CLOSE WINDOW

D2258
བོད་ཡིག

rnal 'byor pa bsod snyoms pa bradz+nyA shrI dz+nyA ni kIrtis rang 'gyur du mdzad pa'o//[ ]@##/ /rgya gar skad du/ do ha go Sha pany+tsi kA nA ma/ bod skad du/ do ha mdzod kyi dka' 'grel zhes bya ba/ 'jam dpal gzhon nur gyur pa la phyag 'tshal lo/ / stong pa snying rje ro mnyam pa/ /lhan cig skyes pa de la 'dud/ /gang zhig zhal gyi bdud rtsi yis/ /'gro ba'i 'chi bdag 'joms mdzad pa/ /bla ma'i zhabs la phyag 'tshal te/ /do ha mdzod kyi dka' 'grel ni/ /rmongs pa'i blo gros sad byed pa/ /'gro la phan phyir bri bar bya//sngags kyi theg pa 'dir rdzogs pa'i byang chub ni bla ma la rag las pa yin no zhes gsungs pas dang por bla ma brtag par bya'o/ /de la bla ma dam pa ma yin pa bsten pa ni bdag nyid nyams par byed pas de'i skyon bstan pa ni/ dug sbrul zhes bya ba la sogs pas bstan te/dper na so ga'i tshad pas nyen pas dug sbrul la grib mar 'khrul te drung du phyin na bdag nyid gsod par byed pa bzhin du/ /bla ma ngan pa rnams la bla mar 'du shes nas sdug bsngal gyis nyen nas de'i drung du phyin na/ de bsten pas de'i skyon lta ba ngan pa dang /spyod pa ngan pa 'go bas/ /de dag sbrul bzhin du bltas te spang bar bya'o/ /sbrul lta bu'i bla ma de gang yin snyam pa la/ /de nyid mi shes bram ze zhes pa nas/ /brdzun pa nyid du gol zhes pa'i bar gyis bram ze ba bstan te/ gyi na rig byed ces pa nas/ / me la sreg gi bar ni khyim na gnas pa'o/ /dbyu gu nas tshig gzhan gyis ni dka' thub la gnas pa bstan te/ dbyu gu ni brtul zhugs 'dul ba dang pos bstan pa 'ang de nyid do/ /e ra'i thal ba nas gzhan la ston gyi bar gyis ni dbang phyug pa bstan te go sla'o/ / sen mo ring zhing nas thar pa nam yang yod ma yin zer ba'i bar gyis mchod 'os pa bstan te go sla'o/ /lus kyi dka' thub 'ba' zhig tsam nas sangs rgyas kyi tshul 'dzin gyi bar gyi ni/ theg pa chung ngu la zhugs pa'o/ /theg pa chen po de la rgyu byed ces nas/ / tshad ma'i bstan bcos yin gyis ni rgyu'i theg pa la zhugs par bstan to/ /kha cig dkyil 'khor 'khor lo ma lus bsgom ni 'bras bu'i theg pa la zhugs pa rtog pa'i rnal 'byor la gnas pa bstan to/ /nam mkha'i khams la rtogs par snang ba ni phyi rol pa dang yang dag thun mong ba ste/nam mkha' la lta ba dang / dus la lta ba dang / phyogs la lta ba'o/ /de la dang po ni nam mkha'i sprin med pa la glo bur du byung bas de mi rtag par lta ba dang / dus kyi 'gyur bas mi rtag par lta ba dang / phyogs ni nyi ma shar nub kyis mi rtag par lta ba'o//bzhi ba'i don 'chad pa ni bzhi pa gsum pa'i don du go nas sangs rgyas pa'i bde ba la brten pa'o/ /de dag las kha cig ni de kho na nyid dang bral pa'o/ /kha cig de nyid ma nor ba dang bral ba'o/ /de ltar bla ma dam pa ma yin pa de dag shes nas spangs la//de dag las bzlog pa'i bla ma'i de kho na nyid ma nor ba la zhugs shing de ston par nus pa rnams bsten par bya'o/ /de nas de kho na nyid kyi don btsal bar bya'o/ /de la dang por de kho na nyid ma yin pa shes par bya ba'i phyir de'i mi mthun pa dmigs pa dang bcas pa'i bsam gtan kun shes nas spang bar bya ba ni/gang zhig gang la zhes pa la sogs pas ston to/ /de la gang zhig ni gang zag go/ /gang la ni yi dam gyi lha lta bu de la'o/ /mos par gyur pa ni des bdag grol bar byed do zhes lhag par dad pa'o/ / bsam gtan gnas pa ni de la bskyed rim gyi sgo nas bsgom pa'o/ /thar pa mi thob pa ni/ sangs rgyas nyid du mi 'gyur ba ste/ dpal dgyes pa'i rdo rje las/ lha med sngags kyi yod ma yin/ /zhes gsungs pa dang / mtshan yang dag par brjod pa las/ / bdag gir mi 'dzin ngar mi 'dzin/ /zhes gsungs pas so/ /mar me ci dgos lha bshos de la dgos/ /de la ci bya gsang sngags brten pa de ci dgos/ /zhes pa ni mchod pa dang bzlas pas mnyes pas mi grol ba'o/ /'bab stegs nas thob bam ci'i bar gyis lha rten lta bas mi grol ba ste/'o na de kho na nyid ji lta bu yin snyam pa la/ snying rje dang bral ba zhes bya ba la sogs pa smos te/ de'i don ni 'di yin te/ stong pa dang snying rje ro mnyam pa'o/ /de la stong pa gang zhe na/ sgyu ma'i rnam par snang ba ste dngos pos stong pa'o//de ni rnam pa thams cad kyi mchog dang ldan pa'i stong pa'o/ /de yang mtshan yang dag par brjod pa las/ gzugs med gzugs bzang dam pa ste/ /sna tshogs gzugs can yid las skyes/ /zhes gsungs pa dang / 'di nyid las/sgyu ma'i rnal 'byor pa ni mchog tu rtogs/ /zhes gsungs pas so/ /de ni mngon sum du mthong ba yin gyis chad pa'i stong pa 'am rtag pa'i stong pa lta bus mngon du ma mthong ba ni ma yin te/ rdo rje gur las/ gal te stong nyid thabs yin no/ /de tshe sangs rgyas mi 'byung ngo //rgyu la 'bras bu gzhan min pas/ /zhes gsungs pas so/ /snying rje ni mi 'bral ba ste/ zag med kyi bde ba'o/ /de ni sdug bsngal dang bral ba tsam yang ma yin gyis/ mi dmigs pa'i bde ba'o/ /de yang bde mchog las/ lha dang mi yi bde ba yis/ / bsdus byas rdo rje 'dzin pa yi/ /bcu drug char yang mi phod do/ /zhes pa dang / 'di nyid las/ gang yang brten par nus pa nas/ /zhes gsungs so/ /snying rje dang bral nas thob par mi 'gyur gyis par gyis ni/ kha yar ba lam ma yin pa dang / gang yang gnyis po la sogs pa ni ro nyams pa lam du bstan te/'bras bu dang mthun pa'i lam bsgom dgos pas so/ /de nyid ma bcos pa'i lha ste/ thams cad don gyi snying por ston pa ni kye lags gang smras zhes pa la sogs pa ste/ kye lags ni bod pa'o/ /gang smras ni bla ma dam pa ma yin pa rnams kyi gong du ston pa'o//brdzun pa ni don med do/ /log pa ni gnyug ma mi mtshon pa'o/ /gang la zhen pa yod pa de yang thong / /zhes pa ni yi dam gyi lha yin zhes 'dzin pa de thong zhes pa'o/ /rtog par gyur na thams cad de yin te/ /zhes pa ni lhan cig skyes pa de rtogs nas brtan g.yo thams cad de yin te zhes pa ni lhan cig skyes pa'i rang bzhin 'ba' zhig yin pa'o//de las gzhan gyis sus kyang shes mi 'gyur/ /zhes pa ni lhan cig skyes pa las gzhan log nas lha gang gis kyang mi shes pa'o/ /'o na gzhan thams cad spang ngam snyam pa la/klog pa zhes pa la sogs pa smos te/ lhan cig skyes pa de ye nas kun la gnas pas rtogs na thams cad de rang las ma 'das pa'o/ /de lta bu'i de kho na nyid de thabs gang gis rtogs par bya snyam pa la/ de mi mtshon pa'i lta ba yod min te/zhes pa la sogs pa smos te/ de ni lhan cig skyes so/ /mi mtshon pa ni mi mtshon pa'i lta ba grub mtha' gang yang med de/ kun nas ston kyang bla mas mtshon na mi rtog ste/ de dag ni mtha' drug gis rgyas btab pas so/ /bla ma'i man ngag gis ji ltar mtshon na/lag gi nor 'dra bar mngon sum du gsal por mthong ste/ bla ma yis ni man ngag gang gis de mngon sum du 'gyur ba'i thabs ston gyi/ don de dngos su brjod nus pa ni ma yin te/ brjod du med de/ gang 'di ltar bshad du yod ces pa dang / bla mas bstan pa ma yin zhing //zhes gsungs pa'i phyir ro/ /de ltar na dbang bzhi pa kho nas rtogs so/ /ma mtshon bar mi rtogs pa ni gnyug ma'i rang bzhin zhes bya ba la sogs pa ston te/ lhan skyes de ye nas gnas kyang rtog pa'i bag chags bzhi pos dkrug pa'i phyir mi rtogs so//de rtogs pa'i gang zag ni shes pa ci la yang mi dmigs shing spyod pa gang yang blang dor med do zhes bstan pa ni bsam gtan med cing zhes pa la sogs pas ston te go sla'o/ /lhan skyes ye shes de dbang gsum pa'i nyams myong gis mi rtogs snyam pa la de dag dgag pa'i phyir/gal te mngon sum gyur na zhes bya ba la sogs pa smos so/ /gal te/ mngon sum gyur na bsam gtan ci/ /zhes pa ni gsum pa'i dus su lhan cig skyes pa de mngon sum du mthong na bsgom ci dgos zhes pa'o//gal te lkog tu gyur na mun pa 'jal/ /zhes pa ni/ gal te ma mthong na bsgom du med de rtogs pas mos par zad de/ mun khung gi gzugs lta ba bzhin no/ /yang na gsum pa'i bde ba de lhan skyes de rnal ma yin te/ rnal ma de ni dngos po ma yin te/rdul phra rab las 'das pa dang / dngos med min te mig sngar snang bas so/ /yang na dngos dang dngos med min ni/ /dngos po ni bde ba'i nyams so/ /dngos med ni stong pa'o/ /min ni tha dad min te ro mnyam pa'o/ /'di ni de las bzlog pa ste/ /'di ni dngos po'i rtog pa'o//de yang he badzra las/ gang phyir 'byung ba che bde ba/ /des na bde ba de nyid min/ /zhes pa dang klu sgrub kyis bcos ma las ma bcos pa ji ltar 'byung ste/ zhes gsungs pa'i phyir ro/ /yang na gal te/ mngon sum gyur na bsam gtan ci/ /zhes pa la sogs pa'i don ni mngon sum gyur na ste/dngos po ni bsgom mi dgos te/ mngon du gyur pas so/ /dngos med ni bsgom du mi rung ste ma mthong pas so/ /de ni lkog tu gyur na mun pa 'jal te/ mun khung gi gzugs la sems pa bzhin no/ /de bas na lhan cig skyes pa nyid ni//dngos dang dngos med min te/ stong pa dang snying rje ro mnyam pa'o/ /de ltar lhan cig skyes pa de spyir bstan nas/ da ni de nyid bye brag tu phye ste bstan pa'i phyir/ gang