CLOSE WINDOW

D2486
བོད་ཡིག

/[ ]@##/ /rgya gar skad du/ badzra yA na mU la patrI TI kA/ bod skad du/ rdo rje theg pa'i rtsa ba'i ltung ba'i rgya cher bshad pa/ 'jam dpal gzhon nur gyur pa la phyag 'tshal lo/byang chub sems dpa' sku gsum sprul/ /sku rnams 'dul ba'i rgyal po dang / /'phags dang zab pa'i don ston dang / /rna brgyud thob pa'i slob dpon ni/ /bcu gnyis tshogs la bdag phyag 'tshal/ /rin chen lta bu'i rgyud chen las/ /gzhi mo lta bur bzhag nas ni//rgyud rnams kun las btus nas kyang / /sgrub pa'i don du bshad par bya/ /de la/ dam tshig nyams dang ma nyams dang / /bskang ba'i cho ga gsum du bstan/ /rdo rje slob dpon dam tshig ni/ /nyams pa'i rab 'bring gsum dang dgu/ /ngan sems bcas nas slob dpon la//tshig rtsub mtshon phyung rgyab nas ni/ /yun ring mthol bshags mi byed pa/ /nyams pa che ste 'bring gi ni/ /mtshon phyung la sogs brgyab nas su/ /cung zhig mthol bshags mi byed pa/ /'bring yin tha ma nyams pa ni/ /ngan sems sgo nas bshags nas su//mthol bshags mi byed zla ba'i bar/ /tha ma yin te gsum ka la/ /sems dang dngos dang sogs pa la/ /bzlog nas ches cher 'khrul pa dang / /go mnyam pa ni mtsho skyes gsungs/ /yang na dgu yi rab kyi rab/ /bsam pa gong rdzogs slob dpon bkrongs/ / lo ru bshags pa mi byed pa/ /'bring ni gong bzhin rdzogs nas su/ /lo phyed bshags pa mi byed pa/ /tha ma zla bar mi bshags pa'o/ /slob dpon ma bkrongs gsum pa rdzogs/ /lo ru mi bshags 'bring gi rab/ /'bring gi lo phyed tha ma ni/ /zla ba gcig go tha ma'i bar//gnyis po rdzogs nas lo dus su/ /'bring ni lo phyed du ni bstan/ /tha ma zla ba gcig gnas pa'o/ /slob dpon gnyis su bstan pa la/ /rdo rje slob dang slob dpon tsam/ /lus ngag yid gsum byin brlabs pa'i/ /rdo rje slob dpon de la ni/ /thams cad brtsi bar bya ba yin//bstan bcos slob dpon dgu yi ni/ /tha ma tsam mam yang na ni/ /yan lag mgo mnyam tsam du dpyad/ /rdo rje slob dpon gsum du ste/ /rtsa ba dang ni yan lag gnyis/ /dgu ka brtsi bar bya ba yin/ /phyag rgya drug pa man chad do/ /las kyi slob dpon gsum pa yin//rtsa ba man ngag gnyis po yang / /rtsa ba man ngag bstan pa ni/ /man ngag pas ni rtsa ba che/ /man ngag gis ni man ngag che/ /rtsa ba chung na go mnyam mo/ /man ngag gis ni man ngag shin tu che/ /gong ma de las bzlog ste bstan//lung ston pa yi slob dpon ni/ /phyag rgya nyid dang go mnyam mo/ /slob dpon gyi rtsa ba'i dam tshig go/ /spun gyi dam tshig nyams pa la/ /rab 'bring bsdus rgyas dgu dang gsum/ /rab kyi yang rab nyams pa ni/ /bsam ngan mtshon dbyug bsnun nas su/ /shi nas lo ru mi bshags pa//yang rab yin te rab kyi 'bring / /lo phyed du ni shes par bya/ /rab kyi tha ma zla ba gsum/ /'bring gi rab kyi dam tshig ni/ /zla ba gcig tu shes par bya/ /'bring gi 'bring ni zla ba phyed/ /'bring gi tha ma zhag gcig go/ /tha ma'i dam tshig nyams pa ni//tshig rtsub smras nas zla gcig tu/ /mthol bshags mi byed tha ma'i rab/ /'bring ni zla phyed shes par bya/ /tha ma zhag gcig yan chad do/ /gsum du phye ste bstan pa ni/ /mtshon dbyug la sogs brgyab nas su/ /shi nas cung zhig mi bshags pa/ /de ni rab yin 'bring gi ni//mtshon phyung brgyab nas ma shi bar/ /tha ma tshig rtsub smras nas ni/ /zhag 'das mthol bshags mi byed pa/ /rdo rje spun gyi dam tshig nyams pa'i tshad do/ /bde gshegs bka' las 'das pa yi/ /dam tshig nyams pa'i tshad bstan pa/ /dam tshig sa ya 'bum sde yang //bde gshegs bka' ru 'dus pa yin/ /'di ni khyab che khyad par ni/ /rdo