CLOSE WINDOW

D2259
བོད་ཡིག

/ //rgya gar gyi mkhan po rgyal ba'i lha dang / rgya lo tsA bas bsgyur pa'o/ /[ ]@##/ /rgya gar skad du/ mu drA tsa tur TI kA rat+na hr-i da ya nA ma/ bod skad du/ phyag rgya bzhi'i rgya cher 'grel pa rin po che'i snying po zhes bya ba/ bcom ldan 'das smra ba'i skyes mchog 'jam pa'i dbyangs la phyag 'tshal lo//chos dbyings ye shes rtogs par dka' ba 'byung ba lnga rang bzhin/ /rdo rje snying po'i snying po ye shes snying gi pad+ma dag /mchog gi byin rlabs dkyil 'khor dam pa 'di nyid gtsor gyur pa/ /bla ma dam pa dag las snying po len pa'i gzhi yin phyir na legs btud de//e baM ma ya'i bdag nyid las dang chos dang phyag rgya che dang dam tshig dang / /gnyis med sbyor bas bdag don gzhan dang nges par phun tshogs pa/ /slob dpon blo bzangs lta bu la ni bdag gis legs par bshad par bya//'di ni ku mu ta'i phreng ba lta bur rigs dang ldan par mnyam par rigs/ /'dod chags zhe sdang gti mug dang / /nga rgyal phrag dog skyon bcas pas/ /bdag ni mi shes blun gyur te/ /nges 'byed sbyangs par mi rigs kyang / /bla ma dam pa'i bkas bskul dang / / lnga yi rtogs pa lnga skyes phyir/ /rgyud rgyal dag dang rje btsun las/ /mthong ba'i don 'di bdag gis bri/ /'di la nyes 'khrul ji snyed pa/ /rje btsun mchog dang dpa' bo'i tshogs/ /bdag byin rlob pa'i rnal 'byor mas/ /bzod pa chen po mdzad par 'os/ /de la bcom ldan 'das de bzhin gshegs pa gnyis su med par sbyor ba he ru ka/sku dang gsung dang thugs gsang ba zad mi shes pa'i ye shes mnga' bdag gis/ /rgyu smin par byed pa'i thabs las 'bras bu phyag rgya chen po'i dngos grub gdod ma nas gnas pa dag nges par bstan te/ de yang rgyu'i rgyud ni sgrub pa po rten gyi gang zag /skal ba rab kyi yang rab dang / /rab dang 'bring dang tha ma dag la go rims su bab pa'i gdams ngag/ bya ba'i rgyud dang / spyod pa'i rgyud dang / rnal 'byor gyi rgyud dang / rnal 'byor bla na med pa dang / gong na med pa'i rgyud dag la legs par sbyangs pas/'bras bu sku bzhi dbyer med pa dag 'chad par 'gyur ro/ /de yang / bskyed pa yi ni rim dag dang / /rdzogs pa ya ni rim pa gnyis/ /rim pa gnyis la brten nas ni/ /rdo rje 'chang gis chos bshad pa'o/ /zhes gsungs pa'i phyir ro//bskyed pa'i rim pa la phyi bskyed pa'i rim pa dang / nang bskyed pa'i rim pa'o/ /rdzogs pa'i rim pa la/ rdzogs pa'i rim pa dang / yongs su rdzogs pa'i rim pa dang / ngo bo nyid kyi rdzogs pa'i rim pa'o/ /de dag kyang sgyu ma lta bu dang / sems la dmigs pa dang /rdo rje'i bzlas pa dang / 'od gsal dang zung du 'jug pa'i bdag nyid du shes par byas la/ e baM ma ya'i mtshan nyid can gyis/ /las kyi phyag rgya dang / chos kyi phyag rgya dang / phyag rgya chen po dang / dam tshig gi phyag rgya rnams kyi bdag gi don dang gzhan gyi don phun sum tshogs par bya'o//de ltar rtogs pa dang ldan pa dag gis thun mong gi don khong du chud par bya ba ste/ de yang brjod par bya ba dang / ngo bo dang mtshan nyid dang / skabs su bab ba'i tshig gis brgyan par bya'o/ /de la brjod par bya ba ni dbang ste/ gsung rab las bum pa'i dbang ni dang po la//gnyis pa gsang ba'i dbang yin te/ /gsum pa shes rab ye shes so/ /de ltar de bzhin bzhi pa yang / /zhes gsungs pa'i phyir/ dbang gi don gyi gtso bo ni lhan cig skyes pa ste/ de yang / sangs rgyas kun gyi sdom pa ni/ /e baM la ni rab tu bzhugs//zhes pas so/ /de yang dper na nor bu thams cad kyi mchog tu gyur pa ni/ /yid bzhin gyi nor bu rin po che sra brtan 'bar ba yin pa bzhin du/ lhan cig skyes pa yang de bzhin no/ /de bas na gsung rab las/ lhan cig skyes dga'i rang bzhin ni/ / mchog mtha' dga' bral dang po can/ /mun pa la ni mar me bzhin/ /de bzhin bus kyang yid ches kyis/ /zhes gsungs pa'i phyir ro/ /ngo bo ni thabs dang shes rab ste/ de yang gsung rab las/ nyams su myong dang rang bzhin med/ /phan tshun res kyi rgyas btab la/ / gnyis la mi gnas thabs shes rab/ /he ru ka yi ngo bo yin/ /zhes gsungs pa'i phyir/ thabs dang bral ba'i shes rab kyang chad pa'i mtha' dang bcas pa'o/ /shes rab dang bral ba'i thabs kyang rtag pa'i mtha' dang bcas pa'o/ /zung du 'jug pa na dbyer mi phyed pa ste/dpa' bo dang / dpa' mo dang / pad+ma dang / rdo rje dang / rgyu dang / 'bras bu dang / mi bskyod pa dang / rdo rje 'chang dang / nyams su myong ba dang / rang bzhin med pa dang / bskyed pa dang / rdzogs pa dang / 'khor ba dang / mya ngan las 'das pa dang / dngos po dang / stong pa dang / e dang / baM dang / a dang / hUM dang / nyi ma dang / zla dang / A li dang / kA li dang / kun rdzob dang / don dam pa'i sgras/ thabs dang / shes rab la rab tu sbyar bar bya'o/ /de yang 'jam dpal sgyu 'phrul dra ba las/ shes rab kyis ni 'khor ba min/ /snying rjes mya ngan 'das mi gnas//mtha' gnyis rnam par don nas kyang / /zung 'jug mi gnas pa nyid do/ /zhes gsungs pas kyang ngo / /mtshan nyid ni snang ba dang stong pa ste/ stong par rtog pa'i mtshan nyid du snang ba 'byung la/ snang ba shar ba'i mtshan nyid du stong pa byung ste/ de bas na snang ba gsum rab tu gyur par shes par bya'o/ /de yang gsung rab las/ snang ba stong pa lhag 'gyur te/ /stong pa nyid kyis snang ba lhag /lhag pa stong pa nyid kyi phyir/ /snang stong bcom ldan 'das su bshad/ /ces gsungs so/ /gzhan yang stong par rtogs pa skyes pa'i bla mar gyur pa ni shes bya sna tshogs su shar ba 'di dag ste/sna tshogs ro gcig tu rtogs par byed pa'i bla ma ni stong pa nyid de/ de bas na snang stong slob dpon du gyur par shes par bya'o/ /de yang gsung rab las/ rnal 'byor pa yis bla ma btsa' mi ba//shes dang shes bya bla ma mchog gyur nyid/ /rtogs pa gnyis don phyir na dam pa ste/ /'di bas mchog 'gyur bla ma gzhan ma mchis/ /zhes gsungs pas so/ /gzhan yang snang ba'i tshe na ni nyams su myong ba la/ /myong ba'i dus na skye ba med pa ste/de bas na snang ba sna tshogs pa 'di dngos su grub pa ma yin te/ gcig dang du mas dpyad na rang bzhin med pa nyid do/ /gtan med pa ri bong gi rwa lta bu ni ma yin te/ snang ba stong par 'grub pa'i rigs pa yod la/ snang ba stong par bsgrub pa'i rigs pa dang bral ba'i phyir/stong pa de las snang ste/ de bas na snang ba'i tshe nyams su myong la/ myong ba de nyid rkyen las skyes pa'i phyir skye ba med pa ste/ de yang 'phags pa zla ba sgron ma'i mdo las/ gang zhig rkyen las skyes pa de ma skyes/ /de la skye ba'i rang bzhin yod ma yin//rkyen las skyes pa gang de stong pa ste/ /gang gis stong nyid shes de bag yod yin/ /zhes gsungs pas so/ /de'i phyir nyams su myong ba ni/ /bde bar nyams su myong ba dang / /stong par nyams su myong ba dang / gnyis med du myong ba las mi 'da' ste/ de yang dbu ma spyan ras gzigs brtul zhugs las/gang de nyams su myong ba ni/ /'gag de nus pa ma yin no/ /zhes gsungs pas so/ /de bas na snang stong gis nyams myong skyed pa'i phyir gdams ngag tu shes par bya'o/ /de dag la gzhan dag ni/ /thabs kyi rgyud sde rnam pa lnga mi dgos par 'gyur ba dang /brgyud pa dang ldan pa'i bla ma bsten pa la don med par 'gyur ba dang / rdo rje lu gu rgyud za ma tog zad mi shes pa dag la btsal mi dgos so snyam pa la/ de ltar ma yin te/ 'di dag ni chos kyi phyag rgya'i lam rtogs pa dang ldan pa'i gang zag gi dbang du byas pa'o//de bas na gsung rab las/ khrus dang gtsang sbra 'dir mi dgos/ /dka' thub dka' spyad 'dir mi dgos/ /sangs rgyas rnams dang sems dpa' cher/ /rtag tu sbyor bas 'grub par 'gyur/ /gzhan du na las dang po pa rnams kyis ni/ /de bzhin gshegs pa'i rgyud dag las 'byung ba'i tshul gyis bla ma dam pa bsten te/de'i zhal gyi bdud rtsis rab tu brlan par bya'o/ /skabs su bab pa'i tshig ni e dang baM ste/ de yang phyag rgya bzhi'i go rims kyis/ /pad+ma dang / rdo rje dang / sgra spyi dang / don spyi dang / bde ba dang / stong pa dang / yul dang yul can gyi khyad par gyis/ /dbyibs dang sgra dang / don dang mtshon pa'i dbye ba las bzhi blang bar bya'o/ /de yang gsung rab las/ rdo rje gdan la snyoms par zhugs nas ni/ /byang chub sems kyi snying po de rtogs byas/ /zhes gsungs pa'i phyir mtshan nyid dang ldan pa'i rig ma dang /snang ba dang / sems dang snying rje dang bcas pa'i smon lam ste 'di dag ni gdan no/ /bye brag gi don ni/ las kyi phyag rgya lus la ste/ chos kyi phyag rgya ngag las so/ /phyag rgya chen po yid kyis te/ /dam tshig phyag rgya kun du 'gro/ /zhes pa'i phyir gsang sngags kyi theg pa rnams ni/bla ma sngon du song ba la/ dngos grub rnam pa gnyis 'byung ba yin pas/ bla ma gtsor gyur pa yin pa'i phyir/ ngag sngon du 'gro dgos pas chos kyi phyag rgya gtan la dbab par rigs so/ /de dag gis ni 'bras bu dang las kyi phyag rgya gnyis ka la rnyed par nus so//de la brjod par bya ba dang / skabs su bab pa'i tshig dang / ngo bo dang / mtshan nyid dang / phan yon du shes par bya'o/ /brjod par bya ba ni/ sgra yi rang bzhin bla ma'i gdams ngag ste/ /de yang rang gi tshig dang tshad ma dang / gang zhig lung dang mi 'gal ba//de don spyod dang mthun pa ni/ /bla ma'i gdams ngag yin par gsungs/ /zhes bya bas/ chos thams cad rkyen gzhan las skyes pa dang / de nyid kyi ngo bo ma skyes pa dang / tha mi dad par rtogs par bya'o/ /skabs su bab pa'i tshig ni e dang baM ste/ / bcom ldan 'das la lha'i dbang bos zhus pa'i mdo las/ chos kyi phung po brgyad khri dang / /bzhi stong dag gi grangs snyed kyi/ /kun gyi gzhi dang pha ma ni/ /yi ge gnyis ni yang dag bstan/ /zhes bya bas/ /bcom ldan 'das kyis gsung rab rnams kyi gleng gzhi'i tshig gam don mdor bsdus pa ni de nyid do//ngo bo ni snang ba dang stong pa ste/ de yang de nyid las/ yi ge e ni mar gyur la/ /baM ni pha zhes bya bar grags/ /thig le de gnyis sbyor ba ste/ /sbyor de shin tu rmad byung ba'o/ /zhes bya ba'i gnyis su med par sbyor ba'o/ /gang la gnyis kyi 'du shes med par sbyor ba ni lhan cig skyes pa'i ye shes so//mtshan nyid ni brjod par bya ba dang / brjod par byed pa ste/ de yang e stong pa'i ngo bor brjod par bya ba yin la/ baM bde ba'i ngo bor brjod par byed pa'o/ /de yang bla ma'i gdams ngag sgra spyi'i rnam pa ni rjod byed du shes par bya ste/des bstan pa'i rtogs pa bde stong don spyi'i rnam pa ni/ brjod byar rtogs par bya'o/ /de dag la byang chub sgrub pa'i thabs yod dam zhe na/ de yang / dang po sgra dang don gyi e baM las/ /skad cig ma bzhi rim gyis 'byung ba la/ /de las dga' ba bzhi skyes pa'i nyon mongs pa bag chags dang bcas pa spong ste/'bras bu phyag rgya chen po rang chas su 'char ba ni don che ba'o/ /de dag las smon lam dang snying rje'i stobs kyis/ gzugs sku rnam pa gnyis sems can gyi snang ba las 'byung ba ni phan yon che ba ste/ de yang /chos kyi phyag rgya'i yi ge gnyis/ /de nyid shes pa gang gis shas/ /des ni sems can thams cad la/ /chos kyi 'khor lo bskor bar 'gyur/ /zhes pa'o/ /de lta bu'i chos kyi phyag rgya la 'jug pa'i nus pa med pa dag gi gang zag gis las kyi phyag rgya la 'jug par bya ste/de yang dpe'i ye shes su rigs pa dang chos kyi 'byung gnas su rigs pa dang / btsan thabs kyi rnal 'byor sun phyung la yang dag gi dbang dper bzhag pa dang / 'phel bar byed pa 'brel pa'i tshul gyis nyams su blang ba'o/ /de la yang chos kyi phyag rgya la skad cig bzhi dang dga' ba bzhi ji ltar yod pa bzhin/las kyi phyag rgya la yang yod pa'i phyir dang / 'dra ba'i phyir na dngos po ma yin te/ mtshon bya mtshon par nus la mtshon byed nyams su myong ba'i phyir dang / thabs kyis ma zin na 'khor ba 'byung la/thabs kyis zin na mya ngan las 'das pa 'byung ba ni/ e ni pad+ma nyid 'gyur la/ /baM ni rdo rjer bshad pa ste/ /thig le de ni sa bon yin/ /de las 'gro ba rnam gsum ste/ /zhes bya ba dang / e yi cha byad bzang po la/ /dbus su baM gyis rnam par brgyan// // zhes bya ba la sogs pa bstan pa'i phyir dang / drag po'i dbang bskur ni rtog pa dang go rims gnyis la 'khrul la/ dbang bskur ngan pa ni rtog pa la 'khrul pa nyid kyi phyir dang / yang dag gi dbang bskur ni/ rtog pa dang go rims la ma 'khrul pa'i phyir dang / de la yang dbyibs kyi e baM pad+ma dang rdo rje snyoms pa dang /skad cig ma'i bye brag gis nyon mongs pa bag chags dang bcas pa rim gyis spangs pa la/ mtshon byed nyams su myong la mtshon bya mtshon par nus pa'i phyir ro/ /de lta bu'i las kyi phyag rgya la rjes su 'jug par mi nus pa rnams ni dam tshig gi phyag rgya la 'jug par bya ste/de yang sbyor ba rnam pa gsum dang / skye ba bzhi'i tshul dang / rnal 'byor rnam pa bzhi dang / sgrub pa po'i dbang du dran pa gcig gis rdzogs pa dang / cho ga gsum dang / lngas skyes pa ni/ kun du brtags bdag par byed pa'i gzhan dbang gi blos sbyong bar byed pa nyid do//de yang dam tshig gi phyag rgya'i lhan cig skyes pa ni/ thabs dang shes rab kyi nyi zla kha sbyar ba'i dbus na/ bde ba dang stong pa'i ngo bo can gyi thig le gnyis gnas pa ni/ kha dog dang dbyibs su grub kyang /rang gi mtshan nyid nyams su myong ba dag la/ shes rab ye shes bstan par bya'o/ /des dpe nyams su myong yang don gyi spyi'i rnam par rtog pa dang bral zhing nyams su ma myong ba dag la skyes pa dang ma skyes pa dang tha mi dad par bstan par bya'o/ /de nyid la goms na don rang gi mtshan nyid du 'gyur ro//de dag gis thun mong gi don mdor bsdus te bstan pa'o/ /de ltar thun mong gi don de dang ldan pa rnams ni/ pha rol tu phyin pa'i theg pa chen po las khyad par du 'phags pa ste/ de yang sgron ma gsal ba'i rgyud las/ don gcig na yang ma rmongs dang //thabs mang dka' ba med pa dag /dbang po rnon pos dbang byas kyang / /sngags kyi theg pa khyad par 'phags/ /zhes gsungs pa'i phyir/ don rab tu mi gnas pa'i dbu ma'i gnas lugs dang / phyag rgya chen po'i gnas lugs la/ dgag sgrub dang bral ba'i phyir gcig gis kyang bsgrub pa'i dus kyi gang zag gi lam la khyad par yod do/ /dbu ma ni lung dang rigs pas gtan la phab pa ste/ rmongs pa yin la 'di dag ni gdams ngag gis khyad par du byas pa'i phyir ma rmongs pa ste/de yang gsung rab las/ brgyud pa byin rlabs cher ldan zhing / /dbang gi man ngag dang bcas pa/ /brda yis go bar byas pa nyid do/ /mtshan nyid myong phyir ma rmongs pa'o/ /zhes bya bas kyang ngo / /pha rol tu phyin pa'i theg pa ni/ tshogs gnyis kyi rang bzhin/ sbyin pa dang / tshul khrims dang / bzod pa dang / brtson 'grus dang / bsam gtan dang / shes rab thabs su gyur pa yin la/ 'di ni dam tshig gi phyag rgyas kun brtags la rgyas 'debs par byed pa dang / las kyi phyag rgyas nyon mongs pa lam du slong bar byed pa dang / / chos kyi phyag rgyas rtog pa ye shes su 'bar bar byed pa'i lam rnams thabs su 'gyur ba'o/ /pha rol tu phyin pa ni dka' ba dang bcas pa ste/ spang bya'i nyon mongs pa spong bar 'dod la/ spong byed kyi gnyen po bsten par 'dod pas gzhi spong ba'i lam ste/ bskal bgrangs med pa gsum gyi 'tshang rgyas par gsungs so//'dir ni dbang gi rab tu byed pas mngon par zhen pa dang bcas pa'i blo'i bdag nyid spongs te/ gnyis med kyi ye shes ci yang ma yin nyid rtogs pas 'tshang rgya ba'i phyir dka' med pa'o/ /pha rol tu phyin pa'i theg pa la ni/dbang po 'bring dang bcas thams kyang 'jug par nus la/ 'dir ni dbang po rab 'ba' zhig gi spyod yul yin gyi spyod pa ma yin pas khyad par du gyur pas te/ de dag gis ni thun mong ma yin pa'i don brjod pa'o/ /da ni tshig gi don bshad par bya ste/ dang por rje btsun pa nyid la ya rabs kyi tshul dang mthun par bya ba'i phyir/ bkra shis par bya ba dang / gzhung bsdu ba dag la bar du gcod pa nye bar zhi ba'i don du/ bya ba la 'jug pa'i sngon rol du yul rang gi 'dong ba'i lha la mchod pa brjod pa ni/ rnam dag ye shes de rang bzhin//rdo rje sems la phyag 'tshal te/ /zhes bya ba ni/ de yang dang por don gyi rang bzhin la mchod par brjod pa dang / de'i tshig gi don gsal bar bya ba'o/ /de la chos kyi sku ni rnam par dag pa'i ye shes te/ yod pa dang med pa dang / gnyis dang gnyis ma yin pa'i mtha' las 'das pa/dri ma dang bral ba'i cha/ sgro skur gyis dben pa/ shes shing brjod pa'i yul las 'das pa blos yul du ma byas pa ste/ phyag rgya chen po'o/ /de la longs spyod rdzogs pa dang sprul pa'i skur snang ba ni/ sems can gyi blos bzhag pa la/ gnyug mas bsdus pas dbyer mi phyed pa'i phyir/ngo bo nyid kyi sku de'i rang bzhin no/ /de yang bed ba stong pa dbyer mi phyed pa'i bde ba chen po ste/ rdo rje sems dpa'o/ /yang na rdo rje sems dpa' ni stong pa nyid mtshon pa yin la/ sems dpas ni snying rje mtshon pa dang bcas pa'i bde ba bstan par shes par bya'o//de yang gsung rab las/ sra zhing brtan la mkhregs pa ste/ /gcad med gzhig tu med mtshan nyid/ /sreg tu med cing gzhom du med/ /stong nyid rdo rje zhes byar brjod/ /ces gsungs pas so/ /gzhan yang / stong nyid myong ba bde sems pa/ /sems dpa' de yis gzhan sems nyid//bde dang snying rje dbyer med pa/ /de ni snying po'i sems dpa'o/ /de dag la gnyis med kyi tshul du phyag 'tshal ba ni/ mchod pa thams cad kyi phul du gyur pa ste/ ji ltar chu la chu bzhag dang / /ji ltar mar la mar bzhag bzhin/ /rang rig yid kyi ye shas kyi//de rtog pa ni 'dir phyag yin/ /zhes 'byung bas so/ /tshig gi don gsal bar bya ba ni/ rnam dag ces bya ba ste/ de'i mtshan nyid rnam par gzhag pa ni/ phung po lnga rnam par dag pas/ /rigs lnga'i bdag nyid du bltas la/ /de nyid rnam par dag pas mi bskyod pa rnam par shes pa'i ngo bor mthong bar bya ste/de yang rang rig ye shes su blta ba dang / rnam pa thams cad de'i rang bzhin du shes pa dag la/ rnam par thar pa'i sgo stong pa nyid dang / mtshan ma med pa dang / smon pa med pa'i stong pa nyid kyi rdo rje las/ dmigs pa med pa'i snying rje chen po'i sems dpa' longs spyod rdzogs pa dang /sprul ba dang / bla ma rje btsun pa dpal mgon gyi tshogs su gyur pa rnams la/ thun mong dang mchog gi dngos grub nye bar rnyed ba'i don du phyag 'tshal ba'o zhes bya ba ni bya ba ma 'ongs pa la ltos pa'i tha tshig ste/bsod nams kyi mthus zhing khyad par can gyi byin rlabs kyis mi mthun pa'i phyogs bsal te/ brtson 'grus kyi stobs kyis bshad par dam bcas pa'i don to/ /de yang rgyas gdab pa'i bdag nyid kyis rnam par dag par byed pa ni dbang la rag las te/ de yang rim gyis 'jug pa'i tshul la/ bum pa'i dbang sngon du 'gro ba'i phyir/ dam tshig gi phyag rgya rgyur gnas pa sngon du bshad par bya'o/ /de la yang dbang dkyil 'khor la brten pa ste/ de yang bum pa rtog par rag pa'i gang zag gi spyod yul yin pa'i phyir/ rdul tshon gyi dkyil 'khor bsam par bya ste/ de la bsnyen pa dang / sgrub pa rnam pa gnyis so/ /bsnyen pa yang dus dang grangs dang mtshan mar shes par bya'o/ /sgrub pa la slob dpon las kyi cho ga dang slob ma 'jug pa'i cho ga'o/ /de la sa'i cho ga dang / sta gon dang /thig bri ba dang / tshon bri ba dang / dkyil 'khor byin gyis brlab pa dang / bum pa dgram pa dang / dkyil 'khor zhag gi cho ga dang / slob dpon bdag nyid 'jug pa'o/ /gzhan la ni 'jug pa dang / dbang bskur ba ste/ dang po la ni gsol ba gdab pa dang / mi gdab ba dang /khyad par gyi don dri ba dang / yon dbul ba dang / nang du 'jug pa dang / dam tshig bsgrags pa dang / mna' bsgag cing mna' chu blud pa dang / bka' bsgo ba dang / ye shes dbab pa dang / me tog dor ba dang / mthong ba dri ba dang / gdong g.yogs bkrol ba dang / rang gi rigs kyi lhar dbang bskur ba dang / lha ngo bstan pa'o/ /gnyis pa dbang bskur ba la ni/ rdo rje slob ma dang slob dpon gyi dbang bskur ba'o/ /de la chu dang cod pan dang / rdo rje dang bdag po dang / ming gi dbang rnams ni ma rig pa'i nyon mongs pa yid kyi rnam par shes pa dang /sgo lnga'i rnam par shes pa dang / nyon mongs pa can gyi yid dang / kun gzhi rnam par shes pa dang / gzung ba dang / 'dzin pa bcom nas rig pa'i ye shes me long lta bu dang / mnyam pa nyid dang / so sor rtog pa dang / bya ba nan tan dang / chos kyi dbyings kyi ye shes rtogs la/rigs lnga'i dbu rgyan du byung ba'i phyir rigs pa dang dbu rgyan du rigs la 'brel pa'i phyir bum pa'i dbang dang bsgrub pa las gzhan ma bshad pa'i phyir slob ma'i dbang du yang rigs so/ /da ni de dag gi rtog pa rnam par 'gyur ba bshad par bya ste/ de yang gsung rab las/ blugs shing dag par byas pa yis/ /rtogs dang ldan pa'i dbang du brjod/ /ces gsungs pa'i phyir/ rang gi lhag pa'i lha'i dkyil 'khor gnyis su med pa'i sbyor bas/ zhu ba'i ye shes kyi bdud rtsi'i chus/ spyi gtsug tu blugs pa tsam nyid kyis/ byin brlabs dang / ting nge 'dzin dang /sngags kyi nus pas/ sgrib pa rnam pa gnyis kyi dri ma 'khru bar byed do/ /gnyis pas ni phyag rgya chen po'i dngos grub ma thob kyi bar du gzhan don dpag bsam gyi shing lta bur byed ba dang / che ba'i yon tan nor bu rin po che lta bur 'byung ba/ dbu'i gtsug tor ltar mi mthong ba thob pa'o//gsum pa ni brdar shes par bya ste/ brda de dag gis mtshon pa'i don rtogs pa'i bya ba'o/ /de la lte ba ni chos kyi dbyings mtha' thams cad dang bral ba ste/ rgyu med pa dang / rnam rtog gi tshogs dang bral ba dang / rtag chad kyi mtha' gang la yang mi gnas pa'i brdar yi ge hUM gis mtshan pa ste/de rtogs par bya ba la ni pad+ma las 'bras bu 'byung ba bzhin/ 'khor pa'i pad+ma las phung po rnam pa lnga'i 'bras bu 'byung ba'o/ /de la rigs lngas rgyas gdab pa'i phyir rwa lnga'o/ /de la rnam par shes ba'i ngo bo mi bskyod pa'i rgyas btab pa'i phyir/rwa bzhi dbus la 'dud pa'o/ /de la rdo rje 'chang gi rgyas gdab pa'i