zhig blangs nas zhes bya ba la sogs pa smos te/ de la gang zhig nas ji ltar bya ba'i bar gyis ni rgyu'i lhan skyes te/gang zhig ni rtsa ba'i 'od gsal ba mi shigs pa'i thig le'o/ /blangs pa ni de la brten nas rtogs pa skye ba'o/ /de'i dbang gis skye zhing 'chi bar byad pas so/ /yang na ye shes kyi rlung gis sems can skye zhing des sreg zad par byas nas 'chi bar ster ro//de nyid blangs nas bde chen mchog grub ces pa ni/ rtsa ba'i 'od gsal de ma dag na 'khor bar skyes la/ de dag ni nyi ma lta bur 'char la/ de shar na de la zag med kyi bde ba 'grub pa'o/ /gzhan ni go sla'o/ /da ni rgyu'i lhan cig skyes pa de rtogs par bya ba'i phyir/lam gyi lhan cig skyes pa ston par bzhed nas/ bsam gtan bral ba ni bsam pa'i yul las 'das pa dang / brjod du med pa ni tha snyad las 'das pa'o/ /ma brjod na rtogs sam zhe na/ ma yin te/ srid pa'i phyag rgya ste/rtog pa'i rgyu rlung la zhugs pa'i dbang gis lhan cig skyes pa de mi rtogs pas/ bla ma dam pa'i gdams ngag la ltos dgos so/ /gdams ngag kyang rtog pas bsgom pa ma yin par ston pa ni/ rgyud med sngags med ces bya ba la sogs pa'o/ / gdams ngag de gang yin na/ za zhing ni bde ba'o/ /'thung ba ni shu kra'o/ /gnyis sprod ni steng 'og gi rlung 'thab pa'i drod kyis so/ /rtag tu yang dang yang du 'khor lo 'gengs/ /zhes pa ni/ rtsa dbu ma'i steng byang chub kyi sems smad khrag gis gang bas byang sems phyir shor bas lus shed nyams pa la sogs pa'o//de nas byang sems kha gyen du 'dren pa'o/ /shu kra la gyen du bltas te 'khor lo drug rim gyis 'gengs pa'o/ /'jig rten pha rol la sogs pa ni go sla'o/ /de ltar bde ba'i bsam gtan bstan nas/stong pa bstan pa'i phyir/ gang du rlung dang sems ni zhes bya ba la sogs pa smos te/ rlung mi rgyu ba ni dbu mar rlung bcings pa'o/ /de yang sems ma bcings ni mi grub pas sems bcings pa ni mi rtog pa la bzhag pa'o/ /nyi zla ni g.yas g.yon gnyis kyi rlung ngo //'jug pa med 'gyur ba ni dbu mar zhugs pa'o/ /gzhan ni go sla'o/ /gnyis med kyi bsam gtan ni gnyis su mi bya zhes bya ba la sogs pas ston te/ de la/ gnyis su mi bya gcig tu bya ba ste/ /zhes bya ba ni g.yas g.yon gyi rlung a ba d+hU tI'i gcig tu byas pa'o//rigs ni kha dog lnga'i rlung tha dad du mi bya bar ye shes kyi rlung kha dog gcig tu byas pa'o/ /yang na rigs las bye brag ni thabs kyi rigs dang / shes rab kyi rigs tha dad du mi bya bar e baM ro mnyam du bya'o/ /khams gsum ni lus ngag yid gsum mo//'dod chags chen po ni bde ba chen por ro mnyam pa'o/ /bde ba chen po de ji lta bu yin zhe na/ des ni thog ma ste dga' ba dang / /bar ma ni mchog tu dga' ba dang / /tha ma dga' bral ste de rnams spangs pa'o/ / srid min ni dga' ba dang mchog tu dga' ba ste/ 'khor ba dang mya ngan las 'das pa ni dga' bral lo/ /ma yin na de gnyis spangs pa'i lhan cig skyes pa'o/ /de ni zag bcas kyi bde ba'o/ /yang zag med kyi bde ba'i dbang du byas nas/ thog ma ni skye ba/ bar ma ni gnas pa'o/ /tha ma ni 'jig pa ste/ zag med kyi bde ba ni rgyu las ma skyes pa'o/ /srid min ni ma zhu ba dang / dpral ba na gnas pa ma yin pa'o/ /mya ngan la 'das pa min na ni/ rdo rje nor bu nas ma 'phos pa'o/ /de ltar phab la ma pho ba'o/ /gzhan ni go sla'o//gnyis med kyi dus der gzung 'dzin gyis 'brel pa chad pa ni/ mdun ni zhes pa la sogs pas ston te/ mdun ni rtog pa'o/ /rgyab ni ye shes so/ /phyogs bcu ni phyi'i phyogs so/ /gang gang mthong ba de de nyid/ /ces pa ni/ ci snang bde de nyid de bde chen nyid do/ /de ring mgon po da ltar 'khrul pa chad//ces pa la/ de ring ni rtogs pa'i dus so/ /mgon po da ltar ni nang du rtogs pa'i nyams bzhin phyir gzung ba'i 'khrul pa chad pa'o/ /de nyid du shes pa'o/ /da ni su la'ang 'dri bar mi bya'o zhes bya ba ni/ /'khrul pa chad pas na bde ba'i don gzhan la mi 'dri ba'o//dbang po gang du la sogs pas ni 'dzin pa'i 'brel pa chad pa ston te/ dbang po ni 'dzin pa'i rtog pa'o/ /gang du ni lhan cig skyes pa gang du'o/ /nub pa ni 'brel pa chad pa'o/ /de yang ji ltar chad na/ rang gi ngo bo nyams pas 'gyur/ / zhes pa ste/ rang gi ngo bo grub pa med par shes pa'o/ /gzung 'dzin gyi 'brel pa chad pas mthong ba de'i ming ci yin na/ lhan cig skyes pa'i lus te sku'o/ /de ni bla ma'i zhal las shes so/ /bla ma'i zhal las thob pa de'i tshe yid 'ching ste/ mi rtogs pas so//rlung de ngas pa de dbu mar thim pa'o/ /gar shes pa ste thabs shes pa'o/ /lhan skyes de la 'khrul pa gsal ba'i phyir/ sa gsum zhes bya ba la sogs pa smos te/ de las gsum ni snang ba gsum mo/ /'di la zhes pa ni 'dir zhes pa'o/ /yan lag thams cad ni 'khor 'das so//gnas ni gzhi'o/ /de ltar snang ba gsum po de ni rmongs pa'i rgyu yin pas bzhag la/ snang ba gsum dang ldan pa'i sems kyi rnam pa 'khor ba yin pas spangs pa dang / sangs rgyas kyi snang ba stobs yin te/ /da ltar mi thob pas de gnyis dbang po'i rim pas mtshams te rnal 'byor pas 'od gsal bsgoms zhes pa'o//mtshams ni bzhi 'od gsal gyi bdag nyid yongs su shes pa'o/ /'od gsal de'i gti mug ste/ mi shes pa'i mtsho chad par byed pa'o/ /gal te 'od gsal gang yin ba de shes na'o//des ni sems can gyis rigs pa'i shes pa myong ba ni rtogs pa yin pas de lhan skyes ma yin par bstan to/ /'o na snang ba 'di nyid la lhan cig yin snyam pa la/ lan du kye ho zhes pa la sogs pa smos te/ kye ho ni kye ma de ngo mtshar ba'o/ /'di ni rang gis rig pa ste/'di la 'khrul par ma byed cig /ces pa ni snang ba 'di nyid ni gang gis gsum zhes pa snang ba dang / mched pa dang / nye bar thob pas te/ 'khor ba rgyud mar 'gro ba rtog pa'i snang ba ste/ 'di la lhan cig skyes pa yin no zhes 'khrul par ma byed cig ces pa'o//de ci'i phyir zhe na/ de dngos dang / dngos med kyi rtog pa gnyis ka 'ching ba nyid du bde bar gshegs pas gsungs pas so/ /de lta bu lam mnor ba de la blo ji ltar gzhag snyam pa la/ gnyug ma'i yid ni zhes pa la sogs pa smos te/gnyug ma'i yid ni lhan skyes so/ /gcig tu stong dang zhes pa ni/ /bsgom bya sgom byed gnyis spangs la/ /mi dmigs pa la gzhag pa'o/ /dpe ji ltar bzhag na chu la chu gzhag bzhin du ste/ chu rgyu 'od gsal stong pa la//chu bzhag ste mi rtog par gzhag pa'o/ /bcos ma'i rnal 'byor gyis mi grol bar bstan pa'i phyir/ bsam gtan brdzun pa zhes pa la sogs pa smos te/ bsam gtan brdzun pa ni rtog pa'i rnal 'byor ro/ /sgyu 'phrul dra ba ni las kyi phyag rgya'o/ /ji ltar pang du 'khyud de ma 'khyud par spongs zhes pa'i don to//de nyid spangs pa'i 'thad pa bstan pa'i phyir/ bla ma dam pa'i zhes bya ba la sogs pa smos te/ bla ma dam pa'i bka' yis bden par yid ches pa/ /de yis ni sa ra ha yis so/ /brjod du yod pa min zhes mda' bsnun smra//zhes pa la/ sgra dang yi ge'i yul ma yin pas na/ /yul ji lta bu la bzhag snyam pa la/ gdod nas dag pa'i zhes bya ba la sogs pa smos te/ gdod nas dag pa'i nam mkha' ni sprin med pa'i nam mkha'o/ /bltas shing bltas shing mthong ba dgag par 'gyur//zhes pa ni/ khengs pa'i lta stangs kyis bltas na mthong ba 'gag pa ni gzung 'dzin gyis 'brel pa chad pa'o/ /de lta bu yi dus su 'gog byed ci/ /zhes pa'i rlung bzhi rim gyis 'gag pa'o/ /de yang dang po sangs rgyas kyis rgyud las/ /nam mkha'i sprin bral ba ni khengs pa'i lta bas blta//zhes gsungs pas so/ /de'i don ni 'di yin te/ nyin par bla gab med par 'dug ste/ sprin med pa'i nam mkha' la khengs pa'i lta bas blta zhing / yid mi rtog pa la bzhag na rlung rim gyis 'gags nas rtags 'char ba'o/ / 'di ni gdams ngag dam pa ste/ gsal bar bla ma'i zhal las shes par bya'o/ /de lta bu lhan cig skyes pa de rang la gnas na mi rtog pa'i rgyu ci yin snyam pa la/ gnyug ma'i yid ces bya ba la sogs pa smos te/ gnyug ma'i yid ni lhan skyes ma bcos pa'o/ / nga rgyal skyon ni nga dang ngar 'dzin pa'i skyon gyis bsgribs pa'o/ /gzhan gyi skyon gyis mi rtogs par ston to/ /'jig rten ma lus bsam gtan gyis rmongs te/ /zhes pa la rtog pa'i rnal 'byor mtshan bcas ston pa'i bla ma'i skyon gyis mi rtog pa dang / gzhan yang stong pa nyid rtog par ston pas kyang mi rtogs te/lhan skyes de skye 'gags rnams kyis brtags na de'i rang bzhin mi shes so/ /lhan cig skyes pa de rtogs pa las ci 'byung snyam pa la de'i phyir don gyi lhan skyes rnam par dag pa'i 'bras bu bstan par bzhed nas/ rtsa ba zhes bya ba la sogs pa smos te/de la rtsa ba dang bral ba ni/ rgyus ma skyes/ rkyen gyis mi 'gags/ ngo bo gang la yang mi rten pas so/ /de nyid mi 'gyur ba ste lhan skyes so/ /gang sems dpa' ni lhan skyes gang yin pa de bsgoms na/ 'khor ba'i rang bzhin ni sems nyid kyi rnam rtog tsam yin pas/sems mtshon pa'i bla ma'i gdams ngag des chog pas gzhan gyis ci bya zhes pa'o/ /lhan skyes de gang gis kyang brjod par bya ba ma yin na/ bla mas ji ltar mtshon snyam pa la de'i phyir