CLOSE WINDOW

D2261
བོད་ཡིག

rgya gar gyi mkhan po chen po zla ba mgon po dang / /bod kyi lo tsA ba shes rab grags kyis bsgyur ba'o//[ ]@##/ /rgya gar skad du/ sa ha dza sid+d+hi pat+tha ti nA ma/ bod skad du/ lhan cig skyes grub kyi gzhung 'grel zhes bya ba/ byang chub sems dpa' phyag na rdo rje la phyag 'tshal lo//dri med chos 'byung gtsang ba'i gnas mchog nyams dga' bar/ /phung po la sogs bdud rnams bzhi po mi 'jug phyir/ /tshad med bzhi yi sgo glegs legs par gtams mdzad nas/ /'dren pa gang zhugs de rnams la ni bdag phyag 'tshal/ /skyes mchog de rnams zhabs la phyag byas nas//'gro bas lhan cig skyes rtogs med pa'i phyir/ /dri med lhan cig skyes pa'i gzhung 'grel 'di/ /'gro la phan phyir dpal mo bdag gis bri/ /ci'i phyir zhe na/ lhan cig skyes pa'i rang bzhin las kha phyir phyogs par gyur pa'i dbang gis 'dzam bu'i gling pa'i skye bo rnams sdig pa'i las la gzhol bar 'gyur te/de yang dgongs pa lung ston pa zhes bya ba'i rnal 'byor chen po'i rgyud las ji skad du/ de nas bcom ldan 'das kyi gsang ba pa'i bdag po byang chub sems dpa' phyag na rdo rje la bka' stsal pa/gsang ba'i bdag po don rgyas tshul/ /tshul chen 'di ni rnyed gyur na/ /ji bzhin don rnyed ma bzung bas/ /de phyir lam ngan dag tu ltung / /rtag par mngon pa'i nga rgyal la/ /rab tu dga' dang ldan pa yis/ /rnal 'byor pa rnams bdag ces smra/ /chos ni g.yo yis byed gyur la//des ni 'dus pa mi shes par/ /dam tshig la sogs spyod byed pa/ /gsang ba gsung par mi byed cing / /thams cad du ni rab tu ston/ /mngon sum sangs rgyas dang 'dra ba'i/ /slob dpon la smod bkur mi byed/ /skad cig tsam gyis khong khro zhing / / de bzhin skad cig gis rjes chags/ /ma dang sring mo bu mo sogs/ /bgrod min la ni 'khrig spyod cing / /pha dang ma gsod de bzhin du/ /srog chags gzhan yang mang du gsod/ /de bzhin brdzun gyi tshig smra zhing / /khyad par du yang rku bar byed/ /gzhan gyi chung ma'i thad 'gro zhing //nyes smad gzhan yang byed par 'gyur/ /de nyid ye shes rang byung ba'i/ /dam tshig rnams ni des mi shes/ /nyes pa cung zad tsam la yang / /mngon spyod drag po byed 'gyur la/ /rnal 'byor rab sbyor sman pa yis/ /sngags pa rnams ni grub mi 'gyur/ / brtag pa phyi yi bstan bcos dga'/ /de phyir sbyor la mkhas pa dang / /rang gi dam tshig spangs nas ni/ /lcags kyu med pa'i glang chen bzhin/ /'dod dgu dag tu 'khyam par byed/ /sngags dang phyag rgya'i sbyor ba yis/ /'tsho ba dag kyang sgrub par byed/ /gang du rnyed pa thob par 'gyur//gsang sngags tshul chen 'chad par 'gyur/ /zhes gsungs pa de bas na bdag gis lhan cig skyes pa'i tshul zab mo nyan thos dang / rang rgyal ba dang / phyi rol pa'i thub pa rnams dang / rtag pa dang chad par lta ba pa rnams kyis rtog par dka' ba dang //dus gsum gyi de bzhin gshegs pa rnams kyis rgyas btab pa/ bla ma yongs su bsten rnams la rna ba nas rna bar 'pho bar 'gyur ba gang yin pa de legs par bstan par bya'o/ /de yang re zhig brjod par bya ba'i lhan cig skyes pa 'di'i rjod par byed pa'i gzhung gi tshogs ni/dang po kho nar dpal ldan rol pa'i lha mo zhes pa nas/ yang dang yang du kun la 'dud/ /ces pa'i bar gyis ni lhan cig skyes pa'i man ngag dpal o rgyan gyi gnas nas/ byang chub sems dpa' phyag na rdo rje'i sprul pa las/ bla ma gcig nas gcig tu brgyud pa'i lo rgyus dang //lhan cig skyes pa 'di nyid kyis ma rig pa'i nyon mongs pa mthar byed pas gshin rje yin pa dang / sa'i bdag po dbang po'i blos rgyal srid yongs su spangs nas rab tu byung ste/ dur khrod bsten pa la sogs pa'i gleng gzhi ston cing /bla ma gong ma rnams la phyag 'tshal ba ston par byed do/ /de rnams zhabs la zhes pa nas brjod par bya zhes pa'i rkang pa gnyis kyis lhan cig skyes pa'i rtsom pa ston par byed do/ /kun 'gro lhan cig skyes zhi ba/ /zhes pa nas/ gzhung las ma gtogs rnyed mi 'gyur//zhes pa'i bar gyis ni/ /lhan cig skyes pa'i rang bzhin rgyu ba dang mi rgyu ba'i dngos po mtha' dag la khyab pa yin yang bla ma'i zhal las ma gtogs pa mi rnyed par ston par byed do/ /gang dang mtshungs par skyes pa na/ /zhes pa nas/ de ni 'bad pa med par 'thob//ces bya ba'i bar gyis ni/ bla ma'i zhal las rnyed pa'i rjes la 'bad pa med pa'i tshul gyi ting nge 'dzin gyi ro nyams su myong ba dang lhan cig skyes pa'i nges tshig ston par byed do/ /the tshom med cing rtog med pa/ /zhes pa nas/ lhan cig skyes pa thob par 'gyur//zhes pa'i bar gyis ni/ lhan cig skyes pa nyams su myong nas za ba dang 'chag pa la sogs pa'i dus su yang mi 'bral bar ston par byed do/ /rtog dang bral zhing mngon sum pa/ /zhes pa nas/ lhan cig skyes par nges brjod bya/ /zhes pa'i bar gyis ni rtog pa med pa'i lhan cig skyes pa'i bskul ba'i dbang gis snying rje cha bcu drug pa zla ba yar gyi ngo bzhin pa'i chos can/sems can dang chos dang dmigs pa med pa la sogs pa la lhan cig skyes pa yin par ston par byed do/ /lhan cig skyes 'di dngos rnams kyis//zhes pa nas/ 'gro ba'i grong khyer dag tu 'khyam/ /zhes pa'i bar gyis ni/ lhan cig skyes pa 'di nyid bde sdug thams cad kyi gzhi yin pa dang / lta ba dang grub pa'i mtha' 'dzin pa thams cad kyi rtsod pa'i gzhir gyur pa dang / /'gro ba gang gis lhan cig skyes pa ma shes pa de dag sdug bsngal gyi phung po las mi grol bar ston par byed do//sangs rgyas bdag nyid lus la ni/ /zhes pa nas/ de yis sdig pa ma byas sam/ /zhes pa'i bar gyis ni/ gang zhig lhan cig skyes pa'i rang bzhin la/ /de'i rang bzhin du mi rtogs pa'i skyes bu de rnams sdig can yin par ston par byed do//bdag nyid nges par sangs rgyas kun/ /zhes pa nas/ dngos po kun la yang dag gnas/ /zhes pa'i bar gyis ni/ 'gro ba thams cad sangs rgyas la sogs pa'i rang bzhin yin par ston te/ 'di ltar lhan cig skyes pas dngos po thams cad la khyab pa yin pa'i phyir ro zhes bya bar ston bar byed do/ /lha dang lha min klur bcas dang / /zhes pa nas/ glen pa rmongs pas mi shes so/ /zhes pa'i bar gyis ni/ bdag tu lta ba can gyi lha tshangs pa la sogs pa dang / drang srong rgyas pa la sogs pa rnams kyis lhan cig skyes pa shes par mi 'gyur ro zhes ston par byed do/ /mchog gi go 'phang mi shes phyir/ /zhes pa nas/ de yis kun nas mi shes so/ /zhes pa'i bar gyis ni/ lhan cig skyes pa mi shes pas grub pa'i mtha' du ma 'dzin cing rtsod pa ston par byed do//theg chen shin tu yangs pa la/ /zhes pa nas/ bla ma de yis 'gro ba sgrol/ /zhes pa'i bar gyis ni/ gsang ba'i theg pa nyid du bstan pa'i lhan cig skyes pa bla ma gcig nas gcig tu 'ongs pa'i ston pa gang yin pa'i bla ma des nyon mongs pa rtsad nas gcod pa ston par byed do//bsgom bya sgom byed 'brel pa 'am/ /zhes pa nas/ dor ba nyid du yongs su brtag /ces pa'i bar gyis ni/ slob bzhin pa'i rnal 'byor pa rnams la gdams pa ston par byed do/ /de bzhin du yang zhes pa nas/ de yis thams cad rdzogs par 'gyur//zhes pa'i bar gyis ni rtog pa'i ting nge 'dzin ma lus par ston par byed cing / zhar la lan cig skyes pa ma yin par ston par byed do/ /thub pas sngon du gang gsungs pa/ /zhes pa nas/ gang zhig mthong bas de bden min/ /zhes pa'i bar gyis ni/ji ltar brtags pa de ltar rtogs pa'i rnal 'byor blo'i yul du 'byung bar ston par byed do/ /gang ma mthong ba de bden te/ /zhes pa nas/ bla ma mchog gis sngon gsungs pa/ /zhes pa'i bar gyis ni lhan cig skyes pa'i rang gi ngo bo rgyas par ston par byed do//dpal ldan rol pa'i lha mo'i drin gyis ni/ /zhes pa nas/ lhan cig gis ni bde ba chen po mkhyen/ /zhes pa'i bar gyis ni/ bla ma gong ma las brgyud pa'i dbang gis sa'i bdag po dbang po'i blos kyang lcam dpal mo las rtogs shing khong du chud pa ston par byed do//the tshom med cing rtog pa med/ /ces pa nas/ srid pa'i mtsho las sangs rgyas bzhin/ /zhes pa'i bar gyis ni/ bdag dbang po'i blo yis ji ltar spyad pa ltar/ bdag las gzhan pa'i rnal 'byor pa rnams kyis kyang lhan cig skyes pa la de ltar 'jug par byed na yang /srid pa'i gzeb las grol bar 'gyur ro zhes ston par byed do/ /bdag nyid kyis ni dran don tu/ /zhes pa nas/ bdag la bzod mdzod sems can che/ /zhes pa'i bar gyis ni/ bdag gi gzhung brtsams pa la rang nyid nga rgyal med pa'i tshul dang bzod par gsol ba ston par byed do//gang zhig cung zad 'di brjod pas/ /zhes pa nas/ lhan cig skyes grub thob par shog /ces bya ba'i bar gyis ni dge ba'i rtsa ba bsngo ba ston par byed do/ /de ltar don mdor bsdus nas/ da ni yan lag gi don dgrol bar bya'o//de la/ dpal ldan rol pa'i lha mo che/ /zhes bya ba la sogs pa smos pa ste/ de la bdag dang gzhan gyi don byed nus pa gang la yod pa de ni shrI ste dpal yin la/ de 'gro ba'i don du rol pa mdzad cing lus ngag gi spyod pa rlabs po che'i rol pa mdzad ces bya ba'i don to//lha mo zhes bya ba ni lus la skyes pa'i bde ba la longs spyod cing bde ba de dang ldan pa la lha mo zhes dgongs so/ /de yang dpal u rgyan gyi yul na rin po ches brgyan pa zhes bya ba'i nags tshal dgon pa zhig na/ gsang ba'i bdag po'i sprul par gyur pa/ drang srong 'gro ba dbugs 'byin pa zhes bya ba skal ba dang ldan pa rnams lhan cig skyes pa'i rin po che'i man ngag gi rgyud bstan par bya ba'i ched du bzhugs par gyur to/ /dus de nas yul de'i rgyal po mthong na dga' zhes bya ba la/ bu mo rol pa mo zhes bya ba mdzes pa/ blta na sdug pa/ skyes bu thams cad kyi yid 'phrog pa cig btsas so/ /bu mo de chung ngu nas sangs rgyas kyi sgra dang / chos dang / dge 'dun la dad cing / lus dang / ngag dang / yid khyad par du dul ba dang ldan no/ /de cher skyes nas g.yog mo bu mo lnga brgya dang lhan cig tu rin po ches brgyan pa'i nags tshal dgon pa bltar dong dong ba las dgon pa der phyin pa na/dgon pa de na drang srong mdog gnag pa skra kham par 'dug pa/ rtswa dang shing shun lus la