CLOSE WINDOW

D2663
བོད་ཡིག

[ ]@##/ /rnam par snang mdzad mngon par byang chub pa'i rgyud chen po'i 'grel bshad bzhugs/ @##/ /nA ma sid+d+hi rA dza/ sid+d+hi sid+d+ha/ bcom ldan 'das kyis thog ma thams cad mkhyen pa'i ye shes brnyes nas/ thams cad mkhyen pa'i ye shes des 'dul ba'i 'gro ba rnam pa gnyis su gzigs pa ni/dmigs pa dang bcas pa la mos pa gtsor gyur ba rnams dang / zab cing rgya che ba la mos pa gtsor gyur pa rnams so/ /'dul ba'i 'gro ba de rnams la yang spyod pa rnam pa gnyis te/ pha rol tu phyin pa'i sgo nas 'jug cing spyod pa dang / sngags kyi sgo nas 'jug cing spyod pa'o/ /de la pha rol tu phyin pa'i sgo nas 'jug cing spyod pa la yang rnam pa gnyis te/ dmigs pa dang bcas pa la mos pa gtsor gyur pa dang / zab cing rgya che ba la mos pa gtsor gyur pa ste/ de la pha rol tu phyin pa'i sgo nas 'jug cing / spyod pa'i 'dul ba'i 'gro ba dmigs pa dang bcas pa la mos pa gtsor gyur pa rnams kyi don du 'dul ba dang /mdo sde dang / mngon pa'i chos rnams dang / de bzhin du gzhan yang theg pa chen po'i mdo sde khyim bdag dpa' bo la sogs pa rnams bstan to/ /de bzhin du zab cing rgya che ba la mos pa'i 'dul ba'i 'gro ba rnams kyi don du zab cing rgya che ba'i mdo sde sdong pos brgyan pa dang /sa bcu pa dang / ting nge 'dzin gyi rgyal po la sogs pa rnams bstan to/ /de bzhin du zab cing rgya che ba sngags kyi sgo nas 'jug cing spyod pa'i gdul bya'i 'gro ba rnams la yang rnam pa gnyis te/ dmigs pa dang bcas pa la mos pa gtsor gyur pa dang /zab cing rgya che ba la mos pa gtsor gyur pa ste/ de la dmigs pa dang bcas pa la mos pa gtsor gyur pa rnams kyi don du 'phags pa rab tu grub pa'i rgyud dang / rig 'dzin gyi sde snod la sogs pa bya ba'i rgyud rnams bstan to/ /de bzhin du zab cing rgya che bas 'dul ba'i 'gro ba rnams kyi don du 'phags pa de kho na nyid bsdus pa'i rgyud la sogs pa bstan te/dmigs pa dang bcas pa la gtsor gyur ches pa yang zab cing rgya che ba la mos shing mi spyad pa ma yin mod kyi/ dmigs pa dang bcas pa la spyod par mos pa'i shas che ba la bya'o//zab cing rgya che ba la mos pa la gtsor gyur pa rnams la dmigs pa dang bcas pa'i spyod pa la ma mos shing mi spyod pa ma yin mod kyi/ zab cing rgya che ba la spyod pa'i shas che ba ste/ de ltar mngon pa ni 'phags pa de nyid bsdus pa la sogs pa nang gi sbyor ba gtsor gyur pa yin mod kyi/phyi'i spyod pa rnams kyang med pa ma yin no/ /de bzhin du bya ba'i rgyud rnams kyang phyi'i spyod pa gtsor gyur pa yin mod kyi/ nang gi spyod pa yang med pa ma yin te/ rig 'dzin gyi sde snod la sogs par gsungs pa rnam par thar pa'i sgo gsum la gzhol ba la sogs pa ste/de bzhin du pha rol tu phyin pa'i sgo nas 'jug cing spyod pa rnams la yang ji ltar rigs par spyad par shes par bya'o/ /de bzhin du rnam par snang mdzad mngon par byang chub pa rnam par sprul pa'i byin gyi rlabs kyi rgyud 'di yang thabs dang shes rab gtsor gyur pa sbyor ba'i rgyud yin mod kyi/bya ba la mos pa'i gdul bya'i 'gro ba rnams la gzung ba'i phyir bya ba'i rgyud kyi rjes su mthun pa'i spyod pa dag kyang bstan pas/ bya ba'i rgyud dam gnyis ka'i rgyud lta bur so sor brtags shing grags so/ /de la bcom ldan 'das kyis rgyud 'di yang gdul bya'i 'gro ba rab 'bring the ma gsum gyi don du bstan pa ni/mgo glengs pas shes pa dang / don rnam par phye bas shes pa dang / tshig gi mthar gyur pa'i gdul ba'i 'gro ba rnams la'o/ /de la mgo glengs pas shes pa ni shes rab mchog tu rno zhing thos pa mang ba dang ldan pas rgyud 'di'i ming don gyi rjes su mthun pa rnam par snang mdzad mngon par byang chub pa rnam par sprul pa'i byin gyi rlabs zhes pa'i ming tsam thos pas/rgyud 'di'i don thams cad go bar gyur pa ni rnam par snang mdzad ces bya ba'i tshig gis bcom ldan 'das rnam par snang mdzad longs spyod rdzogs pa'i sku bsod nams dang ye shes kyi tshogs yongs su rdzogs pa/thams cad mkhyen pa'i rang bzhin du shes so/ /mngon par byang chub pa'i tshe zhes pa'i tshig kyang mngon par byang chub pa ni rang gi sems yang dag pa ji lta ba nyid du shes pa ste/ de yang chos thams cad stong pa nyid nam mkha' lta bu'i mtshan nyid du chud pa'o//rnam par sprul pa'i zhes pa'i tshig gis kyang de ltar mngon par byang chub pa nyid kyi tshe na/ sngon gyi smon lam gyi shugs kyis chos nyid rab tu thob pas lhun gyis grub pa nyid du sku mi zad pa'i rgyan gyis sus kyang zil gyis mi non pa nyid du khams gsum thams cad khyab pa/rdzogs longs spyod pa dang sprul pa'i sku la sogs pas ji ltar snod du gyur pa'i sems can la gang gis 'dul ba'i skus don mdzad pa ni/ sangs rgyas kyi skus 'dul ba'i sems can rnams la sangs rgyas kyi skur ston pa can/ nyan thos dang / rang sangs rgyas dang / brgya byin dang tshangs pa la sogs pa'i gzugs kyis 'dul ba'i sems can rnams la de rnams kyi tshul bstan cing don mdzad pa dang /de bzhin du gsung mi zad pa'i rgyan gyis kyang khams gsum thams cad du sangs rgyas kyi gsung dam pas khyab par chos ston pa de bzhin du thugs mi zad pa'i rgyan gyis kyang /ji bzhin pa dang bcas pa'i yid las byung ba'i dbang chen dang chu'i dkyil 'khor la sogs pa ji bzhin par bstan par go'am/ de bzhin du byin gyi rlabs zhes bya ba'i tshig gis kyang de ltar rnam par sprul pa sku gsung thugs mi zad pa'i rgyan gyis khams thams cad du khyab par bstan pa 'di ni kun du bzang po la sogs pa'i byang chub sems dpa' yongs su dag pa rnams kyi spyod yul du gyur gyi/gdul ba'i 'gro ba 'og ma rnams kyi spyod yul du ma gyur pas sku la sogs pa mi zad pa'i rgyan de nyid gdul ba'i 'gro ba de rnams kyi don du rgyud 'dir dkyil 'khor dang /sngags dang phyag rgya'i sgo nas lus ngag yid kyi mtshan mar gyur pa bstan pa ste/ byin gyi rlabs zhes pa ni dkyil 'khor dang / sngags dang phyag rgya'i sgo nas lus ngag gsum gyi cha lugs dang / rang bzhin du lhag par gnas zhes bya ba'i don to/ /de ltar rnam par snang mdzad mngon par byang chub pa rnam par sprul pa'i byin gyi rlabs zhes pa don gyi rjes su mthun pa'i ming tsam gyis don 'di lta bur go ba ni glengs pas shes pa'i gdul ba'i 'gro ba rnams te/de dag gi don du rgyud 'di ming tsam smos pas shes par bya'o/ /de ltar shes pa 'ga' zhig ma yin gyi/gzhan yang rgyud 'di'i 'grel pa dang / dmigs pa bstan par bya ba dang / dgos pa yang bstan par shes par bya ba ni/ rgyud 'di ni bcom ldan 'das rnam par snang mdzad kyi rang bzhin gyi dkyil 'khor sku mi zad pa la sogs pa'i rgyud dang 'brel bar blta ste/ rang bzhin gyi dkyil 'khor 'di ni rgyud 'di'i rgyu yin no//rgyud 'di ni de'i 'bras bur shes par bya ste de ni 'brel pa'o/ /de bzhin du rgyud 'dir dkyil 'khor dang sngags dang phyag rgya'i sgo nas lus dang ngag dang yid ji bzhin pas bstan pas/ rang bzhin gyi dkyil 'khor gyi tshul ci 'dra ba rgyud 'dis mtshon nas shes par bya ste/de bas rgyud 'di ni dmigs pa ston pa'o/ /bcom ldan 'das kyi rang bzhin gyi dkyil 'khor ni dmigs pa ston par bya'o/ /de la dgos pa ni rgyud 'dir bsgrub pa'i spyod pa ji skad du bshad pa'i rim gyis rang gi lhag pa'i lha mnyes par byas nas lha dang mi'i longs spyod dang ral gri dang /rig 'dzin la sogs pa mngon par 'byung ba'i mtshan nyid mngon sum du thob pa nyid nas bcom ldan 'das rnam par snang mdzad kyi mkhyen rab dam pas bla na med pa thams cad mkhyen pa dang ldan pa thob par dgongs pa ni de'i dgos par shes par bya'o//don rnam par phye bas shes pa'i gdul ba'i 'gro ba ni/ de'i don gyi rjes su mthun pa'i ming tsam smos pas rgyud kyi don kun shes par mi nus te de bas na de dag gi don du rgyud kyi don rnam par phye ste bshad pa ni rnam par snang mdzad kyi rgyu dang rang bzhin dang 'bras bu dang / de'i mngon par byang chub pa'i rgyu dang rang bzhin dang 'bras bu la sogs pa'i bshad pa ste/de la rnam par snang mdzad kyi rgyu bshad pa ni/ 'jig rten gyi sems kyis rim pa brgya la sogs pa dang / dad pa spyod pa la sogs pa'i 'jig rten las 'das pa'i sa rim pa nas kun du sangs rgyas pa'i so so'i bar du ni rnam par snang mdzad kyi rgyu bshad pa'o//rang bzhin bshad pa yang bcom ldan 'das rnam par snang mdzad kyi sku rnam pa bzhi'i mtshan nyid gang gi phyir rgyud 'dir sprul pa'i sku rnam pa gnyis su btags nas sku bzhir bshad de/ bcom ldan 'das rnam par snang mdzad kyi rang bzhin bshad pa'o//lus dang ngag yid mi zad pa'i rgyan rnam par sprul pas khams gsum thams cad khyab pa ni/ sems can dang sems can ma yin pa'i lus la sogs pa ji ltar snod du gyur pa la snang ba de ni de'i 'bras bu bshad pa'o/ /mngon par byang chub ba'i rgyu yang byang chub kyi sems ni rgyu/snying rje ni rtsa ba/ thabs ni mthar gyur zhes pa la sogs pa'o/ /rang bzhin ji srid ji skad du gsungs pa de la/ byang chub gang zhe na/ rang gi sems yang dag pa nyid ji lta bar shes pa'o zhes pa la sogs pa'o/ /de bzhin du de'i rnam par sprul pa dang /byin gyi rlabs dag kyang bshad pa ste/ zhib tu ni bsdus pa'i don nyid du bshad pas 'dir ma smos so/ /tshig gi mthar gyur pas 'dul ba'i 'gro ba rnams la ni de ltar rgyu dang rang bzhin dang 'bras bu la sogs pa rnam par phye ste bshad kyang tshig dang don rnams zhib tu mi go ste/ de bas na de dag gi don du tshig re re nas spros shing rgyas par bshad pa ni bcom ldan 'das de bzhin gshegs pa'i byin gyis rlob pa zhes pa la sogs pa rgyud 'di mgo mjug tu spros te bshad pa'o/ /de la bcom ldan 'das de bzhin gshegs pa'i byin gyis rlob pa rdo rje chen po zhes pa la sogs pa rgyud 'di thams cad kyis bcom ldan 'das rnam par snang mdzad kyi phun sum tshogs pa rnam pa bcu gcig bstan pa ni 'di lta ste/spong ba phun sum tshogs pa dang / gnas phun sum tshogs pa dang / 'khor phun sum tshogs pa dang / ston pa phun sum tshogs pa dang / mthu phun sum tshogs pa dang /pha rol gyi don phun sum tshogs pa dang / bcom ldan 'das rnam par snang mdzad kyi rgyu phun sum tshogs pa dang / rang bzhin phun sum tshogs pa dang / byang chub kyi rgyu phun sum tshogs pa dang / byang chub kyi rnam par sprul pa'i byin gyis brlabs pa phun sum tshogs pa ste/ de la spong ba phun sum tshogs pa ni/bcom ldan 'das zhes pa'i tshig ste/ nyon mongs pa dang shes bya'i sgrib pa thams cad spong ba'i mtshan nyid do/ /gnas phun sum tshogs pa ni yon tan rnam pa brgyad dang ldan pa ste/ de la 'dir gnas phun sum tshogs pa brgyad ni 'di lta ste/ de bzhin gshegs pa thams cad lhag par gnas pa phun sum tshogs pa dang /sra zhing rgya che ba phun sum tshogs pa dang / byang chub chen por chud pa'i gnas phun sum tshogs pa dang / rdo rje 'dzin pa'i byang chub sems dpa' chen po rnams mngon par 'du ba phun sum tshogs pa dang / snga khang gi rtse mo rgya che ba phun sum tshogs pa dang /kha dog phun sum tshogs pa dang / dbyings phun sum tshogs pa dang / gdan phun sum tshogs pa rnams to/ de la de bzhin gshegs pa thams cad la lhag par gnas pa phun sum tshogs pa ni/ de bzhin gshegs pa'i byin gyis rlob pa zhes bya ba'i tshig gis bstan to//sra zhing rgya che ba phun sum tshogs pa ni rdo rje rgya che ba zhes pa'i tshig gis so/ /byang chub chen por chud pa'i gnas phun sum tshogs pa ni chos kyi dbyings 'byung ba zhes bya'o/ /rdo rje 'dzin pa'i byang chub sems dpa' chen po rnams mngon par 'du ba phun sum tshogs pa ni rdo rje 'chang kun 'du ba zhes pa'o//snga khang gi rtse mo rgya che ba phun sum tshogs pa ni de bzhin gshegs pa'i mos pas rnam par rol pa mtha' dang dbung med cing rtse mo mtho ba zhes pa'o/ /kha dog phun sum tshogs pa ni rin po che chen po'i rgyal pos rnam par brgyan pa 'byung ba zhes pas so//dbyibs phun sum tshogs pa ni rin po che'i rgyal po'i snga khang chen po zhes pas so/ /gdan phun sum tshogs pa ni byang chub sems dpa'i lus kyi seng ge'i gdan la bzhugs pa zhes pa ste/ de rnams ni phun sum tshogs pa rnam pa brgyad dang ldan te gnyis pa'o//'khor phun sum tshogs pa ni nam mkha' dri ma med pa'i rdo rje 'dzin zhes pa nas kun du bzang po dang / byams pa dang / sgrib pa rnam par sel ba dang / 'jam dpal zhes pa la sogs pa rig par bya'o/ /ston pa phun sum tshogs pa ni lung dang thob pa'i chos ston pa ste/de yang kun du bskor nas mdun du byas te/ dus gsum gyi dus las 'das pa de bzhin gshegs pa nyi mas byin gyis brlabs te/ lus dang ngag dang yid mnyam pa nyid kyi ye shes gnas zhes bya ba'i chos kyi sgo bshad do zhes pa'i tshig gis so/ / mthu phun sum tshogs pa ni 'jig rten dang 'jig rten las 'das pa'i sbyor ba'i gtso bos ma thob ba'i sprul pa thob pa ste/ de'i skabs su gsungs pa de nas kun du bzang po la sogs pa byang chub sems dpa' chen po rnams bcom ldan 'das rnam par snang mdzad kyi byin gyi rlabs kyis lus dang ngag dang yid mnyam pa nyid mi zad pa'i rgyan gyi mdzod rab tu spyod pa la 'jug ces pas so//pha rol gyi don gyi thabs phun sum tshogs pa ni de'i skabs su gsungs pa thams cad du yang bcom ldan 'das rnam par snang mdzad kyi byin gyi rlabs kyis lus kyi las thams cad dang / ngag gi las thams cad dang /yid kyi las thams cad kyi sngags kyi tshul gyis tshig chos 'chad par mthong ngo zhes pa nas 'di lta ste/ bcom ldan 'das sems can thams cad kyi bsam pa rab tu rangs pa ste/ de bzhin du thams cad mkhyen pa'i ye shes kyis 'jig rten dang lhar bcas pa la rab tu rangs par byed do zhes pas so//gzhan yang rgyud 'di bshad pa thams cad kyis ji ltar rigs par bcom ldan 'das rnam par snang mdzad kyi rgyu phun sum tshogs pa dang / rang bzhin phun sum tshogs pa dang / de'i byang chub kyi rgyu phun sum tshogs pa dang / rang bzhin phun sum tshogs pa dang / byang chub kyi rnam par sprul pa'i byin gyi rlabs kyi rang bzhin phun sum tshogs pa ste/ sngar bshad zin pas 'dir ma bshad do/ /de lta bas na bcom ldan 'das rnam par snang mdzad kyi phun sum tshogs pa rnam pa bcu gcig gis rgyud 'di thams cad bsdus par blta'o/ /mdo sde dang rgyud gzhan dag tu 'di skad bdag gis thos pa 'byung la/rgyud 'dir ma smos pa ni ston pa dang / dus dang / gnas nges pa dang / nyan pa dang sdud par mdzad pa'i byang chub sems dpa' kun du bzang po dang / phyag na rdo rje la sogs pa chud pa gtso bor gyur pa'i phyir 'di skad bdag gis thos ba ma smos te/rgyud 'di bshad pa yang / bcom ldan 'das rnam par snang mdzad longs spyod rdzogs pa'i sku mngon par byang chub pa'i sku'i byin gyi rlabs kyis byang chub kyi snying po na rtag tu bzhugs pas bshad de/ dus dang gnas de nyid na nges par bzhugs pas dus gcig gi tshe zhes pa ma smos so//nyan pa yang kun du bzang po la sogs pa de rnams thos pa snying por gyur pa ma yin gyi chud pa gtsor gyur pas 'di skad bdag gis thos zhes ma smos so/ /mdo sde dang gzhung gzhan dag tu smos pa ni/ bcom ldan 'das rdzogs longs spyod pa'i sku/ dus dang gnas ma nges par yang bzhugs te/bar bar ni 'og min gyi gnas na bzhugs shing chos 'chad/ bar bar ni ri rab kyi rtse mo na bzhugs shing chos 'chad pa dang / de bzhin du sprul pa'i sku yang bar bar ni rgyal po'i khab na bzhugs/ bar bar ni mnyan du yod pa la sogs pa'i gnas na bzhugs shing chos 'chad de de ltar dus dang gnas ma nges pas dus gcig gi tshe na zhes pa la sogs pa'o//nyan pa yang 'phags pa nyan thos la sogs pa thos pa snying por gyur pa ste/ chud pa gtso bor gyur pa ma yin pas 'di skad bdag gis thos pa zhes smos so/ /bcom ldan 'das rnam par snang mdzad kyi phun sum tshogs pa rnam pa bcu gcig gis kyang rnam pa bzhir bsdus te/bzhi gang zhe na/ skyes bu dang gnas dang 'khor dang dgos pa'o/ /de la bcom ldan 'das zhes pa ni nyon mongs pa dang shes bya'i sgrib pa bag chags yan chad dpyis phyin par shes rab kyis dbral de med par byas pa ni bcom pa'o//gnyis su bdud rnams bcom pa la yang bya ste/ mdor na nyon mongs pa dang shes bya'i sgrib pa spangs pa yang mngon par byang chub pa'i sku la bya ste/ des ni skyes bu'i che ba'i bdag nyid bstan pa ste/ skyes bu che ba de bstan pa yang chos nyan pa'i sems can rnam pa gnyis te/ chos kyi rjes su 'jug pa dang dad pa'i rjes su 'jug pa'o//de la chos kyi rjes su 'jug pa ni 'chad pa'i skyes bu la mi rtog gi chos bzang ngan la rtog pa der zad/ dad pa'i rjes su 'jug pa ni 'chad pa'i skyes bu btsan pa de 'di la yid ches shing dgos pa'i skyes bu btsan pa de bstan to/ / gnas phun sum tshogs pa yang bcom ldan 'das gnas de lta bu na bzhugs pas che ba'am/ btsun pa bstan pas dad pa'i rjes su 'jug pa'i 'gro ba bzung ba'i phyir ro/ /'khor phun sum tshogs pa yang bcom ldan 'das gcig pu mi bzhugs kyi/ 'khor de lta bus bskor cing bzhugs pas che ba'am btsun par bstan te/de'i skyes bu btsan par bstan pas dad pas rjes su 'jug pa'i 'gro ba la dgos pa med par skyes bu de lta bu la nyan par spro bas dang pa'i rjes su 'jug pa'i sems can gzung ba'i phyir bstan to/ /gnas bshad pa yang rnam pa gsum gyi phyir de skyes bu btsan pa dang /gnas de lta bu'i yon tan bsgrub pas rjes su dran par byas na 'grub pa'i phyir dang / sangs rgyas dang byang chub sems dpas bcags pa'i gnas te/ mchod rten du 'gyur ba'i phyir ro/ /skyes bu btsan pa ni gong du bshad pa'o/ /'khor phun sum tshogs pa yang rnam pa gsum ste/skyes bu btsan pa de lta bu'i byang chub sems dpa' rdo rje 'dzin nam mkha' dri ma med pa la sogs pa chos nyan pas 'dzin pa'i mchog bstan pa dang / nyan pa mchog de dag bzhugs pas sdud par mdzad pa'i byang chub sems dpa'i dbang du gyur pa bstan pa'o/ /skyes bu ni sngar smos pa'o//dgos pa ni rgyud 'di rnam par snang mdzad mngon par byang chub pa'i rgyud dang / rang bzhin dang / dbang chen dang / chu la sogs pa'i dkyil 'khor du bsgrub pa dang / las bshad pa'i rim bzhin du bsgrubs na mngon par 'chad pa dang ma lus pa'i bde ba thob pa dgos pa'i phyir ro/ / de ltar phun sum tshogs pa rnam pa bcu gcig 'di bzhin bsdus so/ /de la bcom ldan 'das de bzhin gshegs pa'i byin gyis rlob pa zhes pa ni/ 'das pa dang ma 'ongs pa dang da lta'i de bzhin gshegs pa thams cad byang chub kyi snying po la gnas pa la bya ste/ byin gyis rlob pa zhes pa'i tshig ni gnas pa'i don to//skabs 'dir byang chub kyi snying po ni 'das pa dang ma 'ongs pa dang da ltar sangs rgyas thams cad pas sangs rgyas mang po gnas par 'gyur ba'i dogs pa bsal ba la sogs pa ni bsdus pa'i don nyid du zhib tu bshad pas 'dar ma smos so/ /rdo rje chen po ni rdo rje de nyid phal ba ma yin gyi mchog gam dam pa'am chen po zhes bya'o//rgya che ba ni rdo rje dang ldan pa'i khang pa de ni yangs shing rgya che ba'am/ rdo rje de dag nyid grangs mang ba la bya'o/ /chos kyi dbyings 'byung ba zhes bya ba ni de la chos kyi phung po dang khams dang skye mched do/ /dbyings ni rang bzhin phung po la sogs pa'i chos de rnams kyi kun rdzob kyi mtshan nyid ris pas brtag mi bzad pa ste/de dag gi rang bzhin ni stong pa nyid do/ /ston pa'i rang bzhin chud pa ni 'byung ba zhes bya'o/ /rdo rje 'dzin pa kun 'du ba/ /zhes pa ni de la rdo rje ni yang dag pa ma yin pa'i lta ba 'joms pa'i shes rab ste/shes rab de lta bu dang ldan pa'i byang chub sems dpa'i ni rdo rje 'dzin pa'o/ /'du ba'i tshig ni gnas phun sum tshogs pa'i skabs su bshad pa'o/ /rdo rje 'dzin pa ma yin pa'i byang chub sems dpa' yang der mi 'du ba ma yin mod kyi/ 'dir sngags bshad pa'i skabs las rdo rje 'dzin gtso bor smos so//rdo rje 'dzin pa yang rnam pa gsum gyi phyir 'dzin te/ so so'i rnam par grol ba'i sgo ston pa dang / rig pa'i brtul zhugs dang / mchod pa'i yan lag tu 'gyur pa'i phyir 'dzin pa'o/ /pha rol tu phyin pa las byung ba'i byang chub sems dpa' rnams kyi phyag rgya ut+pal dang /pad+mo la sogs pa 'dzin pa yang so sor rnam par grol ba'i ston par rig par bya'o/ /de bzhin gshegs pa shin tu mos shing rnam par rol pa zhes pa ni byang chub sems dpa'i spyad pa spyod pa na/ de lta bu'i gnas la sogs par mos shing smon pa las ji ltar smon pa bzhin du thob nas spyod pa ni rol pa'o//mtha' dang dbus med cing rtse mo mtho ba ni mtha' dmigs su med pas na dbus kyang dmigs su med pa'o/ /rtse mo mtho ba ni de bzhin gshegs pa'i dbu'i gtsug tor dang 'dra ste rtse mo ba ltang mi snang ba la bya'o/ / rin po che chen po'i rgyal pos brgyan cing 'byung bas zhes pa ni kha dog phun sum tshogs pa'i skabs bshad de/ snga khang de nyid ni rin po ches spras pa la bya'o/ /byang chub sems dpa'i lus kyi seng ge'i gdan la bzhugs zhes pa ni sngon gyi smon lam gyis seng ge'i lus su gyur cing seng ge'i gdan byed pa'am/byang chub sems dpa'i lus nyid kyis bcom ldan 'das kyi gdan du byed de seng ge'i bya ba byed pa la bya'o/ /bcom ldan 'das gnas de lta bu na bzhugs pa yang 'khor byang chub sems dpa' 'di rnams dang bzhugs te byang chub sems dpa' de rnams kyang don gyi rjes su mthun pa'i mtshan can sha stag ste/rdo rje 'dzin nam mkha' dri ma med ces pa la sogs pa'o/ /gzhung las 'byung bas bskor te mdun du byas nas chos 'chad do/ /'di lta ste/ dus gsum gyi dus las 'das pa/ de bzhin gshegs pa nyi ma'i byin gyi rlabs kyis lus dang ngag dang yid mnyam pa'i gnas shes bya'i chos kyi sgo mo'i chos 'chad do zhes pa chos la yang rnam pa gnyis te/thob pa'i chos dang lugs kyi chos so/ /de la thob pa'i chos la yang rnam pa gnyis te/ don dam pa dang kun rdzob bo/ /don dam pa ni de bzhin nyid kyi mtshan nyid stong pa'i rang bzhin no//kun rdzob kyi chos ni de bzhin gshegs pa'i lus ngag yid mi zad pa'i rgyan gyis khams gsum bya ba bar ston pa'o/ /lugs kyi chos ni mdo sde dang tshigs su bcad pa la sogs pa gsung rab yan lag bcu gnyis te/ de rnams las gang bshad ce na/skabs 'dir lugs kyi chos rgyud 'di nyid bshad pa ste/ de yang gang zhe na/ gsungs pa lus dang ngag yid mnyam pa nyid kyi shes gnas zhes bya ba'i chos kyi sgo mo bshad do zhes pa ste/ de la lus dang ngag yid mnyam pa nyid ces pa ni/ mnyam pa gsum gyis rig par bya ste/bcom ldan 'das kyi sku dang gsung dang thugs kyi 'khor los sems can gyi lus dang ngag dang yid ji snyed pa de snyed du khyab par mnyam pa nyid do/ /gnyis su na bcom ldan 'das kyi sku gsung thugs kyi 'khor los sems can gyi don du sbyor ba las/ de bzhin gshegs pa'i sku'i 'khor los gsung dang thugs kyi bya ba yang byed/gsung gi 'khor los kyang sku dang thugs kyi bya ba yang byed/ thugs kyi 'khor los kyang sku dang gsung gi bya ba yang byed do/ /de ltar mtshungs par byed pa na mnyam pa nyid do/ /gsum du na de bzhin gshegs pa'i sku la sogs pa dang /sems can gyi lus dang ngag dang yid stong pa nyid kyi rang bzhin du dbyer med cing ro gcig pas na mnyam pa nyid do/ /chos kyi sgo mo zhes pa ni/ de lta bu'i lus dang ngag dang yid kyi mnyam pa nyid kyi shes gnas de bshad pas/ thob pa'i chos la 'jug par 'gyur ba'i sgo nas sgo mo zhes gsungs so//de bzhin du gzhan yang lugs kyi chos rnams ni thob pa'i chos la 'jug pa'i sgo lta bur rig par bya'o/ /de la chos 'chad pa yang sku bzhi gang gis 'chad ce na/ chos kyi sku dang byang chub kyi snying po na bzhugs pa'i sku ni mi g.yo ba nyid tshig tu brjod pa las 'das pas na tshig gis chos mi 'chad/de'i byin gyi rlabs kyis rdzogs longs spyod pa dang sprul pa'i skus 'chad do/ /de la skabs 'dir yang bcom ldan 'das rnam par snang mdzad rdzogs longs spyod pa'i skus lus dang ngag dang yid dang mnyam pa nyid kyi shes gnas kyi chos kyi sgo 'chad de de yang 'di lta ste/dus gsum gyi dus las 'das pa de bzhin gshegs pa nyi ma'i byin gyi rlabs kyis 'chad de/ chos kyi sku de nyi ma lta bur snang ba'i rang bzhin bas na/ de bzhin gshegs pa'i nyi ma zhes bya ba ste/ chos kyi sku nyi ma dang zla ba la sogs pa'i dus las 'das pa ste/de bas na dus gsum gyi dus las 'das pa zhes gsungs pa yin no/ /de la dus gsum gyi dus las 'das pa zhes pa ni/ 'das pa'i dus dang da ltar gyi dus dang ma 'ongs pa'i dus las 'das pa'o/ /de dag ni ston pa phun sum tshogs pa bshad pa la bya'o/ /mthu phun sum tshogs pa bshad pa ni gzhung las 'byung ba de nas kun du bzang po la sogs pa dang /gsang ba'i bdag po rdo rje 'dzin la sogs pa'i rnams zhes pa nas/ sngags kyi tshul gyi tshig gis chos 'chad par mthong ngo zhes pa'i bar du ste/ de la bcom ldan 'das rnam par snang mdzad kyi byin gyi rlabs kyis lus mnyam pa nyid mi zad pa'i rgyan gyi mdzod rnam par sprul pa la 'jug go zhes pa ni/de la kun du bzang po la sogs pa'i byang chub sems dpa' rnams sa bcu la sogs pa rab tu thob pa na/ rang gi ting nge 'dzin dang rnam par grol ba'i sgo nas mthu dang rdzu 'phrul 'byin pa dang /sangs rgyas kyi zhing rnam par brgyan pa la sogs pa byas pas mgu zhing de las gzhan bya ba med snyam pa'i blo skye ba la/ bcom ldan 'das rnam par snang mdzad kyi dpal gyi be'u'i 'od mchog sbyin pa btang bas/ byang chub sems dpa' de rnams kyi gtsug tu phog ste/de'i byin gyi rlabs kyis kun du bzang po la sogs pa byang chub sems dpa' de rnams kyis bcom ldan 'das rnam par snang mdzad kyi sku mnyam pa nyid mi zad pa'i rgyan gyi mdzod rnam par sprul pa la 'jug par gyur to/ /de bzhin du gsung dang thugs mi zad pa'i rgyan gyi mdzod rnam par sprul pa la yang dag par 'jug par gyur to//de la mnyam pa nyid rnam pa gsum gong du bshad pa'o/ /mi zad pa ni chos kyi sku'i byin gyi rlabs kyis sku la sogs pa de dag nam 'khor ba yod kyi bar du gnas pa'o/ /rgyan zhes pa ni skabs 'dir rnam pa sna tshogs su blta'o/ /mdzod ces pa bcom ldan 'das rnam par snang mdzad kyi sku nyid la bya ste/sku de las ji ltar 'dul ba dang rjes su mthun pa'i sku la sogs pa mi zad pa'i 'khor lo 'byung ba'i phyir ro/ /rnam par sprul pa ni sku la sogs pa'i 'khor lo de dag nyid gang gis kyang zil gyis mi non par rang gi bya ba la 'jug pa'o//'on kyang bcom ldan 'das rnam par snang mdzad kyi sku'am gsung ngam thugs las phyir byung ba'am ldog par mi mngon zhes pa las 'ga' zhig rtog pa skye ba gdul bar bya ba'i 'gro ba rnam pa bzhi ste/ shes bya dang nyon mongs pa'i sgrib pa spangs pa'i rnam par rtog pa dar lwa tsam gyis bsgribs pa'i lhag ma ma lus pa'i byang chub sems dpa' rnams dang /mos pa rnam par dag pa spyod pa'i sa mngon du byas pa rnams dang / nyan thos dang rang sangs rgyas kyi nyon mongs pa'i sgrib pa ni byang / shes bya'i sgrib ba ma byang ba phyogs gcig pa rnams dang / 'gro ba tha dad pa nyon mongs pa rnams dang /shes bya'i sgrib pa ma spangs pa rnams te de bas na bcom ldan 'das kyi sku las phyir 'byung ba'am ldog par mi mngon te rnam par mi rtog na/ byang chub sems dpa' yongs su dag pa rnams kyi spyod yul du 'gyur gyi/ 'og ma rnams kyi spyod yul du mi 'gyur snyam du dogs pa skye ba la de'i lan du bcom ldan 'das mngon par byang chub pa nyid kyi tshe na/rnam par mi rtog par sngon gyi smon lam gyi shugs dang chos nyid kyis lhun gyis grub pa nyid du rdzogs longs spyod pa'i sku dang / sprul pa'i skus ji ltar snod du gyur pa'i sems can gyi don thams cad du mdzad de/de bas na gzhung las gsungs pa bcom ldan 'das rnam par snang mdzad kyi sku'i las kun dang / gsung gi las kun dang / thugs kyi las kun thams cad du sems can gyi khams thams cad/ sngags kyi tshul gyi tshig gis chos 'chad par mthong ngo zhes pa'o/ /de la mthong ba ni kun du bzang po byang chub sems dpa' la sogs pa'i spyod yul du gyur pa ste/de yang rnam pa thams cad du mthong ba ni ma yin mod kyi/ rang gi mthu dang spyod yul shas che chung bcom ldan 'das sku la sogs pa'i 'khor lo mthong ba'am chud pa la bya ste/ rnam pa thams cad chud cing mthong na de bzhin gshegs pa dang bye brag med pa'i phyir ro//rdo rje 'dzin pa dang / kun du bzang po dang phyag na pad+ma'i lus dang 'dra ba zhes pa nas las kyi tshe 'gags pa yang 'byung ba'i myu gu mthong bar skye zhes pa'i bar du bshad par bya ba de la rdo rje 'dzin pa dang kun du bzang po dang / phyag na pad+mo'i lus dang 'dra//zhes pa ni bcom ldan 'das rnam par snang mdzad mngon par byang chub pa'i byin gyi rlabs kyis de lta bu'i lus dang 'dra bas chos 'chad pa ni las kyi tshe las skyes pa'i sems dpa' rnams dang / las kyi tshe 'gags pa'i sems can rnams slar 'byung ba'i myu gu mngon par skye bri bya ba'i phyir te/de la las kyi tshe las skyes pa ni mos pa spyod pa'i sa na gnas pa na sems gsum sbyong ba dang / sa bcu la sogs pa'i yon tan ci 'dra ba de nges par shes shing / de la mos pas nyon mongs pa kun nas mi ldang bar rnam pa kun mnan te/ sems spyod ba la sogs pa'i dge ba'i las kyi dbang gis brgya byin dang tshangs pa la sogs par ji ltar smon pa bzhin du gar 'dod par skye ba ni las kyi tshe las skyes pa rnams te/de yang sems dang po bskyed pa nas sa bcu pa'i bar du'o/ /de la sems dang po bskyed pa zhes pa ni sa dang po rab tu dga' ba la bya'o//las kyi tshe bgags pa zhes pa ni 'phags pa nyan thos nyon mongs pa'i sgrib pa spangs pa rnams phung po lhag ma dang bcas pa'i mya ngan las 'das ba'i tsho/ pad+mo dam pa'i snying po la bskal pa brgyad cur gnas nas/ tshe de 'gog par byed pa de la byang chub sems dpa' de rnams kyis tshe 'gog pa de las bzlog ste slar 'byung ba'i myu gu bskyed nas sa bcu la 'jug pa dang /rdzogs par bya ba'i phyir chos 'chad do/ /'di nyid kyis yongs su rdzogs par bya ba'i phyir zhes pa'i sngags kyi tshig rnam par dag pa 'di nyid kyis zhes par dgongs pa'o/ /sngags kyi tshig rnam par dag pa zhes pa ni phyag na pad+mo dang /phyag na rdo rje la sogs pa'i bdag gi ngo bo las kyi tshe las skyes pa'i sems dpa' rnams dang / las kyi tshe bgags pa'i sems can rnams sems can phal dang 'dra bar nyon mongs pa'i dbang du mi 'gro ba ste/ de rnams la chos bshad pa yangs dang po nas brtsams nas sa bcu rdzogs par bya ba'i phyir/rnam par dkar ba'i chos sha stag pas sngags kyi tshig rnam par dag pa'o zhes pa'o/ /da ni 'phags pa kun du bzang po la sogs pa de rnams nyid bshad pa'i chos la 'jug pa'i zhar la sngags rgyud dang rtog pa la sogs pa'i chos kyi bdag nyid rnams la 'jug ste/bshad pa'i chos kyi rim pa bsdus par mdzad pas ji ltar rjes su chud pa ste bstan par gsungs pa ste thams cad du yang / bcom ldan 'das rnam par snang mdzad kyi lus kyi las thams cad dang / dag gi las thams cad dang / yid kyi las thams cad du sems can gyi khams thams cad la sngags smra bar bya ste/thams cad du zhes pa ni dus thams cad du zhes pa kho nas dbyung ngo / /nges tshig gi don la 'di lta ste/ sa dang bo pha rol tu phyin pa rdzogs pa'i dus dang / byang chub thob pa'i dus su zhes pa ste/ de ji lta zhe na/ gsungs pa bcom ldan 'das rnam par snang mdzad lus kyi las thams cad dang /ngag gi las thams cad dang yid kyi las thams cad do zhes so/ /de la 'dir lus kyi las la sogs pa'i tshig gis bcom ldan 'das dang pha rol tu phyin pa rdzogs par byed pa dang / de bzhin du byang chub thob pa'i rgyur gyur pa'i lus dang ngag dang yid kyi bya ba nan tan des gang mthu'i khyad par bcom ldan 'das kyi ye shes la bsags pa de las kyi tshig tu gsungs so//de lta bu'i mthu'i mtshan nyid kyi las kyang dkyil 'khor gyi lha'i gzugs su gyur pa'i spyod pa gsungs pa thams cad du yang sems can gyi khams thams cad la sngags kyi tshig gis chos 'chad par mthong ngo zhes pa'o//de las thams cad du zhes pa ni 'jig rten gyi khams rgyas pa thams cad par shes par bya'o/ /sems can gyi khams thams cad la zhes pa ni de 'jig rten gyi khams rgyas par 'gro ba rgyud drug tu gtogs pa'i sems can rnams las dang nyon mongs pa'i dbang gis tshe thob pa rnams shes par dgongs te/sngags kyi tshul gyi tshig gi chos 'chad pa zhes pa ni/ de la shes pa dang dpung gnyen du sbyor bas na/ sngags des sangs rgyas dang byang chub sems dpa' rnams kyi rang bzhin rnams su gsungs te/ de'i rnam par thar pa'i sgo la sogs pa'i tshig rnams dang / der byin gyis brlabs pa nyid yi ge dang tshig byed pa rnams kyang sngags kyi tshig tu gsungs so/ /sngags de rnams kyi rgyu dang rang bzhin dang / 'bras bu thob pa'i thabs kyi lam ni tshul te de shes shing thob pa ni chos kyi tshig de rnams kyi ste de rnams ni sngags kyi tshig ces gsungs so//tshig de rnams kyis bcom ldan 'das kyi las te sngags la sogs pa'i lhar snang bar 'gyur te/ sngags kyi tshul gyis mtshan nyid bshad pa'i chos ston par kun du bzang po la sogs pa'i byang chub sems dpa' de rnams kyis mthong ngo zhes pa 'dis rnam pa gsum gsungs te/de bzhin gshegs pa'i lus la sogs pa'i lam rnams kyis dkyil 'khor gyi lha'i gzugs su gyur pa dang / de yang ji ltar snod du gyur pa'i gdul ba'i 'gro ba 'dul nus pa'i rjes su mthun pa dang / de bshad pa'i chos sngags kyi tshig tu'o/ / don 'di yang bcom ldan 'das kyis yang rgyud 'dir gzhung 'di gsal bar bstan te/ de gsungs pa bcom ldan 'das kyis rang gi lus la sogs pa'i las kyi lha'i gzugs su gyur pa'i phyir ro/ /de bzhin gshegs pa'i thogs pa med pa'i stobs bcu la mos pa las du ma'i kha dog dang dbyibs su bkod pa'i bdag gi ngo bo bskal pa du ma bye ba khrag khrig brgya stong du sbyin pa dang /tshul khrims dang / bzod pa dang / brtson 'grus dang / bsam gtan dang shes rab kyi pha rol tu phyin pa'i bsod nams bskyed pa'i lus 'byung ngo zhes pa la sogs pa ste/de yang bcom ldan 'das kyi lus la sogs pa'i las rnams lha la sogs pa'i gzugs su gyur pa de ni ci yang rung ba ma yin gyi/ sems can 'dul bar snang ba'i rang bzhin du bas te/ gang gsungs pa/ bcom ldan 'das ting nge 'dzin la mnyam par zhugs ma thag tu yang bcom ldan 'das ji lta ba bzhin du las dang tshe'i rnam par smin pa dang /'bras bu za ba dang / bar 'jug pa'i gzugs dang / kha dog dang / dbyibs dang / spyod pa dang / tshig dang brjod pa rnams sems can so sor mgu bar byed pa/ ba spu'i bu ga thams cad nas chos kyi dbyings las skyes pa rtag tu 'byung ste/byung nas kyang nam mkha'i khams kun du rgyas pa/ 'jig rten gyi khams su rgyas par sgra'i dbyangs gcig gis chos kyi dbyings chud par byed pa/ de bzhin gshegs pa 'byung bar srid pa'i tshigs su bcad pa 'di 'byung ngo zhes pa la sogs pa dang /de bzhin du de dag gis bshad pa'i sngags la sogs pa'i tshig tu bya ba'i don dang / de'i byin gyis brlabs kyi phyir gsungs pa dang / ji ltar yang de bzhin gshegs pa'i sngags kyi tshul yi ge'i 'brur gnas pa de dag la/ gsang ba'i bdag po de dag ni de bzhin gshegs pas bskal pa brgya stong khrag khrig du mar bsags pa'i bden pa'i tshig dang /dran pa nye bar gzhag pa bzhi dang / gang 'phags pa'i bden pa bzhi dang / rdzu 'phrul gyi rkang pa bzhi dang / de bzhin gshegs pa'i stobs bcu dang / pha rol tu phyin pa drug dang / byang chub kyi yan lag bdun rnams dang /tshangs pa'i spyod pa rnam bzhi dang / sangs rgyas kyi chos ma 'dres pa bco brgyad rnams ni mdor na gsang ba pa'i bdag po gang de bzhin gshegs pa rnams kyi thams cad mkhyen pa'i ye shes la/ de thams cad de bzhin gshegs pa'i rang gi smon lam dang ye shes kyi stobs dang /chos kyi dbyings kyi byin gyi rlabs kyis byin gyis brlabs te/ ji ltar stong du gyur pa'i sems can rnams la sngags kyi chos ston zhes pa la sogs pa ste/ de la ji ltar rtog pa thams cad rab tu med pa chos kyi sku gnas pa de bzhin gshegs pa de lta bu'i sngags kyi lha la sogs pa 'byung zhes gang gis glengs na/de'i phyir bcom ldan 'das kyis 'di gsungs te/ ji ltar lus kyi bye brag gi dmigs ston pa rnam pa mang du gnas pa de bzhin du sngags kyi mgon po gsungs pa grangs med pa'o/ /ji ltar/ yid bzhin nor bu dpal ldan pa//'dod pa'i don ni rab bsgrub pa/ /de ltar 'jig rten sgron ma yi/ /lus ni thams cad don sgrub pa'o/ /ji ltar na yang gsang ba'i bdag po chos kyi dbyings rnam par mi rtog pa'i dgos pa thams cad mngon par byed ces pa ni 'di lta ste/ gsang ba'i bdag po nam mkha'i khams ni sems can ma yin/srog ma yin/ shed las skyes pa ma yin/ byed pa po ma yin/ tshor ba po ma yin/ gzung ba ma yin/ 'dzin pa ma yin/ rtog pa dang rnam par rtog pa thams cad dang bral te/ 'on kyang sems can gyi khams ma lus pa'i 'gro ba dang 'ong pa la sogs par byed do//de la dgos pa med do/ /de bzhin du thams cad mkhyen pa gnas med pa 'di rnam par mi rtog kyang 'gro ba thams cad kyi phyi nang gi bya ba byed do zhes so/ /bshad pa 'di yang bcom ldan 'das kyi dgongs pa shes pa ni 'di lta ste/ chos kyi sku la rnam par gnas pa de bzhin gshegs pa la rnam par rtog pa med kyang /sngon gyi smon lam gyi shugs kyis lha'i lus la sogs pa thams cad du rab tu snang ba de la rnam par rtog pa'i skabs kyis ci zhig bya zhes pa'o/ /gzhung las 'byung ba de nas phyag na rdo rje gsang ba'i bdag po 'khor 'dus pa na bzhugs pa las langs nas bcom ldan 'das la 'di skad ces gsol to zhes pa nas bcom ldan 'das de lta bas na ye shes de'i rgyu ni gang lags/rtsa ba ni gang mthar thug pa ni gang lags zhes pa'i bar du/ bcom ldan 'das kyi sku dang gsung dang thugs kyi las las thams cad mkhyen pa'i ye shes las 'byung ba thams cad mkhyen pa'i ye shes de sems can rnams la so sor phye ste/tshul sna tshogs dang / bsam pa sna tshogs dang / thabs sna tshogs su 'chad pa de dag ji ltar mthong ba bcom ldan 'das la slar bzlas nas thams cad mkhyen pa'i ye shes de'i rgyu dang rtsa ba dang mthar thug pa dris pa la bya ste/ji ltar bya zhes pa ni 'og nas 'byung ba'i tshig rnams 'dri ba la mi bya'i/ de rnams bdag gi ji ltar chud pa rnams gsol nas/ thams cad mkhyen pa'i ye shes kyi rgyu dang rtsa ba dang mthar thug pa dris pa'i tshig sbyor smos pa'o/ /de la bcom ldan 'das dang de bzhin gshegs pa ni gong du bshad pa'o//dgra bcom pa ni nyon mongs pa'i dgra bcom pa'am bkur sti'i gnas su rigs pa yang dag par rdzogs pa'i sangs rgyas thams cad mkhyen pa'i ye shes thob nas zhes pa ni snying po byang chub na yang dag par bzhugs pa'o//thams cad mkhyen pa'i ye shes ni kun rdzob dang don dam pa rnam pa gnyis te/ kun rdzob ni stobs bcu dang mi 'jigs pa bzhi dang / sangs rgyas kyi chos ma 'dres pa bco brgyad la sogs pa rnam pa thams cad mkhyen pa'o/ /don dam par ni stong pa nyid du mkhyen pa'o/ /so sor phye ste zhes pa ni so sor bshad pa'i don te/thams cad mkhyen par ro gcig tu gyur cing rdzogs pa'i mtshan ni 'og nas 'chad/ mi dang lhar skye ba la sogs te/ 'jig rten gyi dge ba bcu grub pa dang nyan thos la sogs pa thams cad kyang mkhyen pa'i cha ste/ ji ltar zhe na/ 'jig rten gyi bsod nams thams cad mkhyen pa nyid nas 'byung ba'i rgyu ste/thams cad mkhyen pa'i cha shas yod pas na rgyur 'gyur/ gzhan yang mngon du dang nying nas nying gi rgyu dang rang bzhin par rig par ro/ /byang chub sems dpa'i spyad pa spyod pa na dge ba'i tshogs rnams thams cad mkhyen pa'i ye shes la bsags pa de lhun gyis grub pa nyid du sems can rnams la so sor phye ba'i tshul la sogs pa sna tshogs su bstan pa ste/de la tshul sna tshogs zhes pa ni/ kha cig la nyan thos kyi theg pa'i tshul zhes pa nas lnga mngon par shes pa'i tshul du zhes pa'i bar du ste/ de rnams so sor rnam par grol ba'i las la bya'o//bsam pa sna tshogs zhes pa ni kha cig la lhar skye ba'i phyir nyan pa dang / mi'am cir skye ba'i bar du chos 'chad pa zhes pa'i bar du ste/ de rnams su skye bar 'dod pa'i bsam pa dang rjes su mthun par chos 'chad pa la bya'o/ /thabs sna tshogs su 'chad ces pa ni/de la sems can la la yang sangs rgyas kyis 'dul ba rnams kyi ni sangs rgyas kyi gzugs su mthong ngo zhes pa nas/ so so'i spyod lam du rnam par 'dug par mthong ngo zhes pa ste/ tshul sna tshogs dang bsam pa sna tshogs 'chad pa yang thabs yin mod kyi/ dang gnyid sangs rgyas la sogs pa'i skus sems can de dag gi rang rang gi skad kyi tshul du smra zhing /so so'i spyod lam du rnam par 'jug par ston pa nas thabs kyi yang thabs su blta'o/ /so so'i spyod lam du zhes pa ni sangs rgyas dang nyan thos la sogs pas 'dul ba sems can de dag gi spyod lam dang rjes su mthun pa'i gzugs su 'gyur zhing ston pa la bya'o//thams cad mkhyen pa'i ye shes de ni ro gcig ste/ de bzhin gshegs pa'i rnam par grol ba'i ro lags so zhes pa ni de ltar tshul sna tshogs dang / bsam pa dang thabs sna tshogs kyi sgo nas rnam pa tha dad pa du mar spros pa yang /spyi'i de bzhin gshegs pa'i rnam par grol ba/ nyon mongs pa dang shes bya'i sgrib pa spangs pa rtog pa'i bag chags kyi gnas las shin tu 'das pa'i mtshan nyid du ro gcig tu 'gyur ba ni/ dper na bu ram shing rnam pa mang po'i khu ba las bu ram du byas na/ bu ram shing de rnams kyi so so'i ro dbyer med de ro gcig pa dang 'dra'o//de ni 'di lta ste dper na bcom ldan 'das nam mkha'i khams ni rtog pa thams cad dang bral ba ste zhes pa nas de nas lha dang 'jig rten du bcas pa la tshim par byed do zhes pa'i bar du ni thams cad mkhyen pa'i ye shes de'i rang bzhin phun sum tshogs pa dang /mngon par 'tshang rgya ba'i pha rol gyi don phun sum tshogs pa dang / spong ba phun sum tshogs pa dang / ma lus pa'i bde ba thob pa'i pha rol gyi don phun sum tshogs pa thob par bstan pa'i dpe ste/ dpe de dag gis thams cad mkhyen pa'i ye shes de sngon gyi smon lam gyi shugs kyis lhun gyis grub pa nyid du rnam par mi rtog mi dpyod par tshul sna tshogs la sogs pa'i sgo nas sems can gyi don bya ba byed par yang bstan pa ste/de la nam mkha'i dpes ni rang bzhin phun sum tshogs pa bstan te/ nam mkha' ji ltar rtog pa dang dpyod pa'i bag chags kyi gnas med pa de bzhin du thams cad mkhyen pa'i ye shes de la rtog pa med do//rnam par rtog pa dang rnam par dpyod pa med ces pa'i don to/ /de la the tshom dogs pa de ltar thams cad mkhyen pa'i ye shes rnam par mi rtog ste/ sems pa med na lus la sogs pa'i rgyun 'byung zhing sems can gyi don byed pa sems pa med par ji ltar 'byung zhing byed snyam pa la/sa'i dpes rnam par mi rtog bzhin du mngon par 'char ba'i pha rol gyi don phun sum tshogs pa byed par bstan te/ de las ni rtog pa dang rnam par rtog pa med bzhin rtsa ba dang 'bras bu dang me tog la sogs pas sems can thams cad kyi gsos su 'gyur bar byed do//de bzhin du thams cad mkhyen pa'i ye shes de yang rtog pa dang rnam par rtog pa med bzhin sngags kyi lha la sogs pa'i sgor ston te/ sems can rnams kyis kyang sngags kyi lha la sogs pa bsnyen cing bzlas pa la sogs pa'i sgo nas mnyes par byas te/mngon par 'char ba'i mtshan nyid mi dang lha'i longs spyod la sogs pa thob par 'gyur ro/ /me'i dpes ni spong ba phun sum tshogs pa bstan te/ ji ltar mes rtsi shing la sogs pa thams cad bsregs kyang sreg par 'gyur ba'i mthu mi zad do//de bzhin du thams cad mkhyen pa'i ye shes de yang mi shes pa'i bud shing thams cad sreg pa ni/ /rgyu'i tshe byang chub sems dpa'i spyod pa sa dang pha rol tu phyin pa la sogs pa'i rim gyis mi shes pa la sogs pa nyon mongs pa mi mthun pa la sogs pa'i phyogs rnams sel cing med par byed pa ni bud shing sreg pa'o//gnyis su na 'bras bu'i tshe thams cad mkhyen pa nyid mi shes pa med pa'i mtshan nyid pas na mi shes pa'i bud shing sreg pa'i rang bzhin no/ /rlung gi dpes kyang spong ba phun sum tshogs pa de nyid spong ba gong ma des kyang bag chags thams cad ma lus par spong ba'i dpe 'og mas bstan te/de bas na gsungs pa rlung gi khams ni rdul thams cad 'phyag go zhes pa ste/ de la rdul ni phra ba'i mtshan nyid de/ de bzhin du thams cad mkhyen pa'i ye shes mi shes pa'i bag chags phra mo yan chad spangs pa la bya'o/ /chu'i dpes ni ma lus pa'i bde ba'i pha rol gyi don phun sum tshogs pa bstan te/ji ltar chu des tsha ba la sogs pas gdungs pa'i sems can gyi lus sim par byed pa de bzhin du thams cad mkhyen pa'i ye shes de yang / sems can thams cad kyi sdug bsngal dang 'dod chags la sogs pa'i nyon mongs pa rnams kyis gdungs pa zhi bar byed pa ma lus pa'i bde ba'i mtshan nyid mya ngan las 'das pa la sbyor zhing rdzogs pas na/lha dang 'jig rten du bcas pa la tshim par byed do zhes pa de dag ni/ phyag na rdo rje nyid kyis thams cad mkhyen pa'i tshul sngon chad bcom ldan 'das kyis bka' stsal pa las/bdag rang gi 'di ltar rtogs zhes gsol ba ste/ bdag rang chung bar bstan pa dang chos 'chad pa spro ba bskyed pa'i phyir ro/ /de dag gi rang bzhin de ltar chung mod kyi de dag gi rgyu gtso bo'i rgyu dang / rgyu'i rgyu dang / mthar rdzogs par byed pa'i rgyu gang lags zhes dris pa/de dag gi rgyu ni gang / rtsa ba ni gang / mthar gyur pa ni gang zhes so/ /de la 'phags pa phyag na rdo rje tshul sna tshogs la sogs pa dang / de bzhin gshegs pa'i rnam par grol ba'i ro gcig par chud pa'i shes rab kyis sam/ thos pa'i shes rab kyis shes/ de ste chud pa'i shes rab kyis shes na de bzhin gshegs pa dang khyad par med/thos pa'i shes rab kyis chud na sems can phal dang 'dra bar dogs pa la lan du bya ba/ shes rab de gnyis kas shes pa la nyes pa med de/ bcom ldan 'das kyis sku mi zad pa'i rgyan la sogs par 'jug pa rang gi mthu ji tsam pa'i spyod yul chud kyi/bcom ldan 'das ltar rnam pa thams cad du chud pa ni ma yin te khyad par med par mi 'gyur/ thos pa yang chud pa gtso bo yin par gyur gyi/ sems can phal ltar thos pa tsam gtsor gyur pa ma yin pas sems can phal dang khyad par med par mi 'gyur ro//gnyis su ni chud pa'i shes rab kyis rnam pa thams cad chud pa la nyes pa med de/ bcom ldan 'das kyis byin gyi rlabs kyis pha rol gyi sems shes pa bzhin du thams cad mkhyen pa'i ye shes kyi spyod yul rnam pa thams cad du chud par 'gyur ro//de la bcom ldan 'das la phyag na rdo rjes thams cad mkhyen pa'i ye shes de'i rgyu dang rtsa ba dang mthar gyur pa dris pa la/ dge'o dge'o tshig lan gsum gsungs pa/ gong ma gnyis ni dris pa'i dngos po bzang bas mnyes te/ bstod pa'i tshig tu lan gnyis bzlas pa ni dris pa'i tshig de nyid dge ba la bya/'og ma gcig ni phyag na rdo rje la bya ste/ de lta bu'i don bzang po 'dri zhing sems can la phan gdags pa'i phyir dris pa dge'o zhes gsungs pa'o/ /dge bar nyon la shin tu yid la zung shig ces pas snod bzhi las bzlog par gsungs te/ nyon cig ces pa ni snod khas phub pa las bzlog pa'o//dge bar zhes pa ni snod gyo mo las bzlog pa'o/ /shin tu zhes pa ni snod mi gtsang bas gang ba las bzlog pa'o/ /yid la zung shig ces pas ni snod zhabs rdol las bzlog pa'o/ /byang chub kyi sems ni rgyu'o/ /snying rje ni rtsa ba'o/ /thabs ni mthar gyur pa zhes pa la de la byang chub kyi sems la yang rnam pa gnyis te/byang chub kyi phyir sems dpa' dang byang chub kyi rang bzhin gyi sems so/ /byang chub kyi phyir sems dpa' ni smon pa dang 'jug pa'i sems dag kyang yin mod kyi/ skabs 'dir sa dang po'i byang chub kyi sems la bya ste/ sa dang po'i sems de mngon par byang chub pa'i snying por sbyor ba'i phyir ro/ /byang chub kyi rang bzhin gyi sems kyang 'di lta ste/ sa dang po byang chub kyi sems de ni chos thams cad mnyam pa nyid du chud pa'i rang bzhin te/ mngon par byang chub pa dang rang bzhin gcig pa'i phyir ro/ /de lta bu'i byang chub kyi sems ni thams cad mkhyen pa'i ye shes kyi rgyu'i gtso bor rig par bya'o//snying rje ni rtsa ba ste sems can sdug bsngal bas gdungs pa las bral ba'i phyir/ snying rje'i sgo nas smon lam la sogs pa'i byang chub kyi sems skye ste/ de bas na snying rje chen po byang chub kyi sems kyi rtsa bar gyur pas na rgyu'i yang rgyur blta'o//gnyis su na thams cad mkhyen pa'i ye shes brtan par gnas pa'i phyir rtsa ba zhes bya ste/ thugs rje'i gzungs kyis lhag ma ma lus pa'i mya ngan las mi 'da' bar dus thams cad du mi gnas pa'i mya ngan las 'das par gnas shing / kun rdzob dang don dam pa'i ye shes brtan pa ste/sdong po'i rtsa ba ltar brtan par byed pa bas na thams cad mkhyen pa'i ye shes kyi rtsa ba'o/ /thabs ni mthar gyur zhes pa las/ thabs ni sbyin pa'i pha rol tu phyin pa la sogs pa de dag thams cad mkhyen pa'i ye shes rdzogs par sbyor ba'i mtha' de dag gis brtan pas na mthar gyur par blta'o//de la thams cad mkhyen pa'i rgyu byang chub kyi sems so zhes bya ba byang chub nyid gang yin mi shes pa bstan pa gsang ba pa'i bdag po de la byang chub gang zhe na 'di lta ste/ 'di ni nam mkha'i mtshan nyid do zhes gsungs pa'i bar du'o/ /gong du byang chub kyi sems thams cad mkhyen pa'i ye shes kyi rgyur bshad pa de'i byang chub kyi rang bzhin bshad pa la bya ste/gsang ba'i bdag po de la byang chub gang zhe na/ rang gi sems nyid ji lta ba nyid du shes pa zhes pa la gang zhe na zhes pa ni nyan thos dang rang sangs rgyas dang theg pa chen po'i byang chub rnams las gang yin zhes pa la mi bya'i byang chub de ci 'dra ba zhes pa la bya'o//rang gi sems ji lta ba nyid du shes pa ni sbyor ba'i sems kyis bum pa la sogs pa ji bzhin par mthong ba de skad cig ma phyi ma'i sems kyi bum pa la sogs pa'i ji bzhin pa de yang dag pa ma yin par sun phyung nas de ltar gzung ba'i cha sun phyung ste/med na 'dzin pa'i cha yang yod pa ma yin te/ de ltar gzung ba dang 'dzin pa'i rang bzhin dang bral ba yongs su dag par ji bzhin med par rang bzhin gyis dag par shes pa ni rang gi sems yang dag par ji lta ba nyid du shes pa'o/ /de bzhin du gzhung gzhan las kyang /ye shes bzhi las mnyam pa nyid kyi ye shes ni byang chub kyi sems su bshad/ me long lta bu'i ye shes dang / so sor rtog pa dang / bya ba nan tan gyi ye shes ni thams cad mkhyen pa'i ye shes su bshad par rig par bya'o/ /de ni bla na med pa yang dag par rdzogs pa'i byang chub po zhes pa la/bla na med pa ni byang chub de'i gong na de las lhag pa'i byang chub gzhan med pa'o/ /yang dag par byang chub pa ni phyin ci ma log par byang chub pa la bya ste/ nyan thos dang rang sangs rgyas ni nyon mongs pa'i sgrib pa spangs kyang / shes bya'i sgrib pa ma spangs pas phyogs gcig phyin ci log pa ni ma yin gyi nyon mongs pa dang shes bya'i sgrib pa gnyis spangs pas yang dag par byang chub pa'o//rdzogs par byang chub pa ni kun du byang chub pa zhes bya ste/ shes bya dang nyon mongs pa'i sgrib pa'i bag chags yan chad ma lus par spangs pas na kun du byang chub pa zhes bya'o//gnyis su na rang gi sems ji lta ba nyid kun rdzob dang don dam pa'i chos rnams rnam pa thams cad du stong par shes par bya'o/ /gsang ba'i bdag po de la ni chos cung zad kyang yod pa ma yin zhing dmigs pa med do zhes pa ni/ byang chub de la phung po dang khams dang skye mched dang /gzung ba dang 'dzin pa ni chos kyi rang bzhin bag chags tsam yang med pas byang chub de nyid 'dzin pa'i rang bzhin du yod pa ma yin no/ /dmigs su med do zhes pa ni dmigs pa'i yul ma yin pas gzung ba'i rang bzhin med do/ /de ci'i phyir zhe na/ byang chub de ni nam mkha'i mtshan nyid do zhes pa ni de la nam mkha'i mtshan nyid rtag pa dang mi 'gyur ba dang stong pa la sogs pa'i mtshan nyid kyang yin mod kyi/skabs 'dir gzung ba dang 'dzin pa rang bzhin med pa la bya ste/ de bas na de ltar bstan pas gsungs pa de la shes bya dang shes par bya ba gang yang med do zhes so//shes pa ni 'dzin pa'o/ /shes par bya ba ni gzung bar bya ba ste/ byang chub de la gzung ba dang 'dzin pa gang yang med pa'i phyir ro/ /de ci'i phyir zhe na/ gsang ba'i bdag po byang chub la mtshan ma med pas so zhes pas ni byang chub de la kha dog sngon po dang ser po ji bzhin pa dang kha dog dbyibs la sogs pa ji bzhin pa'i mtshan ma med pa'i phyir ro//chos thams cad kyang mtshan nyid med ces pa la sogs pa'i sems ji bzhin par shes pa de byang chub cas bshad na/ sems las gzhan pa'i chos de dag ji bzhin par shes pa ni ma yin nam zhe na/ ji ltar sems ji bzhin par shes shing mtshan ma med pa la sogs pa bshad pa bzhin no//chos thams cad kyang mtshan ma med de nam mkha' bzhin zhes pa'o/ /yang na byang chub mtshan ma med pa ni chos thams cad mtshan ma med de nam mkha'i mtshan nyid do zhes par yang bshad do/ /de la chos ni sems las gzhan pa'i phung po la sogs pa'o//'di lta ste nam mkha'i mtshan nyid do zhes pa ni nam mkha' la mtshan nyid med pa'i phyir ro/ /de nas bcom ldan 'das la phyag na rdo rjes 'di skad ces gsol to/ /bcom ldan 'das thams cad mkhyen pa'i ye shes gang nas btsal bar bgyi/byang chub mngon par rdzogs pa yang gang nas btsal bar bgyi zhes pa nas/ gsang ba'i bdag po de ni byang chub sems dpa'i byang chub kyi rnam par dag pa'i sgo zhes bya ba chos snang ba'i sgo mo ste chos snang ba'i tshul dang po'o zhes pa'i bar du/ thams cad mkhyen pa'i ye shes dang /byang chub mngon par rdzogs par bya ba'i phyir/ 'jug pa'i thabs dris pa dang / de gnyis rang gi sems las btsal ba'i thabs bstan pa la bya'o/ /de la thams cad mkhyen pa'i byang chub mngon par rdzogs pa gang nas btsal zhes pa ni de la ji ltar 'jug ces dris pa'o/ /byang chub de dang thams cad mkhyen pa nyid rang gi sems las btsal bar bya'o zhes pa nas rang gi sems nyid gzung ba dang 'dzin pa'i phyir rang bzhin rnam par rtog pa'i bag chags spangs te/rnam par dag pa na rang bzhin gyis 'od gsal ba/ so so rang gi rig pa mi g.yo ba ye shes kyi snang ba'i mtshan nyid byang chub dang /thams cad mkhyen pa'i rang bzhin du 'gyur zhes pa'i don to/ /sems la ji ltar brtags pas don de shes par 'gyur zhe na/ de rtog pa'i gang zag kyang rnam pa gnyis te/ dbang po las 'das pa'i ye shes dang ldan pas sangs rgyas dang byang chub sems dpa' dang /'og ma'i lta ba can 'gro ba tha dad pa rnams kyis so/ /de la 'gro ba tha dad pas brtag par gsungs pa/ sems phyi nang dang bar nas mi dmigs so zhes so/ /phyi ni gzung ba nang ni 'dzin pa/ bar ni de gnyis ga'i bar nas kyang sems mi dmigs so zhes pa'o/ / dbang po las 'das pa'i ye shes dang ldan pa rnams kyis kyang rnam pa lnga'i dngos por sems ma dmigs pa ni/ kha dog dang dbyibs dang khams dang rgyud dang gnas par te/ de bas na kha dog sngon por yang ma yin zhes pa nas lus la mi gnas yid la mig nas/ mthong pa yang med/ mthong bar 'gyur ba yang ma yin zhes pa'i bar du gsungs pa ste/mthong pa med ces pa ni 'das pa dang da ltar gyi dus na yang ma mthong ba'o/ /mthong bar 'gyur ba yang ma yin no zhes pa ni ma 'ongs pa'i dus na yang mthong bar mi 'gyur ba'o/ /kha dog sngon po yang ma yin zhes pa nas kha dog shel lta bu'i bar yang ma yin zhes pa'i bar du ni sems de kha dog ji bzhin par mthong ba'i yul ma yin pa la bya'o//thung du ma yin zhes pa nas ma ning du yang ma yin zhes pa'i bar du dbyibs ji bzhin par ma yin pa la bya'o/ /'dod pa'i khams kyi rang bzhin ma yin gzugs dang gzugs med pa'i khams kyi rang bzhin yang ma yin zhes pa ni khams kyi ji bzhin par mthong ba med pa la bya'o//lha dang klu dang gnod sbyin dang zhes pa nas sems can gyi ris mthun pa'i rang bzhin ma yin zhes pa'i bar du rgyud ji bzhin mthong ba med pa la bya'o/ /sems ni mig la'ang mi gnas zhes pa nas yid la mi gnas zhes pa'i bar du dbang po drug la sems gnas par mthong ba med pa la bya'o//kha dog dang dbyibs la sogs pa de rnams kyi ji bzhin par snang ba ni/ sems de gzung ba dang 'dzin pa'i rang bzhin dang ma bral bas dri ma dang bcas par 'gyur/ de ltar dri ma dang bcas pas na thams cad mkhyen pa'i ye shes ma yin te/de bas na dri ma de dag thams cad yongs su dag pa'i sems de ni thams cad mkhyen pa ste/ de'i phyir gsungs pa/ ci'i phyir zhe na/ sems ni nam mkha'i mtshan nyid de/ /zhes pa ste nam mkha'i mtshan nyid ni rtog pa dang rnam par rtog pa spangs pa ste/nam mkha'i mtshan nyid de dang 'dra ba'i phyir gsungs pa de bas na rtog pa dang rnam par rtog pa thams cad dang bral ba'o zhes pa ste/ rnam par rtog pa dang rnam par dpyod pa spangs pa zhes pa'i don to/ /de ltar sems ni nam mkha'i mtshan nyid dang 'dra bas byang chub kyang de yin/gsungs pa gang nam mkha'i rang bzhin pa de sems kyi rang bzhin pas de byang chub kyi rang bzhin zhes pa'o/ /de ltar sems dang nam mkha' dang byang chub rnams gzung ba dang 'dzin pa'i rang bzhin gnyis su med par gsungs pa/ de ltar na gsang ba'i bdag po sems dang nam mkha'i dbyings dang /byang chub mi gnyis te de dag la gnyis su med ces pa'o/ /de ni snying rje'i thabs kyi pha rol tu phyin pas zin pa'o zhes pa ni de lta bu'i sems rang bzhin gyis gzung ba dang 'dzin pa'i bag chags kyang med pa byang chub dang thams cad mkhyen pa'i mtshan nyid de'i rtsa ba ni snying rje ste brtan par byed pa'o//de la sbyor bar byed pa'i thabs ni pha rol tu phyin pa ste/ yongs su zin pa ni thams cad mkhyen pa'i ye shes te skyong ba'i rgyur shes par bya'o/ /gsang ba'i bdag po de gzhung 'dis 'di ltar rig par bya'o zhes pa ni gong du byang chub gang zhe na rang gi sems ji lta ba nyid do zhes pa dang /thams cad mkhyen pa dang byang chub mngon par rdzogs par rang gi sems las btsal bar bya'o zhes gsungs pa dang / byang chub dang thams cad mkhyen pa rang gi sems las bcol te/ rang bzhin gyis 'od gsal ba'i phyir zhes pa la sogs pa gsungs pa de gzhung gcig ste/gnyi ga yang byang chub dang thams cad mkhyen pa'i rgyur 'gyur ba'i tshig gi gzhung du rig par bya'o/ /sangs rgyas bcom ldan 'das kyis chud pa'i chos dang / lugs kyi chos byang chub sems dpa'i 'khor la gang dang gang bshad pa/ tshig la sogs pa'i sgo tha dad kyang gzhan gyi phyir ma yin gyi/don rnam pa gnyis kyi phyir te/ byang chub kyi sems rnam par dag pa dang / rang gi sems kun du shes par bya ba'i phyir/ de bas na gsungs pa/ ngas byang chub sems dpa'i 'khor la chos gang dang gang bshad pa de dag thams cad ni byang chub kyi sems rnam par dag pa dang sems yongs su shes pa'i phyir zhes pa de la byang chub kyi sems rnam par dag pa ni byang chub sems dpa'i sa dang po la byang chub kyi sems chud pa de gzung pa dang 'dzin pa las rnam par grol ba'i phyir dag pa'o//sems zhes pa ni gang sems kyi ngo bo shes pa de'i rgyus sa dang po thob par byed pa de la bya ste/mos pa spyod pa'i tshe sems bskyed de/ de dag gi phyir chos bshad ces pa'i don te byang chub kyi sems nyid la sbyor bar byed pa'o/ /de ltar sems yongs su gzung bar bya ba yang kha dog ji bzhin pa la sogs par shes par bya ba ma yin gyi ji bzhin pa'i rang bzhin thams cad las 'das pa'i rang bzhin du ste/byang chub ni gzung ba dang 'dzin pa'i cha dang bral ba rnam par dag pa tsam gyi rang bzhin du yang ma yin te/ ji tsam du mtshan mar gyur pa de dag thams cad du rang gi sems de shes par mi bya zhing btsal du mi rnyed pa gsungs pa 'di lta ste/ji bzhin du dbyibs sam kha dog tu'am zhes pa nas rnam pa thams cad du yongs su btsal kyang mi rnyed do zhes pa'i bar du ste kha dog dang dbyi bas la sogs pa'i rnam pa de dag re re nas smos pa yang gang dang gang du chags pa'i gnas rnams su rig pa'i gzhung gis brtags na dngos po yod pa ma yin te/kha dog dang gzugs la sogs pa'i de dag brtags pa yang kha dog dang gzugs la sogs pa de dag sems las tha mi dad de/ sems kyi snang ba yin na ni sems nyid kyang gzugs can du 'gyur ba ji tsam du gzugs dang ldan pa de thams cad rdul phran gyi chas gzhigs na yod par mi 'gyur te/kha dog la sogs pa de dag sems la tha dad kyang de dag rdul phran gyi chas gzhigs na yod par ma grub pas gzugs med na gzugs kyi ji bzhin par skye ba'i rnam par shes pa mi skye ste yod pa ma yin no/ /de bzhin du tshor ba la sogs gzhan yang phyi rol gyi yul sun phyung ste/dmigs su med pas na yul can med par sems dang sems las byung ba mi srid pas mi dmigs so/ /gsang ba'i bdag po de ni byang chub sems dpa'i byang chub kyi sems rnam par dag pa'i sgo zhes bya ba chos snang ba'i tshul lo zhes pa ni de lta bu'i tshul du mos pa spyod pa'i sa na sems yongs su shes pa de ni rnam pa gsum gyi rgyu yin par bshad pa ni sa dang po'i byang chub kyi sems dang /mngon par byang chub pa dang thams cad mkhyen pa'o/ /de la sa dang po'i byang chub kyi sems rnam par dag pa'i mtshan nyid la 'jug pa'i sgo nas byang chub kyi sems rnam par dag pa'i sgo zhes gsungs so//chos snang ba'i sgo zhes pa ni mya ngan las 'das pa'i chos gzung ba dang 'dzin pa dang bral ba ste/ snang ba ni mkhyen zhes pa'i don to/ /snying po byang chub nyid do/ /de thob pa'i rgyu'am sgo ni sems zhes pa'o/ /chos snang ba'i tshul zhes pa ni/skad cig ma dang po la mnyam pa nyid kyi ye shes kyi mtshan nyid mngon par byang chub nas/ thams cad mkhyen pa'i mtshan nyid me long lta bu dang so sor rtog pa dang / bya ba nan tan gyi ye shes skad cig ma gnyis pa la thob ste/ mya ngan las 'das pa'i chos kun rdzob dang don dam pa'i tshul du thams cad mkhyen pa'o//dang po zhes pa ni skad cig ma dang po la byang chub thob pa la bya'o/ /de dag la rab tu gnas pa'i byang chub sems dpa' nyon mongs pa'i sgrib pa thams cad spong ba'i ting nge 'dzin rab tu thob bo zhes pa'i bar du de lta bur rang gi sems ji lta ba nyid shes par byed pa la gnas pa'i rjes su bsngags pa bshad pa la bya ste/de dag la rab tu gnas pa'i byang chub sems dpa' zhes pa ni rang gi sems gzung ba dang 'dzin pa la sogs pa'i ji bzhin par mi lta bar gnas pa la bya ste/ de ltar gzung ba dang 'dzin pa'i rang bzhin ma mthong ba'i sems ni rnam par dag pa ste/de ltar sems rnam par dag pa na/ lhun gyis grub pa nyid du nyon mongs pa'i sgrib pa dang / las kyi sgrib pa dang / tshe'i sgrib pa la sogs pa thams cad spang pa'i gnyen por gyur pa'o/ /ting nge 'dzin rab tu 'thob par gyur te/ de bas na gsungs pa/ nyon mongs pa'i sgrib pa thams cad spong ba'i ting nge 'dzin rab tu 'thob ces so//de lta bu'i sems rnam par dag pa la rab tu gnas par gyur pa ni sgrib pa thams cad bsal bas sangs rgyas thams cad la mngon sum du chos nyan cing bsnyen bkur byed pa dang lnga mngon par shes pa 'thob ste/ 'phrul gyi mig gis lam ring po na 'dug pa'i gzugs kyang ri dang rtsig pa la sogs pa la thogs pa med par mthong /rdzu 'phrul gyi rna bas lam ring po na 'dug pa'i sgra yang ri dang rtsig pa la sogs pas bar mi chod par thos/ pha rol gyi sems 'dod chags dang bcas pa'am/ 'dod chags dang bral ba la sogs pa shes/ tshe rabs snga ma la yang ci byed pa dang / gnas gang na gnas pa rjes su dran/ rdzu 'phrul gyi rkang pa la sogs pa 'thob ste/ mtha' yas pa'i mi dang lha la sogs pa'i tshig shes pa gzungs mtha' yas pa'i bya ba la sogs pa'i dbyangs kyi nga ro las don chung pa'i gzugs dang 'brug gi sgra dang /sems can ma yin pa'i sgras sa g.yo ba dang chu la sogs pa'i sgra mtha' yas pa la sogs pa las/ sgra de dag gi don ci zer rtogs pa'i gzungs thob ste/ sems can rnams kyi bsam pa dang rjes su mthun par 'gyur ro//de bzhin gshegs pa thams cad kyis byin gyis brlabs nas khams gsum na 'khor ba na yang 'thob pa'i chos nyams par mi 'gyur ba dang / ma thob pa yang mi thob par mi 'gyur zhing sems can gyi don bya ba la nam 'khor ba yod kyi bar du skyo bar mi 'gyur te/ de bas na gsungs pa/sangs rgyas thams cad gnas par rab tu 'thob/ lnga mngon par shes pa yang rab tu 'thob/ mtha' yas pa'i tshig dang dbyangs dang sgra'i gzungs rab tu 'thob/ sems can rnams kyi bsam pa bzhin du 'jug par 'gyur ro/ /de bzhin gshegs pa thams cad kyis byin gyis brlabs nas 'khor ba na yang chos mi nyams pas sems can gyi don bya ba la mi skyo ba yin zhes pa'o//'dus ma byas kyi tshul khrims la rab tu gnas zhes pa ni/ stong pa nyid rab tu rtogs pa la gnas pas stong pa nyid kyi ngang tshul du gyur pa yin gyi/ sems can gyi don gyi tshul khrims dang /dge ba la sogs pa'i tshul khrims dang sgom pa la sogs pa kun rdzob kyi tshul khrims la ni mi bya'o/ /log par lta ba spangs pa zhes pa ni/ mu stegs la sogs pa'i lta ba rnams dang bral ba la bya'o/ /yang dag par rgyun du zhugs zhes pa ni 'di ltar log pa'i lta ba spangs bas yang dag pa'i lta ba rtogs pa zhe'o//gzhan yang gsang ba'i bdag po sgrib pa thams cad spong ba'i ting nge 'dzin 'di la gnas pa'i byang chub sems dpa' zhes pa ni de lta bu'i ting nge 'dzin sngar thob nas thob pa tsam du ma zad kyi ting nge 'dzin nyid dang ldan par gnas pa la bya'o//shin tu dad pa'i mthus sangs rgyas kyi chos nyon mi mongs par yongs su rdzogs par 'gyur te zhes pa ni gzung ba dang 'dzin pa rab tu spangs pa/ rang bzhin gyis 'od gsal ba'i sems byang chub kyi mtshan nyid de lta bu la lhag par mos pa'i mthus bsags pas sangs rgyas kyi chos chud pa dang /lugs kyi mtshan nyid dang / pha rol tu phyin pa la sogs pa dang / sku'i 'khor lo la sogs pa'i chos rnams ma bsgrubs kyang thob par 'gyur ba'o/ /mdor na gsang ba'i bdag po rigs kyi bu'am rigs kyi bu mo gang yang rung ste/ de ni yon tan tshad med pa dang ldan par 'gyur te zhes pa ni/de lta bu'i ting nge 'dzin dang ldan pa'i rigs kyi bu'am rigs kyi bu mo de dag gi so so'i yon tan brjod na bskal par yang mi rdzogs te/ brjod kyis mi lang bas tshad 'di tsam mo zhes gzung du med de/ mdor smras pa tshad med pa'i yon tan dang ldan no zhes pa'o//de nas yang bcom ldan 'das la phyag na rdo rjes 'di skad ces gsol to zhes pa nas/ thub pa chen pos bshad du gsol/ /zhes pa'i bar du ni gong du thams cad mkhyen pa'i ye shes kyi rgyu dang byang chub sems kyi mtshan nyid zhib tu bshad de/ byang chub kyi sems de lta bu la gnas pa'i ting nge 'dzin thob pa'i yon tan gyi tshad kyang tshad med pa'i yon tan dang ldan pa zhes gsungs te/de lta bu'i byang chub kyi sems ji ltar skye bar 'gyur ba dang / byang chub kyi sems de'i mtshan nyid ci 'dra bar shes par bya ba la sogs pa dris pa ste/ de ji ltar sems na bcom ldan 'das byang chub tu ni skye zhes bgyi zhes pa ni spyir na skyes zhes pa dang /skye zhes bgyi zhes pa gnyis te/ de la skye zhes pa ni ming tsam ste/ dper na bu mngal du zhugs pa lta bu'o/ /skye zhes bgyi zhes pa ni skyes par gdags pa'i don to/ /dper na bu btsas pa dngos lta bu'o/ /de bas na byang chub kyi sems skye ba tsam dris pa ma yin gyi sa dang po'i sems byang chub kyi mtshan nyid yongs su rdzogs par skyes pa dris pa la bya'o//byang chub tu zhes pa ni bla na med pa'i byang chub kyi phyir skye ba la bya ste/ de yang sa dang po'i sems kyi mtshan nyid bla na med pa'i byang chub dang rang bzhin gcig pa'o//bla na med pa'i byang chub la sogs pa rim gyis rdzogs par byed pa yang rang bzhin de la tha dad pa ma yin gyi rang bzhin de nyid las/ mi mthun pa'i gnyen po la sogs pa sel pa'i sgo nas ming gzhan du btags pa tsam du zad do/ /dper na gser nyid las rgyan la sogs par byas na rang bzhin gcig kyang ming gi rnam grangs mang por thogs pa dang 'dra ste/de bas na sa dang po'i byang chub kyi sems de byang chub kyi rang bzhin la yang bya ste/ smon pa dang 'jug pa'i sems kyang byang chub kyi phyir sems pa yin mod kyi/ sa dang po'i byang chub kyi sems ltar bla na med pa'i byang chub dang rang bzhin mi gcig pas de la mi bya'o//yang rnam pa gcig tu na lan bka' stsal pa/ byang chub kyi sa dang po'i mtshan nyid gsungs pas na gzhan ma yin par mngon no/ /ji ltar na mtshan nyid shes par bgyi/ byang chub 'byung ba skyes pa'i sems//zhes pa ni sa dang po'i byang chub kyi sems de las bla na med pa'i byang chub 'byung bas de ni byang chub 'byung ba zhes bya ste/ byang chub 'byung ba'i sems de skyes pa'i mtshan nyid bsod nams chen po'i snying po nam mkha' bzhin du tshad med pa la sogs pa dris pa la bya'o/ / sems rig pa'i mchog ye shes 'byung bas gsungs zhes pa ni bcom ldan 'das la yon tan gyi sgo nas bstod pa la bya ste/ bcom ldan 'das ni 'jig rten dang nyan thos dang rang sangs rgyas su sems rig pa mchog gi phyir bya ba dang / longs spyod rdzogs pa'i sku de thams cad mkhyen pa'i ye shes las byung bas ye shes 'byung zhes gsungs so//dpa' bo chen po ji snyed cig /shin tu 'das nas gdod skye ba/ /zhes pa ni 'jig rten pa'i sems grangs du zhig 'das nas byang chub kyi sems de skye ba dris pa ste/ sems brgya drug cu po 'das nas skye ba la bya ste/ sems skyes zhes pa ma yin gyi skye btsam la bya'o/ /mgon po sems rnams mtshan nyid dang / /dus kyang rgyas par bshad du gsol/ /zhes pa ni sems brgya drug cu po de dag gi mtshan nyid 'dod chags kyi sems zhe sdang gi sems zhes pa la sogs pa dang / sems brgya drug cu po de dag 'das nas kyang bskal pa la sogs pa ji srid cig na byang chub kyi sems de skye bar 'gyur zhes pa'i dus dris pa'o//de'i bsod nams ci 'dra ba dang spyod pa ci 'dra ba zhig ces pa ni de lta bu'i byang chub kyi sems skyes pa de'i bsod nams ji lta bu dang / spyod pa ci 'dra ba zhig spyad pas na byang chub kyi sems de thob ces pa'o//sems la sems kyi khyad par yang / /theg pa chen po bshad du gsol/ /zhes pa ni sems can dbang po rnon po chos la bdag med par rtogs nas 'jug pa dang / 'phags pa nyan thos la sogs pa dbang po rtul po rgyun du zhugs pa la sogs pa'i sa brgyad bsgoms nas 'jug pa'i khyad par dris pa la bya'o//de la sems zhes bya ba ni byang chub kyi sems spyir bya'o/ /de nas rnam par snang mdzad kyis zhes pa nas/ byang chub dang po zhes kyang bya/ /zhes pa'i bar du gong du phyag na rdo rjes dris pa'i lan bka' stsal pa la bya ste/ bu khyod ces pa ni phyag na rdo rje chos kyi dbyings las skyes pas na bcom ldan 'das kyi sras so//chen po 'byung ba zhes pa ni sems kyi rgyud kyi mtshan nyid la bya ste/ sems kyi rgyud de las byang chub dang thams cad mkhyen pa'i ye shes chen po 'byung ba'i phyir ro/ /dge'o zhes pa ni de lta bu'i don bzang po dris pa nyid dge ba dang phyag na rdo rje dga' ba bskyed pa'i phyir gsungs so//theg chen gnas ni mchog yin zhes pa ni sems kyi rgyud de/ theg pa gsum gyi nang na mchog dam pa la bya'o/ /sems kyi rgyud kyi mtshan nyid do zhes pa ni yon tan gyi khyad par de lta bu dang ldan pa'i sems kyi mtshan nyid bshad kyis nyon cig pa dang sbyar ro//sangs rgyas rnams kyi gsang mchog ces pa ni de lta bu'i sems rnam par dag pa thams cad mkhyen pa dang mngon par byang chub pa'i rang bzhin te/ sems can phal gyi spyod yul ma yin pa dang / snod ma yin pa la mi bstan pa'i phyir gsang ba zhes bya'o/ /rtog pa kun gyis rig mi nus//zhes pa ni stong pa'i mtshan nyid kyi sems te/ mngon sum dang rjes su dpag pa'i sgo nas de ji bzhin pa mi rtogs pa'o/ /yid la bsdus la nyon cig pa ni ma yengs par nyon cig pa'o/ /sems brgya drug cu las 'das pa'i skye bo'i 'og tu zhes pa ni 'jig rten pa'i sems brgya drug cu las 'das nas chos la bdag med par rtogs te mos pas spyod pa'i sa la sems gsum rnam par bsgom pa dang /pha rol tu phyin pa rnams rnam par spyad pa dang / bsdu pa'i dngos po rnam bzhi byas nas mos pa spyod pa'i sa las 'phar te/ sa rab tu dga' ba'i sems ye shes kyi sa la zhugs pa la bya ste/ji snyed cig tu 'das nas skye zhing dris pa'i lan to/ /bsod nams chen po zhes pa ni pha rol tu phyin pa la sogs pa'i bsod nams chen po'i rgyu las skyes pa'o/ /snying po zhes pa ni phyin ci ma log pa yongs su rdzogs pa ste/ dper na tsan+dan dang seng ldeng gi snying po ltar mchog dam pa la bya'o//byang chub phyir du byang chub 'byung / /zhes pa ni bla na med pa'i byang chub thob pa'i phyir byang chub kyi sems de las sems 'byung ba la bya'o/ /tshad med pa ni nam mkha' bzhin/ /zhes pa ni byang chub kyi sems de'i yon tan la sogs pa tshad gzung zhing dpag tu med pa'am/de bzhin dpag tu med pas 'di tsam mo zhes tshad gzung du med de nam mkha' dang 'dra ba la bya'o/ /gos pa med pa ji bzhin gnas/ /zhes pa ni de lta bu'i sems nam mkha'i mtshan nyid la glo bur gyi nyon mongs pa'i bag chags kyis ma gos pa ste/ de ltar glo bur gyi nyon mongs pa ji bzhin pa'i dbang du ma gyur pas shin tu rnam par dag pa'i rang bzhin du gnas pa la bya'o//chos kun gyis ni yongs mi g.yos/ /tshad med ye shes kyis bsgrubs pa/ /zhes pa ni byang chub kyi sems de tshad med pa'i ye shes las 'byung ba la bya'o/ /yang dag par rdzogs pa'i sangs rgyas mthong ngo zhes pa ni sangs rgyas dang byang chub sems dpa' la mchod pa byas pa dang sa dang pha rol tu phyin pa la sogs pa spyad pa las byung ste/de ni/ de yi spyad pa ci 'dra ba/ zhes dris pa'i lan to/ /byang chub dang po zhes kyang bya/ /zhes pa ni sa dang po'i byang chub kyi sems la bya ste/de rnams ni byang chub kyi sems kyi rgyu dang rang bzhin bshad pa'o/ /de lta bas na gsang ba'i bdag po 'khor ba thog ma med pa nas bus pa so sor 'gro ba rnams zhes pa nas zhes rtog go zhes pa'i bar du bcom ldan 'das rnam par snang mdzad kyi rgyu bshad pa la bya ste/ rgyu de yang rnam pa gnyis so/ /de la yang 'jig rten pa'i sems brgya drug cu la sogs pa ni rnam par snang mdzad kyi rgyu len pa'i rgyu'o/ /sa dang pha rol tu phyin pa gzhan ni lhan cig pa'i rgyu'o/ /de bas na so sor 'gro ba la yang rnam pa gnyis te/ 'jig rten pa'i gzhung lugs shes pa dang mi shes pa'o//de la byis pas ni ngan par smra ba dang / ngan par byed pa dang / ngan par sems pa ste/ de dag ni rang gi gzhung lugs kyang mi shes pa'o/ /de las gzhan pa ni rang rang gi gzhung lugs shes pa 'phags pa'i lam thob pa la bya ste/ de dag 'khor ba na sdug bsngal gsum gyis gdungs nas gdungs pa de las thar pa'i phyir/bdag dang bdag gir brtags pa de dag la brtan nas sbyin pa la sogs pa byas nas thar par re ba'o/ /bdag dang bdag gi ba la mngon par chags nas bdag tu 'dzin pa grangs med pa la rtog pa de dag kyang bdag ces pa'i rang bzhin ci 'dra bar ma spyad par chags pa skye ba ni rang gi gzhung lugs mi shes pa'i byis pa rnams so//rang rang gi lugs shes pa de rnams kyang so so'i bdag tu brtags pa de la brten pa ni kha cig ni dus las byung ngo zhes pa nas smra ba'o mi smra ba'o zhes pa'i bar du ste/ de dag ni 'jig rten pa rnams kyis so so'i bdag tu brtags pa ste/ji skad du smos pa'i bdag dang bdag gi ngo bo de dag gis bdag cag 'gro ba rnams bskyed de/ 'jig par byed pa yang de dag nyid par rtog pas/ gsang ba'i bdag po de lta bu la sogs pa zhes pa ni gong du smos pa'i bdag gi dngos po rnams la bya'o//thar par re ba'i phyir zhes pa ni de lta bu bdag tu brtags pa nyid la brten nas thar par re ba'o/ /sbyor bas sbyor bar 'dod pa rnams kyi zhes pa ni 'jig rten pa'i tshul du lus ngag yid gsum yul la 'jug pa la 'gog pa dang dngos po gang la dmigs pa de la sems rtse gcig tu dmigs pa'am 'jog pa ni sbyor ba ste lus ngag yid gsum yul la mi 'jug par 'gog pa'i sbyor bar 'dod pa rnams kyis de lta bu'i bdag rnams rab tu rtog pa la bya'o//byis pa so so'i skye bo rnams phyugs dang 'dra zhes pa ni rang gi lugs mi shes pa la bya ste/phyugs dang 'dra zhes pa ni ngan du smra ba dang ngan du sems pa dang / ngan du byed pa'i dpe ste/ phyugs ni za ba dang / g.yem pa dang 'jigs pa las bsam pa gzhan med de/ byis pa rnams kyang de lta bu'i mtshan nyid dang ldan pas phyugs dang 'dra zhes pa'o/ /brgyal gal te kha cig ces pa de lta bu'i byis pa phyugs dang 'dra ba 'khor ba na 'khyam pa na chos kyi 'du shes skyes pa ni shin tu dkon pa'i mchog ste/chos kyi 'du shes skye ba yang smyung bar 'dug nas bsod nams su 'gyur ba la bya ste/ smyung bar 'dug pa de tsam gyis sems mgu ste/ smyung bar 'dug pa de nyid la yang dang yang du dus su goms par byed de/de bas na gsungs pa 'di lta ste/ smyung bar 'dug go zhes pa nas/ de tsam gyis sems mgu ba skyes te/ de'i phyir de dag la goms par byed do zhes so/ /gsang ba'i bdag po de ni dge ba las byung ba'i phyir sems dang po ste/ sa bon du gyur pa'o zhes pa ni sems/bdun po'i tshe tshul khrims bsrungs pa'i dge ba las byung ba'i sa bon du gyur pa la bya'o/ /de la 'ga' zhig dogs pa skye ba ste/ smyung bar 'dug pa ni brtul zhugs kyi mtshan nyid de nyon mongs pa'i phyogs gcig yin na/ ji ltar dge ba'i sa bon du 'gyur snyam pa la dogs pa bsal ba smyung bar byas pa'i 'og tu mchod pa dang sbyin pa'i sems 'byung ste/smyung ba de ni sbyin pa la sogs pa'i dge ba'i de ma thag pa'i rkyen pas nyes pa med do/ /sbyin pa la sogs pa de dag kyang zag pa dang bcas pa'i dge ba la bya'o/ /de'i rgyus ni sbyin pa byin pa ste/ ltas dang sbyor ba nyid pas zhes pa ni/ smyung bar byed pa de nyid las goms par byed pa'i rgyus zla ba dang skar ma dang / nyi ma la sogs pa bzang po'i nyin par pha ma la sogs pa'i gnyen rnams la sbyin par byed pa ni tshul khrims bsrungs pa'i dge ba'i las las byung ba'i myu gur blta'o/ / de nas yang sbyin pa de ni ma 'dris pa la sbyin pa zhes pa ni/ sbyin pa snga ma la goms pa'i mthus gnyen ma yin pa gzhan la yang sbyin pa ste/ de yang dge ba bcu'i las 'byung pa'i rgyu ste sdong bu lta bu'o/ /de nas yang sbyin pa'i snod tshol zhing sbyin no zhes pa ni pa dang ma dang mkhan po dang slob dpon dang /bram ze smrang bzhi rdzogs par shes pa la sbyin na/ de dag ni sbyin gnas te bsod nams mtha' med par 'gyur te/ de dag ni sbyin pa'i snod do snyam nas sbyin par byed pa de yang dge ba 'byung ba'i rgyu ste 'dab ma lta bur blta'o/ /de nas yang sbyin pa de spyod pa'i gnas dang bla ma la dga' bzhin du sbyin pa zhes pa ni sbyin pa de ni snga ma las rgya che ste/snod la yang mi rtog par bla ma dang rol mo mkhan la sogs pa sems dga' bar sbyin pa'i dngos po la ma chags par sbyin pa ste/ de yang dge ba'i las 'byung ba'i rgyu ste me tog lta bur blta'o/ /de nas sbyin pa de 'dod pa rnams la sbyin pa ni zas 'dod pa la zas/gos 'dod pa la gos la sogs pa ci 'dod pa rnams sbyin pa la bya ste/ de yang dge ba'i las byung ba'i rgyu ste 'bras bu lta bur blta'o/ /de nas yang gsang pa'i bdag po mtho ris su skye ba'i phyir tshul khrims bsrung zhes pa ni/ de lta bu'i sbyin pa rnams byas nas lus kyi las gsum dang /ngag gi las bzhi dang / yid kyi las gsum gyi sgo nas mi dge ba 'byung ba spong ba'i mtshan nyid tshul khrims bsrungs nas/ de'i 'bras bu mngon par 'chad pa'i mtshan nyid lha la sogs pa'i longs spyod mtho ris su skye ba'i phyir te/ longs spyod de nyid ga sogs su 'gyur ba la bya'o//de nas yang gsang ba'i bdag po de 'dra ba'i sems su 'khor ba na rgyu bas/ dge ba'i grogs po la las tshig 'di skad ces thos so/ /de lta bur sbyin pa byed cing tshul khrims bsrungs la/ mkhan po 'jig rten pa'i gzhung lugs shes pa 'ga' zhig gis dge ba'i bshes gnyen bya ste rang gi ston pa'i lha la bsten du bcug pa ste/dge ba'i bshes gnyen des kyang lha rnams kyi dngos po bstan pa/ lha chen 'di ni lha 'di yin/ /dge ba kun kyang sbyin par byed/ /khyod kyis 'di mchod dad byas na/ /thams cad kyang ni 'byor par 'gyur/ /lha rnams kun gyi drang srong mchog / de bzhin/ smrang dang smrang gi ming rnams la/ /zhes pa'i bar du'o/ /mkhas pa khyod kyis mchod pa byos/ /zhes pa ni de ltar gong du ming gis smos pa'i lha de rnams la gang la dad pa ston pa mchod cig dang / lha de rnams ni bde ba ster ba dang / bsam pa thams cad 'byor bar byed pa'o zhes bstan pa'o//de skad du ni sgra bzhin rnams/ /thos nas su ni yid mgu ste/ /de nas de la nan tan byed/ /rab ldan gyur to zhes pa ni de ltar dge ba'i bshes gnyen gyis lha rnams bstan pa thos nas byis pa de la yid mgu ba skyes te/ de nas lha de dag la brten pa dang mchod pa nan tan byed cing lha de rnams la rab tu dad pa dang ldan par gyur pa'o//gsang ba'i bdag po de ni byis pa so sor 'gro ba rnams 'khor ba na 'khyam pa na/ mchog tu dbugs dbyung ba de ni brgyad de/ sems kyi stobs su gyur pa'o zhes sngon gyi rgyal ba rnams kyis gsungs so zhes pa ni de lta bu'i byis pa so sor 'gro ba'i tha dad pa rnams 'khor ba na rten dang mgon med par 'khyams pa dge ba'i bshes gnyen gyis rten dang mgon de dag bstan pas byis pa de rnams rten dang mgon rnyed de dbugs byung bar gyur pa ni bstan par gyur pas dge ba'i stobs su gyur pa'o//de nas yang gsang ba'i bdag po de dag gi rim pa ji lta bur khyad par smras pa la/rtogs shing bzhugs pa dang khyad par de rnams la rim par gnas nas mya ngan las 'das pa'i phyir blo skyes pa ni stong pa nyid de la yod snyam sems so zhes pa ni sngar bdag gi ngo bo smos pa rnams dang / ston pa'i lha rnams ji skad du smos pa'i rang bzhin shes nas bdag tu brtags pa dang /lha de rnams la brten te/ lha de rnams bstan pa'i gzhung gis las dang nyon mongs pa spangs nas bdag tu brtags pa de dag par 'gyur te/ dag pa de ni stong pa nyid mya ngan las 'das pa yin snyam du blo skye ste/ stong pa nyid la bdag ces pa'i dngos po rnams kyi 'bru tsam mam/ spu'i nyag ma la sogs pa bde ba dang sdug bsngal myong bar byed pa'i rang bzhin de yod par rtog ste/ de dag ni byis pa so sor 'gro ba rnams kyis bdag dang lha rnams la brten nas bdag cag gi rnam par grol ba btsal ba ste/rnam par grol ba'i bde bde yang bcom ldan 'das rnam par snang mdzad nyid gnas pa'i rgyur blta'o/ /dbang po chen po dang tshangs pa la sogs pa'i lha de rnams kyang spyir sems can rnam pa gnyis te/ las la skyes pa dang / ye shes kyi sems can de la skabs 'dir lha rnams kyang byis pa so sor 'gro ba 'khyams pa rnams so so'i mya ngan las 'das pa'i lam ston pa ste/lam de ston pa yang bcom ldan 'das rnam par snang mdzad kyis shes nas thob pa'i rgyur sbyor ba yin pas/ dbang po dang brgya byin la sogs te lha de rnams bcom ldan 'das rnam par snang mdzad kyi sku las sprul pa'i ye shes kyi sems can du blta'o//gsang ba'i bdag po de dag gis ni stong pa nyid du ma shes te zhes pa ni stong pa nyid las 'ba' zhig ces pa bdag gis ngo bor brtags pas stong par mi 'gyur te/ ji tsam du dngos por brtags pa de tsam du yod pa'i mtha' 'dzin pas stong pa nyid shes par mi 'gyur zhes pa'o//de lta bas na stong pa'i mtshan nyid phyin ci ma log par gsungs pa stong pa nyid ni dngos po yang ma yin/ dngos po ma yin pa yang ma yin/ yod pa yang ma yin/ med pa yang ma yin/ de ltar brtag pa yang ma yin/ mi brtag pa yang ma yin/de la stong pa nyid du ji ltar brtag ces pa ste/ de la dngos po yang ma yin zhes pa ni ji ltar byis pa rnams kyis bdag tu brtags pa'i dngos po ma yin/ dngos po ma yin pa yang ma yin zhes pa ni de lta bu yod pa'i dngos po las gzhan pa yang spong ba de ma yin pa'o/ / yod pa yang ma yin zhes pa ni stong pa nyid la de lta bu'i dngos po med pa'o/ /med pa yang ma yin zhes pa ni stong pa nyid kyi rang bzhin med pa ma yin pa'o/ /gnyis ka ma yin zhes pa ni yod med gnyis las gzhan med pa'o/ /de ni brtag pa yang ma yin mi brtag pa yang ma yin/ de la stong pa nyid du ji ltar brtag ces pa ni/de ltar yod pa dang med pa ma yin pas stong pa nyid la dngos por brtag tu med ces pa ste/ de gnyis kyi don tshigs su bcad de gsungs pa/ gang gis stong nyid mi shes pa/ /de yis mya ngan 'da' mi shes/ /de bas stong nyid shes bya ba/ / dngos dang dngos min rnam par bsgom/ /zhes pa ste/ gang gis stong nyid mi shes pa/ /zhes pa ni stong nyid la dngos por brtags pa/ stong pa nyid kyi rang bzhin phyin ci ma log par mi shes pa ste/ des ni chos kyi dbyings zhi ba mya ngan las 'das pa rnams kyang shes par mi nus pa la bya'o//stong pa nyid ji ltar shes par bya zhe na/ dngos po dang dngos po med par zin pa'i dngos po dang bral bas shes par nus te/ de bas na gsungs pa/ dngos dang dngos min rnam par bsgom/ /zhes pa'o/ /de nas bcom ldan 'das phyag na rdo rjes 'di skad ces gsol to//bcom ldan 'das sems kyi rgyud de dag bshad du gsol zhes pa ni/ sngar sems kyi rgyud brgya drug cu 'das nas byang chub kyi sems skye'o zhes gsungs pa/ sems kyi rgyud de rnams kyi mtshan nyid ci 'dra ba lags bshad du gsol zhes pa la bya'o/ /de skad ces gsol pa nas bshad kyis nyon cig pa'i bar du gsol ba bshad du gnang ba la bya ste/de dag bshad pa yang gsang ba'i bdag po 'di ni 'dod chags kyi sems 'dod chags med pa'i sems zhes pa nas/ phul du gyur pa'i sems cher gyur pa'i sems zhes pa'i bar/ sems de rnams bshad pa yang ming dang mtshan nyid spong ba dang lam gyi sgo bshad par shes par bya ste/sems de rnams kyi rang bzhin yang rnam pa bzhi ste/ nyon mongs pa dang dge ba dang mi dge ba dang lung du ma bstan pa'o/ /de la sems de rnams las 'das par bya ba yang / spyir sngags kyi sgo nas spyod pa rnam pa gnyis te grub pa dang dam tshig can no//de la grub pa ni mos pa spyod pa'i sa nas yid kyi rang bzhin gyi lus kyi gang du 'dod pa 'phar bas rim pa dang bskal pa'i tshig kyang med do/ /dam tshig la yang rnam pa gnyis te/ dbang po rtul po dang rnon po'o/ /de la dbang po rtul po ni thog ma 'jig rten pa'i lam stong pa nyid la lam 'ba' zhig par blo skyes pa las 'phar nas gang zag la bdag med par chud de/sems 'di rnams kyang sdug bsngal ba nyid dang / mi rtag pa nyid dang / stong pa nyid dang bdag med par rtogs te/ spong ba goms par byed pa ni 'jig rten pa'i lam nas brtsams te bskal pa gsum gyi bar du gang zag la bdag med par bsgoms te/de nas phung po la yang snyam pa'i blo skye ba de yang sun phyin nas phung po la sogs pa dang / sgyu ma dang smig rgyu lta bur chos la bdag med par chud de sems gsum bsgom pa dang /pha rol tu phyin pa la sogs pa rnam par dpyod pa'i mtshan nyid mos pa spyod pa'i sa la 'jug go/ /dbang po rnon po ni thog ma nyid nas gang zag dang chos gnyis ka la bdag med par chud pas/ sems de rnams kyang sgyu ma dang smig rgyu'i tshul gyis spong zhing sems gsum po sgom pa pha rol tu phyin pa rnams rnam par dpyod pa'i rim gyis mos pa spyod pa'i sa la bskal pa gcig gis rdzogs nas bskal pa de'i bzhi cha gcig gis ye shes kyi sa la 'jug go//mos pa spyod pa'i sa la zhugs nas ni dbang po rno rtul gnyis ka yang mos pa spyod pa'i sa la de bskal pa gcig gis rdzogs par byed pa dang /ye shes kyi sa la bskal pa bzhi cha gcig gis 'jug par 'dra'o/ /sems kyi dngos bo drug cu rnams las brgyu drug cur 'brel pa yang / sgrib pa'i cha spom phra gsum du phye ste/ gsum po de rnams las gcig cing yang gsum gsum du bsgo ste rnam dgur blta'o//de la sgrib pa chen po'i chen po la sems gcig spong / chen po'i 'bring po la gnyis spong / chen po'i chung ngu la gsum spong / 'bring po'i chen po la bzhi spong / 'bring po'i 'bring po la lnga spong / 'bring po'i chung ngu drug spong / chung ngu'i chen po la bdun spong / chung ngu'i 'bring po la brgyad spong /'og nas 'byung ba'i tshul gyis de ltar sems brgya drug cu mos pa spyod pa'i sa nas spong zhing mos pa spyod pa'i sa de rdzogs par byed do/ /de la dgu rnams kyi mthar chung ngu'i yang chung ngu ni mos pa spyod pa'i sa nas spong ste/ ye shes kyi sa la 'jug par shes par bya'o/ /de la 'dod chags kyi sems gang zhe na/'dod chags kyi chos ba ston pa'o zhes pa la 'dod chags kyi sems zhes pa ni 'dod chags dang ldan pa'i sems la bya ste/ de yang dge ba dang mi dge ba dang / nyon mongs pa dang / lung du mi ston pa'i chos rnam pa bzhi las ji ltar rigs pa chags pas bsnyen par shes par bya ste/lha la sogs pa la dad cing mchod par bya ba la zhen nas mchod pa la sogs pa'i las de dag byed pa ni 'dod chags kyi chos bsnyen par byed pa la bya ste dge ba'o/ /de bzhin du bud med la sogs pa la zhen nas de'i bya ba byed pa ni 'dod chags kyi chos bsnyen pa ste/nyon mongs pa'i sems so/ /ma byin par len pa dang / brdzun du smra ba la sogs pa'i chos la zhen nas de dag gi bya ba byed pa ni 'dod chags kyi chos bsnyen pa ste mi dge ba'i sems so/ /bzo la sogs pa'i chos la zhen nas de dag gi bya ba byed pa ni 'dod chags kyi chos bsnyen pa ste lung du mi ston pa'o//de ltar sems gzhan rnams la yang ji ltar rigs par dge ba dang mi dge ba dang nyon mongs pa dang lung du ma bstan pa 'di'i tshul gyis sbyar bar bya'o/ /'dod chags med pa'i sems gang zhe na/ ma chags par chos bsnyen pa ste gong du smos pa'i chos rnam bzhi la ma chags pa'am/ma mos kyang chos nyid kyis spyod pa'am/ gzhan gyi dbang du mi spyod bzhin du de dag gi bya ba byed pa 'dod mi chags pa'i chos bsnyen pa'o/ /zhe sdang gi sems gang zhe na/ zhe sdang gi chos bsnyen pa zhes pa ni zhe sdang dang ldan pa'i sems de gong du smos pa'i tshul gyis dge ba dang mi dge ba la sogs par rig par bya'o//byams pa'i sems gang zhe na/ byams pa'i rjes su 'gro ba'i chos bsnyen pa ste zhes pa ni byams pa dang ldan pa'i sems de dge ba dang mi dge ba la sogs pa ni snga ma bzhin no/ /gti mug gi sems gang zhe na/mi dpyod par chos bsnyen pa'o zhes pa ni gti mug dang ldan pa'i sems so/ /shes rab kyi sems gang zhe na/ khyad par las khyad par du chud pa'i chos bsnyen pa'o zhes pa ni shes pa dang ldan pa'i sems de khyad par zhes pa ni shes rab ma thob pa las shes rab thob par 'gyur ro//khyad par gzhan du zhes pa ni shes rab de thob pa las shes rab dam pa'i khyad par du chud pa la bya'o/ /gdon mi za ba'i sems gang zhe na/ bka' dang bla ma'i tshig bzhin byed pa zhes pa ni rgyal po la sogs pa'i bka' dang slob dpon la sogs pa'i lung mi byar mi rung ste nges par bya ba'i chos de byed pa'o//the tshom gyi sems gang zhe na/ ji ltar gdon mi zab nyid la dogs pas bsnyen pa'i zhes pa ni the tshom dang ldan pa'i sems de sngar phyin ci ma log par zin pa la phyis bdag nyid kyis the tshom bslang ste/ dogs pa skye bar byed pa ni de'i chos la bsnyen pa'o zhes bya'o//mun par gyur pa'i sems gang zhe na/ mi dogs pa la dogs par shes pa'o zhes pa ni mun pa lta bu'i sems te/ ji ltar mun pa'i nang na bum pa la sogs pa yod kyang gsal bar mi snang bas yod dam med dogs pa ste/ de bzhin du sems mun pa dang 'dra ba yang dngos po phyin ci ma log pa la ma rig pa'i mun pas bsgribs pas dogs pa skye ba'o//snang bar gyur pa'i sems gang zhe na/ the tshom med pa la the tshom med par bsnyen pa'o zhes pa ni snang ba'i rang bzhin du gyur pa'i sems te/ ji ltar nam mkha' snang ba la rdzas kyi dngos po snang bar gsal ba bzhin du snang ba'i rang bzhin gyi gzugs de yang sems des kyang shes par bya'i dngos po the tshom med par shes nas/de nyid la the tshom med bzhin du spyod pa ni the tshom med pa'i chos la bsnyen pa'o/ /sdud pa'i sems gang zhe na/ gang du ma las gcig tu sdud pa zhes pa ni sdud pa'i rang bzhin gyi sems te/phung po dang khams dang skye mched la sogs pa rang gi mtshan nyid so so pa las stong pa dang bdag med pa la sogs pa'i spyi'i mtshan nyid du gcig tu sdud pa'o/ /'thab mo'i sems gang zhe na/ phan tshun rtsod pa'o zhes pa ni 'thab mo can gyi sems te mi mthun pa'i mu re re bzung zhing rtsod pa'i chos bsnyen pa'o//rtsod pa dang bral ba'i sems gang zhe na/ gang bdag nyid la bdag gis rtsod pa'o zhes pa ni rtsod pa med pa'i rang bzhin gyi sems te/ gzhan yang phan tshun du mi mthun pa'i phyogs bzung zhing mi rtsod par bdag rang gi sems la sun 'byin pa'am/dpyod pa lta bu'o/ /mi rtsod pa'i sems gang zhe na/ mnyam par snyoms par rtog pa'o zhes pa ni rtsod pa med pa'i rang bzhin gyi sems te/ dngos po gang yang rung ba la gzhan dang lta ba mthun pas mtshungs par spyod de/ rtsod pa med pa'i chos bsnyen par byed pa'o//lha'i sems gang zhe na/ yid la yid kyis rtog pa'o zhes pa ni lha lta bu'i sems sam lha'i phyir sems pa ste/ lha lta bur sems pa ni ji ltar lha rnams bdag ni lha yin no snyam du sems pa bzhin du sems de yang bdag nyid gang yin pa de yin no snyam du sems pa'o//lha'i phyir sems pa ni bdag gi lhar gyur par bya'o snyam du sems pa'o/ /lha ma yin gyi sems gang zhe na/ gang 'khor ba la smon pa'o zhes pa ni lha ma yin lta bu'i sems te/ de ltar lha ma yin de la sogs pa'i dngos po thams cad la smon par byed pa de bzhin du sems de yang 'khor ba la smon par byed pa'i chos bsten pa'o//klu'i sems gang zhe na/ spyod pa chen por sems pa'o zhes pa ni klu lta bu'i sems te/ ji ltar klu phyug po la mgo mang po yod de/ mgo mang po des longs spyod che bar shes pa bzhin du sems de yang longs spyod chen po spyod pa'i chos bsnyen pa'o//de la klu mgo mang po la ji ltar longs spyod kyi dper gyur zhe na/ rgya gar gyi skad du/ longs spyod la b+ho ga /klu'i mgo la yang b+ho ga zhes bya ste skad kyi gzhung du mthun/ don du yang klu mgo mang po de phyug pas longs spyod chen po spyod do/ /de bzhin du sems de yang longs spyod chen po'i chos la bsnyen par byed pas klu lta bu'i sems zhes bya'o//mi'i sems gang zhe na/ de nyid kyi don la sems pa zhes pa ni/ mi'i longs spyod 'dod pa'i yon tan gyi chos la bsnyen par byed pa'o/ /bud med kyi sems gang zhe na/ 'dod pa'i phyir de'i chos la bsnyen pa'o zhes pa ni bud med lta bu'i sems te bud med ni 'dod chags kyi yul du gyur pa'i chos rnams thob par bya ba'i phyir chos de dag gi bya ba byed de/de bzhin du sems de yang 'dod pa'i yul rnams thob par bya ba'i phyir chos de dag la bsnyen par byed do/ /dbang po'i sems gang zhe na/gang ngas bsam mo snyam mo zhes pa ni dbang po lta bu'i sems te/ dbang po'i 'jig rten thams cad skye ba dang 'jig par ngas bya bar sems so/ /de bzhin du sems de yang bdag gis ma byas pa rnams kyang bdag gis byas so snyam pa'i chos bsnyen par byed pa'o/ /dbang po ni lha chen po la bya'o//tshong pa'i sems gang zhe na/ gang bsdus nas so sor spel ba'i chos bsnyen pa'o zhes pa ni tshong pa lta bu'i sems te/ tshong pa ni 'tshong zhing nyo ba'i chos rnams rin chung ba'i dus na kun bsdus nas nam rin che ba ni rin che ba de dag thams cad slar spel zhing 'tshong bar byed do//de bzhin du sems de yang sngar phung po dang khams dang skye mched rnams mi rtag pa dang sdug bsngal ba la sogs pa'i chos de rnams nyid ji ltar rigs par spang par bya ba'i chos bsnyen par byed pa'o/ /chun pa'i sems gang zhe na/ mang du thos pa btsal nas phyis bsnyen pa'o zhes pa ni chun pa lta bu'i sems te sngar zhing thog rnams bsdus nas/phyis zhing thog de rnams nyid la bza' ba dang btung ba la sogs pa bya ba byed do/ /de bzhin du sems de yang sngar chos rnams mang du thos par byas te/ bsags nas ji ltar thos pa'i chos de rnams phyis sems pa dang bsgom pa la sogs pa'i chos bsnyen par byed pa'o//chu bo'i sems gang zhe na/ gang dag mtha' gnyis mi rtog par bsnyen pa'o zhes pa ni chu bo lta bu'i sems te/ chu bo ni mtha' gnyis su mi mtho bar dbus kyi gzhung bzhin las 'bab bo/ /de bzhin du sems de yang rtag pa dang chad pa'i mtha' gnyis spong bar byed pa'i chos bsnyen pa'o//yang na chu bo mtha' gnyis la rtog cing 'bab ba de bzhin du sems de yang rtag pa dang chad pa'i mtha' gzung zhing de'i chos bsnyen par byed pa la yang bya'o/ /mtshe'u'i sems gang zhe na/bdag bsnyen pa'o zhes pa ni mtshe'u lta bu'i sems te mtshe'u de ni gzhan las 'bab pa'i chu rnams bsogs la/ bdag las gar yang mi 'dzag ste/ de bzhin du sems de yang gzhan gyi thams cad ni bsdus la bdag las gang su yang mi gtong ba'i chos bsnyen pa'o/ / rdzing bu lta bu'i sems gang zhe na/ gang gis mi zab pa las zab par shes pa'o zhes pa ni rdzing bu lta bu'i sems te/ rdzing bu chus gang ba mi zab kyang gting dpag tu mi mngon pas zab pa 'dra/ de bzhin du sems de yang zab mo'i blo ma yin pa la zab snyam du sems pa'i chos bsnyen pa'o//bsrung ba'i sems gang zhe na/ 'di ni bden gyi gzhan ni gti mug go zhes pa ni bsrung bar gyur pa'i sems te/ bdag gis ji ltar thos shing zin pa de nyid ma nor ba'o snyam nas brtan par bzung ste/ gzhan gyis zin cing rtog pa de ma yin pa snyam du chos bsnyen pa'o//ser sna'i sems gang zhe na/ bdag la bsnyen cing gzhan la mi gtong ba'o zhes pa ni ser sna can gyi sems la bya ste/ ji ltar grags pa'o/ /byi la'i sems gang zhe na/ gang 'phar ba'i glags tshol ba'o zhes pa ni byi la lta bu'i sems te/ byi ba la sogs pa 'dzin pa 'phar bas 'phar zhing 'dzin te/de bzhin du sems de yang 'phags pa'i lam la sogs pa thob par byed na 'jug pa'i dus kyi rim gyis 'phar ba yang / de'i rim gyis 'phar ba'o/ /khyi'i sems gang zhe na/ gang chung ngus kyang mgu bar gyur pa'o zhes pa ni khyi lta bu'i sems te khyi ni chung ngus kyang mgu'o//de bzhin du sems de yang gang yang rung ba'i dngos po chung ngu la mgu bar byed pa'i chos bsnyen par byed pa'o/ /nam mkha' lding gi sems gang zhe na/ gang skyabs su gyur pa'i chos bsnyen pa'o zhes pa ni nam mkha' lding lta bu'i sems te/nam mkha' lding ni klu la sogs pa la 'dzin la 'dab mas rdob cing 'dzin te/ de bzhin du sems de yang gang bdag gi yin pa de ni phyogs 'dzin pa'i bsnyen par byed do/ /nam mkha' lding de 'dab mas rdob cing sbrul 'dzin pa de ji ltar phyogs 'dzin pa'i dper 'gyur zhe na/rgya gar gyi skad du/ 'dab ma la pak+Sha sha zhes bya phyogs la yang pak+Sha zhes bya ste/ de ltar skad kyi gzhung las gcig la don du yang nam mkha' lding ni klu de bdag gir byed pa'i phyir 'dzin/ phyogs su gyur pa yang bdag gir bya ba'i dngos po'i don la phyogs 'dzin pas mthun no//byi ba'i sems gang zhe na/ gang bcings pa thams cad gcod par byed par sems pa'o zhes pa ni byi ba lta bu'i sems te/ byi ba ni bcings pa thams cad gcod cing grol bar byed pa'o/ /de bzhin du sems de yang 'dod chags zhe sdang gti mug gis bcings pa las bkrol ba'i chos bsnyen par byed pa'o//glu'i sems gang zhe na/ bdag gis dbyangs sna mang po'i glu'i tshig gis sems can rnams gzung ngo snyam pa ni glu lta bu'i sems te/ ji ltar glu des sems can rnams dga' zhing 'du ba de bzhin du sems de yang bdag gis gang gi rjes su mthun pa'i sgra skad kyis dbyangs mang pos sems can rnams gang du dad par gzung ngo snyam pa'i chos bsnyen par byed pa'o//gar gyi sems gang zhe na/ bdag gis 'phrul snang mang pos pha rol po rnams la byed du gzhug go snyam du sems zhes pa ni gar bya ba'i phyir sems te/gar zhes bya ba'i tshig ni lus g.yo ba'i don to/ /lus g.yo ba ni gar gcig pur ma zad kyi nam mkha' la 'gro ba la sogs pa'i lus kyi rdzu 'phrul thams cad la bya ste/ de lta bas na lus kyi rdzu 'phrul de dag gis sems can rnams rdzu 'phrul sna tshogs la sbyor bar byed pa'i chos bsnyen pa'o//rnga'i sems gang zhe na/ bdag gis chos kyi rnga brdung ngo snyam pa'o zhes pa ni rnga'i sems te/ chos kyi rnga bsgrags shing 'chad par bya ba'i chos bsnyen par byed pa'i sems so/ /khyim gyi sems gang zhe na/ gang bdag gis lus bsrung pa'i chos bsnyen pa'o zhes pa ni khyim lta bu'i sems te khyim ni rdzas la sogs pa chud mi za bar srung skyong bar byed de/de bzhin du sems de yang bdag gis lus srung ba'i chos bsnyen par byed pa'o/ /seng ge'i sems gang zhe na/ gang thams cad zil gyis mnan par sems pa'o zhes pa ni seng ge lta bu'i sems te/seng ge ni bdag gi sgyu rtsal gyis byol song thams cad zil gyis gnon pa de bzhin du/ sems de yang bdag gis kyang shes shing grags pa'i phyogs kyis gzhan rnams zil gyis mnan pa'i chos bsnyen par byed pa'o/ /'ug pa'i sems gang zhe na/gang mtshan mo la sems pa'o zhes pa ni 'ug pa lta bu'i sems te/ 'ug pa ni bdag gis zas tshol ba la sogs pa bya ba thams cad mtshan mo byed do/ /de bzhin du sems de yang bdag gi bya ba rnams mtshan mo byed pa'i chos bsten pa'o/ /bya rog gi sems gang zhe na/gang bas thams cad sems pa'o zhes pa ni bya rog lta bu'i sems te/ bya rog ni kun gyis 'jigs shing brdabs bzhin du rang gi bya ba byed de/ de bzhin du sems de yang gang gis dngos po spyad pa thams cad bag tsha zhing brdabs pas brdabs pa'i chos bsnyen par byed pa'o//'bar ba'i sems gang zhe na/ gang dge ba rnams mi dge bar bzlog pa'o zhes pa ni 'bar ba lta bu'i sems te 'bar ba sngon dge ba la sogs pa spyad pa'i rgyus bdag mthu dang ldan par gyur pas mthu des gsod pa la sogs pa mi dge ba'i chos rnams spyod de sems de yang de lta bu'i chos bsnyen par byed pa'o//tsher ma'i sems gang zhe na/ gang thams cad 'gyod pa sgom pa'o zhes pa ni tsher ma lta bu'i sems te/ tsher ma ni 'dzugs shing gnod par byed pa'o/ /de bzhin du sems de yang gang byas pa'i dngos po la 'gyod pa skye'o//'gyod pa de nyid yang dang yang du yid la byed cing zug rngur gyur pa'i chos bsnyen pa'o/ /sa 'og gi sems gang zhe na/ gang sa 'og gi don la sems pa'o zhes pa ni sa 'og gi phyir sems pa ste/ sa 'og tu song nas de'i bya ba byed pa'i chos bsnyen par byed pa'o/ / rlung gi sems gang zhe na/ gang thams cad du thams cad la rgyu ba'o zhes pa ni rlung lta bu'i sems te/ rlung ni bar bar me'i nang du zhugs/ bar bar chu la sogs pa'i nang du zhugs pa de bzhin du sems de yang bar bar dge ba'i nang du zhugs te mi dge bar byed/ bar bar mi dge ba'i nang du zhugs te dge bar byed de/mdor na kun gyi nang du 'jug la yang mi gnas par byed pa'i chos bsnyen par byed pa'o/ /me'i sems gang zhe na/ gang tsha ba'i mtshan nyid kyis gdungs pa zhes pa'o/ /me lta bu'i sems te/ me ni rang gi tsha bas gdung bar byed de/ de bzhin du sems de yang rang gi dka' thub kyis lus dang sems gdungs shing sma 'bab par byed pa'i chos bsnyen pa'o//me dka' thub kyi dper ji ltar 'gyur zhe na/ rgya gar skad du/ tsha ba la ta pa zhes bya/ dka' thub la yang ta pa zhes bya ste/ de ltar skad dang gzhung mthun pas dper bya'o/ / 'dam gyi sems gang zhe na/ bdag nyid kyi nyes pa pha rol la gos par byed pa'o zhes pa ni 'dam gyi sems te/ 'dam ni bdag gi ngo bor ngan pa de gzhan la gos shing chags par byed do/ /de bzhin du sems de yang rang gi nyes pa gzhan la gos par byed pa'i chos bsnyen par byed do/ / rnyog pa'i sems gang zhe na/ gang pha rol gyi nyes pa byung bas ba dag gi sems 'khrugs par bsnyen pa'o zhes pa ni rnyog pa lta bu'i sems