CLOSE WINDOW

D2455
བོད་ཡིག

/paN+Di ta de nyid dang / lo tsA ba mar pa chos kyi blo gros kyis bsgyur ba'o//[ ]@##/ /rgya gar skad du/ pradz+nyA le kha nA ma/ bod skad du/ shes rab kyi phrin yig ces bya ba/ shes rab kyi pha rol tu phyin pa la phyag 'tshal lo//rje btsun spyan ras gzigs dbang phyug dang lha mo sgrol ma la phyag 'tshal lo/ /de nyid gsum gyi rin chen rnam par dag gyur pa/ /gsang las shin tu gsang gyur mkha' dang mtshungs pa snang / /lha mo kun 'gro bde ba mchog gi sa gzhir gyur/ /shes rab don dam gyur pa khyod la phyag 'tshal lo//sangs rgyas go 'phang grub don thob pa'i rgyur gyur cing / /yid bzhin nor dang bum pa bzang po ltar snang ba/ /de yi shin tu gsang ba'i phrin yig mnyan 'os pa/ /de nyid don gyi go 'phang bshad byar spring bar bya/ /de nas sgrub po la phan phyir/ / shes rab phrin yig pad rdo rjes/ /gsang las shin tu gsang gyur pa/ /de kho na nyid rab gsal bya/ /swa sti dag pa kun grol ba/ /nam mkha' lta bur skye ba med/ /rang rig tsam gyi shes bya dang / /mchog tu dga' ba byed pa mo/ /mtshan ma med cing snang ba med/ /dngos dang dngos med rnam par spangs//chos rang bzhin zhes bya ba/ /mchog tu dri ma med pa'i gnas/ /mtshan min thams cad yang dag spangs/ /mtshan nyid thams cad yang dag rdzogs/ /bdag med dri ma med pa'i gzhi/ /rdo rje gsum byung dri ma med/ /'dod pa'i don gyi gnas gyur pa//yid bzhin nor bu bzhin du 'byung / /lha yi dpag bsam shing lta bu/ /mchod pa mchog gi gnas gyur pa/ /de na gnas pa'i lha mo des/ /shes rab lha mo bla na med/ /rdor gsum mi phyed sbyor ba yis/ /de kho na nyid pad+mar ldan/ / nang gi gnas kyi rang bzhin gyis/ /mchog tu dga' ba byed pa la/ /dngos dang dngos med rang bzhin gyis/ /'bad de yang dag mkhyen par gsol/ /rba rlabs med cing snang ba med/ /rang gi lus la gnas gyur kyang / /'bar ba chen mo de srid kyi/ /dus gsum bdag gis ma shes so//mchog tu dga' ba'i gzugs can ma/ /rang bzhin med pas mdzes pa ste/ /skye ba med pas kun rtogs pas/ /thams cad du ni khyab byed ma/ /'dod pa yon tan bzang sngar ldan/ /lus dang lus la kun du gnas/ /dmyal ba la sogs thams cad la//gsang ba'i spyod pas rol pa ste/ /mdog dang yan lag rnam par spangs/ /gsang las shin tu gsang gyur 'di/ /dpal ldan bde chen zhal snga yi/ /bka' drin gyis ni bdag gis rtogs/ /dri ma med cing khyab pa mo/ /rang rig mtshan nyid gcig bu ste/ /skye ba med la rtogs bya'i phyir//ji bzhin du ni rnam par gnas/ /dngos dang dngos med mchog 'dzin pa/ /zad par bya phyir ji bzhin gnas/ /bla ma'i zhal snga'i bka' drin gyis/ /dge ma ji bzhin shes nas ni/ /yang dag gus dang bcas pa yis/ /nus pa ji bzhin bsgom pa'ang byas//de ltar na yang da bar du/ /gcig tu mi 'gro ci yi phyir/ /yang na bdag la skal med dam/ /ji ste bdag gi sems rgyud la/ /yang dag pa yi sbyor ba yis/ /ji skad gsungs bzhin mi gnas sam/ /rang gi rang bzhin gyis dag pa/ /mngon par byang chub byed pa mo//phung lnga rdo rje gsum