gon pa 'dug pa mthong ba las/ bu mo lnga brgya po skrag par 'gyur nas/ e ma gnod sbyin e ma gnod sbyin zhes bya ba'i sgra so so nas bton to/ /gzhon nu ma rol pa mos drang srong de mthong ma thag tu/ yid dga' ba dang bde ba skyes par gyur nas/ bu mo lnga brgya po la smras pa/ bu mo rnams ma 'jigs shig dang / 'di ni drang srong yin te/ gnod sbyin ma yin par nges so/ /de ci'i phyir zhe na/ kho mos mthong ma thag kho mo yid dga' ba dang bde ba skyes pa las na/ 'di ni gdon mi za bar gnod sbyin ma lags kyi/ kho mo cag rjes su 'dzin pa'i byang chub sems dpa' zhig lags so/ /de ci'i slad du zhe na/ gzhan yang yul khams 'di ni dpal u rgyan zhes bya ba byang chub sems dpa' chen po phyag na rdo rjes byin gyis brlabs pa'i gnas yin no/ /zhes grags pas gnod sbyin mi ma lags pa 'dir gnas par mi 'gyur ro zhes bsgo ba dang / bu mo lnga brgya po yang yid brtan zhing skrag pa med par gyur to//de nas gzhon nu ma rol pa mos g.yog bu mo lnga brgya dang bcas me tog dri zhim pa dang bcas pas/ drang srong la maN+Dal byas te gus pa dang bcas phyag byas nas mgrin gcig tu 'di skad ces gsol to/ /drang srong chen po kho mo cag la bskyab tu gsol/kho mo cag rjes su gzung du gsol/ kho mo cag gi bdag tu lta ba'i mdud pa bcad du gsol/ kho mo cag gi ma rig pa'i ling tog bsal du gsol/ zhes gsol ba dang / bu mo de dag la drang srong gis smras pa/ kye gzhon nu ma rnams kho bo ni yang dag pa'i gnod sbyin no//kho bo ni 'khor ba'i nyon mongs pa gcod pa'i gnod sbyin no/ /kho bo ni 'gro ba rnams kyi bdag tu lta ba'i srog dang phral nas bdag med pa'i gnas su 'khrid par byed pa'i gnod sbyin no zhes bsgrags te/ bu mo rol pa mo'i spyi bor lag pa g.yas pa bzhag nas/bu mo dran par gyur tam dran par gyur tam zhes brjod pas/ bu mo des sngon gyi skye ba dran te sngon gyi dge ba'i bshes gnyen gsang ba'i dkyil 'khor du mngon par dbang bskur bar byed pa/ byang chub sems dpa' phyag na rdo rje'i sprul pa yin pa dran par gyur te/lan brgya stong du mar g.yas phyogs nas bskor ba byas nas zhabs la yang dang yang du gtugs so/ /bu mo lnga brgya po yang bu mo rol pa mo'i rjes su slob par byed do/ /de nas drang srong gis smras pa/ rol pa mo bu mo khyod kyis skye ba snga mar yid la byas shing bzung ba'i lhan cig skyes pa'i ting nge 'dzin sangs rgyas thams cad kyi yul la 'jug pa/bsam du med pa/ thogs pa med pa/ nam mkha' mdzod kyi gter zhes bya ba yid la gyis shig /de bzhin gshegs pa thams cad kyi sku dang gsung dang thugs dang ye shes kyi dam tshig bsrung bar gyis shig /bu mo gzhan yang re ba med pa'i bsam pa rgya chen po skyed cig /ces bsgo nas de nyid du drang srong de mi snang bar gyur to/ /de nas bu mo rol pa mos nam mkha' mdzod kyi gter zhes bya ba nas seng ge rnam par bsgyings pa zhes bya ba la sogs pa'i ting nge 'dzin gyi sgo mtha' yas pa skad cig de nyid la thob nas de bzhin gshegs pa thams cad kyi sku dang /gsung dang / thugs dang ye shes kyi dam tshig bsrungs shing / bu mo lnga brgya dang bcas pa u rgyan gyi yul byang chub sems dpa' phyag na rdo rjes byin gyis brlabs pa'i gnas na rnal 'byor gyi spyod pa mdzad cing /skal ba dang ldan pa rnams la lhan cig skyes pa'i ting nge 'dzin sangs rgyas thams cad kyi yul la 'jug pa bsam du med pa/ thogs pa med pa/nam mkha' mdzod kyi gter/ de bzhin gshegs pa thams cad kyi sku dang / gsung dang / thugs ye shes kyi dam tshig dang ldan pa'i don 'di ston cing bzhugs te de'i tshul ni de 'dra'o/ /de bzhin dpa' bo rdo rje dpal/ /zhes bya ba ni de nas dus phyi ma zhig na u rgyan gyi gnas de nyid du rgyal po chen po dpa' bo rdo rje zhes bya ba/rgyal srid kyi 'byor pa phun sum tshogs pa dang ldan pa/ dkon mchog gsum la mi phyed pa'i dad pa dang ldan pa zhig byung bar gyur to/ /rgyal po de bsnyen gnas kyi sdom pa la gnas shing sbyin pa rgya che ba yang gtong ngo //dus der rnal 'byor ma rol pa mo bu mo rnal 'byor ma lnga brgya dang bcas pa gdol pa mo'i cha byad du byas nas rgyal po'i drung du rgyal po de la phyag rgya chen po'i dngos grub kyi skal ba dang ldan par gzigs nas/ de la ting nge 'dzin 'di bstan pa'i ched du rgyal po'i drung du gdol ba mo rnal 'byor ma rnams kyis sdug bsngal ba'i tshig dang ldan pas slong ba'i tshul byas so//rgyal pos kyang gos dang kha zas mang po byin pa las da dung mdun na 'khod do/ /gdol pa mo de dag 'khod pa na snga ma med pa'i dri bsung bzang pos rgyal po de'i pho brang gang bar gyur to//rgyal pos 'khor mi rnams la smras pa/ kho bo'i pho brang 'di na snga na med pa'i dri 'di gang las byung / me tog gam/ spos sam/ ci bsgos zhes btsal du bcug pa las ma rnyed do/ / skabs der gdol pa mo rnams langs te 'gro bar chas pa las dri de med par gyur te/ rgyal pos bsams pa gor ma chag par dri 'di ni gdol pa mo rnams las byung bas 'di rnams ni gdol pa mo ma lags kyi u rgyan gyi gnas 'di na rnal 'byor ma rol pa mo rnal 'byor ma lnga brgya dang bcas nas 'gro ba'i don la spyod pa mdzad ces grags pa 'di rnams rnal 'byor ma yin no//zhes rtogs te mchod pa'i yo byad bsham pa las/ rnal 'byor ma rnams kyis mngon du ma byed ces pa'i brdas go bar byas nas mtshan mo tshogs kyi mchod pa gyis shig /kho mo cag 'ong ngo zhes brda mdzad nas de nas mi snang bar gyur to/ /de nas rgyal po mchog tu dga' ba skyes nas/ tshogs kyi mchod pa chen po bshams nas 'dug pa las/ rnal 'byor ma rnams byon nas rgyal po'i tshogs kyi mchod pa la longs spyad nas/rgyal pos kyang rgyal srid kyi 'byor pa rtswa dang 'dra bar ltos pa med pa'i tshul gyis rnal 'byor ma rnams la phul ba dang / rnal 'byor ma rnams kyis smras pa/ khyod nyid kyis rgyal srid kyi 'byor pa zung zhig /rgyal pos gsol pa/rgyal srid kyi 'byor pas kho bo 'ching ba'i rgyur mi 'gyur ba lags sam/ rnal 'byor ma rnams kyis smras pa/ seng ge rnam par bsgyings pa zhes bya ba'i ting nge 'dzin la mnyam par bzhag na gang gis kyang 'ching ba med de/ bde bar gshegs pa rnams kyis kyang khyim la gnas pa dang rab tu byung ba ste/byang chub sems dpa'i spyod pa rnam pa gnyis so zhes gsungs pa'i phyir ro/ /rgyal pos smras pa/ seng ge rnam par bsgyings pa zhes bya ba'i ting nge 'dzin gang lags shing ci 'dra ba bdag la bsten du gsol/ rnal 'byor ma rnams kyis mgrin gcig tu rgyal po la 'di skad ces smras so/ /sa'i bdag po 'di lta ste/ dper na ri dgas kyi rgyal po seng ge ni rang las gzhan pa'i ri dgas kyi 'jigs pa'am/ bag tsha ba'am/ spu zing zhes byed pa'am/ dogs pa tsam yang med kyis gzhan du na rang gi kha zas tsam yid la byed do//sa'i bdag po de bzhin du ting nge 'dzin gang la gnas na rnam par rtog pa dang mtshan ma'i 'du shes thams cad zil gyis mnan cing dogs pa med par gnas la/ gzhan du na dngos por lta ba rnams bdag med pa la 'dzud pa tsam cig yid la byed do//sa'i bdag po de ni seng ge rnam par bsgyings pa zhes bya ba'i ting nge 'dzin yin no/ /sa'i bdag po gnod sems spang bya ste/ /mkha' la bya bzhin gang la ma thogs par/ /thogs med ting 'dzin 'di la rab gnas nas//sangs rgyas bye ba phrag brgya khyod mthong 'gyur/ /zhes gsungs nas rnal 'byor ma de dag mi snang bar gyur to/ /de nas rgyal po des kyang skad cig de la lhan cig skyes pa'i ting nge 'dzin sangs rgyas thams cad kyi yul la 'jug pa/ bsam du med pa/thogs pa med pa/ nam mkha' mdzod kyi gter zhes bya ba ji lta ba bzhin du rtogs shing khong du chud de/ kha na ma tho ba med pa'i rgyal srid kyis 'gro ba skyong zhing / rnal 'byor gyi spyod pa byed la skal ba dang ldan pa rnams la ting nge 'dzin 'di de bzhin gshegs pa thams cad kyi sku dang /gsung dang / thugs ye shes kyi dam tshig dang ldan par ston te rnal 'byor pa de'i tshul ni de 'dra'o/ /dam tshig ces bya rdo rje dpal/ /zhes bya ba ni rgyal po dpa' bo rdo rje de nyid kyi bram ze mdun na 'don dam tshig rdo rje zhes bya ba tshig bden par smra zhing /dam bcas pa'i dam tshig las 'da' bar mi byed pa/ bla ma la sri zhu byed pa/ chos dang mthun pa'i smrang 'don gyi/ phur bu pa dang 'jig rten pa'i smrang 'don par mi byed pa cig gnas te/ des gnyug mar chos dang mthun pa'i spyod pa 'ba' zhig gis gnas shing /rgyal po mnyes par byed cing rgyal po'i bka' las nam yang 'da' bar mi byed pa zhig gnas pa las/ de la rgyal pos bka' stsal pa/ mdun na 'don shes par gyis shig /khyod kyis dam tshig la gnas pa legs so//bden par smra ba legs kyis da dung dam tshig la gnas par gyis shig dang / dam tshig gis ni 'gro ba rnams kyi yid du 'ong ba dang / kun gyis bkur bar yang 'gyur ro/ /mdun na 'don gyis yang gsol pa/ lha lags dam tshig ces bgyi ba bden par smra ba lags sam/bka' stsal pa/ mdun na 'don dam tshig ni bden par smra zhing dam bcas pa ltar byed pa'o/ /gsol pa/ lha lags bden par smra bas 'jig rten 'di'i bya ba yongs su rdzogs pa bden par smra ba'i dam tshig lags na/bla ma dang sangs rgyas dang byang chub sems dpa' dang phrad par 'gyur zhing mi 'bral bar 'gyur ba'i dam tshig gang lags/ bka' stsal pa/ mdun na 'don bla ma dang sangs rgyas dang / byang chub sems dpa' dang phrad par 'gyur zhing mi 'bral bar 'gyur ba'i dam tshig gang yin pa de bstan na khyod yid ches par mi 'gyur la/de'i dbang gis mdun na 'don khyod mnar med par song na mi legs so/ /gsol pa/ sa'i bdag po yid mi ches pa ma mchis so/ / bka' stsal pa/ dus gsum gyi de bzhin gshegs pa thams cad kyi sku dang / gsung dang / thugs dang / ye shes mi zad pa zhes bya ba'i dam tshig la gnas par byas na bla ma dang sangs rgyas la sogs pa dang mi 'bral bar 'gyur ro/ /gzhan yang sangs rgyas kyi zhing khams yon tan rin po che bsam gyis mi khyab pa yang mthong bar 'gyur ro//gsol pa/ dam tshig de ma 'tshal lo/ /bka' stsal ba/ mdun na 'don thog mar je rang gi sems la so