CLOSE WINDOW

D2506
བོད་ཡིག

/ //rgya gar gyi mkhan po pra ta ka ra bar ma dang zhu chen gyi lo tsA ba rin chen bzang pos skad gsar chad kyis zhus te gtan la phab pa'o/ /[ ]@##/ /rgya gar skad du/ saM k+Ship+ta maN+Da la sru tra nA ma br-it+ti/ bod skad du/ dkyil 'khor gyi thig gdab pa'i mdor bsdus pa'i 'grel pa/ 'jam dpal gzhon nur gyur pa la phyag 'tshal lo/ /de la dang po kho nar bcom ldan 'das la phyag 'tshal ba sngon du 'gro bas bstan bcos rtsom pa la 'jug pa yin te/ gang gi phyir bstan bcos brtsam pa thams cad la yang dam pa rnams ni rang gi 'dod pa'i lha la phyag 'tshal ba dag dang po kho nar nges par byed do//de bas na dag cing zhes bya ba la sogs pa rnams smos pa yin te/ de la dag pa ni 'dod chags la sogs pa'i nyes pa rnams dang bral ba'i phyir ro/ / de nyid ni rang bzhin zhes bya ba ngo bo nyid kyi chos kyi dbyings kyi bdag nyid yin pas na rang bzhin dri ma med pa ni bag chags dang bcas pa'i nyon mongs pa'i dri ma dang bral ba'o/ /de nyid ni bde ba chen po zhes bya ste bde ba zhes bya ba ni thams cad stong pa'i mtshan nyid can rang bzhin gyis 'od gsal ba chos kyi dbyings mi 'gyur ba'i ngo bo nyid ces bya ba'i don to//chen po zhes bya ba'i sgra ni mchod par bya ba'i tshig ste 'jig rten pa dang 'jig rten las 'das pa'i mchod pa rnams kyis mchod par bya ba yin pa'i phyir ro/ /'dis sku gsum gyi sgo nas bstod nas phyag bya ba ste/ rang bzhin dri ma med pa zhes bya ba ni chos kyi sku'o/ /bde ba chen po zhes pa ni longs spyod rdzogs pa'i sku'o/ /dag cing zhes bya ba ni sprul pa'i sku'o/ /de lta bu'i bcom ldan 'das de la lus dang ngag dang yid kyis phyag 'tshal zhing btud nas rgyud rnams kun gyi ste de kho na nyid bsdus pa la sogs pa'i phyi'i zhes bya ba thun mong du gyur pa'i dkyil 'khor gyi thig gdab pa zhes bya ba de bzhin gshegs pa'i pho brang gsal bar byed pa bshad par bya zhing bstan par bya'o zhes bya ba'i don to//da ni gnas phun sum tshogs pa bstan pa'i phyir/ sa gzhi cha snyoms yid 'ong ba/ / zhes bya ba la sogs pa smos te/ sa yi cha ni gnas te shin tu yang / /snyoms shing phyogs bzhir snyoms pa'o/ /de nyid kyis na yid du 'ong ba ste nye 'khor shing dang chu la sogs pa dang ldan pas nyams dga' ba'o/ /gzhan yang / rgyar ni dkyil 'khor nyis 'gyur la/ /zhes bya ste dkyil 'khor gru bzhi la sogs par byed na dkyil 'khor gyi gnas rgyar khru brgyad la sogs par bya'o//gzhan yang / dri zhim chu yis legs btab cing / /zhes bya ba ni ga pur dang tsan+dan la sogs pa shin tu dri zhim pa'i chus byugs pa'o/ /sngags kyis dag byas zhes pa ni dkyil 'khor sgrub pa'i thabs kyi tshogs yongs su gzung ba la sogs pa'i sngags rnams sngon du bzlas pas dag cing bsang bar bya'o//rab mdzes par zhes bya ba ni legs pa'i khyad par dag dang ldan pa'o/ /de lta bu'i yon tan dang ldan pa'i gnas su ci zhig bya zhe na/ phyogs mdun mnyam par shes byas la//zhes bya ba la sogs pa smos te dbang po dang gshin rje dang chu bdag dang nor bdag gi phyogs te/ /phyogs bzhi dang me dang bden bral dang rlung dang dbang ldan gyi phyogs te mtshams rnam pa bzhir phyogs dang mtshams mnyam zhing mtshungs par shes par byas la thig gdab par bya'o//mtshan nyid ji lta bu dang ldan pa'i thig gis zhe na thig skud ces bya ba la sogs pa smos te/ gang gis thig gdab ce na thig gis so/ /de'i mtshan nyid ji lta bu zhe na dkyil 'khor nyis 'gyur la zhes bya ba smos te chur dkyil 'khor nyis 'gyur gyi tshad do/ de bzhin du/ shin tu gsar zhing gsher ba'i sa/ /zhes bya ba ste dkyil 'khor gzhan du yongs su longs ma spyad pas na shin tu gsar pa'o/ /las thams cad pa'i sngags kyis btab pa'i chus brlan pas na gsher pa'o/ /mkhas pa ni thig gdab pa'i cho ga shes pa ste des ji lta ba bzhin du ma nor bar dkyil 'khor gyi thig gdab par bya'o//des ni 'di skad du ston par 'gyur te/ gru bzhi pa la sogs pa'i dkyil 'khor la de'i nyis 'gyur te chur khru brgyad par bya ba'o/ /de bzhin du khru brgyad pa la sogs pa'i dkyil 'khor byed na khru bcu drug par bya zhing sboms su sgo'i nyi shu cha dang mnyam pa 'jam zhing mdud pa med pa la legs par bsgril ba'i srad bus thig gdab