CLOSE WINDOW

D2532
བོད་ཡིག

@##/ /rgya gar skad du/ nA ma saM gI ti br-it+ti/ bod skad du/ mtshan yang dag par brjod pa'i 'grel pa/ bcom ldan 'das ngag gi dbang phyug la phyag 'tshal lo/ / yod med rtog pa'i dra ba las/ /nges grol dri ma med zhi ba/ /phyag na ral gri po tis mtshan/ /'jam pa'i mgon la bdag phyag 'tshal/ /de nas zhes bya ba la sogs pa la/ de nas zhes bya ba'i sgra ni gang gi phyir bkra shis pa la sogs don mang po la 'jug mod kyi/'on kyang de ma thag pa'i tshig tu blta'o/ /bsod nams dang ye shes kyi mtshan nyid can gyi dpal gang la yod pa de ni dpal ldan no//rdo rje 'chang zhes bya ba ni mtshan no/ /dka' bas 'dul ba'i phyir gdul dka' ba ste/ dbang phyug chen po la sogs pa'o/ /de rnams 'dul bar mdzad pas na gdul dka' 'dul ba'o//de lta mod kyi gdul dka' ba ni sred med kyi bu la sogs pa gzhan dag kyang yod do zhe na/ de'i phyir mchog ces bya ba gsungs te/ gang gi phyir sred med kyi bu la sogs pa rnams kyang gdul dka' 'dul ba yin te/de lta mod kyi de rnams kyis 'dul ba ni lha ma yin 'khor la sogs pa sems can ma rungs pa rnams 'joms pas na gsod par byed par 'dod pa yin la/bcom ldan 'das phyag na rdo rjes gdug pa rnams 'dul ba ni dul bar mdzad par bzhed pas na de'i phyir 'di ni mchog ste dam pa'o/ /'jigs pa thams cad bral bas na dpa' bo'o/ /rnam pa thams cad du 'jig rten gsum las rnam par rgyal bar gyur pas na 'jig rten gsum las rgyal lo//rdo rje rigs kyi bdag por gyur pas na rdo rje dbang phyug ste/ mi bskyod pa'i rigs kyi gtso bo zhes bya ba'i don to/ / gsang ba'i rgyal po yin pas na gsang ba'i rgyal po ste/ de yang de rnams kyi gsang sngags kyis bkug nas bka' nyan pa nyid du 'jog pa'i phyir ro/ /pad+ma rgyas pa dang 'dra ba'i yid 'phrog pa'i spyan gang la yod pa de ni pad+ma rgyas pa'i spyan mnga' ba'o//pad+ma yang yin la rgyas pa yang de nyid yin pas na pad+ma rgyas pa ste/ de dang 'dra ba'i zhal gang la yod pa de ni pad+ma rgyas 'dra'i zhal mnga' ba'o/ /sems can 'dul ba rnams la gzigs nas khro ba dang bcas par gyur pas na rang gi lag ste/de nyid kyi phyag gis rdo rje mchog yang dang yang du gsor zhing bskor bar mdzad pas na rang gi lag gis zhes bya ba la sogs pa gsungs so/ /de ltar rdo rje 'chang gi khyad par gsungs nas/ khro gnyer rim par zhes bya ba la sogs pas ni de'i 'khor gsungs pa yin te/khro gnyer rim par ldan zhes bya ba ni de'i rigs su gtogs pa'i lag na rdo rje la la zhig dang / de la sogs pa bgrang ba las 'das pa mtha' yas pas de rnams dang lhan cig tu phyag byas zhes bya ba dang sbyar ro/ /ji lta zhig ce na/ dpa' bo zhes bya ba la sogs pa gsungs te/rdo rje 'chang ba dang 'dra bar 'jigs pa kun dang bral bas na dpa' zhing gdul dka' 'dul ba'o/ /'jigs su rung dang dpa' byad can/ /zhes bya ba'i nyams dang ldan pas 'jigs su rung dang dpa' byad can te/ de rnams/ rdo rje rtse mo rab 'phro ba/ / rang gi lag gis gsor byed pa'o/ /sems can rnams la dmigs pa'i snying rje chen po dang / shes rab dang thabs kyi bya bas sangs rgyas kyi 'phro ba byas te/ 'gro ba'i don mdzad pas na 'gro don byed pa'o/ /de nyid kyis 'bras bu 'byung bas na mchog go/ /dga' mgu rangs pa'i bsam pa can//zhes bya ba 'dir yang 'gro ba'i don byed pa zhes bya bar sbyar te/ bsam pa zhes bya ba'i sgra ni sems la bya la/ de bas na dga' ba dang mgu ba dang rangs pa'i sems kyis 'gro ba'i don byed pa'o/ /de la gdul dka' ba'i sems can rnams kyi mos pa mthong bas na sems dga' ba'o//ji skad du bstan pa'i chos rnams bstan pa na lan cig gis 'dzin pas na sems mgu ba'o/ /de'i don rtogs pas na rangs pa'o/ /gang gi phyir phyi rol pa'i 'gro ba'i don byed pa rnams ni sems kyi bsam pa'i dbye ba lus sems cha 'dra ba de lta bu dang 'dra ba'i sems skye bar 'gyur gyi bcom ldan 'das de'i thugs gcig pa de lta ma yin te/sems can gdug pa rnams gzigs nas khro bo'i gzugs kyi lus dang ldan par mdzad kyi rang bzhin khro bas ni ma yin gyi/ thugs rje chen po dang ldan pa'i ngo bo nyid yin pa'i phyir ro//'tshang rgya ba'i phyir byed pa ni sangs rgyas kyi phrin las te/ pha rol tu phyin pa la sogs pa yongs su rdzogs pa'o/ /de byed pas na sangs rgyas phrin las byed pa'o/ /sangs rgyas phrin las byed pas ye shes kyi dbang phyug dang ldan pas na mgon po'o/ /lus btud pa ni lus btud pa dang ldan pa ste/de rnams dang lhan cig tu bcom ldan 'das la phyag byas zhes bya bar sbyar ro/ /bcom ldan 'das ji lta bu zhig ce na/ de bzhin gshegs pa zhes bya ba la sogs pa gsungs te/ ji tsam du rtogs par bya ba khong du chud pas de bzhin gshegs pa'o/ / dngos po thams cad las kun nas mngon par rdzogs pa'i sangs rgyas te/ de la rab tu dad pas phyag 'tshal nas thal mo legs par sbyar bar byas nas ni/ spyan sngar mdun du 'dug ste 'di skad ces gsol zhing smra bar gyur to/ /khyab bdag ces bya ba ni bod pa'o/ /bdag la sman pa zhes bya ba bdal phan pas na bdag la sman pa ste/'tshang rgya ba de nyid thob pa'i don du bdag la phan pa'i phyir mtshan yang dag par brjod pa bshad du gsol zhes 'og nas bshad pa'i tshig thams cad la sbyar bar bya'o/ /bdag gi don ni bdag nyid kyi don te/ 'gro ba'i don bya ba de'i don du'o/ /bdag la thugs brtse ba ni bdag la rjes su brtse ba ste de'i phyir ro//sgyu 'phrul dra bas mngon rdzogs pa'i/ /byang chub ci nas bdag thob mdzod/ /ces bya ba 'dis ni nyan thos kyi byang chub la sogs pa las dga' bar ston te/ sgyu 'phrul dra ba'i rgyud chen po'i sngags dang phyag rgya'i rim pas gang mngon par byang chub pa de ci nas bdag gis thob par mdzad pa dang /de bzhin du sems can rnams la phan pa'i phyir mtshan yang dag par brjod pa bshad du gsol zhes pa'o/ /ji lta bu'i sems can rnams kyi phyir zhe na/ nyon mongs pas ni sems dkrugs shing / mi shes 'dam du bying ba yis//zhes bya ba gsungs te/ nyon mongs pa ni 'dod chags la sogs pa ste/ de rnams kyis sems dkrugs pa dang mi shes pa'i ma rig pa'o/ /de nyid 'dam ste der bying ba'o/ /de lta bu'i sems can rnams la sman pa'i nyon mongs pa dang / mi shes pa las bzlog pa'i phyir te/nyon mongs pa dang mi shes pa ldog par gyur na bla na med pa'i 'bras bu thob par 'gyur ro/ /de bas na de thob par bya ba'i phyir te/ bla na med pa'i 'bras bu sangs rgyas pa nyid thob pa'i phyir ro/ /rdzogs pa'i sangs rgyas ni snga ma bzhin no/ /skal ba phun sum tshogs pa dang ldan pas na bcom ldan 'das so//'gro ba rnams la dam tshig ston pas na 'gro ba'i bla ma'o/ /sems can rnams la theg pa gsum rjes su ston pas na ston pa po'o/ /dam tshig chen po zhes bya ba'i sgra ni sa ma ya zhes bya ba'i sgra ni dus la zer te/ de'i phyir bcom ldan 'das ni dus mkhyen pa'o//de yang 'di'i tshe ni sems can blo yongs su smin pa rnams la chos ston par mdzad do/ /'di'i tshe na mi mdzad do zhes bya ba mkhyen te/ de yang la lar bzhugs kyang mi gsung ngo zhes gsungs pa'i phyir ro/ /dbang po zhes bya ba la dbang po'i sgras ni mig la sogs pa gzung ste/de yang sems can rnams kyi tha ma dang 'bring dang mchog mkhyen pas na dbang po mkhyen pa ste/ de yang nyan thos kyi theg pa ni dbang po tha ma'i dbang du mdzad pa'o/ /theg pa chen po ni dbang po 'bring gi dbang du mdzad pa'o/ /gsang sngags kyi tshul ni dbang po rab kyi dbang du mdzad pa'o//de yang dbang po rnon po'i dbang du gyur pas gsang sngags kyi bstan bcos khyad par 'phags zhes gsungs zhes bya'o/ /de bzhin du bsam pa'i sgras ni sems la bya bar shes par bya ste/ des kyang dbang po bzhin du mdzad pa'o/ /gsang sngags kyi tshul ni dbang po rab kyi dbang du mdzad pa ste/des kyang dbang po bzhin du sems can rnams kyi sems mkhyen pas na mkhyen pa'o/ /de nyid kyis na mchog ste gzhan gyi bsam pa rdzogs pa'o zhes bya ba'i don to/ /bcom ldan 'das kyi zhes bya ba ni bod pa'o/ /ye shes kyi rang bzhin gyi sku yin pas na ye shes kyi sku'o/ / de'i gtsug tor yang yin la chen po yang yin pas na gtsug tor chen po ste de'i ngo bo nyid kyi sangs rgyas kyi spyi gtsug tu bzhugs pa'i phyir ro/ /tshig gi bdag ces bya ba ni tshig gi bdag por gyur pa'o/ /gzugs kyi sku med pas na ye shes kyi sku'o/ /bstan mi dgos par bdag nyid kyi dngos po thams cad yongs su mkhyen pas na rang byung ba'o//'jam dpal dbyangs dang ldan pas na 'jam dpal lo/ /ye shes sems dpa' zhes bya ba 'di ni ye shes kyi rang bzhin can gyi sems dpa' yin pas na ye shes sems dpa' ste/ de'i sems dpa'i sgra ni sems yin par shes par bya ste/des na ye shes sems dpa' ste/ de yang kye ma'o shin tu rab tu dang ba'i/ sems dpa' 'di ni yongs su dag pa zhes bshad pa'o/ /ye shes kyi sku dang ye shes sems dpa' gnyis kyi bye brag ni lus dang sems kyi rnam pa'i khyad par ro/ / ye shes sems dpa' de'i mtshan yang dag par brjod pa yang ji lta bu zhe na/ ming ni zhes bya ba la sogs pa gsungs te/ don zab ces bya ba la sogs pa la nyan thos la sogs pa'i spyod yul ma yin pas na don zab pa'o/ /chos rnams kyi dngos po med pa ston pas na don ni rgya che ba'o/ / gsang sngags kyi tshul gyi don dang ldan pas na don che ba'o/ /phyi rol gyi dpe dang bral bas na mtshungs pa med pa'o/ /sems can rnams kyis nges par legs pa'i lam thob par mdzad pas na rab tu zhi ba'o/ /thos pa dang / bsam pa dang / bsgom pa'i gnas skabs na thog ma dang bar dang tha mar dge zhing thob par byed pas na thog ma bar dang mtha' mar dge ba'o//gzhan yang gang 'das pa'i sangs rgyas bcom ldan 'das rnams kyis gsungs pa dang / ma 'ongs pa'i rnams kyis kyang gsung bar 'gyur ba dang / da ltar byung ba'i rdzogs pa'i sangs rgyas rnams kyis kyang gdul bya'i sems can rnams tshogs pa dang ma tshogs pa la ltos nas yang dang yang du gsungs te/rje btsun 'jam dpal gyi mtshan yang dag par brjod pa ni thog ma med pa'i sems dpa' ste/ de dang 'brel pa'i mtshan yang dag par brjod pa 'di yang thog ma med pa'i gzhung lugs nyid do//de lta mod kyi bcom ldan 'das phyag na rdo rjes gdul bya rnams rjes su gzung ba dang / bdag nyid yang dang yang dran par bya ba'i phyir bcom ldan 'das shAkya thub pa la zhus nas yang bshad pa yin gyi/ gzhan du ni/ /'das pa'i sangs rgyas rnams kyis gsungs/ /zhes bya ba ji ltar rung ste/ma byung ba dag gsung ba ni mi rigs so/ /de bas na rgyud chen zhes bya ba la sogs pa gsungs te/ rgyud chen po sgyu 'phrul dra ba 'di las rdo rje 'chang chen po gsang sngags kyi lus 'dzin pa dpag tu med cing bgrang ba las 'das pa rnams kyang sems shin tu dga' bzhin pas glur blangs shing bstod pa gang lags pa de bshad cing bstan par gsol te/bdag yang dag par rdzogs pa'i sangs rgyas kun gyi gsang ba mtshan yang dag par brjod pa de bzung bas sangs rgyas thams cad kyi gsang ba 'dzin par ci nas kyang bdag 'gyur ba'i phyir bshad par gsol te/ sangs rgyas thams cad kyi gsang ba 'dzin par gyur nas bdag gis kyang nges par 'byung ba ste/ mya ngan las 'das pa'i bar du mtshan yang dag par brjod pa 'di'i bdag nyid bsam pa brtan po brjed pa med pa'i sems su gyur pas gzung bar bgyi/ de bzhin du sems can thams cad la yang dag par bstan par bgyi ste/ci'i phyir zhe na/ nyon mongs zhes bya ba la sogs pa gsungs te/ bag chags dang bcas pa'i nyon mongs ma lus par bsal zhing spang pa'i phyir dang / de bzhin du mi shes pa ste/ ma rig pa spang zhing dor ba'i phyir sems can rnams kyi bsam pa tha ma dang 'bring dang mchog gi khyad par ji lta ba bzhin du shes par bgyis nas mtshan yang dag par brjod pa bshad par 'tshal zhing bstan par 'tshal lo zhes pa'o//gsang dbang zhes bya ba la sogs pa la de ltar gsang ba'i bdag po phyag na rdo rjes de bzhin gshegs pa la sogs pa la gsol ba byas nas thal mo sbyar ba byas te/lus btud cing phab nas spyan sngar mdun du 'dug pa'o/ /de nas zhes bya ba ni de ma thag pa ste/ bcom ldan 'das shAkya thub pas gsang ba'i bdag po la slar gsungs pa zhes bya bar sbyar ro/ /de yang dbang phyug la sogs pa dang ldan pas na bcom ldan 'das so/ /shAkya'i rigs su 'khrungs par ston pas na shAkya'o//sku gsung thugs thub pas na thub pa'o/ /phyin ci ma log pa'i don thugs su chud pas na rdzogs pa'i sangs rgyas so/ /lha dang mi'i mchog tu gyur pas na rkang gnyis mchog go/ /ci zhig mdzad nas slar gsungs she na/ nyid kyi zhal nas zhes bya ba la sogs pa gsungs te/nyid kyi zhal nas nyid kyi ljags bsod nams kyi tshogs las byung bas na bzang ba dang / chur ring zhing rgyas par yangs pa brkyang zhing phyung nas 'dzum pa ston par mdzad pa'o/ /ji lta bu'i 'dzum pa zhe na/ 'jig rten zhes bya ba la sogs pa gsungs te/sa 'og sa stengs sa bla ni 'jig rten gsum ste/ de la 'dzum pa las byung ba'i 'od kyis snang bar byed cing gsal bar byed pa'o/ /de bzhin du bdud bzhi'i dgra rnams 'dul bar byed pa zhes bya ba ste/ bdud bzhi ni lha'i bu'i bdud la sogs pa'o/ /de nyid dgra ste/'phags pa'i lam gyi dbang po'i srog mthar byed pa'i phyir ro/ /de rnams 'dul bar byed pa ni rang gi yul las spos te byang chub kyi lam la sbyor ba'o/ /gzhan yang 'dzum pa de ji lta bu zhe na/ sems can zhes bya ba la sogs pa gsungs te/ dmyal ba dang yi dags dang dud 'gror skyes par gyur pa'i ngan song