CLOSE WINDOW

D2472
བོད་ཡིག

@##/ /rgya gar skad du/ rat+na tsakra a b+hi She ka u pa de sha kra ma/ bod skad du/ rin po che 'khor lo'i dbang gi man ngag gi rim pa/ dpal kun du bzang po la phyag 'tshal lo/ /rnal 'byor dbang phyug bde chen po/ /dkyil 'khor sgyu ma la gnas shing / dang po gnyis gsum bzhi pa yi/ /man ngag rdzogs la phyag 'tshal 'dud/ /mthong ba'i chos las rab non/ /dbang dang man ngag 'brel bcas pa'i/ /rgyud rnams kun la rab 'jug pa/ /in+d+ra b+hU ti bdag gis bshad/ /thabs dang shes rab la sogs rgyud/ /phyi nang sbas dang mthar thug pa'i//dbang gi rim pa ngo bo ru/ /rdo rje bdag pos yang dag bshad/ /de bas rgyud kun dbang yin pas/ /man ngag can gyis shes par bya/ /rgyud kyi tshig la rab goms shing / /smra ba'i tshig lam rmongs kyang / /dbang dang man ngag ma thob pa/ /de dag ngal ba don med yin//dbang dang man ngag 'dod pa yis/ /rang srog lus dang rdzas rnams kyis/ /bla ma slob dpon mnyes byas la/ /thabs la mkhas pas 'dod pa blang / /man ngag thob pa'i skyes bus kyang / /srog lus gtang bar phangs pa ltar/ /man ngag dam pa de bas phangs//de bas btsal thabs mkhas par bya/ /bla ma'i drin lan mi shes shing / /man ngag phyal bar spel ba dang / /thos nas mi mos mi sgom na/ /mthong ba'i chos la dmyal tshogs 'tshed/ /bla ma'i drin lan mi brjed cing / /man ngag btsal ba'i thabs mkhas pa//mos shing bsam gtan mchog gzhol ba/ /rgyal sras kun gyi nang na mchog /dbang bskur rim pa yang dag pa'i/ /gnas dang dus dang slob dpon dang / /slob ma dang ni gleng gzhi dang / /dkyil 'khor dag dang der 'jug rim/ /dbang bskur rim dang rnam grangs dang //bskur ba'i gnas dang thabs dag dang / /sgrib byang tshad dang sa non dang / /de 'brel man ngag rim pa dang / /rtags dag dang ni brda dag dang / /rdzas dag dang yang dgos pa'i don/ /nus pa'i tshad dang 'bras bu ste/ /rnam pa nyi shus mngon par brjod/ /de dag kun gyi mtshan nyid dang //bum pa'i dbang dang gsang ba'i dbang / /gsum pa shes rab ye shes dbang / /de ltar de bzhin yang bzhis bshad/ /rgyud rnams kun gyi tshig don rnams/ /ma lus 'dir ni 'dus pa yin/ /dang por bum dbang gleng gzhi nas/ /yang dag brtsams te bdag gis bshad//kye ho shAkya seng ge la/ /bltams tshe klu rgyal dga' sogs pas/ /bum pa'i chu yis khrus byas dang / /mngon par rdzogs par byang chub tshe/ /sa yi lha mos bum pa yang / /bkra shis brjod nas phyag tu phul/ /'khor los sgyur rgyal rgyud 'byung ba//spyi bor dbang bskur gleng gzhi yin/ /gnas ni ri sogs yul khams dang / /sgrub khang gnas dang maN+Dal sa/ /bkra shis yid dga' rjes mthun par/ /so so'i rgyud las gsungs pa yin/ /dus ni bla mas gnang ba yin/ /slob ma dad pa yod pa dang / / dam chos 'byung dang sgrub pa dang / /dgos pa phun sum tshogs pa ste/ /rnam pa bzhir ni brjod pa yin/ /slob dpon yon tan kun ldan zhing / /dbang dang dam tshig ldan pa dang / /rkyen thub sa bon gzi brjid che/ /snying rjer ldan zhing slob la brtson/ /rigs can kun gyis bkur ba'i sa//dbang mchog bskur bar gsungs pa yin/ /slob ma dad par ldan pa dang / /slob dang sgrub la dga' ba dang / /rtsa ba'i sngags zlos byed pa dang / /sngags rgyud dag la dga' sems dang / /gzhan yang tshe phyi don 'don dang / /gzhan yang glegs bam mchod rten sogs//zhal sros rig pa spyi dang ni/ /gzhan yang tshe 'phos ched du ste/ /rnam pa 'di dag rgyal bas gsungs/ /de re la yang gleng gzhi dag /rgyud rnams kun las rgyas par bstan/ /dkyil 'khor slob ma rab 'bring tha/ /ting 'dzin me tog rdul tshon rim/ / gzhan yang lugs 'bur bzo bris dang / /glegs bam mchod rten bla ma sogs/ /de kun spyan sngar bum dbang ni/ /bskur du rung bar bde gshegs gsungs/ /de dag so so'i cho ga'i rim/ /so so'i rgyud las gsal bar bya/ /rdul tshon la sogs byed pa'i tshe/ / sa ni dag par bya ba dang / /bgegs bsal ba dang gzung ba dang / /bum pa'i sta gon bya ba dang / /lha dang slob ma yo byad rnams/ /ji ltar sta gon bya ba dang / /sngon du bsnyen pa'i rim pa dang / /thig gdab pa yi cho ga dang / /tshon rtsi dag ni dgye ba dang / /rgyan rnams bkod de mchod pa dang //ye shes dbab dang mchod sogs dang / /ji ltar grags pa'i tshogs bya/ /gang zag dang pos rang gis bri/ /gnyis pa gsum pas phab ste bri/ /bzhi pas yid kyis bya ba yin/ /lugs ma la sogs de bzhin no/ /yang na slob ma'i snod dang sbyar//yang na mos pa'i dbang du gsungs/ /der 'jug pa yi rim pa ni/ /ku