par bya'o zhes bya ba'i don to//da ni tshangs pa'i thig gnyis pa nas brtsams te thig gdab pa'i cho ga bstan pa'i phyir/ slob dpon shar blta zhes bya ba la sogs pa smos te sngar bshad pa'i gnas der/slob dpon bla ma shar du blta/ /zhes pa shar phyogs su mngon par phyogs par byas la slob ma ste/ sgrub pa'i grogs ni nub bltas te/ /zhes bya ba nub phyogs su mngon par phyogs pa ste gnyis ka yang mthun pa'i rkang stabs kyis gnas par byas la/srad bu rab tu brkyang la rdo rje khu tshur gyis bzung nas srad bu brkyang zhing bsrings la dbang ldan dang me'i mtshams gnyis kyi dbus na mtshan ma yod par slob ma'i khu tshur gyis bzung ba dang / slob dpon gyis bden bral dang rlung gi phyogs gnyis kyi dbus na mtshan ma yod par bzung nas/rdo rje khu tshur sar bzhag pas/ /zhes bya ba dkyil 'khor gyi sar bzhag nas tshangs pa'i thig dang po de rab tu gdab par bya'o/ /tshangs pa'i thig gnyis pa de'i dbang du byas nas/ thig de dkyil 'khor brgyad dag gis/ /zhes bya ba smos te sngar btab pa'i tshangs pa'i thig de dkyil 'khor brgya dag gis zhes bya ba dkyil 'khor ji tsam bya bar mngon par 'dod pa'i tshad kyi'o//yang na/ cha bzhi mnyam par bgo byas la/ /zhes bya ba ni snga ma de dum bu mnyam po bzhir bgo bar bya'o/ /de ltar bgos nas cha bzhi gsal bar bgos pa de dag gi mtha' gnyis dag ni zhes bya ba shar dang nub kyi cha gnyis po dag ni dor nas su zhes bya ba mi dgos pas bor nas su/dbus ma gnyis kyi tshad du bya/ /zhes bya ba mtsho ste gang lte ba dang 'byar ba'i dbus ma gnyis po de'i tshad du byas la tshad de dang mnyam pa'i shing 'jam zhing drang ba byas la tshangs pa'i thig gnyis pa'i mtshams 'og nas bshad pa'i rim pas bya'o//dbus su mnyam pa zhes bya ba la sogs pa la ji snyed pa'i shing yon po ma yin pa las tshur dkyil 'khor gyi phyed kyi tshad la/ zhed du cha chung dang mnyam par legs par bzhogs shing byas nas sngar bshad pa'i dbus ma'i cha gnyis su mi 'gyur bar bzhag la nub nas shar phyogs su bltas te/shing de lag pa g.yon pas mi 'gyur bar bzung la lag pa g.yas pas snga ma bzhin du bzung nas lag pa g.yon pa mi 'gul bar byas te/ rnam thos sras kyi phyogs su lag pa g.yas kyis gzung ba'i shing gi rtse mo drud pas sa la ri mo bya'o//de bzhin du mi 'gul bar gzung ste lho phyogs te gshin rje'i phyogs su sa ris bya'o/ /de ltar byas nas langs la de bzhin du yang nub tu bltas te snga ma bzhin du shing dbus su bzhag la lag pa g.yon pas dam du bzung ste lag pa g.yas pas bzung ba'i shing gi rtse mos dang por lho phyogs dang byang phyogs nas snga ma bzhin du sa ris bya zhing dbus su gnyis phrad par drud la sa ris gnyis bya'o//de ltar byas pas cing 'gyur zhe na des na lho phyogs dang byang phyogs su bya rog rjes gnyis su 'gyur ro/ / bya rog rjes gnyis mtshams su ni/ /zhes bya ba ni byang phyogs dang lho phyogs su bya rog rjes gnyis byas pa'i mtshams te sa ris gnyis drud pa'i gnas su/ tshangs thig gnyis pa gdab bya zhing / /zhes bya ba byang nas lhor brkyang ba'i tshangs pa'i thig gnyis pa snga ma bzhin du gdab par bya'o//de ltar tshangs pa'i thig gnyis pa btab nas zur bzhir cha snyoms pa'i cho ga bstan par bya ba'i phyir/ tshangs phyed kyi zhes bya ba smos te/ tshangs thig phyed kyi tshad kyis ni/ /zhes bya ba dkyil 'khor gyi phyed kyi tshad kyi shing bus tshangs pa'i thig gi mtshams su gzhal zhing bzhag nas bya rog gi rjes bzhi byas nas zur bzhi zhes bya ba dang po'i phyogs la sogs pas phyogs bzhi'i cha'i tshad gzhal bar bya zhing mnyam par bya'o//de'i 'og zur bzhi zhes bya ba la sogs pa la de ltar byas nas de'i 'og tu yang zur bzhi ste/ phyogs bzhi char gyi thig gdab po/ /zhes bya ba bya rog rjes bzhi'i mtshams su thig gdab par bya'o//de'i rim pa gang gis she na byang dang lho zhes bya ba la sogs pa smos te/ dang por slob dpon me'i phyogs su gnas la byang phyogs su bltas te dbang po ste shar phyogs su thig gdab par bya'o/ /de nas rlung gi phyogs su gnas la lho phyogs su bltas te chu bdag dang zhes pa ste nub tu thig gdab par bya'o//de nyid du gnas la shar phyogs su bltas te nor bdag ces bya ba byang phyogs su thig gdab