CLOSE WINDOW

D2334
བོད་ཡིག

@##/ /rgya gar skad du/ /pra ti pat+ti sA ra sha ta kaM/ bod skad du/ go bar byed pa snying po brgya pa/ dpal rdo rje he ru ka la phyag 'tshal lo/ /gang zhig shin tu phul byung chos kun mnyam nyid rang bzhin yang / /rdo rje rnam par sgeg mo rnams kyis dgyes par gyur pa rgyal/ /sprul pa'i gzugs ni rnam pa mang mdzad dkyil 'khor 'khor lo'i dpal//he ru ka dpal mnyam med de yi zhabs la brten par bgyi/ /gang gis dmigs pa rnams kyis khengs pas rlom pa lta'i/ /mang po'i rtog 'di 'bras bu las ni spangs gyur kyang / /shin tu mdzes pa'i dga' bar yongs bsgyur ched du ji lta'i don//go bar byed pa'i snying po ston pa de la phyag 'tshal lo/ /kun du rtog med ma 'dres pa/ /skye ba med cing thogs pa med/ /dor dang bsags pa spangs pa yi/ /sems ni kye yi rdo rje nyid/ /sna tshogs sprul pa'i gzugs rnams su/ / sna tshogs mos pa rnam rtog pa/ /rang gis rang bzhin rtogs pa yis/ /rang gi ngo bo mos med nyid/ /'di ni rang bzhin dkyil 'khor te/ /rnam pa ma lus 'od gsal ba/ /dag pa ye shes lnga rang bzhin/ /bla med dba' rlabs med pa'o/ /spros pa med pa'i rang bzhin gyis//'di ltar lha yi gzugs su ste/ /ma lus dga' ba yang dag rdzogs/ /nyon mongs ma lus 'jig byed pa/ /gzugs la sogs 'di de bzhin nyid/ /ji lta'i rnam par rnam gnas pa/ /gzung bya min par rab rtogs bya/ /rtogs pa de 'di mtshan nyid bral//chos rnams kun gyi snying po ni/ /stong nyid gcig pu de min pas/ /dkyil 'khor de nyid yang dag rig /rnam pa kun du mtshan nyid bral/ /rtsa rnams thams cad mkha' 'gro ma/ /phung po lnga yang dkyil 'khor dang / /dngos po thams cad mnyam sbyor ba/ /bsam med rdo rje can gyi thugs//thams cad du yang sku rnams dang / /de bzhin rigs rnams kun kyang de/ /phyag rgya mtshan ma la sogs rnams/ /de ni de lta de ltar rol/ /thams cad du ni snyoms 'jug de/ /bde ba chen po'i dga' ston ro/ /rdo rje can gzugs phun tshogs pa/ /mtha' yas 'di tsam nyid kyi ci//phung po rnams de khams rnams de/ /skye mched rnams kyang de rnams nyid/ /thams cad ro gcig snyoms 'jug pa/ /rdo rje can gyi rnam 'phrul lo/ /rdo rje can 'di de rnams dang / /de dag rnams kyang rdor can las/ /tha dad ma yin zung 'jug 'di/ / gsal zhing rnyog med rten med pa'o/ /gang du sems la rnam pa mtha' dag snang zhing gsal bar 'phro ba mnyam pa nyid gyur dang / /sems dang sems las byung ba'i dbye ba rnam par nyams shing thams cad ting nge 'dzin gyur pa/ /der ni mchog gi bde ba chen po'i ro yis dbang bskur ba las bdag nyid rab dang zhing //dkyil 'khor dang ni dkyil 'khor pa yi mdzes pa chen po ci yang 'phro ba nyid du mthong / /rnam dag rtog pa'i rdul gyis mnyes pa las/ /kun nas dang zhing shin tu 'od gsal ba/ /mtha' yas pa yi gzugs dang gzugs brnyan tshogs/ /sems kyi me long de la ci yang mdzes//ji ltar sin+d+hur yi rdul gyis gos pa yi/ /me long la ni gzugs brnyan tshogs snang mi 'gyur ba/ /de bzhin rtog pa'i khyad par gyis ni sun phyung ba'i/ /yid 'di la ni rab tu gsal ba ring