CLOSE WINDOW

D2544a
བོད་ཡིག

/bdag gis dge ba gang bsags pa/ /des ni khams gsum sems can kun/ /'jam mgon go 'phang thob par shog /slob dpon 'jam dpal bshes gnyen gyis mdzad pa rdzogs so/ /[{Da}]@##/ /rgya gar skad du/ Ar+ya many+dzu shrI nA ma sang+gI ti bi d+hi maN+Dal nA ma/ bod skad du/ 'phags pa 'jam dpal gyi mtshan yang dag par brjod pa'i dkyil 'khor gyi cho ga zhes bya ba/ 'jam dpal gzhon nur gyur pa la phyag 'tshal lo/ /bag chags skyon gyi dri ma'i tha ba la/ /shes rab bdud rtsi'i char pa 'bebs mdzad pa'i/ / a ra pa tsa na la gus btud de/ /byang sems rdo rje'i dkyil 'khor cho ga bshad/ de la 'dir dus gsum cha mnyam pa bcom ldan 'das byang sems rdo rje'i dkyil 'khor byed par 'dod pas/ bla ma gsang sngags la mkhas pa/ theg pa chen po'i tshul la gnas pas/ slob ma ji skad smras pa de bzhin byed pa ma smin pa smin par bya ba'i phyir ri bo la sogs pa dgon pa'i gnas su maN+Dal byas te/stan bde ba la 'dug ste mchod pa bshams nas/ bdag nyid drag po chen po drag shul che ba bdud la sogs pa 'jigs pa chen po yang 'jigs par byed par bsams la/ rdzu 'phrul chen po'i stobs dang ldan pas bgegs thams cad bskrad de/srid pa'i ri bo'i bgegs thams cad bcom la mkhregs shing rdo rje chen po'i ri bos bskor te/ rdzu 'phrul chen po'i lha tshogs su sprul te mchod pa chen po phul la bsam gtan chen po'i ting nge 'dzin la gnas nas/ nam mkha'i khams su yi ge'i phreng ba snang ba chen pos gsal bar byas la/mkhas pa byang sems rdo rje zhes bya ba'i sangs rgyas 'grub par bya ba'i dang po'i sbyor ba dang / de'i byin rlabs las dkyil 'khor gyi lha tshogs sprul pa zhes bya ba'i dkyil 'khor rgyal mchog dang / sgyu 'phrul chen po'i lha tshogs kyi don grub par bya ba'i phyir las rgyal mchog dang de rnams bsgom par bya'o//de ltar lha nye bar gyur nas dkyil 'khor byar rung ba'i sa'i cho ga dang / slob ma snod dang ldan pa la sdom pa phog la dkyil 'khor bris te rgyan rnams dgram ste/ lha dgod pa ni dbus su bcom ldan 'das byang sems rdo rje zhal gcig phyag gnyis pa/rdo rje dang dril bu can/ mdun du rdo rje sems dpa'/ g.yas su rdo rje rin chen/ nub tu rdo rje chos/ byang du rdo rje las rnams bri/ sgeg mo la sogs pa brgyad dang / /khyams rnams su bskal ba bzang po'i byang chub sems dpa' rnams dang / sgo rnams su rdo rje lcags kyu la sogs pa gzhag go//dkyil 'khor de la mchod pa rnams kyis yang dag par mchod la skal ba dang ldan pa'i slob ma bcug la de la dbang rnams bskur bar bya'o/ /rigs kyi bu de las yon gyi mchog blangs te lha dang slob dpon la mchod nas dkyil 'khor la bzod par gsol nas gshegs par bya'o//de'i rjes la dkyil 'khor bsdus la ci bde bar gnas par bya'o/ /byang sems rdo rje'i dkyil 'khor gyi/ /dge ba gang des 'gro ba kun/ /srid pa'i dgon po las brgal nas/ /rdo rje sems dpa' thob par shog /byang sems rdo rje dbugs dbyung ba'i dkyil 'khor gyi cho ga /