CLOSE WINDOW

D2543
བོད་ཡིག

@##/ /rgya gar skad du/ nA ma sang+gI ti A kA sha bi ma la nA ma/ bod skad du/ mtshan yang dag par brjod pa'i dkyil 'khor cho ga nam mkha' dri med ces bya ba/ 'jam dpal gzhon nur gyur pa la phyag 'tshal lo//dus gsum bde gshegs shes rab ngo bo can/ /ma rig mun nang sems can nyam thag la/ /ye shes nyi zer sbyin mdzad thugs rje'i bdag /'jam dpal de la btud de phyag 'tshal nas//sgyu 'phrul rgya chen nam mkha' lta bu nas/ /dbugs dbyung drug bsdus zab pa yang dag ni/ /dkyil 'khor cho ga dge ba 'di phyogs tsam/ /bsdus la mos pa'i don du bshad par bya//de la 'dir rdo rje slob dpon sdom pa dang ldan zhing dbang thob pa gzhan la phan pa'i blo can zhig gis/ nyon mongs pa rags pa'i gang zag la ma smin pa smin par bya ba'am/sems can thams cad bde ba la dgod par bya ba'i phyir/ sangs rgyas thams cad mnyes par bya ste/ gza' dang nyi ma dang skar ma bzang po la/ mkho ba'i yo byad ci 'byor pa bsogs la/nags tshal lam/ ri bo'am/ chu klung ngam/ tshang tshing la sogs pa nyams dga' ba'i gnas su gnas par byas la stan bde ba la 'dug ste/ rang gi sgo dag par byas nas mos pa'i slob ma ma rungs pa 'dul ba'i rgyal por gnas par bya ste/hUM gi mtshan ma las byung ba'i khro bo gshin rje gshed du skad cig gis bdag nyid gyur te/ sku mdog mthing nag ha la pa/ zhal brgya ljags 'dril zhing ha ha hi hi'i gad rgyangs phyogs bcur sgrogs pa/spyan mig dmar po rdo rje'i mig can/ lag pa brgya po kun bskyod mtshon cha sna tshogs bsnams pa/ gom pa'i stabs kyis gdug pa mnan pa/ thod pa dang sbrul dang stag lpags kyis brgyan pa/zhing chen dang glang chen gyi ko rlon gyon pa/ gshin rje gshed po bgegs thams cad kyi rgyal por bskyed la/ mig tu ma dang ka bkod de/ nyi ma dang zla ba'i dkyil gyi rdo rje sngon po mig 'bras su bsams la/khro bo'i sdang mig g.yon nas bskor bas bgegs thams cad skrag par bya'o/ /g.yas nas bskor bas rdo rje'i ra ba'o/ /'og tu bltas pas rdo rje'i sa gzhi'o/ /steng du bltas pas rdo rje'i gur du bya'o/ / de'i rjes la gnas der phyag dar dang skyong nul bya zhing / a ka ru nag pos kyang phyogs bcur bdugs la sa gzhi tsan+dan la sogs pa'i dris byugs te/ de'i dbus su maN+Dal khru gang pa gsum bya ste/ sa de la rin po che bdar zhing 'thas par byas la/ rdo rgyus kyis dkar por bya zhing 'o ma dang tsan+dan dang gur gum la sogs pa srog chags la gnod pa ma byas pa las byung ba'i dris byugs la/yi ge swA las byung ba'i rin po che bkram pa ni/ bla ma'i maN+Dal ri rab gling bzhis brgyan pa bkod la/ rang nyid dkon mchog gsum la rin po che sna bdun gyi me tog gi tshom bu dgod pa dang / yi dam lha'i maN+Dal gyi dkyil 'khor lha grangs dang mnyam pa'i me tog gi tshom bu bkod la/rang nyid yi dam lha'i nga rgyal gyi snying ga nas sa bon gyi 'od zer gyis gtsug tor 'khor los sgyur ba bkug la maN+Dal la bcug ste/ bzhugs pa'i rten dang / mkho ba'i yon du byin gyis brlab bo/ /de'i rjes la mchod pa lnga dang / yan lag gi mchod pa g.yas dang g.yon du bkram la/ gtsang zhing dag par bshams te/ tshul bzhin du byin gyis brlabs la gzhag par bya'o/ /de nas tshogs bsags pa'i yul dkyil 'khor gyi 'khor lo mdun du mngon par sprul te maN+Dal phul la mchod par bya'o/ /'jam dpal rdo rje la sogs pa//rgyal ba sras dang bcas pa la/ /lus dang ngag yid gus ldan nas/ /kun nas btud de phyag 'tshal lo/ /sangs rgyas zhing du gang bsngags dang / /'jig rten dag pa mchog gyur pa/ /rin chen me tog bdug spos sogs/ /kun nas sprul te mchod par bgyi/ /bdag gis sngon chad byas pa'i sdig /kun nas bsags par gang gyur la/ /rang bzhin med dang yod tshul gyis/ /rgyal ba kun gyi spyan sngar bshags/ /'gro ba gang gis bsod nams gang / /dman pa'i dge ba thams cad la/ /de bzhin mthun pa'i lhag sems kyis/ /dad pas rjes su yi rang ngo / /bde gshegs byang chub mchog bskyed nas//'gro ba thugs rjes gdul slad du/ /chos kyi 'khor lo bskor ba la/ /tshangs pa bzhin du gsol ba 'debs/ /yongs su mya ngan 'da' bzhed la/ /'gro kun yun du bde ba'i phyir/ /ji srid 'tsho ba de srid du/ /mya ngan mi 'da' bzhugs su gsol/ /ji srid 'khor ba gnas par du//bdag gi dge ba de bzhin du/ /kun nas zad par ma gyur par/ /sems can yongs su smin par shog /dkon mchog gsum la skyabs su mchi/ /sangs rgyas byang chub yid kyis gzung / /byang chub sems ni bskyed par bgyi/ /'gro la phan phyir sangs rgyas shog /ji ltar dus gsum mgon po rnams/ /byang chub tu ni nges mdzad pa'i/ /byang chub sems ni bla na med/ /dam pa bdag gis bskyed par bgyi/ /sangs rgyas rnal 'byor sdom pa la/ /sdom pa yi ni tshul khrims dang / /dge ba'i chos ni sdud pa dang / /sems can don byed tshul khrims gsum/ / bdag gis brtan por gzung bar bgyi/ /sangs rgyas rnal 'byor sdom pa la/ /sangs rgyas chos dang dge 'dun la/ /bla na med pa'i dkon mchog gsum/ /deng nas brtsams te gzung bar bgyi/ /rdo rje rigs mchog chen po la/ /rdo rje dril bu phyag rgya dang / /rdo rje slob dpon dam pa dag /yang dag nyid du gzung bar bgyi//rin chen rigs mchog chen po yi/ /dam tshig yid du 'ong ba la/ /nyin re bzhin du dus drug tu/ /sbyin pa rnams ni rab tu sbyin/ /pad+ma'i rigs mchog chen po la/ /sangs rgyas zhal nas gsungs pa la/ /phyi nang gsang ba'i theg pa gsum/ /dam pa'i chos kyang ci nus gzung / / las kyi rigs mchog chen po la/ /mchod pa'i las rnams bya ba dang / /sdom pa rgya mtsho ma lus pa/ /shin tu dam pa bdag gis gzung / /de ltar sdom pa ma lus pa/ /dam pa bdag gis gzung bgyis nas/ /byang chub mchog sems bskyed bgyis nas/ /sems can ma rig ldongs pa rnams/ /bdag gis yang dag dge la gzung //sems can nyon mongs bcings pa yi/ /ma grol ba rnams grol bar bgyi/ /sems can 'khor ba'i rgya mtsho las/ /ma bsgral ba rnams bsgral bar bgyi/ /sdug bsngal chen po'i nang sems can/ /dbugs ma phyung ba dbugs dbyung zhing / /'khor ba dag na gnas pa yi//sems can mya ngan 'das la dgod/ /dus 'di nas ni bzung nas su/ /byang chub snying po mchis kyi bar/ /'jam mgon 'bangs su bdag 'bul lags/ /thugs rjes yongs su gzung bar mdzod/ /dus 'di nas ni bzung nas su/ /bder gshegs khyed kyi bka' bzhin du/ /sems