sor rtog la/ de'i rjes la sems de yang bsam gyis mi khyab pa'i dbyings la zhog shig dang /des ni dam tshig thams cad yongs su rdzogs shing / sangs rgyas thams cad dang phrad par 'gyur ro/ /zhes gsungs nas cang mi gsung bar gyur to/ /mdun na 'don gyis kyang dam tshig de yid la byas pa tsam gyis sangs rgyas kyi zhing khams yon tan rin po che bsam gyis mi khyab pa rnams mthong bar gyur te/mdun na 'don dam tshig rdo rje zhes bya ba'i rnal 'byor pa de'i tshul ni de 'dra'o// //de bzhin pad+ma'i rdo rje dpal/ /zhes bya ba ni dpal u rgyan gyi yul de nyid na zhing pa pad+ma'i rdo rje zhes bya ba/snga nas bdag dang bdag gir 'dzin pa shas chung ba gtsang ba dang / mi gtsang ba'i rnam par rtog pa dang dman pa zhig gnas pa las/ de dus gzhan zhig na sA lu'i zhing rmed pa las/ zhing gi las kyis sun par gyur cing skyo ba shas cher skyes nas/des bsams pa u rgyan gyi gnas 'di na rnal 'byor pa gnas zhes grags na/ kho bo yang rnal 'byor cig las yang dag pa'i lam btsal la/ rnal 'byor gyi spyod pa spyad par bya'o zhes dam bcas pa las/ de'i lhag pa'i bsam pa rgya chen po de rnal 'byor pa mdun na 'don gyis mkhyen cing skal ba dang ldan par gzigs nas/zhing pa pad+ma'i rdo rje ga na ba der byon nas/ zhing pa pad+ma'i rdo rjes mthong nas/ rab tu dga' ba thob nas rkang pa la spyi bos gtugs te 'di skad ces smras te/kye skyes bu chen po khyod ni rnal 'byor pa zhig lags grangs na/ kho bo la rnal 'byor gyi spyod pa bstan du gsol zhes smras pa dang / mdun na 'don gyis smras pa/ rigs kyi bu rnal 'byor pa thams cad kyi spyod pa rlabs po che/ sangs rgyas thams cad kyi yul la 'jug pa/ rnal 'byor rtog pa'i rlung tshubs kyis mi bsgul ba'i spyod pa la spyad par gyis dang rnal 'byor gyi spyod pa mthar phyin par 'gyur ro/ /zhes bsgo nas rang gi rnal 'byor gyi gnas su song bar gyur to/ / zhing pa pad+ma'i rdo rjes rnal 'byor pa thams cad kyi spyod pa rlabs po che sangs rgyas kyi yul la 'jug pa rnam par rtog pa'i rlung gis mi bsgyel pa legs par rtogs shing / dpal u rgyan gyi gnas de nyid kyang skad cig de nyid la rin po che sna tshogs pas brgyan par mthong zhing /sngags kyi tshul gyis spyad pa spyod pa'i rnal 'byor pa dang rnal 'byor ma grub pa rnyed pa 'ba' zhig gis yongs su gang ba mthong te/ rnal 'byor pa pad+ma'i rdo rje'i tshul ni de 'dra'o// //dpal lhan cig skyes pa'i rdo rje zhes bya ba ni/dpal o rgyan gyi gnas de nyid na chang 'tshong ma lhan cig skyes pa'i rdo rje zhes pa gnas pa las/ chang 'tshong ma des bsams pa/ e ma'o kho mo ni rtag par 'jig rten thams cad kyi bya ba 'chor bar byed pa'i chang 'di la spyod cing /gzhan la 'tshong ba ni cha ma yin gyi/ ma la da ni lhan cig skyes pa'i chang zhes bya ba dus gsum gyi sangs rgyas thams cad kyi gsol pa zhig yod kyang zer la/ de de ltar dpa' o rgyan gyi gnas 'di na bzhugs pa'i rnal 'byor pa rnams kyis spyod ces grags pas/kho mos kyang rnal 'byor pa 'ga' zhig la chang de btsal la longs spyad cing gzhan dag la yang bstan par bya'o/ /zhes sems la dran zhing tshig tu yang brjod nas de kun du 'gro zhing kho mo la lhan cig skyes pa'i chang gi ro bstan du gsol//zhes dus rtag par brjod pa las/ /de'i sems rgya chen po de dag rnal 'byor pa pad+ma'i rdo rjes mkhyen cing phyag rgya chen po'i 'bras bu mngon du byed par gzigs nas/ chang 'tshong ma ga la ba der byon nas phyag brkyang ba tsam gyis chang 'tshong ma de rab tu dga' nas/rnal 'byor pa pad+ma'i rdo rje'i zhabs la mgo bos btugs nas 'di skad ces gsol to/ /skyes bu chen po kho mo la lhan cig skyes pa'i btung ba bstan du gsol zhes zhus pa dang / rnal 'byor pa pad+ma'i rdo rjes 'di skad ces gsungs so//rigs kyi bu sus kyang ma byas pa'i chang / de bzhin gshegs pa rnams kyis gsol ba zad pa med pa/ ma rig pa'i gnyid sangs par byed pa/ 'khor ba'i 'brog dgon par ming la ba las dbugs 'don par byed pa 'thung shig /de ni 'di lta ste/ sangs rgyas thams cad kyi yul la 'jug pa mi zad pa'i za ma tog ces bya ba yang yin la/ bsam gyis mi khyab pa'i yul zhes bya ba yang yin te/ rigs kyi bu ting nge 'dzin de la mnyam par zhog dang / gdod lhan cig skyes pa'i chang sangs rgyas rnams kyis gsol pa 'gro ba kun la 'gyed nus pa khyod kyis myong zhing skom pa las sel bar 'gyur ro/ /zhes ba sgo nas rnal 'byor gyi gnas su gshegs so/ /chang 'tshong des kyang ting nge 'dzin de la mnyam par gzhag pa tsam gyis lhan cig skyes pa'i btung ba zad pa med pa'i gter zhes bya ba nyams su myong ste/rnal 'byor ma lhan cig skyes pa'i rdo rje'i tshul ni de 'dra'o// //de bzhin dga' ba'i rdo rje dpal/ /zhes bya ba ni dpal o rgyan gyi gnas de nyid na/ tha ga pa dga' ba'i rdo rje zhes bya ba rnal 'byor pa gang dag mthong ba de dag la dga' ba'i sems bskyed pa cig gnas pa las/ tha ga pa zla bo dag la rnal 'byor gyi spyod pa spyad pa'i bsngags pa 'ba' zhig brjod cing / bdag nyid kyang 'di ltar sems te/ma la bdag ni dkyil 'khor gyi 'khor lo sngon du 'gro bas bla ma dam pa dag las mngon par dbang bskur ba thob ste/ mtshan ma med pa'i gnas la gnas shing rnal 'byor pa de dag dang 'grogs te/ de dag gi zhabs la bsnyen bkur byed na ci ma rung zhes yid la rtag tu byed pa las/tha ga pa des de ma thag tu bya ba lhag ma dag yongs su spangs te/ bla ma dam pa dag las yongs su rnyed de/ yongs su rnyed nas/ mtshan ma med pa'i gnas la nam zhig 'god par 'gyur ba'i bla ma de 'dra ba tshol tshol ba las/rnal 'byor ma lhan cig skyes pa'i rdo rje zhes bya ba/ bla ma dam pa rnams bsnyen bsnyen pa cig da ltar chang 'tshong ba'i grong na rnal 'byor gyi spyod pa mdzad do zhes thos nas/ rnal 'byor ma de ga la ba der son pa las/ rnal 'byor ma des tha ga pa de'i sems kyi rgyud kyi rjes su rtogs te/'di skad ces/ kye thag pa khyod kyis bsam pa rgya chen po de mchog tu legs so/ /myur ba myur bar dkyil 'khor gyi 'khor lo dam par zhugs shig dang / skyes bu chen po khyod kyi bsam pa rgya chen po kho bos myur du bskang ngo zhes smras pa dang /tha ga pa rab tu dga' nas zhabs la spyi bos gtugs te dkyil 'khor sngon du 'gro bas mngon par dbang bskur ba blangs nas/ tha ga pa de la mtshan ma med pa'i gnas la gnas pa sangs rgyas thams cad kyi yul la 'jug pa yang dag pa thob cing rnal 'byor pa gzhan dag la yang bsnyen bkur cing thag pa'i tshul spyod cing rnal 'byor gyi spyod pa byed de/rnal 'byor dga' ba'i rdo rje'i tshul ni de 'dra'o// //rdo rje dang ldan bram ze mo/ /zhes bya ba ni dpal o rgyan gyi gnas de nyid na/bram ze mo rdo rje zhes bya ba khrus dang gtsang sbra mthar phyin pa/ khrus dang gtsang sbra de tsam gyis dag pa dang grol bar 'dzin pa zhig gnas pa las de dus gzhan zhig na 'jug ngogs na khrus byed cing / de'i mthar rang gi sdug pa'i lha la mchod pa byed cing gnas pa las/rnal 'byor pa dga' ba'i rdo rje zhes bya ba des bram ze mo de'i snga phyi'i lo rgyus/ tha ga pa gcig nas gcig tu brgyud pa la thos te/ bram ze mo de rjes su gzung bar bzhed de/ bram ze mo de'i 'jug ngogs su tha ga pa de song ba dang /bram ze mo de yang de na khrus byed pa dang phrad de/ bram ze mo de la 'di skad ces smras so/ /ci bram ze mo khyod de ltar khrus byas pas phyi'i dri ma 'ba' zhig dag par lta ba'am/ 'on te nang yang dag par lta/ bram ze mos smras pa/ gnyis ka dag par blta ste legs ldan chen po tshangs pas kyang de skad ces bstan to//rnal 'byor pa dga' ba'i rdo rjes smras pa/ bram ze mo khyod kyis phyi'i dri ma dag pa la ni kho bo mi 'gegs kyi/ gal te khyod kyi phyi'i khrus kyi nang gi bdag nyid can yang dag par 'dod pa lta na ni kho bo dag par mi 'dod de/de yang ji skad du/ gal te khrus kyis 'dag lta na/ /nya pa rnams kyang don byas shing / /nyin dang mtshan du gnas pa yi/ /nya la sogs pa smos ci dgos/ /zhes gsungs la/ gzhan yang sA lu'i sa bon las ni sA lu nyid 'byung gi/khre rgod ni ma yin no/ /bram ze mo de bzhin du nyon mongs pa'i gzhi las nyon mongs pa nyid skye'i/ rnam par byang ba ni ma yin no/ /bram ze mos smras pa/ 'o na gang gis nang gi bdag nyid dag par 'gyur ba'i khrus de kho mo la bstan du gsol/ rnal 'byor pas smras pa/ gang lus dang ngag gi 'bad pa med pa'i khrus kyis dag par gyis shig dang / khyod kyi phyi nang ma lus par dag par 'gyur ro/ /smras pa skyes bu chen po de lta bu'i khrus de kho mos mi 'tshal gyis legs par bstan du gsol zhes smras nas/snyim pa me tog gis bkang ste rang nyid kyi stod g.yogs dang bcas pa phul lo/ /rnal 'byor pas smras pa/ bram ze mo nam mkha' yongs su dag pa'i dbyings nas sprin dag byung nas de nyid du thim pa'am/ chu klung yongs su dag pa las nya dag byung ba ji lta ba bzhin du bram ze mo khyod kyis sems la lta bar gyis dang /gdod sangs rgyas thams cad kyi yul la 'jug pa'i ye shes kyi chu zhes bya bas bdag tu lta ba'i dri ma ma lus par 'dag par 'gyur ro zhes bsgo nas rang gi gnas su dengs te/ bram ze mo des kyang sangs rgyas thams cad kyi yul la 'jug pa'i ye shes kyi tshul ji lta ba bzhin du rtogs te/bdag tu lta ba'i dri ma can gyi bram ze gzhan rnams kyang 'dren cing gnas te bram ze mo de'i tshul ni de 'dra'o// //de bzhin grub pa'i rdo rje dpal/ /zhes bya ba ni dpal o rgyan gyi gnas de nyid na/'dreg mkhan grub pa'i rdo rje zhes bya ba gnas pa las/ de dman pa'i lus kyis yid byung nas bram ze mo rdo rje zhes bya ba'i rnal 'byor ma zhig yod pa thos nas de'i drung du phyin pa dang / rnal 'byor ma des kyang de'i bsam pa rtogs nas de la gso sbyong gi sdom pa byin te/mthar gyis bcom ldan 'das sangs rgyas thams cad mnyam par 'dus pa zhes bya ba'i dkyil 'khor du bkod cing / rtog pa'i rnal 'byor la mthar phyin par gyur te/ de'i sems kyi mos pa dang lhag pa'i bsam pa rgya chen po rnal 'byor ma des mkhyen nas/'dreg