rje slob dpon byed pas su/ /slob dang 'gro ba'i don du yang / /cho ga tshul bzhin ma gyur pa/ /lo ru byed na rab kyi rab/ /zla dgur byed na 'bring yin no/ /zla drug tha mar shes par bya//'bring gi rab ni zla ba gsum/ /'bring gi 'bring ni zla gcig go/ /'bring gi tha ma zla phyed do/ /tha ma'i rab ni zhag gcig go/ /khengs grags 'dod pa'i dbang gyur nas/ /cho ga thams cad 'khrul pa'am/ /'bring ni cho ga phyed 'khrul pa/ /tha ma cho ga gcig 'khrul pa//de rnams rgyu yi rim pa yang / /'khrul pa'i cho ga rgyun byed la/ /shin tu che bar gyur pa yin/ /bshags pa yun ring mi byed pa/ /bshags la brtson na de la smad/ /'khrul pa'i cho ga rgyun du ni/ /mi byed gcig gnyis de la smad/ /che chung yod na de la bstod//de ltar rab 'bring dgu gsum ni/ /mkhas pas brtags nas shes par bya/ /yang na/ sgrub dang slob dpon gnyis ka yang / /bde gshegs bka' ni khyab che bas /dod mo dbang bskur byas nas su/ /dbang dang dam tshig mi shes dang / /snod min bstan par mi bya la//dbang la sogs pa ston pa dang / /yi dam lha ni brjed nas su/ /slar yang len par mi byed dang / /thun mtshams sgom par mi byed dang / /zas dang gtor ma'i rnal 'byor dang / /phyi nang sbyin sreg rnal 'byor dang / /snying po sngags dang phyag rgya dang / / mchod pa'i dus kyi 'khor lo sogs/ /yi dam lha dang slob dpon gyi/ /mdun du dam bca' byas nas ni/ /spangs dang ma bshags brjed pa rnams/ /rdo rje dril bu phreng ba gsum/ /mi bcang rab gnas ma byas dang / /rgyu dang tshad sogs 'khrul pa dang / /'tshong dang bgo dang gte 'jug dang //rab gnas byas la shes par bya/ /ma byas pa la chung ngu 'ong / /po ti glegs bam la sogs dang / /kha T+wAM la sogs phyag mtshan rnams/ /gong bzhin rab gnas byas pa dang / /ma byas pa ni che chung ngo / /khyad par sgrub pa po yis ni/ /rdor dril la sogs thams cad kun//gtso bo la sogs mchod byas la/ /chos mthun yid 'ong gzung bar bya/ /so sor thar dang byang chub sems/ /rig 'dzin nang gi sdom pa gsum/ /gnyis ni rig 'dzin rten yang yin/ /yang na rig 'dzin nang du 'dus/ /mi dge la sogs bcu po yang //gsum du 'dus te khyad par ni/ /spang ba dang ni mi spang dang / /dngos dang bsam pa dus dang ni/ /gnas skabs dang ni rnal 'byor gyi/ /blo yi khyad par rim pa yis/ /shes par de ni ma byas na/ /byas na yang ni ltung bar 'gyur/ /ma byas na yang ltung bar 'gyur/ /de bas slob dpon la gus pas//man ngag gis ni shes par bya/ /chos spyod la sogs bcu po yang / /man ngag bsgom pa ma shes na/ /mdor na bka' yi chos rnams kun/ /thams cad chos tshul bzhin shes bya/ /de ltar mi shes dam tshig nyams/ /sku dang me tog dman pa dang //slob dpon la sogs grib ma la/ /'gom dang brdzi bar byed pa dang / /dbang dang brdzi bar mi byed kyi/ /bar gyi dam tshig de dag kun/ /lo dus lon la chen por 'gyur/ /lo phyed lon na 'bring du 'gyur/ /tha ma zla gcis shes par bya/ /bde gshegs bka' yi dam tshig go//sems can rnams la byams pa yi/ /sems spangs pas ni dam tshig nyams/ /de yi rab 'bring bstan pa ni/ /zhing dag pa yi gang zag la/ /khros dang byams sems spangs nas ni/ /mtshon dbyug la sogs bsnun nas ni/ /lo ru bshags pa mi byed pa//rab kyi rab yin 'bring gi ni/ /de phyed du ni shes par bya/ /tha ma yi ni zla gcig go/ /zhing ma dag pa'i gang zag la/ /gong bzhin byas nas lo ru ni/ /mi bshags pa ni 'bring gi rab/ /'bring gi lo phyed tha ma ni/ /zla ba gcig tu shes par bya/ /sems can la sogs gzhan po la//gong bzhin byas nas lo ru ni/ /mi bshags pa ni tha ma'i