CLOSE WINDOW

D2496
བོད་ཡིག

@##/ /rgya gar skad du/ kA ya bA ka tsit+ta su pra tiSh+Tha nA ma/ bod skad du/ sku dang gsung dang thugs rab tu gnas pa zhes bya ba/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas mi 'khrugs pa la phyag 'tshal lo/ /sku gsung thugs rten bla ma la//gus pas phyag 'tshal rten gsum la/ /rgyud dang bla ma'i gsung brten nas/ /sgrib sbyong rab gnas bri bar bya/ /slob dpon de nyid bcu shes shing / /mtshan nyid kun dang yang dag ldan/ /phyag rgya sngags dang cho ga shes/ /las rnams kun la mkhas pa ste//dam sdom byang chub sems 'byongs pas/ /bsnyen pa rnam gsum rdzogs byas la/ /de dang 'dra ba'i grogs bcas kyis/ /dus zla gza' skar tshes grangs ni/ /nyi ma'i khyim ni bcu gnyis te/ /dgun dpyid ra 'bring ro hi ta'i/ /dus su nyi ma log nas ni/ / byang 'gro zla drug nyin mo 'phel/ /de drug zhi ba rab gnas shis/ /dbyar ston ra 'bring zla drug lhor/ /nag 'phel drag nyi der mi brtsam / /phur bu lag dang pa ba sangs/ /zla ba bzang ldan gza' de shis/ /nyi spen dmag dpon nor 'joms ngan/ /chu smad snar ma gro bzhin dang / lag dang snon snubs rgyal chu stod/ /khrums smad skye dgu 'phel ba dang / /rab tu gnas pa'i mchog tu byed/ /yid 'dod dngos grub me bzhi ste/ /snrubs dang gro bzhin de bzhin te/ /lag gis skal bzang snar mas rgyal/ /mgo yis nye bar zhi bar byed/ /chu stod kyis ni bu dag gson//khrums smad rtag par dngos grub ster/ /rgyal gyis tshe ring brtan par 'gyur/ /snon gyis mchog tu bde bar byed/ /lha mtshams kyis ni mchog ster 'gyur/ /gza' dang skar ma de dag kyang / /dar gud mi rigs las dang sbyar/ /tshes gcig gsum lnga drug bdun bcu//drug po nor 'joms spang gzhan shis/ /gza' skar tshes grangs mthun 'dzom na/ /mar gyi ngo la'ang bya bar shis/ /gnam stong bcu bzhi kun du spang / /zla ba gza' dang skar ma dang / /nyi ma dus 'dzom skad cig la/ ji skad gsungs pa bzhin byas na/ / bsam pa thams cad yongs rdzogs shing / /rab tu gnas pa mchog 'gyur te/ /'khor los sgyur rgyal dbang phyug ni/ /thob 'gyur 'di la the tshom med/ /slob dpon mtshan ma thob pa na/ /gza' dang rgyu skar brtsi mi dgos/ /bgegs dang log par 'dren pa'ang med/ / gza' rnams thams cad rjes mthun zhing / /bgegs dang rgyu skar lha rnams nyid/ /de drug bka' sgrub kun gnas shing / /gzugs brnyan mchod rten la sogs kyi / /dngos grub dag ni ster bar mdzad/ /yid kyis cung zad gang bsams pa/ /skye dang skye bar 'grub par 'gyur//yang thog mchod rten la sogs gnas/ /khyim dang lha yi gnas rnams su/ /sangs rgyas la sogs rab gnas bya/ /brdungs lugs 'bur bris sogs rten ni/ /rang rang mtshan nyid ldan pa ste/ /zhi khro la sogs rang tshul mthun/ /tshad kyis tshad la phab cing bzang //de 'dra rab tu gnas par 'gyur/ /bzlog pa skyon 'gyur de phyir gzab/ /rab gnas dgos dang mi dgos gnyis/ /dam pa'i don du dpyad pa na/ /gang zhig gang gis gang du brlab/ /gdod ma nas zhi skye med la/ /ji 'dra ji ltar rab tu gnas/ /chos rnams thams cad 'od gsal la du//rtog dang ldan pa'i mchod gnas la/ /rab tu gnas pa mi dgos te/ /yang na stong nyid ma rtogs kyang / /mchod rten