mkhan de pa sangs rgyas thams cad kyi yul la 'jug pa na nam mkha' mdzod kyi gter zhes bya ba skad cig tsam gyis bstan pa dang / 'dreg mkhan des kyang skad cig de nyid la ting nge 'dzin de yid la byas pa tsam gyis lha'i mig la sogs pa mngon par shes pa dang yang ldan la/rnal 'byor gyi spyod pa 'gro ba gzhan gyi don mdzad cing gnas te/ rnal 'byor pa grub pa'i rdo rje'i tshul ni de 'dra'o// //dpal ldan gshin rje'i rgyal po 'di//zhes bya ba ni gong du brjod pa'i lhan cig skyes pa'i ting nge 'dzin sangs rgyas thams cad kyi yul la 'jug pa/ bsam du med pa/ thogs pa med pa/ nam mkha' mdzod kyi gter zhes bya ba tha snyad sna tshogs pas mtshon pa 'di nyid de/ ting nge 'dzin 'di nyid kyis khams gsum pa thams cad kyi bdag tu rtog pa'i bgegs mthar byed pa'i phyir ro/ /de bas na gshin rje ste/ gang la gshin rje'i ngang tshul yod pa de ni gshin rje zhes bya zhing / des bdag cag rnams kyi dpal du byed pas dpal gshin rje'i rgyal po zhes bya'o//'di zhes bya ba ni byed pa'i sgra ru sbyar te/ 'di ltar/ dpal ldan 'khor lo'i mngon brjod pas/ /zhes bya bas srid pa'i 'khor lo gang zhig dpal gyi 'byor ba phun sum tshogs par mngon par bstod cing ston pa ste/ 'khor lo'i ni las su bya ba'i tshig go/ /de bas na/ dpal ldan 'khor lo'i mngon brjod pa/ /zhes bya'o/ /bla ma dge slong gnyid log pa/ /zhes bya ba ni/ sa'i bdag po dbang po'i blo rgyal srid kyi 'byor pas rab tu yengs par gyur pa las/ dpal mo bdag gis rgyal srid kyi 'byor pa spong ba la bkod de/shAkya'i dge slong gis zhes bsgos nas/ des kyang rgyal srid kyi 'byor pa mchil ma'i thal ba ltar bor nas dge 'dun gyi gtsug lag khang du dge slong gi dngos por gyur nas/ chos gos ngur smrig yang dag par blangs te/mkhan po dang slob dpon gyi rjes su yang dag par slob pa las/ da dung blon po dang mdun na 'don la sogs pas bsnyen bkur zhing rjes su 'brangs pas de'i dge ba'i phyogs kyi gegs su gyur to/ /dus de na kho mo dpal gyi ri zhes bya ba la gnas pa dang /dpal mos ltos shig sa bdag ltos/ /mi dbang sa bdag ming po ltos/ /da dung rgyal srid 'byor pa yis/ /mi dbang rnal 'byor gegs byed do/ /zhes nam mkha' la sgrar grags par gyur to/ /de ma thag tu kho mos dpal u rgyan gyi gnas mi dbang dge slong ga la ba der phyin to//gzhan gyis rig par yod ma gyur/ /kho mo'i rkang par de btud nas/ /a ho la k+Sh+miM zhes kyang brjod/ /dga' ba'i mdangs kyis me tog gtor/ /de la kho mos 'di skad ces/ /kye dbang po blo khyod rgyal po'i 'byor pas 'khor ba'i g.yang sa chen por khrid pa'i gnas yongs su dor la/dge slong gi dngos po zung cig ces bsgo ba yin na/ cig dge slong du gyur kyang 'dor bar mi byed dam zhes smras so/ /dge slong des kho mo la 'di skad ces/ kye sring mo bdag gis ni rgyal srid 'chil ma'i thal ba ltar bor lags kyis kyang /skye bo'i tshogs chen po 'di dag ni da lta bdag gi slad bzhin 'brang ba lags na/ de bdag gis ji ltar bsgrub par bgyi ba gsungs shig ces zer ba las/ kho mos de la dur khrod du song la de nyid yid la byos shig ces bsgo ba na/dge slong gis bdag gi ngag gi rjes su zhugs te mtshan phyed nas langs te mkhan po dang dge 'dun la sogs pas dur khrod du gnas pa'i gegs byed pa'i 'jigs pa dang ldan pas mkhan po dang / slob dpon la sogs pa gnyid kyis yongs su non pa gang na ba der song ste/de dag gis mi tshor ba'i tshul du rkang pa la gtugs nas/ gtsug lag khang la ltos pa med par dur khrod du song ste/ de nyid yid la byed cing gnas pa na rgyal po'i btsun mo'i tshogs sngags 'chang ma rnams kyis dge slong de'i sems kyis lhag pa'i bsam pa brtan nam mi brtan zhes co 'dri bar bsams pa las/dge slong de sangs rgyas thams cad kyi yul la 'jug pa'i ting nge 'dzin yid la byed pa'i stobs kyis sngags 'chang ma rnams kyis mthong bar ma gyur cing / dge slong de'i la ba tsam cig snang ba la 'di skad ces brjod de/e ma shAkya'i dge slong dag ni g.yo che ste/ la ba ltar lus bsgyur ba yin grang / la ba 'di nyid bza' 'o zhes/ la ba dum bur byas te khar so sor bcug pa las/ sngags 'chang ma de rnams ma lus pa lug lta bur gyur te/ yul yul por gyur nas rgyal po'i thad du lhags te 'di skad ces/ kye rgyal po bdag cag rnams dge slong dur khrod pas 'di ltar bgyis te/ e ma kyi hud rgyal pos bskyab tu gsol zhes brjod do/ /rgyal pos btsun mo rnams mthong bas mya ngan gyis gdungs nas dge slong ga la ba der khrid de zhabs la gtugs nas 'di skad ces/'phags pa'i rnal 'byor la co dri ba bzod par gsol zhes smras pa dang / dge slong gis rgyal po de la 'di skad ces/ kye rgyal po'i btsun mo 'di dag gis kho bo'i la ba zos pa phyir byin cig ces smras pa dang / de dag gis la ba'i dum bu rnams phyir skyugs te sngon ji lta ba bzhin bsgrubs nas phul ba tsam gyis kyang lug lta bu'i dngos po las slar log par gyur te dge slong rnal 'byor pa de la gzhan dag tu la ba pa zhes kyang grags te ting nge 'dzin de'i byin gyi rlabs ni de dang 'dra'o// // de bzhin gzhan yang gang zhig lha/ /zhes bya ba ni gong du brjod pa'i rnal 'byor pa rnams la/ /rang las byung ba'i bde ba dang ldan pas lha yin la/ de las gzhan pa'i lha'i rnal 'byor pa gzhan yang yod de/ dpal ldan kun 'gro'i mgon po dang / /zhes bya ba ni/ dpal u rgyan gyi gnas 'di nyid na/dpal kun 'gro'i mgon po zhes bya ba'i rnal 'byor pa zhig dpal u rgyan gyi gnas kun du 'gro zhing / de kho na nyid tshol tshol ba dang / rnal 'byor pa grub pa'i rdo rje zhes bya ba'i drung du phyin te/ lo du ma bsnyen bkur nas/ de kho na nyid stsal du gsol zhes gsol pa dang /rnal 'byor pa des 'di skad ces/ rigs kyi bu dus gsum gyi de bzhin gshegs pa thams cad kyi sku gsung thugs ye shes kyi de kho na nyid ni 'bad pa dang / yi ge dang / brda dang / brjod pa dang / sgra'i yul ma yin te/ de kho na nyid ni sangs rgyas thams cad kyi yul la 'jug pa zhes bya ba yin pas 'bad pa dang / yi ge dang / brda dang / sgra brjod pa dang sgras rnyed par mi 'gyur ro zhes brjod ma thag tu ting nge 'dzin de nyid mngon du gsal bar gyur te/ rnal 'byor pa kun 'gro mgon po'i tshul ni de 'dra'o// //de bzhin dpal ldan thugs rdo rje/ /zhes bya ba ni dpal u rgyan gyi yul de nyid na/ rnal 'byor pa thugs kyi rdo rje zhes bya ba bdag dang 'gro ba thams cad kyi sems kyi rgyun la kun du spyod cing sems kyi rang bzhin tshol te/ rnal 'byor pa dag gi drung du 'gro zhing sems kyi rang bzhin ci 'dra ba'i man ngag zhu ba dang /des rnal 'byor pa kun 'gro mgon po zhes bya ba/ 'gro ba rnams kyi sems kyi rgyun la mkhas pa zhig yod ces thos te/ de ga na ba der song nas rnal 'byor pa de la ji lta ba'i bsnyen bkur phul nas sems kyi rang bzhin dris pa dang /rnal 'byor pa kun 'gro mgon pos 'di skad ces/ rigs kyi bu dper na nam mkha' ni kha dog ma yin/ dbyibs ma yin/ tshad ma yin/ bstan du med pa/ brjod du med pa/ rdzas su grub pa med pa'o/ /rigs kyi bu de bzhin du 'gro ba rnams kyi sems kyi rgyun gyi rang bzhin yang nam mkha' ltar kha dog ma yin/dbyibs ma yin/ tshad ma yin/ bstan du med pa/ brjod du med pa/ rdzas su grub pa med pa'o zhes brjod pa tsam gyis/ rnal 'byor pa de sangs rgyas thams cad kyi yul la 'jug pa zhes bya ba yang shes shing khong du chud la/'gro ba rnams kyi sems kyi rang bzhin yang ji lta ba bzhin du shes par gyur te/ rnal 'byor pa thugs kyi rdo rje de'i tshul ni de 'dra'o// //de ltar kho mos kyang lhan cig skyes pa'i ting nge 'dzin sangs rgyas thams cad kyi yul la 'jug pa/bsam du med pa/ thogs pa med pa/ nam mkha' mdzod kyi gter zhes bya ba/ 'gro ba thams cad kyi sems kyi rgyun rtogs par byed pa 'di tshol ba las/ rnal 'byor pa thugs kyi rdo rje zhes bya ba zhig ting nge 'dzin 'di'i rang bzhin la mkhas zhes bya ba thos nas/de'i drung du phyin te kho mos lo du mar mchog gi rnal 'byor pa de'i zhabs la bsnyen bkur te/ de'i mthar ting nge 'dzin des gnang nas kho mos dpal gyi ri la yid la byas pa las mngon du gyur pa yin zhing sa'i bdag po dbang po'i blo la rnam grangs du mas bstan cing khong du chud par bya ste/rgyal srid kyi 'byor pa dang bral nas/ dur khrod du bsten pa las mngon du gyur pa yin no/ /de ltar brjod pa'i rim pas lhan cig skyes pa'i ting nge 'dzin 'di ni rnyed par dka' la/nyan thos dang rang sangs rgyas dang / byis pa phal pa rnams kyis rnyed par rab tu dka' zhing / bla ma legs par bsten pa skal ba dang ldan pa rnams kyi spyod yul yin zhes dgongs so/ /dpal ldan rol pa'i lha mo sogs/ /yang dang yang du kun la 'dud//ces bya ba ni sa'i bdag po dbang po'i blos lhan cig skyes pa'i gzhung gi dum bu lnga bcu rtsa brgyad po 'di rtsom par 'dod pas/ bar du gegs mi 'jug par bya ba'i phyir dang / tshogs bsags pa'i phyir sngon gyi bla ma dpal o rgyan gyi gnas na bzhugs pa'i rnal 'byor chen po rnams la gus pa'i tshul gyis mchod par brjod pa yin no//de rnams zhabs la phyag byas nas/ /gzhung lugs mtha' ni mchod par bya/ /zhes bya ba ni/ bla ma rnal 'byor chen po de rnams la phyag byas nas/ lhan cig skyes pa'i man ngag bla ma dam pa rnams kyi zhal nas byung ba rnyed dka' ba'i tshul bdag gis gsal bar bya/zhes bya ba'i don te/ /kun 'gro lhan cig skyes zhi ba/ /zhes bya ba ni/ lhan cig skyes pa gang yin pa de 'gro ba kun la khyab par gnas par ston to/ /'di ltar re zhig lhan cig skyes pa'i rang bzhin gang zhig ma shes pa de ni sdug bsngal dang mtshungs par lhan cig ste/de bas sa ha dza zhes bya la/ de yang 'di skad du/ 'bum phrag lnga pa'i kye'i rdo rje'i rgyud las/ lus can thams cad sdug bsngal lo/ /ha zhes smre sngags 'don zhing 'byung //rga shi'i rang bzhin lus can rnams/ /da ltar sdug bsngal dang mtshungs skye/ /yang / lus can thams cad skye ba ni/ /ha zhes srog rlung phyir 'byung la/ /rga shi de yi dbang gis 'byung / /de phyir rga shi med la 