sogs la/ /ji bzhin yang dag gnas pa ni/ /slob dpon dpal ldan zhal snga nas/ /snying rjer zhugs pa'i thugs kyis ni/ /'bad de de bzhin rtogs bya'i phyir/ /yang dag ji bzhin bdag la gsungs/ /dpal ldan bde chen mgon po yis//khyod kyis dngos la bdag blo bskyed/ /bka' lung stsal cing gnas pas na/ /de la 'dir ni the tshom med/ /de nyid gsal bar shes nas su/ /nyin dang mtshan du bsgom byas kyang / /gang phyir bden par gsal ba ru/ /mi snang bas te stong ngam ci/ /yid bzhin nor bu mkha' mtshungs pas//rdzogs sangs rgyas kyis gsungs so lo/ /de ltar gsungs pa'i tshig de dag /bden pa dang ni mi bden yin/ /mkha' mtshungs gang yin bden pa ste/ /gang zhig shes nas bsgom gyur kyang / /gang dngos gsal bar mi ston pas/ / yid bzhin nor mtshungs brdzun pa yin/ /bdag gis khyod ni don dam gyis/ /kun du 'char bar shes pa ste/ /de ltar na yang mi dmigs pas/ /sgyu ma tshogs kyi gzugs 'dzin yin/ /rdzogs sangs rgyas kyis don dam du/ /nges par skyon dang yon tan dag /grogs 'dus pa las ji bzhin 'gyur//gsungs pa'i ngag de bden pa ste/ /shes rab bden par smra ba khyod/ /gang gis rtogs pa'i rang bzhin yang / /bdag med bzhi yang 'dus pa yis/ /de dang mtshungs par de gnas so/ /bzang mo dri ma med 'bar ma/ /'on kyang gang gis bdag shes nas//yun ring dus su rnam dpyad kyang / /ma dmigs pa de gang du yib/ /mchog tu dga' bar byed pa'i gzugs/ /mngon par byang chub byed ba'o/ /ye shes sgron ma'i snang ba ni/ /phyogs bcur gsal bar bteg nas su/ /dri dang phreng sogs na bza' dang / bza' bca' ston mo de bzhin gzhan/ /gnyis su med pa'i sbyor ba yis/ /rgyun mi 'chad par rtag tu ni/ /bdag gi shes rab bsten gyur kyang / /skad cig kyang ni 'gyur ba med/ /mngon rtogs dri med 'jug pa'o/ /de bzhin nyid shes dag pa yi/ /khyod kyi dam tshig spyod pas ni//byang chub lam ni ston pa po/ /rgyud las ji skad 'byung ba bzhin/ /rgyun du bar chad med par ni/ /'dod yon lnga po bsten pa yis/ /bdag gi byis pa nas bzung ste/ /shin tu bdag nyid rig pa yis/ /bsten pa dang ni bsgoms gyur pas/ /dge ba yi ni sa gzhi khyod/ / bdag la ci phyir yid mi rton/ /sems gnyis ldan pa'i bud med la/ /su zhig la ni rton byed ces/ /yang dag mgon pos gsungs ba gang / /de ni bden par nye bar gnas/ /sgyu ma dag ni thams cad la/ /bud med sgyu ma khyad par 'phags/ /rnam pa du mas phan btags pas//gang gis rnam kun bsten byas shing / /khams gsum ma lus bar bltas kyang / /mi snang gcig pu ga na gnas/ /khyod kyis gnad ni dran med par/ /byis pa gang gis khyod bsgoms na/ /de rnams don med phung 'gyur zhing / /byang chub rgyur khyod gnas pa min//gnad ni legs par shes ldan pa/ /gang gis khyod ni bsgoms gyur na/ /byang chub snying bo'i bar du yang / /de rnams sangs rgyas bya phyir gnas/ /bzang mo khyod dngos shes gyur nas/ /gang gis ma bsgoms de la yang / /grogs mos lag pa bsdams te song //rigs ngan dang ni mtho ba'ang rung / gnad shes nas ni mdzar gyur nas/ /bzang mo nang du'ang snang