glegs bam sku gzugs sogs/ /sangs rgyas rnam 'phrul byin rlabs las/ /byung ba min na mi 'byung bar/ /rtogs te shin tu dad ldan na//rab tu gnas pa mi dgos so/ /dang po'i las can ma 'byongs la/ /'jig rten tha snyad kun rdzob tu/ /'gro bas de nyid mi shes la/ /ston pas rab tu gnas pa bshad/ /dbye ba sgra don skyon yon las/ /bya ba'i thabs dang rnam pa drug /don dam spros med rab gnas dang //kun rdzob sku gsung thugs gsum ste/ /yon tan phrin las zhor la 'byung / /dam tshig sems dpa' sbyangs bskyed la/ /ye shes sems dpa' yun ring du/ /gnas pa'i phyir ni rab tu gnas/ /gang du sku gzugs rdzogs pa la/ /byin ma brlabs par ring gnas na//de la bkra mi shis 'gyur zhing / /de srid mchod par de mi 'os/ /dper na skyes bu la la zhig /rig pa'i mtshan nyid spangs pa na/ /'jig rten kun gyis mchod mi byed/ /de bzhin byin ma brlabs sku la/ /gang zhig phyag 'tshal mchod byed pa//dam tshig bral zhing sngags dman te/ /sbyin sreg thal ba 'bras med mtshungs/ /'jam dpal rtsa ba'i rgyud chen las/ /skye bo tshul khrims 'chal 'di la/ /bde 'gro mtho ris yod min la/ /bde ba mchog tu'ang mi 'gyur na/ /rgyal bas gsungs pa'i sngags rnams ni//'grub par 'gyur ba smos ci dgos/ /ta la'i mgo bcad sngo min ltar/ /de bzhin sngags sgrub rmongs pa dang / /tshul khrims nyams shing sdig las byed/ /rtag tu bud med chags pa la / /'di ni rab tu bsten ma yin/ /mi dge bshes gnyen bsten pas ni//sngags kyi rgyal po ga la 'grub/ /yon tan yang ni rtsa rgyud las/ /'jig rten sngags rnams ji snyed dang / /de slob bse ru byang chub sems/ /bdag nyid chen pos gsungs pa yin/ /cho ga gzhung dang mthun par ni/ /rab tu gnas pa byas nas kyang / / ri mo 'di ni mdun bzhag na/ /sngags rnams ma lus 'grub par 'gyur/ /de bzhin mchod dang phyag 'tshal dang / /mthong dang reg pa tsam gyis kyang / /sdig pa'i rnyog pa kun las grol/ /ras ris la sogs mthu chen la/ /don du gnyer dang bskul bas ni/ /myur du skye ba don yod thob//rjes su yi rang de bzhin no/ /rten 'di mthong ba'i skye bo yis/ / bsod nams thob pa don yod pa/ /bskal pa bye ba rnams su yang / /brjod par yang ni mi nus so/ /las ni yon bdag bsod nams spel/ /sngags pas dge ba rnyed par byed/ /de bzhin slob dpon sngags gnas pas//chos ldan mchod pa byed pa gang / /de yis skye bar mchod par 'gyur/ /bya thabs cho ga dag las bya/ /cho ga dman gnas bkra mi shis/ /'dir sdug pha rol 'jigs pa che/ /dngos grub 'dod pas cho gar 'bad/ / cho ga'i tshul legs bsod nams ni/ /mthong dang mi mthong rnams su skye/ /sku gzugs sngags kyi mtshan nyid kyis/ /rten la byin rlabs 'jug par 'gyur/ /gang zag blo rigs tha dad pas/ /yon mchod 'byor chog tshogs pa yis/ /rab gnas rgyas pa spros bcas bya// 'bring pos cho ga tshad tsam dang / /bsdus pa ting 'dzin thun gcig la/ /rdul tshon la sogs mi dgos bya/ /rgyas pa mtshan ldan bla ma la/ /slob mas lan gsum gsol btab nas/ /bka' bsgo slob mas rdzas bsogs te/ /yid 'ong gnas su bsnyen gsum bskyal/ sa yi cho ga gzhung bzhin bya/ /lha bum sbyin sreg sa yi lha/ /sta gon spyi dang mthun par bya/ /'di skabs slob ma sta gon