CLOSE WINDOW

D2463
བོད་ཡིག

/[ ]@##/ /rgya gar skad du/ shrI ban+d+ha bi muk+ta shA s+t+ra/ bod skad du/ dpal 'ching ba rnam grol gyi bstan bcos/ bcom ldan 'das 'jig rten dbang phyug la phyag 'tshal lo//gang zhig ma rtogs rtogs dka' rtogs na de nyid dus/ /'ching ba mi bzad shin tu grol dka' grol 'gyur ba/ /bdag dang gzhan don phun tshogs rdzogs pa'i sangs rgyas lam/ /ngo mtshar de ni 'gro ba bsgral phyir bdag gis bshad/ /gyad kyi nor bu la sogs bzhin/ / snying po de ni gzhan min gnas/ /gang phyir thams cad rang gis rang / /'ching dang gol bar 'gyur ba'i phyir/ /'di na 'ching ba gang yang med/ /'ching ba gang yin de grol ba'o/ /de ni stong dang rten 'brel 'jug /de phyir phongs pas mi rtogs so/ /dman dang log pa'i bshes gnyen gyis//zin gyur bsod nams brtson 'grus zhen/ /sbyangs stobs blo gros chung ba yi/ /skye bo rnams kyis rtogs dka'o/ /rtogs ldan snying brtse man ngag mkhas/ /bshes gnyen dam pa btsal bar bya/ /de ni srog lus longs spyod sogs/ /rnam kun dri med gus pas bsten/ / ji srid bdag sems brtan gyur pa/ /de srid lus dang grib ma bzhin/ /de yi rjes su bstan pa ni/ /rten 'brel stong nyid bdud rtsi'i chu/ /skom pas gdungs la chu bsil bzhin/ /dga' mgu mi zad dang bas btung / /lam gzhan phun tshogs nges 'byung min/ /de shes thabs dang shes rab yin//de ni chos sgo kun gyi sgo/ /rtogs dka' rtogs byed dam pa'i lam/ /ji ltar rten 'brel tsam nyid phyir/ /de ni ji ltar stong ma yin/ /gang phyir stong pa nyid yin na/ /de ni mkha' ltar 'gag med phyir/ /ci phyir rten cing 'brel mi 'byung / / de phyir de gnyis gnyis ma yin/ /de la rten 'brel ji lta bu/ /de yi stong nyid gang zhe na/ /nyon cig 'di ltar snang ba'i dngos/ /dbang po'i gzhu ltar rab gsal ba/ /sna tshogs bde dang sdug bsngal sogs/ /'di dag rang 'byung rgyu med min/ /rgyu gzhan ma yin ma nges min//mngar skyur kha la rang rgyu yin/ /sems nyid rten cing 'brel par 'byung / /ji ltar mkha' la sprin bzhin no/ /kye ma srid pa'i nags tshal du/ /sdug bsngal lo 'bras cher lhags shing / /nyes par spyad pa'i yal ga can/ /'dzin pa'i me tog rab gsal ba'o//de rgyu chags sdang tshul min sdong / /bdag tu lta ba'i rtsa brtan te/ /mi shes bag chags bcas drod gsher/ /sa chen 'byung ba las bskyed pa'o/ /mkha' la snod kyi 'jig rten ltar/ /e ma'o rten med rten gyur pa/ /rten 'brel brtan pa rnams kyi mchog /re zhig rten ni ma grub na/ /brten pa ji ltar rnam gzhag rung / /bdag med de lta bden min na/ /des bskyed chags sogs las rnams sogs/ /gang du ji ltar nges par bya/ /de ma grub na sdug bsngal gang / /de myong nyid kyang su zhig brjod/ / ji ltar sdong po'i rtsa phyung na/ /bcad pa'i bya ba grub pa ltar/ /gzhir gyur bdag rtogs rnam bzlog pas/ /mkhas pa de bzhin srid pa gzhig /bsregs bcad bdar bas gser sogs bzhin/ /'di ltar bdag dang gzhan pa zhes/ /bya ba ji ltar rten dang gnas/ / ngo bo mtshan nyid brtag par byos/ /de la lus ngag rlung dang