CLOSE WINDOW

D2257
བོད་ཡིག

@##/ /rgya gar skad du/ do ha ni d+hi ko Sha gIti nA ma ba ri pU ra pra shA sta ma ni ti yo TI kA/ bod skad du/ mi zad pa'i gter mdzod yongs su gang ba'i glu zhes bya ba gnyug ma'i de nyid rab tu ston pa'i rgya cher bshad pa/ bcom ldan 'das 'jam dpal smra ba'i skyes mchog la phyag 'tshal lo//bla ma dam pa rnams la phyag 'tshal lo/ /skyes bu mchog rnams de nyid thugs su chud pa'i ngo bo dang / /shes rab ral gris nyon mongs gcod par byed ba'i rje btsun pa/ /dam pa'i skyes mchog de nyid ston par byed pa'i bla ma la/ /bsam gyis mi khyab don gyis yang dag bstod byas te//sangs rgyas nyid las sangs rgyas rtogs par byed pa'i ngo bo dpal/ /mi shes gnyug ma'i ngo bo tha mal shes ba 'di dag ni/ /dam pa rnams kyi gdams ngag ji lta'i don nyid du/ /tha dad rtog pa gcad phyir mnyam nyid mai tris bshad/ /de la chos kyi sku dang de'i dgongs pa tha mi dad pa dag rje btsun pa dpal gyi ri bo bdag gis rtogs pa'i don glur blangs te bsam gyis mi khyab pa'i don de dag bdag gis rab tu rnyed do//de yang mkha' 'gro ma dag gis rjes su dpag pas nye bar mi rnyed pa'i phyir lkugs pa'i skad brjod de/ du ma mi li'o/ /de'i don ni/ mu stegs sgra dang tshad med ba//mngon sum rjes dpag rigs pa'i mdung / /blo rab mngon shes phra mos kyang / /rtogs par mi nus man ngag yin/ /zhes bya'o/ /de bas na 'di ni tug kan tsam na/ zhes bya'o/ /de'i don ni/ 'byung ba 'byung min 'byung ba 'byin/ /len pa len med len 'ong ba/ / smra ba smra min smra med brda/ /don min med don med min no/ /zhes bya ste/ bla ma'i ngag las nges par rnyed pa'i don to/ /de bas na hi ma hUM maM sa ra hUM ho zhes bya ste/ de dag gi don ni/ mgo bcad nam mkha' dag la 'phangs/ /nang grol tshogs kyis ston mo byas/ /rkang mthil spyi gtsug dag tu bkug /lte ba'i 'khor lo bskor bar bya/ /de ni nges par sbyar ba'i cha'o/ /de bas na rtag la la a ri ta zhes te/ de dag gi don ni/ grub pa med phyir rmi lam ston/ /brgyud pa yin phyir glu len te/ gsang ba yin phyir mkha' 'gro'i skad/ /gdams ngag yin phyir nyams su blang / /zhes bya ba ni gnas par bya ba'i yan lag go//de bas na e kra na zhes bya ste/ skye ba med pa de dag gi ni/ skye med mkha' las thim pa shar/ /rgyud gzhan 'bras bu'i thig pa ste/ /sgra ni dus chen 'gyur dus ston/ /mu rigs tshal du bram zes so/ /zhes pas ni thos pa can la sbyar bar bya'o//de bas na ha hi ta ma ni zhes bya ste de dag gi don ni/ gzhan gsal snying po'i khyad par dang / /bla ma bzang las de rtogs te/ /gnyug mar sbyang ba'i spyod pa yin/ /'dir ni nyams su blang ba ste/ /'bras bu de las 'byung ba'o/ /de dag ni go bar bya ba'i don nyid du sbyar ro/ /de bas na ma ki shu k+Sha na re zhes bya ste de dag gi don ni//g.yas pa gzhan dang gzhan der min/ /g.yon pas gsal ba brtag phyir min/ /de nyid de nyid rtogs pa min/ /min pa rgyal po'i shes pa min/ /zhes bya ba ni khyad par gyi don brjod pa'o/ /de bas na do ha zhes bya ste/ de dag gi don ni/ /rang la med pa a i'o/ / rang dang ldan pa ni e u'o/ /phan tshun gnyis la mi smra ba ni i a'o/ /ngo bo ni li ri a'o/ /gzhan gcod par byed pa ni au l-i'o/ /mtshan nyid kyi don ni i a ra'o/ /gnas bstan pa'i bya ba ni u l-i i'o/ /nyams su myong bas ni a ra'o/ /de nyid kyi brjod pa ni a aM a'i'o/ /de ni mkha' 'gro ma'i sgra'i don dang po'o//sgra'i tshig mang po bzang po'o can la sbyar ba ni/ khur chen khyer dang 'gro ba mgyogs/ /phyin pa med de dang po'i sa/ /gshog pa sbar bas nam mkha'i mtsho/ /ri rab nor bu gling na bde/ /zhes bya ba'i don no/ /sgra'i tshig bka' la sbyar ba ni/ /chu srin gdug pa'i khar 'gro dang / / rus sbal rgyab na gnas pa dang / /nya mid chen po'i lto ba ni/ /nyi ma'i dkyil na mdzes pa che/ /zhes 'byung ba'i phyir ro/ /bstan pa'i sgra sbyar ba ni/ /me yis skams pa'i bdud rtsi dang / /dur khrod tshogs kyi rus pa btung / /rgya mtsho'i steng na gzhon nu ma/ /rgyal pos sa 'dzin gdol ba'i mchog / ces 'byung ba'i phyir ro/ /sgra mkhas pas sbyar ba ni/ /rkang mthil spyi gtsug snying du mnyam/ /kha rkub brgyud pa khyi yi zas/ /srin bu me khyer chu bo'i rgyun/ /thal mo brdabs pa nam mkha'i sgra/ /zhes 'byung ba'i phyir ro/ /bstan pa thun mong ba'i sbyar ba ni/ /par su ni gi hi da ko sha bu ha sa na gi ta na ma'o//de dag gi don ni/ ma zad mi zad zad pa med/ /mthar thug rdo rje nyid kyi rang / /sangs rgyas sangs rgyas rtog ba min/ /lag pa'i nor bu mthong ba'o/ /bde gshegs snang ba sems kyi rang / /nges pa'i don smra nga yi snying / /rtogs par byed pa nor bu'i rten/ /de yang sa bon chu yis skyes/ / gdol ba lta bu'i smos pa las/ /nor bu chen po lag tu 'ongs/ /sangs rgyas dam pa rnams kyis gsungs/ /mkha' la mi smra smra ru med/ /thams cad chos kyi 'khor lo che/ /phyag rgya chen po gnyug ma'i ngang / /bde dang bral ba chos kyi sku /gsal dang mi rtog longs spyod rdzogs/ / snang dang stong pa sprul pa ste/ /rang bzhin lam la shin tu gnas/ /smras kyang grub pa med pa ni/ /rmi lam gyi ni nor bzhin du/ /mtshan nyid bral ba rdo rje'i glu/ /bla ma'i zhal las nges par blang / /de bas na/ /a i u e ra li o zhes bya ste/ de dag gi don ni/ dang po bzang po mchog gis stobs so//gnyis pa glu blang bar bya ba nyid do/ /gsum pa ni mtshungs pa'o/ /bzhi pa ni longs spyod do/ /lnga pa ni grub par byed pa'o/ /drug pa ni de bzhin nyid do/ /bdun pa ni gnas pa'o/ /brgyad pa ni spros pa'o/ /de bas na brda'i don 'di dag ni rje btsun dpal gyi ri bo dang / bdag dang bdag gi cha las sbyar ba dag gis rtogs par bya ba nyid du zad do//de ci'i phyir zhe na/ mkha' 'gro ma lA ma dang du ma di ri ni ni de bzhin gshegs pa'i sprul pa'o/ /kang ka dang gtum mo dang phag mo dang ro langs ma dang 'jigs pa'i gdong can ma ni 'phags pa chen mo dag gi yum mo/ / khaN+Da ro hi dang / be tA lI ni rje btsun pa'i yum mo/ /rdo rje dpa' mo su kha ma hA sid+d+hi ni bdag byin gyis rlobs pa'i mar gyur pa ste/ 'di dag ni gzhan dang ma 'brel pa'i phyir ro/ /der yang ma zad de gnas pa chen po na bdag nyid gnas pa de'i tshe tsun+da ma dang stobs mchog ma dang dkar mo ma dang shan pa mo dag gis ro'i brda bstan par gyur to//de bzhin gshegs pa'i 'byung gnas dam pa dag tu yang he ru ka ni dur khrod ma dang rnal 'byor ma chen mo sna chen ma dag gis/ bsod nams kyi 'khor lo'i brda bstan par 'gyur ro/ /rdo rje btsun mo'i spyan sngar yang sa 'og ma dang 'phar ma dang /brtul zhugs ma dang spyod pa'i rgyu ba dag gis kyang byis pa'i brda bstan par 'gyur ro/ /de bas na rnal 'byor pa dag gis brda'i don la mkhas par bya ste/ 'di dag gi don ni bdag gis kla klo'i skad du brjod do/ /ho sa ra na a sa ra na/ e ta a sa ra/ he dus bu la/ a ta ka ta/ mu lu sa/ la hi/ mu sa ras tris/ tra sa ra/ aM tsa pa ma/ a tsa ba a a ti ma/ a i su mig /po li/ ka'i snig/ sha ho sa ra/ ki pi tsa ta/ yo pi/ tsan he tran/ he ho ma he/ hi ma ri/ ta ma be/ a sig/ ma la po ya ha/ po yin la/ ha hi ho/ / e na sa su ga do yi la/ do pa na/ ru mig sa ra/ ha hi ho/ /i ba ta na ha hi i pa na ha/ po tsa na to ya li/ du ma ho 'o lo tsan do/ smri ri su pa ri/ /smri ri ka'i la/ tsan do pa yi la/ da ki sa pheM pheM pheM ha ha ho zhes pa ste/ 'dir ni srid pa'i 'khor lo'i brdar gyur pa thams cad de/ rje btsun pa ni mnyam pa la bzhugs pa ste/bdag 'ba' zhig gis shes pa kho nar zad do/ /de yang mdor bstan pa'i tshul ni/ dang po pa nyid rnam par zhi ba'o/ /de dag ni can no/ /'byung ba chen po'o/ /byin gyis brlabs pa'o/ /gter ro/ /bzhi'o/ /dag pa'o/ /bzang po'i spyod pa'o/ /yang dag par spyod pa'o//chen po'o/ /stobs so/ /rnam par rgyal ba'o/ /phyag rgya'o/ /snyoms par zhugs pa'o/ /'od gsal ba'o/ /bde ba chen po'o/ /sbyor ba bzlog pa'o/ /mngon du gyur ba'o/ /lnga'o/ /gsum mo/ /gcig go/ /thams cad pa'o/ /thams cad med pa'o/ /gzung ba'o/ /gzung ba med pa'o/ /thams cad pa'o//dus mtshungs pa'o/ /stegs so/ /dge ba'o/ /rnam par dge ba'o/ /smra ba'o/ /tha snyad do/ /'khor lo'o/ /ce spyang ngo / /rgyan no/ /sku'i 'khor lo'o/ /gsung gi 'khor lo'o/ /thugs kyi 'khor lo'o/ /mnyam pa nyid kyi 'khor lo'o/ /'dis ni brda'i don rnam par phye ba'o/ /de yang rje btsun pa dpal gyi ri bo pa dag gis/snying rje chen po dag gis kun nas bslang pa'i sangs rgyas ye shes kyi spyod yul rnam par phye ba'i don de dag gis dgrol zhing gsal ba'i bdag nyid du bshad par bya ste/ de yang dang po snying po'i don dngos kyis mtshan nyid la tha dad kyis yang dag pa'i don gtan la phab cing de bzhin nyid ji lta ba de dag la bsam gyis mi khyab pa'i mchod pa brjod nas/bshad par dam bca' bar bya ste/ 'di dag ni spros pa dang bcas pa'i tha snyad kyis dben pa yin te/ de ci'i phyir zhe na/ 'di dag ni rnal 'byor gyi dbang phyug chen pos rtogs pa'i don yin no//de yang rab tu mi gnas pa'i rgyud las/ dbang phyug chen po dag gis nyams su myong ba 'di ni dam pa rnams kyis gdams ngag go zhes 'byung ba'i phyir 'di dag gi don nges par shes par byed pa yang gnyis med brjod bya dang bral ba ston pa'i lung dang / dam pa rnams kyis rtogs pa las 'byung ba'i zhal gyi bdud rtsi dang /sems nyid bsam gyis mi khyab pa chen por rtogs pa'i lus te/ glegs bam tha dad pa la ltos pa ni ma yin no/ /de yang rgyud de nyid las/ /'di ni gnyis med rab tu sbyor ba'i lung / dam pa rnams kyis rnam par sbrel ba'i ngag /bsam gyis mi khyab sems kyi klong rnams ni//dbang phyug chen po rnams kyi dbang po'o/ /zhes byung ba'i phyir/ don de nyid nyams su myong bar byas la thams cad bde ba chen po'i rig par sbyar bar bya'o/ /yang rgyud de nyid las/ /rnal 'byor rig pa rig pa che/ /dbang phyug rig pa bla na med/ /nyams su myong ba don gyi gtso//thams cad bde ba chen por sbyor/ /zhes 'byung ba'i phyir/ man ngag gi thigs pa nyid snying gi pad+mo'i ze 'brul thim pas rang bzhin gyis 'od 'byung bar 'gyur te/ 'dis ni rtog pa'i 'ching ba thams cad rang grol bar 'gyur ro/ /de yang bsam gyis mi khyab pa'i rgyud las/ /snying gi pad+mo'i tha mal shes pa dag /mnyam nyid rtsi yis kun nas khyab pa ste/ /sems kyi bung ba dag gis 'jibs gyur na/ /chos nyid ma bcos bde ba chen po'i sku/ /zhes 'byung ba'i phyir dang / yang de nyid las/ tha mal shes pa nang nas sgro 'dogs gcod/ /gcod du med de chos dbyings 'khor lo che//zhes 'byung ba'i phyir/ snang ba thams cad chos kyi sku gnyug ma'i ngo bo nyid du shes par bya zhing / dus thams cad du phyag rgya chen po 'ba' zhig tu blta'o/ /de yang rab tu mi gnas pa'i rgyud las/ /snang srid phyag rgya chen po ste/ /bde ba chen po kun du bzang / /'di ni sems kyi 'khor lo ste/ / rnal 'byor dbang phyug blta bar byos/ /zhes 'byung ba'i phyir/ /dus thams cad du lhan cig skyes pa gnyis su med pa'i ye shes kyi tshul du spyad par bya'o/ /de yang rgyud de nyid las/ /bdag tu mi brtag gzhan du min/ /gnyis ka dag tu brtag mi bya/ /lhan cig skyes pa'i ye shes ni//gnyis med spyod pa chen po'o/ /zhes 'byung ba'i phyir/ chos kyi sku de dag ni gzhan du brtag par mi bya ste rang gis sems ji bzhin pa la bya'o/ /yang de nyid las/ sangs rgyas grub pa med phyir gzhan mi brtag /grub med sems ni rdo rje lta bu ste/ /sems can kun gyi rgyud la de gnas shing //gnas pa med pa rdo rje snying po che/ /zhes 'byung ba'i phyir/ de dag ni 'bad rtsol gyis bsgrub pa dang 'grub pa yang ma yin te/ gnyug ma'i don phyin ci ma log pa de dag goms pa mthar phyin pa las ni skye ba 'di la sangs rgyas zhes bya ba 'byung bar 'gyur ro//de yang bsam gyis mi khyab pa'i rgyud las/ /'bad dang rtsol bas de nyid 'grub pa min/ /rtogs pa'i don la goms par gyur ba na/ /skye ba 'di yis sangs rgyas 'bras bu thob/ /bzang po he ru kas ni rnam par smras/ /zhes 'byung ba'i phyir dus de dag kyang thun mong rnam par bshad par bya'o//khyad par gyi don tha mal gyi shes pa 'di dag ni bla ma dam pa'i drin gyis bdud rtsi'i khu ba 'thungs pas rang gi de kho na nyid rtogs te skad cig ma gcig la mngon par rdzogs par 'tshang rgya bar 'gyur ro/ /de yang bsam gyis mi khyab pa'i rgyud las/ rtogs dang goms pa mthar phyin pa//'di la yod pa ma yin te/ /rtogs pa'i skad cig de nyid la/ /bcu bzhi sa la nges par gnas/ /zhes 'byung ba'i phyir/ de nyid kyi don gsal bar bya ba ni/ /kun ldan kun min ldan pa yi/ /lhan cig skyes pa'i ngo bo dpal/ /bde dang stong par dbyer med sku/ /gnyug ma'i don la phyag 'tshal te//bdag gis de nyid bdag 'dra ba/ /bdag 'dra gzhan la de nyid ston/ /brda las shes shing myong ba nyid/ /smar med don ni der bshad bya/ /zhes bya ba'i don ni/ /bla ma dam pa rnams kyis gdams pa'i don de dag smos par bya ste/ de yang kun ldan zhes pa ni snang grags kyi chos thams cad do//de dag gang dang ldan zhe na/ sems sangs rgyas kyi bdag nyid la ldan pa'o/ /kun min zhes bya ba ni de la zhen shes kyi rtog pa ji snyed pa de dag min no/ /ldan pa'i zhes bya ba ni sems gnyug ma'i ngo bo phyin ci ma log pa dag pa dus gsum gyi sangs rgyas thams cad kyi sku gsum dang ye shes lnga'i bdag nyid dang ldan pa'o//lhan cig skyes pa zhes bya ba ni chos gi su la bya ste/ snang ba lhan cig skyes pa dang / /sems nyid lhan cig skyes pa'o/ /de bas na de dag glo bur ba ma yin te thog ma nyid nas chos kyi sku'i ngo bo la rtogs pa dpal du gyur pa dag go//de dag ni bde ba chen po'i rang bzhin yin te/ zag pa dang bcas pa'i bde ba dang zag pa med pa'i bde ba'o/ /de dag kyang lus dang sems dag las byung ba ste/ de la brtags pa'i 'khrul pa med pa ni stong pa'o/ /de ltar bde ba dang stong pa dbyer med pa ni chos kyi sku yin te de nyid tha mal gyi shes pa'i ngo bo 'gyur ba med pa ni mchog ste sku'o//de ni sems ma bcos pa gnyug ma'i don nyid yin te/ de yang mar la mar gzhag pa dang chu la chu gzhag pa'i tshul du sems la snang ba gzhag pa 'di dag ni chos kyi dbyings kyi ye shes te/ kun la gnas shing don dang ldan pa yin pa'i phyir/phyag 'tshal zhing btud par rigs so/ /te zhes bya ba ni lhag ma dang bcas pa'i don te/ gong gi mchod par brjod pa'i gnas bsam gyis mi khyab par don ji bzhin par gsal bar bya ba'i tha tshig go/ /de yang bdag gis zhes bya ba ni tha snyad kyi blo la brjod par bya ste/rje btsun pa nyid do/ /de nyid ces bya ba ni thugs gnyis su med pa'i ye shes so/ /bdag 'dra zhes bya ba ni snang grags kyi chos thams cad la bya ste/ de dag tha mal gyi shes pa bdag nyid kyi dbang du gyur cing de dus thams cad mtshungs par de las mi g.yeng ba'o//de ltar don de nyid kyang su la ston zhe na/ bdag 'dra zhes bya ste/ rje btsun bdag dang mtshungs pa 'am/ /gang zag skal ba dang ldan pa dbang po rab tu gyur pa don gnyis su med pa 'di dag la mos shing gzhol ba tshogs bsags pa'i mthu las nges par grub pa'o/ / gzhan la de kho na nyid bstan pa'am ston pa'o/ /de dag kyang bstan du yod dam zhe na ma yin te/ i du pa ka dang / ka la mu su ra dang / tsi trid ka ni ka dang / ni ba lo bi ka dang / ha sna na ma da ni ma da ra la sogs pa'i brda las shes shing slob pa po'i blo la myong du med pa'i myong ba nyid ston to//de dag nyams su myong ba dang smrar med de med pa'i don de nyid ni rtog ge pa rnams la gsal bar bya ba'i phyir sgro btags te bshad par bya ba'i don to/ /de yang ji ltar bshad par bya zhe na/ log par rtogs pa bsal ba dang / /snying po don gyi khyad par dang / / bla ma bstan la rtogs par bya zhing / /gnyug ma la sbyangs pa'i gang zag gi spyod yul yin pa dang / de nyid nyams su blang ba dang / 'bras bu 'byung ba'i rim pa bstan pa'o/ /de yang dang por mi mthun zhing log pa'i gang zag dang mi 'grogs par ston te/ dug sbrul lta bu'i skal med kyis//nges pa'i skye bo dam pa la/ /skyon gyi dri mas gos byed cing / /smad tshig mngon par sgrub pa la/ /ro snyoms ldan pa'i skyes bu yis/ /mthong ba tsam gyis 'jigs par byos/ /zhes bya ba'i don ni log par rtogs pa'i sems can tha dad kyi bag chags 'thug pos non pa dag la bya ste/dug sbrul zhes bya ba ni sbrul dug can la bya ste/ de dag mthong bas ni skyes pa dang bud med dag 'jigs par 'gyur la/ reg pas ni sngangs par 'gyur te/ bldags shing sos btab pas ni skrangs pa dang 'chi bar 'gyur/ de lta bu'i gang zag skal ba med pa dag gis rnal 'byor gyi dbang phyug chen po dag la skur bar gyur te/mthong ba'i dus su yang khong khro ba dang bcas pas blta bar byed cing lhan cig tu gnas pa na yang de dag gis sangs rgyas kyi gnyug ma nyams su myong ba'i slu ba med pa'i don nges par sbyar ba'i skye bo dam pa dag la rnam par rtog pa'i skyon gyis de kho na nyid la mi 'jug cing zhugs pa dag kyang phyir zlog par byed la the tshom skyed pa ste/de la sogs pa dri mas gos par byed cing 'di ni sangs rgyas kyi chos ma yin no/ /'di ni ston pa'i bstan pa ma yin no/ /'di la dam pa rnams kyis gdams pa ma yin no zhes smod pa'i tshig mngon par sgrub pa rnams la bde ba dang stong pa dbyer mi phyed pa'i ro snyoms dang ldan pa'i skyes bu dam pa des/mi mthun pa'i gang zag de dag mthong ba na de tsam gyis 'jigs par bya ba nyid yin te/ rnal 'byor gyi dbang phyug chen po rnams kyis ni sems nyid gnyug ma'i rang bzhin du blta ba dang /de ma yin pa'i don gyi gzhi nyams su myong pa'i rnal 'byor pa rnams kyis ni gzhan du 'gro bar byos shig /de ci'i phyir zhe na/ sems la gnod pa'i phyir te de nyid rnam par smin pa ma yin pa myong zhing skyed par byed do/ /de ni bram ze'i brtul zhugs kyis mi grol bar ston te/de nyid la 'khrul mu stegs ni/ /bram ze spyod pa la gnas shing / /sgyu ma'i rig byed bzhi dag ni/ /thun bzhis rnam par gnas shing 'don/ /sgyu ma'i dngos po gcod par byed/ /lta ba skye nyid rnam par 'dzin/ /zhes bya ba'i don ni gnyug ma dang bral ba'i tshangs par spyad pas mi grol bar ston te/de yang de nyid ces bya ba ni chos nyid ma bcos pa'i rnal ma ji lta ba la bya'o/ /de nyid la 'khrul pa ni mu stegs lo ma can rnams te/ de dag ni bram ze lta bu'i spyod pa la gnas par byed cing / rtag tu gtsang sbra dang khrus la brtson par byed pa ste tshangs pa'i skud pa dang gun+d+he 'chang ba yang byed do//de dag gi bya ba'i rim pa ni nus pa mi 'byin cing yid brtan du mi rung ba ste sgyu ma'o/ /rig pa ni thun mong gi dngos grub skyed par byed do/ /de la yang pho'i rig byed dang mo'i rig byed dang mtshungs pa'i rig byed dang las kyi rig byed de dag ni ba ra hi dang / ru na ha ta dang / ki hi na dang /bi ru ha na'o/ /de dag gis ni sa 'og gi dngos grub dang mkha' spyod kyi dngos grub dang mig sman gyi dngos grub dang / rkang mgyogs kyi dngos grub 'grub par byed do/ /de yang snga dro dang phyi phred dang srod dang tho rangs dang thun bzhi'i rnam par rig pa dang ldan pa'i lo mang po bcu gcig gis rdo rje skyil mo krung la gnas shing 'don bar byed do//de yang sgyu ma'i dngos po skyes pa dang bud med dang byol song gi tshogs ji snyed pa byung na 'phro gcod par byed do/ /lta ba ni dbang phyug tu 'dzin pa ste/ de dag gi 'dod pa yang dang po nam mkha' la rlung gi rdul phra rab gnyis lha dbang phyug chen po'i thugs rje dang sems can gyi sngon gyi las kyi mthu las byung bar gyur te/de nyid phrad cing 'dus pa las rlung gi dkyil 'khor chen po sra zhing rngams mthug pa 'byung bar 'gyur ro/ /de'i steng du sa'i rdul phra rab gnyis 'grub par 'gyur te/ de gnyis phrad cing 'dus pa las gser gyi sa gzhi chen po 'byung bar 'gyur ro//de'i steng du chu'i rdul phra rab gnyis 'grub par 'gyur ro/ /de gnyis phrad cing 'dus pa'i skad cig ma de nyid las chu'i dkyil 'khor chen po 'byung bar 'gyur ro/ /de'i steng du me'i rdul phra rab gnyis 'grub par 'gyur te/ de gnyis phrad cing 'dus par skad cig med nyid la me'i sgo nga chen por 'gyur ro//de dag gi nang nas mes po ral pa can zhes bya ba tshangs pa gdong bzhi pa byung ste/ de dag gis gdong bzhi las mngal nas skyes pa dang / drod gsher las skyes pa dang / sgo nga las skyes pa dang / brdzus te skyes pa 'byung bar 'gyur ro//de la mchod pas mnyes shing mgu bar gyur pa las ni legs pa dang / dngos grub thams cad skye pa nyid du byed do/ /de dag mnyes par ma byas pa de dag gis ni 'bad pa dang rtsol ba ji snyed cig byas kyang 'grub par mi 'gyur ro zhes mngon par log pa'i lta ba 'dzin par byed do/ / de dag gi 'khrul gzhi gang las 'khrul zhe na/ yul wA rA Na sI'i grong khyer chen po li ga ta na zhes bya ba na bram ze'i rigs su skye ba bzhes pa'i tshangs par spyod pa'i rnal 'byor ba sing ha pa na ha zhes bya ba zhig gis 'jam dpal dpal bo rig pa'i rgyal mtshan gyi rgyud la brtan nas bya ba'i rgyud dang kri ya'i brtul zhugs nye bar spyod pa la gnas pa'i tshul nye bar spyod pa ni rgyud de dag dang mi 'gal bar sgrub pa ste/de yang lung de nyid las/ /rtag tu tshangs par spyod par bya/ /khrus dang gtsang sbras gnas byas te/ /sha chang sgog btsong rnam par spang / /rtag tu bram ze'i spyod pa ni/ / mu tig shel skud dang ldan pa/ /de bzhin mgo bo rkang pa rked/ /lus kun rnam par dkri bya'o/ /lha dang lha mo'i rig pa dang / /chos dang rig pa'i bzlas pa ni/ tshangs par spyod pa dang ldan pa'i/ /bcu gcig dag ni thun bzhir bzlas/ /rdo rje skyil krung gnas byas te/ /lha yi nga rgyal ldan par bya//smra dang dgod dang g.yeng ba dang / /bar du gcod pa'i mi rnams ni/ /spangs nas nges par 'grub par 'gyur/ /zhes bya ba'i don de dag la brten te bsgrub pa las khyim bdag rgyal mtshan gyi dbang por skyes te/ der longs spyod thams cad dang ldan te/ de nas skye ba 'phos nas sum cu rtsa gsum gyi lha 'od kyi rgyal mtshan 'bar ba bya bar skye ba mthong ngo //de dag las 'khrul nas mu stegs lo ma pa ste/ lo tan ta zhes bya bas brtul zhugs de la nye bar zhugs te de dang mtshungs par spyod pa ni de'i rjes su 'dzin pa rnams so/ /da ni ri khrod kyi mu stegs rnal 'byor pa rnams kyi spyod pas mi grol ba bstan te/spre'u la la'i brtul zhugs ni/ /sa chu ku sha pa yu yis/ /gdan dang zas dang 'khrud par byed/ /tsan+dan shing la me sbar te/ /rlangs pa yin zhes lus la gdung / /don med sbyin sreg byed pa ni/ /du bas mig la gnod par zad/ /ces bya ba'i don ni 'khrul pa'i brtul zhugs pa dag ston te/de yang spre zhes pa'i don ni ri khrod kyi 'jigs pa'i gnas la bya'o/ /'u zhes bya ba ni mu stegs kyi mkha' 'gro ma tshogs pa'i sa'o/ /la la zhes bya ba ni log pa'i bsam gtan don du gnyer ba la bya ba ste/ brtul zhugs ni tha mal gyi spyod pa brtul nas drag po'i shugs la 'jug pa ste de dag ni bye ma dag pa'i sa'i tshom bu gsum gyi lus kyi stod dang smad dang rked pa 'khru bar byed do//mtsho dag gi nang du song ste/ /spyi gtsug nas brtsams te khrus la brtson par byed pa dang / ba'i rnam pa lngas maN+Dal byas pa'i steng du rtswa ku sha dag legs par bting ste 'dug pa dang /ba spos kyi rtsa yid du 'ong ba dag zos pa'i ba'i rnam pa ldas zas byed pa dang / de yang rus pa'i khang pa dag tu gnas te yang dang yung du ku sha'i gdan dang / ba yu za ba dang sa dang chu'i khrud pa la brtson par byed do/ /nyi ma phyed kyi dus dag na yang tsan+dan gyi shing la gu gul gyi dud pas bdugs pa dag la me sbar te/ras kyi kha tshar mang po dag gis g.yab pa'i dud pa lho phyogs su 'bud par byed do/ /de la brtul zhugs pa dag gis lus nye par bstan te 'di ni lha dbang phyug chen po'i kha'i rlangs pa yin no zhes lus la bdug par byed cing de yang lus kyi phyi nag por nam song ba na bdag gi sgrib pa thams cad 'dag par byed pa ste/chos nyid mi 'gyur ba'i rtags thob pa yin no zhes don med par sbyin sreg byed pa de ni du bas mig la gnod pa kho