ni/ /gang byed gzhung dang mthun gnas yin/ /de yang sngags grogs slob dpon 'dra/ /yon bdag sta gon gnas pa ni/ /rgyas pa bkra shis cho ga 'di//brtsams nas yongs su rdzogs kyi bar/ /yon mchod la sogs mi rnams kun/ /lus ngag yid spyod bzang ltas bya/ /ngan pa'i phyogs kun thag ring spang / /bzang ngan gang byung mi rabs bdun/ /'byung bas ngan na 'bar sogs bzlog /nang par dkyil 'khor rdzas tshang bsham//shar lhor rab gnas dbang stegs ni/ /dpangs khru rgya ni rten dang sbyar/ /ba yi lngas byugs pad 'khor ser/ /nyi nub dpon slob khrus byas brgyan/ /bgegs bskrad chad lhag bskang byas te/ /bum pa'i bsnyen sgrub gzhung ltar bya/ / de yang srung ba'i 'khor lo nas/ /mchod bstod bsgom bzlas bar du ni/ /mtshan ma byung gi bar du bya/ /de rjes rang 'jug dbang yang blang / /de rjes snyan gsan gsol ba gdab/ /phyir phyin gtor ma rgya chen gtang / /bgegs la bka' bsgo bden bdar bya/ /nang zhugs nye reg 'thor 'thung byas//sngon du yon bdag dbang rgyas bskur/ /de nas rab gnas sta gon te/ /rten gsar rnams ni der drangs la/ /dkyil 'khor mkhar 'degs bdag khror bsgyur/ /bgegs la bka' bsgo stang stabs bya/ /khro bo'i bstod bzlas ra dra sogs//srung 'khor rgyas par bsgom par bya/ /gong nas rten gsar bzhugs pa na/ /na bza' car g.yogs zhal phyir bstan/ /dkyil 'khor bris nas sta gon te/ /ma bris rab gnas dbang nus med/ /slob dpon brtan ma thob nus med/ /dkyil 'khor bris chog dgos med 'gyur//des na rgyud dang bla ma ni/ /dam pa'i snyan brgyud gdams ngag dgos/ /sta gon bgegs ni bskrad pa'i gnad / /dngos gzhi byin rlabs sbar ba'i gnad / /rjes ni bstan pa dar rgyas gsum/ /sta gon nub mo phyag rgya dgrol//dkyil 'khor shar sogs ku sha'i steng / /seng ge'i nyal stabs chos nyid nyal/ /skya rengs shar dus chos nyid las/ /langs te khrus byas brgyan lhar bskyed/ /rten gsar tha mal dril sbyang phyir/ /shing bu gru gsum me sbar la/ /kham phor steng du bag zan gyi//kong bu gsum la mar me sbar/ /'bras kyi chang bu gsum la ni/ /rdo rje gtsug tor gnod sbyin gyis/ /sku la phyi bkru lan gsum bya/ /'bras med bag phyes bya bar 'os/ /sngags gnyis zlos shing yungs kar brab/ /mi gtsang dor bsam sla ngar blugs//de rjes chu mes de ltar bya/ /yang na g.yam steng chu me dang / /zho zan bsres dang yungs kar la/ /oM sarba pA paM da ha na badzrA ya swA hA/ zhes bzlas mer bsregs bzhi mdor dor/ /'dag chal sug pa nye shing pa/ /shu ti sran phye ba yi lnga/ /til mar gyis ni sngags bcas bkru//bag chags sbyang phyir chu brgyad khrus/ /rdul g.yab me long bstan byas te/ /chab gtsang chu gtsang sman chab dang / /spu chab 'o ma 'bru sna lnga/ /rin chen mchod yon khrus byas la/ /shing bal ras kyis sku phyis la/ /dbang stegs steng du bzhugs gsol la//mar dang dri lnga ga pur dang / /tsan+dan dzA ti gur gum dang / /gla rtsi byugs te stong par sbyang / /stong pa'i sngags gsum rim bzhin brjod/ /de nas lhar bskyed dngos de'am/ /dkyil 'khor gang bris yi dam lha/ /gtso 'khor bcas pa'am gtso rkyang ni//mngon par byang chub lngas bskyed la/ /rab gnas dbang bskur mnga' gsol gsum/ /rab gnas ye shes