ba nyid/ /rang gzhan nyid du mngon par zhen pas rgyug par ni/ /kun du byas nas yid ni phyi rol yang dag 'phel//nang dang phyi rol du yang mnyam par ma bzhag pa/ /rang gis byas pas dub pa'i 'gro ba kye ma'o mtshar/ /gnyis kyi rnam pa bral bas mdzes pa'i rnal 'byor pa/ /ji ltar 'dod pa'i spyod pa dga' ba'i ro yi char/ /rnams kyi sgeg pa chen pos mtha' dag brten gyur kyang //de lta nyid kyis dga' zhing 'ching bar mi 'gyur mtshar/ /gnyis kyi rnam pa dor zhing rab tu gsal/ /mkhas pas yang dag reg bya skal bzang la/ /stug po'i dga' bas khyab pa stobs chen ro yis yongs gang nam mkha'i mthil du ni/ / rnam pa sna tshogs 'phro ba nye bar bsags pa mtha' dag nang du son gyur pa'i/ /yid la 'jig rten gsum po snang ba 'di de thim pa lta bur gnas pa'o/ /rang gi bdag po nyid kyis gang gyur pa/ /de 'di rang byin rlabs pa'i rim pa ste/ /gnyis nyid dag las nges pa rnam grol ba//rang gi sgra yis mngon par brjod pa yin/ /sngags dang yang dag dbab pa dang / /sgeg dang bzhad pa sogs rim med/ /sngags min yid la byed pa dang / /'du byed skye ba 'byung ba med/ /gang du dngos rnams rang bzhin ni/ /rang bzhin nyid kyi khong du chud/ /log pa'i rang bzhin zad pa yis//dga' ba rang 'byung 'di 'char byed/ /bde sdug ces bya gnyis dbye ba'i/ /dbye ba sbyin byed rnam rtog ste/ /rnam par mi rtog mi dmigs pa'i/ /dmigs med bde ba chen po'o/ /snang ba med cing gsal ba med/ /'jug pa med cing bsam pa med/ / 'gro ba'i rnam pa'i tshogs rnams ni/ /yang dag bsags pa shel lta bu/ /'gro ba rmi lam sgyu ma dang / /smig rgyu sogs mtshungs nges par blta/ /gzung pa thams cad yongs dor las/ /dpyad du med pa lhun gyis grub/ /dngos dang dngos po med nyid kyis/ /stong par mthong ba kun rdzob rgyu'o//kun rdzob 'di ni don dam ste/ /srid pa shes pas mya ngan 'das/ /mtha' gsum las ni rnam grol ba'i/ /rtog pa'i ngo bo gzhi med pa/ /dor dang bsags pa spangs pa dang / /zhi ba bla na med pa'o/ /dngos po kun la dbang phyug ni/ /dngos po kun la dbang phyug min//dngos kun rang bzhin nyid las ni/ /dngos po kun la rtag tu gnas/ /gnas la sogs pa gsum dbye bas/ /rnam pa gcig nyid gyur pa dang / /chags pa med las rnam 'gyur dang / /bral bas blo ni legs par gnas/ /ji ltar mar me kun du snang / /rnam pa thams cad la 'dra ba//'dir ni gcig dang sna tshogs pa'i/ /don gyi blo ni yod ma yin/ /de bzhin sems nyid kyis ni sems/ /de yi gzugs brnyan bdag nyid kyi/ /gcig dang sna tshogs rtog pa'i blo/ /rnam pa snang ba'ang de dang 'dra/ /rnam pa de yang rnam pa med/ / rnam pa nyid kyis ma gzung bas/ /rang gi rnam rtog dor las gzhan/ /yod min rnam pa med pa'ang mtshon/ /rnam pa bcas dang rnam med ces/ /'di ni rnam rtog 'phel ba ste/ /snam bu med na 'o na ni/ /dkar sogs yon tan gang du gnas/ /rnam bcas ma yin rnam med yin/ / blo ldan sna tshogs nyid spangs pa/ /ji lta de bzhin yid du gyur/ /de yang ci zhig rtogs par byed/ /kye ma ji ltar rnam rtog pa/ /de ltar 'di dag 'ching bar 'gyur/ /rang gi sems