'bad/ /yang / khu ba'i khams ni ji snyed pa/ /de snyed ha zhes dbugs kyis ni/ /dbang po'i lam nas 'dzag par byed/ /gang de skye dang 'chi ba gnas/ /yang / lus can 'di dag thams cad ni/ /nga zhes nga rgyal gyis bcings te/ /rigs su bzung bas phung khrol byed/ / de bas bdag 'dzin rnam spang bya/ /zhes gsungs la/ gzhan yang sdug bsngal gyi phung po de dag las go bzlog ste/ gzod ma nas lhan cig skyes pa'i chos rnams kyi de bzhin nyid gang yin pa de la skyes bu gang zhig gnas pa de lta na ni/ zhi ba'i bdag nyid du lhan cig gnas pa yin te/yang ji skad du/ 'bum phrag lnga pa'i kye'i rdo rje'i de nyid las/ /thams cad gzod nas bdag nyid gnas/ /ha zhes rol cing [(]rged [,]rgod [)]pas gnas/ /rga shi med par de gnas shing / /lhan cig skyes pas rnam par rol/ /yang / lus can 'di dag thams cad ni/ /'di nyid kyis ni dbugs 'byin cing / /dngos med gzhi las skyes par byad/ /de 'di lhan cig skyes pa yin/ yang / 'gro kun gzod ma nyid nas stong / /rgyu rkyen gang gis stong ma byas/ /'di las skye rga yod ma yin/ /lhan cig skyes par de ltar brjod//ces gsungs so/ /de bas na lhan cig skyes pa zhes bya ba'i sgra'i don ni de ltar rtogs par bya ba'i don to/ /rtag tu 'byung zhing rang la gnas/ /zhes bya ba ni/ gong du brjod pa'i rim pa de ltar lus can kun la gnas so zhes pa'i don to//dus kun du na mi zad pa/ /zhes bya ba ni/ da ltar gong du brjod pa'i bde ba dang sdug bsngal gyi bdag nyid/ gnas skabs rnam pa gnyis po dag zad cing dengs pa yin la/ de la cig shos sangs rgyas thams cad kyi yul la 'jug pa zhes bya ba'i rang bzhin ni//rtog pas brtags pa spangs pa nyid/ /ces smos te/ sangs rgyas thams cad kyi yul la 'jug pa gang yin pa de ni rtog pa'i rnal 'byor gyis rnyed par mi 'gyur ro zhes bya ba'i don to/ /rang dang phyi rol nang na gnas/ /zhes bya ba ni/ ma brtags pa'i de kho na nyid rgyu ba dang mi rgyu ba'i dngos po thams cad kyi rang bzhin la gnas zhes dgongs so/ /phyi dang nang las ma skyes pa/ /zhes bya ba ni de ltar rgyu ba dang mi rgyu ba mtha' dag la gnas kyang / bskyed bya dang skyed byed kyi tshul du gnas pa ma yin no zhes bya ba'i don to//zung 'jug tshig gi don de ni/ /rgyu dang mi rgyus gnas pa la/ /dus kun du ni yang dag gnas/ /zhes bya ba ni/ lhan cig skyes pa zhes bya ba de yod pa'am med pa'am gnyis ka las 'das pa zhe'am/ rtag pa'am/ mi rtag pa'am/ bde ba'am/ sdug bsngal ba'am/ bdag gam/ bdag med pa'am/ nyin mo zhe'am/ mtshan mo zhe'am/ 'khor ba zhe'am/ mya ngan las 'das pa zhes gang gis brjod pa'i mtha' dang bral ba'i mtshan nyid de/ de bas rgyu ba dang mi rgyu ba thams cad dus chad pa med par gnas zhes dgongs so//de ltar na 'gro ba rnams de kho na nyid de dang ldan pas/ bla mas bsgo bas ci zhig bya zhe na/ /gzhung las ma gtogs rnyed mi 'gyur/ /zhes smos te/ dper na bud med dbul mo zhig la lto ba na bu gling bzhi la dbang byed pa yod kyang / rang nyid slong ba 'ba' zhig yid la byed pa ltar/so so'i skye bo gang yin pa de dag kyang de dang 'dra ba de bas na/ kye sems can rnams bla ma'i yon tan rin po che gter yang dag par bsten cig ces bya ba'i don to/ /gang dang mtshungs par skyes pa'o/ /des na lhan cig skyes par brjod//ces bya ba'i lhan cig skyes pa'i de kho na gang zhig rgyu ba dang mi rgyu ba'i dngos po rnams dang lhan cig tu gnas pas de bas de skad ces bya'o/ /rtog pa'i bdag nyid can gyis lhan cig skyes pa phyin ci ma log pa'i de bzhin nyid la reg pa med pas/ lhan cig skyes pa rtog pa med/ /mi rtog las skyes lhan cig skyes/ /zhes bya'o/ /sangs rgyas rnams la lhan cig skyes/ /rdzogs pa'i byang chub ster mdzad pa/ /zhes bya ba ni/ gang zhig ji ltar gnas pa de ltar gnas pa'i tshul du gnas pas/ bde bar gshegs pa rnams kyis kyang yang dag par rdzogs pa'i byang chub brnyes so zhes bya'o//sems kyi bcos pa kho na bdud du bstan cing / 'bad pas lhan cig skyes pa thob pa med do zhes bstan par bya ba'i ched du/ rtog las phyi rol lhan cig skyes/ /blang bya dor bya spangs pa nyid//gang du ji lta de lta bur/ /de ni 'bad pa med pas thob/ /ces bya ba smos te ting nge 'dzin 'di la ni gnas pa nges pa'am/ re ba'am/ dogs pa'am/ 'dug stangs sam/ zas kyi bye brag gam/ phyag rgya bcing ba'am/ me thab bam/ gza' dang tshes grangs la sogs pa rnam par dben pa yin te/de lta bu dag ni brtags pa'i rnal 'byor zhes bya'o/ /brtags pa ma yin pa dang / rtog pas ma brtags pa 'thob pa ni 'gal ba yin no/ /gzhan yang ji skad du/ ji srid yid kyi rnam g.yo ba/ / de srid bdud kyi spyod yul yin/ /zhes bya ba la sogs pa rgya cher gsungs so/ /the tshom med cing rtog med pa/ /mngon sum du ni rnyed par 'gyur/ /zhes bya ba ni gong du brjod pa'i lhan cig skyes pa'i the tshom dang rtog pa'i dra ba thams cad gcod pa bla ma dam pa las mngon sum du rtogs te legs par nyams su myong ba de lta bu ni//nyin mtshan bskal pa de bzhin lo/ /bskal pa bye ba brgya dag gam/ /rgyun mi chad par dus kun du/ /lhan cig skyes pa thob par 'gyur/ /zhes bya ba smos te/ tshig 'di'i don ni gang yang sangs rgyas thams cad kyi yul la 'jug pa bsam gyis mi khyab pa'i dbyings de la gnas pa/de bzhin gshegs pa thams cad kyi sku dang / gsung dang / thugs ye shes kyi gsang ba'i dam tshig ces bya ba dri ma med pa'i chu bo'i rgyun ltar 'bab pa yin la/chu rgyun de yang bdag nyid 'dod na ni/ /nyin mtshan gyi grangs sam/ zla ba'i grangs sam/ lo'i grangs sam/ bskal pa bye ba bsam gyis mi khyab pa'i grangs su yang dus kun du rgyun mi 'chad par gnas pa yin zhing / nyams su myong ba yin no/ /gang yang chu rgyun de ni bsam gyis mi khyab pa'i dbyings dang /stong pa nyid du dus mtha' med/ /ces bya bar gsungs pa/ 'og min gyi gnas dpal rnam par snang mdzad kyi zhing khams ye shes gang chen mtsho zhes bya ba nas rab tu 'bab ste/ srid pa gsum na gnas pa'i sems can nyi ma'i zer rab tu tsha bas 'khri shing dang gel pa la sogs pa bsregs pa ltar gnas pa rnams la gnyis su med pa'i ye shes kyi myu gu skyed par byed pa yang yin no//gzhan yang dri ma med pa'i ye shes kyi chu rgyun 'di kho na/ rnal 'byor chen po'i rgyud thabs kyi bdag nyid dang /shes rab kyi bdag nyid kyi rgyud du thabs sam man ngag dam pa zhes su bstan la/ theg pa gzhan dag gam/ bya ba'am/ rnal 'byor gyi rgyud la sogs pa las khyad par 'phags par ston to/ /rtog pa bral zhing mngon sum pa/ /rgyal bas yid kyi nang gnas gsungs//zhes bya ba ni lhan cig skyes pa ma bcos pa gang yin pa de rnal 'byor pa'i mngon sum pa'i rtog pa dang bral ba yin no/ /de nyid rtsol ba med pa'i brtson 'grus kyis phrad de/ rnam par shes pa'i thugs kyi rdo rje dngos kyi rang bzhin du gnas zhes rdo rje 'chang rnams kyis gsungs so//rtag dang chad dang bral ba nyid/ /ces bya ba ni rtag chad du lta ba spangs pa'o/ /mtshon par byed pa dang mtshan gzhi btags pa spangs pas na/ mtshan dang mtshan gzhi spangs pa nyid/ /ces bya'o/ /gzhan yang snying rje mngon brjod pa//zhes bya ba yang / snying rje ni rnam pa gsum ste/ sems can la dmigs pa zhes bya ba dkar po'i tshes gcig nas lnga'i bar dang / chos la dmigs pa zhes bya ba drug nas bcu'i bar dang / dmigs pa med pa zhes bya ba bcu gcig nas bco lnga'i bar yin la/de lta bu'i snying rje nang gi bdag nyid can dag la snying rje zhes bya ba brjod par bya'o/ /de nyid bskul zhing 'jug pa med pa'i byed pa po dmigs pa med pa'i shes rab kyi pha rol tu phyin pa'o/ /lhan cig skyes par yongs brjod bya/ /zhes bya ba ni de ltar skul bar byed pas bskul bar bya ba bskul ba'i bde ba chen po gang yin pa de lhan cig skyes pa chen po yin zhes dgongs so//lhan cig skyes 'di dngos rnams kyi/ /rgyu dag tu ni yongs su brjod/ /ces bya ba ni/ lhan cig skyes pa 'di nyid yongs su shes pa de lta na ni byang ba dang grol ba'i gzhi yin la/yongs su ma shes pas sdug bsngal gyi phung po chen po yongs su bskyed pa'am/ yang na/ sangs rgyas rang sangs rgyas rnams dang / /nyan thos rnams kyis khyod bsten na/ /thar pa'i lam ni gcig nyid khyod/ /gzhan dag med ces bya bar nges//zhes bya ba'i don to/ /la las bdag ni lhan cig skyes/ /kha cig rmongs pas dbang phyug ste/ /zhes pa ni/ byis pa'i skye bo kha cig bdag rtag pa la lhan cig skyes pa zhes zer ro/ /kha cig phywa'am dbang phyug cis bya ba legs pa dang nyes pa spyad pa'i 'bras bu ma yin pa phywa'am dbang phyug de dag legs par mchod na bdag 'dod pa ster ro//zhes de la lhan cig skyes par rtog go/ /'o na gang yin snyam pa las/ /bdag bcas ma yin bdag med pa/ /rtog pa gnyis ni spangs pa nyid/ / ces bya ba smos te/ lhan cig skyes pa ni chos dang gang zag gi bdag nyid las kyang stong pa ste/ de bas na rtog pa gnyis spangs pa'i bdag med pa kho na la brjod par bya'o/ /gang la gnyis kyi 'du shes med pa de la zung 'jug gi go 'phang ste/ de zhes bya ba lhan cig skyes pa de zhes sbyor ro//rgyal bas lhan cig skyes par gsungs/ /zhes bya ba ni gzhan yang gnyis kyi 'du shes spangs pa'i zung 'jug la gnas pa lhan cig skyes par gsungs so/ /sus she na/ rgyal bas zhes bya ba smos so/ / de nyid srog chags rnams kyi srog /ces bya ba ni gang zhig yongs su shes na de ni skye bo thams cad kyi srog chen po yang yin no/ /de nyid zad pa med cing mi 'gyur bas/ /de nyid mchog tu mi 'gyur ba zhes bya'o/ /de nyid kun pa khyab pa'o/ /lus kun la ni rnam par gnas//zhes bya ba ni/ gong du brjod pa'i snying rje rnam pa gsum ste/ de yang lhan cig skyes pa yin te de bas na 'gro ba kun la khyab cing lus thams cad la dbyer med par gnas zhes bya'i don to/ /bud med ni mi mo'o/ /byis pa ni don la shed ma bye ba'o/ / ba lang rdzi ni ba lang skyong ngo / /kla klo ni gang la chos med pa de'o/ /rigs ngan ni gdol pa'o/ /chu yi nang gnas sems can dang / /zhes bya ba ni/ chu'i skye bo