CLOSE WINDOW

D2514
བོད་ཡིག

/ //zhu chen gyi lo tsA ba dge slong rin chen bzang pos bsgyur zhing zhus te gtan la phab pa'o//[ ]@## / /rgya gar skad du/ mA ya dzA la tan+t+ra rA dza pany+dzi ka /bod skad du/ rgyud kyi rgyal po sgyu 'phrul dra ba'i dka' 'grel/ bcom ldan 'das ngag gi dbang phyug la phyag 'tshal lo//sgyu 'phrul dra ba dri ma sel mdzad pa/ /thabs dang shes rab las byung phyag 'tshal te/ /de yi rtogs par dka' ba'i tshig bshad pa/ /dran par bya ba'i phyir ni bri bar bya/ /'dir de kho na nyid rnam pa bcu ni gtso bo yin pas yang dag par brjod par bya ba yin la/ ji srid bcom ldan 'das rnam par snang mdzad chen po 'di gdul bya'i skye bo rnams ji lta ba bzhin du rjes su gzung bar bya ba'i phyir byung bar gyur pas 'grel pa la sogs pa gsum ni don gyi dbang gis ston par 'gyur ro//'dir sdud par byed pa phyag na rdo rje tshad ma nyid yin par bstan par bya ba'i phyir gleng gzhi bshad pa smras pa ni 'di skad ces bya ba la sogs pa la/'di skad ces bya ba ni rgyud kyi don thams cad ston pa'i tshig gi phrad do/ /bdag gis zhes bya ba ni mngon sum du thos kyis rtogs pa ma yin pa'o/ /dus gcig na zhes bya ba ni gzhan du gzhan dag thos pa ste bdag nyid thos pa mang por ston to//bcom ldan 'das zhes bya ba 'dis ni mi shes pa spang ba phun sum tshogs pa'o/ /khang pa brtsegs pa'i zhes bya ba la sogs pas ni me long lta bu dang mnyam pa nyid dang so sor kun du rtog pa dang bya ba sgrub pa'i ye shes kyi sgo nas gnas phun sum tshogs pa ste/'di dag gis bdag gi phun sum tshogs pa bstan nas gzhan gyi phun sum tshogs pa nye bar bstan par bya ba'i phyir/ rdo rje'i 'khor lo zhes bya ba la sogs pa gsungs te rdo rje 'khor los rab tu spras pa'i cha byad sna tshogs 'chang ba'i de bzhin gshegs pa la sogs pa'i rigs dang ldan pa rnams kyi cha lugs bsgyur ba rnam pa sna tshogs kyis spras pa'i rnam par snang mdzad kyi sprul pas zhes bya ba'i bar du'o//rnam par snang mdzad kyi zhes bya ba la sogs pas ni gzhan gyi don mdzad pa'i thabs phun sum tshogs pa ste rnam par snang mdzad nyid snying po yin la de las byung bas na rnam par snang mdzad kyi snying po las byung ba'o//sna tshogs ni don yod grub pa'i dbang phyug go/ /rdo rje ni mi bskyod pa'o/ /rin po che ni rin chen 'byung ldan no/ /thabs dang shes rab dag gis rnam par rol pa bstan par bya ba'i phyir spyod pa zhes bya ba la sogs pa gsungs te/spyod pa ni la la dag gis thabs kyi pha rol tu phyin pa'o zhes 'dod do/ /spyad pa spyod pas rnam par snang mdzad la sogs pa'i lha mo bzhi'i pad+ma'i go skabs nas sam/ stong pa nyid la sogs pa'i rnam par thar pa'i sgo bzhi'i ngo bo'i rdo rje'i go skabs nas byung ba'i byang chub sems dpa' sems dpa' chen po'i tshogs la sogs pa'i 'khor dpag tu med pa rnams kyis yongs su bskor ba'o//mdun gyis bltas pa zhes bya ba ni gtso bor byas pa'o/ /thugs rje chen po sngon du 'gro ba'i sems can thams cad bsgral ba la mngon par brtson par mdzad pa ni bshad ma thag pa nyid kyi rgyud bstan pa yin no//de nas zhes bya ba la sogs pa ni rgyud kyi don nye bar ston te sgyu 'phrul gyi dra ba ni dam tshig gi dkyil 'khor la sogs pa ste kun rdzob yin pa'i phyir ro/ /ye shes chen pos rnam par bsgyings pa ni byang chub kyi sems las byung ba'i phyir ro//sgrub pa zhes bya ba ni rgyu'o/ /rol pas zhes bya ba ni thabs dang shes rab dag gi rnam par 'phrul pas rol cing rtse ba'o/ /stang stabs kyis zhes bya ba ni g.yas brkyang ba la sogs pa'i stang stabs rnams kyis mi mthun pa'i phyogs thams cad rnam par 'jig pa yin pas na stang stabs kyis rnam par rgyal ba'o//thabs dang shes rab las byung ba ni byang chub sems kyi bdag nyid can bde ba chen po'o/ /de las rdo rje ni dam tshig la sogs pa ste/ de ni gdul bya'i skye bo rnams sgrol bar byed pas ni sgrol ba'o/ /de lta bu'i rol bas bzhad pa ston pa'i rnam par 'phrul pa ting nge 'dzin gang du ston pa de la de skad ces bya'o//ye shes rgya mtsho che ni 'od dpag tu med pa'o/ /yid bzhin nor bu rin chen sbyin ni don yod par grub pa ste de ni yid bzhin gyi nor bu rin po che dang 'dra bar bla na med pa'i mchod pa'i don rdzogs par byed bas so/ / rgyud kyi rgyal po sgyu 'phrul dra ba'i le'u dang po'i bshad pa'o// //rnam par snang mdzad 'byung ba zhes bya ba'i dkyil 'khor gyi rgyal po chen po bstan par bya ba'i phyir/ de nas bcom ldan 'das zhes bya ba la sogs pa gsungs te/ sgyu 'phrul chen po'i ye shes ni spyan la sogs pa'i lha mo bskyad pa'i byang chub kyi sems te de rnam par bsgyings pa'o//gsang ba ni dkyil 'khor chen po'o/ /de nyid phun sum tshogs pa thams cad kyi gnas su gyur pas na byin gyi rlabs kyi mchog go/ /mi phyed pas na rdo rje'o/ /de ston pa'i ting nge 'dzin gang yin pa de la'ang de skad ces bya ste de la snyoms par zhugs pa'o//ye shes chen po ni byang chub kyi sems te de nyid 'bar ba'o/ /'di nyid kyi snying po can gang yin pa ni rdo rje'i ste dkyil 'khor ba rnams kyi'o/ /de nyid ni snying po ste de rnams kyi 'byung gnas so/ /grangs su 'gro bar 'gyur ba zhes bya ba ni sangs rgyas kyi zhing che ge mo zhes bya bar de bzhin gshegs pa 'di zhes bya bar 'gyur ro zhes grangs su 'gro bar mkhyen par 'gyur ro zhes bya ba'i bar du'o//dang po kho nar sa yongs su gzung bar bya'o zhes bya ba ni 'di skad ston par 'gyur te/ dang por ji skad bstan pa'i mtshan nyid dang ldan pa'i slob dpon gyis mngon par 'dus byas pa'i sa gzhir/rnam par snang mdzad ji lta ba bzhin du gyur nas gdan bzhir rang gi lha'i gzugs spro ba la sogs pas bsgoms la sprul pa'i sprin phyung ste/ de dag nyid kyis phyogs bcu na bzhugs pa'i de bzhin gshegs pa 'khor dang bcas pa rnams la khyed rnams kyis 'dir byin gyis brlab pa la brtson par mdzod cig ces gsol bar bsam zhing slob dpon dang slob ma de srung bar mdzod cig ces bskul la/de nas de dag yang dag par bsdus te/ nang du bsgoms nas rang gi snying ga'i zla ba'i rdo rje'i lte ba'i yi ge hUM gi nang du gnas par byas la/ de las byung ba'i rdo rje 'dzin pa'i sku rang gi rig pa dang ldan pa dang / bcom ldan 'das rnam par snang mdzad gcig tu gyur par byas nas/ yi ge gsum la sogs pas byin gyis brlab pa sngon du 'gro bas lag pa g.yas pas rdo rje gsor la g.yon dkur brten pas rdo rje dril bu gsil zhing /rkang pa'i 'og tu hUM bkod pa las rdo rje 'bar ba phyung ste/ rgyan gyis brgyan pa dang bcas pa'i khro bo'i nga rgyal dang ldan pas yi ge hUM brjod pa sngon du 'gro ba dang / slob dpon ming 'di zhes bya ba la sogs brjod nas/ rang gi rdo rje las khro bo'i lus phyung ste/ myur ba nyid du rdo rje'i 'gros kyis dkyil 'khor gyis kun du bskor nas gdug pa can thams cad bskrad par bya ste/ de lta bus ni sa gzhi yongs su gzung ba byas par gyur pa yin no/ /nyi ma gnyis pa la dkyil 'khor bri ba 'byung bar 'gyur bas g.yas brkyang ba la sogs pa'i stang stabs la rnam par gnas pas/ji lta bzhin du mngon par 'dus byas pa'i dkyil 'khor gyi sa gzhi rdo rje'i rang bzhin du byin gyis brlab po/ /g.yas brkyang ba ni g.yon pa'i byin pa bskum la g.yas pa rgyar mtho lngar brkyang ba ni g.yas brkyang ba'o/ /g.yon brkyang ba ni g.yon de bzhin du brkyang ba ste/'di gnyis la ni rang gi ming smos pa sngon du 'gro bas hUM zhes bya ba'i sgra 'od zer 'bar ba'i phreng bas kun nas 'khrigs pa rnams kyis dkyil 'khor gyi sa gzhi'i gtan pa la thug gi bar du khyab par bsams la/ rdo rje gsor zhing khro bo'i lta ba dang ldan pas kun du bskor bar bya'o//lhag ma rnams la ni ci rigs par sbyar bar bya'o/ /sa ga'i 'dug stangs ni rkang pa'i phyi rol gyi sor mo'i bar rgyar sor nyi shu rtsa drug gis chod par byas la/ pus mo gnyis brkyang ba'o/ /zlum po'i 'dug stangs kyang de nyid las lag pa gnyis rgyar ngang pa'i gshog pa ltar byas pa'o//mthun pa'i rkang stabs ni rkang pa gnyis phan tshun du mthe bo dang long mo bcer ba'o/ /rus sbal gyi rkang stabs ni rkang pa g.yas pas rkang pa g.yon pa mnan pa'o/ /rdo rje 'degs pa ni rdo rje snying gar 'degs pa'o/ /rdo rje 'jo tshul ni rdo rje nyid sgeg pa dang bcas pas yongs su bskor ba'o//rkang pa ya gcig gi stang stabs ni rkang pa gcig bteg la rkang pa ya gcig gis 'gro ba'o/ /bung ba'i 'phur stangs ni lus kun du bskor ba'o/ /seng ge'i lta thabs ni g.yas brkyang bas rang gi kha gdangs la/ lag pa g.yon pa'i mkhrig ma'i steng du lag pa g.yas pa brkyang ba'i mkhrig ma sbyar ba'o//seng ge'i glal ba ni 'di nyid las rgyab tu lta bar byed pa'o/ /rdo rje dral ba ni snying gar rdo rje bcing ba byed pa'o/ /rdo rje gsor ba ni lag pa gnyis kyis rdo rje bskor nas 'og tu rdo rje yongs su bskor ba las brjid bag dang bcas pas bskyod pa'o//rdo rje'i stang stabs ni rdo rje bsnun pa'i tshul lo/ /rdo rje gar ni rdo rje dang gar byas pas lag pa g.yon pa brkyang la/ de'i rtsa bar g.yas pa ba dan gsum par byas pas 'di 'dzin pa'o/ /rdo rje 'jigs su rung ba ni kha'i steng nas 'og tu lag pa brkyang nas de nyid 'jigs byed kyi tshul du byas pa'o//rdo rje ro langs ma ni lag pa gnyis kyis ro blangs la zab ltar byed cing 'gro ba'o/ /rdo rje tho ba ni rdo rje khu tshur gyis tho ba brdeg pa'i tshul du byed pa'o/ /sgo bzhi byin gyis brlab pa ni shar la sogs pa'i phyogs su sa gnon pa'i phyag rgya dang ldan pas stong pa nyid la sogs pa rnam par thar pa'i sgo bzhi bsgom pa'o//rdo rje'i gdu bu ni skor phyogs su song ste rim gyis sa gzhir rkang pa gnyis 'jog pa'o/ /bud med kyi sgyu 'phrul gyi stang stabs ni/ rdo rje gar sngon du 'gro bas lag pa gnyis ka dkur brten la mgo g.yon du 'dud par byas pa'o//rdo rje stobs po che'i 'degs pa ni/ snying gar lag pa g.yon pas rdo rje rtse gsum par byas la g.yas pa'i rdo rje khu tshur dbyug pa ltar 'debs pas 'jog pa'o/ /rdo rje mche ba ni rdo rje khu tshur gyi mthe'u dag bzlog la kha'i grwa mche ba ltar byas nas lce bskyod cing khro ba'i lta bas blta ba'o//rdo rje'i gad mo ni ha ha zhes bya ba'i sgra yang dang yang du byed pa'o/ /rdo rje'i sgra ni rdo rje'i dril bu 'khrol ba'o/ /ral gri'i stabs ni g.yon pa'i khu tshur gyi shugs las drangs nas g.yas pa'i khu tshur ral gri'i tshul du gzhag pa'o/ /rdo rje'i stabs ni g.yas pas rdo rje rtse gsum pa 'degs pa'o//'khor lo'i stabs ni snying gar rdo rje khu tshur gnyis kyi mthe'u chung dang mdzub mo rdo rje 'dud pa byas la 'khor lo ltar gtong ba'o/ /gtun shing gi stabs ni rdo rje bcings pas gtun shing 'dzin pa'i tshul lo/ /ba dan gyi stabs ni lag pa g.yas pa'i mthe bos srin lag gi sen mo mnan la/sor mo lhag ma rnams brkyang nas g.yas pa'i dpung pa'i thad kar gzhag pa'o/ /zhags pa'i stabs ni 'dod pa'i rgyal po'i phyag rgya nyid do/ /pad+ma'i tshul ni thal mo sbyar ba pad+ma ltar phye ba'o/ /be con gyi tshul ni g.yas pa'i khu tshur gyi mthe bo nang nas bton te bsgreng ba'o//mi 'jigs pa'i tshul ni lag pa g.yas pa mi 'jigs pa'i tshul du byed pa'o/ /lcags kyu'i stabs ni lag pa g.yas pa'i mdzub mo 'gugs pa'i tshul du byed pa'o/ /gshol gyi tshul ni lag pa g.yas pa'i sor mo brkyang nas cung zad bskum pa'o//mdung thung gi stabs ni rdo rje khu tshur gnyis kyis bsnun pa ltar byed pa'o/ /gzhu'i stabs ni lag pa g.yon pas gzhu 'dzin pa'i tshul lo/ /mda' gzung ba'i stabs ni lag pa g.yas pa'i mdzub mo dang gung mo gnyis kyis mda' blangs la gsor ba ltar byed pa'o//mda' gsor ba'i stabs ni de dag nyid kyis mda' 'phen pa'i tshul du byed pa'o/ /thag mdung bskor ba'i stabs ni lag pa g.yas pa'i khu tshur gyis thag mdung yongs su bskor ba'i tshul du byed pa'o/ /mchog sbyin pa'i stabs ni lag pa g.yas pa mchog sbyin pa'i tshul du bzhag pa'o//mdung thung gi stabs ni lag pa g.yas pas gsor ba sngon du 'gro bas mdung thung 'phen pa'i tshul du byed pa'o/ /mtshon rtse gcig pa'i stabs ni mdung rtse gcig pa 'phen pa'i tshul lo/ /phyag 'tshal ba'i tshul ni thal mo sbyar nas bstod pa byed pa'i tshul du snying gar 'jog pa'o//bsam gtan gyi tshul ni ting nge 'dzin gyi phyag rgya de nyid de/ stang stangs de rnams kyis khro bo 'byin pa sngon du 'gro bas bgegs thams cad rnam par gzhom par bya'o/ /de nas rdo rje skyil mo krung la sogs pa rnams kyis dbus su 'dug la hUM zhes brjod cing sa'i cha rdo rje'i rang bzhin 'bar ba rnam par gyur par bsam mo//pad+ma'i 'dug stangs ni g.yas pa'i byin pas g.yon pa mnan la phus mo gnyis phab pa'o/ /bzang po'i 'dug stangs ni/ stan la rkang pa gnyis drang por 'jog pa'o/ / rtse ba'i 'dug stangs ni sems dpa'i skyil mo krung las g.yon pa brjid bag tu brkyang ba'o/ /mdun du bsnur ba ni de nyid la de bzhin du rgyab tu blta ba'o/ /gsang ba'i dkyil 'khor drangs nas lte ba dang byang shar la sogs pa mtshams bzhir sngags dang phyag rgyas byin gyis brlabs pa'i seng ldeng gi phur bu sor brgyad pa dang rdo rje'i tho bas kyang de'i sngags brjod cing rim bzhin gdab par bya ste/de ni mtha' yas dang rnam par rgyal ba la sogs pa zhes grags pa'i phur bus gnas ldar btab nas phyogs bcing zhing ra ba bya ba