CLOSE WINDOW

D2494
བོད་ཡིག

/[ ]@##/ /rgya gar skad du/ ga Na tsakra bi d+hi tsin+ta ma Ni nA ma/ bod skad du/ tshogs kyi 'khor lo'i cho ga yid bzhin nor bu zhes bya ba/ 'phags ma sgrol ma la phyag 'tshal lo/ /mchog dang thun mong kun gyi gzhi/ /lam dang dngos grub mthar phyin pa//rgyud las gsungs pa'i cho ga bzhin/ /de 'dir bsdus te brjod par bya/ /dam tshig nyams pa'i skyon sel cing / /mi mthun phyogs rnams 'joms byed pa/ /'dod pa'i don kun sgrub pa nyid/ /lhag pa'i lha yang tshim par 'gyur/ /phyag rgya chen po'i dngos grub ni/ /myur du lung bstan thob par byed//tshogs kyi 'khor lo'i cho ga yi/ /rim 'dis 'dod pa'i 'bras bu 'byin/ /ji ltar yang dag sbyor ba las/ /rab tu bshad kyis lha mo nyon/ /'dod pa'i don kun grub byed cing / /dge ba'i tshogs la 'dud pa gang / /zos pas dngos grub 'gyur ba nyid/ /de bzhin rdo rje phreng ba las//de nas gzhan yang bshad kyis nyon/ /tshogs kyi 'khor lo'i rim pa 'di/ /gang zhig mchod pa bzhin du spyad/ /rang gzhan dngos grub nye ba nyid/ /'dir ni mgron dang dus dang ni/ /gnas dang rdzas dang bya ba'o/ /mchog tu gyur pa'i cho ga 'dis/ /gang zhig dngos grub mngon du 'gyur//de la tshogs kyi 'khor lo'i sgra/ /don ni dgos pa'i sgo nas te/ /mgron gyi rang bzhin bshad par bya/ /dpal ldan rdo rje phreng ba las/ /rnal 'byor chen po'i ting nge 'dzin/ /mnyam zhing gcig tu gyur byas nas/ /brda dang phyag rgya'i sbyor ba shes//dam tshig ldan pa 'jug pa'o/ /de la mang du 'dus pa'i tshogs/ /'khor lo lha yi rim pa nyid/ /thun mong dus su bshad pa nyid/ /khyad par 'di yis shes par bya/ /thams cad du ni dam tshig gcig /rtog pa thams cad yongs su spangs/ /bla ma la gus ting 'dzin gnas//sbyin sogs yon tan rgyan spras pa'i/ /thabs 'dis tshogs kyi 'khor lo la/ /bgegs med par ni rab tu 'jug /gzhan du skyon dang bcas par 'gyur/ /thabs dang shes rab phan tshun du/ /yid 'phrog bya dang bya min mkhas/ /lo ni nyi shu lnga lon las/ / lhag pa yongs su spang bar bya/ /yongs shes thabs ni thams cad la/ /shes rab gcig gis bya ba min/ /'dir ni sgrub pa gcig pa yi/ /bla mas slob ma rjes su gzung / /ji skad sdom pa 'byung ba las/ /gang zhig dkyil 'khor dge bar 'gyur/ /slob dpon sngon du phyogs byas nas//slob dpon yon tan ma bsdams na/ /'jig rten pa yis dpyas par 'gyur/ /slob dpon med par gyur pa na/ /gzhan yang bla ma mtshan nyid ldan/ /'khor lo'i dbang phyug byas pa nyid/ /gus pa gcig pa'i tshul gyis spyad/ /de yang rdo rje phreng ba las/ / zhi la sogs pa'i phrin las dang / /sngags kyi sbyor ba'i cho ga shes/ /bya ba nyi shu'i dbye bas ni/ /bla ma'i cho ga bya ba nyid/ /sbyin dang tshul khrims bzod pa dang / /brtson 'grus bsam gtan pha rol 'gro/ /nyin mtshan rtag par dge la spro/ /shes rab rno zhing bzo gnas mkhas//gnyis med yon tan gyis lci ba/ /'di ni dpal ldan bla ma'o/ /nang du gsang ba 'dus la sogs/ /phyi ru nyan thos spyod pa can/ /man ngag rim pa'i khyad par gyis/ /ji ltar rigs pa'i spyod pa