par bya'o/ /de nas yang me'i phyogs su gnas la nub tu bltas te gshin rje'i phyogs su ni zhes bya ba lho phyogs su thig gdab par bya'o//de ltar ngos bzhi'i thig bzhi btab nas yang ngos re re zhing gzhal bar byas la/ gzhal nas gal te shin tu mnyam par gyur cing cha snyoms par gyur na de'i 'og tu mtshams kyi thig gnyis gdab par bya'o/ /de yang ji ltar gdab ce na/ byin za zhes bya ba la sogs pa smos te/dang por slob dpon byin za ste me'i phyogs su gnas la mtshams kyi thig gdab par byas la/ de'i 'og tu srin po ste bden bral gyi phyogs su gnas la mtshams kyi thig gnyis pa gdab par bya'o/ /thams cad du yang srad bu 'dzin pa ni slob dpon la blta bar byas la slob dpon dang srad bu 'dzin pa gnyis ka yang g.yas nas bskor bar bya'o//de ltar byas pas ni zur bzhi pa dang thig bzhi pa'i dkyil 'khor du 'gyur te 'dis ni tshad ci tsam du 'dod pa'i dkyil 'khor gyi gnas grub par bshad pa yin no/ /da ni ngos kyi cha chen po rnam par dbye ba bstan pa'i phyir de 'og ces byas ba la sogs pa smos te de ltar byas pa de'i 'og tu ste rjes thogs la'o//sngags pa zhes bya ba la/ rdo rje slob dpon blo ldan pas/ /zhes bya ba shes rab phun sum tshogs pas/ ngos bzhi'i cha ni dbye bya ste/ /zhes bya ba ngos bzhi pa'i cha so sor dbye bar bya'o//re re yang zhes bya ba la sogs pa la re re 'am so sor ngos kyi thig gdab pa la cha chen bcu drug tu zhes bya ba ste/ /yang cha chen po bcu drug bcu drug tu rnam par phye la mtshan ma gdab par bya'o/ /de nas rab mnyam zhes bya ba ni shin tu legs par bcal te mnyam par byas pa'i phyir ro//yid 'ong la ni mdzes shing gsal ba'o/ /so so'i cha ni dbye bar bya//zhes bya ba ni cha chen po re re zhing cha chung ngu bzhi bzhir dbye bar bya'o/ /de ji ltar dbye zhe na dang po dang ni zhes bya ba la sogs pa smos te tshangs pa'i thig dbus ma'i rgyab kyi cha chen po nas bgrangs te phyogs kun du bya'o//de yang dang po ste gcig nas brtsams te gnyis pa dang gsum pa dang bzhi pa bkol la/ de bzhin du lnga pa dang drug pa dang bdun pa dang brgyad pa ste ngos kyi zur na gnas pa'i cha chen po'i bar du bzhi bzhi ste cha chung ngu bzhi bzhir legs par bgo bar bya zhing dbye bar bya'o//de ltar tshangs pa'i thig gi ngos gcig bgos nas tshangs pa'i thig gi ngos gnyis pa yang de dang tshul mthun pa'i phyir/ brgyad pa gzhan yang de bzhin bgo/ /zhes bya ba smos te/ tshangs pa'i thig gi ngos gnyis pa'i brgyad po yang gong ma dang tshul mthun par dbye'o zhes bya ba'i don to//de ltar phyogs bzhir mnyam zhing mtshungs par rnam par bsgo bar byas nas de'i 'og ste phyis legs par thig gdab par bya'o/ /de ltar thig btab pas re'u mig tu 'gyur zhe na de bstan pa'i phyir/ 'di la phreng re'am re'u mig ni/ /zhes bya ba la sogs pa smos te 'di la zhes bya ba ni mngon sum du gyur pa'o//phreng re'am re'u mig ni/ lnga bcu rtsa brgyad dag tu 'gyur/ /zhes bya ba thig gdab pa phreng re zhing lnga bcu rtsa brgyad dag tu 'gyur te/ spyir ni re'u mig lnga stong bzhi brgya yod par shes par bya'o/ /tshon sna lnga'i ri mo'i gnas kyi thig gdab pa bstan pa'i phyir tshangs pa'i thig gi zhes bya ba la sogs pa smos te/dang po tshangs pa'i thig nas brtsams te ngos gnyis la ste/ phan tshun gyi logs kyi cha chung ngu bgrangs pa'i gsum pa dang de bzhin du lnga pa dang / de bzhin du bcu bzhi pa dang / de bzhin du bcu bdun pa dang / de bzhin nyi shu pa dang /cha lnga lngar phyogs bzhir ri mo lnga'i don du cha lngar phye ste thig gdab par bya'o/ /thig gdab pa des cir 'gyur zhe na sgo khyud ces bya ba la sogs pa smos te gsum pa ni sgo khyud du 'gyur/ de bzhin lnga pas logs su 'gyur ro/ /bcu bzhi pa ni ngos su 'gyur ro/ /bcu bdun pa ni 'gram du 'gyur ro//nyi shu pa ni ya phubs bzang po ste sgo'i steng gi char 'gyur ro/ /thig gi rim pa sngar bstan pa 'di ni de kho na nyid kyi bsdus pa la sogs pa rgyud kyi rgyal po ma lus pa thams cad la yang thun mong du gyur pa yin te/ de lta bu'i thig gdab pa mdor bsdus shing nyung ngur byas shing bstan cing bshad pa yin no zhes bya ba'i don to//de ltar btab zin nas ci bya zhe na/ de'i 'og tu ji lta ba bzhin du dbye dgos pa ste