CLOSE WINDOW

D2541
བོད་ཡིག

/[ ]@##/ /rgya gar skad du/ Ar+ya many+dzu shrInA masang+gI ti pany+dzika saM gra ha nA ma/ bod skad du/ 'phags pa 'jam dpal gyi mtshan yang dag par brjod pa'i dka' 'grel bsdus pa zhes bya ba/'phags pa 'jam dpal gzhon nur gyur pa la phyag 'tshal lo/ /sku dang ye shes kun gyi dngos/ /'jam mchog mgon la phyag 'tshal lo/ /rgyud rnams kun las nges pa'i don/ /de yi lung bstan bri bar bya/ /de la lung bstan pa'i tshig gang zhe na/zab cing rgya che ba'i mtshan bstan pa/ /sku dang ye shes kun gyi bdag /yan lag bcu ldan sgrub pa pos/ /sangs rgyas thob par the tshom med/ /de lta bu'i lung bstan pa'i tshig de la rjes su bstan pa ji lta bu zhe na/ zab pa zhes bya ba ni gnyis su med pa'i ye shes kyi de kho na nyid la bya/rgya che ba ni yon tan la bya/ mtshan bstan pa ni rang bzhin yongs su shes na 'phags pa 'jam dpal gyi mtshan du ma gyur pa med la/ rgyu zhes bya ba ni gsum mam lnga la bya la/ ye shes ni lnga'am gcig gis bsdus so/ /yan lag bcu ldan sgrub pa pos//zhes bya ba ni byin gyis brlab pa'i yan lag dang / sku dang ye shes kyi yan lag dang / gzhi'i yan lag dang / lta ba'i yan lag dang / sgom pa'i yan lag dang / lta stangs kyi yan lag dang / brda'i yan lag dang / bsdus pa'i yan lag dang /sbyor ba drug gi yan lag dang / bar mdo'i yan lag ste yan lag bcu po de dang ldan pa'i sgrub pa pos/ sangs rgyas thob par the tshom med/ /ces bya ste ting nge 'dzin dra ba'i le'u 'di nyid ni/ gcig tu bsdus na tshigs bcad brgya drug cu rtsa gnyis rnams dang /yon tan brgya dang lnga bcu'i gzhung gis de bzhin gshegs pa thams cad kyi sku dang yon tan gyi mtshan yang dag par brjod pa bsdus pa'i don to/ /de ltar yin mod kyis kyang dgos pa med na mi 'jug pas/ nyan pa po 'jug par bya ba'i phyir/ dang por brjod par bya ba ni gang zhig /'brel pa ni ci/ dgos pa ni ji lta bu/ dgos pa'i dgos pa ni ji lta bu snyam du rtog na/ de rnams kyi don bstan pa ste/ de bzhin gshegs pa thams cad kyi rang bzhin 'phags pa 'jam dpal gyi sku dang / ye shes kyi yon tan dang bcas pa ni brjod par bya ba'o//de ston par byed pa'i sgra'i tshogs dang 'brel pa ni 'brel pa'o/ /dgos pa ni so so'i dngos po'i mngon par zhen pa bzlog nas rnam par dag pa'i lam gyi rang bzhin sku dang / ye shes kyi ngo bo 'phags pa 'jam dpal gyi rang bzhin du shes pa'o/ / dgos pa'i dgos pa ni de ji lta bar rang gi stobs su gyur pa'o/ /yang na 'di brjod par bya ba ni/ gnyis su med pa'i ye shes so zhes yon tan la de skad du gsung ngo / /yang na brjod par bya ba ni/ dngos po thams cad kyi rang bzhin 'phags pa 'jam dpal du rtogs par bya ste/de yang cis mngon zhe na/ dngos po kun gyi rang bzhin mchog /dngos po kun gyi rang bzhin 'dzin/ /skye med chos te sna tshogs ston/ /mi 'gyur kun 'gro khyab pa po/ /zhes gsungs so/ /de ltar na brtan pa dang g.yo ba'i dngos po thams cad 'phags pa 'jam dpal gyi rang bzhin gyi shes pa yang dgos 'brel gyi yan lag tu shes par bya'o//de ltar na dgos pa'i don dang bsdus pa'i don brjod nas/ da ni tshig gis mtshams sbyar ba'i phyir bkra shis pa la sogs pa mang du 'jug mod kyi/ sdud pa po'i tshig tu bstan par bya'o//dpal ldan rdo rje 'chang bya ba nas brtsams te/ rang gi lag gis gsor byed ces bya ba'i bar gyis zhu ba po'i mtshan nyid bstan to/ /khro gnyer rim par ldan la sogs/ /zhes bya ba nas brtsams te/ rang gi lag gis gsor byed pa/ / zhes pa'i bar gyis zhu ba po 'khor gyi mtshan nyid bstan to/ /snying rje che dang zhes bya ba nas brtsams te/ lus btud rnams dang lhan cig tu/ /zhes bya ba'i bar gyis gnyi ga'i mtshan nyid bstan to/ /de bzhin gshegs pa bcom ldan 'das/ /zhes bya ba nas brtsams te/spyan sngar 'dug ste 'di skad gsol/ /zhes bya ba'i bar gyis zhus pa'i tshul bstan pa'o/ /khyab bdag ces bya ba nas brtsams te/ byang chub ci nas bdag thob mdzod/ /ces pa'i bar gyis bdag don du zhus pa'o/ /nyon mongs pas ni sems dkrugs shing //bya ba nas/ sems can rnams la bshad par 'tshal/ /zhes bya ba'i tshig yar drangs te tshigs bcad gnyis kyis gzhan don du zhus pa'o/ /rdzogs pa'i sangs rgyas bcom ldan 'das/ /bya ba nas/ dbang po bsam pa mkhyen mchog gis/ /zhes pa'i khyad par gyi ston pa'i khyad par bstan pa'o//bcom ldan 'das kyi ye shes sku/ /bya ba nas/ thog ma bar dang mthar dge ba/ /zhes bya ba'i bar gyis dam pa'i chos kyi khyad par bstan pa'o/ /'das pa'i sangs rgyas rnams kyis gsungs/ /bya ba nas/ yang nas yang du gsungs ba gang //zhes bya ba'i bar gyis dus kyi khyad par bstan to/ /rgyud chen sgyu 'phrul dra ba las/ /zhes bya ba'i bar gyis dpag tu med pa'i rdo rje 'chang bas sngags kyi don gzung ngo zhes bya ba'i don to/ /gsang dbang lag na rdo rje zhes bya ba nas brtsams te/ lus btud nas ni spyan sngar 'dug /ces bya ba'i bar gyis gus par 'khod pa'i don to/ /de ni zhu ba bstan pa'o// //da ni lan bstan pa la/ de nas bcom ldan shAkya thub/ /ces bya ba nas brtsams te/ 'jig rten gsum po kun bkang nas/ /zhes bya ba'i bar gyis so//chos gsungs pa'i snga ltas so/ /de nas tshig rkang gnyis kyis ni mtshams sbyar bstan pa'o/ /snying rje che dang ldan gyur nas/ /zhes bya ba nas brtsams te/ lag na rdo rje khyod legs so/ /zhes bya ba'i bar gyis don chen po 'di lta bus zhus pa legs par sbyin pa'o/ / gsang ba'i bdag po zhes bya ba nas brtsams te/ nyon zhes pa'i bar gyis gdams pa la sogs pa'i bstan pa'o/ /de nas tshig gcig gis ni gnang ba'i legs pa phul ba'o/ /de ni gleng gzhi gus pa'i tshul lo// //da ni dam pa'i chos kyi dngos po bstan pa'i phyir/ de nas bcom ldan shAkya thub/ /ces bya ba la sogs pa smos te/ 'og min du sangs rgyas pa ste rigs thams cad kyi ngo bo 'phags pa 'jam dpal du bstan pa'i phyir/ gsang sngags rigs chen thams cad dang / /zhes bya ba nas brtsams te/ rigs chen gtsug tor cher gzigs nas//zhes bya ba'i bar gyis rigs kyi bye brag bstan to// //da ni cung zhig don dgrol na/ /gsang sngags rigs chen thams cad dang / /zhes bya ba ni don dam pa byang chub kyi de kho na nyid la bya la/ rig sngags 'chang zhes bya ba ni/ rig pa'i shes rab kyis mi dor bar 'dzin pa'o//rig pa'i shes rab kyis sku gsung thugs kyi de kho na nyid la gzigs pa'o/ /de'i khyad par ni tshogs kyi khyad par nas bzung ste/ cung zad drod thob pa'i gnas skabs kyi bar ro/ /'das pa'i rigs zhes bya ba ni mthong ba'i lam nas brtsams pa'o//'jig rten snang byed rigs chen dang / /zhes bya ba ni khyad par ro/ /phyag rgya chen po'i rigs mchog dang / /zhes bya ba ni byang chub kyi sems rdo rje'i rigs las ma 'das pa'o/ /rigs chen gtsug tor cher gzigs nas/ /zhes bya ba ni 'dod pa thams cad skong ba'i don to//tshig gi bdag pos tshigs su bcad/ /ces bya ba ni rje btsun gsung gi dbang phyug ste/ de gnyis 'phags pa 'jam dpal lo/ /gsang sngags rgyal po drug ldan zhing / /zhes bya ba ni badzra tIk+Sh+Na ye te na maH'i bar gyis so/ /de'i bdag po ni 'phags pa 'jam dpal nyid do//gnyis su med par 'byung ba dang / /zhes bya ba smos te/ gnyis ni gzung 'dzin la sogs pa'o/ /de med pa de gang de gnyis su med pa'o/ /de las byung ba ni gzung 'dzin lam stong pa skye ba'o/ /de bas na/ mi skye chos can 'di gsungs te/ /chos kyi dbyings kyi rang bzhin don dam pa byang chub kyi sems kyi ngo bo don dam pa'i yi ge ma/sa bcu gnyis dang sbyar te gsungs pa yin no/ /de yang gang zhe na/ dpal rdo rje snying po rgyan gyi rgyud las/ de bzhin gshegs pa'i sa ni bcu gnyis su gsungs te/ kun du 'od kyi sa chen po//de ni nyi ma'i dkyil 'khor 'dra/ /bdud rtsi 'od ni gnyis pa'o/ /shin tu 'od gsal zla ba 'dra/ /nam mkha'i 'od ni gsum pa ste/ /nam mkha' bzhin du rnam par gnas/ /rdo rje 'od ni bzhi pa ste/ /sa de nyid ni yang dag go/ /bsam gtan nang gi rtags sbyor bas/ / rdo rje zhes ni yongs su brtags/ /lnga pa rin chen 'od ces bya/ /dbang bskur ba la rab tu gnas/ /pad+ma'i 'od ces drug pa ste/ /pad+ma bzhin du rab tu bskyed/ /rang bzhin dag pas chos nyid phyir/ /dri ma med pa yongs su gzung / /bdun pa las ni 'od ces pa/ /sangs rgyas phrin las byed par 'dod//brgyad pa dpe med bya ba yin/ /dpe dang ldan pa dgu pa ste/ /thams cad dpe ni so sor 'bigs/ /bcu pa shes rab 'od ces pa/ /sangs rgyas sa ni bla na med/ /bcu gcig thams cad mkhyen pa nyid/ /sa chen rab tu 'od gsal ba/ /bcu gnyis so sor rang rig pa//rnal 'byor ye shes rab tu rdzogs/ /de ltar sa ni bcu gnyis dang / /a bcu gnyis dang sbyar bar shes par bya'o de nyid kyi skabs su/ de nyid rnam pa bcu drug gis/ /rnam pa nyi shu byang chub 'chang / /zhes bya ba'i tshig gis bla ma dam pa'i gdams ngag gis sbyar bar bya'o//s+thi to hr-i di zhes bya ba la sogs pa'i tshig gis dus gsum gyi sangs rgyas thams cad kyi thugs ka nas 'phags pa 'jam dpal ye shes kyi spyi gtsug gi rang bzhin sangs rgyas kyi chags pa'i gnas su bstan to/ /de nas yon tan las de bzhin gshegs pa thams cad kyi sku thams cad mkhyen pa'i ye shes chos kyi dbyings bla na med pa'i thugs su chud pa'o zhes gsungs pas na/de'i bdag nyid kyis rje btsun gsung gi dbang phyug dang po'i sangs rgyas kyi ngo bo de'i rjes su 'dzin pa'i byang chub sems dpa'i gdams ngag gis nges pa'i rgyud kyi don 'di bshad na rnam pa gnyis su shes par bya ste/de yang byang chub sems dpa' dgra las rnam par rgyal ba'i zhal snga nas/ byang chub sems dpa'i mdzad brjod ni/ /mdor bsdus rnam pa gnyis su shes/ /rjes su gzung dang tshar gcod pa'o/ / de la rjes su gzung ba ni/ sngon gyi dus su 'phags pa 'jam dpal des bshad pa'i sgo nas rjes su gzung ba dang / bsgom pa'i sgo nas rjes su gzung ba'o/ /de la bsgom pa'i sgo nas rjes su gzung ba ni/ 'dod chags can gyi gang zag bde ba lam du khyar pa ste/ bcu drug phyed phyed thig le can//bya ba'i tshig gis rnal 'byor ma'i rgyud dang rjes su bstun te bstan pa'o/ /rnam par rtog pa can rjes su gzung ba'i phyir rlung la bslab pa ste/ khong nas 'byung ba skye ba med/ /ces bya ste rlung ji snyed gcig yod kyang rtsa ba'i rlung rnam pa lngar 'dus te/ rnal 'byor ba'i rgyud dang bstun te bslab pa'o/ /tha mal pa'i rtog can rjes su gzung ba'i phyir dmigs pa dang bcas pa'i bskyed pa'i rim pa la bslab ces bya ste/ rigs gsum rnam par gzigs zhes bya ba'i tshig gis rnal 'byor gyi rgyud la sogs pa dang rjes su bstun te bslab pa dang /gang zag shes rab can rjes su gzung bar bslab pa ni sku dang ye shes kyi de kho na nyid la bslab pa ste/ de yang yan lag bcu ldan sgrub pa'o zhes bya ba'i tshig gis so/ /de ni bsgom pa'i rjes su gzung ba'o/ /da ni bshad pa'i rjes su gzung ba ni/ 'jam dpal de nyid gdul bya'i ngo bag dang sbyar te/'dod chags can 'dul ba la dbang phyug chen po'i gzugs so/ /gti mug can la tshangs pa'i gzugs so/ /zhe sdang can la 'jigs byed kyi gzugs so/ /de lta bu la sogs pa ni gdul bya'i bu ram lce'i rig pa'i dpes so//de bye brag cung zhig smras pa ni mu stegs kyi gdul bya'i ral pa can/ gtsug phud phud pu lcang lo can/ /zhes bya ba'i tshig gnyis so/ /dri za'i rgyal po zur phud lnga pa gdul ba'i don du/ gdong lnga gtsug phud lnga dang ldan/ /zhes bya ba'i tshig gis so/ / nyan thos gdul ba'i don du 'phags pa 'jam dpal de ni byang chub sems dpa'i rgyud du rtogs kyang nyan thos kyi tshul bzung nas/ mgo zlum brtul zhugs chen po pa/ /zhes bya ba la sogs pa'i tshig gis bden pa bzhi'i sgo nas chos bstan to/ /rang sangs rgyas gdul ba'i don du/'dren pa rang rgyal bse ru'i tshul/ /zhes bya ste rten cing 'brel par 'byung ba bcu gnyis kyis chos ston to/ /rnam rigs sna tshogs gzugs don can/ /zhes bya ba'i tshig dang / snying rje che dang shes rab thabs/ /zhes bya ba'i tshig dang / bden pa gnyis kyi tshul la gnas//zhes bya ba'i tshig dang / pha rol phyin pa bcu yi tshul/ /zhes pa'i tshig gis byang chub sems dpa'i theg pa bstan/ de yang cis mngon zhe na/ theg pa gsum gyi nges 'byung la/ /zhes bya ba la sogs pa'i tshig gis so/ /gzhan yang sum cu rtsa gsum gyi lha 'dul ba/ lha'i dbang po lha yi lha/ /zhes bya ba ste brgya byin gyis so/ /lha yi dbang po lha min bdag /ces pas thags bzangs ris kyi gzugs kyis so/ /'chi med dbang po lha yi bla/ /zhes bya ste phur bu'i gzugs kyis so/ /'joms byed 'joms byed dbang phyug go/ /zhes bya ba ste khyab mjug gi gzugs so//da ni gzugs med pa gdul ba'i don du gzugs med ces bya ba'i tshig dang / tshangs pa'i yul sa rtse nas gnon/ /zhes bya ba'i tshig gis so/ /da ni thun mong ma yin pa'i gsang sngags kyi theg pa bshad pa'i sgo nas rjes su gzung ba ste/ nor pa thams cad rnam par spangs//zhes bya ba la sogs pa smos te/ de la nor pa ni rnam pa lnga ste/ 'jug pa'i nor pa dang / lta ba nor pa/ bsgom pa nor pa/ thabs nor pa/ spyod pa nor pa/ de las ldog pa zhes pa'i khyad par ro/ /de la 'jug pa'i khyad par ci lta bu zhe na/ don gsum the tshom med pa'i blos//theg pa sna tshogs thabs tshul gyis/ /snying rje che dang shes rab thabs/ /rdo rje rgyal po bde ba che/ /zhes bya bas gsang sngags kyi lam bstan no/ /gzhan yang / bdag rig gzhan rig thams cad pa/ /zhes bya ba nas brtsams te/ phyag rgya bzhi pa'i don ston pa//zhes bya ba la sogs pa dang / rgyud kun gyi ni bdag po'i mchog /ces bya ba la sogs pa'i tshig gis so/ /rgyud thams cad kyi bdag po yin par bstan to/ /gzhan yang 'di nyid kyi brtag pa gzhan du/ la la ni phyi rol gyi tshul lo/ /la la ni nyan thos kyi tshul lo//la la ni rang sangs rgyas kyi tshul lo/ /la la ni byang chub sems dpa'o/ /gzhan du gsang sngags kyi rigs pa 'dzin pa'i rgyud dpag tu med pa gcig bstan kyang / thig le chen po'i ngor ma shar na de thams cad rjes su gzung ba yin gyi/ yang dag pa'i don de nyid thob par mi 'gyur ro//ci'i phyir zhe na/ rjes su