te/ gzhan gyi nyes pas bdag gi sems 'khrugs par byed pa'o/ /kha dog gi sems gang zhe na/ gang de nyid kyis chos bsnyen pa'o zhes pa ni kha dog lta bu'i sems te/tshon dkar po'am dmar po la sogs pa'i kha dog ni gang la bskus pa de tshon de nyid kyi rang bzhin du 'gyur te/ de bzhin du sems de yang gang gi dngos po bsams pa de la zhen ni ji ltar bsams pa de'i rang bzhin du 'gyur ba'i chos bsnyen pa'o/ /phub kyi sems gang zhe na/gang dge ba gzhan spong ba'i chos bsnyen pa'o zhes pa ni phub lta bu'i sems te/ phub ni mtshon la sogs pa gzhan rnams kyis mi phigs par skyob pa'i bya ba byed pa'o/ /de bzhin du sems de yang dge ba gcig spyad pas dge ba gzhan sgrib par byed pa'i chos bsnyen par byed pa'o//'khrul pa'i sems gang zhe na/ gang gzhan gzung zhing gzhan sems pa'o zhes pa ni 'khrul pa'i rang bzhin gyi sems te/ gang gis dngos po zin te 'khrul nas gzhan yin snyam du sems pa'o/ /dug gi sems gang zhe na/ gang shin tu dngos po med par sems pa'o zhes pa ni dug gi sems te/dug ni gang gis zin na shi ste med par 'gyur ba'o/ /de bzhin du sems de gang yang lta ba la sogs pa'i nyon mongs pa rnams spangs nas phyir mi skye bar med par byed pa'o/ /zhags pa'i sems gang zhe na/ gang thams cad rang 'ching zhing 'dug pa'o zhes pa ni zhags pa lta bu'i sems te/zhags pa ni 'ching ba'i bya ba byed do/ /de bzhin du sems de yang bdag nyid bcing bar byed pa'i chos bsnyen par byed pa'o/ /lcags sgrog gi sems gang zhe na/ gang rkang pa gnyis la 'dug par sems pa'o zhes pa ni lcags sgrog lta bu'i sems te/lcags sgrog ni rkang pa gnyis 'dzin par byed de de bzhin du sems de yang yod pa dang med pa'i tshig gi mtha' gnyis 'dzin pa'i chos bsnyen pa'o/ /de la lcags sgrog rkang gnyis 'dzin pa dang sems kyi mtha' gnyis su 'dzin pa ji ltar dper 'gyur zhe na/rgya gar skad du/ rkang pa la yang pa da zhes bya/ tshig la yang pa da zhes bya ste mthun no/ /sprin gyi sems gang zhe na/ gang dbyar du sems pa'o zhes pa ni sprin lta bu'i sems te/ sprin ni dbyar 'du zhing dbyar gyi bya ba byed de/ de bzhin du sems de yang dbyar gyi bya ba byed pa'i chos bsnyen pa'o//zhing gi sems gang zhe na/ bdag gi lus la yongs su las byed pa'o zhes pa ni zhing lta bu'i sems te/ zhing ni 'bru la sogs pa skye bar byed pa'i phyir rmos pa la sogs pa'i las byi dor byed do/ /de bzhin du sems de yang bdag gi lus bzang por bya ba'i phyir khrus dang byug pa dang rgyan la sogs pas bdag gi lus la brgyan par byed pa'i chos bsnyen pa'o//lan tshwa'i sems gang zhe na/ gang la gang gis bsam pa de nyid sems pa'o zhes pa ni lan tshwa'i sems te/ lan tshwa ni bum pa la sogs pa snod kyi nang du gzhag na snod de yang lan tshwas zos nas byang ste rdol pa dang lan tshwa'i ror 'gyur ro//de bzhin du sems des kyang gang gi dngos po la dmigs shing rtog pa la rtog pa'i sems de nyid kyis skad cig ma phyi ma'i cha la rtog pa de sun phyung nas med par byed pa'i chos bsnyen par byed pa'o/ /spu gri'i sems gang zhe na/gang rab tu byung ba tsam la gnas pa'o zhes pa ni spu gri lta bu'i sems te/ spu gri ni rab tu byung ba'i skra 'dreg pa tsam gyi bya ba byed pa de rab tu byung ba ni nan tan gyis gzhan mi byed do/ /de bzhin du sems de yang rab tu byung ste skra 'dreg nas rab tu byung ba tsam la gnas kyi/rab tu byung ba'i bslab pa'i nan tan tshul khrims srung ba la sogs pa mi byed pa'o/ /ri rab tu gyur pa'i sems gang zhe na/ gang che bar gyur pa'i sems pa ni ri rab lta bu'i sems te/ ri rab ni dpag tshad stong phrag brgyad cur gyen du mtho zhing 'phags par gyur to/ de bzhin du sems de yang bdag gi yon tan gyis kun nas 'phags so snyam nas 'gying zhing che bar byed pa'i chos bsnyen par byed pa'o/ /rgya mtshor gyur pa'i sems gang zhe na/ rang gi lus la rtog cing 'dug pa'o zhes pa ni/ rgya mtsho lta bu'i sems te/ rgya mtsho ni rang gi rlabs kyis bdag nyid la rlob cing reg par byed pa'o//de bzhin du sems de yang bdag nyid kyi lus la mi rtag pa dang stong pa la sogs par rtog go/ /phug tu gyur pa'i sems gang zhe na/ sngon nges par gyur pa las phyis de nyid du 'gyur ba ston pa'o zhes bya ba ni phug lta bu'i sems te/sems de phug ni sgor chung ngur nges pa las gyur pa/ phug de sgo las rnam pa du mar che bar 'gyur ro/ /de bzhin du sems de yang sngar bdag dang tshul khrims dang yon tan dang ldan pas nges par 'jug pa las tshul khrims dang yon tan dang de nyid kyis dregs nas de'i gzhis nga rgyal byed cing 'gyur ba'o//tsher 'gyur ba'i sems gang zhe na/ gang gi sems bskyed pa de bzhin du 'gro ba'o zhes pa ni/ /tsher gyur pa'i rang bzhin gyi sems te/ sngon dge ba dang mi dge ba gang yang rung ba la spyad pa'i bag chags yod pas gang du skyes na yang bag chags de nyid lhan cig tu skye ba'o//yang na sngon gyi dge ba dang mi dge ba'i las gang yang rung ba'i rnam par smin pa'i 'bras bu mi 'dra ba'i tshe thob nas de lta bu dang lhan cig tu skye ba ste/ dper na tshe rabs snga ma la srog gcod pa goms shing mang du byas pas tshe phyi ma la nad mang zhing tshe thung bar 'gyur ba ste/de bzhin du dge ba yang ji ltar rigs par sbyar bar bya'o/ /'jig rten las 'das pa'i sems brgya drug cu bskal ba gsum 'das pa dang 'jig rten las 'das pa'i sems skye'o zhes pa 'jig rten las 'das pa'i sems kyang rnam pa gnyis te/gang zag la bdag med par chud pa'i sems zag pa med pa ji bzhin pa dang bcas pa'i sems dang / chos la bdag med par chud pa'i sems zag pa med par ji bzhin pa med pa rang bzhin gyis 'od gsal ba ste/ de la skabs 'dir 'jig rten las ma 'das pa'i sems shes pa ni gang zag rnams kyis shes par nus sam zhe na/de nas rtog pa can de dag gis mi nus te/ de bas na gsungs pa/ rtog pa kun gyi rig dka' ste/ /zhes pa'o/ /sngon gyi sangs rgyas rnams kyis gsungs/ /zhes pa ni de ltar rtog pa rnams kyis kyang shes par mi nus na sus shes par nus she na/rtog pa rnams kyi spyod yul ma yin gyi sangs rgyas bcom ldan 'das rnams kyis mkhyen te gsungs pa'o zhes pa'o/ /sngon gyi sangs rgyas rnams zhes pa ni de lta bu 'ba' zhig gis bshad pa ma yin gyi/ sngon gyi sangs rgyas rnams kyis kyang tshul 'di ltar mkhyen nas bshad pa'o zhes pa ste/sangs rgyas bcom ldan 'das rnams mkhyen pa gcig par bstan pa'o/ /ci'i phyir zhe na/ bsod nams dang ye shes kyi tshogs dang / chos kyi sku dang 'gro ba'i don mdzad par gcig pas mnyam pa nyid kyi phyir ro/ / nyes pa kun dang bral ba'o zhes pa ni de lta bu'i zab cing zhi ba gang zag la bdag med par chud pa de nyon mongs pa dang nye ba'i nyon mongs pa dang bral ba'o zhes pa'o/ /gsang ba'i bdag po 'jig rten las 'das pa'i sems de la gnas nas phung po la sogs pa yod snyam pa'i blo skye ba'o zhes pa ni de ltar gang zag la bdag med pa ji bzhin pa dang bcas pa/zab cing zhi ba 'jig rten las 'das pa'i sems de la gnas na/ gong du smos pa'i tshul du phung po tsam ste/ yod par rtog gi gang zag la ni bdag med par chud de de ni bskal pa gsum gyi sa rdzogs par 'gyur ro/ / nam phung po la skyo ba skye ba nas zhes pa nas sbyor ba'i lam rnams bskal pa gcig gis 'das par 'gyur ro zhes pa'i bar du ni/ de ltar phung po la spyir brtags te/ brtags pa de la dngos po yod snyam du blo skyes pa'o/ /phung po so sor bshig ste sun phyung na gzugs kyi phung po ni dbu ba rdos pa 'dra/ji ltar dbu ba la so sor gzhig na/ dbu ba la snying po med pa bzhin du phung po de yang bshig ste so sor brtags na/ kha dog dang dbyibs la sogs pa so sor chos rnams kyi rang gi mtshan nyid tsam du zad kyi phung po zhes pa'i dngos po gang yang med par shes so//de bzhin du tshor ba ni chu'i chu bur dang 'dra ste byung ma thag tu zhig cing med par byed par 'gyur te/ mi rtag pas 'dug pa'i gnas med pa la phung por brtags pa'i dngos po gang yang med par shes so/ /de bzhin du rnam par shes pa'i phung po yang so sor bshig na rnam par shes pa ni sgyu ma dang 'dra ste/ji ltar sgyu ma'i ba lang la sogs te/ de dag la ba lang yod pa ma yin gyi/ rtsi shing la sogs pa de rnams kyi rang bzhin du zad do/ /rnam par shes pa'i phung po yang de 'dra ste/ phung po brtags pa'i dngos po yod pa ma yin gyi rnam par shes pa'i rang bzhin de tsam du zad do//'du shes kyi phung po lnga yang so sor gzhig na smig rgyu ba 'dra ste/ ji ltar smig rgyu ba la skom pas gdungs pa'i skyes bus chur mthong mod kyi de la chu'i dngos po yod pa ma yin te/ smig rgyu ba'i rang bzhin tsam du zad do/ /'du shes kyi phung po yang de dang 'dra ste/'du shes kyi phung po brtags pa'i dngos po ni yod pa ma yin gyi de la mtshan mar 'dzin pa'i rang bzhin tsam du zad do/ /de bzhin du 'du byed kyi phung po yang chu shing gi phung po dang 'dra ste/ kun du grags pas 'dir ma smos so/ /de ltar phung po de yang dbu ba la sogs pa'i dpes sun phyung nas phung por brtags pa'i dngos po yod par mi 'gyur te so so'i mtshan nyid du zad do//de ltar phung po yod par ma grub na khams dang skye mched rnams kyang phung po las mi gzhan pas na khams dang skye mched du brtags pa'i dngos po yod pa ma yin gyi/ de rnams kyi so so'i rang bzhin tsam du zad do//gzung ba dang 'dzin pa yang gzugs kyi phung po ni gzung ba'i dngos por brtags/ tshor ba la sogs pa phung po bzhi ni 'dzin par brtags pa'i dngos po yang brtags pa'i dngos po yod pa ma yin te chos rnams so so'i rang bzhin tsam du zad do/ /de ltar phung po la skyo ba'i sems skyes pas dbu ba la sogs pa'i rang bzhin du bshig cing bsgoms nas phung po la yod do snyam du blo skyes nas phung por 'dzin pa de las kyang grol bar 'gyur te/nam phung po la skyo ba'i sems skyes nas de ni dbu ba dang chu bur dang sgyu ma dang / smig rgyu dang 'dra bar rnam par bsgoms pas rnam par grol lo zhes pa'o//de ltar phung po las rnam par grol nas chos rnams kyi ngo bo rang bzhin phung po la sogs par brtags pa dang bral ba'i mtshan nyid tsam 'ba' zhig yod par chud par gzhung las gsungs pa de 'di lta ste/ phung po dang / khams dang / skye mched dang / gzung ba dang / 'dzin pa dang rnam par bral ba chos nyid kyi rang bzhin ni zhi ba'i khams te rtogs par 'gyur zhes pa ste/ de la phung po dang khams dang skye mched dang gzung ba dang 'dzin pa dang bral ba zhes pa ni gong du phung po la sogs par brtags pa'i dngos po sun phyung ba'i tshul gyis chos nyid kyi rang bzhin sngon po la sogs pa'i ji bzhin pa la brtags pa'i dngos por yod pa ma yin pas na bral ba'o//de bas na gzung 'dzin dang bral ba zhes pas yang gzugs kyi phung po la gzung bar brtags pa dang tshor ba la sogs pa'i phung po bzhi la 'dzin pa'i dngos por brtags pa de dang bral ba la bya'i//chos la bdag med par chung ba'i mtshan nyid gzung ba dang 'dzin pa dang bral ba la ni mi bya'o/ /chos nyid kyi rang bzhin zhes pa ni/ de la chos ni phung po la sogs pa'o/ /de rnams kyi ngo bo ni chos nyid kyi rang bzhin te/de yang sngon po dang dmar po la sogs pa rang bzhin rnams so/ /de ltar sngon po dang dmar po la sogs pa'i rang bzhin tsam 'ba' zhig yod kyi phung po la sogs pa'i dngos por brtags pa'i dngos po med par chud pa ni zhi ba'i khams rtogs zhes bya ste/ zhi ba zhes pa ni sems kyi rgyu de la phung po la sogs par brtags pa'i 'khrul pa med pas zhi ba'o//khams ni rang bzhin no/ /rtogs pa ni de lta bu'i tshul du chud pa'o/ /gsang ba'i bdag po 'jig rten las 'das pa'i sems de ni log pa dang ma log pa brgyad kyis sems kyi rim pa dang 'brel pas las dang nyon mongs pa'i rgya mtsho dang bral ba sbyor ba rnams bskal pa gcig gis 'da' bar 'gyur ro zhes pa ni phung por brtags pa'i dngos po yod par 'dzin pa las grol nas chos rnams kyi so so'i rang bzhin tsam 'ba' zhig yod par chud pa'i sems zhi ba de phung po la dngos po med pa nas brtsams te/chos rnams kyi so so'i rang bzhin sngon po la sogs pa 'ba' zhig tu zad par chud pa la zhugs nas bskal pa gcig gis sems de nyid las 'das te chos la bdag med par chud pa mos pa spyod pa'i sa la 'jug par 'gyur ro/ /de la 'jig rten las 'das pa'i sems de ni log pa dang ma log pa brgyad kyis sems kyi rim pa shes pa ni rgyun du zhugs pa nas dgra bcom pa'i bar gyis sems brgyad pa la bya ste/sems de dag log pa dang ma log pa'i phung po la sogs par brtags pa'i dngos po yod par 'dzin pas log pa'o/ / nyon mongs pa spangs pas na ma log pa'o/ /nyon mongs pa'i bag chags dang bcas pas na log pa'o/ /rnam par 'brel ba zhes pa ni phung po la bdag med par chud pa'i sems zhi ba de/ phung po la yod par 'dzin pa'i sems kyis rim pa brgyad po des bskyed pa la bya ste/ de lta bas na 'jig rten las 'das pa'i sems de log pa dang ma log pa brgyad kyis sems kyi rim pa dang rnam par 'brel pa zhes gsungs so//de dag gi sngags kyi sgor spyad pa spyod pa'i byang chub sems dpa' dbang po rtul po rnams gang zag la bdag med par chud pa'i rim gyis sems brgya drug cu la sogs pa'i nyon mongs pa rnams spyod pa'i rim pa'o//da ni sngags kyi sgor spyad pa spyod pa'i byang chub sems dpa' theg pa chen pos 'gro ba gzhan gyi rkyen gyis ma yin pa shes rab rnon po rnams chos dang gang zag gnyis ka la bdag med par bsgom zhing mos pa spyod pa'i sa la 'jug pa'i rim pa bshad de/de yang gsang ba'i bdag po theg pa chen por zhugs pa gzhan gyi rkyen gyis ma yin chos la bdag med pa'i rang bzhin du sems skye'o/ /byang chub sems dpa' theg pa chen po la zhugs pa thos pa rab tu mang zhing shes rab mchog tu rno ba gzhan gyi rkyen gyis mi gos par rang gi blos chos rnams sgyu ma dang /smig rgyu ba la sogs pa'i mtshan nyid du shes nas chos la bdag med par chud par 'gyur ba la bya'o/ /de la gang zag la bdag med par chud pa'i rim pa bskal pa gsum gyis 'da' bar bya ba dang / gang zag la bdag med pas kyang phung po tsam yod par 'du shes pa yang bskal pa gcig gis spang bar bya'o/ /dgos na de dag gi bya ba ma byas par ji ltar chos la bdag med par 'gyur zhe na/ gsungs pa ci'i phyir zhe na/ de ni de dag gi sngon spyad pa na phung po dang kun gzhi bsgoms pas ngo bo nyid yongs su rig pa ni/sgyu ma dang smig rgyu dang gzugs brnyan dang / brag ca dang / me mgal bskor ba dang / dri zi'i grong khyer lta bu'i 'du shes skye'o zhes pa ni/ sngon du spyad pa spyod pa na phung po'i gnas bsgoms nas sgyu ma dang smig rgyu ba la sogs pa zhes pa ni dang po'i dad pa rtsol ba'i 'jug pa spyod pa spyad pa na/phung po'i rang bzhin sgyu ma la sogs pa lta bur shes shing goms par byas pas gang zag la bdag med par chud pa'i rim pa ma spyad kyang chos la bdag med par chud par 'gyur ba'o zhes pa'o/ / de la sgyu ma zhes pa ni chos rnams la sgyu ma lta bur 'du shes skyes te/ sgyu ma'i ba lang dang / rta la sogs pa rdo dang / shing la sogs pa la byas kyang rdo shing rnams su mi mngon par ba lang dang / rta la sogs pa'i gzugs su snang mod kyi/ /yang dag par na ba lang dang /rta la sogs pa'i dngos po yod pa ma yin te/ rdo shing la sogs pa tsam du zad do/ /de bzhin du phung po la sogs pa'i chos rnams snang yang rnam par shes pa 'khrul pa'i dbang gis snang ste/ yang dag par ni chos kyi ngo bo sgyu ma'i ba lang dang 'dra ste/ snang du zin kyang yod pa ma yin no//rnam par shes pa de ni rdo dang shing la sogs pa mi 'dra ste/ mi mngon yang gzugs la sogs pa snang ba'i chos rnams ni yod pa ma yin gyi rnam par shes pa'i 'khrul pa ji bzhin tsam du zad do/ /de bzhin du smig rgyu ba dang 'brog dgon pa na skyes bu skom gyis gdungs pas smig rgyu ba la chur mthong ste chu'i dngos po yod pa ma yin gyi smig rgyu tsam du zad do//de bzhin du phung po la sogs pa'i chos rnams snang ba ni ma yin gyi/ rnam par shes pa 'khrul pa ji bzhin tsam du zad do/ /de bzhin du gzugs brnyan dang / brag ca dang / me mgal bskor ba dang / dri za'i grong khyer rnams kyang gong du sgyu ma la sogs pa bshad pa'i tshul du rig par bya ste/ mdor na phung po la sogs pa'i chos rnams snang ba rnam par shes pa 'khrul pa snang pa tsam du zad do/ /rmi lam na gzugs la sogs pa'i yul med par yang gzugs la sogs par mthong zhing /de dag gi bya ba byed mod kyi rmi lam gyi tshe na gzugs la sogs pa med par gsal bar mngon te/ de dag kun rnam par shes pa'i dbang gis gyur pa tsam du zad do snyam nas de ltar mos pa spyod pa'i sa la zhugs nas phung po la sogs pa'i chos rnams la ni bdag med par chud pa ni sgyu ma la sogs pa nas dri za'i grong khyer la sogs pa lta bu'i 'du shes skyes te/chos rnams ni yang dag par yod pa ma yin mod kyi/ rnam par shes pa tsam yod par 'dzin to/ /de lta bur chos la bdag med par chud pa mos pa spyod pa'i sa de la yang de lta bur chos rnams sgyu ma dang smig rgyu ba la sogs pa'i tshul du 'jug cing 'jug pa'i sems dang /chos rnams de ltar bshig nas de'i ting nge 'dzin rnam par mi rtog pa la gnas pa'i sems dang / de nas snying rje'i dbang gis pha rol tu phyin pa la sogs pa rnam par spyod cing sa bcu pa la sogs pa yon tan thos pa dang bsams pa dang bsgoms pa'i shes rab kyis shes nas de dag la rab tu mos pa byed cing 'jug pa dang gnas pa dang ldang ba'i sems de gsum rnam par bsgoms pas sa dang pha rol tu phyin pa'i yon tan la sogs pa rnams yongs su mi shes pa ni yongs su shes/mngon du ma byas pa mnyan pa dang bsams pa dang bsgoms pa'i shes rab kyis chos la bdag med par chud cing rnam par shes pa tsam yod par 'dzin pa de ni mos pa spyod pa'i sa'i mtshan nyid de mos pa spyod pa'i sa de bskal pa gcig gis rdzogs par 'gyur ro//de nas bskal pa bzhi cha gcig gis mos pa spyod pa'i sa de nas 'phar te/ ye shes kyis de la 'jug pa'i rim pa gsungs pa ste/ de lta bas na gsang ba'i bdag po de dag gis bdag gi sems dbang du gyur pas rang gi sems thog ma nas ma skyes pa'i phyir chos la bdag med pa nyid spangs so//de ci'i phyir zhe na/ gsang ba'i bdag po sems kyi ngo bo nyid rig pas thog ma'i mtha' dang / tha ma'i mtha' yang mi rnyed do/ /de'i sbyor ba rnams kyis bskal pa gnyis kyis 'da'o zhes pa'o/ /de la bdag gi sems dbang du gyur pas rang gi sems thog ma nas skyes pa'i phyir chos la bdag med pa nyid kyang spangs so zhes pa ni/sngar chos la bdag med par chud de/ rnam par shes pa 'ba' zhig gzung ba dang 'dzin pa ji bzhin pa yod par sems pa de yang rang gi dbang du gyur pas rnam par shes pa de thog ma nas ma skyes par chud pas rnam par shes pa tsam du byed par 'du shes pa de yang spangs pas chos la bdag med pa nyid kyang spangs so//ci'i phyir rnam par shes pa tsam du 'du shes pa de spangs pas chos la bdag med pa spangs zhes bya zhe na/ /phung po la sogs pa rnams bdag med par chud pa'i rgyus rnam par shes pa tsam du yod par 'du shes skyes te de bas na rnam par shes pa tsam yod par 'du shes pa de spangs na chos la bdag med pa nyid spangs pa yin te/'bras bu la rgyus bslan pa'o/ /rnam par shes pa tsam yod par 'du shes pa de yang ji ltar spong zhe na/ gsungs pa/ ci'i phyir zhe na/ gsang ba'i bdag po sems kyi ngo bo nyid yongs su rig pas thog ma'i mtha' dang / tha ma'i mtha' yang mi rnyed do zhes pa ste/ de ltar rang gi sems de thog mar gang nas skyes pa'i mtha' btsal na mtha' de mi rnyed de/ de ltar thog ma'i mtha' med pas tha ma 'gag pa'i mtha' yang rnyed par mi 'gyur te/thog ma dang tha ma'i mtha' mi rnyed do/ /de ltar thog ma'i mtha' med pas sems de ma skyes par mngon te/ de ltar thog ma nas ma skyes na gzung ba dang 'dzin pa ji bzhin par snang bar shes pa de dag ci zhig yod snyam nas dam par shes pa tsam yod par 'du shes pa de spangs pas chos la bdag med par yang spangs zhes bya'o//de lta bu'i tshul du bsgom zhing chos la bdag med par spong ba yang bskal pa gnyis kyis yongs su rdzogs par 'gyur ro//da ni rab tu dga' ba'i byang chub kyi sems skye ba'i rim pa bshad par bya ste/de yang gzhan yang gsang ba'i bdag po byang chub sems dpa' sngags kyi sgo nas spyad pa spyod pa'i byang chub sems dpa' rnams ni tshad med grangs med pa'i bskal pa bye ba khrag khrig brgya stong du tshad med pa'i bsod nams dang ye shes kyi tshogs bsags pa zhes pa nas/ shin tu rang bzhin med pa'i sems skyes te/gsang ba'i bdag po de ni byang chub kyi sems dang po zhes rgyal ba rnams kyis gsungs so zhes pa'i bar du sa dang po'i byang chub kyi sems de'i rgyu phun sum tshogs pa dang / rang bzhin phun sum tshogs pa dang / mtshan nyid phun sum tshogs pa dang /mtshan nyid de'i sgrub pa phun sum tshogs pa ni bshad par rig par bya ste/ de la rgyu phun sum tshogs pa ni tshad med grangs med pa'i bskal pa bye ba khrag khrig brgya stong du tshad med pa'i bsod nams dang ye shes kyi tshogs bsags pa zhes bya'o/ /rang bzhin phun sum tshogs pa ni tshad med pa'i shes rab kyis yongs su zin pa zhes pa nas/dbang po dang nye ba'i dbang po la sogs pas phyag byas pas zhes pa'i bar du ste/ rang bzhin phun sum tshogs pa des kyang spong ba phun sum tshogs pa dang yang bsdu bar bya ste/ spong ba phun sum tshogs pa ni tshad med pa'i shes rab dang thabs kyis zin pa zhes pa dang /nyan thos dang rang sangs rgyas kyi sa las 'das zhes pa'o/ /mthu phun sum tshogs pa ni lha dang lha ma yin dang 'jig rten du bcas pas phyag byas pa zhes pa dang brgya byin dang tshangs pa dang dbang po dang nye ba'i dbang po la sogs pas phyag byas pa zhes pa'o//mtshan nyid phun sum tshogs pa ni shin tu rang bzhin med pa'i sems skyes zhes pa'o/ /mtshan nyid de sgrub pa phun sum tshogs pa ni de la 'di lta ste/ stong pa nyid kyi rang bzhin rdzas ma yin pa zhes pa nas mig dang rna ba dang sna dang lce dang lus dang yid dang bral ba zhes pa'i bar du'o//de la tshad med pa grangs med pa'i bskal pa bye ba khrag khrig brgya stong du tshad med pa'i bsod nams dang ye shes kyi tshogs bsags pa zhes pa/ bskal pa bye ba zhes pa ni 'bum phrag brgya la bya'o/ /brgya stong zhes pa ni bye ba khri phrag 'bum la bya'o/ /tshad med grangs med ces pa ni bskal pa bye ba phrag 'bum po de yang tshad kyis gzhal du med/grangs med bgrang du med par sems dang po bskyed pa'am/ gang zag la bdag med par bsgoms pa nas brtsams te/ bsod nams dang ye shes kyi tshogs bsags pa'i rgyus sa dang po rab tu dga' ba'i sems shin tu rang bzhin med pa'i mtshan nyid yongs su rdzogs par 'gyur ro//tshad med pa'i shes rab dang thabs kyis yongs su zin pa zhes pa shes rab kyi chos thams cad rang bzhin kun chub par byed pa'o/ /thabs ni snying rje chen po'i dbang gis sems can rnams yongs su smin pa dang grol bar byed pa ste/tshad med pa zhes pa ni shes rab dang thabs de dag nyid 'di tsam zhig ces dpag tu med do/ /de ltar shes rab kyis chos thams cad rang bzhin med par chud pas nyon mongs pa la sogs pa spangs pa dang / thabs kyis sems can smin cing grol bar byed pas/ngan song la sogs pa spangs pa'i yon tan dang ldan pas/ de'i spong ba phun sum tshogs pa'o/ /yongs su zin zhes pa ni/ byang chub kyi sems de de lta bu shes rab dang thabs tshad med pa spong ba phun sum tshogs pa de yongs su zin pa la bya'o/ /nyan thos dang rang sangs rgyas kyi sa las shin tu 'das pa dang zhes pa yang de lta bu'i shes rab dang thabs tshad med pa dang ldan pas nyan thos dang rang sangs rgyas kyi lta ba las 'das te/'phags pa 'am de dag gi spyod yul ma yin pa la bya ste de yang spong ba phun sum tshogs pa'o/ /lha dang lha ma yin dang 'jig rten du bcas pas phyag byas pa/brgya byin dang tshangs pa dang dbang po dang nye ba'i dbang po la sogs pas phyag byas zhes pa ni/ de lta bu'i 'jig rten gyi dbang po la sogs pa sems can mthu can rnams kyis mchod cing phyag byas pa'i mthu dang ldan pas mthu phun sum tshogs pa'o//byang chub kyi sems de gzugs med pa la ji ltar de dag gis phyag bya zhe na/ gzugs med kyang de yon tan dang rdzu 'phrul chen po de dag thob nas 'dud cing phyag 'tshal bar 'gyur ro/ /yang de lta bu'i sems dang ldan pa'i byang chub sems dpa' la phyag 'tshal ba la yang bya'o//'di lta ste stong pa'i ngo bo nyid ces bya ba ni byang chub kyi sems de gzung ba dang 'dzin pa'i rang bzhin med de/ nam mkha' dang 'dra bas stong pa'i rang bzhin no/ /rdzas ma yin zhes pa ni de ltar stong pa'i rang bzhin yin pas rdul phra mo la sogs pa'i rdzas kyi rang bzhin ma yin pa'o//mtshan ma med ces pa ni mu stegs can la sogs pas brtags te bdag la sogs pa khams gsum thams cad skye ba dang 'jig pa'i rgyur gyur pa'i mtshan nyid ma yin pa'o/ /mtshan nyid ma yin zhes pa ni byang chub kyi sems te/ sngon po dang ser po la sogs pa ji bzhin pa'i mtshan nyid ma yin pa'o//'phro ba las shin tu 'das pa zhes pa ni 'phro ba ni rnam par rtog pa la bya ste/ rnam par rtog pa med pa'o/ /nam mkha' ji bzhin tshad med pa zhes pa ni de ltar rnam par rtog pa med pas nam mkha' dang 'dra ste/ nam mkha' ni tshad 'di tsam zhes dpag tu med de/de bzhin du byang chub kyi sems de'i yon tan yang tshad gzung du med pa'o/ /chos thams cad kyi gnas su gyur pa zhes pa la/ chos thams cad ni 'dus byas kyi chos la bya ste/ 'dus byas kyi chos de rnams rdul phran gyi phyogs cha la sogs par bshig gam sgyu ma dang /smig rgyu la sogs pa'i tshul du bshig na stong pa nyid kyi rang bzhin du gyur te/ byang chub kyi sems de dang ro gcig pas chos de dag thams cad kyi gnas su gyur pa zhes pa'o/ /gnyis su ni chos thams cad ces bya ba ni stobs bcu dang mi 'jigs pa bzhi dang ma 'dres pa bco brgyad la sogs pa sangs rgyas bcom ldan 'das kyi yon tan gyi chos rnams byang chub kyi sems de la gnas pa na chos thams cad kyi gnas su gyur pa zhes bya'o//'dus byas dang 'dus ma byas dang bral ba zhes bya ba ni/ 'dus ma byas dang bral ba ni sa dang po'i sems thob pa'i mi mthun pa'i gnyen por gyur pa rnams dang bral ba'o//'dus ma byas dang bral ba ni nyon mongs pa dang shes bya'i sgrib pa'i bag chags ma spangs pas mya ngan las 'da' ba'i dbyings la mig nas pa'o/ /mig dang rna ba dang sna dang lce dang lus dang yid dang bral ba zhes pa ni mig la sogs pa'i rnam par shes pa ltar mig la sogs pas rgyu byas pas skyes pa ma yin pas de rnams dang bral ba'o//shin tu rang bzhin med pa'i sems zhes pa ni de ltar gong du smos pa'i chos rnams gang dang yang mi ldan pas de rnams kyi ji bzhin pa'i rang bzhin ma yin pa ste/de bas na shin tu rang bzhin med pa'i sems so/ /skyes te zhes pa ni de dang 'dra ba'i rang bzhin med pa'i sems kyi mtshan nyid de gong du smos pa de'i bskal pa de snyed du bsod nams dang ye shes kyi tshogs bsags pa'i rgyus sa dang po'i yon tan rnams rdzogs nas/bla na med pa'i byang chub kyi phyir/ sems de skyes par rig par bya'o/ /de ni las dang nyon mongs bral/ /las dang nyon mongs su yang ldan/ /'jig rten rnams kyi sbyin gnas te/ /mchod cing bkur sti de la rtag tu'o/ /zhes pa la las dang nyon mongs bral zhes pa ni/ngan song la sogs pa'i las dang sa dang po'i mi mthun pa'i phyogs dang bral ba'o/ /las dang nyon mongs su yang ldan/ /zhes pa ni sa bla ma rnams thob par bya ba'i las dang de dag la sgrib pa'i nyon mongs pa dang ldan pa'o/ /'jig rten rnams kyi sbyin gnas zhes pa ni de lta bu'i sems dang ldan pa'i byang chub sems dpa' de nor dang 'bru dang rin po che la sogs pas yon dbul ba'i snod du gyur pa'o//mchod pa zhes pa ni dri dang me tog la sogs pas mchod pa'i gnas so/ /bkur sti zhes pa ni phyag bya zhing thal mo sbyar ba dang / bsu zhing bskyal ba la sogs pa'i bkur sti'i gnas so//de la rtag tu ni de lta bu'i byang chub sems dpa' rnams la 'jig rten pa rnams kyis rtag tu mchod pa dang bkur sti la sogs pa'o// //da ni mos pa dang ba'i mtshan nyid dang yon tan yang bshad de/ gnas kyang gsang ba'i bdag po sems gsum rnam par bsgoms na zhes pa nas/mkhas pas bskal pa gcig gis ni/ /sa las shin tu 'das par 'gyur/ /zhes pa'i bar du'o/ /de la sems gsum rnam par bsgoms na zhes pa ni 'jug pa dang ldang ba'i sems te rnam par bsgom pa'i thabs ni sdar chos la bdag med pa'i skabs srung shad de/shin tu dad pa zhes pa ni mnyan pa dang bsams pa dang bsgoms pa'i shes rab kyis sa dang pha rol tu phyin pa la sogs pa sangs rgyas kyi yon tan rnams shes nas de nyid yin gyis gzhan ma yin zhes pa de la shin tu mos pa skye ba'o/ /mos pa zhes pa ni chos de la mos pa tsam ma yin te/de rnams kyis yon tan goms par bya ba la nan tan byed pa de/ de bas na gsungs pa/ pha rol tu phyin pa rnams brtag pa dang bsdu ba rnam bzhi ni zhes pa ste/ de la pha rol tu phyin pa rnams brtag pa zhes pa ni sa dang po nas brtsams te bcu'i bar du sa re re la yang sbyin pa la sogs pa'i pha rol tu phyin pa re re spyod de pha rol tu phyin pa ji ltar bdag spyod pa de bzhin du sems can gzhan rnams kyang bsdu ba rnam bzhi'i sgo nas bsdus te spyod du gzung do//de la rab tu dga' ba'i yon tan sems dga' bzhin du chos dang zang zing gis pha rol tu phyin pa spyod pa'i sa la gnas pa la bdag kyang spyod la/sems can gzhan rnams kyang bsdu ba rnam bzhi'i sgo nas bsdus shing spyod par gzud do/ /sa gnyis pa dri ma med pa la tshul khrims kyi pha rol tu phyin pa dri ma med pa spyod pa yang mos pa spyod pa'i tshe bdag kyang spyod la gzhan rnams kyang spyod du gzud do//sa gsum pa 'od byed pa la ma skyes pa'i chos la bzod de bzod pa'i pa rol tu phyin pa spyod pa yang / mos pa spyod pa'i tshe bdag kyang spyod la gzhan yang spyod du gzud do/ /sa bzhi pa 'od 'phro ba can la ye shes kyi 'od 'phro bas brtson 'grus kyi pha rol tu phyin pa nas spyod pa dang /sa lnga pa shin tu rgyal ba nas bdud la sogs pa las shin tu rgyal bar dka' ba'i bsam gtan gyi pha rol tu phyin pa la spyod pa dang / sa drug pa mngon du bya ba la shes rab mngon du gyur bas shes rab kyi pha rol tu phyin pa la spyod pa dang / sa bdun pa ring du song ba la sems can rnams smin pa dang 'gro bar byed pa'i thabs kyi pha rol tu phyin pa la spyod pa dang /sa brgyad pa mi g.yo ba la smon lam gyi dbang gis thob nas bla ma rnams thob pa'i phyir smon lam gyi pha rol tu phyin pa spyod pa dang / sa dgu pa dge ba'i blo gros la stobs kyi pha rol tu phyin pa spyod pa dang /sa bcu pa chos kyi sprin la phyogs bcu'i de bzhin gshegs pa rnams la mngon sum du ye shes kyis chos 'dri zhing spyod yul du gyur pa ye shes kyi pha rol tu phyin pa spyod pa rnams mos pa spyod pa'i tshe nyid na bdag kyang spyod pa la goms par byed la/ sems can rnams kyang bsdu ba rnam bzhi'i sgo nas bsdus te spyod du 'jug pa'o//bsdu ba rnam bzhi po zhes pa ni sbyin pa dang / snyan par smra ba dang / don byed pa dang / don mthun par byed pa'i sgo nas pha rol tu phyin pa rnams la spyod du 'dzud pa'o/ /sa de rnams kyi mtshan nyid dang / yon tan rgya cher ni sa bcu'i mdo sde la sogs par blta'o//mnyam med shin tu mos pa'i sa/ /zhes pa ni mos pa spyod pa'i sa de 'jig rten pa phal rnams dang mi mnyam pa'o/ /tshad med pa zhes pa de'i yon tan spyi grangs bcal ba las 'das pa'o/ /bsam yas zhes pa ni sems kyis bsams shing dpag pa las 'das pa'o//sa bcu rim par thob ces pa ni pha rol tu phyin pa bcu po spyod pa'i sems kyi rim pa la bya'o/ /tshad med ye shes las byung ba/ /zhes pa ni thams cad mkhyen pa'i ye shes tshad med pa'o/ /mos pa spyod pa'i sa de la bya'o/ /de'i sa thams cad thob pa ni de'i sa cung zad gang gsungs pa'o zhes pa ni mos pa spyod pa des stobs bcu dang /mi 'jigs pa bzhi dang / ma 'dres pa bco brgyad la sogs pa'i chos rnams gang cung zad bcom ldan 'das kyis gsungs pa de thams cad thob par 'gyur ba'o/ /de bas thams cad mkhyen pa'i sa ni shin tu mos pa'i sa zhes bya zhes pa ni/de ltar de bzhin gshegs pa'i chos thams cad mos pas thos pas na/ mos pa spyod pa'i sa de thams cad mkhyen pa'i sa'i rgyu ste de bas na rgyu la 'bras bus bslan te/ gsungs pa des shin tu mos pa'i sa zhes kyang bya zhes pa'o//yid gzhungs bskal pa gcig gis ni/ /sa las shin tu 'das par 'gyur/ /zhes pa ni shes rab can gyis mos pa spyod pa'i sa de bskal pa gcig gis yongs su rdzogs par 'gyur zhes pa'o/ /de'i bzhi cha gcig gi sa ni/ /shin tu mos pas kyang 'das zhes pa ni/bskal pa de'i bzhi cha gcig gis ni/ mos pa spyod pa'i sa chos bdag med par chud pa'i sa de las 'phar te/ ye shes kyi sa la 'jug pa'i stegs su gyur pa'i chos la bdag med par yang spangs nas rang gi sems thog ma nas ma skyes ma byung bar bsgom pa la zhugs pa la bya'o//mos pa spyod pa'i sa'i rim pa dang yon tan de dag sngar mos pa spyod pa'i sa la bdag med pa la 'jug pa'i skabs su mi bshad par rab tu dga' ba'i sa bshad pa'i 'og tu ci'i phyir bshad ce na/ rab tu dga' ba'i sa ni mos pa spyod pa'i sa'i 'bras bu ste de ltar 'bras bu de ci 'dra bar shes nas de'i rgyu gang yin pa de gdod brtag par bya ste/de bas na mos pa spyod pa'i sa de'i phyis bshad do/ /da ni rnam par snang mdzad kyi rgyu 'jig rten gyi sems sbyin pa la sogs pa brgyad po bshad pa dang / so so'i bdag tu brtags pa la brten nas 'ba' zhig pa'i blo skye ba bshad pa dang /de nas 'jig rten las 'das pa'i sems skyes te/ bdag tu brtags pa rnams med par chud nas phung po tsam du zin pa/ gang zag la bdag med par chud pa bshad pa dang / phung po tsam po de la yang dbu ba dang chu'i chu bur la sogs pa'i tshul du bshig nas/chos rnams so so'i rang bzhin sngon po la sogs pa tsam du zad par chud pa bshad pa dang / chos la bdag med par chud nas/ rang bzhin gyi sems thog ma nas ma skyes pa stong pa nyid du chud par bshad pa dang /sa dang po'i sems kyi rang bzhin stong pa nyid kyi rang bzhin de yang ngo bo med par mnyam pa nyid du chud pas rgya cher bshad pa de rnams nyid de 'dir dbugs dbyung ba'i sgo nas mdor bsdus te phyag na rdo rje gsol pa dang / bcom ldan 'das rnam par snang mdzad kyis kyang mdor bsdus te gsungs pa de bshad par bya ste/de rnams bshad pa yang lan gnyis su bzlas pa ci dgos she na/ sngar bshad pas gsal bar ma go na phyis bzlas te bshad pas gsal zhing bstan par 'gyur ba'i phyir te/ de bas na phal cher lang sngar rgya cher bshad de ma go na phyis mdor bsdus te bshad pas go ba yang yod de sngar tshig rkyang pas bshad de ma go ba las phyis tshigs su bcad de go ba yang srid pa'i phyir ro//mdo sde la sogs pa gzhan dag rnams kyang sngar spros te bshad pa'i don de nyid tshigs su bcad pas bsdus te bshad pa de dag srid de/de bas 'dir yang sngar rgyas par bshad pa'i don de nyid phyis bsdus te bshad do/ /de yang de nas bcom ldan 'das phyag na rdo rjes 'di skad ces gsol to zhes pa nas sras rnams dbugs dbyung bar gyur pa'o zhes pa'i bar du ni phyag na rdo rjes gsol ba'i tshig ste/mtshan nyid mgon pos gsungs pa ni/ /sems can rnams kyi mgon khyod kyis/ /zhes pa ni sngar sems can rnams kyi mtshan nyid bshad pa de dbugs dbyung ba rnam pa dus thob par 'gyur zhes zhus pa'o/ /dbugs dbyung ba rnam pa dus thob ces pa ni phyis dbugs dbyung ba zhes pa ni ji ltar 'jig rten na grags pa lam 'phrang gi 'jigs pa nas rkun po la sogs pa'i 'tshe ba las thar na dbugs dbyung ba zhes bya ba de bzhin du 'dir yang 'khor ba'i dgon pa na rnam par 'khyams pa'i sems can las dang nyon mongs pa'i rkun pos 'tshe ba'i 'jigs pa las thar pa'i dbugs dbyung ba zhes bya ba ste/de las thar na gzhan dbugs dbyung bar bya ba'i sa med de/ dbugs dbyung ba gcig tu zad nas ci'i phyir na dbugs dbyung ba'i dus thob ces mang po'i tshig smos she na/ ji ltar 'jig rten pa rnams 'jigs pa gcig las thar nas 'jigs pa de las kun dbugs dbyung mod kyi de las gzhan pa'i 'jigs pa rnams las ma thar na dbugs ma phyung ba'o//de bzhin du 'dir yang dge ba dang gang mi mthun pa'i gnyen por gyur pa de las thar te/ dbugs dbyung mod kyi de las gzhan pa'i bgegs su gyur pa rnams las mthar na/de las dbugs ma dbyung ba zhes bya ste/ de bas na dbugs dbyung ba rnam pa du'i sa bon zhes smos so/ /sras rnams zhes pa ni mchog las skyes pa ste/ mchog ni chos kyi dbyings de bzhin nyid de las skyes pa ni byang chub sems dpa' ste/ de rnams dbugs dbyung bar gyur pa'o//bcom ldan 'das rnam par snang mdzad chen pos phyag na rdo rje la bka' stsal to zhes pa nas thams cad stong pa nyid kyi rang bzhin med do/ /stong pa'i ye shes skyes pa de na chos thams cad kyi ngo bo nyid snyoms par dbugs dbyung ba'o zhes pa'i bar du phyag na rdo rjes gsol ba rnams/bcom ldan 'das rnam par snang mdzad kyis bka' stsal pa la bya'o/ /de la yid bsdus la nyon cig pa ni snod rnam bzhi'i gnyen por gsungs pa ste sngar bshad pa'o/ /byis pa so sor 'gro ba rnams mi dge ba'i las rnams spangs/ dge ba'i las byed pa na dge bar dbugs dbyung ba'o zhes pa ni byis pa phyugs dang 'dra ba rnams 'khor ba na 'khyams pa las skyo ste/bsod nams kyi 'du shes skyes na smyung bar 'dug cing sbyin pa la sogs pa byed pa ni dge bar dbugs dbyung ba zhes bya'o/ /de la dge ba zhes pa ni dbugs dbyung ba gzhan yang dge ba yin na/ci'i phyir 'dir 'ba' zhig la dge ba bya zhe na/ gzhan yang dge ba yin mod kyi/ 'on kyang gzhan rnams la so so'i ming yod pas 'di la dge ba zhes bya'o/ /nam bdag gis de kho na nyid ji lta ba nyid rab tu shes na bdag gi gnas su rab tu dbugs dbyung ba'o zhes pa ni sbyin pa la sogs pa'i sems brgyad spyod pa na/dge ba'i bshes gnyen dang phrad de 'jig rten pa rnams kyis bdag tu brtags pa'i dngos po ji lta ba nyid du shes nas/ bdag la brten cing 'jig rten pa'i las rnams goms par byed pa ni bdag gi gnas su dbugs dbyung ba zhes bya'o//bdag gis de kho na nyid ji lta ba nyid du rab tu shes zhes pa ni stong pa nyid kyi rang bzhin du shes rab kyis ji lta ba nyid du shes pa la ni mi bya'i/ 'jig rten pa'i gzhung bzhin du bdag gi ngo bor brtags pa de phyin ci ma log par shes pa la bya'o/ /nam phung po yongs su gzung ba byas nas bdag gis gnas kun spangs te/nyid kyis gzugs dpyad pa de na bdag med par dbugs dbyung ba'o zhes pa ni phung por brtags pa yod par 'dzin pa de ni dbu ba dang chu bur la sogs pa'i tshul du bshig na phung por brtags pa'i dngos po yod pa ma yin gyi/chos rnams so so'i mtshan nyid tsam 'ba' zhig yod par chud pa ni chos la dbugs dbyung ba zhes bya'o/ /nam chos spangs nas ma skyes pa la 'dug pa de na chos la bdag med par dbugs phyung ba'o zhes pa ni phung po la sogs pa'i chos rnams sgyu ma dang smig rgyu'i tshul du bshig nas yod pa ma yin te/rnam par shes pa tsam du zad par chud de/ rnam par shes pa de nyid kyang thog ma dang tha ma'i mtha' mi rnyed de/ rang bzhin med de thog ma nas ma skyes par chud pa de ni chos la bdag med par dbugs dbyung ba zhes bya'o/ /nam phung po dang / khams dang /skye mched dang / gzung ba dang / 'dzin pa dang / bdag dang / srog la sogs pa dang / ma skyes pa rnam pa thams cad stong pa nyid kyi rang bzhin yang ngo bo med do zhes stong pa'i ye shes skyes pa de na chos thams cad kyi ngo bo nyid mnyam pa nyid du dbugs dbyung ba'o zhes pa ni phung po la sogs pa'i chos rnams bdag med par chud de rnam par shes pa tsam du zad par shes pa dang /rnam par shes pa de yang thog ma nas ma skyes par chud de/ stong pa nyid kyi rang bzhin du shes pa'i stong pa'i rang bzhin de yang ngo bo med par chud pa ni stong pa sa dang po'i sems kyi mtshan nyid stong pa'i yang stong pa ste mnyam pa nyid du dbugs phyung ba zhes bya ste/de rnams ni bcom ldan 'das rnam par snang mdzad kyi rgyu phun sum tshogs pa bshad pa la bya ste/ rgyu phun sum tshogs pa bshad pa yang de 'ba' zhig tu ma zad kyi gzhan yang rgyu'i skabs nas 'byung ba/ byang chub nam mkha'i mtshan nyid de//kun du rtog pa thams cad spangs te chud pa ru gang 'dod pa de ni byang chub sems dpa' zhes bya ste/ bla na med pa'i byang chub chud par 'dod pa de ni sa dang po man chad rnams 'ba' zhig la mi bya'i/ sa bcu dang kun du bzang po'o/ /sa la gnas pa'i byang chub sems dpa' yang bla na med pa'i byang chub chud par 'dod pa ste//de bas na byang chub sems dpa' de rnams spyod pa yang bcom ldan 'das rnam par snang bar mdzad kyi rgyur rig par bya'o/ /da ni 'dis dpyad par bya ste/ sngags rnams kyi spyi'i mtshan nyid ni byang chub kyi sems so zhes gzhung pas gsungs na/byang chub kyi sems ni phung po dang / khams dang / skye mched dang / gzung ba dang / 'dzin pa dang / las dang / bya ba'i rnam pa dang bral ba stong pa nyid kyi rang bzhin du yang ngo bo med par yin la/ sngags ni sangs rgyas dang byang chub sems dpa' rnams dang / de ston par byed pa'i sgra dang yi ge'i 'bru rnams te/de rnams kyang mchog dang / 'bring dang / tha ma'i grub pa dang / zhi ba dang / rgyas pa dang / mngon spyod pa'i las rnams kyi bya ba byed de/ de ltar mi mthun na de rnams ji ltar rig par bya zhe na/ de'i phyir gsungs pa/ de ni gsang ba'i bdag po byang chub sems dpa'i spyad pa sngags kyi sgor spyod pa'i byang chub sems dpa' rnams gnas bcus rkyen dang 'du ba tshogs te byung ba bsgoms nas sngags tshul gyi rgyud du song ba zhes pa ste/yang kun rdzob kyi chos rnams ni rig pas brtag mi bzod de/ don dam par stong ba'i rang bzhin yin mod kyi/'on kyang kun rdzob dang so so'i rgyu dang 'bras bu nges pa'i bya ba rnams kyang byed par 'gyur te/ med ces byar mi rung ngo / /de ltar stong pa'i rang bzhin las kun rdzob yod par snang ba ni sgyu ma la sogs pa dang 'dra'o/ /de bzhin du sngags kyi rang bzhin yang byang chub kyi sems de don dam par stong pa yin mod kyi/chos kyi dbyings kyi byin gyi rlabs dang / sgrub pa po'i sbyor ba'i mthus grub pa'i 'bras bu rnam pa sna tshogs kun du snang zhing myong bar 'gyur te/ de rnams kyang sgyu ma la sogs pa'i dper bshad pa ni 'di lta ste/ sgyu ma dang smig rgyu dang rmi lam dang zhes bya ba la sogs pa nas gzhan yang gsang ba'i bdag po la las me'i mgal pa lag tu blangs te bskor nas 'khor lor mthong mod kyi//de bzhin du stong par 'gyur ba'o zhes pa'i bar du ste/ de la sgyu ma gang zhe na 'di lta ste/ sman dang sngags su sbyor nas/ rnam pa sna tshogs yid dang mig slu ba'i dngos po rnams sngon ma mthong ba rnams ston te de yang phan tshun phyogs bcur 'dod pa yang yin no//de ci'i phyir zhe na/ sgyu ma ni rang bzhin gyis stong pa nyid kyi phyir de bzhin du sngags kyi sbyor bas sbyor ba las thams cad 'byung ngo zhes pa ni ji ltar sgyu ma mkhan gyis sngags dang sman gyi sbyor ba las/ba lang dang rta la sogs pa'i dngos po rnam pa mang pos yid dang mig chags par byed par snang ste/ de rnams kyang ba lang dang rta la sogs pa'i rang bzhin du yod pa ma yin pas na/ phyogs bcu nas 'ongs pa'am 'dod pa yang med de/ 'on kyang de dag la ba lang la sogs pa'i bya ba yang byed do//de bzhin du sngags kyi rang bzhin byang chub kyi sems de stong pa nyid yin kyang / sbyor ba las sngags kyi dngos grub sbyor ba sbyar nas rab dang 'bring la sogs pa grub pa'i 'bras bu rig 'dzin nam mkha' la 'gro ba dang mi snang par 'gro ba la sogs pa rnam pa sna tshogs su snang zhing myong bar byed do//gzhan yang gsang ba'i bdag po smig rgyu ba ni yongs kyis stong pa nyid de yang ming tsam du smos nas brjod do/ /de bzhin du sngags 'di yang ming tsam du smos te dpyad par brjod pa'o zhes pa ni de ltar sngags kyi 'bras bu sgyu ma dang 'dra na sngags kyi dngos po ci zhig ce na/smig rgyu lta bu ste/ ji ltar 'brog dgon pa na smig rgyu ba na ma'i ma ri dwags rnams kyis chur 'du shes skyes te/ de na chu yod pa ma yi na yang smig rgyu ba de ji bzhin pa'i rnam par shes pa bskyed cing sgom pa yang chus de mos pa'i bya ba byed de/de bzhin du sngags de yang dngos po yod pa yang ma yin/ 'du shes tsam du zad mod kyi/ 'on kyang sngags kyi dngos grub kyi 'bras bu bskrun pa'i bya ba byed do/ /de bzhin du yang gsang ba'i bdag po rmi lam na yang nyin par dang skad cig dang yud tsam dang cha shas tsam dang lo la sogs par bdag nyid 'dug cing bde ba dang sdug bsngal rnam pa mang po myong ba mthong nas slar sad pa dang ci yang ma mthong do//de lta bur sngags 'di'i tshul yang rmi lam bzhin du rig par bya'o zhes pa 'di sngar sngags bsgrubs pa'i 'bras bu'i dpe sgyu ma las dpe blangs pa de sgyu ma ni yun ring du 'dug pa ma yin gyi skad cig yud tsam dag tu zad pas sngags kyi 'bras bu ni bskal pa la sogs par yun ring du 'dug na ji ltar dper rung zhe na/rmi lam gyi dpes yun ring du gnas pa bstan pa ste/ ji ltar rmi lam na yun gyi dngos po med par skad cig dang nyi ma dang zhag dang lo la sogs pa yul rnams spyod cing bde ba dang sdug bsngal ba rnam pa mang po myong zhing rig par mthong ste/de las sad na dngos po gang yang med do/ /de ltar yang cis mngon zhe na/ ting nge 'dzin gyi rgyal po'i mdo las kyang gsungs pa/ ji ltar bu mo gzhon nu'i rmi lam na/ bdag las bu byung ste bu de skyes nas dga' ba yang skyes de nas bu de shi ba yang mthong ste/shi nas mi dga' ba yang skyes par mthong bas de ltar rmi lam na yun ring por srid do/ /de bzhin du sngags bsgrubs pa'i 'bras bu yang rang bzhin med pa las sbyor bas sgrub na grub pa'i 'bras bu rnam pa sna tshogs tshe rabs dang bskal pa la sogs par gnas par 'gyur ro//gzhan yang gsang ba'i bdag po gzugs brnyan 'byung ba bzhin du sngags kyi sgrub pa yang rtogs par bya'o zhes pa ni de ltar sngags grub pa de rnams dngos po med par yang rten cing 'brel par 'byung ba las byung na/ sgrub pa thams cad kyis ci'i phyir grub pa mi 'thob ce na/ ji ltar gzugs brnyan de rdo dang shing gzhan la mi 'byung gi me long gi dkyil 'khor dag pa las 'byung bar 'gyur ro/ /de bzhin du sngags kyi sgrub pa de yang sgrub pa po thams cad la mi 'byung gi gang byang chub kyi sems bsgoms shing rgyud dag par gyur pa de la 'byung bar bstan pa'o//gzhan yang gsang ba'i bdag po grub pa'i sgrub gnas ni dri za'i grong khyer lta bur ltos shig ces pa ni/ ji ltar dri za rnams kyi grong khyer dri za de rnams kyis gang du bsams pa der grong rdal byung du gyur te/ de bzhin du sngags kyi sgrub pa de yang bdag nyid kyi lus rig 'dzin la sogs par grub pa'i phyir sgrub kyi/gzhan gyi phyir ma grub kyang nam rig 'dzin la sogs pa grub na lha'i gzhal med khang dang dpag bsam gyi shing gi grib ma dang shel gyi brag la bdud rtsi'i chu 'bab pa dang / rin po che'i gsing ma la sogs pa'i gnas rnams bsams pa tsam gyis 'grub par 'gyur ba bstan pa'o//gzhan yang gsang ba'i bdag po brag ca bzhin du sngags kyi sgra yang rig par bya'o/ /de 'di lta ste/ sgra'i phyir brag ca 'byung ba yin te de bzhin du sngags kyi tshul rig par bya'o zhes pa ni ji ltar sgra'i rkyen gyis brag ca 'byung bas dngos po yod pa ma yin kyang sgrar 'byung ba de bzhin du yang sngags kyi sgrar yang sngags kyi rang bzhin stong pa nyid mod kyi bsgrubs pa'i rkyen gyis de 'byung ba de dper na brag ca dang 'dra bar bstan pa'o//gzhan yang gsang ba'i bdag po zla ba shar ba'i gzugs brnyan chu'i nang du 'byung ba de ni zla ba'i rang bzhin de nas mi gzhan no//de bzhin du sngags sgrub pa'i rig 'dzin de yang rig 'dzin gyi lus bzang po la sogs pa bsgrub pa'i gzugs de las gzhan ma yin te gzugs de nyid las 'gyur mod kyi/ 'on kyang rig 'dzin ces smos par bstan pa'o//gzhan yang gsang ba'i bdag po char 'bab pa chu bur 'byung ba de bzhin du sngags kyi grub gnas/ rnam pa du mar sprul zhes grags/ /zhes pa ni sngags gcig pu las grub pa'i 'bras bu rnam pa mang po ji ltar 'gyur zhe na/ sngags de gcig pu yin yang grub pa'i 'bras bu rnam pa mang po 'byung ba chu'i chu bur gyi dpes bstan pa ste/ji ltar char 'bab pa na chu de gcig pu las chu'i chu bur che phra la sogs pa rnam pa mang po 'byung ba de bzhin du sngags gcig pu las kyang 'grub pa'i 'bras bu rnam pa du ma 'byung ngo / /gzhan yang gsang ba'i bdag po yang sems can med cing srog kyang med pa'i mkhan po yang yod pa ma yin/dngos po kun kyang stong pa ste/ /mthong ba rnams kyang 'khrul pa'o/ /zhes pa ni de ltar sngags kyi rang bzhin stong pa nyid de sems can nam srog gam/ byed pa'i mkhan po med de stong pa nyid kyang grub pa'i 'bras bu la sogs pa kun snang ba ni 'khrul par snang bar bsten pa'o//gsang ba'i bdag po de ni theg pa chen po'i gnas so zhes pa nas ma lus pa'i ye shes chen po 'byung ba 'di thams cad shes na sems kyis rim pa de dag thams cad ji bzhin pa'i de nyid rab tu shes so zhes pa'i bar du ni sa dang po'i byang chub kyi sems mnyam pa nyid chud pa de'i rjes su bsngags pa bshad pa chud pa la bya ste/theg pa chen po'i gnas zhes pa ni byang chub kyi sems de ji lta ba nyid du shes pa ste theg pa chen po ni byang chub sems dpa'i lam 'bras bu dang bcas pa'o/ /byang chub kyi sems kyi gnas so zhes pa ni 'jig rten pa'i sems brgyad nas/sa rab tu dga' ba'i sems kyi bar gyi rim pa de rnams rab tu shes so/ /mi mnyam pa dang mnyam pa'i gnas so zhes pa la/ mi mnyam pa ni nam mkha' ste/ nam mkha' de mtha' med pas ci dang yang mi mnyam pa'o/ / nam mkha' gang dang yang mi mnyam pa dang / de dang mnyam pa ni chos kyi dbyings stong pa nyid de/ stong pa nyid kyi rang bzhin de shes pa ni mi mnyam pa dang mnyam pa'i gnas so/ /gdon mi za ba'i gnas zhes pa ni chos rnams stong pa nyid kyi rang bzhin du phyin ci ma log par nges par shes par bya'o//yang dag par rdzogs pa'i sangs rgyas kyis gnas so zhes pa ni sa dang po'i byang chub kyi sems chos thams cad mnyam pa nyid du chud pa de bla na med pa'i byang chub dang tha mi dad do/ /ro gcig pas na yang dag par rdzogs pa'i sangs rgyas so zhes pa'o/ /mthar gyis theg pa chen po mngon par sgrub pa'i gnas so zhes pa ni bcom ldan 'das rnam par snang mdzad kyi rgyu 'jig rten pa dang 'jig rten las 'das pa'i sems 'og ma rnams kyang /sa dang po'i byang chub kyi sems 'di'i nang du 'dus las dang po nas kun du bzang po'i sa man chad kyi sems kyang 'di las tha mi dad pas na de rnams kyi gnas su gyur pas na mthar gyis theg pa chen po mngon par sgrub pa'i gnas zhes pa'o//ma lus pa'i ye shes 'byung ba chen po 'di thams cad du shes na sems kyis rim pa de thams cad ji lta ba nyid du rab tu shes pa ni sa dang po'i byang chub kyi sems de thams cad mkhyen pa'i ye shes 'byung ba'i gtso bo bsam lus pa'i ye shes 'byung ba chen po zhes pa ste/de legs par shes pa rnam par snang mdzad kyi rgyu 'jig rten las 'das pa'i sems kyis rgyud thams cad rab tu shes par gyur bar bstan pa'o/ /rnam par snang mdzad chen po mngon par byang chub pa rnam par sprul pa'i byin gyis brlabs pa'i sems kyi rgyud rim pa dang po'o// //da ni bcom ldan 'das rnam par snang mdzad kyis thams cad mkhyen pa'i ye shes brnyes nas thams cad mkhyen pa'i ye shes des mtha' yas pa'i sems can gyi khams rnams tshul sna tshogs dang bsam pa sna tshogs dang thabs sna tshogs kyis bla na med par bsgral ba'i phyir sngon gyi smon lam gyi shugs kyis lhun gyis grub pa nyid du sku mnyam pa nyid mi zad pa'i rgyan gyi 'khor los khams gsum thams cad du khyab par mdzad pa/bcom ldan 'das rang bzhin gyi dkyil 'khor de/ byang chub sems dpa' chen po 'phags pa kun du bzang po dang / phyag na rdo rje la sogs pa yongs su dag pa rnams kyis mngon sum du mthong zhing spyod yul du gyur na/ 'gro ba 'og ma rnams kyis bcom ldan 'das kyi sku la sogs pa'i 'khor lo de spyod yul du ma gyur te/sems can de rnams kyi don du sku la sogs pa'i 'khor lo de rnams dkyil 'khor dang sngags dang phyag rgya la sogs par byin gyis brlabs par bcom ldan 'das la phyag na rdo rje sa gsol bas 'chad de/ gsol pa de yang de nas phyag na rdo rje gsang ba'i bdag pos bcom ldan 'das rnam par snang mdzad la 'di skad ces gsol to zhes pa nas deng yang bcom ldan 'das kyis snying rje chen po'i snying po 'byung ba/dkyil 'khor gyi rgyal po yongs su rdzogs pa'i phyir ma 'ongs pa na/ sems can mang po'i don dang / phan pa dang bde bar 'gyur ba'i phyir sngags spyod pa'i tshul de bshad du gsol zhes pa'i bar du ste/ bcom ldan 'das kyis bcom ldan 'das nyid mngon par rdzogs par sangs rgyas nas chos kyi dbyings bsam gyis mi khyab pa/ sems can gyi sa las 'das pa de thugs su chud pa sku la sogs pa'i 'khor los sems can gyi khams thams cad du khyab par sems can rnams so so'i dang pa dang rjes su mthun pa so so'i bsam pa yongs su rdzogs par byed/rnam par sprul pa phyag na rdo rje ji ltar mthong zhing chud pa de bcom ldan 'das la slar bzlas te/ gsol ba la bya ste/de ltar slar bzlas pa yang tshul gyis ston pas/ ci bshad pa rnams nyan pa pos mjal to bar slar mnyan na/ ston pa po yang spro la skabs 'og ma mtshams sbyar ba la bde ba'i phyir ro/ /ngo mtshar che'o zhes pa ni/ de ltar stong pa nyid brjod cing spyad pa las 'das pa chud kyang /sku la sogs pa'i rgyan gyi tshul sna tshogs dang / bsam pa sna tshogs dang / thabs sna tshogs su sprul pa de ngo mtshar che ba la bya'o/ /bcom ldan 'das nyid kyis mngon par rdzogs par sangs rgyas nas zhes pa ni/ chos kyi dbyings bas ma gyis mi khyab pa de gzhan las mnyan te/thugs su chud pa ma yin gyi/ bcom ldan 'das nyid kyis thugs su chud pa la bya'o/ /de yang bcom ldan 'das kyis snying rje chen po'i snying rje 'byung ba/ dkyil 'khor gyi rgyal po yongs su rdzogs pa'i phyir ma 'ongs pa na/ sems can mang po'i don dang phan pa dang bde bar 'gyur ba'i phyir sngags spyod pa'i tshul bshad du gsol zhes pa ni rang bzhin gyi dkyil 'khor sku la sogs pa'i 'khor lo de bdag cag gis chud cing spyod yul du 'gyur na ma 'ongs pa'i 'gro ba rnams kyi don du sku la sogs pa'i 'khor lo de rnams dkyil 'khor de'i sngags dang phyag rgya'i sgo nas 'gro ba de rnams kyi spyod yul du 'gyur bar byin gyis brlab pa'i gsol ba la bya ste/snying rje chen po 'byung zhes pa ni dkyil 'khor chen po las 'byung ba la bya'o/ /dkyil 'khor zhes ni 'og nas gzhung nyid las bshad do/ /rgyal po zhes pa ni de las gzhan pa'i byang chub sems dpa' la sogs pa'i dkyil 'khor kun kyang dkyil 'khor chen po 'di'i nang du 'dus pas na rgyal po zhes bya'o//yongs su rdzogs pa'i phyir zhes pa ni dkyil 'khor gyi sgo nas sgrub pa lha mnyes par bya ba'i spyod yul ba rnam pa bcu drug gis bdag gi lha mnyes par bya ba dang sgrub pa'i sgo nas bslab pa'i yan lag bzhi dang rang gi sems yongs su sbyang ba la sogs pa'i spyod pa'i lha mnyes par bya ste/rig 'dzin la sogs pa'i grub pa thob nas rim gyis sangs rgyas par 'grub pa dang rang gi sems yongs su sbyangs pas mngon du ba dang / pha rol tu phyin pa la sogs pa spyad pa rdzogs nas/thams cad mkhyen pa'i ye shes rnyed par 'gyur ba ni dkyil 'khor te yongs su rdzogs pa la bya'o/ /ma 'ongs pa'i sems can mang po'i don dang phan pa dang bde bar 'gyur ba'i phyir sngags sbyar ba'i tshul de bshad du gsol/ zhes pa ni ma 'ongs pa'i sems can de rnams kyi dkyil 'khor yongs su rdzogs pa'i mtshan nyid thams cad mkhyen pa nyid kyi ye shes de thob pa'i phyir dkyil 'khor de bshad du gsol lo zhes pa ste don gyi phyir zhes pa ni/thams cad mkhyen pa'i ye shes thob pa'i don gyi phyir bya'o/ / phan pa'i phyir zhes pa ni tshe phyi ma la phan pa'i phyir bya'o/ /bde ba'i phyir zhes pa ni tshe 'di la bde ba'i phyir ro/ /yang na don gyi phyir zhes pa ni phan pa dang bde ba'i don gyi phyir yang bya'o/ /sngags spyad pa'i tshul zhes pa/ sngags kyi spyad pa ni dkyil 'khor dang sgrub pa la sogs pa ste de dag nyid tshul lo//tshul zhes pa ni rgya gar skad kyi gzhung dang sbyar na 'gro ba'am thob pa la bya ste/ sngags spyad pa des bla na med pa'i sangs rgyas par 'gro ba'am thob pa de bshad du gsol zhes pa'o/ /de nas bcom ldan 'das rnam par snang mdzad 'khor de dag thams cad la gzigs nas zhes pa ni 'khor byang chub sems dpa' de'i nang nas g.yeng ba yod dam med pa dang /snod du mi 'gyur ba'i nyan pa yod dam med brtag pa'i phyir gzigs pa la bya ste/ bcom ldan 'das rnam par snang mdzad kyi 'khor byang chub sems dpa' yongs su dag pa sha stag na ci'i phyir g.yeng ba dang / / snod du mi 'gyur ba 'byung zhe na/ de'i dgongs pa 'di lta ste/ bcom ldan 'das 'khor byang chub sems dpa' de rnams la g.yeng ba dang snod du mi 'gyur ba med mod kyi/ ma 'ongs pa'i dus na chos nyan pa rnams la de lta bu srid pas de dag la brtag pa'i tshul bstan pa'i phyir ro/ /phyag na rdo rje thams cad mkhyen pa'i ye shes yongs su rdzogs par 'gyur ba'i dkyil 'khor spyad pa bshad pa'i chos kyi gzhung nyon cig pa ni/dkyil 'khor gyi sgo nas lha mnyes par bya ba'i spyod pa'i rnam pa bcu drug bshad pa dang / de bzhin du rim gyis sgrub pa'i sgo nas lha mnyes par bya ba'i spyod pa bzlas pa yan lag bzhi dang /rang gi sems yongs su sbyang bar byas pas lha mnyes par 'gyur te/ rig 'dzin la sogs pa'i grub pa mngon du thob nas rim gyis thams cad mkhyen pa'i ye shes yongs su rdzogs par 'gyur bas na thams cad mkhyen pa'i ye shes yongs su rdzogs pa'i dkyil 'khor zhes bya'o//dkyil 'khor spyad pa zhes pa ni dkyil 'khor bri ba la sogs pa'i spyad pa rnam pa bcu drug la sogs pa'o/ /tshul ni sngar bshad pa'o/ /gzhung zhes pa ni ngon gyi dngos po gcig la tshig mang po'i sgo nas dmigs bstan pa la bya ste/ de yang skabs 'dir thams cad mkhyen pa'i ye shes thob par bya ba ni/pha rol phyin pa la sogs pa'i sgo nas kyang 'gyur/ sngags spyad pa'i sgo nas kyang 'gyur te/ de bas na dkyil 'khor bshad pa'i tshul bshad pa'i chos kyi gzhung zhes bya'o/ /de nas bcom ldan 'das rnam par snang mdzad chos kyi dbyings kyi don ma rdzogs pas sems can gyi khams ma lus par gdon par yi dam bcas nas zhes pa nas/de dag byung nas phyogs bcu kun du bskor te/ slar log nas bcom ldan 'das kyi sku la so so'i gnas su slar zhugs so zhes pa'i bar du ma 'ongs pa'i 'gro ba rnams kyi don du snying rje chen po 'byung ba'i dkyil 'khor bri ba'i phyir rang bzhin gyi dkyil 'khor 'byung ba'i ting nge 'dzin bstan pa la bya ste/ting nge 'dzin bstan pa yang snying rje chen po 'byung ba'i dkyil 'khor bri ba'i slob dpon gyi ting nge 'dzin 'di lta bu mngon du bya ste/ de nas sa tshon gyi gzugs kyi cha lugs la sogs pa'i dkyil 'khor bri ba'i tshul bstan pa'o//de la bcom ldan 'das rnam par snang mdzad chos kyi dbyings kyi don ma rdzogs pa zhes pa/ chos kyi dbyings ni stong pa nyid de/ de bzhin nyid yang dag pa'i mtha' ste/ de'i don ni sku la sogs pa mi zad pa'i rgyan gyis sems can gyi khams thams cad kun du khyab par bstan nas/sems can de rnams bla na med pa'i byang chub tu bsgral bar bya ste/ sems can de rnams kyang ma lus par ma bsgral ba ni don ma rdzogs pa la bya'o/ /sems can gyi khams ma lus par gdon par yi dam bcas zhes pa ni/de ltar chos kyi dbyings kyi don de ma rdzogs par zad pa ma yin gyi/ bcom ldan 'das sngon byang chub sems dpa'i spyad pa spyod pa na thugs yid ma mdzad pa ni/ bdag gis byang chub thob nas sems can yang bsgral bar bya'o/ /de bas na sems can gyi khams ma lus par gdon par yi dam bcas zhes so//de bzhin gshegs pa thams cad dang mol te zhes pa ni 'das pa dang ma 'ongs pa dang da ltar bzhugs pa'i sangs rgyas rnams tshogs dang / chos kyi sku 'gro ba'i don byed par sangs rgyas thams cad mnyam pa nyid de/de bas na sangs rgyas thams cad gsung gcig tu 'bad par bstan pa'o/ /gnyis su na de bzhin gshegs pa thams cad mol te zhes pa ni/ chos kyi dbyings de bzhin nyid mngon du byas nas zhes pa'o/ /yang na de bzhin gshegs pa thams cad dang mol te zhes pa ni ma 'ongs pa'i 'gro ba nga rgyal can rnams nga rgyal bcag pa dang /zhu blag mi byed pa rnams bla ma dang grogs po la dri zhing zhu blag byed par brtson pa skyed pa'i phyir te/ de bzhin gshegs pa thams cad mkhyen pa yang gzhan dang bka' bgros mdzad cing chos ston na bdag cag tshod lta ci zhig snyam nas nga rgyal bcag nas gzhan la 'dri ba la brtson par 'gyur ro//snying rje chen po'i snying po 'byung / /zhes bya ba'i ting nge 'dzin la snyoms par zhugs so zhes pa ni ting nge 'dzin de las snying rje chen po'i snying po 'byung ba'am snying rje chen po ting nge 'dzin 'byung ba la bya'o/ /ting nge 'dzin la zhugs ma thag tu/bcom ldan 'das yan lag thams cad nas/ de bzhin gshegs pa'i sku dang po sems bskyed nas sa bcu'i bar du sems can gyi don byed pa 'byung ngo / /de dag byung nas phyogs bcu kun du bskor te slar log nas bcom ldan 'das kyi sku so so'i gnas su slar zhugs so zhes pa ni bcom ldan 'das ting nge 'dzin du bzhugs pa de la/ba spu'i bu ga re re nas kyang de bzhin gshegs pa'i sku 'dra ba rnam par sprul pa 'byung ste/ sems can gyi don byed pa ni sa dang po nas brtsams nas sa bcu yongs su rdzogs par 'gyur ba'i phyir ro/ /de dag slar bcom ldan 'das kyi sku la so so'i gnas su zhugs pa yang /ting nge 'dzin brtan pa'i mthus ba spu'i bu ga gang nas byung ba de nyid du slar ma 'khrul par zhugs pa'o/ /de nas bcom ldan 'das kyis phyag na rdo rje la 'di skad ces bka' stsal to/ /phyag na rdo rje dkyil 'khor bri ba nyon cig ces pa ni ting nge 'dzin de las bzhengs nas/phyag na rdo rje la dkyil 'khor bshad pa la bya ste/ dkyil 'khor bri ba bshad pa de yang rgyu dang rang bzhin dang 'bras bu rnam pa gsum du blta ste/ de la rgyu ni slob dpon no/ /rang bzhin ni dkyil 'khor sa dpyad cing bri ba la sogs pa'o/ /'bras bu ni slob ma gzung zhing dbang bskur ba la sogs pa'o//de la dkyil 'khor bri ba'i rgyu ni gtso bo ni slob dpon gyi yin te/ de bas na slob dpon gyi mtshan nyid thog mar bshad do/ /slob dpon gyi mtshan nyid bshad de/ slob dpon du 'jug pa'i yon tan gyi mtshan nyid dang / slob dpon du rdzogs pa'i yon tan gyi mtshan nyid dang / de rab tu dbye ba'i mtshan nyid de/slob dpon du 'jug pa'i mtshan nyid ni byang chub kyi sems su song ba'i yid dang ldan pa la sogs pa'o/ /slob dpon du rdzogs pa'i mtshan nyid ni lung thob cing dbang bskur ba zhes bya'o/ /rab tu dbye ba'i mtshan nyid ni byang chub kyi sems la gnas pa zhes pa'o/ /de yang lus kyi yon tan dang /ngag gi yon tan dang yid kyi yon tan dang gsum ste/ gar rigs par sbyor bar bya'o/ /de la byang chub kyi sems su song ba'i yid dang ldan zhes pa ni phung po dang khams dang skye mched la sogs pa'i chos rnams stong par 'jig par 'jug pa dang ldan pa'o/ / shes rab dang ldan zhes pa ni shes rab rnam pa gnyis te/ rang bzhin gyis shes rab rno ba dang / mnyan pa dang / bsam pa la sogs pa'i shes rab ste/ de dag gang yang rung ba dang ldan pa'o/ /snying rje can zhes pa ni snying rje ni sems can sdug bsngal ba las 'don pa ste/ de yang rang bzhin gyis snying rje can dang mngon par 'dus byas pa'i snying rje ste/de dang ldan pa'o/ /thabs la mkhas pa zhes pa ni sbyor ba 'jig rten gyi sgra thabs la sogs pa rnam pa mang ste/ skabs 'dir ni dkyil 'khor bri ba dang / mchod pa'i yan lag rnams la mkhas pa la bya'o/ /rtag tu shes rab kyi pha rol tu phyin pa'i tshul mkhas pa zhes pa ni/don dam pa dang kun rdzob rnam pa gnyis kyi tshul gyis mkhas te/ don dam par ni shes rab kyi pha rol tu phyin pa'i tshul thams cad thog ma nas ma byung ma skyes pa stong pa nyid kyi rang bzhin du bsgom pa la mkhas pa'o/ /kun rdzob tu ni de ltar shes rab stong pa nyid kyi bsgom pa las lang sa nas/sbyin pa la sogs pa'i pha rol tu phyin pa rnams spyad nas/ de la yang mi chags par 'khor gsum yongs su dag pa'i tshul du sbyor ba la mkhas pa'o/ /theg pa gsum 'byed shes pa zhes bya ba ni nyan thos kyi theg pa gang zag bdag med par chud nas phung po dang khams la sogs pa mi rtag pa dang /sdug bsngal ba dang bdag med par chud pa dang / rang sangs rgyas kyi theg pa phung po la sogs pa de rnams kyang rten cing 'brel bar 'byung ba'i rang bzhin du chud pa dang / /theg pa chen po'i chos thams cad thog ma nas ma byung ma skyes par chud pa rnams kyis mtshan nyid bye brag tu 'byed mkhas pa la bya'o//de la spyir theg pa gcig la gsum du dbyer ci yod ce na/ theg pa nyid gsum du dbye ba la ni mi bya'i/ nyan thos dang rang sangs rgyas rnams so sor ji ltar chud pa'i mtshan nyid 'byed mkhas pa la bya'o//sngags kyi de kho na nyid la mkhas pa zhes pa ni sngags rnams spyi'i de kho na'i mtshan nyid ni byang chub kyi sems te/ de la mkhas pa dang sngags dang yi ge sa bon dang ting nge 'dzin rnams la mkhas pa ste/ sngags la mkhas pa'i sngags kyi tshig rnams bskul ba dang phyag rgya'i rang bzhin la 'byed mkhas pa'o//yi ge sa bon la mkhas pa ni/ lha rnams so so'i sa bon snying po gang yin pa dang / de rnams kyi ting nge 'dzin gyi sgo dang las gang yin pa la mkhas pa'o/ /ting nge 'dzin la mkhas pa ni ting nge 'dzin du zhugs pa las dbang chen dang /chu la sogs pa'i dkyil 'khor bkod cing de rnams kyis las bsgrub pa la mkhas pa'o/ /bsam pa shes pa ni slob ma rnams kyi bsam pa shes pa ste/ de yang pha rol gyi sems shes pa'i tshul gyis shes pa la ni mi bya'i/ sngags kyis cha brtags pa'i tshul gyis slob ma rnams kyi spyod pa dang /tshul la brtags na lha zhi ba dang khro bo rnams gang la bsnyen par 'os pa dang / grub pa rab 'bring gsum las gang bsgrub par 'os pa la sogs pa'i tshul la mkhas pa'o/ /sangs rgyas dang byang chub sems dpa' rnams la dad pa zhes pa ni de rnams kyi yon tan la mos shing yid ches pa'o//dkyil 'khor 'dri ba'i las byed par lung thob cing dbang bskur zhes pa la dbang bskur ba ni dbang bskur ba'i dkyil 'khor du dri dang me tog dang sman dang rin po che la sogs pas brgyan pa'i bum par chu blugs te dbang bskur ba la bya/lung thob pa ni de ltar dbang bskur nas dkyil 'khor bri ba dang sgrub pa la spyod pa khyod kyis gyis shig ces tshig gis gnang ba'o/ /de la lung thob cing dbang bskur zhes pa dbang ma bskur bar lung mi thob ste/ smos pas dbang bskur ba/ ma smos kyang zhar la go bar 'gyur nas/ / gnyis ka ci'i phyir smos she na/ gdon la sogs sel ba'i las phran tshegs la dbang ma bskur kyang byos shig pa'i lung thob pa srid kyi/ de bas na lung thob cing dbang bskur zhes smos pa'o/ /brtan pa zhes pa ni shes pa dang longs spyod la sogs pa dang ldan pa yang de dag gis dregs par mi 'gyur/de dag dang mi ldan na yang zhum par mi 'gyur ba'o/ /sbyor ba la mkhas pa zhes bya ba ni sgrub pa dang zhi ba la sogs pa'i las kyi sbyor ba la mkhas pa'o/ /byang chub kyi sems la gnas zhes pa ni/ stong pa nyid rnam par mi rtog pa'i ting nge 'dzin la gnas nus pa'o/ / gsang ba'i bdag po slob dpon de lta bu dang ldan pa de ni rgyal ba'i bdag nyid las skyes pa ste/ sangs rgyas byang chub sems dpas kyang bsngags so/ /zhes pa la slob dpon de lta bu dang ldan pa dang zhes pa ni/ gong du smos pa'i yon tan rnams dang ldan pa'o/ /rgyal ba'i bdag nyid las skyes pa//zhes pa ni/ rgyal ba ni sangs rgyas bcom ldan 'das te de'i bdag nyid ni chos kyi dbyings so/ /chos kyi dbyings stong pa nyid la mos pa las byung ba ni rgyal ba'i bdag nyid las skyes pa zhes bya'o/ /sangs rgyas dang byang chub sems dpa' rnams kyis bsngags so zhes pa ni de lta bu'i yon tan dang ldan pa'i slob dpon de ni sangs rgyas dang byang chub sems dpa' rnams kyis bsngags so//de ltar slob dpon de sangs rgyas dang byang chub sems dpa' rnams kyis bsngags na mi bsngags pa'i slob dpon yod dam zhe na yod de/ sangs rgyas dang byang chub sems dpa' rnams kyis bsngags so zhes pa'i tshig des slob dpon rnam pa gnyis su shes par bya ste/zab cing rgya che ba la mos pa dang dmigs pa can no/ /de la skabs 'dir slob dpon yon tan de lta bu dang ldan pa sangs rgyas dang byang chub sems dpa' rnams kyis bsngags pa ni zab cing rgya che ba'i slob dpon la bya'o//dmigs pa can gyi slob dpon gyi mtshan nyid ni 'og nas slob dpon gnyi ga'i mtshan nyid bshad pa'i skabs su shes par bya'o/ /da ni slob dpon de lta bus 'khor gzung ba'i slob ma rnams brtag par bya ste/ slob ma de rnams brtag pa yang rang bzhin gyi yon tan dang mngon par 'dus byas pa'i yon tan gyi sgo nas so//de bas na gsang ba'i bdag po slob dpon de la gzhan zhig gis bcol yang rung zhes pa ni 'og nas 'byung ba'i mtshan nyid dang ldan pa'i slob ma rnams kyis gsol ba btab kyang rung zhes pa'o//yang na sems can gyi snod du 'gyur ba'i dri ma med pa mthong ba na/ rang gis bskul ma btab ste/ shes pa la snod du 'gyur zhes pa ni sngar bshad pa'i snod du 'gyur ba'o/ /dri ma med ces pa ni sdig pa med pa ste/ de la sdig pa ni sems kyi rgyud la yod de/ ji ltar slob dpon des mthong bar 'gyur zhe na/sems kyi rgyud de la gnas pa'i sdig pa med par mthong ba la ni mi bya'i sdig pa'i rgyu mi dge ba bcu'i las kyi lam mi spyod par mthong ba ni sdig pa med par mthong ba'o/ /de lta bu'i slob ma mthong na phas ma gsol kyang / slob ma de'i snod du 'gyur ba yin pas 'og nas 'byung ba'i tshigs su bcad pas chos bshad cing sngags kyi tshul la gzhag par bya'o//mang du mos pa zhes pa ni sa dang pha rol tu phyin pa la sogs pa sangs rgyas bcom ldan 'das kyi yon tan gyis chos rnams ma chud cing mngon du ma byas kyang mnyan pa dang bsgom pa'i sgo nas 'di nyid yin gyi gzhan ma yin no zhes pa ni mos pa mang ba'o//bstan zhes pa ni gong du slob dpon gyis bstan pa nyid bshad pa dang mthun no/ /dad pa zhes pa ni dkon mchog gsum la yid ches pa ji bzhin pa'o/ /sngags byed pa'i tshul la yid ches pa'i dad pa'o//gzhan la phan par dga' zhes pa ni snying rje chen po dang ldan pa ste/ gzhan sdug bsngal ba las bral bar dga' ba de lta bu dang ldan pa'i slob mar shes shing mthong na/ rang gis bskul mar btab ste zhes pa gong du smos pa'i yon tan gyi mtshan nyid dang ldan par mthong nas zhes pa'o//bos pa la 'di skad ces smros shig ces pa ni gal te slob ma de bdag cag sngags grub pa'i 'bras bu zhig rig 'dzin la sogs pa 'dod pa ma yin gyi/ bla na med pa'i byang chub thob par 'dod do snyam du sems pa la/ sngags kyi sgo nas bla na med pa'i byang chub thob pa'i mtshan nyid kyi chos shod cig ces pa'o//bu 'di theg pa chen po ste/ /sngags spyod tshul gyi cho ga yin/ /khyod la yang dag bshad kyis su/ /khyod kyang tshul chen snod du 'gyur/ /zhes pa ni sngags spyad pa'i tshul 'di theg pa chen po'o/ /de yang khyod la yang dag par bshad pa ni/khe dang bkur sti'i phyir bshad pa ma yin gyi slob ma de snod du 'gyur ba'i phyir bshad pa'o/ /'das pa rdzogs pa'i sangs rgyas dang / /gang rnams phyis kyang byon pa dang / /da ltar mgon po de rnams kyang / /'gro rnams don phyir bzhugs pa yang / /zhes pa ni 'das pa dang / de ltar dang /ma byon pa'i yang dag par rdzogs pa'i sangs rgyas rnams kyang sngags spyad pa'o/ /tshul dam pa 'di las byang chub kyi shing drung du bdud rnam bzhi bcom nas thams cad mkhyen pa'i ye shes thob ste/ de bas na slob ma khyed rnams kyis kyang tshul dam pa 'di las thams cad mkhyen pa'i ye shes thob par 'gyur ro zhes bstan pa ste/de bas na gsungs pa ste/ de dag kun gyis dam pa ni/ /sngags gtso bo mchog mkhyen pas na/ /bstan pa thams cad mkhyen thob pa/ /byang chub drung du mtshan nyid med pa'o/ /sngags kyi sbyor ba mnyam med pas/ /stobs can rnams kyang bcom pa ni//bdud sde shin tu ma rungs rnams/ /shAkya seng ge mgon po yis/ /de bas blo can bus 'di ltar/ /thams cad mkhyen ni thob par gyis/ /zhes pa'o/ /de dag kun gyis zhes pa ni/ 'das pa dang / da ltar gyi dang / ma byon pa'i sangs rgyas kun gyis zhes pa'o/ /byang chub drung du mtshan nyid med pa'o//zhes pa ni byang chub kyi shing drung du thams cad mkhyen pa mtshan ma med pa thob pa'o/ /sngags kyi sbyor ba mnyam med pa'o/ /zhes pa ni gang dang yang mi mnyam pa'i sngags kyi sbyor ba des thams cad mkhyen pa thob par shes par sbyar ro/ /de bas blo can bus 'di ltar thams cad mkhyen pa ni thob par gyis shig pa ni de ltar shAkya seng ges kyang sngags spyad pa'i sgo nas thams cad mkhyen pa brten nas/khyod kyis kyang 'di'i sgo nas thams cad mkhyen pa thob par gyis shig ces bshad pa'o/ /de ltar thams cad mkhyen pa thob par yang / bcom ldan 'das kyis 'og min gyi gnas la sogs par mngon par byang chub pa'i rim pa gzhan yang yod mod kyi/ skabs 'dir mi rnams la bshad pa'i phyir sprul pa'i skus kyang byang chub kyi shing drung du mngon par byang chub pa'i rim pa bstan to/ /de bzhin sngags mkhan mang spyod ces pa ni gong du smos pa'i tshul gyis slob ma de mang du spro ba skyed cig ces pa'o//snying rjes bsam pa'i yid kyis khe dang bkur sti'i phyir ma yin gyi slob ma de dag la snying rje'i phyir ro/ /slob ma de brtan gyur rig nas/ /zhes pa ni slob ma de rnams de ltar gong du smos pa'i tshul gyis yid ches te/ gzhan du mi 'gyur bar gyur nas slob ma de dag gis dkyil 'khor bri ba'i sa rnams brtag par bya ste/ de yang sa nyid kyi yon tan gyis dga' ba dang 'phags pa rnams kyis bcag pas dga' ba dang / lha dang mi rnams kyis bsnyen pas dga' ba dang / sngags mkhan nyid gang du dad pas dga' ba'o//de la sa nyid kyi yon tan gyis dga' ba'i gnas dri dang me tog 'bras bur ldan pa'i ri gtsang zhing dga' ba'i chu 'gram zhes pa ni/ gang na chu bo mang po rnams/ /ngang pa'i chu bya mang brgyan pa/ /de ru sngags la mkhas pa yis/ /snying rjes byung ba'i dkyil 'khor bri/ / zhes pa'i bar du'o/ /sangs rgyas dang rang sangs rgyas zhes pa nas/ sa phyogs thub pas bde bar bsngags/ /zhes pa'i bar du ni 'phags pa rnams kyis zhabs kyis bcags pas dga' ba la bya'o/ /gzhan yang rnam pa mang po yi/ /phyogs rab bzang dang gtsug lag khang / / zhes pa nas/ lha rnams kun gyi gnas rnams dang / /khyim stong rnams su de bzhin te/ /dkyil 'khor nan tan du bris shig /slob ma rnams la phan pa 'dod/ /ces pa'i bar du ni lha dang mi rnams kyis bsnyen pas dga' ba'o/ /yang na ni yid du gar 'ong bar yang rung ste/ der bri'o zhes pa ni gong du smos pa rnam pa gsum las/gzhan pa'i sa sngags pa nyid gang du dad pa der dkyil 'khor bri ba gsungs so/ /de bsal ba'i rnam pa bya ste zhes pa ni bsal ba rnam pa gnyis te/ phyi dang nang gi'o/ /de bas na slob dpon la yang rnam pa gnyis te/ zab cing rgya che ba la mos pa dang dmigs pa can no//de la zab cing rgya che ba la mos pa'i slob dpon gyis ni byang chub kyi sems bsgoms pas phyi'i nyes pa rnams kyi dngos po thog ma nas ma byung ma skyes par chud de/ nang gi sems sbyangs bas dag par 'gyur te phyi'i zug rngu la sogs pa bsal mi dgos mod kyi slob ma rnams kyi yid dang sbyar ba'i phyir/phyi yi sa rnams brtag pa yang de rnams la ma zhen par bya ste/ de bas na slob dpon zab cing rgya che ba la mos pas ni phyi nang gnyis ka'i sa sbyang bar bya'o/ /dmigs pa can gyi slob dpon gyis byang chub kyi sems goms par ma byas pas phyi'i sa rnams sbyang bar bya'o//de la nang gi sa sbyang ba ni/ byang chub kyi sems goms par byed pa'o/ /phyi'i sbyang ba ni rdo dang gyo mo dang sa dang 'bras dang zhes pa nas gnas rnams nyes pa thams cad dang bral na lha rnams kyis kyang bsngags so zhes pa'i bar du'o/ /tshes grangs dang nyi ma zhes pa nas snga dro'i dus na ltas bzang por brtags te zhes pa'i bar du ni dkyil 'khor 'dri ba'i sa brtag pa'i tshad do//yongs su bzung ba rtsom pa'i tshes grangs dang skar ma shis pa zhes pa ni skar ma 'ba' zhig shis pa la mi bya'i/ nyi ma dang tshes grangs kun shis par zhes par so sor sbyar ro//snga dro'i dus la ltas bzang por brtags na zhes pa ni ltas bzang por brtags pa rab 'bring rnam pa gsum ste/ lha'i dang bar snang gi dang sa las byung ba'o/ /de la lha'i nam mkha' las sgra snyan la sogs pa 'byung ste mchog go/ /bar snang gi ni bkra shis kyi tshig dang bram ze'i smrang la sogs pa thob ste 'bring ngo //sa las 'byung ba ni dung la sogs pa sa la 'dug pa mthong ste tha ma'o/ /de ltar thog mar rtsom pa la snga dro'i dus na ltas de rnams las gang yang rung ba cig byung na bzang ste sa yongs su gzung ba la sogs pa'i las rnams brtsam par bya'o//sa'i lha rnams sbran pa'i tshigs su bcad pa 'di gnyis sgrogs par bya'o zhes pa de ltar snga dro'i dus na ltas bzang po dang ldan na dkyil 'khor gang du bri bar bya ba'i sa gzhi der sa'i lha mo la khyod kyi steng du sa'i dkyil 'khor bri'o zhes gsol ba btab ste yang bstod pa'i tshigs su bcad pa'i sgo nas so//de la/ dpang du lha mo khyod gyur ba/ /skyob pa sangs rgyas kun gyi ste/ /zhes pa ni sangs rgyas bcom ldan 'das kyis byang chub sems dpa'i spyad pa spyod pa na sa dang pha rol tu phyin pa rnams kyi tshul khyad par du spyad pa dang / de ltar spyad nas byang chub kyi shing drung du bdud rnam bzhi bcom ste mngon par rdzogs par sangs rgyas pa yang /sa khyod kyi steng du bas/ lha mo khyod kyis ji lta ba nyid shes te dpang du gyur to zhes pa ste/ de bas na gsungs pa/ spyad pa'i tshul gyis spyad par ni/ /pha rol phyin pa rnams kyi'o/ /ji ltar bdud dmag mang bcom pa/ /skyob pa shAkya seng ge yis//zhes pa'o/ /de bzhin bdag gis bdud btul nas/ /dkyil 'khor bdag gis 'dir bya'o/ /zhes pa ni ji ltar bcom ldan 'das shAkya thub pas sa dang pha rol tu phyin pa rnams spyad de/ byang chub kyi shing drung du bdud rnam pa bzhi btul nas mngon par byang chub par byas pa de bzhin du bdag kyang ma lus pa'i sems can gyi khams rnams bsgral ba'i phyir sa khyod kyi steng du dkyil 'khor bris te/rim gyis bla na med pa'i byang chub tu mngon par sangs rgyas par bya'o zhes pa'o/ /lag pa sa la bzhag ste/ de skad du sbran pa mang du bsgrags pa ni pus mo gnyis sa la btsugs nas der spos dang me tog gis mchod nas bsngags pa'i sa de bzhin gshegs pa rnams la phyag 'tshal cig ces sa'i lha mo tshigs su bcad pas bskul te gsol ba gdab pa yang /de tshul bzhin sngar de bzhin gshegs pa rnams dang lha mo de la mchod cing phyag byas la/lag pa sa la bzhag nas gdod gong du smos pa'i tshigs su bcad pas bskul te gsol ba gdab bo/ /de 'og tu tshul bzhin mkhas pas sa rnams tshol cig ces pa ni 'og nas 'byung ba'i tshul gyis btsal bar bya'o/ /de nas phyag na rdo rjes bcom ldan 'das kyi zhabs gnyis la phyag 'tshal te/bcom ldan 'das la 'di skad ces gsol to zhes pa ni dus dang yul dang las byed pa yang dge ba dang mi dge ba'i ltas rnams la smras pa rnams kyis 'bras bur 'dzin pa chos 'di mi shes pa'i phyir du'o/ /de dag don phyir sems dpa'i bar du gong du nyi ma tshes grangs dang skar ma la sogs pa'i ltas rnams bshad pa sngags rnams kyi rang bzhin no//don dam par byang chub kyi sems yin te mtshan ma de dag las 'das pa'o/ /kun rdzob tu yang dkyil 'khor dang sgrub pa dang sngags spyad pa'i yan lag rnams mtshan ma can yin mod kyi don gyi bya ba byed pa ste/skar ma dang tshes grangs la sogs pa'i mtshan ma 'di rnams ni don dam pa dang 'gal/ kun rdzob tu don gyi bya ba ma yin na/ ci'i phyir bcom ldan 'das kyis mtshan ma de dag bshad ces gsol ba dang / bcom ldan 'das kyis kyang don dam pa'i mtshan nyid de lta bu yin mod kyi/ma 'ongs pa'i 'gro ba rnams kyis don dam pa'i tshul de mi shes pa de 'gro ba de rnams bkri ba'i phyir/ mtshan ma rnams bshad pa'i rigs pa bstan pa ste/ 'gro ba de rnams la yang rnam pa gnyis te/ dngos po la chags pa dang / dngos po med pa la chags pa'o//dngos po la chags pa rnams la yang tshes grangs dang dus dang yul la sogs pa'i dngos pos rjes su mthun par bshad cing bkri ba dang / dngos po med pa la chags pa rnams kyang de las zlog ste/ dngos po'i sgo nas bkri ba'i phyir ro/ /mtshan mar bral ba sangs rgyas te//zhes pa ni gzung ba dang 'dzin pa'i mtshan ma dang bral ba'o zhes pa'o/ /chos kyi sku la rnam par zhugs pa zhes pa ni de ltar gzung ba dang 'dzin pa'i mtshan ma dang bral ba sa dmigs su med pa'i chos kyi sku'o/ /de ltar sangs rgyas bcom ldan 'das chos kyi sku'i rang bzhin du gyur pa ni chos kyi sku la rnam par zhugs zhes pa'o//gsang ba'i bdag po de nas ji lta bur bshad pa'i gnas la gcig tu snyoms la rdungs shig ces pa nas bdag kyang yid la spro ba dang / yang na ji ltar mthong ba yang rung bu dge'o/ /sems dpa' chen po khyod myur du dkyil 'khor bris shig ces pa'i bar du zhag bdun gyi sngon rol du snang ba dang /mi snang ba la dkyil 'khor bri ba'i sa bslang ste/ de la snang ba ni rgyal po la sogs pa'i mi rnams so/ /mi snang ba ni 'jig rten pa'i lha dang / gnod sbyin dang / sha za la sogs pa ste lha la sogs pa la ma bslangs par dkyil 'khor bris na dkyil 'khor gyi lha khro bo la sogs pa'i zer gyis 'jig rten pa'i lha de rnams la gnod par 'gyur te/de ltar gnod par gyur na/ lha de dag sgrub pa la bgegs kyi skabs tshol bar 'gyur/ gnyis su ni de dag la gnod bzhin du dkyil 'khor bris na sgrub pa snying rje med par 'gyur te/de bas na de dag la stsal ba'i phyir sngar lha la sogs pa rnams sbran zhing sa blangs te/ lha la sogs pa de rnams kyang bag byed cing de nas gzhan du 'dong ste nyes pa med par 'gyur ro/ /rgyal po la sogs pa mi rnams la yang / sa slar bslang ba ni phyis brtsad par mi 'gyur ba'i phyir ro//der slar bslangs nas phyis dkyil 'khor bri ba las zhag gsum gyi sngon rol du ji skad du smos pa'i sa der/ ji ltar rigs par brtags nas yongs su gzung ba'i rim pa 'di ltar bya'o/ /thog mar ba'i lci ba sa la ma lhung ba dang / ba'i gcin du bsres pa'i dkyil 'khor bya/de nas sa de sngags kyis bsrung bar bya/ de nas phyogs mtshams kun du bgegs bsal bar bya/ de'i 'og tu dri'i dkyil 'khor rnams gru bzhi la sor bcu gnyis par byed de/ de nas sngags pa 'grengs te dkyil 'khor de'i dbus kyi nam mkha' la sangs rgyas bsam par bya'o//de nas rang bzhin gyi dkyil 'khor rnams sdud par 'gyur pa ste/ dam tshig gsum gyi phyag rgya bcings nas bsam mo/ /sngags pa 'grengs te bsam pa ni mi gnas par ston pa ste/ sangs rgyas lnga rnams nam mkha' la bsam pa'i phyir ro/ / de nas der dri dang me tog la sogs pas mchod de sangs rgyas kyi spyan sngar 'phags pa mi g.yo ba'am/ khams gsum rnam par rgyal ba'am gang yang rung ba'i sngags kyis sa de yongs su gzung bar bya'o/ /de nas sangs rgyas sras dang bcas par slob ma rnams dkyil 'khor du gzud pa'i nub mor gshegs su gsol ba'o//de nas sngags pa de nub phyogs kyi ngos su nyal la byang chub kyi sems dang snying rje ldan par bya ste/ rmi lam bltas te/ de yang rab 'bring gsum du shes par bya'o/ /de la byang chub sems dpa' rnams mthong na rmi lam tha ma'o/ / sangs rgyas rnams mthong na 'bring / sangs rgyas de rnams shin tu spro zhing sngags pa la bu khyod dge'o/ /dkyil 'khor myur du bris shig ces bskul ma 'debs par mthong na rmi lam rab tu shes par bya'o/ /'di rnams kyang rgyud nyid kyi nang nas zhib tu 'byung ste/ rgyud kyi nang nas ltag 'og tu 'byung bas 'dir las su bya ba'i rim pa bzhin du bkod do//dad pa rigs btsun las byung ba/ /zhes pa nas gnyis sam gcig bzhi las mang yang sla'o zhes pa'i bar du ni slob ma rnams brtags pa la bya ste/ de yang bye brag gi mtshan nyid rab tu byed pa'i mtshan nyid de/ de la 'dir dad pa rigs btsun pa las byung ba zhes pa la sogs pa'i mtshan nyid ji skad du smos pa rnams bye brag gi mtshan nyid do//rab tu dbye ba'i mtshan nyid ni 'og nas 'chad do/ /phal pa'i mtshan nyid ni gong du ji skad du smos pa'i grangs las gzhan pa ste 'og nas 'byung ba mod kyang slob dpon snying rje chen po dang ldan pas sems can gyi khams ma lus par yi dam bca'o//de byang chub kyi sa bon gyi rgyu'i phyir 'di ltar tshad med pa'i sems can yongs su gzung bar bya'o zhes pa'o/ /slob ma de rnams la yang rgyud la sogs pa la mkhas shing byang chub kyi sems goms pa ni dkyil 'khor du bcug pa de nyid kyi tshe na de slob dpon nam sgrub par dbang bskur bar bya'o//rgyud la sogs pa rnams la ni mkhas kyang / byang chub kyi sems ma bsgoms pa na/ byang chub kyi sems sgom du bcug ste phyis dbang bskur bar bya'o/ /de las gzhan phal rnams kyis ni rgyud kyang mi shes/byang chub kyi sems kyang ma bsgoms phyis kyang shes par mi 'gyur/ byang chub kyi sems kyang mi sgom pa ni phal rnams te/ dus gnyis kar yang dbang mi bskur gyi/ byang chub kyi sa bon du 'gyur ba'i phyir dkyil 'khor du gzung ngo / /de la/ dad pa rigs btsun las byung ba//zhes pa la sogs pa'i mtshan nyid ni gong du slob ma'i mtshan nyid smos par bshad zin pas 'dir ma smos so/ /bcu'am brgyad dam bdun kyang rung / /gnyis sam gcig bzhi las mang sla'o/ /zhes pa ni ji skad du smos pa'i mtshan nyid ldan pa'i slob ma ni shin tu dkon pas grangs nyung du gsungs pa'o//mang yang sla zhes pa ni mtshan nyid de lta bu dang ldan pa dkon pa ste/ brgya la de lta bu'i mtshan nyid dang ldan pa yod na grangs ma mchis pa de las lhag na yang nyes pa med pa'o/ /de nas bcom ldan 'das la phyag na rdo rjes yang dris pa nas byang chub kyi sa bon gyi rgyu'i phyir 'di ltar tshad med pa'i sems can yongs su gzung bar bya'o zhes pa'i bar du gong du slob ma'i grangs nges par bshad pa ci'i phyir 'chad ces bcom ldan 'das phyag na rdo rjes gsol ba dang /de'i lan bcom ldan 'das kyis bshad pa la bya ste/ ci'i phyir slob ma rnam grangs nges par bshad ces dri bar dgongs pa la dkyil 'khor 'di'i ming gi ji ltar dkyil 'khor zhes bgyi zhes ji ltar dris she na/de'i dgongs pa 'di lta ste/ de skad dris na dkyil 'khor gyi nges pa'i tshig dang / dmigs pa brtan par bya ba dang / slob ma'i grangs nges pa gsum char 'dris par 'gyur te/de la dkyil 'khor 'di'i ming ci zhes pa dkyil 'khor gyi dmigs bstan par bya ba dris pa'o/ /ji ltar na dkyil 'khor zhes dris pa ni nges pa'i tshig dris pa'o/ /dkyil 'khor 'di ni sangs rgyas 'byung ba ste/ /zhes pa ni dkyil 'khor 'di sangs rgyas 'byung ba dang 'dra ba'i phyir te/sangs rgyas 'byung ba na sangs rgyas kyi yon tan gyi chos rnams kyang srid/ sems can gyi byed pa yang yod de/ de bzhin du dkyil 'khor 'di las kyang sangs rgyas kyi chos rnams kyang srid cing sems can gyi don bya ba yang 'phral du byang chub kyi sems bskyed pa dang / rim gyis mchog la sogs pa'i grub pa dang zhi ba la sogs pa'i las rnams byed pa yod cing mthar sangs rgyas par 'gyur bar byed pa'i phyir ro//dkyil zhes bya ba ni snying po'o/ /'khor zhes bya ba ni khyab pa'o zhes pa ni mar gyi snying po'am tsan+dan gyi snying po dang 'dra ste mchog dam pa la bya'o/ /mar dang tsan+dan gyi snying po de dag la ni mchog pa'am rdzogs pa med kyang srid/de dag dang 'dra ba ma yin nam zhe na/ snying por 'dra mod kyang / de las kyang khyad par du gsungs pa khyab pa zhes pa ste/ khyab pa ni mchog pa'am yongs su rdzogs pa'i don to/ /dkyil 'khor 'di snying po mchog pa'am rdzogs pa zhes pa ci'i phyir bya zhe na/sangs rgyas bcom ldan 'das bskal pa grangs med par bsod nams dang ye shes kyi tshogs bsags nas/ stobs dang mi 'jigs pa la sogs pa sangs rgyas kyi yon tan gyi chos rnams yongs su rdzogs nas bla na med pa'i byang chub tu mngon par sangs rgyas pa ni snying por gyur pa mchog dam pa ste/mchog de las gzhan pa btsal mi dgos par des chog ste mi 'gyur ba yongs su rdzogs pa'o/ /gang bla na med pa'i byang chub tu mngon par sangs rgyas pa mi 'gyur ba yongs su rdzogs te/ de nyid sngon gyi smon lam gyi shugs kyis sku la sogs pa mi zad pa'i rgyan gyi 'khor lor gyur pa dkyil 'khor 'di byin gyis brlabs pas na/dkyil 'khor 'di'i snying po mchog pa zhes bya'o/ /gsang ba'i bdag po 'on kyang sems can gyi khams ma nges pa rnams yongs su bskyang ba'i phyir snying rje chen po'i snying po 'byung ba zhes bya ba'i dkyil 'khor 'phel ba'o//zhes pa sems can gyi khams ma nges pa yongs su bskyang ba'i phyir zhes pa ni snying rje chen po'i dbang gis tshad med pa'i sems can gyi khams rnams dkyil 'khor 'dir btsud na bla med byang chub kyi rgyur 'gyur bas kyang bskyang ba'i phyir zhes gsungs so/ /snying rje chen po 'byung zhes pa ni/dkyil 'khor 'di snying rje chen po la 'byung ba ste/ bcom ldan 'das thams cad mkhyen pa'i ye shes brnyes nas snying rje chen po 'di'i dbang gis sku la sogs pa mi zad pa'i rgyan gyi 'khor lo 'di 'byung bas na snying rje chen po 'byung zhes bya'o/ /snying po zhes pa ni 'byung ba'i gnas te/snying rje chen po de dkyil 'khor de 'byung ba'i gnas so/ /yang na dkyil 'khor 'di las snying rje chen po 'byung ba la yang bya ste/ dkyil 'khor 'di'i sgo nas de bzhin gshegs pa'i yon tan gyi chos snying rje chen po la sogs pa 'byung ba thams cad mkhyen pa'i ye shes thob par 'gyur ba'i phyir ro//dkyil 'khor 'phel ba'o zhes pa ni dkyil 'khor 'dir btsud pa'i sems can rnams bsod nams 'phel ba'i phyir ro/ /gnyis su na dkyil 'khor nyid snam bu la sogs pa rim pa 'phel ba ste/ sangs rgyas la yang bya'o/ / 'on kyang zhes pa ni sangs rgyas 'byung ba'i dkyil 'khor zhes bya mod kyi/ 'di rnams dang ldan pa'i phyir ming 'di skad ces bya'o/ /gsang ba'i bdag po gang du de bzhin gshegs pa rnams kyis grangs med pa'i bskal par bskyed pa/ bla na med pa yang dag par rdzogs pa'i byang chub par byin gyis brlabs pa ste zhes pa ni dkyil 'khor 'di gzhan ma yin gyi/gang de bzhin gshegs pas bskal pa grangs med par bsod nams dang ye shes kyi tshogs bsags nas bla na med pa'i byang chub thob pa de nyid sngags kyi lha dang phyag rgya dang sngags kyi 'bru rnams su lhag par gnas par byin gyis brlabs pa zhes bstan pa'o//des na gsang ba'i bdag po gzhung 'di ltar rig par bya ste zhes pa ni/ de bzhin gshegs pa rnams bskal pa grangs med par bsod nams dang ye shes kyi tshogs bsags pas thams cad mkhyen pa brnyes nas/ sngon gyi smon lam gyi shugs kyis sku la sogs pa mi zad pa'i rgyan sems can gyi khams ma lus pa la byin gyis rlob ste/sems can gyi khams gcig gam gnyis la ma yin pa de'i gzhung gis de bzhin gshegs pa de gang du 'tshang rgya ba ni sems can gcig gam gnyis kyi phyir ma yin gyi/ mtha' yas sems can don gyi phyir mngon par 'tshang rgya bar rig par bya ste/de bas na gsungs pa de bzhin gshegs pa byang chub tu mngon par sangs rgyas pa ni sems can gcig gi don gyi phyir ma yin gnyis la ma yin gsum la ma yin gyi sems can gyi khams ma lus pa rnams la snying rje'i dbang du gyur pas yongs su bskyang ba'i phyir byang chub tu mngon par 'tshang rgya ste zhes pa'o//des sems can gyi bsam pa ji lta ba bzhin du chos 'chad do zhes pa ni de ltar de bzhin gshegs pa ma lus pa'i sems can rnams kyi don du mngon par sangs rgyas mod kyi sems can thams cad de bzhin gshegs pas chos bshad pa'i snod du mi 'gyur te/so so'i dad pa rjes su mthun par de bzhin gshegs pas chos 'chad pa ni bsam pa ji lta ba bzhin chos 'chad pa'o zhes pa'o/ /de bas na gsungs pa gsang ba'i bdag po theg pa chen po la goms par ma byas pa ni sngags byed pa'i tshul 'di mthong ngam thos na sems can 'ga' zhig dad pa rnams kyang mi skye ba gang gis sngon theg pa chen po'i sngags spyad pa'i tshul mtha' yas pa'i sgo de la goms par ma byas pa'o zhes pa'i phyir byang chub sems dpa' la rnam pa gnyis te/pha rol tu phyin pa'i sgor spyad pa spyod pa dang /sngags kyi sgor spyad pa spyod pa'o/ /de la pha rol tu phyin pa spyad pa spyod pa'i byang chub sems dpa' yang sngags kyi spyad pa spyod/ sngags kyi sgor spyod pa'i byang chub sems dpa' yang pha rol tu phyin pa la spyod de/ de la yang bye brag tu gcig ni sngags gtsor sgrub cing pha rol tu phyin pa zhar la spyod/gcig ni pha rol tu phyin pa gtsor sgrub cing sngags zhar la spyod de/ de ltar spyod pa gnyis ka yang theg pa chen po'i mtshan nyid gcig ste/ sems can gang de lta bu'i theg pa chen po la tshe rabs snga ma la mnyan pa dang / bsam pa dang bsgom pa'i sgo nas ma zhugs shing nan tan du ma byas pas ni sngags spyod pa'i tshul gyis chos rnams thos sam dkyil 'khor la sogs pa mthong na yang dad cing dga' ba mi skye'o//sngags kyi spyod pa dang pha rol tu phyin pa'i spyod pa dag sngon goms par byas pa ni gnyis ka la yang dad pa skyes te/ sngags spyod la goms par byas pas kyang /pha rol tu phyin pa mthong ngam thos na dga' zhing dad pa skye/ pha rol tu phyin pa spyod pa la goms pas kyang sngags kyi spyod pa mthong ngam thos na dga' zhing dad pa skye'o/ /de bas na gsungs pa gang gis sngon theg pa chen po'i sngags spyad pa'i tshul mtha' yas pa'i sgo 'byung ba la goms par bya'o zhes bya ste/de bas na theg pa chen po sngags spyad pa'i tshul 'di lta bu la goms par byas pa ni/ sngags spyad pa'i tshul 'di la dad cing snod du 'gyur gyi/ gzhan rnams kyis ma yin no zhes pa'o/ /mtha' yas pa'i sgo 'byung zhes pa ni theg pa chen po de nyid kyi yon tan te/stobs dang mi 'jigs pa la sogs pa sangs rgyas kyi yon tan gyi chos rnams 'byung ba dang / rig pa'i rgyal po dang khro bo dang pho nya la sogs pa rnam pa mang po'i sgo 'byung ba'i phyir ro/ /de dag rdo rje sems dpa' yin te zhes pa ni de lta bu'i theg pa chen po la goms par byas pa'i sems can de dag sems shin tu brtan pa ni mur 'dug dang /bdud la sogs pas mi bzlog ste/ de dag sems rdo rje dang 'dra bas na rdo rje sems dpa' zhes pa'o/ /de dag gi phyir 'di dang grangs 'chad mod kyi zhes pa ni de lta bu'i sems can shin tu dkon pas mang du mi 'byung ba'i phyir grangs nges par 'chad do//'on kyang slob dpon snying rje chen po dang ldan pas sems can gyi khams ma lus par bskal bar yi dam bca' bar bya ba ni/ de byang chub kyi sa bon gyi rgyu'i phyir/ 'di ltar tshad med pa'i sems can yongs su gzung bar bya'o zhes pa ni gong du grangs su bcad pa ni sgrub pa'am slob dpon du smin par bya ba'i slob ma ste/de las gzhan pa'i sems can rnams la yang snying rje chen po bskyed de/ dkyil 'khor der btsud na slob dpon nam sgrub pa por mi 'gyur yang / dkyil 'khor du btsud cing byang chub tu sems bskyed na/ byang chub kyi rgyu'i sa bon du 'gyur ba'i phyir tshad dang grangs tshad med par gzung ngo //de nas de dag bos la gsum la skyabs su 'gro ba byin la sdig mi bya ba rnams sgrogs shig ces pa nas/ bden pa gnyis la gnas pa ste/ /theg pa mchog tu bzang ba 'di/ /tshul bzhin 'dug na thob par 'gyur/ /zhes pa'i bar du dkyil 'khor bri ba'i snga de'i nub slob ma rnams yongs su gzung ba'i rim pa bshad pa ste de yang rnam pa dgu'o//dgu gang zhe na sdig pa bshags pa dang / skyabs su btang ba dang / dus gsum du sgrib pa med pa'i ye shes kyi sdom pa 'dzin du gzhug pa dang / dri dang me tog sbyin pa dang / so shing 'cha' ru gzhug pa dang /skud pas dpung pa bcings te srung ba dang spro ba bskyed pa dang / rmi lam bltar gzhug pa dang chos bshad pa rnams te/ de rnams kyang rgyud las ni kha cig ltag 'og tu 'byung mod kyi/ las su bya ba'i rim pa 'di ltar blta'o/ /de la gsum la skyabs su 'gro ba byin pa zhes pa ston to//sangs rgyas dang chos dang 'phags pa phyir mi ldog pa'i byang chub sems dpa' rnams te/ brgya la sngon so sor thar pa la sogs pa'i sgom pa'i sgo nas skyabs su song zin pa yang sngon song ba ni 'phags pa'i gang zag brgyad kyi dge 'dun la skyabs su song gi/ 'dir ni sangs rgyas dang chos la skyabs su song ba snga ma dang mthun du zin kyang dge 'dun la mi mthun te/'phags pa phyir mi ldog pa'i byang chub sems dpa' rnams la bye brag tu skyabs su song ba'i phyir sngon gsum la skyabs su song zin kyang / yang 'dir skyabs su gtang bar bya'o/ /de las gzhan la sngon skyabs su ma song ba rnams gdod skyabs su gtang bar bya ba'i phyir ro//de ste 'dir sngon skyabs su song zin pa yang brtan par bya ba'i phyir yang 'dir skyabs su gtang bar bya'o/ /sdig mi bya ba rnams sgrogs shig /ces pa ni sngon chad byas pa'i sdig pa slar bshags pa dang /da ltar dang phyis byed par 'gyur ba mi bya bar yi dam bca' ba'i phyir te/ de la da ltar dang phyis byed par 'gyur ba mi bya ba'i yi dam bca' ba'i rigs na/ sngon byas zin pa slar bshags pa ci phan zhe na/ sdig pa sngon byas pa la yon tan du mi lta zhing 'chags pa 'chi 'pho ba'i tshe sdig pa byed pa'i dngos po de mngon du mi 'gyur ba'i phyir ro//de la sdig pa bshags pa yang gsum la skyabs su 'gro ba'i sngon rol du bya ste/ ci'i phyir zhe na/ sdig bshags te gtsang mar byas pa'i bdag gi ngo bo de skyabs su gtang bar 'os pa'i phyir ro/ /de nas/ de la me tog spos brims te/ /zhes pa ni dus gsum du sgrib pa med pa'i ye shes kyi sdom pa bzung zin pa'i 'og tu bya ste ci'i phyir zhe na/de la sdig pa bshags shing skyabs su song la sdom pa gzung bas slob ma de snod du gyur cing sbyin pa'i gnas pas dri dang me tog sbyin no/ /dus gsum du ma bsgribs pa'i ye shes kyi sdom pa 'dzin du chug cig ces pa dus gsum du sgrib pa med pa'i ye shes ni thams cad mkhyen pa'i ye shes te/thams cad mkhyen pa'i ye shes de ni shes bya dang nyon mongs pa'i sgrib pa spangs pa'i mtshan nyid las 'das pa dang da ltar dang ma 'ongs pa'i dus thams cad du yang dag pa nyid kyi dngos po la mi sgrib cing thogs pa me dpar mthong bas na dus gsum du sgrib pa med pa'i ye shes zhes bya ste/ye shes de thob par bya ba'i phyir mi dge ba'i las kyi lam bcu spong ba'i sdom pa ni dus gsum du sgrib pa med pa'i ye shes kyi sdom pa zhes bya'o/ /sdom pa de yang kun rdzob dang don dam pa'i bye brag gis zhib tu 'og nas 'chad do//gzung ba dang de nas bsngags pa'i so shing u dum+bA ra'am a shwat+tha yang rung ste/ shing rab tu bzang ba spos dang me tog la sogs pas brgyan te/ rtse mo dag gcig tu gshibs la byin cig ces pa ni gtsang zhing dag par bya ba'i phyir dang 'jig rten pa'i tshul du yang sang lta bu nas smyung bar 'dug par bya na/do nub so shing bca' bar srid de/ de dag dang mthun par bya zhing gzung ba'i phyir dang / so shing de bor nas kha gang du blta ba las slob ma rnams grub pa la sogs pa gang gi snod du gyur pa'i ltas blta ba'i phyir ro/ /de nas shar phyogs sam byang phyogs gcig tu blta ste/shin tu sems thub par gyis la 'char chug cig /so shing bor ba'i ltas las sems can snod yin nam ma yin rtogs shig ces pa ni kha phyogs su bltas pa la so shing gi kha bdag la bltas par gyur na grub pa mchog myur du 'thob pa'i snod du yang 'gyur zhing so shing gi kha nub phyogs su bltas pa'i zhar gyi dbang du byas pa'i las kyang 'grub par 'gyur ro//so shing rtse shar phyogs su bltas na/ grub pa mchog dang rgyas pa'i las kyi snod du 'gyur ro/ /so shing kha lho phyogs su bltas na/ mngon par spyod pa'i las 'grub pa'i snod du 'gyur/bdag kha byang phyogs su bltas la so shing gi kha bdag la bltas na/ grub pa 'bring po myur du 'thob pa'i snod du 'gyur/ so shing gi kha byang phyogs su bltas na zhi ba'i las 'grub par 'gyur/ byang dang shar gyi mtshams su bltas na zhi ba dang rgyas pa gnyi ga 'grub par 'gyur/shar dang lho'i mtshams su bltas na mngon par spyod pa 'grub/ lho nub kyi mtshams su bltas na bskrad pa dang skams pa la sogs pa'i las 'grub/ nub byang gi mtshams su bltas na gnod sbyin ma la sogs par 'grub/ so shing gzhi por zugs te rtse bar snang la bltas na bar snang la 'gro ba 'grub par 'gyur/ gyen du bltas na rig 'dzin la sogs pa 'grub/ kha thur du bltas na sa'i 'og tu 'gro ba 'grub pa'i snod du 'gyur te/ zhib tu ni gsang ba'i rgyud la sogs par blta'o/ /so shing bltas te blta ba yang mtshan nyid du gsungs pa dang ldan pa'i slob ma rnams la lta'i/slob ma phal rnams la ni so shing gi ltas de dag dang ldan du zin kyang grub pa la sogs pa de lta bu'i nan tan mi byed pas slob ma phal rnams la ni ltas de rnams mi bltar mi rung ba med do/ /de nas mdud pa gsum dang ldan pa'i skud pas dpung pa g.yon par rang gi sems gcig tu gyis la chings shig ces pa'i 'phags pa mi g.yo ba'am/khams gsum rnam par rgyal ba gang yang rung ba'i sngags kyis mdud pa re re la sngags lan re gdab ste slob ma de rnams bsrung ba'i phyir/ dpung pa g.yon pa la slob dpon nyid kyis bcing ngo //de ltar slob ma rnams sdig pa dang bral bar ldan na kun du sdus la 'di ltar spro ba skyed cig dang / sems brtan par 'gyur zhes pa ni 'og nas 'byung ba'i tshigs su bcad pas gzengs bstod na/ slob ma rnams dga' zhing spro bas sems brtan par 'gyur ro/ /deng ni khyed kyis mnyam pa med pa yi//rnyed pa thob pa mthu chen rnams kyi ste/ /gang phyir rgyal ba kun gyis khyed rnams kyi/ /sras dang bcas pas bstan pa 'dir/ /thams cad yongs su bzung bas na/ /skye bzhin pa ni mthu chen rnams/ /de bas khyed rnams theg chen la/ /gang phyir sang ni skye bar 'gyur/ /zhes pa ni da ltar khyed kyis sdig pa bshags shing /skyabs su song ba dang sdom pa gzung bas mnyam pa med pa thob par bya ba bla na med pa'i byang chub de yang khyed kyis thob bo zhes pa ste/ ci'i phyir zhe na/ rgyal ba sras dang bcas pas bstan pa la khyed yongs su gzung ba'i phyir ro/ /de bas na khyed da ni theg pa chen po la skye bzhin pa ste/sad ni theg pa chen po la skye bar 'gyur ro zhes pa ste de la mnyam pa med pa'i rnyed pa zhes pa ni sngags kyi tshul du spyod pa'i nyan thos dang rang sangs rgyas thams cad kyi theg pa dang / theg pa chen po pha rol tu phyin pa la sogs pa dang yang mi mnyam pa zhe na/ pha rol tu phyin pa la sogs pa spyod pa 'dra mod kyi/ 'di sngags kyi bzlas pa la sogs pa khyad du lhag par spyod pa la mi mnyam pa ste/ thob ces pa ni de lta bu thob ces pa'o/ /mthu chen rnams kyis zhes pa ni slob ma rnams la bstod pa'i tshig ste/ de lta bu'i mthu chen po la zhugs pas btsun pa zhes pa'i don to//rgyal ba sras dang bcas pa zhes pa ni sangs rgyas bcom ldan 'das sras byang chub sems dpa' dang bcas pa zhes pa ste/ gang gi phyir/ rgyal ba kun gyis khyed rnams ni/ /zhes