sems dpa' yi/ /spyan drang chos brgyad snyan gsan dbab/ /spyan drangs bzhugs gsol khrus mchod yon/ /phyag 'tshal sum bsres sku gsung thugs//byin gyis brlab pa'i bar du bya/ /de la mchod pa'i rim pa ni/ /rin chen maN+Dal thun mong lnga/ /rgyan dang gzhal yas gdugs rgyal mtshan/ /ba dan 'phan dang bla re dang / /me tog phreng ba rol mos bskor/ /na bza' nam mkha' mdzod zhal zas/ / gling bzhi maN+Dal dbul bar bya/ /rang rang sngags dang rten 'brel gyi / /snying po brgya dang rtsa brgyad bzlas/ /de nas rdo rje sems dpa' yi/ /yi ge brgya pa brgya rtsa brgyad/ /bzlas pas brtan par byed pa yin/ /de dag spyi yi rab gnas te/ /khyad par sku gsung thugs rnams la//rang rang cho ga gzhung bsrangs la/ /mchod rten la sogs thugs rten la/ /khyad par chos bzhi byin gyis brlab / /rdo ring them skas chu srin gyi/ /rgyal mtshan la sogs dbul ba'o/ /byin brlabs sa gzhi chos kyi dbyings/ /seng khri mi 'jigs bzhir byin brlab //rmang ni dge bcu khri 'phang ni/ /dang po dran pa nyer gzhag bzhi/ /gnyis pa yang dag spong ba bzhi/ /gsum pa rdzu 'phrul rkang pa bzhi/ /bzhi pa snang ba'i dbang po lnga/ /bum rten stobs lngar byin gyis brlab / /bum pa byang chub yan lag bdun//kha khyer 'phags lam yan lag brgyad/ /de dag rgyu chos byin brlab ste/ /'bras bu'i chos su 'di ltar brlab / /srog shing mkhyen bcu bre legs ni/ /ye shes bzhi dang rnam thar bzhi/ /'khor lo bcu gsum sa bcu dang / /dran pa nyer gzhag gsum du brlab//char khabs gdugs ni thugs rje'i skyabs/ /tog ni chos dbyings ngo bo nyid/ /phyi ni sku gsum nang gzhal yas/ /rdo ring rin chen them skas dang / /chu srin rgyal mtshan dar dpyangs dang / /rin chen phreng ba nyi zla dbul/ /bya ru thabs dang shes rab yin// mchod rten sku bsdus rab gnas bya/ /rang rang rab gnas legs par bya/ /sku gzugs khyad par chos brgyad de/ /spyan dbye dbu skra sprul sku'i gzhar / /longs sku'i dung gi so mang sa bshad/ /shangs dbyes spu 'thog tshems rtsa bru/ /ljags bzhar snyan spabs bru zhing bsal//na bza' sprul pa'i sku la ni/ /smad gsum chu tshags par 'khar gsil / /longs sku zhi la dar gyi ste/ /khro bo'i stag lpags dar sngon gyi/ /stod g.yogs rgyan ni sprul thod sogs/ /sprul sku rgyan med longs zhi la/ /bris bkod dbul bsam cho gas dbul//dngos su dbul du yod na rab/ /gsung rab zhal bsro'i khyad par dgu/ /don gsung skye 'gag med par brlab/ /tshig gsung yig 'bru gsung rab ni/ /yan lag tshad med bzhi bcur brlab/ /khri dbul glegs shing glegs thag dbul//na bza' zhal khebs rgya rim bdun/ /pha rol phyin pa yum chen mo/ /mdo sde 'dul ba byang chub che/ /rgyud sde rdo rje chos sogs te/ /cho ga yi dam la sogs pa/ /ngo shes bye brag mi shes spyi/ /yang na bden gnyis yi ger bsam/ /dri lnga yis ni de nas byug /sa bon lnga yi gtor bya'i don/ /skye med rtog pa gsal ba yis/ /chos sku la ni chos sku thim/ /gnyis su med bsams me tog dbul/ /thugs kyi mchod pa dri yis byug /de nas spyir ni dbang bcu gcig /bum pa dbu rgyan cod pan dang //phyag rgya ming dbang las bzhi'i dbang / /chos kyi rgyal po gsang ba'i dbang / /thabs shes gdugs dang