rang bzhin gnyug ma brjod bya ma yin te/slob dpon man ngag mig gis mthong bar 'gyur/ /zhes bya ba la sogs pa smos so/ /de'i don ni brjod bya ma yin du zin kyang / thabs bstan pas dang po dbang po'i mngon sum gyis sgyu ma lta bu'i lus mthong bar 'gyur te/ dper na mun khung gi rdzas brjod pas mi mthong ba'i thabs mar me ston pa lta bu'o//dpes ni 'bras bu'i lhan skyes mngon sum du gyur par bstan te/ de nyid nyes pa dang bral bar bstan pa'i phyir/ chos dang chos min zhes bya ba la sogs pa smos te/ de la chos ni dge ba'i chos dang / chos min ni mi dge ba'o//mnyes par ni khyad par med pa'o/ /zos pa ni rtog pa'o/ /de ltar de ni las rgyu 'bras dang bral ba'o/ /yang de la sangs rgyas kyi yon tan 'byung bar bstan pa'i phyir/ gnyug ma'i zhes bya ba la sogs pa smos te/ gnyug ma'i yid ni lhan skyes so//sbyangs pa ni rtog pa'i rlung dag par byas pa'o/ /bla ma'i yon tan snying la 'jug pa na/ /gong ma mchog gi yon tan stobs dang mi 'jigs pa la sogs pa rang la 'char ba'o/ /glu len ni dga' nas so/ /sngags dang rgyud rnams gcig kyang ma mthong ngo //zhes pa ni ma mthong mod don rtogs pas chog ces pa'o/ /de lhan cig skyes pa de mdor bstan nas/ de nyid rgyas par bshad pa'i phyir/ 'gro ba rnams las kyis zhes bya ba la sogs pa smos te/ de la 'gro rnams thams cad las kyis so sor bcings gyur te//zhes pa la dge mi dge'i las ni rang gi rnam rtog tsam ste/ /des na rang gi rtog pas sprul pa yin gyis las rgyur smra ba ni ma yin no/ /de skad du yang rdo rje phreng ba las/ /khams gsum rlung gi sprul pa ste/ /rmi lam rmi ba bzhin du blta//zhes gsungs so/ /rnam par rtog pa de nyid ni rtsa ba'i 'od gsal te/ de dag na rtog pa kun 'gag ste/ de dag pa'i gnas skabs la mya ngan las 'das pa zhes bya'o/ /de skad du yang / 'khor ba yongs su shes pa na/ /mya ngan 'das zhes de la bya//zhes gsungs so/ /de ltar na sems nyid gcig po kun gyi sa bon te zhes bstan pa'o/ /sems nyid gcig pu de nyid dpyad par bya ste/ rang rig rtog med la bya'am 'on te gzhan ci yin dang po ni ma yin te/ de ni lta ba'i gnas lugs yin te/ de ni 'khor ba'am mya ngan las 'das pa gang yang ma byas pa ma yin te byed pa dang bral bas so/ /gzhan ni ma yin te/ sems las ma gtogs pa'i gzhan med do snyam na de ni bden te/ dang po lta ba'i gnas lugs ni/ /lam du gyur pa ma yin te/ /rgyud du ma las bkag pas so//'o na gang la bya na mi shigs pa la ste/ de ni rtsa ba'i 'od gsal zhes bya/ rnam rtog byang chub sems zhes bya/ ma dag pa'i dus na ma rig pa zhes pa'o/ /de ni rgyud rnams su a zhes bya ba'i brdas bstan te/ mtshan yang dag par brjod pa las/rdzogs pa'i sangs rgyas a las byung / /a ni yig 'bru kun gyi mchog /don chen yi ge dam pa yin/ /srog chen po ste skye ba med/ /ces pas so/ /a zhes pas kyang sems skye med mtshon no snyam na/ de ma yin te rdo rje snying po rgyan gyi rgyud las/snying ga'i dbus na mi shigs pa/ /'bar zhing mar me dag dang mtshungs/ /a ni mi 'gyur dam pa'o/ /zhes pa dang / he badzra las/ de ltar phyag rgya chen po ni/ /dbyangs yig dang po'i rang bzhin te/ /blo chen sangs rgyas rnams kyi rtags//zhes gsungs pas/ skye med la a'i brda bstan pa ma yin te/ skye med ni thun mong du grags pas/ brda don med du 'gyur ro/ /de ltar rgyu'i lhan cig skyes pa bstan nas/ da ni de mngon du bya ba'i phyir thabs kyi lhan cig skyes pa ston te/ sems bcings ba ni zhes bya ba la sogs pa smos te/sems ni mi shigs pa'i thig le'o/ /bcings pa ni rtog pa'i rlung rgyu bas so/ /'ching 'gyur ni 'khor bar 'gyur ba'o/ /de nyid grol nas mya ngan 'das par 'gyur ro/ /'ching ba'i rgyu gang yin zhe na/ blun po gang gis 'ching 'gyur ba//mkhas pa de yis myur du grol/ /zhes gsungs so/ /blun po ni mi shes pa'i grol ba'o/ /gang gis 'ching 'gyur ni rlung gis so/ /thabs shes pas mkhas pa ni/ rlung de nyid kyis myur du ste/ tshe 'di nyid la sangs rgyas ster ba'o/ /de yang he badzra las/gang dang gang gis 'jig rten 'ching 'gyur ba/ /de dang de yis mkhas pa yongs su grol/ /zhes gsungs so/ /'ching ba las thar pa'i thabs de gang yin snyam pa la/ sems ni zhes bya ba la sogs pa gsungs te/ sems ni nam mkha' lta bur gzung bya ste/ / zhes pa ni/ sems rtog med du gzhag pa'o/ /chos rnams kun kyang nam mkhar mnyam par blta/ /zhes pa ni/ chos thams cad sems kyi snang ba yin pas nam mkha' dang mnyam pas te/ de gdod ma nas ma grub pa'o/ /sems ni nam mkha' lta bur gzung bya ste/ / rtog med de las cir 'gyur na/ /sems de bsam gyis mi khyab pa ste/ mi rtog pa lhun grub tu bzhag na/ bla med de sgyu ma'i rang bzhin du rtog par 'gyur ba'o/ /de yang dpal gsang ba 'dus pa las/ dngos po med par bsgom pa min/ /bsgom par bya ba sgom pa min//de bas dngos po dngos med pas/ /bsgom pa dmigs su med pa yin/ /zhes pa'o/ /he badzra las kyang / sgom pa po med bsgom bya med/ /ces gsungs pa dang / 'di nyid las bsam gtan dag gis ma bslad/ ces gsungs pas so/ /sems mi rtog pa la bzhag na rlung gang du 'ching snyam pa la/nam mkha' 'drar byas nas zhes pa la sogs pa gsungs te/ mkha' 'drar byas nas ni mi rtog par byas nas so/ /de cis byas na rlung ni rnam par rtog pas bcings pas so/ /de ltar 'ching ni mnyam nyid de/ / yul dang yul can ro mnyam pa'o/ /de shes pas ni rab tu thim/ /zhes pa ni/ rlung gcig la gcig thim nas 'od gsal du 'jug pa'o/ /mda' bsnun gyis smras sogs ni phan yon te go sla'o/ /rab tu thim pa'i tshul gyis de nyid smra/ /bstan pa ni/ rlung dang zhes bya ba la sogs pa smos te/rlung ni 'og gi dri chu'i rtsa'o/ /me ni steng gi g.yas pa'o/ /dbang chen ni 'og gi dbus ma dri chen gyi rtsa na gnas pa'i rlung ngo / /steng du d+hU tI'o/ /bdud rtsi rgyu ba ni steng du zla ba'i bdud rtsi rgyu ba'i rlung 'og tu g.yas byang chub sems kyi rtsa'o/ /dus mi 'da' ba'o/ /de lta bu'i sems de 'od gsal du 'jug pa'o//yang na sa chu la thim/ me la me/ rlung la rlung / sems 'od gsal du 'jug go/ /chu ni kha bskang ste bstan pa'o/ /bdud rtsi rgyu ba'i dus su zhes pa ni/ snyoms 'jug gi dus su yang sems de rtsa dbu mar gzhug go/ / yang na de ltar rlung dbu mar zhugs na/ srog rtsol gyi mes dpral ba'i haM bzhu nas/ bdud rtsi byang chub kyi sems 'dzag ste/ /de las bde ba skye'o/ /de ltar yang gsungs pa/ sa ni chu la thim pa ste/ /chu ni me la thim par 'gyur/ /me ni rlung la thim pa ste/ /rlung ni rnam par shes la 'jug /rnam shes de ni 'od gsal ba'o/ /zhes pa'o/ /de ltar bcings pa las bde ba skye bar bya ba bstan pa'i phyir/ nam zhig ces bya ba la sogs pa smos te/ de la nam zhig ni gang gi tshe'o/ /sbyor ba bzhi ni steng 'og gi rlung bzhi'o/ /yang na 'byung ba bzhi'i rlung ngo //gnas gcig ni a ba d+hU tIr zhugs pa'o/ /yang na sbyor ba bzhi ni dga' ba bzhi'o/ /gnas gcig la zhugs pa ni lhan cig skyes pa la'o/ /nam mkha'i khams su mi shong ba ni/ /bde ba des chos thams cad la khyab par shes pa'o/ /de rtogs dka' bar bstan pa'i phyir//khyim dang zhes bya ba la sogs pa smos te/ 'gro kun bsam pas sun 'byin pa/ /zhes pa ni rang gi rnam rtog gis bsgribs nas sun 'byin pas de mi rtog pa'o/ /yang na rang gi rnam rtog ngan pas gzhan dam pa'i lam ston pa sun 'byin cing 'dug pas so/ / gzhan ni go sla'o/ /des ni rtogs par dka' yang bsgrub par nus pa ma yin par bstan pa'i phyir/ sems can thams cad kun la yang / /zhes bya ba la sogs pa smos te/ thams cad ro mnyam rang bzhin ni lhan cig skyes pa yod par khyad par med pa'o/ /de'i ming ni bsam yas ye shes bla med pa'o//zhes pa'o/ /gzhan ni go sla'o/ /sgrub pa la zhugs pa rnams kyang le lo'i dbang du gyur pas mi rtogs par bstan pa'i phyir/ de ring zhes bya ba la sogs pa smos te go sla'o/ /de ltar na de nyid rtog pa'i gang zag dkon pas/ sgrub pa la 'bad par byos cig ces bstan pa'i phyir/bya ba byed dang zhes bya ba la sogs pa smos te go sla'o/ /de ltar na rlung bcings pa de yang sems ma bcings na mi 'grub pas sems rtog pas bcings par bstan pa'i phyir 'jug bus bcings pa'i sems 'di ni zhes bya ba la sogs pa smos te/de la 'jur bus bcings pa ni rtog pas sgribs pa'i sems de'o/ /glod na grol bar the tshom med/ /ces bya ba ni/ mi rtog pa la bzhag na rtog pa'i bcings pa las grol bar gdon mi za'o/ /rtog pa'i rtsa ba gang yin zhe na/ gang gis rmongs pa zhes smos te/gang gis ni rlung gis so/ /rmongs pa ni thabs dang bral ba'o/ /'ching ba'i dngos po ni de las byung ba'i rtog pa'o/ /mkhas pa rnams ni thabs dang ldan pa'o/ /de yis zhes pa ni mi rtog pa de yis sgom pa yis rnam par grol bar ni rtog pa'i rtsa ba'i rlung dbus su 'jug par 'gyur ro//bcings pa dang grol ba de dpe yis gsal bar bstan pa ni/ bcings pa'i rnam pa ni zhes bya ba la sogs pa smos te/ dper na/ bcing ba rnams grol bar rtsol la/ ma bcings pa rnams grol bar mi rtsol lo//de