir slob dpon yon tan de lta bu dang ldan pa sangs rgyas dang byang chub sems dpa' rnams kyis bsngags pa ni zab cing rgya che ba'i slob dpon la bya'o//dmigs pa can gyi slob dpon gyi mtshan nyid ni 'og nas slob dpon gnyi ga'i mtshan nyid bshad pa'i skabs su shes par bya'o/ /da ni slob dpon de lta bus dkyil 'khor du gzung ba'i slob ma rnams brtag par bya ste/slob ma de rnams brtag pa yang rang bzhin gyi yon tan dang / mngon par 'dus byas pa'i yon tan gyi sgo nas so/ /de lta bas na gsang ba pa'i bdag po de la slob dpon la gzhan gyis gsol ba btab kyang rung zhes pa ni 'og nas 'byung ba'i mtshan nyid dang ldan pa'i slob ma rnams kyis gsol ba btab kyang rung zhes pa'o//yang na bdag gis sems can dag /snod du rung zhing nyes bral ba/ /de mthong nas ni bdag nyid kyis/ /ma gsol bar ni de bos te/ /zhes sbyar te snod du rung zhing zhes pa ni sngags bshad pa'i snod du 'gyur ba'o/ / nyes bral ba zhes pa ni sdig pa med pa ste de la sdig pa ni sems kyi rgyud la yod na ji ltar slob dpon des mthong bar 'gyur zhe na/ sems kyi rgyud la gnas pa'i sdig pa med par mthong ba la ni mi bya'i/ sdig pa'i rgyu mi dge ba bcu'i las kyi lam mi spyod par mthong ba ni sdig pa med par mthong ba'o//de lta bu'i slob ma mthong na phas ma gsol kyang slob ma de snod du 'gyur ba yin pas 'og nas 'byung ba'i tshigs su bcad pas chos bshad cing sngags kyi tshul la gzhag par bya'o/ /mos mang zhes pa ni sa dang pha rol tu phyin pa la sogs pa sangs rgyas bcom ldan 'das kyi yon tan gyi chos rnams ma rtogs shing mngon du byas kyang thos pa dang bsam pa dang sgom pa'i sgo nas 'di nyid yin gyi gzhan ni ma yin no zhes pa ni mos pa mang ba'o//brtan zhes pa ni gong du slob dpon gyi brtan pa nyid bshad pa dang mthun no/ /dad pa zhes pa ni dkon mchog gsum la yid ches pa'i rnam pa dang sngags kyi tshul la yid ches pa'i dad pa'o//gzhan la phan dga' zhes pa ni snying rje chen po dang ldan pa ste/ gzhan sdug bsngal dang bral bar dga' ba'o/ /slob ma de lta bu dang ldan par shes shing mthong nas bdag nyid kyis ma gsol bar ni de bos te zhes gong du smos pa'i yon tan gyi mtshan nyid dang ldan par mthong nas shes pa'o//'di skad bya zhes pa ni gal te slob ma de bdag cag sngags grub pa'i 'bras bu rig 'dzin la sogs pa 'dod pa ma yin gyi bla na med pa'i byang chub thob par 'dod do snyam du sems pa la/ sngags kyi sgo nas bla na med pa'i byang chub thob pa'i mtshan nyid kyi chos shod cig ces pa'o//khyod ni tshul chen snod yin gyis/ /bu tshur theg pa chen po yi/ /gsang sngags spyod tshul cho ga ni/ /khyod la yang dag bstan par bya/ /zhes pa ni sngags spyad pa'i tshul 'di theg pa chen po yin la/ de yang slob ma snod du gyur pa'i phyir bshad pas na yang dag par bshad pa yin gyi/khe dang bkur sti'i phyir bshad pa ni ma yin no/ /rdzogs pa'i sangs rgyas gang 'das dang / /de bzhin gang dag ma byin dang / /da ltar byung ba'i mgon po rnams/ /'gro la phan phyir bzhugs pa dag /ces pa ni 'das pa dang da ltar dang ma byon pa'i yang dag par rdzogs pa'i sangs rgyas rnams kyang gsang sngags kyi spyad pa'i cho ga mchog 'di las byang chub kyi shing drung du bdud rnam pa bzhi bcom nas thams cad mkhyen pa'i ye shes brnyes te/de bas na slob ma khyed rnams kyis kyang cho ga mchog 'di las thams cad mkhyen pa'i ye shes thob par 'gyur ro zhes bstan pa ste de bas na/de dag kun gyis gsang sngags kyi/ /cho ga mchog bzang 'di mkhyen nas/ /dpa' bos byang chub shing drung du/ /thams cad mkhyen pa mtshan med brnyes/ /gsang sngags sbyor ba mnyam med de//shAkya seng ge skyob pa yis/ /bdud sde shin tu mi bzad pa/ /dpung chen dag kyang de yis bcom/ /de bas kun mkhyen thob bya'i phyir/ /bu yis blo gros 'di gyis shig /ces gsungs pa yin no/ /de dag kun gyis zhes pa ni 'das pa dang da ltar dang ma byon pa'i sangs rgyas kun gyis zhes pa'o//byang chub shing drung du thams cad mkhyen pa mtshan med brnyes/ /zhes pa ni byang chub kyi shing gi drung du thams cad mkhyen pa mtshan ma med pa thob pa'o/ /sngags kyi sbyor ba mnyam med de/ /zhes pa ni gang dang yang mi mnyam pa'i sngags kyi sbyor ba des thams cad mkhyen pa thob par shes par bya'o//de bas kun mkhyen thob bya'i phyir/ /bu yis blo gros 'di gyis shig /ces pa ni de ltar shAkya seng ges kyang sngags kyi spyod pa'i sgo nas thams cad mkhyen pa brnyes pas na khyod kyis kyang 'di'i sgo nas thams cad mkhyen pa thob par gyis shig ces bshad pa'o/ /de ltar thams cad mkhyen pa thob pa yang bcom ldan 'das kyis 'og min gyi gnas la sogs par mngon par byang chub pa'i rim pa gzhan yang yod mod kyi/skabs 'dir mi rnams la bshad pa'i phyir sprul pa'i skus byang chub kyi shing drung du mngon par byang chub pa'i rim pa bstan to/ /de ltar lan mang gzengs bstod de/ /zhes pa ni gong du smos pa'i tshul gyis slob ma de mang du spro ba bskyed cig ces pa'o//snying rjer gyur pa'i yid kyis ni/ zhes pa khe dang bkur sti'i phyir ma yin gyi slob ma de dag la snying rje ba'i phyir ro/ /slob ma de brtan shes nas ni/ /zhes pa ni slob ma de rnams de ltar gong du smos pa'i tshul gyis yid ches te gzhan du mi 'gyur bar gyur na slob ma de dag gi ched du dkyil 'khor bri ba'i sa rnams brtag par bya ste/de yang sa nyid kyi yon tan gyis dga' ba dang / /'phags pa rnams kyis bcags pas dang / lha dang mi rnams kyis bsnyen pas dga' ba dang / sngags mkhan nyid gang du dad pas dga' ba'o/ / de las nyid kyi yon tan gyis dga' ba'i gnas ni/ me tog 'bras bu ldan pa'i ri/ /gtsang zhing yid 'ong chu yi gnas/ /zhes pa nas/ gang na 'bab chu mang po dag /ngang pa bzhad kyis brgyan yod pa/ /der ni sngags pa blo can gyis/ /snying rje 'byung ba'i dkyil 'khor bri/ /zhes pa'i bar du'o//sangs rgyas rnams dang rang mgon dang / /de bzhin rgyal ba'i nyan thos kyis/ /sa phyogs gang dag bsten pa ni/ /de dag thub pas rtag tu bsngags/ /zhes pa'i bar gyis ni 'phags pa rnams kyis zhabs kyis bcags pas dga' ba'o/ /phyogs gzhan rnam pa sna tshogs pa/ / lha khang kun dga' bzang po dang / /khyim dang yang tog nyams dga' dang / /zhes pa nas/ lha yi gnas rnams thams cad dang / /de bzhin khang pa stong par yang / /slob ma dag la phan 'dod phyir/ /nan tan du ni dkyil 'khor bri/ /zhes pa'i bar gyis ni lha dang mi rnams kyis bsnyen pas dga' ba'o//yang na yid du 'ong ba'i sa/ /gang yang rung bar bri bar bya/ /zhes pa ni gong du smos pa rnam pa gsum las gzhan sngags pa nyid gang du dad pa'i sa der dkyil 'khor bri ba gsungs pa yin no/ /de la sa gzhi yongs su sbyang bar bya ba ni zhes pa sbyang ba rnam pa gnyis te phyi dang nang gi'o//de bas na slob dpon yang rnam pa gnyis te/ zab cing rgya che ba la mos pa dang dmigs pa can no/ /de la zab cing rgya che ba la mos pa'i slob dpon gyis ni byang chub kyi sems bsgoms pas phyi'i nyes pa rnams kyi dngos po gzod ma nas ma byung ma skyes par rtogs te nang gi sems sbyangs pas dag par 'gyur ba'i phyir phyi'i zug rngu bsal ba la sogs pa mi dgos mod kyi slob ma rnams kyi yid dang sbyar ba'i phyir phyi'i sa rnams brtag pa yang de rnams la ma zhen par bya ste/de bas na slob dpon zab cing rgya che ba la mos pas ni phyi nang gnyis ka'i sa sbyar bar bya'o/ /dmigs pa can gyi slob dpon gyis ni byang chub kyi sems goms par ma byas pas phyi'i sa rnams sbyang bar bya'o//de la nang gi sbyang ba ni byang chub kyi sems goms par byed pa'o/ /phyi'i sa sbyang ba ni rdo dang bong ba dang / gyo mo dang gseg ma med cing zhes pa nas nyes pa thams cad spangs pa'i gnas ni lha rnams la rab tu shis so zhes pa'i bar du'o//de la tshes grangs dang zhes pa nas snga dro'i dus kyi tshes ltas bzang pos mtshon pa la zhes pa'i bar du ni dkyil 'khor bri ba'i sa brtag pa tshar nas/ yongs su gzung ba rtsom pa'i tshes grangs dang skar ma brtag pa la bya ste/rgyu skar shis pa ni skar ma 'ba' zhig shis pa la mi bya'i/ nyi ma dang tshes grangs kun kyang ste shis pa zhes pa so so la sbyar bar bya'o/ /snga dro'i dus kyi tshe ltas bzang pos mtshon pa la zhes pa ltas bzang po brtags pa rab 'bring rnam pa gsum ste/ lha'i dang bar snang gi dang sa las byung ba'o//de la lha'i ni nam mkha' las sgra snyan pa la sogs pa 'byung ba ste mchog go/ /bar snang gi ni bkra shis pa'i tshig dang bram ze'i rig byed la sogs pa thob pa ste 'bring ngo / /sa las byung ba ni sa la dung la sogs pa 'dug par mthong ba ste tha ma'o/ /de ltar thog mar rtsom pa'i snga dro'i dus na ltas de rnams las gang yang rung ba zhig byung na bzang ste/sa yongs su gzung ba la sogs pa'i las rnams brtsam par bya'o/ /sa'i lha mo sbran pa'i tshigs su bcad pa gnyis bsgrag par bya'o zhes pa ni snga dro'i dus na ltas bzang po dang ldan na dkyil 'khor gang du bri bar bya ba'i sa gzhi der sa'i lha mo la khyod kyi steng du dkyil 'khor bri'i zhes gsol ba btab ste/bstod pa'i tshigs su bcad pa'i sgo nas so/ /sangs rgyas thob pa thams cad kyi/ /spyod pa'i tshul gyis khyad par ni/ /zhes pa la sogs pa ste/ sangs rgyas bcom ldan 'das kyis byang chub sems dpa'i spyad pa spyod pa na sa dang pha rol tu phyin pa rnams kyi tshul khyad par du spyad pa dang /de ltar spyad nas byang chub kyi shing drung du bdud rnam pa bzhi bcom ste mngon par sangs rgyas pa yangs khyod kyi steng du yin pas na lha mo khyod kyis ji lta ba bzhin du shes te dbang du gyur to zhes pa ste/ de bas na/ spyod pa'i tshul gyi khyad par ni/ /sa dang pha rol phyin dag la/ /zhes dang / shAkya seng ge skyob pa yis/ /ji ltar bdud kyi sde bcom pa/ /zhes gsungs so/ /de bzhin bdag gis bdud las ni/ /rgyal bar byas te dkyil 'khor bri/ /zhes pa ni bcom ldan 'das shAkya thub pas sa dang pha rol tu phyin pa rnams spyad de/byang chub kyi shing drung du bdud rnam pa bzhi btul nas mngon par byang chub par byas pa de bzhin du bdag kyang ma lus pa'i sems can gyi khams rnams bsgral ba'i phyir sa khyod kyi steng du dkyil 'khor bri ste/ rim gyis bla na med pa'i byang chub tu mngon par 'tshang rgya bar bgyi'o zhes pa'o//sa la lag pa reg byas shing / /de ltar lan mang sbran nas ni/ /pus mo gnyis ni der btsugs nas/ /me tog spos kyis mchod par bya/ /mchod nas sngags pas de nas ni/ /de bzhin gshegs la phyag 'tshal te/ /zhes pa sa'i lha mo la tshigs su bcad pas bskul te gsol ba gdab pa la yang sngar de bzhin gshegs pa rnams dang lha mo de la mchod cing phyag byas la lag pa sa la bzhag nas/gdod gong du smos pa'i tshigs su bcad pas bskul te gsol ba gdab po/ /de nas cho ga 'di dag gis/ /mkhas pas sa gzhi sbyang bar bya//zhes pa ni 'og nas 'byung ba'i tshul gyis sa sbyang bar bya'o/ /de nas phyag na rdo rjes bcom ldan 'das kyi zhabs la gtugs te bcom ldan 'das la 'di skad ces gsol to zhes pa nas/ 'di lta'i tshul ni mi shes pas/ /yul dang dus dang bya ba las/ /dge dang mi dge'i mtshan ma yis//rmongs pa 'bras bu 'dod byed de/ /sems dpa' chen po de dag phyir/ /cho ga 'di ni brjod pa yin/ /zhes pa'i bar ni gong du nyi ma dang tshes grangs dang / skar ma la sogs pa'i ltas rnams ni bshad na sngags rnams kyi rang bzhin ni don dam par byang chub kyi sems yin te/ mtshan ma med pa de dag las 'das pa'o/ /kun rdzob tu yang dkyil 'khor dang sgrub pa dang sngags spyad pa'i yan lag rnams mtshan ma can yin mod kyi/ don gyi bya ba byed la skar ma dang tshes grangs la sogs pa'i mtshan ma 'di rnams ni don dam pa dang yang 'gal la kun rdzob tu yang don gyi bya ba byed pa ma yin na/ci'i phyir bcom ldan 'das kyis mtshan ma de dag bshad ces gsol pa dang / bcom ldan 'das kyis kyang don dam pa'i mtshan nyid bstan nas don dam pa'i mtshan nyid de lta bu yin mod kyi ma 'ongs pa'i 'gro ba rnams kyi don dam pa'i tshul de mi shes pas 'gro ba de rnams drang ba'i phyir mtshan ma rnams bshad pa'i rigs pa bstan pa ste/'gro ba de rnams kyang rnam pa gnyis te/ dngos po la chags pa dang / dngos po med pa la chags pa'o/ /dngos po la chags pa rnams la yang tshes grangs dang dus dang yul la sogs pa dngos po dang rjes su mthun par bshad cing drang ba dang dngos po med pa la chags pa rnams kyang de las bzlog ste dngos po'i sgo nas drang ba'i phyir ro//sangs rgyas mtshan ma mi mnga' ste/ /zhes pa ni gzung ba dang 'dzin pa'i mtshan ma mi mnga' ba'o/ /chos kyi sku la rnam par bzhugs//zhes pa ni de ltar gzung ba dang 'dzin pa'i mtshan ma mi mnga' bas dmigs su med pa ste/ dmigs su med pa'i sku'o/ /de ltar sangs rgyas bcom ldan 'das chos kyi sku'i rang bzhin du gyur pa ni chos kyi sku la rnam par bzhugs pa shes pa'o/ /gsang ba ba'i bdag po de la ji skad bstan pa'i gnas gang yang rung bar sa gzhi rab tu 'thas par bcags te zhes nas/bdag nyid la ni 'di skad du/ /sems can chen po bu khyod legs/ /dkyil 'khor myur du bris shig ces/ /spro ba bskyed pa mthong yang rung / /zhes pa'i bar zhag bdun gyi sngon rol du snang ba dang /mi snang ba la dkyil 'khor sa blang ste de la snang ba ni rgyal po la sogs pa'i mi rnams so/ /mi snang ba ni 'jig rten pa'i lha dang gnod sbyin dang sha za la sogs pa ste/ lha la sogs pa la ma blangs par dkyil 'khor bris na dkyil 'khor gyi lha khro bo la sogs pa'i zer gyis 'jig rten pa'i lha de rnams la gnod par 'gyur te/de ltar gnod par 'gyur na lha de dag sgrub pa la bgegs kyis skabs 'tshol bar 'gyur ro/ /gnyis su na de dag la gnod bzhin du dkyil 'khor bris na sgrub pa po snying rje med par 'gyur te/ de bas na de dag gis sbyin pa'i ched du sngar lha la sogs pa rnams sbran zhing sa bslangs na lha la sogs pa de rnams kyang bag byed cing de nas gzhan du 'dong ste nyes pa med par 'gyur la/rgyal po la sogs pa mi rnams la yang sngar sa blangs na phyis brtsad pa mi 'gyur pa'i phyir ro/ /der sngar bslangs nas phyis dkyil 'khor bri ba las zhag gsum gyi sngon rol du ji skad du smos pa'i sa der ji ltar rigs par brtags nas sa yongs su gzung ba'i rim pa 'di ltar bya'o//thog mar ba'i lci bas la ma lhung ba dang ba'i gcin du bsres pas dkyil 'khor bya'o/ /de nas sa de sngags kyis bsrung bar bya'o/ / de nas phyogs mtshams kun du bgegs bsal bar bya'o/ /de'i 'og tu dri'i dkyil 'khor sor bcu gnyis pa gru bzhi rnams bya'o/ /de nas sngags pa 'grengs te dkyil 'khor de'i dbus kyi nam mkha' la sangs rgyas rnams bsam par bya ste/ de yang rang bzhin gyi dkyil 'khor rnams sdud par gyur pa dam tshig gsum gyi phyag rgya bcings nas bsam mo//sngags pa 'grengs te sangs rgyas lnga po rnams nam mkha' la bsam pa ni mi gnas pa'i ston pa yin pa'i phyir ro/ /de nas der dri dang me tog la sogs pas mchod de sangs rgyas rnams kyi spyan sngar 'phags pa mi g.yo ba'am/ khams gsum rnam par rgyal ba'am/gang yang rung ba'i sngags kyis sa de yongs su gzung bar bya'o/ /des na sangs rgyas sras dang bcas pa slob ma rnams dkyil 'khor du gzud pa'i nub mo gshegs su gsol lo/ /de nas sngags pa de nub phyogs kyi ngos su nyal la byang chub kyi sems dang snying rje dang ldan par bya ste rmi lam blta bar bya'o//de yang rab 'bring gsum du shes par bya ste/ de la byang chub sems dpa' rnams mthong ni rmi lam tha ma'o/ /sangs rgyas rnams mthong na 'bring ngo / /sangs rgyas de rnams shin tu dgyes shing sngags pa la bu khyod legs so dkyil 'khor myur du bris shig ces bskul ma 'debs par mthong na rmi lam rab tu shes par bya'o//'di rnams rgyud nyid kyi nang nas zhib tu 'byung ste/ rgyud kyi nang na ltag 'og 'khrugs par 'byung bas 'dir las su bya ba'i rim pa bzhin du bkod do/ /de nas de yi phyi de'i nyin/ /zhes pa nas/ gcig gnyis bzhi las lhag kyang rung /dpyad mi dgos par gzung bar bya/ /zhes pa'i bar du slob ma rnams brtag pa ste/ /de yang bye brag gi mtshan nyid dang rab tu dbye ba'i mtshan nyid dang / phal pa'i mtshan nyid do/ /de la 'dir/ slob ma dad cing rigs btsun pa/ /zhes pa la sogs pa'i mtshan nyid ji skad du bshad pa rnams ni bye brag gi mtshan nyid do//rab tu dbye ba'i mtshan nyid ni 'og nas 'chad la/ /phal pa'i mtshan nyid de sngar ji skad du bshad pa dang grangs su bcad pa gzhan pa ste/ 'og nas 'on kyang slob dpon snying rje chen po dang ldan pas sems can gyi khams ma lus pa bsgral bar yi dam bca' ba kho nar bya ste/des byang chub kyi sems kyi rgyur 'gyur bar bya ba'i phyir sems can tshad med pa rnams yongs su gzung bar bya'o zhes 'byung ba yin no/ /slob ma de rnams las kyang rgyud la sogs pa la mkhas shing byang chub kyi sems goms pa ni dkyil 'khor du bcug pa de nyid kyi tshe na de slob dpon nam sgrub par dbang bskur bar bya'o//rgyud la sogs pa rnams la ni mkhas kyang byang chub kyi sems ma bsgoms na byang chub kyi sems sgom du bcug ste phyis dbang bskur bar bya'o/ /de las gzhan snga nas kyang rgyud mi shes byang chub kyi sems kyang ma bsgoms/ phyis kyang rgyud shes par mi 'gyur la byang chub kyi sems kyang sgom par mi 'gyur ba ni phal pa ste/dus gnyis gar yang dbang mi bskur gyi/ /byang chub kyi sa bon du 'gyur ba'i phyir dkyil 'khor du gzud do/ /de la/ slob ma dad cing rigs btsun pa/ /zhes pa la sogs pa'i mtshan nyid ni gang du slob ma'i mtshan nyid brjod pa ni bshad zin pas 'dir ma bshad do//bcu'am brgyad dam bdun nam lnga/ /gcig gnyis bzhi las lhag kyang rung / /zhes pa ni ji skad du bshad pa'i mtshan nyid dang ldan pa'i slob ma ni shin tu dkon pas grangs nyung ngu gsungs pa yin la/ lhag kyang rung zhes pa ni mtshan nyid de lta bu dang ldan pa mang ba dkon pa ste/brgya la de lta bu'i mtshan nyid dang ldan na de las lhag ste grangs med pa yod na yang nyes pa med do/ /de nas yang bcom ldan 'das la phyag na rdo rjes zhus pa zhes pa nas/ byang chub kyi sems kyi rgyur gyur par bya ba'i phyir sems can tshad med pa rnams yongs su gzung bar bya'o zhes pa'i bar ni gong du slob ma'i grangs nges par gsungs na ci las yin zhes bcom ldan 'das la phyag na rdo rjes gsol pa dang /de'i lan bcom ldan 'das kyis gsungs pa yin te/ slob ma rnams kyi grangs nges par gsungs pa ci las yin zhes dri dgos pa las//dkyil 'khor 'di'i ming ci lags ci'i slad du dkyil 'khor zhes bgyi zhes bya ba dris she na/ de'i dgongs pa ni 'di lta ste/ de skad dris na dkyil 'khor gyi nges pa'i tshig dang dmigs su bab bar bya ba dang / slob ma'i grangs nges pa gsum char dris par 'gyur te/ de la dkyil 'khor 'di'i ming ci lags zhes pa ni dmigs su bab cing bstan par bya ba'i dkyil 'khor dris pa'o/ /ci'i slad du dkyil 'khor zhes bgyi zhes pa ni nges pa'i tshig dris pa'o/ /dkyil 'khor 'di ni sangs rgyas 'byung ba ste/ /zhes pa ni dkyil 'khor 'di sangs rgyas 'byung ba dang 'dra ba'i phyir te/sangs rgyas byung na sangs rgyas kyi yon tan gyi chos rnams kyang 'byung la/ sems can gyi don mdzad pa yang yod do/ de bzhin du dkyil 'khor 'di las kyang sangs rgyas kyi chos rnams 'byung zhing sems can gyi don bya ba yang yod de/ 'phral du byang chub kyi sems bskyed pa dang rim gyis mchog la sogs pa'i grub pa dang zhib la sogs pa'i las rnams byed pa yod cing /mthar sangs rgyas su 'gyur bar byed pa'i phyir ro/ /dkyil ni snying po zhes bya'o/ /'khor ni rdzogs pa ste zhes pa ni mar gyi snying po'am/ tsan+dan gyi snying po dang 'dra ste mchog gam dam pa la bya'o//mar dang tsan+dan gyi snying po dag la ni mi chog pa dang ma rdzogs pa yang srid na de dag dang 'dra ba yin nam zhe na/ /snying por 'dra mod kyang de las khyad par du khyab pa zhes gsungs te/ khyab pa ni chog pa dang / yongs su rdzogs pa'i don to/ /dkyil 'khor 'di'i snying po ni ji ltar chog pa dang rdzogs pa yin zhe na/sangs rgyas bcom ldan 'das bskal pa grangs med par bsod nams dang ye shes kyi tshogs bsags nas stobs dang mi 'jigs pa la sogs pa sangs rgyas kyi yon tan rnams yongs su rdzogs te bla na med pa'i byang chub tu mngon par sangs rgyas pa ni snying por gyur pa chog pa dang dam pa ste/chog pa ni de las gzhan pa btsal mi dgos par des chog pas mi 'gyur bar yongs su grub pa'o/ /gang bla na med pa'i byang chub tu mngon par sangs rgyas pa mi 'gyur bar yongs su grub pa de nyid sngon gyi smon lam gyi shugs kyis sku la sogs pa mi zad pa'i rgyan gyi 'khor lor gyur pa ni dkyil 'khor 'dir byin gyis brlabs pas na dkyil 'khor 'di'i snying pos chog pa zhes bya'o//gsang ba pa'i bdag po 'on kyang dkyil 'khor rgyas pa 'di ni sems can gyi khams ma nges pa yongs su bskyab pa'i phyir snying rje chen po'i snying po 'byung ba zhes bya ba zhes pa la/sems can gyi khams ma nges pa yongs su bskyab pa'i phyir zhes pa ni snying rje chen po'i dbang gis tshad med pa'i sems can gyi khams rnams dkyil 'khor 'dir btsud pa bla na med pa'i byang chub kyi rgyur 'gyur bas yongs su bskyab pa'i phyir zhes gsungs so//snying rje chen po'i snying po 'byung ba zhes pa na dkyil 'khor 'di snying rje chen po las 'byung ba ste bcom ldan 'das thams cad mkhyen pa'i ye shes brnyes nas snying rje chen po'i dbang gis sku la sogs pa mi zad pa'i rgyan gyi dkyil 'khor 'di 'byung bas na snying rje chen po las 'byung ba zhes bya'o/ / snying po zhes pa ni 'byung khungs te snying rje chen po'i dkyil 'khor 'di 'byung ba'i gnas so/ /yang na dkyil 'khor 'di las snying rje chen po 'byung ba la yang bya ste/ dkyil 'khor 'di'i sgo nas de bzhin gshegs pa'i yon tan gyi chos snying rje chen po la sogs pa 'byung ste thams cad mkhyen pa'i ye shes thob par 'gyur ba'i phyir ro//dkyil 'khor rgyas pa zhes pa ni dkyil 'khor 'dir btsud pa'i sems can rnams bsod nams rgyas pa'i phyir ro/ /gnyis su na dkyil 'khor nyid kyi snam bu la sogs pa'i rim pa 'phel ba'am/ rgyas pa la yang bya'o/ /'on kyang zhes pa ni sangs rgyas 'byung bas dkyil 'khor zhes bya mod kyi/'di rnams dang ldan pa'i phyir ming yang 'di skad ces bya'o/ /der ni de bzhin gshegs pa rnams kyis bskal pa grangs med par bla na med pa yang dag par rdzogs pa'i byang chub yang dag par bsgrubs pa byin gyis brlabs so zhes pa ni dkyil 'khor 'di ni gzhan ma yin gyi/gang de bzhin gshegs pas bskal pa grangs med par bsod nams dang ye shes kyi tshogs bsags nas bla na med pa'i byang chub thob pa de nyid sngags kyi lha dang phyag rgya dang sngags kyi yi ge rnams su lhag par bkod de byin gyis brlabs so zhes bstan pa'o/ /gsang ba pa'i bdag po/de lta bas na rnam grangs 'dis kyang khyod kyis 'di ltar rig par bya ste zhes sbyar te/ de bzhin gshegs pa rnams bskal pa grangs med par bsod nams dang ye shes kyi tshogs bsags pas thams cad mkhyen pa brnyes nas sngon gyi smon lam gyi shugs kyis sku la sogs pa mi zad pa'i rgyan sems can gyi khams ma lus pa'i phyir byin gyis rlob ste sems can gyi khams gcig gam/gnyis kyi phyir ma yin te rnam grangs des na de bzhin gshegs pa gang du 'tshang rgya ba ni sems can gcig gam gnyis kyi phyir ma yin te/ mtha' yas pa'i sems can gyi don gyi phyir mngon par 'tshang rgya bar rig par bya ste/de bas na de bzhin gshegs pa rnams ni sems can gcig gi phyir byang chub tu mngon par rdzogs par 'tshang rgya ba ma yin/ gnyis kyi phyir ma yin/ gsum gyi phyir ma yin gyi 'on kyang thugs rje chen po'i dbang du gyur pa dag sems can gyi khams ma lus pa yongs su bskyab pa'i phyir byang chub mngon par rdzogs par sangs rgyas te zhes gsungs pa yin no//bsam pa ji lta ba bzhin du sems can rnams la chos 'chad ces pa ni de ltar de bzhin gshegs pa ma lus pa'i sems can rnams kyi don du mngon par sangs rgyas mod kyi/ ma lus pa'i sems can thams cad de bzhin gshegs pas chos bshad pa'i snod du mi 'gyur te/so so'i dad pa dang rjes su mthun par de bzhin gshegs pas chos 'chad pa ni bsam pa ji lta ba bzhin du chos 'chad pa'o zhes so/ /gsang ba pa'i bdag po theg pa chen po la sngon goms par ma byas pa rnams ni gsang sngags spyad pa'i tshul mthong ngam thos na sems la dga' ba 'am dad pa cung zad kyang yang dag par mi skye'i/gsang ba pa'i bdag po gang dag gis sngon theg pa chen po'i gsang sngags spyod pa'i tshul sgo mtha' yas pa sgrub pa la goms par byas pa zhes pa la byang chub sems dpa' la'ang rnam pa gnyis te/ pha rol tu phyin pa'i spyad pa spyod pa dang sngags kyi sgor spyad pa spyod pa'o/ /de la pha rol tu phyin pa'i spyad pa spyod pa'i byang chub sems dpa' yang sngags kyi spyad pa spyod/ sngags kyi sgor spyod pa'i byang chub sems dpa' yang pha rol tu phyin pa la spyod de/ de la yang khyad par ni gcig ni sngags gtso bor sgrub cing pha rol tu phyin pa zhar la spyod la/gcig ni pha rol tu phyin pa gtso bo bsgrub cing sngags zhar la spyod de/ de ltar spyod pa gnyis ka yang chen po'i mtshan nyid du gcig ste/ sems can gang de lta bu'i theg pa chen po la tshe rabs snga ma rnams su thos pa dang bsam pa dang bsgom pa'i sgo nas ma zhugs shing nan tan du ma byas pas ni gsang sngags spyad pa'i tshul gyis chos rnams thos sam/dkyil 'khor la sogs pa mthong na yang dad pa dang dga' ba mi skye ba'o/ /sngags kyi spyod pa dang pha rol tu phyin pa'i spyod pa dag sngon goms par byas pa ni gnyis ka la yang dad pa skye ste sngags spyod pa la goms par byas pas kyang pha rol phyin pa mthong ngam thos na dga' zhing dad pa skye la/pha rol tu phyin pa'i spyod pa la goms pas kyang sngags kyi spyod pa mthong ngam thos na dga' zhing dad pa skye'o/ /de bas na gang dag gis theg pa chen po'i gsang sngags spyod pa'i tshul sgo mtha' yas pa sgrub pa la goms par byas pa zhes gsungs pa yin te/de bas na/ theg pa chen po gsang sngags spyod pa'i tshul 'di lta bu la goms par byas pa ni gsang sngags spyad pa'i tshul 'di la dang cing snod du 'gyur gyi gzhan rnams ni ma yin na zhes pa'o//sgo mtha' yas pa sgrub pa zhes pa ni theg pa chen po de nyid kyi yon tan te/ stobs dang mi 'jigs pa la sogs pa sangs rgyas kyi yon tan gyi chos rnams sgrub pa dang / rig pa'i rgyal po dang / khro bo dang / pho nya la sogs pa'i sgo rnam pa mang po sgrub pa'i phyir ro//de dag ni rdo rje sems dpa' yin te zhes pa ni de lta bu'i theg pa chen po la goms par byas pa'i sems can de dag gi sems shin tu brtan te/ mu stegs dang bdud la sogs pas mi bzlog pas de dag gi sems rdo rje dang 'dra ba'i phyir rdo rje sems dpa' zhes pa'o/ / de rnams nyid kyi don gyi phyir grangs kyi tshad 'di byas so zhes pa ni de lta bu'i sems can shin tu dkon pas na grangs kyi tshad mdzad pa yin no/ /'on kyang slob dpon snying rje chen po dang ldan pas sems can gyi khams ma lus pa bsgral bar yi dam bca' ba kho nar bya ste/ des byang chub kyi sems kyi rgyur 'gyur bar bya ba'i phyir sems can tshad med pa rnams yongs su gzung bar bya'o zhes pa ni gong du grangs su bcas pa ni sgrub pa'am slob dpon du smin par bya ba'i slob ma ste/de las gzhan pa'i sems can rnams la yang snying rje chen po bskyed de dkyil 'khor der btsud na slob dpon nam sgrub pa por mi 'gyur yang dkyil 'khor du btsud cing byang chub tu sems bskyed na byang chub kyi rgyu sa bon du 'gyur ba'i phyir tshad dang grangs tshad med par gzung ngo //de nas de dag bos la dkon mchog gsum la skyabs su gtang bar yang bya'o/ /sdig pa mi bya ba rnams kyang bsgo bar bya'i zhes pa nas/bden pa gnyis la gnas pa yi/ /theg pa rab kyi mchog 'di ni/ /tshul la gnas na thob par 'gyur/ /zhes pa'i bar du dkyil 'khor bri ba'i snga de nub slob ma rnams yongs su gzung ba'i rim pa bshad pa ste de yang rnam pa dgu'o/ /dgu gang zhe na/sdig pa bshags pa dang / skyabs su gtong ba dang / dus gsum gyi sgrib pa med pa'i ye shes kyi sdom pa 'dzin du gzhug pa dang / dri dang me tog sbyin pa dang / so shing 'char gzhug pa dang / skud pas dpung pa bcings te srung ba dang / spro ba skyed pa dang / rmi lam bltar gzhug pa dang chos bshad pa rnams so//de rnams kyang rgyud las ni kha cig ltag 'og tu 'byung mod kyi las su bya ba'i rim pa lta bur blta'o/ /de las gsum la skyabs su 'gro ba sbyin pa ston te/ gsum ni sangs rgyas dang chos dang 'phags pa phyir mi ldog pa'i byang chub sems dpa' rnams so//brgya la sngon so sor thar pa la sogs pa'i sdom pa'i skabs su song zin pa yang slar yang 'dir skyabs su gtang bar bya'o/ /sngon song ba na dge 'dun 'phags pa'i gang zag brgyad la skyabs su song gi 'dir sangs rgyas dang chos la skyabs su song ba snga ma dang mthun du zin kyang dge 'dun la mi mthun te/'phags pa phyir mi ldog pa'i byang chub sems dpa' rnams la bye brag tu skyabs su song ba'i phyir dang / de las gzhan pa skyabs su ma song ba rnams ni gdong skyabs su gtang bar bya ba'i phyir ro/ /de ste 'dir sngon skyabs su song zin pa yang brtan par bya ba'i phyir slar yang 'dir skyabs su gtang bar bya'o//sdig pa mi bya ba rnams kyang bsgo bar bya'o zhes pa ni sngon chad byas pa'i sdig pa sngar bshags pa dang da ltar mi byed cing phyis mi bya bar khas blang ba'i phyir ro/ /de la da ltar mi byed cing phyis mi bya bar khas blang ba ni rigs na sngon byas zin pa slar bshags pa la don ci yod ce na/sdig pa sngon byas pa la yon tan du mi blta zhing / 'chags na 'chi 'pho ba'i tshe sdig pa byas pa'i dngos po de mngon du mi 'gyur bar bya ba'i phyir ro/ /de la sdig pa bshags pa yang gsum la skyabs su 'gro ba'i sngon rol du bya ste de ci'i phyir zhe na/ sdig pa bshags shing gtsang mar byas pa'i lus can de skyabs su gtang ba'i 'os yin pa'i phyir ro//de nas de dag la spos dang me tog la sogs pa sbyin no zhes pa ni/ dus gsum du sgrib pa med pa'i ye shes kyi sdom pa gzung zin pa'i 'og tu bya ste de ci'i phyir zhe na/ de la sdig pa bshags shing skyabs su song la sdom pa bzung bas slob ma de snod du gyur cing sbyin pa'i gnas yin pas dri dang me tog sbyin no//de dag dus gsum du sgrib pa med pa'i ye shes kyi sdom pa yang 'dzin du gzhug go zhes pa la dus gsum du sgrib pa med pa'i ye shes ni thams cad mkhyen pa'i ye shes te/ thams cad mkhyen pa'i ye shes de ni shes bya dang nyon mongs pa'i sgrib pa spangs pa'i mtshan nyid yin pas 'das pa dang da ltar dang ma 'ongs pa'i dus thams cad du yang dag pa nyid kyi dngos po sgrib pa med cing thogs pa med par mthong bas na dus gsum du sgrib pa med pa'i ye shes so//ye shes de thob par bya ba'i phyir/mi dge ba'i las kyi lam bcu spong ba'i sdom pa ni/ dus gsum du sgrib pa med pa'i ye shes kyi sdom pa zhes bya la sdom pa de yang kun rdzob dang don dam pa'i bye brag gis zhib tu 'og nas 'chad do/ /'dzin du bcug nas sngags pa yis/ /de nas so shing dag kyang sbyin//rtse gcig mnyam par gzhag pa dag /shar ram byang du kha bstan te/ /u du m+Wa ra a shwat+tha/ /shin tu bzang po bsrung byas shing / /me tog dri la sogs bskus pa'i/ /so shing dag ni 'char gzhug go /sems can snod rung snod mi rung / /bor ba nyid las brtag par bya//zhes pa ni gtsang zhing dag par bya ba'i phyir dang / 'jig rten pa'i tshul du yang sang lta bu nas smyung bar 'dug par bya na do nub so shing bca' bar srid de/ de dag dang mthun par bya zhing gzud pa'i phyir dang / so shing de bor nas kha gang du bltas pa las slob ma rnams grub pa la sogs pa gang gi snod du gyur pa'i ltas blta ba'i phyir ro//rtse gcig mnyam par gzhag pa dag /shar ram byang du kha bstan te/ /zhes bya ba dag so shing dag ni 'char bzhug go/ /sems can snod rung snod mi rung / /bor ba nyid las brtag par bya/ /zhes pa ni kha phyogs su bltas pa las so shing gi kha bdag la bltas par gyur pa grub pa mchog myur du 'thob pa'i snod du yang 'gyur zhing /so shing gi kha nub phyogs su bltas pa'i zhar gyis dbang du bya ba'i las kyang 'grub par 'gyur ro/ /so shing gi rtse mo shar phyogs su bltas na grub pa mchog dang rgyas pa'i las kyi snod du 'gyur ro//so shing gi kha lho phyogs su bltas na mngon par spyod pa'i las grub pa'i snod du 'gyur ro/ /bdag nyid kha byang phyogs su bltas la so shing gi kha bdag la bltas na grub pa 'bring po myur du 'thob pa'i snod du 'gyur ro/ /so shing gi kha byang phyogs su bltas na zhi ba'i las 'grub par 'gyur la/byang shar gyi mtshams su bltas na zhi dang rgyas pa gnyis ka 'grub par 'gyur zhing shar lho'i mtshams su bltas na mngon par spyod pa 'grub la/ lho nub kyi mtshams su bltas na bskrad pa dang skam pa la sogs pa'i las 'grub cing nub byang gi mtshams su bltas na gnod sbyin mo la sogs pa 'grub po//so shing 'og gzhi la zugs te rtse mo bar snang la bltas na bar snang la 'gro ba 'grub par 'gyur la/ gyen du bltas na rig pa 'dzin pa la sogs pa 'grub cing kha thur du bltas nas 'og tu 'gro ba grub pa'i snod du 'gyur te zhib tu ni gsang ba spyi'i rgyud la sogs par blta'o//so shing gi ltas blta ba yang bshad pa'i mtshan nyid dang ldan pa'i slob ma rnams la blta bar bya ba yin gyi/ slob ma phal pa rnams la ni so shing gi ltas de dag dang ldan du zin kyang grub pa la sogs pa la de lta bu'i nan tan mi byed pas ltas de rnams ci nas kyang brtag dgos pa ma yin no//de nas lag pa g.yon pa la/ /skud pa mdud pa gsum ldan pa/ /bdag nyid mnyam par gzhag pa yis/ /legs pa ru ni bcing bar bya/ /zhes pa ni 'phags pa mi g.yo ba 'am/khams gsum rnam par rgyal ba gang yang rung ba'i sngags kyis mdud pa re re zhing lan re gdab ste/ slob ma de rnams bsrung ba'i phyir dpung pa g.yon pa la slob dpon nyid kyis bcing ngo / /de ltar yongs su gzung ldan pa'i/ /slob ma nyes pa med rnams la/ /bsam pa brtan par bya ba'i phyir//'di ltar spro ba bskyed par bya/ /zhes pa ni 'og nas 'byung ba'i tshigs su bcad pas gzengs bstod na slob ma rnams dga' zhing spro bas sems brtan par 'gyur ro/ /bdag nyid chen po khyed rnams kyis/ /rnyed pa mnyam med de ring rnyed/ /gang phyir rgyal ba sras bcas pa//bdag nyid chen po kun gyis ni/ /bstan pa 'di la khyed rnams kun/ /yongs su bzung ste skye bzhin pa/ /de phyir khyed rnams theg chen la/ /sang ni rab tu skye bar 'gyur/ /zhes pa ste/ de ltar khyed kyis sdig pa bshags shing skyabs su 'gro ba dang sdom pa bzung bas mnyam pa med pa'i rnyed pa bla na med pa'i byang chub de yang rnyed do zhes pa ste de ci'i phyir zhe na/rgyal ba sras dang bcas pas bstan pa 'di la khyed rnams yongs su bzung ba'i phyir ro/ /de bas na khyed rnams de ring ni theg pa chen po la skye bzhin pa yin la sang ni theg pa chen po la skye bar 'gyur ro zhes pa'o//de la rnyed pa mnyam med ces pa pa ni sngags kyi tshul la spyod pa dag nyan thos dang rang sangs rgyas thams cad kyi theg pa dang theg pa chen po pha rol tu phyin pa la sogs pa dang yang mi mnyam pa yin nam zhe na/ pha rol tu phyin pa la sogs pa la spyod par 'dra yang 'dir sngags kyi bzlas pa la sogs pa la khyad par du lhag par spyod pas rnyed pa mnyam par med pa ste rnyed ces pa de lta bu thob ces pa'o//bdag nyid chen po khyed rnams kyis/ /zhes pa ni slob ma rnams la bstod pa'i tshig ste/ de lta bu'i mthu chen po zhugs pas btsun pa zhes pa'i don to/ /rgyal ba sras bcas pa zhes pa ni sangs rgyas bcom ldan 'das byang chub sems dpa'i sras dang bcas pa ste/gang phyir rgyal ba kun gyis khyed rnams zhes sbrel lo/ /bstan pa 'di la kun yongs su gzung zhes kyang sbyar te/ rgyal ba sras dang bcas pas sngags spyad pa'i bstan pa 'dir yongs su bzung bas na khyed rnams kyis mnyam pa med pa'i rnyed pa thob po zhes par 'brel lo//skye bzhin pa ni theg pa chen po skye bzhin pa ste/ de bas na/ de phyir de rnams theg chen la/ /sangs ni rab tu skye bar 'gyur/ /zhes pa ste sang lta bu dkyil 'khor du 'jug pa'i tshe theg pa chen po'i byang chub tu sems bskyed pa skyes zin zhes pa'i don to//gal te rmi lam dag tu/ /gtsug lag khang dang kun dga' bzang / /zhes pa nas/ /brtul zhugs bzang po khyed rnams kyis/ /nang par thams cad la zlos/ /slob ma de dag rnams la ni/ /de skad bsgo nas chos kyang bshad/ ces pa'i bar dag gis ni de ltar spro ba bskyed pa la sogs pa byas nas slob ma rnams la rmi lam gyi ltas 'di rnams bstan te 'di rnams las gang mthong ba de slob dpon la zlos su gzhug pa ste/ rmi lam gyi ltas de rnams kyang sa las byung ba dang bar snang gi dang 'phags pa'i dang rnam pa gsum ste rab dang 'bring dang tha mar blta'o//gsum po de re re la yang / rab dang 'bring dang tha ma ste gsum du dbye bar bya'o/ /de la gtsug lag khang zhes pa nas bram ze dang zhes pa'i bar ni sa las byung ba'o/ /sangs rgyas dang ni rang sangs rgyas/ /de bzhin rgyal ba'i nyan thos dang / byang chub sems dpa' bdag nyid che//zhes pa ni 'phags pa'i'o/ /gal te 'bras bu thob pa dang / /zhes pa nas/ bkra shis yid du 'ong ba'i tshig /'dod pa'i 'bras bu 'byung bar grags/ /zhes pa'i bar ni snang las byung ba'i ltas so/ /de la gtsug lag khang nas yang thog ces pa'i bar du tha ma'o//ral gri dang yid bzhin nor bu ni sa las byung ba'i rab po/ /gdugs dang me tog sna tshogs dang / /bud med bzang mo gos dkar can/ /sdug pa'i gnyen dang bshes dag dang / /glegs bam de bzhin bram ze dang / /zhes pa ni sa las byung ba'i ltas 'bring ngo / / sangs rgyas ni 'phags pa'i ltas rab po/ /byang chub sems dpa' bdag nyid che dang / rang sangs rgyas ni 'phags pa'i 'bring ngo / /nyan thos ni 'phags pa'i tha ma'o/ /'bras bu thob pa ni bar snang gi tha ma'o/ /mtsho dang rgya mtsho la brkyal zhing brgal ba ni bar snang gi 'bring ngo //de bzhin du bkra shis yid du 'ong ba'i tshig 'dod pa'i 'bras bu 'byung ba gang las thos na bar snang gi rmi lam gyi ltas rab tu shes par bya ste/ rmi lam de rnams blta ba yang khyad par gyi slob ma rnams gang du dkyil 'khor bri ba'i sa de'i nye 'khor du nyal bar rigs so/ /theg pa chen po cher 'byung ba'i//lam mchog 'di ni dpal dang ldan/ /zhes pa nas/ theg pa rab kyi mchog 'di ni/ /tshul la gnas na thob par 'gyur/ /zhes pa'i bar gyis ni slob ma de rnams spro ba bya ba'i phyir theg pa chen po la skye bar 'gyur ro zhes bshad pa'i theg pa chen po nyid rgyu dang 'bras bu'i yon tan gyi yang 'dir bshad de/de lta bu'i theg pa khyed kyis thob pa yin no zhes pa bstan to/ /lam mchog 'di ni dpal dang ldan/ /zhes pa ni bla na med pa'i byang chub tu 'gro ba'i lam ste de yang sngags kyi tshul la spyod pa'i lam mo/ /lam mchog ces pa ni nyan thos dang rang sangs rgyas kyi theg pa dang pha rol tu phyin pa la spyod pa'i byang chub sems dpa' rnams kyi lam las 'phags pa'i phyir ro//pha rol tu phyin pa la spyod pa'i byang chub sems dpa'i lam las ci'i phyir 'phags she na/ pha rol tu phyin pa la sogs pa la spyod par 'dra yang lha rnams mnyes par bya ba'i phyir yan lag bzhi la sogs pa'i sngags bzlas pa dang mchod pa dang sbyin sreg la sogs pa'i sgo nas sbyin pa la sogs pa la pha rol tu phyin pa rgyun mi 'chad par spyod pas 'bras bu myur du thob par 'gyur ba'i phyir mchog go//dpal dang ldan zhes pa ni mngon par mtho ba'i mtshan nyid lha dang mi'i longs spyod kyi bde ba dang rig 'dzin la sogs pa'i grub pa thob pa dang /nges par legs pa'i mtshan nyid mi gnas pa'i mya ngan las 'das pa rim gyis thob par 'gyur bas na dpal dang ldan pa'o/ /theg pa chen po cher 'gyur ba'i/ /zhes pa ni sngags spyod pa'i tshul gyi theg pa chen po ni bla na med pa'i byang chub 'byung ba'i rgyu'i gtso bo yin pas na cher 'byung ba zhes bya'o//gang gi phyir/ khyed rnams der ni dong bas na/ /de bzhin gshegs pa rnams su 'gyur bar 'os so zhes pa ste/ de ltar theg pa chen po la zhugs na de yi 'bras bu thams cad mkhyen pa'i ye shes kyi rang bzhin chos kyi sku thob par 'gyur ro zhes pa'o//de nas bcom ldan 'das la rdo rje 'dzin pa spros pa med par gnas pas 'di skad ces gsol to zhes pa nas de ci'i phyir zhe na/ byang chub sems dpa' rnams ni lus dang ngag dang yid yongs su ma btang bar bslab pa 'dzin par mi byed do zhes pa'i bar gyis ni sngar dus gsum du sgrib pa med pa'i ye shes kyi sdom pa gsungs pa de nyid zhib tu bshad pa ste/bcom ldan 'das dus gsum du sgrib pa ma mchis pa'i ye shes kyi sdom pa gang la byang chub sems dpa' rnams gnas na sangs rgyas dang byang chub sems dpa' rnams mnyes par 'gyur bar bshad du gsol zhes pa ni/dus gsum du sgrib pa med pa'i ye shes kyi sdom pa de la gnas na sangs rgyas dang byang chub sems dpa' rnams mnyes te/ mngon par mtho ba dang nges par legs par thob par 'gyur ba de lta bu bshad du gsol zhes pa'o//dus gsum du sgrib pa med pa'i ye shes kyi sdom pa ni bshad zin to/ /lus dang ngag dang yid gcig tu 'jug cing zhes pa ni lus dang ngag dang yid gsum dus gcig tu stong pa nyid la 'jug pa ste/ de ltar lus dang ngag dang yid gsum stong pa nyid kyi rang bzhin du gyur cing dmigs su med pas chags par bya dang chags pa nyid dang chags par byed pa la sogs pa yang dmigs su med de/de ltar dmigs su med pa na lus dang ngag dang yid rnams sdig pa la sogs pa mi byed pa de ni sdom pa'o/ /chos thams cad la rtsom pa med ces pa ni phung po dang khams dang skye mched la sogs pa'i chos thams cad skye bar byed pa'i rgyu lus dang ngag dang yid gsum gyis mi byed pa ste/de ltar de dag skyed pa'i rgyu ma byas pas na sdom pa yin te/ de dag gis ni don dam pa'i sdom pa bstan pa'o/ /de yang gang zhe na/ sangs rgyas dang byang chub sems dpa' rnams la bdag gis lus yongs su gtong ba gang yin pa'o zhes pa ni dus gsum sgrib pa med pa'i sdom pa de gzhan ma yin gyi bdag gi lus sangs rgyas dang byang chub sems dpa' rnams la phul ba lus de sangs rgyas dang byang chub sems dpa' rnams dbang ba yin gyi bdag la dbang med do//de ltar bdag la dbang med de sangs rgyas dang byang chub sems dpa' rnams dbang na sangs rgyas dang byang chub sems dpa' rnams kyi chos ni mi dge ba bcu'i las kyi lam mi spyod do/ /de bas na gang gis lus phul ba des kyang chos bzhin du bya dgos te/lus ngag yid gsum gyi sgo nas mi dge ba'i las kyi lam bcu mi spyod pas na sdom pa zhes bya'o/ /de bas na de ci'i phyir zhe na/ gang gis bdag gi lus yongs su gtang ba des ni dngos po gsum yongs su btang ba yin te/ dngos po gsum yongs su gtang ba de yang gang zhe na 'di lta ste lus dang ngag dang yid do//rigs kyi bu de lta bas na byang chub sems dpa' lus dang ngag dang yid gsum gyi sdom pas bsdam par bya'o zhes gsungs pa yin no/ /de ci'i phyir zhe na/ byang chub sems dpa' rnams ni lus dang ngag dang yid yongs su ma btang bar bslab pa 'dzin pa mi byed do zhes pa ni sangs rgyas dang byang chub sems dpa' rnams la lus phul bas lus dang ngag dang yid gsum char phul bar 'gyur te/lus dang ngag dang yid gsum la bdag mi dbang na lus dang ngag dang yid gsum gyi sgo nas mi dge ba'i las kyi lam bcu mi spyod pas de nyid sdom pa ste/lus dang ngag dang yid gsum lhas lhag pa'i sdom pa gzhan yod pa ma yin no zhes pa'i don to/ /mdor na gang gis sangs rgyas dang byang chub sems dpa' rnams la bdag gi lus phul ba des lus dang ngag dang yid gsum char phul bas na gsum po de dag gi sgo nas mi dge ba bcu'i las kyi lam mi spyod pa de dag thams cad mkhyen pa'i ye shes sgrib pa med pa thob par byed pa'i rgyur 'gyur bar bstan pa yin no//de nas phyis de nyin par bcom ldan 'das rnam par snang mdzad la phyag byas te bdag nyid rdo rje sems dpar byin gyis brlabs la zhes pa nas/de nas sems sbyang ba'i phyir spos chu gtsang ma blud do zhes pa'i bar gyis nang par dkyil 'khor 'dri ba'i slob dpon gyi las su bya ba rnams bshad pa ste/ nang par nyi ma 'char kar brtags na lho byang dang shar nub la sogs pa gsal bar mngon te/ de bas na nang par khrus la sogs pa byas nas dkyil 'khor bri ba'i sa de'i dbus su zhugs te bcom ldan 'das rnam par snang mdzad yid la byas nas phyag byas la dam tshig gsum gyi phyag rgya bcings te chos kyi dbyings kyi phyag rgyas bdag nyid stong par byin gyis brlabs la/chos kyi 'khor lo'i phyag rgya bcings nas rdo rje sems dpar byin gyis brlab po//de nas rdo rje go cha'i phyag rgya bcings nas go cha bgo ba de ni rdo rje sems dpar byin gyis brlab pa ste rdo rje sems dpa' zhes bya ba ni sems shin tu brtan pa rdo rje dang 'dra ba la bya ste/ de yang gang zhe na phyin ci ma log par yongs su grub pa'i mtshan nyid byang chub kyi snying po'i sems te/de nyid dpal rdo rje sems dpa'i byang chub sems dpa'i skur byin gyis brlab pa'o/ /de ltar slob dpon de rdo rje sems pa'i skur byin gyis brlabs la dkyil 'khor gyi sa'i lho byang dang shar nub la sogs pa brtags te gtan la dbab pa dang lha rnams gang du 'god pa'i gnas kyang yid kyis gtan la dbab par bya'o//yang bum pa spos chus bkang ba la 'jig rten gsum las rnam par rgyal bas mngon par bsngags te sgo dang por gzhag la mkhas pas skye bo kun la des bsang gtor bya'o zhes pa ni gzhung las 'byung ba'i mtshan nyid dang ldan pa'i bum pa spos chus bkang ba la rin po che dang sman dang /'bru lnga rnams blugs te dkyil 'khor gyi khang pa'i sgor bzhag ste slob ma rnams nang du 'ong ba'i tshe bgegs bsal ba'i phyir gtor ro/ /khams gsum rnam par rgyal ba'i sngags kyis bum pa de la gdab pa de yang snying po'i sngags kyis gdab na brgya rtsa brgyad du gdab la/rtsa ba'i sngags kyis gdab na bdun nam nyi shu rtsa gcig gdab bo/ /de nas sems sbyang ba'i phyir spos chu gtsang ma blud pa ni slob ma rnams kyi sngags spyod pa dang 'gal ba'i kha zas zos pa'i rnam par rtog pa med na yang spos kyi chu gtsang ma de blud do//gtsang ma zhes pa ni srog chags kyi yan lag la sogs pa med pa'o/ /sngags dang 'gal ba'i kha zas zos pa'i rnam par rtog pa med na yang spos kyi chu gtsang ma 'thungs pas bdag gi rgyud gtsang mar gyur to snyam pa'i 'du shes skye ste mi gtsang ba la sogs pa'i dogs pa med par 'gyur ba'i phyir spos chu blud do//de nas bcom ldan 'das la phyag na rdo rjes 'di skad ces gsol to zhes pa nas/ rtag tu mtshan mo bri bar bya/ /zhes pa'i bar gyis dus ji tsam na dkyil 'khor dri ba zhus shing bshad pa yin te/ dus dang tshod ces pa ni dkyil 'khor 'dri ba'i dus nam nyid kyi tshe na yin pa de bshad du gsol zhes pa'o//kun mkhyen pa ni bcom ldan 'das thams cad mkhyen pa'o/ /smra ba'i mchog gis bka' stsol cig /ces pa ni smra ba thams cad kyi mchog ni sangs rgyas bcom ldan 'das so/ /dkyil 'khor gyi ni slob dpon dag /gsang sngags sgrub la 'bad pa na/ /gang gi dus su dkyil 'khor du/ /sems dpa' chen por byin rlob pa'i/ /zhes pa ni dkyil 'khor gyi slob dpon dam tshig gi dkyil 'khor 'dri ba dang / sgrub pa'i dkyil 'khor 'dri ba na byang chub sems dpa' rnams der gshegs nas byin gyis rlob par 'gyur ba'i dus gang lags zhes zhus pa ste/sems dpa' chen po zhes pa ni sangs rgyas bcom ldan 'das la mi bya'i pha rol tu phyin pa'i spyad pa spyod pa'i byang chub sems dpa' rnams la bya'o/ /de ci'i phyir zhe na sangs rgyas bcom ldan 'das ni dus thams cad du byin gyis rlob pas zhu mi dgos la/byang chub sems dpa' rnams ni ting nge 'dzin las bzhengs nas sems can thams cad kyi don la rtog pa sngon du btang ste gshegs pas dus thams cad du byin gyis mi rlob po/ /de bas na dkyil 'khor 'dri ba la byang chub sems dpa' rnams gshegs par 'gyur ba'i dus gang yin zhes zhus pa'o//gnyis su na sangs rgyas bcom ldan 'das la sems dpa' chen po zhes nam yang mi brjod de/ byang chub sems dpa' rnams sems dpa' chen po zhes brjod par grags so/ /de bas na sems dpa' chen po zhes pa ni byang chub sems dpa' chen po rnams la bya'o//dkyil 'khor don du gnyer ba la/ /rtag tu mtshan mo bri bar bya/ /zhes pa ni dkyil 'khor 'dri bar 'dod pa rnams kyis dus thams cad du dkyil 'khor thams cad mtshan mo bri'o zhes bka' stsal pa ste/ byang chub sems dpa' de rnams kyang mtshan mo'i dus der gshegs par 'gyur ro zhes gsungs pa yin no//de bas na 'dis ni dam tshig gi dkyil 'khor dang sgrub pa'i dkyil 'khor gnyi ga yang dus thams cad du mtshan mo bri bar shes par bya'o/ /de la gsang ba'i rgyud la sogs par sgrub pa'i dkyil 'khor ma gtogs par gzhan thams cad mtshan mo bri'o zhes 'byung ste de bas na sgrub pa'i dkyil 'khor ni nyin par bri bar gsungs so//de ci'i phyir zhe na/ sgrub pa ni nam srod nas nam langs kyi bar tshan rangs par bsgrub dgos te/ de bas na sgrub pa'i dkyil 'khor mtshan mo bri ba'i skabs med de nyin par bri bar gsungs so//'dir ni gnyi ga yang mtshan mo bri bar gsungs pas dam tshig gi dkyil 'khor ni de nyid kyi mtshan mo bri bar bya la/ sgrub pa'i dkyil 'khor ni rgyud 'di las mtshan mo bri bar gsungs pas gsang ba'i rgyud las 'byung ba ltar nyin par bri ra med la/ sgrub pa nyid kyi mtshan mo yang bri ba'i skabs med de nub de nyid la bris na mtshan mo'i mel tshe thun 'ga' dkyil 'khor bri ba la zad pas sgrub pa mtshan rangs par mi 'gyur ro//de bas na snga de nub mo dkyil 'khor bris la phyi de nub mo bsgrub par shes par bya'o/ /dkyil 'khor chen po dag nub gcig gis mi rdzogs pa yang gzhung de ltar shes par bya'o//da ni dkyil 'khor ba'i don du srad bu bre ba la sogs pa bshad par bya ste/ dkyil 'khor bri ba de yang don rnam pa drug gis yongs su rdzogs par 'gyur ro/ /drug gang zhe na/ dkyil 'khor gyi srad bu bre ba'i ting nge 'dzin bshad pa dang /srad bu bre ba bshad pa dang / dkyil 'khor gyi tshad bshad pa dang / snam bu'i rim pa dbye ba dang / sgo khyud dang rta babs rnams rnam par dbye ba dang / lha rnams kyi gnas kyi nges pa bshad pa'o/ /de la slob dpon gyis sangs rgyas thams cad la phyag byas la tshon sna lnga'i srad bu thogs te bdag nyid bcom ldan 'das rnam par snang mdzad du byin gyis brlabs la zhes pa ni srang bu bre ba'i ting nge 'dzin bshad pa ste/sangs rgyas thams cad la phyag byas la zhes pa ni ting nge 'dzin la 'jug par byed pa na thog mar sangs rgyas rjes su dran zhing phyag bya bar rigs so//tshon sna lnga'i srad bu zhes pa ni ye shes lnga'i rang bzhin du bsam pa ste bdag rnam par snang mdzad kyi sku ye shes lnga po de dag dang ldan par byin gyis brlab po/ bdag nyid bcom ldan 'das rnam par snang mdzad du byin gyis brlabs la zhes pa ni dkyil 'khor rnam pa gsum la ting nge 'dzin du gnas pa yang bye brag rnam pa gsum ste/snying rje chen po'i dkyil 'khor la slob dpon rnam par snang mdzad kyi skur byin gyis brlabs nas srad bu bre ba la sogs pa dkyil 'khor gyi las rnams bya'o/ /yi ge 'khor lo bskor ba'i dkyil 'khor la chos kyi skur byin gyis brlabs nas dkyil 'khor gyi las rnams bya'o//gsang ba'i dkyil 'khor la dbang chen la sogs pa'i dkyil 'khor lnga dang ldan pa'i skur byin gyis brlabs nas dkyil 'khor gyi las rnams bya ste/ de dag kyang zhib tu ni bsdus pa'i don las bshad cing rgyud nyid las kyang so so'i skabs su 'chad do//tshon sna lnga'i skud pa rnams ye shes lngar bsam pa ni 'og nas rdul tshon sna lnga la sangs rgyas lngar bsam pa dang sbyar ro/ /shar du srad bu bre ba ni/ /lte ba'i thad kar bzung nas su/ /bar snang la ni gzung bar bya/ /de nas lho phyogs song nas su/ /byang phyogs su ni bre bar bya//zhes pa ni thog mar slob dpon de dkyil 'khor gyi nub phyogs su gnas nas kha shar phyogs su bltas te 'grengs la nam mkha' la rang bzhin gyi dkyil 'khor dmigs pa'i tshul bcom ldan 'das rnam par snang mdzad kyi sku la sogs pa mi zad pa'i rgyan gyi 'khor lo dang bcas pa mngon du bsams te srad bu'i thog ma grogs kyis 'dzin du bcug la shar phyogs su brkyang ngo //de bzhin du lho phyogs nas byang phyogs su brkyang ste de ni nam mkha' la rang bzhin gyi dkyil 'khor bsam pa'o/ /de ltar nam mkha' la rang bzhin gyi dkyil 'khor sems kyis bsams nas phyis sa la dkyil 'khor bri ba na rang bzhin gyi dkyil 'khor de'i gzugs brnyan lta bur shes par bya'o//de ltar nam mkha' la dkyil 'khor sems kyis bsams pa la srad bu bre cing gos she na/ nam mkha' la rang bzhin gyi dkyil 'khor bsam pa'i mtshan mar brtag pa'i phyir ro/ /de nas srad bu gnyis pa ni/rang gis blangs nas zhes pa ni srad bu dang po de dkyil 'khor snga ma'i dman ma yin pas brer mi rung ba'i phyir tshon sna lnga'i skud pa gzhan zhig blangs nas dkyil 'khor phyi ma bri ba'i don to/ /de nyid du/ de bzhin gshegs pa rjes dran zhing / /shar phyogs bltas te bre bar bya/ /zhes pa ni dkyil 'khor mi 'khrul bar gtan la dbab pa'i phyir dbus nas rgya gram du thig btab ste dkyil 'khor gyi dbus su bab par phur bus btsugs la de nas srad bu de blta ba ste dbus kyi phur bu la brtod la grwa bzhi gtan la dbab par bya'o//de ltar gtan la phab nas grwa bzhi'i mtshan mar yang phur bu bzhi gzugs srad bu yang mdud pa mi bor bar skud pa la sogs pa'i mtshan ma gdags par bya'o//de bzhin gshegs pa rjes dran zhing / /zhes pa ni de bzhin gshegs pa rnams yid la byas nas zhes pa'o/ /de nas lho phyogs song nas ni/ /byang phyogs su ni bre bar bya/ /zhes pa yang rgya gram nyid gdab pa la bya'o//blo can de nas slar log nas/ /bden bral phyogs su gnas nas ni/ /byang phyogs su ni bre bar bya/ /zhes pa ni slob dpon de lho nub kyi mtshams su 'dug nas kha byang phyogs su bltas te nub kyi ngos su thig gdab par bya'o/ /de nas g.yas su bsgyur bar bya/ /bsgyur te de ru 'dug nas ni//lho phyogs su ni bre bar bya/ /zhes pa ni slob dpon lho nub kyi mtshams de nyid du 'dug /kha byang phyogs su bltas pa las kha shar phyogs su bsgyur te srad bu 'dzin pa'i grogs po dkyil 'khor bskor nas shar lho'i mtshams su song ste lho phyogs kyi ngos su thig gdab par bya'o//de nas gnas de btang nas su/ /me yi phyogs su gnas nas ni/ /sngags pa gsang sngags cho gar gnas/ /shar du srad bu bre bar bya/ /zhes pa ni slob dpon des lho nub kyi mtshams de bor nas shar lho mtshams su 'dug ste shar phyogs kyi ngos thig gdab par bya'o//sngags pa gsang sngags cho gar gnas/ /zhes pa ni rnam par snang mdzad kyi ting nge 'dzin la gnas zhes pa'i don to/ /de nas de bzhin dbang ldan phyogs/ /song nas nub tu kha bltas te/ /rlung gi phyogs kyi bar du ni/ /byang gi phyogs su bre bar bya/ /zhes pa ni slob dpon byang shar gyi mtshams su 'dug nas byang phyogs kyi ngos thig gdab par bya'o//sngags pa yis ni de lta bur/ /kun nas grwa bzhi lham par bya/ /zhes pa ni de ltar gong du gsungs pa'i mtshan nyid kyis dkyil 'khor de kun nas gru bzhir bya'o zhes pa'o/ /de ltar dkyil 'khor gyi thig gdab pa na thog mar nub phyogs dang de nas lho phyogs dang /de'i 'og tu shar phyogs dang de nas byang phyogs su bya ba ci las yin zhe na/ nub phyogs kyi ngos ni so sor rtog pa'i ye shes su brtags la/ lho phyogs ni mnyam pa nyid kyi ye shes su brtags shing shar phyogs ni me long lta bu'i ye shes su brtags la byang phyogs ni bya ba sgrub pa'i ye shes su brtags te de bas na thog mar so sor rtog pa'i ye shes su 'gyur la de rdzogs pa las mnyam pa nyid kyi ye shes rdzogs par 'gyur zhing /mnyam pa nyid kyi ye shes las me long lta bu'i ye shes rdzogs par 'gyur la/ me long lta bu'i ye shes las lus dang longs spyod dang gnas kyi mtshan nyid bya ba sgrub pa'i ye shes 'byung ste de bas na rim pa de ltar smos so/ /ye shes bzhi'i dmigs pa'i yul yang chos kyi dbyings rnam par dag pa ste/ de bas na srad bu rgya gram du bres pa'i ri mo ngos bzhi nas re re 'byung ba ni chos kyi dbyings la 'du ba'o//rgya gram gcig tu 'dus pa ni chos kyi dbyings kyi mtshan nyid do/ /de ltar thig btab ste sa bcad nas tshon sna gcig pa'i skud pa gcig chal la bsgres te ngos kyi ri mo ma byi bar gsal bar bya ba'i phyir gdab po/ de nas dbus su zhugs nas su//de la cha ni gsum du btag /ces pa ni slob dpon dkyil 'khor de'i nang du zhugs nas snam bu gsum du bcad de/ snam bu gsum pa de las cha bzhir bgos te cha re re yang ngos re rer sbyar ba'o/ /de bzhin du snam bu gnyis la yang shes par bya'o/ /snam bu gsum du bya ba ni//sa rnams thams cad kun du yang / /cha gsum dag tu brtags nas ni/ /zhes pas de ltar dkyil 'khor de kho ra khor yug tu rim pa gsum du bya'o zhes pa'o/ /cha rnams kyang ni re re la/ /cha gsum du ni rab tu brtag /ces pa ni snam bu gsum pa re re la yang cha gsum du bgos pa la cha gcig ni bskor ba'i snam bur bzhag cha gnyis ni lha rnams kyi gnas su bya ba ste de bas na/cha gcig gis ni bskor ba yis/ /'khor sar byas te lhag pa yi/ /cha gnyis po ni lha nyid yi/ /gnas su nges par bya ba yin/ /zhes gsungs pa yin te de dag ni snam bu'i dbye ba'o//blo dang ldan pas phyogs bzhi ru/ /so so'i phyogs char sgo khyud ni/ /sdom brtson can gyis nan tan du/ /lha rnams gtso bo'i gnas su bya/ /zhes pa ni sgo khyud rnams rnam par dbye ba ste sgo khyud de rnams kyi tshad kyang dkyil 'khor snam bu'i dgu cha gcig tu brtag go/ / nang gi snying po'i dkyil 'khor gyi sgo khyud rnams las shar phyogs kyi sgo khyud kyi nang du chos kyi sku'i phyag rgya gzhag par bya'o/ /byang phyogs kyi nang du spyan ras gzigs kyi dbang po bzhag la lho phyogs kyi nang du phyag na rdo rje gzhag go/ /de'i phyir rim gyi sgo khyud rnams las shar phyogs kyi sgo khyud kyi nang du shAkya thub pa sprul pa'i sku bzhag cing lho phyogs kyi nang du gshin rje bzhag la byang phyogs kyi nang du dbang po bzhag ste gshin rje dang dbang po la sogs pa de rnams kyang dkyil 'khor bar ma'i snam bu la sgo khyud kyi nang du 'dug pa yang bcom ldan 'das kyi sprul pa'i sku nyid du rig par bya ste/gshin rje la sogs pas 'dul ba'i sems can rnams gdul ba'i phyir yi dwags rnams kyi rgyal po gshin rje'i gzugs gtso bor byas nas sgo khyud na gnas so/ /dbang po yang lha rnams kyi rgyal po ste gtso bor bya zhing sgo khyud na gnas so/ /bcom ldan 'das shAkya thub pa yang mi rnams kyi gtso bor gyur cing sgo khyud na bzhugs so//snying po'i dkyil 'khor gzhugs pa'i gtso bo rnams ni ye shes bzhi'i rang bzhin du shes par bya ste bcom ldan 'das rnam par snang mdzad mngon par byang chub pa'i mtshan nyid dbus na bzhugs pa ni mnyam pa nyid kyi ye shes kyi rang bzhin no/ /chos kyi sku'i phyag rgya shar na gnas pa ni me long lta bu'i ye shes kyi rang bzhin no//spyan ras gzigs kyi dbang po byang phyogs na gnas pa ni so sor kun du rtog pa'i ye shes kyi rang bzhin no/ /phyag na rdo rje lho phyogs na gnas pa ni bya ba grub pa'i ye shes kyi rang bzhin du rig par bya'o//dkyil 'khor gyi snam bu gsum pa la shar phyogs kyi sgo khyud kyi nang na 'phags pa 'jam dbyangs gtso bo'i gzugs su bzhugs so/ /lho phyogs kyi sgo khyud na byang chub sems dpa' sgrib pa thams cad rnam par sel ba bzhugs te/ de bzhin du nub dang byang na yang nam mkha'i snying po dang sa'i snying po dag gtso bo'i gzugs kyis sgo khyud na bzhugs par shes par bya'o//de ltar rim par legs phye ba/ /'di dag thams cad byas nas ni/ /zhes pa gang du smos pa ltar dkyil 'khor gyi snam bu bgo ba dang / sgo khyud rnams rnam par dbye ba dang sgo khyud rnams su lha gtso bo rnams/shin du bye brag phyed pas dgod/ /ces pa'o/ /dbus su pad+ma dkar po mchog /de ni snying po zhes su bsgrags/ /dkyil 'khor snying rje 'byung ba kun/ /des ni snying po can du byas/ /zhes pa ni dbus kyi pad+ma dkar po ni bcom ldan 'das rnam par snang mdzad kyi rgyu bsod nams kyi tshogs la bya ste/dkar ba ni tshogs de nyid rnam par dag pa'o/ /snying po ni 'byung ba'i gnas te bsod nams kyi tshogs de bcom ldan 'das kyi snying rje chen po'i bdag nyid 'byung ba'i gnas yin la/ snying rje chen po de las dkyil 'khor 'di 'byung ste/des ni snying po can du byas/ /zhes pa'o/ /de yi tshad kyang sor bcu drug /yan chad du ni bshad pa yin/ /zhes pa ni dbus kyi pad+ma'i tshad sor bcu drug ste/ yan chad du zhes pa ni de las lhag par byas kyang rung zhes pa'o/ /de'i dgos pa yang 'di lta ste/bcu drug ni sa bcu dang pha rol tu phyin pa drug dang ldan pa yin la/ yan chad du ni zhes pa de dag las lhag pa kun du bzang po'i sa la sogs pa dang ldan pa zhes pa ste mdor na pad+ma de bcom ldan 'das kyi rgyu bsod nams dang ye shes kyi tshogs kyi rang bzhin gyi mtshon par byed pa lta bur blta bar bya'o//'dab ma brgyad pa legs par rdzogs/ /zhes pa ni bsod nams kyi tshogs de ye shes brgyad dang ldan pas 'dab ma brgyad du gsungs so/ /de la ye shes brgyad ni me long lta bu'i ye shes dang / mnyam pa nyid kyi ye shes dang so sor rtog pa'i ye shes dang bya ba grub pa'i ye shes ni sgo lnga'i rnam par shes pa lngar 'gyur bas rnam pa lngar phye ste ye shes rnam pa de brgyad dang ldan pas 'dab ma brgyad du gyes pa'o//ye shes rnams kyang chos thams cad dmigs su med pa'i rang bzhin du rtogs pa ste de ltar thams cad dmigs su med par rtogs pas sbyin par bya ba dang sbyin pa'i dngos po dang sbyin par byed pa gsum char yang dmigs su med par rtogs so//de bas na sbyin pa la sogs pa'i bsod nams kyi tshogs ni ye shes de lta bu dang ldan pas 'khor gsum yongs su dag pa'i rang bzhin du shes par bya'o//ze bar ldan la shin tu bzang / /zhes pa ze ba rnams ni sangs rgyas bcom ldan 'das kyi rgyu'i yon tan ting nge 'dzin dang gzungs dang rnam par thar pa dang / stobs dang mi 'jigs pa la sogs pa'i mtshan mar brtags pa yin la bsod nams kyi tshogs de yon tan de rnams dang ldan pa'o//'dab ma'i bar ni thams cad du/ /kun nas rdo rje bri bar bya/ /zhes pa ni rdo rje ni ye shes kyi mtshan ma ste gong du bshad pa'i ye shes brgyad po de dang ldan pa zhes bya'o/ /de yi snying po'i dbus su ni/ /rgyal mchog gtso bo zhes pa bcom ldan 'das mngon par byang chub pa'i rang bzhin pad+ma'i snying po'i steng du bri ba'o//rgyal mchog gtso bo zhes pa ni bdud rnams las rgyal ba ste de rnams kyi nang na yang mchog ces bya'o/ /gser gyi mdog /'bar bcas thor tshugs dbu rgyan can/ /'od zer dag gis kun nas bskor/ /mgon po nad dang bral ba ni//ting nge 'dzin du gnas par bri/ /zhes pa la 'bar bcas ni 'bar zhing sreg pa'i rang bzhin te/ nyon mongs pa dang shes bya'i sgrib pa sreg pa'i rang bzhin gyi ye shes dang ldan pa'o/ /gser gyi mdog ni rgyas pa'i rang bzhin no/ /thor tshugs ni 'og min gyi gnas na bzhugs pa yin te 'og min gyi lha rnams ni thor tshugs dang bcas pa yin la/de dag dang mthun par bya ba'i phyir thor tshugs dang ldan pa'o/ /dbu rgyan can zhes pa ni chos kyi rgyal po'am dbang por dbang bskur bas rin po che'i cod pan gsol ba'o//'od zer dag gis kun nas bskor/ /zhes pa ni yongs su dag pa'i ye shes kyi rang bzhin gyi 'od dang 'od kyi dkyil 'khor 'phro ba rnams kyis bskor zhes pa'o/ /nad dang bral ba zhes pa ni nyon mongs pa dang shes bya'i sgrib pa'i gdon dang bral ba'o/ ting nge 'dzin du gnas pa zhes pa ni so so rang gis rig pa'i ye shes las mi g.yo zhing rtse gcig tu gnas la gzugs kyang ting nge 'dzin gyi tshul du gnas pa'o//de yi shar du blo ldan gyis/ /sangs rgyas rnams kyi phyag rgya ni/ /gru gsum thams cad dkar po nyid/ /pad+ma'i steng gnas khor yug tu//'od zer dkar pos yongs bskor ba/ /rab tu bsgrims te bri bar bya/ /zhes pa ni bcom ldan 'das rnam par snang mdzad kyi shar phyogs su sngon mngon par sangs rgyas pa 'das pa'i de bzhin gshegs pa rnams phyag rgya gru gsum pa'i mtshan nyid du bri ste shar phyogs su gzhag pa ni rgya gar gyi skad du shar la pUrba zhes bya ba la/'das pa la yang pUrba zhes bya ste de bas na sngon 'das pa'o zhes gleng ba'i phyir shar phyogs su gzhag go/ /pad+ma'i steng du gru gsum bri ba ni stong pa nyid dang mtshan ma med pa dang smon pa med pa ste rnam par thar pa'i sgo gsum yongs su rdzogs pa'i mtshan nyid do//phyag rgya de'i dbus su rdo rje rtse lnga pa dgod pa dang grwa gnyis nas 'od gnyis 'byung bar bya'o zhes gsang ba'i dkyil 'khor nas 'byung ba la rdo rje rtse lnga pa dgod pa ni ye shes lnga'i mtshan ma'o/ /'od gnyis 'byung ba bya ba ni phyag rgya de chos sku'i mtshan nyid do/ /chos kyi sku las longs spyod rdzogs pa'i sku dang sprul pa'i sku gnyis 'byung ba'o//pad+ma ni sngar bshad la dkar po ni nyon mongs pa dang shes bya'i sgrib pa dag pa ste pad+mo nyid la bya'o/ /'od zer gyis bskor ba ni ye shes kyi 'od 'phro bas bskor ba'o/ /thams cad dkar po nyid ces pa ni phyag rgya de nyid dkar por bya ste yongs su dag pa'i phyir ro//de'i byang du mkhas rnams kyis/ /skyob pa dag ni kun gyi yum/ /gser gyi mdog can 'bar dang bcas/ /na bza' dag ni dkar po mnabs/ /kun du rnam par snang mdzad pa/ /ting nge 'dzin du gnas par bri/ /zhes pa ni phyag rgya gru gsum pa'i byang phyogs su bcom ldan 'das nam mkha'i spyan bri ba ste shes rab kyi pha rol tu phyin pa'i rang bzhin mngon par byang chub pa dang ldan pa'i shes rab po//skyob pa ni sangs rgyas bcom ldan 'das rnams te shes rab de las byung bas na de skyob pa rnams kyi yum mo/ / 'bar dang bcas ni shes bya dang nyon mongs pa'i sgrib pa sreg pa'i rang bzhin gyi 'bar ba dang bcas pa'o/ /gser mdog can ni rgyas pa'i rang bzhin no/ /na bza' dkar po mnabs pa ni na bza' ni g.yogs par byed pa ste de nyid dag pas dkar po'o/ /de bas na shes bya dang nyon mongs pa'i sgrib pa'i g.yogs ma dag pa'i mtshan ma ni na bza' dkar po'o//kun du rnam par snang mdzad pa ni shin tu dag cing rang bzhin gyis 'od gsal ba'i ye shes kyi rang bzhin gyis khyab pa'o/ /ting nge 'dzin du gnas zhes pa ni g.yo ba med pa'i gzugs su gnas pa'o/ / mgon po yi ni byang phyogs su/ /spyan ras gzigs dbang dpa' bo ni/ /pad+ma dkar po'i stan la 'dug /dung dang kun da zla ba 'dra/ /dbul 'od dpag med bzhugs pa/ /bzhin ni bag tsam 'dzum par bri/ /zhes pa ni bcom ldan 'das rnam par snang mdzad kyi g.yas rol byang phyogs kyi ngos su pad+ma'i rigs kyi bdag po spyan ras gzigs kyi dbang po bri ba ste spyan ras gzigs zhes pa ni so sor kun du rtog pa'i ye shes kyi rang bzhin gyis sems can rnams yongs su smin pa dang grol bar bya ba'i phyir gzigs pa dang chos kyi dbyings rnam par dag pa la gzigs pa'o// dpa' bo ni shes bya dang nyon mongs pa'i sgrib pa'i chom rkun 'joms pa la dpa' ba'o/ /pad+ma dkar po'i stan la 'dug pa ni bsod nams dang ye shes kyi tshogs yongs su dag pa'i rang bzhin no/ /rnal 'byor gyi rgyud las pad+ma dmar por gsungs la/ 'dir dkar por gsungs pa de yang rnal 'byor gyi rgyud ni thabs gtso bor gyur pa ste/thabs kyis sems can rnams yongs su smin pa dang grol bar bya ba'i don la zhen par bstan pa'i phyir dmar por bstan pa'o/ /rgyud 'di ni shes rab gtso bor gyur pa'i sgo nas shes rab kyis chos thams cad shin tu dag par rtogs pa'i mtshon byed du dkar por bstan to//dung dang kun da zla ba 'dra/ /zhes pa ni sku'i kha dog dung dang me tog kun da dang zla ba ltar dkar bar shes par bya'o/ /dbu la 'od dpag med bzhugs pa/ /zhes pa ni snang ba mtha' yas ni so sor rtog pa'i ye shes kyi rang bzhin yin pas de'i mtshan mar bstan pa'o//gnyis su ni rnal 'byor gyi rgyud las rigs so so las dbang bskur ba so so ste/ pad+ma'i rigs la snang ba mtha' yas kyis dbang bskur ba'i phyir ro/ /bzhin ni bag tsam 'dzum pa zhes pa ni ting nge 'dzin la mi gnas par sems can chos bshad pa la sogs pa'i phyir du 'dzum zhing zhal ma btsums pa'i don to//de yi g.yas su lha mo ni/ /sgrol ma grags pa chen mo de/ /dge zhing 'jigs pa sel ba ste/ /sngo bsangs ma la sna tshogs gzugs/ /bud med dar la bab pa'i tshad/ /thal sbyar me tog ut+pal thogs//'od zer dag gis kun bskor zhing / /gos ni dkar po gyon par bri/ /zhes pa ni spyan ras gzigs kyi dbang pos sems can gyi khams la gzigs nas bdag gis bsod nams dang ye shes kyi tshogs la sogs pa thams cad mtha' yas pa'i sems can thams cad kyi don du bsngos te bsgral kyang sems can de dag ma lus par 'khor ba las rgal bar ma gyur pa gzigs nas thugs rje chen po'i shugs kyis byung ba'i spyan chab las sgrol ma'i lha mo mang po byung nas sems can thams cad sgrol bar byed pa'i gzugs su gyur pa ste de bas na lha mo sgrol ma'o//gzhan rnam pa du ma yang rgyud gzhan las shes par bya'o/ /grags chen ni yon tan gyi tshig go/ /dge zhing 'jigs pa sel ba zhes pa ni rgyal po dang chom rkun la sogs pa'i 'jigs pa brgyad sel bar byed pa'o/ /sngo bsangs ni kha dog dkar po dang sngon po dang ser po la sogs pa bsdus pa las ljang gur 'gyur te kha dog dkar po dang ser po dang sngon po la sogs pa ni zhi ba dang rgyas pa dang mngon spyod kyi las kyi mtshan ma ste de dag gcig tu bsdus pa ni las thams cad byed pa'o//sna tshogs gzugs zhes pa ni sems can rnam pa mang po'i don du res 'ga' ni pho'i gzugs dang /res 'ga' ni mo'i gzugs la sogs pa rnam pa du mar 'gyur ba'i phyir ro/ /bud med dar la bab pa'i tshad/ /ces pa ni gzhon te yon tan rdzogs pa yang ma yin/ yon tan rnams las 'das pa'i byang chub kyi mya ngan las 'das par 'gyur ba'i tshul gyis rgas pa yang ma yin te/bsod nams dang ye shes kyi tshogs rgyas pa'i mtshan nyid kyi tshad la bab pa'o/ /thal sbyar me tog ut+pal thogs/ /zhes pa ni rnam par thar pa'i sgo sna tshogs 'dzin pa ste de bas na ut+pala'i 'dab ma ral gri lta bu ni shes rab kyi rnam par thar pa'i sgo lta bur shes par bya'o//'od zer dag gis kun bskor zhing / /zhes pa ni ye shes kyi 'od 'phro bas bskor ba'o/ /gos ni dkar po gyon pa ni ngo tsha dang ldan pa'i mtshan ma ste/ ji ltar gos kyis g.yogs shing mi snang bar bya ba bzhin du ngo tsha ba yang 'chab cing sba ba'i mtshan ma ste ngo tsha de dang ldan pa'o//dkar po ni ngo tsha nyid rnam par dag pa'i mtshan ma'o/ /ci'i phyir ngo tsha dang ldan zhe na/ ngo tsha ni byang chub sems dpa'i yon tan de de ltar ni 'og nas 'chad do/ /g.yon du lha mo khro gnyer can/ /sngags zlo'i phreng ba lag na dbyangs//mig gsum pa la thor tshugs can/ /kha dog mdog ni dkar mo la/ /'od zer dkar po ser po dang / /dmar po rnams kyis bskor bar bri/ /zhes pa ni spyan ras gzigs kyi g.yon rol du khro gnyer ma bri ba ste/ khro gnyer ma zhes pa ni rgyu'i ming 'bras bu la btags pa'i mtshan te/spyan ras gzigs kyi dbang po'i smin mtshams kyi nang nas lha mo de byung ste khro gnyer gyi rgyu las byung bas na khro gnyer ma zhes bya'o/ /lha mo khro bo'i bdag nyid 'ba' zhig ma yin gyi/ pha rol tu phyin pa la sogs pa dang ldan par bstan pa ste/ sngags kyi nor bu ni pha rol tu phyin pa'i mtshan ma'o//mig gsum pa ni khro bo'i bdag nyid do/ /thor tshugs can ni 'og min gyi lha rnams dang rigs mthun pa'o/ /kha dog mdog ni dkar mo la/ /zhes pa ni yongs su dag pa'i mtshan nyid do/ /'od zer dkar po ser po dang / /dmar po rnams kyis bskor ba zhes pa ni ye shes kyi 'od 'phro ba dang ldan pa ste 'od nyid dkar po dang ser po dang dmar po'i kha dog de rnams dang ldan pa zhi ba dang rgyas pa la sogs pa'i las thams cad byed pa'i mtshan ma'o//khro gnyer can dang nye bar ni/ /mthu chen lag na pad+ma thogs/ /brtse ba chen po gos dkar gyon//'od zer dag gis bskor ba yi/ /dpa' bo yang dag bri bya ste/ /de yi pad+ma kha ma bye/ /zhes pa ni khro gnyer ma dang nye bar 'phags pa mthu chen thob bri ba ste/ khro gnyer ma dang nye bar bri ba ni mthu chen de dpung bya ba'i phyir ro/ /lag na pad+ma thogs zhes pa dang / /de yi pad+ma kham bye/ /zhes pa ni de'i phyag rgya pad+ma'o//brtse ba chen po ni snying rje chen po dang ldan pa'o/ /pad+ma kha ma bye ba ni spyan ras gzigs kyi dbang po dang khyad par bstan pa'o/ /gos dkar gyon pa ni yongs su dag pa'i mtshan nyid do/ /'od zer dag gis bskor ba yi/ /zhes pa ni ye shes kyi 'od 'phro ba dang ldan pa'o/ /dpa' bo ni sus kyang zil gyis mi non pa'o//de yi drung du blo can gyis/ /rig sngags lha mo drags ldan ma/ /gser gyi kha dog lta bu can/ /rgyan rnams kun gyis brgyan pa ste/ /lag pa g.yon pas pri yang ku'i/ /snye ma yid 'ong mdzes par bri/ /zhes pa ni mthu chen thob kyi drung du lha mo grags 'dzin zhes bya ba bri ba ste/de la grags 'dzin zhes pa ni sangs rgyas bcom ldan 'das kyi yon tan gyi grags pa rnams 'dzin pa'o/ /de'i gser gyi kha dog lta bu ni mtshan nyid do/ /lag pa g.yon pas pri yang ku'i/ /snye ma yid 'ong 'dzin pa zhes pa ni lha mo de'i phyag rgya'o/ /sgrol ma yi ni nye 'khor du/ /blo dang ldan pa gos dkar mo/ /zhes bya ba ni gos dkar mo'am dkar bar gnas pa zhes bya ba'i lha mo der bri ba ste dkar bar gnas pa ni chos kyi dbyings rnam par dag pa la gnas pa'o//sgrol ma'i nye 'khor du bri ba'i lha mo sgrol ma de sems can rnams sgrol zhing las thams cad byed pa 'ba' zhig ma yin gyi/ chos kyi dbyings rnam par dag pa la bsnyen par byed par bstan pa'i phyir ro//thor tshugs can la gos dkar gyon/ /lag na pad+ma thogs par bri/ /zhes pa ni gos dkar po ni yongs su dag pa'i mtshan ma'o/ /lag na pad+ma ni phyag rgya pad+ma thogs pa'o/ /thor tshugs ni sngar bshad pa bzhin no/ /blo dang ldan pas zhes pa ni sngags pa blo dang ldan pas de ltar bri zhes pa'o//de yi 'og tu sngags pa yis/ /rig sngags rgyal po stobs po che/ /kha dog nyi ma 'char ka bzhin/ /pad+ma dkar pos rnam par brgyan/ /'bar ba'i phreng can mi bzad cing / /spu dag seng ge ltar 'dug pa/ /spyan ras gzigs dbang blo ldan gyi//rta mgrin can zhes grags pa bri/ /zhes pa ni lha mo gos dkar mo'i 'og logs su 'phags pa rta mgrin bri bar bya ste/ rig sngags rgyal po ni pad+ma'i rig pa'i rgyal po'o/ /stobs po che ni mthu che ba'i yon tan can no/ /kha dog nyi ma 'char ka bzhin/ /zhes pa ni sku mdog dmar por bstan pa'o//pad+ma dkar pos rnam par brgyan/ /zhes pa ni bsod nams dang ye shes kyi tshogs rnam par dkar bas brgyan pa'o/ /'bar ba'i phreng can ni shes bya dang nyon mongs pa'i sgrib pa sreg par byed pa'i ye shes can te des bsregs na chos kyi dbyings rnam par dag pa thob par 'gyur ba ste/de bas na chos kyi dbyings rnam par dag pa'i rang bzhin lha mo gos dkar mo'i 'og ma zad du bri ba ni de'i bar chad med pa'i lam gyi rang bzhin du shes par bya'o/ /mi bza' ba zhes pa ni khro bas 'jigs pa'i gzugs so/ /spu dag seng ge ltar 'dug pa/ /zhes pa ni seng ge ltar 'dug pa zhes pa ni seng ge ltar sus kyang zil gyis mi non pa'i mtshan ma'o//rta mgrin can zhes grags pa ni chos la 'bigs pa'i ye shes myur zhing mgyogs pa rta dang 'dra ba dang / sems can gyi don bya ba la mgyogs pa rta dang 'dra ba'i phyir rta mgrin zhes bya'o/ /spyan ras gzigs dbang blo ldan gyis//zhes pa ni de dag spyan ras gzigs kyi dkyil 'khor bar shes par bya ste de dag ni pad+ma'i rigs kyi rang bzhin gyi dkyil 'khor gyi gzugs brnyan du bris pa ste/ rang bzhin gyi dkyil 'khor thams cad ni mtha' yas te brir yang mi lang bas dkyil 'khor 'di dag thams cad ni rang bzhin gyi dkyil 'khor sdud pa'i sgor gyur par shes par bya'o//sangs rgyas rnams kyi lho phyogs su/ /byang chub sems dpa' skyob rnams kyi/ /phyag rgya yid bzhin nor bu zhes/ /grags pa bskal pa chen po can/ /re ba thams cad rdzogs byed pa//pad+ma dkar la 'dug par bri/ /zhes pa ni 'das pa'i sangs rgyas rnams kyi phyag rgya gru gsum pa'i lho phyogs su byang chub sems dpa' rnams kyi phyag rgya yid bzhin gyi nor bu 'dra ba bri ste/ byang chub sems dpa' rnams bris na grangs med mtha' med pas de rnams sdud pa'i sgor gyur pa'i phyag rgya thams cad bri bar shes par bya'o//skal ba chen po ni bsod nams dang ye shes kyi tshogs dang ldan pa la bya'o/ /gnyis su na bsnyen pa chen po zhes kyang bya ste sems can mang pos bsnyen pa'i phyir ro/ /re ba thams cad rdzogs byed pa/ /zhes pa ni sems can thams cad kyi bsam pa ji lta ba bzhin du don byed pas re ba thams cad yongs su rdzogs par byed pa'i yid bzhin gyi nor bu dang 'dra ba'i phyir yid bzhin nor bu zhes grags so//yang na phyag rgya nyid yid bzhin nor bu lta bur bri zhes pa'o/ /pad+ma dkar la 'dug pa ni bsod nams dang ye shes kyi tshogs rnam par dkar ba las byung ba'o//mgon po rnam snang mdzad chen gyis/ /lho yi phyogs su rdo rje 'dzin/ /re ba thams cad skong byed pa/ /mdog ni pri yang ku lta bur/ /ljang ser ram ni margad ltar/ /sngo bsangs mgon po dbu rgyan can/ /sems dpa' chen po rgyan kun gyis/ /rnam par brgyan zhing mtha' yas bar//'jug pa rgya chen rdo rjer bcas/ /'od zer dag gis bskor bar bri/ /zhes pa ni phyag rgya rdo rje'i khyad par te bcom ldan 'das rnam par snang mdzad kyi lho phyogs su bri ste de yang bya ba grub pa'i ye shes kyi mtshan nyid do/ /bcom ldan 'das kyi g.yon phyogs su bri ba ni rgyan sna tshogs kyi brgyan la 'gying ba'i tshul du gnas pas bcom ldan 'das zhi ba dang rjes su mthun pa'i phyir g.yon du bri ba yin no//re ba thams cad skong byed pa/ /zhes pa ni sems can gyi don byed pa la nan tan byed pas na sems can thams cad kyi bsam pa yongs su rdzogs par byed pa'o//mtha' yas 'jug pa rgya chen zhes pa ni sems can gyi don du mtha' yas par rgyu ba ste de yang rgya che ba'i rgyu'o/ /rdo rjer bcas zhes pa ni ye shes lnga'i rang bzhin gyi rdo rje 'chang ba'o/ /'od gzer dag gis bskor ba ni ye shes kyi 'od 'phro bas bskor ba'o/ /de yi g.yas su lha mo'i ming //mA ma kI zhes bya ba de/ /rdo rje'i rgyan gyis brgyan pa ste/ /lag na rdo rje thogs par bri/ /zhes pa ni phyag na rdo rje'i yum bya ba grub pa'i ye shes dang ldan pa'i shes rab kyi pha rol tu phyin pa'i rang bzhin no/ /mA ma ka zhes pa la mA ma ka ni phyag na rdo rje'o/ /mA ma kI mo yin pas mA ma kI zhes bya'o//phyag na rdo rje ji ltar mA ma ka yin zhe na/ gdug pa dang ma rungs pa rnams gdug pa'i bya ba byed pa na ma byed ma byed ces 'gog pa ste ma byed pa zhes bya'o/ /ma byed pa de'i yum yin pas na ma byed ma zhes bya'o/ /rdo rje'i rgyan gyis brgyan zhes pa ni rgyan rnams la rdo rje'i mtshan mas btab pa ste rdo rje rigs kyi mtshan ma'o//rdo rje thogs pa ni ye shes kyi rang bzhin gyi phyag rgya rdo rje rtse gsum pa 'chang ba'o/ /de yi 'og tu lha mo ni/ /rdo rje rtse mo stobs chen de/ /pho nya rnams kyis yongs bskor zhing / /bzhin ni bag tsam 'dzum par bri/ /zhes pa ni yum shes rab kyi pha rol tu phyin pa de'i bar chad med pa'i lam gyi rang bzhin yin pas de'i 'og tu bri ba ste rdo rje rtse mo zhes pa ni chos nyid la 'bigs par byed pa'i ngang tshul can no//stobs chen zhes pa ni de'i yon tan no/ /pho nya rnams kyis yongs bskor zhing / /zhes pa ni bar chad med pa'i lam gyi yan lag rnams dang ldan pa'o//yang na rgyal po'i 'khor yin pas na mngag gzhug la sogs pa srid pa'i phyir ro/ /bzhin bag tsam 'dzum pa ni ting nge 'dzin la ma bzhugs par sems can gyi don mdzad pa'i phyir ro/ /g.yon rol du ni sngags pa yis/ /rdo rje lu gu rgyud ces bya/ /lag na rdo rje lu gu rgyud//rang gi pho nya rnams kyis bskor/ /pri yang ku ltar ljang ser mdog /rdo rje'i mtshan mas legs mtshan bri/ /zhes pa ni phyag na rdo rje'i g.yon du rdo rje lu gu rgyud ces pa ni bri ba ste/ lu gu rgyud ma ni 'phags pa'i lam gyi rang bzhin yin la/ /sems can rnams lam der 'dren cing 'dzud par byed pa'i mtshan ma can no//yang na rgyal po'i 'khor gyi phul yin pas gdug pa dang ma rungs pa rnams gzung zhing 'dogs pa'i mtshan nyid do/ /rang gi pho nya rnams kyis bskor/ /zhes pa ni rdo rje lu gu rgyud ma de nyid kyi 'khor mang ga gzhug pa la sogs pa rnams kyis bskor ba'o//rdo rje mtshan mas legs mtshan bri/ /zhes pa ni rgyan rnams la rdo rje'i mtshan mas btab pa'o/ /lag na rdo rje'i 'og logs su/ /zhes pa nas/ khro bo chen po 'di 'dra ba/ /pad+ma'i steng du 'dug pa bri/ /zhes pa'i bar gyis ni bya ba grub pa'i ye shes phyag na rdo rje'i bar chad med pa'i lam gyi mtshan nyid du gyur pa khro bo zla gtso zhes bya ba'i khyad par te 'og logs su bri ba ni bya ba grub pa'i ye shes kyi sbyor ba bar chad med pa'i lam gyi rang bzhin yin pas bya ba grub pa'i ye shes kyis ram phyin pa'i phyir 'og tu bri'o//de ni zla ba thig le 'am zla gtso zhes bya ste zla ba ltar yongs su dag cing sems can thams cad kyi rgyud tshim par byed pa'i rang bzhin no//thig le ni thig le'i mtshan ma dang ldan pa'o/ /yang na rgya gar skad du ti la ka zhes pa gtso bo'i rnam pa la bya'o/ /bgegs chen dgra ni zhi byed pa/ /zhes pa ni lha dang gnod sbyin las gyur pa'i bgegs rnams dang mi la sogs pa'i dgra sel bar byed pa'o//khro bo 'jig rten gsum du grags/ /zhes pa ni yon tan gyis 'jig rten gsum du grags pa'o/ /mig gsum pa ni ye shes kyi spyan lhag par mnga' ba'am/ khro ba'i mtshan ma'o/ /mche ba bzhi pa ni stong pa nyid dang mtshan ma med pa dang smon pa med pa dang rang bzhin gyis 'od gsal ba'i rnam par thar pa'i sgo dang ldan pa'o//kha dog dbyar gyi sprin 'dra ba/ /zhes pa ni dbyar gyi sprin la rlung dang char par bcas pa'i bag gnas pas de dang 'dra bar las thams cad byed pa'i mtshan ma'o/ /rab tu dgod pa'i sgra yang 'byin//zhes pa ni gad mo'i sgras thams cad 'gengs shing gnod par 'gyur ba'i sgra 'byin pa'o/ /rdo rje'i rgyan gyis rnam par brgyan/ /zhes pa ni rgyan rnams la rdo rje'i mtshan mas btab pa'o/ /'khor ni mtha' yas khro bo yi/ /dbang phyug rnams kyis yongs bskor ba/ / zhes pa ni 'khor phal pa dang khro bo grangs med pas bskor ba'o/ /lag pa stong phrag brgya dag ni/ /zhes pa lam gyi yan lag brgya stong du mas sems can rnams 'phags pa'i lam la 'dzud pa'am/ yan lag de rnams kyis lam gyi sgrib pa mang po sel ba'i mtshan ma'o/ /mtshon cha sna tshogs thogs shing gdengs//zhes pa ni lam gyi yan lag gi yon tan de rnams rdo rje la sogs pa'i mtshon char gyur pa'o/ /khro bo chen po 'di 'dra ba/ /pad+ma'i steng du 'dug pa bri/ /zhes pa ni gong du smos pa'i tshul du bri ba ste 'khor dang yan lag mang po rnams ni yid kyis bsam par bya ste nyung zad ci 'os shig bri bar bya'o//de yi nub tu song nas ni/ /rdo rje 'dzin pa mang po dag /lag na mtshon cha sna tshogs thogs/ /kha dog sna tshogs stobs po che/ /'od gzer dag gis yongs bskor ba/ /sems can kun don byed pa bri/ /zhes pa ni phyag na rdo rje'i 'khor rdo rje 'dzin pa rnams bri ba ste ming dang cha lugs dag ni gsang ba'i dkyil 'khor las 'byung ba dang sbyar bar bya'o//gsang sngags mgon po'i 'og logs su/ /bden bral gyi ni phyogs kyi char/ /mi g.yo zhes bya lag na ni/ /ral gri zhags pa legs par thogs/ /zur phud spyi bo'i g.yon du 'chang //rab tu brgyan zhing mig gcig yo/ /rang gi 'od kyi nang na gnas/ /khro dang bcas pa brag la 'dug /bzhin ni khro gnyer rab tu bsnyer/ /byis pa'i gzugs can mkhrang bag bri/ /zhes pa'i bar gyis bcom ldan 'das rnam par snang mdzad mnyam pa nyid kyi ye shes kyi bar chad med pa'i lam du gyur pa bcom ldan 'das kyi 'og ma zad du 'phags pa mi g.yo mgon bri ba'i bye brag gsungs pa ste/lag na ral gri thogs pa ni shes bya dang nyon mongs pa'i sgrib pa gcod pa'i shes rab kyi mtshan nyid do/ /zhags pa ni lam gyi mtshan nyid de lam der sems can thams cad 'dren cing 'dzud pa'o//mig gcig yo ba ni bar chad med pa'i lam gyi rang bzhin yin pas chos kyi dbyings rnam pa thams cad ma rtogs shing mnyam pa nyid kyi ye shes yongs su ma rdzogs pa'i mtshan ma'o/ /rang gi 'od kyi nang na gnas/ /zhes pa ni sgrib pa