phyir/ rwa'i rtse mo la rnam thar sgo gsum gyi bdag nyid me tog kha phye ba gsum gsum gyis mtshan pa'o/ /bzhi pa ni yi ge a las bskyed pa'i phyir chos thams cad skye ba med pa yin la/ sor bcu gnyis su gnas pa ni/ de rtogs pa'i ma rig pa la sogs pa rten 'brel bcu gnyis zad par byed pa'o/ /nang khong stong du gnas pa gsal bar ma yin te/ ngo bo stong pa nyid yin pa'i phyir ro/ /khor yug la rdo rjes bskor ba ni/ 'khor ba ji srid pa de srid la/chos kyi sku'i rgya dang bcas pa'i don to/ /pad+mas steng g.yogs pa ni de bzhin nyid rtogs na/ 'dod yon bsten kyang 'khor ba'i skyon gyis mi gos pa'i don to/ /de la nyams su myong ba'i mgrin pa dang / the tshom med pa'i bum pa dang / sgron ma brtags pa'i pad+ma dang /ye shes rnam pa lnga'i rwas brgyan pa'i don to/ /sgra 'byung ba ni rtogs pa de dang ldan pa'i sgrub pa po dag la/ dus rtag tu stong pa nyid kyi sgra dang mi 'bral ba'i don to/ /lnga pas ni go 'phang dang skal ba dang ldan pa dang / snga ma'i ming dor ba la rtogs pa gsum ste/dmigs pa dman pa dang / spyod pa'i gdung ba dang / 'bras bu'i ni smod pa dor ba'i tha tshig go/ /phyi ma ming btags pa ni dus thams cad du rigs kyi mos pa dang mi 'bral bar byas pa'i don to/ /de dag ni rdo rje slob ma'i dbang gi bshad pa'o/ /slob dpon gyi dbang bskur ba la ni/dam tshig gsum dang / snod du bya ba dang / rjes su gnang ba dang / rdo rje brtul zhugs dang / lung bstan pa dang / gzengs bstod cing dbugs dbyung ba'o/ /de yang thugs kyi dam tshig /thugs rdo rjer byin gyis brlabs pa dang / gsung gi dam tshig dril bu gsung rdo rjer byin gyis brlabs pa g.yas g.yon du byin pa dang /sku'i dam tshig rang gi rigs kyi lha'i nga rgyal du bsgom par gnang ba byin pa'o/ /dkyil 'khor gyi de kho na nyid dang / lha'i de kho na nyid ni byang chub kyi phyogs kyi chos sum cu rtsa bdun la sogs pa dang sbyar ro/ dkyil 'khor dang sgrub pa'i thabs ni bsnyen pa dang sgrub pa'o//slob dpon gyi las ni dbang bskur ba dang / rab tu gnas pa dang / sbyin sreg la sogs pa'o/ /bdud rtsi rnam pa lnga bstan pa ni/ go rims dang spyad thabs la mkhas par bya'o/ /rjes su gnang bas ni/ gzhan ma smin pa dang / ma grol ba ni/ smin pa dang grol bar byed pa'o/ /rdo rje brtul zhugs kyis rtag tu byang chub sems dang mi 'bral bar bya'o/ /lung bstan pa dag gis phyir mi ldog pa go bar bya'o/ /gzengs bstod cing dbugs dbyung bas ni/ sngags kyi theg pa 'di dag gzhan las khyad par du ston pa 'am/go 'phang dang skal ba dang ldan zhes bya ba'i tha tshig go/ /de thams cad kyang chu dang ldan par bya ste/ gsung rab las/ sems can rnams kyi dngos grub gyur/ /dbang ni rnam pa bzhi ru brjod/ /blugs shing bkrus pa 'di yis ni//dbang zhes bya bar nges par brjod/ /ces gsungs pa'i phyir ro/ /de dag gi rtog pa yang dus rtag tu rang bzhin med pa'i nyams dang mi 'bral ba dang / chos kyi phung po brgyad khri la sogs pa shod cig pa dang / lha'i nga rgyal dang mi 'bral bar bya ba dang / brtan ba dang /g.yo ba'i zhan pa bzlog pa dang / 'bras bu lam du byed pa'i gzhan don thog ma nas grub par bya ba dang / kun du brtags pa la gzhan dbang gi rgyas gdab pa dang / mi rtog pa 'phel bar bya zhing rtog pa zhi bar bya ba dang / zhi ba dang / rgyas pa dang / dbang dang / drag po dag gi phrin las kyis sdig pa zhi ba dang / bsod nams rgyas pa dang / gzhan dbang du 'gyur ba dang / mi mthun pa tshar bcad par nus pa ste/ de gzhan don du 'gyur ro/ /dbang bskur ba'i las de dag la nus pa khyad par can 'byin par byed na ni/ 'di de sangs rgyas thams cad kyis/ /phyag na rdo rje'i lag na 'dug /khyod kyis kyang ni rtag tu bcang / /phyag na rdo rje'i brtul zhugs brten/ /zhes bya bas so/ /gzhan dag la ni 'khor ba las zhen pa dang / de ma yin pa'i sar mi ltung ba dang / /des don du 'gyur bar bya ba'o/ / gzhan ni nan tan dang bcas pas bsgrub ces bya ba'i tha tshig go/ /bdag nyid nga rgyal dang ldan pa'i phyir rdo rje sems dpa'i dbang yin pa dang / nus pa'i phyir slob dpon gyi dbang dang / 'brel ba'i phyir bum pa'i dbang dang / khyad par gyi phyir mi log pa'i dbang dang / bya ba sna tshogs la 'jug pa'i phyir 'khor los sgyur ba'i dbang zhes bya'o/ /de dag gi rgyud dam tshig phyag rgya ste/ bum pa'i dbang mdor bsdus te bstan pa'o/ /da ni brtul zhugs kyis de nyid kyi bshad par dam bca' ba ston to/ /phyag rgya bzhi rim mdor bsdus pa//bdag nyid go cha'i don du bshad/ /ces bya ba las/ phyag rgya ni 'debs pa'i don dang / mi 'da' ba'i don te/ lus ngag yid gsum la lhan cig skyes pas 'debs pa dang / chos snang zhing grags pa la skye ba med pas 'debs pa dang / nyams su myong ba la yid la mi byed pas 'debs pa dang /gzhan gyi don la smon lam dang / snying rje'i mthus 'debs pa'o/ /bde ba dang / stong pa dang / shar ba gnyis med las mi 'da' ba'o/ /bzhi ni grangs nges par bzhag pa ste/ de yang gang zag bzhi la shis shing /dbang bzhi/ dkyil 'khor bzhi la brten pa'i tshul gyis gnas bzhir bskur bas/ mi mthun pa bzhi dag cing / gdams pa bzhi dang ldan pas/ 'bras bu sku bzhir rang chas su 'char ba'i phyir ro/ /rim pa ni rim gyis 'jug pa'o/ /don ni rgyud sde rnam pa lnga'i don to//de gang zag gi lam du bsdus pa'o/ /de yang gzhan dbang po shin tu zhan zhing skal ba dang mi ldan pas mi rigs pas/ rtogs pa skye bar mi 'gyur yang / /rje btsun pa bdag nyid go bar bya ba'i don du'o/ /skal pa dang ldan pa gzhan dag bkag pa ni med de//de dag gi don du 'gyur bar bya ba'i phyir yang bshad do/ /de yang / don med ma yin brjod bya dang / /dgos med ma yin yang dgos dang / /'brel dang bcas pas bshad par bya/ /zhes bya ba'i tha tshig gis brjod par bya ba dang / dgos pa dang / dgos pa'i dgos pa dang /'brel pa'o/ /de la dang po la ni brjod bya dang rjod byed do/ /de yang sgra spyi'i rnam pa dang / don spyi'i rnam pa dang / sgra rang gi mtshan nyid dang / don rang gi mtshan nyid kyi gsang sngags kyi rgyu lam 'bras bu dang bcas pa'o/ /de yang thun mong ma yin pa'i nges shes dang /bde stong spyi'i rnam pa nyams su myong ba dang / de rang gi mtshan nyid du gyur pa las/ gzhan gyi don 'byung ba dang / 'brel ba dang / 'dris pa dang / khyad par can gyi don ston nus pa de dag med na mi 'byung ba tsam nyid kyi don to/ /de bas na/ bsgrub mi nus dang don med dang //dman pa la sogs ma yin pas/ /don dang ldan pa'i chos 'di ni/ /brtsam par yang ni rigs pa yin/ /zhes bya bas kyang ngo / /da ni gzhung nye bar bsdu bar bya ba ston te/ gzhan dag ni chos 'di dag bstan pas/ dgos pa khyad par can med do snyam pa la bstan par bya ste/'dir blun po dag ni phyag rgya bzhi go rims la 'khrul cing rmongs pa dang / shin tu rmongs pa dang / dka' ba can dag dang srid pa'i rgya mtshor shin tu sdug bsngal bar gyur cing 'khyams pa la/ bde bar phyag rgya bzhi'i don rtogs shing khong du chud par bya ba'i phyir zhes bya ba la/'dir ni khyad par gyi lam 'di dag tu'o/ /blun po dag ni mi shes shing 'og nas 'byung ba rnams so/ /phyag rgya bzhi bshad zin to/ /skad cig bzhi'i go rims la 'khrul cing / rtogs pa la rmongs pa ni/ phyi rol pa dang khyad med pa'i phyir/ drag po'i dbang bskur ro/ /shin tu rmongs pa dang zhes bya ba ni/ dbang bskur ngan pa rnams te/ go rims la ma 'khrul ba'i rjes la/ mi rigs pa'i phyir ro/ /dka' ba can dag zhes bya ba ni/ rnal 'byor spyod pa dag dang dbu ma pa ste/ bskal pa grangs med pa gsum gyis sangs rgyas zhes gsungs pa'i phyir ro//srid pa'i rgya mtshor shin tu sdug bsngal bar gyur cing zhes pa ni/ nub phyogs pa dang / kha che bye brag tu smra ba ste/ de dag ni khams gsum gyi srid brgal dka' ba'i rgya mtshor bdag tu lta ba'i nad kyis shin tu sdug bsngal bar gyur cing bde bas dben pa'o//'khyams pa la zhes bya ba ni phyi rol ba dang so so'i skye bo ste don med pa'i phyir ro/ /de lta bu dag la rgyu lhan cig skyes pa dang / lam skye ba med pa dang / 'bras bu bde ba chen po las/ 'byung ba tha mi dad pa ni/ bde bar 'byung ba'o//phyag rgya bzhi yi don rtogs nas/ /zhes bya ba ni/ las kyi phyag rgya dbang gi dus su dang / chos kyi phyag rgya don spyi'i rnam par 'char ba'i dus su dang / phyag rgya chen po don rang gi mtshan nyid ji lta bu'i dus su/ dam tshig gi phyag rgya mngon du gyur cing /smin pa'i dus su'o/ /khong du chud par bya ba'i phyir zhes bya ba ni/ dang pos bde ba khong du chud par byed do/ /gnyis pas stong pa khong du chud par byed do/ /gsum pas dbyer mi phyed pa khong du chud par byed do/ /phyir zhes bya ba ni dgos pa ste/ blun po shes rab can du bya ba'i tha tshig go/ /de la dbang po rab 'ba' zhig gi spyod yul yin zhes pa dang 'gal lo zhe na ma yin te/ blo chung byis pa lta bu la/ /ma lta bu yi bla ma yis/ /gdams ngag bcud kyis sbyang byas nas/ /bla med theg pa'i rten du 'gyur/ / zhes bya bas rten cing 'brel te/ blo sbyangs pa la yin gyi/ ma sbyangs pa la ma yin no/ /de yang rang bzo ma yin te/ tshad ma dang ldan par bya ba'i phyir/ rgyud bzang po dag gi rjes su 'brangs nas zhes bya ba ston te/ de la rgyud ni rgyun te/ de rnam pa gsum du 'gyur ba ni/ rim pa gnyis kyi mtshan nyid can te/ 'phrog tu med cing gzhan gcod par byed pa'o/ /bzang po ni pha'i rgyud gsang ba 'dus pa dang / ma'i rgyud bde ba mchog gi 'khor lo dang brtag pa sum cu rtsa gnyis pa dag gi rjes su 'brang nas mdzad pa'o/ /rgyud de de dag dang ldan yang thun mong ma yin pa'i don ston par mi 'gyur ram snyam pa la/bla na med pa'i khyad par can bstan par bya ste/ bde ba chen po'i dngos grub sgrub pa'i thabs zhes bya ba la/ bde ba chen po ni sgro skur dang bral ba ste/ don gzhan la mi ltos pa ci yang ma yin pa'i ye shes ma bcos pa'o//de yang / rang bzhin bcos ma ma yin pas/ /don gzhan la ni ji ltar ltos/ /zhes pas so/ /gal te dngos po rnams rang bzhin med pa yin na/ rnam pa sna tshogs pa'i phyir snang zhe na/ nyes pa med de so so'i skye bo ma rig pa'i rab rib kyis mig nyams par byas pas so//dngos po rnams rang bzhin med pa la/ rang bzhin sna tshogs su rtogs su zad kyis/ rnal 'byor pa ma rig pa'i dri ma dang bral ba'i blo gros kyi mig can la ni ma yin no/ /de yang gsung rab las/ e ma kun du bzang po yis//sku dang gsung thugs rdo rje can/ /skye ba med pa'i tshul gyis so/ /skye ba 'di ni rab tu bsgrags/ /zhes bya bas/ skye med sna tshogs su shar ba la/ tshu rol mthong ba'i gang zag gis/ /mdun du gsal bar snang ba tsam gyis 'jug tu zad kyi/ don la mkhas pa dag gis skye ba med pa nyid do/ /de rtogs nas de tsam du mi 'dzin pa ni bde ba chen po'o/ /dngos grub ni mchog gi dngos grub ste bcu bzhi pa'i sa'o/ /de yang 'di ltar myur du bsgrub pa ni lnga pa dang ldan pa'i thabs so/ /gal te rgyud dang gdams ngag gi do kho na nyid yod kyis kyang /brtsam pa'i tshad dang mi ldan no snyam pa dag la bshad par bya ste/ don rab dang ldan par brtsams te zhes bya ba ni/ chos thams cad de kho na nyid/ sngar ma mthong ba'i don rab mthong pa ni/ mthong ba'i lam ste stong pa nyid kyi ye shes so//de yang gsung rab las/ dngos po thams cad dang bral ba/ /phung po khams dang skye mched dang / /gzung dang 'dzin pa rnam spangs la/ /chos bdag med pa'i mnyam nyid las/ /rang sems gzod nas ma skyes pas/ /stong pa nyid kyi rang bzhin no//zhes bya ba de dang ldan pa brtsams pa ste/ rje btsun gyis 'di dag don med pa'i bstan chos su mi 'gyur ro/ /de dag la gang zag gis bsgrub par bya zhe na/ dbang po mchog gis rnyed pa'i phyir/ dam pa dang mtshungs pas shin tu bsgrub par bya'o zhes bya ba ni sngon du song ba'i mthu las grub pa ste/de yang dge ba'i bshes gnyen bsten pa dang / tshogs gnyis su bsags pa dang / gnyug ma la sbyangs pa dang / smon lam chen po btab pa dag gis bla ma la gus pa dang / gdams pa la ngas pa dang /gdams ngag nyams su myong ba dang / zab mo la mi slag pa ni dbang po mchog ste/ de dag gis bsgrub bya rnyed pa'i phyir bsgrub pa'o/ /de yang bla ma dang mi ldan na dngos grub nye bar rnyed par mi 'gyur te/ bla ma dam pa brgyud pa dang phyin byin gyi rlabs sman lta bu dang /mkhas pa rnyog pa med pa mtshungs pas shin tu bsgrub par bya'o/ /de dag gis ni dgos pa tshad ma dang bcas pa bstan pa'o/ /da ni rtog pa blta bar bya ba'i phyir mdor bstan par bya ste/ de la phyag rgya bzhi zhes bya ba ni/ las kyi phyag rgya dang / chos kyi phyag rgya dang / phyag rgya chen po dang / dam tshig gi phyag rgya'o zhes bya ba las/ las ni bde ba ste/ phyag rgya ni dus kyi sna rtse tshad du 'dzin pa'o/ /chos ni phung po la sogs pa skye med du rtog pa ste/ phyag rgya ni bla ma'i gdams ngag gis tshad du 'dzin pa'o/ /chen po ni bde stong gnyis med de/phyag rgya ni yid la mi byed pas lta ba tshad du 'dzin pa'o/ /dam tshig ni phun sum tshogs pa'i don te/ phyag rgya ni gzugs sku rnam pa gnyis kyi gzhan don tshad du 'dzin pa'o/ /da ni de nyid rgyas par bshad pa ni/ de la las kyi phyag rgya rang gi ngo bo brtag pa dag bya ste/las ni lus ngag yid gsum mnyam pa ste/ bsam pa gtso bo yin la/ phyag rgya ni bla ma'i gdams ngag gis rang gi ngo bor brtags pa'o zhes bya ba la/ las kyi phyag rgya rang gi ngo bo ni lhan cig skyes pa ste/ der sbyor ba gzhan gyis brtag par bya ste/ sbyor ba ni las su shes par bya'o//de la mig blta ba dang / lce gzhib pa dang / mchu so sa gzung ba dang / 'o bya zhing 'khyud pa dang / nu ma mnye ba dang / g.yal bslang pa dang / kak+ko lar po la bskyod pa ni las so/ /chags pa ni gtam gleng pa dang / rdo rje bzlas pa ni ngag go/ /rdo rje dang pad+ma byin gyis brlab pa dang /rdzogs pa'i sangs rgyas kyi blo yod pa ni yid kyi las te/ de dag ni gsang ba nang gi dbang la yang shes par bya'o/ /nang la ltos nas phyi yod dam zhe na/ phyi la ltos nas ma smin par bya ba yang yod do/ /gsung rab las/ khru gsum mtheb sor gsum lhag pa/dkyil 'khor dag gis bya ba yin/ /rigs lnga dag las byung ba ni/ /rig ma der ni gzhug par bya/ /zhes gsungs pa ni/ gong du bshad pa'i bum pa'i dbang ngo / /ma smin pa la yang gsang ba'i dbang mi thob pa ni ma yin te/ de nyid las/ yang dag de ni ji ltar rnyed//bcu drug lo lon de bzhin du'ang / /ji srid shu kra ldan gyur pa/ /de srid du ni phyag rgya bsten/ /zhes bya bas shes par bya'o/ /gsang ba phyi'i dbang ni/ slob dpon yab yum snyoms par zhugs pa'i/ e baM ma ya yongs su gyur pa'i byang chub kyi sems pad+ma rdo rje las ngag gi rtse mos blang bar bya ste//lan gsum gyi sbyor bas zag pa med pa'i ye shes skye ba'i rgyur 'gyur ro/ /de yang gsung rab las/ phyag rgya'i gdong ni g.yogs pa dang / /thabs kyi gdong yang de bzhin te/ /de la brten pa'i gang byung ba/ /slob ma'i khar ni sbyin par bya//zhes bya ba'i tshul gyis so/ /skal ldan slob ma de dag gis kyang 'di ltar shes par bya ste/ shu kra phyag rgyas mi sbyin zhing / /nya phyis dung chos dag tu min/ /pad+ma rdo rje gnyis dag las/ /'chi med lce yis blang bar bya/ /zhes bya ba'i don las mi nyams par bya'o/ / gsang ba nang gi dbang ni/ rnam par smin pa'i skad cig ma mchog gi dga' ba/ pad+mar nyams su myong par byas la/ rang rig pa'i ye shes dang bcas pa'i ro gcig pa de nyid mthus bzlog par bya'o/ /de yang gsung rab las/ der yang slob ma'i spyod yul ni/ / ro gcig par yang bya ba nyid/ /ces bya bas rab tu rtogs par bya'o/ /bsam pa gtso bo yin la zhes bya ba ni dga' ba gsum lhan cig skyes pa'i ngo bor byed cing / lhan cig skyes pa shes pa dang tha mi dad pa'i phyir bsam pa yin pas gtso bor gyur pa ste/ de yang gsung rab las/rang rig las byung ye shes te/ /bdag dang gzhan yang rig pa spangs/ /mkha' mnyam brtul zhugs stong pa ste/ /dngos dang dngos med bdag nyid mchog /thabs dang shes rab dang 'dres shing / /chags dang chags med rnams 'dres pa/ /de nyid srog chags rnams kyi srog /de nyid mchog tu mi g.yo ba/ /de nyid kyis ni kun la khyab/ /lus kun la ni rnam par gnas/ /dngos dang dngos po de las 'byung / /zhes bya ba ni yi ge hUM gi ming can la rab tu rtog par bya'o/ /phyag rgya ni sku gsung thugs kyi rig pa'o//man ngag gis zhes bya ba'i 'dod chags chen po'i sbyor ba bla ma'i gdams ngag gis zin pa'o/ /de dag gis ni lhan cig skyes pa rang gi ngo bor brtags pa'o/ /gal te lhan cig skyes pa de dag go rims ji lta bur skye snyam pa la bstan par bya ste/las kyi phyag rgya de las skad cig ma'i dbye bas phye ba'i dga' ba bzhi skye bar 'gyur ro zhes bya ba ni/ skad cig ma'i dbye ba ni bzhi ste/ de yang phan tshun ma 'dres par skye bas/ dus des phye ba'i dga' ba bzhi'i ye shes skye bar 'gyur ro/ /de yang gang las skye snyam pa la bstan par bya ste/phyag rgya bzhi'i mtshungs pa ni/ gsung rab las/ bcu drug lo lon mdzes pa'i dbyibs/ /lhan cig skyes pa smin gyur nas/ /zhes 'byung ngo zhes bya ba ni/ bcu drug ni lo ste/ de dag la stong par skye ba'i nus pa yod do/ /mdzes pa ni yid du 'ong ba ste/de dag la bde ba skye ba'i nus pa yod do/ /dbyibs ni zhi ba dang dul ba dang des ba dang gdams ngag 'dzin pa'i rtags can gyi phyag rgya dag gis byin rlabs skye bar 'gyur te/ lhan cig skyes pa'i ye shes gnyis su med par smin par 'gyur ba'i gnas su gsungs so//de yang dus kyi dbye ba ji ltar yin snyam pa la/ skad cig ma bzhi bstan par bya ste/ skad cig ma bzhi ni rnam pa sna tshogs pa dang / rnam par smin pa dang / mtshan nyid dang bral ba dang / rnam par nyed pa'o/ /rnam pa sna tshogs pa zhes pa ni/'gro ba drug tha dad du zhen pa dang / gzung 'dzin gyi rnam par stong par smin pa dang / rang la bde ba dang / stong pa gnyis kyi mtshan nyid dang bral ba gnyis med du nyams su myong ba dang / rang gi rnam pa ni med la yod pa la spyod pa'i phyir/ 'jig rten pa'i shes pa dang tha mi dad pa'o//de yang rtog pa la skye 'gag yod pa'i phyir skad cig mar bzhag la/ nyon mongs pa spong pa'i sgo nas ma 'dres pa'i phyir khyad par rigs so/ /dus des bsdus pa'i ye shes ji ltar skye snyam pa la bstan par bya ste/ dga' ba bzhi ni dga' ba dang / mchog tu dga' ba dang / lhan cig skyes pa'i dga' ba dang / dga' bral lo zhes bya ba la/ dga' ba ni gzung ba'i stong pa dang / mchog tu dga' ba ni dga' bas ches lhag ste/ gzung 'dzin gyi stong pa dang / lhan cig skyes pa'i dga' ba ni/ /rtag chad kyi mtha' las log ste/chos kun dang lhan cig skyes pa'o/ /dga' bral ni rang gi phyogs nas dga' ba dang bral la/ gong gi ye shes ngos 'dzin par byed pas/ blo dang bcas pa nyid do/ /de yang pad+ma dang / rdo rje las skye ba ste/ pad+ma dang / rdo rje las skye bar mi 'gyur snyam pa dag la de yang /skad cig ye shes bde ba che/ /e baM la ni rab tu gnas/ /zhes bya ba nges par bya'o/ /gal te rgyud dag las rnam pa med pa'i skad cig ma gsum par bzhag la/ 'dir bzhi par gzhag pa ni bla ma dam pa dag gi zhal gyi bdud rtsis btsan thabs kyi rnal 'byor sun phyung ste/mtshan nyid dang bral ba'i skad cig ma dbus su bstan pa ni mchog tu gyur pa'i phyir yang dag gi dbang du shes par bya'o/ /de yang / drag po'i sbyor ba spangs pa yis/ /sna tshogs de nas rnam par smin/ /gsum pa mtshan nyid bral ba ste/ /rnam pa med pa de na shes//zhes bya bas rigs so/ /de yang ma yin na/ mchog dang dga' bral dbus su ni/ /mtshon cha shes nas brtan par gyis/ /zhes gsungs pa de 'thad par yang mi 'gyur ro/ /rnam par nyed pa gsum par 'dod do zhe na/ rnam nyid kun du spyod ce na//gsum pa ji ltar 'dod par byed/ /ces bya ba'i tshig gis gsal to/ /de bas na btsan thabs kyi rnal 'byor ni/ rigs pa dang bral zhing lung dang 'gal lo/ /gal te 'di ni nges par 'byung ba drug pa'i sgra ste/ dga' ba dang lhan cig skyes pa la ltos pa'i/mchog gi dga' ba dang dga' bral gyi dga' ba ni dbus ma ste de nyid gtso bor gyur pa ni gsum pa yin pa'i phyir/ dga' bral gyi dga' ba ste/ rigs so zhe na/ gsung rab las/ dga' bral dang po mchog gi mtha'/ /stong dang stong min he ru ka / zhes bya bas gsal to/ /de la gsum pa dga' bral yin la/ lhan cig skyes pa la ltos pa'i dang po ste/ mchog gi mtha'o zhe na ma yin te/ /dga' bral dang po mtshon par bya/ /de ni dga' ba gsum bral nyid/ /ces bya bas gsal to/ /de yang snga ma bzhin no zhen ma yin te/ rnam par nyed pa spyod par brjod/ /rang gi bde ba za ba nyid/ /ces bya bas gsal to/ /de bas na rtogs pa mi rtogs par ji ltar 'gyur te mi 'gyur ro/ /de bas na 'jig rten pa'i grags pas kyang gnod la/ des par byed pa dang yang 'gal ba yin no/ /gzhan yang / dga' ba dang po sna tshogs nyid//mchog tu dga' ba rnam par smin/ /dga' bral dga' ba rnam par nyed/ /lhan cig skyes pa mtshan nyid bral/ /zhes bya bas dga' bral ni rnam nyid do/ /gzhan yang / dga' ba dang po'i 'gro ba nyid/ /de bzhin mchog dga' 'gro ba nyid/ /dga' bral dga' ba 'gro ba nyid//lhan cig skyes dga' gsum mi dmigs/ /zhes bya bas dga' bral 'khor bar ston to/ /'on te dga' bral gsum pa yin na/ lhan cig skyes pa mi rtog pa bstan pa'i rgyud dang 'gal te/ lhan cig skyes dga'i ngo bo nga / /mchog mtha' dga' bral dang po can/ /zhes bya ba dang /'thad par mi 'gyur ro/ /de bas na/ dga' phyir de tshe dpyod med de/ /mtshan nyid med par rigs par 'gyur/ /de phyir mtshan nyid bral bar rigs/ /bde ba gsum pa de nyid yin/ /rang rig nyid de dngos grub 'gyur/ /lung gi don dang mtshams ma yin/ /zhes bya bas lhan cig skyes pa gsum pa rtogs par bya'o//de bas na dam pa ni rtogs pa dang mi ldan te/ go rims gnas kyang yang dag par ma yin no/ /drag po'i dbang la ni mtshan nyid dang bral ba dang / lhan cig skyes pa'i