rab/ /'bring ni lo phyed tha ma gcig /zhing dag pa yi gang zag la/ /nyin gcig mang por rdung byed la/ /rab kyi yin te 'bring gi ni/ /ma dag pa yi gang zag la/ /tha ma sems can phal pa la//mang po rnams ni rdung byed la/ /de las mang nyung 'khrul pa dang / /sems dang dngos dang sogs pa rnams/ /slob dpon zhal nas shes par bya/ /dag dang ma dag gang zag dang / /sems can gzhan la sogs pa la/ /lus ngag yid gsum gdungs nas ni/ / 'chi la thug pa'i sems can la/ /nyin dang mtshan ni dus drug tu/ /sbyin pa rnam bzhis mi skyong na/ /dam tshig nyams te gong ma bzhin/ /slob dpon zhal nas shes par bya/ /byams sems spangs pa'i dam tshig go/ /chos kyi rtsa ba byang chub sems/ /de spong dam tshig nyams pa ni//dam tshig rab 'bring tshad bstan pa/ /sngags kyi rnal 'byor sems bskyed nas/ /slar log nyan thos sems bskyed la/ /zhugs nas lo ru gnas pa yin/ /bshags pa mi byed rab yin no/ /'bring gi lo phyed tha ma ni/ /zla ba gcig tu shes par bya/ /zla phyed zhag bdun zhag gcig ni//tha ma yi ni rab 'bring gsum/ /gong ma de ni 'bring gi yin/ /rab ni mu stegs sems su ni/ /zhugs nas lo gcig lo phyed dang / /zla gcig tha ma'i rab yin no/ /sems spangs pa yi dam tshig go/ /rang dang gzhan gyi grub pa'i mtha'/ / chos la smod pa'i dam tshig gi/ /rab 'bring gi ni tshad bstan pa/ /chos la smod nas lo ru ni/ /mi bshags pa ni rab yin no/ /'bring ni lo phyed tha ma ni/ /zla ba gcig tu shes par bya/ /rgyun du smod cing mi bshags pa/ /lo dang lo phyed zla ba dang / /rab kyi rab 'bring gsum yin no//gong ma 'bring yin tha ma ni/ /zla phyed zhag gcig zhag bdun ni/ /tha ma yi ni rab 'bring gsum/ /chos la smod pa'i dam tshig go/ /yongs su ma smin sems can la/ /gsang ba sgrogs pa'i dam tshig ni/ /rab 'bring gi ni tshad bstan pa/ /ma smin pa la gnyis yod de//dbang bskur de ni ma byas dang / /glen pa lkugs par gyur pa gnyis/ /de lta bu yi gang zag la/ /man ngag gsang ba bstan nas kyang / /lo yi dus su mi bshags pa/ /'bring gi rab yin 'bring gi lo/ /phyed 'bring yin te tha ma ni/ /zla ba gcig tu shes par bya//de 'dra'i gang zag mang po la/ /yang nas yang du sgrogs pa ni/ /lo gcig lo phyed zla phyed ni/ /rab kyi rab 'bring gsum yin no/ /mi zab chos su gyur pa yi/ /lo gcig tu ni gnas pa dang / /tha ma'i rab yin tha ma yi/ /lo phyed zla gcig gnyis po yin//yang na zab pa'i don rnams la/ /zla phyed zhag bdun zhag gcig ni/ /tha ma yi ni rab 'bring gsum/ /yang na de gsum 'khrul ka yi/ /slob dpon mkhas pas shes par bya/ /gsang ba sgrogs pa'i dam tshig go/ /phung po sangs rgyas lnga bdag la/ /brnyas par byed pa'i dam tshig ni//rab 'bring tha ma'i tshad bstan pa/ /phung po lha yi nga rgyal du/ /ma shes shes nas spangs pa ni/ /bshags pa mi byed lor lon pa/ /'bring gi rab yin 'bring gi ni/ /lo phyed tha ma zla ba gcig /zla phyed zhag bdun zhag gcig ni//tha ma'i rab 'bring gsum yin no/ /ma shes steng du yang nas yang / /smod par byed cing gdung ba ni/ /lo gcig lo phyed zla gcig ni/ /rab kyi 'bring yin gsum yin no/ /phung po brnyas byed dam tshig go/ /rang bzhin dag pa'i chos rnams la/ /som nyi za ba'i dam tshig ni//rtsa ba rlung gi man ngag la/ /lan cig dka' ba la sogs kyi/ /zab mo'i don la lo dus su/ /the tshom za zhing mi bshags pa/ /rab kyi rab yin 'bring gi ni/ /tha ma zla ba lo gcig go/ /lhan cig bka' bca' ma gtogs pa'i/ /lhag ma rnams la the tshom ni//lo dus zla ba 'bring gi rab/ /lhag ma gnyis po gong bzhin bya/ /sgyu ma lta bu'i