can don du bsgrub lags kyis//byin gyis brlab par mdzad du gsol/ /de ltar bsod nams kyi tshogs bsags pas/ /byams pa chen po dang / snying rje dang dga' ba dang / btang snyoms tshad med pa bzhi rjes su dran nas/ sems bskyed cing sdom pa bzung nas/ da ni ye shes kyi tshogs yongs su dag pa'i ting nge 'dzin bsgom pa stong pa nyid la blo gtad la/de sgrub par byed pa'i tshig 'di brjod de sgra'i don la mos par bya'o/ /rnam par mi rtog dbyings mi zad/ /yang dag bdag med de bzhin nyid/ /yang dag mtha' la yi ge med/ /chos dbyings dam pa zad mi shes/ /oM ma hA shU n+ya tA dz+nyA na badzra swa b+hA ba At+ma kou0f85haM/zhes brjod pas phyi nang gis bsdus pa'i chos thams cad stong zhing bdag med par gyur te/ ye shes kyis sbyangs nas/ chos thams cad nam mkha'i dkyil lta bur rang gi sems kyi snang ba shar ba las A li dang / kA li'i phreng ba bsams la/ A li las ni pad+ma dkar po'i steng / kA li las chos kyi 'byung gnas nam mkha'i mtha' dang mnyam pa/de'i tha ma 'od zer gyi phreng ba lngas bskor ba'i nang du 'od zer gyi phreng ba lnga 'phros shing 'dus pa las/ 'od ljang gu las rlung gi dkyil 'khor rdo rje rgya gram gyis mtshan pa/ 'od dmar po las me'i dkyil 'khor pad+ma dmar pos mtshan pa/ 'od dkar po las chu'i dkyil 'khor rin po ches mtshan pa/'od ser po las gser gyi sa gzhi 'khor los mtshan pa/ 'od sngon po las ri rab rdo rjes mtshan pa/ de yang shar shel/ lho baiDUR+Ya/ nub pad+ma rA ga /byang gser rdo rjes mtshan pa'o/ /de'i steng du 'od zer gyi phreng ba lnga ka ril gyis 'dus pa las/ lha'i gzhal yas khang gru bzhi pa la sgo bzhi pa sgo khyud rin po che'i pa tras mdzes par brgyan pa/phyi rol na mu tig gi za ra tshags dang dril bu g.yer kha grwa bzhi nas 'phyang ba/ rin po che sna tshogs kyi chun 'phyang kyang rta babs kyi ka ba la 'phyang ba/ rta babs kyang twa ra Na la sogs pas brgyan cing / ri dgas dang chos kyi 'khor lo dang /'phan dang rgyal mtshan dang / gdugs dang rin po che 'od du 'bar ba'i tog gis mdzes par byas te/ gzhal yas khang gi nang du seng ge dang glang po che dang / rta mchog dang / rma bya dang / nam mkha' lding gi steng du pad+ma dang zla ba dang / nyi ma'i gdan mdzes par bkram pa dang /'khor rnams kyang go rims su pad+ma dang / zla ba'i gdan bkram par bsams la/ dkyil 'khor gyi dbus kyi gdan thog tu rang gi sems kyi cho 'phrul las A li kA li'i phreng ba byung ba las/ de'i spro bsdu'i byin rlabs las zla ba dang nyi ma la de dang des mtshan par gyur/ de'i nang du a las byung ba'i rdo rje dkar po as mtshan par gyur/de rnams spro zhing bsdus nas 'od 'bar ba las/ bcom ldan 'das rnam par snang mdzad chen po zhal bzhi pa zhal dang po shar du gzigs pa/ gnyis pa lho/ gsum pa nub/ bzhi pa byang ngo / /phyogs bzhi ka na phyag gnyis gnyis pa/ byang chub mchog gi phyag rgya'i steng na rdo rje dkar po rtse lnga pa skyes pa/rgyan thams cad kyis brgyan pa/ de'i thugs kar yi ge d+hIHlas/ dang po'i sangs rgyas zhal lnga pa/ phyag brgyad pa/ g.yas bzhin shes rab kyi ral gri /g.yon bzhin shes rab kyi pha rol tu phyin pa'i po ti yod pa/ zhal bzhi phyogs dang mthun pa/dbus dmar ser ro/ /de'i thugs kar shes rab kyi 'khor lo rtsibs drug pa la/ gsang sngags rgyal po drug gis mtshan pa/ de'i dkyil du 'jam dpal ye shes sems dpa' zhal drug phyag gnyis pa/ g.yas ral gri g.yon po ti 'dzin pa/ de'i steng du zla ba dang / a bsgom par bya'o//de ltar na de ni sbyor ba dang po'i ting nge 'dzin to/ /de nas dkyil 'khor gyi 'khor lo drug bskyed par 'dod pas/ de bzhin gshegs pa thams cad sgrub par byed pa'i sngags kyi phreng ba 'di a las spro bar bya'o/ /a A i I u U e ai o au aM aH s+thi to hraM di dz+ny+'a na mUR+ti ra haM/ bud+d+ho bud+d+h+'a nAM/ t+r+ya d+h+wa brtI nAM/ oM badzra tI k+Sh+Na ya te na maH oM duH kha ts+tshe da ya te na maH oM pradz+nyA dz+nyA na mUR+ha ye ya te na maH/ oM dz+nyA na kA yA ya te na maH oM wA gI shwa rA ya te na maH/ oM a ra pa tsa nA ya te na maH/ oM sarba d+ha r+m+ma a b+hA ba/ swa b+hA wa bi shud+d+ha/ tsak+Shu badzra/ a A aM aH pra kr-i ti/ pa ri shud+d+ha/ sarba d+ha r+m+mA ya du ta/sarba ta thA ga ta/ dz+nyA na kA ya/ many+dzu shrI/ pa ri shud+d+hi tA/ mu pA dA ye ta/ oM a AH/ sarba ta thA ga tA hr-id ya/ ha ra ha ra/ oM hUM hrIH b+ha ga wAn dz+nyA na mU r+t+ti/ wA gI shwa ra/ ma hA bA tsa/ sarba d+ha rma ga ga na/ a ma la su pa ri shud+d+ha/ d+ha r+m+ma d+hA tu dz+nyA na gar+b+ha AH zhes brjod pas yi ge'i phreng ba de rnams 'od zer dang bcas nas dkyil 'khor gyi sgo bzhi nas phar 'phros pas/rab tu dga' ba la sogs pa'i zhing khams su sangs rgyas mchod nas/ slar 'od zer du 'dus te dkyil 'khor gyi sgo nas tshur 'dus pa las/ gdan rnams kyis seng du yi ge a 'ba' zhig tu gyur pa de gnas pa las/ de rnams las byung ba'i sangs rgyas 'di lta ste/shar phyogs kyi gling gi nyi ma la sangs rgyas mi bskyod pa sngon po zhal gcig phyag gnyis pa/ sa gnon gyis rdo rje rtse lnga pa 'dzin pa rgyan thams cad kyis brgyan pa'o/ /mdun du rdo rje sems dpa' dkar po g.yas rdo rje thugs kar bstod pa/ g.yon dril bu dku la gtad pa'o//g.yas ngos su rdo rje rgyal po mdog ser po tho ba thogs pa'o/ /rgyab tu rdo rje chags pa dmar po mda' 'gengs pa'o/ /g.yon du rdo rje legs pa ljang gu rdo rje 'dzin pa/ se gol gyis legs pa ster ba'o/ /lho phyogs kyi gling gi nyi ma la/ sangs rgyas rin chen 'byung ldan ser po zhal gcig phyag gnyis pa/mchog sbyin rin po che bsnams pa/ rgyan thams cad kyis brgyan pa'o/ /mdun du rdo rje rin chen ser po g.yas rin po che rdo rje dpral bar bstod pa g.yon dril bu dkur bsten pa'o/ /g.yas su rdo rje nyi ma sngon po nyi ma 'dzin pa'o/ /rgyab tu rdo rje dbang po dmar po rgyal mtshan bsnams pa'o//g.yon du rdo rje bzhad pa dkar po so shing gi phreng ba thogs pa'o/ /nub phyogs kyi gling gi nyi ma la sangs rgyas snang ba mtha' yas dmar po zhal gcig phyag gnyis pa/ mnyam gzhag gi thog na pad+ma dmar po 'dzin pa rgyan thams cad kyis brgyan pa'o/ /mdun du rdo rje chos dmar po pad+ma'i sdong bu snying gar kha bye ba 'dzin pa'o//g.yas su rdo