nar zad do/ /grong khyer pa rnams kyi me dang khyad med par 'gyur ro//de yang 'khrul gzhi gang las 'khrul zhe na/ rnal 'byor pa chen po te lo pa zhes bya ba dpal he ru ka bzang po'i brtul zhugs la zhugs te ri khrod dag na nye bar gnas pa de yang rgyu de dag na gnas pa'i spyod pa la gnas te de yang ci zhe na/ he ru ka mchog sangs rgyas grub 'dod pa'i//dur khrod dgon pa'i phyogs nyid dam pa ru/ /phyi nang zang zing g.yeng ba rnam spangs te/ /ku sha sngon po'i gdan la 'dug nas kyang / /ba yu rnam lnga zas su bza' bya la/ /tho rangs dus su sa dang chu yis bkru/ /maN+Dal bzang po yid du 'ong ba'i steng / / me tog chal pa legs par bkra ma nas kyang / /tsan+dan dkar po'i shing ni legs brtsigs te/ /bde gshegs mnyes phyir rtag tu sbyin sreg dbul/ /haM ti ta dang bil pa'i snying po dang / /ag ma ka dang kre ya a ka ru/ /sbyar ba'i khu bas lus la byug par bya/ /des ni thun mong mchog gi dngos grub rnams//myur du ster zhing dam par 'gyur ba'o/ /zhes 'byung pa'i phyir/ tshul de bzhin du gnas pa dag skye ba 'phos nas rgyal po stobs kyi glang por skyes par gyur to/ /der tshogs nyid yongs su bsags pa dag gis phung po lhag ma med pa'i rig 'dzin gyi sar tshogs kyi 'khor lo la song ba mthong ngo //de dag la mu stegs pa la kin ti zhes bya ba 'khrul nas ri khrod kyi brtul zhugs de dag la zhugs te/ de dag gi tshul 'dzin pa ni de'i rjes su 'brang ba dang bcas pa'o/ /da ni mu stegs rgyang pan pas mi grol bar ston te/ /spre'u'i brtul zhugs 'dzin pa ni//gtsug dang dbyu gu gnyis la gnas/ /sos kha'i gsal shing rtse la btab/ /zags pas nyon mongs bcom zer te/ /legs ldan dag gis nga rgyal gnas/ /mngon pa'i nga rgyal tha dad med/ /ces bya ba'i don ni mu stegs nags khrod pa'i brtul zhugs 'dzin pa ste/spre'u zhes bya ba ni shing kha la gnas pa dag gi tshul la gdags pa'o/ /brtul zhugs zhes bya ba ni bag yangs pa la brtul nas sdug bsngal gyi bag la brten pa la zhugs pa'o/ /de yang nags tshal dag tu sa gzhi legs par snyoms par byas te/ de dag gi steng du shing tak+Sha na'i sdong po chen po btsugs te/shing kha te ri'i rgya gram sbrel pa 'khor lo'i tshul du dbyu gu gnyis sbrel pa'i sna la spre'u bzhi gnas par byas te de dag gi steng du gnas nas gsal shing shin tu rno ba dag la snum byugs nas legs par brdar bas rno bar byas pa dag gi rtse mos khrag rgyu ba'i phyir rtsa thams cad la btab ste/khrag dang chu ser zags pas bdag gi nyon mongs pa bcom pa yin no zhes zer te/ seng ldeng gi rgya ma dag la nyi ma re te zhing lus 'jal bar byed do/ /de yang ji bzhin du yang song ba ltar bdag ni lha legs ldan chen po dang khyad med pa yin no zhes nga rgyal gnas pa'o//bdag ni 'bras bu thams cad kyi bdag nyid yin no zhes mngon pa'i nga rgyal byed cing / /sangs rgyas dang tha dad med par smra'o/ /de dag kyang 'khrul gzhi gang las 'khrul zhe na/ lho phyogs gyad kyi yul dag na slob dpon ToM bi he ru ka'i slob ma shes rab kyi rgyud la blo gnas par byed pa'i rnal 'byor pa d+ha snya ru pa zhes bya ba zhig gis rgyal po chen po dpa' bas byin pa la 'di skad ces smras so//rgyal po chen po khyod gsang sngags kyi theg pa la rab tu gzhol bar gyis shig /de ci'i phyir zhe na/ skye ba 'di la dngos grub chen po dang ldan par 'gyur ro zhes pa dang / rgyal pos smras pa/ri khrod pa khyod la nus pa ci yod/ bdag la ston cig dang bdag dad par 'gyur ram mi 'gyur blta bar bya'o zhes pa dang / rnal 'byor pas smras pa/ kye rgyal po chen po bdag gis ni gsang sngags kyi theg pa 'di dag la zhugs nas ring por ma lon te/ de ltar yin yang lus kyi khrag dang chu ser thams cad ni 'o mar 'gyur ro zhes pa dang /rgyal pos smras pa/ de bdag gis blta bar bya'o/ /rnal 'byor pas smras pa/ zhag nyi shu snyed nas spyon cig zhes nas dur khrod du phyin te/ lus kyi khrag dang chu ser la srog chags mi 'jug pa'i phyir shing gi sgor bu legs par byas pa'i steng du 'dug ste/gsal shing gi rtse mos lus phug nas khrag dang chu ser gzags te 'o ma 'thungs so/ /de nas rigs bzhi'i mkha' 'gro ma bzhis rnal 'byor ba de dag la srung pa byed pa dang / 'jig rten pa'i mi rnams kyis spre'u bzhir mthong par gyur to//de nas rgyal po des de dag gi phyir/ rnal 'byor pa'i lus dum bur gcod do/ /bcad kyang de dag la khrag dang chu ser ma byung ste 'o ma 'dzag par gyur to/ /de nas rgyal po de ngo mtshar nas rnal 'byor pa bdag la skabs su song ste/ rgyal srid thams cad bor nas ting nge 'dzin la zhugs so//de nas skye pa de nyid la thun mong gi dngos grub dpag tu med pa byung bar gyur nas/ mu stegs ha la ka ga sha zhes bya bas mthong nas de dag gi tshul du spyod de/ /de dag dang nye bar 'dzin pa ni de'i rjes su 'brang ba dang bcas pa rnams so/ / da ni spyod pa'i brtul zhugs kyis mi grol ba ston te/ rgyu ba dur gyi ngang pa'i skad/ /bstan pas gzhan 'dul chos ston pa/ /snying po'i don dang gzhan ma sel/ /de ltar mngon par zhen pa yis/ /'gro ba brdzun pa nyid du grol/ /zhes bya ba'i don ni mu stegs ro langs pa dag gi spyod pa ste/grong khyer du bsod snyoms la rgyu ba'i dus su dur khrod na gnas pa'i ngang pa dag gi skad kyis rgyu bar byed do/ /kang ka ra dang zhes bya ba'o/ /de yang mngon par 'dod pa'i sgras phye ba ni/ kang brtul zhugs so/ /ka ra dbang phyug gi nga rgyal lo/ /dang de dag gi mchod pa'o zhes li ka ru'i mchod pa chen po la gtogs pa'i mi rnams la don de bstan pas/mu stegs kyi bstan pa la 'jug cing gzhan dul bar byed pa de gong ma lta bu'i chos ston pa'o/ /gzhan dag ni chos ma yin no ston pa'i bstan pa ma yin no zhes snying po'i don 'di dag dang nang pa sangs rgyas kyi chos gzhan ma sel bar byed do//de ltar bdag dang bdag gir 'dzin pa la mngon par zhen pa'i mu stegs kyi 'gro ba de dag ni don gyi 'bras bu 'byin par mi nus te/ slu bar byed pa'i phyir brdzun pa nyid du grol pa'o/ /da ni phyi rol pa'i bsam gtan gyi brtul zhugs kyis mi grol bar ston te/bsam gtan tshul byed mu stegs ni/ /gun+d+he e re thal bas bkang / /nyal dus thal byugs ral pa dgrol/ /bsod snyoms thig le spyi bor sdud/ /gtsang ma la ba'i steng nyid du/ /'dug nas tshangs pa'i nga rgyal byed/ /e ran mar mes dbang phyug mchod//mtshams su gtor gtong dril bu dkrol/ /skyil krung bcas nas mig btsums te/ /brtag med tshig gis g.yo sgyu byed/ /skra med rgyan bral rig ma ston/ /thod pa'i dur khrod dbang skur byed/ /bla ma'i nga rgyal yin tan len/ /zhes bya ba ni phyi rol gyi brtul zhugs kyis spyir mi grol par ston te/de yang bsam gtan zhes bya ba ni sangs rgyas kyi dgongs pa dngos gzhi'o/ /de dag ma rtogs pa'i bsam gtan ni bsam gtan gyi tshul du byed pa ste log par rtogs pa'o/ /de dag la gnas pa'i mu stegs ni gun+d+he phrag par bkal te bram ze'i ro bsregs pa'i thal ba ni e ri'o//mu stegs de dag gun+d+he'i nang thal bas bkang ste nyal ba'i dus su yang lus po la thal ba byugs te ral pa'i spyi gtsug nas bkrol nas lus la gon par byed do/ /grong gseb dang dur khrod thams cad du bsod snyoms la rgyu ste khrag dang zhag gi thig le dag gis lus thams cad la 'god par byed do//sbrul gyi chun po dang bcas pa'i ral pa'i spyi bor bsdus te/ sba dang smyug ma las btags pa'i stan la rta'i gzugs bris te/ shin tu gtsang bar byas pa la tsan+dan dang gur gum la sogs pa dris bsgos pa'i steng du 'dug nas kha shar phyogs su bltas te/tshangs pa gdong bzhi pa'i nga rgyal byed do/ /e ran zhes bya ba ni sbrul gdug pa can la bya ste/ de dag gi tshil bus thod pa'i nang du mar me btang ste des dbang phyug chen po'i rten rdo las byes pa lha srid pa'i gdong can la mchod par byed do//shar phyogs mtshams su nyi ma re re la gtor ma bcu bcu gtong ste/ dur khrod kyi ka pA la rnying pa la kha ti ri'i khu bas pad+ma 'dab ma brgyad pa bris pa'i dbus su srid pa'i mes po btags te dril bu dkrol bar byed do/ /rdo rje skyil mo krung bcas nas mig btsums te shes pa'i tshogs drug ma 'gags pa dag la ting nge 'dzin med do zhes rna ba yang 'geg par byed do//da ri ha zhes brda med pa'i tshig de dag gis yon bdag rnams la 'debs par byed cing g.yo sgyur byed do/ /chung ma skra med rgyan dang bral ba la srid pa'i mes po dpral par bris nas 'di dag gsang sngags kyi rig pa yin no zhes ston cing bdag ni chags pa dang bral ba ste/de ci'i phyir zhe na/ rig ma 'di dag la blta bar bya'o zhes so/ /dur khrod kyi thod pa dag la dbang phyug chen po'i gzugs bris te skra shad kyi dra bar bcug nas dur khrod du song ste/skyes pa dang bud med gzhon nu dag gi ro bshas nas za bar byed cing thod pa de dag mgo bo la bzhag nas dbang bskur bar byed do/ /'di dag ni lha chen po dag gis gnang ba'i dngos grub yin no zhes zer ro/ /de nas stan mthon po la 'dug cing nga ni khyed rnams kyi bla ma chen po yin no zhes nga rgyal bas slob mas phul ba'i yon rnams len par byed do//'di dag gi 'khrul gzhi ni rnal 'byor pa chen po dan ta ko la zhes bya ba sgyu 'phrul chen mo la nye bar gnas pa dag gi tshe de'i tshul du sgrub par byed do/ /de yang rgyud de nyid nas/rtag tu dur khrod dag tu gnas/ /he ru ka yi nga rgyal dang / /mkha' 'gro rnams la gtor ma sbyin/ /kang ka ra dang 'bod par byed/ /dpa' bo chen po'i nga rgyal bas/ /dur khrod chas dang thig le mgo /ral pa spyi gtsug dag tu bskur/ /bdug pa'i mar me rtag tu mchod/ / dur khrod gnas su gtor ma gtong / /gcer bu rgyan bral skra grol ba'i/ /mtshan dang ldan pa'i rig ma la/ /dbang bskur bde ba bskyed par bya/ /de ni srid gsum dag pa'i don/ /mi zad rgyan gyi 'khor lo'o/ /zhes 'byung ba'i phyir de dang mthun par spyad de/ /de dag skye ba 'phos pa las rnal 'byor pa shAn+ting d+harma ka ra skyes par gyur te/de la mkha' 'gro ma thams cad kyis dbang bskur nas srid pa gsum gyi 'khor lo thams cad sgyur bar nus so/ /de dag mu stegs gcer bu pa legs srung zhes bya bas mthong nas brtul zhugs la zhugs so/ /de dang nye bar mtshungs pa ni de'i rjes su 'brang ba dang bcas pa rnams so//da ni phyi rol pa brtul zhugs kyi cha dang mthun pa dag gis kyang grol bar mi 'gyur te/ skra sen ring zhing dri ma skud/ /gos bral skra ni rnam par 'bal/ /zhes bya ba'i don ni/ gsang sngags kyi tshul dag dang cha mthun par spyod pa ste/ skra shin tu ring pa la rtsa ba klu shing gi me tog gi chus byugs te/ser skyar byas pas de dag spyi gtsug tu sbrul gyis 'ching bar byed do/ /sen mo'ang shin tu ring bzhin lus po la thang chu dang bdud rtsi bsres pa'i dri mas skud par byed do/ /gcer bu'i tshul gyis gnas par byed de dus rtag tu gos dang bral ba'o//skra'i mtha' thams cad kyang 'bal bar byed de/ nga ni chags pa dang bral ba yin no zhes smra bar byed do/ /de dag kyang 'khrul gzhi ci las 'khrul zhe na/ byang phyogs 'dam bu'i tshal na rnal 'byor pa dpal gyi zhabs chen po zhes bya ba bcom ldan 'das dga' ba'i rdo rje'i nga rgyal du zhugs nas/lo bcu dgu'i bar du shing lo'i stan gcig gi steng nas ma langs te/ bza' ba dang btung ba ni dri chen dang dri chu'i rgyun log pas 'tsho bar byas so/ /de yang gcer bu'i tshul gyis gnas par byas te skra dang sen mo thams cad kyang ring bar gyur to/ /skra'i rtse mos la 'khyil ba dag dum bu dum bur yang gyur to//de nas lha'i bu rnams kyis nam mkha' la tshigs su bcad de smras pa/ skyes bu mchog ldan dpa' bo he ru ka/ /rje btsun bzhengs shig bsam gtan las bzhengs la/ /lhung ba'i las can rnams kyi tshogs bsags phyir/ /sum cu rtsa gsum 'khor los sgyur bar gshegs//zhes nas nam mkha' la rol mo'i tshogs dpag tu med pas/ bsu ba dang blta ba byas nas song ngo / /de dag gdong pa u ri ta na zhes bya bas mthong nas de'i rjes su brtul zhugs spyad do/ /de dang nye bar mtshungs pa ni de'i rjes su 'brang ba dang bcas pa rnams so//de dag thams cad kyang tshul 'di lta bu dag yin te/ yid ni nam mkha'i khams la rtog /bstan la gnod byed lam gzugs ston/ /bdag ni grol 'dod thar la mngon par dga'/ /gnas min bzod pa can la gnas/ /theg chen rnams kyi gzhi yi sa/zhes bya ba'i don ni/ de thams cad mthun pa'i bdag nyid ston par byed pa ste de yang de dag gis yid kyi rnam par shes pa nam mkha'i mtha' la ston cing / nam mkha' sgom par byed do/ /sangs rgyas kyi bstan pa la gnod par byed de bdag ni sangs rgyas kyi bstan pa 'dzin pa'o zhes brjod pas so so'i skye bo blo chung ba rnams lam gyi gzugs su ston pa de la 'jug par 'gyur ro//de dag thams cad kyang bdag nyid grol bar 'dod cing bdag 'ba' zhig gi don du thar pa la mngon par dga' ba'o/ /de yang gnas kyis bzod par brtul zhugs don med pa rnams dang nam mkha'i yid can la gnas te/theg pa chen po pa rnams kyi gzhi ste dpyad pas sa kho nar zad do/ /nga ni wa khyi'i brtul zhugs kyis mi grol bar ston te/ gcer bu nyid kyis gnas byed cing / /wa khyi'i brtul zhugs kyis grol na/ / dur khrod kyi dang wa nyid kyang / /khyod kyi mthun phyir grol bar rigs/ /zhes bya ba'i don ni/ phyi rol pa dag dus rtag tu gcer bu nyid kyis gnas par byed cing / /rkang lag bzhi sa la btsugs nas wa dang khyi'i tshul gyis gnas te/ de'i brtul zhugs kyis spyod do/ /des ni grol bar mi nus te grol lo zhe na/dur khrod kyi wa dang khyis kyang khyod dang mthun pa'i phyir grol bar rigs so/ /de dag gi 'khrul gzhi ni rnal 'byor pa chen po prin ti ra'i dang / sring gi sna gnyis kyis de bzhin gshegs pa'i sku gzugs kyi spyan lam du rul pa'i dugs kyis bdugs dang /gtsug lag khang du mchil lham ma bor bar phyin pas dur khrod kyi wa dang khyi rgod du skyes te/ de dag skye ba 'phos pa las mkha' 'gro ma sug sme si la ha dang / rnal 'byor pa chen po tog rtse ba chen po gnyis su skyes par gyur to/ /de dag bram ze 'jigs pa med par rgyu ba zhes bya bas mthong nas de'i brtul zhugs gzung ngo //de dang mngon par mtshungs pa ni rjes su 'brang ba dang bcas pa rnams so/ /da ni gzhon nu ma'i brtul zhugs kyis mi grol bar ston te/ rdo leb steng du gnas byed cing / /spu 'breg gzhon tshul gyis grol na/ / bud med lang tsho gzhon nu dag /khyim la 'gro dus rked spu 'breg /mtshan spu 'thogs pa'ang grol bar 'gyur/ /zhes bya ba'i don ni/ rdo leb gtsang ma dag gi steng du 'dug ste bag dang ldan pa'i tshul gyis gnas par byed cing rgyal po'i khyim la gnas pa dag gis lus kyi spu bregs te/mgo rgyan dang lus kyi rgyan dang yan lag gi rgyan bgos nas gzhon nu'i tshul gyis kha smra bar byed cing / rnga yab kyi g.yab mos gzhan bsang bar yang byed pa ste/ de dag gis grol na rgyal po dang bram ze dang khyim bdag gi bu mo dag lang tsho la bab pa'i dus su gzhon nu yo byad sna tshogs dag gis mdzes par byed cing khyim bdag la sogs pa gzhan gyis rin po che dang rkang 'gros kyi tshogs kyis nyos te khyim so la 'gro ba'i dus su skye gnas bkra shis par bya ba'i phyir rked pa'i spu 'breg par byed do//ci nas bkra shis par bya ba'i phyir mchan khung gi spu 'thog par byed cing bag dang ldan pa'i spyod pas 'gro bar byed de de dag kyang grol bar 'gyur bar rigs so//da ni rma bya'i brtul zhugs kyis mi grol bar ston te/ mu stegs pan ti ta pa khyod/ /mjug ma btags nas mdzes tshul ston/ /nyi la 'grem bltas grol 'gyur zer//de ni shin tu mi rigs te/ /rma bya g.yag sogs grol bar 'gyur/ /zhes bya ba'i don ni bu ra ka na ti ste de dag gi don ni phyin ci log la mngon du zhen cing gdug pa'i brtul zhugs nye bar bstan pa'i phyir mu stegs so/ /pan tra ti pa zhes bya ba'i rigs so/ /khyod ces bya ba ni dgag par bya ba nyid do//de dag gi tshul ni nya kri ta ma ra'i shing la ldong ros kyis ri mo bris te rma bya'i mjug ma'i gzugs byas nas 'og gi sgor btags te shing 'jam po dag gi steng du 'dug nas rma bya'i rnam pa mdzes pa'i tshul du gzhan la ston par byed do/ /nyi ma la 'grems shing rgyab kyi phyogs su bltas pas grol bar 'gyur ro zhes zer ba de ni shin tu yang mi rigs te/rma bya dang g.yag la sogs pa yang khyod dang mthun pa'i phyir grol bar rigs so/ /de dag gi 'khrul gzhi yang shar phyogs be+e ta la zhes bya ba'i yul du khyim bdag phyug po'i stobs zhes bya ba la/khyim bdag mo 'od zer sbyin ma bya ba cig yod de/ de la bu gnyis dus gcig la btsas par gyur to/ /de nas bram ze mtshan mkhan la mtshan bstan pa dang bram zes smras pa/ 'di gnyis btsas pa'i dus su ltas ci byung zhes dris pa dang smras pa/'di dag dang dus mtshungs par 'bras mu ru te snod gsum khengs pa dang zla ba gnyis shar bar gyur to zhes pa dang / de na bram zes smras pa/ phu bo la sA lu tri pa zhes bya bar btags te 'di dag ni dur khrod du rnal 'byor pa la thong cig /nu bo la tsan+d+ra dz+nyA na zhes bya bar btags te 'di dag ni slob pa po'i phyogs su gtang bar bya'o zhes so//de nas de bzhin du btang ba dang rnal 'byor pas bud med kyi cha byad du gnas nas lha mo bdag med ma'i nga rgyal du de bzhin bsgoms so/ /mkhas pa chen por gyur nas rgyud dag nas byung ba'i dug gi bdud rtsi 'byung bar bya ba'i phyir/rma bya'i cha byad du gnas pa la grong khyer gyi mi rnams kyis blta bar rigs so zhes nas phyin pa dang rnal 'byor pas lus bud med kyi cha byad kyis chos ston nus pa dang / mkhas pas dug gi bdud rtsi byugs pas nad ma lus pa zhi bar nus pa byung ngo / /de la thams cad ngo ma tshar bar gyur te/bram ze gang+ga ta ra zhes bya ba'i bu glang po dang glang po'i stobs zhes bya ba gnyis kyis gsol ba btab pa las gnang bar ma gyur to/ /de nas de gnyis kyis rang bzo zhugs pa las phyi rol gyi gzhon nu ma'i brtul zhugs dang rma bya'i brtul zhugs gnyis su zhugs so//de dang nye bar mtshungs pa ni de'i rjes su 'brang ba dang bcas pa rnams so/ /da ni 'greng ba'i brtul zhugs kyis mi grol bar ston te/ nags tshal gseb tu legs gnas te/ /langs te za bas grol 'gyur na/ /rta dang glang po grol bar thal/ /zhes bya ba'i don mu stegs mtshams na gnas pa rnams kyis nags shin tu 'thug po tsher ma rags pa dag gi gseb tu song ste/bdag gis dngos grub ma thob bar du 'di las ldog par ma gyur cig ces smras nas nges pa'i shes pa gnas nas bza' ba dang btung ba thams cad kyang langs te za bas gzhan dag gis skyes bu legs par zhugs shig /bdag gis zas sbyin par byed do zhes brjod kyang bdag bza' ba dang ldan nas bde ba las langs te sdug bsngal bas shi ba rung ngo zhes zer bas grol bar 'gyur na/ rta dang glang po dang ba men dang ma he dag kyang langs nas za bas phyir grol bar thal lo//de dag gi 'khrul gzhi ni rnal 'byor pa DoM bi he ru ka chen pos 'od ma'i tshal du langs pa'i brtul zhugs lo gsum mdzad de/ dus gcig la sprul pa brgya tham pa spros nas de bzhin gshegs pa thams cad kyi 'byung gnas kyi rten la mchod pa byed pa'i dus su snang bas ngo mtshar bar gyur te/lho phyogs gyad kyi yul na gnas pa'i khyim bdag ma hA ba la zhes bya bas brtul zhugs kyi tshul de la zhugs pa dang / de dang nye bar mtshungs pa ni de'i rjes su 'brang ba dang bcas pa rnams so/ /de dag gi lta ba ni/ spyod pa de mtshungs 'dod pa ni//nam mkha' dag la rtog pa'i yid/ /dbu ma'i don mchog rtogs zer ba/ /mda' dpung mtshon cha rnon re/ /thar pa mi thob mngon par smras/ /zhes bya ba'i don ni spyod pa gong du smos pa de dag gi 'dod pa ni/ nam mkha' dag la rtog par byed pa'i yid de gong du smos pa lta bu'o//de dag ni dbu ma'i don mchog tu gyur pa de ni bdag cag gis rtogs so zhes zer ba la a i zhes pa ste dam pa dang ma 'brel ba'i rtogs pa'o/ /de dag ni mda' dpung ste rang bzhin gyi mtshon cha rnon po thogs pa na re chos kyi sku dang de las gzhan pa'i thar pa dag kyang mi thob bo zhes mngon par smras so//de bas na de'i don 'di la gdams par bya ba nyid du zad do/ /de ltar phyi rol gyi brtul zhugs de dag gis mi grol ba'i log par rtogs pa de dag shugs kyis bsal nas/ da ni bde ba dang bral ba'i pha rol tu phyin pas thar pa mi thob pa bstan par bya ste/log pa'i dka' thub lus mi bde/ /yid log pas ni de nyid min/ /zhes bya ba'i don ni/ bde ba chen po gnyug ma'i ngo bo nyid 'di dag dang mi ldan pa thams cad log pa'i dka' thub la gnas pa ste/ de dag ni ka kalpa sta ha dza na zhes bya ba ste/ de dag gi don ni rtog pa dang bcas pa'i 'ching bas bde ba chen po thob par mi 'gyur ba'i don to//de ci'i phyir zhe na/ 'bras bu thams cad kyi mchog chos kyi sku bde ba chen po'i rang bzhin du ngang gis gnas pa ste sdug bsngal gyi mtha' skad cig kyang mi gnas te/ de ni sems nyid la bya'o//dka' thub 'di dag gis ni lus gdung bar byed de/ de'i phyir sems lus la brten pas sems bde ba mi 'byung ba'o/ /de ni chos sku gdungs pa ste 'bras bu zad par byas pa'i phyir log pa'i dka' thub po/ /yid ni rig pa'i shes pa nyid kyis dgag bya rnam par bcad cing sgrub par byed pa ste/de ni rtog pa dang bcas pa'i shes pa ste/ sdug bsngal ba nyid do/ /de ci'i phyir zhe na/ 'khor ba na sdug bsngal zhing bde ba dang mi ldan pa dag ni rtog pa las byung ba'i phyir ro/ /de dag ni dgag sgrub dang bcas pa ste yid log pa'o/ /de dag kyang ci'i phyir zhe na/gnyug ma'i de kho na nyid ma rtogs pa ste/ de ni spros pa thams cad rang zhi ba ste/ de nyid kyi tha snyad kyang shugs kyis gcod pa'o/ /de ni spyi'i don du bshad pa ste/ da ni bye brag gi tshul du bshad par bya ba ni blo chung ba'i nyan thos kyi theg pa de dag smyung bar gnas pa la sogs pa dka' thub kyis lus mi bde zhing /gang zag gis stong yang chos kyi bdag 'dzin nges par bsam pa'i gzung ba rang bzhin med par shes kyang 'dzin pa rang bzhin med par ma shes pa'i shes pa rtag pa rdzas su 'dod pa ste/ de dag gi yid log pas ni de bzhin nyid min te/ thob par mi nus so/ /de yang rab tu mi gnas pa'i rgyud las/ / dka' thub log pas lus nyid 'ching / /bcing pa'i sems nyid rnam par gdung / /des ni chos sku zad pa ste/ /gnyug ma rtogs par mi 'gyur ro/ /zhes 'byung ba'i phyir/ rje btsun pa ri bo ba'i zhal snga nas/ brtags pa'i rtog pas yang dag 'grol mi srid/ /rtog med tha mal gnas na bde ba che//skyes bu nam mkha'i mtha' la rtog pa bzhin/ /'di mtha' nga yis shes pa ma yin no/ /zhes 'byung ba'i phyir/ gong du smos pa de dag gis myong bar bya ba ni dka' ba nyid du zad do/ /de dag kyang spyod pa'i tshul ji lta bu la gnas zhe na/ lus ngag spyod pa gtsor gyur te/dge slong dge tshul dge bsnyen ma rnams dang / /gnas brtan las byed mngon par bskos pa'i gzhi/ /khyim nas khyim spangs rab tu byung ba'i tshul/ /theg pa chung ngu mdo las slob byed cing / /bden pa bzhi la mngon par rmongs pa'i yid/ /sde pa bco brgyad mi mthun gzhan du 'dor//gang zag bdag med chos la bdag 'dzin gnas/ /shes pa dus gsum rdzas su smra byed cing / /so sor brtags min 'gog pa mthar thug byed/ /mdo sde pa ni rang sangs rgyas nyid de/ /rten 'brel bcu gnyis rgyun dang lugs las bzlog /de bkag pas ni thar pa thob par 'dod/ /kha cig theg chen de la rgyu byed cing / /tshad ma dag gis mngon par brtags pa yis/ /shes pa phra rab rdul du grub pa la/ /des kyang dgra bcom de las gzhan ma yin/ /zhes bya ba'i don ni/ /blo chung ba'i nyan thos kyang bdag nyid mngon par ston te/de dag kyang spong ba bdun 'khor dang bcas pa'i bslab pa la gnas te lus kyi rnam pa gsum dang / ngag gi rnam pa bzhi spyod pa gtso bor gyur te de yang rigs bdun gyi tshul gyis gnas so/ /gang zhe na/ dge slong dang / dge slong ma dang / dge tshul dang / dge tshul ma dang /dge bsnyen dang / dge bsnyen ma dang / dge slob ma rnams so/ /de dag 'dus pa la dge 'dun zhes bos te/ kun dga' ra bdag tu sde tshan dang mtshungs par spyod pa'o/ /de yang mtshungs pa'i gzhi ni/ gnas brtan de dag ni ded dpon lta bu'o/ /las byed pa ni ngag btsun pa dang go rims la mkhas pa dag gis so//dge 