gzung ba tsam yin gyi yang dag pa'i don ma yin no/ /de ci'i phyir zhe na/ ma rtogs pa dang log par rtog pa'i phyir ro/ /la la ni rgyu 'bras rjes su mi mthun pa'i phyir ro/ /la la ni bcos ma la spyod pa'i phyir ro/ /gtan tshigs de bas na 'bras bu de de tsam du sngags pas rjes su gzung ba'o//ji lta bu'i yang dag pa'i yin zhe na/ rnam par dag pa bdag med chos/ /rdo rje rgyal po bde ba che/ /'di ni rnam dag legs pa'i lam/ /yang dag mtha' ste yi ge med/ /de nas thig le chen po'i ngang du sangs rgyas par rig par bya'o//de yang cis mngon zhe na/ thig le chen po yi ge med/ /ces pa la sogs pa'i tshigs bcad gcig gis lta ba bstan/ bcu drug phyed phyed thig le can/ /zhes bya ba'i man ngag gis gnas bstan to/ /bsam gtan zhes bya ba la sogs pa'i tshig gis lta ba bstan to//ting nge 'dzin rig dang zhes bya ba la sogs pa'i tshig gis mthong lam bstan to/ /longs spyod rdzogs sku kun gyi rgyal/ /zhes bya ba la sogs pas 'bras bu bstan to/ /de nyid dran pa chen po 'chang / /bya ba nas brtsams te/ de bzhin gshegs pa'i yon tan mtsho/ / zhes bya ba la sogs pas 'bras bu'i yon tan bstan to/ /yid bzhin nor bu chen po 'chang / /zhes pa nas/ 'jigs pa ma lus sel ba po/ /zhes bya ba la sogs pas sems can gyi don byed pa'i khyad par ro/ /de yang sku dang ye shes kyi khyad par ni/ de yang sku gsum dang /sku lnga dang / ye shes lnga dang ye shes gcig /de yang cis mngon zhe na/ mchog gi dam pa sku gsum 'chang / /sangs rgyas sku lnga'i bdag nyid can/ /khyab bdag ye shes lnga yi bdag /sangs rgyas lnga bdag cod pan can/ /zhes bya bas so/ /de'i rnam par gzhag pa ni/de la sku gsum ni dang por chos kyi sku bshad/ /mi skye chos can 'di gsungs pa/ /a yig bcu gnyis dang / rdzogs pa'i sangs rgyas a las byung / /zhes bya ba dang / don chen yi ge dam pa yin/ /zhes bya ba la sogs pa dang / thog ma med pa spros med bdag /ces bya ba la sogs pa dang / don gcig gnyis med chos kyi don/ /zhes bya ba la sogs pa dang / dang po'i sangs rgyas rgyu med ces bya ba la sogs pa dang / mi 'gyur kun 'gro khyab pa po/ /zhes bya ba la sogs pas chos kyi sku bstan no/ /da ni longs spyod rdzogs pa'i sku bsdu ba/sangs rgyas rnam par snang mdzad ces/ /zhes bya ba la sogs pa'i tshigs su bcad pa gcig dang / longs spyod rdzogs sku sku yi rgyal/ /zhes bya ba'i tshig rkang gcig dang / gnas brtan rgan po skye dgu'i bdag /sum cu rtsa gnyis mtshan 'chang ba//sdu gu 'jig rten gsum la mdzes/ /zhes bya ba la sogs pas/ longs spyod rdzogs pa'i sku bstan no/ /da ni sprul pa'i sku bsdu ba/ sprul pa'i sku ste sku yi mchog /ces bya ba'i tshig dang / phan 'dogs sems can mnyes gshin pa/ /zhes bya ba'i tshig dang / gzugs rnams sna tshogs kun du ston/ /zhes bya ba'i tshig dang / theg pa sna tshogs thabs tshul gyis/ /zhes bya ba la sogs pa'i tshig gis sprul pa'i sku bstan/ de gsum las ngo bo chos kyi sku bstan te/ rnam par dag pa bdag med chos/ /zhes bya ba dang / de bzhin nyid dag dag pa'i bdag /ces bya ba dang / gzhan yang de nyid kyi lung gi spang ba'o/ /de la/ chos gang rnam pa tha dad du/ /rnam dag zag pa med ces pa/ /thub pa'i ngo bo nyid sku ste/ /de yi rang gi mtshan nyid do/ /zhes gsungs pas na/ ngo bo nyid kyi sku/ ye shes kyi sku la gnyis gnyis te ji lta ba dang de'i rgyu mthun no//ji lta ba ni/ ye shes ldan pa yod med shes/ /zhes pas so/ /de'i rgyu mthun pa ni shes pa 'ba' zhig nges gsal zhes bya ba'o/ /ye shes lnga ni me long lta bu la sogs pa'i ye shes lnga'o/ /yang / ye shes mig gcig dri ma med/ /ces pas so//de ltar na mtshan yang dag par brjod pa de ni zab pa dang rgya che ba sku dang ye shes kyis bsdus pa gzhan dang mtshungs pa med pa/ phan yon che ba yon tan thams cad kyi mnga' bdag tu gyur pa phan yon nas 'byung ba bzhin du shes par bya'o/ /de yang cis mngon zhe na/ don zab don gyi rgya che zhing //don chen mtshungs med rab zhi ba/ /thog ma bar dang mthar dge ba/ /zhes gsungs pa ste de bzhin gshegs pa thams cad kyi skye gnas/ de bzhin gshegs pa thams cad kyi rten/ sangs rgyas thams cad kyi yul dang / dge ba'i bshes gnyen la sogs par rig par bya'o//des na don zab ces bya ba ni chos kyi sku la bya'o/ /rgya che ba ni gzugs sku gnyis la bya'o/ /yang na don zab ces pa ni sems kyi de nyid la bya la/ rgya che ba ni snang ba rten cing 'brel par 'byung ba la bya'o/ /yang na don zab ces bya ba ni sgro ma btags pa'i de bzhin nyid la bya la/rgya che zhes bya ba ni chos skus khyab pa la bya'o/ /yang na don zab ces bya ba ni chos thams cad kyi ngo bo nyid stong pa nyid la bya la rgya che ba ni nam mkha' ltar yangs pa la bya'o/ /yang na don zab ces bya ba ni shes bya ji lta ba thugs su chud pa la bya la/ rgya che zhes bya ba ni shes bya ji snyed pa mkhyen pa la bya'o//yang na mnyam gzhag dang rjes thob la bya la/ yang na bde ba chen po dang mi rtog pa la bya'o/ /yang na don zab ces bya ba ni sku dang ye shes la bya la/ rgya che zhes bya ba la sangs rgyas rnams kyi yon tan la bya'o/ /de lta bu'i tshul bla ma dam pa'i gdams ngag gis gzhan du yang sbyar ro//ci'i phyir zab pa la sogs pa bshad ce na/ nyan thos la sogs pa'i spyod yul ma yin pa'i phyir ro/ /'di ni blo zab pa dang rgya che ba rnams la rab tu bsngags pas ni des na zab pa rgya che ba zhes bya'o/ /de ltar na rjes su gzung ba dang zab pa dang rgya che ba bshad nas/da ni tshar gcod pa'i don bshad par bya ste/ log par lta ba tshar gcod pa ni yang gsungs pa/ bdag med seng ge'i sgra dang ldan/ /mu stegs ri dwags ngan 'jigs byed/ /ces bya ba'i tshig dang / tshig la dbang ba tshig mtha' yas//zhes bya ba la sogs pa'i tshigs bcad gcig dang / tshig gi dbang phyug smra ba che/ /zhes bya ba nas brtsams te/ smra ba'i seng ge tshugs pa med/ /ces bya ba'i bar gyis gzhan gyi log par lta ba tshar gcad nas rang gi bstan pa la rjes su gzung ba'o/ / mngon spyod kyi sgo nas mnan pa bya ba ni/ ya te namaHla sogs pa'i sngags la/ gdams ngag gis zhi khro'i rnal 'byor du zhugs la/ rdo rje 'jigs byed 'jigs par byed/ /ces bya ba nas/ sgra dang ldan pa rnams kyi mchog /ces bya ba'i bar gyis bla ma dam pa'i gdams ngag bzhin du sgrub pa sngon du btang nas/'khrul 'khor gyi sngags btu ba'i man ngag ni 'di yin te/ drug pa'i dang po ya/ lnga pa'i mtha' ma ma/ drug pa'i gnyis pa ra/ gnyis pa'i gsum pa dza/ bdun pa'i gsum pa sa/ bzhi pa'i gsum pa do/ lnga pa'i mtha' ma me/ drug pa'i dang po ya/ yang drug pa'i dang po ya/ lnga pa'i mtha' ma me/ gsum pa'i gsum pa do/ /drug pa'i gnyis pa ra/ bzhi pa'i mtha' ma na/ drug pa'i dang po ya/ yang drug pa'i dang po ya/ gsum pa'i gsum pa da/ bzhi pa'i mtha' ma na/ drug pa'i gnyis pa ra/drug pa'i dang po ya/ bdun pa'i mtha' ma k+Sha/ drug pa'i dang po ya/ yang drug pa'i dang po ya/ bdun pa'i mtha' ma k+Sha/ drug pa'i dang po ya/ gnyis pa'i tha ma tsa/ bzhi pa'i tha ma ni/ drug pa'i gnyis pa ra/ lnga pa'i mtha' ma ma/ drug pa'i dang po ya/ de ni rtsa ba'i yi ge'o//gdags yig ni man ngag gis shes par bya'o/ /dang po a ni sbyin par bya/ /ha ha lnga pa'i gsum pa'i ba/ bi kr-i tA na hUM/ dang po oM/ bdun pa ha/ lnga pa ya/ dang po'i ka / gsum pa'i dang po ta/ bzhi pa'i mtha' ma na gnyis/ bdun pa'i bzhi pa hUM gnyis/ phaT dang ha gnyis zhal las shes/ 'di ltar bsgrub par bya ba ni/ mkhas pa grub pa thob pa rnams kyi sgrub thabs las shes par bya'o/ /bsnyen pa sgrub par ma gyur par/ /'khor lo bskor bar ma gsungs te/ /gal te bskor na bdag nyid 'khrugs/ /sngags kyi btu ba ma byas na//sngags zlos pa ni nyams par 'gyur/ /gsang sngags brda yis ma gos par/ /sngags kyi dngos grub med par 'gyur/ /des na zla ba mag dang yon tan dang rig byed mda' zhes bya ba la sogs pa sngags so/ /las kyi mthar thug 'khrul 'khor yin/ / rgyud kyi mthar thug bdag po mchog /dka' thub mthar thug sems dpa' che/ /bsod nams mthar thug yan lag bdun/ /ma byung 'byung bar mi 'gyur ro/ /de ni 'khrul 'khor gyi sgo nas tshar bcad pa'o/ /ting nge 'dzin dra ba'i le'u 'di tshigs bcad brgya drug cu rtsa gnyis rnams dang /yon tan brgya dang lnga bcus zab mo'i bka' 'di sangs rgyas kyi sku dang ye shes/ de'i yon tan de'i mdzad spyod bsdus pa bstan par bya'o/ /dang por chos kyi sku bstan pa ni/ mi skye chos can 'di gsungs pa/ /bya ba nas a bcu gnyis tshig drag dang bcas pa dang / rdzogs pa'i sangs rgyas a las 'byung / /bya ba nas/ tshig kun rab tu gsal bar byed/ /ces bya ba'i bar dang / yang dag bdag med de bzhin nyid/ /ces bya ba la sogs pa'i tshig dang / thog ma med pa spros med bdag /ces bya ba'i tshig dang / thig le stong pa yi ge med//ces bya ba nas rnam pa med ces bya ba'i bar gyis chos kyi sku bstan to/ /mchod pa chen po 'dod chags che/ /zhes bya ba nas/ gzugs chen lus kyang che ba ste/ /zhes pa'i bar gyis longs sku bstan to/ /kha dog che zhing lus bong che/ /zhes bya ba nas/ sgyu 'phrul chen po mig 'phrul can//zhes pa la sogs pas sprul sku bstan/ nam mkha' las byung rang 'byung ba/ /zhes bya ba dang / rnam par dag pa bdag med chos/ /snang ba chen po gsal ba che/ /zhes pa la sogs pas ngo bo nyid kyi sku bstan/ khyab bdag ye shes lnga yi bdag /ces bya ba dang / ye shes ldan pa yod med shes/ /zhes bya ba la sogs pas ye shes kyi sku bstan no/ /ye shes mig gcig dri ma med/ /ces bya ba dang / gzi brjid chen po 'od gsal ba/ /zhes pas ye shes kyi ngo bo gcig par bstan/ yang sku gsum gyi bsngags pa bstan pa/gzugs med ces bya ba ni chos sku gzugs bzangs zhes bya ba ni longs sku dam pa ste zhes bya ba nas gnyis te/ sna tshogs gzugs can yid las skyes/ /zhes bya ba ni sprul sku/ yang de nyid bshad pa/ chos sku ni skye med chos te zhes bya ba la sogs pa'i tshig gis so//longs sku ni/ sum cu rtsa gnyis mtshan 'chang ba/ /zhes bya ba la sogs pa'i tshig dang rnam pa kun ldan zhes bya ba dang / longs spyod rdzogs pa sku yi rgyal/ /zhes bya ba la sogs pa'i tshig gis longs spyod rdzogs pa'i sku bstan/ rjes su gzung ba'i sku dang tshar gcod pa'i khro bo'i sku'o//de la rjes su gzung ba'i sku'i/ 'phags pa 'jam pa'i dbyangs la sogs pa zhi ba'i tshul gyis so/ /tshar gcod pa'i sku ni/ de nas 'jam pa'i dbyangs kyis ni/ /khro bo'i ming ni gshin rje gshed/ /drag la mthu rtsal dang ldan pa/ /zhes bya ba la sogs pa ste/rdo rje 'jigs byed 'jigs par byed/ /ces bya ba nas brtsams te/ sgra dang ldan pa rnams kyi mchog /ces bya ba'i bar gyis so/ /rdo rje rigs kyi le'ur sku dang gsung dang thugs dang yon tan dang / phrin las mdzad spyod du shes par bya'o/ /gzhan yang / byed pa sems can kun don byed//ces bya ba la sogs pa'i tshig gis so/ /gdul bya'i khyad par ni rjes su gzung ba'i skabs su shes par bya'o/ /de yang sangs rgyas rnams kyi mkhyen pa ni/ shes bcu rnam dag bdag nyid can/ /shes bcu rnam dag 'chang ba po/ /rnam bcu dbang ldan che ba po//zhes bya ba la sogs pa'i tshig gis shes pa'i khyad par bstan/ shes rab chen po blo chen ldan/ /shes rab mtshon chen rnam 'joms pa/ /shes rab ye shes me bo che/ /shes rab chen po skad cig la/ /zhes bya bas shes rab kyi khyad par bstan/ ye shes ldan pa yod med shes//bya ba nas/ kun shes kun rig dam pa'o/ /zhes bya ba la sogs pas ye shes kyi khyad par bstan/ grags pa'i bkra shis snyan grags dge /zhes bya ba la sogs pas bkra shis pa dang dge ba'i khyad par bstan/ dbugs 'byin chen po dga' ston che/ /zhes bya ba'i tshig gis dbugs 'byin pa'i yon tan bstan/phra zhing zag med sa bon bral/ /zhes bya ba la sogs pas spangs pa'i khyad par bstan/ ma rig sgo nga'i sbubs 'byed pa/ /zhes bya ba la sogs pas ma rig pa sel ba'i khyad par bstan/ ye shes dbang bskur cod pan can/ /zhes pa dang /chos kyi dbang phyug chos kyi rgyal/ /zhes bya ba la sogs pas dbang gi bdag po dang dbang gi khyad par bstan pa'o/ /tshogs kyi slob dpon tshogs kyi mchog /ces bya ba la sogs pa dang / gnas brtan rgan po skye dgu'i bdag /ces bya ba la/ nam mkha'i bdag po sna tshogs ston//zhes bya ba la thams cad kyi bdag po'am gtso bo'i yon tan gyi khyad par bstan/ 'jig rten gsum na gzhon lus gcig /ces pa dang / sems can kun gyi yid 'phrog pa/ /sdu gu 'jig rten gsum na mdzes/ /zhes bya ba la sogs pas yid du 'ong ba'i khyad par bstan/sems can kun la shas cher chags/ /nam mkha' lta bur chags pa med/ /ces bya ba la sogs pas sems can gyi don byed pa'i khyad par bstan/ de nyid dran pa chen po 'chang / /zhes bya ba'i tshig bzhi pa'i tshigs su bcad pa gcig gis thun mong gi yon tan dang /khyad par gyi yon tan bstan/ sprin dkar dag pa bzhin du dkar/ /'od bzang ston ka'i zla ba'i 'od/ /ces bya ba la sogs pas 'od kyi khyad par bstan no/ /sen mo'i 'od ni shas cher dmar/ /zhes bya ba la sogs pas yan lag gi khyad par bstan/ nor bu chen po 'od chags dpal//zhes bya bas rgyan gyi khyad par bstan/ 'jig rten khams brgya bskyod pa'i bdag /ces bya ba la sogs pas rdzu 'phrul gyi khyad par bstan no/ /skad cig thams cad mngon par rtogs/ /zhes pas mngon par rtogs pa'i khyad par bstan/ 'jig rten slob dpon 'jigs pa med//ces pas rang 'jigs pa med pa'i khyad par bstan/ 'jigs pa ma lus sel ba po/ /zhes pas gzhan gyi 'jigs pa sel ba'i khyad par bstan/ yon tan las/ lag na rdo rje rdo rje 'chang / /'dis ni ngas khyod kyi rgyud la yang gsang sngags thams cad kyi chos nyid byin gyis brlabs so zhes bya ba la sogs pas byin gyis brlab pa'i khyad par bstan/spyod lam thams cad du srung ba dang zhes bya ba'i tshig dang / ma mo bdun gang yin pa la sogs pa'i tshig dang / de'i lus la 'jug par byed do zhes bya ba'i tshig gis bdag gi dbang du 'gro ba'i khyad par bstan to//gzhan yang yon tan gyi khyad par ni le'u de