la sogs pa ji lta ba bzhin du bya'o/ /stang stabs la sogs pa la dang por rang gi ming nas smos pa sngon du 'gro bas yi ge hUM zhes bya ba'i sgra brjod par bya'o//'di nyid 'khor lo thams cad la sbyar bar bya'o zhes bstan par bya ba'i phyir sngags kyi cho ga 'di ni zhes bya ba la sogs pa gsungs so/ /de nas zhes bya ba la sogs pa la sa'i lha mo ji lta ba bzhin du byung bar bsams la yid kyis spyan drangs nas mchod de dbus su gnas pa la/skyob pa sangs rgyas thams cad kyis/ /zhes bya ba la sogs pas lan gsum du bskul la gshegs su gsol lo/ /de nas bdug spos dbul ba sngon du 'gro ba dang / thugs brtse phan pa'i dgongs pa can//zhes bya ba la sogs pas sangs rgyas dang byang chub sems dpa' rnams lhag par gnas par bya ste/ dri la sogs pa rnams kyis byugs la lha thams cad kyi gnas su yi ge hUM dang bcas pa'i mtshan nas smos pa sngon du 'gro bas spos kyi dkyil 'khor bya'o//de nas spyod pas bskyod nas sgo bzhi'i go skabs nas byung ba'i yi ge hUM dang a las dkyil 'khor pa'i lha'i 'khor lo phyung la gnas ji lta ba bzhin du gzhag ste/ spyan drang ba la sogs pa bshad pa'i rim gyis sku byin gyis brlab pa la sogs pa sngon du 'gro bas rang gi phyag rgya sngags dang bcas pas nye bar bstan te/dbang bskur la mchod cing yang dag par bstod nas phyag byas la tshim par bya ba'i phyir sbyin sreg byas nas phyogs kyi gtor ma sbyin no/ /de nas rtsa pa'i bum pa lhag par gnas pa ji lta ba bzhin du byas nas slob ma lhag par gnas par bya ste yi ge hUM bzlas pa'i spos chus snying ga la sogs par gtor te/da nyid kyis rdo rje dang bcas pa'i lag pa g.yas pas reg par byas la snying gar rdo rje rtse lnga pa dang spyi bor sna tshogs rdo rje bsams te gsum la skyabs su btang ba la sogs pa byed du bcug nas yi ge hUM gis yongs su bzlas pa'i srung skud dpung pa la bcings la so shing la sogs pa byin te de rnams la chos bshad par bya'o//de nas dkyil 'khor gyi gnas su zhugs pa gshegs su gsol ba'i phyir sngar bshad pa bzhin du mchod pa la sogs pa byas la dkyil 'khor gyi lha rnams ji lta ba bzhin du rdo rje'i lam nas snying ga'i rdo rje'i lte ba'i nang du gnas par bya'o//de nas phyi de nyin rnam par snang mdzad kyi sbyor ba dang ldan pas mi bskyod pa la sogs pa'i snying pos phyung la sngon po la sogs pa'i tshon skud lnga de'i rang bzhin du byas te yi ge hUM 'don bzhin pas bsgril la de brgya rtsa brgyad bzlas par bya'o//de bzhin du tshon rnams la yang ci rigs par bya'o/ /de nyid bstan par bya ba'i phyir/ tshon dang thig la sangs rgyas lnga'i/ /zhes bya ba la sogs pa gsungs te/ dkyil 'khor ji lta ba bzhin du thig gdab la dang por slob dpon gyis tshon rtsi dgye bar bya ste phyi nas slob mas bya'o//de yang phyi'i dkyil 'khor du sngon po dang dmar po dang dkar po dang ljang gu dang ser po'i tshon rnams kyis rab lnga bya'o/ /gnyis par ni sngon po dang / dmar po dang / dkar po rnams kyis so/ /'khor lo gsum pa la ni tshon rtsi dkar pos so//'khor lo'i lte ba la ni seng ge'i gdan la gnas pa'i pad+ma dang zla ba'i gdan la bzhugs pa'i rnam par snang mdzad dgod par bya'o/ /shar la sogs pa'i re'u'i cha rnams la ni mi bskyod pa la sogs pa'o/ /'khor lo'i byang shar la sogs par ni spyan la sogs pa'o//rim pa gnyis pa'i shar phyogs la sogs par ni rdo rje sems ma la sogs pa'o/ /mtshams rnams su ni skul byed ma la sogs pa'o/ /rim pa gsum pa'i shar la sogs pa'i snam bu la ni byams pa la sogs pa'o/ /shar la sogs pa'i sgo rnams su gshin rje gshed la sogs pa'o//mtshams rnams su mi g.yo ba la sogs pa'o/ /dbang bskur ba'i dkyil 'khor ni go sla'o/ /de ltar dkyil 'khor mngon par bris nas ji lta ba bzhin du mngon par 'dus byas pa'i bum pa la bzlas brjod brgya rtsa brgyad byas te/ rtsa ba'i bum pa la rnam par snang mdzad kyi sngags stong rtsa brgyad bzlas shing yi ge hUM brgya rtsa brgyad bzla ba dang lhag ma rnams kyi bum pa bzhi la ni spyan la sogs pa bzhi'i sngags bzla ba dang /lha thams cad kyi la ni rigs kyi dbye bas so/ /las thams cad pa bzlas pa sgor gzhag pa ni bsang gtor gyi bum pa bya'o//de nas lus khrus byas shing gos la sogs pa'i rgyan gyis brgyan la bdag po'i sbyor ba dang ldan pa'i rnal 'byor dam pas lha'i 'khor lo thams cad dang bdag nyid nang du bsgoms la/ de'i nga rgyal dang ldan pas mchod yon dang mchod pa la yongs su bzlas te/sgo phye nas gnas ji lta ba bzhin du bum pa legs par bzhag la/ dkyil 'khor gyi lha rnams snga ma bzhin du phyung ste rang gnas su gnas par byas la/ 'khor lo'i lha rnams rdo rje khro bo'i lcags kyu'i phyag rgya dang / oM badzra aM ku sha A kaR+Sha ya hUM dzaHzhes brjod la spyan drang ngo //rdo rje sems ma la sogs pa bzhi dang spyan la sogs pa'i rigs kyi yum rnams dang / skul byed ma la sogs pa pho nya rnams ni lcags kyu'i phyag rgyas so/ /'phags pa mi g.yo ba la sogs pa bran rnams ni zhags pa'i phyag rgyas so/ /gshin rje gshed la sogs pa khro bo rnams ni zhal gyi phyag rgyas so//hUM baM AHzhes brjod pa sngon du 'gro bas ni thams cad gzhug pa dang bcing ba dang / dbang du bya'o/ /de nas langs nas phur bu dang ra ba la sogs pas gnas srung ba byas la pad+ma'i gdan dang / mchod yon dang zhabs bsil dag phul la sku la sogs pa byin gyis brlab pa'i phyag rgya rnams kyis byin gyis brlabs te rang gi phyag rgya bstan nas/rang gi dbang bskur bas dbang bskur la ting nge 'dzin la gnas par bsams nas sgeg mo la sogs pa mchod pa thams cad dang sil snyan dang / gling bu la sogs pa yid dga' bar byed pa'i rang bzhin gyi mchod pa'i khyad par thams cad kyis yang dag par mchod nas thal mo sbyar te rol mo'i khyad par gzhan rnams kyis kyang mchod pa dang /lan gsum gyi bar du rdo rje'i glu blangs pas yang dag par bstod nas phyag byas te/lha rnams tshim par bya ba'i phyir bshad pa'i sbyin sreg phul la bzod par gsol te/ de'i 'og tu dngos grub kyi phyir gsol ba btab nas bdag nyid 'jug pa la sogs pa rdzogs par bya'o/ /de'i 'og tu slob ma khrus byas shing rgyan gyis brgyan la dzin dzi ka ces bya ba la sogs pa'i snying po dang /sku la sogs pa byin gyis brlab pa'i phyag rgya rnams kyis byin gyis brlabs te mdzub mo dkri ba'i thal mo sbyar ba dang / badzra ka wa tsa hUM zhes bya ba brjod cing gnas lngar go cha dang bcas par byas nas gdong gos kyis g.yogs te rdo rje sems ma'i phyag rgyas me tog 'dzin pas hUM zhes bya ba nyid kyis gzhug cing thun mong gi cho ga thams cad byas nas/slob ma de'i thugs kar rdo rje sems dpas byin gyis brlabs pa'i rnam par snang mdzad du byin gyis brlabs la/ dri dang me tog la sogs pas brgyan nas lha thams cad kyi bum pa la sogs pa ji lta ba bzhin du dbang bskur la rnam par rgyal ba'i bum pas dbang bskur ro//'di dag kyang ga las she na/ dang por gyi sgra ni gtso bor bstan pa yin pa'i phyir te de bzhin gshegs pa rnams lha'i bdud rtsis gang ba'i bum pa phyag na bsnams pa phyung nas de rnams kyis dbang bskur bar gyur par bsam mo//de nas yang gos la sogs pas brgyan nas rdo rje sems ma la sogs pa'i dbang bskur te/ sangs rgyas rnams rin po che'i dbu rgyan gyi gzugs su gyur par bsams nas/ dar dpyangs dang / phreng ba dang / rdo rje dang / bdag po dang / rdo rje ming gi dbang bskur bas dbang bskur la gser la sogs pa'i thur ma dang / ji ltar mig mkhan rgyal po yis/ /zhes bya ba la sogs pa'i tshigs su bcad pas mi shes pa'i rab rib bsal la me long blangs te/ rdo rje sems dpa'i rang bzhin te//zhes bya ba la sogs pa'i tshigs su bcad pa rnams kyis chos kyi mtshan nyid bstan par bya'o/ /yi ge a dang glegs bam sbyin zhing a dang dril bu sbyin la rjes su gnang ba sbyin par bya ba'i phyir 'khor lo rkang pa gnyis kyi bar du bzhag nas lag pa g.yas par dung byin te/di ring phan chad 'jig rten du/ /chos kyi 'khor lo bskor bar gyis/ /zhes bya ba la sogs pa brjod do/ /de nas/ de ring phan chad bu khyod kyis/ /zhes bya ba la sogs pas dam tshig bstan nas/ bla mas yon blangs te zhi ba'i sbyin sreg byas nas mchod pa dang bstod pa la sogs pa byas la hUM muH/zhes bya ba brjod de sems ma'i phyag rgya spyi bor dkrol te lha'i 'khor lo gshegs su gsol lo/ /de nas phur bu phyung la gsang ba'i dkyil 'khor de bzhin du gshegs su gsol nas bya ba snga mas dzaHhUM baM hoHzhes brjod la/ lhag ma rnams rang gi gnas su nang du bsgom mo//yi ge hUM gis tshon rtsi bsdu bar bya ste bsdus nas chu bo rnams su dor bar bya'o le'u gnyis pa'i bshad pa'o// //gsang sngags kyi rim par phye ba bstan par bya ba'i phyir de nas bcom ldan 'das zhes bya ba la sogs pa gsungs te/ ji lta ba bzhin du phyung la so so'i gsang sngags kyi yi ges gnas ji lta ba bzhin du dkyil 'khor gyi lha rnams dgod par bya'o zhes gsungs pa ste gsang sngags kyi yi ge 'di dag gis dkyil 'khor dgod pa'o/ /de dag la brten nas zhes bya ba la sogs pas ni gsang sngags kyi che ba'i bdag nyid ston pa yin no//le'u gsum pa'i bshad pa'o// //de nas bcom ldan 'das zhes bya ba la sogs pas ni ting nge 'dzin gyi dkyil 'khor bstan pa yin te/ ye shes chen po nyid stobs yin la/ de'i rnam par 'phrul pa ni rnam par snang mdzad la sogs pa'i ting nge 'dzin gyi mtshan nyid do//de nyid mi phyed pas na rdo rje ste ting nge 'dzin gang la de skad ces bya ba de la snyoms par zhugs pa'o/ /yi ge oM nyid ye shes te thugs yin la de las ji lta ba bzhin du sprul to zhes bya ba'i don to/ /shes rab ye shes rab rgyas pa/ /zhes bya ba ni shes rab dang ye shes kyis rab tu rgyas pas sems can rnams sangs rgyas nyid du bskyed pa'i sangs rgyas kun mchog ni rin po che'i dbu rgyan te des mchod pa ni brgyan pa'o//zhal gsum zhes bya ba la dbus ma ni gser gyi mdog can no/ /g.yas pa ni sngon po'o//g.yon ni dkar po ste de rnams kyis rnam par mdzes pa'o/ /bsam gtan phyag rgya can zhes bya ba ni rdo rje skyil mo krung gis bzhugs pa'i pang bar phyag g.yon pa brkyang la de'i steng du phyag g.yas pa brkyang nas 'jog pa'o/ /bgrang phreng ldan zhing zhes bya ba ni g.yas pa'i phyag gnyis na bgrang phreng dang bcas pa'o//mda' yis brgyan ces bya ba ni g.yas kyi gsum pa mda' dang bcas pa'o/ /nu ma 'dzin ces bya ba ni phyag g.yon pa'i gnyis pa lha mo'i nu ma 'dzin pa'o/ /rdo rje gzhu thogs shing zhes bya ba ni gsum pa rdo rje gzhu bsnams shing /'og tu ni kun du drag po dang khyab 'jug la sogs pa'i lha rnams bred cing skrag par bri'o/ /de nyid spyod yul bsgom par gyis/ /zhes bya ba ni 'di skad ston pa yin te rnam par snang mdzad kyi sgrub pa pos yid la rang gi sngags bzlas shing snyoms par 'jug pa las byung ba'i sangs rgyas thams cad kyi sprin rang gi rigs pa dang sbyor ba spro ba dang bsdu ba la sogs pas bsgom par bya'o//A zhes bya ba'i tshig gi lam/ /zhes bya ba ni a las byung ba 'od dpag tu med pa'o/ /'jig rten dbang phyug 'od chen bsam/ /zhes bya ba ni 'jig rten dbang phyug gi skur yongs su byung ba'o//dbu rgyan thams cad mkhyen pas brgyan/ /zhes bya ba ni 'od dpag tu med pa dbu la 'jog pa'o/ /zhal gsum 'bar ba la zhes bya ba ni dang po ni dkar po/ g.yon pa ni gser mdog go/ /g.yas pa ni ut+pala'i mdog can no/ /de rnams kyis 'bar ba zhes bya ba'i bar du'o//lha mo bzhi dang gdan gcig pas na 'dug stangs bzhi pa can no/ /pad+ma'i 'jo tshul ldan zhes bya ba ni g.yon pa dkur brten pas sdong bu 'dzin cing g.yas pa thugs kar 'byed pa'o/ /bgrang phreng rdo rje 'chang zhes bya ba g.yas kyi gnyis kyis bgrang phreng dang rdo rje bsnams pa'o//nu ma 'dzin zhes bya ba ni snga ma bzhin no/ /gsum pas ni spyi blugs bsnams pa'o/ /gzugs rnams thams cad ces bya ba ni lta ba la spyod pa'i sems can rnams gdul bar bya ba'i phyir lha thams cad kyi gzugs kyis 'dul ba'o/ / zla ba'i gzugs zhes bya ba ni pad+ma'i gdan la bzhugs pa'o/ /sems kyi rdo rje zhes bya ba ni rdo rje 'dzin pa'o/ /mthing shun bzang po lta bu'i mdog /ces bya ba ni mthing shun gyi mdog can no/ /mi 'khrugs bzhugs zhes bya ba ni mi bskyod pas brgyan pa'o/ /zhal gsum zhes bya ba la zhal dbus ma ni sngon po'o//g.yas ni dkar po'o/ /g.yon ni ser po'o/ /rin chen 'byung ldan ni dbus ma dang g.yas g.yon dag dmar po dang sngon po dang dkar po'i zhal mnga' bas na zhal gsum pa'o/ /ting nge 'dzin gyi phyag rgya ni snga ma bzhin no/ /g.yas na ni rdo rje bsnams pa g.yon pas ni rin po che bsnams pa ste phyag bzhi par bsgom par bya'o zhes bya ba ni lhag ma'o//don yod grub pa'i rdo rje ni phyag bzhi pa ste/ ting nge 'dzin gyi phyag rgya dang ldan zhing / ral gri dang lcags kyu bsnams pa/ yi ge khaM las byung ba sngo bsangs kyi mdog can no//spyan ni rnam par snang mdzad dang 'dra ba'i zhal gsum mnga' ba dang / g.yon pa sdigs mdzub zhags pa can/ /zhes bya ba ste phyag g.yon pas zhags pa thogs pa dang sdigs mdzub mdzad pa'o/ /byang chub yan lag stobs brgyan pa'i/ /zhes bya ba ni chos rab tu rnam par 'byed pa la sogs pa byang chub kyi yan lag bdun dang /gnas dang gnas ma yin pa mkhyen pa la sogs pa stobs bcus brgyan pa'o/ /mA ma kI'i