de'i thabs bstan pa'i phyir/ blo ldan blo nas brtsams nas dbyi/ /zhes bya ba la sogs pa smos te blo ldan ni shes rab che ba'i slob dpon te des dang po sgo nas brtsis te dbye zhing mi mngon par bya'o//ji ltar dbye zhe na/ shin tu mnyam zhing gsal bar dbye/ /zhes bya ba smos te sgo la sogs pa lha thams cad kyi gnas rnams mnyam zhing gsal bar dbye bar bya'o/ /shin tu mnyam zhing zhes bya ba rang rang gi tshad dang mnyam pa dang /de bzhin gsal ba ste bye brag phyed cing mngon par dbye'o/ /sgo'i tshad ci tsam du zhe na/ sgo ni 'khor lo'i brgyad char ro/ /zhes bya ba smos te 'khor lo'i zhes bya ba ni 'dir ngos kyi ri mo lnga'i thig gi nang gi cha chen po brgyad kyi tshad kun nas mnyam par gnas pa la bya ste/ de'i dbus su tshangs pa'i thig gis brgyan pa brgyad char gnas pa las de cha chen po gcig gi tshad du sgo dbye bar bya'o//ya phubs bcas par zhes bya ba ni steng gi ya phubs dang ngos kyi 'gram dang bcas par dbus su mnyam zhing gsal bar dbye'o/ /sgo khyud ces bya ba la sogs pa la/ sgo khyud ni khyams su bya ba ste de yang zheng du ste rgyar cha bcu gnyis kyi tshad dang mnyam par dbye zhing /de'i chur ni/ ji srid sgo khyud gnyis kyi bar/ /khyams kyi char ni rnam par brkyang / /zhes bya ba smos te sgo gnyis pa'i sgo khyud kyi bar mthar thug gi bar du phyogs bzhi kun nas legs par bskor ba'i khyams su bya ste rnam par brkyang zhes bya ba'i don to//sgo khyud kyi phyi rol nas brtsams te khyams kyis brgyan par bya'o/ /'gram zhes bya ba la sogs pa la/ rin po che'i pha gu ni nor bu phreng ba ste de yang sgo 'gram gyi rgyab zheng du cha chung gcig yod par 'gram gyi cha nyid dang 'brel bar bri bar bya'o//dra ba dang dra ba phyed pa'i gnas bstan pa ni logs kyi phyi rol zhes bya ba ni sgo logs kyi phyi rol zheng du cha chung gnyis su bya'o/ /ka ba bya ba'i don du logs las rgyab kyi zhes bya ba la sogs pa smos te/ logs kyi rgyab kyi cha gzhan pa ste gnyis pa snga ma las cha gcig gis bstod pa ste cha chung lngar gnas shing khyams kyi rgyab la 'og lto brtan cing gnas la/rta babs kyi ni nang du bya/ /zhes bya ba ste rta babs kyi nang gi thig la ka ba'i mgo sbyar bar bya'o zhes bya ba'i don to/ /rta babs kyi gnas bstan pa'i phyir//rta babs ya phubs dag las ni/ /zhes bya ba la sogs pa smos te/ rta babs kyi ya phubs te sgo'i steng gi cha las cha gcig dor ba zhes bya ba de'i phyi rol gyi cha chung gcig dor zhing bzhag la/ zhing du cha chen po gcig yod pa chur ni cha chen po bzhi'i tshad yod par bya'o//skas la sogs pa ji bzhin 'gyur/ /zhes bya ba ni skas la sogs pa'i ming can gyi dbyibs kyi khyad par gang dag yod pa de dag tu 'gyur bar bya'o/ /de yang ji ltar mdzes pa dang yid du 'ong ba bzhin bya ba ste/ skas lta bu dang / glang po'i rgyab ces pa dang / gam+b+hi ra zhes bya ba dang /b+ha la bi zhes bya ba dang / b+hang+ka zhes bya ba dang / sri kar+k+ra dang / ma ka ra dang / byi ti dang / dan ti dang / phreng ba can dang / gdugs can dang / phreng ba can rig pa 'dzin pa dang bcas pa dang ngang pa la sogs pa'i bya rnams kyis mtshan pa ste/ de dag la sogs pa gang yang rung bas brgyan pa'i rta babs bya'o zhes bya ba'i don to//rta babs kyi steng du chos kyi 'khor lo bya ba'i phyir rta babs cha gcig ces pa la sogs pa smos te/ gdan gyi pad+ma ni rta babs kyi steng gi cha la brten nas chur cha chung gcig la zheng du chos kyi 'khor lo dang mnyam pa'i pad+ma la gnas par bya'o//chos kyi 'khor lo de yang tshad ni chu dang zheng du cha chung ngu gnyis gnyis yod pa rtsibs brgyad pa'am bcu gnyis par bya'o/ /chos kyi 'khor lo rtsibs bcu gnyis pa'am brgyad pa de'i tshad ni chu dang zheng du cha chung ngu yod par shes par bya'o/ /chos kyi 'khor lo'i steng du gdugs bya ste de yang tshad ni dpangs su cha chung ngu gcig gi tshad du byas la de las kyang cha chung phyed ni gdugs bya/phyed ni yu bar bya'o/ /ri dgas gnyis bya ba'i phyir 'khor lo'i ngos gnyis zhes bya ba la sogs pa smos te/ chos kyi 'khor lo'i ngos gnyis te g.yas logs dang g.yon logs thad ka ni drang thad du ri dwags gnyis te/kr-iSh+Na sa ri ka gnyis mnyam zhing cha 