nyid du rgyas par shes par bya'o/ /'bras bu'i khyad par ni/ skad cig gcig gis rdzogs sangs rgyas/ /zhes bya ba la sogs pa'i tshig bzhi tshigs su bcad pa gcig gis/ ston pa gcig pu 'gro ba'i zla//sangs rgyas byang chub ba bla na med/ /ces bya ba la sogs pas 'bras bu'i khyad par bstan to/ /thams cad thams cad khyod la 'dud/ /ces pas thams cad kyi ngo bo yin par bstan to/ /sangs rgyas thams cad skyed pa po/ /zhes bya bas ni rgyu'i khyad par bstan to/ /sangs rgyas sras po dam pa'i mchog /ces bya bas thams cad du dam pa'i khyad par bstan to/ /shes pas sred 'byung skye gnas med/ /ces bya bas ni mngal las mi skye ba'i khyad par bstan to/ /chos las byung ba srid pa sel/ /zhes bya bas ni gzhan gyi 'dod chags la sogs pa sel ba'i khyad par ro//gcig pu sra mkhregs rdo rje'i bdag /ces pas ni sems kyi de kho na nyid kyi don rtogs pa'i khyad par ro/ /skyes ma thag par 'gro ba'i bdag /ces pas ni de'i nus mthu'i khyad par ro/ /nam mkha' las byung rang 'byung ba/ /sangs rgyas thog ma tha ma med/ / ces bya ba la sogs pas dang po'i sangs rgyas kyi khyad par bstan to/ /de yang rig pa ci'i phyir zhe na/ rten bsam gyis mi khyab pa dang / brten pa bsam gyis mi khyab pa dang / yul bsam gyis mi khyab pa'i phyir/ ye shes sku ste rang byung ba/ /zhes bya ba dang / shes pa 'ba' zhig nges gsal ba//zhes bya ba dang / nam mkha' las byung rang 'byung ba/ /zhes bya ba dang / dang po'i sangs rgyas rgyu med phyir/ /zhes pas gzhan la ma ltos pa'i khyad par ro/ /'o na 'bad pa med pa'i skyon mi 'ong snyam du dogs na/ de nam mkha' las byin gyis brlabs las byung ba'i phyir ro//de lta bas na skyon thams cad kyis mi tshugs par shes par bya'o/ /de lta bas na de'i ngo bo/ rnam pa kun ldan rnam pa med/ /ces bya'o/ /zab mo'i don 'di yang sku lnga dang gsum ye shes lnga'am gcig gis zhu ba ni tshig nas bzung ste/ rdzogs pa'i sangs rgyas rnams kyis bshad//ces bya ba yan chad kyis sku dang ye shes kyi ngo bor bsdus par shes par bya'o/ /de yang sku dang ye shes de rtag gam mi rtag /log par rtog pa bsal ba'i phyir/ rtag pa kun ldan zhes smos te/ 'o na mu stegs kyi rtag pa'i skyon mi 'ong ngam snyam du dogs na de bsam par mi bya ste/skad cig ma'i rtag pas stong pas na/ sems tsam pa'i rgyun gyis rtag pa'i skyon mi 'ong ngam zhes dogs nas de bsam par mi bya'o/ /rgyu 'bras la sogs pa'i 'brel pas stong pa'i phyir ro/ /ci yang med do snyam du dogs na/ so so rang rig mi g.yo ba/ / zhes smos so/ /rig pa btang snyoms su dogs na/ rdo rje rgyal po bde ba che/ /zhes bya ba smos so/ /de skye bar 'dzin zhes dogs na/ khong nas 'byung ba skye ba med/ /ces bya ba smos so/ /de brjod pas gnod pa 'ong ngo zhes dogs na/ tshig tu brjod pa spangs pa ste/ /zhes pas so/ /khams gsum du g.yo zhing rtog go zhes dogs na/so so rang rig mi g.yo ba/ /zhes bya ba smos so/ /de skad cig ma du ma yin no zhes dogs na/ rnam par dag pa bdag med chos/ /zhes bya ba smos so/ /de nyid kyang dri ma yin na zhes bya bar dogs na/ mi g.yo rab tu dang ba'i bdag /ces bya ba smos so//de nyid kyang zhi gnas la yod do zhes bya bar rtog na/ gzi brjid chen po 'od gsal ba/ /zhes smos so/ /de nyid rjes su dpag pa'i yul yin no zhes bya bar rtog na/ sangs rgyas kun gyi mngon sum mo/ /zhes bya ba la sogs pa smos so/ /de nyid yul med do zhes bya bar rtog na/bsam gtan bsam bya zhes bya ba smos so/ /de nyid so sor bya bar rtog na/ don gcig gnyis med chos kyi don/ /zhes bya ba smos so/ /de la rnal 'byor med do zhes bya par rtog na/ rnal 'byor can zhes bya na smos so/ /de thams cad ma rgyal lo zhes bya bar dogs na/kun kyang zhes smos so/ /shes rab dang ye shes kyi khyad par med do zhes dogs na/ shes rab ye shes me bo che/ /zhes bya ba la sogs pa smos so/ /de gsang sngags dang rig sngags la sogs pa'i bdag po ma yin no zhes rtog na/ sangs rgyas rnam par snang mdzad che/ /zhes bya ba la sogs pa'i tshig bzhi'i tshigs su bcad pa gcig dang /sngags mchog sngags bdag rig sngags rgyal/ /zhes bya ba smos so/ /de sa bcu'i byang chub sems dpa' la don med do zhes rtog na/ gsang sngags rgyal po don bzhin byed/ /ces bya ba la sogs pa smos so/ /rtog go snyam du rtog na/rnam par mi rtog lhun gyis grub/ /ces bya ba la sogs pa smos so/ /de rtog pa med pas sems can gyi don ji ltar byed ce na/ yid bzhin nor bu chen po 'chang / /zhes bya ba dang / dpag bsam shing chen rgyas pa ste/ /bum pa bzang po che ba'i mchog /ces bya ba smos so//de gzhan gyi dring 'jog go ces bya bar rtog na/ tshul chen gzhan gyi dring mi 'jog /ces bya ba smos so/ /de ltar de rgyu med pa las skye bo zhes rtog na/ tshogs gnyis tshogs ni bsags pa po/ /zhes bya ba smos so/ /de ltar smras pa dang 'gal lo zhes bya bar rtog na/ dus gsum sangs rgyas las byed pa/ /zhes bya ba la sogs pa smos so/ /de nyid ji lta ba yin zhes rtog na/ grub pa mthar phyin 'khrul pa med/ /nor pa thams cad rnam par spangs/ /zhes bya ba la sogs pa'o/ /de nas/ ye shes las byung khyod la 'dud/ /ces bya ba la sogs pa smos so//de nyid byin rlabs dang ldan par bya ba'i phyir/ sarba d+harma zhes bya ba nas brtsams te/ d+harma d+hA tu dz+nyA na gar+b+ha A/ zhes bya ba'i bar gyis zab pa dang rgya che ba'i bar du sku dang ye shes kyis bsdus pas dus gsum gyi sangs rgyas ngo bo rdo rje 'chang ba dpag tu med pa'i rnam par dag pa lam du bstan pa'i phyir/'di ni rnam dag legs pa'i lam/ /zab cing yangs la rgya che ba/ /zhes smos so/ /rgyud 'di thabs dang shes rab dang ma 'brel lo snyam du rtog na/ rgyud chen sgyu 'phrul dra ba las/ rdo rje 'chang chen gsang sngags 'chang / /zhes bya ba la sogs pa smos so/ / de rnal 'byor ma'i rgyud la sogs pa dang mtshungs so snyam du rtog na/ de las khyad par du bstan pa'i phyir/ stabs po che la thabs che ba/ /shes rab pha rol phyin pa'i mtha'/ /shes rab kyis ni de nyid thob/ /shes rab shes bya'i bdag po mchog /ces bya ba smos so/ /de ni thabs dang shes rab kyi khyad par ro//de thabs dang shes rab gnyis su rtog na/ gnyis med gnyis su med par ston/ /zhes pas so/ /de mthar thug pa ma yin no snyam du rtog na/ yang dag mtha' ste yi ge med/ /ces bya ba la sogs pa smos so/ /de rgyun chad do snyam du rtog na/ sangs rgyas sprul pa'i rgyud 'chang ba//zhes bya ba la sogs pa smos so/ /sprul pa'i skus sems can rnams kyi ngan song mi sbyang ngo snyam du rtog na/ ngan song thams cad rnam par sbyong / /sems can thams cad rab grol byed/ /ces bya ba la sogs pa smos so/ /de 'jig rten dang 'jig rten las 'das pa'i gar mi byed do zhe na/zhi khro rnam pa gnyis kyi skus gar dang bgegs tshar gcad pa'i phyir dang / stang stabs dang gar gyis gdul ba'i phyir/ dpal ldan blo dang sgeg par ldan/ /zhes bya ba nas brtsams te/ tshangs pa'i yul sa rtse nas gnon/ /zhes bya ba'i bar gyis