CLOSE WINDOW

D2444
བོད་ཡིག

@##/ /bla ma dam pa rnams la phyag 'tshal lo/ /rgyal sras mi yi seng ge yis/ /mkha' 'gro ma yi gsang tshig brtol/ /grub thob nyams kyi rtogs pa rnams/ /bka' rgya bkrol to gtad rgya byas/ /Ar+ya de bas thugs kyi rtogs pa mgur du bzhengs pa/ kye ho phung po lha yi ngo bor gnas//bum pa'i dbang bskur rang la rdzogs/ /sgra stong brag ca lta bur rtogs/ /gsang ba'i dbang la ltos mi dgos/ /nyams myong bde chen khong nas sad/ /shes rab ye shes dbang dang ldan/ /chos rnams nam mkha' lta bur rtogs/ /bzhi pa'i dbang gis don dang ldan//gsung ngo // //nA gArdzu nas gsungs pa/ kye ho rtsa ba bral ba'i sems nyid 'di/ /chos rnams kun gyi rtsa ba yin/ /de las 'khor 'das sdong po gyes/ /bde sdug gnyis kyi lo 'dab rgyas/ /sna tshogs las kyi 'bras bu smin/ /gsung ngo // //mar pas gsungs pa/kye ho sna tshogs snang la ngos gzung med/ /'di zhes mtshon pa'i tshig dang bral/ /mi g.yo mi sems sems chen po/ /bla dgas tsam du brjod par zad/ /'di la don du gzung du med/ /gsung ngo // //rdo rje dril bu pas gsungs pa/ kye ho dbang ldan pad+ma'i dbus na bde ba'i ye shes gnas//thabs kyi sbyor bas spros bral lhan cig skyes pa 'char/ /bde gshegs thugs kyi gdams pas nam mkha'i khams dang mnyam/ /'di ni gsang sngags thabs kyi gnad do ngo mtshar che/ /gsung ngo // //lU yi pas smras pa/ phung po'i dbus na gnyug ma'i ye shes me gcig po//srog dang rtsol bas bskyod na bde ba'i ye shes 'bar/ /bdag 'dzin sreg pa'i me ni rlung gis sbar bar bya/ /bde chen mchog ni nam mkha'i khams su mi shong ngo / /gsung ngo // //shAn+ta de bas gsungs pa/ kye ho sems ni ye shes chen po ste/ /'di las gud na sangs rgyas med//sems kyi de nyid shes gyur na/ /'khor ba rang grol mya ngan 'das/ /gsung ngo // //d+ha sa pas gsungs pa/ kye ho 'gro ba sna tshogs las kyis bcings/ /las kyi de nyid shes gyur na/ /bcings pa med de grol ba med/ /sgyu mkhan ri mo ji bzhin no/ /gsung ngo // //g.yog po ljon pa can gyis gsungs pa/ kye ho he ru ka dpal rdo rje'i sku/ /rnal 'byor ma ni las kyi yum/ /sna tshogs snang ba mchog gi zhing / /'gro ba lha dang lha mo ste/ /'di na 'khor ba'i ming yang med/ /gsung ngo // //a ba d+hU tI pas gsungs pa/gshis kyi stong nyid 'o ma'i mtsho/ /thabs kyi rol pa srub ma'i shing / /dad brtson she mas rtsol byas na/ /sku gsum mar gyi gong bu 'dril/ /gsung ngo // //dur khrod dbang phyug gis smras pa/ mthong du med do sems kyi don/ /bsam du med do gnyug ma'i ngang / /dgag sgrub med pa smyon pa'i lus//btsal du med pa gyad kyi nor/ /gsung ngo // //ye shes skyong gis smras pa/ kye ho snang stong dbyer med lhan cig skyes/ /rig stong dbyer med lhan cig skyes/ /gnyis med ye shes lhan cig skyes/ /rgyu 'bras dbyer med lhan cig skyes/ /'di la tha dad ngas ma mthong //gsung ngo // //li la'i zhabs kyis gsungs pa/ sna tshogs snang ba rang gi sems/ /sems ni sems kyi rang bzhin bral/ /thig le chen po chos kyi sgu/ /'di las mi spro gzhi la bzhag /gsung ngo // //nyi ma sbas pas gsungs pa/ lus la ye shes chen por gnas//bde ba drod kyis sbar bar bya/ /las kyi rtsi bur sreg par byed/ /bla ma'i bka' las shes par bya/ /gsung ngo // //sa 'dzin zhabs kyis gsungs pa/ lus kyi 'khor lo bzhi 'khor bas/ /srid rtsa'i sdong bo gcod par byed/ /rtsa yi rgyal po spangs pa yis/ / thar pa'i srog shing 'dzugs par byed/ /bde chen nam mkha'i ba bzhos pas/ /lhan cig skyes pa ston par byed/ /gsung ngo // //bi na sas smras pa/ nyi zla stod la mnan pa yis/ /las kyi phreng thag gcod par byed/ /spu gri klad la bskor ba yis/ /bya bran nam mkha'i dbyings su skrod//bya ba zin pa'i skyes bu de/ /'a ma'i pang du rgyug par byed/ /gsung ngo // //phyogs kyi glang pos smras pa/ rig pa'i sgron me sbar ba yis/ /log rtog mun pa rab bsal te/ /gzhan gyi sde pa kun bcom nas/ /rang gi mtshan nyid mtshon du med/ /gsung ngo // // dpa' bo dril bu'i zhabs kyis smras pa/ dga' ba'i ye shes spar ba yis//gnyug ma'i lhan cig skyes pa rtogs/ /'khor 'das gnyis po gzhi las grol/ /gsang sngags thabs kyis khyad par 'phags/ /gsung ngo // //li la'i bzang pos smras pa/ lkugs pa'i kha dang rus sbal mig /gzhon nu ma yi bde ba'am/ /khur bar chu blugs ji bzhin du/ /mtshon du 'dug par ngas ma mthong / /gsung ngo // //nA ga bo byes gsungs pa/ gnyis med spros bral nam mkha'i ngang / /ming med ye shes bde chen po/ /bsam med brjod pa'i mtha' las 'das//'gyur med chos sku ngo mtshar che/ /gsung ngo // //tog tse pas gsungs pa/ ltos shig nam mkha'i dkyil du ltos/ /ma mthong ba ni de mthong yin/ /sdod cig rgya mtsho'i gting du sdod/ /mi g.yo ba ni dgongs pa yin/ /zung shig bar snang rlung po zung / / ngos gzung med na stong pa yin/ /gsung ngo // //nag po zhabs kyis gsungs pa/ lam gyi de nyid mthong goms na/ /'chi ba'i 'od gsal gdon mi za/ /las kyi 'phen pa nam mkhas khyer/ /dus der chos nyid ma bu phrad/ /gsung ngo // //b+hi na zhabs kyis smras pa/ snang stong thabs dang shes rab la/ /bla ma'i ngo sprod brda yis rol/ /rig pa'i ye shes khong nas sad/ /bde chen lhan cig skyes pa rtogs/ /gsung ngo // //pad+ma'i myu gus smras pa/ sna tshogs snang ba las kyi phyag rgya ste/ /der 'dzin stong pa chos kyi phyag rgya yin/ /gnyis med ngang las mi 'da' dam tshig ste//der 'dzin blo dang bral na phyag rgya che/ /gsung ngo // //mtsho skyes rdo rjes smras pa/ lte ba mkha' dbyings gru gsum du/ /rig pa'i lha mo'i skur gsal te/ /'od zer spro bsdus 'gro don byed/ /sku gsum gzhan nas btsal mi dgos/ / gsung ngo // //gu d+ha ri pas gsungs pa/ ye shes rdo rje nam mkha'i mdog /sna tshogs 'byung ba'i cho 'phrul ston/ /dmigs pa med par kun la khyab/ /'du 'bral med par rang la rdzogs/ /ma