la/ /slob ma rjes 'dzin ston pa dngos/ /de bzhin dkyil 'khor la sogs dang //mdo dang las kyi tshogs rnams dang / /don dam pa yi bya ba mkhas/ /snang ba gsum la sogs pa la/ /rang gis goms 'gyur gzhan la ston/ /rnal 'byor rim pa'i slob dpon te/ /yid 'phrog sdud pa slob dpon no/ /de nyid bcu ni yongs su shes/ /dkyil 'khor 'dri ba'i las la mkhas//slob ma rjes 'dzin nus pa dang / /gsang ba'i dbang gi mthar son pa/ /shes rab snying rje mtshungs par ldan/ /rgyud kyi rim pa'i sbyor ba mkhas/ /zab mo'i spyod pa rab ldan pa/ /'di ni rdo rje sems dpa' dngos/ /ji skad phyag na rdo rje yis/ / 'khor lo sdom la 'brel pa las/ /thun mong bsod nams bsag pa'i rgyu/ /ye shes dngos grub sgrub pa'i thabs/ /dge bsnyen pha ma la sogs pa/ /slob dpon dag la rab tu phyogs/ /gsang sngags theg pa'i cho ga 'dir/ /slob dpon rnam pa gsum yin la/ / khyim pa dge tshul dge slong ste/ /tha ma 'bring dang mchog yin no/ /sbyin bdag blo gros mi 'phel phyir/ /thun mong spang bya'i slob dpon ni/ /snying rje med cing khro ba dang / /khengs shing chags la mi brtan pa/ /bslab pas ma bsdams 'dod pa che/ /rang la bstod pa mi bya'o//khyad par khyim pa'i slob dpon ni/ /bud med bcas shing dkor zas dang / /zhing las g.yog dang tshong pa dang / /rmongs pa rnyed phyir chos smra ba/ /'di ni tshogs kyi slob dpon min/ /'dir ni tshul khrims yon tan ldan/ /rnal 'byor dkyil 'khor la sogs pa'i/ /yon bdag zil gnon bkur ba'i gnas//'di nyid 'khor lo'i dbang phyug 'gyur/ /'dis ni dkyil 'khor gtso bo dag /ma byas yon bdag bsod nams nyams/ /dkyil 'khor 'khor lo 'di nyid du/ /dam tshig sdom pa ma gcig na/ /'khor lo'i dbang phyug de yis ni/ /rnal 'byor bsdu bar mi bya'o//gzhan gyi rgyud kyi bslab byar mngon/ /gnas khang gzhan du mchod par bya'o/ /'di nyid lung dang bcas pa'i phyir/ /bya ba don dang bcas par 'gyur/ /kha cig rnal 'byor rnal 'byor ma/ /sgom rim gzhan du gyur pa na/ /rnal 'byor lhag pa'i lha la mchod//de yi rjes su rim pa 'dis/ /skad cig byed pa'i rnal 'byor gyis/ /bsgrub bya de yi lha mchod pa/ /'di nyid yang dag mtshan nyid yin/ /tha dad so so'i rgyud dag gis/ /bslab pas grol bar 'dod pa la/ /brda yi rim pa so so yi/ /phan tshun dam tshig sbyor mi shes/ / 'khor lo'i cho ga nyams pa nyid/ /de rnams mgron gyi rnam gzhag go /de nas lha yi nga rgyal gyis/ /gong du gsungs pa'i rnal 'byor la/ /maN+Dal sngon du 'gro ba yis/ /sngags kyis mchod la gsol ba gdab/ /rnal 'byor kun spyod la sogs pa'i/ /'khor lo sdom pa'i rgyud kyis ni/ /nag po'i phyogs dang dkar phyogs kyi//bcu pa la ni de rab mchod/ /yi dwags zla phyed bcu bzhi dang / /de bzhin du ni brgyad pa la/ /dpal ldan dgyes mdzad rdo rje mchod/ /dus kyi 'khor lo gnyis la/ /gsang ba 'dus pa zla re bzhin/ /lnga brgyad bcu dang bcu bzhi dang / /de bzhin bco lnga nag phyogs la'ang /lnga ste dus ni bcu ru 'gyur/ /de dag dus kyi khyad par ro/ /'dir ni rtag tu phun tshogs sam/ /ji ltar 'dod cing ji ltar nus/ /grub