yid/ /phyi nang bar sogs 'di dag ni/ /nam yang rten byed gnas gyur pa/ /sus kyang nges par mi nus so/ /gang phyir bdag de snang rung na/ /dmigs gyur dmigs pa med pa'i phyir/ /mi snang sems dang sems min smos//sems ni rang bzhin stong bdag nyid/ /sems min mi rtag rten 'brel bdag /rnam par dpyad na spros med do/ /rtag la bya ba 'gal ba'i phyir/ /gang na ci 'dra bdag bstan byos/ /mdor na 'dir mang smra mi bya/ /bdag de rang gi sgo gsum las/ / gzhan na 'dir snod ci zhig byas/ /mtshon gyi rma ltar nyes pa yang / /byis pa rnams kyi rang rtags dang / /log sred skye bo'i rtsod par zad/ /gzhan min de dag rnam dpyad na/ /ji ltar gang zhig bdag tu 'gyur/ /de min de rten de gnas gang / /gang yang 'di dag de rten dang / /de gnas phyogs kyang rnam dpyad kyi//tshul 'dis bdag dngos bdag mtshan nyid/ /sgyu ltar legs grub bstan pa yin/ /ltos shig tshul 'di chu shing 'dra/ /ngag ni brag ca mkha' 'dra yid/ /rdul tsam dmigs pa yod min na/ /'di la ji ltar bdag tu brtag /phyi ni phyi rol nang yang gzhan//des na bar yang de dag min/ /gang yang de ni dkar sogs min/ /ring dang thung dang sbom dang phra/ /mthug dang srab ces bya la sogs/ /mtshan nyid nges par nus ma yin/ /ci ste shing la 'khril shing bzhin/ /de ni kun gzhi 'am bag chags la/ / brten te mi mngon gnas she na/ /snang dang mi snang rnam dpyad dang / /de nyid sems dang sems min zhes/ /sngar bzhin brtag pa mtshungs par 'gyur/ /'on te sems ni gang yin pa/ /de nyid bdag ces bya zhe na/ /sems ni dmigs med 'od gsal phyir/ /da ni bdag de bdag med 'gyur//e ma'o shin tu rtogs dka'i gnas/ /e ma'o e ma shin tu rmad/ /e ma'o mkhas pas shes par rung / /e ma'o shes bral shes pa'i dbyings/ /de ltar 'gro ba 'di na bdag /med kyang nga dang nga yi zhes/ /gzung dang 'dzin pas brlabs pa yi/ /skye bo smyos pa 'di dag ci//'on kyang 'jig rten log pas mig /bsgribs nas gzung dang 'dzin pa ni/ /ji ltar snang ba ji bzhin bzhag /snang la snang ltar rab chags srid/ /sdug bsngal 'khor los sgyur ba'i rgyu/ /bdag cag de las 'da' min nam/ /gal te bdag nyid ma grub kyang / / de 'dzin nyid du bden zhe na/ /'di nyid e ma'o 'gro kun gyi/ /log par 'ching ba mi bzad pas/ /mgo la me shor bsgrims pa bzhin/ /rings par myur du ldog par bya/ /grogs dag 'di ltar mngon sum du/ /yang dag rig pa'i mig nyid kyis/ /bdag de ma grub des na 'dir//gzhan zhes bya ba'ang yod min na/ /yu bu thams cad snyam dang / /nga'o snyam dang gzhan snyam dang / /gzhan gyi'o zhes log rtog pa/ /'di dag ji ltar gang du dogs/ /dper na rmi lam bu shi ba/ /bu nyid med na de shi yang / /bden par yod pa ma yin pa/ /de bzhin yu bu'i 'dzin pa yang //e ma'o shin tu ngo mtshar gnas/ /gang zhig gcig nyid rtogs pa yis/ /thams cad rnam par grol 'gyur ba/ /'di la the tshom su zhig skrag /'khor dang mya ngan 'das pa'i chos/ /phung po khams dang skye mched sogs/ /theg gsum theg gsum nges 'byung lam//ma lus bdag min bdag gis