sel ba'i ye shes dang ldan pa'o//mkhrang bag phyin ci ma log par yongs su grub pa'i lam gyi rang bzhin yin pas brtan zhing mi 'gyur ba'o/ /gzhon nu'i gzugs ni bar chad med pa'i lam la dang por zhugs pas lam rgyas pa'i mtshan ma ste de bas na bar chad med pa'i lam rgyas pa'i mtshan nyid khams gsum rnam par rgyal ba rlung gi phyogs su gzhag go//bris nas blo ldan rlung phyogs su/ /zhes pa nas/ zad pa'i dus dang 'drar gnas pa/ /nan tan du ni bri bar bya/ /zhes pa'i bar gyis ni bcom ldan 'das rnam par snang mdzad mnyam pa nyid kyi ye shes kyi bar chad med pa'i lam rdzogs pa'i rang bzhin khams gsum rnam par rgyal ba bri ba'i bye brag gsungs pa ste/zad pa'i dus dang 'drar gnas zhes pa ni zad pa'i tshe nyi ma dang zla ba med pas de mun nag tu gyur te khro bo de'i kha dog mun pa dang 'dra ba nag por bri zhes pa'i don to/ /de ltar nang du bri ba ni//rgyas dang bcas par bshad pa yin/ /zhes pa ni snying po'i dkyil 'khor du sku mi zad pa la sogs pa'i rgyan rang bzhin gyi dkyil 'khor rnams sdud par byed pa ye shes lnga'i mtshan ma rnams 'khor dang bcas par bshad ces pa'o/ /da ni dkyil 'khor gnyis pa'i snam bu la sku mi zad pa'i rgyan sdud par byed pa sprul pa'i sku shAkya thub pa dang /dbang po dang gshin rje la sogs pa'i tshul du bstan pa rnams 'khor dang bcas par bri ba bshad par bya ste/ de nas sngags pa phyir byung nas/ /nges par gnyis pa'i cha dag la/ /shar gyi phyogs kyi nang du ni/ /cha ni gnyis su phye ba la//sgo khyud kyi ni nang rol du/ /sngags pas rgyal ba shAkya thub/ /gser gyi kha dog 'bar dang bcas/ /mtshan mchog sum cu rtsa gnyis ldan/ /mgon po na bza' ngur smrig mnabs/ /khyab bdag bstan pa'i don mdzad pa/ /pad+ma dkar po'i gdan la bzhugs/ / chos 'chad tshul du bzhugs par bri/ /zhes pa ni dkyil 'khor rim pa gnyis pa'i shar gyi ngos cha gnyis su bgos pa'i dbus su bab pa'i sgo khyud kyi nang du bcom ldan 'das shAkya thub pa bri ste/ shAkya thub pa zhes pa ni shAkya'i rigs las byung zhing lus dang ngag dang yid gsum thub pa'i ngang tshul can no//shar phyogs su bri ba ni bcom ldan 'das rnam par snang mdzad pas sngar byang chub kyi shing drung du mngon par byang chub par bstan pa'o/ /gser gyi kha dog ni rgyas pa'i mtshan ma ste bsod nams dang ye shes kyi tshogs rgyas pa'i rang bzhin gyi phyir ro/ /'bar dang bcas pa ni kun du sangs rgyas pas sgrib pa sreg pa'i rang bzhin gyi ye shes dang ldan pa'o//mtshan mchog sum cu rtsa gnyis ldan/ /zhes pa ni spyi gtsug ba ltar mi mngon pa la sogs pa skyes bu chen po'i mtshan gzhung las grags pa dag go/ /na bza' ngur smrig mnabs pa ni 'khor ba la ma chags pa dang snying rje'i dbang gis sems can la chags par bstan pa ste chos gos tshon can gyis ni snying rjes sems can la chags par bstan pa yin la/dmar po 'ba' zhig par mi gsal bar ngur smrig tu gyur pa ni 'khor ba la ma chags par bstan pa'o/ /khyab bdag bstan pa'i don mdzad pa/ /zhes pa ni 'khor rnams la slob cing ston pa'i don byed pa'o//pad+ma dkar po'i gdan ni bsod nams kyi tshogs yongs su dag pa'i mtshan ma ste snga ma bzhin no/ /chos 'chad tshul du bzhugs pa ni gzhung las grags pa'o/ /de yi g.yas su lha mo ni/ /sangs rgyas spyan zhes bya ba ste/ /lha mo cung zad 'dzum pa'i zhal//'od kyi dkyil 'khor 'dom gang ba/ /mtshungs med sku ni rab tu dngas/ /de ni shAkya thub pa'i yum/ /zhes pa ni sangs rgyas kyi yum gyi gzugs su gyur pa ni shAkya thub pa'i g.yas rol gyi byang phyogs logs su bri ste/ sangs rgyas shAkya thub pa shes rab de las byung ba'i phyir sangs rgyas kyi yum zhes bya'o//sangs rgyas spyan zhes pa ni gzigs pa'i rang bzhin yin pas shes rab la bya'o/ /cung zad 'dzum pa'i zhal zhes pa cung zad ni shes bya dang nyon mongs pa'i sgrib pa dag pa'o/ /cung zad 'dzum pa ni chos ston pa'i mtshan ma'o/ /'od kyi dkyil 'khor 'dom gang ba ni kun du sangs rgyas pa la shes bya dang nyon mongs pa sreg pa'i ye shes dang ldan pa'o//mtshungs med ni rnam pa med pa'i ye shes kyi rang bzhin yin pas tshad 'di tsam mo zhes gzung zhing gzhal du med pa'o/ /de yi g.yas su lha mo ni/ /rig sngags mdzod spu zhes grags pa/ / pad+ma'i steng na 'dug pa ste/ /dung zla kun da lta bu'i mdog /lag na yid bzhin nor bu thogs/ /re ba kun rdzogs byed pa bri/ /zhes pa ni sangs rgyas spyan gyi g.yas rol byang phyogs su mdzod spu zhes bya ba'i rig ma bri ba ste/ sangs rgyas kyi smin mtshams na skyes bu chen po'i mtshan thig le 'dra ba de ting nge 'dzin gyi gzugs su gyur pa'i lha mo ni mdzod spu zhes bya'o//de nas sngags pas g.yon rol du/ /shAkya seng ge skyob pa yi/ /zhes pa nas/ gnas ni lnga rnams nyid du ni/ /rab tu bsgrims te bri bar bya/ /zhes pa'i bar gyis ni bcom ldan 'das kyi g.yon rol lho phyogs su gtsug tor lnga bri ba ste/gtsug tor zhes pa ni bcom ldan 'das kyi gtsug tor nas byung brgyus 'bras bu la btags pa'o/ /'di rnams kyi phyag rgya la sogs pa ni gsang ba'i dkyil 'khor las zhib tu smos pas 'dir ma bshad do/ /de'i byang du song nas su /zhes pa nas/ /de dag thams cad legs par bri/ /zhes pa'i bar gyis ni gtsug tor lnga'i g.yon rol lho phyogs su gzugs khams kyi lha rnams la sku mi zad pa'i rgyan gyis khyab par mdzad pa'i sgor gyur pa gnas gtsang ma'i ris kyi lha rnams bri ba ste/ gzhung las byang phyogs su smos na ci'i phyir lho phyogs su bri zhe na/gtsug tor lnga'i byang phyogs na shAkya thub pa la sogs pa bzhugs pas bri ba'i skabs med de lho phyogs su bri bar mngon no/ /gnyis su na ut+ta ra ni byang dang g.yon la 'jug pa skad kyi gzhung dang yang mthun no/ /mdzod spu yi ni g.yas logs su/ / gtsug tor chen po cher 'byung ba/ /de bzhin gyen du 'byung nyid dang / /sgra dbyangs mtha' yas pa yang ste/ /gtsug tor gsum po kho na ni/ /bsgrims te yang dag bri bar bya/ /zhes pa ni mdzod spu'i g.yas rol byang phyogs su gtsug tor gsum rnams bri'o/ /dkar po ser skya ser por bya//zhes pa ni gtsug tor gsum po de dag nyid kyi kha dog ste/ ser skya ni yungs kar gyi kha dog lta bu'o/ /ser po ni gser gyi kha dog lta bu'o/ /mthu chen gtsug tor lnga po yi/ /gsum po las gzhan bya ba ni/ /dkar po dmar po ser po'o/ /zhes pa gtsug tor gsum po las gzhan pa gtsug tor lnga po sngar bshad pa rnams kha dog gsum du bya la/kha dog gsum yang dkar po dang dmar po dang ser po'o/ /gtsug tor lnga las gtsug tor gsum ni kha dog gsum dang sbyar la gtsug tor gnyis ni kha dog de dag nyid las dkar po dang dmar po gnyis dang sbyar ro/ /de dag smon lam stobs can te/zhes pa ni de dag kun kyang bcom ldan 'das shAkya thub pa'i smon lam gyi stobs kyis byung ba'o zhes pa'o/ /de nas sngags pas me logs su/ /me ni drang srong che rnams dang / /zhes pa nas/ bgrang phreng gun+d+he thogs par bri/ /zhes pa'i bar gyis ni shar lho'i mtshams su me'i drang srong 'khor me'i drang srong rnams dang bcas pa bri ba'i bye brag ste de rnams kyang sku mi zad pa'i rgyan nyid me'i drang srong la sogs pa gdul ba'i phyir me'i gzugs su gyur pa'o//de nas lho yi phyogs kyi char/ /gshin rje gtso bo'i lag pa na/ /dbyug pa thogs shing ma he zhon/ / kha dog dbyar gyi char sprin 'dra/ /ma mo rnams dang dus mtshan dang / /'chi bdag rnams kyis bskor ba bri/ /zhes pa ni sku mi zad pa'i rgyan de nyid gshin rje la sogs pa'i dul ba'i yi dwags kyi rgyal po gshin rje'i gzugs su gyur pa de de yang lho phyogs kyi sgo khyud kyi nang du bri'o/ /ma he zhon pa ni de'i theg pa ste 'jig rten pa'i theg pa yin pas na ma he ltar dkar po ma yin pa'o//dbyug pa thogs pa ni shes rab kyi mtshan ma ste dbyug pa zlum po bcad pa'i rang bzhin ma yin pa ni 'khor ba'i rgyud kyi las legs nyes kyi 'bras bu la sogs pa ston cing 'chad pas 'khor ba'i rgyud gcod pa ma yin pa'o//bden bral phyogs su bden bral ni/ /lag na ral gri thogs par bri/ /zhes pa ni lho nub kyi mtshams su srin po rnams gdul ba'i phyir sku mi zad pa'i rgyan de nyid srin po'i rgyal po bden bral gyi gzugs su gyur pa'o/ /de nas kyang ni blo ldan pa/ /myur du byang gi phyogs song ste/ / lha yi rgyal po ri rab la/ /'dug cing lha rnams kyis bskor ba/ /lag na rdo rje cod pan can/ /rgyan kun gyis ni brgyan par bri/ /zhes pa ni 'dod pa'i lha rnams gdul ba'i phyir sku mi zad pa'i rgyan de nyid lha rnams kyi rgyal po dbang po'i gzugs su gyur pa ste de yang byang phyogs kyi ngos sgo khyud kyi nang du bri'o//de yang ri rab kyi rtse mo la gnas shing 'khor lha rnams kyis bskor ba bri ste cod pan ni rgyal po'i tshul 'dzin pas so/ /rdo rje ni de'i ye shes kyi mtshan ma ste gnyis su na lag cha'o/ /de nas de yi shar du ni/ /chu lha lag na zhags thogs bri/ /zhes pa ni shar phyogs su chu'i dbang po bri ba ste zhags pa ni de nyid kyi lam gyi rang bzhin no//shar phyogs su bri ba ni pur ba zhes pa sngon gyi tshig ste bskal ba 'byung ba'i 'og tu chu'i dkyil 'khor gyis thog mar gzhi btsugs pa'i phyir ro/ /nyi ma shing rta'i steng 'dug bri/ /zhes pa ni chu'i rgyal po'i shar phyogs su nyi ma bri ste shing rta ni nyi ma'i bzhon pa'o//shar phyogs su bri ba ni sngon gyi tshig ste bskal pa 'byung ba'i 'og tu 'jig rten pa rnams kyi nang na nyi ma dang zla ba dang por byung ba'i phyir ro/ /de yi g.yas dang g.yon du ni/ /rgyal dang rnam par rgyal ba bri/ /zhes pa ni nyi ma'i chung ma gnyis so/ /de'i g.yas su tshangs pa ni//gdong bzhi pa la thor tshugs can/ /oM zhes bya ba lhur len pa/ /ngang pa pad+ma'i stan 'dug bri/ /zhes pa ni dbang po'i g.yas logs su nub kyi phyogs su tshangs pa bri ba ste/ gdong bzhi ba ni rig byed bzhi'i so so nas 'byung ba'o/ /ngang pa pad+ma'i stan 'dug bri/ /zhes pa ni tshangs pa'i bzhon pa ngang pa'i ste ngang pa'i steng du pad+mo gzhag pa la 'dug par bri'o//oM gyi sgra 'byin pa'i tshul dang phyag rgya ni gsang ba'i dkyil 'khor du bshad pa dang sbyar ro/ /de yi nub tu bri ba ni/ /sa yi lha dang dbyangs can dang / /khyab 'jug skem byed de bzhin rlung / /bde byed de bzhin zla ba ste//nub kyi phyogs su gnas nas ni/ /rab tu nan tan byas te bri/ /zhes pa ni nub phyogs kyi ngos su khyab 'jug la sogs pa'i lha de dag lho phyogs nas brtsams te rim pa ji lta ba bzhin du bri'o/ /nub phyogs su bri ba ni sgo nub tu btod pas sgo gar bri ba ste dbang po dang khyab 'jug la sogs pa'i lha de rnams 'jig rten las 'das pa'i lam du 'jug pa'i sgor gyur pa'i phyir ro//de rnams kyang sku mi zad pa'i rgyan de nyid de lha de dag 'dul ba'i phyir de dag nyid kyi gzugs su gyur pa'o/ /sku mi zad rgyan de dbang po la sogs pa de dag gi gzugs su gyur pa yang cha lugs de dag dang 'dra mod kyi de dag 'dul ba'i phyir mthu dang rdzu 'phrul la sogs pa de dag las lhag par shes par bya'o//de bzhin du gshin rje la sogs pa gzhan la yang sbyar ro/ /bris nas bsngags pas de nas ni/ /yid la 'khrul ba med pa ru/ /gsang sngags mgon po'i 'og logs su/ / khro chen gzhan gyis mi thub ces/ /bya ba nyid dang lha mo ni/ /gzhan gyis mi thub ma dang ni/ /sa bdag lag na bum pa thogs/ /gus par yang dag gnas par bri/ /zhes pa la khro bo gzhan gyis mi thub pa ni bcom ldan 'das shAkya thub pa'i bar tshad med pa'i lam gyi rang bzhin no/ /lha mo gzhan gyis mi thub ma ni bcom ldan 'das shAkya thub pa'i mthu brtan par 'gyur ba'o//sa'i lha mo lag na bum pa thogs pa ni bcom ldan 'das kyi dbang du gyur pa ste de dag kyang bcom ldan 'das shAkya thub pa'i spyan sngar 'og ma zad du bri'o/ /klu chen dga' bo bsnyen dga' dang / /shAkya seng ge skyob pa yi//sgo drung gnyis su mngon phyogs par/ /rab tu bsgrims te bri bar bya/ /zhes pa ni sgo'i pha rol tshu rol nas phan tshun gdong phyogs par bri ste chab sgo bar shes bar bya'o/ /gzhan yang shAkya thub pa yi/ /rgyud rnams kun las dkyil 'khor du/ /sngags dang phyag rgya gang bshad pa//de dag kyang ni mkhas pas bri/ /zhes pa ni bcom ldan 'das shAkya thub pa'i phyag rgya lhung bzed dang 'khar gsil la sogs pa rgyud las 'byung ba rnams ji ltar rig par bya'o zhes glod ni 'phags pa 'jam pa'i dbyangs la sogs pa byang chub sems dpa' chen po rnams chos nyan pa'i tshul du bzhugs par bri ba bshad de/de la chos nyan pa ni lung gi chos dang rtogs pa'i chos te/ lung gi chos zhal nas gsungs pa rnams so/ /rtogs pa'i chos ni sku mi zad pa'i rgyan gyi dkyil 'khor nang ma gnyis kyi nang na sku bzhi po 'khor dang bcas pa ste de bas na de dag rtogs par bya ba'i phyir byang chub sems dpa' de rnams kyis yongs su bskor zhing mdun du byas pa'i tshul du bri bar bstan te/byang chub sems dpa' de rnams kyang pha rol tu phyin pa las skyes pa sha stag tu shes par bya'o/ /sngags pa de nas phyir byung nas/ /cha gsum pa ni nges pa la/ rdo rje dam pa sbyin pa ni/ zhes pa nas/ 'od zer mtshan nyid bzang po yis/ /kun du 'khor bar sngags pas bri/ /zhes pa'i bar gyis ni shar phyogs kyi ngos kyi sgo khyud nang du 'phags pa 'jam pa'i dbyangs bri bar bya ste/ de yang sgra'i rjes su 'gro ba'i shes rab kyi rang bzhin gyis chos thams cad kyi spyi dang rang gi mtshan nyid blos brtags shing dpyad nas rtogs par byed pa'o//de bas na de ltar rtogs nas sgrib pa thams cad spong bar byed pa'i byang chub sems dpa' phyi nas lho phyogs su bri'o/ /de ltar sgrib pa spangs nas bzod pa dang dga' bar ldan pa'i rang bzhin sa'i snying po byang phyogs su bri'o//de ltar bzod pa dang dga' ba dang ldan pa thob nas chos thams cad stong pa nyid nam mkha' lta bur rtogs pa'i rang bzhin nam mkha'i snying po nub phyogs su bri'o/ /rnam par thar pa'i rim pa de lta bas na dang po nyid du shar phyogs su shes rab kyi rang bzhin 'phags pa 'jam dpal bri'o//rdo rje dam pa sbyin pa ni 'phags pa 'jam dpal la phyag na rdo rjes sngags kyi rgyud 'chad par dbang bskur te/ de ltar na rdo rjes dam pa sbyin pas rdo rje dam pa sbyin zhes pa'o/ /zur phud lnga dang ldan zhes pa ni ye shes lnga'i rang bzhin no/ /byis pa gzhon nu'i gzugs can ni gzhon nu'i sa la gnas pa ste chos kyi rgyal bo'i sras kyi gzugs su bzhugs pa'o//ut+pal sngon po rdo rje can/ /lag pa g.yon na thogs pa ste/ /zhes pa ni ye shes lnga'i mtshan ma'i rdo rje ut+pala'i steng du bzhag pa lag pa g.yon na thogs pa ste rdo rje ni mchog sbyin pa'o//ut+pal ni shes rab kyi ral gri'i mtshan ma'o/ /rab tu 'dzum pa'i bzhin du gnas/ /zhes pa ni shes rab kyis chos ston pa'i mtshan ma'o/ /'od zer mtshan nyid bzang po yis/ /zhes pa ni ser po dang dkar po la sogs pa dang ldan pa'i 'od 'phro ba ste nag po la sogs pa'i 'od med pa'o//de yi byang du gzhon nu ni/ /dra ba'i 'od can lag pa na/ /rin chen dra ba thogs pa ste/ /sna tshogs pa yi rgyan gyis brgyan/ /pad+ma dkar po'i stan la 'dug/ /rgyal ba'i sras la blta bar bri/ /zhes pa ni 'phags pa 'jam dpal gyi 'khor ba'i 'od ces bya ba de g.yas rol byang phyogs su bri ste/dra ba'i 'od ces pa ni 'od rnams rgyun mi 'chad par phan tshun du 'brel par gyur pas dra ba'i 'od ces bya'o/ /lag pa ni rin po che'i dra ba thogs pa ni phyag dra ba 'dra ba la rin po ches spras pa thogs pa'o/ /pad+ma dkar po'i stan la 'dug pa ni bla ma dang bye brag yod par bya ba'i phyir ro/ /rgyal ba'i sras la blta bar bri//zhes pa ni 'phags pa 'jam dpal nyid la blta bar bri'o/ /rdo rje dam pa sbyin pa yi/ /g.yon du pho nya mo lnga bri/ /skra can dang ni nye skra can/ /sna tshogs ma dang nor can ma/ /de bzhin 'gugs ma zhes bya ba/ /'di dag blo ldan pho nya mo'o/ /zhes pa ni 'phags pa 'jam dpal gyi 'khor mngag gzhug ma ming smos pa lnga po rnams g.yon rol du bri bar bya'o//de dag gi ni 'og zad du/ /phyag brnyan ma ni lnga rnams dang / /gzhon nu dra ba'i 'od can gyi/ /'khor gnyis po yang bri bar bya/ /zhes pa ni mngag gzhug ma de lnga'i g.yog ci bgyi ma lnga yang mngag gzhug ma rnams kyi 'og ma zad du bri bar bya la/dra ba'i 'od can gyi drung du yang de'i g.yog gnyis po bri bar bya'o/ /de rnams ni 'phags pa 'jam dpal gyi 'khor de kha dog dang phyag rgyal sogs pa ni gsang ba'i dkyil 'khor du blta bar bya'o/ /de nas sngags pas lho phyogs su/ / byang chub sems dpa' grags chen po/ /sgrib pa thams cad rnam sel gtso/ /yid bzhin nor bu thogs par bri/ /zhes pa ni lho phyogs kyi sgo khyud kyi nang du sgrib pa thams cad rnam par sel ba bri ste sgrib pa thams cad rnam par sel zhes pa ni shes bya dang nyon mongs pa'i sgrib pa thams cad spangs zhes pa'i don to//gnyis su na rgyu'i tshe 'dod pa la 'dun pa dang gnod sems la sogs pa'i sgrib pa lnga bsal te de rnams mi bskyod pa las byung bas na rgyus 'bras bul btags pa'o/ /de yi cha gnyis por nas ni/ /zhes pa nas/ de bzhin blo gros bsam yas te/ /mkhas pas brgyad po bri bar bya//zhes pa'i bar gyis ni gtso bo de'i 'khor brgyad po rnams g.yas su bzhi dang g.yon du bzhi rim pa bzhin du bri ste/ cha gnyis bor ba ni dpon g.yog gi mtshams kyi gral dpag pa'i phyir ro/ /byang chub sems dpa' de rnams kyi ming ni don dang rjes su mthun par shes par bya'o//byang gi phyogs su song nas ni/ /zhes pa nas/ de yi steng na 'dug par bri/ /zhes pa'i bar gyis ni byang chub sems dpa' sa'i snying po byang phyogs kyi ngos kyi sgo khyud kyi nang du bri ba ste/ bzod dang des pa phun sum tshogs/ / zhes pa la bzod pa rnam pa gsum dang ldan pa ste chos zab mo la bzod pa dang / sdug bsngal la bzod pa dang / pha rol gyi gnod pa byas pa la bzod pa'o/ /nges pa phun sum tshogs pa ni rang gi rnam par thar pa'i sgos rangs shing dga' ba'o/ /sa'i snying po zhes pa ni de ltar bzod pa dang ldan pas sa dang 'dra ba'i phyir ro//'bar ba ni sngar bshad pa bzhin no/ /de yi stan ni mkhas pa yis/ /'byung khungs kun dang ldan pa'i sa/ /rin chen kun gyis nyer brgyan pa/ /zhes pa ni byang chub sems dpa' de'i khyad par tes de yang dkar dmar la sogs pa'i kha dog dang ldan pa rin po ches spras shing brgyan par bri'o//de yi steng na rin chen bzhi'i/ /pad+ma yang dag gnas pa ni/ /yid du 'ong ba bsam bya ste/ /byang chub sems dpa' grags chen po/ /de yi steng na 'dug par bri/ /zhes pa ni sa'i steng du pad+mo rin po che bzhi'i rang bzhin bris te/ rin po che bzhi ni gong du byang chub sems dpa'i yon tan bzod pa rnam pa gsum dang /des pa de nyid rin po che'i mtshan mar gyur pas pad+mo de brgyan pa ste de'i steng du byang chub sems dpa' de bzhugs par bri'o/ /de yi 'khor ni yon tan gtso/ /mtha' yas shing ni grangs med de/ /zhes pa nas/ grags chen 'di dag bri bar bya/ /zhes pa'i bar gyis ni byang chub sems dpa' de'i 'khor yon tan mtha' yas pa dang ldan pa grangs med pa rnams yod de/ de dag las don dang rjes su mthun pa'i ming dang ldan pa'i byang chub sems dpa' kha cig ste 'di rnams rim pa bzhin du bri bar bya'o/ /de bzhin sngags pas nub phyogs su//dpa' bo nam mkha'i snying po ni/ /gzi brjid chen po gos dkar gyon/ /lag na ral gri thogs bsam ste/ /rgyal sras pad+ma'i stan steng na/ /legs par 'dug pa bri bar bya/ /zhes pa ni byang chub sems dpa' nam mkha'i snying po zhes pa ni byang chub sems dpa' de chos thams cad stong pa nyid kyi mtshan nyid nam mkha' lta bur gyur ba las byung bas na nam mkha'i snying po zhes bya'o//gos dkar gyon pa ni mdzem pa dang ngo tsha ba dang ldan pa'i mtshan ma ste sngar bshad pa lta bu'o/ /ral gri ni de'i rnam par thar pa'i shes rab kyi mtshan ma'o/ /bdag nyid chen po de 'khor du//zhes pa nas/ de dag rab tu bsgrims bri zhing / /zhes pa'i bar gyis ni nam mkha'i snying po'i 'khor byang chub sems dpa' don dang rjes su mthun pa'i ming can 'di rnams go rims bzhin du g.yas dang g.yon du bri bar bya'o/ /rtag tu dpa' bo 'di rnams dang / /lhan cig go rims bzhin du bsam//zhes pa ni bcom ldan 'das kyi sku mi zad pa'i rgyan de dag chos nyan pa'i byang chub sems dpa' chen po 'di rnams kyis yongs su bskor zhing mdun du byas pa dag rtag par lhan cig tu soms shig ces bya'o/ /byang chub sems dpa' de rnams kyi sku mdog dang phyag rgya la sogs pa 'dir gsal bar ma smos pa rnams gsang ba'i dkyil 'khor du blta bar bya'o//de nas gsang ba'i bdag po phyag na rdo rjes thams cad dang ldan pa'i 'khor rnams la bltas nas zhes pa nas/ de dag gis ni ngan 'gro'i rgyun/ /sdug bsngal kun 'byung rab tu bcad/ /zhes pa'i bar gyis ni phyag na rdo rjes gong du dkyil 'khor bshad pa dang lha rnams so sor dgod pa la sogs pa khong du chud nas de dag gi tshul dang yon tan la sogs pa rnams la sems shin tu dang bar 'gyur/dang ba de'i shugs kyis sngags kyi tshul dkon zhing mthu che bar bstan pa dang dkyil 'khor mthong pa mthu che bar bstan pa dang /sngags zlos pa yang mthu che bar bstan pa dang / sngags nyan zhing sems pa'i sgo nas dang ba mthu che bar bstan pa'i tshigs su bcad pa rnams smras pa ste de la sems dang pa rnam pa gsum ste pags par song ba dang / rus par song ba dang / rkang du song ba'o/ /de la pags par song ba ni ba spu langs pa la sogs pa'o//rus par song ba ni mchi ma 'byung ba la sogs pa'o/ /rkang du song ba ni tshig tu smra ba la sogs pa ste de bas na phyag na rdo rje sems shin tu dang ba rkang du song ba dang ldan pas tshig tu smras so/ /de nas gsang ba pa'i bdag po phyag na rdo rjes thams cad dang ldan pa'i 'khor rnams la bltas nas zhes pa ni 'khor de na byang chub sems dpa' chen po kun du bzang po la sogs pa yongs su dag pa sha stag bzhugs pas g.yengs ma g.yengs dang snod du gyur ma gyur brtag pa la ni mi bya'i/dad pa'i shugs nyid kyis 'khor de rnams la bltas pa'o//bcom ldan 'das rnam par snang mdzad la ring zhig tu mig mi 'dzums par bltas te zhes pa yang dad pa'i shugs kyis bcom ldan 'das la snying tshim tshim du ring du bltas pa'o/ /ched du gleng pa 'di ched du gleng zhing tshig tu smras pa zhes pa ni gzhan gyis ma bris par bdag nyid kyis sems dang ba'i shugs kyis tshig tu bton te smras pa'o//'jig rten du ni kun mkhyen rnams/ /u dum wA ra'i me tog bzhin/ /brgya lam na ni res 'ga' zhig /'byung 'gyur yang na mi 'byung ngo / /gsang sngags spyod pa'i tshul 'byung ba/ / de bas kyang ni dkon pa ste/ /zhes pa ni sngags kyi spyod pa shin tu dkon par bstan pa ste/ de bzhin gshegs pa 'jig rten du 'byung ba yang u dum wA ra'i me tog dang 'dra bar dkon la/ /brgya la de bzhin gshegs pa 'jig rten du byung na yang sngags kyi tshul gsungs pa ni sngags spyod pa'i snod du gyur pa'i gdul ba gzigs nas gzod sngags kyi tshul ston pas na brgya lam brgya lam na sngags spyod pa'i tshul 'byung bas na dkon no zhes pa ste/tshig de skad du smras pa yang phyag na rdo rje nyid de ltar thugs su chud nas sems dang ba'i shugs kyis smras pa dang ma 'ongs pa'i 'gro ba rnams la sngags kyi tshul de ltar dkon zhing mthu che bar bstan pa'i phyir ro//thams cad mkhyen pa 'jig rten du skye zhing 'byung ba'i dus nges pa ni bcom ldan 'das shAkya thub pa la sogs pa byang chub kyi shing drung du mngon par sangs rgyas te 'jig rten du byung nas kyang bskal pa dang lo grangs la sogs pa ji tsam lon pa dang 'phags pa byams pa 'jig rten du gdod 'byung pa yang dus 'di tsam na 'byung ngo zhes nges par bshad na/ci'i phyir brgya lam brgya lam na zhes pa nges par brjod ce na/ de bzhin gshegs pa 'jig rten du byung ba'i dus des kyang de bzhin gshegs pa 'jig rten du 'byung ba'i tshe sems can rnams skal ba dang mi ldan pas de bzhin gshegs pa mngon par 'byung ba ni brgya lam brgya lam na ste dus nges pa med do//de bas na de bzhin gshegs pa 'jig rten du mngon par 'tshang rgya ba 'ba' zhig la 'jig rten du 'byung zhes mi bya'i/sems can rnams kyi spyod yul du gyur cing mthong ba la yang bya bas na brgya lam na zhes smos so/ /bskal pa bye ba du ma ru/ /sdig pa bgyis par gyur pa gang / /de kun dkyil 'khor 'di 'dra ba/ /mthong bas 'byung bar 'gyur lags na/ /zhes pa ni dkyil 'khor mthong ba shin tu mthu che bar bstan pa ste de bzhin gshegs pa'i sku mi zad pa'i rgyan la sogs pa'i byin gyi rlabs kyis dkyil 'khor 'di mthong bas bskal pa du mar mi dge ba bcu la spyad pa'i sdig pa bsags pa de thams cad 'byang bar 'gyur zhes pa'o//de 'byang bar 'gyur pa yang dkyil 'khor mthong ba tsam 'ba' zhig gis 'byung bar 'gyur ba ni ma yin gyi/sbyor ba dang dngos gzhi dang rjes gsum dang ldan na 'byang bar 'gyur ba yin no/ /de la sbyor ba ni dkyil 'khor du 'jug pa'i phyir sdig pa bshags pa dang / gsum la skyabs su 'gro ba dang / dus gsum du sgrib pa med pa'i ye shes kyi sdom pa 'dzin pa'o//dngos gzhi ni dkyil 'khor du 'jug pa nyid kyi tshe na byang chub tu sems bskyed pa dang dkyil 'khor du zhugs pa na sangs rgyas dang byang chub sems dpa' la sogs pa'i sku gzugs dang phyag rgya la sogs pa dang / dkyil 'khor gyi rgyan dang lda ldi la sogs pa mthong nas sems dang ba skyes pa'o//rjes ni dkyil 'khor du zhugs pa'i 'og tu dam pa'i chos dang byang chub kyi sems yongs su mi gtong ba la sogs pa'i dam tshig mnos pa'o/ /rnam pa de dag dang ldan par dkyil 'khor mthong na bskal pa du mar bsags pa'i sdig yang 'byang bar 'gyur ba ni dper na lo du mar 'dug pa'i mun nag sgron ma lan cig byung bas med pa dang 'dra'o//grags pa mtha' yas sngags spyod pa'i/ /tshul la gnas na smos ci 'tshal/ /skyob pa'i gsang sngags bzlas na ni/ /go 'phang bla na med par 'gyur/ / zhes pa ni sngags zlos pa mthu che bar bstan pa ste/ dkyil 'khor mthong ba tsam gyis kyang bskal pa du mar bsags pa'i sdig pa 'byang bar 'gyur na sangs rgyas dang byang chub sems dpa'i sngags yon tan mtha' yas par grags pa ji skad du gsungs pa'i chog dang / ldan par bzlas shing goms par byas na bla na med pa'i gnas thob pa lta smos kyang ci dgos zhes pa'o/ /gang dag spyad pa mchog 'di la/ /blo gros shin tu mi g.yo ba/ /de dag gis ni ngan 'gro'i rgyun/ /sdug bsngal kun 'byung rab tu bcad/ /ces pa ni sngags spyod pa'i tshul nyan zhing sems dpa'i sgo nas dad pa mthu che bar bstan pa ste/sngags spyod pa'i tshul mchog 'di la nyan pa dang bsams pa 'di nyid yin gyi gzhan ma yin no snyam nas blo gzhan du mi g.yo bar mos na sdug bsngal can gyi ngan song du skye bar mi 'gyur ro zhes pa'o/ /sngags spyad pa dang sngags spyod pa'i tshul zhes pa dang mchog ces pa la sogs pa'i tshig rnams ni sngar lan mi nyung bar bshad zin pas na 'dir ma bshad do//tshigs su bcad pa 'di rnams kyang phyag na rdo rje nyid kyis don 'di lta bur thugs su chud pas sems dang ba'i shugs kyis smras la/ zhar la ma 'ongs pa'i sems can rnams spro ba bskyed pa'i phyir smras so//de'i tshe thams cad dang ldan pa'i 'khor de dag dang rdo rje 'dzin de dag gis mgrin gcig tu mthun par tshig smras pa zhes pa nas/ sngags spyad 'bras bu la gnas pa/ /bdag cag thams cad dpang du 'gyur/ /zhes pa'i bar gyis phyag na rdo rjes bcom ldan 'das la tshigs su bcad pa 'di skad gsol pa dang byang chub sems dpa' kun du bzang po la sogs pa'i 'khor de rnams dang rdo rje 'dzin pa de rnams kyis phyag ni rdo rje'i dgongs pa 'di ltar rig ste/dkyil 'khor bshad pa'i skabs su bab pa la dkyil 'khor gyi thig bre pa dang lha rnams so sor dgod pa la sogs pa ni bshad zin na tshon byin gyis rlob pa'i ting nge 'dzin dang tshon so so la sangs rgyas kyi sku bsam zhing byin gyis rlob ba dang /tshon gang yin pa dang / tshon 'gyes pa'i thabs dang / tshon gang sngon du gtang ba dang / rta babs dang sgo khyud kyi tshad la sogs pa ma bshad pas de dag bri ba'i phyir phyag na rdo rjes tshigs su bcad pa 'di dag smra'o snyam du rig nas tshig 'di skad smras pa'o//de'i tshe thams cad dang ldan pa'i 'khor de dag dang rdo rje 'dzin de dag gis mgrin gcig tu mthun par tshig smas pa zhes pa ni pha rol tu phyi na pa la spyod pa las byung ba'i byang chub sems dpa' kun du bzang po dang 'jam dpal la sogs pa dang sngags kyi spyod pa las byung ba'i byang chub sems dpa' rdo rje 'dzin pa de dag dgongs pa mthun pas tshig dang don mthun par smras pa'o//legs so legs zhes pa ni phyag na rdo rje don de lta bur sems shing bcom ldan 'das la 'dri bas phyag na rdo rje de nyid legs so zhes pa'o//legs zhes pa gnyis pa ni dri bar bya ba'i don bzang bas legs zhes pa'o/ /gsang sngags spyod pa'i dbang gyur pa/ /dpa' bo chen po legs so legs/ /zhes pa ni phyag na rdo rje'i yon tan brjod pa'o/ /khyod kyis yid la gang bsams pa//mnyam med thams cad mkhyen la zhus/ /zhes pa ni bri bar bya ba'i dngos po ste legs so legs zhes pa dang sbyar ro/ /tshig tu ma smras na phyag na rdo rje'i yid la bsams pa de byang chub sems dpa' de dag gis ji ltar rig ce na/ /kun du bzang po la sogs pa'i byang chub sems dpa' rnams ni mthu chen po sha stag pas pha rol gyi sems rig pa dang 'dra bar phyag na rdo rjes ci bsams pa rnams shes so//gnyis su na de lta bur dri ba'i skabs yin pas phyag na rdo rjes tshigs su bcad pa la gzhan glengs kyang bri bar bya ba'i dngos po 'di dag yin par shes so/ / de ltar phyag na rdo rje'i dgongs pa shes pas na bdag cag thams cad de dpang du gyur pa zhes pa ste/ dpang du gyur pa'i don ni khyod kyis ci bsams pa de nged kyis shes te nged kyang de bzhin du sems so zhes pa'o/ /sngags spyad 'bras bu la gnas pa/ /zhes pa ni byang chub sems dpa' de dag nyin btsan par bstan pa ste nged kyang ngan don ma yin gyi sngags spyad pa'i 'bras bu thob pa dag go zhes pa'o//sngags rgyud rtogs par shes pa yi/ /byang chub sems dpa' gzhan rnams dang / /zhes pa ni byang chub sems dpa' de rnams 'ba' zhig ma yin gyi/ pha rol tu phyin pa las byung ba'i byang chub sems dpa' gzhan rnams kyis kyang de bzhin du mkhyen to//de nas bcom ldan 'das la phyag na rdo rjes 'di skad ces gsol to/ /zhes pa nas/ gsang sngags mtshan nyid ci 'dra lags/ /ting nge 'dzin du bzhed pa gang / /zhes pa'i bar gyis ni gong du zhu bar bsams pa'i dngos po rnams zhus pa ste tshon byin gyis brlab pa la sogs pa 'dir zhus kyang bshad pa'i nang du ma byung ba rnams ni gsang ba'i dkyil 'khor gyi skabs su blta bar bya'o//de skad gsol nas bcom ldan 'das/ /chos kun dbang phyug thub pa yis/ / rdo rje 'dzin la 'di skad gsungs/ /zhes pa nas/ de bas rnam pa thams cad du/ /stong nyid rtag tu dran par bya'o/ /zhes pa'i bar ni phyag na rdo rjes zhus pa rnams kyis na bcom ldan 'das kyis bka' stsal pa ste/ sems can khams ni zhen byed cing / /'di ni chos dbyings ro yin par//sangs rgyas rnams kyis sngon gsungs te/ /de phyir 'di ni tshon zhes bya/ /zhes pa ni/ ci slad 'dir ni tshon zhes bgyi/ /zhes zhus pa'i lan te/ sems can khams ni zhen byed cing / /zhes pa ni tshon zhes bya ba'i tshig gi don te tshon ni zhen par byed pa'i rang bzhin yin la/de bzhin du 'dir yang sangs rgyas dang byang chub sems dpa' rnams kyi kha dog dang cha lugs dang dkyil 'khor gyi ri mor snang bas sems can rnams dad pa skyes te/ mgu zhing zhen par byed pas na tshon zhes bya'o/ /'di ni chos dbyings ro yin par/ /zhes pa ni tshon 'di rnams la chos kyi dbyings dang ldan pa'i sangs rgyas kyi sku'i rang bzhin yi ge rnams kyi byin gyis brlabs pas tshon 'dis chos kyi dbyings mtshon par 'gyur te ro gcig pas na chos kyi dbyings kyi ro zhes bya'o//de ltar yi ge rnams kyi byin gyis brlab pa yang yi ge 'khor lo bskor ba'i dkyil 'khor gyi skabs su blta bar bya'o//tshon ni nang nas dgye bar bya/ /phyi rol nas ni tshon mi dgye/ /zhes pa ni/ tshon ni ji ltar dgye bar bgyi/ /zhes zhus pa'i lan te sngags pa dkyil 'khor gyi nang du zhugs nas nang du bsnur zhing tshon rnams dgye'o zhes pa'o/ /dkar po thog mar gtang bar bya//de yi 'og tu dmar po ste/ /de nas ser po gtang bar bya/ /de yi 'og tu ljang gu gtang / /kun gyi nang rol nag po ste/ /tshon gyi cho ga de ltar bshad/ /ces pa ni/ gang zhig thog mar gtang bar bgyi/ /zhes bya ba dang / tshon zhes bgyi ba de gang lags/ /zhes dang por zhus pa'i lan gnyis ka cig car du bka' stsal pa ste/tshon rnams de ltar dgye ba'i dgongs pa yang 'di lta ste tshon dkar po ni chos kyi dbyings kyi rang bzhin no/ /de ltar chos kyi dbyings su gyur pa'i 'og tu thabs kyi sgo sems can gyi don byed pa'i snying rjes sems can la zhen pa'i rang bzhin dmar po gtang ngo //de'i 'og tu sems can gyi don de nyid rgyas par 'gyur te rgyas pa'i mtshan nyid ser po gtang ngo / /de ltar rgyas pa'i 'og tu thams cad byed nus par 'gyur te/ de bas na de'i 'og tu tshon ljang gu kha dog thams cad pa gtang ngo / /de ltar las thams cad nus na gdug pa dang ma rungs pa rnams 'dul ba mngon spyod kyi mtshan nyid kha dog nag po btang ste thams cad kyi nang rol du btang ba ni gsang ba'i phyir ro//gzhan yang de bzhin gshegs pa'i skur byin gyis brlab pa la sogs pa'i rim pa yi ge 'khor lo bskor ba'i dkyil 'khor du blta bar bya'o//rta babs rnams kyi tshad kyang ni/ /zhes pa nas/ 'jigs med dag gis rim gyis ni/ /bskyed de de las lhag shes bya/ /zhes pa'i bar ni/ rta babs rnams dang de bzhin du/ /sgo khyud rnams kyi tshad dang ni/ /sgo yi tshad kyang ci 'drar bgyi/ /mgon po yis ni bshad du gsol//zhes zhus pa'i lan te/ /rta babs rnams kyi tshad kyang ni/ /dkyil 'khor dbu ma dang mnyam mo/ /zhes pa ni rta babs kyi zhing gi tshang ni snying po'i dkyil 'khor gyi ngos dang mnyam par bya zhes pa'o/ /sgo khyud dag kyang de dang mnyam/ /pad+mo sor bcu drug tu bshad/ /ces pa ni sgo khyud kyang rta babs kyi tshad de dang mnyam par bya'o//dang po'i sgo ni snying po yi/ /dkyil 'khor dang ni mnyam zhes bya/ /'jigs med dag gis rim gyis ni/ /bskyed de de las lhag shes bya/ /zhes pa ni nang gi dkyil 'khor gyi sgo ni snying po'i pad+ma sor bcu drug pa dang mnyam par bya la/de'i phyi ma de las sor bzhi bskyed de/ de'i yang phyi ma sor bzhis bskyed de de ltar rim pa rim pas che bar bya zhes pa'o/ /sgo rnams kyi ni bar bar du/ /sgo srung rnams ni gzhag par bya/ /zhes pa ni dkyil 'khor gyi sgo'i phan tshun gyi 'gram du 'og nas smos pa'i sgo srung rnams bzhag ste/shAkya thub pa'i sgo srung ni sngar gsal bar gsungs zin pas 'og nas 'byung ba la mi bsnyag la/ bcom ldan 'das rnam par snang mdzad kyi sgo srung yang gdul dka' dang mngon phyogs zhes pa gnyis gsal bar gsungs pas 'og nas 'byung ba rnams las 'dir ming gis smos pa med pa gnyis re gzhag par bya'o//ting nge 'dzin ni mdor na sems/ /yang dag mgu ba yin par bshad/ /ces pa ni/ ting nge 'dzin du bzhed pa gang / /zhes zhus pa'i lan te/ de la ting nge 'dzin zhes bya ba ni sems rtse gcig pa'i mtshan nyid de de yang kun rdzob dang don dam pa la rtse gcig pa'o/ / kun rdzob la rtse gcig pa ni chu dang dbang chen gyi dkyil 'khor la sogs pa la sems rtse gcig par gnas pa'o/ /don dam pa ni gzung ba dang 'dzin pa spangs pa stong pa'i rang bzhin la sems rtse gcig pa ste gnyis po gang yang rung ba la sems rtse gcig tu gyur pas sems gud du mi 'gyur bar zhen cing tshim par byed pa ni sems mgu ba zhes bya ste de ni ting nge 'dzin spyi'i mtshan nyid do//sems dpa' chen po khyad par ni/ /yid gcig bsdus la mnyan par gyis/ /zhes pa nas/ de bas rnam pa thams cad du/ /stong nyid rtag tu dran par bya'o/ /zhes pa'i bar gyis ni don dam pa'i ting nge 'dzin gyi khyad par bshad pa yin te de sangs rgyas kyi ting nge 'dzin dang kun du sangs rgyas pa'i ting nge 'dzin no//de la sangs rgyas kyi ting nge 'dzin ni/ sangs rgyas kun gyi ting 'dzin ni/ /stong pa nyid ces rgyal bas gsungs/ /zhes pa ste de la stong pa nyid ces pa ni phung po dang khams dang skye mched la sogs pa'i chos gdod ma nas ma skyes ma byung ba'i tshul gyis bshig gam/rdul phra mo la sogs pa'i tshul gyis bshig na yod pa ma yin la/ de rnams kyi rnam par snang ba yang yod pa ma yin te/ de ltar gzung ba dang 'dzin pa'i mtshan nyid med par rtogs pa ni stong pa nyid do//de ltar chos rnams rang rang gi mtshan nyid stong pa nyid kyi rang bzhin du rtogs te stong pa'i rang bzhin de las sems gzhan du mi 'gyur zhing de nyid la rtse gcig par gyur pa ni sa bcu rdzogs pa'i byang chub sems dpa' rnams kyis ting nge 'dzin de thob ste de'i tshe sangs rgyas zhes bya'o/ /de ltar gzung ba dang 'dzin pa'i cha yongs su spangs pa'i stong pa nyid ni sa rab tu dga' ba'i tshe na yang ma thob pa ni ma yin mod kyi/sa rab tu dga' ba nas sa brgyad pa'i bar du log pa'i gnyen po yongs sum spangs pas lhun gyis grub pa nyid du mi 'jug pa'i phyir de dag la mi bya la/ sa brgyad pa yan chad log pa'i gnyen po rnams spangs te lhun gyis grub par 'jug pas na sa brgyad pa dang /sa dgu pa dang / sa bcu pa rnams dang 'brel lo/ /sa bcu yongs su rdzogs pa'i tshe ting nge 'dzin 'di rab tu thob par 'gyur te/ ting nge 'dzin de rab tu thob pa yang gzhan gyis thob pa ma yin gyi rang gi sems yongs su shes pa las thob pa yin no//de bas na/ de'i sems yongs su shes pa las/ /thob par 'gyur gyi gzhan las min/ /zhes gsungs pa yin no/ /de la sems yongs su shes pa yang gsang ba pa'i bdag po sems ni de bzhin gshegs pa dgra bcom pa yang dag par rdzogs pa'i sangs rgyas rnams kyis ma gzigs gzigs par mi 'gyur te sngon por ma yin/ser por ma yin zhes pa nas rnam pa thams cad kyi bar du yongs su btsal kyang mi dmigs pa yin te zhes pa'i bar sngar byang chub kyi sems bshad pa'i skabs su bshad zin to/ /de gnyis yongs su spangs pa ni//rdzogs sangs rgyas kyi yin par 'dod/ /stong pa chen po zhes bya ste/ /kun mkhyen ye shes rdzogs byed pa'o/ /zhes pa ni kun du sangs rgyas pa'i ting nge 'dzin te/ de gnyis yongs su spangs pa zhes pa ni gzung ba dang 'dzin pa spangs pa dang stong pa'i rang bzhin du 'du shes pa gnyis po spangs pa ste sa bcu gcig pa kun du bzang bo'i sa la gnas pa'i tshe chos thams cad stong pa'i rang bzhin no snyam nas stong par 'du shes pa de yang spangs te stong pa'i rang bzhin du yang yod pa ma yin no snyam pa'i 'du shes tsam la gnas so//de bas na stong par 'du shes pa yang spangs pas stong pa chen po zhes bya'o//kun mkhyen ye shes rdzogs byed pa'o/ /zhes pa ni kun du sangs rgyas pa'i de ma thag tu 'du shes tsam yang spangs pa'i mtshan nyid thams cad mkhyen pa'i ye shes thob par 'gyur te/ kun du sangs rgyas pa de thams cad mkhyen pa'i ye shes la sbyor bar byed pas na//kun mkhyen ye shes rdzogs byed pa'o/ /zhes so/ /de bas rnam pa thams cad du/ /stong nyid rtag tu dran par bya'o/ /zhes pa ni de ltar stong pa nyid kyi ting nge 'dzin des thams cad mkhyen pa rdzogs par byed pas na yan lag bzhi'i bzlas brjod dang bdag gi lhar sbyor ba dang /dbang chen dang chu'i dkyil 'khor gyi ting nge 'dzin la sogs pa thams cad la 'di lta bu'i stong pa nyid rtag tu goms par bya'o zhes pa'o/ /da ni byang chub sems dpa' dang nyan thos dang rang sangs rgyas rnams kyi so so'i ting nge 'dzin rnams bstan pa'i phyir/ bcom ldan 'das ting nge 'dzin la snyoms par zhugs pa dang /ting nge 'dzin de las bzhengs nas byang chub sems dpa'i la sogs pa'i ting nge 'dzin de rnams bstan pa'i skabs bshad de/ de nas bcom ldan 'das rnam par snang mdzad sangs rgyas thams cad thabs cig yang dag par mol nas shes pa nas/sems can rnams la snying brtse'i phyir/ /ngas ni thams cad rab tu bshad/ /ces pa'i bar gyis byang chub sems dpa'i ting nge 'dzin kun du sangs rgyas pa'i mtshan nyid dpa' bo chen po'i ting nge 'dzin la gnas nas bdud bzhi bcom pa'i rang bzhin 'chad de/sangs rgyas thams cad dang thabs cig yang dag par mol nas shes pa ni sangs rgyas thams cad dgongs pa mthun pas bya ba gcig tu bstan pa ste bsod nams dang ye shes kyi tshogs dang chos kyi sku dang sems can gyi don byed par mnyam pa nyid kyi phyir ro/ /sangs rgyas thams cad dang rgyud gcig pa'i stobs kyi shugs zhes bya ba'i ting nge 'dzin la snyoms par zhugs so zhes pa ni/ting nge 'dzin de'i ming ste sangs rgyas thams cad dang rgyud gcig pa zhes pa ni sems can gyi don du spyod pa sna tshogs 'byung yang sangs rgyas thams cad rgyud gcig pa las 'byung zhing chos kyi skur ro gcig pa las 'byung ba yin te/dper na mar me mang po 'od 'dres par gyur na gcig ste dbyer med pa dang 'dra'o/ /stobs zhes pa ni thogs pa med pa'i mthu'o/ shugs zhes pa ni mthu ste sems can gyi don la myur ba'o/ /byang chub snying por 'dug nas su/ /bdud ni rnam pa bzhi bcom pas/zhes pa nas/ sems can rnams la snying brtse'i phyir/ /ngas ni thams cad rab tu bshad/ /ces pa'i bar gyis kun du sangs rgyas pa'i ting nge 'dzin gong du bshad de/ nyid dpa' bo chen po'i ting nge 'dzin la gnas nas stong pa nyid kyi ting nge 'dzin des bdud bzhi bcom par bstan pa ste de la/bdud ni rnam pa bzhi bcom pas/ /zhes pa ni phung po'i bdud dang / nyon mongs pa'i bdud dang / 'chi bdag gi bdud dang / lha'i bu'i bdud rnams bcom pa ste de yang kun rdzob dang don dam pa gnyis su rig par bya'o/ /de la kun rdzob tu bdud bzhi bcom pa ni byang chub chen por lha'i bu'i bdud dang nyon mongs pa'i bdud gnyis ka bcom la/phung po'i bdud dang 'chi bdag gi bdud gnyis ni de'i zhar la bcom pa ste theg pa chung ngu'i lugs las grags pa'o/ /skabs 'dir chos thams cad ma byung ma skyes par rtogs nas bdud rnam pa bzhi char yang dmigs su med pa'i tshul gyis bcom ste/skye ba med par nges rtogs pa/ /zhes pa la sogs pa'i tshigs su bcad pa dang sbyar ro/ /de nas dpa' bo chen po zhes/ /zhes pa nas/ dpa' po zhes su grags/ zhes pa'i bar gyis de ltar bdud rnam pa bzhi bcom nas tshangs pa la sogs pa'i 'jig rten pa'i lha rnams bcom ldan 'das la khyod ni dpa' po chen po 'jigs pa dang bral ba'o zhes dga' bzhin du tshig tu 'don pas nang ni dpa' po chen po yin no zhes bcom ldan 'das kyis gsungs pa'o//skye ba med par ngas rtogs pa/ /zhes pa ni de ltar bdud rnam pa bzhi bcom pa de dmigs pa dang bcas pas bcom pa ma yin gyi chos thams cad ma skyes ma byung bar ngas thugs su chud nas dmigs su med pa'i tshul gyis bcom mo zhes 'brel to//skye ba med par ngas rtogs pa/ /zhes pa ni dngos su na chos thams cad gdod ma nas ma skyes par rtogs pas phung po yang dmigs su med pa'i phyir phung po'i bdud bcom pa'o//tshig gi sbyor yul rnam spangs shing / /zhes pa ni rnam par rtog pa dang bral zhes pa ste rtog pa'i spyod yul las 'das pas dngos su lha'i bu'i bdud bcom pa'o/ /nyes pa thams cad med pa ste/ /zhes pa ni nyon mongs pa las rnam par grol bas na dngos su nyon mongs pa'i bdud bcom pa'o//rgyu dang rkyen dang bral ba yin/ /zhes pa ni rgyu dang rkyen med pas nam skyes pa ste ma skyes pas na 'chi ba med de dngos su 'chi bdag gi bdud bcom pa'o/ /stong pa'i ye shes mkha' 'dra ba/ /zhes pa ni de ltar rnam pa bzhi char las grol bas na rnam pa med pa'i ye shes rang bzhin kyis 'od gsal ba stong pa'i mtshan nyid nam mkha' dang 'dra bar ma skyes pa shes pa'o//ji ltar byung ba nga la byung / /zhes pa ni/ ji ltar gyur pa nga la byung / /zhes bton te stong pa nyid kyi ye shes de ltar bur phyin ci ma log pa nyid du ngas thob ces pa'o//shin tu dri med ces pa ni ye shes de shes bya dang nyon mongs pa'i sgrib pa yongs su spangs pa shes pa'o/ /de kho na zhes pa ni phyin ci ma log par yongs su grub pa'i mtshan nyid yin pas rigs pa dang lung gis sun dbyung bar mi nus pas na stong pa nyid kyi ye shes la de kho na zhes bya'o//kun mkhyen tsam gyi tshul du gnas/ /kun mkhyen sangs rgyas mtshan nyid do/ /zhes pa ni kun du sangs rgyas pa zhes bya ba de stong pa'i rang bzhin du 'du shes pa yang spangs nas stong pa nyid kyi rang bzhin du yang yod pa ma yin par shes pa de tsam la gnas zhes pa'o/ /nga yi de nyid dam pa 'di//'jig rten snang bar byed pa ste/ /byin gyi rlabs kyi stobs kyis ni/ /yig 'bru rnams su bstan nas su/ /sems can rnams la snying brtse'i phyir/ /ngas ni thams cad rab tu bshad/ /ces pa ni de ltar ngas thams cad gdod ma nas ma skyes ma byung bar rtogs kyang sems can rnams la snying brtse ba'i phyir yang dag pa nyid kyi chos de tshig tu brjod pa'i phyir yi ge'i 'bru rnams su byin gyis brlabs te/yi ge'i 'bru rnams kyang dpa' po chen po'i ting nge 'dzin gyi skabs su blta bar bya'o/ /'di rnams kyi rim pa yang bsdus pa'i don gyi nang du bshad pas shin tu ma bshad do//de nas dpal ldan rdo rje 'dzin/ /ngo mtshar gyur nas mig gdangs te/ /thams cad mkhyen la mgo po yis/ /phyag 'tshal nas ni tshig 'di smras/ /zhes pa ni gong du sangs rgyas dang kun du sangs rgyas pa'i ting nge 'dzin stong pa nyid spros pa med pa'i chos sangs rgyas rnams kyis thugs su chud nas yig 'bru la sogs pa'i sgo nas spros pa dang bcas pa'i chos rnams bstan zhing bshad pa de ngo mtshar che bar gyur pa yin no//de bas na/ sangs rgyas kun gyi thabs dang ni/ /shes rab bsam yas ngo mtshar che/ /zhes pa nas/ 'jig rten gyi ni mchod gnas 'gyur/ /zhes pa'i bar du gsungs pa yin te/ /de la sangs rgyas kun gyi ngo mtshar che zhes sbyar te sangs rgyas dang kun du sangs rgyas dang yang dag par rdzogs pa'i sangs rgyas kun kyang spros pa med pa'i chos thugs su chud nas spros pa dang bcas pa'i chos 'chad pa ni ngo mtshar che'o//thabs dang shes rab bsam yas zhes pa la shes rab ni chos thams cad stong pa nyid du rtogs pa dang thabs ni stong pa nyid kyi chos de yi ge'i 'bru la sogs par bstan nas grub pa rab 'bring tha ma la sogs pa dang zhi ba la sogs pa'i las rnams byed pa'i sgo nas sems can rnams 'dzud par byed pa de ni thabs dang shes rab bsam gyis mi khyab pa'o//spros pa kun dang bral ba yi/ /chos rtogs nas ni rab byung rnams/ /zhes pa ni de ltar sangs rgyas rnams kyis spros pa med pa'i chos thugs su chud nas sangs rgyas pa ste rtogs pa'i don to/ /de ltar/ spros pa med pa'i don rtogs nas//'jig rten gyi ni re ba kun/ /yongs su rdzogs par byed pa ston/ /pa ni ngo mtshar che'o zhes sbyar ro/ /rang byung rnams zhes pa ni sa brgyad pa yan chad kyi byang chub sems dpa' rnams te gzhan gyis mi dkri ba'i phyir rang byung zhes bya'o/ /sngags kyi mtshan nyid de lta bu/ / zhes pa ni spros pa med pa'i chos rtogs nas spros pa dang bcas pa'i chos 'chad pa de lta bu ni sngags kyi mtshan nyid de/ sngags kyi mtshan nyid 'di yang kun rdzob dang don dam pa'i bden pa gnyi ga la legs par gnas pa ste/ don dam pa'i bden pa ni stong pa nyid kyi rang bzhin dang kun rdzob kyi bden pa ni grub pa mchog la sogs pa dang zhi ba la sogs pa'i las rnams byed pa'o//sems can kun gyis shes nas ni/ /'jig rten gyi ni mchod gnas 'gyur/ /zhes pa ni grub pa la sogs par ma gyur kyang sngags kyi tshul de lta bu sems can rnams kyis thos pa dang bsam pa'i sgo nas shes pa tsam gyis kyang 'jig rten pa rnams kyi mchod pa'i gnas su 'gyur ro zhes pa'o//gsang ba pa'i bdag po gzhan yang byang chub sems dpa' skye ba gcig gis thogs par zhes pa nas/ dgos pa'i sa la gnas de rnams/ /sangs rgyas sa la gnas pa yin//zhes pa'i bar gyis ni sa bcu yongs su rdzogs pa'i byang chub sems dpa' sangs rgyas kyi sa la gnas pa de rnams ma skyes shing ma byung ba stong pa nyid kyi rang bzhin du rtogs nas sems can gyi don du thabs kyi 'khor los 'bras bu yod pa'i sa la gnas pa'i ting nge 'dzin bshad pa ste/skye ba gcig gis thogs pa zhes pa ni sa bcu pa'i byang chub sems dpa' rnams de bzhin gshegs pa'i sa la skye ba gcig gis thogs pa ste chos kyi rgyal tshab bo/ /gnyis su na sa bcu pa'i byang chub sems dpa' rnams sa bcu pa nyid du ris mthun par gyur pas nas bcu pa rnams rigs gcig pa zhes pa'o//dgos pa dang ni bral ba ru/ /'jig rten mtshan nyid shes nas ni/ /dgos pa'i sa la gnas de rnams/ /sangs rgyas sa la gnas pa yin/ /zhes pa ni 'jig rten rnams ni gang gi yang 'bras bu ma yin la/ rgyu gang las kyang ma byung bas gdod ma nas skye ba med par rtogs kyang 'bras bu'i sa la gnas te sems can gyi don du sbyor zhing sangs rgyas kyi zhing rnam pa sna tshogs kyis brgyan pa la sogs pa mdzad pas na sangs rgyas kyi sa la gnas pa'i byang chub sems dpa' de rnams 'bras bu'i sa la gnas pa ste/de ni byang chub sems dpa' sa bcu pa sangs rgyas kyi sa la gnas pa rnams kyi ting nge 'dzin gyi tshul lo/ /gsang ba pa'i bdag po gzhan yang byang chub sems dpa' sa brgyad pa'i zhes pa nas/ 'jig rten sgyu ma ltar shes nas/ /'jig rten 'jig rten dbang du 'dod//ces pa'i bar gyis ni sa brgyad pa'i byang chub sems dpa' rnams kyi ting nge 'dzin bshad pa ste de la/ chos rnams thams cad ma dmigs shing / /zhes pa ni chos thams cad rang bzhin gyis dngos po med cing dmigs su med par rtogs pa'o/ /chos rnams dngos po med pa ste sngon du yod pa las zhig cing med par gyur te dngos po med pa'am/'on te gdod ma nas ma byung ma skyes pas dngos po med pa yin zhe na de'i phyir/ srid dang skye ba rnam spangs pa'i/ /zhes bya ba gsungs te gdod ma nas ma skyes pas slar 'byung bar yang mi 'gyur te gdod ma nas ma byung ma skyas pas dngos po med par shes pa yin no//'jig rten sgyu ma ltar shes nas/ /zhes pa ni chos rnams de ltar dngos po med par rtogs pas 'jig rten gyi chos rnams kun rdzob tu snang bar 'gyur pa yang dngos po med pa las snang pa ste ji ltar sgyu ma dngos po med pa las snang ba ltar shes so zhes pa'o/ / 'jig rten 'jig rten dbang du 'dod/ /ces pa ni de ltar chos thams cad sgyu ma lta bur shes pas byang chub sems dpa' de 'jig rten pa'i nang na gtso bo dam par 'gyur pa zhes pa'o/ /gsang ba pa'i bdag po gzhan yang nyan thos zhes pa nas shin tu dngos po med pa'i ye shes mi spyod de 'di ni nyan thos rnams kyi ting nge 'dzin gyi tshul la zhes pa'i bar gyis ni 'phags pa nyan thos rnams kyi ting nge 'dzin bshad pa ste/'phags pa nyan thos rnams ni phung po la sogs pa'i chos rnams rgyu dang 'bras bu'i ngo bo skye ba dang 'jig par lta ste dmigs pa dang bcas pa rnams so/ /de ltar skye pa dang 'jig pa yod pas rtag pa dang chad pa'i mtha' gnyis bshig ste/skye pa yong par mthong pas ni chad pa'i mtha' bshig la 'jig pa yod par mthong pas rtag pa'i mtha' bshig go/ /de ltar skye pa dang 'jig pa yod par mthong pas chos rnams shin tu dngos po med par mthong pa'i ye shes mi skye ste shin tu dngos po med na ye shes skye ba'i rgyu mi dmigs pa'i phyir ro//gsang ba pa'i bdag po/ rang sangs rgyas zhes pa nas 'di ni rang sangs rgyas rnams kyi ting nge 'dzin gyi tshul lo zhes pa'i bar gyis ni 'phags pa rang sangs rgyas rnams kyi ting nge 'dzin gyi tshul bshad pa ste/ rgyu dang 'bras bu rnam par bshig nas zhes pa ni rgyu dang 'bras bu sun 'byin pa'i tshul gyis rnam par bshig ces pa ste chos rnams kyi rgyu dang rkyen rnams kyi ngo bo skad cig ma'i cha mi rtag pa gnas pa ni khab kyi rten la yungs kar gyi 'bras bu mi chags pa dang 'dra ste brtag mi bzod pas rgyu dang 'bras bu dngos po med par rtogs so//brjod du med pa'i chos kyi tshul la gnas pa rnams ni chos thams cad brjod du med do snyam pa'i ye shes 'jug ste zhes pa ni de ltar chos rnams yod pa ma yin pas tshig gi brjod du med par mthong ba'i ye shes skyes nas tshig tu brjod pa yang 'gog par byed de de bas na chod thams cad brjod du med do snyam pa'i ye shes 'jug ste ngag shin tu 'gog pa'i ting nge 'dzin la yang dag par reg par byed ces gsungs pa yin no//mdor na 'phags pa rang sangs rgyas rnams rgyu dang 'bras bu'i dngos po bshig nas rang bzhin med par mthong bas chos la bdag med par rtogs kyang ngag dgag pa tsam la gnas pas byang chub sems dpa' ltar rnam pa med pa'i ye shes kyi snang ba la mi gnas la/nyan thos ltar gang zag la bdag med par rtogs pa tsam yang ma yin no/ /gsang ba pa'i bdag po gzhan yang 'jig rten pa rnams rgyu las 'bras bu dang las 'byung ba'am/ ldog par rtogs shing gzhan gyi dbang gis stong pa nyid kyi ting nge 'dzin kun du skye par 'gyur te 'di ni 'jig rten pa rnams kyi ting nge 'dzin gyi tshul lo zhes pa ni 'jig rten pa rnams kyi ting nge 'dzin gyi tshul te 'jig rten pa rnams ni las dang 'bras bu la sogs pa rgyu las skyes kyang nged kyi bdag ces bya ba dbang po dang tshangs pa la sogs pas bskyed par rtogs la/chos rnams dngos po med de stong pa nyid du mthong ba de yang rang bzhin gyis stong pa ma yin gyi dbang po la sogs pas stong par byas so snyam nas stong pa nyid kyi ting nge 'dzin la gnas par byed do/ /gsang ba pa'i bdag po 'di ni ting nge 'dzin gyi tshul yin te zhes pa nas//'jig rten pa yi lha gang yin/ /gsang sngags spyad pa'i cho ga'i tshul/ /sems can rnams la phan 'dogs pas/ /dpa' po de tshe 'chad par byed/ /ces pa'i bar gyis ni sngar bshad pa rnams bsdus nas bshad pa yin te de dag gis so so'i ting nge 'dzin stong pa nyid kyi tshul du rtogs pa'i stong pa de la gnas te stong pa'i chos de nyid tshig dang yig 'bru la sogs pa sa sems can rnams kyi don du ston cing 'chad do zhes pa'o//de nas yang bcom ldan 'das kyis gsang ba pa'i bdag po phyag na rdo rje la bka' stsal pa/ gsang ba pa'i bdag po sngags rnams kyi gsang sngags kyi mtshan nyid nyon cig ces pa nas/rang sangs rgyas kyi 'ang de bzhin te/ khyad par dag ni bshad bya na/ /ting nge 'dzin gyi khyad par las/ /las tshe rnam par sbyong zhes bya/ /zhes pa'i bar gyis de bzhin gshegs pa dang / kun du sangs rgyas pa dang / sangs rgyas dang byang chub sems dpa' dang /nyan thos dang rang sangs rgyas rnams kyi so so'i sngags kyi mtshan nyid bshad pa ste/ sngags kyi mtshan nyid de yang rnam pa gsum du rig par bya ste/ sngags kyi lha dang / sngags kyi don dang / sngags kyi rang bzhin no/ /de la sngags kyi lha ni snying rje chen po 'byung ba'i dkyil 'khor du bshad zin te/de yang de bzhin gshegs pa dang kun du sangs rgyas pa dang sangs rgyas dang byang chub sems dpa' dang nyan thos dang rang sangs rgyas la sogs pa rnams nyid de/ snying rje chen po'i dkyil 'khor du rigs gsum bkod pa rnams ni de bzhin gshegs pa'o//dkyil 'khor bar ma na shAkya thub pa 'khor dang bcas pa bzhugs pa ni kun du sangs rgyas so/ /dkyil 'khor tha man 'phags pa 'jam dpal la sogs pa sa bcu yongs su rdzogs pa'i byang chub sems dpa' gtso bo dag bzhugs pa rnams ni sangs rgyas rnams so//de las gzhan pa'i byang chub sems dpa' phyag na rin chen la sogs pa ni byang chub sems dpa'o/ /nyan thos dang rang sangs rgyas dngos su ma smos kyang sprul pa'i skus gdul ba'i nang du bdog pas na dkyil 'khor bar ma'i nang du 'dus par rig par bya'o/ /'jig rten pa rnams kyang dkyil 'khor bar ma de nyid kyi nang na dngos su 'khod pa'o//sngags kyi don ni kun du sangs rgyas pa nas 'jig rten pa'i lha rnams kyi bar gyi ting nge 'dzin sngar bshad pa dag go/ /de yang kun rdzob dang don dam pa gnyis su shes par bya'o/ /don dam pa ni rnam par thar pa'i sgo stong pa'i rang bzhin no//kun rdzob ni/ dgos pa'i sa la gnas de rnams/ /zhes pa la sogs pa sems can gyi don du chos 'chad pa dang / bcom ldan 'das kyi yon tan stobs dang mi 'jigs pa la sogs pa'i chos rnams so/ /sngags kyi rang bzhin rnam pa bzhir shes par bya ste tshig dang 'bru dang dbyangs dang yul gyi skad rnams so//de la tshig ni yi ge'i 'bru mang po 'dus pa las tshig tu longs par smra ba'o/ /'bru ni yi ge ka la sogs pa sngags kyi yi ge 'bru re re'o/ /dbyangs ni a dang i la sogs pa gug skyed kyi rigs su gtogs pa'o//yul gyi skad ni yul so so na skad gang gis spyod pa de nyid dang mthun par gsungs pa'o/ /sngags rnams kyi gsang sngags kyi mtshan nyid nyon cig ces pa ni sngar/ gsang sngags mtshan nyid ji 'dra lags/ /zhes bcom ldan 'das la gsol ba deng ngas bshad kyis nyon cig pa ste sngags rnams kyi mtshan nyid ces smos pa ni sngags rnams kyi mtshan nyid sngags kyi lha dang sngags kyi don gong du bshad pas na da 'dir sngags rnams kyi mtshan nyid gsang bar smra ba'i rang bzhin gyi tshig rnams nyon cig ces pa'o//rdzogs sangs rgyas kyi gsang sngags ni/ /tshig dang ming dang brda yis mtshan//zhes pa dzi na dzika ces pa la sogs pa'i tshig smos pas 'di ni sangs rgyas kyi ming gi mtshan ma ste sangs rgyas kyi sngags su byed par shes pa'o/ /tshig de dbang du gyur pas na/ /gsang sngags don rnams thams cad sgrub/ /ces pa ni kun du sangs rgyas pa'i sngags kyi tshig smos pa yang dbang chen gyi ting nge 'dzin gyi mtshan ma ste rgyas pa'i don thams cad 'grub par 'gyur zhes pa'o//kha cig skul ba tshig dang ldan/ /kha cig rang ming thog mar smos/ /zhes pa ni sngags kyi tshig las sngags kyi lha yi mthu dang yon tan rnams smos pa dang /shIn+taM ku ru zhes pa la sogs pa'i las rnams la bskul ba smos pa dang dzi na dzika ces pa la sogs pa lha'i mtshan smos pas lha gang gi sngags yin par rig par 'gyur ba'o/ /hUM phaT ces pa la sogs pa dang ldan pa'i tshig rnams ni gong du gtsug tor brgyad smos pa la sogs pa'i sngags su shes par bya ste/gtsug tor gyi sngags rnams gzhung gzhan las hUM dang phaT med pa yang 'byung / gtsug tor ma yin pa'i lha rnams kyi sngags hUM dang phaT du bcas pa yang 'byung bas na hUM dang phaT du bcas pa'i gtsug tor gyi sngags 'di rnams ni rgyud 'di nyid du smos pa'i gtsug tor gyi sngags su shes par bya'o//zung zo choms shig ces pa dang / /snun sod drol cig ces pa ni/ /phyag brnyan rnams dang khro bo yi/ /gsang sngags yin par 'dren pas gsungs/ /zhes pa ni tshig de lta bu drag shul can dang ldan pa'i sngags ni khro bo rnams dang ci bgyi rnams kyi sngags su shes par bya'o//na maHswA hA la sogs ldan/ /zhes pa nas/ byang chub sems dpa' skyob pa'i yin/ /zhes pa'i bar ni sa bcu pa la gnas pa'i byang chub sems dpa' sangs rgyas zhes bya ba dang / de las gzhan pa'i byang chub sems dpa' rnams kyi sngags te mgo na phyag 'tshal ba dang ldan zhing tshig gi mjug na swA hA dang bcas pa dang /byang chub sems dpa' so so'i ting nge 'dzin gyi rang bzhin gyi tshig rnams smos pa dang / zung shig chom sa shig la sogs pa'i tshig drag shul can rnams med cing zhi ba'i tshig rnam par dag pa'i mtshan nyid kyi tshig dang ldan pa'i sngags ni sangs rgyas byang chub sems dpa' rnams kyi yin par shes par bya'o//nyan thos rnams kyi gsang sngags ni/ /gcig pu gzhi ni gcig la gnas/ /zhes pa ni 'phags pa nyan thos kyi gsang sngags rnams ni spyi po spyi gtsug la sogs pa yan lag gi sngags rnams med pas na gcig pa'o//byang chub sems dpa' ltar gzugs sna tshogs su mi 'gyur gyi/ dge slong gi tshul gcig pu 'dzin pa'am/ gang zag la bdag med pa gcig pu rtogs pas na gcig la gnas zhes pa'o/ /rang sangs rgyas kyi'ang de bzhin te/ /khyad par dag ni bshad bya na//ting nge 'dzin gyi khyad par las/ /las tshe rnam par sbyong zhes bya/ /zhes pa ni rang sangs rgyas kyi sngags rnams kyang mtshan nyid gzhan ni nyan thos dang mthun la/ spyad par ni rgyu dang 'bras bu bshig nas chos rnams stong par rtogs pa'i ting nge 'dzin dang ldan par shes par bya'o//de la 'dir kun du sangs rgyas pa la sogs pa'i gsang sngags kyi mtshan nyid ni bshad na/ de bzhin gshegs pa'i gsang sngags kyi mtshan nyid ci'i phyir dngos su ma smos she na/ kun du sangs rgyas pa'i sngags de nyid de bzhin gshegs pa yin te ci'i phyir zhe na/kun du sangs rgyas pa la sogs pa de rnams pha rol tu phyin pa spyod pa las 'byung ba yin na yang de bzhin gshegs pa'i rgyu yin pas de bzhin gshegs pa dang tha mi dad la/ 'on te ye shes kyi sems can yin na yang de nyid de bzhin gshegs pa'i 'bras bu yin pas tha mi dad pa'i phyir de dag de bzhin gshegs pa'i sngags so//don dam par byang chub sems dpa' yang de bzhin gshegs pa'i sngags kyi yi ge 'bru re re pa rnams kyis ting nge 'dzin gyi sgo stong pa nyid kyi rang bzhin du ston par gcig pas na tha mi dad do/ /yang na 'og nas bshad pa'i yi ge a rnam pa bzhi po rnams de bzhin gshegs pa'i sngags so//gsang ba pa'i bdag po gzhan yang gsang sngags rnams kyi mtshan nyid ni sangs rgyas thams cad kyis ma byas byed du ma bcug/ /rjes su yi rang ba ma yin no zhes pa nas gsang sngags kyi tshul 'chad do zhes pa'i bar gyis ni gsang sngags rnams kyi rang bzhin bshad pa ste/tshig dang ming dang brdas mtshan pa'i mtshan nyid kyi gsang sngags bskur ba la sogs pa dang ldan pa'i tshig gis don gang bskul ba de grub par byed pa'i mthu'i rang bzhin rnams mthu 'dis don 'di 'grub par bya'o zhes de bzhin gshegs pas sngags kyi rang bzhin de byas sam/de bzhin du gzhan la byed du bcug gam/ gzhan byed pa la rjes su yi rang na yang de bzhin gshegs pa nyid mtshan ma dang bral bas byas pa'am byed du bcug pa'am/ rjes su yi rang ba ma yin no/ /ci'i phyir zhe na/ sngags kyi rang bzhin de bzhin gshegs pas mdzad par gyur na ni de bzhin gshegs pa ni sems can thams cad kyi don mdzad pas na sgrub par brtsams pa thams cad kyis nges par 'grub par 'gyur te/de ltar sgrub po thams cad kyis 'grub pa ma yin pas de bzhin gshegs pas mdzad pa ma yin no/ /de ste sngags kyi mthu'i don dang mthu gnyis rtag tu phan tshun 'grel pa yin tshig brjod pa tsam gyis don de nyid 'grub par 'gyur te/dper na me zhes tshig tu brjod pa na me'i rang bzhin sred par byed pa yin yang tshig tu brjod pas kha tshig par mi 'gyur ba dang 'dra'o/ /de bas na sngags kyi mthu ni de bzhin gshegs pas mdzad pa yang ma yin/gzhan byed du bcug pa'am/ gzhan byed pa la rjes su yi rang ba ma yin zhes pa'o/ /de ci'i phyir zhe na/ 'di ni chos rnams kyi chos nyid de/ 'di ltar de bzhin gshegs pa rnams kyang byung yang rung ma byung yang rung chos nyid de ni ye nas gnas pa ste/ de yang 'di ltar gsang sngags rnams kyi gsang sngags kyi chos nyid do zhes pa ni/ming dang tshig dang brdas mtshan pa'i sngags de bskul ba la sogs pa'i tshig dang don du ldan na gang bskul ba'i don de nyid sus kyang byas pa ma yin te/ rgyu gzhan la mi ltos par chos de de ltar ye nas gnas pa yin te/ dper na bu ram gyi ro mngar ba dang lan tshwa'i ro bro ba'i rang bzhin rnams rgyu gang gis kyang 'dus ma byas par mngar ba'i rang bzhin du ye nas gnas pa yin no//de ltar de bzhin gshegs pas byas pa yin na de bzhin gshegs pa byung ba na sngags kyi rang bzhin de yang yod la/ ma byung na ni med par 'gyur te de ltar yang ma yin pas na de bzhin gshegs pa rnams byung yang rung ma byung yang rung chos rnams kyi chos nyid de ni ye nas gnas pa ste/de yang 'di ltar gsang sngags rnams kyi gsang sngags kyi chos nyid do zhes pa'o/ /gsang ba pa'i bdag po de la gang gi tshe yang dag par rdzogs pa'i sangs rgyas thams cad gzigs pa 'jig rten du 'byung ba de'i tshe zhes pa nas/dbyangs sna tshogs su go ba rnams su byin gyis brlabs te de ltar gsang sngags kyi tshul 'chad do zhes pa'i bar gyis ni/ gsang sngags kyi chos nyid ye nas de ltar gnas pa la/ tshig dang yig 'bru dang dbyangs rnams su ji ltar rigs par rnam par dgod pa tsam zhig de bzhin gshegs pas mdzad par bstan pa ste/yang dag par rdzogs pa'i sangs rgyas zhes pa ni mnyam pa nyid kyi ye shes kyis phyin ci ma log pa nyid du mngon par byang chub pa'o/ /thams cad mkhyen pa'i zhes pa ni so sor rtog pa'i ye shes kyis kun rdzob dang don dam pa'i tshul du thams cad mkhyen pa'o//thams cad gzigs pa zhes pa ni me long lta bu'i ye shes dang bya ba sgrub pa'i ye shes kyi yul du gzigs pa'o/ /de lta bu'i thams cad mkhyen pa nyid 'jig rten du byung ba na tshul sna tshogs dang zhes pa ni sangs rgyas dang byang chub sems dpa' dang nyan thos dang rang sangs rgyas dang 'jig rten pa la sogs pa'i tshul rnam pa mang po dang rjes su mthun par gsang sngags kyi chos nyid ye nas gnas pa de yig 'bru rnams su 'chad pa ni tshig dang yig 'bru rnams dang dbyangs rnam pa sna tshogs su ston pa'o//gnyis su na de bzhin gshegs pa'i rigs dang pad+ma'i rigs dang / rdo rje'i rigs la sogs pa'i tshul sna tshogs pa'o/ /dgongs pa sna tshogs shes pa ni sngags kyi tshig de rnams kyang la la ni sgra ji bzhin par 'chad/ la la ni ldem po dag tu ston pa zhes pa'o/ /sems can bsam pa sna tshogs pa rnams la zhes pa ni sems can la la zhi bar 'dod/la la rgyas par 'dod/ la la grub pa mchog 'dod/ la la 'bring 'dod pa la sogs pa'i sems can rnams kyi ji ltar 'dod pa dang rjes su mthun par ston pa'o/ /tshig sna tshogs dang yig 'bru sna tshogs dang yul gyi nges pa'i tshig tu brjod pa sna tshogs shes pa ni gsang sngags kyi chos nyid de dzin dzika la sogs pa'i tshig rnam pa du ma dang /dri ma med pa la sogs pa'i skad du smra ba rnam pa du ma'i mtshan mar bkod de ston zhes pa'o/ dbyangs sna tshogs su go ba rnams su byin gyis brlabs te zhes pa ni a i la sogs pa'i gug skyed kyi tshul rnam pa du ma'am/sa 'dzin la sogs pa'i dbyangs sna tshogs su ston zhes pa'o/ /ji ltar na de bzhin gshegs pa rnams gsang sngags kyi tshul yig 'bru dag tu byin gyis rlob ce na zhes pa nas skal pa ji lta ba bzhin du gsang sngags kyi cho ga yang dag par ston to zhes pa'i bar gyis ni gsang sngags kyi chos nyid yig 'bru la sogs par byin gyis brlabs te ston pa yang de bzhin gshegs pa'i yon tan stobs dang mi 'jigs pa la sogs pa de dag sngags kyi yig 'brur byin gyis brlabs nas ston par bshad de/tshig dang yig 'bru rnams su byin gyis rlob pa yang kun rdzob dang don dam pa gnyis su rig par bya ste/ de la kun rdzob tu ston pa ni stobs dang mi 'jigs pa la sogs pa rnams tshig dang yig 'bru la sogs par byin gyis brlabs te ston pa'o/ /don dam par ston pa ni chos thams cad gdod ma nas ma skyes ma byung ba stong pa nyid kyi rang bzhin yi ge la sogs pa'i 'brur ston pa ste/de bas na bskal pa bye ba khrag khrig brgya stong du mar yang dag par bsgrubs pa'i bden pa'i tshig gang yin pa dang 'phags pa'i bden pa bzhi dang zhes bya ba la sogs pa gsungs pa yin no/ / bskal pa bye pa khrag khrig brgya stong du ma zhes pa ni mang po'i mtshon byed de 'phags pa'i bden pa la sogs pa thams cad la sbyar bar bya'o/ /de bzhin gshegs pas bskal pa du mar bden pa'i tshig bsags pa de sngags kyi yig 'bru byin gyis brlabs pas na su bsgrub par 'dod pa des bden pa'i tshig rjes su bsrung bar shes par bya ste/brdzun du smra bas sngags rnams mi 'grub po/ /zhes rgyud gzhan las kyang 'byung ngo / /'phags pa'i bden pa bzhi dang / dran pa nye bar gzhag pa bzhi dang / rdzu 'phrul gyi rkang pa bzhi dang / de bzhin gshegs pa'i stobs bcu dang /pha rol tu phyin pa drug dang / byang chub kyi yan lag rin po che bdun dang tshangs pa'i gnas pa bzhi dang / sangs rgyas kyi chos ma 'dres pa bco brgyad gang dag yin pa rnams ni gzhung gzhan las grags pa nyid do/ /gsang ba pa'i bdag po mdor na de bzhin gshegs pa rnams kyi thams cad mkhyen pa'i ye shes gang yin pa de thams cad de bzhin gshegs pa rnams nyid kyi bsod nams dang ye shes kyi stobs dang sngon gyi smon lam mkhyen pa'i stobs dang chos kyi dbyings kyi byin rlabs kyi stobs kyi byin gyis brlabs nas sems can rnams la skal ba ji lta ba bzhin du gsang sngags kyi cho ga yang dag par ston to zhes pa ni de bzhin gshegs pa'i yon tan gyi mthu rnams kyi byin gyis brlabs nas yig 'bru rnams su ston pa ste/nyid kyi bsod nams dang ye shes stobs zhes pa ni bsod nams kyi stobs ni sbyin pa dang tshul khrims dang bzod pa'i pha rol tu phyin pa spyod pa'o//ye shes kyi stobs ni shes rab dang bsam gtan gyi pha rol tu phyin pa spyod pa ste/ stobs ni de dag gi mthu thogs pa med pa'o/ /sngon gyi smon lam mkhyen pa'i stobs dang zhes pa sngon gyi smon lam gyi shugs kyis gsang sngags rnams kyi rang bzhin ji lta ba ji bzhin du rtogs pa'o//chos kyi dbyings kyi byin gyis brlabs zhes pa ni chos kyi dbyings la gnas nas zhes pa ste chos kyi dbyings la gnas pa'i mthu des sems can rnams kyi bsam pa ji lta ba bzhin du gsang sngags kyi chos nyid yi ge'i 'bru la sogs par ston to zhes pa'o/ /skal ba ji lta ba bzhin du zhes pa ni ji ltar snod du 'gyur ba'i sems can rnams la'o//gsang sngags kyi cho ga de yang gang zhe na/ gzod ma nas ma skyes pa'i phyir a ni chos thams cad kyi sgo'o zhes pa nas gsang ba pa'i bdag po/ nga dang nya dang Na dang na ni ting nge 'dzin thams cad la dbang bsgyur ba ste/ mthu thams cad dang ldan pa rab tu myur bar dgos pa'i don thams cad rab tu sgrub par byed pa yin no zhes pa'i bar gyis/gsang sngags rnams kyi mtshan nyid ni/ /tshig dang ming dang brda yis mtshan/ /zhes bshad pa de dag nyid yi ge'i 'bru dang tshig rnams su bcom ldan 'das kyis bshad pa de rnams ting nge 'dzin gyi sgor gyur pa 'chad de/tshig dang yi ge 'bru re re las ting nge 'dzin gyi sgor gyur pa de yang don rnam pa gnyis ston te kun rdzob dang don dam pa'o/ /de la kun rdzob tu ston pa ni yig 'bru dang tshig rnams las sangs rgyas bcom ldan 'das kyi yon tan stobs dang mi 'jigs pa la sogs pa ston pa'o/ /don dam pa ston pa ni yi ge de nyid kyi sgo nas chos thams cad gzod ma nas ma skyes pa stong pa nyid du ston pa ste/de bas na yig 'bru dang tshig gi sgo nas kun rdzob dang don dam pa'i don bstan pa'i phyir bcom ldan 'das kyis gsang sngags kyi mtshan nyid phyag rgyal sogs pa'i sgo nas tshig dang ming dang brda yis mtshan par bstan te yig 'bru dang tshig rnams su byin gyis brlabs te bstan to//de bas na nga 'dir yi ge a la sogs pa'i yig 'bru rnams kyi sgo nas chos thams cad stong pa nyid rang bzhin du bstan par bshad de de yang yi ge ka la sogs pa sum cu rtsa gnyis po rnams stong pa nyid kyi ting nge 'dzin gyi sgor gyur pa ste/de rnams las kyang kha cig ni chos thams cad stong pa nyid du ston/ kha cig ni phyogs gcig stong pa nyid du ston/ kha cig ni stong par 'jug pa'i sgo nas stong pa nyid kyi ting nge 'dzin gyi sgor gyur pa ji ltar rigs par blta'o/ /de la yi ge a la sogs pa gang yang rung ba zhig gis thams cad stong pa nyid du ston pa las lhag par yi ge gzhan rnams kyis stong pa nyid du ston pa med de/gang yi ge a la sogs pas bstan pa de nyid yi ge gzhan rnams kyis kyang ston pas stong pa nyid du ston par gcig ste/ yi ge a'i sgo nas chos thams cad stong pa nyid du rtogs na yi ge gzhan ci dgos she na/ stong par ston pa ni yi ge gcig gis kyang chog mod kyi/yig 'bru dang tshig rnams las sngags su bstan te sngags de'i sgo nas chos thams cad stong pa nyid du ston par dgongs pa'i phyir yi ge thams cad smos so/ /de bas na sngags thams cad kyi rang bzhin ni byang chub kyi sems so zhes rgyud gzhan las gsungs so/ /gzod ma nas ma skyes pa'i phyir a ni chos thams cad kyi sgo'o zhes pa ni chos thams cad gzod ma nas ma skyes pas stong pa nyid du rtogs pa ni de bzhin gshegs pa ste/de bas na yi ge a de stong pa nyid rtogs pa'i ting nge 'dzin gyi sgor gyur par byin gyis brlabs shing gzhag pa'o/ /de bas na yi ge a'i sgo nas chos thams cad gzod ma nas ma skyes shing ma byung bar bstan to//dgos pa dang bral ba'i phyir ka ni chos thams cad kyi sgo'o zhes pa ni rgya gar skad du dgos pa la kar ya zhes bya la/ yi ge ka de chos thams cad stong pa'i ting nge 'dzin gyi sgor gyur pas yi ge ka'i sgo nas chos thams cad dgos pa med par shes zhes bya'o//dgos pa zhes pa ni 'bras bu ste/ /skyed par byed pa ma yin na/ /rgyu nyid 'thad par mi 'gyur ro/ /rgyu nyid 'thad pa yod min na/ /'bras bu gang gi yin par 'gyur/ /zhes 'byung bas 'bras bu rgyus ma skyes pas med kyi/ rgyu de 'bras bu skyes pa'i rang bzhin du yod mod ce na/ rgyu nyid 'bras bu las gyur pa ste de bas na chos thams cad ma byung ma skyes pa'i don du rig par bya'o//nam mkha' dang 'dra bar dmigs su med pa'i phyir kha ni chos thams cad kyi sgo'o zhes pa ni nam mkha' dang 'dra ba la rgya gar skad du kha sa ma zhes bya ste/ yi ge kha de chos thams cad stong par ston pa'i ting nge 'dzin gyi sgor zhugs te thams cad nam mkha' lta bu'i rang bzhin yin pas yod pa ma yin pa'o//'gro ba thams cad dmigs su med pa'i phyir ga ni chos thams cad kyi sgo'o zhes pa ni ga ti zhes pa 'gro ba la yang bya/ rgyud la yang bya/ rtogs pa la yang bya ste yi ge ga ni chos thams cad stong pa nyid du ston pa'i ting nge 'dzin gyi sgo ste gyur pa yin pas 'gro bar drang na ni/shar dang nub la sogs par 'gro bar bya ba dang 'gro bar byed pa dmigs su med pa'o/ /rgyud du drang na ni mi dang lha la sogs pa'i rgyud drug dmigs su med pa'o/ /rtogs par drang na ni chos thams cad gzod ma nas ma skyes par rtogs par bya ba'i dngos po dang rtogs par byed pa la dmigs su med pa'o//gcig tu 'phungs pa dmigs su med pa'i phyir g+ha ni chos thams cad kyi sgo'o zhes pa ni gcig tu 'phungs pa la rgya gar skad du b+ha ga zhes bya la/ /yi ge b+ha ni chos thams cad stong pa nyid du ston pa'i ting nge 'dzin gyi sgo ste rdul phra mo rnams gcig 'phungs pa'i dngos po dmigs su med ces pa'o//'chi 'pho thams cad dang bral ba'i phyir tsa ni chos thams cad kyi sgo'o zhes pa ni 'chi 'pho la rgya gar skad du ts+yu ti zhes bya ste/ yi ge tsa ni chos thams cad stong par ston pa'i ting nge 'dzin gyi sgo yin pas chos thams cad ma skyes pa'i phyir 'chi 'pho yang dmigs su med ces pa'o//grib ma dang mtshungs pa'i phyir tsha ni chos thams cad kyi sgo'o zhes pa ni grib ma la tsha ya zhes bya ste/ tsha de chos thams cad stong par ston pa'i ting nge 'dzin gyi sgo ste de la grib ma de lus las gzhan yin na ni lus med kyang grib ma 'byung bar rigs la/ lus las gzhan ma yin na grib ma logs shig tu 'byung ba yang mi rigs pa las de lta bu 'byung bas na yang dag pa ma yin te 'khrul pa'am sgyu ma lta bu'o//'khrul pa 'am sgyu ma ni dngos po yod pa ma yin te chos thams cad kyang grib ma de dang 'dra bas stong pa nyid do zhes pa'o/ /skye ba dmigs su med pa'i phyir dza ni chos thams cad kyi sgo'o zhes pa ni skye ba la dzA ti zhes bya ste skye bar bya ba'am skye bzhin pa'i dngos po med pas skye ba dmigs su med pa'o zhes pa'o//mi dmigs su med pa'i phyir dz+ha ni chos thams cad kyi sgo'o zhes pa ni dri ma la dz+ha ma ra zhes bya ste dri mar gyur pa'i chos rnams dmigs su med pa'o/ /nga rgyal dmigs su med pa'i phyir Ta ni chos thams cad kyi sgo'o zhes pa ni nga rgyal la Da kA rA zhes bya ste/chos thams cad stong pa nyid pas nga rgyal gyi dngos po med ces pa'o/ /bskyed pa dmigs su med pa'i phyir ni chos thams cad kyi sgo'o zhes pa ni bskyed pa la bi TA pa na zhes bya ste/ chos thams cad stong pa nyid pas bskyed pa'i dngos po dmigs su med pa'o//'khrug pa dmigs su med pa'i phyir Da ni chos thams cad kyi sgo'o zhes pa ni 'khrug pa la Da ma ra zhes bya ste/ 'khrug par bya ba'i dngos po rnams med pas 'khrug par byed pa'i dngos po yang dmigs su med pa'o zhes pa'o/ /slu ba dmigs su med pa'i phyir D+ha ni chos thams cad kyi sgo'o zhes pa ni slu ba la D+haM ga zhes bya ste chos rnams stong pa nyid yin pas slu ba'i dngos po med pa'o//de bzhin nyid dmigs su med pa'i phyir ta ni chos thams cad kyi sgo'o zhes pa ni de bzhin nyid la ta tha tA zhes bya ste de bzhin nyid dang yang dag pa'i mtha' dang / stong pa nyid ces pa ni gcig gi rnam grangs te de bzhin nyid kyi rang bzhin du dmigs su med pa'o//gnas dmigs su med pa'i phyir tha ni chos thams cad kyi sgo'o zhes pa ni gnas la s+thA na zhes bya ste snod kyi 'jig rten gyi rang bzhin gyi gnas sam chos rnams skad cig pa'i mtshan nyid yin pas mi gnas pa'i phyir gnas dmigs su med ces pa'o//'dul ba dmigs su med pa'i phyir da ni chos thams cad kyi sgo'o zhes pa ni 'dul ba la dman zhes bya ba ste 'dul ba'i dngos po'am gdul bar bya ba dmigs su med ces pa'o/ /khams dmigs su med pa'i phyir d+ha ni chos thams cad kyi sgo'o zhes pa ni khams la d+hA tu zhes bya ste/ 'dod pa'i khams dang gzugs kyi khams dang gzugs med pa'i khams la sogs pa dmigs su med ces pa'o//don dam pa'i bden pa dmigs su med pa'i phyir ba ni chos thams cad kyi sgo'o zhes pa ni don dam pa la par mAr+tha zhes bya ste/ yi ge pa ni de don dam pa'i rang bzhin du yang dmigs su med par bstan pa'o//dbu ba dang 'dra bar snying po med pa'i phyir pha ni chos thams cad kyi sgo'o zhes pa ni dbu ba la phe Na zhes bya ste phung po la sogs pa'i chos rnams dbu ba dang 'dra bar snying po med par bshig pa de yang snying po med par yi ge pha'i sgo nas bstan to/ /ngag gi lam dang bral ba'i phyir ba ni chos thams cad kyi sgo'o zhes pa ni ngag gi lam la bAk+ba tha zhes bya ste rnam par ma brtags ma dpyad par tshig tu mi smra'i/brtag par bya ba dang rtog par byed pas tshig tu smra ba yang dmigs su med pa yig ba'i sgo nas bstan pa'o/ /srid pa thams cad dmigs su med pa'i phyir b+ha ni chos thams cad kyi sgo'o zhes pa ni srid pa la b+ha ba zhes bya ste/de yang 'dod pa'i khams dang gzugs kyi khams dang gzugs med pa'i khams su 'byung bas na srid pa zhes bya ste phung po lnga nyid la bya'o/ /phung po lnga po de dag dmigs su med par yi ge b+ha'i sgo nas ston to/ /'chi ba dmigs su med pa'i phyir ma ni chos thams cad kyi sgo'o zhes pa ni 'chi ba la par Na zhes bya ste chos rnams ma skyes par 'chi ba yang dmigs su med par yi ge ma'i sgo nas bstan to//theg pa thams cad dmigs su med pa'i phyir ya ni chos thams cad kyi sgo'o zhes pa ni theg pa la yA na zhes bya ste chos rnams kyi don shes na chos kyang gzings dang 'dra bar bor bas na chos rnams stong par rtogs pas na theg pa gang la zhugs te rtogs pa'i theg pa de nyid kyang dmigs su med par yi ge ya'i sgo nas bstan to//rdul thams cad dang bral ba'i phyir ra ni chos thams cad kyi sgo'o zhes pa ni rdul la ra dza zhes bya ste rdul zhes bya brdul phra mo rnams la yang bya la nyon mongs pa rnams la yang bya ste de gnyis gang yang rung ba dmigs su med par yi ge ra'i sgo nas bstan pa'o//mtshan nyid dmigs su med pa'i phyir la ni chos thams cad kyi sgo'o zhes pa ni mtshan nyid la lak+Sha Na zhes bya ste/ 'dus byas dang 'dus ma byas kyi mtshan nyid la sogs pa dmigs su med par yi ge la'i sgo nas bstan to/ /rang bzhin gyis zhi ba'i phyir sha ni chos thams cad kyi sgo'o zhes pa ni rang bzhin gyis zhi ba la pra krita shArnyi ni zhes bya ba ste/ chos thams cad stong pa nyid dang rang bzhin gyis zhi bar yi ge sha'i sgo nas bstan to//rang bzhin gyi bems po'i phyir Sha ni chos thams cad kyi sgo'o zhes pa ni bems po la ShaT zhes bya ste mig dang rna ba la sogs pa'i dbang pos zin pa'i chos rnams ni yang dag par na zin pa yin te mig la sogs pa'i dbang po rnams blun pas tshad ma ma yin pa'i phyir dag gis zin pa'i chos rnams yod pa ma yin par Sha'i sgo nas ston pa'o//Sha Da'i sgor ba tang ba ni Da dang Sha gnyis gnas gcig nas byung ba dang Da'i las byed pa'i phyir ro/ /bden pa thams cad dmigs su med pa'i phyir sa ni chos thams cad kyi sgo'o zhes pa ni bden pa la sa t+ya zhes bya ste kun rdzob dang don dam pa'i bden pa dmigs su med par yi ge sa'i sgo nas bstan to//rgyu dmigs su med pa'i phyir ha ni chos thams cad kyi sgo'o zhes pa ni rgyu la he tu zhes bya ste chos thams cad kyi rgyu dmigs su med par yi ge ha'i sgo nas bstan pa ste mdor na yi ge de rnams kyis stong pa nyid kyi ting 'dzin rnams kyi sgo ston par rig par bya'o//gsang ba pa'i bdag po nga dang nya dang Na dang na ni ting nge 'dzin thams cad la dbang bsgyur ba ste zhes pa ni yi ge de rnams la klad kor gyi 'khor btags pas stong pa nyid kyi mtshan ma yin pa'i phyir nga ni ka la sogs pa'i 'khor kun dbang ngo / /nya ni tsal sogs pa'i 'khor kun du gtogs so//Na ni Da la sogs pa'i 'khor kun du gtogs so/ /na ni ta la sogs pa'i 'khor kun du gtogs so/ /de bzhin du yi ge de rnams ya ral sogs pa'i stong par gtogs te stong pa thams cad kyi mtshan nyid yin pas mthu thams cad dang ldan la/kun rdzob tu sgrub pa'i dgos pa rnams kyang myur du 'grub par 'gyur te/ de bas na mthu thams cad dang ldan pa rab tu myur bar dgos pa'i don thams cad rab tu sgrub par byed pa yin no zhes gsungs pa yin no/ /gsang ba pa'i bdag po'o/ /gsang sngags kyi tshul nge 'dzin gyi sgo 'di ni zhes pa nas/sngags pas yid la sems na ni/ /'chi 'pho med pa'i gnas 'thob bo/ /zhes pa'i bar gyis sngags kyi tshul ka la sogs pa'i yig 'bru de bzhin nyid la dmigs pa'i ting nge 'dzin gyi sgor gyur par bshad pa rnams kyi rjes su bsngags pa dang rang bzhin bstan pa ste/de yang 'jug pa'i yon tan dang gnas pa'i yon tan dang sdang ba'i rang bzhin du shes par bya'o/ /de la re ba thams cad yongs su rdzogs par byed pa de bzhin gshegs pa thams cad kyi rnam par smin pa'i 'bras bu bsam gyis mi khyab pa zhes pa ni de bzhin gshegs pa'i rgyu'i yon tan dang stobs dang mi 'jigs pa la sogs pa las gyur pa'o zhes pa'o//rnam pa thams cad kyi mchog dang ldan pa gsang sngags kyi de kho na nyid kyi don nges pa zhes pa ni 'jug pa'i rang bzhin te/ rnam pa thams cad kyi mchog dang ldan pa zhes pa ni yi ge a dang ka la sogs pa de bzhin nyid la dmigs nas 'jug pa'i ting nge 'dzin gyi sgor gyur pa'i chog rnams dang ldan pa zhes pa'o//gsang sngags kyi de kho na nyid kyi don nges pa zhes pa ni phyin ci ma log pas rigs pa dang lung gis sun phyin pa'o/ /dus gsum dus las shin tu 'das/ / mkha' ltar dri ma med pa ste/ /bsam yas sems kyi sa la gnas/ /zhes pa ni gnas pa'i rang bzhin de dus gsum las shin tu 'das pa ni 'das pa dang lnga ltar dang ma 'ongs pa'i dus de yang phung po lnga la bya bas na/ phung po lnga las shin tu 'das/ /zhes pa'o/ /mkha' ltar dri ma med pa ste//zhes pa ni shes bya dang nyon mongs pa'i sgrib pa'i dri ma rnams dang bral ba zhes pa'o/ /bsam yas sems kyi sa la gnas/ /zhes pa ni bsam pa med pa las sems kyis la gnas pa ste so so rang gis rig pa'i rang bzhin zhes pa'o/ /las dang bya ba dag las byung / /spyad pa'i sa ni rjes thob nas//bsam yas 'bras bu sbyin par byed/ /ces pa ni langs pa'i rang bzhin te/ las dang bya ba dag las byung / /zhes pa ni stong pa nyid las langs nas sems can rnams la phan pa'i phyir/ kun du bzlas pa'i yan lag bzhi la sogs pa lus dang ngag gi las rnams kyang ston zhes pa'o//spyad pa'i sa ni rjes thob nas/ /bsam yas 'bras bu sbyin par byed/ /ces pa'i sbyin pa la sogs pa'i pha rol tu phyin pa'i spyad pa rnams bag gis spyad na mngon par mtho ba dang nges par legs pa bsam gyis mi khyab pa sbyin par byed do zhes pa'o/ /'di ni de nyid dam pa ste//sangs rgyas rnams kyis rab tu bstan/ /zhes pa ni gong du bshad pa rnams bsdus pa'i tshig ste/ /sangs rgyas rnams kyis rab tu bstan/ /zhes pa'o/ /gsang sngags cho ga 'di shes na/ /sngags pa dngos grub thob par 'gyur/ /zhes pa ni sngags kyi rang bzhin stong pa nyid byang chub kyi sems sgom pa zhes pa dang sngags kyi yi ge las lha'i gzugs su sbyar zhing yan lag bzhi pa'i bzlas pa la sogs pa'i cho ga shes na grub pa thob par 'gyur zhes pa'o//sgra zhes bya ba de nyid mchog /gsang sngags rnams kyi gsang sngags mtshan/ /sngags pas yid la sems na ni//'chi 'pho med pa'i gnas 