zhal gsum ni mi bskyod pa dang 'dra'o/ /dngos dang dngos med mtshan nyid can/ /zhes bya ba ni dngos po dang dngos po med pa dang bral ba'o//'di 'dra sgom pas bsgom par bya/ /zhes bya ba ni 'di lta bu'i bsam pas bsgom par bya'o/ /gos dkar can gyi zhal ras gsum/ /zhes bya ba ni 'od dpag tu med pa dang 'dra ba'o/ /sgrol ma'i zhal gsum ni don yod rdo rje dang 'dra ba'o/ /mda' yang gsor zhes bya ba ni mdas gar byed pa'i tshul lo//rdo rje sems la sogs pa bzhi ni rim bzhin du rdo rje sems dpa' dang / rin chen dang / chos dang / las kyi sems dpa' dang 'dra bar nye bar bstan par bya ba'i phyir skyes mchog ces bya ba la sogs pa gsungs te de rnams ni zhal gsum pa'o//skul byed ma'i ni/ yi ge dgu yi thabs dgu can/ /lha dgu rnams kyi gnas kyang yin/ /zhes bya ba ni sngags kyi sgo nas yi ge dgu la sogs pa gar thabs dgu dang / de bzhin gshegs pa la sogs pa lha dgu'i gnas su gyur pa yin pa'i phyir ro//'bar ba'i phyag ni nyi shu drug /ces bya ba ni phyag 'bar ba nyi shu rtsa drug dang ldan pa'o/ /rtsa ba'i phyag rgya ni 'og nas bshad pa'i mtshan nyid can no/ /bcu gnyis pa ni phul du byung ba ste/ ngo mtshar du gyur pa'o/ /de yang mdzub mo dang mthe bos ston pa yin no//ltung ba zhes bya ba drag po dang khyab 'jug la sogs pa'o/ /rin chen sgron ma'i zhal ras gsum ni rnam par snang mdzad dang 'dra ba'o/ /phyag gnyis rin chen thal mo ste/ /zhes bya ba ni thal mo sbyar ba la yid bzhin gyi nor bu lta bu'o/ / khro gnyer can gyi zhal ras gsum ni 'jig rten dbang phyug dang 'dra ba'o/ /rdo rje lu gu rgyud kyi zhal ras gsum ni don yod grub pa'i rdo rje dang 'dra pa'o/ /zhal ni cung zad bzhad mdzad pa/ /zhes bya ba ni zhal dbus ma cung zad bzhad pa gang yin pa'o/ /byams pa'i zhal gsum ni rnam par snang mdzad dang 'dra'o//'jam dpal gzhon nur gyur pa'i zhal gsum yang rnam par snang mdzad dang 'dra ba'o/ /bskal pa bzang po pa lhag ma rnams kyang 'di dag gi rjes su 'brangs nas bsgom par bya'o zhes bstan par bya ba'i phyir spos kyi glang po zhes bya ba la sogs pa gsungs so//khro bo gshin rje'i gshed kyi gdan ni 'og tu pad+ma'i zhes bya ba ste/ ma he'i 'og tu pad+ma'i gdan byas pa gang yin pa de la de skad ces bya ba'o/ /sku gsum la ni rnam par bzhugs/ /zhes bya ba ni sku la sogs pa gsum dang ldan pa'o/ /'jam pa'i dpal gyis legs par brgyan//zhes bya ba ni 'jam dpal gyi skus mtshan pa'i thod pa'i phreng ba yod pa'i phyir ro/ /lha mo yis na zhes bya ba la sogs pa la gcig gis ni de g.yas nas 'khyud pa'o/ /gnyis pa ni rgyab tu gnas nas ut+pal thogs pa'o/ /gsum pa ni g.yas phyogs na 'dug pa ste pad+ma thogs pa'o//bzhi pa ni mdun du gnas par shes par bya'o/ /khro bo gzhan gyis mi thub pa'i zhal ras gsum ni rnam par snang mdzad dang 'dra'o/ /rta mchog gi zhal gsum ni rin chen 'byung ldan dang 'dra'o/ /khro bo bgegs kyi gshed ni zhal gsum don yod rdo rje lta bu ste zhabs g.yas pas bgegs gnon cing g.yon pas pad+ma la brten pa'o//khro bo mi g.yo ba ni zhal gsum dpal rdo rje sems dpa' dang 'dra'o/ /rin chen ri steng pad+ma la/ /zhes bya ba ni pad+ma'i 'og tu rin po che'i ri bo yod pa'o/ /khro bo 'dod pa'i rgyal po ni zhal gsum mi g.yo ba dang 'dra ba'o//'dod pa'i rgyal po'i phyag rgya ni 'og nas bshad pa'o/ /khro bo be con sngon po can ni zhal gsum 'dod pa'i rgyal po dang 'dra'o/ /sku ni ri sngon 'dra ba'o zhes bya ba ni zhal dbus ma ri bo sngon po dang 'dra ba mnga' ba'o/ / dbu rgyan la ni sangs rgyas bzhugs/ /zhes bya ba ni spyi bor sangs rgyas kyi dbu rgyan dang ldan pa'o/ /sbyor ba'i ye shes kyis bskul ba'i/ /zhes bya ba ni snyoms par zhugs pa las byung ba'i byang chub kyi sems las skyes zhes bya ba'i don to/ /khro bo stobs po che ni zhal ras gsum bdud rtsi thab sbyor dang 'dra'o//drag po tsham ngam stang stabs can/ /zhes bya ba ni zhabs tsham ngam gyi stang stabs dang bcas pa'o/ /nyi ma'i dkyil 'khor nang na bzhugs/ /zhes bya ba ni nyi ma'i 'od kyi dkyil 'khor la bzhugs pa'o/ /bcom ldan 'das ni rdo rje skyil mo krung dang ldan pa'o//slob dpon la la dag ni rol pa'i stang stabs kyis bzhugs par 'dod do/ /bskal pa bzang po pa rnams dang lha mo sgrol ma la yang de bzhin no/ /lhag ma ni rol pa'i stang stabs kyis bzhugs so/ /gtsug tor 'khor los sgyur ba'i sku gsum zhes bya ba ni sku dang gsung dang thugs kyi dbye bas so//zhal gsum ni rnam par snang mdzad dang 'dra'o/ /rin chen ri steng pad+ma la/ /zhes bya ba ni pad+ma'i 'og tu rin po che'i ri yod pa'o/ /rigs kyi yum ni spyan la sogs pa ste rim bzhin du rin po che'i snye ma dang /rdo rje dang / pad+ma dang ut+pal bsnams pa'o/ /chags phyir spro zhing rtsol ba can/ /zhes bya ba ni chags pas ni shin tu rtsol ba dang bcas pa'o/ /gnod gnas kyi sku gsum can zhes bya ba ni snga ma bzhin no/ /zhal ras gsum ni thugs rdo rje dang 'dra ba'o/ / pad+ma'i gdan la bzhugs pa zhes bya ba ni zhabs g.yas pa pad+ma'i gdan la brten pas bzhugs so/ /bzang po'i 'dug stangs zhes bya ba ni g.yon pas bzang po'i 'dug stangs su gnas pa ste bum pa bzang po la brten pa'o/ /la la ni rol pa'i stang stabs su gnas so zhes zer ro//phyag na rdo rje bdud rtsi yis/ /zhes bya ba ni 'di skad ston par 'gyur te/ rang gi lha spyan drangs pa la sogs pa sngon du 'gro bas lag pa g.yas par dang po'i yi ge a las byung ba'i zla ba'i dkyil 'khor la gnas pa'i yi ge laM gyis khyab pa'i lag pas dri bzang po'i chu ji lta ba bzhin du blugs par bya'o//lha mo 'od zer can gyi zhal gsum ni rnam par mdzad dang 'dra ba'o/ /hUM mdzad ces bya ba ni khro bo'i stang stabs dang ldan pa'o/ /ri khrod shing lo can gyi zhal ras gsum ni rnam par snang mdzad dang 'dra ba'o//de yang khro bo'i me 'bar bas skye dgu rnams la 'tshe ba'i gdon thams cad thal bar byas nas sangs rgyas rnams spros te de rnams kyis 'gro ba rnams la bdud rtsi'i char 'babs pa'o/ /dug sel ma'i zhal ras gsum ni rnam par snang mdzad dang 'dra ba'o/ /blugs zhes bya ba ni sangs rgyas kyi gzugs rnams spros la de dag nyid kyis yi ge dzaHsa kha rnam par brgyan pa'i zla ba'i bum pa rnams kyis dug gis phog pa rnams la ldugs so zhes pa'i bar du'o//ha la ha la'i zhal ras gsum ni 'od dpag tu med pa dang 'dra ba'o/ / lha rnams kyi ting nge 'dzin nyid kyis ji ltar rang gi bsam gtan gyi tshul ston pa bzhin du shes par bya'o/ /skra tshugs phyed du gzar zhes bya ba ni dpral ba'i bar du skra 'khyil ba'o/ /skra rab ces bya ba ni skra ste de'i mgo la'o/ /'jam pa'i rdo rje khro bo yis/ /zhes bya ba ni gshin rje'i gshed ces bya ba'i khro bo de'i mgo la gnas pa'o//de ni 'di skad ston par 'gyur te/ 'jam pa'i rdo rje'i rnal 'byor pas mdun du k+ShaM las byung ba'i gnod sbyin ma bskyed la de dang snyoms par 'jug pa las yang dang yang du de nyid spros nas nam mkha' gang bar bsgoms la/ maM oM A zhes bya ba'i yi ge gsum las khyab 'jug dang /lha chen po dang / tshangs pa ste de dag ji skad du bstan pa'i rang gi yi ge las byung ba la rdo rje hUM mdzad kyi sbyor ba dang ldan pa'o/ /dgug pa la sogs pa sngon du 'gro bas mnan la yi ge hUM brjod cing bsgom par bya'o/ / brgya byin la sogs pa yang rang gi sa bon las byung ba'i rim pa 'di nyid kyis bsgrub par bya'o zhes bstan par bya ba'i phyir gzhan yang zhes bya ba la sogs pa gsungs so/ /'phrog byed las skyes pa zhes bya ba ni/ /yi ge ha las byung ba ste/ der yang rang gi 'khor gyis yongs su bskor ba ji bzhin du sbyor ba dang spro ba la sogs pas bsgrub par bya'o//le'u bzhi pa'i bshad pa'o// //de nas bcom ldan 'das zhes bya ba la sogs pa ni gsang sngags kyi ye shes rnam par bsgyings pa rim par phye ba ston te/ zhi ba nyid ni nyes pa thams cad dang bral bas na rdul dang bral ba'o//de nyid mchog ste ting nge 'dzin gang la de skad ces bya ba de la snyoms par zhugs pa'o/ /sangs rgyas rdo rje zhes bya ba ni bcom ldan 'das rnam par snang mdzad kyi gzugs su byung ba ste/ de bzhin du 'og ma rnams la yang ci rigs par rjes su sbyar bar bya ste/rnam par snang mdzad kyi sbyor ba dang ldan pas yum sangs rgyas spyan gsang sngags kyi yi ge las bdud rtsis gang ba'i zla ba'i bum pa thogs pa phyung la nad pa la ldugs par bsgoms na zhi ba bskyed par 'gyur te/ /zhi ba rnams la yang srog sbyin par byed cing ma grub pa rnams la grub pa stsol bar 'gyur ro//ci'i phyir 'di ltar 'gyur zhe na/ rdo rje zhes bya ba la sogs pa gsungs te/ rdo rje bcings pa la sogs pa'i dam tshig gi sngags kyis dbang bskur ba'i bdag nyid can gyis bskul zhing mngon sum du byas pa ni rdo rje dam tshig gis bskul ba'o//sku gsum 'bar ba yis ni thugs rje ste mchog gi dam tshig ni mA ma kI'i mtshan nyid can te/ ting nge 'dzin gang la de skad ces bya ba de la snyoms par zhugs pa'o/ /rdo rje'i dkyil 'khor zhes bya ba ni rdo rje'i rigs kyi ste de yang sngags kyi yi ge dkar po phyung nas de bsgrub par bya ba'i lus kun du gang bar bsgoms na sdig pa 'joms par 'gyur ro//nad pa la zhi ba ni spyan dang 'dra bar bya'o/ /rgyas pa la rin po che'i bum pas rin po che'i char 'bebs par bsam par bya'o/ /'dod chags chen po ni 'od dpag tu med pa'o//de so sor rtog pa'i mtshan nyid can gyi pad+mas chags shing mnyes par byas pas gar des rnam par 'phrul pa'o/ /de nyid 'thob pa ste gos dkar mo zhes bya bas sgrib pa rnams 'thor bar byed pa'i phyir ro/ /de la dmigs pa'i ting nge 'dzin rdo rje de la de skad ces bya'o//rdo rje chos ni 'od dpag tu med pa ste gsang sngags kyi yi ge gser gyi mdog can du phyung la bsgrub par bya ba dbang bskur na rgyas pa chen po skyed par 'gyur ro/ /de nyid spro ba dang bsdu ba dag tu bsgom pas chos kyi mdzod rnam par 'phel bar byed do//rang gi snying ga'i pad+ma'i lte ba la bsgrub par bya ba gzhag ste/ gsang sngags kyi yi ge'i phreng bas bskor la/ /sna tshogs rdo rje spyi bor gnas par byas nas bzlas pa la sogs pa ji lta ba bzhin du byas na srung ba chen po mdzad par 'gyur ro/ /thams cad dbang du bya ba ni tshe la dbang ba la sogs pa bcu'o//de rnams khong du chud par byas pa las bskyed pa ni don yod rdo rje can no/ /de nyid ni rdo rje gsum mnyam pa nyid de de'i dga' bar byed pa ni rdo rje dang 'dra bar ma phyed pa'i ting nge 'dzin gang yin pa de la snyoms par zhugs nas yi ge dmar po'i gsang sngags phyung la des bsgrub par bya ba kun du bkang la bzlas na mngag gzhug par 'gyur ro//ye shes la 'jug pas sgrol bar byed pa zhes bya ba ni/ /ye shes la 'jug pas sgrol bar byed pas na de las dmigs pa'i ting nge 'dzin de la yang de skad ces bya'o//rdo rje ni gshin rje gshed la sogs pa'i khro bo rnams te/ de dag nyid gdug pa rnams sgrib pa'i phyir de rnams kyis dra bar byas pa'o/ /ye shes sna tshogs can ni 'jig rten las 'das pa'i ye shes sna tshogs dang ldan pa'o/ /srubs gcig pa ni dum bu gcig pa'o/ / srubs gnyis pa ni dum bu gnyis pa ste 'di gnyis kho na bsngags pa yin pa'i phyir ro/ /bzang po ni yan lag ma nyams pa'o/ /rkang rjes sa yi cho ga yis/ /zhes bya ba la des ni 'di skad ston par 'gyur te/ /gshin rje gshed kyi rnal 'byor pas lha mo bzhi'i sbyor ba dang ldan pas de bzhin gshegs pa lngas byin gyis brlabs la bsgrub bya'i rkang rjes kyis las de'i gzugs brnyan byas te/thod par bzhag la de dgug pa dang / gzhug pa dang bcing ba byas la rkang pa g.yon pas mnan te/ bskul ba dang bcas par ji srid du khugs par gyur pa de srid kyi bar du bzlas brjod bya'o//sku gsum dbyer med bsgoms nas su/ /zhes bya ba ni rang gi lha'i nga rgyal brtan po dang ldan pa'o/ /sprin mchog ni don yod rdo rje ste de'i ye shes rdo rje ni mchog go/ /de'i ye shes de las rdo rje bdud rtsi'i khro bo'i ting nge 'dzin gang yin pa de la de skad ces bya'o//tshogs bdag rkang pa'i drung du gzhag /ces bya ba ni bdud rtsi thab sbyor gyi sbyor ba dang ldan pas bsgrub par bya ba'i rkang rjes kyis las de'i gzugs brnyan bong bu'i gcin dang sbrus te byas la rlung gis khyer ba'i 'dab ma la khrag dang btags pa'i dur khrod kyi sol bas/khro bo dang spel ba'i bsgrub par bya ba'i ming bris nas gzugs brnyan gyi gnas lnga'i nang du bcug la/ rdo rje tshogs kyi bdag po bkug nas legs par mchod de/ de'i rkang pa'i 'og tu de gzhag pa byas la sngags kyi mthar hUM che ge mo skrod cig phaT ces bya ba'i bar du khros pas bzlas brjod bya'o//rin po che'i sgrol ma ni rin chen 'byung ldan no/ /de'i khro bo'i ye shes ni snga ma bzhin no/ /de las byung ba'i rdo rje ni khro bo'i bdag nyid can gyi ting nge 'dzin gang yin pa de la de skad ces bya'o/ /rdo rjes gzir ba'i sbyor ba yis//hUM tsam gyis kyang las byed do/ /zhes bya ba ni khro bo gzhan gyis mi thub pa'i sbyor ba dang ldan pas de nyid 'bar ba'i phreng bas 'khrigs pa phyung la sngags kyi mthar hUM zhes bya ba brjod nas gnod sbyin la sogs pa gzir bar bya'o/ /dpag tu med pa ni 'od dpag tu med pa'o//de'i ye shes ni rin po che dang 'dra bas na rin po che'o/ /de nyid ni yon tan bsags pa'o/ /de las byung ba'i rdo rje ni khro