gsum sbyong bar byed pa'o//'di skad ston par 'gyur te/ sems can dmyal ba la sogs pa 'dzum pa'i 'od kyis reg pas dmyal ba la sogs pa'i 'gro ba spangs nas lha la sogs par skyes so/ /ci'i phyir ljags ring zhing yangs pa ston par mdzad ce na/bcom ldan 'das kyis mi'i skye ba bzhes par bstan pa gang yin pa de la ma yin no zhes 'jig rten pa dag som nyir gyur pa de bzlog pa'i phyir rdzu 'phrul dang cho 'phrul ston pa yin no/ /ji ltar gsung gis gsang ba'i bdag po la slar gsungs she na/ tshangs pa'i zhes bya ba la sogs pa gsungs te/tshangs pa'i gsung ni tshangs pa'i sgra sgrogs pa la 'jug pas na 'jig rten gsum po 'gengs te/ ring po na gnas pa la'ang gom na gnas pa ji lta ba bzhin no/ /de lta bu'i gsung shin tu snyan pas gsang ba'i bdag po la slar gsungs pa'o/ /lag na rdo rje yang ji lta bu zhe na/lag na rdo rje stobs po che/ /zhes bya ba la sogs pa gsungs te/ stobs po che zhes bya ba ni khams gsum las rnam par rgyal bas so/ /gang gi don du zhe na/ 'gro la zhes bya ba la sogs pa gsungs te/ sems can rnams la rjes su brtse ba dang ldan pa'i snying rje chen po dang ldan pas 'gro ba la phan pa'i phyir ro//gang gi mtshan yang dag par brjod pa yin zhe na/ ye shes lus can 'jam dpal gyi/ /zhes gsungs pa dang sbyar ro/ /ji lta bu'i mtshan yang dag par brjod par bya zhe na/ ming brjod pas ni don che ba/ /zhes bya ba la sogs pa sangs rgyas nyid thob pa'i rgyur gyur pas na don che ba'o//bklags pa tsam gyis rgyud gtsang bar byed pas na dag par byed pa'o/ /sdig pa rnams 'jig par byed pas na sdig pa sel ba ste/ de lta bu'i don che ba'i mtshan yang dag par brjod pa snying rje chen po dang ldan par gyur pas nga las nyan par brtson zhing thos par bya bar nges par gnas pa ni legs so zhes so//dpal ldan rdo rje 'chang zhes pa ni bod pa'o/ /lag na rdo rje khyod legs so/ /zhes bya ba ni 'dri ba la mkhas pa'i che ba'i bdag nyid bstan pa'i phyir legs so zhes bya ba byin pa'o/ /gsang ba'i bdag po zhes bya ba ni bod pa'o//de ltar bdag gis khyed la legs so zhes bya ba byin nas mtshan yang dag par brjod pa bstan par bya yis khyod kyis gzhan du ma yengs shing rtse gcig pa'i yid kyis nyon cig ces pa'o/ /de ni legs zhes gsol zhes bya ba ni bcom ldan 'das kyis rtse gcig pa'i yid kyis nyon cig ces bka' stsal pa de ni legs so legs par 'di mnyan par bgyi'o zhes pa'i bar du'o//de nas zhes bya ba la sogs pa la/ de nas zhes bya ba ni de ma thag pa'o/ /shAkya'i rigs las byung bas na shAkya'o/ /sku gsung thugs thub pas na thub pa'o/ /gsang sngags rigs chen ni sgyu 'phrul chen po la sogs pa'i rgyud kyi rigs te/bya ba dang / spyod pa dang / rtog pa thams cad bskyed pa'i gnas su gyur pa'i phyir ro/ /thams cad ni ma lus pa'o/ /gsang sngags rig sngags 'chang ba'i rigs/ /zhes bya ba ni rigs de la gcig tu gzhol ba'i rigs so/ / rigs gsum ni de bzhin gshegs pa dang / rdo rje dang / pad+ma'i rigs so/ /'jig rten pa'i rigs ni tha mal pa'i dge bsnyen la sogs pa'i sems can gyi rigs so/ /'jig rten las 'das pa'i rigs ni nyan thos dang rang sangs rgyas dang byang chub sems dpa'i rigs so/ /de nyid kyis ni 'jig rten rnams kyi ye shes kyi snang ba byed pa'i phyir ro//de dang mchog tu gyur pas na chen po'o/ /phyag rgya chen po'i rigs ni lha mo'i rigs te/ de nyid kyis na gtso bor gyur pas na mchog go/ /rigs chen gtsug tor gyi rigs ni gtsug tor yi ge gcig pa la sogs pa'i rigs te/rigs de dag skal ba dang ldan pa dang / skal ba med pa dang snod du gyur pa dang / snod du ma gyur pa ste/ de dag gi ngo bo nyid brtags pas gzigs nas tshig gi bdag po dang 'brel pa'i tshigs su bcad pa 'di dag gsungs so zhes sbyar ro/ /gsang sngags rgyal po drug ldan zhing //zhes bya ba ni oM badzra tIk+Sh+Na zhes bya ba la sogs pa'i gsang sngags kyi rgyal po drug po de dang ldan pa'o/ /gnyis su med par 'byung ba dang / /zhes bya ba ni gzung ba dang 'dzin pa gnyis su med par ston pa'o/ /mi skye ba'i chos can zhes bya ba ni gang mi skye ba'i chos ston pa de ni 'dir mi skye ba'i chos can te des gsungs pa'o//gang zhe na/ a A zhes bya ba la sogs pa gsungs te/ nga ni dus gsum du bzhugs pa'i sangs rgyas bcom ldan 'das de dag nyid kyi ye shes kyi sku ste/ chos kyi dbyings kyi ngo bo nyid kyi thugs la gnas pas na bdag nyid sangs rgyas yin no zhes pa'o//oM badzra tIk+Sh+Na zhes bya ba la sogs pa ni ming gi gtso bo rnams kyis bstod nas mtshan bshad par bya'o/ /zhes gsungs pa'o/ /'di ltar zhes bya ba ni gnas skabs bstan pa'o/ /blo mchog tu gyur pas na sangs rgyas so/ /bdud bzhi bcom pas na bcom ldan 'das so/ /chos thams cad mngon par rdzogs par sangs rgyas pas na rdzogs pa'i sangs rgyas so//a la sogs pa'i yi ge rnams 'byung bas na a las byung ba'o/ /yi ge dpag tu med pa yod kyang ci'i phyir a nyid las byung zhe na/ a ni zhes bya ba la sogs pa gsungs te/ a ni yig 'bru kun gyi mchog tu gyur pas de nyid las byung ba'o//don chen po sangs rgyas la sogs pa yin pas don chen no/ /mchog tu gyur pas na yi ge dam pa'o/ /nam mkha' dang rlung las 'byung bas na khong nas 'byung ba'o/ /a ni chos thams cad gzod ma nas skye ba med pa'i sgo yin pas na skye ba med pa'o//skye ba med pa'i ngo bo nyid kyis na tshig tu brjod pa spangs pa'o/ /brjod pa thams cad kyi rgyur gyur cing sgra'i rgyu'i gtso bo yin pas na brjod pa kun gyi rgyu'i mchog go/ /tshig thams cad kyi rab tu 'jug pa'i rgyur gyur pas tshig kun no/ /sngags kyi bdag nyid kyi 'od shin tu bzang po dang ldan pas na rab tu gsal bar byed pa'o//mchod pa chen po zhes bya ba la sogs pa la/ mchod pa chen po dang ldan pa gang yin pa de ni mchod pa chen po ste/ mchod pa chen po zhes pa'i sgra thams cad la yang don 'di bzhin du shes par bya'o/ /thugs rje chen po dang ldan pas sems can rnams la dam pa'i chos nyan pa la sogs pa'i dga' ba bskyed pa'i rgyur gyur pas na 'dod chags chen po'o//nyon mongs pa can gyi dgra chen po thams cad la sdang ba'i dgrar gyur pas na zhe sdang chen po'o/ /mi shes pa'i mun nag gis khebs pa'i blo gang yin pa de ni gti mug blo ste/sems can gyi rgyud la gnas pa'i gti mug rtsad nas 'byin pa'i rgyur gyur pas na gti mug chen po ste/ ji ltar rims sel ba'i sngags la rims kyi sngags zhes bya ba bzhin no/ /bdud la sogs pa khro ba chen po skyes pa rnams la bzod pa'i mtshon chas de rnam par 'jig pa'i rgyur gyur pas na khro ba chen po'o//de nyid kyis na khro ba'i dgrar gyur pas khro ba chen po'i dgra chen po'o/ /bdag dang bdag gir mngon par zhen pa las byung ba'i chags pa thams cad sel ba'i rgyur gyur pas na chags pa chen po'o/ / sems can rnams sangs rgyas nyid kyi che ba la rab tu 'jog par bzhed pa'i 'dod pa gang la yod pa de ni 'dod pa chen po'o/ /sems can rnams la thar pa'i bde ba stsol bas na bde ba chen po'o/ /zab mo'i chos ston pa'i sgo nas sems can rnams kyi dga' ba chen po'o/ /cho 'phrul rnams bstan pas gdul bya rnams kyi yid mgu ba bskyed pas na mgu ba chen po'o//khong khro ba med pa'i tshul gyis 'gro ba ma lus pa tshim par byed pas na gzugs chen po'o/ /mi'i lus las 'das par gyur pas na lus che ba'o/ /sna tshogs pa'i gzugs dang kha dog ston pas na kha dog chen po'o//gzi mdangs dang ldan pas na lus bong che'o/ /mchog tu gyur pa'i mtshan mnga' bas na ming yang che'o/ /chos dang zang zing dang mi 'jigs pa rab tu stsol bas rgya che ba'o/ /lha dang lha mo rnams kyi 'khor gyis bskor ba'i dkyil 'khor yangs pa mnga' bas na dkyil 'khor chen po yangs pa'o//mu stegs can rnams kyi shes rab gcod pa'i don gyis na shes rab mtshon chen 'chang ba'o/ /nyon mongs pa'i glang po 'dul bas na nyon mongs lcags kyu che ba'o/ /mchog ni gtso bo ste/ gang gi phyir nyon mongs pa'i glang po che bzlog dka' ba 'dren pas so//grags pa khams gsum du sgrogs pas na grags chen no/ /sems can gyi bya ba la spyod pa na bdag gi thams cad gtong bas na snyan grags chen po'o/ /nang gi ye shes kyi snang ba'i ngo bo nyid pas na snang ba che'o/ / phyi rol du 'byung ba'i 'od zer gyis yongs su bskor bas na gsal ba che'o/ /sgyu 'phrul chen po'i ngo bo rten cing 'brel par 'byung ba'i don gzugs brnyan bzhin du sems la 'chang bas na sgyu 'phrul chen po 'chang ba'o/ /'di nyid kyi don gyi snod du gyur pas na mkhas pa'o/ /sgyu 'phrul chen po'i don sems can rnams la sgrub cing gsal bar mdzad pas na sgyu 'phrul chen po'i don grub pa'o//gang sgyu 'phrul chen po'i don gyi ngo bo nyid du grub pa la dga' ba de rnams kyis 'dzin pa de bzlog pa la dgyes pas na sgyu 'phrul chen po dga' bas dga'o/ /so so'i skye bo gang zhig sgyu 'phrul chen po'i don bshad pa yang dag par rtogs par mi 'gyur ba de rnams la mig 'phrul ltar sprul pa rnams sprul te bstan pas dngos por 'dzin pa las bzlog pas na sgyu 'phrul chen po mig 'phrul can no//'khor gsum yongs su dag pa'i sbyin pa la sogs pa mdzad pas na sbyin bdag chen po ste/de nyid kyis na gtso bo ste mchog go/ /srog gcod pa la sogs pa spong ba'i mtshan nyid kyi tshul khrims mnga' bas na tshul khrims chen po 'chang ba'o/ /tshul khrims 'dzin pa thams cad kyi mchog yin pas na mchog go/ /sems can thams cad kyi gnod pa dang khro ba bzod pa dang ldan pas bzod chen 'chang ba brtan pa po'o//bdud kyi zil gyis mi non pas/ /brtson 'grus chen po brtul ba yin/ /zhes bya ste/ pha rol gnon pa byas pa'o/ /'khor lo drug bsgom pa'i bsam gtan chen po'i ting 'dzin gnas pas na bsam gtan chen po'i ting 'dzin gnas so//shes rab chen po'i lus gnyis su med pa'i ye shes 'dzin pas na shes rab chen po'i lus 'chang ba'o/ /bdud rnams zil gyis gnon pas na stobs po che'o/ /sbyin pa chen pos sems can rnams 'dul bas na thabs che ba'o/ / bdag gis sems can thams cad lhag ma med pa'i mya ngan las 'das pa'i dbyings su mya ngan las bzla bar bya'o zhes bya ba'i sngon gyi smon lam rdzogs par mdzad pas na smon lam mo/ /dngos po thams cad kyi don bsags pa'i ye shes bskyed pa dang / rnam par mi rtog pa'i ye shes rin po che'i 'byung gnas su gyur pas na ye shes rgya mtsho'o//de ltar pha rol tu phyin pa bcu'i ngo bo nyid kyis khyad par du 'phags pa bstan nas/ tshangs pa'i gnas bzhis khyad par du 'phags pa bstan par bya ba'i phyir/ byams chen zhes bya ba la sogs pa gsungs te/zhe sdang gi gnyen por gyur pa ni byams pa chen po'o/ /de'i rang bzhin yin pas na byams pa chen po'i rang bzhin no/ /tshad med pas na dpag tu med pa'o/ /thugs rje chen po'i rgyud dang ldan pas na snying rje chen po'o/ /mchog tu gyur pa'i shes rab mnga' bas na blo'i mchog go/ / dga' ba'i ngo bo nyid kyi shes rab chen pos sems can thams cad la chos thams cad khong du chud pa'i dga' ba bskyed pas na shes rab chen po'o/ /blo gros chen po dang ldan pas na blo chen ldan no/ /btang snyoms kyi ngo bo nyid ni/ mkhas pa chen po thabs che ba/ /zhes gsungs pa yin te/sems can chen po'i don mdzad pa rdzogs par mdzad pas na mkhas pa chen po'o/ /nyon mongs pa chen po la btang snyoms kyi mtshan nyid can gyi thabs mnga' bas na thabs che ba'o/ /rdzu 'phrul chen po'i stobs kyi ting nge 'dzin las bdud rnams kyis g.yo bar mi nus pas na rdzu 'phrul chen po'i stobs chen ldan no//ma g.yos kyang thams cad du bdag nyid kyi dngos po ston pas na shugs chen po'o/ /yid kyis 'gro ba'i shugs dang ldan pas na mgyogs pa chen po'o/ /rdzu 'phrul gyi cho 'phrul chen po dang ldan pas rdzu 'phrul chen po'o/ / thams cad kyi gtso bor gyur pas na cher grags pa'o/ /rdzu 'phrul chen po dang ldan pas gzhan gyi don du 'jig rten gyi khams dpag tu med pa gnon pas na stobs chen pha rol gnon pa po'o/ /skye ba chen po'i srid pa'i ri bo yang dag par 'joms pas na srid pa'i ri bo chen po 'joms pa'o//glags skabs tshol ba'i bdud rnams kyis glags mi rnyed pa'i phyir mkhregs pa'o/ /de nyid kyis na dbang po la sogs pa thams cad kyis gnon pas na rdo rje chen po 'chang ba'o/ /sems can drag po rnams la de'i gzugs kyis 'dul bar mdzad pas na drag po chen po'o/ /sems can ma rungs pa rnams gdul ba'i phyir drag shul can gyi gzugs 'dzin pas na drag shul chen po'o//'jigs pa chen po ni seng ge la sogs pa ste/ de rnams 'jigs par mdzad pas na 'jigs chen 'jigs par byed pa'o/ /ye shes kyi dbang phyug dang ldan pas na mgon po'o/ / rma bya chen mo la sogs pa rig sngags kyi mchog tu gyur pas na rig mchog chen po'o/ /dam pa'i chos nye bar ston pas na bla ma'o/ /gsang sngags chen po ni yig 'bru la sogs pa'o/ /de rnams kyi dam par gyur pas na gsang sngags chen po'i mchog ste/ yig ge a'i bdag nyid yin pa'i phyir ro//theg pa chen po'i tshul ni pha rol tu phyin pa'i lugs te/ de la gnas pas na theg pa chen po'i tshul la gnas pa'o/ /ci'i phyir de la gnas she na/ ji ltar nyan thos dang rang sangs rgyas kyi theg pa las theg pa chen po'i tshul mchog tu gyur pas na de la gnas pa'i phyir theg pa chen po'i tshul gyi mchog go//chos thams cad thugs su chud pas na sangs rgyas so/ /'khor gyi dbus na shas cher mdzes pas na rnam par snang mdzad de snang bas na zhes pa'i bar du'o/ /sku gsung thugs thub pas na thub pa chen po'o/ /lha dang drang srong gi mchog tu gyur pas na thub chen ldan no//stong pa nyid sngon du 'gro bas sa bon dang phyag mtshan gyi rim gyis lha'i skur bskyed pas na gsang sngags tshul chen las byung ba'o/ /de'i bdag nyid kyis de'i tshul gyi bdag nyid can yin pas na gsang sngags tshul chen bdag nyid can no/ /pha rol tu phyin pa bcu ni 'di lta ste/sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / thabs dang / smon lam dang / stobs dang / ye shes kyi ngo bo nyid de/ pha rol tu phyin pa de rnams brnyes pas na pha rol tu phyin pa bcu thob pa ste/de la gnas pa'i byang chub sems dpa' gzhan rnams kyi pha rol tu phyin pa rnams rdzogs par mdzad pas na pha rol tu phyin pa bcu la gnas pa'o/ /pha rol tu phyin pa bcu bstan pas sems can rnams kyi sems dga' ba bskyed pas pha rol phyin bcu dag pa ste'o/ /pha rol tu phyin pa bcu'i tshul ni chen po ste/de la gnas pa'i sems can rnams tshul de la rab tu 'jog pas na pha rol phyin pa bcu'i tshul lo/ /yon tan gyi dbang phyug dang ldan pas na mgon po'o/ /sa bcu ni 'di lta ste/ rab tu dga' ba dang / dri ma med pa dang / 'od byed pa dang / 'od 'phro ba dang / shin tu sbyangs dka' ba dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin te/ sa de rnams kyi gtso bor gyur pa dang ldan pas na sa bcu'i dbang phyug go/ /sa bcu rnams la sems 'jog par mdzad pas na sa bcu la ni gnas pa po'o//shes pa bcu ni 'di lta ste/ sdug bsngal shes pa dang / kun 'byung shes pa dang / 'gog pa shes pa dang / lam shes pa dang / zad pa shes pa dang / mi skye ba shes pa dang / chos shes pa dang / rjes su rtogs pa shes pa dang / kun rdzob shes pa dang / 'dris pa shes pa dang / sgra ji bzhin pa shes pa'o/ /shes pa bcu po de rnams kyi rnam par dag pa'i bdag nyid kyi ngo bo gang yin pa de ni shes bcu rnam dag bdag nyid can no/ /shes pa bcu rnam par dag pa'i sems dri ma med pa'i tshul gyis rtag tu 'dzin pas na shes bcu rnam dag 'chang ba po'o//rnam pa bcu ni bden pa bcu ste/ 'di lta ste/ kun rdzob kyi bden pa dang / don dam pa'i bden pa dang / mtshan nyid kyi bden pa dang / rnam par phye ba'i bden pa dang / nges par bye ste rtogs pa'i bden pa dang /dngos po'i bden pa dang / rab tu 'byung ba'i bden pa dang / zad pa dang mi skye ba shes pa'i bden pa dang / lam la 'jug pa'i shes pa'i bden pa dang / de bzhin gshegs pa'i ye shes yang dag par 'byung pa'i bden pa'o/ /de la tshad ma dang 'brel bas yul dang dus yongs su bcad cing gzhan gyi rkyen gyi dbang las skyes pa ni kun rdzob kyi bden pa'o//stong pa nyid zab mo dang so sor ldan pa ni don dam pa'i bden pa'o/ /nyon mongs pa'i mtshan nyid kyis na sdug bsngal lo/ /rab tu byung ba'i mtshan nyid kyis na kun 'byung ba'o/ /zhi ba'i mtshan nyid kyis na 'gog pa'o//nges par 'byung ba'i mtshan nyid kyis na lam mo zhes brjod pa'i mtshan nyid kyi bden pa'o/ /stong pa nyid kyi ngo bo nyid du mtshan nyid gcig pa las de rnams kyi skye ba med pa dang 'gag pa med pa la sogs pa'i tshul gyis rnam par phye ste bstan pa ni rnam par phye ba'i bden pa'o//nges pa'i don la nges par 'dzin cing mngon par rtogs pa'i shes pa ste/ shes pa dang shes bya de ni slu bar mi 'gyur bas na nges par phye ste/ rtogs pa'i bden pa zhes brjod do/ /dngos po ni phung po dang khams dang skye mched la sogs pa ste/ de rnams ni rten cing 'brel par 'byung ba'o zhes gang gi tshe shes pa na de dag ni dngos po med pa'o zhes rtogs pa ni dngos po'i bden pa'o//gang dang gang la nan tan du byas pas nyon mongs pa spong bar nus pa rab tu 'byung ba de ni rab tu 'byung ba'i bden pa'o/ /'dus byas thams cad ni zad par mthong ba zad pa la ni zad pa med do//gang zag pa med pa de ni mi skye ba ste/ de ni zad pa dang mi skye ba shes pa'i bden pa'o/ /ye shes kyi lam gang gis bsod nams dang ye shes bsags nas chos thams cad skye ba med pa dang 'gag pa med par shes pa la 'jug par byed pa de ni lam la 'jug pa'i shes pa'i bden pa zhes brjod do//chos kyi sprin gyi sa la de bzhin gshegs pa'i ye shes dngos po thams cad kyi yul la kun du 'byung ba ni de bzhin gshegs pa'i ye shes yang dag par 'byung ba'i bden pa ste/ bden pa bcu po de'i tshig dang don gang yin pa de ston pa'i dgos pa'i don yod pas na don bcu'i don to//nyan thos dang rang sangs rgyas kyi dbang por gyur pas na thub dbang ngo / /de bzhin gshegs pa'i stobs bcu ni 'di lta ste/ gnas dang gnas ma yin pa mkhyen pa'i stobs dang / las dang rnam par smin pa mkhyen pa'i stobs dang / khams sna tshogs mkhyen pa'i stobs dang /mos pa sna tshogs mkhyen pa'i stobs dang / dbang po mchog dang mchog ma yin pa mkhyen pa'i stobs dang / kun du 'gro ba'i lam yang dag pa ji lta ba bzhin du rab tu mkhyen pa'i stobs dang / bsam gtan dang rnam par thar pa dang / ting nge 'dzin dang snyoms par 'jug pa mkhyen pa'i stobs dang /sngon gyi gnas rjes su dran pa mkhyen pa'i stobs dang / 'chi 'pho dang skye ba mkhyen pa'i stobs dang / zag pa zad pa mkhyen pa'i stobs te/ stobs de rnams dang ldan pas na stobs bcu'o/ /thams cad du khyab pas na khyab pa'i bdag go//mos pa sna tshogs pa'i dbye bas rab tu phye ba'i sems can ma lus pa kun gyi thar pa thob pa'i mtshan nyid can gyi don skal ba ji lta ba bzhin mdzad pas na kun gyi don ni ma lus byed do/ /dbang rnam pa bcu ni tshe la dbang ba dang / sems la dbang ba dang / yo byad la dbang ba dang /las la dbang ba dang / skye ba la dbang ba dang / rdzu 'phrul la dbang ba dang / mos pa la dbang ba dang / smon lam la dbang ba dang / ye shes la dbang ba dang / chos la dbang ba ste/ dbang bcu po de rnams dang ldan pas na rnam pa bcu'i dbang ldan che ba po'o/ /thog ma nyid med pas na thog ma med pa ste/gal te thog ma yod par gyur na ni rgyu med par 'gyur bas na rtag tu yod pa dang med par 'gyur ro/ /phyi dang nang gi spros pas ma bsgribs pa'i bdag nyid can gang yin pa de ni spros pa med pa'i bdag go/ /dus thams cad du de bzhin du gnas pas na de bzhin nyid bdag go//de nyid kyis na dag pa'i bdag go/ /bden pa ni mi slu zhing ma log pa'i chos kyi de kho na nyid do/ /de gsung ba'i ngang tshul mnga' bas na bden par smra ba'o/ /gzhan slu ba'i tshig mi gsung bas na tshig mi 'gyur ba'o/ /dam bcas pa'i don rdzogs par mdzad pas na ji skad smras pa'o//'gro ba la phan pa'i phyir sangs rgyas su grub par gyur cig ces dam bcas pa bzhin du rdzogs par mdzad pas na de bzhin byed do/ /gzung ba dang 'dzin pa'am shes pa dang shes par bya ba gnyis ni gzugs la sogs pa gzung bar bya ba dang mig la sogs pa 'dzin par byed pa nas ji srid du yid nas chos kyi bar ni gnyis te/gnyis po de dag med pas na gnyis su med pa dang ngo / /de ston pa ni yang dag pa'i kun rdzob tu de bzhin nyid dang / yang dag pa'i mtha' dang / stong pa nyid dang / gnyis su med pa dang / mya ngan las 'das pa dang / chos kyi sku dang / chos nyid do zhes 'chad de de ltar ji srid du gnas pa rnam par dag pa gnyis su med pa'i de bzhin nyid kyi ngo bo bcom ldan 'das kyang gnyis su med pa ste/ yang dag pa'i de kho na nyid do/ /de'i mtha' ni mthar thug pa ste/ de las gzhan pa'i de kho na nyid yod pa ma yin pas yang dag pa'i mtha' ste/der ni de'i bdag nyid kyi thams cad mi g.yo ba chos kyi dbyings kyi tshul gyi der gnas pas na yang dag mtha' la rnam par gnas pa'o/ /bdag dang bdag gir mngon par zhen pa la zhugs pa'i sems can rnams kyi dregs pa sel ba'i ngo bo nyid du bstan pa'i phyir/bdag med seng ge'i sgra dang ldan/ mu stegs ri dgas ngan 'jigs byed/ /ces gsungs te/ bdag dang bral bas na bgad med pa ste/ bdag med pa'i ngo bo nyid yin pas na bdag med pa dang ldan la/ seng ge ltar 'jigs pa dang bral ba'i sgra sgrogs pagang yin pa de ni seng ge'i sgra dang ldan pa ste/chos thams cad dag med pa'o zhes bya ba'i seng ge'i sgra'o/ /ngan pa'i mu la brten pa gang yin pa de ni mu stegs ngan pa'o/ /mu stegs ngan pa ri dgas dang 'dra pas na ri dgas so/ /de rnams 'jigs par byed pas na/mu stegs ri dgas ngan 'jigs byed/ /ces bya ste/ chad pa smra ba las sogags yod par las len pa las sogs pa rnams la bdag med pa dang ldan pa'i chos ston pas na skrag par mdzad ces pa'i don to/ /chos kyi dbyings kyi ngo bo nyid yin pas na kun du 'gro ba ste/gang gi phyir chos kyi dbyings las ma gtogs pa'i chos 'ga' yang med pas so/ /sems can gdul bar bya ba'i phyir thams cad yod cing thogs med pa'i 'grod pa gang la yod pa de mi don yod stabs so/ /sngon gyi ngas rgyas rnams ji ltar gshegs pa bde bzhin du gshegs pas na de bzhin gshegs pa'o//yid bzhin du mgyogs pas yid ltar mgyogs pa ste/ yid kyi shugs kyis dam pa'i chos kyi tshigs su bcad pa gtang ba'o/ /sdig pa'ichos rnams las rgyal bas na rgyal ba'o/ /smra ba rnams kyi nang na khyad par du rgyal ba mnga' bas na rnam par rgyal ba'o//phyir gyi bdud la sogs pa'i dgra las rnams par rgyal bas na dgra las rgyal ba'o/ /yi ge gcig pa'i lo 'khor los sgyur ba brnyes pas na 'khor los bsgyur ba'o/ /bdud rnams kyi zil gyi mi nod pas na stobs po che'o//nyan thos kyi tshogs kyi bslab pa'i chos ston pas na tshogs kyi slob dpon no/ /byang chub sems dpa'i tshogs kyi gtso bor gyur pas na tshogs kyi mchog go/ /dkyil khor la gnas pa'i lha la sogs pa'i tshogs kyi mnga' bdag tu gyur bas na tshogs rje'o/ /phyi rol gyi lha dang lha ma yin gyi bdag por gyur pas na tshogs bdag go//bdag por gyur pa'i dbang thob pas na dbang ldan pa'o/ /sems can thams cad kyi steng dumathu chen po mnga' bsam na mthun chen no/ /sangs rgyas dang byang chub sems dpa' thams cad kyi gces pa dang ldan pas na gces par 'dzin pa'o//theg pa chen po'i tshul gyi bdag nyid can yin pas na tshul chen no/ /gzhan rnams kyis bkri mi dgos pas na gzhan gyi dring la mi 'jog pa ste/ /gzhan gyi ma bcol ba rang nyid kyis sems can gyi don mdzad ces bya ba'i don to/ /don so so yang dag par rig pa'i ngo bo nyid kyi tshig gi dbang phyug tu gyur pas na tshig rje'o//chos so so yang dag par rig pas chos kyi rjes su rab tu chos ston par mdzad pas na tshig bdag go/ /lha dang gnod sbyin dang dri za la sogs pa'i tshig gi lam ji snyed pa'i des tshig dang tha snyad de dag thams cad rab tu mkhyen pas de dang de'i sgra dang /de dang de'i nges pa'i tshig gis de rnams la dam pa'i chos ston pas na smra mkhas pa'o/ /bud med dang skyes pa dang ma ning la sogs pa'i dbye bas chos rnams rab tu ston pas na tshig la dbang ba'o/ /mi rtsub pa dang / cal col ma yin pa dang /snyan pa dang / rnam par dag pa'i tshig gi dbyings 'dul ba'i thabs dpag tu med pa'i gsung gang la yod pa de ni tshig mtha' yas pa ste/ de dag gi gis ni slobs pa so so yang dag par rig bstan pa yin no/ /mi slu ba'i tshig dang ldan pas na tshig bden no/ / bden pa ni de bzhi nyid kyi dbyings so/ /bden par smra ba'i ngang tshul mnga' bas na bden par smra ba'o/ /bden pa ni bzhi ste/ sdug bsngal ba dang / kun 'byung ba dang / 'gog pa dang / lam ste/ bden pa bzhi po de dag ston pas na bden pa bzhi ni ston pa po'o/ /sa brgyad pa la bla na med pa'i byang chub las phyir mi ldog pas phyir mi ldog pa'o//'khor bar mi 'ong bas na phyir mi 'ong ba'o/ /rang sangs rgyas kyi lam gyi gtso bor gyur pas na 'dren pa rang rgyal bse ru'i tshul lo/ /'dis sems can rnams nges par 'byung bas na nges par 'byung ba ste lam mo/ / des na nyan thos dang rang sangs rgyas kyi lam dang 'bras bu'i tshul gyis der bdag nyid lam dang 'bras bu'i tshul gyis gzugs su rab tu ston pas na nges 'byung sna tshogs las byung ba'o/ /'byung ba chen po ni rdzu 'phrul can no/ /de sangs rgyas nyid thob pa'i rgyu gcig pu ni bcom ldan 'das nyid yin pas na 'byung ba chen po rgyu gcig pu'o//nyon mongs pa dang bral bas na dge slong ngo / /nyon mongs pa'i dgra bcom pas na dgra bcom mo/ /nang gi nyon mongs pa'i gang zag pa zad pa gang yin pa de ni zag pa zad pa'o/ /'dod pa'i 'dod chags dang / gzugs kyi 'dod chags dang / gzugs med pa'i 'dod chags gang gis spangs shing bor ba de ni 'dod chags dang bral ba'o/ /dbang po thul bas yul la 'jug pa las zlog pa gang yin pa de dbang po thul ba'o/ /nye bar dmigs pa'i nye bar len pa'i nyon mongs pa'i gnas ngan len thams cad dang bral bas na bde ba rnyed pa'o//chos thams cad mnyam pa nyid thob pas na 'jigs med thob pa'o/ /sems can thams cad kyi nyon mongs pa'i gdung ba sel bas na bsil bar gyur pa'o/ /rnyog pa ni dri ma dang bcas pa'o/ /dri ma med pas na rnyog pa med de nyon mongs pa dang bral ba'o//des na gang gi phyir rnyog pa thams cad dang bral ba de'i phyir rnyog pa med pa'o/ /mi slob pa'i rig pa gsum dang / mi slob pa'i lus dang ngag sdom pa'i 'tsho ba la sogs pa'i rkang pa dang ldan pas na rig pa dang ni rkang par ldan no/ /phyir mi ldog par gshegs pas na bde bar gshegs pa ste/rims nad las legs par byang ba bzhin no/ /'gro ba dang / skye gnas dang / rigs kyi dbye bas phye ba'i sems can gyi 'jig rten ji lta ba bzhin mkhyen pas na 'jig rten rig pa'o/ /thams cad kyi dam par gyur pas na mchog go/ /'di ni bdag gi'o zhes bdag gi ba med pas na