rje rnon po sngon po ral gri thogs pa'o/ /rgyab tu rdo rje rgyu ser po 'khor lo can no/ /g.yon du rdo rje smra ba sngon po lce thogs pa'o/ /byang phyogs kyi gling gi ni ma la sangs rgyas don yod grub pa ljang gu zhal gcig phyag gnyis pa skyabs sbyin mdzad cing rgya gram can rgyan thams cad kyis brgyan pa'o//mdun du rdo rje las ljang gu sna tshogs rdo rje dang dril bu thogs pa'o/ /g.yas su rdo rje srung ba ser po rdo rje'i khrab thogs pa'o/ /rgyab tu rdo rje gnod sbyin nag po mche ba thogs pa'o/ /g.yon du rdo rje khu tshur ser po rdo rje thogs pa'o//de nas gtso bo'i dkyil 'khor gyi mtshams bzhi nas rdo rje sems dpa' dang / rin chen sems dpa' dang / pad+ma sems dpa' dang / las kyi sems dpa' dang / rigs bzhi'i sems dpa' bsgom mo/ /de'i phyi rol mtshams bzhin sgeg mo dkar mo rdo rje nyi ma 'dzin pa dang /phreng ba ma ser mo rin po che'i phreng ba 'dzin pa dang / glu ma sngon mo pi bang 'dzin pa dang / gar ma ljang gu rdo rje rtse gsum 'dzin pa dang / de rnams shar lho nas brtsams te bsgom mo/ /gru chad bzhi la spos me ma dkar mo spos phor thogs pa dang / me tog mthing ga me tog 'dzin pa dang / mar me ma dmar mo mar me thogs pa dang / dri chab ma ljang gu dri'i lde gu thogs pa dang / de rnams kyang shar lho mtshams nas rim bzhin no/ /de'i phyi rol gyi khyams rnams su byams pa dang / mthong ba don yod dang / ngan song kun 'dren dang / mya ngan kun 'joms rnams mdog dkar po rdo rje thogs pa rnams ni shar du'o//spos kyi blo gros dang / dpa' bar 'gro ba dang / nam mkha' mdzod dang / ye shes tog dang / de rnams mdog ser po rin po che'i snye ma thogs pa rnams ni lho ru'o/ /'od dpag med dang zla ba'i 'od dang / bzang skyong dang / dra ba can gyi 'od rnams mdog dmar po pad+ma'i sdong bu thogs pa rnams ni nub tu'o//rdo rje snying po dang blo gros mi zad pa dang / spobs pa brtsegs pa dang / kun du bzang po rnams mdog ljang gu rgya gram thogs pa rnams ni byang du'o/ /byang chub sems dpa'i de rnams kyang zhal gcig phyag gnyis pa rgyan thams cad kyis brgyan pa'o//shar gyi sgor ni rdo rje lcags kyu sngon po lcags kyu thogs pa'o/ /lho'i sgor ni rdo rje zhags pa ser po zhags pa thogs pa'o/ /nub kyi sgor ni rdo rje lcags sgrog dmar po lcags sgrog thogs pa'o/ /byang gi sgor ni rdo rje 'bebs pa ljang nag dril bu thogs pa'o/ /sgo ba de rnams kyang cung zad khro ba/zhal mche ba lhag ge brgyan thams cad kyis brgyan pa'o/ /de ltar dkyil 'khor drug pa kun du bsgoms pa la mchod pa'i lha mo dang bskal bzang cha mthun pa'i 'khor la dbus kyi rnam snang chen po'i dkyil 'khor la rnam snang dang byang chub sems dpa' rdo rje zhes pa gnas pa'i tshul lo//de ltar dkyil 'khor bskyed la ye shes kyi dkyil 'khor gyi lha tshogs bar snang la bsdus pa spyan drang bar bya ste/ oM a AHsarba ta thA ga tA hr-i da ya/ ha ra ha ra/ oM hUM hrIH b+ha ga wAn dz+nyA na mUr+t+ti bA gI shwa ra/ ma hA pA tsa sarba d+ha r+m+ma ga ga na a ma la su pa ri shud+d+ha/ d+ha r+m+ma d+hA tu dz+nyA na gar+b+ha AH maN+Da la/badzra sa ma ya dzaH/ zhes lan gsum brjod cing / sngags mjug badzra dr-i sh+ya zhes bya bas ye shes kyi dkyil 'khor legs par blta bar bya'o/ /de'i rjes la phyag btsal te/ sgeg mo la sogs pa brgyad kyis mchod de/ yid kyis sgo phye la dzaHhUM baM hoH zhes brjod cing sgo bzhi nas tshur spyan drangs la bgegs bskrad cing yid kyis sgo bcad la/rdo rje'i go chas bsrung la lha so so la bstims te dbang bskur ba thob par bya ba'i phyir/ rigs kyi yum bzhi nam mkha' la bsdu bar bya'o/ /ye shes kyi bdud rtsis dbang bskur te dbang rtags spyi bor mtshan pa bsgom par bya'o//de nas phyag rgya bzhis rgyas gdab pa ni shar du brtan par bsgoms la bdag nyid lus gnyis kyi tshul du bzung ste/ lha snam la gnas te rdzas mchod pa lnga phul la sgeg mo la sogs pa brgyad kyis mchod de/ rdo rje sems dpa' bsdus pa na/ rdo rje rin chen bla na med/ / rdo rje chos kyi glu blangs pa/ /rdo rje las kun mdzad pa'o/ /oM badzra satwa su saM gra ha zhes bya ba la sogs pa'i sngags dang gar dang glu dang bcas pas dbul lo/ /byang chub yan lag me tog spos/ /mar me snang ba byug pa dri/ /bde bar gshegs pa rnams la dbul/ /ci bde bar ni bzhes su gsol//oM badzra d+hU pe d+hu/ oM badzra puSh+pe pu/ oM badzra A lo ke AHoM badzra gan+d+he gan zhes pas mchod do/ /gzhan yang gsang ba'i yum bzhis mchod de/ mchod pa chen po 'dod chags che/ /sems can thams cad dga' bar byed/ /mchod pa chen po zhe sdang che/ /nyon mongs kun gyi dgra che ba//mchod pa chen po khro ba che/ /khro ba chen po dgra che ba/ /mchod pa chen po chags pa che/ /chags pa thams cad sel bar byed/ /'dod pa chen po bde ba che/ /dga' ba chen po mgu ba che/ /satwa badzra hUM/ rat+Nabadzra hUM/ d+har+m+ma badzra hUM/ karma badzra hUM/ zhes mchod la bstod de/mchog sbyin rdo rje mchog khyod 'dud/ /ces pa nas/ ye shes sku nyid khyod la 'dud/ /ces pa'i bar gyis bstod pa'i rgyal po des bstod la/ /shes rab kyi 'khor lo la sems gtad pa'i yid kyis gsang sngags rgyal po 'di drug bzlas par bya'o/ oM badzra tI kaSh+Na duH khats+tshe da pradz+nyA dz+nyAn mUr+t+ta ye/ dz+nyA na kA ya/ wA gI shwa ra a ra pa tsa nA ya te na maH zhes bzlas par bya'o/ /de ltar lha bskyed cing gsol ba btab la gnas pa de dkyil 'khor rgyal ba mchog ces bya ba'i ting nge 'dzin to/ /da ni de bzhin gshegs pa thams cad kyi mtshan yang dag par brjod pa gdon par bya ste/dkyil 'khor gyi lha la bstod la 'gro ba'i don du phrin las la sbyar te/ dkyil 'khor chen po drug 'jig rten du spro ste phyogs bcur sprul pa sna tshogs bskyed nas nyon mongs pa drug sbyangs 'gro ba drug dbugs phyung dkyil 'khor drug gis 'gro ba'i don mdzad nas slar snga ma nyid la bsdu zhing spros nas 'gro ba'i don bya'o//de tsam gyis ni las rgyal po mchog ces bya ba'i ting nge 'dzin to/ /de lta bu'i cho ga rdzogs nas mchod cing bstod de lhag pa dang ma tshang ba bshags nas dam tshig gi 'khor lo bsdu zhing chos thams cad stong pa nyid du rgyas gdab cing bde ba'i spyod pa bya'o//de lta bu'i sbyor bas mtshan ma brtan po byung ba de srid kyi bar du bya