ting 'dzin las/ /lha yi rnal 'byor gnyis dang ni/ /mi shes phyi nang thun mong gsum/ /yang na gong ma gnyis po yi/ /zla phyed zhag bdun zhag gcig ni/ /tha yi rab 'bring gsum yin no//som nyi za ba'i dam tshig go/ /gdug la rtag tu byams ldan par/ /byed pa'i dam tshig nyams pa ni/ /gdug ces bya ba'i slob dpon ni/ /rdo rje spun dang rnal 'byor gyi/ /dgrar gyur bstan pa 'jig pa dang / /de la sogs pa byed pa rnams/ /gdug pa zhes ni bya ba yin//de lta bu yi gdug pa ni/ /mthol bshags mi byed lo ru ni//gnas pas rab kyi rab yin no/ /lhag ma gnyis po gong bzhin no/ /slob dpon ma gtogs rdo rje spun/ /'bring gi rab 'bring gsum yin no/ /gnyis po ma gtogs lhag ma ni/ /tha ma'i rab 'bring gsum yin no//yang na de rnams gsum ka la/ /zhag grangs brtsi na gong bzhin no/ /gdug la byams pa'i dam tshig go/ /ming sogs bral ba'i chos rnams la/ /rtog par byed pa'i dam tshig ni/ /chos rnams spros dang bral ba la/ /lo gcig rtog par 'dzin pa dang //gzhan yang de la sbyor byed pa'i/ /bshags par mi byed pa yi mi/ /lhag ma gnyis ni gong bzhin no/ /gzhan la mi sbyor rang tsam ni/ /lo nas zla bar 'bring gi ni/ /rab 'bring du ni shes par bya/ /dngos por ma bzung tshol 'dod pa/ /de bzhin lo nas zla ba'i bar//tha ma'i rab 'bring gsum yin no//rtog 'dzin byed pa'i dam tshig go/ /sems can dad dang ldan pa yi/ /sems sun 'byin pa'i dam tshig ni/ /dad dang ldan pa'i gang zag rnams/ /zab mo'i chos las bzlog nas ni/ /mu stegs chos la sbyor byas pa/ /lo nas zla ba'i bar du ni//rab kyi rab 'bring gsum yin no/ /zab mo'i don las bzlog nas ni/ /nyan thos theg par sbyor byed pa/ /'bring rab gsum yin no bzhin tshad/ /zab mo'i don las bzlog nas ni/ /pha rol phyin par sbyor byed pa/ /tha ma'i rab 'bring gsum yin no/ / yang na/ pha rol theg pa bzlog nas ni/ /mu stegs theg par sbyor byed pa/ /'bring yin nyan thos zlog byed pa/ /tha ma yin te gsang sngags ni/ /rab yin yang na mang po rnams/ /zlog byed pa ni rab yin te/ /nyung ngu 'bring yin tha ma ni/ /sems sun 'byin pa'i dam tshig go//dam tshig rnams la ji bzhin rnyed/ /mi bsten dam tshig nyams pa'i tshad/ /rtsa ba dang ni yan lag gi/ /dam tshig nyin mtshan mi sdo dang / /spyod pa la sogs lnga po lnga/ /dang du blangs nas mi bsten pa/ /lo nas zla ba'i bar du ni/ /mi bshags rab kyi gsum yin no/ /rtsa ba dang du mi len par//'jog pa 'bring gi gsum yin no/ /yan lag mi len tha ma gsum/ /yang na zla phyed bzhag bdun du/ /zhag gcig pa ni 'bring gi gsum/ /nyin mtshan gcig la tha ma'i gsum/ /mi bsten pa yi dam tshig go/ /bud med shes rab rang bzhin can/ / smod par byed pa'i dam tshig ni/ /dper na ba lang ko ba nas/ /sgras mtshon bar du slob pa bzhin/ /bud med shes rab sgyu ma can/ /las kyi phyag rgya mtshan ldan la/ /brten nas de la lobs gyur na/ /yid kyi lha mo la brten nas/ /de nas gtum mo nyid la brten/ /da nas shes rab dga' ma la//lhan cig dga' ba'i bar du ni/ /brten nas shes rab rim par bskyed/ /de nas phyag rgya'i dngos grub 'thob/ /de ltar bud med shes rab la/ /smod cing spong bar byed pa ni/ /lo dus lon na rab kyi rab/ /phyed dang zla gcig gnyis su bstan//de lta'i shes rab rang bzhin la/ /rnal 'byor lam pa smod na ni/ /'bring gi gsum dang bstan pa yin/ /mtshan dang mi ldan thams cad la/ /rgyun du smod cing mi bshags pa/ /lo dus lon na tha ma'i rab/ /phyed dang zla gcig gnyis su bstan/ /shes rab smod pa'i dam tshig go//rtsa ba'i dam tshig rab 'bring nyams pa'i tshad bstan pa'o/ /yan