'thob po/ zhes pa ni sngags kyi yi ge'i sgra'i sgo nas bstan pa'i don de bzlas pa la sogs pa la mi ltos par bsgoms pas mya ngan las 'das pa 'chi 'pho med pa'i gnas 'thob ces pa'o/ /de nas yang bcom ldan 'das la gsang ba pa'i bdag po phyag na rdo rjes 'di skad ces gsol to zhes pa nas/thun mong ma lags pa'i yon tan dang ldan par 'gyur ro zhes pa'i bar gyis gong du bshad pa'i don rnams phyag na rdo rjes go bar bstan pa dang / ma 'ongs pa'i 'gro ba rnams spro ba skyed pa dang / dkyil 'khor gyi yo byad bshad pa'i lhag ma rnams bshad par gsol ba'o//bcom ldan 'das kyis gsang sngags kyi mtshan nyid kyi tshul bsam gyis mi khyab pa'i chos kyi rnam grangs bstan pa bcom ldan 'das ngo mtshar lags so zhes pa ni yi ge ka la sogs pa stong pa nyid kyi ting nge 'dzin de dag gi don bsam du med pa de bdag gis go ste ngo mtshar che'o zhes pa'o//de ni nyan thos dang rang sangs rgyas thams cad dang thun mong ma lags te zhes pa ni nyan thos gang zag la bdag med par rtogs pa tsam dang rang sangs rgyas rgyu dang 'bras bu bshig nas ngag dgag pa tsam yin pas de bzhin nyid la dmigs pa'i ting nge 'dzin gyi spyod yul can ma yin zhes pa'o//gang dag gsang sngags kyi tshul 'di la dad pa'i sems can de dag kyang thun mong ma lags pa'i yon tan dang ldan par 'gyur ro zhes pa rnams ni ma 'ongs pa'i 'gro ba rnams spro ba skyed pa'o/ /bcom ldan 'das gzhan yang dkyil 'khor gyi yo byad kyi cho ga bshad du gsol zhes pa ni dkyil 'khor bris zin nas mchod pa la sogs pa bya bar rigs te/de bas na mchod pa'i ting nge 'dzin dang yid kyi mchod pa dang thal mo sbyar ba'i mchod pa dang / byams pa dang snying rje'i mchod pa dang / 'jig rten gyi dri dang me tog la sogs pa'i mchod pa ste/ mchod pa rnam pa bzhi po de dang dkyil 'khor bsrung ba dang /dkyil 'khor gyi lha rnams bzhugs su gsol ba rnams bshad du gsol zhes pa'o/ /de rnams las kyang la la ni snying rje chen po 'byung ba'i dkyil 'khor gyi skabs nas 'byung / la la ni yi ge 'khor lo bskor ba'i dkyil 'khor gyi skabs nas 'byung / / la la ni gsang ba pa'i dkyil 'khor las 'byung ste/ 'di nas mi 'byung ba 'og ma gnyis kyi skabs nas 'byung ba de yang skabs 'dir sbyar bar bya la/ 'di nas 'byung la 'og ma gnyis kyi nang nas mi 'byung ba de yang de bzhin du sbyar bar bya'o/ /de dag gi rim pa yang lha rnams dkyil 'khor du byin gyis brlab pa la spyan drang mi dgos pa'i rigs pa la sogs pa bsdus pa'i don gyi nang du bshad pas 'dir ma smos so//de nas sngags pa de yis su/ /zhes pa nas/ sems dpa' chen po phal rnams la/ /ya re dbul bar rab tu bsgrags/ /zhes pa'i bar gyis dri la sogs pa phyi'i mchod pa rnams bshad pa ste phyi'i mchod pa de rnams kyang sngags pa dmigs pa can gyis tshul bzhin ma byas na 'phags pa'i lha rnams 'khrug par mi 'gyur na yang de'i 'khor phal pa rnams 'khrugs par 'gyur te 'phral du gnod mi byed kyang ji ltar bsams pa'i don rnams 'grub par mi byed cing phan 'dogs par mi 'gyur ro zhes rgyud gzhan las 'byung bas mchod pa de rnams nan tan du bya'o//slob dpon zab cing rgya che ba la mos pas kyang gtso bor yid kyi mchod pa bya ste/ slob ma dmigs pa can rnams kyi yid dang sbyar ba'i phyir phyi'i mchod pa 'di rnams kyang ma chags pa bzhin du bya'o//mchod pa'i ting nge 'dzin dang yid kyi mchod pa de dag ni yi ge 'khor lo bskor ba'i dkyil 'khor dang gsang ba'i dkyil 'khor dag tu blta'o/ /me tog ser po dkar po dmar/ /yid du 'ong bas nan tan du/ /lha nams la ni mchod par bya/ /zhes pa nas/ yid du 'ong zhing blta na sdug /bkra shis pa la sngags pa yis/ /mkhas pas nan tan mchod par bya/ /zhes pa'i bar gyis me tog gi mchod pa rnams bshad de/ me tog ser po dkar po dmar/ /zhes pa ni me tog gi rigs spyir smos pa yin la/ pad+ma'am yang na ut+pal/ /zhes pa la sogs pa ni spyir smos pa de dag nyid las so so'i ming smos pa'o//yid du 'ong zhing ni dri zhim pa'o/ /blta na sdug ces pa ni kha dog dang dbyibs mdzes pa'o/ /bkra shis pa ni lha rnams mchod pa dang mi 'gal ba ste 'dir ni mdo tsam du smos kyi ming gis smos pa las gzhan pa yang yid du 'ong zhing bkra shis pas mchod par bya'o//tsan+dan ta ka ra zhes pa nas/ /sna tshogs yid du 'ong ba 'bul/ /zhes pa'i bar gyis dri chab kyi mchod pa rnams te yid 'ong zhes pa ni 'dir ming gis smos pa las gzhan yang yid du 'ong ba dri zhim pa'i dri'i rigs rnams gang yang rung ba dbul lo zhes pa ste de rnams las kyang la la ni gcig pu sbyar/la la ni bsdus te sbyar bar shes par bya'o/ /dri'i mchod pa dbul ba'i sngon du yang me tog gi mchod pa rnams dbul bar bya'o/ /a ga ru'am sgron shing ngam/ /zhes pa nas/ gzhan yang bdug spos sna tshogs pa/ /bkra shis 'jig rten rnam par grags/ /yid 'ong sngags pas cho ga bzhin//lha rnams la ni 'bul bar bya/ /zhes pa'i bar gyis bdug pa'i mchod pa rnams bshad de/ de rnams kyang la la ni gcig pu sbyar/ la la ni bsdus te sbyar bar shes par bya'o/ /gzhan yang bdug spos sna tshogs pa/ /bkra shis 'jig rten rnam par grags/ /yid 'ong sngags pas cho ga bzhin//lha rnams la ni dbul bar bya/ /zhes pa ni 'dir ming gis smos pa las gzhan yang 'jig rten du grags pa'i bdug pa sna tshogs pa lha rnams mchod pa dang mi 'gal zhing rung ba yang dbul bar bya zhes pa'o/ /de nas gzhan yang sems dpa' che/ /lha bshos las kyi cho ga nyon//zhes pa nas/ zho dang 'o ma rgyas par dbul/ /zhes pa'i bar gyis lha bshos kyi mchod pa rnams bshad pa ste/ de rnams kyang zas dang bza' ba dang bca' ba dang btung ba'i dngos por shes par bya ste/ de la zas ni 'o thug dang 'bras chan la sogs pa'o/ /bza' ba ni la du la sogs pa'o//bca' ba ni shing thog la sogs pa'o/ /btung ba ni zho dang 'o ma la sogs pa'o/ /rgyas par zhes pa ni de rnams bzang zhing mang du dbul ba'o/ /mar me rnam pa sna tshogs pa/ /zhes pa nas/ rab tu bkang ste dbul bar bya/ /zhes pa'i bar gyis mar me'i mchod pa bshad pa ste gtsang zhing zhes pa ni nya tshil la sogs pa mi gtsang ba med pa dang ras kyi sdong bu dri ma med pa zhes pa'o//phyogs su gdugs dang ba dan rnams/ /kha dog sna tshogs rab tu bsgrags/ /zhes pa ni dkyil 'khor gyi phyi'i sgo khar gdugs dkar po gcig gzhag go/ /ngos bzhi dang grwa bzhi'i phyogs so sor kha dog dang mthun pa'i ba dan rnams bsgreng bar bya'o zhes pa'o//rta babs bzang po rnams kyang ni/ /dril bu dang bcas rab tu dbul/ /zhes pa ni phyi'i sgo khar ni shing la sogs pa las byas pa'i rta babs bzang po dril bu dag gis brgyan pa zhes pa'o/ /de nas bum pa brgyad dam ni//zhes pa nas/ mgrin pa ras kyis bcings pa rnams/ /mkhas pas rnam par dgod par bya/ /zhes pa'i bar gyis bum pa rnams dbul ba ste/ nag po la sogs pa'i skyon med cing gzhung las byung ba'i mtshan nyid dang ldan pa rnams dbul lo/ /de rnams gsang ba spyi'i rgyud las 'byung ba bzhin du lha rnams so so la bsngos par mi bya bar spyir dgod pa ni byang chub sems dpa'i sngags kyis btab ste slob ma rnams dbang bskur ba'i tshe blugs par bya ba'i phyir ro//lha yi gtso bo rnams la ni/ /ras ni zung ra zung re dbul/ /zhes pa ni dkyil 'khor rim pa gsum char gyi sgo khyud rnams kyi nang na bzhugs pa'i gtso bo rnams dang dbus na bzhugs pa'i bcom ldan 'das rnam par snang mdzad la ras zung re re dbul lo zhes pa'o//thams cad la zung re mi 'byor na spyir zung gcig dbul bar shes par bya'o/ /sems dpa' chen po phal rnams la/ /ya re dbul bar rab tu bsgrags//zhes pa ni dkyil 'khor gyi lha phal pa rnams la ya re re dbul zhes pa ste/ thams cad la ya re ma 'byor na spyir ya gcig dbul bar shes par bya'o/ /de rnams kyang bum pa'i mgrin pa dkri ba ma gtogs pa'i ras gzhan yin par shes par bya'o/ /slob ma dkyil 'khor drung bkug ste//sngags pas chu yi bsang gtor byas/ /zhes pa nas/ slob ma sdig dang bral ba kun/ /de ltar legs par btsud nas ni/ /zhes pa'i bar gyis slob ma rnams dkyil 'khor du gzud pa'i cho ga bshad de/ de yang sngar mchod pa'i tshe slob dpon las kyi rdo rje sems dpar bsgyur ba las slob ma dkyil 'khor du 'dzud pa'i tshe 'og nas 'byung ba'i slob dpon gyi ting nge 'dzin du bsgyur te/thog ma nyid du dkyil 'khor gyi phyir ra'i sgor slob ma rnams kyi bgegs bsal ba'i phyir khams gsum rnam par rgyal bas bsngags pa'i bum pa'i chus gtor te/ slob ma rnams kyi gdong g.yogs kyi ras la dam tshig gsum gyi phyag rgya bcings nas dam tshig gsum gyi sngags lan gsum bzlas pas slob ma'i gdong g.yogs par bya'o//de nas slob ma'i lag par dri dang me tog byin la byang chub kyi sems bskyed de/ de nas chos kyi dbyings kyi phyag rgya dang sngags kyis chos kyi dbyings su byin gyis rlob bo/de nas chos kyi 'khor lo'i phyag rgya dang sngags dang rdo rje go cha'i sngags kyis slob ma de rdo rje sems dpar byin gyis brlabs la/ spyi bor chos kyi dbyings kyi yi ge kha dog dkar po klad kor dang bcas pa 'bar ba can bsams te/ de nas dam tshig gsum gyi phyag rgya bcings nas de'i sngags zlos su bcug la me tog 'dor du gzhug go//de nas me tog gang du bab pa'i lha de sngags pas slob ma de la sbyin te/ de nas dkyil 'khor lan gsum du bskor du gzhug go/ /de rnams ni dkyil 'khor du gzud pa'i cho ga'i rim pa mdor bshad pa'o//yan lag so sor bshad pa ni/ byang chub sems kyang 'dzin du gzhug /ces pa ston pa byang chub kyi sems 'dzin du gzhug pa'o/ /de bzhin gshegs pa dran byas nas/ /zhes pa ni sangs rgyas dang byang chub sems dpa' rnams bdag la dgongs su gsol zhes smra bar bya'o/ / smon pa byang chub tu sems bskyed pa yang sangs rgyas dang byang chub sems dpa' thams cad bdag la dgongs su gsol/ bdag ming 'di zhes bgyi bas dus 'di nas bzung ste nam byang chub kyi snying po la mchis kyi bar du ji ltar sangs rgyas bcom ldan 'das rnams dang byang chub sems dpa' rnams kyis phung po dang khams dang skye mched dang gzung ba dang 'dzin pa rnam par spangs pa rang gi sems gdod ma nas ma skyes pa stong pa nyid kyi rang bzhin gyi byang chub tu sems bskyed pa de bzhin du bdag gis kyang byang chub tu sems bskyed par bgyi'o zhes pa'o//de nas rgyal ba'i rigs dge la//thams cad rab tu bskyed par 'gyur/ /zhes pa ni de ltar smon pa byang chub kyi sems bskyed pas sa bon btab pa'i sgo nas rgyal ba'i rigs dge bar skye bar 'gyur ro/ /rgyal ba'i rigs zhes pa ni thabs dang shes rab dang ldan pa ste/de la shes rab ni chos thams cad stong pa nyid kyi rang bzhin gyi yum shes rab kyi pha rol tu phyin pa'o/ /thabs ni sbyin pa la sogs pa'i pha rol tu phyin pa rnams te/ de bzhin gshegs pa rnams kyang de las byung bas na de ni rgyal ba'i rigs zhes bya'o/ /chos kyi dbyings las byung ba yi//phyag rgya de dag rnams la bcing / /zhes pa ni 'jug pa'i byang chub kyi sems dang gnas pa'i byang chub kyi sems bskyed pa ste/ chos kyi dbyings stong pa nyid kyi sngags dang phyag rgya des slob ma de stong pa nyid du byin gyis brlab po/ /chos kyi 'khor lo 'ang bcings nas ni/ /rdo rje sems dpar byin gyis brlab//ces pa ni de ltar stong pa nyid kyi rang bzhin du rtogs nas slar kun rdzob kyi sgo nas sems can rnams la chos kyi 'khor lo bskor ba'i phyir chos kyi 'khor lo'i sngags dang phyag rgyas rdo rje sems dpa'i skur bsgyur ro/ /rdo rje sems dpa' zhes pa ni rang gi sems rdo rje dang 'dra bar brtan pa cis kyang zil gyis mi non pa ste/de yang zla ba'i dkyil 'khor gyi nang na bzhugs pa zla ba'i dkyil 'khor yang 'od kyi dkyil 'khor dang ldan pa dbu rgyan dang ldan zhing rgyan sna tshogs kyis brgyan pa'i sku'o/ /de'i snying gar yang zla ba'i dkyil 'khor la gnas pa'i rdo rje rtse lnga pa ye shes lnga'i rang bzhin can bsam par bya'o//de nas sangs rgyas kun gyi ni/ /dam tshig sdom brtson can gyis bcing / /de nas sngags kyi cho ga bzhin/ /ras la lan gsum gdab par bya/ /zhes pa ni slob dpon gyis gdong dgab pa'i ras la dam tshig gsum gyi phyag rgya dang sngags kyis gdab ste/ de yang skabs 'dir bshad mod kyi las 'di rnams dang por shes par bya'o/ /de dag gi ni gdong yang dgab/ /ces pa ni dam tshig gis btab pa'i ras des slob ma de rnams kyi gdong dgab par bya ste/ gdong dgab pa de yang de dag sngar tha mal gyi mig tu 'dug pa las dam tshig gi sngags dang phyag rgyas byin gyis brlabs pas bkag nas ye shes kyi mig tu bsgyur bar gyur te ye shes kyi mig de phye nas bcom ldan 'das kyi sku mi zad pa'i rdo rje'i rgyan gyi dkyil 'khor de bstan pa'i phyir ro//snying rjer gyur pa'i yid kyis su/ /zhes pa ni snying rje dang ldan pas bya ba yin gyis de khe dang bkur sti'i phyir ma yin no zhes pa'o//dam tshig lan gsum bzlas nas ni/ /zhes pa ni me tog 'dor du gzhug ces pa dang sbyar te dam tshig gsum gyi phyag rgya bcings pa sngags kyang lan gsum bzlas te me tog 'dor du gzhug go/ /dam tshig gsum zhes pa ni bcom ldan 'das kyi sku mi zad pa dang gsung mi zad pa dang thugs mi zad pa'i rdo rje'i rgyan gyi dkyil 'khor te/de'i byin gyi rlabs su gyur pa ni dam tshig gi sngags dang phyag rgya ste/ phyag rgya bcings shing de'i sngags lan gsum bzlas na sku la sogs pa mi zad pa'i rdo rje'i rgyan de mthong bar 'gyur ro/ /de bas na sngags pa rtag tu zlos pa la sogs pa byed pa'i tshe yang dam tshig gsum gyi phyag rgya bcing ba de'i phyir du yin la/dam tshig gsum gyi phyag rgya bcings te sngags lan gsum du bzlas na dam tshig nyams pa la sogs pa slar 'tsho bar 'gyur ro/ /spyi bor yi ge ra zhes pa/ /klad kyi 'khor bcas brjid dang ldan/ /'bar ba'i phreng ba rnam par 'phro//zla ba 'char ka lta bu yi/ /kha dog dkar po gzhag par bya/ /zhes pa ni slob ma'i spyi bor yi ge ra chos kyi dbyings kyi ye shes bsam ste ra ni shes bya dang nyon mongs pa'i sgrib pa dang bral ba'i rang bzhin no/ /klad kor gzhag pa ni stong pa nyid kyi rang bzhin no/ /'bar ba'i phreng ba dang bcas pa ni rgyu'i ye shes kyi rang bzhin no//zla ba 'char ka lta bu ni zla ba 'char ba'i tshe rang bzhin dkar ba la cung zad rtsa dmar bar bstan pa ste/ dkar ba ni rang bzhin gyis dag pa'o/ /rtsa dmar ba ni sems can gyi don la chags pa'o/ /skyob pa kun gyi spyan sngar ni//de nas me tog 'dor du gzhug /me tog gang la bab pa de/ /sngags pas de la sbyin par bya/ /zhes pa ni sngon dkyil 'khor du ma zhugs shing lha ma mnos pa'am/ dkyil 'khor du zhugs shing lham mnos sam/ lha mnos te btang ba rnams gdod lha mnos par bya na me tog gdod de ltar dor bar bya la/de ltar lha mnos zin te gdod nod mi dgos na gdong g.yogs bkrol la me tog de dag gi lha'am bcom ldan 'das rnam par snang mdzad la bul bar bya ste/ de dag kyang zhib tu ni bsdus pa'i don du bshad zin to/ /me tog dor nas lha gang la bab pa de'i cha brtag pa yang gsang ba spyi'i rgyud kyi nang du blta bar bya'o//dkyil 'khor dang po'i sgo drung du/ /sgo khyud kyi ni dbus kyi cha/ /dkyil 'khor gyi ni sgo gnyis kyi/ /bar du slob ma gzung bar bya/ /der gnas pa la cho ga kun/ /rim pa bzhin du legs par bya/ /zhes pa ni dkyil 'khor gsum pa'i sgo khyud kyi dbus su slob ma der gzung de der gnas nas gong du smos pa'i las thams cad bya ste/sgo khar slob ma la chus gdab pa 'ba' zhig ma gtogs so/ /dkyil 'khor gyi nang du ma zhugs par sgo gnas las de rnams bya ba dang lha rnams la me tog 'dor ba yang sgo nas bor ba na nang du 'bab par 'gyur gyi/nang du zhugs te bor na lha kha cig rgyab tu las par 'gyur la/ bdag dbus su zhugs te bor na me tog phyi rol du bab par 'gyur ba'i phyir ro/ /gnyis su na gong du/ skyob pa kun gyi spyan sngar ni/ /zhes kyang 'byung bas bdag nang du zhugs nas kha cig gi spyan sngar yang mi 'gyur la/byang chub sems dpa' sems dpa' chen po de rnams kha cig la rgyab kyis blta ba mi rigs pa'i phyir ro/ /gsum du na 'di ni chos kyi rgyal po'i 'khor yin pas thog ma nas nang du zhugs na ko long du 'gyur te rgyal chos dang 'gal ba'i phyir ro/ /slob ma sdig dang bral ba kun//de ltar legs par btsud nas ni/ /de dag zhi bar bya ba'i phyir/ /zhes pa nas/ sbyin sreg rjes la sngags pa yis/ /zhes pa'i bar gyis dkyil 'khor du btsud pa'i slob ma de dag zhi bar bya ba'i sbyin sreg bya ste slob ma rnams dkyil 'khor du zhugs pas sdig pa rnams byang zhing rgyud dag pa des bcom ldan 'das kyi sku mi zad pa'i rdo rje'i rgyan la sogs pa la sbyin sreg gi sgo nas yon phul na bsod nams 'phel te sdig pa 'byang bas zhi bar 'gyur ro//de'i rim pa yang thog mar snying po'i dkyil 'khor gyi mdun rol/ dkyil 'khor bar ma'i sgo'i phyi rim/ gsum pa'i nang rol du me thab khru gang ba bya'o/ /de ste dkyil 'khor chung nas nang du mi shong na dkyil 'khor gyi phyi rim gyi sgo gar bya'o/ /khang thog la sogs par brkor mi rung na tshon dmar pos thab bri bar bya la/ de nas thab de'i tha mar lho phyogs nas brtsams te ku sha g.yas skor du dgram zhing gcig gi rtsa bas gcig gi rtse mo non par byas te bskor ro//de nas khams gsum rnam par rgyal ba'i sngags kyis btab pa'i dri'i chu gtor la/ de nas thab der 'jig rten pa'i mi mr-i ta zhes bya ba las thams cad byed pa mgrin pa ring la spu can kha dog kham par 'dug pa me tog gcig thab der bor la me de byin gyis brlab par bya'o//de nas me lha de la zhal bsil dang gang ba'i sbyin sreg gzhung las 'byung ba bzhin du byin nas de nyid du 'bar ba'i rang bzhin du bzhag la/ de nas thab der me tog gcig bor nas 'jig rten las 'das pa'i zhi ba'i mer byin gyis brlabs te/ zhal bsil dang gang ba'i sbyin sreg la sogs pa snga ma bzhin du byas nas slob ma re re'i phyir yang sbyin sreg lan nyi shu rtsag cig re slob ma'i lag pa g.yas pa'i mthe bong nas slob dpon gyi lag pa g.yon pas bzung ste bya'o//'di ni bsdus pa'i don to/ /yan lag gi don bshad par bya ste sdig dang bral ba kun zhes pa ni slob ma de rnams dkyil 'khor du gzhug par rtsom pa na gsum la skyabs su 'gro ba la sgos pa dang /dkyil 'khor du 'jug pa na byang chub tu sems bskyed pa dang / zhugs nas kyang phyis sngags kyi spyad pa spyod pa na sbyor ba dang dngos gzhi dang rjes gsum ga dge ste sdig pa dang bral ba'o//sbyin sreg cho ga bzhin du bya/ /zhes pa ni sbyin sreg gi cho ga gzhung las ji skad gsungs pa bzhin du bya ba ste 'og nas 'byung bar blta'o/ /snying po'i dkyil 'khor gyi ni mdun/ /dkyil 'khor gnyis pa'i rgyab rol gyi/ /dkyil 'khor gyi ni dbus kyi char/ /ma g.yengs pa yi sems kyis bya//me thab khru gang tsam gyi ni/ /tshad du rab tu bsgrags pa yin/ /zhes pa ni gong du bshad zin to/ /'dir khru gang pa 'ba' zhig gsungs kyi zlum po'am gru bzhir bya ba ma smos kyang zhi ba dang rgyas pa'i thab ji ltar grags pa la bya ste/ skabs 'dir ni zhi ba'i las yin pas zlum por 'os so//yang na zhi ba dang rgyas pa gnyis ka'i bzhi mthun na gru bzhi yang nyes pa med do/ /kha ran so bzhi'i tshad du bya/ /zhes pa ni thab gru bzhi'i ni kha ran yang gru bzhir bya la/ thab zlum po la kha ran yang zlum por bya'o/ /dbus su rdo rje rab tu brtag /ces pa ni ye shes lnga'i phyag rgyar gyur pa rdo rje rtse lnga pa bri'o//de nas sngags pa'i g.yas logs su/ /sbyin sreg gi ni yo byad gzhag /g.yon gyi phyogs su slob ma rnams/ /zhes pa ni bsreg par bya ba'i rdzas rnams sngags pa'i g.yas su gzhag go/ /g.yon du slob ma bkod pa na slob dpon slob ma'i g.yas su 'bab ste/slob dpon des slob ma la phan 'dogs pa dang rjes su mthun par bstan pa'o/ /tsog tsog por ni 'khod du gzhug /ces pa ni cho ga'i las rnams ma zin gyi bar du bag phag ste mi 'dug pa'am gus pa bstan pa'o/ /sdom brtson bdag nyid sa steng du/ /ku sha bting ba'i stan la 'dug /ces pa ni slob dpon rtswa ku sha steng du 'dug pa'o/ /yang na tshon rtsi dmar po mchog /ces pa nas/ nyi shu rtsa gcig sbyin sreg bya/ /zhes pa'i bar ni go rims bzhin du gong du bshad zin la/ yid ni mnyam par bzhag nas su/ /zhes pa ni zhi ba'i las la byams pa'i ngang tshul bya'o//sbyin sreg rjes la sngags pa yis/ /slob ma rnams la yon bslang ba/ /zhes pa nas/ sangs rgyas bsngags pa'i dge 'dun la/ /ci nus par ni mchod bstod bya/ /zhes pa'i bar ni sdig pa dang bral ba'i slob ma de dag slob dpon gyis bsod nams kyi zhing dam pa la sbyin pa byed du gzhug ste/mchog tu phan 'dogs pa'i slob dpon de la slob ma rnams kyis gus par yon phul na bsod nams mchog tu 'gyur ba'i phyir gser dang dngul dang rin po che la sogs pa dbul bar bya'o zhes bskul ma btab bo/ /de ltar slob dpon la yon phul nas kyang 'phags pa'i dge 'dun ni sbyin pa'i gnas dam pa yin pas 'phags pa'i dge 'dun la yon 'bul ba dang chos ston gsol bar bya ba yang /'di ni bsod nams zhig yin zhes/ /sems can kun gyi don gyi phyir/ /skyob pa rnams ni nan gyis gsungs/ /zhes bya ba la sogs pas bstan pa yin no//de nas bcom ldan 'das rnam par snang mdzad kyis byang chub sems dpa' sems dpa' chen po phyag na rdo rje la bka' stsal pa/ sems dpa' chen po dbang bskur ba/ /sngon gyi sangs rgyas kyis bshad pa/ /rgyas pa ru ni bshad par bya/ /yid gcig bsdus te legs par nyon//zhes pa nas/ rdo rje 'dzin pa de kun yang / /khyod la rnam pa kun du srung / /zhes pa'i bar gyis slob ma rnams dbang bskur ba'i skabs 'chad de/ de la mngon par dbang bskur ba zhes pa ni bcom ldan 'das kyi sku dang gsung dang thugs mnyam pa nyid mi zad pa'i rgyan rang bzhin gyi dkyil 'khor gyi byin gyis brlabs par gyur pa'i spyan sngar rin po che la sogs pa'i bum pas chu blugs pa ste mngon par blugs zhes pa'i tshig gi don to//de yang rnam pa gsum du brtag par bya ste/ dbang bskur ba'i ming ji lta bu yin pa dang / su la dbang bskur ba dang / ci'i phyir dbang bskur ba'o//de la dbang bskur ba'i ming ji lta bu yin pa ni spyir dbang bskur ba'i rnam pa mang ste/ sngags pa nyid du bya ba'i phyir rig pa sbyin pa dang / las kyi dbang bskur ba ni zhi ba dang rgyas pa dang mngon spyod kyi las bya ba'i phyir dang / gdon bsal ba la sogs pa bya ba'i phyir dbang bskur ba'o//de dag las skabs 'dir ni slob dpon du dbang bskur ba zhes bya ste de ni ming ngo / /su la dbang bskur ba ni slob ma phal pa thams cad la dbang bskur bar bya ba ma yin gyi dam tshig can lnga'i skabs nas/ dkyil 'khor dang ni phyag rgya mthong / /las dang bya ba la yang sbyar/ / zhes sngags kyi rgyud rnams thos shing dkyil 'khor la sogs pa 'dri bar nus pa khyad par can gyi slob ma dang / yongs su grub pa'i slob ma rnams la dbang bskur te/ su la dbang bskur ba zhes pa ni de rnams la dbang bskur ba'o/ /ci'i phyir dbang bskur zhes pa ni chos kyi mig mi 'tshub par bya ba'i phyir te/'jig rten na yang 'jig rten gyi gtsug lag lung bstan pa dang rtog pa dang / sman la sogs pa rnams kyang slob mas rdzogs par lobs nas slob dpon gyis dbang bskur ba'i cho ga 'jig rten pa rnams la ji ltar srid pa bzhin du byas na bshad pa la sogs pa bya bar slob ma la lung sbyin pa srid do//de dag kyang so so'i gtsug lag rdzogs par mi shes shing dbang ma bskur bar bshad pa la sogs pa byas na gtsug lag de dag ji lta ba bzhin du bshad mi nus pas de dag gis mi 'tshub par 'gyur ba'i phyir ro/ /de bzhin du 'dir yang slob ma rnams rgyud la sogs pa rdzogs par shes par bya ste/de dag nyid slob dpon gyi mdo mngon sum du bzlas nas rgyud bshad pa dang dkyil 'khor bri ba la sogs pa ji lta ba bzhin du shes par slob dpon nyid yid ches te/ sems can gyi don byed nus par gyur pa rnams la dbang bskur na chos kyi mig mi 'tshub par 'gyur ba'i phyir ro//gnyis su na de ltar mngon par 'dus byas pa'i slob ma de slob dpon du gyur na 'jig rten pa rnams kyang khungs de lta bu las byung ba'i slob dpon de la yid ches shing btsun par byed do/ /rim pa 'di lta bus dbang ma bskur la rgyud la sogs pa mi shes par btsan thabs su sngags kyi rgyud la sogs pa 'chad cing dkyil 'khor 'drin ji lta ba nyid du mi shes te/don log par 'gyur bas sngags kyi lha la sogs pas kyang byin gyis mi rlob pa'i phyir ci bsams pa'i don mi 'grub la/ gdul ba'i 'gro ba rnams yid mi ches shing mi phyogs pas chos kyi mig 'tshub par 'gyur ro//ci'i phyir dbang bskur ba zhes pa ni de'i phyir ro/ /de la dbang bskur ba yang ji ltar 'jig rten gyi rgyal po dge ba bcu'i las kyi lam gyi bka' khrims ston pa/ mngon par mtho ba'i 'bras bu sbyin par byed pa de ji ltar rgyal thabs su dbang bskur bar bya ba de bzhin bya ba ste/'dir yang mngon par mtho ba dang nges par legs pa'i 'bras bu sbyin par byed pa'i chos kyi rgyal por dbang bskur ba'i phyir te/ de yang rim pa 'di ltar bya'o/ /thog mar rtsa ba'i dkyil 'khor gyi mdun du bar khru dos bcad de der dbang bskur ba'i dkyil 'khor rim pa gcig pa sgo gcig pa bris la/de'i nang du pad+ma 'dab ma brgyad pa bris te/ dkyil 'khor gyi grwa bzhir rdo rje 'dzin pa bri zhing pad+ma'i 'dab ma brgyad po la yang byang chub sems dpa' bzhi dang phyag brnyan bzhi ste brgyad bri'o/ /pad+ma'i dbus su chos kyi dbyings kyi yi ge raM bris la der slob ma bzhag ste/ dri dang me tog la sogs pa'i mchod pa dang /bkra shis pa'i tshigs su bcad pa dang / gleng gzhi rgya chen po snyan pa rnams bsgrags shing kun du bzang po la sogs pa'i sems dpa' rnams kyis byin gyis brlabs pa'i rin po che bzhi'i bum pa dkyil 'khor chen po lan re bskor nas slob ma de'i spyi bo nas blugs so/ /de'i 'og tu 'dir dngos su ma smos kyang de bzhin gshegs pa'i gtsug tor dang spyan dang ljags dang go cha rnams kyi phyag rgya dang /sngags kyis kyang slob ma de la pad+ma'i steng na 'dug pa nyid nas rim pa bzhin du byin gyis brlab par bya'o/ /de nas gnas de bslab ste dkyil 'khor de'i nye 'khor du dri bzang po gcig bzhag ste gos gsar pa brjes nas gos gsar pa phrugs cig gon nas khri'i steng du bzhag go//dri dang me tog la sogs pas mchod nas/ slob dpon nyid mig dbye ba'i thur ma thogs nas mdun du 'dug ste/ de bzhin gshegs pa rnams kyis bu khyod kyis mi shes pa'i rab rib rnams bsal to zhes pa la sogs pa'i tshig brjod do//de nas me long thogs la chos rnams gzugs brnyan dang 'dra bar rang bzhin med pa'i stong pa nyid kyi tshul du sgoms shig ces pa'i tshig brjod do/ /de nas de ltar bdag gi don yongs su rdzogs nas gzhan gyi don phun sum tshogs par bya ba'i phyir rkang pa'i 'og tu gser gyi 'khor lo bzhag ste/chos kyi 'khor lo skor cig ces bsgrag go /de nas chos kyi 'khor lo bskor ba de yang sangs rgyas kyi gsung mchog 'jig rten gyi khams thams cad du grags par bskor bar bya ste/ gsung mchog de'i phyag rgyar gyur pa dung bzang po cig lag pa g.yas par byin la/khyod kyi chos kyi dung bus shig /ces brjod do/ /de ltar sems can gyi don byas nas sangs rgyas rnams la byas pa gzo ba la sogs pa'i tshig de'i 'og tu brjod par bya ste/ de rnams ni las su bya ba'i rim pa bsdus te bshad pa'o/ /yan lag gi don bshad par bya ste/sems dpa' chen po dbang bskur ba/ /rgyas pa ru ni bshad par byas/ /yid gcig bsdus te legs par nyon/ /zhes pa la dbang bskur ba'i tshig gi don gong du bshad zin la/ rgyas pa ru ni bshad par byas/ /zhes pa ni dbang bskur ba'i cho ga 'og nas 'byung ba rnams dang ldan par 'chad pas shes pa'o//sngon gyi sangs rgyas kyis bshad ces pa ni sangs rgyas thams cad mnyam pa nyid pas bya ba gcig tu bstan pa'o/ /gsang ba pa'i bdag po slob dpon gyis rtsa ba'i dkyil 'khor gyi mdun du bar khru do bor nas phyi rol gyi sa la dkyil 'khor gnyis pa gru bzhi la sgo gcig pa bri bar bya'o zhes pa la don gzhan ni sngar bshad zin te/'dir dngos su ma smos kyang spyi'i mtshan nyid ltar byas na nang gi dkyil 'khor gyis shar phyogs su gzhol na dbang bskur ba'i dkyil 'khor byang phyogs su bri bar bya/ nang gi dkyil 'khor byang phyogs su gzhol na dbang bskur ba'i dkyil 'khor nub phyogs su bri bar bya ste/ 'dir ni nang gi dkyil 'khor gyi mdun du dbang bskur ba'i dkyil 'khor bri ba mtha' gcig tu gsungs pas nang gi dkyil 'khor la dbang bskur ba'i tshu mi 'byung bar bya ba'i phyir nang gi dkyil 'khor gyi sa byang phyogs su gzhol bar bya'o//'on te shar phyogs su gzhol na yang bar sa rgal gyis bcad par bya'o/ /grwa bzhir rdo rje 'dzin sngar bzhin dgod de zhes pa ni/ rdo rje 'dzin pa de rnams dang 'og nas byang chub sems dpa' bzhi dang phyag brnyan bzhi 'byung ba rnams kyang de bzhin gshegs pa'i yon tan las gyur pa ste de rnam par rtog pa med pa'i phyir spros pa med par gnas pa zhes pa'o//nam mkha' dri ma med pa ni stong pa nyid kyi spyod yul nam mkha' dang 'dra ba ste shes bya dang nyon mongs pa'i dri ma spangs pa'o/ /dri ma med pa'i mig ni gzung ba dang 'dzin pa'am/shes bya dang nyon mongs pa'i sgrib pa spangs pa'i shes rab can zhes pa'o/ /gos sna tshogs gyon pa ni ngo tshab sgrib par byed pas gos te/ gang zhig ngo tsha ba yod na mi byed pa dang / bya ba'i rigs pa rnams byed pa dang / dam pa rnams kyis bsngags pa ste de lta bu'i ngo tsha dang ldan pa zhes pa'o//dbus su pad+ma chen po 'dab ma brgyad pa ze ba dang bcas pa gzhag pa ste zhes pa ni/ ye shes brgyad kyi phyag rgyar gyur pa'o/ /ze ba ni yon tan rnams so/ /'dab ma bzhi la byang chub sems dpa' grogs su gyur pa sngon gyi smon lam gyi mthu can du gyur pa bzhi bri bar bya ste zhes pa ni/byang chub sems dpa' de rnams de bzhin nyid kyi yon tan las gyur pa ste gnyis ni rang gi don phun sum tshogs pa/ gnyis ni gzhan gyi don du phun sum tshogs pa'i rang bzhin te smon lam gyi dbang gis chos kyi rgyal por dbang skur ba de'i pad+ma'i gdan gyi gnas su gyur pa'o//de la gzungs kyi dbang phyug rgyal po zhes pa la gzungs ni shes rab ste de'i rgyal por gyur pa'o/ /dran pa dang shes bzhin can ni shes rab de nyid mi gnas pa'i mya ngan las 'das pa'i rang bzhin sems can rnams la rgyun mi 'chad do//phan pa ni lhag pa'i bsam pa can rnams la phan par sems pa'o/ /snying rje can ni snying rje'i dbang gis sems can rnams la phan par sems pa ste de gnyis ni/ gzhan gyi don phun sum tshogs pa'i rang bzhin yin la/ snga ma gnyis ni rang gi don phun sum tshogs pa'i rang bzhin no/ /'dab ma gzhan rnams la ni phyag brnyan bzhi bri ste zhes pa yang de bzhin nyid yon tan du shes par bya ste smon lam gyi dbang gis gyur pa ni gong ma bzhin no/ /sems can gyi khyad par la spyod pa ni gzhan gyi sems shes pa'i rang bzhin no//'dod pa yongs su rdzogs par byed pa ni/ sems can rnams kyi re ba yongs su rdzogs par byed par shes pa'o/ /ma chags pa dang rnam par grol ba zhes pa ni 'bras bu'i yon tan te stong pa nyid kyi rang bzhin ni chags pa med pa yin la chags pa med pas na rnam par grol ba'o/ / gong ma gnyis ni rgyu'i rang bzhin no/ /dbus su ni chos kyi dbyings bsam gyis mi khyab pa'i gzugs gzhag go zhes pa ni/ chos kyi dbyings kyi yi ge ra kha dog dkar po pad+ma'i snying bo la gzhag go/ /rin po che'i bum pa bzhi zhes pa ni/ gser dang / dngul dang / pad+ma rA ga dang / ma ra ka ti'i bum pa gser dang / dngul la sogs pa de dag gis brgyan pa'i bum pa bya'o/ /de ltar yang ma 'byor na/ de rnams kyi kha dog dang mthun pa'i sa'i bum pa bya ste/ de dag la sogs pa'i yo byad rnams 'byor bzhin du ji skad du 'byung ba bzhin ma sbyar na/'jungs pa'i sems dang ldan te sems ma dag pas lha rnams kyang byin gyis mi rlob ces gzhung las 'byung ngo / /snying nas med kyang mi 'byor du mi rung snyam nas mi spobs te mi byed dam/'tsho ba'i yo byad dang / nad kyi rkyen sman gyi zong yang mi 'jog par byed na/ yang dgongs pa'am cho ga mi shes pa yin la/ 'tsho ba'i yo byad dang / nad kyi rkyen sman gyi zong du snyad btags nas lhag par yod pa gtong mi phod na gong du smos pa dang 'dra ste/ mdor na sems la sgyu med pa'i gtsang sbra shes par bya'o/ /kun du bzang po la sogs pa byang chub sems dpa' rnams kyis byin gyis brlabs pa yang slob ma de ngan song spang bar bstan pa'i phyir thog ma nyid du ngan song thams cad spong ba'i byang chub sems dpa'i sngags kyis btab pa'i bum pas bkru'o//ngan song spangs nas shes bya dang / nyon mongs pa'i sgrib pa dang bral bar gyur cig pa'i don du/ de nas sgrib pa thams cad rnam par sel ba'i sngags kyis btab la bkru'o/ /de nas kun du bzang po'i sa thob par gyur cig pa'i don du kun du bzang po'i sngags kyis btab pa'i bum pas bkru'o//de nas chos kyi rgyal tshab tu gyur cig pa'i don du byams pa'i sngags kyis btab pa'i bum pas bkru'o/ /pad+ma dam pa de la ni/ /sngags pa dag gis de bzhag nas/ /zhes pa nas/ spos dang me tog bzang po yis//de la yang ni mchod par bya/ /zhes pa'i bar du don gzhan ni gong du bshad zin la/ slob ma de dbang bskur bar bya ba'i tshe/ 'dir dngos su ma gsungs kyang dkyil 'khor du 'jug pa'i tshe na rdo rje sems dpa'i skur bsgyur te/ de las gzhan pa'i skur bsgyur ba ma gsungs pas rdo rje sems dpa'i skur bsgyur te dbang bskur bar bya'o//dbang bskur ba'i tshe pad+ma'i gdan la bzhag pa yang 'khor los sgyur ba'i rgyal po'i 'dug thabs su bzhag ste/ rkang pa g.yon pa khri'i steng du bzhag la g.yas pa sa la gzhag cing /lag pa g.yon pa khri la brten la/ g.yas pa pus mo la bzhag ste gdong yang mi mtho mi dma' bar drang por blta bar bya'o/ /de nas gser gyi thur ma ni/ /zhes pa nas/ /ling tog rgyal ba rnams kyis bsal/ /zhes pa'i bar du rim pa gzhan ni gong du bshad la//bu khyod kyis ni mi shes pa'i/ /ling tog rgyal ba rnams kyis bsal/ /zhes pa ni/ sngon thos pa dang bsams pa'i shes rab kyis rgyud la sogs pa mi shes pa rgyal ba'i lung slob dpon gyis bshad pas mi shes pa bsal to zhes pa'o/ /sngon gyi mig mkhan rgyal po yis//'jig rten ling tog bsal ba bzhin/ /zhes pa ni/ dpe ste/ de ltar mig gi sman pa'i rgyal pos 'jig rten pa rnams kyi mig gi rab rib bsal te gzugs la sogs pa'i rang dngos ji lta ba nyid du 'dug pa mi mthong ba las mthong bar byas pa bzhin du/rgyal ba rnams kyis kyang bu khyod kyi ma rig pa chos rnams kyi mtshan nyid ji lta ba bzhin du 'dug pa mi shes pa las shes par bya'o zhes pa'o/ /de nas me long blangs nas su/ /chos kyi mtshan nyid bshad par bya/ / chos rnams gzugs brnyan lta bu ste/ /zhes pa ni/ phung po dang / khams dang / skye mched la sogs pa'i chos rnams gzugs brnyan dang 'dra ste/ bltar yang snang la yang dag par brtags na dngos po yod pa ma yin pa'o/ /dang zhing zhes pa ni/'di ltar phung po la sogs pa'i chos rnams phung po'i rang bzhin du dmigs su med pas dang ba zhes pa'o/ /dag pa zhes pa ni/ shes bya dang nyon mongs pa'i sgrib pa dang bral ba'o/ /rnyog pa med pa'i sgrib pa dang de dag gi bag chags kyang med ces pa'o//gzung du med cing brjod du med/ /ces pa ni/ de lta bu'i stong pa'i rang bzhin la rnam par shes pa drug gis gzung du med cing tshig gis brjod pa las 'das pa'o/ /rgyu dang las las byung ba ste/ zhes pa ni/ phung po la sogs pa'i chos rnams rang bzhin gyis yod pa'i rang bzhin ma yin gyi/rgyu dang las las byung bas gzugs brnyan dang 'dra ste/ yod pa ma yin pas brjod du med pa la sogs pa'i tshig gong ma rnams dang sbyar ro/ /ngo bo nyid med gnas med pa//de ltar chos 'di shes nas su/ /zhes pa ni/ gzugs brnyan dang 'dra bas rang bzhin med pa'o/ /rgyu dang rkyen las byung bas skad cig ma'i char mi gnas par shes pa ste/ chos rnams kyi mtshan nyid de ltar shes nas de lta bu'i tshul du sgom pa'i shes rab kyis sgoms shig ces pa'o//sems can don ni mnyam med byos/ /zhes pa nas/ chos kyi dung ni bla med pa/ /zhes pa'i bar ni/ de ltar bdag gi don phun sum tshogs nas gzhan gyi don phun sum tshogs par byos shig ces pa ste gong du bshad zin to//sangs rgyas sras su skye zhes pa ni/ khyod de bzhin gshegs pa'i ye shes las skyes so zhes pa'o/ /som nyi yid gnyis mi bya zhing / /dog pa med pa'i sems kyis khyod/ /ces pa ni/ chos kyi 'khor lo bskor zhing sems can gyi don bya ba de ltar yin nam ma yin snyam pa'i the tshom dang yid gnyis mi skye ba dang /'khor rnams la bag tshab med par 'jig rten pa rnams la gsang sngags spyad pa'i tshul gyi chos rab tu sgrogs shig ces pa'o/ /de ltar byas na sangs rgyas la//phan thogs byas pa gzo zhes bya/ /zhes pa ni/ de ltar sems can gyi don byas na sangs rgyas rnams kyi bya ba byas pas byas pa dran zhing sangs rgyas la lan ldon par bshad do zhes pa'o/ /rdo rje 'dzin pa de kun yang / /khyod la rnam pa kun du srung //zhes pa ni/ dbang bskur ba'i dkyil 'khor grwa bzhir rdo rje 'dzin pa bzhi bkod pa dang / pad+ma'i 'dab ma la bzhugs pa'i byang chub sems dpa' de rnams kyang las byas pa don yod do snyam nas srung bar byed do zhes pa'o/ /de nas slob ma de bslangs la//sngags pa snying rjer gyur pa yi/ /zhes pa nas/ /shin tu nges pa'i yid kyis ni/ /de dag thams cad khas blang ngo / /zhes pa'i bar gyis slob ma la dam tshig bstan pa ste/ de yang sngon dam tshig mnos pa dang ma mnos pa gnyis ka la bstan no/ / de la slob dpon dam tshig bzhi dang lnga dag tu ldan la/ las dang bya ba dag la sbyar ba rgyud la sogs pa dang dam tshig shes shing mnos zin pa la bstan ci dgos she na/ 'jig rten na rgyal po rnams kyang rgyal chos su bya ba rnams snga nas kyang shes shing srung mod kyi/nam rgyal por dbang bskur ba'i tshe na/ yang slob dpon la sogs pas bstan zhing gsol bar byed do/ /de bzhin du 'dir yang snga nas kyang dam tshig 'di rnams srung mod kyi/ chos kyi rgyal por dbang bskur ba'i chos kyis bstan par bya'o/ / gnyis su na yang dang yang du bstan na brtan par 'gyur ba'i phyir ro/ /de nas slob ma de bslangs la/ /sngags pa snying rjer gyur pa yi/ /yid kyis nang du bcug nas ni/ /de la dam tshig bstan par bya/ /zhes pa ni/ me long dang 'khor lo la sogs pa bstan pa'i gnas de nas slob ma de bslang ste slob dpon gyis slob ma'i gdugs bzung nas dkyil 'khor dang po'i sgo khyud kyi nang du khyud kyi nang der bzhag nas 'og nas 'byung ba'i dam tshig rnams bstan par bya zhes pa'o//de ring phan chad bu khyod kyis//dam pa'i chos dang byang chub sems/ /srog gi phyir yang nga phyin chad/ /yongs su gtang bar mi bya'o/ /zhes pa ni/ dam pa'i chos btang ba yang rnam pa gsum gyis 'gyur te/ theg pa chen po las log par lta ba dang / chos smra ba la mngon du dbang za zhing skur pa 'debs pa dang /nyin re zhing dam pa'i chos nyan pa dang / sems pa dang / sgom pa dang /'dri ba dang / klog pa dang / mchod pa la sogs pa'i bya ba las gang yang rung ba zhig ma byas na dam pa'i chos gtang ba zhes bya ste/de rnams khyod kyis srog gi phyir yang mi gtong ngo zhes pa'o/ /de nas gzhan yang byang chub kyi sems gtang bar mi bya'o zhes sbyar te/ byang chub kyi sems rnam pa bzhi las sems can rnams la phan pa'i phyir bdag sangs rgyas su gyur cig ces pa'i smon lam gyi sems dang chos thams cad stong pa nyid du rtag tu bsgom par bya'o zhes pa'i 'jug pa'i sems mi gtong ba la bya'o//khyod kyis ser sna mi bya'o zhes sbyar te chos dang nor bdag la bdog cing gzhan la byin par rigs pa las mi sbyin par mi bya'o//gang sems can la gnod pa mi bya'o zhes te/ lus dang / ngag dang / yid gsum gyi sgo nas sems can rnams la 'phral gyi gnod pa dang yun gyi gnod pa mi bya zhes pa'o//slob mas bla ma'i rkang pa la/ /dad cing gus par phyag byas nas/ /shin tu nges pa'i yid kyis ni/ /de dag thams cad khas blang ngo / /zhes pa ni/ gong du slob dpon gyis dam tshig bsgo ba de rnams lus dang /ngag dang / yid gsum gyi sgo nas sgyu med par khas blang ngo zhes pa ste lus kyis/ slob mas bla ma'i rkang pa la/ /dad cing gus par phyag byas nas/ /zhes pa'o/ /ngag gis/ de dag thams cad khas blang ngo //zhes pa ste bka' stsal pa bzhin du bgyi'o zhes smra bar bya'o/ /sems kyis/ shin tu nges pa'i yid kyis ni/ /zhes pa ste slob dpon gyi ngo tsam khas blang ba ma yin gyi/ sems thag pa nas so zhes pa'o/de yan chad kyis snying rje chen po 'byung ba'i dkyil 'khor gyi cho ga rnams rdzogs so// // @#/ /da ni snying rje chen po 'byung ba'i dkyil 'khor der zhugs pa rnams kyi rjes su bsngags pa bshad de/ de yang de nas bcom ldan 'das la gsang ba pa'i bdag po phyag na rdo rjes 'di skad ces gsol to zhes pa nas/bcom ldan 'das de ci'i slad du zhe na/ rigs kyi bu dang rigs kyi bu mo de dag nyid sangs rgyas bcom ldan 'das rnams su blta bar bgyi ba lags so zhes pa'i bar te/ bcom ldan 'das rigs kyi bu'am/ rigs kyi bu mo gang snying rje chen po'i snying po 'byung ba'i dkyil 'khor gyi rgyal po chen po 'di'i dam tshig la bzhugs par gyur pa de'i bsod nams ji tsam zhig mngon par 'dus bgyis par rig par bgyi zhes pa ni dkyil 'khor du zhugs shing dam tshig mnos pa 'ba' zhig la mi bya'o/de bzhin gshegs pa'i sku la sogs pa mnyam pa nyid mi zad pa'i rdo rje'i rgyan de dag gis byin gyis brlabs par gyur pa snying rje chen po'i dkyil 'khor dang /yi ge'i 'khor lo bskor ba'i dkyil 'khor dang / gsang ba'i dkyil 'khor rnams de bzhin gshegs pa'i sku gsung thugs kyi mtshan mar gyur pa ste/de dag nyid la dam tshig gsum zhes bya'o/ /dam tshig la zhugs pa zhes pa de'i rgyu dang rang bzhin dang 'bras bu la sbyor bar shes pa zhes pa ste/ de dag shes yang rgyu shes pa ni sku mi zad pa la sogs pa'i rdo rje'i rgyan gyi rgyu byang chub kyi snying po yin par shes pa'o//rang bzhin shes pa ni sku zad pa la sogs pa nyid shes pa'o/ /'bras bu la sbyor ba ni gsang sngags kyi spyad pa rnams kyis bla na med pa'i byang chub tu 'gyur pa'am/ ji ltar bsams pa 'grub pa la sogs pa 'thob par shes nas de la sbyor ba ste/de lta bur zhugs par gyur pa de'i bsod nams ji tsam zhig mngon par 'dus byas pa zhes zhus pa'o/ /sems dang po bskyed pa nas nye bar bzung ste/ de bzhin gshegs pa las byung ba'i bsod nams mngon par 'dus byas pa ji tsam pa rigs kyi bu'am rigs kyi bu mo de dag gi bsod nams mngon par 'dus byas pa de tsam du rig par bya'o zhes pa ni sa dang po'i sems bskyed pa nas sa bcu gcig tu 'gyur ba'i bsod nams mngon par 'dus byas pa dang mnyam mo zhes pa ste/ci'i phyir zhe na/ dam tshig de lta bu la zhugs pa ni mos pas spyod pa nas zhugs na mtha' de bzhin gshegs pa'i bar 'gyur ba'i phyir ro/ /rigs kyi bu dang rigs kyi bu mo de dag ni de bzhin gshegs pa'i zhal dang thugs las skyes pa'i sras yin par rig par bya'o zhes pa la zhal nas skyes pa ni 'jug pa'i sgo nas skyes pa ste/zhal ni mos pas spyod pa'i sa la sogs pa ste/ de dag mos pas spyod pa'i sa la zhugs pa'i phyir ro/ / skyes pa ni de bzhin gshegs par 'jug pa'o/ /thugs las skyes pa'i sras zhes pa ni de bzhin gshegs pa'i spyod pa dang mthun par spyod pa'i phyir ro/ /rigs kyi bu'am/ rigs kyi bu mo de dag phyogs gang na gnas pa der de bzhin gshegs pas chen po dgongs mi dgos par 'gyur ro zhes pa ni de dag gang na 'khod pa sems can gyi don spyad pa ste/sa phyogs de bzhin gshegs pas sems can gyi don spyad pa chen po mi dgos so zhes pa'o/ /mgrin gcig tu zhes pa ni dus gcig tu smras pa dang / smra ba'i tshig gcig pa dang / smra bar bya ba'i don gcig pa dang /sgra gcig tu 'byin pa'o/ /da ni dkyil 'khor la sogs pa bsrung ba la sogs pa rnams 'chad de/ sngags de rnams kyang de bzhin gshegs pa'i gsung gi 'khor los khams gsum du khyab pa'i byin gyi rlabs su gyur pa ste/ de nas yang bcom ldan 'das rnam par snang mdzad kyis thams cad ldan pa'i 'khor de dag la gzigs nas zhes pa nas dus gsum du chags pa med pa'i stobs dang ldan pa'i gsang sngags kyi tshig dag yod do zhes bya ba'i bar ni khyad par de lta bu dang ldan pa'i gsang sngags kyi tshig yod kyis bshad do zhes pa'i tshig khong nas dbyung bar rig par bya'o//mtha' yas par 'jug pa rgya chen po las 'byung ba zhes pa ni sems can gyi khams thams cad du khyab par 'jug pa zhes pa'o/ /sna tshogs kyi gzugs kyi nor bu dang 'dra ba zhes pa ni yid bzhin gyi nor bu de gzugs sna tshogs su snang la/sems can gyis ci 'dod pa thob pa'i bya ba sna tshogs byed de/ de bzhin du rig pa'i rgyal mo 'di yang sems can rnams kyi don du gzugs sna tshogs ston cing bya ba sna tshogs byed ces pa'o/ /bsod nams kyi tshogs dpag tu med pa bsags pa zhes pa ni de bzhin gshegs pa'i gsung de tshad med pa'i bsod nams kyi tshogs bsags pa las byung ba'i phyir ro//thogs pa med pa'i rtogs pa la gnas pa zhes pa ni sems can gyi khams thams cad ye shes kyi sgrib pa med par mkhyen zhes pa ste/ de bas na dus gsum du chags pa med pa'i stobs dang ldan pa'i gsang sngags kyi tshig ces gsungs so//de nas bcom ldan 'das kyis de'i tshe ljags kyi dbang po 'dod pa thams cad yongs su rdzogs par zhes pa nas/ ting nge 'dzin la snyoms par zhugs so zhes pa'i bar gyis rig pa'i rgyal mo de yongs su bsgrags pa'i phyir ting nge 'dzin la zhugs pa ste/de ltar ting nge 'dzin du zhugs pa yang / bcom ldan 'das ting nge 'dzin de lta bu zhig la zhugs kyis/ ngo mtshar ba zhig 'byung ngo snyam nas sems can rnams lta ba dang nyan pa la gzung bar bya ba'i phyir ro/ /ljags kyi dbang po 'dod pa thams cad yongs su rdzogs pa rnam par sprul pas thams cad dang ldan pa'i sangs rgyas kyi zhing kun du g.yogs nas zhes pa ni ting nge 'dzin der 'jug pa'i phyir de bzhin gshegs pas bskal pa du mar bden pa'i tshig bsags pa las byung ba de bzhin gshegs pa'i skyes bu chen po'i mtshan ljags rgya che ba srab pa kha dog zangs 'dra ba des khyab par byas zhes pa'o//rgya chen po zhes pa ni ting nge 'dzin de'i khyad par te/ khams gsum thams cad du khyab par byed pa'i phyir ro/ /yongs su dag pa zhes pa shes bya dang nyon mongs pa'i sgrib pa med pa'o/ / chos kyi rgyal mtshan zhes pa ni rgyal mtshan ltar gzhan las 'phags pa'i chos ston par brjod pa'o/ /tog ces pa ni ting nge 'dzin de nyid sngags kyi tshig ston pa'i mtshan nyid do/ /rtse mo la lta ba zhes pa ni khams gsum thams cad gzigs pas na rtse mo ltar mtho ba ste/ de dag ni ting nge 'dzin gyi khyad par ro//de bzhin gshegs pa thams cad kyis chos kyi dbyings khyab pa zhes pa ni khams gsum thams cad khyab pa zhes pa'o/ /de bas na sems can gyi khams ma lus pa rnams yongs su bskyab pa zhes bya ste/ bcom ldan 'das de lta bu'i sgra 'byin pa rig sngags kyi rgyal mo gsungs so zhes sbyar ro//sangs rgyas mkhas pa thams cad kyis/ /rig sngags 'di gsungs sod la ni/ /zhes pa nas/ srin po 'jigs pa'i gzugs can ni/ /de dag thams cad 'jig par 'gyur/ /zhes pa'i bar gyis rig pa'i rgyal mo de mthu rjes su bsngags pa ste/sems can thams cad bsrung ba dang / /bskyab cing spa ba'i phyir gsungs te/ /zhes pa ni/ bsrung ba ni gnod pa chung ngu las bsrung ba'o/ /sba ba ni gnod pa 'bring po las sba ba'o/ /bskyab pa ni gnod pa chen po las sems can rnams skyob par byed pa'o//gang gi snying la srung gnas pa/ /de dag la ni 'jigs pa med/ /ces pa ni sems can gang rig pa'i rgyal mo 'di snying la dran na de la 'jigs pa med do zhes pa'o/ /de nas yang bcom ldan 'das kyis chos kyi dbyings rgya chen por byin gyis brlabs nas zhes pa nas de bzhin gshegs pa'i ljags kyi'o zhes pa'i bar gyis dkyil 'khor du dgos pa'i sngags rnams bshad pa ste/de nas yang bcom ldan 'das kyis chos kyi dbyings rgya chen por byin gyis brlabs nas zhes pa la/ chos kyi dbyings la yang rnam pa gnyis te/ zab pa dang rgya che ba'o/ /de la zab pa ni byang chub kyi snying po'i rang bzhin no/ /rgya che ba ni sku la sogs pa mi zad pa'i rdo rje'i rgyan gyi 'khor lo ste/ sku la sogs pa mi zad pa'i 'khor lo de nyid byin gyis brlabs nas zhes pa'o/ /de'i tshe chos kyi mdzod kyi snying po can zhes bya ba'i ting nge 'dzin la snyoms par zhugs so zhes pa ni ting nge 'dzin de'i bye brag ste/chos kyi mdzod ces pa ni dam tshig gi sngags la sogs pa de las 'byung ba'i phyir ro/ /snying po zhes pa ni 'byung ba'i gnas te sngags de rnams 'byung ba'i gnas de yin no zhes pa'o/ /dam tshig la 'jug pa'i rig sngags 'byung ngo zhes pa la dam tshig ces pa ni kun du 'gro ba'am/rtog pa ste de yang sku la sogs pa mi zad pa'i rdo rje'i rgyan te de rtog pa la 'jug pa ni rig pa 'di lta ste/ 'jug pa yang ma thob par 'jug pa dang / thob nas zhig ste 'jug pa'o/ /de la ma thob par 'jug pa ni dkyil 'khor ma mthong ba dang por rig pa 'di blangs te 'jug pa'o//byang chub sems dpa' kun du bzang po la sogs pa rnams kyang rig pa de brjod pa tsam gyis rang bzhin gyis dkyil 'khor de mthong bar 'gyur ro/ /thob nas zhig ste 'jug pa ni dkyil 'khor du zhugs zin pa bar gzhan gyis mchod nas dam tshig gi sngags 'don pa'o//sngags de 'don pa yang de bzhin gshegs pa'i sku dang gsung dang thugs gsum gyi 'khor lo'i yon tan gsang ba de thos pa'o/ /de nas de ma thag tu sangs rgyas kyi zhing thams cad dang byang chub sems dpa'i 'khor gyi dkyil 'khor thams cad du dam tshig la 'jug pa'i rig sngags kyi sgra zhes pa la/sangs rgyas kyi zhing thams cad ces pa ni 'dul ba'i 'gro ba phal rnams la'o/ /byang chub sems dpa'i 'khor gyi dkyil 'khor thams cad du zhes pa ni kun du bzang po la/ sogs pa'i 'khor rnams la'o/ /gang zhig thos nas mkhas pa rnams chos thams cad las 'da' bar mi 'gyur zhes pa la dam tshig ni mkhas pa rnams kyis thos nas lung gi chos dang rtogs pa'i chos gnyis las mi 'da' ba ste/ lung gi chos las mi 'da' ba ni dam pa'i chos yongs su mi gtong ba la sogs pa'i dam tshig rnams mi 'dral ba'o//rtogs pa'i chos las mi 'da' ba ni rang bzhin gyi dkyil 'khor de yid la byed pa mi gtong ba'o/ /chos kyi dbyings kun du 'byung ba'i gsang sngags ni 'jug pa ste slob ma'am/ bdag kyang rung ste stong pa nyid du bsgyur ba'o//rdo rje sems dpa'i byin gyis brlabs pa'i sngags ni gnas pa ste/ ye shes lnga'i rang bzhin nam/ rdo rje sems dpa' nyid kyi skur gnas pa'o/ /rdo rje go cha'i sngags ni ldang ba ste/ sems can thams cad bde ba dang ldan pa'i byams pa chen po'i go cha bgos pa'o/ /de bzhin gshegs pa'i spyan gyi sngags ni slob ma mig g.yogs bkrol te dkyil 'khor bltar gzhug pa'o//byug spos kyi sngags ni de bzhin gshegs pa'i tshul khrims rnam par dag pa'i yon tan las gyur pa'o/ /me tog gi sngags ni byams pa chen po'i yon tan las gyur pa'o/ /bdug spos kyi sngags ni chos kyi dbyings dang rjes su mthun pa'i ye shes kyi nyon mongs pa la sogs pa bsregs pa'i yon tan las gyur pa'o//mar me'i sngags ni de bzhin gshegs pa'i ye shes kyi 'od 'bar ba nam mkha' bzhin du rgya che bar snang ba las gyur pa'o/ /mchod yon gyi sngags ni chos kyi dbyings rnam par dag pa nam mkha' dang mnyam zhing mi mnyam pa las byung ba'o//gtsug tor gyi sngags ni de bzhin gshegs pa'i spyi gtsug bltar mi snang ba nam mkha' ltar mtha' med pa las byung ba'o/ /de bzhin gshegs pa'i go cha'i sngags ni de bzhin nyid thob par byed pa'i lam gyi ye shes 'bar ba des shes bya dang nyon mongs pa'i sgrib pa dag sreg par byed pa las byung ba'o//kun du 'bar ba'i sngags ni 'od kyi dkyil 'khor te/ de yang lam gyi shes rab 'bar bas shes bya dang / nyon mongs pa'i sgrib pa sreg par byed pa las byung ba'o/ /de bzhin gshegs pa'i ljags kyi sngags ni bden pa'i tshig gi chos la gnas pa las byung ba ste/de bzhin gshegs pa'i spyan dang gtsug tor la sogs pa'i sngags de rnams 'og nas 'byung ba'i phyag rgya dang ldan par bya ste/ slob dpon nyid de bzhin gshegs pa'i skur bsgyur na yang sngags de rnams kyis bsgyur bar bya'o//nam snying po 'bru gcig pa las bsgyur na ni 'di rnams kyang mi dgos so/ /slob ma dbang bskur ba na yang bum pa'i chus bkrus pa'i 'og tu sngags de rnams phyag rgya dang bcas par sbyar ro/ /bcom ldan 'das ji ltar na dkyil 'khor bri ba'i tshe na ni bgegs rnams zhi bar 'gyur ba lags zhes pa ni thog ma dkyil 'khor 'dri ba ste/sbyor ba'i tshe dang bris nas slob ma la sogs pa gzud pa'i las byed pa'i tshe dang / slob ma la sogs pa btsud zin pa'i tshe bgegs byung na ji ltar bgyi zhes zhus pa'o/ /gsang sngags sgrub pa'i tshe na yang //log 'dren rnams ni ma mchis 'gyur/ /zhes pa ni dkyil 'khor ma bris kyang rung ste/ spyir sngags sgrub pa la bgegs byung na ji ltar zhi bar bgyi zhes pa'o/ /gsang sngags rnams kyang ji ltar bsgrub//ces pa ni gsang sngags kyi sgrub pa bzlas pa'i yan lag bzhi la sogs pa ji ltar bgyi zhes pa'o//de yi 'bras bu ci 'drar 'gyur/ /zhes pa ni gsang sngags bsgrubs na de'i 'bras bu ci 'dra bar 'gyur zhes pa'o/ /bgegs ni rang gi sems las byung / /zhes pa nas/ tshangs pa'i ma 'on te brgya byin yang / /de yi mod la myur du 'tshig /ces pa'i bar gyis bgegs zhi bar bya ba bshad pa ste/ de yang mtshan ma med pa dang mtshan ma dang bcas pa'o/ /mtshan ma med pa ni byang chub kyi sems bsgom pa'o/ /mtshan ma dang bcas pa ni 'phags pa mi g.yo ba'i gzugs su bsgyur cing sngags dang phyag rgya dang dkyil 'khor du ldan par sbyar ba'o//sngon chad ser sna bstan pa'i phyir/ /bgegs ni rang gi sems las byung / /de yi rgyu ni gzhig pa'i phyir/ /zhes pa nas/ byang chub sems zhes bshad pa yin/ /zhes pa'i bar ni bgegs ni chos dang zang zing gzhan la mi gtong bar 'jungs pa las brten pa'i bag chags rang gi sems la bsags pa las gyur te bgegs de'i rgyu ni ser sna yin no//de gzhig pa'i phyir byang chub kyi sems bsgom pa ni byang chub kyi snying po'i rang bzhin goms par bya ba ste/ stong pa nyid goms par byas na ser sna'i dngos po'am/ bgegs kyi dngos po dag dmigs su med pa'i sgo nas zhi bar 'gyur ro/ /gang tu sems dang sems byung ba'i/ /zhes pa nas/ spros pa thams cad 'gag 'gyur ba/ /zhes pa'i bar ni byang chub kyi sems de nyid kyi khyad par te/ byang chub kyi sems de ni rnam par rtog pa la sogs pa spong zhing 'gog pa'i rang bzhin no zhes pa'o//sngags pas byang chub sems dran zhing / mi g.yo ba ni yid la bzlas/ /de yi phyag rgya bcings nas ni/ /bgegs rnams thams cad 'jig par 'gyur/ /zhes pa ni bgegs bsal ba'i thabs gnyis pa ste/ sngags bas byang chub kyi sems dran par byas nas 'phags pa mi g.yo ba'i sngags yid la bzlas par bya ste/de'i snying gar rlung gi dkyil 'khor gyi nang na yi ge haM 'dug par bsams te yi ge haM gi sgras chos thams cad rgyu dang 'bras bu mi dmigs pa ni byang chub kyi sems dran pa'o/ /sngags zlos pa ni yid la mi g.yo bar zlos pa ste/de ltar sngags de phyag rgya dang ldan par bzlas nas bsdigs na bgegs de 'byer bar 'gyur ro/ /gsang ba pa'i bdag po de la rlung bcing ba nyon cig ces pa nas/ sngon gyi rgyal ba rnams kyis bshad/ /ces pa'i bar ni rlung bcing pa'i cho ga ste/ bdag yi ge a las rnam par snang mdzad du bsgyur nas yid la 'phags pa mi g.yo ba'i snying po haM bsam zhing rlung gi phyogs su dri'i thig le bdun bya ba ni rlung gi rgyal po 'khor dang bcas pa ste/'khor drug gis mtha' bskor nas rgyal po nyid dbus su gzhag la kun kyang ri dgas la zhon pa kha dog sngon por bsams te/de'i steng du kham phor gyis bkab la/ kham phor de ri rab tu bsams te de'i steng du yi ge aM bsam zhing aM las dbang chen gyi dkyil 'khor gser gyi kha dog 'dra ba shin tu khro bar bsam mo/ /sems dpa' chen po chu yi yang / / zhes pa nas/ phyogs kun nas ni langs pa'i sprin/ /de ma thag tu 'jig par 'gyur/ /zhes pa'i bar gyis ni chu'i bgegs bsal ba ste/ bdag nyid yi ger las 'phags pa mi g.yo ba mdog dmar po 'bar bar bsams la sprin gyi gzugs la bris te de ral gri'i phyag rgyas gtubs na 'jig par 'gyur ro//yang na sngags pa mi g.yeng pas/ /de dag phur bus gdab byas te/ /mkhas pa rdo rjer gyur nas su/ /thams cad rdo rje'i phur bus gdab/ /yang na bgegs rnams thams cad ni/ /zhi bar bya ba yang bshad de/ /zhes pa ni chu'i bgegs de nyid bsal ba'i phyir gzhan gsungs pa ste/bdag nyid phyag na rdo rjer bsgyur la/ rdo rje rtse lnga pa'i phyag rgya bcings nas phyag rgya'i rtse sprin gyi gzugs la/ phur bus gdab pa'i thabs su btsugs na zhi bar 'gyur ro/ /yang na bgegs su gyur pa kun zhi bar 'gyur bar bya bar yang bshad do//sngags pa dkyil 'khor dbus gnas nas/ /zhes pa nas/ dogs pa med par 'chi bar 'gyur/ /zhes pa'i bar gyis bgegs zhi bar byed pa'i thabs gzhan gsungs pa ste/ sngags pa 'phags pa mi g.yo ba'i gzugs su bsgyur nas de'i sngags bzlas par bya ste/'phags pa mi g.yo bar bsgyur ba'i snying gar rlung gi dkyil 'khor bsams te de la sngags gnas par bsam zhing sngags pa nyid dkyil 'khor chen po'i sgo khyud kyi nang du 'dug la der bgegs kyi gzugs bris te/ de'i spyi bor rkang pa g.yon pas btsir na bgegs zhi bar 'gyur ro//de yi gzugs brnyan byas nas su/ /zhes pa nas/ de yi mod la myur du 'tshig /ces pa'i bar gyis kyang bgegs bsal ba'i thabs gzhan bshad pa ste/ bgegs kyi gzugs byas la dug dang ske tshe bsres pas bskus te me la bskams na bgegs zhi bar 'gyur ro//de nas bcom ldan 'das la phyag na rdo rjes 'di skad ces gsol to zhes pa nas/ byang chub sems dpa' gsang sngags kyi sgo nas byang chub sems dpa'i spyad pa spyod pa rnams kyis kyang rang rang gi gnas la gnas nas don thams cad ba sgrub par bgyi'o zhes pa'i bar ni sngar bgegs bsal ba bshad pa'i skabs su 'phags pa mi g.yo ba rlung gi kha dog tu gnas te bskrad pa dang /me'i kha dog tu bsgyur te bgegs bskrad pa dang / kham phor la dbang chen gyi dkyil 'khor bsams nas rlung bcing bar bshad pa'i don phyag na rdo rjes mjal ba ni zhi ba dang rgyas pa'i las bya ba rnams la/lha rnams rang rang gi dkyil 'khor la gnas nas zhi ba la sogs pa'i las rnams byed par mjal te/ de ci'i slad du zhe na/ dam tshig gi tshul gyis de lta bu yin te lha rnams rang rang gi dkyil 'khor la gnas par sbyar na gang du bsams pa de byin gyis kyang rlob pa las gang bya ba rnams kyang de bzhin gshegs pas ji skad gsungs pa bzhin du byed par 'gyur te/de bas na sngags pa rnams kyang lha'i kha dog ci 'dra bar der bsgyur te las rnams bya bar mjal to zhes pa'o/ /bcom ldan 'das kyis bka' stsal pa/ gsang ba pa'i bdag po de de bzhin te/ de skad smras pa de de bzhin no zhes pa ni phyag na rdo rjes mjal ba de phyin ci ma log par mjal to zhes pa'o/ /gang gis kha dog gang gsungs pa/ /de nyid de yi dkyil 'khor te/ zhes pa ni lha rnams kyi kha dog ci 'dra ba de'i dkyil 'khor yang de 'dra bar bya'o zhes pa ste/lha'i kha dog ser po ni dbang chen gyi dkyil 'khor la sbyar bar bya zhing / lha'i kha dog dkar po ni chu'i dkyil 'khor la sbyar bar bya/ lha'i kha dog dmar po ni me'i dkyil 'khor la sbyar bar bya la/ lha'i kha dog sngon po dang nag po ni rlung gi dkyil 'khor la sbyar bar bya ste/de rnams ni so so'i dkyil 'khor mtha' gcig tu'o/ /de las mchod pa'i yo byad la sogs pas gzhan du bsgyur na rgyal ba'i lha yang zhi bar 'gyur/ zhi ba yang khro bo la sogs par dgos pa'i dbang gis bsgyur du rung bar shes par bya'o/ /lha la la ni kha dog thams cad dang ldan pa ste/dper na 'phags ma sgrol ma la sogs pa kha dog ljang gu yin pas kha dog thams cad dang ldan pa ste/ dkyil 'khor kun dang las thams cad byed par shes par bya'o/ /de bzhin du dgos pa'i dbang gis mchod pa'i yo byad la sogs pas bsgyur na rang bzhin so sor nges pa las kyang las thams cad byed par shes par bya'o//de la gsang ba pa'i bdag po ma 'ongs pa'i dus na sems can blo zhan pa zhes pa nas/ des sems can rnams la phan par bzhed nas 'di dag thams cad bshad do zhes bya bar ni mi shes so zhes pa'i bar gyis ni lha rnams kyi kha dog gang yin pa dkyil 'khor yang de yin par gsungs pa na/dbang chen dang me'i dkyil 'khor la sogs pa ni 'jig rten pa'i rgyud la yod kyi 'jig rten las 'das pa'i rgyud bya ba'i rgyud dang rnal 'byor gyi rgyud kun las mi 'byung bas na 'di ni sangs rgyas kyis gsungs pa ma yin no zhes zer te/gang 'jig rten gyi rgyud rnams kyang sangs rgyas bcom ldan 'das thams cad mkhyen pas sems can rnams so so'i dad pa dang rjes su mthun par bshad do zhes mi shes pa'i phyir ro zhes pa ste/ de ci'i phyir de ltar mi shes she na/blo zhan cing dad pa chung ba la sogs pa'i nyes pas bskal pa'i phyir ro/ /chos rnams kyi ni chos kyi mtshan/ /blun po des ni de mi shes/ /chos rnams kun gyi mtshan nyid ni/ /stong pa nyid du yang dag gsungs/ /zhes pa ni de dag ni bdag nyid kyang ma rung la gzhan yang phung bar byed pa yin no zhes bya ba dang sbyar ro//sngags pa rtag tu der gnas nas/ /rab tu nges par las bya'o/ /zhes pa ni sngags pas stong pa nyid la gnas nas zhi ba la sogs pa'i las bya'o zhes pa ste/ stong pa nyid la gnas nas las bya ba yang gcig ni mtshan ma med pa'i ting nge 'dzin la gnas nas de nyid kyis grub pa thob par 'gyur ba'o//gcig ni stong pa nyid kyi ting nge 'dzin mngon du byas nas de las langs te bzlas la sogs pa byas nas grub pa thob pa'o/ /de dag ni bgegs zhi bar bya ba'i skabs so// // da ni kun du bzang po la sogs pa byang chub sems dpa' de rnams thog ma mos pas spyod pa'i sa la zhugs pa'i tshe rang rang gis rnam par grol ba'i sgo gsang sngags kyi tshig bstan pa de nyid la goms par byas pas sa bcu dang sa bcu gcig la sogs pa yongs su rdzogs pa'i rang rang gi rnam par thar pa'i sgo ji ltar rtogs pa'i gsang sngags rnams snying rje chen po 'byung ba'i dkyil 'khor du dgod pa'i phyir smra bar 'dod nas bcom ldan 'das la gsol ba ste/de nas phyag na rdo rje la sogs pa rdo rje 'dzin pa de dag ces la sogs pas so/ /de nas bcom ldan 'das rnam par snang mdzad kyis byang chub sems dpa' de dag dang rdo rje 'dzin de dag la mi nyams pa'i chos nyid du byin gyis brlabs zhes pa ni byang chub sems dpa' de rnams mi 'gong ba'am/spobs pa skye bar byin gyis brlabs zhes pa'o/ /sangs rgyas kyi rgyan zhes pa ni byang chub sems dpa' kun du bzang po ting nge 'dzin du zhugs na spu'i khung bu re re nas sangs rgyas re re 'byung ste/de ltar lus las sangs rgyas grangs med pa 'byung bar 'gyur ba de nyid la rgyan zhes bya'o/ /de bzhin du ting nge 'dzin rnams byang chub sems dpa' so so'i yon tan dang rjes su mthun par shes par bya ste/de bzhin du gsang sngags rnams kyang de bzhin gshegs pa'i yon tan las byung zhing byang chub sems dpa' de rnams kyi so so'i rnam par grol ba'i sgo ste/ de dag nyid kyi tshig tu byin gyis brlabs par shes par bya'o/ /de nas yang bcom ldan 'das rnam par snang mdzad kyis thams cad dang ldan pa'i 'khor 'dus pa la gzigs nas zhes pa nas/rnam rtog rnam par spangs te spyad pa spyod par gyis zhes pa'i bar du sngar yi ge a rnam pa bzhi byang chub dang spyod pa dang kun du sangs rgyas pa dang mya ngan las 'das pa'i ting nge 'dzin gyi sgo gsod pa ste/de nyid kyi don byang chub dang spyod pa dang kun du sangs rgyas pa dang mya ngan las 'das pa'i rang bzhin yang bstan pa ste/ de bstan pa yang 'dul ba'i 'gro ba rnams la la ni yi ge a la sogs pa'i yi ge 'bru'i sgo nas goms par byed la/ la la ni de'i don gyi sgo nas goms par byed de/de bas na don 'di bstan pas byang chub la sogs pa'i rang bzhin khong du chud par bya bar don gyi sgo nas bstan to/ /re ba thams cad yongs su rdzogs par byed pa dus gsum mtha' yas pa'i sgo nges pa'i ye shes yongs su rdzogs par byed pa'i chos kyi tshig rnams gsungs so zhes pa la re ba thams cad yongs su rdzogs par byed pa dus gsum mtha' yas pa'i sgo nges pa'i ye shes ni de bzhin nyid kyi ye shes la bya ste/re ba thams cad yongs su rdzogs par byed pa zhes pa ni ye shes rnam par mi rtog kyang smon lam gyi shugs kyis sku mi zad pa'i rdo rje'i rgyan la sogs pa thams cad du khyab par sems can thams cad la rjes su mthun pa'i don byed do zhes pa'o//dus gsum mtha' yas pa'i sgo nges pa'i ye shes yongs su rdzogs par byed pa zhes pa ni nyan thos dang rang sangs rgyas dang byang chub sems dpa' la sogs pa'i ting nge 'dzin rnam pa mang po'i sgo nas stong pa nyid du 'jug cing ye shes nges par byed pa'o//yongs su rdzogs par byed pa'i tshig rnams yongs su zhes pa ni ye shes de nyid yongs su rdzogs par byed pa'i tshig ste/ de yang / mkha' ltar dri med ngo bo nyid med pa/ /zhes pa la sogs pa'i tshigs su bcad pa rnams te/ de rnams kyi don khong du chud na ye shes de yongs su rdzogs par 'gyur ba'i phyir ro//de la/ mkha' ltar dri med ngo bo nyid med pa/ /zhes pa ni byang chub kyi rang bzhin te ji ltar nam mkha' la rdul la sogs pa'i sgrib pa'i dri ma med cing sngon po la sogs pa'i ngo bo nyid du gzung du med pa de bzhin du byang chub kyi rang bzhin la yang nyon mongs pa la sogs pa'i sgrib pa'i dri ma med cing de'i rnam pa ye shes kyi gzung du med pa'o zhes pa'o//rnam mang ye shes sna tshogs sbyin par byed/ /ces pa ni spyod pa'i rang bzhin te/ mngon par byang chub pa nyid kyi tshe na sngon gyi smon lam gyi shugs kyis mi zad pa la sogs pa'i rdo rje'i rgyan rnams sems can rnam pa mang po la ji ltar rjes su mthun par lung gi chos dang rtogs pa'i chos dag ston te/chos de dag bstan na sems can rnam pa sna tshogs pa de rnams kyis ye shes thob par 'gyur ba'i phyir ro/ /gnyis su na rgyu'i cho ga'i spyod pa la yang bya ste/rnam par dag pa'i chos de nyid la 'jug pa'i tshe kun rdzob dang don dam pa'i ye shes thob par byed pa'i phyir ro/ /ngo bo nyid kyis rtag tu stong pa nyid/ /ces pa ni kun du sangs rgyas pa'i rang bzhin la bya ste/ phyi gzung bar bya ba'i chos rnams kyang rang bzhin med na/'dzin par byed pa'i ye shes kyang med de/de ltar gzung ba dang 'dzin pa'i cha gnyis ka spangs pa'i rang bzhin phyin ci ma log par yongs su grub pa'i mtshan nyid la bya'o/ /rkyen la rag las zab cing blta bar dka'/ /zhes pa ni mya ngan las 'das pa'i rang bzhin la bya ste/rkyen la rag las zhes pa ni gzhan gyi dbang gi mtshan nyid kyi ye shes mar me'i rgyun dang 'dra ba skad cig ma'i rgyun mi 'chad par rten cing 'brel par 'byung ba'i rang bzhin zhes pa'o/ /zab cing blta bar dka' zhes pa ni zab pa ni gzung ba dang 'dzin pa'i cha gnyis spangs pa stong pa nyid kyi rang bzhin no//de bas na stong pa nyid kyi rang bzhin de la sngon po la sogs pa'i rnam pa med pas blta bar dka' zhes pa'o/ /khyad par 'gro ba rnams la rtag pa ru/ /zhes pa nas/ de las go 'phang rnyed dka' gzhan med do/ /zhes pa'i bar ni byang chub kyi rang bzhin rnam par dag pa'i chos nyid de la 'jug cing goms par byed pa de'i 'bras bu thob pa'i rim pa bshad pa ste/khyad par 'gro ba rnams la rtag pa ru/ /rnam par bsams pa'i 'bras bu mchog sbyin byed/ /ces pa ni rnam par dag pa'i chos nyid de la nyan pa dang bsams pa dang goms par byas na 'jig rten gyi rgyal po dang longs spyod la sogs pa bde ba'i mchog thob par 'gyur ro zhes pa'o//ji ltar nam mkha' chags med spyod yul can/ /'gro ba kun gyi gnas su gyur pa ltar/ /de bzhin rnam par dag pa'i chos nyid 'di/ /srid gsum ma lus 'byor pa 'byung bar byed//ces pa ni rnam par dag pa'i chos nyid de la mos pas spyod pa'i sa la gnas nas goms par byas na khams gsum gyi dbang po mngon par mtho ba'i mtshan nyid thob par 'gyur ro zhes pa ste/ rnam par dag pa'i chos rnam par mi rtog kyang de lta bu'i 'bras bu 'byung ste dag pa ni dper na nam mkha' rnam par mi rtog kyang 'gro ba thams cad kyi gnas byed pa bzhin du rnam par dag pa'i chos nyid de yang rnam par mi rtog bzhin du khams gsum gyi 'byor pa 'byung bar byed de//de bas na/ ji ltar nam mkha' chags med spyod yul can/ /'gro ba kun gyi gnas su 'gyur pa ltar//de bzhin rnam par dag pa'i chos nyid 'di/ /srid gsum ma lus 'byor pa 'byung bar byed/ /ces gsungs pa yin no/ /mchog skyes mkhas pa gang zhig 'dir spyod na/ /rgyal ba kun dang spyod yul gcig par 'gyur/ /zhes pa ni sa rab tu dga' ba la gnas pa rnams kyis goms par byas na de'i 'bras bu sangs rgyas rnams dang spyod yul gcig par 'gyur ro//rgyal bas ji skad gsungs pa'i chos nyid ni/ /shin tu rnam dag thams cad snang byed pa/ /de las go 'phang rnyed dka' gzhan med do/ /zhes pa ni sangs rgyas thob pa ni 'bras bu ste/sangs rgyas pa la rnyed par dka' ba gzhan med cing / 'jig rten gyi khams thams cad du thams cad mkhyen pa'i ye shes kyis khyab par snang bar mdzad pa'i phyir ro/ /rgyal bas ji skad gsungs pa'i chos nyid ni/ /shin tu rnam dag ces pa ni de lta bu'i chos nyid rnam par dag pa bcom ldan 'das rnam par snang mdzad kyis gsungs so zhes pa ni sdud pa po'i tshig go//yangs pa'i chos ni zab la 'grib med cing / /mnyam med 'jig rten phan byed de la ni/ /rnam dag rnam par sbyangs te spyad par gyis/ /zhes pa la de lta bu'i rang bzhin gyi chos de la rnam par rtog pa spangs te spyad par gyis shig ces pa'o//yangs pa'i chos ni zab la 'grib med cing / /zhes pa ni chos nyid rnam par dag pa de rgya che zhing mi 'gyur bar yongs su grub pa'i mtshan nyid yin pas 'grib pa'am/ 'gog pa med ces pa ste/ chos nyid de'i rang bzhin spyir bstan pa'o//gsang ba pa'i bdag po de la 'dod pa'i khams kyi dbang phyug la myos par byed pa zhes bya ba'i rig sngags yod de zhes pa nas/ 'di lta ste dper na gsang sngags kyis ni me'i tsha ba med par byas nas grang bar byed par 'gyur ro/ /rigs kyi bu dag dpe'i tshig 'di rnams kyis gsang sngags kyi mthu la mngon par dad par bya'o zhes pa'i bar gyis sngags kyi rgyu dang rang bzhin dang mthu dang 'bras bu rnams bshad la/rgyu dang rang bzhin ni gong du yi ge la sogs pa'i nang du bshad do/ /skabs 'dir ni sngags kyi mthu bstan par bshad de/de yang sgrub pa po yid gnyis dang the tshom can gang dag bsgrub pa la the tshom du gyur pa dang / grub pa thob bam mi thob snyam du the tshom za ba 'og nas 'byung ba'i sngags kyi mthu rnams bstan pas bsal te/ de la rab ni 'dod pa'i khams kyi dbang phyug chen po'i rig sngags kyis lha'i bu thams cad spyod par 'gyur ba dang gzugs khams kyi dbang phyug chen po la yid mgyogs zhes bya ba'i rig sngags las byung ba'i mthu ste gnyis bshad do//mig 'phrul mkhan gyi sngags kyis spyod pa dang lha ma yin gyi sngags kyis sgyu ma la sogs pa rnams mthu 'bring du bshad do//dug dang rims la sogs pa med par byed pa dang ma mo rnams kyi sngags kyis 'chi bar byed pa dang / me'i tsha ba med par byas nas grang por byed pa rnams mthu tha mar bshad do/ /gsang ba pa'i bdag po de la 'dod pa'i khams kyi dbang phyug la myos par byed pa zhes bya ba'i rig sngags yod de zhes pa ni 'dod pa ni gzugs dang sgra dang dri dang ro dang reg bya rnams la spyod pa'o//khams kyi dbang phyug la zhes pa ni 'dod pa'i khams kyi lha'i gnas rim pa drug gi dbang phyug la mos par byed pa zhes bya ba'i rig sngags yod de/ khams der skyes pa rnams rang bzhin gyi rig sngags dang ldan pas rig sngags de bsams pa'am/brjod pa tsam gyis 'dod pa lnga'i longs spyod dang ldan par 'gyur ro/ /des 'dod pa na spyod pa'i lha'i bu thams cad myos pas brgyal bar byed cing zhes bya ba la myos pa zhes pa ni mi dran zhing dbang po mi gsal bar gyur pa ni ma yin gyi rig sngags de'i mthus lha'i bu rnams 'dod pa lnga'i longs spyod la chags shing zhen par 'gyur te/'dod pa'i dbang du gyur pas na 'dod pas myos pa zhes bya'o/ /me tog mang po sna tshogs dang ldan pa'i sa phyogs nyams dga' ba rnams kyang ston zhes pa ni de la me tog sna tshogs ni ldum ra dang me tog gi tshal dang yid du 'ong ba'i skyed mos tshal dang /me tog dang tshal de dag kyang dri zhim zhing kha dog shin tu mdzes pas brgyan pa'o/ /sa phyogs nyams dga' ba'i rab dang rin po che sna tshogs kyis brgyan pa'i lding khang la sogs pa ston pa'o//yongs su spyad pa dang nye bar spyad pa rnam pa tha dad pa sna tshogs rnams kyang mngon par sprul nas zhes pa ni 'dod pa rnam pa lnga'i longs spyod dang nye bar spyad pa ste/ bza' ba'i kha zas dang lha'i gos rab tu bzang zhing 'jam pa la sogs pa rnams so/ /mngon par sprul pa ni gnas de na lha'i bu rnams rang rang gi rig sngags kyi mthus 'dod pa rnam pa lnga'i longs spyod 'byung ba la bya'o//gzhan 'phrul dbang byed kyi lha rnams la yang sbyin la bdag nyid kyang yongs su spyod do zhes pa de la gzhan 'phrul dbang byed ces pa ni rang gi mthu las 'dod pa rnam pa lnga'i longs spyod 'byung ba rnams lha'i bu mo rnams la'ang sbyin la de dag kyang yongs su spyod do//de bzhin du byang chub sems dpa' yang de bzhin gshegs pa la mchod pa la sogs pa yid bzhin du spyod kyang bdag nyid de la ma chags par spyod do/ /'di lta ste/ lha'i dbang phyug chen po la yid mgyogs zhes bya ba'i rig sngags yod de zhes bya ba ni rig sngags de bsams pa tsam gyis sems can gyi don bya ba dang ji ltar 'dod pa'i gnas de dag tu skad cig yud tsam gyis phyin par 'gyur bas na yid mgyogs zhes bya'o//des stong gsum gyi stong chen po'i 'jig rten gyi khams su sems can gyi dgos pa byed cing zhes pa/de la stong gsum gyi stong chen po ni steng 'og kun la bya ba'am/ de ma yin par gzugs kyi khams stong gsum gyi stong chen po'i 'jig rten gyi khams la bya la/ stong gsum ni gzhung las grags pa'o//sems can gyi dgos pa ni gzugs kyi sems can rnams la rig sngags de'i mthus 'og nas 'byung ba'i longs spyod la sogs pas sems can rnams kyi don byed pa'o/ /nye bar spyad pa dang yongs su spyad pa thams cad kyang mngon par sprul nas zhes pa ni de la kha zas kham gyis za ba dang dri la sogs pa khyad par du mi spyod la/longs spyod gzhan ni lhag ma dang 'dra'o/ /gnas gtsang ma'i rigs kyi lha'i bu rnams la yang sbyin la bdag nyid kyang kun du spyod do zhes pa gzugs kyi khams de na gtsang ma'i rigs kyi lha rnams la yang sbyin la/ bdag nyid kyang rig sngags kyi mthu las byung ba'i longs spyod la spyod pa'o//'di yan chad ni rig sngags kyi mthu rab tu bstan pa yin no/ /'di lta ste dper na mig 'phrul mkhan ni gsang sngags rnams kyis kun dga'i ra ba dang mtsho dang 'bab chu dang mi la sogs pa rnam pa tha dad pa sna tshogs ston to zhes pa ni mig 'phrul gyi sngags kyi mthu bshad de de yang gang zhe na/mig 'phrul gyi sngags mkhan ni gsang sngags rnams kyis zhes pa ni dbang po la sogs pa'i lha rnams dang lha ma yin 'thab pa'i tshe na/ sngags kyis grangs med pa'i lha'i dbang po rnams su sprul nas lha ma yin rnams kyi mig bslu ba dang /gang la brgal pa'i gtol med par mig 'phrul gyi mthus byed pa'o/ /mig 'phrul gyi sngags kyi mthu las kun dga'i ra ba bzang po dang / mtsho dang 'bab chu dang mi la sogs pa sngags kyi mthus mngon par spyod cing ston to/ /'di lta ste dper na lha ma yin rnams ni gsang sngags kyis sgyu ma rnams ston to zhes pa ni lha ma yin gyi sngags kyi mthu bshad de/de yang gang zhe na/ lha ma yin dang dbang po la sogs pa'i lha rnams 'thab pa'i tshe na lha ma yin gyi sngags kyi mthus lha ma yin grangs med par sprul pa dang / sgra gcan gyi gzugs lha ma yin gyi gnas nas ri'i rgyal po ri rab las 'phags pa'i lus su gyur nas lha rnams skrag pa dang mthus byin gyis brlabs pa'i sgyu ma rnams ston pa'o//gong du dbang po la sogs pa'i mi 'phrul gyi sngags kyi mthu bshad pa dang / lha ma yin gyi sngags kyi mthu bshad pa gnyis ni mthu 'bring po bshad pa zin no//'di lta ste dper na gsang sngags dag gis ni dug dang rims la sogs pa med par 'gyur ro zhes pa ni/ mi rnams kyi sngags kyi mthu bshad de/ de yang gang zhe na/ de sngags de nyid kyi mthus dug thams cad dang rims la sogs pa'i nad thams cad med par byed pa la bya'o//'di lta ste dper na ma mo zhes bya ba'i lha mo rnams ni gsang sngags kyis sems can rnams la nad 'go ba gtong ngo zhes pa ni ma mo bdun po rnams kyi gsang sngags kyi mthu bshad de/ de yang gang zhe na/ dbang po la sogs pa'i lha rnams dang lha ma yin rnams 'thab pa'i tshe lha rnams kyis lha ma yin thob par ma gyur na dbang po dang tshangs pa la sogs pa so so las ma mo zhes pa'i lha mo bdun sprul te/lha mo bdun po de rnams kyis mtshon gyis btab pa'i khrags lam lhung bar 'thungs pa dang gdong lha ma yin rnams zhi bar 'gyur ba la yang bya la/ bdun po'i gsang sngags des gnod pa'i las rnams byed pa'i tshe ma mo rnams kyi sngags kyi tshig bzhin byas na sems can 'chi bar byed pa dang lha dang lha ma yin du 'thab pa'i tshe 'jig rten na sems can dge ba'i spyod pa mang zhing bsod nams che na lha rnams rgyal bar 'gyur la/dge ba spyod pa nyung zhing mthu chung na lha ma yin rnams rgyal bar 'gyur te/de la lha rnams rgyal bar gyur na gang zla ba dang nyi ma gzas zin pa'i dngos grub rnams kyang 'thob/ lha ma yin rnams rgyal na sems can gyi khams su sngags kyi mthus sems can rnams 'chi bar byed pa'i rims rnams 'byung bar byed pa'o//'di lta ste dper na gsang sngags kyis ni me'i tsha ba med par byas nas grang bar byed par 'gyur ro zhes pa ni sngags kyi mthus me 'bar ba'i nang du zhugs kyang tshig pa dang gdung ba la sogs pa med cing chu'i nang du 'gro ba dang 'dra ste grang bar 'gyur ro/ /rigs kyi bu dag dpe'i tshig 'di rnams kyis gsang sngags kyi mthu la mngon par dad par bya'o zhes pa ni gong du mthu rab 'bring rnam pa gsum bstan pa la gang ma dad pa rnams dad par 'gyur ba dang //the tshom dang yid gnyis za ba rnams kyi the tshom bsal nas gsang sngags kyi mthu la mngon par dad par bya'o zhes bskul ba'o//gsang sngags kyi mthu de yang gsang sngags rnams las byung ba yang ma yin zhes pa nas/ rtag tu rgyun mi 'chad par gsang sngags kyi tshul gyi rjes su 'jug par bya'o zhes pa'i bar gyis sngags kyi rang bzhin bshad de/ de yang gang zhe na/ gsang sngags kyi mthu de yang gsang sngags rnams las byung ba yang ma yin pa ni/ gsang sngags kyi mthu de gsang sngags kyi yig 'bru las byung ba yang ma yin te/ gal te gsang sngags kyi yig 'bru la yod na ni gsang sngags kyi glegs bam la sogs pa rkun pos kyang mi thob/mes kyang tshig par mi 'gyur te de bas na sngags kyi yi ga 'bru las mthu 'byung ba yang ma yin no/ /rdzas la 'jug pa yang ma yin zhes pa ni ral gri dang 'khor lo dang / ril bu la sogs pa'i rdzas rnams la ste/ rdzas de rnams la gsang sngags kyi mthu zhugs nas grub par 'byung ba yang ma yin zhes pa'o//sbyor ba po las dmigs pa yin zhes pa ni sgrub pa la 'jug pa'i sbyor ba de nyid las gsang sngags kyi mthu 'byung ba yang ma yin te/ gal te sgrub pa la 'jug pa las byung ba yin na ni grub zin pa yin pas mi dgos so zhes pa'o/ / rigs kyi bu dag 'on kyang gsang sngags kyi byin gyi rlabs kyis chos nyid 'byung ba las 'da' bar yang mi 'gyur te/ dus gsum las 'das pa'i phyir dang rten cing 'brel bar 'byung ba zab mo bsam gyis mi khyab pa las mngon par grub pa'i phyir ro zhes pa na de bzhin gshegs pa rnams 'jig rten du byung yang rung ma byung yang rung ste gsang sngags kyi chos nyid ni thams cad du gnas pa'o zhes bshad de/rigs kyi bu dag kyang gsang sngags kyi byin gyi rlabs kyis chos 'byung ba las 'da' bar yang mi 'gyur te/ dus gsum las 'das pa'i phyir zhes pa ni dus gsum ste snga ma 'das pa'i dus na grub pa'i rang bzhin yin na ni ma 'ongs pa dang da ltar gyi dus na grub par mi 'gyur la/gal te ma 'ongs pa'i dus dang da ltar gyi dus na grub pa'i rang bzhin yod na ni snga ma 'das pa'i dus na yang grub par mi 'gyur te/ de bas na sngags grub pa'i rang bzhin ni dus gsum gang la yang gnas pa ma yin pa'i phyir dus gsum las 'das pa'o//rten cing 'brel bar 'byung ba zab mo bsam gyis mi khyab pa las mngon par grub pa'i phyir ro zhes pa ni dper na me tog sna tshogs dang 'dra ste/ sa bon dang myu gu dang lo ma'i tshe kha dog sngon po la sogs pa gzhan la/me tog du gyur pa'i tshe kha dog gzhan du gyur pa lta bus rtswa rtsub mo dang sngon po la sogs pa zos kyang 'o ma 'jam zhing dkar ba'i rang bzhin du gyur pa lta bu ste/ de lta bas na sngags kyi dngos grub ni gang la yang mi gnas mod kyi zab mo bsam gyis mi khyab pa'i chos nyid dang rgyu dang rkyen gcig tu tshogs pa sngags kyi chos nyid kyis byin gyi rlabs las grub pa rab 'bring rnam pa gsum la sogs pa thob par 'gyur ro//sngags kyis byin gyis brlabs pa'i chos nyid las 'byung ba las 'da' bar yang mi 'gyur te zhes pa ni byin gyis rlob pa yang mi 'gyur bar bshad de/de la byin gyis brlabs zhes pa gang grub pa nyid la chos nyid kyis byin gyis rlob cing grub pa thob pa de dag brtan zhing mi 'gyur ba'o/ /rigs kyi bu dag de lta bas na chos bsam gyis mi khyab pa'i ngo bo nyid du rtogs par bya'o zhes gsungs pa yin no//de nas yang bcom ldan 'das dus gsum du chags pa med pa'i stobs kyi gzhi byin gyis rlob pa zhes pa nas/ /yang dag par rdzogs pa'i sangs rgyas kyi snying po'i tshig gis mtshan pa rnam par rig pa'i dbyangs kyi sgra gcig nas gcig tu mngon par grag go zhes pa'i bar gyis byang chub kyi rang bzhin yan lag bzhi dang ldan pa'i rten ston pa'i yi ge a rnam pa bzhi bcom ldan 'das kyis gsungs pa ste/a rnam pa bzhi sngar yang bshad na/ ci'i phyir 'dir yang bzlas te gsungs she na/ sngar bshad pa ni don dam pa'i ting nge 'dzin gyi sgor gyur pa'i yig 'bru re re ba spyir bshad pa ste/'dir yang bzlas te gsungs pa ni gsang sngags sgrub pas de'i don bsgom zhing bzlas par bya ba'i phyir khyad par du gsungs pa yin no/ /de la dus gsum du chags pa med pa'i stobs kyi gzhi byin gyis rlob pa de bzhin gshegs pa'i gnas bsam gyis mi khyab pa'i rgyan rnam par dag pa'i snying po can zhes bya ba'i ting nge 'dzin la snyoms par zhugs so zhes pa ni a rnam pa bzhi po de gsungs pa'i phyir bcom ldan 'das ting nge 'dzin du zhugs pa ste/de rnams kyis kyang don dam pa dang kun rdzob kyi don rnam pa gnyis ston te/de la don dam pa ston pa ni yi ge a de'i sgo nas de bzhin nyid ston pa'o/ /kun rdzob tu ston pa ni yi ge a de las skyes bu chen po'i mtshan sum cu rtsa gnyis 'byung bar bstan pa ste/ gang gi phyir yi ge brgya ba'i le'u a 'di rnams las ka la sogs pa sum cu rtsa gnyis spros par bshad de yi ge sum cu rtsa gnyis po de rnams kyang skyes bu chen po'i mtshan sum cu rtsa gnyis su blta'o zhes 'byung ba'i phyir ro//ting nge 'dzin 'di las don rnam pa gnyis su ston pa'o/ /de la dus gsum du chags pa med pa'i stobs kyi gzhi zhes pa ni don dam pa ni de bzhin nyid de yi ge a rnams kyi rten du bstan par bya ba ste/dus gsum du chags pa med pa'i stobs zhes pa ni de bzhin nyid kyi rang bzhin mi 'gyur bar yongs su grub pa'i mtshan nyid yin pas nam mkha' dang 'dra ba ste dus gsum du thogs pa med pa'i mthu dang ldan pa zhes pa'o//gzhi zhes pa ni de bzhin nyid kyi rang bzhin te/ yi ge a'i 'brur byin gyis rlob pa ste/ 'khor ba'i mtha' ji srid kyi bar du yi ge a rnams su lhag par gnas zhes pa'i don te de ni don dam pa bstan pa'o/ /de bzhin gshegs pa'i gnas bsam gyis mi khyab pa'i rgyan rnam par dag pa zhes pa ni kun rdzob tu yi ge a las skyes bu chen po'i mtshan sum cu rtsa gnyis rnams byung bar bstan pa ste/de bzhin gshegs pa'i gnas bsam gyis mi khyab pa zhes pa ni de bzhin gshegs pa'i sku bsam gyis mi khyab pa ste/ de bzhin gshegs pa'i sku las rdzu 'phrul sna tshogs bsam gyis mi khyab pa 'byung ba'i phyir ro//rgyan zhes pa ni skyes bu chen po'i mtshan sum cu rtsa gnyis rnams te mtshan de rnams te de a bzhi po 'di las byung bas na rgyan zhes pa a 'di rnams nyid la bya'o/ /rnam par dag pa zhes pa ni mtshan sum