ste chu mi la sogs pa'o/ /lha ni rgyal po chen po bzhi la sogs pa'o/ /gnod sbyin ni 'gro ba'i mdangs 'phrog pa la sogs pa'o//klu ni dga' bo la sogs pa ste/ de dag gi tshogs la bcas pa zhes bya'o/ /de rnams lhan cig skyes mi shes/ /zhes bya ba ni 'gro ba de rnams kyis lhan cig skyes pa gang zhig ma shes pas srid pa gsum gyi 'gro ba'i grong khyer dag tu 'khyam pa yang yin no//sangs rgyas bdag nyid lus la ni/ /zhes bya ba ni lus can thams cad kyi phung po dang / khams dang / skye mched rnams gzod ma nas sangs rgyas kyi rang bzhin yin no/ /de bas de'i phyir/ dngos grub bde ba mi nus shing / zhes bya ba ste/ sangs rgyas kyi rang bzhin du lta zhing rtog par mi byed pa'i phyir/bdag nyid 'phrog pa'i chom rkun te/ /zhes smos te rang gi rang 'joms pa'i phyir ro/ /de yis sdig pa ma byas sam/ zhes pa ni/ gang zhig gang gi rang bzhin la/ /de dang de yi rang bzhin du/ /ma byas de'i phyir sdig can no//bdag nyid 'di dag gzhan pa la/ /zhes pa ni/ lus can rnams kyis stong pa gzhan pa la/ /gzhan dag tu ni rtog par byed/ ces bya ste/ bdag med pa la bdag tu rtog pa'i phyir na'o/ /de'i phyir na yang / /bdag nyid 'phrog pa'i chom rkun te/ / de yis sdig pa ma byas sam/ /zhes bya ste/ gong ma bzhin du sbyar ro/ /'o na ci zhe na/ bdag nyid nges par sangs rgyas kun/ /zhes bya ba smos te/ kye sems can rnams ma rtogs pa'i phyir/ sems can zhes pa'i ming yin la/ rtogs pas sangs rgyas zhes bya ba'i don to//mdza' bo thams cad nyid kyang ngo / /zhes bya ba ni bdag nyid sangs rgyas kun gyi rang bzhin gang yin pa de ni/ mdza' bo dang grogs dang / pha ma dang / rtsa lag la sogs pa yang yin zhes pa'i don to/ /rang gi lhag pa'i lhar sbyor bas/ /zhes pa na 'dod pa'i lhar sbyor bas so//de phyir bdag nyid bsgrub par bya/ /zhes pa ni bdag nyid lhan cig skyes pa'i sangs rgyas yin/ de bas na sangs rgyas lhan cig skyes par shes par gyis shig ces pa'i don to/ /lus gnas lus las ma skyes pa/ /zhes pa ni/lhan cig skyes pa ni rtog pa gang yin pa de lus la gnas kyang lus kyi rgyu'i tshul du skyed pa ni med do/ /rtog pa gnyis ni zhes ni/ gzung ba dang / 'dzin pa dang / yod pa dang / med pa'am/ rtag pa dang chad par rtog pa yin la lhan cig skyes pa la de mi mnga' bas spangs pa'o//khyab bya khyab byed tshul gyis ni/ /dngos po kun la yang dag gnas/ /zhes bya ba ni/ rgyu ba dang mi rgyu ba'i dngos po khyab par byas pa lhan cig skyes pa'i ngo bos khyab nas gnas zhes bya ba'i don to/ /lha dang lha min klur bcas dang / /thub pa rnams dang drang srong dang //zhes pa ni/ lha ni sngon du bstan pa'o/ /lha ma yin ni chang la mi dga' ba'am kun nas stobs dang ldan pa'o/ /klu ni dga' bo la sogs pa ste/ sngon du bstan to/ /thub pa ni me sbyin la sogs pa'o/ /drang srong ni rgyas pa la sogs pa'o/ /bdag tu 'dzin pa mthar gnas pa//zhes bya ba/ bdag med pa la bdag tu lta ba'i phyir glen pa rmongs pa yin la/ de bas na lhan cig skyes pa mi shes so/ /mchog gi go 'phang mi shes phyir/ /rmongs pa thams cad nyon mongs 'gyur/ zhes bya ba ni/ lhan cig skyes pa'i mchog gi gnas ma shes pas 'khor bar nyon mongs shing sdug bsngal lo zhes bya ba'i don to/ /bskal pa gsum du ngal byas nas/ /zhes bya ba ni bskal pa chen po grangs med pa gsum dus dma' ba'i tshul khrims su khas len cing lha dang mi'i 'byor pa'i stegs tsam tshol zhing /dag pa dang grol bar 'dzin pa yin te/ 'di ltar/ bdag nyid gcig pu 'dul ba'o/ /zhes bya ba ni sems bskyed pa dman pas ji srid 'tsho'i bar du zhes dam bca' ba'i phyir dang / bdag nyid gcig pu dul zhing zhi ba'i bsam pa dang ldan pa'i phyir dang /rnam pa kun du 'di dag min/ /zhes bya ba ni bdag nyid gcig pu zhi zhing dul ba las/ gzhan du 'gro ba ni rnam pa kun du zhi zhing dul ba la mi brtson pa ste/ bdag nyid 'ba' zhig 'jug pa bzhi dang 'bras bu bzhi tsam zhig gis chog par 'dzin pa ni/nyan thos pa yi byang chub 'dod/ /ces bya ba yin no/ /de bas kyang lhan cig skyes pa mi shes zhes bya ba'i don to/ /dbu ma'i 'dod lugs gzhung gi tshul/ /de ni rtsod pa kun la mos/ /zhes bya ba ni/ rtog ge pa gang zhig dbu ma pa khas len cing dam bca' ba dang /rtags kyi rjes su 'gro ba dang / ldog pa tsam gyis gzhan dag sun 'don cing / bdag rang gi gzhung yang chos thams cad dbus dang mtha' dmigs su med do zhes dam bca' ba dang / gtan tshigs la sogs pa tsam gyis sgrub ste/gang yang tshig tsam gyis chos thams cad stong par brjod pa rtog ge brtsad pa la mos pa zhes bya ba yin la/ skyes bu de dag gis chos thams cad bdag yod pa'am med par dam bca' ba la sogs pa'i sbyor bas/ bskal pa'i yal kar te/bskal pa grangs med par brtsad kyang ngal ba don med pa yin pas/ lhan cig skyes pa'i rang bzhin de yis kun nas mi shes so zhes bya ba'i don to/ /'di lta ste dper na skyes bu 'ga' zhig gla rtsi'i dri nyams su ma myong bas/ gla rtsi'i yon tan skyes bu gzhan dag la ston pa dang mtshungs pa ni dbu ma'i gzhung yin te/gang yang rdo rje 'chang gis gsungs pa'i chos thams cad stong pa dang / zhi ba dang / bdag med pa nyid nyams su myong zhing / gzhan la yang tshig gis mtshon par byed cing ston par byed pa dag gi rnal 'byor pa ni kho bo 'gog par mi byed do//theg chen shin tu yangs pa las/ /zhes bya ba ni sangs rgyas thams cad kyi sku dang gsung dang thugs kyi gsang ba ston par byed pa rnal 'byor chen po'i rgyud do/ /rgyal ba mchog ces pa ni/ rdo rje 'chang rnams so/ /sngon gsungs pa zhes pa ni lhan cig skyes pa'o//'di ltar gcig pu nyid kyis zhes pa ni/ sangs rgyas thams cad kyi yul la 'jug pa rtog pa'i dri mas dben pa'i ting nge 'dzin 'di gcig pu nyid kyis so/ /yang dag rdzogs pa'i byang chub mchog /phyag na rdo rje'i rim pas 'ongs//zhes pa ni gsang ba'i bdag po'i sprul pa las brgyud de gong du bstan pa nyid do/ /rna ba nas ni rna bar rnyed/ /ces pa ni/ bla ma gcig nas gcig tu rna ba nas rna bar brgyud pa yin zhing / gzhung gi tshogs nas mi rnyed ces bya ba'i don to/ / gang la byang chub gzhung gnas pa/ /bla ma de yis 'gro ba sgrol/ /zhes bya ba ni gang yang sangs rgyas thams cad kyi yul la 'jug pa nam mkha' mdzod kyi gter gyi ting nge 'dzin gyi gzhung gang la gnas pa'i bla ma chen po des skye bo skal ba dang ldan pa rnams grol bar nus kyi/gzhan du tshig tsam dang kun du brtags pas mi grol zhes bya ba'i don to/ /bsgom bya sgom byed 'brel pa'am/ /zhes bya ba ni lhan cig skyes pa bsgom par 'dod pa rnams kyis kyang bsgom par bya zhe'am/ bsgom pa po zhes ni nam du yang brtag par mi bya'o zhes pa'i don to//yang dang yang du brtags pa ni/ /zhes pa ni gdan dang sa bon dang mtshan ma la sogs pa'am/ rtsa 'am/ thig le 'am/ rlung gi gong bu'am/ sgra 'am/ zla ba'i dum bu 'am/ lte bar me'i gzugs la sogs pa yang dang yang du brtag par mi bya'o zhes pa'i don to//ci'i phyir mi brtag snyam pa las/ /rtog pa bsgom pa'i bdag nyid kyis/ /dngos grub don du sgrub pa'i thabs/ /zhes bya ba smos te/ rdo rje 'chang chen po'i gnas kyi dngos grub 'dod pa gang dag yin pa de dag gis kun brtags pa'i rnal 'byor gyis rdo rje 'chang gi gnas la reg pa med de brtags pa yin pa'i phyir ro//gang yang gnas de ni ma brtags pa/ 'dus ma byas pa/ rgyu rkyen gyis ma bskyed pa/ rdo rje ltar gzhig tu med pa'i phyir ro/ /de bas na de'i phyir/ de kun rtag tu rnal 'byor pas/ /dor ba nyid du yongs su brtag /ces bya ba smos so/ /brtag pa'i bdag nyid kyi ting nge 'dzin gang yin pa de dag yongs su spangs zhes bya'o/ /de bzhin du yang zhes pa ni mdor bsdus pa'i tshul lo/ /ji srid ji srid rnam rtog pa/ /de srid thams cad kun nas brdzun//zhes bya ba ni mdor na ji srid du rnam par rtog pa yin pa de srid du brdzun pa dang / slu ba'i chos can yin pas spang zhes pa'o/ /mi 'gyur ba'i chos can gang yin zhe na/ gang zhig de nyid ma brtags pas/ /de bzhin yang dag de bden pa//zhes bya ba smos te gang zhig ste ting nge 'dzin gang zhig ma brtags pa dang / ma bcos pa dang / btsal ba thams cad dang bral ba de ni bden pa dang / brtag pa dang / brtan pa dang / gzhig tu med pa'o zhes bya ba'i don to/ /de yang 'di skad du/ gang dag stong nyid mi shes pa//de dag mya ngan 'das mi shes/ /de phyir dngos dang dngos med pa/ /'jig pas stong nyid shes par bya/ /zhes gsungs pa dang / gzhan yang / ma bcos lam la gnas na ni/ /thams cad byas kyang grol 'gyur zhing / /zhes bya ba la sogs pa rgya cher gsungs so//de bas na de'i phyir sems kyi kun du rtog pa kho na bdud yin la de dang bral bas sangs rgyas su shes par bya'o/ /rten 'brel las skyed skad cig ma/ /zhes bya ba ni/ byis pa gang dag skyes pa dang mi mo las byung ba nyid dngos grub tu 'dod de/de ni/ kha cig dngos grub dbang gnyis skyes/ /zhes bya ba yin te/ thugs rdo rje chen po mnga' ba'i sangs rgyas rnams kyis ma 'ongs pa'i dus kyi skye bo 'dul bar dka' ba 'dod chags kyi dbang du gyur pa rnams la dpe'i ye shes dang mtshon par byed pa dang brid par gsungs pa kho na mchog dang /dam pa dang / gtso bo dang / khyad par 'phags par 'dzin par byed de/ de ni gnas phyi ma phyi ma'i dbang gis spang par bya'o gsungs so/ /gang yang dpe'i ye shes de yang gsang sngags kyi sgo nas spyad pa spyod pa las kyi dang por gtogs pa rnams kyis dpe'i ye shes brten par ma gyur gyi bar du bla ma dam pa rnams kyi zhal las rtogs par bya zhing /spang bar yang mi bya la/ gang zhig yongs su shes pa'i rjes la spang bar bya zhes gsungs so/ /gzhan yang 'di na gang dag lam 'di la smod cing skur pa dag kyang phyi mi'i dus su 'byung bar gsungs la/de dag la ji skad du/ tsakra sam+b+ha ra'i rgyud las gdams pa bstan te/ zab mo'i chos 'di ston pa la/ /gal te mos par ma gyur kyang / /smad pa dag tu mi bya ste/ /chos nyid bsam mi khyab dran bya/ /zhes pa gsungs so//de bas