'dra bar gnas la ji ltar gnas she na/ rta babs la brten 'khor lor phyogs/ /zhes bya ste rta babs kyi steng gi cha la brten nas gnas la chos kyi 'khor lo la mngon par phyogs shing kha bltas nas 'dug par bri bar bya'o//ji tsam gyis gnas par bya zhe na/ shin tu 'jar min rgyang ring min/ /zhes bya ba ste chos kyi 'khor lo dang ri dgas gnyis kyi bar na cha chung gcig gis chod pa'i gnas su bya'o zhes bya ba'i don to/ /rdo rje dang rin po che'i yu ba can zhes bya ba'i phyir/ /rdo rje rin chen zhes bya ba la sogs pa smos te/rdo rje dang rin po ches mtshon pa'i dbyig pa la bya ste tshad ni de tshad ces bya ba la sogs pa smos pas ri dgas kyi dpangs kyi tshad dang zheng du cha chung gnyis yod pa'o/ /de yang ri dgas de'i rgyab kyi cha gcig dor ba'i phyi rol gyi thig la brten par bya ste/de'i 'og gi cha chung ngu gcig gis yu bar byas la steng gi cha chung ngu gcig las phyed ni rin po cher bya/ phyed ni rdo rjer bya'o/ /ba dan bya ba'i phyir ba dan dril bu zhes bya ba la sogs pa smos te/ ba dan dril bur ldan pa yi/ /zhes bya ba ni rdo rje rin po che mchog gi yu ba la gnas pa'i ba dan gcig la dril bu 'phyang zhing 'khrol bar btags pa dang /ba dan gnyis pa ni rta babs kyi mtha' ma ka ba'i mgo dang nye ba la btags pa ste/ de ltar rta babs kyi ngos gnyis la ba dan mdzes par bya'o zhes sngon gyi slob dpon dag 'dod do/ /gzhan yang dra ba dang dra ba phyed pa'i snam bu'i phyi rol gyi mtshams kyi ngos gnyis la yang gdags par bya ste/de ltar thams cad brtsis na dkyil 'khor re re zhing ba dan nyi shu rtsa bzhi bzhi 'dogs pa yin no/ /'dir ba dan nye bar mtshon pa tsam du zad do/ /rdo rje rgyal mtshan dang /dar sna dang / rin po che dang / me tog gi phreng ba la sogs pa ji ltar 'os pa'i lha'i mchod rdzas sna tshogs pa bzang zhing mdzes pa rnams kyis kyang brgyan par bya'o/ /gzhan yang ngos nas zhes bya ba ni tshon sna lnga bri zhing zur bzhir gnas pa'i nang du shar lho mtshams la sogs pa'i so so'i mtshams dag tu lha'i snam bu ste lha rnams kyi gnas kyi re khar gyur pa'o//de cha chen po gcig gi tshad du byas pas lha so so'i gnas rnams byas la/ de yang rgyud la lar ni re khA gsum du bya dgos la/ dkyil 'khor la lar ni lha'i gnas lngar bya dgos/la lar ni gcig tu bya dgos te bcom ldan 'das kyis ji skad gsungs pa de bzhin du lha rnams dgod pa dang rjes su 'tsham par bya'o/ /da ni cho ga de thams cad kyi thun mong yin par bstan par bya ba'i phyir/ 'di ni zhes bya ba la sogs pa smos te 'das ma thag pa/ 'di ni rgyud rnams thams cad kyi//zhes bya ba de kho na nyid bsdus pa la sogs pa rgyud ma lus pa kun gyi spyi'i thun mong yin te gzhan dang gzhan du bya ba ni med do/ /thig dbye ba ni legs pa yin/ /zhes pa ni thig gdab pa dang dbye ba legs shing gsal ba yin no zhes bya ba'i don to/ / 'o na khyad par du bya ba gang yin zhe na 'di yi nang zhes bya ba la sogs pa smos te sngar thig btab pa dang dbye ba byas nas/ sgo bzhi pa dang rta babs bzhi pa la sogs pa dang ldan pa'i ngos kyi nang du lha'i gnas kyis brgyan pa'i dkyil 'khor 'di'i nang du zhes bya ba'i lha'i snam bu'i thig gi nang logs su kun nas cha chen po drug yod pa'i zur bzhir gnas pa gang yin pa de'i dbyibs ni nang gi dkyil 'khor gyi tshul rgyud kyi rgyal po du ma las sna tshogs par 'byung bas na de ni rgyud de dang de'i dbye ba nyid kyis rnam par phye ba yin te/de bas na thams cad kyang de dag nyid las gsal zhing zur phyin par shes par bya zhing rtogs par byas nas lhag chad med par nges pa nyid du bya'o//yang na lhag chad med pa nyid du zhes bya ba ni nga'i gzhung 'di la mi dgos pa'i lhag pa yang med do zhes bya ba'i don la nges par byas pa'i don to/ /da ni de kho na nyid bsdus pa las rdo rje dbyings kyi dkyil 'khor 'byung ba dang de'i nang gi dkyil 'khor bstan pa'i phyir de nyid bsdus pa zhes bya ba la sogs pa smos te/de nyid bsdus pa zhes bya ba ni rgyud kyi mtshan te/ de bzhin gshegs pa thams cad kyi de kho na nyid bsdus pa zhes mtshan du btags pa'i phyir ro/ /rtsa ba'i rgyud kyi zhes bya ba ni de nyid rnal 'byor gyi rgyud phyi ma lta bu yin pa'i phyir ro//bshad bya