phreng dbang bskur/ /rjes la mnga' gsol rten kun la/ /rdzas brgyad sna bdun dbul ba dang / /bkra shis byin cher gsol ba ni/ /'brang rgyas la sogs bkra shis rdzas//mang la 'jig rten dge ba dang / /mdzad pa bcu gnyis dkon mchog gsum/ /rigs lnga la sogs mang po ni/ /bklag dang gyer bas zhal bsro bya/ /gong du cod pan dbang bskur ram/ /yang na sngags 'dis bcing byas te/ / oM hUM oM dzr-I khaM/ sku yi sum 'gyur khri la ni/ /mdun du ma nub mi yor bzhugs/ /de ltar ma byas skyon mang 'byung / /de nas slob dpon yon bdag gnyis/ /me tog gtor te gdan khri nas/ /bzung la bzhugs par lan gsum gsol/ /de nas mtshan brgya rtsa brgyad sogs//bstod pa rgyas bsdus skabs dang sbyar/ /de yi yon tan la dad pas/ /me tog spos dang de bzhin dri/ /mar me lha bshos na bza' sogs/ /sngags ldan rgyas bsdus skabs dang sbyar/ /de nas yon bdag mdun bzhag la//me tog dri yi mnga' gsol ba/ /rten 'brel snying po zlos bzhin du/ /lha la dbul ba bzhin byas la/ /gzengs bstod mchod pa'i rjes gnang sbyin/ /gsang ba'i bdag po bcom ldan 'das/ /phyag na rdo rje 'khor bcas la/ /gtor ma phul la gsol ba gdab//spyi yi chos skyong phyogs skyong bcu/ /rnam sras mgon po gzhi bdag la/ /gtor sbyin phrin las bka' bsgo bya/ /phyi rjes bzo bo grogs byed sogs/ /'di skad brjod de mchod par bya/ /kye gson dga' bas 'di nyid du/ /ji ltar gsungs pa'i mchod pa rnams//bdag la mthun pa'i nus pa med/ /de phyir khyed ni bzod par gsol/ /de dag gang dag brtul zhugs can/ /dge slong dge bsnyen dge bsnyen ma/ /mchog tu gus pas mchod byas la/ /ji ltar 'os pa'i yon yang dbul / /rab tu byung ba'i gnas brtan dang //khyim pa'i gtso bo la sogs la/ /gnyer gtang bka' bsgo 'di skad brjod/ /snyigs ma lnga yi dus 'di yi/ /mchog gi sku dang mnyam pa yi/ /sprul pa'i sku ni 'di yin gyis/ /khyod kyis ma nyams srung mchod kyis/ /sngags kyi bza' bca' yon bdag la//skabs 'dir sbyin te 'di skad brjod/ /sngags kyi gtsang sbra'i bza' bca' dag /gzugs brnyan bdag po khyod la sbyin/ /bde gshegs lhag ma 'di dag ni/ /zos na sdig pa byang bar 'gyur/ /gal te lhag nyid dge 'dod na/ /bla ma gus pas dge bya zhing / / de ltar rnam pa thams cad du/ /bla ma yang dag mnyes byas te/ /yon gyi dam pa dbul ba ni/ /rta dang glang po shing rta nor/ /longs spyod yo byad dbul 'di brjod/ /bla ma yongs su mnyes pa yis/ /las dang dngos grub thams cad 'thob/ /de bas dngos po thams cad kyis//bla ma mnyes par byed par shog /de nas mtshan mo gtang rag ste/ /gnyen dang rigs rgyud 'khor rnams kyi / /bzang ba'i glu gar rol mo ste/ /dung la sogs pa'i rol mo dbul/ /lho phyogs rgyas pa'i thab byas la/ / 'o ma can gyi bud shing brtsig /'bru dang mngar gsum mar 'o mas/ /dang po mjug tu me lha mchod/ /bar du dkyil 'khor rab gnas lha/ /stong ngam lnga brgya sogs sngags 'dis/ /oM badzra A yu She puSh+TaM ku ru swA hA/ sdig zhi tshe dpal rgyas par 'phel/ /gtang rag lhag chad bskang ba yi//mchod bstod bzod gsol skabs sbyar bya/ /rten gsar ye shes mi gshegs te/ /tsA ru'i ston mo rgyas par bya/ /dkyil 'khor lha gshegs dam tshig bsdu / /rdul tshon a kAr