cu rtsa gnyis po de rnams yul na gnas pa dang gsal ba nang kun du rdzogs pas na rnam par dag pa zhes bya'o//snying po can zhes pa ni 'byung ba'i gnas zhes pa'i don te/ de lta bu'i don dam pa dang kun rdzob kyi don ston cing 'byung ba'i yi ge a rnam pa bzhi po ting nge 'dzin 'di las byung bas na ting nge 'dzin de dus gsum du chags pa med pa'i stobs kyi gzhi byin gyis rlob pa de bzhin gshegs pa'i gnas bsam gyis mi khyab pa'i rgyan rnam par dag pa'i snying po can zhes bya'o//chos kyi dbyings ma lus pa ji snyed yod pa rnam par rig par byed pa'i sgra rnams las chos kyi dbyings kyi gnas kyi stobs/mi mnyam pa dang mnyam pa'i stobs/ yang dag par rdzogs pa'i sangs rgyas kyi mos pa las byung ba gnas skabs bzhi dbyangs gcig las byung bas chos kyi dbyings thams cad khyab par byas te nam mkha' dang mnyam par gyur nas byung ba zhes pa la/chos kyi dbyings ma lus pa ji snyed yod pa rnam par rig par byed pa'i sgra zhes pa ni gnas skabs bzhi dbyangs gcig las byung ba zhes pa dang 'brel te/ a bzhi po 'di ma skyes pa'i sgra 'byung ba las rnam par rig pas na bum pa la sogs pa'i chos rnams kyi tshig thams cad kyang ma skyes pa'i tshig tu 'du bar 'gyur ba'i a bzhi po chos kyi dbyings kyi gnas kyi stobs zhes bya ba la sogs pas bye brag tu gsungs te/a de rnams chos kyi dbyings kyi tshig tu gyur pas na chos kyi dbyings kyi gnas zhes bya'o/ /stobs zhes pa ni chos kyi dbyings kyi tshig las gzhan du mi 'gyur bas mthu dang ldan pa'i phyir ro//mi mnyam pa dang mnyam pa'i stobs zhes pa ni de dag mthu phun sum tshogs par bstan pa'o/ /yang dag par rdzogs pa'i sangs rgyas kyi mos pa las byung ba zhes pa ni de bzhin gshegs pas rgyu'i tshe na yang dag par rdzogs pa'i sangs rgyas kyi yon tan rnams la mos pa ji lta ba bzhin du mngon par byang chub pa'i tshe na yongs su rdzogs gyur pa de las yi ge a bzhi po 'di 'byung ba'i phyir ro//dbyangs gcig las byung bas zhes pa ni bum pa la sogs pa'i so so'i tshig rnams ma skyes pa'i sgra gcig pu las byung ba'i phyir ro//chos dbyings thams cad khyab par byas te nam mkha' dang mnyam par gyur nas zhes pa ni ma skyes pa'i sgras chos kyi dbyings thams cad nam mkhas khyab pa dang 'dra bar byas nas zhes pa'am/ chos kyi dbyings nam mkha'i mtha' dang mnyam par byas nas zhes pa ste/chos kyi dbyings zhes pa 'di yang 'jig rten gyi khams rnams su rig par bya'o/ /yi ge a ni byang chub kyi rang bzhin te rnam pa bzhi ni byang chub de yan lag bzhi dang ldan pa ste byang chub dang / spyod pa dang / kun du sangs rgyas pa dang / mya ngan las 'das pa rnams su reg pa bzhin du blta bar bya'o/ /de dag byung ma thag tu de nas yang chos kyi dbyings thams cad nges par sgrogs pa'i sgo dag nas yang dag par rdzogs pa'i sangs rgyas kyi snying po'i tshig gis mtshan pa rnam par rig pa'i dbyangs kyi sgra gcig nas gcig tu mngon par grag go zhes pa ni snying po de rnams gsungs pa dang 'jig rten gyi chos rnams kyi sgra las de bzhin gshegs pa'i tshig gis mtshan pa ma byung ma skyes pa'i sgra sgrogs pa byung ngo //byang chub sems dpas de thos nas/ /zhes pa nas/ nang gi bdag nyid rnam dag pas/ /rtag tu mngon par brtson par bya//zhes pa'i bar gyis de ltar ma skyes pa'i sgra 'jig rten gyi khams thams cad du khyab pa byang chub sems dpa' rnams kyis thos nas ngo mtshar du gyur te de'i rjes su bsngags pa bcom ldan 'das la slar gsol pa'o/ /de nas yang dag par rdzogs pa'i sangs rgyas kyi snying po rnams sgrub pa 'byung ste zhes pa nas nam mtshan ma byung gi bar ji srid du 'dug par bya'o zhes pa'i bar gyis sgrub pa'i sngon rol du byang chub kyi sems bsgom par bya ba bshad de/de yang skyed mos tshal lam gtsug lag khang la sogs pa'i gnas ming smos pa'am/de las gzhan pa'i gnas bdag nyid sems gang du dga' bar 'dug ste bsgom mo/ /de la skyed mos tshal dang phug ni lus dben par bya ba'i gnas so/ /gtsug lag khang ni sems dben na lus mi dben kyang bla ste sems dben pa'i gnas so/ /yid gang du dben pa der zhes pa gnas de dag las gzhan pa yang rung ste/sems gang du dben pa de gtso bas der 'dug ste/ mtshan ma byung gi bar de srid du 'dug par bya'o zhes 'brel to/ /mtshan ma yang skabs 'dir ni sngags bzlas pa las nad med pa dang bru ba mi tsha ba la sogs pa byung ba la mi bya'i/bsam gtan la sems brtan zhing mi 'byung bar gyur pa la bya'o/ /de nas snying po de dag las gang yang rung ba cig gzung ste zhes pa nas nam mkha' ltar gzod ma nas zhi ba ste/ de la sgra gnas par bsam zhing mnyam par gzhag pas bzlas brjod bya'o zhes pa'i bar gyis gong du smos pa'i tshul gyis byang chub kyi sems goms par bya ste/mtshan ma byung nas rang gi lha'i gzugs su sbyar ba goms par bya ba dang de'i snying gar me long gi dkyil 'khor la sangs rgyas kyi sku bsam pa dang / sangs rgyas kyi sku'i snying gar yang zla ba'i dkyil 'khor dang bzlas pa'i sngags bsams te/de'i rim pa yang 'di'o/ /a rnam pa bzhi las gang yang rung ba cig snying gar zla ba'i dkyil 'khor la bsams la/ a de'i sgra chos thams cad gzod ma nas ma skyes pa'o zhes pa la dmigs shing rang gi phung po lnga gzod ma nas ma byung ma skyes pa'i sbyor ba'am/rdul phran du zhig pa la sogs pa'i sbyor bas stong pa nyid du gzhig ste/ zla ba'i dkyil 'khor la a gnas pa tsam 'ba' zhig yod par bsams te/ de nas zla ba'i dkyil 'khor dang a nyid kyang gong ma'i tshul gyis dmigs su med par bshig ste ji tsam 'dod kyi bar du stong pa nyid kyi ting nge 'dzin mngon du bya'o//de nas snying rje'i dbang gis ting nge 'dzin de las langs te sgyu ma lta bur mos pa'i tshul gyis a de snying ga'i phyogs su bsams nas de las 'od sgro zhing bsdu ba'i sbyor bas rang gi lha'i gzugs su bsgyur bar bya ste/ de yang the tshom med par rang gi lha'i gzugs su snang bar 'gyur gyi bar du'o//de la spyir lha'i gzugs su bsgyur ba la yang rnam pa gsum ste/ gcig ni phyag rgya dang sngags sbyar bas lha'i gzugs de bdag go snyam par mos pa tsam mo/ /gnyis pa ni rtag tu goms pa'i dbang gis rang gi lus lha'i gzugs su the tshom med par gsal bar snang ba'o//gsum pa ni sbyor ba'i mthus rang gi lus brjes te lha'i lus su gyur pa'o/ /de la skabs 'dir ni rtag tu goms pa'i dbang gis rang gi lus lha'i gzugs su gsal bar snang ba la bya'o/ /de ltar rang gi lus lha'i gzugs su bsgyur nas de'i snying po a cig bsams te/a de las byang chub kyi sems kyi phyag rgya zla ba'i dkyil 'khor me long dang 'dra bar bsams te de yang shin tu gsal ba dri ma med par bsam mo/ /de'i dbus su yi ge a las bcom ldan 'das rnam par snang mdzad kyi skur gyur par bsams te/de bas na/ gzhi gnyis pa ni yang dag par rdzogs pa'i sangs rgyas me long gi dkyil 'khor de nyid kyi nang na pad+ma'i rgyal po la bzhugs pa lta bu'i ting nge 'dzin la snyoms par zhugs pa zhes pa la sogs pa gsungs pa yin te/ phug gi nang na bzhugs pa lta bu zhes pa ni me long gi dkyil 'khor gyi nang na bzhin gyi gzugs brnyan snang ba ltar de bzhin nyid kyi nang na nye bar 'dug par bsams te zhes pa'o//de nas de bzhin gshegs pa'i snying gar zla ba'i dkyil 'khor bsams te de'i dbus su bzlas par bya ba'i sngags bsams nas de zlos shing sngon du bsnyen pa 'bum bya ste/de bas na/ de nas sngon du bsnyen pa ni/ /'bum phrag gcig tu bya bar bshad/ /ces gsungs pa yin no/ /de nas zla ba gnyis pa la/ /me tog dri la sogs pa dbul/ /zhes pa ni sngar 'bum phrag gcig gi grangs su bzlas la/de nas zla ba gnyis kyi dang po snga dro dang phyi dro la mel thun re re/ nyi ma gung la mel tshe thun phyed bzlas pa'i sbyor bas dus chad pa ste/ sngar tshig 'bum gyi grangs su zlos pa dang / zla ba gnyis dus su zlos pa las zla ba phyi ma gcig la ni dri dang me tog la sogs pa'i mchod pa mi bya bar bzlas te dang po sems ma goms pa la phyi'i mchod pa la sogs pas sems yongs su dogs pa'i phyir ro//zla ba phyi ma gnyis pa la ni goms shing brtan par gyur pas phyi'i mchod pa la sogs pas yengs bar mi 'gyur ba'i phyir ro/ / sems can rnams la rnam mang po'i/ /phan pa nye bar sgrub byed cing / /zhes pa ni/ /da ni dpa' bo chen po'i snying po 'bru rnam pa lnga rnams sgrub pa dang sa rnams bshad de/ de la spyir de bzhin gshegs pa'i rgyu dang 'bras bu'i yon tan mos pas spyod pa'i sa nas brtsams te kun du sangs rgyas par gyur gyi bar du ci bsags pa rnams sdud pa'i sgor gyur pa ni phung po'i lhag ma dang bcas pa'i mya ngan las 'das pa dang /phung po'i lhag ma med pa'i mya ngan las 'das pa'o/ /de la phung po'i lhag ma med pa'i mya ngan las 'das pa ni de bzhin nyid stong pa'i mtshan nyid du shes pa phra mo yang sbangs pa 'og min gyi gnas su mngon par byang chub pa'o//phung po'i lhag ma dang bcas pa'i mya ngan las 'das pa ni kun du sangs rgyas pa'i mtshan nyid chos rnams sgyu ma'i rang bzhin du yang med bas chos rnams stong pa'o snyam pa'i 'du shes tsam gyi bag chags phra mo lhag ma lus par 'dod pa'i khams su byang chub kyi shing drung du mngon par byang chub nas bdud rnam pa bzhi btul ba'o//de la phung po'i lhag ma med pa'i mya ngan las 'das pa'i snying po ni a rnam pa bzhi ste/ de rnams kyi sgrub pa la sogs pa ni bshad zin to//'dir ni phung po'i lhag ma dang bcas pa'i mya ngan las 'das pa'i snying po bdud bzhi 'joms pa'i ting nge 'dzin gyi sgo rnams kyi sgrub pa dang las rnams 'chad de/ de yang / de nas bcom ldan 'das rnam par snang mdzad kyis thams cad dang ldan pa'i 'khor 'dus pa la gzigs nas gsang ba pa'i bdag po phyag na rdo rje la bka' stsal pa/lag na rdo rje de bzhin gshegs pa rnams kyi thugs las byung ba zhes bya ba la sogs pas so/ /de la yi ge a la sogs pa'i ting nge 'dzin gyi sgo nas bdud bzhi bcom pa dang ting nge 'dzin de rnams nyid dbang chen la sogs pa'i dkyil 'khor bzhir byin gyis brlab pa'i rim pa yang 'di lta ste/yi ge a ni chos thams cad gzod ma nas ma skyes par rtogs pa'i ting nge 'dzin gyi sgo ston pa ste/ de'i sgo nas phung po dang khams dang skye mched la sogs pa'i chos rnams ma skyes par rtogs te dmigs su med pas phung po'i bdud bcom pa'o//yi ge ba ni chos thams cad ngag gi lam dang bral bar ston pa'i ting nge 'dzin gyi sgo ste/ ngag gi lam ni rnam par rtog pa med par rtogs te rtog pa med pas lha'i bu'i bdud bcom pa'o/ /de ltar phung po la sogs pa'i chos rnams dang /de la dmigs pa'i rnam par rtog pa med na de dag la chags par 'gyur ba 'dod chags la sogs pa'i nyon mongs pa rnam par dag pa yi ge ra'i sgo nas mtshon te/ /chos thams cad rdul dang bral bar rtogs so/ /rdul zhes bya ba ni nyon mongs pa la bya ste des nyon mongs pa'i bdud bcom pa'o//yi ge ha ni chos thams cad rgyu dang bral bar rtogs pa'i ting nge 'dzin gyi sgo ste/ nyon mongs pa las las dang skye ba 'byung la/ nyon mongs pa med na las dang skye ba yang mi 'byung / skye ba ma byung na 'chi bar yang mi 'gyur te de ltar rtogs pas 'chi ba'i bdud bcom pa'o//de ltar chos rnams gzod ma nas ma skyes pa la sogs pa'i tshul gyis stong pa nyid kyi rang bzhin du rtogs pa'i sgo ni yi ge kha ste chos thams cad nam mkha' dang 'dra'o zhes bstan pa'o/ /de ltar ting nge 'dzin de rnams la kun rdzob tu yang yi ge a la sogs pa re re las dbang chen la sogs pa'i dkyil 'khor du yang sbyar te/yi ge a'i sgo nas zhugs pa'i ting nge 'dzin gyis phung po'i bdud bcom ste/ phung po ni sra zhing khur khyer nus pa'o/ /de bzhin du de dang rjes su mthun par yi ge a de las sa'i dkyil 'khor du gyur te/sa yang sra zhing khur khyer bzod pa'o/ /yi ge ba las rnam par rtog pa dang bral ba'i ting nge 'dzin gyi sgor gyur te/ de ni rtog pa la sogs pa'i dri ma dag par byed pa'o/ /de bzhin du yi ge ba las chu'i dkyil 'khor du gyur pa de dang rjes su mthun par dri ma dag par byed pa'o//yi ge ra las chos thams cad rdul dang bral ba'i ting nge 'dzin du gyur te/ de ni 'dod chags la sogs pa'i nyon mongs pa sreg par byed pa'o/ /de bzhin du de dang rjes su mthun par yi ge ra las me'i dkyil 'khor du gyur te/ me ni thams cad sreg cing med par byed pa'o//de bzhin du yi ge ha las chos thams cad rgyu dang bral ba'i ting nge 'dzin gyi sgor gyur te/ de ni nyon mongs pa'i rgyu las byung ba'i las la sogs pa 'thor bar byed pa'o/ /de bzhin du yi ge ha las rlung gi dkyil 'khor du gyur pa yang de dang rjes su mthun te/rlung ni thams cad 'thor ba'am/ 'jig par byed pa'i rang bzhin no/ /yi ge kha las chos thams cad stong pa nam mkha'i rang bzhin du rtogs pa'i ting nge 'dzin gyi sgor gyur te/ de bzhin du yi ge kha las nam mkha'i dkyil 'khor du gyur pa yang nam mkha'i rang bzhin du mthun te de dag ni spyi'i don to//de bzhin gshegs pa rnams kyi thugs las byung ba zhes bya ba ni de bzhin nyid kyi ye shes las byung ba zhes pa ste/ a la sogs pa'i stong pa nyid de dag nyid la bya'o/ /las dang bya bas rnam par rol pa zhes bya ba ni grub pa ra ba la sogs pa dang /zhi ba la sogs pa'i las rnams byed pa'o/ /spyod pa'i rol mo zhes pa ni rol mo mkhan dang 'dra ba ste/ rol mo mkhan ni gar la sogs pa'i rol mo sna tshogs ston pa de bzhin du snying po 'di rnams kyang grub pa dang las sna tshogs ston pa'i phyir ro/ /khams bzhi yang dag par bsdu bas bsdus pa zhes pa ni snying po 'di rnams las sa dang /chu dang / me dang / rlung gi khams kyi dkyil 'khor rnams byung ba'i phyir ro/ /nam mkha' ltar kun du khyab pa zhes pa ni 'di ltar nam mkha' thams cad du khyab pa de bzhin du snying po de rnams kyis kyang thams cad du khyab pa ste/de dag ni snying po de rnams kyi rang bzhin bstan pa'o/ /mthong ba dang ma mthong ba'i 'bras bu mang ba zhes pa ni mthu bstan pa ste/ mthong ba ni rig 'dzin la sogs par dngos su bsgyur ba'o/ /ma mthong ba ni sangs rgyas la sogs pa'i 'bras bu nyid nas thob pa ste de lta bu'i 'bras bu mchog sbyin par byed pa zhes pa'o//nyan thos dang rang sangs rgyas dang byang chub sems dpa' thams cad kyis mngon sum pa zhes pa ni de dag gi spyod yul du gyur pa zhes pa ste/ nyan thos rnams kyang zad par sa dang zad par chu la sogs pa'i ting nge 'dzin mngon du byed de/de yang dkyil 'khor 'di dag gi rang bzhin yin pa'i phyir la/ byang chub sems dpa' yang sa gzhi thams cad rin po che la sogs pas bkang ste/ de bzhin gshegs pa la mchod pa byed pa la sogs pa yang dkyil 'khor 'di dag rang bzhin yin pa'i phyir ro//gsang sngags kyi sgo nas byang chub sems dpa'i spyad pa spyod pa rnams kyi re ba thams cad yongs su rdzogs par byed pa zhes pa ni bstan pa 'di la zhugs pa rnams grub pa la sogs pa 'thob pa'i sgo nas re ba yongs su rdzogs par byed pa'i phyir ro/ / las sna tshogs dang ldan pa ni gdon dang dug la sogs pa sel ba'i las sna tshogs dang ldan pa'o/ /sems can thams cad la phan 'dogs pa zhes pa ni bstan pa 'dir zhugs pa dang ma zhugs pa gnyis ka'i sems can la phan 'dogs pa'o/ /lag na rdo rje de la spyod pa'i rol mo las dang bya bas mngon par grub pa'i 'bras bu phal che ba lus can kun gyi mngon sum pa gang zhe na zhes pa ni gong du smos pa de dag nyid dngos su bstan pa'i phyir gang zhe na zhes gsungs pa'o//cho ga shes pas thog mar ni/ /bdag gi de nyid rim bzhin bya/ /zhes pa nas/ 'di bdag nyid ni rgyal mchog tu//bsgyur na smos kyang ci zhig dgos/ /zhes pa'i bar gyis sngags pas bdag gi de kho na nyid la sbyar ba dang / de'i rjes su sngags pa 'chad de/ sngags pas bdag gi de kho na nyid kyi rnal 'byor sngon du byas nas de nas sngags kyi yi ge rnams lus la so so'i gnas su bkod de dbang chen gyi dkyil 'khor la sogs par bsgyur nas de dag gi sgrub pa dang las la sogs pa la 'jug go//rim pa de lta bur 'jug pa yang sngon sangs rgyas bcom ldan 'das chos rnams gdod ma nas ma skyes pa stong ba'i rang bzhin du mngon par byang chub nas de'i 'og tu sngon gyi smon lam gyi shugs kyis sku mi zad pa la sogs pa'i rgyan rnams kun rdzob kyi tshul du 'jig rten thams cad du khyab par ston te/de bas na sngags pas kyang thog mar bdag gi de kho na nyid stong par dmigs pa byas nas phyis yi ge dgong pa dang bzlas pa la sogs pa bya'o//de la/ cho ga shes pas thog mar ni/ /bdag gi de nyid rim bzhin bya/ /zhes pa nas/ 'di ni sangs rgyas thams cad kyis/ /bdag gi de nyid yin par gsungs/ /zhes pa'i bar ni bdag gi de kho na nyid kyi rnal 'byor te/ bdag gi de kho na nyid ces pa ni sngags mkhan rang gi lus kyang yi ge a'i sgo nas gdod ma nas ma byung ma skyes par stong par bshig ste/de nas a las dbang chen gyi dkyil 'khor kha dog shin du ser zhing lci ba bsams te/ de'i steng na sangs rgyas bcom ldan 'das bzhugs pa de lta bur bdag nyid kyi lus la bsams te/de bas na/ cho ga shes pas thog mar ni/ /bdag gi de nyid ji bzhin bya/ /zhes bya ba la sogs pa gsungs pa yin te/ bdag gi de nyid rim bzhin bya/ /zhes pa ni byang chub kyi sems bsgom pa byas shing lha'i gzugs su sgrub pa la sogs pa rim pa bzhin du bya'o zhes pa'o//sngags pa snga ma bzhin 'dug la/ /zhes pa ni gong du de bzhin gshegs pa'i snying po bshad pa'i rim pa bzhin du 'dug nas zhes pa'o/ /de bzhin gshegs pa dran byas te/ /zhes pa ni bzlas pa la sogs pa'i las rnams bya ba na de bzhin gshegs pa mdun du bsams nas bya ste/sngags dang po la sogs pa dmigs pa'i yul yin pa'i phyir ro/ /gnyis su na de bzhin gshegs pa'i dum bu bsams na bgegs med pa'i phyir ro/ /bdag nyid a zhes bya ba ni/ /klad kor dang bcas rgyas byas la/ /zhes pa ni bdag nyid yi ge a las stong pa nyid kyi rang bzhin du bsams te/klad kor gyis ni 'dzin par byed pa'i ye shes kyang stong pa nyid du ston pa ste gzung ba dang 'dzin pa med par stong pa'i rang bzhin du bsgyur bar bya'o zhes pa'o/ /thams cad ser zhing shin tu bzang / /gru bzhi rdo rjes mtshan byas te/ / zhes pa ni stong pa'i rang bzhin du gyur pa de las dbang chen gyi dkyil 'khor gru bzhi pa kha dog shin tu ser ba rdo rje'i mtshan mas mtshan pa bsam mo zhes pa'o/ /sngags pas der gnas rdzogs pa yi/ /sangs rgyas kun gyi gtso bo bsam/ /zhes pa ni dkyil 'khor de'i steng na bcom ldan 'das rnam par snang mdzad kyi skur bsams te/de yang bdag gi lus nyid de ltar bsam par shes par bya'o/ /nam zhig sngags pa bdag gis ni/ /de nyid dogs pa med gyur pa/ /zhes pa ni bdag gis de kho na nyid stong par dmigs pa dang lha'i gzugs su gsal bar snang ba the tshom med par gyur na zhes pa ste/stong pa nyid du the tshom med par gyur pa yang ting nge 'dzin dag pa dang / rnam pa dang bral ba dang rnam par rtog pa thams cad spong ba yang dag pa nyid du the tshom med pa'o/ /lha'i gzugs su gsal bar snang ba the tshom pa med pa yang ting nge 'dzin dag pa dang lha'i gzugs su kun du gsal ba dang rnam par rtog pa spong ba na yang dag par the tshom med pa'o//nam zhig sngags pa rab tu mos pa'i sems kyis the tshom med pa'o/ /nam zhig sngags pa rab tu mos pa'i sems kyis the tshom med par gyur na 'og nas 'byung ba'i rjes su bsngags pa rnams thob ste/de'i tshe 'jig rten thams cad la phan pa byed pa nyid du 'gyur zhes pa ni grub pa la sogs pa thob pa'i sgo nas sems can rnams la phan gdags nus te/ de ni gzhan gyi don phun sum tshogs pa'o/ /ngo mtshar sna tshogs dag dang ldan/ /mig 'phrul can gyi gnas la 'dug /ces pa ni rig 'dzin la sogs pa'i grub pa thob nas mig 'phrul mkhan dang 'dra bar rdzu 'phrul ngo mtshar sna tshogs pa rnams byed nus par 'gyur zhes pa ste mthu phun sum tshogs pa'o/ /sngags pa nam zhig mnyam gzhag na/ /srid pa rab tu dog pa na/ /thog med dus nas mi shes pas//bsags pa'i las de kun zad gyur/ /zhes pa ni rnal 'byor de lta bu la mnyam par gzhag na thog ma med pa'i dus nas ma rig pa'i dbang gis 'khor ba dog pa rnams su mi dge ba dang nyon mongs pa'i las bsags pa de dag thams cad byang bar 'gyur ro zhes pa ste/de ni spong ba phun sum tshogs pa'o/ /bla na med pa'i byang chub sems/ /sems de nam zhig sgom byed pa/ /de tshe'ang sngags pa rnal 'byor pa/ /chu yis pad+ma lta bur ni/ /dge dang mi dge'i 'bras 'byung ba'i/ /las kyis rtag par mi gos na/ /zhes pa ni byang chub kyi sems de stong pa'i mtshan nyid yin pas dge ba dang mi dge ba'i las kyi 'bras bus mi gos te dge ba la sogs pa'i 'bras bus dngos po rnams kyi gnyen po yin pa'i phyir ro//de la mi dge ba'i 'bras bus mi gos pa ni rigs na dge ba'i 'bras bus mi gos na tshul khrims bsrungs pa la sogs pa'i 'bras bu yang med dam zhe na/byang chub kyi sems ni stong pa'i rang bzhin yin pas dge ba dag dmigs su med par 'gyur mod kyi/ de las langs nas phyis rnal 'byor pa bdag nyid 'tshang rgya ba'i rgyur gyur pa'i lus dang longs spyod la sogs pa dang ldan par shog shig ces smon lam btab pas dge ba'i las kyi 'bras bu'i bag chags slar brta bar 'gyur ro//'di bdag nyid ni rgyal mchog tu/ /bsgyur na smos kyang ci zhig dgos/ /zhes pa ni byang chub kyi sems 'ba' zhig bsgoms pas kyang de ltar 'gyur na byang chub kyi sems bsgoms pa'i rnal 'byor pa de bdag nyid sangs rgyas kyi skur bsgyur ba na mi dge ba la sogs pa'i las kyis mi gos par 'gyur ba lta ci smos zhes pa'o//de nas bcom ldan 'das rnam par snang mdzad bdud bzhi las rgyal ba rdo rje rnam par rol pa zhes bya ba'i ting nge 'dzin la snyoms par zhugs nas zhes pa ni bcom ldan 'das ting nge 'dzin de la zhugs nas bdud bzhi las rgyal bar byed pa dang /rdo rje rnam par rol pa'i sngags rnams 'byung bas na ting nge 'dzin de la bdud bzhi las rgyal ba rdo rje rnam par rol pa zhes bya'o/ /de la bdud bzhi las rgyal ba zhes bya ba ni spong ba phun sum tshogs pa'o/ /rdo rje rnam par rol pa zhes pa ni rdo rje dang 'dra bar cis kyang mi tshugs par rnam par sprul pa ste mthu phun sum tshogs pa'o//de bas na rdo rje yi ge'i tshig ces bya ba la sogs pa gsungs te/ rdo rje yi ge'i tshig 'di rnams gsungs so zhes sbrel te/ bdud bzhi las rgyal bar byed pa zhes pa ni sngar bzhin no/ rgyud drug las rnam par grol bar byed pa zhes pa yi ge rnams kyi sgo nas stong pa nyid kyi ting nge 'dzin la zhugs na rgyud drug la sogs pa thams cad dmigs su med par rtogs pas rgyud drug las rnam par grol bar byed pa'o/ /gnyis su na yi ge de rnams kyi sgo nas dbang chen la sogs pa'i dkyil 'khor du sbyar zhing rig 'dzin la sogs pa'i grub pa thob nas rim gyis sa gong ma la 'phar bas na rgyud drug las rnam par grol bar byed pa'o zhes pa ni sngags de rnams kyis gzhan gyi don phun sum tshogs pa bstan pa'o//thams cad mkhyen pa'i ye shes yongs su rdzogs par byed pa zhes pa ni ye shes phun sum tshogs pa ste/gong ma'i rim gyis zhugs na thams cad mkhyen pa'i ye shes yongs su rdzogs par 'gyur ba'i phyir ro/ /sngags kyi yig 'bru rnams las bdud bzhi 'joms pa'i ting nge 'dzin dang dbang chen la sogs pa'i dkyil 'khor du bsgyur ba'i rim pa ni gong du bshad zin to//de nas yang gsang ba pa'i bdag po phyag na rdo rje dang rdo rje 'dzin de dag dang zhes pa nas/ des ni gsang sngags spyod pa yi/ /theg chen bla na med pa las/ /sems can rnams ni dga' bzhin du/ /mthong ba'i chos la gnas par 'gyur/ /zhes pa'i bar gyis bcom ldan 'das kyis sngags gsungs pa na phyag na rdo rje la sogs pa'i byang chub sems dpa' de rnams kyis sngags de rnams kyi mthu dang yon tan rnams khong du chud nas ngo mtshar gyur te sngags de rnams kyi rjes su bsngags pa rtogs nas gnas so sor dgod pa dang cho ga rnams bshad par gsol pa ste/byang chub sems dpa' skyob rnams dang / /sangs rgyas kun gyi nor gyi dbyig /ces pa ni snying po 'di rnams sangs rgyas dang byang chub sems dpa' rnams kyi nor gyi dbyig go zhes pa'o/ /'dis ni gang dag sangs rgyas dang / /byang chub sems dpa' skyob rnams dang / /rang sangs rgyas dang nyan thos pa//mkhas pa de dag 'jig rten 'dir/ /sangs rgyas ye shes bla med pa/ /dpe med ye shes thob nas su/ /rdzu 'phrul sna tshogs rnam 'phrul bas/ /sa steng kun du rnam par spyod/ /ces pa ni snying po 'di rnams kyi mthus sangs rgyas dang byang chub sems dpa' rnams kyang rdzu 'phrul sna tshogs spyod/nyan thos dang rang sangs rgyas rnams kyang ting nge 'dzin gyis nam mkha' stong pa la gnas par bsams te de la spyod lam bzhis gnas pa dang / smad nas chu 'byung zhing stod nas me 'bar ba dang / rlung gi dkyil 'khor bsams nas ri la sogs pa yang 'jig par byed pa la sogs pa'i rdzu 'phrul sna tshogs spyod do zhes pa'o//sangs rgyas ye shes bla med pa/ /dpe med ye shes thob nas su/ /zhes pa ni de ltar rdzu 'phrul sna tshogs pa spyod nas kyang snying po 'di rnams kyi mthus rim gyis thams cad mkhyen pa'i ye shes thob par 'gyur ro zhes pa'o//de bas 'di dag so so yi/ /cho ga rgyas pa dag dang las/ /sna tshogs dgod pa thams cad kyang / /bstan pa 'di la bshad du gsol/ /zhes pa ni sngags de rnams las dbang chen la sogs pa'i dkyil 'khor du bsgyur ba'i cho ga dang so sor dgod pa dang las kyi spyod pa rnams bstan pa 'dir bshad du gsol zhes pa'o//des ni gsang sngags spyod pa yi/ /theg chen bla na med pa la/ /sems can rnams ni dga' bzhin du/ /mthong ba'i chos la gnas par 'gyur/ /zhes pa ni de dag bshad pa yang sems can rnams mthong ba'i chos la mngon par mtho ba'i bde ba thob par bya ba'i phyir de rnams bshad du gsol ba ste bshad pa'i dgos pa bstan pa'o//da ni gong du sngags bshad pa de rnams kyi so so'i las rnams bshad de/ las de rnams kyang sngags pa bdag nyid yi ge a las sngar bshad pa bzhin du stong pa nyid du bsams te de nas bdag nyid bcom ldan 'das rnam par snang mdzad kyi sku dbang chen la bzhugs par bsam zhing lus kyi nang du yang dbang chen gyi dkyil 'khor bams la der yi ge rnams rim pa bzhin du bsam te/de bas na/ de'i tshe sa gzhi rdo rje chen por byin gyis brlabs te nyid kyi sku las byang chub kyi snying po can nye bar bstan par bshad nas gsungs pa zhes bya ba la sogs pa gsungs pa yin te sa gzhi rdo rje chen por byin gyis brlabs te zhes pa ni sku dbang chen gyi dkyil 'khor du byin gyis brlabs te zhes pa'o//nyid kyi sku las byang chub kyi snying po can nye bar bstan pa zhes pa ni de ltar dbang chen gyi dkyil 'khor du bsgyur ba la a la sogs pa'i yi ge rnams dgod par bstan pa ste yi ge de rnams nyid mngon par byang chub pa'i ting nge 'dzin gyi sgo yin pas byang chub kyi snying po can zhes bya ste/de ltar bcom ldan 'das kyis dbang chen gyi dkyil 'khor du sngar byin gyis brlabs nas phyis yi ge rnams dgod par bstan pa yang ma 'ongs pa'i 'gro ba rnams kyis kyang tshul 'di ltar bya'o zhes bstan pa'o//a ni mchog tu shes bya ba/ /dbang chen dkyil 'khor bstan pa ste/ /phyi rol dang ni nang du yang / /rdo rje'i dkyil 'khor shes par bya//zhes pa ni gong du bshad pa'i rim pas bdag gi lus sangs rgyas kyi sku dbang chen gyi dkyil 'khor dang bcas par bsam mo zhes pa'o/ /rdo rje'i dkyil 'khor zhes pa ni dbang chen gyi dkyil 'khor te/ rdo rje'i mtshan mas mtshan pa'o/ /der 'dug nas ni thams cad bsam/ / zhes pa ni de las yi ge a la sogs pa rnams rim pa bzhin du bsam mo zhes pa'o/ /rnal 'byor gnas zhes bshad pa yin/ /zhes pa ni dbang chen gyi dkyil 'khor la gnas pa'i sku de rnal 'byor gyi gnas yin pas rnal 'byor gnas zhes pa'o/ /a ni srog gi dam pa ste/ /'gugs par byed pa'i mchog tu bshad//ces pa ni sngags pa dbang chen gyi dkyil 'khor la gnas nas yi ge a de kha dog gser btso ma lta bu nang gi dkyil 'khor dbugs kyi rlung gis gyen du phul bar bsams la/ bdag gi sna'i bu ga nas byung ste pha rol po nad pa'i sna'i bu gar zhugs nas khong thams cad du khyab pa ni chu'i nang du ras bting ba'am//g.yag rnga bkram pa dang 'dra bar bsams te slar yid kyis a de dbugs dang bcas par drang bar bsams te ras sam g.yag rnga chu nang du bkram pa'i dpung nas bzung nas drangs na zhum par 'gyur pa de ltar bsams nas des nad thams cad a'i rang bzhin la bsdus te slar yang nad pa'i sna nas 'byung ste/bdag gi khong du zhugs par bsam mo/ /de bzhin du lan mang du goms par byas na thams cad 'gugs par 'gyur ro/ /de bzhin du sems drangs na yang a de snga ma bzhin du rlung dang bcas pa bdag gi lus las pha rol gyi lus la 'jug par bsams te/khyad par du bdag gi dbugs dang pha rol gyi dbugs gnyis 'dres te gcig tu gyur par bsams nas a snga ma bzhin du slar drangs na dbang du 'gyur ro/ /de bzhin du a des bsdu bar bya ba'i mig la sogs pa'i dbang po'i rgyud la khyab par bsams te slar drangs na rkang pas 'ong bar 'gyur ro//yang snga ma bzhin du bsams te a des bsgrub par bya ba'i lus kyi nang thams cad du khyab par bsams te slar drangs na gong bu 'gugs par 'gyur ro/ /nam zhig klad kor gyis sel bar 'gyur/ /zhes pa bsdu ba'o/ /sngags pa nam zhig zla gcig tu//zhes pa nas/ lha dang lha min rnams kyis kyang / /mi byed shin tu brtag par 'gyur/ /zhes pa'i bar gyis bzlas pa las byung ba'i grub pa bshad de/ bdag gi lus snga ma bzhin du bsgyur nas snga dro mel tshe thun gcig /gung la mel tshe thun phyed du bzlas pa zla gcig gi bar du byas na ma rig pa bsal bar 'gyur zhing lha dang lha ma yin la sogs pas kyang mi tshugs par 'gyur zhes pa'o//bdag gi rnyed pa 'grub bya'i phyir/ /rgyas pa'i las ni gang cung zad/ /de kun rtag tu sngags pa yis/ /dkyil 'khor gyi ni dbus su bya/ /zhes pa ni rgyas pa'i las dang bdag gi longs spyod bsgrub pa la sogs pa yang dkyil 'khor la gnas te/sgrub pa po zhes pa'o/ /gser gyi kha dog 'bar dang bcas/ /thor tshugs dbu rgyan 'chang ba yi/ /rdzogs pa'i sangs rgyas ting 'dzin bzhugs/ /dbang chen gyi ni gzhi zhes bya//zhes pa ni dbang chen gyi dkyil 'khor la bcom ldan 'das kyi sku 'di lta bur bzhugs par bsam zhes pa'o/ /rdo rje pad+ma ral gri dang / /zhes pa nas/ dbang chen du ni bsgoms te bsgrub/ /ces bya ba'i bar gyis rdo rje la sogs pa'i rdzas de rnams sngags pa dbang chen gyi dkyil 'khor la gnas nas rgyud gzhan dag las 'byung ba'i rim gyis bsgrub po zhes pa'o//mnan ba dag kyang bshad par bya/ /'di ni khyed kyis mnyam gzhag nyon/ /zhes pa nas/ de ni mi g.yo gnas par 'gyur/ /zhes pa'i bar gyis pha rol gyi rgol ba la sogs pa mnan par bya ba ste/sngags pas snga ma bzhin du dbang chen gyi dkyil 'khor la gnas par bsams nas mnan par bya ba'i spyi bor ri rab shin tu ser zhing lci ba rtse mo brgyad pa bsams te/ de'i steng du pad+mo bsam zhing pad+ma'i steng du rdo rje rgya gram bsams la/ steng du a de las bcom ldan 'das kyi sku bsams te mnan par bya ba rnams kyi spyi bo non par bsams na thams cad mi g.yo bar 'gyur ro zhes pa'o//sman la yang ni lan brgya ru/ /zhes pa nas/ sngon gyi las las byung ba yi/ /de yi nad rnams 'byang bar 'gyur/ /zhes pa'i bar ni bdag snga ma bzhin du bsams te sman la lan brgya bsngags nas nad pa la blud na nad 'tsho bar 'gyur ro zhes pa'o//de nas gzhan yang nges pa yis/ /zhes bya ba nas/ klad kyi 'khor dang bcas byas na/ /sel bar byed pa'i mchog tu 'gyur/ /zhes pa'i bar gyis pa'i sgrub pa rnams bshad pa ste/ yi ge ba bsams pa yang dbang chen gyi dkyil 'khor du bsams pa ni snga ma bzhin te/de las khyad par du na nang gi dbang chen gyi dkyil 'khor lte ba'i thad kar bsam mo/ /gangs dang 'o ma dung 'dra ba/ /lte ba'i dbus nas byung ba ste/ /pad+ma dkar po dam pa ni/ /de yi dbus na rab tu gnas/ / mgon po dam pa rab tu zhi/ /zhes pa nas/ gdung ba thams cad zhi byed pa/ /smug zil 'dus pa'i nang na gnas/ /zhes pa'i bar gyis ba'i las gcig bshad pa ste/ bdag nyid dbang chen gyi dkyil 'khor du gyur nas nang gi rdo rje'i dkyil 'khor lte ba'i thad kar bsams te de'i steng du pad+ma dkar po kha ba dang 'o ma dang dung 'dra ba lte ba'i nang nas byung ba 'dug par bsams shing pad+ma'i steng du yi ge ba ston gyi zla ba'i kha dog 'dra ba bsams la ba las chu rgyun dgu 'byung bas sgor ba chu'i dkyil 'khor zla ba'i 'od 'dra ba de'i gzhir gyur pa yang bsams la/yi ge ba de yang bum pa 'dra ba smug pa'i zil pa dkar po 'dus pa 'dra ba'i nang na 'dug pa bsams te/bdag gi lus kyi nang thams cad khyab par bsams na gdug pa dang tsha ba'i rims la sogs pa thams cad 'byang bar 'gyur ro/ /de bzhin du bdag gi lus dbang chen gyi dkyil 'khor la 'dug par bsams la gzhan gyi lus la yang ba de de bzhin du bsams na gdug pa dang tsha ba'i rims la sogs pa 'byang bar 'gyur ro//'o ma mu tig phreng dkar dang / /zhes pa nas/ sngags pas yid la bsams na ni/ /gdung ba kun las thar bar 'gyur/ /zhes pa'i bar gyis ba'i las gzhan bshad de/yi ge ba de snga ma bzhin du bsams nas smug zil med par ba de las chu rgyun dkar po byung ste/ chu rgyun des pa de la bskor nas 'khyil bar 'dug par bsams la/ de bdag gi dbugs kyis bskyod nas rang gi lus thams cad du khyab par bsams na de gdung ba la sogs pa'i nad rnams zhi bar 'gyur ro//de bzhin du pha rol la bsams na yang gdung ba la sogs pa'i nad rnams de lta bur zhi bar 'gyur ro/ /mnyam par gzhag pa dngos 'di rnams/ /dkyil 'khor 'dir ni bsgrub par bya/ /zhes pa nas/ dkyil 'khor dpal dang ldan pa 'di//zhi bar byed par bsam pa 'di/ /zhes pa'i bar gyis ba'i dkyil 'khor gyi rnal 'byor la gnas nas rdo rje la sogs pa dang rdzas ming gis smos pa de rnams bsgrubs na tshe ring ba la sogs pa'i grub pa rnams thob par 'gyur te/ rim pa bzhin du sbyar bar bya'o/ /klad kyi kor dang bcas byas nas//sel bar byed pa'i mchog tu 'gyur/ /zhes pa ni nad pa'i lus la ba de klad kor dang bcas par bsams na ba ni gzung ba'i chos thams cad stong par byed la/ klad kor ni 'dzin pa thams cad stong par ston par byed la/ de ltar lus de gzung ba dang 'dzin pa gnyis ka dang bral te stong bas nad kyang stong pa'i rang bzhin du 'dus nas med par 'gyur ba'o//ra zhes bya ba yang dag mchog /ces pa nas/ me dang lhan cig 'di sbyar na/ /zhes pa'i bar gyis ra'i sgrub pa dang las rnams bshad de/ ra zhes bya ba yang dag mchog /ces pa ni chos thams cad rdul dang bral ba'i ting nge 'dzin stong pa'i rang bzhin mchog gi de bzhin nyid de ra'i yi ge des ston pas na mchog gi de bzhin nyid ces bya ste don dam pa'i mtshan nyid do//'od can rnams kyi 'od ces bya/ /zhes pa ni 'od can ni nyi ma dang zla ba dang skar ma la sogs pa ste/ 'od can de rnams kyi nang na me'i 'od mchog yin la/yi ge ra ni me'i sa bon yin pas 'od can rnams kyi mchog ces bya ste kun rdzob kyi rang bzhin bstan pa'o/ /des ni las rnams gang cung zad/ /mtshams med lnga las byung ba yang / /rnal 'byor shin tu mnyam bzhag nas/ /bsams na de kun zad par 'gyur//zhes pa'i bar gyis ni de bsgoms pa'i 'bras bu bstan pa ste/ chos thams cad rdul dang bral ba stong pa nyid kyi rang bzhin du bsgoms na mi dge ba bcu la sogs pa'i las rnams dang mtshams med pa la sogs pa dmigs su med pas de dag gi 'bras bu zad cing 'byung bar mi 'gyur ro//yid 'ong thams cad rab tu dmar/ /gru gsum pa yi tshul du gnas/ /zhi ba 'bar ba'i phreng bas 'khrigs/ /sum mdo'i ris mtshan snying gar gzhag /ces pa ni me'i dkyil 'khor gyi mtshan nyid de snying gar nang gi rdo rje'i dkyil 'khor gyi steng du gru gsum shin tu dmar ba 'greng bur 'dug pa gru gsum gyi mtshan mas btab par bsam mo zhes pa'o//rnal 'byor pa ni der 'dug nas/ /ra ni klad kor bcas par bsam/ /zhes pa ni me'i dkyil 'khor gyi mtshan nyid kyi dbus na yi ge ra kha dog dmar po klad kor dang bcas pa 'greng bur 'dug par bsam zhes pa ste/klad kor dang bcas pa ni kun du sangs rgyas pa'i snying po gzung ba dang 'dzin pa gnyis dang bral bar ston pa yin la/ de bzhin du yi ge ba yang klad kor med kyang kun du sangs rgyas pa'i snying po yin pas ba'i bu ga nyid klad kor lta bur 'dzin pa med par ston par blta'o//mi 'jig bas ni ci rigs par/ /dngos po 'di dag der bsgrub po/ /zhes pa nas/ me dang lhan cig 'dir sbyar na/ /de dag thams cad byed par 'gyur/ /zhes pa'i bar gyis yi ge ra'i sgrub pa dang las rnams bshad de/ sngags pa ra'i dkyil 'khor la gnas nas sgrub pa ming gis smos pa rnams rgyud dang rtog pa gzhan las byung ba'i cho gas rdzas kyi mtshan ma dang bcas pa'am/mtshan ma med pas bsgrubs na nyi ma la sogs pa grub ste ci bsgo ba nyan to/ ha zhes bya ba dam pa mchog /ces pa nas/ rgyu kun dmigs su med sgo nas/ /bdud las rnam par rgyal bar byed//ces pa'i bar gyis yi ge ha'i sgrub pa dang yon tan dang dkyil 'khor la sogs pa bshad pa ste/ ha zhes bya ba dam pa mchog /ces pa ni chos thams cad rgyu dang bral bar ston pa'i rang bzhin yin pas de kho na nyid kyi mchog ces pa'o/ /rlung ni thams cad yang dag 'byung / / zhes pa ni rlung gi dkyil 'khor las 'byung ba'am/ de las rlung gi dkyil 'khor 'byung bas so/ /rgyu dang las dang 'bras bu dang / /gang gis sa bon rnams skye ba/ /'di ni klad kor bcas sbyar na/ /de dag thams cad 'jig par byed/ /ces pa ni de'i rang bzhin bsgoms pa'i 'bras bu bstan pa ste/ha zhes pa klad kor dang bcas par bsams pas chos thams cad rgyu dang bral ba'i tshul gyis gzung ba dang 'dzin pa gnyis ka dmigs su med de/ /rgyu zhes pa ni ma rig pa la sogs pa'i nyon mongs pa rnams so/ /las ni lus ngag yid gsum gyi sgo nas dge ba dang mi dge ba la sogs pa rnams so//'bras bu ni las de dag gi rnam par smin pa ngan song dang bde 'gro la sogs pa'o/ /gang gis sa bon rnams skye ba/ /zhes pa ni rgyu dang las de dag gis slar yang phung po rnams skye ba ste de dag thams cad dmigs su med par ston pas na 'jig par byed do zhes pa'o//de yi gzugs kyang bshad pa ni/ /kha dog gnag la 'od po che/ /mi bzad 'bar ba'i phreng ba 'khrigs/ /kun du yang ni rnam par 'phro/ /zhes pa ni yi ge ha nyid gzugs bstan pa ste/ de yang rlung gi dkyil 'khor gyi steng na gnas par bsams te rlung gi dkyil 'khor yang /mkhas pas smin ma'i mtshams su ni/ /dkyil 'khor la ni gnas par bsam/ /zhes pa nas/ sngags pas der gnas bsam par bya/ /zhes pa'i bar gyis gsungs pa yin te/ g.yo ba ni rlung gi rang bzhin g.yo bas bsam mo/ /yi ge rab tu mi 'gyur ba/ /sngags pas der gnas bsam par bya//zhes pa la yi ge'i rang bzhin sngar bshad zin mod kyi/ yi ge'i sgra'i rjes la mi 'gyur ba zhes yang bzlas te gsungs pa ni rab tu goms pa'i mthus yi ge mi 'gyur bar bsam zhes pa'o/ /dkyil 'khor de yi dbus su ni/ /gang gis mthong ba kho na la/ / zhes pa nas/ sngags pas mnyam par gzhag pa yis/ /dkyil 'khor gnas na de kun byed/ /ces pa'i bar gyis ni sngags pa rlung gi dkyil 'khor la gnas nas ming gis smos pa'i dngos po de rnams rgyun gzhan las byung ba'i cho ga bzhin du bsgrub par bya'o zhes pa ste/yi ge ci yin yang rung gzhi ni rtsis mgo gcig ste/ dbang chen gyi dkyil 'khor gyi dbus su bsam zhing bdag nyid kun du sangs rgyas pa'i skur bsgyur ba dang / nang gi rdo rje'i dkyil 'khor la yi ge ba la sogs pa gang bsams pa'i gnas de nyid du spo zhing bsam pa dang las su bya ba rnams ma gtogs par sgrub pa rnams la phyag rgya rdo rje rtse lnga pa bcings te/sngon du bsnyen pa zla ba gcig tu dus gsum du bya ba dang / mtshan ma dang bcas pa dang / mtshan ma med pa gnyi gas sgrub tu rung ba ni kun la so sor sbyar bar bya'o/ /'dis ni snying po byang chub 'dir/ / byang chub sems dpa' grags chen rnams/ /rgyu kun dmigs su med sgo nas/ /bdud las rnam par rgyal bar byed/ /ces pa ni yi ge'i mthu bstan pa ste/ byang chub sems dpa' rnams kyang yi ge 'di'i sgo nas chos thams cad rgyu dang bral bar rtogs pas bdud bzhi rnam par bcom ste/mngon par byang chub pa thob po zhes pa'o/ /rgyu med pas na 'bras bu'ang med/ /ces pa nas/ go 'phang dam pa sgrub par byed/ /ces pa'i bar gyis yi ge khaM gi rang bzhin dang sgrub pa bshad pa ste/ las kyang yod pa ma yin te/ /dngos po de gsum med pas na/ /stong pa'i ye shes 'thob par 'gyur//zhes pa ni rgyu ma rig pa la sogs pa'i nyon mongs pa dang dge ba dang mi dge ba la sogs pa'i las dang / bde 'gro dang ngan 'gro la sogs pa'i 'bras bu rnams yi ge khaM gzung ba dang 'dzin pa stong par ston pa'i sgo nas dmigs su med ces pa'o/ / rdzogs pa'i sangs rgyas mthu chen gyi/ /de'i gzugs yang dag bshad pa ni/ /klad kor bcas dang ldan pa ste/ /khaM ni stong pa'i mchog ces bya/ /zhes bya ba ni yi ge de'i rang bzhin gsungs pa ste/ yi ge khaM de gzung ba dang 'dzin pa gnyis ka dang bral bar ston pas stong pa'i mchog ces bya'o//ral gri'i phyag rgya ldan pa yis/ /bsgrub par bya ba nges par bsgrub/ /ral gri zhags pa 'khor lo dang / /lcags mda' de bzhin thob ste/ /rdzas de rnams dang ldan na ni/ /go 'phang dam pa sgrub par byed/ /ces pa ni sngags pa rnams rnal 'byor gyi stan la gnas nas spyi bor yi ge khaM bsams te/thams cad nam mkha'i rang bzhin du bsams nas yi ge khaM 'ba' zhig kha dog nam mkha' dang 'dra bar bsams la ral gri'i phyag rgya bcings te snga ma bzhin du bzlas na ming gis smos pa rnams 'grub par 'gyur ro/ /bdag nyid a zhes bya ba'i rang gi ngo bor bsgyur nas phyi dang nang du bcas pa'i dngos po thams cad la mi lta bar gyur cing zhes pa nas/de lta bu la sogs pa dag ni yid las byung ba yin no zhes pa'i bar ni sngags pas rnal 'byor gyi stan snga ma bzhin du bsgoms pa las khyad par du 'dod chags la sogs pa'i nyon mongs pa rnams kun nas mi ldang bar nus kyi bar du bdag gi de kho na stong par bsgom pa goms par byas nas/a la sogs pa'i snying po rnams sgrub pa dang las rnams phyi rol gyi rdzas la mi ltos par sgrub pa bshad pa ste/ bdag nyid a zhes bya ba'i rang gi ngo bor bsgyur nas phyi dang nang du bcas pa dngos po thams cad la mi lta bar gyur cing zhes pa ni a la sogs pa'i rang bzhin du bsgyur te/phyi rol gyi gzugs la sogs pa'i dngos po rnams dang / nang gi gzugs yod pa'i blo mi skye zhing dngos po rnams la ma chags par byas la a de bsgrubs na de'i 'bras bu bong ba dang gser du yang mi 'byed de/ji ltar rdo ba dang bong ba la chags pa mi skye ba de bzhin du gser la yang chags pa mi skye ste/ 'dod chags dang zhe sdang mngon du mi ldang ba dang mi dge ba bcu'i las byas pa'i sdig pa'i 'bras bu'i dbang du mi 'gyur ba ste/ de bas na/ de tshe de ni dag gyur pa/ /thub pa rdzogs pa'i sangs rgyas bzhin//des ni las rnams thams cad nus/ /zhes pa ni grub pa rab 'bring la sogs pa 'grub cing zhi ba la sogs pa'i las rnams nus zhes pa'o/ /nyes pa thams cad rnam par spangs/ /zhes pa ni las de dag byed pa na ma tshang pa'am 'khrul pa la sogs pa'i nyes pa med par byed nus par 'byung zhes pa'o//de nas gzhan sngags rnal 'byor la/ /zhes pa nas/ gang gi de dag 'thung ba'am/ /lag pas kyang ni reg kyang rung / /de kun nges par byang chub tu/ /'gyur te 'di la dogs pa med/ /ces pa'i bar gyis ba yig gi rnal 'byor te/sngags pa rnal 'byor gyi stan la gnas nas yi ge ba las chu'i dkyil 'khor la sogs pa snga ma bzhin du bsams la/ khyad par du na ba las chu'i rgyun 'byung ba dang chu'i dkyil 'khor gyis bdag gi lus spyi bo nas rting pa'i bar du rgyas par gang bar bsams te/ de ltar brtan par yid ches pa na chu de dag thams cad ba spu'i bu ga nas phyir byung ste/bdag gi lus kyi thon kor dang khang pa la sogs pa kun dga' bar bsams la rim gyis gtsug khang dang yul la sogs pa thams cad du gang bar bsams na chu de la sems can skal ba dang ldan pa gang gis 'thungs sam/reg pa na de ltar 'thungs pa dang reg pa'i spyod yul du gyur pa de ni sems can phal pa de dang mi 'dra bar skal ba dang ldan par mngon par byang chub tu nges par 'gyur ro zhes pa'o/ /yan lag kun dur zhes pa/ /zhes pa nas/ btang na ra yis rnam sprul pas/ / sngags pa 'dod pa bzhin du byed/ /ces pa'i bar gyis ra'i rnal 'byor te/ yan lag kun du ra zhes pa/ /'bar ba'i phreng ba zhi bas 'khrigs/ /kun du rnam par 'phro ba ni/ /shin tu rnam par gzhag pas bsam/ /zhes pa ni sngags pa rnal 'byor gyi stan la snga ma bzhin du gnas nas snying gar yi ge ra me'i dkyil 'khor la gnas par bsams te/'bar ba'i 'od 'phros pas lus kyi nang thams cad khyab par gang bar bsams nas de ltar brtan par gyur pa dang ba spu'i bu ga thams cad nas phyir byung ste rim gyis grong khyer dang yul la sogs pa thams cad me'i 'od 'phro ba'i snang bas gang bar bsams te/de bas na/ de tshe rnal 'byor pa yi phyir/ /'bar ba kun du snang byed pa/ /btang na zhes gsungs pa yin no/ /ra yi rnam pas/ sngags pa 'dod pa bzhin du byed/ /ces pa ni rnal 'byor de ltar byas na ra las me byung ba des sngags pa ji ltar 'dod pa bzhin du byed par 'gyur ro zhes pa'o//ra zhes bya ba ro stod du/ /ba zhes bya ba lte ba khung / /'bar ba dang ni chu 'bab pa/ /de tshe cig car ston par 'gyur/ /zhes pa ni ra dang ba gcig dus gcig tu sbyar ba ste/ sngags pa snga ma bzhin du rnal 'byor gyi stan la gnas nas snying gar yi ge ra me'i dkyil 'khor la gnas par bsams te lte ba'i khung du snga ma bzhin du yi ge ba chu'i dkyil 'khor la gnas par bsams na dus gcig tu ra las me 'byung ba dang ba las chu 'bab pa'i cho 'phrul can du 'gyur ro//dmyal ba grang ba'i sdug bsngal rnams/ /ras ni shin tu zhi bar byed//ces pa ni ra 'ba' zhig snga ma bzhin du me'i dkyil 'khor la gnas nas bsgribs te bsgrubs na grub pa'i me de sems can dmyal ba'i steng gi bar snang la gnas nas lus las me byung ste sems can dmyal ba thams cad khyab par byas grang bas sgribs shing sdug bsngal ba'i sems can de rnams me des zhi bar nus zhes pa'o//sngags pa sngags kyi tshul gnas pas/ /bas kyang tsha ba la sogs zhi/ /zhes pa ni sngags pa snga ma bzhin du rnal 'byor gyi stan la gnas nas yi ge ba snga ma bzhin du chu'i dkyil 'khor la gnas par bsams te/ ba las chu byung ba yang snga ma ltar bsams nas bdud rtsi'i chu des tsha bas gdungs pa'i sems can dmyal ba de dag thams cad bsil bar 'gyur te/zhi bar bya ba'i thabs ni me'i rnal 'byor dang mthun no/ /ha zhes bya ba ba dan bcas/ /ra zhes bya ba'i 'og tu gzhag /sdig dang ldan pa'i mi rnams kyang //de yi las rnams myur du sgrub/ /ces pa ni me de las la sbyar ba na me mi 'bar zhing las su rung bar ma gyur na me'i dkyil 'khor de'i 'og tu yi ge ha rlung gi dkyil 'khor la gnas pa bsams te rlung des bskyod par bsams na me de las gang la sbyar ba de nges par byed do zhes pa'o//sdig dang ldan pa'i mi rnams kyang / /zhes pa ni sdig pa dang ldan pa'i mis sbyar na yang 'grub na gzhan lta smos kyang ci dgos zhes pa ste/ nges par las byed pa'i tshig bstan pa yin la/ rnal 'byor pa ni phyi dang nang gi dngos po la mi blta zhing kun nas ldang ba dang bral bas bsgom par bya ba yin pa sdig pa dang ldan par mi spyod do//sngags pa dbang chen la 'dug nas/ /chu yi las ni brtsam par bya/ /sel ba la sogs thams cad kyang / /byed 'gyur 'di la the tshom med/ /ces pa ni dbang chen gyi dkyil 'khor la gnas nas chu'i las byar rung bar bshad pa ste/sngags pa snga ma bzhin du rnal 'byor gyi stan la gnas nas yi ge a dbang chen gyi dkyil 'khor la snga ma bzhin du bsams te/ yi ge bas sgrub par byed pa'i las rnams byed do zhes pa'o/ /de la ba las chus thams cad du gang bar bya ba ni ma gtogs te/ chus thams cad du gang bar byas na dbang chen gyi dkyil 'khor de nyid chu'i dkyil 'khor du gyur pas dbang chen gyi dkyil 'khor du mi 'gyur ba'i phyir ro/ /sel ba la sogs thams cad kyang / /byed 'gyur zhes pa ni yi ge a de nad pa la sogs pa'i spyi bor bsams la/ de'i 'od ser po 'phro ba zhi ba'i rang bzhin gyis spyi bo nas rting pa'i bar du mthar phyi nang khyab par song bas bkrus par bsams na nad kyang de bzhin du 'dag par 'gyur zhes pa'o//de bzhin du nam yi ge ba'i sbyor ba byed pa na/ yang nad pa'i spyi bor ba de'i chu'i dkyil 'khor la sogs pa snga ma bzhin du bsams la bum pa kha sbub pa'i kha nas bdud rtsi'i chu dkar po bab par bsams te/chu des spyi bo nas rting pa'i bar du mthar gyis phyi nang dang bcas par bkrus par bsams na nad thams cad 'byang bar 'gyur ro/ /sbyor ba de ni spyi'i cho ga ste/ /gzhan dag tu yang sbyar bar bya'o//rlung ni kun du 'gro bar gsungs/ /zhes pa nas/ lha yi rna ba thob par 'gyur ro/ /zhes pa'i bar gyis yi ge ha de dbang chen la sogs pa'i dkyil 'khor kun gyi las byed par bshad pa ste/ de la/ rlung ni kun du 'gro bar gsungs/ /zhes pa ni yi ge ha de rlung gi rang bzhin te/de ni dbang chen la sogs pa'i dkyil 'khor kun du gtogs zhes bya ste/ dbang chen gyi dkyil 'khor dbyibs gru bzhi dang chu'i dkyil 'khor zlum po la sogs pa'i dbyibs so sor 'byed pa yang rlung yin pa'i phyir te/ de bas na/ thams cad 'jig par byed pa'ang de/ /rnam pa sna tshogs tha dad pa'i//las rnams dbye ba las byung ba/ /gzugs kyi dkyil 'khor dbus su ni/ /zhes pa dang 'brel te/ rnam pa tha dad pa ni dbang chen la sogs pa'i dkyil 'khor kha dog ser po dang / dmar po dang / dkar po la sogs pa'i rnam pa tha dad pa'o/ /sna tshogs las rnams zhes pa ni dkyil 'khor de rnams kyi so so'i las sna tshogs pa zhes pa'o//dbye ba las byung ba zhes pa ni dbang chen dang chu'i dkyil 'khor la sogs pa so so ba rnams zhes pa'o/ /cho ga 'di yis rab tu bya/ /zhes pa ni yi ge ha'i cho gas bya zhes pa'o/ /gzugs kyi dkyil 'khor dbus su ni//zhes pa sngags pa lha'i gzugs su bsgyur te dbang chen gyi dkyil 'khor rnal 'byor gyi stan la gnas zhes pa ste/ mdor na yi ge a dang ba la sogs pa so so'i dkyil 'khor du yi ge ha bsams te sbyor ba byas na a la sogs pa'i las rnams byed par 'gyur ro zhes pa'o//yid yongs su sbyor zhing bzlas brjod byas na yid rnam par dag par 'gyur ro zhes pa yid ni rnam pa dang bcas pa'i sems te snying gar me long gi dkyil 'khor bsams la/ de'i dbus na yi ge ha de me long gi gzugs brnyan bzhin du bsams te bzlas na pha rol gyi sems shes par 'gyur ro//lus yang bar goms par byed cing 'chag bzhin du bzlas brjod byas na rdzu 'phrul gyi rkang pa 'thob par 'gyur ro zhes pa ni sems la bdag gis sa shing bal lta bur yang ba'am/ /nam mkha' la 'phur te 'gro ba snyam du sems shing 'chag pa'i tshe yi ge ha bzlas na rdzu 'phrul gyi rkang pa thob cing nam mkha' la 'gro bar 'gyur ro zhes pa'o//tsog pur 'dug la a zhes bya ba rnam par gzhag ste zla ba gcig tu bzlas brjod byas na lha'i rna ba thob par 'gyur ro zhes pa ni sngags pa tsog pur byas te yi ge a zhes bya ba rna bar gzhag la zla ba gcig tu bzlas na lha'i rna ba thob par 'gyur ro zhes pa'o//gsang ba pa'i bdag po dngos grub [(]gyi [,]kyi [)]go 'phang de lta bu la sogs pa dag ni yid las byung ba yin no zhes pa ni gong du smos pa'i dngos grub de rnams phyi rol dang nang du mi rtog par gyur pas bsgoms pa'i yid las byung zhes pa'o//gsang ba ba'i bdag po rnam par bsams pa tsam kho nas dngos po gzugs can ma yin pa zhes bya ba nas/ de bas kun mkhyen dngos grub dang / /go 'phang mchog kyang bsgrub par bya/ /zhes pa'i bar gyis spyir sngags kyi dngos grub rnams sems kyis bsams pa dang /tshig tu brjod pa dang de bzhin gshegs pa'i byin rlabs las byung bar bstan pa ste/ dngos po gzugs can ma yin pa rnams kyi 'du byed rnam pa tha dad pa sna tshogs rnam par bsams pa tsam kho nas 'byung ngo zhes sbrel te/ dngos po gzugs can ma yin pa zhes pa ni sems dang sems las byung ba'i ngo bo gzugs med pa rnams las so//mdor na phyi rol gyi dngos po rnams med par sems kyis bsams pa tsam las dngos grub rnam pa mang po sna tshogs pa gzugs dang ldan pa rnams 'byung bar 'gyur ro zhes pa'o/ /las thams cad pa'i sa bon gyi bya ba tshig tu brjod pa tsam las 'byung zhes pa ni ha la sogs pa'i yi ge rnams kyi sgra brjod pa tsam las ha la sogs pa'i yi ge 'bru dbang chen la sogs pa'i dkyil 'khor gyi sa bon du 'gyur ba yang rab dang 'bring la sogs pa'i grub pa dang zhi ba la sogs pa'i las rnams byed par 'gyur ba 'byung ngo zhes pa'o//gsang ba pa'i bdag po gzhan yang de bzhin gshegs pa ni zhes pa nas/ /gzugs brnyan lta bur bzhugs so zhes pa'i bar gyis thams cad du de bzhin gshegs pas byin gyis brlabs par bshad pa ste/ de bzhin gshegs pa de byin gyis rlob pa yang sngon gyi smon lam gyi shugs kyis gdul ba'i 'gro ba so so'i ji ltar dad pa dang rjes su mthun pa thams cad kyi re ba yongs su rdzogs par 'gyur ba sems can re re'i mdun na yang gzugs brnyan lta bur bzhugs te zla ba nam mkha' la 'dug kyang gzugs brnyan mtsho dang rdzing bu dang chu snod la sogs pa thams cad du snang bar 'gyur ba dang 'dra'o//de ltar sems kyis bsams pa tsam dang tshig tu brjod pa tsam dang / de bzhin gshegs pa'i byin rlabs las grub pa rnam pa mang po sna tshogs pa rnams 'byung ba la ltos zhes pa'o/ /de bzhin gshegs pa de ni rnam par mi rtog ces pa nas/chos dang chos ma yin pa rnam par spangs kyang zhes pa'i bar ni de bzhin gshegs pa de ltar sems can thams cad kyi mdun na gnas kyang rnam par rtog pa la sogs pa'i dngos po 'di rnams dang bral zhes pa ste/ de la rnam par mi rtog ces pa ni de bzhin gshegs pa de ngas sems can 'di rnams kyi don bya'o snyam pa'i rnam par rtog pa de mi 'dzin zhes pa'o//yid kyi spyod yul las yang dag par 'das pa zhes pa ni yid ni rnam pa dang bcas pa'i sems de las 'das pa'o/ /bya ba dang las dang zhes pa ni lus ngag yid gsum gyi sgo nas spyod pa'i bya ba dang las rnams dang bral lo zhes pa'o//chos dang chos ma yin pa rnams spangs zhes pa ni chos ni dge ba bcu'i las kyi lam dang / chos ma yin pa ni mi dge ba bcu'i las kyi lam ste/ de dag gi dngos po rnams spangs so zhes pa'o/ /gsang sngags spyod pa las byung pa'i//thams cad mkhyen pa'i go 'phang stsol/ /zhes pa ni de ltar dngos po de rnams spangs kyang mngon par shes pa lnga la sogs pa'i dngos po rnams sngags kyi spyod pa'i sgo nas thob par byed do zhes pa'o/ /de bas kun gyis dngos grub dang / /go 'phang mchog kyang bsgrub par bya//zhes pa ni de lta bas na mngon par shes pa lnga dang sangs rgyas bcom ldan 'das kyi go 'phang mchog kyang bsgrub par bya'o zhes pa'o/ /de nas dpal ldan rdo rje 'dzin/ /zhes pa nas/ sngags pa gsang sngags gnas 'dug pa/ /yid ni de ltar shes nas su/ /zhes pa'i bar gyis sngar phyi dang nang gi bzlas pa'i yan lag bzhi dang /dpa' bo chen po'i snying po lnga'i bzlas pa'i yan lag gsum sngar bshad pa rnams kyang de bzhin gshegs pa'i snying gar zla ba'i dkyil 'khor la bzlas par bya ba'i sngags dgod pa dang / dbang chen la sogs pa'i dkyil 'khor rnams la bzlas par bya ba'i sngags rnams bkod de bzlas pa bya'o zhes mdo tsam du gsungs la/zla ba'i dkyil 'khor dang bzlas pa'i sngags rnams zlos pa nyid kyi tshe na gsal bar snang bar bsam pa'i thabs zhib tu ma gsungs kyang de dag gsal bar snang ba'i yongs su sbyang ba'i sgo bshad pa dang nang gi bzlas pa'i yan lag bzhi sbyor ba la bdag gi snying gar de bzhin gshegs pa'i sku me long gi dkyil 'khor gyi nang na bzhugs par bsam pa yang mdo tsam du gsungs kyi gsal ba nyid du ma bshad pas de yang sngags zlos pa'i tshe na sems la gsal bar snang bar bya ba bshad pa ste/de la/ de nas dpal ldan rdo rje 'dzin/ /ngo mtshar gyur nas mig bgrad de/ /zhes pa ni gong du dpa' bo chen po'i snying po rnams bshad pa thos shing rtogs nas ngo mtshar du gyur pa'o/ /de tshe rdo rje 'od zer ni/ /me stag 'phro ba 'dra gsor zhing //sangs rgyas zhing ni 'di thams cad/ /kun du snang bar byas nas su/ /zhes pa ni de ltar ngo mtshar du gyur te dga' ba'i shugs kyis rdo rje gsor zhing rdo rje'i 'od zer me stag 'phro ba dang 'dra bas sangs rgyas kyi zhing thams cad khyab ste snang bar gyur pa'o//gnyis su na de ltar rdo rje gsor ba yang ma 'ongs pa'i 'gro ba rnams sngags kyi spyod pa la dad pa bskyed pa ste sngags kyi phyag rgya rdo rje gsor bas sangs rgyas kyi zhing thams cad 'od kyis khyab pa mthong na dad pa skye ba'i phyir ro/ /sngags kyi 'jug pa bshad lags na//'jug pa de yang ma rtogs na/ /gsang sngags gang nas 'ong ba dang / /gang du 'gro ba gtso khyod kyis/ /de kun bdag la bshad du gsol/ /zhes pa ni sngar bzlas pa'i yan lag bzhi la sogs pa gsungs pa na zla ba'i dkyil 'khor la sngags dgod par bya ba bshad pa rnams zlos pa nyid kyi tshe bdag gi snying ga nas de bzhin gshegs pa'i snying gar 'gro ba dang de bzhin gshegs pa'i snying ga nas dbugs slar sdud par bsam zhing bdag gi snying gar dmigs pa na gang nas 'ong ba'i gnas bdag gis gsal bar ma dmigs na gnas de dang de dag ji ltar dmigs par bgyi ba bshad du gsol zhes pa'o//go 'phang dam pa khyod las med/ /khyod ni ji ltar chu rnams kyi/ /rgya mtsho bzhin du chos kun gnas/ /zhes pa ni bcom ldan 'das la bstod pa'i tshig ste/ chos kun gyi gnas zhes pa ni khyod ni lung gi chos dang rtogs pa'i chos kyi gnas so//chu rnams kyi rgya mtsho bzhin zhes pa ni de'i dpe ste/ chu thams cad kyi gnas kyang rgya mtsho yin pa dang 'dra'o zhes pa'o/ /sems dpa' chen po dkyil 'khor gyi/ /gnas ni yid ces bshad pa yin/ /zhes pa ni gong du phyag na rdo rjes gsol pa'i don sngags rnams kyi gnas dkyil 'khor rnams yin par gsungs pa yang yid yin par bshad de//yid ces pa ni rnam pa dang bcas pa'i sems te/ nam bdag gi sems zla ba'i dkyil 'khor la sogs pa'i rnam par snang bar gyur pa de nyid gnas zhes bshad do zhes pa ste/mdor na sngags zlos par byed pa'i tshe rab tu goms pa'i mthus bdag gi sems nyid zla ba'i dkyil 'khor la sogs pa'i rnam par gsal bar snang bar bya'o/ /de bas na/ snying ni gsang sngags gnas yin par/ /shes na 'bras bu thob par 'gyur/ /zhes gsungs pa yin te bdag gi sems nyid sngags rnams kyi gnas su shes na ting nge 'dzin grub cing sems sbyangs pa'i mtshan ma yin pas de nas ji ltar bsams pa'i grub pa la sogs 'thob par 'gyur ro zhes pa'o//dkar po ser po dmar po gang / /yid kyis sems par byed pa ste//de la yongs su spyod pa gang / /de ni sems kyis byed pa yin/ /zhes pa ni/ sems dpa' chen po dkyil 'khor gyi/ /gnas ni yid ces bshad pa yin/ /zhes pa'i 'grel pa'i tshig ste yid ji ltar gnas yin pa dang dkyil 'khor yang gang rnams yin pa bstan pa ste/dbang chen dang chu'i dkyil 'khor dkar po dang ser po dang dmar po la sogs pa rnams yid kyis bsams pa ste/ de rnams bye brag tu 'byed cing yongs su gcod par byed pa ni sems yin te/ sems kyis dkyil 'khor de rnams gang yang rung ba zhig bsams nas goms pa'i mthus bdag gi sems dkyil 'khor gyi rnam pa nyid du gyur na sems de la gnas zhes bya'o//sems ni mgu nas nges gyur pa/ /de ni snying zhes bshad pa yin/ /zhes pa ni/ snying ni gsang sngags gnas yin par/ /shes na 'bras bu thob par 'gyur/ / zhes gong du bshad pa'i 'brel ba ste bdag gi sems dkyil 'khor gyi rnam par zhen par 'gyur te/ de las mi 'gyur zhing rtse gcig par 'gyur na des sems nges par mgu ba yin te de lta bu'i tshul du sems mgu bar gyur pa de ni sngags rnams kyi gnas snying yin par shes par bya'o//der gnas pa yi gsang sngags rnams/ /'bras bu rgya chen ster bar 'gyur/ /zhes pa ni de ltar rang gi sems nyid zla ba'i dkyil 'khor la sogs pa'i rnam par gyur te sngags rnams kyang de la gnas par snang zhing sems tsam du shes na sngags de rnams 'bras bu rgya cher ster ro zhes pa'o//de ru pad+ma bsam pa ni/ /'dab ma brgyad pa ze bar bcas/ /zhes pa nas/ sngags pa gsang sngags gnas 'dug pas/ /yid ni de ltar shes nas su/ /zhes pa'i bar gyis nang gi bzlas pa yan lag bzhi sngar bshad pa na bdag gi lus lhar bsgyur ba'i snying ga na de bzhin gshegs pa'i sku me long gi dkyil 'khor gyi nang na gnas pa bsam pa de nyid zhib tu bshad pa ste/de ru pad+ma bsam pa ni/ /'dab ma brgyad pa ze bar bcas/ /a zhes bya ba 'bar phreng 'khrugs/ /bzang po de ru gnas pa ni//zhes pa rang gi sems zla ba'i dkyil 'khor gyi rnam par gyur pa der pad+mo dang a bsam mo zhes pa'i a de las bcom ldan 'das rnam par snang mdzad kyi skur bsam pa ni/ /zhi ba kun du rnam par g.yo/ /zhes pa srog dang bcas pa 'dra bar bsam mo zhes pa'o//gtso bo sna tshogs gzugs mnga' ba/ /zhes pa ni sku mi zad pa'i rgyan la sogs pa rnams du mar 'byung ba'i rang bzhin can zhes pa'o/ /snang ba kun du ston pa ni/ /zhes pa sems can thams cad kyi mdun na gnas par ston pa'o/ /me long phug na gnas pa bzhin/ /zhes pa ni sngar bshad zin to//chu yi zla ba'i rnam pa bzhin/ /zhes pa ni dpe ste zla ba de chu'i nang na gzugs 'byung bar byed pa dang 'dra'o/ /yid ni de ltar shes nas su/ /zhes pa ni sngags pas rang gi yid de bzhin gshegs pa'i sku de lta bu'i rnam par shes par bya'o zhes pa'o/ / de ltar de bzhin gshegs pa'i sku'i bye brag bshad pa de rnams kyang rnal 'byor pas tshul de ltar bsgom par bya ba bstan pa'i zhar la de bzhin gshegs pa'i sku gsum char la bstod pa yang bstan te/ a zhes bya ba de ru gnas/ /zhes pa ni chos kyi sku'i rang bzhin du bstan zhing bstod pa'o//'bar phreng 'khrug ces pa nas/ gtso bo sna tshogs gzugs mnga' ba/ /zhes pa'i bar gyis longs spyod rdzogs pa'i sku'i rang bzhin du bstod pa'o/ /snang ba kun du ston pa ni/ /chu yi zla ba'i rnam pa bzhin/ /zhes pa ni sprul pa'i sku'i rang bzhin du bstod pa'o/ / de nas sngags pas stod du yang / /zhes pa nas/ sangs rgyas ye shes mchog gyur pa/ /zhes pa'i bar ni rnal 'byor gyi stan la gnas pa las klad du yang yi ge aM shin tu dkar ba bsams la mig gi nang du yi ge ra bsams te/ yi ge de'i 'od kyis snying ga na de bzhin gshegs pa'i sku bsams pa de snang bar bsams pa dang /de rnams bsams nas kyang yi ge ra'i gnas mig gnyis su yi ge la bsams te la'i sgra'i de kho na nyid chos thams cad mtshan nyid med par ston pa la dmigs nas thams cad stong pa'i rang bzhin du bsams pa dang slar yang a la sogs pa'i yi ge dag bsams pa las dngos grub tu 'gyur ba dang de'i rjes su bsngags pa rnams 'chad de/yi ge de rnams de ltar bsams pa dang de sems yongs su sbyang ba dang / de rnams kyis rnal 'byor pas grub pa 'thob pa'i phyir ro/ /de la sems can su sbyong ba'i rim pa yang thog ma nyid bdag gi lus yi ge a la sogs pa'i sgo nas ma skyes shing ma byung ba'i stong par gshig ste/de nas slar yang yi ge a bsams te de las sngar bshad pa'i rim pa bzhin du phyi dang nang gi dbang chen gyi rdo rje'i dkyil 'khor dang bcas pa'i lha'i gzugs su bdag gi lus bsgyur te nang gi dkyil 'khor gyi dbus na bcom ldan 'das rnam par snang mdzad sngar bshad pa'i tshul bzhin du bsams la/de nas klad pa'i nang du yi ge a shin tu dkar ba bsam zhing mig gnyis su bsams te ra de yang chos kyi dbyings kyi yi ge shin tu dkar ba de'i 'od kyis slar snying ga na bcom ldan 'das kyi sku me long gi nang na bzhugs pa dang 'dra ba la gsal bar snang bar bya'o//de nas de'i 'od kyis slar yang stod du bsams nas yi ge a de shin tu gsal bar snang bar bya ste/de ltar gsal ba brtan par gyur pa dang slar yang yi ge ra'i gnas mig gnyis su yi ge la klad kor dang bcas par bsams la/ de'i sgra'i de kho na nyid chos thams cad mtshan nyid dang bral ba la dmigs pas yi ge a la sogs pa sngar bsams pa thams cad stong par bsam mo//de ltar stong par bsams pa yang brtan par gyur nas yang dag gi sems dbang du gyur par bya ba'i phyir snga ma'i rim pa bzhin du rnal 'byor gyi stan dang bcom ldan 'das kyi sku snying gar bsams pa dang / klad par a bsams pa rnams snga ma'i rim pa bzhin du bya'o/ /de bzhin du yang dang yang du yi ge la bsams nas stong par bya ba dang slar bcom ldan 'das kyi gzugs dang a la sogs pa bsams pa dang stong par bya ba dag sems dbang du bya ba'i phyir lan mang du goms par bya ste de bas na/de nas sngags pas stod du yang / /klad pa'i rgyas kyi dbus su ni/ / klad kor bcas pa'i mtshan ma can/ /e zhes bya ba dang de nyid kyi bye brag /shel dang zla ba gangs 'dra ba/ /dri med dag pa mthong ba ni/ /zhi ba chos kyi rang bzhin sku/ /thams cad kyi ni gzhi zhes bya/ /zhes gsungs pa yin te bsam pa'i thabs ni gong du bshad la/ yi ge'i don ni a shel dang zla ba lta bur dkar ba klad kor dang bcas pa bsams te de ni chos kyi sku'i rang bzhin du shes par bya'o//de bas na/ thams cad kyi ni gzhi zhes bya/ /zhes pa ste chos kyi sku ni thams cad kyi gzhi ste chos kyi sku'i dbang gis thams cad 'byung ba'i phyir ro/ /gnyis su na e de thams cad kyi snying po yin pas thams cad kyi gzhi zhes bya'o//de las gsang sngags dngos grub ni/ /sna tshogs gzugs can thob par 'gyur/ /de bzhin gshegs pa'i gnas mthong na/ /mtho ris dang ni byang grol thob/ /ces pa ni de ltar sems yongs su sbyangs nas a de klad pa'i nang du bsams te rig 'dzin la sogs pa'i grub pa thob par 'gyur ro zhes pa'o//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ dngos grub sgrub pa'i de kho na nyid rim par phye ba rgyas pa'o// //da ni lha'i rang bzhin gyi ting nge 'dzin bshad de/de la lha'i rang bzhin yang 'og nas 'byung ba'i tshul gyis rnam pa drug tu rig par bya ste/ rnam pa drug po de dag kyang gzugs dang phyag rgya la sogs pa yin la/ lha'i rang bzhin de rnams ni sngar bshad pa'i yan lag rnam pa bzhi la sogs pas bshad zin pa dag yin te/de yang phyi rol du de bzhin gshegs pa'i sku la dmigs pa dang / bdag nyid lha'i gzugs su bsgyur ba ni gzugs kyi lha'i rang bzhin no/ /zla ba'i dkyil 'khor ni byang chub kyi sems kyi phyag rgyar gyur pa'i lha'i rang bzhin no/ /zla ba'i dkyil 'khor la yig 'bru dgod pa ni sgra'i lha'i rang bzhin no//bdag lhar bsgyur ba ni uta pa la sogs pa rnam par grol ba'i phyag rgya ni gzugs dang bcas pa'i phyag rgya'i lha'i rang bzhin no/ /phyag rgya de nyid lag pa'i phyag rgyar bsgyur te/ lha'i skur byin gyis brlab pa dang bsrung ba la sogs pa bya ba ni gzugs dang bcas pa ma yin pa'i phyag rgya'i lha'i rang bzhin no//drug pa ni yongs su dag pa'i lha'i rang bzhin mtshan ma med pa'i ting nge 'dzin la gnas pa ste/ lha'i rang bzhin de sngar ma bshad pas skabs 'dir bshad par bya ba dang lha'i rang bzhin lnga po lngar bshad pa rnams kyang bzlas pa'i yan lag tsam du shes kyi/lha'i rang bzhin yin par mi shes te phyag rgya la sogs pa de rnams kyang lha'i rang bzhin yin par bstan pa'i phyir/ de nas yang bcom ldan 'das la gsang ba pa'i bdag po phyag na rdo rjes 'di skad ces gsol to zhes pa la sogs pa nas/lha'i gzugs byin gyis brlab pa bshad du gsol zhes pa'i bar te/ 'og nas 'byung ba'i lha'i gzugs su byin gyis rlob par 'gyur ba de bshad du gsol zhes pa ste/ gzugs zhes pa'i tshig ni lha'i rang bzhin zhes pa'i don to/ /lha'i rang bzhin de bshad par gsol ba de la dgos pa ci zhig yod ce na/lha'i gzugs gang gis byang chub sems dpa' gsang sngags kyi sgo nas byang chub sems dpa'i spyad pa spyod pa rnams lha'i gzugs la dmigs nas bdag nyid rang gi lha'i gzugs su bsgyur bas the tshom ma mchis par dngos grub 'thob par 'gyur ba zhes gsungs te/de la lha'i gzugs la dmigs nas zhes pa ni phyi rol gyi de bzhin gshegs pa'i sku dang / de la zla ba'i dkyil 'khor sngags dang bcas pa'i lha'i rang bzhin la dmigs nas zhes pa'o/ /bdag nyid rang gi lha'i gzugs su bsgyur bas zhes pa ni zhi ba dang rgyas pa dang /rab dang 'bring la sogs pa'i grub pa dang las la lha'i gzugs su bsgyur bas zhes pa'o/ /the tshom ma mchis par dngos grub 'thob par 'gyur zhes pa ni lha'i rang bzhin de rnams bshad pas shes par gyur na the tshom med pas ji ltar bsams pa'i don 'grub par 'gyur ba'i phyir lha'i rang bzhin de rnams bshad du gsol zhes sbyar ro//gsang ba pa'i bdag po de la lha'i gzugs ni rnam pa gsum ste/ yi ge dang / phyag rgya dang / gzugs so zhes pa la lha'i gzugs rnam pa gsum ni lha'i rang bzhin rnam pa gsum zhes pa'o//yi ge zhes pa rang bzhin mi 'gyur ba zhes pa'i tshig ste de yang gang zhe na/ /de la yi ge la yang rnam pa gnyis te/ sgra dang byang chub kyi sems so zhes pa'o/ /de la sgra ni sngags kyi yig 'bru ste sgra des kun rdzob dang don dam pa'i lha rnams kyi rnam par grol ba ston pa las rang bzhin gzhan du mi 'gyur bas na mi 'gyur ba zhes bya ste/'di ltar de bzhin gshegs pa rnams byung yang rung ma byung yang rung chos rnams kyi chos nyid de ni ye nas gnas pa ste/ de yang 'di ltar/ gsang sngags rnams kyi gsang sngags kyi chos nyid do zhes ji skad du gsungs pa las so//byang chub kyi sems ni zla ba'i dkyil 'khor la bya ste/ de bzhin nyid kyi rang bzhin byang chub kyi sems de zla ba'i dkyil 'khor du byin gyis brlabs pa ste/ zla ba'i dkyil 'khor du byang chub kyi sems kyi phyag rgyas btab pa'i phyir ro/ /byang chub kyi sems de la mi 'gyur ba zhes bya ste/phyin ci ma log par yongs su grub pas stong pa nyid kyi rang bzhin la gzung ba dang 'dzin pa la sogs pa'i rnam pa med par rtog pa can du mi 'gyur ba'i phyir ro/ /phyag rgya'i gzugs la yang rnam pa gnyis te/ gzugs dang bcas pa dang /gzugs dang bcas pa ma yin pa'o zhes pa la gzugs dang bcas pa ni lha rnams kyi so so'i rnam par grol ba'i phyag rgya pad+mo dang ut+pal la sogs pa'o/ /gzugs dang bcas pa ma yin pa ni pad+mo la sogs pa'i phyag rgya de dag nyid lag pa'i phyag rgyar bsgyur pa'o//lha'i gzugs kyang rnam pa gnyis te/ yongs su dag pa dang zhes pa la lha'i gzugs ni lha'i rang bzhin zhes pa ste/ de yang gang zhe na/ de la yongs su dag pa'i rtogs pa'i ngo bo ste mtshan ma thams cad bral ba'o zhes gsungs pa'o/ /stong pa nyid kyi ting nge 'dzin kha dog dang dbyibs la sogs pa'i rnam pa'i mtshan ma thams cad spangs pa de bzhin nyid kyi ye shes kyi lha'i rang bzhin zhes pa'o//yongs su ma dag pa ni mtshan ma dang bcas pa'i gzugs de kha dog dang dbyibs so zhes pa ni/ 'phags pa 'jam dpal dang / spyan ras gzigs kyi dbang po la sogs pa'i cha lugs te kha dog dang dbyibs la sogs pa'i mtshan ma la dmigs pas ma dag pa zhes bya'i/ don gyi bya ba byed pa'i sgo nas yongs su ma dag pa ni ma yin no/ /de la lha'i gzugs rnam pa gnyis kyis dgos pa gnyis 'grub par 'gyur te zhes pa ni yongs su dag pa dang yongs su ma dag pa'i lha'i gzugs rnam pa de gnyis kyis dgos pa rnam pa gnyis 'grub par 'gyur ro zhes pa'o//de yang gang zhe na/ mtshan ma dang bcas pas ni mtshan ma dang bcas pa'o zhes gsungs te kha dog dang dbyibs dang ldan pa'i mtshan ma dang lha'i gzugs su bsgyur ba'i ting nge 'dzin gyis ral gri dang rdo rje la sogs pa'i grub pa'i rdzas mtshan ma dang bcas pa 'grub ces pa'o//mtshan ma med pas ni mtshan ma dang bcas pa'i dngos grub kyang 'byung bar 'gyur ro zhes pa ni stong pa nyid kyi lha'i rang bzhin mtshan ma med pa'i ting nge 'dzin gyis ni ral gri dang rdo rje la sogs pa'i rdzas kyi mtshan ma la mi ltos pa'i dngos grub mngon par shes pa lnga dang gzungs dang rnam par thar pa la sogs pa rnams 'thob po zhes pa'o//skabs 'dir mtshan ma med pa zhes pa ni sgrub pa'i rdzas ral gri la sogs pa'i mtshan ma med pa la bya'i/mngon par shes pa lnga la sogs pa dmigs pa dang bcas pa grub pas na mi dmigs pa'i mtshan ma med pa la ni mi bya'o/ /mtshan mar bcas pas mtshan bcas kyi/ /dngos grub rgyal ba dam pa bzhed/ /ces bya ba la sogs pas ni yongs su dag pa dang yongs su ma dag pa'i ting nge 'dzin las mtshan ma dang bcas pa'i grub pa dang mtshan ma med pa'i grub pa so sor gyur pa las kyang mtshan ma dang bcas pa'i lha'i rang bzhin las grub pa yang mtshan ma dang bcas pa nyid 'byung gi /mtshan ma med pa'i grub pa mi 'byung ba'i nges pa bshad pa yin no//rgyal ba dam pa bzhed ces pa ni de lta bu sngon gyi sangs rgyas bcom ldan 'das rnams kyis kyang dgongs pa'am bzhed do zhes pa'o/ /mtshan ma med la gnas pa ni/ /mtshan ma can yang bsgrub tu rung / /zhes pa ni mtshan ma med pa'i lha'i ting nge 'dzin las mngon par shes pa lnga la sogs pa rdzas la mi ltos pa mtshan ma med pa'i grub pa 'ba' zhig ma yin gyi/ral gri la sogs pa'i rdzas kyis mtshan ma dang bcas pa yang 'grub bo zhes pa'o/ /de bas rnam pa thams cad du/ /mtshan ma med pa bsten par bya/ / zhes pa ni mtshan ma med pa'i ting nge 'dzin las mtshan ma dang bcas pa dang mtshan ma med pa gnyi ga 'grub pas rnam pa thams cad du mtshan ma med pa de bsten par bya'o zhes pa'o/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las lha'i ting nge 'dzin gtan la dbab pa rim par phye ba rgyas pa'o// //de nas yang bcom ldan 'das kyis gsang ba pa'i bdag po phyag na rdo rje la bka' stsal pa/ gsang ba pa'i bdag po de la byang chub sems dpa' gsang sngags kyi sgo nas byang chub sems dpa'i spyad pa spyod pa mtshan ma med pa'i ting nge 'dzin sgrub par 'dod pas 'di ltar bsam par bya'o zhes pa la sogs pa ni gong du yongs su dag pa dang yongs su ma dag pa'i lha rnam pa gnyis kyi ting nge 'dzin bsgom pa'i yan lag bzhi la sogs pa'i skabs snga mar bshad cing bstan du zin kyang yongs su dag pa'i lha'i rang bzhin gyi ting nge 'dzin bsgom pa'i rim pa ma bstan pas da 'dir ni mtshan ma med pa'i ting nge 'dzin de bsgoms na sngar lus dang sems dang yid gsum gyi mtshan ma 'byung ba so sor bshig nas sun byung ste mtshan ma byung ba med par byed pa'i thabs bstan te/de la mtshan ma rnams gang nas byung / /ci bdag gi lus sam/ bdag gi sems sam/ bdag gi yid las byung zhes pa ni mtshan ma rnams gang las 'byung zhes dang por dris pa'o/ /lus sam zhes pa ni sems dang yid gnyis ma gtogs par 'byung ba chen po'i rang bzhin gyi lus de las sngon po dang ser po la sogs pa'i mtshan ma 'byung ngam zhes brtags pa'o//sems sam zhes pa ni yid kyi rnam par shes pa de las mtshan ma 'byung ngam zhes brtags pa'o/ /yid las zhes pa ni sgo drug gi rnam par shes pa las mtshan ma de 'byung ngam zhes brtags pa ste/yid ces pa ni rnam pa dang bcas pa'i bsam pa la bya ste gzugs la sogs pa'i rnam par snang ba'i sgo drug gi rnam par shes pa nyid la bya'o/ /de la thog mar lus las mtshan ma mi 'byung bar brtag pa ni/de la lus ni las las skyes pa ste zhes pa nas gsang ba pa'i bdag po de ltar lus la lus kyi rjes su song ba'i dran pa ngo bo nyid kyis stong par bsgom par bya'o zhes pa'i bar te mdor na las las skyes pa'i lus de ni rang bzhin gyis be+ems po ste rtswa dang shing dang bong ba lta bu'o//ji ltar rtswa shing dang bong ba de sngon po dang ser po la sogs pa'i mtshan ma 'byung ba'i bya ba mi byed pa bzhin du lus de yang mtshan ma rnams 'byung ba'i bya ba mi byed do zhes pa'o/ /de nyid kyi dpe yang gsungs pa ni phyi rol gyi rnam pa lta bu la bzos byas pa'i gzugs lta bur brtag par bya'o zhes bya ba la sogs pa ste/ji ltar bzo bos rdo dang sa la sogs pa las lha dang mi'i rnam pa'i gzugs byas pa de mi 'ga' zhig gis khros te me'am/ dug gam/ mtshon nam/ chu 'am/ rdo rjes bshig gam/ bsregs sam/ bcad kyang mi dga' ba cung zad kyang med la/ de bzhin du skyes bu 'ga' zhig gis byams pa'i sems dang bcas pas bza' ba'am btung ba la sogs pa'am/ gos dang rgyan la sogs pa lha dang mi'i yo byad ji skad du smos pa rnams kyis mchod kyang gzugs de la drin du gzo ba dang byams pa'i sems mi skye ba de bzhin du/bdag gi lus 'di yang rang bzhin gyis bems po ste mtshan ma la sogs pa skyed pa'i bya ba byed pa ma yin no zhes lus de ltar bshig nas mtshan ma med pa'i ting nge 'dzin du 'jug par bya'o zhes dgongs pa'o//gsang ba'i bdag po gzhan yang sems ni ngo bo nyid med pa zhes pa nas ngo bo nyid kyis mtshan ma dang bral ba'o snyam du bsam par bya'o zhes pa'i bar gyis sems las byung ba'i mtshan ma mi 'byung bar bya ba'i bsgom pa'i thabs bstan pa ste/ sems de ni don dam par gzung ba dang 'dzin pa'i rang bzhin med pa sngon po dang ser po la sogs pa'i mtshan ma thams cad dang bral ba rang bzhin gyis stong pa yin pa'i phyir dus gsum las yang dag par 'das pa ste/gang dus gsum med cing rang bzhin gyis stong pa de ni de bzhin nyid kyi mtshan nyid rnam par mi rtog pa yin pas mtshan ma 'byung ba ma yin par rig par byas la mtshan ma med pa'i ting nge 'dzin la gnas par bya'o zhes dgongs pa'o//gsang ba pa'i bdag po gzhan yang byis pa so so'i skye bo rnams yid mtshan ma dang bcas par rtog ste 'di ni yang dag pa ma yin pa'i kun du rtog pa'i tshig bla dgas so//yang dag pa ma yin pa gang yin pa de ni ma skyes pa'o zhes bya bar ni rab tu mi shes so zhes pa ni yid las mtshan ma mi 'byung bar brtag pa bstan te/ mig la sogs pa'i sgo drug gi rnam par shes pa gzugs la sogs pa'i rnam par snang bar 'byung ba ni byis pa rnams kyis 'khrul par rtog pa ste/byis pa de rnams kyis ni 'khrul pa yin par mi shes pa'o/ /yang dag pa ma yin pa de ni ma skyes pa'o zhes bya ba ni gong du sgo drug gi rnam par shes pa de yang dag par yod pa ma yin pas yang don dam par mtshan ma 'byung ba'i rgyu ma yin no zhes pa'o//gsang ba pa'i bdag po byang chub sems dpa' gsang sngags kyi sgo nas byang chub sems dpa'i spyad pa spyod pas de ltar bsams na mtshan ma med pa'i ting nge 'dzin thob par 'gyur ro zhes pa ni ji ltar yongs su ma dag pa'i lhar bdag gi lus su bsgyur ba na lha de'i kha dog dang dbyibs ci 'dra bar bsgyur ba bzhin du mtshan ma med pa'i lha'i rang bzhin du bsgyur ba na yang mtshan ma med pa'i ting nge 'dzin du zhugs na yongs su dag pa'i lha'i rang bzhin du bsgyur ba yin te/mtshan ma med pa'i ting nge 'dzin rab tu thob po zhes pa ni yongs su dag pa'i lha'i rang bzhin du gnas par 'gyur ro zhes pa'o//gsang ba pa'i bdag po nam mtshan ma med pa'i ting nge 'dzin la gnas par gyur pa de'i tshe de la de bzhin gshegs pas gsungs pa'i gsang sngags rnams mngon du phyogs shing gzhol bar 'gyur ro zhes pa ni nam yongs su dag pa'i lha'i rang bzhin du gnas na de bzhin gshegs pas gsungs pa'i thabs kyi lha rnams 'grub par 'gyur ro//de la gzhol ba zhes pa ni lha de rnams sngags pa de la gzhol lo zhes pa'o/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/mtshan ma med pa'i ting nge 'dzin rim par phye ba rgyas pa'o// //gsang ba pa'i bdag po gzhan yang bzlas brjod gsang ba bshad par bya'o zhes pa la sogs pa ni bzlas brjod kyi de kho na nyid kyi le'u bshad pa ste/ bzlas pa de yang lha'i rnal 'byor rnam pa gnyis la gnas nas bzlas pa ni gong du yongs su dag pa dang yongs su ma dag pa'i lha'i rang bzhin bshad pa la gnas nas te/de yang yongs su ma dag pa'i lha'i rang bzhin la gnas pa'i bzlas brjod yan lag bzhir ldan pa ni sngar yang bshad zin mod kyi/'dir bshad pa ni mtshan ma med pa'i bzlas brjod dang 'jig rten dang 'jig rten las 'das pa'i bye brag dbye ba'i phyir ro/ /de gcig pus gcig gam zhes pa ni yongs su dag pa'i lha'i rnal 'byor gcig pu la gnas nas yid kyis bzlas brjod gcig pu bya'o zhes pa'o//gcig gis gcig ces pa ni yongs su ma dag pa'i lha'i rnal 'byor pas kyang yid kyis bzlas brjod bya'o zhes pa'o/ /yang na shu ba bur rnam gnyis pa/ /zhes pa ni yongs su dag pa dang yongs su ma dag pa'i lha'i rnal 'byor pa gnyi gas yang na shub bu'i bzlas pa bya'o zhes pa ste/de bas na/ rnam gnyis pa/ rnal 'byor mchog gis brtag par bya/ /zhes gsungs pa yin te/ yongs su dag pa dang yongs su ma dag pa'i lha'i rnal 'byor la rtag tu brtson par bya'o/ /sngags pa yan lag nyams sbyar bar/ /bzlas brjod gzhan du mi bya'o//zhes pa ni phyi nang gi yan lag bzhi'i bzlas brjod dang nang gi don dam pa'i bzlas pa 'di gnyis las gzhan pa'i bzlas pa cho ga nyams pa dang yan lag ma tshang ba dag mi bya'o zhes pa'o/ /phyi dang nang gi sbyor ba yis/ /yan lag bzhi pa ngas bshad pa/ / zhes pa nas/ bshubs te bzlas brjod byed pa'i mchog /ces pa'i bar gyis ni gong du don dam pa dang kun rdzob kyi rang bzhin mdor bstan pa de las kun rdzob kyi bzlas pa phyi'i yan lag gsum dang nang gi yan lag gcig ste bzhir ngas bshad pa de ni 'jig rten gyi bzlas pa ni yin la/de yang dmigs pa dang bcas pa'i bzlas pa'i nang na mchog go zhes pa'o/ /slar sdud pa yi tshig gis non/ /zhes pa ni snga ma bzhin no/ /lha yi rjes su song ba'i yid/ /ces pa ni 'di la sems rtse gcig tu dmigs par bya'o zhes pa'o/ /yid kyi/ 'jig rten 'jig rten 'das zhes bya//zhes pa nas/ gzhan du bya ba ma yin no/ /zhes pa'i bar gyis ni gong du bshad pa'i don dam pa'i bzlas pa de zhib tu 'grel pa ste/ de la/ slar sdud la sogs rnam par spangs/ /zhes pa 'jig rten las 'das pa'i bzlas pa de yongs su ma dag pa'i lha'i rang bzhin la dmigs pa ma yin pas phyi rol gyi bzlas pa'i yan lag las nang gi yan lag tu bsdu ba med do zhes pa'o//lha dang gcig tu byed pa dang / /zhes pa ni lha'i gzugs dang bdag gi gzugs gcig tu byed pa'o/ /tha dad ma yin 'dzin pa yi/ /zhes pa ni lha dang bdag gnyis gcig tu bya ba yang gzugs tha dad pa gnas gcig tu 'jug pa yang srid pas de lta bu ma yin gyi/lha dang bdag gnyis tha mi dad par bya'o zhes pa'o/ /lha dang bdag gnyis tha mi dad pa yang gzugs kyi rang bzhin du tha mi dad pa srid pas de bsal ba'i phyir/ yid kyis rang bzhin dbyer med bya/ /zhes gsungs pa yin te/ gzugs la sogs pa gcig tu bya ba ni ma yin gyi yid gnyis pa stong pa nyid kyi rang bzhin du dbyer med par bya'o zhes pa'o/ /gzhan du bya ba ma yin no/ /zhes pa ni 'jig rten las 'das pa'i bzlas pa de tshul 'di 'dra ba las gzhan du mi bya'o zhes pa ste/mdor na rang gi snying po gang yin pa'i sgra'i de kho na nyid la dmigs nas bdag nyid kyi gzugs stong pa nyid du bshig ste bshig nas kyang ji ltar bdag gi gzugs stong pa nyid du phyi nang gi chos thams cad kyang stong ba'i rang bzhin du gcig par rtogs par bya ste/de ltar chos thams cad stong pa'i rang bzhin du dbyer med pas bdag dang lha'i rang bzhin kyang stong pa'i mtshan nyid du dbyer med par rtogs par byas la/ stong pa'i ting nge 'dzin rtse gcig pa la gnas nas yid la bzlas par bya'o zhes pa'o/ /gsang sngags grangs ni sum 'bum du//phal cher ngas ni bshad pa dag /lus can sdig dang bral ba yi/ /sngags pa rnam par dag pa la/ /bzlas brjod grangs 'di bstan pa ste/ /gzhan du bya ba ma yin no/ /zhes pa ni grangs sum 'bum gyi bsnyen pa sngon du byas na 'grub po zhes ngas phal cher bshad pa de dag ni sngags pa sdig pa dang bral ba la ste/sdig pa dang bral ba la yang tshe rabs snga ma tshun chad du bsod nams dang ye shes kyi tshogs bsags bsags pa'am/ /tshe 'di la byang chub kyi sems bsgom pa'i thabs sngar bshad pa'i rim pa bzhin du bsgoms nas mtshan ma byung ba la bya'o//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ 'jig rten dang 'jig rten las 'das pa'i bzlas brjod kyi de kho na nyid rim par phye ba rgyas pa'o// //rnam par snang mdzad mngon par byang chub pa'i lus dang ngag dang yid kyi 'khor lo dkyil 'khor gsum byin gyis brlabs pa las lus kyi 'khor lo byin gyis brlabs pa snying rje chen po'i dkyil 'khor de bshad nas/ da ni ngag gi 'khor lo byin gyis brlabs pa yi ge 'khor lo bskor ba 'dir bshad par bya ste/'dir lus dang ngag dang yid gsum ka'i 'khor lo 'dus mod kyi bdag gi 'khor lo byin gyis brlabs pa ste/ gzhan yang med pa ni ma yin no/ /de la dang po dkyil 'khor bri bar brtsam pa'i tshe dkyil 'khor gyi slob dpon gyis rang gi ting nge 'dzin gyi khyad par bshad pa gang yang rung ba la dmigs te/bdag dang 'khor thams