'dun 'dus pa dag gis mngon par bskos pa ni nang khrims pa dag ste/ rin po che'i phung po nas bshad pa lta bu'i tshul du byed pa'o/ /gzhi zhes bya ba ni bstan pa dag gi gzhir gyur pa 'am sdom pa rnam pa gsum gyi gzhir gyur pa'o/ /de yang ji lta zhe na/mdo rgyal mtshan gyi rtse mo nas gsungs pa lta bu ste/ kye dge slong dag khyim na gnas pa ni sdug bsngal gyi rgyu las nye bar spyod pa'o/ /kye dge slong dag shes pa ni 'grib srog ni 'chad tshe'i 'du byed kyang nges par 'joms par 'gyur na/ ci'i phyir brtson 'grus dang dad pa brtan pos grub par mi byed/mi'i lus thob pa ni shin tu yang rnyed par dka' na de rnyed nas rgyal ba'i bstan pa la rab tu byung ba yang rnyed par dka' na/ thar pa'i don dang mi mthun pa dag gis bslus te/ sdug bsngal bar 'gyur ta re/ srog dang bral te 'chi ba ni sla'o//tshul khrims nyams shing zhig pa ni de lta ma yin no/ /de ci'i phyir zhe na/ srog dang bral ba ni skye ba 'di nyid zad par 'gyur gyis tshul khrims nyams shing zhig pa ni skye ba 'bum phrag brgya'i bar du rigs dang bral zhing bde ba spangs te/ rnam par smin pa'i sdug bsngal nyams su myong bar 'gyur ro//de bas na dge slong dag khyim du gnas par mi bya'o/ /khyim ni nyon mongs pa'i gnas so/ /sdig pa'i dra ba'o/ /'khor bar 'ching pa nyid do/ /sdug bsngal mi zad pa thams cad kyi 'byung gnas so/ /dge slong dag khyim na gnas pa ni blo chung ba nyid do/ /rtag tu 'khor ba'i btson ra las mi thar pa nyid do//dge slong dag khyim du gnas pa dag ni dge ba'i sa bon sreg par byed pa'o/ /'dzin par byed pa'i rnyi'o/ /nya'i rgya mo lta bu'o/ /'dam gyi rdzab lta bu'o/ /pha rol gyi mtshon cha lta bu'o/ /glang po che smyon pa la zhon pa lta bu'o/ /me'i khang pa na gnas pa lta bu'o//shing rta rkang pa dang bral pa lta bu'o/ /me tog si ka ti lta bu'o/ /khri mon na gnas pa lta bu'o/ /shing ta la mgo bcad pa lta bu'o/ /yan lag dang bral ba'i stobs po che lta bu'o/ /nyi mas gdungs pas sdo'i myu gu lta bu ste/ /skyon dang bcas pa yin pa'i phyir khyim nas khyim spangs la 'gro bar bya'o//dge slong dag nga ni rkang gnyis thams cad kyi rab tu gyur pa ste/ 'das pa'i sangs rgyas bcom ldan 'das thams cad kyis rtag tu rab tu 'byung pa'i tshul khrims las mi 'da' bar byas so/ /de bas na nga ni bya ba byas pa'o/ /zag pa zad pa'o//nyon mongs pa bcom pa'o/ /khur bor ba'o/ /srid pa'i dgon pa las 'das pa'o/ /bdag gi don rjes su dran pa'o zhes 'byung ba lta bu ste/ de dag gi rjes su slob par byed pa ni 'phags pa kau di n+ya dang / kun dga' bo dang / rab 'byor la sogs pa ste/ de dag thams cad kyang sprul pa'i nyan thos su rig par bya'o//de dag gis bdag nyid nye bar spyod pa rnams ni slob pa po rgyun la zhugs pa rnams te/ theg pa chung ngun gyi rgyas par 'od kyi mdo dang 'phags pa las brgya ba'i mdo dang ston pa kau sha ni'i mdo la sogs pa la slob par byed cing / sdug bsngal dang kun 'byung dang 'gog pa dang lam gyi bden pa bzhi la rtag pa nyid kyi 'khrul pa ste/ mngon sum du rmongs pa kho nar zad do/ /de dag ni rtog bcas 'ba' zhig la spyod pa kho na yin no/ /sde pa zhes bya ba ni dge slong dang / dge tshul gyi bdag nyid 'dzin bzhin tshogs pa dang de las lhag pa'o//de yang bye brag tu phye nas bstan pa ni/ bco brgyad de de yang rtsa ba'i sde bzhi ni dang po dge 'dun phal chen sde dang / thams cad yod par smra ba'i sde dang / gnas brtan pa'i sde dang / mang pos bkur ba'i sde'o/ /dang po la yang shar gyi ri bo pa'i sde dang / nub kyi ri bo pa'i sde dang /gangs ri pa'i sde dang / 'jig rten las 'das par smra ba'i sde dang / rtag par smra ba'i sde rnams su gyes so/ /gnyis pa la yang gzhi thams cad yod par smra pa'i sde dang / 'od srungs sde dang / sa ston sde dang / chos srung sde dang / mang du thos pa'i sde dang / gos dmar po'i sde dang / rnam par phye ste smra ba'i sde rnams su gyes so/ /gsum pa yang rgyal byed tshal gnas sde dang / 'jigs med na gnas sde dang / gtsug lag khang chen po sde rnams su gyes so/ /bzhi pa la yangs sgrogs rigs pa'i sde dang / bsrung ba'i sde dang / gnas ma bu'i sde rnams su gyes so/ /de thams cad kyang spyod pa'i sgo mi mthun te sun 'byin cing gzhan du bor bar byed do/ /lta ba ni nyan thos bye brag tu smra ba dang / mdo sde pa gnyis su gzhi mthun no/ /de yang gzung ba rang bzhin med par shes pas gang zag la bdag med par rtogs la/'dzin pa rang bzhin du gnas pas chos la bdag tu 'dzin par gnas so zhes pa yang 'das pa dang ma 'ongs pa dang da ltar gyi dus gsum du bsags pa'i rdzas rdul phri rab tu grub par 'dod de/ de yang ne+e'u gsing dang g.yag rnga'i tshul du sil bu phrag can sdud byed kyi rlung gis bsdus pa go 'gegs pa'i ngo bor 'dug pa'am/gong bu bar mtshams med cing ma 'byar bar smra bar byed cing yang snang ba gzugs kyi gzhi dang / gtso bo sems kyi gzhi dang / 'khor sems las byung ba'i gzhi ni kun rdzob kyi bden bar smra la/gnas skabs dang mi ldan pa'i gzhi dang / chos nyid 'dus ma byas kyi gzhi ni so sor brtags min gyi 'gog par smra ste/ de bzhin nyid dang nam mkha' zhes mthar thug byed do/ /de la nyan thos mdo sde pa blo rab tu gyur pa ni rang sangs rgyas nyid yin te/ de yang rten cing 'brel par 'byung ba bcu gnyis kyi rgyu las 'khor ba 'byung ba dang /lus de dag la bkag cing bzlog pas de bkag pas ni thar pa'i 'bras bu thun mong ma yin pa thob par 'dod do/ /kha cig ni dbu ma pa bye brag tu smra ba dag gi theg pa chen po la rgyu byas pas 'bras bu bdag nyid 'di lta bu dag 'thob par 'gyur ro//smra bar byed cing / gzhi dang gzhi yongs su grub par byed pa dang / mngon sum dang rjes su dpag pa dang tshig gi mtshon cha dang smra ba'i mtshon cha dang / dbang por byung ba'i tshad ma dang / tshad ma phan pas grub cing rjes su phan pa'i sgras khas len par 'dod pa ste/de dag gis mngon par brtags pa'i shes pa phra rab kyi rdul du rang nyid kyi 'dod pa'i blos grub pa la nges shing 'bad kyang dgra bcom pa'i 'bras bu rdo la brkos pa'i ri mo lta bu ma yin te chu la bris pa bzhin no/ /de las gzhan ma yin no//de ci'i phyir zhe na/ bde ba chen po bsam gyis mi khyab pa nyid dang bral ba'i phyir ro/ /da ni sngags kyi rnal 'byor pa rnams kyis thar pa mi thob pa bstan par bya ste/ rtog ge blo chung gang zag dag /brtags nas lha yi dkyil 'khor bsgom/ /mu stegs bdag bzhin bsgrub par rtog /bum gsang shes rab ye shes dang / /mthar thug man ngag tshig tu 'don/ /don gyi rnam pa de dang bral/ /'bad cing 'khor la rnam par zhen/ /stong pa mkha' bzhin gzhan du rtog /ces bya ba'i don ni/ kun du brtags pa 'ba' zhig la zhen pa'i shes pa rnams mtshan ma'i rtog ges yid dkrug pa'i phyir blo chung ba ste/de dag shin tu grub par byed pa'i gang zag dag ni bdag nyid rten dang brten pa'i ngo bor brtags nas lha'i dkyil 'khor bsgom pa dang / de yang rgyal dang ldan pas grub par smra ste/ 'di dag ni mu stegs kyi bdag dang khyad med pa lta bu ste/de bzhin du grub par rtog pa'o/ /de yang dbang gi rang bzhin ji lta bar ma shes pa las byung ste/ de yang bum pa'i dbang ni ma rig pa nyon mongs pa lnga las log nas/ rig pa ye shes lnga skyed par byed pa ste chos kyi dbyings so/ / de nyid las spros pa'i rnam par rtog par 'dzin pa'o/ /gsang ba'i dbang ni zag pa med pa'i ye shes skyed par byed pa ste byang chub kyi sems so/ /de la 'jug pa'i rnam par rtog par 'dzin pa'o/ /shes rab ye shes dang zhes bya ba ni shes rab las kyi phyag rgyal brten nas lhan cig skyes pa'i ye shes nyams su myong bar byed pa ste chos kyi sku'o//de dag la 'dod pa'i zhen par rtog pa'o/ /mthar thug pa'i don ni pradz+nyA a mu sna'o/ /de dag gi don ni shes rab chen po ste gsal ba dang mi rtog pa dang bde ba'i rang bzhin dang ldan pa ste gnyug ma'i de kho na nyid do//de dag ni man ngag ste tshig tsam du 'dod par byed do/ /de bas na sems gnyug ma'i rang bzhin dang de nyams su myong bar byed pa'i tshul gyi rnam pa de dang bral ba ste/ tshogs ma bsags shing dam pa dang nye bar mi ldan pa dag gis bcad cing rtul phod la gnas kyang tha dad kyi rtog pa dang ma bral ba'i phyir 'khor ba na 'khor zhing rnam par zhen pa'o//de dag gi stong nyid ni 'jig rten pa dag gi bltas pa lta bu ste/ nam mkha' bzhin gzhan du rtogs par byed de/ de yang ci'i phyir zhe na/ rnal ma la bde ba chen po'i ngos tshim par ma byas pa'i phyir ro//da ni dbu ma pas thar pa mi 'thob par bstan par bya ste/ kha cig stong pa nyid la lta ba 'ching / /zhes bya ba ni stong pa nyid mi rtog pa'i cha la gnas pa dag la mngon par zhen pa ste/ de dag la zhen pa nyid du lta bas 'ching ba nyid du zad do/ /de ci'i phyir zhe na/ ltar med pa'i phyir ro//de nyid kyi don ni/ lhan cig skyes pa'i ngo bo ni/ rtogs pas mngon par grub pa ste/ rang nyid mngon par grub/ ces bya ba smos te/ de dag gi don ni ma ha ra na ka ste sems so/ /de ni lhan skyes kyi rnam pa'o/ /pa na sa ka ri ste gcig go//de ni sems kyi rnam pa'o/ /a na a sa pu ta ste bla ma'i gdams ngag las skyes pa de de ni thog ma nyid nas sangs rgyas pa'i ngo bo'o/ /e i thar te rtog pa'o/ /da ni tha mal gyi shes pa nyid do/ /e bud rtog ka'o/ /de ni nyams su myong bas mngon pa grub pa ste/de thog ma nyid nas sangs rgyas pa'i ngo bo'o/ /e i a ta ma ki ti ste rang nyid la mngon par 'grub pa'o/ /de ni kun du bzang po nyid do/ /de bas na don khyad par du gyur pa'i phyir ro/ /gzhan dag ni 'di dang mi ldan pa dag yin te/ ji ltar zhe na/ gzhan la lta/ rgyu la 'bad pa legs byas pas/ /mya ngan 'das pa thob gyur smra/ /zhes bya ba'i don ni 'bras bu gzhan du rtog cing lta ba la re ba'i phyir rtog pa'o/ /rtog pa de yang rtogs pas grub par 'dod de rgyu bsod nams kyi tshogs la 'bad pa legs par byas pas rnam par rtog pa zad nas mya ngan las 'das pa'i don 'thob par 'gyur bar smra ste rtog pa'o//rtog pas rtog pa nyid slu ba kho nar byed de 'khor ba'o/ /'khor ba nyid kyis rtog pa mi slu bar byed de sdug bsngal lo/ /de yang ci las byung bar brtag par bya zhe na/ tshig dang lus kyi rnam pa la//shin tu mkhas pa ltar snang yang / /cig shos de la rnam med phyir/ /nus par gyur pa ma yin no/ /zhes bya ba ni tshig gi tha snyad kyi rnam par rtog pa bslangs te/ /de nyid mtha' med pa la rtog go/ /snang ba dang grags pa'i yul gyi rnam pa gtan la phab nas don med pa la rtog go//de dag cha shas kyi rnam pa la bdag ni shin tu mkhas pa yin no zhes nga rgyal bar byed de 'khor ba'o/ /de ci'i phyir zhe na/ mkhas pa ltar snang yang mkhas pa ni ma yin te/ rgyal po'i bang mdzod dang 'dra bas rang bzhin gyi nor bu rin po che'o/ / cig shos de la med cing de'i rnam pa yang med pa'i phyir ka ka ra ste nub par mi 'gyur ba'i don to/ /de dag ni 'khrul bar brtag pa'i phyir de kho na nyid ma yin no/ /de nyid kyi don ni/ gdams ngag gzhi ru grub pa'i phyir/ /gong mas smra tshul mi rigs min/ /zhes bya ba'i don u pa ha ra ste de ni myong bas don skye bar byed pa'i don te/de yang gu ru u pa ri ste gdams ngag go/ /de ni bla ma dam pa'i gdams ngag bzhin nyams su myong bas chos kyi sku'o/ /de dag kyang cis she na/ rgyu med pa dang ma ning gi spyod yul du rung ba dang / so sor rtog pa'i shes rab yod pa dang //rgyu 'bras dus mtshungs shing chu bo ltar gnas pa ste/ de yang thog ma nyid nas sangs rgyas pa yin pa dang / thams cad la chos kyi sku gnyug ma'i rang bzhin gnas pa dang / thams cad bde ba chen po'i phyag rgyar ro gcig pa dang / rgyu 'bras dus mtshungs shing dus thams cad bzhi ru grub pa'i phyir/is a ra ste gong ma ste nga yis so/ /'og ma rnams la thar pa mi thob pa smra ba'i tshul mi rigs pa ma yin te rig pa'o/ /de bas na thams cad thabs dang yang bral shes rab dang yang bral ba ste/ tha mal gyi shes pa dang /de'i rang bzhin med pa'i phyir thar pa mi thob pa bshad par bya ste/ gang zhig don la mos 'gyur na/ /spyad pas 'bras bu thob par 'dod/ /ces bya ba'i don ni rigs pa gang zhig go/ /don dam pa'i lta ba zhes de la mos shing gzhol bar 'gyur te zhen na de 'grub par byed pa yang tshangs pa'i spyod pa la spyad pas 'bras bu dam pa thob par 'dod pa'i phyir/dgag sgrub dang bcas pa nyid du zad de de nyid ma yin no/ /gang zhig gnyis med myong bral na/ /bka' dang dman pa'i bsam gtan ni/ /dgos pa med phyir phyir bsal te/ /snying po'i don mchog rtogs pa na//mar ma lha bshos de ci dgos/ /gnyis med ldang dang 'jug med na/ /spyod pa ci byed sngags mi smra/ /las dang bya ba gtsor gyur pa'i/ /'bab stegs chu la khrus byed cing / /gnyug ma'i dka' thub ci dgos te/ /de nyid don dang ma 'brel na/ / khrus la sogs pas grol mi 'gyur/ /zhes bya ba'i don ni snying po'i don rtogs pa'i gnyis med la gnas shing ldang 'jug med pa na spyod pa 'di dag shugs kyis dgag cing rtog pas 'ching ba'i phyir mi dgos pa ston pa dang spyod na yang de nyid dang bral bar shugs kyis ston pa ste/de yang gang zhig ces bya ba ni rten gyi gang zag khyad par du gyur pa rnams so/ /gnyis med ces bya ba ni tha mal gyi shes pa nyid do/ /myong zhes bya ba ni gsal ba dang mi rtog pa dang bde ba dang / bral zhes bya ba ni myong du med pa'i myong ba ste ci yang ma yin pa nyid do//de nyid kyi bdag nyid can de dag la dka' ba'i mu stegs kyi brtul zhugs dang / dman pa nyan thos kyi spyod pa dang ldan pa lta ba dang sgom pa dang / rnam par rig pa dang dbu ma'i dgag sgrub dang bcas pa'i bsam gtan ni dgos pa med pa'i phyir bsal ba ste snying po'i don mchog tu gyur pa 'di rtog pa ni log nas sangs rgyas grub pa med pa'i phyir/mar me dang me tog dang bdug pa dang dri dang lha bshos la sogs pa de ci dgos bsgrub tu med pa'i phyir/ gnyis su med pa'i dang de las mi g.yo zhing ldang ba dang 'jug pa la khyad par med na/sbyin pa btang ba la sogs pa'i spyod pas ci byed de don med pa'i phyir ro/ /sngags kyang mi smra ste 'bras bu grub tu med pa'i phyir ro/ /bla ma mnyes par bya ba la sogs pa'i las dang / tshogs sogs pa'i bya ba gtsor gyur pa ni chu 'bab pa'i stegs su 'dug ste/chu la khrus byed cing gtsang bar spyod pa dang / smyung ba'i dka' thub dang dka' spyad rnams ci dgos te de dag nyid kyis 'ching ba'i phyir ro/ /de yang rnam par bcad pa lta bu ni ma yin te shugs kyis 'gags pa yin pa'i phyir ched du grub pa lta bu ni ma yin no//de bas na de kho na nyid kyi don dang / ma 'brel na khrus la sogs pa gong du smos pa'i spyod pas grol bar mi 'gyur te/ 'brel na don dang ldan par 'gyur ba ni shugs las shes par bya'o/ /ma rtog pa dang ldang 'jug yod pa dang don dang mi 'brel ba rnams kyis kyang de ltar bya ba yin nam zhe na/las dang po yi skyes bu yis/ /de nyid nyams su myong 'gyur te/ /ma rtog par du de mi gtong / /rtogs na gnyug ma'i lam yin no/ /zhes bya ba'i don ni las dang po pa'i gang zag skal ba rab tu gyur pa de dag la skyes bu dam pa'i gdams ngag gis nye bar gyur te/de kho na nyid nyams su myong ba'i rnam pa de kho na nyid dang mi 'bral yang gnyis su med pa'i klong du ma gyur gyi bar du de bzhin nyid ma yin te ma rtog par du de mi gtong ngo / /rtogs na bsod nams kyi tshogs de dag kyang sems gnyug ma'i ngo bo nyid kyi mnyam pa'i lam chen po yin no//de dag kyang man ngag gis stobs gang las skyes she na/ shes rab dang snying rje zung du 'jug pa la skye ste/ de dag bye brag tu gnas pa las mi 'grub cing dbyer mi phyed pa'i ngo bo bstan par bya ste/ snying rje bral bas stong nyid ni/ /snying po rtog par mi 'gyur te//lam mchog mngon par bor nas kyang / /nyan thos sa la nges par gnas/ /snying rje 'ba' zhig bsgom na yang / /lus dang sems ni gdung 'gyur bas/ /mu stegs dag dang khyad med de/ /bdud kyi las su rig par bya/ /skyes bu mchog ldan gang zhig gis//gang yang gnyis po spyor nus pas/ /'khor dang mya ngan 'das spangs te/ /mi gnas mtha' la mngon par gnas/ /zhes bya ba'i don ni/ snying rje dang bral ba'i stong nyid kyang bdud kyi las su rig par bya'o/ /stong nyid dang bral ba'i snying rje yang bdud kyi las su rig par bya'o//gnyis su med pa'i don 'di ni sangs rgyas kyi dgongs par rig par bya'o/ /de dag gsal bar bya ba ni rnal 'byor pa thams cad kyi las nges par bstan pa'i rgyud las bcom ldan 'das kyis gsungs te/ lho phyogs Asha na'i yul grong khyer mchod rten brtsegs pa zhes bya ba na bram ze nor bu bzang po zhes bya ba zhig yod de/des yul gzhan gyi bram ze mo legs sbyin me tog ces bya ba zhig khyim thab tu blang bar gyur to/ /gzhon nu de yang bzhin mdzes pa blta na sdug pa yid du 'ong ba skye bo thams cad kyi blo mos par gyur pa zhig ste/de yang tshangs par spyod pa'i sdom pa la gnas pa dam pa'i chos dkar po la gzhol ba pha ma la srid zhu che ba/ 'khor 'bangs rnams yongs su skyong ba/ bran dang g.yog rnams la byams pa'i snying rje chen po dge slong bzhin du tshangs par spyod pa zhig ste/des zla ba bzang po'i tshes bcu bzhi la gtsug lag khang du mchod pa la phyin te/ dag pa'i dge slong dam pa rnams mthong ste shin tu yid dad par gyur te/ bdag la yang bu dam pa dag btsas par gyur te/ de nas rab tu byung ba ste bstan pa'i lam dang mthun par gyur cig ces smon lam btab po//de nas de'i nub mo nyal ba'i rmi lam na ral gri gsum spyi gtsug tu skyes par gyur te/ ral gri gcig ni g.yang sa chen po la ltung bar gyur to/ /gcig snum du bcos nas ngar shi bar gyur to/ /gcig las 'od dpag tu med pa byung ste nam mkha'i khams thams cad khyab pas me tog tu gyur nas char gyi rgyun chen po phab pas sems can thams cad tshim par byas shing 'bras bu gcig tu smin par rmis so//de nas nang par langs nas khrus byas te bram ze la 'di skad ces smras so//kye khyim bdag bdag la dgongs su gsol/ /bdag gis nyal ba'i rmi lam na/ /spyi gtsug ral gri gsum skyes te/ /g.yon pa g.yang sa chen por lhung / /g.yas pa snum bcos ngar dang bral/ /dbus ma'i gri las 'od byung ste/ /nam mkha'i khams kun me tog rgyas/char gyi rgyun babs sems can tshim/ /'bras bu gcig tu smin par gyur/ /'di dag bzang dang ngan pa'i ltas/ /gang yin kho mos mi shes te/ /'di dag ci rigs smra bar gyis/ /zhes smras pa dang / de nas bram zes btsun mo dam pa de la 'di skad ces smras so//kye kye btsun mo dam pa khyod/ /rtag tu tshangs par spyod la gnas/ /rmi lam dam pa 'di dag ni/ /ngan par mi 'gyur gzhan la dris/ /zhes nas yul bA rA Na sI nas bram ze a ga sha ta na zhes bya ba'i mtshan mkhan bkug go/ /bram zes smras pa/kye gtsang ma yab yum bdag la gson cig /ltas de dag ni sras gsum btsas par 'gyur ba lags te/ de yang gcig stong pa la mngon par zhen pas chad pa'i g.yang sa la lhung bar 'gyur ro/ /gcig snying rje la mngon par zhen bas snying rje'i snum gyis shin tu gdung bar gyur te/bdud kyi byin gyis brlabs par 'gyur ro/ /gcig shes rab dang snying rje dbyer med pa'i ngang las 'od gsal chen po ngang gis skye bar 'gyur ro/ /longs spyod rdzogs pa'i sku'i me tog dang / sprul pa'i sku'i char gyi rgyun bab ste/ chos kyi sku 'bras bu gcig tu grub par 'gyur ba'i rtags so//'di gsum yang mthun par sangs rgyas kyi chos la gzhol te/ smon lam dang dge ba'i bshes gnyen gyi stobs kyis de ltar 'gyur te/ de dag ni ming yang chen po'i stobs dang / snying rje'i stobs dang bla med stobs zhes bya bar gdags par bya'o zhes so//de nas go rims kyi tshul gyis mtshan dang ldan pa'i bu gsum btsas par 'gyur ro/ /de nas phu bo 'phags pa ga ya te zhes bya ba la rnal 'byor gyi lam yun ring du brten nas gsol ba btab pa las bdag tu lta ba la mngon par zhen nas stong pa nyid kyi de bzhin nyid bstan pas khyad par du zhen bar gyur te de dag gis 'khor ba'i bde ba ma yin pa mya ngan las 'das pa'i bde ba mi thob cing 'thob pa'i rgyur yang mi 'gyur ro//de nas 'od ma'i tshal na gnas pa'i tshe rnal 'byor ba 'dus pa'i dus su mkha' 'gro ma blo gros ma dang legs sbyin ma gnyis kyis tshigs su bcad de smras pa/stong pa nyid la zhen pa ni/ /mya ngan mi 'da' 'da' mi 'gyur/ /gzugs med khams su skyes nas kyang / /'gro ba don med 'khor bar lhung / /zhes so/ /de nas de dag tshe 'phos nas kyang gzugs med kyi khams su skyes so//nu bo rnal 'byor pa 'dus pa rang na zhes bya ba la lo dpag tu med par bstan cing gsol ba btab pa las zhe sdang che bar mthong nas snying rje bsgom du bcug pa las/ snying rje khyad par du gdungs te sems can rnams mthong ba'i dus su ngu zhing 'dre log par gyur to//de nas rnal 'byor pa 'dus pa'i dus su mkha' 'gro ma tsan ma dang la ma gnyis kyis nam mkha' la tshigs su bcad de smras pa/ snying rje che bas yid gdung ste/ /sems ni ngan song gnas dang bral//bdud kyi byin gyis brlabs pa'i phyir/ /shi 'phos dga' rab dbang phyug go/ /zhes pa dang / de nas shi 'phos nas bdud dga' rab dbang phyug dag tu skyes par gyur to/ /de nas bu sar pa de dag rnal 'byor pa srid pa dang zhes bya ba la lo dpag tu med par bstan zhing gsol ba btab pa las/shes rab snying rje zung du 'jug pa'i ye shes de kho na nyid bstan pas/ nyams su myong pa'i zla ba tshes gcig pa dang nya gang ba'i tshul du 'phel bar gyur te/ bla ma dam pa de dag gis kyang ci yang ma yin pa'i stong pa nyid dang /gdung ba dang bral bas snying rje'i rnam pa blo la mngon par sbyangs shing nyams su myong bar byas so/ /de nas rnal 'byor pa 'dus pa'i dus su mkha' 'gro ma san ta hi dang nye ba can gnyis kyis tshigs su bcad de smras pa/ shes rab snying rje zung 'jug pas//rtogs pa mya ngan 'das pa ste/ /'khor dang mya ngan 'das spangs nas/ /mi gnas sa la mngon 'tshang rgya/ /zhes phung po lhag ma med pa'i mya ngan las 'das par gyur to/ /de bas na rigs kyi bu rnams dge ba'i bshes gnyen dam pa yun ring du bsten cing thabs dang shes rab gnyis su med pa'i don bstan par bya bar rigs so zhes 'byung ba'i phyir bshad par bya'o//snying rje zhes bya ba ni phrag dog med pa'i dge ba'i rtsa ba ste/ ngo bo sems can thams cad sdug bsngal dang bral bar 'dod pa'o/ /de yang rang gi glad nad dang bral bar dga' ba bzhin du ste/bde ba dang bral ba'i stong pa nyid kyis ni theg pa chen po'i dge ba'i rtsa bar yang mi 'gyur la/ snying po'i chos kyi sku rtog par yang mi 'gyur te/ lam gnyis su med pa'i mchog tu gyur pa mngon par bor nas kyang zhi ba phyogs gcig tu bgrod pa'i nyan thos kyi sa la nges par gnas so//stong pa dang bral ba'i snying rje 'ba' zhig bsgoms na yang skyi bung zhes byed pa dang ba spu ldang ba dang skra rtsa zing zhes byed pa la sogs pas mi bzod pa'i phyir/ lus gdung bar 'gyur te/ lus dang sems ni brten pa'i tshul du gnas pas sems gdung bar 'gyur ro//de bas na phyi rol gyi mu stegs pa dag dang khyad med de/ sems sangs rgyas kyi bdag nyid zad par bya ba'i phyir bdud kyi las su rig par bya'o/ /skyes bu bsod nams kyi rgyu las grub pa bla ma mchog dam pa dang ldan pa gang zhig gis/gang yang stong pa dang snying rje dbyer mi phyed pa gnyis po yid la mi byed pa'i tshul du sbyor bar byed de 'khor ba la/ chags pa dang mya ngan las 'das pa la zhen pa yang spangs te/ shes rab kyis 'khor ba la mi gnas shing snying rjes mya ngan las 'das pa la mi gnas pa ste/tha mal gyi shes pa'i mtha' sangs rgyas kyi dgongs pa la mngon par gnas so/ /de bas na de lta bu'i don de dag las gdams par bya ste/ kye ho bdag tu 'dzin pa dang / /log par zhen pa brdzun du smros/ /brdzun la nges par chags ma byed//zhen pa'i rnam rtog ma byed par/ /re dog rtsol ba'i sems de thong / /zhes bya ba'i don ni/ kye ho khams gsum thams cad skye bo zhes bos nas yin pa'i don/ de la gdams par bya ba'i tha tshig go/ /de dag kyang ci zhe na/ bdag ces bya ba ni tha dad kyi rtog pas brtags pa'i bdag nyid la zhen pa'o//de bdag tu 'dzin pa las 'khor bar snang zhing sdug bsngal du gyur pa'i phyir thong zhes pa'o/ /de'i mtha' la rtog pa ni log par zhen pa ste/ des ni bslu ba dang bcas pa yin pa'i phyir yid brtan du mi rung ste/ chags pa dang bral ba nyid kyis brdzun du smros zhes bya'o//bdag ni chags pa dang bral ba yin no zhes brdzun pa bzlog pa'i don de nyid la yang nges par chags par ma byed cig ces gdams so/ /ji ltar gnas par bya zhe na/ tha dad du zhen pa'i rnam par rtog par mi byed par gnyug ma'i don de kho na nyid la gnas par bya ste/'bras bu la re ba dang 'khor ba dang mnyam pa'i don la brtson par byas pa'i sems de dag thong la cir yang ma yin pa'i sems rang dga' rnal ma 'di nyid dam pa'o/ /de ltar gnyis med kyi don bstan nas/de rtogs na thams cad de'i ngo bo yin pa bshad par bya ste/ rtogs par gyur nas thams cad de yin te/ /de las gzhan zhig sus kyang mi shes 'gyur/ /klog 'dzin bsam dang sgom pa de nyid yin/ /bstan bcos sems la bshad cing go bar nges/ / yin min mtshon pa'i lta ba yod min te/ /zhes bya ba'i don ni/ gnyug ma'i don rtogs par gyur na snang zhing grags pa thams cad de'i ngo bo nyid yin te/ de las gzhan pa'i mtha' bzhi thams cad mkhyen pa dang rje btsun pa la sogs pa sus kyang shes par mi 'gyur ro/ / de yang rab tu mi gnas pa'i rgyud las/ sems nyid klong du gyur pa kun du bzang / /tha mal shes pa de nyid nyams su myong / /dam pa dag gis de nyid rtogs pa na/ /'di ni he ru ka ste kun gyi ngang / /zhes 'byung ba'i phyir ro/ /de bas na klog pa dang / 'dzin pa dang / bsam pa dang / sgom pa thams cad kyang de nyid kyi bye brag gis 'dod pa yin te/ de'i ngo bo las ma 'das pa'i phyir ro/ /de yang rgyud de nyid las/ /nam mkha' ngo bo dag pa'i rang bzhin las/ /sprin sogs glo bur dri ma byung gyur yang / /de nyid yin gyi nam mkha'i nyid kyi ngang //sems nyid gnas pa rdo rje ye shes ni/ /sna tshogs snang yang gnyug ma'i ngo bo nyid/ /byed sgo tha dad rnam pa'i tshul snang yang / /de nyid don las gzhan pa yod ma yin/ /'di ni rang bzhin nyid de bde ba che/ /zhes 'byung ba'i phyir/ thams cad de bzhin nyid kyi rang bzhin du shes par bya'o//de bas na brda dang tha snyad kyis 'di dag gzhal bar bstan par mi nus te/ bstan pa'i chos dam pa rnams kyi zhal gyi bdud rtsi las byung ba 'di dag sems ci yang min pas sems ci yang ma yin pa la bshad cing de nyid du go bar byas te 'di ni nges pa'o//de'i ngo bo de yang yin pa dang min par mi rtog ste/ mtshon par nus pa'i lta ba yang yod pa ma yin no/ /de bas na 'di dag la gzhal bar bya ba ni ma yin te/ rtogs ma rtogs su med pa nyid do/ /de ltar snying po'i don gyi khyad par bstan nas/ de yang bla ma dam pa las rtogs par bya ba ston te/bdag gi de nyid rtogs pa'i man ngag de/ /nyag gcig bla ma'i zhal las ltos pa yin/ /bla ma'i smras pa gang zhig snying zhugs pa/ /lag mthil dag tu skyu ru rlon gzhag dang / /nor bu rin chen mi rtog gsal lta 'dra/ /zhes bya ba'i don ni sems can thams cad kyi bdag tu 'dzin pa'i shes pa de nyid kyang chos kyi sku dag las mi gzhan te/de nyid rtog par bya ba'i man ngag de dag kyang srid ta sna e ga ri ste bla ma nyag gcig gi zhal la ltos par bya ba yin no/ /de dag kyang ci zhe na/ a smri rag tra na zhes bya ste/de dag gi don ni/ mgon po gang gis lung bstan nus/ /ring ba'i bla ma nyid yin no/ /de nyid nyams su myong ba ni/ /nye ba'i bla ma nyid yin te/ /dus gsum sangs rgyas skye ba'i phyir/ /bla na med pa ma yin no/ /dam pa'i zhal la gus pa dang / /sgra la nges par byas pa ste//ltos pa spangs na the tshom med/ /bsgrub dang de bral de yin no/ /zhes sgra'i don du nges par 'byung ngo / /de bas na bla ma dag gis smras pa'i rnal ma'i shes pa de dag shugs kyis go ba ste de nyid kyi ngo bos bde ba lus la 'gyel ba dang / sems la 'gyel ba dag gi tshul gyis gang bar 'gyur la/de la yang zhen pa med par phyag rgya chen pos bde ba zhig cing snying po gnyug ma'i ngo bo nyid la goms pas mnyam pa nyid kyi don snying la zhugs par gyur te/ ji bzhin pa'i don de bzhin par rtogs so/ /de dag kyang dper na lag pa'i mthil dag tu skyu ru ra dang a mra la sogs rlon pa gzhag pa na de dag phyi nang med par gsal ba'i ngo bor shes par 'gyur ba bzhin dang /nor bu rin po che a smri ra me long dang / steng du bzhag ste bltas na 'od mi rtog cing gsal ba'i ngo bor lta ba dang / ltos pa med par 'byung ba dang 'dra bar gnyug ma'i don 'di dag rtogs pa na snang grags kyi chos thams cad sems kyi ngo bo nyid du rtogs shing bde ba chen po'i ros thams cad nga bdag med pa'i mnyam pa'i don la zhugs kyis 'jog /don de nyid kyang brtags par mi nus shing brtag par yang dka' ba gzhan la ltos par bya ba yang ma yin te/mi rtog cing gsal la rang bzhin grub pa med pa ni dpe gong ma lta bu dang mtshungs so/ /don de nyid kyang dbu ma la sogs pa gzhan gyis mi rtogs pas de dag la smra bar bya ba ni/ gnyug ma'i rang bzhin byis pas ma tshor bas//'khrul pas byis pa bslus zhes snying pos smras/ /zhes pa'i don ni/ gnyug ma'i rang bzhin de kho na nyid byis pa lta bu'i rtog pa dang ldan pa rnams kyis ma tshor te/ de kho na nyid las log par 'khrul pas byis pa de dag bslus te sdug bsngal bar gyur to zhes snying pos smras so//de nyid tshul ji lta bu zhe na/ bsam gtan med cing rab tu byung ba med/ ces bya ste/ de dag gi ni bsgom bya dang sgom byed du rtogs pas bsam par bya ba dang ldan te/ de dag ni zug rngu'o/ /de ci'i phyir zhe na/ bsam gtan la zhen cing chags pa dang de las gzhan pa la zhe sdang ba'o//de bas na chags sdang mngon par 'phel ba ni 'khor ba 'ba' zhig tu zad do/ /'di ni bza' gtad dang bral ba'i phyir bsam gtan med cing rtogs pas 'tshang rgya ba'i phyir rtsol ba'i bdag nyid thams cad kyi gzhir gyur pa'i brtul zhugs rab tu byung ba la sogs pa yang med do//'o na khyim na gnas shing 'jig rten pa phal pa dang mthun pa'i spyod pa las 'grub pa ma zhe na/ ma yin pa'i phyir bshad par bya ste/ khyim gnas chung ma 'khor dang lhan cig tu/ /gang zhig yul chags dga' bcings mi grol na//snying po'i don mchog ldan pa ngas smras pa/ /de nyid don la regs pa yin no/ /zhes bya ba'i don ni/ ri khrod dang dgon pa dang chu 'gram dang phug stong dang nags la sogs pa dben pa'i gnas dor nas khyim na gnas shing yo byad dang chu ma dang 'khor rnams dang lhan cig tu mtshungs par spyod pa gang zhig bdag ni bsam gtan yin no zhes de de bzhin nyid sgom yang yul chags pa dang /'dod pa'i yon tan la dga' bas bcings pa mi grol bas na de'i rgyus chags sdang mngon par 'phel par 'gyur te/ snying po'i don mchog dam pa dang ldan pa ngas smras pa de kho na nyid kyi don la reg pa ma yin no zhes so//da ni de nyid kyi don de dag brtags pas mi 'thob pa bshad par bya ste/ gal te mngon du gyur na bsam gtan gang / /gal te lkog na yod na mun tshod dpog /ces bya ba'i don ni kho bos dbu ma pa dag la smras pa ste/shes bya nang du 'dod pa dag ni snang ba sems las ma byung ba yin no zhes smras pa dag la/ gal te sems las byung ba yin na sems sangs rgyas yin pa'i phyir mngon du gyur pa thams cad kyang chos kyi sku ste/ bsgom du med pa'i phyir bsgom par bya ba'i don khyod kyi bsam gtan ni gang yin smros shig /gal te phyi rol na snang ba de dag ni lkog na skyed par byed pa yod pa ste/ shes pa'i rnam pa yin par smra na tha dad pa'i phyir khyod kyis gzhal bar yang mi nus te/ mun pa la tshod dpog pa dang 'dra ba'i phyir bsgoms kyang don med par 'gyur ro//da ni de kho na nyid kyi rang bzhin bstan par bya ste/ lhan cig skyes pa'i 'gro ba'i ye shes de/ /rang bzhin nyid kyi dngos dang dngos med par/ /snying po'i don ni 'o dod rtag tu 'bod/ /ces bya ba'i don ni lhan cig skyes pa'i ye shes 'gro ba thams cad kyi rgyud la yod pa'i gnyug ma'i ye shes de dag thog ma dag nas rang bzhin nyid kyi dngos por rtog pa dang dngos po med par rtog pa dang bral bas snying po'i don 'di ni tha mal gyi shes pa yin/rtogs pas sangs rgyas pa yin no/ /thams cad bde ba chen po'i rang bzhin no zhes snyan pa'i 'o dod dang /bde ba'i 'o dod dang / grags pa'i 'o dod rtag tu 'bod do/ /'di dag gis nges par 'tshang rgya bar ji tsam na nus zhe na/ lta ba'i khyad par bstan par bya ste/ gang zhig blangs na skye 'chi gnas gyur pa/ /de nyid blangs nas bde chen mchog grub ces/ /skad snyan grags pa'i snying po smra byed kyang //byol song 'jig rten mi go ji ltar bya/ /zhes bya ba'i don ni/ bla ma'i gdams ngag de nyid nyams su myong ba las gang gi rgyas btab ste/ tha mal gyi shes pa blangs nas rtag chad kyi skye 'chi gnas gyur pas/ de kho na nyid 'bras bu chags pa thams cad kyi mchog bdag nyid kyis blangs te/ de nas skad cig ma de nyid la bde ba chen po de kho na nyid kyi mchog grub ste/ mngon par rdzogs par sangs rgyas so zhes skad snyan par bsgrags pas snying po'i don gyi smra bar byed kyang tshogs ma bsags pa'i gang zag rtog pa'i rmongs pas byol song gi 'jig rten dang 'dra ba rnams kyis mi go ba'i phyir de ji ltar bya zhes bya ba'i don to//da ni phyin ci ma log pa'i don bstan par bya ste/ bsam gtan bral bas ji zhig bsam byar yod/ /brjod du med la gang zhig bshad du yod//srid pa'i phyag rgyar 'gro ba ma lus zhugs/ /rang bzhin gnyug ma sus kyang rtog pa med/ /rang bzhin snying po nyams su myong dus su/ /rgyu med sngags med sems med bsam gtan med/ /mnyam dus de kun rang bzhin 'khrul pa'i rgyu/ /rang bzhin shes pas 'khrul pa snying po'i don//rang bzhin dag pa'i sems kyi pad+mo la/ /rtog gi bsam gtan dag gis mi bslad de/ /bdag nyid bde la gnas kyang ma zhen cig /ces bya ba'i don ni/ de kho na nyid gnyug ma'i don de dag la bsgom du med pa'i phyir bsgom par bya ba ma yin te/gnyis 'dzin gyi bsam gtan dang bral bas ci zhig bsam du yod de med do/ /bsam gtan gyi ngo bo sgrub par byed pa'i tshig dag kyang brjod du med la yul grub pa med pa'i phyir gang zhig gis bshad du yod pa ma yin te med do/ /de ltar ma rtogs pa'i sems can rnams kyi bsgom par bya ba'i yul dang /de nyams su blangs pa'i thabs kyi tha snyad kyi tshig brjod du yod pa'i phyir srid pa ste khams gsum pa'o/ /de ni rtog pa las byung ba yin pa'i phyir dam pa rnams kyi gdams ngag dang nye bar ma 'brel bas rnam rtog gi phyag rgyar 'gro ba ma lus pa thams cad zhugs so//rang bzhin gnyug ma'i de kho na nyid ni sus kyang rtog pa med de rang bzhin gnyug ma'i snying po'i don de nyams su myong ba'i dus su rgyud med de de bzhin gshegs pa'i bka' grub pa med do/ /sngags med de de la brten pa'i bstan bcos su grub pa med do//de dag gis bsgrub pa'i sems nyid dang nyams su myong ba'i bsam gtan du grub pa med do/ /de kho na nyid nyams su myong ba'i mnyam pa nyid kyi ye shes kyi dus su gong du bshad pa de kun thams cad chos nyid kyi don rnal ma'i rang bzhin 'khrul pa'i rgyu'o//de dag kyang 'khrul du yod dam zhe na/ snang srid chos kyi sku phyag rgya chen po'i ngo bo nyid du rtogs shing tha mal gyi shes pas don ci yang med pa'i rang bzhin shes pa rnams kyis ni 'khrul pa logs su mi rtog ste/ de nyid snying po'i don yin pa'i phyir ro//de ltar rang bzhin gyis dag pa'i sems kyi rang bzhin rtog pa'i dri mas ma gos pa'i pad+mo la rtog ge ba'i bsam gtan dag gis bslad par mi bya ste/ rang bzhin gar dga' ba'i tshul du gzhag pa de'i de nyid nyams su myong ba'i bde ba lus dang sems la gnas kyang de la ma zhen cig ces dam pa rnams kyis gdams pa'i don to//da ni rang bzhin de kho na nyid kyi gnas lugs bstan par bya ste/ bdag nyid bde yid dag la 'dug mi bya/ /bdag nyid za zhing 'thungs la gnyis sbyor te/ /dga' ba'i yid kyis sprod par byed pa ni//rtag tu yang dang yang du 'khor lo 'gengs/ /chos 'dis 'jig rten pha rol 'grub 'gyur te/ /rmongs pa'i 'jig rten 'gror rtog bzhag nas so/ /zhes pa'i don ni rnal ma'i don gnyug ma'i de nyid nyams su myong ba ni rnal 'byor pa bdag nyid la bde ba skyes kyang yid de dag la 'dug par mi bya'o//'o na bsgom par bya ba ma yin nam zhe na/ rnal 'byor pa bdag nyid gnyug ma'i ting nge 'dzin de dag gi zas za zhing bla ma'i gdams ngag dam pa'i skom 'thungs la bde ba dang stong pa gnyis de nyid du sbyor par byed pa ni rang dga'i tshul gyis te/dran pa rgyun chags kyi yid kyis sems sems su sprod par byed pa ni snang ba sems la ma thim par dus rtag tu yang dang yang du goms par bya ste/ lus bde ba chen po'i 'khor lo la sems sangs rgyas kyi bdag nyid kyis 'gengs zhes bya'o//de bas na rang bzhin gyi chos 'dis ni yang dag par rdzogs pa'i sangs rgyas su mtshon pa'i 'jig rten pha rol pos 'grub par 'gyur te/ de ni sems nyid du 'grub cing rtogs pa'o/ /tha dad kyis bsgribs pa'i rmongs pas 'jig rten gyi khams rnam par rtog pas brtags pa'i mgor sems rnam rtog tu brtags pa bzhag nas song ngo //de dag gis ni 'bras bu la nye bar byed pa yang ma yin no/ /da ni dman pa'i bsam gtan dag gis don med par 'gyur ba bshad par bya ste/ gang du rlung dang sems ni mi rgyu zhing //thabs dang shes rab 'jug pa med gyur pa/ /skyes bu mi shes pa dag gnas der ni/ /gnas shing gnas skabs sems ni dbugs dbyung zhing / /zhes bya ba'i don ni/ rmongs pa'i bsam gtan dag gis steng 'og gi rlung snga ma zhing mnan pa dang / rtsa'i nA da thig le'i rnam pa la blo zhen du 'jug pa dang / shes pa kha nang du bltas pa'i zhi gnas bsgom pa dang / phyi rol gyi yul sku dang phyag rgya la sogs pa la dmigs pa nye bar 'dzin pa ste/ de dag gi dus su yul gang du yang rlung dang sems mi rgyu ba ste/ 'phros par gyur na yid kyi zhing de dag la rang ldog par 'gyur ro zhes smra bar byed kyang shes pa khugs su bcug nas shes pa de dag nan gyis sdud par 'gyur te/sdug bsngal 'ba' zhig kho na skyed par zad do/ /de ci'i phyir zhe na/ thabs tha mal gyi shes pa dang / shes rab gsal ba dang mi rtog pa dang bde ba dang 'jug pa'i chos kyi sku bde ba chen po'i rang bzhin dang bral te med par 'gyur bas thabs zhi gnas la nan tan byas pas 'bras bu lhag mthong gi shes rab skyed par 'dod de/de dag kyang bsgom bya dang sgom byed du brtags par skyes bu mi shes pa dag gnyis 'dzin gyi shes pa'i gnas der ni mnyam par gzhag pa la gnas shing rjes su thob pa'i gnas skabs su sems kyi ngo bo ni dbugs dbyung zhing gnas par byed pa ste/'di dag la ni bye ma la mar btsir ba bzhin no/ /slob dpon chen po dag gi zhal gyi bdud rtsi gnyis pa rje btsun pa las thos pa ni man ngag tu gnas pa ste zhal las shes par bya'o//da ni ji ltar bsgom par bya ba yin zhe na/ snying po'i don gyi ye shes de kho na/ /bdag med mas ni man ngag bstan nas song / /gnyis su mi bya gcig tu bya ba ste/ /gcig tu rtog na rnal 'byor spros pa'i lam//zhes bya ba'i don ni sems gnyug ma'i rang bzhin snying po'i don de nyid kyi ye shes kyi cho 'phrul dpag tu med par snang ste/ de thams cad kyang rnal ma'i de kho na nyid kyi nyams su myong bar byed de de nyid kyang sems nyid kyi ngo bo steng bdag gi cha dang bral ba'i phyir bdag med yin la 'bras bu thams cad skyed par byed pas na ma ste/des de la ni ci yang min pa'i man ngag bstan nas song / /de 'dzin par byed pas man ngag gi bsgom bya dang sgom byed gnyis su mi bya zhing ngo bo gcig tu bya ba ste/ bdag nyid kyi ngo bo yin no zhes gcig tu rtog na rnal 'byor pa'i rtog pa dang spros pa'i lam ste/'bras bu zad par byed pa nyid do/ /'di dag gi byed pa'i tshul ni 'di lta bu yin te/ rigs la bye brag bzang ngan ma byed par/ /khams gsum ma lus 'di dag thams cad ni/ /'dod chags rnam spangs 'dod chags nyid min te//'dod chags chen po gcig tu kha dog bsgyur/ /zhes bya ba'i don ni snang grags kyi chos 'di dag thams cad de bzhin gshegs pa'i rigs te nam mkha' dang 'dra'o/ /de la bye brag dang bzang ngan ma byed par chos kyi skur blta bar bya'o//de nyid la rigs gsum du snang ste/ /'dod pa'i khams ni rin po che'i rigs so/ /gzugs kyi khams ni pad+ma'i rigs so/ /gzugs med pa'i khams ni rdo rje'i rigs te/ de yang rab tu mi gnas pa'i rgyud las/ /khams gsum sems can bde gshegs rigs//thams cad chos kyi sku ru blta/ /'dod khams rin chen rigs yin te/ /'dod pa'i yon tan rnam par 'byung / /gzugs khams pad+ma'i rigs yin te/ /lus rnam dag cing dri ma med/ /gzugs med rdo rje'i rigs yin te//mtshon gyis bcad kyang snad mi nus/ /rigs gsum sku yi 'khor lo 'di/ /rigs gcig dag las nges par 'byung / /zhes 'byung ba'i phyir khams gsum pa ma lus 'di dag thams cad ni tha dad kyi 'dod chags rnam par spangs te/ spang du med pa'i don sems nyid gnyug ma'i ngo bo nyid yin pa'i phyir ro//de bas na 'dod chags spang du med de tha mal gyi shes pas 'dod chags chen po nyid yin te/ de yang nges pa'i 'dod pa dang ci yang ma yin pa'i chags pa chen pos chos kyi sku nyag gcig tu kha dog bsgyur bar bya'o//da ni mtshan nyid kyi rnam pa brjod par bya ste/ de la thog mtha' dbus ni yod min te/ /srid dang mya ngan 'das pa gnyis mi rtogs/ /ma bcos bde ba chen po'i mchog 'di la/ /bdag dang gzhan du grub pa yod ma yin/ /mdun dang rgyab dang g.yas g.yon phyogs bcu ru//gang du rtog dang myong ba de dag ni/ /de ni 'khrul pa'i lam la mngon par gnas/ /rang bzhin mtshon cha chen po rtogs pa na/ /da ni su la'ang dri bar mi bya'o/ /zhes bya ba'i don ni gong du smos pa'i gnyug mi'i ngo bo de dag la thog ma dang mtha' yod pa ma yin te nam mkha' dang 'dra'o//dbus ni ci yang ma yin pa'i phyir yod pa min te bdag gis smra bar mi nus so/ /de ltar nyams su myong ba'i don de nyid la srid pa dang mya ngan las 'das pa gnyis su mi rtog ste dbyer mi phyed pa'i phyir ro/ /de ltar na rang bzhin gyi ngo bo ni sems ma bcos pas yin te/de nyid kyi khyad par ni thams cad bde ba chen po'i rang bzhin las rtog pa mchog tu gyur pa 'di la bdag dang gzhan du grub pa yod pa ni ma yin no/ /de'i phyir rnal 'byor pa rnams kyi sems nyid du rtogs pa dang bskyed pa'i rim pa brtan pas thob cing de nyid la 'byung ba dang /rtsa ba'i rgyal po dang blon po dang dmangs rnams dang steng du rgyu ba'i rlung dang thur la rgyu ba'i rlung dang 'phred la gnas pa'i rlung dang gnas pa'i byang chub kyi sems dang / 'pho ba byang chub kyi sems dang 'gyur ba byang chub kyi sems la bde ba skyed cing blo gnas shing brtan pa dang shes pa mi rtog pa 'ba' zhig la gnas pa dang /bum pa'i dbang me long lta bu'i ye shes su blta ba dang / gsang ba'i dbang mnyam pa nyid kyi ye shes su blta ba dang / shes rab kyi dbang so sor rtog pa'i ye shes su blta ba dang / mtha'i dbang bya ba nan tan gyi ye shes su blta ba rnams dang /de thams cad bsten par byed pa yang dam tshig las 'byung ba yin pa dang / de thams cad kyang chos kyi dbyings kyi ye shes las ma 'das so zhes mdun dang rgyab dang g.yas g.yon phyogs bcu ru brtags shing dpyad de gang du rtogs pa dang nyams su myong ba de dag gi zug rngu ste/skyes bu de ni 'khrul pa'i lam las mngon par gnas pa kho na'o/ /gnyug ma'i don phyin ci ma log pa mi mthun pa'i phyogs skad cig ma de nyid la zhi bar byed pa'i rang bzhin gyi mtshon cha chen po 'di rtogs na da ni bdag gis su la yang dri bar mi bya'o//de ci'i phyir zhe na/ rtag pa thams cad sdug bsngal yin pa'i phyir ro/ /nga ni rtogs pa'i tshad bstan par bya ste/ snang ba'i dbang po gang du nub 'gyur zhing / /rang gi ngo bo ma nyams dngos nyams 'gyur/ /zhes bya ba'i don ni gnyug ma'i ngo bor bzhag pa la khyad med kyang rnam pa la yod pa'i phyir dang por myong du med pa'i myong ba dang /goms pa dang mthar phyin pa'i dus su snang ba dang dbang po'i yul du gyur pa thams cad gnyug ma'i ngo bo nyid du nub par 'gyur zhing / de yang rang bzhin gyi ngo bo nyams te ji bzhin par rtogs pa'o//byis pa rnams kyis brtags pa'i dngos po thams cad nyams par 'gyur ro/ /da ni de nyid kyi don de dag bla ma ma yin pa'i gzhan las mi rtog pa bstan par bya ste/ kye ho grogs dag lhan cig skyes pa de/ /gzhan nas mi rnyed bla ma'i zhal las dris//don dam zhal gyi ngo bo de rtogs na/ /yid ni 'ching med rlung yang 'chad par med/ /khams gsum 'di ni thams cad de yi bdag /de ma rtogs pas 'ching dang 'chad par 'gyur/ /zhes bya ba'i don ni kye ho zhes bya ba ste bla ma la brten pa la gdams pa yin pa'i don te/grogs dag ces bya ba'i don ni blo shin tu chen por 'gyur ba'i gang zag rje btsun pa rnams dang mtshungs par spyod nus pa rnams la'o/ /de dag la sbyangs pa'i don de ni lhan cig skyes pa'i ye shes de dag gzhan nas rnyed pa ma yin te mi rnyed pa'i phyir ro//de bas na bla ma'i zhal gyi bdud rtsi la dris nas don dang ldan par 'gyur ro/ /de bas na dam pa'i gdams ngag de dag rtogs na yon tan dang ldan par 'gyur la/ ma rtogs na dug tu 'gyur ba'i phyir gnyis med kyi don dam pa de dag bla ma'i zhal gyi ngo bo de las rtogs na yid 'ching ba med de/shes pa rnal ma chos kyi sku yin pa'i phyir ro/ /rtog pa dang rlung yang chad pa med pa ste snang grags kyi chos sku phyag rgya chen po yin pa'i phyir ro/ /de bas na khams gsum pa 'di dag thams cad ni bde ba chen po de'i bdag nyid yin te/de nyid kyi ngo bo la rtogs pas rtogs par 'dod pa'i phyir yid 'ching ba dang / rlung bzlog cing 'chad par 'gyur te/ sems bsad cing dgag sgrub byas pa'i phyir ro/ /da ni rtogs pa'i don las snying po log na med par bshad par bya ste/ khams gsum 'di na yan lag dngos po gnas//de ni rmongs par rab tu shes par gyis/ /ma rig mi rig gti mug rgya mtsho che/ /chad pa'i tshul snang de la ma zhen pa'i/ /'di ni snying po bde chen mchog yin no/ /'di ni sangs rgyas dgongs pa sangs rgyas nyid/ /gzhan gyi spyod min sa ra pa yis bstan//rjes su 'gro ba glu yi gar blang bya/ /zhes bya ba'i don ni khams gsum pa 'di dag ni gsal ba dang mi rtog pa'i yan lag dang / bde ba chen po'i dngos po gnas te de ni gnyis su med pa'i phyir rmongs pa yin pas don de nyid rab tu shes par gyis shig ces bya ba'i don dang /khams gsum pa 'di dag yan lag can rdzas dang bsags pa dang 'dus pa'i dngos po dang / sems las byung ba'i dang / rnam pa yin par 'dod pa smra ste/ de ni kun nas dkris pa'i phyir rmongs pas 'khor ba'i bdag nyid la gnas pa kho na ste/den gi yang sa yin pa'i phyir rab tu shes par gyis shig pa'i don to/ /da ni nyon mongs pa dang de kho na nyid tha mi dad pa yin te/ khams gsum pa thams cad kyi ma rig pa ni ye shes nyid yin te rig tu med pa'i phyir ro/ /de bas na ma rig pa'i don de nyid gti mug chen po ste mi shes shing shes pa med pa'i phyir ro//de ni zab cing dpag dka' ba'i phyir rgya mtsho chen po dang 'dra'o/ /de bas na ci yang ma yin pa'i phyir chad pa'i tshul du snang ste/ ma yin zhes de la ma zhen pa'i bdag nyid du bya'o/ /don 'di ni snying po yin te de rtogs pa na bde ba chen po mchog gis rab tu non pa yin no//'di ni phyogs bcu dus gsum gyi sangs rgyas kyi dgongs pa yin te/ tha mi dad pa'i phyir sangs rgyas nyid kyang de nyid yin no/ /don 'di dag gang zag gzhan gyi spyod pa'am smra bar nus pa ma yin te rje btsun pa'i sprul pa'i sku sa ra pa yis bstan pa kho na'o//skal ba dang ldan pa gang zag de'i rjes su 'gro ba rnams kyis ni rang bzhin thams cad 'grub pa med pa'i phyir glu'i tshul du shes par bya ba dang nyams su myong ba brtag tu med pa'i phyir gar gyi tshul du blang bar bya'o/ /de ni rnal 'byor pa rnams kyi rang gi blo la gdams par bya'o//kye ho 'di ni rang rig ye shes te/ /'di la the tshom rtog par ma 'khrul cig /dngos dang dngos med bde gshegs 'ching