ste zhes bya ba ni bstan par bya'o zhes khas len pa'i tha tshig go/ /tshad ci tsam zhe na/ lha yi snam bu'i thig la ni/ /'dab 'byor 'khor lo rab tu mdzes/ /zhes bya ba smos te lha'i gnas kyi snam bu'i nang gi thig la 'dab 'byor zhing reg par 'khor lo ste/nang gi dkyil 'khor gyi 'khor lo shin tu mdzes shing tshad dang ldan par bya'o/ /de yang / ji ltar rgyud kyi rjes mthun par/ /zhes bya ba smos te bcom ldan 'das kyis rgyud las zhes bya ba la sogs pa ji skad du gsungs pa bzhin du bya'o//de nyid ni/ dkyil 'khor lnga dang ldan zhing gsal/ /zhes bya ba ste sangs rgyas kyi dkyil 'khor dang rdo rje'i dang rin po che'i dang pad+ma'i dang las kyi dkyil 'khor te/ de bzhin gshegs pa lnga'i dkyil 'khor zlum po'i dbus dang shar la sogs pa'i phyogs bzhir gsal zhing mngon par bya'o//de 'og tu dkyil 'khor gyi rnam par dbye ba bstan par bya ba'i phyir/ snga ma'i zhes bya ba la sogs pa smos te/ sngar bshad pa'i thig gi cho ga'i rim pa de la gang cha phra mo'i rnam par dbye ba'i thig gdab pa byas pa gsal zhing rdzogs pa de la de bzhin gshegs pa lnga'i dkyil 'khor gyi sbyor bas bgo bar bya zhing bskor bar bya'o//lha'i snam bu'i zhes bya ba la sogs pa de la dang po'i lha'i gnas kyi nang gi thig la sbyar zhing reg par byas nas dang po kho nar zlum po gcig gis bskor bar bya'o/ /de'i 'og ste rjes thogs la nang gi zlum por bskor ba gnyis pa ni snga ma'i nang gi cha chung gcig las zlum por bskor bar bya'o//de ltar bskor ba gnyis kyi bar dag ni ste phan tshun gyi zlum por bskor ba gnyis kyi bar gyi gnas gang yin pa de ni cha chung ngu nyi shu rtsa gnyis su nges par yod pa ma yin te gnas der ni dkyil 'khor gyi mchog lnga po bya ba'i gnas yin par shes par bya zhing khong du chud par bya'o//de la dbus su sangs rgyas kyi dkyil 'khor bya bar bstan pa'i phyir ro/ /tshangs pa'i thig las zhes bya ba la sogs pa smos te dbus kyi tshangs pa'i thig de'i phan tshun ngos gnyis te g.yas dang g.yon du cha bran gsum bskor bar bya zhing zlum por bskor la/yang bskor ba de'i nang du cha chung gcig gi phyed kyi tshad kyis zlum por skor ba gnyis pa bya'o/ /de gnyis zhes bya ba la sogs pa la gong bskor ba phan tshun de gnyis bar du kun nas cha chen po gcig dang bzhi cha dang bcas pa cha chung ngu ni dbus ma ste de bzhin gshegs pa'i dkyil 'khor yin par shes par bya'o//lnga po zhes bya ba la sogs pa la dkyil 'khor de yang dbus dang phyogs bzhi ste lngar gnas pa de la sna tshogs pad+ma dang de'i steng du zla ba bya ba ste/zla ba rgyas pas lte ba ste dbus dang shar la sogs pa'i phyogs bzhir brgyan par bya'o/ /de lta bu'i dkyil 'khor de ni gang gis na/ sangs rgyas dkyil 'khor nyid ces te/ bcom ldan 'das rnam par snang mdzad kyi dkyil 'khor yin pa de'i phyir 'khor lo'i phreng bas yang dag par ldan par bya ba ste/zlum por bskor ba'i ri mo gnyis kyi bar du 'khor lo'i phreng bas mu khyud brgyan par bya'o zhes bya ba'i don to/ /de ltar sangs rgyas kyi dkyil 'khor bshad nas shar phyogs kyi cha la rdo rje'i rigs kyi dkyil 'khor bya ba'i phyir de mtshungs zhes bya ba la sogs pa smos te/shar gyi phyogs cha la zhes bya ba ni dbus kyi dkyil 'khor gyi shar phyogs su dkyil 'khor dbus ma dang mnyam pa'i mi bskyod pa'i dkyil 'khor bya'o/ /cha chung phyed dang bcas dor bas/ /zhes bya ba ni rnam par snang mdzad kyi dkyil 'khor la cha chung phyed dang gnyis dor zhing spangs pa'o//tshangs pa'i thig las de bzhin bskor/ /zhes bya ba ni tshangs pa'i thig gi ngos gnyis las cha chung gsum gsum pa'i gnas su bskor zhing zlum pa'o/ /nang du cha phyed las bskor bya/ /zhes bya ba ni sngar bskor ba'i nang du cha chung phyed kyi tshad las zlum por bskor ba gnyis pa bya'o//de'i nang du yang snga ma bzhin du sna tshogs pad+ma'i steng du zla ba'i dkyil 'khor shes par bya'o/ /de bzhin zhes bya ba la sogs pa la de ltar shar dang lho dang nub dang byang ste phyogs bzhi'i gnas rnams su'o//mi bskyod dkyil 'khor la sogs zhes bya ba ni mi bskyod pa dang rin chen 'byung ldan dang / 'od dpag med dang / don yod grub pa la sogs pa'o/ /dkyil 'khor ni zhes bya ba ni gnas mnyam par byas