bo'i rang bzhin te/ ting nge 'dzin gang la de skad ces bya ba de la snyoms par zhugs pa'o/ /bsam zhes bya ba ni 'di skad ston par 'gyur te/rta mgrin gyi rnal 'byor pas lag pa g.yas pa las byung ba'i pad+ma dkar po 'dab ma brgyad pa gnas par bsams la/ de'i lte ba la gnas pa'i yi ge ha 'od zer 'bar ba las bsgrub par bya ba'i steng du/ bdud rtsi 'bar bar bsams la/ de dang gsang sngags 'don pa sngon du 'gro bas dug thams cad drang bar bya'o//don yang dag par 'byung ba ni don yod rdo rje'o/ /de'i mchog gi nor bu ste rdo rje rin po che'o/ /de las byung ba'i rdo rje ni khro bo chen po'i mtshan nyid can gyi ting nge 'dzin gang yin pa de la snyoms par zhugs shing dmigs pa la sems rtse gcig tu gyur la mngon du mdzad ces bya ba'i bar du'o//gsod par byed do zhes bya ba ni khro bo be con sngon po can gyi rnal 'byor pas bsgrub par bya ba mdun du gnas par bsams nas khro bo mtshon cha 'bar ba lag na thogs pa phyung la de dag nyid kyis de gsod par bsams la khro bo'i tshig gis gsang sngags brgya rtsa brgyad brjod na/nges par gsod par byed do/ /kun du rnam par 'phro ba ni byang chub kyi sems te de nyid bkod pa'o/ /de las byung ba'i rdo rje ni khro bo'i bdag nyid can gang yin pa ste ting nge 'dzin de la yang de skad ces bya'o//char pa chen gcod par 'gyur/ /zhes pa ni stobs po che'i sbyor ba dang ldan pas khro bo mtshon cha 'bar ba thogs pa phyung nas sprin rnams bsregs par gyur cing / chu rnams skams par bsams la khro bas bzlas na char chen po gcod par 'gyur ro//gdengs ka can gyi klu'i gzugs grog mkhar gyis las byas nas dgug pa la sogs pa sngon du 'gro bas mnan la char phob cig ces bskul te de bzhin du bzlas brjod byas na char 'bebs par 'gyur ro/ /kun du 'bar ba zhes bya ba ni snga ma bzhin no//de nyid snying po can gyi khro bo gang yin pa ste de la dmigs pa'i ting nge 'dzin de la yang de skad ces bya'o/ /bkug nas ni zhes pa ni 'dod pa'i rgyal po'i ting nge 'dzin dang ldan pas rkang pa g.yas par sna tshogs rdo rje 'bar ba dgod pas bkug nas bsgrub par bya ba'i mtshan ma mnan te khro gnyer rim par bsnyer zhing khros pas bskul ba'i tshig dang bcas par gsang sngags bzlas pa byas na nges par khugs par 'gyur ro//ye shes 'bar ba dang 'dra bas na ye shes rab tu 'bar ba'o/ /de las rab tu 'bar ba ni khro bo gtum pa ste de la dmigs pa'i ting nge 'dzin de la yang de skad ces bya'o//khro bo'i rgyal po zhes bya ba la sogs pa gsungs pa la mi g.yo ba'i sbyor ba dang ldan pas de nyid mnan la zhags pas bcings la drang bar bya'o/ /yang na las 'di dag thams cad la ni rang gi bdag po'i sbyor ba ji lta bas bya'o//sku gsum rdo rje ni bcom ldan 'das rnam par snang mdzad do/ /de'i ye shes 'bar ba'i 'od zer lta bu de las gnod mdzes kyi bdag nyid can ni rdo rje ste de la dmigs pa'i ting nge 'dzin la snyoms par zhugs pa'o/ /sku gsum rdo rje mchog mnga' bas/ / zhes bya ba ni rnam par snang mdzad do/ /dgug bya ba zhes bya ba ni gnod mdzes kyi sbyor ba dang ldan pas bsgrub par bya ba'i snying ga'i pad+ma'i lte ba lcags kyus phug la dgra bdud zhags pas bcings nas gsang sngags brjod de dgug par bya'o/ /ye shes chen po ni snga ma bzhin te/ rdo rje'i sngags kyi gzugs kyis de rnam par bsgyings pa nyid ni dga' ston te/de la dmigs pa'i ting nge 'dzin la yang de skad ces bya'o/ /sangs rgyas byang chub rjes dran pas/ /zhes bya ba ni sangs rgyas kyi byang chub la sems can thams cad dgod par bya'o zhes mngon du byed pa'o//'khor lo che la rnam gnas nas/ /zhes bya ba ni 'di skad ston par 'gyur te/ rdo rje sems dpa'i rnal 'byor pas 'khor lo chen po'i dbus su 'dug ste/ lcags kyu dang zhags pa thogs pa'i sangs rgyas kyi sprin phyung ste/ das ni sangs rgyas rnams kyang 'gugs par byed do//rang sngags skyes bur rnam bsgoms nas/ /zhes bya ba ni rang gi lha'i sbyor ba dang ldan pa'o/ /'gugs 'gyur te zhes bya ba ni mi'am lha ma yin gyi bu mo rlung gi dkyil 'khor la gnas par bsams la lcags kyus snying ga phug ste sngags brjod nas bkug na nges par khugs par 'gyur ro//zla ba'i dkyil 'khor la gnas pa/ /zhes bya ba ni bcom ldan 'das rnam par snang mdzad zla ba'i mdog can sku chen po dang ldan pa bsams la bsgrub par bya ba zla ba'i dkyil 'khor de la gnas par bya'o/ /rdo rje bdud rtsi zhes bya ba ni 'di skad ston te/rdo rje bdud rtsi zhes bya ba'i khro bo'i sbyor bas de 'ongs par rnam par bsams la de'i gsang sngags lan bcu brjod na/ nges par khugs par 'gyur ro/ /gzhon nu ma dag nges par khugs/ /zhes bya ba ni rdo rje bdud rtsi'i khro bo'i sbyor ba nyid kyis rdo rje lcags kyu gzugs chen po dang ldan zhing 'bar ba dang /rdo rje rlung gi dkyil 'khor de la bsgrub par bya ba gnas par bsams la lcags kyus snying ga phug ste gzhon nu ma dgug par bya'o/ /lha ma yin gyi bu mo dgug pa'i cho ga ni snga ma bzhin no/ /khugs zhes bya ba ni 'di skad ston par 'gyur te/rdo rjes 'og gi rnal 'byor pas dbu gsum pa la zhags pa dang / dgra sta dang / rtse gsum pa dang / lcags kyu thogs pas mdun du rang gi rig pas byin gyis brlabs pa'i nu ma pad+ma'i lte ba'i nang na gnas par byas la/ rdo rje lcags kyu'i ting nge 'dzin las byung ba'i btsag la sogs pa las 'od zer 'bar ba dang ldan pa'i rdo rje lcags kyu la sogs pa yang nas yang du byung ste/hUM zhes bya ba'i sngags brjod nas spros pa sngon du 'gro bas gzas zin pa'i tshe mtshan ma byung gi bar du de bzlas par bya'o/ /de nas de dang ming bris na gnod sbyin mo la sogs pa nges par khugs par 'gyur ro//bkug nas zhes bya ba ni 'jam pa'i rdo rje'i ting nge 'dzin dang ldan pas sangs rgyas kyi 'khor lo'i nang na gnas la gshin rje gshed skra 'bar bas 'bar bar gyur cing lag na rdo rje lcags kyu thogs pa phyung la de nyid lcags kyur byas te gnod sbyin mo dgug par bya'o zhes bya ba'i bar du'o//phyag rgya gsang sngags sbyor ba dang / /bsam gtan 'khor lo'i sbyor ba yis/ /zhes bya ba ni 'gog pa'i rdo rje bsgom pa'i sbyor bas so/ /bskul bar bya zhes bya ba ni yang rdo rje sems dpa'i nga rgyal dang ldan pa'am//de nyid dbu rgyan la bsgom par bya ste gnod mdzes bzhin du sbyar bar bya'o/ /ye shes ni byang chub kyi sems so/ /de las byung ba'i rnam par rgyal ba'i rdo rje ni drag po'i rdo rje ste de la dmigs pa'i ting nge 'dzin gang yin pa de la'ang de skad ces bya'o/ /nye bar spyod par byed ces bya ba ni rnam par snang mdzad kyi sbyor ba dang ldan pas zhal gsum pa thod pa dang /rtse gsum dang / zhags pa dang / lcags kyu bsnams pa phyag gnyis kyis glang po'i pags pa 'dzin la ral pa gcig ma de'i sngags brjod pas phyung la des klu'i bu mo bkug nas nye bar spyad par bya'o zhes bya ba'i don to//nam mkha' chen po dang 'dra ba'i shugs rgya mtsho ni mtha'i rgya mtsho ste de 'phro ba'o/ /dam tshig ni rgyu ste skul byed ma gang yin pa de la dmigs pa'i ting nge 'dzin de la yang de skad ces bya ste/ snga ma bzhin du 'di nyid kyis sam rang gi sbyor bas gsang ba la sogs pa'i bu mo rnams legs par bkug nas bsten par bya'o//nam mkha' mdzod ni 'od dpag tu med pa ste chos kyi mdzod kyi mthu yis so/ /de'i rnam par rgyal ba ni khro gnyer can gyi bdag nyid can no/ /de nyid mchog ste ting nge 'dzin de la dmigs pa'i ting nge 'dzin de la de skad ces bya'o//'di la yang de bzhin du bkug nas spyad par bya'o/ /'gog pa'i rdo rje bsgom pa rdzogs pa ma thos pas ni gsang sngags thams cad kyi bzlas brjod bye ba bya'o zhes bstan par bya ba'i phyir/ yang na zhes bya ba la sogs pa gsungs so//sangs rgyas kyang ni nges par 'jig /ces bya ba ni khro bo'i rgyal po'i rnal 'byor pas khrag gis brlan pa'i gos kyis lus g.yogs pa'am gcer bu dang / rkang pa g.yon pas mtshan ma mnan la yi ge hUM gis phyogs bcu'i sems can thams cad khro bor byin gyis brlabs par bsams nas/de rnams kyis bsgrub par bya ba gsod par bsgoms la khro bo'i tshig tu 'don pas gsang sngags brgya rtsa brgyad bzlas la gsad par bya'o/ /de la phyogs bcu'i sems can thams cad yi ge gsum las byung ba'i rnam par snang mdzad la sogs pa'i ngo bo nyid kyis dang por dgra bo bsad par bsams la de'i 'og tu mngon spyod kyi las bya ste des ni nges par sangs rgyas kyang 'jig par 'gyur ro//mngon spyod kyi gnas bstan par bya ba'i phyir ma mo'i gnas dang zhes bya ba la sogs pa gsungs so//mi rus las byas zhes bya ba la sogs pa ni 'di skad ston par 'gyur te/ khro bo'i sbyor ba dang ldan pas mi rus kyi phur bu sor brgyad pa de'i gsang sngags brgya rtsa brgyad bzlas pa dang bcas pas bsgrub par bya ba'i rkang rjes kyis las de'i gzugs brnyan byas te/ dgug pa ston du 'gro bas sngags brjod la snying gar phur bu gdab pa'am de'i khang pa'i sgor sa brkos par sba bar bya'o/ /nges par skrod ces bya ba ni yan lag ma nyams pa'i thod pa blangs la khro bo'i sngags dang spel ba byas nas 'dir bsgrub par bya ba'i ming bris la rdo rje'i tshig dag bzlas nas dgra'i sgo kha'am yul gyi dbus su sbas na nges par skrod par byed do//de bzhin du ta la'i lo ma'am dur khrod kyi ras la bris nas dgra'i khyim sgo la sogs par sbas na 'chi ba'am skams par 'gyur ro/ /rdo rje sems dpa' rnam par 'jig /ces bya ba ni sku la sogs pa'i rdo rje phur bu 'debs pa'i phyir ro//'od bzang me stag 'khrugs pa can/ /zhes bya ba ni 'od kyi phreng bas 'khrigs pa hUM las byung ba'i phyir ro/ /mthas gtugs pa zhes bya ba ni/ spyi bo nas brtsams te rkang pa'i bar du'o/ /sbyor ba gang gis bya ba de bstan par bya ba'i phyir rnam snang zhes bya ba la sogs pa gsungs so//sku rdo rje la sogs pa bstan par bya ba'i phyir dang de'i phur bu nye bar brtan par bya ba'i phyir/ de nas bcom ldan 'das zhes bya ba la sogs pa gsungs te sku'i ye shes ni rnam par snang mdzad de/ de'i rnam par bsgyings pa ting nge 'dzin gang du ston pa de la de skad ces bya'o//phan tshun dkri ba'i tshul gyis zhes bya ba la sogs pa gsungs te sor mo rnams rgyab tu phan tshun dkris la/ mthe bo gnyis lag pa g.yas pa'i mthil du kha sbyar ba ni 'khor lo'i phur bu'i phyag rgya'o/ /snang mdzad zhabs kyis mnan nas su//zhes bya ba ni 'di skad ston par 'gyur te phur bu'i dbyibs kyi phyag rgya rnam par snang mdzad du gyur par bsams la yid nyid kyis bkug nas gsang sngags 'don pa sngon du 'gro bas phur bus gdab par bya'o/ /dam tshig mchog gis bzhengs par mdzod//ces bya ba ni bcom ldan 'das rnam par snang mdzad nyid phur bu'i dbyibs su der 'byung bar 'gyur ro zhes bya ba'i bar du'o/ /sbyor ba'i che ba'i bdag nyid bstan par bya ba'i phyir/ gzhan du byas na brlag par 'gyur/ /zhes bya ba gsungs te/ rdo rje thugs kyi ye shes chen po zhes bya ba ni rnam par snang mdzad de/ de'i rnam par bsgyings pa ston pa'i ting nge 'dzin gang yin pa de la yang de skad ces bya'o/ /rtse mo lnga pa zhes bya ba la sogs pa la/ thal mo sbyor ba bcings la srin lag sbyar ba nang du gzhug ste/ gung mo gnyis sbyar ba'i tshigs gsum par mdzub mo gnyis rdo rje dang 'dra bar bzhag na rtse mo lnga par 'gyur te/'di las me stag 'phro bas 'khrigs pa'i rdo rje phur bur bltas la stang stabs kyis sbyar bar bya'o/ /'jig rten dbang phyug nyid gsung gi dam tshig nyid yin te de'i rnam par 'phrul pa ston pa'i ting nge 'dzin gang yin pa de la yang de skad ces bya'o//rdo rje sor mo zhes bya ba la sogs pa la/ thal mo khong stong du sbyar ba pad+ma dang 'dra bar phye na pad+ma kha phye bar 'gyur te/ de dag ni rang gi bdag po'i sbyor ba gtso bor byas pas sbyar bar bya'o//gsang ba'i tshig ni rnam par snang mdzad kyi ngo bo nyid yin pa'i phyir ro/ /gsang ba kun btus pa ni mi bskyod pa'i ngo bo nyid yin pa'i phyir ro/ /zhi ba chos kyi tshig ni 'od dpag tu med pa'i ngo bo nyid yin pa'i phyir ro/ /de bas na rdo rje ye shes nges par 'chi bas rdo rje ye shes so//mngon spyod la yang bsam pa'i khyad par gyis rdo rje phur bus gdab pa ji lta ba bzhin du sbyar bar bya'o/ /rkun ma mdongs par byed pa'i rdo rje zhes bya ba la/ rkun ma mdongs par byed pa ni lha mo 'od zer can te/ de nyid mi phyed pas na rdo rje ste de la dmigs pas na ting nge 'dzin de la yang de skad ces bya'o//de la 'dir 'od zer can gyi sbyor ba dang sngags dang phyag rgyar bcas pas rnam par 'tshe bar byed pa rnams kyi kha dang mig btsems la de rnams lkugs pa dang long bar gyur par bsams na chom rkun dang sdang ba rnams bcings par 'gyur ro//nad chen po thams cad dgug pa las rnam par rgyal ma de nyid ye shes yin pa de la dmigs pa'i ting nge 'dzin de la yang de skad ces bya'o/ /zhi bar 'gyur zhes bya ba ni don yod rdo rje'i sbyor ba dang ldan pas ri khrod kyi lo ma can spyan drangs la de'i zhal du pad+ma dkar po dang mar srang bsres pa'i til dang 'o ma la sogs pa ji lta ba bzhin du sbyin sreg byas la/sems can rnams kyi yams dang 'tshe ba la sogs pa dang bral bar bsams na zhi bar 'gyur ro/ /yang na 'di nyid phyung la kun du spros te bdud rtsi'i char rab tu 'bebs par bsam mo zhes bstan par bya ba'i phyir nam mkha' kun nas zhes bya ba la sogs