bzhin du bcings pa ni rtog pas bzung na'o/ /thongs par gyur na ni mi rtog pa la bzhag go/ /go bzlog pa'i chos ni bcings na grol ba la/ thongs na sdod do/ /bdag gis bzlog pa'i gdams ngag rtog pa'o/ /rang la tshol te ltos zhes pa ni/ sems 'dzin 'dod na zhes pa'o/ /de ltar bcings pa dang grol ba'i rgyu bstan nas/da ni thabs bstan par bya ste/ kye lags zhes bya ba la sogs pa smos te/ de la dbang po ltos shig ces pa ni khengs pa'i lta bas nam mkha' sprin med pa la ltos shig pa'o/ /'di la ngas ni me rtog zhes pa ni/ / yid kyis mi rtag go zhes pa'i don to/ /las zin pa'i skye bo yis/ /zhes pa ni rtog pa bkag pa yis so/ /drung du ni nam mkha' sprin med du'o/ /sems thag bcad pa ni rtog pa thag bcad pa'o/ /des ni 'di skad ston pa yin te/ nyin mo'i sbyor bas bla gang med pa'i nam mkha' dri ma med pa bltas pas/me 'bar ba dang / glog dang / zla ba dang / nyi ma dang / sgra gcan gyi rnam pa mthong la/ mtshan mo'i rnal 'byor gyis mtshan ma lnga 'byung ste/ du ba dang / smig rgyu dang / mkha' snang dang / mar me dang / nam mkha' lta bu'o//de dag ni rlung dbu mar zhugs pa'i rtags yin no/ /de yang he badzra las/ bsam pa thams cad yongs spangs te/ /nyi ma gcig tu yongs su rtog/ /gal te mtshan ma ma byung na/ /de tshe nga yi brdzun tshig yin/ /zhes pa dang / dang po sangs rgyas kyi rgyud las kyang /sprin med nam mkha' la ni khengs pa'i lta bas blta/ /zhes pa la sogs pa gsungs so/ /'di nyid las 'og nas/ mig ni mi 'dzums sems 'gog na/ /rlung 'gog pa ni dpal ldan bla ma'i rtog /zhes pa dang / gdod nas rang bzhin dag pa'i nam mkha' la//bltas shing bltas shing mthong ba 'gag par 'gyur/ /zhes gsungs te/ gsal por bla ma'i zhal las shes par bya'o/ /da ni thabs dang thabs ma yin pa'i khyad par bstan pa'i phyir/ rlung bcings pa la rang nyid la sems kye/ /zhes pa la sogs pa gsungs te/de la rlung bcings pa ni rlung grags pa lta bu'o/ /mi gang zhig gi rnal 'byor ni des don med pa'o/ /sna rtse ni rtog pa'i rnal 'byor steng 'og gi sna rtser sems 'dzin pa'o/ /ma 'dug kye zhes pa ni ma sgoms shig ces pa'o/ /'o na gang bsgom na/e ma ho ma yin zhes pa ni/ rtog pa'i rnal 'byor thabs ma yin gyis zhog la/ lhan cig skyes pa mchog mi rtog pa la gnas par gyis shig ces pa'o/ /rtog pa'i rnal 'byor de thabs ma yin par bstan pa'i phyir/ srid pa'i sna rtser zhes pa la sogs pa smos te/srid pa'i sna rtser bcings pa yongs su spang / /zhes pa ni/ srid pa'i sna rtser gtad pa bcing bar de yongs su spangs zhes pa'o/ /spang pa de ci'i phyir zhe na/ 'di ni yongs su 'dus pa las rlung gis brlabs pas g.yo zhing 'phyar la shin tu mi srun par 'gyur pa'i phyir ro//lhan skyes de bsgrub pa ci'i phyir zhe na/ lhan cig skyes pa'i rang bzhin gyi rtogs pa la gnas na bstan par 'gyur ba'i phyir ro/ /yid mi g.yo ba la dgos pa ci yod snyam pa la/ yid ni nye bar 'gags gyur na/ /lus kyi bcings pa rtogs pa dang / /sdug bsngal chad par 'gyur ba'o/ / der ma zad kyi bde stong ro mnyam du 'gyur bar bstan pa ni dbus su lhan cig skyes dang ro mnyam pa ste/ dbus ni mtha' dang bral ba ste stong pa dang / lhan skyes bde bar ro mnyam na gdol pa ste/ ma reg pa na stong pa dang / bram ze ste bde ba tha dad med pa'o/ /de ltar srid pa'i sna rtser thabs ma yin zhing /lhan skyes thabs su bstan nas/ lhan skyes de ni phyi rol mi gnas shing rang gi lus la gnas par bstan pa'i phyir/ 'di na zla ba zhes bya ba la sogs pa smos te/ lus dang dran pa'i mun gnas pa'i mtsho/ /zhes pa la lus ni lus la gnas pa'o//dran pa ni man ngag la gnas pa'o/ /mtsho ni bde ba mi zad pa'o/ /gzhan ni go sla'o/ /lhan skyes de rang la yod pas gnas gzhan las mi btsal bar bstan pa'i phyir/ 'dab ldan zhes pa la sogs pa smos te/ 'dab ma dang ldan pa'i ge sar gyi dbus na gnas pa ni/kha ga mu kha'o/ /shin tu phra ba ni a ba d+hU tI'i rtsa'o/ /dri ni ut+pal gyi dri lta bu'o/ /kha dog ni dmar po'o/ /dri dang kha dog dang ldan pa'i bye brag ste/ las kyi phyag rgya dang / rang 'od kyi rig ma la brten par mi bya'o/ /lhan skyes de nyid ma bcos pa'i lha yin pas phyi'i lha mchod pa la mi ltos par bstan pa'i phyir/gang du tshangs pa zhes bya ba la sogs pa smos te go sla'o/ /lhan cig de rtog pa'i yon tan bstan pa'i phyir/ kye ho zhes bya ba la sogs pa smos te/ bde ba'i gnas mchog rtog pa spangs pa de ngas mthong zhes pa la/ bde ba'i gnas ni rgyu ste stong pa'o/ / rtog pa spangs pa ni mi rtog pa'i lam de ngas mthong zhes pa ni mngon sum du'o/ /'gro ba nye bar skye bar byed pa nyid bzhin no zhes pa ni ma la bu skye ba dang 'dra bar zag med kyi bde ba skye'o/ /blo rnams 'gag ni yul gyi rtog pa'o/ /yid rang bzhin ni yul can gyi rtog pa'o/ /gang du mngon pa'i nga rgyal chad pa ni de nyid kyi zhen pa chad pa'o//de nyid sgyu ma'i rang bzhin mchog tu rtog pa zhes bya ba ni de ltar yul dang yul can gyi 'brel pa chad na chos thams cad sgyu ma ltar mthong ba'o/ /rtog pa chad pa'i tshul bstan pa ni/ dngos po zhes bya ba la sogs pa smos te/ dngos po skye ba ni yul du snang ba'i rtog pa'o//mkha' ltar gyi rtog pa gang zhe na zhes pa'o/ /dngos po rnam spangs phyir na ci zhig skye/ /zhes pa ni/ yul gyi rtog pa chad na yul can gyi rtog pa chad pa'o/ /de'i phyir bla mas bstan pa'i dbye ba rnam spang pa ni yul dang yul can gyi dbye ba tha dad spangs pa ni bral ba ste/mi rtog pa la gnas par byos shig ces pa'o/ /yang na sgyu ma lta bu la gnas par byos shig ces pa'o/ /de la ji ltar rnam par gnas par bya snyam pa la mthong dang zhes bya ba la sogs pa smos te/ sems so zhe na gcig gi rnam pa las mi 'da' zhes pa ni spyod lam la sems 'jug pa ni/gcig gi rnam pa ste sgyu ma la sems ma g.yos pa'o/ /da ni de lta bu ston pa'i bla ma la brten pa'i phyir/ gang zhig bla ma'i man ngag ces bya ba la sogs pa smos te/ de la bla ma'i man ngag bdud rtsi la sogs pa dang bral ba ni/ sdug bsngal gyis 'dzin par bstan te go sla'o/ /bla mas bstan pa zhes bya ba la sogs pas ni lhan cig skyes pa ni rtogs par bstan te go sla'o/ /tshig 'di ni 'og ma dang 'brel te bla mas bstan du med cing / slob mas mi go ste/ 'on kyang bla ma'i gdams ngag la bden par 'dzin pa'i dbang gis bye brag rnyed pa ste/blun pos kyang mngon sum du mthong bar 'gyur ro/ /de mthong na bzang ngan dang / che chung dang / gtsang mi gtsang gi rtog pa thams cad spang ste/ gdol pa'i khyim ste de la rol yang dri mas ma gos pa ni de'i nyes pas ma reg pa'o/ / de ltar blun pos kyang mngon sum du byed pa'i yon tan bstan nas dman pa mchog tu gyur pa bstan pa ni/ gang tshe zhes pa la sogs pa smos te/ srang khar bor ba'i kham phor slong ba po'i sprang pho ra yin yang man ngag ma thob pa'i rnal 'byor pa de ni rang la dbang chen pos rgyal po yin na/slar yang ci byar yod ni dman pa'i gnas med de lhan cig skyes pa'i rtog pas 'gag zhes pa'o/ /de yang gzhi mal stan chen po lag pa'i sngas ni 'bol la khrid ces pa la sogs pa nas/ rnal 'byor pa nyid rgyal po yin/ /zhes bya ba'i bar du gsungs pas so/ /mya ngan 'das la mi gnas srid par mdzes//zhes pa ni 'khor ba na 'dug mod sems sangs rgyas su 'dug pas so/ /de lta bu'i rnal 'byor des 'khor ba na gnas na ci'i tshul gyis gnas snyam pa la/ ji ltar bu chung tshul du gnas bya zhing / /zhes gsungs te/ bu chung gi tshul ji ltar bu zhe na/bsam dang bsam bya rab tu spangs nas su/ /zhes pa'o/ /bsam pa ni rtog pa'o/ /bsam bya ni brtags pa'o/ /de ltar rab tu spangs pa ni rtog pa mtha' dag spangs pa'o/ /rtog pa spangs ba de ci'i phyir zhe na/ nad gzhan dag la sman gzhan gtang mi bya//zhes gsungs te/ de'i don ni ngan pa spong ba la ngan par brtag pas mi spongs te/ ci yang ma brtags par bzhag na ngan pa'i rtog pa spong ba'o/ /'o na bsgom pas spang bar bya'am snyam na/ bla ma'i lung la bsgrims te gus 'bad na/ /zhes gsungs te/ bla ma'i lung bzhin du gus par 'bad par bya'o//de las lhan cig skyes pa 'byung bar 'gyur ro/ /lhan skyes smra ru mi btub pa de ji ltar 'byung ba bstan pa ni/ kha ton zhes pa la sogs pa ste/ kha ton mi byed yi ge mi 'dri/ yon tan mi tshol/ dpe mi bshad do/ /gzhan ni go sla'o//lhan skyes de gzhan la bstan du mi btub pa ni/ gzhon nu ma'i zhes pa la sogs pa smos te go sla'o/ /de lta bu'i rnal 'byor pa ni/ rtog pa dang sdug bsngal las grol bar bstan pa'i phyir dngos dang zhes bya ba la sogs pa smos te/ dngos po ni yod pa/ dngos po ni med pa/spang pa ni de las 'das pa'o/ /des ni 'gro ba ma lus rab thim 'gyur/ /zhes pa ni der mnyam pa'o/ /gang tshe yid ni mi g.yo brtan pa ni mi rtog pa la'o/ /de tshe 'khor ba'i dngos po rang grol 'gyur/ /zhes pa ni/ rtog pa dang sdug bsngal las so/ /sdug bsngal dang bral bar ma zad kyi yon tan khyad par can 'byung bar bstan pa'i phyir/gang tshe zhes