gar dngos su bstan nas stang stabs shugs kyis shes par bya'o//rgyud 'di la dkyil 'khor med do snyam na/ dpal ldan rgyu skar dkyil 'khor can/ /zhes bya ba dang / sprul pa'i 'khor lo sna tshogs 'chang / /zhes bya ba la sogs pa smos so/ /phyag rgya med do snyam du rtog na/ /phyag rgya bzhi po'i don ston pa/ /zhes smos so/ /dbang bskur dbang ngo snyam du rtog na/ rdo rje rin chen dbang bskur dpal/ /rin chen kun bdag dbang phyug che/ /zhes bya ba la sogs pa smos so/ /dam tshig med do snyam du rtog na/ dam tshig chen po de nyid mkhyen/ /zhes bya ba smos so//sa dang pha rol tu phyin pa dang 'gal lo snyam du rtog na/ sbyin bdag chen po gtso bo ste/ /zhes bya ba la sogs pa dang / pha rol phyin bcu thob pa ste/ /zhes bya ba dang / sa bcu la ni gnas pa po/ /zhes bya ba la sogs pa smos so/ /'di ni rgyud 'di sgro skur dang bral ba nyid du bstan pa'i phyir yon tan gyi le'u las/chos nyid dang bral ba'i phyir gnyis su med pa'i chos nyid do/ /sgro btags pa med pa'i phyir de bzhin nyid kyi rang bzhin no zhes bya ba la sogs pa smos so/ /lha'i grangs nges so zhes bya bar rtog na/ ming gi don gang yang rung ba re re nas kyang zhes bya ba la sogs pa smos pa dang /yang na bdag nyid kyi lus las spros te/ phyogs bcur sprul pa sna tshogs 'gyed/ /ces bya ba dang / bye ba dpag med 'gyed pa po/ /zhes bya ba dang / rigs gsum la ni rnam par gzigs/ /zhes bya ba la sogs pas sangs rgyas dang rjes su mthun pa'i sku spro ba'o//dmigs pa med pa'i don zhes bya ba'i don to/ /de ltar na rgyud kyi dgongs pa thams cad rdzogs par bstan pa'i phyir/ med pa las byung khyod la 'dud/ /ces bya ba'i don to/ /de ltar rgyud kyi bya ba yongs su rdzogs pa la 'khor mos pa can bstan pa'i phyir/dga' zhing mgu nas thal mo sbyar/ /zhes bya ba la sogs pa smos so/ /thun mong ma yin pa bstan pa'i phyir/ sangs rgyas rnams kyi yul 'di ni/ /zhes bya ba la sogs pa smos so/ /de shAkya thub pa kho nas bshad do snyam du rtog na/ rdzogs pa'i sangs rgyas rnams kyis bshad//ces bya ba la sogs pa smos so/ /de ltar rgyud kyi bya ba rdzogs nas/ de bshad pa ni rnam pa gnyis te/ rmongs pa ngo mtshar skyed pa dang / mkhas pa yid dga' bar byed pas so/ /de la rmongs pa ngo mtshar skyed pa bshad pa ni/ drang don gtso che ste/ tshig la rton la don la mi rton pa dang /rnam par shes pa la rton la/ ye shes la mi rton pa dang / gang zag la mi rton la/ chos la mi rton pa dang / de lta bu'i gang zag bcos ma la dga' ba la phyi ltar bshad pa dang / nang ltar bshad pa la sogs pa mtshan ma dang bcas pas du ma'i sgo nas mngon par dga'o//brtag mi bzod pa ni don du mas blo 'phrog pa/ yid brtan du mi rung pa/ phyis 'gyur ba yang dag pa'i ye shes mi skye ba/ shes rab rnam gsum mi 'brel ba/ bcos ma'i bde ba la dga' ba/ btsan thabs kyi thabs kyis 'jug pa/ phyi pa mu stegs dang khyad par med pa/rigs pas gnod pa/ lung ltar bcos pa/ de lta bu'i gang zag ni dngos po'i gdon gyis zin par rig par bya'o/ /de la mkhas pa yid dga' bar byed pa'i bshad pa ni/ rjes su gzung ba ni sngar bstan pa yin no/ /rgyud kyi bshad pa ni rdzogs rim ltar bshad pa dang / bskyed rim ltar bshad pa'o/ /de yang tshig gi skabs sa bon yod pa dang / med pa'i skabs zhes pa ni mkhas pa yid dga' bar byed pa'i bshad pa'o/ /rgyud 'di nyid kyi bshad pa ni/ rdzogs pa ye shes kyi sku dang ye shes ji ltar gnas pa dang / de'i yon tan gyi nus mthu ji ltar byung ba dang /de'i sgrub pa pos ji ltar nyams su blang ba'o/ /sangs rgyas kyi mdzad pa nyams su ma blangs na 'bras bu rdo rje'i theg pa zhes bya ba mi 'grub ste/ skyon mang du 'dus pa'i phyir te/ gong du sangs rgyas kyi rgyu dang ye shes de'i yon tan sangs rgyas kyi chos ma 'dres pa bco brgyad la sogs pa'o//dran pa nye bar gzhag pa la sogs pa byang chub kyi chos sum cu rtsa bdun/ mngon par shes pa drug /rjes su dran pa drug /shes pa bcu la sogs pa nang gi yon tan thams cad dang / sku'i yon tan mtshan dang dpe byad la sogs pa/ gsung gi yon tan tshangs pa'i dbyangs la sogs pa/de dag thams cad ni mkhas pas mdzad cing thun mong gi 'grel pa las shes par bya'o/ /'di ni sgrub pa gtsor byas nas sgrub pa'i dbang du byas te bris pa'o/ /gzhan yang slob dpon kha cig gis tshig re re la lha'i mtshan du sbyar ba yang yod de/ de ni shin tu 'khrul ba'o//ci'i phyir zhe na/ chos mthun tsam yang med pa'i phyir ro/ /rang bzhin la dgongs nas she na/ de ltar na chos thams cad kyang lha'i rang bzhin no/ /da ni gong du bshad pa'i sku dang ye shes kyi bdag nyid de sgrub pa pos nyams su blangs na don 'di yin te/yan lag bcu ldan sgrub pa pos/ /zhes bya ba la sogs pa smos te/ de la dang po byin gyis brlab pa'i yan lag ji lta bu zhe na/ de lung med do snyam du sems na/ lag na rdo rje rdo rje 'chang / /'di ni ngas khyod kyi rgyud la gsang sngags thams cad kyi chos nyid kyi byin gyis brlabs so zhes bya ba la sogs pa smos so//sku dang ye shes kyi yan lag ni/ sangs rgyas sku lnga'i bdag nyid can/ /khyab bdag ye shes lnga yi bdag /ces bya ba la sogs pa smos so/ /gzhi'i yan lag la/ dang po srung ba'i 'khor lo'i yan lag ni/ rdo rje hUM ste hUM zhes sgrogs/ /mtshon du rdo rje'i mda' thogs pa//zhes bya ba la sogs pa smos so/ /tshogs bsags pa'i yan lag ni/ 'gro ba'i bla ma ston pa po/ /dam tshig chen po de nyid mkhyen/ /zhes bya ba la sogs pa smos so/ /ye shes rten gyi yan lag ni/ lus med lus de lus kyi mchog /ces bya ba la sogs pa smos so/ / ye shes dngos te yan lag ni/ /'gro ba'i mar me ye shes sgron/ /zhes bya ba la sogs pa smos so/ /des ni tshogs kyi yan lag go/ /lus rnam par dben pa ni ye shes kyi rten dang mtshungs so/ /ngag rnam par dben pa ni/ a ni yig 'bru kun gyi mchog /khong nas 'byung ba skye ba med/ /ces bya ba la sogs pa smos so//sems rnam par dben pa ni/ rnam rigs sna tshogs gzugs don can/ /sems dang rnam shes rgyud dang ldan/ /zhes bya ba dang / dngos po kun gyi rang bzhin 'dzin/ /gzi brjid chen po 'od gsal ba/ /zhes bya ba la sogs pa smos so/ /lta ba'i yan lag ni lta ba'i ngo sprad pa la bya'o//de yang cis mngon zhe na/ shes dang shes bya'i bdag po mchog /ces bya ba dang / rnam par dag pa bdag med chos/ /zhes bya ba dang / gnyis med gnyis su med par ston/ /zhes bya ba dang / thig le chen po yi ge med/ /ces bya ba la sogs pa smos so/ / bsgom pa'i yan lag ni bsgom pa'i ngo sprad de/ rlung ji snyed cig yod kyang rtsa ba'i rlung rnam pa lngar 'dus te/ de yang srog rtsol gnyis su shes par bya'o/ /de yang sngags su ngo sprad de/ de'i man ngag gis btu ba 'di yin te/ drug pa'i gnyis pa ra dang / bdun pa'i bzhi pa ha dang /de la thig le bzhi pa'o/ /de ni chags pa'i gsang sngags so/ /skye ba'i sngags ni/ dbyangs yig dang po a dang / bdun pa'i bzhi pa ha dang / de la thig le bzhi pa'o/ /bzhi pa'i rang