par nus na nyin re'am/ /lo zla kun du bya ba'o/ /gnas ni dben par gsang ba yi/ /'khor lo rab tu bskor bar bya/ /phyag rgya chen po thig le las//thams cad 'jigs pa spangs pa yi/ /skye bos dben zhing yid 'phrog pa/ /grong ngam ldum ra nags tshal dang / /dur khrod ri yi phug tu'o/ /dang po yid 'jug byi dor bya/ /dkyil 'khor rnam par me tog dgram/ /rdo rje phreng ba'i rgyud las ni/ /me tog sna tshogs bkram pa yi//gzhal yas khang gis rnam par spras/ /de dag gnas kyi rnam bzhag go/ /gang zhig dam tshig med par ni/ /bu la sogs pa'ang mi gzhug go/ /ji skad sdom pa 'byung ba las/ /yongs su grub pa'i gnas dag dang / /gdan la 'jug par bya ba ni//rgan dang gzhon pa'i dbye bas der/ /slob dpon rjes su 'jug par bya/ /snod dang mi ldan nga rgyal che/ /bla ma'i skyon rtog shes rgyud rtsub/ /gong ma'i dbang gis ma smin pa/ /rang gi bu dang chung ma dang / /de bzhin bran dang bran mor bcas/ /dngos grub 'dod phyir sgrub pa pos//dam tshig 'di dag gzhug mi bya/ /de ltar 'di dag gzhug pa na/ /rmongs dang dngos grub ring bar 'gyur/ /dam tshig bral gyur sdug bsngal zhing / /de bzhin lus ngag yid kyis myong / /gnas nas 'thon dang phun tshogs nyams/ /sna tshogs sdug bsngal myong ba nyid/ / sgrub pos 'di bzhin mchod pa'i yul/ /pha rol rnal 'byor dngos grub nyams/ /dam tshig med pa'i 'khor lo ni/ /nam yang bskor bar mi bya'o/ /mched yul rnam par bzhag pa ni/ /tshul dang mthun pa'i gnas dag tu/ /snyan gsan phab pa'i rnal 'byor pa/ /slob dpon rjes su 'jug par bya'o//phyi ru rnal 'byor khrus byas nas/ /sgo dag skyong ba'i slob dpon la/ /tshigs bcad 'di yis 'jug par bya/ /khro bo sngon po mdzes pa ste/ /khyod ni dam tshig yid du 'ong / /nor bu rin chen spras pa yi/ /dbyug pa phyag na bsnams pa nyid/ /bdag ni 'khor ba las bsgral phyir//rnal 'byor tshogs kyi dbus dag tu/ /bzang po'i sgo ni phye nas su/ /dpa' bos gnang gis gtong du gsol/ /nang du stan la rgan rim gyis/ /dkyil 'khor 'khor lo'i rim pa 'am/ /yang na gral gyi rim pa'o/ /de nas slob dpon yon bdag gis//ri rab steng du skad cig la/ /gnas pa'i gzhal yas khang dkyil du/ /lhag pa'i lha yi gzugs su blta/ /dam tshig sems dpa'i rang bzhin la/ /ye shes sems dpa' gzhug par bya/ /ar+g+ha dang ni zhal bsil dang / /bsang chu sngon du 'gro ba yis//me tog phreng ba spos la sogs/ /thun mong gi ni mchod pa dbul/ /yon gyi bdag pos bstod pa bya/ /dpal ldan rdo rje mkha' 'gro ni/ /mkha' 'gro ma yi 'khor los sgyur/ /ye shes lnga dang sku gsum nyid/ /'gro ba skyob la phyag 'tshal bstod/ /ji snyed rdo rje mkha' 'gro ma//kun du rtog pa'i 'ching gcod cing / /'jig rten bya ba rab 'jug ma/ /de snyed rnams la phyag 'tshal lo/ /yod med rtog pa las grol zhing / /'khor 'das rnam pa gnyis med pa/ /dpe med bde bas gang gyur pa'i/ /'khor lo'i dpa' bo la sogs bstod/ /'dis ni mngon par brkyang phyag 'tshal//slob dpon rgyud kyi dbye bas der/ /ting nge 'dzin gyi rim pas ni/ /rang gi lha yi gzugs su 'gyur/ /ji