ste/ de yang sems rtse gcig tu bsgom zhing zlos pa de la ni dus gsum gyi sangs rgyas dang byang chub sems dpa' thams cad 'dus te gshegs nas chos kyi sgo thams cad ston par mdzad de sku yang ston to zhes gsungs pas/zhal mthong ba'am rmi lam du lung bstan pa la sogs pa ma byung gi bar du bde bar gshegs pa rnams bsnyen pa ni bsnyen pa'i cho ga'o/ /de ltar bsnyen pa'i sgo nas dkyil 'khor gyi lha la gnang ba thob nas gzhan gyi don du dkyil 'khor chen pa'i cho ga byed par 'dod pas/ri dang chu klung dang nags tshal la sogs pa'i gnas su slob dpon la slob mas dkyil 'khor 'dri ba'i don du gsol ba gdab par bya'o/ /de nas dkyil 'khor bya ba'i go skabs phye ste/ dang po sa'i cho gar yang de bzhin du mnyam pa yin na dbus mtho byang shar gzhol te dma' ba/sa gzhi 'jam pa nyams dga' ba'i gnas su ngam grog dang bya skyibs dang / bong ba la sogs pa med pa 'jam zhing lhun stug pa der dkyil 'khor brtsig pa'am bri ba'i don du sa'i bdag po la gnang ba thob par byas la/ sa'i lha mo la gtor ma phul la/dngos grub rab 'bring thob pas brkos nas ltas brtags la mi shis pa yin na bar chad byung bas dor bar bya'o/ /shis pa yin na de'i phyogs thams cad byi dor bya ste spos chus chag chag btab la shin tu ba lang gi lci bas byugs la 'thas par bcags te mnyam par me long gi ngos ltar byas la rdo rje rtse lnga pa'i phyag rgyas sa la gtugs te/oM badzra me di nI badzrI b+ha ba ma hA badzra hUM/ zhes pas rdo rje'i sa gzhir byin gyis brlab po/ /de'i phyogs kun kyang a ga ru nag po gtul zhing du bas bdug go/ /de ltar na lhag par gnas pa'i yan lag sa'i cho ga bstan to//de nas dkyil 'khor brtsigs la/ bsrung ba'i 'khor lo sngon du 'gro bas tshogs bsags la/ ting nge 'dzin gyis rnam par bsgoms te/ mchod pa rgyas par phul nas bzlas pa bya ste/ mchod pa'am bstod pa'i rgyal pos bstod la/ de nas mdun du maN+Dal bya ste/ me tog bkram nas sa'i lha mo la mchod yon sngon du 'gro ba'i mchod pa bshams te gtor ma yang bshams dam tshig gi phyag rgya bstan te/ 'di skad bsgo'o/ /skyob pa sangs rgyas thams cad kyi/ /spyod pa'i tshul dang khyad par gyi/ /sa dang pha rol phyin pa la//lha mo khyod ni dpang du gyur/ /ji ltar shAkya seng ge yis/ /bdud kyi sde rnams bcom pa ltar/ /de bzhin bdag gis bdud kyi sde/ /pham par byas te dkyil 'khor 'dri/ zhes brjod de/ mchod yon sngon du 'gro ba'i mchod pa lnga dang gtor ma phul la ye shes pa gshegs su gsol lo//de nas sgrub pa'i grogs pos bstod pa'i rgyal bos bstod la/ slob dpon gyis phur bu bcu gshin rje gshed du bskyed la/ dar gyi cod pan gyis dbang bskur la oM badzra kI li kI la hUM phaT ces gzi brjid bskyed la gzhag go/ /de'i rjes la dkyil 'khor gyi lha rnams rang gi snying gar bcug la langs te/rdo rje gsor shing dril bu dkrol la 'di skad ces bsgo'o/ /hUM ye shes zhi ba'i ngang las ma g.yos kyang / /sku yi cha byad za byed rngam pa'i stabs/ /gsung gi nga ro 'brug stong ldir ba yis/ /khams gsum dbang du sdud la phyag 'tshal lo//hUM bskal ba'i me ltar 'bar ba'i dkyil 'khor nas/ /khro bo'i rgyal po brkyang bskum tshul du bzhugs/ /nyi zla 'bar ba'i spyan gyi sdang mig gis/ /bgegs kun sreg par mdzad la phyag 'tshal bstod/ /hUM rang bzhin rnam dag dbyings las thugs rje chen por sprul//skye med ngang las 'jigs byed chen po'i skur bstan te/ /gdug pa 'dul phyir thugs dam mi 'gyur zhing / khro rgyal gshin rje gshed la phyag 'tshal bstod/ /hUM dkyil 'khor chen po'i sa gzhi la gnas pa'i/ /lha la sogs pa'i bgegs tshogs kun nyon cig /gnas 'dir bde gshegs dkyil 'khor pho brang bri/ /bgegs kyi rigs tshogs gang yin byer bar gyis/ /gal te nga yis bsgo ba las 'das nas/ /ye shes can gyi rdo rje rab 'bar bas/ /mgo bo tshal pa brgyar ni 'gas 'gyur zhing / /rnam par 'jig par 'gyur bar gdon mi za//he sa phyogs bgegs gnas che ge mo 'di ru/ bdag rdo rje slob dpon che ge mo zhes bya bas/ slob ma che ge mo zhes bya ba rdzogs pa'i byang chub thob par bya ba'i phyir dang / sems can thams cad bde ba la dgod par bya ba'i phyir nam mkha' dri ma med pa'i dkyil 'khor chen po'i rigs thams cad bsdus pa zhig bdag gis bri bas/dus de ring bgegs kyi tshogs su gyur pa lha'i gdon dang klu'i gdon dang / lha ma yin gyi gdon dang / gnod sbyin dang / nam mkha' lding rgan po dang rgan mo la sogs pa thams cad dengs shig /byer shig song shig /gang mi 'gro ba de ni rdo rje ye shes rab tu 'bar ba 'dis/ mgo bo tshal pa brgyar 'gas par gyur ta re/ rdo rje hUM ste hUM hUM hUM zhes pa dang / hrIHSh+T+rIH /bi kr-i tA na na sarba bi g+h+naM uts+tsha TA ya hUM phaT ces bgegs bskrad do/ /spyan mig bskal pa'i me ltar 'bar ba'i 'od zer gyis kyang bsreg par bya'o//khro bo'i stangs stabs gom pa'i stabs kyis gar byed pas kyang bgegs bskrad par bya'o/ /de bzhin du rdo rje 'gros kyis dkyil 'khor gyi mtha' ma lan gsum bskor bar bya'o/ /de nas rdo rje'i sa gzhi dang / ra ba dang gur dang /dra ba rnams byas la phur bus btab la gzhag go/ /de nas tsan+dan dang ba'i rnam lngas dkyil 'khor byugs la/ lha rnams kyi rten dri'i thig le dang / me tog gi tshom bu rnams bkod la/ /rnam snang gi nga rgyal dang ldan pa'i snying ga nas dkyil 'khor bton la mdun du dgod par bya'o//de rnams la ye shes sems dpa' spyan drangs la mchod pa dang / sgeg mo la sogs pa brgyad kyis mchod la gzhug par bya'o/ /de nas dbang bskur ba'i phyir lha mo bzhis bsdus la dbang bskur te/ rgyas btab la mchod pa byas te/ bsgom bzlas brtsam mo/ / de ltar rdzogs pa dang mchod pa dang bstod pa rgyas par byas la/ snyan gsan dbab pa ni/ rnam par snang mdzad bcom ldan 'das/ rig sngags rgyal la phyag 'tshal lo/ /slob ma rnams la brtse ba dang / /khyed rnams la yang mchod pa'i phyir/ /rdo rje can dag 'di zhes pas/ nang par dkyil 'khor bzang po'i mtshan/ /'di zhes bya ba bri lags na/ /rjes su brtse bas nyer dgongs nas/ /kun gyis byin gyis brlab tu gsol/ /lha lhag par gnas pa'o/ /de nas bum pa bzang po nag nog med pa'i tshul dang mthun pa lha grangs dang mnyam pa'am/ yang na bum pa bdun gu gul gyis bdug cing / bgegs bskrad cing bsangs te/ dri'i thig le dang mtshan