pa lnga po'i bdag nyid can zlum por bya'o zhes bya ba'i don to//rdo rje rin chen chu skyes dang / /sna tshogs rdo rje'i phreng bas brgyan/ /zhes bya ba ni dkyil 'khor de dag la grangs ji lta ba bzhin du rdo rje'i phreng ba dang / rin po che'i phreng ba dang / pad+ma'i phreng ba dang / sna tshogs rdo rje'i phreng bas bskor bas ri mo gnyis kyi bar du brgyan par bya'o//slob dpon la la dag gi gzhung gzhan yang rdo rje'i ra ba zhes bya ba la sogs pa smos pa yin te/ gong du smos pa ltar sangs rgyas la sogs pa'i dkyil 'khor du 'khor lo la sogs pa'i phreng bas bskor bar mi bya'o/ /rdo rje'i ra bas shin tu mdzes pas dkyil 'khor lnga po thams cad la brgyan par bya'o zhes sngon gyi slob dpon kha cig 'chad de/de yang rigs pa nyid de 'di ni gang gi phyir rdo rje dbyings kyi dkyil 'khor yin pas na gtan tshigs de'i phyir slob dpon de'i gzhung lugs de ni mchog dam pa yin pas gzung bar bya ba nyid do//ji ltar zhes pa la sogs pa la/ ji ltar dbus kyi dkyil 'khor gyi bdag po bcom ldan 'das rnam par snang mdzad kyi dkyil 'khor la pad+ma dang zla bas brgyan pa de bzhin du gzhan dag gi yang pad+ma dang zla bas brgyan par bya'o zhes bya ba'i don to/ /re'u mig la'o zhes bya ba la sogs pa la de bzhin gshegs pa'i dkyil 'khor gyi re'u mig gang yin pa de'i dkyil 'khor gnyis kyi bar du cha chung ngu gcig po phyed dang bcas pa ste/cha chung ngu phyed dang gnyis kyi tshad du dkyil 'khor dbus ma'i phyogs bzhir gnas pa der chu dang zheng du rang gi tshad ji tsam yod pa'i gnyi ga'i mtha' ru rdo rje phyed pas mtshon pa'i ka ba brgyad byas la/de yang gcig la gcig rdo rje'i rtse mo 'dus pas mtshams kyi zur bzhi bzhir 'gyur ro/ /dkyil 'khor zhes bya ba la sogs pa la dkyil 'khor bzhi'i phyi rol gyi rgyab tu cha chung phyed ces bya ba cha chung ngu phyed du dor zhing spangs par sngar dang por byas pa'i zlum por bskor ba gnyis kyi bar du rdo rje'i phreng ba bri bar bya'o zhes bya ba'i don to//mtshams su zhes bya ba la sogs pa la nang gi dkyil 'khor gyi mtshams te mi bskyod pa dang rin chen 'byung ldan gyi dkyil 'khor gnyis kyi bar dang / de bzhin du rin chen 'byung ldan dang 'od dpag tu med pa'i dkyil 'khor gnyis kyi bar dang /'od dpag tu med pa dang don yod pa'i dkyil 'khor gnyis kyi bar dang / de bzhin du don yod grub pa dang mi bskyod pa'i dkyil 'khor gnyis kyi bar dang / shar lho mtshams la sogs pa'i gnas bzhi po de rnams su rang rang gi gnas tshad kyi zhes bya ba rang rang gi gnas kyi tshad dang 'tsham pa'i zlum por bskor bar byas la/de'i dbus su sna tshogs pad+ma dang zla bas brgyan par bya ba'i don to/ /der ni zhes bya ba la sogs pa las mtshams kyi gnas bzhi po de dag tu sgeg mo la sogs zhes bya ba rdo rje sgeg mo dang /phreng ba ma dang / glu dbyangs ma dang / gar mkhan ma dang / nang gi mchod pa'i lha mo dgod par bya'o/ /de nyid bsdus pa'i dbus dkyil 'khor/ /zhes bya ba ni dpal de kho na nyid bsdus pa zhes bya ba'i rgyud kyi rgyal po'i dbus ma'i dkyil 'khor te nang gi de bzhin gshegs pa'i pho brang zhes bya ba'i don to//bdug sogs phyi yi lha mo bzhi/ /phyi yi mtshams su bri bya zhing / /zhes bya ba ni rdo rje bdug pa ma dang / me tog ma dang / mar me ma dang / byug pa ma ste phyi'i mchod pa'i lha mo bzhi ni phyi rol gyi snam bu'i shar lho la sogs pa'i mtshams bzhir bri bar bya'o/ /ji bzhin sems dpa' rnam par dgod//ces bya ba ni mgron gyi byang chub sems dpa' bskal pa bzang po bri bar bya ste de rnams ni sngar bshad pa'i ngos kyi nang na phyogs re re zhing lha'i gnas bzhi bzhir byas pa'i nang du dgod par bya'o/ /sgo rnams su ni sgo srung bri/ /zhes bya ba ni shar la sogs pa'i sgo bzhir rdo rje lcags kyu dang /zhags pa dang / lcags sgrog dang / dril bu ma ste sgo srung bzhi bri bar bya'o/ /gzhan yang phyi rol zhes bya ba la sogs pa la sngar bshad pa'i sgo bzhi dang rta babs bzhi la sogs pa'i phyi'i dkyil 'khor gyi rgyab rgyan zlum por bskor ba gnyis kyi dbus su rdo rje'i phreng ba ste rdo rje'i ra ba gsal zhing mdzes par bya'o//de yang tshad ji tsam du zhe na/ cha chen gyi ni phyed kyi tshad/ /ces bya ba ste cha chung ngu