cad bsrung ba'i phyir rig pa 'di lan gsum mam/ bdun nam/ nyi shu rtsa gcig bzlas par bya ba yin la/ bcom ldan 'das kyis rig pa de'i don rnam par thar pa'i ting nge 'dzin la dmigs nas sngags bshad par mdzad pa ni de nas yang bcom ldan 'das zhes pa nas rig sngags kyi rgyal mo byung ngo zhes pa'i bar gyis gsungs pa yin te/de nas yang bcom ldan 'das rnam par snang mdzad kyis thams cad dang ldan pa'i 'khor 'dus pa la gzigs nas zhes pa de la thams cad dang ldan pa ni 'khor de dag nyid thams cad dang ldan pa zhes pa'i don to//rnam pa gcig tu na thams cad srung ba zhes pa ste/ byang chub sems dpa'i 'khor phyag na rdo rje de sems can thams cad srung zhing skyong ba'i phyir ro/ / gzigs pa ni 'khor sems bsdu bar bskul ba dang snod du gyur pa dang ma gyur pa brtag pa rnam pa gnyis kyi phyir 'khor la gzigs pa ni chos nyid kyis de lta bu yin te/ skabs 'di'i 'khor la de dag mi dgos kyang ma 'ongs pa la bstan pa'o/ /byams pa chen po dang snying rje chen po'i spyan gnyis kyis kyang sems can gyi khams thams cad la gzigs te zhes pa ni bcom ldan 'das mi gnas pa'i mya ngan las 'das pa rtog pa thams cad dang gtan du bral bas gzigs pa'i rtog pa mi 'byung mod kyi/sngon gyi smon lam gyi shugs kyis thugs rje chen po'i yum dang byams pa chen po'i dbang gis sems can thams cad kyi khams la gzigs pa ni ma grol ba grol ba dang /ma smin pa smin par bya ba'i phyir rig pa bshad par bzhed pa'o/ /bdud rtsi 'byung ba zhes bya ba'i ting nge 'dzin la snyoms par zhugs so zhes pa ni 'chi bar 'gyur ba med pa'i bdud rtsi ste de yang /chos kyi sku stong pa nyid do/ /de la dmigs nas ting nge 'dzin 'byung bas na bdud rtsi 'byung ba zhes bya'o/ /yang na bdud rtsi de nyid ting nge 'dzin 'di las 'byung bas na bdud rtsi 'byung ba ste/ byang chub las chos kyi sku'i ye shes 'byung ba'i don te/ ting nge 'dzin de la snyoms par zhugs nas rig pa gsungs pa'o/ /bcom ldan 'das snyoms par zhugs ma thag tu yan lag thams cad nas dus gsum du ma chags pa'i stobs can zhes bya ba'i rig sngags kyi rgyal mo byung ngo zhes pa de la bcom ldan 'das kyi yan lag thams cad ni longs spyod rdzogs pa'i sku dang sprul pa'i sku dang snying po byang chub kyi sku'i yan lag thams cad nas byung ba ste/stong pa nyid rnam par mi rtog pa'i ting nge 'dzin la gnas pas zhal nas tshig tu 'byin pa mi rigs so zhes bya ba yan lag nas byung ngo zhes pa'o/ /de la dus gsum du ma chags pa'i stobs can zhes pa ni sngar 'das pa dang ma 'ongs pa dang da ltar gyi dus la ma chags pa ni stong pa nyid de chos kyi dbyings yin la/de la dmigs pa'i skye ba stobs dang ldan pa ni don dam pa'o/ /rig pa 'di'i mthus bdud dang rgol ba thams cad kyis bgegs byed par mi tshugs pa ni kun rdzob tu'o//rig pa ni shes pa'i don te/ skabs 'dir byang chub pa'i shes rab nyid la bya la/ rgyal mo ni shes rab thams cad kyi nang na byang chub pa'i shes rab mchog yin pa'i phyir rgyal mo zhes bya ste/ de bas na rig pa 'di yang byang chub nyid kyi ye shes kyi rang bzhin byin gyis brlabs pa'o//rig pa de'i rang bzhin dang gzugs bstan pa'i phyir rigs kyi bu rig sngags kyi rgyal mo de bzhin gshegs pa thams cad kyi sku dang gnyis su med pa'i spyod yul can de zhes gsungs pa yin te/ de la de bzhin gshegs pa thams cad kyi sku ni chos kyi sku ste de dang rig pa 'di ni spyod yul gnyis su med de/de bzhin nyid la dmigs par 'dra ba'i phyir ro/ /rig pa 'di'i mthu chen po bstan pa'i phyir/ 'di yis byin brlabs zhes pa nas/ /chags med thob par 'gyur zhes bya ba'i bar gyis gsungs te/rig pa 'dis sangs rgyas dang byang chub sems dpa' thams cad kyis byin gyis brlab pas na sangs rgyas dang byang chub sems dpa' de dag gis mi gnas pa'i mya ngan las 'das pa'i chos nyid chags pa med pa gang du sdug bsngal 'gag par 'gyur ba thob par 'gyur zhes pa'i don to//de la sangs rgyas dang zhes pa ni bla na med pa'i sangs rgyas la mi bya ste/ byang chub sems dpa' sa bcur phyin pa dbang bcu thob pa'i sangs rgyas de la byang chub sems dpa' ni de las gzhan pa'i 'phags pa'i sa la gnas pa rnams la bya'o//chos nyid chags med ces pa ni mi gnas pa'i mya ngan las 'das pa'i rang bzhin te/ nyon mongs pa dang shes bya'i sgrib pa med pas na ma chags pa'o zhes bya'o/ /yang ci lta bu zhe na/ gang du sdug bsngal 'gag 'gyur pa'i/ /zhes pa ste/ /mya ngan las 'das pa zhes bya ba'i chos de la phung po'i sdug bsngal rnams med ces pa'i don to//de nas bcom ldan 'das kyis yi ge 'khor lo'i dkyil 'khor spyad pa 'khor rnams la bshad par bya'o zhes bka' stsal pa/ de nas bcom ldan 'das rnam par snang mdzad ces pa nas/ rim par phye ba rgyas pa nyon cig ces pa'i bar du gsungs pa yin te/ de la de bzhin gshegs pa thams cad rjes su dgongs nas zhes pa ni sems can gzhan dang ma 'ongs pa'i sems can rnams ci tsam na yang dang por de bzhin gshegs pa rjes su dran par gyis shig ces lung bstan pa'o//bdag nyid dang phyag na rdo rje gnyi ga gzod ma nas ma skyes pa nyid du byin gyis brlabs te zhes pa ni dkyil 'khor gyi cho ga bstan pa ste/ 'chad pa po dang nyan pa po gnyis ting nge 'dzin la snyoms par zhugs nas 'chad cing mnyan pa'i tshul te de bas na 'chad pa po bcom ldan 'das dang nyan pa po phyag na rdo rje gnyi ga ma skyes pa'i chos stong pa nyid kyi ting nge 'dzin la snyoms par zhugs par bstan te/de yang ting nge 'dzin la ma zhugs pa'i spyod yul ma yin pa'i phyir ro/ /de bas na dkyil 'khor gyi slob dpon gyis kyang dkyil 'khor dang por brtsam pa'i tshe bdag nyid kyang byin gyis brlabs grogs byed pa yang rdo rje dam pa sbyin par byin gyis rlobs shig ces pa ste/de yang rang ngam slob dpon gyis stong pa nyid du byin gyis brlab po/ /yi ge 'khor lo bskor ba zhes bya ba'i dkyil 'khor spyad pa rim par phye ba rgyas pa zhes bya ba de la yi ge 'khor lo bskor ba zhes pa ni gcig tu na yi ges 'khor lo bskor te yi ge a dbus su gzhag la ka la sogs pas mtha' bskor ba'i phyir ro//gnyis su na 'khor lo'i dkyil 'khor du yi ger bsgyur bas na yi ge'i 'khor lo bskor ba ste/ dkyil 'khor der gzugs yi ge'i 'brur bsgyur te bkod pa'i phyir ro//spyad pa zhes pa ni dkyil 'khor gyi las su bya ba rnams so/ /rim par phye ba zhes pa de nyid kyi gzhung gi le'u'o/ /rgyas pa zhes pa ni dkyil 'khor der slob ma'i bsod nams kyi tshogs shin tu 'phel ba'o/ /dkyil 'khor de yang ji lta bu zhe na/rang bzhin bstan pa'i phyir byang chub sems dpa' gsang sngags kyi sgo nas byang chub sems dpa'i spyad pa spyod pa rnams la sangs rgyas kyi mdzad pas so sor nye bar gnas pa zhes gsungs te/ de la sangs rgyas kyi mdzad pa ni tshe 'di dang pha rol du mngon par mtho ba dang nges par legs pa'i 'bras bu thob par mdzad pa yin la/de bzhin du dkyil 'khor 'di'i sgo nas sngags spyod pa rnams tshe 'di dang pha rol du 'jig rten dang 'jig rten las 'das pa'i 'bras bu thob par byed pa'i phyir dkyil 'khor 'di ni sangs rgyas kyi mdzad pas nye bar gnas pa yin te de bshad kyis nyon cig ces pa'i don to//bcom ldan 'das kyis yi ge 'khor lo bskor ba'i dkyil 'khor spyad pa bshad par gnang bas des phyag na rdo rje shin tu mgu nas bcom ldan 'das la yon tan gyi sgo nas bstod pa yang bcom ldan 'das la gus pa bskyed pa'i phyir phyag 'tshal te rdo rje pad+ma'i stan de las rdo rje 'bab pa'i tshul du babs zhes gsungs te/rdo rje'i tshul du babs pa ni g.yeng ba dang 'drog pa med par brtan por babs pa'o/ /gcig tu na dkyil 'khor 'di'i nang nas bcom ldan 'das kyi rgyu dang 'bras bu'i yon tan 'byung ba rnams kyi sgo nas bstod pa'i phyir/de nas phyag na rdo rjes bcom ldan 'das la mngon par bstod pa zhes sbyar ro/ /bcom ldan 'das zhes bya ba la sogs pas yon tan rnam pa lnga'i sgo nas bstod de/ byang chub kyi sems kyi sgo nas bstod pa dang / rgyu dang 'bras bu'i spyod pa'i sgo nas bstod pa dang /de bzhin gshegs pa'i de ma thag pa'i lam gyi sgo nas bstod pa dang / kun du sangs rgyas pa'i yon tan gyi sgo nas bstod pa dang / mya ngan las 'das pa'i yon tan gyi sgo nas bstod pa ste/ yon tan gyi go rims kyang 'di ltar rigs mod kyi/ /tshigs su bcad pa sbyar bde ba'i phyir gong 'og bsnor te gsungs so//de la/ phyag 'tshal byang chub sems khyod la/ /zhes pa ni byang chub kyi sems dngos ni byang chub sems dpa'i sa dang po yan chad la bya mod kyi/ sa dang po la sogs pa rnams sa dang pha rol tu phyin pa'i sgo nas bstod zin pas na de la mi bya bar skabs 'dir ni btags pa'i byang chub mos pas spyod pa'i sa la bya ste/de yang de bzhin gshegs pa'i rgyu yin pas rgyu de la 'bras bu de bzhin gshegs pa'i ming gis btags so/ /phyag 'tshal byang chub 'byung khyod la/ /zhes pa ni de bzhin gshegs pa'i de ma thag pa'i lam gyi yon tan gyi sgo nas bstod pa ste/byang chub sems dpa'i sa bcu las 'das nas snying po byang chub ma thob kyi bar du de ma thag pa'i lam ste/ de las byang chub 'byung bas na byang chub 'byung ba zhes bya'o/ /spyod gzugs zhes pa la rgyu'i spyod pa dang 'bras bu'i spyod pa rnam pa gnyis las 'bras bu'i spyod pa ni/lus dang ngag dang yid gsum gyi 'khor lo'i spyod pas 'jig rten gsum du khyab par ston pa yin la/ rgyu'i spyod pa'i gzugs ni sa dang pha rol tu phyin pa rnams so/ /phyag 'tshal thog mar byed khyod la/ /zhes pa ni kun du sangs rgyas pa'i yon tan gyi sgo nas bstod pa ste/chos rnams thog ma nas yang dag par gzung ba dang 'dzin pa dang bral ba stong pa nyid yin pa de la phyag 'tshal ba'o/ /stong pa nyid la 'dud phyag 'tshal/ /zhes pa ni mya ngan las 'das pa'i rang bzhin gyi sgo nas bstod pa ste thams cad ma byung ma skyes pa'i ngo bo nyid mi gnas pa'i mya ngan las 'das pa la phyag 'tshal lo zhes pa'o//de nas phyag na rdo rjes dkyil 'khor de bshad par gsol ba gdab pa'i phyir bcom ldan 'das la 'di skad ces gsol to zhes pa nas bshad du gsol zhes pa'i bar du gsungs so/ / de la gang dag dang ldan na bdag cag rnams zhes pa ni bcom ldan 'das kyis bshad pa'i dkyil 'khor gyi tshul de dag dang ngo / /de la phyag na rdo rje ni rtogs pa'i chos dang ldan pas na bcom ldan 'das bshad pa'i lung gi chos de des thos nas sems can gyi don bya ba dang sngags kyi tshul rdzogs par bya'o zhes pa de mi rigs so//de ci'i phyir zhe na/ rtogs pa'i chos nyid la gnas pas lung gi chos mnyan nas sems can gyi don bya ba la sogs pa mi rigs pa'i phyir ro zhe na/ de ni de lta ma yin te/ gcig tu na bcom ldan 'das kyis chos bshad pa gces shing btsun par bstod pa'i phyir te/bcom ldan 'das kyis chos de bshad pa na phyag na rdo rje lta bu rtogs pa dag ldan pas kyang thos nas yon tan gyi bye brag thob par 'gyur na gzhan lta ci smos snyam du 'jig rten gyis shes par bya ba'i phyir ro/ /yang gcig tu na phyag na rdo rje rtogs pa'i chos dang ldan pa yin mod kyi lung gi chos rnams kyang bcom ldan 'das las mnyan te sems can gyi don mdzad par gyur na yang nyes pa med do//de nas bcom ldan 'das mi gnas pa'i mya ngan las 'das pa la bzhugs pas rnam par rtog pa mi mnga' ba'i phyir ro/ / chos gsungs pa'i tshig de 'byung bar mi rigs la/ yang na ni rnam par mi rtog pa'i tshig nyams par 'gyur ro snyam pa de 'dra ba'i klan kar mi 'gyur ba'i phyir/ bcom ldan 'das kyi longs spyod rdzogs pa dang / sprul pa'i skus chos dang bshad la rnam par mi rtog pa'i ting nge 'dzin las kyang nyams pa med par bstan pa'i phyir/nga ni 'jig rten dang po yi/ /zhes pa nas/ las kyi rnam par smin pa bzhin du mthong bar 'gyur ba de lta bu'i byin gyis brlab pa mdzad do zhes pa'i bar du gsungs pa yin te/ de la 'jig rten dang po yi/ /zhes pa dang / chos bshad do zhes pas ni mi rtog pa'i ngang las chos bshad pa mi 'byung ba ma yin par bstan to/ /de la 'jig rten dang po ni rnam pa gnyis te/ dag pa dang / ma dag pa'o/ /de la dag pa ni sa dang po yan chad kyi byang chub sems dpa' rnams te de rnams sngar byung nas phyis mngon par chos bshad pa mi 'byung ba ma yin par bstan te/de rnams dang po'i 'jig rten sangs rgyas pa yin pa'i phyir 'jig rten dang po zhes bya'o/ /de la ma dag pa'i 'jig rten pa ni bskal pa chen po zhig pa'i 'og tu dang po 'jig rten 'chags pa'i tshe tshangs pa dang brgya byin la sogs pa dang po nyid du 'byung bas na 'jig rten dang po zhes bya'o//de dag la bcom ldan 'das kyis chos rnam pa gsum bshad pas na de dag gis bcom ldan 'das la 'jig rten gyi mgon po zhes bsgrags so/ /de la chos bshad pa rnam pa gsum po de yang gang zhe na/ mnyam pa med pa'i chos dang / gzod ma nas zhi ba dang /bla na med pa'i chos so/ /de rnams kyang 'jug pa dang / sbyor ba dang / 'bras bu'i bye brag tu blta ste/ de la mnyam pa med ces pa ni bla na med par 'jug pa'i chos de dge ba bcu dang sbyin pa la sogs pa'i dge ba'i chos rnams so/ /de yang 'jig rten pa phyi rol mu stegs kyi chos dang mi mtshungs pas na mnyam pa med pa'o//gzod ma nas zhi ba zhes pa ni sangs rgyas par sbyor ba'i rim pa ste/ chos thams cad rgyu dang rkyen gyis mi bskyed pa'i phyir na gzod ma nas zhi ba'o zhes bstan to/ /de la bla na med pa zhes pa ni 'jug pa dang sbyor ba'i 'bras bu ste mi gnas pa'i mya ngan las 'das pa'i sa bstan pa'o//de ltar chos bstan cing 'chad mod kyi rnam par mi rtog pa las nyams pa med par bstan pa'i phyir/ de lta bu'i byin gyis brlob pa mdzad do zhes gsungs te/ de la de lta bu'i byin gyis brlob pa zhes pa ni byang chub sems dpa' kun du bzang po la sogs par bsam pa yongs su dag pa rnams ji ltar bcom ldan 'das kyis byin gyis brlabs pa 'od la sogs pas bskul ba de lta bus byin gyis brlabs nas snying po byang chub na bzhugs pa'i sku mthong bar bstan to//de dag gis snying po byang chub kyi sku mthong ba de ji lta bur mthong zhe na/nam mkha' bzhin du spros pa med pa la sogs par te/ nam mkha' bzhin zhes pa ni rang bzhin gyis 'od gsal zhing dri ma med pa stong pa nyid kyi rang bzhin no/ /spros pa med pa zhes pa ni nang gi yid kyi rnam par shes pa'i rnam par rtog pa thams cad spangs zhes pa'i don to//spyod pa la gnyis su med pa'i rnal 'byor zhes pa ni lus dang ngag dang yid gsum gyi 'khor los spyod pa dang snying po byang chub kyi sku gnyis su med par sbyor ba ste/ de gnyis rang bzhin dbyer med pa'i phyir ro/ /las kyi rnam par smin pa bzhin/ /zhes pa ni las kyi rnam par smin pa dang 'dra'o zhes pa ste/rnam par smin pa nyid ma yin gyi de dang 'dra bar bstan pa'o/ /de ci'i phyir zhe na/ sems dad pa'i sems can ni las kyi rnam par smin pa la brten te de nyid zad par 'gyur gyi bcom ldan 'das ni bsod nams dang ye shes kyi tshogs chen po'i rgyu mthun pa'i 'bras bu de zad par mi 'gyur ba ste/snying po byang chub kyi sku de ni bsod nams dang ye shes kyi tshogs chen po'i rgyu mthun pa'i 'bras bu yin pas rnam par smin pa lta bu zhes bya'o/ /de'i tshe bcom ldan 'das kyi yan lag dang / de bzhin gshegs pa'i sku thams cad nas zhes pa nas/ snying po 'di la brtson par bya'o zhes pa'i bar gyis ni yi ge a yi ge 'khor lo bskor ba'i dkyil 'khor gyi bdag por bzhag nas a de'i yon tan brjod pa dang bcas par gsungs pa yin te/de la bcom ldan 'das kyi yan lag dang de bzhin gshegs pa'i sku thams cad nas zhes pa ni yi ge a de bzhin gshegs pa'i lus kyi 'khor lo sku thams cad nas byung ngo zhes pa'i don to//'jig rten pa dang 'jig rten las 'das pa zhes pa la sogs pa de dag ni yi ge a'i mthu chen po bstan pa ste/ de la 'jig rten pa zhes pa ni mu stegs kyi drang srong la sogs pa dang phyogs gcig stong par lta ba rnams so//'jig rten las 'das pa zhes pa ni byang chub sems dpa' rnams la bya ste/ nyan thos dag ni 'og nas 'byung bas na 'dir ma gtogs so/ /nyan thos dang rang sangs rgyas dag kyang rang gi rnam par grol ba phyogs gcig gi sgo stong pa la gnas pa ste/de rnams kyang sngags sgrub pa'i 'jug pa dang / bsam gtan gyi sgor 'jug pa rnam pa gnyis te de gnyi ga'i yang srog dang 'dra ba'o/ /de ci'i phyir zhe na/ de dag thams cad kyang don dam par yang la la ni phyin ci ma log par yongs su grub pa'i stong pa/la la ni phyogs tsam stong par lta ba ste/ spyir thams cad stong pa'i don la brten pas na yi ge a'i don skyes pa'i chos nyid ni de dag thams cad kyi srog lta bu'o/ /kun rdzob tu yang gang yig 'bru la brten pa'i chos thams cad a las 'gyur bas na srog lta bu'o//de la bsam gtan zhes pa ni rnal 'byor te sems pa'o/ /bsam gtan du bya ba zhes pa ni bsam pa de'i 'bras bu gang yin pa ste de ni bsam gtan gyi sgo nas 'jug pa'o/ /dngos grub sgrub pa ni rab dang 'bring dang tha ma la sogs pa ste de dag sgrub pa'i phyir 'jug pa de ni sngags sgrub pa'i sgor zhugs pa'o//yi ge'i 'bru rnams kyang kun rdzob dang don dam pa'i sgo nas srog la sogs par 'gyur ba ste/ de la yi ge thams cad kyi 'tsho bar gyur pa zhes pa ni byang chub kyi sgo nas yi ge rnams a la brten pa'i phyir 'tsho bar gyur pa ste/ a zhes pa'i don ni ma skyes pa yin la/ de bzhin gshegs pa zhes bya ba'i don kyang dgos pa thams cad dang bral ba ste ma skyes pa'i don to/ /de bas na yi ge ka byang chub kyi sa bon gyi 'tsho ba yang a la rag lus pa'i phyir srog ces bya'o/ /de bzhin du yi ge lhag ma rnams kyang shes par bya'o//de la yi ge thams cad kyi srog tu gyur pa zhes pa ni spyod pa'i sgo nas yig 'bru rnams de la brten pas na de'i phyir srog ces bya'o/ /skyabs su gyur pa zhes pa ni kun du sangs rgyas pa'i sgo nas yi ge rnams kyi rten yin pas na skyabs so/ /byung ngo zhes pa ni mya ngan 'das pa'i sgo nas yi ge rnams byung ba'i don to//rigs kyi bu dag 'di ni de bzhin gshegs pa thams cad kyis byin gyis brlabs pa zhes pa ni sangs rgyas kyi sku'i 'khor lo thams cad kyis byin gyis brlabs zhes pa'i don to/ /byang chub sems dpa' gsang sngags kyi sgo nas byang chub sems dpa'i spyad pa spyod pa rnams la/sangs rgyas kyi mdzad pas so sor nye bar gnas pa yin te zhes pa ni yi ge a de'i mthu chen po bstan pa ste sangs rgyas 'jig rten du 'byung ba'i tshe chos rnam pa gnyis bstan pa ni sangs rgyas kyi mdzad pa ste/ rnam pa gnyis ni bsam pa dag pa rnams la rtogs pa'i chos bstan pa dang bsam pa ma dag pa rnams la lung gi chos bstan pa'o//de bzhin du yi ge a yang chos de gnyi ga ston pa'i rgyu yin te/ de bas na sangs rgyas kyi mdzad pas so sor nye bar gnas pa yin no/ /ji ltar zhe na/ rtogs pa'i chos rnams kyang yi ge a de'i don ma skyes pa las byung la/lung gi chos rnams kyang yi ge'i 'bru'i sgo nas bshad pa yin te/ tshig thams cad yi ge a las ma gyur pa med pa'i phyir ro/ /sangs rgyas kyi mdzad pa byed par ji ltar shes she na/ chos thams cad ni a zhes bya ba'i sgo nas 'jug go zhes gsungs te/de yang ji ltar zhe na/ yi ge a zhes bya bas rgyu byas pa las rtogs pa'i chos dang lung gi chos thams cad 'byung ba'i phyir ro/ /de ltar yi ge a zhes bya ba de sangs rgyas kyi mdzad pa byed cing chos thams cad 'byung ba'i sgo yin pa de lta bas na sngags la spyod pa'i byang chub sems dpa' rnams kyi yi ge a de de bzhin gshegs par blta ba la sogs pa bya ste/de la de bzhin gshegs pa rnams mthong bar 'dod pas de bzhin gshegs pa rnams kyi snying po 'di la brtson par bya'o zhes sbyar te/ yi ge a zhes bya ba'i don ni de bzhin gshegs pa'i rang bzhin las gzhan ma yin pa'i phyir snying po byang chub nyid kyi snying po ste de ni don dam pa'o//kun rdzob tu yang a zhes bya ba'i yi ge'i 'bru de bsgoms na de'i mthus de bzhin gshegs pa grangs med pa 'char ba'i phyir ro/ /de bzhin gshegs pa mchod par 'dod pas kyang yi ge 'di bsgom par bya la mchod pa yang sgrub pa'i mchod pa dang /zang zing gi mchod pa rnam pa gnyis su rig par bya'o/ /de la sgrub pa'i mchod pa ni yi ge a de nyid kyi don bsgoms par 'gyur la/ zang zing gi mchod pa ni yi ge a de bsgoms pa'i mthu las nam mkha' gang ba'i mchod pa rgya chen po 'byung ba'i phyir ro//byang chub kyi sems mngon sum du bya bar 'dod pa zhes pa ni byang chub sems dpa'i sa dang po yan chad kyi sems la bya ste/ de mngon du bya bar 'dod pas yi ge a'i don mngon par sgrub par byos shig ces pa'i don to/ /de ci'i phyir zhe na/byang chub kyi sems kyang ma skyes pa yin pas yi ge a'i don ma skyes pa dang mtshungs pa'i phyir ro/ /byang chub sems dpa' rnams dang 'grogs par 'dod pa zhes pa ni de ltar 'dod pas yi ge a'i sgo sgoms shig ces 'don te/ byang chub sems dpa' rnams kyang ma skyes pa'i don la dmigs/yi ge a yang ma skyes pa'i don yin pas na spyod yul mthun pas lhan cig tu skye bar 'gyur ro/ /de yan chad ni bsam gtan gyi sgo nas bsgom pa dang / a nyid sngags kyi sgo sgrub pa la zhugs pa gnyis ka'i thun mong gi yon tan bstan pa yin la dngos grub mngon par 'dod pa zhes pa ni sngags kyi sgo nas zhugs pa'i grub pa rab 'bring rnam pa gsum mo//de rnams ni yan lag gi tshig yin la/ rnam pa thams cad mkhyen pa nyid thob par 'dod pas 'di sgoms shig ces bya ba ni bsdus pa'i don yin no/ /de nas dkyil 'khor bri ba'i cho ga rnam pa gsum bstan pa'i phyir/de nas bcom ldan 'das rnam par mdzad kyis snying rje chen po'i snying po 'byung ba'i dkyil 'khor gyi rgyal po 'di'i cho ga dgod pa dang / lha'i gnas gtan la dbab pa dang zhes bya ba la sogs pa gsungs te/ de la snying rje chen po'i snying po 'byung ba zhes pa ni lus kyi 'khor los byin gyis brlabs pa'i dkyil 'khor 'di dang /ngag gi dkyil 'khor la yang ming du gdags so/ /de ci'i phyir zhe na/ dkyil 'khor rnam pa gsum ka yang snying rje chen po'i nus pa dang rgyus dkyil 'khor 'byung ba'i phyir de skad ces bya'o/ /lha'i gnas gtan la dbab pa zhes pa ni dbung mtha' dang mchog du bkod pa'i lha bzhugs pa'i gnas nges par bya'o//ting nge 'dzin rnam par sprul pa zhes bya ba ni gang ting nge 'dzin du zhugs nas srung ba'i rig pa dang sngags la sogs pa'o/ /gsang sngags spyod pa zhes pa ni dkyil 'khor du 'jug pa'i tshe las su spyad pa rnams so//bsam par bya ba ni dkyil 'khor du 'jug pa na slob mas byang chub kyi sems bsam pa dang / slob dpon rang gi ting nge 'dzin du gnas pa la sogs pa'i bye brag gsungs pa'o/ /de dag so so'i bshad pa ni phyis 'chad par 'gyur ro/ / de la dkyil 'khor gyi rgyal po 'di'i cho ga dgod pa zhes don bshad pa'i phyir/ de la slob dpon gyis thams cad mkhyen pa nyid kyi sgo a zhes bya ba la gnas te zhes pa nas/ de bzhin gshegs pa'i gzugs snying po nyid kyi rang gi ngo bor byin gyis brlabs la zhes pa'i bar du gsungs te/ de la dkyil 'khor gyi thig bre ba'i tshe dkyil 'khor gyi snam bu re re la yang slob dpon gyi ting nge 'dzin re re gsungs te/ phyi rol gyi rim pa'i dkyil 'khor la byang chub sems dpa' 'jam dpal la sogs pa pha rol tu phyin pa las skyes pa rnams bzhugs pas na thig bri ba'i slob dpon gyi ting nge 'dzin kyang thams cad mkhyen pa'i rgyu'i gnas kyi snying po yi ge a la gnas te dkyil 'khor gyi srad bu bres shig ces gsungs pa yin no//de la dang po thig bri ba'i tshe dang por nam mkha'i thig bri bar gsungs pa ni sangs rgyas thams cad la phyag 'tshal nas zhes pa nas byang phyogs su kha bltas nas srad du bres te zhes pa'i bar gyis so//de nas sa'i dkyil 'khor gyi thig bri ba'i phyir/ /nub phyogs su kha bltas la bsgyur te thig gdab po zhes gsungs pa yin no/ /lhag ma rnams 'dir ma gsungs pa ni snying rje chen po'i dkyil 'khor du thig bri ba zhib tu bshad zin pas 'dir yang lhag ma rnams de dang 'dra bar shes par bya'o//de nas snying po'i dkyil 'khor gyi thig bri ba'i slob dpon gyi ting nge 'dzin bshad pa'i phyir/ de nas bdag nyid rdo rje sems dpa' lag na rdo rjer de'i phyag rgya'am/ yi ge ba zhes bya bas byin gyis brlabs te nang du zhugs la snying po'i dkyil 'khor bri bar bya'i zhes gsungs te/ de'i slob dpon gyi ting nge 'dzin ni byang chub pa'i sa bon yi ge as bskyed pa'i rdo rje sems dpar slob dpon bdag nyid byin gyis brlab pa'o/ /rdo rje sems dpa' la yang las kyi rdo rje sems dpa' la sogs pa bzhin du 'dren pa yang yod de/skabs 'dir ni gzhan la mi bya'i rdo rje sems dpa' phyag na rdo rje la bya'o/ /de nas dkyil 'khor bar ma'i snam bu'i thig bri ba'i ting nge 'dzin bstan pa'i phyir/ /de bzhin du dkyil 'khor gnyis pa la yang zhes pa nas/snying po nyid kyi rang gi ngo bor byin gyis brlabs la zhes pa'i bar du gsungs te/ de la dkyil 'khor snam bu bar ma'i nang na longs spyod rdzogs pa'i sku dang sprul pa'i sku gnyis bzhugs pas dkyil 'khor de'i thig bri ba'i tshe'ang sku de gnyis kyi rgyu'i ting nge 'dzin rnam pa bzhi slob dpon byin gyis brlabs te/slob dpon gyis ting nge 'dzin de rnams dmigs nas bya'o zhes pa'i don to/ /de nas gzod ma nas zhi ba ni byang chub pa'o/ /gnyis su med pa'i rnal 'byor gyi gzugs ni spyod pa'o/ /de bzhin gshegs pa'i gzugs ni kun du sangs rgyas pa'o//snying po nyid kyi rang gi ngo bo ni mya ngan las 'das pa'o/ /de nas de bzhin gshegs pa'i gnas pa mngon du byed cing zhes pa nas/ lha'i gnas bsham par bya'o zhes pa'i bar gyis de'i rgyud nas bshad pa gnas gtan la phab pa yin te/ phyis kyang 'chad do/ / de la snam bu gcig las kyang gsum du bgos te/ sum cha la 'khor sa bya zhing sum gnyis la lha'i gzugs bya'o zhes pa'i don to/ /de bzhin gshegs pa'i gnas pa mngon du byed cing srad bu bres la zhes pas de ltar lha'i gnas dang 'khor sa dgod pa gya tshom du mi bya bar thig btab ste bya bas de nyid kyi tshe na yang de bzhin gshegs pa'i spyod pa stong pa nyid la dmigs par bya'o zhes pa'i don to//de nas dkyil 'khor gyi tshon rtsi rnams byin gyis brlab pa'i cho ga bstan pa'i phyir/ de nas yang bdag nyid bcom ldan 'das rnam par snang mdzad du de'i phyag rgyas byin gyis brlabs la zhes pa nas/bdud sde sdang ba thams cad la/ /rnam pa kun du bsdigs par byed/ /ces pa'i bar du gsungs pa yin te/ de la bdag nyid bcom ldan 'das rnam par snang mdzad du de'i phyag rgyas byin gyis brlabs la zhes pa ni tshon rnams byin gyis rlob pa'i tshe rdo rje'i phyag rgyas slob dpon nyid rnam par snang mdzad kyi skur byin gyis rlobs shig ces pa ste/rdo rje ni ye shes kyi mtshan ma yin pas na ye shes lngas byin gyis brlabs pa'i don to/ /tshon rnams byin gyis brlab pa yang kun rdzob dang don dam pa rnam pa gnyis te/ de la don dam par byin gyis brlab pa'i phyir/chos kyi dbyings rgya chen por byin gyis brlabs te zhes gsungs pa yin te/ des ni mtshon sna tshogs chos kyi dbyings rgya chen po stong pa nyid du byin gyis brlab bo zhes bstan to/ /thog mar tshon rtsi dkar po blangs la zhes pas ni kun rdzob kyi sgo nas tshon re re zhing yang lha re res byin gyis brlab par gsungs pa yin te/de la tshon dkar po ni chos kyi dbyings kyis byin gyis brlab par gsungs pa la/ chos kyi dbyings de'i rang bzhin dang mthu bstan pa'i phyir/ 'di ni chos dbyings dag pa ste/ sems can khams ni rnam sbyong ba/ / 'di ni bdag nyid de bzhin gshegs/ /nyes pa thams cad rnam par spangs/ /zhes gsungs pa yin no/ /chos kyi dbyings kyi don de lta bur bsams nas don de yi ger 'bar ba la sogs pa'i yon tan bshad pa de lta bus byin gyis brlab po/ /de nas tshon dmar po byin gyis brlab pa'i phyir/de nas tshon rtsi gnyis pa ni/ /zhes bya ba la sogs pa gsungs te/ yi ge a'i sa bon gyis bskyed pa'i sangs rgyas thub dkas byin gyis brlab par gsungs so/ /de nas tshon ser po la yi ge ka'i sa bon gyis bskyed pa'i/ sangs rgyas gser thub kyis byin gyis brlab pa'i phyir/de nas sngags pas tshon gsum pa/ /zhes pa la sogs pa gsungs pa yin no/ /tshon ljang gu la snying po byang chub na bzhugs pa'i skus byin gyis brlab pa'i phyir/ de nas margad 'dra ba yi/ /zhes pa la sogs pa gsungs pa yin te/ tshon ljang gu'i kha dog ni nor bu margad kyi kha dog lta bu'o//tshon nag po khams gsum rnam par rgyal bas byin gyis brlab pa'i phyir/ de nas tshon rtsi nag po ste/ zhes bya ba la sogs pa gsungs pa yin te/ de la yi ge has bskyed pa'i khro bo'i gzugs de yang ci 'dra zhe na/ 'bar ba'i phreng ba rnam par 'phro//dus mtha'i me ltar mi bzad pa/ /zhes pa la sogs pa'o/ /de yang tshon sna lnga rnams ye shes lnga'i rang bzhin du blta ste dkar po ni chos kyi dbyings kyi rang bzhin no/ /dmar po ni sangs rgyas thub dka'i rang bzhin te me long lta bu'o/ /ser po ni mnyam pa nyid kyi ye shes so/ / ljang gu ni so sor kun du rtog pa'i ye shes so/ /nag po ni bya ba sgrub pa'i ye shes so/ /de dag gi rim pa bshad pa ni dang por chos kyi dbyings nyid du 'jug la/ stong pa 'ba' zhig tu dmigs par yang mi rung ste snying rje chen po'i dbang gis sems can la dmigs shing chags pa bskyed pa'i phyir de'i 'og tu tshon dmar po dgye'o//sems can gyi don la zhugs pas rgyas par 'gyur te/ de bas na de'i 'og tu tshon ser po bri'o/ /rgyas shing mthu dang ldan pas na las thams cad nus pa ste/ bdag dang gzhan gyi don nus pas de'i 'og tu tshon ljang gu bri'o/ / 'jam pos 'dul ba la yang 'jam por ston/ ma rungs pa rnams la yang khro bor ston te thabs gzhan gyis mthu ma rungs pa rnams la thabs gzhan med na mthar drag shul gyis gdul ba'i phyir/ tha mar nag po gzhag ste khro bo la sogs ting nge 'dzin rnam par sprul pa zhes gong du smos pa de/de nas bcom ldan 'das rnam par snang mdzad de'i tshe ting nge 'dzin de las bzhengs nas zhes bya ba la sogs pa 'di man chad kyis 'chad de/ ting nge 'dzin de las bzhengs zhes pa ni sngar ting nge 'dzin du zhugs pa las bzhengs nas rgyal ba'i ting nge 'dzin la 'jug pa'o//mtha' yas pas rnam par rgyal ba zhes pa ni grangs med pa'i rgol ba rnams kyis mi tshugs pas na grangs med pa las rgyal ba zhes pa'i don to/ /thams cad du thogs pa med pa'i stobs zhes bya ba'i rig sngags kyi rgyal mo de bzhin gshegs pa thams cad kyi yul las 'byung ba 'di 'byung ngo zhes pa de la thams cad du thogs pa med pa'i stobs zhes pa ni kun rdzob dang don dam par te/nyon mongs pa dang lha'i bu'i bdud la sogs pas mi tshugs zhes pa'i don to/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/yi ge'i 'khor lo rim par phye ba rgyas pa'o// //da ni phyag rgya'i le'u bshad par bya ste/ phyag rgya rnams bshad pa yang spyir 'dul ba'i 'gro ba zab cing rgya che ba rnams mos pa dang dmigs pa de rnam pa gnyis so/ /de la zab cing rgya che ba la mos pa'i don to/ /'gro ba ni sngags kyi tshig rnams bshad pas sngags tshig de bdag gi sgra'i de kho na nyid la dmigs shing byang chub kyi sems kyi bsgom pa sngon du 'gro ba'i lha'i gzugs su sbyor te lha'i gzugs sbyor ba de yang ting nge 'dzin dag pa dang /rnam par rtog pa gzhan spangs pa dang / lha'i gzugs su snang ba rdzogs par sbyor ro//dmigs pa can gyis gdul ba'i 'gro ba ni sngags kyi sgra'i de kho na nyid la dmigs pa la sogs pa de dag mi nus te phyag rgya tsam bcings nas lha'i gzugs su sbyor bar byed pas na dmigs pa can gyis gdul ba'i 'gro ba de dag gi phyir bcom ldan 'das kyi rgyu dang 'bras bu'i yon tan rnams phyag rgya'i gzugs su byin gyis brlob po//de la ral gri dang rdo rje la sogs pa'i phyag rgya ni yid kyi yon tan no/ /dung gi phyag rgya la sogs pa'i phyag rgya ni gsung gi yon tan no/ /gtsug tor gyi phyag rgya la sogs pa'i phyag rgya ni sku'i yon tan no//ji ltar rigs par sbyar bar bya'o/ /phyag rgya'i le'u bshad pa de yang / de nas bcom ldan 'das kyis thams cad dang ldan pa'i 'khor 'dus pa la gzigs nas/ byang chub sems dpa' gsang ba'i bdag po phyag na rdo rje la 'di skad ces bka' stsal to/ /gsang ba ba'i bdag po de bzhin gshegs pa rnams la de bzhin gshegs pa rgyan du gyur pa/chos kyi dbyings rtogs pa'i mtshan mar gyur pa'i phyag rgya rim par phye ba rgyas pa zhes bya ba la sogs pa ste/ de la de bzhin gshegs pa'i rgyan du gyur pa zhes pa'i gtsug tor dang / spyan gyi phyag rgya la sogs pa sku'i rgyun du gyur pa'i phyir ro/ /chos kyi dbyings rtogs pa'i mtshan mar gyur pa zhes pa ni de bzhin nyid kyi ye shes te de rtogs shing chud par byed pa'i mtshan mar ral gri dang rdo rje la sogs pa'i phyag rgya'o/ /gang gis brgyan na byang chub sems dpa' rnams zhes pa nas/de rnams kyang de dag gi ngag nyan par 'gyur zhes pa'i bar gyis ni phyag rgya de rnams bstan pa'i dgos pa bshad pa ste/ byang chub sems dpa' gang dag phyag rgya de rnams dang ldan na/ de bzhin gshegs pa thams cad kyi byang chub chen po'i mtshan mas btab pas de dag la lha dang mi dang lha ma yin la sogs pa rnams kyis brdzi bar mi 'gyur zhing lha dang lha ma yin la sogs pa de rnams kyang byang chub sems dpa' de dag gi ngag nyan par 'gyur ro//ji ltar 'jig rten na rgyal ba'i phyag rgya 'chang ba'i skyes bu de la 'jig rten pa'i mi rnams kyang brdzi bar mi byed la/'jig rten pa rnams de'i ngag kyang nyan par 'gyur ba dang 'dra ste/ mdor na phyag rgya 'di rnams bshad pas gdul ba'i 'gro ba rnams la mthong ba'i chos dang / tshe phyi ma la phan par 'gyur bar bstan to/ /de nas bcom ldan 'das kyis de'i tshe stobs thogs pa med par gnas byin gyis rlob pa zhes bya ba'i ting nge 'dzin la snyoms par zhugs so zhes pa ni 'og nas byung ba'i phyag rgya de dag nyid stobs thogs pa med pa'i gnas zhes bya ste/bcom ldan 'das ting nge 'dzin de la snyoms par zhugs nas phyag rgya de dag 'chad pa na ting nge 'dzin de'i ming stobs thogs pa med pa'i gnas byin gyis rlob pa zhes bya ba'o//de la thogs pa med pa zhes bya ba ni bcom ldan 'das kyi sku mi zad pa la sogs pa'i rdo rje'i rgyan de dag ci la yang thogs pa med pa'o/ /stobs zhes pa ni de ltar thogs pa med pa nyid stobs su gyur pa'o//gnas zhes pa ni bcom ldan 'das kyi sku la bya la/ byin gyis rlob pa zhes pa ni bcom ldan 'das kyi sku mi zad pa la sogs pa rdo rje thogs pa med pa'i stobs su gyur pa de nyid phyag rgya'i ngo bo byin gyis rlob pa'o/ /bcom ldan 'das ting nge 'dzin de la snyoms par zhugs ma thag tu rig sngags kyi rgyal mo thams cad du thogs pa med pa'i stobs can/mi mnyam pa dang mnyam pa'i stobs can/ dam tshig la 'jug par byed pa stobs gsum dang ldan pa byung ngo zhes pa la sogs pa med pa'i stobs can zhes pa ni gong ma bzhin no/ /mi mnyam pa dang mnyam pa'i stobs zhes pa ni thogs pa med pa'i stobs de nyid gang dang gang mi mnyam pa'o//dam tshig la 'jug par byed pa zhes pa ni/ dam tshig gi don ni sngar bshad zin la/ dam tshig la 'jug pa ni sku mi zad pa la sogs pa'i rang bzhin gyi dkyil 'khor 'og ma'i 'gro ba rnams kyi lta ba'i spyod yul du mi 'gyur bas de'i byin rlabs su gyur pa dam tshig gi phyag rgya dang sngags 'di bcings shing brjod pa na rang bzhin dkyil 'khor de mthong ba dang 'dra bas na 'jug pa zhes bya'o//gnyis su na srung ba'i dam tshig rnams las nyams pas dam tshig gi phyag rgya dang sngags 'di byas na dkyil 'khor mthong ba dang 'dra ste/de byas pa tsam gyis dam tshig las nyams nges so/ /slar dam tshig tu zhugs par 'gyur bas na dam tshig la 'jug par byed pa zhes bya'o/ /gsum du na dkyil 'khor du 'jug pa'i tshe dam tshig gi phyag rgya dang sngags 'di byas te 'jug pas na dam tshig la 'jug pa zhes bya'o//gsang ba pa'i bdag po rig sngags kyi rgyal mo 'di ni de bzhin gshegs pa thams cad kyis yang dag par ston par byed pa zhes pa ni rig pa ni brjod pas sangs rgyas thams cad kyi gnas rang bzhin gyi dkyil 'khor mthong ba dang 'dra bas na sangs rgyas thams cad kyi yang dag par ston par byed pa zhes bya'o//gnyis su na gzugs brnyan gyi dkyil 'khor bris pa yang rig pa 'di brjod nas ston pa'am rig pa 'di brjod nas sangs rgyas thams cad kyi dkyil 'khor de mthong bar 'gyur bas na sangs rgyas kyi sa dang yang dag par ston par byed pa zhes bya'o//chos gsum gyi lam gyi mtshams las mi 'da' bar byed pa zhes pa la chos gsum ni de bzhin gshegs pa'i sku dang gsung dang rdo rje'i yid mi zad pa'i rgyan nam sku gsum ste de'i lam ni dam tshig srung ba'i bya ba la sogs pa ste lam de las mi 'da' ba'o//sa dang pha rol tu phyin pa yongs su rdzogs par byed pa yin te zhes pa ni dam tshig der zhugs nas bcom ldan 'das la mchod pa la sogs pa sbyin pa'i pha rol tu phyin pa la sogs rim gyis rdzogs par byed pa dang / de'i mthus sa la rim gyis 'phar bar 'gyur bas na sa dang po pha rol tu phyin pa yongs su rdzogs par byed pa'o/ /sangs rgyas kun gyi dam tshig ni/ /phyag rgya 'di la rab tu gnas/ /zhes pa ni dam tshig gi don dam tshig srung ba las mi 'da' ba'am/ sku mi zad pa la sogs pa rtog par byed pa'am/sku de dag yongs su thob par byed pa de dag phyag rgya 'di'i sgo nas mtshon cing rtog par byed pas na/ phyag rgya 'di la rab tu gnas/ /zhes bya'o/ /rgya 'di phyag rgya chen po ste/ /chos dbyings rnam par sbyong ba'o/ /zhes pa ni chos kyi dbyings stong pa nyid phyag rgya 'dis mtshon cing rtog par 'gyur bas chos kyi dbyings sbyong ba zhes bya'o//phyag rgya dpal dang ldan pa ni/ /chos kyi 'khor lo zhes su grags/ /'jig rten mgon po skyob rnams kyis/ /'khor lo rab tu 'dis bskor ro/ /chos kyi dbyings su byin brlabs nas//chos kyi 'khor lo bskor ba'i phyir/ /rdo rje sems dpar byin brlabs te/ /dpal dang ldan pa zhes pa ni/ /rdo rje sems dpa' nyid la dpal rdo rje sems dpa' de lung gi chos dang rtogs pa'i chos rnams kyi 'khor lo bskor ba yin la/ phyag rgya rdo rje sems dpar bsgyur na byang chub sems dpa' 'jig rten gyi mgon po rnams kyang chos kyi 'khor lo bskor bar byed do zhes pa'o//sangs rgyas skyob pa thams cad kyi/ /phyag rgya chen po ral gri'i rgya/ /'dis ni lhan cig skyes pa yin/ /'jig tshogs lta ba gcod par byed/ /ces pa ni ral gri'i phyag rgya ni chos dang gang zag la bdag med par rtog pa'i ye shes kyi mtshan mar gyur pa ste/ye shes 'dis ni lhan cig skyes pa'i bdag tu lta ba rnams gcod do zhes pa'o/ /phyag rgya dpal dang ldan pa 'di/ /chos kyi dung zhes rnam par bsgrags/ /'di ni 'jig rten 'di dag na/ / sangs rgyas byang chub sems dpa' rnams/ /zhi ba mya ngan 'das 'gro ba/ /rdul dang bral ba'i chos 'chad do/ /zhes pa ni dung gi phyag rgya ste sangs rgyas kyi gsung gi mtshan mar gyur pa ste/ sangs rgyas dang byang chub sems dpa' rnams sangs rgyas kyi gsung 'dis rdul dang bral ba'i chos rnams mya ngan las 'das pa zhi ba thob par byed pa 'chad do zhes pa'o//pad+ma dam pa dpal ldan 'di/ /sangs rgyas skyob pa thams cad kyi/ /mi shigs rdo rje'i gdan yin te/ /der ni 'dren pa 'tshang rgya zhing / /rgyal ba sras bcas thams cad ni/ /'di las skye dang byang chub 'gyur//zhes pa ni pad+ma'i phyag rgya de/ sangs rgyas rnams kyi gdan yin te/ /mgon po sangs rgyas rnams gang du byang chub pa na yang gdan 'di la bzhugs te byang chub la/ sangs rgyas kyi sras byang chub sems dpa' rnams kyang pad+mo 'di las skyes zhes pa'o/ /phyag rgya chen po rdo rje'i rgya//mi shes grong khyer 'jig pa ste/ /sangs rgyas rnams kyi ye shes 'di/ /nyid kyis byin gyis brlabs te bstan/ /zhes pa ni bcom ldan 'das kyi de ma thag pa'i lam gyi ye shes de rdo rje'i phyag rgyar byin gyis brlabs pa ste/ mi shes pa'i grong khyer 'jig pa ni ye shes des sems las byung ba'i 'khor dang bcas pa'i ma rig pa rnams 'joms zhes pa'o//gtsug tor phyag rgya chen po ste/ /gtsug tor zhes ni bsgrags pa yin/ /'di ni bcings pa tsam gyis kyang / /rgyal ba mchog tu 'gyur ba yin/ /zhes pa ni bcom ldan 'das kyi skyes bu chen po'i mtshan gtsug tor de phyag rgyar byin gyis brlabs pa ste/'di ni bcings pa tsam gyis kyang / /rgyal ba mchog tu 'gyur ba yin/ /zhes pa ni phyag rgya la ni mang po bsdus pa las lha'i gzugs su 'gyur la gcig pus lha'i gzugs su gyur pa ni gtsug tor gyi phyag rgya ste 'di gcig pus bcings pas kyang sangs rgyas kyi skur bsgyur du rung zhes pa'o//rgyal ba dam pas phyag rgya 'di/ /mdzod spu zhes ni rab tu bsgrags/ /'di ni bcings pa tsam gyis su/ /rgyal ba mchog tu 'gyur ba yin/ /zhes pa bcom ldan 'das kyi skyes bu chen po'i mtshan smin mtshams nas mdzod spu zhes bya ba spu'i nyag ma gcig gis brkyang na ni khams gsum thams cad du yang khyab par 'gyur la bskyil na de nyid du zad pa de phyag rgya 'dir byin gyis brlabs pa ste/'di 'ba' zhig bcings pas kyang sangs rgyas kyi skur bsgyur du rung zhes pa'o/ /lhung bzed kyi phyag rgya ni tshigs su bcad pa nyid kyis gsal bar gsungs so//sems can kun la mi 'jigs pa/ /de yis rab tu sbyin par 'gyur/ /gang gi rgya chen de bcings na/ /mi 'jigs phyag rgya zhes bsgrags so/ /zhes pa ni mi 'jigs pa sbyin pa'i phyag rgya ste/ bdag gam sems can rnams bgegs la sogs pas skrag cing 'jigs par gyur na phyag rgya bcings te bstan pas de las thar bar 'gyur zhes pa'o//'di ni dam pa byin rgya zhes/ /'jig rten mgon po rnams kyi sgra/ /'di ni bcings pa tsam gyis su/ /rgyal mchog dam pa stsol bar byed/ /ces pa ni bcom ldan 'das kyis sems can rnams la mchog sbyin pa'i phyag rgya ste nam grub pa la sogs pa'i mchog 'dod na mchog sbyin pa'i phyag rgya 'di bcings nas mnod do//phyag rgya chen po rgya chen 'dis/ /sangs rgyas skyob pa thams cad kyis/ /bdud ni rnam par bsdigs zhes bya/ /phung byed thams cad 'jigs par byed//'di ni bcings pa tsam gyis su/ /bdud sde shin tu mi bzad dang / /gegs dang log 'dren gzhan dag kyang / /the tshom med par rab tu 'byer/ /zhes pa ni gegs rnam par bskrad pa'i phyag rgya ste bcings pa tsam gyis gegs la sogs pa thams cad rnam par skrag nas so sor 'byer bar 'gyur te/de ltar gegs rnams so sor byer na gegs med pas ji ltar bsams pa'i don grub par 'gyur bas na re ba thams cad yongs su rdzogs par byed pa'o/ /'di ni sangs rgyas mgon rnams kyi/ /thugs rje las byung spyan yin te/ / mig gi steng du mkhas pas bzhag /de las sangs rgyas spyan du 'gyur/ /zhes pa sangs rgyas bcom ldan 'das kyi snying rje chen po'i dbang gis shes rab kyi spyan sems can thams cad la gzigs pa ni snying rje las byung ba'i spyan zhes bya ste/ spyan de phyag rgya 'dir byin gyis brlabs bas na phyag rgya 'di bcings te mig tu gzhag na bdag sangs rgyas kyi skur bsgyur ba'i tshe sangs rgyas kyi spyan du 'gyur ro//'di ni zhags pa mchog ces grags/ /sdang ba thams cad 'jig par byed/ /sngags pas 'di bcings de yi tshe/ /rtag tu sdang ba bcings par 'gyur/ /zhes pa ni 'phags pa'i lam gyi yan lag brgyad kyi rang bzhin gyi ye shes sems can thams cad 'don par byed pa zhags pa'i phyag rgyar byin gyis brlabs te/zhags pa'i phyag rgya 'di bcings pas bgegs la sogs pa'i gnod pa rnams 'ching ba'i las byed do zhes pa'o/ /sangs rgyas skyob pa thams cad kyi//lcags kyu zhes ni 'di bshad de/ /byang chub sems dpa' bdag nyid che/ /sa bcu dag la gnas pa dang / /sdang bar sems pa gzhan dag kyang / /sangs rgyas rab tu 'gugs par byed/ /ces pa ni de bzhin gshegs pa'i rgyu dang 'bras bu'i spyod pa rnams las rgyu'i tshe na bsdu ba rnam pa bzhis sems can rnams sdud cing 'dren pa dang /'bras bu'i tshe sku mi zad pa la sogs pa'i rdo rje'i rgyan gyis sems can rnams sdud cing 'dren pa'i spyod pa de dag nyid lcags kyus phyag rgyar byin gyis brlabs pa ste/ lcags kyus kyang bgegs la sogs pa gnod par byed pa rnams dang byang chub sems dpa' sa bcu la gnas pa yang ste thams cad 'dren par byed de byang chub sems dpa' sa bcu la gnas pa yang 'gugs na gzhan lta smos kyang ci dgos zhes pa'o//de bzhin gshegs pa'i lte ba'i phyag rgya la phyag rgya de nyid las zhes pa ni lcags kyu'i phyag rgyal snyegs te lcags kyu'i phyag rgya las srin lag gnyis bsgreng par shes par bya'o//de bzhin gshegs pa'i rdo rje'i phyag rgya ni mngon par byang chub pa dang sbyar ro/ /lcags kyu'i phyag rgya ni spyod pa dang sbyar ro/ /de bzhin gshegs pa'i thugs kyi phyag rgya dang stobs bcu'i phyag rgya ni kun du sangs rgyas pa dang sbyar ro//chos thams cad mnyam pa nyid du rtog par byed pa'i phyag rgya ni mya ngan las 'das pa dang sbyar ro/ /de la sngags kyang / namaH sa man+ta bud+d+hA mAM/ zhes pa ni kun du sangs rgyas pa dang sbyar ro/ /na maHsa man+ta badzrA NAM zhes pa ni byang chub dang sbyor ro//na maHsarba ta thA ga te b+h+yaH zhes pa ni de bzhin gshegs pa dang sbyar ro/ /de la sngags dang phyag rgya rnams bstan pa yang spyir bstan pa dang so sor bstan pa de/ de la so sor bstan pa yang rnam pa gnyis te dngos su bstan pa dang / gzhan du snyeg pa'o/ /de la dngos su bstan pa ni gong du ming smos pa rnams so//gzhan du snyeg pa ni de lta bu la sogs pa zhes pa ste/ rgyud gzhan du snyeg pa'o/ /spyir bstan pa ni gsang ba pa'i bdag po 'on kyang ji tsam du yan lag bskyod pa de dag kun phyag rgya rgyas par rig par bya'o/ /ji tsam du lce bskyod pa de dag kun kyang gsang sngags bstan pa rig par bya'o zhes pa ste/de yang ji lta bur gnas nas she na/ /byang chub kyi sems dang ldan pa'i yid kyis de bzhin gshegs pa'i sa la gnas te dkyil 'khor bri bar bya'o zhes pa ste/ nam sngags pa byang chub kyi sems dang ldan pa'i yid dang / de bzhin gshegs pa'i sa la gnas par gyur na ji tsam du yan lag la sogs pa bskyod pa de tsam du phyag rgyar 'gyur ji tsam du lce bskyod pa de tsam du sngags spyod par 'gyur ro zhes pa dang sbyar te/byang chub kyi sems dang ldan pa'i yid ces pa ni stong pa nyid la dmigs pa'i sems dang ldan pa zhes bya'o//de bzhin gshegs pa'i sa la gnas zhes pa ni kun rdzob dang don dam pa rnam pa gnyis te/ /kun rdzob tu de bzhin gshegs pa'i sa la gnas pa ni lha'i gzugs su sbyar ba'o/ /don dam pa ni stong pa nyid kyi rang bzhin gyi lhar sbyar ba ste/de ltar yang byang chub kyi sems dang ldan zhing kun rdzob dang don dam pa'i mtshan nyid lha'i gzugs su sbyar ba ma yin par sngags dang phyag rgya bya ba'am/ dkyil 'khor bris na sangs rgyas dang byang chub sems dpa' rnams kyis srung bar mi 'gyur ro zhes dngos su gsungs so//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ phyag rgya'i rim par phye ba rgyas pa'o// //da ni sngags kyi le'u bshad pa la sogs pas sngags kyi tshig dang / yi ge'i 'bru las ting nge 'dzin gyi sgor 'gyur ba la sogs pa dang /yi ge ka la sogs pa sum cu rtsa gnyis rnams a la sogs pa bcu drug dang ldan par 'gyur ba bstan te/ de la yi ge ka la sogs pa sum cu rtsa gnyis po rnams ni yi ge a dang mi smra ste/ de thams cad kyang a dang ldan par shes par bya'o//de yang gsang ba pa'i bdag po thams cad du 'jug pa'i chos kyi sgo chos kyi rnam grangs nyon cig ces pa la sogs pa ste/ thams cad du 'jug pa'i sgo zhes pa ni a dang ldan pa'i yi ge rnams sngags la sbyar ba dang / ting nge 'dzin la sogs pa thams cad du khyab par 'jug pa'i sgo'o zhes pa'o//de bas na gsang ba'i bdag po de la byang chub sems dpas a zhes bya ba la gnas te/ dgos pa thams cad bsgrub par bya'o zhes gsungs pa yin no/ /dang po a dang sa dang ba ste gsum smos pa ni rigs gsum smos pa'o/ /de dang por yi ge a tha mal par smos nas ka la sogs pa sum cu rtsa gnyis pa ma smos pa ni ka la sogs pa rnam pa thams cad kyang tha mal pa'i rang bzhin du shes par bya ste/de dag thams cad byang chub kyi rang bzhin du bstan pa'o/ /yi ge a 'dren pa thog mar smos nas ka la sogs pa thams cad kyang ring por smos pa rnams ni de dag thams cad spyod pa'i rang bzhin du shes par bya'o//yi ge aM thog mar smos nas kaM zhes pa la sogs pa sum cu rtsa gnyis smos pa thams cad kyang aM dang ldan pas kun du sangs rgyas pa'i rang bzhin du shes par bya'o/ /yi ge a cho ga gnyis dang ldan pa thog mar smos na ka la sogs pa thams cad a tsheg gnyis dang ldan pa ni thams cad kyang mya ngan las 'das pa'i rang bzhin du shes par bya'o//ka la sogs pa'i yi ge sum cu rtsa gnyis po de rnams i la sogs pa dang ldan pa na yang ting nge 'dzin de dag nyid kyi sgo ston pa'i rang bzhin du shes par bya'o//de la r-i r-I dang l-i l-I gnyis ma smos pa ni gong du yi ge ra dang i la sogs par ldan pa r-i r-I zhes pa'i khongs su 'dus la/ la dang i la sogs par ldan pa l-i l-I zhes pa de'i khongs su 'dus par shes par bya'o/ /gsang ba pa'i bdag po de ltar na 'di ni yi ge'i tshul la mkhas pa'i chos kyi rnam grangs te zhes pa nas gsang ba pa'i bdag po ngas ni sangs rgyas kyi zhing rab 'byams gang dag na de bzhin gshegs pa rnams thams cad du 'dug pa'i chos kyi rnam grangs 'di mi 'chad pa mthong ngo zhes pa'i bar ni bshad pa'i yi ge rnams kyi rjes su bsngags pa bshad pa ste/rang bzhin phun sum tshogs pa dang / lus phun sum tshogs pa dang / byin rlabs phun sum tshogs pa dang / mthu phun sum tshogs pa bstan pa'o/ /de lha rang bzhin phun sum tshogs pa ni yi ge'i rang bzhin rnams so sor bstan pa ste yi ge'i tshul la mkhas pa'i chos kyi rnam grangs te zhes pa'i tshig gis so//lus phun sum tshogs pa ni gsang sngags kyi tshul la mkhas pa'i cho ga zhes pa'i tshig go/ /byin rlabs phun sum tshogs pa ni nam yi ge'i sngags rnams kyi sgrar brjod dam/ ting nge 'dzin bsgom pa'am/lha'i gzugs su sbyor bas na de bzhin gshegs pa rnams kyis byin gyis rlob pa dang / de bzhin gshegs pa thams cad kyi byin gyi rlabs kyis byin du brlabs pa zhes pa la sogs pa'i tshig gis so/ /mthu phun sum tshogs pa ni 'das pa dang / da ltar dang / ma 'ongs pa'i sangs rgyas bcom ldan 'das rnams kyis kyang bshad ces pa nas/chos kyi rnam grangs 'di mi chad pa ma mthong ngo zhes pa'i bar gyi tshig gis so/ /byin gyi rlabs phun sum tshogs pa la las rnam pa bzhi ste/ sngags rnams su sbyor ba dang / lha'i gzugs su sbyor ba dang /ting nge 'dzin du sbyor ba dang spyod pa'o/ /de la sngags rnams su sbyor ba ni yi ge'i 'bru de rnams las sngags kyi tshig gi tshul du sbyar ba ste/ gsang sngags kyi tshul la mkhas pa'i cho ga zhes pa'i tshig snga ma nyid kyis so/ /lha'i gzugs su sbyor ba ni yi ge rnams gang rung ba las lha'i gzugs su sbyor ba ste/lha yongs su gzung ba'i cho ga zhes pa'i tshig gis so/ /ting nge 'dzin du sbyor ba ni yi ge 'bru de rnams la stong pa nyid kyi rang bzhin chos kyi skur sbyor ba ste/ yang dag par rdzogs pa'i sangs rgyas kyi tshul la mkhas pa zhes pa'i tshig gis so//spyod pa zhi ba dang rgyas pa la sogs pa'i las dang rab 'bring la sogs pa'i dngos grub bsgrub pa'i spyod pa ste/ byang chub sems dpa'i spyad pa spyod pa'i rol mo ste zhes pa'i tshig gis so/ /ka dang tsa dang Ta dang ta dang pa rnams thog ma dang tha ma dang dbus dang ldan zhing ting nge 'dzin gyi tshogs 'jug pas byang chub dang spyod pa dang yang dag par rdzogs pa'i sangs rgyas dang /mya ngan las 'das pa dang bcas par thob par byed do zhes pa ni yi ge ka la sogs pa sum cu rtsa gnyis po de rnams dang / dang po'i a A zhes pa gnyis dang / tha ma'i aM a zhes pa gnyis dang /dbus kyi i la sogs pa rnams dang ldan par sbyar na byang chub dang spyod pa dang / kun du sangs rgyas pa dang / mya ngan las 'das pa'i sgo ston pa'i rang bzhin yin pas de rnams dang ldan par ting nge 'dzin du sbyar na byang chub la sogs pa thob par 'gyur ro zhes pa'o//de bzhin du de bas na gsang sngags kyi cho ga dang po la sogs pa'i tha snyad dang ldan par gyur pa de dag nyid thog ma dang tha ma dang / dbus dang lhan cig tu gyur par shes par bya ste zhes pa dang po la sogs pa'i zhes pa ni thog ma'i a A dang / tha ma'i aM a dngaH dbus kyi i la sogs pa dang ldan par ka la sogs pa rnams brjod na byang chub la sogs pa 'thob pa 'ba' zhig ma yin gyi sngags kyi tshig rnams su yang 'gyur ro zhes pa'o//gsang sngags kyi tshig re re la ji ltar 'dod par sbyar bar bya'o/ /blo yis rnam par rtog na ni/ /de dag bla ma'i gnas mchog ster//zhes pa ni mkhas pa ji ltar 'dod pas sngags kyi gtso bor de'i tshig re re dang sbyor cig de dang nges par 'tshang rgya zhing bla na med pa'i gnas mchog sbyin par byed do zhes 'don te/ gong du smos pa'i tshul la mkhas pas ting nge 'dzin gang 'dod pa'am/ rang gi lha gang yin par sbyar ba la sogs pa la yi ge de rnams las gang yang rung ba ji ltar 'dod pa'i 'bru gcig la sbyar na yang ji ltar bsam pa'i don 'grub par byed do zhes pa'o/ /de ltar 'di ni 'khor lo gcig ste/ 'khor lo bzhin du yongs su 'khor ba ni yi ge'i 'khor la zhes pa ni yi ge a gcig po las ka la sogs pa du ma'i ting nge 'dzin gyi rang bzhin 'khor lo lta bur 'khor ba'o zhes pa'o//sngags pas yi ge'i 'khor lo ste shes na rtag tu ji ltar bcom ldan 'das rnam par snang mdzad 'khor lo bskor ba bzhin du rnam par mdzes par 'gyur ro zhes pa ni sngags pas gong du smos pa'i yi ge 'khor lo de shes na bcom ldan 'das rnam par snang mdzad bzhin du las dang spyod pa thams cad spyod nus par 'gyur ro zhes pa ste/mdzes pa zhes pa ni spyod pa'i tshig tu shes par bya'o/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/thams cad du 'jug pa'i sgo chos kyi yi ge'i tshul rim par phye ba rgyas pa'o// //sangs rgyas bcom ldan 'das kyi sku mi zad pa dang / gsung mi zad pa dang / thugs mi zad pa'i rdo rje'i rgyan de rnams dkyil 'khor byin gyis brlabs pa la/sku mi zad pa byin gyis brlabs pa'i dkyil 'khor snying rje chen po'i snying po 'byung ba dang gsung mi zad pa'i byin gyi rlabs yi ge 'khor lo bskor ba'i dkyil 'khor dag ni gong du bshad zin to/ /da ni thugs mi zad ba'i sku'i dkyil 'khor chos kyi sku byin gyi rlabs su 'gyur ba de 'chang la de'i zhar la sngar dkyil 'khor gnyis pa bshad pa'i cho ga'i dkyil 'khor gyi mtshan nyid dang /slob ma'i mtshan nyid la sogs pa dang / dkyil 'khor gyi yo byad du bcas pa sngar rgyas par bshad cing ma rdzogs pa rnams dang / sbyin sreg gi cho ga la sogs pa yang 'di nyid du rgyas par 'chad do/ /de la chos kyi sku ni mtshan mas bstan pa las 'das te/ dngos po med pas bstan du mi mngon yang yon tan dang rjes su mthun pa las bstan par bya ste/ chos kyi sku'i yon tan ni phyin ci ma log pa dang mi 'gyur bar yongs su grub pa'i rang bzhin rnam par rtog pas thams cad spangs pa dang nyon mongs pa thams cad las rnam par grol ba dang /bya ba thams cad byed nus pa'i rang bzhin no/ /de dang rjes su mthun pa'i sgo nas de ston pa nas dang chu dang me dang rlung rnams kyi dkyil 'khor du byin gyis brlabs pas ston te/sa ni brtan zhing mi 'gyur bar yongs su grub pa'i mtshan nyid rdo rje dang 'dra bas dbang chen rdo rje'i dkyil 'khor du byin gyis brlabs te bstan to/ /chu ni thams cad 'khru bas dag par byed pa'i rang bzhin yin pas rnam par rtog pa thams cad spangs pa'i rang bzhin ni chu'i dkyil 'khor du byin gyis brlabs nas bstan to//me'i rang bzhin sreg par byed pa dang yi ger chos thams cad rdul dang bral bar ston pa'i phyir nyon mongs pa thams cad rdul dang rnam par grol ba'i mtshan nyid ni me'i dkyil 'khor du byin gyis brlabs te bstan to/ /rlung ni kun du 'gro zhing thams cad byed par sngar bshad zin te/bya ba thams cad byed nus pa'i rang bzhin ni rlung gi dkyil 'khor du byin gyis brlabs te bstan to/ /de ltar chos kyi sku'i byin rlabs su gyur pa gsang ba'i dkyil 'khor de dang / dkyil 'khor gsum char gyi cho ga rdzogs par bshad pa'i phyir/ bcom ldan 'das ting nge 'dzin la snyoms par zhugs te/de yang ci zhig byas nas zhugs she na/ de nas bcom ldan 'das kyis de bzhin gshegs pa'i spyan gyis thams cad la gzigs nas zhes bya ba gsungs te/ de bzhin gshegs pa'i ye shes kyis gzigs nas zhes pa'i don to/ / chos kyi dbyings kyi mdzod kyi mthu rlabs te de bzhin gshegs pa'i mnyam pa nyid bkod pa'i snying po can zhes bya ba'i ting nge 'dzin la snyoms par zhugs so zhes pa la chos kyi dbyings ni de bzhin nyid de/ de las sku mi zad pa la sogs pa'i rdo rje'i rgyan rnams kyis mtshan nyid 'byung ba de bzhin gshegs pa'i mnyam pa nyid bkod pa zhes bya ste/de dag chos kyi dbyings de las 'byung bas na/ chos kyi dbyings de nyid mdzod ces bya'o/ /mthu rlabs ni rnam par 'phrul pa ste/ de las byung ba'i de bzhin gshegs pa rnams rnam pa sna tshogs su spyod pa zhes bya'o//mnyam pa nyid ces pa ni de bzhin gshegs pa'i sku 'byung ba de dag nyid tshogs dang chos kyi sku dang / sems can gyi don byed par mnyam pa nyid kyi phyir ro/ /bkod pa zhes bya ba ni mang po'i tshig go/ /snying po can zhes bya ba ni 'byung ba ni 'byung ba'i gnas ting nge 'dzin de nyid la bya ste/ting nge 'dzin der zhugs na de lta bu dag 'byung ba'i phyir ro/ /ting nge 'dzin du zhugs nas kyang ji lta bu zhig ston zhe na/ chos kyi dbyings mi zad pa bkod pa bstan pa dang / gsang sngags kyi spyad pa mngon par bsgrub pa 'di nyid kyi sems can gyi khams ma lus pa gdon par thugs dam bcas pa yongs su rdzogs par bya ba'i phyir zhes bya ba gsungs te/chos kyi dbyings zhes pa ni skabs 'dir sems can gyi khams la bya ste/ de las mngon par 'byung ba bstan pa yang las dang tshe dang / rnam par smin pa'i 'bras bu zhes pa la sogs pa 'og nas 'byung ba'i tshig rnams kyis 'chad do//sngags kyi spyad pa mngon par bsgrub pa 'di nyid kyi sems can gyi khams ma lus pa gdon par thugs dam bcas pa yongs su rdzogs par bya ba'i phyir zhes pa ni snying rje chen po 'byung ba'i dkyil 'khor dang / yi ge 'khor lo bskor ba'i dkyil 'khor bstan du zin kyang gsang ba'i dkyil 'khor ma bstan na tshig lnga la sogs pa dang ldan par yang mi 'gyur la/de'i zhar la snga ma'i cho ga lhag ma rnams kyang rdzogs par bshad par bya ba ma bstan na/ sngags par rdzogs par mi 'gyur te de bas na de dag thams cad rdzogs par bstan na sems can gyi khams ma lus pa gdon par thugs dam bcas par rdzogs par 'gyur ro//de nas de nyid kyi tshe sems can gyi khams ma lus pa zhes bya ba 'byung bar byed pa'i sgo'i bu ga thams cad nas bsam pa ji lta ba bzhin las dang tshe dang rnam par smin pa'i 'bras bu za ba dang /zar 'jug pa'i gzugs dang / kha dog dang / dbyibs dang / nga ro dang / 'gro ba dang / spyod pa dang / nges pa'i tshig brjod pa sems can thams cad so so so sor yang dag par mgu bar byed pa dang / chos kyi dbyings kyi rnam par bskyed pa'i sku rnams byung bar gyur to zhes pa ni de ltar bcom ldan 'das ting nge 'dzin la snyoms par zhugs ma thag tu bcom ldan 'das kyi sku'i ba spu'i bu ga thams cad nas de bzhin gshegs pa'i sku sems can thams cad dang rjes su mthun pa las dang tshe dang rnam par smin pa'i 'bras bu za ba dang zar 'jug pa la sogs pa smon pa 'byung zhes pa ste/las kyi rnam par smin pa dang / tshe'i 'bras bu za bar ston pa ni las legs nyes ci spyad pa'i 'bras bu bde ba dang sdug bsngal rnams la rang rang spyod par snang ba'o/ /zar 'jug pa ni rgyal po dang sems can dmyal ba'i srung ma la sogs pa lta bu'o//de dag gi dbang du byas nas gzhan dag bde ba dang sdug bsngal la spyod du 'bab pa'o/ /de dag nyid kyi bye brag gzugs dang kha dog dang zhes bya ba la sogs pas gsungs te/ sems can rnams kyi gzugs dang / kha dog dang bsam pa la sogs pa rjes su mthun par chos 'chad pa'i sku rnams byung ngo zhes sbyar te/de bas na sems can thams cad so so so sor yang dag par mgu bar byed pa zhes gsungs pa yin no/ /sems can gyi khams ma lus pa nges par 'byung bar byed pa'i sgo zhes pa ni de bzhin gshegs pa'i sku'i ba spu'i khung bu de sems can gyi khams ma lus pa nges par 'byung bar byed pa las dang tshe dang rnam par smin pa'i 'bras bu za ba dang zar 'jug par snang ba'i sku rnams 'byung ba'i sgo yin pa'i phyir ro//byung nas kyang nam mkha' dang mnyam pa'i 'jig rten gyi khams rab 'byams rnams su sgra dbyangs gcig gis chos kyi dbyings khyab par rnam par rig par byed pa de bzhin gshegs pa 'byung bar 'gyur ba'i tshigs su bcad pa 'di sgrogs par gyur to zhes pa ni 'og nas byung ba'i tshigs su bcad pa de sgrogs pa ste/de yang thams cad tshig tu sgra sgrogs pas na sems can gyi khams thams cad du thos shing rtogs par byed pa ste/chos kyi dbyings ni 'dir sems can gyi khams su shes par bya'o/ /de skad du bsgrags pa'i tshigs su bcad pa de chos kyi dbyings la dmigs nas ston pa'i tshig de tshigs su bcad pa bstan pa de la rtogs shing goms par byas na de bzhin gshegs par 'gyur bas na/de bzhin gshegs pa 'byung bar 'gyur ba'i tshigs su bcad pa zhes bya'o/ /gsungs pa'i tshigs su bcad pa ni/ /chos kyi mtshan nyid gang las ni/ /zhes pa nas/ lam 'di khyed kyis bsgom par gyis//zhes pa'i bar 'di dag yin/ chos rnams kyi mtshan nyid gang las 'byung ba ni sangs rgyas dang nyan thos la sogs pa ming gis smos pa rnams te/ /mdor na chos rnams kyi chos nyid kyi mtshan nyid chos kyi dbyings de bzhin nyid las sangs rgyas dang / nyan thos dang / byang chub sems dpa' dang / kun du sangs rgyas pa dang / sems can gyi 'jig rten dang / snod kyi 'jig rten dang / chos rnams skye zhing gnas pa dag 'byung ste/ ji ltar 'byung ba shes rab dang thabs su ldan pas lam 'di khyed kyis rtag tu sgom par gyis shig ste/ de yang rdzogs pa'i sangs rgyas kyis bshad pa yin no zhes pa'o//brtags pa'i rim pa zhes pa ni kun rdzob tu zhes pa ste/ mdor na chos rnams kyi chos kyi dbyings mtshan nyid ci 'dra ba dang / de'i dbang gis de bzhin gshegs pa'i sku las sprul pa'i sku la sogs pa 'byung ba dang / de la dmigs nas nyan thos dang rang sangs rgyas la sogs pa sangs rgyas la thug pa'i bar du ji ltar 'grub par 'gyur ba'i lam de khyed kyis shes par gyis shig ces pa'o/ /de ltar bcom ldan 'das ting nge 'dzin der zhugs nas 'jig rten pa dang / 'jig rten las 'das pa'i chos gnyis bstan te/'jig rten pa ni las dang / tshe dang / rnam par smin pa'i 'bras bu za ba dang zar 'jug pa la sogs pa'o/ /'jig rten las 'das pa ni tshigs su bcad pa 'di nyid do/ /de nas de bzhin gshegs pa'i sku chos kyi dbyings las byung ba de dag gis chos kyi dbyings thams cad rang gi sku rnam par rig par byed pa sprul pa'i sprin gyis yongs su bkang nas bcom ldan 'das rnam par snang mdzad kyi thugs kyi dbang tsam gyis ba spu'i bu ga thams cad nas/sangs rgyas 'byung ba gcig nas gcig tu brgyud pa byin gyi rlabs te/ rang rang gi chos kyi dbyings kyi gnas su zhugs par gyur to zhes pa ni gang du bcom ldan 'das kyi ba spu'i bu ga thams cad nas chos kyi dbyings kyi bskyed pa'i byung ba de dag bcom ldan 'das rnam par snang mdzad kyi thugs kyi dbang tsam gyis sangs rgyas kyi sku mngon par byang chub pa dang /chos kyi 'khor lo bskor ba la sogs pa sems can gyi khams thams cad du rang gi sku rnam par rig byed pa sprul pa mang pos khyab par byas nas thugs kyi dbang tsam gyis rang rang gi chos kyi dbyings kyi gnas su zhugs par bstan to//thugs kyi dbang tsam gyis zhes pa ni bcom ldan 'das rnam par snang mdzad ni sgrub pa po lta bur blta la/sprul pa'i sku rnams 'byung ba ni bsgrub pa'i lha rnams lta bur blta'o/ /chos kyi dbyings kyi bskyed pa'i de bzhin gshegs pa'i sku ni chos kyi dbyings kyi byin gyi rlabs kyis bcom ldan 'das rnam par snang mdzad kyi sprul pa'i sku rnams 'byung ngo zhes pa ste/des kyang chos kyi dbyings kyi byin rlabs dang sgrub pa po sems kyi dbang tsam gyis rang gi lha'i sku'i gzugs su snang bar 'gyur ro zhes ma 'ongs pa'i gdul ba'i 'gro ba rnams la bstan pa yin no/ /rang rang gi chos kyi dbyings kyi gnas su zhugs par gyur to zhes pa ni slar ba spu'i bu ga de rnams su zhugs pa la mi bya'o/gang du byung ba'i gnas de dag nyid du chos kyi dbyings stong pa nyid kyi rang bzhin du mi snang bar gyur pa la bya'o/ /de ltar bcom ldan 'das kyi rang gi sku las byung ba'i de bzhin gshegs pa'i sku rnams kyis sems can gyi khams thams cad du khyab par byas te/slar mi snang bar gyur pa bstan nas/ de yang bcom ldan 'das kyi byang chub sems dpa' phyag na rdo rje la bka' stsal pa zhes bya ba la sogs pas thugs mi zad pa'i rdo rje'i byin gyi rlabs gsang ba'i dkyil 'khor dang / dkyil 'khor gsum gyi cho ga'i lhag ma rnams bshad par gsungs pa yin/gsang ba zhes pa ni dkyil 'khor 'dis yid kyi rang bzhin chos kyi sku byin gyis brlabs pa yin pa'i phyir/ yid kyi rang bzhin chos kyi sku de dngos su bstan pa'i rang bzhin yin te phra bas na gsang ba zhes bya'o/ /gnyis su na sku dang gsung gi rang bzhin lang phyag rgya'i rang bzhin du bsgyur bas sku dang gsung du mi mngon pa la'ang bya'o//lha rnams kyi gnas pa zhes pa ni dbang chen la sogs pa'i dkyil 'khor de dag lha rnams byin gyis rlob pa'i gnas yin pa'i phyir ro/ /sa bon dang bcas pas mtshan pa zhes pa ni dbang chen la sogs pa'i dkyil 'khor so so'i sa bon a dang ba la sogs pas mtshan pa zhes pa'o//dang por sngags pas dkyil 'khor de/ /rang gi lus la bgo bya ste/ /zhes pa ni tshon 'gyed pa la sogs pa'i sngon rol du sngags pa sngar bshad pa'i rnal 'byor gyi stan la gnas nas/ snga ma bzhin du dbang chen la sogs pa'i dkyil 'khor lus la rim pa bzhin du gzhag go zhes pa ste/ de bas na/ rkang pa rnams ni chu so la/ /thug gi bar du sa yig bsam/ /de nas 'og tu snying ga'i bar/ /sdom brtson can gyis chu yig bsam/ /chu yi yan chad me yi ste/ /me yi yan chad rlung yin no//zhes gsungs te/ chu yi yan chad me yi ste/ /zhes pas snying ga yan chad mer bsam pa ni gsal na/ me yi yan chad rlung yin no/ /zhes pa la gang yan rlung du bsam pa'i mtshams gsal bar ma smos kyang snying po las smin mtshams su yi ge hUM bsam par gsungs pas na smin mtshams yan chad rlung gi dkyil 'khor du bsams par shes par bya'o//bsams nas de nas mkhas pa yis/ /sa la gzugs brnyan gzhag par bya'o/ /zhes pa ni sngags pas de lta bu'i ting nge 'dzin byas nas sa la gzugs brnyan gyi dkyil 'khor bri bar bya'o zhes pa'o/ /de nas phyag na rdo rjes bcom ldan 'das rnam par snang mdzad kyi sku dang gsung dang thugs kyi sa la zhugs nas zhes pa ni bcom ldan 'das kyi sku dang gsung dang thugs mi zad pa'i rdo rje'i rgyan la zhugs zhes pa'o//chos mnyam pa nyid la bltas te zhes pa ni don dam par yang chos thams cad stong pa nyid kyi rang bzhin du mnyam la kun rdzob tu yang de bzhin gshegs pa'i sku la sogs pa sems can gyi khams ji snyed pa dang mnyam pa la bya'o//ma 'ongs pa'i skye bo rnams la brtags nas zhes pa ni ma 'ongs pa'i 'gro ba rnams [(]gyi [,]kyi [)]don du rig sngags kyi rgyal po the tshom thams cad gcod par byed pa 'di smras so zhes pa ni ma 'ongs pa'i dus na sngags pas dkyil 'khor bri ba'i sngon rol du sngags kyi rgyal po 'di bsnyen par byas nas dkyil 'khor bri ba'i phyir dang /sngags 'di'i don la 'jug pa dang 'dis bsrung bar bya ba'i phyir ro/ / gsang ba pa'i bdag po phyag na rdo rjes gsang sngags kyi rgyal po 'di smras ma thag tu zhes pa nas/ 'jig rten khams kun zhugs pa yis/ /rdzogs sangs rgyas rnams dbang du 'gyur/ /zhes pa'i bar phyag na rdo rjes gsang sngags kyi rgyal po 'di smras pa'i rjes su bsngags pa gsungs pa yin no//de nas dpal ldan rdo rje 'dzin/ /zhes pa nas/ mtshan nyid 'di dag rtog par 'gyur/ /zhes pa'i bar gyis sngar bcom ldan 'das kyis/ yid gnyis som nyi dang bral ba/ /rdzogs sangs rgyas kyis rab bshad pa'i/ /lam 'di khyed kyis bsgom par gyis/ /zhes gdams pa nyid kyi don phyag na rdo rjes ji ltar rtogs pa bzhin du bcom ldan 'das la gsol pa ste/rtog pa de yang bcom ldan 'das kyis byin gyis brlab pa'i rtog pa bstan pa'i phyir/ de nas dpal ldan rdo rje 'dzin/ /bsam pa mchog rab mgu gyur pa/ /zhes pa la sogs pa gsol pa yin te/bdag gi sangs rgyas bcom ldan 'das rnams kyi dgongs pa zhes pa ni phyogs bcu'i sangs rgyas thams cad kyi phyag g.yas pa brkyang ste spyi bor gzhag ste byin gyis brlabs pa shes pa yin no zhes pa'o/ /chos 'di rnams ni mtshan nyid med/ /ces pa ni phung po dang khams dang skye mched la sogs pa'i chos rnams rang bzhin gyis stong pas na mtshan ma dang bral pa'o//ngo bo nyid med ces pa ni bdag dang bdag gi ba'i rang bzhin du yod pa ma yin te zhes pa'o/ /gnas med pa ni pha rol po rnams kyi cha shas can la sogs pa kun gyis gnas su brtags pa de yod pa ma yin zhes pa'o//las dang tshe las rnam grol te/ /zhes pa ni chos rnams kyi rgyu dang 'bras bu'i rang bzhin med ces pa ste/ de ltar rgyu dang 'bras bu'i rang bzhin med pas mtshan nyid med pa la sogs pa'i tshig gong ma rnams dang sbyar ro/ / rdzogs pa'i sangs rgyas 'dra bar spyod/ /ces pa ni chos thams cad gang du yang dngos po yod pa ma yin te/ 'du shes tsam du zad do zhes pa'o/ /thugs rje mnga' ni mdzad pa yis/ /mgon po rnams kyi thabs kyis ni/ /rnam par bskul nas chos rnams kyi/ / mtshan nyid 'di dag rtogs par 'gyur/ /zhes pa ni chos rnams kyi mtshan nyid 'di 'dra ba de bcom ldan 'das kyi thugs rje chen po'i thabs kyi sgo nas byin gyis brlabs pas bdag gis rtogs so zhes pa'o/ /de nas gsang ba pa'i bdag po phyag na rdo rjes ched du brjod pa'i tshigs su bcad pa de smras nas zhes pa nas/sngags pa rnams kyis nam zhig na/ /las dang tshe las rnam grol 'gyur/ /zhes pa'i bar gyis gsang ba pa'i dkyil 'khor bri ba dang / dkyil 'khor gsum char gyis cho ga'i lhag ma rnams bris pa ste/ slob dpon gyi ting nge 'dzin dang dbang bskur ba'i cho ga rnams ma gtogs par dkyil 'khor gsum char cho ga gzhan thams cad mthun par shes par bya'o//snying rje chen po'i snying po 'byung ba'i dkyil 'khor chen po 'di'i the tshom bcad pa'i phyir zhes pa ni dkyil 'khor gsum char yang snying rje chen po las 'byung bas na gsang ba'i dkyil 'khor la snying rje chen po'i snying po las 'byung ba zhes bya'o//the tshom bcad pa ni 'og nas 'byung ba'i don rnams bshad na cho ga rnams ma rdzogs pas ma 'ongs pa'i 'gro ba rnams the tshom du 'gyur te/ de bas na de dag gi the tshom bcad pa'i phyir zhes bya ba ni ma 'ongs pa'i skye bo rnams la brtags nas zhes pa la sogs pas dngos su gsungs so//dri ba 'di rnams kyi don ni 'og nas lan zhib tu 'byung bas na de dang sbyar te bya'o/ /de'i 'og tu bcom ldan 'das kyis phyag na rdo rje la bshad pa'i skabs la babs pas/ de nas kun mkhyen rdzogs sangs rgyas//zhes pa la sogs gsungs pa yin no/ /phyag na rdo rjes dris pa rnams kyang bcom ldan 'das kyis spyir rnam pa gsum du bsdu ba mdzad nas/ snying rje chen po'i rtsa las byung / /gsang ba'i dkyil 'khor rnams dgod pas/ /lha rnams kyi ni gnas nges pa/ / theg pa chen po'i go 'phang mchog /rdzogs sangs rgyas kyi rab gsang ba/ /dpa' bo cher byung khyod kyis gang / /yongs su dris pa de legs so/ /lag na rdo rje stobs po che/ /mdor ni bsdus nas bshad par bya/ /zhes gsungs pa yin te de la/ lha rnams kyi ni gnas nges pa/ /zhes bya bas ni 'jig rten dang 'jig rten las 'das pa'i lha'i bye brag dang lha de rnams kyi kha dog la sogs pa dris pa dang /lha rnams kyi gnas dbang chen la sogs pa'i dkyil 'khor du brtag pa de dag mdor bsdus te gsungs pa'o/ /theg pa chen po'i go 'phang mchog /ces pa ni/sngags pa byang chub mchog sems dpa'/ /thams cad mkhyen pa ji ltar 'gyur/ /ji ltar bden pa mthong bar 'gyur/ /zhes dris pa de dag bsdus te gsungs pa yin te/ gnas de dag ni byang chub tu gzhol ba'i go 'phang yin pas/ theg pa chen po'i go 'phang mchog / ces bya'o/ /gzhan rnams kyang theg pa chen po'i gnas yin mod kyi/ gzhan las 'di nye zhing gtso bo yin pa'i phyir ro/ /de gnyis las gzhan pa slob dpon gyi mtshan nyid dang tshon 'gyed pa la sogs pa ji srid dris pa de dag thams cad ni gsang ba'i dkyil 'khor rnams dgod bzhes pa'i nang du bsdus par rig par bya'o//de la skabs 'dir gsang ba'i dkyil 'khor zhes pa ni dkyil 'khor gsum char gyi cho ga spyir bris pa'i don de dag nyid dam tshig can ma yin pa la mi bstan pas gsang ba zhes bya'o/ /gzhan ni gong du smos pa bzhin no/ /cher 'byung zhes pa ni gong du dris pa de dag thams cad bla na med pa'i byang chub kyi rgyu sha stag yin pas dris pa'i don de dag la chen po 'byung ba'i rgyu zhes bya'o//snying rje chen po'i rtsa las byung / /zhes pa ni dkyil 'khor de dag snying rje chen po las byung bas de'i yo byad dris pa'i don de dag kyang / snying rje chen po'i rtsa las byung //zhes bya'o/ /rdzogs sangs rgyas kyi rab gsang ba/ /zhes pa ni theg pa chen po'i go 'phang mchog la sogs pa de dag snod ma yin pa'i sems can rnams la mi bshad pas rab tu gsang ba zhes bya'o/ /dkyil 'khor gyi ni sngon rol du/ /zhes pa nas/ go rims bzhin du bzlas brjod bya//zhes pa'i bar ni dkyil 'khor bri ba'i sngon rol slob dpon gyis bdag dang slob ma srung ba la sogs pa'i las bya ba'i sngags rnams la yun du bsnyen pa byas nas so so'i las la sbyar ro zhes gsang ba'i rgyud la sogs pa las byung ste de'i phyir dkyil 'khor bri ba'i sngon rol du rig pa'i rgyal po'i bzlas pa bya ste/mtshan ma byung gi bar du bzlas na de dag thams cad bsnyen pa byas par 'gyur ro/ /'di'i mtshan ma yang dkyil 'khor gyi lha'i rnam par gnas pa na sngags pa'i rmi lam du sangs rgyas dang byang chub sems dpa' rnams dkyil 'khor 'dri ba'i las la sogs mthong na zhes pa dang sbyar ro//yan lag bcu gnyis tshig byung ba/ /zhes pa ni yi ge 'bru yan lag bcu gnyis sngags kyi tshig tu gyur pa la yang bya ba la gnyis su na yig 'bru bcu gnyis las don dam pa'i mtshan nyid rtogs par 'gyur ba la yang bya ste/yan lag ces pa ni yi ge'i 'bru'o/ /pA da zhes pa ni rtogs pa la bya'o/ /rig sngags rgyal po stobs po che/ /zhes pa ni don dam par stong pa nyid kyi rang bzhin ston par byed la/ kun rdzob tu yang sprul pa la sogs pa byed pas na mthu che ba'o/ /go rims bzhin du bzlas brjod bya//zhes pa ni rtsa sngags dang snying po dang nye ba'i snying po rim pa bzhin du bzlas zhes pa'o/ /rang gi ting 'dzin la gnas te/ /zhes pa ni slob dpon rang gi ting nge 'dzin rigs gsum gyi snying po gnas gsum du gzhag pa dang / dpa' bo chen po'i snying po gnas lngar dgod pa dang //yan lag thams cad du yi ge dgod pa yang rung ba'i ting nge 'dzin la gnas nas bzlas par bya'o zhes pa'o/ /so so'i las rnams 'dod pa yis/ /tshul zhes pas ni ci rigs par/ /zhes pa ni de lta bu'i rim pas sngon du bsnyen pa byas nas bdag dang gnas dang slob ma srung ba la sogs pa'i sngags rnams ji ltar rigs par sbyor ro zhes pa ste/rig pa'i rgyal po 'di sngon du bsnyen pa bya ba yang dkyil 'khor gsum ga dang 'brel par shes par bya'o/ /gsang sngags phyag rgya rtogs shes pa'i/ /zhes pa nas/ rjes su gnang zhing dbang yang bskur/ /zhes pa'i bar gyis slob dpon gyi mtshan nyid dang bye brag bshad pa ste/ de yang spyi'i mtshan nyid dang bye brag bshad pa'o/ /de la spyi'i mtshan nyid ni yid byang chub kyi sems la zhugs pa zhes pa dang / theg pa gsum gyi khyad par shes pa la sogs pas sngar bshad zin to//'dir ni zab cing rgya che ba la mos pa dang / dmigs pa can gyi bye brag bshad pa ste/ /de bas na/ zab dang mi zab bye brag las/ /de yi mtshan nyid shes par bya/ /zhes bya ba la sogs pa gsungs so/ /gsang sngags phyag rgya rtogs shes pa'i/ / zhes pa ni slob dpon nyid kyi spyi'i mtshan nyid de/ phyag rgya dang sngags rnams gzhung las ji skad bshad pa bzhin shes par bya'o/ /zab mo rgya cher shes par bya/ /zhes pa nas/ mthong ba'i chos ni rnam par spangs/ /zhes pa'i bar ni zab cing rgya che ba la mos pa'i slob dpon gyi bye brag ste/zab mo ni stong pa nyid dmigs su med pa la mos pas de'i sems kyi rgyud sus kyang rig par mi nus te dpag par dka' zhes pa'o/ /rgya che ba ni don dam par chos thams cad stong pa nyid nam mkha'i rang bzhin lta bur rtogs la kun rdzob tu yang sgyu ma dang smig rgyu lta bur shes nas tshod pa la sogs pa rgya chen po la sbyor ba'o//lus can rnams ni yid mi rton/ /zhes pa ni lus can rnams dang spyod lam mi mthun pas gcig la gcig yid mi rton pa'o/ /sangs rgyas rnams kyi sras mchog ste/ /zhes pa ni sangs rgyas kyi spyod pa dang rjes su mthun pa'i phyir te/ / 'jig rten na yang pa'i spyod pa dang mi 'gal bar spyod pa ni be'u mchog ces bya'o/ /mthong ba'i chos ni rnam par spangs/ /zhes pa ni 'jig rten kun rdzob kyi chos rnams la ma chags pa zhes pa'o/ /gnyis pa mthong ba'i chos rnams kyis/ /zhes pa nas/ rjes su gnang zhing dbang yang bskur//zhes pa'i bar slob dpon dmigs pa can gyi bye brag ste/ mthong ba'i chos rnams kyis/ /myos par 'gyur ba dmigs pa can/ /zhes pa ni thos pa dang bsam pa'i shes rab kyis sngags kyi rgyud la sogs pa thos shing bsam pa'i shes rab kyis stong pa'i rang bzhin du mos su zin kyang bsgom pa'i shes rab kyis goms par nus pas phyi rol gyi spyod pa rnams la mos par 'gyur te/des 'jig rten pa'i dkyil 'khor tshon la sogs pas bri bar bcom ldan 'das kyis dbang bskur zhing lung stsal to zhes pa'o/ /'jig rten pa'i dkyil 'khor ni tshon la sogs pas bris nas 'jig rten pa rnams kyi lta ba'i spyod yul du gyur pas 'jig rten pa'i dkyil 'khor zhes bya'i mu stegs pa la sogs pa'i dkyil 'khor la ni mi bya'o//de bas na slob dpon dmigs pa can gyis phyi rol gyi tshon la sogs pas dkyil 'khor bri bar dbang bskur gyi//sems dbang du ma gyur pas yid kyi dkyil 'khor bri bar ni dbang mi bskur ro/ /zab cing rgya che ba la mos pa'i slob dpon de ni phyi'i dkyil 'khor dang nang gi dkyil 'khor gnyis ka bri bar dbang bskur te/ phyi rol gyi spyod pa rnams la ma chags shing sems dbang du gyur pas nang gi dkyil 'khor bri bar dbang bskur te/slob ma rnams kyi yid dang sbyar ba'i phyir phyi rol gyi dkyil 'khor yang bri bar gsungs so/ /dus dang dus min bye brag las/ /zhes bya ba nas/ slob ma de ni rgyal ba'i mchog /ces bya ba'i bar gyis slob ma'i bye brag bshad de/ dus dang dus min bye brag las//zhes pa las spyir slob ma rnam pa bzhi las slob ma kha cig sngags kyi rgyud la sogs pa thos shing shes la/ byang chub kyi sems kyang bsgoms pa ni dkyil 'khor du bcug pa nyid kyi tshe na sgrub par dbang bskur la slob dpon dmigs pa can gyis mtshan nyid dang ldan na byang chub sems dang mi ldan yang de nyid kyi tshe na slob dpon du dbang bskur bar bya ste/de dag ni/ gcig ni de yi mod la bsgrub/ /ces pa'o/ /gzhan ni sngags kyi rgyud la sogs pa thos shing shes kyang byang chub kyi sems ma bsgoms na sgrub par dbang bskur du mi rung ste/ dkyil 'khor der bcug nas byang chub kyi sems bsgom pa'i thabs bstan te/byang chub kyi sems goms par gyur pa ni phyis bsgrub par bya ba ni dus gnyis par bsgrub pa'o/ /de bzhin du slob dpon dbang bskur ba don du gnyer na yang sngags kyi rgyud la sogs pa mi shes na der dbang mi bskur bar sngags kyi rgyud la sogs pa rdzogs par slob tu bcug ste slob dpon gyi mtshan nyid dang ldan pa na slob dpon du dbang bskur ba yang dus gnyis par bsgrub pa'o//de la kha cig snga nas kyang rgyud la sogs pa mi shes shing byang chub kyi sems kyang ma bsgoms phyis kyang mi slob la bsgom par mi 'gyur ba ni dkyil 'khor du gzung ba tsam las dus gnyis par yang slob dpon du sgrub par dbang mi bskur bar ni gnyis kar min zhes pa'o//mtshan nyid thams cad rdzogs pa yis/ /slob ma de ni rgyal ba'i mchog /ces pa ni/ rgyud la sogs pa yang rdzogs par shes/ /byang chub sems kyang tshul bzhin du bsgom pa zhig gis bsod nams spel ba'i phyir dkyil 'khor du zhugs pa de yang slob ma'i grangs su yang gtogs te/de ni dbang la sogs pa bskur bas/ /'dir dbang la sogs pa gdod bskur mi dgos te/ de ni/ mtshan nyid thams cad rdzogs pa yis//zhes pa'o/ /sa ni dang por shes bya ba/ /zhes pa nas/ de bas rtog pa rnam spangs nas/ /sa kun rnam par sbyang bar bya/ /zhes pa'i bar gyis sa sbyang ba bshad de/ phyi nang gi rnam pa gnyis las/ /phyi'i sa sbyang ba ni sngar bshad zin to/ /'dir nang gi sa sbyang ba bshad de/ / sems kyi sar ni bshad pa yin/ /zhes pa ni/ spyad pa sngar ni bstan pa ste/ /zhes pa ni sngar byang chub kyi sems ni rang gi sems yang dag pa ji lta ba bzhin du shes pa zhes nang / rnam par ram/ kha dog tu'am/ dbyibs su'am zhes pa nas rnam pa thams cad kyi bar du yongs su btsal kyang mi dmigs pa yin te zhes pa la sogs pa'i bar du bshad pa de'i tshul du ting nge 'dzin dag pa dang /rnam pa thams cad spangs pa dang / /rnam par rtog pa dang bral bas na/ /sems kyi dri ma dag pa ste/ /de ltar dag par byas nas phyi rol gyi dkyil 'khor ram/ nang gi dkyil 'khor gang yang rung ba bri bar bya'o zhes pa'o//de yis de ni yongs su spangs/ /zhes pa ni sngar byang chub kyi sems sbyang bar bshad par des sems kyi sbyang bar bya'o zhes pa'o/ /nam zhig nyes pa dang bral na/ /sems kyi sa ni mi 'jigs pa/ /zhes pa ni ji ltar phyi rol gyi sa'i nyes pa rus pa dang rdo ba la sogs pa med pa bzhin du 'dir yang rnam par rtog pa la sogs pa dang /'dod chags la sogs pa'i nyon mongs pa rnams dang bral na bgegs la sogs pas mi 'jigs zhes bya'o/ /de bas na/ de tshe de ni dag pa ste/ /nyes pa thams cad rnam par spangs//mngon par byang chub mthong bas na/ /de ltar de ni bstan zhes bya/ /zhes gsungs pa yin no/ /de las gzhan du sa spyod pa/ /zhes pa nas/ byang chub sems kyi sa sbyang bya/ /zhes pa'i bar gyis phyi rol gyi sa rnams sa sbyangs pa na yang byang chub kyi sems dang mi ldan par rtog pa la gnas te/sbyangs na mi 'dag go/ /de las gzhan du zhes pa gang gi nang du sbyang ba las gzhan pa ste phyi'i sa la bya'o/ /sngags pa rtog pa la gnas nas su/ /zhes pa ni phung po dang khams dang skye mched la sogs pa'i dngos po yod par rtog ste/sbyang bar bya ba'i sa dang / /rus pa la sogs pa'i nyes pa yang dngos po yod par rtog cing sa de sbyong na de byang chub kyi sems dang mi ldan pas de dag par 'gyur ba ma yin zhes pa ste/ de bas rtog pa rnam spangs nas/ /sa kun rnam par sbyang bar bya/ /nga yis dkyil 'khor rnams kyi ni//cho ga rgyas par gang bstan pa/ /de dag thog mar bstan pa ni/ /zhes bya ba gsungs pa yin te/ byang chub kyi sems sngon du bsgom pa yang slob dpon gyi mtshan nyid mang pa las shes rab kyi pha rol tu phyin pa'i tshul la rtag tu mkhas pa theg pa gsum gyi khyad par shes pa zhes bya ba la sogs pa gsungs pa'i phyir/shes rab kyi pha rol tu phyin pa'i tshul la mkhas pa ni stong pa nyid kyi rang bzhin la mkhas par mngon par sngon du byang chub kyi sems bsgom par rig par bya'o/ /theg pa gsum gyi khyad par shes pas kyang stong pa nyid la mkhas par mngon te/gang zag dang chos la bdag med pa'i khyad par la mkhas pa'i phyir ro/ /dkyil 'khor gyi las 'di rnams thams cad kyang bya ba byas pa'i slob dpon gyi mtshan nyid de lta bu dang ldan pas sa sbyang bar bya bas na rtog pa 'ba' zhig la mi gnas gyi/ byang chub kyi sems dang ldan pas 'jig rten pa rnams kyi sems dang sbyar ba'i phyir/ phyi rol gyi sa rnams sbyang ba rgya cher bshad pa'i bcom ldan 'das kyi dgongs pa de/ rmongs pa rnams kyis mi shes te/ /gang gis de lta bu'i rtog pa ma spangs pa de ni sangs rgyas dang thams cad mkhyen pa'i rgyur mi 'gyur ro//de bas na/ 'jig rten 'di na sangs rgyas smin/ /zhes bya ba la sogs pa gsungs la/ slob ma rnams la nan tan du/ /byang chub sems kyi sbyang ba ste/ /de yang smon pa byang chub kyi sems dang / 'jug pa byang chub kyi sems sbyang ba gnyis 'jug pa byang chub kyi sems sngar bsgoms na de sbyangs pa yin pas phyis dkyil 'khor du 'jug kar smon pa byang chub