byed cing / /lan 'ga' 'ang mdza' ba'i ngo med cing / /ma rabs rnams kyi rang bzhin ni/ /mtshang brtol na ni nges pa ru/ /skye bo de yi gdong gi ni/ /pad+ma lta zhing dbang du 'gyur//cho 'brang can gyi skye bo yang / /'jug pa lam ni 'di nyid de/ /tshig tsam chad pa byas na yang / /'chi ba na yang 'gyur ba med/ /gnyi ga dag pa'i rigs las byung / /cho 'brang can du skyes pa yin/ /bya ba dang ni bya min dang / /snod dang snod min 'dir khyad med/ / khyed la bdag gis rnam kun du/ /mchod byas lan 'ga' nga mi lta bas/ /shes rab khyod kyi rigs spyod yul/ /da ltar bdag gis khong du chud/ /bud med rnams kyi rang bzhin ni/ /shin tu 'phyar la g.yo ba yin/ /mchu rkan la sogs skam pa ste/ /mtshang 'dru mang bos ci zhig bya//khyod ni nyin dang mtshan dag dang / /skad cig gcig kyang ma yengs par/ /sgo man skad cig nyid kyis ni/ /bla na med pa'i gnas thob byed/ /gang gis nye bar bsgoms pa yis/ /sangs rgyas go 'phang rgyu yin pa'i/ /khyod kyi spyod pa 'di lta bu/ /ji skad gsungs bzhin sngar ma shes//mang po smra ba ci zhig dgos/ /yid brtan rung ba 'ga' yang med/ /'gyod dang gnyid dang rmugs pa yis/ /rmongs pas khyod ni mi shes na/ /khyod kyi rang gi rang bzhin gang / /gsal ba ru ni de smros shig /rdor gsum sa bon las byung bas//gsum gyis bskyed par the tshom med/ /'dod chags zhe sdang sogs dri mas/ /sems can thams cad rmongs pas na/ /bye ba du ma'i nang nas kyang / /gang gis khyod shes su yang med/ /mang du smra ba ci zhig dgos/ /smad 'tshong g.yon can gyis bskor bzhin//don dam du ni grub med pas/ /sgyu ma mchog gi gzugs 'dzin ma/ /bskal pa bye ba grangs med par/ /rmongs pa khyod ni ma shes te/ /bza' dang btung sogs chags pa yis/ /srid pa'i brtson rar lhung bar 'gyur/ /de la shin tu chags pa yis/ /'byor ster khyod ni brjed par 'gyur//phyag rgya'i chags la 'jug pa yis/ /rgyal 'gyur rdo rje can mchog ma/ /bla ma'i zhabs kyi bka' drin las/ /bzang mo khyod kyi rang bzhin ni/ /ji ltar yang dag gnas pa bzhin/ /thams cad bdag gis shes par 'gyur/ /khyod kyi rang bzhin ma lus pa//thams cad bdag gis shes pas na/ rmi lam na yang slu mi nus/ /de bas bdag la blo gtod cig /khyod kyi lam ni gcig pu nyid/ /mkhas pas cho ga bzhin sbyangs te/ /gang bzhugs sangs rgyas nyid phrad par/ /rgyal ba rnams kyis yang dag bstan//zab mo de yang bdag gis ni/ /ji srid sbyang ba ma byas pa/ /de srid khyod kyi lus reg las/ /byung ba'i bde ba rnyed ma yin/ /gti mug 'obs kyis 'khrigs pa dang / /zhe sdang gis ni sdong dum ldang / /'dod chags tsher ma nyam nga bas/ /byang chub lam ni bgod par dka'//phung po'i shing ni thog mtha' med/ /'dod yon yal ga gyen 'grengs pas/ /nam mkha'i mthong ni g.yogs pas na/ /lam de dam por bkag ste gnas/ /phung po nyon mongs de bzhin du/ /'chi bdag lha bdud chom po pa/ /sdang ba mang pos bskor nas su//rnam rtog chen po las byung ba'i/ /srid pa'i rtswa dang lcug ma dang / /rdo rgyal la sogs ldan pa'i nags/ /shin