lag dam tshig bstan pa ni/ /rnal 'byor sngags pas sngags pa ni/ /nan gyis len pa gsum du bsten/ /gzhan gyi bud med len pa dang / /rang gi rnal 'byor ma gnyis la/ / chags pa'i don du 'jug pa dang / /byin gyis brlab par mi byed par/ /tha mal spyod pas 'jug pa dang / /rtags dang mi ldan 'jug pa ni/ /rnal 'byor chags pa'i lam pas ni/ /dang po chags pa 'dul ba dang / /zab mo'i don la 'jug bya'i phyir/ /shin tu chags pa cher ldan pa//bde gshegs rgyal bas bstan pa yin/ /rnal 'byor grol ba'i lam pa la/ /gong ma de bzhin ma bstan te/ /las dang rnal 'byor dus su ni//yid kyi lha mo gzugs mdzes ma/ /tshogs kyi 'khor lo'am spyod dus su/ /mos pas de bsam dam tshig yin/ /rtags ldan brtan pa thob nas ni//mchog gi dngos grub myur 'dod pas/ /rnal 'byor ma yis lung bstan nas/ /mi de lha la sogs pa yis/ /zhag gcig zla gcig zhag drug tu/ /bsnyen pas mchog ni thob par 'gyur/ /chags med rnal 'byor mos pa yi/ /skad cig shes rab la brten nas//phyag rgya'i dngos grub thob par 'gyur/ /de don bya ba'i rim pa ni/ /sa la gnas pa'i mkha' 'gro ma/ /kho na nyid la brten pa yin/ /de ltar mi shes 'khrul par spyod/ /rgyun du spyod cing lo dus su/ /mi bshags de ni rab yin no/ /de bas nyung bar gyur pa ni/ / 'bring nyid du ni shes par bya/ /thabs cig spyod pa tha ma yin/ /nan gyis len pa'i dam tshig go/ /ma gsungs pa yi rig ma la/ /sngags pas bdud rtsi thob byed ni/ /bla ma rdo rje slob dpon gyis/ /man ngag rna bar ma brgyud par/ /nan gyis brtags nas tshul 'chos pa/ /rgyun du byed cing lo dus su//mi bshags pa ni rab yin no/ /de bas nyung ba 'bring yin te/ /gcig tsam byed pa tha ma yin/ /ma thob pa yi dam tshig go/ /tshogs kyi 'khor lo'i dam tshig go/ /bstan la 'thab mo rtsod byed pa/ /dbang bskur man ngag zab mo dang / /slob dpon gcig par ma gyur la//mi zab tshogs la bshad pa yi/ /dus su rtsod nas mtshon dbyug ni/ /'dres nas cung zhig mi bshags pa/ /rab kyi yin te 'bring gi ni/ /mtshon dbyug 'dres nas yun thung ba/ /tha ma tshig rtsub shin tu thub/ /shi bar gyur na slob dpon gyi/ /'bring po man chad brtsi bar bya//tshogs kyi dam tshig nyams pa'o/ /gsang chos yan lag shes gyur kyang / /gzhan la mi ston shes ngan ni/ /snod du gyur pa'i gang zag la/ /man ngag shes bzhin mi ston na/ /snod gyur mang la mi ston rab/ /nyung la mi ston tha ma gcig /yang na dus kyi gsum po ni//gong ma bzhin du shes par bya/ /lung mi ston pa'i dam tshig go/ /dad pa'i sems can chos kyi rgyu/ /gzhan gyi gtam byed byang chub sems/ /theg chen snod du gyur pa la/ /gus pas chos ni dri byed pa/ /lan mi 'debs te yi ge'i gtam/ /byed pa rab yin 'bring gi ni//lung ma bstan pa'i gtam byed cing / /tha ma nyan thos kyi ni gtam/ /dus gsum gong bzhin shes par bya/ /log par ston pa'i dam tshig go/ /nyan thos nang du zhag bdun 'dug /theg pa chen po'i chos la ni/ /thos par gyur nas skur pa yi/ /nang du zhag bdun 'dug nas ni//spangs nas spong byed lo dus su/ /mi bshags pa ni rab yin no/ /zhag gsum du ni gcig ni tha/ /de gnyis su ni gong bzhin no/ /yang na rigs 'drar gyur pa la/ /gnyis po man chad brtsi bar bya/ /zhag bdun nyal ba'i dam tshig go/ /rnal 'byor ye shes mi shes par//nga ni sngags pa yin zhes zer/ /rnal 'byor med pa'i ting 'dzin gyis/ /tshig tsam 'ga' yi nga rgyal gyis/ /sngags par khas 'ches yang nas yang / /lo dus mi bshags rab yin no/ /de bas nyung ltar shin tu nyung / / gnyis po yin par shes par bya/ /mi shes pa yi dam tshig go/ /snod min pa yi