bar 'brel to/ /bstan pa 'di zhes pa ni/ thams cad yongs su bzung bas na//zhes par 'brel te/ rgyal ba sras dang bcas pas sngags spyad pa'i bstan pa 'dir yongs su bzung bas na/ khyed rnams kyis mnyam pa med pa'i rnyed pa thob bo zhes par 'brel to/ /skye bzhin pa ni zhes pa theg pa chen po la skye bzhin pa ste/ de bas khyed rnams theg chen la//gang phyir sang ni skye bar 'gyur/ /zhes pa ni sang lta bu na dkyil 'khor du 'jug pa'i tshe byang chub tu sems bskyed pa/ theg pa chen po la skyes zin zhes pa'i don to/ /de nas rmi lam du gtsug lag khang dang kun dga'i ra ba bzang po rnams dang zhes pa nas shin tu brtan pa khyed kyis sang nang par nga la zlos shig ces de skad bsgo la de nas slob ma de dag la yang chos shod cig ces pa'i bar du de ltar spro ba bskyed pa la sogs pa byas nas slob ma rnams la rmi lam gyi ltas 'di rnams bstan te/'di rnams las gang mthong ba sang nang par slob dpon la zlos su gzhag pa ste/ rmi lam gyi ltas de rnams kyang sa las byung ba dang /bar snang gi dang 'phags pa'i dang rnam pa gsum ste rab 'bring tha mar blta'o/ /de gsum re re las kyang rab dang 'bring dang tha ma gsum byed par bya'o/ /de la gtsug lag khang zhes pa nas gnyen sdug pa'i zhes pa'i bar du sa las byung ba'o/ /de bzhin gshegs pa'am rang sangs rgyas sam/de bzhin rgyal ba'i nyan thos sam mthu chen po'i byang chub sems dpa' 'am zhes pa ni 'phags pa'i 'o/ /'bras bu thob pa'i 'am zhes pa nas bkra shis pa'i sgra 'bras bu thob par 'gyur ba thos na zhes pa'i bar du bar snang las byung ba'i ltas so//de la gtsug lag khang nas khang thog ces pa'i bar du sa las byung ba'i tha ma'o/ /ral gri dang yid bzhin nor bu ni sa las byung ba'i rab po/ /gdugs dang me tog dang bud med gos dkar mo can brgyan pa dang gnyen sdug pa rnams dang bram ze dang ba rnams kyis las byung ba'i ltas kyi 'bring ngo //de bzhin gshegs pa ni 'phags pa'i ltas kyi rab bo/ /byang chub sems dpa' mthu chen po/ rang sangs rgyas ni 'phags pa'i 'bring ngo / /nyan thos ni 'phags pa'i tha ma'o/ /'bras bu thob pa ni bar snang gi tha ma'o/ /rgya mtsho rnams dang rdzing la rkyal zhing brgal ba ni bar snang gi 'brid ngo //de bzhin du yid du 'ong pa'i sgra bkra shis pa 'bras bu thob par 'gyur ba ni ga las thos nas bar snang gi rmi lam gyi ltas rab tu shes par bya ste/ rmi lam de rnams lta pa yang khyad par gyi slob ma rnams ni gang du dkyil 'khor du nyal ba'i rigs so/ /lam 'di mchog ste dpal dang ldan//theg pa chen po rgya mtsho che/ /zhes pa nas/ theg pa mchog tu bzang ba 'di/ /tshul bzhin 'dug na thob par 'gyur/ /zhes pa'i bar du yang slob ma de rnams spro bar bya ba'i phyir theg pa chen po las skyes par 'gyur ro zhes pa ni/ theg pa chen po nyid rgyu dang 'bras bu'i yon tan 'dir bshad de/de lta bu'i theg pa khyed kyis thob par 'gyur ro zhes bstan pa ste/ lam 'di mchog ste dpal dang ldan/ /zhes pa ni bla na med pa'i byang chub tu 'gro ba'i lam ste/ de yang sngags kyi tshul spyod pa'i lam mo/ /mchog ces pa ni nyan thos dang rang sangs rgyas kyi theg pa dang /byang chub sems dpa'i pha rol tu phyin pa spyod pa rnams kyi lam las 'phags pa'i phyir/ byang chub sems dpa' pha rol tu phyin pa spyod pa'i lam las ci'i phyir 'phags she na/ pha rol tu phyin pa la sogs pa spyod pa 'dra yang lha rnams mnyes par bya ba'i phyir yan lag bzhi la sogs pa'i sngags bzlas pa dang mchod pa dang sbyin sreg la sog pa'i sgo nas sbyin pa la sogs pa pha rol tu phyin pa rgyun mi 'chad par spyod pas 'bras bu myur du thob par 'gyur ba'i phyir mchog go//dpal ldan zhes pa ni mngon par 'char ba'i mtshan nyid lha dang mi'i longs spyod kyi bde ba dang /rig 'dzin la sogs pa'i grub pa thob pa dang / ma lus pa'i bde ba'i mtshan nyid mi gnas pa'i mya ngan las 'das pa rim gyis thob par 'gyur bas na dpal dang ldan pa'o/ /theg pa chen po 'byung chen la/ /zhes pa ni sngags spyod pa'i tshul gyis theg pa chen po ni bla na med pa'i byang chub 'byung ba'i rgyu'i gtso bo yin pas na 'byung ba chen po zhes bya'o//gang gi phyir khyed cag dong ba ni de bzhin gshegs par 'gyur bar 'ong do zhes pa ni de ltar theg pa chen po la zhugs na/ de'i 'bras bu thams cad mkhyen pa'i ye shes kyi rang bzhin chos kyi sku thob par 'gyur ro zhes pa'o//de nas bcom ldan 'das la 'phro ba dang bral ba rdo rje 'dzin gyis 'di skad gsol to zhes pa nas ci'i phyir zhe na/ byang chub sems dpa' ni lus dang ngag dang yid yongs su btang ba ma yin pa'i bslabs pa gzung bar bya ba med do zhes pa'i bar du yang sngar dus gsum du sgrib pa med pa'i ye shes kyi sdom pa gsungs pa de nyid zhib tu bshad pa ste/bcom ldan 'das gang la gnas pa'i byang chub sems dpa'/ rnams kyi sangs rgyas dang byang chub sems dpa' de rnams mnyes par 'gyur ba dus gsum du ma bsgribs pa'i sdom pa de bshad du gsol zhes pa ni dus gsum du sgrib pa med pa'i ye shes sdom pa de la gnas nas sangs rgyas dang byang chub sems dpa' rnams mnyes te/mngon par mtshar ba dang ma lus pa'i bde ba thob par 'gyur ba de bzhin du bshad par gsol ba'o/ /dus gsum du sgrib pa med pa'i ye shes sdom pa ni bshad zin to// //lus dang ngag yid lhan cig gtod/ /ces pa'i lus dang ngag yid gsum dus gcig tu stong pa nyid la 'jug pa ste/ de ltar lus dang ngag yid gsum stong pa nyid kyi rang bzhin du 'gyur te dmigs su med pas chags par bya ba dang / chags pa'i dngos po dang /chags par byed pa la sogs pa yang dmigs su med de/ de ltar dmigs su med pa ni lus dang ngag dang yid rnams sdig pa la sogs pa mi byed pa ste de ni sdom pa'o/ /chos thams cad la rtsol ba med pa zhes pa ni/ phung po dang khams dang skye mched la sogs pa'i chos thams cad skye bar byed pa'i rgyu lus dang ngag yid gsum mi byed ces pa ste/de ltar de dag skyed pa'i rgyu ma byas pa'i sdom pa ste/ de dag gi don dam pa'i sdom pa bstan pa'o/ /de yang gang zhe na sus sangs rgyas dang byang chub sems dpa' la bdag gi lus rab tu gtod pa'o zhes pa ni dus gsum du sgrib pa med pa'i sdom pa de gzhan ma yin gyi/bdag gi lus sangs rgyas dang byang chub sems dpa' rnams la phul ba de sangs rgyas dang byang chub sems dpa' mnga' ste dbang bdag la med do//de ltar dbang bdag la med de sangs rgyas dang byang chub sems dpa' mnga' na sangs rgyas dang byang chub sems dpa' rnams kyi chos ni mi dge ba bcu'i las kyi lam mi spyod do//de bas na gang gis lus phul ba des kyang chos bzhin du bya dgos te/ mi dge ba'i las kyi lam bcu lus dang ngag yid gsum gyi sgo nas mi spyod pas sdom pa zhes bya'o/ /de bas na gsungs pa de ci'i phyir zhe na/gang gis bdag gi lus yongs su btang ba des ni dngos po gsum yongs su btang pa'o/ /gsum po de gang zhe na lus dang ngag yid do/ /rigs kyi bu de lta bas na byang chub sems dpa' lus dang ngag dang yid gsum gyi sdom pas bsdam par bya'o zhes pa'o/ /de ci'i phyir zhe na byang chub sems dpa' ni lus dang ngag yid gsum btang ba ma yin pa'i sdom pa gzung bar bya ba med do zhes pa ni sangs rgyas dang byang chub sems dpa' rnams la lus phul bas lus dang ngag dang yid gsum char phul bar 'gyur te/lus dang ngag dang yid gsum la bdag mi dbang na/lus dang ngag yid gsum gyi sgo nas mi dge ba'i las bcu mi spyod pas de nyid sdom pa ste/ lus dang ngag yid gsum las lhag pa'i sdom pa gzhan yod pa ma yin zhes pa'i don te/ mdor na gang gis sangs rgyas dang byang chub sems dpa' rnams la bdag gi lus phul ba des lus dang ngag yid gsum gyi sgo nas mi dge ba bcu'i las mi spyod pa ste/de dag thams cad mkhyen pa'i ye shes sgrib pa med pa thob par byed pa'i rgyur 'gyur ba bstan pa'o/ /de nas phyi de nyin par bdag lus rdo rje sems dpar byin gyis rlobs la zhes pa nas sems dag par 'gyur ba'i phyir spos kyi chu gtsang ma byin cig ces pa'i bar du dkyil 'khor 'dri ba'i nang par slob dpon gyis las su bya ba rnams bshad pa ste/nang par nyi ma'i rtse la lho byang shar nub la sogs pa brtags na gsal bar mngon te/ de bas na nang par khrus la sogs pa byas nas dkyil 'khor bri ba'i sa de'i nang du zhugs te/bcom ldan 'das rnam par snang mdzad yid la bya ste/ phyag 'tshal ba la dam tshig gsum gyis phyag rgya bcings te/ chos kyi dbyings kyi phyag rgyas bdag nyid stong par byin gyis brlabs te/ chos kyi 'khor lo'i phyag rgya bcings nas rdo rje sems dpa' byin gyis brlab bo/ /de nas rdo rje go cha'i phyag rgya bcings te go cha bgo'o//de ni rdo rje sems dpar byin gyis brlabs te/ rdo rje sems dpa' zhes bya ba ni sems shin tu brtan pa rdo rje dang 'dra ba la bya ste/ de yang gang zhe na/ phyin ci ma log pa yongs su rdzogs pa'i mtshan nyid byang chub kyi snying po'i sems te/ de nyid dpal rdo rje sems dpa' byang chub sems dpa'i skur byin gyis brlabs pa'o/ /de ltar slob dpon de rdo rje sems dpa'i skur byin gyis brlabs pa la dkyil 'khor gyis lho byang shar nub la sogs pa brtags te gtan la dbab pa dang lha rnams gar dgod pa'i gnas rnams kyang yid kyis gtan la dbab par bya'o//yang spos chus bum pa bkang ste/ khams gsum rnam par rgyal ba'i sngags kyis btab la thog mar sgor bzhag ste/ mkhas pas 'gro ba kun la des gtor cig /ces pa ni gzhung las 'byung ba'i mtshan nyid dang ldan pa'i bum pa spos chus bkang la/ rin po che dang sman dang 'bru sna lnga blugs te dkyil 'khor gyi phyi ra'i sgor bzhag ste/ slob ma rnams nang du 'ong ba'i tshe bgegs bsal ba'i phyir gtor ro/ /khams gsum rnam par rgyal ba'i sngags kyis bum pa de la gdab pa de yang snying po'i sngags kyis gdab na brgya rtsa brgyad du gdab/ rtsa ba'i sngags kyis gdab na bdun na nyi shu rtsa gcig tu gdab po/ /de nas sems dag par 'gyur ba'i phyir spos kyi chu gtsang ma byin cig pa ni slob ma rnams sngags spyod pa dang 'gal ba'i kha zas zos pa'i rnam par rtog pa bsal ba'i phyir spos chu gtsang ma de blud do/ /gtsang ma zhes pa ni sems can gyi yan lag la sogs pa med pa'o//sngags dang 'gal ba'i kha zas zos pa'i rnam par rtog pa med na'ang spos kyi chu gtsang ma 'thungs pas bdag gi rgyud gtsang mar gyur to snyam pa'i 'du shes skyes te/ mi gtsang ba la sogs pa'i dogs pa med par 'gyur ba'i phyir spos chu blud do//de nas bcom ldan 'das la phyag na rdo rjes 'di skad gsol to zhes pa nas nam srod nas 'di 'bri ba ste/ nam mkha' la yang dkyil 'khor bri/ /zhes pa'i bar du dkyil 'khor ji tsam na bri ba'i dus zhus pa dang bshad pa ste/ kun mkhyen zhes pa ni bcom ldan 'das thams cad mkhyen pa'o//dus dang tshod ces pa ni dkyil 'khor 'dri ba'i dus de nyid kyi tshe na ste de bshad du gsol zhes pa'o/ /smra ba'i mchog gis bka' stsal cig /ces pa ni smra ba thams cad kyi mchog ni sangs rgyas bcom ldan 'das te/ sems dpa' chen po gang dus su byin gyis brlab par 'gyur ba ni dkyil 'khor mkhan/sngags grub nan tan zhugs tshe'o/ /zhes pa ni dkyil 'khor gyi mkhan po dam tshig gi dkyil 'khor 'dri ba dang grub pa'i dkyil 'khor 'dri ba la byang chub sems dpa' rnams dus gang der gshegs par 'gyur zhes zhus pa ste/ sems dpa' chen po zhes pa ni sangs rgyas bcom ldan 'das la mi bya'o/pha rol tu phyin pa spyad pa spyod pa'i byang chub sems dpa' rnams la bya ste/ ci zhe na sangs rgyas bcom ldan 'das ni dus thams cad du byin gyis rlob pas zhu mi dgos so/ /byang chub sems dpa' rnams ni ting nge 'dzin las bzhengs nas sems can thams cad kyi don la rtog pa sngon du btang bar gshegs//dus thams cad du byin gyis mi rlob bo/ /de bas dkyil 'khor 'dri ba la byang chub sems dpa' rnams gang gi dus su gshegs par 'gyur zhes zhus pa'o/ /gnyis su na sems dpa' chen po zhes nams kyang mi 'bod de/ byang chub sems dpa' rnams la sems dpa' chen po zhes 'bod par grags pas de bas na sems dpa' chen po zhes pa ni byang chub sems dpa' chen po rnams la bya'o//nam sros nas ni bri ba ste/ /nam yang dkyil 'khor bris pas so/ /zhes pa ni dkyil 'khor 'dri bar 'dod pa rnams kyi phyir/dus thams cad kyi dkyil 'khor thams cad mtshan mo bri'o zhes bka' stsal te/ byang chub sems dpa' de rnams kyang mtshan mo'i dus der gshegs par 'gyur ro zhes gsungs pa'o/ /de bas na 'di ni dam tshig gi dkyil 'khor dang / bsgrub pa'i dkyil 'khor gnyis ka yang dus thams cad du mtshan mo bri bar shes par bya'o//de la gsang ba'i rgyud la sogs pas bsgrub pa'i dkyil 'khor ma gtogs pa gzhan thams cad mtshan mo bri'o zhes 'byung ste/ de bas na bsgrub pa'i dkyil 'khor nyin par bri bar gsungs so/ /de ci'i phyir zhe na bsgrub pa ni nam sros nas nam langs kyi bar mtshan rangs par bsgrub dgos te/de bas na bsgrub pa'i dkyil 'khor mtshan mo bri ba'i skabs med de nyin par 'dri bar gsungs so/ /'dir ni gnyis ka yang mtshan mo bri bar gsungs pas dam tshig gi dkyil 'khor de nyid mtshan mo bri bar bya'o/ / bsgrub pa'i dkyil 'khor ni gsang ba'i rgyud las 'byung ba ltar nyin par bri bar gsungs kyi/ rgyud 'di las mtshan mo bri bar gsungs/ bsgrub pa nyid kyi mtshan mo bri ba ni skabs med de de'i nub mo bris na mtshan mo mal tshe thun 'ga' dkyil 'khor bri bar zad pas bsgrub pa mtshan rangs par mi 'gyur te/de bas na snga de nub mo dkyil 'khor bris la phyi de nub mo bsgrub par shes par bya'o/ /dkyil 'khor chen po dag nub gcig gis mi zin pa yang gzhung de ltar shes par bya'o/ /da ni dkyil 'khor bri ba'i slad du bri ba la sogs pa bshad par bya ste/ dkyil 'khor bri ba de yang spyir rnam pa drug gis yongs su rdzogs par 'gyur ro//drug gang zhe na/ dkyil 'khor srad bu bre ba'i ting nge 'dzin bshad pa dang / srad bu bre ba bshad pa dang / dkyil 'khor gyi tshad bshad pa dang / snam bu'i rim par dbye ba dang / sgo khyud dang rta babs rnam par dbye ba dang lha rnams kyi gnas nges par bshad pa'o//de nas slob dpon gyis sangs rgyas thams cad la phyag bgyis la/ tshon sna lnga'i srad bu thogs nas bdag gi lus bcom ldan 'das rnam par snang mdzad du byin gyis brlabs la zhes pa ni srad bu bre ba'i ting nge 'dzin bshad pa ste/ de la sangs rgyas thams cad la phyag bgyis te zhes pa ni ting nge 'dzin la 'jug par bya na/thog mar sangs rgyas rjes su dran zhing phyag bya bar rigs so/ /tshon sna lnga'i skud pa zhes pa ni ye shes lnga'i rang bzhin du brtags te/ ye shes lnga po de dag dang ldan par bdag rnam par snang mdzad kyi skur byin gyis brlab bo//bdag nyid bcom ldan 'das rnam par snang mdzad kyi skur byin gyis brlabs la zhes pa ni dkyil 'khor rnam pa gsum la ting nge 'dzin du gnas pa yang bye brag rnam pa gsum ste/ snying rje chen po'i dkyil 'khor la slob dpon rnam par snang mdzad kyi skur byin gyis brlabs te srad bu bye ba la sogs pa dkyil 'khor gyi las rnams bya'o//yi ge 'khor lo bskor ba'i dkyil 'khor la chos kyi skur byin gyis brlabs nas dkyil 'khor gyi las rnams bya'o/ /gsang ba'i dkyil 'khor la dbang chen la sogs pa'i dkyil 'khor lnga dang ldan pa'i skur byin gyis brlabs nas dkyil 'khor gyi las rnams bya ste/de dag kyang zhib tu ni bsdu pa'i don las bshad do/ /rgyud nyid kyang so so'i skabs su 'byung ngo / /tshon sna lnga'i skud pa rnams ye shes lngar brtags pa ni 'og nas phye ma'i sna lnga la sangs rgyas lngar brtags pa dang sbyar ro/ /thog mar shar phyogs su srang bu bre ba ni/ /lte ba khung dang bsnyams nas ni//bar snang la ni gzung bar bya/ /de nas lho phyogs song nas su/ /byang phyogs su yang de bzhin bre'o/ /zhes pa ni thog mar de slob dpon dkyil 'khor gyi nub phyogs kyi ngos nas kha shar phyogs su bltas te/ 'greng la nam mkha' la rang bzhin gyi dkyil 'khor dmigs pa'i tshul/bcom ldan 'das rnam par snang mdzad kyi sku la sogs pa mi zad pa'i rgyan gyi 'khor lo dang bcas pa mngon du bsams te/ srad bu'i thog ma grogs la 'dzin du bcug la shar phyogs su gtong ngo / /de la lho phyogs nas brkyang ste nam mkha' la rang bzhin gyi dkyil 'khor btab ste/ de ltar nam mkha' la sems kyis rang bzhin gyi dkyil 'khor btab nas/ phyis sa la dkyil 'khor bri ba ni rang bzhin gyi dkyil 'khor de'i gzugs brnyan lta bur shes par bya'o/ /de ltar nam mkha' la dkyil 'khor sems kyis bsam pa la srad bu bre ci dgos she na/ nam mkha' la rang bzhin gyi dkyil 'khor bsam pa'i mtshan mar brtags pa'i phyir ro//de nas srad bu phyi ma de dang gos blangs zhes pa ni srad bu snga ma'i dman mas brir mi rung bas na/ tshon sna lnga'i skud pa gzhan zhig blangs nas dkyil 'khor phyi ma bri ba'i don to/ /shar phyogs bltas nas bye ba yang //de bzhin gshegs pa dran bzhin no/ /zhes pa ni dkyil 'khor mi 'khrul par gtan la dbab pa'i phyir srad bu dbus nas rgya gram du bres nas te/ dkyil 'khor gyi dbus su bab par phur bu btsugs la de nas srad bu de bltas te/ dbus kyi phur bu bzung la grwa bzhi gtan la dbab par bya'o//de ltar gtan la dbab nas grwa bzhir mtshan mar yang phur bu bzhi gzugs/ srad bu yang mdud pa mi bor bar skud pa la sogs pa'i mtshan ma gdag par bya'o/ /de bzhin gshegs pa dran bzhin du/ /zhes pa ni de bzhin gshegs pa rnams yid la byas nas zhes pa'o/ /de nas lho phyogs song nas su//byang phyogs su ni bre bar bya/ /zhes pa yang rgya gram nyid bre ba la bya'o/ /blo can de nas bskor nas su/ /ni r-i ti yi phyogs 'dug ste/ /byang phyogs su ni bre bar bya/ /zhes pa ni slob dpon de lho dang nub kyi mtshams su 'dug nas kha byang phyogs su blta ste nub kyi ngos su srad bu bre bar bya'o//de mas g.yas su bsgyur bar bya/ /bsgyur te de ru 'dug nas su/ /lho phyogs kyang ni bre bar bya/ /zhes pa ni slob dpon lho nub kyi mtshams de nyid du 'dug cing kha byang phyogs su bltas pa las kha shar phyogs su bsgyur te/ de nyid du 'dug pa la shar phyogs su blta ste/srad bu 'dzin pa'i grogs pos dkyil 'khor bskor nas shar dang lho'i mtshams su song ste/ lho phyogs kyi ngos su srad bu bre bar bya'o/ /de nas gnas de btang nas su/ /me yi phyogs der gnas nas ni/ /shar ngos bre bar bya ba yang / /sngags mkhan sngags kyi cho gar gnas//zhes pa ni slob dpon de lho dang nub mtshams de bor nas shar lho'i mtshams su 'dug ste shar phyogs kyi ngos srad bu bre bar bya'o/ /sngags mkhan sngags kyi cho gar gnas/ /zhes pa ni rnam par snang mdzad kyi ting nge 'dzin la gnas zhes pa'i don to/ /de nas i shwa nar song nas//nub phyogs su ni kha blta ste/ /byang phyogs ngos de bre ba dang / /rlung gi grwar ni thug pa'i bar/ /zhes pa ni slob dpon byang dang shar gyi mtshams su 'dug nas byang phyogs kyi ngos su srad bu bre bar bya'o/ /de bzhin sngags pas bya ba ni/ /kun kyang gru bzhi lham par te/ /zhes pa ni de ltar gong du smos pa'i mtshan nyid kyis/dkyil 'khor de kun gru bzhi bya/ /zhes pa'o/ /de ltar dkyil 'khor gyi srad bu bre bar thog mar nub phyogs/ de nas lho phyogs/ de'i 'og tu shar phyogs/ de nas byang phyogs su bya ba ci'i zhe na/ nub phyogs kyi ngos ni so sor rtog pa'i ye shes su brtag /lho phyogs ni mnyam pa nyid kyi ye shes su brtag /shar phyogs ni me long gi ye shes su brtag /byang phyogs ni bya ba nan tan gyi ye shes su brtag ste/ de bas na thog mar so sor rtog pa'i ye shes su 'gyur/ de rdzogs pa las mnyam pa nyid kyi ye shes rdzogs par 'gyur/ mnyam pa nyid kyi ye shes las me long gi ye shes rdzogs par 'gyur/ me long gi ye shes las lus dang longs spyod dang gnas kyi mtshan nyid bya ba nan tan gyi ye shes 'byung ste/ de bas na rim pa de ltar smos so/ /ye shes bzhi'i dmigs yul kyang chos kyi dbyings rnam par dag pa ste/ de bas na srad bu rgya gram du bres pa'i ri mo ngos bzhi nas re re byung ba ni chos kyi dbyings la 'du ba'o/ /rgya gram gyi gcig tu 'dus pa ni chos kyi dbyings kyi mtshan nyid do/ /de ltar srad bu bre ste sa bcad nas tshon sna gcig pa'i skud pa thig gsher ba la bsgres te/ gos kyi rim gro mi byed par snang bar bya ba'i phyir gdab bo//de nas dbus su zhugs nas ni/ /de nas snam bu gsum du dbye/ /zhes pa ni slob dpon gyi dkyil 'khor de'i nang du zhugs nas snam bu gsum du bcad de/ snam bu gsum po las cha bzhir bgos te/ cha re re yang ngos re re sbyar ba'o/ /de bzhin du snam bu gnyis la yang shes par bya ste/snam bu gsum du bya ba ni/ /sa de 'khor kyang thams cad du/ /zhes pa ni de ltar dkyil 'khor de khor yug tu rim pa gsum du bya'o zhes pa'o/ /re re la yang char bya ba/ /dum bu gsum du gcad par bya/ /zhes pa ni snam bu gsum po re re la yang cha gsum du bgos pa la/cha gcig ni bskor ba'i snam bur gzhag /cha gnyis ni lha rnams kyi gnas su bya ba ste/ de bas na gsungs pa/ phyi rim cha gcig dor ba ni/ /snam bu gcig bskor phyi ru ste/ /lhag ma'i rim pa gnyis po ni/ /nges par lha rnams gnas par ro//zhes pa ste de dag gis snam bu dbye ba'o/ /sgo khyung dag ni phyogs bzhi ru/ /blo can gyis ni so sor bya/ /lha rnams de ru bri ba yang / /dka' bar spyod pas nan tan bya/ /zhes pa ni sgo khyud rnams rnam par dbye ba ste/ sgo khyud de rnams kyang tshad ni dkyil 'khor snam bu'i dgu cha gcig tu brtags te/snying po'i dkyil 'khor gyi nang gi sgo khyud rnams shar phyogs kyi sgo khyud nang du chos kyi sku'i phyag rgya gzhag par bya/ byang phyogs kyi nang du spyan ras gzigs kyi dbang po gzhag /lho phyogs kyi nang du phyag na rdo rje gzhag /de'i phyi rim gyi sgo khyud rnams la shar phyogs kyi sgo khyud kyi nang du shAkya thub pa sprul pa'i sku gzhag /lho phyogs kyi nang du gshin rje gzhag /byang phyogs kyi nang du dbang po gzhag pa ste/ gshin rje dbang po la sogs de rnams kyang dkyil 'khor bar ma'i snam bu la sgo khyud kyi nang du 'dug pa yang /bcom ldan 'das kyi sprul pa'i sku nyid du rig par bya ste/ gshin rje la sogs pas 'dul ba'i sems can rnams gdul ba'i phyir yi dwags rnams kyi rgyal po gshin rje'i gzugs su gtso bor byas nas sgo khyud na gnas so/ /dbang po yang lha rnams kyi rgyal po ste/ gtso bor bya zhing sgo khyud na gnas so//bcom ldan 'das shAkya thub pa yang mi rnams kyi gtso bor gyur cing sgo khyud na bzhugs so/ /snying po'i dkyil 'khor na bzhugs pa'i gtso bor ye shes bzhi'i rang bzhin du shes par bya ste/ bcom ldan 'das rnam par snang mdzad mngon par byang chub pa'i mtshan nyid dbus na bzhugs pa ni mnyam pa nyid kyi ye shes kyi rang bzhin no//chos kyi sku'i phyag rgya shar na gnas pa ni me long gi ye shes kyi rang bzhin no/ /spyan ras gzigs kyi dbang po byang phyogs na gnas pa ni so sor kun du rtog pa'i ye shes kyi rang bzhin no/ /phyag na rdo rje lho phyogs na gnas pa ni bya ba nan tan gyi ye shes kyi rang bzhin du rig par bya'o//dkyil 'khor gyi snam bu gsum pa la shar phyogs kyi sgo khyud kyi nang na 'phags pa 'jam dbyangs gtso bo'i gzugs su bzhugs/ lho phyogs kyi sgo khyud kyi nang na sgrib pa thams cad rnam par sel ba'i byang chub sems dpa' bzhugs/de bzhin du nub dang byang na yang nam mkha'i snying po dang / sa'i snying po gtso bo'i gzugs su sgo khyud na bzhugs par shes par bya'o/ /de bzhin 'di ltar kun bya ba/ /rim par phye ste shin tu brtag /ces pa ni gong du smos pa ltar dkyil 'khor gyi snam bu bgo ba dang sgo khyud rnams rnam par dbye ba dang /sgo khyud rnams su gtso bo'i lha rnams shin tu bye brag phye bar dgod ces pa'o/ /'bras bu pad+mo dkar po mchog /de yi snying po zhes su bsgrags/ /snying po nges byas kun kyang dkyil 'khor snying rje 'byung ba zhes pa ni/ dbus kyi pad+mo dkar po ni bcom ldan 'das rnam par snang mdzad kyi rgyu bsod nams kyi tshogs la bya ste/ dkar ba ni tshogs de nyid rnam par dag pa'o/ /snying po ni 'byung ba'i gnas te/ bsod nams kyi tshogs te bcom ldan 'das kyi snying rje chen po'i bdag nyid 'byung ba'i gnas so/ /snying rje chen po de las dkyil 'khor 'di 'byung ste/de bas na snying po 'di las 'byung ba zhes pa'o/ /de yi tshad ni smras pa yang / /chen por yang ni sor bcu drug /ces pa ni dbus kyi pad+ma'i tshad sor bcu drug ste/ chen por yang ni zhes pa ni de las lhag par kyang rung zhes pa'o/ /de'i dgongs pa yang 'di lta ste/bcu drug ni sa bcu dang pha rol tu phyin pa drug dang ldan pa'o/ /chen por yang ni zhes pa ni de las lhag pa kun du bzang po'i sa la sogs pa dang ldan pa zhes pa ste/ mdor na pad+mo de bcom ldan 'das kyi rgyu bsod nams dang ye shes kyi tshogs kyi rang bzhin gyi mtshan nyid lta bur blta'o/ / 'dab brgyad kyi rdzogs ldan zhes pa ni bsod nams tshogs te/ ye shes brgyad dang ldan pas 'dab ma brgyad du gsungs so/ /de las ye shes brgyad ni me long gi ye shes dang / mnyam pa nyid kyi ye shes dang / so sor kun du rtog pa'i ye shes dang / bya ba nan tan gyi ye shes de nyid sgo lnga'i rnam par shes pa lnga las gyur pas rnam pa lngar phye ste/ye shes de rnams de brgyad dang ldan pas 'dab ma brgyad du gyes so/ /ye shes rnams kyang chos thams cad dmigs pa med pa'i rang bzhin du chud pa ste/ de ltar thams cad dmigs su med par chud pas sbyin par bya ba dang /sbyin pa'i dngos po dang / sbyin par byed pa gsum char yang dmigs su med par chud de/ de bas na sbyin pa la sogs pa'i bsod nams kyi tshogs te ye shes lta bu dang ldan pas 'khor gsum yongs su dag pa'i rang bzhin du shes par bya'o/ /ge sar dang ldan shin tu bzang //zhes pa ge sar rnams ni sangs rgyas bcom ldan 'das kyi rgyu'i yon tan dang ting nge 'dzin dang gzungs dang rnam par grol ba dang / stobs dang mi 'jigs pa la sogs pa'i mtshan mar brtag ste/ bsod nams kyi tshogs de yang yon tan de rnams dang ldan pa zhes pa'o/ / 'dab ma'i bar ni kun du yang / /chub par rdo rje bri bar bya/ /zhes pa rdo rje ni ye shes kyi mtshan ma ste/ gong du smos pa'i ye shes brgyad rnams dang ldan pa zhes bya'o/ /de yi snying po'i dbus su ni/ /rgyal ba'i gtso mchog bri zhes pa ni bcom ldan 'das mngon par byang chub pa'i rang bzhin pad+ma'i snying po'i steng du bris te/rgyal ba'i gtso mchog ces pa ni bdud rnams las rgyal ba ste/ de rnams kyi nang na yang mchog ces bya'o/ /'bar bcas gser gyi kha dog 'dra/ /thor tshugs cod pan 'chang ba ste/ /mgon po'i 'od kyis rim par bskor/ /nad dang bral ba'i ting 'dzin gnas//shes pa 'bar dang bcas zhes pa ni 'bar ba ni sreg pa'i rang bzhin te nyon mongs pa dang shes bya'i sgrib pa sreg pa'i rang bzhin gyi ye shes dang ldan pa zhes pa'o/ /gser gyi kha dog 'dra zhes pa ni rgyal ba'i rang bzhin no/ /thor tshugs 'chang ba ni 'og min gyi gnas na bzhugs na 'og min gyi gnas kyi lha rnams thor tshugs dang bcas pa ste/de dag dang mthun par bya ba'i phyir thor tshugs dang ldan pa'o/ /cod pan 'chang zhes pa ni chos kyi rgyal po'am dbang por dbang bskur ba ni rin po che'i cod pan gsol ba'o/ /mgon po'i 'od kyis rim par bskor/ / zhes pa ni yongs su dag pa'i ye shes rang bzhin gyis 'od dang ba/ 'od kyi dkyil 'khor las 'phro bas bskor ba zhes pa'o/ /nad dang bral ba zhes pa ni nyon mongs pa dang shes bya'i sgrib pa'i gdon dang bral ba zhes pa'o/ /ting nge 'dzin gnas zhes pa ni so so rang gis rig pa'i ye shes mi g.yo ba rtse gcig tu gnas pa ste/gzungs kyang ting nge 'dzin gyi tshul du gnas pa'o/ /de'i/ shar du sangs rgyas rnams kyi ni/ /phyag rgya nan tan bri ba ni/ /pad+ma'i steng du gru gsum pa/ /mkhas pas kun kyang dkar po ru/ /'od kyis kun bskor dang ba ni/ /thams cad du yang dkar po ru//zhes pa ni bcom ldan 'das rnam par snang mdzad kyi shar phyogs su mngon par sangs rgyas pa 'das pa'i de bzhin gshegs pa rnams phyag rgya gsum pa'i mtshan nyid du bris te/ shar phyogs su gzhag pa ni rgya gar skad du shar phyogs la pUrba zhes bya/ 'das pa'ang pUrba zhes bya ste/de bas na sngon 'das pa'o zhes gleng ba'i phyir/ shar phyogs su gzhag go/ /pad+ma'i steng du gru gsum bri ba ni stong pa nyid dang / mtshan ma med pa dang smon pa med pa ste/ rnam par thar pa'i sgo gsum yongs su rdzogs pa'i mtshan nyid/ /phyag rgya de'i dbus su rdo rje rtse lnga pa bzhag pa dang /grwa gnyis nas 'od gnyis 'byung bar bya'o zhes gsang ba'i dkyil 'khor nas 'byung ba ste/ rdo rje rtse lnga pa gzhag pa ni ye shes lnga'i mtshan ma'o/ /'od gnyis 'byung bar bya ba ni phyag rgya ste chos kyi sku'i mtshan nyid de chos kyi sku las rdzogs longs spyod pa'i sku dang /pad+mo ni sngar bshad pa'o/ /dkar po ni nyon mongs pa dang shes bya'i sgrib pa dag pa ste pad+mo nyid la bya'o/ /'od kyis bskor ba ni ye shes kyi 'od 'phro bas bskor ba'o/ /thams cad du yang dkar po zhes pa ni phyag rgya de nyid dkar po bya ste yongs su dag pa'i phyir ro/ /de yi byang du bri ba ni//mgon po thams cad kun gyi yum/ /'od bcas gser gyi kha dog 'dra'o/ /na bza' dkar po mnabs pa ste/ /kun du yang ni 'bar ba la/ /ting 'dzin gnas bzhin mkhas pa'o/ /zhes pa ni phyag rgya gru gsum pa'i byang phyogs su bcom ldan 'das ma nam mkha'i spyan bri ba ni/shes rab kyi pha rol tu phyin ma'i rang bzhin mngon par byang chub pa dang ldan pa'i shes rab ste/ mgon po sangs rgyas bcom ldan rnams shes rab de las byung bas na de mgon po rnams kyi yum mo/ /'bar bcas pa ni shes bya dang nyon mongs pa'i sgrib pa sreg pa'i rang bzhin 'bar ba dang bcas pa'o//gser gyi kha dog ni rgyas pa'i rang bzhin no/ /na bza' dkar po mnabs pa ni na bza' ni g.yogs par byed pa ste/ g.yogs pa de nyid dag pa ni dkar po/ de bas na shes bya dang nyon mongs pa'i sgrib pas g.yogs pa dag pa'i mtshan ma ni na bza' dkar po'o//rnam par snang zhing zhes pa ni shin tu dag cing rang bzhin gyis 'od gsal ba'i ye shes kyi rang bzhin du khyab pa'o/ /ting nge 'dzin gnas zhes pa ni mi g.yo ba'i gzugs su gnas pa'o/ /mgon po yi ni byang phyogs su/ /spyan ras gzigs ni legs par bri/ / dpa' bo pad+mo dkar po'i stan/ /dung dang kun+da zla ba 'dra/ /snang ba mtha' yas thor tshugs gnas/ /yid tsam 'dzum pa'i zhal ras su/ /zhes pa ni bcom ldan 'das rnam par snang mdzad kyi g.yas rol byang phyogs kyi ngos su pad+mo'i rigs kyi bdag po spyan ras gzigs kyi dbang po bri ste/spyan ras gzigs zhes pa ni so sor kun du rtog pa'i ye shes kyi rang bzhin gyis sems can rnams yongs su smin pa dang / grol bar bya ba'i phyir gzigs pa dang / chos kyi dbyings rnam par dag pa la gzigs so/ /dpa' bo zhes pa ni shes bya dang nyon mongs pa'i sgrib pa'i rkun po 'joms pa la dpa' ba'o//pad+mo dkar po la bzhugs pa ni/ bsod nams dang ye shes kyi tshogs yongs su dag pa'i rang bzhin no/ /sbyor ba'i las pad+mo dang dmar por gsungs la 'dir dkar por gsungs pa de yang sbyor ba'i rgyud ni thabs gtso bor gyur pa ste/ thabs kyis sems can rnams yongs su smin par grol bar bya ba'i don la zhes bstan pa'i phyir dmar po bstan to//rgyud 'dir ni shes rab gtsor gyur pa'i sgo nas shes rab kyi chos thams cad shin tu dag par chud pa'i mtshan nyid du dkar por bstan to/ /dung dang kun+da zla ba 'dra/ / zhes pa ni sku'i kha dog dang me tog kun+da dang zla ba ltar dkar bar shes pa'o/ /snang ba mtha' yas thor tshugs gnas/ /zhes pa ni snang ba mtha' yas ni so sor rtog pa'i ye shes kyi rang bzhin te de'i mtshan mar bstan pa'o/ /gnyis su na sbyor ba'i rgyud las rigs so so'i dbang bskur ba so so pad+mo'i rigs la snang ba mtha' yas kyis dbang bskur ba'i phyir ro//yid tsam 'dzum pa'i zhal zhes pa ni ting nge 'dzin du mi gnas par sems can gyi don du chos la sogs pa bshad pa'i phyir/ 'dzum zhing zhal ma btsums pa'i don du/ de yi g.yas su bri ba ni/ /sgrol ma'i lha mo grags chen te//ljang gu gdangs bzhin kha dog mang / /bud med na chung tshad dang 'dra/ /thal sbyar me tog ut+pal thogs/ /'od rnams kun gyis kyang ni bskor/ /'od gsal kun kyang 'byung bzhin te/ /na bza' yang dag dkar mnabs pa'o/ /zhes pa ni spyan ras gzigs kyi dbang po sems can gyi khams la gzigs nas bdag gi bsod nams dang ye shes kyi tshogs la sogs pa thams cad mtha' yas pa'i sems can thams cad kyi don du bsngos te bsgral kyang sems can de dag ma lus par 'khor ba las rgal bar ma gyur pa gzigs nas thugs rje chen po'i shugs kyis bshums pa las sgrol ma'i lha mo mang po byung nas sems can thams cad sgrol bar byed pa'i gzugs su gyur pa ste de bas na sgrol ma'i lha mo'o//gzhan yang rnam pa du ma rgyud gzhan las shes par bya'o/ /grags chen zhes pa ni yon tan gyi tshig go/ /ljang gu gdangs bzhin zhes pa ni kha dog dkar po dang sngon po dang ser po la sogs pa bsdus pa las ljang gur 'gyur te/kha dog dkar po dang sngon po la sogs pa ni zhi ba dang rgyas pa dang mngon par spyod pa'i las kyi mtshan ma ste/ de dag gcig tu bsdus pa ni las thams cad byed pa'o/ /gzugs med po zhes pa ni sems can rnam pa mang po'i don du bar bar pho'i gzugs/bar bar mo'i gzugs rnam pa du mar 'gyur ba'i phyir ro/ /bud med na chung tshad dang 'dra/ /zhes pa ni yon tan ma rdzogs te gzhon pa yang ma yin/ yon tan rnams las 'das pa'i byang chub nyid mya ngan las 'das par gyur pa'i tshul du rgas pa yang ma yin te/bsod nams dang ye shes kyi tshogs rgyas pa'i mtshan nyid ni tshad la bab pa'o/ /thal sbyar me tog ut+pal thogs/ /zhes pa ni rnam par grol ba'i sgo sna tshogs 'dzin pa ste/ de bas na ut+pala'i 'dab ma ral gri lta bu ni shes rab rnam par grol ba'i sgo lta bur shes par bya'o//'od rnams kyis ni kun du bskor/ /zhes pa ni ye shes kyi 'od 'phro bas bskor ba'o/ /'jigs pa sel ba zhes pa ni zhi zhing rgyal po dang rkun po la sogs pa'i 'jigs pa brgyad sel bar byed pa'o/ /na bza' yang ni dkar po mnabs pa ni ngo tsha ba dang ldan pa'i mtshan ma ste/ji ltar gos kyis g.yogs shing mi snang bar bya ba bzhin du ngo tsha ba yang 'chab cing sba ba'i mtshan ma ste ngo tsha ba de dang ldan pa'o/ /dkar ba ni ngo tsha nyid rnam par dag pa'i mtshan ma'o/ /ci'i phyir ngo tsha ba dang ldan zhe na/ ngo tsha ba ni byang chub sems dpa'i yon tan de bzhin du 'og nas 'chad do//khro gnyer ma ni g.yon phyogs bri/ /sngags kyi nor bu phreng 'chang ba/ /lha mo spyan gsum thor tshugs can/ /kha dog rnams kyang dkar po ste/ /'od kyi 'khor gyis de bskor ba/ /dkar po dmar po ser po rnams/ /zhes pa ni spyan ras gzigs kyi g.yon rol du khro gnyer ma bri ste/khro gnyer ma zhes pa ni 'bras bu la rgyus brlan pa'i mtshan ma ste spyan ras gzigs kyi dbang po'i smin mtshams kyi nang nas lha mo de phyung ste/ khro gnyer gyi rgyud las byung bas na khro gnyer ma zhes bya'o/ /sngags kyi nor bu'i phreng ba 'chang / /zhes pa ni lha mo de khro bo'i bdag nyid 'ba' zhig ma yin gyi/pha rol tu phyin pa la sogs pa ldan par bstan pa ste/ sngags kyi nor bu pha rol tu phyin pa'i mtshan ma'o/ /spyan gsum pa ni khro bo'i bdag nyid do/ /thor tshugs can zhes pa ni 'og min gnam gyi lha rnams dang rigs mthun pa'i kha dog rnams kyang dkar po zhes pa ni yongs su dag pa'i mtshan nyid do//'od rnams 'khor gyis bskor ba zhes pa ni ye shes kyi 'od 'phro ba dang ldan pa'o/ /de ni/ dkar po dmar po ser po rnams/ /zhes pa ni 'od nyid kha dog de rnams dang ldan pa ste/ zhi ba dang rgyas pa la sogs pa'i las thams cad byed pa'i mtshan ma'o/ /khro gnyer ma'i drung du bri ba ni/mthu chen yang ni legs bri ba/ /dpa' bo na bza' dkar mnabs te/ /phyag na pad+mo snying brtser ldan/ /de yi pad+mo kha ma bye/ /'od kyi dkyil 'khor bskor ba'o/ /zhes pa ni khro gnyer ma'i drung du 'phags pa mthu chen po thob pa bri ste/ khro gnyer ma'i drung du bri ba ni mthu chen te dpung du bya ba'i phyir ro//dpa' zhes pa ni sus kyang zil gyis mi gnon pa'o/ /na bza' dkar po mnabs pa ni yongs su dag pa'i mtshan nyid do/ /phyag na pad+mo snying brtser ldan/ /de yi pad+mo kha ma bye/ /zhes pa ni de'i phyag rgya'o/ /snying brtser ldan pa ni snying rje chen po dang ldan pa'o/ / pad+ma kham bye ba ni spyan ras gzigs kyi dbang po dang khyad par bstan pa'o/ /'od kyi dkyil 'khor bskor ba'o/ /zhes pa ni ye shes kyi 'od 'phro ba dang ldan pa'o/ /mkhas pas de'i drung du bri ba ni/ grags 'dzin rig pa'i lha mo'o/ /de yi kha dog gser 'dra ba/ /rgyan kun gyis ni shin tu brgyan/ /me tog tshoms cig bzang thogs pa//pri yang ku ste phyag g.yon par/ /zhes pa ni mthu chen po thob pa'i drung du grags 'dzin zhes pa'i lha mo bri ste/ de la grags 'dzin zhes pa ni sangs rgyas bcom ldan 'das rnams kyi yon tan grags pa rnams 'dzin pa'o/ /de'i kha dog gser 'dra ba ni rgyas ba'i mtshan nyid do//me tog tshoms cig bzang thogs pa/ /pri yang ku ste phyag g.yon par/ /zhes pa ni lha mo de'i phyag rgya'o/ /sgrol ba'i lha mo'i drung du ni/ /dkar bar gnas par zhes bya ba'i lha mo der bri ste/ dkar bar gnas pa ni chos kyi dbyings rnam par dag pa la gnas pa'o/ /sgrol ba'i lha mo'i drung du bri ba ni/sgrol ma'i lha mo de rnams can rnams sgrol zhing las thams cad byed pa 'ba' zhig ma yin gyi/ chos dbyings rnam par dag pa la bsnyen par byed pa bstan pa'i phyir ro/ /na bza' dkar mnabs dza ta can/ /phyag rgya pad+mo blo can gyis/ /zhes pa ni na bza' dkar mo ni yongs su dag pa'i mtshan ma'o//phyag na pad+mo'i ni phyag rgyas pad+mo thogs pa'o/ /thor tshugs snga ma bzhin no/ /blo can gyis zhes pa ni sngags mkhan blo can gyis de ltar bri ba zhes pa'o/ /de'i 'og tu bri ba ni sngags pas/ rig pa'i rgyal po stobs can te/ / nyi ma 'char ba'i kha dog 'dra/ /pad+ma dkar pos shin tu brgyan/ /ma rungs 'od 'bar phreng ba can/ /spu yang seng ge 'dra bar 'dug /rta mgrin zhes su bsgrags pa ste/ /blo can spyan ras gzigs kyi'o/ /zhes pa ni dkar bar gnas pa'i lha mo'i 'og logs su 'phags pa rta mgrin bri ste/ rig pa'i rgyal po zhes pa ni pad+mo'i rigs kyi rig pa'i rgyal po stobs can zhes pa ste mthu chen po'i yon tan no/ /nyi ma 'char ba'i kha dog 'dra/ /zhes pa ni kha dog dmar bar bstan pa'o/ /pad+mo dkar pos kun nas brgyan/ /zhes pa ni bsod nams dang ye shes kyi tshogs rnam par dkar bas brgyan pa'o//ma rungs pa zhes pa ni khro bas 'jigs pa'i gzugs so/ /'od 'bar ba'i phreng ba can ni shes bya dang nyon mongs pa'i sgrib pa sreg par byed pa'i ye shes can te/ de bsregs nas chos kyi dbyings rnam par thar pa 'thob par 'gyur ba ste/ de bas na chos kyi dbyings rnam par dag pa'i rang bzhin dkar bar gnas pa'i lha mo'i 'og zad du bri ste/bar chad med pa'i lam gyi rang bzhin du shes par bya'o/ /spu yang seng ge 'dra bar 'dug /ces pa ni seng ge ltar sus kyang zil gyis mi non pa'i mtshan ma'o/ /rta mgrin zhes su bsgrags zhes pa ni chos la 'bigs pa'i ye shes myur zhing mgyogs pa rta dang 'dra ba dang /sems can gyi don bya ba la mgyogs pa rta dang 'dra ba'i phyir rta mgrin zhes bya'o/ /blo can spyan ras gzigs kyi'o/ /zhes pa ni de dag spyan ras gzigs kyi 'khor lo can gyis shes par bya'o zhes pa ste de dag gi pad+mo'i rigs kyi dkyil 'khor rang bzhin gyi dkyil 'khor gyi gzugs brnyan du bris pa ste/rang bzhin gyi dkyil 'khor thams cad ni mtha' yas pas brir yang mi lang bas/ dkyil 'khor 'di dag thams cad ni rang bzhin gyi dkyil 'khor sdud pa'i sgor gyur par shes par bya'o/ /sangs rgyas rnams ni lho phyogs su/ / byang chub sems dpa' mgon rnams kyi/ /phyag rgya mthu can bri ba ni/ /re ba thams cad yongs 'grub pa/ /yid bzhin nor bu zhes su grags/ /pad+mo dkar la gnas par ro/ /zhes pa ni 'das pa'i sangs rgyas rnams kyi phyag rgya gru gsum pa'i lho phyogs su/ byang chub sems dpa' rnams kyi phyag rgya nor bu yid bzhin 'dra ba bri ste/byang chub sems dpa' rnams bri na/ grangs med mtha' med pas de rnams sdud pa'i sgor gyur pa'i phyag rgya bri bar shes par bya'o/ /skal ba chen po zhes pa ni bsod nams dang ye shes kyi tshogs dang ldan pa la bya'o/ /gnyis su na bsnyen pa chen po zhes kyang bya ste sems can mang pos bsnyen pa'i phyir ro//bya ba yongs su rdzogs pa zhes bya ba ni/ sems can thams cad kyi bsam pa ji lta ba bzhin du don byed pa'o/ /yid bzhin nor bu zhes bsgrags pa/ /zhes pa ni re ba yongs su rdzogs par byed pa yid bzhin gyi nor bu bzhin pa'o/ /yang na phyag rgya yid bzhin gyi nor bu ltar bri zhes pa'o//pad+mo dkar po gnas pa ni bsod nams dang ye shes kyi tshogs rnam par dkar ba las byung ba'o/ /mgon po yi ni lho phyogs su/ /snang mdzad chen de'i zhes pa nas/ /'od kyis bskor ba rdo rje 'chang / /zhes pa'i bar du phyag na rdo rje'i bye brag ste/ bcom ldan 'das rnam par snang mdzad kyi lho phyogs su bri'o/ /de yang nan tan ye shes kyi mtshan nyid de/ bcom ldan 'das kyi g.yon phyogs su bri ba ni rgyan sna tshogs kyis brgyan la 'gying ba'i tshul du gnas pas bcom ldan 'das zhi ba dang rjes su mthun pa'i phyir g.yon du bri'o/ /re ba kun ni rdzogs par byas pa bzhin du sems can gyi don byed pa'i nan tan byed pas na/sems can thams cad kyi bsam pa yongs su rdzogs par byed pa'o/ /'phro ba mtha' yas rgya chen po/ /zhes pa ni sems can gyi don du mtha' yas par rgyu ste/ de yang rgya che ba'i rgyu'o/ /'od kyis bskor ba ni ye shes kyi 'od 'phro bas bskor ba'o//rdo rje 'chang ba ni ye shes lnga'i rang bzhin gyi rdo rje 'chang ba'o/ /de yi g.yas su bri ba ni/ /mA ma kI zhes bya ba ni/ /lha mo phyag na rdo rje 'chang / /rdo rje rgyan gyis brgyan pa'o/ /zhes pa ni rdo rje'i yum bya ba nan tan gyi ye shes dang ldan pa'i shes rab kyi pha rol tu phyin pa'i rang bzhin te/mA ma kI zhes pa ni/ mA ma kI ni phyag na rdo rje'o/ /mA ma kI bas mA ma kI zhes bya'o/ /phyag na rdo rje ji ltar mA ma kI zhe na/ gdug pa dang ma rungs pa rnams gdug pa'i bya ba byed pa la ma byed ces 'gog pa ste/ ma byed pa zhes bya ste/ yum de'i ma byed ces bya'o/ /rdo rje 'chang ba ni ye shes kyi rang bzhin gyi phyag na rdo rje rtse gsum pa 'chang ba'o/ /rdo rje'i rgyan gyis brgyan zhes pa ni rgyan rnams kyi mtshan ma rdo rjes btab pa ste/ rdo rje rigs kyi mtshan ma'o/ /de yi 'og zad bri ba ni/ /stobs chen rdo rje kha ba can ma/ /lha mo zha 'bring bas bskor te//bzhin ni yid tsam 'dzum pa ste/ /zhes pa ni yum shes rab kyi pha rol tu phyin pa de'i bar chad pa med pa'i lam gyi rang bzhin pas de'i 'og tu bri ste/ rdo rje rtse can ma zhes pa ni chos nyid la 'bigs par byed pa'i ngang tshul can no/ /stabs can zhes pa ni de'i yon tan no//lha mo zha 'bring mas bskor ba zhes pa ni de ma thag pa'i lam gyi yan lag rnams dang ldan pa'o/ /yang na rgyal po'i 'khor bas mngag gzhug ma la sogs pa srid pa'i phyir ro/ /de bzhin yid kyis 'dzum pa ste/ /zhes pa ni ting nge 'dzin du ma zhugs pas sems can gyi don mdzad pa'i phyir ro//g.yon du sngags pas bri ba ni/ /rdo rje lu gu rgyud ces bya/ /rdo rje lu gu rgyud thogs pa/ /rang gi 'khor gyis bskor ba ste/ /kha dog pri yang ku ba zhin sngo/ /rdo rje mtshan mas mtshan byas pa'o/ /zhes pa ni phyag na rdo rje g.yon du rdo rje lu gu rgyud ces bya ba bris te/ lu gu rgyud ni 'phags pa'i lam gyi rang bzhin te/sems can rnams lam der 'dren zhing 'dzud par byed pa'i mtshan ma'o/ /yang na rgyal po'i 'khor gyis phul bas gdug pa dang ma rungs pa rnams bzung zhing 'dogs pa'i mtshan nyid do/ /rang gi 'khor gyis bskor ba ste/ /zhes pa ni rdo rje lu gu rgyud ma de nyid kyi 'khor mngag gzhug ma la sogs pa rnams kyis bskor ba'o//rdo rje mtshan mas mtshan byas pa'o/ /zhes pa ni rgyan rnams la rdo rje mtshan gyis btab pa'o/ /phyag na rdo rje 'og logs su/ /zhes pa nas/ khro bo chen po 'di 'dra bas/ /pad+mo'i gdan la gnas par bri/ / zhes pa'i bar du phyag na rdo rje'i bya ba nan tan gyi ye shes bar chad med pa'i lam gyi mtshan nyid du gyur pa khro bo zla ba thig le'i bye brag ste/ ma zad 'og tu bri ba ni bya ba nan tan gyi ye shes la sbyor ba bar chad med pa'i lam gyi rang bzhin pas bya ba nan tan gyi ye shes kyi sar ma phyin pa'i 'og tu bri'o//khro bo khams gsum grags pa zhes pa ni yon tan gyis 'jig rten gsum du grags pa'o/ /bgegs dang dgra chen zhi bar byed/ /ces pa ni lha dang gnod sbyin las 'byung ba'i bgegs rnams mi la sogs pa'i dgra sel bar byed pa'o/ /zla ba ltar yongs su dag cing sems can thams cad kyi rgyud tshim par byed pa'i rang bzhin no//thig le ni thig le'i mtshan ma dang ldan pa'am/ yang na ni ti la ka zhes pa ni rgya gar skad du gtso bo'i rnam pa la bya ste/ khro bo zla ba'i gtso bo lta bur zhes bya'o/ /spyan gsum pa ni ye shes kyi spyan lhag par mnga' ba'am khro ba'i mtshan ma'o//mche ba bzhi pa ni stong pa nyid dang mtshan ma med pa dang smon pa med pa dang rang bzhin gyis 'od gsal ba'i rnam par thar pa'i sgo dang ldan pa'o/ /'od ni dbyar gyi sprin 'dra bar/ /zhes pa ni kha dog dbyar gyi sprin 'dra ba ste/ dbyar gyi sprin gyi rlung dang char par bcas pa'i bag gnas pa ste/de dang 'dra bas las thams cad byed pa'i mtshan ma'o/ /drag po rgod pa'i sgra 'byin pa/ /zhes pa ni rgod pa'i sgras thams cad khengs shing gnod par 'gyur ba'i sgra 'byin pa'o/ /rdo rje'i rgyan gyis shin tu brgyan/ /zhes pa rgyan rnams la rdo rje mtshan mas btab pa'o/ / mtha' yas 'khor gyis bskor ba ni/ /khro bo'i 'khor gyis bskor ba zhes pa ni 'khor phal dang khro bo grangs med pas bskor ba'o/ /lag pa brgya stong du ma zhes pa ni lam gyi yan lag brgya stong du mas sems can rnams 'phags pa'i lam la 'dzud pa'am/ yan lag de rnams kyis lam gyi sgrib pa mang po rnams sel ba'i mtshan ma'o//mtshon cha du ma sna tshogs zhes pa ni lam gyi yan lag yon tan rnams rdo rje la sogs pa'i mtshon char gyur pa'o/ /khro bo chen po de 'dra bar/ /pad+mo'i gdan la gnas par bri/ /zhes pa ni gong du smos pa'i tshul du bri ste 'khor yan lag mang po rnams ni yid kyis bsam par bya ste/nyung zad ci 'os par bri bar bya'o/ /de yi nub tu song nas ni/ /rdo rje 'dzin pa mang du bri/ /lag na rdo rje mtshon cha thogs/ /mthu chen kha dog sna tshogs pa/ /dpa' bo 'od kyi 'khor gyis bskor/ /sems can kun gyi don byed pa'o//zhes pa ni phyag na rdo rje'i 'khor rdo rje 'dzin pa rnams bri ste/ ming dang cha lugs gsang ba'i dkyil 'khor las 'byung ba dang sbyar bar bya'o/ /sngags mgon gyi ni 'og logs su/ /nai r-i ti ni phyogs logs su/ /zhes pa nas/ khro bo lta bu gzhon nu'i gzugs/ /zhes pa'i bar du bcom ldan 'das rnam par snang mdzad nyid kyi mnyam pa nyid kyi ye shes kyi bar chad med pa'i lam du gyur pa/bcom ldan 'das kyi 'og ma zad du 'phags pa mi g.yo mgon bri ba'i bye brag gsungs pa ste/ lag na ral gri thogs pa ni shes bya dang nyon mongs pa'i sgrib pa gcod pa'i shes rab kyi mtshan nyid do//zhags pa ni lam gyi mtshan nyid do/ /lam der sems can thams cad 'dren zhing 'dzud pa'o/ /mig gcig btsums pa ni/ bar chad med pa'i lam gyi rang bzhin pas chos kyi dbyings rnam pa thams cad du ma chud cing mnyam pa nyid kyi ye shes yongs su rdzogs pa'i mtshan ma'o//'bar bas bskor ba'i nang du 'dug /ces pa ni sgrib pa sel ba'i ye shes dang ldan pa'o/ /mkhregs pa ni phyin ci ma log pa yongs su rdzogs pa'i lam gyi rang bzhin pas brtan zhing mi 'gyur ba'o/ /gzhon nu ma'i gzugs ni bar chad med pa'i lam la dang po zhugs pas lam rgyas pa'i mtshan ma ste/de bas na bar chad med pa'i lam rgyas pa'i mtshan nyid khams gsum rnam par rgyal ba rlung gi phyogs su gzhag go/ /bris nas blo can 'gro ba ni/ /rlung phyogs su ste nan tan bya/ /zhes pa nas/ zad pa'i dus bzhin 'dug pa'o/ /zhes pa'i bar du bcom ldan 'das rnam par snang mdzad mnyam pa nyid kyi ye shes kyi bar chad med pa'i lam rdzogs pa'i rang bzhin khams gsum rnam par rgyal ba bri ba'i bye brag gsungs pa ste/zad pa'i dus bzhin 'dug pa'o/ /zhes pa ni zad pa'i tshe nyi ma dang zla ba med de mun nag tu 'gyur te/khro bo de'i kha dog kyang mun pa dang 'dra ba nag po bri zhes pa'i don to/ /de bzhin nang rol bris pa rnams/ /rgyas pa ru ni bshad pa yin/ /zhes pa ni snying po'i dkyil 'khor du sku mi zad pa la sogs pa'i rgyan rang bzhin gyi dkyil 'khor rnams sdud par 'gyur ba ye shes lnga'i mtshan ma 'khor dang bcas par bshad ces pa'o//da ni dkyil 'khor gnyis pa'i snam bu'i sku mi zad pa'i rgyan sdud par gyur pa sprul pa'i sku shAkya thub pa dang / dbang po dang gshin rje la sogs pa'i tshul du bstan pa 'khor dang bcas pa bri bar bshad par bya ste/ gnyis po'i cha ni nges pa ru shar phyogs kyi dbus su cha gnyis rnam par brtags pa'i sgo khyud kyi nang rol du/sngags pas bri ba shAkya thub/ /rgyas pa gser gyi kha dog 'bar/ /mtshan mchog sum cu rtsa gnyis ldan/ /mgon po chos gos gsol bzhin te/ /gtso bo chos kyi don byed pa/ /pad+ma dkar po'i gdan la bzhugs//bzhugs pa chos kyang 'chad pa bzhin/ /zhes pa'i bar du bcom ldan 'das shAkya thub pa dkyil 'khor nyis rim gyi shar gyi ngos cha gnyis bgos pa'i dbus su bab pa'i sgo khyud kyi nang du bris te shAkya thub pa zhes pa ni/ shAkya'i rigs las byung zhing lus dang ngag yid gsum thub pa'i ngang tshul can no//shar phyogs su bri ba ni bcom ldan 'das rnam par snang mdzad pas sngar byang chub kyi shing drung du mngon par byang chub pa bstan pa'o/ /gser gyi kha dog ni rgyas pa'i mtshan ma ste bsod nams dang ye shes kyi tshogs rgyas pa'i rang bzhin gyi phyir ro//'bar ba dang bcas pa ni kun du sangs rgyas pas sgrib pa sreg pa'i rang bzhin gyi ye shes dang ldan pa'o/ /mtshan mchog sum cu gnyis dang ldan/ /zhes pa ni gtsug tor bltar mi snang ba la sogs pa skyes bu chen po'i mtshan gzhung las grags pa'o/ /chos gos ngur smrig gsol ba ni 'khor ba la ni ma chags pa dang /snying rje'i dbang gis sems can thams cad la chags pa bstan pa ste/ chos gos tshon gyis zhes pa ni snying rjes sems can la chags pa bstan pa'o/ /dmar po nyid du mi gsal bar ngur smrig tu gyur pa ni 'khor ba la ma chags par bstan pa'o//gtso bo bstan pa'i don byed pa zhes pa ni/ 'khor rnams la slob cing ston pa'i don byed pa'o/ /pad+ma dkar po'i gdan ni bsod nams kyi tshogs yongs su dag pa'i mtshan ma ste snga ma bzhin no/ /chos 'chad bzhin du bzhugs pa ni gzhung las grags pa'o/ / de yi g.yas phyogs logs su ni/ /lha mo sangs rgyas spyan zhes bya/ /zhal ras zhi ba'i yid 'dzum par/ /'od kyi 'khor gyis shin tu bskor/ /mnyam med sku yang shin tu dngas/ /de ni shAkya thub pa'i yum/ /zhes pa ni sangs rgyas pa'i shes rab yum gyi gzugs gyur pa shAkya thub pa'i g.yas rol gyi byang phyogs logs su bri ste/sangs rgyas shAkya thub pa shes rab de las byung ba'i phyir/ sangs rgyas kyi yum zhes bya'o/ /sangs rgyas kyi spyan zhes pa ni gzigs pa'i rang bzhin pas shes rab la bya'o/ /zhal ras zhi pa yid 'dzum pa ni zhi bshes bya dang nyon mongs pa'i sgrib pa dag pa'o//yid tsam 'dzum pa ni chos ston pa'i mtshan ma'o/ /'od kyis shin tu bskor zhes pa ni kun du sangs rgyas pa la shes bya dang nyon mongs pa sreg pa'i ye shes dang ldan pa'o/ /mnyam pa med pa ni ji bzhin pa med pa'i ye shes kyi rang bzhin pas tshad 'di tsam mo zhes bzung zhing gzhal du med pa'o//de yi g.yas phyogs bri ba ni/ /rig pa smin mtshams zhes grags pa/ /lha mo pad+ma'i steng bzhugs par/ /dung dang zla ba'i 'od 'dra ba/ /yid bzhin nor bu lag na thogs/ /re ba kun kyang rdzogs par byed/ /ces pa ni sangs rgyas spyan gyi g.yas rol byang phyogs su smin mtshams zhes bya ba'i rig ma bri ste/sangs rgyas kyi smin mtshams na skyes bu chen po'i mtshan thig le 'dra ba de'i ting nge 'dzin gyi gzugs su gyur ba'i lha mo ni smin mtshams zhes bya'o/ /mgon po'i g.yon logs sngags mkhan gyis/ /legs par gtsug tor lnga bri zhes pa nas/ kun kyang nan tan cher bri ba//gnas rnams kyang ni lnga nyid du/ /zhes pa'i bar du bcom ldan 'das kyi g.yon rol lho phyogs su gtsug tor lnga bri ste/ gtsug tor zhes pa ni bcom ldan 'das kyi gtsug nas byung ba ste/ 'bras bu rgyu las brlan te mtshan gsol ba'o/ /'di rnams kyi phyag rgya la sogs pa ni/zhib tu gsang ba'i dkyil 'khor las smos pas na 'dir ma bshad do/ /de rnams kyi ni byang phyogs su/ /gtsang bar gnas dag legs par bri/ /zhes pa'i bar du gtsug tor lnga'i g.yon rol lho phyogs su gzugs med pa'i khams kyi lha rnams la sku mi zad ba'i rgyan gyis khyab par mdzad pa'i sgor gyur pa gnas gtsang ma'i ris kyi lha rnams bri ste/gzhung las byang phyogs su smos na/ ci'i phyir lho phyogs su bri zhe na/ gtsug tor lnga'i byang phyogs na shAkya thub pa la sogs pa bzhugs pas bri ba'i skabs med de/ lho phyogs su bri bar mngon no/ /gnyis su na skad kyi gzhung gis kyang byang phyogs su zhes pa'o//lho phyogs bya ba'i phyir ro/ /mdzod spu'i g.yas logs byang phyogs su/ /gtsug tor gsum po nyid kyis te/ /cher 'byung ba yi gtsug tor dang / /de bzhin gyen du 'byung ba dang / /mtha' yas dbyangs kyi sgra dang ste/ /de rnams nan tan legs par bri/ / zhes pa ni/ mdzod spu'i g.yas rol byang phyogs su/ /gtsug tor gsum rnams bri ba ste/ /dkar po ser skya ser gdangs te/ /zhes pa ni gtsug tor gsum po de dag nyid kyi kha dog ste/ ser skya ni yungs kar gyi kha dog 'dra'o/ /ser gdangs ni gser gyi kha dog 'dra'o/ /mthu chen gtsug tor lnga po gsum du bya ba gzhan gyi ste zhes pa'i gtsug tor gsum po las gzhan pa gtsug tor lnga po sngar smos pa rnams kha dog gsum du bya'o zhes pa ste kha dog rnam pa gsum po zhes pa yang dkar po dmar po ser po zhes pa'o//gtsug tor lnga la kha dog gsum ni gtsug tor gsum dang sbyar/ gtsug tor gnyis ni kha dog de dag nyid las dkar po dang dmar po gnyis dang sbyar ro/ /de dag smon lam mthu can zhes pa ni de dag kun kyang bcom ldan 'das shAkya thub pa'i smon lam gyi mthu las byung ba'o zhes pa'o/ /de nas sngags pa me'i phyogs su me ni drang srong che ba dang bcas pa zhes pa nas ril ba spyi blugs dang /sngags nor thogs zhes pa'i bar du shar dang lho'i mtshams su 'khor me'i drang srong rnams dang bcas par bri ba'i bye brag de rnams kyang sku mi zad pa'i rgyan nyid me'i drang srong la sogs pa gdul ba'i phyir me'i gzugs su gyur pa'o/ /de nas lho yi phyogs su ni/ /song nas gshin rjer khri bar bya//lag na dbyig thogs ma he zhon/ /'od kyi kha dog dbyar sprin 'dra/ /ma mo rnams dang dus mtshan dang / /'chi byed rnams kyis bskor ba'o/ /zhes pa ni sku mi zad pa'i rgyan de nyid gshin rje la sogs pa gdul ba'i phyir yi dwags kyi rgyal po gshin rje'i gzugs su gyur pa ste/de'ang lho'i phyogs kyi sgo khyud kyi nang du bri ste/ ma he zhon pa ni de'i theg pa ste/ 'jig rten gyi theg pa pas ma he ltar dkar po ma yin pa'o/ /dbyig pa thogs pa ni shes rab kyi mtshan ma ste dbyig pa zlum po bcad pa'i rang bzhin ma yin pa ni 'khor ba rgyud las legs nyes kyi 'bras bu ston pa la sogs pa 'chad pas 'khor ba'i rgyud gcod pa ma yin pa'o//nai r-i'i phyogs su ni ri bri'o/ /'jigs pa lag na ral gri can/ /zhes pa ni lho nub kyi mtshams su 'bar ba rnams gdul ba'i phyir sku mi zad pa'i rgyan de nyid 'bar ba'i rgyal po ni ri'i gzugs su gyur pa'o/ /de nas blo can bri ba ni/nub byang phyogs su bri ba lha'i rgyal po ste/ ri rab rtse gnas lhas bskor ba/ /lag na rdo rje cod pan can/ /rgyan kun gyis ni brgyan pa'o/ /zhes pa ni 'dod pa'i lha rnams gdul ba'i phyir sku mi zad pa'i rgyan de nyid lha rnams kyi rgyal po dbang po'i gzugs su gyur pa ste/ de yang byang phyogs kyi ngos sgo khyud kyi nang du bri'o/ /de yang ri rab kyi rtse mo la gnas shing 'khor lha rnams kyis skor bar bri ste cod pan gyi rgyal po'i tshul 'dzin pas so/ /rdo rje ni de'i ye shes kyi mtshan ma'o/ /gnyis su na lag cha'o/ /de yi shar du ba ru Na/ /lag na zhags pa thogs pa bri//zhes pa ni chu'i dbang po shar phyogs su bri ste/ zhags pa ni de nyid kyi lam gyi rang bzhin no/ /shar phyogs su bri ba ni pUrba zhes pa sngon gyi tshig ste/ bskal pa 'byung ba'i 'og tu chu'i dkyil 'khor gyis thog mar gzhi btsugs pa'i phyir ro/ /nyi ma'i shing rta steng 'dug pa//zhes pa ni chu'i rgyal po'i shar phyogs su nyi ma bri ste shing rta ni nyi ma'i bzhon pa'o/ /shar phyogs su bri ba ni sngon gyi tshig ste/ bskal pa 'byung ba'i 'og tu 'jig rten pa rnams kyi nang na nyi ma dang zla ba dang por 'byung ba'i phyir ro/ /rgyal dang rnam par rgyal ba yang / /de yi g.yas logs bri bar bya//zhes pa ni nyi ma'i chung ma gnyis so/ /de yi g.yas phyogs tshangs pa ste/ /gdong bzhi pa la ral pa can/ /oM zhes 'byin cing nan tan byed/ /ngang pa pad+ma'i steng gnas pa/ /zhes pa ni dbang po'i g.yas logs nub phyogs su tshangs pa bri ste/ gdong bzhi pa ni smrang bzhi so so nas 'byung ba'o//ngang pa pad+ma'i steng gnas pa/ /zhes pa ni tshangs pa'i bzhon pa ngang pa ste/ ngang pa'i steng na pad+ma bzhag pa la 'dug par bri'o/ /oM gyi sgra 'byin pa'i tshul dang phyag rgya ni gsang ba'i dkyil 'khor du bshad pa dang sbyar ro/ /de yi nub tu bri ba ni/ /sa yi lha mo dbyangs can dang //gtogs 'dod phung po de bzhin rlung / /dbang po che dang zla ba ste/ /nub kyi phyogs su gnas pa ni/ /nan tan chen por byas la bri/ /zhes pa ni nub phyogs kyi ngos su gtogs 'dod la sogs pa'i lha de dag lho phyogs nas brtsams te rim pa ji lta ba bzhin du bri'o//nub phyogs su bri ba ni/ sgo nub tu gtod pas sgo khar bri ba ste/ dbang po dang gtogs 'dod la sogs pa'i lha de rnams 'jig rten las 'das pa'i lam du 'jug pa'i sgor gyur pa'i phyir ro/ /de rnams kyang sku mi zad pa'i rgyan de nyid de/ lha de dag gdul ba'i phyir de dag nyid kyi gzugs su gyur pa ste/sku mi zad pa'i rgyan de la sogs pa de dag gi gzugs su gyur pa yang cha lugs de dag 'dra mod kyi/ de dag ngag gcig cing gdul ba'i phyir mthu dang rdzu 'phrul la sogs pa de dag las lhag par shes par bya'o/ /de bzhin du gshin rje la sogs pa gzhan yang sbyar ro//de dag bri ba sngags pa yis/ /mi 'khrugs pa yi yid kyis te/ /thub pa rgyal po'i 'og tu bri/ /khro bo 'di dag bri bar bya/ /gzhan gyi mi tshugs khro chen dang / /gzhan gyis mi tshugs lha mo dang / /sa bdag lag na bum pa thogs/ /gus par de dag 'khor bzhin du'o//khro bo gzhan gyis mi thub pa ni bcom ldan 'das shAkya thub pa'i bar chad med pa'i rang bzhin no/ /lha mo gzhan gyis mi thub pa ni bcom ldan 'das shAkya thub pa'i mthu brtan par gyur pa'o/ /sa'i lha mo lag na bum pa thogs pa ni bcom ldan 'das kyi dpang du gyur pa ste de dag kyang bcom ldan 'das shAkya thub pa'i spyan snga ma zad 'og tu bri'o//klu chen dga' bo nye dga' bo/ /nan tan tu ni bri bar bya/ /sgo ba gnyis kyi mdun du ste/ /shAkya seng ge sbyong ba yi/ /zhes pa ni klu'i rgyal po gnyis sgo pha rol tshu rol nas gcig la gcig phyogs par bri ste chab sgo bar shes par bya'o//gzhan yang shAka thub phyag rgya dang / /sngags rnams dkyil 'khor bar bshad pa/ /rgyud rnams kun las byung ba yang / /dbang po yis ni bri bar bya/ /zhes pa ni bcom ldan 'das shAkya thub pa'i phyag rgya lhung bzed dang gseg shang la sogs pa rgyud las 'byung ba rnams ji ltar rigs par bya'o zhes pa'o//da ni 'phags pa 'jam dbyangs la sogs pa byang chub sems dpa' chen po rnams chos nyan pa'i tshul du bzhugs pas bri bar bshad de/ de la chos nyan pa ni lugs kyi chos dang thob pa'i chos te/ lugs kyi chos ni zhal nas gsungs pa rnams so//thob pa'i chos ni sku mi zad pa'i rgyan gyi dkyil 'khor nang logs pa gnyis po nang du sku bzhi po 'khor dang bcas pa ste/ de bas na de dag chud par bya ba'i phyir byang chub sems dpa' de rnams kyis yongs su bskor zhing mdun du byas pa'i tshul du bri bar bstan te/ byang chub sems dpa' de rnams kyi pha rol tu phyin pa las skyes pa she dag par shes par bya'o//sngags pa de nas byung nas su/ /cha gsum gtan la bab pa der/ /mchog sbyin rdo rje bri ste zhes pa nas/ kun nas 'khor bar sngags pa yis/ /mtshan ma bzang po'i 'od kyis so/ /zhes pa'i bar du'o/ / shar phyogs kyi ngos kyi sgo khyud kyi nang du 'phags pa 'jam dbyangs bri bar bya ste/ de yang sgra'i rjes su 'gro ba'i shes rab kyi rang bzhin te/ chos thams cad kyi spyi dang rang gi mtshan nyid blos brtags shing dpyad nas chud par byed pa ste/ de bas na de ltar chud nas sgrib pa thams cad rnam par spong ba'i byang chub sems dpa' phyi nas lho phyogs su bri ste/de ltar sgrib pa spangs nas bzod pa dang dga' bar ldan pa'i rang bzhin sa'i snying po byang phyogs su bri ste/ de ltar bzod pa dang dga' bar ldan pa thob nas chos thams cad stong pa nyid nam mkha' ltar chud pa'i rang bzhin nub phyogs su bri ste/rnam par grol ba'i rim pa de lta bas na/ dang po nyid du shar phyogs su shes rab kyi rang bzhin 'phags pa 'jam dpal bri'o/ /mchog sbyin rdo rje zhes pa ni 'phags pa 'jam dpal phyag na rdo rjes mchog byin te/ phyag na rdo rjes sngags kyi rgyud 'chad pa'i dbang bskur te de ltar rdo rje mchog byin zhes bya'o//zur phud lnga dang ldan pa ni ye shes lnga'i rang bzhin no/ /gzhon nu bris pa'i gzugs 'dzin pa ni gzhon nu'i sa 'dzin pa ste chos kyi rgyal po'i gzugs su bzhugs pa'o/ /lag na ut+pal thogs pa ni rdo rje can te/ lag pa g.yon pa zhes pa ni ye shes lnga'i mtshan ma'i rdo rje'i ut+pala'i steng du gzhag pa lag pa g.yon na thogs pa ste/rdo rje ni mchog byin pa'o/ /ut+pal ni shes rab kyi ral gri'i mtshan ma'o/ /rab tu dgod bzhin 'dug pa'o/ /zhes pa ni shes rab kyi chos ston pa'i mtshan ma'o/ /mtshan bzang ldan pa'i 'od kyis te//zhes pa ni 'od 'phro ser po dang dkar po la sogs pa dang ldan pa ste/ nag po la sogs pa'i 'od med pa'o/ /de bri ba ni/ gzhon nu dra ba'i 'od can te/ /lag na rin chen dra ba thogs/ /pad+ma dkar po'i stan la ste/ /rgyal ba'i sras la lta bar bri/ /zhes pa ni 'phags pa 'jam dpal gyi 'khor dra ba'i 'od ces bya ba ni g.yas rol byang phyogs su bri ste/dra ba'i 'od ces pa ni 'od rnams rgyun mi 'chad par gcig la gcig 'brel pa dang ldan pa ni dra ba'i 'od ces bya/ lag na rin chen dra ba thogs/ /zhes pa ni phyag dra ba 'dra ba la rin po ches spras pa thogs pa'o/ / pad+ma dkar po'i gdan la bzhugs pa ni bla ma bye brag yod par bya ba'i phyir ro/ /rgyal ba'i sras la lta bar bri/ /zhes pa ni 'phags pa 'jam dpal nyid la lta bar bri ba'o/ /mchog sbyin rdo rje g.yon rol du/ /mngag gzhug ma ni lnga bri zhes pa nas/ 'gugs pa zhes su bsgrags pa ste/ / zhes pa'i bar du 'phags pa 'jam dpal gyi 'khor mngag gzhug ma rnams ming gis smos pa lnga g.yon rol du bri bar bya'o/ /blo can rnams kyis mngag pa rnams kyi ni/ /'og tu ci bgyi zhes pa lnga po bri/ /zhes pa ni mngag gzhug ma de lnga'i g.yog ci bgyi zhes pa lnga mngag gzhug rnams kyi ma zad du bri bar bya'o//g.yog gnyis po yang bri ba ni/ /dra ba'i 'od can gyi ste zhes pa ni dra ba'i 'od kyi drung de'i g.yog gnyis bri bar bya/ de rnams ni 'phags pa 'jam dpal gyi 'khor te/ kha dog dang phyag rgya la sogs pa ni gsang ba'i dkyil 'khor du blta bar bya'o/ /lho phyogs su ni sngags mkhan gyis//byang chub sems dpa' cher grags pa/ /sgrib pa kun sel de ru bri/ /gtso bo'i rang bzhin nor bu thogs/ /zhes pa ni lho phyogs kyi sgo khyud kyi nang du sgrib pa thams cad rnam par sel ba bri ste/ sgrib pa thams cad rnam par sel zhes pa ni shes bya dang nyon mongs pa'i sgrib pa thams cad spangs zhes pa'i don to//gnyis su ni rgyu'i tshe 'dod pa dang sred pa dang na sems la sogs pa'i sgrib pa lnga bsal te/ de rnams mi bskyod pa las byung bas na 'bras bu la rgyus brlan pa la yang bya'o/ /de yi go gnyis bor nas su/ /dpa' bo brgyad po rnams bri ste/ /zhes pa nas/blo gros bsam pas de bzhin no/ /zhes pa'i bar du mgon po'i 'khor brgyad po rnams g.yas su bzhi g.yon du bzhi rim bzhin du bris te/ cha gnyis bor pa ni dpon g.yog gi mtshams kyi gral dpag pa'i phyir ro/ /byang chub sems dpa' de rnams kyi ming ni don gyi rjes su mthun par shes par bya'o//lho phyogs de ni bor nas su/ /byang gi phyogs su song la ni/ /zhes pa nas/ byang chub sems dpa' grags chen po/ /zhes pa'i bar du sa'i snying po byang chub sems dpa' byang phyogs kyi ngos kyi sgo khyud kyi nang du bri ba ste/ bzod pa rab tu dga' ldan pa/ /zhes pa ni bzod pa rnam pa gsum dang ldan pa ste/zab mo'i chos la bzod pa dang sdug bsngal ba la bzod pa dang pha rol gyi gnod pa byas pa bzod pa'o/ /dga' bar ldan pa ni rang gi rnam par thar ba'i sgos rangs shing dga' ba'o/ /sa'i snying po zhes pa ni de lta bur bzod pa dang ldan pas sa dang 'dra ba'i phyir ro/ /'bar ba ni sngar bshad pa bzhin no//de'i stan yid du 'ong ba ni/ /mkhas pas kyang ni bsam par bya/ /'byung gnas kun dang ldan pa yis/ /rin chen kun gyis shin tu brgyan/ /zhes pa ni byang chub sems dpa' de'i bye brag sa de yang dkar dmar la sogs pa'i kha dog dang ldan pa rin po ches brgyan par bri'o//de yi steng du 'dug pa ste/ /der 'dug par bri ba ni/ byang chub sems dpa' grags chen no/ /zhes pa ni sa'i steng du pad+mo rin po che bzhi'i rang bzhin bri ste/ rin po che bzhi ni gong du byang chub sems dpa'i yon tan bzod pa rnam pa gsum dang / rab tu dga' ba de nyid rin po che'i mtshan mar gyur pas pad+mo de brgyan pa ste/de'i steng du byang chub sems dpa' de bzhugs par bri'o/ /de yi yon tan sgo mtha' yas/ /zhes pa nas/ bsam pa brtan pa yang de bzhin/ /zhes pa'i bar du byang chub sems dpa' de'i 'khor yon tan mtha' yas pa dang ldan pa grangs med pa rnams yod do//de dag las don gyi rjes su mthun pa'i ming dang ldan pa byang chub sems dpa' 'di rnams rim bzhin du bri bar bya'o/ /de nas sngags pa nub phyogs su/ /nam mkha'i snying po der bsam ste/ /dpa' bo gos kyang dkar po gyon/ /lag na ral gri shin tu 'bar/ /legs par 'dug pa bri ba ni//rgyal sras pad+mo'i steng du ste/ /zhes pa ni nub phyogs kyi ngos kyi sgo khyud kyi nang du nam mkha'i snying po byang chub sems dpa' bri bar bya ste/ nam mkha'i snying po zhes pa ni chos thams cad stong pa nyid kyi mtshan nyid nam mkha' lta bur gyur pa byang chub sems dpa' de las byung bas na nam mkha'i snying po zhes bya'o//na bza' dkar mo man bas pa ni 'dzem pa dang ngo tsha ba dang ldan pa'i mtshan ma ste sngar bshad pa dang 'dra'o/ /ral gri ni de'i rnam par grol ba'i shes rab kyi mtshan ma'o/ /de yi 'khor du bsgrags pa ni/ /zhes pa nas brtan pa'i blo zhes pa'i bar du nam mkha'i snying po'i 'khor byang chub sems dpa' don gyi rjes su mthun pa'i ming dang ldan pa 'di rnams go rims bzhin du g.yas g.yon du bri bar bya'o//soms shig go rims bzhin du'o/ /zhes pa ni bcom ldan 'das kyi sku mi zad pa'i rgyan de dag chos nyan pa'i byang chub sems dpa' chen po 'di rnams kyis yongs su bskor zhing mdun du byas te/rtag par lhan cig tu soms shig ces pa'o/ /byang chub sems dpa' de rnams kyi sku mdog dang phyag rgya la sogs pa 'dir gsal bar ma smos pa rnams gsang ba'i dkyil 'khor du blta bar bya'o/ /de nas phyag na rdo rje gsang ba'i bdag pos 'khor de thams cad la bltas nas zhes pa nas/gang gis spyad pa'i mchog 'di la/ /shin tu brtan yid thub pa'o/ /zhes pa'i phyag na rdo rje gong du dkyil 'khor bshad pa/ lha rnams so sor dgod pa la sogs pa chud nas de dag gi tshul dang yon tan la sogs pa sems shin tu dang bar gyur te/dang ba de'i shugs kyis sngags kyi tshul dkon zhing mthu che ba bstan pa dang / dkyil 'khor mthong ba mthu che ba bstan pa dang / sngags slob pa yang mthu che ba bstan pa dang / sngags nyan cing sems pa'i sgo nas dad pa mthu che ba bstan pa'i tshigs su bcad pa smras pa ste/de la sems dang ba rnam pa gsum ste/ pags par song ba dang / rus par song ba dang / rkang du song ba'o/ /de la pags par song ba spur ldang ba la sogs pa'o/ /rus par song ba ni mchi ma 'byung ba la sogs pa'o/ /rkang du song ba ni tshig tu smra ba la sogs pa ste/de bas na phyag na rdo rje sems shin tu dad rkang du song ba dang ldan pas tshig tu smras so/ /de nas phyag na rdo rje gsang ba'i bdag pos 'khor de thams cad la bltas nas zhes pa ni/ 'khor de rnams kyang byang chub sems dpa' chen po kun du bzang po la sogs pa yongs su dag pa sha stag tu bzhugs pas g.yeng ngam mi g.yeng ba snod du gyur tam ma gyur pa brtag pa la ni mi bya'i/dang pa'i shugs nyid kyis 'khor de rnams la bltas pa'o/ /bcom ldan 'das rnam par snang mdzad la ring zhig tu mig mi 'dzums par bltas nas zhes pa yang dad pa'i shugs kyis bcom ldan 'das la snying tshim tshim du ring du bltas pa'o//gleng gzhir gleng ba'i tshig 'di skad ces gsol to zhes pa ni gzhan gyis ma dris par bdag nyid kyis sems dang ba dang / dang ba'i shugs kyis tshig tu 'dor te smras pa'o/ /kun mkhyen gal te 'jig rten du/ /'byung zhing skye bar 'gyur ba yang //u du m+bA ra'i me tog bzhin/ /brgya lam brgya lam gdod 'byung ba'o/ /de bas shin tu 'byung dka' ba/ /sngags spyad pa yi tshul 'di ste/ /zhes pa ni sngags spyad pa shin tu dkon pa bstan pa ste/ de bzhin gshegs pa 'jig rten du 'byung ba yang u du m+bA ra'i me tog dang 'dra ba ste/dkon pa brgya la de bzhin gshegs pa 'jig rten du 'byung na yang / brgya lam brgya lam na sngags kyi tshul 'chad pa ni sngags spyod pa'i snod du gyur pa'i gdul ba gzigs nas/ gdod sngags kyi tshul ston pa na/ de bzhin gshegs pa 'jig rten du 'byung na/yang sngags spyod pa'i tshul ni brgya lam brgya lam na 'byung ba yin pas na dkon no zhes te/ tshig de skad du smras pa yang phyag na rdo rje nyid de ltar chud nas sems dad pa'i shugs kyis smras pa dang / sngags kyi tshul de ltar dkon zhing mthu che bar ma 'ongs pa'i 'gro ba rnams la bstan pa'i phyir ro//thams cad mkhyen pa'i 'jig rten du skye zhing 'byung ba'i dus nges pa ni bcom ldan 'das shAkya thub pa la sogs pa byang chub kyi shing drung du mngon par sangs rgyas te/ 'jig rten du 'byung nas kyang / bskal pa dang lo grangs la sogs pa 'di srid cig lon/'phags pa byams pa 'jig rten du gdod 'byung ba yang / dus 'di srid cig na 'byung ngo zhes nges par bshad na/ ci'i phyir brgya lam brgya lam na zhes ma nges pas smos she na/ de bzhin gshegs pa 'jig rten du 'byung ba'i dus nges kyang de bzhin gshegs pa 'jig rten du 'byung ba'i tshe/sems can rnams skal ba dang mi ldan pas brgya lam brgya lam na de bzhin gshegs pa mngon par 'byung ste dus nges pa med do/ /de bas na de bzhin gshegs pa 'jig rten du mngon par 'tshang rgya ba 'ba' zhig la 'jig rten du 'byung zhes mi bya'i sems can rnams kyi spyod yul du gyur cing mthong ba la yang bya bas na/brgya lam brgya lam zhes smos so/ /bskal pa bye ba du ma ru/ /sdig pa ji snyed byas yod pa/ /de kun 'byung bar 'gyur ba ni/ /dkyil 'khor 'di ni mthong ba'o/ /zhes pa ni dkyil 'khor mthong ba shin tu mthu che bar bstan pa ste/de bzhin gshegs pa sku mi zad pa'i rgyan la sogs pa'i byin gyi rlabs kyis dkyil 'khor 'di mthong bas/ bskal pa du mar mi dge ba/ /bcu la spyad pa'i sdig bsags pa/ /de dag thams cad 'byang bar 'gyur/ /zhes pa ste de 'byang bar 'gyur ba yang dkyil 'khor mthong ba tsam gyis 'byang bar 'gyur ba 'ba' zhig ma yin gyi/sbyor ba dang rtsa ba dang phyi ma dang gsum du ldan na 'byang bar 'gyur te/ de la sbyor ba ni dkyil 'khor du 'jug pa'i phyir sdig pa bshags pa dang / gsum la skyabs su 'gro ba dang / dus gsum du sgrib pa med pa'i ye shes kyi sdom pa 'dzin pa'o//rtsa ba ni dkyil 'khor du 'jug pa nyid kyi tshe byang chub kyi sems bskyed pa dang / dkyil 'khor du gzhug pa dang / sangs rgyas dang byang chub sems dpa' la sogs pa'i sku gzugs dang / phyag rgya la sogs pa dang dkyil 'khor gyi rgyan dang lda ldi la sogs pa mthong nas sems dang ba skyes pa'o//phyi ma ni dkyil 'khor du zhugs pa'i 'og tu dam pa'i chos dang / byang chub kyi sems yongs su mi gtong ba la sogs pa'i dam tshig mnos te/ rnam pa de dag gsum dang ldan par dkyil 'khor mthong na bskal pa du mar bsags pa'i sdig pa yang 'byang bar 'gyur na ni/dper na mun nag lo du mar 'dug pa sgron ma lan cig 'byung bas med pa dang 'dra'o/ /ji smos grags pa mtha' yas pa'i/ /sngags spyad cho ga gnas pa ste/ /bla med gnas su 'gro ba ni/ /mgon po sngags 'di zlos ba ste zhes pa ni sngags zlos pa mthu che ba bstan pa ste/dkyil 'khor mthong ba tsam gyis kyang bskal pa du mar bsags pa'i sdig pa 'byang bar 'gyur na/ sangs rgyas dang byang chub sems dpa'i sngags yon tan mtha' yas par grags pa ji skad du gsungs pa'i cho ga dang ldan par bslab pa goms par byas na bla na med pa'i gnas thob pa lta smos ci dgos zhes pa'o//de dag log par 'gro chad pa/ /sdug bsngal kun kyang 'byang ba ste/ /gang gis spyad pa'i mchog 'di la/ /shin tu brtan yin 'dug pa'o/ /zhes pa ni sngags spyad pa'i tshul la nyan cing sems pa'i sgo nas dad pa mthu che bar bstan pa ste/sngags spyad pa'i tshul dam pa 'di la nyan pa dang bsam pas de nyid yin gyi gzhan ma yin no snyam nas blo gzhan du mi 'gyur bar mos na sdug bsngal can gyi ngan song du mi skye bar 'gyur ro zhes pa'o/ /sngags spyad pa dang spyad pa'i tshul/ /zhes pa la sogs pa'i tshig rnams ni sngar lan mi nyung bar bshad zin pas na 'dir ma smos so//tshigs su bcad pa 'di rnams kyang phyag na rdo rje nyid kyis don de lta bur chud pas sems dang ba'i shugs kyis smras pa'i zhar la ma 'ongs pa'i sems can rnams sngags spyod pa la spro ba bskyed pa'i phyir smras so/ /de'i tshe 'khor de dag thams cad dang /rdo rje 'dzin pa de dag mgrin gcig tu mthun par tshig 'di skad ces gsol to zhes pa nas/ byang chub sems dpa' gzhan rnams kyang / /sngags rgyud rjes bzhin dang ba'o/ /zhes pa'i bar du'o/ /phyag na rdo rjes bcom ldan 'das la tshig su bcad pa 'di skad gsol ba dang /kun du bzang po byang chub sems dpa' la sogs pa 'khor de rnams dang rdo rje 'dzin pa de rnams kyis phyag na rdo rje'i dgongs pa 'di ltar rig ste/ dkyil 'khor bshad pa'i skabs su bab pa la/ dkyil 'khor gyi srad bu bre ba dang / lha rnams so sor dgod pa la sogs pa ni bshad zin gyi tshon byin gyis brlab pa'i ting nge 'dzin dang /sa tshon so so la sangs rgyas kyi sku bsam zhing byin gyis brlab pa dang / tshon gang yin pa dang / ji ltar tshon zhes bya ba dang / tshon 'gyed pa'i thabs dang / tshon gang sngon du gtang ba dang / rta babs dang sgo khyud kyi tshad la sogs pa ma bshad pas de dag dri ba'i phyir phyag na rdo rjes tshigs su bcad pa 'di dag smra'o snyam par rig nas tshig 'di skad smras pa ste/phyag na rdo rjes de'i tshe 'khor de dag thams cad dang / rdo rje 'dzin pa de dag mgrin gcig tu mthun par 'di skad ces gsol to zhes pa ni/ pha rol tu phyin pa spyod pa las byung ba'i byang chub sems dpa' kun du bzang po dang / 'jam dpal la sogs pa dang / sngags kyi spyod pa las byung ba'i byang chub sems dpa' rdo rje 'dzin pa de rnams dgongs pa mthun pas tshig dang don mthun par smras pa'o/ /dge'o dge'o zhes pa ni phyag na rdo rje don de lta bur sems shing bcom ldan 'das la 'dri ba phyag na rdo rje de nyid dge'o zhes pa'o//dge'o zhes pa gnyis pa ni dri bar bya ba'i don bzang bas dge'o zhes pa'o/ /dge'o dge'o dpa' chen pa/ /sngags spyad dbang du gyur pa ste/ /zhes pa ni phyag na rdo rje'i yon tan brjod pa'o//khyod kyis kun dris mnyam med la/ /bdag gi yid la bsams pa'o/ /zhes pa ni dri bar bya ba'i dngos po ste/ dge'o dge'o zhes pa dang sbyar ro/ /phyag na rdo rje'i yid la bsams pa de tshig tu ma smras na byang chub sems dpa' de dag gis ji ltar rig ce na/kun du bzang po la sogs pa'i byang chub sems dpa' mthu chen po sha stag pas/ pha rol gyi sems rig pa dang 'dra bar phyag na rdo rjes ci bsams pa rnams shes so/ /gnyis su na de lta bur dri ba'i skabs yin pas phyag na rdo rjes tshigs su bcad pa gzhan glengs kyang bri bar bya ba'i dngos po 'di yin par shes so//de ltar phyag na rdo rje'i dgongs pa shes pas na/ bdag cag kun gyi dbang du gyur/ /zhes pa ste dbang du gyur zhes pa'i don ni khyod kyis ci bsams pa de nged kyis shes te/ ded kyang de bzhin du sems so zhes pa'o/ /sngags spyad 'bras bu gnas zhes pa ni byang chub sems dpa' de nyid brtsam par bstan te/nged kyang ngan don ma yin gyi/ sngags spyad pa'i 'bras bu thob pa dag go zhes pa'o/ /byang chub sems dpa' gzhan rnams kyang / /sngags rgyud rjes bzhin dang ba'o/ /zhes pa ni byang chub sems dpa' de rnams 'ba' zhig ma yin gyi pha rol tu phyin pa las byung ba'i byang chub sems dpa' gzhan rnams kyis kyang de bzhin du mkhyen to//de nas bcom ldan 'das la phyag na rdo rjes 'di skad ces gsol to zhes pa nas/ sngags rnams mtshan nyid ci 'dra ba dang ting nge 'dzin ji ltar rtogs pa yang zhes pa'i bar du gong du zhu bar bsams pa'i dngos po rnams zhus pa ste/tshon byin gyi brlab pa la sogs pa 'dir zhus pa dang / bshad pa'i nang du ma byung ba rnams gsang ba'i dkyil 'khor gyi skabs su blta bar bya'o/ /de skad ces gsol ba dang / bcom ldan 'das chos kun dbang thub pas phyag na rdo rje la bka' stsal pa zhes pa nas/de bas rnam pa kun la yang / /stong nyid rtag tu dran par bya/ /zhes pa'i bar du phyag na rdo rjes zhus pa rnams kyi lan bcom ldan 'das kyis bka' stsal pa ste/ sems can khams dag mgu rnyed pa/ /chos kyi dbyings ni ro de yin//de phyir sngon gyi sangs rgyas gsung / /de bas de yi tshon zhes bya/ /zhes pa ni ci'i phyir tshon zhes bgyi zhes zhus pa dang / 'og gi lan te/ sems can khams ni mgu rnyed pa/ /zhes pa ni tshon zhes bya ba'i tshig gi don te/ tshon zhen par byed pa'i rang bzhin te 'dir yang sangs rgyas dang byang chub sems dpa' rnams kyi kha dog dang cha lugs dang /dkyil 'khor gyi ri mor snang bas sems can rnams dad pa skyes te mgu zhing zhen par 'gyur bas na tshon zhes bya'o/ /sa bcu yongs su rdzogs pa'i tshe ting nge 'dzin 'di rab tu thob par 'gyur te/ ting nge 'dzin 'di rab tu thob pa gzhan gyis thob pa ma yin gyi/ rang gi sems yongs su shes pa las thob pa de bas na/ gsungs pa de ni sems kun zhes pas ni/ /rnyed kyi gzhan las ma yin no/ /zhes pa'o/ /de la sems yongs su shes pa yang gsang ba'i bdag po rang gi sems ni sngon po yang ma yin zhes pa nas rnam pa thams cad du btsal kyang rnyed par mi 'gyur ro zhes pa'i bar du byang chub kyi sems bshad pa'i skabs su bshad zin to//gnyis po yongs su spangs pa ni/ /sangs rgyas rdzogs rnams de la dad/ /stong pa chen por gsungs pa ni/ /kun mkhyen ye shes rdzogs byed pa'o ni kun du sangs rgyas pa'i ting nge 'dzin de gnyis yongs su spangs zhes pa ni/gzung ba dang 'dzin pa spangs pa dang stong pa'i rang bzhin du 'du shes gnyis spangs pa ste/ sa bcu gcig pa kun du bzang po'i sa la gnas pa'i tshe chos thams cad stong pa'i rang bzhin no snyam nas stong par 'du shes pa de spangs te/stong pa'i rang bzhin du yang yod pa ma yin no snyam pa'i 'du shes tsam la gnas pa ste/ de bas na stong par 'du shes pa yang spangs pas stong pa chen po zhes bya'o/ /kun mkhyen ye shes rdzogs byed pa'i/ /zhes pa ni kun du sangs rgyas pa'i de ma thag tu 'du shes tsam po yang spangs pa'i mtshan nyid thams cad mkhyen pa'i ye shes 'thob par 'gyur te/kun du sangs rgyas pa de thams cad mkhyen pa'i ye shes la sbyor ba byed pas na/ kun mkhyen ye shes rdzogs byed pa/ /zhes pa'o/ /de bas na rnam pa kun dul yang stong pa nyid kyi ting nge 'dzin rtag tu dran par bya'o zhes pa ni de ltar stong pa nyid kyi ting nge 'dzin des thams cad mkhyen pa rdzogs par byed pas na yan lag bzhis byin gyis brlab pa dang /bdag gi lhar sbyor ba dang / dbang chen dang chu'i dkyil 'khor gyi ting nge 'dzin la sogs pa thams cad la 'di lta bu'i stong pa nyid rtag tu goms par bya'o zhes pa'o//da ni byang chub sems dpa' dang / nyan thos dang rang sangs rgyas rnams so so'i ting nge 'dzin rnams bstan pa'i phyir/ bcom ldan 'das ting nge 'dzin la mnyam par zhugs te/ ting nge 'dzin de las bzhengs nas byang chub sems dpa' la sogs pa'i ting nge 'dzin de rnams bstan pa'i skabs bshad de/de la bcom ldan 'das rnam par snang mdzad sangs rgyas thams cad dang mol nas zhes pa nas/ sems can rnams la snying brtse'i phyir/ /ngas ni thams cad bshad pa yin// zhes pa'i bar du byang chub sems dpa'i ting nge 'dzin kun du sangs rgyas pa'i mtshan nyid dpa' bo chen po'i ting nge 'dzin la gnas nas bdud bzhi bcom pa'i rang bzhin 'chad de/ sangs rgyas thams cad dang mol nas zhes pa ni sangs rgyas thams cad dgongs pa mthun pas bya ba gcig tu bstan pa ste/bsod nams dang ye shes kyi tshogs dang chos kyi sku dang / sems can gyi don byed par mnyam pa nyid kyi phyir ro/ /sangs rgyas thams cad dang rgyud gcig pa stobs mgyogs pa'i ting nge 'dzin la snyoms par zhugs so zhes pa ni ting nge 'dzin de'i ming ste/ sangs rgyas thams cad dang rgyud gcig tu zhes pa ni sems can gyi don du spyod pa sna tshogs 'byung yang /sangs rgyas thams cad rgyud gcig pa las byung ba ni chos kyi ro gcig pa las byung ste/ dper na me mar mang po yang 'od 'dres par gyur na gcig ste dbyer med pa dang 'dra'o/ /stobs zhes pa ni thogs pa med pa'i mthu'o//mgyogs zhes pa ni mthu de sems can gyi don la myur ba'o/ /snying por byang chub 'dug nas su/ /bdud bzhi yang ni shin tu bcom/ /zhes pa nas/ sems can rnams la snying pa rtse'i phyir/ /des ni thams cad bshad pa yin/ /zhes pa'i bar kun du sangs rgyas pa'i ting nge 'dzin gong du bshad pa de nyid dpa' bo chen po'i ting nge 'dzin la gnas nas stong pa nyid kyi ting nge 'dzin des bdud bzhi bcom pa bstan pa ste/de la/ bdud bzhi yang ni shin tu bcom/ /zhes pa ni phung po'i bdud dang / nyon mongs pa'i bdud dang / 'chi bdag gi bdud dang /lha'i bu'i bdud rnams bcom pa ste/ de yang kun rdzob dang don dam pa gnyis su rig par bya'o/ /de la kun rdzob tu bdud bzhi bcom pa ni byang chub chen por lha'i bu'i bdud dang nyon mongs pa'i bdud gnyis bcom/ phung po'i bdud dang 'chi ba'i bdud gnyis de'i zhar la bcom pa ste/theg pa chung ngu'i lugs la grags pa'o/ /skabs 'dir chos thams cad ma byung ma skyes par chud nas/ bdud rnam pa bzhi char yang dmigs su med pa'i tshul gyis bcom ste/ ma skyes pa las sangs rgyas zhes pa la sogs pa'i tshigs su bcad pa dang sbyar ro//de nas dpa' bo chen po zhes pa nas/ dpa' bo chen po zhes kyang bya/ /zhes pa'i bar du de ltar bdud rnam pa bzhi bcom nas tshangs pa la sogs pa'i 'jig rten pa'i lha rnams bcom ldan 'das la khyod ni dpa' bo chen po 'jigs pa dang bral ba'o zhes dga' bzhin du tshig tu 'dod pas na/nga ni dpa' bo chen po yin/ /zhes bcom ldan 'das kyis gsungs pa'o/ /ma skyes pa las ngas sangs rgyas/ /zhes pa ni de ltar bdud rnam bzhi bcom pa de dmigs pa dang bcas pas bcom pa ma yin/ chos thams cad ma skyes ma byung bar ngas chud nas dmigs su med pa'i tshul gyis zhes pa dang 'brel to//chos kyi dbyings kyi rol phyir yid/ /ces pa ni tshon 'di rnams la chos kyi dbyings dang ldan pa'i sangs rgyas kyi sku'i rang bzhin yi ge rnams kyis byin gyis brlabs pas/ tshon 'dis chos kyi dbyings mtshon par 'gyur te/ ro gcig pa ni chos kyi dbyings kyi ro zhes bya'o//de ltar yi ge rnams kyis byin gyis rlob pa yang / yi ge 'khor lo'i dkyil 'khor skabs su blta bar bya'o/ /tshon ni nang logs 'dug nas bri/ /phyi rol 'dug nas tshon mi bri/ /zhes pa ni ji lta bur na tshon zhes zhus pa'i lan te/ sngags pa dkyil 'khor gyi nang du zhugs nas nang du bsnur zhing tshon rnams bri zhes pa'o/ /dkar po ni thog mar gtang / de yi 'og tu dmar po ste/ /de nas su ni ser po gtang / /de yi 'og tu sngon po gtang / /kun gyi nang rol nag po ste/ /tshon 'gyed tshul smras de bzhin no//zhes pa ni/ de la gang gi thog mar gtang / /zhes zhus pa dang / ci'i phyir de la tshon zhes bya/ /zhes pa dang / dang por dris pa'i lan gnyis ka cig car bka' stsal pa ste/ tshon rnams de ltar dgye ba'i dgongs pa yang 'di lta ste/ dkar po ni chos kyi dbyings kyi rang bzhin no//de ltar chos kyi dbyings su gyur pa'i 'og tu thabs kyi sgo nas sems can gyi don byed pa'i snying rjes sems can la zhen pa'i rang bzhin dmar po gtang ngo / /de'i 'og tu sems can gyi don de nyid rgyas par 'gyur te rgyas pa'i mtshan nyid tshon ser po gtang ngo / /de ltar rgyas pa'i 'og tu thams cad byed nus par 'gyur te/de bas na de'i 'og tu tshon ljang gu kha dog thams cad pa gtang ngo / /de ltar las thams cad nus na gdu ga pa dang ma rungs pa rnams 'dul ba mngon par spyod pa'i mtshan nyid kha dog nag po gtang ste/ thams cad ni nang rol du gtang ba ni gsang ba'i phyir ro//gzhan yang de bzhin gshegs pa'i skur byin gyis brlab pa la sogs pa'i rim pa'i yi ge 'khor lo bskor ba'i dkyil 'khor du blta bar bya'o/ /rta babs tshad ni zhes pa nas/ /dpa' bas rim gyis che bar ro/ /zhes pa'i bar du ni/ rta babs rnams kyi tshad dang ni//sgo khyud rnams kyang de bzhin te/ /sgo rnams kyang ni rig par bya/ /mgon pos de dag 'dra ba yi/ /tshad gsungs zhes zhus pa'i lan te/ /rta babs kyi ni tshad kyang ni/ /dkyil 'khor dbus ma'i tshad du bya/ /zhes pa ni rta babs kyi zheng gi tshad snying po'i dkyil 'khor gyi ngos dang mnyam par bya zhes pa'o//sgo khyud pad+mor mnyam pa sor bcu drug tu bcas pa zhes pa ni sgo khyud kyang rta babs kyi tshad byed de de dang mnyam par bya'o/ /thog mar sgo rnams rig par bya ba dkyil 'khor mnyam par te/ de las skyed par rig par bya'o/ /dpa' bas che bar ro zhes pa ni nang gi dkyil 'khor gyi sgo snying po pad+mo sor bcu drug pa dang mnyam par bya/de'i phyi ma de la sor bzhis skyed/ de'i phyi rim yang sor bzhis skyed de/ de ltar rim gyis rim gyis che bar bya zhes pa'o/ /sgo rnams kyi ni bar bar du/ /sgo srung rnams ni gzhag par bya/ /zhes pas dkyil 'khor gyi sgo'i pha rol tshu rol gyi ngos su 'og nas smos pa'i sgo srung rnams gzhag ste/shAkya thub pa'i sgo srung ni sngar tshang bar gsungs zin pas 'og nas 'byung ba mi snyag go/ /bcom ldan 'das rnam par snang mdzad kyi sgo srung yang / thub dka' ba dang mngon du ba/ /zhes pa gnyis tshang bar gsungs pas 'og nas 'byung ba'i rnam pa las ming gis smos med pa 'di nyid gzhag par bya'o//sems mgu ba ni ting nge 'dzin te/ mdor bshad pa ni de yin no zhes pa ni ting nge 'dzin ji ltar rtogs pa yang zhes zhus pa'i lan te/ de la ting nge 'dzin zhes bya ba ni sems rtse gcig pa'i mtshan nyid de/de yang kun rdzob dang don dam pa la rtse gcig pa ni/ chu dang dbang chen gyi dkyil 'khor la sogs pa la sems rtse gcig par dmigs pa'o/ /don dam pa ni gzung ba dang 'dzin pa spangs pa stong pa'i rang bzhin la sems rtse gcig pa ste/ gnyis gang yang rung ba la ting nge 'dzin rtse gcig tu gyur pa sems gud du mi 'gyur bar zhen cing tshim par byed pa ni/ sems mgu ba zhes bya ste/ de ni ting nge 'dzin spyi'i mtshan nyid do/ /khyad par du ni sems dpa' che/ /nyon cig pa yi yid kyis te/ /zhes pa ni/ de bas rnam pa kun la yang //stong nyid rtag par dran par bya'o/ /zhes pa'i bar du ni don dam pa ting nge 'dzin gyi khyad par du bshad pa ste/ de yang sangs rgyas kyi ting nge 'dzin dang / kun du sangs rgyas pa'i ting nge 'dzin to/ /de las sangs rgyas kyi ting nge 'dzin ni sangs rgyas kun gyi stong pa nyid kyi ting nge 'dzin zhes rgyal bas gsungs zhes pa ste/de la stong pa nyid ces pa ni/ phung po dang khams dang skye mched la sogs pa'i chos rnams thog ma nas ma skyes ma byung ba'i tshul bshig gam rdul phra mol sogs pa'i tshul bshig na yod pa ma yin te/ de rnams kyi ji bzhin par snang ba yang yod pa ma yin te/de ltar gzung ba dang 'dzin pa'i mtshan nyid med par chud pa ni stong pa nyid de/ de ltar chos rnams so so'i mtshan nyid stong pa nyid kyi rang bzhin du chud de/ stong pa'i rang bzhin de las sems gzhan du mi 'gyur zhing de nyid la rtse gcig par gyur pa ni sa bcu rdzogs pa'i byang chub sems dpa' rnams kyi ting nge 'dzin de thob ste/de'i tshe sangs rgyas zhes bya'o/ /de ltar gzung ba dang 'dzin pa'i cha yongs su spangs pa'i stong pa nyid sa rab tu dga' ba de dag gi tshe na ma thob pa ma yin mod kyi/ sa rab tu dga' ba nas sa brgyad pa'i bar du log pa'i gnyen po yongs su ma spangs pas lhun gyis grub pa nyid du mi 'jug pa'i phyir de dag la mi bya/sa brgyad pa yan chad log pa'i gnyen po rnams spangs te lhun gyis grub par 'jug pas na/ sa brgyad sa dgu sa bcu la sbyor ro/ /chom sa zhes pa ste/ ma skyes pa la sangs sangs rgyas/ /zhes pa ni dngos su na chos thams cad thog mnas ma skyes par chud pas phung po yang dmigs su med pa'i phyir phung po'i bdud bcom pa'o/ /ngag gi spyod yul dang bral zhes pa ni rnam par rtog pa dang bral zhes pa ste/ rtog pa'i spyod yul las 'das pas dngos su lha'i bu'i bdud bcom pa'o//nyes pa kun nas rnam par grol/ /zhes pa ni nyon mongs pa las rnam par grol bas dngos su na nyon mongs pa'i bdud bcom pa'o/ /rgyu dang rkyen du bral ba ste/ /zhes pa ni rgyu rkyen med pas na ma skyes pas 'chi ba med de/ dngos su ma 'chi ba'i bdud bcom pa'o//ye shes nam mkha' stong pa 'dra/ /zhes pa ni de ltar rnam pa bzhi char las grol bas na ji bzhin pa med pa'i ye shes rang bzhin gyis 'od dngas pa stong pa'i mtshan nyid nam mkha' dang 'dra bar ma skyes zhes pa'o/ /ji ltar 'byung ba nga yis byung / /zhes pa ni stong pa nyid kyi ye shes de lta bur phyin ci ma log pa nyid du ngas thob ces pa'o//shin tu dri ma med pa zhes pa ni ye shes de shes bya dang nyon mongs pa'i sgrib pa yongs su spangs pa zhes pa'o/ /de kho na zhes pa ni phyin ci ma log pa yongs su rdzogs pa'i mtshan nyid pas rigs pa dang gzhung gis sun dbyung du mi nus pas na stong pa nyid kyi ye shes de kho na zhes bya'o//ming ni sangs rgyas mtshan nyid ces pa ni kun du sangs rgyas pa zhes bya ba de stong pa'i rang bzhin du 'du shes pa yang spangs nas stong pa nyid kyi rang bzhin du yang yod pa yin par shes pa'i 'du shes de tsam la gnas pa zhes pa'o/ /de bas nga ni yang dag nyid//byin gyi rlabs kyi mthu yis ni/ /yi ge 'bru ru smras pa ni/ /'jig rten du ni snang byed pa/ /sems can rnams la snying brtse'i phyir/ /ngas ni thams cad bshad pa yin/ /zhes pa ni de ltar ngas thams cad thog ma nas ma skyes ma byung bar chud kyang / sems can rnams la snying brtse ba'i phyir yang dag pa nyid kyis chos de'i tshig tu brjod pa'i phyir yi ge'i 'bru rnams su byin gyis brlabs te/yi ge'i 'bru rnams kyang dpa' bo chen po'i ting nge 'dzin gyi skabs su blta bar bya'o/ /'di rnams kyi rim pa yang bsdus pa'i don gyi nang du bshad pas shin tu ma bshad pa'o/ /de nas rdo rje 'dzin pa chen po ngo mtshar du gyur nas mig gdangs te spyi bos phyag 'tshal nas tshig 'di skad gsol to zhes pa nas/gong du sangs rgyas dang kun du sangs rgyas pa'i ting nge 'dzin stong pa nyid 'phro ba med pa'i chos sangs rgyas rnams kyis chud la 'phro ba dang bcas pa'i chos rnams yig 'bru la sogs pa'i sgo nas bstod cing bshad pa de ngo mtshar che bar gyur pa ste/de bas na gsungs pa/ sangs rgyas kun kyang ngo mtshar che/ /zhes pa nas/ sngags kyi mtshan nyid 'di yang ni/ /bden pa gnyis la gnas pa ste/ /zhes pa'i bar du ste/ de la/ sangs rgyas kun kyang ngo mtshar che//zhes pa ni sangs rgyas dang kun sangs rgyas yang dag par rdzogs pa'i sangs rgyas kun kyang 'phro ba med pa'i chos chud nas 'phro ba dang bcas pa chos 'chad pas na ngo mtshar che zhes pa'o/ /thabs dang shes rab bsam mi khyab/ /ces pa ni shes rab ni chos thams cad stong pa nyid du chud pa'o//thabs ni stong pa nyid kyi chos te yi ge'i 'bru la sogs pa bstan nas/ rab dang 'bring dang tha ma la sogs pa 'grub pa dang / zhi ba la sogs pa'i las rnams byed pa'i sgo nas sems can rnams 'jud par byed pa de ni thabs dang shes rab bsam gyis mi khyab pa'o/ /'od 'phro kun dang bral ba ni/chos dang sangs rgyas rang byung ba'o/ /de ltar sangs rgyas rnams kyis 'phro ba med pa'i chos chud nas zhes pa ste sangs rgyas zhes pa ni chud pa'i don te/ de ltar 'phro ba med pa'i don chud nas 'jig rten pa kun re ba yongs su rdzogs par bya ba'i phyir chos de 'chad pa ni ngo mtshar che'o zhes pa dang sbyar ro//rang byung ba zhes pa ni sa brgyad pa yan chad kyi byang chub sems dpa' rnams gzhan gyis mi bkri ba'i phyir rang byung ba zhes bya'o/ /sngags kyi mtshan nyid 'di yang sngags kyi tshul la gnas zhes pa ni de ltar 'phro ba med pa'i chos chud nas 'phro ba dang bcas pa'i chos 'chad pas na/sngags kyi mtshan nyid 'di yang kun rdzob dang don dam pa'i bden pa gnyis ka la gnas pa ste/ don dam pa'i bden pa ni stong pa nyid kyi rang bzhin no/ /kun rdzob kyi bden pa ni grub pa mchog la sogs pa dang / zhi ba la sogs pa'i las rnams byed pa'o/ /sems can kun gyis shes na yang //'jig rten gyi yang mchod rten 'gyur/ /zhes pa ni sngags kyi tshul de lta bus grub pa la sogs par ma gyur kyang / sems can rnams kyis mnyan pa dang bsams pa tsam gyi sgo nas shes pa tsam gyis kyang 'jig rten pa rnams kyi mchod rten du 'gyur ro zhes pa'o/ /gzhan yang gsang ba'i bdag po skye ba gcig gis thogs pa med pa'i byang chub sems dpa' zhes pa nas/dgos pa'i sa la gnas pa ni/ /de dag sangs rgyas sa la gnas/ /zhes pa'i bar du sa bcu yongs su rdzogs pa'i byang chub sems dpa' sangs rgyas kyi sa la gnas pa de chos rnams ma byung ma skyes pa stong pa nyid kyi rang bzhin du chud nas/sems can gyi don du thabs kyi 'khor los bya ba yod pa'i sa la gnas pa'i ting nge 'dzin bshad pa ste/ skye ba gcig gis thogs pa zhes pa ni sa bcu'i byang chub sems dpa' rnams de bzhin gshegs pa'i sa la chos kyi rgyal tshab kyi sar skye ba gcig pus thogs pa zhes pa'o//gnyis su na sa bcu'i byang byang chub sems dpa' rnams sa bcu nyid du ris mthun par gyur pas bcu pa rnams rigs gcig pa zhes pa'o/ /de dag don dang bral ba ni/ /'jig rten gyi ni mtshan shes nas/ /don gyi sa la gnas pa ni/ /de dag sangs rgyas la gnas so//zhes pa ni 'jig rten rnams gang gi 'bras bu yang ma yin te/ rgyu gang las kyang ma byung bas thog ma nas ma skyes par chud kyang bya ba'i sa la gnas te/ sems can rnams kyi don du sbyar ba dang / sangs rgyas kyi zhing rnam pa sna tshogs kyis brgyan pa la sogs pa mdzad pas na/sangs rgyas kyi sa la gnas pa'i byang chub sems dpa' de rnams bya ba'i sa la gnas pa ste/ de ni byang chub sems dpa' sa bcu pa sangs rgyas kyi sa la gnas pa rnams kyi ting nge 'dzin gyi tshul lo/ /gzhan yang gsang ba'i bdag po sa brgyad pa la gnas pa'i byang chub sems dpa' zhes pa nas/'jig rten sgyu ma ltar shes te/ /'jig rten rnams kyi dbang po'o/ /zhes pa'i bar dus brgyad pa'i byang chub sems dpa' rnams kyi ting nge 'dzin bshad pa ste/ de la/ chos rnams kun ni ma rnyed de/ /zhes pa'i chos thams cad rang bzhin gyis shin tu dngos po med do//dmigs su med par chud ces pa ni chos rnams dngos po med par de sngon yod pa las zhig ste med par 'gyur te/ dngos po med pa'am 'on te thog ma nas ma byung ma skyes pas dngos po med ce na/ de bas na gsungs pa/ byung dang skye ba yongs su bral/ /zhes pa ste thog ma nas ma skyes pas slar 'byung ba yang mi 'gyur te/thog ma nas ma byung ma skyes pas dngos po med par shes so/ /'jig rten sgyu ma ltar shes te/ /zhes pa ni de lta bu'i chos rnams dngos po med par chud pas/ 'jig rten gyi chos rnams kun rdzob tu snang bar 'gyur pa yang dngos po med pa las snang ba ste ji ltar sgyu ma dngos po med pa las snang ba ltar shes so zhes pa'o//'jig rten rnams kyi dbang po zhes pa ni/ de ltar chos thams cad sgyu ma lta bur shes pas byang chub sems dpa' de 'jig rten pa'i nang na gtso bo dam par 'gyur ba'o zhes pa'o/ /gzhan yang gsang ba'i bdag po nyan thos pa rnams zhes pas dngos po shin tu med pa'i ye shes mi spyod de/nyan thos kyi ting nge 'dzin gyi tshul lo zhes pa'i bar du 'phags pa nyan thos pa rnams kyi ting nge 'dzin bshad pa ste/ 'phags pa nyan thos pa rnams ni phung po la sogs pa'i chos rnams rgyu dang 'bras bu'i ngo bo nyid skye ba dang 'jig par lta ste dmigs pa dang bcas pa rnams so//de ltar skye ba dang 'jig pa yod pas rtag pa dang chad pa'i mtha' gnyis bshig pa dang / skye ba yod par mthong bas chad pa'i mtha' bshig ste/ 'jig pa yod par mthong bas rtag pa'i mtha' bshig go//de ltar skye ba dang 'jig pa yod par mthong bas chos rnams shin tu dngos po med par mthong ba'i ye shes mi skye ste/ shin tu dngos po med cing ye shes skye ba'i rgyu ma rnyed pa'i phyir ro/ /gsang ba'i bdag po rang sangs rgyas rnams ni zhes pa nas/ de ni rang sangs rgyas rnams kyi ting nge 'dzin gyi tshul lo zhes khyad par 'phags pa rang sangs rgyas rnams kyi ting nge 'dzin gyi tshul bshad pa ste/rgyu dang 'bras bu rnam bsgoms nas/ /zhes pa ni rgyu dang 'bras bu sun 'byin pa'i tshul du rnam par bshig ces pa ste/ chos rnams kyi rgyu dang rkyen rnams kyi ngo bo skad cig ma'i cha mi rtag pa gnas pa ni khab kyi rtse la yungs kar gyi 'bras bu mi chags pa dang 'dra ste/brtag mi bzod pas rgyu dang 'bras bu dngos po med par chud do/ /brjod du med pa'i chos kyi tshul la gnas pa'i ye shes 'byung ngo zhes pa ni de ltar chos rnams yod pa ma yin pa'i tshig gis brjod du med par mthong ba'i ye shes skyes nas/tshig tu brjod pa yang 'gog par byed de/ de bas na gsungs pa chos thams cad brjod du med pa'o zhes shin tu ngag dgag pa'i ting nge 'dzin la 'dug ces pa'o/ /mdor na 'phags pa rang sangs rgyas rnams rgyu dang 'bras bu'i dngos po bshig nas/rang bzhin med par mthong bas chos la bdag med par chud kyang ngag dgag pa tsam la gnas pas byang chub sems dpa' ltar ji bzhin pa med pa'i ye shes kyi snang ba la mi dmigs so/ /nyan thos ltar chud pa gang zag la bdag med pa ltar chud pa tsam yang ma yin no//gzhan yang gsang ba'i bdag po 'jig rten pa rnams ni rgyu las 'bras bu dang las byung ba yang rung / 'jig rten kyang rung dbang gzhan la las pa'i phyir/ stong pa'i ting nge 'dzin skyes te de ni 'jig rten gyi ting nge 'dzin gyi tshul lo zhes pa ni 'jig rten pa rnams kyi ting nge 'dzin gyi tshul te/'jig rten pa rnams ni las dang 'bras bu la sogs pa rgyu las skyes kyang / nged kyi bdag ces bya ba dbang po dang tshangs pa la sogs pas bskyed par chud/ chos thams cad dngos po med de stong pa nyid du mthong pa de yang rang bzhin gyis stong pa ma yin gyi/dbang po la sogs pas stong par byas so snyam nas stong pa nyid kyi ting nge 'dzin la gnas par byed do/ /gsang ba'i bdag po ting nge 'dzin gyi tshul ni de lta bu'o zhes pa nas/ 'jig rten gyi lha yang rung ste su sngags spyod pa dang / gang la gnas te tshul gyi cho ga 'chang na sems can rnams la phan par byed pa zhes pa'i bar du gong du bshad pa rnams kyi sdud pa'i tshig ste/ de dag so so'i ting nge 'dzin stong pa nyid kyi tshul du chud nas stong pa de la gnas te/ stong pa'i chos de nyid tshig dang yig 'brul la sogs pas ston cing 'chad pa ni/sems can rnams kyi don gyi phyir/ /zhes pa'o/ /de nas bcom ldan 'das kyis phyag na rdo rje gsang ba'i bdag po la 'di skad ces bka' stsal to/ /sngags rnams kyi sngags kyi mtshan nyid nyon cig ces pa nas/ rang sangs rgyas kyang de bzhin te/ /de yi khyad par bshad pa ni//ting 'dzin bye brag rig bya ba/ /rnam par las dang tshe sbyong ba'o/ /zhes pa'i bar du de bzhin gshegs pa dang kun du sangs rgyas pa dang sangs rgyas dang byang chub sems dpa' dang nyan thos dang rang sangs rgyas rnams kyi so so'i sngags kyi mtshan nyid bshad pa ste/ sngags kyi mtshan nyid de yang rnam pa gsum du rig par bya ste/sngags kyi lha dang / sngags kyi don dang / sngags kyi rang bzhin no/ /de la sngags kyi lha ni snying rje chen po 'byung ba'i dkyil 'khor du bshad zin te/ de yang de bzhin gshegs pa dang / kun du sangs rgyas pa dang sangs rgyas dang byang chub sems dpa' dang nyan thos dang rang sangs rgyas la sogs pa rnams nyid snying rje chen po'i dkyil 'khor du rigs gsum bkod pa rnams ni de bzhin gshegs pa'i dkyil 'khor bar ma na shAkya thub pa 'khor dang bcas te bzhugs pa ni kun du sangs rgyas so//dkyil 'khor tha ma na 'phags pa 'jam dpal la sogs pa sa bcu yongs su rdzogs pa'i byang chub sems dpa' gtso bo bzhugs pa rnams ni sangs rgyas rnams so//de las gzhan pa'i byang chub sems dpa' phyag na rin chen la sogs pa ni/ byang chub sems dpa' nyan thos dang rang sangs rgyas ni dngos su ma smos kyang /sprul pa'i skus 'dul ba'i nang du bdog pas na dkyil 'khor bar ma'i nang du 'dus par rig par bya'o/ /'jig rten pa rnams kyang dkyil 'khor bar ma de nyid kyi nang na dngos pos 'khor ba'o/ /sngags kyi don ni kun du sangs rgyas ba nas 'jig rten pa'i lha rnams kyi bar gyi ting nge 'dzin gyi gong du bshad pa ste/de yang kun rdzob dang don dam gnyis su shes par bya ste/ don dam ni rnam par grol ba'i stong pa'i rang bzhin no/ /kun rdzob ni don gyi sa la gnas zhes pa la sogs pa sems can gyi don du chos 'chad pa dang / bcom ldan 'das kyi yon tan stobs dang mi 'jigs pa la sogs pa'i yon tan gyi chos rnams so//sngags kyi rang bzhin yang rnam pa med pa bzhin shes par bya ste/ tshig dang 'bru dang dbyangs dang yul gyi skad rnams so/ /de la tshig ni yi ge'i 'bru mang po 'byung / 'dus pa las tshig tu langs par smra'o//'bru ni yi ge ka la sogs pa sngags kyi yi ge 'bru re ba'o/ /dbyangs ni yi ge a dang i la sogs pa gug skyed kyi ris su gtogs pa'o/ /yul skad ni so so'i yul na skad gang gis spyod spyad pa de nyid dang mthun par gsungs pa'o/ /sngags rnams kyi sngags kyi mtshan nyid nyon cig pa ni/sngar sngags rnams kyi mtshan nyid bshad du gsol zhes bcom ldan 'das la gsol pa de dang / ngas bshad kyis nyon cig pa ste/ sngags rnams kyi mtshan nyid ces mi smos par sngags rnams kyi sngags kyi mtshan nyid ces smos pa ni sngags rnams kyi mtshan nyid sngags kyi lha dang sngags kyi don gong du bshad pas na/da 'dir sngags rnams kyi sngags kyi mtshan nyid gsang bar smra ba'i rang bzhin gyi tshig rnams nyon cig ces pa'o/ /kun du sangs rgyas pa'i sngags rnams ni tshig las kyang ming dang mtshan mar rtogs shes pa ni dzi na dzika ces pa la sogs pa'i