ba ste/ /gnyug ma'i yid la ltos dang rnal 'byor pa/ /mar la mar gzhag chu la chu gzhag bzhin/ /dpes mtshon don de de bzhin shes par gyis//bsam gtan gzhan la rtog med de med de/ /dngos gzhi 'khrul pas thar pa mi rnyed do/ /sgyu 'phrul dra bas ji ltar nyams su len/ /zhes bya ba'i don ni rang gi blo la bos nas gdams pa'i don 'di yin no zhes pa ni/ kye ho de ltar gong du bstan pa'i don 'di ni rang rig pa'i ye shes rang 'byung ba ste/'di la the tshom dang tha dad kyi rtogs pa 'khrul par ma byed cig /rnam par rtog pa ni 'khor ba thams cad kyi rtsa ba ste/ de bas na sems dngos po yod par rtog pa dang / dngos po med par rtogs kyang /bde bar gshegs pa chos kyi sku'i 'ching ba ste/ don gyi 'bras bu bskyed par mi nus so/ /de bas na sems gnyug ma'i rang bzhin ci yang ma yin pa yid la de nyid kyi tshul gyis ltos dang / rnal 'byor pa kun gyis so/ /de yang ji ltar zhe na/ mar gyi khu ba la mar gyi khu ba gzhag pa dang /chu la chu gzhag pa bzhin du dpes mtshon pa'i don dam yang sems la sems bzhag pa ste/ de bzhin du gnyis su med par shes par gyis shig /rtog pa dang ldan pa'i gang zag gis ni bsam gtan bsgoms byar gzhan du rtog pa'i phyir de'i blo dman pa ste/de la de kho na nyid med do/ de ci'i phyir zhe na/ bde ba chen po dngos gzhi 'khrul pas thar pa mi rnyed do/ /snang ba 'di thams cad sems nyid snang ba ste/ ci yang ma yin bzhin du snang bas sgyu ma dang 'phrul gyi rnam pa lta bu'o/ /de la tha dad du brtags pa ni sdug bsngal gyi rnam pa ste/de ji ltar nyams su len zhes gdams pa'o/ /da ni bde ba chen po bla ma'i zhal las rtogs su med pa'i rtogs pa bshad par bya ste/ bla ma dam pa'i bka' las yid ches pa'i/ /nyams myong myong med ye shes snying po ste/ /nga yis brjod du yod pa ma yin zhes//snying po don mchog dag ni de skad smras/ /zhes bya ba'i don ni bla ma dam pa'i bka' dag las slob pa pos yid ches par bya ba'i tha mal gyi shes pa nyams su myong ba de dag ni myong du med do/ /de ci'i phyir zhe na/ snying po sku gsum dang ye shes rnam pa lnga'i bdag nyid de/de dag brtag par mi nus pa'i phyir nga yis zhes bya ste/ /rje btsun dag gis kyang brjod par nus pa'am brjod du yod pa ma yin no zhes snying po gnyug ma'i don gyi mchog de dag gi shugs kyis de skad smra bar 'gyur ro/ / da ni dpe khyad par can gyi sgo nas bstan par bya ste/ gdod nas dag pa'i rang bzhin nam mkha' la/ bltas shing brtags kyang mthong bar mi 'gyur te/ /lhan cig skyes pa'i ngo bo de dag la/ /skye 'gag mthong med smra ba'i brda dang bral/ /zhes bya ba'i don ni gdod ma nas dag pa'i rang bzhin gyis cir yang ma yin pa'i nam mkha' de dag la rtog ge dang ldan pa dag gis 'bad pa dang rtsol bas bltas shing brtags kyang mthong bar mi 'gyur te/sdug bsngal lo/ /mkhas pa shes rab can dag gis ni nam mkha'i ngo bo ye nas dag pa yin pa de dag la bltas nas mi rnyed pa yin pa'i phyir 'bad pa dang rtsol bsam rtogs te bde ba dang ldan no//de'i rang bzhin du lhan cig skyes pa'i ngo bor rang 'byung gi ye shes de dag dang / dang por skye ba dang / bar du gnas pa dang / tha mar 'gag par yod pa ma yin te/nyams su myong ba'i de nyid rnam rtog gi blo mthong ba yang med do/ /de'i phyir de brjod par bya ba'i smra ba'i brda dang tha snyad gdags pa dang bral lo/ /de ni bde ba chen po'i rang bzhin te de dag la rtsol zhing bsgrub pa ni sdug bsngal lo/ /da ni chos kyi sku la 'khrul pa mi rigs pa bstan par bya ste/gnyug ma'i ngo bo sna tshogs par snang yang / /gcig tu ma shes tha dad yul la brtags/ /rnam rtog nga rgyal skyon gyis skye bo bslus/ /tshig gi mtshon chas gzhan dag sun 'byin kyang / /rnam rtog skyon gyis de nyid mtshon mi nus//zhes bya ba'i don ni thams cad sems gnyug ma'i rang bzhin chos kyi sku de nyid yin te/ de dag gi cho 'phrul snang grags sna tshogs par snang ba la so so'i skye bo rtog pa dang ldan pa rnams kyis dus thams cad bde ba chen po'i ro gcig tu ma shes pas tha dad kyi yul la brtags pa'i phyir rnam par rtog pa'i nga rgyal gyi skyon de dag gis so so'i skye bo rnams bslus so//mngon sum dang rjes su dpag pa'i rigs pa'i tshig gi mtshon chas gzhan dag sun 'byin par byed kyang rnam par rtog pa'i skyon de dag gis de kho na nyid mtshon par mi nus so//da ni de kho na nyid gzhan gyis mi rtogs pa bstan par bya ste/ 'jig rten log pa'i bsam gtan gyis rmongs te/ /rang bzhin gnyug ma sus kyang mtshon ma yin/ /sems kyi rtsa ba rang bzhin 'bras mi mthong / / skye 'gag gnas par shes pa ma yin no/ /lhan cig skyes pa'i ngo bo de nyid ni/ /bstan du med kyis rang bzhin chos su khyer/ /zhes bya ba'i don ni 'khor ba mi rtag pa'i mtshan nyid 'jig cing rten pa'i ngo bo la gnas pa'i sems can de dag de bzhin nyid kyi don las log pa'i bsam gtan gyis rmongs te/de ci'i phyir zhe na/ bla ma dam pa dang bral ba ste/ rang bzhin gnyug ma'i de kho na nyid sus kyang mtshon pa ma yin no/ /de bas na rang gis brtags pas kyang mi rnyed de sems kyi rtsa ba de dag dang po gang nas byung ba dang gnas pa dang rang bzhin ji lta bu yin pa dang /de bsgoms pa'i 'bras bu thob pa'i don mi mthong ste/ skye ba dang 'gag pa dang gnas med par 'byung ba'i ngo bo nyid yin kyang de nyid shes pa ma yin no/ /de ltar rtogs pa rnams kyis ni sems de kho na nyid du khyer bar bya ste/ lhan cig skyes pa'i gnyis su med pa'i ngo bo de nyid ni bla ma dam pa rnams kyis kyang bstan du med cing /slob pa pos kyang nyams su myong ba med kyis de bas na shes pa rnal ma rang bzhin gyi chos su khyer bar bya'o/ /da ni de ltar shes nas rtogs pa bstan par bya ste/ rtsa ba bral bas de nyid gang sems pa//bla ma'i man ngag de yis thob pa ste/ /rgyu med sems la gnas pa mchog tu gsungs/ /'khor bar snang ba sems kyi ngo bo ste/ /de ltar shes nas rnal 'byor snying po che/ /rmongs rnams mda' bsnun ngas smras shes par byos/ /rang bzhin gnyug ma brjod bya ma yin te//slob dpon man ngag mig gis de mthong 'gyur/ /de la chos dang chos min rtog pa dang / /lam dang gnyen pos bcos pa ma yin no/ /'di la nyes pa rdul tsam yod ma yin/ /gnyug ma'i yid ni gang tshe sbyangs gyur pa/ /de tshe bla ma'i yon tan snying la 'jug /ces bya ba'i don ni gnyug ma'i yid la yun ring du sbyangs pas gang zag gis spyod pa ma yin pa ston te/ rtsa ba zhes bya ba ni rnam par rtog pa ste de dang bral ba ni sems so/ /de nyid nyams su myong bar bya ba ni shes pa rnal ma ste/ de'i mthus zag pa dang bcas pas bde ba dang zag pa med pa'i bde bas lus dang sems gang bar 'gyur te/de dag thams cad la zhen pa med pa'i sems ni dran pa rgyun chags nyid do/ /de ltar rtogs pa de ni bla ma dam pa'i zhal gyi man ngag de'i thob pa ste/ de ci'i phyir zhe na/ lhan cig skyes pa'i ye shes tha mal gyi shes pas/nyams su myong bar byas pa la nges pa'i shes pas brgyan te dran pa'i grogs dag gis mnyam pa nyid thob pa'o/ /de dag kyang ci'i phyir zhe na/ de nyid kyi ngo bo la rgyu med pa dang / sems mtha' dang dbus su mi gnas pa dang / de la sems can thams cad kyi sems kyi ngo bo de ltar gnas shing rgyu dang 'bras bu dbyer mi phyed pa'i mchog tu dam pa rnams kyis gsungs pa'o//de ji srid du 'khor ba'i rnam par snang ba de srid thams cad ni sems kyi ngo bo ste/ de ltar shes nas rnal 'byor pa rnams kyis snying po'i de kho na nyid kyi ngo bo chen po rtog pa'o//de ltar ma rtogs pa'i rmongs pa rnams la mda' bsnun ngas smras pa de dag shes par byos shig /de dag kyang shes su med pa ste/ rang bzhin gnyug ma de dag gi don ni brjod bya thams cad kyi mtha' las 'das pa'i phyir shes par bya ba'ang ma yin te/mi shes pa'i nyams su myong ba'i slob pa po de nyid kyis ni slob dpon gyi man ngag dam pa des mthong bar 'gyur ro/ /de ltar nyams su myong ba'i don de dag la mtha' gnyis kyi chos dang / mtshan ma'i chos min par rtog pa dang /bgrod par bya ba'i lam dang / nyon mongs pa'i gnyen pos go rims kyi tshul du blo bcos par bya ba ma yin no/ /de ci'i phyir zhe na/ gnyug ma'i ngo bo 'di dag la rtog pa'i nyes pa rdul tsam yang yod pa ma yin no/ /gnyug ma'i ngo bo de dag slob pa po'i yid la de nyid kyi don ni gang gi tshe myong zhing sbyangs par gyur pa de'i tshe bla ma'i yon tan dam pa snying la 'jug cing zhugs pa'o//de lta bu'i don de nyid kyang rtog pas 'grub pa yin gyi 'bad pas 'grub pa ma yin pa bstan par bya ste/ de ltar rtogs na snying po glur len te/ /sngags dang rgyud rnams kun la 'bad byas kyang / /rtog ge de bral gcig la mthong lam med/ /'gro rnams las kyis so sor 'ching 'gyur te/ /las dang sdig las grol nas yid mthong ste/ /rang yid rtogs nas grol ba gzhan med do//mya ngan 'das pa mchog ni thob par 'gyur/ /thob ces mtshon kyang rtogs pa'i dus nyid yin/ /zhes bya ba'i don ni gong du bstan pa'i ngo bo de ltar rtogs na rnal 'byor pa chen po dag byang chub kyi snying por 'khor ba'i sems can thams cad gdams pa'i don glur len te/'phags pa'i gang zag rnams kyis sngags kyi bstan bcos rig pa dang / de bzhin gshegs pa'i bka' dang rgyud rnams la rigs pa dang 'brel pa kun la 'bad par byas kyang tha dad kyi rtog ge'i de dag dang ma bral na gang zag gcig la yang mthong ba'i lam skye ba'i skal pa med do//de ci'i phyir zhe na/ 'khor ba pa'i 'gro ba rnams tha dad du brtags pa'i dge ba dang sdig pa'i las rnam par smin pa'i don mi bslu ba'i so sor 'ching bar 'gyur te/ gang dag gis dge ba dang sdig pa'i las dang tha dad kyi rtogs pa'i zug rngu'i sdig pa las tha mal gyi shes pa rang grol bar 'gyur te/de ltar na rang gi yid sangs rgyas kyi bdag nyid du mthong ste/ de ltar rang gi yid rtogs na grol bar 'bras bu gzhan med do/ /de bas na de nyid la goms shing mthar phyin pa ni mya ngan las 'das pa'i mchog gnyis su med pa ni thob par 'gyur ro//de dag kyang thob tu yod ce na/ thob pa zhes slob pa so so'i las mtshon du zad kyang rtogs pa'i dus de nyid kyi ngo bo mtshon pa yin no/ /da ni chos thams cad sems nyid yin pa bstan par bya ba ste/sems nyid gcig pu kun gyi sa bon te/ /de las 'khor dang mya ngan 'das snang ngo / /srid pa sna tshogs de las 'phros pa yin/ /'phros pa de nyid chos kyi sku yin te/ /chos kyi sku las snang ba gzhan med do/ /rtog pas mya ngan 'das pa nyid yin te//zhes bya ba'i don ni sems chos kyi sku rnam par dag pa'i ngo bo de las thams cad kyi bdag nyid rnam par 'phel te/ skyes par byed pa'i sa bon gzhan grub pa med pa'i phyir de bas na sems nyid gcig tu snang grags kyi chos kun gyi sa bon yin te/de bas na de las 'khor ba rnam par rtog pa'i bdag nyid dang zhi ba mya ngan las 'das pa'i ngo bor snang ste/ khams gsum gyi srid pa sna tshogs kyi snang ba thams cad nyi ma'i 'od zer bzhin ngo bo de las 'phros pa yin no/ /nyi ma dang zer gnyis tha mi dad pa ltar 'phros pas snang grags kyi chos de nyid dang /sems nyid chos kyi sku gnyis tha mi dad pa yin te/ chos kyi sku'i rnam pa de nyid las snang ba gzhan zhig grub pa med do/ /de nyid rtog pas mya ngan las 'das pa nyid yin pa ste gzhan du rtogs pa mi bya'o/ /de ltar rtogs pa'i don de nyid la bstod par bya ste//'dod pa'i 'bras bu ster bar byed pa yis/ /yid bzhin nor bu mchog legs 'byung ba bzhin/ /man ngag mchod 'bul sems la nor bu'i tshul/ /rnal 'byor khyad par sems la phyag 'tshal lo/ /zhes bya ba'i don ni dper na sems can gyi 'dod pa'i don mi bslu bar 'khor ba'i yo byad kyi 'bras bu ster bar byed pa ni yid bzhin gyi nor bu rin po che ste/de la mchod pa dag legs par phul nas gsol ba btab na/ mchod pa'i don 'dod pa legs par 'byung ba bzhin du khams gsum gyi sems can thams cad kyi sdug bsngal gyi dbul ba sel bar byed pa ni sems nyid de kho na nyid yin te/de dag rten gyi gang zag skyes pa dang bud med kyis tha mal gyi shes pa'i mchod pa'i rdzas dag bla ma'i gdams ngag gis mchod pa phul nas sems nyid kyi don la nges pa'i shes pa'i gsol ba btab na nor bu'i tshul du sangs rgyas kyi 'bras bu 'byung ngo //de ltar rtogs pa'i rnal 'byor ba'i khyad par sems la phyag 'tshal lo zhes bya ba'i don to/ /de nyid kyi ngo bo de sems rang dga'i tshul gyis sgrub pa bstan par bya ste//sems bcings na 'khor ba'i bar 'ching 'gyur te/ /de ma bcings na grol zhing thar bar 'gyur/ /blun po gdams pa bral bas bcings 'gyur bas/ /bla ma mkhas pa dag gis myur du grol/ /zhes bya ba'i don ni rnal 'byor pa'i sems nyid de dag bcings na ni 'khor bar 'ching bar 'gyur te/sems ma bcings pa'i tshul gyis rang dgar glod de bzhag na rang grol zhing thams cad mkhyen pa'i sangs rgyas su thar bar 'gyur ro/ /blun po gang zhig bla ma dam pa'i gdams ngag dang bral bas yid 'ching bar 'gyur te/de dag las bde bar byed pa ni bla ma mkhas pa dag gi zhal gyi bdud rtsi dag las shes pa glang po che smyon pa'i tshul du gar dgar btang bas myur du grol bar 'gyur ro/ /da ni sems yangs par bzhag pa bstan par bya ste//sems ni nam mkha' 'dra bar blta bya ste/ /lus ni de nyid yin pas chags mi bya/ /chos rnams kun dang sems nyid mnyam pa ste/ /sems de bsam gyis mi khyab bsam byas nas/ /des ni bla na med pa thob par 'gyur/ /zhes bya ba'i don ni rnal 'byor pas sems kyi ngo bo nyid ni mkha' dang 'dra bar blta bar bya ste/de ni mi shes shing mnyam la smrar med de ci yang ma yin pa'i phyir de dang mtshungs pa'o/ /de bas na lus kyi ngo bo nyid ni de kho na nyid la ma 'das pa yin pas chags par mi bya ba kho na'o//de bas na lus sems thams cad dogs pa med pa'i rnam pas bag yangs pa'i tshul du gzhag ste/ de ci'i phyir zhe na/ snang grags kyi chos kun dang sems nyid kyi ngo bo mnyam pa ste/ sems de chos kyi sku yin pa'i phyir bsam gyis mi khyab pa'i ngo bo ste de nyid ci yang ma yin pa'i tshul du bsam par byas na des ni bla na med pa'i 'bras bu thob par 'gyur ro//da ni thams cad sems su shes par bstan par bya ste/ nam mkha' dag la sprin byung rlung gis thim/ /sems kyi de nyid rtogs bya brtags pas thim/ / snying pos smras pa nam zhig nus ldan na/ /mi rtag g.yo ba myur du spong bar 'gyur/ /zhes bya ba'i don ni/ nam mkha'i rang bzhin dag pa'i las glo bur gyi sprin byung ste/ de dag rlung gi g.yo bas thim pa bzhin du sems nyid kyi ngo bo rnam par dag pa de nyid la phyi nang gi rnam par rtog pa du ma byung ste/bla ma'i gdams ngag gi sems skye med rtog par byas nas brtags pa'i bdag nyid rtog pa thams cad rang zhi zhing thim par 'gyur ro/ /de nyid du shes pa'i phan yon ni snying po gnyug ma'i ngo bo sems la smras pa ni tha mal gyi shes pa de nyid la goms nas nam zhig nus pa dang ldan pa na rtogs pa de 'khor ba mi rtag pa'i rnam pa dang mtshan ma'i g.yo ba thams cad myur du shugs kyis spong bar 'gyur ro//da ni sangs rgyas pa'i dus bstan par bya ste/ rlung dang me dang dbang chen 'gags pa na//bdud rtsi'i dngas ma rlung chen la zhugs pas/ /d+hU tI'i rlangs pa sems la 'jug 'gyur te/ /srid pa'i sa ru rdzogs pa'i sangs rgyas nas/ /sbyor ba bzang po 'di la snang ba thim/ /nam zhig sbyor bzhi gnas 'gyur tshul gyis ni/ /sems zhugs dus su bde ba chen rgyas te//nam mkha'i khams su shong min myang ba'i tshul/ /zhes bya ba'i don ni/ rnal 'byor pa de nyid goms par bya ba la brtson pa rab dang 'bring du gnas pa'o/ /de dag gis ni gnyug ma'i de kho na nyid la goms pas 'da' ka ma'i ye shes de kho na nyid bsgoms te/de yang dang por sa chu la zhugs pa dang chu me la zhugs pa dang / me rlung la zhugs pa dang rlung rnam par shes pa la zhugs pa dang / rnam par shes pa 'od gsal bde ba chen po la zhugs pa de chos kyi sku'o/ /de ltar g.yo ba dang bcas pa'i rlung dang smin par byed pa'i me chu sra ba'i bdag nyid kyi dbang chen de dag rtogs pa'i dri ma ste/shugs kyis 'gags pa ni bdud rtsi rnam pa lnga'i dngas ma de dag g.yas g.yon gyi rtsa la la nA dang / ra sa nA'i rlung chen po la zhugs pas de nyid kyi rtsa dbu mar rim gyis 'jug par 'gyur te/de ltar a wa d+hU tI'i rlangs pa de dag rtog pa med pa'i thig le'i sems la 'jug par 'gyur te/ shes pa bar ma do'i sa ru mngon par rdzogs par sangs rgyas nas/ bde ba chen po dang ldan par 'gyur ro/ /brtson pa'i sbyor ba dang ldan pa bzang pos ni skye ba de nyid la snang ba sems la thim par 'gyur ro//bde ba 'di lus la brtan pa ste/ /bar ma do'i shes pa de dag lus dang bral ba'i phyir bde ba dang ldan par mi 'gyur bas chos kyi sku phyag rgya chen po gnyug ma'i ngo bo nyid rtogs pa ma yin no zhe na/de kho na nyid gnyug ma la goms pa'i shugs kyis nam zhig 'pho ba'i dus kyi tshe/ sa chu la zhugs pa dang chu me la zhugs pa dang me rlung la zhugs pa dang / rlung rnam par shes pa la zhugs pa dang / rnam par shes pa 'od gsal bde ba chen po la zhugs pa'i sbyor ba bzhi gnas 'gyur ba'i tshul gyis sems 'od gsal gyi bde ba la zhugs pa'i dus su zag pa med pa'i bde ba chen po rgyas te/gzugs shig yod na ni nam mkha'i khams su yang shong ba med de/ myong ba'i yul du yang rung ngo / /gong ma'i tshul de dag bden na ni chos kyi sku bde ba chen po dang mi ldan par 'gyur ba'i phyir bsgrub par yang mi rigs la/rang bzhin can dang de nyid kyi ngo bo yang tha mi dad par thal te ches lhag go/ /da ni rtogs pa'i khyad par du gyur pa bstan par bya ste/ gnas dang khyim na de yi gtam smra yang //bde chen gnas ni yongs su shes pa min/ /'gro kun bsam pas sun 'byin mda' bsnun smras/ /bsam gyis mi khyab bsgrub pa 'ga' yang med/ /ces bya ba'i don ni sems can thams cad rang gi de kho na nyid la brtags 'khrul pa'i dri mas bsgrib pa'i phyir/ de bzhin gshegs pa'i bka' dag gis gnas dang mkhas pa'i gang zag rnams kyis khyim na brjod du med pa'i de kho na nyid kyi gtam smra pa yang snang srid bde ba chen po'i phyag rgya'i gnas ni yongs su shes pa min te/ 'gro kun rang gi bsam pa las byung ba'i rtogs pas rang nyid sun 'byin to zhes mda' bsnun gyis smras so//bsam gyis mi khyab pa'i don bde ba chen po gnyis su med cing ci yang ma yin pa'i zhal gyi bdud rtsi tha mi dad pa'i tshul du bsgrub pa ni gcig kyang med do/ /da ni thams cad la khyab pa'i bdag nyid bstan par bya ste/ srog chags thams cad kun la yang / /de nyid yod de rtogs pa med/ /thams cad ro mnyam rang bzhin pas/ /bsam yas ye shes bla med pa'i/ /dpa' bo rnams kyis brtags pa'i rigs/ /zhes bya ba'i don ni ta ka hi ha na ste srog chags so/ /de dag gi don gyi khyad par ni snang ba'i ngo bor gsal ba'i rnam pa dang gnas skabs kyi mi rtog pa'i rang bzhin dang 'dod pa nyams su myong ba'i bde ba ste de ltar sangs rgyas kyi dgongs pa de dag rang bzhin gyis ldan pa'i don to//de bas na sems can thams cad la de kho na nyid kyi ye shes rang khyab tu gnas te snang grags kyi chos kun la yang til dang mar gyi tshul du de nyid kyi ngo bo yod de gyad kyi nor bu dang 'dra bar rtog pa med do//de bas na thams cad chos kyi skur ro mnyam pa'i rang bzhin yin pas bsam yas nam mkha' dang 'dra ba'i ye shes bla ma'i gdams ngag gis nyams su myong bar byas pa'i rnal 'byor pa dpa' bo rnams kyis brtag cing mnyam pa la gzhag pa'i rigs so//da ni brtson 'grus kyi stobs bskyed pa bstan par bya ste/ de ring sang tsam la 'di snyam/ /skyes bu phun sum tshogs 'dod pas//kye ho snyim pa chus bkang bzhin/ /'dzag pa mthong ngam skyes bu rnams/ /zhes bya ba'i don ni/ snying po'i don 'di dag rtogs pas 'tshang rgya ba yin no zhes ming la zhen pa'i skyes bu de dag gis brtson 'grus kyi stobs bskyed cing bsgom par bya ba kho na ste/ tshe 'di yun thung zhing bya ba'i rnam pa mang pos 'di nyid la goms par 'gyur ba yang shin tu dka' ba'i phyir rnal 'byor pa rnams kyis de ring sang tsam las 'di byas la de nas bde ba bsgrub pa brtag par mi bya ste/da lta nyid nas brtun te bsgrub par bya'o//phyi ma'i dus la bde ba 'dod pa'i skyes bu le lo dang ldan pa phun sum tshogs par 'dod pas de dag la kye ho zhes gdams par bya ste/ snyim pa chus bkang ba de dag gi dus de nyid nas zags la thug gi bar du 'grib pa bzhin te 'dzag pa dang mtshungs pa khyed kyi tshe 'di dag kyang rtag tu 'grib pa mthong ngam skyes bu rnams mthong ngo zhes rtogs pa rnams ni 'bad de bsgrub par rigs so//de la rtog pa med pa'i skyes bu rnams ni blun pa ste rtag tu sdug bsngal zhing 'khor ba na gnas pa kho nar zad do/ /de nyid kyi phyir mnyam pa la gzhag par bya ba bstan te/ bya ba byed dang bya min mi byed pa/ /nges par rtogs na 'gro rnams 'ching mi 'gyur/ /yi ge med la chad pa'i yid 'jug pa/ /gang zhig rnal 'byor brgya la 'ga' yis mthong / /zhes bya ba'i don ni bya ba byed pa rtogs pa'i rnam par snang ba thams cad dang bya ba mi byed pa sems kyi ngo bo gnas pa thams cad gnyug ma'i ngo bo ste/de nyid nges par rtogs nas 'gro ba rnams rang grol bar gyur te 'ching bar mi 'gyur ro/ /de bas na 'di dag ni thun mong ma yin pa ste/ ta yaSh+Ta ni zhes pa ste yi ge med pa'i tha tshig go/ /de dag gi don ni brjod bya dang rjod byed kyi ngo bo dang bral ba ste bems rig rnam pa gnyis las grol ba'o//de dag nyams su blang bar bya ba ni chad pa ste tha mal gyi shes pa'o/ /de dag kyang dran pa rgyun chags kyi yid la 'jug par 'gyur te/ don de dag kyang bla ma gang zhig gis nye bar gdams kyang skal pa dang ldan pa dag la mtshungs pa'i phyir/btags pa'i ming tsam du sbyar ba'i rnal 'byor pa dpag tu med pa ji snyed cig gnas kyang don 'di dag ni gcig tsam gyis mtshon pa'i don nyams su myong ba las mi srid do/ /da ni de nyid kyi grogs bstan par bya ste/shin tu gdams pa'i sems de ni/ /klong de bzhag na grol bar 'gyur/ /rmongs pa gang gis bcing pa'i ngos/ /mkhas rnams de yis rnam par grol/ /bcings pa dag ni phyogs bcu yis/ /grol bar rtsol ba byed pa rnams/ /mthong bar 'gyur ba'i dus nyid du/ / mi g.yo mi 'gyur brtan par gnas/ /go bzlog pa dag bdag gis rtogs/ /bu khyod snying po len pa rnams/ /de ltar rang la mtshon te ltos/ /zhes bya ba'i don ni khams gsum pa rnams kyi blo ni rtswa'i phon lta bu ste/ rnam par rtog pa'i rnam par rtog pa shin tu gdams shing bcings pa ste/de lta bu'i sems 'di ni bla ma dam pa'i zhal gyi bdud rtsis glod de bzhag na rang grol bar 'gyur ro/ /tha dad kyi rmongs pa la gnas pa'i sems can gang gis yid bcings pa'i dngos po de dag bla ma mkhas pa de nyid nyams su myong ba rnams kyi rnam par grol bar 'gyur ro//tha dad kyi rtog pas bcings pa de dag ni ye shes lnga dang rigs lnga'i ngo bos bdag nyid rnam pa bcus blo la gnas par bya ste/ des spang bya dang spong byed kyi tshul gyis bcing pa las grol bar rtsol ba byed pa rnams de nyid kyi nyams su myong bas mthong bar 'gyur ba'i dus nyid du sems mi g.yo ste mtshan ma la 'pho bar mi byed do//mi 'gyur te glo bur gyi rkyen gyis gnon par mi 'gyur ro/ /brtan par gnas zhes bya ste/ shes pa shin tu yun ring zhing gzhan du bsgyur bar mi nus pa'o/ /de nyid ni blo chung ba ste 'ching ba dang bcas par bya'o//de la go bzlog pa dag ni bdag ste rje btsun pa dag gis rtogs so/ /de dag kyang ci zhe na/ zhen pa bzlog par bya ba ni ma yin te snang srid chos kyi sku phyag rgya chen po yin pa'i phyir na mi g.yo bar 'gyur ro/ /de nyid la brten par bsgom pa ma yin te/ bsgom du med par tha mal gyi shes pa rnal mar bzhag pas phyi nang gi g.yeng bas gnod par mi 'gyur ro/ /de ltar shes pa bying zhing yun ring ba dag la yon tan du blta bar mi bya ste/ gar yang 'gyur zhing de la zhen pa med pa ni dran pa yang dang yang du brtan pa ste brtag par gnas so//de bas na rje btsun pa dag gis zhal nas bu zhes bos te/ khyod snying po chos kyi sku len par 'dod pa rnams de