bya ba la sogs pa gsungs te/ bdag gzhan yongs su shes min na/ zhes pa ni/ bdag gzhan gyi rtog pa spangs pa'o/ /bla ma'i lus su grub pa nyid/ /ces pa ni gong ma'i sku thob pa'o/ /de ltar bstan pa nyid la zhes pa la sogs pa ni/bla ma'i man ngag las yon tan de dag 'byung ba de la 'bad par bya'o zhes gdams pa'o/ /bla mas bstan pa'i lam nyams su blangs pa'i phan yon ni/ rdul med ces pa la sogs pa smos te/ de la rdul med ni rdul phra rab kyis bsdus pa ma yin pa'o//rdul bral min ni gzugs su snang ba med pa ma yin no/ /sems kyang min ni gzugs su snang ba'o/ /de ltar na dmigs par bya ba'i yul ni sgyu ma lta bu'i lus so/ /de bas na dngos po 'di dag ni 'di ltar snang ba kun gdong nas ma grub pas mthong yang zhen pa med pa'o//gzhan ni go sla'o/ /de lta bu de rang la yod kyang bla mas ma bstan na mi go bar bstan pa ni khyim na yod pa zhes bya ba la sogs pa ste/ khyim na yod pa zhes bya ba ni rang la yod pa'o/ /phyi rol song nas tshol zhes bya ba ni gzhan du'o/ /dpe bstan pa ni/ khyim bdag mthong nas khyim de rang khyim bdag che ge mo mthong ngam zhes 'dri'o//bla mas bstan kyang rang gis ma bsgoms na mi rtog par bstan pa ni/ blun po'i zhes bya ba la sogs pa smos te go sla'o/ /rang gis bsgom pa yang bde bar gnas pas 'grub par bstan pa ni yul rnams bgrod cing zhes bya ba la sogs pa smos te/de la yul rnams bgrod cing gdung bas nyan byas kyang ni/ thos pa btsal ba'i yul rnams su mkhyen cing dka' bas gdung kyang zhes bya ba'i don to/ /de ni mtshon pa tsam ste/ dka' thub gzhan yang gzung ngo / /gzhan ni go sla'o/ /'o na gang gis 'grub na bde ba la longs spyod pas 'grub po zhes kha bskang ngo //des mi 'ching ngam snyam pa la yul rnams bsten pas yul gyis mi gos te yul dang yul can ro mnyam par shes pas so/ /dpe ji lta bu snyam pa la/ ut+pal blangs kyang zhes pa ste go sla'o/ /mi 'ching ba'i rgyu ci snyam pa la/ 'di ltar zhes bya ba la sogs pa smos te/ gang 'di zhes pa ni bsgrub pa'o/ /'di ltar zhes pa ni gang gi phyir zhes pa ste/ rtsa ba rlung gi skyabs su 'gro bas de'i phyir ro/ /de la rtsa ba ni sgyu lus so/ /rlung gi skyabs su 'gro ba ni/ rlung dag pa la sgyu lus 'byung ba'o/ /mi 'ching ba'i dpe bstan pa ni dug gis zhes smos te go sla'o//de ltar rang la yod pa ma bcos pas sgyu ma lta bu nyid mi 'ching ba'i rgyu ru bstan nas/ gzhan dad pa lha la mchod pas mi grol bar bstan pa ni/ lha la mchod pa zhes pa la sogs pa ston te go sla'o/ /da ni sgyu ma'i lus mngon sum du bya ba'i phyir thabs kyi dam pa lta stangs skyon med dang bstan pa bcas pa'i phyir/mig ni zhes pa la sogs pa gsungs te/ de la mig mi 'dzums pa ni khro bo'i blta ba'o/ /sems 'gags pa ni de'i stobs kyis rtog pa 'gags pa'o/ /rlung 'gag pas ni rlung lnga rim gyis a ba d+hU tI'i lam la zhugs pa'o//rlung ma 'gags na skyon ci yod ce na/ gang tshe rlung rgyu de ni mi g.yo ste/ /zhes pa ni rlung ni 'khor ba'i rtsa ba yin pas ji srid du rlung rgyu ba de srid du 'khor ba las ma 'das pa'o/ /'chi ba'i tshe na zhes pa ni 'chi ka'i dus su'o//rnal 'byor mas ni ci bya zhes bya ba la/ rnal 'byor ma ni sgyu ma'i rnal 'byor ma'o/ /ci bya zhes pa ni rang la yod kyang phan mi thogs zhes pa'o/ /'khor ba las ji ltar mi 'da' snyam pa la/ ji srid dbang po yul gyi zhes pa la sogs pa smos te/ don ni 'di yin te/ thur sel gyi rlung rgyu ba'i stobs kyis shu kra thur du lhung la/ rak+ta gyen du smin na des dbang po'i sgo sad par byed do/ /de nas zhes pa srog la zhon pas rtog pa kun skyed do/ /de ltar yang dgongs pa lung ston pa las/ /ji srid 'jig rten brtag pa dang / /'jig rten brtag pa sna tshogs pa/ / rnam rtog byang chub sems zhes pa/ /rlung las rtag tu 'byung ba yin/ /zhes gsungs so/ /de ltar na 'khor ba'i rtsa ba ni rlung yin pas de dgag par bya dgos la/ de yang yid bcings pa la rag lus so/ /yid bcings pa yang rnam par mi rtog pa bsgom pa la rag lus pas phan yon gyi tshul gyis yid mi rtog par bzhag pa gsungs pa ni khyed cag ces pa la sogs pa ste/de la de ci byed ces pa ni bya rgyu med rang du gcig ces pa'o/ /gar 'gro soms dang kye zhes pa ni 'gro sa rang du gcig ces pa ste/ de ltar na bya byed spangs la mi rtog par gzhag pa'o/ /de ni shin tu dka' ba'i dgongs pas 'jug /ces pa la shin tu dka' ba ni bya byed stong pa ste dka' ba'o/ /dgongs pas 'jug ces pa ni thabs dang ldan na mi rtog par ngang gis 'jug pa'o/ /de ltar rtog med la zhugs nas rang gi rang bzhin mi rtog par bstan pa ni/ gang zhig ces pa la sogs pa ste/ gang zhig ni sangs rgyas so//gang la ni rang las so/ /de ni sangs rgyas so/ /de ru ni rang la'o/ /ma mthong zhes pa ni rgyu lus med na mi mthong ba'o/ /gzhan ni go sla'o/ /da ni nyams su blang ba'i thabs de nyid dpe'i sgo nas rgyas par bstan pa'i phyir/ glang chen lob nas zhes bya ba la sogs pa smos te/ glang po che 'tsho ba'i ri khrod pas glang chen lob na blo bde bar gnas pa bzhin du sems kyi rtog pa btang na sems tshags su tshud de/sems ni g.yo bas der ni zhes pa ni rtsa dbus ma der ro/ /'gro 'ong ni rlung 'gro 'ong ste/ de bcad na rtsa dbus su dal ba'o/ /de ni sems mi rtog pa la rnal du gzhag pa dang /rlung dbu mar rnal du gzhag pa'o/ /chos ci dgos zhes pa ni rtog pa'i rnal 'byor mi dgos pa'o/ /ngo tsha med smra mkhas pa nga / /zhes pa ni 'dzem pa med par smra ba'i mkhas pa'o zhes pa'o/ /gson pa gang zhig ces pa la sogs pas ni/ rnal ma'i bdud rtsi 'thung nas 'chi ba med pa thob par ston te/gson po ni gzhon nu'i gnas skabs lta bu/ khyad kyi rnam par ma gyur na mi rgas mi 'chi'o/ /gzhan yang gson po gang zhig ni srog rlung ngo / /rnam par ma gyur pa ni/ khyad kyis dbu mas ma brkus na ste/ srog thams cad dbus su bcug pas rku rgyu med na skye 'chi med par 'gyur ro//de nyid las 'od gsal ye shes skye ba bstan pa ni/ bla mas bstan pas zhes bya ba la sogs pa ste/ dri med blo gros ni 'bras bu 'od gsal ba'o/ /de nyid gter yin te/ de skyes pa'i dus na gter te rin po che'o//de ltar sems rnal du gzhag pa phan yon dang bcas pa bstan nas/ sems bcos pa'i thabs bstan pa'i phyir/ yul nyid rnam par dag pa ste/ /zhes pa la sogs pa gsungs te/ de la yul nyid ni rnal ma la blo bzhag pa'i tshe/ yul gzhan rnam par rtog pa mi 'byung ba'o//rnam par dag pa ste zhes pa ni rnal ma'i don to/ /bsten bya min zhes pa ni tshur la bkug pa slar rnal mar gzhag pa ma yin zhes pa'i don to/ /'o na ji ltar bya snyam pa la/ stong pa 'ba' zhig gis ni dpyad par bya/ /zhes gsungs te/ yul gang du 'phros pa de yang stong pa yin pas tshul la dgug mi dgos zhes par dgongs pa'o//de'i dpe bstan pa'i phyir/ ji ltar gzings las 'phur pa'i bya rog ni/ /zhes pa la sogs pa gsungs te/ de'i don ni dper na gzings la bzhag pa'i bya rog bzung bas mi thub par 'gro ba la/de btang bas gar phyin kyang chur song 'chags sa ma rnyed de/ slar la der 'bab pa bzhin du yul la 'phros pa'i sems kyang de dang 'dra'o/ /gar 'phros kyang de nyid las ma g.yos pas so/ /yul gcig la dmigs pa mi zhen pas shes pa glod la gzhag pa'o//yul gcig la zhen pa'i nyes pa bstan pa'i phyir yul la zhen pas zhes bya ba la sogs pa smos te go sla'o/ /yang na tshig 'dis ni rnal 'byor pas 'dod yon la zhen pa'i skyon bstan pa'o/ /gzhan yang lhan skyes de nyid las 'byung bar shes pas/sems bcos pa'i thabs bstan pa'i phyir/ gang zhig sems las zhes bya ba la sogs pa smos te gang zhig ni rtog pa'o/ /sems las rnams 'phros pas/ zhes pa ni rtog pa byung ba kun no/ /de nyid mgon po'i rang bzhin te zhes pa ni rtsa ba'i 'od gsal ba nyid rtog par shar ba ste/dper na chu dang rlabs bzhin no/ /srid dang mnyam nyid nam mkha'i rang bzhin no zhes pa ni/ don de srid pa ni 'khor ba'i rtog pa'o/ /mnyam nyid ni mya ngan las 'das pa ste rtsa ba'i 'od gsal lo/ /nam mkha'i rang bzhin ni gnyis ka skye med do//de ltar shes pa'i phan yon bstan pa'i phyir/ gang zhig bstan te zhes bya ba la sogs pa gsungs te/ de la gang zhig bstan pa ni man ngag gang zhig bla mas bstan pas/ gang zhig thos gyur zhes pa ni slob mas thos pa'o/ /dgos pa gang yin na grub pa'i/dam par skyol ba ni mthar phyin pa na'o/ /gdug pa ni nyon mongs so/ /bkug pa ni rtsa ba'i sems so/ /rdul bzhin brlag ni rtsa ba nas dag pa'o/ /de gang du dag na snying ga nyid du nub ste/ mi shigs thig le'o/ /der ji ltar thim par 'gyur zhe na/ ji ltar chu la chu bzhag pa//de srid chu ru ro mnyam 'gyur/ /zhes pas ston te/ dper na chu nang du chu blugs pa ni/ chur ro gcig pa bzhin du/ rtsa ba'i sems su thim par 'gyur pa'o/ /yang na 'dis ni gnyis med ro mnyam ston te/ chu stong pa'o/ /chu bzhag pa ni snying rje'o/ /chur ro mnyam pa ni gnyis med du bya ba'o//de nyid ye nas ro gcig tu bstan pa'i phyir skyon dang zhes bya ba la sogs pa smos