dga' bas mthar 'dod do zhes bya ba la dman pa ni ngan pa ste/ rgyas 'debs pa med pa'i phyir nyams su myong pa tsam las gnyis med kyi rtogs pa dang mi ldan pas skad cig ma dang dga' ba'i go rims kyi mi gnas kyang /don dang mi ldan te gdol pa la rgyal por brjod pa bzhin du yang dag pa ma yin no/ /drag po ni stobs kyis byas pa ste/ dbang ni mtshan nyid dang bral ba'i skad cig ma dang /lhan cig skyes pa'i dga' ba mthar 'dod pa'i phyir/ go rims kyang 'khrul la rtogs pa yang gong ma lta bu ste/ bzang po ma yin pa nyid do/ /de las gzhan pa'i 'dod pa yang / /kho bos dgag par bya ba nyid/ /rdo rje nang gi rnam bcas te/ /de yi rtse mor rnam med nyid//dbu mar gnas zhes gang smra ba/ /kho bo'i bla ma de mi 'dod/ /ces bya bas gsal to/ /de ci'i phyir zhe na/ de dag ni sngon du zhen pa 'ba' zhig gtso bor gyur pa'i phyir dang / de las 'das pa'i ni chad pa'i mtha' la ltung pa'i phyir/ rdo rje'i nang du de'i rtse dang / /thod pa'i nang du lhung ba dang //bar du 'dug pa'ang mi 'dod la/ /de nyid bla ma'i kha la rig /ces bya ba ni/ bcu drug phyed phyed thig le 'chang gi bcom ldan 'das so/ /de yang bla ma'i zhal las rtogs par bya ba ni/ gnyis 'das nas ni gnyis mnyam pa/ /rdo rje nas lhung pad+mar reg /mi bskyod rdo rje nas lhung ba//rdo rje pad+ma la reg pa/ /rgyu la 'bras bus rgyas gdab cing / /'bras bu la yang rgyus rgyas gdab/ /'di ni bde chen rgyal po yin/ /zhes bya bas nor bu lta bu'i don rnyed par rig par bya'o/ /gal te rgyun ni nges pa'i don te/ 'dir drang ba'i don du 'gyur ba 'am/ yang na brtsams pa la don med de 'khrul bar 'gyur ro zhe na ma yin te/sngags kyi theg pa ni bla ma'i zhal la rag las pa'i phyir dang / gzhan shes rab kyis nga rgyal ba'i blo 'jug pa spangs pa'i phyir zhal las shes par bya ba'i don to/ /gal te yang dag gis 'grub pa'i phyir/ btsan thabs dgong par mi rigs so zhe na/ ma yin te/ nges shes ni ltos par 'grub pa yin pa'i phyir/ bden pa gsum pas bstan pa ltar rje btsun pas kyang ston te/ dbang des pa dang de dang rjes su mthun pa dag ni bcom ldan 'das kyis bstan pa ltar/ bdag gis 'dir rgyas par bshad do zhes bya ba ni go sla'o//da ni lhan cig skyes pa grib mar gyur pa bstan par bya ste/ nyams su blangs pa ni bla ma'i zhal las shes par byas la rtog pa'i don bshad par bya ste/ de yang phyogs snga ma gnyis dang 'dod pa de dag thams cad lhan cig skyes pa'i ye shes ma rnyed pa'i phyir grib ma'o zhes bya ba la/mtshon byed nyams su myong ba la/ /mtshon bya mtshon par nus pa'i phyir lhan cig skyes pa ste/ 'dra ba tsam nyid kyi phyir dngos ma yin pas ye shes ma rnyed pa ste/ chos kyi phyag rgya grib ma'o/ /'dra ba tsam gyis mtshon par mi nus snyam pa la/grib ma'i lhan cig skyes pa ni/ lhan cig skyes pa dang 'dra ba'i ye shes khong du chud par byed pa'i phyir ro/ /de yang mtshon par lhan cig skyes pa'i chu'i zla ba lta bur/ khong du chud pas don gyi lhan cig skyes pa nam mkha'i zla ba lta bu mtshon par nus pa'i phyir ro//de yang dpe las kyi phyag rgya'i ye shes la grib mar bzhag pa'i rgyu mtshan gang zhe na/ de bas na lhan cig skyes pa grib mar smra ba ni shes rab bo zhes bya bas bstan te/ shes rab kyi las kyi phyag rgya ste/ de las skyes pa'i ye shes ni rkyen gzhan las skyes pa dang /'dod chags kyi spu gri dang khyad nye ba dang / ched du bcos pa yin pa dang ma'i bu mo las byung ba'i rigs so/ /de bas na shes rab la brten pa'i ye shes ni shes rab ye shes so/ /des don gyi ye shes mtshon par nus sam zhe na/ don gyi ye shes chos kyi phyag rgya ji lta bu mtshon par nus so//don gyi ye shes ji lta bu zhe na/ de'i phyir na bstan par bya ste/ shes rab ye shes kyis bstan pa'i lhan cig skyes pa'i ye shes ni skyes pa med pa nyid do/ /gang gi phyir chos kyi phyag rgya la lhan cig skyes par gdags she na/ gang gi phyir lhan cig skyes na/ chos thams cad kyi rang bzhin te/ ma bcos pas ji srid pa rang gi mtshan nyid dag pa'o zhes bya ba la/ gang gi phyir zhes bya ba ni rgyu mtshan dang ldan par gzhag rigs pa'o/ /de yang skye ba med pa'i spros pa dang bral ba de dag phung po la sogs pa dang lhan cig skyes pas na chos thams cad rang bzhin te/de yang sna tshogs su snang ba de nyid kyi tshe chos yin te/ dpyad pas skye ba med pa'i phyir lhan cig skyes pa'o/ /de yang nyams su ji ltar blang zhe na/ ma bcos pas na zhes bya ba ste/ de yang lus ngag yid gsum gyis 'bad pa'i shes pa bzhin du brjod du med pa/gzhan gyis brjod du med pa/ gzhan rjod pa med pa/ gzhan la brjod pa med pa/ ji srid pa de srid kyi chos kyi phyag rgya lhan cig skyes pa ste/ dbyer med pa'i phyir rang gi mtshan nyid dag pa'o/ /de yang gsung rab las/gzhan gyis brjod med lhan cig skyes/ /gang las kyang ni rnyed mi 'gyur/ /bla ma'i dus tshigs bsten pa yis/ /bsod nams las ni rang bzhin shes/ /zhes gsungs pa'i phyir/ de dag ni don gyi ye shes so/ /de bas na las kyi phyag rgya de dag gis mtshon bya mtshon par nus pa de'i phyir/las kyi phyag rgya thob nas rgyu mthun pa'i 'bras bu skyed par byed do/ /de dag gi ni go ba yang ci zhe na/ rgyu mthun pa'i 'dra bar 'byung bas na'o zhes bya ba ni go sla'o/ /de dag kyang ji ltar 'byung snyam pa dag la/ de'i phyir/ e yi cha byad bzang po gang //dbus su baM gyis rnam par brgyan/ /bde ba thams cad kyi ni gnas/ /sangs rgyas rin chen za ma tog /ces 'byung ba'i phyir ro zhes bya ba la/ e ni e d+harma d+hA tu ste/ rnam par thar pa'i sgo gsum las chos 'khor ba dang mya ngan 'das pa ste/ de dag kun 'byung ba'i dbyings yin pa'i phyir ro//cha byad ni rigs lnga las byung ba'i brtul zhugs dang lo grangs tshad dang mthun no/ /bzang po gang zhes bya ba ni/ mtshan nyid dang ldan pa ste/ de dag kyang / dkar sham sngo bsangs skra ser li/ /nu ma sra 'khregs rked pa phra/ /b+ha ga 'khyil ba yangs pa'i tshul//bzhin mdzes byed mkhas pa yi dri/ /dad dang snying rje tshogs sogs brtson/ /rgyud 'jam byang chub sems gang shes/ /ha cang ring min thung ba min/ /khro dang nyon mongs nyes spangs pa/ /gzhon zhing ting nge 'dzin dang ldan/ /dpa' bo dag la gus byed cing //'dod la ma chags phan sems ldan/ /de ni mchog gi grogs su 'gyur/ /zhes gsungs pa la bya'o/ /dbus zhes bya ba ni/ stong pa bde bas gang ba'i bdag nyid bde ba chen po dag gi thig les smin pa'i gnas ni e'i bdag nyid ka ko la'o//de gnyis nyams su myong bar 'gyur ba ni/ waM gyi bdag nyid bo la'o/ /de dang gnyis su med pa'i rnam par sbyor ba las/ skad cig ma la dga' ba'i ye shes kyis brgyan pa skye'o/ /bde ba ni 'bras bu'o/ /thams cad ces bya ba ni ma lus pa'i don te sku bzhi dang ye shes rnam pa lnga'i ngo bo nyid can bdag nyid la'o//de yang rgyu dang 'bras bu nye bar mtshungs pa ste/ dga' ba sprul ba'i mchog longs spyod/ /lhan cig skyes pa chos sku la/ /dga' bral ngo bo nyid can no/ /zhes bya ba dang / chags pa ma yin chags bral min/ /bar ma la ni yod pa min//gsum po spangs phyir lhan cig skyes/ /yang dag byang chub nyid du brjod/ /ces bya bas/ ye shes lnga gzung bar bya'o/ /sangs rgyas ni sems can 'byung ba'i don gyis so/ /rin po che ni rin po che'i don mtshon nus pa nyid kyis so/ /za ma tog ni nyams su myong ba 'byung ba'i don gyis so//de yang sems can thams cad la phyag rgya chen po rang chas su yod pa dang 'dra ba'i phyir dang mngon du bya ba nyid kyis so/ /gal te de dag la phan yon de lta bu yod pa'i phyir/ chog par 'dzin pa na de dgag par bya ste/ de ltar blo dman pa'i slob dpon rnams shes rab ye shes bsgrubs nas rtogs pa dang mi ldan pas 'bras bu nye bar rnyed par mi 'gyur yang /lhan cig skyes pa myong zhes zer na dga' ba skye bar 'gyur te/ de dag ni dper na me long la brten nas bzhin gyi gzugs brnyan 'byung ba de bzhin du mi 'gyur ba dang 'dra'o/ /de ni sngon du yang ma grub la da ltar yang ma grub pa'i phyir ro zhes bya ba bstan te/blo dman pa ni blo'i shes rab ste/ chos thams cad nges par 'byed pa'i don gyis skye ba med par byed pa'o/ /de dang mi ldan pa ni dman pa ste/ de lta bu'i slob dpon rnams kyis/ bum pa dang gsang ba dang shes rab ye shes bzhi'i man ngag dang bcas pas slob ma la bsgrubs nas/rtogs pa chos kyi phyag rgya dang mi ldan pas dbang bzhi dang bral te 'bras bu phyag rgya chen po rnyed par mi 'gyur yang / dus kyi sna rtse dpe'i lhan cig skyes pa'i ye shes nyams su myong bas dbugs dbyung ba dang rgyas gdab pa dang ldan pa'i phyir 'di ni mchog go zhes zer nas/mthar phyin pa'i nga rgyal skye bar 'gyur te/ de dag ni dper na bzhin ni me long dang bar nam mkha' snang ba'i 'od rnam la brten nas bzhin gyi gzugs ci 'dra ba cig byung ba ste/ rkyen gyi dbang ni snang du zad kyi de ni bzhin du mi 'gyur ro//de bzhin du dpe'i ye shes de dag kyang / rkyen tshogs pa las myong du zad kyi/ de nyid kho na skye ba med pa nyid kyi don gyi ye shes su mi 'gyur ba dang 'dra'o/ /de dag ni 'das pa dang ma 'ongs pa dang / da ltar gyi sangs rgyas dang des bstan pa'i rgyud rnams dang / dbang gsum pa'i dus su yang ma grub la/ mkhas pa dag gis da ltar gyi dus su yang don gyi ye shes su lung dang rigs pa dang bla ma'i gdams ngag dang nyams su myong ba las kyang ma grub pa'i phyir ro/ /gal te de lta bu dgra dper yang mi rigs so zhe na/ de ltar bzhin gyi gzugs brnyan ni 'dra ba tsam du rtogs par bya'o zhes bya bas ston te/me long gi nang na bzhin gyi gzugs brnyan gnas pa ni bcos ma yin yang ma bcos pa'i bzhin gyi dri ma sel bar nus pa ni/ dran pa tsam nyid du gnas pas so/ /de bzhin du las kyi phyag rgya dus kyi sna rtse bcos ma de dag gis chos kyi phyag rgya'i ngo bo ston par nus te/'dra ba de kho na nyid kyis rtogs par bya ste/ de bas na nges par byed pa bzhin gyi gzugs brnyan rgyu mthun pa tsam mthong ba la/ 'jig rten pa rnams rang gi bzhin zhes 'khrul pas dga' bar 'gyur ro zhes bya ba la/ de nyid chos dang chen po ste/bde stong spyi'i dang rang gi mtshan nyid do/ /don de dag nges par byed pa ni las kyi phyag rgya ste/ rkyen gzhan las skyes pas na gzhan gyi'o/ /dngos ma yin pa'i phyir gzugs brnyan no/ /mtshon byed yin pa'i phyir rgyu mthun pas na ste/ dpe tsam mthun pa la 'jig rten pa rnams rang bzhin mthong zhes 'khrul pas dga' bar 'gyur ba ni rmongs pa ste/tshu rol mthong ba 'ba' zhig la 'jig rten pa zhes bya la/ phal cher skal pa chung ba'i phyir rnams so/ /de yang phyag rgya chen po rang la yod pa/ rang gi rang bzhin rang gis mthong //zhes dngos po'i gnas lugs la 'khrul pas zag bcas kyi bde ba la dga' bar 'gyur ba ni blun pa'o/ /de dag dga' zhing mgu pas ni chos kyi phyag rgya'i gtam tsam yang mi 'dri'o/ /chos kyi phyag rgya ma shes na/ /las kyi phyag rgya bcos ma 'ba' zhig la zhen pas/ma bcos pa'i lhan cig skyes pa'i ye shes ji ltar 'byung bar 'gyur te/ mi 'gyur ro zhes bya ba la/ de la zhes bya ba ni las kyi phyag rgya ste/ dga' zhing zhes 'dod pa rjes su gzhol ba'o/ /bde bas mgu ba ni bla ma bsten cing bla ma'i gdams ngag gtso bor mi 'dzin te/chos kyi phyag rgya'i rten tsam yang mi 'dri'o/ /de bas na rtog pa dang mi ldan te zhes bya ba longs spyod du mi 'gyur ba'i phyir/ chos kyi phyag rgya ma shes pa na las kyi phyag rgya byas pa'i phyir mi rtag pa dang / rkyen las skyes pa'i phyir ma skyes pa dang / bde btsam nyid kyi phyir mtha' dang bcas pa ste de lta bu rtog pa dang bral zhing rgyu bcos ma 'ba' zhig la zhen pas phyag rgya chen po ma bcos pa'i lhan cig skyes pa'i ye shes lam dang bral ba'i phyir ji ltar 'byung bar 'gyur te mi 'gyur ro//da ni dpe'i sgo nas bcos ma yin pa'i phyir 'thad pa ston to//de ci'i phyir zhe na/ rigs mthun pa'i rgyu las rigs mthun pa'i 'bras bu skye bar 'gyur gyis/ mi mthun pa'i las ni ma yin no/ /de yang sA lu'i sa bon las sA lu skye ba yin gyi drug cu pa las ni ma yin no zhes bya ba ni go sla'o/ /de ci'i phyir na chos kyi phyag rgyas ma bcos pa las/bcos pa'i lhan cig skyes pa'i ye shes so zhes bya ba la/ gal te chos dang chen po gnyis ma bcos pa'i phyir lam dang 'bras bu gnyis mi rigs te/ gcig nyid do zhe na/ ma yin te/ don gyi ye shes su gcig pa'am/ nyams su myong ba la gcig brtag go/ /don du gcig pa ni bden te snang stong dbyer med pa nyid kyis bde stong dbyer med pa nyid do/ /nyams su myong ba ni spyi dang rang gi mtshan nyid kyis khyad par bzhag par rigs so/ /de nyid du bzhag pa'i rgyu mtshan gang yin zhe na/ de'i phyir chos kyi phyag rgya ma bcos pa ni/ro mnyam dang ldan pa'i ma bcos pa ste/ spyi'i mtshan nyid do/ /de las phyag rgya chen po'i ma bcos pa'i lhan cig skyes pa'i ye shes skye ba ni ro mnyam dang bral ba'i rang gi mtshan nyid do/ /gal te chos kyi phyag rgya la ji ltar sbyangs pas phyag rgya chen po mi 'byung snyam pa dag la/bstan par bya ste/ da'i phyir chos kyi phyag rgya nyid las mi phyed par spyad na 'bras bu phyag rgya chen po 'byung bar 'gyur ro zhes bya ba la/ chos kyi phyag rgya la mi phyed par spyad pa ni/ dga' ba bzhi pa'i man ngag gis nyams su myong ba'i phyir/bde ba dang stong pa nyid la gnyis med kyi ro mnyam gyis mi phyed par byas shing ma yengs pa nyid kyis spyad na/ 'bras bu phyag rgya chen po rang chas su 'byung zhing 'char bar 'gyur ro/ /'o na sngar bshad pa dang 'gal lo zhe na/ de dag ni khyod kyis khyad par ma gsungs te/e yi cha byad bzang po gang / /zhes bya ba la sogs pa ni dpe'i yon tan bstan pa ste/ 'di dang yang mi 'gal ba'i don ni/ sangs rgyas rin chen za ma tog zhes bya bas bshad zin to/ /da ni las kyi phyag rgya chos kyi phyag rgya dang ldan na/ mtshon byed dper rigs pa ston te//phyag rgya ni sangs rgyas kyi grib ma ste/ ye shes rin po che'i gnas dang bzhi'o zhes bya ba la/ phyag rgya ni rig pa nyid do/ /sangs rgyas kyi zhes bya ba ni don to/ /grib ma ste zhes bya ba ni 'jig rten 'das pa'i ye shes so/ /ye shes rin po che zhes bya ba ni/ des mtshon pa'i mtshon bya'o/ /de bas na mthong ba'i gnas yin la/ myong ba'i gzhi nyid do/ /de'i rjes su byed pas grib mar 'gyur ro zhes bya ba ni/ chos kyi phyag rgya dang bral bas 'khor bar 'gyur ro zhes bya ba'i tha tshig go/ /dpe'i ye shes de dag ni mchog gi ye shes skye ba'i rgyur gyur pa'i phyir las kyi phyag rgya'i pad+ma'i sangs rgyas thams cad kyi 'byung gnas rin po che'i las dga' ba'i tshogs skye bar 'gyur ro zhes bya ba la/pad+ma dri ma med pa'i don to/ /bde ba 'dzin par byed pa'o/ /de yang oM pad+ma su khaM d+ha ra/ma hA rA ga su khaM da/ tsa tur A nan+da b+ha ga bi shwa/ hUM hUM hUM kA R+YaM ku ru shwa me zhes bya bas/ ye shes lnga yi bde 'dzin cing / /chags pa chen pos bde ster ba/ /dga' ba bzhi yi dbang phyug ni/ /pad+mar bsdus pa'i 'bras bu'o/ /zhes bya bas so/ /sangs rgyas thams cad kyi zhes bya ba ni/snying po'i don gyi sangs rgyas so/ /'byung gnas zhes bya ba ni rtogs pa tsam la rag las pa'i phyir/ sems can 'byung ba'i gnas la gdags so/ /rin po che ni 'dod pa 'byung ba'i don to/ /dga' ba'i tshogs ni bzhi'o/ /skye bar 'gyur ro zhes bya ba ni go rims kyi tshul gyis nyams su myong ba'o//de yang bde gshegs gang du bzhugs pa dang / /'chags pa dang ni bzhengs pa dang / /seng ge lta bur gzims pa yi/ /gnas de la ni bdag phyag 'tshal/ /zhes gsungs pas kyang shes par bya'o/ / da ni las kyi phyag rgya'i dga' ba bzhi bstan par bya ste/ de la e baM gyi phyag rgya bol+la dang kak+ko la bsrub pa'i sbyor ba las/ a ba d+hU tI nas kun rdzob byang chub kyi sems la tha mi dad pas khyab pa'i don dam pa dang / gnyis su med par nor bu'i nang du son pas/ skad cig ma'i dus kyis bsdus pa'i dga' ba'i ming can lhan cig skyes pa'i ye shes skye bar 'gyur ro zhes bya ba la/e ni shes rab ste stong pa skye ba'i gnas so/ /baM ni thabs te bde ba'i gnas so/ /phyag rgya ni dbyibs so/ /bol+la dang kak+ko la ni brdar smras pa'o/ /bsrub cing bsrubs pa'i sbyor ba la ni bskyod pa dang khyad par bskyod pa'o//a ni ma skyes pa la baM ni bde ba ste/ d+hU tI ni gnyis med gnyis kyis stong pa ste/ kun rdzob ni kun+da lta bu'o/ /byang chub kyi sems ni ye shes kyi nus pa yod pas so/ /tha mi dad pa'i khyab pa ni lus gang na gnas pa na rtsa/ de la thig le de la shes rab de la ye shes kyis khyab cing /gnyis su med pa ste 'khor lo bzhi nas 'byung ba bzhi'i rang bzhin du rig pa bzhi'i ngo bo la/ phyag rgya bzhi'i chos mthun dga' ba bzhir gnas pa ni/ don dam pa dang kun rdzob gnas su med pa ste/ de yang / e ni sa ru shes bya ste/las kyi phyag rgya spyan ma nyid/ /'dab ma drug cu bzhir ldan pa'i/ /lte ba sprul pa'i 'khor lor gnas/ /baM ni chu ru shes bya ste/ /chos kyi phyag rgya mA ma kAM/ /'dab ma brgyad ldan 'dam skyes ma/ /snying ga chos kyi 'khor lor gnas/ /ma ni mi ru bstan pa ste/ /phyag rgya chen po gos dkar mo//bcu drug 'dab ldan chu skyes la/ /mgrin pa'i longs spyod 'khor lor ldan/ /yaM ni rlung du rab tu bstan/ /dam tshig phyag rgya sgrol ma ste/ /sum cu rtsa gnyis 'dam skyes la/ /bde ba chen po'i 'khor lo bstan/ /zhes bya bas rab tu rtogs par bya'o/ /nor bu'i nang du son pas zhes bya ba ni dga' ba gnyis te/gnyis pa dang gsum pa yang shugs kyis go bar bya'o/ /skad cig ma'i dus kyis bsdus pa'i zhes bya ba ni skad cig ni bzhi ste/ rnam pa sna tshogs pa dang / rnam par smin pa dang / mtshan nyid dang bral ba dang / rnam pa med pa'o/ / dus ni phyi rol gyi'o/ /bya ba ni brtsams te nor bu'i mgrin pa'i bar dang / nor bu'i nang du khyab cing mthar thug pa dang / gnyis shor bas 'dod chags kyi dad yal zhing gnyis gnas pas zung du 'jug pa dang / ma lus pa'i 'phros pa'i dus kyis bsdus pa'i dga' ba dang mchog dga' dang lhan cig skyes pas dga' bral gyi ming can la/bzhi'i man ngag gis zin pa'i dus su lhan cig skyes pa/ chos thams cad dang mtshungs pa'i ye shes so/ /phyogs snga ma btsan thabs kyi rnal 'byor dag /dpe'i ye shes kyi rgyu mthun par mi 'gyur ram zhe na/'gyur ba bstan par bya ste/ de yang lhan cig skyes pa'i rgyu mthun par 'gyur ba ni/ shes rab dang dga' ba la 'khrul pa'i dga' ba bzhi dang skad cig ma bzhi ni/ dman pa dang drag po'i sbyor ba la yang yod pa'i phyir/ phyogs snga ma'i tshul gyi las kyi phyag rgya bsten te/byang chub kyi sems su rgyu mthun pa tsam dor bar mi nus pas na/ ltos par gzhag pa'i rgyu mthun pa'i 'bras bu rnam par smin pa dang 'dra ba ste/ las ni lhan cig skyes pa skye bar gsungs pas na/ tshad du byas pa ni dga' bar rigs pas so/ / shugs las byung ba ni ma yin no/ /las kyi phyag rgya la brten nas rgyu mthun pa'i 'bras bu skye bar gsungs so/ /gal te lhan cig skyes pa'i ye shes de dag sna rtse'i dus su nyams su myong ba de dag phyis 'byung ba yin nam zhe na/ dus de nyid gtso bor gyur pa las gzhan ni ma yin te/de bas na dga' bral nas rjes su 'gro bar zad do/ /ye shes tsam nyid yin pa'i phyir ro zhes pa ni dngos por gyur pa'i tha tshig go/ /des nges par byed pa yang / gsung rab las/ bag chags kyis ni dkrugs pa las/ /stong nyid ye shes dngos por 'gyur/ / rlung gi shugs kyis chu dag ni/ chab rom gyur pa ji bzhin no/ /zhes bya ba ni bag chags ni tha dad du brtags pa'o/ /de dag gi gnyis med kyi ye shes 'jug pa'i phyir/ stong pa nyid kyi ye shes dran pa nyams su myong yang tha ma'i dus su dngos por 'gyur ro/ /dper na rlung gi shugs kyi rgyun gyis chu dag ni chab rom gyi gong bur gyur pa ji bzhin no//de bas na chos kyi phyag rgya'i lam dang ldan pa la rab tu 'bad par bya'o/ /las kyi phyag rgya'i rgyu mthun pa'i 'bras bu zhes bya ba ni/ rgyu rten cing 'brel te 'byung ba'i stobs kyis/ bcom ldan 'das mngon gyi shes rab la longs spyod pa ste/de yang 'dra ba'i rgyu mthun pa'i lta ba bzhin du'o/ /nges par bstan pa ste zhes bya ba ni/ btsan thabs kyi rnal 'byor bkag pa'i phyir ro/ /de yang / las kyi rlung gis 'phangs pa yi/ /bcom ldan shes rab ma la spyod/ / ji lta byas pas de bzhin mthong / /rgyu mthun zhes ni grags pa yin/ /zhes bya bas so/ /dang po zhes bya ba ni rim gyis 'jug pa la bdag don du 'gyur ba'i dang po'o/ /byang chub kyi sems de dag thabs gang gis bsgom zhe na/ bdag lus thabs ldan dang gzhan lus tshad ldan te/de yang / las kyi phyag rgya dam tshig dang 'brel ba dang / /ye shes kyi phyag rgya chen po dang 'brel pa'o/ /de yang gsung rab las/ dkyil 'khor la sogs thabs dang ni/ /rang byin brlabs pa'i rim pa yis/ /sgrib byed sgrib bral tshul can gyis/ /byang chub sems ni bskyed par bya//de dag gi khyad par ci zhe na/ sgrib byed kun+da lta bu ste/ /sgrib bral bde ba'i rang bzhin can/ /gzhan lus gang du bsgom zhe na/ /bud med pad+ma'i bde ba can/ /e baM rnam pa'i rang bzhin gyis/ /de dag tu bde ba 'byung ngam zhe na/ /bde ba gsungs pa nyid kyi ni/ /bde ba can zhes mngon par brjod//bde ba dang ldan pa nyid ci'i phyir zhe na/ sangs rgyas byang chub sems dpa' dang / /rdo rje 'chang gi gnas yin no/ /'khor bar skye ba'i gnas de dag tu mya ngan 'das pa skye bar mi 'gyur ram zhe na/ de bzhin du ni 'khor ba dang / /mya ngan 'das pa de bzhin te/ /'khor ba ma gtogs gzhan du ni//mya ngan 'das pa bstan du med/ /'khor ba mya ngan 'das par mi 'gyur ro zhe na/ 'khor ba gzugs dang sgra la sogs/ /'khor ba tshor ba la sogs pa'i/ /'khor ba dbang po nyid yin te/ /'khor ba zhe sdang la sogs yin/ /chos 'di rnams ni mya ngan 'das//gti mug 'khor ba'i rang bzhin te/ /rmongs med 'khor ba dag pa yin/ /'khor ba mya ngan 'das bzhin spyod/ /ji spyad ce na/ sgrib bral sgrib byed rang bzhin can/ /byang chub sems ni mya ngan 'das/ /bde ba gang la brten nas 'bar/ /zhe na/ bzhin sdug mig ni dkyus ring zhing //gzugs dang lang tshos rnam par brgyan/ /sdo bsangs brten zhing rigs ldan dang / /lha rdzas ga pur yang dag ldan/ /rang gi dbang bskur kye rdo rje/ /skra bzangs sgrub pa po la dga'/ /bde ba gso ba'i rdzas ji lta bu zhe na/ de la chang ni sbyin bya zhing / / brtul zhugs can dang brdung bar bya/ /gang gi don du bsgom zhe na/ /bdag gzhan don ni rab bsgrub phyir/ /de nas phyag rgya rjes chags bya/ /nyams su ji lta bu bdag gis blang zhe na/ /pad+ma rdo rje rab sbyar te/ /brtul zhugs kyis ni legs bdag spyad/ /sbyor ba de la yang dag 'byung / / ga bur blo ldan gyis mi spang / /ji ltar mi spang zhe na/ /de las lag pas mi blang zhing / /nya phyis dung chos dag ma yin/ /stobs ni bskyed par bya ba'i phyir/ /'chi med lce yis blang bar bya/ /dus rgyun du gtang ngam zhe na/ /rnam lnga ro snyoms dus min par/ / byang chub sems ni gtang mi bya/ /rdzogs pa'i rim pa'i rnal 'byor la/ /gang ltar spyad kyang de bden 'gyur/ /zhes bya bas gus pa dang bcas shing / /rgyun mi 'chad par bsgoms na bde ba chen po'i mchog gi dngos grub mngon du 'gyur ro/ /thabs dang shes rab gnyis sbyor ba/ / mthe bo gnyis bsnol sor bsnyams bsgreng / /mthe bo srin lag lce la gnas/ /mnyam du bkag pa mkhas pas bya/ /e baM bol+la kak+ko la/ he dang / i kang / a aM/ de dag ni las kyi phyag rgya'i bshad pa'o/ /de ltar mtshon byed dpe'i lhan cig skyes pa bstan nas/ da ni lam chos kyi ye shes bstan par bya ste/oM chos kyi phyag rgya ni zhes bya ba la/ oM ni ye shes rnam pa lnga ste/ de yang sems dang snang ba dang / gnyis su med pa'i rnam grangs ngo bo gcig tu byas pa ni/ sems rang rig cing nyams su myong ba la rten 'brel las skyes pa'i phyir skye ba med pa dang / rang rig pa gzhan la mi ltos par gsal ba dang / de nyid mu bzhi dang bral ba dang / gzung 'dzin gyi skyon gyis ma gos pa dang / de dag rtogs pa ni yongs su grub pa ste/ rnam pa med pa'i bdag nyid do/ /de las gzhan pa yang skye med dang rnam pa dang sems gnyis med du gsal par nyams su myong ba dang /sna tshogs su snang ba dang / gnyis med pa dang / sems la sna tshogs su snang ba dang / snang ba yang dag gis kun rdzob tu don byed nus pa ni rnam pa dang bcas pa'i bdag nyid do/ /snang ba rten cing 'brel te 'byung ba las skyes ba skye pa med pa dang / sna tshogs pa'i skye ba med la gom pa med pa dang / skyes ba dang skye ba med pa gnyis tha mi dad pa dang / skye ba med pa nyid kyis sna tshogs su shar ba dang / gang gi mtshan nyid la gdams ngag gis nan tan du byas pa ni gnyis pa'o/ /gnyis med sgro skur dang bral ba dang / ngang gis gsal ba dang /phyogs cha dang bral ba dang / gsal ba dang / stong ba dang / bde ba dang / mngon du byas nas rtogs na sangs rgyas pa de gsum pa'o/ /de las mi gzhan pa bstan pa'i phyir chos kyi phung po dang khams dang skye mched dang rten cing 'brel par 'byung ba dang / 'byung bzhi ste/ de dag la rgyas 'debs pa'i phyag rgya ni/ bla ma'i zhal las rtogs pa'i lhan cig skyes pa'i ye shes so/ /de'i mtshan nyid kyang chos kyi dbyings kyi rang bzhin zhes bya ba bsten te/ chos kyi dbyings ni bde ba dang stong pa gnyis su med pa ste/ kun du 'gro ba'i mtshan nyid can no/ /de yang gsung rab las/chos rnams rang bzhin 'od gsal ba/ /gdod nas dag pa nam mkha' bzhin/ /byang chub med cing mngon rtogs med/ /byang chub tshul 'di brtan pas so/ /zhes bya bas so/ /rang bzhin zhes bya ba ni/ bde ba dang stong pa spyi'i rnam pa la bya'o/ /de dag kyang gang gis rtogs par bya zhe na/dga' ba bzhis rtogs par bya ste/ spros pa dang bral ba/ mi rtog pa ma bcos pa/ /snying rje'i rang bzhin mchog tu rtog pa zhes bya ba la/ spros pa dang zhes bya ba ni/ lhan cig skyes pa la sna tshogs su shar ba ni/ rnam pa sna tshogs pa'i skad cig ma ste dga' ba'o/ /bral pa ni gnyis su brtag pa dang bral ba ste/ sna tshogs su shar ba'i lhan cig skyes pa mi rtog pa nyid du shes pa ni/ rnam par smin pa'i skad cig ma ste/ mchog tu dga' ba'o/ /ma bcos pa ni gnyis snang 'gags la gnyis med du nyams su myong la/ myong ba tsam du yang mi 'dzin pa ni/ mtshan nyid dang bral ba'i skad cig ma ste/ lhan cig skyes pa'i dga' ba'o/ /snyong rje'i yul khams gsum pa ste/ de dag la lhan cig skyes pa gnyug mar gnas kyang / sna tshogs su snang ba la 'khrul te/ ma rtogs par 'khrul pa nyid kyis snying rje'i phyir ro/ /rang bzhin ni rjes thob sna tshogs su snang ba/lhan cig skyes pa snang ba ste/ rnam pa med pa'i skad cig ma ste/ dga' bral lo/ /mchog tu rtogs pa ni bzhi pa'i man ngag gis/ mchog lhan cig skyes pa'i dga' ba gsum tha mi dad par rtog pa ste/ de dag gis 'khor ba'i sems snying rje'i rgyu mtshan gyi 'khrul pa mchog tu rtogs pa'o//de dag gis lam la ji ltar bslab ce na/ skye ba med pa zhes bya ba bstan te/ thams cad nas thams cad du skye ba med kyi nyams dang ma 'bral ba la bya ste/ de yang gsung rab las/ ma skyes pa yi chos rnams la/ /ngo bo med de bsgom pa ste//nam mkha'i khams su sbyor ba las/ /de ltar dngos por rab tu bsgrags/ /zhes bya bas so/ /skye med kyi lam de dag gi 'bras bu gang zhe na/ gcig tu mdzes pa zhes bya ste/ gcig ni gnyis med kyi ye shes phyag rgya chen po nyid do/ /mdzes pa ni longs spyod rdzogs pa dang sprul pa'i skus mdzes pa'o//de bas na thabs su gyur pa nyid do/ /de ltar rtogs pa du dang ldan pa zhig tu 'gyur zhe na/ mtshan nyid bdun dang ldan pa ste/ snang ba skye med du thim pa longs spyod kyi yan lag dang / snang stong tha mi dad pa kha sbyor gyi yan lag dang / tha mi dad pa nyams su myong ba bde ba'i yan lag dang /rang la yod cing gang 'dod skye la/ nam 'dod pa'i dus na 'byung ba ni/ snying rjes yongs su gang ba'i yan lag dang / bde stong gzhan la mi ltos pa rang rdzogs su yod pa ni dngos po'i yan lag dang rtag tu nyams su myong dang mi 'bral ba ni rgyun mi 'chad pa'i yan lag dang /nyams su myong ba'i dus na snang ba mi 'gog par ni 'gog pa med pa'i yan lag ste/ de lta bu rtogs shing ma yengs pa nyid kyis myong ba la/ rgyun gyi rtag pa nyid du zhes bya'o/ /chos kyi phyag rgya'i lhan cig skyes pa de dag gang gis mtshon la/ gang gis nyams su myong bar bya zhe na/lhan cig skyes pa'i rang bzhin ni shes rab kyi sbyor ba las byung ba dang tha mi dad pa gang yin pa de ni/ chos kyi phyag rgya'o zhes bya bas bstan te/ lhan cig skyes pa'i rang bzhin ni gong du bshad pa kho nar zad do/ /shes rab kyi sbyor ba las byung ba dang zhes pa dang /shes rab ni las kyi phyag rgya ste/ sbyor ba ni kak+ko la dang bo l+la'o/ /de las byung ba ni mtshon byed kyis mtshon pa'i mtshon bya'i don to/ /don de dang tha mi dad par ston par byed pa ni bla ma'i man ngag bde stong ston par byed pa'i sgra spyi'i rnam pa'o/ /de la rtog pa bde stong don spyi'i rnam pa gang yin pa de ni chos kyi phyag rgya'o//bla ma'i gdams ngag gis 'khrul pa sel bar mi nus so snyam pa la bstan par bya ste/ de las gzhan pa ni dper na mun pas kun nas dkrugs pa la nyi ma'i 'od zer dang 'dra bar mi shes pas 'khrul pas kun nas dkrugs shing rtog pa'i dra ba dpag tu med pa gnas pa dag la/bla ma'i gdams ngag 'brel ba rjes su slob ma'i gdams pas/ 'khrul pa rdul tsam gyi zug rngu yang bcad de/ blo'i bdag nyid spang nas rtog pa'o zhes bya ba la/ de las gzhan pa ni ngo bo las gzhan pa nus pas ston pa'i tha tshig go//dper na mun pas kun nas dkrugs pa la zhes pa ni mun pa ni snang ba nub pa'i dus su shugs kyis 'byung la/ lag pa brkyang pa dang bskum pa tsam yang mi mthong pa ni kun nas dkrugs pa'o/ /de la nyi ma'i 'od zer shar bas mun pa'i ngo bo dag cing rab tu gsal bar 'gyur ba'i dus su mun pa gsal bar byed pa dang /snang ba grub par bya ba med pa dang 'dra bar thog ma med pa nas/ mi shes pa'i dbang gis tha dad du brtag pa'i 'khrul pas kun nas non cing gnyis med kyi ye shes phyogs tsam yang ma mthong la/ rtogs pa sna tshogs kyis dkrugs shing rtog pa'i dra ba las byung ba'i nyon mongs pa dpag tu med pa dag gis/rnam par smin pa gnas pa dag la/ bla na med pa yang dag par rdzogs pa'i sangs rgyas de skyed par byed pa'i mar gyur pa'i man ngag brgyud pa dang ldan pa dang / de yang sgrar 'brel pa dang lus kyis byin gyis brlabs pa rjes su slob pa'i gdams pa ni nyi ma lta bu ste/de dag gi nus pas mun pa lta bu 'khrul pa rdul tsam gyi zug rngu bcad do/ /snang ba stong pa yul du byas pa'i blo'i bdag nyid spangs nas/ snang ba dang stong pa dbyer med pa nyid du rtogs pa'o//blos gzhag gi dngos po dngos med du de ltar 'gyur zhe na/ gsung rab las/ srid pa gsum po yongs gyur pa/ /gzung dang 'dzin pa rnam spangs pa'o/ /yang na thabs ni thams cad kyi/ /dngos po dngos med mtshan nyid rtogs/ /zhes bya ba'i phyir rtog pa kho na'o//gal te dngos po thams cad ni ye nas dngos po med pa ste/ dngos po zhes bya ba gang zhe na bstan par bya ste/ sa dang chu dang med dang rlung gcig tu gyur pas zhes bya ba la/ sa ni sra ba ste brtan par byed pa'o/ /chu ni gsher ba ste skyed par byed pa'o/ /me ni tsha ba ste smin par byed pa'o//rlung ni g.yo ba ste yang zhing skyod par byed pa'o/ /de dag thams cad ni rang bzhin du grub pa ma yin yang / bag chags kyi stobs 'khrul pa'o/ /de la dngos po zhes bya ba ste/ gcig tu gyur pa ni skye med kyi rgyas gdab pa'o/ /gal te rgyas gdab pas rtogs pa de dag dngos po nyid kyis rtogs na ni dug gis dug sel bar mi nus pa dang 'dra'o//dngos med dngos med kyis sel na/ rtog pa dang bral ba'i phyir rgyas gdab par yang mi rigs so zhe na/ ma yin te dngos po nyid kyis dngos po sel te/ dper na dri mas dri ma 'khru ba dang 'dra'o//de yang gsung rab las/ rdo rje snying po snying rje che/ /dngos po nyid kyis rnam par grol/ /zhes gsungs pas so/ /de bas na dngos pos dngos po la brtags pas dngos po sel te/ gal te khams gsum pa thams cad sangs rgyas par rigs te/ dngos po la longs spyod pa'i phyir ro zhe na ma yin te/de dag gis ni dngos po yongs su ma shes pa ste/ brtag pa'i phyir grol bar mi 'gyur te/ gang gis yongs su shes pa de nyid grol bar 'gyur bas na/ gsung rab las/ dngos po 'ching bas bcings gyur pa/ /yongs su shes pas grol par 'gyur//zhes gsungs pa'i phyir ro/ /gal te yongs su shes pas ji ltar rtogs she na bstan par bya ste/ 'jig rten gsum dbyer med pa'i rang bzhin ni lhan cig skyes pa'i ye shes te zhes bya ba la/ 'jig rten ni 'jig cing rten pa'i brtan pa dang g.yo ba'i bdag nyid do//gsum ni 'dod pa dang gzugs dang gzugs su med pa'o/ /de dag gi rtog pa ni nyon mongs pa bag chags dang bcas pa'o/ /de spang ba ni bla ma las 'ongs pa'i skad cig bzhi dga' ba dang bcas pa'o/ /dbyer med par byed pa ni bzhi pa'i gdams ngag ste/bde ba deng stong pa dbyer med pa'i rang bzhin lhan cig skyes pa'i ye shes so/ /gal te bzhi pa bstan pa tsam gyis de ltar 'gyur ram zhe na/ ma yin te blugs shing bkrus pa zhes bstan pa'i phyir dang / /ngag gi spyod yul las 'das pa'i phyir dang / de kho na nyid bstan par mi nus pa bla ma'i gdams ngag gis bstan kyang / thos pas mngon du bya bar mi nus pa'i phyir ro/ /de bas na gsung rab las/ /smra pos myong de kho na/ /nyan pas mngon sum ma mthong ste/ /'on kyang sgra las pa ste/ rnam rtog gzugs brnyan nyid yin no//zhes gsungs so/ /de dag dpyad pa rtogs pa'i gdeng dang ldan pa dang / man ngag gis nyams su myong bar byas nas 'bad pa med pa'i ting nge 'dzin dang ldan no/ /bcos ma'i rtog pa mi spyod zhing / /byas pa'i rlabs mi ldang te med do/ /de yang bdag nyid ji lta bu zhe na bstan par bya ste/de'i bdag nyid ni gzhan du mi 'gyur te/ stong pa dang snying rje dbyer mi phyed pa'o/ /zhes bya ba la/ de'i zhes bya ba ni lhan gcig skyes pa'o/ /bdag nyid ni gnas thabs so/ /gzhan ni yul du byas pa'o/ /mi 'gyur ba ni rtag chad kyi dbang du mi 'gyur pa'o//stong pa ni chos thams cad skye med du rtogs pa'o/ /snying rje ni rgyu mtshan gyi sgo ste/ sems can 'khrul pa'i rgyu mtshan dang / bdag nyid kyi nyams su myong pa'i rgyu mtshan no/ /dbyer mi phyed pa ni ma bcos pa ste gnyis med do/ /de dag gsal bar bya ba ni/ /bcom ldan 'das kyis gsung rab las//rkyang ma shes rab rang bzhin te/ /ro ma thabs kyis yang dag gnas/ /sdig spangs pa ni dbus nyid du/ /gzung dang 'dzin pa rnam par spangs/ /de ni gnyis min gnyis mtshungs pas/ /smra ba'i brda min phyag rgya che/ /grub par byed pa'i rgyu dang lam//zhes bya ba la/ bcom pa ni bdud bzhi'o/ /yon tan drug mnga' ba ni ldan pa'o/ /rtogs pa de bzhin nyid du thugs su chud pa ni 'das pa'o/ /gsung ni bka'o/ /rab ni bden pa gsungs pa ste/ /slu ba med pa'o/ /las zhan pas ni gdams pa tshad ma dang mi ldan pa'i don du lung 'bras bu'i gtan tshigs su sgrub pa'o//rkyang ma ni rtsa sti khrag 'bab pa'o/ /de dag ni shes rab 'byed pa'i bdag nyid rtsa ba'i las rno ba'i rlung gis byed pa'o/ /A li bcu drug gi nus pa gnas pa dang / g.yon na gnas pa dang / rig ma las bde ba'i ye shes myong ba ni 'di dag gtso bor gyur pa'i phyir shes rab po/ /rang bzhin ni nus pa dang bcas pa'o/ /ro ma ni khu ba 'bab pa'o/ /thabs ni mngon du rgyu zhing rig pa'i tshul gyis nyams su myong ba'o/ /kA li bzhi bcu'i nus pa gnas pa dang / g.yas su rgyu ba dang kun rdzob de lta bu'i bde ba de dag gis gtsor myong ba dang /dpa' bo la rag las pa'i don gyis na'o/ /yang dag gnas pa ni bde stong gi rten byed pa'o/ /sdig ni mtha'o/ /spangs pa ni mtha' dang bral ba'o/ /ma ni yon tan gyi 'byung gnas so/ /dbus ni a ba d+hU tI'o/ /nyid ni dbyer mi phyed pa'i rlung ngo //gzung ba ni phyi'o/ /'dzin pa ni nang ngo / /rnam pa ni gnyis las grol ba'o/ /grol ba de ni bde ba dang stong pa gnyis su min no/ /gnyis spangs pa yang ma yin te/ dbyer mi phyed pa'i phyir mtshungs pa'o/ /de tsam du yang mi 'dzin pas na sgro skur dang bral ba'i phyir smra ba'i brda gtan la dbab par mi nus pa'i phyag rgya chen po ste/de don du grub pa'i rnam par smin pa'i rgyu dang lam mo/ /de la yang ji ltar 'bad par bya zhe na/ de ltar rab tu 'bad pas 'bras bu nye bar rnyed pa'i rgyur gyur pas lam du shes par bya'o zhes bya ba la/ de ltar ni gang du bstan pa de ltar ro//rab tu 'bad pas ni ma yengs pa'i nges pa dang bcas pa'o/ /'bras bu ni phyag rgya chen po'o/ /nye bar ni skye ba 'di'o/ /rnyed pa ni mi slu ba'o/ /rgyur ni ma bcos pa'o/ /gyur pa ni rigs mthun pa'i rgyu'o/ /de las goms par bya ba'i tha tshig tu lam shes par bya'o zhes pa'o//lam de yang ji lta bu zhe na/ bstan par bya ste/ lam rab tu mkhas pas rtogs par 'gyur te/ de dag la goms par byas pas 'gog pa dang lhan cig skyes pa'i rang bzhin dbyer mi phyed par mngon du byed par 'gyur zhes bya ba la/ lam la rab tu mkhas pa ni shes rab kyis thabs la rgyas btab pa dang / thabs kyis shes rab la rgyas btab pa dang / gnyis med kyis rgyas btab pa'o/ /de la yang snang ba thug phrad dang / du ma ro gcig dang / sna tshogs don mthun pa'i mtshan ma rang sar grol ba dang / goms pa dang khong du chud pa'o//gnyis pa ni lus kyi sna rtse bskul ba dang / bdag byin gyis brlab pa bskul ba dang / yid kyi sna rtse bskul ba'o/ /gsum pa ni bde ba dang stong pa dang gnyis su ro mnyam pa'o/ /des 'bras bu 'byin pas na rtogs par gyur te/ de dag la goms par byas pas zhes bya'o//'gog pa ni snang zhing grags pa'i chos rnams so/ /lhan cig skyes pa'i rang bzhin dbyer mi phyed pa ni chos kyi phyag rgya mthar phyin pa ste/ shes pa rnams sngon du byed par 'gyur ro/ /de yang nges par bya ba'i phyir yang gsungs pa ni/ /'di la bsal bya ci yang med//gzhag par bya ba cung zad med/ /yang dag nyid la yang dag blta/ /yang dag mthong na yang dag grol/ /zhes bya ba la/ 'di la ni chos kyi phyag rgya'o/ /gsal ba ni snang ba chos kyi sku yin pa dang / bla ma yin pa dang / /gdams pa yin pa dang / glegs bam yin pa dang / med pa zhig la bsal yang mi dgos/ yod na bsal yang mi sol ba'i phyir bsal bar bya ba med do/ /de bas na gsung rab las/ gzugs ni rang gi ngo bo med de/ mthong ba po yang med do/ /sgra med de thos pa po yang med do/ /dri med de snom pa po yang med do/ /ro med de myong pa po yang med do//reg med de reg pa po yang med do/ /sems med de bsam par bya ba yang med do zhes gsungs pas so/ /gzhag pa ni bsgom pa ste/ de yang gnyis yod na de'i phyir bsgom par rigs pa las gnyis med pa'i phyir bsgom par bya ba cung zad med do/ /de bas na gsung rab las/bsgom bya med cing sgom byed med/ /gsang sngags med cing lha yang med/ /spros pa med cing rang bzhin du/ /sngags dang lha ni yang dag gnas/ /zhes bya bas so/ /de bas na dmigs par bya ba cung zad kyang med do/ /de'i phyir snang ba skye ba dang sems skye med gnyis mi byed pa ni yang dag nyid la zhes bya'o//de la ci yang ma yin pa'i tshul gyis blta ba la/ yang dag blta zhes bya'o/ /de mngon du gyur pa ni yang dag mthong ba ste/ de ma thag tu skad cig nas/ rnam par grol bar 'gyur ro zhes bya ba'i phyir na rkyang ma dang / ro ma gnyis kyi dbus ni sdig spangs ma ste/ lha na cig skyes pa'i ye shes so zhes bya ba ni go sla'o/ /gal te grol ma de dag goms pa las byung bas na/ goms par ji lta bu zhe na/ de nyid la rtag tu goms pa ni tsa na ra tsa ba bzhin no zhes bya ba la/ yul ra ma la'i rgyal po tsa na ra tsa ba bsnyungs pas//drang srong rig pa mkhan la brtag pa dang / rgyal po'i blon po bram ze mdun na mngon/ tsa na ra tsa la 'bru mar ka to ra gang bskur bas/ lho phyogs sa gzhi rab tu 'dar ba la btang ste/ rgyal bu stobs dang ldan pa gnyis kyis ral gri rab tu rno ba thogs te/ 'di dag dpag tshad gcig tu skyol bar bo na/khyod lus dum bu brgyar gtubs te/ /yab rgyal po yang 'da' bar 'gyur ro zhes pas/ rkang pa gnyis rab tu brtan nas/ lag pa gnyis kyi g.yas g.yon nas gzung ste/ shes pa dam du brtan par bcas te/ mig mar khu las gzhan du ma yengs par byas pas mthar phyin te/rgyal po bsnyun dngas nas/ blon pos rgyal po'i srid rab tu sgyur ba'i dbang thob po/ /dpe de bzhin du chos kyi sku'i rgyal po/ /rnam par rtog pa'i nad kyis bzung ba dag la/ bla ma'i rig pas brtags te/ tha mal gyi shes pa'i blon pos bde ba chen po'i sa gzhi la mnyam pa'i rtog pa dang ldan pa'i phyogs su bltas te/thabs dang shes rab kyi rkang pa nges pa'i shes pas brtan par byas nas/ bde ba dang stong pa'i lag pa g.yas g.yon gyis/ /gnyis med kyi ka to ra khyer te/ nyams su myong ba'i mar khu 'thor bar mi 'gyur bar dam bcas nas/ma yengs pa dang yid la mi byed pa'i mig gnyis kyis bltas te/ 'on te skye med kyi nyams dang 'brel te/ mngon par zhen pa'i rgyal bus rtag chad kyis mtshon btab ste/ mtha' gnyis su gsod par 'gyur snyam pas goms par byas nas/chos kyi sku'i rgyal po rtog pa'i nad dang bral zhing / sku gsum dbyer med pa'i rgyal srid la dbang bar 'gyur ro/ /de dag gi thabs de dag gang las 'byung zhe na/ de rtogs pa dang don thams cad lhan cig skyes pa'i rang bzhin gnyis su med de/ sems rtse gcig par 'jug pa ni bla ma dam pa'i gdams ngag nyid las so zhes bya ba la/gong du bstan pa de rtogs pa dang / nyams su myong ba 'di lta bu 'char bar 'gyur te/ phyi rol gyi don sngon po la sogs pa thams cad lhan cig skyes pa'i rang bzhin gnyis su med de bsam gyis mi khyab par 'gyur ro//de la dang po lhan cig pa la goms pa dang / rtogs pa dang tha mi dad par bzhag pa dang / rtog pa nyams su myong ba la thim pa dang / yid la mi bya bar gzhag go/ /de las rtog pa skyes nas/ sngar gyi yid la mi byed pa dang / tha mi dad par gzhag pa'o/ /de lta bu'i sems rtse gcig par 'jug pa ni/bla ma dam pa'i gdams ngag slob ma la bshad pa spros pa med pa'i don/ lan du mar gsol ba btab pa dang / tshogs kyi 'khor lo'i dus su byung ba dang / nyams su myong ba'i 'bar ba'i shugs kyi spyod pa'i dus su ched du ma gtad bar byung ba nyid las mngon du byed par 'gyur ro//de bas na chos kyi phyag rgya ni phyag rgya chen po bsam gyis mi khyab pa'i rgyur gyur pa'o zhes pa ni go sla'o/ /gal te mnyam pa la gzhag na gnyis med du myong yang / /rjes thob sna tshogs su snang bas nyams su myong ba dang bral lo zhe na/ bstan par bya ste/ de yang gsung rab las/gzugs dang sgra sogs skye ba med/ /gang gis lhan cig skyes rig na/ /gzugs sogs blo yis myong dus su/ /skye med bcos myong ma yin nam/ /gang zhig star bu myong ba yis/ /skyur ba mthong tsam nyid na yang / /star bu'i ro dang bcas myong bzhin/ / snang stong gnyis med bder ro gcig/ /ces 'byung bas so zhes bya ba la/ dang por bla ma'i zhal las thos pa'i don bdag nyid kyi blos dpyad pas gzugs dang grags pa la sogs pa'i chos thams cad skye med du rtogs par byas la/ don de dag gnyis med du nyams su myang ba ni/gang gis lhan cig skyes par rig pa ste/ de dag la goms na tha na rmi lam gyi gnas skabs na yang / gzugs la sogs pa blo yis gang nyams su myong ba'i dus su skye ba med pa dang bcas par myong ba nyid ba ma yin nam/ dper na skyes pa dang bud med gang zhig gis sngon du star bu myong ba'i rgyud mtshan gyis//phyir skyur pa gzhan mthong tsam nyid na yang / star bu la sogs myong ba'i ro dang khyad med de/ /de dang bcas pa myong ba bzhin no/ /de bas na snang ba sna tshogs su shar ba'i rjes thob kyis snang bar mi 'gyur te/ stong dang gnyis su med pa'i rtogs pa'i grogs su 'gyur ro/ /chos kyi phyag rgya rnam par smin par 'bras bu zhes bya ba ni/ phyag rgya chen po skyer rung pa dang / tshogs bsags pa'i rnam pa'i smin pa dang / bla ma dam pa bstan pa'i gdams pa'i rnam par smin pa dang las chung la 'bras bu che ba nyid kyis so//de yang gsung rab las/ rnam smin de las bzlog pa ste/ las chung 'bras bu che ba'i phyir/ /zhes pas so/ /nges par bstan pa ni bde stong spyi'i rnam pa ma bcos pa nges par bstan pa'o/ /gnyis pa ni dang po ltos pas so/ /de dag gis ni chos kyi phyag rgya mdor bsdus te bstan pa'o//nu ma gnyis te lag mthil gnyis/ /thal mo gdab ste mnyam du gzhag /a ta ra ta/ ngu da e/ a aM sar/ da ni 'bras bu phyag rgya chen po bstan par bya ste/ a phyag rgya chen po ni/ phyag rgya yang yin la chen po yang yin pa'i phyir phyag rgya chen po'o zhes bya ba la/a ni a ka ma ta sa A ste/ rgyu lam 'bras bu gsum du skye ba med pa'o/ /de yang rten 'brel las skyes pa dang / ma skyes pa dang tha mi dad pa'o/ /phyag rgya ni 'da' ba'i don to/ dpe dang yod pa dang / yin pas mi 'da' ba'o//de yang nam mkha' lta bu dang / gyad kyi nor bu lta bu dang / sdug bsngal gyis brtul gyis brtul ba lta bu yin la/ chen po ni las dang chos dang dam tshig dang gsum gyi mchog gi mchog tu gyur pa'i phyir yang yin pas na phyag rgya chen po'o/ /phyag rgya chen po la 'bras bur gzhag pa'i rgyu mtshan ci yod ce na bstan par bya ste/de yang rang bzhin med pa'i ngo bo nyid/ sgro skur gyis dben pa zhes bya ba la/ phyag rgya chen por rigs pa dang / de yang rang bzhin med pa ni rnam pa sna tshogs pa'i skad cig ma 'dzin pa dang bcas pa dang / rnam par smin pa brtag dpyad dang bcas pa dang /rnam pa med pa gzung 'dzin dang bcas pa'i dri ma ste/ /de dag gi yid rang bzhin med pa ni dri ma dang bral bar rigs so/ /de dag gi ngo bo nyid ni sgro skur dang bral ba ste/ dper na shing sna tshogs pa las mi bus pa me lce gcig tu gyur te/shing zad pa'i dus su me mi gnas pa bzhin du/ snang grags sna tshogs pa las skyes pa'i me lce gcig tu gyur te/ skye med rtogs kyi rjes su skyes la med tsam du yang mi 'dzin te/ de dag gang du yang mi 'dzin pa ste/ de dag gis rtogs pa de yang sangs rgyas pa ste/rtog pa tsam la rag las pa'o/ /de bas na/ skad cig gcig gis rdzogs sangs rgyas/ /zhes pa'i phyir dgag bsgrub dang bral bar rigs so/ /dben zhes pa stong pa'i tha tshig go/ /phyag rgya chen po nyid ji lta bu zhe na re ba bcad pas te/ shes bya'i sgrib pa la sogs pa spangs pa zhes bya ba la shes bya'i sgrib pa ni nyon mongs pa dang /nye ba'i mongs pa spangs dka' ba shin tu phra ba rnams so/ /sogs pa ni nyon mongs pa dang nye ba'i nyon mongs pa shin tu rags pa rnams so/ /spangs pa ni spang bya ser sna dang / 'chal ba'i tshul khrims dang /gnod sems dang / le lo dang / rnam par g.yeng ba dang / 'chal ba'i shes rab rnams la/ sbyin pa la sogs pa spong bar 'dod pa med pa ni gnyen po la re ba med pa'o/ /bskyed pa dang rdzogs pa 'di gnyis kyis legs par sbyangs pas 'bras bu zhig thob snyam pa med pa ni/de kho na nyid la re ba med pa'o/ /'bras bu rdzogs pa'i sangs rgyas zhig logs nas 'thob po snyam pa ni 'bras bu la re ba med pa'o/ /de yang nyon mongs pa dbang du slong ba dang / chos thams cad kyi de bzhin nyid bsgom du med pa dang / bde ba chen po rang chas su yod pa'i phyir ro//de yang chos rnam pa lnga dang ldan te/ ston ka'i nyi ma phyed kyi nam mkha' ltar dri ma de pa zhes bya ba bzhi la/ ston ka'i dus kyi nyi ma phyed kyi nam mkha' ni sprin dang 'ja' tshon dang / na bun dang / khug rna dang / rlung gis ma dkrugs pa dag ni ma skyes shing /rang bzhin med la 'das pa dang / ma 'ongs pa dang / da ltar gyi dus su khyab pa dang / gdod ma nas mi 'gyur ba dang / 'khor ba thams cad la khyab bzhin du phyag rgya chen po de dag kyang ngo bo nyid kyis ma skyes pa dang / yod pa dang med pa dang gnyis dang gnyis med pa'i rang bzhin med pa dang /'khor ba'i dus dang sbyangs pa dang / khyad par du sbyangs pa dang / bla na med pa dang / mngon du gyur pa'i dus rnams la yang phyag rgya chen po nyid do/ /de nyid las sna tshogs su snang yang 'gyur ba cung zad kyang med de dper na nam mkha' la sprin dang 'ja' tshon la sogs pa snang yang nam mkha' las mi 'gyur ba dang /chu la rlabs dang / rnyog ma dang / lbu ba dang gnyer ma la sogs pa chu nyid las mi 'gyur ba bzhin no/ /de yang yungs kar la mar gyis khyab bzhin du 'khor ba'i bdag nyid la khyab pa'o/ /de yang phyag rgya chen po nyid snang du zad/ khyab bya khyab byed kyi tshul ni ma yin no//de bas na gsung rab las/ da ni ston pa nga ni chos/ /nga ni tshogs ldan nyan pa nga'o/ /'gro ba'i ston pa bsgrub byang / /'jig rten pa nga 'jig rten nga / /mchog dga'i mkha' ste bral ba'i mdun/ /lhan cig skyes dga'i ngo bo nga / /mun pa la ni sgron med bzhin/ /bu ga de bzhin shes byed gang //zhes bya ba shes par bya'o/ /de dag la sku'i bye brag ji ltar bzhag ce na bstan par bya ste/ yon tan thams cad kyi 'byung gnas zhes bya ba la/ yon tan ni chos dang longs spyod dang sprul pa dang ngo bo nyid de/ de yang rang gi nyams su myong ba la gnas te/ sgro skur dang bral ba dang /nyams su myong ba dang / sna tshogs su shar ba dang / gnyug ma'i ngo bo gcig pa'o/ /de yang so ma dang rang dga' ba dang / lhug pa'o/ /de yang rje btsun gyi zhal snga nas/ /kye ho grogs dag lhan cig skyes pa de/ /gzhan nas mi rnyed bla ma'i zhal la dris/ /don dam zhal gyi ngo bo ma rtogs nas//yid ni chu byed rlung ni 'chad ba med/ /ces pa ni/ skad cig ma skyes pa la ma 'gag pa'i ngo bo ji lta ba'o/ /gnyis pa ni rje btsun pa'i zhal snga nas/ ji ltar gzings la 'phur ba'i bya rog bzhin/ /bskor zhing bskor zhing slar yang de ru 'bab/ /ces bya bas bsam gyis mi khyab pa'o//gsum pa ni rje btsun pa'i zhal snga nas/ glang chen lobs nas sems tshags tshud pa ni/ /'di ni 'gro 'ong bcas nas dal pa ste/ /de ni 'di ltar rtogs so chos ci dgos/ /zhes bya ba ni bde zhing nga ba rgyun du'o/ /de ni thams cad kyi 'byung gnas so/ /de bas na/de ltar ngo tsha med smra mkhas pas zhes bya bas so/ /de lta bu'i ye shes ni phun sum tshogs pa thams cad kyi gzhir gyur pa zhes bya ba la/ phun sum tshogs pa ni ji ltar 'dod pa'i bde ba tshogs pa'o/ /thams cad kyi zhes bya ba ni 'khor ba'i bde ba dang / mya ngan las 'das pa'i bde ba chen po'o//gzhir gyur pa ni nor bu lta bu ste/ 'byung ba bzhir gyur pa'o/ /de yang ji ltar blta zhe na/ dag pa dang / dam pa dang / bsam gyis mi khyab pa/ 'khor ba dang mya ngan las 'das pa gnyis su med pa'i rang bzhin zhes bya ba la/ lhun gyis grub pa ste gdod ma nas sangs rgyas pa ni dag pa'o//bde ba dang stong pa zung du 'jug pa ni rtag pa dang chad pa'i mtha' las bral ba ste/ dam pa'o/ /bsam gyis mi khyab pa ni yengs pa'i mu dang bral ba'o/ /de yang gsung rab las/ sangs rgyas kun gyi ye shes ni/ /bya ba cung zad med pa ste/ /'di la yengs pa'i mu dang bral//bsam mi khyab kyi dus nyid do/ /de lta bu'i ngo bo dag gis 'khor ba dang rnam par rtog pa'i bdag nyid/ ye shes skye ba med pa 'bar bas/ /mya ngan las 'das pa gnyis su med pa'i rang bzhin las rtogs na bcu bzhi pa'i sa la ma rtogs na bcu bzhi pa'i sa la ma rtogs na 'khor ba nyid kyi phyir ro//de yang rje btsun pa shar phyogs kyi dur khrod pa'i zhal nas/ rgyu med pas gdod ma nas sangs rgyas te/ dag pa dang sems can thams cad la rang chas su yod pas dam pa ste/ ma ni ngag gi spyod yul du rung pa dang / so sor rtog pa'i shes rab yod pa'i phyir/ mu thams cad dang bral ba ste bsam gyis mi khyab pa'o/ /nyams su myong ba nyid chu bo ltar dus thams cad du nyams su myong bas/ gnyis kyis mi phyed pa ste/ 'khor ba dang mya ngan las 'das pa gnyis su med pa'i rang bzhin no/ /de dag la gzhan don du 'byung ngam zhen bstan par bya ste/dmigs pa med pa'i snying rje chen po'i lus zhes bya ba la/ dmigs pa med pa'i snying rje chen po dang / smon lam thun mong ma yin pa'i stobs kyis/ lus gzugs sku rnam pa gnyis/ snang ba shin tu dag pa dang / dag pa las 'byung ngo //lus de kho na nyid las gzhan nam zhe na bstan par bya ste/ bde ba chen po rang bzhin gang yin pa'i ngo bo nyid do zhes bya ba ste/ bde ba chen po ni sgro skur dang bral ba la/ yid la mi phyed pa nyid kyi sku'o/ /de dag gi rang bzhin gang yin pa ni gzugs kyi sku ste/ ngo bo nyid do/ /gal te yid la byed pa'i 'gal tshabs can du 'gyur ba su zhig yod ce na bstan par bya ste/ gsung rab las/ de ltar yid kyi mi byed pa'i chos ni dge ba'o/ /yid la byed pa'i chos ni mi dge ba'o zhes bya ba la/ a ma na se zhes bya ste/ brda dang sgra'i bye brag gis shes par bya'o//de la yang a ni skye ba med pa/ ma na ni yid de rtogs pa/ se ni byed pa'o/ /de bas na rtogs pa dang / byed pa ni a 'gegs par byed pas de nyid du bkag pa'i phyir yid la mi byed pa'o/ /de'i phyir mi byed pa byed pa byed cing / byed pa mi byed ba'i phyir dge ba'o//gzhan mi mthun pa'i phyogs la ma na s+ye zhes bya ste/ rtogs pa med pa'o/ /de dag ni yid la byed pa'i chos te/ mi dge ba 'byung ba'i phyir 'khor bar brtag par bya ste/ gal te klu dag sha ka'i gtsug gi nor bu bzhin du bstan par mi nus so//ma yin te/ bla ma dam pa'i zhabs kyi bka' drin gyis rnam par thams cad kyi mchog bka' drin nyams su myong bar nus so/ /gal te phyag rgya chen po la skad cig ma bzhir mi gzhag pa ci zhe na/ dri ma med pa dang rang rig pa yin pa'i phyir ro/ /'o na bsams na dri mar gyur pa'i phyir//bsam par mi rigs so zhe na/ gnas pa med pa 'bad pa dang bral ba'i ye shes bsam gyis mi khyab pa ste/ dpyad pa las ma byung bar bsgom mo/ /de dag kyang bsam par bya ba dpyad nas mi sems ba de'i tshe bsam pa mi 'byung ba'i ye shes lhun gyis grub pa'i mi rtog par brjod do//de bas na bsam par byed pa'i rgyu med/ rgyu med pas bsam bya med pa ma yin te yod do/ /chad par 'gyur ro zhen ma yin te/ de bzhin dang dag pa'i mtha' sngon du byas pa'i nyams su myong ba'i phyir mi 'gyur ro/ /'o na rnam par rig pa dang khyad med do zhe na/'dir ni sgyu ma lta bu yan sgro btags pa ste/ /dbu mar sgro btags par zhen pa med do/ /rnal 'byor sbyor ba dang / /dbu ma la khyad ci yod ce na// /rnam rig ni rnam par rtog pas brtags pa'i shes pa dngos su yod par rig la/ ma rig pa'i bag chags kyi dngos po yod pa ni rjes su thob po//rnam pa dang gnyis med kyi tshogs su nyams su myong pa ni gsal ba ste ma rtogs pa'o/ dbu ma ni sems can gyi don phyir kun rdzob tu tha snyad brtags la/ /byis pa dag la don dam zhes mthong par bya pa'i phyir ji srid du blos yul du byas nga thams cad ni kun rdzob tu brtags la//de yang mthun pa'i rkyen tshogs pa tsam la snang zhing / snang ba'i rgyun slu pa'i chos can yin pas sgyu mar mthong par byas te/ /de yang bdag la ltos nas skad cig mar bzhag la/ cha shas dang bcas pa'i phyir rang bzhin med pa ste/de yang rtag pa dang chad pa gnyis med pa las 'das pa ste/ rnam grangs ma yin pa'i don dam pa'i bden pa dri ma med pa'i cha blo yul du ma byas sgro skur dang bral ba'o/ /de yang smig rgyu la chur 'du shes pa'i dus nyid nas/ chu med de chur 'du shes pa dang cu med pa gnyis tha mi da pa nyid la/ smig rgyu bsal bar bya ba nyid dam cu bsgrub pa cung zad kyang med pa bzhin du 'khor ba bsal bar bya ba 'am/ mya ngan las 'das pa bsgrub par bya ba med do/ /de yang zung du 'jug pa ste/ gang la gnyis kyi 'du shes med pa'o//de yang mthar thug pa'i don ni/ /gsung rab las/ kun du rtog pas ma brtags pas/ /rab tu mi gnas pa yi sku/ /dran pa med pa'i yid la byed/ /dmigs pa med la phyag 'tshal lo/ /zhes bya ba la de dag ni lta ba dang bsgom pa dang spyod pa dang /dbyer mi phyed pa gsum du shes par bya'o/ /de yang kun du rtog pas ma brtags pas dpyad pa gnyis dang bral ba ni spyod pa'o/ /bde ba dang stong pa rab tu mi gnas shing / /'dod pa gnyid dang bral ba ni bde ba chen po'i sku ste lta ba'o//sbyor ba dang / dngos gzhi dang mjug gi go rims kyi dran pa med pas yid la byed pa ni bsgom pa'o/ /gsum du brtags pas dbyer mi phyed pa ni dmigs pa med pa ste/ de dag la goms pa med pa ni phyag 'tshal ba'o zhes bya ba gang yin pa de dag gi phyag rgya chen por rig par bya'o//de lta bu'i phyag rgya chen po ci yang ma yin pa'i bde ba chen po las dam tshig phyag rgya mchog gi 'bras bu skye bar 'gyur ro zhes bya ba ni go sla'o/ /gal te phyag rgya chen po lhan cig skyes pa las dga' bral dam tshig phyag rgya 'byung bar mi rigs so zhe na/de la yang gsung rab las/ /gang zhig n+ya gro d+ha 'dod pas/ /ma ri sha dag srung 'gyur na/ de ni ma ri sha nyid de/ /rgyu dang 'bras bu dbyer med bzhin/ /bde bas gang bar 'dod pa la/ /phyag rgya chen po thob gyur nas/ /grub pa med par rmi lam lta/ /gzugs ni snang bar 'gyur ba yin//zhes bya ba la rgyal po gang zhig bsil ba la mos pas/ shing n+ya gro d+ha 'dod pa'i phyir shing ma ri sha dag bskrun par gyur na n+ya gro d+ha skye bar 'gyur te/ rgyu ma ri sha las n+ya gro d+ha skyes pa ni ma yin no/ /n+ya gro d+ha de dag shugs kyis 'byung bar zad kyi ma ri sha las 'byung ba de ni ma ri sha nyid de/rgyu dang 'bras bu dbyer med pa bzhin du grags chen gyis dang / de las gzhan pa'i sems can rmas la bde bas gang bar 'dod pa las phyag rgya chan po mchog thob par gyur nas longs spyod rdzogs pa dang sprul pa'i sku grub pa med par rmi lam lta bu'i gzugs ni shugs kyis snang bar gyur pa yin no//a de dag ni phyag rgya chen po dri ma dang bral ba'i 'bras bu nges par bstan pas te/ gnyis pa la ltos pa'i phyir gsum pa'o/ /de ltar bdag don yongs su rdzogs par bstan nas/ /da ni gzhan don phun sum tshogs par bya ste/ hUM dam tshig gi phyag rgya ni zhes bya ba la/hUM ni de bzhin gshegs pa thams cad kyi thugs gnyis su med pa'i yi ge ste/ ha ni de bzhin gshegs pa thams cad kyi ye shes te de dag yod pa dang / med pa dang gnyis dang gnyis med pa las mi skye ba'i phyir rgyu med pa'o/ /u ni rtag pa dang chad ba dang /bem po dang / rigs pa dang / 'khor ba dang mya ngan las 'das pa'i rnam par rtog pa'i tshogs dang bral ba'o/ /a ni mtha' thams cad dang bral ba ste/ bde ba chen po'o/ /ye shes lnga'i tshul nyid kyang shes par bya'o/ /de bas na mar gyur pa'i phyir bskyed pa dang / sna tshogs su 'char ba'i phyir spro ba dang de nyid las gnas pa'i phyir bsdu ba dang /rang rig mtshan nyid yin pa'i phyir 'bras bu dam tshig gi phyag rgya'o/ /dam tshig ni snying rje chen so kun nas bslang pa'i bsam pas slob dpon nam dkon mchog gsum gyi spyan sngar gzhan gyi don las 'ches pa dang 'jig rten pa'i sa nyid la gzhan gyi don dgos pa dang chos kyi phyag rgya nyams su myong nas gzhan gyis spyod pa nyid do//phyag rgya ni de lta bu'i smon lam gyi stobs kyis sa bcu'i byang chub sems dpa' la rten gzhal yas khang brten pa lha'i 'khor lo dang bcas pa/ mtshan dang dpe byad kyis rab tu spras shing dbang po'i spyod yul du gyur pa ste/ skus chos ston pa rnams dang / sgrub po dag la rang gi lhag pa'i lhar gnas pa dag la chos ston pa dang / mthun par snang ba la shAkya seng ge lta bu dang / thun mong du sna tshogs su shar ba ni/ gzhan gyi don phun sum tshogs pa'i 'bras bu de/phyag rgya chen po rnam par dag pa'i chos sku'i gtso bo las/ snang ba shin tu dag pa dang / snang ba dag pa dang / snang ba thun mong ba rnams la longs spyod rdzogs pa dang sprul pa'i sku'i rnam pa 'byung bar 'gyur ro/ /de bas na slob dpon d+harmA kIrti'i zhal snga nas/de'i phyir yang dag yang dag min/ /gang gang shin tu sgom pa las/ /bsgom pa'i stobs kyis rdzogs pa dang / bde gsal mi rtog dgos pa can/ /zhes bya bas rtogs par bya'o/ /de yang phyag rgya chen po nyid snang ba'i phyir/ rang bzhin te zhes bya ba la/ de yang rnam med rjes thob lta bu ni ma yin te/ nor bu rin po che dang dpag bsam gyi shing dang / bum pa bzang po bzhin no/ /de bas na 'bras bu dam tshig gi phyag rgyar rig par bya'o/ /sems can gyi phyir 'das pa'i rgyun nye bar bzung bar rdo rje 'dzin pa he ru ka la sogs pa zhes bya ba la/sems can gyi don ni theg pa chen po rnams kyis bsgrub bya yin la/ de nyid kyi phyir snying rje dang / smon lam gyi phyir 'das pa ste/ rgyun ni des 'brengs ma chad par nye bar bzung bas/ sgrub byed yin la sgrub pa la rdo rje 'dzin pa he ru ka dang / rgyud sde bzhi'i lha tshogs la sogs pa ste/ gzhan gyi rtog pa dang mthun par 'phros pa ni spro ba dam tshig gi phyag rgya'o/ /rgyu'i dus su ji ltar bslab par bya zhe na bstan par bya ste/ dam tshig gi phyag rgya rdo rje slob dpon gyi dbang blangs te zhes bya ba ni bshad 'dzin no/ /de dag gi lam ji lta bu zhe na/lha'i 'khor lo lha'i rnam pa ye shes lnga'i rang bzhin cho ga lngar brtags pa ni me long lta bu dang / mnyam pa nyid dang / so sor rtog pa dang / bya ba nan tan dang / chos kyi dbyings rnam par dag par 'gyur pa dang / smon pa'i tshul du bsgom pa de yang sbyor ba dang po dang /dkyil 'khor rgyal po mchog dang las rgyal po mchog go/ /rdzogs pa'i rim pa rnam par brtag pa ni/ /thig le'i rnal 'byor dang / phra mo'i rnal 'byor dam tshig gi phyag rgya bsgom pa'i slob dpon gyi ni bsod nams chen po byas par 'gyur ro zhes bya ba ni bum pa'i dbang gi lus ngag par byed pa ste/dam tshig gi phyag rgya nyid yin pas/ /spros pa sna tshogs pa'i phyir skal pa tha ma dag gis bsgrub par byas te/ rdo rje slob dpon gyi dbang blangs la bdag dang gzhan grol ba dang / dgrol ba dang bcas pa ste/ de yang dang por phyag rgya chen por gyur pa'i phyir snying rje dang / sangs rgyas pa'i rtags nyid kyi phyir khrus dang byug pa dang / skal pa dang ldan pa'i phyir lha'i nga rgyal dang bkra shis par bya ba'i phyir tshogs bsags pa dang / don du 'gyur bya ba'i phyir tshad med pa bzhi dang / chos thams cad kyi ngo bo bstan pa'i stong pa nyid dang /bar chos zhi bar bya ba'i phyir srung ba'i 'khor lo dang / chos thams cad rnam par thar pa'i sgo gsum gyi bdag nyid do/ /chos kyi dbyings las skye ba'i phyir nam mkha' byin gyis brlabs pa dang / rten gyi zhen pa bzlog pa'i phyir gzhal yas khang dang gnas khang gi zhen pa bzlog pa'i phyir gdan pad+ma dang /bzhon pa'i zhen pa bzlog pa'i phyir nyi zla'i gdan dang / gos kyi zhen pa bzlog pa'i phyir glang po che dang stag gi pags pa dang / rgyan gyi zhen pa bzlog pa'i phyir dur khrod kyi rgyan dang / byug pa'i zhen pa bzlog pa'i phyir thal ba'i byug pa dang / ltos pa'i 'jigs pa'i zhen pa bzlog pa'i phyir gces bu'i stang stabs dang / 'khor gyi zhen pa bzlog pa'i phyir lta'i tshogs dang / lus dag yid kyi zhen pa bzlog pa'i phyir de nyid gsum dang / skye mched kyi zhen pa bzlog pa'i phyir sems dpa' drug dang /'byung ba zhen pa bzlog pa'i phyir lha mo bzhi dang / lus kyi zhen pa zlog pa'i phyir dkyil 'khor du blta ba dang / 'dod chags dag pa'i don du bde chen gyi sbyor ba dang / zhe sdang dag pa'i don du he ru ka'i sbyor ba dang / gti mug dag pa'i don du mi shes pa'i do kho na nyid dang /nga rgyal dag pa'i don du skye ba med pa'i phyir myong ba dang / phrag dog dag pa'i don du mnyam pa la ma yengs pa'i ye shes dang / srog gcod pa'i nyes pa dag pa'i don du rtsa ba'i 'khor lo dang / ma byin par len pa dag pa'i don du rlung 'byung 'jug gi gnas dran pa dang /mi tshangs pa spyod pa dag pa'i don du phra mo'i thig le dang / brdzun du smra pa dag pa'i don du rdo rje'i bzlas pa dang / phra ma dag pa'i don du bla ma la bstod pa dang / tshig 'khyal pa dag pa'i don du rdo rje sems dpa'i yi ge brgya pa dang / ngag rtsub mo dag pa'i don du bzlas pa dang /chags sems dag pa'i don du sems la lta ba dang / gnod sems dag pa'i don du yul la lta ba dang / log lta dag pa'i don du stong nyid snying rje'i snying po can dang / ser sna dag pa'i don du ma chags pa dang / 'chal pa dag pa'i don du blo rlabs po che dang mi 'bral ba dang /khong khro bdag pa'i don du kun la rang gi lhar lta ba dang / le lo dag pa'i don du thob par dka' ba'i 'chi bar myur ba lta ba dang / g.yeng ba dag pa'i don du mgo na po bsten pa dang / mtshan ma'i rnam par rtog pa dag pa'i don du gang dang gang du skye pa de dang de la dpyad par bya ba dang /zas kyi zhen pa bzlog pa'i phyir bdud rtsi rnam pa lnga bsten pa dang tshogs su gyur par yang bya ste/ mi mthun pa dag par bya ba'i don du brda'i rab tu dbye ba la mkhas par bya'o/ /de las khyad par gyi don ni phyag rgya chen po'i dngos grub thob par bya ba'i phyir bskyed pa'i rim pa dang /mchog gi dngos grub thob par bya ba'i phyir rdzogs pa'i rim pa dang / lha nye bar bya ba'i bzlas pa dang las nye bar 'grub par bya ba'i phyir gtor ma dang / bsod nams kyi tshogs khyad par can la sogs par bya ba'i phyir tshogs kyi 'khor lo dang /dngos grub myur du thob par bya ba'i phyir sbyin sreg dang / bla ma mnyes par bya ba'i phyir maN+Dal dang / bkra shis par bya'i phyir chod pa dang / bar chad bzlog par bya ba'i phyir mchod rten gyi las dang shes pa dang bral bar bya ba'i phyir glegs bam bklags pa dang /slob ma bsdu bar bya'i phyir dbang bskur ba'i dkyil 'khor gyi cho ga dang / bya ba'i cha la mkhas par bya ba'i phyir rgyud la sogs par blta ba ste/ de dag thams cad bdag la ltos pas gzhan gsal bar bya ba yin gyi bdag dag par bya ba la ni lha'i 'khor lo la lha'i 'khor lo'i rnam pa phung po lnga la rigs lnga'i rgyas gdab par byas te/gzugs ni rnam par snang mdzad do/ /tshor ba ni rin chen 'byung ldan no/ /'du shes ni snang ba mtha' yas so/ /'du byed ni don yod grub pa'o/ /rnam pa ni rdo rje mi bskyod pa'o//de