tshig smos pas 'di ni sangs rgyas kyi ming gi mtshan ma ste/sangs rgyas kyi sngags shes par byed pa'o/ /tshig de rnams ni dbang gi yin pas/ /sngags kyi don kun sgrub pa'o/ /zhes pa ni kun du sangs rgyas pa'i sngags kyi tshig smos pa yang dbang chen gyi ting nge 'dzin gyi mtshan ma ste/ rgyas ba'i don thams cad 'grub par 'gyur ba'o zhes pa'o//kha cig skul ba'i tshig dang ni/ /rang ming thog mar bcas pa'o/ /zhes pa ni sngags kyi tshig las sngags kyi lha'i mthu dang yon tan rnams smos pa dang / zhi bar gyur cig ces pa la sogs pa'i las rnams skul ba smos pa dang / dzin dzika ces pa la sogs pa lha'i mtshan smos pas lha gang gi sngags yin pa rig par 'gyur ba'o//hUM phaT ces pa la sogs pa dang ldan pa'i tshig rnams ni gong du gtsug tor brgyad smos pa la sogs pa'i sngags su shes par bya ste/ gtsug tor gyi sngags rnams gzhung gzhan las hUM dang phaT med pa yang 'byung / gtsug tor gyi ma yin pa'i lha rnams kyi sngags hUM dang phaT du bcas pa yang 'byung bas na/ hUM dang phaT du bcas pa'i gtsug tor gyi sngags 'di rnams ni rgyud 'di nyid du smos par shes par bya'o/ /zung choms zhes pa rnams dang / snun cig sod cig khos shig pa dang khro bo dang ni ci bgyi zhes pa ni tshig de lta bu drag shul can dang ldan pa ni/sngags ni khro bo rnams dang ci bgyi zhes pa rnams kyi sngags su shes par bya'o/ /na maHswA hA la sogs pa dang ldan zhes pa nas/ mgon po byang chub sems dpa'o/ /zhes pa'i bar du ni sa bcu la gnas pa'i byang chub sems dpa' sangs rgyas zhes bya ba dang /de las gzhan pa'i byang chub sems dpa' rnams kyi sngags te/ mgon phyag 'tshal ba dang ldan zhing tshig mjug swA hA dang bcas pa dang / byang chub sems dpa' so so'i ting nge 'dzin gyi rang bzhin gyi tshig rnams smos pa dang / zung zhig choms shig pa la sogs pa'i tshig drag shul can rnams med pa zhi ba'i tshig rnam par dag pa'i mtshan nyid kyi tshig dang ldan pa'i sngags ni/sangs rgyas dang byang chub sems dpa' rnams yin par shes par bya'o/ /nyan thos rnams kyi sngags ni tshig re re la 'jug pa ste zhes pa ni/ 'phags pa nyan thos rnams kyi sngags rnams ni spyi bo dang gtsug phud la sogs pa yan lag gi sngags rnams med pas na gcig pu'o//byang chub sems dpa' ltar gzugs sna tshogs su mi 'gyur gyi/ dge slong gi tshul gcig pu 'dzin pa'am/ gang zag la bdag med pa gcig pu chud pa ni gcig pu 'dug pa zhes pa'o//rang sangs rgyas dang de bzhin te/ de'i khyad par bshad pa ni ting nge 'dzin bye brag rig par bya ba rnam par sbyor bar bya'o zhes pa ni rang sangs rgyas kyi sngags rnams kyang mtshan nyid gzhan ni nyan thos kyi dang mthun te/ khyad par du ni rgyu dang 'bras bu bshig nas chos rnams stong par chud pa'i ting nge 'dzin dang ldan par shes par bya'o//de la 'dir kun du sangs rgyas pa la sogs pa'i mtshan nyid bshad pa la de bzhin gshegs pa'i sngags kyi mtshan nyid ci'i phyir dngos su ma smos she na/ kun du sangs rgyas pa'i sngags de nyid de bzhin gshegs pa'i ste/ ci'i phyir zhe na/kun du sangs rgyas pa la sogs pa de rnams pha rol tu phyin pa spyod pa las byung ba yin na yang / de bzhin gshegs pa'i rgyu yin pas de bzhin gshegs pa dang tha mi dad/ 'on te ye shes kyi sems can yin yang / de nyid de bzhin gshegs pa'i 'bras bu yin pas tha mi dad pas de bzhin gshegs pa'i sngags so//don dam par byang chub sems dpa' yang de bzhin gshegs pa'i sngags kyi yi ge 'bru re re pa rnams kyi ting nge 'dzin gyi sgo stong pa nyid kyi rang bzhin du ston par gcig pas na tha mi dad do/ /yang na de bzhin gshegs pa'i sngags rnams ni snying po yi ge a rnam pa bzhi rnams 'og nas bshad pa'o//'on kyang gsang ba'i bdag po sngags rnams kyi mtshan nyid ni sangs rgyas thams cad kyis ma byas/ byed du ma bcug /rjes su smos pa ma yin no zhes pa nas/ sngags kyi cho ga kun rab tu 'chad do zhes pa'i bar du sngags rnams kyi rang bzhin bshad pa ste/tshig las ming dang mtshan mar rtog pa'i mtshan nyid kyi sngags bskul ba la sogs pa dang ldan pa'i tshig gis don gang bskul ba de grub par byed pa'i mthu'i rang bzhin rnams mthu 'dis don 'di 'grub par bya'o zhes de bzhin gshegs pas sngags kyi rang bzhin te byas pa yin nam/ de bzhin du gzhan la byed du bcug gam/ gzhan byed pa la rjes su yi rang na yang de bzhin gshegs pa nyid kyi mtshan ma dang bral bas/ byed du bcug pa'am rjes su yi rang ba ma yin te/ ci'i phyir zhe na/ sngags kyi rang bzhin de bzhin gshegs pas mdzad par gyur pa na de bzhin gshegs pa ni sems can thams cad kyi don mdzad pas na/bsgrub par brtsam pa thams cad kyi nges par 'gyur te/ de ltar sgrub pa thams cad kyis 'grub pa ma yin pas de bzhin gshegs pas mdzad pa ma yin no/ /de ste/ sngags kyi mthu'i don dang mthu gnyis rtag tu gcig la gcig 'brel pa yin na/tshig brjod pa tsam gyis don de nyid 'gyur te/ dper na me zhes tshig tu brjod na me'i rang bzhin sreg par byed pa yin yang tshig tu brjod pas kha 'tshig par mi 'gyur ba dang 'dra'o/ /de bas na sngags kyi mthu de ni de bzhin gshegs pas mdzad pa yang ma yin/gzhan byed du bcug pa'am/ gzhan byed pa la rjes su yi rang ba ma yin zhes pa'o/ /de ci'i phyir zhe na/ chos rnams kyi chos nyid de lta bu'o/ /de 'di lta ste yang dag par gshegs pa byung ba yang rung / ma byung ba yang rung / chos rnams kyi chos nyid de lta bu yongs su 'jug pa yin te/'di lta ste sngags rnams kyi sngags kyi mtshan nyid du zhes pa ni tshig las don ming dang mtshan mar rtog pa'i sngags de bskul ba la sogs pa'i tshig dang don du ldan na yang bskul pa'i don de nyid sus kyang byas pa ma yin te/ rgyu gzhan la mi ltos par chos de ltar yi nas 'dug pa ni/dper na bu ram gyi ro mngar ba dang lan tshwa'i ro bro ba'i rang bzhin te/ rgyu gang gis kyang 'dus ma byas par mngar ba'i rang bzhin ye nas 'dug pa bzhin no/ /de ste de bzhin gshegs pas byas pa ma yin nam/ de bzhin gshegs pa byung ba na sngags kyi rang bzhin de yang yod/ma byung na ni med par 'gyur te de lta ma yin pas na de bzhin gshegs pa byung yang rung ma byung yang rung / chos rnams kyi chos nyid de lta bu ni yongs kyis 'dug pa ma yin te/ /de 'di lta ste/ sngags rnams kyi sngags kyi chos nyid kyi don zhes pa'o/ /de ltar de gsang ba'i bdag po nam nga yang dag par gshegs pa'i sangs rgyas thams cad mkhyen pa thams cad gzigs pa 'jig du 'byung ba ni zhes pa nas/dbyangs rnams du mar byin gyis brlabs nas sngags kyi tshul 'chad do zhes pa'i bar du sngags kyi chos nyid ye nas de ltar 'dug pa la tshig dang yig 'bru dang dbyangs rnams su ji ltar rig par rnam par dgod pa tsam/de bzhin gshegs par mdzad par bstan pa ste yang dag par rdzogs pa'i sangs rgyas zhes pa ni/ mnyam pa nyid kyi ye shes kyi phyin ci log pa nyid du mngon par byang chub pa'o/ /thams cad mkhyen pa zhes pa ni so sor rtog pa'i ye shes kyis kun rdzob dang don dam pa'i tshul du thams cad mkhyen pa'o thams cad gzigs pa'o zhes pa ni me long lta bu'i ye shes dang /bya ba nan tan gyi ye shes yun du gzigs pa'o/ /de lta bu'i thams cad mkhyen pa 'jig rten du byung ba na tshul rnam pa du ma dang zhes pa ni sangs rgyas dang byang chub sems dpa' dang nyan thos dang rang sangs rgyas dang 'jig rten la sogs pa'i tshul rnam pa mang po'o//rjes su mthun par sngags kyi chos nyid ye nas 'dug pa de yi ge 'bru rnams su ston pa ni tshig dang 'bru dang dbyangs rnam pa sna tshogs su bstan pa'o//gnyis su de bzhin gshegs pa'i rigs dang / pad+mo'i rigs dang / rdo rje'i rigs la sogs pa'i tshul sna tshogs dang zhes pa'i sngags kyi tshig de rnams kyang la la ni sgra ji bzhin par 'chad/ la la ni ldem po ngag tu ston zhes pa'o/ /bsam pa rnam pa du ma'i sems can la la zhes pa ni/sems can la la zhi ba 'dod/ la la sangs rgyas par 'dod/ la la grub par 'dod/ la la 'bring 'dod pa la sogs pa'i sems can rnams ji ltar 'dod pa dang rjes su mthun par sngags kyi chos nyid de/ dzin dzika ces pa la sogs tshig rnam pa du ma dang / ka la sogs pa'i 'bru rnam pa du ma dang / dri ma med pa la sogs pa'i skad du smra ba rnam pa du ma'i mtshan mar bkod de ston zhes pa'o/ /dbyangs rnam pa du mar byin gyis brlabs nas zhes pa ni a i la sogs pa'i gug skyed kyi tshul rnam pa du ma'am/ ban+d+har ba la sogs pa'i dbyangs sna tshogs su ston zhes pa'o//ji ltar na de bzhin gshegs pa'i sngags rnams kyi tshig 'bru dang yi ger byin gyis rlob ce na zhes pa nas/ ji ltar rigs par sngags kyi cho ga kun rab tu 'chang ngo zhes pa'i bar du sngags kyi chos nyid yi ge 'bru la sogs par byin gyis brlabs te ston pa yang de bzhin gshegs pa'i yon tan stobs dang mi 'jigs pa la sogs pa de dag sngags kyi 'brur byin gyis brlabs pa ste ston par yang bshad de/tshig dang 'bru rnams su byin gyis rlob pa yang kun rdzob dang don dam pa gnyis su rig par bya ste/ de la kun rdzob kyi ston pa ni stobs dang mi 'jigs pa la sogs pa rnams tshig dang 'bru la sogs par byin gyis brlabs te ston pa'o//don dam par ston pa ni chos thams cad thog ma nas ma skyes ma byung ba stong pa nyid kyi rang bzhin yi ge la sogs pa'i 'brur ston pa ste/ de bas na gsungs pa/ bskal pa bye ba brgya phrag du mar sngags pa'i bden pa'i tshig dang /'phags pa'i bden pa bzhi po rnams dang zhes pa la sogs pa bskal pa bye ba brgya phrag du ma zhes pa ni mang po'i mtshan ma ste/ 'phags pa'i bden pa la sogs pa kun la sbyar bar bya'o/ /de bzhin gshegs pas bskal pa du mar bden pa'i tshig bsags pa ste/sngags kyi yi ge 'brur byin gyis brlabs pas na/ su bsgrub par 'dod pa des kyang bden pa'i tshig rjes su bsrung bar shes par bya'o/ /brdzun du smra bas sngags rnams mi 'grub bo zhes rgyud gzhan las kyang 'byung ngo / /'phags pa'i bden pa bzhi dang /dran pa nye bar gzhag pa dang / rdzu 'phrul gyi rkang pa dang / stobs bcu dang / byang chub kyi yan lag dang / tshad med pa bzhi dang / chos ma 'dres pa la sogs pa dang gzhung gzhan las grags pa nyid do/ /gsang ba'i bdag po mdor na de bzhin gshegs pa thams cad kyi ye shes thams cad kyang de bzhin gshegs pa'i rang bzhin gyi bsod nams dang ye shes kyi stobs dang /rang gi smon lam gyi ye shes kyi stobs dang chos kyi lhun gyis grub pa'i stobs kyis lhun gyis grub nas sems can ji lta bu'i rigs par sngags kyi cho ga kun rab tu 'chad do zhes pa ni de bzhin gshegs pa'i yon tan rnams kyi mthu rnams byin gyi rlabs kyis/yi ge'i 'bru rnams su ston pa ste/ rang gi bsod nams dang ye shes kyi stobs zhes pa ni/ bsod nams kyi stobs ni sbyin pa dang tshul khrims dang bzod pa'i pha rol tu phyin pa la spyod pa'o/ / ye shes kyi stobs ni shes rab dang bsam gtan gyi pha rol tu phyin pa la spyod pa ste/ stobs zhes pa ni de dag gi mthu thogs pa med pa'o/ /rang gi smon lam dang ye shes kyi stobs dang zhes pa ni/ sngon gyi smon lam gyi shugs kyis sngags rnams kyi rang bzhin ji lta ba nyid du rtogs pa'o zhes pa'o/ chos kyi dbyings kyi byin gyis brlabs zhes pa ni chos kyi dbyings la gnas nas zhes pa ste/ chos kyi dbyings la gnas pa'i mthu des sems can rnams kyi bsam pa ji bzhin du sngags kyi chos nyid yi ge'i 'bru la sogs par ston to zhes pa'o/ /ji ltar rigs par zhes pa ni ji ltar snod du 'gyur ba'i sems can rnams la'o//sngags kyi yi ge dag gang zhe na/ thog ma bar nas ma skyes pa'i phyir/ a ni chos thams cad kyi sgo'o zhes pa ni/ gsang ba'i bdag po nga dang nya dang Na dang na ni ting nge 'dzin thams cad kyi dbang po ste/ nus pa thams cad dang ldan pa myur du bya ba'i don rab tu bsgrub pa'o zhes pa'i bar du sngags rnams kyi mtshan nyid tshig dang /ming dang mtshan mar rtogs pa'o zhes bshad pa de dag nyid yi ge'i 'bru dang tshig rnams su bcom ldan 'das kyis bshad pa de rnams ting nge 'dzin gyi sgor gyur pa ste/ tshig dang yi ge 'bru re las ting nge 'dzin gyi sgor gyur pa de yang don gnyis ston te/kun rdzob dang don dam pa'o/ /de la kun rdzob kyi ston pa la ni/ yi ge 'bru dang tshig rnams las/ sangs rgyas bcom ldan 'das kyi yon tan stobs dang mi 'jigs pa la sogs pa ston pa'o/ /don dam par ston pa ni yi ge de nyid kyi sgo nas chos thams cad kyi thog ma nas ma skyes pa stong pa nyid ston pa ste/de bas na yi ge 'bru dang tshig gi sgo nas kun rdzob dang don dam pa'i don bstan pa'i phyir/ bcom ldan 'das kyis sngags kyi mtshan nyid phyag rgya la sogs pa'i sgo nas ming dang mtshan nyid ma gtogs par bstan/ yi ge 'bru dang tshig dang 'bru rnams byin gyis brlabs te bstan to//de bas na da 'dir yi ge a la sogs pa'i yi ge'i 'bru rnams kyi sgo nas chos thams cad stong pa nyid kyi rang bzhin du bstan te/ 'chang de de yang yi ge ka la sogs pa sum cu rtsa gnyis po rnams dang ldan pas stong pa nyid kyi ting nge 'dzin gyi sgor gyur pa ste/ de rnams kyang kha cig ni chos thams cad stong pa nyid du ston/kha cig ni phyogs gcig stong pa nyid du ston/ kha cig ni stong par 'jug pa'i sgo nas stong pa nyid du ston pa'i ting nge 'dzin gyi sgor gyur pa ste ji ltar rigs par blta'o/ /de la yi ge a la sogs pa gang yang rung ba cig gis thams cad stong pa nyid du ston pa las lhag par yi ge gzhan rnams stong pa nyid du ston pa med de/gang yi ge a la sogs pa bstan pa de nyid kyi yi ge gzhan rnams kyis ston pas stong pa nyid du ston par do na gcig ste/ yi ge a'i sgo nas chos thams cad stong pa nyid du chud na/ yi ge gzhan ci dgos she na/stong par ston pa ni yi ge gcig gis kyang chog mod kyi/ yi ge 'bru dang tshig rnams las sngags su bstan te sngags de'i sgo nas ma skyes pas stong pa nyid dgongs pa'i phyir yi ge thams cad smos so/ /de bas na sngags thams cad kyi rang bzhin ni byang chub kyi sems so zhes rgyud gzhan las gsungs so//thog ma nas ma skyes pa'i phyir/ a ni chos thams cad kyi sgo mo zhes pa ni/ chos thams cad thog ma nas ma skyes pas stong pa nyid du chud pa ni de bzhin gshegs pa ste/ de bas na stong pa nyid du chud pa'i ting nge 'dzin gyi sgor gyur par yi ge a de byin gyis brlabs te gzhag pa ste/de bas na chos thams cad thog ma nas ma skyes pa ma byung bar yi ge a'i sgo nas bstan te/ dgos pa dang bral ba'i phyir ka ni chos thams cad kyi sgo mo'o zhes pa ni rgya gar skad du/ dgos pa la kAR+Ya zhes bya ste/ yi ge ka de chos thams cad stong pa'i ting nge 'dzin gyi sgor gyur pa bas yi ge ka'i sgo nas chos thams cad dgos pa med par shes par bya ste/dgos pa zhes pa ni 'bras bu ste/ 'bras bu de yang rgyus ma bskyed na 'bras bu med par 'gyur te/ rgyu med pa'i 'bras bu yang med pa'o/ /de ste dgos pa bral ba zhes byung bas/'bras bu rgyus ma bskyed pa med kyi/ rgyu de 'bras bu skyed pa'i rang bzhin du yod dam zhe na/ rgyu nyid 'bras bu las gyur pa ste/ de bas na chos thams cad ma byung ma skyes pa'i don du rig par bya'o/ /nam mkha' dang 'dra ba dmigs su med pa'i phyir/ kha ni chos thams cad kyi sgo zhes pa ni/nam mkha' dang 'dra ba la/ rgya gar skad du/ khaM kha sa ma zhes bya ste/ yi ge kha de ni chos thams cad stong par ston pa'i ting nge 'dzin gyi sgo ste thams cad nam mkha' lta bu'i rang bzhin yod pa ma yin pa'o/ /rgyud thams cad dmigs su med pa'i phyir/ga ni chos thams cad kyi sgo zhes pa ni/ ga ti zhes pa rgyud la'ang bya/ 'gro ba la yang bya/ byang chub pa la yang bya ste/ yi ge ga ni chos thams cad stong pa nyid du ston pa'i ting nge 'dzin gyi sgor gyur pa yin pas rgyud du drang na ni mi dang lha la sogs pa'i rgyud drug dmigs su med pa'o/ / 'gro bar drang na ni shar dang nub la sogs par 'gro bar bya ba dang / 'gro ba'i bya ba dmigs su med pa'o/ /chud par drang na ni chos thams cad thog ma nas ma skyes par chud par bya ba'i dngos po dang / chud par byed pa dmigs su med pa'o/ /gcig tu 'phangs pa dmigs su med pa'i phyir/ g+ha ni chos thams cad kyi sgo mo zhes pa ni gcig tu 'phungs pa la/ rgya gar skad du/ g+ha ni zhes bya ste/ yi ge g+ha ni chos thams cad stong pa nyid ston pa'i ting nge 'dzin gyi sgo de rdul phra mo rnams gcig tu 'phungs pa'i dngos po'o/ /dmigs su med ces pa'o/ /'chi 'pho thams cad dang bral ba'i phyir/tsa ni chos thams cad kyi sgo mo zhes pa ni/ rgya gar skad du/ 'chi 'pho la ts+yu ti zhes bya ste/ yi ge tsa ni chos thams cad stong par ston pa'i ting nge 'dzin gyi sgo bas/ chos thams cad ma skyes pa'i phyir 'chi 'pho yang 'chi 'pho dmigs su med pa'o zhes pa'o/ /grib ma dang mtshungs pa'i phyir/tsha ni chos thams cad kyi sgo mo zhes pa ni grib ma la tsha ya zhes bya ste/ tsha de chos thams cad stong pa ston pa'i ting nge 'dzin gyi sgo ste/ de la grib ma de lus las gzhan pa ma yin na ni lus med kyang grib ma 'byung ba'i rigs te/ lus las mi gzhan na grib ma logs shig tu 'byung ba yang mi rigs pa las de lta bu 'byung ba ni yang dag pa ma yin te 'khrul pa la sgyu ma lta bu'o//'khrul pa'am sgyu ma ni dngos po yod pa ma yin te/ chos thams cad kyang grib ma de dang 'dra bas stong pa nyid do zhes pa'o/ /skye ba dmigs su med pa'i phyir/ dza ni chos thams cad kyi sgo mo zhes pa ni skye ba la dzA ti zhes bya ste/skye bar bya ba'am skye bzhin pa'i dngos po med pas skye ba dmigs su med pa'o zhes bya'o/ /dri ma ni dmigs su med pa'i phyir/ dz+ha ni chos thams cad kyi sgo zhes pa ni dri ma la dz+ha ma ra zhes bya ba ste/ dri mar gyur pa'i chos rnams dmigs su med pa'o//nga rgyal dmigs su med pa'i phyir Ta ni chos thams cad kyi sgo mo zhes pa ni/ nga rgyal la Ta ka ra zhes bya ste/ chos thams cad stong pa nyid pas nga rgyal gyi dngos po dmigs su med pa'o/ /skye ba med pa'i phyir/ Tha ni chos thams cad kyi sgo mo zhes pa ni skye ba la bi Tha ba na zhes bya ba ste/chos thams cad stong pa nyid pas skye ba'i dngos po dmigs su med ces pa'o/ /'tshe ba dmigs su med pa'i phyir/ Da ni chos thams cad kyi sgo mo zhes pa ni/ 'tshe ba la Da ma ra zhes bya ba ste 'tshe bar bya ba'i dngos po rnams med pas 'tshe bar bya ba'i dngos po yang dmigs su med pa'o zhes pa'o//mu ge dang yongs su bral bar bya ba'i phyir/ T+ha ni chos thams cad kyi sgo mo zhes pa ni/ mu ge la T+hang+ga zhes bya ste/ chos rnams stong pa nyid pas mu ge'i dngos po dmigs su med ces pa'o/ / de bzhin nyid dmigs su med pa'i phyir/ ta ni chos thams cad kyi sgo mo zhes pa ni/de bzhin nyid la ta thA ta zhes bya ste/ de bzhin nyid dang yang dag pa'i mtha' dang stong pa nyid ces pa ni gzhung gcig ste/ de bzhin nyid du dmigs su med ces bya'o/ /gnas dmigs su med pa'i phyir/ tha ni chos thams cad kyi sgo mo zhes pa ni/ gnas la s+tha na zhes bya ste/snod kyi 'jig rten gyi rang bzhin gyi gnas sam/ chos rnams skad cig pa'i mtshan nyid pas mi gnas pa'i phyir gnas dmigs su med ces pa'o/ /'dul ba dmigs su med pa'i phyir da ni chos thams cad kyi sgo mo zhes pa ni/ 'dul ba la da na ma zhes bya ste/ 'dul ba'i dngos po'am/dul bar bya ba dmigs su med ces pa'o/ /khams dmigs su med pa'i phyir/ d+ha ni chos thams cad kyi sgo mo zhes pa ni/ khams la d+hA tu zhes bya ste/ 'dod pa'i khams dang / gzugs yod pa dang / gzugs med pa'i khams la sogs pa dmigs su med ces pa'o//don dam pa'i bden pa dmigs su med pa'i phyir/ pa ni chos thams cad kyi sgo mo zhes pa ni/ don dam pa la pa ra mA N+ra zhes bya ste/ yi ge pa ni de ni don dam pa'i rang bzhin du'ang dmigs su med par bstan pa'o/ /dbu ba dang 'dra ste snying po dmigs su med pa'i phyir/pha ni chos thams cad kyi sgo mo zhes pa ni dbu ba la phe na zhes bya ste/ phung po la sogs pa'i chos rnams dbu ba dang 'dra bar snying po med par bshig pa de yang snying bo med par yi ge pha'i sgo nas bstan to/ /'byung ba thams cad dmigs su med pa'i phyir/b+ha ni chos thams cad kyi sgo mo zhes pa ni 'byung ba la b+ha ba zhes bya ste/ de yang 'dod pa'i khams dang / gzugs yod pa'i dang gzugs med pa'i khams su 'byung bas na 'byung ba zhes bya ste phung po lnga nyid la bya'o/ /phung po lnga po de dag dmigs su med par yi ge b+ha'i sgo nas ston to/ / 'chi ba rnams dmigs su med pa'i phyir/ ma ni chos thams cad kyi sgo mo zhes pa ni 'chi ba la ma ra Na zhes bya ba ni/ chos thams cad ma skyes pas 'chi ba yang dmigs su med par yi ge ma'i sgo nas bstan to/ /theg pa thams cad dmigs su med pa'i phyir/ ya ni chos thams cad kyi sgo mo zhes pa ni theg pa la yA na zhes bya ste/chos rnams gang zhe na/ chos kyang gzings 'dra bar bor bas na/ chos rnams stong par chud nas theg pa gang la zhugs te chud pa'i theg pa de nyid kyang dmigs su med par yi ge ya'i sgo nas bstan pa'o/ /rdul thams cad dang bral bar bya ba'i phyir/ ra ni chos thams cad kyi sgo mo ste zhes pa ni rdul la ra dza zhes bya ste/rdul zhes rdul phra mo rnams la yang bya ba ste nyon mongs pa rnams la yang bya ste/ de gnyis gang yang rung ba dmigs su med par yi ge ra'i sgo nas bstan pa'o/ /mtshan nyid dmigs su med pa'i phyir la ni chos thams cad kyi sgo mo zhes pa ni/mtshan nyid la lak+Sha Na zhes bya ste/ 'dus byas dang 'dus ma byas pa'i mtshan nyid la sogs pa dmigs su med par yi ge la'i sgo nas bstan pa'o/ /ngag gi lam dang yongs su bral ba'i phyir wa ni chos thams cad kyi sgo mo zhes pa ni/ ngag gi lam la lbA ka zhes bya ste/ rnam par ma brtags ma dpyad par tshig tu mi smra'i rnam par dpyad nas tshig tu smra ba ste/brtag par bya ba dang rtogs par byed pa'i tshig tu smra ba yang dmigs su med par yi ge wa'i sgo nas bstan pa'o/ /rang bzhin gyis zhi ba'i phyir sha ni chos thams cad kyi sgo mo'o zhes pa ni rang bzhin gyis zhib la pra kra ta shAn+ti zhes bya ba ste/chos thams cad stong pa nyid dang rang bzhin gyis zhi bar yi ge sha'i sgo nas bstan pa'o/ /rang bzhin gyis blun pa'i phyir/ Sha ni chos thams cad kyi sgo mo'o zhes pa ni/ blu na po la dz+ha Sha zhes bya ste/ mig dang rna ba la sogs pa'i bdag po rnams kyis chos rnams zin pa ni yang dag pa ma yin par zin par bya ste/mig la sogs pa'i dbang po rnams blun pas mi brtsan pa'i phyir de dag gis zin pa'i chos yod pa ma yin pa Sha'i sgo nas ston pa'o/ /yi ge pa'i gor btang ba ni/ Ta dang Sha gnyis gnas gcig nas byung ba dang / pa'i las Ta byed pa'i phyir ro/ /bden pa kun dmigs su med pa'i phyir sa ni chos thams cad kyi sgo mo'o zhes pa ni bden pa la sat+ya zhes bya ste/kun rdzob dang don dam pa'i bden pa dmigs su med par yi ge sa'i sgo nas bstan pa'o/ /rgyu dmigs su med pa'i phyir ha ni chos thams cad kyi sgo mo zhes pa ni rgyu la he tu zhes bya ste/ chos thams cad kyi rgyu dmigs su med par yi ge ha'i sgo nas bstan pa ste/mdor na yi ge de rnams stong pa nyid kyi ting nge 'dzin rnams kyi sgo ston par rig par bya'o/ /gsang ba'i bdag po nga dang nya dang na dang Na ni ting nge 'dzin thams cad kyi dbang po ste zhes pa ni/ yi ge de rnams klad kor gyi 'khor btags pas stong pa nyid kyi mtshan ma bas ni ka la sogs pa'i 'khor kun dbang ngo //nya ni tsa la sogs pa'i 'khor kun du gtogs so/ /na ni ta la sogs pa'i 'khor kun du gtogs so/ /de bzhin du yi ge de rnams ya ra la sogs pa'i stong par gtogs te/ stong pa thams cad kyi mtshan nyid pas mthu dang ldan pa ste/kun rdzob tu bsgrub pa'i dgos pa rnams kyang myur du 'grub par 'gyur te/ de bas na gsungs pa/ mthu thams cad dang ldan pa myur du bya ba'i don rab tu bsgrub pa zhes bya'o/ /gsang ba'i bdag po sngags kyi tshul gyi ting nge 'dzin gyi sgo 'di ni zhes pa nas/yid la sngags mkhan gyis bsams na/ 'chi 'pho med pa'i gnas thob 'gyur/ /zhes pa'i bar du sngags kyi tshul yi ge 'bru ka la sogs pa/ de bzhin nyid la dmigs pa'i ting nge 'dzin gyi sgor gyur pa rnams bshad pa rnams kyi rjes su bsngags pa dang rang bzhin bstan pa ste/de yang 'jug pa'i yon tan dang gnas pa'i yon tan dang ldang ba'i rang bzhin du shes par bya ste/ de la re ba thams cad yongs su rdzogs par byed pa de bzhin gshegs pa thams cad kyi bsam gyis mi khyab pa'i rnam par smin pa'i 'bras bu'o zhes pa ni/ de bzhin gshegs pa'i rgyu'i yon tan dang /stobs dang mi 'jigs pa la sogs pa las gyur pa zhes pa'o/ /rnam pa mchog thams cad dang ldan pa/ sngags kyi de kho na'i don gdon mi za ba'o zhes pa ni 'jug pa'i rang bzhin te/ rnam pa mchog thams cad dang ldan pas zhes pa ni/ yi ge a dang ka la sogs pa de bzhin nyid la dmigs par 'jug pa'i ting nge 'dzin gyi sgor gyur pa dam pa rnams dang ldan pa zhes pa'o//sngags kyi de kho na'i don gdon mi za ba zhes pa ni phyin ci ma log pas rigs pa dang gzhung gis sun mi phyin pa'o/ /dus gsum las shin tu 'das pa nam mkha' dang 'dra ste dri ma med pa/bsam yas sems kyi sa la gnas/ /zhes pa ni gnas pa'i rang bzhin te/ dus gsum las shin tu shes pa ni/ 'das pa dang da ltar dang ma 'ongs pa'i dus te/ de yang phung po lnga la bya ste/ phung po lnga las shin tu 'das/ /zhes pa'o/ /nam mkha' dang 'dra ste dri ma med ces pa ni shes bya dang nyon mongs pa'i sgrib pa dri ma rnams dang bral ba zhes pa'o//bsam yas sems kyi sa la gnas/ /zhes pa ni sems pa med pa las sems kyi sa la gnas pa ste so so rang gi rig pa'i rang bzhin zhes pa'o/ /las dang bya ba las byung ba/ /spyod pa rnams kyang rjes su thob/ / bsam yas 'bras bu smin pa'o/ /zhes pa ni langs pa'i rang bzhin te/ las dang bya ba las byung ba/ /zhes pa ni stong pa nyid las langs nas sems can rnams la phan pa'i phyir/ kun rdzob tu bzlas pa'i yan lag bzhi la sogs pa lus dang ngag gi las rnams kyang ston zhes pa'o/ /spyod pa rnams kyang rjes su thob//bsam yas 'bras bu smin pa'o/ /zhes pa ni sbyin pa la sogs pa'i pha rol tu phyin pa rnams dang / sngags kyi spyod pa rnams spyad na mngon par 'byung ba dang / ma lus pa'i bde ba bsam gyis mi khyab pa 'byin pa'o zhes pa'o/ /'di ni don dam de kho na/ /sangs rgyas kun gyis rab tu bsgrags//zhes pa ni gong du bshad pa rnams sdud pa'i tshig ste/ sangs rgyas rnams kyis rab tu bsgrags/ /zhes pa ni sngags kyi rang bzhin stong pa nyid kyi byang chub kyi sems bsgom pa shes pa dang / sngags kyi yi ge las lha'i gzugs su sbyar zhing / yan lag bzhi pa'i bzlas pa la sogs pa'i cho gar shes na grub pa thob par 'gyur zhes pa'o//sgrar smras yang dag de kho na/ /sngags rnams kyi ni sngags mtshan nyid/ /yid la bsam pa'i sa bsams na/ /'chi 'pho med pa'i gnas thob 'gyur/ /zhes pa ni sngags kyi yi ge'i sgra'i sgo nas bstan pa'i don de bzlas pa la sogs pa la mi rtog par bsgoms pas mya ngan las 'das pa 'chi 'pho med pa'i gnas thob ces pa'o//de nas bcom ldan 'das la phyag na rdo rje gsang ba'i bdag pos 'di skad ces gsol te zhes pa nas thun mong ma yin pa'i yon tan dang ldan par 'gyur ro zhes pa'i bar du bshad pa'i don rnams phyag na rdo rjes mjal bar bstan pa dang /ma 'ongs pa'i 'gro ba rnams spro ba bskyed pa dang / dkyil 'khor gyi yo byad bshad pa'i lhag ma rnams bshad par gsol ba'o/ /bcom ldan 'das kyis bsam gyis mi khyab pa'i sngags kyi mtshan nyid kyi tshul gyis chos kyi gzhung bshad pa/bcom ldan 'das ngo mtshar che'o zhes pa ni/ yi ge ka la sogs pa stong pa nyid kyi ting nge 'dzin de dag gi don bsam du med pa de dag gis 'jal te ngo mtshar che'o zhes pa'o/ /nyan thos dang rang sangs rgyas thams cad dang thun mong ma lags te zhes pa ni/ nyan thos ni gang zag la bdag med par chud pa tsam dang /rang sangs rgyas ni rgyu dang 'bras bu bshig nas ngag 'gags pa tsam pas de bzhin nyid la dmigs pa'i ting nge 'dzin gyi spyod yul ma yin zhes pa'o/ /sems can de dag thun mong ma lags pa'i yon tan dang ldan par 'gyur ba ni/ gang sngags kyi tshul 'di la dad par 'gyur pa'o zhes pa rnams ni ma 'ongs pa'i 'gro ba rnams ni spro ba bskyed pa'o/ /bcom ldan 'das gzhan yang dkyil 'khor gyi yo byad kyi cho ga rnams bshad par gsol zhes pa ni/ dkyil 'khor bris zin na mchod pa la sogs pa bya bar rigs te/ de bas na mchod pa'i ting nge 'dzin dang /yid kyis mchod pa dang / thal mo sbyar ba'i mchod pa dang / byams pa dang snying rjes mchod pa dang / 'jig rten gyi mchod pa dri dang me tog la sogs pa ste/ mchod pa rnam pa de bzhi dang / dkyil 'khor bsrung ba dang / dkyil 'khor gyi lha rnams bzhugs su gsol ba rnams bshad du gsol zhes pa'o//de rnams las kyang la la ni snying rje chen po 'byung ba'i dkyil 'khor gyi skabs nas 'byung / la la ni yi ge 'khor lo bskor ba'i dkyil 'khor gyi skabs nas 'byung / la la ni gsang ba'i dkyil 'khor las 'byung ste/ de 'di nas mi 'byung ba 'og ma gnyis kyi skabs nas 'byung ba yang skabs 'dir sbyar bar bya/'di nas 'byung ba la 'og ma gnyis kyi nang nas mi 'byung ba yang de bzhin du sbyar bar bya ste/ de dag gi rim pa yang lha rnams kyi dkyil 'khor du byin gyis brlab pa la spyan drang mi dgos pa'i rim pa la sogs pa bsdus pa'i don gyi nang du zhib tu bshad pas 'dir ma smos so//de nas sngags pas bya ba/ lha rnams la ni mchod pa'i phyir/ /zhes pa nas/ sems dpa' chen po phal rnams la'ang / /re re bar ni bsgrags pa yin/ /zhes pa'i bar dri la sogs pa phyi'i mchod pa rnams bshad pa ste/phyi'i mchod pa de rnams kyang / sngags pa dmigs pa bas tshul bzhin ma byas na/ 'phags pa'i lha rnams 'khrug par mi 'gyur yang de'i 'khor phal rnams 'khrug par 'gyur te/ 'phral du ga nod pa mi byed kyang ji ltar bsams pa'i don grub par mi byed de/ phan 'dogs par mi 'gyur ro zhes rgyud gzhan las 'byung bas mchod pa de rnams nan tan du bya'o/ /slob dpon zab cing rgya che ba la mos pas kyang gtsor ni yid kyis mchod pa bya ste/ slob ma dmigs ba can rnams kyi yid dang sbyar ba'i phyir phyi ma'i mchod pa 'di rnams kyang ma chags bzhin du bya'o//mchod pa'i ting nge 'dzin dang yid kyis mchod pa de dag ni yi ge 'khor lo bskor bar dkyil 'khor dang gsang ba'i dkyil 'khor dag tu blta'o/ /me tog dkar dang dmar ser dag /ces pa nas/ yid du 'ong ba bltar sdug pa/ /bkra shis kun te nan tan du//mkhas pas su ni mchod par bya/ /zhes pa'i bar du me tog gi mchod pa rnam pa bshad de/ dkar dang dmar dang ser zhes pa ni me tog gi rigs spyir smos pa'o/ /pad+mo dang ut+pal zhes pa la sogs pa ni spyir smos pa de dag nyid las so so'i ming smos pa'o/ /yid du 'ong ba zhes pa ni dri zhim pa'o//bltar sdug pa zhes pa ni kha dog dang dbyibs mdzes pa'o/ /bkra shis pa ni lha rnams mchod pa dang mi 'gal ba zhes pa ste/ 'dir ni mdo tsam du smos kyi/ 'dir ming gis ma smos pa las gzhan du yang yid du 'ong ba dang bkra shis pa las mchod par bya'o zhes pa'o//tsan+dan dang a ka ru zhes pa nas/ spos bzang rnams kyang dbul bar bya/ /zhes pa'i bar du dri'i mchod pa rnams te/ shin tu dri zhim zhing yid du 'ong / /zhes pa ni 'dir ming gis smos pa las gzhan yang dri zhim zhing yid du 'ong ba la sogs pa dri'i rigs rnams gang yang rung ba dbul lo zhes pa ste/de las kyang la la ni gcig tu sbyar/ la la bsdus te sbyar bar shes par bya'o/ /dri'i mchod pa dbul bar yang me tog gi mchod pa rnams sngon rol du dbul bar bya'o/ /a ka ru dang thang shing zhes pa nas gzhan yang bdug pa sna tshogs pa 'jig rten gyis bsgrags pa bkra shis la tshul bzhin du sngags pas gsol cig /lha'i yid du 'ong zhes pa'i bar du bdug pa'i mchod pa rnams bshad de/ de rnams kyang la la ni gcig tu sbyar/ la la ni bsdus te sbyar te shes par bya'o/ /gzhan yang bdug pa sna tshogs pa 'jig rten gyi khams su bsgrags pa bkra shis pa zhes pa ni/'dir ming gis ma smos pa gzhan du 'jig rten du grags pa'i bdug pa sna tshogs lha rnams la mchod pa dang mi 'gal bar yang rung ba dbul bar bya zhes pa'o/ /sems dpa' chen po de nas yang gtor ma'i las kyi cho ga nyon cig ces pa nas/zho dang 'o ma rgyas par ro/ /zhes pa'i bar du bshos kyi mchod pa rnams bshad pa ste/ de rnams kyang zas dang / bza' ba dang / bca' ba dang btung ba'i dngos por shes par bya ste/ de'i zas ni'o thug dang 'bras la sogs pa'o/ /bza' ba ni khur ba la sogs pa'o//bca' ba ni shing thog la sogs pa'o/ /btung ba ni zho dang 'o ma la sogs pa'o/ /rgyas pa'o zhes pa ni de rnams bzang zhing mang du 'bul ba'o/ /mar me bzang po rnams khyad ni/ /zhes pa nas/ shin tu dri zhim pas kyang gsol/ /zhes pa'i bar du mar me'i mchod pa bshad pa ste/gtsang ma zhes pa ni nya tshil la sogs pa btsog pa med pa dang / ras kyi snying po dri ma med pa zhes pa'o/ /phyogs su gdugs dang ba dan rnams/ /kha dog sna tshogs bzang yang bre/ /zhes pa ni dkyil 'khor gyi phyi'i sgo khar gdugs dkar po gcig bzhag /ngos bzhi grwa bzhir phyogs so sor kha dog dang mthun pa'i ba dan rnams bsgreng bar bya'o zhes pa'o//rta babs bzang po rnams kyang ni/ /dril dang bcas te rab tu dbul/ /zhes pa ni phyi'i sgo khar shing la sogs pa las byas pa'i rta babs bzang po dril bu dag gis brgyan pa zhes pa'o/ /de nas bum pa rnams blang ba//zhes pa nas/ gos rnams kyis ni mgrin pa bcings/ /mkhas pa yis ni rnam par bkod/ /ces pa'i bar te bum pa rnams dbul te nag po la sogs pa'i skyon med par gzhung las byung ba'i mtshan nyid dang ldan pa dbul te/ de rnams gsang ba'i rgyud las 'byung ba bzhin du/lha rnams so so la bsngo bar mi bya bar spyir dgod pa ni byang chub sems dpa'i sngags kyis btab ste/ slob ma rnams dbang bskur ba la blugs par bya ba'i phyir/ gtso bo lha rnams kun la ni/ /gos zung re ni dbul bar bya/ /zhes pa ni dkyil 'khor rim pa gsum char gyi sgo khyud rnams kyi nang na bzhugs pa'i gtso bo rnams dang /bcom ldan 'das rnam par snang mdzad dbus na bzhugs pa la ras zung re re dbul lo zhes pa'o/ /thams cad la zung re mi 'byor na spyir zung gcig dbul bar bya'o/ /sems dpa' chen po phal rnams la/ / ya re bar ni bsgrags pa yin/ /zhes pa ni dkyil 'khor gyi lha phal rnams la ya re dbul zhes pa ste/ thams cad la re re ma 'byor na yang spyir ya gcig dbul bar shes par bya'o/ /de rnams kyang bum pa'i mgrin pa dkri ba ma gtogs par gzhan du rig par bya'o/ /slob ma dkyil 'khor drung dgug ste//sngags pa yis ni chus thob cig /ces pa nas/ de bzhin slob ma kun tshud cig /ces pa'i bar du slob ma rnams dkyil 'khor du gzud pa'i cho ga ste/ de yang slob dpon sngar mchod pa na las kyi rdo rje sems dpar bsgyur ba las slob ma 'dzud pa'i tshe 'og nas 'byung ba'i slob dpon gyi ting nge 'dzin du bsgyur te/thog ma nyid du dkyil 'khor gyi phyi ra'i sgor khams gsum rnam par rgyal bas bsngags pa'i bum pa'i chus slob ma rnams bgegs bsal ba'i phyir gtor te/ slob ma rnams gdong g.yogs pa'i ras la dam tshig gsum gyi phyag rgya bcings te/dam tshig gsum gyi sngags lan gsum bzlas pas slob ma'i gdong g.yogs/ /de nas slob ma'i lag par dri dang me tog byin la byang chub kyi sems bskyed de/ de nas chos kyi dbyings kyi phyag rgya dang sngags kyis dbyings su byin gyis brlab/ de nas chos kyi dbyings kyi 'khor lo'i phyag rgya dang sngags dang /rdo rje go cha'i sngags kyis slob ma de rdo rje sems dpar byin gyis brlabs la/ spyi bor chos kyi dbyings kyi yi ge raM kha dog dkar po klad kor dang bcas pa 'bar ba can bsam/ de nas dam tshig gsum gyi phyag rgya bcings te/de'i sngags zlos su bcug la me tog 'dor du bcug /de nas me tog gar babs pa'i lha slob ma de la byin te/ de nas dkyil 'khor lan gsum bskor du gzhug ste/ de rnams ni dkyil 'khor du gzud pa'i cho ga rim pa mdor smras pa'o/ /yan lag so sor bshad pa ni/ / byang chub sems kyang 'dzin du gzhug /ces pa'i smon lam gyis byang chub kyi sems 'dzin du gzhug ces pa'o/ /de bzhin gshegs pa dran par bya/ /zhes pa ni sangs rgyas dang byang chub sems dpa' rnams bdag la dgongs zhes smra bar bya ba ste/ smon lam gyis byang chub tu sems bskyed pa yang sangs rgyas dang byang chub sems dpa' rnams bdag la dgongs shig /bdag ming 'di zhes bgyi bas dus 'di nas bzung nas/ nam byang chub kyi snying po la 'dug gi bar du phung po dang khams dang skye mched dang gzung ba dang 'dzin pa rnam par spangs pa rang gi sems thog ma nas ma skyes pa stong pa nyid kyi rang bzhin ji ltar sangs rgyas bcom ldan 'das rnams dang /byang chub sems dpa' de rnams kyis byang chub tu sems bskyed pa de ltar bdag gis kyang byang chub tu sems bskyed do zhes pa'o/ /de nas/ thams cad skye bar 'gyur ba ni//skye ba rgyal ba'i rigs dge la'o/ /zhes pa ni de ltar smon lam gyis byang chub kyi sems bskyed pas sa bon btab pa'i sgo nas rgyal ba'i rigs dge ba la skye bar 'gyur te/ rgyal ba'i rigs zhes pa ni thabs dang shes rab tu ldan pa ste/ de la shes rab ni yum shes rab kyi pha rol tu phyin pa chos thams cad stong pa nyid kyi rang bzhin no//thabs ni sbyin pa la sogs pa'i pha rol tu phyin pa rnams te/ de bzhin gshegs pa rnams kyang de las byung bas na de ni rgyal ba'i rigs zhes bya'o/ /de dag phyag rgya bcings pa ni chos kyi dbyings las byung ba'o zhes pa ni/ 'jug pa'i byang chub kyi sems dang gnas pa'i byang chub kyi sems bskyed pa de/ chos kyi dbyings stong pa nyid kyi sngags dang phyag rgya des slob ma de stong pa nyid du byin gyis brlab bo/ /chos kyi 'khor lo las de bzhin du/ rdo rje sems dpar byin gyis brlab/ /ces pa ni/ de ltar stong pa nyid kyi rang bzhin du chud nas slar kun rdzob kyi sgo nas sems can rnams la chos kyi 'khor lo bskor ba'i phyir/chos kyi 'khor lo'i sngags dang phyag rgyas slob ma rdo rje sems dpa'i skur bsgyur ro/ /rdo rje sems dpa' zhes pa ni gang gi sems rdo rje dang 'dra bar brtan pa/ cis kyang zil gyis mi non pa ste/de yang zla ba'i dkyil 'khor gyi nang du bzhugs pa/ zla ba'i dkyil 'khor 'od kyi dkyil 'khor dang ldan pa/ dbu rgyan dang ldan pa rgyan sna tshogs kyis brgyan pa'i sku'o/ /de'i snying gar yang rdo rje rtse lnga pa ye shes lnga'i rang bzhin zla ba'i dkyil 'khor la gnas par bsam par bya'o/ /sangs rgyas kun gyi dam tshig ni//bcing ba de nas sngags pa rang gis nan tan gyis/ gos la lan gsum gdab pa yang / /sngags kyis de tshe cho ga bzhin/ /zhes pa ni gdong dgab pa'i ras la sngags pa nyid kyis dam tshig gsum gyi phyag rgya dang sngags kyis gdab ste/ de yang skabs 'dir smos/ mod kyi las 'di rnams kyi dang por shes par bya'o/ /de dag rnams kyi gdong khob cig ces pa ni/ dam tshig gis btab pa'i ras des slob ma de rnams kyi gdong dgab par bya ste/ gdong dgab pa de yang de dag sngar rang bzhin gyis mig tu 'dug pa las/ dam tshig gi sngags dang phyag rgyas byin gyis brlabs pas bkab nas ye shes kyi mig tu bsgyur bar 'gyur te/ye shes kyi mig de phye nas bcom ldan 'das kyi sku mi zad pa'i rdo rje'i rgyan gyi dkyil 'khor de bstan pa'i phyir ro/ /snying rjer song ba'i yid kyis te/ /zhes pa ni snying rje dang ldan par bya ba'i phyir/ de khe dang bkur sti'i phyir ma yin no zhes pa'o//lan gsum dam tshig zlos su gzhug /ces pa ni me tog 'dor du gzhug ces pa dang sbyar te/ dam tshig gsum gyi phyag rgya bcings la sngags kyang lan gsum bzlas te me tog 'dor du gzhug go/ /dam tshig gsum zhes pa ni bcom ldan 'das kyi sku mi zad pa dang /gsung mi zad pa dang / thugs mi zad pa'i rdo rje'i rgyan gyi dkyil 'khor te/ de'i byin gyi rlabs su gyur pa ni dam tshig gi sngags dang phyag rgya ste/ phyag rgya bcings shing de'i sngags lan gsum bzlas na/ sku la sogs pa mi zad pa'i rdo rje rgyan de mthong bar 'gyur ro/ /de bas na sngags pa rtag tu zlos pa la sogs pa byed pa'i tshe yang dam tshig gsum gyi phyag rgya bcings te/sngags lan gsum bzlas na/ dam tshig nyams pa la sogs pa slar 'tsho bar 'gyur ro/ /spyi bor yi ge gzhag pa ni/ /klad kyi 'khor dang bcas pa ste/ /'bar ba'i phreng zer 'byung bzhin du'am//zhes pa ste/ kha dog dkar ba zla ba shar ba bzhin du'o zhes pa ni/ slob ma'i spyi bor yi ge ra chos kyi dbyings kyi ye shes bsam ste/ ra ni shes bya dang nyon mongs pa'i sgrib pa dang bral ba'i rang bzhin no/ / klad kor bzhag pa ni stong pa nyid kyi rang bzhin no/ /'bar ba'i phreng dang bcas pa ni rgyu'i ye shes kyi rang bzhin no/ /zla ba shar ba dang 'dra ba ni zla ba 'char ba'i tshe/ rang bzhin dkar ba la cung zad dmar po bstan pa ste dkar ba ni rang bzhin gyis dag pa'o/ /rtsa dmar ba ni sems can gyi don la chags pa'o//de nas me tog 'thor chug cig /mgon po kun gyi spyan sngar te/ /me tog de ni gang lhung ba/ /sngags mkhan gyis ni de byin cig /ces pa ni sngon dkyil 'khor du ma zhugs shing lha ma mnos pa'am/ dkyil 'khor du zhugs shing lha ma mnos pa'am/ lha mnos te btang ba rnams gdod lha mnos par bya na me tog gdod de ltar dor bar bya/ de ltar lha mnos zin te/ gdod mnos mi dgos na/ gdong g.yogs bkrol la me tog de bdag gi lha'am bcom ldan 'das rnam par snang mdzad la dbul bar bya ste/ de dag kyang zhib tu ni bsdus pa'i don du bshad zin to//me tog bor nas lha gang la bab pa de'i cha brtag pa yang zhib tu gsang ba'i rgyud kyi nang du blta'o/ /dkyil 'khor dang po'i sgo ru ste/ /sgo khyud kyi ni dbus kyi cha/ /sgo gnyis kyi ni bar der yang / /slob ma der gzud dkyil 'khor gyi/ /der 'dug pa ni cho ga kun//rim bzhin de rnams chud par bya'o/ /zhes pa ni dkyil 'khor gsum pa'i sgo khyud kyi dbus su slob ma der gzung ste/ der gnas nas gong du smos pa'i las thams cad bya ste/ sgo khar slob ma la chu gdab pa 'ba' zhig ma gtogs so/ /dkyil 'khor gyi nang du ma zhugs par sgo kha nas las de rnams bya ba yang /lha rnams la me tog 'dor na yang sgo kha na bor na nang du 'bab par 'gyur gyi/ /nang du zhugs te bor na lha kha cig rgyab tu lus par 'gyur la/ bdag nang du zhugs te bor na me tog phyi rol du bab par 'gyur ba'i phyir ro/ /gnyis su na gong du skyob pa rnams kyi spyan sngar zhes kyang 'byung bas/bdag nang du zhugs na kha cig gi spyan sngar kyang mi 'gyur la/ byang chub sems dpa' sems dpa' chen po de rnams kha cig la rgyab kyis blta bar mi rigs pa'i phyir ro/ /gsum du na 'di ni chos kyi rgyal po'i 'khor bas thog ma nang du zhugs na ko long du 'gyur te/rgyal po'i chos dang 'gal ba'i phyir ro/ /de bzhin slob ma kun chud nas thams cad rtog pa dang bral ba'o/ /de dag rnams la zhir byas nas/ /zhes pa nas sngags pa 'og ma'i bar du dkyil 'khor du chud pa'i slob ma de rnams zhi bar bya ba'i phyir zhi ba'i sbyin sreg bya ste/slob ma rnams dkyil 'khor du zhugs pas sdig pa rnams byang zhing rgyud dag pa des/ bcom ldan 'das kyi sku mi zad pa'i rdo rje'i rgyan la sogs pa la sbyin sreg gi sgo nas yon phul na/ bsod nams 'phel te sdig pa byang bas zhi bar 'gyur ro/ /de'i rim pa yang thog ma'i snying po'i dkyil 'khor gyi sngon rol/dkyil 'khor bar ma'i sgo'i phyi rim gsum po'i nang rol du zhugs te thab khru gang ba bya/ de ste dkyil 'khor chud de nang du mi shod na dkyil 'khor gyi phyi rim gyi sgo khar bya/ khang thog la sogs par brkor mi rung na/ tshon dmar pos zhugs thab de bri bar bya ste/de nas zhugs thab de'i mtha' mar ku sha lho phyogs nas brtsams te bskor ba'i thab tu dgram pa ni/ rtswa gcig gi rtsa bas gcig gi mgo non par byas te bskor ro/ /de bas na khams gsum rnam par rgyal bas bsngags pa'i spos chus der btab bo/ /de nas zhugs thab der 'jig rten pa'i tri ta zhes bya ba las thams cad byed pa mgrin pa ring la spu can/kha dog kham par 'dug pa/ me tog gcig zhugs thab der bor la me de byin gyis brlab par bya'o/ /de nas me de kha bkru ba dang / gang ba'i sbyin sreg gzhung las 'byung ba bzhin du byin nas/de nyid du 'bar bzhin du bzhag la/ de nas 'jig rten las 'das pa'i zhi ba'i me zhugs thab der me tog gcig bor nas byin gyis brlabs te kha bkru ba dang / gang ba'i sbyin sreg la sogs pa snga ma bzhin du byas nas slob ma re re'i phyir yang sbyin sreg lan nyi shu rtsa re re bya ba ni/slob ma'i lag pa g.yas pa'i mthe bong nas slob dpon gyis lag pa g.yon pas bzung ste bya'o/ /'di ni bsdus pa'i don to/ /yan lag gi don bshad pa ni/ rtog pa kun dang bral ba'o/ /zhes pa ni slob ma de rnams dkyil 'khor du gzhug par sbyor na/ skyabs gsum la sogs par song ba dang / dkyil 'khor du zhugs nas byang chub tu sems bskyed pa dang / zhugs nas kyang phyis sngags kyi spyad pa spyod pa sbyor ba dang / rtsa ba dang / phyi ma gsum dag ste rtog pa dang bral ba'o/ /sbyin sreg tshul nas sbyin sreg bya/ /zhes pa ni sbyin sreg gi cho ga gzhung las ji skad gsungs pa bzhin du bya ba ste 'og nas 'byung bar blta'o//snying po'i dkyil 'khor ni sngon rol du gnyis po yang rgyab tu ste/ dkyil 'khor bar ma'i dbus su ni/ /ma yengs pa yi sems kyis su/ /khru gang tsam du bya ba ni/ /me yi zhugs thab bsgrags pa yin//zhes pa ni gong du bshad zin to/ /'dir tshad 'ga' zhig khru gang du gsungs kyi zlum po'am gru bzhir bya ba ma smos kyang zhi ba dang rgyas pa'i zhugs thab ji ltar grags pa ltar bya ste/ 'di'i skabs su zhi ba'i las pas zlum por 'os so/ /yang na zhi ba dang rgyas pa gnyis su mthun na gru bzhi yang nyes pa med do//kha ran sor bzhi'i tshad du zhes pa ni zhugs thab gru bzhi na kha ran yang gru bzhir bya/ zhugs thab zlum po na kha ran yang zlum por bya'o/ /dbus su yang ni rdo rje bri/ /zhes pa ni ye shes lnga'i phyag rgyar gyur pa rdo rje rtse lnga pa bri'o/ /sngags pa yi ni g.yas logs su//sbyin sreg gi ni yo byad bzhag /g.yon logs su ni slob ma dgod/ /ces pa ni bsreg par bya ba'i rdzas rnams sngags pa'i g.yas su gzhag go/ /g.yon du slob ma dgod pa ni slob ma'i g.yas su slob dpon 'bab ste/ slob dpon de slob ma la phan 'dogs pas rjes su mthun pa bstan to//kun kyang tsog pur 'dug par bya/ /zhes pa ni tshul gyi las rnams ma zin na bag phab ste 'dug pa'am gus pa bstan pa'o/ /bdag ni 'jag ma'i rtswa bting ba'i steng du ste/ der 'dug shig pa ni slob dpon nyid rtswa ku sha bting ba'i stang du 'dug pa la bya'o//yang ni tshon rtsis bri zhes pa nas/ so so'i sbyin sreg bya ba ni/ /nyi shu rtsa gcig blugs shing sreg /ces pa'i bar du ni go rims bzhin du gong du bshad zin to/ /yid thub byams par bsams la ni/ /zhes pa ni zhi ba'i las la tshul gyis byams par bya'o/ /sbyin sreg byas nas sngags pa yis//slob ma rnams la yon slongs shig /ces pa nas mchod ston khyed kyis ci nus par/ dge 'dun gsol ba sangs rgyas kyis bsngags pa la'o zhes pa'i bar slob ma rtog pa sbyangs pa de dag bsod nams kyi zhing dam pa la sbyin pa byed du slob dpon gyis gzhug ste/ phan dam pa 'dogs pa'i slob dpon de la slob ma rnams kyis gus par yon phul na bsod nams mchog tu 'gyur ba'i phyir/gser dang dngul dang rin po che la sogs pa dbul bar bya'o zhes bskul ma btab bo/ /de ltar slob dpon la yon phul nas kyang 'phags pa'i dge 'dun ni sbyin pa'i gnas dam pa ste/'phags pa'i dge 'dun la yon phul ba dang / mchod ston gsol bar bya ba bstan pa ni/ 'di ni bsod nams zhing yin te/ /mgon po rnams kyis gsungs pa ste/ /zhes pa la sogs pa'o/ /de nas bcom ldan 'das rnam par snang mdzad kyis phyag na rdo rje byang chub sems dpa' la 'di skad ces bka' stsal to//sems dpa' chen po dbang bskur ba/ /de ni rgyas par bshad par bya/ /yang dag yid gcig gis la nyon/ /sangs rgyas kun gyis bshad pa'o/ /zhes pa nas/ rdo rje 'dzin pa de kun gyis/ /khyod la rtag tu srung bar byed/ /ces pa'i bar du slob ma rnams dbang bskur ba'i skabs 'chad de//de la mngon par dbang bskur zhes pa ni bcom ldan 'das kyi sku dang gsung dang thugs mnyam pa nyid mi zad pa'i rgyan rang bzhin gyi dkyil 'khor gyi byin gyis brlabs su 'gyur ba'i spyan sngar mngon sum du rin po che la sogs pa'i bum par chu blugs pa ste/mngon par blugs zhes pa ni tshig gi don to/ /de yang rnam pa gsum du brtag par bya ba ni dbang bskur ba'i ming ji ltab dang / su la dbang bskur ba dang / ci'i phyir dbang bsgur ba'o/de la dbang bskur ba'i ming ji lta ba zhes pa ni spyir dbang bskur ba'i rnam pa mang ste/ spyir sngags par bya ba'i phyir rig pa sbyin pa'o//las kyi dbang bskur ba ni zhi ba dang rgyas pa dang mngon par spyod pa'i las bya ba dang gdon bsal ba la sogs pa bya bar dbang bskur ba ste/ de la skabs 'dir ni slob dpon du dbang bskur ba zhes bya ba ste de ni ming ngo / /su la dbang bskur bar bya zhes pa ni/slob ma phal thams cad la dbang bskur bar bya ba ma yin gyi/ khyad par can gyi slob ma dam tshig lnga'i skabs nas gsungs pa/ sngags dang phyag rgya yang bstan zhing / las dang bya ba la yang rab tu sbyar bar bya zhes pa ste sngags kyi rgyud rnams thos shing / dkyil 'khor la sogs pa bri nus pa yongs su rdzogs pa'i slob ma rnams la dbang bskur te/su la dbang bskur zhes pa ni de rnams la dbang bskur ba'o/ /ci'i phyir dbang bskur zhes pa ni/ chos kyi mig mi 'tshub par bya ba'i phyir te/ 'jig rten na yang 'jig rten gyi gtsug lag lung bstan pa dang rtog pa dang sman la sogs pa rnams kyang slob mas rdzogs par lobs nas/slob dpon gyis dbang bskur ba'i cho ga 'jig rten pa rnams la ji ltar srid par byas nas bshad pa la sogs pa bya bar slob ma la lung sbyin pa srid do/ /de dag kyang so so'i gtsug lag rdzogs par mi shes shing dbang ma bskur bar bshad pa la sogs pa byas na/gtsug lag de dag ji lta ba bzhin du bshad mi nus pas de dag gis mig mi 'tshub par 'gyur ba'i phyir ro/ /de bzhin du 'dir yang slob ma rnams rgyud la sogs pa rdzogs par shes par bya ste/ de dag nyid slob dpon gyis mngon sum du bskor nas rgyud bshad pa dang /dkyil 'khor bri ba la sogs pa ji lta ba bzhin du shes par slob dpon nyid kyis yid ches te/ sems can gyi don byed nus par gyur pa rnams la dbang bskur na chos kyi mig mi 'tshub par 'gyur ba'i phyir ro/ /gnyis su na de ltar mngon par 'dus pa'i slob ma des slob dpon du gyur na/'jig rten pa rnams kyang khungs de lta bu las byung ba'i slob dpon de la yid ches shing btsun par byed do/ /rim pa 'di lta bur dbang ma bskur ba rgyud la sogs pa mi shes par thug thub tu sngags kyi rgyud la sogs pa 'chad cing / dkyil 'khor 'dri na ji lta ba nyid du mi shes pas don log par 'gyur na/sngags kyi lha la sogs pas kyang byin gyis mi rlob pas ci bsams pa'i don mi 'grub ste/ gdul ba'i 'gro ba rnams yid mi ches shing mi phyogs pas chos kyi mig 'tshubs par 'gyur ro/ /ci'i phyir dbang bskur zhes pa ni de'i phyir ro//de la dbang bskur ba yang / ji ltar 'jig rten gyi rgyal po dge ba bcu'i las kyi lam gyi bka' khrims ston pa/ mngon par 'byung ba'i 'bras bu sbyin par byed pa de ji ltar rgyal thabs su bsgyur bar bya ba de bzhin du bya ste/ 'di yang mngon par 'byung ba dang / ma lus pa'i bde ba'i 'bras bu sbyin par byed pa'i chos kyi rgyal por dbang bskur ba'i phyir te/ de yang rim pa 'di ltar bya'o/ /thog mar rtsa ba'i dkyil 'khor gyi mdun du bar khru dos bcad de/ de dbang bskur ba'i dkyil 'khor rim pa gcig pa sgo gcig pa bris la/ de'i nang pad+ma 'dab ma brgyad pa bris te/dkyil 'khor gyi grwa bzhir rdo rje 'dzin pa bzhi bri/ pad+ma 'dab ma brgyad pa yang byang chub sems dpa' bzhi dang / ci bgyi zhes pa bzhi ste brgyad bri/ pad+mo'i dbus su chos kyi dbyings kyi yi ge raM bris la der slob ma bzhag ste/ dri dang me tog la sogs pa'i mchod pa dang bkra shis pa'i tshigs su bcad pa dang /gleng gzhi rgya chen po snyan pa rnams kyis bsgrags shing / kun du bzang po la sogs pa'i byang chub sems dpa'i rnams kyis byin gyis brlabs pa'i rin po che bzhi'i bum pa dkyil 'khor chen po lan re bskor nas slob ma de'i spyi bo nas blugs so//de'i 'og tu 'dir dngos kyis ma smos kyang / /de bzhin gshegs pa'i gtsug tor dang / spyan dang / lce dang / go cha rnams kyi phyag rgya dang / sngags kyis kyang slob ma de la pad+mo'i steng na 'dug pa nyid na rim pa bzhin du byin gyis brlab par bya'o/ / de nas gnas de nas bslangs te/ dkyil 'khor de'i nye 'khor du khri bzang po gcig gzhag ste/ gos gsher ba brjes nas gsar pa phrugs gcig gon nas khri steng du gzhag ste dri dang me tog la sogs pas mchod nas/ slob dpon nyid mig phye ba'i thur ma thogs nas mdun du 'dug ste/ de bzhin gshegs pa rnams kyis bu khyod mi shes pa'i rab rib rnams bsal to zhes pa la sogs pa'i tshig brjod do/ /de nas me long blangs la chos rnams gzugs brnyan dang 'dra ste/ rang bzhin med pa'i stong pa nyid kyi tshul du sgoms shig ces pa'i tshig brjod do/ /de nas de ltar bdag gi don yongs su rdzogs nas pha rol gyi don phun sum tshogs par bya ba'i phyir rkang pa'i 'og tu gser gyi 'khor lo bzhag ste/chos kyi 'khor lo bskor cig ces bsgrags so/ /de nas chos kyi 'khor lo bskor ba de yang sangs rgyas gsung mchog 'jig rten gyi khams thams cad du khyab par grags pa bskor bar bya ste/gsung mchog de'i phyag rgyar gyur pa dung bzang po cig lag pa g.yon par byin la/ chos kyi dung khyod kyis byin cig ces brjod do/ /de ltar sems can gyi don byas nas sangs rgyas rnams la byas pa shes pa'o zhes pa la sogs pa'i tshig de'i 'og tu brjod par bya ste/de rnams ni las su bya ba'i rim pa bsdus te bshad pa'o/ /yan lag gi don so sor bshad pa ni/ sems dpa' chen po mngon par dbang / /bskur ba rgyas pa ru ni bya/ /yang dag yid gcig gis la nyon/ /zhes pa ni mngon par dbang bskur ba zhes pa ni tshig gi don gong du bshad zin to//rgyas pa ru ni bshad par bya/ /zhes pa ni dbang bskur ba'i cho ga 'og nas 'byung ba rnams dang ldan par bshad do zhes pa'o/ /sngon gyi sangs rgyas rnams kyis bshad pa'i zhes pa ni sangs rgyas thams cad mnyam pa nyid pas bya ba gcig tu bstan pa'o/ /de nas gsang ba'i bdag po nang gi dkyil 'khor gyi mdun du phyi rol gyi khru ngo bor la dkyil 'khor bri ba ni/gru bzhi pa la sgo gcig ste/ /zhes pa'i don gzhan ni sngar bshad zin te/ 'dir dngos su ma smos kyang spyi'i mtshan nyid ltar byas na/ nang gi dkyil 'khor gyi sa shar phyogs su gzhol na dbang bskur ba'i dkyil 'khor byang phyogs su bri bar bya/nang gi dkyil 'khor byang phyogs su gzhol na/ dbang bskur ba'i dkyil 'khor nub phyogs su bri bar bya ste/ 'dir ni nang gi dkyil 'khor gyi mdun du dbang bskur ba'i dkyil 'khor bri bar 'chad par gsungs pas/ dbang bskur ba'i chus nang gi dkyil 'khor la chu mi 'byung bar bya ba'i phyir/nang gi dkyil 'khor gyi sa byang phyogs su gzhol bar bya'o/ /'on te shar phyogs su gzhol na yang bar sa rgal gyis gcad par bya'o/ /grwa bzhir rdo rje 'dzin pa bzhi gzhag par bya ste zhes pa ni rdo rje 'dzin pa de rnams dang / 'og nas byang chub sems dpa' bzhi dang / ci bgyi zhes pa bzhi 'byung ba rnams kyang de bzhin gshegs pa'i yon tan las gyur pa ste/ 'phro ba med par spyod pa zhes pa'o/ /nam mkha' dri med ces pa ni stong pa nyid kyi spyod yul nam mkha' dang 'dra ba ste shes bya dang nyon mongs pa'i dri ma spangs pa'o//dri ma med pa'i mig dang zhes pa ni gzung ba dang 'dzin pa'am/ shes bya dang nyon mongs pa'i sgrib pa spangs pa'i shes rab can zhes pa'o/ /sna tshogs gos 'chang ba zhes pa ni gos g.yogs par byed pa bas ngo tsha ba ste/ gang ngo tsha ba yod pa mi bya ba rnams mi byed pa dang / bya ba'i rigs pa rnams byed pa dang / dam pa rnams kyis bsngags pa ste de lta bu ni ngo tsha ba dang ldan pa zhes pa'o/ /dbus pad+ma chen po 'dab ma brgyad la/ ge sar bcas par gyis la zhes pa ni ye shes brgyad kyi phyag rgyar gyur pa'o/ /ge sar ni yon tan rnams so/ /'dab ma bzhi la byang chub sems dpa' grogs su gyur pa smon lam gyi mthu dang ldan pa bzhi bri ste zhes pa ni byang chub sems dpa' de rnams de bzhin nyid kyi yon tan las gyur pa ste/gnyis su ni rang gi don phun sum tshogs pa gnyis ni pha rol gyi don phun sum tshogs pa'i rang bzhin te/ smon lam gyi dbang gis chos kyi rgyal por dbang bskur ba de'i pad+mo'i gdan gyi gnas su gyur pa ste/de la gzungs dbang rgyal po zhes pa gzungs ni shes rab kyi rgyal por gyur pa zhes pa'o/ /dran pa yang dag ces pa ni shes rab de nyid mi gnas pa'i mya ngan las 'das pa'i rang bzhin sems can rnams la rgyun mi 'chad do//phan pa lhag par sems pa zhes pa ni sems can rnams la phan par sems pa'o/ /snying rje can zhes pa ni snying rje'i dbang gis sems can rnams la phan par sems pa ste/ de gnyis ni pha rol gyi don phun sum tshogs pa'i rang bzhin no/ /gong ma gnyis ni rang gi don phun sum tshogs pa'i rang bzhin no//lo ma bzhi po gzhan la ni/ /ci bgyi zhes pa bzhi bri ste/ /zhes pa yang de bzhin nyid kyi yon tan du shes par bya ste/ smon lam gyi dbang gis gyur pa ni gong ma bzhin no/ /sems gzhan la spyod pa zhes pa ni gzhan gyi sems shes pa'i rang bzhin no//'dod pa yongs su rdzogs par bya/ /zhes pa ni sems can rnams kyi re ba yongs su rdzogs par byed pa zhes pa'o/ /ma chags pa dang rnam par grol ba zhes pa ni 'bras bu'i yon tan de stong pa nyid kyi rang bzhin chags pa med pas na grol ba'o/ /gong ma gnyis ni rgyu'i rang bzhin no/ /dbus su ni bsam gyis mi khyab pa'i chos kyi dbyings kyi gzugs so zhes pa ni/chos kyi dbyings kyi yi ge kha dog dkar po pad+mo'i snying po la gzhag go/ /rin po che'i bum pa bzhi zhes pa ni/ gser dang dngul dang / pad+ma rA ga dang / margat+ta'i bum pa gser dang dngul de dag gis brgyan pa'i bum pa bya'o//de ltar yang ma 'byor na de rnams kyi kha dog dang mthun pa'i sa'i bum pa bya ste/ de dag la sogs pa'i yo byad rnams 'byor pa las ji skad du 'byung ba bzhin du ma sbyar na 'jungs pa'i sems dang ldan te/ sems ma dag pas lha rnams kyang byin gyis mi rlob ces gzhung las 'byung ngo //snying nas med pa mi 'byor du mi rung na snyam nas mi spobs te/ mi byed dam 'tsho ba'i yo byad dang / nad gsos kyi sman zong yang mi 'jog par byed na/ yang dgongs pa'am cho ga mi shes pa ste/ 'tsho ba'i yo byad dang nad rkyen gyi sman zong du snyad btags nas lhag par yod la gtong mi phod na gong du smos pa dang 'dra ste/mdor na sems la sgyu med pa gtsang sbrar shes par bya'o/ /kun du bzang po la sogs pa byang chub sems dpa' rnams kyis byin gyis brlabs pa yang / slob ma de ngan song spong bar bstan pa'i phyir ro/ /thog ma nyid du ngan song thams cad sbyang ba'i byang chub sems dpa'i sngags kyis btab pa'i bum pas blugs so//ngan song spangs nas shes bya dang nyon mongs pa'i sgrib pa dang bral bar gyur cig pa'i don du/ de nas sgrib pa thams cad rnam par sel ba'i sngags kyis btab pas blugs so/ /de nas kun du bzang po'i sa thob par gyur cig pa'i don du kun du bzang po'i sngags kyis btab pa'i bum pas blugs so//de nas chos kyi rgyal tshab tu gyur cig pa'i don du byams pa'i sngags kyis btab pa'i bum pas blugs par bya'o/ /sngags pas pad+ma dam pa de la ni rang gis bzhag nas su zhes pa nas/ de nas yang de mchod pa ni//me tog spos la sogs pas so/ /zhes pa'i bar du don gzhan ni gong du bshad zin to/ /slob ma des dbang bskur bar bya ba'i tshe 'dir dngos su ma gsungs kyang / dkyil 'khor du 'jug pa'i tshe na/ rdo rje sems dpa'i skur bsgyur te/ de las gzhan pa'i skur bsgyur bar ma gsungs pas rdo rje sems dpa'i skur bsgyur te dbang bskur bar bya'o//dbang bskur ba'i tshe pad+ma'i gdan la bzhugs pa yang 'khor los sgyur ba'i rgyal po'i 'dug thabs su bzhag ste/ rkang pa g.yon pa khri'i steng du gzhag la g.yas pa sa la bzhag ste/ lag pa g.yon pa khri la bsten la/g.yas pa pus mo la bzhag /gdong yang mi mtho mi dma' bar drang por blta bar bya'o/ /thur ma blang ba gser gyi ste/ /zhes pa nas/ thur ma'i sman pa rgyal po yis/ /ji ltar 'jig rten rnams la sngon gyi'o/ /zhes pa'i bar du rim pa bzhin du gong du bshad pa'o/ /ma rig pas bsgribs pas/bu khyod kyi rgyal bas khyod kyi de bsal ba ni zhes pa sngon mnyam pa dang / bsam pa'i shes rab kyi rgyu la sogs pa mi shes pa/ rgyal ba'i lung slob dpon gyis bshad pa mi shes pa bsal to zhes pa'o/ /thur ma'i sman pa rgyal po yis/ /ji ltar 'jig rten rnams la sngon gyi'o//zhes pa ni dpe ste/ ji ltar mig gi sman pa'i rgyal pos 'jig rten pa rnams kyi mig gi rab rib bsal te/ gzugs la sogs pa'i rang gi dngos po ji lta ba bzhin du 'dug pa mi mthong ba las mthong bar byas pa bzhin du/ rgyal ba rnams kyis kyang bu khyod kyi ma rig pas chos rnams kyi mtshan nyid ji lta ba bzhin 'dug pa mi shes pa las shes par bya'o zhes pa'o//me long la 'di ltar yang chos kyi mtshan nyid de smros shig /chos rnams gzugs brnyan dang 'dra ste zhes pa ni/ phung po dang khams dang skye mched la sogs pa'i chos rnams gzugs brnyan dang 'dra ste bltar yang snang la/yang dag par ni brtags na dngos po yod pa ma yin pa'o/ /phra zhes pa ni 'di ltar phung po la sogs pa'i chos rnams phung po'i rang bzhin du dmigs su med pas phra ba zhes pa'o/ /dge ba zhes pa ni shes bya dang nyon mongs pa'i sgrib pa dang bral ba zhes pa'o//rtog pa med pa zhes pa ni sgrib pa dang de dag gi bag chags kyang med ces pa'o/ /mi gzung ba brjod du med pa zhes pa de lta bu'i stong pa'i rang bzhin la rnam par shes pa drug gis gzung du med cing / tshig gis brjod du med pa de las 'das pa'o/ /rgyu dang las las byung ba'o zhes pa ni phung po la sogs pa'i chos rnams ye nas yod pa'i rang bzhin ma yin gyi/rgyu dang las las byung bas na gzugs brnyan dang 'dra ste/ yod pa ma yin pas brjod du med pa la sogs pa'i tshig gong ma de rnams dang sbyar ro/ /de bzhin chos 'di shes par gyis/ /rang bzhin med cing gnas med pa//zhes pa ni gzugs brnyan dang 'dra bas rang bzhin med pa'o/ /rgyu dang rkyen las byung bas skad cig ma'i cha mi gnas par shes pa ste/ de rnams chos rnams kyi mtshan nyid ji ltar shes nas de lta bu'i tshul du bsgom pa'i shes rab kyis sgoms shig ces pa'o/ /tshad med sems can don byos shig /ces pa nas bla na med pa chos kyi dung sgra bsgrag go zhes pa'i bar du ste de ltar bdag gi don phun sum tshogs nas/ pha rol gyi don phun sum tshogs par byos shig ces pa ste gong du bshad zin to/ /sangs rgyas rnams kyi bur skyes so/ /zhes pa ni khyod de bzhin gshegs pa'i ye shes las skyes so zhes pa'o//the tshom blo ngan dogs pa med pa'i sems kyis so/ /zhes pa ni chos kyi 'khor lo bskor zhing sems can gyi don bya ba de ltar yin nam ma yin snyam pa'i the tshom med pa dang / mi bya'o snyam pa'i blo ngan pa mi skye ba dang 'khor rnams la bag tsha ba med par 'jig rten pa rnams la sngags spyad pa'i tshul gyis chos rab tu sgrogs shig ces pa'o//de ltar byas pa shes pa/ sangs rgyas de nas phan 'dogs pa/ /zhes brjod pa ni de ltar sems can gyi don byas na/ sangs rgyas rnams kyi bya ba byas pas dran zhing sangs rgyas la lan ldon par bshad pa zhes pa'o//rdo rje 'dzin pa de kun kyang / /khyod la rtag tu srung bar byed/ /ces pa ni dbang bskur ba'i dkyil 'khor gyi grwa bzhir rdo rje 'dzin pa bzhi gzhag pa dang / pad+ma'i 'dab ma la bzhugs pa'i byang chub sems dpa' de rnams kyang las byas pa'i don yod do snyam nas srung bar byed do zhes pa'o//de nas slob ma de bslangs la/ snying rjes song ba'i yid kyis su/ /zhes pa nas/ de nas su ni khas blang ba/ /nang gi bdag nyid nges pa'o/ /zhes pa'i bar du slob ma la dam tshig bstan pa ste/ de yang sngon dam tshig mnos pa dang ma mnos pa gnyis ka la bstan te/ de la slob ma dam tshig bzhi dang lnga dag tu ldan la/ las dang bya ba dag la sbyar ba rgyud la sogs pa dang / dam tshig shes shing mnos zin pa la bstan ci dgos she na/ 'jig rten na rgyal po rnams kyang rgyal chos su bya ba rnams snga na yang shes shing srung mod kyi/ nam rgyal por dbang bskur ba'i tshe yang slob dpon la sogs pas bstan cing gos par byed do//de bzhin du 'dir yang snga nas yang dam tshig 'di rnams srung mod kyi/ chos kyi rgyal por dbang bskur na chos kyis bstan par bya'o/ /gsum du na yang dang yang du bstan na brtan par 'gyur ba'i phyir ro/ /de nas slob ma de bslang la//snying rjer song ba'i yid kyis ni/ /sngags pas nang du bcug nas su/ /de la dam tshig bstan par bya'o/ /zhes pa ni me long dang 'khor lo la sogs pa bstan pa'i gnas de nas slob ma de bslang ste/ slob dpon gyis slob ma'i gdugs bzung nas/ dkyil 'khor dang po'i sgo khyud kyi nang du khrid la/sgo khyud kyi nang der gzhag ste 'og nas 'byung ba'i dam tshig rnams bstan par bya zhes pa'o/ /bu khyod deng phan chad/ srog gi yang ni phyi ru yang / /dam pa'i chos ni yongs btang ba/ /zhes pa ni dam pa'i chos de btang ba la yang rnam pa gsum ste/theg pa chen por bltas pa las log par bltas pa dang / chos smra ba la bltas par dbang bza' zhing skur pa 'debs pa de nyin re zhing dam pa'i chos nyan pa dang / sems pa dang / sgom pa dang / 'dri ba dang / klog pa dang mchod pa la sogs pa byas pa las gang yang rung ba cig ma byas na dam pa'i chos btang ba zhes bya ste/de rnams khyod kyis srog gi phyir yang mi gtang ngo zhes pa'o/ /de nas gzhan yang byang chub sems dpa' zhes pa ni mi gtang zhes par sbyar te/ byang chub kyi sems rnam pa bzhi las smon lam gyi sems dang 'jug pa'i sems dag mi gtang ba la bya ste/sems can rnams la phan pa'i phyir bdag sangs rgyas su gyur cig ces pa dang / chos thams cad stong pa nyid du bsgom pa rtag tu bya'o zhes pa'o/ /ser sna khyod kyis yongs mi bya/ /zhes pa ni chos dang nor bdag la yod pa las gzhan la sbyin par rigs pa las mi sbyin par mi bya'o//sems can la yang gang gnod pa/ /zhes pa ni mi bya zhes pa dang 'brel te lus dang ngag dang yid gsum gyi sgo nas sems can rnams la 'phral gyi gnod pa dang yun gyi gnod pa mi bya zhes bya'o/ /bla ma slob mas phyag bya ba/ /gus par nan tan rkang pa la'o/ / de nas thams cad khas blang ba/ /nang gi bdag nyid nges pas so/ /zhes pa ni gong du slob dpon gyis dam tshig sgom pa de rnams lus dang ngag dang yid gsum gyi sgo nas 'gyur ba med par khas blang ngo zhes pa ste/ lus kyis bla ma la slob mas phyag bya ba dad cing gus pas rkang pa la'o zhes pa'o//ngag gis zhes pa nas thams cad khas blang pa zhes pa ste/ bka' stsal pa bzhin du bgyi'o zhes smra bar bya'o/ /sems kyis ni nang gi bdag nyid nges pas so zhes pa ste/ slob dpon gyi ngo tsam du khas blang ba ma yin gyi/ sems thag ma nas zhes pa'o/ /de yan chad du snying rje chen po 'byung ba'i dkyil 'khor gyi cho ga rnams rdzogs so// //da ni snying rje chen po 'byung ba'i dkyil 'khor der zhugs pa rnams kyis rjes su bsngags pa bshad de/ de yang de nas bcom ldan 'das la phyag na rdo rje gsang ba'i bdag pos 'di skad ces gsol to zhes pa ni bcom ldan 'das rigs kyi bu pho dang /rigs kyi bu mo de dag rnams ni sangs rgyas bcom ldan 'das bzhin du blta'o zhes pa'i bar du ste/ bcom ldan 'das rigs kyi bu'am rigs kyi bu mo gang snying rje chen po 'byung ba'i dkyil 'khor chen po'i dam tshig la zhugs nas de'i bsod nams ji snyed cig mngon par 'dus par rig par bgyi zhes pa ni dkyil 'khor du zhugs shing dam tshig mnos pa tsam 'ba' zhig la mi bya'o//de bzhin gshegs pa'i sku la sogs pa mnyam pa nyid mi zad pa'i rdo rje'i rgyan de dag gi byin gyis brlabs su gyur pa/ snying rje chen po'i dkyil 'khor dang /yi ge 'khor lo bskor ba'i dkyil 'khor dang / gsang ba'i dkyil 'khor rnams de bzhin gshegs pa'i sku gsung thugs kyi mtshan mar gyur pa ste/ de dag nyid dam tshig gsum zhes pa'o/ /dam tshig de zhugs pa zhes pa ni de'i rgyu'i rang bzhin 'bras bu la sbyor bar shes pa zhes pa ste/de dag shes pa yang rgyu shes pa ni sku mi zad pa la sogs pa'i rdo rje'i rgyan gyi rgyu byang chub kyi snying po yin par shes pa'o/ /rang bzhin gyi sku mi zad pa la sogs pa nyid du shes pa'o/ /'bras bu la sbyor ba ni bla na med pa'i byang chub tu 'gyur ram/ ji ltar bsams pa 'grub pa la sogs pa 'thob pa'i phyir/sngags kyi spyod pa rnams shes nas/ /de la sbyor ba ste de lta bur zhugs na bsod nams ji tsam mngon par 'dus byas pa zhes zhus pa'o/ /ji snyed sems thog ma bskyed pa nas de bzhin gshegs pa 'byung ba'i bsod nams mngon par 'dus byas pa de snyed du rigs kyi bu'am rigs kyi bu mo de'i bsod nams mngon par 'dus byas par rig par bya'o zhes pa ni sa dang po'i sems bskyed pa nas sa bcu gcig tu 'gyur ba'i bsod nams mngon par 'dus byas pa dang mnyam mo zhes pa ste/ci'i phyir zhe na/ dam tshig de lta bu la zhugs pa ni mos pa spyod pa nas zhugs na mtha' de bzhin gshegs pa'i bar 'gyur ba'i phyir ro//rigs kyi bu dang rigs kyi bu mo de dag ji ltar zhal dang lhums nas skyes pa'i sras po zhes pa zhal nas skyes pa ni/ 'jug pa'i sgo nas skyes pa zhes pa ste/ de bzhin gshegs par 'jug pa'o/ /sgo ni mos pa spyod pa'i sa la sogs pa ste de dag mos pa spyod pa'i sa la zhugs pa'i phyir ro//lhums su skyes pa'i sras po zhes pa ni de bzhin gshegs pa'i spyod pa dang mthun par spyod pa'i phyir ro/ /rigs kyi bu dang rigs kyi bu mo de dag phyogs gang na 'khod pa de dag de bzhin gshegs pas chen po bya mi dgos so zhes pa ni de dag gang na 'khod pa na sems can gyi don spyad pa ste sa phyogs der de bzhin gshegs pas sems can gyi don spyad pa chen po mi dgos zhes pa'o//mgrin gcig tu zhes pa ni dus gcig tu smras pa dang / smra ba'i tshig gcig pa dang / smra bar bya ba'i don gcig pa dang / sgra gcig tu 'byin pa'o//da ni dkyil 'khor la sogs pa srung ba la sogs pa rnams 'chad de/ sngags de rnams kyang de bzhin gshegs pa'i gsung gi 'khor los khams gsum du khyab pa'i byin gyis brlabs su gyur pa ste/ de nas bcom ldan 'das rnam par snang mdzad kyis 'khor de dag thams cad la gzigs nas zhes pa nas/dus gsum du ma chags pa'i stobs kyi sngags kyi tshig ces bya ba yod do zhes bya ba'i bar du ste/ khyad par de lta bu dang ldan pa'i sngags yod kyis bshad do zhes pa'i tshig kho nas dbyung bar rig par bya'o/ /mtha' yas par 'phro zhing lus rgya chen po zhes pa ni sems can gyi khams thams cad du khyab par 'jug pa zhes pa'o//sna tshogs kyi gzugs kyi nor bu dang 'dra zhes pa ni yid bzhin gyi nor bu de gzugs rnam pa sna tshogs su yang snang la sems can ci 'dod pa thob par bya ba sna tshogs byed de/ de bzhin du rig pa'i rgyal mo 'di yang sems can rnams kyi don du gzugs sna tshogs ston cing bya ba sna tshogs byed pa zhes pa'o//tshad med pa'i bsod nams kyi tshogs bsags pa zhes pa ni de bzhin gshegs pa'i gsung de tshad med pa'i bsod nams kyi tshogs bsags pa las byung ba'i phyir ro/ /thogs pa med par gnas pa zhes pa ni sems can gyi khams thams cad du ye shes kyis sgrib pa med par mkhyen pa zhes pa ste/de bas na dus gsum du ma chags pa'i stobs kyi gnas kyi tshig ces gsungs so/ /de nas bcom ldan 'das kyis de'i tshe re ba thams cad yongs su rdzogs par byed pa zhes pa nas ting nge 'dzin la kun du mthun par zhugs so zhes pa'i bar du rig pa'i rgyal mo de yongs su bsgrags pa'i phyir ting nge 'dzin la zhugs pa ste/de ltar ting nge 'dzin du zhugs pa yang bcom ldan 'das ting nge 'dzin de lta bu zhig la zhugs kyis ngo mtshar zhig 'byung ngo snyam nas/ sems can rnams de ltar blta pa dang nyan par gzung par bya ba'i phyir ro//re ba thams cad yongs su rdzogs par byed pa lce'i dbang pos sangs rgyas bcom ldan 'das kyi zhing thams cad du khyab par byas nas zhes pa ni ting nge 'dzin der 'jug pa'i phyir/ de bzhin gshegs pas bskal pa du mar bden pa'i tshig bsams pa las gyur pa de bzhin gshegs pa'i skyes bu chen po'i mtshan lce rgya che ba srab pa kha dog zangs 'dra ba des khyab par byas zhes pa'o//rgya chen po zhes pa ni ting nge 'dzin de'i khyad par te khams gsum thams cad du khyab par byed pa'i phyir ro/ /rnam par dag pa zhes pa ni shes bya dang nyon mongs pa'i sgrib pa med pa'o//chos kyi rgyal mtshan zhes pa ni chos ston pa rgyal mtshan ltar gzhan las 'phags par ston pa'o/ /mtshan zhes pa ni ting nge 'dzin de nyid sngags kyi tshig ston pa'i mtshan nyid do/ /rtse mo kun du blta ba zhes pa ni khams gsum thams cad du gzigs pas na rtse mo ltar mtho ba ste de dag ni ting nge 'dzin gyi khyad par ro//de bzhin gshegs pa thams cad kyi chos kyi dbyings khyab par zhes pa ni khams gsum thams cad khyab pa zhes pa ste/ de bas na sems can gyi khams yongs su skyong ba zhes bya ba ste/ bcom ldan 'das de lta bu'i sgra 'byin cing rig pa'i rgyal mo gsungs so zhes pa dang sbyar ro//de skad gsungs ma thag tu zhes pa nas/ stobs chen gsang sngags 'di dran pas so zhes pa'i bar du rig pa'i rgyal mo de'i mthu rjes su bsngags pa ste/ bsrung zhing bsgrib pa dang bskyab pa'i phyir ro zhes pa ni/ bsrung ba ni gnod pa chung ngu las bsrung ba'o/ bsgrib pa ni gnod pa 'bring po las bsgrib pa'o/ /skyob pa ni gnod pa chen po las sems can rnams sbed par byed pa'o/ /de dag la ni 'jigs pa chen po gang dag bsrung ba snying la gnas pa zhes pa ni sems can gang rig pa'i rgyal mo 'di snying la dran na 'jigs pa med do zhes pa'o/ /de nas bcom ldan 'das kyis chos kyi dbyings rgya chen po byin gyis brlab pa zhes pa nas/de bzhin gshegs pa'i lce'i zhes pa'i bar du dkyil 'khor dgod pa'i sngags rnams bshad pa ste/ de nas bcom ldan 'das kyis chos kyi dbyings rgya chen po byin gyis brlab pa zhes pa ni chos kyi dbyings la yang rnam pa gnyis te zab pa dang rgya che ba'o//de la zab pa ni byang chub kyi snying po'i rang bzhin no/ /rgya che ba ni sku la sogs pa mi zad pa'i rdo rje rgyan gyi 'khor lo ste sku la sogs pa mi zad pa'i 'khor lo de nyid byin gyis brlabs nas zhes pa'o/ /de'i tshe chos kyi dbyings mdzod kyi snying po zhes bya ba'i ting nge 'dzin la snyoms par zhugs so zhes pa ni ting nge 'dzin de'i bye brag ste/chos kyi dbyings mdzod ces pa ni dam tshig gi sngags la sogs pa de las 'byung ba'i phyir ro/ /snying po zhes pa ni 'byung ba'i gnas te sngags de rnams 'byung ba'i gnas de yin no zhes pa'o//dam tshig las byung ba'i rig pa gsungs so zhes pa ni/ /dam tshig ces pa ni kun 'gro ba'am chud pa ste/ de yang sku la sogs pa mi zad pa'i rdo rje'i rgyan te de chud par 'jug pa ni rig pa 'di ste 'jug pa yang ma thob par 'jug pa dang thob nas zhig ste 'jug pa'o/ /de la ma thob par 'jug pa ni dkyil 'khor ma mthong ba dang por rig pa 'di blangs te 'jug pa'o//byang chub sems dpa' kun du bzang po la sogs pa rnams kyang rig pa de brjod pa tsam gyis rang bzhin gyi dkyil 'khor de mthong bar 'gyur ro/ /thob nas zhig ste 'jug pa ni dkyil 'khor ma mthong ba dang / bar gzhan gyis chod nas dam tshig gi sngags 'don pa'o/ /sngags de 'don pa yang de bzhin gshegs pa'i sku dang gsung dang thugs gsum gyi 'khor lo'i yon tan brjod pa de thos pa'o/ /de nas de ma thag tu sangs rgyas kyi zhing thams cad dang / byang chub sems dpa'i 'khor 'dus pa thams cad du dam tshig la 'jug pa'i rig pa'i sgra 'byung ngo zhes pa sangs rgyas kyi zhing thams cad ces pa ni 'dul ba'i 'gro ba phal rnams la'o//byang chub sems dpa' 'khor 'dus pa thams cad du zhes pa ni kun du bzang po la sogs pa'i 'khor rnams la'o/ /gang thos nas ni chos kun la mi 'da' ba ni mkhas pa'o zhes pa ni dam tshig ni mkhas pa rnams kyis thos nas lung gi chos dang thob pa'i chos gnyis las mi 'da' ste/lung gi chos las mi 'da' ba ni dam pa'i chos yongs su mi gtong ba la sogs pa'i dam tshig rnams mi 'dral ba'o/ /thob pa'i chos las mi 'da' ba ni rang bzhin gyi dkyil 'khor de yid la byed pa de mi gtong ba'o//chos kyi dbyings su 'byung ba'i sngags ni 'jug pa ste slob ma'am bdag kyang rung ste stong pa nyid du bsgyur ba'o/ /rdo rje sems dpar byin gyis brlab pa'i sngags ni gnas pa ste ye shes lnga'i rang bzhin nam/ rdo rje sems dpa' nyid kyi skur gnas pa'o//rdo rje go cha'i sngags ni ldang ba ste sems can thams cad bde ba dang ldan pa'i byams pa chen po'i go cha bgos pa'o/ /de bzhin gshegs pa'i spyan gyi sngags ni slob ma mig g.yogs bkrol te dkyil 'khor bltar gzhug pa'o/ /dri'i sngags ni de bzhin gshegs pa'i tshul khrims rnam par dag pa'i yon tan las gyur pa'o//me tog gi sngags ni byams pa chen po'i yon tan las gyur pa'o/ /bdug pa'i sngags ni chos kyi dbyings dang rjes su mthun pa'i ye shes kyis nyon mongs pa la sogs pa sreg pa'i yon tan las gyur pa'o//me mar gyi sngags ni de bzhin gshegs pa'i ye shes kyi 'od 'bar ba nam mkha' bzhin du rgya che bar snang ba las gyur pa'o/ /ar+g+ha'i sngags ni chos kyi dbyings rnam par dag pa nam mkha' dang mnyam pa dang mnyam pa med pa las byung ba'o/ /gtsug tor gyi sngags ni de bzhin gshegs pa'i spyi gtsug bltar mi snang ba nam mkha' ltar mtha' med pa las byung ba'o//de bzhin gshegs pa'i go cha'i sngags ni/ de bzhin nyid thob par byed pa'i lam gyi ye shes 'bar ba des shes bya dang nyon mongs pa'i sgrib pa dag sreg par byed pa las byung ba'o/ /kun du 'bar ba'i sngags ni 'od kyi dkyil 'khor te de yang lam gyi shes rab 'bar ba ste/shes bya dang nyon mongs pa'i sgrib pa sreg par byed pa las byung ba'o/ /yang dag par gshags pa'i lce'i sngags ni/ bden pa'i tshig gi chos la gnas pa las byung ba ste de bzhin gshegs pa'i spyan dang /gtsug tor la sogs pa'i sngags de rnams 'og nas 'byung ba'i phyag rgya dang ldan par bya ste/ slob dpon nyid de bzhin gshegs pa'i skur bsgyur na yang sngags de rnams kyis bsgyur ba'o/ /nam snying po 'bru gcig pa las bsgyur na ni 'di rnams kyang mi dgos so/ /slob ma dbang bskur ba na yang bum pa'i chus blugs pa'i 'og tu sngags de rnams phyag rgya dang bcas par sbyar ro//ji ltar bcom ldan 'das kyi dkyil 'khor de bri ba'i tshe ni bgegs zhi bar 'gyur zhes pa ni/ dkyil 'khor thog mar 'dri ba ste/ sbyor ba'i tshe dang bris nas slob ma la sogs pa gzung ba'i las byed pa'i tshe na/slob ma la sogs pa bcud zin pa'i tshe bgegs byung na ji ltar bgyi zhes zhus pa'o/ /sngags rnams kyang ni sgrub pa yi/ /bgegs rnams kyis ni gnod mi byed/ /ces pa ni dkyil 'khor bris kyang rung ste/ spyir sngags sgrub pa la bgegs byung na ji ltar zhi bar bgyi zhes pa'o//sngags rnams kyang ni ji ltar sgrub/ /ces pa ni sngags sgrub pa bzlas pa'i yan lag bzhi la sogs pa ji ltar bgyi zhes pa'o/ /'bras bu'ang ci ru 'gyur zhes pa ni sngags bsgrubs na de'i 'bras bu ci 'dra bar 'gyur zhes pa'o/ /bgegs ni rang gi sems las byung //zhes pa nas/ tshangs pa brgya byin bcas pa'o/ /zhes pa'i bar du bgegs zhi bar bya ba bshad pa ste/ de yang mtshan ma med pa ste/ mtshan ma dang bcas pa'o/ /mtshan ma med pa ni byang chub bsgom pa'o/ /mtshan ma ni 'phags pa mi g.yo ba'i gzugs su bsgyur zhing sngags dang phyag rgya dang dkyil 'khor dang ldan par sbyar ba'o//bgegs ni rang gi sems las byung / /sngon chad ser sna bsnyen pas te/ /de yi rgyu ni gzhig pa'i phyir/ /byang chub sems zhes dran pa ste/ /zhes pa ni bgegs chos dang zang zing gzhan la mi gtong bar 'jungs pa'i bsnyen pa'i bag chags rang gi sems la sogs pa las gyur te/bgegs de'i rgyu ni ser sna yin te/ de gzhig pa'i phyir byang chub kyi sems bsgom pa na snying po nyid kyi rang bzhin goms par bya ba ste/ stong pa nyid goms par byas na/ ser sna'i dngos po'am bgegs kyi dngos po dag dmigs su med pa'i sgo nas zhi bar 'gyur ro/ / gang gi rtog pa spangs pa zhes pa nas rnam par rtog pa las byung de kun de bzhin zhes pa'i bar du byang chub kyi sems de nyid kyi khyad par te/ byang chub kyi sems de ni rnam par rtog pa la sogs pa spong zhing 'gog pa'i rang bzhin no zhes pa'o/ /sngags pa byang sems dran par bya/ /yid la mi g.yo ba yi bzlas//bgegs rnams kyang ni rab tu 'bros/ /de yi phyag rgya byas na'o/ /zhes pa ni bgegs bsal ba'i thabs gnyis pa ste/ sngags pa byang chub kyi sems dran par byas nas 'phags pa mi g.yo ba'i sngags yid kyis zlos pa ni/ de'i snying gar rlung gi dkyil 'khor gyi nang na yi ge haM 'dug par bsams te/yi ge haM gi sgra chos thams cad rgyu dang 'bras bur mi dmigs pa ni byang chub kyi sems dran pa'o/ /sngags zlos yid la mi g.yo ba zlos pa ste/ de ltar sngags de phyag rgya dang ldan par bzlas te/ bsdigs na bgegs de 'byer bar 'gyur ro/ /rlung bcing ba ni 'di nyon cig pa nas sngon gyi rgyal bas gsungs zhes pa'i bar du rlung mnan pa'i cho ga ste/bdag yi ge a las rnam par snang mdzad du bsgyur nas/ yid la 'phags pa mi g.yo ba'i snying po haM bsams shing / rlung gi phyogs su yi ge dri'i thig le bdun bya ba ni/ rlung gi rgyal po 'khor dang bcas pa ste/'khor drug gi mtha' bskor nas rgyal po nyid dbus su bzhag la/ kun kyang ri dwags la zhon pa/ kha dog sngon por bsams te/ de'i steng du kham phor gyis bkab la/ kham phor de'i bar du bsams te/ de'i steng du yi ge aM bsams te/ aM las dbang chen gyi dkyil 'khor gser gyi kha dog 'dra ba shin tu khro bar bsam mo//sems dpa' chen po chu ni zhes pa nas/ sprin de ma thag 'gyes pa phyogs kun nas ni langs pa'o zhes pa'i bar du chu'i bgegs bsal ba ste/ bdag nyid yi ge ra las 'phags pa mi g.yo ba mdog dmar po 'bar bar bsams la/sprin gyi gzugs sa la bris te/ ral gri'i phyag rgyas de gtubs na 'jig par 'gyur ro/ /yang de la btab ste/ mkhas pas rdo rjer gyur pa ste/ zhes par 'gyur ro/ /yang na bgegs su 'gyur ba kun zhi bar 'gyur bar bya ba yang bshad do/ /chu'i bgegs de nyid bsal ba'i phyir gzhan gsungs te/bdag nyid phyag na rdo rjer bsgyur la/ rdo rje rtse lnga pa'i phyag rgya bcings la/ phyag rgya'i rtse sprin gyi gzugs la phur bus gdab pa'i thabs su btsugs pa ni zhi bar 'gyur ro/ /yang na bgegs su 'gyur ba kun zhi bar 'gyur ba bya ba yang bshad do/ /'chi ba yang ni dog med ces pa'i bar du bgegs zhi bar byed pa'i thabs gzhan du gsungs pa ste/sngags pa 'phags pa mi g.yo ba'i gzugs su bsgyur nas de'i sngags bzlas pa bya ste/ 'phags pa mi g.yo bar bsgyur ba yang / rlung gi dkyil 'khor snying gar bsams te/ de la gnas par bsam zhing sngags pa de nyid dkyil 'khor chen po'i sgo khyud kyi nang du 'dug la/der bgegs kyi gzugs bris te/ de'i spyi bor rkang pa g.yon pas btsir na bgegs zhi bar 'gyur ro/ /ske tshe dug dang bsres pa yis/ /zhes pa nas/ tshangs pa brgya byin bcas pa yang / /zhes pa'i bar du yang bgegs gzhan bsal ba'i thabs gzhan bshad pa ste/bgegs kyi gzugs byas la dug dang ske tshe bsres pas bskus te/ me la bskams na bgegs zhi bar 'gyur te/ /de nas bcom ldan 'das la phyag na rdo rjes 'di skad ces gsol to zhes pa nas/ sngags kyi sgo nas byang chub sems dpa'i spyad pa spyod pa'i byang chub sems dpa' rnams kyis kyang rang gi gnas la 'dug nas don thams cad la nan tan bgyi'o zhes pa'i bar du sngar bgegs bsal ba bshad pa'i skabs su/'phags pa mi g.yo ba rlung gi kha dog tu gnas te/ bskrad pa dang me'i kha dog tu bsgyur te/bgegs bskrad pa dang kham phor la dbang chen gyi dkyil 'khor bsam pa nas phyag na rdo rje mjal ba'i don/ zhi ba dang rgyas pa'i las bya ba rnams la/ lha rnams rang rang gi dkyil 'khor la gnas nas/ zhi ba la sogs pa'i las rnams byed par mjal te/ de ci'i phyir zhe na/ dam tshig gi tshul gyis de lta ste/lha rnams rang rang gi dkyil 'khor la gnas par sbyar na/ gang du bsam pa de byin gyis brlabs la las gang bya ba rnams kyang de bzhin gshegs pas ji skad gsungs pa bzhin du byed par 'gyur te/ de bas na sngags pa rnams kyang / lha'i kha dog ci 'dra ba der bsgyur te/las bya ba rnams mjal to zhes pa'o/ /bcom ldan 'das kyis bka' stsal pa/ gsang ba'i bdag po de de bzhin no/ /ji skad smras pa de de bzhin te zhes pa ni/ phyag na rdo rje mjal ba de phyin ci ma log par mjal to zhes pa'o/ /gang dang gang gi kha dog tu gsungs pa de'i dkyil 'khor yang de nyid do zhes pa ni/lha rnams kyi kha dog ste/ ci 'dra ba de'i dkyil 'khor yang de 'dra bar bya'o zhes pa ste/ kha dog ser po ni dbang chen gyi dkyil 'khor la sbyar bar bya/ lha'i kha dog dkar po ni chu'i dkyil 'khor du sbyar bar bya/ lha'i kha dog dmar po ni me'i dkyil 'khor la sbyar bar bya/lha'i kha dog sngon po dang nag po ni rlung gi dkyil 'khor la sbyar bar bya ste/ de rnams ni so so'i dkyil 'khor 'chad pa'o/ /de las mchod pa'i yo byad la sogs pas gzhan du bsgyur na/ rgyas pa'i lha yang zhi bar 'gyur/ zhi ba yang khro bo la sogs par dgos pa'i phyir sgyur du rung bar shes par bya'o//lha la la ni kha dog thams cad dang ldan pa ste/ dper na AR+Ya tA ra la sogs pa kha dog ljang gu bas kha dog thams cad dang ldan pa ste/ dkyil 'khor kun dang las thams cad byed par shes par bya'o/ /de bzhin du dgongs pa'i dbang gis mchod pa'i yo byad la sogs pas sgyur na/rang bzhin so so'i nges pa las kyang las thams cad byed par shes par bya'o/ /de la gsang ba'i bdag po ma 'ongs pa'i dus na sems can blo zhan pa zhes pa nas/ de dag gis sngon sems can rnams la phan par dgongs pa'i phyir/ 'di thams cad bstan par rab tu mi shes so zhes pa'i bar du lha rnams kyi kha dog gang yin pa dkyil 'khor yang de yin par gsungs pa/dbang po dang me'i dkyil 'khor la sogs pa ni/ 'jig rten pa'i rgyud la yod kyi/ 'jig rten las 'das pa'i rgyud/ bya ba'i rgyud dang spyod pa'i rgyud kun las mi 'byung bas na/ 'di ni sangs rgyas kyis gsungs pa ma yin no zhes zer te/gang 'jig rten gyi rgyud rnams kyang / sangs rgyas bcom ldan 'das thams cad mkhyen pas sems can rnams so so'i dad pa dang rjes su mthun par mi shes so zhes pa'i phyir ro zhes pa ste/ de ci'i phyir de ltar mi shes she na/ blo zhen cing dad pa chung ba la sogs pa'i nyes pas bskal pa'i phyir ro//chos rnams kyi mtshan nyid kyang blun po rnams kyis mi shes so zhes pa ni chos rnams kyi mtshan nyid stong pa nyid kyi rang bzhin yang de dag gis mi shes so zhes pa ste/ bdag kyang ma rung la/ gzhan yang ma rung bar byed do zhes pa dang sbyar ro/ /rtag tu sngags pa der gnas la//rab tu nges par las byed do/ /zhes pa ni sngags pas stong pa nyid la gnas nas zhi ba la sogs pa'i las bya'o zhes pa ste/ stong pa nyid la gnas nas las bya ba yang / gcig ni mtshan ma med pa'i ting nge 'dzin la gnas nas/ de nyid kyis grub pa thob par 'gyur ba'o//gcig ni stong pa nyid kyi ting nge 'dzin sngon du byas nas de las langs te/ bzlas pa la sogs pa byas nas grub pa thob pa'o/ /de dag ni bgegs zhi bar bya ba'i skabs so/ /da ni kun du bzang po la sogs pa byang chub sems dpa' de rnams thog ma mos pa spyod pa'i sa la zhugs pa'i tshe/rang gi rnam par grol ba'i sgo sngags kyi tshig bstan pa de nyid la goms par byas pas/ sa bcu dang sa bcu gcig pa la sogs pa yongs su rdzogs pa'i rang rang gi rnam par thar pa'i sgo ji ltar chud pa/ snying rje chen po 'byung ba'i dkyil 'khor du sngags rnams dgod pa'i phyir smra bar 'dod nas/bcom ldan 'das la gsol pa ste/ de nas rdo rje 'dzin pa de dag phyag na rdo rje la sogs pa dang zhes pa la sogs pa'o/ /de nas bcom ldan 'das rnam par snang mdzad kyis byang chub sems dpa' de dag dang / rdo rje 'dzin pa de dag la mi nyams pa'i chos nyid kyis byin gyis brlabs zhes pa ni byang chub sems dpa' de rnams mi 'gong ba'am/spobs pa skye bar byin gyis brlabs zhes pa'o/ /sangs rgyas kyi rgyan zhes pa ni/ kun du bzang po byang chub sems dpa' de ting nge 'dzin du zhugs na/ spu'i khung bu re re nas sangs rgyas re re 'byung ste/de ltar lus las sangs rgyas grangs med par 'gyur ba de nyid rgyan zhes bya'o/ /de ltar ting nge 'dzin rnams ni byang chub sems dpa' so so'i yon tan dang rjes su mthun par shes par bya'o/ /de bzhin du sngags rnams de bzhin gshegs pa'i yon tan las byung ba'o/ /byang chub sems dpa' de rnams kyi so so'i rnam par grol ba'i sgo ste de dag nyid kyi tshig tu byin gyis brlab par shes par bya'o//de nas bcom ldan 'das rnam par snang mdzad kyis 'khor 'dus pa thams cad la gzigs nas zhes pa nas rkyen dbang la ste/ zab la blta dka' ba zhes pa'i bar du/sngar yi ge a rnam pa bzhi byang chub dang spyod pa dang / kun du sangs rgyas pa dang mya ngan las 'das pa'i ting nge 'dzin gyi sgo bshad pa ste/ de nyid kyi don byang chub dang spyod pa dang / kun du sangs rgyas pa dang / mya ngan las 'das pa'i rang bzhin kun bstan pa ste/ de bstan pa yang gdul ba'i 'gro ba rnams/la la ni yi ge a la sogs pa'i 'bru'i sgo nas goms par byed de/ la la ni de'i don gyi sgo nas goms par byed de/ de nas don 'di bstan pas byang chub la sogs pa'i rang bzhin chung par bya ba don gyi sgo nas bstan to/ /re ba thams cad rdzogs par byed pa dus gsum mtha' yas pa'i sgo gdon mi za ba'i ye shes yongs su rdzogs par byed pa'i chos kyi tshig gsungs so zhes pa de la re ba thams cad rdzogs par byed pa dus gsum mtha' yas pa'i sgo gdon mi za ba'i ye shes ni de bzhin nyid kyi ye shes la bya ste/re ba thams cad rdzogs par byed pa zhes pa ni/ ye shes rnam par mi rtog kyang sngon gyi smon lam gyi shugs kyis sku mi zad pa'i rdo rje'i rgyan la sogs pas khams gsum thams cad du khyab par sems can thams cad dang rjes su mthun par byed do zhes pa'o/ /dus gsum mtha' yas pa'i sgo gdon mi za ba'i ye shes yongs su rdzogs par byed pa zhes pa ni/nyan thos dang rang sangs rgyas dang byang chub sems dpa' la sogs pa'i ting nge 'dzin rnam pa mang po'i sgo nas stong pa nyid du 'jug cing ye shes nges par byed pa'o zhes pa'o/ /yongs su rdzogs par byed pa'i chos kyi tshig gsungs so zhes pa ni ye shes de nyid yongs su rdzogs par byed pa'i tshig ste/de yang nam mkha' dri ma med pa la sogs pa'i tshigs su bcad pa la sogs te/ de rnams kyi don chud na ye shes de yongs su rdzogs par 'gyur ba'i phyir ro/ /de la/ nam mkha' dri med ngo bo nyid med pa/ /zhes pa ni byang chub sems kyi rang bzhin de ni ji ltar nam mkha' la nyon mongs pa la sogs pa'i sgrib pa'i dri ma med cing /sngon po la sogs pa'i rang bzhin gzung du med pa de bzhin du byang chub kyi rang bzhin la yang nyon mongs pa la sogs pa'i sgrib pa'i dri ma med cing / de ji bzhin pa ye shes kyis gzung du med pa'o zhes pa'o//rnam mang ye shes sna tshogs sbyin pa ste/ /zhes pa ni spyod pa'i rang bzhin te/ mngon par byang chub pa 'di nyid kyi tshe na/ sngon gyi smon lam gyi shugs kyis sku mi zad pa la sogs pa'i rdo rje'i rgyan rnams sems can rnam pa mang po la ji ltar rjes su mthun par lung gi chos dang thob pa'i chos dag ston te/chos de dag ston na sems can rnam pa sna tshogs pa de rnams ye shes thob par 'gyur ba'i phyir ro/ /gnyis su ni rgyu'i tshe'i spyod pa la yang bya ste/ rnam par dag pa'i chos de nyid la 'jug pa'i tshe/ kun rdzob dang don dam pa'i ye shes thob par byed pa'i phyir ro//rtag pa ru ni stong pa'i rang bzhin te/ /zhes pa ni kun du sangs rgyas pa'i rang bzhin la bya ste/ phyi'i gzung bar bya ba'i chos rnams kyang rang bzhin med na/ 'dzin par byed pa'i ye shes kyang med de/ de ltar gzung ba dang 'dzin pa'i cha gnyis ka spangs pa'i rang bzhin phyin ci ma log pa/yongs su rdzogs pa'i mtshan nyid la bya'o/ /rkyen dbang la ste/ zab la blta dka' ba'o zhes pa ni mya ngan las 'das pa'i rang bzhin la bya ste/ rkyen dbang la ste zhes pa ni gzhan gyi dbang las kyi mtshan nyid kyi ye shes mar me'i rgyun dang 'dra ba skad cig ma'i rgyun mi 'chad par rten cing 'brel par 'byung ba'i rang bzhin zhes pa'o//zab la blta dka' ba zhes pa ni/ zab pa ni gzung ba dang 'dzin pa'i cha gnyis spangs pa stong pa nyid kyi rang bzhin no/ /de bas stong pa nyid kyi rang bzhin de la sngon po la sogs pa'i ji bzhin pa med pas blta dka' zhes pa'o//rtag tu khyad par 'gro ba zhes pa nas/ de las rnyed dka' gnas gzhan med pa ni/ 'jig rten du snang bar mdzad pa ste/ rgyal bas gsungs pa shin tu rnam par dag pa'i chos nyid do zhes pa'i bar du byang chub kyi rang bzhin shin tu rnam par dag pa'i chos nyid de la 'jug cing goms par byed pa na/de'i 'bras bu thob pa'i rim pa bshad pa ste/ rtag tu khyad par rim par 'gro ba ste/ /rnam par bsams bzhin rnam pa'i mchog kyang sbyin/ /zhes pa ni rnam par dag pa'i chos nyid de/ de la mnyan pa dang / bsam pa dang / 'jig rten gyi rgyal po dang longs spyod la sogs pa bde ba'i mchog thob par 'gyur zhes pa'o//ji ltar 'gro ba kun gyi gnas pa ni/ /nam mkha' yin te mi chags spyod yul ba de/ /de ltar rnam par dag pa yis/ /chos nyid 'di la sogs pa gsum/ /ma lus skyid 'byung ba'o zhes pa ni/ rnam par dag pa'i chos nyid de las/mos pa spyod pa'i sa la gnas nas goms par byas na/ khams gsum gyi dbang po mngon par 'byung ba'i mtshan nyid thob par 'gyur ro zhes pa ste/ rnam par dag pa'i chos de rnams rnam par mi rtog kyang / de lta bu'i 'bras bu 'byung ste/ dag pa ni dper na nam mkha' rnam par mi rtog kyang /'gro ba thams cad kyi gnas byed pa bzhin du/ chos de nyid rnam par dag pa de yang rnam par mi rtog bzhin du/ khams gsum gyi skyid pa 'byung bar byed de/ de bas na/ ji ltar 'gro ba kun gyi gnas ni nam mkha' yin te mi chags spyod yul ba//de ltar rnam par dag pa'i chos nyid 'di la sogs gsum ma lus skyid 'byung ba'o gsungs pa'o/ /khams gsum mchog de spyod na ni/ sangs rgyas kun dang spyod yul gcig par 'gyur zhes pa ni sa rab tu dga' ba la gnas pa rnams kyis goms par byas na de'i 'bras bu sangs rgyas rnams dang spyod yul gcig par 'gyur ro zhes pa'o//de las rnyed dka' gzhan med pa ni 'jig rten kun du snang bar byed pa ste/ rgyal bas gsungs pa rnam par dag pa'i chos nyid do zhes pa ni sangs rgyas pa'i tshe 'thob pa'i 'bras bu ste/ sangs rgyas pa las rnyed par dka' ba gzhan med cing /'jig rten gyi khams thams cad du thams cad mkhyen pa'i ye shes kyis khyab par snang bar mdzad pa'i phyir ro/ /rgyal bas gsungs pa shin tu rnam par dag pa'i chos nyid do/ /zhes pa ni de lta bu'i chos nyid rnam par dag pa bcom ldan 'das rnam par snang mdzad kyis gsungs so zhes pa ni sdud pa'i tshig go//der spyod pa rnam par rtog pa spangs te de'o zhes pa ni de lta bu'i rang bzhin gyis chos de la rnam par rtog pa spong ba ste spyod cig ces pa'o/ /spangs pa'i chos de zab la 'gong ba med pa'o zhes pa ni chos nyid rnam par dag pa'o/ /de rgya che zhing mi 'gyur ba yongs su rdzogs pa'i mtshan nyid pas 'gong ba'am 'gog pa med ces pa ste/chos nyid de'i rang bzhin spyir bstan pa'o/ /'di lta ste gsang ba'i bdag po 'dod pa'i khams kyi dbang po la myos par byed pa zhes bya ba'i rig pa yod do zhes pa nas/ 'di lta ste/ sngags kyis ni me'i tsha ba med par byas nas grang bar 'gyur ro/ /rigs kyi bu dpe'i tshul de lta bu las kyang sngags kyi mthu las mngon par dad par bya ba'i rigs so zhes pa'i bar du sngags kyi rgyu dang rang bzhin dang mthu dang 'bras bu bshad de/ rgyu dang rang bzhin ni rtag tu yi ge la sogs pa'i nang du bshad do//thabs 'dir ni sngags kyi mthus bstan pa bshad de/ de yang sgrub pa yid gnyis dang the tshom can las 'og nas 'byung ba'i sngags kyi mthu rnams bstan pas/ gang sgrub pa la the tshom du gyur pa la/ grub pa 'thob mi 'thob snyam pa'i the tshom bsal ba dang /de la rab ni 'dod pa'i khams kyi dbang po chen po rig pas lha'i bu rnams rig par 'gyur zhes pa dang / gzugs yod pa'i khams kyi dbang po chen po'i bu la yid mgyogs zhes bya ba'i rigs las byung ba'i mthu dang gnyis ni rab tu bshad do/ /dbang po'i mig 'phrul gyi sngags ni spyod pa dang /lha ma yin gyi sngags kyi sgyu ma la sogs pa'i sngags ni mthu 'bring du bshad do/ /dug dang rims la sogs pa dang / ma mo rnams kyi sngags kyis 'chi bar byed pa dang / me dang tsha ba la sogs pas drang bar 'gyur ro zhes pa ni mthu tha mar bshad do/ /'di lta ste gsang ba'i bdag po 'dod pa'i khams kyi dbang po la myos par byed pa yod pa zhes pa ni/'dod pa zhes pa ni gzugs dang / sgra dang / dri dang / re dang / reg pa rnams spyod pa'o/ /khams kyi dbang po la zhes pa ni/ 'dod pa'i khams kyi gnas rim pa drug gi dbang po la myos par byed pa zhes bya ba'i rim pa yod do zhes pa ni khams der skyes pa rnams rang bzhin gyi rig pa dang ldan pas rig pa de bsams pa'am brjod pa tsam gyis 'dod pa lnga'i longs spyod dang ldan par 'gyur ro//des 'dod pa na 'khod pa'i lha'i bu rnams myos pas brgyal bar 'gyur zhes bya ba ni/ myos pa zhes pa ni mi dran zhing dbang po mi gsal bar gyur pa ni ma yin gyi/rig pa de'i mthus lha'i bu rnams 'dod pa lnga'i longs spyod la chags shing zhen par gyur te/ 'dod pa'i dbang du gyur pas na 'dod pas myos pa zhes bya'o/ /me tog mang po sna tshogs dang ldan pa'i gnas dga' ba rnams kyang ston zhes pa ni/ de la me tog sna tshogs ni ldum ra dang /me tog gi tshal dang / yid du 'ong ba'i skyed mos tshal dang / me tog dang tshal de dag kyang dri zhim po dang / kha dog shin tu mdzes par brgyan pa'o/ /gnas dga' ba ni kun dga' ra ba dang / rin po che sna tshogs kyis brgyan pa'i lding khang la sogs pa bstan pa'o//longs spyod bzang po rnam pa mang po yang mngon par sprul nas zhes pa ni/ longs spyod bzang po ni 'dod pa rnam pa lnga'i longs spyod bzang po la bya ste/ kha zas kyi bza' ba dang lha'i gos rab tu bzang zhing 'jam pa la sogs pa rnams so/ /mngon par sprul pa ni gnas de na lha'i bu rnams rang rang gi rig pa'i mthus/'dod pa rnam pa lnga'i longs spyod 'byung bar bya'o/ /gzhan 'phrul dbang byed kyi lha rnams la yang sbyin pa dag kyang yongs su spyod do zhes pa ni/ de la gzhan 'phrul dbang byed ces pa ni/ yang rang gi mthu las 'dod pa rnam pa lnga'i longs spyod 'byung ba rnams/lha'i bu mo rnams la'ang sbyin pa de dag yongs su spyod do/ /de bzhin du byang chub sems dpa' yang sbyin pa la sogs pa yid bzhin du spyod kyang bdag nyid de la chags par mi spyod do/ /'di lta ste dbang po chen po'i lha'i bu la yid mgyogs zhes bya bar rig pa zhes bya ni rig pa ste/bsams pa tsam gyis sems can gyi don du bya ba dang / ji ltar 'dod pa'i gnas de dag tu skad cig yud tsam gyis phyin par 'gyur bas na yid mgyogs zhes bya'o/ /des ni stong gsum gyi stong chen po'i 'jig rten gyi khams su sems can rnams kyi don byed cing zhes pa ni/ de la stong gsum gyi stong chen po ni bla dang 'og dang kun la bya ba'ang ma yin gyi/gzugs yod pa'i khams stong gsum gyi stong chen po'i 'jig rten gyi khams la bya'o/ /stong gsum ni gzhung la grags pa'o/ /sems can gyi don ni gzugs yod pa'i sems can rnams la/ rig pa de'i mthus 'og nas 'byung ba'i longs spyod la sogs pas sems can rnams kyi don byed pa'o//longs spyod dang zas la sogs pa rnams mngon par sprul nas zhes pa ni/ de la khyad par du na/ kha zas kham gyi bza' ba dang dri la sogs pa mi spyod de/ longs spyod gzhan ni lhag ma dang 'dra'o//gtsang ma'i gnas kyi lha'i bu rnams la sbyin pa dag kyang spyod do zhes pa ni/ de las gtsang ma zhes pa ni gzugs kyi khams de na/ gtsang ma'i ris kyi lha rnams la yang / sbyin bdag rig pa'i mthu las byung ba'i longs spyod la spyod pa'o/ /'di yan chad ni sngags kyi mthu rab tu bstan pa'o//'di lta ste/ dper na mig 'phrul can gyi sngags kyis ni/ kun dga'i ra ba bzang po rnam pa mang po dang / chu dang 'bab chu dang mi la sogs pa mngon par ston to zhes pa ni dbang po'i sngags kyi mthu bshad de/ de yang gang zhe na/ mig 'phrul can gyi sngags kyis zhes pa ni/dbang po la sogs pa'i lha rnams dang lha ma yin du 'thab pa'i tshe/ sngags kyi grangs med pa'i dbang po'i lha rnams su sprul nas/ lha ma yin gyi mig bslu ba dang / gang la rgol ba'i gtol med par/ mig 'phrul gyi mthus byed pa'o/ /dbang po ni sngags kyi mthu la kun dga'i ra ba bzang po dang /chu dang 'bab chu dang mig la sogs pa sngags kyi mthus mngon par spyod cing ston to/ /'di lta ste/ dper na lha ma yin gyi sngags kyis ni sgyu ma mang po ston to zhes pa ni/ a su ra sngags kyi mthus bshad de/ de yang gang zhe na/ lha ma yin dang dbang po la sogs pa'i tshe lha ma yin gyi sngags kyi mthus/lha ma yin grangs med par sprul pa dang / rA hu la lta bu'i gzugs lha ma yin gyi gnas nas/ ri rab ri'i rgyal po las 'phags pa'i lus byung ba nas/ lha rnams la skrag pa dang mthus byin gyis brlabs pa'i sgyu ma rnams ston pa'o//rtag tu dbang po la sogs pa'i sngags kyi mthu bshad pa dang / lha ma yin gyi sngags kyi mthu bshad pa des 'di gnyis ni mthu 'bring du bshad pa la bya'o/ /'di lta ste/ dper na sngags kyis ni dug dang rims la sogs pa med par 'gyur ro zhes pa ni mi rnams kyi sngags mthu bshad de/de yang gang zhe na/ de sngags de gnyis kyi mthus dug thams cad dang rims la sogs pa'i nad thams cad zhi zhing med par byed pa la bya'o/ /'di lta ste/ dper na ma zhes bya ba'i lha rnams kyi sngags kyis ni/ sems can rnams 'chi bar byed do zhes pa ni/ ma bdun po rnams kyi sngags kyi mthu bshad de/de yang gang zhe na/ dbang po la sogs pa'i lha rnams dang / lha ma yin rnams su 'thob pa'i tshe/ lha rnams kyis lha ma yin thub par ma gyur na/ dbang po dang tshangs pa la sogs pa rang rang las ma zhes bya ba'i lha mo bdun sprul te/ lha mo bdun po de rnams kyis mtshon gyis btab pa'i khrag sa la ma lhung bar 'thungs pa dang /gdod lha ma yin rnams zhi bar 'gyur bar yang bya'o/ /bdun gyi sngags de spyod pa'i las rnams byed pa'i tshe/ ma rnams kyi sngags kyi tshig bzhin byas nas/ sems can 'chi bar byed pa dang / lha dang lha ma yin du 'thab pa'i tshe/'jig rten na sems can rnams dge bar spyod pa mang zhing / bsod nams che na lha rnams rgyal bar 'gyur/ dge ba spyad pa nyung zhing mthu chung na lha ma yin rgyal bar 'gyur te/ de la lha rnams rgyal bar 'gyur na/ gang zla ba dang spyang kis zin pa'i dngos grub kyang thob/lha ma yin rnams rgyal na sems can gyi khams su sems can rnams bcing bar byed pa'i rims nad rnams kyi sngags kyi mthu las 'byung bar byed pa'o/ /'di ltar sngags kyis ni me'i tsha ba med par byas nas grang bar 'gyur ro zhes pa ni/ sngags kyi mthus me 'bar ba'i nang du zhugs kyang /tshig pa dang gdung ba la sogs pa med cing chu'i nang du 'gro ba dang 'dra ste grang bar 'gyur ro/ /rigs kyi bu dpe tshul de lta bu las kyang sngags kyi mthu las mngon par dad par 'gyur ba dang / rigs so zhes pa ni rtag tu mthu rab 'bring rnam pa gsum bstan pa la/ gang ma dad pa rnams dad par 'gyur ba dang the