bdag gir mi 'dzin pa'o//bdag tu 'dzin pa'i rkyen gyi bdag gi ngo bo med pas na ngar mi 'dzin pa'o/ /kun rdzob dang don dam pa'i bden pa gnyis po de nyid tshul te gzhung lugs so/ /der gnas par mdzad pas na bden pa gnyis kyi tshul la gnas pa'o//'khor ba ni dmyal ba dang / yi dags dang / dud 'gro dang / mi dang / lha'i srid par yang dang yang du 'khor bas 'khor ba'o/ /de'i pha rol tu son pas na 'khor ba'i pha rol tu son pa'o/ /de'i mtha' ni mthar thug pa ste/ der gnas pas na 'khor ba'i pha rol mthar son pa'o//'di skad ston par 'gyur te/ 'khor ba'i ngo bo nyid yongs su skye ba med par mkhyen la de med na mya ngan las 'das pa yang med pas mi gnas pa la bzhugs zhes bya ba'i don to/ /sems can ma lus pa'i don mdzad pas na bya ba byas pa'o/ /bsod nams dang ye shes kyi tshogs dang pha rol tu phyin pa'i thabs thams cad las mthong ba'i gnas su bzhugs pas na skam sar gnas pa'o//grangs can la sogs pas yongs su brtags pa'i 'ba' zhig pa'i rgyu bdag la sogs pa las byung ba dgag pa'i phyir shes pa 'ba' zhig nges gsal ba'o//shes rab nyid mtshon cha ste shes rab mtshon cha gang yin pa de ni shes rab mtshon cha'o/ /des sems can rnams kyi log pa'i blo gros 'jig pas na rnam par 'joms pa'o/ /dam pa'i chos ston pas na dam chos so/ /chos kyi rgyal por dbang bskur bas dbang bskur ba'i phyir chos rgyal lo//sems can rnams kyi rgyu la gnas pa'i ma rig pa'i mun pa rnam par sel bas na gsal bar ldan no/ /ye shes kyi 'od zer rnam par 'phro ba shin tu rgyas pas sems can rnams kyi snang ba mdzad pas na 'jig rten snang bar byed pa'o/ /dam pa yin pas na mchog go//chos thams cad la dbang bsgyur zhing chos thams cad la rab tu 'jug pa de la rag las pas na chos kyi dbang phyug go/ /'khor gyi dbus na chos kyis mdzes pas na chos kyi rgyal po'o/ /mya ngan las 'das pa dang rjes su mthun pa'i 'phags pa'i lam nye bar ston pas na legs pa'i lam ni ston pa po'o//don ni sa dang pha rol tu phyin pa'i mtshan nyid can gyi dgos pa'o/ /grub pa ni yongs su rdzogs pa gang yin pa de ni don grub bo/ /sngon byang chub sems dpa'i gnas skabs na sangs rgyas nyid 'thob par bya'o zhes yang dag par rtogs pa'i bsam pa grub pas na bsam pa grub pa'o//chos kyi dbyings rnam par dag pa'i gnas skabs na ma rig pa las byung ba'i rtog pa spangs pas kun du rtog pa thams cad spangs pa'o/ /gang gi phyir kun du rtog pa thams cad spangs pa de nyid kyis na rnam par mi rtog dbyings mi zad de chos kyi dbyings so/ /mchog tu phul du byung bas dam pa'o//nam yang dngos gzhan du mi 'gyur bas na zad mi shes pa'o/ /gang la bsod nams yod pa de ni bsod nams dang ldan pa'o/ /de la mchod pa byed pa'i sems can rnams kyi bsod nams kyi tshogs bskyed pas na bsod nams tshogs so/ /rtag tu gnyis su med pa'i ye shes kyi ngo bo nyid yin pas na ye shes so//thams cad mkhyen pa'i ye shes kyi gnas su gyur pas na ye shes kyi 'byung gnas so/ /thams cad du mchod pa yin pas che ba'o/ /thams cad mkhyen pa'i yongs su mkhyen pa mnga' bas na ye shes ldan pa'o/ /dngos po rnams kyi yod pa dang med pa nyid kyis 'byung ba dang 'jig pa ston pa'i ye shes mnga' bas na yod med shes so//bsod nams dang ye shes kyi tshogs yang dag par rdzogs pas na tshogs gnyis tshogs ni bsags pa po'o/ /thams cad du rab tu 'brel ba'i gzugs kyis gnas pas na rtag pa'o//rnam pa sna tshogs pa'i 'gro ba kun du mdzes pas na kun rgyal lo/ /bla na med pa'i shes rab dang / thabs dang / ye shes dang ldan pas na rnal 'byor can no/ /bsam gtan dang bsam par bya ba dang bral bas rnam par mi rtog pa'i bsam gtan dang ldan pas na bsam gtan no//'tshang rgya ba nyid don du gnyer bas rtag tu bsam par bya ba yin pas na bsam bya'o/ /sems can thams cad kyi shes rab kyi gtso bor gyur pas na blo ldan mchog go/ /so so rang rig pa'i bdag nyid yin pas na so so rang rig go/ /tshul 'di nyid kyis dus thams cad du mi 'gyur bas na mi g.yo ba'o//mchog kyang yin la dang po yang yin pas na mchog gi dang po ste yi ge a'o/ /de'i ngo bo nyid yin pas na mchog gi dang po'o/ /chos dang longs spyod rdzogs pa dang / sprul pa'i sku mnga' bas sku gsum 'chang ba'o/ /chos rnams phyin ci ma log par thugs su chud pas na sangs rgyas so//ngo bo nyid dang longs spyod rdzogs pa dang / sprul pa dang / chos dang / ye shes te/ sku lnga po de rnams kyi bdag nyid du gyur pas na sku lnga'i bdag nyid can no/ /chos kyi dbyings kyi tshul gyis kun du khyab pas na khyab bdag go//me long lta bu dang / mnyam pa nyid dang / so sor rtog pa dang / bya ba grub pa dang / chos kyi dbyings rnam par dag pa ste/ ye shes lnga'i bdag nyid can yin pas na ye shes lnga'i bdag nyid can no/ /sangs rgyas lnga'i bdag nyid can gyi de bzhin gshegs pa'i cod pan dang ldan pas na sangs rgyas lnga bdag cod pan can no//sha dang / lha dang / chos dang / shes rab dang / sangs rgyas kyi spyan te lnga po gang la yod pa de ni spyan lnga'o/ /chags pa ni 'khor ba dang mya ngan las 'das pa la mngon par zhen pa'o/ /de mi mnga' bas na chags pa med pa 'chang ste/'chang ba ni gnyis su med par 'dzin pa'o/ /dkyil 'khor gyi dbus su shes rab dang thabs kyi tshul gyis sangs rgyas thams cad kyi yum du gyur pas na sangs rgyas thams cad bskyed pa po'o/ /byang chub sems dpa'i tshul gyis bzhugs pas na sangs rgyas sras po'o//phul du byung bas na dam pa'o/ /rab tu byung bas na mchog go/ /shes rab nyid kyi srid pa yin pas na shes rab srid pa'o/ /de las byung ba'i byang chub sems dpa' yin pas na shes rab srid 'byung ngo / /skye gnas ni rgyu ste/ 'khor bar skye ba'i rgyu mi mnga' bas na skye gnas med pa'o//gal te skye ba'i rgyu dang bral na byang chub sems dpar ji ltar 'gyur zhe na/ chos las 'byung ba zhes bya ba gsungs te/ thabs dang shes rab gnyis su med pa'i chos kyi skye gnas las 'byung bas na chos las 'byung ba'o/ /gang gi phyir chos kyi skye gnas las byung bas na srin pa sel ba ste/'khor bar skye ba'i rgyu med pa'o/ /srid pa nyid kyi gnyis su med pa'i mkhregs pa gang yin pa de ni gcig pu sra mkhregs te/ khong stong gi rnam pa'i gnyis med pa'o/ /de nyid kyis na bcom ldan 'das mi phyed pa'i bdag nyid can yin pas na rdo rje'i bdag nyid do/ /skyes ma thag pa ni yi ge hUM ste de las byung zhing 'gro bas na skyes ma thag pa'o//'gro ba rnams bka' bzhin byed pa'i bdag po yin pas na 'gro ba'i bdag go/ /chos rnams nam mkha' dang 'dra bar bstan pa las byung ba gang yin pa de ni nam mkha' las byung ba'o/ /gdul bya'i dbang du de dang de'i gzugs su bdag nyid gyur pas na rang byung ba'o//shes rab dang ye shes ni chos thams cad dngos po med par thugs su chud pa'o/ /de nyid nye bar dmigs pa'i nyon mongs pa'i bud shing thal bar byed pas na shes rab ye shes me bo che'o/ /thams cad du chos nyid kyis snang bar byed pas na 'od chen no//khyad par du snang zhing gsal bar mdzad pas na rnam par snang byed do/ /ye shes kyi snang ba sems can rnams kyi ma rig pa'i mu na pa rnam par sel bas ye shes snang ba'o/ ye shes kyi snang ba de sna tshogs snang bas na lam me'o/ /dam pa'i chos kyi 'od zer gyis 'gro ba la snang bar mdzad pas na 'gro ba'i mar me'o//ye shes kyi sgron mas ma rig pa'i rab rib kyis khebs pa'i sems can rab tu gsal bar mdzad pas na ye shes sgron ma'o/ /gzi brjid chen po dang ldan pas na gzi brjid chen po'o/ /rab tu snang ba'i ngang tshul can yin pas na 'od gsal ba'o//gsang sngags kyi gtsor bor gyur pas na sngags mchog mnga' bdag go/ /gnod mdzes rgyal po'i ngo bo nyid du gyur pas na rig sngags rgyal po'o/ /yi ge b+h+rUM gyi bdag nyid can yin pas na gsang sngags rgyal po'o/ /sems can rnams kyi don mdzad pas na don chen byed pa'o//'khor los sgyur ba'i yi ge gcig pa'i ngo bo nyid yin pas na gtsug tor chen po'o/ /'khor los sgyur ba nyon mongs pa gdul ba'i ngo bo nyid du gyur pas na rmad byung gtsug tor ro/ /nam mkha' na gnas pa'i zla ba la sogs pa'i bdag por gyur pas na nam mkha'i bdag po'o//gzi brjid phung po'i ngo bo nyid du gyur pas na sna tshogs ston pa'o/ /yang na sna tshogs pa la mnyam par lta bas na mthong ba'i ngang tshul gang la mnga' ba de la de skad ces bya'o/ /sangs rgyas thams cad kyi sku'i bdag nyid ni rnam par snang mdzad la sogs pa'o/ /de rnams kyi mchog ni gtso bo ste/rnam par snang mdzad chen po'i ngo bo nyid yin pas na sangs rgyas kun bdag dngos po'i mchog go/ /mnyam par blta bas 'gro ba kun la gzigs pas dga' bar byed pa'i spyan gang la yod pa de ni 'gro kun dga' ba'i mig dang ldan no/ /sna tshogs pa'i skus sems can rnams 'dul bar mdzad pas na sna tshogs gzugs can no//dge ba dang mi dge ba'i las yongs su mkhyen pas na skyed pa po'o/ /tshangs pa la sogs pas mchod pas na mchod pa'o/ /mchod yon dang zhal zas la sogs pas rjed par 'os pa yin pas na rjed pa'o/ / 'jig rten pa'i drang srong dang nyan thos kyi drang srong rnams kyi mchog tu gyur pas na drang srong chen po'o/ /de bzhin gshegs pa dang / rdo rje dang / pad+ma'i rigs gsum gyi ngo bo nyid kyi bdag nyid 'dzin pas na rigs gsum 'chang ba'o/ /rigs gsum gyi nang du gtogs pa'i rigs dang gsang sngags thams cad 'dzin pas na gsang sngags 'chang ngo //dam tshig chen po'i sgras ni spyan la sogs pa ston la/ de rnams kyi gsang sngags 'chang bas na dam tshig chen po gsang sngags 'dzin no/ /mchog tu gyur pas na gtso bo'o/ /bstan pa 'jig pa bsrung ba'i phyir dkon mchog gsum gyi yon tan ston pa sngon du 'gro ba ston pas sangs rgyas dang chos dang dge 'dun rnams 'gro ba 'dzin du 'jug pas na dkon mchog gsum 'dzin pa'o//nyan thos kyi theg pa dang / rang sangs rgyas kyi theg pa dang / theg pa chen po ni theg pa gsum mo//de rnams ni phyi rol gyi tshul las dam pa yin pas na mchog ste/ de rnams bsam pa rab dang 'bring dang tha ma'i sems can rnams la ston par mdzad pas na theg pa mchog gsum ston pa po'o/ /don yod cing 'bras bu dang bcas pa'i thugs rje chen po'i zhags pas sems can rnams bcings nas lam bzang po la bkod pas na don yod zhags pa'o//bdud dang mu stegs rnams las rnam par rgyal ba mnga' bas na rnam par rgyal ba'o/ /phyi rol gyi don la mngon par zhen pa'i 'dzin pa chen po nges par bzlog pas na 'dzin pa chen po'o/ /rdo rjes mtshan pa'i zhags pa bsnams pas na rdo rje zhags pa'o//rdo rjes mtshan pa'i lcags kyu bsnams pas na rdo rje lcags kyu'o/ /zhags pa chen pos sems can gdug pa can rnams bcings nas yang dag pa'i lam la 'god pas na zhags pa chen po'o/ /rdo rje 'jigs byed ni gshin rje gshed do/ / de'i gzugs la gnas nas sems can ma rungs pa rnams la 'jigs pa bskyed par mdzad pas na rdo rje 'jigs byed 'jigs par byed do/ /khro bo'i gtso bor gyur pas na khro bo'i rgyal po'o/ /gdong drug gang la yod pa de ni gdong drug go/ /skrag par byed pas na 'jigs pa'o/ /mig drug gang la yod pa de ni mig drug go//rjes su dran pa drug gi ngo bo nyid kyi phyag drug gang yin pa de ni lag drug ces bya'o/ /sred med kyi bu'i stobs dang ldan pas na stobs dang ldan no/ /keng rus rnams kyis brgyan pas keng rus so/ /rno zhing 'jigs pa'i mche ba gtsigs pas na mche ba gtsigs pa'o//ha la ha la'i dug dang ldan pa'i sbrul brgya snyed kyis yan lag thams cad brgyan pas na ha la ha la gdong brgya pa'o/ /gshin rje mthar byas nas lam bzang po la 'jog pas gshin rje gshed do/ /bgegs thams cad kyi mnga' bdag yin pas na bgegs kyi rgyal lo//thogs pa med par 'gro ba dang ldan pas na rdo rje shugs can no/ /gdug pa can rnams skrag par mdzad pas na 'jigs par mdzad pa'o/ /mi phyed pas na rdo rje'o/ /shin tu 'jigs pa'i ngo bor 'jig rten gsum du grags pas na grags pa'o/ /snying ga'i phyogs su rdo rje 'dzin pas na rdo rje snying ngo //sgyu 'phrul sna tshogs ston pas na sgyu 'phrul rdo rje'o/ /gsus pa chen po mnga' bas na gsus po che'o/ /mi phyed pa'i chos kyi skye gnas las byung bas na rdo rje las skyes pa'o/ /rdo rje rigs kyi bdag por gyur pas na rdo rje'i bdag go/ /rdo rje snying po'i sku mnga' bas na rdo rje snying po'o//sems can thams cad la go skabs 'byed pas na nam mkha' 'dra'o/ /rang gi shes rab las mi bskyod pas na mi g.yo ba'o/ /rgya che ba'i ral pa'i tshogs mnga' bas na ral pa gcig gis bsgyings pa'o/ /glang po che'i pags pas gos su mdzad pas na glang chen ko rlon gos su gyon no//'jigs pa'i gzugs ston pas na drag chen no/ /hA hA zhes bya ba'i sngags 'don pas na hA hA zhes sgrogs pa'o/ /hi hi zhes pas 'jigs pa bskyed pas na hi hi zhes sgrogs 'jigs par byed pa'o/ /'jig rten gyi khams ma lus pa khyab pas na gad mo chen po'o//rdo rje hA hA zhes bzhad pa sgrogs pas na gad rgyangs can no/ /gzhan rnams kyis mi phyed pas ye shes kyi bdag nyid can gyi sgra chen po mnga' bas na cher sgrogs pa'o/ /rdo rje dang 'dra ba mi phyed pa'i thugs mnga' bas na rdo rje sems dpa'o/ /sems can rnams kyi don mdzad pas na sems dpa' chen po'o//rdo rje'i rigs kyi gtso bor gyur pas na rdo rje rgyal po'o/ /shin tu phul du byung zhing lhun gyis grub pa'i bde ba la 'bab pa'i ngo bo yin pas na bde ba chen po'o/ /shin tu drag pas sems can rnams 'dul bas na rdo rje