sngags ni bdun pa'i bzhi pa ha dang / de la thig le gnyis gnas pa'o/ /de la khro bo'i rang sngags ni/bdun pa'i bzhi pa ha dang / dbyangs yig dbus ma sha sbyin pa'o/ /rang byung gi rang sngags ni bdun pa'i gsum pa dang / drug pa'i bzhi pa sbyin pa'o/ /de yang ngo sprad gsum ni thams cad sngags su ngo sprad/ sngags rlung du ngo sprad/ rlung sems su ngo sprad/ sems 'od gsal du ngo sprad do/ /lta stangs kyi yan lag ni mi mngon zhe na/ rin chen gtsug tor cher gzigs nas/ /zhes bya ba la sogs pa smos so/ /brda'i yan lag ni lus dang ngag go/ /brda ni rig pa ste/ de yang cis mngon zhe na/ bdag rig gzhan rig thams cad pa/ / zhes bya ba la sogs pa smos so/ /bsdu ba'i yan lag ni tshig la bsdu ba dang / don la bsdu ba'o/ /tshig la bsdu ba ni yi ge a la bsdu ba'o/ /de yang cis mngon zhe na/ a ni yig 'bru kun gyi mchog /ces bya ba la sogs pa smos so/ /don la bsdu ba ni/ thams cad ye shes kyi de kho na nyid la bsdu ba ste/de yang cis mngon zhe na/ dngos po kun gyi rang bzhin mchog /ces bya ba dang / thams cad thams cad khyod la 'dud/ /ces bya ba la sogs pa dang / yang dag mtha' ste yi ge med/ /ces bya ba dang / shes rab pha rol phyin pa'i mtha'/ /zhes bya ba dang /yang dag mtha' la rnam par gnas/ /zhes bya ba la sogs pa smos so/ /de ltar na 'phags pa 'jam dpal 'di ni dus gsum gyi sangs rgyas thams cad kyi dus med pa dang ldan pa'i sangs rgyas dang byang chub sems dpa' thams cad 'dus te/ gshegs nas chos kyi sgo thams cad ston par mdzad do sku yang ston to//de'i rgyud la yang dag par byin gyis rlob po zhes bya ba la sogs pa sbyar ro/ /rtse gcig tu bsgom zhes pa ni bla ma'i man ngag gis bskyed rim dang / rdzogs rim ji lta ba bzhin du bstan par bya'o/ /ji ltar bstan zhe na/ dam tshig ji lta ba bzhin du bstan par bya zhes gsungs pas na/sems bskyed pa dang / dbang bskur ba la sogs pa shes par bya'o/ /de yang dbang bskur ba ni rnam pa gnyis te/ rjes su gzung ba'i dbang dang / chos las rnam par rgyal ba'i dbang ngo / /de la rjes su gzung ba'i dbang ni bum pa'i dbang la sogs pa'o//de la chos las rnam par rgyal ba'i dbang ni/ chos kyi dbang phyug chos kyi rgyal/ /zhes bya ba la sogs pa smos so/ /dbang bskur ba'i rten ni/ rnam rig sna tshogs gzugs don can/ /rnam shes sna tshogs rgyud dang ldan/ /zhes bya ba'i tshig dang / sa yi snying po 'gro ba 'dzin//zhes bya ba'i tshig gis rten gyi gang zag bstan pa'o/ /de la dang po lta ba bstan pa ni/ dngos po kun gyi rang bzhin 'dzin/ /dngos po kun gyi rang bzhin mchog /ces bya ba'i tshig dang / rnam pa kun ldan rnam pa med/ /ces bya ba'i tshig dang / rnam par dag pa bdag med chos//de ni sbyor ba'i yan lag dang pos dbang bskur ro/ /de la lung gi mtha' mar ni dza'i mtha' can gyi rgyud phyi ma las/ so sor sdud dang bsam gtan dang / /zhes bya ba la sogs pa'i tshig gis so/ /'di nyid kyi lung gis zin pa ni/ mchod pa chen po 'dod chags che//zhes bya ba la sogs pa'i tshig gis rab tu bsngags te/ de yang 'dod pa can gzugs la sogs pa lnga ste/ de la dga' ba ni sems can thams cad do/ /sems can dang zhes bya bas ni yid kyi yul chos kyang bsdu'o/ /gzugs la sogs pa re re la gsum gsum du shes par bya'o//'dod chags che zhes bya ba dang / chos kyi dbang phyug chos kyi rgyal/ /zhes bya ba'i tshig gis sems kyi ngo bo mi rtog pa'i nus pa'i mthu can du bya zhes bya ba'i don to/ /de la dus ji tsam zhe na/ shes rab chen po skad cig la/ /chos kun khong du chud pa ste/ /zhes bya ste bla ma'i byin gyi rlabs kyis so//de la dang por dbang bskur ba ni/ slob ma'i rgyud sbyang ba la sogs pa ste/ zhal gyi gdams ngag las shes par bya'o/ /de la gong du bstan pa'i brda'i yan lag ni skabs der bstan pa ste mkha' 'gro ma'i rgyud las shes so/ /skabs de ru/ bsam gtan bsam bya blo ldan mchog /so so rang rig mi g.yo ba/ /mchog gi dang po sku gsum 'chang / /sangs rgyas sku lnga'i bdag nyid can/ /khyab bdag ye shes lnga yi bdag /ces bya ba la sogs pa smos te/ de rnams kyis khyad par gyi man ngag bstan to/ /de nas bsam gtan gyi yan lag bstan te/bsam gtan ni don rab 'byed pa'i bsam gtan dang / mi rtog pa tsam gyi bsam gtan dang / ngo bo nyid kyi bsam gtan dang / rjes su dran pa'i bsam gtan dang / thams cad mkhyen pa dang rjes su mthun pa'i bsam gtan no/ /de yang cis mngon zhe na/ bsam gtan yan lag kun shes shing / /zhes bya ba la sogs pa smos so/ /srog rtsol ni bsgom pa ngo sprod pa'i skabs su shes par bya'o/ /ting nge 'dzin gyi yan lag ni/ yang dag pa'i ting nge 'dzin dang / yang dag pa ma yin pa'o/ /yang dag pa ma yin pa ni 'dir ma smos so//yang dag pa ni las dang po pa dang mthong ba'i lam la sogs pa bsdus pa'o/ /de la rjes su dran pa ni/ rgyud gzhan du ni slob dpon gyi don gzhan du yang bshad do/ /kho bos ni/ bsam gtan bsam bya blo ldan mchog /so so rang rig mi g.yo ba/ /zhes bya ba dang / mi g.yo rab tu dang ba'i bdag /ces bya ba smos te/ de cir 'gyur zhe na/ chos kun mngon par rtogs pa ste/ /zhes bya ba smos te/ 'di ni rnam dag legs pa'i lam/ /zhes bya ba ste 'di mngon par rtogs pa'i lam du sbyar bar bya'o/ /de yang dang po ji lta bu zhe na/ dang po du ba lta bu ste/ gnyis pa smig rgyu lta bu dang / /gsum pa srin bu me khyer te/ /bzhi pa mar me lta bu yin/ /lnga pa sprin med mkha' ltar brtag /ces rgyud gzhan gyi dbang pos kyang gsungs la/ de ni dang po'i rtags su shes par bya'o/ /de yang bye brag tu phye nas bshad pa ni/ skad cig thams cad mngon par rtogs//zhes bya ba ste/ de nyid rnam pa bcu drug rig /ces smos te/ de las gdams ngag tu sbyar na las dang po pa'i snang ba bzhi dang / cung zad ye shes la dbang ba'i snang ba bzhi dang / sor chud pa'i snang ba bzhi dang / ye shes la gzhol ba'i snang ba bzhir shes par bya'o//rnam pa nyi shu byang chub 'chang / /zhes bya ba la sogs pa ni bla ma dam pa'i gdams ngag gis sbyar bar bya'o/ /des cir 'gyur zhe na/ rnam pa sangs rgyas kun rig mchog /ces bya ba dang / longs spyod rdzogs pa sku yi rgyal/ /zhes bya ba la sogs pas de'i rdzogs pa'i 'bras bu bstan to//de la bar ma dor yan lag ni/ shes pa srid 'byung skye gnas med/ /ces bya ba la sogs pa smos te/ bar du lung gis ngos zin par shes par bya'o/ /bar ma do ni du mar gsungs mod kyi 'chi ba'i bar ma do dang / srid pa'i bar ma do la sogs pa'i man ngag gis shes par bya ste/de la re zhig gang zag ni gnyis te/ brtson 'grus can dang le lo can gyi gang zag go/ /de la brtson 'grus can gyi gang zag la chos rnam pa brgyad de/ dge ba'i bshes gnyen gyis zin pa dang / de'i gzhung ji lta ba bzhin du lung mnos pa dang /sngon sbyangs pa'i shes rab dang ldan pa dang / yang dag pa'i don go zhing yid ches pa dang / bdud kyi las kyis mi bzlogs pa dang / 'jig rten gyi bya ba mchil ma bzhin du dor ba dang / brtson pa mi dor ba dang / rlung sems la dbang thob pa'o/ /de yang sbyor ba rnam pa bzhi ste dang po srung ba'i 'khor lo/gnyis pa de kho na nyid/ gsum pa rjes su rig pa dang / lung bstan pa'i rnal 'byor ro/ /bzhi pa rnam pa thams cad mkhyen pa'i sems so/ /de la dang po rmi lam gyi gdams ngag dang / de'i zhugs pa'i man ngag rjes su dran par shes par bya'o//de yang dang po rmi lam bzlog /des gnyid log /de ni ye shes mtshams sbyor ba'i yan lag go/ /des 'chi ba'i bar ma do yang shes par bya'o/ /brtson 'grus can gyi gang zag ni sgyu lus dang 'ja' tshon zab pa'i brdas byang chub kyi sems kyi rang bzhin des 'od gsal ba'i gnas 'pho'o zhes bya ba'i don to//de'i shugs kyis gzhan yang shes par bya ba'i phyir le lo can gyi gang zag ni srid pa bar ma dor las smin pa la sogs pa shes par bya'o/ /de'i mngon par rtogs pa gzhan yang sa dang chu dang me dang rlung rdo rje dbyings kyi dbang phyug ma gcig la gcig gis 'jus par rang bzhin gyis mi rtog par skye ba 'dzin pa'i man ngag gis shes par bya'o//de yan chad kyis bar do'i yan lag go/ //da ni rgyud dkrugs pa'i bdag nyid kyi man ngag bla ma dam pa'i man ngag gis sbyar ba ni/ sangs rgyas thams cad skyed pa po//zhes bya ste don dam pa byang chub kyi sems la bya la/ skyes ma thag tu 'gro ba'i bdag /ces bya ste de ma thag tu bden pa'i tshig don mthong ba zhes bya ba'i don to/ /bden pa'i don ji lta bu zhe na/ gzi brjid chen po 'od gsal ba/ /zhes bya ba smos so/ /de nyid sar chud pa'i byang chub sems dpa' dang 'dra bas na/sangs rgyas sras po dam pa'i mchog /ces bya ba smos so/ /de nyid srid pa'i skye ba mi len pas na/ shes pa srid 'byung skye gnas med/ /ces bya ba smos so/ /byang chub kyi sems de nyid rdo rje dang 'dra bas na/ gcig tu sra mkhregs rdo rje'i bdag /ces bya ba smos so/ /de nyid la lung gi dbang po bstan pa'i phyir ro/ /rdo rje rtse mo las/ snying po brtan zhing khong stong min/ /mi chod mi phyed mtshan nyid de/ /mi shigs pa dang mi nyams pa'i/ /stong nyid rdo rje zhes brjod do/ /de nyid stong pa nyid kho nar rtog na de bsal ba'i phyir/ rdo rje nyi ma snang ba che//rdo rje zla ba dri ma med/ /ces bya ba la sogs pa smos so/ /de ltar rtog pa'i gang zag gis pha rol tu phyin pa dang sbyar na/ 'dod pa'i yon tan lnga la sems nyid la byin pas sbyin pa/ lus ngag yid gsum sems nyid la mnyam par bzhag pas tshul khrims de nyid las mi 'da' bas dam tshig yang dag pa'i ye shes la bsten pas na bsam gtan/zab mo'i don la mi skrag pas na bzod pa/ rgyun gyi rnal 'byor gyi bsgom pas na brtson 'grus/ rang bzhin rnam par dag pa'i lta ba shes pas na shes rab/ de lta bu'i stobs kyis thams cad zil gyis gnon pas na stobs/thabs sna tshogs mnga' bas na thabs kyi pha rol tu phyin pa/ smon lam la mngon par 'du mi byed pas na smon lam gyi pha rol tu phyin pa/ rtog pa 'bigs pa'i ye shes mnga' bas na ye shes kyi pha rol tu phyin pa'o/ /de lta bu'i pha rol tu phyin pa dang sbyar na sa nas sar yongs su 'phen pa ste/'phen byed kyi 'phangs nas rdzogs byed kyi/ rnam pa nyi shu byang chub 'chang / /zhes bya bar rdzogs so/ /rdzogs pa ni gong du sku dang ye shes kyi ngo bor bshad pa'i don to/ /sangs rgyas zhes bya ba ni/ ji lta ba yod pa dang / ji snyed pa yod pa ma lus pa thugs su chud cing gnyis su med par ji lta bar mkhyen cing /rnam par rtog pa thams cad kyi mtshan ma nub pa/ skye ba med/ rang bzhin gyis rnam par dag pa/ sgro 'dogs dang skur pa thams cad dang bral ba'i de bzhin nyid la ngo bo nyid kyis stong pa nyid ces bya'o/ /yang dag pa'i mtha' zhes bya la chos kyi sku zhes bya/ming du ma'i sgo nas bos pa de la ni/ med pa las byung khyod la 'dud/ /ces bya ste longs spyod rdzogs pa'i sku dang sprul pa'i sku la sogs pa thams cad de las byung ba'i phyir ro/ /de ltar na sku dang ye shes kyis thams cad ma lus par bsdus so zhes bya ba'i don to//de yang cis mngon zhe na/ dngos po kun gyi rang bzhin mchog /dngos po kun gyi rang bzhin 'dzin/ /skye med chos te sna tshogs ston/ /zhes bya ba dang / mi 'gyur kun 'gro khyab pa po/ /zhes bya ba la sogs pa smos so/ /sangs rgyas kyi yon tan stobs bcu dang shes pa bcu la sogs pa/sangs rgyas kyi sku'i yon tan mtshan dang dpe byad la sogs pa/ sangs rgyas kyi gsung gi yon tan tshangs pa'i dbyangs la sogs pa/ sangs rgyas kyi yon tan ma 'dres pa bco brgyad la sogs pa ma lus pa rgyas par gzhan nas gsungs pas gzhan du blta bar bya'o//kho bos ni sgrub pa gtsor byas pa kho na'i dbang du bris kyis tha snyad la dga' ba'i dbang du ma byas so/ /rtog ge pa rnams kyi spyod yul ni ma yin no/ /de ci'i phyir zhe na/ so sor rtogs pa'i shes rab kyi mthu rdug pa'i phyir ro/ /des na rtog ge ba nga rgyal can rnams la bstan par mi bya'o//'o na ji lta bu la bstan zhe na/ sbyangs pa'i las 'phro yod pa dad pa dang ldan pa/ dam tshig srog bzhin du bsrung ba/ bla ma dam pa'i bka' la yid ches zhing tshad mar 'dzin pa la sogs pa'i yon tan dang ldan pa rnams la bstan par bya'o/ /de las gzhan du bstan na log par ltung ba'i gnas su 'gro'o//des na rigs kyi bu'am rigs kyi bu mo gsang sngags kyi sgo nas spyod par 'dod pa rnams kyis po tir bris la bklag pa'am/ tshul bzhin du yid la bya ba'am/ de kho na nyid la rtse gcig tu bsgoms te/ de lta bu'i bye brag dang ldan pa ni yon tan dpag tu med pa thob po zhes bya ba sangs rgyas kyis rab tu bsngags te/des na 'di gzung bar bya'o/ /dam pa'i chos 'di la mdo sde zhes bya bar yang gdags te/ zab mo'i don mdor bsdus nas ston pa'i phyir ro/ /rgyud ni 'di nyid la rab tu bsngags te/ rgyud chen sgyu 'phrul dra ba la sogs pa dang /rgyud kun gyi ni bdag po mchog /ces bya ba la sogs pa smos so/ /ci'i phyir rgyud ces bya zhe na/ bred chags pa'i don gyis na rgyud de ras bal gyi thag pa bzhin no/ /dkrugs pa'i don gyis na rgyud de thags lta bu'o/ /yongs su rdzogs pa'i don gyis na rgyud de dpag bsam gyi shing rgyas pa bzhin no//de la breng chags pa'i rgyud ces bya ba ni sangs rgyas kyi gdung rgyud 'dzin pa'i don to/ /dkrugs pa'i don gyis na thags rgyud ces bya ba ni bla ma dam pa la rag las pa'i don to/ /yongs su rdzogs pa'i phyir na rgyud de bya ba ma lus pa'i don to/ /des na log pa med par smra bar bya'o//ka tak+Sha la sogs pa'i sgra/ /'jig rten bstan bcos la med phyir/ /rtog can rnams ni rmongs pa skyed/ /des na 'di ni dkrugs pa'o/ /rgyud kyi bdag pos gsungs pa'i bka'/ /gang zag phal gyi yul min zhing / /mkhas pa rnams kyis mang du byas/ /'on kyang de don mi rtogs so// mkhas pa byang chub sems dpa' yis/ /lung bstan thob nas bsdus pa bris/ /'di la brten nas sems can rnams/ /sku dang ye shes thob par shog /'phags pa 'jam dpal gyi dka' 'grel rat+na A ka ra gup+tas mdzad pa rdzogs so// //rgya gar gyi mkhan po kA la tsa kra dang / bod kyi lo tsA ba dz+nyA na gar+b+ha dang /