sha so shing skud pa dang / /dag pa'i chus reg gtsang byas pa'i/ /thun mong sdom gnas sems bskyed pa/ /sgor bkug me tog sbyin bya zhing / /gdong g.yogs gsol btab spro bskyed de//kun byed chu yis gsal dag bya/ /snying la rdo rjer der gzhan bsgom/ /yol ba'i nang du drangs nas su/ /bskor ba phyag 'tshal gsol ba gdab/ /mna' yi dam tshig cho ga sbyin/ /thun mong bsrung ba'i dam tshig dbog /phyi yi dbab pa'i dam tshig gis/ / phyi rol rdo rje 'dzin pa dbab/ /phyi yi me tog phreng dor ro/ /phyi yi rang gi lha yang sbyin/ /lhung ba'i mtshan ma shes bya bsgom/ /sha mig dag 'gyur snga ltas su/ /ci mthong bri ba'i cho ga bya/ /de nas sha yi mig phye ste/ /gzugs brnyan dkyil 'khor bstan par bya/ /de kun rgyud nas rgyas par gsungs//dkyil 'khor mthong ba'i 'og tu ni/ /dbang gi maN+Dal gnas su bzhag /mgo la me tog phreng btags pa/ /lha'i dbang ste dang por bshad/ /chu dang dbu rgyan rdo rje dang / /dril bu ming dang rnam pa lnga/ /slob ma rig pa'i dbang zhes bya/ /de nas seng ge'i khri steng du//rig byed slob dpon dbang sbyar bya/ /gong ma brtan par bya ba'i phyir/ /rdo rje dril bu brtul zhugs gnyis/ /phyag rgya dam tshig gsum pa yin/ /dbugs dbyung ba dang lung bstan pa/ /phyir mi ldog sogs rim pa yin/ /de kun bum pa'i dbang yin te/ / der yang bum khrus byed phyir ro/ /gzhan yang dbang gi rnam grangs ni/ /so so'i rgyud kyi rjes 'brangs te/ /ji skad gsungs pa de shes bya/ /bum pa'i dbang la rnam gsum ste/ /phyi dang nang dang sbas pa'o/ /spyi la thun mong khyad par te/ /thun mong phyi pa'i rgyud dang mtshungs/ / de mtshungs bum pa'i bcud nang du/ /mi 'chi bcu phyed dag dang ni/ /btung ba snum pos gang byas pa/ /khyad par bum pa zhes gsungs so/ /nang gi slob dpon bla ma'i sku/ /bum pa'i nang nas 'bab pa'i chus/ /slob ma'i spyir blugs sems skul byed/ /sbas pa'i bum pa bde chen gnas//stong phrag bdun cu'i rtsa lam nas/ /thugs ka'i ye shes sems dpa' la/ /lha yi chu yis khrus byas pa/ /sbas pa'i thabs kyis bum pa'o/ /phyag rgya ma yi bum pa nas/ /sems kyi chu dang mtshal chen sems/ /thabs kyi gsang ba'i nor bu la/ /dag pa'i chu yis khrus byed pa//sbas pa'i shes rab bum par bshad/ /de nas bum pa'i dbang la yang / /dbang rnam bzhir ni nges gsungs te/ /bum pa'i bum pa thun mong ste/ /gsang dbang khyad par bum pa'o/ /shes rab ye shes sbas pa gnyis/ /de ltar rnam gsum bum pa yang //yod med mtha' las yang dag grol/ /bum pa'i dbang ni bzhi pa yin/ /de'i gnas spyi bor bum brtan bya/ /phyi yi spyi bor chu yi khrus/ /nang gi spyi bor tshangs pa'i sgor/ /sems 'bebs sbas pa sems phyir 'bebs/ /dbang bskur ba yi thabs mchog ni/ / slob mas bsgoms nas bzed pa'i tshul/ /mnyes pa'i bla mas sbyin par mtshungs/ /bsam mthun bde thabs dam pa'o/ /phyi nang sbas pa'i bum pa yis/ /srog gcod rku dang log par g.yem/ /lus kyi nyes gsum byang bas na/ /lus kyi dri ma dag par bshad/ /nyon mongs sgrib dang shes bya'i sgrib//sa bcu dag gis byang bar gsungs/ /dkyil 'khor mthong bas tshogs kyi lam/ /phreng bas mos spyod sbyor lam dag /chu dang dbu rgyan sa dang po/ /mthong lam rnam par dag par gsungs/ /rdo rje dril dang bdag po yis/ /sa gnyis pa nas brgyad pa'i bar//sgom lam rnam par dag par bshad/ /brtan par byed pas 'bras bu lam/ /sa bcu dag par rgyal bas gsungs/ /de ltar dbang thob slob ma la/ /bla mas man ngag drin sbyin bya/ /dkyil 'khor bri ba la sogs pa'i/ /slob dpon spyi yi las dag dang //bskyed pa'i rim pa'i man ngag dang / /zhi sogs bya ba'i las dag dang / /thun mong sgrub sogs man ngag sbyin/ /thun mong bum sogs phyi rgyud sbyin/ /khyad par nang gi de bzhin no/ /nang gi bum pa'i dbang rdzogs na/ /bden pa gnyis kyi man ngag bstan//sbas pa'i bum pa'i dbang thob nas/ /sbas pa'i kun rdzob spyod gsum bstan/ /mdor na ji bzhin sgra dang ni/ /dgongs ma yin dang bkri don dang / /tshig gi don dang yan lag don/ /tshogs la bshad rim gnas par bshad/ /dngos grub myur ba'i rtags dang ni//so shing dor dang rmi lam dang / /ci mthong dri dang me tog dor/ /dbab pa dag las shes par bya/ /phyi yi sbas pa'i ngag brda dang / /lnga bsdus phyag rgya de la bstan/ /'dri bas dge slong gsang phyir bstan/ /dbang rdzas dag gi khyad par ni/ /mgo la 'dogs pa'i me tog phreng //spyi bor dag pa'i chu yin no/ /de yang bum pa'i bye brag las/ /rin chen dang ni thod sogs phreng / /mgo la bcing ba'i dbu rgyan