tu rgya chen rgal dka' bar/ /phung po'i shir rta brten nas su/ /gti mug 'obs ni rgal dkar gnas/ /kun rtog rtswa dang ldum sogs pa'i//skyibs su 'bad de yib par byed/ /lha bdud la sogs chom po pa/ /de lta bu yi phyogs na gnas/ /yang dag lam zhugs 'gron po dag /sems kyi nor bu 'phrog pa yis/ /rab tu sdang bas 'joms par byed/ /dkon mchog gsum gyi mdzod po che/ / yon tan nor gyis yongs bkang pa/ /byang chub lam la gnas pa yi/ /mel tshe ba yis de mthong nas/ /ye shes rdo rje sta re ni/ /so ni rnon por bdar ba yis/ /byang chub kyi ni lam 'gog pa'i/ /phung po shing ni kun bcad nas/ /cho ga bzhin du gtubs nas su/ /yid kyi shing de las byung ba'i//nyon mongs ldum dum tsher mar bcas//bdag med me la bsreg par bya/ /nga rgyal rdo yi tshogs de ni/ /shes rab rdo rje phye mar bya/ /gti mug 'obs ni 'khrigs pa dag /byang sems rgyun mi 'chad bas dag /yang dag lam zhugs 'gron po la/ / 'tshe byed 'dul bar dka' ba yi/ /'chi bdag bdung sogs chom po pa/ /bcom pas de dang des 'bros 'gyur/ /byang chub lam ni yangs pa na/ /byang chub 'gegs bya'i phyir gnas pa/ /phyogs bcur gnas pa'i sdang ba rnams/ /thabs kyi lus ni dri med pas/ /shes rab ral gri rnon po yis//'bad pas de dag bcom nas su//lam bzang de ru zhugs nas ni/ /thams cad der ni ci dgar 'gro/ /byang chub lam ni sbyangs pa yis/ /kun du shin tu dri med pas/ /rmad byung bsam gyis mi khyab ba'i/ /grogs mo khyod ni sbyangs pas na/ /rang bzhin dri med dag cing zhi//rang rig bdag med mnyam pa nyid/ /'dong pa'i don gyi 'bras ster ba/ /go 'phang bla med thob par 'gyur/ /khyod kyi rang bzhin ro myang na/ /'di ni 'di 'dra zhes bya ba/ /sangs rgyas kyis kyang brjod mi nus/ /rang rig skye ba med pa nyid/ /sangs rgyas kun gyis phyag byas pa//dbang po las 'das gang yin 'thob/ /mchog tu dga' ba las byung dag /shin tu rnyed dka' go 'phang ni/ /bsam gyis mi khyab bla na med/ /mya ngan 'das gnas zhes bya ba/ /mngon par byang chub byed ba'o/ /bla ma'i zhal snga'i bka' drin ni/ /nyin dang mtshan du bsgom pa yi//chos gcig gis ni thob par 'gyur/ /shin tu gus pas bsgom pa las/ /gzhan du de ni thob pa min/ /de ni rang bzhin dag pa ste/ /dus kun du ni 'dus ma byas/ /rtag dang chad pa rnam par spangs/ /thabs dang shes rab dri ma med/ /skye ba med par rtogs pa yis/ sems can kun la yang dag gnas/ /sangs rgyas byang chub bsam mi khyab/ /bla na med par der shes bya/ /sangs rgyas kun gyi gnas de ni/ /sangs rgyas nyid ni thob byed pa'o/ /de ltar sems dang sems byung gi /don gyi rang bzhin rtogs nas ni/ /rdo rje dri med gsum sbyor ba/ /ji ste shes nas rnam bsgoms na//ye shes rdo rje rab sbyor gyis/ /des ni grogs mo 'grub par 'gyur/ /dngos dang dngos med las 'das pas/ /nam mkha' lta bur khyab pa ste/ /dri med zhi ba thabs bcas par/ /brten par bya zhes 'dren pas brjod/ /thabs dang bral na khyod kyi min/ / thabs kyang khyod dang bral na min/ /de gnyis phan tshun bral ba yis/ /'grub pa nam