kyi kun du rtog /spangs pa tsam ni thar zhes bya/ /kak+ko lar ni ga bur zhu ba dri med bzang po'i ro dang 'dra min zhing //bo la yi ni rtse dga'i longs spyod rab tu gsal ba'i skal ba bzangs te 'dra yang min/ /ci yang gsal bya min pa 'di ni mtha' dag kun du rtog pa'i tshogs zad pa/ /dmigs pa med pa'i dga' ba chen po yis ni nam mkha' rab tu gang bar 'gyur/ rnam par mi rtog bde ba che/ /'dod pa'i mtshan nyid bdag nyid kyi/ /dga' 'di bde ba'i khyim gyis ni/ /sgo yi them skas lta bu yin/ /e ma'o bde ba e ma'o bde chen nyid/ /e ma ji ltar ji ltar longs spyod bgyi'o/ /zhes byar 'dod pa rtsol ba'i sems kyi ni/ /dga' de don du 'gro ba lta bu yin//dngos po rnams la ngo bo nyid brtags pa/ /stong pa nyid kyis rnam par 'joms par byed/ /rang bzhin med pa nyid du sbyor ba las/ /mchog tu dga' ba yi ni rang bzhin can/ /e ma'o ye shes e ye shes/ /ye shes gsal ba'i 'di ngo mtshar/ / zhes byar longs spyod rtsol ba'i sems/ /mchog tu dga' ba tsam nyid do/ /gang du dngos dang dngos po med pa 'ba' zhig nyid dang rnam bral rang nyid mdzes pa ste/ /stug por gyur pa'i dga' ba'i rang bzhin rab tu rtog pa chen po nam mkha'i gnas khyab cing / /rgya che'i rnam pa sna tshogs can dang dri med nyid kyis me long dkyil 'khor 'phro 'dra ba//bde ba kun gyi gnas gyur lhan cig skyes pa'i dga' ba de ni bzhi pa yin par brjod/ /e ma'o bde chen rol pa yis/ /srid pa gsum po gang ba na/ /gang gis rang gzhan dbye ba 'di/ /skad cig gis ni dbyer med 'gro//rang gzhan tshul du mngon gsal bar/ /srid pa'i bur du bsgrags pa ni/ /kye ho bde chen char bab pas/ /rgyas pa'i 'gro ba dbyer med nyid/ /dngos rnams yod dang med nyid na/ /slar yang dbye bas kun du gnas/ /rnam pa kun gyi mchog ldan pa'i/ / stong nyid phyir na bde ba che/ /gzung dang 'dzin pa'i dbye ba 'di/ /lus can thams cad rnams kyi ste/ /dbyer med 'di dag ye shes kyi/ /snang ba rnal 'byor can rnams kyi'o/ /shes rab ma la rlung gis bskul bas gtum mo 'bar ba rab tu gsal zhing rgya che ba/ /sgrib pa nyid kyi dri ma dang bral dngos po tshogs pa rnam par gcod pas 'phel ba byed//rnam par rtog pa thams cad bsregs pa na ni bdud rtsi de ni dmigs pa med/ /yang dag rig byed nam mkha' khyab pa dang yang dngos po mtha' dag mnyam nyid yang dag rdzogs/ /rang bzhin gyi ni rtsa rnams ni//de kho na las lha rnams min/ /'di rnams kyi ni shin tu dang / /rang bzhin med 'di rang ngo bo/ /shes rab thabs dag gcig nyid gang / /rnam pa thams cad sdom pa gcig /a wa d+hU tI rnam gsal bdag /de ni dbu ma'i rtog par 'dod/ /thog ma dbus mtha' yang dag phung po skye mched khams rnams ni//dag pa'i shel ltar rab gsal ba/ /de ni a wa d+hU tI nyid/ /rnam pa thams cad mngon sum du/ /rnam pa mnyam pa mtshan nyid bral/ /mtshon bya mtshon byed kun spangs pa/ /gcig pu a wa d+hU tI nyid/ /rab tu dga' ba yang dag rtogs shing dag pa'i dpa' bo nam mkha' che//rnam kun nye bar bsags pa mtha' dag rdzogs par rtogs bya longs spyod rdzogs/ /dngos po'i tshogs