pa gsungs so//le'u lnga pa'i bshad pa'o// //lag pa'i phyag rgya la sogs pa'i gleng bslang bar bya ba'i phyir/ de nas bcom ldan 'das zhes bya ba la sogs pa gsungs te/ lag pa gnyis kyi nang gi khu tshur bcings te mthe bo gnyis gshibs nas bsgreng bar byas pa 'di dang /mgor rang gi gsang sngags kyis sku byin gyis brlab par bya'o/ /'di nyid las g.yon pa'i mthe bo nang du bcug pa ni de bzhin du gsungs so/ /'di nyid las g.yas pa'i mthe bo nang du bcug la g.yon pa bteg pa ni de bzhin du thugs kyi ste rang gi stan la gnas nas spyi bo la sogs par yi ge oM la sogs pa gsum bsgom pa nas byin gyis brlab pa la sogs pa bya'o//g.yon pa'i rdo rje khu tshur gyi mdzub mo bsgreng la g.yas pa'i rdo rje khu tshur gyis rtse mo bzung ba ni rnam par snang mdzad kyi phyag rgya'o//sems dpa'i skyil mo krung du 'dug nas lag pa g.yon pa'i khu tshur pang par gzhag ste g.yas pas sa gnon pa ni mi 'khrugs pa'i'o/ /g.yon pa de bzhin bzhag la g.yas pa mchog sbyin ltar byas pa ni rin chen 'byung gnas kyi'o//lag pa gnyis pang par bzhag ste bsam gtan gyi tshul du sbyar ba ni 'od dpag med kyi'o/ /g.yon pa snga ma bzhin du bzhag la g.yas pa mi 'jigs pa'i tshul du gzhag pa ni gdon mi za bar grub pa'o/ /lag pa gnyis rdo rje bcing bar byas la gung mo gnyis gshibs te bsgreng ba ni rdo rje sems ma'i'o//de nyid las gung mo'i tshigs dang po dgug ste/ rin po che'i tshul du byas pa ni/ rdo rje rin chen sems ma'i'o/ /gung mo sbyar ba pad+ma'i 'dab ma ltar byas pa ni rdo rje chos ma'i'o/ /de nyid las gung mo sbyar te tshigs par ma rtse bskum nas ral gri ltar byas pa ni rdo rje las ma'i'o//thal mo khong stong du sbyar ba las mdzub mo gnyis gdu bu 'dra bar zlum por byas te mthe bo'i steng du mig dang 'dra bar gzhag pa ni sangs rgyas spyan gyi'o/ /rdo rje bcings pa las gung mo gnyis gshibs te sbyar ba'i tshigs gsum par mdzub mo gnyis rdo rje'i tshul du gzhag pa ni mA ma kI'i'o//lag pa gnyis kyi thal mo gnyis khong stong du sbyar te pad+ma kha bye ba dang 'dra bar byas pa ni gos dkar can gyi'o/ /thal mo khong stong du sbyar ba las mdzub mo gnyis kyis gung mo'i sen mo mnan te dbus su gzhag pa ni sgrol ma'i'o//thal mo sbyar te mdzub mo gnyis gung mo'i tshigs dbu mar sbyar la mthe bo gnyis glor gzhag pa ni skul byed ma'i'o/ /rdo rje bcing ba byas pa las mthe bo gnyis bsdams te mdzub mo gnyis kyi rtse mo bkug nas sbyar ba ni rin chen sgrol ma'i'o//thal mo khong stong du sbyar ba las mthe bos so so'i rang gi mthe'u chung gi sen mo mnan la lhag ma rdo rje'i mtshan nyid du byas pa khro gnyer can gyi'o/ /rdo rje khu tshur gnyis bcings pa las mdzub mo dang mthe'u chung gnyis lu gu rgyud ltar bcings pa ni rdo rje lu gu rgyud kyi'o//lag pa gnyis khu tshur nang du bcangs pa las gung mo gnyis gshibs te sbyar la srin lag gnyis bkrol te bsnol ba mdzub mo gnyis kyis dkris te mthe bo gnyis brkyang la rtse sbyar te bkug la kha dang 'dra bar byas pa ni gshin rje gshed kyi'o/ /g.yon pa'i rdo rje khu tshur bcangs pa las mdzub mo brkyang nas snying gar gzhag /g.yas pa bteg pa thal lcag gi tshul du byas pa ni gzhan gyis mi thub pa zhes bya ba'i'o/ /rdo rje khu tshur gnyis mthe'u chung lu gu rgyud du byas la mdzub mo gnyis gshibs te rtse mo sbyar la bzlog ste dpral bar gzhag pa ni rta mgrin gyi'o//lag pa gnyis brkyang la mthe bo gnyis kyis rang rang gi mthe'u chung gi sen mo mnan nas dpung mgo'i drung du rdo rje bcing ba'i tshul du byas nas khros pas sbyar ba ni bdud rtsi thab sbyor gyi'o/ /lag pa gnyis brkyang la mthe bos rang gi srin lag dang mthe'u chung gi sen mo mnan te shubs las phyung nas/g.yas pas ral gri'i tshul du gzhag pa ni mi g.yo ba'i'o/ /lag pa g.yon pa'i rdo rje khu tshur gyi rgyab tu lag pa g.yas pa rdo rje khu tshur du byas la/ mthe'u chung gnyis lu gu rgyud ltar bcings nas mdzub mo gnyis bteg ste zhags par byas pa ni 'dod pa'i rgyal po'i'o//g.yon pa'i rdo rje khu tshur las byung ba'i mdzub mo bsgreng la snying gar bzhag la g.yas pa'i rdo rje khu tshur gyi mdzub mo be con ltar brdegs pa ni be con sngon po can gyi'o/ /lag pa g.yon pa'i rdo rje khu tshur gyi rtse gsum pa byas la g.yas pa'i rdo rje brdeg pa'i tshul du gteg pa ni stobs po che'i'o//khu tshur gnyis bcings la mthe bo dang mdzub mo dang gung mo rnams bsgreng ste so so zhing phan tshun rtse sprad pa ni byams pa'i'o/ /thal mo khong stong du sbyar la mdzub mo gnyis kyis rang gi srin lag gi sen mo mnan nas/ ut+pa la'i tshul du gzhag pa ni 'jam pa'i dbyangs kyi'o//lag pa g.yon pa pang par gnas par byas la g.yas pa glang po'i sna ltar byas pa ni spos kyi glang po che'i'o/ /lag pa g.yon pa'i rdo rje khu tshur bteg pa lag pa g.yas pa ba dan gyi tshul du gzhag pa ni ye shes tog gi phyag rgya'o/ / bzang po'i 'dug stangs su 'dug la thal mo khong stong snying gar sbyar ba ni bzang skyong gi'o/ /lag pa g.yon pa brkyang ba'i rgyab tu lag pa g.yas pa rus sbal gyi tshul du byas la sor mo rnams chu rlabs 'dren pa'i tshul du byed pa ni blo gros rgya mtsho'i'o/ /g.yon pa'i rdo rje khu tshur snying gar bcings la g.yas pa mchog sbyin pa'i tshul du gzhag pa ni blo gros mi zad pa'i'o//g.yon pa'i rdo rje khu tshur pang par bzhag la g.yas pas se gol gtogs pa'i tshul du byed pa ni spobs pa brtsegs pa'i'o/ /thal mo gnyis khong stong du sbyar la pad+ma cung zad kha bye ba ltar byas pa ni mthu chen thob pa'i'o//lag pa gnyis kyis 'thor ba ni ngan song thams cad spong ba'i'o/ /lag pa gnyis thal mo sbyar la bsnun pa'i tshul du byed pa ni mya ngan thams cad kyi mun pa nges par 'joms pa'i blo gros kyi'o/ /lag pa gnyis brkyang la 'bar ba'i tshul du byed pa ni dra ba can gyi 'od kyi'o//g.yas pa mchog sbyin par byas la g.yon pa'i mthe bo dang mdzub mo zla ba ltar brkyang pa ni zla 'od kyi phyag rgya'o/ /lag pa gnyis bum pa'i tshul du gzhag pa ni 'od dpag med pa'i'o/ /rdo rje khu tshur gnyis nam mkhar kun du bskor ba ni nam mkha' mdzod kyi'o/ /lag pa g.yon pa sa la brkyang nas g.yas pa'i mthe bo dang mdzub mo sprad la/zhu ba'i tshul du byed pa ni sgrib pa thams cad rnam par sel ba'i phyag rgya ste/ de dag ni dkyil 'khor ba'i lha rnams kyi phyag rgya rnams so/ /g.yon pa rdo rje khu tshur las khro bo'i mdzub mo snying gar rab tu bzhag la/ hUM zhes smra zhing lag pa g.yas pa'i rdo rje khu tshur brdeg pa'i tshul gyis 'degs par byed pa ni ri khrod lo ma can gyi'o/ /g.yon pa'i mdzub mo dang mthe bos skud pa bzung la g.yas pas khab kyis kha dang mig 'tshems pa'i tshul du byed pa ni 'od zer can gyi'o/ /lag pa gnyis spyi bor sbrul mgo'i gdengs ka'i tshul du byas la phuT ces brjod pa ni dug sel ma'i ste dug sel ma 'di nyid kyi sbyor bas dug bsal bar bya'o//'dod pa'i rgyal po'i phyag rgya las mdzub mo gnyis bsgreng nas gzhag pa ni rdo rje hUM mdzad kyi'o/ /de nyid lag pa g.yas pa'i mdzub mo lcags kyu'i tshul du byas pa ni rdo rje'i khro bo'i lcags kyu'i phyag rgya ste/de bzhin gshegs pa thams cad spyan 'dren pa la ni dzaHzhes bya ba dang sbyar bar bya'o/ /rdo rje khu tshur gnyis kyi mthe'u chung gnyis kha'i grwa gnyis su bzlog ste mche bar byas la lce bskul zhing khro bo'i lta bas lta bar byed pa ni rdo rje mche ba'i phyag rgya'o//rdo rje khu tshur gnyis kyi mthe'u chung dang mdzub mo gnyis rdo rjes mnan pa'i lcags kyu byas la hUM zhes brjod cing khro bo'i lta ba dang ldan pas lus gcu pa ni rdo rje mkha' 'gro ma'i phyag rgya ste/ khrag la sogs pa drang ba la sbyar bar bya'o//rdo rje khu tshur gnyis bcings la mdzub mo gnyis brkyang nas bsnol te gyen du 'degs pa ni dkyil 'khor gyi phyag rgya ste/ bzlas brjod 'bum byas nas mtshan mo thog thag bsgrubs la phyag rgya 'di dang badzrod tiSh+Tha zhes bya ba dang dkyil 'khor bteg la bstan par bya'o//de nyid las mkhrig ma g.yon pa la mkhrig ma g.yas pa gzhag ste/ /yang sgo logs su bteg pa ni sgo dbye ba'i phyag rgya'o/ /rdo rje khu tshur gnyis bzlog nas bsnol la mchan khung du bsams te khro bo'i lta ba dang ldan pa ni gdon thams cad skrag par byed pa'i phyag rgya'o//lag pa g.yon pa brkyang ste kha sbubs la de'i steng du g.yas pa bzhag la gnyis ga'i mthe bo bskyod pa ni lha ma yin gyi sgyu dang 'khrul 'khor dbye ba dang / lha ma yin gyi bu mo smrar gzhug pa'i phyag rgya'o/ /lag pa gnyis kyi mthe bo dang mthe'u chung lu gu rgyud du byas la lhag ma brkyang ste stang stabs dang bcas pas hUM zhes bya ba dang sbyor ba ni khro bo rdo rjes 'og gi phyag rgya ste 'dis 'khrul 'khor bshig la lha ma yin gyi grong khyer du 'jug par bya'o//g.yon pa'i rdo rje khu tshur gyis sdigs mdzub byas pa ni/ rdo rje nag mo'i phyag rgya'o/ /rdo rje bcings pa las mdzub mo gnyis brkyang ste phur bu'i tshul du byas pa ni rdo rje phur bu'i phyag rgya'o//g.yas pa'i rdo rje khu tshur brdung ba'i tshul du byed pa ni rdo rje tho ba'i phyag rgya'o/ /lag pa gnyis rdo rje khu tshur byas la mdzub mo gnyis brgyang ste mdud pa dor ba'i tshul du byas pa ni de bzhin gshegs pa thams cad kyi rdo rje bcing ba'i phyag rgya ste 'di dang baM zhes bya ba 'dis dkyil 'khor gyi lha rnams bcing bar bya'o//rdo rje khu tshur gnyis sog les bgegs 'dra ba ltar byed pa ni rdo rje sog le'i phyag rgya ste bgegs 'dra ba la ni hUM zhes brjod nas sbyar bar bya'o/ /lag pa gnyis zla ba 'dra bar byas pas gdong g.yogs la a la la zhes brjod cing mig steng du bgrad par gyur pa ni rdo rje srin mo'i phyag rgya ste 'di ni gdug pa gnon pa'o//lag pa gnyis lu gu rgyud du byas la/ gung mo dang mdzub mo brkyang nas gri gug ltar byas pa ni chad pa'i phyag rgya ste 'di dang stobs po che'i phyag rgyas sprin thams cad gtubs par 'gyur ro//lag pa gnyis khu tshur bcangs la mdzub mo gnyis skam par byas nas dpung pa brkyang la phur bu 'byin pa'i tshul du byed pa ni skam pa'i phyag rgya ste/ lag pa gnyis kyi mthe bo rang gi lag mthil du bzhag la rkang pa gcig sa la btsugs nas rkang pa gnyis pa rgyab tu bskum la khro bo'i blta bas lce bskyod cing hUM phaT ces brjod cang gom pa 'dor zhing bskyod pa ste/rang gi lag mthil du mthe bo gzhag pa'i lag pa gnyis kyis gshog pa bskyod pa ltar byed pa ni rdo rje nam mkha' lding gi phyag rgya ste rdo rje nam mkha' lding du bdag nyid bsams la 'dis nad thams cad bsal bar bya'o//rdo rje khu tshur gyis mda' gzung la/ g.yas dang g.yon du brkyang ba'i tshul du byas la/ steng dang 'og dang ngos gnyis su mda' 'phen par byed pa ni rdo rje mda'i phyag rgya ste 'di dang hUM phaT ces bya bas gzhan gyi dbung gzhig pa dang /de bzhin gshegs pa thams cad mnyes par byas la hoHzhes bya bas mnyes par bya'o/ /rdo rje khu tshur gnyis bcings la gung mo gnyis gshibs te bsgreng la tshigs gsum pa bcag ste rin po che dang 'dra bar bya/ mthe bo gnyis bsnyams pa'i steng du mdzub mo gnyis gdu bu'i tshul du byas pa ni bcom ldan 'das 'khor lo can gyi phyag rgya ste 'di dang de'i gzugs su bsgoms nas 'khor lo 'bar ba lta bu 'dzin pa ni g.yul las sgrol bar byed pa'o//lag pa g.yon pa'i sor mo kun rang gi mthe bos mnan te gung mo bsgreng g.yas pa pad+mar bya ba ni ha la ha la'i phyag rgya'o//rdo rje khu tshur gnyis kyi mthe'u chung gnyis lu gu rgyud du byas la/ mdzub mo gnyis gshibs te bzlog la dpral bar gzhag pa ni rdo rje khrag 'thung gi phyag rgya ste 'dis dur khrod du zhugs la mkha' 'gro ma rnams bskrad par bya'o//g.yon pas thod pa gzung ba'i tshul du byas la/ g.yas pas mdung rtse gsum par byas nas ral ba la zla bas brgyan te bcings nas mtshan ma bsgrengs pa mig gsum pa la gar stabs kyis gar byed par bdag nyid bsgoms pa ni bde byed kyi phyag rgya'o/ / g.yon pa'i gung mo dang mthe bo 'jigs pa'i tshul du brkyang la g.yas pa'i khu tshur dbyug to 'dzin pa ltar byas pa ni khyab 'jug gi phyag rgya'o/ /lag pa gnyis thal mo sbyar nas pad+ma'i tshul du brkyang bar byed pa ni tshangs pa'i phyag rgya'o/ /lag pa gnyis me tog thogs pa'i phyag rgyar byas pa ni ma mo thams cad kyi'o//rdo rje sems ma la sogs pa de dag nyid ni rin po che ste me long lta bu la sogs pa'i ye shes kyi ngo bo nyid des dkyil 'khor gyi lha rang gi ting nge 'dzin la gnas par bsgoms la dbang bskur bar bya ste/ de la bcom ldan 'das rnam par snang mdzad kyi ni rin po che'i dbu rgyan nyid kyis so//gzhan rnams kyi ni mi bskyod pa dang / 'od dpag tu med pa dang / sangs rgyas lnga'i dbu rgyan nyid kyis ci rigs par bskyed par bya'o/ /dar dpyangs dang phreng bas kyang dbang bskur bar bya ste rdo rje khu tshur gnyis ltag par mdung la mthe'u chung la sogs pa sor mo thams cad bkrol nas 'gying bag dang bcas pas dar dpyangs kyi tshul du bya'o//gsang ba'i mchod pa nyid bstan par bya ba'i phyir 'gyur zhing zhes bya ba la sogs pa gsungs te/ rdo rje khu tshur gnyis dkur brten nas cung zad 'jo sgeg gi tshul gyis 'gyur zhing g.yon phyogs su 'dud pa ni sgeg mo'i'o//de nyid las phreng ba'i tshul du mgo la 