tshom dang yid gnyis pa'i 'gro ba rnams the tshom bsal nas sngags kyi mthu la mngon par dad par bya ba'i rigs so zhes bskul ba'o/ /sngags de'i mthu yang sngags las byung ba yang ma yin zhes pa nas/ rtag tu rgyun mi 'chad par sngags kyi tshul gyi rjes su 'jug par rig par bya'o zhes pa'i bar du sngags kyi rang bzhin bshad pa la bya ste de yang gang zhe na/de la sngags kyi mthu yang sngags las byung ba ma yin zhes pa ni/ sngags kyi mthu de sngags kyi yig 'bru las byung ba yang ma yin/ de ste sngags kyi yig 'bru las sangs rgyas kyi mthu de yod na ni/sngags kyi glegs bam la sogs pa rkun pos kyang mi thob/ mes kyang tshig par mi 'gyur te/ de bas na sngags kyi mthu las mthu 'byung ba yang ma yin no zhes so/ /don la yang zhugs pa ma yin zhes pa ni/ ral gri dang 'khor lo dang ri lu la sogs pa'i rdzas rnams la ste/rdzas de rnams la sngags kyi mthu zhugs nas grub par 'byung ba yang ma yin zhes so/ /sbyor ba las rnyed pa yang ma yin zhes pa ni/ sgrub pa la 'byung ba'i sbyor bde gnyis las sngags kyi mthu 'byung ba yang ma yin te/ de ste sgrub ba la 'jug ba las byung ba yin na grub zin pa yin pas bsgrub mi dgos zhes pa'o//'on kyang rigs kyi bu dus gsum las 'das pa zab mo bsam gyis mi khyab pa rten cing 'brel par 'byung ba las mngon par grub pa'i phyir ro zhes pa ni/ de bzhin gshegs pa 'jig rten du byung yang rung ma byung yang rung ste/ sngags kyi chos nyid ni yong nas 'dug pa'o zhes bshad de/'on kyang rigs kyi bu dus gsum las 'das pa zhes pa ni/ dus gsum du snga ma 'das pa'i dus na grub pa'i rang bzhin ma yin na ni/ ma 'ongs pa dang da ltar gyi dus na grub par mi 'gyur te/ de ste ma 'ongs pa'i dus dang da ltar gyi dus na grub pa'i rang bzhin yod na ni snga ma 'das pa'i dus na 'grub par yang mi 'gyur te/de bas sngags grub pa'i rang bzhin ni/ dus gsum gang la yang gnas pa yin pas na dus gsum las 'das pa'o/ /zab mo bsam gyis mi khyab pa rten cing 'brel bar 'byung ba las mngon par gyur pa'i phyir ro zhes pa ni/dper na me tog sna tshogs dang 'dra ste/ sa bon dang / myu gu dang lo ma'i tshe kha dog sngon po la sogs pa gzhan la me tog tu gyur pa'i tshe/ kha dog gzhan du gyur pa lta bu dang / ba lta bus rtswa rtsub po dang sngon po la sogs pa zos kyang / 'o ma 'jam zhing dkar ba'i rang bzhin lta bur gyur pa ste/de lta bas na sngags kyi dngos grub ni gang la yang mi gnas mod kyi zab mo bsam gyis mi khyab pa'i chos nyid rgyu rkyen gcig tshogs pa la sngags kyi chos nyid kyis byin gyis brlabs pa las/ grub pa rab 'bring rnam pa gsum la sogs par thob par 'gyur ro/ /sngags kyis byin gyis brlabs pa'i chos nyid las byung bas na mi 'gyur ba'o zhes pa ni byin gyis rlob pa dang mi 'gyur ba bshad de/de las byin gyis brlabs zhes pa gang grub pa nyid la chos nyid la byin gyis rlob cing / grub pa thob pa de yang brtan zhing mi 'gyur ba'o/ /de bas na rigs kyi bu bsam gyis mi khyab pa'i chos kyi rang bzhin gyi rgyun du zhugs pas rtag tu rgyun mi 'chad par sngags kyi tshul gyi rjes su 'jug par bya'o//de nas yang bcom ldan 'das dus gsum la ma chags pa'i stobs kyis gnas kyi byin gyis brlabs pa zhes pa nas/ yang dag par kun rdzogs pa'i sangs rgyas kyis tshig gis btab pa gcig nas gcig tu mngon par grags pa'o zhes pa'i bar du byang chub kyi rang bzhin yang lag bzhi dang ldan pa'i dmigs ston pa'i yi ge a rnam pa bzhi bcom ldan 'das kyis gsungs pa ste/a rnam pa bzhi sngar yang bshad de/ 'dir yang bzlas te gsungs pa ci'i phyir zhe na/ sngar bshad pa ni don dam pa'i ting nge 'dzin gyi sgor gyur pa'i yi ge 'bru re po spyir bshad pa ste/ 'dir yang bzlas te gsungs pa ni/ sngags bsgrub pas de'i don sgom zhing brlab par bya ba'i phyir/ khyad par du gsungs pa'o/ /de la dus gsum dang ma chags pa'i stobs kyi gnas byin gyis brlabs pa/de bzhin gshegs pa bsam gyis mi khyab pa'i rgyan rnam par dag pa'i snying po zhes bya ba'i ting nge 'dzin du zhugs so/ /a zhes pa ni a rnam pa bzhi po de gsungs pa'i phyir/ bcom ldan 'das ting nge 'dzin du zhugs te/ de rnams kyis kyang don dam pa dang kun rdzob gnyis kyis ston te/ de la don dam par ston pa ni yi ge a de'i sgo nas de bzhin nyid ston pa'o/ /kun rdzob tu ston pa ni yi ge a de las skyes bu chen po'i mtshan sum cu rtsa gnyis 'byung bar bstan pa ste/ gang gi phyir yi ge brgya pa'i le'u las a 'di rnams las yi ge ka la sogs pa sum cu rtsa gnyis 'phro bar bshad pa de yi ge sum cu rtsa gnyis po de rnams kyang /skyes bu chen po'i mtshan sum cu rtsa gnyis su blta'o zhes 'byung ba'i phyir ro/ /ting nge 'dzin 'di las don rnam pa gnyis su ston pa'o/ /yi ge a de rnams 'byung ba ste/ de la dus gsum du ma chags pa'i stobs kyi gnas zhes pa ni don dam pa de bzhin nyid de/yi ge a rnams kyi dmigs bstan par bya ste/ dus gsum du ma chags pa'i stobs zhes pa ni/ de bzhin nyid kyi rang bzhin te/ mi 'gyur ba yongs su rdzogs pa'i mtshan nyid pas nam mkha' dang 'dra ba ste/ dus gsum du thogs pa med pa'i mthu dang ldan pa zhes pa'o//gnas zhes pa ni de bzhin nyid kyi rang bzhin te/ yi ge a'i 'bru byin gyis brlabs pa ste/ 'khor ba de'i mtha' ji tsam pa'i bar du yi ge a rnams su lhag par gnas zhes pa'i don te/ de ni don dam par bstan pa'o/ /de bzhin gshegs pa'i sku bsam gyis mi khyab pa ste/ gnas rgyan rnam par dag pa zhes pa ni kun rdzob tu yi ge a las skyes bu chen po'i mtshan sum cu rtsa gnyis rnams 'byung bar bstan pa ste/de bzhin gshegs pa'i bsam gyis mi khyab pa'i gnas zhes pa ni de bzhin gshegs pa'i sku bsam gyis mi khyab pa ste/ de bzhin gshegs pa'i bsam gyis mi khyab pa ni de bzhin gshegs pa'i sku las rdzu 'phrul sna tshogs bsam gyis mi khyab pa 'byung ba'i phyir ro//rgya chen po ni skyes bu chen po'i mtshan sum cu rtsa gnyis rnams te/ mtshan de rnams kyang yi ge a 'di bzhi las byung bas na/ rgyan zhes pa ni a 'di rnams yid la bya'o/ /rnam par dag pa zhes pa ni mtshan sum cu rtsa gnyis po de rnams phyogs na gnas pa dang /rtsa la'ang kun rdzob pa na rnam par dag pa bzhes pa'o/ /snying po zhes pa ni 'byung ba'i gnas zhes pa'i don te/ de lta bu'i don dam pa dang kun rdzob kyi ston cing 'byung ba'i yi ge a rnam pa bzhi ting nge 'dzin las byung bas na/ ting nge 'dzin de dus gsum du na ma chags pa'i stobs kyi gnas byin gyis brlabs te/de bzhin gshegs pa'i bsam pa'i gnas kyis rgyan rnam pa'i snying po zhes bya'o/ /chos kyi dbyings ma lus pa so sor brjod pa'i sgra las chos kyi dbyings la gnas pa'i stobs yang dag par rdzogs pa'i sangs rgyas shin tu mos pa las 'byung ba'i tshig 'di bzhi dbyangs gcig tu 'byung bar gsungs te zhes pa ni/chos kyi dbyings ma lus pa so sor dmigs pa'i sgra zhes pa ni/ sgra 'byung ba a 'di bzhi gsungs so zhes pa dang 'brel te/ a 'di bzhi sgra ma skyes par 'byung ba la dmigs pas/ bum pa la sogs pa'i chos rnams kyi tshig thams cad kyang ma skyes pa'i tshig tu sdug par 'gyur te/de ston pa'i a bzhi bye brag gsungs pa/ chos kyi dbyings kyi stobs la gnas pa zhes bya ba la sgo pa ste/ a de rnams chos kyi dbyings kyi tshig tu gyur pas na/ chos kyi dbyings la gnas pa zhes bya'o//stobs zhes pa ni chos kyi dbyings kyi tshig las gzhan du mi 'gyur bar mthu dang ldan pa'i phyir ro/ /mi mnyam pa'i stobs zhes pa ni de dag mthu phun sum sogs pa ston ba'o/ /yang dag par rdzogs pa'i sangs rgyas shin tu mos pa las byung ba zhes pa ni/ de bzhin gshegs pa'i rgyu'i tshe/yang dag par rdzogs pa'i sangs rgyas pa'i yon tan rnams la ji ltar mos pa mngon par byang chub pa'i tshe yongs su rdzogs par gyur pa de las yi ge a 'di bzhi 'byung ba'i phyir ro/ /dbyangs gcig tu 'byung zhes pa ni bum pa la sogs pa'i so so'i tshig rnams ma skyes pa'i sgra gcig pur 'byung ba'i phyir ro//chos kyi dbyings thams cad khyab par byas nas nam mkha' dang mnyam par gyur nas zhes pa ni ma skyes pa'i sgras chos kyi dbyings thams cad nam mkhas khyab pa dang 'dra bar byas nas zhes pa'am/ chos kyi dbyings nam mkha'i mtha' dang mnyam par khyab par byas nas zhes pa ste/'di yang chos kyi dbyings zhes pa ni 'jig rten gyi khams rnams su rig par bya'o/ /yi ge a ni byang chub kyi rang bzhin te/ rnam pa bzhi la ni byang chub kyi yan lag bzhi dang ldan pa ste/ byang chub dang spyod pa dang kun du sangs rgyas pa dang mya ngan las 'das pa rnams rim bzhin du blta'o//de byung ma thag tu chos kyi dbyings grags pa'i sgo las/ 'di ltar yang dag par rdzogs pa'i sangs rgyas kyi tshig gis btab pa brjod pa'i skad gcig nas gcig tu grags pa'o zhes bya ba ni/ snying po de rnams gsungs pa dang / 'jig rten gyi chos rnams kyi sgra las de bzhin gshegs pa'i tshig gi mtshan ma ma byung ma skyes pa'i sgra sgrog par byung ngo zhes pa'o//byang chub sems dpa' gang gis thos pa rnams shes pa nas rtag tu nan tan cher bya ba dang / sems can yongs su dag pa'o zhes pa'i bar du de lta bu ma skyes pa'i sgra 'jig rten gyi khams thams cad du khyab pa/byang chub sems dpa' rnams kyis thos nas ngo mtshar du gyur te/ de'i rjes su sngags pa dang bcom ldan 'das la slar gsol ba/ 'di ltar yang dag par rdzogs pa'i sangs rgyas kyi snying po 'di sgrub pa zhig yod na zhes pa nas/ mngon rtags byung ba'i bar du 'dug go zhes pa'i bar du sgrub pa'i sngon rol du byang chub sems bskyed par bya ba ste/de yang gtsug lag khang ngam skyed mos tshal la sogs pa'i gnas ming gis smos pa'am/ de las gzhan pa'i gnas bdag nyid sems gang du dga' bar 'dug ste sgom mo/ /de skyed mos tshal dang phug ni lus dben par bya ba'i gnas so//gtsug lag khang ni sems dben na lus mi dben kyang bla ste/ sems dben pa'i gnas so/ /gang na yid dben pa der zhes pa ni gnas de dag las gzhan gang yang rung ste/ sems gang du dben pa de gtso bas der 'dug ste/ mtshan ma byung ba'i bar du bsgom mo zhes pa dang 'brel te//mtshan ma yang skabs 'dir ni nang med pa dang / bru ba mi tsha ba la sogs pa sngags bzlas pa las byung ba la ni mi bya'i/ bsam gtan sems brtan zhing mi 'gyur bar gyur pa la bya'o/ /de las gang yang rung ste/ snying po tshig gcig zung la zhes pa nas/ nam mkha' bzhin thog ma nas zhi ba de la zhugs par soms la zhes pa'i bar du/ gong du smos pa'i tshul gyis byang chub kyi sems goms par byas te/ mtshan ma byung nas rang gi lha'i gzugs su sbyar ba goms par bya ba dang / de'i snying gar me long gi dkyil 'khor la sangs rgyas kyi sku bsam pa dang /sangs rgyas kyi sku'i snying gar yang zla ba'i dkyil 'khor dang bzlas pa'i sngags bsam ste/ de'i rim pa yang 'di'o/ /a rnam pa bzhi po las gang yang rung ba cig snying gar zla ba'i dkyil 'khor bsams pa la/ a de'i sgra chos thams cad thog ma nas ma skyes pa'o zhes pa la dmigs shing /rang gi phung po lnga thog ma nas ma byung ma skyes pa'i sbyor ba'am/ rdul phran du gzhig pa la sogs pa'i sbyor bas stong pa nyid du gzhig ste/ zla ba'i dkyil 'khor la a gnas pa tsam 'ba' zhig yod par bsams te/ de nas zla ba'i dkyil 'khor dang a nyid kyang gong ma'i tshul gyis dmigs su med par bshig ste/ji tsam 'dod kyi bar du stong pa nyid kyi ting nge 'dzin mngon du bya'o/ /de nas snying rje'i dbang gis ting nge 'dzin de las langs te/ sgyu ma lta bur mos pa'i tshul gyis/ a de snying ga'i phyogs su bsams nas/ a de las 'od 'phro ba 'byung ba dang / 'dus pa'i sbyor bas rang gi lha'i gzugs su bsgyur bar bya ste/ de yang the tshom med par rang gi lha'i gzugs su snang bar gyur gyi bar du'o/ /de la spyir lha'i gzugs su bsgyur ba yang rnam pa gsum ste/ gcig ni phyag rgya dang sngags sbyar bas lha'i gzugs de dag go snyam par mos pa tsam mo/gnyis ni rtag tu goms pa'i dbang gis rang gi lha'i gzugs su the tshom med par gsal bar snang ba'o/ /gsum ni sbyor ba'i mthus rang gi lus brjes te/ lha'i lus su gyur pa ste/ de la skabs 'dir rtag tu goms pa'i dbang gis rang gi lus lha'i gzugs su gsal bar snang ba la bya'o//de ltar rang gi lus lha'i gzugs su bsgyur nas/ de'i snying po a gcig bsams te/ a de las byang chub kyi sems kyi phyag rgya bsgyur ba zla ba'i dkyil 'khor me long 'dra bar bsams te/ de yang shin tu gsal ba dri ma med par bsam/ de'i dbus su yi ge a las bcom ldan 'das rnam par snang mdzad kyi skur gyur par bsams te/de bas na de gsungs pa gnyis po yang dag par rdzogs pa'i sangs rgyas te/ me long gi dkyil 'khor gyi dbus su pad+ma'i rgyal po chen po'i steng na/ phug gi nang na ting nge 'dzin du zhugs shing / bzhugs pa bzhin zhes pa la sogs pa ste/ phug gi nang na bzhugs bzhin zhes pa ni/ me long gi dkyil 'khor nang na bzhin gyi gzugs brnyan snang ba ltar/ de nyid kyi nang na nye bar 'dug par bsams te zhes pa'o/ /de nas de bzhin gshegs pa'i snying gar zla ba'i dkyil 'khor bsams te/ de'i dbus su bzlas par bya ba'i sngags bsams nas/de bzlas shing sngon du bsnyen pa 'bum byas te/ de bas na gsungs pa thog mar bsnyen to/ /de la chig 'bum tshang bar bya'o zhes pa'o/ /de bas na zla ba gnyis po la me tog spos la sogs pa gsol zhes pa ni/ sngar 'bum gcig grangs su bzlas la/de nas zla ba gnyis dang / snga dro dang phyi dro la mel tshe thun re re/ nyi ma gung la mel tshe thun phyed bzlas pa'i sbyor bas dus chad pa ste/ sngar chig 'bum grangs zlos pa dang zla ba gnyis dus su zlos pa las/ zla ba phyi ma gcig la ni dri dang me tog la sogs pa'i mchod pa mi bya bar bzlas te/dang po sems ma goms pa la phyi'i mchod pa la sogs pas sems g.yengs su dogs pa'i phyir ro/ /zla ba phyi ma gnyis po la ni goms shing brtan par gyur pas phyi'i mchod pa la sogs pas mi g.yengs par 'gyur ba'i phyir ro/ /phan par bsgrub par bya ba ni/ sems can la ni rnam pa mang du zhes pa ni/da ni dpa' bo chen po'i snying bo 'bru rnam pa lnga pa rnams ni bsgrub pa dang sa rnams bshad de/ de la spyir de bzhin gshegs pa'i rgyu dang 'bras bu'i yon tan mos pa spyod pa'i sa nas brtsams te kun du sangs rgyas par gyur gyi bar du ci bsags pa rnams sdud pa'i sgor gyur pa ni/ phung po lhag ma dang bcas pa'i mya ngan las 'das pa dang /phung po lhag ma med pa'i mya ngan las 'das pa ste/ de las phung po lhag ma med pa ma lus pa'i mya ngan las 'das pa na/ de bzhin gshegs pa'i mtshan nyid du 'du shes pa yang spangs pa 'og ma'i phra mo'i gnas su mngon par byang chub pa'o/ /phung po lhag ma dang bcas pa'i mya ngan las 'das pa ni/kun du sangs rgyas pa'i mtshan nyid chos rnams sgyu ma'i rang bzhin du nga'i chos rnams ni stong pa'o snyam pa'i 'du shes tsam pa'i bag chags phra mo lhag mar lus pa 'dod pa'i khams su byang chub kyi shing drung du mngon par byang chub nas bdud rnam bzhi btul ba'o//de la phung po lhag ma ma lus pa'i mya ngan las 'das pa'i snying po ni/ a rnam pa bzhi ste/ de rnams kyi sgrub pa la sogs pa ni bshad zin to/ /'dir ni phung po'i lhag ma dang bcas pa'i mya ngan las 'das pa'i snying po bdud bzhi 'joms pa'i ting nge 'dzin nge 'dzin gyi sgo rnams kyi sgrub pa dang las rnams 'chad de/de yang de nas bcom ldan 'das rnam par snang mdzad 'khor 'dus pa thams cad la gzigs nas/ phyag na rdo rje gsang ba'i bdag po la bka' stsal pa/ phyag na rdo rje de bzhin gshegs pa rnams kyi yid las byung ba zhes bya ba la sogs pa ste/ de la yi ge a la sogs pa'i ting nge 'dzin gyi sgo nas bdud bzhi bcom pa dang /ting nge 'dzin de rnams nyid dbang chen la sogs pa'i dkyil 'khor bzhin byin gyis brlab pa'i rim pa yang 'di lta ste/ yi ge a ni chos thams cad thog ma nas ma skyes par chud pa'i ting nge 'dzin gyi sgo mo ston pa ste/ de'i sgo nas phung po dang khams dang skye mched la sogs pa'i chos rnams ma skyes par chud de/dmigs su med na phung po'i bdud bcom pa'o/ /yi ge ba ni chos thams cad ngag gi lam dang bral ba ston pa'i ting nge 'dzin gyi sgo ste/ ngag gi lam ni rnam par rtog pa ste/ rnam par rtog pa med par chud de/ rnam par mi rtog pas lha'i bu'i bdud bcom mo//de ltar phung po la sogs pa'i chos rnams dang / de la dmigs pa'i rnam par rtog pa med na/ de dag la chags par 'gyur ba 'dod chags la sogs pa'i nyon mongs pa rnams med par yi ge ra'i sgo nas mtshon te/ chos thams cad rdul dang 'dra bar chud de/rdul che ba ni nyon mongs pa la bya ste/ des nyon mongs pa'i bdud bcom mo/ /yi ge ha ni chos thams cad rgyu dang 'bras bur chud pa'i ting nge 'dzin gyi sgo de nyon mongs pa la las dang tshe 'byung ste/ nyon mongs pa la las dang tshe yang mi 'byung / tshe ma byung na 'chi bar mi 'byung ste/ de ltar chud pas 'chi ba'i bdud bcom pa'o/ /de ltar chos rnams thog ma nas ma skyes pa la sogs pa'i tshul gyis stong pa nyid kyi rang bzhin du chud pa'i sgo ni yi ge la ste/ chos thams cad nam mkha' dang 'dra'o zhes bstan pa'o/ /de ltar ting nge 'dzin de rnams la kun rdzob tu yang yi ge a la sogs pa re re las dbang chen la sogs pa'i dkyil 'khor du yang sbyar te/yi ge a'i sgo nas zhugs pa'i ting nge 'dzin gyi phung po'i bdud bcom ste/ phung po ni sra zhing khur khyer nus pa'o/ /de bzhin du de'i rjes mthun par yi ge a de las/ sa'i dkyil 'khor du gyur te/ sa yang sra zhing khur khyer bzod pa'o//yi ge pa las rnam par rtog pa dang bral ba'i ting nge 'dzin gyi sgor gyur te/ de ni rtog pa la sogs pa'i dri ma dag par byed pa'o/ /de bzhin du yi ge ba las chu'i dkyil 'khor du gyur pa'am de'i rjes su mthun pa ste/ me ni thams cad sreg cing med par byed pa'o//yi ge ra las chos thams cad rdul dang bral ba'i ting nge 'dzin du gyur te/ de bzhin du yi ge ha las rlung gi dkyil 'khor du gyur pa yang / de'i rjes su mthun pa ste/ rlung ni thams cad du 'thor ba'am 'jig par byed pa'i rang bzhin no/ /yi ge kha las chos thams cad stong pa nam mkha'i rang bzhin du chud pa'i ting nge 'dzin du gyur te/de bzhin du yi ge kha las nam mkha'i dkyil 'khor du gyur pa dang nam mkha'i rang bzhin du mthun te/ de dag ni spyi'i don to/ /de bzhin gshegs pa'i yid las byung / /zhes bya ba ni de bzhin nyid kyi ye shes las 'byung zhes pa ste/ a la sogs pa'i stong pa nyid de dag nyid la bya'o//las dang bya ba rnam par rol pa zhes bya ba ni grub pa rab la sogs pa dang zhi ba la sogs pa'i las rnams byed pa'o/ /spyod pa ni rol mo zhes pa ni rol mo mkhan dang 'dra ste/ rol mo mkhan gyi gar la sogs pa'i rol mo sna tshogs ston te/ de bzhin du snying po 'di rnams kyang grub pa dang las sna tshogs ston pa'i phyir ro//khams bzhi 'dus pa zhes pa ni/ sa dang chu dang me dang rlung gi khams kyi dkyil 'khor rnams snying po 'di rnams las byung ba'i phyir ro/ /nam mkha' dang 'dra bar khyab par shes pa ni/ 'di ltar nam mkha' thams cad du khyab pa de bzhin du snying po de rnams kyis kyang thams cad du khyab pa ste/de dag ni snying po de rnams kyi rang bzhin bstan pa'o/ /snang ba dang ni mi snang ba'i 'bras bu'i gtso zhes pa ni mthu bstan pa ste/ snang ba ni rig 'dzin la sogs pa'i mngon sum du 'gyur ba'o/ /mi snang ba ni sangs rgyas la sogs pa'i 'bras bu re zhig nas thob pa ste/de lta bu mchog gi sbyin pa byed pa zhes pa'o/ /nyan thos dang rang sangs rgyas dang byang chub sems dpa' thams cad kyi mngon sum du gyur zhes pa ni/ de dag gi spyod yul du gyur pa zhes pa ste/ nyan thos rnams kyang sa ma lus pa dang chu ma lus pa la sogs pa'i ting nge nge 'dzin mngon du byed de/de yang dkyil 'khor de dag gi rang bzhin pa'i phyir ro/ /byang chub sems dpa' yang sa gzhi thams cad rin po che la sogs pas bkang ste/ de bzhin gshegs pa la mchod pa byed pa la sogs pa yang dkyil 'khor 'di dag gi rang bzhin pa'i phyir ro/ /sngags kyi sgor byang chub sems dpa' spyad pa spyod pa rnams re ba thams cad yongs su rdzogs par byed pa zhes pa ni bstan pa 'di la zhugs pa rnams grub pa la sogs pa 'thob pa'i sgo nas re ba yongs su rdzogs par byed pa'i phyir ro//sems can thams cad la phan 'dogs zhes pa ni bstan pa 'dir zhugs pa dang ma zhugs pa gnyis ka sems can la phan 'dogs pa ste/las du ma dang ldan pa ni gdon dang dug la sogs pa sel ba'i las sna tshogs dang ldan pa'o/ /phyag na rdo rje spyod pa'i rol mo las bya ba mngon par 'byung ba 'bras bu'i gtso bo sems can kun gyi mngon sum pa de gang zhe na/gong du smos pa de dag nyid dang dngos su bstan pa'i phyir ro/ /gang zhe na zhes gsungs pa'o/ /chog shes pas thog mar byas pa ni/ bdag gi de nyid rim bzhin du'o/ /zhes pa nas ci smos/ de ni bdag nyid kyis/ rgyal ba mchog tu bsgyur na'o/ /zhes pa'i bar du sngags pas bdag gi de kho na nyid sbyar ba dang /de'i rjes su sngags pa 'chad de/ sngags pas bdag gi de kho na nyid sbyor ba sngon du byas te/ de nas sngags kyi yi ge rnams lus la so so'i gnas su bkod de/ dbang chen gyi dkyil 'khor la sogs par bsgyur nas/ de dag gi bsgrub pa dang las la sogs pa la 'jug go/ / rim pa de lta bur 'jug pa yang sngon sangs rgyas bcom ldan 'das chos rnams thog ma nas ma skyes pa stong pa'i rang bzhin du mngon par byang chub pa nas/ de'i 'og tu sngon gyi smon lam gyi shugs kyis sku mi zad pa la sogs pa'i rgyan rnams kun rdzob kyi tshul du 'jig rten thams cad du khyab par ston te/ de bas na sngags pas kyang bdag gi de kho na nyid stong par dmigs pa sngon du byas te/ yi ge dgod pa dang bzlas pa la sogs pa phyis bya'o/ /de la chog shes par thog mar byas pa ni bdag gi de nyid rim bzhin no zhes pa nas de'i sangs rgyas kun gyi bdag gi de nyid bar gsungs zhes pa'i bar du bdag gi de nyid sbyor ba ste/bdag gi de bzhin nyid ces pa ni/ sngags mkhan rang gi snying po yang / yi ge a'i sgo nas thog ma nas ma byung ma skyes par stong par bshigs te/ de bas na a las dbang chen gyi dkyil 'khor kha dog shin tu ser zhing lci ba bsams te/ de'i steng na sangs rgyas bcom ldan 'das bzhugs te/de lta bur bdag nyid kyi lus la bsams te/ de bas na gsungs pa chog shes pas thog mar bya'o zhes pa la sogs pa ste/ bdag gi de nyid rim bzhin du'o/ /zhes pa ni byang chub kyi sems bsgom pa bzhin byas shing / lha'i gzugs su bsgrub pa la sogs pa'i las rim pa bzhin du bya'o zhes pa'o//sngags mkhan 'dug nas snga ma bzhin du zhes pa ni/ gong du de bzhin gshegs pa'i snying po bshad pa'i rim pa bzhin du 'dug nas zhes pa'o/ /de bzhin gshegs pa dran par bya/ /zhes pa ni slob pa la sogs pa'i las rnams bya na/de bzhin gshegs pa mdun du bsam par bya ste/ sngags dag rig pa la sogs pa dmigs pa'i yul yin pa'i phyir ro/ /gnyis su na de bzhin gshegs pa mdun du bsams nas bgegs med pa'i phyir ro/ /bdag nyid a ru bya ba ni 'khor ba dang bcas pa rgyas par te zhes pa'i bdag nyid yi ge a las stong pa nyid kyi rang bzhin du bsams te/klad kor gyis ni 'dzin par byed pa'i ye shes kyang stong pa nyid du ston pa ste/ gzung ba dang 'dzin pa med par stong pa'i rang bzhin du bsgyur bar bya'o zhes pa'o/ /thams cad kha dog ser zhing bzang / /grwa bzhi la ni rdo rjes mtshan//zhes pa ni stong pa'i rang bzhin du gyur pa de las/ dbang chen gyi dkyil 'khor gru bzhi kha dog shin tu ser ba rdo rje'i mtshan ma btab pa bsam mo zhes pa'o/ /sngags pa der 'dug bsam pa ni/ /rdzogs pa'i sangs rgyas kun gyi gtso/ /zhes pa ni dkyil 'khor de'i steng na bcom ldan 'das rnam par snang mdzad kyi skur bsams te//de yang bdag gi lus nyid de ltar bsam par shes par bya'o/ /nam zhig sngags pa de the tshom/ /med bdag nyid yang dag 'gyur na/ /zhes pa ni bdag gi de kho na nyid stong par dmigs pa dang / lha'i gzugs su gsal bar snang ba the tshom med par gyur nas zhes pa ste/stong pa nyid du the tshom med par gyur pa yang ting nge 'dzin dag pa dang / ji bzhin pa dang bral ba dang / rnam par rtog pa thams cad spang ba na/ ji lta ba nyid du the tshom med pa'o/ /lha'i gzugs su gsal ba the tshom med pa yang / ting nge 'dzin lha'i gzugs su kun du gsal ba dang /rnam par spang ba ni ji bzhin pa nyid du the tshom med pa zhes pa ste/ nam zhig sngags pa rab tu mos pa'i sems kyis byed par gyur na/ 'og nas 'byung ba'i rjes su sngags pa rnams thob ste/ 'on kyang 'gyur ba'i 'jig rten pa kun la phan par byed pa ste/ zhes pa ni grub pa la sogs pa thob pa'i sgo nas/ sems can rnams la phan gdags nus te/ de ni pha rol gyi don phun sum tshogs pa'o/ /ngo mtshar mang po dang yang ldan/ /mig 'phrul rnams kyi gnas na 'dug /ces pa ni rig 'dzin la sogs pa'i grub pa thob nas/ mig 'phrul mkhan dang 'dra bar rdzu 'phrul ngo mtshar sna tshogs rnams byed nus par 'gyur zhes pa ste mthu phun sum tshogs pa'o//thog ma med nas bsags pa ni/ /ma rig sogs pas dog pa rnams/ /de dag thams cad 'byung ba ni/ /sngags pa nam zhig snyoms thub na'o/ /zhes pa ni thog ma med pa'i dus nas ma rig pa'i dbang gis 'khor ba dog pa na/mi dge ba dang nyon mongs pa'i las bsags pa sbyor ba de lta bu la snyoms par thub na/ de dag thams cad byang bar 'gyur ro zhes pa ste/ de ni spong ba phun sum tshogs pa'o/ /nam zhig sems ni bsgom bya ba/ /bla na med pa'i byang chub sems//de nas sngags pa las rnams ni/ /dge dang mi dge las byung ba'i/ /sbyor ba rtag tu mi gos pa/ /pad+mo chus mi chags dang 'dra'o/ /zhes pa ste byang chub kyi sems te stong pa'i mtshan nyid pas dge ba dang mi dge ba'i las la sogs pa'i 'bras bu dngos po rnams kyi gnyen po yin pa'i phyir ro//de la mi dge ba'i 'bras bu mi gos pa ni rigs na dge ba'i 'bras bu mi gos na/ tshul khrims bsrung ba la sogs pa'i 'bras bu yang med dam zhe na/ byang chub kyi sems ni stong pa'i rang bzhin pas/ dge ba dag dmigs su med par 'gyur mod kyi/ de las langs nas phyis sbyor ba bdag 'tshang rgya ba'i rgyur gyur pa'i lus dang /longs spyod la sogs pa dang ldan par shog cig ces smon lam 'debs pas dge ba'i las kyi 'bras bu'i bag chags slar lta bar 'gyur ro/ /ci smos de ni bdag nyid kyis/ rgyal ba mchog tu bsgyur na'o//zhes pa ni byang chub kyi sems 'ba' zhig bsgoms pas kyang / de ltar gyur na byang chub kyi sems bsgom pa la sbyor ba pa de bdag nyid sangs rgyas kyi skur bsgyur ba ni/ mi dge ba la sogs pa'i las kyis mi gos par gyur pa lta ci smos zhes pa'o/ /de nas bcom ldan 'das rnam par snang mdzad bdud bzhi rab tu 'dul ba rdo rje rnam par rol pa zhes bya ba'i ting nge 'dzin la snyoms par zhugs zhes pa ni/bcom ldan 'das ting nge 'dzin de la zhugs nas bdud bzhi las rgyal bar byed pa dang / rdo rje rnam par rol pa'i sngags rnams 'byung bas na/ ting nge 'dzin de bdud bzhi las rgyal ba rdo rje rnam par rol pa zhes bya'o//de la bdud bzhi las rgyal ba zhes bya ba ni/ spong ba phun sum tshogs pa'o/ /rdo rje rnam par rol pa zhes pa ni rdo rje dang 'dra bar cis kyang mi tshugs par rnam par rol pa sprul pa ste/ mthu phun sum tshogs pa'o/ /de bas na gsungs pa/bdud bzhi las rgyal bar zhes pa la sogs pa ste/ rdo rje yi ge'i tshig 'di rnams gsungs so zhes pa dang 'brel to/ /bdud bzhi las rgyal ba zhes pa ni snga ma bzhin no/ /rgyud drug rnam par rol pa zhes pa ni yi ge rnams kyi sgo nas stong pa nyid kyi ting nge 'dzin la zhugs na/rgyud drug la sogs pa thams cad dmigs su med par chud pa rgyud drug las rnam par grol lo/ /gnyis su yi ge de rnams kyi sgo nas dbang chen la sogs pa'i dkyil 'khor du sbyar zhing / rig 'dzin la sogs pa'i grub pa thob nas rim gyis sa la bla ma la 'phar bas na/ rgyud drug las rnam par grol lo zhes pa ste/ sngags de rnams pha rol gyi don phun sum tshogs pa bstan pa'o/ /thams cad mkhyen gyi ye shes yongs su rdzogs par byed pa zhes pa ni/ ye shes phun sum tshogs pa ste/ gong ma'i rim gyis zhugs na thams cad mkhyen pa'i ye shes rdzogs par 'gyur ba'i phyir ro//sngags kyi yi ge 'bru rnams las bdud bzhi 'joms pa'i ting nge 'dzin dang / dbang chen la sogs pa'i dkyil 'khor 'gyur ba'i rim pa ni gong du bshad zin to/ /de nas phyag na rdo rje gsang ba'i bdag po dang / rdo rje 'dzin pa de dag dang zhes pa nas/ gang gi sems can theg chen gyi//sngags kyi spyod pa bla med la/ /mthong ba'i chos la bder spyod pa/ /rnam par spyod pa dga' bar ro/ /zhes pa'i bar du bcom ldan 'das kyi sngags gsungs pa ste/ phyag na rdo rje la sogs pa'i byang chub sems dpa' de rnams kyis/ sngags de rnams kyi mthu dang yon tan rnams chud na ngo mtshar du 'gyur te/sngags de rnams kyi rjes su bsngags pa rnyed nas/ so so'i gnas su dgongs pa cho ga rnams bshad du gsol ba ste/ sangs rgyas dang byang chub sems dpa' thams cad don kun te zhes pa ni snying po 'di rnams sangs rgyas dang byang chub sems dpa' rnams kyi bya ba thams cad byed pa don gyi mchog go zhes pa'o//des ni sangs rgyas dang byang chub sems dpa' skyong ba rnams dang / rang sangs rgyas dang 'jig rten 'di yin na nyan thos pa gang dpa' bo rnams sa'i steng na ma lus par rdzu 'phrul rnam pa du mar spyod do zhes pa ni snying po 'di rnams kyi mthus sangs rgyas dang byang chub sems dpa' rnams kyang rdzu 'phrul sna tshogs spyod/nyan thos dang rang sangs rgyas rnams kyang ting nge 'dzin gyis nam mkha' stong pa la sar bsams te/ de la spyod lam bzhir gnas pa dang / ro smad la chu 'byung / ro stod la me 'byung ba dang /rlung gi dkyil 'khor bsams nas/ ri la sogs pa yang 'jig par byed pa la sogs pa rdzu 'phrul sna tshogs spyod do zhes pa'o/ /de dag thob pa dpe med ye shes te/ /sangs rgyas ye shes bla na med pa'o/ /zhes pa ni de ltar rdzu 'phrul sna tshogs spyad nas kyang / snying po 'di rnams kyi mthus/rim gyis thams cad mkhyen pa'i ye shes thob par 'gyur ro zhes pa'o/ /de bas na so so'i cho ga rgyas par bzhag pa'i las rnams so sor bstan pa 'di la bshad par gsol zhes pa ni/ sngags de rnams las dbang chen la sogs pa'i dkyil 'khor du bsgyur ba'i cho ga dang /so sor dgod pa dang las rnams spyod pa bstan pa 'di bshad du gsol zhes pa'o/ /gang gi sems can theg pa chen po'i sngags kyi spyod pa bla na med pa mthong ba'i chos la yang spyod pa ni/ rnam par spyod pa dga' bar ro/ /zhes pa ni de dag bshad pa yang sems can rnams mthong ba'i chos la mngon par 'byung ba'i bden pa thob pa'i phyir/de rnams bshad du gsol pa ste bshad pa'i dgos pa bstan pa'o/ /da ni gong du bshad pa de rnams so so'i las rnams bshad de/ las de rnams kyang sngags pa bdag rang yi ge a las snga ma bzhin du stong pa nyid du bsams te/de nas bcom ldan 'das rnam par snang mdzad kyi sku dbang chen la bzhugs par bdag nyid bsams te/ lus kyi nang du dbang chen gyi dkyil 'khor bsam la/ de yi ge rnams rim bzhin du bsams te/ de bas na gsungs pa de'i yangs gzhi rdo rje chen por byin gyis brlabs nas/nyid kyi sku las byang chub kyi snying por nye bar bstan par dgongs te gsungs pa zhes pa la sogs pa ste/ sa gzhi rdo rje chen por byin gyis brlabs nas zhes pa ni/ sku dbang chen gyi dkyil 'khor du byin gyis brlabs nas zhes pa'o/ /nyid kyi sku las byang chub kyi snying po nye bar bstan pa nas zhes pa ni/de ltar dbang chen gyi dkyil 'khor du bsgyur ba las al sogs pa'i yi ge rnams dgod par bstan pa ste yi ge rnams nyid mngon par byang chub pa'i ting nge 'dzin gyi sgo byang chub kyi snying po zhes bya ste/ de ltar bcom ldan 'das kyis dbang chen gyi dkyil 'khor du sngar byin gyis brlabs nas/phyis yi ge rnams dgod par bstan pa yang ma 'ongs pa'i 'gro ba rnams kyis kyang tshul 'di ltar bya'o zhes bstan pa'o/ /a de rab tu shes bya ba/ /dbang chen gyi dkyil 'khor bcas pa/ /phyi rol dang ni nang du yang / /rdo rje dkyil 'khor shes par bya//zhes pa ni gong du bshad pa'i rim gyis yi ge a las bdag gi lus las sangs rgyas kyi sku dbang chen gyi dkyil 'khor dang bcas par bsam pa'o/ /rdo rje dkyil 'khor zhes pa ni dbang chen gyi dkyil 'khor de rdo rje'i mtshan nyid btab ces pa'o/ /de 'dug nas kun bsams zhes pa ni/yi ge a la sogs pa rnams rim bzhin du de las bsams zhes pa'o/ /sbyor ba bstan zhes gsungs pa ni/ dbang chen gyi dkyil 'khor la gnas pa'i sku de la/ sbyor ba gnas pas sbyor ba bstan/ /zhes pa'o/ /a ni srog gi gtso bo ste/ /'dren pa'i mchog ces bya ba yin//zhes pa ni sngags pa dbang chen gyi dkyil 'khor la gnas nas/ yi ge a de kha dog gser btso ma 'dra ba/ nang gi dkyil 'khor gyen du dbugs kyi rlung gis phul ba dang 'dra bar bsams la/ bdag gi sna'i bu gnas byung ste/ pha rol po nad pa'i sna'i bu gar zhugs nas khong thams cad du khyab pa ni/chu'i nang du ras bting ba'am/ g.yag rang bkram pa dang 'dra bar bsams te/ slar yid kyi a de dbugs dang bcas par drang bar bsam pa ni/ ras sam g.yag rnga chu nang du bkram pa'i dpung nas bzung nas drangs nas zhum par 'gyur ba de ltar bsams te/des nad thams cad a'i rang bzhin du 'dus te/ slar nad pa'i sna nas byung ste/ bdag gi khong du zhugs par bsam mo/ /de bzhin du lan mang du goms par byas nas thams cad 'dren par 'gyur ro/ /de bzhin du sems drang na yang a de snga ma bzhin du rlung dang bcas par bdag gi lus las pha rol gyi lus la 'jug par bsams te/khyad par du bdag gi dbugs dang / pha rol gyi dbugs gnyis 'dres te gcig tu gyur par bsams te/ a snga ma bzhin du slar drangs na dbang du 'gyur ro/ /de bzhin du a des bsgrub par bya ba'i mig la sogs pa'i dbang po'i rgyud du khyab par bsams te/slar drangs na rkang pas 'ong bar 'gyur/ yang snga ma bzhin du bsams te/ a des bsgrub par bya ba'i lus kyi nang thams cad du khyab par bsams te/ slar drangs na ril por drangs par 'gyur ro/ /klad kor bzhag na ni sems can kun gyi sdud par 'gyur zhes pa ni/sngags pa 'dir zla ba gcig tu zhes pa nas/ mi g.yo ba shin tu mi phyed pa dang / lha dang lha ma yin gyis so zhes pa'i bar du bslab pa las byung ba'i grub pa bshad de/ bdag gi snga ma bzhin du bsgyur nas/ snga dro mel tshe thun gcig gung la mel tshe thun gcig tu bzlas pa/zla ba gcig gi bar du byas na ma rig pa bsal bar 'gyur zhing / lha dang lha ma yin la sogs pas mi tshugs par 'gyur zhes pa'o/ /las gang rgyas par 'gyur ba dang / /bdag gi rnyed pa sgrub pa yang / /de dag rtag tu sngags mkhan gyis//phye ba'i dkyil 'khor dbus su ste/ /zhes pa ni rgyas pa'i las dang / bdag gi longs spyod du 'gyur ba la sogs pa yang / dkyil 'khor la gnas te sgrub bo zhes pa'o/ /gser gyi kha dog 'bar bar bcas/ /thor tshugs cod pan 'chang ba ni/ /rdzogs pa'i sangs rgyas ting 'dzin bzhugs//de ni dbang chen gnas zhes bya'o/ /zhes pa ni dbang chen gyi dkyil 'khor la bcom ldan 'das kyi sku 'di lta bur zhugs par bsam zhes pa'o/ /rdo rje pad+mo ral gri'am/ /zhes pa nas/ dbang chen du ni bsgom byas te/ /sgrub bo zhes bya ba ni rdo rje la sogs pa'i rdzas de rnams sngags pa dbang chen gyi dkyil 'khor la gnas nas/rgyud gzhan dag las 'byung ba'i rim gyis sgrub bo zhes pa'o/ /da ni gnas pa rab bshad kyis/ /de ni rtse gcig tu yang nyon/ /zhes pa nas mi g.yo 'dug par 'gyur zhes pa'i bar du pha rol gyi rgol ba la sogs pa gnan par bya ba ste/sngags pas snga ma bzhin du dbang chen gyi dkyil 'khor la gnas par bsams nas gnan par bya ba'i spyi bor ri rab shin tu ser la lci ba rtse mo brgyad pa bsams te/ de'i steng du pad+mo bsam/ pad+mo'i steng du rdo rje rgya gram bsam/ de'i steng du a de las bcom ldan 'das kyi sku bsams te/mnan par gnas pa rnams kyi spyi bor non par bsams na/ thams cad mi g.yo bar 'gyur ro zhes pa'o/ /sman la yang na lan brgya ru/ /zhes pa nas de'i nad med par 'gyur ba ni/ sngon gyi las las byung ba rnams so zhes pa'i bar du ni bdag snga ma bzhin du bsams te/sman la lan brgya sngags/ nad pa la blud na nad 'tsho bar 'gyur ro zhes pa'o/ /de las gzhan yang gtso bo zhes pa nas rab tu sdud pa'i mchog ni klad kyi 'khor dang bcas pa'o zhes pa'i bar du ba'i sgrub pa rnams bshad pa ste/ yi ge bsam pa yang dbang chen gyi dkyil 'khor du bsam pa ni snga ma bzhin te/de la khyad par du nang gi dbang chen gyi dkyil 'khor lte ba'i thad kar bsam mo/ /kha ba 'o ma'am dung 'dra bar/ /lte ba'i dbus nas byung bar de/ /zhes pa nas/ kha ba'i phung po'i dbus na zhugs/ /gdug pa kun kyang rab tu zhi/ / zhes pa'i bar du ba'i las gcig bshad pa ste/ bdag nyid dbang chen gyi dkyil 'khor du bsgyur na/ nang gi rdo rje'i dkyil 'khor lte ba'i thad kar bsam ste/ de'i steng du pad+mo dkar po kha ba 'o ma dung 'dra ba lte ba'i nang nas 'byung ba 'dug par bsams te/ pad+mo'i steng du yi ge ba ston gyi zla ba'i kha dog 'dra ba bsams la/ba la chu rgyun dgu 'byung bas bskor te/ chu'i dkyil 'khor zla ba'i 'od 'dra ba de'i gzhir gyur pa bsams la/ yi ge ba de yang bum pa 'dra ba smug pa'i zil pa dkar po 'dus pa 'dra ba'i nang na 'dug par bsams te/ bdag gi lus kyi nang thams cad khyab par bsams na/gdug pa dang tsha ba'i rims la sogs pa thams cad 'byang bar 'gyur ro/ /de bzhin du bdag gi lus dbang chen gyi dkyil 'khor la 'dug par bsams la gzhan gyi lus la de bzhin du bsams na/ gdug pa dang tsha ba'i rims la sogs pa 'byang bar 'gyur ro//'o ma mu tig phreng dkar dang / /zhes pa nas/ sngags pa yid la bsams na ni/ /gdug pa kun las thar bar 'gyur/ /zhes pa'i bar du ba'i las gzhan te/ yi ge bde snga ma bzhin du bsams nas smug zil med par de la chu rgyun dkar po 'byung ste/ chu rgyun des ba de la 'khor nas 'khyil bar 'dug par bsams la/de bdag gi dbugs kyis bskyod nas rang gi lus thams cad du khyab par bsams na/ des gdug pa la sogs pa'i nad rnams zhi bar 'gyur ro/ /de bzhin du pha rol bsams na yang / gdug pa la sogs pa'i nad rnams de bzhin du zhi bar 'gyur ro//dkyil 'khor de la sgrub pa ni/ /dngos po 'di rnams thub sems kyis/ /zhes pa nas de ni zhi byed dpal ldan pa'i dkyil 'khor ro zhes gsungs pa yin zhes pa'i bar du ba'i dkyil 'khor gyi sbyor ba la gnas nas/ rdo rje la sogs pa'i rdzas ming gis smos pa de rnams bsgrubs na/tshe ring ba la sogs pa'i grub pa rnams thob par 'gyur te rim bzhin du sbyor bar bya'o/ /rab tu sdud pa'i chog pa ni/ /klad kyi 'khor dang bcas na'o/ /zhes pa ni nad pa'i lus la ba de klad kor dang bcas par bsams na/ba ni gzung ba'i chos thams cad stong par byad pa/ klad kor ni 'dzin pa thams cad stong par ston te/ de ltar lus de gzung ba dang 'dzin pa gnyis ka dang bral te/ stong pas nad kyang stong pa'i rang bzhin du 'dus te med par 'gyur ba'o/ /ra de ni nyid mchog yin zhes pa nas/me dang bcas par sbyar na'o zhes pa'i bar du ra'i sgrub pa dang las rnams bshad de/ ra ni yang dag mchog yin te/ /zhes pa ni chos thams cad rdul dang bral ba'i ting nge 'dzin stong pa'i rang bzhin mchog gi de bzhin nyid de yi ger de ston pas na/ mchog gi de bzhin nyid ces bya ba ste/don dam pa'i mtshan nyid do/ /'od can gyis 'od ces bya ba ni/ nyi ma dang zla ba dang skar ma la sogs pa'i 'od can rnams te/ 'od can de rnams kyi nang na me ni 'od can gyi mchog ste/ yi ger ni me'i sa bon yin pas na 'od can rnams kyi mchog ces bya ste/ kun rdzob kyi rang bzhin bstan pa'o//des na las rnams gang yang rung / /mtshams med par ni 'gyur ba rnams/ /de kun 'byung gyur sbyor bas ni/ /shin tu 'thob par bsams na'o/ /zhes pa'i bar du de la bsgoms pa'i 'bras bu bstan pa ste/ chos thams cad rdul dang bral ba stong pa nyid kyi rang bzhin du bsgoms na/mi dge bcu la sogs pa'i las rnams dang / de'i 'bras bu mtshams med pa la sogs pa dmigs su med pas 'byung bar mi 'gyur ro zhes pa'o/ /rab tu kun dmar yid 'ong gru gsum lta bu ru ni 'dug /'bar ba'i phreng bas 'khor lo ni/ / gru gsum rwa can snying gar gzhag /ces pa ni me'i dkyil 'khor gyi mtshan nyid de snying gar nang gi rdo rje'i dkyil 'khor gyi steng du gru gsum shin tu dmar ba/ 'greng bur 'dug pa gru gsum gyi mtshan nyid btab par bsam mo zhes pa'o/ /de ru 'dug pas sbyor bas bsam/ /ra klad kor dang bcas par te//zhes pa ni dkyil 'khor gyi mtshan nyid dbus na yi ger kha dog dmar po klad kor dang bcas pa 'greng bur 'dug par bsam zhes pa ste/ klad kor dang bcas pa ni/ kun du sangs rgyas pa'i snying po gzung ba dang 'dzin pa gnyis dang bral ba ston pa'o/ /de bzhin du yi ge ba yang klad kor med kyang kun du sangs rgyas pa'i snying po bas pa'i bu ga nyid klad kor lta bur 'dzin pa med par ston par blta'o//dngos po de rnams der sgrubs su/ /zhes pa ni me dang bcas par sbyar ro/ /zhes pa'i bar du yi ge ra bsgrub pa ba dang las rnams bshad pa ste/sngags pa ra'i dkyil 'khor la gnas nas/ bsgrub pa ming gis smos pa rnams rgyud dang rtog pa gzhan las byung ba'i tshogs rdzas kyi mtshan ma dang bcas pa'am mtshan ma med par bsgrubs na/ nyi ma la sogs pa grub ste ci bsgo ba nyan to/ /ha de yang dag mchog yin te/ / zhes pa nas/ bdud rnams rnam par 'gyur byed pa/ /rgyu kun mi dmigs pa ru ste/ /zhes pa'i bar du ha zhes pa'i bsgrub pa dang / yon tan dang dkyil 'khor la sogs pa bshad pa ste/ ha de de nyid mchog yin te/ /zhes pa ni chos thams cad rgyu dang 'bras bur ston pa'i rang bzhin pas de kho na nyid kyi mchog ces pa'o//de yang rlung las mngon byung ba/ /zhes pa ni rlung gi dkyil 'khor las byung ba'am/ de las rlung gi dkyil 'khor 'byung bas so/ /rgyu dang las dang 'bras bu yin/ /gang gi sa bon skyes par te/ /de yis kun kyang 'joms pa ni//gang gi 'khor dang bcas pa'o/ /zhes pa ni de'i rang bzhin bsgoms pa'i 'bras bu bstan pa ste/ ha zhes pa ni klad kor dang bcas par bsam pas/ chos thams cad rgyu dang 'bras bu'i tshul gyis gzung ba dang 'dzin pa gnyis ka dmigs su med de/ rgyu zhes pa ni ma rig pa la sogs pa nyon mongs pa rnams so//las ni lus dang ngag yid gsum gyi sgo nas dge ba dang mi dge ba la sogs pa rnams so/ /'bras bu ni de dag gi rnam par smin pa ngan song dang ngan 'gro la sogs pa'o/ /gang gi sa bon rnams skye ba/ /zhes pa ni rgyu dang las de dag gis yang phung po skyed pa ste/de dag thams cad dmigs su med par stong pas na 'joms par 'gyur zhes pa'o/ /de yi gzugs kyang bshad pa ni/ /kha dog nag la 'od che ba/ /'jigs shing 'bar ba'i phreng bar 'khor/ /kun du g.yo ba 'bar bzhin du'o//zhes pa ni yi ge ha nyid kyi gzugs bstan pa ste/ de yang rlung gi dkyil 'khor gyi steng na gnas par bsam ste/ rlung gi dkyil 'khor gsungs pa dang / /dkyil 'khor de'i steng bsam pa ni/ /zhes pa ni/ ba dan bcas par g.yo bzhin te/ /zhes pa'i bar du ste g.yo bzhin pa ni rlung gi rang bzhin g.yo bas dkyil 'khor g.yo bar bsam mo//sngags pas bsams der 'dug par ni/ /yi ge mchog gi yi ge'o/ /zhes pa ni yi ge'i rang bzhin sngar yang bshad zin mod kyi/ yi ge shes rab kyi sgra ni mi 'gyur zhes pa ste/ 'di yang bzlas te gsungs pa ni/ rab tu goms pa'i mthus yi ge mi 'gyur bsam zhes pa'o/ /der ni dngos po rnams sgrub pa/ /de kun sngags pa yis byas pa/ /sems thub dkyil 'khor 'dug nas so/ /zhes pa'i bar du ming gis smos pa'i dngos po de rnams sngags pa rlung gi dkyil 'khor la gnas nas rgyud gzhan las byung ba'i cho ga bzhin du grub par bya'o zhes pa ste/yi ge de bzhi char yang brtsis na go gcig pa ni/ dbang chen gyi dkyil 'khor gyi nang du bsam zhing / bdag nyid kun du sangs rgyas pa'i skur bsgyur dang / nang gi rdo rje'i dkyil 'khor yi ge ba la sogs pa gang bsams pa'i gnas de nyid du spong zhing bsams pa dang las su bya ba rnams ma rtogs par bsgrub ba rnams la/phyag na rdo rje rtse lnga pa bcings te/ sngon du bsnyen pa zla ba gcig tu dus gsum du bya ba dang / mtshan ma dang bcas pa dang mtshan ma med pa gnyis bsgrub tu rung ba ni kun la so sor spyad par bya'o//des ni snying po byang chub tu/ /byang chub sems dpa' grags chen rnams/ /bdud rnams rnam par 'dul byed pa/ /rgyu kun mi dmigs pa ru ste/ /zhes pa ni yi ge'i mthu bstan pa ste/ byang chub sems dpa' rnams kyang yi ge 'di'i sgo nas chos thams cad rgyu dang bral bar chud nas/bdud bzhi rnam par bcom ste/ mngon par byang chub pa thob bo zhes pa'o/ /rgyu med pas na 'bras bu yang med do/ /zhes pa nas/ gnas mchog dam pa bsgrub par bya'o/ /zhes bya ba'i bar du yi ge khaM gi rang bzhin dang sgrub pa bshad pa ste/las de yang ni yod pa ma yin te/ /de ltar dngos su de med pas/ /stong pa'i ye shes thob pa yin/ /zhes pa ni ma rig pa la sogs pa'i nyon mongs pa rgyu dang dge ba dang mi dge ba la sogs pa'i las dang / bzang 'gro dang ngan 'gro la sogs pa'i 'bras bu yi ge khaM gzung ba dang 'dzin pa stong par ston pa'i sgo nas dmigs su med ces pa'o//de yi gzugs kyang gsungs pa ni/ /mthu chen sangs rgyas rdzogs pa ste/ /klad kyi 'khor dang bcas pa ni/ /khaM ste nam mkha'i mchog ces bya ba ni/ yi ge de'i rang bzhin gsungs pa ste/yi ge khaM de gzung ba dang 'dzin pa gnyis ka dang bral bar ston pas stong pa'i mchog ces bya'o/ /ral gri phyag rgya bcas pa ru/ sgrub pa 'di rnams gdon mi za bar sgrub/ ral gri zhags pa 'khor lo'am/ /mda' 'am tho ba'am de bzhin te/ /de'i dra'i rdzas dang ldan pa ru/ / gnas mchog dam par bsgrub par bya'o/ /zhes pa ni sngags sbyor ba'i stan la gnas nas spyi bor yi ge khaM bsams te/ thams cad nam mkha'i rang bzhin du bsams te/ yi ge khaM 'ba' zhig kha dog nam mkha' dang 'dra bar bsams nas/ ral gri phyag rgya bcings te snga ma bzhin du bzlas na ming gis smos pa rnams 'grub par 'gyur ro//nang par bdag gi gzugs bsgyur nas/ phyi rol dang nang la mi rtog par 'gyur na zhes pa nas/ de lta bu la sogs pa sgrub pa'i tshig ni yid las 'byung ba'o zhes pa'i bar du sngags pa sbyor ba'i bstan pa snga ma bzhin du bsgom pa las khyad par du bdag gi de kho na stong par bsgom pa 'dod chags la sogs pa'i nyon mongs pa rnams kun nas mi ldang bar nus kyi/bar du goms par byas na a la sogs pa'i snying po rnams sgrub pa dang / las rnams phyi rol gyi rdzas la mi ltos par sgrub pa bshad pa de/ nam ar bdag gi gzugs bsgyur nas/phyi rol dang nang la mi rtog par gyur na zhes pa ni/ a la sogs pa'i rang bzhin du bsgyur te/ phyi rol gyi gzugs la sogs pa dngos po rnams dang / nang gi gzugs yod pa'i blo mi skye ba ste/ dngos po rnams la ma chags par gyur pa byas la/a de bsgrubs na de'i 'bras bu bong ba dang rdo dag dang gser du yang mi 'byed de/ ji ltar rdo dang bong ba la chags pa mi skye ba de bzhin du/ gser la yang chags pa mi skye ste/ 'dod chags dang zhe sdang mngon du mi ldang ba dang mi dge ba bcu'i las byas pa'i sdig pa'i 'bras bu'i dbang du mi 'gyur zhing ste/de bas gsungs pa de rnam par dag ste/ rdzogs pa'i sangs rgyas dang 'dra bar grub par 'gyur ro/ /de ni las thams cad kyang nus zhes pa ni grub pa rab 'bring la sogs pa grub pa dang / zhi ba la sogs pa'i las rnams nus zhes pa'o/ /nyes pa kun dang bral ba yin//zhes pa ni las de dag byed na ma rgyas pa'am 'khrul pa la sogs pa'i nyes pa med par byed nus par 'gyur zhes pa'o/ /de las gzhan yang bshad pa ni/ /zhes pa nas/ gang gis chu de 'thungs pa dang / /lag pas kyang ni reg kyang rung / /gdon mi za bar de dag kun//the tshom ma za byang chub 'gyur/ /zhes pa'i bar du ba'i sbyor ba ste/ sngags pa sbyor ba'i stan la gnas nas/ yi ge ba las chu'i dkyil 'khor la sogs pa bsam pa ni snga ma bzhin te/ khyad par du ba las chu'i rgyun 'byung ba dang / chu'i dkyil 'khor gyis bdag gi lus spyi bo nas rting pa'i bar du rgyas par gang bar bsams te/de ltar bstan par yid ches te/ chu de thams cad ba spu'i bu ga thams cad nas phyir byung ste/ bdag gi lus kyi then 'khor dang / khang pa la sogs pa kun gang bar bsams nas/ rim gyis gtsug lag khang dang yul la sogs pa thams cad du gang bar bsams na/chu de la gang sems can skal ba dang ldan pa rnams kyis 'thungs sam reg pa na/ de ltar 'thungs pa dang / reg pa'i spyod yul du gyur pa de ni sems can phal dang mi 'dra bar skal ba dang ldan par mngon pas byang chub tu nges par 'gyur ro zhes pa'o//lus kun du ni ra de'ang / /shin tu thub par sems kyis bsam/ /zhes pa nas/ ra de'i rnam par 'phrul pa'o/ /zhes pa'i bar du ra'i sbyor ba ste/ lus kun du ni ra de'i yang / /shin tu thub par sems kyis bsam/ /zhes pa ni sngags pa sbyor ba'i stan la snga ma bzhin du gnas nas/snying gar yi ger me'i dkyil 'khor la gnas par bsam ste/ 'bar ba'i 'od 'phros rang gi lus kyi nang thams cad khyab par gang bar bsams nas/ de ltar bstan par gyur pa dang / ba spu'i bu ga thams cad nas phyir byung ste rim gyis grong khyer dang yul la sogs pa thams cad me'i 'od 'phro snang bas gang bar bsams te/de bas na gsungs pa/ de nas phyi rol gyi gtong ba ni/ sbyor bas snang byed 'bar ba ste/ /zhes pa'o/ /sngags pa 'dod bzhin byed pa ni/ /ra des rnam par sprul pa yis/ /zhes pa ni sbyor ba de ltar byas na ra las me byung ba des sngags pa'i ci 'dod pa bzhin du byed par 'gyur ro zhes pa'o//ro stod du ni ra der bya ba ni/ /lte ba'i khung gi nang du gzhag /'bar ba dang ni chu 'bab par/ /de ni gnyis ka'ang ston par 'gyur/ /zhes pa ni ra dang ba gnyis dus gcig tu sbyar ba ste/ sngags pa snga ma bzhin du sbyor ba'i stan la gnas nas/snying gar yi ge ra me'i dkyil 'khor la gnas par bsams te/ lte ba'i khung gi snga ma bzhin du chu'i dkyil 'khor la gnas par bsams na/ dus gcig tu ra las me 'byung ba dang ba las chu 'bab pa'i cho 'phrul can du 'gyur ro/ / grang bas sdug bsngal sems can dmyal/ /ras ni shin tu zhi bar byed/ /ces pa ni ra 'ba' zhig tu snga ma bzhin du me'i dkyil 'khor la gnas nas bsgrims te/ bsgrubs na 'grub pa'i me de sems can dmyal ba'i steng bar snang la gnas nas lus la me byung ste/ sems can dmyal ba thams cad khyab par byas nas/grang bas bsgribs shing sdug bsngal ba'i sems can de rnams me des zhi bar nus zhes pa'o/ /bas ni gdung ba'i rnam pa ste/ /sngags pa sngags kyi cho gar gnas/ /zhes pa ni rab tu zhi bar 'gyur zhes pa dang sbyar te/ sngags pa snga ma bzhin du sbyor ba'i stan la gnas nas/yi ge snga ma bzhin du chu'i dkyil 'khor la gnas par bsams te/ ba las chu byung ba ni yang snga ma ltar bsams nas/ bdud rtsi'i chu de tsha bas gdungs pa'i sems can dmyal ba de dag thams cad bsil bar 'gyur te zhi bar byas nas/thabs ni me'i sbyor ba dang mthun no/ /de'i 'og tu bzhag pa ni ha zhes pa ste/ ba dang bcas pa de'i las rnams bsgrubs te/ sdig pa dang ldan pa'i mi yang rung zhes pa ni/ mi de'i las sbyar ba las me mi 'bar zhing las su ma btub par gyur na/ me de'i dkyil 'khor gyi 'og tu yi ge ha rlung gi dkyil 'khor la gnas par bsams te/rlung des bskyod par bsams na/ me de las gang las kyang sbyar ba de nges par 'byed do zhes pa ste/ sdig dang ldan pa'i mi yang rung / /zhes pa ni sdig pa dang ldan pa'i mis sbyar na yang 'grub na gzhan lta smos kyang ci dgos zhes pa ste/nges par las byed pa'i tshig bstan pa yin no/ /sbyor bas phyi dang nang gi dngos po rnams la mi ltos te/ kun nas ldang ba dang bral bas bsgom par bya ba yin pas/ sdig pa dang ldan par mi spyod do/ /sngags pa dbang chen la 'dug nas//chu yi las la zhugs shig dang / /bsdu ba la sogs pa thams cad/ /gdon mi za bar byed par 'gyur/ /zhes pa ni dbang chen gyi dkyil 'khor la gnas la chu'i las byar rung bar bshad pa ste/ sngags pa snga ma bzhin du sbyor ba'i stan la gnas nas/ yi ge a dbang chen gyi dkyil 'khor la snga ma bzhin du bsams te/yi ge bas sgrub par byed pa'i las rnams byed do zhes pa'o/ /de ba'i las chu thams cad du gang bar bya ba ni ma gtogs te/ chu thams cad du gang bar byas nas/ dbang chen gyi dkyil 'khor de nyid chu'i dkyil 'khor du gyur pas dbang chen gyi dkyil 'khor du mi 'gyur ba'i phyir ro//bsdu ba la sogs pa thams cad kyang byed par 'gyur zhes pa ni yi ge a de nad pa la sogs pa'i spyi bor bsams la/ de'i 'od 'phro ba ser po zhi ba'i rang bzhin gyis spyi bo nas mthar phyi nang khyab pa'i rting pa'i bar du phyin par bkrus par bsams na/nad kyang de bzhin du 'dag par 'gyur zhes pa'o/ /de bzhin nam yi ge sbyor bar byed na yang nad pa'i spyi bor ba de'i chu'i dkyil 'khor la sogs pa snga ma bzhin du bsams la/ bum pa kha sbub pa'i kha nas bdud rtsi'i chu dkar po bab par bsams te/chu des spyi bo nas rting pa'i bar du mthar gyis phyi nang bcas par bkrus par bsams na nad thams cad 'byang bar 'gyur te/ sbyor ba de ni spyi'i cho ga ste/ gzhan dag tu sbyar bar bya'o/ /rlung ni kun du 'gro ba ste/ /zhes pa nas/ 'phrul gyi rna ba thob par 'gyur/ /zhes pa'i bar du yi ge ha dbang chen la sogs pa'i dkyil 'khor kun gyi las byed par bshad pa ste/de la rlung ni kun du 'gro/ /zhes gsungs pa zhes pa ni/ yi ge ha ni rlung gi rang bzhin te/ de ni dbang chen la sogs pa'i dkyil 'khor kun du gtogs zhes pa ste/ dbang chen gyi dkyil 'khor dbyibs gru bzhi chu'i dkyil 'khor zlum po la sogs pa dbyibs so sor byed pa ni rlung yin pa'i phyir te/de bas na gsungs pa de ni thams cad byed pa'o/ /rnam pa tha dad sna tshogs pa'i las rnams ni/ rab tu rnam par dbye ba rnams/ de'i tshogs bya ba ni/ gzugs kyi dkyil 'khor dbus su zhes pa dang 'brel te/rnam pa tha dad par zhes pa ni/ dbang chen la sogs pa'i dkyil 'khor kha dog ser po dang dmar po dang dkar po la sogs pa'i rnam pa tha dad pa'o/ /sna tshogs las rnams zhes pa ni/ dkyil 'khor de rnams kyi so so'i las sna tshogs pa zhes pa'o//rab tu rnam par dbye ba'i las zhes pa ni/ dbang chen dang chu'i dkyil 'khor la sogs pa'i so so'i ba'i rnams zhes pa'o/ /de'i tshogs bya zhes pa ni yi ge ha'i tshogs bya zhes pa'o/ /gzugs kyi dkyil 'khor dbus su'o/ /zhes pa ni sngags pa lha'i gzugs su bsgyur te/dbang chen gyi dkyil 'khor sbyor ba stan la gnas pa zhes pa ste/ mdor na yi ge a dang ba la sogs pa'i so so'i dkyil 'khor du yi ge ha bsams te/ sbyor ba byas na a la sogs pa'i las rnams byed par 'gyur ro zhes pa'o/ /yid kyang yongs su spyod bar du/ /bzlas na yid ni dga' bar 'gyur//zhes pa yid ni ji bzhin pa dang bcas pa'i sems te/ snying gar me long gi dkyil 'khor bsams la/ de'i dbus na yi ge ha me long gi dri phyi ba bzhin du bsams te/ bzlas na pha rol sems shes par 'gyur ro/ /lus ni yang bar bsgoms nas su//'gro zhing 'chag tshe bzlas na ni/ /'phrul gyi rkang pa thob par 'gyur/ /zhes pa ni sems la bdag gi lus yang ba shing bal lta bu'am/ nam mkha' la 'phur du cha snyam du sems shing 'chag pa'i tshe/ yi ge ha bzlas na rdzu 'phrul gyi rkang pa thob cing nam mkha' la 'gro bar 'gyur ro zhes pa'o//a ni tsog pur rab tu yang / /rna bar bzhag nas bzlas bya ba/ /zla ba gcig tu tshang bar te/ /'phrul gyi rna bar 'gyur zhes pa ni sngags pa tsog pur byas te/ yi ge rna bar bzhag la zla ba gcig tu bzlas na/ 'phrul gyi rna ba thob par 'gyur/ /zhes pa'o/ /gsang ba'i de lta bu la sogs pa sgrub pa'i tshig las byung ba'o zhes pa ni gong du smos pa'i sgrub pa de rnams phyi rol dang nang la mi rtog par gyur pas bsgoms pa yid la byung zhes pa'o//gsang ba'i bdag po gzugs med pas sems med pa'i dngos po rnams zhes pa nas/ de bas kun mkhyen 'grub pa yang //gnas mchog kyang ni bsgrub par bya'o/ /zhes pa'i bar du spyir sngags kyi grub pa rnams sems kyis bsams pa dang / tshig tu brjod pa dang / de bzhin gshegs pa'i byin rlabs las byung bar bstan pa ste/ gzugs med pa'i ngo bo rnams las zhes pa ni/ sems dang sems las byung ba'i ngo bo gzugs med pa rnams las/rnam pa tha dad pa rnams las mngon par 'du byas pa rnams sems kyi bsam pa las 'byung ngo zhes pa dang 'brel te/ mdor na phyi rol gyi dngos po rnams las zhes pa ni/ sems kyi bsam pa tsam las grub pa rnam pa mang po sna tshogs pa gzugs dang ldan pa rnams/sems las byung ba'i gzugs med pa 'byung bar 'gyur ro zhes pa'o/ /ngag rnam par bskyod pa tsam gyis las thams cad dang / sa bon bya ba 'byung zhes pa ni ha la sogs pa'i yi ge rnams kyi sgra brjod pa tsam las ha la sogs pa'i yig 'bru dbang chen la sogs pa'i sa bon gyi dkyil 'khor gyi sa bon du 'gyur ba yang /rab dang 'bring la sogs pa'i grub pa dang zhi ba la sogs pa'i las rnams byed par 'gyur ba 'byung ngo zhes pa'o/ /las thams cad spyad pa spyod pa'i byang chub sems dpa' rnams kyi mdun na zhes pa nas/ de bzhin gshegs pa gzugs brnyan lta bur bzhugs so zhes pa'i bar du de bzhin gshegs pa thams cad du byin gyis brlabs par bshad pa ste/ de bzhin gshegs pa de byin gyis brlab pa yang smon lam gyi shugs kyis gdul ba'i 'gro ba rnams ji ltar dad pa'i so so'i rjes su mthun pa thams cad kyi re ba yongs su rdzogs par 'gyur ba sems can re re'i mdun na gzugs brnyan lta bur bzhugs pa ni/zla ba gnam la 'dug kyang gzugs brnyan mtsho dang rdzing bu dang snod kyi chu la sogs pa thams cad du snang bar gyur pa dang 'dra ste/ de lta bur sems kyis tshig brjod pa tsam dang /de bzhin gshegs pa'i byin gyi rlabs las grub pa rnam pa mang po sna tshogs pa rnams 'byung ba la ltos zhes pa'o/ /de bzhin gshegs pa de ni rnam par rtog pa yang med ces pa nas/ chos dang chos ma yin pa las rnam par dul zhes pa'i bar ni/ de bzhin gshegs pa de ltar sems can thams cad kyi mdun na gnas kyang rnam par rtog pa la sogs pa'i dngos po 'di rnams dang bral zhes pa ste/de la rnam par rtog pa yang med ces pa de ni de bzhin gshegs pa de ngas sems can 'di rnams kyi don bya'o snyam pa'i rnam par rtog pa de la mi 'dzin zhes pa'o//yid kyi yul las 'das zhes pa ni/ yid ni ji bzhin pa dang bcas pa'i sems te de las 'das zhes pa'o/ /bya ba dang las dang zhes pa ni lus dang ngag dang yid gsum gyi sgo nas spyod pa'i bya ba dang las rnams dang bral lo zhes pa'o/ /chos dang chos ma yin pa las rnam par bral ba zhes pa ni/chos ni dge ba bcu'i las kyi lam/ chos ma yin pa ni mi dge ba bcu'i las kyi lam ste/ de dag ni dngos po rnams dang bral lo zhes pa'o/ /kun mkhyen gnas su thob byed pa/ /sngags spyad las ni 'byung ba ste/ /zhes pa ni de ltar dngos po de rnams dang yang lnga mngon par shes pa la sogs pa'i dngos po rnams sngags kyi spyod pa'i sgo nas thob par byed do zhes pa'o//de bas kun mkhyen sgrub pa dang / /gnas mchog kyang ni bsgrub par bya'o/ /zhes pa ni de lta bas na lnga mngon par shes pa dang / sangs rgyas bcom ldan 'das kyis shes nas mchog kyang bsgrub par bya'o zhes pa'o//de nas dpal ldan rdo rje 'dzin/ /zhes pa nas/ yid ni de ltar shes par bya/ /sngags pa sngags rgyud la gnas so/ /zhes pa'i bar du snga phyi dang nang gi bslab pa'i yan lag bzhi dang dpa' bo chen po snying po lnga'i bzlas pa yan lag gsum sngar bshad pa rnams de bzhin gshegs pa'i snying ga nas zla ba'i dkyil 'khor la bzlas par bya ba'i sngags dgod pa dang /dbang chen la sogs pa'i dkyil 'khor rnams la bzlas par bya ba'i sngags rnams dgod de/ bzlas par bya'o zhes mdo tsam du gsungs te/zla ba'i dkyil 'khor dang bzlas pa'i sngags rnams zlos pa nyid kyi tshe na/ gsal bar snang bar bsam pa'i thabs zhib tu ma gsungs te/ de dag gsal bar snang ba'i yongs su sbyang ba'i sgo nas bshad pa dang / nang gi bzlas pa'i yan lag bzhi'i sbyor ba la/bdag gi snying gar de bzhin gshegs pa'i sku me long gi dkyil 'khor gyi nang na bzhugs par bsam pa yang mdo tsam gsungs te/ gsal ba nyid du ma bshad pas de yang sngags zlos pa'i tshe na sems kyi gsal bar snang bar bya bar bshad pa ste/ de la/ de nas dpal ldan rdo rje 'dzin/ /mig mi 'dzums par ngo mtshar te/ /zhes pa ni gong du dbang chen po'i snying po rnams bshad pa thos shing chud na ngo mtshar du 'gyur ba'o/ /de ni rdo rje spor ba ni/ /'od zer kun du 'bar ba bzhin/ /'di kun snang bar gyur pa yang / /sangs rgyas zhing rnams khyab par ro//zhes pa ni de ltar ngo mtshar du gyur te/ dga' ba'i shugs kyis rdo rje spor ba ste/ rdo rje'i 'od 'phro 'bar ba dang 'dra bas sangs rgyas kyi zhing thams cad khyab ste snang bar gyur pa'o/ /gnyis su de ltar rdo rje sbor ba yang ma 'ongs pa'i 'gro ba rnams sngags spyod pa la dad pa bskyed pa ste/sngags kyi phyag rgya rdo rje spor bas sangs rgyas kyi zhing thams cad 'od kyis khyab pa mthong na dad pa skye ba'i phyir ro/ /sngags pa rnams kyi gnas gsungs pa/ /gnas de yang ni ma rnyed na/ /sngags de rnams ni gang nas dong / /gtso bo de rnams gang nas lhags//zhes pa ni sngar bzlas pa'i yan lag bzhi la sogs pa gsungs pa ni/ zla ba'i dkyil 'khor la sngags gnas par bya ba bshad pa rnams zlos pa nyid kyi tshe na/ bdag gi snying ga nas de bzhin gshegs pa'i snying gar 'dod pa dang / de bzhin gshegs pa'i snying gnas dbugs slar sdud par bsam zhing /bdag gi snying gar dmigs pa na gang nas lhags pa'i gnas gsal bar bdag gis ma dmigs na/ de gnas de dag dmigs par bgyi ba bshad du gsol zhes pa'o/ /tshig mchog khyod kyis mi mkhyen med/ /chos rnams kun gyi gnas khyod do//chu rnams kyi ni rgya mtsho bzhin/ /zhes pa ni bcom ldan 'das la bstod pa'i tshig ste/ /chos rnams kun gyi gnas khyod do/ /zhes pa ni lugs kyi chos dang chud pa'i chos kyi gnas zhes pa'o/ /chu rnams kyi ni rgya mtsho bzhin/ /zhes pa ni de'i dpe ste chu rnams thams cad kyi gnas kyang rgya mtsho yin pa dang 'dra'o zhes pa'o//sems dpa' chen po yid gnas par/ /dkyil 'khor rnams ni bshad pa ste/ gong du phyag na rdo rjes gsol ba'i don te/ sngags rnams kyi gnas dkyil 'khor rnams gsungs pa ni yid yin par bshad de/ yid ces pa ni ji bzhin pa dang bcas pa'i sems te/nam bdag gi sems zla ba'i dkyil 'khor la sogs pa'i ji bzhin par snang bar gyur pa de nyid gnas zhes bshad do zhes pa ste/ mdor na sngags zlos par byed pa'i tshe/ rab tu goms pa'i mthus bdag gi sems nyid zla ba'i dkyil 'khor la sogs pa ji bzhin par gsal bar snang bar bya'o//de bas na gsungs pa sngags rnams kyi gnas snying du shes na 'bras bu thob ces pa ste/ bdag nyid sems nyid sngags rnams kyi gnas su shes na/ ting nge 'dzin khugs shing sems sbyong ba'i mtshan ma bas te/des na ji ltar bsam pa'i grub pa la sogs pa 'thob par 'gyur zhes pa'o/ /yid kyis bsams pa de yang ni/ /dkar po ser po dmar po ste/ /de la bye brag 'byed pa yang / /sems kyis kyang ni bya ba yin/ /zhes pa ni/ sems dpa' chen po yid gnas pa ni/dkyil 'khor rnams ni bshad pa ste/ /zhes pa'i 'brel pa'i tshig ste/ yid ji ltar gnas yin pa dang / dkyil 'khor yang gang rnams yin pa bstan pa ste/ dbang chen dang chu'i dkyil 'khor dkar po dang ser po dang dmar po la sogs pa rnams yid kyis bsams pa ste/de rnams bye brag tu 'byed cing yongs su chad par byed pa ni sems nyid de/ sems kyi dkyil 'khor de rnams gang yang rung ba cig bsams nas/ goms pa'i mthus dkyil 'khor ji bzhin pa nyid du bdag gi sems gyur na/ de sems de gnas shes bya zhes pa'o/ / sems de nges par mgu ba na/ /de yi snying du bshad pa yin/ /zhes pa ni sngags rnams kyi gnas snying du shes na 'bras bu thob par 'gyur ro zhes gong du bshad pa'i 'brel pa ste/ bdag gi sems dkyil 'khor ji bzhin par zhen par 'gyur te/ de las mi 'gyur zhing rtse gcig par gyur na/de na sems nges par mgu ba yin te/ de lta bu'i tshul du sems mgu bar gyur pa de ni sngags rnams kyi gnas snying du shes pa zhes bya'o/ /gnas der gnas pa'i sngags rnams kyis/ /'bras bu yang ni rgya cher sbyin/ /zhes pa de ltar rang gi sems nyid zla ba'i dkyil 'khor la sogs pa ji bzhin par 'gyur te/sngags rnams kyang der gnas par snang zhing / sems tsam na sngags de rnams 'bras bu rgya cher ster te zhes pa'o/ /de ru bsam pa pad+mo ste/ /'dab ma brgyad pa ge sar bcas/ /zhes pa nas/ sngags pa sngags rgyud gnas pa'o/ / zhes pa'i bar du nang gi yan lag bzhis bzlas pa sngar bshad pa ni/ bdag gi lus lhar bsgyur ba'i snying ga na/ de bzhin gshegs pa'i sku me long gi dkyil 'khor gyi nang na gnas par bsam pa de nyid zhib tu bshad pa ste/ de ru bsam pa pad+mo ste/ /'dab ma brgyad pa'i ge sar bcas//de yi steng du a de gnas/ /zhes pa ni rang gi sems zla ba'i dkyil 'khor ji bzhin par gyur pa ste/ pad+mo dang a bsam mo zhes pa'i a de las bcom ldan 'das rnam par snang mdzad kyi skur bsam pa ni/ 'bar ba'i phreng ba bzang pos 'khor/ /kun du yang ni g.yo bzhin ba//zhes pa la sogs pa ste/ kun du g.yo bzhin pa zhes pa ni srog dang bcas par 'dra bar bsam mo zhes pa'o/ /gtso bo rnam mang gzugs kyang 'chang / /zhes pa ni sku mi zad pa'i rgyan la sogs pa rnam pa du mar 'byung ba'i rang bzhin can zhes pa'o/ /me long phug na 'dug bzhin du/ /zhes pa ni sngar bshad zin to//snang ba kun kyang ston pa zhes pa ni/ sems can thams cad kyi mdun na gnas par ston pa zhes pa'o/ /chu dang zla bar 'dra ba ru/ /zhes pa ni/ snang ba kun kyang ston pa ste/ /zhes pa ni dpe ste/ zla ba de chu'i nang na gzugs brnyan 'byung bar byed pa dang 'dra'o/ /yid ni de ltar shes par bya//zhes pa ni sngags pas rang gi yid de de bzhin gshegs pa'i sku de lta bu ji bzhin pa nyid du gyur par shes par bya'o zhes pa'o/ /de ltar de bzhin gshegs pa'i sku'i bye brag bshad pa de rnams kyang sbyor ba bas tshul de ltar bsgom par bya ba bstan pa dang / de bzhin gshegs pa'i sku gsum char la bstod pa yang zhar la bstan pa ste/de yi steng du a de gnas/ /zhes pa ni chos kyi sku'i rang bzhin bstan cing bstod pa'o/ /'bar ba'i phreng ba bzang pos 'khor/ /zhes pa nas/ gtso bo rnam mang gzugs kyang 'chang / /zhes pa'i bar du rdzogs longs spyod pa'i sku'i rang bzhin du bstod pa'o//snang ba kun kyang ston pa ste/ /chu nang zla ba 'dug pa bzhin/ /zhes pa ni sprul pa'i sku'i rang bzhin la bstod pa'o/ /de nas sngags pa ro stod kyi/ /zhes pa nas/ bla med sangs rgyas ye shes so/ /zhes pa'i bar du sbyar ba sbyor ba'i stan sbyar ba las/klad pa'i nang du yi ge a shin tu dkar ba bsams la/ mig gi nang du yi ger bsams te/ /yi ge de'i 'od kyis snying ga nas de bzhin gshegs pa'i sku bsam pa ste/ snang bar bsam pa dang / de rnams bsams nas kyang yi ge ra'i gnas mig gnyis su yi ge la bsams te/ra'i sgra ni de kho na nyid chos thams cad mtshan nyid med par ston pa la dmigs nas/ thams cad stong pa'i rang bzhin du bsams pa dang / a la sogs pa'i yi ge dag bsams pa las grub par 'gyur ba dang / de'i rjes su sngags pa rnams 'chad de/yi ge de rnams de ltar bsams pa dang / sems yongs su sbyang ba dang / de rnams sbyar ba las grub pa thob pa'i phyir te/ de sems yongs su sbyang ba'i rim pa yang thog ma nyid bdag gi lus yi ge a la sogs pa'i sgo nas ma byung ma skyes par stong par bshigs te/de rnams slar yi ge a bsams te/ a de las gong ma'i rim bzhin du phyi nang gi dbang gi rdo rje dkyil 'khor dang bcas pa'i lha'i gzugs su bdag gi lus bsgyur te/ nang gi dkyil 'khor gyi dbus na bcom ldan 'das rnam par snang mdzad gong du smos pa'i tshul bzhin du bsams te/de nas klad pa'i nang du yi ge a shin tu dkar ba bsams la mig gnyis su bsams te/ ra de yang chos kyi dbyings kyi yi ge shin tu dkar ba ste/ de'i 'od kyis slar snying ga na/ bcom ldan 'das kyi sku me long nang na bzhugs pa bzhin gsal bar snang bar bya'o/ / de nas de'i 'od kyis slar yang bsams na yi ge a de shin tu gsal bar snang bar byas te/ de ltar gsal bar brtan par gyur pa yang yi ge ra'i gnas mig gnyis su yi ge klad kor dang bcas par bsams la/ de'i sgra kho na nyid chos thams cad mtshan nyid dang bral ba la dmigs pas/ yi ge a la sogs pa ltar bsams pa thams cad stong par bsam mo/ /de ltar stong par bsam pa yang brtan par gyur nas/ yang bdag gi sems dbang du gyur par bya ba'i phyir/ snga ma'i rim bzhin du sbyor ba'i gnas dang / bcom ldan 'das kyi sku snying gar bsams pa dang / klad par a bsams pa snga ma'i rim bzhin du bya'o//de bzhin du de yang dang yang du yi ge la bsams nas stong par bya ba dang / slar bcom ldan 'das kyi gzugs dang a la sogs pa bsams pa dang / stong par bya ba dag sems la dbang du bya ba'i phyir lan mang du goms par bya ba ste/ de bas na gsungs pa/de nas sngags pa ro stod kyi/ /thod pa'i rim pa'i dbus su ni/ /klad mtshan 'khor gyis btab bcas pa/ /a zhes bya ba de ltar bsams/ /zhes pa ste de nyid kyi bye brag tu gsungs pa mthong ba rgya che ba dag ste/ shel dang zla ba bzhin du gsal/ /zhi ba chos kyi sku yin te//kun gyi rten zhes bya ba yin/ /zhes pa ste/ bsam pa'i thabs ni gong du bshad pa'i yi ge'i don ni/ mdor na yi ge a shel dang zla ba lta bur dkar ba klad kor dang bcas par bsams te/ de ni chos kyi sku'i rang bzhin du shes par bya'o/ /de bas na/ kun gyi rten zhes bya ba yin//zhes pa ste chos kyi sku ni thams cad kyi rten te/ chos kyi sku'i dbang gis thams cad 'byung ba'i phyir ro/ /yang gnyis su a de thams cad kyi snying po yin pas kun gyi rten bya'o/ /de la sngags kyis bsgrub pa ni/ /rnam pa mang po'i gzugs kyang thob/ /mtho ris mya ngan 'da' ba'ang thob//de bzhin gshegs nas mthong ba'o/ /zhes pa ni de ltar sems yongs su sbyangs nas/ a de klad pa'i nang du bsams te/ rig 'dzin la sogs pa'i grub pa thob par 'gyur zhes pa'o/ /rnam par snang mdzad mngon par byang chub pa'i lus dang ngag dang yid kyi dkyil 'khor gsum byin gyis brlabs pa las lus kyi 'khor lo byin gyis brlabs pa ni snying rje chen po'i dkyil 'khor de bshad lags/ngag gi 'khor los byin gyis brlabs pa yi ge 'khor lo'i skor 'dir bshad par bya ste/ lus dang ngag dang yid gsum ka'i 'khor lo 'dir 'dus mod kyi/ngag gi 'khor lo gtso bo bas ngag gi 'khor lor byin gyis brlabs pa ste/ gzhan yang med pa ma yin no/ /de la dkyil 'khor dang po bri bar brtsams pa'i tshe/ dkyil 'khor gyi slob dpon rang gi ting nge 'dzin rnam par bshad pa gang yang rung ba la dmigs te/bdag dang 'khor thams cad bsrung ba'i phyir/ rig pa 'di lan gsum mam bdun nam nyi shu rtsa gcig bzlas par byas te/ rig pa de bcom ldan 'das kyis rig pa de'i don rnam par grol ba'i ting nge 'dzin dmigs nas sngags bshad par mdzad pa ni/ de nas bcom ldan 'das zhes pa nas rig pa'i rgyal mo 'byung ngo zhes pa'i bar du gsungs pa'o//de nas bcom ldan 'das rnam par snang mdzad kyis thams cad srung ba'i 'khor la gzigs nas zhes pa de la thams cad srung ba zhes pa ni/ 'khor byang chub sems dpa' phyag na rdo rje de sems can thams cad la srung zhing skyob pa'i phyir ro//yang na gcig tu na thams cad dang ldan pa ni 'khor de dag nyid thams cad nyid dang ldan pa zhes pa'i don to/ /gzigs pa rnam pa gnyis kyi phyir 'khor la gzigs pa chos nyid kyis de bzhin te/ 'khor sems can 'dus par bskul ba dang snod du gyur tam ma gyur brtag pa ste/'di'i skabs su 'khor de dag la mi dgos pa phyi ma la bstan pa'o/ /byams pa chen po dang snying rje chen po'i spyan gyis sems can thams cad kyi khams la gzigs zhes pa ni bcom ldan 'das kyis mi gnas pa'i mya ngan las 'das pa nyid ni rtag tu rtog pa thams cad dang bral bas gzigs shing rtog pa yang mi 'byung mod kyi//sngon gyi smon lam gyi shugs thugs rje chen po'i yum dang / byams pa chen po'i dbang gis na/sems can thams cad kyi khams la gzigs pa ni/ ma grol ba dgrol ba dang ma smin pa smin par bya ba'i phyir rig pa bshad par dgongs so//mi 'chi ba zhes pa'i ting nge 'dzin la mnyam par bzhugs zhes pa ni/ de la mi 'chi ba ni 'chi bar 'gyur ba med pa'i phyir te/ de ni chos kyi sku stong pa nyid do/ /de la dmigs te ting nge 'dzin 'byung bas na/ mi 'chi ba las 'byung zhes bya'o//yang na mi 'chi ba de nyid ting nge 'dzin 'di las 'byung bas na/ mi 'chi ba las 'byung ba ste/ byang chub pa las chos kyi sku'i ye shes 'byung ba zhes pa'i don te/ ting nge 'dzin de las mnyam par bzhugs nas rig pa gsungs so/ /bcom ldan 'das kyis yan lag thams cad nas dus gsum du ma chags pa'i rgyal mo 'byung zhes pa de la bcom ldan 'das kyis yan lag thams cad ces pa ni rdzogs longs spyod pa'i sku dang sprul pa'i sku dang /snying po byang chub pa'i sku'i yan lag thams cad nas byung ba ste/ stong pa nyid rnam par mi rtog pa'i ting nge 'dzin la gnas pas zhal nas tshig tu 'byung ba'i mi rigs shes nas yan lag nas byung zhes pa'o//de la dus gsum la ma chags pa'i stobs zhes pa ni snga ma 'das pa dang ma 'ongs pa dang da ltar gyi dus la stong pa nyid chos kyis dbyings kyis de la dmigs pa'i skye ba mthu dang ldan pa ni don dam pa'o//rig pa 'di'i mthus bdud rgol ba thams cad kyis bgegs byed par mi tshugs pa ni kun rdzob tu'o/ /rig pa zhes pa ni shes pa'i don te/ 'di'i skabs su byang chub pa'i shes rab nyid la bya'o/ /rgyal mo zhes pa ni shes rab thams cad kyi nang na byang chub pa'i mchog pas na rgyal mo zhes bya ste/de bas na rig pa 'di yang byang chub nyid kyi ye shes kyi rang bzhin byin gyis brlabs pa'o/ /rig pa de'i rang bzhin gzugs bstan par gsungs pa/ rigs kyi bu rig pa 'di ni de bzhin gshegs pa'i sku dang mi gnyis pa'i spyod yul zhes so/ /de la ni de bzhin gshegs pa'i sku zhes pa ni chos kyi sku de dang /rig pa 'di dang gnyis spyod yul gnyis su med pa ni de bzhin nyid la dmigs pa 'dra ba'i phyir ro/ rig pa 'di'i mthu chen po bstan pa'i phyir/ gsungs pa 'dis byin gyis brlabs zhes pa nas sdug bsngal 'gags zhes pa'i bar du ste/rig pa 'dis sangs rgyas dang byang chub sems dpa' thams cad byin gyis brlabs pa na/ sangs rgyas dang byang chub sems dpa' de dag gis mi gnas pa'i mya ngan las 'das pa'i chos thogs pa med pa gang sdug bsngal 'gags pa thob pa zhes pa'i don te/ /de la sangs rgyas dang zhes pa ni bla na med par sangs rgyas pa la mi bya ste/byang chub sems dpa' sa bcur phyin pa dbang bcu thob pa'i sangs rgyas de la bya'o/ /byang chub sems dpa' ni de las gzhan pa 'phags pa'i sa la gnas pa rnams la bya'o/ /ma chags pa'i chos zhes pa ni mi gnas pa'i mya ngan las 'das pa'i rang bzhin te/nyon mongs pa dang shes bya'i sgrib pa med pas na ma chags pa'o zhes bya'o/ /yang ci 'dra zhe na/ gang na sdug bsngal gyi rnam pa 'gags zhes pa ste/ phung po'i sdug bsngal rnams mya ngan las 'das zhes pa'i chos de la med ces pa'i don to//de nas bcom ldan 'das kyis yi ge dkyil 'khor gyi spyod pa'i 'khor rnams la bshad par bya'o zhes bka' stsal pa/ de nas bcom ldan 'das rnam par snang mdzad ces pa nas/ sangs rgyas kyi byed pa la 'jug par gnas zhes pa'i bar du'o/ / de la de bzhin gshegs pa thams cad la rjes su dgongs zhes pa ni phyi ma'i sems can dang ma 'ongs pa'i sems can rnams ci rtsom na yang / dang por de bzhin gshegs pa rjes su dran par gyis shig ces lung bstan pa'o/ /bdag nyid dang phyag na rdo rje thog ma nas ma skyes par byin gyis brlabs zhes pa ni/dkyil 'khor gyi rnam pa bstan pa ni/ 'chad pa dang nyan pa gnyis ting nge 'dzin la mnyam par bzhugs nas bshad cing nyan pa'i tshul te/ de bas na bcom ldan 'das 'chad pa nyid dang / phyag na rdo rje nyan pa gnyis ma skyes pa'i chos stong pa nyid kyi ting nge 'dzin la mnyam par bzhugs pa bstan to//de yang ting nge 'dzin la ma zhugs pa ni/ spyod yul ma yin pa'i phyir ro/ /de bas dkyil 'khor gyi slob dpon gyis kyang / dkyil 'khor dang por rtsom pa'i tshe/ bdag nyid kyang byin gyis brlabs/ grogs byed pa'i rdo rje mchog sbyin gyis byin gyis rlabs shig ces pa de bas rang ngam slob dpon gyis stong pa nyid du byin gyis brlab po//yi ge'i 'khor lo bskor ba zhes bya ba'i dkyil 'khor la spyod pa'i le'u rgyas par zhes pa de la yi ge 'khor lo bskor ba zhes pa ni/ gcig tu ni 'khor lo bzhin du yi ges bskor ba ste/ yi ge a dbus su bzhag la ka la sogs pas mtha' bskor ba'i phyir ro//gnyis su ni 'khor lo'i dkyil 'khor du yi ger bsgyur bas na yi ge'i 'khor lo bskor ba ste/ dkyil 'khor der gzugs yi ge'i 'brur bsgyur te bkod pa'i phyir ro/ /spyod pa zhes pa ni dkyil 'khor gyi las su bya ba rnams so//le'u zhes pa ni de nyid kyi gzhung gi le'u'o/ /rgyas pa zhes pa ni dkyil 'khor der slob ma'i sems rgyud la bsod nams kyi tshogs shin tu 'phel ba'o/ /dkyil 'khor de yang ji lta bu zhe na/ rang bzhin bstan par gsungs pa sngags kyi sgo nas byang chub sems dpa'i spyad pa spyod pa rnams kyis sangs rgyas kyi bya ba la zhugs zhes pa'i don to//de las sangs rgyas kyi bya ba ni tshe 'di dang pha rol du mngon par 'char ba dang / bde ba ma lus pa'i 'bras bu thob par mdzad pa'o/ /de bzhin du sngags spyod pa rnams la dkyil 'khor 'di'i tshul gyis tshe 'di dang pha rol du 'jig rten dang 'jig rten las 'das pa'i 'bras bu thob par byed pas na/sangs rgyas kyi bya ba la zhugs pas ni dkyil 'khor 'di lta ste/ de bshad kyis nyon cig ces pa'i don to/ bcom ldan 'das kyis yi ges 'khor lo bskor ba'i dkyil 'khor gyi spyod pa bshad par gnang nas/ phyag na rdo rje des shin tu mgu nas bcom ldan 'das la yon tan gyi sgo nas bstod pa yang gcig tu na dkyil 'khor 'di'i nang nas bcom ldan 'das rgyu dang 'bras bu'i yon tan 'byung ba rnams kyi sgo nas bstod pa'i phyir gsungs pa'o//de nas phyag na rdo rjes bcom ldan 'das la 'dis mngon par bstod do zhes pa'i bar du'o//de la bcom ldan 'das la gus pa bskyed pa'i phyir phyag 'tshal te/ rdo rje'i tshul du bab ces pa ste/ rdo rje'i tshul du babs pa ni g.yeng zhing 'grogs pa med par brtan por babs pa'o/ /bcom ldan 'das zhes pa ni yon tan rnam lnga'i sgo nas bstod de/ byang chub sems kyi sgo nas bstod pa dang / rgyu dang 'bras bu'i spyod pa'i sgo nas bstod pa dang / de bzhin gshegs pa'i de ma thag pa'i lam gyi sgo nas bstod pa dang / kun du sangs rgyas pa'i yon tan dang mya ngan las 'das pa'i yon tan gyi sgo nas bstod pa ste/ yon tan gyi go rims kyang 'di ltar rigs na/tshigs bcad la mi bde ba'i phyir ltag 'og 'brel par gsungs so/ /de la phyag 'tshal byang chub sems khyod la/ /zhes pa ni byang chub sems dpa' ni byang chub sems dpa' sa dang po yan chad la bya mod kyi/ 'di'i skabs su sa dang po la sogs pa rnams dang pha rol tu phyin pa'i sgo nas bstod zin pas na de la mi bya'i 'dir rtsol ba'i byang chub mos pa spyod pa'i sa la bya ste/yang de bzhin gshegs pa'i rgyu yin pas na rgyu de las de bzhin gshegs pa'i 'bras bu'i ming btags te/ byang chub kyi sems 'byung ba khyod la phyag 'tshal lo zhes so//byang chub kyi sems 'byung ba khyod la phyag kyang 'tshal zhes pa ni/ de bzhin gshegs pa'i de ma thag lam gyi yon tan gyi sgo nas bstod pa ste/ byang chub sems dpa'i sa bcu las 'das pas na/ snying po byang chub ma thob kyi bar du de ma thag pa'i lam ste/ de la byang chub 'byung bas na/byang chub 'byung ba zhes bya'o/ /spyod pa'i gzugs zhes pa ni rgyu'i spyod pa dang 'bras bu'i spyod pa rnam pa gnyis te/ 'bras bu'i spyod pa ni lus dang ngag yid gsum gyi 'khor lo spyod pas 'jig rten gsum du khyab par ston pa'o/ /rgyu'i spyod pa'i gzugs ni sa dang pha rol tu phyin pa rnams so//thog mar mdzad pa la sogs pa la phyag 'tshal zhes pa ni/ kun du sangs rgyas pa'i yon tan gyi sgo nas bstod pa ste/ chos rnams dang po nas ji lta ba bzhin du gzung ba dang 'dzin pa las bral ba stong pa nyid pas na de la phyag 'tshal lo zhes pa'o/ / stong nyid la 'dug phyag 'tshal te/ /zhes pa ni mya ngan las 'das pa'i rang bzhin gyi sgo nas bstod pa ste/ chos thams cad ma byung ma skyes pa'i ngo bo nyid mi gnas pa'i mya ngan las 'das pa la phyag 'tshal lo zhes pa'o/ /de nas phyag na rdo rjes dkyil 'khor de bshad par gsol zhes pa'i phyir smras pa/bcom ldan 'das la 'di skad ces gsol to zhes pa nas bshad du gsol zhes pa'i bar du gsungs pa ste/ de la bdag gis rig nas zhes pa ni dkyil 'khor gyi tshul bcom ldan 'das kyis bshad de zhes pa'i don to/ /de la phyag na rdo rje thob pa'i chos dang ldan pa yin pas na/bcom ldan 'das des lugs kyi chos bshad pa de thos nas sems can gyi don bya ba dang sngags tshul rdzogs par bya'o zhes pa de ni mi rigs so zhes so/ /de ci'i phyir zhe na/ thob pa'i chos nyid la gnas pas lugs kyi chos mnyan te/ sems can gyi don bya ba la sogs pa mi rigs so//de ni de ltar ma yin te/ gcig tu na bcom ldan 'das kyis chos bshad pa gces shing btsun par bstod pa'i phyir te/ bcom ldan 'das kyis chos de bshad pas na/ phyag na rdo rje lta bu thob pa dang ldan pas kyang thos nas yon tan gyi bye brag thob par 'gyur na gzhan lta ci smos zhes 'jig rten gyis shes par bya ba'i phyir ro//yang gcig tu na phyag na rdo rje thob pa'i chos dang ldan mod kyi/ lugs kyi chos rnams kyang bcom ldan 'das las mnyan te/ sems can gyi don mdzad par gyur na yang nyes pa med do/ /de nas bcom ldan 'das mi gnas pa'i mya ngan las 'das pas na/rnam par mi rtog pa la zhugs pa las chos gsungs pa'i tshig de 'byung ba mi rigs te/ yang na ni rnam par mi rtog pa'i tshig nyams par 'gyur ro zhes pa de 'dra ba'i klan kar mi 'gyur ba'i phyir/ bcom ldan 'das kyis rdzogs longs spyod pa dang sprul pa'i skus chos kyang bshad la/rnam par mi rtog pa'i ting nge 'dzin las kyang nyams pa med par bstan pa'i phyir gsungs pa de ni dang po'o/ /'jig rten gyis zhes pa nas las kyi rnam par smin pa zhes pa'i bar du'o/ /de la dang po'i 'jig rten pa chos bstan pas ni mi rtog pa'i tshul las chos bshad pa mi 'byung ba ma yin par bstan te/de la thog ma'i 'jig rten pa dang zhes pa ni rnam pa gnyis te dag pa dang ma dag pa'o/ /de la dag pa ni byang chub sems dpa'i sa dang po can rnams te/ de rnams sngar byung nas phyis mngon par chos bshad pa mi 'byung ba ma yin par bstan pa ste/de la thog ma'i 'jig rten sangs rgyas pa'i phyir na/ de rnams snga ma'i 'jig rten pa/ /zhes pa'o/ /de ma thag pa'i dngos po 'jig rten pa ni bskal pa chen pos bshig pa'i 'og tu dang po 'jig rten byung ba'i tshe tshangs pa dang /brgya byin la sogs pa dang / dang po nyid du 'byung bas na dang po 'jig rten pa zhes bya ste/ de dag la bcom ldan 'das kyis chos rnam pa gsum du bshad pas na/ de dag gis bcom ldan 'das la 'jig rten gyi mgon po zhes bsgrags so//de la chos rnam pa gsum bshad pa de yang gang zhe na/ mtshungs pa med pa'i chos dang thog ma nas zhi ba dang bla na med pa'i chos so/ /de rnams kyang 'jug pa dang sbyor ba dang 'bras bu'i bye brag tu blta ste/ de la mtshungs pa med ces pa ni bla na med par 'jug pa'i chos te/ gang mtshan ma la gnas she na/ bka' stsal pa dge ba bcu dang sbyin pa la sogs pa'i dge ba'i chos rnams so/ /de yang 'jig rten pa phyi rol mu stegs kyi chos dang mi mtshungs pas na mtshungs pa med pa'i phyar ro/ /thog ma nas zhi zhes pa ni sangs rgyas par spyod pa'i rim pa ste/chos thams cad rgyu rkyen gyis bskyed pa'i phyir na thog ma nas zhi ba'o zhes par bstan pa'o/ /de la bla na med pa zhes pa ni 'jug pa dang sbyor ba'i 'bras bu ste/ mi gnas pa'i mya ngan las 'das pa'i sa bstan pa'o/ /de ltar chos bstan cing 'chad mod kyi rnam par mi rtog pa las nyams pa med par bstan pa'i phyir gsungs pa de ltar byin gyis brlabs zhes pa la sogs pa'o//de la de ltar byin gyis brlabs zhes pa ni/ byang chub sems dpa' kun du bzang po bsam pa yongs su dag pa la sogs pa ji ltar bcom ldan 'das kyis byin gyi rlabs kyis 'od la sogs pas bskul ba de lta bus byin gyis brlabs nas snying po byang chub na bzhugs pa'i sku mthong bar bstan to//de dag gi snying po byang chub kyi sku mthong ba de ci lta bur mthong zhe na/ nam mkha' lta bur spros pa med pa la sogs pa'o/ /nam mkha' gzhan zhes pa ni rang bzhin gyis 'od dang dri ma med pa stong pa nyid kyi rang bzhin no//spros pa med pa zhes pa na ning gi yid kyi rnam par shes pa'i rnam par rtog pa thams cad spangs zhes pa'i don to/ /spyod pa dang mi gnyis par sbyor ba zhes pa ni lus dang ngag dang yid gsum gyis 'khor lo spyod pa dang / snying po byang chub kyi sku mi gnyis par sbyor ba ste/ de nyid rang bzhin dbyer med pa'i phyir ro/ /las kyi rnam par smin pa lta bu zhes pa ni/ las kyi rnam par smin pa dang 'dra zhes pa rnam par smin pa nyid ma yin gyi/ de dang 'dra ba bstan pa'o/ /de ci'i phyir zhe na/ sems dad pa'i sems can ni las kyi rnam par smin pa la brten te/de nyid zad par 'gyur gyis/ bcom ldan 'das ni bsod nams dang ye shes kyi tshogs chen po rgyu mthun pa'i 'bras bu ste/ de zad par mi 'gyur ba ste/ snying po byang chub kyi sku ste bsod nams dang ye shes kyi tshogs chen po'i rgyu mthun pa'i 'bras bu bas na rnam par smin pa lta bu zhes bya'o//yi ge 'khor lo bskor ba'i dkyil 'khor gyi bdag por yi ge a bzhag pa ste/ a de'i yon tan dang brjod pa dang bcas par gsungs pa/ de bzhin gshegs pa'i sku thams cad ces pa ni/ de bzhin gshegs pa'i snying po 'di la nan tan du bya'o zhes pa'i bar du ste/de la de bzhin gshegs pa thams cad kyi yan lag thams cad nas zhes pa ni yi ge a ste/ de bzhin gshegs pa'i lus kyi 'khor lo sku thams cad nas byung ba zhes pa'i don to/ /'jig rten dang 'jig rten las 'das pas zhes pa de dag ni/yi ge a'i mthu chen po bstan pa ste/ de 'jig rten pa zhes pa ni mu stegs kyi drang srong la sogs pa dang / phyogs gcig stong par lta ba rnams so/ /'jig rten las 'das pa'i zhes byang chub sems dpa' rnams la bya ste/ nyan thos dag ni 'og nas 'byung bas na 'dir ni ma gtogs so//nyan thos dang rang sangs rgyas dag kyang rang gi rnam par grol ba phyogs gcig gi sgo stong pa la gnas pa ste/ de rnams kyang sngags bsgrub pa'i 'jug pa dang / bsam gtan gyi sgor 'jug pa rnam pa gnyis te/ de gnyis ka'i yang srog dang 'dra ba ste/de ci'i phyir zhe na/ de dag thams cad kyang don dam pa yang la la ni ma nor la/ yongs su rdzogs pa'i stong pa la la ni phyogs mtshams stong par lta ba ste/ spyir thams cad stong pa'i don la brten pas na/ yi ge a'i don ma skyes pa'i chos nyid de dag thams cad kyi srog lta bu'o//kun rdzob tu gang yang yig 'bru la brten pa'o/ /chos thams cad a las gyur pas na srog lta bu'o/ /de la bsam gtan zhes pa ni sbyor ba ste sems pa'o/ /bsam gtan byas zhes pa ni gang bsam pa de'i 'bras bu ste/ de ni bsam gtan gyi sgo nas 'jug pa'o/ / sgo sgrub pa ni rab dang 'bring dang tha ma la sogs pa ste/ de la bsgrub pa'i phyir 'jug pa ste/ de ni sngags bsgrub pa'i sgor zhugs pa'o/ /yig 'bru rnams kyang kun rdzob dang don dam pa'i sgo nas srog la sogs par 'gyur ba ste/ de la/ yi ge rnams kyi tsher 'gyur ba/ /zhes pa ni/ byang chub kyi sgo nas yi ge de rnams la brten pa'i phyir tsher gyur te/a zhes pa'i don ni ma skyes pa'o/ /de bzhin du yi ge ka zhes bya ba'i don dngos po thams cad dang bral ba ste ma skyes pa'i don to/ /de bas na yi ge ka byang chub kyi sa bon gyi tshe yang a la rag lus pa'i phyir srog ces bya'o//de bzhin du yi ge lhag ma rnams kyang shes par bya'o/ /de la yi ge rnams kyi srog ces pa ni spyod pa'i sgo nas yig 'bru rnams de la rtogs pas na/ de bas na srog ces bya'o/ /skyabs su 'gyur zhes pa ni kun du sangs rgyas pa'i sgo nas yi ge rnams kyis brten pas na skyabs so/ / 'byung ngo zhes pa ni mya ngan las 'das pa'i sgo nas yi ge rnams 'byung ba'i don to/ /rigs kyi bu 'di ni de bzhin gshegs pa thams cad kyis byin gyis brlabs zhes pa ni sangs rgyas kyi sku 'khor lo thams cad kyis byin gyis brlabs zhes pa'i don to/ /sngags kyi sgo nas byang chub sems dpa'i spyad pa spyod pa rnams kyis sangs rgyas kyi bya ba zhugs pa zhes pa ni yi ge a de'i mthu chen po bstan pa ste/sangs rgyas 'jig rten du 'byung ba'i tshe/ chos rnam pa gnyis bstan pa ni sangs rgyas kyi bya ba ste/ gnyis pa ni bsam pa dag pa rnams la thob pa'i chos bstan pa dang / bsam pa ma dag pa rnams la lugs kyi chos bstan to//de bzhin du yi ge a yang chos de gnyis ka ston pa'i rgyu yin te/ de bas na sangs rgyas kyi bya ba la zhugs pa yin no/ /ji ltar zhe na/ thob pa'i chos rnams kyang yi ge a de'i don ma skyes pa las byung ba'o/ /lugs kyi chos rnams kyang yig 'bru'i sgo nas bshad do//chos thams cad yi ge a las ma gyur pa med pa'i phyir ro/ /sangs rgyas kyi bya ba byed par ji ltar shes she na/ gsungs pa a zhes bya ba'i sgo nas chos thams cad 'byung zhes so/ ji lta zhe na/ yi ge a zhes bya bas rgyu byas pa na/ thob pa'i chos dang lugs kyi chos thams cad 'byung ba'i phyir ro//de ltar yi ge a zhes bya ba de sangs rgyas kyi bya ba byed cing chos thams cad 'byung ba'i sgo yin pas na/ yi ge a de sngags brjod pa'i byang chub sems dpa' rnams kyis de bzhin gshegs par blta'o zhes pa la sogs pa ste/ /de la de bzhin gshegs pa mthong bar 'dod pas/de bzhin gshegs pa'i snying po la mngon par bsgrub pa zhes bya ba'i yi ge a zhes pa'i don ni snying po byang chub nyid kyi snying po ste/ de bzhin gshegs pa'i rang bzhin las gzhan ma yin pa'i phyir te/ de ni don dam pa'o/ /kun rdzob tu na a zhes bya ba'i yi ge'i 'bru de bsgoms na/de'i mthus de bzhin gshegs pa grangs med pa 'byung ba'i phyir ro/ /de bzhin gshegs pa mchod par 'dod pas kyang yi ge 'di bsgom par bya ste/ mchod pa yang rnam pa gnyis su rig par bya ba ni nan tan gyis mchod pa dang zang zing gi mchod pa'o//de la nan tan gyis mchod pa ni/ yi ge a de nyid kyi don la bsgom par 'gyur ro/ /zang zing gis mchod pa ni yi ge a de bsgom pa'i mthus na/ mchod pa'i sprin rgya chen po nam mkha' gang bar 'gyur ba'i phyir ro/ /byang chub kyi sems mngon du byed 'dod pas zhes pa ni byang chub sems dpa'i sa dang po yan chad kyi sems la bya ste/de mngon par byed 'dod pas yi ge a'i don mngon par bsgrub par byos shig ces pa'i don to/ /de ci'i phyir zhe na/ byang chub kyi sems kyang ma skyes pa'o/ /yi ge a'i don kyang ma skyes pas mtshungs pa'i phyir ro/ / byang chub kyi sems kyang lhan cig tu gnas par 'dod pas zhes pa ni/ de ltar 'dod pa yi ge a'i don la sgoms shig ces pa'i don te/ byang chub sems dpa' rnams kyang ma skyes pa'i don la dmigs/ yi ge a yang ma skyes pa'i don la dmigs pas na/ spyod yul mthun pas lhan cig tu skyes par 'gyur ro//de yan chad ni bsam gtan gyi sgo nas bsgom pa dang / a nyid sngags kyi sgo nas bsgrub pa la zhugs pa gnyis ka thun mong ba'i yon tan no/ /grub pa mngon par 'dod ces pa ni sngags kyi sgo nas zhugs na/ grub pa rab 'bring rnam pa gsum mo/ / de rnams ni yan lag tu smos pa'i tshig ste/ mdor na thams cad mkhyen pa grub par 'dod pas 'di sgoms shig ces gsungs so/ /de nas dkyil 'khor bri ba'i cho ga rnam pa gsum gsungs pa/ de nas bcom ldan 'das kyis snying rje chen po 'byung ba las gyur pa'i dkyil 'khor gyi rgyal po dgod pa dang /lha'i gnas gtan la dbab pa zhes pa ni/ de la snying rje chen po 'byung ba las gyur pa zhes dngos su ni lus kyi 'khor lo'i byin gyis brlabs pa'i dkyil 'khor 'di dang / bdag rang gi dkyil 'khor la yang ming du gdags so/ /de ci'i phyir zhe na/'khor lo rnam pa gsum po yang snying rje chen po 'byung ba las gyur pa'i phyir ro/ /de la bya ba ni dkyil 'khor gyi mthur gyur cing rgyur bya'o/ /lha'i gnas gtan la dbab ces pa ni/ dbung mtha' dang mchog rgyan du lha'i bzhugs pa'i gnas nges par bya ba dang / ting nge 'dzin la mnyam par sprul zhes bya ba ni gang ting nge 'dzin du zhugs nas bsrung ba'i rig pa dang sngags la sogs pa'o//sngags kyi spyod pa zhes pa ni dkyil 'khor du 'jug pa'i tshe las su spyod pa rnams so/ /bsam pa'i cho ga bya ba ni dkyil 'khor du 'jug pa na/ slob mas byang chub kyi sems su bsam pa dang /slob dpon rang gi ting nge 'dzin du gnas pa la sogs pa'i bye brag gsungs pa'o/ /de la re re zhing bshad pa ni 'di man chad nas 'byung ngo / /de la dkyil 'khor gyi rgyal por rnam par bkod ces pa ni/ don bshad pa'i gsungs pa de la slob dpon gyis thams cad mkhyen pa'i sgo a zhes pa la gnas te zhes pa nas de bzhin gshegs pa'i rang bzhin stong pa nyid kyi rang gi gzugs zhes pa'i bar du'o//de dkyil 'khor gyi thig bri ba'i tshe/ dkyil 'khor gyi snam bu re re zhing yang / slob dpon gyis ting nge 'dzin re res gsungs te/ phyi rol gyi rim pa'i dkyil 'khor la byang chub sems dpa' 'jam dpal la sogs pa'i pha rol tu phyin pa las skyes pa rnams bzhugs pas na/thig bri ba'i slob dpon gyis ting nge 'dzin kyang thams cad mkhyen pa'i rgyu'i gnas kyi snying po yi ge a la gnas te dkyil 'khor gyi skud pa drongs shig ces gsungs so//de la dang po thig bri ba'i tshe dang por nam mkha'i thig bri bar gsungs pa la/ sangs rgyas thams cad la phyag 'tshal nas zhes pa nas byang phyogs su bltas te thig skud drongs shig ces pa'i bar du'o/ /de nas sa'i dkyil 'khor gyi thig bri ba'i phyir gsungs pa/ nub phyogs su ltos la thig skud drongs shig ces so/ /lhag ma rnams 'dir ma gsungs pa ni/ snying rje chen po'i dkyil 'khor du thig bri ba zhib tu bshad zin pas/ 'di'i lhag ma ni de dang 'dra bar shes par bya'o/ /de nas snying po'i dkyil 'khor thig bri ba'i slob dpon ting nge 'dzin bshad par gsungs pa/rdo rje sems dpa' phyag na rdo rje zhes pa nas/ snying po'i dkyil 'khor brtag par bya'o zhes pa'i bar du'o/ /de'i slob dpon gyi ting nge 'dzin ni byang chub pa'i sa bon yi ge as bskyed pa'i rdo rje sems dpar slob dpon bdag byin gyis brlab pa'o/ /rdo rje sems dpa' la yang las kyi rdo rje sems dpa' la sogs pa bzhin du 'dren pa yang yod de/de'i skabs su gzhan la mi bya'i rdo rje sems dpa' phyag na rdo rje la bya'o/ /de nas dkyil 'khor bar ma'i snam bu'i thig bri ba'i ting nge 'dzin gsungs pa de bzhin du gnyis pa'i dkyil 'khor zhes pa nas snying po nyid kyi gzugs zhes pa'i bar du'o//de la dkyil 'khor snam bu bar ma'i nang na rdzogs longs spyod pa'i sku dang sprul pa'i sku gnyis bzhugs te/ dkyil 'khor de'i thig bri ba'i tshe yang sku de gnyis kyi rgyu'i ting nge 'dzin rnam pa bzhi'i slob dpon gyi byin gyis rlabs te slob dpon gyi ting nge 'dzin de rnams dmigs nas bya'o zhes pa'i don te/de la dang po ni zhi ba'i zhes bya ba byang chub pa'o/ /gnyis zhes pa na spyod pa'o/ /stong pa'i gzugs zhes pa ni mya ngan las 'das pa'o/ /lhag ma ni gnas gtan la phab par bya'o zhes pa ni de'i rgyud nas bshad pa 'di man chad du 'byung ste/de nas bcom ldan 'das lha'i gzugs su rtag go zhes pa'i bar du'o/ /de la snam bu gcig las kyang gsum du bgos te sum char bskor bar bya/ sum gnyis lha'i gzugs su bya'o zhes pa'i don to/ /thig drangs nas de bzhin gshegs pa'i spyod pa mngon du bya'o zhes pa ni/de ltar lha'i gnas dang bskor sa dgod pa nyid kyi tshom bu mi bya bar thig btab ste bya'o/ /de nyid kyi tshe na yang de bzhin gshegs pa'i spyod pa stong pa nyid la dmigs zhes pa'i don to/ /de nas dkyil 'khor gyi tshon rtsi rnams byin gyis brlab pa'i cho ga gsungs pa yang / bcom ldan 'das rnam par snang mdzad du bdag nyid byin gyis brlab po zhes pa nas/bdud kyi sde gnod pa thams cad bsdigs pa zhes pa'i bar du/ de la rnam par snang mdzad dub dag nyid phyag rgyas byin gyis brlab ces pa ni tshon rnams byin gyis brlab pa'i tshe/ rdo rje'i phyag rgyas slob dpon nyid rnam par snang mdzad kyi skur byin gyis rlobs shig ces pa ste/rdo rje ni ye shes kyi mtshan mas na ye shes lngas byin gyis brlabs pa'i don to/ /tshon rnams byin gyis brlabs pa yang / kun rdzob dang don dam pa rnam pa gnyis te/ de la don dam par byin gyis brlabs pa'i phyir gsungs pa/chos thams cad kyi dbyings rgya chen pos byin gyis brlabs zhes pa'o/ /de ni tshon sna lnga'i sbyor/ chos kyi dbyings chen po stong pa nyid du byin gyis brlab ces pa'i don to/ /kun rdzob kyi sgo nas tshon re re zhing yang / lha re res byin gyis brlabs par gsungs pa/ tshon ni dang po blangs nas su//zhes pa la sogs pa'o/ /de tshon dkar po ni chos kyi dbyings kyi byin gyis brlab par gsungs te/ chos kyi dbyings de'i rang bzhin dang mthu bstan par gsungs pa/ chos kyi dbyings dag pa sems can gyi khams sbyong ba po de bzhin gshegs pa nyid de dag ste zhes pa thams cad yang ba zhes so//chos kyi dbyings de lta bu'i don du bsam nas don de yi ge ra 'bar ba la sogs pa'i yon tan smod pa de lta bus byin gyis brlab bo/ /de nas tshon dmar po byin gyis brlabs pa gsungs pa/ de nas gnyis dang dmar po'i zhes pa la sogs pa'o/ /yi ge ma'i sa bon gyis bskyed pa'i sangs rgyas mi thul bas byin gyis brlabs par gsungs so//de nas tshon ser po la yi ge'i sa bon gyis bskyed pa/ sangs rgyas gser thub kyis byin gyis brlabs par gsungs pa/ de nas/ gsum pa'i tshon de blangs nas su/ /zhes pa la sogs pa'o/ /tshon ljang gu la snying po byang chub na bzhugs pa'i skus byin gyis brlabs par gsungs pa/de nas margad ces pa'i kha dog la sogs pa'i tshon ljang gu'i kha dog ni nor bu margad 'dra ba'i kha dog lta bu'o/ /tshon nag po khams gsum rnam par rgyal bas byin gyis brlabs par gsungs pa/ de nas nag po blangs nas su/ /zhes pa la sogs pa ste/ de la yi ge lngas bskyed pa'i khro bo'i gzugs de yang ji 'dra zhe na/ rnam par g.yo zhing 'bar ba'i phreng ba dus mtha'i me'i mtha' lta bu 'jigs pa la sogs pa'o/ /de la tshon sna lnga rnams ye shes lnga'i rang bzhin du blta ste/ dkar po ni chos kyi dbyings kyi rang bzhin no/ /dmar po ni thul bar dka' ba sangs rgyas kyi rang bzhin te me long lta bu'o/ /ser po ni mnyam pa nyid kyi ye shes/ ljang gu ni kun du rtog pa'i ye shes/ nag po ni bya ba nan gyi ye shes/ de la rim par bshad pa ni chos thams cad kyi dbyings nyid du dang po nas 'jug go//stong pa 'ba' zhig gis dmigs par yang mi rung ste/ snying rje chen po'i dbang gis sems can la dmigs shing chags pa bskyed pa'i phyir de'i dus su tshon dmar dgye'o/ /sems can gyi don la zhugs pas rgyas par 'gyur te/ de bas na de'i 'og tu tshon ser po bri'o//rgyas shing mthu dang ldan pas na las thams cad nus pa ste/ bdag dang gzhan gyi don nus pas na/ 'jam po 'dul ba la yang 'jam por ston/ ma rungs pa rnams la yang khro bo/ /thabs gzhan gyis ma khugs pa ma rungs pa rnams la thabs gzhan med na/ mthar drag shul gyis gdul ba'i phyir/tha mar nag po bzhag ste/ khro bo'i las byed do/ /ting nge 'dzin las rnam par grol ba zhes gong du smos pa de 'di man chad 'chad de/ de bcom ldan 'das rnam par snang mdzad kyis de'i ting nge 'dzin las bzhengs nas zhes pa la sogs pa bshad pa'o/ / ting nge 'dzin de las bzhengs nas zhes pa ni/ sngar ting nge 'dzin du zhugs pa las bzhengs nas/ rgyal ba'i ting nge 'dzin la 'jug pa'o/ /mtha' yas par rnam par rgyal bzhes bya ba ni/ grangs med pa'i rgol ba rnams kyis mi tshugs pas na/ grangs med pa'i rgyal ba zhes pa'i don to//thams cad kyis mi tshugs pa'i rig pa'i rgyal mo zhes bya ba de bzhin gshegs pa thams cad kyi yul las byung ba gsungs so zhes pa de las thams cad kyis mi tshugs pa zhes pa ni kun rdzob dang don dam par te/ nyon mongs pa dang lha'i bu'i bdud la sogs pas mi tshugs zhes pa'i don to//da ni phyag rgya'i le'u bshad pa ste/ phyag rgya rnams bshad pa yang spyir gdul ba'i 'gro ba rnam pa gnyis zab cing rgya che ba la mos pa dang dmigs pa can no/ /de la zab cing rgya che ba la mos pa'i gdul ba'i 'gro ba ni sngags tshig rnams bshad pas sngags tshig de dag gi sgra'i de kho na nyid la dmigs shing /byang chub kyi sems sgom pa sngon du bar lha'i gzugs sbyor te/ lha'i gzugs sbyor ba de yang ting nge 'dzin dag pa dang / rnam par rtog pa gzhan spangs pa dang / lha'i gzugs su snang ba rdzogs par ro/ /dmigs pa can gyis gdul ba'i 'gro ba ni/sngags kyi sgra'i de kho na nyid la dmigs pa la sogs pa de dag ma nus te/ phyag rgya tsam bcings nas lha'i gzugs su sbyor bar byed pas na/ dmigs pa can gyis gdul ba'i 'gro ba de dag gi phyir/ bcom ldan 'das kyi rgyu dang 'bras bu'i yon tan rnams kyi phyag rgya'i gzugs byin gyis brlab po//de la ral gri dang rdo rje la sogs pa'i phyag rgya ni yid kyi yon tan no/ /dung gi phyag rgya la sogs pa'i phyag rgya ni gsung gi yon tan no/ /gtsug tor gyi phyag rgya la sogs pa'i phyag rgya ni sku'i yon tan te ci ltar rig par so sor sbyar bar bya'o//phyag rgya'i le'u bshad pa de yang de nas bcom ldan 'das rnam par snang mdzad kyis 'khor 'dus pa thams cad la gzigs nas/ phyag na rdo rje byang chub sems dpa' la 'di skad ces bka' stsal to/ /gsang ba'i bdag po de bzhin gshegs pa rnams la de bzhin gshegs pa rnams kyi rgyan du gyur pa/chos kyi dbyings rtogs pa'i mtshan mar gyur pa/ phyag rgya'i le'u rgyas pa zhes bya ba med do zhes bya ba la sogs pa'o/ /de la de bzhin gshegs pa rnams kyi rgyan du gyur ces pa ni gtsug tor dang spyan gyi phyag rgya la sogs pa sku'i rgyan du gyur pa'i phyir ro//chos kyi dbyings rtogs pa'i mtshan mar gyur pa zhes pa chos kyi dbyings de bzhin nyid kyi ye shes te/ de rtogs shing chud par mdzad pa'i mtshan ma ni ral gri dang rdo rje la sogs pa'i phyag rgya'o/ /des brgyan pa'i byang chub sems dpa' rnams ni zhes pa nas de dag kyang de'i ngag nyan par 'gyur te zhes pa'i bar du phyag rgya de rnams bstan pa'i dgongs pa bshad pa ste/gang byang chub sems dpa' rnams phyag rgya de dag dang ldan pa ni/ de bzhin gshegs pa'i byang chub chen po'i mtshan mas btab pa yin te/ de dag la lha dang mi dang lha ma yin la sogs pa rnams kyis mi brdzi bar 'gyur zhing /lha dang lha ma yin la sogs pa de rnams kyang / byang chub sems dpa' de dag gi ngag mnyan par 'gyur ro/ /ji ltar 'jig rten na rgyal po'i phyag rgya 'chang ba'i skyes bu de la 'jig rten pa'i mi rnams kyang mi brdzi bar 'gyur zhing /'jig rten pa rnams kyang de'i ngag nyan par 'gyur ba dang 'dra ba ste/ mdor na phyag rgya 'di rnams bshad pas gdul ba'i 'gro ba rnams la mthong ba'i chos dang tshe phyi ma la phan par 'gyur bar bstan pa'o/ /de nas bcom ldan 'das mi tshugs pa'i gnas kyi stobs byin gyis brlab pa zhes bya ba'i ting nge 'dzin la snyoms par zhugs so zhes pa ni/'og nas 'byung ba'i phyag rgyas de dag nyid mi tshugs pa'i gnas kyi stobs zhes bya ste/ bcom ldan 'das ting nge 'dzin la mnyam par bzhugs nas/ phyag rgya de dag 'chad pas na/ ting nge 'dzin de'i ming mi tshugs pa'i gnas kyi stobs byin gyis brlab pa zhes bya'o//de la mi tshugs pa zhes bya ba ni bcom ldan 'das kyi sku mi zad pa la sogs pa'i rdo rje rgyan de dag ci la yang thogs pa med pa'o/ /gnas zhes pa ni bcom