ltar rang la mtshon te ltos shig ces bya ba'i don to/ /da ni dpe nye bar bsgrub par bya ba bstan par bya ste/ kye lags dpa' bo ltos shig dang //'di la nga ni mi rtogs so/ /las zin pa yi skyes bu yis/ /drung du sems thag gcod par byos/ /zhes bya ba'i don ni rnal 'byor pa rnams la kye zhes bos te/ ci yang ma yin pa'i don de dag lags so zhes bya ba'i don te dpa' bo zhes bya ba ni de nyid don du gnyer ba'i rnal 'byor ba'o//ltos shig dang zhes bya ba ni gong gi ngo bo de nyid la'o/ /sdug bsngal thams cad ni nga bdag gi rnam pa las skyes pa ste/ ci yang ma yin pa'i don 'di dag la ni bdag tu 'dzin pa ma rtogs so zhes 'byung ba'i phyir bdag med rtogs na sangs rgyas kho na'o//de dag kyang ci lta zhe na/ las zin pa yi skyes bu yis/ /phyi ma'i bya ba la ma 'jug gi bar du bza' gtad med pa'i shes pa rang 'byung du skye ba ste/ de dag la gnas pa'i rnal 'byor pas de nyid kyi drung du rtogs pa'i sems kyi thag shugs kyis gcod par byos shig ces bya ba'i don to//da ni gnyis med kyi don de dag la gdams par bya ste/ rlung bcings pa la rang nyid ma sems kyi/ /shing gi rnal 'byor sna rtser ma sems shig /kye ma'o ma yin lhan cig skyes pa yi/ /gnyis med dang du mnyam pa'i 'dod chags byos/ / zhes bya ba'i don ni rnam rtog gi rta rlung gi rnam par de dag bcings pa'i don/ mi rtog pa 'ba' zhig la zhen na ma sems kye zhes gdams so/ /de bas na shing zhes ni zag pa med pa'i ye shes gnyug ma'i rang bzhin te de dag ni 'phel zhing skyes pa 'di nyid kyis 'bras bu smin par byed pa ste/dang po'i cha ma yin pa'i rnal 'byor gyi shes pa mnyam pa nyid de dag sna rtse la sogs pa rnams su rnam par rtogs pa gtad de ma sems shig /de bas na de ltar rtogs pa rnams kyi ting nge 'dzin ni kye ma'o ma yin zhes bya'o/ /lhan cig skyes pa'i ye shes de dag ni bde ba chen po'i ngang du mnyam pa nyid du 'dod chags byos zhes bya'o//da ni gzung ba'i skyon bstan par bya ste/ srid pa'i sna rtser 'ching ba yongs su spangs/ /'di ni yid 'dus pa la rlung gis rlabs/ /g.yo zhing 'phar bar shin tu mi srun 'gyur/ /zhes bya ba'i don ni yid bcings pa dag ni srid pa ste 'khor ba'i rnam pa yin no//de'i phyir sna rtser 'ching pa la sogs pa yongs su spang ngo / /de'i mi rtog pa 'di ni yid 'dus pa ste 'phred la gnas pa'i rlung zin pa'o/ /de la steng 'og gi rlung gis rlabs na sems g.yo zhing lus 'phar bas shin tu mi srun par 'gyur te/smyon pa dang mtshungs pa'i phyir don med par 'gyur ro/ /de ltar ma bcings pa'i phan yon bstan pa'i phyir/ /lhan cig skyes pa'i ye shes gnas gyur na/ /de'i phyir bdag nyid brtan par 'gyur ba ste/ gang zhig yid ni nye bar 'gags gyur na//lus ni 'ching pa rnam par 'chad par 'gyur/ /zhes bya ba'i don ni/ snang ba dang sems lhan cig skyes pa'i rang bzhin ci yang ma yin pa'i ngo bor gnas gyur na/ chos kyi sku de'i bdag nyid brtan par 'gyur ba'i phyir ro/ /gang gi tshe gnyug ma la goms par 'gyur ba de'i phyir yid kyi rtog pa ni nye bar 'gag par 'gyur bas na/lus kyi 'ching ba 'char bar 'gyur ba dang bde ba la zhen pa la sogs pa rnam par 'chad par 'gyur ro/ /da ni nyams myong gi rtags bstan par bya ste/ dbus su lhan cig skyes dang ro mnyam pas//de tshe dmangs rigs dag dang bram ze med/ /ces bya ba'i don ni/ sems dang snang ba gnyis kyi dbus su lhan cig skyes pa'i ye shes kyi de kho na nyid ro mnyam par 'gyur ba'i re dog med pa'i don de nyid rtogs shing gnyis 'dzin med cing gza' gtad dang bral ba'i ngo bo nyams su myong ba las blang dor med pa'i spyod pa dag 'byung bar 'gyur te/de'i tshe nyam nga bar 'gyur ba med pa'i phyir tha dad kyi rtog pa dang bral bas dmangs rigs dang bram ze med do zhes bya'o/ /da ni grags pa'i dpe'i sgo nas don mtshon par bya ste/'di nas zla ba'i rgya mtsho nyid dang ni/ /'di nas gang+gA'i rgya mtsho'i bar dag dang / /bA rA Na sI'i khor yug bar dag ni/ /'di ni zla ba rgyas pa gsal byed cing / /byang chub sems kyi ri bong gis/ /sems can rgya mtsho gsal bar byed//dran pa gang+gA'i mtsho dag gis/ /yul chen bA rA Na sIr gsal/ /zla ba 'grib dang rgyas pa ni/ /zla bar 'gyur ba ma yin te/ /nyi ma'i rkyen gyis 'phel 'grib snang / /zla ba lta bu'i sems nyid la/ /'phel dang 'grib pa yod med de/ /rtog pa'i dbang gis de ltar snang //de phyir rtog pa bsal ba'i phyir/ /gnyug ma'i grogs dang bcas pas 'bad/ /'bad pa ngal ba med 'gyur te/ /kye ho dang po'i rten la smros/ /zhes bya ba'i don ni/ dpe dag gis nye bar mtshon pa'ang / /gnyug ma'i don kho na nyid brjod par bya ste/'di nas zhes bya ba ni de bzhin gshegs pa thams cad kyi 'byung gnas so/ /zla ba rgya mtsho zhes bya ba ni lto phyogs kyi ngos dpag tshad bcu gnyis pa dag na'o/ /de dag ni chu zheng du dpag tshad bcu gnyis yod pa khor yug tu dpag tshad bzhi bcu rtsa brgyad pa yod pa ste/de dag gi nang na nor bu rin po che hu lu in+d+ra zhes bya ba las dpag tshad gcig gyen du 'phags pa yod de/ de dag la zla ba'i 'od kyis phog pa'i dus su chu'i rgyun 'byung bar 'gyur zhing 'od kyang phyogs bcur 'phro'o/ /'di nas gang+gA'i rgya mtshor dpag tshad bcu gnyis te/de dag gi bar dag tu rin po che'i 'od kyis khyab cing khyad par du chu de dag gsal bar byed do/ /'od de dag dang 'brel ba'i gang+gA'i chu'i nang na rin po che asma gar+b+ha zhes bya ba yod de/ de'i 'od kyis yul bA rA Na sI'i grong khyer gyi dbus na mchod rten da sha ka zhes bya ba yod de/de dag gi rtse mo la nor bu rin po che mu sa la gar+b+ha zhes bya ba gnas te/ de dag la khyad par byed do/ /de'i 'od kyis bA rA Na sI'i khor yug gi bar thams cad 'od kyis gang bar byed cing khyad par du yo byad thams cad kyi mdog kyang gsal bar byed do/ / de bas na grong khyer 'di ni zla ba rgyas pa gsal byed pa ste zla ba nyid kyi mthu yin pa'i phyir ro/ /de bzhin du don dam pa'i byang chub kyi sems chos kyi sku'i ri bong gis sems can gyi rgya mtsho thams cad la gsal bar byed de de dag la ye shes kyi nor bu rin po che rang 'byung du gnas so/ / de'i 'od len par byed pa yang dran pa rgyun chags te gang+gA'i mtsho lta bu'o/ /de dag gi nang na chos kyis rtog par byed pa'i nor bu gnas te/ skal ba dang ldan pa'i yul tshogs chen po bsags pa'i gang zag bA rA Na sIr gsal lo/ /de dag ni tha mal gyi shes pa'i mchod rten gyi rtse mo la nyams su myong ba'i nor bu rin po che gnas so//snang srid bde ba chen po'i 'od 'byin par byed do/ /de'i 'od kyi khyad par du sna tshogs du ma'i yo byad thams cad ro gcig tu mdog 'byin to/ /de yang rtogs pa dang ldan pa'i gang zag rnams la mi snang ba'i phyir dpe brjod par bya ste/zla ba nyid la 'grib pa dang rgyas pa ni yod pa ma yin te zla ba 'gyur ba ma yin pa'i phyir ro/ /de ltar 'phel 'grib kyi rnam pa yang nyi ma dang nye ba dang ring ba'i rkyen gyis 'phel ba dang 'grib par snang ngo / /dpe de bzhin du zla ba lta bu'i 'od don dam pa byang chub kyi sems de nyid la ni thog ma nyid nas ma bcos pa rnal ma'i rang bzhin yin pa'i phyir skal pa dang ldan pa rnams 'phel ba dang skal ba med pa rnams la 'grib pa yang med do//blo chung ba'i gang zag rnams kyis tha dad kyi rtog pa'i ngo bor brtags pa'i dbang gis de ltar snang ba dang /chos thams cad ci yang ma yin pa'i ngo bo tha mal gyi shes pas nyams su myong bar bya ba rtogs pas 'phel 'grib kyi tshul du snang ste de ltar ma rtogs pa rnams kyi ni rtogs par bya ba'i phyir rtog pa bsal bar bya ste/ de nyid kyi phyir gnyug ma'i de bzhin nyid bsgom zhing de'i grogs bsod nams kyi tshogs dang snying rje dang bcas pa la 'bad par bya'o//rtsol sgrub dang bcas par thal lo zhe na/ byis pa'i ngang tshul can rnams la rtog par bya ba'i yan lag tu smras pa ste chen po pa rnams la ni 'bad pa ngal med 'gyur te zhes bya ba ste rtsol bar bya ba ma yin pa'i tha tshig go//de bas na thabs khyad par can la gdams pa'i phyir kye ho zhes bya'o/ /dang po'i rten zhes bya ba ni tha mal gyi shes pa ste de dag nyams su myong bar bya ba la smros zhes bya'o/ /da ni grogs dang bcas pa'i de kho na nyid mthong bar 'gyur bar bya ba bstan par bya ste/zhing kun gnas dang nye ba'i gnas tshogs su/ /phyin te bltas pas rtog par nga smras pa/ /lung dang dran pa'i mu nas bzung ba'i tshe/ /dge ba nga yis yang dag nges par mthong / /nga yis rmi lam du yang mthong ba med/ / ri bo'i khrod du gnas te bag yod byos/ /zhes bya ba'i don ni/ ta na ta ha ra zhes bya ba ste de dag ni zhing dang nye ba'i zhing ngo / /de'i don bsnyad par bya ste/ rab tu mi gnas pa'i rgyud las/ /slob ma skal ldan mtshungs pa dang po'i zhing / /bla ma nyams myong dag pa gnyis med zhing / / zhes bya ba'i phyir skal pa nye bar mtshungs pa dang ldan pa'i slob ma dang de kho na nyid nyams su myong bar byed pa'i bla ma'i ste de dag la sbyar bar bya'o/ /de la ji ltar zhe na/ keng ri ba ha na ra zhes bya ba ste/ /dur khrod dang nye ba'i dur khrod do/ /de dag gi don ni rgyud de nyid las/ /slob ma'i dur khrod des par gsol ba 'debs//rdzogs pa'i sangs rgyas 'byung ba lus kyi khrod/ /bla ma de yis nye bar smin par byed/ /dag pa'i gdams ngag dag gis nye bar ston/ /zhes 'byung ba'i phyir slob pa po dag gis gus pa dang ldan pas bla ma la gsol ba btab ste/btab pa'i don de nyid mi bslu ba'i don du zhal gyi bdud rtsi dag gis rgyud yongs su smin par byas te de dag la sbyar bar bya'o/ /de yang ji ltar bsgrub par bya zhe na/ gi sa ra ni su'i ha zhes bya ste/ tshan+do ha dang nye ba'i tshan+do ha'o/ /de dag gi don ni yang rgyud de nyid las/tha mal shes pas brgyan pa tshan+do ha/ /de nyid goms par gyur pa nye bar mchog /ces 'byung ba'i phyir/ bla ma las thos pa'i don de dag tha mal gyi shes pa nyams su myong bar byas shing dus thams cad du goms par byed pa ste de dag tu sbyar bar bya'o/ /de dag kyang gang dang ldan par 'grub ce na/u Ni la ma ha po ti ha ra Ni zhes bya ste/ gnas dang nye ba'i gnas so/ /de nyid gsal bar bya ba yang rgyud de nyid las/ snang srid bde chen bla ma dran pa dang / /sems nyid bla ma mchog ste gnod mi byed/ /gnas dang nye ba'i gnas la rnyed nas kyang //skad cig gcig la rdo rje chos kyi sku/ /zhes 'byung ba'i phyir dus rtag tu bla ma mi brjed par bya ba dang / snang srid thams cad chos kyi sku gnyug ma'i ngo bo nyid du rtogs par bya ba ni gnas so/ /dus rtag tu sems nyid bla ma dam pa'i tshul du bkur bar byed cing sems la mi gnod pa'i lam gyis dus thams cad du chu bo lta bur sems chos kyi skur gzhag pa ni nye ba'i gnas so//de dag kyang ji lta bu'i tshul du bcas par bya zhe na/ ka na to pi ha'i na ra te 'du ba dang nye ba'i 'du ba'o/ /de yang rgyud de nyid las/ gsal dang mi rtog bde ba dang //dbyer mi phyed kyi de nyid ni/ /spyod lam bzhi la khyad med pa/ /goms pa'i gnas te 'du ba'o/ /dur khrod grong khyer tshogs rnams su/ /'jigs pa med par rgyu byed cing / /chags pa med par slong mo byed/ /kha T+wAM 'dzin cing mu cor smra/ /'di ni nye ba'i 'du ba ste//dam pa rnams kyi lam yin no/ /zhes bya ba'i don ni/ zhing kun gnas dang nye ba'i gnas dang tshogs su zhes sbyar ro/ /phyin te zhes bya ba ni go rims de nyid kyi tshul lo/ /bltas pas zhes bya ba ni de dag gi tshul ma nyams par nyams su blangs pa'o/ /de nyid kyis chos kyi sku gnyis su med pa'i ye shes kyi de kho na nyid rtogs par 'gyur ro zhes rje btsun pa dag gis gsungs so//de nyid bla ma dam pa'i lung dang dran pa rgyun chags kyis gnyug ma'i mu nas bzung ste/ ci snang chos kyi sku phyag rgya chen por ngo bor snang ba'i tshe de ni thun mong ma yin pa'i dge bar yang dag par mngon par shes pas nges par gzigs so//de dag la rgyu 'bras kyi tshul du 'thob par 'gyur ba yod dam zhe na/ nga yis zhes bya ste rje btsun pa dag gis kyang de nyid mi srid pa'i phyir ro/ /rmi lam du yang mthong ba med do/ / dngos su rgyu 'bras kyi tshul du 'byung bar lta smos kyang ci dgos/ 'o na 'bras bu de dag 'thob par 'gyur ba ma yin nam zhe na/ lus kyi ri bo'i khrod du tha mal gyi shes bas rnal 'byor ba gnas te/ dran pa rgyun chags kyi bag yod par byos shig ces pa'am/las dang po pa rnams kyi ri bo dang dgon pa dang chu 'gram dang dur khrod du gnas te spyod lam thams cad du de kho na nyid las mi g.yengs par bag yod par byos shig dang rtog pa'i skad cig de nyid las sangs rgyas par 'gyur ro/ /da ni gnyug ma'i don de nyid kyi rten mtshon par bya ste//'dab ldan pad sdong ge sar gyi dbus na/ /shin tu phra ba'i rnal ma'i kha dog ldan/ /bye brag bor cig rmongs pa mya ngan gyis/ /gdungs pa 'bras bu med par ma byed cig /ces bya ba'i don ni/ 'dab ces bya ba ni sha brtsegs pa'i 'dab ma ste/de dang ldan pa ni keng rus kyi rus pa'i tshogs so/ /pad ces bya ba ni mdangs nye bar 'dzin pa ste khrag go/ /sdong zhes bya ba ni lus brtan par byed pa ste/ rtsa'i rgyal po a wa d+hU tI la sogs pa'i nang na gnas pa'i byang chub kyi sems so/ /ge sar zhes bya ba ni 'khor lo rnam pa drug gi 'dab ma'o//de dag gi dbus na gnas pa'i thig le ste snying ga chos kyi 'khor lo'i dbus na gnas pa na rtog pa med pa'i thig le'o/ /de yang bsam gyis mi khyab pa'i rgyud las/ /sha yi 'dab ma yongs su rdzogs pa'i nang / /keng rus tshogs kyis yongs su gang bar byas//'dab ma khrag gi mdangs kyis drod 'dzin te/ rtsa brtsegs sdong bo'i tshul du nges par gnas/ /ge sar 'khor lo drug ni rnam par bkram/ /sdong po byang chub sems kyi lus bstan te/ /chos kyi 'khor lo'i dbus na thig le mchog /shin tu phra ba rnal ma'i kha dog ldan//zhes 'byung ba'i phyir rtog pa med pa'i thig le de dag ni gnyug ma'i de kho na nyid skyed par byed de/ de dag ni shin tu brtags dka' ba'i phyir zab cing phra ba'i rnal ma ste/ rgya mtsho lta bu'o/ /de yang tha mal gyi shes pa gsal ba dang mi rtog pa dang bde ba dang nyams su myong bar byed pa ste chos kyi sku nyid yin pa'i phyir rnal ma'i kha dog dang ldan zhes bya'o//de nyid kyi ngo bo nyams su myong ba la ni re dogs gnyis 'dzin/ blang dor gyi rnam pa yod pa ma yin te/ 'bras bu thams cad kyi mchog go/ /de bas na tha dad bye brag bor cig de ci'i phyir zhe na/tha dad kyi rtog pas bsgribs pa'i rmongs pa de dag la 'khor ba'i mya ngan gyis gdungs pas sdug bsngal bar 'gyur te/ de kho na nyid kyi 'bras bu med par ma byed cig ces bya ba'i don to/ /da ni spyi dang mtshungs pa'i dpe brjod par bya ste/ gong du/ tshangs pa khyab 'jug mig gsum pa//'jig rten ma lus zhi bar 'gyur/ /zhes pa/ rigs med dag la mchod gnas las kyi mtha'/ /rtog pa de nyid yang dag zad par 'gyur/ /zhes bya ba'i don ni/ gnyug ma'i de kho na nyid ma yin pa'i phyi rol pa dag gis kyang 'di dag dang nye bar mtshungs par gyur kyang don med par 'gyur ro//des kyang ci zhe na/ gang du zhes bya ba ni phyi rol ba rnams kyi rigs so/ /tshangs pa khyab 'jug mig gsum pa/ /zhes bya ba ni lha dbang phyug chen po'i rten la bya'o/ /de dag gi smra ba'i tshul ni lha chen po dag la mchod pa phul nas de dag mnyes par gyur bas/'jig rten ma lus thams cad zhi ba mya ngan las 'das par 'gyur ro zhes bya ba ste/ 'bras bu rdzogs pa'i sangs rgyas kyi rigs med pa de dag la mchod pa la/ las kyi mtha'i rtog pa de nyid zad par 'gyur zhes te 'gyur ba ma yin te don med do//de bas na bdag dang gzhan du 'dzin pa thams cad kyang tha dad du rtogs pa'i phyir de dang mtshungs pa nyid do/ /de ni mi mthun pa de nyid dper bsgrub par bya ste/ gang du zhes bya ba'i rnal 'byor ba gang gis so/ /tshangs pa zhes bya ba ni tha mal gyi shes pa ste de dag la rtogs pa'i skyon gyis ma gos pa'o//snang grags kyi chos thams cad la de'i ngo bos khyab pa'o/ /bla ma dam pa dag gis bstan pa de nyid la 'jug par nus pa na gsal ba dang mi rtog pa dang bde ba'i mig gsum dang ldan pa ste/ de ltar rtog pa na 'jig rten gyi rnam par rtog pa thams cad ma lus par zhi bar 'gyur ro zhes pa ni bla ma dam pas gdams pa'o//de dag la rigs med da ci yang ma yin pa'i phyir ro/ /de dag la snang grags kyi chos thams cad la mchod par phul te/ gnyug ma'i ngo bo nyid la gnas na las kyi mtha'i rtog pa thams cad de nyid du yang dag par zad par 'gyur ro//da ni rtogs par dka' ba'i gdams ngag la rag las pa bstan par bya ste/ kye ho bu nyon mchod pa'i tshogs dang bya ba mang smra dang / /yang dag gnas shes pa zhes zer ba ste/ /'gro ba mchod cing 'don pa la sogs pas//de ni shes par nus pa ma yin no/ /zhes bya ba'i don ni/ dam pa rnams kyi gdams ngag gdams par bya zhing tha snyad tsam du don du gnyer bar mi bya ste/ de dag la gdams pa'i don ni/ bu zhes pa ni khams gsum pa rnams la bos nas yang dag pa'i don la gzhol ba la dgod pa'i phyir nyon zhes bya'o//mchod pa'i tshogs dang zhes bya ba ni bdun rnam par dag pa'i bsod nams kyi tshogs bsags pa la sogs pa'o/ /bya ba mang po smra dang zhes bya ba ni don chung ngu dang don med pa'i bstan bcos 'chad pa dag go/ /yang dag gnas zhes bya ba ni rmongs pa'i bsam gtan pa dag ste/'gro ba tha snyad kyi brjod pa dag 'chad cing pha rol po 'don pa la sogs pas bla ma dam pa'i gdams ngag dang bral ba'i phyir/ de kho na nyid kyi don de ni shes par nus pa ma yin no/ /de bas na yang dag pa'i don las ma yengs shing ji bzhin pa'i don de nyid la bsgom par bya'o//da ni snying po'i don de nyid du rtogs pa'i dka' ba bstan par bya ste/ kye ho bu nyon de nyid sna tshogs kyi/ /ro 'di bstan par brjod pa ma yin te/ /bde ba'i gnas mchog rtogs pa spangs pa ni/ / 'gro ba nye bar skye ba ji bzhin no/ /blo ni rnam 'gag yid ni rang zhi bas/ /gang du mngon pa'i nga rgyal 'chad pa ni/ /sgyu ma'i rang bzhin mchog tu rtog pa ste/ /de bas bsam gtan 'ching ba des ci bya/ /dngos por skyes ba mkha' ltar rab zhi na/ /dngos po spangs na phyi nas ci zhig bya//de ring dpal ldan mgon pos bstan pa yis/ /dbye ba rnam spangs de la gnas par byos/ /zhes bya ba'i don ni/ brjod par dka' ba'i don de nyid la gdams pa'i phyir kye ho zhes bya'o/ /bu nyon zhes bya ba ni smos pa kho nar zad do/ /de nyid ces bya ba ni rang bzhin gnyug ma ji lta ba la bya'o//de nyid sna tshogs kyi ngo bor snang ste bde ba chen por gyur pa'i ro 'di cir yang grub pa med pa'i phyir rje btsun pa rnams kyis kyang brtan par brjod pa ma yin te/ bde ba chen po rang bzhin rtog pa dang bral ba'i gnas ni tha mal gyi shes pa nyid do//de nyid goms shing mchog tu gyur pas ni/ /rtog pa ma lus pa thams cad spangs pa'o/ /de dag ni 'gro ba dag nye bar skye ba ji bzhin pa ste byis pa dang / gzhon nu dang lang tsho la bab pas stobs yongs su rdzogs par 'gyur ba bzhin du de nyid kyi don 'di dag kyang mthong ba dang myong ba dang rtogs pa dang mthar phyin pa las chos kyi sku'i stobs yongs su rdzogs nas sprul pa'i sku dang longs spyod rdzogs par 'gyur ro//skyes bu dag gi rtogs pa la blo gtad de spros pa'i g.yeng ba ni rnam par 'gags nas yid ni mi rtog pa 'ba' zhig la rab tu zhi bar 'gyur ba'i 'jig rten pa'i gnas gang du gnas shing 'dug pa de dag tu bdag ni bsam gtan pa yin no zhes mngon pa'i nga rgyal 'chad pa de ni sgyu ma'i rang bzhin snang yang med pa tsam mchog tu rtog pa ste/de dag la gnyis 'dzin gyi rnam pas zhen pa 'khor bar 'khor zhing sdug bsngal 'ba' zhig gi rgyu byed pa ste/de bas na bsam gtan gyi 'ching ba des ci zhig bya'o/ /de dag gi don ji ltar yin zhe na/ dngos por snang zhing skyes pa de dag thams cad sems nyid nam mkha'i ngo bo lta bu las ma 'das pa yin te/de ltar ngo bo gcig pa de dag lhan cig skyes pa'i ye shes kyis rab tu zhi na dngos po thams cad bde ba chen po'i chos sku ste/ de dag spangs nas gzhan zhig nas de bzhin nyid 'thob pa ma yin pa'i phyir dngos po'i rnam par 'khrul bar brtags nas phyi nas de ma yin pa'i ye shes skye zhes pa ni don med de log pa yin pa'i phyir des ci zhig bya'o//bdag nyid skal pa dang ldan pa'i dus de ring yin pa'i tshe/ dpal ldan sangs rgyas dang bla ma dam pa'i mgon pos bstan pa'i don yid la byar med pa de dag la nges pa'i sgo nas nyams su myong na/dbyer med pa ni rnam pa thams cad ro gcig ste shugs kyis spangs pa'i don de la gnas par byos shig ces bya ba'i don to/ /da ni rnal 'byor gyi spyod lam bstan par bya ste/ mthong dang thos dang reg dang dran pa dang / /zas snom pa dang mtshan na gnas pa dang //cal col gtam dang lan smrar gyur pa la/ /sems so zhes ni gcig gi ngo bo dang / /rnal ma de bzhin rnam pa la mi 'da'/ /zhes bya ba'i don ni rnal 'byor pa dag gis 'dod pa'i yon tan mi dgag cing longs spyod par bya ste/ de dag kyang ma zhen pa'i tshul du chos kyi sku gnyug ma'i rang bzhin du shes par bya'o//de yang mig dang rna ba dang sna dang lus dang yid dang lce la sogs pas mthong ba dang thos pa dang reg pa dang dran pa dang zos pa dang snom pa thams cad chos kyi sku bde ba chen po'i rang bzhin dang de bzhin nyid kyi sgra dang /ci yang ma yin pa'i reg bya dang / dbyer mi phyed pa'i dran pa dang / gnyis su med pa'i ro dang / tha mal gyi shes pa'i dri dang / de dag thams cad kyang sems nyid du longs spyad par bya'o/ /mtshan na gnas pa dang zhes bya ba ni rnam par rtog pa ste phyi nang gi byung tshor thams cad la dran pa de bzhin nyid du shes par bya'o//gzhan dag chags pa dang zhe sdang dang btang snyoms kyi cal col gyi gtam dang bya ba dag la yang de bzhin nyid du shes par bya'o/ /bdag nyid kyi lan smra bar gyur pa la yang sems so zhes ni gcig gi ngo bo dang rnal ma'i de bzhin nyid kyi rnam pa las mi 'da' bar bya'o//da ni bla mas bstan pa'i don la 'bad par bya ba bshad de/ gang zhig bla ma'i man ngag bdud rtsi'i chu/ /gdung sel bsil ldan ngoms par mi 'thung na/ /de ni bstan bcos don med mya ngan gyi/ /thang la skom pas gdungs te shi bar zad//ces bya ba'i don ni/ skal ba dang ldan pa'i gang zag skyes pa dang bud med kyi ngo bor snang ba gang zhig gis 'bras bu khyad par can thob par byed pa'i bla ma dam pa dag gis don nye bar 'dzin pa ste man a sa ra zhes bya'o/ /de dag gi don ni shes rab dang snying rje'i bdag nyid 'brel pa ste gnyis med kyi ye shes de kho na nyid do//de dag ni dam pa'i dag las shes par bya ba nyid do/ /de dag gi mi mthun pa'i phyogs sangs rgyas kyi ye shes bdud rtsi ma rungs par byed pa'i rtsir gyur pa ste dper na chu lta bu'o/ / de dag gis ni nyon mongs pa'i than pas gdungs pa'i gdung ba sel cing bde ba chen po'i bsil dang / ma bcos pa dang ba'i don gnyis su med pa'i tshul gyis ngoms par mi 'thung ba de ni 'jig rten pa'i bstan bcos don med pa sdug bsngal gyi khang bu de dag la gnas pas 'khor ba'i mya ngan gyi thang la bde ba chen po'i skom gyis shin tu gdungs te/rnam par rtog pa la sogs pas bskyed pa'i gnas su de kho na nyid shes par zad do/ /da ni don de kho na nyid bstan par bya ba'i thabs bshad par bya ste/ bla mas bstan pa mi shes na//slob mas go bar yod min te/ /lhan cig skyes pa bdud rtsi'i ro/ /gang zhig ji ltar bsten par bya/ /zhes bya ba'i don ni bla ma dam pas bstan pa'i thabs ni tha mal gyi shes pa ste/ mi shes pa bstan pas na mchog go/ /slob mas rtogs pa'i bdag nyid kyang go bar bya ba yod pa ma yin te/min pa nyid ni rtog pas bdag nyid yongs su dag pa'o/ /de nyid yin nam zhe na/ yin du med pa yin te/ lhan cig skyes pa'i bdud rtsi'i ro ni sems nyid ma bcos pa rnal ma ste gang zhig yin min no/ / min pa'i don de nyid ji ltar bstan par bya ste bstan pa med do/ /dam pa dag gi gdams ngag las 'byung ba ni bla ma dag gis tha snyad dpag tu med pa brjod cing de kho na nyid go bar ma nus na bstan par mi shes pa nyid do/ /de lta bu'i zug rngus