drag po'o//rab tu dga' ba'i bdag nyid can yin pas na dga' ba chen po'o/ /rdo rje hUM mdzad ni khams gsum rnam par rgyal ba'o/ /de'i gzugs kyis gnas nas sems can ma rungs pa rnams skrag par byed pa'i phyir na rdo rje hUM ste hUM zhes sgrogs pa'o/ /rdo rjes mtshon pa'i mda' bsnams pas na mtshon du rdo rje'i mda' thogs pa'o//nye bar dmigs pa'i mi shes pa ma lus par gcod pas na rdo rje ral gri'o/ /shes rab 'chal pa gcod pas na ma lus par gcod pa'o/ /sna tshogs rdo rje bsnams pas na rdo rje kun 'chang ngo / /rdo rje can zhes bya ba ni mtshan no/ /mi phyed pa'i mtshan nyid can gyi rdo rje gcig pu nyid gang la yod pa de ni rdo rje gcig pu'o//bdud kyi g.yul las rgyal bas na g.yul sel ba'o/ /rdo rje 'bar bas 'joms shing dmar ser can gyi mig shin tu mi bzad pa gang yin pa de ni/ rdo rje 'bar ba mig mi bzad/ /ces bya'o/ /rdo rje 'bar ba rnams kyis sreg par byed pa'i ngo bo nyid kyi sgra gang la yod pa de ni sgra yang rdo rje 'bar ba ste'o//rdo rjes sems can gdug pa can rnams 'bebs pas na rdo rje 'bebs pa'o/ /dbang phyug chen po la sogs pa 'bebs pas na 'bebs pa che'o/ /dngos po'i chos ji lta ba bzhin gnas pa'i don gzigs pa'i spyan brgya snyed kyis gnas pa gang yin pa de ni mig brgya pa'o//de rnams kyang rdo rje 'bar ba dang ldan pas na rdo rje'i mig go/ /rdo rje'i gzugs can gyi ba spu ni shin tu rno ba myu gu lta bu gang la yod pa ste/ /des na 'di ni lus rdo rje'i ba spu can no/ /tha mal pa'i ba spu mi mnga' bas na rdo rje'i spu gnyis su med pa'i lus gang yin pa de ni rdo rje'i spu ni gcig pu lus so//shin tu brtan zhing sra ba'i lus rdo rje'i rtse mo rnams las bsgrubs shing skyes pa'i sen mo gang la yod pa de ni sen mo skyes pa rdo rje'i rtse'o/ /rdo rje ltar snying po mkhregs shing sra ba'i pags pa gang la yod pa de ni rdo rje snying po pags pa mkhregs so//rdo rje'i phreng ba bsnams pas rdo rje phreng thogs so/ /ye shes kyi dbang phyug dang ldan pas na dpal ldan no/ /rdo rjes mtshon pa'i rgyan rnams kyis brgyan pa yin pas na rdo rje rgyan gyis brgyan pa'o/ /gad rgyangs zhes pa'i bzhad pa sgrogs par mdzad pas na gad rgyangs hA hA'o//chos nyid nges par sgrogs pas na nges par sgrogs so/ /yi ge drug pa'i gsang sngags kyi bdag nyid can yin pas yi ge drug pa'o/ /rdo rje theg pa'i sgra yin pas na rdo rje sgra'o/ /'jam zhing mnyen pa'i gsung gang la yod pa de ni 'jam dbyangs so//bdag med pa'i sgra sgrogs pas na sgra che ba'o/ /'jig rten gsum na sgra gcig gis gnyis su med pa chen po nyid ston pa'i sgra sgrogs pas 'jig rten gsum na sgra gcig pa'o/ /nam mkha'i khams kyi mthar thug par sgra sgrogs pa dang ldan pas na nam mkha'i mtha' klas sgra sgrogs pa'o//sgra dang ldan pa rnams kyi nang na dam pa yin pas na sgra dang ldan pa rnams kyi mchog ste dam pa'o/ /yang dag pa dang / bdag med pa dang / de bzhin nyid dang / yang dag pa'i mtha' zhes bya ba'i rnam grangs kyis de kho na nyid ston pas na/ yang dag bdag med de bzhin nyid/yang dag mtha' ste zhes bya'o/ /yi ge thams cad kyi brjod du med pas na yi ge med pa'o/ /stong pa nyid gsungs pa'i ngang tshul mnga' bas na stong nyid smra ba'o/ /smra ba po thams cad kyi nang na gtso bor gyur pas na smra ba'i khyu mchog go/ /stong pa nyid rab tu ston pa'i zab cing rgya che ba sgrogs pa gang yin pa de ni zab cing rgya che sgra sgrogs pa'o//chos kyi dung 'bud pas na chos kyi dung ngo / /bsod nams chen po'i sgra sgrogs pas na sgra chen no/ /chos kyi gaN+DIs bdud kyi yul rnam par skrag par mdzad pas na chos kyi gaN+DI sgra bo che'o/ /gnas pa ni ston pa ste/'khor ba dang mya ngan las 'das pa la mi gnas pas na mi gnas mya ngan 'das pa po'o/ /phyogs bcur chos kyi rnga bo che brdung bas na chos kyi rnga bo che'o/ /chos kyi dbyings kyi ngo bo nyid pas na gzugs med pa'o/ /mtshan thams cad yang dag par rdzogs pa'i sku'i bdag nyid can pas na gzugs bzang dam pa ste'o//sprul pa'i skus gdul bya sna tshogs pa dang rjes su mthun pas yang dag par bstan pas na sna tshogs gzugs can no/ /phyi rol gyi don gyis stong zhing yid tsam pa nyid pas na yid las skyes pa'o/ / gzugs can thams cad snang ba'i dbang phyug dang ldan pas na gzugs rnams thams cad snang ba'i dpal lo/ /'jig rten gyi khams ma lus pa gdul bar bya ba'i phyir nyan thos dang rang sangs rgyas dang byang chub sems dpa' la sogs pa'i gzugs su gcig par ston pa'i gzugs brnyan 'chang bas gzugs brnyan ma lus 'chang ba po'o//thams cad du thogs pa med pa'i nus pas mi g.yo ba dang ldan pas na tshugs pa med cing ngo / /khams gsum thams cad kyi bdag por gyur pas na cher grags pa'o/ /khams gsum du ye shes kyi dbang phyug dang ldan pas na khams gsum dbang phyug chen po ste'o//'phags pa'i lam mtho zhing 'phags pa la zhugs pas na 'phags lam shin tu mtho la gnas pa'o/ /gang zhe na dar ba chen po chos kyi tog ste/ dar ba chen po'i rgyur gyur pas na dar ba chen po'o/ /chos kyi tog ni chos kyi rgyal mtshan no//'jig rten gsum po dag na gzhon nu'i lus kyi sku 'chang ba gcig pu nyid gang yin pa de ni 'jig rten gsum na gzhon lus gcig pa'o/ /byang chub sems dpa'i dge 'dun gyi gnas brtan du gyur pas na thams cad kyis mchod par 'os pas na gnas brtan no/ /thams cad mkhyen pas bgres pas na rgan po'o//skye dgu ma lus pa skyong bas na skye dgu'i bdag po'o/ /phyag dang zhabs kyi mthil 'khor los mtshan pa la sogs pa skyes bu chen po'i mtshan sum cu rtsa gnyis mnga' bas na sum cu rtsa gnyis mtshan 'chang ba'o/ /'od dang ldan pas na sdu gu'o/ /yan lag gi cha shasalegs par rdzogs pas na 'jig rten gsum na mdzes pa'o//'jig rten pa'i shes pa dang / yon tan gyi pha rol tu son pas na 'jig rten shes legs slob dpon te'o/ /'jig rten pa'i tha snyad rnams la shin tu mkhas pas na 'jig rten slob dpon no/ /rgol ba thams cad zil gyis gnon pas na 'jigs pa med pa ste mkhas pa'o//'gro dang ldog pa thams cad kyi mgon du gyur pas na mgon po'o/ /sems can ngan 'gro'i 'jigs pa rnams las skyob pas na skyob pa'o/ /'jig rten gsum la slu ba med pas na 'jig rten yid gcugs pa'o/ /nyon mongs pa'i dgra thams cad kyi 'jigs pas skrag pa rnams kyi skyabs su gyur pas na skyabs dang ngo //sems can thams cad kyi rgyud skyob pas na skyob pa'o/ /'di'i gong na med pas na bla na med pa'o/ /nam mkha' dang 'dra bar longs spyod kyis khyab pa'i chos dang zang zing dang mi 'jigs pa'i mtshan nyid can gyis yang dag pa'i longs spyod la spyod pas na nam mkha'i mtha' la longs spyod pa'o//thams cad mkhyen pa'i ye shes kyi rin po che dang 'dra bas na thams cad mkhyen pa'i ye shes mtsho'o/ /ma rig pa'i sgo nga nyid ni de kho na nyid rab tu 'gebs pas na sbubs so/ /de yang dag par 'byed cing rnam par 'joms pas na ma rig sgo nga'i sbubs 'byed pa'o//srid pa nyid dra ba yin la/ shes rab kyi ral gris rnam par 'joms pas na srid pa'i dra ba 'joms pa po'o/ /nyon mongs ma lus pa dang bral ba gang yin pa de ni nyon mongs ma lus zhi byed pa'o/ /gang gi phyir kun nas nyon mongs pa thams cad dang bral ba de nyid kyis na 'khor ba'i rgya mtsho pha rol phyin pa nyid de/nyes pa dang bral bas 'khor ba mi srid pa'i phyir ro/ /thams cad mkhyen pa'i ye shes kyi dbang bskur ba'i cod pan gyis dbang bskur ba mnga' bas na ye shes dbang bskur cod pan can no/ /yang dag par rdzogs pa'i sangs rgyas rgyan du thogs pa ni bcom ldan 'das rje btsun 'jam dpal lo//sdug bsngal gyi sdug bsngal dang / 'gyur ba'i sdug bsngal dang / 'du byed kyi sdug bsngal ni sdug bsngal gsum ste/ de lta bu'i sems can rnams kyi sdug bsngal gsum zhi bar mdzad pas na sdug bsngal gsum gyi sdug bsngal zhi ba'o//bdag nyid kyi sdug bsngal gsum mthar phyin par mdzad pas na gsum sel lo/ /sems can dpag tu med pa'i don mdzad pas na mtha' yas so/ /nyan thos dang rang sangs rgyas dang yang dag par rdzogs pa'i sangs rgyas kyis mi phyed pa'i rnam par grol ba gsum 'dul ba'i skye bo rnams kyi ngor gshegs pas na grol gsum thob pa'o//nyon mongs pa'i sgrib pa dang / shes bya'i sgrib pa dang las kyi sgrib pa dang bral bas na sgrib pa gsum las nges par grol ba'o/ /sgrib pa rnam par dag pas nam mkha' ltar mnyam pa'i chos kyi dbyings kyi ngo bo nyid la gnas pas na nam mkha' ltar mnyam pa nyid la gnas pa'o//nyon mongs pa'i dri ma thams cad las 'das pas na nyon mongs dri ma kun las 'das pa'o/ /'das pa dang ma 'ongs pa dang / da ltar byung ba ste dus gsum las 'das pas na dus gsum dus med rtogs pa po'o//dam pa'i chos kyi bdud rtsi'i char gyis sems can gyi rgyud tshim par mdzad pa'i phyir sems can kun gyi klu chen po'o/ /yon tan nyid thod dam rtse mo yin la/ yon tan gyi thod de thod du byas pas na yon tan thod can rnams kyi thod de mchog tu gyur pa'o/ /glo bur ba'i nyon mongs pa rnams las nges par grol bas na nyon mongs kun las rnam par grol ba'o//de nyid kyis na nam mkha'i lam ni rnam par mi rtog pa'i chos kyi dbyings kyis te/ de'i bdag nyid kyis mi g.yo ba'i ngo bo nyid du rab tu gnas pas na nam mkha'i lam la rab gnas pa'o/ /yid bzhin gyi nor bu rin po che'i gzugs 'dzin pas ni yid bzhin nor bu chen po 'chang ngo //khyab pas na khyab bdag go/ /sems can thams cad kyi ji ltar 'dod pa'i don yongs su rdzogs par mdzad pa nyid kyis na rin chen kun gyi mchog go/ /sems can thams cad mngon par 'dod pa'i dngos po rdzogs par mdzad pas na dpag bsam shing chen no//thams cad du khyab pa'i grib ma dang ldan pas na rgyas pa ste'o/ /sems can thams cad la bde ba stsol pa ni bum pa bzang po che ba'i mchog go/ /sngon gyi smon lam gyi dbang gis sems can thams cad kyi don mdzad pas na byed pa sems can kun don byed do//rnam pa thams cad du gzhan la phan pa rdzogs par mdzad pas na phan 'dogs mdzad do/ /sems can thams cad la bu gcig pa gces pa ltar mnyes gshin pas na sems can mnyes gshin pa'o/ /dge ba dang mi dge ba'i 'bras bu mtho ris dang dmyal ba yongs su mkhyen pas na bzang ngan shes pa'o//bya ba dang dus kyi rnam par 'byed pa mngon du yongs su mkhyen pas na dus shes pa'o/ /thams cad du khyab pa'i chos kyi dbyings kyi ngo bo nyid pas na khyab bdag go/ /kun nas nyon mongs pa yongs su mkhyen pas na dam tshig shes pa'o//grub pa'i mtha' thams cad kyi dngos grub dang dam tshig yongs su mkhyen pa mnga' bas na dam tshig ldan no/ /sems can rnams yongs su smin pa'i dus las mi 'da' bar 'dul bar mdzad pas na dus shes pa'o/ /sems can rnams kyi dad pa la sogs pa'i dbang po mkhyen pas na sems can dbang don shes so//nyan thos dang rang sangs rgyas dang yang dag par rdzogs pa'i sangs rgyas kyi rnam par grol ba nyon mongs pa dang rnam par bral ba'i bdag nyid can yongs su mkhyen pas na rnam pa gsum la mkhas pa po'o/ /stobs dang mi 'jigs pa ni yon tan te/de rnams 'di la mnga' bas na yon tan ldan no/ /gzhan gyi rgyud la yod pa'i yon tan rnams kyang mkhyen pas na yon tan shes pa'o/ /chos rnams sgyu ma dang 'dra ba la sogs pa'i tshul gyis ji lta ba bzhin du mkhyen pas na chos shes pa'o/ /bsod nams kyi rang bzhin yin pas na bkra shis so//bkra shis thams cad kyang 'di las byung bas na bkra shis 'byung ngo / /bkra shis thams cad kyi bdag nyid can yin pas na bkra shis kun gyi bkra shis pa'o/ /grags pa'i rgyur gyur pas na'am bsod nams kyi ngo bo nyid kyis kun gyis bsgrags pas na grags pa'o/ /dpal gyi gnas su gyur pas na bkra shis pa'o//yon tan thams cad dri ma med pa'i snyan pa grags pas na snyan grags so/ /bsod nams dang ye shes kyi rang bzhin gyis dge ba'i ngo bo nyid pas na dge ba'o/ /thams cad kyi dbugs 'byin pa'i gnas su gyur pas na dbugs 'byin chen po'o/ /sbyin pa la sogs pa yang dag par ston pa'i dga' ston chen po mnga' bas na dga' ston chen po'o//sems can rnams kyi dga' ba'i mchog tu gyur pas na dga' chen no/ /'tshang rgya ba dang che bas thob pa'i rol mo gang yin pa de ni rol mo che'o/ /mchod pa la sogs pa'i bkur sti thams cad dang ldan pa gang yin pa de ni bkur sti'o/ / mdzes par byed pa'i bya bas sems can rnams kyi don rdzogs par byed pa gang yin pa de ni rim gro'o/ /bsod nams dang ye shes kyi tshogs kyi 'byor pa dang ldan pas na phun sum tshogs pa'o/ /rtag tu bde ba dang yid bde ba'i bdag nyid can yin pas na mchog tu dga' ba'o//rnam pa thams cad du yongs su dag pa'i yon tan gyi grags pa'i bdag por gyur pas na grags bdag go/ /chos kyi rgyal po'i dpal dang ldan pas na dpal lo/ /sangs rgyas nyid kyi mchog dang ldan pas na mchog ldan no/ /mchog stsol bar 'os pas na mchog sbyin no//thams cad kyi mchog tu gyur pas na gtso bo'o/ /skyabs rnams kyi nang na mchog tu gyur pas na skyabs kyi dam pa'o/ /'khor bas 'jigs shing skrag pa'i skyabs su 'os pas na skyabs su 'os pa'o/ /seng ge la sogs pa 'jigs pa chen po'i dgra'i gzugs can du gyur pas na 'jigs chen dgra'o//bdag med pa gnyis thugs su chud pas na rab kyi mchog go/ /'khor ba'i 'jigs pa ma lus par sel bar mdzad pas na 'jigs pa ma lus sel ba'o/ /gtsug phud tsam 'jog pas na gtsug phud do/ /rma bya la bcibs pas na gtsug phud can no/ /lcang lo 'dzin pas na lcang lo can no//ral pa