kyi sems sbyin par bya ste/gnyis po de dag sa sbyang ba'o/ /de ste sngar 'jug pa'i byang chub kyi sems goms par ma byas na dkyil 'khor du 'jug pa'i tshe smon pa byang chub kyi sems sbyin la/phyis 'jug pa byang chub kyi sems bsgom du gzhug ste de ni slob ma rnams kyi byang chub kyi sems kyi sbyong ba'o/ /srung ba mi g.yo mgon po'am/ /khams gsum rnam par rgyal bas bya/ /zhes pa ni slob ma rnams kyi srung ba gsungs pa ste/ slob ma rnams thog ma nang du 'ong ba'i tshe srung ba dang /lhag par gnas pa'i tshe srung ba la sogs pa thams cad gnyis po 'di dag gang yang rung bas srung ngo zhes so/ /slob ma nam zhig dmigs pa yis/ /nam yang g.yos par mi 'gyur ba/ /de tshe dri med nam mkha' bzhin/ /yang dag par ni dag par 'gyur//zhes pas ni slob ma dag pa'i mtshan nyid gsungs te/ de yang nam slob ma de rnal 'byor la gnas pa'i tshe ting nge 'dzin dag pa dang / rnam par rtog pa spangs pa dang / /rnam pa dang bral ba ste/ dge ba dang mi dge ba gnyis ka la dmigs pas mi g.yos pa dang rnal 'byor las langs nas kyang mchod pa la sogs pa'i dge ba ni spyod kyi 'dod chags la sogs pa'i yul gyi dmigs pas mi g.yo bar gyur na de dag pa'i mtshan nyid do zhes pa'o//de tshe dri med nam mkha' bzhin/ /zhes pa ni ji ltar nam mkha' gang gis kyang ma bsdus pas rang bzhin gyis dang ba dang /glo bur gyi sprin la sogs pas chod na yang nam mkha' de rang bzhin dag pa las nyams par mi 'gyur ba bzhin du/ 'di yang ting nge 'dzin la gnas pa'i tshe dge ba dang mi dge ba la sogs pa'i dri ma gnyis med pa dang /ting nge 'dzin las langs pa'i tshe mchod pa la sogs pa'i spyod pa byed kyang sgyu ma la sogs pa'i rang bzhin du shes bzhin du byed de/ dngos po yod par rtog pa'i dri mas mi gos pa'i phyir/ /sa byin brlab pa dang po ni/ /rdzogs sangs rgyas kyis bya bar bshad/ /gnyis pa sems kyi dbang gis te//'dir ni gzhan gyis mi bya'o/ /zhes pa ni/ sngar snying rje chen pos sa yongs su gzung ba'i tshe dkyil 'khor gyi sa sbyang ba der sangs rgyas lnga bsam pa la sogs pa gsungs pa de nyid 'dir gleng nas rim pa bzhin du bshad pa ste/ dkyil 'khor gyi sa de dang por sangs rgyas bcom ldan 'das rnams der bsams nas byin gyis brlab/de'i 'og tu sems kyis bdag gi bar gzung / /de'i 'og tu sngags kyis bsrung ba ste/ /de gsum gyis yongs su gzung gi de las gzhan du ma yin zhes pa'o/ /srad bu rnam bzhi bshad de/ /zhes pa nas/lnga pa nam mkha' lta bur bshad/ /ces pa'i bar ni sngar tshon sna lnga'i srad bu zhes spyir bshad pa de tshon sna lnga gang yin pa'i ming smos nas gsal bar bshad pa'o/ /bar snang la ni bzung nas su/ /der ni dkyil 'khor brtag par bya/ /zhes pa ni dkyil 'khor snga ma la lte ba'i thad kar srad bu gzung zhes spyir gsungs kyi/der dkyil 'khor bri bar ma bshad pa de nyid bar snang la srad bu gzung / bar snang der dkyil 'khor bri'o zhes gsal bar bshad pa yin no/ /srad bu dag ni gnyis pa yis/ /sa la dkyil 'khor dgod par bya/ /zhes pa ni sngar srad bu gnyis pa blangs nas kha shar phyogs su blta zhes pa la sogs pa spyir smos kyi/dkyil 'khor nyid gang du bri ba zhib tu bshad pa de nyid gsal bar gsungs pa yin te/ bar snang la bris pa'i 'og tu srad bu gnyis pa blangs pa des sa la dkyil 'khor bri'o zhes pa'o/ /sangs rgyas rnams ni thams cad dang //de'i sras blo can rnams kyi gdan/ /pad+ma yid las byung ba'i mchog /bkra shis 'jig rten rnams kyis bsngags/ /zhes pa ni gdan pad+ma dkar pos bya'o zhes pa ste/ yid las byung ba'i mchog /ces pa ni sngar bzlas pa'i yan lag bzhi bshad pa'i tshe snying gar pad+ma dkar po bsam par bshad la/'dir pad+ma dkar po zhes bshad pas yid las byung ba'i pad+ma smos pas ni yid kyis bsam pa'i pad+ma dkar po de dang 'dra ba'i gdan bya'o/ /rang rgyal dang ni dgra bcom pa/ /phyogs gcig shes par gang grags pa/ /de dag stan du shes bya ba/ / pad+ma las byung 'dab ma'o/ /zhes pa ni nyan thos dang sangs rgyas ye shes phyogs gcig pa dang ldan pa rnams kyi stan pad+ma dkar po'i 'dab ma gcig steng du bya zhes pa'o/ /'jig rten gyi ni lha rnams gang / /zhes pa nas/ rgyal po rnams kyis rab bsngags pa'o/ /zhes pa'i bar du 'jig rten gyi lha tshangs pa la sogs pa rgyal po'i gzugs can de dag 'dod chags dang bcas pa yin pas stan gyi pad+ma dkar por bshad pa yin no//phal pa rnams kyi ci rigs par/ /sa yi bye brag dag las bsam/ /zhes pa ni 'jig rten pa'i 'khor phal ba rnams bla ma'i drung na bla ma dang lha 'dra bar pad+ma'i stan mi rigs pas de las dma' ba'i stan rnams gang rigs bya'o zhes pa ste/nyan thos dang rang sangs rgyas dang 'jig rten pa'i lha rnams kyi stan 'dir bshad pa yang 'di rnams dkyil 'khor 'dir ma smos pas zhar la bshad par shes par bya'o/ /dkyil 'khor bar ma la gshin rje la sogs pa 'jig rten gyi lha rnams smos pa yang de bzhin gshegs pa'i sku las sprul pa sha stag yin pas pad+ma'i gdan nyid du rigs par bya'i 'jig rten pa phal pa rnams kyi ni ma yin no//mchod pa rnam bzhir shes bya ste/ /zhes pa nas/ de las gzhan pa 'jig rten pa'i lha rnams la ni go rims bzhin zhes pa'i bar gyis mchod pa rnams bshad pa ste/de la spyir mchod pa rnam pa bzhi ste/ /thal mo sbyar ba dang / byams pa dang / /snying rje dang me tog dang bdug pa la sogs pa dang yid kyi mchod pa'o/ /de la sngags pa zab cing rgya che ba la mos pa'i mchod pa 'di bzhi char spyod de yid kyi mchod pa yang byed/phyi rol gyi mchod pa yang byed do/ /dmigs pa can gyi sngags pas ni phyi rol gyi mchod pa rnams byed kyi/ ting nge 'dzin ni mi khug pas yid kyi mchod pa med do/ /byams pa dang snying rje ni nan tan gyi mchod pa ste/phyi dang nang gi mchod pa gang yang rung ba byas nas sems can rnams la byams pa dang snying rje bskyed nas mchod pa de dag nyid sems can rnams la bsngo bar byed pa'o/ /de la phyi rol gyi mchod pa rnams ni sngar bshad zin to/ /da ni 'dir yid kyi mchod pa bshad par bya ste/de la/ me tog bdug spos 'jig rten pa'i/ /sor mo las byung me tog rnams/ /zhes pa la sogs pa ste/ sor mo las byung me tog rnams/ /zhes pa ni thal mo sbyar ba las me tog 'byung ba de skyob pa kun la dbul bar bya zhes pa'o/ /de nyid dgrol ba'i phyir/ yan lag kun 'byung phyag rgya ni//bcings nas byang chub sems bsgoms te/ /zhes bya ba gsungs te/ yid kyi mchod pa bya ba yang thog mar bdag gis phyag rgya 'di bcings pas ji ltar bsams bzhin du sangs rgyas dang byang chub sems dpa' rnams la mchod pa'i sprin 'byung bar shog shig ces smon lam btab nas stong pa nyid kyi ting nge 'dzin la gnas te byang chub kyi sems de mngon du bya'o//de ltar ting nge 'dzin la gnas pa nyid na yang yid la nam mkha' mdzod kyi rig pa bzlas te/ de nas phyag rgya de las mchod pa rgya chen po 'og nas smos pa rnams char bzhin du 'bab par bsam mo//de ltar bsams na chos kyi dbyings kyi byin rlabs ting nge 'dzin gyi dbang dang sngags kyi mthus de'i tshe sangs rgyas kyi spyan sngar char bzhin du 'bab par 'gyur te/ de bas/ 'di ni skyon med me tog ste/ /zhes pa la sogs pa rjes su bsngags pa dang bcas pa gsungs so/ /lha rnams phal ba gzhan la ni//zhes pa nas/ ji ltar rigs par rnam par bsam/ /zhes pa'i bar gyis ni gzugs brnyan gyi dkyil 'khor tshon gyis bris pa'i lha rnams la phyi'i mchod pa me tog la sogs pa dbul ba'i rim pa bstan pa ste/ so so'i sngags kyis btab nas thog mar bcom ldan 'das rnam par snang mdzad la sogs pa de bzhin gshegs pa'i rigs la mchod de/de nas pad+ma'i rigs la sogs pa la mchod pa bya ste/ de bas na/ ji ltar rigs par rnam par bsam/ /zhes gsungs pa yin no/ /mthe bo srin lag sbyar ba ni/ /zhes pa nas/ de las gzhan pa 'jig rten pa'i//lha rnams la ni go rims bzhin/ /zhes pa'i bar gyis mchod pa rnams 'bul ba'i thabs bstan pa ste/ mthe bo srin lag sbyar ba ni/ /zhes pa la sogs pas me tog dbul ba gsungs pa/ 'jig rten pa yi lha rnams la/ /lte ba'i thad ka nas shes bya/ / zhes pa 'jig rten pa'i 'dir gzugs brnyan gyi dkyil 'khor gyi lha rnams la bya ste/ de'i lha rnams la lte ba'i thad ka nas me tog dbul bar bya la/ 'jig rten las 'das pa'i yid kyi dkyil 'khor rnams la ni snying ga nas dbul bar bshad pa'o/ /bdug spos rdo rje'i khu tshur ram//yang na pad+ma'i phreng ba yis/ /bar snang la ni bzung nas su/ /'jig rten mgon skyob rnams la dbul/ /zhes pa ni bdug spos gsol ba na rdo rje lta bu'i khu tshur ram/ pad+ma'i phyag rgya bcings pa ste/ /pog phor ni rdo rje khu tshur gyis bzung la kham por ni pad+ma'i phyag rgyas bzung ste yid kyis dkyil 'khor gyi lha rnams la bar snang la bstod de bzung nas gsol zhes pa'o//gzugs brnyan gyi dkyil 'khor gyi lha rnams la ni lte ba'i thad ka nas rim pa bzhin du gsol lo zhes pa ste/ de bas na/ de las gzhan pa 'jig rten pa'i lha rnams la ni go rims bzhin zhes gsungs pa yin no//phyi dang nang gi bye brag gis/ /sbyin sreg rnam pa gnyis shes bya/ /zhes pa nas/ sngags kyi shes pa spangs pa ste/ /zhes pa'i bar gyis phyi nang gi sbyin sreg gnyis bshad pa ste/ de la phyi'i sbyin sreg ni bsreg par byas pa ste/ sreg pa'i me la sogs pa phyi'i dngos po gzugs la sogs pa la ltos pa'o//nang gi sbyin sreg ni de rnams sems gnyis kyis byas te phyi rol gyi gzugs la sogs pa la ltos pa ma yin te/ de bas na/ las dang tshe las rnam par grol/ /zhes gsungs pa yin te/ phung po dang khams dang skye mched la sogs pa'i chos rnams 'jig par byed pa'i byang chub kyi sems kyis stong par bshig ste las dang tshe la sogs pa dmigs su med par spros pa med pa'i shes rab kyis rtogs te yid la phung po la sogs pa dang sems dang sems las byung ba'i rgyu dang 'bras bu dag dmigs su med par gyur pa de la/las dang tshe las rnam par grol/ /zhes pa'o/ /de la sreg par byed pa ni spros pa med pa'i shes rab yin la las dang tshe la sogs pa ni bsreg par bya ba yin zhing sreg pa'i me ni rnam pa dang bral ba'i yid la bya'o/ /slar yang sa bon 'byung ba ste/ /zhes pa ni las dang tshe sreg pa'i mtshan nyid stong pa nyid kyi ting nge 'dzin de las langs nas snying rje'i dbang gis lha'i gzugs su bya ba la bya ste/bdag gi lha gang yin pa'i sngags kyi sa bon las lhar bsgyur ba'i rim pa ji skad gsungs pa'i tshul gyis bdag nyid kyi lha'i gzugs su bsgyur ba la bya ste/de la dang po phung po la sogs pa 'jig pa'i byang chub kyi sems ni 'jug pa'i byang chub kyi sems so/ /ji ltar 'jigs shing rtog pa de yang spangs te spros pa med pa'i shes rab rnam par mi rtog pa las dang tshe sreg par byed pa so so rang gi rig pa'i mtshan nyid ni gnas pa byang chub kyi sems so//slar rang gi sa bon las lha'i gzugs su bsgyur ba ni ldang ba'i byang chub kyi sems so/ /las dang 'dod pa'i sbyin sreg bya/ /zhes pa ni zhi ba dang rgyas pa la sogs pa'i las rnams grub par 'dod pas phyi dang nang gi bya'o zhes pa ste/ /mtshan mar bcas pas mtshan bcas kyis//dngos grub rgyal ba dam pa bzhed/ /mtshan ma med pa gnas pas ni/ /mtshan ma can yang bsgrub tu rung / /zhes bya ba dang sbyar te/ nang gi sbyin sreg phyi rol gyi gzugs la sogs pa la mi ltos pa'i mtshan ma med pa des kyang shing la sogs pa mtshan ma dang bcas pa rnams 'grub par 'gyur ro zhes pa'o//phyi rol gyi ni gsum ldan zhing / /zhes pa ni phyi rol gyi sbyin sreg byed pa na gsum dang ldan par bya ba ni zhi ba dang rgyas pa dang mngon spyod kyi las gang yang rung ba'i kha dog dang tshul du ldan par bya ba dang rdzas rnams kyang de'i kha dog dang ldan par bsams pa dang /bdag nyid kyang de'i kha dog dang mtshungs par ldan pa'i lhar bsgyur ba ste/ de ltar me dang rdzas dang bdag gsum po zhi ba la sogs pa'i las gang yang rung ba'i kha dog dang tshul du ldan par bya ba ni gsum dang ldan pa'o/ /gnas gsum dang zhes pa ni zhi ba dang rgyas pa dang mngon spyod rnams kyi dkyil 'khor dbang chen dang chu dang rlung gi gnas gsum dang ldan pa'o//gsum la gnas zhes pa ni zhi ba la sogs pa'i me thab zlum po dang gru bzhi dang gru gsum dag bsreg rdzas la sogs pa'i gnas yin no zhes pa'o/ /las gsum ni zhi ba dang rgyas pa dang mngon spyod rnams yin la/lam grub pa ni de dag gi 'bras bu gsum grub pa'o/ /phyi dang nang gang yang rung ba'i sbyin sreg gi cho ga de las gzhan du byas na de dag gis 'bras bu thob par mi 'gyur te/ de bas na/ gang dag gzhan du byed pa ni/ /zhes pa la sogs pa ni gnyi ga'i spyir gsungs pa yin no//de bzhin gshegs pa'i gsang sngags dang / /zhes pa nas/ lha yi tshad kyang go rims bzhin/ /de tsam du ni shes par bya/ /zhes pa'i bar gyis ni sngags kyi lha la sogs pa'i kha dog dang dbyibs dang tshad rnams bshad de/ de bzhin gshegs pas gsang sngags dang //de bzhin rdzogs sangs rgyas kyis gsungs/ /dkar dang ser du shes par bya/ /zhes pa ni de bzhin gshegs pa'i rigs ni chos thams cad rnam par dag pa'i mtshan nyid zhi ba'i rang bzhin yin pas na kha dog dkar por rig par bya'o zhes pa'o//de bzhin rdzogs sangs rgyas kyis gsungs/ /zhes pa ni shAkya thub pa dang 'phags pa 'jam dpal la sogs pa byang chub sems dpa' kun du sangs rgyas pa de dag ni sems can gyi don la spyod pas na tshogs rdzogs par mdzad de rgyas pa'i mtshan nyid yin pas kha dog ser por rig par bya'o//phyag na rdo rje thams cad pa/ /zhes pa ni phyag na rdo rje yang bya ba grub pa'i ye shes kyi rang bzhin sems can gyi don du spyod pas kha dog thams cad par rig par bya'o/ /'jig rten dbang phyug gsang sngags ni/ /las kyi bye brag dag las dkar/ /zhes pa ni spyan ras gzigs kyi dbang po ni so sor kun du rtog pa'i ye shes kyi rang bzhin chos thams cad 'khrul par byed pa'i bdag nyid pas kha dog dkar por shes par bya'o//kun du gru bzhi lham pa la/ /go rims bzhin du zlum po dang / /gru gsum dang ni zla gam 'dra/ /dbyibs ni legs par bshad pa yin//zhes pa ni lha de rnams kyi 'khor dbang chen la sogs pa'i dbyibs bshad pa ste/ rim pa bzhin du shes par bya'o/ /gzugs ni gnyis su shes bya ba/ /bud med dang ni skyes pa nyid/ /ces pa ni lha rnams kyi gzugs bshad pa ste/ de la lha rnams kyang rnam pa gsum ste rnam par smin pa'i gzugs dang /gnas yongs su gyur pa dang / sprul pa'o/ /de la rnam par smin pa'i gzugs ni rang gi las dang bsod nams las skyes pa'o/ /gnas yongs su gyur pa ni sgrub pa pos grub pa'i gzugs so/ /sprul pa ni ting nge 'dzin la sogs pa'i dbang gis gang yang rung ba cig yid la bsams par gyur pa ste/de dag las la la ni skyes par snang / la la ni bud med du snang ba'o/ /yang na kun du thams cad kyi/ /kha dog dbyibs dang gzugs rnams te/ /zhes pa ni yang na gong du kha dog dkar po la sogs smos pa dang /dbyibs gru bzhi la sogs pa smos pa dang / gzugs bud med dang skyes par smos pa de dag nges pa ni ma yin te de dag kun kyang kha dog thams cad dang dbyibs thams cad dang / gzugs thams cad du shes par bya'o/ /de ci'i phyir zhe na/ bsam yas ye shes las byung bas//de bas de rnams bsam yas te/ /zhes gsungs te de thams cad kyang de bzhin nyid kyi ye shes bsam du med pa las byung ba sha stag yin pas kha dog dang dbyibs la sogs pa chad pa med pas bsam gyis mi khyab pa'o/ /de yang ci'i phyir zhe na/ ye shes mkhyen gyis ye shes ni//sems can don phyir tha dad 'gyur/ /zhes pa ste/ de dag gi kha dog dang dbyibs la sogs pa chad pa med pa yang sems can gyi don sna tshogs la mkhas pa'i ye shes des gdul ba'i 'gro ba dang rjes su mthun pa'i gzugs la sogs pa ston pa'i phyir ro//yid kyi rgyan ni ji tsam pa/ /stan dang phyag rgya dag dang ni/ /lha yi tshad kyang go rims bzhin/ /de tsam du ni shes par bya/ /zhes pa ni lha la sogs pa'i tshad bsams te/ nang du yid la bsam pa'am/ phyi rol du bri ba la sogs pa kun kyang yid la ji tsam du 'dod pa de tsam du bsam pa'am bri bar bya zhes pa'o//lha yi tshad kyang go rims bzhin/ /zhes pa ni dkyil 'khor du bri ba'i lha rnams kyang snying po'i dkyil 'khor du bri ba rnams ni dkyil 'khor gyi sa'i zheng che bas lha'i gzugs kyang che bar bya de'i go rims kyis de bzhin du zheng chung ba rnams su rim gyis chung bar bya zhes pa'o//sangs rgyas gang nas gang byung ba/ /phyag rgya rnams kyang de nas byung / /zhes bya ba ni phyag rgya gang nas byung ba'i khungs bshad pa ste/sangs rgyas rnams kyi chos kyi dbyings las byung ba'i phyag rgya des bdag dang slob ma la sogs pa'i lha'i lus su byin gyis brlabs pa dang phyag rgya des slob ma la sogs pa srung ba ste/de bsrungs na chos kyi dbyings kyi mtshan mas btab pas cis kyang mi tshugs par 'gyur ba ni 'jig rten na rgyal po'i rgya dang ldan pa'i skyes bu la sus kyang gtse bar mi 'gyur ba dang 'dra'o zhes sngar bzhin du bshad do//de bas mdor na chos kyi dbyings/ /mtshan ma phyag rgya yin par bshad/ /ces pa ni mdor na phyag rgya rnams chos kyi dbyings kyi mtshan ma yin par shes par bya'o zhes pa'o/ /dbang bskur gsum du shes bya ste/ /zhes pa nas/ rdzogs pa'i sangs rgyas rnams kyis bsgrags//zhes pa'i bar gyis ni dbang bskur ba rnam pa gsum bshad de/ /phyag rgya gang zhig dbang bskur ba/ /las dang bya ba spangs pa ste/ /zhes pa ni snying rje chen po 'byung ba dang yi ge 'khor lo bskor ba'i dkyil 'khor du nam slob dpon dang slob ma zab cing rgya che ba la mos pa dag phyag rgyas dbang bskur bya bar bshad pa ste/dkyil 'khor gnyis gang yang rung ba'i mdun du dbang bskur ba'i dkyil 'khor dang bum pa la sogs pa la mi ltos par kun du bzang po la sogs pa byang chub sems dpa'i phyag rgya dang 'og nas 'byung ba'i phyag rgyas dbang bskur ba'o//las dang bya ba spangs pa ste/ /zhes pa ni dbang bskur ba'i bum pa dang / dkyil 'khor dang dung dang 'khor lo la sogs pa'i cho ga rnams dang bral ba zhes pa'o/ /gnyis pa las dang bya ba yis/ /kun nas bslangs par yang dag bshad/ / ces pa ni snying rje chen po dang 'byung ba dang yi ge 'khor lo bskor ba'i dkyil 'khor gyi mdun du dbang bskur ba'i dkyil 'khor bris nas sngar ji skad bshad pa'i cho ga bzhin du dbang bskur bar gsungs pa'o/ /gsum pa yid kyis shes bya ste/ /yul dang dus tshod spangs pa'o/ /zhes pa ni gsang ba'i dkyil 'khor du yid kyis dbang bskur ba ste 'og nas dngos su 'byung ngo //bla ma legs par mgu byas nas/ /phan byed pas gang smras pa yi/ /dbang bskur 'di ni mchog yin par/ /rdzogs pa'i sangs rgyas rnams kyis bsgrags/ /zhes pa ni dkyil 'khor gong ma gnyis su phyag rgyas dbang bskur nas rjes su gnang ba'i tshig smras pa la bya ste/phyag rgyas dbang bskur ba'i 'og tu slob dpon slob ma'i rim gro dang nan tan la sogs pas mgu nas khyod kyis deng phyin chad chos kyi 'khor lo bskor cig ces pa la sogs pa'i tshig tu shes par bya'o//phyag rgyas dbang bskur ba dang po dang dbang bskur ba gnyis pa ni snying rje chen po 'byung ba dang yi ge 'khor lo bskor ba'i dkyil 'khor du bya'o/ /gsang ba'i dkyil 'khor du ni yid kyis dbang bskur ba dngos su gsungs pas gong ma gnyis mi bya bar shes pa'o//'di rnams kyang 'dir tshig tsam bshad kyis don bsdus pa'i don nyid du gtan la phab ste bshad zin to/ /sangs rgyas rnams kyis mdor na ni/ /dam tshig can rnams sngar bshad de/ /zhes pa nas/ dam tshig can zhes gzhan mi bya/ /zhes pa'i bar gyis ni dam tshig can gyi rim pa'i bshad pa yin te/de la spyir slob ma rnams dkyil 'khor du 'jug pa yang kha cig ni dam tshig can du 'dod pa'i phyir 'jug la kha cig ni sgrub par byed pa'i phyir 'jug /kha cig ni slob dpon du 'dod pa'i phyir 'jug ste/ de la dam tshig can du 'dod pa'i phyir 'jug pa ni/dkyil 'khor 'di gsum las gang yang rung bar zhugs te dam tshig can du gyur na dkyil 'khor lhag ma gnyis la mi ltos la/ /sgrub pa dang slob dpon du 'dod pa ni dkyil 'khor gsum char la ltos par shes par bya'o/ / dkyil 'khor 'di ni mthong ba las/ /dam tshig shes pa gcig ces bya/ /zhes pa ni dam tshig gi don ni 'dir tshul las mi 'gal ba'i don te dkyil 'khor gsum las gang yang rung ba zhig mthong na dam tshig can gcig ces bya ste/ des sngar byang chub kyi sems bsgoms na ni de la phyag rgya dang sngags sbyin par bya la/sngar byang chub kyi sems ma bsgoms na de la phyag rgya dang sngags sbyin du mi rung ste/ de bas na/ de la phyag rgya mi bstan zhing / /sngags kyang sbyin par mi bya'o/ /zhes gsungs pa yin no/ /de ltar dkyil 'khor der zhugs nas phyag rgya dang sngags mi sbyin par byang chub kyi sems bsgom du bcug ste goms par gyur na/byang chub sems kyi bye brag las/ /sngags dang phyag rgya yongs su gzung / /zhes bya bas gdod phyag rgya dang sngags sbyin par gsungs so/ /dkyil 'khor mthong zhes bya ba 'di/ /dam tshig can gnyis shes par bya//zhes pa ni de ltar byang chub kyi sems goms nas yang dkyil 'khor du bcug ste phyag rgya dang sngags byin pa de ni dam tshig can gnyis par shes par bya'o/ /dkyil 'khor dang ni phyag rgya mthong / /las dang bya ba la yang sbyar/ /bla mas lung ni ma byin par/ /de yang dam tshig shes par bshad//ces pa ni dkyil 'khor kyang mthong la/ /rgyud dang rtog pa la sogs pa nyan du bcug cing slob dpon du lung ma bstan pa de ni dam tshig shes pa gsum pa zhes bya'o/ /phyag rgya dkyil 'khor bri ba rnams/ /de tshe cho ga bzhin du bstan/ /gsang ba'i ye shes byung ba yis//dbang bskur med pa'i sngags pa'ang yin/ /zhes pa ni snying rje chen po 'byung ba'i dkyil 'khor dang / yi ge 'khor lo bskor ba'i dkyil 'khor gnyis ka dbang bskur ba'am/ gang yang rung ba cig tu dbang bskur te phyag rgya dang dkyil 'khor bri ba dang phyag rgya bshad pa de dag cho ga bzhin du des gzhan la yang bstan par gsungs pa las gsang ba'i dkyil 'khor 'ba' zhig tu dbang ma bskur ba de ni dam tshig shes pa bzhin zhes bya'o//gsang ba'i dkyil 'khor dbus su ni/ /sngags pa cho gas dbang bskur ba/ /dam tshig shes pa lngar shes bya//dam tshig can zhes gzhan mi bya/ /zhes pa ni dkyil 'khor gong ma gnyis su yang dbang bskur la/ /gsang ba'i dkyil 'khor du dbang bskur ba de ni dam tshig gshegs pa lnga zhes bya'o/ /dam tshig can zhes gzhan mi bya/ /de ltar gong du smos pa las gzhan du cho ga las 'gal bar byas na dam tshig can zhes mi bya'o zhes pa'o//brtul zhugs bzang po byang chub phyir/ /zhes pa nas/ gnas pa de ni bden pa mthong / /zhes pa'i bar gyis gong du ni/ /sngags spyad pa la brtson pa yi/ /sngags pa byang chub sems dpa' dang / /thams cad mkhyen par ji ltar 'gyur/ / ji ltar bden pa mthong bar 'gyur/ /zhes pa ni dris pa de dag bshad pa ste/ brtul zhugs bzang po byang chub phyir/ /gang zhig sems ni bsgom pa na/ /sngags pa'i gnas gsum mi dmigs pa/ /de ni byang chub sems dpa' yin/ /zhes pa ni gang zhig byang chub kyi sems rtag tu bsgoms te/lus dang ngag dang yid kyi gnas gsum mam/ 'dod pa'i khams dang gzugs kyi khams dang gzugs med pa'i khams kyi gnas gsum du 'jug pa'i byang chub kyi sems kyis bshig ste/ dmigs su med par byed pa de ni byang chub sems dpa'i zhes bya'o/ / thabs kyi snying stobs skyes nas su/ /sems can don la sbyor ba ni/ /dmigs su med pa'i spyod pa thob/ /rgyal ba'i mchog tu shes par bya/ /zhes pa ni dmigs su med pa'i spyod pa thob nas de las langs te chos rnams sgyu ma lta bur shes pa bzhin du thabs kyis sems can gyi don du spyod pa de ni thams cad mkhyen pa zhes bya ste/dmigs su med pa'i spyod thob pa/ /zhes pa ni mos pas spyod pa'i tshe na 'jug pa'i byang chub kyi sems kyi chos rnams bshig nas gnas pa'i byang chub kyi sems kyi mtshan nyid stong pa nyid la gnas pa na don dam par yang chos rnams dmigs su med la/kun rdzob tu yang chos rnams 'khrul pa'am sgyu ma lta bur rtogs pas na/ dmigs su med pa'i spyod pa thob pa/ /zhes bya'o/ /rgyal ba'i mchog ces pa ni de ltar kun rdzob dang don dam par chos rnams dmigs su med par rtogs pa de ni bdud bzhi dngos su bcom yang bdud bzhi las rgyal ba'i ngang tshul can yin pas rgyal ba'i mchog ces bya'o//thog ma nas ni zhi ba'i chos ngo bo nyid med pa la/ gang gi sems ni rang bzhin gyis/ /gnas pa de ni bden pa mthong / /zhes pa ni bden pa mthong ba bshad pa ste/ de nas chos rnams thog ma nas zhi zhing gang gi ngo bo nyid med par rtogs te de nyid la sems ri rab bzhin du mi g.yo bar 'gyur na de ni bden pa mthong ba zhes bya'o//de dag kyang mdor na thog ma ni 'jug pa'i byang chub kyi sems dang ldan pa'o/ /bden pa mthong ba zhes pa ni gnas pa'i byang chub kyi sems bshad pa'o/ /rgyal ba'i mchog ces pa ni ldang ba'i byang chub kyi sems bstan pa ste de dag kyang mos pas spyod pa'i sa gnyis la gnas pa'i yon tan du shes par bya'o//'di bden 'di ni yang dag par/ /zhes pa nas/ sangs rgyas nyid dang gang gzhan no/ /zhes ba'i bar gyis grub pa'i rigs rnams bshad pa ste/'di bden 'di ni yang dag pa/ /de bzhin du ni mi slu ba/ /ji ltar sangs rgyas bden gzigs pa/ /de bzhin sngon ni ngas ma mthong / /zhes pa ni/ 'di ni byang chub sems thob pa/ /zhes pa ni de nyid kyi rjes su bsngags pa'i khyad par te/ gang yang byang chub kyi sems thob pa de ni bden zhing yang dag pa mi slu ba ste ji ltar sngon gyi sangs rgyas dang /ngas kyang yang dag mi slu ba yin par mthong ngo zhes pa'o/ /gang gis byang chub kyi sems thob pa yang bsgrubs nas/ de srid du byang chub sems dpa' kun du bzang po'am/'phags pa 'jam dpal lam/ rdo rje 'dzin chen po gang yang rung ba cig 'ongs te mgo la nyug gam legs so zhes zer gyi bar du bzlas brjod bya'o//de nas phyag byas te mchod yon phul na byang chub kyi sems mi brjed pa'i ting nge 'dzin thob par 'gyur ro zhes gong du bshad pa de lta bu'i grub pa thob pa ni byang chub kyi sems thob pa zhes bya ste/de lta bu grub na de nyid dngos grub yin gyis/gzhan ci zhig dgos te byang chub kyi sems de grub pa gzhan gyi rgyu yin pa'i phyir ro/ /de las gzhan du'ang dngos grub ni/ /rnam pa dag ni lngar 'dod de/ /zhes pa ni byang chub kyi sems grub pa de las gzhan pa ming gis smos pa lnga po la bya ste/de dag kyang spyod pa'i rjes su 'jug pa la sogs pa rnams so/ /de la spyod pa'i rjes su 'jug pa ni mos pas spyod pa'i sa las 'phar te ye shes kyi sa la 'jug pa'i skabs su snang ba thob pa dang snang ba mched pa zhes bya ba la sogs pa'i ting nge 'dzin gyi khyad par grub pa'o//de bzhin sa ni gnon pa dang / /zhes pa ni sa rab tu dga' ba thob pa las grub pa'o/ /'jig rten mngon shes lngar 'dod dang / /zhes pa ni 'jig rten gyi mngon par shes pa lnga grub pa'o/ /sangs rgyas nyid dang zhes pa ni sangs rgyas kyi gzugs su gyur pa'i rig 'dzin grub pa'o//gang gzhan zhes pa ni rig 'dzin pa phal ba rnams grub pa ste/ de nyid kyi gzungs kyi grub pa'o/ /gong ma gsum ni sems kyi grub par shes par bya'o/ /rgyud las rgyud du gyur pa yi/ /zhes pa nas/ yid las yang dag 'byung ba thob/ /ces pa'i bar gyis grub pa'i dus bshad de/de las grub pa'i dus kyang tshe 'di la grub pa dang tshe phyi ma la grub pa rnam pa gnyis so/ /rgyud las rgyud du gyur pa yi/ /las ni mi srid ma nyams shing / /rnam smin rnam par ma smin te/ /dngos grub dag gis dus su 'dod/ /ces pa ni tshe 'di la grub pa ste/ rgyud las rgyud du gyur pa'i las rnams ma zad de tshe snga ma'i rgyud go drug la sogs pa nas las bsags pa tshe 'di'i rgyud la ma nyams shing bdag gi phung po gson na zhes pa'o//rnam smin rnam par smin pa de/ /zhes ston la de ltar yang gson la tshe dang bsod nams la sogs pa'i rgyud bsags pa'i 'bras bu yang 'dir smin par gyur cing snga ma'i las rnams ma zad pas bdag tshe ring ba'i rnam smin rnam par smin pas bdag gi bsod nams kyi rgyud mthu brtas par gyur te/sgrub pa'i tshe de ltar tshe dang bsod nams gnyis bsrungs na de tshe 'di nyid la grub par bshad do/ /mdor na gang tshe dus gcig tu//las dang skye ba 'phang gyur pa/ /de tshe'ang sngags pas dngos grub ni/ /yid las yang dag 'byung ba thob/ /ces pa ni dngos grub sgrub pa ni las dang tshes ma btang ste/ dus gcig tu las dang tshe zad par gyur na sgrub pa'i 'bras bu sngags pa des tshe phyi ma la bsgrub mi dgos par rdo rje la sogs pa'i rigs su skye ba dang rig 'dzin la sogs pa'i skye ba thob par 'gyur ro zhes pa'o//yid las yang dag 'byung ba yis/ /zhes pa ni rdzas la sogs pas bsgrub mi dgos par tshe 'phos ma thag tu yid nyid kyis grub pa de dag thob par 'gyur ro/ /grub nas mkha' la 'gro ba ni//zhes pa nas/ rdzogs sangs rgyas dang lhan cig dga'/ /zhes pa'i bar gyis ni grub pa'i 'bras bu rnams dris pa'i lan bshad pa ste/ grub nas nam mkha' la 'gro ba ni/ ji ltar sgyu ma 'jigs med bzhin/ /sngags kyi dra bas rmongs byed pa/ /ji ltar mig 'phrul chen po bzhin//zhes pa ni nam mkha' la 'gro ba'i grub pa bshad pa ste/ ji ltar mig 'phrul gzhan nam mkha' la 'gro ba dang rdzu 'phrul sna tshogs byed pa bzhin du sngags pa de yang rig 'dzin la sogs pa grub nas nam mkha' la 'gro ba dang sngags kyi mthus rnam pa sna tshogs pa'i sprul pa la sogs par ston par byed ces pa'o//gang la lus dang ngag med par/ /dri za'i grong khyer de bzhin te/ /de bzhin mi snang 'gyur zhes bya/ /de ni de na gnas pa yin/ /zhes pa ni rig 'dzin la sogs pa grub nas mi snang bar gyur pa'i dpe dri za'i grong khyer las blangs nas bshad pa ste/ji ltar dri za'i grong khyer lus la sogs pa dngos su mi snang la gnas par byed pa de bzhin du/ sngags pa de yang grub nas lus kyang mi snang la tshig tu brjod pa yang mi thos par nam mkha' la mi snang bar gyur cing bar snang la gnas par byed do zhes bshad do//ji ltar nyal ba'i rmi lam na/ /sum cu rtsa gsum gnas su ni/ /lus kyang spangs pa ma yin la/ /de nyid kyis kyang de ma song / /de bzhin rnal 'byor gnyid kyis kyang / /sngags pa sngags la gnas pa dang / /bsod nams byas pa'i las rnams kyis/ /'ja' dang 'dra ba'i lus kyang thob//ces pa ni sngags pa rig 'dzin la sogs pa grub nas lus 'di yang mi 'dor bar nam mkha' la sogs pa la 'gro ba'i dpe rmi lam las blangs nas bshad pa ste/ ji ltar skyes bu nyal ba'i rmi lam na sum cu rtsa gsum la sogs pa'i gnas mthong bar yang 'gyur ba de bzhin du//sngags pa de yang rnal 'byor gyi dbang gis lus 'di ni ma bor bar nam mkha' la sogs par 'gro ba yang rang gis mthong ngo / /gzugs rnam pa sna tshogs yang ston nus par 'gyur zhes pa'o/ /'ja' dang 'dra ba'i lus kyang thob/ /ces pa ni gzugs sna tshogs ston pa'o//lus dang ngag yid las byung ba'i/ /gsang sngags yid bzhin nor bu 'dra/ /de las rnam par bsams pa'i don/ /ma brtags par yang 'byung bar 'gyur/ /zhes pa ni sngags kyi grub pa'i yid bzhin gyi nor bu las dpe blangs nas bshad pa ste/ji ltar yid bzhin gyi nor bu gang bsams pa'i don rnams brtags mi dgos par lhun gyis grub pa nyid du 'byor bar gyur pa de bzhin du sngags grub pa'i 'bras bu yang gang 'dod pa rnams brtags mi dgos par lhun gyis grub pa nyid du 'byor par 'gyur zhes pa'o/ /ji ltar nam mkha' phyogs rnams su//'dus byas spyod yul thams cad kyis/ /mi gos de bzhin sngags pa yang / /rtogs pa'i spyod yul kun gyis so/ /zhes pa ni grub pa thob pa de yang ni gza' dang skar ma dang ltas ngan la sogs pas mi tshugs par bshad pa ste/ ji ltar nam mkha' la 'dus byas la sogs pa'i dri mas mi gos pa de bzhin du grub pa'i sngags pa de yang gza' dang skar ma la sogs pa bzang ngan la mi ltos te/de dag gis ltas ngan la sogs pas mi tshugs par shes pa'o/ /'di kun 'du shes tsam du ni/ /nam zhig de ltar bsgoms gyur cing //rnam par bsgoms na sngags pa de/ /rdzogs sangs rgyas dang lhan cig dga'/ /zhes pa ni sngags pa grub pa thob nas sangs rgyas dang lhan cig tu 'grogs pa thob par bshad pa de/ 'di kun 'du shes tsam du ni//zhes pa 'dus byas la sogs pa'i chos 'di dag thams cad dngos su spong ba ma yin gyi//'du shes tsam du byang chub kyi sems bsgom pa'i tshe bsgoms pas kun du sangs rgyas pa dang lhan cig tu 'grogs shing de la chos nyan pa la sogs pas dga' bar 'gyur zhes pa'o/ /sangs rgyas rkang gnyis gtso bo yis/ /sbyin sreg gnyis su bshad pa ni//phyi rol gyi dang nang gi ste/ /de yang tshim par bya dang bcas/ /zhes pa ni sbyin sreg las me dag dang / zhes sngar dris pa la rnam pa gnyis ni sngar bshad zin la/ 'dir ni sbyin sreg rnam pa gnyis phyi ma'i me dang nang gi me rnam pa gnyis su bshad de/ de yang tshim par bya ba bcas//zhes gsungs pa de la nang gi sems kyi tshim par bya ba ni rang gi sa bon las slar lha'i gzugs su bsgyur bar sngar bshad do/ /phyi rol gyi me ni mnyes par bya ba'i bsreg pa'i rdzas kyis tshim par bya'o/ /lha rnams kyis ni so so yis/ /zhes pa nas/ yang dag rdzogs pa'i sangs rgyas kyis/ /gsang sngags 'bras bu skal ba ldan/ /zhes pa'i bar gyis lha rnams kyi rang bzhin dang grub tshad rnams bshad pa ste/ lha rnams kyang ni so so yis/ /rang bzhin yongs su mkhyen nas su/ /zhes pa ni lha rnams kyi rang bzhin shes par byas na de dag gi grub pa'i 'bras bu yang shes par 'gyur zhes pa ste/de la 'jig rten las 'das pa'i lha rnams kyi rang bzhin ni sngar bshad zin to/ /'dir ni 'jig rten gyi lha rnams kyi rang bzhin bshad nas de'i mthus 'bras bu'i tshad shes par bya ste/ de bas na/ 'jig rten pa yi sngags rnams kyi//tshad dag legs par gsungs pa ni/ /zhes bya ba la sogs pa gsungs pa yin no/ /dbang phyug la sogs pa'i lha mthu chen po de dag gis smras pa'i sngags dang phyag rgya rnams ni 'bras bu 'phral du ster ba ni de dag gi tshad bstan pa yin no/ /tshad ces pa ni de dag gi mthu la bya'o//'on kyang skye dang 'jig pa yi/ /chos can de dag brtan pa med/ /ces pa ni de dag gi khyad par gsungs pa ste/ 'jig rten pa'i lha rnams 'bras bu tshe 'di la 'phral du ster mod kyi/ de rnams skye zhing 'jig pa'i chos can yin pas mi rtag pa'o/ /'jig rten 'das pa'i sngags rnams ni//zhes pa nas/ gsang sngags tshad ni sngon bshad pa/ /zhes pa'i bar gyis 'jig rten las 'das pa'i sngags te/ byang chub sems dpa' dang nyan thos dang rang sangs rgyas la sogs pas gsungs pas sngags rnams thog ma'i byed pa med cing las dang skye ba bcad pa ste/'dod chags dang zhe sdang dang gti mug gi nyes pa gsum dang bral bas skye zhing 'jig pa la sogs pa med de tshad rnams sngar bshad zin to zhes pa'o/ /dus gsum las ni shin tu 'das/ /rten cing 'brel pa las byung ba/ /mthong dang ma mthong 'bras bu can/ / dag gi lus las byung ba'o/ /zhes pa ni de lta bas na 'jig rten las 'das pa'i sngags rnams 'jig rten pa ltar mthong ba'i chos 'ba' zhig la 'bras bu 'phral du ster ba kho na ma yin gyi/ mthong ba'i chos dang ma mthong ba gnyi ga la 'bras bu ster ro zhes pa ste/ mthong ba ni lha dang mi la sogs pa 'grub ba'o//ma mthong ba ni mya ngan las 'das pa'o/ /'jig rten las 'das pa'i 'bras bu'i tshad/ /bskal ba gcig tu bshad pa yin/ /zhes gsungs pa ni 'jig rten pa'i lha rnams kyi grub pa'i 'bras bu ji srid thub pa gsungs pa ste/ 'jig rten pa'i 'bras bu ni bskal ba gcig gi bar du thub ces pa'o//yang dag rdzogs pa'i sangs rgyas kyis/ /gsang sngags 'bras bu bskal ba 'das/ /zhes pa ni 'jig rten las 'das pa'i sngags rnams kyi 'bras bu bskal pa las 'das par thub ces pa'o/ /sangs rgyas drang srong chen po dang / /rgyal sras rnams kyi ting 'dzin ni//mtshan ma med cing dag pa'o/ /'jig rten par ni mtshan mar bcas/ /zhes pa ni sngags pa rnams kyi ting nge 'dzin bshad pa ste/ de la spyir ting nge 'dzin la yang rnam pa gnyis te/ don dam pa dang kun rdzob kyi'o/ /de la don dam pa ni a la sogs pa yi ge 'bru re'i sgo nas bstan pa'o//kun rdzob kyi ni stobs dang mi 'jigs pa la sogs pa'i yon tan gyi tshig tu gyur pa de dag gi sngags kyi phreng ba'i tshig las ting nge 'dzin gyur pa'i yi ge rnams te sngar bshad zin to/ /'dir ni ting nge 'dzin gyi don rnams bshad pa ste/ sangs rgyas drang srong chen po ni//lus dang ngag dang yid gsum thub pa'i mtshan nyid can yin pas drang srong ste/ mi gnas pa'i mya ngan las 'das pa kun du sangs rgyas pa la sogs pa la bya'o/ /rgyal sras rnams ni byang chub sems dpa' la sogs pa'o/ /de dag gi ting nge 'dzin gyi chos thams cad gzod ma nas ma skyes pa rnam par mi rtog pa'i mtshan nyid can yin pas mtshan ma med pas dag pa'o//'jig rten par ni mtshan mar bcas/ /zhes pa ni nam byang chub sems dpa' ting nge 'dzin las bzhengs nas sangs rgyas kyi zhing rnam par brgyan pa la sogs pa rnam pa dang bcas pa'i spyod pa dang /'jug pa dang sangs rgyas shing mngon par byang chub nas sngon gyi smon lam gyi shugs kyis sku mi zad pa'i 'khor lo la sogs pa 'byung ba ya mtshan dang bcas pa'i spyod pa ste de dag la yang 'jig rten pa mtshan ma dang bcas zhes bya'o/ /gnyis su na mu stegs byed kyi 'jig rten pa'i lha rnams kyi ting nge 'dzin ni dngos po yod par lta bas na mtshan ma dang bcas zhes bya'o//rnam par smin pa 'di nyid la/ /las kyi 'bras bu smin gyur pa/ /nam zhig dngos grub thob pa na/ /de tshe las dang zlog par 'gyur/ /zhes pa ni sngon gyi las kyi rnam par smin pa'i phung po lnga po 'di la lha'i gzugs su smin par 'gyur ba'i las kyi 'bras bu smin par 'gyur te/nam bdag gi ting nge 'dzin la sogs grub pa thob pa ni de'i tshe grub pa de las kyi rnam par smin pas de zil gyis mnan nas 'bras bu mi smin par ldog par 'gyur ro zhes pa'o//sems ni ngo bo nyid med pa'i phyir/ /rgyu dang 'bras bu rnams spangs shing / /las dang tshe las rnam par grol/ /nam mkha' lta bur gyur pa yin/ /zhes pa ni grub pa'i mthar sangs rgyas su 'gyur bar bstan te/ sgrub pa pos byang chub kyi sems dag par bsgom pas sems kyi ngo bo nyid med par rtogs te/chos kyi rgyu dang 'bras bu dmigs su med pas rgyu las dang 'bras bu che ste/ las dang tshe dag las kyang rnam par grol bar 'gyur te/ de ltar las dang tshe las rnam par grol na nam mkha' lta bur gzung ba dang 'dzin pa spangs pa dag pa'i mtshan nyid du 'gyur ro zhes pa'o//gsang ba'i bdag po zhes pa nas/ /snying rje chen po'i 'byung ba zhes bya ba yod kyi de bri ba'i cho ga nyon cig ces pa'i bar gyis gsang ba'i dkyil 'khor gyi rang bzhin dang yon tan brjod nas nyon cig ces pa ste/ de la phyag rgya'i gzugs su dgod ba'i rim par phye ba zhes pa ni snying rje chen po 'byung ba'i dkyil 'khor dang yi ge 'khor lo bskor ba'i dkyil 'khor du lus dang tshig gis gzugs su bkod kyi/'dir sems kyi rang bzhin dngos su gzhag tu mi rung pas phyag rgya'i gzugs su bkod pa de/ /de'i rim par phye ba ni phyag rgya'i gzugs su bkod pa'i dkyil 'khor la bya'o//lha rnams gnas par byin gyis rlob pa zhes pa ni dkyil 'khor der lha rnams phyag rgya'i gzugs su bkod pas byin gyis rlob par gyur pa'o/ /ting nge 'dzin lnga rtogs pa zhes pa ni dbang chen la sogs pa'i dkyil 'khor lnga po de dag nyid ye shes kyi bye brag tu byin gyis brlabs pa ste/dkyil 'khor lnga po de las ye shes kyi ting nge 'dzin gyi khyad par lnga rtogs par 'gyur pa'o/ /sngon gyi sangs rgyas rnams kyi mngon par rdzogs par sangs rgyas pa zhes pa ni sangs rgyas thams cad mdzad pa gcig tu bstan pa ni/sngon gyi sangs rgyas rnams kyis kyang mkhyen nas bshad kyis de nyon cig ces sbyar ro/ /byang chub sems dpa' gsang sngags kyi sgo nas zhes pa nas/ phan pa dang bde ba'i phyir zhes pa'i bar du ni dkyil 'khor de bshad pa yang phyag na rdo rjes mi mkhyen pa'i phyir bshad pa ni ma yin gyi/mos pas spyod pa'i sa la gnas pa'i byang chub sems dpa' gsang sngags kyi sgo nas byang chub sems dpa'i spyad pa spyod pa rnams la phan pa dang bde ba'i phyir bshad do zhes pa ste/ chos kyi dbyings rtogs pa spyod yul du gyur pa zhes pa ni mos pas spyod pa'i sa la gnas pa rnams kyi shes rab kyi yon tan bshad pa ste/de dag gi shes rab ni nam mkha' dang 'dra ba'i chos kyi dbyings dmigs pa'i spyod yul du 'gyur zhes pa'o/ /chos kyi dbyings nam mkha' dang 'dra ba de dag gi spyod yul du gyur na sngags kyi tshul bshad ci dgos she na/ de dag de ltar stong pa nyid kyi spyod yul can du gyur kyang thabs kyis sems can bsgral bar byed do//de bas na sems can gyi khams ma lus pa bsgral ba yi dam bcas pa zhes gsungs pa yin no/ /de ltar thabs dang shes rab zung du 'brel ba'i sngags kyi sgo nas byang chub sems dpa'i spyad pa spyod pa rnams la phan pa dang bde ba'i phyir dkyil 'khor de nyon cig ces pa'o//de la don dang zhes pa ni byang chub sems dpa' rnams kyi don mya ngan las 'das pa'am/ nges par legs pa'i bde ba'i phyir ro/ /phan pa dang bde ba'i zhes pa ni tshe 'di dang phyi ma la phan pa'i phyir ro/ /bde ba'i phyir zhes pa ni tshe 'di la bya ba'i phyir zhes pa'o//gsang ba pa'i bdag po dang por yang dag par rdzogs pa'i sangs rgyas kyi dkyil 'khor dgod pa zhes pa ni dkyil 'khor snga ma dag dang 'dra bar dang po snying po'i dkyil 'khor du bcom ldan 'das rnam par snang mdzad dgod pa zhes pa ste/bri ba'i cho ga nyon cig ces 'og nas 'byung ba dang sbyar ro/ /gsang ba las kyang ches gsang ba/ /zhes pa la gsang ba ni sems kyi rang bzhin phra zhing dmigs su med pas na gsang ba'o/ /de las kyang ches gsang ba ni dam tshig med pa'i sems can rnams la mi bstan pa'i phyir ro//snying rje chen po'i snying po 'byung ba zhes pa ni sngar bzhin no/ /gang las 'jig rten pa dang 'jig rten las 'das pa'i dkyil 'khor grangs med pa 'byung ba zhes pa la 'jig rten pa'i dkyil 'khor ni gzugs brnyan gyi dkyil 'khor te tshon gyis bri ba rnams so//'jig rten las 'das pa ni rang bzhin gyi dkyil 'khor te gzugs brnyan gyi dkyil 'khor rnams kyang 'di las 'phro ba dang rang bzhin gyi dkyil 'khor yang 'di mthong ba las shes par gyur pas na 'jig rten pa dang 'jig rten las 'das pa'i dkyil 'khor 'byung ba zhes bya'o/ /yang na 'jig rten pa'i lha rnams kyi dkyil 'khor dang 'jig rten las 'das pa'i lha rnams kyi dkyil 'khor grangs med pa rnams kyang 'di las 'byung ba zhes pa ste/de bri ba'i cho ga nyon cig ces pa'o/ /kun du grub bzhi lham pa la/ /zhes pa nas/ dgod pa rnams kyang nges pa yin/ /'di las byung bar shes par bya//zhes pa'i bar gyis bcom ldan 'das rnam par snang mdzad bzhugs pa'i snying po'i dkyil 'khor bri ba ste/ dkyil 'khor gyi sa bcad pa dang / snam bu'i rim pa dang / tshon dgye ba la sogs pa'i cho ga rnams dkyil 'khor gong ma rnams su ji skad gsungs pa bzhin no//kun du gru bzhi lham pa ni tshad med pa bzhi dang ldan par ston pa'o/ /sgo gcig pa ni sgo mang po nas chos kyi dbyings kyi sgo gcig tu 'du bar bstan pa'o/ /stegs bur bcas pa ni mtha' tshon gyis bris pa'i dbus tshon ser pos bkang ste bcom ldan 'das bzhugs pa'i gzhir bcas zhes pa'o//rdo rje rnams kyi mtshan pa ni de'i nang nub phyogs kyi logs su rdo rje rtse lnga pa bri ba'o/ /dbus su rdo rje rtse brgyad pa/ /zhes pa ni rgyu'i tshe rnam par grol ba'i gzungs ye shes brgya dang bcas par ston to/ /rnam par grol ba'i sgor gyur pa ye shes brgyar yang yi ge 'khor lo bskor ba'i rim par phye ba las yi ge as mgo btsugs nas ka'i rim nas ya dang ra dang ba dang la yan chad kyi bar du yi ge nyi shu rtsa bzhi smos pa dang dang po'i yi ge a dang bcas pa nyi shu rtsa lnga pa'o//de bzhin du A dang bcas pa de yang nyi shu rtsa lnga oM dang bcas pa nyi shu rtsa lnga/aHdang bcas pa yang nyi shu rtsa lnga ste/ de ltar rnam par thar pa'i sgo brgya las ye shes brgyar sbyar ba'i rang bzhin rdo rje rtse brgyad pa de'i dbus su bri'o zhes pa'o/ /sha dang Sha dang sa dang ha rnams ni cha gnyis pa'i nang du 'dus par shes par bya'o/ /de'i steng pad+ma bri ba ni//sa bon dang bcas rgyas par byas/ /zhes pa ni rdo rje de'i steng du pad+ma 'dab ma bzhi pa rang gi sa bon dang bcas par bri'o/ /de steng du yang pad+ma che/ /phyag rgya klad kor gyis mdzes byas/ /'dab ma brgyad pa legs par rdzogs/ /ze bar bcas pa shin tu bzang / /zhes pa ni pad+mo de'i steng du yang pad+ma chen po 'dab ma brgyad pa bris te/phyag rgya klad kor gyis mdzes byas/ /zhes pa klad kor ni stong pa nyid du ston pa'i tshig yin pas yan lag bcu gnyis pa'i rig pa'i rgyal po la bya ste/ yan lag bcu gnyis tshig dgod pa/ /zhes pa dang sbyar ro/ /phyag rgya ni gsang ba'i phyag rgya brgyad pa ste/dkyil 'khor brgyad kyi 'khor rnams kyi/ /zhes pa dang sbyar ro/ /pad+ma steng mche ba dang 'dab ma brgyad kyis bye brag che bas 'og de bas chung bar bya bar mngon te 'dab ma bzhi bar shes par bya'o/ /gnyis su rgyu'i tshe pad+ma yin pas chung bar shes par bya'o/ / pad+ma chen po 'dab ma brgyad pa ni ye shes brgyad kyi rang bzhin du sngar bshad pa bzhin no/ /'dab ma rnams ni thams cad la/ /yan lag bcu gnyis tshig dgod pa/ /zhes pa ni yan lag bcu gnyis pa'i rig pa'i rgyal mo'i snying po dang nye ba'i snying por bcas pa'i yi ge zung brgyad po rnams 'dab ma brgyad la bri bar bya'o//de rnams dbus na mgon bzhugs pa/ /rdzogs pa'i sangs rgyas rkang gnyis gtso/ /dkyil 'khor brgyad kyi 'khor rnams kyis/ /kho ra khor yug yongs bskor ba/ /zhes pa ni pad+ma'i dbus kyi snying po la bcom ldan 'das bzhugs te/ phyag rgya brgyad po rnams kyang bcom ldan 'das kyi kho ra khor yug tu rang gi dkyil 'khor dang sa bon du bcas par pad+ma'i snying po de nyid la bri bar bya'o/ /snying rje las byung dkyil 'khor 'di/ /mchog tu shes par bya ba ste/ /zhes pa ni/ mchog ni ston pa'i mchog go/ /snying rje las byung zhes pa ni snga ma bzhin no//lung bzhin dkyil 'khor rnams dang ni/ /las dang lus dang dngos grub dang / /dgod pa rnams kyang nges pa yis/ /'di las byung bar shes par bya/ /zhes pa ni zhi ba dang rgyas pa la sogs pa'i las rnams kyi dkyil 'khor lugs gzugs su dgongs la/dkyil 'khor gyi sngags kyi lung gzhan dag las bshad pa rnams kyang dkyil 'khor 'di las byung bar shes par bya ste/ de ni bcom ldan 'das rnam par snang mdzad kyi gnas dbang chen gyi dkyil 'khor du shes par bya'o/ /gsang ba ba'i bdag po gzhan yang de bzhin gshegs pa rnams kyi dkyil 'khor ni zhes pa nas/de ni phyogs bcu rnams su song / /zhes pa'i bar gyis bcom ldan 'das kyi shar phyogs su sngar 'das pa'i de bzhin gshegs pa thams cad kyi dkyil 'khor bri ste/ zla ba'i dkyil 'khor 'dra zhing mdog/ ces pa ni bcom ldan 'das kyi gdan pad+ma'i kha dog zla ba'i dkyil 'khor ltar dkar po zhes pa'o/ /dung lta bu yi dbus na ni/ /zhes pa chu'i dkyil 'khor kha dog dung dang 'dra bar shes par bya'o/ /sangs rgyas kun gyi gru gsum pa/ /pad+ma dkar po'i steng na gnas/ / zhes pa ni chu'i dkyil 'khor gyi steng na phyag rgya gru gsum pad+ma dkar po'i steng gnas pa bri'o zhes pa'o/ /klad kor bcas pa'i mtshan gyis btab/ /ces pa ni der yi ge a klad kor dang bcas par gzhag ces pa'o/ /rdo rje'i mtshan mas mtshan pa ste/ /zhes pa ni der rdo rje rtse lnga pa bris zhes pa'o//dpyad mi dgos par kun nas ni/ /'od zer dag ni gnyis bya ba/ /gsang sngags mgon las byung bas su/ /de ni phyogs bcu rnams su song / /zhes pa ni phyag rgya gsum pa de'i gra gnyis nas 'od gnyis byung bar bri ste/ de yang chos kyi sku las longs spyod rdzogs pa dang sprul pa'i sku 'byung bar shes par bya'o//gsang ba pa'i bdag po gzhan yang / spyan ras gzigs dbang dkyil 'khor ni/ /zhes pa nas/ rig sngags rgyal dang bcas par ni/ /mkhas pas rnam par dgod par bya/ /zhes pa'i bar gyis spyan ras gzigs kyi dbang po'i dkyil 'khor bshad pa ste/kun du gru bzhi lham pa la/ /zhes pa dbang chen gyi dkyil 'khor du bri ba'o/ /dbus su dung 'dra gzhag par bya/ /zhes pa ni de'i dbus su chu'i dkyil 'khor bri ba'o/ /de yi steng du pad+ma ni/ /sa bon bcas byas rgyas par bri/ /zhes pa ni chu'i dkyil 'khor de'i steng du pad+ma dkar po sa bon a dang bcas pa bri'o//de yi steng du'ang rdo rje che/ /zhes pa ni pad+mo'i steng du rdo rje rtse lnga pa gzhag ces pa'o/ /rdo rje las kyang pad+ma che/ /thams cad sa bon rnams kyis mtshan/ /rang gi sa bon legs par sbyar/ /zhes pa ni rdo rje de'i steng du chen po 'dab ma brgyad pa bri ste/rang gi sa bon dang bcas pa bri zhes pa'o/ /sgrol ma dang ni khro gnyer can/ /zhes pa nas/ khyad par du ni bri bar bya/ /zhes pa'i bar gyis sgrol ma la sogs pa'i 'khor rnams dkyil 'khor der phyag rgya'i gzugs su bris zhes pa'o//rta mgrin can gyi bya ba ni/ /zhes pa nas/ mkhas pas rnam par dgod par bya/ /zhes pa'i bar ni dkyil 'khor de'i nub phyogs kyi mtha' mar rta mgrin can gyi dkyil 'khor gru gsum pa bri ste/ dkyil 'khor mtshan ma bzang pos btab/ /ces pa ni gru gsum pa dkyil 'khor gyi mtshan pa zhes pa'o//nyi ma 'char ba'i kha dog 'dra/ /zhes pa dkyil 'khor de'i kha dog nyi ma dang 'dra ba'o/ /rig sngags rgyal dang bcas par ni/ /mkhas pas rnam par dgod par bya/ /zhes pa ni dkyil 'khor gru gsum po de rig pa'i rgyal po rta mgrin dang bcas par bri ste/de'i phyag rgya'i gzugs su bri bar shes par bya'o/ /gsang ba pa'i bdag po gzhan yang khyod kyi dkyil 'khor mdor bshad par bya'o zhes pa nas/ rgyal ba'i gtso bo rnams kyis gsungs/ /zhes pa'i bar gyis phyag na rdo rje'i dkyil 'khor bshad pa ste/ phyag na rdo rje ni bya ba sgrub pa'i rang bzhin las thams cad pa yin pas dkyil 'khor bzhi char dang ldan par shes par bya'o//kun du gru bzhi lham pa la/ /rdo rje'i mtshan ma rnams kyis mtshan/ /thams cad ser po yid du 'ong / /zhes pa ni dbang chen gyi dkyil 'khor dang por bri ba ste snga ma bzhin no//dbus na pad+ma rab tu gnas/ /de yi dbus su bya ba ni/ /bum pa zla ba'i 'od 'dra ba/ /zhes pa ni dbang chen gyi dkyil 'khor gyi dbus su pad+ma bris te/ pad+ma'i steng du chu'i dkyil 'khor bri'o/ /bum pa ni chu'i dkyil 'khor du shes par bya'o/ /'di ni mtshan ma rnams kyis mtshan//klad kor gyis kyang rnam par brgyan/ /zhes pa ni dkyil 'khor de rang gi sa bon yi ge ba klad kor dang bcas pa'i mtshan mas mtshan pa'o/ /de'i steng du yang rlung chen ni/ /dbyar gyi char sprin 'dra ba'i mdog /ba dan g.yo ba sngags pas bya/ /klad kor gyis kyang rnam par brgyan//zhes pa ni chu'i dkyil 'khor de'i steng du rlung gi dkyil 'khor kha dog smug nag dbyar gyi char sprin dang 'dra ba g.yo bzhin pa'i ba dan dang bcas pa bri ste/ klad kor gyis kyang rnam par brgyan/ /zhes pa ni rang gi sa bon yi ge klad kor dang bcas par shes par bya'o//de'i steng du yang gru gsum pa/ /rab tu 'jigs pa'i gzugs can te/ /'jig par byed pa'i me 'dra ba/ /sum mdo'i ris mtshan mtshan gyis btab/ /ces pa ni rlung gi dkyil 'khor de'i steng du me'i dkyil 'khor gru gsum pa 'jig pa'i bskal pa'i me'i kha dog 'dra ba 'jigs 'jigs ltar 'dug pa zhes pa ste/sum mdo'i rigs mtshan mtshan gyis btab pa ni dkyil 'khor de'i mtshan ma gru gsum pas kyang btab pa'o/ /'bar phreng 'khrigs pa 'jigs 'jigs ltar/ /nyi ma 'char ba'i gzugs 'dra ba'o/ /zhes pa ni 'bar ba'i phreng ba kha dog nyi ma 'char ba dang 'dra ba 'jigs pas 'khor bar bya zhes pa'o//de yi dbus su pad+ma che/ /zhes pa ni me'i dkyil 'khor de'i dbus pad+ma kha dog dus mtha'i me 'od 'dra ba dmar po gnyis 'dri zhes pa'o/ /pad+ma'i steng du rdo rje ni/ /'bar ba'i phreng ba 'phro ba can//zhes pa ni pad+ma'i steng du rdo rje kha dog dmar smug tu bri ste 'bar ba ni me'i kha dog yin la/ 'phro ba ni rlung gi shas te/ me dang rlung gnyi ga'i shas yod pas rdo rje dmar smug tu bri ste 'bar ba ni rdo rje me'i kha dog yin la/ hUM zhes bya ba'i sgra dang ldan/ /dam pa sa bon rnams kyis mtshan//zhes pa ni de'i steng du phyag na rdo rje'i sa bon gyi yi ge hUM gzhag par bya'o/ /dpa' bo khyod kyi dkyil 'khor 'di/ /rgyal ba'i gtso bo rnams kyis gsungs/ /zhes pa ni sngon gyi rgyal ba rnams kyis kyang gsungs zhes pa ste/ dpa' bo zhes pa ni phyag na rdo rje la bod pa'o/ / mA ma kI dang lu gu rgyud/ /ces pa nas/ de dag ji ltar rig par bya/ /zhes pa'i bar gyis mA ma kI la sogs pa'i 'khor rnams kyang dbang chen gyi dkyil 'khor gyi nang du bri bar bshad pa ste/ phyag rgya'i dkyil 'khor sa bon dang / kha dog khyad par go rims bzhin/ /de dag ji ltar rig par bya//zhes pa ni so so'i phyag rgya'i dang sa bon rnams so so'i kha dog ci 'dra ba las/ dkyil 'khor kyang de bzhin du shes par bya ste/ /sngar bshad pa'i rim pa bzhin du bri zhes pa'o/ /de nas gzhan yang rdo rje 'dzin/ /zhes pa nas/ rnam par rgyal dang ldan pa'o//zhes pa'i bar gyis phyag na rdo rje'i dkyil 'khor gyi 'og logs su nam mkha' dri ma med pa la sogs pa'i rdo rje 'dzin ming gis smos pa bcu gnyis po rnams bris te de rnams kyi dkyil 'khor yang dbang chen la sogs bzhi po bri ste/ de rnams dkyil 'khor bshad pa ni//dkar po ser po dmar po dang / /nag po yin par yang dag bsgrags/ /zhes pa rdo rje 'dzin bcu gnyis po rnams la dkyil 'khor bzhi po 'di lan gsum du bsgres te rim pa bzhin du sbyar ro/ /de nas gzhan yang phyag rgya'i gzugs/ /rtse gsum pa dang rtse gcig dang / / gzhan yang gnyis dang gnyis ma yin/ /phreng ba lta bu'i de bzhin gzhan/ /kha dog bye brag las shes bya/ /zhes pa de rnams kyi phyag mtshan rdo rje rtse gsum pa la yang rnam pa gnyis te/ phyogs gcig rtse gsum pa dang / /phyogs gnyis ka rtse gsum pa'o/ /de bzhin du rtse gcig pa yang shes par bya ste/de bas na kha gnyis pa yang gzung ba'o/ /gnyis ka ma yin pa ni rdo rje tho lum du shes par bya'o/ /phreng ba lta bu'i de bzhin gzhan/ /zhes pa ni rdo rje phreng ba'i phyag rgya ste/ phyag rgya drug po de dag lan gnyis su bsgres pas bcu gnyis po la khyab pa'o//kha dog bye brag las shes bya/ /zhes pa ni phyag rgya de rnams kyi kha dog dag kyang rdo rje 'dzin pa de dag nyid kyi kha dog ji lta ba bzhin du'o zhes pa'o/ /'di rnams kun kyang mthu chen te/ /rnam par rgyal dang ldan pa'o/ /zhes pa ni rdo rje 'dzin pa de dag gi rjes su bsngags pa ste/gdul dka' ba rnams las rnam par rgyal ba dang ldan no zhes pa'o/ /mi g.yo mgon gyi dkyil 'khor ni/ /zhes pa nas/ blo ldan de yis bri bar bya/ /zhes pa'i bar gyis 'phags pa mi g.yo ba'i dkyil 'khor bshad pa ste/ rlung dang me yi yin par 'dod/ /ces pa ni rlung gi dkyil 'khor gyi steng du me'i dkyil 'khor bris nas de'i steng du 'phags pa mi g.yo ba'i phyag rgya ral gri'am zhags pa gang yang rung ba cig rang gi sa bon dang bcas par bri'o zhes pa'o//'jig rten gsum las rnam rgyal gyi'ang / /bye brag tu ni rlung gi dbus/ /zhes pa'ang zhes pa'i tshig gis 'phags pa mi g.yo ba'i dkyil 'khor ltar rlung gi dkyil 'khor gyi steng du me'i dkyil 'khor bri zhes pa'o//rlung gi dbus zhes pa ni me'i dkyil 'khor gyi steng du rlung gi dkyil 'khor bris te/ de'i dbus su rdo rje'i phyag rgya rang gi mtshan ma dang bcas par bri zhes pa'o//gnas gsum dag la 'dug pa'o/ /zhes pa ni rlung gi dkyil 'khor gnyis dang me'i dkyil 'khor gcig ste gsum la 'dug ces pa'o/ /gsang ba pa'i bdag po gzhan yang zhes pa nas/ mdor na sa bon dang ldan par bya/ zhes pa'i bar gyis nam mkha'i spyan gyi dkyil 'khor bshad pa ste/dbang chen gyi dkyil 'khor ni snga ma bzhin no/ /lha mo de'i kha dog kyang ser por bya ste/ pad+ma'i steng du bzhugs pa'o/ /der yang gtsug tor gzhag pa ni/ /cha gsum la ni gnas par bya/ /zhes pa ni dbang chen gyi dkyil 'khor gyi steng du pad+ma bri ste/pad+ma'i steng du gtsug tor cha gsum dang ldan pa bri'o zhes pa'o/ /dbu ma'i cha ni bor nas ni/ /de yang spyan ni bri bar bya/ /zhes pa ni gtsug tor gyi phyag rgya de'i smad sum gnyis bor la stod kyi sum cha'i nang du spyan gyi phyag rgya bri'o/ /rang gi 'od 'bar dbus na gnas//zhes pa ni gtsug tor gyi phyag rgya de 'od 'bar ba'i dbus na gnas par bya'o zhes pa'o/ /mdor na sa bon dang ldan par bya/ /zhes pa ni yum de'i sa bon gyi yi ge dang bcas par bya zhes pa'o/ /byang chub sems dpa' thams cad kyis/ /zhes pa nas/ re ba thams cad rdzogs byed pa'o//zhes pa'i bar ni byang chub sems dpa' rnams kyi phyag rgya yid bzhin gyi nor bu ni chu'i dkyil 'khor gyi steng du bris zhes pa'o/ /de nas shAkya seng ges yang / /zhes pa nas/ go rims bzhin du gzhag par bya/ /zhes pa'i bar ni dkyil 'khor gyi snam bu gnyis pa la shAkya thub pa dbang chen gyi dkyil 'khor la bzhugs pa bri ste gzhan ni snga ma bzhin no//dbang chen gyi dkyil 'khor gyi steng du pad+ma ser po bzhag ste pad+ma'i steng du lhung bzed dam/ chos gos sam/ 'khar gsil gsum las gang yang rung ba gzhag ste/ de yang 'bar ba dang bcas pa'i rdo rjes mtshan par bya'o zhes pa'o//gtsug tor lnga po gang bsgrags pa/ /zhes pa nas/ kha dog bye brag las shes bya/ /zhes bya ba'i gtsug tor lnga po rnams kyi phyag rgya bri bar bshad pa ste/ de dag gi dkyil 'khor ni so so'i kha dog ci 'dra ba dang sbyar bar bya ste/kha dog kyang dkyil 'khor snga mar bshad zin to/ /mdzod spu'i yid bzhin nor bu bzhin/ /zhes pa ni mdzod spu'i phyag rgya yid bzhin gyi nor bu bri zhes pa ste/ dkyil 'khor yang de nyid kyi kha dog ci 'dra ba dang sbyar ro/ /spyan gyi yang ni 'di nyon cig /gtsug tor thams cad ser po ste//rdo rje'i mtshan mas mtshan par bya/ /zhes pa ni sangs rgyas spyan gyi phyag rgya gtsug tor ser po bris te/ rdo rje'i mtshan ma dang bcas pa bri'o zhes pa'o/ /de'i kha dog ser po yin pas dbang chen gyi dkyil 'khor du bri bar shes par bya'o/ /gzhan gyis mi thub ma yi ni//lag pa ngo mtshar pad+ma can/ /zhes pa ni lha mo gzhan gyis mi thub pa'i phyag rgya lag pa khu tshur bcangs pa 'dra ba pad+mo thogs par bri'o/ /gzhan gyis mi thub ces bya ba'i/ /kha chen pad+ma gnag la gnas/ /zhes pa ni gzhan gyis mi thub pa zhes bya ba'i rig pa'i rgyal mo'i phyag rgya pad+ma nag po'i steng na gnas pa bri bar bya'o//gtsang mar gnas pa gang grags pa/ /zhes pa nas/ cho ga rgyas par bri bar bya/ /zhes pa'i bar gyis gnas gtsang ma rnams kyi phyag rgya bri bar bshad pa ste/ sems pa'i lag pa ni thal mo 'gram pa la brten pa ste/ dkyil 'khor du bri ba na 'gram pa mi bri bar thal mo 'ba' zhig gyen du shor du 'dug pa bri'o/ /dge ba'i lag ni mi 'jigs pa sbyin pa'i lag pa bri'o/ /'dzum pa'i lag pa ni kha 'gram nas 'dren pa lta bu bri'o/ /lag na me tog ni srin lag dang mthe bong gnyis sprad pa bri'o/ /nam mkha'i lag pa ni lag pa bsgreng bar bri'o//sa yi lha mo'i bum pa ste/ /chu yi dkyil 'khor rdo rjes mtshan/ /zhes pa ni sa bdag gi phyag rgya bum pa chus gang ba rdo rjes brgyan par bri zhes pa'o/ /gnyer ba'i lag pa me yi ste/ /drang srong rnams dang bcas par bri/ /zhes pa ni sa 'od srungs zhes pa la sogs pa'i drang srong ming gis smos pa rnams dang lhan cig tu bris pa ste/rig byed lag pa zhes pa ni smrang 'don pa'i lag pa ltar mthe bo sor mo'i tshigs su 'bog pa ni drang srong rnams kyi phyag rgya'o/ /gshin rje'i be con bri ba ni/ /rlung gi dkyil 'khor nang na 'dug /ces pa ni gshin rje'i be con rlung gi dkyil 'khor du 'dug pa bri zhes pa'o/ /'chi bdag gi ni dril bu yin/ /zhes pa nas/ ji ltar rigs par bri bar bya/ /zhes pa'i bar gyis gshin rje'i 'khor 'chi bdag dang dus mtshan mo la sogs pa ming gi smos pa rnams kyi phyag rgya rlung gi dkyil 'khor gyi nang du tha ma bya rog dang bya rgod la sogs pas bskor bar bri'o//bden bral gyi ni ral gri bri/ /zhes pa nas/ chu lha yin par shes par bya/ /zhes pa'i bar du khyab 'jug la sogs pa ming gis smos pa rnams kyi phyag rgya yang ji skad smos pa bzhin du bri bar bshad do//de dag la sogs pa'i dkyil 'khor dngos su ma smos pa rnams kyang so so'i kha dog dang gzugs kyi dkyil 'khor yang sngar bshad pa dang sbyar bar bya'o/ /gzhan yang mchog sbyin rdo rje yi/ /zhes pa nas/ ut+pal rnams kyis khebs par bya//zhes pa'i bar gyis dkyil 'khor gyi snam bu gsum pa la 'phags pa 'jam dpal gyi dkyil 'khor bri bar bshad pa ste/ kun du gru bzhi lham pa la/ /rdo rje'i mtshan mas mtshan pa ste/ /zhes pa ni dbang chen gyi dkyil 'khor de snga ma bzhin no/ /de yi dbus su bya ba ni//dkyil 'khor me las byung ba'o/ /zhes pa ni dbang chen gyi dkyil 'khor de'i dbus su me'i dkyil 'khor bri'o/ /de'i dbus phyag rgya bzhag pa ni/ /ut+pal zhes bya gzugs bzang ba/ /zhes pa ni me'i dkyil 'khor gyi dbus su phyag rgya ut+pal 'dzin pa ut+pala'i kha dog nyid du bri'o//'jam dbyangs blo dang ldan pa yis/ /rang gi sngags kyis gzi bskyed pa'o/ /zhes pa ni ut+pal de'i steng du 'jam dbyangs nyid kyi sngags kyi sa bon bzhag ste/ gzengs bstod par bya zhes pa'o/ /de yi gnas ni cho ga bzhin/ /rang gi sa bon nyid kyis btab//ces pa ni dbang chen dang me'i dkyil 'khor la so so'i sa bon a dang ra cho ga bzhin du gzhag ces pa'o/ /mtha' ma kho ra khor yug tu/ /ut+pal rnams kyis khebs par bya/ /zhes pa ni dkyil 'khor de'i mtha' ut+pa las bskor bar bya'o/ /de yi dbus su bri ba ni//zhes pa nas/ ut+pa la kha ma bye bar zhes pa'i bar du dra ba can gyi 'od la sogs pa'i phyag rgya ji skad smos pa bzhin du bri zhes pa'o/ /'jam dbyangs blo dang ldan pa yi/ /mngag gzhug mar ni gang grags pa/ /zhes pa nas/ de dag thams cad ut+pa la'i/ / mtshan ma dag gis mtshan par bya/ /zhes pa'i bar ni skra can ma la sogs pa'i mngag gzhug ma rnams kyi phyag rgya ji skad du smos pa rnams la ut+pa la'i mtshan mas btab ste bri'o/ /ji skad gsungs pa'i phyag brnyan ma/ /de dag phyag rgya khaD+ga ri/ /zhes pa ni 'phags pa 'jam dpal gyi phyag brnyan ma sngar ji skad du bshad pa rnams kyi phyag rgya khaD+ga ri zhes bya ba gri gug 'dra ba rnams bri'o//lho yi phyogs su nan tan du/ /sgrib pa rnams sel brtson 'grus che'i/ /zhes pa nas de dag thams cad kyang pad+ma la gnas shing dkyil 'khor gyi nang du chud par bya'o zhes pa'i bar ni sgrib pa thams cad rnam par sel ba 'khor dang bcas pa'i phyag rgya ji skad du smos pa rnams bri bar gsungs pa ste lag pa snying gar gzhag pa ni lag pa 'ba' zhig gzhag pa 'dra bar bri bar bya'o//de dag thams cad kyang pad+ma la gnas shing dkyil 'khor gyi nang du chud par bya'o zhes pa ni 'phags pa 'jam dpal dra ba can gyi 'od man chad dkyil 'khor dngos su ma smos pa thams cad dkyil 'khor gong ma'i nang du pad+mo'i steng du bri'o zhes pa'o//byang phyogs su sa'i snying po'i phyag rgya ni/ /zhes pa nas/ phyag rgya'i gzugs su 'dir bshad do/ / zhes pa'i bar ni sa'i snying po'i dkyil 'khor bshad pa ste/ dbang chen dkyil 'khor nang gnas pa/ /zhes pa ni dbang chen ni snga ma bzhin la/ stan ni snga ma bzhin du gzhag /ces pa ni dbang chen gyi dkyil 'khor de'i dbus su stan snying rje chen po 'byung ba'i dkyil 'khor du bshad pa bzhin du bri zhes pa'o//de'i steng pad+ma chen po ste/ kha dog kun ldan 'bar bar bcas/ /zhes pa ni gdan de'i steng du pad+ma 'dab ma brgyad pa bri ste/ kha dog kun ldan ni dkar po ser po dmar po sngon po dang / kha dog de rnams las gzhan du sbyar ba ljang gu la sogs pa gsum dang /brgyad de pad+ma 'dab ma brgyad pa kha dog sna tshogs rnams su bya'o/ /de'i steng ba dan chen po ste/ /rtse la rin chen chen po gzhag /ces pa ni pad+ma'i steng du ba dan gyi rtse la rin po che gzhag pa bri zhes pa'o/ /de yi gzugs kyi mchog yin te/ / phyag rgya'i gzugs su 'dir bshad do/ /zhes pa ni sa'i snying po de'i gzugs phyag rgya'i gzugs su bshad pa yin zhes pa'o/ /de yi 'khor ni grangs med pa/ /gtso bo yon tan mtha' yas te/ /zhes pa nas phyag rgya thams cad kyang dkyil 'khor gyi nang du chud par bya'o zhes pa'i bar ni sa'i snying po'i 'khor mtha' yas shing /grangs med pa rnams kyi phyag rgya bri bar bshad pa ste/ sa 'dzin gyis ni rdo rje kha gnyis pa rin po che'i steng ni 'dug pa'o zhes pa ni rdo rje'i ya thog ma thog gnyis ka rtse mo can zhes pa ste/ de ltar rdo rje de bye brag tu che bas na rdo rje gong ma gnyis bo phyogs re re na rtse gsum pa dang /rtse gcig par shes par bya'o/ /phyag rgya thams cad kyang dkyil 'khor gyi nang du chud par bya'o zhes pa ni phyag rgya de dag thams cad kyang dbang chen gyi dkyil 'khor gyi nang du chud par bya'o zhes pa'o/ /nub phyogs su nam mkha'i snying po'i phyag rgya ni zhes pa nas rim par phye ba rgyas pa'i bar ni nub phyogs su nam mkha'i snying po 'khor dang bcas pa'i phyag rgya ji skad smos pa'i rnam par bri bar shes pa'o//de la dkyil 'khor 'dir lha rnams kyi kha dog dang dbyibs gsal bar ma gsungs pa rnams ni dkyil 'khor gong ma gnyis su bshad pa'i kha dog dang dbyibs su blta bar bshad par bya'o//dkyil 'khor gong ma dag tu kha dog la sogs pa zhib tu ma bshad pa yang dkyil 'khor 'og ma 'dir lha so so'i dkyil 'khor ji skad bshad pa las de rnams kyi kha dog kyang de bzhin du shes par bya'o//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ gsang ba'i dkyil 'khor rim par phye ba rgyas pa'o// //de nas yang bcom ldan 'das kyis gsang ba'i dkyil 'khor du 'jug pa'i cho ga gsungs pa zhes pa nas/dam tshig ces ni gzhan mi bya/ /zhes pa'i bar gyis gsang ba'i dkyil 'khor du bcug nas dbang bskur ba'i cho ga bshad de/ dkyil 'khor du 'jug pa'i rim pa lnga de nub mo lhag par gnas shing sdom pa bzung ba la sogs pa dang /dkyil 'khor du 'jug pa'i tshe bsrung zhing chus bsang gtor bya ba dang / byang chub tu sems bskyed pa la sogs pa dkyil 'khor snga mar bshad pa sbyin no/ /khyad par du ni dkyil 'khor gyi sgo khyud kyi nang du slob ma snga ma bzhin du gzhag ste slob dpon yang snga ma bzhin du rang gi ting nge 'dzin la gnas nas slob ma'i snying gar yi ge ra bsams te yi ge de'i sgra'i de kho na nyid chos thams cad rdul dang bral ba la dmigs nas slob ma de'i lus rdul phran la sogs par bshig ste rdul phran de dag kyang mi dmigs par byas pas yi ge ra'i sgra las slob ma'i lus don dam par stong par bya'o//de ltar bsams nas yi ge ra'i me des slob ma'i lus bsregs te thal bar gyur par bsam mo/ /de ltar stong par gyur pa dang / de'i gnas su slar yang yi ge a bsams te/ a las bcom ldan 'das kyi skur gyur par bsam mo zhes pa ni 'dus pa'i don to//yan lag gi don yang bshad par bya ste/ kun du bslabs pa'i sngags pa ni/ /zhes pa slob dpon snying rje chen po 'byung ba dang yi ge 'khor lo bskor ba'i dkyil 'khor gnyis po bri ba dang dbang bskur ba dang bzlas pa dang bsgrub pa la sogs pa'i cho ga bslabs te lobs par gyur pas mkhas pa zhes bya'o//gsang ba'i dkyil 'khor la mkhas pas/ /zhes pa ni dkyil 'khor gong ma gnyis las mkhas pa 'ba' zhig ma yin gyi/ gsang ba'i dkyil 'khor la yang bri ba dang dbang bskur ba la sogs pa'i cho ga rnams la mkhas pas shes pa ste/mdor na dkyil 'khor gong ma gnyis su dbang bskur ba'i slob dpon gyi las 'di rnams bya'o zhes pa'o/ /de tshe slob ma'i sdig pa kun/ /cho ga bzhin du bsreg par bya/ /zhes pa ni dang po gleng ba'i tshig ste sdig pa kun zhes pa ni sems kyi rgyud la mi dge ba'i bag chags bsags pa'i mi 'dod pa'i rnam par smin pa brta bar byed pa la bya ste/slob ma'i sdig pa de 'og nas 'byung ba'i cho gas bsreg ces pa'o/ /ci nas slar yang mi skye bar/ /de yi 'tsho ba'ang bsreg par bya//bsregs te thal bar gyur nas kyang / /zhes pa ni gong du sdig pa bsreg par bya zhes smos pa de ji ltar bsreg pa gsal bar gsungs pa ste/ de'i 'tsho ba zhes pa slob ma de'i phung po lnga la bya'o/ /ci nas slar yang mi skye bar/ /zhes pa ni phung po lnga po de ltar bsregs te stong par byas pa de nyid kyi tshe na slob ma de'i phung po lnga yod pa'i 'du shes mi skye bar bya zhes pa'o//bsregs te thal bar gyur nas kyang / /zhes pa ni sreg pa yang lhag ma dang bcas pa ma yin gyi shin tu tshig nas stong pa nyid du gyur par bya'o zhes pa'o/ /de ni slar yang gso bar bya//zhes pa ni de ltar stong pa nyid du brtan par gyur nas 'og nas 'byung ba'i tshig gis slob ma de ltar rnam par snang mdzad kyi gzugs su sbyar ro zhes pa'o/ /de ltar slob ma de'i 'tsho ba bsreg go zhes spyir smos pa tsam du zad kyi/ gang gis sreg ji ltar sreg snyam pa la//yi ge yis ni mi 'gyur bsreg/ /ces bya ba gsungs te/ yi ge yis ni zhes pa ni yi ge ra des sngar smos pa bzhin du slob ma'i phung po lnga po de bsreg go zhes pa'o/ /ak+Sha ra ni mi 'gyur ba de/ /phung po lnga po slar mi skye bar stong par gyur pa las gzhan du mi 'gyur bar ting nge 'dzin gyis brtan par bya'o zhes pa'o//'tsho bas slar yang gso bar bya/ /'tsho bas thams cad gsos nas ni/ /zhes pa ni tshig snga ma nyid 'grel pa yin te/ slob ma'i 'tsho ba phung po lnga po stong par gyur pa las yi ge a 'tsho bar gyur pa des slar yang sangs rgyas kyi skur gong du smos pa'i tshul du 'gyur zhes pa'o//kun du dag pa ni dkar po yin la/ dri ma med pa ni gsal ba ste/ /sangs rgyas kyi sku dkar zhing gsal bar 'gyur zhes pa'o/ /yan lag bcu gnyis tshig rnams kyi/ /de yi snod la dgod par bya/ /zhes pa ni yan lag bcu gnyis kyi tshig rnams de'i gdan pad+ma la dgod par bya zhes pa'o//byang chub sems dpa' skyob rnams dang / /zhes pa nas/ 'jig rten rnams kyis bskur ba yin/ /zhes pa'i bar ni sangs rgyas dang byang chub sems dpa' dang / nyan thos dang rang sangs rgyas dang 'jig rten pa rnams kyang dam tshig 'di la mos pa dang ldan par rigs so zhes pa'o//gsang ba'i dkyil 'khor dbus gnas pa'i/ /dam tshig 'di ni sus rig pa/ /rgyud rnams kun du zhugs pa dang / /dkyil 'khor kun la dbang ba yin/ /zhes pa ni gsang ba'i dkyil 'khor gyi dbus su 'di lta bu'i ting nge 'dzin gyi tshul bstan pa'i rgyud thams cad kyi dkyil 'khor du zhugs pa dang 'dra ste/thams cad kyi dam tshig can du 'gyur ba dang / dkyil 'khor thams cad kyang bri ba la dbang ngo zhes pa'o/ /sngags 'chang de ni nga dang 'dra/ /zhes pa ni gong du slar gsos nas dkar zhing gsal bar bya zhes spyir smos pa tsam du zad la//tshig 'dis ni bcom ldan 'das rnam par snang mdzad kyi gzugs nyid du bya zhes pa'o/ /dam tshig ces ni gzhan mi bya/ /zhes pa ni ting nge 'dzin de lta bur ma byas te log par gzhan du byas na dam tshig can du mi bya zhes pa'o//dam tshig ces pa ni skabs 'dir stong pa nyid kyi ting nge 'dzin rtog pa la bya la/ ting nge 'dzin de yang dang po bsreg pa ni 'jug pa'i sems so/ /bsregs nas stong ba'i rang bzhin du gnas te mi 'gyur ba ni gnas pa'i sems so/ /de nas gsos te bcom ldan 'das kyi skur bsgyur ba ni sdang ba'i sems su shes par bya'o//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ gsang ba'i dkyil 'khor du 'jug pa'i rim par phye ba rgyas pa'o// //da ni gsang ba'i phyag rgya brgyad po bshad par bya ste/phyag rgya 'di rnams kyang sngags pa lha'i gzugs su bsgyur ba de brtan por bya ba'i phyir sbyar te/ lha'i gzugs su bsgyur ba yang rnam pa gnyis te/ de bzhin gshegs pa'i skur bsgyur ba dang byang chub sems dpa'i skur bsgyur ba'o//bcom ldan 'das kyi skur bsgyur ba'i tshe na yang gsang ba'i phyag rgya 'og nas 'byung ba rnams kyi gdan dang 'od la sogs pa 'og nas ji ltar 'byung ba'i rim pa bzhin du bya'o/ /byang chub sems dpa' la sogs gzhan gyi gzugs su bsgyur na yang phyag rgya de rnams kyis byin gyis brlabs na brtan par 'gyur ro//de bzhin gshegs pa'i skur bsgyur ba la phyag rgya 'di rnams kyis byin gyis brlabs na phyag rgya 'di rnams de bzhin gshegs pa'i phyag rgya yin pa'i phyir/ de bzhin gshegs pa nyid kyi rang bzhin du 'gyur ro/ / de la lha'i sku yongs su rdzogs par bya ba yang rnam pa gnyis te/ gnas rdzogs par bya ba dang lus rdzogs par bya ba'o/ /gnas rdzogs par bya ba ni rdo rje mi shigs pa'i phyag rgya dang pad+ma'i sbubs kyi phyag rgya gnyis so/ /lhag ma drug gis ni lus rdzogs par bya ba'o//de rnams ni rnam pa gsum du dbye ste/ lus dang ngag dang yid rdzogs par byed pa'o/ /de la lus rdzogs par byed pa ni yan lag thams cad 'byung ba'i phyag rgya dang / gzi brjid 'byung ba'i phyag rgya'o/ /gzungs kyi phyag rgya dang bcom ldan 'das kyi chos gnas pa'i phyag rgya gnyis ni sems rdzogs par byed pa'o//sangs rgyas kyi gsung dbyangs bkod pa'i rgyan gyi phyag rgya ni ngag rdzogs par byed pa'i phyag rgya'o/ /bcom ldan 'das kyi rnal 'byor 'dzin pa'i phyag rgya ni ting nge 'dzin gyi rnal 'byor rdzogs par byed pa'o/ / de rnams sbyar bar bya ba'i rim pa yang thog mar rdo rje mi shigs pa'i phyag rgyas bdag gnas pa'i gzhi dang dbang chen gyi dkyil 'khor rdo rje'i gdan du byin gyis brlabs te/ de nas dam tshig gi phyag rgya bcings nas bdag dang gnas srung ba dang / mchod pa bya ba dang rdo rje sems dpar byin gyis brlab pa la sogs pa ji skad gsungs pa rnams rim pa bzhin du byas la/de nas de'i 'og tu ji skad bshad pa'i rim gyis bdag nyid lha'i skur bsgyur te/ dang por pad+ma'i sbubs kyi phyag rgyas pad+ma'i gdan byin gyis brlabs la/ yan lag thams cad 'byung ba'i phyag rgyas lha'i skur brtan par byin gyis brlabs nas/de nas gzi brjid 'byung ba'i phyag rgyas 'od kyi dkyil 'khor byin gyis brlabs te/ de nas gzungs kyi phyag rgyas chos mi brjed pa'i dran pa brtan par byin gyis brlab po/ /de nas sangs rgyas kyi gsung dbyangs bkod pa'i rgyan gyis phyag rgyas ngag byin gyis rlabs nas/de nas chos gnas pa'i phyag rgyas de bzhin nyid kyi chos nyid brtan par byin gyis brlabs nas/ de'i 'og tu rnal 'byor 'dzin pa'i phyag rgyas ting nge 'dzin brtan par byin gyis brlab po/ /de dag ni bsdus pa'i don to//yan lag gi don ni/ de nas bcom ldan 'das rnam par snang mdzad kyis thams cad dang ldan pa'i 'khor gyi dkyil 'khor la gzigs nas zhes pa ni snga ma bzhin no/ /byang chub sems dpa' phyag na rdo rje la bka' stsal pa zhes phyag na rdo rjes ma gsol bar bcom ldan 'das nyid 'chad pa ni phyag rgya de'i che ba'i bdag nyid bstan pa'i phyir te/de rnams sangs rgyas bcom ldan 'das kyi spyod yul yin gyi/ byang chub sems dpa' la sogs pa gzhan rnams kyi spyod yul du ma gyur pas phyag na rdo rjes kyang de bshad du gsol zhes ma gsol to//gsang ba'i phyag rgya zhes pa ni dam tshig med pa dang dbang ma bskur ba la sogs pa kun la mi bstan pa'i phyir ro/ /gsang ba dang bcas pa zhes pa ni rdo rje gdan dang pad+ma dang 'od kyi dkyil 'khor la sogs pa lha rang gi gzugs su mi bstan par lag pa'i phyag rgyar bstan pa'i phyir ro//lha'i gnas byin gyis rlob par gyur pa zhes pa lha'i gnas ni rdo rje'i gdan dang pad+ma ste/ der lha rnams gnas par 'gyur bas na rdo rje mi shigs pa'i phyag rgya dang pad+ma'i phyag rgya gnyis la bya'o/ /gnyis su na phyag rgya brgyad char la bya ste/ phyag rgya de rnams kyis byin gyis brlabs na rang gi lus la lha gnas par 'gyur ba'i phyir ro//rang gi gsang sngags kyis mtshan pa/ /zhes pa ni phyag rgya de dag so so'i sngags sogs 'og nas 'byung ba'i mtshan ma rnams gyis btab ste/ phyag rgya de bcing ba na sngags kyang der bsam mo zhes pa'i don to//dkyil 'khor dang ldan par zhes pa ni phyag rgya de dag so so'i dbang chen la sogs pa ji ltar 'og nas 'byung ba dang ldan pa zhes pa ste/ rang rang gi dkyil 'khor rnams phyag rgya nyid kyi nang du bsams la/ rdo rje dang pad+ma'i gdan dang / 'od kyi dkyil 'khor la sogs pa ni so so'i gnas su yang ldan par bsam mo zhes pa'i don to//rang gi lha'i tshul du rnal 'byor du bya ba zhes pa ni zhi ba dang rgyas pa dang rab dang 'bring la sogs pa'i bsgrub pa'i bya ba rnams la rang gi lha nyid kyi rnal 'byor du byas pa la phyag rgya 'di rnams dang ldan zhes pa'o//byang chub sems dpa'i spyad pa spyod pa rnams cho ga bdag nyid lha'i gzugs su bsgyur ba la phyag rgya 'di rnams kyi ji skad bshad pa'i rim pa bzhin du so so'i byin gyis brlabs na lha'i gzugs su bstan par 'gyur ro zhes pa'o/ /shes nas kyang rang gi lha'i tshul du gnas nas dngos grub thob par 'gyur ba zhes pa ni de'i skur bsgyur te phyag rgya de rnams kyis byin gyis brlabs nas brtan par byas pa tsam gyis cho ga ma yin gyi/rang gi lha'i bya ba zhi ba dang rgyas pa rab dang 'bring la sogs pa'i grub pa dang las rnams bsgrubs na 'grub par 'gyur ro zhes pa ste/de lta bu yod de zhes 'brel to/ /rdo rje mi shigs pa'i phyag rgya dang / pad+ma'i sbubs kyi phyag rgya dang / sangs rgyas kyi gsung dbyangs bkod pa'i phyag rgya bcings pa na phyag rgya snga ma las shes pa ni de dag gsum char yang gzi brjid 'byung ba'i phyag rgya la snyeg par shes par bya'o//de bzhin du gzungs kyi phyag rgya la sogs pa phyag rgya gsum po la phyag rgya snga ma las shes pa ni yan lag thams cad 'byung ba'i phyag rgya las shes par bya'o/ /gzungs kyi phyag rgya'i dkyil 'khor 'ja' 'dra ba mtshan ma thams cad dang ldan pa rdo rje ba dan phyar ba zhes pa la gzungs ni rdo rje'i gdan dang pad+ma dang 'od kyi dkyil 'khor la sogs pa'i dngos po ji ltar bsam pa rnams mi brjed par byas na mthu thams cad dang ldan par dgongs pas 'ja' dang 'dra bar dkyil 'khor bzhi char gyi kha dog dang ldan pa'o// mtshan ma thams cad dang ldan pa ni dkyil 'khor so so'i mtshan ma rdo rje dang pad+ma rdo rje pad+ma la sogs pa dang ldan pa'o/ /rdo rje ba dan phyar ba ni dkyil 'khor de'i dbyibs 'ja' 'dra bas rlung gi dkyil 'khor mtshan ma ba dan rab tu mi g.yo ba bya ba'i phyir rdo rje dang ldan pa'i ba dan no/ / chos gnas pa'i phyag rgya'i klad kor gnyis zhes pa ni stong pa dang stong pa'i mtshan ma'o/ /dkyil 'khor ni rnal 'byor 'dzin pa'i phyag rgya'i dkyil 'khor ro/ /nam mkha' ste nam mkha'i kha dog las khyad par du sngo bar bya ba ni ting nge 'dzin gyi mthu thams cad dang ldan pa'i phyir rlung gi dkyil 'khor gyi shas che bar bya bar dgongs pa'o//gsang ba pa'i bdag po 'di dag ni gsang ba'i phyag rgya ste/ /de bzhin gshegs pa rnams kyis rab tu gsang ba yin pas gzhan su la yang ma sbyin cig ces sbyar te/ dbang bskur ba la sogs pa 'og nas 'byung ba'i yon tan ming gis smos pa rnams mi ldan zhing dam tshig med pa su la yang mi sbyin gyi yon tan de rnams kyang ldan pa la ni sbyin no zhes pa'o//dbang bskur ba zhes pa ni gsang ba'i dkyil 'khor du dbang bskur ba'o/ /cho rigs btsun pa zhes pa ni bram ze dang rgyal rigs rnams la sbyin gyi nye ba la sogs pa rigs ngan pa rnams la mi sbyin no zhes pa'o//gnyis su na rigs dang ldan zhes pa ste/ de bzhin gshegs pa'i rigs dang pad+ma'i rigs kyi lha rnams la brten cing de la gnas pa'o/ /gsum du na de bzhin gshegs pa'i rigs la sogs pa'i sngags pa'i spyod pa la brtson zhing 'bad pa rnams la zhes pa'o//spro ba can zhes pa ni sngags kyi spyod pa la brtson pa zhes pa'o/ /yi dam la brtan pa zhes pa ni ji ltar bsams pa'i don ma grub kyi bar du mi gtong ba'o/ /bla ma la gus pa zhes pa ni bla ma la dad pa'o/ / byas pa gzo ba zhes pa ni bla ma la dad cing gus pas ji ltar bstan pa bzhin du yang dag par sbyor zhing nan tan byed pa'i phyir ro/ /gtsang sbra che ba zhes pa ni lus gtsang na sems 'dul bar 'gyur ba'i phyir ro/ /bdag gi lus dang srog la yang mi lta ba zhes pa ni las dang bsgrub pa la sogs pa'i sngags kyi spyod pa la lus dang srog kyang mi phongs te de lta bu la phyag rgya de rnams sbyin no zhes pa'o//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ gsang ba'i phyag rgya brgyad rim par phye ba rgyas pa'o// //da ni nang yid kyi dkyil 'khor bri ba'i skabs 'chad de/ yid kyi dkyil 'khor bri ba yang spyir dkyil 'khor gnyis te/ rang bzhin gyi dkyil 'khor dang / gzugs brnyan gyi dkyil 'khor ro/ /de la rang bzhin gyi dkyil 'khor ni rgya che zhing bsam gyis mi khyab ste/mdor bsdus te bstan pa ni yid kyi dkyil 'khor du shes par bya'o/ /gzugs brnyan gyi dkyil 'khor yang ji skad gsungs pa bzhin du rdzogs par dka' ste/ de mdor bsdus pa bstan pa ni rgyud phyi ma las dkyil 'khor bshad pa'o/ /de bas na yid kyi dkyil 'khor 'di'i sgo nas sems kyi rang bzhin gyi gsang ba'i dkyil 'khor ji 'dra ba'i tshul shes par 'gyur te/'di ni 'jug pa'i sgo lta bur bstan to/ /yid kyi dkyil 'khor de bri ba'i thabs bstan pa'i phyir bcom ldan 'das ting nge 'dzin du bzhugs nas sangs rgyas kyi zhing 'di lag mthil bzhin du mnyam par gnas shing /sgo khyud dang rta babs rin po che sna lngas rab tu rnam par spras pas brgyan par bstan pa ste/ de dag thams cad kyang dngos po med pa las sems kyi dbang tsam gyis ji ltar bsams pa bzhin du 'byung bar bstan pa'o/ /de bas na yid kyi dkyil 'khor la sogs pa yid kyis bskyed pa thams cad rnal 'byor pas sems mnyam par gzhag pa las bkod pa'i mgon po ji lta bur gyur cig ces bsams nas smon lam btab la/ting nge 'dzin du zhugs na ji ltar smon pa de ltar 'gyur bar shes par bya'o/ /de ltar yid kyi dkyil 'khor bri ba'i thabs bstan pa yang /de nas bcom ldan 'das rnam par snang mdzad chen pos de'i tshe ma 'ongs pa'i 'gro ba rnams la gzigs nas thams cad kyi rjes su 'jug pa zhes bya ba'i ting nge 'dzin la snyoms par zhugs so zhes bya ba la sogs pa yin te/ bcom ldan 'das sngon gyi smon lam gyi shugs kyis sems can gyi don mdzad pa la sogs pa lhun gyis grub pa nyid du 'byung bas ting nge 'dzin du 'jug mi dgos mod kyi/'on kyang dngos po bstan par bya ba'i ting nge 'dzin du zhugs na/ byang chub sems dpa' kun du bzang po la sogs pa 'dul ba'i 'gro ba rnams kyis bcom ldan 'das ci'i phyir ting nge 'dzin du zhugs pa dang /zhugs nas ji ltar ston par 'gyur ba la sogs pa shes par 'gyur te/ de'i phyir bcom ldan 'das ting nge 'dzin du 'jug go/ /thams cad kyi rjes su 'jug pa zhes pa ni bcom ldan 'das ting nge 'dzin de la zhugs na don dam par chos kyi dbyings kyis kun du khyab par rtog pa dang kun rdzob tu yang sangs rgyas kyi zhing 'di lag mthil bzhin du mnyam par gnas pa la sogs pa gnas kyi khyab par bstan pa rnams khong du chud pa ste/bcom ldan 'das ting nge 'dzin la zhugs na don dam pa dang kun rdzob rtogs pa de dag 'byung ba'i phyir ting nge 'dzin de'i ming thams cad kyi rjes su 'jug pa zhes bya'o//ma 'ongs pa'i 'gro ba rnams la gzigs nas zhes pa ni kun du bzang po dang phyag na rdo rje la sogs pa yongs su dag pa'i byang chub sems dpa' rnams kyis ni de dag ji lta ba bzhin du mkhyen mod/ma 'ongs pa'i 'gro ba rnams kyi don du dngos po yod pa ma yin pa las sems kyi dbang tsam gyis rnam pa sna tshogs 'byung bar bstan pa yin no zhes pa'o/ /bcom ldan 'das snyoms par zhugs ma thag tu de nas 'di ltar sangs rgyas kyi zhing 'di lag mthil bzhin du mnyam par gnas shing zhes pa ni dkyil 'khor bri ba na sngar sa mtho dman la sogs pa snyoms shing sbyang dgos te de'i tshul bstan pa'o//sangs rgyas kyi zhing 'di zhes pa ni mi mjed kyi stong gsum gyi stong chen po'i khams so/ /lag mthil bzhin du mnyam par gnas shing zhes pa ni sangs rgyas kyi zhing de ri dang gcong rong la sogs pa med par mnyam par gyur zhes pa ni/tshig des ma 'ongs pa'i dus kyi 'gro ba rnams nam dkyil 'khor 'dri ba na dkyil 'khor gyis de lag mthil bzhin du mnyam par sbyang bar bya ba bstan pa'o//sgo khyud dang rta babs rin po che sna lngas rab tu rnam par spras pas brgyan pa zhes pa nas/ sil snyan gyi sgra yid du 'ong zhing snyan pa rnam pa du ma grag pa zhes pa'i bar gyis ni sangs rgyas kyi zhing de mnyam par gyur nas kyang rgyan de dag gis brgyan par bstan pa ste/des ni dkyil 'khor gyi sa de dag bsnyams nas rta babs dang sgo khyud dang gdugs dang ba dan la sogs pas brgyan pa dang ri mo rnams kyis brgyan par bya ba'i thabs bstan pa'o/ /pad+ma'i tshe'u chu dri zhim po yan lag brgyad dang ldan pas yongs su gang ba smos pa ni dkyil 'khor gyi nye 'khor du rdzing bu la sogs pa bri bar bya'o//yan lag brgyad ni bsil ba dang dang ba dang mngar ba la sogs pa'o/ /byang chub sems dpa' mang po'i bsod nams kyis bsags pa'i stan dang khang pa dang gzhal med khang yid las byung ba dang ldan par gyur to zhes pa ni sangs rgyas kyi zhing der pha rol tu phyin pa las byung ba'i byang chub sems dpa' rnams kyi so so'i bsod nams ji tsam las so so'i stan dang khang pa dang lding khang la sogs pa dang ldan pa zhes pa ste/des kyang dkyil 'khor gyi sa der byang chub sems dpa' la sogs pa lha so so'i gnas dang bcas par bya ba bstan to//pad+ma'i rgyal po chen po zhes pa nas bsod nams kyi rnam par skyed pa dag byung bar gyur to zhes pa'i bar ni sangs rgyas kyi zhing de'i dbus na pad+ma'i rgyal po chen po la de bzhin gshegs pa bzhugs te/ de bzhin gshegs pa'i sku las ye shes kyi sems can chos kyi tshig ston pa sha stag byung ngo zhes pa ste/de yang dkyil 'khor gyi dbus su bcom ldan 'das rnam par snang mdzad bzhugs pa la de bzhin gshegs pa'i sku las gyur pa'i lha rnams kyis bskor te bzhugs par bya ba bstan pa'o//de bzhin gshegs pa'i mos pa las byung ba'i chos kyi dbyings rtogs pa'i mtshan mas mtshan pa zhes pa ni pad+ma'i rgyal po de'i bye brag ste/ de bzhin gshegs pa'i mos pa las byung ba ni sngar bshad pa bzhin no/ /chos kyi dbyings rtogs pa zhes pa ni de bzhin nyid kyi ye shes dag pa la bya ste/de'i mtshan mas mtshan pa ni ye shes dag pa de'i mtshan ma yin pas dkar por shes par bya ste/ mdor na de bzhin gshegs pa nyid kyi ye shes dag pa pad+ma'i rgyal po chen por snang ba byin gyis brlab po zhes pa'o/ /de'i dbus na de bzhin gshegs pa'i sku bzhugs pa ni de bzhin nyid kyi ye shes chos kyi dbyings kyi mtshan nyid de las bcom ldan 'das rnam par snang mdzad kyi sku dbyung bar bstan pa'o//chos kyi dbyings la gzhol ba la zhes pa ni stong pa nyid kyi rang bzhin du gyur pa zhes pa'o/ /de ltar bcom ldan 'das stong pa nyid kyi rang bzhin du gyur kyang phung po lhag ma med pa'i mya ngan las 'das pa lta bu ni ma yin gyi/sngon gyi smon lam gyi shugs kyis rnam par mi rtog bzhin du kun rdzob kyi bya ba thams cad 'byung bar bstan pa'i phyir sems can gyi bsam pa dang mos pa ji lta ba bzhin du mgu bar mdzad pa zhes gsungs pa yin no//cis kyang mi tshugs pa'i stobs dang ldan pa stobs bcu la mos pa las byung ba zhes pa ni bcom ldan 'das kyi sku las byung ba'i sku de rnams kyi mthu ni ci las mi tshugs pa sha stag ste/ de yang bcom ldan 'das nyid kyi sku tshe kun du sangs rgyas pa'i mtshan nyid kyis stobs bcu la mos pa bskyed pas 'bras bu stobs bcu rdzogs par gyur pa las byung ba zhes pa'o//kha dog dang dbyibs rnam pa du mas bdag gi sku brgyan pa zhes pa ni sku mang po byung ba dag gi khyad par te/ de dag kha dog dang gzugs sna tshogs dang bcas pa zhes pa'o//sku mang po de rnams kyang bcom ldan 'das nyid byang chub sems dpa'i spyad pa spyod pa'i tshe bskal pa grangs med par sbyin pa'i pha rol tu phyin pa la sogs pa'i bsod nams kyi tshogs bsags pa'i rgyu las byung bar bstan pa'i phyir/ bskal pa bye ba khrag khrig brgya stong du mar zhes pa la sogs pa gsungs pa yin no//de dag byung nas thams cad dang ldan pa'i 'jig rten gyi khams rnams su sgra mngon par go bar mdzad cing ched du gleng pa 'di gleng ngo zhes pa ni gong du bcom ldan 'das kyis sangs rgyas kyi zhing lag mthil bzhin du mnyam pa la sogs par dngos su snang ba der rtogs pa'i chos rnams bstan pa de nyid rnam grangs kyis 'og nas byung ba'i tshigs su bcad pa rnams kyis bstan pa ste/de yang / e ma ho sangs rgyas thams cad kyi/ /zhes pa nas/ gang brnyes rnyed pa thob par 'gyur/ / zhes pa'i bar gyis so/ /de la e ma ho zhes pa ni ngo mtshar du gyur pa'o/ /sangs rgyas thams cad kyi/ shes rab thabs ni bsam mi khyab/ /ces sbyar te/ shes rab ni chos thams cad bdag med par rtog pa'i rang bzhin yin la/ thabs ni de ltar chos thams cad stong par rtogs kyang sems can gyi don du dngos po rnam pa sna tshogs yod par ston pa ste/de dag ngo mtshar che ste bsam gyis mi khyab pa'o/ /tshig de dag nyid dgrol ba'i phyir/ /gnas med pa ni rtogs gyur nas/ /gnas dang bcas pa'i chos kyang 'chad/ /ces pa la sogs pa gsungs te/shes rab kyis chos thams cad gzung ba dang 'dzin pa'i gnas med pa stong pa nyid du shes nas shes pa'o/ /gnas dang bcas pa'i chos kyang 'chad/ /ces pa ni de ltar shes rab kyis chos thams cad dngos po med par rtogs kyang thabs kyis sems can rnams la phan gdags pa'i phyir/gzung ba dang 'dzin pa'i gnas la sogs pa'i chos rnams dngos po yod par snang ba dngos su ston zhes pa'o/ /gang dag gis ni chos rnams kyi/ /chos kyi mtshan nyid rnyed pa dang / /shes pa zhes pa ni phung po dang khams dang skye mched la sogs pa'i chos rnams kyi mtshan nyid gang dag gis mi dmigs par shes pa zhes pa'o//des ni 'dren kun gyis/ /gang brnyes rnyed pa thob par 'gyur/ /zhes pa ni de ltar chos rnams dmigs su med par gang gis shes pa des 'dren pa sangs rgyas bcom ldan 'das kyi 'bras bu thob par 'gyur ro zhes pa ste/mdor na chos rnams stong pa nyid du rtogs pa de sangs rgyas su 'gyur ro zhes bstan pa yin no/ /de dag gi ched du gleng ba de khyed du glengs nas de dag slar yang de bzhin gshegs pa'i chos kyi sku bsam gyis mi khyab pa la zhugs so zhes pa ni de ltar chos kyi dbyings stong pa nyid kyi rang bzhin du mi snang bar gyur pa'o//de ltar gsang ba'i dkyil 'khor bri ba'i thabs bcom ldan 'das kyis rang bzhin gyi dkyil 'khor sngar bstan nas/ da ni gsang ba'i dkyil 'khor nyid bri ba'i thabs bshad de de yang / de nas bcom ldan 'das kyis byang chub sems dpa' phyag na rdo rje la bka' stsal pa/rigs kyi bu nang gi dkyil 'khor nyon cig ces pa la sogs pas so/ /'di yang slob ma lhag par gnas pa de nyid kyi nub mo bya bar shes par bya ste/ de'i rim pa yang de la thog mar slob dpon gyis mchod pa'i yo byad 'di dag la sogs pa'i dngos po gzhung las 'byung ba bzhin du sta gon byas nas slob ma rnams kyang bsags te phyi rol du bkod la/de nas slob dpon de dkyil 'khor gyi khang ba'i nang du zhugs te/ sangs rgyas dang byang chub sems dpa' thams cad la phyag byas nas dam tshig gi phyag rgya bcings te snying rje chen po'i dkyil 'khor du bstan pa bzhin du mdun du rang bzhin gyi dkyil 'khor so so'i sngags 'bru re'am/spyi'i snying pos der bsams te/ de nas bdag nyid chos nyid chos kyi dbyings kyi phyag rgya dang sngags kyis byin gyis brlabs pa dang chos kyi 'khor lo bskor ba'i sngags dang phyag rgyas rdo rje sems dpar byin gyis brlabs pa dang /rdo rje go cha'i phyag rgya dang bsrung bar bya ste/ de nas las kyi rdo rjer bsgyur nas lha rnams la dam tshig gi phyag rgya bstan te mchod yon phul nas dri dang me tog la sogs pa'i mchod pa rnams kyang so sor sngags kyis btab ste dbul ba dang yid kyi mchod pa yang bya'o//de ltar phyi nang gi mchod pa la sogs pa byas nas slob dpon de phyir byung la slob ma rnams la dri dang me tog byin te las thams cad pa'i sngags kyis bsrung ba dang / las thams cad pa'i sngags kyis btab pa'i skud pa dpung par bcing ba dang so shing sbyin pa rnams byas nas/de nas sdig pa bshags pa dang lus dbul ba dang sdom pa 'dzin du gzhug ste/ de dag ni lhag par gnas pa'i cho ga'o/ /dkyil 'khor du gzhug pa'i cho ga yang sgrub pa'i grogs po gzhan yod na des rim pa bzhin du bya la/med na slob dpon nyid kyis de nyid du slob ma dam tshig gi phyag rgya 'ching du gzhug pa dang chos kyi dbyings kyi phyag rgya dang sngags kyis byin gyis brlab pa dang /chos kyi 'khor lo phyag rgya dang sngags kyis byin gyis brlab pa dang / byang chub tu sems bskyed pa la sogs pa rim pa bzhin du bya ste/ de nas slob dpon de ltar mchod pa'i gnas su zhugs te/ sems mnyam par bzhag la snying gar zla ba'i dkyil 'khor gyi steng du yi ger kha dog dkar po yid tsam rtsa dmar ba bsams te/yi ge de'i sgra'i de kho na nyid chos thams cad rdul dang bral ba bsgom pa ni bdag gi lus nyid rdul phra rab la sogs pa'i rim pas bshig ste rdul phran de yang phyogs cha dang bral bas dmigs su med la/ de bzhin du rnam par shes pa la sogs pa yang dngos po med par bsgoms te/zla ba'i dkyil 'khor dang yi ger dang stong par bsam zhing tha ma sgra'i de kho na nyid de yang dmigs su med par bsgoms te stong pa nyid la ji srid 'dod par gnas so/ /de'i 'og tu thog mar rlung gi dkyil 'khor dang /de nas chu'i dkyil 'khor dang / de nas gser gyi dkyil 'khor bsam zhing gser gyi dkyil 'khor de'i steng du bdag gi lus lte ba'i 'og man chad kyang gser gyi dkyil 'khor gru bzhi par bsams te de'i steng du pad+mo rtsa ba dang bcas pa snying ga'i bar du phyin par bsams la/de'i dbus na bcom ldan 'das rnam par snang mdzad bzhugs te/ de'i shar phyogs kyi pad+mo'i 'dab ma la de bzhin gshegs pa rin po che'i tog go/ /lho phyogs kyi 'dab ma la de bzhin gshegs pa me tog kun du rgyas pa'i rgyal po'i dbang po'o/ /byang phyogs kyi 'dab ma la de bzhin gshegs pa rnga dbyangs can no//nub phyogs kyi 'dab ma la de bzhin gshegs pa 'od dpag tu med pa'o/ /shar lho'i 'dab ma la byang chub sems dpa' kun du bzang po'o/ /byang shar gyi 'dab ma la spyan ras gzigs kyi dbang po'o/ /lho nub kyi 'dab ma la 'jam dpal gzhon nur gyur pa'o//nub byang gi 'dab ma byang chub sems dpa' byams pa bsams te bcom ldan 'das rnam par snang mdzad la sogs pa dang byang chub sems dpa' de rnams kyang me tog dor ba la bde ba'i phyir de rnams kun gyi sku bdag gi klad pa'i bar du phyin par bsam zhing pad+mo'i ge sar kun la byang chub sems dpa' rnams kyi yum rnams dang sa bcu dang pha rol tu phyin pa drug ting nge 'dzin rnams lha mo'i gzugs su bsam mo//pad+mo'i rtsa ba la byang chub sems dpa' phyag na rdo rje bsam zhing de'i drung dang g.yas dang g.yon dag tu spyan ras gzigs kyi dbang po'i 'khor rnams dang phyag na rdo rje'i rig pa dang khro bo rnams dang sgo skyong dang khro gnyer la sogs pa rim pa bzhin du bsam mo//de'i phyi rim du lha dang klu la sogs pa mang po rnams bsams te de ltar brtan par byas nas yid kyi mchod pa tshul bzhin du bya'o//de nas de dag thams cad zin pa dang se gol brdab pas brda byas te slob ma rnams mgo bo la me tog 'dor du gzhug go/ /me tog de dag kyang yid la bsam pa'i lha gang gi steng du babs pa ste/ slob ma de la sbyin par bya ste/ de dag ni bsdus pa'i don to/ / tshig gi don ni gsang ba pa'i bdag po lus kyis gzhi gang yin pa de chos kyi dbyings kyi rang bzhin gyi sngags dang phyag rgya'i rang bzhin gyi byin gyi rlabs kyis byin du brlab par bya ste/ rang bzhin gyis rnam par dag pa'i phyir ro zhes pa ni mchod pa la sogs pa sngar smos pa rnams rim pa bzhin du byas nas bdag gi lus chos kyi dbyings kyi phyag rgya dang sngags kyis byin gyis brlabs te/stong pa nyid du byos shig ces pa'o/ /de nas bdag las kyi rdo rje sems dpar byin gyis brlabs te zhes pa ni snga ma'i rim pa bzhin du chos kyi 'khor lo'i phyag rgyas byin gyis brlabs nas las kyi rdo rje sems dpar bsgyur te mchod pa dang slob ma'i cho ga bya ba la sogs pa thams cad gong du smos pa'i rim pa bzhin du bya'o//rdul thams cad dang bral ba zhes pa ni de nas slar bdag nyid nang du zhugs nas snying gar yi ger bsams te chos thams cad rdul dang bral bar bsgom pa'i rim pa yang snga ma bzhin du bya'o//bdag dang sems can dang srog dang 'gro ba dang shed can dang shed las skyes pa dang / byed pa po la sogs pa'i zug rngu'i skyon dang bral la zhes pa ni mu stegs can gzhan rnams kyis bdag la sogs pa'i dngos po de rnams kyang dmigs su med par bsgom zhes pa ste/de dag ni ji ltar rdo shing la sogs pa'i zug rngu dang nyes pa bsal bas phyi rol gyi sbyang ba bzhin du nang gis sbyang ba yang thabs 'di lta bus sbyong ngo zhes bshad pa'o//gru bzhi la sgo bzhi dang ldan pa nub phyogs kyi sgo rtag tu phye ba sgo khyud dang stegs bus brgyan pa zhes pa ni de ltar stong pa nyid la sogs pa'i ting nge 'dzin byas la de nas rlung dang chu'i dkyil 'khor la sogs pa snga ma bzhin du bsams te/ de'i steng du dbang chen gyi dkyil 'khor de'i steng du bdag gi rked pa man chad gser gyi dkyil 'khor gru bzhi par gyur par bsams te/stegs bu zhes pa ni dbus kyi gzhi'i gdan de nyid la bya la de yang gser gyi kha dog tu bsam mo/ /dbus na pad+ma'i rgyal po chen po yid las byung ba 'dab ma brgyad pa sdong bu dang bcas pa ze ba rgyas shing shin tu mdzes par byung ba zhes pa la yid las byung ba zhes pa ni pad+mo ste sngar bshad zin to//shin tu mdzes par byung ba zhes pa ni 'dab ma brgyad la sangs rgyas bzhi dang byang chub sems dpa' bzhi rnams kyi sku mdog ci 'dra ba dang mthun par kha dog sna tshogs su bya ste/rin po che'i tog gi kha dog dkar po/ /me tog kun du rgyas pa'i rgyal po'i dbang po'i kha dog ser po/ /rnga dbyangs can gyi kha dog smug nag /'od dpag tu med pa'i kha dog dmar po/ /de bzhin du kun du bzang po ni ser po//spyan ras gzigs kyi dbang po ni dkar po/ /'jam dpal gzhon nur gyur pa ni ser po/ /byams pa ni dmar por bya'o/ /yang na thams cad kyang kho dag thams cad do zhes pa dang sbyar te chad pa med par shes par bya'o/ /de'i dbus na yang de bzhin gshegs pa sku dang gsung dang thugs 'jig rten thams cad las 'das pa zhes pa ni bcom ldan 'das rnam par snang mdzad kyi sku pad+ma'i dbus su bsams pa de mchog tu bzang ba 'jig rten thams cad las 'das pa zhes bya'o//sems kyi sa las yang dag par 'das pa zhes pa ni sems kyi yul du gyur pa'i gzung ba dang 'dzin pa'i cha spangs zhes pa'o//sems kyi rjes su thob pa zhes pa'i stong pa nyid kyi mtshan nyid de so sor rang gis rig pa thob pa zhes pa'o/ /de dag gis ni rang gi don du phun sum tshogs pa bstan to//'dod pa'i 'bras bu khyad par can stsol ba zhes pas ni gzhan gyi phun sum tshogs pa bstan te sems can rnams la mtho ris dang mya ngan las 'das pa'i 'bras bu rnams sbyin no zhes pa'o/ /de'i shar phyogs su zhes pa nas sdong bu ni phyag na rdo rje'o zhes pa'i bar ni sangs rgyas dang byang chub sems dpa' rnams pad+ma'i 'dab ma dang ge sar dag la sngar smos pa'i rim pa bzhin du bsam par bya'o//lhag ma ni rgya mtsho chen po'o zhes pa ni dkyil 'khor de'i 'og tu chu'i dkyil 'khor rgya mtsho bsam zhes pa'o/ /mar me me tog bdug spos dang //bshos dang bdug pa yid las byung / /lus can rnams kyi dam tshig phyir/ /thams cad sngags pas bsam par bya/ /zhes pa ni dri dang me tog la sogs pa de dag thams cad sngags pas yid kyis bsam zhes pa'o/ /lus can rnams kyi dam tshig phyir/ / zhes pa ni dkyil 'khor te/ sems can rnams dam tshig la gzhug pa'i phyir gzugs brnyan gyi dkyil 'khor rnams rgyas par bri mi nus shing zab cing rgya che ba la mos pa dkyil 'khor 'di bya'o zhes pa'o/ /'og gi sa gzhi thams cad la/ /lha la sogs pa grangs med pa'ang / / bdag nyid chen po'i dkyil 'khor 'dir/ /sngags pas nan tan bskyed de bri/ /zhes pa ni bcom ldan 'das bdag nyid chen po'i dkyil 'khor 'dir dbus kyi stegs bu'i 'og gi phyi rim gyis gzhi thams cad du lha dang klu la sogs pa grangs med pa zhes pa'o//rang gi las ni bdag nyid kyis/ /ra zhes bya bas rnam sbyangs nas/ /sngags pa rnal 'byor stan la 'dug /de bzhin gshegs pa rjes dran zhing / /zhes pa ni rnal 'byor pa de rnams kyi bya ba yang bdag nyid yi ge re stong pa nyid du sbyang ba la sogs pa gong du smos pa'i tshul bzhin du byas nas gdod las 'di rnams bya zhes pa'o//slob ma rnams kyi spyi bor ni/ /klad kor bcas pa'i a gzhag ste/ /zhes pa ni slob ma dkyil 'khor du 'jug pa'i tshe chos kyi dbyings su byin gyis brlab pa la sogs pa byas nas de dag brtan par bya ba'i phyir/ kun du sangs rgyas pa'i snying po aM spyi bor bsam zhes pa'o//'jigs pa med pa'i bdag lus la/ /zhes pa nas/ yang na de la rig sngags sbyin/ /zhes pa'i bar ni bdag gis lus la me tog dor nas gang la bab pa'i rig pa de slob ma rnams la sbyin pa'o/ /brtags nas de la bstan par bya//zhes pa ni dkyil 'khor gyi tshul rnams slob ma la bstan pa'o/ /lus can rnams kyi dam tshig ni/ /zhes pa ni dkyil 'khor 'di'i dam tshig can du bya ba'i phyir ro zhes sngar bshad pa bzhin no/ /'di ni dkyil 'khor gtso bor 'dod/ /ces pa ni stong pa nyid kyi ting nge 'dzin bsgoms pa las byung zhing phyi rol gyi mtshan ma rnams su mi gtogs pas gtso bo zhes bya'o//gsang ba'i dkyil 'khor du gzung ba la 'jug pa la zhes pa ni thog mar gong ma'i nang du bshad zin to/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/gsang ba'i dkyil 'khor du gzung ba la 'jug pa rim par phye ba rgyas pa'o// //da ni rig sngags kyi brtul zhugs rim par phye ba 'chad de/ rig pa zhes bya ba ni yang dag pa'i don ji lta ba bzhin du rig pas na de bzhin nyid kyi ye shes dang de las byung ba'i sngags dang phyag rgya la yang bya la/de'i dka' thub ni de dang rjes su mthun pa'i spyod pa ste ji ltar bcom ldan 'das shAkya thub pa dang spyod pa skra dang kha spu bregs pa dang chos gos bgo ba la sogs pa dge slong gi gzugs su spyod pa dang / 'jig rten pa rnams kyi yang lha chen po la sogs pa la dad pa'i spyod pa dang tshul 'jig rten na yod pa ji lta ba bzhin du rig pa'i brtul zhugs 'di yang bdag nyid kyi lha'i gzugs ci 'dra ba dang rjes su mthun par spyod pa dang /stong pa nyid kyi rang bzhin gyi ting nge 'dzin dang rjes su mthun par spyod pa dang /ting nge 'dzin las langs nas kyang chos thams cad sgyu ma lta bu'i rang bzhin du rtogs pa dang rjes su mthun par spyod pa dang / de'i sngags zlos par byed pa rnams te yan lag de bzhin dang ldan pa ni rig sngags kyi brtul zhugs zhes bya'o/ /de la kha cig ni brtul zhugs 'di spyod cing sngon du bsnyen pa'i grangs sum 'bum la sogs pa gzhung las ji skad 'byung ba bzhin du byas nas sgrub pa la 'jug par bya'o//de ste de bas kyang lhag par brtan par 'dod pas dbang chen la sogs pa'i dkyil 'khor la gnas shing zla ba drug tu rig pa'i brtul zhugs spyod par shes par bya ste/de bas brtul zhugs 'di ni dbang chen la sogs pa la gnas pa'i brtul zhugs kyi rgyu lta bur blta bar bya la/ rig pa'i brtul zhugs 'di las byung ba'i dbang chen la sogs pa'i dkyil 'khor la gnas pa'i brtul zhugs ni brtul zhugs gong ma 'di las byung bar blta ste/de bas na brtul zhugs 'dis sngar sems can yongs su sbyangs nas phyis brtul zhugs 'og ma la 'jug ste/ brtul zhugs 'og ma spyod pa na yang lha'i gzugs su gnas pa dang stong pa nyid kyi ting nge 'dzin la gnas pa dang /ting nge 'dzin las langs pa'i tshe'ang chos thams cad sgyu ma lta bur rtogs pa'i ma chags par spyod pa dang sngags zlos par byed pa rnams rim pa bzhin du spyad par bya ba la/ lhag pa ni dbang chen la sogs pa'i dkyil 'khor la gnas shing de'i rang bzhin du bya ba dang dbang chen la sogs pa so so'i phyag rgya 'ching ba'o//rig sngags kyi brtul zhugs de bris pa yang / de nas bcom ldan 'das rnam par snang mdzad la phyag na rdo rjes gsang sngags kyi sgo nas byang chub sems dpa'i spyad pa spyod pa rnams kyi don du tshigs su bcad pa'i dbyangs kyis brtul zhugs zhus pa zhes pa la sogs pa yin te/phyag na rdo rje rig sngags kyi brtul zhugs dris pa yang dbang chen la sogs pa'i dkyil 'khor la gnas shing rig sngags kyi brtul zhugs spyod pa de gtso bor dris par shes par bya'o//tshigs su bcad pa'i dbyangs kyis dris pa ni don go dka' zhing zhes pas don dang tshig 'bru rnams mi mnyam par bya ba'i phyir ro/ /gsang sngags kyi sgo nas byang chub sems dpa'i spyad pa spyod pa rnams kyi don du zhes pa ni phyag na rdo rje rang nyid dmigs mi mkhyen nas dri ba ma yin gyi/ma 'ongs pa'i 'gro bas gsang sngags kyi sgo nas byang chub sems dpa'i spyad pa spyod pa rnams la phan gdags pa'i phyir yin no zhes pa'o/ /ji ltar brtul zhugs spyad pa lags/ /zhes pa nas/ rgyal ba'i gtso bo dbang du bzhugs/ /zhes pa'i bar ni phyag na rdo rjes dris pa'i tshig ste/de la/ sangs rgyas rnams kyis sngon bstan pa/ /zhes pa las ji ltar sngon gyis bstan zin na dri ci dgos she na/ bdag nyid sngon gyi sangs rgyas kyis bshad pas de'i don 'tshal mod kyi ma 'ongs pa'i 'gro ba rnams kyi don du bcom ldan 'das kyis mngon sum du bstan cing bshad na de rnams yid ches par 'gyur ba dang bcom ldan 'das nyid dbang du bgyis pa'i phyir zhes pa ste/de bas na/ ma 'ongs 'gro ba'i don gyi phyir/ /zhes dang / rgyal ba'i gtso bo dbang du bzhugs/ /zhes gsungs pa yin no/ / dris pa'i tshig gzhan rnams ni/ /'og nas lan ldon pa dang sbyar ro/ /rig pa'i brtul zhugs las byung ba'i/ /brtul zhugs sangs rgyas bzhin du gnas/ /zhes pa la/ rig pa'i brtul zhugs las byung ba'i/ /zhes pa ni sems yongs su spyod pa'i mtshan nyid yan lag bzhi dang ldan pa'i rig pa'i brtul zhugs de las byung ba dbang chen la sogs pa'i dkyil 'khor la gnas te spyod pa de bsten par bya'o zhes pa dang sbyar ro//brtul zhugs sangs rgyas bzhin du gnas/ /zhes pa ni ji ltar sangs rgyas bcom ldan 'das kun du sangs rgyas pa don dam pa'i ting nge 'dzin la zhugs pa'i phyir yang chos thams cad stong pa nyid kyi mtshan nyid du gcig par thugs su chud la kun rdzob la spyod pa'i tshe na yang chos rnams sgyu ma lta bur mkhyen pas ji ltar yang mi chags par spyod pa de bzhin du rig sngags kyi brtul zhugs la gnas pa de yang ting nge 'dzin la gnas pa'i tshe chos thams cad stong pa nyid kyi rang bzhin la gnas pa dang /ting nge 'dzin las langs nas spyod pa'i tshe na yang chos rnams sgyu ma lta bur rtogs shing gang la yang mi chags par spyod pas na kun du sangs rgyas pa dang 'dra zhes pa'o//bdag nyid de nyid bskyed nas ni/ /zhes pa nas/ de'i tshe brtul zhugs spyad pa yin/ /ji ltar brtul zhugs spyod pa lags/ /bdag gis de nyid bskyed nas ni/ /zhes pa bdag gi de kho na nyid ji skad bshad pa bzhin du byas nas shes ba'o/ /rtag tu the tshom med pa'i yid//ces pa ni de ltar bdag gi de kho na nyid bdag gi lha gang yin pa'i gzugs su bsgyur ba'i ting nge 'dzin grub pas lha'i rnam par snang ba rtog pa bzhin med par lha'i gzugs nyid yid la the tshom med par snang na/ de tshe brtul zhugs spyad pa yis/ / zhes pa dang sbyar ro/ /de bas na/ gang tshe rtag tu mnyam gzhag pa/ /zhes gsungs pa yin te mdor na rtag tu sems mnyam par gzhag par bya ste/ lha'i gzugs de nyid la yid la brtan por snang bar ma byas na sngags dang phyag rgya sbyar ba tsam dang lha gang yin pa de bdag go snyam du bsams pa tsam gyis rig pa'i brtul zhugs su mi chud ces pa ste/de ni rig sngags dang mi mthun pa'i gzugs su spyod pa'o/ /byang chub sems dang chos rnams dang / /zhes pa nas/ tshul khrims ldan zhes gzhan mi bya/ /zhes pa'i bar ni/ tshul khrims la gnas ji lta bu/ /zhes pa'i lan te 'jug pa'i byang chub kyi sems chos sun 'byin pa'i mtshan nyid rnam par rtog pa dang bcas pa'i phung po dang khams dang skye mched la sogs pa'i rnam pa dang dge ba bcu'i rang bzhin gyis bslab pa dang / 'dus byas kyi las dang 'bras bu rnams stong pa nyid kyi mtshan nyid gcig tu ldan par rtogs na tshul khrims de las dang bya ba rnam par spangs pa'i zag pa med pa'i tshul khrims stong pa nyid kyi mtshan nyid de/ de bas na/ tshul khrims sangs rgyas bzhin zhes bya/ /zhes gsungs pa yin te/ji ltar sangs rgyas bcom ldan 'das chos thams cad stong pa nyid kyi rang bzhin du mtshan nyid gcig par thugs su chud pa bzhin du zhes pa ste/ de ni rig sngags dang rjes su mthun pa'i stong pa nyid kyi ting nge 'dzin gyi spyod pa'o/ /de yang sngar bzhin bdag gi lha'i gzugs su bsgyur nas de'i 'og tu rang gi sems yongs su sbyang ba'i phyir lha'i gzugs su bsgyur ba de la so sor mi gzhig par yid la mi bya ba'i tshul gyis stong pa nyid kyi ting nge 'dzin la gnas par bya'o//chos rnams kun la dbang thob cing / /zhes pa nas/de ni myur du ma chags spyod/ /ces pa'i bar ni/ gang na ji ltar gnas kyang rung / /ma chags par ni ji ltar spyod/ /ces zhus pa'i lan te/ chos rnams kun la dbang thob cing / /zhes pa ni chos thams cad stong pa'i rang bzhin du rtogs te 'dod chags la sogs pa nyon mongs pa rnams kyi dbang du mi 'gro'o zhes pa'o//sems can don rtogs khong du chud/ /gser dang bong rdo mnyam gyur na/ /de ni myur du ma chags spyod/ /ces pa ni stong pa nyid kyi ting nge 'dzin las langs nas sems can gyi don du sbyin pa la sogs pa kun rdzob la spyod pa'i phyir 'dus byas kyi chos rnams sgyu ma lta bur rtog cing de rnams la chags pa mi 'byung ba ni ji ltar rdo ba dang bong ba la sogs pa'i sems mi skye ba bzhin du gser la yang chags pa'i sems mi skye ba gang na gnas kyang ma chags par spyod pa zhes bya ste/de ni kun rdzob tu yang spyod pa na rig sngags dang rjes su mthun pa'i spyod pa'o//gsang sngags kyi grangs dag las kyang / /'bum grangs ji snyed bstan gyur pa/ /brtul zhugs yongs su rdzogs par 'gyur/ /zhes pa ni/ dus ni ji srid lon gyur na/ /brtul zhugs yongs su rdzogs par 'gyur//zhes dris pa'i lan te/ sngags bzlas pa'i grangs 'bum la sogs pa ji snyad gzhung las bstan pa de srid kyi bar du gong du bshad pa'i tshul bzhin du brtul zhugs de spyad na yongs su rdzogs par 'gyur zhes pa ste/ de yang dbang chen la sogs pa'i dkyil 'khor la gnas pa'i brtul zhugs kyi sngon rol du sems yongs su sbyong ba'i mtshan nyid can yan lag bzhi dang ldan pa'i brtul zhugs de la bya'o//dbang chen gyis ni dngos po yis/ /zhes pa nas/ zla ba gzhan la bzlas brjod bya/ /zhes pa'i bar ni/ gnas ni gang du bgyi ba lags/ /zhes dris pa'i lan te/ dbang chen la sogs pa'i dkyil 'khor la gnas nas rig sngags kyi brtul zhugs spyad par bshad pa'i phyir/ dbang chen gyi dngos po yis/ /zhes pa nas/ sngags pas zla ba gcig tu bzlas/ /zhes pa'i bar du gsungs te/de la dbang chen gyi dkyil 'khor la gnas nas bdag nyid rang gi lha'i gzugs su bsgyur te/ ji ltar sa'i rang bzhin sra zhing mkhrang ba ltar bdag gi lus kyang de lta bu sems kyi zhar la bsgom zhing bzlas pa zla ba gcig tu gnas par bya ba bshad de//dbang chen gyi ni dngos po yis/ /dbang chen dkyil 'khor la gnas te/ /zhes pa ni dbang chen gyi snying po chos thams cad gzod ma nas ma skyes par ston pa'i a yig gi sgra de kho na nyid bsgoms nas yi ge de nyid las dbang chen gyi dkyil 'khor du gyur par snga ma bzhin du bsams te/de'i steng du bdag rang gis lha'i lus su bsgyur nas rdo rje'i phyag rgyas bcings te dbang chen gyi rang bzhin lta bur sra zhing brtan par bsgom par bya zhes pa'o/ /rdo rje can gyi rgya bcings la/ /zhes pa ni sra zhing brtan par rjes su mthun pa'i phyir rdo rje'i phyag rgya bcings pa'o//rjes su rtag par 'o ma btung / /zhes pa ni zas kyang rjes su mthun pa ste 'o ma 'thungs na lus brtas shing mkhrang bar 'gyur ba'i phyir ro/ /'jig rten na yang sems dang kha zas gnyis kyis lus 'dzin par 'gyur ba de bzhin du 'dir yang ste/sems kyi mkhrang ba bsgom zhing mkhrang bar 'gyur ba'i kha zas zos na dbang chen gyi ting nge 'dzin dang mthun pa'i phyir ro/ /srog dang rtsol ba rab bsdams nas/ /sngags pas zla ba gcig tu bzlas/ /zhes pa ni sngar bshad pa'i tshul bzhin du srog dang rtsol ba bsdams nas rang gi snying po zla ba gcig tu bzlas so zhes pa'o//de nas zla ba gnyis pa na/ /zhes pa nas/ de tshe zas su chu btung ngo / /zhes pa'i bar ni chu'i dkyil 'khor la gnas par bshad pa ste/ chu'i dkyil 'khor gyi sa bon gyi sgra'i de kho na nyid bsgoms pa dang sa bon de las chu'i dkyil 'khor du bsgoms pas go rims dman ma bzhin du bya ste/bdag gi lus kyang chu'i rang bzhin ltar sngo bar bsgom zhing pad+ma'i phyag rgya bcings la zla ba gcig tu bzlas te pad+ma'i phyag rgya bcings pa dang zas su chu btung ba yang de dang rjes su mthun par bya ba'i phyir ro/ / de nas zla ba gsum pa la/ /zhes pa nas/ sdig pa thams cad bsreg par bya/ /zhes pa'i bar ni me'i dkyil 'khor la gnas par bshad pa ste/ ma bslangs pa yi zas za zhing / /zhes pa ni me dang rjes su mthun par bya ba'i phyir te/ ji ltar me ni skam gsher dang bzang ngan la sogs pa la mi rtog par sreg pa bzhin du zhim po la sogs pa'am/'dod pa'i dngos po rnams la mi rtog cing ma bslangs par bza' zhes pa'o/ /ral gri'i phyag rgya dang ldan pas/ /zhes pa yang me dang rjes su mthun pa ste/ ji ltar me ni thams cad sreg cing gcod pa de bzhin du ral gri yang dngos po thams cad gcod cing med par byed pa'o//lus dang ngag yid las byung ba'i/ /sdig pa thams cad bsreg par bya/ /zhes pa ni sngags pa de lta bu'i ting nge 'dzin la gnas shing bzlas na lus dang ngag dang yid gsum gyi sgo nas sdig pa byas pa'i las kyi bag chags sems la bsags pa de las 'byung bar 'gyur zhes pa'o//bzhi la rlung dang ldan byas te/ /zhes pa nas/ mnyam par gzhag ste gsang sngags bzlas/ /zhes pa'i bar ni zla ba bzhi pa la rlung gi dkyil 'khor la gnas par bshad pa ste/ sngar bshad pa bzhin rlung gi dkyil 'khor gyi ting nge 'dzin du sbyar la khyad par du bdag gi lus rlung gi reg pa dang ldan par yid la bsgom mo//zas su rtag tu rlung bza'o/ /zhes pa kha zas kyang de dang rjes su mthun par sbyar ba ste/ nang du rgyu ba'i rlung lkog mar 'gog cing 'gag par bsams na bru ba tsha ba dang skom pa med par 'gyur te/de la rlung za ba zhes bya'o/ /de nas 'khor lo'i rgya bcings la/ /zhes pa ni 'khor lo ni 'khor zhing g.yo ba'i mtshan nyid can yin pas rlung dang rjes su mthun par bya ba'i phyir ro/ /mnyam par gzhag ste gsang sngags bzlas//zhes pa ni srog dang rtsol ba bsdams pa la sogs pa sngar bshad pa'i rim pa bzhin du bzlas pa'o/ /dbang chen dang ni chu dngos la/ /zhes pa nas/ rdzogs pa'i sangs rgyas bzhin du 'gyur/ /zhes pa'i bar ni/ dbang chen gyi dkyil 'khor dang chu'i dkyil 'khor gnyis la gnas nas rig sngags kyi brtul zhugs spyod pa ste/dbang chen dang ni chu'i dkyil 'khor so so'i snying po las snga ma bzhin du bsam pa ste/ ro smad ni dbang chen gyi rang bzhin du bsam zhing ro stod ni chu'i rang bzhin du bsams nas zas su yang 'o ma dang chu gnyis btung zhing zla ba gcig tu bzlas par bya'o//rnyed dang ma rnyed rnam spangs te/ /zhes pa ni rnyed na yang dga' ba med/ ma rnyed na yang mi dga' ba med pa'o/ /rlung dang mer ni ldan byas nas/ /zhes pa nas/ zla ba gzhan la bzlas brjod bya/ / zhes pa'i bar du rlung dang me gnyis ga'i dkyil 'khor la gnas nas rig sngags kyi brtul zhugs spyod pa ste/ rlung gi dkyil 'khor gyi steng du raM gyi sa bon las me'i dkyil 'khor bsams te bdag gi lus ro stod me 'bar ba'i rang bzhin du bsam zhing ro smad kyang snga ma bzhin du rlung gi rang bzhin du bsams te zas su yang rlung gi sbyor ba yang sngar smos pa bzhin du cung zad bya la me'i zas ma bslangs pa yang cung zad bya ste/zla ba gcig tu bzlas pa bya/ /zhes pa'o/ /de dag thams cad kyang rang gi lha'i gzugs su sbyor ba na dkyil 'khor so so'i kha dog ci 'dra ba bzhin du lha'i gzugs kyi kha dog kyang de bzhin du shes par bya'o//dbang chen gyi dkyil 'khor gyi skabs su bshad pa'i rim pa bzhin du zla gcig tu srog dang rtsol bsdams te bzlas par yang bshad par bya'o/ /brgya byin tshangs pa la sogs lha//zhes pa nas/ snying rje 'jig rten dbang po bzhin/ /zhes pa'i bar ni/ de'i mthu ci lags 'tshal bar bgyi/ /zhes zhus pa'i lan te/ mthu bshad pa ni brgya byin dang tshangs pa la sogs pa'i lha rnams dang / sha za dang lto 'phye la sogs pa rnams kyis rig sngags kyi brtul zhugs de lta bu dang ldan pa'i sngags pa mthong na rgyang ring po nas phyag 'tshal zhing sngags pa de la srung bar byed la sngags pa des ni ci bsgoms pa rnams kyang byed par 'gyur zhing lha'i sman rnams kyang sngags pa de'i drung na 'khod cing bka' nyan te/sman btsal gyis mi rnyed pa dag kyang de'i drung na 'dug par mthong ngo / /bgegs dang ma mo bdun la sogs pa 'jigs par byed pa rnams kyang rgyang ring po nas phyag 'tshal bar byed pa dang sngags pa'i gnas kyang me 'bar ba ltar snang la/sangs rgyas bcom ldan 'das ltar 'jig rten dang 'jig rten las 'das pa rnams la dbang thob par 'gyur ba dang mi mthun par bdun pa ni phyag na rdo rje lta bu dang snying rje che ba ni spyan ras gzigs kyi dbang po lta bur 'gyur zhes pa'o/ /zla ba drug rnams bzlas gyur na//'dod pa'i dngos grub 'bras bu thob/ /bdag nyid dang ni gzhan la yang / /rtag par rjes su phan par byed/ /ces pa ni/ dus dang yul dang bya ba las/ /chos dang chos min rnam spangs par/ /de ni ji ltar myur du 'gyur/ /tshad kyang 'dren pas bka' stsol cig /ces zhus pa'i lan te/ dbang chen la sogs pa'i dkyil 'khor bsgom pa'i rim pas zla ba drug na dus la sogs pa la mi ltos shing bdag dang gzhan la phan pa'i grub pa thob par 'gyur te de lta bu thob pa'i tshad zla ba drug go zhes pa'o/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/rig sngags kyi brtul zhugs rim par phye ba rgyas pa'o// //de nas yang bcom ldan 'das phyag na rdo rjes yang gsang sngags rnams dang dkyil 'khor rnams kyi snying po zhus pa zhes pa la sogs pa ni slob dpon gyi de kho na nyid bshad pa ste/slob dpon gyi de kho na nyid kyang rig sngags rnams dang dkyil 'khor gyi snying po gang yin pa la sogs pa yang dag pa nyid shes na slob dpon du 'gyur te/ de bas na/ sngags rnams 'byung ba'i gnas snying po de sngon du bshad nas slob dpon gyi de kho na nyid bstan te/de bas na/ gsang sngags kun gyi snying po gang / /ci zhig 'tshal nas slob dpon 'gyur/ /zhes phyag na rdo rjes zhus pa yin no/ /de la gsang sngags kun gyi snying po gang / /zhes pa ni/ a ni gsang sngags thams cad kyi//snying po yin par yang dag bshad/ /ces pa dang sbyar ro/ /slob dpon zhes pa ni/ snying gar snying po gzhag nas ni/ /yan lag rnams la yan lag 'god/ /ces pa dang sbyar te/ de rnams kyang bkod pa tsam gyis chog pa ma yin gyi/ de dag gi skra de kho na nyid la sogs pa shes na slob dpon zhes bya'o//ye shes gsang bas ches gsang zhing / /zhes pa ni gsang sngags spyad pa'i tshul rang bzhin gyi gsang ba'i steng du sngags kyi snying po yi ge a zhes pa thams cad gzod ma nas ma skyes par rtog pa'i ye shes 'byung ba'i sgo ste/ shin tu zab pas snod ma yin zhing dam tshig med pa la bstan par bya ba ma yin pa'i phyir na gsang ba bas ches gsang ba zhes bya'o/ /gsang sngags ye shes cher 'byung ba/ /zhes pa ni snying po'i sgo nas chos thams cad stong pa nyid du rtogs par 'gyur bas de nyid la ye shes zhes bya la ye shes de las bla na med pa'i 'bras bu rtog pa chen po 'byung bas na zhes bya'o//pha rol tu phyin pa la sogs pa'i sgo nas ye shes 'byung ba yang 'bras bu chen po 'byung ba yin mod kyi/ de las khyad par du/ gsang sngags ye shes cher 'byung ba//zhes gsungs pa yin no/ /de lta bu bris pa ni legs so tshig dang sbyar ro/ /a ni gsang sngags thams cad kyi/ /snying po yin par yang dag bshad/ /'di las byung ba'i gsang sngags ni/ /grangs med rnams kyang 'byung bar 'gyur/ /zhes pa ni/ gsang sngags kun gyi snying po gang / /zhes zhus pa'i lan te/ de la yi ge a zhes pa ni/ gsang sngags thams cad kyi snying po ste/ snying po zhes pa ni 'byung ba'i gnas so/ /de bas na kun rdzob dang don dam pa gnyis ka 'byung ba'i gnas te/ de la ka la sogs pa'i yig 'bru thams cad kyang a dang mi ldan na mi smra ste/de bas na/ yi ge ka la sogs pa thams cad kyang a las byung bar shes par bya bas de ni kun rdzob tu 'byung ba'i gnas so/ /don dam pa ni yi ge a de las chos thams cad gzod ma nas ma byung zhing ma skyes par rtog pa'i ye shes 'byung ste/'di ni don dam pa'i gnas so/ /'di las 'byung ba'i gsang sngags ni/ /grangs med rnams kyang 'byung bar 'gyur/ /zhes pa ni 'jig rten dang 'jig rten las 'das pa'i gsang sngags ji tsam gsungs pa de dag thams cad ni yig 'bru'i ngo bo ste/yig 'bru de rnams kyang a las gyur pas gsang sngags grangs med pa de dag thams cad a de las byung zhes pa'o/ /de ni kun rdzob tu chos thams cad 'byung ba'i gnas su bstan to/ /spros pa thams cad zhi ba yi/ /ye shes mtha' dag skye bar 'gyur//zhes pa ni a'i ting nge 'dzin gyi sgo nas chos thams cad gzod ma nas ma byung ba stong pa nyid kyi rang bzhin du rtogs pas gzung ba dang 'dzin pa la sogs pa'i rnam par rtog pa'i spros pa dang bral ba'i ye shes kyang a de las byung ngo zhes bstan te/de ni don dam par 'byung ba'i gnas su bstan pa'o/ /gsang ba pa'i bdag po zhes pa nas/ lus ni sna tshogs las byung ba'o/ /zhes pa'i bar ni gong ma'i tshigs su bcad pas mdor bstan pa de nyid 'bral pa ste/ de la spyir rnam pa lnga ste/ a dang aM dang aHdang i dang u rnams so//de dag ni yi ge thams cad kyi spyi'i rang bzhin no/ /aM klad kor ni nga dang nya dang na dang Na dang ma rnams kyi rang bzhin te/ nga'i nang du ka'i 'khor rnams 'dus/ nya'i nang du tsha'i 'khor rnams 'dus/ Na'i nang du Da'i 'khor rnams 'dus/na'i nang du ta'i 'khor rnams 'dus/ ma'i nang du pa'i 'khor rnams 'dus par blta'o/ /a dang i'i nang du ya 'dus par blta'o/ /ra dang la ni r-i r-I dang l-i l-I nang du 'dus la sha Sha sa ha rnams ni yi ge aHzhes pa'i tshig gnyis po'i nang du 'dus te/a de rnams las ka la sogs pa'i yan lag thams cad 'byung bar shes par bya'o/ /rdzogs pa'i sangs rgyas rkang gnyis gtsos/ /a ni 'tsho ba yin par gsungs/ /zhes pa ni yi ge a de kun rdzob dang don dam pa gnyi gar thams cad kyi srog ste/kun rdzob tu yang gong du bshad pa'i tshul gyis a de med na ka la sogs pa smrar med pas thams cad kyi srog ces bya la/ don dam par ni chos thams cad gzod ma nas ma skyes par rtog pa'i ye shes 'byung bas srog ces bya'o/ /de ltar srog yin par nga 'ba' zhig gis bshad pa ma yin gyi/sngon gyi sangs rgyas rnams kyis kyang bshad pa'o/ /de bas 'di kun thams cad de/ /zhes pa ni de ltar a de srog yin pas ka la sogs pa'i dngos po thams cad 'di yin no zhes pa'o/ /ji ltar yin zhe na/ yan lag kun la rnam par gnas//zhes gsungs te a de ka la sogs pa'i 'bru rnams la gnas zhes pa'o/ /yan lag rnams kyang ci rigs par/ /rtag par kun du rig par gyis/ /zhes pa ni ka la sogs pa'i yan lag rnams kyang ji ltar rigs par sngags kun la rtag tu gnas par shes par bya'o//yi ge rnams kyis thams cad khyab/ /ces pa yang de nyid kyi snod du gsungs pa ste/ ka la sogs pa'i yi ge rnams kyis sngags kyi tshig thams cad du khyab ces pa'o/ /yi ge rnams kyang de yis khyab/ /ces pa ni a des ka la sogs pa'i yi ge rnams la khyab ces pa'o//yi ge rnams las sgra 'byung ba/ /cha dang cha las byung ba'o/ /zhes pa ni ka la sogs pa'i yi ge'i sgra rnams las chos thams cad dgos pa dang bral ba'o zhes pa la sogs sgra'i phyogs gcig pa rnams 'byung zhes pa'o/ /de bas 'di kun thams cad de//lus ni sna tshogs las byung ba'o/ /zhes pas ni de bas a de ni ka la sogs pa'i dngos po thams cad de/ ka la sogs pa'i dngos po de rnams kyang lha thams cad kyi sa bon yin pas lha'i gzugs rnams sna tshogs pa'i yi ge de rnams ji ltar rigs par sbyar ba las 'byung zhes pa'o//de yi 'god pa yang dag bstan/ /zhes pa nas/ de ni slob dpon yin par bshad/ /ces pa'i bar gyis yi ge sum cu rtsa gnyis po de dag thams cad slob dpon gyi lus la 'god pa bshad de/ de yi 'god pa yang dag bstan//zhes pa ni yi ge a de snying gar 'god par sngar bshad zin to zhes pa'o/ /snying po dag ni de bas nyon/ /zhes pa ni snying po zhes pa'i tshig a 'ba' zhig la bya ba ma yin gyi/ /sems ni mgu nas nges gyur pa/ /de ni snying zhes bshad pa yin/ /der gnas pa yi gsang sngags rnams//'bras bu rgya cher ster bar 'gyur/ /zhes bshad pa'i tshul du rig par bya ste/ yi ge 'di rnams lus la bkod pa tsam gyis chog pa ma yin gyi so so'i sgra de kho na nyid sems tshim zhing mgu ba'i bar du bsgom par bya ba nyon cig ces pa'o//snying gar snying po bzhag nas ni/ /yan lag rnams la yan lag dgod/ /ces pa ni/ snying gar yi ge a bkod la/ /yan lag rnams su ka la sogs pa'i yig 'bru rnams/ ka ni lkog mar shes par bya/ /zhes pa la sogs pa 'og nas 'byung ba'i rim pa bzhin du dgod ces pa'o//blo ldan rnal 'byor stan 'dug ste/ /bdag lus rdzogs sangs rgyas kyi sku/ /byas nas de bzhin gshegs pa rnams/ /dran par byas te 'di kun bya/ /zhes pa ni slob dpon bdag gi lus kun du sangs rgyas pa'i skur bsgyur te/ yi ge 'di thams cad dgod par bya'o zhes pa'o/ /blo ldan rnal 'byor stan 'dug ste/ de bzhin gshegs pa rnams dran par byas te zhes pa ni de bzhin gshegs pa rnams la phyag byas la rnal 'byor gyis skyil mo krung bcas te lus dang sems mnyam par gzhag nas da lta smos pa rnams bya zhes pa'o//gang gi ye shes rgya chen de/ /cho ga bzhin du shes gyur na/ /de'i tshe sangs rgyas mthu chen gyis/ /de ni slob dpon yin par bshad/ /ces pa ni de ltar yi ge rnams bkod cing de rnams kyi sgra'i de kho na nyid stong pa nyid rtogs pa'i ye shes rgya chen po de dag cho ga bzhin du byas nas shes par gyur na kun du sangs rgyas pa rnams kyis slob dpon no zhes gsungs so//de bas de nyid de bzhin gshegs/ /zhes pa nas/ dpal ldan sngags rgyal rdo rje 'dzin/ /zhes pa'i bar gyis de'i rjes su bsngags pa bshad pa ste/de la sangs rgyas la sogs pa grub pa'i rgyu yang rnam pa gnyis te/ bsod nams dang ye shes so/ /de la sbyin pa la sogs pa'i bsod nams ni brgyud pa'i rgyu'o/ /ye shes ni dngos kyi rgyu ste/ de la 'dir sngags kyi yi ge de rnams kyi sgra'i de kho na nyid stong pa nyid rtogs par byed pa'i ye shes mngon du byas pa 'di ni dngos kyi rgyu'o//de bzhin gshegs zhes bya ba la sogs pa stong pa ni slob dpon de mos pa'i sa la gnas pa yin pas de bzhin gshegs pa ma yin kyang de bzhin gshegs pa la sogs par 'gyur ba'i rgyu byed pas na rgyu la 'bras bu'i ming gis btags par shes par bya'o//de bzhin du char chu mod cing myu gu bzang na 'bras bu ma grub kyang lo legs so zhes pa la sogs pa 'jig rten na snang ngo / /rjes su bsngags pa yang rnam pa bzhi'i sgo nas te/'jig rten las 'das pa'i lha rnams te/ 'jig rten gyi lha rnams dang / 'jig rten las 'das pa'i mi rnams dang / 'jig rten gyi mi rnams so/ /'jig rten las 'das pa'i lha rnams ni/ de bas de nyid de bzhin gshegs/ /de nyid rdzogs sangs rgyas zhes bya//zhes pa la sogs pa'o/ /'jig rten gyi lha rnams ni/ tshangs dang khyab 'jug dbang phyug che/ /zhes pa la sogs pa'o/ /'jig rten gyi mi ni/ /bram ze dang ni khrus byed nyid/ /tshangs par spyod pa zhes kyang bya/ /zhes pa'o/ /'jig rten las 'das pa'i mi ni//dge slong dpal ldan zag pa zad/ /ces pa'o/ /gsang ba thams cad 'dzin pa'o/ /zhes pa ni bdag gi lus lha'i gzugs su bsgyur ba dang ngag gi rang bzhin gyi yi ge rnams bdag gi lus la tshang ba dang yi ge de rnams kyi sgra de kho na nyid la dmigs pa'i ye shes dang ldan pas lus dang ngag dang yid gsum gyi gsang ba thams cad 'dzin pa'o//chos kun dbang phyug gtso bo ste/ /zhes pa'i lung dang rtogs pa'i chos nyid ga la dbang du gyur pa zhes pa'o/ /gang zhig byang chub sems brtan zhing / /sgra shes pa ni lhur len gang //zhes pa ni de sangs rgyas dang byang chub sems dpa' la sogs par 'gyur ba ni lus la yi ge bkod pa tsam gyis 'gyur ba ma yin gyi/ byang chub kyi sems brtan zhing yi ge rnams kyi sgra'i de kho na nyid kyi ye shes bsgom pa la brtson na ji skad smos pa de rnams su 'gyur zhes pa'o//de ni slob dpon gyi ting nge 'dzin te dang po'o/ /smin mtshams dbus su yi ge hUM/ /zhes pa nas/ mtha' dag ngas ni rab tu khyab/ /ces pa'i bar ni slob dpon gyi ting nge 'dzin gnyis pa ste rigs gsum gyi steng du dgod pa'o/ /smin mtshams dbus su yi ge hUM//zhes pa ni snga ma bzhin du slob dpon bcom ldan 'das rnam par snang mdzad kyi skur bsgyur te/ smin mtshams su phyag na rdo rje'i snying po yi ge hUM rang gis dkyil 'khor la gzhag par bsam mo/ /brang du yi ge sa zhes bya/ /phyag na pad+ma'i gzhi zhes bya/ /zhes pa ni spyan ras gzigs kyi dbang po'i snying po ste/zla ba'i dkyil 'khor dang bcas te brang mkhar bsam zhes pa'o/ /da ni snying ga'i gnas gzhag pa/ /zhes pa ni bcom ldan 'das nyid kyi snying po a de rang gi snying ga'i dkyil 'khor la bsam zhes pa'o/ /kun gyi rje ste dbang phyug yin//rgyu dang mi rgyu sna tshogs pa/ /mtha' dag ngas ni rab tu khyab/ /ces pa ni snying po de'i yon tan bsngags pa ste/ /rgyu ba ni mi la sogs pa'i sems can no/ /mi rgyu ba ni sa dang shing la sogs pa ste de dag thams cad khyab ces pa'o/ /a zhes bya ba srog gi mchog /ces pa nas/ 'chi 'pho med pa'i go 'phang 'thob/ /ces pa'i bar ni slob dpon gyi ting nge 'dzin gsum pa ste/ dpa' bo chen po'i snying po rnams las a'i yi ge srog gi mchog yin pas bdag gi khong du dbugs yas man du rgyu ba dang lhan cig tu sngar bshad pa bzhin du bsam mo//ba zhes bya ba tshig tu bshad/ /ces pa ni yi ge ma tshig gi rang bzhin yin pas khar bsam mo zhes pa'o/ /ra zhes bya ba me zhes brjod/ /ces pa ni yi ge ra de rang gi dkyil 'khor dang bcas par bsam mo/ /hUM zhes bya ba khro bor bshad/ /ces pa ni smin mtshams su yi ge hUM dkyil 'khor dang bcas par bsam mo//kha ni nam mkha' shes par bya/ /klad kor stong pa'i mchog ces bya/ /zhes pa ni yi ge kha klad kor dang bcas pa klad pa'i steng du bsams te/ kha ni chos thams cad nam mkha' lta bu'i mtshan nyid du ston pa'o//klad kor yang stong pa'i rang bzhin zhes pa'o/ /gang shes slob dpon zhes bya ba/ /'di ni yang dag dam pa yin/ /zhes pa ni gong du smos pa'i yi ge rnams kyi sgra'i de kho na nyid dang dgos pa rnams gang gis shes pa de ni slob dpon zhes bya'o zhes pa'o/ /de bas rnam pa thams cad du//rdzogs sangs rgyas bsngags shes 'di la/ /rtag tu brtson par byas na ni/ /'chi 'pho med pa'i go 'phang 'thob/ /ces pa ni de dag ni rjes su bsngags pa ste/ snying po de rnams 'ba' zhig gis bshad pa ma yin gyi/ sngon gyi sangs rgyas rnams kyis kyang gsungs te/de bas na rnam [(]ba [,]pa [)]thams cad du de dag gi sgra'i de kho na nyid stong pa la sogs pas rtag tu nan tan byas na sangs rgyas kyi go 'phang 'thob po zhes pa'o/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/slob dpon gyi de kho na nyid zhes pa rim par phye ba rgyas pa'o// //ka ni lkog mar shes par bya/ /zhes pa nas/ nges pa thams cad mkhyen pa bzhin/ /zhes pa'i bar du yi ge dgod pa rim par phye ba gsungs pa ni gong du/ yan lag rnams la yan lag dgod/ /ces spyir smos pa de la ka la sogs pa'i yan lag gang rnams lus kyi yan lag gang dang gang du dgod pa'i gnas 'chad par gsungs pa ste/ yi ge sum cu rtsa gnyis po 'di rnams bkod pa ni skyes bu chen po'i mtshan sum cu rtsa gnyis su sbyar ro//de la slob dpon gyi ting nge 'dzin dang de ni snying rje chen po 'byung ba'i dkyil 'khor gyi dus su sbyar zhing / gnyis pa ni yi ge 'khor lo bskor ba'i dkyil 'khor gyi dus dang sbyar la/ gsum pa ni gsang ba'i dkyil 'khor gyi tshe na sbyar bar shes par bya'o//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ yi ge dgod pa rim par phye ba rgyas pa'o// //de nas gzhan yang bcom ldan 'das la gsang ba pa'i bdag po phyag na rdo rjes 'di skad ces gsol to zhes pa la sogs pa ni byang chub sems dpa'i bslab pa thabs dang ldan pa'i dge ba bcu'i las kyi lam bshad pa'o//de la gsang sngags kyi sgo nas byang chub sems dpa'i spyad pa spyod pa rnams kyi bslab pa thun mong ma yin pa dam tshig gi mtshan nyid ni sngar bshad zin te/'dir ni pha rol tu phyin pa la spyod pa'i byang chub sems dpa' dang sngags la spyod pa'i byang chub sems dpa' gnyis ka'i spyi'i bslab pa thabs dang ldan pa bshad par shes par bya'o/ /de la byang chub sems dpa' zhes pa de bzhin nyid gyi byang chub de khong du chud par 'dod pa'i bsam pa dang ldan pa la ni byang chub sems dpa' zhes bya'o//sems dpa' chen po ni chos thams cad sgyu ma lta bur shes te/ gang yang dngos po yod pa ma yin gyi/ 'on kyang kun rdzob tu rgyu dang 'bras bu nges pa'i tshul gyis kun rdzob nyid du don byed pa sgyu ma lta bur rtogs nas sems can yongs su bsgral ba'i phyir thabs dang bcas pa'i bslab pa la slob pa ni sems dpa' chen po zhes bya'o//skabs 'dir yang bslab pa de lta bu la sogs pa bshad pa la dgongs nas byang chub sems dpa' sems dpa' chen po rnams khyad par du smos/bslab pa bzhi zhes pa ni 'og nas 'byung ba'i dge ba bcu'i tshul la 'jug pa dang / mi dge ba bcu las ldog pa'i mtshan nyid la bya'o/ /thabs dang shes rab kyis yongs su zin pa zhes pa ni shes rab ni chos thams cad gzod ma nas ma skyes par rtog pa'i mtshan nyid yin la/thabs ni chos thams cad gzod ma nas ma skyes shing dngos po med par rtog kyang sgyu ma lta bu'i tshul du thabs kyi sgo nas kun rdzob tu bslab pa 'di lta bu dang 'khor gsum yongs su dag pa'i sbyin pa la sogs pa kun tu spyad pa la bya'o//yang na thabs dang shes rab kyis yongs su zin pa zhes pa ni mi dge ba bcu'i dngos po mi spyod par bya ba la 'phags pa nyan thos rnams ltar thabs med pa ma yin gyi/ shes rab [(]gyis [,]kyis [)]don chen po mthong na sems can la rgyu med par bdag nyid sems can la sbyin pas ngan song du 'gyur ba las khas blangs te spyod par mi bya ba'i dngos po spyod pa la yang thabs dang shes rab kyis yongs su zin pa'i bslab pa zhes bya'o//byang chub sems dpa' sems dpa' chen po rnams the tshom dang yid gnyis ma mchis shing 'khor ba na 'khor ba'i tshe nyams par mi 'gyur ba bshad du gsol zhes pa las byang chub sems dpa' sems dpa' chen po ni bshad zin to//the tshom dang yid gnyis ma mchis pa ni bcom ldan 'das kyis ji skad du bshad pa'i lung ma yin no snyam pa'i yid gnyis med pa dang yin nam ma yin gtol med pa'i the tshom mi skye ba'i byang chub sems dpa' de rnams bslab pa de dang ldan pas 'khor na 'khor kyang ngan song la sogs par ltung zhing nyon mongs par mi 'gyur ba de bshad du gsol zhes pa'o//de bzhin gshegs pa'i spyan gyis chos dbyings thams cad la gzigs nas zhes pa ni de bzhin gshegs pa'i spyan ni sangs rgyas kyi ye shes la bya la/chos kyi dbyings ni sems can gyi khams la bya ste/ sangs rgyas kyi ye shes des sems can gyi khams thams cad du sems can 'di rnams las gang ni sdug bsngal la su zhig bde ba dang ldan zhes gzigs pa'am/sems can 'di rnams las dge ba dang nyes par spyod pa'i rgyu gang dang gang gis bde ba dang sdug bsngal 'di lta bur 'gyur snyam du gzigs pa'o/ /byang chub sems dpa'i spyad pa spyod pa'i tshul la mkhas pa bstan pa gang la gnas na zhes pa la byang chub sems dpa'i spyad pa ni skabs 'dir thabs dang bcas pa'i bslab pa la bya la/tshul ni thob pa la bya ba ste bslab pa 'dis ji ltar 'dod pa'i don thob par byed pa'i phyir ro/ /mkhas pa ni thabs dang shes rab kyis yongs su zin pa/ nyan thos ltar ma yin pa gong du bshad pa'i tshul lta bur bslab pas so/ /gang la gnas na byang chub sems dpa' sems dpa' chen po rnams theg pa chen po rtog par khor du chud par 'gyur zhes pa ni byang chub sems dpa' rnams kyi spyod pa'i tshul la mkhas pa'i thabs dang shes rab kyis yongs su zin pa'i bslab pa de la rab tu gnas na de bslab pa la zhugs pa zhes bya ste/de la bslab pa la zhugs pa'i byang chub sems dpa' sems dpa' chen po rnams theg pa chen po la rab tu zhugs par 'gyur ba de nyon cig ces pa'o/ /gsang ba pa'i bdag po de la byang chub sems dpas srog gcod pa dang zhes pa nas log par lta ba las slar bzlog par bya'o zhes pa'i bar gyis mi dge ba bcu las ldog par bya ba'i ming rnams smos pa yin la/de dag gi bshad pa ni 'og nas 'chad par 'gyur ro/ /gsang ba pa'i bdag pos gang la bslab na sangs rgyas dang byang chub sems dpa' rnams dang spyod pa mtshungs par bslab par 'gyur la byang chub sems dpa'i bslab pa ni 'di dag yin no zhes pa ni gong du smos pa'i bslab pa de rnams la bslab na sangs rgyas dang byang chub sems dpa'i spyod pa rnams la bslab pa yin pas sangs rgyas dang byang chub sems dpa'i go 'phang thob ste/de bas na bslab pa 'di dag la bslab na sangs rgyas dang byang chub sems dpa' rnams kyang spyad pa gcig la mtshungs pa bslab par shes pa'o/ /de nas yang bcom ldan 'das la gsang ba pa'i bdag po phyag na rdo rjes 'di skad ces gsol to zhes pa nas tha dad du bgyi ba ni ci zhig mchis zhes pa'i bar ni byang chub sems dpa' rnams dang nyan thos dang 'jig rten pa thams cad la yang bslab pa 'di bshad na de la khyad par ci mchis zhes phyag na rdo rjes zhus pa ste/'jig rten pa mu stegs byed ces pa ni 'jig rten pa phal bas mi bya ba'i bslab pa'i dngos po la sogs pa bstan pa 'di la 'jug pa'i sgo byed pa rnams la bya'o//khyad par ni ci zhig mchis zhes pa ni bslab pa de'i rang bzhin gyi khyad par dris pas so/ /tha dad du bgyi ba ni ci zhig mchis zhes pa ni rgyu dris pa ste 'og nas 'chad pa dang sbyar ro//gsang ba pa'i bdag po de'i phyir rab tu rnam par dbye ba'i tshul dang tshul gcig tu bstan pa'i chos kyi rnam grangs bstan gyis nyon cig ces pa ni rab tu rnam par dbye ba ni 'jig rten pa dang nyan thos dang byang chub sems dpa' rnams kyi bsam pa'i tshul ni bye brag 'og nas bstan pa'i tshul gyis tha dad do//tshul gcig pa ni dge ba bcu'i rang bzhin du mtshungs par bstan pa'i phyir ro/ /gsang ba pa'i bdag po de la ngas gang nyan thos rnams la bslab pa bstan pa gang yin pa de ni thabs dang shes rab tu mi ldan pa bka' sgrub par byed pa phyogs gcig shes pa rtogs pa ste/de bas na de dag dang dge ba bcu'i las kyi lam dang mtshungs par mi 'gyur ro zhes pa ni 'phags pa nyan thos rnams ston pas ji skad du bstan pa'i bka' bzhin du grub pa yin gyi/byang chub sems dpa' ltar rang gi shes rab kyis lung dang rigs par sbyar zhing 'phral la ji ltar rig par mi byed la/ thabs dang shes rab med cing gang zag la bdag med par rtogs pa'i phyogs gcig pa'i shes pa la gnas pas mtshungs par mi 'gyur ro zhes pa'o//'jig rten pa rnams ni bdag gi dngos po la mngon par zhen pa dang gzhan gyi rkyen gyis 'jug go zhes pa ni 'jig rten pa rnams ni skye ba dang 'jig pa dang bde ba dang sdug bsngal ba dang bslab pa'i dngos po la sogs pa thams cad bdag ces pa'i dngos po des bya'o zhes pa dang bdag ces pa de gzhan gyi rkyen gyis bslab pa la 'jug pa ste/bdag go snyam pa'i dngos po la brten pas mnyam par mi 'gyur ro zhes pa'o/ /theg pa chen pos 'gro ba'i byang chub sems dpa' rnams ni chos thams cad kyi mnyam pa nyid la 'jug par bya ba'i phyir zhes pa ni don dam par chos thams cad stong pa nyid kyi rang bzhin nyid du mnyam pa nyid la zhugs shing kun rdzob tu chos thams cad sgyu ma lta bu'i rang bzhin du mnyam pa nyid la zhugs pa'o//gzhan gyi dring mi 'jog cing zhes pa ni 'jig rten pa bdag tu rtog pa gzhan gyi rkyen gyis 'jug pa lta bu ma yin zhes pa'o//thabs dang shes rab kyis yongs su zin pa zhes pa ni gong du bshad zin to/ /bdag dang gzhan gnyi ga'i don byed pa la 'jug go zhes pa ni thabs dang shes rab kyis yongs su zin pa'i bslab pa de lta bu la bdag kyang spyod la gzhan yang bsdu ba rnam pa bzhi'i sgo nas bsdu zhing spyod du gzhug pa zhes pa ste/de bas na 'jig rten pa dang nyan thos dang byang chub sems dpa' rnams kyi bslab pa dag mtshungs par mi 'gyur ro zhes sbyar ro/ /de bas na gsang ba pa'i bdag po byang chub sems dpa' sems dpa' chen pos shes rab dang thabs kyis yongs su zin par chos thams cad la 'jug pa'i phyir brtson par bya'o zhes pa ni gong du bshad pa rnams bsdus pa'i tshig ste/'jig rten pa dang nyan thos rnams kyi bslab pa thabs dang shes rab med pa ltar ma yin pa shes rab dang thabs su ldan pa'i tshul ji skad bshad pa de lta bus chos thams cad la sbyar bar bya'o zhes pa'o//de nas bcom ldan 'das kyis byams pa chen po dang thugs rje chen po'i spyan gyis sems can gyi khams rnams la gzigs nas byang chub sems dpa' phyag na rdo rje la bka' stsal pa zhes pa ni gong du byang chub sems dpa'i bslab pa ming tsam du smos pa rnams re re nas zhib tu bshad pa'i phyir bka' stsal pa ste/byams pa ni sems can thams cad bde ba la dgod pa'i mtshan nyid yin la thugs rje ni sdug bsngal las bral ba'i mtshan nyid do/ /byams pa dang thugs rje de dag nyid bcom ldan 'das kyi spyan de byams pas ni sems can gyi khams rnams las su zhig bde ba la gzhag par 'os pa dang thugs rjes ni su zhig sdug bsngal dang bral bar 'os pa gzigs pa'i phyir ro//skabs gzhan du gsang ba pa'i bdag po phyag na rdo rjes zhes smos la/'dir byang chub sems dpa' phyag na rdo rje zhes smos pa ni bslab pa 'di dag byang chub sems dpa' spyi'i yin pa'i phyir ro/ /de la byang chub sems dpas ched du bsams te srog gcod pa las slar ldog par bya'o zhes pa ni 'dul ba la sogs pa'i gzhung las ji skad du grags pa rnam pa lnga dang ldan pa'i mtshan nyid spang bar bya ste/dbyug pa ni spang zhing 'khon du 'dzin pa spang bar bya'o/ /des bdag la ji lta ba bzhin du gzhan gyi srog kyang bsrung bar bya'o zhes pa ni mtshon cha 'chang ba dang 'khon du bzung nas dgrar byed pa ni srog gcod pa'i yan lag yin pas de dag spang ba ni spong ba'i yan lag yongs su rdzogs par bya ba'i phyir ro//de bzhin du ma byin par len pa la sogs pa lhag ma rnams kyang gzhung las ji skad du 'byung bar zad de skabs skabs nas spyod par bya ba ma yin pa rnams la gnang ba yang khyim pa'i phyogs su gtogs pa'i byang chub sems dpa' rnams la bya'i rab tu byung ba ni 'dul ba'i gzhung dang 'gal bas ma yin no zhes byang chub sems dpa'i tshul khrims kyi le'u las 'byung ngo //de nas yang bcom ldan 'das la gsang ba pa'i bdag po phyag na rdo rjes 'di skad ces gsol to zhes pa nas/ji ltar ltung bar mi 'gyur ba de bshad du gsol zhes pa'i bar ni god du bshad pa'i dge ba bcu'i dngos po rnams rtsa ba nyams pa dang mi nyams par 'gyur ba'i bye brag dris pa ste/ de la rab tu byung ba rnams kyi sdom pa ni so so thar pa'i skabs su bshad pas 'dir mi gleng la/skabs 'dir khyim na gnas pa'i byang chub sems dpa' la bya bas de yang rnam pa gnyis te/ khyim lnga'i sdom pa blangs pa dang sdom pa ma mnos par yi dam du bsrung ba'o/ /de la dge ba bcu'i las kyi lam 'di rnams kyi sdom pa nyams pa dang zhes pa ni khrims lnga'i sdom pa mnos pa'i byang chub sems dpa'i dge ba bcu'i las kyi lam rnams kyi sdom pa ji tsam gyis med par 'gyur ba de bshad du gsol zhes pa'o//shin tu rtsa nas chad par 'gyur ba zhes pa ni khrims lnga ma mnos par bdag nyid kyis yi dam du bsrung ba ji tsam gyis med par 'gyur ba de bshad du gsol zhes pa'o//bcom ldan 'das byang chub sems dpa' rgyal srid dbang phyug dang khyim dang chung ma dang bu dang bu mo dang nye du dang snag gi gnyen rnams kyis yongs su bskor zhing lha dang mi'i bde ba myong bar bgyid kyang ltung bar mi 'gyur ba de bshad du gsol zhes pa ni gong ma'i tshig nyid rgyu mtshan gyis bkrol te byang chub sems dpa' khyim na gnas pa la bye brag tu zhus pa ste/khyim na gnas pa'i byang chub sems dpa' bu smad dang 'khor gyis bskor zhing lha dang mi'i longs spyod la spyod cing dbang byed kyang de rnams kyi dbang du mi 'gyur bas thabs mkhas pas dge ba bcu'i sdom pa las mi nyams zhing ltung bar mi 'gyur ba bshad du gsol zhes zhus pa ste/'og nas bcom ldan 'das kyis slar gsungs pa dang sbyar ro/ /de yang khyim na gnas pa'i byang chub sems dpa' rnams la bye brag tu phye ste bshad pa ste/thabs dang thabs mtshungs sna tshogs kyis/ /rgyal srid la ni dbang byed do/ /zhes pa nas/ bzo'i gnas rnam pa sna tshogs ston cing zhes pa'i bar ni rab tu byung ba ni tshe 'di nyid kyi 'bad cing rtsol gyi khyim pa'i byang chub sems dpa' ni dus dang yul chad pa med de tshe 'di 'ba' zhig gi ma yin gyi tshe rabs du mar rtog cing rtsol ba dang thabs sna tshogs pa du ma'i sgo nas sangs rgyas kyi zhing la sogs pa'i yul gang du skyes kyang rung bar rtsol ba'o//de bas na/ 'di ltar thabs kyis yongs su zin par zhes bya ba la sogs pa gsungs pa yin no//rol mo la sogs pa dang bzo rnam pa mang po ston pa yang sems can so so dang rjes su mthun par sbyar nas bsdu ba rnam pa bzhi'i sgo nas bsdus te bla na med pa yang dag par rdzogs pa'i byang chub tu gdon pa'i phyir ro//de la srog gcod pa dang zhes pa nas log par lta ba rab tu spangs pa yin te zhes pa'i bar ni byang chub sems dpa'i khrims lnga po'i dngos po smos pa'o/ /bslab pa'i gzhi de lnga bzung nas/ /zhes pa nas thabs shes rab kyis yongs su zin par spyod cing zhes pa'i bar ni bslab pa de rnams kyi rjes su bsngags pa ste/de lta bur slob pas ltung ba'i rtsa ba bzhi ni srog gi phyir yang nyams par mi bya'o zhes pa dang sbyar ro/ /khyim pa'i byang chub sems dpa' ji skad smos pa'i bslab pa 'di lnga la dad pas bslabs na sngon gyi de bzhin gshegs pa'i bslab pa bla na med pa de bzhin gshegs pas bsngags pa'i bslab pa dang rjes su mthun par bslabs pa yin te/de ci'i phyir zhe na/ sngon gyi de bzhin gshegs pas kyang 'dus ma byas pa'i tshul khrims kyi phung po la gnas nas 'dus byas kyi tshul khrims thabs dang shes rab kyis yongs su zin pa la bslabs nas bla na med pa brnyes te/de bas na 'di ltar bslab pa ni de dag gi rjes su slob pa zhes bya'o/ /'dus ma byas pa'i tshul khrims kyi phung po la gnas nas zhes pa ni chos thams cad gdod ma nas ma byung zhing ma skyes pa stong pa nyid kyi rang bzhin du rtogs pa la gnas nas zhes pa'o//'dus byas kyi tshul khrims zhes pa ni srog gcod pa las slar ldog par la sogs pa ming gis smos pa rnams so/ /thabs dang shes rab kyis yongs su zin pa zhes pa ni snga ma bzhin no/ / de ltar slob ma de 'og nas ming gis smos pa'i rtsa ba bzhi po 'di srog gi phyir nyams par mi bya ste/ bzhi po 'di yang sngar dam tshig gi skabs su bshad zin to/ /de ci'i phyir zhe na/ 'di dag ni slar gsor mi rung pa'o zhes pa ni/ bzhi po 'di dang ldan na byang chub sems dpa' zhes kyang mi bya ste/sngar gsor mi rung ba'o zhes pa'o/ /bzhi po de thabs dang shes rab tu mi ldan pa rang bzhin gyis nyon mongs pa can te/ slar gsor mi rung zhes pa dang sbyar te/ thabs dang shes rab tu mi ldan pa zhes pa ni bzhi po de 'jig par byed pa'o//de bas na/ de ci'i phyir zhe na/ gang dag 'das pa'i sangs rgyas dang / /de bzhin gang dag ma byon dang / /gang yang da lta'i mgon po rnams/ /thabs dang shes rab ldan pa la/ /bslabs nas bla med byang chub ni/ /'dus ma byas pa des thob po/ /zhes gsungs pa yin te/de bas na bzhi po 'di dang ldan zhing thabs dang shes rab med na bla na med pa'i byang chub 'dus ma byas pa thob par mi 'gyur bas slar gsor mi rung ba'o zhes pa'o/ /de ltar thabs dang shes rab tu mi ldan pas slar gsor mi rung na nyan thos rnams la thabs dang shes rab tu mi ldan pa'i bslab pa de lta bu ji ltar bshad ce na/thabs dang mi ldan ye shes dang / /bslab pa dag kyang bshad pa ni/ /dpa' bo chen po'i nyan thos rnams/ /de la gzung ba'i phyir bshad do/ /zhes pa ste/ nyan thos rnams la ngas thabs dang shes rab tu mi ldan pa'i bslab pa bstan pa yang nges pa'i don du bstan pa ma yin gyi/de dag gi snod dang sbyar zhing drang ba'i phyir ro zhes pa'o/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ byang chub sems dpa'i bslab pa thabs dang ldan pa rim par phye ba rgyas pa'o// //bcom ldan 'das rnam par snang mdzad kyi sku mi zad pa la sogs pa'i rdo rje'i rgyan gyi 'khor lo 'dir byin gyis brlab pa las sngags bzlas pa'i skabs la thog mar spyir phyi dang nang gi bzlas pa'i yan lag bzhi bstan to//de'i 'og tu de bzhin gshegs pa'i snying po bzhi'i skabs su nang gi bzlas pa'i yan lag bzhi bstan to/ /de'i 'og tu dpa' bo chen po'i snying po'i skabs su nang gi bzlas pa'i yan lag gsum bstan te/ de rnams kyang bzlas pa'i grangs dang dus nges pa'i bsnyen pa bya ba gsungs pa yin no//da ni yi ge brgya pa'i skabs 'dir bzlas pa'i yan lag gcig dang grangs dang dus med pa'i bsnyen pa ma yin par kun du sangs rgyas pa'i skur bsgrub pa gnas yongs su gyur pa'i bar du bzlas pa'i mtshan ma 'chad do/ / de bas na bzlas pa de rnams kyang rags pa dang phra ba'i rim pas bshad par shes par bya ste/ dang po nyid du phyi dang nang gi bzlas pa'i yan lag bzhi pa'i phyi dang nang gnyi ga la dmigs pas rags so/ /de'i 'og tu nang gi bzlas pa'i yan lag bzhi ni phyi rol du sangs rgyas kyi sku la mi dmigs par nang du rang gi snying gar de bzhin gshegs pa'i sku bsams nas zlos pas de bas phra'o//de'i 'og tu dpa' bo chen po skabs su snying gar de bzhin gshegs pa'i skur bsams pa yang gsal btab ste/ dbang chen la sogs pa'i dkyil 'khor gang yang rung ba bsams nas yan lag gsum du byas te zlos te de bas kyang phra'o//yi ge brgya pa'i skabs 'dir ni bdag nyid stong pa nyid kyi ting nge 'dzin la gnas nas snying po'i sgra tsam la dmigs nas yan lag gcig pur byas te zlos pas gong ma kun pas phra bar rig par bya'o//de la yi ge brgya po kun kyang kun du sangs rgyas pa yin yang yi ge aM du byin gyis brlab pa ste/ de yang yi ge brgya pa 'byung ba'i rim par phye ba dang / sgra'i 'bras bu'i sbyor ba bstan pa'i rim par phye ba dang / yi ge brgya pa rnam par dgod pa sgrub pa'i rim par phye ba dang / bdag nyid bsgrub pa rim par phye ba dang /rdzogs par byang chub pa'i ngo bo nyid bstan pa'i rim par phye ba ste/ rim par phye ba lngas yi ge brgya pa bshad pa'i yan lag rdzogs par shes par bya'o/ /de la 'dir de nas yang bcom ldan 'das rnam par snang mdzad kyis thabs dang ldan pa'i 'khor 'dus pa la gzigs te zhes pa la sogs pas dang por yi ge brgya pa 'byung ba'i rim par phye ba bshad de/de la yi ge brgya po ni aM zhes pa nyid kyi nang du 'dus par shes par bya ste/ 'dir klad kor ni nga dang nya dang Na dang ma rnams kyi rang bzhin te/ka sde ni nga'i rang bzhin du 'dus so/ /rtsa'i sde ni nya'i nang du 'dus so/ /Ta'i sde ni Na'i nang du 'dus so/ /ta'i sde ni na'i nang du 'dus so/ /pa'i sde ni ma'i nang du 'dus so/ /de ltar yi ge nyi shu dang rnam par shes pa'i rim par phye ba las bshad pa dang sbyar bas a yang aM la 'dus la/r-i r-I dang l-i l-I ni ra dang la dngos so/ /ya ni i I'i nang du 'dus la ba ni u U'i nang du 'dus te/ de ltar ya ra la wa rnams ni der 'dus so/ /aM la sogs pa gang dang ldan pas yi ge nyi shu lnga po rnams byang chub dang spyod pa dang kun du sangs rgyas pa dang mya ngan las 'das pa bzhi po la yi ge nyi shu rtsa lnga lnga la sbyar na brgya par 'gyur te/yi ge de rnams gcig tu bsdus pa ni a zhes pa ste a ni shes bya dang shes pa gnyis ka stong pa'i mtshan nyid yin la klad kor yang stong pa'i mtshan nyid de/ a yi ge a bzhi char yang de'i nang du 'dus pas aM de nyid bcom ldan 'das kun du sangs rgyas pa'i rang bzhin yi ge brgya pa zhes bya'o//nga dang nya dang Na dang na dang ma rnams dang sha dang Sha dang sa dang ha dang a dang aM dang AHrnams ni ting nge 'dzin thams cad kyi dbang po yin pas 'dir yi ger mi bgrang ngo //thams cad dang ldan pa'i 'khor 'dus pa la gzigs te zhes pa ni sngar bshad pa bzhin no/ /bstan pa don yod par grub par bzhengs nas zhes pa la bstan pa zhes pa ni gdul bya'i 'gro ba rnams la bslab pa'i phyir bstan pa zhes byas nas mdo sde la sogs pa thams cad la yod mod kyi skabs 'dir ni sngags kyi bstan pa la bya ste/de yang bzlas pa'i grangs dang dus nges par bstan nas bsgrub par bya bar gong du bshad pa rnams ni/ gsang sngags grangs ni sum 'bum du/ /phal cher ngas ni bshad pa dag /lus can sdig dang bral ba yi//sngags pa rnam par dag pa la/ /bzlas brjod grangs 'di bstan pa ste/ /gzhan du bya ba ma yin no/ /zhes 'byung bas sngon du grangs dang dus nges pa'i bsnyen pa byas kyang rgyu ma dag pa'i sems can rnams kyis mi 'grub pa yang srid de/ de dag ni gdon mi za ba yin la/'dir ni gnas yongs su 'gyur ba'i mtshan ma 'byung gi bar du bzlas par gsungs pas mtshan ma 'byung ba de nyid grub pa ste/ mtshan ma de byung nas mi 'grub pa mi srid pas gdon mi za bar zhes bya ste/ bcom ldan 'das bstan pa de grub par bzhengs nas gsang sngags thams cad kyi dbang phyug gsang sngags kyi mgon po gzi brjid kyi rgyal po gsungs so zhes sbyar ro//gsang sngags thams cad kyi dbang phyug gsang sngags kyi mgon po gzi brjid kyi rgyal po chen po zhes pa yang kun du sangs rgyas pa'i rang bzhin du aM zhes pa de nyid la bye brag tu bya la/de'i rang bzhin yang rnam pa gsum du rig par bya ste/ rtogs pa'i mtshan nyid dang lung gi mtshan nyid don dam pa dang kun rdzob kyi mtshan nyid gnyis te/ de ltar rnam pa gsum mo/ /de la rtogs pa don dam pa'i rang bzhin ni yi ge a zhes pa dang de la sogs pa'i sngags kyi yi ge rnams so//de la gsang sngags thams cad kyi dbang phyug ces pa la gsang sngags thams cad ces pa ni 'jam dpal gzhon nur gyur pa la sogs pa'i ting nge 'dzin gyi rang bzhin rnam par thar pa'i ye shes phyogs gcig pa chos thams cad zhi ba dang bral ba'o zhes pa la sogs pa dang /kun rdzob de dag nyid kyi skur snang ba dang lung gi chos su yi ge aM la sogs pa ni sngags thams cad do/ /de dag gi dbang phyug gi bcom ldan 'das kun du sangs rgyas pa'i yi ge brgya pa ste/ phyogs gcig pa rnams kyang der kun du 'dus la/ kun rdzob tu yang bcom ldan 'das kyi sku las sngags kyi gzugs phal che ba 'byung zhing lung gi chos kyang aM la sogs pa ni yi ge thams cad 'byung ba ste/ kun rdzob dang don dam pa kun du yang gsang sngags thams cad der gtogs shing de'i dbang gis 'gyur bas na aM de gsang sngags thams cad kyi snying po zhes bya'o//rgyal po chen po zhes pa ni kun rdzob dang don dam pa gnyis kar yang sngags phal mo che las yon tan thams cad kyis 'phags pa'i phyir ro/ /gzi brjid ces pa ni mthu phun sum tshogs pa bstan pa ste/mthu chen po dang zhes pa'o/ /gsang sngags kyi mgon po zhes pa ni skyabs zhes pa'i don te gong du bshad pa'i tshul gyis gsang sngags thams cad de las byung zhing der 'du ba'i phyir ro/ /de lta bu'i snying po 'jam pa'i gsung gis phyag na rdo rje la bka' stsal pa zhes pa dang sbyar te/phyag na rdo rje yang ci 'dra ba zhig ce na/ dam tshig gsum la gnas pa la/ /lam gsum yongs su rdzogs par byed/ /ces gsungs te/ dam tshig gsum zhes pa ni bcom ldan 'das kyi sku dang gsung dang thugs mi zad pa'i rdo rje'i rgyan la bya ste/phyag na rdo rje la sogs pa'i byang chub sems dpa' sa bcu yongs su rdzogs pa rnams ye shes chen po dang ldan pa'i dbang bskur ba na bcom ldan 'das kyi sku las 'od zer btang ba'i byin gyi rlabs kyis sku mi zad pa la sogs pa'i rdo rje'i rgyan gsum po de dag mthong zhing zhugs pas dam tshig gsum la gnas pa zhes pa'o//lam gsum yongs su rdzogs par byed pa zhes pa ni dam tshig gsum thob par byed pas lam ste/ de phyag na rdo rjes rdzogs par byed pa'o/ /gsang sngags mgon ni snga ma bzhin no//de'i tshe ye shes dam pa zhes bya ba'i ting nge 'dzin la snyoms par zhugs nas zhes pa ni bcom ldan 'das ting nge 'dzin de la zhugs nas kun du sangs rgyas pa'i ye shes dam pa chos thams cad gzod ma nas ma byung ma skyes par mkhyen pa'i rang bzhin gyi yi ge chad pas ting nge 'dzin gyi ming yang ye shes dam pa zhes bya'o//de bas na ye shes sna tshogs 'byung ba zhes bya ba la sogs pas yi ge aM de'i khyad par gsungs pa yin te/ ye shes sna tshogs ni rtogs pa'i chos dang lung gi chos sna tshogs pa kun rdzob dang don dam pa'i tshul gnyi ga mkhyen pa la bya ste/yi ge aM zhes pa 'di las de lta bu'i ye shes de 'byung ba la bya'o/ /'od zer brgya 'phro ba zhes pa ni don dam par de bzhin nyid kyi ye shes rgya mtsho dang 'dra ba de las ye shes phyogs gcig pa'i sngags gzhan rnams 'byung ba dang / kun rdzob tu de bzhin gshegs pa'i sku las sngags kyi sku mang po 'byung bas khams gsum du khyab pa dang /lung gi chos su yang yi ge aM las gong du bshad pa'i tshul gyis yi ge brgya rnams 'byung zhing sngags thams cad la khyab pa'i phyir ro/ /lag na rdo rje 'di gsang sngags thams cad kyi mgon po gzi brjid chen po ste zhes pa ni gong du bshad pa'i tshul bzhin no//'di ni bdag nyid rdzogs sangs rgyas/ /zhes pa ni yi ge aM zhes pa 'di bcom ldan 'das kun du sangs rgyas pa'i phung po lhag ma dang bcas pa'i mya ngan las 'das pa'i rang bzhin nyid yin no zhes pa'o//chos kun dbang phyug ces pa ni lung gi chos dang rtogs pa'i chos kun mkhyen pas chos kun dbang phyug ces pa'o/ /thub pa yin zhes pa ni lus dang ngag dang yid gsum thub pa'i mtshan nyid de shAkya thub pa nyid la bya'o/ /mi shes mun nag kun 'joms pa//nyi ma shar ba bzhin du snang / /zhes pa ni rtogs pa'i chos dang lung gi chos gnyis ka la sgrib pa spang ste ji ltar mun pa na 'dug pa'i rdzas rnams dngos po gang yin mi shes pa las nyi ma shar ba na rdzas dag gsal bar mthong ba bzhin du/ thams cad mkhyen pa'i ye shes des kyang ma rig pa'i mun pa bsal kyang kun rdzob dang don dam pa'i dngos po rnams gsal bar mkhyen pa ste/des ni spong ba phun sum tshogs pa bstan la/ /tshig gong mas ni ye shes phun sum tshogs pa bstan to/ /thub pa chen po bdag nyid kyis//'di lta bur byin gyis brlabs te/ /zhes pa ni kun du sangs rgyas pa stong pa nyid kyi rang bzhin de nyid shAkya thub pa'i skur byin gyis brlabs te shes pa'o/ /de ltar byin gyis brlabs nas kyang ci zhig mdzad ce na/ sems can rnams la phan bzhed phyir//sprul pa rnams ni sprul par mdzad/ /ces bya ba gsungs te/ shAkya thub pa'i skur byin gyis brlabs nas/ sems can rnams kyi don du rnam par sprul pa sna tshogs pa rnam par sprul zhes pa'o/ /rnam par sprul pa de yang de snyed cig sprul zhe na/ 'di ni sems can rnam dag gis//sems pa 'byung ba ji snyed pa/ /de rnyed kyi ni sprul pa yis/ /go 'phang dam pa mdzad par 'gyur/ /zhes gsungs te/ sems kyi 'jug pa ji snyed pa dang ji tsam 'dod pa de snyed kyi sku rnam par sprul par byed ces pa'o/ /de ni stong pa nyid las ldang bar bstan pa ste/de bas na sngar don dam pa stong pa nyid kyi ting nge 'dzin la gnas nas phyis kun rdzob tu kun du sangs rgyas pa'i skur bsgyur ba la sogs pa'i spyod pa rnams bya'o zhes dgongs so/ /de bas rnam pa thams cad du/ /rdzogs sangs rgyas kyis thabs 'dod pas//nang gi bdag nyid rnam dag pas/ /rtag tu mngon par brtson par bya/ /zhes pa ni mjug bsdu ba'i tshig ste/ kun du sangs rgyas pa'i rang bzhin de lta bu yin pas na gang kun du sangs rgyas pa'i sku thob par 'dod pas kun du sangs rgyas pa'i sku'i yi ge brgya pa'i rang bzhin du bsgom pa la brtson par bya'o zhes pa ste/de bas rnam pa thams cad du/ /zhes pa ni lus dang ngag dang yid rnam pa thams cad kyi sgo nas zhes pa'o/ /rtag tu ni dus thams cad du'o/ /nang gi bdag nyid rnam dag pas/ /zhes pa ni sems gtso bor bshad pa ste/ bdag gi lus bcom ldan 'das kyi skur bsgyur ba tsam gyis chog pa ma yin gyi/nang sems kyi ting nge 'dzin rnam par dag pas nan tan la mngon par brtson par bya'o zhes pa'o/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ yi ge brgya 'byung ba bstan pa rim par phye ba rgyas pa'o// //yi ge brgya pa'i rang bzhin gsum las don dam pa de bzhin nyid kyi ye shes rtogs pa'i rang bzhin dang / kun rdzob tu bcom ldan 'das kyi sku'i rang bzhin dag ni yi ge aM gi don du blta bar bya'o/ / yi ge aM ni tshig gi rang bzhin du blta ste/ de la kun du sangs rgyas pa'i rang bzhin gyi yi ge aM 'di ni bcom ldan 'das gsung gi rgyan sna tshogs su 'byung ba sdud pa'i sgor 'gyur te/ de yang 'dir don dang dam tshig gi bye brag gis rang bzhin gsum du dbye mod kyi/ sangs rgyas kyi bya ba byed pa'i sgor ni tha mi dad de/de dag gi bya ba'i las kyang gzugs dang sems kyis byed la/ gzugs kyi bya ba'i las kyang dag dang sems kyis byed cing / sems kyi bya ba'i las kyang lus dang ngag gis byed do/ /de bas na skabs 'dir yi ge brgya pa'i 'bras bu'i sbyor bas kun du sangs rgyas pa'i gsung mi zad pa de ston te/de las kun du sangs rgyas pa'i yi ge'i 'bras bu ni sems can yongs su smin pa dang ma smin pa rnams yongs su grol ba dang smin par byed de/ de yang de nas bcom ldan 'das rnam par snang mdzad kyis gsang ba pa'i bdag po phyag na rdo rje la bka' stsal pa zhes pa la sogs pa'o//de la gsang ba pa'i bdag po sangs rgyas bcom ldan 'das rnams gang gi tshe zhes pa nas dam tshig gsum gyi lam la gnas par gzigs so zhes pa'i bar ni kun du bzang po la sogs pa'i byang chub sems dpa' sa bcu yongs su rdzogs pa rnams rang rang gi mthu dang spyod yul gyi rdzu 'phrul sna tshogs dang sangs rgyas kyi zhing rnams sna tshogs brgyan pa'i mthus mgu zhing 'khod pa la bcom ldan 'das mngon par byang chub pa'i sku'i mdzod spu las bkod pa'i 'od zer byung bas byang chub sems dpa' de rnams kyi gtsug tu phog ste/'od zer de'i byin gyi rlabs kyis byang chub sems dpa' de rnams ye shes chen po mngon par shes par dbang bskur ba dang ldan pa'i sa thob par gyur te/ de'i tshe byang chub sems dpa' de rnams kyis bcom ldan 'das kyi sku dang gsung dang thugs mi zad pa rdo rje'i rgyan dam tshig gsum gyi rang bzhin rtogs shing mngon du 'gyur zhes pa'o//sangs rgyas bcom ldan 'das zhes pa ni sa bcu'i gnas yongs su rdzogs shing dbang bcu'i dbang thob pa chos rnams sgyu ma lta bur rnam pa thams cad du rtogs pa'i byang chub sems dpa' de rnams nyid la sangs rgyas zhes bya'o//ye shes chen po zhes pa ni de bzhin nyid kyi ye shes la bya ste ye shes de byang chub sems dpa' de rnams kyis mngon par shes par bya ba'i phyir 'od zer gyi dbang bskur ba las ye shes chen po mngon par shes par dbang bskur ba zhes bya'o//yang na ye shes chen po yang de yin la/ mngon par shes pa yang de yin pas ye shes chen po mngon par shes pa ste/ ye shes chen po snga ma bzhin du chos thams cad stong par rtogs pa ste don dam pa'o//mngon par shes pa drug ni/ mngon par shes pa ste kun rdzob kyi ye shes so/ /de ltar don dam pa dang kun rdzob kyi ye shes de byang chub sems dpa' de rnams kyis thob par bya ba'i phyir dbang bskur ba ni ye shes chen po mngon par shes par dbang bskur ba zhes bya ste/dbang bskur ba de dang ldan pa ni dbang bskur ba dang ldan pa'i sa thob par gyur pa zhes pa ni sems kyi khyad par nyid la bya'o/ /de'i tshe sangs rgyas bcom ldan 'das de dag ces pa ni byang chub sems dpa' de dag nyid la bya'o/ /dam tshig gsum zhes pa ni bcom ldan 'das kyi sku dang gsung dang thugs mi zad pa'i rdo rje'i rgyan gyis khams gsum thams cad du khyab pa la bya ste/dam tshig gi don ni skabs 'dir kun du rtog pa'am thob pa la bya ste/ sku mi zad pa'i rgyan la sogs pa khams gsum du khyab par 'byung ba de ni byang chub sems dpa' de rnams kyis de'i tshe mthong zhing ye shes kyis rtogs pa'i phyir ro//lam zhes pa ni dam tshig de dag rtogs pa'i phyir zhugs pa la bya'o/ /bdag nyid gnas par gzigs so zhes sbyar te bcom ldan 'das kyi spyod yul dam tshig gsum gyi rang bzhin de dag byang chub sems dpa' de rnams kyi yang spyod yul du gyur te/mthong zhing rtogs par bdag nyid kyis gzigs so zhes pa'o/ /gsang ba pa'i bdag po de'i tshe yang bcom ldan 'das zhes pa nas/ sangs rgyas kyi mdzad pa nye bar bstan to zhes pa'i bar ni sa bcu la gnas pa'i byang chub sems dpa' sangs rgyas kyi mdzad pa dam tshig gsum po de rnams la zhugs par gyur pa de'i tshe na sangs rgyas kyi gsung sna tshogs sdud pa'i sgor gyur pa yi ge brgya pa'i rang bzhin bcom ldan 'das kun du sangs rgyas pa de gzungs kyi tshul du gyur nas sangs rgyas kyi ming can byang chub sems dpa' de rnams la sangs rgyas kyi mdzad pa nye bar ston pa ste/bcom ldan 'das zhes pa ni kun du sangs rgyas pa nyid la bya'o/ /ye shes chen po mngon par shes par dbang bskur ba dang ldan pa zhes pa ni kun du sangs rgyas pa de nyid kyi bye brag ste/ ye shes chen po ni snga ma bzhin no//mngon par shes pa zhes pa ni ye shes chen po de mngon par rtogs pa zhes pa'o/ /dbang bskur ba dang ldan pa zhes pa ni ye shes chen po mngon par rtogs pa'i ched du dbang bskur ba dang ldan pa zhes pa'o/ /gzungs kyi tshul zhes pa la don gyi gzungs dang tshig gi gzungs te rnam par mi rtog pa la 'jug pa'i dbang dang gzungs la sogs pa'o//bcom ldan 'das kun du sangs rgyas pa ye shes chen po mngon par shes pa dbang bskur ba dang ldan pa nyid gzungs gyur nas sangs rgyas kyi mdzad pa sems can yongs su smin pa dang grol bar gyur pa'i thabs sna tshogs byang chub sems dpa' de rnams la ston te/de bas na sangs rgyas kyi mdzad pa nye bar ston to zhes gsungs pa yin no/ /de nyid kyi tshe/ sangs rgyas bcom ldan 'das zhes pa nas/ /dam tshig gsum gyi lam ston par nye bar gnas par 'gyur ro zhes pa ni de ltar bcom ldan 'das kun du sangs rgyas de byang chub sems dpa' sangs rgyas zhes bya ba de rnams la sangs rgyas kyi mdzad pa ston pa dang byang chub sems dpa' de rnams kyang rang gi dam tshig gsum gyi rang bzhin ji ltar mthong zhing rtogs pa de sangs rgyas kyi mdzad pa'i tshul des dam tshig gsum po de rnams kyi lam ston pa la zhugs so zhes pa ste/de la de nyid kyi tshe sangs rgyas bcom ldan 'das de dag ces pa ni gong du smos pa'i byang chub sems dpa' de dag nyid la bya'o/ /sems can thams cad la zhes pa ni yongs su dag pa dang ma dag pa'i sems can ji ltar snod du gyur pa rnams la'o//sangs rgyas kyi mdzad pa zhes pa ni snga ma bzhin no/ /dam tshig gsum gyi lam zhes pa ni sku mi zad pa'i rdo rje'i rgyan la sogs pa thob par gyur pa'i lam mo/ /ston par nye bar gnas par 'gyur ro zhes pa ni byang chub sems dpa' de rnams ji ltar snod du gyur pa'i sems can rnams la dam tshig gsum thob par byed pa'i lam de bstan pas sems can de rnams kyi sku mi zad pa la sogs pa'i rgyan dam tshig gsum gyi rang bzhin de thob par 'gyur ba'i phyir ro//gsang ba pa'i bdag po nga'i gsung gi 'khor lo zhes pa nas/ byung ba yin no zhes bya bar rab tu mi shes pa la ltos zhes pa'i bar ni de bzhin gshegs pa'i gsung gi 'khor lo sangs rgyas kyi dbyangs sna tshogs las shAkya thub pa'i skur sprul te 'jig rten gyi khams thams cad du khyab par yongs su smin pa dang ma smin pa'i sems can ji ltar snod du gyur pa rnams la sangs rgyas kyi phrin las mdzad par 'gyur ba bshad pa ste/gsang ba pa'i bdag po nga'i gsung gi 'khor lo zhes pa ni de bzhin gshegs pa'i sangs rgyas kyi gsung rnam pa sna tshogs su 'byung ba sems can rnams kyi rgyud du 'gro bas na 'khor lo zhes bya ste/dkyil 'khor sprul pa rgya chen po zhes pa ni gsung gi 'khor lo de las shAkya thub pa'i sprul pa de dag gis 'jig rten gyi khams nam mkha'i dbyings ma lus pa de snyed du khyab par sangs rgyas [(]gyi [,]kyi [)]mdzad pa ston pas na rgya chen po zhes bya'o//'jig rten gyi khams mtha' yas par khyab par zhes pa ni chos kyi dbyings so sor rnam par rig par byed pa zhes pa dang sbrel te sprul pa'i sku des chos kyi dbyings kyi tshig dang don rnams 'jig rten