yang yod ma yin/ /thabs dang yang dag ldan pa ru/ /mdza' mo khyod ni ji bzhin 'gyur/ /bdag gis kun du shes zin na/ /de las gzhan pa ci smrar yod/ /bla ma'i zhal snga'i bka' drin ni/ / bdag gi byang chub snying po'i bar/ /sangs rgyas nyid du brtan bgyid na/ /de bas bdag la drin gyis g.yogs/ /dpal ldan bde chen zhal snga nas/ /bdag ni sangs rgyas nyid bya'i rgyu/ /thabs dang yang dag ldan pa yi/ /blo gros chen mo khyod la ni/ /pad+ma rdo rje nges par ni/ / sangs rgyas kyis zhes ji skad du/ /spring ba de bzhin grogs mo mchog /thabs dang bcas par bya dgos par/ /dpal ldan bde chen rdo rje can/ /de skad phrin brdzongs de bzhin du/ /bdag ni sangs rgyas rgyu nyid du/ /khyod kyis de ltar myur du gyis/ /bdag la ji bzhin gsal po ru//phrin las skad cig myur du bskur/ /khyod kyis pa'am brjed ngas pa/ /bdag gis tshe 'dir gnas mi bya/ /bying dang rgod ba sbangs nas su/ /dus kun nyin dang mtshan du ni/ /rgyun du bar chad med pa ru/ /skad cig skad cig khyod dran pas/ / dngos grub don kun bdag la sbyin/ /gal te nge ltar ma gyur na/ /de tshe bdag ni smra bab pas/ /ji ltar byed pa ltos shig dang / /ji bzhin rgyud kyi de nyid kyi/ /theg pa yis ni bcings nas su/ /yang dag pa yi khyim du ni/ /dge mas kun nas bcug nas ni/ /skye ba med par rtogs pa yi//sems dang sems byung rang bzhin gyis/ /'bad de srung ba byas nas su/ /de nyid sangs rgyas sa mchog tu/ /thabs kyi lcags sgrog gis bcings te/ /ye shes rdo rje'i gzer btab la/ /bdag med rdzong du bzhag nas ni/ /de nas bdag gis bsgrub par bya/ / de ltar khyod la spring bya ba/ /ji ltar gyur pa bdag gis springs/ /'dzom dang ngo dga' spangs nas su/ /bzang mo la ni kun bzlas kyis/ /gal te byams par mi byed na/ /de tshe ci zhig smra ru yod/ /'on te min na than 'di dag /rdo rje 'dzin ma'i snying la zhog /khyod kyi lam dang sbyang ba yi//bye brag dag kyang ngas shes la/ /rigs dang gzugs kyi rang bzhin dang / /bdag gis khyod kyi kun 'byung dang / /don dam gnas kyang shes pas na/ /de bas bdag la blo gtod cig /bla ma'i zhal snga'i bka' drin gyis/ /thabs kyi mchog dang bcas pa ru/ / shes bya thag pa rab sra bas/ /de dang de ru rgyug byed pa/ /bdag gis bzung ste bcings zin pas/ /da ni 'bros sa ga la yod/ /de bas lha mo bdag dga' bas/ /dbang gyur dam tshig la mnos la/ /dpal ldan bde chen zhal snga'i bka'/ /yon tan rgya mtshos bskyang bar gyis/ / khyod kyi rang bzhin gzung med cing / /rmad byung ji bzhin rig nas ni/ /dpal ldan bde chen spyod pa ni/ /bka' yis de bzhin 'jug par bya/ /rdo rje gsang ba'i tshig ldan pa/ /shes rab phrin yig mnyam med pa/ /dpal ldan bde chen zhal snga yi/ /bka' drin gyis ni bdag gis byas//shes rab ri bo srub shing gis/ /shes bya'i 'o mtsho bsrubs las byung / /ye shes bdud rtsi rang byung ba/ /mngon sum sangs rgyas byed pa po/ /shes rab phrin yig la 'bad de/ /skyes bu gang gis de rig nas/ /'bad de rnam par bsgoms pas na/ /de ni rdo rje 'dzin dngos 'gyur/