te/ de la skyon ni rtsa ba'i sems mi shigs pa'o/ /yon tan gyi ngo bo ni sems kyi ngo bo 'od gsal ba'o/ /mnyam ldan ni gnyis po'i ro mnyam pa'o/ / sus kyang mtshon ma gyur zhes pa ni/ /thabs dang bral ba gang gis kyang ma rtog pa'o/ /gzhan ni go sla'o/ /da ni lhan skyes de rang ye nas ro mnyam du gnas pas spyod lam ci snang yang thug phrad du myong bar bstan pa ni/ nags la mched pa'i me bzhin zhes pa la sogs pa ste go sla'o//lhan skyes de ma rtogs pa'i skyon bstan pa'i phyir/ gal te yid du 'ong ba la zhes bya ba la sogs pa smos te/ de la yid du 'ong ba ni yid dang mi 'gag pa'i dngos po la'o/ /mnyam pa'i sems ni stong pa dang ro mnyam pa'i sems ma skyes na/ de la dngos por zhen pas sdug bsngal skyed do//tshig gi don ni go sla'o/ /stong par shes pas mi 'ching ba'i phyir/ stong na gang yang 'dra 'am snyam pa la/ grogs dag phag dang glang po ltos/ /de ltar yin te de ni ma yin no/ /zhes gsungs pa ste/ phag dang glang po ni phyogs 'ga' 'dra yang /phag ni glang po ma yin no/ /de bzhin du stong par 'dra yang theg pa gzhan gyis brtags pa'i stong pa ni lam ma yin no zhes pa'i don to/ /stong pa des 'khrul pa ji ltar spong zhe na/ ji ltar yid bzhin nor bu zhes pa la sogs pa smos te/ dper na smyon ma'i lus la rin po che btags pas smyon ma'i 'khrul pa bshig pa bzhin du/stong pa'i rtog pas kyang dngos po'i 'khrul pa bshig pa'o/ /stong pa de bde ba'i gnas su bstan pa'i phyir/ rang rig pa zhes pa la sogs pa smos te/ rang la rang rig bde ba chen po'i bag chags gzugs de bde ba'i rgyu'o//yang na de ma dag na bag chags te/ ma rig pa zhes bya'o/ /de nyid dag na gzugs te stong pa'i gzugs su gyur pa'o/ /de rtog pa las cir 'gyur zhen thams cad ces pa la sogs pa smos te/ thams cad ni phyi nang ngo //de tshe ni stong pa rtog pa de'i tshe'o/ /mkha' mnyam byed par 'gyur ba ni nam mkha' dang mnyam par mthong ba'o/ /stong gzugs nyams su myong ba de ni tshig gis mtshon mi nus par bstan pa'i phyir/ kA la ku Ta zhes bya ba la sogs pa smos te/ kA la ku Ta ni nyams su myong ba'i ming ngo //smos su mi rung ba ni tshig gis mi mtshon pa'o/ /'o na gang gis mtshon na/ rang bzhin nam mkha' ni stong pa de rtog pa dang bral te/ yid kyi 'dzin pa yin zhes pa ni des myong ba'o/ /'o na yid yod dam zhe na/ yid de yid med byed 'gyur te/ /rang bzhin lhan cig skyes pa mchog tu mdzes//zhes gsungs te/ yid de zhes pa ni dag pa'i yid do/ /yid med byed ces pa ni ma dag pa'i yid do/ /dag pa'i yid de gang yin na rang bzhin lhan cig skyes pa mchog tu mdzes te stong gzugs so/ /de nyid rtogs dka' bar bstan pa'i phyir/ /khyim dang khyim na de nyid gnas pa ste//zhes pa la sogs pa gsungs te/ khyim na gnas pa ni khyim mo/ /nags na gnas pa ni khyim min no/ /de'i don brjod pa ni stong pa'o/ /bde chen gnas ni de'i rgyu stong pa ste/ de'i drin gyis bde ba 'char ba'o/ /de'i phyir de rnams kyis stong par ma shes na/ 'gro kun sems 'phrul gyur pa ste/sems 'khrul nas dngos por zhen par gyur pa'o/ /de ni bsam med sus kyang rtogs ma yin/ /zhes pa ni bsam med kyi lhan skyes de/ thabs gang dang bral ba'i gdams ngag gis kyang mi rtogs pa'o/ /stong pa de 'gro bsam mthong na/ /rnal 'byor pas ji ltar mthong snyam pa la/kye ma zhes pa la sogs pa smos te/ mgo snying lte gsang spangs pa ste/ /ngas mthong ste zhes pa ni gzugs med pa'i gzugs te des mthong ba'o/ /de yang / gzugs med gzugs bzang dam pa ste/ /sna tshogs gzugs can yid las skyes//zhes gsungs so/ /stong pa de thabs gang gis mthong bar 'gyur snyam pa la/ bsam pas yul ni zhes pa la sogs pa gsungs te/ bsam pa ni mi rtog pa'i bsgom pas yul ni mtshon par byed ces pa'o/ /yul du snang ba stong pa'i gzugs mtshon par byed pa ste/ mthong bar 'gyur ba'o/ /stong gzugs de mi rtog pa'i dbang gis ji ltar mthong bar 'gyur snyam pa la/ gzhan dag bsam pas rlung 'gag 'gyur/ /zhes smos te/ gzhan dag ni mi rtogs pa'o/ /bsam pa ni blo de la gzhag pa'o/ /rlung 'gag 'gyur zhes pa ni rlung dbus su 'jug par 'gyur ro//'dis ni 'di skad du ston pa yin te/ 'khor ba'i rtsa ba ni rlung yin pas de dbus su zhugs te dag par byas nas gzung 'dzin gyis 'brel pa chad nas stong pa'i gzugs mthong bar 'gyur ro/ /rlung 'gag pa'i thabs de nyid gsal bar bya ba'i phyir/gal te sems kyi zhes bya ba la sogs pa smos te mi rtog pa'i sems kyis stong pa'i sems mtshon du 'gro ba ni/ mthong ba rgyu des rlung dang / yid ni brtan par 'gyur te/ rang bzhin du thim pa'o/ /yid kyi rtog pa rang bzhin gnyug ma la thim pa'i dpe bstan pa ni/ji ltar lan tshwa chu la zhes pa gsungs te go sla'o/ /bsam gtan mi dgos na/ sangs rgyas kyis bsam gtan mang po ci'i phyir bstan snyam pa la/ lhan cig la ni lung rnams mang po mthong / /zhes pa la sogs pa gsungs te/ de la lhan cig la zhes pa ni/ de kho na gcig pa'o//lung rnams mang po mthong ba ni de kho na nyid brda du ma'i sgo nas bstan pa'o/ /rang 'dod pa yis so sor snang / /zhes pa ni/ dper na sna rtser yungs kar zhes pa lta bu ni rtog pa la dga' ba rnams kyis steng 'og gi sna rtser thig le bsgom pas mthong la/ de kho na nyid la mos pa rnams kyis rlung byang chub sems su mthong ba'o//des ji ltar mthong ba de ltar mthar thug pa ma yin te/ mgon po ni lhan skyes te des sa ra ha gcig po dang mthun gyis/ rtog pa la gnas pa gzhan rnams dang ni 'gal lo/ /don la 'gal na de thams cad nor ram snyam na khyim dang zhes smos te/rang rang gi skal ba dang mthun pa tsam gyis grub mtha' ni ma nor ba nyid do/ /de ltar sangs rgyas kyis ci dang ci bstan pa rnams ni de kho na nyid las brtsams te bstan gyi rtog pa'i bsgom pa las brtsams te ni ma yin no//de ni sems de ci bde bar rtogs pas chos thams cad rtog pa'i dpe ston pa ni/ gcig zos pas ni gzhan kun tshim/ /zhes pa ste/ de la gcig ni rnam shes so/ /zos pas ni bde ba'i ros bsgyur ba'o/ /gzhan kun ni phung po bzhin no/ / tshim pa ni bde ba'i ros tshim pa'o/ /yang na gzhan kun tshig ces pa ste/ dper na shing gcig mes tshig pas 'phros zos nas gzhan nags tshal tshig pa bzhin du'o/ /lhan skyes de ngo ma shes na btsal bas mi rnyed par bstan pa ni/ phyi rol song nas zhes pa la sogs pa smos te/ de la phyi rol song nas zhes pa ni rang la yod pa ngo ma shes par ro//khyim bdag ni lhan skyes so/ /tshol ba ni btsal bas mi rnyed pa zhes pa'o/ /de nyid bshad pas ni 'on kyang ma mthong zhes pa la sogs pa smos te go sla'o/ /gang gis rnyed snyam na rba rlabs med pa zhes bya ba la sogs pa smos te/rba rlabs med pa ni rtog med do/ /rtog pa ni sdug bsngal gyi rnyog pa'o/ /de dang bral ba ni bsam gtan rnam par mi rtog pa'i bsgom pa'o/ /bsam gtan de nyid kyi dpe bstan pa ni chu dang zhes pa la sogs pa smos te/ chu dngas pa dang mar me rang gsal ba bzhin du rtog pas ma bslad par zhog ces pa'o/ /'gro 'ong nga yis mi len mi 'dor ro/ /zhes pa ni de'i tshe spyod lam gang yang mi dgag par bzhag pa'o/ /de yang dgyes pa'i rdo rje las/ yid kyi dag par mi bya zhing / /dbang po rnams ni dgag mi bya//zhes gsungs so/ /da ni stong pa'i gzugs de nyid kyi dpe bstan pa'i phyir sngon med pa'i zhes bya ba la sogs pa gsungs te/ dper na mi zhig rmi lam na gzhon nu ma dang nyal bar rmis na/ de ni rang gi sems nyid der snang ba ste log na med do//de bzhin du sgyu ma'i lus 'di rang gi sems nyid der snang ba'o/ /yang na rmi lam gyi gzhon nu ma la brten pa'i bde ba ni/ gzhon nu ma dang tha mi dad de ro gcig pa'o/ /de bzhin du rang gi sems ni yul can bde ba gzugs ni lus sgyu ma'o/ /tha dad ma lta zhig ces pa ni bde stong mnyam par gyis zhes pa'o//de yang dang po'i sangs rgyas kyi rgyud las kyang / gzhon nu ma yi pra las ni/ /snga na med pa'i gzugs mthong ngo / /zhes bya ba gsungs pa dang / /byang chub pa'i rgyud las kyang / /'ja' tshon lta bu'i lus nyid ni//de nyid sgom pas thob par 'gyur/ /zhes gsungs pa dang / klu sgrub kyis kyang / 'di nyid rdzogs pa'i rim pa ste/ /sgyu ma lta bu'i ting 'dzin de/ /zhes pas so/ /rang gi sems ni gzugs dang zhes pa ste/ gzugs de nyid gsal bar ston pa ni gal te lus dang zhes pa la sogs pa ste/rdo rje gsum dbyer med pa ni stong pa'i gzugs te/ de yang he badzra las/ sems dpa' srid pa gsum gcig pa/ /zhes gsungs pas so/ /yang na 'dis bde ba bstan pa yin te/ lus ngag yid gsum gyi rtog pa 'gag pa ni lhan skyes kyi dga' ba'o//stong pa nyid rtog pa ni yul snang ba thams cad thug phrad du stong par mthong bar bstan pa ni/ khyim bdag ces pa la sogs pa ste/ dper na khyim bdag pho mo bag tsha med par longs spyod pa bzhin stong par brtag mi dgos par yul du snang ba rnams spyod pa'o//yang na rtog med du yul la spyod pa'i dpe bstan pa'o/ /da ni gong gi don de dag bstan kyang / gzhan gyis mi go bar bstan pa ni/ nga yis zhes pa la sogs