rnams ro mnyam nyid kyis rmi lam sprul pa lta bu ste/ /sgrib pa zhi ba'i ye shes yul de rnam dag a wa d+hU tI'o/ /chos dang longs spyod rdzogs sprul pa//bde ba chen po zhes bya'i rim/ /bde ba chen po'i rang bzhin gyis/ /'khor lo bzhi po mnyam pa nyid/ /grangs kyang rtogs pa'i rang bzhin te/ /bgrang byar byas pa min pa las/ /gnyis nyid dang ni bral ba'i bdag /mnyam nyid nam mkha' 'dra ba'o/ / mkha' dang nye bar len pa yi/ /dbye bas rnam par 'gyur ba'ang med/ /sna tshogs rtswa dang shing bsregs na/ /nags su dbye ba'i mtshan nyid ci/ /rang bzhin de nyid las dbyer med/ /kun rdzob tu ni dbye ba lta/ /gang du kun rdzob nyid med pa/ /der ni don dam nyid kyi ci/ /dngos rnams rang bzhin nyid kyis ni//rang bzhin med pa blo gcig pu/ /mo gsham bu la sogs rnams kyi/ /rang bzhin rnam par dpyod pa med/ /gzhan yang gang 'dir bshad par bya ste phra mo'i rang bzhin ni/ /nges par de kho na nyid ma yin 'dir ni bshad pa tsam/ / mchog gi bde ba ro gcig dang pa yi ni rgyun snang ba/ /gsal bar nyams su myong ba'i snying po de nyid dmigs pas stong / /rang bzhin med pa'i rang bzhin gyis/ /dngos rnams rtog pa'i rang bzhin can/ /rang bzhin med nyid gang 'di ni/ /chos rnams kun gyi rang bzhin no/ /rang gi 'dod pas bcug pa las//bag chags stobs kyis g.yos gyur pas/ /rnam par rtog pa skyes gyur pa/ /phyi rol don 'bras nyid lta bu'o/ /kye ho rnam bkra'i yul nyid la/ /rnam rtog rjes su song gyur pa/ /ka dam pa yi ro sgra ltar/ /rnam pa du ma dus gcig la'o/ /gcig gi dngos po nyid la yang //rnam pa sna tshogs don du rtog /de dang de yi bdag nyid med/ /'dod pas nye bar brtags tsam nyid/ /dngos po med kyang 'khrul pa yi/ /sems kyi 'dod pa'ang skyes gyur pa/ /snga ma snga ma yid byed pa'i/ /'du byed kyi ni 'bras bu'i bdag /rang gis rang bzhin ma rtogs pas//sems ni phyi rol rgyug gyur pa/ /phyis pas reg bya ngan pa la/ /reg pas rang nyid sdug bsngal bzhin/ /sems de rtog pa'i rnam pa ste/ /phyi rol don du'ang brtags pa nyid/ /rtog pa 'di dag spangs pa na/ /gcig pu nam mkha'i bdag nyid do/ / mi shes pas ni dngos rnams kyi/ /rang bzhin rang bzhin bcas pa nyid/ /dngos po rnams ni yongs shes pas/ /rang bzhin rang bzhin med pa'o/ /rang bzhin med pa'i chos rnams la/ /rang dbang gis ni thams cad byed/ /de yi bya ba zhig pa dang / /byed pa po yang de bzhin no/ / bya ba dang ni byed pa yi/ /'brel pa rtog pa'i dbang gis te/ /rang bzhin khong du chud pa las/ /bya med byed pa po yang med/ /bya ba cung zad yod min zhing / /byed pa po yang de bzhin no/ /brda tsam thob pa 'di dag ni/ /byed do zhes bya byed po med/ /chos rnams rang bzhin med nyid na//blang dang dor bya nyid ga la/ /rmi lam nang gi chos kun la/ /blang dor bya ba ji bzhin no/ /pha rol phyin pa thams cad rnams/ /de la kun nas bsten bya ste/ /pha rol phyin kun ye shes ni/ /shes rab pha rol phyin min nam/ /de nyid lhun gyis grub pa'i sems/ /lhag ma med cing gos pa med//dbang po med cing gzhi med la/ /spyod