yin/ /dpral bar rigs dang rjes mthun pa'i/ /rtags kyi rdo rje de sbyin bya/ /dril bu kha yi tha dkar sbyin/ /ming la dbang rdzas dag pa'i mtshan//dam tshig rdor dril lag tu sbyin/ /gsor gsil sgra dang bcas pa'o/ /phyag rgya'i bdag po'i phyag rgyar bsgom/ /dbugs dbyung ba dang yon tan brjod/ /lung bstan pa la chos gos dbyibs/ /phyir mi ldog la de nyid bstan/ /gzhan yang zhar la 'ongs pa'i rdzas//cod pan me long dung dang ni/ /gser byas thur ma la sogs pa'i/ /so so'i rgyud kyi rjes 'brangs te/ /ji ltar 'byung ba de bzhin bya/ /de las gzhan pa'i thun mong dang / /rin chen bdun dang nye ba'i bdun/ /bkra shis brgyad dang nyer brgyad sogs/ / bya ba'i rgyud dang gnyis ka dang / /rnal 'byor rgyud las gang bstan pa/ /rnal 'byor bla ma'i gnas skabs su/ /rdzogs par yod ces rgyal bas gsungs/ /dbang bskur bla ma'i dgongs pa yang / /spyi dang khyad par shes bya ste/ /mkha' dang mnyam pa'i ye shes las/ / snying rje slob ma la bskyed de/ /bu yi 'du shes nyer bzhag nas/ /byams sems dga' sems btang snyoms sems/ /rtse gcig ci yi dgongs rgyud yin/ /khyad par so so'i dgongs pa ste/ /me tog lha dang bcas pa de/ /slob ma de la thim par bsam/ /rgyud rnams so so'i rjes mthun pa'i//lha dang lha mo ji lta bas/ /bdud rtsi'i bum pas dbang bskur ba/ /chu yi dgongs pa'o ye shes lnga'i/ /rtags su sku lnga rdzogs byed pa/ /dbu rgyan hUM las rdo rje bskyed/ /de 'og rgyud lnga sbyang bya ste/ /ye shes lngar grub rdo rje'o/ / shes rab dbyangs kyis ngag sgrib sbyangs/ /dril bu'o ming gi bdag po yi/ /dngos grub rjes su 'dzin par bshad/ /yang na/ phreng ba'i yi dam rgyal ba'i dbang / /chu khams mi bskyod rnam par dag /dbu rgyan rin chen mnyam nyid de/ /rdo rje kun rtog 'od dpag med/ / dril bu bya grub gdon mi za/ /ming ni chos dbyings snang mdzad sku/ /rdo rje brtul zhugs sems dag byed/ /dril bu ngag ni rnam dag ste/ /phyag rgya dam tshig lus dag pa'o/ /yang na/ rdo rje thabs kyi ngo bo ste/ /dril bu de bzhin shes rab sbyangs/ /gnyis med phyag rgya dam tshig 'dod//gzengs bstod pas ni lung bstan no/ /ji skad bsgo ba bka' yin no/ /yon tan brjod pas dbugs phyung bas/ /de kho na nyid kyis phyir mi ldog /gzhan yang rgyud kyi rjes 'brangs te/ /ji lta'i dgongs rgyud de dang des/ /slob ma rnams ni yongs smin bya//nus pa'i tshad ni rnam pa lnga/ /dri ma 'khrud dang sgrib byang dang / /las byed pa dang 'bras bu la/ /mngon du phyogs dang bdud bzhi ni/ /'joms pa'i nus pas brjod pa ste/ /phreng bsam dag dri ma dang / /mos pa'i spyod pas sgrib pa 'khru/ /'dod lha ma nyes pa'i las yin te//'bras bu mthong ba'i lam la phyogs/ /yi dam dngos grub nye ba yin/ /gzung 'dzin phung po'i bdud rnams bcom/ /chu dang dbu rgyan gyi nus pas/ /'khor 'das dri ma rnam gnyis 'khru/ /sa ni dang po'i sgrib pa dag /las ni rdo rje rin chen gyis//rigs kyi nga rgyal byed ba yin/ /'bras bu bsgom lam phyogs pa dang / /rdo rje dang ni rin chen gyi/ /thun mong dngos grub 'grub pa yin/ /nyon mongs pa yi bdud rnams bcom/ /rdo rje dril bu bdag po yis/ /g.yeng ba lnga yi dri ma 'khru/ /sa gnyis pa nas brgyad pa yi//bar gyi sgrib pa sbyangs pa yin/ /pad+ma las dang sangs rgyas kyi/ /rigs kyi nga rgyal las byed yin/ /'bras bu mthar phyin la phyogs shing / /gsum po'i thun mong grub pa yin/ /'chi bdag bdud bcom tshe la dbang / /brtan byed dbang gi rim pa yis/ / g.yeng ba phra mo'i dri ma 'khru/ /sa bcu'i sgrib pa dag par byed/ /las ni brten par byed pa ste/ /brtul zhugs kyis ni me tog brtan/ /chu dang dbu rgyan dam tshig gis/ /bum pa brtan par bka' stsal gyi/ /rdo rje dril bu lung bstan gyis/ /dbugs phyung bas ni bdag po'o/ / yang na kun gyis thams cad do/ /sangs rgyas sa la mngon phyogs dang / /dngos grub brtan byed 'bras bu'o/ /lha yi bdud gcod bum pa yin/ /'bras bu bzhi ni me tog la'o/ /rgyu mthun chu dang dbu rgyan gyis/ /rdo rje dril bu rnam smin yin/ /skyes bu byed pa ming gis te/ / brtan pa dri med 'bras bu ste/ /yang na 'bras bzhi bstan zhes pa'o/ /rgyud las gsungs pa'i yon tan ni/ /bsam yas ji snyed bstan pa kun/ /dbang gi 'bras rab yin par gsungs/ /'bras bu yod dang rgyu 'byung ste/ /dbang thob rgyu ni yon yin te/ /ji ltar rgyud lus gsungs pa yin//las kyi dang por dbang bya ba/ /dang po'i dbang du gsungs pa yin/ /gnyis pa gsang ba bshad bya ste/ /kye ho ston pa rdo rje 'dzin/ /'dod chags chen po'i ting 'dzin