sems can la/ /phyi yi chos bshad yin pa la/ /gsang ba'i chos rnams 'chad pa ni/ /phyi tsam bstan pa'i gang zag la/ /gsang ba'i man ngag ston pa ni/ /yang yang ston dang mang la ston/ / lo dus mi bshags rab yin no/ /gnyis po gong bzhin shes par bya/ /dam tshig de rnams kun la yang / /dus dang bsam pa dngos po kun/ /che chung byung bar gyur pa dang / /mnyam par gyur dang ma tshang rnams/ /mkhas pas brtags nas cho ga ni/ /che chung bstod dang smad par bya//de ltar ma shes gsum dang dgu/ /mu de bzung nas lhag kyang bzang / /de rnams ni dam tshig nyams pa'i tshad bstan pam/ /ma nyams pa'i tshad bstan pa ni/ gong ma de rnams ma byung dang / /yang na slob dpon dkon mchog dang / /rdo rje spun dang sdug pa yi/ /sems can rnams kyi don du ni//rab tu ma gyur 'bring gi ni/ /de dag man chod byung na yang / /nyams par mi 'gyur bde gshegs gsungs/ /lus la phan par gyur nas kyang / /ting 'dzin grogs su gyur pa ni/ /nges par mi 'gyur bde gshegs gsungs/ /sems can 'dul bar gyur pa dang //sems can drang ba'i don du yang / /nyams par mi 'gyur bde gshegs gsungs/ /de rnams shes rab zab mo dang / /slob dpon zhal gyi man ngag la/ /brten nas gnang bkag rim pa ni/ /mkhas pa rnams kyis shes par bya/ /dam tshig ma nyams pa'i tshad bstan pa'o//da ni dam tshig nyams pa bskang ba'i cho ga bstan te cho ga yang ni dgu ru shes par bya/ rab kyis lo gcig la bsgoms la/ /tshogs 'khor bcu gnyis phrag bzhi dang / /sbyin sreg bdun brgya nyi shu dang / /gtor ma bdun brgya nyi shu dang //de dus rdo rje slob dpon dang / /rdo rje mched kyang spyan drangs la/ /rdo rje slob dpon grangs gyur na/ /gzugs bya yang na mchil lham gos/ /de rten yang na ming gi yi ges bskyed/ /'od zer 'phros nas slob dpon gyis/ /rnam shes bkug nas de la gzung / /yi dam lha'am mi bskyod pa'i//gzugs su bltas la de la ni/ /bskyed rim thun re byed pa dang / /bzlas brjod 'bum phrag gsum gyis ni/ /yi ge 'khor lo'i 'od zer gyis/ /bdag dang slob dpon gnyis ka yi/ /lus ngag yid kyi sgrib pa sbyang / /sbyin sreg gis kyang de bzhin sbyang //tshogs kyi 'khor lo'i mchod pa yis/ /'khor lo 'du 'phros sbyang bar bya/ /'khor lo 'du 'phros mchod pa'o/ /gtor ma dang pos sbyang mchod dang / /bar mas bsrung zhing spel ba dang / /tha mas gnod pa mi byed cing / /bshags pa rgyun bya 'dus byas kyi/ /dge rtsa la sogs gzhan yang bya//de ltar byas nas slob dpon la/ /slar yang sdom pa gsum blangs la/ /dkyil 'khor 'jug cing dbang bskur blang / /slob dpon med gyur rdo rje spun/ /mkhas pa nyid las blang bar bya/ /de med yi dam lha la blang / /de ltar byas na dag 'gyur te//dngos grub kyang ni thob par 'gyur/ /'bring dang tha ma gnyis po yang / /phyed phyed 'dres phyed shes par bya/ /'bring gi rab ni zla ba gcig /lha bsgom sbyin sreg sum cu dang / /gtor ma sum cu phrag gnyis dang / /tshogs 'khor gsum dang bzlas brjod ni/ /sum khri bshags pa thun mtshams su//'bring gi 'bring ni nyi shu ru/ /sbyin sreg gtor ma nyi shu dang / /tshogs gnyis bzlas brjod nyi khri bya/ /'bring gi tha ma bcu ru sbyin sreg bya/ /gtor ma bcu dang bzlas brjod khri/ /de dag cho ga byed pa yang / /slob dpon la sogs ma tshogs kyang //rnal 'byor gnyis kyis bor len bya/ /tha ma'i rab 'bring zhag bdun du/ /sbyin sreg gtor ma bdun dang bzlas brjod stong / /tshogs 'khor gcig dang bshags pa mthun/ /tha ma'i 'bring ni zhag gsum du/ /sbyin sreg gtor ma gsum dang mchod pa brtsam//bzlas brjod lnga brgya bshags pa bya/ /tha