pa med cing 'khrugs pa med/ /pha rol phyin pa lnga 'di rnams/ /dga' ba ro gcig bdag nyid can/ /dga' ba yongs su shes pa ni/ /shes rab pha rol phyin pa mchog /'di rnams 'bras bu dga' ba ste//'di rtogs rang bzhin med pa nyid/ /gnyis po shin tu dbyer med pa'i/ /dga' ba nyid ni bde ba che/ /shes rab snying rje gcig pa nyid/ /sgron ma dang ni snang ba bzhin/ /shes rab snying rje'i dbye ba yang / /sgron ma snang ba ji bzhin no/ /gnyis po 'di ni dbyer med bdag / sems gcig pu ni ngo bo nyid/ /shes rab thabs kyi bdag nyid des/ /sems ni kyi yi rdo rje'i gzugs/ /dga' ba yang ni rang bzhin med/ /de rtogs pa yang de dang 'dra/ /'di ltar kye'i rdor rang bzhin gyis/ /ma lus rnam par dbyer med pa'o/ /rnam rtog rnal 'byor ma rnams te/ / srid pa gsum po dkyil 'khor ro/ /bde ba chen po'i dga' ston gyis/ /der ni kye yi rdo rje rol/ /bza' dang nyal dang rtse ba dang / /dgod bzhin du yang de dang de/ /rnal 'byor sbyor las rnal 'byor pa/ /kye yi rdo rje'i mchod pa po'o/ /thams cad dus su dngos kun la/ /rnal 'byor pa yis dogs med spyad//'khor ba'i 'dam gyi nang du yang / /gos pa med pa mya ngan 'da'/ /ji ltar sgyu ma shes pas sgyu ma brgya phrag ston pa na/ /skyo dang rab tu dga' ba mnyam pa nyid kyis ci dgar spyod/ /de bzhin rnal 'byor kho na rjes rtogs rang bzhin can/ /'jigs pa brgyad dang bde ba 'char la'ang 'jigs dang chags pa med//'dir ni so sor bsgom bya med/ /sgom pa po ni su yang med/ /gnyis po med phyir sgom pa'ang med/ /mnyam nyid 'ba' zhig rtogs pa'o/ /gnyis kyi rnam pa yongs dong bas/ /dbye ba dbyer med rnam par bral//yod nyid tsam du yongs shes pas/ /bsgom pa yang ni skyon med pa'o/ /sngags bzlas la sogs 'di rnams kyang / /mnyam pa nyid kyi rang bzhin can/ /'gro kun lhan cig skyes ngo bo/ /'di las de yang bgag pa med/ /lus dang ngag dang yid ces pa//gsum gyi bdag nyid yi ge hUM/ /dogs med he ru ka lta bur/ /kun rtog kun du rmongs pa sel/ /rtog pa'i sgrib pa kun spangs nas/ /ma brtags par ni gang mthong ba'i/ /gsang ba de nyid sngags de rnams/ /dngos grub thams cad sbyin byed pa'o/ /chos rnams rmi lam lta bu la'ang //de bzhin zhi la sogs pa yi/ /sbyor la sngags kyis bde bar byed/ /dngos po'i nus pa'i rang bzhin 'di/ /kun rdzob tu yang mthong ba yin/ /kun rdzob rnam par spangs na ni/ /don dam zhes bya ba nyid ci/ /shing la sogs las byung nyid kyis/ /sangs rgyas gzugs brnyan dor mi bya//de yi rang bzhin rtogs pa des/ /phyag byas pa la skyon yod min/ /sa sogs las byung sku gzugs la sogs la/ /lhan cig skyes pa'i bdag pos phyag mi bya/ /lhan cig skyes pa rtogs par gyur pa nyid/ /bla na med pa'i phyag ni de yin no/ /de bzhin du yang gtor ma'i rim pa 'di//rmi lam dang ni sprul pa lta bu ste/ /chos kyi dbyings kyi rang bzhin nyid du ni/ /de yi 'khor gsum po rnams mnyam pa nyid/ /de bzhin nyid kyi rang bzhin dbyer med par/ /khams gsum po ni gcig tu yang dag rig /rnal 'byor rnams kyi rgyun mi 'chad pa yi/ / dga' ba 'di de gtor ma chen