gyis/ /'khor rnams bsdu ba rnam mdzad nas/ /yum gyi gsang ba'i dkyil 'khor du//gsang ba byang chub sems rab bskur/ /de ltar dpal 'dus la sogs pa'i/ /rgyud rgyal kun la grags pa rnams/ /gleng gzhi zhes su rnam par bshad/ /gnas ni bud med dkyil yin te/ /lhan cig skyes dang zhing skyes dang / /sngags skyes pa zhes grags pa la/ / sme sha can dang mthu chen dang / /gar mkhan btso blag mkhan la sogs/ /so so'i rgyud la grags pa yi/ /ji ltar rigs kyi rjes mthun pa'i/ /shes rgyud sbyangs shing yon tan ldan/ /byin gyis brlabs pa'i gnas bya ste/ /sangs rgyas gtso bo'i yum du gzung / / bum pa'i dbang rnams rdzogs pa dang / /rak+ta 'bab pa'i dus dang ni/ /bla ma yum gyi gnang ba ni/ /gnyis pa'i dus su rnam par brtag /slob dpon rnam pa gsum du shes/ /dang po thabs mchog yab kyis te/ /gnyis pa gsang ba'i gzungs ma la'o/ /gsum pa gnyis su med pas bya'o//slob ma bum dbang rdzogs pa dang / /snying po bzlas pas byed pa dang / /brtul zhugs dam tshig 'dod pas bya'o/ /dkyil 'khor lus su gsungs pa dang / /dkyil 'khor b+ha gar bstan pa'o/ /de yang lus kyi dkyil 'khor dang / /lha yi mtshan nyid shes bya ste//lus ni 'dom gang gru bzhi pa'o/ /yang na gru bzhi 'byung ba bzhi/ /steng 'og g.yas g.yon sgo bzhi'o/ /tshon sna kha dog sna lnga'o/ /yang na bdud rtsi rnam pa lnga/ /rtsa ni thig gi rang bzhin te/ /ka ba brgyad ni rkang brgyad do/ /yan lag rta babs mtshan nyid de//so sen pa sbu twa ra brgyad/ /snying ni dbus kyi lte ba ste/ /rgyud gang dang ni rjes mthun sbyar/ /lha yi phung po lnga gtso bo/ /'byung ba lha mor shes par bya/ /khams dang skye mched mang po kun/ /sems dpa' sems mar rab tu grags/ /bud med dkyil 'khor du gsungs te//b+ha ga gzhal yas brtsegs par bstan/ /de la gzung ba'i cho ga dang / /sbyang dang brtag dang byin brlab dang / /rgyan dang ldan zhing bdug pas bdug /phyi nang khrus byas lha rnams dbab/ /tshogs kyi 'khor los mchod byas la/ /lha ru nye bar brtag par bya//de la chang yang drang bar bya'o/ /de la 'jug pa'i rim pa yang / /bum pa'i bya ba yang bya ste/ /yol bas bar du bcad nas ni/ /gsol gdab de yi ngo yang dgab/ /me tog byin ta drangs nas su/ /dkyil 'khor bskor nas phyag gsum btsal//nang gi dam tshig brtul zhugs sbyin/ /de bzhin dbab pa yang byas nas/ /me tog dor te mthong ba dri/ /lha dang chos kyi tshig phye ste/ /lus kyi dkyil 'khor rdzogs par bstan/ /legs par mthong ba'i 'og tu ni/ /mdun na gnas pa de nyid la/ /gsang ba'i dbang gis sbyor byas te//dam tshig 'khor lo drug rim gyis/ /khu ba phyung ste dbang bskur bya/ /dkar dmar spel ba phreng ba'i dbang / /shu kra zhes te chu yi dbang / /tshangs sgor mi bskyod dbu rgyan dbang / /lce la rdo rje de rdo rje/ /rdor bum hUM sgra dril bu'i dbang / / a ho su kha ming gi dbang / /dam tshig lces len brtul zhugs dbang / /blta bar mi bya lung bstan dbang / /longs spyod rtsar sbyar phyir mi ldog /bde bas bde thabs dbugs dbyung ba'o/ /'di kun gsang bar bstan pas na/ /gsang ba'i dbang zhes bstan pa yin/ / gsang ba la yang gsum du ste/ /phyi dang nang dang sbas pa'o/ /ga bur tsan+dan bcu phyed bcas/ /sbom po dang ni dbang mo'i rtses/ /slob ma'i kha ru dbab pa phyi'o/ /slob ma'i dus nyid mnan byas te/ /kha yi thad kar gnyis sbyar nas/ /ra ka a ta ra 'bab pa/ /be'u 'drar rdo rje bzhib pa'i thabs//bung 'drar pad+ma lces len pa/ /shes rab nang gi gsang ba'i dbang / /slob ma rang gi lte ba can/ /rdo rje pad+ma 'dus pas gsungs/ /rdul dang mun pa snying stobs te/ /'og sgo'i kha ru rab 'bab pa/ /sbas pa'i gsang ba'i dbang du gsungs//gsang ba'i dbang la yang bzhi ste/ /rdo rje dang ni pad+ma nas/ /dri med chu 'bab bum pa'i dbang / /yang na gong gi rim de nyid/ /zla ba nyi ma lce la reg /de ni gsang ba gnyis pa ste/ /bde chen lam sbyangs gsum pa'o/ /thabs dang shes rab gnyis med pa/ /ye shes chen po bzhi pa'o//de nas ngag gi lam yin te/ /lce yi pad+ma zhes bya ba/ /phyi dang nang dang sbas pa'i lce'o/ /phyi yi pad+ma ngag gi lam/ /nad du tsit+tar der shes bya/ /sbas pa lte ba'i pad+ma la'o/ /thabs ni gtso gzungs slob mar bcas/ /lus ngag sems la dri med cing //de ni mi phyed mthun pa yin/ /ngag gi sgrib pa des byang nas/ /ngag ni shin tu sbyangs pa ste/ /sangs rgyas sa ni dang po non/ /de yi man ngag gsang ba'o/ /dgongs pa'i don dang nges don dang / /ji bzhin med dang sbas pa yi/ /don rnams nges par bstan