yang ye shes lnga'i rnag bzhin te/ sna tshogs su shar ba ni me long lta bu dang / rang gi ngo bo mnyam pa nyid dang / rigs lngar snang bas so sor rtog pa dang / phrin las kyi sgo nas bya ba nan tan dang / sgro skur dang bral ba'i sgo nas chos kyi dbyings su rtogs par byas la/de la mi bskyod pa dang / /rdo rje 'chang gi bshad pa kho nar zad do/ /cho ga lngar brags pa ni mngon par byang chub pa lnga ste/ nyi ma dang zla ba dag la A li kA lis brgyan pa dang / ro mnyam pa'i gong bu dang / thugs kyi yi ge dang / rdo rje rtse lnga pa dang / sku yongs su rdzogs pa rnams la byang chub kyi mchog tu sems bskyed pa dang / sems so sor rtog pa dang / gsung rnam par dag pa dang / thugs zad mi shes pa dang / sku 'khor lo dam pa'i byang chub pa'i bdag nyid can me long lta bu dang / mnyam pa nyid dang / so sor rtog pa dang /bya ba nan tan dang / chos kyi dbyings kyi ye shes dang skyar bar bya'o/ /rnam par dag par 'gyur pa ni me tog las 'bras bu 'byung ba'o/ /rnon po'i tshul ni rtse gcig pa ste/ slob dpon dag gi 'dod pa'o/ /de lta bu nyid du bsgom pa de yang rigs te/ phung po lnga ni mdor bsdus na//sangs rgyas lngar ni rab tu grags/ /rdo rje skye ma chen 'di dag kyang / /mkha' 'gro ma yi dkyil 'khor nyid/ /ces bya bas so/ /yang sbyor ba dang po ni rnal 'byor dang rjes thob kyi rnal 'byor ro/ /dkyil khor rgyal po mchog ni shin tu rnal 'byor ro/ /las rgyal po mchog ni shin tu rnal 'byor chen po'o//de lta bu'i lam de dag kyang 'di ltar shes par bya ste/ grogs dag chu yi zla ba ni/ /bden pa ma yin brdzun ma yin/ /de bzhin dkyil 'khor 'khor lo yang / rang bzhin med lus gsal ba nyid/ /ces bya ba gsung rab las so/ / de dag ni shin tu brtags pa'i phyir bskyed pa'i ri pa'o/ /da ni yod pa gsal bar byed pa bstan par bya ste/ rdzogs pa ni rang la'o/ /rim pa ni 'khor lo bzhi'i rim pa'o/ /rnam par brtag pa ni e baM ma ya'o/ /thig le ni byang chub sems kyi khu ba ste/ kha dog dang dbyibs so//bde ba dang yid tha mi dad par byed pa ni rnal 'byor ro/ /phra mo ni rlung dang rtse'o/ /rtsa ni 'khor lo rnam bzhi'o/ /de dag yid sbyor ba byed pa ni rnal 'byor te/ spros pa'i mtha' dang bral ba'i phyir dam tshig gi phyag rgya'o/ /bsgom pa ni dmigs pa'o/ /slob dpon ni dbang gi rnam par phyed pa'i gzhan gyi don no//sgrub pa po de nyon mongs pa bcom pa'i phyir bsod nams chen po byas par 'gyur ro/ /mchog gi 'bras bu ma yin nam zhe na/ de ltar yang chos kyi phyag rgya'i bdag nyid dang / 'bras bu rtogs par mi 'gyur te/ nges pa'i rgyu las nges pa'i 'bras bu 'byung bar 'gyur ro zhes gsungs so zhes bya ba la/bsod nams kyis nyon mongs pa'i sgrib pa dag par byed pa de ltar yin yang / chos kyi phyag rgya bde stong spyi'i rnam pa'i bdag nyid dang / 'bras bu phyag rgya chen po bde stong rang gi mtshan nyid rtogs par mi 'gyur te/ de ci'i phyir zhe na/dam tshig gi phyag rgya spros pa sna tshogs pa rtogs pa can gyi spyod yul zhen pa dang bcas pa 'khor ba'i rgyu de bcos ma'o/ /de bas na nges pa ma bcos pa'i rgyu las nges pa'i 'bras bu rtogs par 'gyur ro zhes gsungs pas so/ /gal te bcos ma yin pa'i phyir lam tsam du yang mi rigs so zhe na/byis pa blo chung rnams kyi ni/ /bdag med la sogs go bya'i phyir/ /dge bshes dam pa mchog bsten nas/ /rim par de bzhin bstan par bya/ /zhes bya ba'i phyir dang gsung rab las/ 'di dag thams cad sems cam du/ /thub pas gang zhig gsungs pa rnams//byis pa skrag pa spang pa'i phyir/ /gsungs kyi de bzhin nyid du min/ /zhes 'byung ba nyid kyis da bas na don dam pa rang bzhin med pa nyid de/ bskyed pa dam tshig gi phyag rgya'o/ /'dis ni dngos po rnams ni de kho na nyid bstan pa'o/ /dngos po de kho na nyid du ji ltar bsdu zhe na/bstan par bya ste/ de'i rnal 'byor pa dag gis gang byis pa rnams kyis brtags pa'i brtan g.yo'i dngos po thams cad lhan cig skyes pa'i nyams su myong ba'i lam gyi rtog pa dang ro gnyis su med pas de nyid du phug ste/ tha mi dad pa de nyid byang chub bla na med pa'i gser du gyur pa'o//des ni 'jig rten gsum gyi 'khor lor yang dag par bsgom par 'gyur te/ lhan cig skyes pa'i dga' ba dang / de nyid nyams su myong ba lam gyi rtogs pa dang / sgro skur dang bral ba bsam gyis mi khyab pa'i bdag nyid du 'gyur ro//mngon par rnyed pa'i dngos grub mchog bsgoms pas 'thob po zhes bya ba la/ gang de kho na nyid la rmongs pa ni byis pa ste/ de lta bu rnams kyis tha snyad du brtags pa'i rig pa bag chags rab tu stug po las/ rnam par rtog pa'i dbang gis brtan pa dang / g.yo ba'i dngos po thams cad la mngon zhen du bltas pas sdug bsngal du gyur pa la dpe'i lhan cig skyes pa'i las bya ba'i phyag rgya nyams su myong ba'i ro chos kyi phyag rgya lhan cig skyes pa'i gnyis su med pas rtag pa thams cad de nyid du phug ste/spang bya dang blang bya tha mi dad na dper na gser 'gyur gyi rtsis lcags gser du 'gyur ba bzhin du dngos po de nyid byang chub bla na med pa'i gser du gyur pa'o//las 'dis ni 'dod pa dang gzugs dang gzugs med pa'i 'jig rten chos dang longs spyod rdzogs pa dang / sprul pa gsum gyis 'khor lo dbyer mi phyed par yang dag par bsgom par 'gyur te/rtogs pa'i dus de nyid ni dpe'i lhan cig skyes pa'i dga' ba dang / des mtshon pa'i ye shes de dag nyams su myong ba don lam gyi rtog pa dang sgro skur dang bral ba'i phyag rgya chen po'i 'bras bu'i rnam bsam gyis mi khyab pa'i bdag nyid du gyur pa ste/de dag gis rtogs pa de dag sngon snying po don gyi sangs rgyas su 'gyur te/ ma 'ongs pa rnams su 'gyur ro/ /de ltar mngon par rnyed pa'i dngos grub mchog gang gis bsgoms pas 'thob po/ /de dag nges par grub par nus sam zhe na/ bstan par bya ste/ de bas na gsung rab las/ 'di ni gzhal yas khang min las min dbang po min te 'byung ba la sogs min/ /gzugs la sogs pa ma yin srog chags min zhing mi dang gzhan ma yin te rdzogs sangs rgyas/ /'khor lo'i gtso bo dag ni chos sku yin te dkyil 'khor pa dang lha dag dang //khams gsum 'di dag thams cad sna tshogs ma yin 'khor lor rtogs na ji ltar 'khrul par byed/ /ces bya ba la brtags pa 'di ni gzhal yas khang ste/ bde ba chen po nyid gzhal yas khang du shar ba'i phyir/gzhal yas khang rtog pas phyag rgya chen por rig par bya ste/ gzhal yas khang gsal bar bya ba'am/ bde chen grub par bya ba ni med do/ /bdag dang gzhan gyi lus kyang de bzhin te min no/ /mig dang rna ba dang sna dang lce dang lus dang yid rnams kyang dbang po gzhan min te gong bzhin no//'byung ba sa dang chu dang me dang rlung dang de dag la sogs pa ni rten 'brel bcu gnyis te gzhan min no/ /gzugs la sogs pa ni sgra dang dri dang ro dang reg bya ste/ de dag kyang gzhan ma yin no/ /srog gi rlung dang bcas pa bde sdug dang bcas pa skye shi dang bcas pa ste/de la srog chags zhes bya ba la/ /de yang gzhan min zhing mi dang de las gzhan pa lha dang lha ma yin dang dud 'gro dang yi dwags dang dmyal ba rnams kyang gzhan ma yin te de nyid las gzhan pa dang de nyid sbyar ba ni de dang bral ba'i phyir gdod ma nas rdzogs pa'i sangs rgyas so//lha'i 'khor lo dkyil 'khor gyi gtso bo rnal 'byor pa bdag nyid kyang chos kyi sku yin te/ de bas na rten gyi dkyil 'khor dang sgrub pa po dang / lha dag dang khams gsum 'di dag thams cad dang / sna tshogs su snang ba de dag gzhan ma yin te/gnyis med kyi 'khor lor rtogs na ji ltar yang gzhan med pa'i phyir 'khrul par byed pa med cing 'khrul bar yang ma 'gyur na/ 'khrul pa las gzhan ma yin zhing 'khrul bar mi 'gyur bar yang phyag rgya chen po la snyegs la/ mar las kyi phyag rgya la snyegs te/ de yang ji ltar snyegs te/ phyag rgya chen po ma bcos pa bzhin chos rgya yang ma bcos pas yar snyegs la las rgya la dga' ba bzhi yod pa bzhin du chos rgya la yang dga' ba bzhi yod par mar snyegs so/ /gzhan yang gsang sngags kyi lus kyis bla ma'i ngag sngon du song bas dngos grub rnam pa gnyis 'byung ba yin pas bla ma'i gdams ngag sngon du 'gro dgos pas chos rgya gtan la dbab par rigs te//de yang / /las kyi phyag rgya lus la ste/ /chos kyi phyag rgya ngag la'o/ /phyag rgya chen po yid la ste/ /dam tshig phyag rgya kun la 'gro/ /zhes bya bas kyang shes par bya'o//de la 'di ltar ste/ brjod par bya ba dang / skabs su bab pa'i tshig dang / ngo bo dang mtshan nyid dang / phan yon no/ /de la brjod par bya ba ni/ /bde stong spyi'i rnam pa'o/ /de yang phyag rgya chen po la ltos pas spyi'i rnam pas chen po ni rang gi mtshan nyid do//skabs su bab pa'i tshig ni e baM ste/ dbyangs kyi yi ge dang gsal byed kyi yi ge'o/ /de yang rab tu mi gnas pa la/ /byin rlabs bla ma'i ngag chen po/ /chos kyi phung po brgyad khri dang / /bzhi stong grags kyi rtsa ba dang / /yi ge pha ma gnyis yin te//kun gyi yang ni gzhir gyur pa'o/ /zhes pas rgyud sde lnga la sogs pa ji ltar snyed cig yod pa de dag thams cad dbyangs dang gsal byed gnyis su 'dus de yang e baM gnyis su 'dus so/ /ngo bo ni bla ma'i gdams ngag sgra'i rang bzhin brjod pas/ slob ma'i blo la brjod bya don spyi'i rnam par bde stong du shar pa'o//mtshan nyid ni snang stong gnyis su med pa ste/ de yang snang ba shar ba'i mtshan nyid du stong ba byung la/ stong pa rtogs par byed pa'i mtshan nyid du snang ba byung ste de yang / stong pa bcom ldan 'das su bshad/ /ces pa dang / yang / sna tshogs snang ba'i chos rnams la//skye ba med pa nyid gnas pa/ /stong pa snang ba mtshan nyid gcig /ces pas so/ /phan yon la gnyis te don che ba dang / phan yon che ba'o/ /don che ba ni bla ma'i gdams ngag sgra'i stobs las slob ma'i blo la rtogs pa shar ba ni skad cig mas bsdus pa'i dga' ba bzhi skye ste/de yang snang ba sna tshogs su shar ba dga' ba de ltar shar ba yang lhan cig skyes pa yin snyam pa mchog dga' lhan skyes yin par yid ches pa lhan cig skyes pa'i dga' ba/ rjes la rags snang du shar ba dga' bral lo/ /de ltar chos thams cad la lhan cig skyes pas rgyas gdab kyin bsgom pas rang gi don du chos kyi sku phyag rgya chen po thob pa ni don che ba'o//de nas sems can gyi don gyi smon lam gyi dbang gis gzugs sku gnyis sems can gyi snang ba bdag pa dang ma dag pa'i bye brag gis longs sku dang sprul sku snang ba ni phan yon che ba'o//de lta bu la 'jug par mi nus pa la/ lam gyi phyag rgya bstan pa la bzhi ste/ chos 'byung du gzhag pa'i rgyu mtshan dang / de nyid dpe'i ye shes su rig pa dang / dman drag gnyis sun bton pa yang dag pa'i ye shes dpe'i ye shes su rig pa dang /'phel bar byed pa 'brel pa'i tshul gyis nyams su blangs pa'o/ /de la chos 'byung du gzhag pa ni rtogs shing bla ma'i gdams ngag gis zin na mya ngan las 'das pa 'byung ba ste/ e yi cha byad bzang po la/ /dbus su baM gyis rnam par brgyan//bde ba thams cad skyed pa'i gnas/ /sangs rgyas rin chen za ma tog /ces gsungs pas so/ /ma rtogs shing bla ma'i gdams ngag gis ma zin na 'khor ba 'byung ste/ de yang / yi ge e ni mar gyur la/ /baM ni pha zhes bya bar grags/ /thig le de ni byang chub sems//de las srid pa thams cad skyes/ /zhes 'byung ba'i phyir chos 'byung du rigs so/ /de nyid dpe'i ye shes su rigs te/ chos kyi phyag rgya la dga' ba bzhi yod pa bzhin du las kyi phyag rgya la yang dga' ba bzhi nA da bas so/ /de yang dper na chu'i zla bas nam mkha'i zla ba mtshon nus pa bzhin du/mtshon byed dpe'i lhan cig skyes pa ni nyams su myong la/ mtshon bya don gyi lhan cig skyes pa ni mtshon par nus la dngos ni ma yin te/ 'dra ba'i phyir na dper rigs so/ /de yang / don gyis 'dra ba gang yin pa/ /dpe dag la ni brten par 'gyur/ / zhes pas so/ /dman drag gnyis sun phyung ba yang dag pa'i dbang bskur ba dper gzhag par bya ste/ de yang drag po'i dbang ni/ go rims dang gnas dang rtogs pa gsum las 'khrul te/ de yang go rims la 'khrul pa ni/ mtshan nyid dang bral ba'i skad cig ma dang / lhan cig skyes pa'i dga' ba mthar 'dod la rnam par nyed pa'i skad cig ma dang /dga' bral gyi ye shes gsum par 'dod do/ /gnas la 'khrul pa ni rdo rje nor bur byang chub kyi sems kyis khyab pa la lhan cig skyes pa ngos 'dzin pas 'khrul lo/ /rtogs pa la 'khrul pa ni rdo rje nor bu la byang chub sems kyis khyab pa ni mchog dga'i ye shes te rang gi ba tsam rtogs pa ste de la dngos po'i gshis yin zer bas 'khrul lo//dbang bskur nges pa ni go rims mi 'khrul yang gnas dang rtogs pa las 'khrul te rtogs pa ni nor bu'i nang du byang sems kyis khyab pa la dngos po'i gshis rtogs par 'dod pa'o//gnas ni rdo rje bum pa la khyab pa la ngos 'dzin pas so/ /des na de gnyis ni dper mi rigs so/ /yang dag pa'i dbang dpe'i ye shes su gzhag pa ni byang chub kyi sems ma nor ba ste/ dang po'o byed 'khyud pa nas brtsams nas rdo rje'i mgrin pa man chad du khyab pa la dga' ba nor bu'i nang du khyab pa la mchog dga'/gnyis shor gnyis gnas par de ni lhan cig skyes pa'i dga' ba ste/ gnyis shor bas 'dod chags kyi dad yal/ gnyis gnas pa de la rigs kyi bdag po'i kha na gnas pa de ni rdo rje 'chang gi thig le stong pa mdzes pa'i spyi bo na gnas pa de ni mi bskyod pa'i thig le ste bde ba/de gnyis kyang rgyu 'bras su byas nas rdo rje 'chang gi thig le des ni rang bzhin med par byas pas rtag pa'i mtha' bsal/ mi bskyod pa'i thig les rdo rje 'chang gi thig le rgyas btab pas rang bzhin med pa nyams su myong bar bya ste chad pa'i mtha' bsal lo//rtag chang gnyis las 'das pa ste lhan cig skyes pa'o/ /de yang / rgyu la 'bras bus rgyas btab cing / /'bras bu la yang rgyus rgyas gdab/ /'di ni bde chen rgyal po yin/ /zhes pa dang / gzhan yang rab tu mi gnas pa las/ /lhan cig skyes dga'i rang bzhin ni//mchog dga'i mtha' dang dga' bral gong / /'bras bu gang zhig rigs 'gyur ba/ /mi bskyod rdo rje las ltung zhing / /rdo rje 'chang chen pad+mar reg /rgyu la 'bras bus rgyas btab pas/ /rig byed mtha' yi 'dod pa dgag /'bras bu la yang rgyus rgyas btab//gsang bar smra ba'i 'dod pa dgag /gnyis la gnyis med rgyas btab pas/ /la ba can gyi 'dod pa dgag /ces gsungs pas so/ /'phel bar byed pa 'brel pa'i tshul gyis nyams su blangs pa ni/ dga' bral gyis lhan cig skyes pa la spyad pas dga' ba gsum lhan cig skyes par 'gyur te/de yang / chos rnams kun gyi ngo bo ni/ /lhan cig skyes par bsgom par bya/ /zhes pas so/ /de lta bu la 'jug par mi nus pa'i gang zag gis dam tshig gi phyag rgya la bslab par bya ste/de la yang dga' ba bzhi brtsi ste/ dang po bsod nams tshogs bsags pa nas bzung nas byang chub pa rnam pa lngas lha bskyed pa ni dga' ba'o/ /dkyil 'khor gang yin pa spyan drangs nas zhal du zhugs te/ lha zhu ba'i khu bas lus gang ba ni mchog dga'o//rang yang zhu nas thig le gnyis su gnas pa ni lhan cig skyes pa'i dga' ba'o/ /lha mo bzhis gsol ba btab nas sku ru bzhengs pa ni dga' bral lo/ /de yang dga' ba bzhis tha mi dad du khyer ba ni bzhi pa'i man ngag go/ /de yang rab tu mi gnas pa las//phyag rgya chen po'i byang chub lnga/ /dga' ba'i ye shes nyid yin no/ /chags pa chen po'i 'od zer gyis/ /sangs rgyas rnams ni bsdus nas kyang / /khu ba'i ngo bor gyur gzugs pa/ /khyad par gyi ni dga' ba'o/ /thabs dang shes rab kha sbyor ba/ /thig le dkar dmar thog mtha' can//yi ge gsum gyi bdag nyid do/ /lha yi 'khor lo sna tshogs pa/ /bral ba'i dga' bar rab shes bya/ /zhes gsungs pas so/ /de lta bu'i dam tshig gi phyag rgya'i thig le gnyis kyi dbyibs dang kha dog tu nyams su myong yang / thig le gnyis kyi mtshan nyid nyams su ma myong ngo zhes the tshom bskyed nas de'i mtshan nyid nyams su myong bar bya ba'i phyir las kyi phyag rgya bstan la/ lhan cig skyes pa nyams su myong bar bya'o/ /des dpe'i ye shes nyams su myong yang / don bde stong spyi'i rnam par rtog pa dang bral zhing nyams su myong ba dag la chos kyi phyag rgya bstan te/chos thams cad skyes pa dang tha mi dad par bstan pas/ bde stong gnyis med du nyams su myong ba de ni chos kyi phyag rgya'o/ /de la yang dga' ba bzhis lam du 'gyur te/ sna tshogs su shar ba dga' ba la sogs pa gong du bstan pa bzhin no//phyag rgya chen po gtan la dbab pa gnyis te/ rten gyi gang zag dang de la gdams pa'o/ /rten gyi gang zag ni sngon smon lam khyad par can btab pa/ tshogs khyad par can bsags pa/ gnyug ma la yun ring du sbyangs pa/bla ma'i dus thabs bsten pa la mkhas pa/ phyogs las rnam par rgyal ba'i spyod pa la 'jug nus pa'o/ /de yang / /lhan cig skyes pa'i ye shes te/ /thabs gzhan gyis ni mi rnyed de/ /bla ma'i dus thabs bsten pa'am/ /bsod nams kyi ni bdag nyid shes//zhes pas so/ /de la gdams pa ni/ phyag rgya chen po brngas bstan par bya ste/ de la gsum ste/ chos thams cad skyes pa'i brda dang / ma skyes pa'i brda dang / skyes ma skyes gnyis su med par nyams su myong ba'i brda'o/ /de la dang po ni chos thams cad rol pa sna tshogs su shar ba ni skyes pa'i brda'o//de nyid rang bzhin med par rtog pa ni ma skyes pa'i brda'o/ /rol pa 'gag med dang rang bzhin med pas gnyis su med par myong ba tha mi dad kyi brda'o/ /de lam du byed pa'i man ngag la lnga ste/ rgyu mtshan gyi man ngag dang /de nyid rjes su 'gro ba'i man ngag dang / thabs khyad par can dang / nyams su blang ba'i man ngag dang / gdams ngag la nges shes skyes pa'i man ngag go/ /de la rgyu mtshan gyi man ngag ni/ phyag rgya bzhi pa'i kho nar bzhag pa'i rgyu mtshan ni gang zag bzhi la dgongs pa ste/gang zag skal pa tha ma bskyed rim la mos pa dang / skal pa 'bring rtsa rlung thig le la mos pa dang / skal pa rab bla ma'i man ngag la nges shes skyes pa dang / skal pa yang rab gnas lugs nyams su len nus pa'o/ /de rnams la phyag rgya bzhi nyams su len nus pa'o//de la phyag rgya bzhi bstan te/ dam tshig gi phyag rgya thabs sna tshogs pa rtog pa can gyi yul du gyur pa dang / las kyi phyag rgya bde ba nyams su myong ba rtog pa'i yul du gyur pa dang / chos kyi phyag rgya stong pa nyams su myong ba zhen shes med pa'i yul du gyur pa dang /phyag rgya chen po rnal ma nyams su myong ba ci yang ma yin pa'i yul du gyur pa bstan par bya'o/ /de yang rgyud las/ las kyi phyag rgya rnam par bsgom/ /de yi steng du phyag rgya che/ /de nyid phyag rgya rnam bsgom bya/ /de yi steng du phyag rgya che//de nyid dam tshig phyag rgya'o/ /zhes pas so/ /de yang / dbang bzhi dang 'brel te bum pa dang / gsang ba dang shes rab ye shes kyi dbang dang / mthar thug pa man ngag gi dbang ngo / /de yang / chu dang 'brel phyir bum pa'i dbang / /gsang ba las byung gsang ba ste/ /shes rab ma yi gzugs dag las//ye shes skyed phyir de nyid dbang / /kun gyi ngo bor mi gnas shing / mthar thug pa ni bzhi pa'i dbang / /zhes pas so/ /dbang de dag kyang dkyil 'khor bzhi dang 'brel te/ rngul tshon gyi dkyil 'khor dang / mkha' gsang gi dkyil 'khor dang /byang chub sems kyi dkyil 'khor dang / bden pa dbyer med kyi dkyil 'khor ro/ /de yang / gsang ba'i dkyil 'khor bzang po dag /thig le don dam dbyer med dkyil/ /snying po ye shes rang sbyin gnas/ /zhes so/ /dbang de dag la yang bskur ba'i gnas bzhi ste/bum pa'i dbang spyi bor bskur ba dang / byang chub kyi sems lce la sbyin pa dang / /gsum pa sems la bskur ba dang / /bzhi pa lus ngag yid gsum dbyer med pa la bskur ba'o/ /de yang / lus kyi rtse mor chu blugs shing / /ngag gi rtse mor bsam mi khyab/ /ces pas so//de dag gis kyang sgrib pa bzhi dag ste/ lus kyi sgrib pa dang / ngag gi sgrib pa dang / yid kyi sgrib pa dang / sgro skur thams cad gcod pa'o/ /de yang / srog gcod pa dang ma byin len/ /mi tshangs spyod dang brdzun smra dang / /phra ma ngag 'khyal tshig rtsub mo/ / chags sdang gnod sems log lta dang / gzung 'dzin sgro 'dogs skur 'debs mtha'/ /ma lus spyod pa nus pa'i mchog /ces so/ /'o na dbang bzhi pa kho nas chog mod/ /gsum pa man chad la dgos pa med do zhe na bzhi pa rgyud las skyes pa'i gang zag cig car ba dga' ba dang bzhi pa rgyud la skya ba'i thabs yin pas dgos par bstan to//de la gdams pa bzhi bstan te phyi bskyed pa'i rim pa ste/ bskyed rim dang / zab mo bskyed pa'i rim pa ste rtsa rlung bsgom pa dang / yongs su rdzogs pa'i rim pa ste/ snang grags stong pa nyid du rtogs pa dang /ngo bo nyid rdzogs pa'i rim pa ste/ rgyu rkyen las rag ma lus par lhun gyis grub pa la'o/ /de yang / bskyed pa yi ni rim pa dang / /rdzogs pa yi ni rim pa gnyis/ /phyi dang nang gi rnam pa can/ /yongs su pa dang ngo bo nyid/ /ces pas so/ / de las 'bras bu bzhi 'byung ste/ /sprul pa'i sku dang longs sku dang / /chos kyi sku dang ngo bo nyid kyi sku'o/ /de yang / sna tshogs pa las sna tshogs skye/ /bde ba can gyi gzhan mos pa/ /mtha' med pa las yon tan 'byung / /dbyer med gcig bu ngo bo nyid/ /ces pas so/ / de nyid rjes su 'gro ba'i man ngag ni bzhi ste/ las kyi phyag rgya de nyid rjes su 'gro ba'i man ngag dang / phyag rgya chen po dang dam tshig gi phyag rgya rjes su 'gro ba'i man ngag go/ /de la las kyi phyag rgya de nyid rjes su 'gro ba'i man ngag la bdun te/ las dang rgyas gang gis 'debs pa dang / gang gis 'grub bdag gang 'grub pa dang // nges par gang gis byed pa dang ming gang yin pa dang / 'bras bu gang thob pa'o/ /de la las ni lus ngag yid gsum la bsam pa gtso bas te/ de yang lus kyi las chags pa ste bskyed pa'i sbyor drug dang / bsrub pa dang srubs pa'i sbyor ba'o/ /gong ma ni drug ste/ sen mos gdab pa dang /nu ma mnye ba dang / 'khyud pa dang / lce gzhib pa dang / ma mchu sos gzung ba dang / g.yal bsgag pa'o/ /ngag la gnyis thun mong ngu