lha'i rdzogs pa'i rim pa bsgom/ /yon bdag yi dam gzhan yin na/ /sngon la rang gi yi dam ste/ /rjes la skad cig nyid la ni/ /yon bdag 'dod lha'i rnal 'byor bsgom//rgyud las gsungs pa'i mtshan nyid can/ /las kyi rdo rje'i bya ba ni/ /ji skad bde mchog 'byung ba las/ /gtsang zhing zhi la blo gros ldan/ /rmongs dang ser sna rnam par spang / /thams cad dang ni mthun par blta/ /las kyi rdo rjer der rtog go/ /de bzhin rdo rje phreng ba las//khyod ni rang byung rdo rje sems/ /mtshungs med las kyi rdo rje nyid/ /de nas sna tshogs ston mo dang / /sha dang chang ni mnyam por sbyor/ /longs spyod yid 'phrog bde ba can/ /dpal ldan rdo rje sems dpa' mnyes/ /a mra dang ni pa nas/ /mi dim na rI ke la sogs//'bras bu rnam pa sna tshogs pa/ /tshogs kyi dkyil du dbul ba ni/ /yang dag sbyor ba'i rgyud las gsungs/ /'phags pa phyag na rdo rjes gsungs/ /ji ltar tshogs pa'i rnal 'byor la/ /bdud rtsi ri lu'i chu yis bsang / /sngon du gtor ma sbyin par bya/ /phyag rgya chen po'i thig le las//thog mar gtor ma chen po ni/ /sna tshogs pa yi bza' ba dang / /btung ba dang ni ldan pa nyid/ /thog ma bar dang tha ma ni/ /lhag pa lha yi rnal 'byor gyis/ /gtor ma dbul bar bya ba ni/ /mdun du dri bzang sogs pas byug /dri yis thig les dkyil 'khor la//rang gi lha yi 'khor lo ni/ /cho ga bzhin du bskyed la mchod/ /dam tshig sems dpa' mkha' nyid las/ /ye shes sems dpa' dgug par bya/ /de yi rtsibs bcur khro bo bcu/ /srung ba'i 'khor lo'i lte ba la/ /sgrub pa po yi lha nyid de/ /srung ba'i 'khor lo'i phyi rol du//'khor dang bcas pa'i phyogs skyong dang / /zhing skyong dur khrod la sogs pa/ /ji ltar mngon rtogs sngags kyis ni/ /skad cig gis ni rang gi lha/ /dkyil 'khor 'khor lo'i gzugs su blta/ /yum dang bcas pa nyid du bsgom/ /dam tshig la ni gzhug par bya/ / ji ltar cho ga la sogs pa/ /gtor ma bdud rtsir byin brlabs te/ /rang rang sngags kyis dbul bar bya/ /khyad par so so'i mngon rtogs ni/ /gzhung mangs 'jigs pas ma bris shing / /yongs su grags pa cung zad bkod/ /de nas g.yon pa'i ming med dang / /rgan po'i sor mo gnyis sbyar nas//shes rab khu ba byin gyis brlab/ /de yi mdun du chos 'byung bri/ /shes rab thabs kyi khu bas gtor/ /lhag pa lha yi dkyil 'khor ni/ /gzugs brnyan bzhin du gsal bar blta/ /srung bas byin gyis brlabs pa'i gnas/ /ting 'dzin byed pa rgyun mi bcad//de nas las kyi rdo rje yis/ /slob dpon la ni snod gnyis dbul/ /gzhan pa rnams la re re'o/ /mchod rdzas bla ma nyis 'gyur ro/ /de nas gzhan rnams mnyam por shes/ /'ga' zhig tshim par ma gyur na'ang / /rang gis blang bar mi bya ste/ /las kyi rdo rje las blangs na//ltung ba nyid du mi 'gyur ro/ /gang zhig lag nas lhung ba dag /dngos po gzhan gyis dgab par bya/ /'dren pas ha cang gang ba min/ /len pas ha cang stong pa min/ /phan tshun gcig la gcig min bzhin/ / 'dod ces ngag gis smra ba min/ /'dren pas pad kor phyag rgya ste/ /g.yon pas steng du bskyod par bya/ /len pas kyang ni