ma bkod la/ /rin po che lnga dang / sman lnga dang / 'bru lnga dang / snying po lnga dang / spos lnga dang / ba dmar ser gyi 'o ma dang / srog chags med pa'i chus bkang la/ras kha tshar ma nyams pas mgul bcings te/ 'bras bu can gyi shing gis kha brgyan la bzhag ste/ nang du lha thams cad bskyed pa dang / las thams cad par gshin rje gshed po bskyed cing ye shes sems dpa' spyan drangs la/ mchod cing dbang bskur la phreng sngags dang /gsang sngags rgyal po drug bzlas la gzhag go/ /bum pa lhag par gnas pa'o/ /de nas sgrub pa po'i g.yas ngos su gzhung dang mthun pa'i thab khung byas la/ las dang mthun pa'i shing dang rdzas bsags te/me lha sngon du mchod la de'i snying gar dkyil 'khor gyi lha rnams spyan drangs mchod rdzas phul la thun mong du mchod nas/ dkyil 'khor gyi lha rnams sngar gyi gnas su gshegs te/ brtan par byas la/ sngar me lha la rdzas lhag mas mchod la/'dod pa'i don gsol ba btab nas me lha gshegs su gsol bar bya'o/ /de nas ci 'byor pa'i gtor mas chos skyong rnams la tshim par byas la/ 'dod pa'i don la phrin las bcol la slar gnas su btang ngo / /gtor ma dang sbyin sreg lhag par gnas pa'o/ / de nas snod du rung ba'i slob mas maN+Dal byas la/ me tog bkram nas me tog gis snyim pa bkang nas/ slob dpon la gsol ba gdab par bya ste/ dga' chen khyod bdag ston pa bas/ /slob dpon khyod ni dgongs su gsol/ /byang chub chen po'i tshul bstan pa/ /mgon po chen po bdag 'tshal lo//dam tshig de ni stsal du gsol/ /byang chub sems kyang bdag la stsol/ /sangs rgyas chos dang dge 'dun te/ /skyabs gsum dag kyang bdag la stsol/ /thar pa chen po'i grong khyer du/ /mgon po bdag ni 'jug par 'tshal/ /zhes brjod do//slob dpon gyis de la 'di skad ces bsgo ste/ 'das pa'i sangs rgyas thams cad dang / /de bzhin gang du ma byon dang / /da ltar bzhugs pa'i bde gshegs rnams/ /de dag kun gyis gsang sngags kyi/ /cho ga bzang po 'di mkhyen nas/ /dpa' bo byang chub shing drung du//thams cad mkhyen pa tshad med nyid/ /gsang sngags spyod pa bla med de/ /skyob pa rnam par snang mdzad kyis/ /bdud sde shin tu mi bzad pa/ /dpung chen dag kyang de yis bcom/ /de bas kun mkhyen thob bya'i phyir/ /bu yis blo gros 'di gyis shig / ces brjod do/ /de nas phyag 'tshal ba dang / sdig pa bshags pa kun bya ba dang / sems bskyed cing sdom pa srung du bcug la/ yi dam gang 'dod lhar bskyed byin gyis brlabs te mchod pa lngas mchod la/ /so shing dor ba dang / srung skud bcing ba dang / byams pa'i go cha bskon la/dbu'i gtsug tor bskyed de/ rmi lam brtag pa'i phyir ku sha byin la/ /zab cing rgya che ba'i chos bshad la/ /slob dpon gyi las rnams rdzogs par bya'o/ /slob ma lhag par gnas pa'o/ /de nas dkyil 'khor bsdus te/ go bskon la bsrungs te ci bder gnas par bya'o//de nas nang par nyi ma 'char khar rdul tshon gyi dkyil 'khor byed par 'dod pas/ ba'i rnam lngas dkyil 'khor byugs te/ tsan+dan gyi lde gu dri dang ldan par byas la/ thig skud sar pa nyis 'gyur tshad sgo'i nyi shu cha kha dog lnga pa rin po che'i snod du bcug la/ byin gyis brlabs la mchod la/sna slob ma'i lag tu gtad la bsgril nas/ 'jig rten khams 'di ma lus pa'i/ /sangs rgyas la sogs 'gro mgon gyi/ /khyed kyi dus ni 'di lags kyis/ /bcom ldan rdo rje'i thig gdab gsol/ /zhes brjod la/ /bdag dang slob ma g.yas nas bskor bas thig gdab par bya'o//tshangs thig dang po shar nas nub tu gdab/ gnyis pa byang nas lho ru gdab/ slob dpon me lhar gnas slob ma dbang ldan du gnas te/ shar gyi thig dang de bzhin du logs gsum du gdab/ de rjes tshangs thig dang / zur thig dang thig chen dang /thig phran gyi bye brag man ngag ji lta ba bzhin du dkyil 'khor gyi gling ngam lngar thig gdab po/ /de yang steng du ye shes kyi thig dang / 'og tu dam tshig gi thig ste/ sa thig rlan gyis spangs la tshul ji lta ba bzhin du mkhas pas dpyad la gdab par bya'o/ / de'i rjes la gser las byas pa'i rin po che lnga'i phye ma ji ltar byin gyis brlabs la/ mchod pa phul la bstims te/ tshon dgye ba ni dkar po chos kyi dbyings kyi ye shes te/ sngon po me long lta bu'i ye shes nyid/ /ser po so sor rtog pa'i ye shes la/ /dmar po mnyam pa nyid kyi ye shes nyid//ljang gu bya ba grub pa'i ye shes so/ /ye shes lnga ldan dkyil 'khor 'grub/ /ces brjod la/ sngon la slob dpon gyis byang shar mtshams kyi rtsig pa brtsigs la/ phyi nas slob mas bskor phyogs ma log pa'i ci bde bar tshon dgye bar bya'o//de la dang po gtso bo'i gnas rnams ni/ nyi ma'i 'od la zla bas brgyan pa'o/ /gzhan dag ni phyogs kyi kha dog go/ /'dod yon pad+ma rA ga'i sa gzhi/ rin chen pha gu gser las byas pa/ rin po che'i phreng ba bkye ba la/ dra ba dra phyed nam mkha'i mdog can mu tig gi ha ra 'phyang ba/ de'i phyi rol du nam mkha'i mdog la ka ba dang rta babs dang ri dgas dang / chos kyi 'khor lo dang / gdugs dang / rgyan rnams ci mdzes par bri bar bya'o/ /de dag gi rgyab tu rdo rje dang / me 'od kyi phreng ba bri bar bya'o/ /dkyil 'khor lnga'i bar bar ni/ gser gyi sa gzhi la rin po che gcal du bkram par bya'o//de'i phyi rol gru bzhir byas la grwa bzhi la dpag bsam gyi shing dang / bum pa bzang po mdzes pa bri bar bya'o/ /de ltar dkyil 'khor legs par bris zin nas/ lhag pa dang chad pa bskang ba'i phyir dril bu dkrol zhing yi ge brgya pa bzlas la/ tha ma lan gsum bskor bar bya'o/ /de nas dpal dang 'byor ba phun sum tshogs par byas la mchod pa'i bye brag me tog gi snod dang / spos phor dang dri'i snod dang mar me'i phreng ba dang / zhal zas kyi snod stong ngam brgya'am bcu la sogs pa ci 'byor ba dang / na bza' dang / gdugs dang rgyal mtshan la sogs pa ci 'byor ba bsags nas/ slob dpon dkyil 'khor gyi shar du stan bde ba la gnas te/ cod pan la sogs pa'i rgyan thams cad bsags te/ mchod pa byin gyis brlabs nas/ de bzhin gshegs pa'i sku'i phreng ba'i sngags kyis lhag par gnas pa'i dkyil 'khor snying ga nas sprul nas/rdul tshon gyi dkyil 'khor dang bsres nas tshogs bsags pa sngon du 'gro bas srung ba'i 'khor lo'i skabs su phur pa dang / mda' dang ral gri la sogs pa'i ra bas bskor te/ sngon du gsungs pa'i tshal du