bsgyings pa dang ldan pas na ral pa can no/ /gdul bar bya ba'i phyir rab tu byung ba'i rtags 'dzin pas na muny+dza'o/ /nor bu thams cad kyi rgyan gyis brgyan pa'i cod pan 'chang bas na cod pan thogs pa'o/ /zhal lnga dang ldan pas na gdong lnga'o/ /gzhon nu'i gzugs kyi gtsug phud mnga' bas na gtsug phud lnga dang ldan pa'o//zur phud lnga dang ldan pa'i me tog gi thod dang ldan pa'i cod pan mnga' ba gang yin pa de ni zur phud lnga pa me tog thod do/ /mgo bregs shing ska rags 'chang bas na mgo zlum mo/ /brtul zhugs chen po'i sngags spyod pa 'dzin pas na brtul zhugs chen po'o//ye shes kyi tshangs pa dang spyod pas na tshangs par spyod pa'o/ /gsang sngags kyi tshul gyi brtul zhugs mchog go/ /dka' thub kyi mthar phyin pa brnyes pas na dka' thub mthar phyin no/ /sku gsung thugs chen po bsgom pa'i dka' thub dang ldan pas na dka' thub chen po'o/ /dkyil 'khor chen po'i dbang bskur bas bkrus pas na gtsang gnas so//thams cad kyi gtso bor gyur pas na dam pa'o/ /gau ta ma la sogs pa'i drang srong rnams 'dul bas na gau ta ma'o/ /srog gcod pa la sogs pa'i sdig pa thams cad dang bral bas na bram ze'o/ /chos kyi dbyings kyi tshangs pa mkhyen pas na tshangs pa'o//gnyis su med pa'i tshangs pa shes pa'o/ /mi gnas pa'i mya ngan las 'das pa ni mya ngan las 'das pa'i tshangs pa'o/ /de brnyes pas na mya ngan las 'das pa'i tshangs pa thob pa po'o/ /skye ba dang las dang sdug bsngal la sogs pa las ldog pas na grol ba'o/ / rmongs pa'i bdag nyid can gyi 'khor ba'i 'ching ba las thar bas na thar pa'o/ /yang dag pa'i lta ba'i rnam par grol ba'i yan lag dang ldan pas na rnam grol lus so/ /nyon mongs pa sna tshogs ma skyes pas na rnam grol lo/ /nyon mongs pa'i gnod pa dang rnam par 'tshe ba dang bral bas na zhi ba'o/ / sems can rnams kyi legs pa'i lam thob par mdzad pas na zhi ba nyid do/ /mi gnas pa'i mya ngan las 'das pa brnyes pas na mya ngan las 'das pa'o/ /rdzas su yod pa'i mya ngan las bzlog pas na mya ngan las 'das pa'o/ /mar me dang 'dra bar thams cad nye bar zhi ba'i ngo bo nyid pas na zhi ba'o/ / sems can rnams kyi dge ba thob par byed pas na legs pa'o/ /gsang sngags kyi tshul gyi lam gyis nges par 'byung bas na mya ngan las 'das pa'o/ /las zad par byed pas na mthar thug pa'o/ /mi gnas pa'i ting nge 'dzin brnyes pas na bde sdug sel ba'o/ /mthar thug pa thob pas thams cad kyi rtse mo thob pas na mthar gyur pa'o//lus zad pa'i chags pa dang bral ba brnyes pas na chags bral lus las 'das pa po'o/ /bdud la sogs pa rnams kyis brgal bar mi nus pas na thub pa med pa'o/ /gnyis pa med pas na dpe med pa'o/ /mngon par gsal ba'i sku med pas na mi mngon pa'o//rnam pa thams cad dang bral bas na mi snang ba'o/ /rnam pa gang gis kyang rtogs par mi nus pas na gsal byed min no/ /dus thams cad las 'das pas na mi 'gyur ba'o/ /lus med pa'i tshul gyis thams cad du shes pas na kun du 'gro ba'o/ /rtags ni khyab pa po'o/ /rnal 'byor pa rnams kyis kyang rtogs par mi nus pas na phra ba'o//zag pa dang bcas pa'i nyon mongs pa las grol bas na zad med do/ /byang chub kyi sa bon yin zhing de nyid nyes pa'i skyon dang bral bas na sa bon bral lo/ /'dod chags kyi rdul dang bral bas na rdul med pa'o/ / rdul thams cad kyis ma gos pas na rdul bral lo/ /bsam pa dang bag la nyal ba dang bcas pa'i dri ma dang bral bas na dri ma med pa'o/ /gnas ngan len la sogs pa'i nyes pa dang bral bas na nyes pa spangs pa'o/ /nad thams cad dang bral bas na skyon med pa'o/ /chos thams cad thugs su chud pas na shin tu sad pa'o//nyes pa gsum gyi dri ma dang bral bas na sad pa'i bdag go/ /nyan thos la sogs pa'i ye shes dang ldan pas na kun shes so/ /chos kyi dbyings kyi tshul gyis dngos po thams cad yang dag par rig pas na kun rig go/ /de nyid mchog tu gyur pas na dam pa'o/ / gzung ba dang 'dzin pa'i dngos po dang bral bas na rnam par shes pa'i chos nyid 'das so/ /chos thams cad gnyis su med pa'i ye shes mnga' bas na ye shes so/ /gnyis su med pa'i ngo bo 'dzin pas na gnyis med tshul 'chang pa'o/ /rnam par rtog pa thams cad las 'das pas na rnam par rtog med do//phyi rol gyi don la mi dpyod pas na lhun gyis grub ba'o/ /dus gsum gyi sangs rgyas bzhin du sems can gyi bya ba mdzad pas na dus gsum sangs rgyas las byed pa'o/ /chos thams cad thugs su chud pas na sangs rgyas so/ /thog ma dang tha ma ni thog ma dang tha ma ste/ gang la thog ma dang tha ma med pa de ni thog ma dang tha ma med pa ste chos sku'i ngo bo nyid do//dang po nyid nas chos nyid bdag nyid can yin pas na dang po'i sangs rgyas so/ /gang las kyang skye ba med pas na rgyu med pa'o/ /ye shes kyi rang bzhin gyi spyan gcig pus thams cad gzigs pas na ye shes mig gcig go/ /'dod chags la sogs pa'i dri ma dang bral bas na dri ma med pa'o//ye shes kyi rang bzhin gyi sku gang la yod pa de ni ye shes lus can no/ /ji ltar sngon gyi de bzhin gshegs pa slar mi ldog par gshegs pa de bzhin du de bzhin gshegs pas na de bzhin gshegs pa'o/ /tshig gi dbang phyug yin pas na tshig gi dbang phyug go//rgol ba rnams kyis zil gyis mi non pas na smra ba che ba'o/ /smra ba thams cad kyi gtso bor gyur pas na smra ba'i skyes mchog go/ /tshangs pa dang dbang po la sogs pa'i smra ba po thams cad kyi nang na mdzes par smra bas na smra ba'i rgyal po'o/ /tshangs pa la sogs pa smra ba po rnams kyi mchog tu gyur pas na smra ba'i dam pa'o//mchog tu phul du byung bas gtso bor gyur pas na mchog gi gnas so/ /mu stegs ngan pa'i ri dgas skrag par mdzad pas na smra ba'i seng ge'o/ /de nyid kyis na gzhan gyis mi thub pas na tshugs pa med pa'o/ /chos rnams kyi de kho na nyid thugs su chud pas na kun du blta ba'o//rab tu dga' bas sku'i bde ba chen po 'phags pas na mchog tu dga' ba'o/ /'od zer 'phro ba'i phreng bas brgyan pa'i sku mnga' bas na gzi brjid phreng ba'o/ /gzi brjid kyi phreng bas bskor yang zhi ba'i ngo bo nyid kyi sku dang ldan pas na legs par snang ba'i phyir blta na sdug pa'o//mi shes pa'i mun nag sel bar byed pa'i ye shes dam pa'i 'od mnga' bas ni 'od bzang ngo / /ye shes kyi gzugs kyis shes bya rnams la khyab cing gsal bar mdzad pas na 'bar ba'o/ /dpal gyi be'u'i gzugs kyis gnas pas na dpal gyi be'u'o/ /lag na 'od 'bar bas na 'od 'bar ba ste/lag pa 'od 'bar bas gsal bar byed pas na lag na 'od 'bar ro/ /ye shes kyi tshul gyis snang bar byed pas na snang ba po'o/ /dam pa'i chos kyi sman gyis nyon mongs pa'i nad gso bar mdzad pas na sman pa che mchog go/ /de nyid kyis na gtso bo ste'o/ /thog ma med pa'i skye ba'i zug rngu rtsa ba dang bcas pa 'byin pas na zug rngu 'byin pa bla na med pa'o//sman ma lus pa ngo bo nyid sangs rgyas dang chos kyis bsgrubs shing bskyed pa'i shing yin pas na sman rnams ma lus ljon pa'i shing ngo / /nyon mongs pa'i nad rtsa ba nas 'byin pas na nad do cog gi dgra che ba ste/ gnyen por gyur zhes bya ba'i don to/ /thams cad kyi 'dod par bya ba yin pas na sdu gu'o/ /'jig rten gsum gyi dpral bar gyur pas na 'jig rten gsum gyi mchog go/ /gang la ye shes mtshan nyid can gyi dpal yod pa de ni dpal ldan no/ /ji ltar skar ma'i dkyil 'khor gyi dbus na zla ba mdzes pa de bzhin du 'khor gyi dkyil 'khor na mdzes pas na rgyu skar dkyil 'khor can no//phyogs bcu nam mkha'i mtha' gtugs pa rnams su chos kyi rgyal mtshan shin tu mthon po sgreng bar mdzad pas na/ phyogs bcu nam mkha'i mtha' gtugs par/ /chos kyi rgyal mtshan legs par 'dzugs//zhes bya'o/ /char dang tsha ba'i gdung ba nye bar bzlog pa'i phyir dang / 'gro ba rnams la khyab pa'i gdugs gcig pu'i bdag nyid can pas na 'gro na gdugs gcig yangs pa ste'o/ /byams pa dang snying rje dag gis yongs su bskor ba'i tshul gyis 'gebs pas na byams dang snying rje'i dkyil 'khor can no//ye shes kyi dbang phyug dang ldan pas na dpal ldan no/ /pad+ma gar gyi dbang phyug gi gzugs 'dzin pas na pad+ma gar gyi bdag go/ /thams cad du khyab pas na khyab bdag chen po'o/ /rin po ches nye bar mdzes pa'i gdugs gang la yod pa de ni rin chen gdugs so/ /sangs rgyas thams cad kyi dbus na mdzes pas na sangs rgyas kun gyi gzi brjid che'o//sangs rgyas thams cad sku'i bdag nyid kyi ngo bo 'chang bar mdzad pas na sangs rgyas kun gyi sku 'chang ba'o/ /sangs rgyas thams cad kyi rnal 'byor chen po dang ldan pas na sangs rgyas kun gyi rnal 'byor che'o/ /de'i bka' bzhin byed pas sangs rgyas thams cad kyi bstan pa gcig pa'i tshul gang yin pa de ni sangs rgyas kun gyi bstan pa gcig go//rdo rjes mtshan pa'i rin po che ni rdo rje rin chen no/ /des dbang bskur bas khams gsum gyi bdag po'i mtshan nyid can gyi dpal gang la yod pa de ni rdo rje rin chen dbang bskur dpal lo/ /rin chen 'byung ldan gyi rigs la brten pa'i bdag po'i dbang phyug yin pas rin chen kun bdag dbang phyug ste'o//'jig rten gyi dbang phyug thams cad kyi bdag por gyur pas na 'jig rten dbang phyug kun gyi bdag go/ /rdo rje 'chang ba thams cad kyi bdag por gyur pas na rdo rje 'chang ba kun gyi rje'o/ /rin chen 'byung ldan dang /'od dpag tu med pa dang / mi bskyod pa'i ngo bo nyid kyis sangs rgyas thams cad dang gnyis su med pa'i thugs nyid du gyur pas na sangs rgyas kun gyi thugs che ba'o/ /sangs rgyas thams cad kyi thugs la bzhugs pa gang yin pa de ni sangs rgyas kun gyi thugs la gnas pa'o/ / sangs rgyas thams cad kyi sku mnga' ba de ni sangs rgyas kun gyi sku che ba'o/ /gang gi gsung sangs rgyas thams cad dang 'dra ba de ni sangs rgyas kyi gsung yang yin no/ /nyi ma dang 'dra bar byed pas mi shes pa'i mun nag sel bar mdzad pas na rdo rje nyi ma snang ba che'o/ /nyon mongs pa'i gdung ba sel bar byed pa dang dri ma med pa'i 'od zer dang ldan pas na rdo rje zla ba dri med 'od do//'dod chags dang bral ba sngon du 'gro ba la sogs pa spong ba dang ldan pas na chags bral la sogs so/ /thugs rje chen po'i chags pa dang ldan pas na chags pa che'o/ /sna tshogs pa'i gzugs su yang dag par ston pas na kha dog sna tshogs 'bar ba'i 'od do//yang dag par rdzogs pa'i sangs rgyas kyi rdo rje'i skyil krung 'chang bas rdo rje skyil krung rdzogs sangs rgyas so/ /sangs rgyas rnams kyi 'gro ba ni yang dag par 'dus nas chos kyi 'gro ba mdzad pa'o/ /de 'dzin pas na sangs rgyas 'gro ba'i chos 'dzin pa'o//gang la dpal yod pa de ni dpal ldan no/ /sangs rgyas kyi pad+mas bskyed pa gang yin pa de ni sangs rgyas pad+ma skyes so/ /thams cad mkhyen pa'i ye shes ni mdzod do/ /de 'dzin pas na kun mkhyen ye shes mdzod 'dzin pa'o/ /sangs rgyas thams cad kyi bdag por gyur pas na rgyal po'o/ / med pa'i ngo bo sna tshogs yod pa'i ngo bor ston pas na sgyu 'phrul te/ de thugs la 'jog par mdzad pas na sgyu 'phrul sna tshogs 'chang ba'o/ /mchod par 'os pas na che ba'o/ /sangs rgyas rnams kyi rig sngags ni shes rab bo/ /de 'dzin par mdzad pas na sangs rgyas rig sngags 'chang ngo / / chos thams cad bdag med par so sor thugs su chud pas na rdo rje rnon po'o/ /nyon mongs pa'i ljon shing gcod pas na ral gri che'o/ /yi ge mchog ni a yis brjod pa de 'dzin pas na yi ge mchog go/ /mi bden pa'i dri ma'i rnam par rtog pa med pas na rnam par dag pa'o/ /theg pa chen po'i lam gyis 'khor ba'i sdug bsngal gcod pas na theg pa chen po sdug bsngal gcod do//rdo rje'i chos ni gnyis su med pa'i ye shes te/ rdo rje chos kyi mtshon cha chen po de gzung ba dang 'dzin pa'i rnam par rtog pa gcod pas na mtshon cha chen po rdo rje chos so/ /mi phyed cing zab pa ston pa'i theg pa chen pos nyan thos dang rang sangs rgyas kyi rgyal ba gang yin pa de ni rdo rje zab mo dzi na dzika go//bdud rnams kyis mi phyed pa'i blo dang ldan pas na rdo rje blo gros so/ /mi rtag pa la sogs pa'i tshul gyis dngos po thams cad kyi don mkhyen pas na don bzhin rig go/ / pha rol tu phyin pa bcu yongs su rdzogs pa mnga' bas na pha rol phyin pa kun rdzogs pa'o/ /sa bcu'i rgyan dang ldan pa de ni sa rnams kun gyi rgyan dang ldan pa'o/ /rnam par dag pa'i chos bdag med pa'i ye shes thugs su chud pas na rnam par dag pa bdag med chos so/ /yang dag pa'i ye shes nyid zla ba ste/de'i 'od kyis log pa'i shes pa'i mun nag gis khebs pa'i sems dri ma med par mdzes pas na yang dag ye shes zla 'od bzang ngo / /sgyu 'phrul dra ba'i rgyud kyi don ston pa'i brtson 'grus chen po dang ldan pa gang yin pa de ni brtson chen sgyu 'phrul dra ba ste'o/ /ci'i phyir zhe na/ rgyud thams cad kyi bdag por gyur pa des na rgyud kun gyi bdag po'o//de nyid kyis na dam par gyur pas na mchog go/ /ma lus pa'i rnam pa las rgyal ba'i phyir rdo rje skyil mo krung bcas gang yin pa de ni rdo rje gdan ni ma lus ldan no/ /bya ba byas pas phung po'i bdag nyid can longs spyod rdzogs pa dang sprul pa'i sku mnga' bas na ye shes sku rnams ma lus 'chang ngo //thams cad du bzang bas na kun du bzang po'o/ /blo gros shin tu bzang po dang ldan pas na blo gros bzang ngo / /byang chub sems dpa' sa'i snying po'i gzugs 'dzin pas na sa'i snying po'o/ /'gro ba rnams kyi dbugs 'byin pa'i gnas su gyur