ldan 'das kyi sku la bya/ stobs zhes pa ni de ltar thogs pa med pa nyid stobs su gyur pa'o//byin gyis brlabs zhes pa ni bcom ldan 'das kyi sku mi zad pa la sogs pa'o/ /rdo rje thogs pa med pa'i stobs su gyur pa de nyid phyag rgya'i ngo bor byin gyis brlabs pa'o/ /bcom ldan 'das ting nge 'dzin la snyoms par zhugs ma thag tu/ de 'di ltar kun gyis mi tshugs pa'i stobs/mi mnyam pa dang mnyam pa'i stobs dam tshig la 'jug pa zhes bya ba'i stobs kyi rig pa 'byung ngo zhes pa mi tshugs pa'i stobs zhes pa ni gong ma bzhin no/ /mi mnyam pa'i stobs zhes pa ni/ mi tshugs pa'i stobs de nyid gang dang yang mi mnyam pa'o/ /dam tshig la 'jug pa'i stobs zhes pa ni dam tshig gi don ni sngar bshad zin to//dam tshig la 'jug pa ni sku mi zad pa la sogs pa'i rang bzhin gyis dkyil 'khor lta ba 'og ma'i 'gro ba rnams kyi spyod yul du mi 'gyur bas/ de'i byin gyis brlabs su gyur pa/ dam tshig gi phyag rgya dang sngags 'di bcings shing brjod pa na rang bzhin gyis dkyil 'khor de mthong ba dang 'dra ba na 'jug pa zhes bya'o//gnyis su dam tshig srung ba rnams nyams pa na/ dam tshig gi phyag rgya dang sngags 'di byas na/ dkyil 'khor mthong ba dang 'dra ste/ de byas pa tsam gyis dam tshig las nyams pa de 'tsho ba ste/slar dam tshig tu zhugs par 'gyur bas na dam tshig tu 'jug pa zhes bya'o/ /gsum du na dkyil 'khor du 'jug pa'i dam tshig gi phyag rgya dang / sngags 'dir byas na 'jug pas na/ dam tshig tu 'jug pa zhes bya'o/ / gsang ba'i bdag po rig pa'i rgyal mo 'di ni de bzhin gshegs pa thams cad kyis ston pa'o zhes pa 'di brjod pas/ sangs rgyas thams cad kyi gnas rang bzhin gyi dkyil 'khor mthong ba dang 'dra bas na/ sangs rgyas thams cad kyi sa ston pa zhes bya'o/ /gnyis sun gzugs brnyan gyi dkyil 'khor bris pa yang /rig pa 'di brjod nas bstan pa'am/ rig pa 'di brjod na sangs rgyas thams cad kyi dkyil 'khor de mthong bar 'gyur bas/ sangs rgyas thams cad kyis ston pa zhes bya'o/ /chos lam gsum gyi mtshams las mi 'da'o zhes pa chos lam gsum ni de bzhin gshegs pa'i sku dang gsung dang rdo rje'i yid mi zad pa'i rgyan nam/sku gsum ste de'i lam ni dam tshig bsrung ba bya ba rnams la sogs pa ste/ lam de de las mi 'da' ba'o/ /pha rol tu phyin pa dang sa yongs su rdzogs pa ste zhes pa ni dam tshig der zhugs nas/ bcom ldan 'das la mchod pa la sogs pa sbyin pa'i pha rol tu phyin pa la sogs pa rim gyis rdzogs par byed pa dang / de'i mthus sa las rim gyis 'phar bar 'gyur bas na/ sa dang pha rol tu phyin pa rdzogs par byed pa'o/ /sangs rgyas kun gyi dam tshig ni/ phyag rgya 'di la gnas zhes pa ni dam tshig gi dan/dam tshig tu bsrung ba las mi 'da' 'am/ sku mi zad pa la sogs pa chud par byed pa'am/ sku de dag yongs su thob par byed pa de dag phyag rgya 'di'i sgo nas mchod cing chud par byed pas na phyag rgya 'di la rab tu gnas par byed pa zhes bya'o/ /rgya 'di phyag rgya chen po ste//chos dbyings rnam par spyod pa'o/ /zhes pa ni chos kyi dbyings stong pa nyid phyag rgya 'dis mtshon gyi chud par 'gyur bas na/ chos kyi dbyings sbyong ba zhes bya'o/ /phyag rgya 'di ni dpal mchog ste/ /chos kyi 'khor lo zhes kyang bsgrags/ /de yi 'khor lo bskor pa ni//'jig rten mgon po sgrol rnams so/ /zhes pa ni chos kyi dbyings su byin gyis brlabs nas/ chos kyi 'khor lo bskor ba'i phyir rdo rje sems dpa' byin gyis brlabs te/ dpal mchog ces pa ni rdo rje sems dpa' nyid la bya ste/ dpal rdo rje sems dpa' de lugs kyi chos dang /thob pa'i chos rnams 'khor lo bskor ba ste/ phyag rgya des rdo rje sems dpar gyur nas/ byang chub sems dpa' 'jig rten gyi mgon po rnams kyang chos kyi 'khor lo skor bar byed do zhes pa'o/ /ral gri'i phyag rgya ste phyag rgya chen po'o/ /mgon po sangs rgyas kun gyi ste//des ni lta ba rnams gcod pa/ /lhan cig pa dang bdag tu blta/ /zhes pa ni ral gri'i phyag rgya chos dang gang zag la bdag med par chud pa'i ye shes kyi mtshan mar gyur pa ste/ ye shes de ni lhan cig tu skyes pa'i bdag tu lta ba rnams gcod pa zhes bya'o/ /phyag rgya 'di ni dpal mchog ste//chos kyi dung zhes bsgrags pa yin/ /des ni sangs rgyas 'jig rten na/ /byang chub sems dpa' mchog rnams dang / /rdul med pa yi chos 'chad pa/ /zhi ba mya ngan 'das 'gro ba'i/ /zhes pa ni dung gi phyag rgya de sangs rgyas kyi gsung gi mtshan mar gyur pa ste/sangs rgyas kyi gsung de rdul dang bral ba'i chos mya ngan las 'das pa zhi ba thob par byed pa/ sangs rgyas dang byang chub sems dpa' rnams 'chad do zhes pa'o/ /'dis ni dpal mchog pad+mo ste/ /mgon po sangs rgyas kun gyi ni/ mi tshugs rdo rje'i gdan yin te//mgon po gang du 'tshang rgya ba/ /de ni skyes dang byang chub pa/ /sangs rgyas rnams kyi'o zhes pa ni/ phyag rgya pad+mo de sangs rgyas rnams kyi gdan te/ mgon po sangs rgyas rnams gang du byang chub na yang gdan 'di la bzhugs te/ byang chub sangs rgyas sras byang chub sems dpa' rnams kyang pad+mo 'di las skyes zhes pa'o//phyag rgya chen po rdo rje'i rgya gram ma rig pa'i grong khyer rnams 'byed pa ste/ sangs rgyas rnams kyi ye shes te/ /lha min lha yis btsugs pa'o/ /zhes pa ni bcom ldan 'das kyi de ma thag pa'i lam gyi ye shes te/rdo rje'i phyag rgyar byin gyis brlabs pa ste/ ma rig pa'i grong khyer rnams 'joms pa ni/ ye shes des ma rig pa dang sems las byung ba'i 'khor rnams dang bcas par 'dzoms zhes pa gtsug tor phyag rgya chen po ste/ gtsug tor zhes su bsgrags pa yin/des ni bcings ma thag tu yang / /phyag rgya gtso bor gyur par 'ang / /zhes pa ni bcom ldan 'das kyi skyes bu chen po'i mtshan gtsug tor te/ phyag rgyar byin gyis brlabs pa ste/ de ni bcings ma thag tu sangs rgyas gtso bor 'gyur zhes pa ni phyag rgya la mang du bsdus pas lha'i gzugs su 'gyur ba la/gcig pus lha'i gzugs su gyur te/ gtsug tor gyi phyag rgya 'di gcig pu bcings pas kyang sangs rgyas kyi skur bsgyur du rung zhes pa'o/ /spu mdzod ces su bsgrags pa ste/ /rgyal mchog phyag rgya rtag pa ru//'di ltar bcing ba byas na ni/ /de dag rgyal ba mchog tu 'gyur/ /bcom ldan 'das kyi skyes bu'i mtshan smin mtshams nas spu mdzod ces bya ba nas/ spu'i nyag ma gcig 'byung ba brkyang na ni/ khams gsum thams cad du yang khyab par 'gyur ba/dkyil nas de nyid du zad par phyag rgya 'dir byin gyis brlabs pa ste/ 'di 'ba' zhig bcings pas kyang / sangs rgyas kyi skur bsgyur du rung zhes pa'o/ /lhung bzed kyi phyag rgya ni tshigs su bcad pa rang log tu gsungs par zad do/ /sems can kun la mi 'jigs pa//de yis dbugs ni 'byin pa yin/ /gang gi rgya chen de bcings pa/ /mi 'jigs phyag rgya zhes bsgrags pa'o/ /zhes pa mi 'jigs pa sbyin pa'i phyag rgya ste/ bdag gam sems can rnams bgegs la sogs pa skrag cing 'jigs par gyur na/ phyag rgya bcings te bstan la de las thar bar 'gyur zhes pa'o//'di ni mchog sbyin phyag rgya ste/ /'jig rten mgon po rnams kyis bsngags/ /'di ni bcings ma thag tu yang / /mchog sbyin rgyal ba dam par 'gyur/ /zhes pa ni bcom ldan 'das sems can rnams la mchog sbyin gyi phyag rgya ste/nam grub pa la sogs pa'i mchog nod na/ mchog sbyin pa'i phyag rgya 'dis bcings nas mnod do/ /rgyal chen phyag rgya chen po 'di/ /sangs rgyas mgon po kun gyi ste/ /bdud rnams kun la bsdigs pa yin/ /re ba kun gyi sbyin pa'o//de ni bcings ma thag tu yang / /so sor gyes par gdon mi za/ /bdud sde mang po 'jigs pa dang / /bgegs dang rnam bgegs gzhan dag kyang / /zhes pa ni bgegs rnam par skrag par byed pa'i phyag rgya ste/ phyag rgya de bcings pa sbyin/ bgegs la sogs pa thams cad rnam par skrag nas so sor 'byer bar 'gyur te/de ltar bgegs rnams so sor 'byer na bgegs med pas/ ji ltar bsams pa'i don grub par 'gyur bas na/ re ba thams cad yongs su rdzogs par byed pa'o/ /'di ni sangs rgyas mgon rnams kyis/ / snying rje las byung spyan yin te/ /mig gi steng du de zhog cig /de phyir sangs rgyas spyan du 'gyur/ /zhes pa nas sangs rgyas bcom ldan 'das kyis shes rab kyi spyan snying rje chen po'i dbang gis sems can thams cad la gzigs pa snying rje las byung pa'i spyan zhes bya ste/ spyan de phyag rgya 'dir byin gyis brlabs pa yin pas na/phyag rgya 'di bcings te/ mig tu bzhag na bdag sangs rgyas kyi skur bsgyur ba'i tshe/ sangs rgyas kyi spyan du 'gyur ro/ /zhags pa 'di ni mchog ces gsungs/ /gnod pa thams cad med par byed/ /sngags pa yis ni 'di bcings na//rtag tu gnod pa rnam bcings yin/ /zhes pa ni 'phags pa'i lam yan lag brgyad kyi rang bzhin gyis ye shes sems can thams cad 'don par byed ces zhags pa'i phyag rgyar byin gyis brlabs te/ zhags pa'i phyag rgya 'di bcings pas/ bgegs la sogs pa'i gnod pa rnams bcings pa'i las byed do zhes pa'o//'di ni kyo ba btang zhes gsungs/ /sangs rgyas mgon po kun gyis te/ /thams cad ma lus 'gugs pa yin/ /sa bcur gnas pa rnams dang ni/ /mthu chen byang chub sems dpa' dang / /gzhan yang gnod par sems pa'o//zhes pa ni de bzhin gshegs pa'i rgyu dang 'bras bu'i spyod pa rnams rgyu'i tshe na/ bsdu ba rnam bzhis sems can rnams 'dud cing 'dren pa dang / 'bras bu'i tshe na sku mi zad pa la sogs pa'i rdo rje'i rgyan gyis sems can sdud cing 'dren par spyod pa de nyid lcags kyu'i phyag rgyar byin gyis brlab pa ste/lcags kyus kyang thams cad 'dren par byed pa ni/ bgegs la sogs pa gnod par byed pa rnams dang / byang chub sems dpa' sa bcu la gnas pa yang ste/ byang chub sems dpa' sa bcu la gnas pa yang 'gugs na/ gzhan lta smos kyang ci dgos zhes pa'o//de bzhin gshegs pa'i lte ba'i phyag rgya/ phyag rgya snga ma las zhes pa ni lcags kyu'i phyag rgya la bsnyel te/ lcags kyu'i phyag rgya srin lag gnyis bsgreng bar shes par bya'o/ /de bzhin gshegs pa'i rdo rje'i phyag rgya ni/ mngon par byang chub pa lnga sbyar ro/ / lcags kyu'i phyag rgya ni spyod pa dang sbyar ro/ /de bzhin gshegs pa'i snying po'i phyag rgya dang / stobs bcu'i phyag rgya ni kun du sangs rgyas pa dang sbyar ro/ /chos thams cad snyoms par chud pa'i phyag rgyas ni mya ngan las 'das pa dang sbyar ro/ /de la sngags kyang kun du sangs rgyas pa la phyag 'tshal lo zhes pa ni/kun du sangs rgyas pa dang sbyar/ /kun du rdo rje phyag 'tshal lo/ /zhes pa ni byang chub dang sbyar ro/ /de bzhin gshegs pa thams cad la phyag 'tshal lo zhes pa ni de bzhin gshegs pa dang sbyar ro/ /de la sngags dang phyag rgya rnams/ bstan pa yang spyir bstan pa dang so sor bstan pa ste/de la so sor bstan pa yang rnam pa gnyis te/ dngos su bstan pa dang gzhan du bsnyel ba'o/ /de la dngos su bstan pa ni gong du ming smos pa rnams so/ /gzhan du bsnyel ba ni de la sogs pa'o zhes pa ste rgyun du bsnyel ba'o/ /spyir bstan pa ni gsang ba'i bdag po lus ji tsam du bskyod pa kun kyang phyag rgyar rig par bya'o//lce ji tsam bskyod pa de yang sngags rnams su shes par bya'o zhes pa ste/ de yang ji lta bur gnas na gsungs pa/ byang chub kyi sems dang ldan pa'i yid dang / de bzhin gshegs pa'i sa la gnas nas dkyil 'khor bri zhes pa ste/nam sngags pa byang chub kyi sems dang ldan pa'i yid dang / de bzhin gshegs pa'i sa la gnas par gyur na/ ji tsam du lus la sogs pa de tsam du phyag rgyar 'gyur/ ji tsam du lce bskyod pa de tsam du sngags brjod par 'gyur ro zhes pa dang sbyar te/byang chub kyi sems dang ldan pa'i yid ces pa ni/ stong pa nyid la dmigs pa'i sems dang ldan zhes pa'o/ /de bzhin gshegs pa'i sa la gnas/ /zhes pa ni kun rdzob dang don dam pa rnam pa gnyis te/ kun rdzob tu de bzhin gshegs pa'i sa la gnas pa ni lha'i gzugs su sbyar ro//don dam par ni stong pa nyid kyi rang bzhin du lhar sbyar ba ste/ de ltar yang byang chub kyi sems dang ldan zhing / kun rdzob dang don dam pa'i mtshan nyid lha'i gzugs su sbyar ba ma yin par sngags dang phyag rgya bya ba'am/ dkyil 'khor bris na sangs rgyas dang byang chub sems dpa' rnams srung bar 'gyur ro zhes dngos kyis gsungs so//da ni sngags kyi le'u zhes bshad pa la sogs pa sngags kyi tshig dang yi ge'i 'bru las ting nge 'dzin gyi sgor gyur pa la sogs pa yi ge ka la sogs pa sum cu rtsa gnyis dang / A li la sogs bcu drug dang ldan par 'gyur ba bstan te/ de la yi ge ka la sogs pa sum cu rtsa gnyis po rnams ni/ yi ge a dang mi ldan par mi smra ste/ de thams cad kyang a dang ldan par shes par bya'o/ /de yang gsang ba'i bdag po thams cad du rgyas pa'i sgo mo chos kyi gzhung nyon cig ces pa la sogs pa ste/a dang ldan pa'i yi ge rnams sngags su sbyar ba dang / ting nge 'dzin la sogs pa thams cad du khyab par 'jug pa'i sgo mo zhes pa'o/ /de bas na gsungs pa/ gsang ba'i bdag po byang chub sems dpa' a la gnas te/kun la nan tan bya'o zhes so/ /dang po a dang sa ba gsum smos pa ni rigs gsum smos pa'o/ /de la dang por yi ge a la tha ma la par smos nas ka la sogs pa sum cu rtsa gnyis po rnams smos pa ni ka la sogs pa ste/ rnam pa thams cad kyang tha mal pa'i rang bzhin du shes par bya ste/de dag thams cad byang chub kyi rang bzhin du bstan pa'o/ /yi ge a 'dren pa thog mar smos nas ka la sogs pa thams cad kyang 'dren par smos pa rnams ni/ de dag thams cad spyod pa'i rang bzhin du shes par bya'o/ /yi ge a thog mar smos na/ ka la zhes pa la sogs pa sum cu rtsa gnyis rnams smos pa thams cad kyang a dang ldan pas/ kun sangs rgyas pa'i rang bzhin du shes par bya'o/ /yi ge a tshig gnyis dang ldan pa thog mar smos nas/ yi ge tshig gnyis dang ldan pa la sogs pa thams cad yi ge a tshig gnyis dang ldan pas//thams cad kyang mya ngan las 'das pa'i rang bzhin du shes par bya'o/ /ka la sogs pa yi ge sum cu rtsa gnyis po de rnams i la sogs pa dang ldan pa na yang ting nge 'dzin de dag nyid kyi sgo nas ston pa'i rang bzhin du shes par bya'o/ /de la r-i r-I dang l-I gnyis ma smos pa ni/gong du yi ge ra dang i la sogs pa r-i r-I zhes pa de'i khongs su 'dus/ la dang a mi smos pa l-i zhes de'i khongs su 'dus par shes par bya'o/ /gsang ba'i bdag po yi ge'i tshul la mkhas pa'i chos kyi gzhung ngo zhes pa nas/ gsang ba'i bdag po ngas sangs rgyas kyi zhing pra sa ra na/de bzhin gshegs pa thams cad du khyab pa'i sgo mo chos kyi gzhung 'di mi 'chad pa ma mthong ngo zhes pa'i bar du smos pa'i yi ge rnams kyi rjes su bsngags pa bshad pa ste/ rang bzhin phun sum tshogs pa dang / byin gyis brlabs pa phun sum tshogs pa dang /mthu phun sum tshogs pa dang / las phun sum tshogs pa bstan pa'o/ /de la rang bzhin phun sum tshogs pa ni/ yi ge'i rang bzhin rnams so sor ston pa ste/ yi ge'i tshul la mkhas pa'i chos kyi gzhung ngo zhes pa'i tshig gis so/ /las phun sum tshogs pa ni sngags kyi tshul la rnam par gnas pa'i cho ga'o zhes gsungs pa'i tshig gis so//byin gyis brlabs pa phun sum tshogs pa ni/ nam yi ge rnams sngags kyi sgra brjod dam/ ting nge 'dzin bsgom pa'am lha'i gzugs su sbyor na/ de bzhin gshegs pa rnams byin gyis brlab ste/ de bzhin gshegs pa thams cad kyi byin gyis brlabs pa zhes pa'i tshig gis so/ /mthu phun sum tshogs pa ni/ 'das pa dang da ltar dang ma 'ongs pa'i sangs rgyas bcom ldan 'das rnams kyis bshad do zhes pa nas chos kyi gzhung 'di mi 'chad par ma mthong ngo zhes pa'i bar du ste/sangs rgyas thams cad kyis bshad pas mthu che'o/ /las phun sum tshogs pa la rnam pa bzhi ste/ sngags rnams su sbyor ba dang / lha'i gzugs su bsgyur ba dang / ting nge 'dzin du sbyor ba dang / byang chub sems dpa'i spyod pa'i rol mo'o/ /de la sngags rnams su sbyor ba ni yi ge 'bru de rnams las sngags kyi tshig gi tshul du sbyar ba ste/sngags kyi tshul la rnam par gnas pa'i cho ga'o zhes pa'i tshig snga ma nyid kyis so/ /lha'i gzugs su bsgyur ba ni yi ge rnams gang yang rung ba las lha'i gzugs su sbyor ba ste/ gzugs yongs su 'dzin pa'i tshig gis so//ting nge 'dzin du sbyor ba ni yi ge 'bru de rnams las stong pa nyid kyi rang bzhin chos kyi skur sbyor ba ste/ de bzhin gshegs pa'i tshul la mkhas pa'i tshig gis so/ /spyod pa ni zhi ba dang rgyas pa la sogs pa'i las dang / rab dang 'bring la sogs pa 'grub par spyod pa ste/byang chub sems dpa'i spyod pa rol pa zhes pa'i tshig gis so/ /thog ma dang tha ma dang dbus rnams ka tsa Ta ta pa rnams dang ldan pa'i ting nge 'dzin mang por 'jug pa la nan tan gyis shig dang / byang chub dang spyod pa dang kun du sangs rgyas dang mya ngan las 'das pa dang bcas par thob par byed do zhes pa ni/yi ge ka la sogs pa sum cu rtsa gnyis po de rnams dang po'i a A zhes pa gnyis dang / tha ma'i saM a zhes pa gnyis dang / dbus kyi i la sogs pa rnams dang ldan par sbyar na/ byang chub dang spyod pa dang kun du sangs rgyas pa dang mya ngan las 'das pa'i sgo ston pa'i rang bzhin pas de rnams dang ting nge 'dzin du sbyar na byang chub la sogs pa thob par 'gyur ro zhes pa'o//de bzhin du thog ma la sogs pa dang ldan par brjod na/ sngags kyi cho gar 'gyur gyis/ thog ma dang tha ma dang dbus su ldan par de yang rig par bya'o zhes pa thog ma la sogs pa zhes pa ni/thog ma'i a A dang / tha ma'i aM a dang / dbus kyi i la sogs pa dang ldan par ka la sogs pa'i yi ge rnams brjod na/ byang chub la sogs pa thob pa 'ba' zhig ma yin gyis sngags kyi tshig rnams su yang 'gyur ro zhes pa'o//mkhas pas ji ltar 'dod pas sngags kyi gtso bor de'i tshig re re dang sbyor cig dang / nges par 'tshang rgya zhing bla na med par gnas mchog sbyin par byed do zhes pa'o/ /gong du smos pa'i tshul la mkhas pas ting nge 'dzin gang 'dod chags pa'am/rang gi lha gang yin par sbyar ba la sogs pa la/ ji ltar 'dod par yi ge de rnams gang yang rung ba 'bru gcig la sbyar na yang / ji ltar bsams pa'i don 'grub par byed pa'o zhes pa 'di ni de ltar 'khor lo gcig ste/ 'khor lo bzhin du 'khor ba ni/yi ge 'khor lo zhes pa ni yi ge a gcig po las ka la sogs pa du ma'i ting nge 'dzin gyi rang bzhin gyi 'khor lo lta bur 'khor ba'o zhes pa'o/ /sngags pa'i yi ge 'khor lo de shes na/ rtag tu ji ltar mdzes pa ni/ bcom ldan 'das rnam par snang mdzad 'khor lo bskor ba bzhin no zhes pa ni sngags pas gong du smos pa'i yi ge 'khor lo zhe na/bcom ldan 'das rnam par snang mdzad las dang spyod pa thams cad du spyod nus pa bzhin du 'gyur ro zhes pa'o/ /mdzes pa zhes pa ni spyod pa'i tshig tu shes par bya'o/ /da ni sangs rgyas bcom ldan 'das kyi sku mi zad pa dang /gsung mi zad pa dang / yid mi zad pa rdo rje'i rgyan rnams de dkyil 'khor du byin gyis brlabs pa la sku mi zad pa dang / gsung mi zad pa'i byin gyis brlabs kyi dkyil 'khor la snying rje chen po'i snying po 'byung ba dang / yi ge 'khor lo bskor ba'i dkyil 'khor ni gong du bshad zin/yid mi zad pa'i dkyil 'khor chos kyi sku'i byin gyis brlabs su 'gyur ba de bstan te/ de'i zhar la gong du dkyil 'khor gnyis bshad pa'i cho ga'o/ /lhag ma slob dpon gyi mtshan nyid dang / slob ma'i mtshan nyid la sogs pa dang / dkyil 'khor gyi yo byad du byis pa rnams la gong du rgyas pa ma smos shing /ma rdzogs pa rnams dang sbyin sreg gi cho ga la sogs pa 'di nyid du rgyas par bshad de/ de la chos kyi sku ni mtshan mas bstan pa las 'das te/ dngos po med pas bstan du mi mngon pa la yon tan gyi rjes su mthun pa las bstan par bya ste/chos kyi sku'i yon tan ni phyin ci ma log pa dang mi 'gyur bar yongs su rdzogs pa'i rang bzhin dang / rnam par rtog pa thams cad spangs pa dang / nyon mongs pa thams cad las rnam par grol ba dang / bya ba thams cad byed nus pa'i rang bzhin te/de'i rjes su mthun pa'i sgo nas de bstan pa ni/ sa dang chu dang me dang rlung rnams kyi dkyil 'khor du byin gyis brlabs te/ sa ni brtan zhing mi 'gyur ba yongs su rdzogs pa'i mtshan nyid rdo rje dang 'dra bas/ dbang chen gyi rdo rje'i dkyil 'khor du byin gyis brlabs te bstan pa'o//rnam par rtog pa thams cad spangs pa'i rang bzhin ni/ chu'i dkyil 'khor du byin gyis brlabs nas bstan pa ste/ chu ni thams cad 'khru bar byed pa'i rang bzhin no/ /de'i snying po ba ni snga ma bzhin du shes par bya'o/ /nyon mongs pa thams cad las rnam par grol ba'i mtshan nyid ni/me'i dkyil 'khor du byin gyis brlabs pa ste/ me'i rang bzhin bsreg par bya ba dang / yi ger chos thams cad rdul dang bral bar ston pa'i phyir ro/ /bya ba thams cad nus pa ni rlung gi dkyil 'khor du byin gyis brlabs pa ste/rlung ni kun du 'gro zhing thams cad 'byed pa'o zhes sngar bshad zin pa'i phyir ro/ /de ltar chos kyi sku byin gyis brlabs su gyur pa gsang ba'i dkyil 'khor de dang / dkyil 'khor sum char cho ga rdzogs par bshad pa'i phyir/ bcom ldan 'das ting nge 'dzin de la mnyam par zhugs te/de yang ci byas nas zhugs she na/ gsungs pa bcom ldan 'das kyis sems can gyi khams thams cad du de bzhin gshegs pa'i spyan gyis gzigs nas zhes pa ste/ de bzhin gshegs pa'i ye shes kyis gzigs nas zhes pa'i don to/ / chos kyi dbyings kyi mdzod rnam par 'phrul pa de bzhin gshegs pa mnyam pa'i rgyan gyi snying po zhes bya ba'i ting nge 'dzin la mnyam par zhugs so zhes pa chos kyi dbyings ni de bzhin nyid de/ de las sku mi zad pa la sogs pa'i rdo rje'i rgyan rnams kyi mtshan nyid 'byung ba ni/ de bzhin gshegs pa mnyam pa'i rgyan zhes bya ste/de dag chos kyi dbyings de las 'byung ba na/ chos kyi dbyings de nyid mdzod ces bya'o/ /rnam par sprul pa zhes pa ni/ de las byung ba'i de bzhin gshegs pa rnams rnam pa sna tshogs su spyod pa zhes pa'o/ /mnyam pa zhes pa ni de bzhin gshegs pa'i sku 'byung ba de dag nyid tshogs pa dang /chos kyi sku dang sems can gyi don byed par mnyam pa'i phyir ro/ /rgya cher zhes bya ba ni mang po'i tshig go/ /snying po'o zhes bya ba ni 'byung ba'i gnas te/ ting nge 'dzin de nyid la bya ste/ ting nge 'dzin der zhugs na de lta bur 'byung ba'i phyir/ ting nge 'dzin du zhugs nas kyang /ji ltar bstan zhe na/ gsungs pa chos kyi dbyings mi zad pa mang po mngon par bstan pa dang / sngags kyi spyod pa 'di las sems can gyi khams ma lus par gdon pa'i yi dam bcas par rdzogs par bya ba'i phyir zhes pa ste/ chos kyi dbyings zhes pa ni skabs 'dir sems can gyi khams la bya ste/de mngon par 'byung ba bstan pa yang las dang tshe'i rnam par smin pa dang / 'bras bu zhes pa la sogs pa'i tshig 'og nas 'byung ba bshad do/ /sngags kyi spyod pa 'di nyid las sems can gyi khams ma lus par gdon par yi dam bca' ba rdzogs par bya ba'i phyir zhes pa ni snying rje chen po 'byung ba'i dkyil 'khor dang /yi ge 'khor lo bskor ba'i dkyil 'khor bstan du zin kyang / /gsang ba'i dkyil 'khor ma bstan na/ dam tshig lnga la sogs pa dang yang ldan par mi 'gyur la/ de'i zhar la snga ma'i cho ga lhag ma rnams kyang rdzogs par bshad par bya ba ma bstan na/sngags pa rdzogs par mi 'gyur bas/ dam tshig ma rdzogs par 'gyur te/ de bas na de dag kun rdzogs par bstan na/ sems can gyi khams ma lus par gdon pa'i yi dam bcas pa rdzogs par 'gyur ro/ /de nas 'di ltar sems can gyi khams su rnam par sprul pa'i sgo nas las dang tshe'i rnam par smin pa dang /'bras bu za ba dang / /zar 'jug pa dang / kha dog dang / dbyibs dang / dbyangs dang / 'gro ba dang / spyod pa dang / nges pa'i tshig 'byung ba dang / ji lta bur bsams pa bzhin pas sems can thams cad so sor mgu bar byed pa/ba spu'i bu ga thams cad nas chos kyi dbyings nas rnam par 'phel ba'i sku 'byung zhes pa ni/ de ltar bcom ldan 'das ting nge 'dzin la mnyam par zhugs ma thag tu bcom ldan 'das kyi sku ba spu'i bu ga thams cad du de bzhin gshegs pa'i sku sems can thams cad dang rjes su mthun pa/las dang tshe'i rnam par smin pa dang / 'bras bu dang / za ba dang zar 'jug pa la sogs pa ston pa 'byung po zhes pa ste/ las kyi rnam par smin pa dang tshe'i 'bras bu za bar ston pa'i las legs nyes ci spyad pa'i 'bras bu bde ba dang sdug bsngal rnam par rang rang spyod pa snang ba'o//zar 'jug pa ni rgyal po dang sems can dmyal ba'i srung ma la sogs pa lta bu ste/ de dag gis dbang byas nas gzhan rnams la bde ba dang sdug bsngal spyod du 'jug pa'o/ /de dag nyid kyi bye brag tu gsungs pa/ gzugs dang kha dog dang zhes pa la sogs pa ste/sems can rnams kyi gzugs dang kha dog dang bsam pa la sogs pa'i rjes su mthun par chos 'chad pa'i sku rnams 'byung ngo zhes pa dang sbyar te/ de bas na gsungs pa/ sems can thams cad so sor mgu bar byed pa zhes pa'o/ /sems can gyi khams su rnam par sprul pa'i sgo'o zhes pa'i tshig gong ma de ba spu'i khung bu zhes pa dang sbyar ro//de bzhin gshegs pa'i sku ba spu'i khung bu de sems can gyi khams rnam par sprul pa las dang che'i rnam par smin pa dang / 'bras bu za ba dang zar 'jug pa rnams snang ba'i sku rnams 'byung ba'i sgo yin pa'i phyir ro//de byung nas nam mkha' dang 'dra ba 'jig rten gyi khams rgyas par khyab pa dang / dbyangs sgra gcig tu chos dbyings rig par byed cing / de bzhin gshegs pa 'byung bar 'gyur ba'i tshigs su bcad pa 'di skad ces bsgrags so zhes pa ni tshig tu 'og nas 'byung ba de bsgrags te/ de yang thams cad tshig gcig tu sgra sgrogs pa na/ sems can gyi khams thams cad du thos shing chud par byed pa ste/ chos kyi dbyings zhes pa'i tshig ni 'dir sems can gyi khams su shes par bya'o/ /de skad du/ sgra sgrogs pa'i tshigs su bcad pa de chos kyi dbyings su dmigs pa pa'i tshig ste/tshigs su bcad pa bstan pa de la chud cing goms par byas nas/ de bzhin gshegs par 'gyur bas na/ de bzhin gshegs pa 'byung bar 'gyur ba'i tshigs su bcad pa zhes bya ste/ tshigs su bcad pa gsungs pa 'di ltar gang nas 'byung ba de kun zhes pa nas/ sangs rgyas rdzogs pas bshad pa'o/ /zhes pa'i bar du ste/ gang nas zhes pa ni chos rnams kyi mtshan nyid nas zhes pa'o/ /'byung ba de kun zhes pa ni sangs rgyas dang nyan thos la sogs pa ming gis smos pa rnams te/ mdo ra na chos rnams kyi chos nyid mtshan nyid ni chos kyi dbyings de bzhin nyid las sangs rgyas dang nyan thos dang byang chub sems dpa' dang /kun du sangs rgyas pa dang / sems can gyi 'jig rten dang / snod kyi 'jig rten dang chos rnams 'byung zhing gnas pa dag 'byung ste/ de dag rtag tu ji ltar 'byung ba shes rab dang thabs su ldan pas lam 'di khyed kyis bsgom par gyis shig ces pa ste/de yang rdzogs pa'i sangs rgyas kyis bshad pa zhes pa'o/ /rnam par brtag pa'o zhes pa na kun rdzob tu 'ang zhes pa ste/ mdor na chos rnams kyi dbyings mtshan nyid dang 'dra ba dang / de'i dbang gis de bzhin gshegs pa las sprul pa'i sku la sogs pa 'byung ba dang de la dmigs nas nyan thos dang rang sangs rgyas la sogs pa mthar sangs rgyas pa'i bar du/ji ltar 'grub par 'gyur ba'i lam de khyed kyis shes par byos shig ces pa'o/ /de ltar bcom ldan 'das ting nge 'dzin der zhugs nas/ 'jig rten pa'i tshig dang 'jig rten las 'das pa gnyis bstan te/'jig rten pa'i las dang / tshe'i rnam par smin pa dang / 'bras bu za ba dang zar 'jug pa la sogs pa'o/ /'jig rten las 'das pa ni tshigs su bcad pa'i 'di nyid do/ /de nas bcom ldan 'das rnam par snang mdzad kyi sems kyi dbang tsam gyis spu'i bu ga thams cad nas/sangs rgyas 'byung ba'i rgyu byin gyi rlabs chos kyi dbyings las 'phrul pa de bzhin gshegs pa'i sku chos kyi dbyings thams cad du/ rang gi sku rig par byed pa/ sprul pa'i sprin khyab par byas nas/ chos kyi dbyings rang rang gi gnas su slar zhugs so zhes pa ni/gong du bcom ldan 'das kyis ba spu'i bu ga thams cad nas/ chos kyi dbyings nas 'phrul pa'i sku 'byung ba de dag bcom ldan 'das rnam par snang mdzad kyi sems kyi dbang tsam gyis/ sangs rgyas kyi sku mngon par byang chub pa dang / chos kyi 'khor lo bskor ba la sogs pa sems can gyi khams thams cad du rang gi sku rig par byed pa/sprul pa'i sku mang pos khyab par byas nas/ sems kyi dbang tsam gyis rang rang gi chos kyi dbyings su slar zhugs pa bstan to zhes pa ste/ sems kyi dbang tsam gyis zhes pa ni/ bcom ldan 'das rnam par snang mdzad de/ sgrub pa po lta bur blta/ sprul pa'i sku rnams 'byung ba ni bsgrub pa'i lha rnams lta bur blta'o/ /chos kyi dbyings kyi las 'phrul pa'i de bzhin gshegs pa'i sku zhes pa ni/ chos kyi dbyings kyi byin gyi rlabs kyi bcom ldan 'das rnam par snang mdzad kyi sprul pa'i sku rnams 'byung zhes pa ste/ des kyang chos kyi dbyings kyi byin gyi rlabs dang /sgrub pa po'i sems kyi dbang tsam gyis rang gi sku'i gzugs su snang bar gyur pa/ ma 'ongs pa'i gdul ba'i 'gro ba rnams la bstan pa'o/ /chos kyi dbyings rang rang gi gnas su slar zhugs so zhes pa ni slar bsdu'i bu ga rnams su zhugs pa la ni mi bya'i/ gang du byung ba de dag gi gnas nyid du chos kyi dbyings stong pa nyid kyi rang bzhin du mi snang bar gyur pa la bya'o//de ltar bcom ldan 'das kyis rang gis sku las de bzhin gshegs pa'i sku rnams 'byung bas/ sems can gyi khams thams cad du khyab par byas te/ slar mi snang bar gyur pa bstan nas/yid mi zad pa'i rdo rje'i byin gyi rlabs gsang ba'i dkyil 'khor dang dkyil 'khor gsum gyi cho ga'i lhag ma rnams bshad par gsungs pa/ de nas bcom ldan 'das kyis phyag na rdo rje byang chub sems dpa' la bka' stsal pa zhes pa la sogs pa ste/ gsang ba zhes pa ni dkyil 'khor 'di'i yid kyi rang bzhin chos kyi sku'i byin gyis brlabs pas yid kyi rang bzhin chos kyi sku ste/ dngos por bstan pa'i rang bzhin ma yin to/ phra bas na gsang ba zhes bya'o/ /gnyis su na sku dang gsung gi rang bzhin phyag bzhin phyag rgya'i rang bzhin du bsgyur bas sku dang gsung du mi mngon pa la'ang bya'o//lha rnams gshegs pa'i gnas zhes pa ni/ dbang chen la sogs pa'i dkyil 'khor de dag lha rnams byin gyis brlab pa'i gnas yin pa'i phyir ro/ /rang gi sa bon gyi mtshan mas btab pa zhes pa ni/ dbang chen la sogs pa'i dkyil 'khor so so'i sa bon a ba la sogs pa'i mtshan mas btab pa zhes pa'o//thog mar dkyil 'khor sngags pa yis/ /bdag gi lus la dgod do zhes pa ni/ tshon dgye ba la sogs pa'i sngon rol du/ sngags pa sbyor ba'i stan sngar bshad pa la gnas nas/ snga ma bzhin du dbang chen la sogs pa'i dkyil 'khor lus la rim bzhin du bzhag go zhes pa ste/de bas na gsungs pa/ rkang pa nas rked pa'i bar du ni bsam pa yang ni dbang chen du/ de nas snying ga'i bar du ni chur bsam mo/ /chu yan chad ni me ru ste/ me yan chad ni rlung du yang zhes pa ste/ chu yan chad me ru ste zhes pa ni/ snying g.yan chad me ru bsam par gsal na me yan chad ni rlung du yang zhes pa ni/rlung du gang yan chad bsam pa'i mtshams gsal bar ma smos kyang dbang po chen po'o/ /snying po las smin mtshams su yi ge hUM bsam par gsungs pas/ smin mtshams yan chad rlung gi dkyil 'khor bsam par shes par bya'o//mkhas pa yis ni bsams nas su/ /de nas sa la gzugs bzhag go/ /zhes pa ni sngags pas de lta bu'i ting nge 'dzin byas nas/ gzugs brnyan gyi dkyil 'khor sa la bri bra bya'o zhes pa'o/ /de nas phyag na rdo rjes bcom ldan 'das rnam par snang mdzad kyi lus dang ngag dang yid kyi sa la zhugs nas zhes pa ni bcom ldan 'das kyi lus dang ngag dang yid mi zad pa'i rdo rje rgyan la zhugs zhes pa'o//chos mnyam pa la bltas te zhes pa ni/ don dam par yang chos thams cad stong pa nyid kyi rang bzhin mnyam pa'o/ /kun rdzob tu yang de bzhin gshegs pa'i sku la sogs pa dang / sems can gyi khams ji snyed par mnyam pa la bya'o/ /ma 'ongs pa'i 'gro ba rnams la bltas nas zhes pa ni/ ma 'ongs pa'i 'gro ba rnams kyi don du sngags kyi rgyal po 'di smras so zhes pa ste/ ma 'ongs pa'i dus na sngags pas dkyil 'khor 'dri ba'i sngon rol du/ sngags kyi rgyal po 'di bsnyen par byas nas/ dkyil 'khor 'dri ba'i phyir dang / sngags 'di'i don la 'jug pa dang 'dis bsrung bar bya pa'i phyir ro/ /phyag na rdo rje de gsang ba'i bdag pos smras ma thag tu zhes pa nas/ rdzogs pa'i sangs rgyas dpang du 'gyur/ /'jig rten khams na bzhugs pa zhes pa'i bar du phyag na rdo rje rig pa'i rgyal po 'di smras pa'i rjes su bsngags pa gsungs so//de nas dpal ldan rdo rje 'chang / /zhes pa nas/ chos rnams mtshan nyid de 'dra'o/ /zhes pa'i bar du gong du bcom ldan 'das kyis tshigs su bcad pa gsungs te/ the tshom dang yid gnyis med par lam 'di khyed kyis sgoms shig ces gdams pa de nyid kyi don te/phyag na rdo rje ji ltar chud pa ltar/ /bcom ldan 'das la bsnyad pa ste/ chud pa de yang bcom ldan 'das kyi byin gyis rlabs su chud do zhes gsungs so/ /de nas dpal ldan rdo rje 'chang / /bsam pa rab tu rangs mgu ba/ /zhes pa la sogs pa ste/ bdag ni sangs rgyas bcom ldan 'das rnams kyis dgongs zhes pa ni/ phyogs bcu'i sangs rgyas thams cad kyis phyag g.yas pa brkyang ste/ spyi bor bzhag nas byin gyis brlabs zhes pa'o/ /chos de dag ni mtshan nyid med de zhes pa'i phung po dang / khams dang skye mched la sogs pa'i tshes rnams rang bzhin gyis 'od gsal ba ni mtshan ma dang bral ba'o//gnas med pa ni pha rol po rnams kyi cha shas can la sogs pa kun gyi gnas su brtags pa de yod pa ma yin zhes so/ /ngo bo ma yin zhes bya ba ni/ bdag dang bdag gi rang bzhin yod pa ma yin zhes pa'o/ /las dang tshe las rnam par bral//zhes pa ni chos rnams kyi rgyu dang 'bras bu'i rang bzhin med ces pa ste/ de ltar rgyu dang 'bras bu'i rang bzhin med pas na/ mtshan nyid med pa zhes pa la sogs pa'i tshig gong ma dang sbyar ro/ /rdzogs pa'i sangs rgyas rang bzhin zhes pa ni/ chos thams cad dngos po yod pa gang yang ma yin te/'du shes tsam du zad do zhes pa'o/ /mgon po rnams kyi thabs kyis ni/ /snying rje dbang du gyur pas su/ /chud par byas nas chud par bya'o/ /zhes pa ni chos kyi mtshan nyid de 'dra ba ni/ bcom ldan 'das kyi thugs rje chen po'i thabs kyi sgo nas byin gyis brlabs pas bdag cag gi chud do zhes pa'o//de ltar phyag na rdo rje gsang ba'i bdag pos gleng pa'i tshigs su bcad pa de ched du smras nas zhes pa nas/ las dang skye ba las thar par ni/ ji ltar sngags pa nam zhig 'gyur/ /zhes pa'i bar du gsang ba'i dkyil 'khor bri ba dang / dkyil 'khor gsum char gyi cho ga'i lhag ma rnams dris pa ste/slob dpon gyi ting nge 'dzin dang dbang bskur ba'i cho ga rnams ma gtogs par gzhan thams cad dkyil 'khor gsum char cho ga mthun par shes par bya'o/ /snying rje chen po 'byung ba'i dkyil 'khor gyi rgyal po'i de'i the tshom bcad pa dang zhes pa ni dkyil 'khor gsum char yang snying rje chen po las byung bas na/gsang ba'i dkyil 'khor la snying rje chen po 'byung ba zhes pa'o/ /the tshom bcad pa ni 'og nas 'byung ba'i don rnams ma bshad na/ cho ga rnams ma rdzogs pas ma 'ongs pa'i 'gro ba rnams the tshom can du 'gyur te/ de bas na de dag gi the tshom bcad pa'i phyir zhes pa ste/ma 'ongs pa'i 'gro ba rnams la brtags nas zhes pa la sogs pa ste dngos kyis gsungs pa'o/ /dngos po 'di rnams dris pa'i lan ni/ 'og nas zhib tu 'byung bas na/ de dang sbyar bar bya'o/ /da ni 'og tu phyag na rdo rjes bcom ldan 'das kyis bshad pa'i skabs la bab ste/de nas sangs rgyas kun mkhyen la sogs pa'o/ /phyag na rdo rjes dris pa rnams kyang bcom ldan 'das kyis spyir bsdus te/ rnam pa gsum du byas nas gsungs pa/ gsang ba'i dkyil 'khor bri ba dang / /lha rnams dgod pa'i gnas kyang ni/ /snying rje chen po'i rtsa las byung //theg pa chen po'i gnas mchog ste/ /sangs rgyas kun gyi gsang chen po/ /khyod kyis kun kyang dris pa ni/ /mdo ru yang ni bstan par bya'o/ /zhes pa ste/ de la/ lha rnams dgod pa'i gnas kyang ni/ /zhes pas 'jig rten dang 'jig rten las 'das pa'i lha'i bye brag dang / lha de rnams kyi kha dog la sogs dris pa dang /lha rnams kyi gnas dbang chen la sogs pa'i dkyil 'khor du brtags pa la sogs brtag pa dang / de dag mdor bsdus te gsungs pa'o/ /theg pa chen po'i gnas mchog de/ /zhes pa ni sngags pa byang chub sems dpa' dang thams cad mkhyen par ji ltar 'gyur/bden pa thob pa ji ltar zhes pa dris pa de dag bsdus te gsungs pa ste/ tshig de dag ni byang chub tu gzhol ba'i tshig pas theg pa chen po'i lam mchog ces bya'o/ /gzhan rnams kyang theg pa chen po'i tshig yin mod kyi/ gzhan pas 'di nye zhing gtso bo'i phyir ro/ /de gnyis las gzhan pa slob dpon gyi mtshan nyid dang /tshon 'gyed pa la sogs pa ji srid dris pa de dag thams cad gsang ba'i dkyil 'khor bri ba zhes pa'i nang du 'dus par rig par bya'o/ /de la skabs 'dir gsang ba'i dkyil 'khor zhes pa ni dkyil 'khor gsum char gyi cho ga spyir dris pa'i dngos po de dag nyid chen po 'byung ba'i rgyu zhes pa'o//dam tshig can ma yin pa las mi bstan pas gsang zhes bya'o/ /gzhan ni gong du smos pa bzhin no/ /'byung ba chen po zhes gong du dris pa de dag thams cad bla na med pa'i byang chub kyi rgyu she dag dris pa'i dngos po de dag nyid chen po 'byung ba'i rgyu zhes bya'o/ / snying rje chen po rtsa las 'byung / /zhes pa ni dkyil 'khor de dag snying rje chen po las byung bas/ de'i yo byad dris pa'i dngos po de dag snying rje chen po'i rtsi las 'byung zhes bya'o/ /sangs rgyas rdzogs pa'i gsang chen po/ /zhes pa ni theg pa chen po'i gnas mchog de dag la sogs pa snod ma yin pa'i sems can rnams la mi bshad pas gsang ba chen po zhes bya'o//dkyil 'khor gyi ni thog ma ru/ /zhes pa nas/ so so'i las la 'dod bzhin du'o/ /zhes pa'i bar du'o zhes pa dkyil 'khor bri ba'i sngon rol du/ slob dpon gyis bdag dang slob ma bsrung ba la sogs pa'i las byas pa'i sngags rnams la yun du bsnyen pa byas nas/so so'i las la sbyar ro zhes gsang ba'i rgyud la sogs pa nas 'byung ste/ de'i phyir rig pa'i rgyal po'i dkyil 'khor bri ba'i sngon rol du bzlas pa bya ste/ mtshan ma byung ba'i bar du bzlas na/ de dag thams cad mtshan ma byas par 'gyur ro//'di'i mtshan ma yang dkyil 'khor gyi lhag mar gnas pa na/ sngags pa'i rmi lam du sangs rgyas dang byang chub sems dpa' rnams dkyil 'khor bri ba'i las rtsom pa mthong na zhes pa dang sbyar ro/ /yan lag bcu gnyis tshig las byung / /zhes pa ni yig 'bru yan lag bcu gnyis sngags tshig tu gyur pa la yang bya/gnyis su na yi ge 'bru bcu gnyis las/ don dam pa'i mtshan nyid du chud par 'gyur ba la yang bya ste/ yan lag ces pa ni yi ge 'bru'o/ /pad ces pa ni chud pa la bya'o/ /rig pa'i rgyal po stobs chen po/ /zhes pa ni don dam par kyang stong pa nyid kyi rang bzhin ston par byed pa dang /kun rdzob tu yang sprul pa la sogs pa byed pas na mthu che ba'o/ /de nas rim gyis bzlas par bya/ /zhes pa ni rtsa ba dang snying po dang nye ba'i snying po rim bzhin bzlas zhes pa ste tshig bcu gnyis po tshang bar bzlas zhes pa'o/ /rang gi ting 'dzin la gnas te//zhes pa ni slob dpon rang gi ting nge 'dzin la rigs gsum gyi snying po gnas gsum du bzhag pa dang / dpa' po chen po'i snying po gnas lngar dgod pa dang / yan lag thams cad du yi ge dgod pa gang yang rung ba'i ting nge 'dzin la gnas nas bzlas par bya'o zhes pa'o/ /ji ltar rim pa'i tshul shes nas//so so'i las la 'dod bzhin du'o/ /zhes pa de ltar rim pa dang sngon du bsnyen pa byas nas/ bdag dang / gnas dang / slob ma srung ba la sogs pa'i sngags rnams ji ltar rim par sbyar ro zhes pa ste/ rig pa'i rgyal po 'di sngon du bsnyen pa bya ba yang dkyil 'khor gsum du sbyar bar shes par bya'o//slob dpon gnyis su shes par bya/ /zhes pa nas/ sangs rgyas rkang gnyis gtso bos so/ /zhes pa'i bar du slob dpon gyi mtshan nyid dang bye brag bshad pa ste/ de 'ang spyi'i mtshan nyid dang bye brag bshad pa ste/ de la spyi'i mtshan nyid ni/ theg pa gsum 'byed mkhas pa/ byang chub kyi sems dang ldan pa zhes pa la sogs pa sngar bshad zin to/ /'dir ni zab cing rgya che ba la mos pa dang / dmigs pa can gyi bye brag bshad pa ste de bas na/ de yi mtshan ma rtogs par bya/ /zab mo dang yang ba yin zhes pa la mos pa'o/ / phyag rgya sngags rgyud rtogs pa ste/ /zhes pa ni slob dpon gnyis kyi spyi'i mtshan nyid de phyag rgya dang sngags rnams gzhung las ji skad bshad pa bzhin shes pa zhes pa'o/ /zab ste rgya cher shes par bya/ /zhes pa nas/ mthong ba'i chos ni rnam par spang ba'o/ /zhes pa'i bar du zab cing rgya che ba la mos pa'i slob dpon gyi bye brag ste zab pa ni stong pa nyid dmigs su med pa la mos pas/de'i sems kyi rgyud sus kyang rig par mi nus te dpag dka' zhes pa'o/ /rgya chen po'i don dam par chos thams cad stong pa nyid nam mkha'i rang bzhin lta bur chud pa'o/ /kun rdzob tu 'ang sgyu ma dang smig rgyu lta bur shes nas/mchod pa la sogs pa rgya chen por sbyor ba'o/ /sems can rnams la yid mi ches pa ni sems can rnams dang / spyod lam mi mthun pas gcig la gcig yid mi rton pa'o/ /sangs rgyas rnams kyi sras mchog ste/ /zhes pa ni sangs rgyas kyi spyod pa dang rjes su mthun pa'i phyir te/'jig rten na yang ba'i spyod pa dang mi 'gal bar spyod pa ni be'u mchog ces bya'o/ /mthong ba'i chos ni rnam par spang ba'o/ /zhes pa ni 'jig rten gyi kun rdzob kyi chos rnams lam chags pa'o zhes pa'o/ /gnyis po da ltar yis ni zhes pa nas/ sangs rgyas rkang gnyis gtso bos so/ /zhes pa'i bar du dmigs pa can gyi slob dpon gyi bye brag ste/ mthong ba yi ni chos kyis su/ /mos nas dmigs par 'gyur ba ste/ /zhes pa ni nyan pa dang bsam pa'i shes rab kyis sngags kyi rgyud la sogs pa thos shing / bsam pa stong pa'i rang bzhin du mos su zin kyang bsgom pa'i shes rab kyis goms par bya bar mi nus pas/phyi rol gyi spyod pa rnams la mos par 'gyur te/ de 'jig rten gyi dkyil 'khor tshon la sogs pas bri bar bcom ldan 'das kyis dbang bskur zhing lung stsal to zhes pa'o/ /'jig rten gyi dkyil 'khor zhes pa ni tshon la sogs pas bris nas 'jig rten pa rnams kyi lta ba'i spyod yul du gyur pas 'jig rten gyi dkyil 'khor zhes bya'i mu stegs pa la sogs pa'i dkyil 'khor la ni mi bya'o//de bas na slob dpon dmigs pa can gyis phyi rol gyi tshon la sogs pas dkyil 'khor bri bar dbang bskur gyi/sems kyi dbang du mi 'gyur bas yid kyis dkyil 'khor bri bas ni dbang mi bskur ro/ /zab cing rgya che ba la mos pa'i slob dpon de ni phyi'i dkyil 'khor dang / nang gi dkyil 'khor gnyis ka bri bar dbang bskur te phyi rol gyi spyod pa rnams la mi chags shing / sems kyi dbang du gyur pas nang gi dkyil 'khor bri bar dbang bskur ro//slob ma rnams kyi yid dang sbyar ba'i phyir phyi rol gyi dkyil 'khor yang bri bar gsungs so/ /slob ma rnams rig bya zhes pa nas/ slob ma de ni rgyal ba'i mchog /ces bya ba'i bar du slob ma'i bye brag bshad pa ste dus dang dus ma yin par dbye ba zhes pa ni spyir slob ma rnam pa bzhi slob ma kha cig sngags kyi rgyud la sogs pa thos shing shes/byang chub kyi sems kyang bsgoms pas ni dkyil 'khor du bcug pa nyid kyi tshe na bsgrub par dbang bskur/ byang chub kyi sems dang mi ldan pas kyang slob dpon dmigs pa can gyi mtshan nyid dang ldan na de nyid kyi tshe na slob dpon du dbang bskur bar bya ste/de dag ni gcig ni de'i dus na bsgrub ces pa'o/ /gcig ni sngags kyi rgyud la sogs pa thos shing shes kyang byang chub kyi sems ma bsgoms na bsgrub par mi rung ste/ der dkyil 'khor du bcug nas byang chub kyi sems bsgom pa'i thabs bstan te/byang chub kyi sems goms par gyur na/ phyis sgrub par dbang bskur bar bya ba ni gnyis po'i dus na bsgrub pa'o/ /de bzhin du slob dpon du dbang bskur na yang sngar sngags kyi rgyud la sogs pa ni mi shes na/ der dbang mi bskur bar sngags kyi rgyud la sogs pa rdzogs par slob tu bcug ste slob dpon gyi mtshan nyid dang ldan na/slob dpon du dbang bskur ba ni gnyis po'i dus na bsgrub pa'o/ /de kha cig snga nas kyang rgyud la sogs pa mi shes shing byang chub kyi sems kyang ma bsgoms/ phyis kyang mi slob la/ sgom par mi 'gyur ba'i phyir dkyil 'khor du gzud pa tsam yin gyi dus gnyis kar yang slob dpon dang /bsgrub par dbang mi bskur ba ni gnyis kar ma yin zhes pa'o/ /mtshan rnams kun ni rdzogs pa'o/ /slob ma de ni rgyal ba'i mchog /ces pa ni rgyud la sogs pa yang rdzogs par shes/ byang chub kyi sems kyang tshul bzhin du bsgoms/'ga' zhig bsod nams spel ba'i phyir dkyil 'khor du zhugs pa de yang slob ma'i grangs su yang gtogs te/ de ni dbang la sogs pa bskur bas 'dir dbang la sogs pa gdod bskur mi dgos te/ de ni mtshan rnams kun rdzogs pa/ /zhes bya'o/ /da ni thog mar rig bya ba//zhes pa nas/ de bas rtog pa rnams spangs la/ /sa kun yang ni sbyang bar bya'o/ /zhes pa'i bar du sa sbyang bar bshad pa ste/ sa la phyi nang gi rnam pa gnyis te/ de la phyi'i sa sbyang ba ni sngar bshad zin to/ /'dir ni nang gi sa sbyang bar bshad de/ sems kyi sa zhes bya ba yin//zhes pa'o/ /sbyang ba sngon du bshad pa ste/ /zhes pa ni sngar byang chub kyi sems rang gi sems ji lta bu nyid du shes pa ste kha dog tu yang ma yin/ dbyibs su yang ma yin zhes pa nas rnam pa thams cad du btsal kyang mi rnyed do zhes pa la sogs pa'i bar du ste de'i tshul du ting nge 'dzin dag pa dang ji bzhin pa thams cad spangs pa dang /rnam rtog dang bral bas na sems kyi dri ma dag pa ste/ de ltar dag par byas nas phyi rol gyi dkyil 'khor ram nang gi dkyil 'khor gang yang rung ba bri bar bya'o zhes pa'o/ /de yis ni yongs su sbyang ba zhes pa ni sngar byang chub kyi sems sbyang ba bshad pa ste/sems kyis sbyang bar bya'o zhes pa'o/ /nam zhig nyes dang bral ba ni/ /mi 'jigs pa ni sems kyis zhes pa ni ji ltar phyi rol gyi sa'i nyes pa rus pa dang rdo ba la sogs pa med pa bzhin du/ 'dir ni rnam par rtog pa la sogs pa dang 'dod chags la sogs pa'i nyon mongs pa rnams dang bral na bgegs la sogs pas skabs mi rnyed pas mi 'jigs pa zhes bya'o//de bas na/ gsungs pa de ni dag pa ste/ /nyes pa kun dang bral ba'o/ /zhes pa'o/ /de bas 'di ltar rig par bya/ /zhes pa nas/ rtog pa sdug bsngal rgyud 'gyur ba'o//zhes pa'i bar du phyi rol gyi sa rnams sbyang ba yang byang chub kyi sems dang mi ldan par rtog pa la gnas te sbyong ba ni mi dbang ngo zhes pa ste/ de las gzhan yang ni zhes pa gong gi sbyang ba las gzhan pa ste phyi'i sa la bya'o/ /sngags mkhan rtog pa la gnas te/ /zhes pa ni phung po dang khams dang skye mched la sogs pa'i dngos por yod par rtogs te sbyang bar bya ba'i sa dang /rus pa la sogs pa'i nyes pa yang dngos po yod par rtog cing sa de sbyang na/ de byang chub sems dang mi ldan pas de dag par 'gyur ba ma yin zhes pa ste/ de bas na gsungs pa de bas rnam par spangs pa la sogs pa phyi rol gyi sbyang ba/rgya cher bshad pa de yang rtog pa 'ba' zhig gnas nas sbyang ba ngas bshad pa ni byang chub kyi sems sngon du bar sa de sbyang bar bshad pa ste/ byang chub kyi sems sngon du ba yang ni slob dpon gyi mtshan nyid smos pa nyid na slob dpon shes rab kyi pha rol tu phyin pa'i tshul la mkhas pa theg pa gsum 'byed mkhas pa zhes pa la sogs pa smos pas byang chub kyi sems sngon du rig par bya ste/shes rab kyi pha rol tu phyin pa'i tshul la mkhas pa ni stong pa nyid kyi rang bzhin la mkhas par mngon no/ /theg pa gsum 'byed mkhas pa yang gang zag dang chos la bdag med pa'i bye brag la mkhas pas stong pa nyid la mkhas par mngon te/dkyil 'khor gyi las 'di rnams thams cad kyang slob dpon gyi bya ba byas pas slob dpon de lta bu dang ldan pas sa sbyang bar bya na rtog pa 'ba' zhig la mi gnas kyi byang chub kyi sems dang ldan par 'jig rten pa rnams kyi sems dang sbyar ba'i phyir/phyi rol gyi sa rnams sbyang bar bcom ldan 'das kyis rgya cher bshad pa de'i dgongs pa de ma mos pa rnams kyis shes par mi 'gyur ba zhes pa'o/ /gang gis de lta bu'i rtog pa ma spangs pa de ni sangs rgyas dang thams cad mkhyen pa'i rgyur mi 'gyur ro zhes bya ste/ de bas na gsungs pa/ 'jig rten du na sangs rgyas ma yin zhes pa la sogs pa/ byang chub sems kyis sbyang ba ru/ /slob ma rnams la nan tan bya/ /zhes pa ni slob ma sbyang ba ste/ de yang smon lam gyi byang chub kyi sems dang 'jug pa byang chub kyi sems gnyis kyis sbyang bar bya ste/ 'jug pa'i byang chub kyi sems kyis sngar bsgoms na de yang sbyang ba ste/ phyis dkyil 'khor du 'jug kar smon lam gyi byang chub kyi sems sbyin pa dang gnyis kyis sa sbyang ba'o/ /de ste sngar 'jug pa'i byang chub kyi sems goms par ma byas na dkyil 'khor du 'jug pa'i tshe smon lam gyi byang chub kyi sems byin la phyis 'jug pa'i byang chub kyi sems sgom du gzhug pa ste/de ni slob ma rnams byang chub kyi sems kyis sbyang ba'o/ /srung ba mi g.yo mgon po ste/ /yang khams gsum rnams brtul bas zhes pa ni slob ma rnams kyi srung ba ste/ slob ma rnams thog mar nang du 'ong ba'i tshe srung ba dang lhag par gnas pa'i tshe srung ba la sogs pa thams cad 'di gnyis gang yang rung bas bsrung zhes pa'o//slob ma nam zhig mi g.yo ba/ /dmigs pa rnams kyis nam yang rung / /de tshe yongs su dag pa ste/ /nam mkha' dri ma med pa'o/ /zhes pa ni slob ma dag pa'i mtshan nyid gsungs pa ste/de yang nam slob ma de sbyor ba la gnas pa'i tshe ting nge 'dzin dag pa dang / rnam par rtog pa spangs pa dang ji bzhin pa nyid dang bral ba ste dge ba dang mi dge ba gnyis ka la dmigs pas ma g.yos pa dang / sbyor ba las langs nas yang mchod pa la sogs pa'i dge ba ni spyod kyi/'dod chags la sogs pa'i yul la dmigs pas mi g.yo bar gyur na de dag pa'i mtshan nyid ces pa'o/ /dri med nam mkha' 'dra'o zhes pa ni/ ji ltar nam mkha' cis kyang ma bsdus pa'i tshe/ rang bzhin gyis dngas pa dang / glo bur gyi sprin la sogs pas chod na yang nam mkha' rang bzhin dag pa ste/de nyams par mi 'gyur ba bzhin du 'di yang ting nge 'dzin la gnas pa'i tshe/ dge ba dang mi dge ba gnyis la rtog pa'i dri ma med pa dang / ting nge 'dzin las langs pa'i tshe mchod pa la sogs pa'i spyod pa byed kyang sgyu ma la sogs pa'i rang bzhin du byed de dngos po yod par rtog pa'i dri mas mi gos pa'i phyir ro//byin gyis brlab pa dang po ste/ /yongs su dag ces bya ba yin/ /gnyis po sems kyi skyid bang gis te/ /gzhan gyi su ni ma yin no/ /zhes pa ni sngar snying rje chen pos sa yongs su gzung ba'i tshe dkyil 'khor gyis sbyangs pa der/sangs rgyas lnga bsam pa la sogs pa gsungs pa de nyid 'dir gleng ste/ rim du bshad pa ste/ dkyil 'khor gyi sa de dang por sangs rgyas bcom ldan 'das rnams der bsams nas byin gyis brlab/ de'i 'og tu sems kyis bdag gi bar gzung / de'i 'og tu sngags kyis bsrung ba ste de gsum gyis yongs su gzung gi de las gzhan du ma yin zhes pa'o//srad bu rnam pa bzhir bshad de/ /zhes pa nas/ lnga po nam mkha' 'dra bar bshad/ /ces pa'i bar du ni sngar tshon lnga'i srad bu zhes spyir bshad pa ste/ tshon sna lnga gang yin pa 'dir ming gis smos pa gsal bar bshad pa'o//bar snang la ni bzung nas su/ /de yang dkyil 'khor bri bar bya/ /zhes pa ni dkyil 'khor snga ma la/ lte ba'i thad kar srad bu gzung / /zhes spyir gsungs kyi dkyil 'khor gar bri bar ma bshad de/ de nyid gsal bar gsungs pa/ bar snang la srad bu bzung nas bar snang der dkyil 'khor bri zhes pa'o//srad bu gnyis pa de yis nam/ /sa la dkyil 'khor bri bar bya'o/ /zhes pa ni sngar srad bu gnyis po blangs nas kha shar phyogs su blta zhes pa la sogs pa'i spyir smos te/ dkyil 'khor nyid gar bri bzhin du ma bshad de/ de nyid la gsal bar gsungs pa/bar snang la bri zhes pa'i 'og tu srad bu gnyis pa blangs pa des sa la dkyil 'khor bri'o zhes pa'o/ /sangs rgyas kun gyi gdan dang ni/ de'i sras dpa' bo rnams kyis yang / /pad+mo yid du 'ong mchog ste/ bkra shis 'jig rten gyis bsngags so/ /zhes pa ni gdan pad+mo dkar pos bya'o zhes pa ste/yid las byung ba'i mchog ces pa ni sngar bzlas pa'i yan lag bzhi bshad pa'i tshe/ snying gar pad+mo dkar po bsam par bshad par bya ste/ 'dir pad+mo dkar po zhes ma bshad pas yid las byung ba'i pad+mo smos pas yid kyis bsams pa'i pad+mo dkar po de dang 'dra ba'i gdan bya'o zhes pa'o//rang rgyal dgra bcom rnams kyis ni/ /phyogs gcig ces par bsgrags pas na/ /de dag stan du rig par bya'o/ /pad+mo rnams kyi 'dab ma zhes pa ni nyan thos dang rang sangs rgyas ye shes phyogs gcig pa dang ldan pa rnams kyi stan pad+mo dkar po 'dab ma gcig gi steng du bya zhes pa'o//'jig rten gyi lha rnams la zhes pa nas/ rgyal por bsgrags pa de'i stan no/ /zhes pa'i bar du 'jig rten pa'i lha tshangs pa la sogs pa rgyal po chen po'i gzugs can de dag 'dod chags dang bcas pas pad+mo dkar po'i stan du bshad pa'o//lhag ma rnams ni gar rigs par sa'i rim pa las bsam par bya'o zhes pa ni/ 'jig rten gyi 'khor phal pa rnams bla ma'i drung na bla ma dang 'dra ba'i pad+mo'i stan ni mi rigs pas de las dma' ba'i stan rnams gar rigs par bya'o zhes pa ste/ nyan thos dang rang sangs rgyas dang 'jig rten pa'i lha rnams kyi stan 'dir bshad pa yang /'di rnams dkyil 'khor 'dir ma smos pas zhar la bshad par shes par bya'o/ /dkyil 'khor bar ma la gshin rje la sogs pa 'jig rten gyi lha rnams smos pa yang de bzhin gshegs pa'i sku las sprul pa sha stag pas pad+mo'i gdan nyid du shes par bya'o//'jig rten pa rnams kyi ma yin no/ /mchod pa rnams ba bzhir shes par bya'o zhes pa nas/ 'jig rten gyi rim bzhin du'o zhes pa'i bar du mchod pa rnams bshad pa ste/ de la spyir mchod pa rnam bzhi ste thal mo sbyar ba dang / byams pa dang / snying rje dang / me tog dang bdug pa la sogs pa dang yid kyis mchod pa'o//de la sngags pa zab cing rgya che ba las mchod pa ni mchod pa 'di bzhi char spyod de yid kyi mchod pa yang byed/ phyi rol gyi mchod pa yang mthong / dmigs pa can gyi sngags pa ni phyi rol gyi mchod pa rnams byed kyi/ /ting nge 'dzin mi 'khrugs pas yid kyi mchod pa med do//byams pa dang snying rje ni nan tan gyis mchod pa ste phyi dang nang gi mchod pa gang yang rung ba byas nas/ sems can rnams la byams pa dang snying rje bskyed nas mchod pa de dag nyid sems can rnams la sngo bar byed pa'o/ /de la phyi rol gyi mchod pa rnams ni sngar bshad zin to//da 'dir ni yid kyi mchod pa bshad par bya ste/ de la/ thal sbyar me tog 'gyur ba yis/ /zhes pa la sogs te de la/ thal sbyar me tog 'gyur ba yis/ /zhes pa ni de thal mo sbyar ba las me tog 'byung ba des mgon po rnams la gsol zhes pa ste/ de nyid dgrol ba gsungs pa/ phyag rgya yan lag kun 'byung bas/ /byang chub sems ni rnam bsgoms nas/ /zhes pa ste yid kyi mchod pa bya ba yang thog mar bdag gis phyag rgya 'di bcings pas ji ltar bsams pa bzhin du sangs rgyas dang byang chub sems dpa' rnams la mchod pa'i sprin 'byung bar shog cig ces smon lam btab nas stong pa nyid kyi ting nge 'dzin du gnas te byang chub kyi sems de mngon du bya'o//de ltar ting nge 'dzin la gnas pa nyid na yang yid la nam mkha' mdzod kyi rig pa bzlas te/ de nas phyag rgya de las mchod pa rgya chen po 'og nas smos pa rnams char bzhin bab par bsam mo//de ltar bsams nas chos kyi dbyings kyi byin gyis brlab/ ting nge 'dzin gyi dbang dang sngags kyi mthus de'i tshe sangs rgyas kyi spyan sngar char bzhin du bab par gyur te/ de bas na gsungs pa/ de ni nyes med me tog ste/ /zhes pa la sogs pa rjes su bsngags pa dang bcas par gsungs so//lhag ma rnams kyi lha rnams la/ /zhes pa nas rnam par soms shig /gar rigs par zhes pa'i bar du gzugs brnyan gyi dkyil 'khor tshon gyis bris pa'i lha rnams la phyi'i mchod pa me tog la sogs pa dbul ba'i rim pa bstan pa ste so so'i sngags kyis btab nas thog mar bcom ldan 'das rnam par snang mdzad la sogs pa de bzhin gshegs pa'i rigs mchod de/de nas pad+mo'i rigs la sogs pa la rim bzhin du mchod pa byas te de bas na gsungs pa/ gang du ji ltar rim bzhin du/ /zhes pa la sogs pa'o//mthe bong srin lag rtse sbyar te/ /zhes pa nas 'jig rten gyi sde rim bzhin du'o zhes pa'i bar du'o/ /mchod pa rnams dbul ba'i thabs bstan pa ste me tog dbul bar gsungs pa/ mthe bong srin lag rtse sbyar nas/ /zhes pa la sogs pa'i 'jig rten gyi lha rnams las gzhan ni lte ba'i thad kar rig par bya'o zhes pa ste/'jig rten zhes pa ni 'dir gzugs brnyan gyi dkyil 'khor gyi lha rnams la bya ste/ de'i lha rnams la lte ba'i thad ka nas me tog dbul bar bya'o/ /'jig rten las 'das pa'i yid kyi dkyil 'khor rnams la ni snying ga nas dbul bar bshad pa'o//bdug pa khu tshur rdo rjes so/ /yang na pad+mo phreng gis te/ /bar snang la ni bzung nas su/ /'jig rten mgon po rnams la'o/ /zhes pa ni bdug pa gsol ba ni rdo rje lta bu'i khu tshur ram/ pad+mo'i phyag rgya bcings te/ pog snod can du byas na ni rdo rje khu tshur gyis gzung / kham phor ni pad+ma'i phyag rgyas bzung ste yid kyi dkyil 'khor lha rnams la bar snang la stod de bzung nas gsol zhes pa'o//gzugs brnyan gyi dkyil 'khor lha rnams la lte ba'i thad ka nas rim bzhin du gsol zhes pa ste de bas na gsungs pa/ de las lha rnams gzhan dag ni/ /'jig rten gyi rim bzhin du zhes pa'o//sbyin sreg gnyis su rig par bya ste zhes pa nas/ sngags kyi shes pa med pa'o/ /zhes pa'i bar du phyi nang gnyis kyi sbyin sreg bshad pa ste/ de la phyi'i sbyin sreg ni bsreg par bya ste/ sreg pa'i me la sogs pa phyi'i dngos po gzugs la sogs pa la ltos pa'o/ / nang gi sbyin sreg ni de rnams ni sems nyid kyis bya ste/ phyi rol gyi gzugs la sogs pa la ltos pa ma yin te de bas na gsungs pa/ las dang skye ba rnam par bral/ /zhes pa ste phung po dang khams dang skye mched la sogs pa'i chos rnams 'jig par byed pa'i byang chub kyi sems kyis chos rnams stong pa zhig ste/las dang skye ba la sogs pa dmigs su med par rab tu mi 'pho ba'i shes rab kyis chud de yid la phung po la sogs pa dang / sems dang sems las byung ba rnams kyi rgyu dang 'bras bu dag dmigs su med par gyur pa de ni/ las dang skye ba rnam par bral/ /zhes bya ba ste de la sreg par byed pa'i bar du mi 'pho ba'i shes rab bo//sreg par byed pa ni las dang skye ba la sogs pa'o/ /sreg pa'i me ni ji bzhin pa dang bral ba'i yid la bya'o/ /sa bon du ni phyis 'gyur zhes pa ni las dang skye ba sred pa'i mtshan nyid stong pa nyid kyi ting nge 'dzin de las langs nas snying rje'i dbang gis lha'i gzugs su bya ba la bya ste/bdag gi lha gang yin pa'i sngags kyi sa bon las lhar bsgyur ba'i rim pa ji skad du gsungs pa'i tshul gyis bdag nyid kyi lha'i gzugs su bsgyur ba la bya ste/ de la dang po phung po la sogs pa 'jig pa'i byang chub kyi sems ni 'jug pa'i byang chub kyi sems so//ji ltar 'jig cing rtog pa de yang spangs te rab tu mi 'phro ba'o/ /shes rab rnam par mi rtog pa las dang skye ba sreg par byed pa so so rang gis rig pa'i mtshan nyid du gnas pa ni byang chub kyi sems so/ /slar rang gi sa bon las lha'i gzugs su bsgyur ba ni ldang ba'i byang chub kyi sems so//las su 'dod pas sbyin sreg bya/ /zhes pa ni zhi ba dang rgyas pa la sogs pa'i las rnams grub par 'dod pa'i phyir dang nang gi sbyin sreg de bya'o zhes pa ste/ mtshan ma can gyis mtshan ma dang bcas par 'grub/ mtshan ma med pas mtshan ma dang bcas pa gnyis ka 'grub/bya ba dang sbyar te nang gi sbyin sreg phyi rol gyi gzugs la sogs pa la ltos par mtshan ma med pa des kyang shing la sogs pa mtshan ma dang bcas pa rnams 'byung bar 'gyur ro zhes pa'o/ /phyi rol gyi gsum ldan zhing zhes pa ni phyi rol gyi sbyin sreg byed pa na gsum dang ldan par bya ba ni zhi ba dang rgyas pa dang mngon par spyod pa'i las gang yang rung ba'i kha dog dang tshul du ldan par bya ba dang rdzas rnams kyang de'i kha dog dang ldan par bsam pa dang /bdag nyid kyang de'i kha dog dang mtshungs shing ldan pa'i lhar bsgyur ba ste/ de ltar me dang rdzas dang bdag gsum zhib la sogs pa'i las gang yang rung ba'i kha dog dang tshul du ldan par bya ba gsum dang ldan pa'o//gsum dang ldan pa zhes pa ni zhi ba dang rgyas pa dang mngon par spyod pa'i dkyil 'khor dbang chen dang chu dang rlung gi gnas gsum dang ldan pa'o/ /gsum la gnas te zhes pa ni zhi ba la sogs pa'i zhugs thab zlum po dang gru bzhi dang /gru gsum po la bsreg pa'i rdzas la sogs pa gnas zhes pa'o/ /las gsum ni gnas grub pa zhes pa ni/ zhi ba dang rgyas pa dang mngon par spyod pa'i 'bras bu gsum 'grub pa'o/ /phyi nang gang yang rung ba'i sbyin sreg gi cho ga de las gzhan du byas na de dag gi 'bras bu thob par mi 'gyur te/de bas na gnyis ka'i spyir gsungs pa gang gis gzhan du byas na ni zhes pa la sogs pa'o/ /de bzhin gshegs pas gsungs pa'i sngags dang zhes pa nas/ lha rnams kyang de bzhin te zhes pa'i bar du sngags kyi lha la sogs pa'i kha dog dang dbyibs dang tshad rnams bshad pa ste/de bzhin gshegs pas bsngags pa/ sangs rgyas rdzogs par gsungs pa ni/ /dkar dang ser du rig par bya/ /zhes pa ni de bzhin gshegs pa'i rigs chos thams cad rnam par dag pa'i mtshan nyid zhi ba'i rang bzhin pas kha dog dkar por rig par bya'o zhes so//sangs rgyas rdzogs par gsungs zhes pa ni shAkya thub pa dang 'phags pa 'jam dpal la sogs pa byang chub sems dpa' kun du sangs rgyas pa rnams kyi ste/ de dag ni ting nge 'dzin las bzhengs nas sems can gyi don la sogs pa spyod pas na tshogs mdzad de/rgyas pa'i mtshan nyid pas kha dog ser por rig par bya'o/ /phyag na rdo rje'i thams cad du/ /zhes pa ni phyag na rdo rje bya ba nan tan gyi ye shes kyi rang bzhin sems can gyi don spyod pa thams cad pas kha dog thams cad du rig par bya'o/ /'jig rten dbang po'i sngags rnams ni/ /dkar te las kyi rim pa'o//zhes pa ni spyan ras gzigs kyi dbang po so sor rtog pa'i ye shes kyi rang bzhin chos thams cad 'khru bar byed pa'i bdag nyid pas kha dog dkar por shes par bya'o/ /gru bzhi ldan par gdon mi za/ /zlum por yang ni rim bzhin te/ /zla ba kham 'dra khru gsum du/ de 'dra dbyibs zhes sgrogs pa yin//zhes pa ni lha de rnams kyi dkyil 'khor dbang chen la sogs pa'i dbyibs bshad pa ste rim bzhin du shes par bya'o/ /gzugs ni gnyis su rig par bya/ /bud med dang ni skyes par ro/ /zhes pa ni lha rnams kyi gzugs bshad pa ste/ de la lha rnams kyang rnam pa gsum ste/ rnam par smin pa'i gzugs dang gnas yongs su gyur pa dang sprul pa ste/ de la rnam par smin pa'i gzugs ni rang gi las dang bsod nams las skyes pa'o/ /gnas yongs su gyur pa ni bsgrubs pa las grub pa'i gzugs so/ /sprul pa ni ting nge 'dzin la sogs pa'i dbang gis yid la bsams par gyur pa ste de dag la la ni skyes par snang /la la ni bud med du snang ba'o/ /yang na kun du thams cad kyang / /kha dog gzugs dang dbyibs rnams ni/ /zhes pa yang na gong du kha dog dkar gnag la sogs pa smos pa dang dbyibs gru bzhi la sogs pa smos so/ / gzugs bud med dang skyes par smos pa de dag chad pa med de/ de dag kun kyang kha dog thams cad dang dbyibs thams cad dang gzugs thams cad du shes par bya'o zhes pa ste/ ci'i phyir zhe na gsungs pa/ bsam yas ye shes las byung bas/ /de bas de yang bsam yas te/ /zhes pa ste de thams cad kyang de bzhin nyid kyi ye shes bsam du med par 'byung ba sha stag gi kha dog dang dbyibs la sogs pa chad pa med pas bsam du med do//de yang ci'i phyir zhe na/ sems can don byed tha dad pas/ /ye shes mkhas pas rtag tu mkhyen/ /zhes pa ste de dag kha dog dang dbyibs la sogs pa spyad pa med pa yang sems can gyi don sna tshogs la mkhas pa'i ye shes des gdul ba'i 'gro ba dang rjes su mthun pa gzugs la sogs pa ston pa'i phyir ro//ji tsam rgya cher yid gyur pa/ /de yi tshad du shes par bya'o/ /stan rnams dang ni phyag rgya dang / /lha rnams go rims kyang de bzhin//zhes pa ni lha la sogs pa'i tshad bshad pa ste nang du yid la bsam pa'am phyi rol du bri ba la sogs pa kun kyang yid la ji tsam du 'dod pa de tsam du bsam pa'am bri bar bya zhes pa'o/ /lha rnams rim kyang de bzhin te/ /zhes pa ni dkyil 'khor du bri ba'i lha rnams kyang snying po'i dkyil 'khor du bri ba rnams ni dkyil 'khor sa'i zheng che bas lha'i gzugs kyang che bar bya/de'i go rims kyang de bzhin du rim gyis chud par bya zhes pa'o/ /sangs rgyas gang las byung ba nas/ /phyag rgya'ang de nas byung zhes bya ba ni phyag rgya gang nas byung ba'i khungs bshad pa ste/sangs rgyas rnams kyi chos kyi dbyings las byung ba'i phyag rgya des bdag dang slob ma la sogs pa lha'i lus byin gyis brlab pa dang / phyag rgya des slob ma la sogs pa bsrung ba ste/ de bsrungs na chos kyi dbyings kyi mtshan nyid kyis btab pas cis kyang mi tshugs par 'gyur ba ni 'jig rten rgyal po'i rgya dang ldan pa'i skyes bu la sus kyang gtse bar mi 'gyur ba dang 'dra'o zhes sngar yang zhib tu bshad do//de bas chos dbyings mdo ru ni/ /phyag rgya'i mtshan ma zhes kyang bya/ /zhes pa ni mdor na phyag rgya rnams chos kyi dbyings kyi mtshan ma yin par shes par bya'o zhes pa'o/ / dbang sbyin rnam gsum rig par bya/ /zhes pa nas/ de'i sngags bsgrags pa yin zhes pa'i bar du dbang bskur ba rnam pa gsum bshad pa ste phyag rgyas dbang bskur ba/ de ni las dang bya ba ste/ /zhes pa ni snying rje chen po las 'byung ba dang / yi ge 'khor lo bskor ba'i dkyil 'khor du nam slob dpon dang slob ma rgya che ba la mos pa dag /phyag rgyas dbang bskur bar bya bar bshad pa ste/ dkyil 'khor de gnyis gang yang rung ba'i mdun du dbang bskur ba'i dkyil 'khor dang / bum pa la sogs pa la mi ltos par kun du bzang po la sogs pa byang chub sems dpa'i phyag rgya dang 'og nas 'byung ba'i phyag rgyas dbang bskur ba'o//las dang bya bar bral zhes pa ni dbang bskur ba'i bum pa dang dkyil 'khor dang dung dang 'khor lo la sogs pa'i cho ga rnams dang bral ba zhes pa'o/ /gnyis po kun gyi gsungs pa ni/ /las dang bya ba las byung zhes pa ni snying rje chen po 'byung ba dang /yi ge 'khor lo bskor ba'i dkyil 'khor gyi mdun du dbang bskur ba'i dkyil 'khor bris nas/ ji skad du sngar gsungs pa'i cho ga bzhin du dbang bskur gsungs pa'o/ /gsum po yid kyis rig par bya/ /dus dang dus yul spangs pa'o/ / zhes pa ni gsang ba'i dkyil 'khor du yid kyis dbang bskur ba ste dngos kyi 'og nas 'byung ba'o/ /bla ma tshul bzhin rim gro byas/ /ji ltar phan par bstan pa ni/ /dbang bskur ba'o zhes sangs rgyas pa/ /de ni bsngags shing bsgrags pa yin/ /zhes pa ni dkyil 'khor gong ma gnyis su phyag rgyas dbang bskur nas rjes su gnang ba'i tshig smras pa la bya ste/phyag rgyas dbang bskur ba'i 'og tu slob dpon slob ma'i nan tan dang rim gro la sogs pas mgu nas/ khyod kyis deng phan chad chos kyi 'khor lo bskor cig ces pa la sogs pa'i tshig tu shes par bya'o/ /phyag rgyas dbang bskur ba dang po dang dbang bskur ba gnyis pa ni snying rje chen po 'byung ba dang yi ge 'khor lo bskor ba'i dkyil 'khor du bya'o//gsang ba'i dkyil 'khor du ni yid kyis dbang bskur ba dngos su gsungs pas/ gong ma gnyis mi bya bar shes par bya'o/ /'di rnams kyang 'dir tshig tsam bshad kyi don gtan la dbab par bsdus pa'i don nyid du bshad zin to//dam tshig rnam pa lnga ru ni/ /zhes pa nas/ dam tshig ces su gzhan mi bya'o/ /zhes pa'i bar du dam tshig can gyi rim pa bshad pa ste/ de la spyir slob ma rnams dkyil 'khor du 'jug pa yang kha cig ni dam tshig can du 'dod pa'i phyir 'jug /kha cig ni sgrub par byed pa'i phyir 'jug /kha cig ni slob dpon du 'dod pa'i phyir 'jug ste/ de la dam tshig can du 'dod pa'i phyir 'jug pa ni dkyil 'khor du 'di gsum gang yang rung ba la zhugs te/ dam tshig can du gyur na dkyil 'khor lhag ma gnyis mi ltos/sgrub pa dang slob dpon du 'dod pa ni dkyil 'khor gsum char ltos par shes par bya'o/ /dkyil 'khor de nyid mthong ba ni/ /dam tshig shes pa cig ces bya/ /zhes pa ni dam tshig gi don ni 'dir tshul las mi 'gal ba'i don te/ dkyil 'khor gsum las gang yang rung ba cig mthong na dam tshig can cig ces bya ba ste/des sngar byang chub kyi sems bsgoms pa na ni de la phyag rgya dang sngags sbyin par bya ste/ sngar byang chub kyi sems ma bsgoms na de la phyag rgya dang sngags sbyin du mi rung ste de bas na gsungs pa/ de la phyag rgyas btab pa'ang med//de bzhin sngags kyang gzung du med/ /ces pa'o/ /de ltar dkyil 'khor der zhugs na phyag rgya dang sngags mi sbyin par byang chub kyi sems bsgom du bcug ste/ goms par gyur nag gdod phyag rgya dang sngags sbyin par gsungs pa/ byang chub kyi sems kyi khyad par ni phyag rgya dang sngags gzung ngo zhes pa'o//dkyil 'khor kyang mthong ba de dam tshig gnyis zhes bya'o zhes pa ni de ltar byang chub kyi sems goms nas yang dkyil 'khor du bcug ste/ phyag rgya dang sngags sbyin pa de ni dam tshig can gnyis zhes bya'o/ /dkyil 'khor phyag rgya mthong ba ni/ / las su bya ba la yang 'jug /bla mas lung ni ma byin pa/ /de yang dam tshig shes zhes bya/ /tsho zhes bya ba ni dkyil 'khor yang mthong la rgyud dang rtog pa la sogs pa yang nyan du bcug la/ slob dpon du lung ma bstan pa de ni dam tshig shes pa gsum zhes bya'o/ /phyag rgya dkyil 'khor bri ba rnams//de tshe cho ga bzhin du bstan/ /sngags pa dbang ni ma thob pa/ /gsang ba'i ye shes 'byung ba'o/ /zhes pa ni snying rje chen po 'byung ba dang / yi ge 'khor lo bskor ba dkyil 'khor pa'i dkyil 'khor gnyis kar dbang bskur ba'am gang yang rung ba cig tu dbang bskur te/phyag rgya dang dkyil 'khor la sogs pa bri ba dang bshad pa de dag cho ga bzhin du des gzhan la yang bstan pa gsungs pa'i dkyil 'khor 'ba' zhig tu dbang bskur ba de ni dam tshig shes pa zhes bya'o/ /sngags pa tshul bzhin dbang bskur ba/ /gsang ba'i dkyil 'khor dbus su ste//dam tshig shes pa lngar rig bya/ /zhes pa ni dkyil 'khor gong ma gnyis su yang dbang bskur ba la gsang ba'i dkyil 'khor du dbang bskur ba de ni dam tshig shes pa lnga zhes bya'o/ /dam tshig can zhes gzhan mi bya/ /zhes pa ni de ltar gong du smos pa las gzhan du cho ga las 'gal bar byas na dam tshig can zhes mi bya'o zhes pa'o//gang gis rtag tu bsgoms pa zhes pa nas/ bden pa mthong zhes bya ba yin/ /zhes pa'i bar du sngar ji ltar/ byang chub sems dpa' zhes bgyi zhes/ /ji ltar thams cad mkhyen pa lags/ /ji ltar bden pa mthong ba lags//zhes dris pa de dag bshad pa ste/ gang gis rtag tu bsgoms pa ni/ /dka' thub byang chub sems la ste/ /gnas gsum du ni mi dmigs pa/ /byang chub sems dpa' zhes kyang bya/ /zhes pa ni gang byang chub kyi sems rtag tu bsgoms te lus dang ngag dang yid kyi gnas gsum mam/'dod pa'i khams dang / gzugs yod pa'i khams dang / gzugs med pa'i khams kyi gnas gsum 'jug pa'i byang chub kyi sems kyis bshig ste dmigs su med par byed pa de ni byang chub sems dpa' zhes bya'o/ /sems can la ni thabs bskyed nas/ /sems can don la rab 'jug pa//dmigs pa med pa'i spyod pa yi/ /rgyal ba'i mchog tu rig par bya'o/ /zhes pa ni dmigs pa med pa'i spyod pa thob nas de las langs te chos rnams sgyu ma lta bur shes bzhin du thabs kyis sems can gyi don du spyod pa de ni thams cad mkhyen pa zhes bya ste/dmigs pa med pa'i spyod pa thob/ /ces pa'i mos pa spyod pa'i tshe na/ 'jug pa'i byang chub kyi sems kyi chos rnams bshigs nas gnas pa'i byang chub kyi sems kyi mtshan nyid stong pa nyid la gnas pa na don dam par yang chos rnams dmigs su med de/ kun rdzob tu yang chos rnams 'khrul pa'am sgyu ma lta bur chud pas ni mi dmigs pa'i spyod pa thob ces pa'o/ /rgyal ba'i mchog ces pa ni de ltar kun rdzob dang don dam par chos rnams dmigs su med par chud pa ni bdud bzhi dngos su ma bcom yang bdud bzhi las rgyal ba'i ngang tshul can pas rgyal ba'i mchog ces bya'o//thog ma nas su zhi ba'i chos/ /rang bzhin med la gang gis ni/ /sems ni ri rab bzhin 'dug na/ /de ni bden pa mthong zhes bya/ /zhes pa ni bden pa mthong ba bshad pa ste/ de rnams chos rnams thog ma nas zhi zhing rang bzhin med par gang gis chud de/de nyid la sems ni ri rab bzhin du mi g.yo bar gyur na de ni bden pa mthong zhes bya ste/ de la mdor na thog ma ni 'jug pa'i byang chub kyi sems dang ldan pa'o/ /bden pa mthong ba zhes pa ni gnas pa'i byang chub kyi sems bshad pa'o/ /rgyal ba'i mchog ces pa ni ldang ba'i byang chub kyi sems su bstan pa ste/de dag kyang mos pa spyod pa'i sa nyid la gnas pa'i yon tan du shes par bya'o/ /'di bden pa yang bdag nyid ces pa nas/ sangs rgyas 'grub dang 'og rnams so/ /zhes pa'i bar du grub pa'i rigs rnams bshad pa ste 'di bden pa yang bdag nyid mi 'grub pa yang de bzhin du yang dag mthong ba de bzhin sangs rgyas kyang de bzhin ngas kyang mngon pa'o zhes pa ni/gang gis byang chub sems dpa' thob/ /zhes pa de nyid kyi rjes su bsngags pa'i khyad par te/ gang yang byang chub kyi sems thob pa de bden pa yang dag pa nyid kyi mi slu ba ste/ sngon gyi sangs rgyas dang ngas kyang yang dag pa nyid kyi slu ba yin zhes par mthong zhes pa'o//gang gis byang chub sems thob pa yang bsgrubs nas kun du bzang po'am 'phags pa 'jam dpal cig gis klad pa la byugs na byang chub kyi sems mi brjed pa zhes bya ba 'thob bo zhes gong du bshad pa de lta bu'i grub pa thob pa ni byang chub kyi sems thob pa zhes bya ba ste/de lta bu grub na de nyid grub pa yin gyi gzhan ci dgos pa zhes pa ni byang chub kyi sems de grub pa la sogs pa gzhan gyi rgyu yin pa'i phyir ro/ /de bas gzhan yang grub pa ni/ /grub pa rnam pa lnga zhes bsgrags/ / zhes pa ni byang chub kyi sems grub pa de las gzhan pa'o/ /gzhan ming gis 'byung ba lnga la byas te de rnams kyang spyod pa'i rjes su 'jug pa la sogs pa'o/ /de la spyod pa'i rjes su zhugs/ /zhes pa ni mos pa spyod pa'i sa las 'phar te ye shes kyi sa la 'jug pa'i skabs su snang ba thob pa dang /snang ba mched pa zhes bya ba la sogs pa'i ting nge 'dzin gyi khyad par grub pa'o/ /sa las 'phar ba'ang de bzhin te/ /zhes pa ni sa rab tu dga' ba thob par grub pa'o/ /'jig rten mngon shes lnga rnams dang / /zhes pa ni 'jig rten gyi lnga mngon par shes pa grub pa'o/ /sangs rgyas grub dang zhes pa ni sangs rgyas kyi gzugs su gyur pa'i rig 'dzin du grub pa'o//phal rnams zhes pa ni rig 'dzin phal rnams grub pa ste de gnyis ni gzugs kyis grub pa'o/ /gong ma gsum ni sems kyis grub pa shes par bya'o/ /rgyud nas rgyud du ba rnams kyis/ /zhes pa nas/ sngags pa yid las byung ba'o//zhes pa'i bar du grub pa'i dus bshad pa ste/ de las grub pa'i dus kyang tshe 'di la grub pa dang tshe phyi ma la grub pa rnam pa gnyis te/ rgyud nas rgyud du ba rnams kyi/ /las rnams ji srid ma zad cing / /smin pa rnam par de smin pa/ /de ni grub pa yin zhes bsgrags/ /zhes pa ni tshe 'di las grub pa ste/rgyud nas rgyud du ba rnams kyi las rnams rgyud ma zad ces pa ni/ tshe snga ma'i rgyud sgo drug la sogs pa nas las bsags pa'i tshe 'di'i rgyud la zad par ma gyur te/ bdag gi phung po gson na zhes pa'o/ /smin pa rnam par de smin na/ /zhes pa ni da lta yang gson la tshe dang bsod nams la sogs pa'i rgyu btab pa'i 'bras bu yang 'dir smin par gyur na snga ma'i las rnams ma zad pas bdag tshe ring smin pa rnam par smin pas bdag gi bsod nams kyi rgyu mthus rtag par gyur te/sgrub pa'i tshe de ltar tshe dang bsod nams gnyis kas bsrungs na de nyid tshe 'di nyid la 'grub par bshad do//mdo ru dus gcig tu yang na nam zhig dang / tshe zad na tshe de grub pa thob pa ni sngags pa yid las byung ba'o zhes pa ni sgrub pa bsgrubs pas las dang tshes ma bstangs te/ dus gcig tu ni las dang tshe zad par gyur na/ sgrub pa bsgrubs pa'i 'bras bu sngags pa des tshe phyi ma la bsgrub mi dgos par rdo rje la sogs pa'i rigs su skye ba dang /rig 'dzin la sogs par skye ba 'thob par 'gyur ro zhes pa'o/ /sngags pa yid las byung ba'o/ /zhes pa ni rdzas la sogs pa bsgrub mi dgos par tshe 'phos ma thag tu yid nyid kyis grub pa de dag thob par 'gyur ro//grub nas nam mkha' la 'gro ba/ /zhes pa nas/ sangs rgyas gcig brjod par mi 'gyur/ /zhes pa'i bar du grub pa'i 'bras bu rnams dris pa bshad pa ste/ grub nas nam mkha' la 'gro ba/ /ji ltar sgyu ma mkhas pa bzhin/ /sngags kyi dra bas bslus pa ni/ /ji ltar mig 'phrul chen po bzhin//zhes pa ni grub nas nam mkha' la 'gro ba bshad pa ste/ ji ltar mig 'phrul mkhan de nam mkha' la 'gro ba dang / rdzu 'phrul sna tshogs byed pa bzhin du sngags pa de yang rig 'dzin la sogs par grub nas nam mkha' la 'gro ba dang / sngags kyi mthus rnam pa sna tshogs pa'i sprul pa la sogs pa ston par byed do zhes pa'o//gang na lus dang ngag med par dri za'i grong khyer bzhin du de bzhin mi snang bar 'gyur zhes bya/ de'i gnas ni de yin no zhes pa ni rig 'dzin la sogs pa grub nas mi snang bar 'gyur ba'i dpe dri za'i grong khyer las blangs te bshad pa ste/ ji ltar dri za'i grong khyer lus la sogs pa dngos su mi snang zhing /bar snang la gnas par byed pa de bzhin du sngags pa de yang grub nas lus kyang mi snang la tshig tu brjod pa yang mi thos par nam mkha' la mi snang bar gyur cing bar snang la gnas par byed pa'o zhes bshad do/ /ji ltar nyal ba'i rmi lam na sum cu rtsa gsum gnas su phyin te/de'i lus dang bral ba yang med/ de la ni der phyin pa yang med/ de bzhin sbyor ba gnyis kyis kyang sngags pa sngags kyi rgyud nas/ lus ni 'ja' zug pa dang 'dra/ /las dang bsod nams las rnyed pa/ /zhes pa ni sngags pa de rig 'dzin la sogs pa grub nas lus 'di yang mi 'dor bar nam mkha' la sogs pa la 'gro ba'i dpe rmi lam las blangs te bshad pa ste/ji ltar skyes bu nyal ba'i rmi lam na/ sum cu rtsa gsum la sogs pa'i gnas mthong bar 'gyur ba de bzhin du sngags pa de yang sbyor ba'i dbang gis lus 'di nyid ma bor bar nam mkha' la sogs par 'gro ba yang rang gis mthong ngo //gzugs rnam pa sna tshogs kyang ston nus par 'gyur zhes pa'o/ /lus ni 'ja' zug pa dang 'dra/ /zhes pa ni gzugs sna tshogs ston pa'o/ /sngags ni yid bzhin nor bu 'dra/ /lus dang ngag dang yid las byung / /de las don du brtsams pa ni//ma brtags bzhin du grub pa yin/ /zhes pa ni sngags kyi grub pa yid bzhin nor bu las dpe blangs te bshad pa ste/ ji ltar yid bzhin nor bu gang bsams pa'i don rnams ma brtags par dgos pa lhun gyis grub pa nyid du 'byor bar 'gyur ba de bzhin du sngags 'grub pa'i 'bras bu yang gang 'dod pa rnams brtag mi dgos par lhun gyis grub pa nyid du 'byor bar 'gyur zhes pa'o//ji ltar nam mkha' phyogs rnams la 'dus byas spyod yul thams cad kyis mi gos pa de bzhin sngags pa yang rtog pa'i spyod yul kun gyis so/ /grub pa thob pa de yang gza' dang skar ma dang ltas ngan la sogs pas mi tshugs par bshad pa ste/ji ltar nam mkha' 'dus byas la sogs pa'i dri mas mi gos pa bzhin du grub pa'i sngags de yang gza' dang skar ma la sogs pa bzang ngan gyi las su mi rtog ste/ de dag gis ltas ngan pa la sogs pas kyang mi tshugs zhes pa'o/ /'di dag thams cad 'du shes tsam//de ltar rnam par sgom par byed/ /sngags pa de ltar bsgoms na ni/ /sangs rgyas lhan cig brjod 'gyur ro/ /zhes pa ni sngags grub pa thob nas sangs rgyas dang lhan cig tu 'grogs pa thob par bshad pa ste/ de dag thams cad 'du shes tsam/ /zhes pa ni 'dus byas la sogs pa'i chos 'di dag thams cad dngos su yod pa ma yin gyi/'du shes tsam du byang chub kyi sems sgom pa'i tshe bsgom pas kun du sangs rgyas pa dang lhan cig tu 'grogs shing / de la chos nyan pa la sogs pas dga' bar 'gyur zhes pa'o/ /sbyin sreg gnyis su gsungs pa ni//sangs rgyas rkang gnyis gtso bo ste/ /phyi rol gyi dang nang gi ste/ /de yang tshim byed bcas pa'o/ /zhes pa ni sbyin sreg gi las me rnams su zhes sngar dris pa la rnam pa gnyis ni sngar bshad zin to/ /'dir ni sbyin sreg rnam pa gnyis bshad pa'i phyi'i me dang nang gi me rnam pa gnyis bshad de/de yang mnyes par bya ba dang bcas par bya ba dang zhes gsungs pa'o/ /de la nang gi sems kyis mnyes par bya ba ni/ rang gi sa bon las slar lha'i gzugs su bsgyur bar sngar bshad do/ /phyi rol gyis mnyes par bya ba'i bsreg pa'i rdzas gnyis kyis mnyes bar bya'o//lha rnams kyi so so'i zhes pa nas/ yang dag sangs rgyas rdzogs par gsungs/ /zhes pa'i bar du lha rnams kyi rang bzhin dang grub pa'i tshad rnams bshad pa ste/ lha rnams kyi/ so so'i ngo bo nyid kyang shes nas su/ /zhes pa ni lha rnams kyi rang bzhin shes bar byas nas de dag gi grub pa'i 'bras bu yang shes par 'gyur zhes pa ste/de la 'jig rten las 'das pa'i lha rnams kyi rang bzhin ni sngar bshad zin to/ /'dir ni 'jig rten gyi lha rnams kyi rang bzhin bshad nas/ de'i rang bzhin ni mthu las 'bras bu'i tshad shes pa ste/ de bas na gsungs pa/ 'jig rten gyi sngags kyi tshad ni kun du gsungs pa yang zhes pa la sogs pa ste/dbang po la sogs pa'i lha mthu chen po de dag gis smras pa'i sngags dang phyag rgya rnams ni 'bras bu 'phral du ster ba ste/ de dag gi tshad du gsungs pa ste/ tshad ces pa ni de dag gi mthu la bya'o/ /de rnams la rtag pa med de/ skye zhing 'jig pa'i chos can no//zhes pa ni de dag gi khyad par gsungs pa ste/ 'jig rten pa'i lha rnams 'bras bu tshe 'di la 'phral du ster mod kyi/ de rnams skye zhing 'jig pa'i chos can pas mi rtag pa'o/ /'jig rten las 'das pa'i sngags rnams ni zhes pa nas/ bye brag kun kyang bshad pa yin zhes pa'i bar 'jig rten las 'das pa'i sngags byang chub sems dpa' dang nyan thos dang /rang sangs rgyas la sogs pas gsungs pa'i sngags rnams thog ma'i byed pa med cing las dang tshe dang 'chad pa ste/ 'dod chags zhe sdang dang gti mug gi nyes pa gsum dang bral bas skye zhing 'jig pa la sogs pa med pas sngar tshad rnams bshad zin to zhes pa'o//dus gsum las ni shin tu 'das/ /rkyen las skyes par byung ba ste/ /'bras bu mthong dang mi mthong la/ /ngag yid gsum las byung ba'o/ /zhes pa ni de lta bas na 'jig rten las 'das pa'i sngags rnams 'jig rten pa ltar mthong ba'i chos 'ba' zhig la/'bras bu 'phral du ster ba 'ba' zhig ma yin gyi mthong ba'i chos dang mi mthong ba gnyis ka la 'bras bu ster zhes pa ste/ mthong ba'i lha dang mi la sogs pa 'grub pa'o/ /mi mthong ba ni mya ngan las 'das pa'o/ /'bras bu'i tshad ni bskal pa gcig 'jig rten gyi zhes gsungs pa ni/'jig rten pa'i lha rnams kyi grub pa'i 'bras bu ji srid thub pa gsungs pa ste/ 'jig rten gyi 'bras bu ni bskal pa gcig gi bar du thub ces pa'o/ /bskal pa gcig las sngags 'bras bu/ /yang dag sangs rgyas rdzogs pas gsungs//zhes pa ni 'jig rten las 'das pa'i sngags rnams kyi 'bras bu bskal pa las 'das par thub ces pa'o/ /ting 'dzin rgyal ba'i sras rnams dang / /drang srong chen po sangs rgyas kyi/ /mtshan dang bral te dag pa yin/ /'jig rten mtshan mar bcas zhes pa ni sngags pa rnams kyi ting nge 'dzin bshad pa ste/de la spyir ting nge 'dzin la yang rnam pa gnyis te/ don dam pa dang kun rdzob kyi'o/ /de la don dam pa ni yi ge a la sogs pa 'bru re'i sgo nas bstan pa'o/ /kun rdzob kyi ni sngags kyi phreng ba'i tshig las stobs dang mi 'jigs pa la sogs pa'i yon tan rnams te/de dag gi tshig tu gyur pa'i ting nge 'dzin gyi yi ge rnams ni sngar bshad zin to/ /'dir ni ting nge 'dzin gyi don rnams bshad pa ste/ rgyal ba'i sras rnams zhes pa ni byang chub sems dpa' la sogs pa'o/ /drang srong chen po sangs rgyas kyi/ /zhes pa ni lus dang ngag dang yid gsum thub pa'i mtshan nyid drang srong ste mi gnas pa'i mya ngan las 'das pa kun du sangs rgyas pa la sogs pa la bya ste/de dag gi ting nge 'dzin gyi don chos thams cad thog ma nas ma skyes pa rnam par mi rtog pa'i mtshan nyid pas mtshan ma dang bral ba ste dga' ba'o/ / 'jig rten gyi mtshan mar bcas pa zhes pa ni nam byang chub sems dpa'i ting nge 'dzin las bzhengs pa ni/ sangs rgyas kyi rnam par brgyan pa la sogs pa ji bzhin pa dang bcas pa'i spyod pa dang 'jug pa dang sangs rgyas dang mngon par byang chub nas sngon gyi smon lam gyi shugs kyis sku mi zad pa'i 'khor lo la sogs pa 'byung ba yang sbyin pa dang bcas pa'i spyod pa ste/de dag la yang 'jig rten gyi mtshan ma dang bcas zhes pa'o/ /gnyis su na mu stegs 'jig rten pa'i lha rnams kyi ting nge 'dzin dngos po yod par blta bas na mtshan ma dang bcas zhes bya'o/ /rnam par smin pa'ang rnam smin 'dir//las kyi 'bras bu rnyed 'gyur ba/ /nam zhig grub pa rnyed na ni/ /de la las kyang ldog par shes/ /zhes pa ni sngon gyi las kyi rnam par smin pa lha'i rnam par smin pa'i gzugs phung po lnga 'di las las kyi 'bras bu smin par gyur pa ste nam bdag gis ting nge 'dzin la sogs pa'i grub pa thob na/de na las kyi rnam par smin pa de grub pa des zil gyis non nas 'bras bu mi smin par de ldog par 'gyur ro zhes pa'o/ /sems ni ngo bo nyid med pas/ /'bras bu rgyu yang rnam spangs la/ /las dang tshe las rnam grol ba/ /nam mkha' 'dra bar skye bar 'gyur//zhes pa ni grub pa'i mtha' sangs rgyas su 'gyur ba bstan pa ste/ sgrub pos byang chub kyi sems dag par bsgoms pas sems kyi rang bzhin med par chud de/ /chos kyi rgyu dang 'bras bu dmigs su med pas las kyi rgyu tshe ni 'bras bu ste/ las dang tshe las kyang rnam par grol bar gyur te/de ltar las dang tshe rnam par grol na nam mkha' 'dra bar gzung ba dang 'dzin pa spangs pa dag pa'i mtshan nyid du 'gyur zhes pa'o/ /de ltar gsang ba'i bdag po zhes pa nas 'jig rten dang 'jig rten las 'das pa'i dkyil 'khor grangs med par 'byung ba de bri ba'i tshul nyon cig ces pa'i bar du gsang ba'i dkyil 'khor rang bzhin dang yon tan smos nas nyon cig ces pa ste/de la phyag rgya'i gzugs su dgod pa'i le'u zhes pa ni snying rje chen po 'byung ba'i dkyil 'khor dang yi ge 'khor lo bskor ba'i dkyil 'khor du lung bstan pa dang / tshig gis gzugs su bkod kyi 'dir ni sems rang bzhin dngos su gzhug tu mi rung ba'i phyag rgya'i gzugs su bkod pa ste/de ni le'u phyag rgya'i gzugs su bkod pa'i dkyil 'khor la bya'o/ /lha rnams gnas su byin gyis rlob pa zhes pa ni dkyil 'khor der phyag rgya'i gzugs su lha rnams dgod par byin gyis rlob par 'gyur ro zhes pa'o//ting nge 'dzin gyi rgyud lnga zhes pa ni dbang chen la sogs pa'i dkyil 'khor lnga po de dag nyid ye shes kyi bye brag las byin gyis brlabs te/ dkyil 'khor de lnga las ye shes kyi ting nge 'dzin gyi khyad par la chud par 'gyur ba'o zhes pa'o/ / sngon gyi sangs rgyas rnams kyis mngon par sangs rgyas pa zhes pa ni sangs rgyas thams cad bya ba gcig tu bstan pa ste/ sngon gyi sangs rgyas kyis kyang mkhyen nas bshad kyis de nyon cig ces pa dang sbyar ro/ /chos kyi dbyings nam mkha'i spyod yul zhes pa nas phan pa dang bde ba'i phyir zhes pa'i bar du dkyil 'khor de bshad pa yang phyag na rdo rjes mi mkhyen pa'i phyir bshad pa ni ma yin gyi/mos pa spyod pa'i sa la gnas pa sngags kyi sgor byang chub sems dpa'i spyad pa spyod pa rnams la phan pa dang bde ba'i phyir bshad do zhes pa ste/ chos kyi dbyings nam mkha'i spyod yul zhes pa ni/ mos pa spyod pa'i sa la gnas pa ste/ de rnams kyi shes rab kyi yon tan bshad pa ste/ de dag gi shes rab kyi dbyings nam mkha' dang 'dra ba la dmigs pa'i spyod yul du gyur zhes pa'o/ /de dag chos kyi dbyings nam mkha' dang 'dra ba'i spyod yul du gyur na sngags kyi tshul bshad ci dgos she na/de dag de ltar stong pa nyid kyi spyod yul du gyur kyang thabs kyis sems can sgrol bar byed do/ /de bas na gsungs pa/ sems can gyi khams ma lus pa bsgral bar yid mches pa zhes pa ste/ de ltar thabs dang shes rab tu 'brel pa'i sngags kyi sgor byang chub sems dpa'i spyad pa spyod pa rnams la phan pa dang bde ba'i phyir dkyil 'khor de nyon cig ces pa'o//de la don gyi phyir zhes pa ni byang chub sems dpa' rnams kyi don mya ngan las 'das pa'am ma lus pa'i bde ba'i phyir ro/ /phan pa'i phyir zhes pa ni tshe 'di dang phyi ma gnyis la phan pa'i phyir ro//bde ba'i phyir zhes pa ni/ tshe 'di la bde ba'i phyir ro zhes pa'o/ /gsang ba'i bdag po thog mar yang dag par kun du sangs rgyas pa'i dkyil 'khor bri ba'i zhes pa ni dkyil 'khor snga ma dag dang 'dra ba ste/ dang po snying po'i dkyil 'khor du bcom ldan 'das rnam par snang mdzad bri ba'i zhes pa ste bri tshul nyon cig ces pa'o//'og nas 'byung ba dang sbyar ro/ /gsang ba'i yang gsang ba zhes pa ni/ gsang ba ni sems can gyi rang bzhin phra zhing dmigs su med pas na gsang ba'o/ /de'i yang gsang ba ni dam tshig med pa'i sems can rnams la mi bstan pa'i phyir ro//snying rje chen po'i snying po 'byung ba zhes pa ni snga ma bzhin no/ /gang las 'jig rten dang 'jig rten las 'das pa'i dkyil 'khor grangs med pa 'byung ba zhes pa ni 'jig rten gyi dkyil 'khor ni gzugs brnyan gyi dkyil 'khor tshon gyis bri ba rnams so//'jig rten las 'das pa ni rang bzhin gyi dkyil 'khor te gzugs brnyan gyi dkyil 'khor rnams kyang 'di las 'phro ba dang / rang bzhin gyi dkyil 'khor kyang 'di mthong ba las shes par gyur pas na/ 'jig rten dang 'jig rten las 'das pa'i dkyil 'khor 'byung ba zhes bya'o//yang na 'jig rten gyi lha rnams kyi dkyil 'khor dang / 'jig rten las 'das pa'i lha rnams kyi dkyil 'khor grangs med pa rnams kyang 'di las 'byung ba zhes pa ste de bri ba'i tshul nyon cig ces pa'o/ /kun du gru bzhi lham par te/ /zhes pa nas/ bri ba yang ni dpa' bos so//zhes pa'i bar du bcom ldan 'das rnam par snang mdzad bzhugs pa'i snying po'i dkyil 'khor bri ba ste/ dkyil 'khor gyis bcad pa dang snam bu'i rim pa dang tshon dgye ba la sogs pa'i cho ga rnams kyi dkyil 'khor gong ma rnams su ji skad gsungs pa bzhin no/ / kun du gru bzhi lham pa zhes pa ni tshad med pa bzhi dang ldan par ston pa'o/ /sgo gcig ces pa ni sgo mang po nas chos kyi dbyings kyi sgo gcig tu 'du bar bstan pa'o/ /stegs bur bcas pa zhes pa ni mtha' tshon gyis bri ba'i dbus tshon ser pos bkang ste/ bcom ldan 'das bzhugs pa'i gzhir bcas zhes pa'o//rdo rje'i mtshan mas btab pa zhes pa ni de'i nang du nub phyogs kyi logs su rdo rje rtse lnga pa gcig pa'o/ /dbus su rdo rje rtse brgya pa/ /zhes pa ni rgyu'i tshe rnam par grol ba'i gzungs zhes brgya pa dang bcas pa bstan pa ste/ rnam par grol ba'i sgor ye shes brgyar yang yi ge 'khor lo bskor ba'i le'u las yi ge as mgo btsugs na/ka'i ris nas ya dang ra dang ba dang la yan chad kyi bar du yi ge nyi shu rtsa bzhi smos pa dang / dang po a dang nyi shu lnga ste/ de ltar a dang bcas pa de yang nyi shu lnga/ a dang bcas pa nyi shu lnga/ a dang bcas pa nyi shu lnga ste/de ltar rnam par thar pa'i sgo brgya las ye shes brgyar sbyar ba'i rang bzhin rdo rje rtse brgya pa de'i dbus su bri'o zhes pa'o/ /sha dang Sha Ta ra sa dang / ha rnams ni cha gnyis pa'i nang du 'dus par shes pa'o/ /de'i steng du pad+mo bri bar bya ba ni sa bon dang bcas pa rgyas par te zhes pa ni rdo rje de'i steng du pad+mo 'dab ma bzhi pa rang gi sa bon dang bcas pa bri ba'o//de steng du yang pad+mo chen/ /phyag rgya klad kyi 'khor gyis brgyan/ /'dab ma brgyad kyang rdzogs par te/ /ge sar bcas pa shin tu bzang / /zhes pa ni pad+mo'i steng du yang pad+mo chen po 'dab ma brgyad pa bris pa ste/phyag rgya klad kor gyis brgyan zhes pa ni klad kor ni stong pa nyid du ston pa'i tshig yin pas yan lag bcu gnyis kyi rig pa'i rgyal po la bya ste/ yan lag bcu gnyis tshig bri bar/ /zhes pa dang sbyar ro/ /phyag rgya ni gsang ba'i phyag rgya brgyad pa ste brgyad pa dkyil 'khor gyi zhes pa dang sbyar ro//pad+mo steng mche ba dang 'dab ma brgyad kyi bye brag che bas de'i 'og ma de bas chung bar bya bar mngon pa ste 'dab ma bzhi par shes par bya'o/ /gnyis su na rgyu'i tshe pad+mo bas chung ngu shes par bya'o/ /pad+mo chen po 'dab ma brgyad pa ni ye shes brgyad kyi rang bzhin du sngar bshad pa bzhin no//yan lag bcu gnyis tshig bri ba/ /'dab ma kun la rgyas par te/ /zhes pa ni yan lag bcu gnyis pa'i rig pa'i rgyal mo'i snying po dang nye ba'i snying por bcas pa'i yi ge zung brgyad pa rnams 'dab ma brgyad la bri bar bya'o//de yi dbus su mgon po bzhugs/ /kun du sangs rgyas rkang gnyis gtso/ /brgyad pa dkyil 'khor brgyad 'khor gyis/ /kun du yang ni bskor bzhin du/ /zhes pa ni pad+mo'i dbus kyi snying po la bcom ldan 'das bzhugs te/ phyag rgya brgyud po rnams kyang bcom ldan 'das kyi khor khor yug tu rang gi dkyil 'khor dang sa bon du bcas par pad+mo'i snying po de nyid la bri bar bya'o//'di ni mchog tu shes par bya/ /snying rje 'byung ba'i dkyil 'khor te/ /zhes pa ni mchog ces pa ni ston pa'i mchog go/ /snying rje 'byung zhes pa ni snga ma bzhin no//de las 'byung bar shes par bya/ /dkyil 'khor rnams ni gzhung bzhin du'o/ /las dang lus ni kun grub pa/ /grub pa yang ni dpa' bos so/ /zhes pa ni zhi ba dang rgyas pa la sogs pa'i las rnams kyi dkyil 'khor gzugs su bri'o/ / dkyil 'khor gyi sngags kyi gzhung gzhan dag las bshad pa rnams kyang dkyil 'khor 'di las 'byung bar shes par bya zhes te de ni dbang chen gyi dkyil 'khor te/ bcom ldan 'das rnam par snang mdzad kyi gnas su shes par bya'o/ /gsang ba'i bdag po gzhan yang de bzhin gshegs pa'i dkyil 'khor du gyur pa ni zhes pa nas/de ni phyogs bcu kun du song / /zhes pa'i bar du bcom ldan 'das kyi shar phyogs su ma 'das pa'i de bzhin gshegs pa thams cad kyi dkyil 'khor bri ste/ zla ba'i dkyil 'khor 'dra ba ste/ /zhes pa ni bcom ldan 'das kyi gdan pad+mo'i kha dog zla ba'i dkyil 'khor ltar dkar po zhes pa'o//dbus na 'od dkar dung 'dra zhes pa ni chu'i dkyil 'khor kha dog dung dang 'dra bar bya'o/ /sangs rgyas kun gyi gru gsum po/ /pad+mo dkar po'i steng na gnas/ /zhes pa ni chu'i dkyil 'khor gyi steng na phyag rgya gru gsum po pad+ma dkar po'i steng na gnas pa bri zhes pa'o//'khor bcas byas pa rgya chen po/ /zhes pa ni der yi ge a klad kor dang bcas par bzhag ces pa'o/ /rdo rje'i rgyan gyis brgyan pa ste/ /zhes pa ni der rdo rje rtse lnga pa bri zhes pa'o/ /'od kyang gnyis su bya ba ni//kun du the tshom med bzhin du/ /sngags kyi mgon las byung ba ni/ /de ni phyogs bcu kun du song / /zhes pa ni phyag rgya gru gsum po de gru gnyis nas 'od gnyis 'byung bar bris te/ de yang chos kyi sku las longs spyod dang sprul pa'i sku 'byung bar shes par bya'o/ / de nas gsang ba'i bdag po 'jig rten gyi dbang po'i dkyil 'khor ni zhes pa nas/ rig pa'i rgyal por bcas pa ru/ /mkhas pas su ni bri bar bya/ /zhes pa'i bar du spyan ras gzigs kyi dbang po'i dkyil 'khor bshad pa ste/ kun du gru bzhi lham par te/ /zhes pa dbang chen gyi dkyil 'khor du bri zhes pa'o//dbus su dung ni gnyag par bya/ /zhes pa ni de'i dbus su chu'i dkyil 'khor bri zhes pa'o/ /de steng pad+mo bri ba ni/ /sa bon du bcas rgyas pa ste/ /zhes pa ni chu'i dkyil 'khor de'i steng du pad+mo dkar po sa bon a dang bcas pa bri zhes pa'o/ / de steng rdo rje chen po ste/ /zhes pa ni pad+mo'i steng du rdo rje rtse lnga pa bzhag ces pa'o/ /rdo rje las ni pad+mo rgya chen po/ /sa bon gyis ni kun gdab pa/ /rang gi sa bon gyis kyang gdab/ /ces pa ni rdo rje de'i steng du pad+mo chen po 'dab ma brgyad pa bris te/ rang gi sa bon dang bcas pa bri zhes pa'o//skyong ba dang ni khro gnyer dang / /zhes pa ni legs par bye brag tu zhes pa'i bar du skyong ba la sogs pa'i 'khor rnams phyag rgya'i gzugs su dkyil 'khor der bri zhes pa'o/ /rta mgrin can gyi bya ba ni/ /zhes pa nas/ mkhas pas su ni bri zhes pa'o/ /zhes pa'i dkyil 'khor de'i nub phyogs kyi mtha' mar rta mgrin can gyi dkyil 'khor gru gsum pa bris te/dkyil 'khor 'phrul gyi mtshan gyis btab/ /ces pa ni gru gsum po dkyil 'khor gyi mtshan ma zhes bya'o/ /nyi ma shar ba dang 'dra ste/ /zhes pa ni dkyil 'khor de'i kha dog nyi ma dang 'dra zhes pa'o//rig pa'i rgyal po bcas pa ru/ /mkhas pas su ni bri bar bya/ /zhes pa'i dkyil 'khor gru gsum po der rig pa'i rgyal po rta mgrin dang bcas pa bri zhes pa ste/ de'i phyag rgya'i gzugs su bri bar shes par bya'o/ /gsang ba'i bdag po gzhan yang khyod nyid kyis dkyil 'khor 'dir bshad do zhes pa nas/rgyal ba gtso bo rnams kyis gsungs pa zhes pa'i bar du phyag na rdo rje'i dkyil 'khor bshad pa ste/ phyag na rdo rje ni bya ba nan tan gyi rang bzhin te/ las thams cad pas dkyil 'khor bzhi par tshad dang ldan par shes par bya'o//kun du gru bzhi lham par te/ /rdo rje'i mtshan gyis shin tu btab/ /kun kyang rab tu ser la bzang / /zhes pa ni dbang chen gyi dkyil 'khor dang por bris te snga ma bzhin no/ /pad+ma'i dbus su rab tu gnas/ /de yi dbus su yang bri ba/ /bum pa zla ba dang 'dra ba//zhes pa ni dbang chen gyi dkyil 'khor gyi dbus su pad+mo bris te/ pad+mo'i steng du chu'i dkyil 'khor bri ba ste bum pa ni chu'i dkyil 'khor du shes par bya'o/ /de ni mtshan gyis su yang btab/ /'khor gyis kyang ni rnam par brgyan/ /zhes pa ni dkyil 'khor de rang gi sa bon yi ge pa klad kor dang bcas pa'i mtshan mas btab ces pa'o//de yi steng du chu chen po/ /gsal bar dbyar gyi sprin 'dra bar/ /dpal dang g.yo ba sngags mkhan gyis/ /'khor gyis rnam par brgyan par bya/ /zhes pa ni chu'i dkyil 'khor de'i steng du rlung gi dkyil 'khor kha dog smug nag dbyar gyi sprin dang 'dra bar ba dan dang bcas pa g.yo bzhin du bris te/'khor gyis rnam par brgyan par bya/ /zhes pa ni rang gi sa bon yi ge ha dang bcas par shes par bya zhes pa'o/ /de'i steng na 'jigs pa chen po 'jigs pa'i me'i gzugs 'dra ba gru gsum po dang 'dra bar bya zhes pa ni/rlung gi dkyil 'khor de'i steng du me'i dkyil 'khor gru gsum 'phags pa'i bskal pa'i me'i kha dog 'dra ba 'jigs 'jigs ltar 'dug pa 'dra ba zhes pa'o/ /'bar bas kyang brgyan bzhin du zhes pa ni dkyil 'khor de'i mtshan ma gru gsum pos kyang gdab ces pa'o//'bar ba'i phreng bas 'jigs bzhin du/ /'khor ni nyi ma shar dang 'dra/ /zhes pa ni 'bar ba'i phreng ba kha dog nyi ma shar ba dang 'dra ba 'jigs pas 'khor bar bya zhes pa'o/ /de yi dbus su pad+mo bya/ /dus mtha'i me yi dkyil dang 'dra/ /zhes pa ni me'i dkyil 'khor de'i dbus su pad+mo'o kha dog 'dra ba dmar po gnyis bri zhes pa'o//pad+ma'i steng du rdo rje ste/ /'bar ba'i phreng ba gong bzhin bya/ /zhes pa ni pad+ma'i steng du rdo rje dmar smug gi kha dog tu bris te/ 'bar ba zhes pa ni me'i kha dog g.yo ba ni rlung gi shas te/ me dang rlung gnyis ka'i shas yod pas rdo rje dmar smug tu bya'o/ /hUM zhes pa yi sgras non pa'i/ /sa bon dam pas su ni brgyan/ /zhes pa ni rdo rje'i sngon du phyag na rdo rje'i sa bon gyi yi ge hUM gzhag par bya zhes pa'o/ /dpa' bo khyod kyi dkyil 'khor 'di/ /rgyal ba gtso bo rnams kyis gsungs//zhes pa ni sngon gyi rgyal ba rnams kyis kyang gsungs zhes pa'o/ /dpa' bo zhes pa ni phyag na rdo rje la bos pa'i tshig go/ /mA ma kI dang lu gu rgyud/ /ces pa ni de las kun shin tu grub pa'i phyir ro zhes pa'i bar du/ mA ma kI la sogs pa'i 'khor rnams dang /dbang chen gyi dkyil 'khor gyi nang du bri bar bshad pa ste/ phyag rgya'i dkyil 'khor sa bon gyi/ /kha dog rim par phyed pa ste/ /ji ltar rim pa bzhin du shes/ /zhes pa ni so so'i phyag rgya dang sa bon rnams so so'i kha dog ci 'dra ba las dkyil 'khor kyang de bzhin du shes par bya ste/sngar bshad pa'i rim pa bzhin du ji ltar rim bzhin du bri zhes pa'o/ /de nas gzhan gyis yang bshad pa/ /zhes pa nas mthu chen dang ldan pa'o zhes pa'i bar du phyag na rdo rje'i dkyil 'khor 'og logs su nam mkha' dri ma med pa la sogs pa'i rdo rje 'dzin bcu gnyis ming gis smos pa rnams bris te/de rnams kyi dkyil 'khor kyang dbang chen la sogs pa bzhi po bri bar gsungs pa/ dkar po dmar po ser po dang / /nag po zhes kyang gsungs pa yin/ /zhes pa ste dkyil 'khor 'di bzhi rdo rje 'dzin pa bcu gnyis la lan gsum du rim bzhin du bsgres te sbyar ro//phyag rgya'i gzugs kyang bshad pa ni/ /rtse gsum dang ni rtse gcig ste/ /kha cig gnyi ga yang ma yin/ /de la kha cig phreng can ni/ /de rnams kyi phyag rgya ste rdo rje rtse gsum la yang rnam pa gnyis te/ phyogs gcig rtse gsum pa dang /phyogs gnyis ka rtse gsum pa'o/ /de bzhin rtse gcig pa yang shes par bya ste/ de bas na kha dog gnyi ga gzung ba'o/ /gnyi ga yang ma yin zhes pa ni rdo rje thu lum du shes par bya'o/ /de la kha cig phreng ba can/ /zhes pa ni rdo rje phreng ba'i phyag rgya ste/ phyag rgya de lan drug tu bsgres pa bcu gnyis su khyab par bya'o/ /kha dog rnam pa'ang shes par bya/ /zhes pa ni phyag rgya de rnams kyi kha dog sha stag kyang rdo rje 'dzin de dag nyid kyi kha dog ji lta ba bzhin du'o zhes pa'o/ /kun kyang rnam par 'dul ba ste/ /mthu chen dang ni ldan pa'o/ / zhes pa ni rdo rje 'dzin pa de dag gi rjes su bsngags pa ste gdul dka' ba rnams 'dul nas zhes pa'o/ /mgon po mi g.yo'i dkyil 'khor ni/ /zhes pa nas/ mkhas pas der ni bri bar bya/ /zhes pa'i bar du 'phags pa'i dkyil 'khor bshad pa ste/ rlung dang me zhes bsgrags pa yin//zhes pa ni rlung gi dkyil 'khor gyi steng du me'i dkyil 'khor bri/ de'i steng du 'phags pa mi g.yo ba'i phyag rgya ral gri'am zhags pa gang yang rung ba cig rang gi sa bon dang bcas par bri zhes pa'o/ /khams gsum rnam par 'dul ba yang / /shin tu rlung gi dbus su ste//zhes pa yang zhes pa'i tshig gis 'phags pa mi g.yo ba'i dkyil 'khor ltar rlung gi dkyil 'khor gyi steng du me'i dkyil 'khor bri zhes pa'o/ /rlung gi dbus su zhes pa ni me'i dkyil 'khor gyi steng du rlung gi dkyil 'khor bris te/ de'i dbus su rdo rje'i phyag rgya rang gi mtshan ma dang bcas par zhes so//gnas gsum la ni 'dug pa'o/ /zhes pa ni rlung gi dkyil 'khor gnyis dang me'i dkyil 'khor gsum la 'jug ces pa'o/ /gsang ba'i bdag po gzhan yang zhes pa nas sa bon gyis gdab mdo ru zhes pa'i bar du nam mkha' can gyi dkyil 'khor bshad pa ste/dbang chen gyi dkyil 'khor ni snga ma bzhin no/ /lha mo de'i kha dog kyang ser por bya ste/ pad+mo'i steng du bzhugs par ro/ /de ru bri ba gtsug tor te/ /dum bu gsum du gnas par zhes