par bya/ /slong ma bkri ba'i don bstan bya//de ni ma hA yo ga yin/ /thabs dang shes rab rtags su sbyar/ /nang gi sbas pa'i ngag brda dang / /sbyor ba yi ni brda rnams dang / /rim gyis mkha' 'gro'i brda skad bstan/ /sbom pos khro mo mnan pa ni/ /lag brda 'dri na shes par bya/ /rdzas ni zla ba nyi ma dang //bcu phyed rdzas kyi rnam pa yis/ /longs spyod bya yi dor mi bya'o/ /ji snyed sangs rgyas thams cad kun/ /gtso gzungs zhal du thim pa las/ /sku yi dbus su thim pa dang / /bde ba'i 'bru tshogs gsal ba'i rgyun/ /rdo rje'i lam nas pad+mor 'khyil/ /shu kra rak+ta 'dres pa ni//yab yum pa yi ngang du gsal/ /ji ltar chu la chu bzhag ltar/ /thim pas sems gyur dgongs pa'i don/ /nus pa'i tshad kyang de bzhin du/ /ji snyed ngag gi dri ma 'khru/ /bud+d+ha'i sar sgrib shin tu dag /shes rab thabs kyi nga rgyal byed/ /chos kun ro gcig shes par nus//sangs rgyas sa ni mngon du thob/ /thabs kyi phyag rgyas phung po 'joms/ /nyon mongs shes rab ma yin te/ /'chi bdag gnyis su med pa yis/ /sems 'phros pas ni lha yi bdud/ /'joms pa gsang ba'i nus pa'i tshad/ /thabs ni skyes bu byed pa'i 'bras//shes rab dri med 'bras bur bshad/ /rgyu mthun khu ba'i ngo bo yin/ /lces len rnam par smin par gsungs/ /yab yum mnyes par mchod bya ba/ /dbang thob pa yi rgyu yin no/ /de nas gsum pa bshad bya ste/ /kye ho dpal ldan 'dus sogs las//sngags kyi spyad pa spyod pa'i tshe/ /'khor gyi byang chub sems dpa' rnams/ /sngags dang dus sa dang rgyal ba las/ /bslang ste sbas pa'i don bstan pa/ /de lta bu yi gleng gzhi'o/ /lus kyi ngo bo dgon pa la/ /byang chub sems kyi gnas bcas pa/ /bde ba'i stan yang gnas su bshad/ / dus ni dbang gnyis rdzogs pa dang / /bla mas gnang dang rig mar ldan/ /de yi slob dpon phyi dang nang / /phyi yi bla ma'o nang rig ma/ /slob ma dbang gnyis rdzogs pa dang / /sbas pa'i don la yid mos dang / /nye ba'i snying po zlos pas bya'o/ /gnyis pa gsum pa bzhi pa la//glegs bam la sogs bya ba min/ /tshe 'phos pa yang de bzhin min/ /sems kyi dkyil 'khor dkyil 'khor mchog /de la bzung bar gnang ba yin/ /rig ma bzung dang sta gon dang / /sbyang dang sems bskyed byin rlabs dang / /dbang bskur bla mas bya ba yin/ / lo grangs bcu gnyis bcu drug dang / /nyi shu nyi shu lnga lon pa/ /lhan cig skyes pa'i bu mo dang / /sring mo grogs mo ma yin te/ /de sems sbyang ba mchog yin no/ /yang na lha yis lung bstan pa'i/ /zhing skyes ma ni rung ba yin/ /sngags skyes bzlas dang bsgom ldan pa'i/ / rnal 'byor ma ni so so med/ /dkyil 'khor lhar bcas sngon dang 'dra/ /sbas pa'i dkyil 'khor bzhi po la/ /rtsa yi 'dab ma gnas nas su/ /pad+ma'i sna 'dra'i yi ge rnams/ /rgyud las gsungs pa brtag par bya/ /g.yas dang g.yon dang dbu ma yi/ /rtsa gsum mtshan nyid shes bya ste//dkyil 'khor sbyor ba mchog yin no/ /me tog bkram pa'i maN+Dal du/ /ga bur la sogs dris byugs te/ /chos gos rgyan chas ldan par bya/ /de la tshogs kyi ston mo dbul/ /chang yang drang ba byas nas ni/ /rang yang mos pa'i lha ru bsgom/ /'khor lo bzhi yang de dang 'dra//rdo rje pad+mo rnam gnyis kyang / /rgyud las 'byung ba ji bzhin du/ /bla mas byin rlabs tshul bzhin bya/ /'jug pa'i tshul ni dben pa ru/ /yol bas bar du bcad nas ni/ /'jug par gsol ba gdab par bya/ /ngo yang bkab nas drang bar bya/ /brtul zhugs sdom pa sbyin pa dang //ye shes dbab pa de byas te/ /bud med rnams ni kun la yang / /rab tu dga' ba'i sems bskyed de/ /bskor ba la na gsum byas nas ni/ /yid kyis me tog gtor nas kyang / /mos pas phyag kyang btsal bar bya/ /shes rab spyan dang sangs rgyas spyan/ / phye ste mtshan dang dpe byad ni/ /mar me'i 'od la bstan par bya/ /lus kyi dkyil 'khor dang por bstan/ /de nas sems kyi dkyil 'khor ni/ /'khor lo rnam bzhi legs par bstan/ /dkyil 'khor mthong ba'i 'og tu ni/ /dbang gi rim pa brtsam par bya/ /chags pa'i glu dang dga' ba'i gar//rol pa'i brda rnams mtshon par bya/ /chags pa'i mtshan nyid phreng ba'i dbang / /chu 'byung mtshan khrus chu yi dbang / /b+hag tsum skra gzung dbu rgyan dbang / /pad+mar rdor bcug rdo rje'i dbang / /de gnyis bskyod pa dril bu'i dbang / /dam tshig ha skad ming gi dbang //de dag brtan pa sar 'byung ba/ /bltas pas dga' ba rdo rje yi/ /brtul zhugs dbang du de brjod do/ /bgad pa dril bu'i brtul zhugs so/ /'khyud pa dam tshig phyag rgya yin/ /kha phrad pa ni dbugs phyung ba/ /ku tsa mnye