sngags bsdus te/ /chu sogs dor la ba'i lngas byug /de nas 'gro rnams dad bya'i phyir/ /shing rta khri sogs mtho bar bteg /mchod pa rol mo dang bcas pas/ /grong khyer rnams su bskor bar bya/ /spros mi dga' la bsdus pa ni/ /bsnyen pas cho ga sta gon dang / /dkyil 'khor bri sgrub rten gsar la/ /bgegs bskrad yi ge brgyas brtan par//gong bzhin byin dbye la sogs pa/ /nub gcig la ni kun rdzogs bya/ /mnga' gsol rgyas par ma grub kyang / /'di la nyes par mi 'gyur ro/ /shin tu bsdus pa'i rab gnas ni/ /brtan pa thob pa'i slob dpon gyis/ /gza' skar tshes grangs mi brtsi ste//rdul tshon mi brten thun gcig la/ /dkyil 'khor bsgoms te brgya rtsa bsnyen/ /bgegs bskrad bkru sogs gong ltar bya/ /bskyed de spyan drangs sku gsung thugs/ /byin gyis brlab dang dbang bskur ba/ /snying ga'i sa bon 'od kyis ni//'og min rigs lnga'i thugs ka nas/ /bkra shis lha mo bum rol bcas/ /dbang bskur rigs bdag rgyas btab bsam/ /rten 'brel snying po brgya rtsa res/ /dri dang me tog gtor byugs te/ /rang rang lha la chos skur thim/ /bsams la rdo rjes mchod bstod bya//rjes sogs spyi dang mthun par bya/ /lha khang rab gnas 'dir ma bshad/ /da ni phyag mtshan byin dbab ste/ /swa b+hA'i sngags kyis stong ngang las/ /dkar rigs lha khang mchod rten gnas/ /khang khyim b+hUM las 'khor rnam snang / /gsung rigs dmar dang po ti cod //gaN+DI cha lang dril bu sogs/ /dzr-IM las pad+ma snang mtha' yas/ /nag sngo rdo rje phur phreng thugs/ /hUM las rdo rje mi bskyod pa bskyed / /ser po bang mdzod yon tan rigs/ /aM las rin chen rin 'byung bskyed/ /las rigs ljang gu rgya gram gri/ /khaM las ral gris don yod grub//chos skyong rnams la'ang rang rang gis/ /'jig rten 'bag la rigs gsum gyis/ /rigs kyi 'bag la rang rang lhas/ /ngo mi shes kun de 'drar re'am/ /rigs bstun gong gis shes par bya/ /srog chags gtso bo'i sprul skus bya//srung 'khor kun dga' ra bkad sa/ /gzhal yas khang ngam a mo li/ /chu mig khron sogs mA ma kI/ /bza' shing ra dang ldum ra sogs/ /shing gi lha mo 'od 'chang mas/ /phyugs lhas par+Na sha ba ri/ /'bru dang bang mdzod dzam+b+ha la/ /yon bdag dkyil 'khor mthong na lha//ma mthong ni ni sprul skus bya/ /bla ma'i sku 'bag thugs dam ste/ /mi shes rang gi yi dam las/ /sngags la ma zhugs sprul pa'i sku/ /kun la dgug gzhug gong bzhin bya/ /phrin las rgyas pa'i cho ga ste/ /rab gnas rim gsum 'khor bcas 'di//bdag gis rang bzor ma byas te / /gtso cher klu sgrub lugs gtsor bzhag /rdo rje 'chang nas gnyis brgyud pa'i/ /lung dang 'dra ba'i nA ro dang / /byang chub sems las thob pa yi/ /sgeg pa rdo rje skal ldan mchog /de gsum snyan nas snyan brgyud pa'i//man ngag bla ma mnyes pas thob/ /rgyud dang bstan bcos legs brten nas/ /rang nyid dran pa gso ba dang / /gzhan yang bdag 'dra gti mug la/ /phan phyir gzhan gyis bskul nas bris / /ma rtogs nongs pa bzod par gsol/ /brtsams pa'i dge ba cung zad des//sems can bde chen sku thob shog /sku dang gsung dang thugs rab tu gnas pa zhes bya ba dpal mar me mdzad ye shes kyis mdzad pa rdzogs so// //rgya gar gyi mkhan po dI paM ka ra dang / /