pas 'gro ba 'dzin pa'o//sangs rgyas thams cad bskyed pa'i rgyur gyur pas na sangs rgyas kun gyi snying po che'o/ /sprul pa'i 'khor lo sna tshogs ni dkyil 'khor gyi 'khor lo'o/ /de 'dzin par mdzad pas na sprul pa'i 'khor lo sna tshogs 'chang ngo / /dngos po thams cad kyi ngo bo nyid ni ngo bo nyid med pa'o/ /de nyid kyis na rang bzhin gyi mchog tu gyur pa'o//de nyid kyis na dngos po kun gyi rang bzhin 'dzin no/ /skye ba med pa'i chos gang yin pa de ni skye med chos te/ rang bzhin med pa'i chos gang yin pa de ni skye ba med pa'i don ston pas na chos kyi don to/ /chos thams cad kyi ngo bo nyid ni stong pa nyid kyi rang bzhin no/ / de 'dzin pas na chos kun ngo bo nyid 'chang ba'o/ /shes rab chen pos skad cig ma la chos thams cad thugs su chud pas na shes rab chen pos skad cig la'o/ /chos thams cad mi rtag pa la sogs pa'i tshul gyis thugs su chud pa thugs la 'dzin pas na chos kun khong du chud pa 'chang ngo / /chos thams cad ni 'dus byas la sogs pa ste/de mngon par rtogs shing thugs su chud pa gang yin pa de ni chos kun mngon par rtogs pa ste'o/ /shes rab mchog tu gyur pas na thub pa blo mchog go/ /'byung po ni bden pa'i don to/ /de'i mtha' ni mthar thug pa nyid de/ de thugs su chud pas na 'byung po'i mtha'o//gnas ngan len gyi rnam par rtog pa thams cad dang bral bas mi 'gyur bas na mi g.yo ba'o/ /ma rig pa dang 'dod chags la sogs pa'i rnyog pa dang bral bas na rab tu dang ba'i bdag nyid do/ /rdzogs pa'i sangs rgyas kyi byang chub ni zad pa dang mi skye ba shes pa'o/ /de 'dzin par mdzad pas na rdzogs pa'i sangs rgyas byang chub 'chang ngo //chos kyi dbyings kyi ngo bo nyid kyis sangs rgyas thams cad kyi thugs su chud pas na sangs rgyas kun gyi mngon sum pa'o/ /ye shes kyi me lce gang yin pa de ni ye shes kyi me lce'o/ /shin tu bzang po'i 'od dang ldan pas na 'od 'bar gsal lo/ /'dod pa ni dgos pa ste sangs rgyas nyid do//de'i don grub pas na 'dod pa'i don grub pa'o/ /'jig rten las 'das pa nyid pas na dam pa ste'o/ /ngan 'gro ngan song thams cad nye bar zhi bar mdzad pas na ngan song thams cad rnam sbyong ba'o/ /ye shes kyi dbang phyug dang ldan pas na mgon po'o/ /nyon mongs pa'i 'ching ba thams cad dang bral bas na sems can kun gyi mchog go//thabs la mkhas pa thams cad kyi stobs kyis sems can thams cad rab tu grol bar mdzad pas na sems can thams cad rab grol byed do/ /nyon mongs pa de ni 'dod chags la sogs pa'o/ /de dang lhan cig g.yul sprod pas na nyon mongs g.yul lo//der ni gcig pu dpa' bo yin gyi gzhan ma yin pas na gcig dpa' ba'o/ /mi shes pa'i dgra'i dregs pa ni phyi rol gyi don la mngon par zhen pa'o/ /de spangs pas na mi shes dgra'i dregs pa 'joms pa'o/ /ye shes kyi dbang phyug dang ldan pas na dpal ldan no/ /'jig rten las 'das pa'i blo ste/de dang ldan pa'i steg cing sgeg pa dang ldan pa'o/ /brtan po'i nyams dang ldan pa la brten cing bdud la sogs pa'i dgra bzlog pas na brtan po'i gzugs 'chang ba'i/ /shin tu mi bzad pa'i gzugs 'dzin pas na mi sdug gzugs 'chang ba'o//mtshon cha sna tshogs thogs pa'i lag pa'i mchog brgya po bskyod cing sna tshogs su 'jog pa'i rkang pa brgya snyed kyis bskyod pa'i gar mdzad pas na/ /lag pa brgya po kun bskyod cing / /gom pa'i stabs kyis gar byed pa/ /zhes bya'o/ /dpal dang ldan pa'i lag pa brgyas khyab pas nam mkha'i khams kyi mthar thug par gar mdzad pas na/dpal ldan lag pa brgyas gang la/ /nam mkha' khyab par gar byed pa/ /zhes bya'o/ /sa'i dkyil 'khor gzhi ni sa'i cha'i steng ste/ de'i khyon de la rkang pa ya gcig gi mthil gyis mnan nas bzhugs pas na/ sa yi dkyil 'khor gzhi yi khyon/ /rkang pa ya gcig mthil gyis gnon//zhes bya'o/ /gang gis rkang pa'i mthe bong gi sen mo'i khyon gyis tshangs pa'i yul sa'i steng gi cha gnon pa ste/ rkang mtheb kyi sen mos tshangs pa'i yul sa dang bcas pa'i rtse mo mnan nas der bzhugs pa gang yin pa de ni/ rkang mtheb sen mo'i khyon gyis kyang / /tshangs pa'i yul sa rtse nas gnon//zhes bya'o/ /don gcig pa nyid ni 'di lta ste/ /gnyis su med pa'i don nyid do/ /gzung ba dang / 'dzin pa dang bral ba gnyis su med pa ni gnyis su med pa'i chos kyi don dam pa yin no/ /de ni nam yang gzhan du 'gyur ba med pas 'jig pa med pa'o/ /phyi rol gyi gzugs la sogs pa'i don so sor snang ba yod pas rnam pa sna tshogs pa'i rnam par rig pa skye bar 'gyur bas rnam rig sna tshogs gzugs don can no//sems nyid rnam par shes pa ste/ de'i rgyud rgyun mi 'chad pas na sems dang rnam shes rgyud dang ldan no/ /dngos po'i don ma lus pa rnams la sems pa'i rang bzhin gyi shes rab kyis rnam par dpyad nas dga' ba bskyed pas na dngos don ma lus rnams la dga'o//stong pa nyid kyi don la shin tu dga' ba skyes pas na stong pa nyid dga'o/ /de nyid kyis na shes rab kyi mchog yin pas na blo'i mchog go/ /srid pa la chags pas na srid pa'i 'dod chags so/ /srid pa'i 'dod chags la sogs pa las 'das pas na srid pa'i 'dod chags sogs spangs pa'o//sogs pa'i sgras ni 'dod pa'i 'dod chags las 'das pa'o/ /gzhan sems can gyi don gyi dbang gis srid pa gsum la dga' ba gang la yod pa de ni srid gsum dga' ba chen po pa'o/ /sprin dkar po ltar dkar bas na sprin dkar dag pa bzhin du dkar ro//kha dog thams cad med pas na dag pa'o/ /de nyid kyis na 'od bzang ston ka'i zla ba'i 'od de/ /'od shin tu bzang po dang ldan pas 'od bzang ngo / /'char ma thag pa'i nyi ma'i dkyil 'khor gyi 'od ltar dmar bas na nyi ma 'char ka'i dkyil ltar mdzes so//sen mo'i 'od shin tu dmar ba dang ldan pas na sen mo'i 'od ni shas cher dmar ro/ /cod pan nor bu mthon ka'i rtse mo ltar mdzes pa yod pa gang yin pa de ni cod pan bzang po mthon ka'i rtse'o/ /skra'i rtse mo mthon ka chen po dang 'dra ba mnga' bas na skra mchog mthon ka chen po can no/ /nor bu chen po'i 'od dang ldan pa'i dpal gang la yod pa de ni nor bu chen po 'od chags dpal lo//shes rab kyi pha rol tu phyin pa bzhin du sangs rgyas kyi sprul pas brgyan pas na sangs rgyas sprul pa'i rgyan dang ldan no/ /rdzu 'phrul chen po'i gom pa'i stobs che ba 'dor bas 'jig rten gyi khams brgya g.yo bar mdzad pas na 'jig rten khams brgya kun bskyod pa'o//rdzu 'phrul rkang pa'i stobs chen ldan/ /zhes bya ba la/ rdzu 'phrul nyid kyi rkang pa'i stobs chen po dang ldan pa gang yin pa de ni rdzu 'phrul rkang pa'i stobs chen ldan no/ /de kho na nyid la gnas pas na de nyid do/ /sngon nyams su myong ba brjed par mi 'gyur bas na dran pa chen po 'chang ngo / / sangs rgyas dang chos dang dge 'dun dang / gtong ba rjes su dran pa ste/ rjes su dran pa bzhi po de nyid ting nge 'dzin to/ /de rnams kyi bdag por gyur pas na dran pa bzhi po ting nge 'dzin rgyal lo/ /byang chub kyi yan lag gi me tog gi dri dang ldan pa'i gzugs can yin pas na byang chub yan lag me tog spos so//de bzhin gshegs pa thams cad kyi yon tan rin po che'i bzhir gyur pas de bzhin gshegs pa'i yon tan mtsho'o/ /lam gyi yan lag brgyad nyan thos dang rang sangs rgyas la sogs pa dang / thun mong gi tshul gyis yongs su mkhyen pas na lam gyi yan lag brgyad tshul rig go/ / de nyid kyis na yang dag sangs rgyas lam rig pa'o/ /thugs rje chen po'i dbang gis sems can thams cad kun la shas cher chags pas na sems can kun la shas cher chags pa'o/ /shes rab kyi de kho na nyid la brten pas na nam mkha' lta bur chags pa med pa'o/ /sems can thams cad kyi yid la 'jug cing shes pas sems can kun gyi yid la 'jug pa'o//de nyid kyis na yid mgyogs pas sems can thams cad la chos kyi tshigs su bcad pa gtong bas na sems can kun gyi yid ltar mgyogs so/ /tha ma dang / 'bring dang / mchog gi sems can thams cad kyi dbang po'i don yongs su mkhyen pas na sems can kun gyi dbang don shes so//shin tu yid du 'ong zhing dga' bas sems can thams cad kyi yid 'phrog pas na sems can kun gyi yid 'phrog pa'o/ /gzugs ni dbu ba lta bu ste/ /tshor ba chu yi chu bur 'dra//'du shes smig rgyu 'dra ba ste/ /'du byed rnams ni chu shing 'dra/ /rnam shes sgyu ma lta bu'o/ /zhes phung po bstan pa'i tshul gyis ston pa 'dis phung po lnga don gyi de kho na nyid mkhyen pas na phung po lnga don de nyid shes so/ /tshul khrims dang / ting nge 'dzin dang / rnam par grol ba dang / rnam par grol ba'i ye shes mthong ba ste/ dung po lnga po rnam par dag pa'i ngo bo nyid 'dzin pas na rnam dag phung po lnga 'chang ba'o/ /nyan thos la sogs pa'i nges par 'byung ba'i mthar thug pa la zhugs pas na nges 'byung kun gyi mtha' la gnas so/ /nges par 'byung ba thams cad kyi rang gi ngo bo thugs su chud pas na nges par 'byung ba kun la mkhas pa'o//nges par 'byung ba thams cad la zhugs pas na sems can rnams lam de la 'jog pas na nges 'byung kun gyi lam la gnas so/ /sems can rnams la nges par 'byung ba thams cad ston pas na nges par 'byung ba kun ston pa'o/ /rten cing 'brel par 'byung ba yan lag bcu gnyis kyi mtshan nyid can gyi srid par 'jug pa rtsa ba dang bcas pa yang bton pas na yan lag bcu gnyis srid rtsa bton pa'o//de nyid kyis na rten cing 'brel par 'byung ba yan lag rnam pa bcu gnyis can med pa rnam par dag pa'i mya ngan las 'das pa thob pas na dag pa rnam pa bcu gnyis 'chang ba'o//sdug bsngal dang / kun 'byung ba dang / 'gog pa dang / lam gyi mtshan nyid can bden pa bzhi'i tshul gyi rnam pa ston pas na bden bzhi'i tshul gyi rnam pa can no/ /sdug bsngal la chos shes pa la sogs pa'i shes pa brgyad ni shes pa brgyad po ste/ shes pa de rnams thugs su chud cing de rnams nyid thugs la 'jog pas na shes pa brgyad po rtog pa 'chang ngo //skye mched bcu gnyis kyi rnam pa'i mtshan nyid can kun rdzob kyi bden pa'i don ston pas na bden don rnam pa bcu gnyis ldan no/ /de kho na nyid rnam pa bcu drug ni nang stong pa nyid nas brtsams te/ dngos po med pa'i ngo bo nyid stong pa nyid kyi bar gyi stong pa nyid bcu drug go//de rnams ji lta ba bzhin mkhyen pas na de nyid rnam pa bcu drug rig go/ /de kho na nyid kyi ye shes bcu drug gi rnam pa la gzhan yang me long lta bu dang / mnyam pa nyid dang / so sor rtog pa dang / bya ba sgrub pa ste/ rnam pa bzhi bsnan pa ni rnam pa nyi shu ste/de lta bu'i tshul gyis byang chub pa'o/ /sna tshogs pa'i rnam pas byang chub pas na rnam pa sangs rgyas so/ /rnam pa thams cad mkhyen pa'i ye shes dang ldan pas na kun rig go/ /thams cad kyi dam pa yin pas na mchog go/ /sangs rgyas kyi sku dpag tu med pa'i sangs rgyas kyi sprul pa rnams kyis 'jig rten gyi khams mtha' yas par sems can gyi don la cig car 'jug pas na/sangs rgyas kun gyi sprul pa'i sku/ /bye ba dpag med 'gyed pa po'o/ /skad cig thams cad mngon par rtogs pa ni dus kyi mtshan nyid yongs su shes pa ste de mkhyen pas na skad cig thams cad mngon par rtogs pa'o//sems can thams cad dang 'brel pa'i sems kyi mtshan nyid ni yang dag pa dang log pa'i mtshan nyid can no/ /de mkhyen pas sems kyi skad cig kun rig go/ /theg pa sna tshogs pa ni nyan thos kyi theg pa la sogs pa'o/ /de nyid thabs te/ theg pa sna tshogs pa'i thabs des 'gro ba rnams kyi don la rnam par rtog cing rdzogs par mdzad pas na/theg pa sna tshogs thabs tshul gyis/ /'gro ba'i don la rtog pa po'o/ /theg pa gsum ni nyan thos la sogs pa'i theg pa ste/ de rnams las 'byung bas na theg pa gsum gyi nges 'byung la'o/ /don dam par ni theg pa la dbye ba yod pa ma yin te/sangs rgyas nyid du 'bras bu gcig pas na/ theg pa gcig gi 'bras bur gnas/ /zhes bya'o/ /nyon mongs pa rnams kyi khams ni mig la sogs pa'i rigs te/ pha rol gyi don med pas rgyu dang 'bras bu'i ngo bor med pas na rnam par dag pa'i bdag nyid gang yin pa de ni nyon mongs khams rnams dag pa'i bdag go//dge ba dang mi dge ba'i las kyis kun nas bslang ba'i sems ni las kyi khams so/ /de yang mi skye ba'i chos can nyid du byas pas na las kyi khams rnams zad byed pa'o/ /chu bo ni bzhi ste/ 'dod pa'i chu bo dang / srid pa'i chu bo dang /lta ba'i chu bo dang / ma rig pa'i chu bo'o/ /de nyid brgal dka' bas na rgya mtsho'o/ /de rnams las brgal bas na chu bo'i rgya mtsho kun las brgal ba'o/ /sbyor ba ni bzhi ste/ srid pa la sogs pa'o/ /sbyor ba nyid 'jig par byed pas na dgon pa'o/ /de rnams las nges par 'byung bas na sbyor ba'i dgon pa las byung ba'o//nyon mongs pa ni 'dod chags la sogs pa'o/ /nye ba'i nyon mongs pa ni khro ba la sogs pa'o/ /de rnams kun nas bsags pas kun nas nyon mongs pa'i phyir kun nas nyon mongs pa'o/ /de rnams bag chags bcas par shin tu spangs pa gang yin pa de ni bag chags bcas pa gtan spangs pa'o//thugs rje chen po dang shes rab dang thabs rnams kyis 'bras bu dang bcas shing don yod par 'gro ba'i don mdzad pas na/ snying rje chen po shes rab thabs/ /don yod 'gro ba'i don byed pa'o/ /mtshan mar 'dzin pa'i bdag nyid can ni 'du shes so//'du shes kyang phyi'i yul med pas mtshan mar 'dzin pa yang med pa nyid ni 'du shes thams cad kyi don spangs pa'i don gyi dgos pa gang yin pa de ni 'du shes kun gyi don spangs shing ngo / /rnam par shes pa'i don ni rnam par shes pa'i yul du brtags pa