ba lung bstan yin/ /pad+mar tsum byas phyir mi ldog /de yang gsum pa la yang gsum/ /phyi dang nang dang sbas pa'o/ /shes rab ye shes dbang zhes bya/ /rig ma gtad pa'i rim pa ni/ /phyi rol shes rab ye shes yin/ /shes rab la brten bde ba yi/ /ye shes skye phyir de skad do/ /shes rab rang sems ye shes las/ /bde ba 'gog pa bde chen po 'am//shes rab 'khor lo'i rtsa lam du/ /bde ba'i ye shes 'bab pas na/ /bde ba myong ba nang gi bshad/ /dmigs su med pa'i shes rab las/ /skad cig ye shes byung nas ni/ /sems dang lus kyi bde thob pa/ /sbas pa shes rab ye shes so/ /'di la yang ni dbang bzhi tshang / /lta sbyin brda phrad la sogs pa//bum pa'i dbang du 'dod pa yin/ /pad dang rdo rje phrad sogs pa/ /gsum pa gsang ba'i dbang yin no/ /zhu ste bde ba babs pa ni/ /gsum pa yi ni gsum pa yi/ /dga' byed bde byed bzhi par 'dod/ /de ni gsum pa'i rnam grangs yin/ /bskur ba'i gnas ni snying la ste//sems kyis len par byed pas so/ /bud med sgyu ma la brten te/ /bde de dang po sems kyis myong / /de 'og lus kyis myong ba yin/ /skal ba med pa'i sems can la/ /rtsa 'gog pas na cha shas myong / /de mtshon bde ba rnyed pa dang //thun dang zhag dang lo yi bar/ /ji srid bskal pa'i bar du ni/ /sangs rgyas bde chen thob par 'gyur/ /bde gshegs yon tan bsam yas thob/ /thabs kyi dam pa mchog yin no/ /sems kyi sgrib pa kun byang ste/ /thams cad kun mkhyen yi shes ldan/ /sangs rgyas sa gnyis non pa ste//rdo rje 'dzin pa'i sa zhes zer/ /de dang 'brel ba'i man ngag ni/ /sems kyi rang bzhin 'od gsal ba/ /sems kyi rig pas brtan gyur na/ /gzung 'dzin gnyis kyi lam 'gog pas/ /las kyi mdud pa grol bar 'gyur/ /byang chub sems kyi 'od zer gyis//bsod nams rlung las bskyod pa na/ /ye shes chen po 'bar byas te/ /bde chen gnas nas zhu nas su/ /'khor lo bzhi la 'bab pa na/ /dga' ba rnam bzhi rim par bskyed/ /til gyi 'bru bzhin bde sa gang ba/ /bde ba chen po'i sku zhes bya/ /de yis las kun byed pa ni//rtsa ba lnga dang yan lag lnga'i/ /rlung bcu'i rtsol bas byed pa yin/ /de lta'i tshul du bstan pa ni/ /steng gi sgo la brten pa yi/ /man ngag rim pa de la brten/ /yang na de la brten pa ni/ /dang por rlung gi de nyid bslab/ /de nas rlung dang 'dres pa yi/ / sngags kyi de nyid bslab par bya/ /rlung dang sngags ni rab sbyor bas/ /dbugs kyi 'byung 'jug mtshan nyid can/ /rdo rje'i bzlas pa bslab par bya/ /de yi sems kyi dmigs pa dang / /sgyu ma lta bu'i ting 'dzin gnas/ /'od gsal ba yi gnas thob nas/ /gnyis med ye shes thob 'gyur ba'i//steng gi man ngag bslab par bya/ /'og gi sgo la brten pa ni/ /rdo rje pad+mar sbyor ba las/ /bskyod pa'i rlung gis drod bskul bas/ /sra ma ka ni bde bskyod de/ /shu kra su kha'i rang bzhin can/ /'khor lo bzhi la brgyud nas kyang / /bde bskyod gnas su sbrul 'khyud de//gsang ba'i pad+mor ma sbos par/ /til 'bru lta bur gang ba ni/ /bde ba ji srid bskal ba'i bar/ /rab tu dga' ba'i bde bas myong / /ye shes chen pos gnas pa'i tshe/ /sangs rgyas sems can thams cad dang / /mtshan mar btags pa thams cad kun//bde chen nyid las gzhan ma yin/ /bde chen nyid las gzhan pa'i chos/ /sangs rgyas nyid kyis ma brnyes so/ /rang sems las su rung ba'i rtags/ /phyi yi yul la snang ba ni/ /dang por smig rgyu lta bu dang / /gnyis pa du ba lta bu dang / /gsum pa glog gi rnam pa dang //bzhi pa mar me lta bu dang / /lnga pa nam mkha' 'dra ba'o/ /rlung dang rtsa dang 'khor lo dang / /skad cig dga' bzhi'i rnam pa kun/ /ngag brda ji ltar grags pas brjod/ /sbom po khro bo mnyam sbyar ba/ /dbang gsum thob pa'i lag brda yin/ /gsum pa yi ni rdzas dag ni//rang dang rig tu bcas pa yi/ /dri chen chu dang rak+ta dang / /ga bur maM sa'i shel sogs rdzas/ /'jigs pa med par bza' bar bya/ /bud med rnams ni spyad par bya/ /de yi gzugs lta sgra ni mnyan/ /dri dag kyang ni man ma par bya/ /gsang ba'i pad+mar tsum+ba bya/ / glang po'i lag pas g.yon pa blang / /dung gi phur pas gdab pa dang / /'da' 'da' ya bcu gzung bar bya/ /mdor na rig la snang ba'i rdzas/ /de kun dgongs pa bstan pa yang / /sprul pa chos dang longs spyod dang / /bde ba chen po'i 'khor lo bzhi/ /mgrin dang gsang ba'i 'khor lo gnyis//spas pa yin te rnam pa drug /lte ba snying ga rkan dang ni/ /spyi bo dag la rim pa ste/ /sbas pa mgrin pa gsang bar gnas/ /drug cu rtsa bzhi brgyad dang ni/ /bcu drug sum cu rtsa gnyis ni/ /rtsa yi grangs te 