btsal lhan gyis grub pa'i don/ /gsung ngo // //ti lo pas gsungs pa/ kye ho ltos shig yul la ltos/ /snang ba sna tshogs rig pa'i rtsal/ /'dod yon sna tshogs sems kyi rgyan/ /bde sdug sna tshogs gnyug ma'i rtsal/ /gar yang ma phyin nam mkha'i bya/ /snang ba sna tshogs gzigs mor che/ /gsung ngo // //nA ro pas gsungs pa/spyi gtsug pad+ma'i gdan stengs su/ /mtshan ldan bla ma'i spyan snga ru/ /rtsa dar dkar gyi lam la 'gro shes na/ /mtshams med lnga po byed kyang grol/ /gsang sngags thabs kyi khyad par yin/ /gsung ngo // //kr-iSh+Ta pas smras pa/ rtse gsum gsal ba'i me long la//sems kyi rgyal po lta shes na/ /'khrul pa'i yul gyis mi phrogs te/ /gnyug ma'i rdzong la nges par gnas/ /gsung ngo // //b+ha du las smras pa/ ka ra yul la bcings pa yis/ /rtog pa'i 'gyu ba gcod par byed/ /lta stangs snga phyi brjes pa yis/ /bying rgod thun skyon sel bar byed//gnyen po'i rtsol ba bshig pa yis/ /gnyug ma rang la 'khor bar byed/ /gsung ngo // //Dom+bi te ru kas smras pa/ las kyi phyag rgya las byung ba'i/ /dga' bzhi'i ye shes phyag rgya che/ /snang ba zag med spros dang bral/ /gnyug ma don gyi ye shes mthong //gsung ngo // //ka na pas smras pa/ sems nyid spros dang bral ba nam mkha'i ngang / /rgya mtsho shel dang me tog bzhin/ /sang nge rje ne sa le ba/ /dran du mod sbung yengs su med/ /ci rigs tsam du goms par gyis/ /gsung ngo // //ban+d+ha badzras smras pa/ gnyis med ye shes chen po 'di/ /bstan du yod de mtshon du med/ /goms su yod de bsgom du med/ /myong du yod de brjod du med/ /gsung ngo // //kalba las smras pa/ snang ba'i ngo bo stong pa'i ror/ /spor cig yul la yengs pa'i tshe/ /bde ba'i ngo bor gsal ba'i ror/ /spor cig sems la bltas pa'i tshe//rtogs pa'i ngo bor nyams kyi ror/ /spor cig chags sdang skyes pa'i tshe/ /gsung ngo // //pradz+nyA pha las smras pa/ sna tshogs sna tshogs de de nyid/ /dgag pa med cing sgrub pa med/ /dran pa'i rtsi dang ma bral bar/ /spang blang med par rol du gsol/ /gsung ngo // // dpa' bo rdo rjes smras pa/ sems kyi thig le yi ge'i dbyibs/ /rlung gis bskyod de mkha' la 'phur/ /las kyi sgo bzhi 'gags nas kyang / /bde chen gnas su 'pho bar byed/ /gsung ngo // //shrI ba tas smras pa/ dug sbrul bsad la glang chen btsong / /bya ni mkha' la spar bar bya//btsun mo lha sras yul phyung la/ /rgyal po bcom na nges par grol/ /gsung ngo // //gnyis med sbas pas smras pa/ yon tan thams cad 'byung ba'i gnas/ /spyi bo'i bla ma legs mchod la/ /'dod pa thams cad 'byung ba'i gnas/ /bya ba mang pos ci zhig bya//gsung ngo // //in+d+ra b+hu tis smras pa/ sna tshogs yul gyi snang ba 'di/ /rig pa ye shes rgyan yin pas/ /mi spang de bzhin nyid du rol/ /'ching bar mi 'gyur grol ba'i lam/ /gsung ngo // //ka pa tsa ris smras pa/ chu bo sbubs su chud pa bzhin//sna tshogs de bzhin nyid du 'dus/ /rgya mtsho lan tshul ro bzhin du/ /du ma ro gcig bde bar 'bar/ /nags kyi me la rlung bzhin du/ /rkyen ngan sna tshogs lam gyi gogs/ /gsung ngo // //ku la ma ris smras pa/ gzhi ma bcos chos dbyings pho brang du/ / lam rig pa'i ye shes lham me ba/ /de bde gsal stong pa'i ngar gyis rdeg /don chos sgu gnyis med kyi ngang du grol/ /gsung ngo // //rat+na bo d+his smras pa/ ma bcos rnal ma'i shes pa de/ /mi bsgom de bzhin nyid du bzhag /bcos pa thams cad blo yin te/ /blo las grol na thar pa'i lam//gsung ngo // //pad+ma badzras smras pa/ gang gis sems kyi don mthong na/ /rtsa ba bral ba'i sdong bu bzhin/ /sna tshogs snang bas 'ching mi nus/ /sems kyi de nyid yin phyir ro/ /gsung ngo // //ra ma pha las smras pa/ gang du rtogs pa blo yin la//gang du sgom pa rtog pa ste/ /gang du bcos kyang bcos ma nyid/ /ji ltar bsgrubs kyang 'dod pa'i lam/ /'di kun byis pa'i rtsed mo yin/ /mkhas pa rnams la ci yang med/ /gsung ngo // //klu'i byang chub kyis smras pa/ yi ge gsum gyi sbyor ba yis/ / rlung gi de nyid shes gyur na/ /sems kyi de nyid rtogs par 'gyur/ /sems rtogs pas ni bde ba che/ /gsung ngo // //karma badzras smras pa/ 'khrul pa'i rtsa ba ma chod na/ /sems kyi 'khrul 'khor mi 'jig ste/ /bcos ma'i theg pa snying re rje/ / rtsa ba bral ba'i don mthong na/ /las kyi 'khrul 'khor gzhi la 'jig /gsung ngo // //zla ba grags pas smras pa/ yod dam med pa'i mtha' spangs te/ /dbus kyi don la mi gnas par/ /bsgom du med pa'i ngang la zhog /thob tu med pa'i 'bras bu 'byung / /gsung ngo // // sa ra pas smras pa/ lhan cig skyes pa'i ye shes 'di/ /khyod kyis smros dang ji ltar yin/ /ma myong shes na myong ba'i mchog /mi btsal de bzhin nyid du bzhag /gsung ngo // //su ka ra sid+his smras pa/ gang la zhen pa'i blo de thong / /rtog pa gnyis ni mtshungs par sgrib/ /rtog dang bral na sgom du med//bsam du med pa ji ltar dran/ /gsung ngo // //ye shes rdo rjes smras pa/ kun gzhi dag pa'i dbyings nas rig pa'i nyi ma shar/ /rgya mtsho nor bu'i gling nas yid bzhin nor bu lon/ /'gro ba'i ma rig ling tog shes rab thur mas phye/ /'khor ba'i chu bo bzhi las thabs ldan bla mas bsgral//gsung ngo // //mtsho skyes rdo rjes smras pa/ dpe yi ye shes mtshon du med/ /don gyi ye shes sgom du med/ /thabs kyi man ngag smra ru med/ /bla ma'i drin lan 'khor thabs sked/ /gsung ngo // //ra tri tas gsungs pa/ mtshon gyi 'khor los phyogs rnams kun gyi dngos po gcod//thos pa'i 'khor los log rtog blo yi spros pa gcod/ /nyams kyi 'khor los gzung 'dzin 'khrul pa'i snang ba gcod/ /rtogs pa'i 'khor los 'khor 'das gnyis kyi re dogs gcod/ /gsung ngo // //grub thob lnga bcu'i rtogs pa brjod pa thig le 'od kyi phreng ba zhes bya ba mkha' 'gro ma'i gsang mdzod nas phyung ste rje dam pa rgya gar rin po che la gnang ba zha ma lo tsA bas bsgyur ba'o/