na mtshon pa'i ye shes bya ba yin gyi/ de dngos grub tu mi lta zhing mchog tu mi gzung ngo / /byis pa yun ring rgan sogs kyis/ /'bad pa yis ni thob mi 'gyur/ /zhes bya ba la lhan cig skyes pa de nyid las gzhan pa sprod pa las byung ba/ khams thams cad zad par byed pa/mchog gi dngos grub kyi don du bskal pa dpag tu med pa'i yun du byis pa dang rgan po kha cig gis bsgrubs kyang 'grub par mi 'gyur te/ 'bad par byas kyang 'grub par mi 'gyur zhes pa'i don to/ /rgyu dang bcas pa'i skad cig ma/ /zhes brtag pa'i rnal 'byor thams cad kyi rgyu la rag lus pas skad cig pa ste/mi brten zhes bya'o/ /'khrul dang rnam par 'khrul 'dra ba/ /kha cig longs spyod rdzogs pa'i gzhung / /zhes bya ba 'di ni theg pa chen po la kha cig chos thams cad sgyu ma dang rmi lam dang mig yor zhes zer yang rmi lam dang mig yor nyid kyang ji lta ba bzhin rtogs pa med na/chos thams cad sems tsam mo zhes sems nyid gzung ba dang 'dzin pas kun nas stong pa nyid ces tshig tu brjod la kun du rtogs pa ni med do/ /kha cig chos thams cad sems tsam ste/gzung ba dang 'dzin pas stong pa'i sems ston ka'i nyi ma phyed pa'i nam mkha' dri ma med pa lta bu kho na bsgrub par bya bar 'dod de/ de ltar brjod pa'i rim pa de ni/ lhan cig skyes par de mi brjod/ /ces bya ste rnam par shes pa'i chos nyid 'das//ye shes gnyis med tshul 'chang ba/ /zhes gsungs pa'i phyir ro/ /lte ba'i dbus su 'khor lo mchog /de dbus gzi brjid gzugs can ni/ /sgrub pa po yis rtag bsgoms pa/ /zhes bya ba ni/ byis pa dag sprul pa'i 'khor lo zhes bya bar nyi ma dang zla ba kun du kha sbyar ba'i dbus su A li dang kA lis kun nas bskor ba'i dbus su me'i gzugs can gyi shes rab bsams pa las/dkar po 'dzag pa las shes rab tu 'dod de/ de yang rtog pas brtag pa'i phyir/ /lhan cig skyes pa der mi brjod/ / ces bya'o/ /spyi bor gnas pa'i 'khor lo che/ /zhes bya ba'i bde ba chen po'i 'khor lo'o/ /de la reg dang bde ba 'bab/ /ces bya ba ni bde ba chen po'i 'khor lo la gnas pa'i byang chub sems kyis gang ba'i rtsa haM thur du bltas pa lta bu tsaN+Da li'i ming can gyi mes reg pa na bde ba 'byung ste/de yang / bya ba'i rab tu sbyor bas thob/ /ces bya ba smos te/ kha mig la sogs pa kar+Na bcing pa'i sbyor bas rlung dang me sbar la des 'dzag par byed ces bya/ de yang 'jig rten pa'i spyod pa nyid yin pas/ lhan cig skyes pa der mi brjod//ces bya ste/ brjod bral lhan cig skyes pa yin/ /zhes gsungs pa'i phyir ro/ /srog gi rlung ni 'gog pa yis/ /sna yi rtse mor rab gzhug bya/ /zhes gsungs pa ni/ rlung gi rgyun rim gyis bgrang ba la sogs pa sngon du 'gro bas kun rdzob kyi sna rtser rlung gi gong bu'i tshul du 'jug par byed pas/de 'gog pa yis gang thob pa/ /ces bya ba de ltar rlung zhugs pa na dus cung zad tsam gsal zhing gnas pa la byis pa shes rab chung ba can rnams dngos grub tu 'dod de/ des ni phyis yang slar zhing 'byung ba'i phyir/ /lhan cig skyes pa der mi brjod//ces smos pa ste/ gang yang gnas min lhan cig skyes/ /zhes gsungs pa'i phyir ro/ /thur ser rlung ni 'gog pa yis/ /lus ni rtas par byas pa yis/ /yang nas yang du goms par byed/ /ces bya bas/ de las srog gi rlung dang thur sel dang //me dang mnyam du gnas pa dang / /gyen du rgyu dang khyab byed dang / /rgyu dang rnam par rgyu ba dang / /yang dag rgyu dang rab rgyu dang / /nges par rgyu ba zhes bya ste/ /rlung ni rnam pa bcu ru 'dod/ /ces gsungs la/ de yang thur du sel ba zhes bya ba'i rlung ni 'doms na gnas la de ni bcom ldan 'das rin chen 'byung ldan gyi ngo bo yin te/gang yang rlung de'i rgyu ba drag shul gyi sbyor bas 'gegs par byed cing lus sdug bsngal bar byed pa/ yang nas yang du goms par byed de/ de yang dus ma yin par tshe'i dus byed par 'gyur bas/lhan cig skyes pa der mi brjod/ /ces smos te/ thog mar dge ba ma yin pa'i phyir ro/ /mnyam gnas ched brjod brgyad rnams kyis/ /gang zhig rlung ni 'gog pa ru/ /'bad pa yis ni gang byed pa/ /zhes bya ba ni yang / srog dang thur sel gyen rgyu dang //khyab byed mnyam gnas zhes bshad dang / /klu dang ru sbal rtsangs pa dang / /lha sbyin dang ni gzhu las rgyal/ /zhes pa rnams te/ rlung bcu po rnams 'bad pas 'gog par byed kyang mtshan ma la gnas pa yin pa'i phyir/ lhan cig skyes pa der mi brjod/ ces smos pa yin no/ /sa la sogs pa gzung ba yis/ /zhes bya ba ni/ sna sgo g.yas nas sa la sogs pa dbyug tshod lngar rgyu la/ de lnga las kyang sa la sogs pa gang yang rung ba'i dbyug tshod gcig 'gags pa tsam gyis/ sgrub po gang zhig thams cad 'dod//ces bya ba ste/ bzung bas spyod pa grol ba'i 'bras bur 'dod/ /de bas shin du 'bad par sgrub byed pa/ /zhes bya ba spyod pa dang grol bar 'dod pas 'bad pas sgrub par byed do/ /de yang 'jig rten pa'i spyod pa yin pas/ lhan cig skyes pa der mi brjod//ces bya ba yin no/ /phra mo'i thig le rnal 'byor ni/ /zhes bya ba ni/ byang chub kyi sems bab par bya ba'i ched du yar 'gro ba skyon gyi rang bzhin dang / mar 'ong ba yon tan gyi rang bzhin dag phra ba'i phra bar lta ba dang / gzhan yang snying ga la sogs par pad+ma'i 'dab ma kha dog lnga dang ldan pa'i thig le la dmigs pa/kha cig sgrub par byed ces pa ste/ de dang 'dra ba'i ting nge 'dzin la gnas pas lhan cig skyes pa mthong ba med de/ de ci'i phyir zhe na/ bsam gtan bsam byar gang yod pa/ /zhes bya ba/ gang du sgom pa po dang bsgom par bya ba'i 'brel ba'i dra ba ma chad pa de srid du mtshan ma la gnas pa ste/lhan cig skyes pa ni mtshan ma'i khams la mi gnas pa'i phyir/ lhan cig skyes pa der mi brjod/ /ces bya ba smos so/ /b+ha ga nang gnas thig le ni/ /zhes bya ba ni/ a ba d+hU tI zhes bya ba'i rtsa'i rtse mor byang chub kyi sems kyi thig le rgya shug gi tshig gu tsam bsams pas lus sim pa la sogs pa dang /kha cig sgrub pos sgrub byed de/ /de ni rtog bcas go 'phang ste/ /zhes bya ba de yang / rtog pa'i gnas la brten cing gnas pa yin pas/lhan cig skyes pa der mi brjod/ /ces smos pa yin no/ /snying ga'i dbus su bsam gtan ni/ /yid 'dod rnams kyis goms par byed/ /ces bya ba la/ 'di ni sgrub pa po kha cig bdag gi snying gar 'byung ba bzhi'i rang bzhin pad+ma dmar po 'dab ma bzhi pa la nyi ma dang zla ba'i bar du chud pa'i thig le kha sbyar la pad+ma'i rtsa ba'i skud pa 'dra ba ri mo sgra zhes bya bar grags pa phyed dang bdun bskor du bsdams te/rtse mo steng du phyung nas/ de nas zla ba'i bu gar zhugs te rjes su 'gro ba dang 'ong bar gyur pas brjod cing spro bar bya ba dang /srog dang rtsol ba bsdams te sngags slar bsdu ba dang / yi ge gsum gyi sgras gzhug cing dbyung bar bya ba ni/ steng du 'gro ba'i rlung yi ge gsum dang ldan pa'i sgras dbyung zhing gzhug par bya ba'i gzhi la yang bcug la/ gnas par bya ba'i gzhi la yang rlung phra mo'i thig le dkar po'i dbus su 'jug pa'i de nyid dal zhing dal bas gzhan du mi gtong zhing /oM AHhUM zhes rtag par zlos par byed do/ /de ltar na de dag kyang / de ni rtog bcas go 'phang ste/ /zhes bya ba smos te/ gang la rtog pa dang brtag par bya ba'i gzhi dang ldan pa'i phyir/lhan cig skyes pa der mi brjod/ /ces smos pa yin no/ /lug dang ser skya dag dang ni/ /zhes bya ba ni g.yas pa g.yon pa'o/ /de dbus la gnas yid bzang ma/ /zhes bya ba ni/ a ba d+hU tI ste g.yas g.yon gnyis kyi dbus na gnas pa me'i ri mo can gyi rtsa'o//de 'gog pa yis gang thob pa/ /zhes pa ni de gsum na rgyu ba'i khams rnams 'gags pa las byung ba'i bde ba tsam la mchog gi gnas su blta ste/ gang bde ba de ni rtog pas mtshams sbyar ba yin pas/ lhan cig skyes pa der mi brjod/ /ces pa yin no//dga' dang khro ba'i dbang gi sems/ /rtse gcig ces su mtshan par ni/ /zhes bya ba ni/ byis pa'i rnal 'byor pa la la dag 'di skad ces/ kye rigs kyi bu dag shes par gyis shig /gang du chags pa'i sems skyes pa der ni 'dod chags rdo rje shes par byas la/ gzhan yang gang du zhe sdang rdo rje zhes bya bar sems rtse gcig par gnas par bya'o/ /zhes brjod cing de lta bu'i sems kyi gnas skabs la/ byis pa rnams kyis lhan cig skyes pa'i ye shes su rtog par byed de/ de rnams kyis lhan cig skyes pa'i rang bzhin log par rtog par byed pa de bas na/lhan cig skyes pa der mi brjod/ /ces pa yin no/ /kun du gnas su 'khyil pa la/ /zhes bya ba ni/ gnas gang na gang zhig gi rtsa dang phrad na/ g.ya' zhing bde bar gyur pa'o/ /rlung 'gog pa yis zhes pa ni//rtsa ba de dag phrad pa'i sbyor ba ste rlung 'gog par byed pa'o/ /'bar ba zhes pa ni sbyor ba de dag ma lus pas kyang me'i tshul can gyi drod skyed par byed la/ drod kyi dbang gis lus can rnams kyi khu ba 'byung bar byed do/ /gzhan yang de'i sbyor ba ni 'di lta ste/ zum pa'am ni rgyas pa ste//zhes bya ba ni gser gling zhes bya ba'i gnas kyi sgo 'byed pa dang / bcad pa'i sbyor bas kyang rtsa gang zhig phrad par byed de/ gang yang sbyor ba de dag thams cad ni 'jig rten pa'i spyod pa nyid yin pas/ lhan cig skyes pa der mi brjod/ /ces bya ba smos so//'dar dang brgyal dang de bzhin nyid/ /ces bya ba ni yi dags la sogs pa 'bebs par byed pa'i sbyor bas/ kha cig 'dar zhing sprug par byed pa dang / kha cig brgyal bar 'gyur ba dang / kha cig bdag la ni rnal 'byor ma rnams dang mkha' 'gro ma'i tshogs rnams kyis byin gyis brlabs shing /chos kyang 'chad la 'gro ba gzhan gyis rtogs par ma gyur pa'i zab mo'i ting nge 'dzin yang ston to zhes brjod pa dang / kha cig rdo rje'i glu lha'i skad ltar 'gro ba'i yid 'phrog pa len cing / rdo rje'i glu de nyid don dang ldan par 'khor gyi tshogs la ston pa dang /'byed dang 'dzums pa la sogs dang / /zhes bya ba ni/ kho bo ni mig 'dzums pas lha la sogs pa'i tshogs mthong ngo zhes zer ba dang / kha cig nam mkha' lta bar byed cing / kho bos tshangs pa dang / sred med kyi bu la sogs pa mthong ngo zhes