'ching ba ni phreng ba ma'i'o/ /glu len cing rdo rje'i pi wang brdung ba'i tshul du byed pa ni rdo rje glu ma'i'o/ /rdo rje khu tshur gnyis gar byed pa'i tshul du bskor ba ni rdo rje gar mkhan ma'i'o/ /gsang ba dang phyi'i mchod pa gar sngon du 'gro bas bya'o zhes bstan par bya ba'i phyir/'jo sgeg thabs la spro ba yis/ zhes bya ba la sogs pa gsungs so/ /me tog ni thal mo dang gar gyis me tog dbul ba'i tshul du byed pa ni me tog ma'i'o/ /phan tshun rgyab sbyar la gung mo bsgreng nas spos kyi tshul du bskor ba ni bdug spos ma'i'o//mthe bo gnyis mar me'i tshul du gzhag pa ni mar me ma'i'o/ /gar sngon du 'gro bas byug pa'i tshul du byed pa ni byug pa ma'i'o/ /lag pa gnyis dung gi tshul du sbyar la mchod yon dbul bar bya'o/ /lag pa gnyis kyis brdebs pas rdza rnga brdung ba'i tshul du bya ba dang /rang gi bud pa'i tshul gyis gling bu 'bud pa dang / rdo rje bsdams pa nang du bcings la mthe bo gnyis gshibs la brkyang / mthe bo gnyis gdu bur byas pa'i dung 'bud pa dang lag pa g.yas pa bteg ste/ de nyid kyis rnga yab g.yob ba ltar bya ba dang lag pa g.yon pa bteg la lag pa g.yas pa rgyal mtshan gyi tshul du dpyangs pa dang / de bzhin du gnyi ga ba dan du bya ba'i don du g.yo zhing bskor bas 'og tu bya ba dang tshon 'gyed pa'i tshul gyis phreng ba bya ba dang lag pa g.yon pa pang bar gzhag ste snod du byas la/g.yas pa bzung nas lha bshos rnam pa sna tshogs pa dbul ba dang / zur bzhi'i tshul gyis khang pa brtsegs ma bya ba dang / gos kyi tshul te na bza' 'dra ba'i tshul dang / gdu bu dang do shal dang / dpung rgyan dang / rkang rgyan dang / rna cha rnams ni gnas ji lta bar brgyan par bya ba dang /lag pa g.yon pa'i mthe bo'i rtse mo'i steng du g.yas pa brkyang la gdugs su bya ba dang / lag pa g.yon pa thad kar brkyang la g.yas pa de bzhin du g.yon pa'i steng du gzhag ste nam mkha' la bskor na bla rer 'gyur ro/ / mtshams rnams su drang ba la sogs pa bya ste 'di dag la yi ge hUM gis ci rigs par bya'o/ /de kho na nyid kyi mchod pa'i don du shes rab kyi sgo 'phar dbye bar bya ba'i phyir dbye bar bya'o/ /gang rnam par rtog pa dang bral ba de rnams kyi byang chub kyi sems rnam par bsgoms pas thams cad rdo rje 'dzin pa'i bdag nyid du shin tu dad pa ni lha thams cad kyi sku dang gsung dang thugs rnams la mchod pa bla na med pa byas par 'gyur ro//dbu ma'i theg pa bsgoms pas rnam par ma bsgoms pa yang kun rdzob kyi mchod pa yin par blta bar bya'o/ /dkyil 'khor ba'i lha rnams kyi sku dang gsung dang thugs dang de bsgrubs pa'i 'bras bu mnyam pa med pas legs so zhes gsungs so//de bzhin gshegs pa la sogs pa rigs lnga ni skye ba dang 'gag pa dang bral bas bcom ldan 'das la bstod pa bstan par bya ba'i phyir/ mtha' ma med cing zhes bya ba la sogs pa gsungs so/ /sku gsum gyi bde ba'i sgo nas lha thams cad la bstod pa bstan par bya ba'i phyir/ bde ba las 'khrungs rdo rje 'chang ba yi/ /zhes bya ba la sogs pa gsungs te/ rdo rje ye shes ni byang chub kyi sems kyi bdag nyid can te de las zla ba dang rdo rje la sogs pa'i rim gyis bde ba'i ngo bor 'khrungs pa'o//ji lta bu zhe na dngos po zhes bya ba la sogs pa gsungs te/ dngos po rnam par bsgom pa ni rnam par snang mdzad la sogs pa bdag po bskyed pa'i sgo yod pa de nyid bstan par bya ba'i phyir/ gang phyir zhes bya ba la sogs pa gsungs te gang gi phyir dang por te/ thog mar rnam par snang mdzad ni/ /oM las byung bar sprul pa'o/ /gang gis she na dag cing zhes bya ba la sogs pa gsungs te/ dag cing rnam dag ces bya ba ni nyon mongs pa dang shes bya'i sgrib pa las dben zhing /sgrib pa thams cad spangs pa yin pas na de skad ces bya'o/ /gzungs mang tshul gyis zhes bya ba ni yang dag pa'i rig pa bcu mtshan nyid can gyi phreng bas bcings pa ni bskyed pa ste/ kun nas nyon mongs pa zil gyis gnon pa'i bdag nyid can gyi bstod pa'i rnam pa'o/ /de bas na sgyu 'phrul dra ba'i rgyud kyi ngo bo bcom ldan 'das de nyid la phyag 'tshal ba'o//gsung snyan zhes bya ba la sogs pa la yi ge kun ni pad+ma'i rigs kyi lha mo rnams kyis te de kun du bsten cing khyab pa'i bar gyis gsungs snyan ces gsungs so/ /gsung ni yi ge AHste/ de nyid skye ba med pa ston pas spros pa med par ston pa'o//de la 'jig rten dbang phyug bzhugs pa ni de las byung ba'i phyir te/ snga ma bzhin du de la yang bdag phyag 'tshal lo zhes bya bar sbyar ro/ /des byas pa'i mig gsum pa lha mo dang bcas pa khro bo'i rgyal po'i skus btul bar mdzad pa dang / rdzu 'phrul gyi rkang tshul mang ba dang ldan pa gang yin pa de lta bu gzhan 'ga' yang mnyam pa med pa dang bde ba chen po'i rang bzhin gyi rjes su chags pas bzhugs pa ste/ na chung dag dang lhan cig bzhad cing rol ba ni bden pa ma yin pas kun rdzob tu bzhugs par ston pa'i bar du'o/ /da ni 'di skad ston par 'gyur te yi ge gsum gyi rnam pa las rim gyis 'bras bu'i sgo nas bdag nyid chen po'i 'byung ba sngon du 'gro bas phyag 'tshal ba ston pa yin te de la yang snga ma bzhin no//'di'i yang phyag g.yas pas thugs kar rdo rje bstod de 'jog la/ g.yon pa dkur brten nas dril bu 'khrol bar mdzad cing /yang g.yas dang g.yon gyis mda' dang gzhu gsor zhing bsnams pa/ zla ba'i mdog can la cung zad dmar bas mdzes pa'i mdangs can lha mo bzhi'i btsun mos bskor ba ste/ de yang gcig ni lha mo kI li kI la ste mchog tu dbus kyi rang gi lha'i dam tshig pa la 'khyud pa'o//gnyis pa ni chu srin gyi rgyal mtshan can te rgyab tu gnas shing rjes su chags pa bde ba chen po'i mthu dang ldan pa'o/ /gsum pa ni bsnyems ma zhes bya ba ste me tog gi phreng bas bdag po la kun nas 'phen pa'o zhes bya ba ni lhag ma'o//bzhi pa ni me tog gi mig can te/ g.yas nas bde ba'i mda' 'phen pa ste 'dod pa'i mda' zhes bya ba'i don to/ /gang zhig glu 'di len cing stod par byed pa dang / sgom par byed pa des ni bde ba'i rdo rje can dang mnyam pa thob par 'gyur ro/ /de rnams kyis phyi'i mchod pa rnam pa sna tshogs dang yid kyi mchod pa rnams oM a nut+ta ra zhes bya ba la sogs pas byin gyis brlab par bya'o zhes gsungs pa yin no//le'u drug pa'i bshad pa'o// //da ni byang chub kyi sems bstan par bya ba'i don du/ rgyud phyi ma bshad par bya ba'i phyir/de nas bcom ldan 'das zhes bya ba la sogs pa gsungs te/ sems ni lus kyi rnam pa yin la zhes bya ba ni de lta bu'i rnam par snang ba yin te/ de skad du khams gsum po 'di dag ni sems tsam mo zhes gang gsungs pas so/ /chos rnams zhes bya ba ni de bzhin gshegs pa'i rigs rnams la'o//skye ba med pas brjod du med pa ni yi ge med pa'o/ /yi ge med pas na gnas pa med pa'o/ /de bas na de kho na nyid du med pa'o/ /rtog pa dang brjod pa thams cad kyi gnas ma yin pas na rtog pa dang brjod pa'i tshul spangs pa'o/ /gsung gi spros pa tsam nyid rdo rje yin pas na de la dmigs pa'i ting nge 'dzin de la yang de skad ces bya'o//dngos po zhes bya ba ni rdo rje'i rigs rnams so/ /de ma bskyed pa yin te/ de bas na chos can dang chos nyid dang bral bas chos thams cad med pa ste/ yang dag par rig pa bcu'i mtshan nyid can dang chos nyid med pa ste yid du 'ong ba'i don thob pa'i bdag nyid can med pa'o//de bzhin gshegs pa thams cad kyi dmigs su med pa'i ting nge 'dzin gang yin pa de la de skad ces bya'o/ /dngos po 'di dag ces bya ba ni rin po che'i rigs dang ldan pa rnams so//chos kyi mtshan nyid spangs pa yin/ /zhes bya ba ni dkyil 'khor la sogs pa'i chos rnams ni rang gi mtshan nyid dang bral ba'i phyir ro/ /ji ltar na 'di ltar 'gyur zhe na/ bdag med chos las legs byung ba'i/ /zhes bya ba gsungs te mnyam pa nyid kyi ye shes kyi bdag po las skyes zhes bya ba'i don to//me lce 'bar ba ni chos thams cad rang bzhin gyis dag pa'o/ /de nyid rdo rje 'bar ba ste de la dmigs pa'i ting nge 'dzin de la yang de skad ces bya'o/ /dngos po zhes bya ba ni pad+ma'i rigs dang ldan pa rnams so/ /de ni skye ba med pa yin la de bas na dngos po med pa ste/lha rnams dang sgom du med pa ste bsgom par bya ba'ang med pa'i phyir ro/ /dngos po zhes rab tu brjod pa ni kun rdzob yin no/ /de bzhin gshegs pa thams cad kyi bla na med pa'i rang bzhin gyis 'od gsal ba'o/ /de nyid rdo rje ste de la dmigs pa'i ting nge 'dzin gang yin pa de la yang de skad ces bya'o//chos rnams zhes bya ba ni las kyi rigs dang ldan pa rnams so/ /gzod nas dag pa ni thog ma nas skye ba med pa'i phyir ro/ /rnyog pa med pa ni nyes pa thams cad las dben pa'i phyir ro/ /de bas na sems can med pa ste zla ba'i dkyil 'khor gyi ngo bo dang srog kyang med pa ste phyag mtshan gyi gzugs med pa dang sangs rgyas nyid med pa ste rigs kyi bdag po'i mtshan nyid can dang /byang chub med pa ste bya ba sgrub pa'i ye shes kyi bdag nyid can dngos po med pa'o/ /sangs rgyas dang dag pa dang / chos bstan pa rnams ni sku dang thugs dang gsung gi sgo nas so//chos thams cad bdag med pa bsgom pa'i bdag nyid can yin pas na/ bdag med chos las legs byung ste/ /'di dag ni sangs rgyas la sogs pa'i rgyu dang 'bras bur gyur pa yin no/ /byang chub ces bya ba la sogs pa ni phyag 'tshal ba ston pa yin te/ji ltar 'byung zhe na byang chub tshogs kyis bsgoms pa yis/ /zhes bya ba ste byang chub kyi sems bsgoms pa'i bsod nams dang ye shes kyi tshogs bla na med pa'i bsod nams dang ye shes kyi tshogs des rgyud bsgos pa'i phyir ro/ /mi g.yo yi ge las 'byung zhing //zhes bya ba ni zla ba la gnas pa'i yi ge hUM las 'byung ba'i phyir ro/ /de ni 'di skad ston par 'gyur te/ byang chub kyi sems bsgom pa sngon du 'gro bas zla ba'i dkyil 'khor la sogs pa bsgom par bya'o/ /thugs rdo rje'i sbyor bas dang por bzlas pa la sogs pa la rang gi lha spyan drang ba la sogs pa bya'o zhes bstan par bya ba'i phyir/gnas dang zhes bya ba la sogs pa gsungs te 'di dag ga las shes she na/ 'khor los sgyur ba chen por gyur pas chos kyi mthar yang dam tshig rdo rje can du gyur nas rang gi lha spyan drang bar bya'o zhes bstan par bya ba'i phyir ro//rnal 'byor bdag nyid can gyis brtag /ces bya ba ni 'di skad ston par 'gyur te/ sems dpa'i skyil mo krung dang ldan par 'dug la rang bzhin gyis dag pa'i chos nyid mngon du byas te/ rang gi phyag rgya byin gyis brlab pa sngon du 'gro ba dang / rdo rje sems mas byin gyis brlabs la hUM zhes bya ba brjod de/rang gi lus kyi rin po che la bdag nyid rdo rje can yin no zhes nga rgyal bskyed la ji skad du bshad pa'i gnas dang stan la sogs pa rdzogs nas/ rdo rje'i lcags kyus rang gi lha spyan drangs la gdan ji lta ba bzhin du bstabs te/ rigs kyi yum gyi dam tshig nye bar bstan nas phyag rgya bskor bas phyogs bcings la mchod yon dang zhabs bsil la sogs pa phul nas go cha bskon te/ phyogs su mda' 'phen pa'i tshul dang / phur bu dang ra bas srung ba byas la/ rang gi phyag rgyas byin gyis brlab cing dbang bskur te gsang ba'i mchod pa dang rol mo la sogs pa bsam zhing bstod pa dang /phyag bya ba la sogs pa'i rim gyis rang gi lha'i gzugs su bsgom par bya'o/ /byin gyis brlabs pa'i rnal 'byor la ni rang gi sngags dang phyag rgyas bdag nyid byin gyis brlabs la rang gi lha'i nga rgyal du bya'o//yongs su rtog pa'i rnal 'byor ni byang chub kyi sems bsgom pa la sogs pa'i rim gyis rang gi lhar bskyed pa'o/ /yongs su rdzogs pa'i rnal 'byor ni/ skad cig gis rnam pa thams cad kyi mchog dang ldan pa'i rang gi lha'i gzugs su spro ba dang /sdud par byed pas bsgom pa'o/ /dam tshig byin gyis brlab pa ni ltar byin gyis brlab pa yin te sngar bshad pa'o/ /rnal 'byor spyod pa zhes bya ba ni bcom ldan 'das lha thams cad kyi rnal 'byor gyis byung ba yin pa'i phyir ro/ /de nyid brtags pa ste sems so sor rtogs pa la sogs pa'i rim gyis byung ba'i phyir ro//bar du zhes bya ba ni dbus su byung ba ste rnam par snang mdzad kyi thugs ka'i zla ba'i dbus na gnas pa'i gsang sngags kyi yi ge las nges par byung ba zhes bya ba'i bar du'o/ /yongs su brtag pa la sogs pa rnal 'byor gnyis bstan par bya ba'i phyir/byang chub sems ni zhes bya ba la sogs pa gsungs so/ /de ni 'di ltar ston par 'gyur te/ de la dang por yi ge hUM gis thal mo gsum brdabs la rang gi byang chub kyi sems bsgoms nas rang bzhin gyis dag par mngon sum du byas la rang gi sems byang chub kyi tshogs kyis bsgos pa zla ba'i dkyil 'khor lta bur so sor brtags la/de nyid yongs su rdzogs pa de la yi ge oM myu gur byas nas/ de las de bzhin gshegs pa thams cad phyung ste/ de rnams kyis sems can thams cad btul nas nang du chud pa sngon du 'gro bas de las byung ba'i sku rdo rje la rang gi gdan paM las byung ba'i pad+ma la gnas pa'i mtshan ma thams cad yongs su rdzogs par bsgoms la/gnas ji lta bar yi ge gsum gyis sku gnyis byin gyis brlabs la/ rang dang spyan gnyis byung ba'i rgyal mtshan la gnas pa'i yi ge thams cad ra sa'i sems zhu bar byas la byang chub kyi sems phyung ste hUM las byung ba'i rang gi gsang ba'i rdo rje byas la de nas sngags kyi yi ge gnyis yi ge ho dmar po