gnyis tsam mam ji tsam 'os par bya'o/ /'bar ba'i phreng ba'ang de yi tshad/ /ces bya ba rdo rje ra ba'i phyi rol du'ang me 'od 'bar ba'i phreng ba dang zheng mnyam par bya'o//phyi rol shing la sogs pas brgyan/ /zhes pa ni de'i phyi rol shar la sogs pa tshangs pa'i thig brgyad btab pa'i mtshams thig la sogs pa'i gnas su pa ta la'i shing dang / puN+Da rI ka dang / sA la'i shing dang / shing sha pa dang / u du m+bA ra dang / a mra dang / a shwad+tha dang /nA ga ge sar gyi shing dang / me tog la sogs pas brgyan par bya zhing / shing gnyis kyi bar du mtsho dang rdzing bu dang ut+pal dang / pad+ma dang / ku mu da dang / puN+Da rI ka la sogs pa me tog rnams kyis brgyan par bya zhing / de'i steng na ngang pa dang dur pa dang bya ka lan da ka la sogs pa sgra sgrogs pa lta bur mdzes par bya'o//nang du de yi phyed phyed du/ /zhes bya ba la sogs pa la cha chung ngu nyi shu rtsa bzhi ni nang gi dkyil 'khor te/ de ni sgyu 'phrul dra ba la sogs pa'i dkyil 'khor du nang du bgo ba bya bar gsungs pa gang yin pa der ni cha chung nyi shu rtsa bzhi po de nyid cha chung re re zhing phyed phyed du bgos te cha gnyis par byas la de bzhin du gsum pa dang lnga pa dang bcu bdun pa dang nyi shu pa dang nyi shu gsum pa ste/de lnga la thig gi cha gsum gsum du bgos la ri mo gsum gsum du bya'i ri mo lnga lngar ni mi bya ste phyi'i tshon sna lngas ri mo bya ba yin la nang gi ri mo gsum du bya ba yin pa'i phyir ro//de ltar byas pa'i sgo bzhi'i bar du dkyil 'khor gyi rim pa gnyis pa dang gsum pa dang bzhi pa dang lnga pa dang bdun pa la sogs pa sna tshogs pa'i rim pa bya ba ni rgyud kyi dbye ba las rdo rje slob dpon nyid kyis shin tu zhi ba'i shes rab kyi blos rnam par brtag cing rdzogs par bya ba'i don to//da ni nye bar bsdu ba'i phyir/ /rin chen bzang pos dpa' bo rdo rje la/ /zhes bya ba la sogs pa smos te gang gi don du 'di byas she na rin chen bzang po ste/ gang gi phyir ming rin chen gyi mtha' bzang po dang ldan pa des tshul bzhin du btab pa'o/ / gang la btab ce na dpa' bo rdo rje la ste dbang bskur ba'i ming ni dpa' bo rdo rje ste slob dpon dad byed go cha la'o/ /ji ltar btab ce na/ dad cing gus pas mang du gsol btab pas/ /zhes bya ba smos te gsang sngags kyi spyod pa dang / dkyil 'khor gyi las la dad cing mos la bla ma la gus pas mang du gsol ba btab pa'o//ci'i phyir byas she na brtse phyir zhes bya ste rang gi slob ma dang / sems can rnams la brtse ba'i phyir slob dpon gyi dpe mkhyud spangs pa'o/ /gang zhig byas she na/ thig gi cho ga gsal phye byas zhes bya ba ste/ nor bu'i gling gi slob dpon bde ba'i rdo rje'i rjes su 'brangs nas gsal zhing phyin ci ma log par byas pa'o//nyes 'gyur dam pas bdag la bzod par mdzod/ /ces bya ba ni/ bdag gis slob ma dam pa'i don du thig gdab pa'i cho ga mdor bsdus pa 'di la dam pa ste bde ba'i rdo rje la sogs pa slob dpon bdag la bzod par mdzod cig pa'o/ / bsod nams yongs su bsngo bar bya ba'i phyir/ 'di byas bsod nams dam pa ni/ /zhes bya ba la sogs pa smos te/ gong du bshad pa'i thig gdab pa'i cho ga byas pa las dri ma med pa'i bsod nams dam pa/ byang chub tshogs gyur gang thob des/ /zhes bya ba ste/ byang chub ni sgrib pa dang bral ba'i ye shes so//de'i cho gas ni rdzogs par byed pa ste de lta bur 'gyur ba'i bsod nams gang zhig thob pa'i bsod nams des ni 'gro ba drug tu gtogs pa'i sems can ma lus pa 'di dag dkyil 'khor gyi bdag po rnams par snang mdzad du rang nyid mngon sum du grub par gyur cig pa'o//gang zhig bla ma'i rab mchog u rgyan mkhan po'i gzhung / /yon tan de nyid bcu shes sangs rgyas zhi ba yi/ /shin tu gces shing sbas pa'i dkyil 'khor bri ba'i las/ /de 'dir phye bas 'jig rten rdo rje 'dzin grub shog /yul kha cher skyes pa'i rdo rje slob dpon shrad+d+ha ka ra barmas rang nyid kyis mdzad pa'i thig gdab pa'i cho ga'i 'grel pa/bod yul du skyes pa'i dge slong rin chen bzang pos gsol ba btab nas 'grel pa byas pa rdzogs so// //rgya gar gyi mkhan po shrad+d+ha ka ra barma dang / zhu chen gyi lo tsA ba dge slong rin chen bzang pos skad gsar bcad kyis zhus te gtan la phab pa'o/