chags pa'i gtam gleng pa dang / khyad par du rdo rje'i bzlas pa bya'o/ /yid kyi las la gsum ste/ dga' ba bzhi ngos gzung ba dang / rdo rje pad+ma pad+ma byin gyis brlab pa'o/ / de dag kyang bsam pa gtso bo'o/ /rgyas ni bla ma'i gdams dag gis 'debs te/ de yang gnyis sbyor dam pa dang / thabs khyad par can no/ /gong ma la lnga sta/ lus ngag yid gsum mnyam pa 'dod pa mnyam pa/ byin gyis brlabs pa mnyam pa/ phyag rgya dag pa/ bla ma'i gdams ngag gis zin pa'o//dang po ni lus lha ngag rdo rje'i bzlas pa/ yid lhan cig skyes pa ngos gzung mnyam par mnyam pa'o/ /gnyis pa ni skye ba 'di la phyag rgya chen po'i dngos grub thob par bya'o snyam pa'i 'dod pa mnyam pa'o/ /gsum pa ni hUM las rdo rje a las pad+mar byin gyis brlabs pa dang mnyam mo//phyag rgya dag pa ni sku'i bcu drug/ ngag gi nyi shu/ thugs kyi nyer lnga ma'o/ /bla ma'i gdams ngag zin pa ni/ nyon mongs pa'i rjes su gzhol ba ma yin ba dang rang bzos zhugs pa lta bum yin pa'o/ /de yang rgyud las/ lus ngag yid gsum rgyal bar mnyam/ /bsam pa'i stobs ni rab bzang bya//shes rab thabs kyi rnam pa las/ /dpa' bo dpa' mos byin gyis brlabs/ /sku rigs gsung rigs thugs rigs pa/ /stong dang 'jig tshogs lo yi grangs/ /de'i steng mda' yi grangs can mchog /dbang bskur ba ni gang la yang / /bla ma gces spras bya ba mchog /ces pas so//thabs khyad par can la bzhi ste/ dus nges par bya ba'i phyir skad cig ma bzhi dang / ye shes nges par bya ba'i phyir na dga' ba'i phyir bzhi dang / rtogs pa nges par bya ba'i phyir na gnas bzhi dang / mtshan nyid nges par bya ba'i phyir na chos bzhi'o/ /de la skad cig ma bzhi ni rnam pa sna tshogs pa'i skad cig ma dang /rnam par smin pa'i skad cig ma dang / mtshan nyid dang bral ba'i skad cig ma dang / rnam pa med pa'i skad cig ma'o/ /de yang / rnam pa sna tshogs rnam par smin/ /rnam par nyed pa'i mtshan nyid bral/ /zhes pas so/ /dga' ba bzhi ni dga' ba dang / /mchog dga' dang / lhan cig skyes pa'i dga' ba dang //dga' bral lo/ /de yang / dga' ba dang ni mchog tu dga'/ /dga' bral lhan cig skyes dga' ba/ /zhes pas so/ /gnas bzhi ni rdo rje'i mgrin pa dang / rdo rje'i rtse mo dang gnyis shor gnyis mnyam pa dang / thams cad shor ba dang / de yang / chags pa chen po snyoms 'jug gis//rab tu sbyor zhing bsrubs pa las/ /nor bu'i mgrin dang rtser khyab pa'o/ /gnyis bzlas nas ni gnyis mnyam ste/ /lhag ma 'das nas dga' bral lo/ /zhes pas so/ /chos bzhi ni dga' ba la gzung 'dzin thams cad kyi rtog pa yod/ mchog dga' ba la gzung ba yod la 'dzin pa med/lhan cig skyes pa'i dga' ba la gzung 'dzin rtag chad kyi mtha' thams cad las 'das pa'o/ /dga' bral la yang rags snang gi rtog pa sna tshogs dang bcas pa'o/ /yang / dga' ba 'dzin pa dang bcas pa/ /mchog dga' de las lhag 'gyur nyid/ /rnam nyed gzung 'dzin rtog pa can//lhan cig skyes gsum mi dmigs so/ /zhes so/ /gang gis 'grub na rig ma mtshan dang ldan pas 'grub ste/ de yang rig ma zhes pas/ /rig ma ni ye shes lnga rig pa ste/ skad cig ma'i ye shes de sgro skur thams cad dang bral bas chos kyi dbyings kyi ye shes rang gis rang gsal bas me long lta bu phyogs cha med pas mnyam pa nyid kyi ye shes/cir yang snang bas so sor rtog pa'i ye shes/ de nyid rtogs pas don thams cad 'grub pas bya ba nan tan gyi ye shes so/ /ye shes lnga dang ldan pas skad cig ma'i ye shes de mtshan dang mtshan ldan gyi lus la brten nas skye bas ma zhes bya'o//'o na mtshan ldan gyi rig ma de rgyu gang las 'grub ce na/ dang por gnas pa'i rgyu gsum dang ldan te sngon smon lam khyad par can btab pa de yang da ltar bla ma la gus pas shes rigs bzang po nas bzang por brgyud pa/ bla ma dang ldan zhing bla ma'i gdams pas zin pa'o//bzhin mdzes pa dang / zab mo la mi skrag pas zhes so/ /rim pa bzhin du sbyar ro/ /de las da lta gnas pa'i rgyu bdun dang ldan par 'byung ste/ bzhin mdzes pa dang / skra ser la li ba kha nas ut+pala'i dri bro ba/ nu ma rgyas pa dang / rked pa phra ba dang / b+ha ga rub pa dang /byang chub kyis sems kyis gang ba'i ngang tshul can/ /de lta bus 'grub pa ste/ de yang / gnas pa med pa'i ye shes ni/ /phyag rgya la ni brtan pas 'grub/ /ces pa'o/ /gang 'grub na lhan cig skyes pa'i ye shes skad cig ma de 'grub ste/ lhan cig skyes pa ni snang grag gi chos thams cad dang lhan cig skyes pa ste/de yang snang ba lhan cig skyes pa ni snang stong dbyer med/ sems nyid lhan cig skyes pa ni bde stong dbyer med/ de nyid gnyis su med pa ni lhan cig skyes pa'i ye shes so/ /de yang / gzugs sogs blo yi myong dus su/ /skye med bcas myong ma yin nam//zhes so/ /nges par gang gis byed na rgyud kyi gzhung gis byed de/ de bzhin gshegs pa thams cad kyi sku dang gsung dang thugs rdo rje btsun mo'i b+ha ga la zhugs so zhes pas/ sku bzhugs te lha thams cad de nas bskyed/ gsung bzhugs te rgyud sde thams cad der 'dus/thugs bzhugs te lhan cig skyes pa'i ye shes der rtogs pa'o/ /ming ni dbyibs kyi e baM ste/ e ni ka ko la ste shes rab kyi bdag nyid stong pa mtshon la/ baM ni bo la ste thabs kyi rang bzhin bde ba mtshon pa'o/ /bde ba stong pa'i rang bzhin can de thabs dang shes rab dbyer med pa de tha mi dad pa'o//'bras bu ni rgyu mthun pa'i 'bras bu ste/ dga' bzhi thig le'u rgyu mthun te thig le byang chub sems su mthun no/ /phyag rgya bzhi skad cig mar rgyu mthun te/ mtshan nyid dang bral ba'i skad cig mar mthun no/ /sems can dang sangs rgyas su mthun te/rgyu sems can gyi rgyu dang sangs rgyas kyi dgongs pa gnyis tha mi dad pas so/ /chos kyi phyag rgya de nyid rjes su 'gro ba'i man ngag ni bdun te/ chos dang rgyas gang gis 'debs pa dang / /gang gis 'grub pa dang / gang 'grub pa dang / nges par gang gis byed pa dang / ming gang yin pa dang /'bras bu gang yin pa'o/ /de la chos ni gnyis te shes pa dang shes bya'o/ /shes bya la rtog bcas dang / rtog med do/ /rtog med la gnyis dag pa'i de bzhin nyid dang / ma dag pa'i de bzhin nyid do/ /rgya ni lhan cig skyes pas 'debs te/ de la gsum/ thabs la stong pa'i rgyas btab pa dang /stong pa la thabs kyi rgyas btab pa dang / tha dad la gnyis med kyi rgyas btab pa'o/ /thabs la stong pas rgyas gdab pa la gsum ste/ snang ba thug phrad du bya ba ste/ snang ba gang phrad pa lhan cig skyes pas rgyas 'debs/ sna tshogs don mthun du bya ba ni cir snang cir sred kyang sems skye med du don gcig pa'o//du ma ro gcig tu bya ba ni cir snang thams cad lhan cig skyes pa'i ros khyab par bya'o/ /de yang rgyal po dang phrad pa lta bu dang / chu snod du mar zla ba shar ba lta bu dang / bu ram gyi gzugs kyi bye brag ltar du shes par bya ste/ dpe rim bzhin sbyar ro/ /stong pa la thabs kyi rgyas gdab pa la bzhi ste/chos thams cad lhan cig skyes par bsgom pa dang / de nyid nyams su myong ba'i zhen pa btang ba dang / byung tshor dran pas gzung ba dang / goms pa'i rtags so/ /lhan cig skyes pa bsgom pa ni lhan cig skyes pa bsgom pa'i dus su 'khor 'das kyi chos thams cad lhan cig skyes pa gsal btab la bsgom mo//de yang / chos rnams kun gyi ngo bo ni/ /lhan cig skyes par bsgom par bya/ /zhes pas so/ /de nyid nyams su myong ba'i zhen pa btang ba ni/ de ltar bsgom pas chos thams cad lhan cig skyes pa la thim pa dang / lhan cig skyes pa nyams su myong bar 'dzin pa'i zhen pa yang btang ste gang yang yid la mi bya'o/ /de yang / nyams su myong ba gang dang gang / /yid la med par bya ba nyid/ /ces pas so/ /byung tshor dran pas gzung ba ni/ /de ltar yid la mi byed pa'i dang las/ yang glo bur gyi rtog pa skye srid na/sngar gyi yid la mi byed pa dang / glo bur gyi rtog pa nyid tha mi dad par gzhag ste/ lhan cig skyes pa'i nyams dran pas gzung bar bya'o/ /de yang / glo bur rtog pa gang skyes pa/ /thams cad de yi ngo bor bsgom/ /zhes gsungs pas so/ /goms pa'i rtags la gsum ste/ thun mong gi rtags dang /thun mong min pa'i rtags dang / khyad par gyi rtags so/ /thun mong gi rtags ni bzhi ste/ zas la phyogs med de mnyam pa dang / gos la phyogs med de mnyam pa dang / gnas la phyogs med de mnyam pa dang / grogs la phyogs med de mnyam pa'o/ /de yang / bgrod pa dang ni bgrod min dang //bza' ba dang ni bza' min dang / /btung dang gos sogs de bzhin nyid/ /thams cad mnyam pa nyid du'o/ /thun mong min pa'i rtags ni/ mnyam gzhag dang / rjes thob dang / gdab gsal ba dang / gnyid sad pa bzhin du mnyam pa'o/ /de yang / mnyam gzhag dang ni rjes thob min//rgyud 'di la ni rgyun chad med/ /'di sgom rnal 'byor chen po yang / /dum bur gyur pa ma yin no/ /zhes pas so/ /khyad par gyi rtags ni/ de ltar rtogs pa'i rnal 'byor de la re dogs med de/ bsod nams bsags pas sangs rgyas thob tu re ba med la/sdig pa byas pas ngan song du 'gro ru dogs pa med pa'o/ /gnyis med kyi rgyas btab pa ni/ spyod lam bzhi la khyad med de rnal ma las ma yin pa'o/ /de yang / 'gro 'chags nyal dang 'dug sogs la/ /rjes dran bzang po bsam par bya/ /zhes pas so/ /gang gis 'grub na gdams ngag gis 'grub ste/de la gsum ste bshad bya'i dbang du byas pa/ gdams par rang gi ngo bo dang / bshad lugs kyi dbang du byas pa'o/ /bshad bya la gsum ste/ tshogs la bshad pa dang / slob ma la bshad pa dang / bu la byin pa dang / gsum las bu la sbyin pas 'grub po//gdams pa rang gi ngo bo'i dbang du byas na gsum ste/ spros bcas dang spros med dang / shin tu spros med dang gsum las shin tu spros med kyis 'grub/ dus kyi dbang du byas na bzhi ste/ yang dang yang du gsol ba btab pa dang / tshogs kyi 'khor lo'i dus dang / bsnyen bkur byas pa'i dus dang / spyod pa'i dus bzhi las spyod pa'i dus su gsungs pas 'grub po/ /gang 'grub na snang ba skye med du 'grub ste/ skye med kyi rmi lam gyi dus tshod na yang skye med du rtog pa'o/ /nges par gang gis byed na snang ba ro snyoms kyis byed de/ de la gnyis te bde bar ro mnyam pa dang /stong par ro mnyam pa'o/ /gong ma la gnyis phyi'i bde ba ro mnyam pa dang / nang gi bde bar ro mnyam pa'o/ /phyi ni snang ba la brtags pas zhen pa med pa'o/ /nang gi dbang gsum pa'i nyams dran par byed pa'o/ /stong pa ro mnyam pa la gnyis/ /mnyam pa'i tshul du mnyam pa dang /gdab pa'i tshul du mnyam pa'o/ /gong ma ni gnas lugs sems ci yang ma yin pa de'i ngang du thams cad mnyam pas so/ /des snang ba la rgyas 'debs pa'i tshul du mnyam pa'o/ /ming gi sgra ni e baM ste/ de la bzhi ste/ rgyud pa dang rgyud par 'brel rgyud pa dang sgrar 'brel sgra dang lus su 'brel/lus dang byin rlabs su 'brel pa'o/ /'bras bu ni rnam par smin pa'i 'bras bu ste/ de la gsum/ 'das pa rnam par smin pa dang / da ltar rnam par smin pa dang / ma 'ongs pa rnam par smin pa dang / de la 'das pa rnam par smin pa ni/ sngon tshogs bsags pa las da ltar chos rgya bsgom pa'i skal pa dang ldan pa'o//da ltar rnam par smin pa ni da ltar bla ma bsten pa las gdams ngag da ltar rang gnas nas nyams su len pa'o/ /ma 'ongs pa rnam par smin pa ni chos kyi phyag rgya lam du khyer ba las 'bras bu phyag rgya chen po 'grub pa'o/ /phyag rgya chen po de nyid rjes su 'gro ba'i gdams ngag ni bdun te/phyag rgya dang chen po dang / gang gis 'grub pa dang / gang 'grub pa dang / nges par gang gis byed pa dang / ming gang yin pa dang / 'bras bu gnag 'grub pa'o/ /de la phyag ni mi 'da' ba'i don gyis ni phyag rgya'o/ /de la bzhi ste/ don gyi zung 'jug las mi 'da'/ / dpe'i zung 'jug las mi 'da'/ gnas pa'i zung 'jug las mi 'da'/ yin pa'i zung 'jug mi 'da'o/ /de yang don gyi zung 'jug ni 'od gsal ba dang stong pa gnyis su med par zung 'jug ste/ de yang 'od gsal ba ni gnyis su myong ba la bya'o/ /stong pa ni de nyid rang bzhin med par rtogs pa'o//'o na gtan med du song ngo zhe na/ de nyid nyams su myong ba'o/ /'o na myong ba'i phyir na de nyid ma yin no zhe na/ ci yang ma yin par myong ba'o/ /des na 'od gsal ba dang stong pa nyid dbyer med du zung du 'jug pa'o/ /zung du 'jug pa dang gzhan gyis gnyis su snang ba'i zhen pa dgag pa'i phyir gsungs pa yin no//rang gi gnas lugs la zung du 'jug pa dang gnyis su med pa tsam du yang mi gnas te/ de bas na 'di la ming ngam ngos gzung ngam 'di zhes bstan du med do/ /dpe'i zung 'jug ni dpe las phyag rgyas mtshon pa'i bde stong dbyer med kyi don yin pas de las mi 'da' bas so/ /gnas pa'i zung 'jug ni lhan cig skyes pa'i ye shes de/sems can thams cad kyi rgyud la khyab nas gnas pa de las mi 'da' bas so/ /yin pa'i zung 'jug ni/ 'khor 'das thams cad gnyis su med pa'i bde ba chen po nyid yin pas de las mi 'da' ba'o/ /chen po ni rgyu mngon sum dang ldan pas che ste/ gsum las mchog tu gyur pa na/ yang chen po phyag rgya chen po de rtog pa tsam la rag las pa'i phyir na yang chen po phyag rgya chen po de rten gang la yang mi 'cha' bas na yang chen po'o/ /gang gis 'grub na shes pa so ma ma bcos pas 'grub ste/ de la gnyis te/ brtags pa'i so ma dang /bsgom pa'i so ma'o/ /brtags pa'i so ma ni chos thams cad rkyen gzhan las skyes pa brtags pa dang / rkyen gzhan las skyes pa de nyid skye ba med par brtags pa dang / skye med de nyid ci yang ma yin par brtags pa'o/ /de yang / blo ni thams cad rkyen las 'byung / /de phyir skye med rab shes bya//dbyer med sangs rgyas kun gyi sdom/ /zhes so/ /bsgom pa'i so ma ni de la gsum ste/ dang po rtsol grub dang bral te lus sems khong glod de ras bal 'da' ba skud par gzhag pa lta bu dang / bar du the tshom dang bral te sems ma bcos par gzhag pa dang / mtha' ma'i nges pa'i shes pas byung tshor thams cad skye med du bstim pa'o//de yang / ras bal lta bu'i thabs la gnas/ /'bad pa kun gyis ma grub pa/ /yid gnyis pas ni phyir spangs te/ /dpal mchog dang po'i skyes bu bsgom/ /sna tshogs myong ba'i cho 'phrul ni/ /rtsa ba des pa der shes bya//zhes bas so/ /gang 'grub na dgag sgrub dang bral ba de grub ste/ de yang lta ba mi 'gegs grub mtha' thams cad de nyid/ sgom pa mi 'gegs brtags pa thams cad de nyid yin pas so/ /spyod pa mi 'gegs bcos pa thams cad de nyid yin pas so/ /lta ba mi bsgrub lhun gru brang chas/sgom pa mi sgrub rang byung rab chas su yod pas so/ /de yang / gnyis med dgag sgrub bral ba che/ /'bras bu phyag rgya chen po'o/ /zhes pas so/ /nges par gang gis byed na nyams su myong ba la ci yang ma yin pas byed de de la gsum ste/ lta ba gang yang ma yin 'dod pa gnyis dang bral ba/bsgom pa ci yang ma yin go rims gsum dang bral ba/ spyod pa ci yang ma yin dpyad pa gnyis dang bral ba'o/ /de yang / ci yang ma yin ye shes ni/ /yid la mi byed phyag rgya che/ /zhes pas so/ /ming gang yin na/ don ni e baM ste/ de la gsum ste/ re ba gsum dpyad de/ chos lnga dang ldan pa/ sku bzhi dag gis rdzogs pa'o/ /de la re ba gsum dpyad pa ni gnyen po'i re ba dang / de kho na nyid kyi re ba dang 'bras bu'i re ba'o/ /de yang / gnyen po yang ni phyogs kyang min/ /de nyid bral la gzhan mi skye/ /zhes pas so/ /chos lnga dang ldan pa ni//lnga ste ngo bo nyid kyis ma skyes pa dang / rang bzhin med pa dang / kun la khyab pa dang / mi 'gyur ba dang / dus thams cad pa'o/ /ngo bo nyid kyis ma skyes pa la rgyu mtshan gsum ste/ chos thams cad rkyen gzhan las skyes pa dang / skyes pa'i ngo bo la 'di zhes bstan du med pa dang / rgyu rkyen gzhan la rag ma lus pa'o/ /de yang / thog mtha' med pa'i dang po nyid/ /skye med rdo rje kun du bzang / /zhes pas so/ /rang bzhin med pa ni yod pa dang med pa dang gnyis ka dang / gnyis med kyi rang bzhin med pa'o/ /de yang / bdag tu mi brtag gzhan mi brtag / gnyis ka dag kyang brtag mi bya/ /zhes pa dang / yang / rang gzhan kun nas kun du med/ /rang las byung zhing rang gis khyab/ /ces pas so/ /kun la khyab pa ni snang zhing srid pa'i chos thams cad phyag rgya chen pos ma khyab pa med pas kun la khyab pa'o/ /de yang / mkha' ltar kun la khyab pa'o//thams cad rgyud la rab tu rdzogs/ /kun kyang de nyid gzhan mi 'gyur/ /zhes pas so/ /mi 'gyur ba ni 'khor ba'i dus dang / sbyangs ba'i dus dang / khyad par du sbyangs pa'i dus dang / mngon du gyur pa'i dus rnams su phyag rgya chen po nyid las 'gyur ba med do/ /de yang / dus rnams kun du de nyid 'byung / /'pho 'gyur med pa ye shes mchog /ces 'byung bas so/ /sku bzhi ngang gis rdzogs pa ni/ /gnas lugs de sgro skur thams cad dang bral ba chos kyi sku dang / de nyid nyams su myong ba longs spyod rdzogs pa dang / de nyid las ming gzhan yang sna tshogs su snang ba sprul pa'i sku ste tha snyad de ltar brtags so//don la de dag thams cad ma bcos pa nyid yin pas ngo bo nyid do/ /de yang / gnyis spangs pa ni gnyis su med/ /myong ba chen po sku gnyis pa/ /sna tshogs pas ni gsum pa nyid/ /ngo bo nyid ni gcig pa can/ /zhes pas so/ 'bras bu dang dri ma dang bral ba'i 'bras bu ste/ de la brgyad de/ spyad pa las ma 'ongs pa de bzhin nyid kyi ye shes rang gi ngo bo ma skyes pa lam gyi ye shes grub pa dang bcas pas rgyun mi 'chad pas rang bzhin med pa shes pa la sogs pa'i sgrib pa spangs pa phun sum tshogs pa thams cad kyi gzhir gyur pa 'khor ba dang mya ngan las 'das pa nyid kyis gcig pa/dmigs pa med pa'i snying rje chen po'i lus can bde ba chen po'i sku gcig pus so/ /de ltar brgyad kyi dri ma dang bral bar rigs so/ /gzhan yang skad cig ma gsum las dga' ba gsum gyi dri ma dang bral te phyag rgya chen po ni lhan cig skyes pa dngos yin pa'i phyir ro//dam tshig gi phyag rgya chen po de nyid kyis rjes su 'gro ba ni/ gzhan don gtso bor bstan pa ste/ de yang zla ba sgron ma las/ /gzhan don phun tshogs sangs rgyas nyid/ /'bras bu gtso bor bstan pa yin/ / sems can rnams kyi don spangs nas/ /chen po'i don ni gzhan ma mchis pas so/ /de la bdun te/ dam tshig dang / phyag rgya dang / gang gis 'grub pa dang / gang 'grub pa dang / nges par gang gis byed pa dang / ming gang yin pa dang / 'bras bu gang thob pa'o/ /dam tshig ni rgyu dam tshig gi phyag rgya ste/ gzhan don phun sum tshogs par khas 'ches pa dam tshig gi phyag rgya ni dang por sems bskyed pa'o/ /gzhan don phun sum tshogs pa smin pa dam tshig gi phyag rgya ni tshogs gnyis bsags pa'i dge ba gzhan don du 'dod pa'o/ /gzhan don phun sum tshogs par spyod pa dam tshig gi phyag rgya ni/ pha rol tu phyin pa'i dbang du byas na sbyor ba'i lam nas sa bcu man chad do/ /gsang sngags kyi dbang du byas na/ chos kyi phyag rgya nas phyag rgya chen po bsgom pa'i dus so/ /phyag rgya gang gis 'debs na gzugs sku gnyis kyis 'debs te/ de yang snang ba shin tu dag pa la snang ba ni/ sa bcu'i byang chub sems dpa' la rtan gzhal yas khang gi nang /brten pa lha'i gtso bo dang / 'khor gyi tshul khro bo'am zhi ba'i bdag nyid du snang ba dang / spros bcas dang spros med kyi lha mang nyung gi bye brag snang ba ni/ shin tu dag pa la snang ba'o/ /snang ba dag pa la sbyor ba'i lam la sprul pa'i sku shAkya thub pa la sogs par snang ba'o//snang ba thun mong ba la sman dang sman pa'i tshul lam/ /mkhan po dang slob dpon gyi tshul du snang nas don byed pa'o/ /gang gis 'grub na gnyis te thun mong du byas na dbang po rab 'bring gsum gyis 'grub/ khyad par gyi dbang du byas na skal pa yang rab dang / rab dang 'bring dang mtha' ma bzhis 'grub/phyag rgya chen po'o/ /chos kyi phyag rgya dang / las kyi phyag rgya dang / dam tshig gi phyag rgya rnams 'grub po/ /gang 'grub na thun mong du so so'i lta sgom spyod 'bras 'grub po/ /khyad par du phyag rgya bzhi dbang po rab 'bring bzhi'i rab kyis 'grub po/ /nges pa gang gis byed na pha rol tu phyin pa'i dbang du byas na theg pa gsum gyi bka'am bstan bcos kyis byed do//sngags kyi dbang du byas na rgyud sde lnga'am/ de la brten pa'i man ngag gis byed do/ /ming mtshon pa ni e baM ste/ rgyu dang 'bras bu dang / thabs dang shes rab bam don dam dang / kun rdzob dang bskyed rim dang / rdzogs rim la sogs par mtshon no//'bras bu ni go rims gong nas gong du 'phel ba'am/ skyes bu byed pa'i 'bras bu'o/ /go rims 'phel ba ni phyag rgya bzhi'am sbyor ba dgu mas zhar rim gyis zhugs pa'o/ /skyes bu byed pa'i 'bras ni gsum ste/ skyes bu byas pa'i 'bras bu dang / skyes bu'i 'bras bu dang / skyes bu byed pa'i 'bras bu'o/ /skyes bus byas pa ni rgyal bu don thams cad 'grub pa lta bu ste/ sngon bskal pa grangs med gsum du tshogs bsags na/ gzugs sku rnam pa bzhi gzhan don la snang nas de la longs spyod pa'o/ /skyes bu'i 'bras bu ni sngon tshogs bsags pas da ltar rten khyad par can grub nas rgyud dam tshig gi phyag rgya bsgom pa'i skal pa dang ldan pa'o//skyes bu byed pa'i 'bras bu ni lam rim pa la zhugs pas phyis dam tshig gi phyag rgya gzhan don la snang bar 'byung ngo / /yang rgyu bskyad rim bsgoms pa'i 'bras bu'i dus su gzugs sku gnyis gzhan don la 'byung ngo / /gsungs so/ /nyams su blang pa bzhi ste/rgyur snang ba dam tshig gi phyag rgya dang / dpe las kyi phyag rgya dang / lam chos kyi phyag rgya dang / 'bras bu phyag rgya chen po dang / gzhan don dam tshig gi phyag rgya'o/ /rgyu dam tshig gi phyag rgya ni/ bskyed rim bsgom pa la bya ste/ gzhan du shes par bya'o/ /las kyi phyag rgya nyams su blang ba la lnga ste/rtogs par bya ba dang / bdag byin gyis brlab pa dang / bde ba spyang pa dang / yi ge'i sbyor ba dang / gnas par bya ba'o/ /de la rtogs par bya ba la gnyis te/ gang du rtogs par bya ba dang / gang rtogs par bya ba'o/ /gang du na mtshan nyid dang bral ba'i skad cig ma'i dus su rtogs pa'o/ / gang rtogs na lhan cig