'dab ma yin/ / ka nas brtsams nas sa yi bar/ /g.yas dang g.yon du mnyam sbyar ba/ /drug cu rtsa bzhi sprul pa'o/ /ka sogs dang po chos sku brgyad/ /longs spyod A li bcu drug yin/ /bde chen A li mnyam sbyar gnyis/ /a dang hUM dang oM dang haM/ /sprul chos longs spyod bde chen dbus//'khor lo chags pa dmar po ste/ /yig 'bru dkar po sems rang bzhin/ /sprul dang longs spyod shes rab la/ /chos dang bde chen thabs su bshad/ /kA li thabs la A li ni/ /shes rab de phyir 'khor lo bzhi/ /shes rab thabs kyi sbyor ba dang //thabs la thabs kyi sbyor ba dang / /shes rab shes rab sbyor ba dang / /thabs la shes rab sbyor ba ste/ /rnam pa bzhi ni gsungs pa yin/ /thabs dang shes rab gnyis med pa/ /sbas pa'i 'khor lo rnam pa gnyis/ /mgrin 'og dkyil 'khor lha grangs bzhin//tsi ta ti la ka de bzhin/ /pad+ma drug la de ltar gnas/ /lha re'i byang chub sems su bshad/ /gsang ba bde skyong sbubs su ni/ /sangs rgyas rin chen gab tse la/ /dbus su mi shigs yi ge ha/ /re'u mig lnga bcu'i yi ge ni/ /kA li rnams la A lis bskor//'byung bzhi'i yi ge grwa na gnas/ /bde bskyed pa yi yi ger bshad/ /rlung dkyil gzhu 'dra gsang bar gnas/ /de steng me ni gru gsum pa/ /rlung gis me bskyed lte dbus langs/ /sprul ba'i yi ge bsregs nas su/ /chos kyi yi ge yang bsregs nas//longs spyod lan gsum bskor byas te/ /gling bu smin phrag g.yas phyung nas/ /bde chen 'khor lor phyin nas bzhu/ /bdud rtsi 'grogs te sngar lam du/ /longs spyod chos dang sprul pa yi/ /'og rnams la brten yig rnams gsos/ /spu yi nyag ma khri yi cha/ / lte ba'i dbus nas 'gro dang 'ong / /mgrin pa'i 'khor lor song nas su/ /lha rnams kyi ni sems bzhus nas/ /bde skyong gnas su phyin pa dang / /A li kA li la thim ste/ /kA li 'byung ba'i yi ge la/ /'byung ba lha la thim pa dang / /ma spros bar du bde chen sku/ /pad+mar spros nas longs spyod sku//phyogs bcur spros pas sprul sku yin/ /slar 'dus chos kyi sku ru gsal/ /de ni gsum pa'i dgongs pa'i don/ /nus pa'i tshad kyang de bzhin te/ /des ni sems kyi dri ma 'khru/ /rdo rje 'dzin pa'i sgrib pa dag /phyag rgya bsten pa'i las dang ni//bde bskyed thob par nus pa yin/ /'bras bu rdo rje 'dzin pa ste/ /rang gi rig pas rig pa 'dzin/ /bde chen nyon mongs bdud bcom ste/ /longs spyod gnas su phung po'i bdud/ /d+harma tsakrar lha bdud bcom/ /sprul par 'chi bdag bdud bcom ste/ /dga' bzhis bdud bzhi rnam par 'joms//dam tshig 'khor lor phung po 'joms/ /pad+mar rdor bcug nyon mongs 'joms/ /rdo rje pad bskyod lha bdud 'joms/ /bde ba 'bebs pas 'chi bdag 'joms/ /bde chen rnam smin 'bras bu ste/ /longs spyod rgyu mthun 'bras bur bshad//dri med 'bras bu chos su ste/ /skyes bu byed pa sprul pa'o/ /yang sprul rgyu mthun 'bras bu ste/ /chos kyi 'khor lo rnam par smin/ /longs spyod skyes bu byed pa yin/ /bde chen 'khor lo dri med pa'o/ /yang / /dam tshig 'khor lo rgyu mthun pa/ /rdo rje pang sbyor skyes bu byed//bde ba babs pas rnam smin yin/ /chags dang bral ba dri ma med/ /'bras bu rnam pa bzhi ru gsungs/ /bla ma rig ma mnyes ma ni/ /de ni dbang thob rgyur bshad do/ /yang / 'bras bu dga' ba bzhi skyed byed/ /lha sbyin brda phrad bum pa'i dbang / /de yi 'bras bu dga' bskyed/ / b+ha ga tsum skra bzung dbu rgyan dbang / /de yi 'bras bu dga' bskyed/ /pad+mar rdor bcug rdo rje'i dbang / /de yi 'bras bu mchog dga' skyed/ /rdo rje pad bskyod dril bu'i dbang / /de 'bras lhan cig dga' ba skyed/ /dam tshig ha skad ming gi dbang / /bde ba chen po skyed par byed/ /ngo bo 'bras bu dbyer med do/ / shes rab la ni brten nas su/ /gnyis med ye shes bskyed pas na/ /shes rab ye shes dbang zhes grags/ /rim pa tha ma bshad bya ste/ /kye ho dpal ldan 'dus sogs par/ /'khor gyi byang chub sems dpa' yis/ /gsang ba'i yi ge mthong ba yi/ /skal ba bdag gcig med ces dus//ston pas yi ge rnam dag ces/ /yi ge las dben mtshan nyid gsungs/ /bzhi pa'i gleng gzhir shes par bya/ /sangs rgyas rnams kyi ye shes ni/ /bde bar gshegs pa'i thugs la gnas/ /chos kun sems la gnas byas te/ / sems ni ye nas rnam par dag /de phyir chos kun rnam par dag /de ni gnas kyi bla mar gsungs/ /dus gsum gcig ste khyad med cing / /gang du dus gsum dbyer med pa/ /de ni blang dor med pa'i dus/ /mchog ni bla mar de rab gsungs/ /slob dpon ma mthong sems nyid mthong / / rang sems bla mar snang ba'i phyir/ /kun gyi slob dpon skal ba bzang / /gnyis med