de bzhin no/ /phyag 'tshal nas ni dbul bya zhing / /'dren pas de bzhin shes par bya/ /g.yas pa'i lha nga sar btsugs te/ /thog mar thabs dang shes rab la//gzigs shig mdzes pa dam pa'i chos/ /'di la the tshom bya mi rung / /bram ze khyi dang gdol pa yang / /rang bzhin gcig tu dgongs te rol/ /tshigs bcad 'dis ni sbyin par bya'o/ /yang ni len pa po yis ni/ /bde gshegs chos la rin thang med/ /'dod chags la sogs dri ma bral//gzung 'dzin rnam par spangs pa yis/ /de kho na nyid la skyabs mchi'o/ /tshigs bcad 'dis ni len par bya'o/ /bla ma'i bka' drin gnang ba yi/ /snod ni sa la gzhag mi bya/ /gnang ba thob gyur gzhag par bya'o/ /de las gzhan du chad par 'gyur//slob dpon rjes gnang ma byin par/ /rnal 'byor bza' btung don gzhan min/ /slob dpon thog mar rang gi ni/ /phyag rgya mchod la de nas rol/ /btung ba dga' ba bskyed pa tsam/ /de bas lhag dang chad pa min/ /bde ba bskyed phyir btung ba ste/ /myos pa'i phyir ni ma yin no//rnal 'byor lha yi nga rgyal dang / /dus rnams kun du bya ba nyid/ /rdo rje phreng ba'i rgyud las ni/ /tshogs kyi 'khor lor 'dus pas na/ /gtam gyi rnyed pa la sogs pa/ /de bzhin g.yeng ba spang bar bya/ /mchil ma 'dor la sogs pa dang / /smang ra 'thog dang dgod pa dang //rkang lag brkyang bar mi bya'o/ /yang yang ldang dang 'dug pa dang / /mgrin pa bsgyur sogs rtag tu spang / /gang zhig dgos pa'i dbye ba la/ /brda skad phyag rgya bgo bar bya/ /'dus pa'i dkyil 'khor dbang phyug gis/ /gnang ba byin par ma gyur par/ /gzhan du glu dang gar dang ni//de bzhin rol mo 'khrol la sogs/ /zab mo'i skad sogs 'dri ba min/ /gnang ba thob nas ci bder 'gyur/ /gang zhig bza' dang btung ba la/ /thams cad bdud rtsir sbyar byas la/ /de nas rang gi lte bar ni/ /gang zhig dgos pa'i dbye ba yis/ /lha yi 'khor lo gnas par bsam//rang gi lag pa g.yas dang g.yon/ /blugs gzar dgang gzar rang gzugs nyid/ /lte ba'i lha la mchod pa'i tshul/ /longs spyod tshogs kyis mchod par bya/ /de bzhin gzugs la sogs pa'i yul/ /mig la sogs pa'i dbang po nyid/ /ji ltar lha yi gzugs kyis ni//rnam par dag pa'i ro gcig pa'i/ /phan tshun shes pa nyid kyis so/ /de yang rdo rje phreng ba las/ /lte ba pad+ma'i dbus su ni/ /dpa' bo dbang phyug dran pa nyid/ /gang zhig phan tshun gcig la gcig /rnam par dag par mi shes na/ /de la 'khor lo'i 'bras bu med//thams cad dngos grub 'bras nyams 'gyur/ /gang du rim pa 'di yis ni/ /phyi dang nang gi bdag nyid kun/ /ro gcig par ni spyad byas nas/ /de ni 'grub par 'gyur ba nyid/ /yang dag tshogs 'khor 'bras bu 'byin/ /myos byed bde ba bskyed pa'i tshe//glu dang gar ni byed 'dod na/ /gnang ba thob nas rdo rje yi/ /glu gar rnal 'byor pa yis bya/ /de yang brtag gnyis rgyal po las/ /glu ni rnam dag sngags su gnas/ /gar ni sdom pa byed pa nyid/ /de yi phyir ni glu dang gar/ /rnal 'byor pa yis rgyun du bya/ / dga' ba rdo rje bsdams pa yis/ /rkang pa rdo rje rtse gcig dang / /rnal 'byor mnyam par gzhag pa yis/ /bde