dang spel ba rang gi khar bcug ste/'dod chags chen po'i mes de zhu bar gyur cing / gnyi ga yang zhu bar gyur par bltas la spyan la sogs pas bslang ba'i glu dang yang dag par bskul ba sngon du 'gro bar byas pa dang /de nas rnam par snang mdzad du gyur nas thugs ka'i zla ba'i dkyil 'khor la rang gi gsang sngags dang ldan pas rdo rje'i bdag nyid ni bdag yin no zhes bya ba'i nga rgyal bskyed nas/mtshan thams cad la sogs pa yongs su rdzogs shing 'od kyi dkyil 'khor dam pas brgyan pa dang phyag rgya dang nye bar ldan pa'i ye shes sems dpar bdag nyid bsgom par bya'o/ /cha shas kyi ni dra ba can/ /zhes bya ba ni sa la sogs pa spyan la sogs par rang gi sa bon las byung ba dgod par bya'o//phung po dang khams dang skye mched la sogs pa rnams la ni de bzhin gshegs pa rnams dang sa'i snying po la sogs pa bkod la/ yang yi ge gsum gyis byin gyis brlabs te rdo rje sems dpa' la sogs pa'i rang gi sngags dang phyag rgyas byin gyis brlab po//de nas go cha dang mtshon cha la sogs pa brtag par bya zhing rdzogs pa'i sangs rgyas lnga po rin po che'i dbu rgyan du gyur pa'i cod pan dang / phreng ba rnams kyis dbang bskur la/ gsang ba'i mchod pa rnams kyis mchod de/ de'i 'og tu sgyu ma ste rang gi lha'i gzugs kyi mtshan nyid can sangs rgyas kyis sprul pa mdzad pa de rnams kyis sems can thams cad 'dul zhing /pad+ma la gnas pa rdo rje 'bar ba'i 'phro ba'i bdag nyid can gyi lus dang ldan pa spros nas/ yang dag par bsdus te rang gi gdan la gnas par bya ste rang gi lha'i nga rgyal bya'o//'dir yang rdo rje sems dpa' la sogs pa'i sbyor bas rnal 'byor gsum char yang ston pa ni sgrub pa'i thabs gzhan dag nye bar mtshon pa'i don du 'di dag bstan pa yin te gzhan du na de rnams kyi mos pa'i dbang gis nye bar dgod pa don med par thal bar 'gyur ro//dbang bskur ba byas pas ni sgeg mo la sogs pa yang dag par mchod la stong pa nyid du byas te/ rdo rje glu la sogs pa rnams kyis bdag nyid kyi lus bskyed do/ /la la ni yongs su brtags pa dang gzhan gyi dbang la sogs pa'i de kho na nyid kyi dbye ba dang rang gi lha nyid kyi sbyor ba nyid kyis sems can gyi bsam pa'i nga rgyal gyi dbye bas byang chub gsum 'dir gsungs pa yin la/de ni dang po phye ste spros pa yin la gzhan dag ni ma bshad do/ /bsgom pas skyo bar gyur na myur ches pa dang bul ba la sogs pa dang bral ba'i gsang sngags bzlas brjod bya'o//bzlas pas skyo na g.yas pas rdo rje gsor la g.yon pa dkur brten pa'i dril bu gsil zhing rdo rje'i glu blangs la mchod pa byas te/ snga ma bzhin du gshegs su gsol la bdag nyid bsrungs te/ sku dang gsung dang thugs bsgom pa ci bde ba la gnas par bya'o/ /bsgom pa dang bzlas pa bar chad du gyur pas kyang yi ge brgya ba brjod pa nye bar bsdu bar bya'o/ /le'u bdun pa'i bshad pa'o// //las kyi tshogs bstan par bya ba'i phyir/ de nas bcom ldan 'das zhes bya ba la sogs pa gsungs te/lha ni gang yang rung ba zhes bya ba la sogs pa gsungs te/ 'di skad ston par 'gyur te/ dkyil 'khor gyi dbus su gang gzhag par gyur pa'i dkyil 'khor te de'i ming 'byung ba zhes bya bar 'gyur ro/ /bdag po nyid kyis zhes bya ba ni rnam par snang mdzad la sogs pa'i rnal 'byor gyis zhi ba la sogs pa'i las rnams bya ba'o//'khor lo'i rgyal mo rnams bsgoms nas/ /zhes bya ba ni spyan la sogs pa'i rgyal mo bsgoms pas te zhi ba'i las ni skul byed ma dang spyan gnyis kyis so/ /rgyas pa la ni rin chen sgrol ma dang gos dkar mo gnyis kyis so//dbang la ni sgrol ma dang / rdo rje lu gu rgyud gnyis kyis so/ /yams la sogs pa rnam par gzhig pa la ni 'od zer can dang ri khrod kyi lo ma can gyis so/ /mngon spyod la ni mA ma kI dang khro gnyer can gyis so/ /rol pa ste zhes bya ba ni don dam pa la rol pa'i ngang tshul dang ldan pas so//chags pa'i rdo rjes rjes chags pa/ /zhes bya ba ni snyoms par 'jug pa la rjes su chags pa'o/ /gsang sngags de nyid kyis bskul na/ /zhes bya ba ni sbyor bas so/ /dang po ting 'dzin gyis sprul nas/ zhes bya ba ni snga ma bzhin du sprul par bsams te rnam par snang mdzad kyi sbyor bas bskul ba dang bcas pa de'i sngags brjod la spyan nam skul byed ma phyung ste/byang chub kyi sems kyi bdud rtsis gang ba'i zla ba ltar dkar ba'i bum pa lag pa gnyis kyis 'dzin cing bgrang phreng dang ril ba spyi blugs bsnams la/dbang po zhi zhing zla ba ltar dkar ba spros la nad la sogs pas gdungs pa'i 'jig rten la ldugs par bsam mo zhes bya ba'i bar du'o/ /dang po ting nge 'dzin gyis sprul nas/ /zhes bya ba ni snga ma dang 'dra'o/ /lus la sogs pa rgyas par bya ba la ni rin chen tog gi ting nge 'dzin dang ldan pas rin chen sgrol ma dang gos dkar mo gser gyi mdog can la bdud rtsi la sogs pas yongs su gang ba'i gser gyi bum pa phyag gnyis kyis 'dzin cing pad+ma dang rin po che bsnams pa bdud rtsi'am rin po che'i char 'bebs pas bsgrub par bya ba'am/de'i khyim 'gengs par de bzhin du bsgom mo/ /bkug ste mda' yis bsnun na ni/ /zhes bya ba 'di skad ston par 'gyur te/ 'od dpag med kyi rnal 'byor pas sgrol ma'am lu gu rgyud mdog dmar zhing 'od zer dmar po dang ldan pa zhags pa dang lcags kyu 'dzin la/g.yon gyis gzhu bzung nas g.yas kyis rtse dmar ba'i mda' 'dren pas bsgrub par bya ba'i snying ga'i lte ba la bsnun par snga ma bzhin du bsams na nges par mngag gzhug nyid du 'gyur ro/ /don yod rdo rje'i rnal 'byor pas ni 'od zer can nam/ri khrod kyi lo ma can mdog ljang gu byang chub kyi sems kyi chus gang ba'i bum pa phyag na thogs nas yul 'khor du snga ma bzhin du ldugs par bsams na bdud la sogs pa'i nye bar 'tshe ba sel bar 'gyur bas na yams dang gnod pa zhi bar 'gyur ro zhes gsungs so//margad lta bu'i mdog can la/ /zhes bya ba ni ba rgad kyi 'od kyi mdog can no/ /hUM zhes bya ba'i sgra sgrogs pa/ /zhes bya ba ni khro gnyer can nam mA ma kIs hUM gi nga ro'i sgra sgrogs pa'o/ /rdo rje bsdigs par brtson pa yis/ /zhes bya ba ni snying gar khro bo'i sdigs mdzub kyis bsgrub bya la bsdigs par brtson pa'o//khros nas ni zhes bya ba ni khro bo'i lta bas rdo rje me'i char 'bebs par mi bskyod pa'i rnal 'byor dang ldan pas snga ma bzhin du bsam par bya zhing bsgrub par bya ba 'jigs par 'gyur ba la sbyar bar bya'o/ / sbyor ba zhes bya ba ni phyag rgya la sogs pa'i sbyor bas so/ /rdo rje sems ma la sogs pa bzhis rang gi rigs dang ldan pa rnams byin gyis brlab cing spyan drangs la dam tshig la bzhag nas/ dbang bskur bar bya'o/ /skal ba bzang po pa rnams kyang zhi ba dang rgyas pa la sogs pa'i las la sbyar na des rang gi las zhi ba dang rgyas pa la sogs pa'i 'bras bu don yod par sbyin par byed par 'gyur ro//khro bo'i rgyal por sbyar bar bya/ /zhes bya ba ni gshin rje gshed la sogs pa'i rnal 'byor pas las de nyid la sbyar bar bya'o/ /ji ltar zhe na/ /dam tshig ces bya ba la sogs pa gsungs te rang gi lha'i nga rgyal gyis bskul ba sngon du 'gro ba dang /gsang sngags brjod la dam tshig spyan drang ba dang bskrad pa dang / bsrung ba dang mngon spyod la sogs pa bya'o/ /mngon spyod nyid bstan par bya ba'i phyir/ rkang rjes sa'i zhes bya ba la sogs pa gsungs te/dgra bo'i tsha ba bskyed par bya ba'i phyir ji skad du bstan pa bzhin de'i gzugs brnyan byas la/ rnam par shes pa dgug pa la sogs pa sngon du 'gro bas dug dang ske tshe la sogs pas bkang nas shin tu sdug bsngal bar gyur pa la/ po son cha'i tsher mas khro bo'i sngags bzlas pas dbug go /gsad pa la ni mi rus kyi phur bus dpral ba la sogs pa gnas lngar gdab bo/ /de yang 'di ltar phur bus btab nas bskam par bya ste/ de bzhin du des kyang ma nus na dum bur gtubs nas sbyin sreg bya'o/ /rus sbal gyi rkang pas ni sngar bshad pa'o//cho ga bzhin du dgug par bya/ /zhes bya ba ni yi ge hUM gis srung ba drangs la dpal dang bral bar bya'o/ /bsgrub bya bsams nas zhes bya ba ni rdo rje khro bo la las zhags pas bcings nas lho phyogs su khrid par gyur pa dang / la las rdo rjes brdegs bzhin pa dang / la las ral gris gtubs bar gyur pa dang / hUM badzra rAk+Sha/ zhes bya ba la sogs pa'i bskul tshig sngon du 'gro bas rdo rje srin pos bsgrub par bya ba zos par bsgoms shing / bya rog dang khyi la sogs pas kun nas bskor nas za zhing 'thog par bsams mo/ /ming nas bskul bar bya zhes bya ba ni de'i ming nas bskul bas so//bskrad pa'i yang nang gi sbyor ba bstan par bya ba'i phyir/ /rlung gi dkyil 'khor zhes bya ba la sogs pa gsungs te rlung gi dkyil 'khor la zhon pa hUM dang spel ba'i u las byung ba'i rdo rje rnga mo bsams te/ de'i rgyab tu bsgrub par bya ba zhon par yongs su brtags la rdo rje khro bos gzir bar gyur bzhin du lho phyogs su khrid par gyur par bsam mo//de nyid la phyi'i cho ga bstan par bya ba'i phyir de'i rkang rjes zhes bya ba la sogs pa gsungs so/ /de ni 'di skad ston pa yin te rlung gis btsugs pa'i shing lo la khro bo'i sngags dang spel ba'i ming bris la de dang /de'i rkang rjes kyis dang bsres la ming nas smos pa sngon du 'gro bas bkug la rdo rje sna yon gyi rkang pa'i drung du sba'o/ /de'i ming gsang sngags dang spel te zhes bya ba ni 'ug pa'i sgro la bsgrub par bya ba'i ming khro bo'i sngags dang spel te bris la dge sbyong dang bram ze'i skra yis de dkris la sa'i 'og tu brkos nas gzhug ste de gnyis khro bo gnyis kyis 'thab mo 'gyed par bsam par bya ste/des ni phan tshun 'bye bar 'gyur ro/ /bsgrub par bya ba'i lus bskam par bya ba'i phyir hUM zhes bya ba la sogs pa gsungs te khro bo'i rnal 'byor dang ldan pas rang gi sna'i rtse mo la gnas pa'i hUM las byung ba'i rdo rje phra mo spros la bsgrub par bya ba bkang ste de'i yan lag gi tshigs thams cad du sna tshogs rdo rje rab tu 'bar ba bsams la/de 'bar bas lus bskams nas oM badzra DA ki ni/zhes bya ba la sogs pa'i sngags bskul ba'i tshig sngon du 'gro bas/ rdo rje mkha' 'gro rnams kyis khrag kun nas gzhibs par gyur par bsam mo/ /rlung bcing bar bya ba'i phyir mkhas pas rlung gi zhes bya ba gsungs te/ rlung gi phyogs su dri nag pos dkyil 'khor gru bzhi byas par thig le bdun re re zhing yi ge yas bskor bar byas la de'i steng du kham phor gyis dgab la de yang ri rab rtse mo brgyad par bsams nas/dbus su laM gyis mtshan pa'i dbang chen gyi dkyil 'khor rdo rje chen pos mnan pa'i nang du rlung rnams nges par chud par bsams la gsang sngags brjod de 'di bya'o//char dbab pa'i phyir pad+ma 'dab brgyad ces bya ba la sogs pa gsungs te/ pad+ma 'dab ma brgyad pa bris te de'i 'dab ma brgyad la mtha' yas dang rigs ldan dang / nor rgyas dang / dung skyong dang / 'jog po dang / pad+ma chen po dang / karko Ta dang / pad+ma zhes bya ba gnyis gnyis shing nag po dang / dmar po dang / ser po dang / dkar po'i mdog can/ oM sha la sa ha kha zhes bya ba dang / rkang pa nas brtsams te spyi bo'i bar du klu brgyad byin gyis brlab cing pad+ma'i lte ba la mjug ma rnams gnas par byas la rang gi gnas nas bkug ste mchod nas khro ba'i gzugs 'bar ba'i phreng ba can du bdag nyid dbus su gnas la hUM nAM hUM zhes brjod cing rting pa'i mthil gyis gzir bar gyur par bsams shing /klu rnams kyang char 'bebs pa la brtson par bsam mo//char bcad ba'i phyir nyi ma'i mdog ltar zhes bya ba la sogs pa gsungs te/ bdag nyid nyi ma dmar po'i mdog dang 'dra ba'i 'od can gyi khro bo'i gzugs su bsams la/ rang gi kha nam mkha'i tshad tsam la yi ge hUM gis 'bar bar gyur pa'i lce dang ldan pa gdangs te chus yongs su gang ba'i sprin bldags la dbugs kyis rngubs la dbugs phyung bas shing bal bzhin du gtor bar bya'o//yang na rang gi phyag rgya'i tshogs kha nam mkha'i tshad tsam la lce 'bar ba gdangs la chus yongs su gang ba'i sprin bldags te dbugs kyis drangs la dbugs phyung bas shing bal bzhin du gtor bar bya'o//gal te yang rang gi phyag rgya'i tshogs kyi 'bar ba btang bas/ sprin bcad cing gtubs la hUM zhes bya bas bsdigs pa la brtson par bya'o/ /bgegs thams cad rnam par gzhig pa'i phyir me'i dkyil 'khor zhes bya ba la sogs pa gsungs te/rnam par snang mdzad kyi sbyor ba dang ldan pas rang gi dpral ba las byung ba'i 'phags pa mi g.yo ba me'i dkyil 'khor la gnas pa phyag drug pa bsams te/ de nyid khro bo grangs med pa dang bcas pas bgegs thams cad hUM gi sgra dang rab tu 'bar ba'i ral gri la sogs pa 'bebs pas bgegs rnams gzhig par bya'o//mi'i bgegs gzhom par bya ba'i phyir rkang rjes sa dang zhes bya ba la sogs pa gsungs te/ mi'i rkang rjes kyi sa dang mi'i khrag gis bsgrub par bya ba'i gzugs brnyan byas la mi rus kyi phur bu dag la 'od zer can gyi sngags nyi shu bzlas la gnyis kyis mig gnyis su phur bu btab la tshogs kyi bdag po'i khar bcug ste/oM su m+b+ha badzra mu sa la/ zhes brjod pa sngon du 'gro bas rdo rje gtun shing gis rgyab nas brdung par bsam par bya'o/ /me mched pa bzlog par bya ba'i phyir stang zil kha dog ces bya ba la sogs pa gsungs te/rang gi yi shes hU~M dang spel ba las byung ba'i nam mkha' lding mdog nag po lus la klu stong gis khyab par