pa ni dbang chen gyi dkyil 'khor gyi steng du pad+mo bris te/ pad+mo'i steng du phyag rgya gtsug tor cha gsum dang bcas pa bri zhes pa'o//de las dbu ma'i cha bor de ru'ang spyan bris shig /ces pa ni gtsug tor gyi phyag rgya de smad sum gnyis bor la stod kyi sum cha ni nang du spyan gyi phyag rgya bri'o/ /'od 'bar dbus su gnas pa ste/ /zhes pa ni gtsug tor gyi phyag rgya de 'od 'bar ba'i nang du 'dug par bya zhes pa'o//sa bon gyis gdab mdo ru zhes pa ni yum de'i sa bon dang yi ge dang bcas par bya zhes pa'o/ /byang chub sems dpa' kun gyi zhes pa nas/ kun gyi bsam pa rdzogs byed pa'o/ /zhes pa'i bar du byang chub sems dpa' rnams kyi phyag rgya yid bzhin gyi nor bu chu'i dkyil 'khor gyi steng du bri zhes pa'o//de nas shAkya seng ge'i zhes pa nas/ rim bzhin du ni gzhag par bya/ /zhes pa'i bar du dkyil 'khor snam bu gnyis po shAkya thub pa dbang chen gyi dkyil 'khor bzhugs par bri ste gzhan ni snga ma bzhin no/ / dbang chen gyi dkyil 'khor gyi steng du pad+mo ser po bzhag ste/ pad+mo'i steng du lhung bzed dam chos gos sam 'khar gsil gsum las gang yang rung ba cig bzhag ste/ de yang 'bar ba dang cas pa la rdo rje'i mtshan gyis btab par bya zhes pa'o/ /gtsug tor lnga gsungs pa zhes pa nas/kha dog rim pa rtogs par bya/ /zhes pa'i bar du gtsug tor lnga po rnams kyi phyag rgya bri bar bshad pa ste/ de dag gi dkyil 'khor ni so so'i kha dog ci 'dra ba dang sbyar bar bya ste/ kha dog kyang dkyil 'khor snga mar bshad zin to/ /yid bzhin nor bu spu mdzod kyi/ /zhes pa ni spu mdzod kyi phyag rgya yid bzhin gyi nor bu bri zhes pa ste/dkyil 'khor yang de nyid kyi kha dog ci 'dra ba dang sbyar ro/ /spyan rnams kyis ni 'di nyon cig /gtsug tor de ni kun ser po/ /rdo rje mtshan gyis gdab par bya/ /zhes pa ni sangs rgyas kyi spyan phyag rgya gtsug tor ser po bris te rdo rje mtshan ma dang bcas pa bri zhes pa'o//de'i kha dog ser po bas dbang chen gyi dkyil 'khor du bri bar shes par bya'o/ /gzhan gyis mi tshugs lag pa pad+mor bcas te ngo mtshar che'o zhes pa ni lha mo gzhan gyis mi thub pa'i phyag rgya lag pa khu tshur bcas pa 'dra ba pad+mo thogs pa bri'o//gzhan gyis mi tshugs de yi ni/ /dbang chen pad+ma gnas pa'o/ /zhes pa ni gzhan gyis mi thub ces bya ba'i rig pa'i rgyal mo phyag rgyar bri ste pad+mo nag po'i steng na gnas par bya'o/ /gtsang ma gnas pa rnams kyi bshad pa ni zhes pa nas/ rgyas pa bris shig cho ga bzhin du zhes pa'i bar du gnas gtsang ma rnams kyi phyag rgya bri bar bshad pa ste/ bsam pa'i lag pa ni thal mo 'gram pa la brten pa ste dkyil 'khor du bri bar bya na/ 'gram pa mi bri bar thal mo 'ba' zhig gyen shor 'dug par bri'o/ /lag bzang zhes pa ni mi 'jigs pa sbyin pa'i lag pa bri'o//dgod pa'i lag pa ni kha 'gram nas 'dren pa lta bur bri'o/ /lag na me tog ni srin lag dang mthe bong gnyis sprad pa bri'o/ /nam mkha'i lag pa ni lag pa bsgreng ba bri'o/ /bum par shes par bya ba bdag gi chus gang rdo rjes brgyan bzhin no zhes pa ni sa bdag gi phyag rgya bum pa chus gang pa rdo rjes brgyan par bri zhes pa'o//me'am 'bud pa'i thab bzhin gyi/ /lag pa bri ste drang srong bcas/ /zhes pa ni bsod skyabs zhes pa la sogs pa'i drang srong ming gis smos pa rnams dang lhan cig tu bri zhes te lag pa smrang 'don pa bzhin du bya zhes pa ni/drang srong rnams kyi phyag rgya smrang 'don pa'i lag pa ltar mthe bo sor mo'i tshigs su 'jog par bya'o/ /gshin rje yi ni dbyig pa bri/ /rlung gi nang na rtag 'du bar/ /zhes pa ni gshin rje'i phyag rgya dbyug pa rlung gi dkyil 'khor du bri zhes pa'o/ /'chi bdag gi dril bur te zhes pa nas grub par 'dod pa rnams kyis so//zhes pa'i bar du gshin rje'i 'khor 'chi bdag dang dus mtshan mo la sogs pa'i phyag rgya ming gis smos pa rnams kyi dkyil 'khor gyi nang du tha mar khwa dang bya rgod la sogs pas bskor bar bri'o/ /ni ri ti yi ral gri bri//zhes pa nas shes bya dkyil 'khor du zhes pa'i bar du gtogs 'dod la sogs pa ming gis smos pa rnams kyi phyag rgya yang ji skad du smos pa bzhin du bri bar bshad do/ /de dag la sogs pa'i dkyil 'khor dngos su ma smos pa rnams kyang lha rnams so so'i kha dog dang gzugs dkyil 'khor sde ma bshad pa dang sbyar bar bya'o//de nas rdo rje yon sbyin zhes pa nas/ ut+pal rnams nyid kyis bya'o zhes pa'i bar du dkyil 'khor snam bu gsum po 'phags pa 'jam dpal gyi dkyil 'khor bri bar bshad pa ste/ kun kyang gru bzhi lham par bya/ /rdo rje'i mtshan gyis btab ces pa ni dbang chen gyi dkyil 'khor de snga ma bzhin no//de yi dbus su yang bya ba/ /me 'byung ba yi dkyil 'khor te/ /zhes pa ni dbang chen gyi dkyil 'khor te de'i dbus su me'i dkyil 'khor bri'o/ /de'i dbus su phyag rgya bri ba ni ut+pal ste legs pa'o zhes pa ni me'i dkyil 'khor dbus su phyag rgya ut+pal mdzes pa ut+pala'i kha dog nyid du bri/rang sngags kyis ni 'bar byas pa/ /'jam dbyangs te blo can gyis zhes pa ni ut+pal de'i steng du 'jam dbyangs nyid kyi sngags kyi sa bon bzhag ste gzengs bstod par bya zhes pa'o/ /de'i sa bon gyis gdab pa yang /rang gi sa bon tshul bzhin no/ /zhes pa ni dbang chen dang me'i dkyil 'khor la so so'i sa bon a dang ra cho ga bzhin du gzhag ces pa'o/ /mtha' yang kun du bskor ba ni/ /ut+pal ni nyid kyis bya'o/ /zhes pa ni dkyil 'khor de'i mtha' ut+palas bskor bar bya'o/ / de yi dbus su bri ba zhes pa nas/ ut+pal kha ma bye ba bya'o zhes pa'i bar du dra ba'i 'od la sogs pa'i phyag rgya ji skad smos pa bzhin du bri zhes pa'o/ /pho nya dag gis gsungs pa ni/ /zhes pa nas/ ut+pa las ni brgyan par ro/ /zhes pa'i bar du sgra gcan la sogs pa'i mngag gzhug pa rnams kyi phyag rgya ji skad du smos pa rnams ut+pala'i mtshan gyis btab ste bri ba'o//ci bgyi ji skad gsungs rnams kyi/ /de dag phyag rgya khang ga ri/ /zhes pa ni 'phags pa 'jam dpal gyi ci bgyi ba zhes pa ni sngar ji skad du bshad pa rnams kyi phyag rgya khang ga ri bya ba gri gug 'dra ba rnams bris te de'i phyogs su ni sgrib pa thams cad rnam par sel ba'i phyag rgya bris te zhes pa nas/de dag kun kyang dkyil 'khor gyi nang na pad+mo la gnas par bya'o zhes pa'i bar du sgrib pa thams cad rnam par sel ba 'khor dang bcas pa'i phyag rgya ji skad du smos pa rnams bri bar gsungs pa ste/lag pa snying gar bzhag pa ste lag pa 'ba' zhig snying gar 'jog pa 'dra ba bri'o/ /de dag kyang dkyil 'khor gyi nang na pad+mo la gnas par bya'o zhes pa ni 'phags pa 'jam dpal gyi dra ba'i 'od man chad dkyil 'khor dngos su ma smos pa rnams thams cad bla ma'i dkyil 'khor gyi nang du pad+mo'i steng du bri'o zhes pa'o//de'i byang phyogs su sa'i snying po'i phyag rgya yin zhes pa nas/ phyag rgya'i gzugs su de bshad do/ /zhes pa'i bar du sa lnga'i dkyil 'khor bshad pa ste/ dbang chen gyi dkyil 'khor gyi dbus su zhes pa ni dbang chen gyi dkyil 'khor ni snga ma bzhin te/gzhan rnams snga ma bzhin bri zhes pa ni dbang chen gyi dkyil 'khor de'i dbus su sa'i snying po'i steng na snying rje chen po 'byung ba'i dkyil 'khor du bshad pa bzhin du bri zhes pa'o/ /de'i steng du pad+mo chen po 'bar ba bcas/ kha dog kun kyang ldan zhes pa ni gdan de'i steng du pad+mo 'dab ma brgyad par bri ste/kha dog kun dang ldan pa ni/ dkar po ser po dmar po sngon po kha dog de rnams las gzhan du sbyar ba ljang gu la sogs pa gsum dang brgyad de pad+mo 'dab ma brgyad pa kha dog de rnams su bya'o zhes pa'o/ /de'i steng ba dan chen po ste/ /rin chen rtse la gnas pa'o//zhes pa ni pad+mo'i steng gdu ba dan rtse la rin chen bzhag pa bri zhes pa'o/ /de'i gzugs ni mchog sbyin yin te/ phyag rgya'i gzugs su de bshad do/ /zhes pa ni sa'i snying po de'i gzugs su bshad pa zhes pa'o/ /de mtha' yas mang po'i gtso 'khor rnams grangs med pa ste zhes pa nas phyag rgya thams cad kyang dkyil 'khor gyi nang du chud par bya'o zhes pa'i bar du/snying po 'khor mtha' yas pa grangs med pa rnams kyi nang nas gtso bo rnams kyi phyag rgya bri bar bshad pa ste/ sa 'dzin gyi ni rin po che'i steng na rdo rje gnyis pa 'jug pa'o zhes pa ni rdo rje yi thog ma thog gnyi ga rtse can zhes pa ste/rdo rje de ltar bye brag che bas rdo rje gong ma gnyis phyogs re re nas rtse gsum pa dang rtse gcig par shes par bya'o/ /phyag rgya thams cad kyang dkyil 'khor 'di'i nang du chud par bya'o zhes pa ni/ dkyil 'khor phyag rgya de dag thams cad kyang dbang chen gyi dkyil 'khor gyi nang du chud par bya'o zhes pa'o//nub phyogs su ni nam mkha'i snying po bris te zhes pa nas/ le'u rdzogs pa'i bar du nub phyogs su nam mkha'i snying po dang 'khor dang bcas pa'i phyag rgya ji skad smos pa'i rnam pa bri bar bshad pa'o/ /de la dkyil 'khor 'dir lha rnams kha dog dang dbyibs gsal bar ma gsungs pa rnams ni dkyil 'khor gong ma gnyis su kha dog dang dbyibs bshad par blta'o//dkyil 'khor gong ma dag tu kha dog la sogs pa zhib tu bshad pa yang / dkyil 'khor 'og ma 'dir lha so so'i dkyil 'khor ji skad du bshad pa las de rnams kyi kha dog kyang de bzhin du shes par bya'o//de nas yang bcom ldan 'das kyis gsang ba'i dkyil 'khor du 'jug pa'i cho ga gsungs pa zhes pa nas/ dam tshig ces su gzhan mi bya/ /zhes pa'i bar du gsang ba'i dkyil 'khor du bcug nas dbang bskur ba'i cho ga bshad pa ste/dkyil 'khor du 'jug pa'i rim pa lnga ste nub mo lhag par gnas shing sdom pa gzung ba la sogs pa dang / dkyil 'khor du 'jug pa'i tshe bsrung zhing chus gdab pa dang / byang chub tu sems bskyed pa la sogs pa ni dkyil 'khor snga mar bshad pa bzhin no/ /khyad par du ni dkyil 'khor gyi sgo khyud kyi nang du slob ma snga ma bzhin du bzhag ste/slob dpon yang snga ma bzhin du rang rang gi ting nge 'dzin la gnas nas/ slob ma'i snying gar yi ge ra bsams te/ yi ge sgra de kho na nyid chos thams cad rdul dang bral ba la dmigs nas/ slob ma de'i lus rdul phran la sogs par gshegs te rdul phran de dag kyang mi dmigs par bya ste/yi ge ra'i sgra las don dam par slob ma'i lus stong par bya'o/ /de ltar bsams nas yi ge ra'i me des slob ma'i lus bsregs te thal bar gyur par bsams te/ de ltar stong par gyur pa dang de'i gnas su yang yi ge a bsams te/a las bcom ldan 'das kyi skur gyur par bsam mo/ /de ni bsdus don te yan lag gi don du gsungs pa sngags pa kun du bzlas te zhes pa ni slob dpon snying rje chen po dang 'byung ba'i yi ge 'khor lo bskor ba'i dkyil 'khor gnyis kyi dkyil 'khor bri ba dang /dbang bskur ba dang / bzlas pa dang sgrub pa la sogs pa'i cho ga bzlas te lobs par gyur cing mkhas pa zhes pa'o/ /dkyil 'khor mkhas pas zhes pa ni dkyil 'khor gong ma gnyis la mkhas pa 'ba' zhig ma yin gyi/ gsang ba'i dkyil 'khor la yang bri ba dang dbang bskur ba la sogs pa'i cho ga rnams mkhas pa zhes pa ste/mdor na dkyil 'khor gong ma gnyis su yang dbang bskur ba'i slob dpon gyi las 'di rnams bya'o zhes pa'o/ /sdig pa ma lus kun bsregs pa/ /cho ga de slob ma'i zhes pa ni dang po gleng ba'i tshig ste sdig pa rnams zhes pa ni sems kyi rgyud la mi dge ba'i bag chags bsags pa mi 'dod pa'i rnam par smin pa lta bar byed pa la bya ste/slob ma'i sdig pa de 'og nas 'byung ba'i cho gas bsreg ces pa'o/ /de'i 'tsho ba bsreg pa ni phyin chad slar mi 'khrungs par de shin tu tshig nas thal bar gyur zhes pa ni gong du sdig pa bsreg ces smos pa de ji ltar bsreg par gsal bar gsungs pa ste/de'i 'tsho ba zhes pa de ni slob ma de'i lnga phung la bya'o/ /phyin chad slar mi 'khrungs pa de zhes pa ni lnga phung de ltar bsregs te/ stong par byas nas de nyid kyi tshe na/ slob ma de'i lnga phung yod par 'du shes mi skye bar bya zhes pa'o//shin tu tshig nas thal bar 'gyur/ /zhes pa ni bsreg pa yang lhag ma yod pa ma yin par shin tu tshig nas stong pa nyid du 'gyur bar bya'o zhes pa'o/ /slad du yang ni de gso'o/ /zhes pa ni de ltar stong pa nyid du brtan par gyur nas/ slob ma de slar rnam par snang mdzad kyi gzugs su 'og nas 'byung ba'i tshig gis sbyar ro zhes pa'o//de ltar slob ma de de'i tshe tsho ba bsreg go zhes smos pa tsam du zad kyi cis bsreg /ji ltar bsreg ces gsungs pa yi ge su ni yi ge bsreg ces pa ste/ yi ge su ni zhes pa ni yi ger der sngar smos pa'i tshul du slob ma'i lnga phung de bsreg ces pa'o//yi ge zhes pa'i tshig gnyis po de ni mi 'gyur ba zhes pa ste/ de ltar bsregs te stong par gyur nas kyang slar lnga phung mi skye bar stong par 'gyur ba las gzhan du mi 'gyur bar ting nge 'dzin gyis brtan par bya'o zhes pa'o/ /'tsho ba yang ni phyir gso ba//'tsho ba yis ni 'tsho ba ste/ /zhes pa ni slad du yang ni gso'o zhes pa'i tshig snga ma de'i 'grel pa ste slob ma'i 'tsho ba lnga phung ste/ stong par gyur pa las yi ge a 'tsho bar gyur pa des slar sangs rgyas kyi skur gong du smos pa'i tshul du bsgyur zhes pa'o/ /kun du dag pa zhes pa ni dkar po'o//dri ma med pa zhes pa ni gsal ba zhes pa ste sangs rgyas kyi skur bsgyur ba dkar zhig gsal bar bya zhes pa'o/ /yan lag bcu gnyis tshig gis btab/ /de yi snod du gyur par bya/ /zhes pa ni de'i gdan pad+mo la yan lag bcu gnyis kyi tshig rnams dgod par bya zhes pa'o//sa ma ya 'dis sangs rgyas kun/ /zhes pa nas/ 'jig rten rnams kyang thar par ro/ /zhes pa'i bar du sangs rgyas dang byang chub sems dpa' dang nyan thos dang rang sangs rgyas dang 'jig rten pa rnams kyang dam tshig 'di la mos shing 'thad ces pa'o/ /dam tshig 'di ni sus rig pa//gsang ba'i dkyil 'khor dbus su ste/ /rgyud kun du yang bzhugs pa yin/ /dkyil 'khor thams cad la yang dbang / /zhes pa ni gsang ba'i dkyil 'khor gyi dbus su 'di lta bu'i ting nge 'dzin gyi tshul bstan pa ni/ rgyud thams cad kyi dkyil 'khor du zhugs pa dang 'dra ba ste/thams cad kyi dam tshig can du gyur pa dang / dkyil 'khor thams cad kyang 'dir dbang zhes pa'o/ /sngags pa de ni nga dang 'dra'o/ /zhes pa ni gong du slar gsos nas dkar zhing gsal bar bya zhes pa ni spyir smos pa tsam du zad kyi tshig 'dis ni bcom ldan 'das rnam par snang mdzad kyi gzugs nyid du bya zhes pa'o//dam tshig ces su gzhan mi bya/ /zhes pa ni ting nge 'dzin de lta bur ma byas te log par gzhan du byas na dam tshig tu mi bya zhes pa'o/ /dam tshig ces pa ni skabs 'dir stong pa nyid kyi ting nge 'dzin pas chud pa la bya'o/ /ting nge 'dzin de yang dang po sreg pa ni 'jug pa'i sems so//bsregs nas stong pa'i rang bzhin du gnas te mi 'gyur ba ni gnas pa'i sems so/ /de nas slar gsos te bcom ldan 'das kyi skur bsgyur ba ni ldang ba'i sems su shes par bya'o/ /bcom ldan 'das kyi skur bsgyur ba'i tshe yang gsang ba'i phyag rgya 'og nas 'byung ba rnams kyi gdan dang /yan lag 'od la sogs pa 'og nas ji skad du byung ba'i rim bzhin du bya'o/ /byang chub sems dpa' la sogs pa gzhan gyi gzugs su bsgyur na phyag rgya de rnams kyis byin gyis brlabs na brtan par 'gyur ro//da ni nang gi yid kyi dkyil 'khor bri ba'i skabs 'chad de/ yid kyi dkyil 'khor bri ba yang spyir dkyil 'khor gnyis te/ rang gi gzugs kyi dkyil 'khor dang gzugs brnyan gyi dkyil 'khor ro/ /de la rang gi gzugs kyi dkyil 'khor ni rgya che zhing bsam gyis mi khyab ste mdor bsdus pa bstan pa ni yid kyi dkyil 'khor du shes par bya'o//gzugs brnyan gyi dkyil 'khor kyang ji skad du gsungs pa bzhin du rdzogs par dka' ste/ de ni mdor bsdus pa ni phyi ma'i rgyud las dkyil 'khor bshad pa'o/ /de bas na yid kyi dkyil 'khor 'di'i sgo nas sems kyi rang bzhin gyi gsang ba'i dkyil 'khor ji 'dra ba'i tshul shes par 'gyur te 'di ni 'jug pa lta bur blta'o//yid kyi dkyil 'khor de bri ba'i thabs bstan pa'i phyir bcom ldan 'das ting nge 'dzin du zhugs nas/ sangs rgyas kyi zhing de thams cad lag mthil dang mnyam par gyur pa dang rin po che sna lnga'i rta babs dang sgo khyud la sogs pa rnam pa mang pos brgyan par bstan pa ste/de dag thams cad kyang dngos po yod pa ma yin pa las/ sems kyi dbang tsam las ji ltar bsams pa bzhin du 'byung bar bstan pa'o/ /de bas na yid kyi dkyil 'khor la sogs pa'i yid kyis bskyed pa thams cad sbyor bas thog mar sems mnyam par gzhag pa la dgod pa'i mgon ji ltar gyur cig ces bsams shing /smon lam btab la ting nge 'dzin la zhugs na ji ltar smon pa de ltar 'gyur bar shes par bya'o/ /de ltar yid kyi dkyil 'khor bri ba'i thabs bstan pa yang /de nas bcom ldan 'das rnam par snang mdzad chen po de'i tshe ma 'ongs pa'i 'gro ba la gzigs nas kun rjes su chud pa zhes bya ba'i ting nge 'dzin la snyoms par zhugs so zhes pa la sogs pa ste/ bcom ldan 'das sngon gyi smon lam gyi shugs kyis sems can gyi don bya ba la/ sogs pa lhun gyis grub pa nyid du 'byung bas ting nge 'dzin du 'jug mi dgos mod kyi/ 'on kyang dngos po gang bstan par bya ba'i ting nge 'dzin du zhugs nas byang chub sems dpa' kun du bzang po la sogs pa 'dul ba'i 'gro ba rnams kyis bcom ldan 'das ci'i phyir ting nge 'dzin du zhugs pa dang zhugs nas ji ltar ston par 'gyur ba la sogs pa shes par 'gyur te/de ci'i phyir bcom ldan 'das ting nge 'dzin du 'jug go/ /kun du rjes su chud pa zhes pa ni/ bcom ldan 'das ting nge 'dzin la zhugs nas don dam par chos kyi dbyings kun du khyab par chud pa dang / kun rdzob tu yang sangs rgyas kyi zhing thams cad lag mthil bzhin du mnyam par 'gyur ba la sogs pa'o//gnas brtan pa rnams kyis khyad par du chud pa ste bcom ldan 'das ting nge 'dzin la zhugs na don dam pa dang kun rdzob tu chud pa de dag 'byung ba'i phyir ting nge 'dzin de'i ming kun du chud pa zhes pa'o//ma 'ongs pa'i 'gro ba la gzigs nas zhes pa ni kun du bzang po dang phyag na rdo rje la sogs pa byang chub sems dpa' yongs su dag pa rnams kyis ni/ de dag ji lta ba nyid du mkhyen gyi ma 'ongs pa'i 'gro ba rnams kyi don du dngos po yod pa ma yin pa las/ sems kyi dbang tsam gyis rnam pa sna tshogs 'byung ba bstan pa zhes pa'o//bcom ldan 'das snyoms par zhugs ma thag tu/ de nas de'i tshe nyid na sangs rgyas kyi zhing 'di lag mthil bzhin du mnyam par 'dug par gyur te zhes pa ni/ dkyil 'khor bri ba na sngar sa mthon dman la sogs pa bsnyams shing sbyang dgos te/de'i thabs bstan pa sangs rgyas kyi zhing 'di zhes pa ni mi mjed kyi stong gsum gyi stong chen po'i khams so/ /lag mthil bzhin du mnyam par 'gyur/ /zhes pa ni sangs rgyas kyi zhing de ri dang gcong rong la sogs pa med par mnyam par gyur ces pa ste/tshig des ma 'ongs pa'i dus kyi 'gro ba rnams nam dkyil 'khor brin dkyil 'khor gyis de ltar lag mthil bzhin du mnyam par sbyang bar bya ba bstan pa'o/ /sgo khyud dang rta babs rin po che sna lngas so sor brgyan pa zhes pa nas sil snyan du ma'i sgra 'jam po yid du 'ong ba ni rab tu grag pa'o zhes pa ni sangs rgyas kyi zhing de mnyam par gyur nas kyang rgyan de dag gis brgyan pa bstan pa ste/des ni dkyil 'khor gyi sa de dag brtan nas rta babs dang sgo khyud dang gdugs dang ba dan la sogs pas brgyan pa dang / ri mo rnams kyis brgyan par bya ba'i thabs bstan pa'o//dri zhim po yan lag brgyad dang ldan pa'i rdzing bu smos pa ni rdzing bu la sogs pa chu dang nye gnas su dkyil 'khor bri ba bstan pa'o/ /yan lag brgyad kyi rdzing bu de ni chu bsil ba dang / dang ba dang mngar ba la sogs pa'i byang chub sems dpa'i bsod nams kyi ji ltar bsags pa'i yid kyis bsten pa dang /khang pa dang gzhal med khang du ma dang ldan zhes pa ni sangs rgyas kyi zhing pha rol tu phyin pa las byung ba'i byang chub sems dpa' rnams kyi so so'i bsod nams ji tsam las so so nas stan dang khang pa dang lding khang la sogs pa dang ldan pa zhes pa ste/ des kyang dkyil 'khor gyis der byang chub sems dpa' la sogs pa lha rnams so so'i gnas dang bcas par bya ba bstan pa'o//de bzhin gshegs pa'i mos pa las byung ba zhes pa nas bsod nams rnam par bskyed pa'i sku rnams 'byung zhes pa'i bar du sangs rgyas kyi zhing de'i dbus na pad+mo'i rgyal po la de bzhin gshegs pa bzhugs te/de bzhin gshegs pa'i sku la ye shes kyis sems can chos kyi tshig ston pa sha stag 'byung ngo zhes pa ste/ de yang dkyil 'khor gyi dbus su bcom ldan 'das rnam par snang mdzad bzhugs pa de bzhin gshegs pa'i sku las gyur pa'i lha rnams kyis bskor zhing bzhugs par bya ba bstan pa'o//des na de bzhin gshegs pa'i mos pa las byung ba chos kyi dbyings rtogs pa'i mtshan mas btab ces pa ni/ pad+mo'i rgyal po de'i bye brag ste de bzhin gshegs pa'i mos pa las 'byung ba ni sngar bshad pa bzhin no/ /chos kyi dbyings rtogs pa zhes pa ni de bzhin nyid kyi ye shes dag pa la bya ste de'i mtshan mas btab pa ni/ye shes dag pa de'i mtshan mas dkar bar shes par bya ste/ mdor na de bzhin gshegs pa nyid ye shes dag pa de pad+mo chen po'i rgyal por snang bar byin gyis brlab ces pa'o/ /de'i dbus na de bzhin gshegs pa'i sku bzhugs pa zhes pa ni de bzhin nyid kyi ye shes chos kyi dbyings kyi mtshan nyid de las bcom ldan 'das rnam par snang mdzad kyi sku 'byung bar bstan pa'o//chos kyi dbyings la ston pa zhes pa ni stong pa nyid kyi rang bzhin du gyur pa zhes pa'o/ /de ltar bcom ldan 'das stong pa nyid kyi rang bzhin du gyur kyang phung po lhag ma ma lus pa'i mya ngan las 'das bzhin pa ni ma yin gyi/sngon gyi smon lam gyi shugs kyis rnam par mi rtog bzhin du kun rdzob kyi bya ba thams cad 'byung bar bstan pa'o/ /sems can rnams kyi bsam pa dang dad pa ji lta ba bzhin du mgu bar byed pa zhes pa'o//mi tshugs pa'i stobs dang stobs bcu'i mos pa las 'byung zhes pa ni bcom ldan 'das kyi sku las 'byung ba'i sku de rnams kyi mthus cis kyang mi tshugs pa sha stag ste/ de yang bcom ldan 'das nyid kyi rgyu de'i tshe kun du sangs rgyas pa'i mtshan nyid stobs bcu la mos pa bskyed pa de ni 'bras bu stobs bcu rdzogs par 'gyur ba las byung ba zhes pa'o//kha dog dang dbyibs su sna tshogs du mar ldan pa'i bdag nyid kyi ngo bo zhes pa ni sku mang po 'byung ba dag gi khyad par te/ de dag gi kha dog dang gzugs sna tshogs su bcas pa zhes pa'o/ /sku mang po de rnams kyang bcom ldan 'das nyid byang chub sems dpa'i spyad pa spyod tshe bskal pa grangs med par sbyin pa la sogs pa pha rol tu phyin pa la sogs pa'i bsod nams kyi tshogs bsags pa'i rgyu las byung ba bstan pa bskal pa bye ba khrag khrig brgya stong du mar zhes pa la sogs pa'o//de byung nas 'jig rten pa'i khams thams cad du gleng ba'i tshig 'di skad du dbyangs gcig gis kun du bsgo'o zhes pa de ltar gong du bcom ldan 'das kyis sangs rgyas kyi zhing lag mthil lta bu mnyam pa la sogs pa dngos su snang bar chud pa'i chos rnams bstan pa de nyid gzhung gi chos su 'og nas 'byung ba'i tshigs su bcad pa rnams kyi tshig gis bstan pa ste de yang /e ma'o sangs rgyas kun gyi ni/ /zhes pa nas/ mgon po kun gyis gang rnyed pa'o/ /zhes pa'i bar du'o/ /de la e ma'o zhes pa ni ngo mtshar du gyur pa'o/ /sangs rgyas kun gyi ni shes rab dang thabs rnams bsam gyis mi khyab pa zhes pa dang sbyar te shes rab ni chos thams cad bdag med par chud pa'i rang bzhin no//thabs de ni de ltar chos thams cad stong par chud kyang sems can gyi don du dngos po rnam pa sna tshogs yod par ston te/ de dag ngo mtshar che ste bsam gyis mi khyab ces pa'o//tshig de dag grol bar gsungs pa/ gnas med pa ru shes nas su/ /gnas dang bcas pa'i chos rnams 'chad/ /ces pa ste gnas med par ni shes nas zhes pa ni shes rab kyis chos thams cad gzung ba dang 'dzin pa'i gnas med de stong pa nyid du shes zhes pa'o//gnas dang bcas pa'i chos rnams 'chad/ /ces pa ni de ltar shes rab kyis chos thams cad dngos po med par chud kyang thabs kyis sems can rnams la phan gdags pa'i phyir gzung ba dang 'dzin pa'i gnas la sogs pa'i chos rnams dngos po yod par snang ba dngos su ston zhes pa'o//mi shes pa ni gang shes pa/ /chos rnams chos kyi mtshan nyid de/ /zhes pa ni phung po dang khams dang skye mched la sogs pa'i chos kyi mtshan nyid gang gis mi dmigs par shes zhes pa'o/ /des ni rnyed pa 'thob 'gyur ba/ /mgon po kun gyis gang rnyed pa/ /zhes pa'o//de ltar chos rnams dmigs su med par gang gis chud pa de mgon po sangs rgyas bcom ldan 'das kyis 'thob pa sangs rgyas kyi 'bras bu thob par 'gyur zhes pa ste/ mdor na chos rnams stong pa nyid du chud pa de sangs rgyas par 'gyur ro zhes bstan pa'o/ /gleng ba'i tshig de skad ces smras nas/sku de dag slar de bzhin gshegs pa'i chos kyi sku bsam gyis mi khyab pa la bzhugs so zhes pa ni de dag chos kyi dbyings stong pa nyid kyi rang bzhin du 'gyur te mi snang bar 'gyur ba'o/ /de ltar gsang ba'i dkyil 'khor bri ba'i thabs bcom ldan 'das kyis sngar bstan nas/da ni gsang ba'i dkyil 'khor nyid bri ba'i thabs bshad de/ de yang de nas bcom ldan 'das kyis phyag na rdo rje byang chub sems dpa' la bka' stsal pa/ rigs kyi bu nang gi dkyil 'khor de nyon cig ces pa la sogs te 'dir yang slob ma lhag par gnas pa de nyid kyi nub mo bya ba shes par bya'o//de'i rim pa yang de la thog mar slob dpon gyis mchod pa'i yo byad 'di dag la sogs pa nyid gzhung las 'byung ba bzhin du sta gon byas nas slob ma rnams kyang bsogs te/ phyi rol du bkod la de nas slob dpon de dkyil 'khor gyi gnas su zhugs te/ sangs rgyas dang byang chub sems dpa' thams cad la phyag 'tshal nas dam tshig gi phyag rgya bcings te/ mdun du rang bzhin gyi dkyil 'khor snying rje chen po'i dkyil 'khor du bstan pa rang bzhin du so so'i sngags 'bru re'am spyi'i snying po der bsams te/ de nas bdag nyid chos dbyings kyi phyag rgya dang sngags kyis byin gyis brlab pa dang chos kyi 'khor lo bskor ba'i sngags dang phyag rgyas rdo rje sems dpar byin gyis brlab pa dang /rdo rje go cha'i phyag rgya dang sngags kyis bsrung bar bya ste/ de nas las kyi rdo rjer bsgyur te de rnams la dam tshig gi phyag rgya bstan to/ / yon chab dbul ba dang dri dang me tog la sogs pa'i mchod pa rnams so so'i sngags kyis btab ste dbul ba dang yid kyi mchod pa yang bya'o/ /de ltar phyi nang gi mchod pa la sogs pa byas nas slob dpon de'i phyir byung la slob ma rnams la dri dang me tog byin te/ las thams cad pa'i sngags kyis bsrung bar bya ba dang las thams cad pa'i sngags kyis btab pa'i skud pa dpung par bcing ba dang so shing sbyin pa rnams byas te/de nas sdig pa bshags pa dang / lus dbul ba dang / sdom pa 'dzin du gzhug ste/ de dag ni lhag par gnas pa'i cho ga'o/ /dkyil 'khor du gzhug pa'i cho ga yang grogs po bsgrub pa'i phyi ma yod na yang des rim bzhin du bya ste/med na slob dpon gyis de nyid du slob ma dam tshig gi phyag rgya 'ching du gzhug pa dang chos kyi dbyings kyi phyag rgya dang sngags kyis byin gyis brlab pa dang / chos kyi 'khor lo'i phyag rgya dang sngags kyis byin gyis brlab pa dang /byang chub tu sems bskyed pa la sogs pa rim bzhin du bya ste/ de nas slob dpon des slar mchod pa'i gnas su zhugs te/ sems mnyam par gzhag la snying gar zla ba'i dkyil 'khor gyi steng du/ yi ge ra kha dog dkar po yid tsam dmar ba bsams te/yi ge de'i sgra'i kha de kho na nyid chos thams cad rdul dang bral ba bsgom pa ni/ bdag gi lus nyid rdul la sogs pa'i tshul du bshigs te/ rdul phran de yang phyogs dang cha phral na dmigs su med/ de bzhin du rnam par shes pa la sogs pa dngos po med par bsgoms te/zla ba'i dkyil 'khor dang yi ge ra yang stong par bsams te tha mar sgra'i de kho na nyid de yang dmigs su med par bsgoms te stong pa nyid du ji srid 'dod par gnas te/ de'i 'og tu thog mar rlung gi dkyil 'khor de nas chu'i dkyil 'khor de nas gser gyi dkyil 'khor bsams te/gser gyi dkyil 'khor de'i steng du bdag gi lus lte ba man chad kyang gser gyi dkyil 'khor gru bzhi par bsams te/ de'i steng du pad+mo rtsa ba dang bcas pa snying ga'i bar du phyin par bsams te/ de'i dbus na bcom ldan 'das rnam par snang mdzad bzhugs te/de'i shar phyogs kyi pad+mo'i 'dab ma la rin po che dpal de bzhin gshegs pa/ lho phyogs kyi 'dab ma la kun du rgyas pa'i dbang po zhes bya ba de bzhin gshegs pa/ nub phyogs kyi 'dab ma la snang ba mtha' yas de bzhin gshegs pa/ byang phyogs kyi 'dab ma la rnga dbyangs de bzhin gshegs pa bsam mo//shar lho'i 'dab ma la kun du bzang po byang chub sems dpa'/ byang shar gyi 'dab ma la spyan ras gzigs kyi dbang po/ lho nub kyi 'dab ma la 'jam dpal gzhon nur gyur pa/ nub byang gi 'dab ma la byams pa byang chub sems dpa' bsams te/ bcom ldan 'das rnam par snang mdzad la sogs pa byang chub sems dpa' de rnams kyang me tog dor ba la bde ba'i phyir/de rnams kun gyi sku bdag gi/ /klad pa'i bar du phyin par bsam/ /pad+mo'i ge sar kun la ni byang chub sems dpa' rnams kyi yum rnams dang / sa bcu dang pha rol tu phyin pa drug dang ting nge 'dzin rnams lha mo'i gzugs su bsam mo//pad+mo'i rtsa ba la phyag na rdo rje byang chub sems dpa' bsam mo/ /de'i drung g.yas g.yon du spyan ras gzigs kyi dbang po 'khor rnams dang / phyag na rdo rje'i rig pa khro bo rnams dang / skyong ba dang khro gnyer la sogs pa rim bzhin du bsam mo//de'i phyi rim du lha dang klu la sogs pa mang po bsams te/ de ltar brtan par byas nas yid kyis mchod pa tshul bzhin du bya'o/ /de nas de dag kun zin pa dang se gol brdab par bya ste/ slob ma rnams mgon po la me tog 'dor du gzhug go/ /me tog de dag kyang yid la bsams pa'i lha gang gi steng du bab pa de slob ma de la sbyin par bya'o//de dag ni bsdu ba'i don du tshig gi don la gsang ba'i bdag po de ni rang bzhin gyis rnam par dag pa'i phyir lus kyis gang ba de chos kyi dbyings kyi ngo bo nyid kyi sngags dang phyag rgya'i byin gyi rlabs kyis byin gyis rlobs shig ces pa ni mchod pa la sogs pa sngar smos pa'i rim bzhin du byas nas/bdag gi lus la chos kyi dbyings kyi phyag rgya dang sngags kyis byin gyis brlabs pa stong pa nyid du byos shig ces pa'o/ /de nas bdag las kyi lha rdo rje sems dpar byin gyis brlabs la zhes pa ni/ snga ma'i rim bzhin du chos kyi 'khor lo'i phyag rgyas byin gyis brlab pa dag byas nas las kyi rdo rje sems dpar bsgyur te/mchod pa dang slob ma'i cho ga bya ba la sogs pa thams cad gong du smos pa'i rim bzhin du bya'o/ /rdul dang zhes pa ni de nas slar bdag nang du zhugs nas yi ger snying gar bsams te/ chos thams cad rdul dang bral ba'i bar bsgom pa'i rim pa snga ma bzhin du bya'o/ /bdag dang sems can dang srog dang 'gro ba dang shed las skyes dang shed can dang / byed pa po la sogs pa'i nyes pa dang / zug rngur bral zhes pa ni mu stegs gzhan rnams kyi bdag la sogs pa'i dngos po de rnams kyang dmigs su med par sgom zhes pa ste/de dag ni ji ltar phyi rol gyi dkyil 'khor gyis sbyang ba rdo shing la sogs pa'i zug rngu dang nyes pa bsal ba bzhin du gang gis sbyang ba yang thabs ji ltar sbyang ngo zhes bshad pa'o/ /gru bzhi sgo bzhi las nub phyogs kyi sgo rtag par phye ba sgo khyud dang stegs bu rab tu brgyan pa zhes pa de ni de ltar stong pa nyid la sogs pa'i ting nge 'dzin byas la/de nas rlung dang chu'i dkyil 'khor la sogs pa snga ma bzhin du bsams te/ de'i steng du dbang chen gyi dkyil 'khor gyi steng du bdag gi rked pa man chad 'gyur bar bsams te/stegs bu zhes pa ni dbus kyi gzhi'i gdan de nyid la bya ste de yang gser gyi kha dog tu bsam mo/ /dbus na yid bzhin gyi pad+mo'i rgyal po chen po dang / ge sar rgyas pa dang bcas shing shin tu rnam par brgyan pa yid kyis zhes pa ni yid las byung ba'i pad+mo zhes pa ste sngar bshad zin to//shin tu rnam par brgyan pa'i yid la zhes pa ni/ 'dab ma brgyad la sangs rgyas bzhi dang byang chub sems dpa' bzhi rnams kyi kha dog ci 'dra ba dang mthun par kha dog sna tshogs su bya ba ste/ rin chen rgyal mtshan gyi kha dog dkar po/ kun du rgyas pa'i rgyal po'i kha dog ser po/rnga dbyangs kyi kha dog smug nag /snang ba mtha' yas kyi kha dog dmar po/ de bzhin du kun du bzang po ni ser po/ spyan ras gzigs kyi dbang po ni dkar po/ 'jam dpal gzhon nur gyur pa ni ser po/ byams pa ni dmar po bya'o/ /yang na thams cad kyang kha dog thams cad do zhes pa dang sbyar te chad pa med par shes par bya'o//de'i dbus su yang lus dang ngag yid 'jig rten thams cad las 'das pa'i de bzhin gshegs pa'i sku zhes pa ni/ bcom ldan 'das rnam par snang mdzad kyi sku pad+mo'i dbus su bsam pa ste mchog tu bzang ba 'jig rten thams cad las 'das pa zhes pa'o//sems kyi sa las 'das zhes pa ni gzung ba dang 'dzin pa'i cha sems kyi yul spangs pa zhes pa'o/ /sems kyis shin tu thob ces pa ni stong pa nyid kyi mtshan nyid de so sor rang gis rig pa thob pa zhes pa ste/ des ni rang gi don phun sum tshogs pa bstan pa'o//'bras bu dam pa yid du 'ong ba sbyin pa zhes pa ni pha rol gyi don phun sum tshogs pa bstan pa ste sems can rnams la mtho ris dang mya ngan las 'das pa'i 'bras bu rnams sbyin zhes pa'o/ /de'i shar du zhes pa ni de'i drung du rig pa dang / khro bo rnams zhes pa'i bar du sangs rgyas dang byang chub sems dpa' rnams pad+mo'i 'dab ma dang ge sar dag la bsam pa sngar smos pa'i rim bzhin du bya'o//gzhan ni mtsho chen por zhes pa'i bar du dkyil 'khor de'i 'og tu chu'i dkyil 'khor rgya mtsho bsam zhes pa'o/ /mar me dang / dri dang / me tog dang /bshos dang bdug pa yid du 'ong ba rnams sngags pas kun bsam zhes pa ni/ yid kyis dri dang me tog la sogs pa de dag thams cad sngags pas bsam zhes pa'o/ /sems can kun gyi dam tshig phyir/ /zhes pa ni dkyil 'khor de sems can rnams dam tshig la zhugs pa'i phyir/gzugs brnyan gyi dkyil 'khor rnams rdzogs pa rgyas par bri mi nus shing zab cing rgya che ba la mos pas dkyil 'khor 'di bya zhes pa'o/ /drung gi sa gzhi kun du ni/ /lha rnams grangs med pa yang ni/ /sngags mkhan gyis ni nan tan bri/ /dkyil 'khor mthu chen 'di ru ste//zhes pa ni bcom ldan 'das mthu chen po dkyil 'khor 'di'i dbus kyi stegs bu'i 'og phyi rim gyi sa gzhi thams cad du lha dang klu la sogs pa grangs med pa bri zhes pa'o/ /rang lus rang gis bya ba ni/ /ras kyi rnam pa sbyangs nas su/ /sngags pa sbyar stan der 'dug nas//de bzhin gshegs rnams rjes mos pas/ /zhes pa ni sbyor ba de rnams bya ba yang bdag nyid yi ge raM snying po nyid du sbyang ba la sogs pa gong du smos pa'i tshul bzhin du byas nas gdod las ni 'di rnams bya zhes pa'o/ /slob ma rnams kyi spyi bo ru/ /a ni 'khor dang bcas te gzhag /ces pa ni slob ma dkyil 'khor du 'jug pa'i tshe chos kyi dbyings su byin gyis brlab pa la sogs pa byas nas de dag brtan par bya ba'i phyir/ kun du sangs rgyas pa'i snying po oM spyi bor bsam zhes pa'o/ /de nas me tog 'dor du gzhug /ces pa nas/ rig pa yang ni de la byin//zhes pa'i bar du slob ma rnams bdag gi lus la me tog bor nas gang la bab pa'i rig pa de sbyin pa'o/ /de la bsgom par zhes pa'i dkyil 'khor bar zhes pa ni dkyil 'khor gyi tshul rnams slob ma la bstan pa'o/ /'di ni dkyil 'khor dam pa ste/ /zhes pa ni stong pa nyid kyi ting nge 'dzin bsgoms pa las byung ba'i pha rol gyi mtshan ma rnams la mi rtog pas dam pa zhes pa'o//lus can rnams kyi dam tshig phyi ru gsungs/ /zhes pa ni dkyil 'khor 'di dam tshig can du bya ba'i phyir ro zhes pa sngar bshad pa bzhin no/ /gsang ba'i dkyil 'khor du 'jug pa'i thabs zhes pa ni mgon na gong ma'i nang du bshad zin to// //da ni rig pa'i dka' thub kyi le'u 'chad de/ rig pa zhes bya ba ni yang dag pa nyid don ji lta ba bzhin pa nyid rig pas na de bzhin nyid kyi ye shes dang / de las byung ba'i sngags dang phyag rgya la yang bya ste/de'i dka' thub ni de dang rjes su mthun par spyod pa ste/ ji ltar bcom ldan 'das shAkya thub pa dang rjes su mthun pa'i spyod pa skra dang kha spu bregs pa dang chos gos bgo ba la sogs pa dge slong gi gzugs su spyod pa dang / 'jig rten pa rnams kyi yang lha chen po la dad pa la sogs pa nyid kyi spyod pa dang /tshul 'jig rten du rig pa'i brtul zhugs 'di yang bdag nyid kyi lha'i gzugs ci 'dra ba dang / rjes su mthun par spyod pa dang ting nge 'dzin stong pa nyid kyi rang bzhin dang rjes su mthun par spyod pa dang / ting nge 'dzin las langs nas kyang chos thams cad sgyu ma lta bu'i rang bzhin rtogs pa dang /rjes su spyod par mthun par spyod pa dang / de'i sngags slob par byed pa rnams te yan lag de bzhi dang ldan pa ni rig pa'i brtul zhugs zhes pa'o/ /de la kha cig ni brtul zhugs 'di spyod cing sngon du bsnyen pa'i grangs sum 'bum la sogs pa ji skad du gzhung las 'byung ba bzhin du byas nas sgrub pa la 'jug par bya'o//de ste de bas kyang lhag par bstan par 'dod pas/ dbang chen la sogs pa'i dkyil 'khor la gnas shing / zla ba drug tu rig pa'i brtul zhugs spyod par shes par bya ste/ de bas na brtul zhugs 'di ni dbang chen la sogs pa la gnas/brtul zhugs kyi rgyu lta bur bltas te rig pa'i brtul zhugs 'di las byung ba'i dbang chen la sogs pa'i dkyil 'khor la gnas pa'i brtul zhugs ni brtul zhugs gong ma 'di las byung bar blta ste/ de bas na brtul zhugs 'dis sngar sems yongs su sbyangs nas phyis brtul zhugs 'og ma la 'jug ste brtul zhugs 'og ma spyod pa dang /lha'i gzugs su bskyed pa stong pa nyid kyi ting nge 'dzin la gnas pa dang / ting nge 'dzin las langs nas spyod pa'i tshe yang chos rnams sgyu ma lta bur rtogs shing chags par spyod pa dang / sngags slob par byed pa'i rim bzhin du spyad par bya ste/ lhag pa ni dbang chen la sogs pa'i dkyil 'khor la gnas shing de'i rang bzhin la bya ba dang / dbang chen la sogs pa so so'i phyag rgya 'ching ba'o/ /rig pa'i brtul zhugs de dris pa yang / de nas bcom ldan 'das rnam par snang mdzad la phyag na rdo rjes tshigs su bcad pa'i dbyangs kyis sngags kyi sgor byang chub sems dpa'i spyad pa spyod pa rnams kyi don gyi phyir rig pa'i dka' thub kun dris pa zhes pa la sogs pa ste/phyag na rdo rje rig pa'i dka' thub dris pa yang dbang chen la sogs pa'i dkyil 'khor la gnas shing /rig pa'i dka' thub spyod pa de gtsor dris par shes par bya'o/ /tshigs su bcad pa'i dbyangs kyis dris pa ni don dka' zhing zhes pas don gyi tshig dang 'bru rnams mi nyams par bya ba'i phyir ro/ /sngags kyi sgor byang chub sems dpa'i spyod pa spyod pa rnams kyi spyir zhes pa ni phyag na rdo rje nyid dmigs mi mkhyen te/'dri ba ma yin gyi ma 'ongs pa'i 'gro ba sngags kyi sgor byang chub sems dpa'i spyad pa spyod pa rnams la phan gdags pa'i phyir zhes pa'o/ /'di ltar dka' thub spyad pa lags/ /zhes pa nas rgyal po gtso nyid dbang du zhes pa'i bar du phyag na rdo rjes dris pa'i tshig ste/de la sngon gyi sangs rgyas kyis gsungs zhes pa las 'di ltar sngon gyi sangs rgyas kyis zin na da dri ci dgos she na/ bdag nyid sngon gyi sangs rgyas kyis bshad pas de'i don 'tshal mod kyis/ ma 'ongs pa'i 'gro ba rnams kyi don du bshad na/ bcom ldan 'das kyis mngon sum du bstan na/de rnams yid ches par 'gyur ba dang / bcom ldan 'das nyid du dbang du bgyis pa'i phyir zhes pa ste de bas na gsungs pa/ ma 'ongs pa'i 'gro ba rnams kyi don du bshad de/ rgyal ba gtso nyid dbang du bya/ /zhes pa'o/ /dris pa'i tshig gzhan rnams ni 'og nas lan ldon pa dang sbyar ro//rig pa'i dka' thub las byung ba'i/ /dka' thub gnas pa sangs rgyas bzhin/ /zhes pa ni/ rig pa'i dka' thub las byung ba/ /zhes pa ni sems su sbyor ba'i mtshan ma nyid yan lag bzhi dang ldan pa'i rig pa'i dka' thub de las byung ba dbang chen la sogs pa'i dkyil 'khor la gnas te spyod pa de bshad do zhes pa dang sbyar ro//dka' thub gnas pa sangs rgyas bzhin/ /zhes pa ni ji ltar sangs rgyas bcom ldan 'das kun du sangs rgyas pa don dam par yang ting nge 'dzin la zhugs pa'i tshe yang chos thams cad stong pa nyid de mtshan nyid gcig tu chud/kun rdzob tu spyod pa'i tshe yang chos rnams sgyu ma lta bur mkhyen pas ji ltar yang mi chags par spyod pa de bzhin du rig pa'i brtul zhugs la gnas pa de yang ting nge 'dzin la zhugs pa'i tshe chos thams cad stong pa nyid kyi rang bzhin du gnas/ ting nge 'dzin las langs te spyod pa'i tshe yang chos rnams sgyu ma lta bur rtogs shing gang la yang mi chags pas spyod pas na/kun du sangs rgyas pa dang 'dra/ /zhes pa'o/ /yang dag 'di byas nas zhes pa nas/ nam zhig rtag tu sems thub na/ /zhes pa'i bar du ji ltar dka' thub spyad pa la gnas zhes zhus te bshad pa ste/yang dag nyid du bdag byas nas/ /zhes pa ni bdag gi de kho na nyid ji skad bshad pa bzhin du byas nas zhes pa'o/ /rtag tu the tshom med na ni/ /zhes pa ni de ltar bdag gi de kho na nyid bdag ni lha gang yin pa'i gzugs su bsgyur ba ting nge 'dzin 'khrugs pa dang lha ji bzhin pa'i bar snang ba rnam par rtog pa gzhan med par lha'i gzugs nyid yid la the tshom med par snang na de/dka' thub spyad pa spyod pa yin/ /zhes pa dang sbyar ro/ /de bas na gsungs pa/ nam zhig rtag tu sems thub na/ /zhes pa ste mdor na rtag tu sems thub par bya ste/ lha'i gzugs de nyid la brtan pa snang bar ma byas na/ sngags dang phyag rgya sbyar ba tsam dang / gang lta ba de dag bdag go tsam du bsam pa tsam gyis rig pa'i brtul zhugs mi chud ces pa'o/ /de ni rig pa dang mthun pa'i gzugs su spyod pa'o/ /byang chub sems dpa' dang chos rnams dang /gzhan gyi tshul khrims can ma yin zhes pa'i bar du/ ji ltar tshul khrims la yang gnas/ /zhes zhus pa de bshad pa ste 'jug pa'i byang chub kyi sems chos sun 'byin pa'i mtshan nyid rnam par rtog pa dang bcas pa dang / phung po dang khams dang skye mched la sogs pa'i rnam pa dang /dge ba bcu'i rang bzhin la bslab pa dang / 'dus byas kyi las dang 'bras bu rnams stong pa nyid kyi mtshan nyid gcig tu ldan par chud na/ tshul khrims de las dang bral ba zag pa med pa'i tshul khrims stong pa nyid kyi mtshan nyid de de bas na gsungs pa/ tshul khrims sangs rgyas bzhin rig bya//zhes pa ste ji ltar sangs rgyas bcom ldan 'das chos thams cad stong pa nyid kyi rang bzhin du mtshan nyid gcig tu chud pa bzhin du zhes pa ste/ de ni rig pa dang rjes su mthun pa'i stong pa nyid kyi ting nge 'dzin spyod pa de sngar bdag gis lha'i gzugs su bsgyur nas/de'i 'og tu rang gi sems yongs su sbyang ba'i phyir lha'i gzugs su bsgyur ba de so so nas mi zhig par yid la mi bya ba'i tshul gyis stong pa nyid kyi ting nge 'dzin la gnas par bya'o/ /chos kun dbang thob ces pa nas gser dang rdo bar bsnyams nas zhes pa'i bar du/mi chags pa ni ji ltar spyod/ /gang na ji ltar gnas nas so/ /zhes bshad pa ste/ chos kun la yang dbang thob cing / /zhes pa ni chos thams cad stong pa'i rang bzhin du chud de/ 'dod chags la sogs pa nyon mongs pa rnams kyi dbang du mi 'gro zhes pa'o/ /sems can don phyir der zhugs pa//mi chags bzhin du spyod pa ni/ /gser dang rdo bar snyoms na'o/ /zhes pa ni stong pa nyid kyi ting nge 'dzin las langs nas/ sbyin pa la sogs pa sems can gyi don du kun rdzob spyod na/ 'dus byas kyi chos rnams sgyu ma lta bur rtogs shing de rnams la chags pa mi 'byung ba ni ji ltar rdo ba dang bong ba la chags pa'i sems mi skye bzhin du gser la yang chags pa'i sems mi skye na gang na gnas kyang mi chags pa spyod pa zhes pa ste de ni kun rdzob tu yang spyod na rig pa dang rjes su mthun par spyod pa'o//ji srid mtshan mar bshad pa ni sngags kyi grangs su bya ba rnams de srid du sgrub pa dang /dka' thub yongs su rdzogs par 'gyur/ /zhes pa ni ji srid du bsgrubs na/ dka' thub yongs su rdzogs par 'gyur/ /zhes de bshad pa ste/ sngags bzlas pa'i grangs sum 'bum la sogs pa ji srid du gzhung las bshad pa/ ji srid kyi bar du dka' thub de gong du bshad pa'i tshul bzhin du spyad na yongs su rdzogs par 'gyur zhes pa ste/de yang dbang chen la sogs pa'i dkyil 'khor la gnas pa'i dka' thub kyi sngon rol du sems yongs su sbyong pa'i mtshan nyid yan lag bzhi dang ldan pa'i dka' thub de la bya'o/ / dbang chen gyi ni lha lta bur/ /zhes pa nas/ rnyed dang mi rnyed rnam par spangs/ /zhes pa'i bar du de'i gnas gang du bgyi zhes pa'i lan te/ dbang chen la sogs pa'i dkyil 'khor la gnas nas rig pa'i dka' thub spyad pa bshad pa de la/ dbang chen gyi ni lha lta bur/ /zhes pa nas/ srog dang rtsol ba nan tan du//zhes pa'i bar du dbang chen la sogs pa'i dkyil 'khor la gnas nas bdag nyid rang gi lha'i gzugs su bsgyur te/ ji ltar sa'i rang bzhin sra zhing mkhrang ba ltar bdag gi lus kyang de lta bur sems la zhar la bsgom zhing zla ba gcig tu bzlas shing gnas par bya ba bshad de/dbang chen gyi ni lha lta bur/ /dbang chen dkyil 'khor la 'dug nas/ /zhes pa ni dbang chen gyi snying po yi ge a chos thams cad thog ma nas ma skyes par ston pa'i sgra'i de kho na nyid bsgoms nas yi ge de nyid las dbang chen gyi dkyil 'khor du gyur pa snga ma bzhin du bsams te/ de'i steng du bdag rang gi lha'i gzugs su bsgyur nas rdo rje'i phyag rgya bcings te dbang chen gyi rang bzhin lta bu sra zhing brtan par bsgom zhes pa'o/ /rdo rje'i phyag rgya bcings nas su/ /zhes pa ni sra zhing brtan pa'i rjes su mthun pa'i phyir rdo rje'i phyag rgya bcing ba'o/ /zas su rtag par 'o ma btung / / zhes pa ni zas kyang rjes su mthun par zhes pa ste/ 'o ma 'thungs nas lus brtas shing mkhrang bar 'gyur ba'i phyir ro/ /'jig rten na yang sems dang kha zas gnyis kyis lus 'dzin par 'gyur ba de bzhin du/ 'dir yang sems mkhrang bar 'gyur ba'i kha zas zos na dbang chen gyi ting nge 'dzin dang mthun par 'gyur ba'i phyir ro//sngags mkhan gyis ni zla gcig bzlas/ /srog dang rtsol bas nan tan du'o/ /zhes pa ni sngar bshad pa'i tshul bzhin du srog dang rtsol ba bsdams nas/ rang gi snying po zla gcig bzlas/ /zhes pa'o/ /de nas zla ba gnyis pa'i tshe//zhes pa nas/ de'i tshe zas su chu btung ngo / /zhes pa'i bar du chu'i dkyil 'khor la gnas par bshad pa ste/ chu'i dkyil 'khor gyi sa bon gyi sgra'i de kho na nyid bsgom pa dang / sa bon de las chu'i dkyil 'khor du bsgoms pas rim pa bzhin du bya ste/ bdag gi lus kyang chu'i rang bzhin ltar sngo bar bsgom zhing pad+mo'i phyag rgya bcings la zla ba gcig tu bzlas pa bya ste/pad+mo'i phyag rgya bcings pa dang zas su chu btung ba yang de dang rjes su mthun par bya ba'i phyir ro/ /de nas zla ba gsum pa'i tshe/ /zhes pa nas/ lus ngag yid las byung ba'o/ /zhes pa'i bar du/me yi dkyil 'khor la gnas pa'i/ /bshad pa'i zas bza' ste zhes pa ni me dang rjes su mthun par bya ba'i phyir/ ji ltar me skam gsher dang bzang ngan la sogs pa mi rtog par sreg pa bzhin du zhim po la sogs pa'am/ 'dod pa'i dngos po rnams la mi rtog cing slong bar bza' zhes pa'o//ral gri'i phyag rgya dang ldan pa/ /zhes pa yang me dang rjes su mthun pa ste/ ji ltar mes thams cad 'tshig cing gcod pa bzhin du ral gris kyang dngos po thams cad gcod cing med par byed pa'o/ /sdig pa kun du bsreg pa ni/ /lus po nyid las byung ba'o//zhes pa ni de lta bu'i ting nge 'dzin la gnas shing sngags bzlas na/ lus dang ngag yid gsum gyi sgo nas sdig pa sbyang ba'i las kyi bag chags las bsams te 'byung bar 'gyur zhes pa'o/ /bzhi la rlung gi ldan par te/ /zhes pa nas/ sems thub par ni sngags zlos shig /ces pa'i bar du zla ba gcig rlung gi dkyil 'khor la gnas pa ste/ rlung gi dkyil 'khor ting nge 'dzin du sbyar ba ni sngar bshad pa bzhin te/ khyad par du bdag gi lus rlung gis reg par ldan par yid la bsgom mo/ /zas su rtag par rlung bza'o/ /zhes kha zas kyang de'i rjes su mthun par sbyar ba ste/rlung ni nang du rgyu ba lkog mar bags kyis bgags par bsams na bru ba tsha ba dang skom pa med par 'gyur te rlung za ba zhes bya'o/ /de la 'khor lo'i phyag rgya bcings/ /zhes pa ni 'khor los 'khor zhing g.yo ba'i mtshan nyid pas rlung dang rjes su mthun par bya ba'i phyir ro//sems thub par ni sngags zlos shig pa ni srog dang rtsol ba bsdams pa la sogs pa sngar bshad pa'i rim pa bzhin du bzlas pa'o/ /dbang chen gyi dang chu dngos las/ /zhes pa nas/ rdzogs pa'i sangs rgyas rdzogs 'gyur ro/ /zhes pa'i bar du dbang chen gyi dkyil 'khor dang chu'i dkyil 'khor gnyis la gnas te/rig pa'i brtul zhugs spyad pa ste/ dbang chen dang chu'i dkyil 'khor so so'i snying po las snga ma bzhin du bsams te/ ro smad ni dbang chen gyi rang bzhin du snga ma bzhin du bsam mo/ /ro stod ni chu'i rang bzhin du bsams te/zas su yang 'o ma dang chu gnyis btung zhing zla ba gcig tu bzlas par bya'o/ /rnyed dang mi rnyed rnam pata spangs/ /zhes pa ni rnyed na yang dga' ba med ma rnyed na yang mi dga' ba med pa'o/ /rlung dang me yi ldan pa ste/ /zhes pa nas rnyed pa dang mi rnyed pa rnam par spangs so zhes par rlung dang me gnyis ka'i dkyil 'khor la gnas nas rig pa'i dka' thub spyod pa ste/rlung gi dkyil 'khor gyi steng du me'i dkyil 'khor dang / raM gyi sa bon las bsams te/ bdag gi lus ro stod me'i rang bzhin du 'bar ba bzhin du bsam/ ro smad kyang snga ma bzhin du rlung gi rang bzhin du bsams te/zas su yang rlung gi zas kyi sbyor ba sngar smos pa bzhin du cung zad bya/ me'i zas ma blangs par yang cung zad bya ste/ zla ba gcig tu zlas par bya/ /zhes pa de dag thams cad kyang rang gi lha'i gzugs su sbyor ba ni so so'i dkyil 'khor kha dog ci 'dra ba bzhin du lha'i gzugs kyi kha dog kyang de bzhin du shes par bya'o//zla ba gcig tu srog dang rtsol ba bsnams te bzlas pa yang dbang chen gyi dkyil 'khor gyi skabs su bshad pa'i rim bzhin du bshad par bya'o/ /brgya byin tshangs pa la sogs pa'i/ /lha rnams zhes pa nas sems can kun la phan byed pa'i bar du de'i mtha' ji ltar rig par bgyi zhes zhus pa'i lan te mthu bshad pa ste/brgya byin dang tshangs pa la sogs pa'i lha rnams dang / sha za dang lto 'phye la sogs pa'i rig pa'i dka' thub de lta bu dang ldan pa'i sngags pa de lta bu mthong na/ rgyang ring po nas phyag 'tshal zhing sngags pa de la srung bar byed/sngags pa des ni ci dgos pa rnams kyang byed par 'gyur ba dang / lha'i sman rnams kyang sngags pa de'i drung na 'khod cing bka' mnyan zhing sman btsal gyis mi rnyed pa dag kyang de'i drung na 'dug pa mthong ngo / /bgegs dang ma bdun po la sogs pa'i 'jigs par byed pa rnams kyang rgyang ring po nas phyag 'tshal bar byed pa dang /sngags pa'i gnas kyang me 'bar ba ltar snang ba sangs rgyas bcom ldan 'das ltar 'jig rten dang 'jig rten las 'das pa rnams la dbang thob pa dang / dbang bar 'gyur ba dang mi mthun pa 'dum pa ni phyag na rdo rje lta bu/snying rje chen po spyan ras gzigs kyi dbang po lta bur gyur zhes pa'o/ /de ni zla drug bzlas rnams la/ /dngos grub 'dod bzhin 'bras bu smin/ /bdag rang dang ni gzhan rnams la'ang / /rtag tu skyong bar bye dpa'o/ /zhes pa ni/ dus dang yul dang bya ba las chos dang //chos min rnam par spong bar byed pa 'dis/ /ji ltar myur du 'gyur ba'i tshad kyang mgon pos bka' stsol cig /ces pa de bshad pa ste dbang chen la sogs pa'i dkyil 'khor la bsgom pa'i rim gyis zla ba drug na dus la sogs pa la mi ltos shing bdag dang gzhan la phan pa'i grub pa thob par 'gyur te/de lta bu thob pa'i tshad ni zla ba drug go zhes pa'o/ /de nas yang bcom ldan 'das la phyag na rdo rjes sngags rnams dang dkyil 'khor yang dris pa zhes pa la sogs pa ni/ slob dpon gyi de kho na nyid bshad pa ste/ slob dpon gyis dri ba de kho na yang sngags rnams dang dkyil 'khor gyi snying po gang yin pa la sogs pa ji lta bu nyid du shes na slob dpon du 'gyur te/de bas na sngags rnams 'byung ba'i gnas snying po de bshad pa/ sngon du slob dpon gyi de kho na nyid bstan te/ de bas na phyag na rdo rjes kyang / sngags kun gyi ni snying po gang / /slob dpon zhes bgyi ci zhe na//zhes pa zhus so/ /de la/ sngags kun gyi ni snying po gang / /zhes pa ni a a zhes pa ni sngags rnams/ snying po ru ni gsungs pa yin/ /zhes pa la sogs pa dang sbyar ro/ /slob dpon zhes pa ni/ snying ga ru ni snying po gzhag /yan lag tu ni yan lag gzhag /ces pa dang sbyar te/ de rnams kyang bkod pa tsam gyis chog pa ma yin gyi/ de dag sgra'i de kho na nyid la sogs pa shes na slob dpon zhes bya'o/ /gsang ba'i ye shes de zhes pa ni sngags spyad pa'i tshul rang bzhin gyis gsang ba'i steng du sngags kyi snying po yi ge a zhes thams cad thog ma ma skyes par chud pa'i ye shes 'byung ba'i sgo ste/shin tu zab ste snod ma yin zhing dam tshig med pa la mi bstan pas na gsang ba'i gsang ba zhes bya'o/ /sngags kyi yi ges 'byung chen po/ /zhes pa ni snying po'i sgo nas chos thams cad stong pa nyid du chud par 'gyur bas de nyid yi ge zhes bya ste/ye shes de las bla na med pa'i 'bras bu thob pa chen po 'byung bas na 'byung chen po zhes bya'o/ /pha rol tu phyin pa la sogs pa'i sgo nas ye shes 'byung ba yang 'bras bu chen po 'byung ba yin mod kyi/ de las khyad par du gsungs pa/ sngags kyi ye shes 'byung chen po//zhes pa ste de lta bur dris pa dge ba'i tshig dang sbyar ro/ /a zhes bya ba sngags kun gyi/ /snying po ru ni gsungs pa yin/ /de las byung ba sngags rnams ni/ /grangs med pa ru skyes pa ste/ /zhes pa ni/ sngags kun gyi ni snying po gang / /zhes zhus pa'i lan te/ de la yi ge a zhes pa ni sngags thams cad kyi snying po/snying po zhes pa ni 'byung ba'i gnas so/ /de bas na kun rdzob dang don dam pa gnyis ka 'byung ba'i gnas te/ de la ka la sogs pa yi ge 'bru thams cad kyang a dang mi ldan na mi smra ste/ de bas na yi ge ka la sogs pa thams cad kyang a las byung bar shes par bya ste/de ni kun rdzob tu 'byung ba'i gnas so/ /don dam pa ni yi ge a de las chos thams cad thog ma nas ma byung ma skyes par chud pa'i ye shes 'byung ste 'di ni don dam pa'i gnas so/ /de la/ de las 'byung ba'i sngags rnams ni/ /grangs med bar du skyes pa ste/ / zhes pa ni 'jig rten dang 'jig rten las 'das pa'i sngags ji snyed du gsungs pa de thams cad yi ge 'bru'i ngo bo ste/ 'bru de rnams kyang a las gyur pas sngags grangs med de/ de dag thams cad a las byung / /zhes pa ste des ni kun rdzob tu thams cad 'byung ba'i gnas su ston pa'o/ / 'phro ba thams cad zhi bar byed/ /ma lus ye shes kyang 'byung zhes pa ste/ a de ting nge 'dzin gyi sgo nas chos thams cad thog ma nas ma byung ba stong pa nyid kyi rang bzhin du chud pas gzung ba dang 'dzin pa la sogs pa rnam par mi rtog pa'i 'phro ba dang bral ba'i ye shes kyang a de las 'byung ngo zhes bstan pa ste des ni don dam par 'byung ba'i gnas su bstan pa'o//de lta bur na gsang ba'i bdag po zhes pa nas/ sna tshogs pa'i lus las byung ba'o/ /zhes pa'i bar du gong ma'i tshigs su bcad pa mdor gsungs pa de nyid ni 'brel pa ste/ de la spyir rnam pa lnga ste/ a dang aM dang i dang u rnams so//de dag yi ge thams cad spyi'i rang bzhin no/ /oM klad kor gyi nga dang nya dang na dang Na dang ma rnams kyi rang bzhin te/ nga'i nang du ka'i 'khor rnams 'dus/ nya'i nang du tsa'i 'khor rnams 'dus/ Na'i nang du Ta'i 'khor rnams 'dus/ na'i nang du ta'i 'khor rnams 'dus/ ma'i nang du pa'i 'khor rnams 'dus par blta'o/ /a dang i'i nang du ya 'dus par blta'o/ /ra dang la ni r-i r-I dang l-i l-I'i nang du 'dus/ sha Sha dang sa ha rnams ni yi ge zhes pa'i tshig gnyis po'i nang du 'dus te/ a de rnams las ka la sogs pa'i yan lag thams cad 'byung bar shes par bya'o//de la a de ni srog tu gsungs pa ste/ sangs rgyas rkang gnyis mchog gis zhes pa ni/ yi ge a de kun rdzob dang don dam pa gnyis ka ru thams cad kyi srog ste/ kun rdzob tu yang gong du bshad pa'i tshul gyis a de med na ka la sogs pa smras pa thams cad kyi srog ces bya'o//chos thams cad thog ma nas ma skyes par chud pa'i ye shes 'byung bas srog ces bya ste/ de lta bur srog yin par 'ga' zhig gis bshad pa ma yin gyi/ sngon gyi sangs rgyas rnams kyis bshad pa'o/ /de bas 'di kun thams cad de/ /zhes pa ni a de ltar de srog yin pas ka la sogs pa'i dngos po thams cad 'di ji ltar yin zhes gsungs pa/yan lag kun rnam par zhes pa ste/ a de rnams ka la sogs pa'i 'bru rnams la gnas zhes pa'o/ /yan lag rnams kyang ci rigs par/ /rtag par kun la'ang shes par byos/ /zhes pa ni ka la sogs pa'i yan lag ji ltar rigs par sngags kun la rtag tu gnas par shes par bya'o zhes pa'o//yi ge rnams kyis thams cad khyab/ /ces pa dang de nyid kyi don du gsungs pa ste/ ka la sogs pa'i yi ge rnams kyis sngags kyi tshig thams cad du khyab ces pa'o/ /yi ge rnams kyang de yis so//zhes pa ni ka la sogs pa'i yi ge rnams la a des khyab ces pa'o/ /yi ge las ni sgra 'byung ba dang / cha ru kun du 'byung ngo zhes pa ni ka la sogs pa'i yi ge'i sgra rnams las chos thams cad dgos pa dang bral ba'o zhes pa la sogs pa'i sgra'i phyogs gcig pa rnams 'byung zhes pa'o//de bas na de kun thams cad de sna tshogs pa'i lus 'byung ba'o zhes pa ni/ de bas na a de ni ka la sogs pa'i dngos po thams cad de/ ka la sogs pa de rnams kyang lha rnams thams cad kyi sa bon bas lha rnams kyi gzugs rnams tshogs pa'i yi ge de rnams las ji ltar rigs par sbyar na 'byung zhes pa'o//de yis gzhan pa bshad pa yin/ /zhes pa nas/ slob dpon gyis su de bsgrags pa/ /mthu chen sangs rgyas rnams kyis so/ /zhes pa'i bar du yi ge sum cu rtsa gnyis so/ /de dag thams cad 'og nas 'byung ba'i tshul gyis slob dpon gyi lus la dgod pa bshad de/de'i gzhag pa yin zhes pa ni yi ge de snying gar gzhag go/ /sngar bshad zin to zhes pa'o/ /dpa' bo snying po de nyid tshig /ces pa snying po zhes pa'i tshig ni a 'ba' zhig la mi bya'i/ sems mgu ba ni snying yin te/ /rigs nas sngags rnams grub sder zhes bshad pa'i tshul du rig par bya ste/yi ge 'di rnams lus la bkod pa tsam gyis chog pa ma yin gyi/ so so'i sgra de kho na nyid sems tshim zhing mgu ba'i bar du bsgom par bya ba nyon cig ces pa'o/ /snying ga ru ni snying po gzhag /yan lag rnams su yan lag gzhag /ces pa snying gar yi ge a/lus kyi yan lag rnams su ka la sogs pa'i 'bru rnams ka de lhag mar rig par bya'o zhes pa la sogs pa 'og nas 'byung ba'i rim bzhin du bkod ces pa'o/ /de ltar 'di kun bya ba ni/ /bdag gi lus ni kun du sangs rgyas su/ /zhes slob dpon bdag gi lus kun sangs rgyas pa'i skur bsgyur te yi ge 'di thams cad dgod par bya'o zhes pa'o//sbyor ba'i stan gnas blo can gyis/ /de bzhin gshegs pa rjes dran nas/ /zhes pa ni de bzhin gshegs pa bsams te/ phyag byas la sbyor ba'i skyil mo krung du bcas te sems dang lus mnyam par bzhag nas gong du smos pa rnams zhes pa'o//rgyal chen ye shes sras 'di la/ /cho ga bzhin du shes nas dgod/ /slob dpon zhes su de bsgrags pa/ /mthu chen sangs rgyas rnams kyis so/ /zhes pa ste/ de ltar yi ge rnams bkod cing de rnams kyi sgra'i de kho na nyid stong pa nyid du chud pa'i ye shes rgya chen po de dag cho ga bzhin du bgyis nas she na kun du sangs rgyas pa rnams kyis slob dpon zhes gsungs so//de bas na de bzhin gshegs pa zhes pa nas/ yi ge 'khor lo ma lus par/ /rang gi lus la gnas pa'o/ /zhes pa'i bar du de'i rjes su bsngags pa bshad pa ste/ de la sangs rgyas la sogs pa grub pa yang rgyu rnam pa gnyis te bsod nams dang ye shes kyis so/ /de la sbyin pa la sogs pa'i bsod nams ni de bzhin gshegs pa'i rgyu'o/ /ye shes ni mngon sum pa'i rgyu ste/ de la 'dir sngags kyi yi ge rnams kyi sgra de kho na nyid stong pa nyid chud par byed pa'i ye shes mngon du byas nas/'di ni mngon sum pa'i rgyu ste/ de bzhin gshegs pa'o zhes pa la sogs pas bstod pa ni/ slob dpon de mos pa spyod pa'i sa la gnas te de bzhin gshegs pa ma yin/ de bzhin gshegs pa la sogs par 'gyur ba'i rgyu byed pas rgyu las 'bras bu bstan par shes par bya'o//de bzhin du 'jig rten na snang ba char chu mod cing / myu gu bzang na 'bras bu ma gyur kyang lo legs so zhes pa la sogs pa'o/ /rjes su bsngags pa yang rnam pa bzhi'i sgo nas te/ 'jig rten las 'das pa'i lha rnams dang / 'jig rten gyi lha dang /'jig rten las 'das pa'i mi ni 'jig rten gyi mi rnams te/ 'jig rten las 'das pa'i lha ni de bas de ni/ de bzhin gshegs pa de ni sangs rgyas rdzogs/ /zhes bya ba la sogs pa'o/ /'jig rten gyi lha rnams ni/ tshangs pa gtogs 'dod dbang chen dang / /zhes pa la sogs pa'o//'jig rten gyi mi ni bram ze khru gang / /tshangs par spyod pa zhes kyang bya/ /zhes pa'o/ /'jig rten las 'das pa'i mi ni/ dge slong zag zad dpal chen dang / /zhes pa'o/ /gsang ba thams cad 'chang zhes pa ni bdag lus lha'i gzugs su bsgyur ba dang / dag gi rang bzhin gyi yi ge rnams bdag gi lus la tshang ba dang /yi ge de rnams kyi sgra'i de kho na nyid la dmigs pa'i ye shes dang ldan pas lus dang ngag yid gsum gyi gsang ba 'chang ba zhes pa'i chos kun gyi dbang phyug gtso bo ste zhes pa ni/ chud pa'i chos gzhung gi chos gnyis ka la dbang du gyur pa zhes pa'o//gang gis byang chub brtan pa la/ /sgra yi ye shes la yang bstun/ /zhes pa de sangs rgyas dang byang chub sems dpa' la sogs pa dang 'dra bar 'gyur ba yang / yi ge lus la bkod pa tsam gyis 'gyur ba ni ma yin gyi/ byang chub kyi sems brtan zhing yi ge rnams kyi sgra'i de kho na nyid kyi ye shes bsgom pa la brtson na 'di skad smos pa de rnams su 'gyur zhes pa'o//de ni slob dpon gyi ting nge 'dzin gyi ste dang po'o/ /smin ma gnyis kyi mtshams su zhes pa ni 'gro ba dang mi 'gro ba ma lus pa'o zhes pa'i bar du slob dpon gyi ting nge 'dzin gnyis pa ste/ rigs gsum gyi steng du dgod pa'o//smin ma gnyis kyi mtshams su ni hUM zhes pa ste/ snying rje'i gnas zhes pa ni slob dpon yang snga ma bzhin du bcom ldan 'das rnam par snang mdzad kyi skur bsgyur te/ smin mtshams su phyag na rdo rje'i snying po'i yi ge hUM rang gi dkyil 'khor la bzhag par bsams te brang khar shes par bya/phyag na pad+mo'i gnas zhes bya/ /zhes pa ni spyan ras gzigs kyi dbang po'i snying po ste zla ba'i dkyil 'khor dang bcas te/ brang khar bsam zhes pa'o/ /da ni snying gar gnas pa ni/ /zhes pa ni bcom ldan 'das nyid kyi snying po a de rang gi snying gar dkyil 'khor bsam zhes pa'o//kun gyi gtso bo dbang po yin/ /nga yis su ni kun khyab pa/ /'gro dang mi 'gro ma lus pa'o/ /zhes pa ni snying po de'i yon tan bsngags pa ste/ 'gro ba ni mi la sogs pa'i sems can no/ /mi 'gro ba ni sa dang shing la sogs pa ste de dag kun khyab ces pa'o/ /a zhes pa ni srog gi mchog /ces pa nas/ 'chi ba med pa'i gnas mchog thob/ /ces pa'o/ /bar du slob dpon gyi ting nge 'dzin gsum pa ste/ dpa' po chen po'i snying po rnams las/ yi ge a srog gi mchog pas bdag gi khong du dbugs yan man du lhan cig tu sngar bshad pa bzhin du bsam mo zhes pa tshig ces bya zhes pa ni yi ge'i tshig rang bzhin pas khar bsam mo zhes pa'o//ra zhes pa ni me ru bsgrags/ /zhes pa ni yi ger de rang bzhin gyis dkyil 'khor dang bcas par bsams la 'od kyi dkyil 'khor bsam mo/ /hUM ni khro bo zhes su bya/ /zhes pa ni smin mtshams su yi ge hUM gi dkyil 'khor dang bcas par bsam mo//kha ni nam mkha' rig par bya/ /'khor ni stong pa mchog ces pa ni/ yi ge kha klad kor dang bcas pa klad pa'i steng du bsams te/ kha ni chos thams cad nam mkha' lta bu'i mtshan nyid par ston pa'o/ /'khor ni stong pa yang stong pa'i rang bzhin zhes pa'o//yang dag pa'i mchog de rnams slob dpon zhes bya/ bsdus she na'o zhes pa ni gong du smos pa'i yi ge rnams kyi sgra'i de kho na nyid dang / dgos pa rnams kyis zhes pa ni de slob dpon zhes bya zhes pa'o/ /de bas rnam pa thams cad du'ang / / sangs rgyas rnams kyis gsungs ye shes/ /rtag tu nan tan mngon byas nas/ /'chi 'pho med pa'i gnas thob bo/ /zhes pa ni de dag gi rjes su bsam pa ste/ snying po de rnams nga 'ba' zhig gis bshad pa ma yin gyi/ sngon gyi sangs rgyas rnams kyis kyang gsungs pa ste/ de bas na rnam pa thams cad du de dag gi sgra de kho na nyid du stong pa la bsgom pa la sogs pa rtag tu nan tan byas na sangs rgyas pa'i gnas thob pa zhes pa'o//ka de lkog mar rig par bya/ /zhes pa la sogs pa nas/ dpa' bo thams cad mkhyen bzhin no/ /zhes pa'i bar du yi ge dgod pa'i le'u gsungs pa ni gong du/yan lag rnams su yan lag bzhag /ces smos pa de ka la sogs pa'i yan lag gang rnams lus kyi yan lag gzhag pa'i gnas 'chad par gsungs pa ste/ yi ge sum cu rtsa gnyis po 'di rnams bkod pa'i skyes bu chen po'i mtshan sum cu rtsa gnyis su sbyar ba'o//de la slob dpon gyi ting nge 'dzin dang po snying rje chen po 'byung ba'i dkyil 'khor gyi tshe sbyar/ gnyis pa ni yi ge 'khor lo bskor ba'i tshe sbyar/ gsum pa ni gsang ba'i dkyil 'khor gyi tshe sbyar bar shes par byed pa'o/ /de nas bcom ldan 'das la phyag na rdo rje gsang ba'i bdag pos 'di skad ces gsol to zhes bya ba la sogs pa ni dge ba bcu'i las kyi lam byang chub sems dpa'i bslab pa thams cad dang ldan pa bshad do//de la sngags kyi sgor byang chub sems dpa'i spyad pa spyod pa rnams kyi bslab pa thun mong ma yin pa dam tshig gi mtshan nyid ni sngar bshad zin te/ 'di ni pha rol tu phyin pa spyod pa'i sa byang chub sems dpa' dang sngags pa'i byang chub sems dpa' gnyis ka spyi'i bslab pa thams cad dang ldan par shes par bya ste/de la byang chub sems dpa' rnams zhes pa byang chub ni de bzhin nyid kyi mtshan nyid de chud par 'dod pa'o/ /bsam pa dang ldan pa la ni byang chub sems dpa' zhes bya/sems dpa' chen po ni chos thams cad sgyu ma lta bur shes te/ gang yang dngos po yod pa ma yin gyi/ 'on kyang kun rdzob tu rgyu dang 'bras bu nges pa'i tshul gyis kun rdzob nyid du don byed pa sgyu ma'i tshul du rtogs/ sems can yongs su bsgrub pa'i phyir bdag dang bcas pa'i bslab pa slob pa ni sems dpa' chen po zhes bya/skabs 'dir yang bslab pa de lta bu la sogs pa bshad pa la dgongs nas byang chub sems dpa' chen po khyad par du smos so/ /bslab pa'i gnas zhes pa ni 'og nas 'byung ba dge ba bcu'i tshul la 'jug pa dang /mi dge ba bcu las ldog pa'i mtshan nyid la bya'o/ /thabs dang shes rab kyis yongs su zin pa zhes pa ni shes rab ni chos thams cad thog ma nas ma skyes par chud pa'i mtshan nyid do/ /thabs ni chos thams cad thog ma nas ma skyes te/ dngos po med par chud kyang sgyu ma lta bu'i tshul du thabs kyi sgo nas kun rdzob tu slob pa 'di lta bu dang /'khor gsum yongs su dag pa'i sbyin pa la sogs pa kun du spyod pa la bya'o/ /yang na thabs dang shes rab kyis yongs su zin pa zhes pa ni mi dge ba bcu'i dngos po mi spyod par bya ba la 'phags pa nyan thos rnams ltar thabs med pa ma yin gyi shes rab kyi don chen po mthong na/sems la sgyu med par bdag nyid sems can lta bur sbyin par ngan song du 'gyur ba'i las khas blangs te/ mi spyad par bya ba'i dngos po spyad pa la yang thabs dang shes rab kyis yongs su zin pa'i bslab pa zhes bya'o/ /byang chub sems dpa' sems dpa' chen po yid mi ches pa dang bral zhing the tshom med pa rnams 'khor ba na 'khor kyang nyams par mi 'gyur bar bshad du gsol zhes byang chub sems dpa' sems dpa' chen po ni snga ma bzhin yid mi ches pa dang bral zhing /the tshom med pa zhes pa'i bcom ldan 'das kyis ji skad du bshad pa'i gzhung las ma yin no snyam pa'i yid mi ches pa med pa dang /yin nam gtol med pa'i the tshom skye ba'i byang chub sems dpa' de la yang bslab pa de dang ldan pa'i 'khor ba na 'khor kyang / ngan song la sogs par ltung zhing nyon mongs par mi 'gyur ba de bshad du gsol zhes pa'o//de bzhin gshegs pa'i spyan gyis chos kyi dbyings thams cad du gzigs nas zhes pa ni/ de bzhin gshegs pa'i spyan ni sangs rgyas kyi ye shes la bya'o/ /chos dbyings ni sems can gyi khams la bya ste/ sangs rgyas kyi ye shes des sems can gyi khams thams cad du sems can 'di rnams gang sdug bsngal ba gang /bde ba dang ldan zhes gzigs pa'am sems can 'di rnams las legs nyes dang gang gang gi rgyus bde ba dang sdug bsngal 'di dang 'di lta bur 'gyur zhes gzigs pa'o/ /phyag na rdo rjes byang chub sems dpa' rnams kyi spyod pa'i tshul de bstan pa mkhas pa zhes/byang chub sems dpa' rnams kyi spyad pa ni/ skabs 'dir thabs dang bcas pa'i bslab pa la bya'o/ /tshul zhes pa ni thob pa la bya ste/ bslab pa 'dis ji ltar 'dod pa'i don thob par byed pa'i phyir ro/ /mkhas pa zhes pa ni thabs dang shes rab kyis yongs su zin pa nyan thos ltar ma yin pa gong du bshad pa'i tshul lta bu bslab pas so//de la rab tu gnas na theg pa chen po'i rgyud du zhugs par 'gyur zhes pa ni/ byang chub sems dpa' rnams kyi spyod pa'i tshul mkhas pa'i thabs dang shes rab kyis yongs su zin pa'i bslab pa de la rab tu gnas pa ni de bslab par zhugs pa zhes bya ste/de slob par zhugs pa'i byang chub sems dpa' sems dpa' chen po rnams theg pa chen po la rab tu zhugs par 'gyur ba de nyon cig ces pa'o/ /gsang ba'i bdag po byang chub sems dpa' de srog gcod pa spang bar bya'o zhes pa nas log par lta ba rab tu spang bar bya'o zhes pa'i bar du mi dge ba bcu las ldog par bya ba'i ming rnams smos pa de bshad pa ni 'og nas 'byung ngo //gsang ba'i bdag po byang chub sems dpa'i bslab pa'i gnas de rnams bslabs na sangs rgyas bcom ldan 'das rnams dang / byang chub sems dpa' rnams dang mtshungs par spyad pa de rnams bslabs pa yin no zhes pa ni gong du smos pa'i bslab pa de rnams la bslabs na sangs rgyas dang byang chub sems dpa'i spyad pa bslabs nas sangs rgyas dang byang chub sems dpa'i gnas thob ste/de bas na bslab pa 'di la bslabs na/ sangs rgyas dang byang chub sems dpa' rnams kyang spyad pa gcig la mtshungs par bslabs zhes pa'o//de bas na bcom ldan 'das la phyag na rdo rjes 'di skad ces gsol to zhes pa nas/ ji ltar tha dad pa lags zhes pa'i bar phyag na rdo rjes byang chub sems dpa' rnams dang / nyan thos dang 'jig rten pa rnam pa thams cad yang bslab pa 'di bshad na/de la khyad par ci mchis zhes zhus pa ste/ 'jig rten pa mur 'dug byed pa zhes pa ni/ 'jig rten pa phal la mi bya'i/ dngos po la sogs pa bstan pa 'di la 'jug pa'i sgo byed pa rnams la bya'o/ /khyad par ci mchis zhes pa ni bslab pa de'i rang bzhin gyi khyad par dris pa'o//ji ltar na tha dad pa lags zhes pa ni rgyu dris pa ste 'og nas 'chad pa dang sbyar ro/ /gsang ba'i bdag po tha dad pa tshul dang tshul du bshad pa'i chos kyi gzhung bshad kyis nyon cig ces pa tha dad pa ni 'jig rten zhes pa dang nyan thos dang byang chub sems dpa' rnams kyi bsam pa'i tshul gyi bye brag 'og nas bstan pa'i tshul gyis tha dad pa'o//tshul gcig pa ni dge ba bcu'i rang bzhin du mtshungs par bstan pa'i phyir ro/ /gsang ba'i bdag po 'di ltar nyan thos rnams bslab pa gang bstan pa de ni shes rab dang thabs su 'brel pa ste/ bka' lung grub pa'i zhes pa phyogs gcig tu rig pa ma yin te/de bas na de dag gi dge ba'i las bcu dang mnyam par mi 'gyur ro zhes pa ni/ 'phags pa nyan thos rnams ston pas ji skad bstan pa'i bka' lung bzhin du grub pa ste/ byang chub sems dpa' ltar rang gi shes rab kyis rig pa'i gzhung dang sbyar zhing 'phral la ci rigs par mi byed pas/thabs dang shes rab med cing gang zag bdag med par chud pa'i shes pa des phyogs gcig la gnas pas mtshungs par mi 'gyur ro/ /'jig rten pa rnams bdag gi dngos po la chags shing gzhan gyi rkyen gyis 'gyur ro zhes pa ni 'jig rten pa rnams skye ba dang 'jig pa dang bde ba dang sdug bsngal ba dang bslab pa'i dngos po la sogs pa thams cad bdag ces pa'i dngos po des bya'o zhes pa nas/bdag ces de bzhin gyi rkyen gyis bslab pa la 'jug pa ste/ bdag ces pa'i dngos po la brten pas mnyam par mi 'gyur zhes dang /byang chub sems dpa' theg pa chen po dag la 'gro ba rnams chos thams cad la snyoms par zhugs shing / shes pa ni don dam par sems can thams cad stong pa nyid kyi rang bzhin du mnyam pa nyid du zhugs pa'o/ /kun rdzob tu chos thams cad sgyu ma lta bu'i rang bzhin du mnyam pa nyid du zhugs pa'o//gzhan gyi rkyen gyis mi 'jug pa zhes pa ni/ 'jig rten pa ltar bdag tu rtog pa'i gzhan gyi rkyen gyis mi 'jug pa zhes bya'o/ /thabs dang shes rab yongs su zin pa zhes pa ni gong du bshad zin to/ /bdag dang pha rol gnyis ka'i don du byed pa la 'jug go zhes pa ni thabs dang shes rab kyis yongs su zin pa ni bslab pa de lta bul bdag kyang spyod la/gzhan la yang bsdu ba rnam bzhi'i sgo nas bsdu zhing spyod du gzhug pa zhes pa ste/ de bas na 'jig rten pa dang nyan thos dang byang chub sems dpa' rnams kyi bslab pa dang mnyam par mi 'gyur ro zhes pa dang sbyar ro//de lta bas na gsang ba'i bdag po byang chub sems dpa' sems dpa' sems dpa' chen po rnams kyis shes rab dang thabs yongs su zin pa bzhin du chos thams cad la nan tan bya'o zhes pa ni/ gong du bshad pa rnams bsdus pa'i tshig ste/'jig rten dang nyan thos pa rnams kyi bslab pa thabs dang shes rab med pa ma yin la/ shes rab dang thabs su ldan pa'i tshul ji skad bshad pa ste/ de lta bur chos thams cad la sbyar bar bya'o zhes pa'o/ /de nas bcom ldan 'das kyis byams pa dang snying rje chen po'i spyan gnyis kyis sems can gyi khams la gzigs nas/phyag na rdo rje byang chub sems dpa' la bka' stsal pa zhes pa ni/ gong du byang chub sems dpa'i bslab pa ming tsam du smos pa rnams re re nas zhib tu bshad pa'i phyir bka' stsal pa ste/ byams pa ni sems can thams cad bde bar 'jog pa snying rje'i sdug bsngal ba las bral ba'i mtshan nyid de/byams pa dang snying rje de nyid bcom ldan 'das kyi spyan te byams pa ni sems can gyi khams rnams la yang bde ba la gzhag par 'os/ snying rje ni gang sdug bsngal ba las gzhol bar 'os pa gzigs pa'i phyir/skabs gzhan du phyag na rdo rje gsang ba'i bdag po zhes smos pas/ phyag na rdo rje byang chub sems dpa' zhes smos pa yang bslab pa 'di byang chub sems dpa' rnams spyi'i yin pa'i phyir/ 'di ltar byang chub sems dpa' rnams bsams bzhin du srog gcod pa rab tu spang bar bya'o zhes pa ni/'dul ba la sogs pa'i gzhung las ji skad du grags pa rnams lnga dang ldan pa'i mtshan nyid spang bar bya'o/ /dbyug pa spang bar bya'o zhes pa'o/ /ji ltar bdag rang la ji lta ba bzhin du pha rol po'i srog btsa' bar bya'o zhes pa ni/ mtshon cha 'chang ba dang khon du 'dzin te dgrar byed pa ni srog gcod pa'i yan lag pas de dag spang ba ni yan lag yongs su rdzogs par bya ba'i phyir ro//de bzhin du ma byin par len pa sogs lhag ma rnams kyang gsal bas ji skad du 'byung ba las zad de/ skabs skabs nas mi spyad par bya ba rnams la bkrol yang khyim pa'i phyogs su gtogs pa'i byang chub sems dpa' rnams la bya'i/rab tu byung ba rnams ni 'dul ba'i gzhung dang 'gal bas ma yin no zhes byang chub sems dpa'i tshul khrims kyi le'u las byung ngo / /de nas bcom ldan 'das la phyag na rdo rje gsang ba'i bdag pos 'di skad ces gsol to zhes pa nas 'phral gyi bde ba la spyod cing /'phral gyi rgyal po byed kyang ltung bar mi 'gyur ba bshad du gsol zhes pa'i bar du/ gong du dge ba bcu'i dngos po rnams bshad pa ste/ rtsa ba nyams pa dang mi nyams par 'gyur ba'i bye brag dris pa ste/ de la rab tu byung ba rnams kyi sdom pa ni so sor thar pa'i skabs su bshad pas 'dir mi gling /skabs 'dir khyim la gnas pa'i byang chub sems dpa' la bya ste/ de yang rnam pa gnyis te khrims lnga'i sdom pa blangs pa dang / sdom pa mnos pa yi dam du bsrung ba'o/ /de la dge ba bcu'i las kyi lam 'di rnams kyi sdom pa nyams pa dang zhes pa ni/khrims lnga'i sdom pa mnos pa'i byang chub sems dpa' dge ba bcu'i las kyi lam rnams kyi sdom pa ji tsam gyis med par 'gyur zhes pa de bshad du gsol zhes pa'o/ /shin tu rtsa ba nas 'chad ces pa ni khrims lnga ma mnos par bdag nyid kyi yi dam du bsrung ba de ji tsam med par 'gyur zhes pa de bshad du gsol zhes pa'o//ji ltar bcom ldan 'das byang chub sems dpa' khyim na bud med dang bu mo dang phyugs 'khor rnams kyis bskor cing 'phral gyi bde ba la spyod cing phyug la/ rgyal po byed kyang ltung bar mi 'gyur zhes pa ni gong ma'i tshig gnyis dkyus nas bkrol te/byang chub sems dpa' khyim na gnas pa la bye brag tu zhus pa ste/ khyim na gnas pa'i byang chub sems dpa' bu smad dang 'khor gyis bskor zhing lha dang mi'i longs spyod la spyod cing dbang byed kyang de rnams kyi dbang du mi 'gyur bas/ thabs mkhas bas dge ba bcu'i sdom pa las mi nyams shing ltung bar mi 'gyur ba bshad du gsol zhes zhus pa ste/'og nas bcom ldan 'das kyis slar bshad pa dang sbyar ro/ /de la khyim na gnas pa'i byang chub sems dpa' rnams la bye brag tu phye ste bshad pa ste/ rnam pa mang po la rgyal po'i dbang byed ces pa ni thabs kyis yongs su zin pas rtsed mo dang gar dang mig 'phrul dang bzo sna mang po la sogs pa rab tu ston to zhes yul dang dus kyi dbang gis thams cad mkhyen pa rtsol lo zhes pa ni/rab tu 'byung ba ni 'di nyid kyis 'bad cing rtsol gyis khyim pa'i byang chub sems dpa'i ni dus dang yul chad pa med de/tshe 'di 'ba' zhig ma yin gyi tshe rabs du mar rtog cing rtsol ba dang / thabs sna du ma'i sgo nas sangs rgyas kyi zhing la sogs pa'i yul gang du skyes kyang rung bar rtsol ba'o/ /de bas na gsungs pa/ 'di ltar thabs kyis yongs su zin pas zhes pa la sogs pa ste/rol mo la sogs pa bzo rnam pa mang po ston pa yang / sems can rnams so so'i rjes su mthun par sbyar nas bsdu pa rnam bzhi'i sgo nas bsdus nas bla na med pa yang dag par rdzogs pa'i byang chub tu gdon pa'i phyir ro/ /de ni srog gcod pa rab tu spangs pa yin zhes pa na log par lta ba rab tu yang spangs shes pa yin zhes pa'i bar byang chub sems dpa'i khrims lnga po'i dngos po smos pa'o//bslab pa'i gnas 'di lnga bzung nas zhes pa nas/ thabs dang shes rab kyis zin pas bslab pa'i bar du bslab pa de rnams kyis rjes su bsngags pa dang / de lta bur slob pas ltung ba'i rtsa ba 'di bzhi srog gi phyir yang nyams par mi bya'o zhes pa dang sbyar te/khyim pa'i byang chub sems dpa' 'di skad smos pa'i bslab pa 'di lnga la dad pas bslabs nas sngon gyi de bzhin gshegs pa'i bslab pa bla na med pa de bzhin gshegs pas bsngags pas bsngags pa bslab pa dang rjes su mthun par bslab pa yin no zhes so//de ci'i phyir zhe na/ sngon gyi de bzhin gshegs pas kyang 'dus ma byas pa'i tshul khrims kyi phung po la gnas nas/ 'dus byas pa'i tshul khrims thabs dang shes rab yongs su zin pas bslabs nas bla na med pa brnyes te/ de lta bas na 'di ltar bslab pa ni/de dag gi rjes su slob pa zhes bya'o/ /'dus ma byas pa'i tshul khrims kyi phung po la gnas nas zhes pa ni chos thams cad thog ma nas ma byung ma skyes pa stong pa nyid kyi rang bzhin la chud par gnas nas zhes pa'o/ /'dus byas pa'i tshul khrims kyi zhes pa ni srog gcod pa rab tu spang ba yin zhes pa la sogs pa ming gis smos pa rnams te/de bas na thags dang shes rab kyis yongs su zin pa zhes pa ni snga ma bzhin no/ /de ltar slob ma des 'og nas ming gis 'byung ba'i rtsa ba 'di bzhi srog gi phyir yang nyams par mi bya ste/ 'di bzhi bshad pa yang dam tshig gi skabs su sngar bshad zin to//de ci'i phyir zhe na/ de ni slar 'byung du med pa zhes pa ni 'di bzhi dang mi ldan na byang chub sems dpa' zhes kyang mi bya ste slar gsor mi rung ngo zhes pa'o/ /thabs dang shes rab tu bral ba/ /zhes pa ni de bzhin ni 'jigs par byed pa'i thabs dang shes rab tu sbyar bar rang bzhin gyis nyon mongs pa yin te slar dbyung du med pa zhes pa dang sbyar ro//de bas na gsungs pa de ci'i phyir zhe na/ 'das pa'i sangs rgyas rnams dang / gang ma byon pa'i sangs rgyas rnams dang / da ltar bzhugs pa'i mgon po yang shes rab dang thabs yongs su zin par bslabs nas bla na med pa'i byang chub 'thob bo zhes pa ste/de bas na 'di bzhi dang mi ldan zhing thabs dang shes rab med na bla na med pa'i byang chub 'dus ma byas pa thob par mi 'gyur bas slar dbyung du med do zhes pa'o/ /de ltar thabs dang shes rab tu mi ldan pas na slar dbyung du med na/ nyan thos pa rnams la ngas thabs dang shes rab tu mi ldan pa'i bslab pa bshad ce na/thabs dang mi ldan pa'i ye shes nyan thos rnams la bslab pa bshad pa ni/ dpa' bo chen po de dag gzung ba'i phyir ro zhes pa ste/ nyan thos rnams la ngas thabs dang shes rab tu mi ldan pa'i bslab pa bstan pa yang nges pa'i don du bstan pa ma yin gyi/de dag snod dang sbyar zhing bkri ba'i phyir ro zhes pa'o/ /bcom ldan 'das rnam par snang mdzad kyi sku mi zad pa la sogs pa'i rdo rje'i rgyan gyi 'khor lo 'dir byin gyis brlabs pa las sngags bzlas pa'i skabs la thog mar spyir phyi nang gi bzlas pa yan lag bzhi bstan te/ de'i 'og tu de bzhin gshegs pa'i snying po bzhi'i skabs su nang gi bzlas pa'i yan lag bzhi bstan/de'i 'og tu dpa' bo chen po snying po'i skabs su nang gi bzlas pa'i yan lag gsum bstan te de rnams kyang bzlas pa'i grangs su dus nges pa'i bsnyen par byas pa gsungs so/ /da ni yi ge brgya pa'i skabs su 'dir yang bzlas pa'i yan lag gcig dang grangs dang dus nges pa'i bsnyen pa ma yin/kun du sangs rgyas kyi skur bsgrub pa'i gnas yongs su gyur pa'i bar du bzlas pa'i mtshan ma 'chad de/ de bas na bzlas pa de rnams kyang sgom rim tsam yang bshad par shes par bya ste/dang po nyid du phyi nang gi bzlas pa'i yan lag bzhi phyi dang nang gnyis ka la dmigs pas spom mo/ /de'i 'og tu nang gi bzlas pa'i yan lag bzhi phyi rol du sangs rgyas kyi skul mi dmigs par nang du rang gi snying gar de bzhin gshegs pa'i sku bsams nas slob pa de bas phra'o//de'i 'og tu dpa' bo chen po'i skabs su snying gar de bzhin gshegs pa'i skur bsams pa yang btang ste/ dbang chen la sogs pa'i dkyil 'khor gang rung ba bsams nas yan lag gsum du bya ste zlos pas de bas kyang phra'o/ /yi ge brgya ba'i skabs 'dir ni bdag stong pa nyid kyi ting nge 'dzin la gnas nas snying po'i sgra tsam la yan lag gcig pur bya ste/zlos pas gong ma kun phra par rig par bya'o/ /de la yi ge brgya pa yang kun du sangs rgyas pa yin yang / yi ge aM gis byin gyi brlab pa ste/ de yang le'u lngas yi ge brgya ba'i bshad pa'i yan lag rdzogs par shes par bya ba ni/yi ge brgya pa 'byung ba'i le'u dang / sgra'i 'bras bu'i sbyor ba bstan pa'i le'u dang / yi ge brgya pa'i le'u bsgrags pa'i le'u dang / bdag bsgrub pa'i le'u dang kun du byang chub pa'i rang bzhin bstan pa'i le'u rnams te/ de la 'dir dang por yi ge brgya ba 'byung ba'i le'u bshad de/ de nas bcom ldan 'das rnam par snang mdzad chen pos 'khor 'dus pa thams cad la gzigs nas zhes pa la sogs pa ste/ de la yi ge brgya pa ni aM zhes pa nyid kyi nang du 'dus par shes par bya ste/ de ni klad kor ni nga dang / nya dang / Na dang / na dang ma rnams kyi rang bzhin te/ nga'i nang du ka'i ris 'dus/nya'i nang du tsha'i ris 'dus/ Na'i nang du Ta'i ris 'dus/ na'i nang du ta'i ris 'dus/ ma'i nang du pa'i ris 'dus te/ yi ge de nyi shu dang rnam par shes pa'i le'u las bshad pa dang sbyar nas/ a dang oM nang du yang 'dus/ r-i r-I dang l-i l-I ni ra dang la dngos so/ /i I'i nang du b+ha 'dus te/de ltar sa ra la ba rnams kyang der 'dus te/ aM la sogs pa gang dang ldan pa dang / yi ge nyi shu lnga rnams byang chub pa dang / spyod pa dang kun du sangs rgyas pa dang mya ngan las 'das pa bzhi re re la yi ge nyi shu lnga lngar sbyar nas brgya par 'gyur te/ yi ge de rnams gcig tu bsdus pa ni a zhes pa ste/a ni shes bya dang ye shes gnyis ka stong pa'i mtshan nyid de/ klad kor ni stong pa'i mtshan nyid do/ /yi ge a bzhi char yang de'i nang du 'dus pas/ aM de nyid bcom ldan 'das kun du sangs rgyas pa'i rang bzhin yi ge brgya pa zhes bya'o/ /da dang / nya dang / Na dang / na dang ma rnams/ sha dang / pa dang / aM dang a rnams ni ting nge 'dzin thams cad kyi dbang po pas 'dir yi ge mi bgrang / 'khor 'dus pa thams cad la gzhigs nas zhes pa ni sngar bshad pa bzhin no/ /bstan pa gdon mi za bar dngos grub par bzhed nas/ bstan pa zhes pa'i tshig ni 'dul ba'i 'gro ba rnams la bslab pa'i phyir bstan pa zhes bya ste/ mdo sde la sogs pa thams cad la yang bya mod kyi/ skabs 'dir ni sngags bstan pa la bya ste de yang bzlas pa'i grangs dang / dus te nges pa sngon du bstan pa byas nas bsgrub par bya ba gong du bshad pa rnams bzlas pa'i grangs sum 'bum la sogs pa byas nas bsgrub bo zhes/yang bshad pa rgyud yongs su dag pa'i sems can rnams la yang gsungs kyi/ /thams cad lam yin no zhes 'byung bas grangs dang dus nges pa'i sngon du bsnyen pa byas kyang rgyud ma dag pa'i sems can rnams kyis mi 'grub kyang srid de de dag ni gdon mi za ba'o//'dir ni gnas yongs su 'gyur pa'i mtshan ma byung gi bar du bzlas pa gsungs pas mtshan ma byung ba de nyid 'grub pa ste/ mtshan ma de byung nas mi 'grub par mi srid pas gdon mi za ba zhes bya ste/ bcom ldan 'das bstan pa de grub par bzhed nas sngags kyi mgon po shin tu 'bar ba gsungs so zhes pa dang sbyar ro//sngags thams cad kyi dbang po sngags kyi rgyal po mgon po shin tu 'bar ba zhes pa ni kun du sangs rgyas pa'i rang bzhin aM zhes pa de nyid bye brag la bya/ de'i rang bzhin kyang rnam pa gsum du rig par shes par bya ste/chud pa'i mtshan nyid dang gzhung gi mtshan nyid de/ gzhung gi mtshan nyid la yang don dam pa dang kun rdzob kyi mtshan nyid de de ltar rnam pa gsum mo/ /de la chud pa'i don dam pa'i rang bzhin ni yi ge a dang zhes pa dang / de la sogs pa'i sngags kyi yi ge rnams so//de la sngags thams cad kyi dngos po zhes pa sngags thams cad ces pa ni 'jam dpal gzhon nur gyur pa la sogs pa'i ting nge 'dzin gyi rang bzhin rnam par thar pa'i ye shes phyogs gcig pa/ chos thams cad pa dang zhes bral lo zhes pa la sogs pa dang / kun rdzob tu de dag nyid kyi skur snang ba dang / gzhug gi chos su yi ge aM la sogs pa ni sngags thams cad de/ de dag gi dbang po ni bcom ldan 'das kun du sangs rgyas pa'i yi ge brgya pa ste phyogs gcig pa rnams kun du 'dus/ kun rdzob tu yang bcom ldan 'das kyi sku las sngags phal gyi gzugs rnams 'byung /gzhung gi chos kyang yi ge aM la sogs pa ni yi ge thams cad 'byung ste/ kun rdzob dang don dam pa kun du yang sngags thams cad der gtogs shing ge'i dbang gis gyur pas na aM de sngags thams cad kyi dbang po zhes pa'o/ /sngags kyi rgyal po zhes pa ni kun rdzob dang don dam pa gnyis kar yang sngags phal las yon tan thams cad kyis 'phags pa'i phyir ro//sngags kyi mgon po zhes pa ni skyabs zhes pa'i don te/ sngags thams cad kyi gong du bshad pa'i tshul gyis de las byung zhing der 'du ba'i phyir shin tu 'bar ba zhes pa ni mthu phun sum tshogs pa bstan pa ste/mthu chen dang ldan zhes pa ste de lta bu'i snying po 'jam pa'i tshig gi phyag na rdo rjes gsungs pa zhes pa dang sbyar te/ phyag na rdo rje yang ci 'dra zhig ce na gsungs pa/ sa ma ya ni gsum pa gnas dang lam gsum yongs su rdzogs par byed pa zhes pa ste/ dam tshig gsum pa zhes pa ni bcom ldan 'das kyi lus dang ngag dang yid mi zad pa'i rdo rje'i rgyan la bya ste/ rdo rje la sogs pa'i byang chub sems dpa' sa bcu yongs su rdzogs te ye shes chen po dang ldan pa'i dbang bskur ba na bcom ldan 'das kyi sku las 'od zer btang ba'i byin gyi rlabs kyis sku mi zad pa la sogs pa'i rdo rje'i rgyan te/gsum pa mthong ba la zhugs pa ni dam tshig gsum la gnas pa zhes pa'o/ /lam gsum yongs su rdzogs par byed ces pa ste/ dam tshig gsum thob par byed pa'i lam phyag na rdo rje thob par byed pa'o/ /sngags kyi mgon po zhes pa ni snga ma bzhin no//de'i ye shes dam pa zhes bya ba'i ting nge 'dzin la snyoms par zhugs nas zhes pa ni/ bcom ldan 'das ting nge 'dzin de la zhugs nas/ kun du sangs rgyas pa'i ye shes dam pa thams cad thog ma nas ma byung ma skyes ba ste/ mkhyen pa'i rang bzhin gyi yi ge 'chad pas ting nge 'dzin gyi ming ye shes dam pa zhes bya'o//de bas na yi ge aM de khyad par gsungs pa/ rnam pa mang po'i ye shes 'byung / /zhes pa ste rnam pa mang po'i ye shes ni chung pa'i chos dang / gzhung gi chos rnam pa mang po kun rdzob dang don dam pa'i tshul gnyis kar mkhyen pa la bya ste/ de lta bu'i ye shes yi ge aM zhes pa'i yi ge 'di las ye shes de 'byung ba la bya'o//'od zer brgyas khyab pa zhes pa ni/ don dam par yang de bzhin nyid kyi ye shes rgya mtsho dang 'dra ba de las sngags gzhan pa'i ye shes phyogs gcig pa rnams 'byung ba dang / kun rdzob tu de bzhin gshegs pa'i sku las sngags kyi sku mang po 'byung bas khams gsum kun du khyab pa dang /gzhung gi chos su yang yi ge a las gong du 'chad pa'i tshul gyis yi ge brgya rnams 'byung zhing sngags thams cad du khyab pa'i phyir ro/ /phyag na rdo rje 'di ni sngags thams cad kyi sngags kyi mgon po shin tu 'bar ba zhes pa ni gong du bshad pa'i tshul bzhin no//'di ni kun du sangs rgyas pa nyid do zhes pa ni yi ge aM zhes pa ni bcom ldan 'das kun du sangs rgyas pa'i phung po lhag ma dang bcas pa'i mya ngan las 'das pa'i rang bzhin nyid yin no zhes pa'o/ /chos thams cad kyi dbang phyug ces pa ni chud pa'i chos dang gzhung gi chos thams cad mkhyen pas na chos thams cad kyi dbang phyug ces pa'o//thub pa zhes pa ni lus dang ngag dang yod gsum thub pa'i mtshan nyid de shA kya thub pa nyid la bya'o/ /mi shes pa'i mun pa thams cad med par byed pas nyi ma shar ba bzhin no zhes pa ni chud pa'i chos dang / gzhung gi chos gnyis ka la sgrib pa spangs te/ ji ltar chud pa na 'dug pa'i rdzas rnams dngos po gang yin mi shes pa nyi ma shar ba na rdzas dag gsal bar mthong ba bzhin du thams cad mkhyen pa'i ye shes des kyang ma rig pa'i mun pa bsal nas kun rdzob dang don dam pa'i dngos po rnams gsal bar mkhyen pa ste/des ni spong pa phun sum tshogs pa bstan pa'o/ /tshig gong mas ni ye shes phun sum tshogs pa bstan pa'o/ /bdag nyid kyang 'di ltar thub pa chen por byin gyis brlabs pa ste zhes pa ni kun du sangs rgyas pa stong pa nyid kyi ye shes kyi rang bzhin de nyid shAkya thub pa'i skur byin gyis brlabs te zhes pa'o//de ltar byin gyis brlabs nas kyang ci bya zhe na gsungs pa/ rnam par 'phrul pa'i sprul pa ste/ /sems can rnams la phan 'dod phyir/ /zhes pa ste shAkya thub pa'i skur byin gyis brlabs nas sems can rnams kyi don du/ rnam par sprul pa sna tshogs sprul//zhes pa'o/ /rnam par sprul pa de yang ji snyed du sprul zhe na gsungs pa/ ji snyed sems can rnams kyi ni/ /sems su mngon par gyur rnams te/ /de snyed du ni de byas pa/ /rnam par sprul pa gnas mchog go/ /zhes pa ste/ sems can ji snyed du 'jug cing ji snyed 'dod pa de snyed kyi sku rnams su rnam par sprul pa byed ces pa'o//de ni stong pa nyid las ldang bar bstan pa ste/ de lta bas na don dam pa bstan pa stong pa nyid yi ting nge 'dzin la gnas nas/ phyis kun rdzob tu sangs rgyas pa'i sku la sogs par bsgyur pa'i spyod pa rnams bya'o zhes dgongs so/ / de lta bas na kun du sangs rgyas pa'i gnas 'dod nas/ rtag tu nan tan mngon bya ba/ /bdag gi nang nyid dag pas so/ /zhes pa ni sdud pa'i tshig ste kun du sangs rgyas pa'i rang bzhin de lta bus na gang kun du sangs rgyas pa'i sku thob par 'dod pas/ yi ge brgya pa'i rang bzhin du kun du sangs rgyas pa'i sku bsgom pa la brtson par bya'o zhes pa ste/de lta bas na kun du yang zhes pa ni lus dang ngag dang yid kun gyi sgo nas zhes pa'o/ /rtag tu zhes pa ni dus thams cad du'o/ /bdag gi nang nyid dag pas so/ /zhes pa ni sems gtso bor bshad pa ste/ bdag gi lta bas bcom ldan 'das kyi skur bsgyur ba tsam gyis chog pa ma yin gyi/nang gi sems kyi ting nge 'dzin rnam par dag pas nan tan mngon par bya'o zhes pa'o/ /yi ge brgya pa'i rang bzhin gsum la chud pa'i rang bzhin don dam pa de bzhin nyid kyi ye shes dang kun rdzob tu bcom ldan 'das kyi sku'i rang bzhin yi ge aM don du lta/yi ge aM gi tshig gi rang bzhin du blta ste/ de la yi ge aM kun sangs rgyas pa'i rang bzhin 'di ni bcom ldan 'das kyi gsung gi rgyan sna tshogs su 'byung ba'i sdud pa'i sgor gyur pa ste/ de yang 'di ltar don dang tshig gi bye brag rang bzhin gsum du dbye mod kyi/ sangs rgyas kyi bya ba byed pa'i sgo tha mi dad de/gang gis bya ba'i las kyang gzugs dang sems kyis byed pa'i gzugs kyis bya ba'i las kyang ngag dang sems kyis bya ba'i las kyang lus dang ngag gis byed/ de bas na skabs 'dir kun du sangs rgyas pa'i gsung mi zad pa de/ yi ge brgya ba'i 'bras bu'i sbyor ba ston te/de las kun du sangs rgyas pa'i yi ge'i 'bras bu ni/ sems can yongs su smin pa dang / ma smin pa rnams yongs su grol ba dang smin par byed pa ste/ de yang bcom ldan 'das rnam par snang mdzad kyis phyag na rdo rje gsang ba'i bdag po la bka' stsal pa zhes pa la sogs pa'o//de la gsang ba'i bdag po nam sangs rgyas bcom ldan 'das rnams zhes pa nas dam tshig gsum la bdag nyid gnas par mthong zhes pa'i bar du kun du bzang po la sogs pa'i byang chub sems dpa' sa bcus yongs su phyug pa rnams rang rang gi mthu dang spyod yul gyi rdzu 'phrul sna tshogs dang /sangs rgyas kyi zhing rnam pa sna tshogs kyis brgyan pa'i mthus mgu zhing 'khod pa la/ bcom ldan 'das mngon par byang chub pa'i sku las dpal gyi cho ga'i rgyan gyi 'od zer byung bas byang chub sems dpa' de rnams kyi gtsug tu phog ste/ 'od zer de'i byin gyi rlabs kyis byang chub sems dpa' de rnams ye shes chen por mngon par shes par dbang bskur ba dang ldan pas rab tu thob ste/de'i tshe byang chub sems dpa' de rnams kyis bcom ldan 'das kyi lus dang ngag yid mi zad pa'i rdo rje'i rgyan/ dam tshig gsum gyi rang bzhin chud cing mngon par gyur ces pa'o/ /sangs rgyas bcom ldan 'das zhes pa ni skabs 'dir sa bcu la gnas yongs su rdzogs shing dbang bcu la dbang du gyur pa/chos rnams sgyu ma lta bur rnam pa thams cad chud pa'i byang chub sems dpa' de rnams nyid la sangs rgyas zhes bya'o/ /ye shes chen po zhes pa ni de bzhin nyid kyi ye shes la bya ste/ye shes de byang chub sems dpa' de rnams kyis mngon par shes par bya ba'i phyir/ 'od zer gyis dbang bskur ba las ye shes chen por mngon par dbang bskur ba zhes bya'o/ /yang na ye shes chen po yang de mngon par shes pa yang de ste/ ye shes chen po ni snga ma bzhin te don dam par chos thams cad stong par chud pa'o//mngon par shes pa drug ni mngon par shes pa ste kun rdzob kyi ye shes so/ /de ltar don dam pa dang kun rdzob kyi ye shes de byang chub sems dpa' de rnams kyis thob par bya ba'i phyir/ dbang bskur ba ni ye shes chen po mngon par dbang bskur ba zhes bya ste/dbang bskur ba de dang ldan pa ni dbang bskur ba dang ldan pa'i sa rab tu thob po zhes bya ba ste zhes pa ni sems kyi khyad par nyid la bya'o/ /de nas sangs rgyas bcom ldan 'das de dag ces pa ni byang chub sems dpa' de dag nyid la bya'o/ /dam tshig gsum zhes pa ni bcom ldan 'das kyi lus dang ngag yid mi zad pa'i rdo rje'i rgyan gyi khams gsum thams cad du khyab pa la bya ste/dam tshig ces pa ni tshig gi don ni skabs 'dir kun du chud pa'am thob pa la bya ste/ sku mi zad pa'i rgyan la sogs pa khams gsum du khyab par 'byung ba byang chub sems dpa' de rnams kyis de'i tshe mthong zhing ye shes kyis chud pa'i phyir ro//lam zhes pa ni tshig de dag chud par zhugs pa la bya/ bdag nyid gnas par mthong ngo zhes pa ni bcom ldan 'das kyi spyod yul dam tshig gsum gyi rang bzhin la bya/ byang chub sems dpa' de rnams kyang spyod yul du gyur te mthong zhing chud par bdag cag nyid kyis mthong ngo zhes pa'o//de bas na gsang ba'i bdag po bcom ldan 'das de zhes pa ni/ sangs rgyas kyi bya ba mngon du ston pa'o zhes pa'i bar dus bcu la gnas pa'i byang chub sems dpa' sangs rgyas kyi bya ba de rnams kyi dam tshig gsum la zhugs par gyur pa de'i tshe na/ sangs rgyas kyi gsung sna tshogs su sdud pa'i sgor gyur pa'i yi ge brgya pa'i rang bzhin bcom ldan 'das kun du sangs rgyas pa gzungs kyi gzungs su gyur nas/ sangs rgyas pa zhes bya ba'i byang chub sems dpa' de rnams la sangs rgyas kyi bya ba nye bar ston pa ste/ gsang ba'i bdag po bcom ldan 'das zhes pa ni kun du sangs rgyas pa nyid la bya'o//ye shes chen po mngon par dbang bskur ba dang ldan pa zhes pa ni kun du sangs rgyas pa de nyid kyi bye brag la bya ste ye shes chen po ni snga ma bzhin no/ /mngon par shes pa zhes pa ni ye shes chen po de mngon du chud pa zhes pa'o/ / dbang bskur ba dang ldan pa zhes pa ni/ ye shes chen po de mngon par chud par ldan pa zhes pa'o/ /gzungs kyi gzungs zhes pa ni/ don gyi gzungs dang tshig gi gzungs de rnam par mi rtog par 'jug pa'i dbang dang gzungs la sogs pa ste/ bcom ldan 'das kun du sangs rgyas pa'i ye shes chen po mngon par chud pa'i dbang dang ldan pa de nyid gzungs su gyur nas/sangs rgyas kyi bya ba sems can yongs su smin pa dang grol bar gyur pa'i thabs sna tshogs byang chub sems dpa' de rnams la ston te/ de bas na gsungs pa/ sangs rgyas bya ba mngon par ston/ / zhes pa'o/ /sangs rgyas bcom ldan 'das de nyid/ /ces pa nas/ dam tshig gsum gyi lam ston par/ /so sor nye bar gnas par gyur/ /zhes pa ni de ltar bcom ldan 'das kun du sangs rgyas pa de byang chub sems dpa' sangs rgyas zhes bya ba de rnams la sangs rgyas kyi bya ba bstan pa dang /byang chub sems dpa' de rnams kyang rang gi dam tshig gsum gyi rang bzhin ji ltar mthong zhing chud pa dang / sangs rgyas kyi bya ba'i tshul gyis dam tshig gsum po de rnams kyi lam ston par zhugs so zhes te/ de la sangs rgyas bcom ldan 'das de dag nyid ces pa ni gong du smos pa'i byang chub sems dpa' de dag nyid la bya'o//sems can thams cad ces pa ni yongs su dag pa dang / ma dag pa'i sems can ji ltar snod du gyur pa rnams so/ /sangs rgyas kyi bya ba zhes pa ni snga ma bzhin no/ /dam tshig gsum gyi lam zhes pa ni sku mi zad pa'i rdo rje'i rgyan la sogs pa thob par 'gyur ba'i lam de ston par rab tu nye bar gnas par 'gyur ro zhes pa ni/byang chub sems dpa' de rnams ji ltar snod du gyur pa'i sems can rnams la dam tshig gsum thob par byed pa'i lam de so sor ston par zhugs pa ste/ lam de bstan pas sems can de rnams kyi sku mi zad pa la sogs pa'i rgyan dam tshig gsum gyi rang bzhin te thob par 'gyur ba'i phyir ro//gsang ba'i bdag po nga'i ngag gi 'khor lo zhes pa nas/ rab tu byung bar mi shes so/ /zhes pa'i bar du de bzhin gshegs pa'i ngag gi 'khor lo sangs rgyas kyi dbyings kyi rgyan sna tshogs las shAkya thub pa'i skur sprul te/'jig rten gyi khams thams cad du khyab par yongs su smin pa dang ma smin pa'i sems can ji ltar snod du gyur pa rnams la sangs rgyas kyi bya ba byed par 'gyur ba bshad pa ste/ gsang ba'i bdag po ngag gi 'khor lo zhes pa ni de bzhin gshegs pa'i sangs rgyas kyi gsung rnam pa sna tshogs su 'byung ba'o//sems can rnams kyi rgyud du grol bas na 'khor lo zhes bya ba ste/ 'khor lo de nyid 'khor gyi 'khor lo sprul pa rgya chen po zhes pa ni/ ngag gi 'khor lo de las shAkya thub pa'i skur sprul pa de dag 'jig rten gyi khams nam mkha'i dbyings ma lus pa de snyed du khyab pa sangs rgyas kyi bya ba ston pas na rgya chen po zhes bya'o//mtha' yas ba'i 'jig rten du khyab pa zhes pa ni/ chos kyi dbyings rab tu ston pa zhes pa dang 'brel pa ste/ sprul pa'i sku ste chos kyi dbyings kyi tshig dang don rnams 'jig rten gyi khams su khyab par sems can thams cad la ston pa ste/de yang rnam par dag pa'i sgo sha stag go/ /rnam par dag pa'i sgo zhes pa ni chos kyi dbyings rnam par dag pa la 'jug pa'i thabs zhes bya'o/ /sems can thams cad ji lta bur bsams pa bzhin mgu bar byed pa chos kyi dbyings rab tu ston pa'i sgo mo zhes pa ni de lta bur chos thams cad ston pa de yang sems can rnams so so'i dad pa dang rjes su mthun pa ste/sangs rgyas kyis 'dul ba la sangs rgyas kyi chos ston/ de bzhin du nyan thos dang / rang sangs rgyas dang / brgya byin dang tshangs pa la sogs pa so sor bstan pa dang /rjes su mthun pa'i chos thams cad du ston te de yang chos kyi dbyings su 'jug pa'i thabs sha stag go/ /de 'di lta ste/ shAkya thub pas nam mkha'i dbyings su rgyas pa ma lus pa'i 'jig rten gyi khams su zhes pa ni de lta bu'i chos ston pa dang / shAkya thub pa'i sku gcig gam gnyis ma yin gyi/ nam mkha'i khams rgyas par ji snyed pa de snyed kyi 'jig rten gyi khams ma lus par khyab pa'i shAkya thub pa'i skus sems can thams cad la ji ltar bsams pa bzhin du mgu bar byed pa'i chos kyi dbyings rab tu ston zhes pa'o/ /de bas na gsungs pa sangs rgyas kyi bya ba la rab tu zhugs pa zhes pa ste/shAkya thub pa'i sku de rnams 'jig rten gyi khams de snyed du sems can de ltar snod du gyur pa rnams ma smin pa ni yongs su smin par byed/ smin pa rnams ni grol par byed pa'i sangs rgyas kyi bya ba rab tu zhugs zhes pa'o//sangs rgyas kyi bya ba byed pa shAkya thub pa'i sku de rnams sangs rgyas kyi dbyings su mang po'i rgyan gyi snying po las 'byung ba/ bcom ldan 'das kyi ngag gi 'khor lo las sprul pa'i sangs rgyas kyi gzugs su ni sems can rnams kyis mi shes kyi/ shAkya'i rigs kyi rgyal po zas gtsang ma'i rigs 'di ltar gyur to zhes 'dzin te de'i phyir gsungs pa/gsang ba'i bdag po sems can rnams kyis ni zhes pa la sogs pa 'on kyang 'jig rten gyi khams mtha' yas pa rgya mtsho'i sgo nas zhes pa la sogs pa ni/ de ltar ngag gi 'khor lo las sprul pa'i sku rnams kyis 'jig rten gyi khams thams cad du khyab par sangs rgyas kyi bya ba byed pa'i shAkya thub pa'i sku rnams bstan kyang /sems can rnams kyis sprul pa de dag gi 'khor lo las byung bar mi shes mod kyi 'on kyang kun du bzang po'i spyod pa las byung ba'i byang chub sems dpa' chos kyi dbyings mngon par chud par byed pa rnams 'jig rten gyi khams mtha' yas pa nas byung pa'i byang chub sems dpa' me