slob dpon dam pa'o/ /'gro kun dbyings las skyes pas na/ /rdo rje sems dpa'i spun yin te/ /bsam gyis mi khyab yul slob pa/ /rgyal ba'i sras kyi dam par bshad/ /sangs rgyas kun gyi byang chub sems//bla na med par thugs chud pa/ /gnyis su med pa'i ye shes gang / /de ni dkyil 'khor snying por gsungs/ /'di yi gzhung thos mig phye ba/ /dkyil 'khor mthong ba don rtogs yin/ /rtogs nas goms byed 'jug pa ste/ /mngon du gyur pa dngos grub yin//gnyis med ye shes dbang 'gyur bas/ /mya ngan 'das dang 'khor ba la/ /ji ltar 'dod par dbang bsgyur bas/ /rig pa rang dbang mchog tu bshad/ /'di dbang thob pa'i rnal 'byor ni/ /bsgyur ba'i dbang la thogs pa med/ /ji snyed theg pa rab 'byam gyis//dbang bskur rnam grangs ji snyed kun/ /gsang ba'i dbang du gsungs pa ste/ /yang dag pa yi grangs las 'das/ /mnyam pa ye shes chen po nyid/ /gcig dang du ma las grol phyir/ /gnas dang gnas min dmigs dbye med/ /sgo gsum dbye ba rdul tsam med//gnyis med ye shes chen po las/ /sgyu 'phrul dra ba mi 'gog phyir/ /thabs dang thabs byung thabs bsam yas/ /thabs kyi nang na mchog tu gsungs/ /rang rig ye shes rgyal ba nyid/ /khams gsum 'khor ba nyid yin phyir/ /'di la sgrib dang mi sgrib ces//mnyam pa'i rgyal pos yongs ma gsungs/ /sgrib pa nyid ni byang chub la/ /'khor ba nyid ni mya ngan 'das/ /dbye ba med pa'i sa mchog gis/ /sa yi khyad par zil gyis gnon/ /thams cad sa nyid ye shes dang / /brjod pa'i tha snyad yul las 'das/ / rang bzhin gyis ni 'od gsal zhing / /rdzogs pa chen po'i mthar thug pa/ /man ngag kun gyi mchog gi mchog /de sgrub thabs su gsungs par zad/ /dper na glang po rnyed gyur na/ /glang po'i rjes ni mi btsal ltar/ /rang rig ye shes mngon sum na/ /mtshan ma'i rtags ni 'khrul pa'i gzhi//yang dag don ni brda las 'das/ /mtshon par bya ba'i yul min yang / /mdzub mos zla ba bstan pa ltar/ /brda yi sgo nas 'jug pa yin/ /snang dang srid pa ji snyed pa/ /sku gsung thugs kyi rdzas yin pas/ /lhag par spang ba blang dang bral//ye shes rjes kun las grol bshad/ /rang gi don la mngon sum na/ /rang rig kho na tsam du zad/ /rang rig de yang 'di snyam zhes/ /brjod pa'i tha snyad rnams dang bral/ /'di ni dgongs pa'i mchog tu gsungs/ /rig pa rang dbang gyur pa ni/ /srid pa gsum na 'gran zla med//'og ma rnams kyi gnyen por che/ /nus pa mang po'i bye brag ldan/ /rgyu dang 'bras bu dbyer med pas/ /rgyu 'bras tha snyad yongs kyis bral/ /rgyu yi nang na'ang mchog yin te/ /'bras bu'i nang na'ang bde mchog go/ /dbang gsum bye brag las grol phyir//bzhi pa'i dbang zhes grags pa ste/ /rgyal ba rnams kyi thugs kyi gsang / /thams cad mkhyen par 'dir brjod do/ /'on kyang kun mkhyen ma thob par/ /de nyid nye bar yang mi 'gyur/ /'on kyang 'di yi dbye ba yis/ /de nyid thob bya'i gnas su 'gyur/ /de las rim pa mchog yin pas//sgrub po rnams kyis nan tan bya'o/ /slob dpon rnams ni ma mnyes shing / /dbang rnams rim gyis ma bgrod par/ /sngags spyod sgrub pa rtsom byed na/ /de 'bras med cing ngan song ltung / /dbang rnams bgrod pa ma byas par/ /thugs thub ra chod sems kyis ni//gang dag man ngag rim bstan na/ /phung byed gnyis ka dmyal bar ltung / /de ni sngags kyi dam tshig ces/ /smra byed lce la zhing rmo zhing / /mnar med gnas su nye bar 'khor/ /dbang ma bgrod pa'i gang zag dag /gal te 'dri bas dge slong yang / / gtam gyi rigs tsam yang mi brjod/ /de brjod nyes pa'ang brjod mi lang / /rim pa rdzogs shing snod can la/ /'dri shing gleng slong byed pa na/ /de la de don ma bstan na/ /de yang nyes pa'i gnas su 'gyur/ /gang zhig dbang gi rim pa ni/ /bla ma gzhan las rdzogs blangs la//man ngag gi ni rim pa ni/ /bla ma gzhan las blang du rung / /dbang dang man ngag ma bgrod par/ /glegs bam la brten shes rab kyis/ /gang zhig man ngag rim rnyed na/ /de ni sngon sbyangs 'phro can no/ /des kyang bla ma dag pa la/ /dbang gi rim pa bgrod par gces//rnam smin shes rab sbyangs pa'i mthus/ /lung ngag rtogs pa sbyangs pa dang / /rin chen 'khor lo'i man ngag 'di/ /dbang ma bgrod la bstan gyur na/ /bdag kyang phung la gzhan yang brlag /de bas gzhan du bstan mi bya/ /bdag gis brtsams pa'i man ngag 'di//rim pa tshul bzhin bris pa yis/ /'gro kun gsang sngags snod ldan te/ /tshe 'di nyid la byang chub shog/ /rin chen 'khor lo'i dbang gi man ngag gi rim pa slob dpon in+d+ra b+hU ti'i zhal snga nas mdzad pa rdzogs so// //