bsams la/ oM badzra nA ra yA na zhes bya ba la sogs pa dang / bskul ba sngon du 'gro ba des brgya byin bskul la 'di la yang sprin gyi tshogs las char dbab pa'i phyir bka' bsgo bar bya'o//bka' thos nas chu'i char 'bebs pa'i sprin rnams kyis me gsod pa la brtson par bsams la nam mkha' lding gis kyang gshog pa'i chu dang / mchus brkos pas chu klung gi mtshams byed par bsam mo//rdo rje thog thog bzlog par bya ba'i phyir zhal ras gsum pa zhes bya ba la sogs pa gsungs te/ dpal rdo rje sems dpa' zhal ras gsum pa zla ba'i mdog can phyag bzhi pa 'od dmar po sna tshogs 'bar ba'i 'od dang ldan pa bsnyems ma la sogs lha mo bzhis yongs su bskor ba bdag nyid rnam par bsams la g.yas pas rdo rje bstod de 'jog pa/lag pa g.yon pas rdo rje dril bu bsnams pa'i rdo rje sems dpa' la sogs pa phyung la spros te/ nam mkha'i khams su sprin bzhin du khyab par bsams nas bsgrub par bya ba'am/oM ma hA su kha badzra/ zhes bya ba la sogs pas rnam pa thams cad kyis brgyan pa'i rdo rje can du byin gyis brlabs la sangs rgyas rin po ches dbang bskur nas cod pan dang phreng ba'i dbang bskur bar bya'o/ /da ni rnam par snang mdzad chen po 'gro ba thams cad la gzigs nas smin ma mdzes par bskyod cing /'dzum pa la sogs pa dang ldan par mdzad pa dang phyag na rdo rjes gzigs pa la sogs pa'i rgyu zhus shing / bcom ldan 'das kyis kyang bka' stsal pa bstan par bya ba'i phyir/ bsgom pa'i lam las zhes bya ba la sogs pa gsungs te sems can gyi dngos po gang yin pa'i dngos po rnams ni dngos po med la skye ba dang 'gag pa mtha' gnyis dang bral ba yin zhing de med pas dbu ma yang med do//de bas na nam mkha' dang 'dra ba yin na byang chub ji ltar mngon sum du bya ba'i thabs de bstan par bya ba'i phyir phung po zhes bya ba la sogs pa gsungs te/thabs dang shes rab kyi bdag nyid can gyi lha'i phung po dang gcig tu gyur par bsgoms pas sgom pa ni bsgom pa goms par byed pa'o/ /byang chub sems ni grogs 'gyur pas/ /zhes bya ba ni byang chub kyi sems sgom pa sngon du 'gro bas so//sprul pa dang ni bsdu ba yis/ /zhes bya ba ni de bzhin gshegs pa thams cad mchod par bya ba'i phyir sprul pa spro ba dang bsdu ba dag byed pa ste/ de yang sems tsam yin pas de nyid kyi lha rnams kyi sku dang gsung dang byang chub kyi mtshan nyid can gyi sems 'thob par 'gyur la de yang sgyu ma dang 'dra ste byang chub kyang de dang 'dra'o//sgyu ma lta bu las ji ltar na 'bras bu 'byung bar 'gyur zhe na dper na zhes bya ba la sogs pa gsungs so/ /lhag ma dang bcas pa'i byang chub ni nyan thos la sogs pa ste phung po la sogs pa med pa'i phyir ro//lhag ma med pa yang sgrib pa'i bag chags dang bral bas bla na med pa'i byang chub bo/ /'di nyid bskyed par bya ba'i phyir kun rdzob tu de kho na nyid rnam pa bcu gsungs so/ /ji skad du bshad pa'i cho ga byas kyang ma grub na lha rnams tshar gcad par bya ba'i don du ji lta ba bzhin du phur bus gdab par bya ba'i phyir/der lcags kyus zhes bya ba la sogs pa gsungs te/ rdo rje lcags kyus bkug nas rdo rje zhags pas bcings la/ rdo rje nag mos sdigs mdzub byas la rdo rje khu tshur gyis phur bu bzung ste/rdo rje tho bas phur bu'i sngags gdon bzhin du gnas lngar phur bus gdab par bya'o/ le'u brgyad pa'i bshad pa'o// //dbab pa la sogs pa'i las bstan par bya ba'i phyir de nas bcom ldan 'das zhes bya ba la sogs pa gsungs te/rnam par snang mdzad la sogs pa'i rnal 'byor pas dbab pa'i snod skul byed ma la sogs pa'i gzugs su rnam par bsams la/ gnas ji lta bar gyur pa'i yi ge gsum gyis byin gyis brlabs la/ rang gi sa bon las byung ba'i rlung dang me'i dkyil 'khor la gnas pa rang gi rdo rje 'bar bar 'gyur bas 'bar bzhin par bltas la/rdo rje bsdams pa dang bcas pa'i dril bu bskyod cing gzengs bstod pa dang bcas par gsang sngags brjod na 'bar bar 'gyur ro zhes gsungs so/ /gnas par bya ba'i don du sbyor ba bstan par bya ba'i phyir dbang chen dkyil 'khor zhes bya ba la sogs pa gsungs so//de ni 'di skad ston par 'gyur te/ ras la sogs pa la dbang chen gyi dkyil 'khor phyogs dang mtshams rnams su oM gyis mtshan par gi wang gis bris la/ dbus su pad+ma 'dab ma brgyad pa AHsa mtshan pa bris te/lte ba la gnas pa'i yi ge hUM bzhi/ mtha' ma bsgrub par bya ba'i ming dang ldan pa bris la/ da nas der de'i rnam par shes pa bkug nas kham phor ser po kha sbyor gyi nang du bcug ste steng du rdo rje 'chang bas mnan la bskul tshig dang bcas par hUM brgya rtsa brgyad bzlas pa'i rdo rje'i skud pas dkris la gzhag par bya'o//dbang du bya ba'i phyir sngags la mkhas pa zhes bya ba la sogs pa gsungs te/ 'dod chags che dang ldan pa'i gzugs/ /zhes bya ba ni rdo rje'i 'dod chags te de'i gzugs can la de skad ces bya ste/rdo rje sems dpar gyur nas rdo rje chags par gyur pa'o/ /dpyid ces bya ba ni me tog dri zhim pa'i phreng ba la sogs pas brgyan pa'i phyir ro/ /'dod pa dang 'dra ba ni me tog gi mda' dang gzhu dang ldan pa'i phyir ro//sku gsum ldan pa mda' thogs shing / /zhes bya ba ni ltong dang dbus dang mde'u la oM la sogs pa gsum bkod pa'i mdas bsgrub par bya ba'i bud med kyi spyi bor chags pas mnan la mar sar bzhin du zags par gyur par bsams zhing /'dzag par bya ba'i phyir pad+ma'i nang du zhugs pa'am yang na 'dod chags can mi 'dzag par 'gyur ba ste/ 'dod pa zhu ba bzhin du'o/ /pad+ma ni pad+ma'i lte bar ro/ /de ltar na 'di'i 'dzag par 'gyur ba'o/ /bu mo zas sbyin ma dgug par bya ba'i phyir mi thod las byas zhes bya ba la sogs pa gsungs te/mi thod las byas cang te'u la/ /zhes bya ba ni mi thod las byas pa'o/ /g.yogs nas ni zhes bya ba ni kha spre'u'i pags pas g.yogs pa'o/ /bud med khrag gis mdzes par bya/ /zhes bya ba ni bud med kyi zla mtshan gyis ngos gnyi ga la yang pad+ma bris pas mdzes pa'o//bris te zhes pa ni bud med kyi khrag nyid kyis pad+ma'i lte ba gnyis su'o/ /mi yi skra yis btags nas ni/ /zhes bya ba ni dur khrod kyi skra blangs pas rus pa gnyis bcing zhes bya ba'i don to//dkyil 'khor bri zhes bya ba ni mtshan mo lam gyi bzhi mdor rkang pa g.yon pa'i mthe bos dkyil 'khor zur bzhi pa la mtshams rnams su rdo rje lcags kyu bri bar bya'o zhes bya ba'i bar du'o/ /brdung zhes bya ba'i bar du ni de la gnas nas rkang pa g.yon pa'i rting pas 'gugs shing ming brjod pa sngon du 'gro bas/khroM hUM zhes brjod cing thing ril gyi rkang pa'i rus pas sgra dbyung ba'i phyir brdungs na bu mo zas sbyin ma 'gugs par 'gyur ro/ /rnal 'byor pa 'khor lo rdzogs par gyur pas bltas pa dang / tshig tsam gyis kyang mngon par dad pa'i 'bras bu thams cad rdzogs par 'gyur ro zhes bstan par bya ba'i phyir gang yang rung ba zhes bya ba la sogs pa gsungs so//sbyin sreg gi las bstan par bya ba'i phyir sbyin sreg ces bya ba la sogs pa gsungs te/ dge ba yi ni las rnams byed//ces bya ba ni zhi ba dang rgyas pa dang dbang du bya ba ni g.yas su gtsubs pa las byung ba'i me las bya'o/ /mngon spyod la ni dur khrod las byung ba'i me las bya'o/ /thab khung zhes bya ba ni zlum po dang zur bzhi dang zla gam dang zur gsum pa'i thab khung gi dbus su gnas pa'i dkar po dang / ser po dang / dmar po dang / nag po'i pad+ma la gzhag pa'i gtsug tor dang / rin po che dang / pad+ma dang / 'bar ba'i rdo rje de nyid kyi mdog can bya'o zhes bya ba'i don to/ /las kun byed pas bzlas nas su/ /zhes bya ba ni hUM gis mngon par bzlas pa'o/ /lag g.yon rdo rje zhes bya ba ni lag pa g.yon pa rdo rje rtse gsum par byas pa'o//las kyi 'od zer rnams kyis brgyan/ /ces bya ba ni zhi ba la sogs pa'i las kyi mchog gi 'od zer rnams kyis mdzes par 'gyur pa'o/ /'bar ba'i rnam par bsgyur bar bya/ /zhes bya ba ni 'bar bas lha 'bar ba'i gzugs kyis de bzhin nyid kyi ye shes ngo bo nyid du 'gyur bar bya'o/ / oM zhes pa dang swA hA'i mtha'/ /zhes bya ba ni zhi ba dang rgyas pa dang dbang rnams la ni gsang sngags gzhan gyis mi thos par brjod par bya'o/ /mngon spyod la ni hUM dang phaT bcas shing khro bo'i tshig gis thog ma dang tha mar dgang blugs dbul bar bya'o/ /zhal bkang nas zhes gsungs pas lha rnams kyi zhal gyi pad+mar sbyin sreg dbul lo//bshang gci la sogs pas sbyin sreg byas pas sdig par 'gyur ro zhes som nyi skye bar mi bya ste/ gang gi phyir 'di dag thams cad rnam par rtog pa tsam yin gyi don dam par ngo bo nyid kyis dag pa yin pa'i phyir ro/ /de bas na dbang po gnyis kyi snyoms par 'jug pas kyang /lha'i nga rgyal sngon du 'gro bas thabs dang shes rab ro gcig pa mngon gsum du byas na zag pa med pa'i ye shes skyed pa yin no/ /sku la sogs pa'i dam tshig bstan par bya ba'i phyir/ las las byung ba zhes bya ba la sogs pa gsungs te/ las las byung ba rnams bstan pa'i//zhes bya ba ni dge ba dang mi dge ba'i las rnams kyis so/ /sha dang rkang la sogs pa rnams ni rnam par snang mdzad dang / mi bskyod pa la sogs pa'i ngo bo yin te de bas na bsten par bya'o/ /gang yang 'dod chags dang zhe sdang la sogs pa'i 'du byed rnams 'phel ba'i bshang gci la sogs pa 'dzag pa rnam pa lnga ni sa la sogs pa 'byung ba chen po bzhi'i ngo bo nyid do//bsgom pa'i blo gros rdzogs pa yis/ /zhes bya ba ni rtog pa dang bral bar gyur pa'o/ /le'u dgu ba'i bshad pa'o// //de nas bcom ldan 'das zhes bya ba la sogs pa gsungs pa ni sgrub pa chen po bsgrub pa la sogs pa bstan pa yin te/ting nge 'dzin thams cad thob cing 'khor lo la sogs pa'i dngos grub mchog la dmigs pa'i ting nge 'dzin gang yin pa de la de skad ces bya'o/ /rnam par snang mdzad ting 'dzin gnas/ /zhes bya ba ni spyan dang ldan pa'i rtog pa'i rnal 'byor dang ldan pas so//'khor lo bsgrub par bya zhes bya bas ni 'di skad ston par 'gyur te/ 'khor lo bsgrub par bya ba'i phyir ston du bsnyen pa byas la/ rang gi dkyil 'khor gyi dbus su rang gi mtshan nyid ji lta ba dang ldan pa'i 'khor lo gzhag ste/ 'od zer 'bar ba'i phreng bas 'khrigs pa rnam par snang mdzad la sogs pa sku gsum rdo rje can gyi gzugs 'bar ba'i phreng bas 'khrigs pa'i 'od dang ldan pa snyoms par 'jug pa las phyung la 'khor lo nang du zhugs par bsgoms te/ji srid du zhugs nas 'bar bar gyur pa de srid du bsgoms la/de rang gi spyan gyi rig sngags bzlas brjod byed bzhin du blang bar bya'o/ /de bzhin du ci rigs par mi bskyod pa la sogs pa'i sgom pas rdo rje la sogs pa bsgrub pa yang nyams su blang bar bya'o/ /'di nyid kyi sku gsum dbye ba'i rang gi ngo bo bstan par bya ba'i phyir rim pa bzhin du zhes bya ba la sogs pa gsungs so//las kyi phyag rgya ni lcags kyu la sogs pa'am sngar bshad pa'i mtshan ma thams cad kyang phyogs gcig bstan pa'i nye bar mtshon pas bdag po'i sbyor ba dang ldan pas 'khor lo dang 'dra ba lcags kyu la sogs pa grub par bya ba'i phyir 'dir sku la sogs pa nang du gzhug par bya'o zhes bstan par bya ba'i phyir ro//'dis zhes bya ba la sogs pa spyan la sogs pa'i gzugs su bstan par bya ba'i phyir sa ni zhes bya ba la sogs pa gsungs so/ /de bzhin gshegs pa thams cad mnyam pa nyid du gnas pa'i ting nge 'dzin gang yin pa de la de skad ces bya'o//gsang ba 'dus par dbang bskur ba ni de bzhin gshegs pa thams cad bum pa'i nang du zhugs nas bde ba chen por zhu bar gyur par rnam par bsams la de spyan la sogs pas thogs te/ 'khor lo chen po dbang bskur ba/ /zhes bya ba la sogs pa'i tshigs su bcad pa dang / gsang sngags kyi bdag nyid la slob dpon gyis dbang bskur ba'i phyir ro//rdo rje 'chang thams cad kyi dam tshig ste rgyu de nyid la dmigs pa'i ting nge 'dzin gang yin pa de la'ang de skad ces bya'o/ /de nyid 'phags pa ste de bzhin gshegs pa thams cad kyi ye shes kyi bdag po rdo rje 'chang chen por gyur pas so/ /gang du yang mi gnas so zhes bya ba ni de rnams bskyed pa nyid du med pas so//stang stabs ni g.yas brkyang ba la sogs pa'o/ /'dug stangs ni rdo rje'i skyil mo krung la sogs pa'o/ /las la sbyor ba ni srung ba dang spyan drang ba la sogs pa'o/ /slar bsdu ba ni mchod pa dang bstod pa bya ba la sogs pa sngon du 'gro bas gshegs su gsol ba'o//gsang ba dang gsang chen nyid ye shes yin la de nyid ni rnam pa gsum ste/ bla na med pa'i 'bras bu bskyed pas na snying po ste de nyid bstan par bya ba'i phyir/ rnal 'byor ces bya ba la sogs pa gsungs te rnal 'byor ni byin gyis brlab pa la sogs pa'i bdag nyid can rnam pa gsum mo/ / de bas na gang gis sbyor ba de ni lhag pa'i rnal 'byor te spyan la sogs pa'i lha mo'i khyad par ro/ /de dag ni snyoms par 'jug pa'i bdag nyid can gyi rnal 'byor ni rnal 'byor chen po'o/ /yang na lhag pa'i rnal 'byor dang rnal 'byor chen po 'di'i nang du chud pa sngon du 'gro ba'i dkyil 'khor lha rnams kyi nga rgyal te 'di dag ni go rims bzhin du sems can rnams la bshad par bya'o//bshad pa 'di ni legs bris las/ /bdag gis dge ba gang bsags pa/ /des ni rab zhi bshes gnyen bcas/ /'jig rten rdo rje 'dzin par shog /rgyud kyi rgyal po sgyu 'phrul dra ba'i dka' 'grel slob dpon rab tu zhi ba'i bshes gnyen gyis mdzad pa rdzogs so/