pa ste/ nga yis rtsed mo byas pa la/ /zhes pa ni smyon pa'i tshig tu smras pa la'o/ / byis pa rnams ni sha thang chad de mi rtog pa zhes pa'o/ /me ni spra ba nyid la 'bar/ /zhes pa ni rang kho nas rtogs par zad ces pa'o/ /yang na/ /nga yis rtsed mo byas pa la/ /byis pa rnams ni sha thang chad/ /ces nga ni/ lhan cig skyes pa nga yis rtsed mor byas pa ni/ rnam par 'phrul pa la byis pa ma rtogs pa rnams 'khor bar khrid pa'o//me ni spra ba nyid la 'bar/ /zhes pa ni mkhas pa rnams ni rtogs pa'i spra ba de nyid la me ye shes 'bar ba'o/ /de ltar bcings pa bstan nas/ da ni byang chub sems ma bcings na mi 'gyur ba'i bde ba med la/de med na sangs rgyas mi 'byung bas mi 'gyur ba'i bde ba bsgrub pa'i phyir byang chub sems bcings pa bstan pa ni/ e ma zhes pa la sogs pa gsungs te/ gzhan na ni yod ma yin zhes pa ni/ /gzhan yin nam 'on te rang yin zhes pa'o//'on te gzhan na gnas sam ci zhes pa na/ gzhan na yod dam/ 'on te rtag tu yod ces pa'o/ /lan du rnal 'byor 'di ni dpe dang bral ba ste zhes pa ni/ yod min med min zhes bya ba la sogs pa'i spros pa dang bral ba'o/ /de gang las byung zhing rang bzhin ji lta bu zhe na/bdag po za zhing rang bzhin mdzes/ /zhes smos te/ bdag po za zhes pa ni ye shes kyi rlung ngo / /rang bzhin mdzes zhes pa ni/ /de dag ni sgyu ma'i rnam pa yid du 'ong ba'o/ /des ci byed na chags pa'i yul gyis gang ba'i sems de nyid ces smos te/chags pa'i zhes pa zag bcas kyi bde ba'o/ /yul gyis gang ba ni yul yid du 'ong ba'i bde ba'o/ /sems nyid de zhes pa ni rtog pa'i bde ba ste spong ba'o/ /ji ltar spong zhe na/ chags dang chags bral byas nas gnyug mar zhugs/ / zhes smos te/ de la chags pa ni dpral bar gnas pa'o/ /chags bral ni thig le mkha' la ltung ba'o/ /byas nas zhes pa ni phab lam spro ba ni ro mnyam pa'o/ /gnyug mar zhugs pa ni de las 'bras bu'i lhan skyes su 'gyur ba'o/ /sgyu ma'i rnal 'byor ma de thabs cis mthong zhe na/sems nyams pas na rnal 'byor ma ngas mthong / /zhes smos te/ sems nyams pa ni gzung 'dzin gyi rtog pa 'gags na/ rnal 'byor mas ni sgyu ma'i rang bzhin mthong ngo / /za zhing mthong la bsam pa'ang med/ /ces pa ni bsam pa 'di gnyis tsam las ma gtogs pa gzhan spangs la bsgom par bya'o zhes pa'o//de'i tshe sems la snang ba rnams ji ltar lta snyam pa la/ grogs mo 'di ni zhes pa la sogs pa smos te/ rang gi sems la snang ba'i phyi rol tha dad du rtogs na sdug bsngal gyis 'dzin no zhes pa'o/ / sgyu ma'i rnal 'byor 'di ni dpe dang bral/ /zhes pa ni/ sems la gang snang ba de sems sgyu ma'i snang bar lta'o/ /bya ba 'di tsam zhig tu rab bsams la/ zhes pa ni/ snang ba'i bya ba sgyu ma tsam du bya ba'o/ /rtsom pa gang la dbyer med pa yi blo/ /zhes pa ni/ /rtsom rgyu med pas rtsol pa spangs la glod la bzhag pa'o//sa gsum gang du dri ma med/ /ces pa ni des lus ngag yid gsum rnam par dag par 'gyur ro/ /de ltar byang chub kyi sems bcing pa'i thabs stong pa nyid bstan nas/ da ni des ji ltar 'ching ba'i dpe bstan pa'i phyir zla ba chu 'dzag ces pa la sogs pa gsungs te/zla ba chu 'dzag nor bu rang dbang med/ /ces pa ni dper na chu shel ni zla ba'i 'od dang phrad nas rang dbang med par 'dzag pa'o/ /thabs kyis rgyal srid kun la dbang sgyur ba/ /zhes pa ni/ dpe de bzhin du stong pa'i thabs kyis rgyal srid kun ni mi 'gyur ba'i bde ba'o/ /dbang sgyur ba ni ji ltar 'dod pa rang dbang du byed pa'o//sems nyid de ni grub pa'i rnal 'byor ma/ /zhes pa ni shes rab stong pa'o/ /lhan skyes pa'i thabs bde ba'o/ /sdom par shes par bya zhes pa ni de gnyis ro mnyam du sdom par shes par bya'o/ /da ni mi 'gyur ba'i bde ba'i mtshan nyid bstan pa'i phyir//yi ge pa'i zhes pa la sogs pa smos te/ de la yi ge tha snyad dam brda'am mtshan ma'o/ /'gro ba ma lus zhes pa ni 'gro ba thams cad do/ /yi ge med pa gcig kyang med/ /ces pa ni/ sems can la mtshan ma med pa gang yang med do/ /ji srid yi ge med gyur pa//zhes pa ni mtshan ma'i rtog pa 'gags na zhes pa'o/ /de srid yi ge rab tu shes/ /zhes pa ni/ mtshan ma 'gag na tha snyad kun shes pa'o/ /yi ge med pa yi ge yin/ /zhes pa ni/ brda yi ge ste brda med na yi ge a ste stong pa'i gzugs su rig ces pa'o/ yang na de srid yi ge rab tu shes/ /zhes pa ni/ yi ge ni ak+Sha ste mi 'gyur ba'i bde ba shes pa'o/ /yi ge gang zhe na/ yi ge med pa yi ge yin/ /zhes smos te/ yi ge ni rtog pa ste med pa'o/ /yi ge yin zhes pa ni/ mi rtog pa'i bde ba'o/ /dang po'i sangs rgyas las kyang /mi 'gyur las skyes 'gyur ba spangs pa'i bde ba nyid/ /ces gsungs so/ /phyi rol pa'i yi ge la zhen pa dgag pa'i phyir/ col med rig byed 'dod pa nyams/ /zhes pa ni/ des don dam pa'i oM zhes 'don pa de nyams pa ste/ 'khor bar sdug bsngal bar 'gyur ro//de ltar yi ge med na yang / /rang gi lus la rang bzhin gyis gnas pas rtogs su rung bar bstan pa'i phyir/ dam pa sogs dang zhes pa la sogs pa smos te/ dam pa sogs dang cig shos mi shes na/ /zhes pa la/ cig shos ni stong gzugs te mi shes pa ni ma rtogs na rtog pa rnams kyang gang nas skye ba dang gnas pa dang /gang du 'gag pa mi shes so/ /de shes na ji ltar phyi rol gyi rtog pa de bzhin du nang ste stong gzugs so/ /bcu bzhi pa'i sa la gnas zhes pa ni/ snying ga'i dbus na gnas pa'o/ /de ni gzugs med kyang lus su gnas pa'o//gang gis de shes pa'i mi de grol bar 'gyur ro/ /yang na bde ba dang sbyar na cig shos bde ba'o/ /gang nas shar ba ni dpral ba nas so/ /gang du nub pa ni nor bu 'das pa'o/ /ji ltar phyi rol de bzhin nang / /zhes pa ni/ shu kra de ni phyi rol gyi zla ba ni tshes gcig shar ba'i yar ngo nas tshes bco lnga nya gang ba'o//mar ngo'i tshes gcig shar nas gnam stong la zla ba zad pa'o/ /de bzhin du shu kra yang dpral bar dkar po'i tshes gcig shar nas nor bu'i nang du nya gang ba'o/ /de nas nor bu'i gnas nas bcu drug gi cha nag po'i tshes gcig nor bu shar nas/gtsug tor du gnam stong rdzogs pa'o/ /bcu bzhi pa'i sa la gnas zhes pa ni rang bzhin gyis gnas lugs te/ go bzlog pa ni lam du 'gro ste/ shu kra de 'pho ba'i bag chags spang ba ni kha gyen du bltas nas 'khor lo drug dang bar du drug ste bcu gnyis rin po che'i 'khor lo dang /bar Ta ka rtog med kyi sa ste bcu bzhir rim gyis 'grims nas sa bcu dag par 'gyur ro/ /de yang he badzra las/ /bde ba chen po A li'i gzugs/ /de yi cha ni rnal 'byor ma/ /gang phyir bcu drug cha med pas/ /'bad pa kun gyi lhag ma spang / /zhes gsungs so//lus med lus la gnas pa ni/ /de yi dbang gis ma skyes pa ste/ de yang he badzra las/ lus gnas lus las me skyes pa'o/ /zhes gsungs pas so/ /gang gis de shes de yid grol/ /zhes pa ni/ sa bcu bgrod pa'i ye shes de'o/ /bde ba de gang las ji ltar byung snyam na//nga yis sgrub pa'i yi ge dang po bton/ /zhes pa la sogs pa gsungs te/ sgrub pa'i yi ge dang po ni stong gzugs so/ /bton pa ni rig pa'o/ /khu ba 'thungs pas nga ni brjod par gyur/ /zhes pa ni/ stong pa'i drin gyis khu ba 'thungs pa ni//'pho ba spangs pas nga ni brjed par gyur/ /zhes pa ni/ sems kyi rtog pa 'gags pa nas bde bar gyur pa'o/ /de'i rang bzhin ji lta bu zhe na/ gang gis zhes pa la sogs pa gsungs so/ /yi ge gcig ces pa ni mi 'gyur ba'i bde ba'o/ /yang na a ste stong gzugs so//de yi ming ni mi shes so/ /zhes pa ni/ mtshan ma'am 'du shes kyi chos nub pa'o/ /nags khrod gsum ni lus ngag yid gsum mo/ /yi ge gcig ni A ste gzhom med do/ /yi ge gsum gyi dbus na lha/ /zhes pa ni/ rlung dag dgug rengs gsum ni yi ge oM AHhUM gsum gyis gzhom med dag gi dbus na lha stong gzugs su 'gyur ro//gang zhig gsum la bab pa ni/ /zhes pa ni lus ngag yid gsum las 'byung ba'i chags pa de stong pa'i drin gyis gdol ba'i rig byed ces pa ni rtog med dga' ba bzhi 'char ba'o//de ltar zag med kyi bde ba bstan nas zag bcas 'gyur ba'i bde ba spang ba'i phyir/ ma lus rang bzhin mi shes gang / /zhes pa ni 'od gsal gyi rang bzhin mi shes pas/ kun du ru ni las rgyas pas/ /bde chen ni zag med kyi bde ba'o/ /ji ltar skom pas smig rgyur bsnyag pa bzhin//skom nas 'chi ste nam mkha'i chu rnyed dam/ /zhes pa ni bde ba'i rnam pa 'dra yang don mi 'dra ba la 'dra bar 'khrul nas skom par 'chi ste/ sdug bsngal gyis bzung nas bde chen mi rnyed do/ /ci ste mi rnyed ce na/ rdo rje pad+ma gnyis kyi bar gnas pa/ /zhes gsungs te/ rdo rje dang pad+ma gnyis kyi bar du gnas pa'i bde ba'o/ /bde ba gang gis rnam par bskyed pa ni/ /zhes pa ni de gnyis bde bar rnam par rang mthun yang zhes pa'o/ /ci ste de snyed nus pa med pas na/ /zhes pa ni zag med kyi bde ba de skyes pa'i nus pa med pas na/sa gsum re ba gang gis rdzogs par 'gyur/ /zhes pa ni lus ngag yid gsum po de ji ltar 'dag ces pa'o/ /yang na rdo rje pad+ma'i bde ba de med na yang / zag med kyi bde ba ji ltar skyes zhes