skyes pa'i ye shes bde stong dbyer med de rtogs par bya'o/ /bdag byin gyis brlab bzhi/ bdud rtsi lnga'i maN+Dal byas la bla ma yab yum spyan drangs de la phul la/ de nas bdag gi spyi bor nyi ma'i dkyil 'khor bug pa lnga 'bru tsam yod pa'i steng du spyan drangs la gsol ba btab pas yab yum gyi sbyor mtshams nas byang chub kyi sems pa bas pas/bdag gi tshangs pa'i bu gar zhugs pas phyur gyis khengs par bsgom zhing / dbang gsum pa'i nyams myong yid la dran par byas nas bde ba khyed par can bsgom par bya'o/ /bde ba sbyang ba la gnyis te/ snang ba ye shes bskul ba dang //ye shes kyis snang ba la rgyas gdab pa'o/ /snang bas ye shes bskul ba ni/ mig gis gzugs mthong ba dang / snas dri tshor ba la sogs pa dang / de bzhin du yid la rtog pa ci skyes tshad kyi dbang gis nyams myong bskul nas dran rtog thams cad bde stong dbyer med du bsgom par bya'o//ye shes kyis snang ba la rgyas gdab pa ni/ mig gis gzugs mthong yang bde stong gi rgyas gdab/ de bzhin du sgra dang dri dang ro la sogs pa rtog cing skye ba la bde stong gi rgyas gdab po/ /yi ge'i sbyor ba ni/ dbang gi nyams myong gar skyes pa'i sar/ e dmar po lag pa'i ri mo tsam gyi dbus su baM gyis brgyan pa cig bsgom par bya'o//der bde ba skyes pa dang lte bar bsgom/ /der bde ba skyes pa dang snying gar bsgom/ /der bde ba skyes pa dang mgrin par bsgom/ der bde ba skyes pa dang spyi por bsgom/ de ltar bde bas gang tsam na/ nA da gnas par bya ste/ de la yang gsum ste/ 'tshor ba'i rkyen dang / de srung thabs dang / gnas pa'i thabs so/ /de la rkyen ni brgyad de/ bde bas gang bas 'tshor ba dang / rkyen dang phrad nas 'chor ba dang / nad kyis 'chor ba dang / spyod lam gyis 'chor ba dang / mi ma yin gyis 'chor pa dang / kha zas ma mthun pas 'chor ba dang / dam tshig nyams pas 'chor ba dang /byin rlabs yal bas 'chor ba'o/ /de srung thabs la brgyad de/ gang bas 'chor ba la 'gi wang gi thag pas bo la'i mgrin par dkris nas rked pa la bcings te/ /ba sbrugs pa dang / shes pa lte bar gtad pa dang / hri'i sgras gyen du drang ba dang / mi drag par bcag pa'o//rkyen dang phrad pas 'chor ba dang / rkang ba sprugs pa dang / 'og sgo bsdams pa dang / 'gyur ba drug gis bzlog pa'o/ /nad kyis 'chor na/ skyil mo krung bcas la/ g.yas g.yon gyi gru mo'i gar slebs pa'i sar me btsa' nyi shu tsa lnga lnga bsregs pa dang / gcan gzan gyi dri chings bya ba dang /zas gsar pa bcud che ba bza' ba dang / lto stong la tsha ba gsum gyi gam phye 'gam pa dang / gos dro bar bsgo ba dang / a ru ra'o mas btsos ba bza' pa'o/ /spyod lam gyis 'chor ba ni/ /'gros dal bar bya ba dang / /'og sgo ras kyis bcings la/ tsog por 'dug la nyin mo gnyid mi log/nub mo gnyid mi dgag par nyal lo/ /mi ma yin gyis 'chor na/ tshil chen gu gul yungs kar gyi thal ba mi glag pad+ma rak+ta de lda sbyar bas byug/ srad bu sngon po cig la rdo rje phag mo'i sngags bzlas la rked pa la dkris/ cong zhi la yi dam gang yang rung ba'i sngags bzlas la rdo rje'i mgo la byug pa bya'o//kha zas mi mthun pas 'chor na/ /bdud rtsi lnga'i bdud bzlog byas la/ sgog pa bza' ba'i 'o ma du bar gdul la btung / byin rlabs nyams bas 'chor na/ tshogs bsags shing tshogs 'khor bskor/ bla ma'i byin rlabs zhu'o/ /dam tshig nyams pas 'chor na/ bla ma la dbang bzhi nod bshags pa bya'o//bde ba gnas par bya ba la bcu ste/ nyams kyi bde la gnas par bya ba'i phyir/ dus kyi sna tshe dang mi 'bral bar bya ba dang / smad kyi bde ba gnas par bya ba'i phyir/ spyod la mngal bar bya ba dang / stod kyi bde ba gnas par bya ba'i phyir lkugs ba'i brtul zhugs kyis gnas par bya ba dang /khyab pa'i bde ba gnas par bya ba'i phyir te/ rlung sbyang par bya ba dang / rjes thob kyi bde ba gnas par bya ba'i phyir snang ba bde bar ro mnyam pa dang / mi rtog pa'i bde ba gnas par bya ba'i phyir/ bdud rtsi rnam pa lnga la spyad par bya ba dang / byin rlabs kyi bde ba gnas par bya ba'i phyir/ tshogs kyi 'khor lo bskor ba dang /zag bcas kyi bde ba gnas par bya ba'i phyir/ las kyi phyag rgya bstan pa dang / rtog pa'i bde ba gnas par bya ba'i phyir/ bla ma bsnyen bkur zhing / bla ma la gdams ngag zhu ba dang / 'bras bu'i bde ba gnas par bya ba'i phyir/ man ngag la nan tan bya ba'o//chos kyi phyag rgya nyams su blang pa la lnga ste/ rtogs par bya ba dang / sgom pa dang / grogs dang / mtshan nyid dang / ro mnyam pa'o/ /de la rtogs par bya ba ni/ bde stong dbyer med de/ de yang dga' ba bzhis lam du 'khyer te/ de yang / snang grags sna tshogs su snang ba de dga' ba/de las bde bar 'dug stong par 'dug snyam pa de la mchog dga'/ rtog pa thams cad dang bral ba ni lhan cig skyes pa'i dga' ba/ mnyam gzhag la de ltar 'dug kyang / rjes thob la sna tshogs su snang ba ni dga' bral lo/ /chos rgya bsgom pa ni de ltar rtogs nas ci bsgom zhe na/ dang por chos thams cad lhan cig skyes par bsgom par bya'o/ /de rtog pa lhan cig skyes pa la thim pa dang / lhan cig skyes pa tsam du yang yid la mi bya bar bsgom mo/ /yid la mi byed pa las rtog pa ci skyes pa de yang sngar gyi yid la mi byed pa dang / gnyis tha mi dad par bsgom mo//grogs la lnga ste/ chu shas chen rlung du ro mnyam pa dang / rlung shas chen sar ro mnyam pa dang / sa shas chen me ru ro mnyam pa dang / me shas chen nam mkhar ro mnyam pa dang / de la chu shas chen shes pa lci zhing 'dar na/ rlung du ro mnyam ste/ snang pa la dpyad cing skye med du bzhag/ shes pa rlung la bskyon nas shes pa bzeg bkur ro/ /rlung shas chen sa ro mnyam pa ni lhan cig skyes ba skye/ 'gro 'ong med par brtan par gzhag ste/ bde stong dbyer med du glod la gzhag go/ /sa shas che ste lus sems thogs pa chen me ro mnyam ste/ dus kyi sna rtse dran par bya zhing phyi nang med par bde bar ro mnyam mo//me shas che na shes pa dga' ba dang / bde ba gtso byed na/ nam mkha' ro mnyam pa ste/ ci yang yid la mi byed par gzhag cing / rang 'byung gi spyod pa mi dgag par rang yan du gtang ngo / /mchan nyid la bdun te/ snang ba skye med du longs spyod pas longs spyod kyi yan lag dang / snang stong tha mi dad du rtogs pas kha sbyor gyi yan lag dang / tha mi dad du nyams su myong ba'i bde ba'i yan lag dang / bde stong de dang po nas rang la yod/ nam 'dod na 'byung bas ci 'dod skye ba'i snying rje'i yan lag dang bde ba rang la rang chas su dngos su longs spyod du yod pas dngos po'i yan lag dang /don de chu bo bzhin rgyun mi 'chad pas rgyun mi 'chad pa'i yan lag dang / snang ba mi 'gog par 'gog pa med pa'i yan lag go/ /don la snang ba mi 'gegs la brtag pa mi 'gegs pa'o//ro mnyam pa la gsum ste/ nyams su myong ba 'grib sa na snang ba bde bar ro mnyam/ rtogs pa 'gribs na snang ba skye med du ro mnyam/ spyod pa 'gribs na snang ba yid la mi byed par ro mnyam mo/ /phyag rgya chen po nyams su blang ba lnga ste/ gnas lugs dang /sgom ba dang / sgrub pa dang / spyod pa dang / bsam mi khyab pa'o/ /gnas lugs la gsum ste/ rgyu mtshan gyi gnas lugs dang / lta pa'i gnas lugs dang / ngo bo'i gnas lugs so/ /rgyu mtshan nyid kyi gnas lugs la gsum ste/ phyag rgya chen po'i rigs pa dang / dri ma dang bral ba'i 'bras bur rigs pa dang / dgag bsgrub dang bral ba'i rigs pa'o/ /phyag rgya chen por rigs pa yin te/ phyag rgya dang chen po'o/ /phyag rgya ni mi 'da' ba'i don gyis ni phyag rgya ste/ de yang gsum ste gnas pa'i zung 'jug dang /khyab pa'i zung 'jug dang / yin pa'i zung 'jug las mi 'da' bas so/ /chen po ni gsum po las mchog tu gyur bas na chen po'o/ /de yang dri ma dang bral bar rigs pa ni gnyis te/ skad cig ma gsum dang / dga' ba gsum gyi dri ma dang bral ba'o/ /gong ma gsum ni/sna tshogs pa dang / rnam par smin pa dang / rnam nyed dang gsum gyi dri ma dang bral lo/ /gnyis pa ni dga' ba dang / mchog dga' dang / dga' bral gyi dri ma dang bral ba'o/ /dgag bsgrub dang bral bar rigs pa ni/ rang gi lta ba mi sgrub cing / gzhan gyi lta ba mi 'gegs pas so//lta ba'i gnas lugs la gsum ste/ re ba gsum dpyad pa dang / chos lnga dang ldan pa dang / sku bzhi ngang gis rdzogs pa'o/ /re ba gsum dpyad pa ni gnyen po'i re ba dang / de kho na nyid kyi re ba dang / 'bras bu'i re ba'o/ / chos lnga ni skye ba med pa dang / rang bzhin med pa dang / kun la khyab pa dang / dus thams cad pa dang / mi 'gyur ba'o/ /sku bzhi ngang gis rdzogs pa ni ci yang ma yin pa'i shes pa sgro skur gyis dben pa ni chos sku/ de nyid nyams su myong ba longs sku/ de nyid sna tshogs su snang ba sprul sku/ de gsum dbyer med ngo bo nyid kyi sku'o//ngo bo nyid kyi gnas lugs la gsum ste/ lhun gyis grub pa'i dus dang / zung du 'jug pa'i dus dang / bsam gyis mi khyab pa'i dus so/ /de yang lhun gyis grub pa'i dus ni/ gdod ma nas gnas pa ni gdeng rnyed pa ste/ re dogs dang bral ba'o//bsams mi khyab pa ni lhun gyis grub pa de nyams su blangs pas mnyam rjes gnyis rgyun 'dres nas bsgom mi dgos pa la bya ste/ ye shes pa'i mu dang bral ba'o/ /zung du 'jug pa'i dus ni/ snang ba sems la thim pa'i dus de gzugs sku gnyis 'char ka ma de'o//bsgoms pa la gnyis te/ dang por dpyod pa dang nyams su blangs pa'o/ /dpyod pa la gsum ste/ rtogs pa thams cad rkyen gzhan la brten nas skyes par dpyad pa dang / rkyen las skyes pa de yang skye ba med par dpyad pa dang / skye med de yang ci yang ma yin par dpyad pa'o//nyams su blangs pa la gsum ste/ dang po rtsol bsgrub dang bral te lus sems khong glod pa dang / bar du the tshom med de sems ma bcos par gzhag pa dang / tha ma byung tshor thams cad med du shes par bya'o/ /bsgrub pa la gnyis te/ sgrub pa dang / bsgrub pa'i khyad par ro/ /bsgrub la gsum ste/ rtogs pa ci skyes pa thams cad skye ba med pa nyid skyes pas shes pa mi dgag pa dang / bde stong dbyer med nyams su myong bas nyon mongs dang gnyen por mi bsam zhing 'bras bu la re ba med bar gzhag pa dang / cir snang phyag rgya chen po yin pas chu bo bzhin du rgyun mi 'chad par sgom pa'o//sgrub pa'i khyad par ni gsum ste/ bde stong dbyer med nyams su myong bas btang snyoms kyi rnyog pa bcad pa dang / lung dang rigs pa'i steng du/ bla ma'i gdams ngag yod pas ma rmongs pa'i khyad par dang /rgyu tha mal gyi dus na 'bras bu ye shes la sogs pa rang chas su yod pas ma rmongs pa'i khyad par ro/ /rtags la gsum/ snang ba stong par myang ba'i rtags chab rom mthong ba lta bu/ de nas bde stong dbyer med du myong ba'i rtags chab rom chu ru 'dug pa lta bu dang /gsum pa snang ba sems la thim pa'i rtags chab rom chu la zhub bzhin du/ bde chen du ro gcig go/ /spyod pa la lnga ste/ 'gras 'grib med pa lam po che lta bu dang / phyogs cha med par rten pas gzhi lta bu dang / dge sdig med par glang po che smyon pa lta bu dang /re dogs med pa seng ge lta bu dang / khyab la ma zhen pa nyi ma lta bu'o/ /bsam gyis mi khyab pa gnyis te/ nyams su myong ba bsam gyis mi khyab pa dang / nyams su myong ba'i shes pa bsam gyis mi khyab pa'o/ /de la gsum lhun gyis grub pa'i ngos mi 'dzin pa nyam mi nga ba'o//bsam gyis mi khyab pa la dngos so/ /dngos ni rgyu bsam du med pa/ thabs bsam gyis mi khyab pa/ 'bras bu bsam shing rang 'byung ba'o/ /nyams su myong ba bsam gyis mi khyab pa la dpe lta bu'i rtog pa nyi shu ste gang zhe na/ 'di lta ste/ dper na thams cad gser gyi sa gzhir gyur na/ /ra gan dang / gser gnyis dbyer med pa ltar/ thams cad bde stong chen por rtogs tsam na/ kun rdzob dang / don dam du mi dbye/ 'jur du glod na grol ba bzhin/ /rnal 'byor gyi sems glod na grol/khri mon nas shor ba'i btson de gar dgar 'gro ba bzhin/ rnal 'byor gyi sems gar dgar gtang / gzings las 'phur ba'i bya rog bzhin du yul las 'phros pa'i sems mi dgug /glang po smyon pa'i sna la lcags kyus btab pa longs skyang du btub pa bzhin du yul sna tshogs la skye med kyi lcags kyus btab la/'dod yon du longs spyad/ glang po che smyon pa lob pa'i sems de bde zhing dal ba bzhin du rnal 'byor gyi sems bde zhing dal bar gzhag /spra ba la me mched pa bzhin du/ snang ba skye med du me sbar/gzhon nu ma'i bde ba bzhin du/ nyams su myong ba la smrar med/ lan tshwa la chu thim pa bzhin du/ rtogs pa ci skyes pa skye ba med du bstim/ mar me rang gis rang gsal ba bzhin du/ bde ba chen po de rang gis rang gsal/ byas sri ko ni de rten gang la yang mi 'cha' ba bzhin du/phyag rgya chen po de rten gang la yang mi 'cha'/ srog chags pa ta ra la blang dor med pa bzhin/ rnal 'byor pa la blang dor med par bya/ sman b+ha ta ri bzhin rgyu'i dus na 'bras bu rang chas su yod/ khyim bdag gi mtshon cha'i 'khor lo bzhin du/nyams su myong ba la gnyis 'dzin med/ chu bo rgyun mi chad pa bzhin/ nyams su myong la rgyun mi chad pa bsgom/ 'dod yon zas kyi snod bzhin du/ 'dod yon la zhen pa med par bya/ bya rgod phung po'i ri bo bzhin/ shes pa la 'byung 'jug med par gzhag / nam mkha' stong pa'i dkyil bzhin du/ grub mtha' la zhe 'dod med par bya/ rgya mtsho chen po de mi g.yo ba ltar/ zab cing rgya che ba'i don de mi g.yo bar bya'o/ /chu'i gzugs brnyan ltar du rnal 'byor pas gzugs brnyan ltar du rtogs par bya'o/ /gdams pa la nges shes kyes pa'i tshul la bzhi ste/phyag rgya bzhi'i ngo bo dang / rgyus dgos par go ba dang / de nyid brdar shes pa dang / bdag nyid gzhung du bstan pa'o/ /gsum pa brdar shes par bya ba la bzhi ste/ las kyi phyag rgya byang chub kyi shing ltar bshad pa dang / chos kyi phyag rgya gser gyi 'khor lo ltar bshad pa dang / phyag rgya chen po shing n+ya gro d+ha ltar bshad pa dang / dam tshig gi phyag rgya a ru ra'i snying po ltar bshad pa'o/ /de yang byang chub kyi shing dang / las kyi phyag rgya la 'brel pa ci yod ce na/ he ru ka bzang po'i rgyud las/rig ma mchan dang ldan zhing lang tsho gzhon/ /byang chub sems kyis gang ba'i dang tshul ni/ /byang chub shing gi sdong po yal 'dab la/ /shin tu 'jam zhing mnyen la'i mas gang / /dkar po lnga tshan gsum du skyes 'gyur te/ / nag po'i ngos gnyis dkar po gcig tu 'bar/ /bcu tshan bcu dang lnga ni 'bras bur gnas/ /nag po'i phye ma thig le gcig 'bab pa/ /gang gis 'thungs pas nad kun rnam par 'joms/ /de ltar las kyi phyag rgya rtogs pa can/ / bsten zhing lhan cig skyes pa dran pa yis/ /las kyi phyag rgya bde bar cher skyes te/ /sbyangs la gnas pa'i 'bras bu smin pa ni/ /rtogs dang ldan pa'i he ru ka nyid phyir/ /rnal 'byor brda la rab tu mkhas rnams kyi/ /spyod yul yin phyir byang chub shing gzung bya//zhes 'byung ba'i phyir ro/ /'khor lo dang / chos rgyal 'brel pa ci yod ce na/ slob dpon kA ma la'i zhal nas gsungs te/ rga shi rnam rtog gzung 'dzin rnam rtog gcod/ /mu khyud lta bu'i rtogs pa nyams su blangs/ /rtsibs rnams mnyam par rtogs pa ro mnyam ste//mtshan nyid gser gyi rang bzhin dang 'dra la/ /bde stong gnyis med shes pa cha snyoms pa/ /'khor lo'i ngos gnyis khor yug mnyam pa bzhin/ /zhes 'byung bas so/ /phyag rgya chen po dang / shing n+ya gro d+ha la 'brel pa ci yod ce na/'jam dpal lung bstan pa las/ n+ya gro rtse mthon shing rnams yal ga dang / /sdong po dri ma dag gis dben pa ste/ /thang chu rtsi 'thungs tsha grang gnyis ka sel/ /rtsa bzangs sbom dang yan lag du ma rgyas/ /sa phyogs dug sel dus rnams kun du gsar//chu zheng gab pa dbyar dgun med par skye/ /sa phyogs khor yug dri yis khyab par skye/ /'bras bu me tog sil ma'i chu 'bab pa/ /yal ga gcig las gom gsum mnyam du 'char/ /de dag rgyas par skye zhing me tog 'bras/ /mnyam du 'char pa'i shing de ro yis skyes//ro de skyed bar nus ba ma yin te/ /de nyid tshogs pa rgyu rkyen rnal ma ste/ /lud dang ma 'dres chu yis ma bsgrubs pa'o/ /de dag gang yin zhe na/ bstan par bya ste/ 'khrul dang ma 'khrul gnyis med cir yang min pa'i rtogs pa lhun gyis grub na bde//'di la brtag mi dgos pas las dang bya ba ma sems thams cad btang na phyag rgya che zhes bya ba la/ 'khrul dang zhes pa ni/ nyon mongs pa ste/ spang du med pa'o/ /ma 'khrul zhes pa ni ye shes te/ bstan du med pa'o/ /gnyis med nyams su myong ba ste/ yid la byar med pa'o/ /cir yang min pa'i rtogs pa ni 'bras bu ste re ba dang bral ba'o/ /de thams cad kyang lhun gyis grub ba'i bde ba nyid kyis so/ /man ngag gi phyag rgya chen po 'di la gang du yang brtag mi dgos pa'o//khyad par ni dge pa'i las dang / sdig pa'i las kyi rgyud dang / rnam par smin pa dang bral ba'o/ /thabs ni bya ba dang bral ba ste/ ma sems shig pa'o/ /'bras bu'i mngon par zhen pa dang / gnyis pa rtags thams cad btang na phyag rgya chen po ste/bcu bzhi pa'i sa'o/ /gang de kho na nyid bcu pa la sogs pa la don med par 'gyur ro zhe na ma yin te/ bsgrub bya bsgrub pa'i dus ni bkag pa yang med de lam du 'gyur bar bshad do/ /bsgrub bya grub pa'i dus su ni/ /dri ma yin pa'i phyir ched du mi bsgrub sa la thams cad de kho na nyid du 'dus pa'i phyir ro//de yang bstan par bya ste/ gzhan yang / lha dang sngags med dka' thub sbyin sreg yod ma yin/ /dkyil 'khor ma grub dkyil 'khor pa yang de bzhin te/ /zhes bya ba ni gong du bshad par zad la ldan pa'i don no//phyag rgya chen po de dag lha dang sngags dang dka' thub ste/ /sbyin sreg dkyil 'khor dkyil 'khor pa yang de nyid do/ /mnyam pa gnyis med ji bzhin par ni 'dus pa'i bdag /gang gis rtog pa grol 'gyur grol bar rdo rje 'chang gis bshad/ / cis bya ba la/ rgyud kyi tshogs gzhan gyis gtan la dbab par bya ste/ gsung rab las/ sku bzhi dbyer med phyag rgya che/ /chos sku de dag lhan cig skyes/ /zhes pa dang / gzhan yang / shes rab snying rje nyer bcas dang / ze baM kA li A li sngags/ /zhes pa dang / gzhan yang /sangs rgyas kun gyi sdom pa ni/ e baM la ni rab tu zhugs/ /zhes pa dang gzhan yang / /sems la bde chen 'byin pa yis/ /'khor ba de ma thag tu sreg /ces pa dang / gzhan yang / bde steng gnyis med snying po la/ /yid la mi byed de len byed/ /ces pa dang / gzhan yang / gnyis su med pa'i dkyil bcas pa/ /ro snyoms gsum byas sgrub pa po/ /zhes pa dang / gzhan yang / chu rnams rgya mtshor lan tshwa'i ro/ /chos rnams bde chen mnyam pa nyid/ /ces pa dang / gzhan yang / chu dang chu gnyis dbyer med ltar/ /'khor ba nyid nas rdzogs sangs rgyas//zhes pa dang / gzhan yang / byang chub sems kyi chu bo nyid/ /ji bzhin par gzhan rgyu mi 'chad/ /ces pa dang / gzhan yang / las dang chas dang dam tshig rnams/ /bzhi pa'i dbang thob myong bar 'dus/ /gang gis bdag nyid de rtogs pa/ / 'das pa grol zhing gnyis grol 'gyur/ /rdo rje 'chang mchog he ru ka /nges pa'i rgyud rgyal bshad pa yin/ /zhes bya bas gsal ba'i phyir rtogs par bya'o/ /tshogs tha ma'i dang po gsal bar bya ba ni/ /chos rnams thams cad bde ba chen por gcig pa mnyam pa gnyis su med pa nyid do/ / ji bzhin pa ni byang chub kyi sems so/ /'dus pa'i bdag nyid chos kyi phyag rgya dang / /phyag rgya chen po'i dbang bzhi pa'i dus kyi ye shes gsum 'dus pas so zhes bya ba ni bsdus pa dam tshig gi phyag rgya'o/ /dam tshig gi phyag rgya skyes bu byed pa'i 'bras bu ni/ sngon gyi skyes bu rnams kyis byas pa dang /ma 'ongs pa'i dus skyes bu'i 'bras bur bcas pa dang / nges par sbyang ba'i mthu las byung ba'i skyes bus byed pa ste/ 'bras bu ni gzhan gyi don to nges pra bstan pa ste zhes pa ni/ rgyu 'bras kyi 'brel pa ma bslus pa'i don to/ /bzhi pa ni gsum pa la ltos pa'o/ /byang chub mchog rgya 'dzin pa dang / sa gnon mchog sbyin ting 'dzin skyabs/ /gzhan dang mthu las grub pa yi/ /'gron mchog tu 'dzin pa'o/ /nre ro e hrI/ sam do ka e bo b+h+ra b+hu ha/ de dag ni dam tshig gi phyag rgya'i bshad pa'o/ /de ltar phyag rgya bzhi'i bye brag de dag skad cig bzhi dang dga' ba bzhi dang / dbang bzhir sbyar bar bya'o/ /phyag rgya chen po ma yin gsum gyi re re zhing / /skad cig ma bzhi bzhir shes bar bya'o/ /de skyed pa'i rgyu 'bras ni ma yin la ltos pa'i rgyu 'bras su shes par bya'o/ /de ni phyag rgya bzhi shin tu bsdus pa'i don to/ /de ltar gzhung gi don bshad nas/ /mtshan 'jug gi don du bshad pa ni//haM phyag rgya bzhir rjes su 'gro ba drug pa zhes bya ba la/ /haM ni lhan cig skyes pa'i nus pa dang bcas pa ste/ a ba d+hU tI'i rtse mo bde chen gyi 'khor lo'i dkyil na gnas te/ lus thams cad der 'dus shing de'i nus pa las mi 'da' ba bzhin du nor bu lta bu'i phyag rgya bzhir rgyud sde rnam pa lda 'dus shing de nyid las mi 'da' ste/de dag ni mchog tu gyur ba gces par bya ba'i tha tshig go/ /sangs rgyas gsungs las rab tu lung bstan pa'i/ /nA gA rdzun mchog las rnyed pa'i don/ /sar ba dang rgyal ba mchog las 'ongs/ /rje btsun mchog gis 'di skyon bzod pa mdzod/ /pha dang ma yi rgyud las 'di rtogs shing //shes rab snying rje bcas pas don 'di brtsams/ /rin chen snying po zhes bya'i 'grel pa 'dis/ /yid pham ngal sos mngon par rgyal gyur cig chos 'di byas pa'i bsod nams kyis/ /'khor gnas 'di na 'khyams gyur pa'i/ /'gro rnams las 'dis sbyangs gyur te/ bcu bzhi'i sa la gnas par shog /phyag rgya bzhi'i rgya cher 'grel ba rin po che'i snying po zhes bya ba/ /rgya gar gyi mkhan po mkhas par grags pa bla ma b+hi ta karmas mdzad pa rdzogs so// //rnal 'byor ba bsod snyoms pa pradz+nyA shri dz+nyAn kI rtis rang 'gyur du byas pa'o// //rje btsun b+hi ta karma de nyid mtshan nyid mdzad pa'i skabs su slob dpon chen po ka ro pa zhes kyang grags so//rnal 'byor mdzad pa'i skabs su/ /da ka ro zan zhes bya bar grags so/ /spyod pa mdzad pa'i skabs su/ /phyogs kyi gos can zhes bya bar grags so// //