rgyas par bsgoms nas mchod de/bum pa yang bkod la dbang bskur zhing rgyas btab la/ rdzas kyi mchod pa lnga dang / phyi nang gi mchod pa lnga dang / gsang ba'i yum bzhis kyang legs par mchod la/ gzhan yang bsam gyis mi khyab pa'i rol mo'i bye brag thams cad kyang dbul bar bya ste/dbugs 'byin chen po dga' ston che/ /dga' chen rol mo chen po ste/ /bkur sti rim gro phun sum tshogs/ /mchog tu dga' ba grags pa'i dpal/ /bde bar gshegs pa rnams la dbul/ ci bde bar ni bzhes su gsol/ /de bzhin gshegs pa'i sku'i phreng sngags dang /oM dang hUM bzlas pa'am/ lha re re zhing re re dbul bar bya'o/ /bsam gtan chen po'i ting 'dzin gnas/ /shes rab chen po'i lus 'chang ba/ /stobs po che la thabs che ba/ /smon lam ye shes rgya mtsho 'di/ /bde bar gshegs pa rnams la dbul/ /bdug pa'i snod du ma dang /me tog gi snod du ma dang / byug pa'i snod du ma dang / mar me'i phreng ba bsam gyis mi khyab pas so so'i sngags dang / gar dang bcas pas dbul lo/ /yid bzhin nor bu chen po dang / /khyab bdag rin chen kun gyi bdag /dpag bsam shing chen rgyas pa dang /bum pa bzang po che ba'i mchog /bde bar gshegs pa rnams la dbul/ /ci bde bar ni bzhes su gsol/ /oM dang hUM bzlas te/ so so'i ming spel te/ oM rat+na ye hUM swA hA/ zhes bya ba la sogs pas rin po che dang nor bu'i bye brag mang po dang / dpag bsam gyi shing la sogs pa mang po dang /bum pa bzang po 'bras bu can gyi shing gis brgyan pa la sogs pa rin po che'i bye brag thams cad kyang lha re re zhing dbul lo/ /sman rnams ma lus ljon pa'i shing / /nad do cog gi dgra che ba/ /'gro ba'i sdug bsngal gzigs pa yi/ / zug rngu 'byin pa bla na med/ /bde bar gshegs pa rnams la dbul/ /'gro ba'i don du bzhes su gsol/ /oM hUM zhes zlos shing 'bras bu gsum dang / tsan+dan dang / gur gum dang / ga pur dang / dzA ti la sogs pa srog chags las ma byung ba'i sman ji snyed yod pa de rnams lha re re zhing so so'i ming dang spel la dbul bar bya'o//phyogs bcu nam mkha'i mthar thug pa'i/ /chos kyi rgyal mtshan btsugs pa dang / /khyab bdag chen po rin chen gdugs/ /sangs rgyas kun gyi gzi brjid 'di/ /bde bar gshegs pa rnams la dbul//'gro ba'i don du bzhes su gsol/ /zhes brjod cing / rgyal mtshan dang ba dan dang / 'phan dang gdugs la sogs pa ras sam 'phan gyi lnga ldi bsam gyis mi khyab pa lha re re zhing dbul lo/ /lag pa brgya po kun bskyod cing / /gom pa'i stabs kyis gar byed pa/ /dpal ldan lag pa brgyas gang la//nam mkha' khyab par gar byed pa/ /bde bar gshegs pa rnams la dbul/ /'gro ba'i don du bzhes su gsol/ /zhes brjod cing gar gyi rnam pa glog ltar bsgyur cing gzugs brgya stong du ma snyed du sprul la/ gar byed cing dkyil 'khor la dbul lo/ /de'i rjes la sbyin sreg gi cho gas mchod cing /mchod pas kyang lha tshogs mnyes par bya bar gsungs so/ /de nas dkyil 'khor la gnang ba thob pa'i slob dpon gyis slob ma dkyil 'khor du gzhug par bya ste/ sngar sdom pa blangs pa'i slob ma des slob dpon la gsol ba btab nas/ de nas slob ma de la bgegs bskrad nas/a ga ru nag pos bdug la/ oM badzra rak+Sha hUM/ zhes pa'i don bzlas pa'i stod g.yogs dang / oM badzra lak+Sha hUM zhes bzlas pas gdong pa bkab la/ sgo bzhi'i phyogs nas rigs lnga la phyag 'tshal du gzhug go/ /de'i rjes la lag na me tog thogs pa'i slob mas phyag 'tshal ba sngon du 'gro bas rgyun bshags bya'o//de nas slob dpon la gsol ba 'di skad gdab par bya'o/ /sangs rgyas kun gyi rang bzhin sku/ /slob dpon la ni bdag phyag 'tshal/ /bde bar gshegs pa'i grong khyer mchog/ /'jam dpal dkyil 'khor 'di ru ni/ /slob dpon bdag ni 'jug par 'tshal//zhes brjod par bya'o/ /slob dpon gyis 'di skad ces bya'o/ /bde bar gshegs pa thams cad kyi/ /gsang ba chen po'i rigs dag pas/ /gsang ba yongs su 'dzin pa ni/ /bdag nyid chen po khyod 'dod dam/ /des kyang 'tshal lo zhes brjod par bya'o/ /de la slob dpon gyis rigs lnga'i sdom pa rig pa'i dbang lnga'i rten du rung bar bya ba'i phyir phog la//gzhan yang mi dge ba bcu dang / nye ba'i las kyang spang ba'i sdom pa sbyin no/ /des kyang slob dpon gyis sdom pa gsungs pa ltar/ kho bo yang bsrung zhing sdom par bgyid do zhes khas blangs la/ de dang mthun par sngar gsungs pa ltar khas blang bar bya'o//de nas dbang bskur ba'i gsol ba slob mas gdab pa ni/ /rdo rje slob dpon blo gros che/ /sangs rgyas rnams ni bdag la dgongs/ /bdag ming 'di zhes bya bas ni/ /slob dpon dpang du gnas pa la/ /sangs rgyas rol mo las byung ba/ /mi ldog 'khor lo sbyin par ldan//thar pa chen po'i grong khyer mchog /dkyil 'khor chen por zhugs nas kyang / /sangs rgyas kun gyis dbang bskur te/ /skal ba chen po bdag la stsol/ /mtshan rnams kun gyis rgyas gdab cing / /dpe byad rnams dang yang dag ldan/ /sangs rgyas sku ni yid 'ong ba//slob dpon chen po bdag la stsol/ /zhes gsol ba gdab pa'o/ /slob dpon gyis kyang dkyil 'khor gyi lha la gsol ba gdab pa ni/ che ge zhes bya 'di nyid ni/ /byang chub sems ni yongs 'dzin cing / /dam tshig sdom dang gsang ba yi/ /dkyil 'khor 'dir yang 'jug par 'tshal//zhes brjod do/ /de nas lha la gnang ba thob pa dang / snying gar rdo rje bzhag la/ oM sarba yo ga bo d+hi ci t+ta ut+pA da yA mi/ su ra ta sa ma ya s+t+waM badzra sid+d+hi ya thA su khaM zhes snying gar zla ba rdo rje bsams la/ lag pa nas khrid de/ dzaHhUM baM hoHzhes bya bas sgo bzhi nas gzhug go/ /de nas shar gyi sgor phyogs par bzhag la/rdo rje slob dpon gyis 'di skad ces brjod par bya'o/ /deng khyod de bzhin gshegs pa thams cad kyi rigs su zhugs kyis/ ngas khyod la ye shes gang yin gyi de bzhin gshegs pa thams cad du yang 'grub pa thob na dngos grub gzhan lta smos kyang ci dgos de lta bu'i ye shes bskyed par bya yis/khyod kyis dkyil 'khor chen po ma mthong ba rnams la smra bar ma byed cig /dam tshig nyams par gyur te re zhes brjod de/ de nas slob ma'i snying gar rdo rje bzhag la/ rdo rje sems dpa' deng khyod kyi/ snying la yang dag gzhug par mdzad/ / gal te tshul 'di smras na ni/ /de ma thag tu dral te gshegs/ /oM badzrod ka Tha hUM/ 'di de khyod kyi dmyal ba'i chu/ /dam tshig 'das na sreg par byed/ /dam tshig bsrungs na dngos grub ni/ /rdo rje bdud rtsi'i chu 'dis 'grub/ /oM a mr-i ta hUM badzra a gat+ta hri tha hUM/ de nas slob dpon gyis dam tshig bsgrags te/deng nas brtsams te khyod kyi rdo rje slob dpon nga yin gyi/ ngas 'di byos shig ces bsgo bya gang yin pa de bya dgos so/ /khyod kyis nga la brnyas par ma byed cig /mi bde ba ma spangs par khyod dus byas nas dmyal bar gyur ta re/ de nas ye shes sems dpa' dbab par bya ste/'di skad brjod du gzhug go/ /de bzhin gshegs pa thams cad kyis byin gyis rlobs la/ 'jam dpal ye shes sems dpa' bdag la dbab par gyur cig ces smros shig pa'o/ /rdo rje dris bsgos pa snying gar bzhag la/ 'di de rdo rje'i dam tshig ste/ 'jam dpal rdo rje yin par grags/ / rdo rje ye shes bla med ni/ /deng 'dir khyod la 'bab par shog /oM many+dzu shrI badzra A be sha ya a a a a zhes nyi shu rtsa gcig brjod do/ /rdo rje dmar po mtshon gang pa char ltar du 'bebs par bsam mo/ /gal te 'bab par ma gyur na sdig pa byang ba'i cho gas dbab par bya'o/ /de nas bab pa dang yi ge brgya pas brtan par bya'o//de nas me tog gi phreng ba dor te/ pra tI ts+tsha badzra ho zhes pas dkyil 'khor la gtor la gang du babs pa'i lha de yi dam du dbog go/ /oM pra ti gr-i h+Na twaM i maM satwa ma hA ba le zhes bya bas phreng ba de mgo la bcing bar bya'o/ /de nas gdong g.yogs bkrol te mig lcags kyu'i phyag rgyas dbye zhing sngags 'di brjod do//oM 'jam dpal rdo rje deng khyod kyis/ /mig 'byed par ni brtson par mdzad/ /mig ni thams cad 'byed mdzad de/ /rdo rje'i mig ni bla na med/ /de ring nyid du 'byed par shog /he badzra pa sh+ya hUM zhes brjod la/ /mig g.yogs kyang dgrol te 'di skad brjod do/ /legs par ltos shig sems dpa' che//thar pa chen po'i dkyil 'khor du/ /me tog gang la phog pa ni/ /'di de khyod kyi rigs kyi lha/ /rang gi lha ru shes par gyis/ /zhes brjod la rdo rje lcags kyu nas brtsams te/ bcom ldan 'das rnam par snang mdzad chen po'i bar du dkyil 'khor drug bstan par bya'o/ /de nas dkyil 'khor gyi shar ngos su maN+Dal la pad+ma 'dab brgyad bris la/yi dam lha'i gzugs su bsams la dbang bskur bar bya ste/ de yang dang por re zhig chu'i dbang bskur bar bya ste/ ji ltar bltams pa tsam gyis ni/ /lha rnams kyis ni khrus gsol ltar/ /de bzhin bdag gis lha yi chu/ /dag pa yis ni sku khrus gsol//oM sarba ta thA ga ta badzra a b+hi She ka ta sa ma ya shri ye hUM/ dpal ldan rdo rje thugs 'chang ba/ /rdo rje mi phyed gsum bsgoms nas/ /deng bdag byin gyis brlabs nas su/ /rdo rje thugs kyis mdzad du gsol/ /oM sarba ta thA ga ta tsit+ta badzra swa b+hA ba At+ma kou0f85haM/ rnam shes p hung po rnam dag pa'i//me long lta bu'i ye shes kyi/ /zhe sdang chen po mi bskyod pa'i/ /dpal ldan chu yis dbang bskur ro/ /oM sarba ta thA ga ta badzra a b+hi Shiny+tsa hUM/ de nas cod pan gyi dbang bskur te/ /phal ba'i sa ni gzhom pa dang / /yon tan gzi brjid bskyed pa'i phyir/ /nga rgyal rin chen 'byung ldan gyi//cod pan gyis ni dbang bskur ro/ /oM sarba ta thA ga ta mu ku Ta a b+hi Shiny+tsa hUM/ zhes brjod pa dang / dpal ldan rin chen cod pan dbang / /rdo rje mi phyed gsum bsgoms nas/ /deng bdag byin gyis brlabs nas su/ /rdo rje rin chen mdzad du gsol/ /oM sarba ta thA ga ta rat+na swa b+hA ba At+ma kou0f85haM//tshor ba'i phung po rnam dag pa'i/ /mnyam pa nyid kyi ye shes kyi/ /nga rgyal rin chen 'byung ldan gyi/ /cod pan gyis ni dbang bskur ro/ /de nas rdo rje'i dbang bskur te/ /sangs rgyas kun gyi rdo rje'i dbang / /de ring khyod la bskur bar bya/ /sangs rgyas kun gyis rab grub phyir/ /rdo rje 'di ni khyod kyis long //oM sarba ta thA ga ta badzra a b+hi Shiny+tsA mi tiSh+Tha badzra sa ma ya s+t+waM/ chos kyi gsung rab dpal dang ldan/ /rdo rje mi phyed gsum bsgoms nas/ /deng bdag byin gyis brlabs nas su/ /rdo rje gsung du mdzad du gsol/ /oM sarba ta thA ga ta bAka badzra swa b+hA ba At+ma kou0f85haM/ 'du shes phung po rnam dag pa'i/ / so sor rtog pa'i ye shes kyi/ /'dod chags snang ba mtha' yas kyi/ /rdo rje yis ni dbang bskur ro/ /de nas dril bu'i dbang bskur te/ /'di de sangs rgyas thams cad kyi/ /shes rab dbyangs kyi rjes 'gror bshad/ /khyod kyis kyang ni rtag tu bcang / /rgyal ba rgya mtsho'i mchog tu bshad/ /oM sarba ta thA ga ta a d+hi ba ti s+t+waM a b+hi Shi ny+tsa mi tiSh+Tha sa ma ya s+t+waM/dpal ldan rdo rje dril bu 'chang / /rdo rje mi phyed gsum bsgoms nas/ /deng bdag byin gyis brlabs nas su/ /rdo rje las su mdzad du gsol/ /oM sarba ta thA ga ta a mo g+ha badzra swa b+hA ba At+ma kou0f85haM/ 'du byed phung po rnam dag p a'i//bya ba nan tan ye shes kyi/ /phrag dog don yod grub pa yi/ /dril bu yis ni dbang bskur ro/ /de nas ming gi dbang bskur te/ /srid pa'i bde ba shin tu chung / /sdug bsngal chen po bsal ba'i phyir/ /shin tu bde ba dam pa'i thabs/ /rnam par snang mdzad rtag tu bskyed/ /oM sarba ta thA ga ta a b+hi Shiny+tsA mi che ge mo nA ma a b+hi She ka ta hUM/dpal ldan rdo rje sku 'chang ba/ /rdo rje mi phyed gsum bsgoms nas/ /deng bdag byin gyis brlabs nas ni/ /rdo rje sku ni mdzad du gsol/ /oM sarba ta thA ga ta kA ya badzra swa b+hA ba At+ma kou0f85haM/ gzugs kyi phung po rnam dag pa'i/ /chos kyi dbyings kyi y e shes kyi//gti mug rnam par snang mdzad kyi/ /dpal ldan mi bskyod dbang bskur ro/ /de dang ldan na de lnga ni rig pa'i dbang lnga ste/ phung po lnga dag nas nyon mongs pa lnga spangs nas/ ye shes lnga dang ldan te/ ma rig pa rig pas na rig pa'i dbang lnga zhes bya'o/ /de nas brtul zhugs kyi dbang zhes bya ba ni/ 'di de sangs rgyas thams cad kyi/ /'jam dbyangs rdo rje'i lag na 'dug /khyod kyis kyang ni rtag tu bcang / /'jam dpal rdo rje'i brtul zhugs brtan/ /oM sarba ta thA ga ta many+dzu shrI tsit+ta badzra sa ma ya tiSh+Tha a b+hi She ka ta ya mi hUM ha ha ha hi hi hi/ de nas phreng ba sbyin te/ sangs rgyas kun gyi mi phyed pa'i/ /gsang sngags bla na med pa yi//snying po yid bzhin nor bu 'di/ /skyob pa sngags kyis dbang bskur ro/ /de nas phyir mi ldog pa'i dbang bskur bar bya ba'i phyir/ yon bdag gis yon gyi mchog phul la gsol