zer ba dang /kha cig lus la sogs pa las 'bar bar ston pa dang / kha cig las sgra skad drag pos srog chags rnams skrag par byed pa 'byung ba dang / kha cig rang gi lus mi bzad pa chen po ste/ mi sdug pa'i cha byad du ston pa dag yod de/ gang de dag thams cad ni sha za dang grong gi lha mo la sogs pas byin gyis brlabs pa yin pas sangs rgyas rnams kyi lhan cig skyes par mi 'gyur te/de bas/ lhan cig skyes pa der mi brjod/ /ces bya ba smos so/ /bum pa bzhin du khong stong du/ /zhes bya ba ni skyes bu la la ni bdag gi lus bum pa ltar nang stong la phyi'i sha'i dra bas g.yogs pa ltar lta ba dang /la las bde ba chen po'i rang bzhin gyis lus sun 'don te 'di skad ces/ gsod ldan ngal skyen phol mig ldan/ /rgyun lam dgu nas rtag tu ni/ /mi gtsang rab tu 'dzag par byed/ / gal te bdag gis khyod mthong na/ /dbyar dus phyi sas bslad pa bzhin/ /thag ring rnam par 'dor bar bgyid/ /ces brjod cing mi gtsang ba'i rang bzhin du rtogs te/ gang yang des ni gsang sngags kyi theg pa'i rim pa spangs pa yin no/ /yang na stong par smra ba'i blo/ / zhes bya ba ni rgyu dang 'bras bu la skur pa 'debs pa'am/ nyams su myong ba'i dngos po la sogs pa 'di dag 'gog pa ste/ de ni chad par smra ba yin pas/ lhan cig skyes pa der mi brjod/ /ces smos so/ /dngos po gang zhig de dag kun/ /ces bya ba ni gong du brjod pa'i rtog pa'i rnal 'byor rnams so//rtog pa'i ye shes las skyes brjod/ /ces bya ba ni rtog pa'i rang bzhin yin zhes bya ba'i don to/ /bsgom pa'i stobs kyi sems kyis ni/ /de yis thams cad rdzogs par 'gyur/ /zhes bya ba gang zhig rtog pa'i rnal 'byor pa de thams cad ji ltar rtag par mthong bar 'gyur te ji skad du/sa bon gang dang gang las ni/ /'bras bu de dang de 'dra 'byung / /zhes pa dang gzhan yang / 'dod dang mya ngan blo dang mtshungs/ /zhes bya ba la sogs pa rgya cher brjod la/ kun rdzob kyi dngos po thams cad de dang de'i rnam par mi slu zhes bya ba'i don to//thub pas sngon du gang gsungs pa/ /zhes pa nas/ spyi blugs dpung mgor thogs pa ste/ /zhes bya ba yan chad ni rtogs par sla ste grags pa nyid yin pas 'dir gzhung mang ba'i 'jigs pas ma bkrol lo//de ltar sna tshogs rnam pa ni/ /bsgoms pa'i stobs kyis mthong bar 'gyur/ /zhes bya ba ni/ rtog pa'i rnal 'byor pa gang dag goms pas de dag mngon du gyur pa'i dpe rgyas par bstan pa yin no/ /'dir ni bden min mthong bas na//zhes bya ba ni sangs rgyas thams cad kyi yul la 'jug pa rnam pa'i lam zhes bya ba mthong ba med la/ bden pa ma yin par brtags pa'i yul rnams mthong bas/ lhan cig skyes pa mthong ba med/ /ces pa'i don de yin no/ /de bzhin du yang zhes pa ni gzhan yang zhes bya ba'i don to//don gzhan yang 'di lta ste zhes bya ba'i don/ gang zhig mthong ba de bden min/ /zhes pa bdag las gzhan pa'i dngos po gang zhig phywa'am dbang phyug gam byed pa po la sogs par lta ba dang rtog pa rnams ni bden pa ma yin te/ bdag las gzhan pa'i dngos po yod pa ma yin no//gang ma mthong ba de bden te/ /zhes bya ba'i don to/ /gang zhig mthong ba med pa'i tshul du gang mthong ba mthong ba zhes su tha snyad gdags so/ /de las gzhan du dngos por rtog pa ste bdag dang bdag gi zhes bya ba la sogs par gang rtog na/de ni de kho na lta ba'i skabs la dmus long chen po zhes ston to/ /ci'i phyir na/ rab rib la sogs gnod pa bzhin/ /zhes bya ba smos te dper na mig ser la sogs mig la gnod pa'i nad kyis skyes bu 'ga' zhig bzung na/ dngos po thams cad ser por mthong ba'am/nam mkha' la skra shad 'dzings pa la sogs par mthong ba ltar/ dngos por rtog pa rnams kyang de ltar blta bar bya'o/ /skye 'gro thams cad bden pa'i tshul/ /zhes bya ba ni lhan cig skyes pa'i tshul dang rang bzhin du gnas pa'i don to/ /gzung dang 'dzin pa spangs pa nyid//lhan cig skyes bya'i go 'phang gnas/ /gang gis mthong ba de yis mthong / /zhes bya ba ni 'di ltar gnas pa 'di dag gzod ma nas rang bzhin gyis rnam par dag pa/ skye ba dang gnas pa dang 'jig pas dben par skyes bu gang gis mthong ba'am/ rig pa des lhan cig skyes pa mthong ba'o zhes bya ba'i don to//dngos dang dngos med go 'phang gnas/ /zhes bya ba 'di ni dngos po ste dor ba yin la/ 'di ni dngos po med pa ste/ blang bar bya'o zhes bya ba'i 'du shes thams cad dang bral ba'i gnas la gnas pa'o zhes bya ba'i don to//gzhan yang / rtog dang brtags pa min las grol/ /zhes bya ste mi rtag pa'i dbyings chen po la gnas pa'i phyir ro/ /lhan cig skyes pa'i rang bzhin ni dngos po kun la rang bzhin du yod de/ 'on kyang rdo ba dang shing dag la me gnas kyang ma gtsubs na mngon du mi 'gyur ba ltar lhan cig skyes pa yang gsal ba ma byas zhes bya ba de ltar gnas kyang /skye bo kun gyis mthong ba'i skal ba las 'das zhes bya ba'i don to/ /de ltar brjod pa'i rim pas lhan cig skyes kyang / rdo dang shing dag gtsubs pa la ltos nas gdod me 'byung ba ltar/bla ma rje btsun gyi zhal las rtogs par bya zhes bya ste/ lhan cig skyes par sngon du brjod/ /ces bya ba la lhan cig skyes pa'i rang bzhin sngon du bstan pa rnams rje btsun gyi zhal snga nas rtogs par bya ba'i don to/ /byis pa'i brjod pa dag dang bral/ /brjod bya rjod byed spangs pa nyid//lhan cig skyes pa de lta bur/ /bla ma mchog gis sngon du gsungs/ /zhes bya ba ni/ bla ma rnams kyis ci zhig ston zhe na/ byis pa rnams kyis kun nas rtogs pa'i rang gi ngo bo dang bral ba/ brjod bya dang rjod byed kyi kun du stong pa kho na bstan par bya ba yin la/sngon rabs kyi bla ma rje btsun rnams kyis kyang de kho na dang du bzhes pa yin no zhes bya ba'o/ /de la slob ma rnams kyis kyang ji lta ba'i tshul bslab par bya zhes bya ba'i don to/ /de yang ji skad du/ btsal bas rnyed pa ma yin la/ /ma btsal pas kyang rnyed mi 'gyur//chu zla bzhin du rtogs dka' ba/ /de 'di lhan cig skyes par brjod/ /ces gsungs pa'i tshul du bslab par bya'o/ /dpal ldan rol pa'i lha mo'i drin gyis ni/ /de bzhin dpal ldan bla ma dag dang ni/ /zhes bya ba ni gong du bstan pa'i bla ma gcig nas gcig tu brgyud de rtogs par byas zhes bya ba yin la/sa bdag dbang po blo'i bdag po dpal bde ba chen po'i rdo rje zhes bya bas kyang sring mo rnal 'byor gyi dbang phyug ma dpal mo yongs su mnyes pa las lhan cig skyes pa rin po che'i man ngag zhal nas 'phros pa tsam gyis lhan gcig gis ni bde ba chen po mkhyen zhes bya ba/rje btsun mas gsungs pa tsam gyis rtogs shing / khong du chud pa zhes bya ba'i don to/ /the tshom med cing rtog pa med/ /rang rang ngo bo ston pa po/ /bdag gis yang dag nyams su myong / zhes pa ni dbang po'i blo bdag gis lhan cig skyes pa'i rang bzhin dngos po thams cad kyi ngo bo ston par byed pa nyams su myong ba ni/ dper na/ mun pa la ni sgron ma bzhin/ /zhes bya ba ste mun rum smag tu gyur pa la zas kyi bya ba byed bde ba ma yin pa la sgron mas gsal bar byas pas bde zhing tshim pa ltar/bdag kyang bde ba chen po'i rang bzhin gyis tshim zhes bya'o/ /za ba'am ni 'khrig na yang / /gnas skabs kun la thams cad du/ /gsang ba med cing 'jigs pa spangs/ /zhes bya ba ni ting nge 'dzin chen po 'di la gnas pa rnams ni bza' ba dang 'khrig pa dang /btsun mo'i 'khor gyi nang dang rgyal po'i pho brang 'khor na 'dug kyang kun nas 'ching ba med de/ gzhan yang ting nge 'dzin 'di la gnas pa'i rnal 'byor pa la ni rgyal po dang chom po la sogs pas brtse ba'i 'jigs pa las bsrung ba dang /gsang ba dang / sba ba mi dgos te/ bdag nyid kun gyi mnga' bdag chen po yin pa'i phyir ro/ /ye shes chen po rang gis rig /ces bya ba ni/ rang la yod pa'i ye shes chen po rang gis rig ste/ sangs rgyas thams cad kyi ye shes rgya mtsho yang yin zhes bya ba'i don to//gang zhig 'di la rjes dran par/ /yang dang yang du dran byed pa/ /de ni dngos grub rgyas 'gyur te/ /srid pa'i mtsho las sangs rgyas bzhin/ /zhes bya ba ni/ lhan cig skyes pa'i gnas 'di la dran cing mos pa byed pas kyang /mchog gi go 'phang thob par 'gyur na tshul bzhin yid la byed pa rnams lta smos kyang ci dgos zhes bya'o/ /bdag nyid kyis ni dran don du/ /bdag gi 'di ni brjod pa yin/ /zhes bya ba ni lhan cig skyes pa'i de kho na nyid 'di gzhan la bstan kyang rtogs pa'i skal ba med de de bas na bdag nyid dbang po'i blos slar zhing dran pa'i don du brtsams la/gzhan dag skal ba dang ldan pa rnams kyang bkag pa ni med do zhes bya ba'i don to/ /gang zhig snying rjes bcings pa yi/ /zhes bya ba ni bla ma rje btsun gong na bzhugs pa rnams kyis gzhung gi skyon gyi dri ma bcom pa dang bsal bar gsol zhes bya ba'i don to//bdag la gzod mdzod sems dpa' che/ /zhes bya ba ni gal te gzhung gi don la 'khrul pa na yang dam tshig dam pas bdag la mi gus par mi mdzad pa'i rigs zhes bya ba'i don to//gang zhig cung zad 'di brjod pas/ /zhes bya ba ni lhan cig skyes pa'i gzhung gi tshogs zur cung zad brjod pas zhes bya'o/ /de yis bsod nams gang gyur pa/ /zhes bya ba ni lhan cig skyes pa'i gzhung brtsams pa'i bsod nams zhes sbyar ro//bsod nams des zhes bya ba ni/ /de las byung bas zhes bya'o/ /sems can rnams zhes bya ba ni/ /nam mkha'i mthas khyab pa'i sems can rnams so/ /lhan cig skyes grub thob par shog /ces bya ba ni bsod nams de'i shugs kyis ni/ nam mkha'i mtha' ji tsam du khyab pa de tsam du 'gyur ba med pa'i lhan cig skyes pa phyin ci ma log pa nam mkha' mdzod kyi gter zhes bya ba thob par shog cig ces bya ba'i don to//lhan cig skyes pa grub pa yi/ /gzhung 'grel brtsams pa'i dge tshogs kyis/ /skye bo dpal mo bdag bzhin du//lhan cig skyes la gnas par shog /dpal u rgyan gyi yul du sku 'khrungs pa'i rgyal po in+d+ra bud+d+hi/ zhes bya bas mdzad pa'i lhan cig skyes pa grub pa'i gzhung 'grel lha lcam rje btsun ma dpal mos mdzad pa rdzogs so// //rgya gar gyi mkhan po chen po ma nA bi ha ra la dang /