pa'o/ /kun du ru'i bde ba de ci ste/ rnal ma'i bde ba ma yin zhe na/ thabs kyi bde ba skad cig ma/ /zhes pa gsungs te/ skad cig ma yin pa dang / yang na de nyid gnyis su 'gyur ba ste/ /zhes pa ni shes rab ma las skyes pa'i ye shes de shes rab ye shes yin na/ thabs las skyes pa'i ye shes kyang shes rab thabs kyi ye shes su 'gyur ro//bla ma'i drin gyis slar yang ni/ /brgya lam 'ga' yis shes par 'gyur/ /zhes pa la/ slar yang zhes pa ni shes rab ye shes de sems can kun la skye yang thig le gsum pa'i mthar skyes pa'i lhan cig skyes pa ngo shes pa ni brgya lam na 'ga' tsam gyis shes par 'gyur ba'o//de bas na slar yang zhes pa ni phyi nas te thig le gsum gyi mthar ro/ /da ni bde stong zung du 'jug pa bstan pa'i phyir/ grogs dag ces pa la sogs pa smos te/ grogs dag ni bod pa'o/ /zab mo ni bde ba'o/ rgya che ba ni stong pa'o/ /gzhan min ni tha dad min pa'o//bdag nyid ma yin pa ni gcig nyid kyang ma yin te/ gnyis ma grub pas so/ /yang na stong pa nyid ces gcig pu la sbyar te zab pa ni rtogs dka' bas so/ /rgya che ba ni stong nyid gcig pu rtogs na chos kun rtogs pa'o/ /gzhan min ni rang gis rig pas so//bdag nyid min ni rtogs pa'i bdag nyid ma yin pa'o/ /de lta bu de dus nam skye na/ /lhan cig skyes dga' bzhi pa'i dus/ /zhes pa la sogs pa smos te/ lhan cig skyes pa'i dga' ba ni bzhi pa'i dus te/ snang ba gsum la ltos pa'i bzhi pa'i dus kyi 'od gsal gyi ngo bo nyid do//gnyug ma nyams su myong bas shes/ /zhes pa ni/ dus rtag tu yod pa'i lhan cig skyes pa de'o/ /de shar ba'i yon tan bstan pa'i phyir/ /mun nag ces pa la sogs pa smos te/ bde ba chen po'i dus ji ltar mun pas g.yogs pa la/ zla ba shar bas mun pa'i tshogs dus gcig la 'joms pa ltar bde ba chen po shar ba'i dus gcig na/sdig pa ma lus pham par byed/ /ces pa ste/ rtog pa thams cad 'joms par byed do/ /sdug bsngal snang byed na rtog pa nub pa'o/ /sgrol pa'i bdag po ni me rtog pa'i ye shes so//bza' dang mnyam du shar zhes pa ni/ nang gi bza' ye shes kyi rlung dang dus gcig tu shar ba'o/ /nges cir 'gyur zhe na/ 'di ltar gnas pas sprul pa sprul pa dang / /zhes pa ni sprul pa 'byung ba dang / de ni dkyil 'khor 'khor lo dam pa'o//zhes pa ni ma bcos pa'i dkyil 'khor ro/ /kye ma ho zhes pa ni ci yang bod pa'o/ /des ci ltar 'gyur sems kyi zhes pa ni/ rang gi sems kyis so/ /sems la zhes pa ni rang bzhin rtog med ci yang ma yin pa la/ rtog ces pa ni de la sems bzhag pa'o//lta ba ngan pa thams cad las grol zhes pa ni ci yang ma yin na sgro 'dogs skur 'debs kun las grol bar 'gyur ro/ /mchog tu bde ba chen po'i dbang gis ni/ /zhes pa ni/ mchog tu bde ba chen po ni zag med kyi dga' ba ste/ de'i dbang gis ni mthus so/ /dngos grub dam pa ni sangs rgyas kyi go 'phang grub pa'o//de ltar bde stong dbyer med kyi yon tan bstan nas/ da ni stong pa dang bde ba la sems bzhag pa'i thabs bstan pa'i phyir/ sems kyi glang po zhes bya ba la sogs pa smos te/ sems kyi glang po yan du chug / ces pa ni/ nan tshir du mi dgag ces pa'i don to/ /da ni bdag nyid la dris shig ces pa ni/ sems rang lugs su zhog cig ces pa'o/ /de la rtogs pas ma dris cig /ces pa ni/ 'di'i tshe mtshan ma yid la mi bya'o/ /da ni sems bde ba la bzhag pa'i thabs bstan pa'i phyir nam mkha'i ri bo zhes pa la sogs pa smos te/de la nam mkha' ni spyi bo'o/ /ri bo ni lus so/ /chu 'thung ni shu kra'i bde ba myong ba'o/ /de'i 'gram du zhog ces pa ni/ gnyug ma'i dbang po'i rtsar bzhag pa'o/ /rang dga' bas ni ci bde bag yangs su'o//ji ltar gzhag snyam pa la yul gyi dbang po zhes pa la sogs pa smos te/ yul gyi zhes pa ni phyi rol gyi glang po che rgyal po'i lag pas khrid nas ji ltar bskyod par snang yang zhes pa ste/ rang gang dga' bar bskyod pa ltar rnal 'byor pa yang sems kyi glang po la dbang byed do//rnal 'byor pa ni glang po bskyod pa bzhin/ /zhes pa ni ma bsgrims ma gtad pas so/ /de nyid nas ni ldog par 'gyur ba yin/ /zhes pa ni rang log tu 'gyur ba'o/ /dbyer med du gzhag par bya ba'i thabs bstan pa'i phyir/ gang zhig 'khor ba zhes pa la sogs pa smos te/gang zhig 'khor ba de ni mya ngan 'das par nges/ /zhes bya ba ni 'khor ba rang la thar pa'o/ /yul gyi dbye bas gzhan du sems pa ma yin te zhes pa ni/ yul lnga'i dbye bas phyi rol tu mi lta'o/ /de ci'i phyir zhe na/ rang bzhin gcig pa zhes pa la sogs pa smos te/rang bzhin gcig pa ni yul dang yul can tha mi dad du'o/ /dbye ba rnams spangs pa ni tha dad kyi dbye ba spangs pa'o/ /dri med ni gnyis 'dzin med pa'o/ /dbyer med kyi 'thad pa bstan pa'i phyir yid kyi de nyid ces pa la sogs pa smos te/ dmigs bcas ni snying rje'o//dmigs med ni stong pa'o/ /gnyis la skyon yod ni ma 'dres na'o/ /bde ba'i rang bzhin ni ro mnyam du'o/ /rab tu bla med rang 'byung ba/ ces pa ni/ gang dang yang ma 'grogs par byung ba'o/ /gzhan ni go sla'o/ /da ni gnyis med la gnas pa zhes pa la gnas la nges pa med par bstan pa'i phyir na/gsum 'gro zhes pa la sogs pa smos te/ gang yang de ru zhes pa ni nags dang khyim du 'ongs zhes pa ni mnyam par ro/ /ma lus rgyun du rtogs pas gnas/ /zhes pa ni gnyug ma'i rang bzhin no/ /gzhan ni go sla'o/ /de la gnas pa'i yon tan bstan pa'i phyir/de tshe dgra'i zhes pa la sogs pa smos te/ mi rtog pa de rtogs pa'i rigs la mi 'jug pas na/ dgra'i rigs la mi 'jug pa'o/ /'di ltar dbye ba yongs shes na/ /zhes pa ni bzang ngan mnyam par ro/ /dbye ba de ni yongs su 'ching dang bral bar byas//zhes pa ni/ gnyis kyi 'du shes spangs pa'o/ /tha dad du snang ba de nyid ji ltar yin zhe na/ ji ltar rgya mtsho mthong phye bzhin/ /zhes pa ni/ chu dngas pa'i nang du byad kyi gzugs brnyan snang ba bzhin no/ /bdag dang gzhan du 'khrul par ma byed dang / /zhes pa ni gcig la gnyis su 'khrul pa'o//de ltar thabs kyi lhan cig skyes pa bzhi bstan nas/ da ni 'bras bu'i lhan cig skyes pa rgyas par bstan pa'i phyir/ thams cad snga nas med pa yi/ /zhes bya ba la sogs pa smos te/ sems ni ngo bo nyid kyis dag /ces pa ni ye nas so//gnyis med du ni ro mnyam du'o/ /ma lus khyab par song ni sems can gyi don du'o/ /ming ni gzhan la phan pa'o zhes pa ni/ don la gzhan med ces bya'o/ /sna tshogs du ma dang ldan zhes pa ni/ phrin las sna tshogs pa'o/ /lhun gyis grub pa ni ma btsal bar ro//phyi ma'i 'bras bu ni thams cad la'o/ /bde ba 'di ni gzhan pa'i sems mi mngon no zhes pa ni zag bcas min pa'o/ /bzlog pa'i sgo nas bstan pa'i phyir/ /stong pa'i sdong po dam pa zhes pa la sogs pa smos te/ stong pa'i sdong po med na snying rje'i yal 'dab med do zhes pa'i don to//da ni dmigs par 'dzin pa'i skyon bstan pa'i phyir/ de la dmigs par byed pa gang yin pa/ /zhes pa la sogs pa smos te/ de la dmigs par byed pa ni gnyis med de la rtog pas mtshan mar 'dzin pa'o/ /der lhung ba ni zhes pa mtshan mar 'dzin pas lhung pa'o//yan lag chad par 'gyur zhes pa ni/ 'khor bar nyon mongs pa'o/ /mtshan med du rtogs pa'i yon tan bstan pa'i phyir/ sa bon zhes pa la sogs pa smos te/ sa bon gcig pa ni rang gi sems so/ /stong pa gnyis zhes pa ni bde stong gnyis so//rgyu mtshan de las 'bras bu gcig /ces pa ni ro mnyam du'o/ /de yang dbyer med ni 'dres pa'o/ /gang sems pa ni bsgom pa'o/ /de ni 'khor ba dang mya ngan las 'das par grol zhes pa ni/ mi gnas pa'i mya ngan las 'das pa thob pa'o/ /de lta bu'i gang zag de la 'dod pa can ni don du gnyer ba'o//slong ba po 'ongs pa'i tshe/ de ni gal te 'gro na re ba med/ /ces pa ni/ 'gro ba gang la yang lan la re ba med par ster ba'o/ /rang don med par gzhan don mi 'grub par bstan pa ni/ kham phor dum bu zhes bya ba la sogs pa smos te/ ji ltar slong mo pa ni/gzhan gyi don mi byed pa ni gzhan la phan mi 'dogs pa'o/ /'dod pa po la mi ster pa ni sbyin pa mi gtong ba'o/ /'khor ba'i 'bras bu gang yin lo/ /zhes pa ni 'khor bar skyes pa don med du byas pa'o/ /de bas rang nyid dor bar byas na rung / /zhes pa ni bdag don du gnyer ba bor na rung zhes pa ste gzhan don bya'o zhes pa'o//yang na bdag gzhan gyi don med kyang ma zhen na/ 'khor ba'i nyes pas mi gos par ston te/ gzhan gyi don ni mi byed pa zhen pa ni phan 'dogs pa'i 'du shes mi byed pa'o/ /'dod pa po la mi ster ba ni sbyin pa'i zhen pa med pa'o//'khor ba'i 'bras bu gang yin lo/ /zhes pa ni/ de la 'khor bas mi gos pa'o/ /de bas rang nyid bor bar byas na rung / /zhes pa ni ngar 'dzin gyi zhen pa spangs pa'o/ /kham phor dum bu la sogs pa ni/ dper na slong ba po la byin pa'i lan mi re ba bzhin du blta bar bya'o zhes pa'o//bla ma'i zhal gyi bka' drin gyis/ /cung zad snying po'i don bshad pa/ /bdag gi dge ba gang bsags pas/ /'gro kun snying po'i don rtogs shog /do ha mdzod kyi dka' 'grel slob dpon chen po thar pa'i 'byung gnas sbas pas mdzad pa rdzogs so/