ma'i tha ma zhag gcig tu/ /gtor ma sbyin sreg re re dang / /bzlas brjod brgya dang bshags pa bya/ /de ltar byas pas dag par 'gyur/ /tshogs kyi 'khor lo ma 'byor pas/ /sbyin sreg gcig pus bskang ba yin//rab kyi gsum gyi sbyin sreg ni/ /sum khri nyi khri khri ru bya/ /'bring gi gsum gyi sbyin sreg ni/ /lnga stong stong dang lnga brgya bya/ /tha ma gsum gyi sbyin sreg ni/ /brgya dang lnga bcu nyi shu lnga/ /de ltar byas pas dag par 'gyur/ /sbyin sreg ma byas rnal 'byor pas/ / bzlas brjod kyis ni bya bar gsungs//gsum gyi rab 'bring gsum gsum ste/ /bye ba bdun 'bum sum 'bum dang / /'bum dang bdun khri sum khri dang / /khri dang bdun stong sum stong dang / /stong dang bdun brgya sum brgya dang / /de ltar byas pas dag par 'gyur/ / de ltar mi 'grub rnal 'byor pas/ /gtor ma chen po'i cho gas kyang / /sbyin sreg bzhin du bsten nas su/ /nyams pa dag ste bskong bar 'gyur/ /sbyin sreg bzlas brjod gtor ma las/ /byung ba'i dngos grub gsum gyis ni/ /dam tshig nyams pa bskong bar 'gyur/ / thun mong dngos grub grub nas kyang / /brgyud pas mchog kyang 'grub par gsungs/ /bsgom pa las byung dngos grub kyis/ /dam tshig nyams pa bskongs gyur nas/ /dngos grub gnyis ka thob par 'gyur/ /lhag ma rnams kyi cho ga ni/ /slob dpon rab gsum phar bor nas/ / 'bring gi gsum gyi rab tu bstan/ /tha ma gsum gyi 'bring du bstan/ /tha ma rab kyi sbyin sreg gcig /'bring gi gtor ma'am bzlas brjod bya/ /tha mas bla ma'i mchod pa bya/ /bla ma mchod pa'i man ngag kyang / /maN+Dal gsum mam gcig byas la/ /maN+Dal mthar phyin mdzes pa la//me tog mdzes ldan mchod pa bsags/ /lus tshags bgos pas pus btsugs nas/ /bdun dang bcu dang bcu gnyis dang / /bya ba cho ga gzhan dang mthun/ /khyad par bdag gi sdig pa ni/ /'od zer dra bas bsdus nas ni/ /phyung nas gdan gyi pad stengs su//bla ma yi dam dkon mchog dang / /bdag gi 'od zer 'khrul 'khor gyis/ /sdig pa sbyong zhing bshags par bya/ /yang na sgyu ma lta bu'i sems/ /de bzhin byas pas dag par 'gyur/ /yan lag cho ga bstan pa ni/ /rtsa ba'i tha ma gsum po dang / /go rims bzhin du shes par bya//khyad par cho ga bstan pa ni/ /rdo rje spun ni bkug gyur nas/ /sgrib sbyang lha ru bskyed pa la/ /mchod pa la sogs gong bzhin no/ /de bzhin 'gyur na'ang gong bzhin no/ /bde gshegs bka' 'das dus su ni/ /gang du nyams pa de la ni/ /sbyang ba la sogs bya ba dang //rigs kyi lha'am phyag mtshan nam/ /A li kA li'i phreng ba ni/ /bstims nas gong bzhin shes par bya/ /sems can byams sems dam tshig la/ /gang du spangs pa de bkug nas/ /dngos dang bsam pa gnyis kas su/ /sbyang ba la sogs gong bzhin bya//byang sems spong ba de la yang / /phyi nang yang ni gnyis su bstan/ /phyi ni gong bzhin nang gi ni/ /'bab ra ka tar ma zin pa'o/ /de yi sbyang ba la sogs kun/ /snying ga gong 'og la bstims nas/ /rang gi po ti kho na la/ /gzhan gyi po ti 'am dngos de nyid/ /bsam dang dngos la sogs pa ni//gong ma bzhin du shes par bya/ /de 'og slar yang smin par bya/ /yang na yi dam lha sogs la/ /gong bzhin khyad par ngag gis sbyang / /phung po lha ru bsams nas ni/ /nang mchod nang gi sbyin sreg ni/ /bsam ste sbyang ba'i cho ga bya/ /rang bzhin chos kyi gnas de ru//the tshom za ba'i de nyid la/ /rang bzhin de nyid bsams nas su/ /de nyid lha 'am thig le 'am/ /yig 'bru gtum mo la sogs la/ /gtsang mchod la sogs gong bzhin bya/ /sems can gdug pa sbyang ba dang / /bla ma srun la mchod pa bya/ /stong pa'i don la mos pa dang //bla