min/ /bdag med stong pa'i mtshan nyid de/ /med phyir med la med nyid du/ /tshul bzhin nges par byas pa la/ /kye ma khyod la skyon ci yod/ /gang gang bdag dang bdag gi zhes/ /'dzin pa'i 'ching ba thams cad kyang //phyi min nang min par yang min/ /de bzhin lus ngag yod ma yin/ /de dag las min der gnas min/ /de bzhin chags dang sdang sogs kyi/ /ma lus yid la byed pa yang / /dpyad na re zhig gang la gang / /gang du gang gis chags pa dang / /sdang bar 'gyur ba'ang ga la yod//gzugs sdug sgra snyan dri zhim dang / /ro mngar reg 'jam yid bde'i rkyen/ /'di dag gang gis de shes la/ /ci zhig phan btags 'brel ba yod/ /de shes pas kyang de dag la/ /chags dang rab tu chags 'gyur gang / /de ni phyi nang bar dag dang //lus sogs dngos po gang zhig yin/ /de min de la de brten dang / /skyes dang gnas dang 'gag 'gyur ba/ /sgyu ma yi ni rta glang ltar/ /don du grub pa yod ma yin/ /gang gis bdag la brnyas sogs dang / /smad sogs brdeg sogs byas pa'i rgyu/ /sdang dang rab sdang sems 'byung ba//'di yang sngar bzhin bdag sems dang / /gang yang pha rol de yi sems/ /mkha' 'dra mtshan ma med pa yin/ /de bzhin gzhan de'i ngag nyid dang / /lus ni dri sgra shing lta bu/ /yin na sgyu mas sgyu ma yi/ /rgyal ltar des 'dir bdag gnod gang //bdag gi'ang de bzhin ngag dang lus/ /de ltar lus can thams cad kyi'ang / /mtshungs phyir 'di dag skye ba dang / /gnas dang 'gag 'gyur mi dmigs so/ /gang phyir phan tshun 'brel med phyir/ /dpyad na thams cad spros med phyir/ /yul dus rnam kun dri med phyir//mkha' la 'phur ba'i bya rjes bzhin/ /de ltar stod pa'i spyod yul 'dir/ /rmi lam sgra dang 'ja' bzhin du/ /gang la gang zhig ji ltar chags/ /de bzhin sdang ba 'ang gang du dogs/ /pha dang ma dang chung ma bu/ /gnyen dang bshes pa de bzhin dgra/ / sgyu ma ji bzhin de bzhin pas/ /'dzin pa thams cad gzhig par bya/ /de nyid kyis na chags sogs kyis/ /las byed de yang ji lta bu/ /yang yang shes rab brtan po yis/ /mkhas pas sngar bzhin brtag par byos/ /de phyir bde dang sdug bsngal yang / /bems pos rnam par myong min la//rig la dngos po yod min te/ /thog med dus nas log sbyangs pa/ /'khrul pas 'dzin pa nyi tshe ba/ /de yang dngos po med pa nyid/ /de ltar med la med nyid du/ /blo bzang rnams kyis goms byas na/ /smyos bas gnyen la dgra bzhin du/ / mi bzad 'ching bas bcings pa de/ /sbrul mdud rang gis 'grol ba bzhin/ /nges par rnam par grol bar 'gyur/ /rnam grol rnam grol las byung ba'i/ /'bras bu lhun gyis grub pa gang / /don gnyis phun tshogs ngo mtshar ba/ /de ni bum pa bzang po bzhin/ /dpal 'ching ba rnam grol gyi bstan bcos rgya gar gyi slob dpon chen po grub pa brnyes pa'i dpal ni ska lang+kas mdzad pa rdzogs so// //rnal 'byor gyi dbang phyug chen po shrI dza ga ta mi trA nan+da'i zhal snga nas/ kha che'i paN+Di ta chen po bud+d+hA shrI b+ha dras gtan la phab nas bod kyi lo chung gnubs tshul khrims shes rab kyis bsgyur ba'o/