nyid kyis 'gog par byed pa'i rnam pa 'gag par ston pas na rnam shes don ni 'gag par byed do//sems can thams cad kyi yid kyi yul la dmigs pas na sems can kun yid yul dang ldan no/ /'gro ba gzhan med pas sems can thams cad kyi yid kyi 'gro ba mkhyen pas na sems can kun gyi yid rig pa'o/ /gzhan yang gcig pur ma zad kyi de'i yid kyi bar la gnas pas na sems can kun gyi yid la gnas so//de rnams kyi sems ni de dag sems te/ de la dmigs pas de dang mnyam pa nyid thob pas de dag sems dang mthun par 'jug go/ /sems can thams cad la yid du 'ong ba'i gzugs kyis tshim par byed pas na sems can kun yid tshim par byed do//sems can thams cad la don dam pa ston pas yid dga' ba bskyed pas na sems can kun gyi yid dga' ba'o/ /gang grub cing yongs su rdzogs pa'i mthar thug pa de ni grub pa'i mthar phyin no/ /phyi'i don gyi 'khrul pa med pas na log par lta ba'i mtshan nyid can nor ba mi mnga' bas na nor ba thams cad rnam par spangs pa'o//de nyid kyis na the tshom med pa'i blo'o/ /blang ba dang spang ba dang btang snyoms su bya ba'i don gsum po ston pas na don gsum the tshom med pa'i blo'o/ /longs spyod dang thar pa'i mtshan nyid can gyi don thams cad la rang dbang yod pa gang yin pa de ni kun don to/ /stong pa nyid dang mtshan ma med pa dang /smon pa med pa ni yon tan gsum ste/ rnam par thar pa'i sgo de gsum yod pa'i bdag nyid can gang yin pa de ni yon tan gsum gyi bdag go/ /phung po lnga ni gzugs la sogs pa'o/ /dus gsum ni 'das pa dang / ma 'ongs pa dang / da ltar byung ba'i dus so/ /dus de rnams kyi dus gcig pa gang yin pa de ni gsum ste/dus de rnams kyi phra ba'i gnas skabs sngon dang phyi mar 'byung ba ni skad cig thams cad de/ de rnams kyi bye brag phyed pas na/ phung po lnga don dus gsum du/ /skad cig thams cad bye brag phyed/ /ces bya'o/ /shin tu phul du byung ba ye shes kyi dbang phyug dang ldan pas na skad cig gcig gis rdzogs sangs rgyas so//chos kyi sku'i ngo bo nyid du mi phyed pas na sangs rgyas kun gyi rang bzhin 'chang ngo / /chos kyi sku dang ldan pas na 'byung ba las gyur pa'i lus med pa'o/ /longs spyod rdzogs pa'i sku kun dang ldan pas na lus te'o/ /sprul pa'i sku dang ldan pas na lus kyi mchog go//lus kyi mtha' rtogs pa dang ldan pas na lus kyi mtha' ni rtogs pa'o/ /lus kyi mtha' rtogs pa'i tshul gyis na gzugs rnams thams cad kun du ston pa'o/ /bsam pa thams cad yongs su rdzogs par mdzad pa'i yid bzhin gyi nor bu'i ngo bor gyur pas na nor bu chen po'o/ / rin po ches mtshan pa'i rgyal mtshan ni rin chen tog go/ /chos kyi sku'i ngo bo nyid yang dag par rdzogs pa'i sangs rgyas thams cad kyis rtogs par bya ba yin pas na sangs rgyas kun gyis rtogs bya ba'o/ /bla na med pa yang dag par rdzogs pa'i byang chub de'i rang bzhin yin pas na sangs rgyas byang chub bo//'di'i gong na gzhan med pas na bla na med pa'o/ /gsang sngags kyi rgyud las byung bas na gsang sngags las byung ba'o/ /gnyis su med pa'i ye shes kyi ngo bo nyid yin pas na yi ge med pa'o/ /de bzhin gshegs pa dang / pad+ma dang / rdo rje'i rigs ni gsang sngags chen po'i rigs gsum yin te/de'i rang bzhin yin pas na gsang sngags chen po'i rigs gsum pa'o/ /gsang sngags thams cad kyi bskyed pa'i rgyur gyur pas na gsang sngags don kun bskyed pa po'o/ /rig pa'i ngang tshul can ni thig le chen po ste/ sems dpa' zhes bya ba'i don to/ /yi ge dang sgra skad dang brda thams cad dang bral bas yi ge med pa'o//stong pa nyid chen po'i ngo bo nyid yin pas na stong pa chen po'o/ /a ra pa tsa na ste yi ge lnga'i bdag nyid can yin pas na yi ge lnga'o/ /thig le stong pa nyid kyi gsang sngags dam pa'i yi ge brgya yin pas na thig le stong pa yi ge brgya'o/ /sna tshogs pa'i rnam pa dang ldan pas na rnam pa kun ldan no//chos kyi sku'i bdag nyid yin pas na rnam pa med pa'o/ /bcu drug phyed phyed bzhi cha'i lhag mar gyur pa'i zla ba'i thig le ral pa'i cod pan la thogs pas na bcu drug phyed phyed thig le can no/ /yan lag med pa gang yin pa de ni yan lag med pa ste cha shas med pa zhes bya ba'i don to//brtsi ba dang grangs kyis bcad pa las 'das pas na/ brtsi ba las 'das pa'o/ /bsam gtan gsum pa'i rtse mo rnam par mi rtog pa'i bsam gtan bzhi pa 'dzin pas na bsam gtan bzhi pa'i rtse mo can no/ /de nyid mkhyen pas na bsam gtan yan lag kun shes shing ngo //ting nge 'dzin ni dpa' bar 'gro ba la sogs pa'o/ /de'i rigs dang rgyud ni shes rab kyi pha rol tu phyin pa'o/ /de mkhyen pas na ting nge 'dzin rigs dang rgyud rig pa'o/ /ting nge 'dzin lus can ni chos kyi sku'o/ /de nyid sku gnyis pas mchog tu gyur pas na lus kyi mchog go//longs spyod rdzogs pa'i sku thams cad du mdzes pas na longs spyod rdzogs sku kun gyi rgyal lo/ /gang gi phyir mchog tu gyur cing sangs rgyas kyi sprul pa'i rgyud 'chang ba de nyid kyis na sprul pa'i sku ste sku'i mchog /sangs rgyas pa'i sprul pa'i rgyud 'chang ngo / /phyogs bcur sprul pa sna tshogs 'gyed//ji bzhin 'gro ba'i don byed pa/ /zhes bya ba ni/ phyogs bcur rnam pa sna tshogs shing du ma'i sprul pa 'gyed pa la brten nas ji lta ba bzhin 'gro ba'i don mdzad pa gang yin pa de la de skad ces bya'o/ /la lar ni lha'i dbang por ston pa'o/ /la lar ni lha'i lha'o/ /lha'i bdag po ni dga' ldan gyi lha'i bdag po'o//lha min bdag po ni thags bzangs ris la sogs pa'o/ /la lar ni 'chi med dbang po ste/ 'thab bral la sogs pa'i lha rnams kyi rgyal po'o/ /lha'i bla ni gza' phur bu'o/ /'jigs byed ni drag po'i tshogs so/ /'joms byed dbang phyug ni drag po'o//de dag la sogs pa'i sprul pa rnams kyis 'gro ba'i don mdzad ces bya ba'i don to/ /'khor ba'i bag chags kyi nyes pa med pas na srid pa'i dgon pa las brgal ba'o/ /'gro ba la rjes su ston pas na ston pa'o/ /gnyis pa med pas na gcig pu'o/ /'gro ba'i bla mar gyur pas na 'gro ba'i bla ma'o//chos kyi sbyin bdag chen por phyogs bcu'i 'jig rten gyi khams su shas cher grags pas na/ 'jig rten phyogs bcur rab grags pa/ /chos kyi sbyin bdag che ba po'o/ /ci zhig mdzad nas bdud 'joms she na/ /byams pa'i go chas sku la gyon pas chas byas shing de bzhin nyid du snying rje'i ya lad bgo ba byas nas shes rab kyi ral gri mda' gzhu thogs te g.yul las rgyal bar mdzad do zhes sbyar ro//nyon mongs pa dang mi shes pa'i g.yul ngo las rgyal bar mdzad pas na nyon mongs mi shes g.yul ngo sel to/ /'jigs pa med pas na dpa' bo'o/ /bdud kyi dgra yin pas na bdud dgra'o//bdud las rgyal bas na bdud thul ba'o/ /phung po dang / nyon mongs pa dang / 'chi bdag dang / lha'i bu'i bdud ces grags pa ni bdud bzhi'o/ /de rnams kyi 'jigs pa rnams sel cing mthar thug par mdzad pas na/ bdud bzhi'i 'jigs pa sel bar byed/ bdud kyi dgra gcig pur ma zad de/bcom ldan 'das ni bdud kyi dpung gi bar rnams kyang pham par mdzad pas na bdud kyi dpung rnams pham byed pa'o/ /de nyid kyis na rdzogs pa'i sangs rgyas 'jig rten gyi 'dren par gyur pa'o/ /mchog tu bla mar gyur pa yin pas na phyag byar 'os pa yin la/de nyid kyis na/ mchod 'os bstod 'os phyag gi gnas/ /rtag tu ri mor bya ba'i 'os/ /bkur 'os rjed par bya ba'i mchog /phyag byar 'os pa bla ma'i rab/ /ces bya'o/ /khams gsum thams cad du gom pa gcig gis bgrod par mdzad pa gang yin pa de ni 'jig rten gsum po gom gcig bgrod pa'o//de ltar mkha' ltar mtha' yas te de'i mthar thug pa'i gom pa mnga' bas na mkha' ltar mtha' med pa rnam par gnon zhes bya'o/ /byang chub sems dpa'i rig pa gsum ni 'di lta ste/ lha'i mig dang / sngon gyi gnas rjes su dran pa dang / zag pa zag pa'o/ /rig pa zhes bya ba'i sgra ni ye shes la zer bas des na ye shes rnam pa gsum dang ldan pas gsum rig go//bdag dang bdag gir yongs su shes pa'i bag chags thams cad dang bral bas na gtsang ba'i phyir gtsang ma'o/ /nyes pa thams cad dang bral ba'i phyir dag pa'o/ /lha'i mig la sogs pa mngon par shes pa drug gang la yod pa de ni mngon shes drug ldan no//sangs rgyas rjes su dran pa dang / chos rjes su dran pa dang / dge 'dun rjes su dran pa dang / tshul khrims rjes su dran pa dang / gtong ba rjes su dran pa dang / lha rjes su dran pa rnams te/ de rnams dang ldan pas na rjes dran drug go/ /byang chub la sems pa'i sems gang la yod pa de ni byang chub sems dpa'o//gzhan gyi don la gcig tu mdzad pas na sems dpa' chen po'o/ /rnam pa thams cad kyi yul la dad pa'i rdzu 'phrul ldan pas na rdzu 'phrul chen po'o/ /'jig rten las 'das pa'i ye shes thugs su chud pas na 'jig rten las 'das pa'o/ /shes rab kyi pha rol tu phyin pa'i sbyor bas chos kyi sku thugs su chud pa'i mthar thug pas na shes rab pha rol phyin pa'i mtha'o//rnam pa thams cad du de'i ngo bo nyid du gyur pas na shes rab kyis ni de nyid thob pa'o/ /so so rang rig pa'i chos kyi tshul gyis bdag rig pas na bdag rig go/ /sgyu ma la sogs pa'i tshul gyis gzhan rig pas gzhan rig go//bya ba thams cad rdzogs par mdzad pas na thams cad pa'o/ /sems cad thams cad la phan par dgongs pas na kun la phan pa'o/ /mang pos bkur bas gang zag gi gtso bor gyur pas na gang zag mchog go/ /thams cad dpe thams cad las 'das pas na dper bya kun las 'das pa ste'o//nges par legs par 'dod pa rnams la mtho ris dang thar pa'i rgyur gyur pas na de nyid shes par bya ba ste/ shes par bya ba de las gzhan med ces bya ba'i don to/ /de kho na nyid kyi ye shes ma lus pa skye ba'i rgyur gyur pa shes pa thams cad mkhyen pa nyid bdag po'o/ / dam pa yin pas na mchog go/ /sbyin pa thams cad kyi gtso bor gyur pa ni chos kyi sbyin pa yin la/ de bas na chos kyi sbyin bdag gi gtso bor gyur pas gtso bor chos kyi sbyin bdag ste'o/ /phyag rgya chen po dang / chos kyi phyag rgya dang / las kyi phyag rgya dang / dam tshig gi phyag rgya dang bzhi'o/ /de rnams kyi don ni phyag rgya bzhi'i don te/de la phyag rgya chen po ni lha'i sku ste/ longs spyod rdzogs pa'i sku'o/ /dam tshig gi phyag rgya ni chos kyi sku'o/ /chos kyi phyag rgya ni ngag tu brjod pa'o/ /las kyi phyag rgya ni bya ba grub pa'i sku'o/ /de bzhin du 'gro ba'i bsnyen bkur gyi gnas kyi mchog tu gyur pa dang / nyan thos la sogs pa nges par 'byung ba gsum gyis bgrod par bzhud pa ni bcom ldan 'das 'jam dpal lo//de bas na don gyi dam pa rnam dag dpal te gzhan ma yin no/ /ji ltar shes she na/ don gyi dam pa rnam dag dpal/ /zhes bya ba las shes so/ /'di dag las kyang shes te/'jig rten gsum na skal ba bzang po nyid kyis mngon par 'dod pa'i don thams cad rdzogs par mdzad cing dpal dang ldan pa thams cad kyi mchog tu gyur pas na/ 'jig rten gsum na skal bzang che/ /dpal ldan 'byor pa kun byed pa/ 'jam dpal dpal dang ldan pa'i mchog go//de nas da ni phyag 'tshal gsungs pa yin te/ /mchog sbyin rdo rje mchog khyod 'dud/ /ces bya ba la mchog ni sangs rgyas nyid do/ /de stsol bas na mchog sbyin no/ /rdo rje rigs kyi gtso bor gyur pas na rdo rje mchog go/ /de la bod pa ni/ mchog sbyin rdo rje mchog khyod 'dud//ces bya'o/ /yang dag mthar gyur pa ni de bzhin nyid do/ /de'i ngo bor gyur pas na yang dag mthar gyur ro/ /stong pa nyid kyi skye gnas las gang byung ba de ni stong pa nyid las byung ba'o/ /sangs rgyas kyi byang chub ni bla na med pa yang dag par rdzogs pa'i byang chub ste/ de'i ngo bo nyid pas na sangs rgyas byang chub bo/ /sangs rgyas kun gyi yul la chags pa gang yin pa de ni sangs rgyas chags pa'o/ /sangs rgyas rnams kyi 'dod pa ni 'gro ba rnams 'don pa'o/ /de'i ngo bo nyid pas na sangs rgyas 'dod pa'o/ /sems can rnams kyi don mthar phyin pas sangs rgyas rnams kyi dgyes pa bskyed pas na sangs rgyas dgyes pa'o//sems can rnams theg pa chen po la rab tu 'jog pas dga' ba bskyed pas na sangs rgyas rol pa'o/ /byang chub sems dpa' rnams lus ston pa'i rgyur 'dzum pa mdzad pas sangs rgyas 'dzum pa'o/ /khro bo'i gzugs la gnas nas gdug pa rnams skrag par bya ba'i phyir/ha ha zhes bzhad par mdzad pas na sangs rgyas bzhad pa'o/ /sangs rgyas kyi gsung ni chos ston pa'i rnam pa'o/ /'di yang de bzhin du gyur pas na sangs rgyas gsung ngo / /sangs rgyas kyi thugs ni sangs rgyas kyi de bzhin nyid de/ de la phyag 'tshal zhing 'dud pa'o//'di la dngos po med pas na dngos po med pa'o/ /de lta na yang sems can gyi don du 'khor bar 'byung bar ston pas na med pa las byung ngo / /'di las sangs rgyas 'byung bas na sangs rgyas 'byung ba'o/ /nam mkha' dang mnyam pa'i chos kyi de kho na nyid las nges par 'byung bas na nam mkha' las byung ba'o//gnyis su med pa'i de bzhin nyid kyi ye shes las byung bas na ye shes las byung ba'o/ /sgyu 'phrul dra ba'i spros pa ston pas na sgyu 'phrul dra ba'o/ /kun rdzob tu sangs rgyas kyi rol pas na sangs rgyas rol ston no/ /sngar bshad pa'i rnam pa thams cad pa'i yon tan gyi rang bzhin rnams la 'dud cing phyag 'tshal lo zhes pa'o//de dag thams cad ye shes kyi sku'i mthu las de ltar so sor snang ste/ de bas na/ ye shes sku nyid khyod la 'dud/ /ces bya ba gsungs pa yin no/ /mtshan yang dag par brjod pa'i 'grel pa/ slob dpon chen po 'jam dpal bshes gnyen gyi zhal snga nas kyis mdzad pa rdzogs so/