ma yi dam dbu steng du/ /chos sku'i rtags dang gtsug tor la/ /khyad par mchod par bya ba'o/ /sems can dad ldan bkug nas ni/ /sbyang ba la sogs byas nas kyang / /dkyil 'khor bsgrub cing dbang bskur dang / /man ngag zab mo'i don bstan pa//lhar dmigs mchod pa la sogs bya/ /dam tshig thams cad dran nas kyang / /thams cad lhar dmigs khyad par ni/ /spyad par bya ba la sogs la/ /rigs lnga yab yum bsams nas ni/ /mchod cing sbyang bar bya ba yin/ /shes rab thams cad bkug nas ni//sbyang bar byas la lha mor dmigs/ /mchod pa sna tshogs khyad par bsam/ /bdag po dang bcas bkug pa la/ /sbyang ba la sogs gong bzhin bya/ /yang na tha mal zhen pa bzlog /mkha' la sogs pa byin brlabs la/ /lha yi rnal 'byor bltas nas ni//phan tshun mchod pas tshim par bya/ /tha mal lce ni sbyangs nas su/ /rdo rje lce ru byin brlabs la/ /gang bshad legs bab gnas pa ni/ /sbyang dang lhag bsam la sogs bya/ /khyad par rdo rje 'od zer las/ /bzlas shing mchod pas tshim par bya/ /bstan bya nyid kyang bkug nas ni//gso zhing sbyang ba'i cho ga bya/ /rnal 'byor spun rnams bkug nas ni/ /sbyang ba la sogs gong bzhin no/ /snod ldan sems can bkug nas ni/ /sbyang ba la sogs bya ba dang / /gsang ba dngos dang bsam pa yis/ /bstan la sogs pa bya ba'o/ /dad ldan kun la gong bzhin no/ / sbyang ba la sogs dngos dang bsam/ /gnyis ka'i thabs kyis bstan pa yin/ /nyan thos la sogs sbyang ba dang / /bdag nyid sbyang bar bya ba'o/ /rnal 'byor lha la nan tan bya'o/ /nga rgyal la sogs sbyang ba'o/ /de ltar cho ga byas nas ni/ /dam tshig nyams pa bskongs nas kyang / /dngos grub rnam gnyis thob par gsungs//las dang po yi gang zag la/ /rtog pa sna tshogs dgur gyur pas/ /rig 'dzin sa ni ma thob par/ /dam tshig nyams pa 'byung 'gyur bas/ /bskang ba'i cho ga ma byas na/ /ngan song gsum dang rdo rje yi/ /dmyal ba dag tu ltung bar 'gyur//bskal pa grangs med gnas nas ni/ /de nas bskal par tsha grang myong / /de nas byol song yi dags su/ /yun ring gnas nas brgya lam na/ /sems can glen lkugs la sogs su/ /yun ring gnas nas tha mar ni/ /sngon gyi dge ba'i sa bon gyis/ / bde gshegs thugs rjes phrad pa dang / /de ru dam tshig nyams gyur na/ /slar yang thur la ltung bar 'gyur/ /ma nyams gyen du 'gro bar 'gyur/ /de bas nan tan cher bskyed cing / /dam tshig sa ya 'bum sde ni/ /lung rgyud kun la'ang gsal bas na/ /shes rab can gyis blang bar bya'o//'di ni blo dman don du gsungs/ /theg pa chen po smod pa dang / /khyad par gsang sngags smod pa ni/ /bskal pa mtha' yi bar du yang / /lce la phur bus 'debs shing khro chu ldud/ /de bas gsang sngags 'di la smad par mi bya'o/ /rgyud rnams kun dang mi 'gal tsam du ni//dper na sa gzhi lta bu'i dam tshig ni/ /sgrub dang slob dpon rnams la bsten pas su/ /myu gu lta bu'i sangs rgyas 'grub par shog /rin chen phug gi yang steng du/ /snying pos dam tshig nyams pa la/ /bskang ba'i cho ga mi shes pas/ /mkha' 'gro ma yi nad kyis btab//de la slob dpon chen pos su/ /rdo rje bstod glus bshags pa yis/ /mkha' 'gro ma la bshags nas kyang / /mkha' 'gro ma yi rgyud kun du/ /cho ga zab mo sbas pa la/ /yang nas yang du gsol btab pas/ /mkha' 'gro ma yis chos bstan te/ /de ni slob dpon chen po yis//bdag gi rna bar brgyud pa 'di/ /phyi nas rnal 'byor don ched du/ /bdag gis rim par bkod pa yang / /bde gshegs mkha' 'gros bzod par bzhes/ /slob dpon chen po snying po zhabs kyis mdzad pa slob dpon b+ha bi pa'i gdams ngag mngon par bkod pa rdzogs so/