gyi khams su khyab par sems can thams cad la ston la/de yang rnam par dag pa'i sgo sha stag ste/ rnam par dag pa'i sgo zhes pa ni chos kyi dbyings rnam par dag pa la 'jug pa'i thabs zhes bya'o/ /sems can thams cad re ba ji lta ba bzhin du mgu bar byed pa chos kyi dbyings so sor rnam par rig par byed pa'i sgo zhes pa ni de ltar chos thams cad ston pa de yang sems can so so'i dad pa dang rjes su mthun pa ste/sangs rgyas kyis 'dul ba la sangs rgyas kyi chos ston/ /de bzhin du nyan thos dang rang sangs rgyas dang brgya byin dang tshangs pa la sogs pas so so'i dad pa dang rjes su mthun pa'i chos rnams sngon du ston te/de yang chos kyi dbyings su 'jug pa'i thabs sha stag go/ /da lta 'di ltar bcom ldan 'das shAkya thub pa 'jig rten gyi khams nam mkha'i khams gyis klas pa ma lus par zhes pa ni de lta bu'i chos ston pa yang shAkya thub pa'i sku gcig gam gnyis shig gis ma yin gyi/nam mkha'i khams kyis klas pa ji snyed pa de snyed kyi 'jig rten gyi khams ma lus par khyab pa'i shAkya thub pa'i skus sems can thams cad la ji ltar bsams pa bzhin du mgu bar byed pa'i chos kyi dbyings rab tu ston zhes pa'o//de bas na sangs rgyas kyi bya ba byed pa la zhugs zhes gsungs pa ste/ shAkya thub pa'i sku de rnams kyis 'jig rten gyi khams de snyed du de ltar snod du gyur pa'i sems can ma smin pa ni yongs su smin par byed pa smin pa rnams grol bar byed pa'i sangs rgyas kyi bya ba la rab tu zhugs zhes pa'o//sangs rgyas kyi bya ba byed pa shAkya thub pa'i sku de rnams sangs rgyas kyi gsung rnam par bkod pa'i rgyan gyi snying po las byung ba ste/ bcom ldan 'das kyi gsung gi 'khor los sprul pa'i sangs rgyas kyi gzugs yin par ni sems can rnams kyis mi shes kyi/shAkya'i rigs kyi rgyal po zas gtsang ma'i lus las 'di ltar gyur to zhes zin to/ /de'i phyir gsang ba pa'i bdag po de la sems can rnams 'di ni zhes pa la sogs pa gsungs pa yin no/ /'on kyang byang chub sems dpa' 'jig rten gyi khams mtha' yas pa rgya mtsho snyed kyi sgor zhes pa la sogs pa ni de ltar gsung gi 'khor lo las sprul pa'i sku rnams kyis 'jig rten gyi khams thams cad du khyab par sangs rgyas kyi bya ba byed pa'i shAkya thub pa'i sku rnams bstan kyang sems can rnams kyis sprul pa de dag gi 'khor lo las byung bar mi shes mod kyi//'on kyang byang chub sems dpa' 'jig rten gyi khams mtha' yas pa rgya mtsho snyed kyi sgor zhes pa la sogs pa la chos kyi dbyings mngon par rdzogs par byang chub par bya ba la brtson pa byang chub sems dpa' kun du bzang po'i spyod pa las byung ba 'jig rten gyi khams mtha' yas pa nas byung ba'i byang chub sems dpa' rnams 'jig rten gyi khams kyi rigs rgya mtsho me tog gi gzhi'i snying po'i rgyan can 'di ngas yongs su bzung bas sangs rgyas kyi zhing 'di rnam pa sna tshogs kyis brgyan par byed cing byang chub kyi snying po mngon par sgrub pa dang byang chub tu mngon par rdzogs par 'tshang rgya ba la sogs pa yang byang chub sems dpa' de rnams kyi rang bzhin mthu 'ba' zhig yin gyi de'i sangs rgyas kyi zhing brgyan par byed pa la sogs pa de rnams byed do zhes pa ste/de lta bur mdzad pa yang shAkya thub pa'i sku nyid kyis yin mod kyi/ gdul ba'i 'gro ba byang chub sems dpa' yongs su dag pa de dag gis ni shAkya thub pa'i sku yang longs spyod rdzogs pa'i skur mthong bar 'gyur te/ de bas na skabs tha ma'i 'di ni longs spyod rdzogs pa'i skus byang chub sems dpa' de rnams kyi don mdzad par bstan par shes par bya ste/de dag ni bsdus pa'i don to/ /tshig gi don la 'on kyang zhes pa ni de bzhin gshegs pa'i sprul pas sems can rnams la sangs rgyas kyi bya ba ston pa'i shAkya thub pa'i sku de 'jig rten pa rnams kyis de bzhin gshegs pa'i sprul par mi shes mod kyi/'on kyang shAkya thub pa des 'og nas 'byung ba'i don de rnams kyang mdzad do zhes pa'i/ /'jig rten gyi khams mtha' yas pa rgya mtsho snyed kyi sgo ni byang chub sems dpa' bshad pa de rnams 'byung ba'i gnas la bya ste/'jig rten gyi khams mtha' yas pa de dag shes shing brtag par dka' ba rgya mtsho dang 'dra ba'i phyir rgya mtsho zhes bya'o/ /sgo zhes pa ni byang chub sems dpa' de rnams 'jig rten gyi khams 'di dag nas 'byung ba'i phyir ro/ / chos kyi dbyings mngon par rdzogs par byang chub par bya ba la brtson pa la byang chub sems dpa' kun du bzang po'i spyod pa las byung ba zhes pa ni sangs rgyas kyi zhing brgyan pa la sogs pa byed pa'i byang chub sems dpa' de dag gi bye brag ste/ chos kyi dbyings ni de bzhin nyid kyi ye shes la bya la/mngon par rdzogs par byang chub par bya ba la brtson pa zhes pa ni de bzhin nyid kyi ye shes chos kyi dbyings de mngon par rtogs pa'i phyir brtson pa zhes pa'o/ /byang chub sems dpa' kun du bzang po'i spyod pa las byung ba zhes pa ni byang chub sems dpa' kun du bzang po'i smon lam las skyes pa'o//'jig rten gyi khams kyi rigs rgya mtsho'i me tog gi gzhi'i snying po'i rgyan can 'di zhes pa mi mjed kyi 'jig rten gyi khams la bya ste/ me tog gi gzhi zhes pa ni 'jig rten gyi khams de me tog gis brgyan pa'o/ / snying po zhes pa ni 'byung ba'i gnas so/ /rgyan can zhes pa ni 'jig rten gyi khams me tog gis brgyan pa de sems can gang dag bsod nams spyad pa rnams kyi rgyud la byung bas na bsod nams kyi 'bras bu 'jig rten gyi khams de lta bur skye bar 'gyur te/ sems can de dag gis brgyan zhes pa'o//rigs rgya mtsho zhes pa ni sangs rgyas kyi zhing de yang 'jig rten gyi khams kyi rgyud rgya mtsho'i grangs snyed dang ldan pa'i sangs rgyas kyi zhing zhes pa'o/ /ngas yongs su bzung bas zhes pa ni longs spyod rdzogs pa'i sku'i ma thus so zhes pa ste/ sangs rgyas kyi zhing rnams ni yongs su sbyong zhes pa dang sbyar te/bsam pa sna tshogs pa rnam par dag pa'i sgo rnams kyis zhing rnams ni yongs su sbyong zhes pa ni byang chub sems dpa' de dag gi bsam pa rnam par dag pa sna tshogs pa'i sgo nas sangs rgyas kyi zhing yongs su sbyong ngo zhes pa ste/de yang bcom ldan 'das kyi mthus sbyong bas yongs su bzung bas zhes pa dang sbyar ro/ /byang chub kyi snying po ni mngon par bsgrub ces pa ni byang chub kyi snying po 'og min gyi gnas su mngon par byang chub pa'i sa dang mi'i gnas su byang chub chen por mngon par byang chub pa'i gnas dag la byang chub kyi snying po zhes bya ste/de dag byang chub sems dpa'i 'di rnams kyis yongs su rdzogs par byed ces pa'o/ /byang chub tu ni mngon par 'tshang rgya zhes pa ni nyon mongs pa'i sgrib pa yongs su byang ba'i byang chub nam mkha'i mtshan nyid lta bu mngon par rtogs par byed ces pa'o//chos kyi 'khor lo ni bskor zhes pa ni gzhung las ji skad du grags pa'i chos kyi 'khor lo bskor ba'o/ /sangs rgyas kyi mdzad pa ni byin gyis rlob cing zhes pa ni sems can yongs su smin pa dang grol bar byed pa'i mtshan nyid can gyi sangs rgyas kyi mdzad pa byin gyis rlob ces pa'o//de'i gong du yang dag par rdzogs pa'i sangs rgyas kyi go 'phang 'dod pas zhes pa ni de ltar sangs rgyas kyi zhing yongs su sbyong ba la sogs pa byas nas kun du sangs rgyas pa'i go 'phang du 'phar bar byed pa ste/de'i tshe chos thams cad stong pa nyid du rtogs pa'i mtshan nyid de bzhin nyid kyi ye shes mngon par rtogs te de ltar mngon du byed pa na sems tshad med pa la sogs pa 'og nas 'byung ba'i yon tan rnams thob par 'gyur ba ste/ de yang / sems can med pa'i phyir zhes pa nas/ tshad med pa bzhi rab tu thob par 'gyur ro zhes pa'i bar du'o/ /de la sems tshad med pa ni sems la rnam par rtog pa la sogs pa rnam pa thams cad dang bral te chos thams cad stong pa nyid du rtogs pa'i sems nam mkha'i rang bzhin lta bur 'gyur te/ nam mkha' ni stong pa'i mtshan nyid cis kyang ma gos shing thams cad du yang ma khyab pa med pas tshad gzung du med pa'o//de bzhin du stong pa nyid kyi rang bzhin gyi sems des thams cad du khyab par 'gyur bas sems tshad med pa'o/ /lus tshad med pa zhes pa ni de ltar sems tshad med pa thob pas de dag gi lus kyang sems ji snyed pa de snyed du lus kyis khyab par 'gyur te/de bas na lus tshad med pa'o/ /lus tshad med pa'i phyir ye shes tshad med ces pa ni de ltar lus tshad med par gyur na lus ji snyed par gyur pa de dag thams cad ye shes byin gyis brlabs pa dang bcas par 'gyur te/lus ji snyed pa de dag gi ye shes 'byung bas na ye shes tshad med pa zhes bya'o/ /ye shes tshad med pa'i phyir sems can tshad med ces pa ni sku dang ye shes de dag kyang sems can ji snyed pa de snyed du 'byung ste/ de dag tshad med pas sems can tshad med pa'o/ /sems can tshad med pa'i phyir nam mkha'i khams tshad med pa rab tu 'thob po zhes pa ni nam mkha'i khams ji snyed pa sems can gyi khams kyang de snyed de sems can gyi khams tshad med par rtogs na nam mkha'i khams kyang tshad med par rtogs par 'gyur ba rab tu thob par rig par bya'o//gsang ba pa'i bdag po de ltar na sems tshad med pas tshad med pa bzhi thob par 'gyur ro zhes pa ni nam sems can nyid stong pa nyid kyi rang bzhin nam mkha'i mtshan nyid lta bur gyur pa rab tu thob na lus dang ye shes dang sems can dang nam mkha'i khams kyang de bzhin nyid du 'gyur ba thob po zhes pa'o//thob nas yang dag par rdzogs pa'i sangs rgyas su 'gyur ro zhes sbyar te/ de ltar de bzhin nyid kyi ye shes dang sems can dang nam mkha'i khams kyang de bzhin nyid du 'gyur ba thob bo zhes pa'o/ /thob nas kyang yang dag par rdzogs pa'i sangs rgyas su 'gyur ro zhes sbyar te/de ltar de bzhin nyid kyi ye shes mngon du byas na de ma thag tu kun du sangs rgyas pa phung po lhag ma dang bcas pa'i mya ngan las 'das pa'i rang bzhin gyi go 'phang thob par 'gyur ro zhes pa'o/ /stobs bcu'i stobs dang ldan pa bdud bzhi las rgyal ba zhes pa la sogs pa zhes pa ni kun du sangs rgyas pa de nyid kyi bye brag ste gzhung las ji skad grags pa'o//khyu mchog dang seng ge'i sgra sgrogs pa zhes pa ni ji ltar seng ge'i sgras byol song thams cad zil gyis gnon par gyur pa de bzhin du bcom ldan 'das kun du sangs rgyas pa de yang 'dus byas thams cad mi rtag pa dang sdug bsngal ba la sogs pa'i chos kyi sgra sgrogs pas rtag pa dang bde ba la sogs par lta ba'i mu stegs pa rnams zil gyis gnon par 'gyur ba dang /rdzogs sangs rgyas kyis gsungs pa yi//snying po sgo brgya 'di bslabs nas/ /go 'phang dam pa 'di dag kun/ /dpa' bo de dag kun gyis rtogs/ /zhes pa ni gong du smos pa'i yon tan thams cad byang chub sems dpa' dpa' bo de rnams kyis thob nas kun du sangs rgyas pa'i go 'phang dam pa der 'tshang rgya'o//de ltar kun du sangs rgyas pa'i go 'phang dam pa der 'tshang rgya ba yang kun du sangs rgyas pa'i snying po yi ge brgya pa de bzlas shing bsgom pa thob par 'gyur zhes pa'o/ /yi ge brgya pa'i 'bras bu'i sbyor ba rnam pa gsum gyi bye brag bstan pa yang rim gyis 'phar ba'i tshul shes par bya ste/sa bcu gcig pa'i byang chub sems dpa' sangs rgyas zhes bya ba de dag sa bcu gcig pa la gnas pa las bcom ldan 'das kyi 'od kyis bskul te dam tshig gsum gyi lam la zhugs pa nas sa bcu gcig pa de las 'phar te/ye shes chen po mngon par shes par dbang bskur ba dang ldan pa'i sa la gnas par shes par bya'o/ /de nas kun du sangs rgyas kyi gzugs su gyur cing sangs rgyas kyi mdzad pa bstan pa dang / de bzhin gshegs pa'i sprul pa'i sku shAkya thub pas spyir sangs rgyas kyi mdzad pa ston pa na byang chub sems dpa' de dag kun du bzang po'i sa la gnas par shes par bya'o//byang chub sems dpa' kun du bzang po'i spyod pa las byung zhing longs spyod rdzogs pa'i skus btang ste sangs rgyas kyi zhing spyod pa na kun du sangs rgyas pa'i sa ma thob kyi bar du kun du bzang po'i sa las ni 'phar/kun du sangs rgyas pa'i sa la ni 'jug pa'i stegs bu'i sa la gnas par shes par bya'o/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/'bras bu'i sbyor ba bstan pa rim par phye ba rgyas pa'o// //spyir gdul ba'i 'gro ba rtogs pa gtso bor gyur pa yongs su dag pa dang lung gi chos la gnas pa yongs su ma dag pa ste rnam pa gnyis so/ /de la yi ge brgya pa'i 'bras bu sbyor ba bstan pa'i rim par phye ba ni yongs su dag pa'i gdul ba'i 'gro ba rnams kyi don mdzad pa bstan pa'o//rim par phye ba 'dir ni yongs su ma dag pa'i 'gro ba rnams kyi don mdzad pa bstan pa ste/ gang gi phyir bcom ldan 'das kyi rgyu dang 'bras bu'i yon tan rnams kun du sangs rgyas pa'i snying po yi ge brgya pa'i mtshan nyid aM zhes pa'i gzugs su byin gyis brlabs pa'i de'i 'og tu 'byung ba'i rim par sgrub pa pos rang gi snying gar bsams te kun du sangs rgyas pa'i skur bsgrub pa'i phyir//de nas yang bcom ldan 'das la gsang ba pa'i bdag po phyag na rdo rjes 'di skad ces gsol to zhes pa la sogs pa gsungs pa yin te/de la/ sngags rnams kyi ni sngags 'byung ba'i/ /sngags kyi mgon po 'di bshad pa/ /ngo mtshar che'o bcom ldan 'das/ /zhes pa ni yi ge brgya pa'i rang bzhin gong du bshad pa de yon tan dang mthu che bas ngo mtshar che'o zhes pa'o//sngags kyi mgon po zhes pa dang sngags 'byung ba zhes pa yang snying po de nyid kyi bye brag ste sngar bshad pa bzhin no/ /thub pa chen po gnas gang du/ /gang gis ji ltar 'tshal bar bgyi/ /zhes pa ni yi ge brgya pa rnam par dgod pa sgrub pa'i rim par phye ba zhes pa ste/gang gis zhes pa ni sgrub pa po ci 'dra bas 'tshal bar bgyi zhes pa/ gang dag theg chen dkyil 'khor ni/ /snying rje 'byung bar dbang bskur zhing / /zhes pa la sogs pa sgrub pa po'i mtshan nyid 'og nas bshad pa dang sbyar ro/ /ji ltar zhes pa ni snying po de ci 'dra bar rig par bgyi zhes pa ste/gser gyi kha dog 'bar dang bcas/ /zhes pa la sogs pa dang sbyar ro/ /thub pa chen po gnas gang du/ /zhes pa ni snying po de gnas gang du dgod par bgyi zhes pa ste/ de yi gnas ni snying ga ste/ /zhes pa dang sbyar ro//de las sngags rnams 'byung ba ni/ /gang gis ji ltar bdag la gsungs/ /zhes pa ni bdag nyid sgrub pa rim par phye ba bris pa ste/ snying po yi ge brgya pa de las sngags phal rnams 'byung na rgyu gang dang thabs ji lta bus 'byung zhes pa ste/ 'od zer sku las byung ba rnams//yan lag gis ni yan lag gnas/ /zhes pa la sogs pa bdag nyid sgrub pa las chad par 'gyur ba dang sbyar ro/ /mgon po smra ba rnams kyi mchog /'di kun bdag la bshad du gsol/ /zhes pa ni gong du zhus pa de rnams bka' stsol cig ces pa'o//smra ba rnams kyi mchog ces pa ni stong pa'i tshig ste smra ba rnams kyi nang na dam pa zhes pa'o/ /de skad ces gsol nas bcom ldan 'das zhes pa la sogs pa ni gong du zhus pa de rnams slar 'chad pa ste/ chos kyi dbang phyug thub pa che/ /zhes pa ni bcom ldan 'das kyi bye brag ste/lung dang rtogs pa'i chos la dbang du gyur cing lus dang ngag dang yid gsum thub pa'o/ /kun mkhyen bcom ldan snang mdzad kyi/ /de tshe 'jig rten khams kun du/ /yongs su khyab par 'gyur ba'i tshig /'jam dpal gsung gis bka' stsal pa/zhes pa ni bcom ldan 'das rnam par snang mdzad thams cad mkhyen pas 'jig rten gyi khams ma lus pa thams cad khyab pa'i tshig tu gsungs so zhes pa tshig de yang / sems dpa' chen po legs so legs so zhes pa la sogs pa'o/ /rab tu gsang zhes pa ni sems las byung ba'i mtshan nyid shin tu phra ba zhes pa'o//ngo mtshar chen po zhes pa ni yig 'bru sems kyis bsams pa las kun du sangs rgyas pa'i sku la sogs par 'gyur bas ngo mtshar che zhes pa'o/ /sangs rgyas rnams kyi gsang ba'i mchog /ces pa ni snying po de'i don dam pa dang kun rdzob kyi rang bzhin sems can rtog ge ba rnams kyi rjes su dpag pa'i sogs pa'i sgo nas brtags pas mi rtogs pas/sangs rgyas rnams kyi gsang ba'i mchog /ces bya ste/ de bas na/ rtog ge kun gyis mi shes pa/ /zhes gsungs so//gang dag theg chen dkyil 'khor ni/ /snying rje 'byung bar dbang bskur zhing / /zhes pa nas/ bdag nyid chen po shes par 'gyur/ /zhes pa'i bar gyis gang gis 'tshal bar gyur pa zhus pa'i lan bshad pa ste/ theg pa chen po'i dkyil 'khor snying rje chen po 'byung ba zhes bya ba der dbang bskur zhing zhi gnas dang lhag mthong dang ldan pa'i sgrub pa pos snying po 'di shes par 'gyur zhes pa ni spyi'i don to//yan lag gi don ni/ gang dag theg chen dkyil 'khor ni/ /snying rje 'byung bar dbang bskur zhing / /zhes pa ni sgrub pa po gang ji snyed chen po 'byung ba'i dkyil 'khor du dbang bskur ba des snying po 'di shes par 'gyur zhes pa ste/theg pa zhes pa ni 'gro pa'i tshig ste/ rang bzhin gyi dkyil 'khor sku la sogs pa mi zad pa'i mtshan nyid 'dir 'gro ba'am/ gzugs brnyan gyi dkyil 'khor 'di'i sgo nas 'dis 'gro bar 'gyur ba ste/snying rje 'byung ba'i dkyil 'khor 'di la bya'o/ /chen po zhes pa'i tshig ni spyir gsungs mod kyi/ 'on kyang skabs 'dir ni lus kyi dkyil 'khor dang ngag gi dkyil 'khor gnyis kun rdzob kyi mtshan nyid yin pas chen po zhes mi bya'i/sems kyi dkyil 'khor don dam pa'i rang bzhin yin pas de la chen po zhes bya ste/ mdor na gsang ba'i dkyil 'khor du dbang bskur ba zhes pa'o/ /gsang ba'i dkyil 'khor der dbang bskur na sngar bshad pa'i tshul gyis dam tshig lnga char dang ldan zhing dbang gsum char dang ldan par 'gyur te/de ltar dkyil 'khor gsum char la rim pa bzhin du bslabs pa yongs su rdzogs pa'i sgrub pa por 'gyur ba'i phyir ro/ /gang dag drang zhing mnyen pa dang / /zhes pa ni sgrub pa po de gsang ba'i dkyil 'khor du dbang bskur ba 'ba' zhig gis chog pa ma yin gyi/skabs 'dir ni sgrub pa po gong ma dag ltar bzlas pa las byung ba'i sgrub pa'i spyod yul can te/ drang zhing zhes pa ni sems la g.yo dang gya gyur med pa zhes pa'o/ /mnyen pa zhes pa ni khengs pa dang zhe sdang med pa ste/ gang dag drang zhing mnyen pa ni ting nge 'dzin dang rjes su mthun pas zhi gnas dang ldan par bstan pa'o//rtag tu snying rje gang che dang / /gang dag nam yang byang chub la/ /dmigs pa can du mi lta ba/ /zhes pa ni shes rab med par zhi gnas 'ba' zhig tu gyur na dmigs par 'gyur te/ snying rjes sems can thams cad sdug bsngal dang bral bar byed cing de bzhin nyid kyi ye shes rang bzhin byang chub kyi sems des dngos po dmigs par blta zhing stong ba nyid rtogs pa'i lhag mthong dang ldan par gsungs pa yin te/ de ltar lhag mthong dang zhi gnas dang ldan pa de dag gi snying po bdag nyid chen po 'di shes par 'gyur ro zhes pa'o//'dren pa gang na bzhugs pa yi/ /zhes pa nas/ mthu chen rtag tu gnas pa bzhugs/ /zhes pa'i bar ni/ mthu chen po gnas gang du/ zhes zhus pa'i lan bshad pa ste/ sgrub pa pos dang por sangs rgyas dang byang chub sems dpa' thams cad mngon du bsams te/phyag byas nas de dag gi spyan sngar sdig pa bshags pa la sogs pa dang / dam tshig gi phyag rgya bcings pa la sogs pa bzhin du bya ste/ rang gi snying gar pad+ma dkar po 'dab ma brgyad pa bsams la/de'i steng du rlung gi dkyil 'khor me long lta bur gsal bar bsam zhing de'i dbus su bcom ldan 'das yi ge brgya pa aM zhes pa bsams te/ de yang me long gi nang na gzugs brnyan snang ba bzhin du de nyid du zhi bar blta ste/ de ni gnas pa'i bsdus pa'i don to//tshig gi don la/ 'dren pa gang na bzhugs pa yi/ /de yi gnas ni snying ga ste/ /zhes pa ni 'dren pa de'i gnas ni sgrub pa po'i snying gar bya'o zhes pa'o/ /pad+ma yid las byung ba ni/ /'dab ma brgyad pa rab mdzes la/ /zhes pa ni 'dren pa de'i gnas snying ga zhes bya ba de yang yid kyis bsam pa'i pad+ma 'dab ma brgyad pa shin tu gsal zhing dkar ba snying gar bsams la de'i steng du zla ba'i dkyil 'khor bsams te/de'i dbus su 'dren pa de bsam zhes pa ste de bas na/ dkyil 'khor zla ba lta bu ni/ /zhes gsungs pa yin no/ / dri med me long 'dra ba la/ /zhes pa ni zla ba yang dkar mod kyi dri ma rab rib kyis mi snang bas de las gsal bar bsam par bya ba'i phyir/ me long ltar shin tu dri ma med cing gzugs brnyan 'char ba la snying po de bsam zhes pa'o/ /mthu chen rtag tu gnas pa bzhugs/ / zhes pa ni me long la snying po de rtag par gnas shing bzhugs par bya'o zhes pa ste/ rtag par gnas zhes pa ni don dam pa'i rang bzhin dang kun rdzob kyi sku'i rang bzhin la bstod pa ste/ don dam pa'i rang bzhin de bzhin nyid kyi ye shes de mi 'gyur par yongs su grub pa'i tshul gyis rtag par gnas pa zhes bya la/kun rdzob tu sku'i rang bzhin du yang bcom ldan 'das kyi sku mi zad pa'i rgyan de sngon gyi shugs kyis 'khor ba'i mtha' ji srid pa de srid du sems can rnams kyi don gyi phyir phyin ci ma log par yongs su grub pa'i tshul gyis rtag par bzhugs pa'o//yang na sgrub pa po ji srid ting nge 'dzin la gnas pa de srid du snying po de yang mi g.yo bar rtag par gnas par bya'o/ /de la gsang sngags mgon po ni/ /zhes dang / gser gyi kha dog 'bar dang bcas/ /sdig dang bral ba'i ting 'dzin gnas/ /nyi ma bzhin du brtag par dka'//zhes pa ni ji ltar 'tshal bar bgyi zhes zhus pa'i lan bshad pa ste/ gser gyi kha dog 'bar dang bcas/ /zhes pa ni snying po'i kha dog gser 'dra ba la 'od 'phro ba dang bcas pa zhes pa'o/ /sdig dang bral ba zhes pa ni/ 'bras bu'i rang bzhin la bstod pa ste/shes bya dang nyon mongs pa la sogs pa'i sdig pa'i rtog pa dang bral zhes pa'o/ /ting 'dzin gnas zhes pa ni ting nge 'dzin gyi yi ge'i 'bru dbyi ba mi srid de/ /de bas na sgrub pa'i ting nge 'dzin du 'dug pa la snying po de gnas zhes bya'o/ /nyi ma bzhin du brtag par dka'//zhes pa gzi brjid dang ldan par bsam par gsungs pa ste/ ji ltar nyi ma 'od zer gyis bskor ba la mig mi chags shing blta bar mi bzod pa bzhin snying po 'di yang rang las 'phros pa'i 'od kyis bskor zhing blta dka' bar bsam zhes pa ste/ don ni mdor na snying gar me long gi dkyil 'khor de'i dbus su snying po kha dog gser 'dra ba dang bcas te 'phros pa'i 'od kyis sgrub pa po'i lus khyab par bsam zhing 'od 'phro ba de dag nyid 'dus pa las rang gi lus shin tu sangs rgyas ba'i skur gyur par bsams te/de ltar gyur pa na yang zla ba'i dkyil 'khor la gnas pa'i snying po yang snga ma bzhin du snying ga na gnas par bsam zhes pa'o//de bas na/ de yis 'gro ba 'di dag kun/ /phyi rol dang ni nang du yang / /kun du khyab par byin gyis brlabs/ /zhes gsungs pa yin te/ 'gro ba 'di dag kun zhes pa ni sgrub pa po'i phung po lnga po 'di dag kun snying po 'dis kun du khyab par byin gyis brlabs zhes pa'o//de la phyi rol gyi byin gyis brlabs pa ni phyi'i lus kun du sangs rgyas pa'i skur gyur pa'o/ /nang gi byin gyis brlabs pa ni snying gar zla ba'i dkyil 'khor la gnas pa'o//yang na 'gro ba 'di dag kun/ /zhes pa ni 'phags pa 'jam dpal dang spyan ras gzigs kyi dbang po la sogs pa sngags kyi lha rnams la bya ste/ de dag thabs 'dis kun du khyab pa ste/ phyi'i gzugs de dag gi gzugs su bsgyur ba dang / nang gi yi ge a la sogs pa zla ba'i dkyil 'khor la bsam par bya ba yang snying po 'dis byin gyis brlabs pa las byung ba'i phyir ro//de ltar rang gi lus kun du sangs rgyas pa'i skur bsgyur ba snying gar zla ba'i dkyil 'khor la snying po dang bcas pa bsams shing bsgoms na kun du sangs rgyas pa'i sku dang ldan pa'i rig pa 'dzin par 'gyur ro//de ltar na de'i lus mthong ba dang des smras pa dang bsam pa'i sems can skal pa dang ldan pa rnams ji ltar bsam pa'i don rnams 'grub par 'gyur ro zhes 'og nas 'byung ba dang sbyar ro/ /me long nang du shes par byos//zhes pa nas/ bdag gi las kyis 'byung bar 'gyur/ /zhes pa'i bar ni snying gar zla ba'i dkyil 'khor yang me long nyid du shes par bya'o zhes pa nas yi ge bsam pa de las kun du sangs rgyas pa'i skur bsgyur bar bya ba'i thabs bstan pa ste/ me long yid du shes par byos//zhes pa ni snying gar me long bsam pa de ni me long gi dngos po gzhan ma yin gyi/ rnam pa dang bcas pa'i sems ni yid ces bya ste/ yid de nyid me long gi dkyil 'khor gyi rnam par 'gyur bar shes par byos shig ces pa'o/ /shes rab mig kyang de nyid de//zhes pa ni me long gi dkyil 'khor du gyur pa'i skad cig phyi ma la gsal bar rtog cing yongs su dpyod pa'i ngang tshul gyis sems 'byung ba ni shes rab ces bya ste/ shes rab snying po la rtog pas na yid ces bya'o/ /sngags pa shes rab mig gis su/ /me long la ni rnam bltas na//de ni rang gzugs rdzogs sangs rgyas/ /mtshan nyid rab tu zhi bar mthong / /zhes pa ni skad cig ma phyi ma'i shes rab kyi snying po dang bcas pa'i zla ba'i dkyil 'khor la rtse gcig tu rtog pa'i tshe gong du bshad pa'i tshul du snying po de'i 'od 'phros te 'dus pa las rang gi gzugs kun du sangs rgyas pa'i sku'i mtshan nyid du gyur par mthong ba zhes pa'o//de bas na/ de'i tshe lus la lus kyi gzugs/ /zhes gsungs te/ bdag gi lus la bcom ldan 'das kyi sku'i gzugs su bya'o zhes pa ste/ de ni phyi rol gyi lus sangs rgyas kyi skur sems pa'i thabs so//yid las yid las byung ba ni/ /zhes pa bdag gi yid las byung ba'i me long gi dkyil 'khor snying po dang bcas pa bsam zhes pa ste/ de ni phyi rol gyi lus sangs rgyas kyi skur bsgyur ba'i tshe nang du yang snying po dang bcas pa'i zla ba'i dkyil 'khor bsam zhes pa'o//dag cing rnam par mdzes pa dag /bdag gi las kyis byang bar gyur/ /zhes pa ni phyi dang nang gnyis ka de ltar bsgoms na phyi'i lus kun sangs rgyas pa'i sku rnam par mdzes shing dag par gyur pa dang nang gi yid la yang snying po dang bcas pa'i zla ba'i dkyil 'khor gsal zhing dag pa ste/dag pa de dag ni bdag gi lus skur bsam pa dang nang gi snying po bsam pa'i bdag gi las byas pa las byung ngo zhes pa'o/ /dag pa zhes pa yang skabs 'dir ye shes la sogs pa dag pa'i mtshan nyid la mi bya'i/ phyi dang nang gi gzugs de dag gsal ba'i sgo nas dag pa'o/ /rang gi las zhes pa yang tshe rabs snga ma'i dge ba la sogs pa la mi bya'i phyi dang nang gi gzugs 'di dag skyed pa'i sbyor ba'i las bya'o/ /de nas de yi 'od zer ni/ /gang gis sngags pa sangs rgyas kyi/ / spyod pa thams cad rab byed pa/ /kun nas rnam par snang bar 'gyur/ /zhes pa ni sgrub pa po kun du sangs rgyas pa'i skur gyur pa de'i tshe de las 'od zer 'phro zhing byung ba rnams kyi mthus sngags de kun du sangs rgyas pa'i spyod pa thams cad byed nus par 'gyur ro zhes pa'o//yang na snying po de las 'od zer 'phro zhing 'byung ba na a las yi ge a'i rigs rnams 'byung ba dang klad kor las ka la sogs rnams 'byung la/ de rnams kyang 'phags pa 'jam dpal la sogs pa sngags kyi lha rnams kyi snying po ste/ de dag thams cad kyang 'og nas bdag nyid sgrub pa'i rim par phye ba las byung ba'i rim pas yid las byung zhing zhes pa la sogs pa kun du sangs rgyas pa'i skur gyur pa'i rjes su bsngags pa gsungs so//de bzhin bdag nyid dag pa yis/ /bltas pa'am ni smras pas kyang / / yid la bsam pa'i las rnams ni/ /thams cad byed par 'gyur ba nyid/ /ces pa ni kun du sangs rgyas pa'i skur gyur pa'i rig pa 'dzin pa de gang gis mthong ba'i sems can de'i ji ltar bsams pa'i don rnams 'grub par 'gyur zhes pa ste/ dgos pa ni/ thams cad byed par 'gyur ba nyid//ces pa dang sbyar ro/ /de bzhin du su zhig rig pa 'dzin pa de dang lhan cig tu smras pa yang don thams cad 'grub par 'gyur zhes pa'o/ /de bzhin du rig pa 'dzin pa des sems can de 'di ltar gyur cig ces bsams na yang de'i dgos pa kun du byed par 'gyur zhes pa'o//rig pa 'dzin pa de mthong ba la sogs pa'i spyod yul du gyur pa'i sems can de dag kyang bsod nams bsags shing skabs dang ldan par shes par bya ste/ sems can de dag gi don byed par 'gyur gyi/ phal rnams kyis de mthong ba la sogs pa'i spyod yul du mi 'gyur ro//gsang ba pa'i bdag po gzhan yang zhes pa nas/ phan tshun byed pa po dang las su rnam par 'jog pa yang mi byed do zhes pa'i bar ni sangs rgyas kyi skur nga rgyal bskyed pa'i phyir de ji ltar 'gyur ba'i rgyu kun rdzob tu rkyen dang 'du zhing tshogs te/'byung ba'i rgyu dang 'bras bu nges pa'i sgo nas bstan pa ste/ 'di ltar lus la lus kyi gzugs bskyed par bya'o zhes pa ni gong du gsungs pa'i tshul gyis bdag gi las kun du sangs rgyas pa'i skur bskyed par bya'o zhes pa'o/ /yang dag par rdzogs pa'i sangs rgyas las lhag pa ni gang yang med de zhes pa ni kun du sangs rgyas pa'i sku la shin tu bsngags pa'i phyir gsung pa ste/kun du sangs rgyas pa'i sku las khyad par du 'phags pa'i gzhan dag gi sku yang med pas na kun du sangs rgyas pa'i sku 'di nyid rang gi lus la bskyed par bya'o zhes pa'o//ji ltar bdag gi mig dang rna ba zhes bya ba la sogs pas ni kun du sangs rgyas pa'i skur bskyed pa de yang don dam par gzugs kyi dngos po med mod kyi/ kun rdzob rgyu dang 'bras bu nges pa'i chos nyid med pa ma yin te/ dper na mig dang rna ba la sogs pa'i dngos po chen po bzhi'i rang bzhin du gtogs pa de dag /don dam par ma yin par stong pa nyid sangs rgyas bcom ldan 'das rnams kyi mkhyen mod kyi/ 'on kyang rgyu dang rkyen 'dus pa las de dag 'byung bar snang ste/ rgyu dang rkyen med na ma yin no zhes gsungs pa yin no//de dag kyang ngo bo nyid kyis stong pa zhes pa ni mig dang rna ba la sogs pa 'byung ba chen po bzhir gtogs pa'i chos de dag gzod ma nas ma byung zhing ma skyes pa'am/ rdul phran phyogs kyi cha la sogs par bshig na de dag rang bzhin yod par mi 'grub ces pa'o/ /ming tsam gyis bsdus pa zhes pa ni dngos po stong bas na ming du gdags pa tsam mo zhes pa'o//dngos po med na ming du gdags pa yang ji ltar yod ce na/ nam mkha' dang mtshungs shing 'dra ba zhes gsungs te/ nam mkha' yang dngos po med mod kyi/ nam mkha' zhes ming du brjod pa de bzhin du 'di dag kyang dngos po med mod kyi/mig dang rna ba zhes ming tsam du brjod do zhes pa'o/ /gzung du med pa zhes pa ni de ltar de dag rang bzhin gyis stong pas na gang gi yang gzung ba'i cha ma yin no zhes pa ste/ tshig de dag gis ni mig la sogs pa'i dngos po de rnams stong pa'i rang bzhin nam mkha' lta bur bstan pa'o//rgyu dang las las byung ba zhes pa'i kun nas nyon mongs pa'i phyogs su bstan pa ste/ /rgyu ni ma rig pa la sogs pa'i nyon mongs pa'o/ /las ni 'phral gyi dge ba la sogs pa lus ngag yid gsum gyi spyod pa ste/de dag don dam par dngos po med kyang kun rdzob du rgyu dang las las skyes par snang ngo zhes pa'o/ /gzugs brnyan dang 'dra ba zhes pa ni kun rdzob tu snang ba yang gzugs brnyan de ma brtags pa'i sgo nas snang bar zad kyi/ gzugs brnyan de rigs pa dang lung gis brtags na bstan mi bzod de yod par mi 'grub pa bzhin no zhes pa'o/ /de bzhin gshegs pa rnams kyis mngon par rdzogs par sangs rgyas so zhes pa ni chos de rnams sngon gyi de bzhin gshegs pa rnams kyis kyang 'di lta bu'i tshul du mngon par mkhyen to zhes pa'o//de dag kyang phan tshun rten cing 'brel par 'byung ba'i rgyun ma chad par 'brel te/ gang rten nas skyes pa de ni gzugs brnyan dang 'dra bar 'byung ngo zhes pa la gal te de ltar gzugs brnyan dang 'dra ba na gzugs brnyan ni gzugs med na mi 'byung ba bzhin du rgyun 'chad dam zhe na/gzugs brnyan bzhin 'chad pa ma yin gyi nyon mongs pa snga ma'i skad cig gi cha shas med kyang nyon mongs bskyed pa'i las dang skye ba dag kyang 'bras bu skyed par byed de/ gzugs med na gzugs brnyan mi 'byung ba ltar ma yin gyi/phan tshun rten cing 'brel bar 'byung ba'i rgyun mi 'chad par 'byung ngo zhes pa'o/ /gang rten nas skyes pa de ni gzugs brnyan dang 'dra bar 'byung ngo zhes pa ni de lta bu'i rkyen las byung ba'i chos de rnams brtag mi bzod cing don dam par yod pa ma yin pa'i dper gzugs brnyan dang 'dra zhes pa'o//de lta bas na phan tshun rten cing 'brel par 'byung ba'i phyir lha gang yin pa de bdag yin/ bdag gang yin pa de ni lha yin no zhes pa ni de ltar don dam par chos yod pa ma yin kyang kun rdzob tu rten cing 'brel bar 'byung ba las chos rnams snang bas na bdag gi rkyen gyis lha bskyed//lha'i rkyen gyis bdag bskyed pa na bdag bskyed do zhes bya ste/ lha gang yin pa de bdag yin zhes pa ni yi ge brgya pa'i rang bzhin aM zhes pa snying ga na gnas pa de bdag gis bsams pa las 'byung ba'i phyir ro zhes pa'o//bdag gi yin pa de ni lha ma yin no zhes pa ni snying po des bdag kun du sangs rgyas pa bskyed pa'i phyir ro zhes pa'o/ /de bzhin du lus kyi lus gzugs ni lha'i skur bskyed par bya'o zhes pa ni de ltar phan tshun rgyu dang rkyen 'dus shing tshogs te byung bas bdag gi gzugs kun du sangs rgyas skur bskyed par bya'o zhes pa'o//gsang ba pa'i bdag po chos la brten nas rtogs pa 'byung / rtogs pa la brten nas kyang chos 'byung ba la ltos zhes pa ni lha gang yin pa de bdag yin bdag yin pa de lha yin zhes pa'i tshig de nyid gzhung gzhan gyis bstan pa ste/chos zhes pa ni aM zhes pa'i yig 'bru'o/ /rtogs pa 'byung ba zhes pa ni kun du sangs rgyas pa'i sku de yi ge de'i rkyen gyis kun du sangs rgyas par 'gyur/ kun du sangs rgyas par 'gyur nas slar yang snying ga'i yi ge bsam par bya ba ni gcig gi rkyen gyis gcig 'byung ba ste/de ltar ltos shig pa'o/ /de gnyis kyang rang bzhin gyis stong pa'i phyir/ phan tshun byed pa dang las su rnam par 'jog par yang mi byed do zhes pa ni yi ge dang gzugs de gnyis rang bzhin gyis stong pa'i phyir yi ges gzugs bskyed pa'i bya ba mi byed la/gzugs kyis kyang yi ge bskyed pa'i bya ba mi byed ces pa'o/ /gsang ba'i bdag po ji ltar na yid la yid las byung ba'i gzugs bskyed par bya zhe na zhes pa la sogs pas ni yid la zla ba'i dkyil 'khor la gnas pa'i sngags kyi 'bru bskyed pa de brtan por bya ba'i phyir yid las ji ltar 'byung ba'i rgyu mtshan bshad pa ste/gsang ba'i bdag po/ /dkar po'am/ ser po'am/ dmar po yid la byas na yid de'i rnam pa la zhen par 'gyur te zhes pa ni chu'i dkyil 'khor dang dbang chen gyi dkyil 'khor dang me'i dkyil 'khor bsams na yid kyang rnam pa ru 'gyur ro zhes pa'o//des na de lta bus dgos pa yang de lta bu kho na mngon par sgrub par byed do zhes pa ni dbang chen la sogs pa'i dkyil 'khor gyi rnam par gyur pa'i yid des dbang chen la sogs pa'i bya ba byed par 'gyur ro zhes pa ste/de bas na/ gsang ba pa'i bdag po 'di lta ste/ yid la dkyil 'khor bsams nas su/ /rims nad can zhig bya ba na ni/ /de yi mod la skye bo ni/ /rims las thar 'gyur dogs pa med/ /ces bya ba gsungs pa yin te/ tsha ba'i rims kyis btab pa la nad pa'i klad pa'i steng du bum pa kha sbub par chu'i dkyil 'khor ji skad du bshad pa bsams la/de las bdud rtsi'i chu dkar po byung bas nad pa'i spyi bo nas mthar gyis phyi dang nang dang bcas par rting pa'i bar du khyab par bsams te/ de'i tshe chus byab cing de'i mod la rims nad thams cad phyir 'byung bar bsam pa de lta bu lan gnyis sam/lan gsum du byas na rims las thar bar 'gyur ba la dogs pa med do/ /de bzhin du dbang chen gyi dkyil 'khor la yang sbyar ro/ /grang zhing 'dar ba'i rims kyis btab pa la me'i dkyil 'khor ji skad du bshad pa bsams nas de'i steng du nad pa bzhag la me des mas yar gyen du lus kyi phyi nang khyab par bsams na grang ba'i rims las thar bar 'gyur ro//yid med par yang dkyil 'khor yod pa ma yin la/ dkyil 'khor med par yang yid mod pa ma yin no//de ci'i phyir zhe na/ dkyil 'khor dang mtshan nyid gcig pa'i phyir ro zhes pa ni dbang chen la sogs pa'i dkyil 'khor de dag dngos po gzhan du yod pa la yid kyis de'i rnam par bsam pa ma yin gyi/ yid nyid dkyil 'khor de dag gi rnam par gyur pas mtshan nyid gcig cing yid dang dkyil 'khor gnyis dbyer med pa ste/de dag gnyis ka don dam par yod pa ma yin pa las kun rdzob tu rnam pa dang bcas pa'i sems kyis brtags pa tsam yin pa'i phyir te/ de bas na de nyid dpes bsgrub par bya ba'i phyir gsang ba pa'i bdag po 'di lta ste zhes bya ba la sogs pas sgyu mar sprul pa gsungs te/mdor na gang yid la zla ba'i dkyil 'khor dang snying po bskyed ba de yang don dam par rang bzhin gyis stong zhing yod pa ma yin mod kyi/ 'on kyang kun rdzob tu rgyu dang rkyen nges pa'i dbang gis don gyi bya ba byed pas na yid la zla ba'i dkyil 'khor snying po dang bcas pa bsam pa la nan tan du bya'o zhes pa'o//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ yi ge brgya pa rnam par dgos pa grub pa rim par phye ba rgyas pa'o// //da ni bcom ldan 'das kun du sangs rgyas pa'i rang bzhin gyi yi ge brgya pa las 'phags pa 'jam dpal dang spyan ras gzigs kyi dbang po la sogs pa'i sngags kyi sku dang yig 'bru rnams 'byung bar bstan pa'i phyir/ de nas yang bcom ldan 'das kyis gsang ba'i bdag po phyag na rdo rje la bka' stsal pa zhes pa la sogs pa gsungs te/de la gsang ba pa'i bdag po sngags kyi mgon po'i sku dang lus su dbyer med pa nyon cig ces pa ni kun du sangs rgyas pa'i sku las sngags kyi lha gzhan rnams 'byung ba'i lus de dag dbyer med pa nyon cig ces pa'o//yid las gyur pa las byung zhing / /zhes pa ni sku de rnams kyang bcom ldan 'das kyi gsung mi zad pa sdud pa'i sgor gyur pa aM zhes pa zla ba'i dkyil 'khor la gnas pa snying gar bsams pa de ni yid las gyur pa zhes bya la/de las kun du sangs rgyas pa'i sku'am/ sngags kyi lha gzhan rnams kyi skur 'byung bas na/ yid las gyur pa las byung zhing / /zhes pa'o/ /yid kyang shin tu rnam sbyangs na/ /zhes pa ni sku de dag yid las 'byung ba yang bsams pa tsam gyis chog pa ma yin gyi/zhi gnas dang lhag mthong zung du 'brel par sbyangs pa las byung ba'i sku'o zhes pa'o/ /mgon po de na bzhugs pa las/ /'od zer sku las byung ba rnams/ /zhes pa ni yid shin tu sbyangs pa de la zhugs shing gnas pa'i snying po de las sngags kyi lha rnams kyi snying po 'byung la/'od zer sku las byung ba rnams/ /zhes pa ni snying po de las ka la sogs pa'i yi ge rnams 'byung zhes pa'o/ /yan lag gi ni yan lag nas/ /rtag par kun du rnam par 'phro/ /zhes pa la yan lag ni a nyid la bya la/ yan lag de'i yan lag ni klad kor dang i dang u la sogs pa ste/de rnams las sngags rnams 'byung bas na/ yan lag gi ni yan lag nas/ /rtag par zhes gsungs pa yin te/ mdor na 'phags pa 'jam dpal lam spyan ras gzigs kyi dbang po'i skur bsgyur ba na gzhan ni rim pa snga ma bzhin te/yi ge a'i klad kor de las yi ge maM la sogs pa gang yang rung ba 'byung bar bsams te de'i 'od 'phros shing 'dus pa las 'jam dpal la sogs pa'i skur bsgyur ro/ /yang na a'i gnas nyid du bsams te/ snga ma bzhin du skur bsgyur bar bya'o//tshul 'di dag ni ma shes pas/ /rmongs pa rnams kyis yongs mi shes/ /zhes pa ni kun du sangs rgyas pa'i sku gcig pu de las sngags kyi sku rnam pa mang po de dag ji ltar 'byung bar 'gyur snyam du yid mi ches shing mi shes pa ni 'og nas 'byung ba'i tshul 'di ma shes pa las yin no zhes pa ste/lus kyi bye brag ji snyed pa/ /brjod pa las ni mang du 'gyur/ /de bzhin sngags kyi mgon po yi/ /bye brag dag kyang grangs med gsungs/ /zhes pa ni sangs rgyas dang byang chub sems dpa' la sogs pa'i lus kyi bye brag mang po dag brjod pa'i rang bzhin yi ge'i 'bru las rnam pa mang du 'byung ba bzhin du/sngags kyi mgon po kun du sangs rgyas pa las sngags kyi lha'i bye brag grangs med pa 'byung ngo zhes pa'o/ /kun du sangs rgyas pa'i rang bzhin de rnam par rtog pa las shin tu 'das na des sku rnam pa mang po 'di rnams ji ltar skyed par byed ce na/ji ltar yid bzhin nor bu ni/ /dpal ldan 'dod pa'i don sgrub pa/ /de bzhin 'jig rten sgron ma yi/ /sku yang don rnams thams cad sgrub/ /ces bya ba gsungs te/ ji ltar yid bzhin gyi nor bu de rnam par mi rtog kyang thams cad kyi re ba yongs su rdzogs par byed la/don thams cad sgrub pa de bzhin du/ sngags kyi mgon po 'jig rten gyi sgron ma de yang rnam par mi rtog bzhin du sngon gyi smon lam gyi shugs kyis sku la sogs pa rnam pa sna tshogs 'byung zhing don thams cad rab tu byed do zhes pa'o//de nyid kyang nam mkha'i dpes bstan pa'i phyir/ gsang ba pa'i bdag po chos kyi dbyings rnam par mi rtog pa ji ltar dgos pa thams cad mngon par sgrub ce na zhes pa la sogs pa gsungs te/ de dag gi ni aM zhes pa ni yi ge brgya pa de las bcom ldan 'das kun du sangs rgyas dang /sngags kyi lha rnams kyi skur bsgyur nas kyang yid zla ba'i dkyil 'khor la gnas par bsam pa'i sbyor ba bshad do/ /'dir ni de ltar bdag gi lus kun du sangs rgyas pa'i sku la sogs par yongs su bsgyur nas kun du sangs rgyas pa dang rjes su mthun pa'i sems kyi yon tan bskyed pa'i phyir sems yongs su sbyang bar bya ba 'chad de/de yang / de nas bcom ldan 'das kyis sems can gyi khams ma lus pa rnam par sbyong ba'i tshig rnams kyis zhes pa la sogs pa gsungs pa la sems can gyi khams ma lus pa rnam par sbyong ba'i tshig ces pa ni ting nge 'dzin sgrub pa'i tshig ces pa la sogs pa 'og nas 'byung ba'i tshig rnams la bya ste/tshig de dag gis sems can rnams kyi nyon mongs pa'i sgrib pa la sogs pa ni sel/ ye shes khyad par can skye bar byed pa'i sgo nas rnam par spyod pa'i phyir ro//sgrub pa'i sems yongs su sbyang bar bya ba yang 'jug pa'i sems dang gnas pa'i sems dang ldan pa'i sems dang ldan pa ste/ de la 'jug pa'i sems ni ting nge 'dzin sgrub pa'i tshig ces pa ste/ gang gi tshe na thog ma nas//cung zad skye ba'am 'jig med pa/ /de tshe rnal 'byor can dag gi/ /stong pa'i ye shes ji ltar skye/ /zhes pa dang sbyar ro/ /bsam gyis mi khyab pa'i tshig ces pa ni gnas pa'i sems 'chad pa ste/ gang tshe chos zhes bya ba ste/ /ngo bo nyid kyis mi rnyed pa//de tshe nam mkha' 'dra ba'i sems/ /byang chub 'byung ba skye bar 'gyur/ /zhes pa dang sbyar ro/ /yongs su gyur pa'i sgo yi tshig /ces pa ni ldang ba'i sems 'chad pa ste/ de tshe 'jig rten kun mthun pa'i/ /snying rje dag kyang skye bar 'gyur/ / zhes pa dang sbyar ro/ /de la ting nge 'dzin grub pa'i tshig ces pa ni tshig des chos thams cad gzod ma nas ma skyes shing mi 'gag par rtog pa'i ting nge 'dzin 'byung bar ston pa'i phyir ro/ /bsam gyis mi khyab pa'i tshig ces pa ni tshig des chos thams cad dmigs su med pa nam mkha' dang 'dra ba'i sems ston pa'i phyir ro//yongs su gyur pa'i sgo'i tshig ces pa ni tshig des ting nge 'dzin las yongs su gyur te/ langs nas snying rje'i dbang gis sems can gyi don bya ba la sogs pa ston pa'i phyir ro/ /gang gi tshe na thog ma nas/ /cung zad skye ba'am 'jig med pa//de tshe rnal 'byor can dag gi/ /stong pa'i ye shes ji ltar skye/ /zhes pa ni gang gi tshe phung po dang khams la sogs pa'i chos rnams thog ma nas ma skyes shing ma byung ba'i phyir 'chi 'pho ba yang med de/ de ltar phyi gzung ba'i chos med na de la 'dzin par byed pa'i rnam par shes pa yang skye ba'i gnas med pas mi skye'o//de ltar gzung ba dang 'dzin pa'i cha gnyis ka med de/ stong pa de'i tshe na rnal 'byor can gyi stong pa'i ye shes kyang skye bar mi 'gyur ro zhes pa'o/ /gang tshe chos zhes bya ba de/ /ngo bo nyid kyis ma rnyed pa//de tshe nam mkha' 'dra ba'i sems/ /byang chub 'byung ba skye bar 'gyur/ /zhes pa ni gong du bshad pa'i rim gyis phyi'i chos rnams dang nang gi rnam par shes pa gnyi ga med par bshig na phung po la sogs pa'i chos 'di dag thams cad dmigs su med par rtog pa la gnas pa'i sems ni nam mkha' dang 'dra bar rtog pa thams cad bral bar 'gyur zhes pa'o//rnam par mi rtog pa'i sems de las de bzhin nyid kyi ye shes byang chub kyi mtshan nyid can 'byung bas na de la byang chub 'byung ba zhes bya'o/ /de tshe 'jig rten kun mthun pa'i/ / snying rje dag kyang skye bar 'gyur/ /zhes pa ni ting nge 'dzin de las langs nas snying rje'i dbang gis sbyin pa la sogs pa dang / spyod pa dang lha'i skur bsgyur ba la sogs pa sems can gyi don bya ba dang ldan pa'i sems bskyed do zhes pa'o/ /de dag gi don mdor bsdu na dang por 'jug pa'i sems rtog pa dang bcas pa'i chos rnams stong pa'i rang bzhin du bshig ste/de nas stong pa nyid rtogs pa rnam par mi rtog pa'i sems la ji srid 'dod par gnas nas de'i 'og tu snying rje'i dbang gis lha'i gzugs su snang bar byas te/ sbyin pa la sogs pa sems can gyi don rnams la bya'o zhes dgongs pa'o//ming tsam gyi ni tshul du gnas/ /zhes pa ni spyod pa de dag kyang don dam par yod pa ma yin te/ ming tsam du rtog pa'i gnas so zhes pa'o/ /de ltar thams cad ming tsam yin/ /sngar kun du sangs rgyas pa'i skur bsgyur ba la nan tan cher bya ba yang ji ltar dgos she na/sangs rgyas ming du 'dir brjod do/ /zhes gsungs te/ kun du sangs rgyas pa yang 'dir don dam par yod pa ma yin gyi/ ming tsam du zad do zhes pa'o/ /de tshe stong dang mi stong zhes/ /yang dag tu na ming du 'dogs/ / zhes pa ni de'i tshe nam mkha' la sogs pa stong pa'o zhes bya ba dang bum pa la sogs pa chos rnams kun rdzob tu stong pa ma yin no zhes pa yang ming tsam du bya'o zhes pa'o/ /de la gcig gnyis gsum la sogs/ /grangs [(]gyi [,]kyi [)]dbye ba'ang 'byung bar 'gyur/ /zhes pa ni yi ge a zhes pa gcig pu de las kyang ming can du bya ba'i sgo nas i la sogs pa'i yi ge'i dbye ba mang po rnams su 'gyur ro zhes pa'o//de ltar dpa' bo stong pa de/ /rang 'byung rnams kyi byin rlabs las/ /a la sogs pa rim bzhin 'phel/ /de ltar stong pa nyid kyi ngo bo las a dang i la sogs pa'i yi ge rnams kyi bye brag mang por 'phel bar 'gyur te/yid la gnas pa'i snying po las so zhes pa'o/ /rang 'byung zhes pa ni bcom ldan 'das kun du sangs rgyas pa'i rang bzhin la bya ste/ sus kyang ma skyes pa'i phyir ro/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/bdag nyid sgrub pa rim par phye ba rgyas pa'o// //rnam par snang mdzad chen po mngon par rdzogs par byang chub pa rnam par sprul ba byin gyis rlob pa las/ yi ge brgya pa'i sngags kyi cho ga rim par phye ba'i 'grel pa mi snang ngo //de ni de bzhin gshegs pa'i kun du byang chub pa'i rang bzhin bstan pa'i phyir/ ji ltar nam mkha' phyogs rnams na/ /kun la rtag par mi gnas pa/ /de bzhin chos rnams thams cad la/ /gsang sngags mgon po mi gnas so//zhes pa la sogs pa gsungs te/ ji ltar nam mkha' lho byang dang shar nub la sogs pa'i phyogs la mi gnas pa bzhin du don dam pa'i mtshan nyid kyi sngags kyi mgon po de yang gzugs la sogs pa'i chos rnams la dmigs par byed pa dang / / dmigs par bya ba'i sgo nas mi gnas so zhes pa'o/ /ji ltar dngos rnams nam mkha' la/ /gnas shing rtag tu rnam snang yang / /de ni gnas su mi 'gyur ba/ /gsang sngags mgon po'ang de bzhin no/ /zhes pa ni ji ltar nam mkha' la gzugs kyi dngos po rnams gnas par snang yang dngos po de rnams la nam mkha' gnas par mi 'gyur ba bzhin du de bzhin gshegs pa yang mngon par byang chub pa'i tshe sku mi zad pa'i rdo rje'i rgyan la sogs pa rnam pa sna tshogs pa rnams de'i dbang gis byung ba yang byang chub kyi rang bzhin de ni sku mi zad pa la sogs pa'i rdo rje'i rgyan de rnams la dmigs pa'i sgo nas mi gnas so zhes pa'o//nam mkha' dus gsum la sogs dang / /ji ltar bral bar 'dod pa bzhin/ /de ltar gsang sngags mgon po yang / /dus gsum med kyang rnam par snang / /zhes pa ni ji ltar nam mkha' de rang bzhin gcig las mi 'gyur bas na dus gsum las 'das pa bzhin du de bzhin nyid kyi rang bzhin sngags kyi mgon po de yang mi 'gyur bar yongs su grub pa yin pa'i phyir/dus gsum la mi gnas par stobs dang mi 'jigs pa la sogs pa'i yon tan rnams snang ngo zhes pa'o//ming tsam du ni gdags pa'i gnas/ /byed pa po la sogs dang bral/ /nam mkha' la ni tha snyad du/ /mkhas pa rnams ni 'dogs par byed/ /ming tsam gtogs par chu zad kyang / /yod pa ma yin nam mkha' bzhin/ /de bzhin gsang sngags dbang phyug kyang //tha snyad tsam du snang bar zad/ /ces pa ni de bzhin gshegs pa'i gsung mi zad pa'i rgyan yig 'brur byin gyis brlabs pa'i rang bzhin de don dam par dngos po yod pa ma yin par bstan pa ste/ ji ltar nam mkha' ming du gdags pa tsam du gnas kyi/nam mkha' de nyid med pa'i rang bzhin nam/ gzhan gyis byas pa'i dngos po yod pa ma yin te/ nam mkha' zhes brjod pa tsam du zad kyi/ /ming las lhag par nam mkha' zhes bya ba'i dngos po yod pa ma yin pa de bzhin du sngags kyi dbang phyug snying po de yang kun rdzob pa tsam yongs su snang bar zad kyi dngos por mod pa ma yin no zhes pa'o//me dang chu dang rlung ma yin/ /zhes pa la sogs pa ni de bzhin gshegs pa'i byang chub kyi rang bzhin de ni me dang chu la sogs pa chen po bzhi dang / nyi ma dang zla ba la sogs pa chen po bzhi la gnas pa dang /nyin mo dang mtshan mo la sogs pa'i dus la sogs pa ming gis smos pa rnams kyi rang bzhin ma yin te/ gang thams cad mkhyen pa'i go 'phang thob par 'dod pa des ni ji skad du smos pa'i dngos po 'di rnams dang bral ba'i byang chub kyi rang bzhin de la nan tan bya'o zhes pa'o//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ rdzogs par byang chub pa'i ngo bo nyid bstan pa rim par phye ba rgyas pa'o// //da ni dam tshig gsum bshad de/ de yang rnam pa gnyis te/rgyu'i dam tshig gsum dang 'bras bu'i dam tshig gsum mo/ /de la rgyu'i dam tshig gsum ni 'jug pa'i sems dang ldan pa'i sems so/ /'bras bu'i dam tshig gsum ni bcom ldan 'das kyi sku mi zad pa la sogs pa rnam pa gsum mo/ /de la dam tshig ces pa'i tshig gi don ni kun du 'gro ba zhes bya ste/'jug pa dang gnas pa dang ldang ba'i sems 'dis kun du 'gro zhes pa'i don to/ /kun du thob pa'am rtog par bya ba zhes kyang bya ste/ sku mi zad pa'i rdo rje'i rgyan la sogs pa de dag ni thob par bya ba'am/rtogs par bya ba yin pas de dag gnyis la dam tshig ces bya'o/ /skabs 'dir ni rgyu'i dam tshig bshad de/ de yang / de nas yang bcom ldan 'das la gsang ba pa'i bdag po phyag na rdo rjes 'di skad ces gsol to zhes pa la sogs pas gsungs pa yin te/de la chos kyi khyad par rnam pa gsum zhes pa ni 'jug pa dang ldang ba dang gnas pa'i sems gsum tha dad pas chos kyi khyad par rnam pa gsum zhes bya'o/ /chos kyi khyad par gang las sgrib pa med pa'i tshul gyis 'byung bar 'gyur ba de ni dam tshig gsum ste zhes sbyar te/'jug pa la sogs pa'i sems gsum po de spyad pa las thogs pa med par sku mi zad pa la sogs pa'i rdo rje'i rgyan dam tshig gsum gyi mtshan nyid de 'byung ngo zhes pa ste/ gong du nyon la zhes bya ba dang / ngas bshad do zhes bya ba dang 'brel to/ /chos kyi khyad par de yang gang zhe na zhes pa ni 'jug pa la sogs pa'i sems gsum po de dag so sor bye brag phye ste bshad pa'i phyir gsungs pa'o//de la 'jug pa'i sems ni dang po'i sems te zhes pa nas/ byang chub kyi mtshan nyid do zhes pa'i bar gyis te/ rnam par bsgom pa'i rang bzhin zhes pa ni phung po dang khams la sogs pa'i chos rnams shes rab kyis ma shes pa'o zhes pa'o//de la ma bsgoms pa'i rang bzhin zhes 'don to/ /de'i rjes las byung ba'i shes rab ces pa ni ma bsgoms pa'i rjes la chos la bdag med par shes rab po//des kyang yang dag pa ji lta ba bzhin du yongs su shes nas sems bskyed pa zhes sbyar te/ shes rab des chos thams cad phyin ci ma log par shes pa bskyed do zhes pa ste/ de bas na/ rtog pa'i dra ba ma lus pa dang bral ba'i byang chub kyi mtshan nyid ces sbyar bar bya ba ste/phung po dang khams la sogs pa'i chos kyi mtshan nyid la yod cing chags par rtog pa ni grol ba'i gegs su 'gyur ba'i phyir/ rtog pa de nyid dra ba zhes bya la/ gang rtog pa'i dra ba med pa'i sems ni stong pa nyid du rtogs pa'i sems te/ byang chub kyi mtshan nyid do//de ni dang po'i sems shes pa'i tshig gong ma dang 'brel te/ 'jug pa'i sems so/ /gnyis pa ni rnam par mi rtog pa ste/ rdzogs pa'i sangs rgyas kyi go 'phang ngo zhes pa ni gnas pa'i sems te/ rtog pa'i dra ba thams cad med pa'i byang chub kyi mtshan nyid kyi shes rab de nyid chos thams cad stong pa'i rang bzhin du rtogs nas rnam par mi rtog pa nyid la gnas te/de nyid la kun du sangs rgyas pa'i go 'phang zhes bya'o/ /yang dag pa ji lta ba bzhin mthong nas kyang zhes pa nas de ni dam tshig gsum mo zhes pa'i bar gyis ldang ba'i sems bshad pa ste/yang dag pa ji lta ba bzhin mthong nas kyang zhes pa ni 'jug pa dang gnas pa'i sems kyis de bzhin nyid phyin ci ma log par rtogs nas kyang zhes pa ste/ de ltar de bzhin nyid du rtogs nas kyang rnam par mi rtog pa de nyid la mi gnas par sems can gyi don du spyod pa ste/de bas na sems can gyi khams ma lus pa la bltas nas zhes pa la sogs pa gsungs pa yin no/ /sems can gyi khams la lta ba de yang dmigs pa dang bcas pas khe dang bkur sti'i phyir lta ba ni ma yin te/ de bas na snying rje'i dbang du gyur pas dmigs su med pa nyid du blta ste zhes gsungs pa yin no//byang chub kyi sems de yang gang zhe na/ spros pa thams cad dang bral ba mtshan nyid med pa'i byang chub la sems can rnams rab tu dgod par bya'o zhes gsungs pa yin te/ mngon par de bzhin nyid rnam par mi rtog pa la gnas nas kyang sngon gyi smon lam gyi shugs kyis snying rje'i dbang du gyur cing dmigs pa med pa nyid du sems can thams cad ji ltar bdag gis rtogs pa'i byang chub rtog pa dang bral zhing spros pa thams cad dang bral ba mtshan nyid med pa de la dgod par bya'o snyam pa'i byang chub kyi sems skye'o zhes bya'o//de ni dam tshig gsum mo zhes pa ji skad du smos pa'i 'jug pa dang gnas pa dang ldan pa'i sems te/ gsum po de ni dam tshig gsum mo zhes pa'o//gsang ba pa'i bdag po gzhan yang dam tshig gsum gang zhe na zhes pa la sogs pa la ni 'jug pa la sogs pa'i sems de dag nyid kyi rnam grangs bshad pa ste/ dang po'i sems ni sangs rgyas te/ /zhes pa ni dang po 'jug pa'i sems kyi phung po la sogs pa rnams bdag med par rtogs pas na sangs rgyas zhes bya ste/sangs rgyas kyi tshig ni rtogs pa zhes pa dang rnam grangs yin pa'i phyir ro/ /gnyis pa yang ni chos zhes bya/ /zhes pa ni gnas pa'i sems te/ de bzhin nyid kyi rang bzhin gyi mtshan nyid 'dzin pa'i phyir chos zhes bya'o//de dang lhan cig byung ba'i sems/ /dge 'dun zhes ni bshad pa yin/ /zhes pa ni chos thams cad stong par rtogs pa'i tshe nyid na snying rje'i dbang gis phyir mi ldog pa'i byang chub sems dpa'i dge 'dun gyi mtshan nyid lha rnams kyi skur bsgyur ba la bya'o//dpa' bo dam tshig de gsum ni/ /'dren pa rnams kyis khyod la bshad/ /ces pa ni ji skad bshad pa'i dam tshig gsum po 'di dang nga 'ba' zhig gis dpa' bo khyod la bshad pa ma yin gyi/sngon gyi sangs rgyas bcom ldan 'das 'dren pa rnams kyis kyang bshad do zhes pa ste/ sangs rgyas rnams spyod pa gcig tu bstan pa'o/ /de tshe sna tshogs tshul gyi sgos/ /dpa' bo sems can phan 'dod pas/ / dam tshig gsum po 'di dag la/ /gnas nas byang chub spyad pa spyod/ /ces pa ni byang chub sems dpa' byang chub kyi spyad pa spyod pa rnams dam tshig gsum po 'di la gnas nas/ 'jig rten pa rnams kyi tshul mang po dang 'jig rten las 'das pa nyan thos dang rang sangs rgyas la sogs pa'i tshul sna tshogs kyi sgo nas sems can gyi phyir spyod do zhes pa'o//gsang ba pa'i bdag po gang gi tshe sku gsum la mnga' mdzad pa de dag rdzogs par sangs rgyas par gyur pa de'i tshe zhes pa la sogs pa ni 'bras bu'i dam tshig gsum bstan pa ste/nam kun du sangs rgyas par gyur pa de'i tshe sprul pa'i skus sangs rgyas yab zas gtsang ma'i sras su ston pa nas mya ngan las 'das pa'i bar du ston te/ de la sku gsum la mdzad pa zhes pa nam 'og min gyi gnas su kun du sangs rgyas par gyur pa de nyid kyi tshe na chos thams cad stong pa nyid du rtogs pa de bzhin nyid kyi rang bzhin du gyur pa ni chos kyi sku la mnga' mdzad pa'o//de'i tshe longs spyod rdzogs pa'i skur snang bas na longs spyod rdzogs pa'i sku la mnga' mdzad pa'o/ / de nas sprul pa'i sku 'jig rten du snang bas na sprul pa'i sku la mnga' mdzad pa'o/ /'di ltar dang por sprul pa'i sku gcig pur byin gyis brlabs nas zhes pa ni yang dag par rdzogs pa'i sangs rgyas de dag bstan pa gzhag pa mdzad do zhes sprel te/ thog mar 'og min gyi gnas su kun du sangs rgyas nas sprul pa'i skur byin gyis brlabs te rgyal po zas gtsang ma'i sras su ston pa dang gzhon nu rol pa dang rab tu 'byung ba dang dka' ba spyod pa dang byang chub kyi snying po nye bar 'gro ba la sogs pas bstan pa rnams ston par byed do zhes bya'o//gsang ba pa'i bdag po gzhan yang sku gcig po de nyid rnam pa gsum du 'jog pa ni 'di ltar sangs rgyas dang chos dang dge 'dun no zhes pa yang yang dag par rdzogs pa'i sangs rgyas de dag bstan pa gzhag pa mdzad do zhes sbyar te/ sangs rgyas kyi sprul pa'i sku nyid la bya'o/ /chos ni gsung mi zad pa'i sgo nas gsung rab yan lag bcu gnyis 'chad pa'o/ /dge 'dun ni 'phags pa'i gang zag brgyad kyi dge 'dun te/ sprul pa'i sku gcig pu de 'di rnams su byin gyis brlabs nas kun du sangs rgyas pa'i bstan pa ston par byed do zhes pa'o//gsang ba pa'i bdag po gzhan yang de nyid theg pa gsum du 'jog pas ston to zhes pa ni sprul pa'i sku de nyid gang zag la bdag med par rtogs pa la mos pa'i 'gro ba nyan thos rnams la ni nyan thos kyi theg par brtags shing 'chad do//chos rnams rten cing 'brel bar 'byung ba'i tshul du bshig ste mi rtag par mthong nas grol bar byed pa la mos pa'i 'gro ba rnams la ni rang sangs rgyas kyi theg par brtags shing 'chad do/ / chos dang gang zag gnyis ka bdag med par rtogs pa la mos pa'i 'gro ba rnams la theg pa chen por brtags shing 'chad do/ /de'i tshe sangs rgyas kyi bya ba mtha' dag byas nas yongs su mya ngan las 'da' ba ston cing sems can rnams yongs su smin par mdzad do zhes pa ni mi rtag par mthong nas 'khor ba las thar ba'i ched du nan tan byed pa'i sems can smin par bya ba'i phyir mya ngan las 'das pa ston te/mya ngan las 'das pa de sems can rnams kyis mthong nas sangs rgyas bcom ldan 'das lha dang mi'i bdag po bsod nams dang ye shes kyi tshogs bsags pa yang mi rtag na gzhan lta ci smos snyam nas 'phags pa'i lam nan tan byed cing smin par 'gyur ro zhes pa'o//'di dag ni rgyu dang 'bras bu'i dam tshig gsum pha rol tu phyin pa la spyod pa sngags la spyod pa'i byang chub sems dpa' gnyi ga'i phyir bstan pa ste/rgyu'i dam tshig gsum ni mos pas spyod pa'i sa nas kun du bzang po'i sa'i bar du ste/ de'i bar du 'jug pa la sogs pa'i sems gsum dang ldan pa'i phyir ro/ /'bras bu'i dam tshig gsum ni snga ma bzhin no/ /de ltar sngags la spyod pa'i byang chub sems dpa' mos pas spyod pa'i sa la gnas pa rnams las gang dam tshig gsum po 'di shes shing de la gnas pa de'i rjes su bsngags pa bshad pa'i phyir//gsang ba pa'i bdag po zhes pa nas/ rtog pa las byung ba'i bgegs med pa la ltos zhes pa'i bar du gsungs pa yin te/spyir bgegs la rnam pa gsum ste/ rnam par rtog pa las byung ba dang / las las byung ba dang / gang zag med pa ma spangs pa las byung ba ste/ las las byung ba'i bgegs ni nad mang ba la sogs pa dang /bag med pa ma spangs pa las byung ba'i bgegs ni dug dang mes tshig dang g.yang sa la sogs par 'gro ba dang / de dag rnam par rtog pa sngon du song ba las gyur pas rtog pa las byung ba'i bgegs zhes bya ste/ bgegs de dag med par 'gyur ro zhes pa'o//mi dad pa dang le lo can dang 'du 'dzi can dang sngags la yid mi ches pa dang yo byad mang po sogs pa ma gtogs par zhes pa ni dam tshig gsum po de dag dang ldan du zin kyang bsgrub par mi 'dod pa dang / le lo la sogs pa ming gis smos pa 'di rnams dang ldan pa ni bgegs med pa'i nang du ma gtogs te/sgrub par mi 'dod pa dang le lo la sogs pa de dag nyid bgegs yin pa'i phyir ro/ /chang btung ba dang khri la nyal ba gnyis ni mi bya'o zhes pa ni myos pa'i btung ba ni ma rungs par gyur pa thams cad pa yin pa'i phyir spang ngo //rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ dam tshig gsum spyad par rim par phye ba rgyas pa'o// //ji ltar de bzhin gshegs pa lags/ /zhes bya ba la sogs pa'i tshigs su bcad pa rnams kyis bcom ldan 'das la phyag na rdo rjes zhus pa ni sngar sangs rgyas dang byang chub sems dpa' rnams kyis gsang sngags gsungs pa la 'di ni de bzhin gshegs pa rnams kyi sngags so//'di ni byang chub sems dpa' rnams kyi sngags so zhes pa la sogs pa gsungs pa de la/de bzhin gshegs pa dang kun du sangs rgyas pa dang byang chub sems dpa' mtshan gnyid bye brag ci mchis gang lags pa ma 'tshal na the tshom de dag bsal bar gsol zhes pa'o/ /de yang phyag na rdo rje nyid kyis mi mkhyen pa ni ma yin gyi/ ma 'ongs pa'i 'gro ba rnams kyi the tshom bsal ba'i phyir ro/ /zhus pa'i tshig bzhi po de yang / byang chub nam mkha'i mtshan nyid de/ /zhes pa la sogs pa'i tshigs su bcad pas rim pa gzhan du bstan te/ byang chub sems dpa' grags chen rnams/ /the tshom yid gnyis bsal nas su//spyad pa'i rgyal po bla med pa/ /theg pa la ni spyod par 'gyur/ /zhes pa ni byang chub sems dpa' grags pa chen po rnams theg chen gyi sngags kyi spyad pa la spyod pa ni the tshom dang yid gnyis spangs nas theg pa chen po sngags kyi spyod pa la spyod pa'i phyir bdag gi the tshom bsal du gsol zhes pa dang sbyar ro//spyod pa'i rgyal po bla med pa/ /zhes pa ni sngags kyi spyod pa nyid la bya'o/ /byang chub nam mkha'i mtshan nyid de/ /kun du rtog pa thams cad spangs/ /gang zhig de rtogs 'dod pa de/ /byang chub sems dpa' zhes bya'o//zhes pa ni/ ji ltar byang chub sems dpa' lags/ /zhes zhus pa'i lan te/ des ni 'di skad du gsungs pa yin te chos thams cad stong pa nyid du rtogs pa'i de bzhin nyid kyi ye shes gzung ba dang 'dzin pa la sogs pa'i rtog pa thams cad spangs pa nam mkha' lta bu nyon mongs pa dang shes bya'i sgrib pa med pa de ni byang chub ste/de lta bu'i byang chub rtogs par 'dod pa gang yin pa de ni byang chub sems dpa' zhes bya ste/ de yang sa dang po la gnas pa nas/ /sa dgu pa man chad kyi byang chub sems dpa' rnams la bya'o/ /gang gis sa bcu bsgrubs nas ni//zhes pa nas/ sangs rgyas zhes ni bya ba yin/ /zhes pa'i bar ni/ ji ltar sangs rgyas zhes ni bgyi/ /zhes zhus pa'i lan te sa de yongs su rdzogs pa'i byang chub sems dpa' ji skad du grags pa'i dbang bcu la yang dbang du gyur pa'i ting nge 'dzin gnas pa dang langs pa gnyis ka'i tshen yang snying po la sogs pa'i chos rnams sgyu ma lta bur rtogs shing rten pa rnams kyi rgyud kun rtog dang don dam pa'i mtshan nyid stong pa nyid dang sgyu ma lta bur shes pa de ni sangs rgyas shes pa zhes bya ste/byang chub sems dpa' ji skad phal mo che rnams kyis kyang chos rnams stong pa nyid dang sgyu ma lta bur rtogs shing 'jig rten kun gyi rgyud kyang shes mod kyi/mi mthun phyogs thams cad du ma spangs pas chos rnams stong pa nyid dang sgyu mar rtogs pa'i mnyam par gzhag pa langs pa'i chos mi mthun pa'i phyogs kyis sgrib par 'gyur te/ de bas na sa bcu dang dbang bcus rdzogs par sangs rgyas pa zhes khyad par du gsungs pas sangs rgyas pa zhes bya ba ni log pa'i gnyen po la sogs pa spangs nas phyin ci ma log par khong du chud pa la bya'o//chos ni nam mkha'i mtshan nyid de/ /gnyis su med cing mtshan nyid gcig /stobs bcus rdzogs par sangs rgyas pa/ /de ni rdzogs sangs rgyas shes bya/ /zhes bya ba ni/ ji ltar rgyal ba mchog tu 'gyur/ /zhes zhus pa'i lan te/ sa bcu'i byang chub sems dpa' sangs rgyas zhes bya ba rnams stong par rtogs pa yang mtshan nyid so so bar rtogs pa yin la/de las lhag par mtshan nyid so so bar stong par rtogs pa gang yin pa de rnams la gzugs kyi stong pa nyid gang yin pa de tshor ba'i stong pa nyid de/ gzugs kyi stong pa nyid dang tshor ba'i stong pa nyid ni gnyis su med cing gnyis su byar med ces bya ba la sogs pa'i tshul du chos thams cad nam mkha'i mtshan nyid ltar gnyis su med cing mtshan nyid gcig tu stobs bcus yongs su rdzogs nas kun rtog pa de ni kun du sangs rgyas pa zhes bya ste/de yang phung po lhag ma dang bcas pa'i mya ngan las 'das pa kun du bzang po'i sa la gnas pa'i byang chub sems dpa' la bya'o//rgyal ba mchog ces pa ni bdud bzhi las rgyal ba'i phyir ro/ /'du shes tsam yang sangs rgyas pa'i phyir/ /rang gi ngo bor bstan du med/ /ye shes rang rig bya ba ni/ /de ni de bzhin gshegs par bshad/ /ces pa ni//ji ltar de bzhin gshegs pa lags/ /zhes zhus pa'i lan te/ kun du sangs rgyas pa'i chos thams cad stong pa'i mtshan nyid gcig tu rtogs pa'i 'du shes tsam po de yang spangs te/ rang gis rig pa'i rang bzhin du bstan du med pa lhag ma ma lus pa'i mya ngan las 'das pa de ni de bzhin gshegs pa zhes bya'o//rnam par snang mdzad chen po mngon par rdzogs par byang chub pa rnam par sprul pa byin gyis rlob pa las/ de bzhin gshegs pa bstan pa rim pa phye ba rgyas pa'o// //da ni me rnams kyi rabs bshad de/ de yang bcom ldan 'das sngon byang chub sems dpa'i spyad pa spyod pa na bram ze la sogs pa'i mu stegs pa rnams log pa la phyogs shing sems can rgyun chags su gsod pa la sogs pa'i sdig pa'i las spyod pa rnams sems can rgyun du gsod pa las grangs bsnyung ba'i phyir/lha la gtor ma dbul ba'i tshe sems can gsod pa ma gtogs par dus gzhan du sems can mi gsod do zhes pa la sogs pa mu stegs kyi gzhung las dge ba'i phyogs su 'chad pa dang bram ze'i rig byed las me bshad pa rnams kyang bcom ldan 'das nyid kyis bstan par shes par bya ste/de ltar cis mngon zhe na/'phags pa 'jam dpal gyi rgyud las ji skad du legs par smras pa cung zad du zhig yod pa rnams kyang ngas bstan to zhes 'byung ba'i phyir ro/ /lag na rdo rje gzhan yang dus gcig gi tshe na nga byang chub sems dpar gyur te/ byang chub sems dpa'i spyad pa spyod cing tshangs pa'i 'jig rten na 'dug pa na tshangs pas nga la kye'i tshangs pa chen po me la rnam pa du yod par shes par bya zhes dris pa dang zhes bya ba la sogs pa gsungs te/bcom ldan 'das byang chub sems dpa'i spyad pa spyod pa ni tshangs pa'i 'jig rten na tshangs pa'i gzugs su gyur cing bzhugs te/de na stong gsum gyi stong chen po'i 'jig rten gyi khams la dbang ba'i tshangs pa'i rgyal po la 'di skad ces dris so zhes pa'o/ /ngas de la 'di skad ces smras so zhes pa ni tshangs pa de langs 'og nas 'byung pa'i tshig rnams smos so zhes pa'o//de la mi nga rgyal can gang yin pa de ni rang byung ba'o zhes pa ni bskal pa dang po'i tshe 'jig rten thams cad sus kyang ma byas par rang byung nas nam mkha' la 'gro zhing dga' ba'i zas za ste de'i tshe yang me tshangs pa'i 'jig rten du rang byung ste/ nga ni rang byung ste sus kyang ma byas snyam pa'i nga rgyal yod pas nga rgyal can rang byung ba zhes bya ste/me de lta bu dang por byung ngo zhes pa'o/ /de'i 'og na tshangs pa'i bu ste/ de las skyes pa yin no/ /'jig rten pa'i me pa ba ka /tshangs pa'i bu ni dang po yin/ /zhes pa ni rang byung ba'i me de'i 'og tu pa ba ka zhes bya ba 'jig rten pa'i btso zhing sreg par byed pa'i me tshangs pa las byung ste/de yang tshangs pa'i bu de rnams kyi nang na dang po'o zhes pa'o/ /de'i bu tshangs pa'i zas zhes pa ni 'jig rten pa'i me pa ba ka zhes bya ba de'i bu'o/ /de'i yang / b+hA ra ta zhes bya bar bshad//ces bya ba ni tshangs pa'i zas de'i bu b+hA ra ta zhes bya'o/ /de'i bu bai shwa na ra dang / /ha ba na dang bsreg bya len/ /zhes pa ni bai shwa na ra dang / ha ba na dang bsreg bya len zhes bya ba'i me de rnams ni b+hA ra ta zhes bya ba de'i bu'o/ /ngos bsrungs a thar pa na yi/ /bu yin par ni rgya mtsho grags//zhes pa ni ngos bsrungs zhes bya ba'i me ni a thar pa na zhes bya'i me'i bu ste/ de yang bu ska ra zhes bya ba'i rgya mtsho na gnas par grags pa'o/ /rlung zhes bya ba'i me de ni/ /mngal du 'jug pa'i cho gar bshad/ /ces pa ni bram ze'i cho ga las mngal du 'jug par bya ba'i tshe sbyin sreg bya ba'i me ni rlung zhes bya'o//de nas mi khrus bya ba la/ /de bzhin pA ba mA na ra shes/ /zhes pa ni mngal du zhugs nas sbrum par gyur pa na bu de'i ched du khrus bya ba'i tshe sbyin sreg bya ba'i me ni pA ba mA na zhes bya'o/ /bkra shis zhes bya mtshams kyi mthar/ /zhes pa ni bu byung ba'i tshe sbyin sreg bya ba'i me ni bkra shis zhes bya'o//btsas pa'i las la pra gal la b+ha'o/ /zhes pa ni bu btsas zin pa'i 'og tu sbyin sreg bya ba'i me ni pra gal la b+ha zhes bya'o/ /ming 'dogs me ni pA r+thi pa/ /zhes pa ni bu'i ming 'dogs pa'i tshe sbyin sreg bya ba'i me ni pA r+thi ba zhes bya'o/ /de bzhin rkan dbab pa la gtsang //zhes pa ni bu rkan dbab pa'i tshe sbyin sreg bya ba'i me ni gtsang ma zhes bya'o/ /shad b+hi zhes kyang gtsug phud la/ /zhes pa ni gtsug phud 'jog pa'i tshe sbyin sreg bya ba'i me ni shang b+hi zhes bya'o/ /brtul zhugs sbyin la kun 'byung ngo / /zhes pa ni bu lo brgyad lon nas bag ma blangs kyi bar du brtul zhugs 'dzin du gzhug pa'i tshe sbyin sreg bya ba'i me ni kun du 'byung ba zhes bya'o//nyi ma zhes bya phyugs sbyin la'o/ /zhes pa ni bag ma len pa'i tshe sbyin sreg bya ba'i me ni nyi ma zhes bya'o/ /bag ma len la sbyor byed bshad/ /ces pa ni bag ma len pa'i tshe bskor bar byed pa'i me ni spyor byed ces bya'o//ag+ne yas ni khyim kha bsro/ /zhes pa ni khyim kha bsro ba'i tshe sbyin sreg bya ba'i me ni ag+ne ya zhes bya'o/ /nye bar 'bul la me nyid do/ /zhes pa ni a ba ni ka zhes bya ba'i cho ga la sbyin sreg bya ba'i me ni me nyid ces bya'o/ /pa ba ka zhes bya ba'i me//sna tshogs lha la sbyar bar bshad/ /ces pa ni gza' skar la sogs pa'i lha sna tshogs pa la sbyin sreg bya ba'i me ni pa ba ka zhes bya'o/ /khyim bdag la ni tshangs pa'i me/ /zhes pa ni khyim bdag gi tshogs la sbyin sreg bya ba'i me ni tshangs pa'i me zhes bya'o/ /de bzhin yon dbul ba la zhi//zhes pa ni yon dbul ba'i sbyin sreg zhes bya'o/ /gnyis su na dkri Na zhes bya ba ni lho phyogs la yang bya ste/ tshangs pa'i me dang zhi ba'i me gnyis ni lho phyogs logs su bzhag nas rtag tu gso ba'i me zhes pa'o/ /de bzhin phyugs ni bcing ba la/ /a ba ni ka zhes bya'i me/ /zhes pa ni phyugs gsad de lha la yon dbul ba'i sbyin sreg bya ba'i me ni a ba ni ka zhes bya'o//ltung ba la ni pi be+e tse/ /zhes pa ni myos pas ltung ba byung ste/ 'gyod nas myos pa de dag par bya ba'i sbyin sreg bya ba'i me ni pi be rtse zhes bya'o/ /btsos sbyin la ni sa ha sa/ /zhes pa ni zas bcos pa sbyin pa'i cho ga la sbyin sreg bya ba'i me ni sa ha sa zhes bya'o//dus kyi mtshams la ha bir shes/ /dus kyi mtshams zhes bya ba'i cho ga la sbyin sreg bya ba'i me ni ha bi zhes bya'o/ /de bzhin zla ba gnas la gter/ /zhes pa ni zla ba gnas pa zhes bya ba'i cho ga la sbyin sreg bya ba'i me ni gter zhes bya'o/ /mri Ta zhes bya ba sreg blugs la/ / zhes pa ni sbyin sreg gi sngon rol du rdzas rnams las gang ba'i sbyin sreg gsum bya ba'i me ni mri Ta ces bya'o/ /zhi la da ru Nar 'dod do/ /zhes pa ni zhi ba'i sbyin sreg la ni me du Na zhes bya bar 'dod do/ /byas mtha'i me ni gshin rje'i/ /zhes pa ni mi shi ba'i tshe sbyin sreg bya ba'i me ni gshin rje zhes bya'o//de bzhin rgyas la stobs sbyin pa'o/ /zhes pa ni rgyas pa'i sbyin sreg gi me ni stobs sbyin pa zhes bya'o/ /drag shul spyad pa thams cad la/ /khro bo'i me ni rab tu bsgrags/ /zhes pa ni mngon spyod kyi sbyin sreg bya ba'i me ni khro bo zhes bya'o/ /'dod las skyes zhes bya ba'i me/ /de ni dbang gi don du bshad//ces pa ni dbang du bya ba'i sbyin sreg la 'dod skyes zhes bya ba'i me de bshad do zhes pa'o/ /nags tshal sreg la pho nya'i me/ /zhes pa ni gang nags sreg par byed pa'i me ni pho nya zhes bya'o/ /khong pa'i me ni dza Tha ra/ /zhes pa ni khong pa na gnas nas zas la sogs pa 'ju bar byed pa'i me ni dza Tha ra zhes bya'o//bza' bar bya ba sha zar bshad/ /ces pa ni bza' bar byed pa'i me ni sha za zhes bya'o/ /rgod ma'i kha ni rgya mtsho na'o/ /zhes pa ni rgya mtsho na gnas pa'i me ni rgod ma'i kha zhes bya'o/ /zad tshe 'jig pa zhes bya ste/ /dus mtha'i mer ni yang dag bsgrags//zhes pa ni 'jig rten 'jig pa'i tshe'i me ni 'jig pa zhes bya ste/ de yang dus mtha'i me zhes so/ /'di ni me rnams mdor bsdus nas/ /nges par khyod la bshad pa ste/ /rig byed thos pa spyod rnams kyi/ /tshangs pa'i bu dag brjod pa yin/ /bzhi bcu rtsa bzhi 'di dag ni/ / de yi tshe na ngas bstan to/ /zhes pa de la me nga rgyal can gang yin pa de ni rang byung ba'o zhes pa nas/ ngos bsrungs a thar na ba yi/ /bu yin bar ni rgya mtshor grags/ /zhes pa'i bar ni me rnams kyi skyes pa'i rabs bstan pa'o/ /rlung zhes bya ba'i me de ni/ /mngal du 'jug pa'i cho gar bshad//ces pa nas/ 'dod las skyes zhes bya ba'i me/ /de ni dbang gi don du bshad/ /ces pa'i bar ni las rnams kyi rang bzhin gyi me bstan pa'o/ /nags tshal sreg la pho nya'i me/ /zhes pa nas/zad tshe 'jig pa zhes bya ste/ /dus mtha'i mer ni yang dag bsgrags/ /zhes pa'i bar ni me rnams kyi ngang tshul las rang bzhin bstan pa ste/de rnams bram ze la sogs pa 'jig rten pa'i gzhung las grags shing 'jig rten pa'i las byed pa'o/ /gsang ba pa'i bdag po de la/ me rnams rang bzhin mi shes par/ /gang dag sbyin sreg byed pa de/ /sbyin sreg ma yin legs byas min//las kyi 'bras bu'ang yod mi 'gyur/ /zhes pa ni me rnams kyi rang bzhin mi shes na cho ga dang 'gal bas sbyin sreg byas par mi chud la/ legs byas min zhes pa ni sbyin sreg gi cho ga 'jag ma dgram pa la sogs pa'i legs byas rnams kyang legs byas su mi chud do zhes pa'o/ / las kyi 'bras bu'ang yod mi 'gyur/ /zhes pa ni gang gi phyir sbyin sreg brtsams pa'i las de'i 'bras bur mi 'gyur ro zhes pa'o/ /ngas byang chub mngon par rdzogs par sangs rgyas nas ni me bcu gnyis bstan te zhes pa ni bcom ldan 'das byang chub sems pa'i spyad pa spyod pa na bram ze'i rig byed las 'byung ba'i me gong du smos pa rnams bstan la/mngon par sangs rgyas nas ni 'jig rten las 'das pa'i sbyin sreg la sogs pa bya ba'i phyir me rnam pa bcu gnyis po 'di bstan to zhes pa'o/ /de yang gang zhe na zhes pa nas/ ye shes rdzogs byed yin zhes bya/ /zhes pa'i bar ni rgyas pa'i sbyin sreg gi me'i mtshan nyid gsungs pa ste/ye shes me zhes pa ni ye shes sems dpa' yin pa'i phyir ro/ /gnyis pa 'dzin byed ces bya ste/ /zhes pa nas/ bgrang phreng ril ba spyi blugs thogs/ /zhes pa'i bar ni zhi ba'i sbyin sreg gi me'i mtshan nyid gsungs pa'o/ / gsum pa rlung zhes bya ba ste/ /mdog med gnag la rtsub pa'o/ /zhes pa ni rlung zhes pa'i me de me thab tu me sbar ba'i tshe bod pa'o/ /bzhi pa dmar po zhes bya ste/ /nub kha'i mtshams kyi dmar thag 'dra/ /zhes pa ni dbang gi sbyin sreg gi me'o/ /lnga pa mri Ta zhes bya ba/ /sbun la kha dog kham pa ste//mgrin pa ring zhing gzi brjid che/ /kun la phan ni 'dogs par bshad/ /ces pa ni gang ba'i sbyin sreg bya ba'i me'o/ /drug pa khro na'o zhes bya ste/ /mig yon dud pa'i kha dog 'dra/ /gyen du skra brdzes sgra chen 'byin/ /mche ba bzhi pa stobs po che'o/ /zhes pa ni mngon spyod kyi sbyin sreg bya ba'i me'i mtshan nyid gsungs pa'o//bdun pa lta ba zhes bya ste/ /rno la kha dog kun dang ldan/ /zhes pa nas/ rmugs byed ces pa bcu gnyis te/ /sems can thams cad rmugs byed pa'o/ /zhes pa'i bar ni me lhag ma rnams kyi mtshan nyid nyi tshe smos pa'o//gsang ba pa'i bdag po de ltar/ me yi gzugs ni byin brlabs te/ /zhes pa la sogs pa me rnams bshad pa'i zhar la sbyin sreg bshad pa ste/ me yi gzugs ni byin brlabs te/ /zhes pa ni zhi ba dang rgyas pa gang yang rung ba'i mis las byed pa dang rdzas gnyis ka'i kha dog bsgyur ro zhes pa ste/de bas na/ bdag rang gi ni gzugs dang ni/ /rdzas kyang de yi ngo bor bya/ /zhes gsungs pa yin no/ /'di ni phyi yi sbyin sreg ste/ /zhes pa ni de ltar bdag dang me dang rdzas gsum tshar du ldan pa de ni phyi rol gyi sbyin sreg go zhes pa'o/ /nang gi sbyin sreg kyang gsang ba pa'i bdag po nang gi ni rang bzhin gcig pa ste zhes pa ni stong pa nyid kyi rang bzhin du gcig pa'o zhes pa ste/gnas du zhig gcig tu bsdu zhe na/ gnas gsum gcig tu bya ba'i tshul gyis gsum dang ldan pa ni nang gi sbyin sreg yin no zhes gsungs te/ bdag dang me dang rdzas te gsum po gcig tu ldan pa'i gnas gsum po de/stong pa nyid kyi rang bzhin gcig tu bya'o zhes pa ste/ de yang 'og nas 'grel to/ /gsang ba pa'i bdag po byams pa chen po dang snying rje chen po dang ldan pa ni zhi ba'o zhes pa ni zhi ba'i sbyin sreg bya ba la byams pa dang snying rje lhag par bskyed do zhes pa'o//dga' ba dang ldan pa ni rgyas pa'o zhes pa ni rgyas pa'i sbyin sreg la dga' ba lhag par bskyed do zhes pa'o/ /khro bo'i mes ni zhes pa nas/ khro ba thul bas bya ba'o/ /zhes pa'i bar ni mngon spyod kyi sbyin sreg gsungs pa ste/ khro bar bya ba yang ldang ba dang bcas pa ma yin te/de bas na khro ba thul bas bya ba'o/ /zhes gsungs pa yin no/ /dbus su rlung gi me gzhag go/ /zhes pa ni dang por zhugs thab tu me sbar ba'i tshe rlung gi me bos nas rlung g.yab kyis me sbar bar bya'o zhes pa'o/ /gsang ba pa'i bdag po de ltar ji skad bsgrags pa'i gnas de dang de dag tu ji ltar rigs pa dang ji ltar ldan par sbyin sreg bya'o zhes pa ni zhi ba dang rgyas pa la sogs pa'i gnas ji skad du gsungs pa de dag gar rigs par zhi ba la sogs pa'i sbyin sreg rnams bya'o zhes pa'o//de nas yang bcom ldan 'das la phyag na rdo rjes 'di skad ces gsol to zhes pa nas/ji ltar bsam pa bdag la gsungs/ /zhes pa'i bar ni gong du sbyin sreg mdor bstan pa de la me thab ji ltar bya ba dang / me bsang ba'i phyir chus gtor ba ni ji ltar gtor ba dang / me thab kyi mthar 'jag ma ji ltar gding ba dang //me thab tu me ji ltar gzhag pa zhus pa'o/ /gsang ba pa'i bdag po/ de la me yi thab khung ni/ /kun du khru gang tsam gyi tshad/ /kha khyer sor bzhi'i tshad du bya/ /rdo rje'i mtshan ma dag gis mtshan/ /zhes pa ni/ me yi thab khung ji ltar bgyi/ /zhes zhus pa'i lan te/me thab kho ra khor yug tu khru gang tsam la kha khyer yang zheng dang dpangs su sor bzhi par bya ste/ zhabs su rdo rje'i mtshan mas mtshan par bya'o/ /thab khung gi ni g.yas phyogs nas/ /ku sha'i rtswa ni rlon pa dgram/ /rtse mo dag kyang rtsa bas dkri/ /rtsa ba dag kyang rtse mos dkri//zhes pa ni/ ku sha'i rtswa yang ji ltar dgram/ /zhes zhus pa'i lan te go bar zad do/ /'dir ni bsang gtor g.yas phyogs nas/ /ku sha bskor ba bzhin du bya/ /zhes pa ni/ bsang gtor dag kyang ji ltar bgyi/ /zhes zhus pa'i lan te/ me bsang ba'i phyir chu gtor ba yang 'jag ma bskor ba'i tshul du g.yas phyogs nas bskor zhing gdab po zhes pa'o//byug spos me tog bdug spos dag /mr-i Ta'i me la dbul bar bya/ /zhes pa nas/ mkhas pas de la dbul bar bya/ /zhes pa'i bar ni/ ji ltar bsam pa bdag la gsungs/ /zhes zhus pa'i lan te/me thab der thog mar me tog gcig gzhag ste/ mri Ta'i me bos la dri dang me tog la sogs pas mchod de/ de nas yang chus bsangs la gang ba'i sbyin sreg lan gsum me de nyid kyi sngags kyis btab ste dbul lo zhes pa'o/ /de nas zhi pa'i sbyin sreg gam/ /yang na rgyas pa'i sbyin sreg bya//'jig rten pa yi sbyin sreg 'di/ /phyi rol pa zhes gsungs pa yin/ /zhes pa ni ji skad bshad pa'i rim pas me thab kyi cho ga bya ba dang mri Ta'i me la gang ba'i sbyin sreg byin te/ me de rang gi gnas su gzhag la/ /de nas zhi ba'am rgyas pa'i me gang yang rung ba spyan drangs na zhi ba la sogs pa'i sbyin sreg gam/ji ltar 'dod pa bya'o/ /de dag ni me thab dang me la sogs pa phyi rol gyi dngos po rnams la dmigs pas 'jig rten pa'i sbyin sreg gsungs pa yin no/ /gzhan yang nang gi sbyin sreg ni/ /zhes pa nas/ de ni nang gi sbyin sreg ces/ /des pa khyod la bstan pa yin//zhes pa'i bar ni nang gi sbyin sreg bshad pa ste/ de yang bdag nyid kyi phung po lnga stong pa nyid du bshig la/ phyi rol gyi me thab la sogs pa yul gyi gzugs rnams kyang stong par bshig ste/ de bzhin du sgo drug gi rnam par shes pa 'phro ba rnams kyang so sor bshig nas mi 'phro bar bkag cing de ltar 'jig cing 'gog par byed pa'i byang chub kyi sems de yang 'phro ba med pa'i shes rab kyis bkag pa rnam par mi rtog pa'i ting nge 'dzin la gnas pa ni nang gi sbyin sreg ste/de bas na/ rlung gi me yang 'phro ba med pa'i shes rab kyis bkag ste/yid kyis me la sbyin sreg bya'o zhes gsungs pa yin no/ /rlung gi me bkag pa ni srog dang rtsol ba rab tu bsdams nas zhes pa'o/ /yid kyis me la sbyin sreg bya'o/ /zhes pa ni sems mi g.yo bar bsreg go zhes pa'o/ /de nas bcom ldan 'das kyis thams cad dang ldan pa'i 'khor 'dus pa la bka' stsal pa/khyed rnams kyis chos kyi rnam grangs 'di la bag yod par gnas pas spyad par bya'o zhes pa ni chos kyi rnam grangs 'di ni snod du ma gyur pa'i sems can rnams la gya tshom du sbyin par mi bya ba ste/ de bas na/ nga'i sras rnams ma gtogs par dbang po ma brtags pa gzhan su la yang ma sbyin cig ces gsungs pa yin no//nga'i bu rnams kyi mtshan nyid 'og nas bshad pa rnams la ni dbang po brtag mi dgos par sbyin/ de las gzhan pa rnams la ni chos kyi rnam grangs zab mo 'di shes rab dang ldan nam mi ldan pa dang / dbang po rnams 'dod chags la sogs pa'i yul rnams la 'phro ba yin nam ma yin pa brtags te shes par byas nas de lta bu la sogs pa'i skyon rnams med cing snod du gyur na gdod sbyin cig ces pa ste/ dman pa la mos pa la zab cing rgya che ba'i chos bshad pa ni byang chub sems dpa'i 'khrul pa'o zhes 'byung ba'i phyir/de nas de'i tshe thams cad kyis/ de bzhin gshegs la phyag 'tshal te/ /zhes pa nas/ bstan pa 'di la bshad du gsol/ /zhes pa'i bar ni phyag na rdo rje la sogs pa'i 'khor de rnams kyis rnam par snang mdzad mngon par rdzogs par byang chub pa rnam par sprul pa byin gyis rlob pa'i chos kyi rnam grangs 'di 'jig rten na mi nyams shing yun ring du gnas par bya ba'i phyir byin gyis brlab pa'i sngags kyis byin gyis rlob par bcom ldan 'das la gsol ba ste/sngags 'dis byin gyis brlabs nas chos kyi rnam grangs 'di gsungs par gyur pa'i phyir ro/ /rnam par snang mdzad chen po mngon par rdzogs par byang chub pa rnam par sprul pa byin gyis rlob pa shin tu rgyas pa chen po'i mdo sde'i dbang po'i rgyal po las/gsang sngags kyi sgo nas byang chub sems dpa'i spyad pa spyod pa'i cho ga ji snyed pa rdzogs so// //rnam par snang mdzad mngon par rdzogs par byang chub pa rnam par sprul pa byin gyis rlob pa'i rgyud chen po slob dpon sangs rgyas gsang bas phyin ci ma log par bshad pa rdzogs so// //rnam par snang mdzad mngon par rdzogs par byang chub pa'i rgyud kyi tshig 'grel zhes grags pa 'di ni dpal snar thang gi gtsug lag khang du bstan bcos bod kyi yul du 'gyur ba ji ltar snyed pa bsdus pa'i tshe/ 'grel ba 'di'i dpe phyi mo ma dag cing gong 'og 'khrugs la bar bar nas cung zad ma tshang ba zhig la brten pas bstan 'gyur thams cad du ma dag pa brgyud pa dang /skad gsar bcad kyis gtan la ma phab pa'i 'gyur yang mi bde ba zhig snang ba las/ skad gnyis smra ba'i dbang po ska ba dpal brtsegs kyis bsgyur ba'i rgyud kyi tshig dang bstun te/skad gsar bcad dang mthun par bcos pa 'di ni yul dbus kyi ban+de gzhon nu dpal zhes bgyi bas/ dpal rtse thang gtsug lag khang du lcags mo sbrul gyi lo la bris pa'o/ /