po'o/ /ji srid du ni byang chub bar gyi tshogs/ /de srid der ni dri ma rnams med pa/ /bla na med pa'i 'bras bu thob pa las/ /shes rab pha rol phyin pa rnam par dag /rab gnas sbyin sreg mchod pa la sogs pa/ /bya ba thams cad kyang ni dri ma med/ / shes rab thabs dag yang dag sbyor ba las/ /rdzogs pa'i byang chub bsgrub par byas pa yin/ /de bzhin mtha' dag sangs rgyas rnams kyi ni/ /rab tu gnas pa bla na med pa'ang de/ /gang du rnam dbyer med pa'i rnam pa ni/ /yang dag rig la rdo rje sems dpa' gnas/ /rol pa'i tshogs kyi rgyur gyur pa'i//bde ba'i tshogs rnams ci tsam pa/ /de tsam nyams su myong ba nyid/ /rnal 'byor tshogs ni rdzogs byed pa'o/ /bsam gyis mi khyab sbyor ba'i bdag nyid kyis/ /rnam par sgeg pa'i sbrang rtsi'i tshogs rnams dang / /ge sar mdzes pa 'bar ba'i pad+ma yis/ / rdo rje'i dbang phyug la ni mchod par bya/ /gzugs la sogs pa lngar btags pa/ /za ba dam tshig chen po yin/ /de ni rnam dag dag pa'i bdag /rdzogs pa'i byang chub sgrub byed pa'o/ /rnam par rtog pa spangs pa yis/ /lhag par mos pa mi 'byung ba/ /gsal bar snang ba 'di de ni//rang rig bde ba chen po'o/ /'ga' zhig bdud rtsi zhes bya ba'i/ /gtam nyid kyis ni tshim mod kyang / /rang gi mngon sum nyams myong ni/ /rol brtson pa yi rnam smin no/ /su zhig gzugs kyi tshogs bsdus pa/ /dmigs dang bcas la chags med dang / /dmigs pa med par rtse gcig pa'i//mchog de rnams ni dkon pa nyid/ /kha cig stong pa nyid dang ni/ /la la sbyor ba'i rim par rmongs/ /su zhig bde ba cher spro ba'i/ /rang bzhin can 'dir rnal 'byor ba'o/ /go bar byed pa'i snying po rab tu dang bas gsal byas las/ /bsod nams phung po dri ma med pa bdag gis gang thob pa//des ni 'jig rten rnam par rtog pa'i dra ba yongs bsal nas/ /rdzogs pa'i byang chub tshogs mchog snying po go bar byed gyur cig /dpe la shin tu rmongs pa ro gcig gyur pa'i yid can rnams kyi dper bya rab gsal ba/ /gsal bar rig ba bla ma'i bla mar gyur la gal te shes rab rang bzhin can yin yang //gzhan las rtogs pa'i 'bras min rdo rje can gyi bka' lung thob pa rgyud dang rjes mthun pa/ /de rig pa las go byed snying po brgya pa dpal ldan 'phags pa lha yis brjod pa yin/ /dngos po'i yid kyi rol pa mang po'i tshogs kyis phal cher rtse ba'i ro yis ni//bsnyems pa'i rtsom pas rnam par bsgyings pa'am gus las 'jug pa ci yang rung ba spros/ /rnam pa thams cad don ni ji lta'i nyams kyi kun du rtog pas gzung ba las/ /bdag la sngon med pa zhes smra bar bya ba'am ji ltar dad pa de bzhin gyis//go bar byed pa snying po brgya pa zhes bya ba/ slob dpon chen po AR+Ya de ba'i zhal snga nas mdzad pa rdzogs so// //'di ni shar phyogs sang+na ga ra'i gnas brtan theg pa chen po'i dge ba'i bshes gnyen mkhas pa la dngos grub kyis brgyan pa dpal nags kyi rin po che'i zhal snga nas man ngag gi bshad pas yang dag par gsungs pa'i sgra don ji lta ba bzhin du dge slong chos smra ba bsod nams rnam par rgyal ba dbang po'i sde zhes bya bas legs par bsgyur ba'o/