tog gi gzhi snying po rgyan gyis 'jig rten gyi khams 'di sangs rgyas kyi zhing 'di rnam pa sna tshogs kyis brgyan par byed pa dang /byang chub kyi snying po mngon par sgrub pa dang /byang chub tu mngon par rdzogs par 'tshang rgya ba la sogs pa yang byang chub sems dpa' de rnams kyi rang rang gi mthu 'ba' zhig ma yin gyi/ nga'i mthus sangs rgyas kyi zhing brgyan par byed pa la sogs pa de rnams byed do zhes pa ste/ de lta bur mdzad pa yang shAkya thub pa'i sku nyid mod kyi 'dul ba'i 'gro ba de dag kyang byang chub sems dpa' yongs su dag pa de dag gis ni shAkya thub pa'i sku yang rdzogs longs spyod pa'i skur mthong bar 'gyur te/de bas na skabs mtha' ma 'di ni rdzogs longs spyod pa'i skus byang chub sems dpa' de rnams kyi don mdzad par bstan par shes par bya'o//de dag gi bsdus pa'i don du tshig gi don la 'on kyang zhes pa ni/ de bzhin gshegs pa'i sprul pas sems can rnams la sangs rgyas kyi bya ba bstan pa de shAkya thub pa'i sku 'jig rten pa rnams kyis de bzhin gshegs pa'i sprul par mi shes mod kyi/ 'on kyang shAkya thub pa des 'og nas 'byung ba'i don de rnams kyang byas so zhes pa'o/ /'jig rten gyi khams mtha' yas rgya mtsho'i sgo nas smos pa'i byang chub sems dpa' de rnams 'byung ba'i gnas la bya ste/ 'jig rten gyi khams de dag mtha' yas par shes shing brtag par dka' ste/ rgya mtsho dang 'dra bas na rgya mtsho zhes bya'o/ /sgo zhes pa ni byang chub sems dpa' de rnams 'jig rten gyi khams 'di dag nas 'byung ba'i phyir ro/ /chos kyi dbyings su mngon par byang chub par nan tan byed pa kun du bzang po'i spyod pa las byung zhes pa ni sangs rgyas kyi zhing brgyan pa la sogs pa byed pa'i byang chub sems dpa' de dag gi bye brag ste/chos kyi dbyings su ni de bzhin gshegs pa nyid kyi ye shes la bya'o/ /mngon par rdzogs par byang chub par nan tan byed ces pa ni de bzhin gshegs pa'i ye shes chos kyi dbyings de mngon par chud par brtson pa zhes pa'o/ /kun du bzang po'i byang chub sems dpa'i spyod pa las 'byung ba zhes pa ni/kun du bzang po byang chub sems dpa'i smon lam las skyes pa'o/ /me tog gzhi'i snying po rgyan gyi 'jig rten gyi khams 'di zhes pa ni mi mjed kyi 'jig rten gyi khams la bya ste/ me tog gi gzhi zhes pa ni 'jig rten gyi khams de me tog gis brgyan pa'o//snying po zhes pa ni 'byung ba'i gnas so/ /rgyan zhes pa ni 'jig rten gyi khams me tog gis brgyan pa ste/ sems can gang bsod nams spyad pa rnams kyi rgyu las byung bas na/ bsod nams kyi 'bras bu 'jig rten gyi khams de lta bur skye bar 'gyur te/ sems can de dag gi rgyan zhes bya'o//rigs sa mu dra snyed ces pa ni/ sangs rgyas kyi zhing de yang 'jig rten gyi khams 'ba' zhig cas bya ba dang / sa mu dra zhes bya ba de snyed dang ldan pa'i sangs rgyas kyi zhes pa'o/ /ngas yongs su zin pas zhes pa ni rdzogs longs spyod pa'i sku'i mthus zhes pa ste/ sangs rgyas kyi zhing rnams yongs su sbyong ba zhes pa la sogs pa dang sbyar zhes pa'o/ /so so'i bsam pa rnam par dag pa'i sgo nas sangs rgyas kyi zhing zhes yongs su spyod ngo zhes pa ni byang chub sems dpa' de dag gi bsam pa rnam par dag pas sna tshogs pa'i sgo nas sangs rgyas kyi zhing yongs su spyod do zhes pa ste/de yang bcom ldan 'das kyi mthus sbyang te ngas yongs su zin pa zhes pa dang sbyar ro/ /byang chub kyi dkyil 'khor mngon par bsgrub ces pa ni byang chub kyi snying po 'og min gnas su mngon par byang chub pa'i sa dang / mi'i gnas su byang chub chen por mngon par byang chub pa'i gnas dag la byang chub kyi snying po zhes bya ste/de dag byang chub sems dpa' 'di rnams yongs su rdzogs par byed ces pa'o/ /byang chub mngon par 'tshang rgya zhes pa ni nyon mongs pa'i sgrib pa dang shes bya'i sgrib pa yongs su byang ba'i byang chub nam mkha'i mtshan nyid lta bu'o/ / mngon par chud par ci byed ces pa'o/ /chos kyi 'khor lo bskor zhes pa ni gzhung las ji skad du grags pa'i chos kyi 'khor lo bskor ba'o/ /sangs rgyas kyi don la shin tu gnas zhes pa ni/ sems can yongs su smin pa dang grol bar byed pa'i mtshan nyid sangs rgyas kyi bya bar byin gyis rlobs zhes pa'o//de nas gyen du yang dag par rdzogs pa'i sangs rgyas kyi gnas rab 'dod pa zhes pa ni/ de ltar sangs rgyas kyi zhing yongs su sbyong ba la sogs byas nas kun du sangs rgyas pa'i gnas su 'phar bar byed pa ste/ de'i tshe de bzhin nyid kyi ye shes chos thams cad stong pa nyid du chud pa'i mtshan nyid mngon du chud de/de ltar mngon du byed pa ni sems med pa la sogs pa 'og nas 'byung ba rnams kyi yon tan thob par 'gyur ba ste/ de yang sems tshad med pa zhes pa nas/ tshad med pa rab tu thob bo zhes pa'i bar du'o/ /de la sems med pa zhes pa ni sems la rnam par rtog pa la sogs pa ji bzhin pa thams cad dang bral te/chos thams cad stong pa nyid du chud pa'i sems bzhin du gyur pa na/ nam mkha'i rang bzhin lta bur gyur te/ stong pa'i mtshan nyid kyis kyang ma gos shing thams cad du ma khyab pa yang med de tshad gzung du med pa'o//de bzhin du stong pa nyid kyi rang bzhin gyi sems des thams cad du khyab par 'gyur bas/ de bas sems tshad gzung du med pa zhes bya'o/ /lus tshad med pa zhes pa ni/ de ltar sems tshad med pa thob pas/ de dag gi lus kyang sems ji snyed pa de nyid kyi lus khyab par 'gyur te/ de bas na lus tshad med pa'o/ /lus tshad med pas ye shes tshad med pa zhes pa ni de ltar lus tshad med par 'gyur na/lus ji snyed du 'gyur ba de dag thams cad ye shes kyis byin gyis brlabs pa dang bcas par 'gyur te/ lus ji snyed pa de dag gi ye shes su gyur pas na ye shes tshad med pa zhes bya'o//ye shes tshad med pas sems tshad med pa zhes pa ni/ sku dang ye shes de dag kyang sems can ji snyed pa de snyed du 'byung ste/ de dag tshad med pas sems can tshad med pa'o/ /sems can tshad med pas nam mkha'i khams tshad med pa rab tu thob bo zhes pa ni nam mkha'i khams ji snyed pa sems can gyi khams kyang de snyed de sems can gyi khams tshad med par chud na/nam mkha'i khams kyang tshad med par 'gyur ba rab tu thob par rig par bya'o/ /de ltar gsang ba'i bdag po sems can tshad med pas na tshad med pa'i gzhi rab tu thob bo zhes pa ni/ nam sems can nyid stong pa nyid kyi rang bzhin nam mkha'i mtshan nyid lta bur gyur pa rab tu thob na/lus dang ye shes dang sems dang nam mkha'i khams kyang de bzhin du gyur pa thob bo zhes pa'o/ /thob nas kyang yang dag par rdzogs pa'i sangs rgyas par 'gyur te zhes pa ni de ltar de bzhin nyid kyi ye shes mngon du byas nas/de ma thag tu kun du sangs rgyas pa phung po lhag ma dang bcas pa mya ngan las 'das pa'i rang bzhin gnas thob par 'gyur ro zhes pa'o/ /stobs bcu'i stobs dang ldan par bdud bzhi rab tu 'dul ba zhes pa ni/ kun du sangs rgyas pa'i de bzhin nyid kyi bye brag ste/ gzhung las ji skad grags pa'o//chos kyi seng ge'i sgra sgrogs pa/ /zhes pa ni ji ltar seng ge'i sgras byol song thams cad zil gyis gnon par 'gyur ba bzhin du bcom ldan 'das kun du sangs rgyas pa de yang 'dus byas thams cad mi rtag pa dang sdug bsngal ba la sogs pa'i chos kyi sgra sgrogs pas rtag pa dang bde ba la sogs par lta ba'i mur 'dug pa rnams zil gyis gnon par 'gyur ba'o/'di dag thams cad dpa' bo dag gis/ dam pa'i gnas su 'tshang yang rgya/ /zhes pa ni gong du smos pa'i yon tan thams cad byang chub sems dpa' dpa' bo de rnams kyis thob nas kun du sangs rgyas pa'i gnas dam pa der 'tshang rgya zhes pa'o//sgo bzhi 'di ru bzlas pa ste/ de yang kun du sangs rgyas kyis gsungs pa'i snying po la'o/ /de ltar kun du 'tshang rgya ba'i gnas dam pa der 'tshang rgya ba yang kun du sangs rgyas pa'i snying po yi ge brgya pa de bzlas shing bsgoms nas thob par 'gyur zhes pa'o//yi ge brgya pa'i 'bras bu'i sbyor ba rnam gsum gyi bye brag gis bstan pa yang rim gyis 'phar ba'i tshul du shes par bya ste/ sa bcu gcig pa'i byang chub sems dpa' sangs rgyas zhes bya ba de dag sa bcu gnyis la gnas pa las bcom ldan 'das kyi 'od kyis bskul te/ dam tshig gsum gyi gnas la zhugs pa nas sa bcu de las 'phar te/ye shes chen po mngon par shes pa dbang bskur ba dang ldan pa'i sa la gnas par shes par bya'o/ /de nas kun du sangs rgyas gzugs kyi gzugs su gyur cing / sangs rgyas kyi bya ba bstan pa dang de bzhin gshegs pa'i sprul pa'i sku shAkya thub pas spyir sangs rgyas kyi bya ba bstan pa na byang chub sems dpa' de dag kun du bzang po'i sa la gnas par shes par bya'o//kun du bzang po byang chub sems dpa' kun du bzang po'i spyod pa las byung zhing rdzogs longs spyod pa'i skus btang ste/ sangs rgyas kyi zhing spyod pas na/kun du sangs rgyas pa'i sa ma thob kyi bar du kun du bzang po'i sa las ni 'phar/ kun du sangs rgyas pa'i sa la ni 'jug pa'i stegs bu lta bu'i sa la gnas par shes par bya'o/ /spyir gdul ba'i 'gro ba chud pa'i gtso bor gyur pa yongs su dag pa dang / gzhung gi chos la bstan pa yongs su ma dag pa rnam pa gnyis te/ de la yi ge brgya ba'i 'bras bu sbyor ba bstan pa'i le'u ni yongs su dag pa'i gdul bya'i 'gro ba rnams kyi don mdzad pa bstan pa'o/ /le'u 'dir ni yongs su ma dag pa'i 'gro ba rnams kyi don mdzad pa ste/ gang gi phyir bcom ldan 'das kyis rgyu dang 'bras bu'i yon tan rnams kun du sangs rgyas pa'i snying po yi ge brgya ba'i mtshan nyid aM zhes pa'i gzugs su byin gyis brlabs pa de 'og nas 'byung ba'i rim gyis bsgrub pa pos rang gi snying gar bsams te/kun du sangs rgyas pa'i skur bsgrub pa'i phyir ro//de nas bcom ldan 'das la phyag na rdo rje byang chub sems dpas 'di skad ces gsol to zhes pa la sogs pa'o/ /de la bcom ldan 'das kyi sngags kyi mgon po 'di sngags rnams kyi 'byung ba de ngo mtshar che'o zhes pa ni yi ge brgya pa'i rang bzhin gong du bshad pa de yon tan dang mthu che bas ngo mtshar che zhes pa'o//sngags kyi mgon po zhes pa dang / sngags rnams 'byung zhes pa yang / snying po de dag gi bye brag sngar bshad pa bzhin no/ /gang gis ji ltar rig par bgyi/ /thub pa chen po gnas na gang / /zhes pa ni yi ge brgya pa'i sngags bsgrub pa'i le'u zhes pa ste/ gang gis zhes pa ni bsgrub cing 'dra bas shes par bgyi zhes pa ste/ theg chen du ni dbang bskur zhes pa la sogs pa bsgrub pa'i mtshan nyid 'og nas bshad pa dang sbyar ro/ /ji ltar zhes pa ni snying po ci 'dra bar rig par bgyi zhes pa ni ste/ gser gyi kha dog 'bar ba dang bcas par shes pa la sogs pa 'og nas 'chad pa dang sbyar ro//thub pa chen po gnas ni gang / /zhes pa ni snying po de gnas gang du bzhag par bgyi zhes pa ste de'i gnas ni snying po zhes pa ste zhes pa dang sbyar ro/ /sngags rnams de las 'byung ba yang / /ji ltar gang gis bdag la gsungs/ /zhes pa ni bdag kun du bsgrubs pa'i le'u dris pa ste/snying po yi ge brgya pa de las sngags phal rnams 'byung ba thabs ji ltar 'byung rgyu gang gis 'byung zhes pa ste/ 'od rnams yan lag las 'byung ba zhes pa la sogs pa bdag bsgrub pa'i las 'chad pa dang sbyar ro/ /bdag la de kun mgon gyis su/ / dam pa'i gsung gis bka' stsol cig /ces pa ni gong du zhus pa de rnams bka' stsol zhes pa'o/ /dam pa'i gsung zhes pa ni stong pa'i tshig ste/ smra ba rnams kyi nang na dam pa zhes pa'o/ /de skad gsol nas bcom ldan 'das zhes pa la sogs pa'i gong du zhus pa de rnams slar 'chad pa ste/chos phyug chen po thub pa yis/ /zhes pa ni bcom ldan 'das kyi bye brag ste chud pa dang gzhung gi chos la dbang du gyur pa lus dang ngag yid gsum thub ces pa'o/ /kun du khyab par bsgrags pa ni/ /thams cad 'jig rten khams gsum ste/ /thams cad mkhyen gyis tshig gsungs pa//snang mdzad bcom ldan 'das kyis so/ /zhes pa ni bcom ldan 'das rnam par snang mdzad thams cad mkhyen pa'i tshig gsungs pa des 'jig rten gyi khams ma lus pa thams cad ces pa ste/ tshig de yang dge'o/ /dge'o sems dpa' zhes pa la sogs pa'o//gsang ba zhes pa ni sems las byung ba'i mtshan nyid shin tu phra ba zhes pa'o/ /shin tu ngo mtshar zhes pa ni/ /sems kyis yi ge 'bru bsam pa las kun du sangs rgyas pa'i sku la sogs par gyur pas ngo mtshar che zhes pa'o/ /sangs rgyas rnams kyi gsang mchog ces pa ni snying po de'i don dang /kun rdzob kyi rang bzhin rtog pa can gyi sems can rnams kyi rjes su dpag pa la sogs pa'i sgo nas brtag pa mi rtog pas/ sangs rgyas rnams kyis gsang ba'i mchog /ces pa ste de bas na gsungs pa'i rtog pa kun gyis mi rtog pas zhes pa'o/ /su zhig theg chen dbang bskur ba//zhes pa nas/ mthu chen gyi ni snying po'o/ /zhes pa'i bar du gang gis rig par bgyi zhes pa zhus pa 'chad pa ste/ spyi'i don du theg pa chen po'i dkyil 'khor snying rje chen po 'byung zhes bya ba der dbang bskur ba'i bsgrub pa zhi gnas dang lhag mthong du ldan pas snying po 'di shes par 'gyur zhes pa ste/su zhig theg chen dbang bskur ba/ dkyil 'khor snying rje chen po 'byung ba der zhugs pa ni/ bsgrub pa gang snying rje chen po 'byung ba'i dkyil 'khor du dbang bskur ba des snying po 'di shes par 'gyur zhes pa ste/ theg pa zhes pa ni 'gro ba'i tshig ste/rang bzhin gyi dkyil 'khor sku mi zad pa'i mtshan nyid der 'gro bar bya ba'am/ gzugs brnyan gyi dkyil 'khor 'di'i sgo nas der 'gro bar 'gyur ba ste/ snying rje 'byung ba'i dkyil 'khor 'di la bya'o/ /chen po zhes pa'i tshig ni spyir gsungs mod kyi/ 'on kyang skabs 'dir ni lus kyi dkyil 'khor dang ngag gi dkyil 'khor gnyis kun rdzob kyi mtshan nyid pas chen po zhes mi bya ba'i sems kyi dkyil 'khor de don dam pa'i rang bzhin pas de la chen po zhes bya ste/mdor na gsang ba'i dkyil 'khor du dbang bskur ba zhes pa ste/ gsang ba'i dkyil 'khor der dbang bskur na sngar bshad pa'i tshul gyis dam tshig lnga char dang ldan zhing dbang gsum char dang ldan par 'gyur te/de ltar dkyil 'khor gsum char la rim bzhin du bslab pa'i bsgrub pa de yongs su rdzogs par 'gyur ba'i phyir ro/ /drang zhing mnyen pa su yin dang / bsgrub pa de gsang ba'i dkyil 'khor du dbang bskur ba 'ba' zhig tu chog pa ma yin gyi/skabs 'dir ni bsgrub pa gong ma dag ltar bzlas pa las byung ba'i sgrub pa po'i spyod yul de drang zhes pa ni/ sems la sgyu dang gya gyu med pa zhes pa'o/ /mnyen pa zhes pa ni khengs pa dang zhe sdang med pa zhes pa ste/ gang drang zhing mnyen pa ting nge 'dzin dang rjes su mthun pa ste/zhi gnas dang ldan par bstan pa'o/ /snying rje rtag tu ldan pa su zhig byang chub dmigs pa ru nam kyang mi lta zhes pa ste/ shes rab med par zhi gnas 'ba' zhig tu 'byung na yang mi dmigs par 'gyur te/ lhag mthong dang ldan par gsungs pa ste/snying rje sems can thams cad sdug bsngal dang bral bar byed cing de bzhin nyid kyi rang bzhin gyi byang chub sems dpa' dngos por dmigs par mi lta zhing / stong pa nyid na lhag mthong dang ldan pa ste/ de ltar lhag mthong dang zhi gnas su ldan pa de dag gis snying po mthu chen po 'di shes par 'gyur ro zhes pa'o//gnas ni de'i snying po la ste zhes pa nas/ sngags kyi mgon po mthu chen po/ /zhes pa'i bar/ thub pa chen po gnas ni gang / /zhes zhus pa las de bshad pa ste/ sgrub pa po dang por sangs rgyas dang byang chub sems dpa' thams cad la mngon du bsams te phyag 'tshal nas/de dag gi spyan sngar sdig pa bshags pa la sogs pa dang / dam tshig gi phyag rgya bcings pa la sogs pa rim pa bzhin du bya ste/ rang gi snying gar pad+mo dkar po 'dab ma brgyad pa bsams la/ de'i steng du rlung gi dkyil 'khor me long lta bur gsal bar bsams te/de'i dbus su bcom ldan 'das yi ge brgya pa aM zhes pa bsams te/ de yang me long gi gzugs brnyan snang ba bzhin du de nyid du zhi bar blta ste/ de'i gnas bshad pa'i bsdus pa'i don to/ /tshig gi don la gnas nyid de'i snying la med de/ mgon po gang du bzhugs pa'o//zhes pa ni mgon po de'i gnas sgrub po'i snying gar bya'o zhes pa'o/ /yid las byung ba 'dab ma brgyad/ /pad+mo shin tu bzang mo la/ /zhes pa ni mgon po de'i snying gar zhes bya ba de yang yid kyis bsams pa'i pad+mo 'dab ma brgyad shin tu gsal zhing dkar pa snying gar bsams la/de'i steng du zla ba'i dkyil 'khor bsams te de'i dbus su mgon po de bsams zhes pa ste/ de bas na gsungs pa'i dkyil 'khor zla ba dang 'dra ba zhes pa'o/ /dri ma med pa me long dang 'dra zhes pa ni zla ba yang dkar mod kyi/ dri ma rab rib yod cing mi snang bas de nyid gsal bar bsam par bya ba'i phyir ro//me long ltar shin tu dri ma med cing gzugs brnyan snang ba snying po de bsam zhes pa'o/ /de la rtag tu gnas pa ni/ /zhes pa ni me long la snying po rtag par gnas pa de zhugs par bya'o zhes pa ste/ rtag par gnas zhes pa'i don dam pa'i rang bzhin dang /kun rdzob kyi sku'i rang bzhin las stong pa ste/ don dam pa'i rang bzhin de bzhin nyid kyi ye shes de mi 'gyur pa yongs su rdzogs pa'i tshul gyis rtag par gnas pa zhes bya'o/ /kun rdzob tu sku'i tshul du yang bcom ldan 'das kyi sku mi zad pa'i rgyan de sngon gyi shugs kyis 'khor ba'i mtha' ji tsam pa de srid du/sems can rnams kyi don gyi phyir phyin ci ma log pa yongs su rdzogs pa'i tshul gyis rtag par bzhugs pa'o/ /yang na sgrub po ji tsam du ting nge 'dzin du gnas pa de tsam du snying po de yang mi g.yo bar rtag par gnas pa la yang bya'o/ / sngags kyi mgon chen zhes pa ni snga ma bzhin du kha dog gser 'dra bar 'bar bcas dri med ting 'dzin gnas pa ste/ nyi ma bzhin du bltar mi bzod/ /ces pa ni ji ltar rig par bgyi zhes bshad pa ste/ kha dog gser 'dra bar bcas zhes pa ni snying po kha dog gser 'dra ba la 'od 'phro ba dang bcas zhes pa'o//dri med ces pa ni 'bras bu'i rang bzhin las stong pa ste/ shes bya dang nyon mongs pa la sogs pa sgrib pa'i rtog pa dang bral zhes pa'o/ /ting nge 'dzin gnas zhes pa ni yi ge'i 'bru la ting nge 'dzin gyi dbyi bas mi srid de/ de bas na sgrub po ting nge 'dzin du 'dug pa la snying po de gnas zhes bya'o//nyi ma bzhin du bltar mi bzod/ /ces pa ni gzi brjid dang ldan par bsam par gsungs pa ste/ ji ltar nyi ma'i 'od zer gyis bskor la/ mig mi chags shing bltar mi bzod pa bzhin du snying po 'di yang rang gi 'od 'phro ba 'khor zhing blta dka' bar bsam zhes pa ste/don mdor na snying gar me long gi dkyil 'khor bsams pa de'i dbus su snying po kha dog gser 'dra ba dang bcas par bsams pa ste 'od 'phro bas sgrub po'i lus khyab par bsams te/ 'od 'phro ba de nyid 'dus pa las rang gi lus shel bzhin du sangs rgyas pa'i skur gyur par bsams te/de ltar gyur na yang zla ba'i dkyil 'khor la gnas pa'i snying po yang snga ma bzhin du snying ga na gnas par bsam zhes pa'o/ /de bas na gsungs pa/ de yis 'gro ba 'di kun ni/ /byin gyis su ni khyab par brlabs/ /phyi dang nang du 'jug pa ru/ /zhes pa ste 'gro ba 'di kun zhes pa ni bsgrub pa'i phung po lnga po de kun snying po 'dis kun khyab par byin gyis brlabs zhes pa'o//de la phyi rol gyi byin gyis brlabs pas ni phyi'i lus kun du sangs rgyas pa'i skur gyur pa'o/ /nang gi byin gyis brlabs pas ni snying ga na zla ba'i dkyil 'khor la gnas pa'o//yang na 'gro ba 'di kun zhes pa ni 'phags pa 'jam dpal dang / spyan ras gzigs kyi dbang po la sogs pa sngags kyi lha rnams la bya ste de dag thams cad 'dis khyab pa ste/ de dag gi gzugs spyi'i gzugs su bsgyur ba dang / nang gi yi ge a la sogs pa zla ba'i dkyil 'khor la bsam par bya ba yang /snying po 'dis byin gyis brlabs pa las byung ba'i phyir ro/ /de ltar rang gi lus kun du sangs rgyas pa'i skur bsgyur ba snying gar zla ba'i dkyil 'khor la snying po bsam pa bcas pa bsgoms na kun du sangs rgyas pa'i sku dang ldan pa'i rig pa 'dzin par 'gyur ro//de ltar gyur nas lus mthong ba dang des smras pa dang bsams pa'i sems can skal ba dang ldan pa rnams ji ltar bsams pa'i don rnams 'grub par 'gyur ro zhes 'og nas 'byung ba dang sbyar ro/ /me long nyid du byos zhes pa nas/ rang gi lus kyis bzang po ste/ /zhes pa'i bar du snying gar zla ba'i dkyil 'khor dang me long nyid du shes par bya'o zhes pa nas yi ge bsams pa yang de las kun du sangs rgyas pa'i skur bsgyur bar bya ba'i thabs bstan pa ste me long nyid du shes par byos zhes pa ni snying gar me long bsam pa de me long gi dngos po gzhan ma yin gyi/ji bzhin pa dang bcas pa sems ni yid ces bya ste/ yid de nyid kyi me long gi dkyil 'khor ji bzhin par 'gyur bar shes par byos shig ces pa'o/ /shes rab kyang de dag nyid kyi de zhes pa ni/ yid me long gi dkyil 'khor du gyur pa'i skad cig phyi ma la gsal bar rtog cing yongs su mchod pa'i ngang tshul gyi sems 'byung ba ni shes rab ces bya ste/shes rab de snying po la rtogs pas na yid ces bya'o/ /sngags mkhan shes rab mig gis ni/ /me long la ni bltas nas su/ /rang gi gzugs su rab zhi ba/ /sangs rgyas mtshan nyid de ltar te/ /zhes pa skad cig ma phyi ma'i shes rab kyis snying po dang bcas pa'i zla ba'i dkyil 'khor la rtse gcig tu rtogs pa'i tshe gong du bshad pa'i tshul du snying po de'i 'od 'phros 'dus pa las rang gi gzugs kun du sangs rgyas pa'i sku'i mtshan nyid du gyur par mthong ba zhes pa'o//de bas na gsungs pa lus la lus kyi gzugs su zhes pa ste bdag gi lus la bcom ldan 'das kyi sku'i gzugs su bya'o zhes pa ste de'i phyi rol gyi lus sangs rgyas kyi skur bsam pa'i thabs so//yid las byung ngo zhes pa ni bdag gi yid las byung ba'i me long gi dkyil 'khor snying po dang bcas pa bsam zhes pa ste/de ni phyi rol las sangs rgyas kyi skur bsgyur ba'i tshe nang du yang snying po dang bcas pa'i zla ba'i dkyil 'khor bsam zhes pa'o/ /de na dag pa 'byung ba ni rang gi bzang po ste zhes pa ni phyi dang nang gnyis ka de ltar bsgoms na phyi'i lus kun sangs rgyas pa'i skur mdzes par dag par 'gyur ba dang /nang gi yid la yang snying po dang bcas pa'i zla ba'i dkyil 'khor gsal zhing dag pa'i phyir skur bsam pa'i bdag gi lus dang nang gi snying por bsam pa'i bdag gi las byas pa las dag pa de dag kyang 'byung zhes pa'o/ /dag pa zhes pa yang skabs 'dir ye shes la sogs pa dag pa'i mtshan nyid la mi bya'i/phyi dang nang gi gzugs de dag gsal ba'i sgo nas dag pa'o/ /rang gi las shes pa de yang tshe rabs snga ma'i dge ba la sogs pa la mi bya'i/ phyi dang nang gi gzugs 'di ltar bskyed pa'i sbyor ba'i las la bya'o//de nas de'i tshe 'od kyang ni/ /yi ge kun du 'bar 'gyur ba/ /gcig gis sngags par byed pa ni/ /kun kyang sangs rgyas spyod pa'o/ /zhes pa ni sgrub pa po kun du sangs rgyas pa'i skur gyur pa de'i tshe de la 'od 'phro ba byung ba rnams kyi mthus sngags pa de kun sangs rgyas pa'i spyod pa sna tshogs byed nus par 'gyur ro zhes pa'o//yang na snying po de las 'od 'phro ba 'byung ba ni a las yi ge a'i ris rnams 'byung ba dang / klad kor ka la sogs pa 'byung ba ste/ de rnams kyang 'phags pa 'jam dpal la sogs pa sngags kyi lha rnams kyi snying po ste de dag thams cad kyang 'og nas bdag bsgrub pa'i le'u las 'byung ba'i rim gyis/yid kyis su ni bsams na yang / /zhes pa ni kun du sangs rgyas pa'i skur gyur pa'i rjes su bsngags pa gsungs pa ste/ de bzhin dag pa mthong ba dang / /zhes pa ni kun du sangs rgyas pa'i skur 'gyur ba'i rig 'dzin te/gang gis mthong ba'i sems can de ji ltar bsams pa'i don rnams 'grub par 'gyur zhes pa ste/ ma lus pa'i don ni kun byed pa zhes pa dang sbyar ro/ /de bzhin du gang rig 'dzin de dang lhan cig tu smras pa yang don kun shes par 'gyur zhes pa'o/ /de bzhin rig 'dzin des sems can de 'di ltar gyur cig ces bsams na/yang de'i don kun du byed par 'gyur zhes pa'o/ /rig 'dzin de mthong ba la sogs pa'i spyod yul du gyur ba'i sems can de dag kun bsod nams bsags pa skal ba dang ldan par shes par bya ste/ sems can de dag gi don byed par 'gyur gyi phal rnams kyis ni de mthong ba la sogs pa'i spyod yul du mi 'gyur ro//gsang ba'i bdag po 'on kyang zhes pa nas/ de nyid phan tshun byed pa dang las la gnas par 'gyur ba ma yin no zhes pa'i bar du sangs rgyas pa'i skur nga rgyal bskyed pa'i phyir de ji ltar 'gyur ba'i rgyu kun rdzob tu rkyen dang 'du ba tshogs te/'byung ba'i rgyu dang 'bras bu nges pa'i sgo nas bstan pa ste/ de ltar lus la lus kyi gzugs bskyed par bya'o zhes pa ni gong du gsungs pa'i tshul du/ bdag gi lus la kun du sangs rgyas pa'i skur bskyed par bya'o zhes pa'o//rdzogs pa'i sangs rgyas 'dra bar gzhan cung zad med do zhes pa ni/ kun du sangs rgyas pa'i sku la shin tu zhes pa'i phyir gsungs pa ste/ kun du sangs rgyas pa'i sku las khyad par 'phags shing gzhan dag gi sku yang med pas na kun du sangs rgyas pa'i sku 'di nyid rang gi lus la bskyed par bya'o zhes pa'o//kun du sangs rgyas pa'i skur bskyed pa de yang don dam par gzugs kyi dngos po med mod kyi/ kun rdzob tu rgyu dang 'bras bu nges pa'i chos nyid med pa ma yin te/ dper na mig dang rna ba la sogs pa'i dngos po chen po bzhi'i rang bzhin du rtogs pa de dag gdon dam par ma yin pa stong pa nyid du sangs rgyas bcom ldan 'das rnams kyang mkhyen mod kyi/'on kyang rgyu dang rkyen 'dus pa las de dag kyang 'byung bar snang ste/ med pa la ma yin no zhes gsungs pa ji ltar bdag gi mig dang rna ba la sogs pa'o/ /de dag kyang rang bzhin gyis stong pa zhes pa ni mig dang rna ba la sogs pa 'byung ba chen po bzhir gtogs pa'i chos de dag thog ma nas ma byung ma skyes pa'am/rdul phran phyogs dang cha la sogs pa bshig na/ de dag rang bzhin yod par mi 'grub ces pa'o/ /ming tsam gyis zin pa zhes pa ni dngos po stong pa ste ming du gdags pa tsam zhes pa'o//dngos po med na yang ming du gdags pa ji ltar yod ce na gsungs pa nam mkha' dang 'dra zhes pa nam mkha' yang med mod kyi/ nam mkha' zhes pa'i ming du brjod do/ /de bzhin du 'di dag kyang dngos po med mod kyi/ mig dang rna ba zhes ming tsam du brjod do//gzugs med pa'o zhes pa ni de ltar de dag rang bzhin gyis stong pa bas gang gis gzung ba'i cham yin no zhes pa ste/ tshig de dag gis mig la sogs pa'i dngos po de rnams stong pa'i rang bzhin nam mkha' ltar bstan pa'o/ /las dang rgyu las byung zhes pa'i nyon mongs pa'i phyogs su bstan pa ste/rgyu ma rig pa la sogs pa'i nyon mongs pa'o/ /las ni 'phral gyi dge ba dang mi dge ba la sogs pa lus dang ngag yid gsum gyi spyod pa ste/ don dam par de dag dngos po med kyang kun rdzob tu las dang rgyu las skyes par snang ngo zhes pa'o/ /gzugs brnyan dang 'dra zhes pa ni kun rdzob tu snang ba yang gzugs brnyan ltar ma brtags pa'i sgo nas snang bar zad kyi/gzugs brnyan de rigs pa dang gzhung gi sgo nas brtags pa dang / brtag mi bzod de yod par mi 'grub pa bzhin no zhes pa'o/ /de bzhin gshegs pas mngon par sangs rgyas so zhes pa ni/chos de rnams sngon gyi de bzhin gshegs pa rnams kyis kyang 'di lta bu'i tshul du mngon par mkhyen to zhes pa'o/ /de dag kyang phan tshun rten cing 'brel par 'byung ba'i rgyun mi 'chad par so sor zin pa zhes pa ni/ gang du gzugs brnyan dang 'dra zhes pa la gal te de ltar gzugs brnyan dang 'dra na/gzugs brnyan ni gzugs med na mi 'byung ba bzhin du rgyun chad dam zhe na/ gzugs brnyan bzhin chad pa ma yin gyi nyon mongs pa snga ma'i skad cig pa'i cha med kyang / nyon mongs pas bskyed pa'i las dang tshe dag kyang 'bras bu skyed par byed de/ gzugs brnyan ltar gzugs med na mi 'byung ba ma yin gyi/phan tshun rten cing 'brel par 'byung ba'i rgyun mi 'chad par 'byung ngo zhes pa'o/ /gang rkyen las 'byung ba de ni gzugs brnyan lta bu zhes pa ni/ de lta bu'i rkyen las byung ba'i chos de rnams brtag mi bzod cing don dam par yod pa ma yin pa dper na gzugs brnyan dang 'dra zhes pa'o//rten cing 'brel pa las byung bas na gang lha ni bdag /gang bdag ni lha'o zhes pa ni de ltar don dam par chos yod pa ma yin kyang kun rdzob tu rten cing 'brel par 'byung ba las chos rnams kun rdzob tu snang bas na/ bdag gi rkyen gyis lha bskyed lha'i rkyen gyis bdag bskyed pa bas bdag bskyed do zhes pa'o//gang lha ni bdag ces pa ni yi ge brgya pa'i rang bzhin aM zhes pa snying ga na gnas pa de dag gi bsams pa las byung ba'i phyir ro zhes pa'o/ /gang bdag gi lha'o zhes pa ni snying po des bdag kun du sangs rgyas pa'i skur bskyed pa'i phyir ro zhes pa'o//de bzhin du lus la lus kyi gzugs bskyed par zhes pa ni de ltar phan tshun rkyen dang 'du ba tshogs te byung bas bdag gi gzugs kun du sangs rgyas pa'i skur bskyed par bya'o/ /gsang ba'i bdag po chos kyi rkyen gyis ni khong du chud par rtogs/ khong du chud pa'i rkyen gyis rtogs pa'am ltos pa zhes pa ni gang lha ni bdag /gang bdag po ni lha'o zhes pa'i tshig de nyid gzhung gzhan gyis bstan pa ste/ chos zhes pa ni aM zhes pa'i yig 'bru'o/ /khong du chud pa zhes pa ni kun du sangs rgyas pa'i sku ste/ yi ge'i rkyen gyis kun du sangs rgyas par 'gyur/kun du sangs rgyas par gyur nas slar snying ga'i yi ge bsam par bya ba ni/ gcig gi rkyen gyis gcig 'byung bar bya ste de ltar ltos pa'o/ /rang bzhin gyis stong pa nyid kyi phyir de gnyis phan tshun du byed pa dang / las la gnas par 'gyur ba yin/ / zhes pa ni yi ge dang gzugs de gnyis rang bzhin stong pa las yi ge dang gzugs bskyed pa'i bya ba mi byed/ gzugs kyang yi ge bskyed pa'i bya ba mi byed ces pa'o/ /gsang ba'i bdag po ji ltar yid la yid kyi gzugs 'byung bar bya zhen zhes pa la sogs pa ni/ yid la zla ba'i dkyil 'khor la gnas pa'i sngags kyi 'bru bskyed pa de bstan par bya ba'i phyir yid las ji ltar 'byung ba'i rgyus bshad pa ste/'di ltar gsang ba'i bdag po yid la dkar po'am ser po'am dmar po bsams pa ni de 'dra bar yid nye bar zhen par 'gyur ro zhes pa ni/ chu'i dkyil 'khor dang dbang chen gyi dkyil 'khor dang me'i dkyil 'khor bsams na/ yid kyang ji bzhin par 'gyur ro/ /zhes ba'o/ /de lta ba nas de 'dra ba'i don kyang de 'dra bar byed par 'gyur ro zhes pa ste/ dbang chen la sogs pa'i dkyil 'khor ji bzhin par 'gyur ba'i yid des dbang chen la sogs pa'i bya ba byed par 'gyur ro zhes pa ste de bas na gsungs pa 'di lta ste/gsang ba'i bdag po/ yid la dkyil 'khor bsams nas su/ /rims nad can la bzhag na ni/ /'gro ba rims nad las thar ba/ /de ma thag tu gdon mi za'o/ /zhes pa ste tsha ba'i rims kyis btab pa la nad pa'i klad pa'i steng du chu'i dkyil 'khor ji skad du bsgrags pa ste/bum pa kha bu tu soms la de la bdud rtsa'i chu dkar po byung bas nad pa'i spyi bo nas mthar gyis phyi nang bcas par khyab par rting pa'i bar bsams te/ de'i tshe bya ba cing de'i gdong la rims nad thams cad phyir 'byung ba bsams te/de ltar lan gnyis lan gsum du byas na rims nad las thar bar 'gyur te dogs pa med do/ /de bzhin du dbang chen gyi dkyil 'khor yang bya'o/ /grang zhing 'dar ba'i ri mas kyis btab pa la me'i dkyil 'khor ji skad du grags pa de bsams te/ de'i steng du nad pa bzhag la/ me des mas yar gyen du lus phyi nang khyab par bsams na grang ba'i rims las thar bar 'gyur ro zhes pa'o/ /yid las dkyil 'khor gzhan ma yin/ dkyil 'khor las yid gzhan ma yin te mi gzhan ci'i phyir zhe na/ dkyil 'khor gyi mtshan nyid gcig pa'i phyir ro zhes pa'o/ /dbang chen la sogs pa'i dkyil 'khor de dag dngos po gzhan yod pa la yid kyis de ji bzhin bsams pa ma yin gyi/yid kyi dkyil 'khor de dag ji bzhin par gyur pas mtshan nyid gcig pa ste/ yid dang dkyil 'khor gnyis dbyer med pa ste de dag gnyis ka don dam par yod pa ma yin pa las/kun rdzob tu ji srid du ji bzhin pa dang bcas pa'i sems kyis brtags pa'i phyir te/ de bas na de nyid sgyu mar sprul pa'i dpes bsgrub par gsungs pa/ 'di lta ste gsang ba'i bdag po zhes pa la sogs pa ste/ mdor na gang yid la zla ba'i dkyil 'khor dang snying po bskyed pa de yang don dam par rang bzhin gyis stong pa ste yod pa ma yin mod kyi/'on kyang kun rdzob tu rgyu dang rkyen nges pa'i dbang gis don gyi bya ba byed pas na/ yid la zla ba'i dkyil 'khor dang bcas pa'i bsams pa nan tan du bya'o zhes pa'o/ /da ni bcom ldan 'das kun du sangs rgyas pa'i rang bzhin yi ge brgya pa aM las 'phags pa 'jam dpal dad spyan ras gzigs kyi dbang po la sogs pa la sngags kyi sku dang yi ge 'bru rnams 'byung bar bstan pa ste/de nas yang bcom ldan 'das kyis phyag na rdo rje gsang ba'i bdag po la 'di skad ces bka' stsal to zhes pa la sogs pa ste/ de la gsang ba'i bdag po sngags kyi mgon po'i sku dbyer med pa zhes pa ni/kun du sangs rgyas pa'i sku las sngags kyi lha gzhan rnams 'byung ba sku de dang dbyer med pa nyon cig ces pa dang 'brel to/ /yid las kun du 'byung ba'i zhes pa'i sku de rnams kyang / bcom ldan 'das kyi gsung mi zad pa sdud pa'i sgor gyur pa maM zhes zla ba'i dkyil 'khor la gnas pa de dag snying gar bsams pa de ni yid las 'byung ba zhes bya ste/de las kun du sangs rgyas pa'i sku'am sngags kyi lha gzhan rnams kyi skur 'gyur bas na yid las byung ba las kun du 'byung ba zhes pa'o/ /yid kyang shin tu sbyangs na zhes pa ni/ sku dag yid las 'byung ba yang bsams pa tsam gyis chog pa ma yin gyi/zhi gnas dang lhag mthong zung du 'brel par sbyangs pa las 'byung pa'i sku zhes pa'o/ /der gnas pa'i mgon po kun rnam par 'bar ba zhes pa ni/ yid shin tu sbyangs pa de la gnas pa'i snying po de las sngags kyi lha rnams kyi snying po 'byung ba de nyon cig ces pa'o//sku 'od rnams mngon du 'byung ba zhes pa ni/ snying po de las ka la sogs pa'i yi ge rnams 'byung zhes pa'o/ /yan lag gi ni yan lag dang / /gnas dang rtag tu zhes pa ni yan lag ces pa ni a nyid la bya/ yan lag de'i yan lag ni klad kor dang i dang u la sogs pa ste/de rnams las sngags rnams 'byung ba ni/ yan lag 'di ni yan lag gnas/ /rtag tu zhes pa ste mdor na 'phags pa 'jam dpal lam spyan ras gzigs kyi dbang po'i skur bsgyur na gzhan ni snga ma rim bzhin te/ yi ge a ni klad kor de las/ yi ge maM la sogs pa gang yang rung ba 'byung bar bsams te de 'od 'phros 'dus pa las/ 'jam dpal la sogs pa'i skur bsgyur ro/ /yang na i'i gnas nyid du bsams te snga ma bzhin du skur bsgyur bar bya'o/ /smras pa rnams kyis mi shes pa tshul 'di mi shes pa su ste zhes pa nas kun du sangs rgyas pa'i sku gcig po de las sngags rnams kyis sku rnam pa mang po 'byung ba de dag ji ltar 'gyur snyam du yid mi ches shing /mi shes pa ni 'og nas 'byung ba'i tshul 'di mi shes pa'i phyir ro zhes pa ste/ lus kyi bye brag ji snyed pa/ /tshig las rnam pa mang gnas te/ /de bzhin sngags kyi mgon po yi//bye brag gsungs pa grangs med do/ /zhes pa ni sangs rgyas dang byang chub sems dpa' la sogs pa lus kyi bye brag mang po'i tshig gi rang bzhin te/ yi ge'i 'bru las rnam pa du mar 'byung bzhin du sngags kyi mgon po kun du sangs rgyas pa las sngags kyi lha'i bye brag grangs med pa 'byung ngo zhes pa'o//kun du sangs rgyas pa'i rang bzhin te/ de rnam par rtog pa las shin tu 'das pa las/ sku rnam pa mang po 'di rnams ji ltar skyed par byed ce na gsungs pa/ ji ltar yid bzhin nor bu dpal ldan pa/ /'dod pa'i don ni rab tu sgrub pa bzhin/ / 'jig rten sgron ma'i sku yang don kun sgrub pa'o/ /zhes pa ste ji ltar yid bzhin nor bu de rnam par mi rtog kyang thams cad kyi re ba yongs su rdzogs par byed de/ don thams cad sgrub pa de bzhin du sngags kyi mgon po 'jig rten gyi sgron ma de yang rnam par mi rtog pa bzhin du sngon gyi smon lam gyi shugs kyis bskul ba la sogs pa rnam pa sna tshogs 'byung zhing don rnams rab tu byed do zhes pa'o//de nyid kyang nam mkha'i dpes gsungs pa/ /gsang ba'i bdag po chos kyi dbyings rnam par mi rtog par don thams cad sgrub par byed pa zhes pa la sogs pa'o/ /de dag ni aM zhes pa yi ge brgya pa de las bcom ldan 'das kun du sangs rgyas pa dang /sngags kyi lha rnams kyi skur bsgyur nas kyang yid la zla ba'i dkyil 'khor la gnas par bsam pa'i sbyor ba bshad do/ /'dir ni de ltar kun du sangs rgyas pa'i sku la sogs pa'i bdag gi lus yongs su bsgyur nas kun du sangs rgyas pa dang rjes su mthun pa'i sems kyi yon tan bskyed pa'i phyir/sems yongs su sbyang bar bya bar 'chad de/ de yang de nas bcom ldan 'das kyis sems can gyi khams ma lus pa rnam par sbyang bar bya ba'i tshig gis zhes pa la sogs pa ste/ sems can gyi khams ma lus par sbyong ba'i tshig ces pa ni ting nge 'dzin mngon par sgrub ces pa la sogs pa'i tshig ni 'og nas 'byung ba la bya ste/tshig de dag gis sems can rnams nyon mongs pa'i sgrib pa la sogs pa ni sel/ ye shes khyad par can skyed par byed pa'i sgo nas rnam par sbyong ba'i phyir ro/ /sgrub pa'i sems yongs su sbyang bar bya ba yang 'jug pa'i sems dang gnas pa'i sems dang ldang ba'i sems su ldan pa ste/de la 'dug pa'i sems ni ting nge 'dzin mngon par sgrub pa'i tshig ces pa ste/ nam zhig thog ma nas kyang cung zad ni skye zhing 'chi 'pho ba yang med na/ de ni stong pa'i ye shes ji lta bur sbyor ba ni skye bar 'gyur zhes pa dang 'brel to//bsam gyis mi khyab pa'i tshig ces pa ni/ gnas pa'i sems 'chad pa ste/ nam zhig ngo bo nyid kyis su/ /chos rnams 'di ni dmigs med na/ /de ni nam mkha' dang 'dra ba'i/ /sems skye ba byang chub 'byung ba'i/ /zhes pa dang 'brel to//slar ldog pa'i sgo'i tshig ces pa ni ldang ba'i sems 'chad pa ste/ de ni snying rje 'byung ba ni/ /'jig rten kun gyi rjes bzhin 'jug /ces pa ste de la ting nge 'dzin mngon par sgrub pa'i tshig ces pa ni tshig des chos thams cad thog ma nas ma skyes shing mi 'gog par chud pa'i ting nge 'dzin 'byung ba'i phyir ro//bsam gyis mi khyab pa'i tshig ces pa ni tshig de las chos thams cad dmigs su med pa nam mkha' dang 'dra ba'i sems ston pa'i phyir ro/ /slar ldog pa'i sgo'i tshig ces pa ni des ting nge 'dzin las ldog ste langs nas snying rje'i dbang gis sems can gyi don bya ba la sogs pa ston pa'i phyir ro//nam zhig thog ma nas cung zad ni skye zhing 'chi 'pho ba yang med na de na stong pa'i ye shes ji lta bur sbyor ba ni skye bar 'gyur zhes pa ni nam phung po dang khams la sogs pa'i chos thog ma nas ma skyes pa ma byung bas 'chi 'pho ba yang med de/de ltar phyi'i gzung ba'i chos rnams med na de la 'dzin par byed pa'i rnam par shes pa skye ba'i gnas med par mi skye ste/ de ltar gzung ba dang 'dzin pa'i cha gnyis ka med de/ stong pa na de na sbyor ba'i ye shes stong par skye bar mi 'gyur ro zhes pa'o/ /nam zhig ngo bo nyid kyis chos rnams 'di ni dmigs med na de nam mkha' dang 'dra ba'i sems skye byang chub 'byung ngo zhes pa ni gong du bshad pa'i rim gyis phyi'i chos rnams dang /nang gi rnam par shes pa gnyis kyang med par bshig nas/ de phung po la sogs pa'i chos 'di dag thams cad dmigs su med par chud pa la gnas pa'i sems nam mkha' dang 'dra bar rtog pa thams cad dang bral bar 'gyur zhes pa'o//rnam par mi rtog pa sems de las de bzhin nyid kyi byang chub kyi mtshan nyid du 'byung bas na de byang chub 'byung zhes pa'o/ /de nas snying rje 'byung ba ni 'jig rten kun gyi rjes su ji bzhin du 'jug ces pa'i ting nge 'dzin de las langs nas snying rje'i dbang gis sbyin pa la sogs pa dang /spyod pa dang lha'i skur bsgyur ba la sogs pa'i sems can gyi don du bya ba dang ldan pa'i sems bskyed do zhes pa'o/ /de ni mdor na dang por 'jug pa'i sems rtog pa bcas pas chos rnams stong pa'i rang bzhin du bshig ste/de nas stong pa nyid chud pa rnam par mi rtog pa'i sems la ji srid 'dod pas gnas nas de'i 'og tu snying rje'i dbang gis lha'i gzugs mngon par ston te/ sbyin pa la sogs pa sems can gyi don rnams bya'o zhes par dgongs pa'o/ /'du shes tsam du rtogs pa'i gnas//zhes pa ni spyod pa de dag kyang don dam par yod pa ma yin te/ 'du shes tsam du rtogs pa'i gnas so zhes pa'o/ /de ltar thams cad 'du shes tsam na sngar kun du sangs rgyas skur bsgyur ba nan tan cher byas pa yang ji ltar dgos she na/ 'du shes 'di ru kun nas sangs rgyas zhes bya ba ste kun du sangs rgyas pa yang 'dir don dam par yod pa ma yin gyi 'du shes tsam du zad do zhes pa'o//de nas 'du shes bya ba stong dang mi stong ngo bo zhes pa ni/ de'i tshe nam mkha' la sogs pa stong pa'o zhes bya ba dang / bum pa la sogs pa chos rnams kun rdzob tu stong pa ma yin no zhes pa yang 'du shes tsam du bya'o zhes pa'o//de la grangs su 'dug pa gcig gnyis gsum la sogs pa byed pa zhes pa ni yi ge a zhes pa gcig po de las kyang 'du shes tsam du bya ba'i sgo nas i la sogs pa'i yi ge mang po rnams kyi bye brag tu 'gyur ro zhes pa'o/ /de ltar dpa' bo snying po de las rim bzhin du rnam par 'phel a i la sogs pa 'dus rang byung yid byin gyis brlabs pa'o zhes pa ni de ltar stong pa nyid kyi ngo bo las a dang i la sogs pa'i yi ge rnams a zhes pa yid la gnas pa'i snying po las bye brag rnams mang por 'phel bar 'gyur ro zhes pa'o// rang byung zhes pa ni bcom ldan 'das kun du sangs rgyas pa'i rang bzhin la bya ste/ sus kyang ma bskyed pa'i phyir ro/ /da ni de bzhin gshegs pa'i kun du byang chub pa'i rang bzhin bstan te/ phyogs bcu nam mkha'i ji lta bur/ /kun du rtog pa mi dmigs pa/ /de bzhin chos kun la yang ni/ / sngags kyi mgon po gnas pa min/ /zhes pa nas/ ji ltar nam mkha'i lho byang shar nub la sogs pa'i phyogs la mi gnas pa bzhin du don dam pa'i mtshan nyid kyi sngags kyi mgon po de yang gzugs la sogs pa'i chos rnams la dmigs pa dang mi dmigs par bya ba'i sgo nas mi gnas so zhes pa'o//de ltar nam mkha'i ngo bo rnams gnas pa rtag par snang ba yang de ni gnas su 'byung ba'ang min sngags kyi mgon po de yang de bzhin no zhes pa ni ji ltar nam mkha' la gzugs kyi dngos po rnams gnas par snang yang dngos po de rnams la nam mkha' gnas par mi 'gyur ba bzhin du de bzhin gshegs pa yang mngon par byang chub pa'i tshe/sku mi zad pa'i rdo rje'i rgyan la sogs pa rnam pa sna tshogs de'i dbang gis 'byung ba yang byang chub kyi rang bzhin te/ sku mi zad pa la sogs pa'i rdo rje'i rgyan de rnams la dmigs pa'i sgo nas mi gnas pa zhes pa'o/ /dus gsum la sogs pa dang bral bar nam mkha' ji ltar bsgrags pa bzhin te/de ltar dus gsum bral ba ni/ /sngags kyi mgon po rnam par snang / /zhes pa ni ji ltar nam mkha' ni rang bzhin gcig ste/ mi 'gyur bas na dus gsum las 'das pa bzhin du de bzhin nyid kyi rang bzhin sngags kyi mgon po de yang mi 'gyur ba yongs su rdzogs pa bas dus gsum la mi gnas par stobs dang mi 'jigs pa la sogs pa'i yon tan rnams snang ngo zhes pa'o//ming gis rtogs pa tsam la gnas/ /byed pa la sogs rnam par bral/ /nam mkha' de ni brjod pa ru/ /mkhas pa yis ni bshad pa yin//ming ni rtogs par ci yang ni/ /yod pa ma yin nam mkha' bzhin/ /de ltar gsang sngags kyis phyug pa/ /de yang brjod pa ru ni snang / /zhes pa ni de bzhin gshegs pa'i gsung mi zad pa'i rdo rje'i rgyan yi ge 'brur byin gyis brlabs pa'i rang bzhin de don dam par dngos po yod pa ma yin par bstan pa ste/ji ltar nam mkha' ming du gdags pa tsam la gnas kyi/ nam mkha' de nyid med pa'i rang bzhin nam gzhan gyis byas pa'i dngos po yod pa ma yin te/ nam mkha' zhes brjod pa tsam du zad kyi ming las lhag par nam mkha' zhes pa'i dngos po yod pa ma yin pa de bzhin du sngags kyi dbang po'i snying po de yang kun rdzob pa tsam snang bar zad kyi/dngos por yod pa ma yin no zhes pa'o/ /me dang rlung dang chu ma yin/ /zhes pa la sogs pa ni de bzhin gshegs pa'i byang chub kyi rang bzhin te/ me dang chu la sogs pa chen po bzhi dang / nyi ma dang zla ba la sogs pa chen po bzhi la gnas pa dang /nyin par mtshan mo la sogs pa'i dus la sogs pa ming gis smos pa rnams kyi rang bzhin ma yin te/ gang thams cad mkhyen gyi gnas thob par 'dod pa de ni/ ji skad du smos pa'i dngos po 'di rnams dang bral ba'i byang chub kyi rang bzhin de la nan tan bya'o zhes pa'o//da ni dam tshig gsum bshad de/ de yang rnam pa gnyis te/ rgyu'i dam tshig gsum dang / 'bras bu'i dam tshig gsum mo/ /de la rgyu'i dam tshig gsum ni 'jug pa'i sems dang / gnas pa'i sems dang ldang ba'i sems so/ /'bras bu'i dam tshig gsum ni bcom ldan 'das kyi sku mi zad pa la sogs pa rnam pa gsum mo//de la dam tshig ces pa'i tshig gi don ni kun du 'gro ba zhes kyang bya ste/ 'jug pa dang gnas pa dang ldang ba'i sems so/ /'dis 'gro'o zhes pa'i don to/ /kun du thob pa'am chud par bya ba zhes kyang bya ste/ sku mi zad pa'i rdo rje'i rgyan la sogs pa rnam pa gsum po de dag thob pa'am chud par bya bas de dag nyid la bya ste/skabs 'dir ni rgyu'i dam tshig bshad de/ de yang de nas bcom ldan 'das la phyag na rdo rje gsang ba'i bdag pos 'di skad ces gsol to zhes pa la sogs pa'o/ /de la chos gzhan pa rnam pa gsum ste zhes pa ni 'jug pa dang /gnas pa dang ldang ba'i sems gsum tha dad pas chos gzhan pa gsum zhes bya'o/ /gang chos gzhan pa las sgrib pa med pa'i tshul gyis dam tshig gsum 'byung ba'o zhes pa ni 'jug pa la sogs pa'i sems gsum po de spyad pa las thogs pa med par sku mi zad pa la sogs pa'i rdo rje'i rgyan dam tshig gsum gyi mtshan nyid de 'byung ngo zhes pa ste/de nyon cig bshad do zhes pa'i tshig gong ma dang 'brel to/ /chos gzhan pa zhes bya ba de yang gang zhe na zhes pa ni 'jug pa la sogs pa'i sems de gsum po so sor bye brag phye ste bshad pa'i phyir gsungs pa'o//de la 'jug pa'i sems ni dang po sems ma bsgoms pa'i rang bzhin zhes pa nas byang chub kyi mtshan nyid do zhes pa'i bar du ma bsgoms pa'i rang bzhin zhes pa ni phung po dang khams la sogs pa'i chos rnams shes rab kyis ma bshig pa'o zhes pa'o/ / de'i rjes bzhin 'byung ba'i shes rab ces pa ni ma bsgoms kyi de ma thag tu chos la bdag med pa'i shes rab bo/ /des kyang yang dag pa ji lta ba bzhin du yongs su shes pa bskyed pa zhes pa ni shes rab de chos thams cad phyin ci ma log par shes pa bskyed pa zhes pa ste/ de bas na gsungs pa/rtog pa'i dra ba thams cad med pa'i sems byang chub kyi mtshan nyid ces pa ste/ phung po dang khams la sogs pa'i chos rnams kyi mtshan nyid la yod cing chags par rtog pa ni grol ba'i bgegs su 'gyur ba ste rtog pa de nyid dra ba zhes bya ba'o/ /gang rtog pa'i dra ba med pa'i sems ni stong pa nyid du chud pa'i sems te/byang chub kyi mtshan nyid de/ de ni dang po'i sems zhes pa'i tshig gong ma dang 'brel te 'jug pa'i sems so/ /gnyis par ni rnam par mi rtog pa'i kun du sangs rgyas pa'i gnas so zhes pa ni gnas pa'i sems te/ rtog pa'i dra ba thams cad med pa byang chub kyi mtshan nyid kyi shes rab de nyid lus thams cad stong pa'i rang bzhin du chud nas rnam par mi rtog pa nyid la gnas te/de nyid kun du sangs rgyas pa'i gnas zhes bya'o/ /yang dag pa de bzhin du mthong nas kyang zhes pa nas de'i dam tshig gsum po zhes pa'i bar du ldang ba'i sems bshad pa ste/yang dag pa ji bzhin du mthong nas kyang zhes pa ni 'jug pa dang gnas pa'i sems kyis de bzhin nyid la phyin ci ma log par chud nas kyang zhes pa ste/ de ltar de bzhin pa nyid du chud nas kyang rnam par mi rtog pa de bzhin pa nyid la mi gnas pa'i sems can gyi don du spyad de/de bas na gsungs pa sems can gyi khams ma lus pa la bltas nas zhes pa la sogs pa'o/ /sems can gyi khams la blta ba de yang dmigs pa dang bcas shing khe dang bkur sti'i phyir blta ba ma yin te/ de bas na gsungs pa gsang ba'i bdag po snying rje'i dbang du gyur cing mi dmigs pa nyid du byang chub kyi sems skye'o zhes pa ste/byang chub kyi sems de gang zhe na/ gsungs pa 'di lta ste spros pa thams cad dang bral ba mtshan nyid med pa'i byang chub tu sems can thams cad rab tu da god par bya'o zhes pa ste/ mdor na de bzhin nyid kyi rnam par mi rtog pa la gnas nas kyang sngon gyi smon lam gyi shugs kyis snying rje'i dbang du gyur cing dmigs pa nyid du sems can thams cad ji ltar bdag gis chud pa'i byang chub tu rtog pa las byung ba'i spros pa thams cad dang bral ba mtshan nyid med pa de la dgod par bya'o zhes pa'i byang chub kyi sems skye'o zhes pa'o//'di ni dam tshig gsum po zhes pa ni ji skad du smras pa'i 'jug pa dang / gnas pa dang ldang ba'i sems te gsum ni dam tshig gsum zhes pa'o/ /ji ltar na gsang ba'i bdag po dam tshig gsum zhe na zhes pa la sogs pa ni 'jug pa la sogs pa'i sems de dag nyid kyi gzhung bshad pa ste/dang po'i sems sangs rgyas so zhes pa ni dang po'o/ /'jug pa'i sems te phung po la sogs pa'i chos rnams bdag med par chud pas na sangs rgyas zhes bya ste/ sangs rgyas zhes pa'i tshig ni chud pa zhes pa'i gzhung yin pa'i phyir ro/ /gnyis po ni chos zhes bya'o zhes pa ni gnas pa'i sems de bzhin pa nyid kyi rang bzhin pa'i mtshan ma 'dzin pa'i chos zhes pa'o//de dang lhan cig tu 'byung ba'i sems ni dge 'dun no zhes bsgrags so zhes pa ni chos thams cad stong par chud pa'i tshe nyid na/ snying rje'i dbang gis phyir mi ldog pa byang chub sems dpa'i dge 'dun gyi mtshan nyid lha rnams kyi skur bsgyur ba la bya'o//dpa' bo dam tshig 'di gsum bshad pa khyod la mgon po rnams kyis zhes pa ni/ ji skad smos pa 'di dam tshig 'di gsum dpa' bo khyod la ngas bshad pa 'ba' zhig ma yin gyi/ sngon gyi sangs rgyas bcom ldan 'das mgon po rnams kyis kyang bshad do zhes pa ste/sangs rgyas bcom ldan 'das rnams kyi spyod pa gcig pu bstan pa'o/ /dam tshig gsum po 'di gnas nas spyod pa byang chub spyod pa de tshe tshul yang sgo'i ste/ dpa' bo'i sems can phan don phyir/ /zhes pa ni byang chub sems dpa' byang chub kyi spyad pa spyod pa rnams dam tshig 'di gsum la gnas nas 'jig rten pa rnams kyi tshul mang po dang 'jig rten las 'das pa nyan thos dang rang sangs rgyas la sogs pa'i tshul sna tshogs kyi sgo nas sems can gyi don gyi phyir spyod do zhes pa'o//nam zhig gyur pa kun sangs rgyas/ /sku gsum la ni dbang thob pa/ de nas gsang ba'i bdag po de yang dag par kun du sangs rgyas pa ston par byed do zhes pa la sogs pa ni 'bras bu'i dam tshig gsum bstan pa ste/nam kun du sangs rgyas par gyur pa de na sprul pa'i skus sangs rgyas kyi yab zas gtsang ma'i sras su ston pa nas mya ngan las 'das pa'i bar du ston pa ste de la/ sku gsum la ni dbang thob pa//zhes pa ni nam 'og min gnas su kun du sangs rgyas par gyur pa de nyid na chos thams cad stong pa nyid du chud pa de bzhin pa nyid kyi rang bzhin du gyur pa ni chos kyi sku la dbang thob pa'o/ /de'i tshe rdzogs longs spyod pa'i skur snang bas na/ rdzogs longs spyod pa'i sku'i dbang thob pa'o//de nas sprul pa'i sku 'jig rten du snang bas na sprul pa'i sku'i dbang thob pa'o/ /lus gcig byin gyis brlabs pa ni 'di lta ste/ thog mar sprul pa'i sku'o zhes pa ni yang dag par kun du sangs rgyas pa'i bstan pa ston par byed do zhes pa dang 'brel te/ thog mar 'og min gnas su kun du sangs rgyas nas sprul pa'i skur byin gyis brlabs te rgyal po zas gtsang ma'i sras su ston pa dang /gzhon nu rol pa dang / rab tu byung ba dang / dka' ba spyod pa dang / byang chub kyi snying por nye bar 'gro ba la sogs pa'i bstan pa rnams ston par byed do zhes pa'o/ /gzhan yang gsang ba'i bdag po lus gcig po de nyid la rnam pa gsum du ston te/'di ltar sangs rgyas pa dang chos dang dge 'dun no zhes pa yang / yang dag par kun du sangs rgyas pa'i bstan pa ston par byed do zhes pa dang 'brel te sangs rgyas ni sprul pa'i sku nyid la bya'o/ /chos ni gsung rab yan lag bcu gnyis gsung mi zad pa'i sgo nas 'chad pa'o//dge 'dun 'phags pa'i gang zag brgyad kyi dge 'dun te/ sprul pa'i sku gcig pu de 'di rnams su byin gyis brlab cing kun du sangs rgyas pa'i bstan pa ston par byed do zhes pa'o/ /gzhan yang gsang ba'i bdag po de nyid theg pa gsum du brtags pa 'chad do zhes pa ni sprul pa'i sku de nyid gang zag la bdag med par chud pa la mos pa'i 'gro ba nyan thos rnams la ni nyan thos pa'i theg par brtags shing 'chad/chos rnams rten cing 'brel par 'byung ba'i tshul du bshig ste/ mi rtag par mthong nas grol bar byed par mos pa'i 'gro ba rnams la ni rang sangs rgyas kyi theg par brtags shing 'chad/chos dang gang zag gnyis ka bdag med par chud pa la mos pa'i 'gro ba rnams la theg pa chen por brtags shing 'chad do zhes pa'o/ /de nas sangs rgyas kyi bya ba thams cad byas nas yongs su mya ngan las 'das pa ston cing sems can kun smin par byed do zhes pa ni/mi rtag par mthong nas 'khor ba las thar bar nan tan byed pa'i sems can rnams smin par bya ba'i phyir mya ngan las 'das pa ston te/ mya ngan las 'das pa de sems can rnams kyis mthong nas sangs rgyas bcom ldan 'das lha dang mi'i bdag po bsod nams dang ye shes kyi tshogs la yang mi rtag na gzhan lta ci smos snyam nas 'phags pa'i lam la nan tan byed cing smin par 'gyur ro zhes pa'o//'di dag ni rgyu dang 'bras bu'i dam tshig gsum pha rol tu phyin pa la spyod pa dang / sngags spyod pa'i byang chub sems dpa' gnyis ka'i phyir bstan pa ste/rgyu'i dam tshig gsum ni mos pa spyod pa'i sems kun du bzang po'i sa'i bar du ste/ de'i bar du 'jug pa la sogs pa'i sems gsum dang ldan pa'i phyir ro/ /'bras bu dam tshig gsum ni snga ma bzhin te/ de ltar sngags spyod pa'i byang chub sems dpa' mos pa spyod pa'i sa la gnas pa rnams la gang dam tshig gsum po 'di shes shing de la gnas pa de'i rjes su bsngags pa bshad pa de gsungs pa/gsang ba'i bdag po zhes pa nas rtog pa thams cad las byung ba'i bgegs med do zhes pa ste/ spyir bgegs la rnam pa gsum ste/ rnam par rtog pa las 'byung ba dang /las las 'byung ba dang / gang bag med pa ma spangs pa las 'byung ba ste/ las las 'byung ba bgegs nad mang po la sogs pa dang / bag med pa ma spangs pa las 'byung ba'i bgegs dug dang / mtshon dang g.yang sa la sogs par 'gro ba dang / de dag rnam par rtog pa sngon du song ba las gyur pas rtog pa thams cad las byung ba'i bgegs zhes bya ste/bgegs de dag med par 'gyur ro zhes pa'o/ /mi 'dod pa dang le lo can dang 'du 'dzi can yid mi ches pa dang / yo byad mang po la sogs pa rnams ni ma gtogs so zhes pa ni/ dam tshig gsum po de dag dang ldan du zin kyang sgrub pa mi 'dod pa dang /le lo la sogs pa'i ming gis smos pa 'di rnams dang ldan pa ni bgegs med pa ni nang du ma gtogs te sgrub pa mi 'dod pa dang / le lo la sogs pa de dag nyid bgegs yin pa'i phyir ro/ /des na rnam gnyis mi bya ste myos pa'i btung ba dang nyal ba'i khri'o zhes pa ni myos pa'i btung ba ni ma rungs par 'gyur ba thams cad kyi rtsa bas spang ngo //ji ltar de bzhin gshegs pa lags/ /zhes pa la sogs pa'i tshigs su bcad bas bcom ldan 'das la phyag na rdo rjes zhus pa ni sngar sangs rgyas dang byang chub sems dpa' rnams kyis sngags gsungs pa ni/'di ni de bzhin gshegs pa'i sngags 'di ni byang chub sems dpa' rnams kyi sngags so zhes pa la sogs pa gsungs pa de la de bzhin gshegs pa dang / kun du sangs rgyas pa dang byang chub sems dpa' rnams kyi mtshan nyid bye brag ci mchis gang lags pa ma 'tshal na/the tshom de bsal bar gsol zhes pa'o/ /de bas na phyag na rdo rje nyid kyis mi mkhyen pa ma yin gyi ma 'ongs pa'i 'gro ba rnams the tshom bsal ba'i phyir ro/ /zhus pa'i tshig de bzhi yang / byang chub nam mkha'i mtshan nyid do/ /zhes pa la sogs pa zhes pa'i tshigs su bcad pas rim bzhin du gnyis gsol to//the tshom yid mi ches spangs nas/ /byang chub sems dpa' grags chen rnams/ /theg chen la ni spyod 'gyur ba/ /spyod pa'i rgyal po bla na med pa'o/ /zhes pa ni byang chub sems dpa' grags pa chen po rnams theg chen sngags kyi spyod pa la spyod pa ni yang the tshom dang yid mi ches pa spangs nas de bas na theg pa chen po sngags kyi spyod pa la spyod pa'i phyir bdag gi the tshom de bsal du gsol zhes pa dang sbyar ro//spyod pa'i rgyal po bla na med/ /ces pa ni sngags kyi spyod pa nyid la bya'o/ /byang chub nam mkha'i mtshan nyid de/ rtog pa thams cad spangs pa yin te/ bdag gis de 'dra'o rtogs 'dod pa/ /de ni byang chub sems dpa'o/ /zhes pa ni/ ji ltar byang chub sems dpa' lags/ /zhes zhus pa'i lan te 'di skad gsungs pa/ chos thams cad stong pa nyid du chud pa/ de bzhin pa nyid kyi ye shes gzung ba dang 'dzin pa la sogs pa'i rtog pa thams cad spangs pa nam mkha' lta bur nyon mongs pa dang shes bya'i sgrib pa med pa de ni byang chub ste/byang chub de lta bur gang chud par 'dod pa de ni byang chub sems dpa' zhes bya ste/ de yang sa dang po la zhugs nas sa dgu man chad kyi byang chub sems dpa' rnams la bya'o//sa bcu mngon par bsgrubs nas su/ /sangs rgyas zhes su de bsgrags so/ /zhes pa'i bar du ji ltar sangs rgyas zhes su de bgyi zhes zhus pa'i lan te/ sa bcu yongs su rdzogs pa'i byang chub sems dpa' ji skad du grags pa'i dbang bcu la yang dbang du gyur pa'i ting nge 'dzin la gnas pa dang /langs pa gnyis ka'i tshe na yang phung po la sogs pa'i chos rnams sgyu ma lta bur rtogs pa 'jig rten pa rnams kyi rgyud kun rdzob dang don dam pa'i mtshan nyid du stong pa nyid dang sgyu ma lta bur shes pa de ni sangs rgyas zhes bya ste byang chub sems dpa' phal rnams kyis kyang chos rnams stong pa sgyu ma lta bur rtogs pa dang /'jig rten kun gyi rgyud du shes mod kyi mi mthun pa'i phyogs thams cad ma spangs pas/ chos rnams stong pa dang sgyu mar rtog pa yang mnyam par gzhag pa las langs pa'i tshe mi mthun pa'i phyogs kyi sgrib par gyur te/ de bas na khyad par du gsungs pa/sa bcu dang sa bcu la rdzogs par sangs rgyas pa zhes bya ste/ sangs rgyas pa zhes bya ba ni log pa'i gnyen po la sogs pa spangs nas phyin ci ma log par chud pa la bya'o/ /chos rnams nam mkha'i mtshan nyid de/ /gnyis su med de mtshan nyid gcig /stobs bcu kun du sangs rgyas pa//de ni kun du sangs rgyas so/ /zhes pa ni ji ltar rgyal ba mchog ces zhus pa'i lan te/ sa bcu'i byang chub sems dpar sangs rgyas zhes bya ba rnams kyis chos rnams stong par chud pa yang so sor mtshan nyid du chud de/ de las lhag par gang so sor mtshan nyid du stong par chud pa de rnams gang gzugs kyi stong pa de tshor ba'i stong pa ste/gzugs kyi stong pa dang tshor ba'i stong pa nyid gnyis gnyis su dbyer med ces pa la sogs pa'i tshul du chos thams cad nam mkha'i mtshan nyid ltar gnyis su med de/ mtshan nyid gcig tu stobs bcu yongs su rdzogs nas kun du chud pa de ni kun du sangs rgyas zhes bya ba ste/de yang phung po lhag ma dang bcas pa'i mya ngan las 'das pa kun du bzang po'i sa la gnas pa'i byang chub sems dpa' la bya'o/ /rgyal ba'i mchog ces pa ni bdud bzhi las rgyal ba'i phyir ro/ /'du shes tsam du spangs pa su/ /rang bzhin bstan du med na ni//gang gis rig pa'i ye shes kyis/ /kun du sangs rgyas pa'i tshe chos thams cad stong pa'i mtshan nyid gcig tu chud pa'i 'du shes tsam pa de yang spangs te/ rang gis rig pa rang bzhin du bstan pa med pa lhag ma ma lus pa'i mya ngan las 'das pa de ni de bzhin gshegs pa zhes bya'o/ /da ni gsang ba'i phyag rgya brgyad po bshad par bya ste/phyag rgya 'di rnams kyang sngags pa lha'i gzugs su bsgyur ba de brtan par bya ba'i phyir sbyar te/ lha'i gzugs su bsgyur ba yang rnam pa gnyis te de bzhin gshegs pa'i skur bsgyur ba dang / byang chub sems dpa'i skur bsgyur ba'o/ / de bzhin gshegs pa'i skur bsgyur la phyag rgya 'di rnams kyis byin gyis brlabs na phyag rgya 'di rnams de bzhin gshegs pa'i phyag rgya bas de bzhin gshegs pa nyid kyi rang bzhin du 'gyur ro/ /de la lha'i sku yongs su rdzogs par bya ba yang rnam pa gnyis te/ gnas rdzogs par bya ba dang lus rdzogs par bya ba'o//gnas rdzogs par bya ba ni rdo rje mi phyed pa'i phyag rgya dang / pad+mo mdzod kyi phyag rgya gnyis so/ /lhag ma drug gis ni lus rdzogs par bya'o/ /de rnams la rnam pa gsum du dbye ste/ lus dang ngag dang yid rdzogs par bya'o/ /de la lus rdzogs par byed pa ni yan lag thams cad 'byung ba'i phyag rgya dang 'od kyi phyag rgya'o//gzungs kyi phyag rgya dang chos gnas pa gnyis ni sems rdzogs par byed pa'o/ /sangs rgyas kyi dbyangs kyi rgyan mang po'i phyag rgya ni ngag rdzogs par byed pa'i phyag rgya'o/ /sbyor ba chen po'i phyag rgya ni ting de 'dzin sbyor ba rdzogs par byed pa'o/ /de rnams sbyar bar bya ba'i rim pa yang thog mar rdo rje mi phyed pa'i phyag rgyas bdag gnas pa'i gzhi dang dbang chen gyi dkyil 'khor rdo rje'i gdan du byin gyis brlabs te/de nas dam tshig gi phyag rgya bcings nas bdag dang gnas bsrung ba dang / mchod pa bya ba dang / rdo rje sems dpar byin gyis brlab pa la sogs pa ji skad gsungs pa'i rim bzhin du byas la de nas de'i 'og tu ji skad bshad pa'i rim gyis bdag nyid lha'i skur bsgyur te/dang por pad+mo phyag rgyas pad+ma'i gdan byin gyis brlab/ yan lag thams cad 'byung ba'i phyag rgyas lha'i skur brtan par byin gyis brlab/ de nas 'od 'byung ba'i phyag rgyas 'od kyi dkyil 'khor byin gyis brlabs te/de nas gzungs kyi phyag rgyas chos mi brjed pa'i dran pa brtan par byin gyis brlab/ de nas sangs rgyas kyi dbyangs kyi rgyan mang pos ngag byin gyis brlab/ de nas chos gnas pa'i phyag rgyas de bzhin nyid kyi chos nyid brtan par byin gyis brlab/ de'i 'og tu sbyor ba chen po'i phyag rgyas ting nge 'dzin brtan par byin gyis brlab ste de dag ni bsdus pa'i don to//'khor gyi dkyil 'khor 'dus pa thams cad gzigs nas zhes pa ni snga ma bzhin no/ /phyag na rdo rje byang chub sems dpa'i zhes pa phyag na rdo rjes kyang ma gsol bar bcom ldan 'das nyid 'chad pa ni phyag rgya de che ba'i bdag nyid du bstan pa'i phyir te/de nas sangs rgyas bcom ldan 'das kyi spyod yul gyis byang chub sems dpa' la sogs pa gzhan rnams kyi spyod yul du ma gyur pas phyag na rdo rjes kyang de bshad du gsol zhes ma gsol to/ /gsang ba'i phyag rgya zhes pa ni dam tshig med pa dang dbang ma bskur ba la sogs pa kun la mi bstan pa'i phyir ro//gsang ba dang bcas pa'i zhes pa ni rdo rje'i gdan dang pad+mo dang 'od kyi dkyil 'khor la sogs pa lha rang gi gzugs su mi bstan par lag pa'i phyag rgyar bstan pa'i phyir ro/ /lha yi gnas su byin gyis brlab/ /ces pa ni lha'i gnas ni rdo rje'i gdan dang pad+mo ste/de ltar lha rnams gnas par 'gyur bas na rdo rje mi phyed pa'i phyag rgya dang pad+mo'i phyag rgya gnyis la bya'o/ /gnyis su na phyag rgya brgyad ca ra la bya ste/ phyag rgya de rnams kyis byin gyis brlabs na/ rang gi lus la lha gnas par 'gyur ba'i phyir ro/ / rang gi sngags kyi mtshan nyid kyis btab ces pa ni phyag rgya de dag so so'i sngags 'og nas 'byung ba rnams mtshan nyid kyis btab ste phyag rgya de bcings nas sngags kyang der bsam mo zhes pa'i don to/ /dkyil 'khor dang ldan pa zhes pa ni phyag rgya de dag so so'i dkyil 'khor dbang chen la sogs pa ji ltar 'og nas 'byung ba dang ldan pa zhes pa ste/rang rang gi dkyil 'khor rnams phyag rgya nyid kyi nang du bsam/ rdo rje dang pad+mo'i gdan dang / 'od kyi dkyil 'khor la sogs pa so so'i gnas su yang ldan par bsam mo zhes pa'i don to/ /rang gi las la lhar sbyor ba/ /zhes pa ni zhi ba dang rgyas pa dang rab dang 'bring la sogs pa'i sgrub pa'i las rnams la rang gi lha nyid du sbyor ba phyag rgya 'di rnams ldan zhes pa'o//gang gi sngags kyi sgo nas byang chub sems dpa' spyad pa spyod pa'i byang chub sems dpa' rnams bdag dang lha'i gzugs su rig pa bstan par 'gyur ro zhes pa ni bdag gi lha'i gzugs bsgyur ba phyag rgya 'di rnams kyis ji skad du bshad pa'i rim pa bzhin du so sor byin gyis brlabs na lha'i gzugs su bstan par 'gyur ro zhes pa'o//rig nas kyang lha'i rang gi bya ba la gnas na grub pa thob par 'gyur ro zhes pa ni/ /de'i skur bsgyur te/ phyag rgya de rnams kyis byin gyis brlabs nas bstan par bya ba tsam gyis chog pa ma yin gyi/rang gi lha'i bya bzhi ba dang rgyas pa dang rab dang 'bring la sogs pa'i grub pa dang las rnams bsgrubs na 'grub par 'gyur ro zhes pa ste/ de lta bu'i yod do zhes pa 'brel to/ /rdo rje mi phyed pa'i phyag rgya dang / pad+mo mdzod kyi phyag rgya dang /sangs rgyas kyi dbyings kyi rgyan mang po'i phyag rgya bcings pa la phyag rgya snga ma las zhes pa ni de dag gsum char gyis kyang 'od 'byung ba'i phyag rgya las shes par bsnyeg go/ /de bzhin du gzungs kyi phyag rgya la sogs pa phyag rgya gsum po la phyag rgya snga ma las shes pa ni yan lag thams cad du 'byung ba'i phyag rgya las shes par rig par bya'o//gzungs kyi phyag rgya'i dkyil 'khor 'ja' lta bu la mtshan ma thams cad dang ldan zhing rdo rje dang ba dan gyis brgyan pa zhes pa ni gzungs te rdo rje'i gdan dang pad+mo dang 'od kyis bskor ba la sogs pa'i dngos po ji ltar bsams pa rnams mi brjed par bya ste/mthu thams cad dang ldan par dgongs pas 'ja' lta bu'i dkyil 'khor bzhi char gyi dkyil 'khor kha dog dang ldan pa'o/ /mtshan ma thams cad dang ldan pa'i dkyil 'khor so so'i mtshan nyid rdo rje dang / pad+mo la sogs pa dang ldan pa'o zhes pa'o//rdo rje dang ba dan gyis brgyan pa zhes pa ni dkyil 'khor de'i dbyibs dang 'ja' 'dra bas rlung gi dkyil 'khor de rlung gi dkyil 'khor gyi mtshan ma ba dan rab tu mi g.yo bar bya ba'i phyir rdo rje can gyi ba dan chos gnas pa'i phyag rgya'i dkyil 'khor gnyis zhes pa ni stong pa dang stong pa'i yang stong pa'i mtshan ma sbyor ba chen po phyag rgya'i dkyil 'khor nam mkha'i kha dog las khyad par du sngo bar bya ba ni ting nge 'dzin gyi mthu thams cad dang ldan pa'i phyir rlung gi dkyil 'khor gyi shas che bar dgongs pa'o//gsang ba'i bdag po gsang ba'i phyag rgya 'di rnams ni de bzhin gshegs pa rnams kyi shin tu gsang ba ste/su la yang mi sbyin no zhes pa ni dam tshig med pa dang dbang ma bskur ba la sogs pa 'og gnas 'byung ba'i yon tan ming gis smos pa rnams dang mi ldan pa su la yang mi sbyin gyi yon tan de rnams dang ldan pa la ni sbyin no zhes pa'o/ /dbang sbyin zhes pa ni gsang ba'i dkyil 'khor du dbang bskur ba zhes pa'o//rigs dang ldan pa zhes pa ni bram ze dang rgyal rigs rnams la sbyin gyi/ /nya pa la sogs rigs ngan pa rnams la mi sbyin no zhes pa'o/ /gnyis su rigs dang ldan zhes pa ni de bzhin gshegs pa'i rigs dang pad+mo'i rigs kyi lha rnams la brten cing de la gnas pa'o zhes pa'o//gsum du na de bzhin gshegs pa'i rigs la sogs pa'i sngags pa'i spyod pa la brtson zhing 'bad pa rnams la zhes pa'o/ /spro ba zhes pa ni sngags spyod pa la brtson zhes pa'o/ /yid dam brtan pa zhes pa ni ji ltar bsams pa'i don ma grub kyi bar du mi gtong ba zhes pa'o//bla ma la rim gro che ba zhes pa ni bla ma la dad cing gus na ji ltar bstan pa bzhin du yang dag par sbyor zhing nan tan byed pa'i phyir ro/ /gtsang zhes pa ni lus gtsang na sems 'du bar 'gyur ba'i phyir ro/ /rang gi lus dang srog la mi blta'o zhes pa ni las dang sgrub pa la sogs pa'i sngags kyi spyod pa la lus dang srog kyang mi phangs te/de lta bu la phyag rgya de rnams mi sbyin no zhes pa'o/ /da ni lha'i rang bzhin gyi ting nge 'dzin bshad do/ /de la lha'i rang bzhin kyang 'og nas 'byung ba'i tshul rnam pa drug tu rig par byas te/ rnam pa drug po de las kyang gang yang gzugs dang phyag rgya la sogs pa'o//lha'i rang bzhin gyi rnam pa la ni sngar bshad pa'i yan lag rnam pa bzhi la sogs par bshad zin to/ /de yang phyi rol du de bzhin gshegs pa'i sku la dmigs pa dang / bdag rang lha'i gzugs su bsgyur ba ni gzugs kyi rang bzhin zla ba'i dkyil 'khor ni byang chub kyi sems kyi phyag rgyar gyur pa'i lha'i rang bzhin zla ba'i dkyil 'khor la yig 'bru dgod pa ni sgra'i rang bzhin bdag dang lha'i rang bzhin bdag lhar bsgyur ba na ut+pal la sogs pa'i lha'i rnam par grol ba'i phyag rgya ni/rang gi gzugs kyi phyag rgya lha'i rang bzhin phyag rgya de nyid lag pa'i phyag rgya ra bsgyur te lha'i skur byin gyis brlab pa dang srung ba la sogs pa bya ba ni rang gi gzugs ma yin pa'i phyag rgya'i rang bzhin no//drug po ni yongs su dag pa'i lha'i rang bzhin mtshan med pa'i ting nge 'dzin la gnas te/ lha'i rang bzhin de sngar ma bshad pas de skabs 'dir bshad par bya ba dang /lha'i rang bzhin lnga po sngar bshad pa rnams kyang bslab pa'i yan lag tsam du shes kyi lha'i rang bzhin yin par mi shes te phyag rgya la sogs pa de rnams kyang lha'i rang bzhin yin par bstan te/ de yang bcom ldan 'das la phyag na rdo rje gsang ba'i bdag pos 'di skad ces gsol to zhes pa la sogs pa'o//de lha'i gzugs byin gyis brlabs par 'gyur ba'i lha'i gzugs bshad du gsol zhes pa ni/ 'og nas 'byung ba'i lha'i gzugs la byin gyis brlab par 'gyur ba de bshad du gsol zhes pa ste gzugs zhes pa'i tshig ni lha'i rang bzhin zhes pa'i don to//lha'i rang bzhin de bshad par gsol ba de ji ltar dgos she na gsungs pa/ gang gi sngags kyi sgor byang chub sems dpa' spyad pa spyod pa'i byang chub sems dpa' rnams lha'i gzugs la dmigs nas rang gi bya ba'i lha'i gzugs su bdag nyid byas nas the tshom med par grub pa rab tu thob par 'gyur ba'o//de la lha'i gzugs la dmigs nas zhes pa ni phyi rol gyi de bzhin gshegs pa'i sku dang / de la zla ba'i dkyil 'khor sngags dang bcas pa'i lha'i rang bzhin la dmigs nas zhes pa'o/ /rang gi bya ba'i lha'i gzugs su bya ba dag byas nas zhes pa ni/zhi ba dang rgyas pa dang rab dang 'bring la sogs pa'i grub pa dang las la lha'i gzugs su bsgyur ba zhes pa'o/ /the tshom med par grub pa thob par 'gyur zhes pa ni lha'i rang bzhin de rnams bshad de/ de shes par gyur na the tshom med do//ji ltar bsams pa'i don grub par 'gyur ba'i phyir lha'i rang bzhin de rnams bshad du gsol zhes pa dang sbyar ro/ /de la gsang ba'i bdag po lha'i gzugs rnam pa gsum ste/ yi ge dang phyag rgya dang gzugs so zhes pa la lha'i gzugs rnam pa gsum zhes pa la lha'i rang bzhin rnam pa gsum zhes pa'o//yi ge zhes pa ni rang bzhin mi 'gyur ba'i phyir zhes pa'i tshig ste/ de yang gang zhe na gsungs pa/ yi ge la yang rnam pa gnyis te/ sgra dang byang chub kyi sems so zhes pa'o/ /de la sgra ni sngags kyi yig 'bru ste/ de'i sgras kun rdzob dang don dam pa'i lha rnams grol ba ston pa la rang bzhin gzhan du mi 'gyur bas na nam yang mi 'gyur zhes pa ste/ji skad du gsungs pa/ de bzhin gshegs pa rnams byung yang rung ma byung yang rung chos rnams kyi chos nyid ye nas gnas pa ni 'di lta ste/ sngags kyi chos nyid do zhes pa'i phyir ro/ /byang chub kyi sems zhes pa ni zla ba'i dkyil 'khor la bya ste/de bzhin pa nyid kyi rang bzhin byang chub kyi sems de la zla ba'i dkyil 'khor du byin gyis brlabs te/ zla ba'i dkyil 'khor de byang chub kyi sems kyi phyag rgyas btab pa'i phyir/ byang chub kyi sems de mi 'gyur ba ni phyin ci ma log pa yongs su rdzogs pas stong pa nyid kyi rang bzhin la gzung ba dang 'dzin pa la sogs pa'i ji bzhin rnam par rtog pa can du mi 'gyur ba'i phyir ro//phyag rgya'i gzugs la yang rnam pa gnyis te/ gzugs 'dra ba gzugs mi 'dra ba'o zhes gzugs 'dra ba zhes pa ni lha rnams so sor grol ba'i phyag rgya pad+mo dang ut+pal la sogs pa'o//gzugs mi 'dra ba zhes pa ni pad+mo la sogs pa'i phyag rgya de dag nyid lag pa'i phyag rgyar bsgyur ba'o/ /lha'i gzugs la yang rnam pa gnyis te/ yongs su dag pa dang ma dag pa zhes pa'o/ /lha'i gzugs zhes pa ni lha'i rang bzhin zhes pa ste de yang gang zhe na gsungs pa/de yongs su dag pa ni lhag par chud pa'i gzugs mtshan ma thams cad dang bral ba'o zhes pa ste/ stong pa nyid kyi ting nge 'dzin kha dog dang dbyibs la sogs pa ji bzhin pa'i mtshan ma thams cad spangs pa de bzhin nyid kyi ye shes kyi lha'i rang bzhin zhes pa'o//yongs su ma dag pa ni mtshan ma dang bcas pa ste/ gzugs kha dog dbyibs so zhes pa ni 'phags pa 'jam dpal dang spyan ras gzigs kyi dbang po la sogs pa cha lugs te/ kha dog dang dbyibs la sogs pa'i mtshan ma la dmigs pas yongs su ma dag pa zhes bya ba'i don bya ba byed pa'i sgo nas yongs su ma dag pa ni ma yin no//de la lha'i gzugs rnam pa gnyis kyis don rnam pa gnyis 'grub par 'gyur te zhes pa ni yongs su dag pa dang / yongs su ma dag pa'i lha'i gzugs rnam pa de gnyis kyis 'grub par 'gyur ro zhes pa'o//de yang gang zhe na gsungs pa/ mtshan ma dang bcas pa zhes te kha dog dang dbyibs su ldan pa'i mtshan ma dang lha'i gzugs su bsgyur ba'i ting nge 'dzin gyi ral gri dang rdo rje la sogs pa'i grub pa'i rdzas mtshan ma dang bcas pa zhes pa ste/ kha dog dang dbyibs su ldan pa'i mtshan ma dang lha'i gzugs su bsgyur ba'i ting nge 'dzin gyi ral gri dang rdo rje la sogs pa'i grub pa'i rdzas mtshan ma dang bcas pa 'grub pa zhes pa'o//mtshan ma med pa ni 'grub pa nye bar skye'o zhes pa ni stong pa nyid kyi lha'i rang bzhin mtshan ma med pa'i ting nge 'dzin gyis ni lnga mngon par shes pa dang gzungs dang rnam par grol ba la sogs pa'i ral gri dang rdo rje la sogs pa'i rdzas kyi mtshan ma la mi rtog pa 'grub pa ni rnam par 'thob bo zhes pa'o//skabs 'dir mtshan ma med pa zhes pa ni lnga mngon par shes pa la sogs pa dmigs pa dang bcas pa'i grub pas mi dmigs pa'i mtshan ma med pa la ni mi bya'i sgrub pa'i rdzas ral gri la sogs pa'i mtshan ma med pa'o//mtshan ma yod pas mtshan ma yod pa'i grub pa la rgyal mchog rnams rtag tu dgyes so zhes pa la sogs pa ni yongs su dag pa dang yongs su ma dag pa'i lha'i ting nge 'dzin las mtshan ma yod pa'i grub pa dang mtshan ma med pa'i grub pa so sor gyur pa las kyang nges par bshad pa ste/mtshan ma yod pa'i lha'i rang bzhin las grub pa yang mtshan ma yod pa nyid 'byung ba'i mtshan ma med pa'i grub pa mi 'byung ngo zhes pa'o/ /rgyal ba mchog rnams kyang rtag tu dgyes so zhes pa ni de lta bu sngon gyi sangs rgyas bcom ldan 'das rnams kyang dgongs pa'am bzhed de zhes pa'o//mtshan ma med pa la gnas nas mtshan ma yod par rab tu 'byung ngo zhes pa ni mtshan ma med pa'i lha'i ting nge 'dzin de las lnga mngon par shes pa la sogs pa rdzas la mi rtog pa mtshan ma med pa'i grub pa 'ba' zhig ma yin gyi/ral gri la sogs pa'i rdzas kyi mtshan ma dang bcas pa yang 'grub bo zhes pa'o/ /de bas na rnam pa thams cad la mtshan ma med pa bsnyen par bya'o zhes pa ni/ /mtshan ma med pa'i ting nge 'dzin de las mtshan ma yod pa dang med pa gnyis ka 'grub pas rnam pa thams cad du mtshan ma med pa de bsnyen par bya'o//de nas yang bcom ldan 'das kyis phyag na rdo rje gsang ba'i bdag po la 'di skad ces bka' stsal to/ /de la gsang ba'i bdag po mtshan ma med pa'i ting nge 'dzin sgrub par 'dod pa'i sngags kyi sgor byang chub sems dpa'i spyad pa spyod pa'i byang chub sems dpa' rnams kyis 'di ltar bsam par bya'o zhes pa la sogs pa ni gong du yongs su dag pa dang yongs su ma dag pa'i lha rnam pa gnyis kyi ting nge 'dzin sgom pa'i thabs ni bzlas pa'i yan lag bzhi la sogs pa sngar bshad pa'i skabs su bstan zin to//de yongs su dag pa'i lha'i rang bzhin gyi ting nge 'dzin bsgom pa'i rim pa bstan pas de 'dir ni mtshan ma med pa'i ting nge 'dzin de bsgoms na slar lus dang sems dang yid gsum la mtshan ma 'byung ba so sor bshig ste/mtshan ma 'byung ba med par sun phyin par bya ba'i thabs bstan te de la mtshan ma de gang las 'byung /rang gi lus las sam sems las sam yid las sam zhes pa ni/ 'di gang las mtshan ma 'byung zhes pa ni dang por dam bcas pa'o/ /lus las sam zhes pa ni sems dang yid gnyis ma gtogs par 'byung ba chen po'i rang bzhin gyi lus de las sngon po dang ser po la sogs pa'i mtshan ma 'byung ngam zhes brtags pa'o//sems las ma yin zhes pa ni yid kyi rnam par shes pa de las mtshan ma 'byung ngam zhes brtags pa'o/ /yid las sam zhes pa ni sgo drug gi rnam par shes pa las mtshan ma de 'byung ngam zhes brtags pa ste yid ces pa ni ji bzhin pa dang bcas pa'i bsam pa la bya ste/gzugs la sogs pa ji bzhin par snang ba'i sgo drug gi rnam par shes pa nyid la bya'o/ /de la thog mar lus las mtshan mar mi 'byung bar brtag pa ni de la lus de ni las las skyes pa nas de ltar gsang ba'i bdag po lus las su dran pa yin te rang bzhin gyis stong par sgoms shig cas pa'i bar du ste/mdor na las las skyes pa'i lus de ni rang bzhin gyis blun pa ste rtswa dang shing dang bong ba lta bu ste/ ji ltar rtswa dang shing dang bong ba de sngon po dang ser po la sogs pa'i mtshan ma 'byung ba'i bya ba mi byed pa bzhin du lus de yang mtshan ma rnams 'byung ba'i bya ba mi byed do zhes pa'o//de nyid kyi dpe yang gsungs pa/ phyi rol gyi ji bzhin pa'i gzugs las skyes pa bzhin du brtag go zhes pa ste/ ji ltar gzugs mkhan gyis rdo dang sa la sogs pa la lha dang mi'i ji bzhin pa'i gzugs byas pa de la skyes bu 'ga' zhig zhe sdang dang bcas pas mtshon dang me la sogs pas gtub pa dang bsreg pa la sogs pa byas kyang gzugs de la zhe sdang mi skye ste/de bzhin du skyes bu 'ga' zhig gis byams pa'i sems dang bcas pas bza' ba dang btung ba la sogs pa dang gos dang rgyan la sogs pa lha dang mi'i yo byad ji skad du smos pa rnams kyi mchod kyang gzugs de la drin du gzo ba dang /byams pa'i sems mi skye ba de bzhin du bdag gi lus 'di yang rang bzhin gyis blun pa ste mtshan ma la sogs pa bskyed pa'i bya ba byed pa ma yin no zhes lus de ltar bshig nas/mtshan ma med pa'i ting nge 'dzin du 'jug par bya'o zhes dgongs pa'o/ /gzhan yang gsang ba'i bdag po sems ni ngo bo nyid med pa'o zhes pa nas rang bzhin gyis mtshan ma dang bral bar soms shig ces pa'i bar du sems las byung ba'i/ mtshan ma mi 'byung bar bya ba'i bsgom pa'i thabs bstan pa ste/ sems de ni don dam par gzung ba dang 'dzin pa'i rang bzhin sngon po dang ser po la sogs pa'i mtshan ma thams cad dang bral ba dang rang bzhin gyis stong pa bas dus gsum pa yang 'das pa ste/ gang dus gsum med cing rang bzhin gyis stong pa de ni de bzhin nyid kyi mtshan nyid rnam par mi rtog pas mtshan ma 'byung ba ma yin par rig par byas nas mtshan ma med pa'i ting nge 'dzin la gnas par bya'o zhes dgongs pa'o//gzhan yang gsang ba'i bdag po yid ni mtshan ma dang bcas pa'o zhes byis pa so so'i 'gro ba rnams rtog pa yang dag pa ma yin par kun du brtags pa'i tshig bla dwags par ni mi shes so zhes pa ni yid las mtshan ma mi 'byung ba'i rtog pa bstan pa ste/mig la sogs pa'i sgo drug gi rnam par shes pa gzugs la sogs pa ji bzhin par snang bar 'byung ba ni byis pa rnams kyis 'khrul par rtogs pa ste/byis pa de rnams kyis ni 'khrul pa yin par mi shes so zhes pa gang yang dag par ma yin pa de ni ma skyes pa'o zhes pa'i gong du sgo drug gi rnam par shes pa de yang dag par yod pa ma yin pas de yang don dam pa'i mtshan ma 'byung ba'i rgyu ma yin no zhes pa'o/ /de ltar bsams na gsang ba'i bdag po sngags kyi sgor byang chub sems dpa'i spyad pa spyod pa'i byang chub sems dpa' mtshan ma med pa'i ting nge 'dzin thob bo zhes pa ni ji ltar yongs su ma dag pa'i lhar bdag gi lus bsgyur ba na/lha de'i kha dog dang dbyibs ci 'dra bar bsgyur ba bzhin du mtshan ma med pa'i lha'i rang bzhin du bsgyur ba yang mtshan ma med pa'i ting nge 'dzin du zhugs na yongs su dag pa'i lha'i rang bzhin du bsgyur ba ma yin te/mtshan ma med pa'i ting nge 'dzin rab tu thob bo zhes pa ni yongs su dag pa'i lha'i rang bzhin du gnas par 'gyur ro zhes pa'o/ /nam mtshan ma med pa'i ting nge 'dzin la gnas par gyur pa de ni gsang ba'i bdag po de la de bzhin gshegs pas gsungs pa'i sngags mngon du phyogs par gnas so zhes pa ni nam yongs su dag pa'i lha'i rang bzhin la gnas na de bzhin gshegs pas gsungs pa'i thabs kyis lha rnams 'grub par 'gyur ro zhes pa'o//de la gzhol ba zhes pa ni sngags pa de la lha de rnams gzhol lo zhes pa'o/ /gzhan yang gsang ba'i bdag po bzlas pa bshad do zhes pa la sogs pa ni bzlas pa'i de kho na nyid kyi le'u bshad pa ste/ bzlas pa de yang lha'i sbyor ba rnam pa gnyis la gnas nas bzlas pa ni gong du yongs su dag pa dang ma dag pa'i lha'i rang bzhin bshad pa la gnas na ste/de yang yongs su ma dag pa'i lha'i rang bzhin la gnas nas bzlas pa'i yan lag bzhir ldan pa ni sngar yang bshad zin te/ 'dir bshad pa ni nang gi mtshan ma med pa'i bzlas pa 'dir bshad pa dang / 'jig rten dang 'jig rten las 'das pa'i bye brag tu dbye ba'i phyir ro/ /de la gcig gis gcig tu zhes pa ni yongs su dag pa'i lha'i sbyor ba gcig la gnas nas yid kyis bzlas pa gcig pu bya'o zhes pa'o/ /gcig pu yang na gcig gis so zhes pa ni yongs su ma dag pa ni lha'i sbyor bas yid kyis bzlas pa bya'o zhes pa'o//rang thos rnam pa gnyis kyis bya'o zhes pa ni yongs su dag pa dang ma dag pa'i lha'i sbyor ba gnyis kas rang thos kyi bzlas pa bya'o zhes pa ste de bas na gsungs pa/ rtag tu sbyor mchog gnyis su bya'o/ /zhes pa ste yongs su dag pa dang yongs su ma dag pa'i lha'i sbyor ba la rtag tu brtson par bya'o zhes pa'o//bzlas pa gzhan du mi bya'o/ /yan lag 'gal bar sngags mkhan gyis/ /zhes pa ni phyi nang gi yan lag bzhi bzlas pa dang / nang gi don dam pa'i bzlas pa 'di gnyis las gzhan pa bzlas pa'i cho ga las 'gal ba dang yan lag ma tshang ba mi bya'o zhes pa'o//phyi dang nang gi sbyor bas su/ /yan lag bzhi ru ngas bshad pa/ /zhes pa nas/ rang thos bzlas pa dam pa'o/ /zhes pa'i bar du gong du don dam pa dang kun rdzob kyi rang bzhin rnam pa gnyis mdor glengs pa las kun rdzob kyi bzlas pa phyi'i yan lag gsum dang //nang gi yan lag gcig dang bzhir ngas bshad pa de ni 'jig rten gyi bzlas pa ni yin te/ de yang dmigs pa dang bcas pa'i bzlas pa'i nang nas mchog go zhes pa'o/ /slar sdud pa yi shes gnas nyon/ /zhes pa ni snga ma bzhin no/ /lha la song ba'i yid kyis so//zhes pa ni 'di la sems rtse gcig tu dmigs par bya'o zhes pa'o/ /'jig rten 'das pa'i yid kyis bya'o/ /zhes pa nas/ gzhan du bar ni bshad pa med/ /ces pa'i bar du don dam pa'i bzlas pa gong du bshad pa de zhib tu 'grel pa ste/ de la slar sdud pa'i rnam pa spangs zhes pa ni 'jig rten las 'das pa'i bzlas pa de yongs su ma dag pa'i lha'i rang bzhin mi dmigs pas phyi rol gyi bzlas pa'i yan lag las nang gi yan lag tu bsdu ba med do zhes pa'o//lha dang gcig tu bya ba dang / /zhes pa ni lha'i gzugs dang bdag gi gzugs gcig tu bya'o zhes pa'o//tha dad ma yin par ni gzung / /zhes pa ni gzugs lha dang bdag gnyis gcig tu bya ba dang gzugs tha dad pa gnas gcig 'dug pa yang srid de de lta bu ma yin gyi/ /lha dang bdag gnyis tha mi dad par bya'o zhes pa'o/ /lha dang bdag nyid tha mi dad par yang gzugs kyi rang bzhin du tha mi dad pa srid de/de las gsal bar gsungs pa/ yid la rang bzhin 'byed med par/ /zhes pa ste gzugs la sogs pa gcig tu bya ba ni ma yin gyi/ yid nyid la stong pa nyid kyi mtshan ma nyid du dbyer med par zhes pa'o/ /gzhan du bar mi bya'o zhes pa ni 'jig rten las 'das pa'i bzlas pa de tshul 'di 'dra ba las gzhan du mi bya'o zhes pa ste/mdor na bdag nyid kyi gzugs rang gi snying po gang yin pa'i sgra'i de kho na nyid la dmigs nas stong pa nyid du bshig ste/ bshig nas kyang ji ltar yang bdag gi gzugs stong pa'i rang bzhin du phyi nang gi chos thams cad kyang stong pa'i rang bzhin du gcig tu chud par bya ste/de ltar chos thams cad stong pa'i rang bzhin te/ dbyer med pa bdag dang lha'i rang bzhin kyang stong pa'i mtshan nyid du dbyer med par chud par byas la/ stong pa'i ting nge 'dzin rtse gcig pa la gnas nas yid la bzlas par bya'o zhes pa'o//'bum phrag gsum du grangs bcad pa/ /sngags ni mang du nga yi ste/ /de ni sngags pa dag pa ste/ /sdig dang bral ba'i lus can la/ /bzlas pa'i grangs su bstan pa ste/ /gzhan du bshad pa ma yin no/ /zhes pa'i grangs sum 'bum sngon du bsnyen pa byas nas sgrub po zhes ngas rnam pa mang du bshad pa de dag ni sdig dang bral ba yang tshe rabs snga mtshun chad du bsod nams dang ye shes kyi tshogs bsags pa'am/tshe 'di la byang chub kyi sems sgom pa'i thabs sngar bshad pa'i rim bzhin du bsgoms nas mtshan ma 'byung ba la bya'o/ /da ni de rnams kyi rabs bshad de/yang bcom ldan 'das sngon byang chub sems dpa'i spyad pa spyod pa na bram ze la sogs pa'i mur 'dug pa rnams log pa la phyogs shing sems can rgyun du gsod pa la sogs pa'i sdig pa'i las spyod pa rnams sems can rgyun du gsod pa la grangs bsnyung ba'i phyir lha la gtor ma dbul ba'i tshe sems can gsod pa ma gtogs par dus gzhan du sems can mi gsod do zhes pa la sogs pa mur 'dug gi gzhung las dge ba'i phyogs su 'chad pa dang /bram ze'i smrang las me bshad pa rnams dang / bcom ldan 'das nyid kyis bstan pa shes par bya ste/de ci mngon zhe na/ 'phags pa 'jam dpal gyi rgyud las ji skad du dge bar smras pa/ chung zad du zhing gi rnams yan chad kyang ngas bstan to zhes 'byung ba'i phyir ro/ /de bas na gsungs pa/ gzhan yang phyag na rdo rje dus gcig gi tshe nga mkhan por gyur/byang chub sems dpar gyur cing / byang chub sems dpa'i spyad pa spyod pa tshangs pa'i 'jig rten la gnas te/ tshangs pas nga la dris pa la sogs pa ste/ de la kye tshangs pa chen po/ /me la rnam pa du mar shes par bya/ zhes pa ni bcom ldan 'das byang chub sems dpa'i spyad pa spyod pa na tshangs pa'i 'jig rten na tshangs pa'i gzugs su gyur cing bzhugs te/de na stong gsum gyi stong chen po 'jig rten gyi khams la dbang ba tshangs pa'i rgyal pos nga la 'di skad ces dris so zhes pa'o/ /de la ngas 'di skad ces smras so zhes pa ni tshangs pa de langs 'og nas 'byung ba'i tshig rnams smras so zhes pa'o//de la gang me de nga rgyal can de rang 'byung ba zhes pa ni bskal pa dang po'i tshe 'jig rten thams cad sus kyang ma byas par rang byung nas nam mkha' la 'gro zhing dga' ba'i zas za ste/ de'i tshe yang me tshangs pa'i 'jig rten du rang byung ste/ da ni rang ste sus kyang ma byas pa'i nga rgyal yod pas nga rgyal can rang 'byung ba zhes pa ste me dang por de ltar bur 'byung zhes pa'o//de'i 'og tu tshangs pa'i bu kun du skyes par gyur pa ni ka ba ste 'jig rten me ni tshangs pa'i bu dang po'i'o zhes pa ni rang byung ba'i me de'i 'og tu pa ba ka zhes bya ba 'jig rten pa btso zhing sreg par byed pa'i me tshangs pa las byung ste/de yang tshangs pa'i bu de rnams kyi nang na dang po'i zhes pa'o/ /bra ma da na de yi bu/ /zhes pa ni bra ma da na zhes bya ba'i me de ni 'jig rten pa'i me pa ba ka zhes bya ba de'i bu'o/ /de yi yang ni b+ha ra ha/ /zhes bya ba ni b+ha mo da na zhes bya ba de'i bu pha ra de ba zhes bya ba'o zhes pa'o//de'i bu ni b+ha'i shwa na ra ha ba na dang / ha b+h+ya pa ha'o zhes pa ni b+he shwa na ra na dang / ha bya na zhes bya ba'i me de rnams ni b+ha ra da zhes bya ba de'i bu'o zhes pa'o/ /pa shwa ba sam+b+hi da ni/ a dur pa'i bu a ka ra'i rgya mtsho na gnas par grags zhes pa ni/ pa ra shwa sam+b+hi da zhes bya ba'i me ni a dar pa zhes bya ba'i me'i bu ste/de yang a ska ra zhes bya ba'i rgya mtsho na gnas par grags pa'o/ /rlung bya ba'i me yang ni mngal du 'jug pa la bshad pa'o zhes pa ni bram ze'i cho ga la mngal du 'jug par bya ba'i tshe sbyin sreg bya ba'i me ni rlung zhes bya ba'i zhes pa'o//de nas bu bkru ba la zhes bya ba/ pa ba ma na yang ni de bzhin no/ /zhes pa ni mngal du zhugs nas sbrum par gyur pa na bu de'i phyir khrus bya ba'i tshe sbyin sreg bya ba'i me ni pa ba ma na zhes bya'o zhes pa'o/ /mtshams kyi mtha' mar bkra shis zhes bya ba ni bu byung ba'i tshe sbyin sreg bya ba'i me ni bkra shis bya ba zhes pa'o//phrag la b+ho ni skyas pa'i las la'o zhes pa ni bu btsas zin pa'i 'og tu sbyin sreg bya ba'i me ni/ su g+ha b+hi zhes bya ba yi/ /zhes pa'o/ /ming la ni ba rti ba zhes pa ni bu'i ming dogs pa'i tshe sbyin sreg bya ba'i me ni ba rti ba zhes bya ba'o zhes pa'o/ /dkan 'bab pa la de bzhin gtsang ba'o zhes pa ni bu dkan 'bab pa'i tshe sbyin sreg bya ba'i me ni gtsang ma'o zhes bya ba'o//shad+b+hi zhes phud bu la'o zhes pa ni phud bu 'jog pa'i tshe sbyin sreg bya ba'i me ni shad b+hi zhes bya ba'o/ /brtul zhugs sbyin la kun 'byung ba'o/ /zhes pa ni bu lo brgyad lon nas bag ma blangs kyi bar du brtul zhugs 'dzin du zhugs pa'i tshe sbyin sreg bya ba'i me ni kun du 'byung ba zhes pa'o//phyugs sbyin pa nyi ma'o zhes bya ba ni bag ma len pa'i tshe sbyin sreg bya ba ni/ sbyin sreg bya ba'i me ni nyi ma zhes bya'o/ /bag ma len pa'i tshe sprod pa'o zhes pa ni bag ma len pa'i tshe bskor bar bya ba'i me ni sprod pa'i zhes bya ba'o zhes pa'o/ /khyim pa kha bsro ba zhes pa ni khyim pa kha bsro ba'i tshe/sbyin sreg bya ba'i me ni me zhes pa'o/ /me nyid kyang zhes pa ni ut+pal ni ka zhes pa ni a pa ni ka zhes bya ba'i cho ga la sbyin sreg bya ba'i me ni me nyid ces bya ba'o zhes pa'o/ /pa ba ka ni sna tshogs rnams me kun du bshad pa la'o zhes pa ni gza' skar la sogs pa'i lha sna tshogs pa la sbyin sreg bya ba'i me ni pa ba ka zhes bya ba zhes pa'o//tshangs pa'i me ni khyim bdag la'o zhes pa ni khyi ma bdag gi cho ga sbyin sreg bya ba'i tshe na tshangs pa'i me zhes bya ba'o/ /zhi ba'i me ni sbyin pa la'o zhes bya ba ni sbyin pa'i tshe sbyin sreg bya ba'i me zhes ba'o//gnyis su dak+Shi na zhes bya ba ni lho phyogs la yang bya ste/ tshangs pa'i me dang zhi ba'i me gnyis ni lho phyogs logs su bzhag nas rtag tu gso ba'i me zhes pa'o/ /a ba ni ka zhes bya ba'i me phyugs bcings pa la yang de bzhin no zhes pa ni phyugs gsad de lha la yon 'bul ba'i sbyin sreg bya ba'i me a ba ka ni ka zhes bya'o zhes pa'o//'gyod tshangs la yang dbyer bye ri/ /zhes smos pa la sogs par 'gyur te/ 'gyod nas myos pa de las tshangs bar bya ba'i sbyin sreg bya ba'i me ni be+e tsi zhes bya ba'o/ /btsos pa sbyin pa la ni sa ha sa zhes pa ni zas btsos pa sbyin pa'i cho ga sbyin sreg bya ba'i me ni sa ha sa zhes bya'o//ad+ya sa d+h+yan la ha b+hi ra zhes par bya zhes pa ni id di san+d+h+ya zhes bya ba'i cho ga ha bi zhes bya ba'i mer shes par bya'o/ /so b+ha saM s+t+ra la yang de bzhin no/ /zhes pa ni so saM sta zhes pa ni bya ba'i cho ga la bsreg pas min na ni de zhes bya ba'o zhes pa'o/ / gang sbyin pa smr-i Da zhes bya ba'o zhes pa ni sbyin sreg gi sngon rol du rdzas las gang ba'i sbyin sreg gsum bya ba'i me smr-i sta zhes bya ba'o zhes pa'o/ /zhi ba la da ru na ni thar zhes pa ni zhi ba'i sbyin sreg da ru na zhes bya ba'i me mthar ro zhes pa'o/ /bas mtha'i me gshin rje zhes pa ni me shi ba'i tshe sbyin sreg bya ba'i tshe me'i gshin rje zhes bya'o zhes pa'o//rgyas la stobs sbyin de bzhin no/ /zhes pa ni rgyas pa'i sbyin sreg gi me ni stobs sbyin pa'o zhes pa'o/ /mngon par spyad pa thams cad las khro bo'i me mngon du bsgrags pa zhes pa ni mngon par spyad pa'i sbyin sreg la ni khro bo'i me'o zhes pa'o//me ni 'dod skyes zhes bya ba la dbang gi don de la de bshad do zhes bya ba ni dbang du bya ba'i sbyin sreg la 'dod skyes zhes pa ni me de bshad do zhes pa'o/ /nags bsregs pa'i me ni pho nya'i me zhes pa ni/ gang nags sreg par byed pa'i me ni pho nya zhes bya'o zhes pa'o/ / khong pa'i me ni dza ti ta ra zhes pa ni khong nad pa kha zas la sogs pa 'ju bar byed pa'i me ni dza tir zhes bya'o/ /sha za ni b+hak+Sha yin zhes pa ni sha za'i me ni b+hak+Sha zhes bya'o zhes pa'o/ /rgya mtsho na ni b+ha da ba yi kha/ /zhes pa ni b+ha Da pa zhes bya ba'i me ni rgya mtsho na gnas pa'i zhes pa'o/ /'jig tshe 'byung ba'i zhes bya ba ni/dus mtha'i me zhes bsgrags pa'o/ /zhes pa ni bskal pa la sogs pas 'jig rten 'jig pa'i tshe me ni 'byung ba zhes bya ste de yang dus mtha'i me zhes bsgrags pa'o/ /'di rnams mdo ru smras pa ni/ dpa' bo khyod la me rnams te/ /sgra dang thos pa kun spyod pas//smras pa tshangs pa'i bu rnams te/ /bzhi bcu rtsa bzhi 'di rnams ni/ /nga yis de tshe bsgrags pa yin/ /zhes pa ni 'di rnams mdor ngas khyod la smras te/ nga 'ba' zhig gis bshad pa ma yin gyi smrang thos pas spyad pa rnams kyis kyang tshangs pa'i bu me 'di rnams bshad de tshangs pa nga la dris pa de'i tshe ngas me 'di rnams bstan to zhes pa'o//de la gang me ni nga rgyal can rang byung zhes pa nas par sha sam+b+hi do ni a thar pa ni'i bu ste/ puska ri'i rgya mtsho na bar grags pa zhes pa ni bar du me 'di rnams skyes pa'i rabs bstan pa'o/ /rlung zhes bya ba'i me yang ni/ / mngal du 'jug pa bshad pa'o/ /zhes pa nas/ 'dod skyes zhes pa'i me yang ni/ /dbang gi don la de bshad do/ /zhes pa'i bar du las rnams la me'i rgyus bstan pa'o/ /nags sreg pa ni pho nya'i me/ /zhes pa nas/ 'jig tshe kun 'byung zhes pa/ dus mtha'i me zhes kun du bsgrags/ / zhes pa'i bar du me rnams kyi ngang tshul las rgyus bstan pa ste de rnams bram ze la sogs pa 'jig rten pa'i gzhung las grags shing 'jig rten pa'i las byed pa'o/ /de la gsang ba'i bdag po me rnams kyi rang bzhin mi shes par gang sbyin sreg byed pa ni gang sbyin sreg byas pa yang ma yin no zhes pa ni me rnams kyi rgyus mi shes na cho ga dang 'gal bas sbyin sreg byas par mi chud do zhes pa'o//'dus byas pa yang ma yin no/ /zhes pa ni sbyin sreg gi cho ga 'jag ma bting ba la sogs pa'i 'dus byas pa rnams kyang byas par mi chud do zhes pa'o/ /las kyi 'bras bur yang mi 'gyur/ / zhes pa ni gang gi phyir sbyin sreg brtsams pa'i las de'i 'bras bur mi 'gyur ro zhes pa'o/ /rang byang chub tu mngon par sangs rgyas nas ni me rnam pa bcu gnyis smras so zhes pa ni bcom ldan 'das byang chub sems dpa'i spyad pa spyod pa na bram ze'i smrang las byung ba'i me gong du smos pa rnams bstan/mngon par sangs rgyas ni 'jig rten las 'das pa'i sbyin sreg la sogs pa bya ba'i phyir me rnam pa bcu gnyis po 'di smras so zhes pa'o/ /de yang gang zhe na zhes pa las ye shes rdzogs pa'i shes bya'i zhes pa'i bar du rgyas pa'i sbyin sreg gi me'i mtshan nyid gsungs pa ste/ye shes kyi me zhes pa ni ye shes kyi sems can yin pa'i phyir ro/ /'dzin zhes pa ni bya ba gnyis po de zhes bya ba nas/ bgrang phreng dang ni spyi blugs 'chang / /zhes pa'i bar du zhi ba'i sbyin sreg gi me'i mtshan nyid gsungs pa'o/ /gsum po de ni rlung zhes bya/ /kha dog gnag la snum med pa'o//zhes pa ni rlung zhes pa'i me de dang po zhugs ma thag tu me spar ba'i tshe gnyer ba'o/ /bzhi po dmar po zhes bya ste nang phan tshun 'od dang 'dra zhes pa ni dbang gi sbyin sreg gi me'o/ /lnga po mi ta zhes pa kham pa la bya ste/ skra can de bzhin te/ mgrin pa ring la mdangs po che/ /kun du rjes su brtse ba yin//zhes pa ni gang ba'i sbyin sreg bya ba'i me'o/ /drug po khro can zhes su bya/ /zhes pa nas/ mche ba bzhi ldan mthu tshe ba'o/ /zhes pa'i bar du mngon par spyad pa'i sbyin sreg gi me'i mtshan nyid du gsungs pa'o/ /bdun po lta ba zhes bya ba ste/ sdug pa'i kha dog kun dang ldan pa zhes bya ba nas/bcu gnyis smras byed pa zhes bya ba sems can kun gyi smras byed pa'o zhes pa'i bar du me lhag ma lnga po rnams kyi mtshan nyid nyi tshe smos pa'o/ /de ltar na gsang ba'i bdag po me'i gzugs su byin gyis brlabs te zhes pa la sogs pa ni me rnams bshad pa'i zhar la sbyin sreg bshad pa ni me'i gzugs su bdag byin gyis brlabs la zhes pa ni zhi ba dang rgyas pa gang yang rung ba'i me las byed pa de'i phyir kha dog gnyis kar bsgyur ro zhes pa ste/de bas na gsungs pa bdag dang rdzas kyang me'i rang bzhin du sbyar ro zhes pa'o/ /'di ni phyi rol sbyin sreg go/ /zhes pa ni de ltar bdag dang me dang rdzas gsum char du ldan pa de ni phyi rol gyi sbyin sreg go zhes pa'o//nang gi sbyin sreg kyang gsang ba'i bdag po rang bzhin gcig pa zhes pa ni stong pa nyid kyi rang bzhin gcig pu'o zhes pa ste gnas rnam gcig tu bsdu zhe na/ gsungs pa rnam pa gsum du ldan pa gnas gsum gcig tu bya ba'i sbyor ba ni nang gi sbyin sreg go zhes pa ste/bdag dang me dang rdzas gsum gcig tu ldan pa'i gnas gsum po de stong pa nyid kyi rang bzhin gcig tu bya'o zhes pa ste/ de yang 'og nas 'grel to/ /byams pa chen po dang snying rje chen po dang ldan pa de ni gsang ba'i bdag po zhi ba'o zhes pa ni zhi ba'i sbyin sreg bya ba la byams pa dang snying rje lhag par bskyed do zhes pa'o//dga' ba dang lhan cig tu ldan zhes pa rgyas pa'o zhes pa ni rgyas pa'i sbyin sreg la dga' ba lhag par bskyed do zhes pa'o/ /khros pa'i dbang du byas te zhes pa nas khro ba thul bas bya'o zhes pa'i bar du mngon par spyod pa'i sbyin sreg gsungs pa ste/khros par bya ba yang ldang bar bya ba dang bcas pa ma yin te/ de bas na gsungs pa khros pa thul bas bya'o zhes pa'o/ /rlung gi me ni zhabs su gzhag par bya'o zhes pa ni dang por zhugs thab tu me spar ba'i tshe rlung gi me gnyer nas rlung g.yab kyis me sbar bar bya'o zhes pa'o/ / de ltar na gsang ba'i bdag po ji ltar yongs su bsgrags pa'i gnas de dang de dag tu gang rigs pa dang ji ltar rigs par sbyin rigs par sbyin sreg bya'o zhes pa ni zhi ba dang rgyas pa la sogs pa'i gnas ji skad du gsungs pa de dag gar rigs par zhi ba la sogs pa'i sbyin sreg rnams bya'o zhes pa'o/ /de nas yang bcom ldan 'das la phyag na rdo rje byang chub sems dpas 'di skad ces gsol to zhes pa nas/ji ltar bsams pa bka' stsal du gsol zhes pa'i bar du gong du sbyin sreg mdor smras pa de zhugs thab ji ltar bya ba dang / me bsang ba'i phyir chus gtor ba ji ltar gtor ba dang zhugs thab kyi mtha' 'jag ma ji ltar gding ba dang zhugs thab tu me ji ltar gzhug pa zhus pa'o//de la gsang ba'i bdag po zhugs thab ni/ /kun du khru gang tsam la ni/ /kha khyer sor bzhi tsam pa ste/ /rdo rje'i mtshan gyis gdab pa'o/ /zhes pa ni/ ji ltar zhugs thab bsam par bgyi/ / zhes zhus pa'i lan te zhugs thab kho ra khor yug tu khru gang tsam la kha khyer yang chu zheng du bcas par sor bzhi par bya ste/ zhabs su rdo rje'i mtshan mas btab par bya'o zhes pa'o/ /'jag ma rlon pa gding bya ba/ /zhugs tha ba dag kyang bskor ba ste/ /rtse mo rtsa bas non par bya/ / rtsa ba rtse mo dkri bar bya/ /zhes pa ni/ 'jag ma ji ltar gding bar bgyi/ /zhes zhus pa'i lan te/ gtor ma 'di ru g.yas phyogs nas/ /'jag ma bskor ba bzhin du bshad/ /ces pa ni/ ji ltar me las gtor bar bgyi/ /zhes pa'i lan te me bsang ba'i phyir chus gtor ba yang 'jag ma bskor ba'i thabs su g.yas phyogs nas bskor zhing gdab bo zhes pa'o//dri dang me tog bdug pa dag /smr-i Da'i me la rab tu sbyin/ /zhes pa nas/ mkhas pas de la sbyin par bya/ /zhes pa'i bar du ji ltar bsams pa bka' stsal du gsol zhes zhus pa'i lan te zhugs thab der thog mar me tog cig bzhag ste/smr-i Da'i me gnyer ba la dri dang me tog la sogs pas mchod de/ de nas yang chus gtor la gang ba'i sbyin sreg lan gsum me de nyid kyi sngags kyis btab ste sbyin no zhes pa'o/ /de nas zhi ba'i sbyin sreg gam rgyas pa'i yang ni rnam par bya'o/ / 'di ni 'jig rten sbyin sreg ste phyi rol du bshad pa'o zhes pa ni ji skad du smos pa'i rim bzhin du zhugs thab kyi cho ga bya ba dang / smr-i Da'i me la gang ba'i sbyin sreg byin te me de rang gi gnas su bzhag la de las zhi ba'am rgyas pa'i me gang yang rung ba gnyer te/ zhi ba la sogs pa'i sbyin sreg gam ci 'dod pa bya ste/de ni zhugs thab dang me la sogs pa phyi rol gyi dngos po rnams la dmigs pas 'jig rten pa'i sbyin sreg ces gsungs pa'o/ /nang gi sbyin sreg ni zhes pa nas/ de'i nang gi sbyin sreg ces dpa' bo la bshad pa'o zhes pa'i bar du nang gi sbyin sreg bshad pa ste/de yang bdag nyid kyi lnga phung stong pa nyid du bshig ste/ phyi rol gyi zhugs thabs la sogs pa yul gyi gzugs rnams stong par bshad de/ de bzhin sgo drug gi sa rnam par shes pa 'phro ba rnams kyang so sor bshig nas/ mi 'phro bar bkag nas de ltar 'jig cing 'gog par byed pa'i byang chub kyi sems de yang mi 'phro ba'i shes rab kyis bkag pa rnam par mi rtog pa'i ting nge 'dzin la gnas par bya ba ni nang gi sbyin sreg ste/de bas na gsungs pa/ mi 'phro ba'i shes rab kyi rlung gis me gogs la yid me la bsregs shing bshigs te/ rlung gis me gogs la zhes pa ni srog dang rtsol bas rab tu bsdams pa la zhes pa'o/ /yid me la sregs shig ces pa ni sems mi g.yo bar sreg go zhes pa'o/ /de nas bcom ldan 'das kyis 'khor 'dus pa thams cad la bka' stsal ba/ bdag yod par spyad pas khyed kyis chos kyi gzhung 'di la spyad par bya'o zhes pa ni chos kyi gzhung 'di ni snod du ma gyur pa'i sems can rnams las gya tshom du mi sbyin par bya ste/de bas na gsungs pa dbang po yongs su ma rtogs par su la yang mi sbyin par nga'i bu rnams ma brtags pa la zhes pa ste/ nga'i bu rnams kyi mtshan nyid 'og nas ji skad du smos pa rnams la ni dbang po brtag mi dgos par sbyin gyis/de las gzhan pa rnams la chos kyi gzhung zab mo 'di shes rab dang ldan nam mi ldan pa dang / dbang po rnams 'dod chags la sogs pa'i yul rnams la 'phro ba yin nam ma yin brtags te shes par byas nas de la sogs pa'i skyon rnams med cing snod du gyur na gdod byin cig ces pa ste/blo chung zhing ma dad pa la zab cing rgya che ba'i chos bshad na byang chub sems dpa'i 'khrul pa'o zhes 'byung ba'i phyir ro/ /de nas de'i tshe kun gyis mchod de de bzhin gshegs pa la phyag byas nas zhes pa nas/ chos kyi mig 'di 'jig rten na yun ring kun du gnas pa'i phyir ro zhes pa'i bar du phyag na rdo rje la sogs pa'i 'khor de rnams kyis rnam par snang mdzad mngon par byang chub pa rnam par sprul pa'i byin gyi rlabs kyis chos kyi gzhung 'di 'jig rten gsum na mi nyams shing yun ring du gnas pa'i phyir/bcom ldan 'das la byin gyis brlab pa'i sngags kyis brlab par gsol ba ste/sngags kyis 'di byin gyis brlabs na chos kyi gzhung 'di bsrung bar 'gyur ba'i phyir ro/ /rnam par snang mdzad mngon par byang chub pa rnam par sprul pa'i byin gyi rlabs kyis rgyud chen po slob dpon sangs rgyas gsang bas phyin ci ma log par bshad pa rdzogs so// //