ba bskyed phyir gar nyid de/ /thar pa'i rgyur ni brjod par bya'o/ /rgyud las gsungs pa'i rim pa ste/ /gzhan du gnang ba ma yin no/ /de bzhin rdo rje phreng ba las/ / dga' ba bskyed nas gnang ba yis/ /glu dang gar ni bya ba nyid/ /gang zhig rdo rje bsdams la sogs/ /de bzhin lha ni mnyes pa nyid/ /rgyud las gsungs pa rdo rje'i glu/ /kol+la i reT+Thi A bo lA/ mum+mu Ni re ka k+ko lA/ g+ha Ne kr-i pi Ta ho bAdzra i/ ka ru Ne ki a i Na ro lA/ta hiM ba la khAdz+dza i/ gA D+heM ma a NA pidz+dza a i/ ha le kwa ye kA liny+dza ra pa Ni a i/ dun+du ra bAdz+dzi a i/ tsa u sa ma kats+tshu rI si h+la/ kap+pu ra lA i a i/ mA la a n+d+ha Na sA liny+dza/ ta hiM b+ha ru khA i a i/ phreM kha Na kha Ta ka ren+te/ shu d+d+ha a shud+d+ha Na mu Ni a i/ni raM su aM ge ts+tsha DA wi/ ta hiM dza sa rA wa pa Ni a i/ ma la a dze kun+du ru pA Ta i DeN+Di ma ta hiM Na bIdz+dza a i/ grub thob bla mas gsungs pa'i dbyangs/ /stong pa snying rje dbyer med par/ /don ston rdo rje'i glu nyid do/ /gzhan du rtogs pas phan tshun du//sbrel ba rdo rje'i glu ma yin/ /rdo rje rkang pa'i gar la sogs/ /gzhan du grags phyir 'dir ma spros/ /'dir ni cho ga ji bzhin du/ /glu gar la sogs rim pa ni/ /byin gyis brlab par 'gyur ba nyid/ /de la thun mong byin rlabs rtags/ /de yang brtag gnyis rgyal po las//gsungs pa rim bzhin shes byas te/ /'khor lo'i dbang phyug mdun du ni/ /gang zhig gus pas glu dang gar/ /byas pas dri yi mtshan nyid ni/ /thog mar sgog pa'i dri nyid de/ /de nas yang ni bya rgod dri/ /ga pur ma la ya yi dri/ /byin rlabs glu yi mtshan nyid do/ /ngang pa dang ni bung ba'i sgra//thos pas glu yi khyad par nyid/ /ba lang tshe yi sgra nyid ni/ /phyi rol nye ba'i mtshan nyid do/ /khyad par byin gyis brlabs pa'i rtags/ /de yang rdo rje phreng ba las/ /gal te thun mong rnal 'byor ma/ /'dus pa'i tshogs su 'ongs pa na/ /g.yon pa'i ts+tsho ma'i brda yis ni/ / bde ba'i phyag rgya bya ba nyid/ /de la sgrub pa po yis ni/ /gtam 'dri rnam rtog byar mi rung / /cung zad dri bar 'dod na yang / /gang zhig rdo rje slob dpon nam/ /yang na las kyi rdo rje yis/ /brda dang phyag rgya 'dri bar 'gyur/ /sna tshogs gzugs kyi rnal 'byor ma/ /yang dang yang du 'gro zhing 'ong //de la the tshom za ba dang / /ya mtshan 'jigs par byed don sogs/ /sgrub pa po yis mi bya ste/ /byas na dngos grub nyams pa nyid/ /de nas dkyil 'khor sbud pa na/ /lhag ma'i gtor ma sbyin par bya/ /de yang rdo rje phreng ba las/ /lhag ma'i gtor ma'i sbyor ba yis//dngos grub rnal 'byor chen por 'gyur/ /oM k+Shi uts+tshi N+De k+She tra pA lA ya swA hA/ /sngags 'di brjod cing kha phrus gdab/ /yang na slob dpon sngon 'gro bas/ /gang zhig ma mthong gyur pa na/ /rtags kyi sbyor ba'i mtshan nyid ni/ /rnal 'byor gyis ni shes par bya//gang zhig byad zlum kha dog dmar/ /bzhin bzang smin ma ring ba ni/ /'od dpag med kyi rigs shes bya/ /de la rus sbal phyag rgya bstan/ /cung zad sbom zhing mig dkyus ring / /dkar ser mdog can yid 'phrog ma/ /sna tshogs gos ni 'dzin pa ste/ /ri mo gsum 'greng dpral bar mtshan//gang du gnas pa'i sa dag tu/ /grong pa'i shi sogs gtam smra ba/ /'di nyid rin 'byung rnal 'byor ma/ /dpal ldan mkha' 'gro zhes byar blta/ /rtse gsum pa yi phyag rgya bstan/ /g.yon brkyang ba yi gar stabs kyis/ /de yi mdun du blta bar bya'o//lag tu g.yon pas byin nas ni/ /phyag rgya rab tu ston par byed/ /kha dog gnag cing gos nag 'dzin/ /skra li dpral ba gzhu yi dbyibs/ /mtshan ma'i rnam par rtog par ston/ /sems 'gro ba yi mar rab grags/ /g.yon bskum dge ba'i gar gyis ni//phyag rgya rab tu bstan par bya/ /mi bskyod pa yi rigs su shes/ /g.yon pa'i stangs kyi lan yang 'debs/ /lus sbom gsus pa cung zad 'phyang / /mig yangs rdzi ma mang ba la/ /byin pa sbom zhing mdzes pa ni/ /sa 'og grub pa shes pa ste/ /rnam snang rigs su shes pas na//de la dung gi phyag rgya bstan/ /mig skam ba spu thams cad langs/ /lus skem lag pa ring ba la/ /mkha' 'gro zhes sgra rab tu sgrogs/ /'di nyid don grub rigs su shes/ /de la rab blta mtha' ma bskor/ /lag pa g.yon gyi dbye ba yi//ba dan phyag rgya bstan par bya/ /ji ltar 'di dag la mkhas pas/ /rab tu 'bad bas shes par bya/ /dri ba'am phyag rgya byed pa na/ /de yi don gyis mchod par brjod/ /gang zhig 'di rnams thams cad la/ /dpa' bo rkyang pa'i bya ba ni/ /dpa' bo'i ston mo zhes su brjod//tshogs kyi dbang phyug de lta min/ /de bzhin dpa' mo rkyang pa la/ /dpa' mo'i dbang phyug ston mo nyid/ /de ltar 'khor lo'i dbang phyug la/ /shes rab thabs dang bcas pa nyid/ /gzhan yang gang zhig stobs dang ni/ /myos byed khu ba rkyang pas ni//'phags pa phyag na rdo rje'i zhabs/ /stobs dang myos byed khu bar ni/ /mi ldan yon tan bsod nams nyams/ /gtso bo tshogs kyi dbang phyug gis/ /khyad par shes rab g.yon du bzhag /'dir ni ji ltar 'byor pa dang / /ji ltar nus pa'i rim pa yis/ /lnga yi bdag nyid dkyil 'khor sogs//rnam par dag pa'i cho gas mchod/ /thams cad rang gi rnal 'byor gyis/ /'dir ni dge bar 'dod pas na/ /rnam dag lha yi rnal 'byor gyis/ /slob mas tshogs kyi rnal 'byor goms/ /nang gi dbang phyug gyur pa ste/ /rgyun par shin tu goms pas na//gang tshe cho ga 'di yis ni/ /rim pa 'di ni rnam par spyad/ /de tshe rtag tu goms pas na/ /spros bcas spros med rnam par gzhag /de nas sgrub pa po yis ni/ /zhal bsil phyag phyis go la dbul/ /yon tan sogs pas mnyes par bya/ / rang gi lha yi 'khor lo nyid/ /dang po thar par 'gyur ba ste/ /de nas bsod nams bsngo bar bya/ /bzod par gsol la tshogs kyi ni/ /'khor lo gshegs par bya ba nyid/ /bdag nyid dbang phyug gyur pas na/ /gzhan la phyag ni bya mi dgos/ /cho ga'i rim pa 'di yis ni//ji ltar rigs par 'bad gyur na/ /de yi bsod nams mtha' ma ni/ /tshad gzung nus pa ma yin no/ /de ltar phyag na rdo rje yis/ /gsungs pa'i rjes su 'brang bar 'gyur/ /tshogs kyi 'khor lo'i cho ga yid bzhin nor bu zhes bya ba paN+Di ta rat+na rak+Shi tas mdzad pa rdzogs so/