ba btab la/ byang chub rdo rje sangs rgyas la/ /ji ltar mchod stsol bgyis pa ltar/ /bdag kyang bsrung ba'i don gyi phyir//nam mkha'i rdo rje bdag la stsol/ /de bzhin gshegs pa'i dbang bskur ba/ /'gro ba bskyab pa'i gzi brjid can/ /ji ltar yon tan 'byung gnas stsol/ /slob dpon chen po mi ldog pa'i/ /dbang bskur ba ni bdag la stsol/ /sems can kun gyi don gyi phyir/ /bdag ni rtag tu slob dpon gyur/ / slob dpon chen po bdag la stsol/ /de ltar gsol ba btab rjes la sdom pa sbyin te/ /ji bzhin don ldan dam tshig ni/ /rtsa ba yan lag bcas pa kun/ /phas pham par ni rab tu grags/ /spang zhing dor bar mi bya ste/ /rtsa ba'i ltung bar shes par bya/ /srog gcod rku dang 'phrog pa dang / /brdzun dang chang ni cung zad spang //mi dge ba ni bcu po dag /khyod kyis nam yang ma spyod cig /theg pa dman la mos pa dang / /sems can 'khor ba mi spang zhing / /mya ngan 'das la ma chags shing / /lha dang lha min brnyas mi bya/ /de bzhin gshegs pa'i phyag rgya rnams/ /'gom par bya ba ma yin te/ /dam tshig 'di dag nyams pa na//rdo rje dmyal bar 'tshed par 'gyur/ /de bas dam tshig bsrung bar gyis/ /des kyang slob dpon gyi bka' bzhin bgyid par 'tshal lo zhes khas blangs so/ /de nas slob ma dam pa de'i lus la lha bkod la/ rnam rgyal bum pa thogs te/ khams gsum kun gyis phyag byas pa//gsang ba gsum gyi gnas las byung / /dbang bskur ba ni rdo rje che/ /sangs rgyas kun gyis dbang bskur ro/ /oM sarba ta thA ga ta a pa ya/ pa ra ti ga a b+hi She ka sa ma ya shri ye hUM/ de nas gser la sogs pa las byas pa'i mig thur thogs la/ ji ltar mig mkhan rgyal po yis/ /'jig rten ling tog bsal ba ltar//bu khyod kyis ni mi shes pa'i/ /rab rib rgyal ba rnams kyis bsal/ /oM badzra nai tra a pa ha ra ba Ta laM hri zhes nyon mongs pa spong ba'i dbang ngo / /de nas me long bstan la/ chos rnams gzugs brnyan lta bu ste/ /dag cing gsal la rnyog pa med/ /gzung du med cing brjod du med/ rgyu dang las las kun du 'byung / /ngo bo med cing gnas med par/ /de ltar chos 'di shes nas su/ /sems can don ni mnyam med byos/ /'on kyang sangs rgyas sras su skye/ /ye shes kyi dbang ngo / /de nas mda' gzhu blangs la mi'i drung du 'phen bcug la/ /thabs dang shes rab gnyis med de/ /bskal pa'i cho 'phrul cir yang ston//bdud gyi rigs rnams pham byed pa'i/ /ye shes kyi ni mda' 'phongs shig /ho zhes mda' 'jig rten gyi khams drug tu 'phen du gzhug go/ /sku'i dbang ngo / /de nas dril bu blangs la dkrol te/ chos rnams nam mkha'i mtshan nyid de/ /nam mkha' la yang mtshan nyid med//mkha' dang mnyam par sbyor ba yis/ /sku mchog mnyam pa nyid du gsal/ /AH zhes gsung gi dbang ngo / /me long blangs la/ 'jam dbyangs rdo rje me long bzhin/ /dag cing gsal la rnyog pa med/ /sangs rgyas kun bdag rang bzhin ni/ /bu khyod kyi ni snying la zhugs/ / many+dzu shrI tsit+ta a/ thugs kyi dbang ngo / /de nas rkang pa'i bar du chos kyi 'khor lo gzhag /lag par dung dang lce la po ti gtad/ mgo la gdugs gtad de/ deng nas brtsams te sems bskyed pa/ /tsam gyis chos kyi 'khor lo bskor/ /de ring phan chad 'jig rten la/ /chos kyi 'khor lo rab tu bskor/ / chos kyi dung ni bla med pas/ /kun du ma lus gang bar gyis/ /som nyi yid gnyis mi bya zhing / /dogs pa med pa'i sems kyis su/ /gsang sngags spyod pa'i tshul gyi mchog /'jig rten 'di la rab tu sgrogs/ /de ltar byas na sangs rgyas la/ /phan 'dogs drin du gzo zhes bya/ /rdo rje 'dzin pa de kun kyang //kun tu khyod la srung bar byed/ /ces brjod do/ /yang / 'jig rten kun la thams cad du/ /sems can kun la phan pa'i phyir/ /ji ltar sna tshogs 'dul 'gyur ba'i/ /chos kyi 'khor lo rab tu bskor/ /zhes brjod do/ /de nas thams cad gzengs bstod de/ /kun bdag sangs rgyas sgom pa po/ / rdo rje'i ming dbang bskur bas kyang / /de bzhin gshegs par lung bstan nyid/ /oM 'di de ngas khyod lung bstan yin/ /'jam dpal rdo rje de bzhin gshegs/ /srid pa kun du bsgrub pa'i phyir/ /srid pa'i ngan 'gro rnams las bton/ /kye de bzhin gshegs pa che ge mo zhes bya ba/ /sid+d+hi sa ma ya s+t+waM b+hur b+hu ba swaH de nas gnang ba sbyin pa/ngo bo nyid kyis sems can rnams/ /ji lta ji ltar 'dul 'gyur ba/ /de lta de ltar chags la sogs/ /gtsang mas sems can don bya'o/ /de nas dbugs dbyung ba/ gsang ba mchog gi dkyil 'khor 'dir/ /de ring phan chad khyed zhugs kyis/ / sdig pa kun las nges grol bar/ /khyed rnams deng ni legs par gnas/ /bde chen thob pa 'di las ni/ /slar khyod 'chi ba yod min te/ /mi tshugs pa dang mi smod pa/ /cis kyang mi 'jigs dga' bar gyis/ /srid pa shin tu dag pa'i phyir/ /srid pa'i sdug bsngal las khyod 'das/ / khyed rnams kyis ni sangs rgyas nyid/ /de nyid the tshom med par 'thob/ /de nas bdag nyid thar bsams la/ /chos gos bzung ste/ oM 'di ltar nga yis lung bstan par/ /mgrin gcig tu ni rdzogs pa'i phyir/ /byang chub tu ni lung bstan mdzad/ /sangs rgyas rdo rje 'dzin bcas pas/ / kun gyis deng khyod dbang bskur bas/ /khams gsum gyi ni rgyal po che/ /rgyal ba'i bdag po ston pa yin/ /deng ni bdud las rnam rgyal te/ /grong khyer mchog tu rab tu zhugs/ /khyed rnams kyis ni sangs rgyas nyid/ /deng nyid the tshom med par 'thob/ /de ltar gzengs bstod pa dang / /dbugs dbyung ba dang /lung bstan pa'o/ /de nas slob ma de la mchod pa lnga dang / sgeg mo la sogs pa brgyad kyis yang dag par mchod de/ khyed rnams kyis kyang dus gsum bde bar gshegs pa rnams yang dag par mchod cig par bka' bsgo'o/ /de nas de rnams kyis yo byad kyis dkyil 'khor gyi lha mchod la/lhag mas der tshogs tshim par byas la dkyil 'khor gyi lha la bstod de/ /sgeg mo la sogs pas mchod la bstod do/ /de nas slob dpon la yon gyis mnyes par byas la/ 'dod pa'i don gsol ba gdab po/ /dge ba'i rtsa ba bsngo ste/ dkyil 'khor la bskor ba byas la lha gshegs su gsol te/dam tshig bsdus la ci bde ba'i spyod lam bya'o/ /slob ma rnams kyi don gyi phyir/ /dkyil 'khor cho ga byas pa la/ /dge ba bsags pa gang gyur pa/ /thams cad rdzogs pa'i byang chub thob/ /'phags pa 'jam dpal gyi mtshan yang dag par brjod pa'i dkyil 'khor gyi cho ga nam mkha' dri ma med pa zhes bya ba/