slob mas go ba dang rtogs pa yod pa yin to//de bas na lhan cig skyes pa'i ye shes kyi bdud rtsi'i ro 'di dag ni gang zhig ji ltar bstan par bya zhe na/ des par byas shing tha mal gyi nyid do/ /da ni de ltar ma rtogs pa dag gi skyon bstan par bya ste/ gal te tshad mar 'dzin pa'i dbang gis su//blun pos bye brag rnam par 'byed pa ste/ /de tshe de ni gdol pa'i khyim du rol/ /'on kyang de la dri mas mi gos so/ /zhes bya ba'i don ni/ gal te'am brgya lam na rtog ge pa'i gang zag dag gis rjes dpag tshad mar 'dzin pa'i dbang gis su rtog pa de dag gis gnyis med kyi ye shes dkrug pa'i phyir blun pa ste/de'i tshe de ni gdol ba'i de ci'i phyir zhe na/ bdag gzhan gyis bye brag rnam par 'byed pa ste/ dper na bram zes gang gi tshe gtsang ma bcas pa de'i tshe gdol pa'i khyim du rol pas skyon dang bcas pa bzhin no/ /rnal 'byor pa brtul zhugs kyi spyod pa la zhugs pa dag gam gdol pa dag gis de nyid kyi khyim du 'ongs kyang de la skyon gyi dri mas mi gos rigs so//da ni nan tan dang bcas pa the tshom med par bsgrub pa bstan pa ni/ gang tshe slong pa srang kha'i kham phor gyis/ /bdag nyid rgyal po slar yang ci byar yod//mya ngan 'das pa la gnas srid par mdzes/ /nad gzhan dag la sman gzhan gtang mi bya/ /bsam dang bsam bya rab tu spang nas su/ /ji lta bu yi tshul la gnas byas shing / /bla ma'i lung la bsgrims te gus 'bad na/ /lhan cig skyes pa 'byung bar the tshom med//ces bya ba'i don ni gang gi tshe/ grong khyer pa dag gi rigs ngan gyi spyod pas rgyu ba na slong ba'i zas kyi bya ba byed pa'i srang khar bor ba'i kham phor gyi dum bu dgos pa yin gyi de dag gis bdag nyid rgyal por gyur pa'i mthus bsod nams kyi bdag nyid yongs su dag pa dag rnyed pa'i phyir zas kyi bya ba byas zin pa de bor ba'i kham phor gyi dum bu de dag gis bdag nyid rgyal po la slar ci yang byar yod de med do//de bzhin du tha snyad kyi rtog pa'i bdag nyid kyis brtags pa'i las dang bya ba dag gis bde ba chen po'i ro dang bral ba'i phyir rmongs pa'i spyod pas rgyu ba dag la 'khor ba'i bde ba cung zad tsam bskyed pas dgos pa ste/bdag nyid re ba dang dogs pa dang bral ba'i don de kho na nyid rtogs nas tha snyad kyi rnam par gzhag pa ni mi dgos te/ de ni zug rngu yin pa'i phyir de ltar rtog pa de dag ni mya ngan las 'das pa la gnas pa ste/de nyid gzhan du ma brjod cing srid par mdzes pa'o/ /de la gzhan du brjod par ni mi bya ste/ dper na nad gzhan te tsha ba lta bu dag la sman gzhan te tsha ba btang bar mi bya ste rnam par rtog pa'i nad dag la tha dad kyi rtog pa gzhag par mi bya ba nyid do/ / de dag ji ltar gzhag par bya zhe na/ bsam pa dang bsam bya'i gnyis 'dzin gyi rtog pa rab tu spang nas su/ sems rnal ma ji lta bu'i tshul du gnas par bya zhing sems ma bcos pa bla ma'i mchog dang snang srid bde ba chen po'i lus la dran pas bsgrims te spyod lam rnam pa bzhi'i tshul la ma g.yengs pa'i rnam pas gus par 'bad na lhan cig skyes pa'i ye shes 'byung bar the tshom med do//da ni ji ltar mtshon par mi nus pa bstan te/ kha dog yon tan yi ge dpe spangs nas/ /smra ru mi btub de ni gang gis mtshon/ /gzhon nu'i bde ba snying la zhen pa bzhin//dbang phyug bde ba rang bzhin med pa ste/ /de ni su la bstan par bya nus sam/ /zhes bya ba'i don ni tha mal gyi shes pa dngos kyi mtshan nyid de dag kha dog med de mtshan ma dang bral ba'o/ /yon tan med de re ba dang bral ba'o/ /yi ge med de brjod par bral ba'o/ / dpes mtshon par mi nus te bsgrub bya dang bral ba'o/ /de dag thams cad shugs kyis spangs nas don chen po de dag smrar mi btub pa ste/ de ni gang gis kyang mtshon par nus pa ma yin no/ /nyams su myong du yang yod pa ma yin nam zhe na/ bu mo lo bcu drug lon pa'i bde ba snying la zhen pa bzhin du myong du yod kyang brjod pa'i tha snyad kyis gtan la dbab pa yod pa ma yin no//de ltar rtogs pa de ni sa bcu'i dbang phyug dam pa ste de'i ngo bo ni rang bzhin med pa'o/ /de'i phyir de ni su la yang bstan par bya bar nus sam ste mi nus pa nyid do/ /da ni brtags pa'i brtag bya thim zhing de dang bral ba bstan pa ste/dngos dang dngos med yongs su bcad pa gang / /des ni 'gro ba ma lus rab thim 'gyur/ /gang tshe yid ni gcod pa med pa yi/ /mi g.yo brtan pa dran zhing gnas pa der/ /de ni 'khor ba'i dngos po rang grol 'gyur//gang tshe bdag gzhan yongs su shes med na/ /de tshe bla ma'i lus su 'grub pa nyid/ /de ltar brtan pa nyid la nges rtogs par/ /ma 'khrul pa yi ngo bor rdzogs sangs rgyas/ /rang gi rang la rig par shes par bya/ /dngos dang zhes bya ba'i don ni bems po'i rnam pa dag go//dngos po med pa ni rig pa'i rnam pa'o/ /bems rig rnam pa gnyis yongs su bcad pa gang yin pa de nyid do/ /de ltar rtogs pa'i ngang der ni rnam par rtog pa las 'byung ba'i 'gro ba ma lus pa rab tu thim par 'gyur ro/ /gang gi tshe rnal 'byor pa'i yid ni bcos pa med pa'i bdag nyid yongs su rdzogs pa med pa de'i tshe phyi nang gi rnam par rtog pas mi g.yo ba dang /de kho na nyid klong du gyur pa bstan pa dang spyod lam rnam pa bzhi khyad med pa rang bzhin gyis gnas pa der de'i tshe 'khor ba'i dngos po thams cad rang grol bar 'gyur ro//de ltar nyams su myong ba'i rtags ni bdag dang gzhan du rtog pa yongs su shes pa med pa ste/ de ltar rtogs na bla ma chen po'i lus su grub pa nyid do/ /de ltar bla ma dam pas bstan par nges par rtogs nas ma 'khrul pa'i ngo bor mngon par rdzogs par sangs rgyas pa nyid do//de yang gzhan la rag las pas go ba ma yin te/ rang gi sems nyid kyis rang gi sems nyid la bstan la legs par shes par bya ba nyid do/ /da ni ji ltar yang ma yin pa bstan par bya ste/ rdul med rdul bral ma yin sems kyang min/ /dngos po de dag gdod nas zhen pa med//mda' bsnun gyis smras de tsam zhig tu zad/ /kye ma ma lus dri med don dam shes par byos/ /zhes bya ba'i don ni de kho na nyid gnyug ma'i ngo bo la rnam par rtog pa'i rdul med do/ /rdul de dang bral ba ma yin no/ /snang ba dang sems kyang ma yin no/ /'di ltar snang ba'i dngos po'o//'di dag ni gdod ma nas zhen pa med pa nyid do/ /de ni ci yang ma yin pa'i don nyams su myong bar nus so/ /bdag ni rang bzhin gyi mtshon cha can te mda' bsnun gyis smras de tsam zhig tu zad/ de bas shin tu ngo mtshar ba'i don de kye ho zhes bya'o/ /de dag kyang ci zhe na/snang ba ma lus pa ni lhan cig skyes pa'o/ /sems la ni dri ma med de de nyid do/ /lhan cig skyes pa'i ye shes ni don dam pa ste de dag shes par byos shig /da ni brtags pas mi rtog pa bstan par bya ste/ khyim na yod pa phyi ru song nas tshol/ /khyim bdag mthong nas khyim tshes dag la 'dri//mda' snun gyis smras bdag gis shes par byos/ /blun po'i bsam gtan bsam bya brjod pa min/ /gal te bla mas bstan cing rtog pas brtags/ /bden pa thams cad shes par byas gyur kyang / /de dag gis ni yongs su brtags pa na//de ma rtogs pas thar pa thob bam ci/ /yul nas bgrod cing gdung bas nyes byas kyang / /lhan cig skyes pa mi rnyed sdig par 'dzin/ /zhes bya ba'i don ni snang srid thams cad kyi khyim gyi bdag po ni gnyug ma'i sems te/ /des ni rang gi khyim na yod pa'o/ /de ltar na rtogs pa'i phyir phyi rol du song nas tshol lo//de ston par byed pa'i bla ma dam pa ni khyim bdag ste/ /des bstan pa'i zhal gyi bdud rtsi de dag mthong zhing myong nas 'bras bu dang don chen por 'gyur ba bor te/ khyim tshes pa lta bu'i phyi rol pa dang de dang mtshungs pa dag la 'dri'o//mda' bsnun gyis smras pa ni gzhan la drir yod pa ma yin te/ bdag nyid kyis bdag nyid las shes par byos shig /'di dag ni gti mug chen po yin pa'i blun po'i bsam gtan te/ bsam bya dang brjod bya min pas don de ston par byed pa'i tshig gis gtan la mi 'bebs shing ma 'brel ba'i phyir mi shes so//gal te blo dman pa dag gis bla mas bstan du yod pa bstan cing slob pa pos brtag tu yod pa'i rtog pas brtags pa'i gtan tshigs kyi sgo nas rnam par rtog pa'i bsam gtan la/ bden pa thams cad shes par byas gyur kyang de ni bdag dang gzhan du 'dzin pa dang ma bral ba ste/de dag gis yongs su brtags pas de ma rtogs so/ /ma rtogs pa'i don ni de nyid rtogs pa chen po ste/ de dag yongs su dor nas gzhan zhig rtogs pa'i thar pa bde ba 'thob pa'am ci ste mi 'thob po//de ci'i phyir zhe na/ rnam par rtog pas yul nas rtogs pa de nyid du 'khor te spang bya dang spong byed kyi sgo nas bgrod cing tshul khrims dang brtul zhugs kyi sgo nas gdung pas nye bar byas kyang lhan cig skyes pa'i ye shes mi rnyed de/de ci'i phyir zhe na/ rnam rtog gis sdig par 'dzin pa'i phyir ro/ /da ni dpe khyad par can gyis bstan par bya ste/ yul rnams bsten pas yul gyis mi gos te/ /ut+pal blangs kyang chu yis mi 'chags bzhin/ /'di ltar rtsa ba rlung gis skyabs su 'gro// rlung rnams de nyid yin pas zhi bar nus//zhi ba med de de nyid rtogs pas 'grub/ /rtogs dus grub pa med de tshig tu zad/ /dug gi sngags can dug gis ga la tshugs/ /lha la mchod pa khri phrag byin byas kyang / /brtags te 'bras bu gzhan du 'grub 'dod pas/ / de nyid bdag la 'bras bu de med de/ /bdag nyid 'ching 'gyur des ni ci zhig bya/ /de la goms pas grol bar mi 'gyur zhing / /de 'dres 'khor ba 'di 'dra 'chad min te/ /'dir goms ma rtogs ma lus rgal ma yin/ /mig ni mi 'dzums sems ni 'gags pa dang //rnam shes rlung 'gog pa ni bla mas rtogs/ /zhes bya ba'i don ni/ dper na 'jig rten pa dag gi shes pa ni chags sdang la mngon par zhen pa ste/ dbang po rnam pa lnga yul rnams la brten cing bltas pas yul gyis gos par 'gyur zhing / khyad par du zhen cing chags pas mi gos te mi 'bral bar 'gyur ba bzhin du snang srid thams cad bde ba chen po'i ros khyab pa'i phyir/de dag la tha mal gyi shes pas bltas shing brtags na khros par mi 'gyur te shin tu spro ba'o/ /de dag 'khor ba la chags pa'i skyon du mi 'gyur ram zhe na/dper na ut+pal chu'i nang nas blangs kyang chu'i nyes pas mi chags pa bzhin du de nyid kyang de'i ngo bo dang mtshungs so/ /rmongs pa dag gis rtsa byang chub kyi sems 'di dag rtogs pa'i rlung gis bcings te de dag gis skyabs su 'gro bar byed do/ / de ni ma yin te 'di dag gi tshul ni rtog pa dang rlung rnams kyis tha mal gyi shes pa de nyid kyi ngo bo yin pas de la gnas na ngang gis zhi bar nus so/ /zhi bar bya ba ni 'di skyon dang bcas pa'o zhe na/ zhi ba ni med de de kho na nyid rtogs pas 'grub pa'o/ /de dag kyang grub tu yod pa ma yin te/gnyis med kyi ye shes rtogs pa'i dus nyid la smras pa ste/ dngos po rang gi mtshan nyid la grub pa med de slob pa po'i blo la brjod par bya ba'i phyir tshig tsam du zad do/ /de dag la rtsod de 'khor ba ni zas dug can gyi rnam pa lta bu ste/ gnod pa 'ba' zhig byed pa'i phyir rtogs pa tsam gyis grub pa ni mi rigs so//de lta yin na ni sems can thams cad kyis kyang skad cig tsam rtogs su rung phyir sangs rgyas par thal lo/ /de ltar ma yin na ni chos kyi sku gnyug ma'i sems can gyi rgyud la yod ces par 'gal lo//med na ni ma thob par byed pa yin pa'i phyir 'khor ba yongs su dor ba las mya ngan las 'das pa thob par rigs so/ /de lta yin na ni sems can thams cad dka' thub dang dka' spyad kyis 'grub par 'gyur ro/ /de dag ni ngo bo gcig pa ni mi rigs te mun pa dang snang ba bzhin no//de bas na 'di dag skyon dang bcas par 'gyur ro zhe na ma yin te/ dper na dug gis sems can 'chi bar gyur kyang dug gi sngags can de dag dug gis gal tshugs te de de nyid sman du 'gyur ro/ /de bas na ngo bo gcig pa la 'gal ba med de/dug logs su song ba'am sman gzhan nas byung ba med de/ de nyid de'i ngo bor gyur pa bzhin rnam par rtog pa logs su dor zhing bde ba chen po gzhan nas thob pa ma yin te/ bla ma dam pa'i gdams ngag gis tha mal gyi shes pa nyams su myong bas de nyid de'i ngo bor gyur te/de bas sems can thams cad kyi rgyud las ye shes de kho na nyid gnas te de dag gi mthus skad cig ma nyams su myong srid kyang ji bzhin pa'i ma myong bas grol bar mi nus pa dag go/ /de nyid nyams su myong bas na skad cig ma de nyid la sangs rgyas par nus so//de ltar ma rtogs pa rnams kyis brtags pa'i lha la mchod pa lo khri phrag 'bum rnams su mchod cing / sems can thams cad la sbyin par byas kyang rnam par rtog pas brtags te 'bras bu logs su 'grub par 'grub par 'dod pa'i phyir ro//de nyid dang bral te brtags pa'i bdag la mngon par zhen pas chos kyi sku'i 'bras bu de med de mi 'byung ngo / /de bas na gnyis 'dzin dang bral ba de kho na nyid rtogs pa ste/ gnyis 'dzin dang bcas pa ni bdag nyid 'ching bar 'gyur ba'i phyir de yis ci zhig bya'o/ /de bas na de la goms pas grol bar yang mi 'gyur zhing /de 'dra ba'i spyod lam 'khor ba'i sdug bsngal 'di 'dra bar chad pa med do/ /'di la 'dis 'di nyid du 'dir goms par byas pas mi rtog pa'i rnam par rtog pa 'khor ba pa ma rtogs pa'i bdag nyid ma lus brgal dka' ba 'di dag brgal bar 'gyur ba ma yin no//ji ltar spyad pas 'gyur zhe na/ mig ni mi 'dzums te cir snang phyag rgya chen po'i bdag nyid dang / tha mal gyi shes pa nyams su myong bas sems ni ngang gis 'phags pa dang phyi nang gi byung tshor zhi bar 'gyur te/ skad cig ma de nyid la rnam par shes pa'i rtags rlung gi bdag nyid kyis 'gog pa tsam byed pa'i bla mas bstan pa'i bla ma chen po'i ngag las rtogs so//de ni 'du shes bcings pas mi grol bar 'gyur bar bstan par bya ste/ gang tshe rlung rgyu ba de mi g.yo ste/ /gang gi tshe na 'ching bar ci byar yod//ces bya ba'i don ni dus gang gi tshe bla ma dam pa de nyid dang bral ba'i tshe rnam par rtog pa bkag ste/ steng 'og gi rlung rgyu ba bkag ste/ de rtog pa la mi g.yo ste/ mi rtog 'ba' zhig la gnas pa'i phyir bsgom bya dang sgom byed du rtog cing thabs dang 'bras bu thob par 'dod pa gang gi tshe na 'ching bar 'gyur te de dag gi tshe ci byar yod do//da ni de nyid du shes pas grol bar 'gyur ba bstan par bya ste/ ji srid dbang po yul la lhung pa dang / /de srid rang nyid las ni rab tu rgyas/ /khyed cag ci byed da lta sems la ltos/ / gar 'gro sems dang kye'o dpa' bo rnams/ /de ni shin tu dga' ba'i dgongs pas bzhugs/ /gang zhig gang na gnas pa'i mi rnams ni/ /de srid rang nyid de yis ma mthong ste/ /mkhas pa thams cad bstan bcos 'chad pa yis/ /lus la sangs rgyas yod pa ma rtogs so//zhes bya ba'i don ni rnal 'byor pa dag gis ji srid dbang po'i yul la lhung zhing zhen pa na de srid du snang ba la sogs pa de thams cad rang bzhin gyi sems nyid las ni rab tu rgyas par shes par bya'o/ /de ltar snang grags thams cad sems gnyug ma'i ngo bo yin pa'i phyir/khyed cag gis sems rang bzhin gyis gnas pa de dag de lta ci byed de mi byed do/ /byed na sems la ltos shig dang ngo / /de dag gar 'gro sems dang steng 'grongs med do/ /de ci'i phyir zhe na/ de nyid kyi ro yin pa'i phyir/ de bas kye ho rnal 'byor pa'i dbang po rnams rang bzhin gyis sems dag pa de ni shin tu dga' ba'i dgongs pas de nyid la zhugs par bya'o//skyes pa dang bud med gang zhig rnam par rtog pa'i gnas gang na gnas pa'i mi rnams ni de kho na nyid rang la gnas pa de ma mthong ste/ de thams cad ni rmongs pa nyid du zad do//de bas na tshig dang tha snyad la mkhas pa thams cad bstan pa'i chos kyi bye brag ma lus pa 'chad pa'i rang bzhin gyi lus la chos kyi sku'i sangs rgyas yod pa ma rtogs so/ /da ni dal ba dang bde ba'i dpe'i sgo nas bstan par bya ste/ glang chen lo bas nas sems tshags tshud pa ni//de ni 'gro 'ong bcang nas ngal ba ste/ /de ni 'di ltar rtogs so chos ci dgos/ /zhes bya ba'i don ni lum pa'i tshal na khyim bdag ag sho dan la glang po che pa tro ta zhes bya ba shin tu smyo ba zhig yod pa la/ de dag btul ba na las dang bya bya ba la dge ba dang ldan par bya ba'i phyir/zhi bar 'dod pa las de ltar ma gyur te/ de dag 'ong ba dang 'gro ba dang gnas pa dang / rtswa za ba dang chu 'thung ba dang / 'tsho gnyer byed pa'i dus su shin tu sdug bsngal bar 'gyur te/ 'tsho bas stobs zil gyis mnan par ma nus shing bdag nyid shin tu ngal bar gyur te 'tsho ba dang bral ba'i sdug bsngal gyis gdungs par gyur to//de nas bat+sa'i bu ga ya mgo zhes bya bas smras pa/ kye stobs chen glang po 'di dag btsongs na bde/ /bya ba'i las dang ngal ba rnams dang bral//'chi bar byed pa'i rkyen gyis gnod pa min/ /dge ldan zhi bar 'dod pas de mi thul/ /de ltar ma gyur ku sha'i rtsa nyid la/ /re ba ma skyes yangs pa nyid du thong / /zhes nas glang po che de tshong 'dus su btsongs so/ /de lob par gyur nas sems tshags su tshud pa na de ni 'gro bar yang mi byed 'ong bar yang mi byed ngal zhing dub par yang mi 'gyur 'tsho ba dang bral ba'i sdug bsngal rnam par bcad nas ngang gis dal ba ste bde ba dang ldan no//de nas smras pa/ kye kye bdag ni shin tu bde dang ldan/ /bde 'dod glang chen dag gis sdug bsngal 'gyur//glang chen btang bas dal ba'i mchog dang ldan/ /kun kyang bya ba btang na bde bar 'gyur/ /zhes bya ba ni khyim bdag ma ga ta na zhes bya bas thos nas rang gis rang nyid la bsam pas thos nas bdag gi sems ni glang po che smyon pa lta bu ste/'di dag btul ba las dge ba dang ldan par yang ma gyur te thul ba yang ma yin pa'i phyir/ btsong bar bya ba'i yul ni bdag gis mi rnyed de 'di ni gar dgar gtang bar bya'o zhes lhod de bsdad pas sems de dag 'gro bar yang mi byed/ 'ong ba yang mi byed/ gnas par yang mi byed/ 'dzin rtog byung tshor gyi rnam pa rang gis 'gags te bde ba chen po ci yang ma yin pa'i rang bzhin shin tu rtogs so/ /de nas de dag gis dur khrod chen po keng ri ya na zhes bya bar phyin te/ rnal 'byor pa'i tshogs la smras pa/dpa' bo rnams kyis gdams ngag stsal du gsol/ /bdag la byin gyis brlabs shing gnang bar mdzod/ /khyed ni chos sku'i bdag nyid stobs dang ldan/ /rmongs pa dag gi sgrib pa dag par mdzod/ /ces pa dang rnal 'byor pa rnams kyis de la smras pa/chos nyid dam pa'i ye shes de dag ni/ /'di ltar khyod nyid kyis ni shin tu rtogs/ /rtogs so zhes ni smra ru med pa'i don/ /'di dag nyams su myong bas chos ci dgos/ /zhes nges pa'i shes pa skyes pas skad cig ma de nyid la grol bar gyur to/ /de bas na blo dang ldan pa dag gis de bzhin nyid shes par bya'o//da ni chags pa dang bral bas 'bras bu mi 'gyur ba bstan par bya ste/ de ltar ngo tsha med smra mkhas pa de/ /gson po gang zhig rnam par ma gyur pa/ /de ni rgas shing 'khogs par 'gyur ram ci/ /bla mas bstan pa'i dri med blo gros ni//de nyid gter yin gzhan yang gang yin lo/ /yul nyid rnam par dag pa rten yang min/ /stong pa 'ba' zhig gis ni bshad par bya/ /zhes bya ba'i don ni/ de ltar gong du smos pa'i tha mal pa'i shes pa rang gi mtshan nyid de dag dogs pa dang 'jigs pa dang ngo tsha ba med de smra ba ni mkhas pa nga zhes bya ba ste/rje btsun pa ri bo ba nyid do/ /de dag kyang ci zhe na/ shes pa som ma bcos pa gson po'i tshul de dag nyams su myong bas lus dang sems bde bas gang zhing stong pa rgyas de nyid zhi bar byed de/bde ba dang stong pa dbyer med pa'i rnam pas mnyam pa nyid kyi don las ma gyur pa de ni rtogs mi ldan pas rgas par yang mi 'gyur te/ 'khor bar mi ltung ba nyid kyis 'khogs par yang ma yin te sdug bsngal gyi rnam pas 'gyur ram ci ste 'gyur ro/ / de ltar bla mas bstan pa'i don de kho na de bzhin nyid la ni dri ma med de/ de dag ni blo gros kyi mthar thug pa'i shes rab kyi de bzhin nyid do/ /de nyid zad mi shes pa'i gter yin te de las gzhan pa'i gter gang yin lo ste med do/ /yul dang yul can du rtog pa dag ni de nyid rnam par dag pa'i ye shes yin no zhes pa brjod kyang /de kho na nyid kyi rten tsam du yang mi rung ste yin no/ /de dag kyang ci zhe na/ stong pa nyid la stong pa nyid 'ba' zhig gis de nyid ni bshad du med pa'i tshul gyis bshad par bya'o/ /da ni rtogs pa'i sems pha rol tu phyin pa drug gi ngo bor snang pa bshad par bya ste/dngos po ma chags sems su shes pa dang / /shes pa brda ru grags kyi de nyid tshul/ /tshul khrims de nyid ngo bor srung byed cing / /ngo bo tsam du rtog med snying po che/ /sems kyi rdo rje nang du khro 'joms te//rlom med rdo rje mkha' la gnod mi 'gyur/ /sems nyid rang bzhin dal dang myur min yang / /rtog pa bsal phyir cho 'phrul myur du brtsam/ /rang bzhin sangs rgyas lhan cig skyes pa ste/ /rtogs par byed pa mnyam gzhag tshul du bya/ /bla ma'i man ngag mtshon cha shes rab ste//rtogs nas rnal mar sbyor bar rdzogs sangs rgyas/ /zhes bya ba'i don ni/ dngos po snang grags kyi chos thams cad la ma chags pa ni sbyin pa ste/ de nyid sems su shes pa ni pha rol tu phyin pa'o/ /de dag gis shes su yod dam zhe na/ shes pa de dag slob pa po'i blo la brda tsam du zad kyi don la sems ma bcos pa de kho na nyid kyi tshul lo//sbyin pa rnam pa de nyid la tshul khrims su brjod par bya ste/ de yang sems can la gnod pa'i las mi byed pa dang / de yang de nyid kyi ngo bor srung bar byed cing ngo bo tsam du yang rtog pa min te/don la ni snying po'i don che ba'i bdag nyid do/ /de nyid ngo bo de dag bzod pa bsgom par bya ste/ sems chos kyi sku rdo rje gnyug ma de dag gi ngang du bdag gzhan gyi khro ba rnam par 'joms te/ de la yang rlom sems med pa'i rdo rje ste/ nam mkha' dang 'dra ba'i phyir de la gnod pa mi 'byung ngo //de nyid kyi ngo bor brtson 'grus brtsam par bya ste/ sems nyid kyi rang bzhin ni dal ba dang myur ba gnyis ka rtag tu mi 'dod pa yin yang ma rtogs pa rnams kyis rtog pa bsal bar bya ba'i phyir dang / rtogs pa gdeng du gyur par bya ba'i phyir bsod nams kyi tshogs nyi ma'i zer lta bu'i cho 'phrul myur du brtsam par bya'o//de nyid ngo bor bsam gtan la mnyam par gzhag par bya ste/ sems nyid rang bzhin gyi sangs rgyas lhan cig skyes pa'i ye shes ye nas gnas te de dag las sangs rgyas su med kyang bla ma'i gdams ngag nye bar bstan pa'i don rtogs par byed pa'i bdag nyid la mnyam gzhag gi tshul du bya'o//de nyid ngo bor shes rab bsgom par bya ste/ bla ma'i gdams ngag mtshon cha dam pa de dag gis bdag gi rnam pa yongs su gcod par byed pas na shes rab ste/ slob pa po'i blo la de dag rtogs nas don dang rtogs don rnal 'byor pa ni mngon par rdzogs par sangs rgyas pa ste chos kyi sku'o//de ltar sbyin pa dang tshul khrims dang bzod pa dang / brtson 'grus dang bsam gtan dang / shes rab mthar thug pa'i ngo bo de dag chos thams cad 'dus pa'i tshul du bshad par bya ste/ji ltar gzings la 'phur ba'i bya rog ni/ /bskor zhing bskor zhing slar yang de ru 'bab/ /ces bya ba'i don ni rin po che len par 'dod pa'i phyir rgya mtsho'i steng du gzings bcas te/ rig pa'i ltas brtag pa'i phyir bya rog dag bzung ste 'o mas brid nas 'dzin bam gyi rnga yab phyar te bya rog de dag 'phur ba las gzhan du 'gro bar mi 'gyur te/bskor zhing bskor zhing slar la gzings kyi gnas de nyid du 'bab pa bzhin du/ bla ma dam pa'i gdams ngag rgya mtsho lta bu'i steng du chos kyi sku'i nor bu thob par bya ba'i phyir/ tha mal gyi shes pa'i gzings bcas nas snang srid phyag rgya chen po'i skur btags pa'i phyir dran pa rgyun chags kyi don 'o ma lta bu la blo brid de shes par bya rog gar dgar yan du bcug pa las slar la bskor zhing slar de nyid kyi ngo bor babs so//da ni 'dod pa'i yon tan la chags pa de bzhin nyid kyi dper sbyar bstan par bya ste/yul la zhen pas 'ching bar ma byed cig /kye ho rmongs pa mda' bsnun gyis smras pa/ nya dang phye leb glang chen bung ba dang / /'di ni ri dgas bzhin du lta bar byos/ /mchil pa ro la chags bzhin myang ba dang / /reg bya bde la dang por gnas pa'i tshul//stong pa dri yis khyab par bya ba ste/ /sna ma'i me tog rab tu dang pa dang / /dbyer med glu la myur du rgyug pa'i rigs/ /zhes bya ba'i don ni rnal 'byor pa 'dod pa'i yon tan gyi yul zhen pa dang tha dad kyi rtogs pas bcings par ma byed cig /de bas na ngo mtshar ba'i don te 'khor ba'i sems can thams cad la kye ho rmongs pa zhes bos te/ /de dag gis ci byed ce na/ mda' snun gyis smras pa la nyon zhes bya ba'i tha tshig go/ /de dag kyang ci zhe na/ nya ro la chags pa dang phye ma leb reg bya la chags pa dang glang po che a ga ru nag po'i dri la chags pa dang /bung ba me tog gi kha dog la chags pa dang / ri dgas e na ya glu snyan la chags pa bzhin du de nyid kyi don la blta bar byos shig /de dag ni skyon dang bcas pa ste/ chags pa mngon par 'phel ba'i phyir 'khor ba'i rgyur 'gyur ro zhe na ma yin te/nya mchil pa'i ro la chags pa bzhin du rnal 'byor pa de bzhin nyid kyi ro myong ba dang / bye ma leb reg bya'i bde ba la chags pa bzhin du rnal 'byor pas dang por lus dang sems kyi bde ba la gnas pa'i tshul dang / glang po che dri la chags pa bzhin du rnal 'byor pa bde ba la ma chags shing stong pa'i dri yis khyab par bya ba dang /bung ba kha dog la chags pa bzhin du rnal 'byor pas snang srid chos kyi sku phyag rgya chen po'i me tog rab tu dang bar shes pa dang / ri dgas glu la rgyug pa bzhin du rnal 'byor pas bde ba dang stong pa dbyer med pa'i glu la myur du rgyug pa'i rigs so//da ni snang stong dbyer med pa bstan par bya ste/ gang zhig sems la rnam par 'phro bar snang / /de srid mgon po la ni rang bzhin te/ /chu dang rlabs dag kyang ni gzhan yin nam/ /srid dang mnyam nyid nam mkha'i rang bzhin no//zhes bya ba'i don ni rnal 'byor pa gang zhig gis sems ni sems la rnam par 'phro bar snang ste/ ji srid du 'phro ba de srid du bla ma dam pa'i mgon po dang phrad pa yin te/ de las ni rang bzhin gzhan du mi rtogs pa'i de kho na nyid do/ /de bas na rang bzhin rnal ma de las gzhan du 'gyur ba lta bu ni ma yin no//dper na chu'i rgya mtsho chen po dag la chu dang rlabs dag dpag tu med pa cig yod kyang de nyid las gzhan yin nam ste ma yin no/ /de bas na ngo bo tha mi dad pa'i phyir srid pa'i ngo bo dang mya ngan las 'das pa'i mnyam pa nyid nam mkha'i ngo bo ltar rang bzhin gyis dag pa yin no//da ni khyad par gyi nus pa bstan par bya ste/ gang zhig ston te gang gis thos pa yi/ /dgos pa gang yin dam pa skyong ba na/ /gdug pa'i skungs sa rdul bzhin rlog par byed/ /snying ga nyid du nub par gyur pa yin//zhes bya ba'i don ni/ /bla ma dam pa gang zhig gis ston pa yang dag pa'i don de dag slob pa po gang gis thos pa'i dgos pa de dag gang yin zhe na/ tha mal gyi shes pa'i dam pa ste/ de dag dran pa rgyun chags kyis skyong ba na rnam par rtog pa'i gdug pa'i skungs sa de dag rdul bzhin rlog par byed do//rtogs pa'i bye brag dpag tu med pa dag ni snying ga tha mal gyi shes pa nyid du nub par gyur pa yin no/ /nub pa de yang mtshon pa tsam du zad de/ don la ji bzhin pa de kho na nyid rtogs pa la bya'o/ /da ni de kho na nyid kyi ngo bo'i tshul du mtshon par bya ste/ji ltar chu la chu bzhag na/ /de snyed chu ru ro mnyam 'gyur/ /ji ltar mar la mar gzhag mtshungs/ /sems dang snang ba de bzhin smra/ /skyon dang yon tan rnams dang ldan pa'i sems/ /mgon po sus kyang mtshon par mi 'gyur ro/ /zhes bya ba'i don ni dper na chu'i thigs pa la chu'i thigs pa bzhag na ji snyed du bzhag pa de snyed chu ru ro mnyam par 'gyur ro//ji srid mar gyi khu ba la mar bzhag pa de dang mtshungs pa ste mar du ro mnyam par 'gyur ro/ /sems snang ba la bzhag pa dang snang ba sems la bzhag pa'i ngo bos lhan cig skyes pa'i ye shes kyi de kho na nyid rtogs par byed pa ste/de dag ni gnyis su med par ro mnyam pa ste bde ba chen po'i ngang du yongs su rdzogs par 'gyur ro/ /de bas na rje btsun pa ri bo pa'i zhal sngar de bzhin du smra bar 'gyur ro/ /de bas na sems nyid kyi ngo bo ni cir yang ma yin pa'i don la cir yang snang ba ste/snang ba la rtogs na skyon du 'gyur ba dang / de ma bcos par bzhag na sangs rgyas kyi yon tan rnams rtogs par byed pa ste/ de dang ldan pa'i sems 'di ni mgon po sangs rgyas bcom ldan 'das la sogs pa sus kyang mtshon par mi nus shing mtshon par yang mi 'gyur ro//da ni de nyid kyi mtha' la gdams pa bstan par bya ste/ rmongs pa dag la gnyen po gang yang med/ /khyod ni stong pa nyid la zhen tam ci/ /nags la mched pa'i me lce ji bzhin du//gong du babs pa 'di ltar snang ba kun/ /ji ltar snang dang grags pa'i dngos po rnams/ /rtsa ba stong pa nyid dang lhan cig byos/ /zhes bya ba'i don ni tha mal gyi shes pa ni rmongs pa chen po ste/ de dag la ni gnyen po gang yang med do/ /de bas na sems khyod ni sems nyid stong pa nyid ni cir yang ma yin pa la zhen tam ci/dbang po'i spyod yul du 'gyur ba thams cad kyang nags la me lce mched pa bzhin du gong du bstan pa'i don ci yang ma yin pa la babs pa'o/ /ji ltar snang ba kun kyang de bzhin ni ji ltar snang ba dang grags pa'i dngos po ma lus pa rnams rtsa ba chos kyi sku yin pa'i phyir stong pa nyid dang lhan cig tu byos shig pa'o//da ni mnyam pa'i don la zug rngu'i tsher mas gnod pa de bsal ba bstan par bya ste/ gal te yid du 'ong ba mnyam pa'i sems/ /snying la gces spras byams pa'i sems nyid la//til gyi shun pa tsam gyi zug rngus kyang / /nams kyang sdug bsngal 'ba' zhig byed par zad/ /ces bya ba'i don ni rnal 'byor pa bdag ni gal te 'am brgya lam na gsal ba dang mi rtog pa dang bde ba dang yid du 'ong ba'i ngo bo la ci yang ma yin pa'i sems dang ldan te de ltar rtogs pa de ni rnal 'byor pa rnams kyi bla ma'i mchog ste/snying de la gces spras dang byams pa'i sems nyid bya bar rigs la/ g.yeng ba dang gnod pa'i zug rngu dang bral bar bya'o/ /de ci'i phyir zhe na/ til gyi shun pa tsam gyi zug rngu yang rnal 'byor pa de dag gi sems la gnod pa'i phyir nams kyang sdug bsngal 'ba' zhig skyes par byed par zad do//da ni dpe lta bu'i spyod pa bstan par bya ste/ grogs po phag dang glang po smon pa ltos/ /de ltar yin pa de ni ma yin no/ /rtog bral gtan dang chags pa'i bza' gtad bral//rnam rtog klong dang dmag bzlog sdig par bral/ /zhes bya ba'i don ni rnal 'byor pa rnams la grogs po zhes bos te/ grong khyer gyi phag dang rgyal po'i glang po che dang gnod sbyin gyis zin pa'i smyon pa ltos shig pa'i don to/ /de dag gis ci byed ce na/ rnal 'byor pa dang chos mthun pa'i spyod pa de ltar yin te mi mthun pa'i phyogs dgag par bya ba'i phyir de dang mi mthun no//de dag kyang ci zhe na/ phag pa rtog pa dang bral ba bzhin rnal 'byor pa dag kyang zas la gtsang btsog med cing rtog pa dang bral ba'o/ /glang po che yid bsgyur bar mi nus shing brtan pa bzhin du rnal 'byor dag la yang bdud dang mu stegs dang phyir rgol ba dang phyi nang gi g.yengs pa dag gis blo bslad par mi nus shing brtan pa'o//smyon pa ni chags pa'i bza' gtad dang bral ba ste/ rnal 'byor pa dag gis kyang su la yang chags par mi bya zhing spyod pa bza' gtad dang bral bar spyod pa'o//de dag dang mtshungs pa'i phyir mthun pa'i dpe nye bar 'grub pa'o/ /rnal 'byor pa dag gis rnam par rtog pa'i sa glong ba dang / pha rol po'i dmag zlog pa dang srog gcod pa la sogs pa'i sdig pa dang bral bar bya'o//de ci'i phyir zhe na/ tha dad kyi rtog pa dang bcas kyi bar du rnam par smin pa mi slu bar 'byung ba'i phyir ro/ /da ni nor bu'i dpe'i sgo nas sems can la phan par bya ba bstan par bya ste/ ji ltar yid bzhin nor bu'i dgos pa bzhin/ /'khrul pa gzhig pa'i mkhas pa ngo mtshar che//ngang las rang rig bde chen bag chags gzugs/ /thams cad de tshe mkha' mnyam de ltar 'gyur/ /ka la ku ta rmongs su mi rung ste/ /rang gzhan mkha' mnyam yid kyis 'dzin pa yin/ /yid de yid ma yin par byed 'gyur te/ zhes bya ba'i don ni ji ltar yid bzhin gyi nor bu rin po che snod bzang po'i nang du bzhag nas mchod pa phul te gsol ba btab pas dgos pa'i don ji lta bar 'byung ba bzhin du bla ma'i gdams ngag gi nor bu rin po che de dag rten gang zag gi snod bzang po'i blo la bcug ste/tha mal gyi shes pa'i mchod pa phul nas nges pa'i shes pa'i gsol ba btab na skad cig ma de nyid la 'khrul pa ma lus pa zhi bar 'gyur ro/ /de dag gi don la mkhas pa ste ngo mtshar che'o/ /de dag kyang gzhan las 'thob pa ma yin te/ / rang la rang rig pa'i bde ba chen po 'di ni snang ba dang sems kyi tshul du bag chags kyi gzugs su snang ngo / /tha mal gyi shes pa rtogs pa na brtags pa thams cad de'i tshe nam mkha' dang mnyam par 'gyur ro/ /ka la ku ta zhes bya ba ni/ ka ka pa a i ta dang / / la pa ni ha ri ha dang / /ku ku pa ra na he dang / /ta ta pa shi ne ke dang ste brda'i don to/ /de dag gsal bar bya ba ni/ /nyams su myong ba tha mal nyid/ /nam mkha' lta bu'i ngo bor gsal/ /re dogs gnyis 'dzin blang dor med/ /'di rtogs kun du bzang po'o/ /ma rtogs nang dang phyi ru blta//nges pa skyes nas go rims nyid/ /bsod nams tshogs bsags la brtson pa/ /'di ni dam pa'i lam yin no/ /snang srid thams cad chos kyi sku/ /chu bo lta bu'i ngo bo nyid/ /dbang po yul phrad bde ba'i mchog /dran pa bsten pa mchog yin no/ / spyod lam bzhi la sngon 'gro ba'o/ /dran pa de bzhin nyid du bsten/ /sems nyid bla ma dam par bkur/ /dgag par dor zhing ci ster spyad/ /ces bya ba ni thun mong gi tshul lo/ /sems nyid ma bcos chos kyi sku/ /snang ba bde chen longs spyod rdzogs/ /'gro 'ong sems can sprul pa'i bdag /dam pa dag la rtog pa'o/ /'di dag ni khyad par gyi tshul lo/ /sems nyid rnal ma'i ngang gnas na/ /spyod pa drug gis ci byar yod/ /bde ba chen po'i ro myong nas/ /dge dang sdig pa'i bye brag med/ /'di ni bla na med pa'i tshul lo/ /rnal ma rtogs pa rdzogs sangs rgyas//sdig pa'i rnam par smin mi myong / /dge ba'i bde bas 'bras bu min/ /rmi lam bzhin lta ci bder spyod/ /'di dag ni de kho na nyid kyi tshul lo/ /ka ni rtsol sgrub bral ba ste/ /la ni ma bcos don gyi gtso/ /ku ni rnam rtog mtha' dang bral//ma shes smrar med mnyam nyid te/ /zhes bya ba 'di ni bsam gyis mi khyab pa'i tshul du bshad pa'o/ /de bas na smos su mi rung ba ste/ rang bzhin rnal ma 'di dag nam mkha' dang mnyam pa'i phyir dran pa'i yid kyis 'dzin par byed pa yin no/ /yin pa de yang rtog pa'i zug rngu yin te//yid de dag dang dran pa rtog pa ma yin par shugs kyis byed par 'gyur te 'di ni dam pa'o/ /da ni bsam gyis mi khyab pa'i rang bzhin bstan par bya ste/ rang bzhin gyis mdzes skyes pa'i mchog tu mdzes/ /khyim dang khyim na de ni brjod pa ste//bde chen gnas ni yongs su shes pa min/ /'gro kun sems kyi sprul par mda' bsnun smras/ /de ni bsam med rtog pa ma yin no/ /kye ma rnal 'byor bsgom pa rang la dris/ /snying po rang bzhin dag pa'i rtog pa la/ /rang bzhin gnas pa'i sems kyis blta bar rigs/ / zhes bya ba'i don ni sems kyi rang bzhin bla ma dam pa'i gdams ngag gis mdzes par byas pa'i sems rnal ma gnyis su med pa skyes pa'i bde ba dang stong pa dbyer med pa las mchog tu gyur pa'i bdag nyid dran pa rgyun chags kyis mdzes par byas pa'i don 'di dag theg pa 'og ma rnams kyis khyim dang tshig dang tha snyad kyi khyim na de nyid brjod par bya ste/'o khri phrag dpag tu med pa dag tu bshad du zin nas kyang dam pa rnams kyi gdams ngag la rag las pa'i bde ba chen po'i gnas ni yongs su shes pa min no/ /'gro ba kun gyi shes pa ni snang ba thams cad sems kyi 'khrul par 'dod pa'am/de la rnam pa gzhan du yod par 'dod pa ste/ de dag ni ma yin par mda' bsnun smras so/ /de dag kyang ci zhe na/ snang grags kyi chos thams cad bde ba chen po gnyug ma'i rang bzhin yin pa'i phyir de ni bsam du yang med de/ rtog pa yang ma yin no//kye ma rnal 'byor pa kun de kho na nyid rang gi sgom pa ni rang gi dri bar bya'o/ /de ci'i phyir zhe na/ rang ma yin pa gzhan mi snang ba'i phyir ro/ /rang de dag kyang ci zhe na/ ye nas rnam par dag pa'i phyir snying po'o/ /de yang rang bzhin gdod ma nas dag pa'i rnal 'byor pa las rtog par cir yang snang ngo //de dag ni sems tha mal gyi shes pa rang bzhin du gnas pa'i sems kyis blta ba'i rigs so/ /da ni don de nyid la gdams pa bstan par bya ste/ de nas phyi nang mnyam par shes pa dang / /shes byed de 'gog par ni bla ma'i lung //mgo snying lte gsang rkang lag spangs pa ste/ /ngas mthong bsam pa'i yul ni mchod par byed/ /gzhan dag bsam pa'i yul ni 'gag par 'gyur/ /gal te sems la sems kyis mtshon du 'gro/ /rlung dang yid ni mi g.yo brtan par 'gyur//zhes bya ba'i don ni rnal 'byor pa de dag gis nyams su myong nas mthong ba'i rtags ni phyi dang nang mnyam par shes shing ci yang ma yin pa nyid du mthong ba ste ci yang ma yin pa'o/ /de ltar shes par byed pa de shugs kyis 'gog pa la ni bla ma rnams kyi lung ste de nyid do//de nyid mngon sum du rtogs pas ni dge ba thams cad kyi sngon du 'gro ba sbyor ba snying rje chen po nyid dang bsod nams dang ye shes kyi tshogs kyi dngos po bzhi dang sems can thams cad yongs su smin par bya ba'i phyir 'jug sngo zhing smon lam rgya chen po gdab pa dang / de dag thams cad dbang rnam pa bzhi go rims kyi tshul du gnas par byed pa'i dam tshig srung ba dang / de brtan par byed pa'i bsod nams kyi tshogs yan lag shugs kyis spang ba ste/ de dag la gnas kyang don med par 'gyur ro/ /don dang ldan pa ni gang zhig yin zhe na/nga mthong zhes pa ste tha mal gyi nga'o/ /de dag bsam pa'i yul ni don dam pa'o/ /bsod nams kyi tshogs khyad par can rdzogs par byed pa ni mchod par byed pa'i nges shes so/ /de dag ni nyams su myong ba dang gzhan dang gzhan du brtags pa'i bdag nyid dag bsam pa'i yul rtog pa can de dag ni ngang gis 'gag par 'gyur ro//gal te slob pa po dag gi blo la brjod par bya ba'i phyir sems kyis sems ni mtshon du 'gro ste/ de tsam du zad pa nyid yin te/ gzhan ni skyon dang bcas pa'o/ /mtshon pa'i don la rtog pa yin na rlung dang yid kyi rnam par shes pa ni 'gag par 'gyur te//mtshan ma la mi g.yengs shing mi rtog pa la brtan pa kho nar 'gyur ro/ /da ni rnal ma'i don phyin ci ma log pa bstan par bya ste/ ji ltar lan tshwa chu la thim pa ltar/ /de ltar sems ni rang bzhin nyid dag la//dngos por rtogs pa'i mtshan nyid thim par 'gyur/ /de tshe bdag dang gzhan ni mnyam par mthong / /'bad de bsam gtan byas pas ci byar yod/ /brtags gcig la ni lugs rnams mang po mthong / /'ongs pa ma mthong phyis kyang de mthong med//rang 'dod pa yis rang rig gsal bar 'gyur/ /rang bzhin 'jig cing gzhan dang 'gal ba yin/ /mgon po bdag ni gcig po bzhin dang ldan/ /khyim dang khyim nas grub mtha' de sgrub pa'i/ /gcig zos pas ni gzhan kun tshim par 'gyur/ /nang bzhag phyi rol song nas khyim bdag tshol//btsal kyang ma mthong phyis kyang de med de/ /'dug par gyur kyang de yis ma shes so/ /zhes bya ba'i don ni/ ji ltar lan tshwa chu dag gi nang du bcug na de la thim zhing lan tshwa'i ror 'gyur ba ltar sems rang bzhin nyid nas dag pa'i tshul dag la dngos por rtog pa'i mtshan nyid kyi lan tshwa dag bzhag na dngos po thim zhing bde ba chen po'i ror 'gyur ro//de'i tshe bdag dang gzhan du mnyam par mthong ste tha mi dad do/ /de ltar ma rtogs pa'i rtsol sgrub dang bcas pa'i don de nyid la 'bad de bsam gtan byas pas 'ching ba'i phyir ci byar yod do//gnyug ma'i don de kho na nyid kyi brtags gcig la ni tha dad kyi rtogs pas brtag par lugs rnams mang por mthong ngo / /mthong du yod dam zhe na/ byis pa'i ngang tshul can nam mkha' la tshad byed pa dang 'dra ba rnams kyis brtag par zad kyi de kho na nyid la 'ongs par yang ma yin phyis kyang de mthong ba med do//sems tsam dag gi 'dod pa ni rang gi 'dod pa'i shugs kyis rang gi rang gsal ba'i ngo bo sgrub par smras te de ni mu stegs kyi bdag dang 'dra'o/ /de'i phyir rang bzhin 'jig shing dbu ma la sogs pa'i gzhan dang yang 'gal bar 'gyur ba yin no//dgag sgrub dang bral ba'i don ni chos kyi sku'i mgon po bde ba chen po'i bdag nyid tha mal gyi shes pa gcig pu rang bzhin gyi bzhin dang ldan no/ /de dag kyang bla ma dam pa'i gdams ngag gi khyim dang bdag nyid kyi nyams su myong ba'i khyim nas grub pa'i mtha' dgag sgrub dang bral ba de grub pa'o//de ni ma bcos pa'i don te de gcig pu rnal ma nyams su myong ba'i tshul gyis zos pa ni grub pa'i mtha' ma lus pa gzhan kun yang tshim par 'gyur ro//de ni rang byung gi ye shes te khyim gyi bdag po de dag bdag nyid kyi blo'i gting gi nang du bzhag ste/ phyi rol du song nas tha snyad la rnam par brten pa'i mthus khyim bdag tshol lo/ /btsal ba'i don de dag kyang rnyed pa ma yin te/ ci yang ma yin pa'i phyir ma mthong ngo //phyis kyang de dag la mthong ba med de rang nyid la ngang gis 'dug par gyur kyang rnam par rtog pa'i rtog ges bslad pa'i phyir de yis ma shes so/ /de bas na rab tu mi gnas pa'i rgyud las/ bla ma'i gdams ngag khyim mchog dam pa dang / /nyams myong khyim nas dgag sgrub med par rtog /ma bcos rnal ma'i zas shig za 'gyur bas/ /grub mtha' ma lus kun kyang tshim par 'gyur/ /rmongs pa ma rtogs tha snyad tshig la brten/ /btsal kyang ma rnyed 'dug kyang de ma shes/ /zhes 'byung ba'i phyir ro/ /da ni bde stong dbyer med bstan par bya ste//rba rlabs med pa'i dbang phyug chen po'i mchog /rnyog pa med pa'i bsam gtan ci mi bzhag /chu dang mar me rang gsal gcig pu zhog /'gro dang 'ong ba ro gcig mi dor ro/ /snga na med pa'i sgeg mo dang phrad nas/ /nyal bas sems ni gzhi med pa la brten/ / rang rig gzugs dang tha dad ma lta cig /'di ltar sangs rgyas lag tu gtong ba yin/ /zhes bya ba'i don ni/ sems nyid gnyug ma'i ngo bo de dag la sems bcos pa'i rba dang rnam par rtog pa'i rlabs dag gis gnod pa med pa'i don de nyid ni sa bcu'i dbang phyug chen po ste mchog go//de bas na don de nyid ni rnyog pa med pa ste/ khyad par gyi bsam gtan yin pa'i phyir/ /mnyam pa'i don de la sems ci'i phyir mi bzhag ste gzhag go/ /chu ma rnyog pa'i rnal ma dngas pa dang mar me ma bslang pa dang gsal ba bzhin du sems ma bcos pa gcig pu de kho na nyid du zhog cig /khams gsum gyi sems can thams cad kyi 'gro ba dang 'grub pa'i mtha' dbu ma la sogs pa thams cad kyi 'ong ba thams cad kyang bdag nyid du ro gcig pa'i phyir mi 'dor ro/ /de dag ched du sgrub pa yang med de/ /srid pA paM li pAM zhes bya'o/ /de dag gi don ni bla ma dam pa las snga na med pa'i don rtogs te/chos thams cad bde ba chen po ror sgeg pa'i phyir dang / shes rab chen po'i rang bzhin yin pa'i phyir ngo bo de dag dang phrad nas mthar phyin pa dag go/ /de dag gi don yang snga na med pa yin nam zhe na/ ma yin te paM li pra pa pri zhes bya ste/chos sku gnyug ma'i ngo bo dag /bdag nyid la ni yod pa ste/ /dgag sgrub med par sgeg pa la/ /dus gsum sangs rgyas 'byung ba'i mo/ /zhes bya ba'i don ni de dag kyang praM li praM pri ba zhes bya ste/ /nyams myong bde ba chen po'i ro/ /nyams su myong bar shin tu bde//bdag gis smra bar mi nus kyis/ /'di la smra na skyon du 'gyur/ /zhes 'byung ba dang / de nyid kyi phyir pA paM li praM pri zhes bya ste/ de dag gi don ni/ chos sku bde chen smra ru med/ /zab cing tshad dang rgya tshad med/ /de nyid ngo bo shes mi nus/ /rtogs par gyur pa ma yin no//zhes 'byung ba'i phyir dang / /de nyid gsal bar bya ba'i phyir/ /pA pri paM pri laM zhes pa ste de dag gi don ni/ bde stong dbyer med mnyam pa nyid/ /mnyam pa phyogs cha cha dang bral/ /nam mkha'i ngo bo nyid mtshungs phyir/ /brjod pa tha snyad mtha' las 'das/ / zhes 'byung ba'i phyir snga na med pa dang snga na yod pa dang smrar med pa dang mi shes pa dang mnyam pa nyid kyi sgeg mo ste/ 'di dag ni ji bzhin shes pa 'ba' zhig la brjod pa'o/ /de yang shes pa bag yangs kyi spyod pa rnal mas 'grub pa'i phyir nyal ba'i sems ni gzhi med pa la brten zhes bya'o//de bas na sems rang rig pa'i ye shes dang snang ba yul gyi gzugs dang de sgrub par byed pa'i tshad ma dang / des rtogs pa'i don rnams tha dad pa'i rtogs par ma lta cig /'di ltar rtogs pa de ni chos kyi sku sangs rgyas lag tu gtod pa yin no//da ni dran pa rgyun chags kyi bdag nyid bstan par bya ste/ lhan cig skyes pa'i rang bzhin de tshe mdzes/ /gang tshe lus dang ngag yid dbyer med pa/ /de tshe thams cad mkhyen pa thob pa ste/ /dbyer med dang la gzhag pa thob med kyang / /brda ru mtshon nas gzhag dang thob par smras//smras pa'i tshig tu zhog la de don bsgoms/ /bsgom par bya ba rdul tsam med pa ste/ /med pa'i ngang la gzhag tu med pa'i ngang / /de la gnas na rnal 'byor snying po'i lam/ /snying po med du brjod par ma yin gyis/ /dngos dang sems su shes shing shes pa med//med pa'i rdo rje de la 'jug par bya/ /zhes bya ba'i don ni lhan cig skyes pa'i ye shes kyi rang bzhin ni gang gi tshe don rnal ma nyams su myong ba'i tshe chos kyi sku mdzes pa'o/ /gang gi tshe rnal 'byor pa dag gi lus dang ngag dang yid dbyer med cing mnyam pa nyid kyi dang la gnas pa de'i tshe thams cad mkhyen pa'i sangs rgyas thob pa ste/de ni bde ba dang stong pa dbyer med pa'i ngang la gnas pa'o/ /de ltar rtog pa'i don la mnyam par gzhag pa dang rjes la thob pa med do/ /de ltar med kyang ma rtog pa'i slob pa po'i blo la brda ru mtshon nas mnyam par gzhag pa dang rjes las thob pa smras so//brjod bya de tshig tsam du shugs kyis zhog la de'i don brjod bya dang bral ba sgoms shig pa'o/ /bsgom du yod dam zhe na/ bsgom par bya ba ni rdul phra rab tsam yang med pa ste/ de dag gi ngang la ni gzhag tu med pa'o//gzhag tu med pa'i ngang la bzhag na mchog go/ /don de dag la gnas na rnal 'byor pa snying po'i lam mo/ /snying po'i lam brtags shing gnas pa'o/ /snying po zhes bya ba'i ngo bo nyid kyang gzhan du brjod du yod pa ma yin gyi dngos por snang ba dang grags pa thams cad sems su shes shing shes pa med pa'o//med pa'i don de ni ye shes rnam pa lnga ste/ de nyid kyang tha mal gyi shes pa'i ngo bo yin pa'i phyir rdo rje ste de la 'jug par bya'o/ /da ni gnyis su med pa'i mtshan nyid bstan par bya ste/ de'i phyir snying po brtag dka' bka' dang bral//khyim bdag dang ni khyim bdag mo longs spyod/ /yul ni gang mthong ba de bshad par bya'o/ /zhes bya ba'i don ni chos nyid ma bcos pa rnal ma'i de kho na nyid la tshad gzung bar mi nus pa'i phyir snying po de brtag dka'o/ /skal ba dang ldan pa'i gang zag gis tha mal gyi shes pa nyams su myong ba nyid yin pa'i phyir dga' ba dang bral ba'o//de nyid kyis dus na kun gzhi byang chub kyi sems kyi khyim bdag dang chos nyid ma bcos pa rnal ma'i khyim bdag mo gnyis longs spyod de de yang 'dod pa'i yon tan mi 'gog cing rang dga'i tshul du'o/ / yul gang mthong ba de chos kyi sku'i ngo bor bshad par bya'o/ /da ni ngo mtshar gyi glu bstan par bya ste/ /nga yis rtsed mo byas pa la/ /byis pa rnams ni sha thang chad/ /me byung ba ni spra ba ste/ /me ni spra ba nyid la 'bar/ /zhes bya ba'i don ni sems nyid kyi don gyi glu blangs pa nang yis zhes pa ni sems nyid do//rtsed mo byas pa las zhes bya ba ni nyi ma'i zer bzhin du snang ba snang srid kyi tshogs kun la bya'o/ /nus pa rnams zhes bya ba ni bde ba chen po'i ro ma myongs pa rnams so/ /sha thang med ces bya ba ni dgag sgrub dang bral ba'i don gyis bslus pa'o/ / de dag kyang ji ltar spyad par bya zhe na/ dpes mtshon par bya ste/ me 'byung ba'i rgyu ni spra ba ste byung ba'i me de nyid kyis ni spra ba nyid la 'bar zhing sreg go/ /de bzhin du sems la snang ba'i chos de dag byung ste/ 'byung ba'i sems nyid de dag snang ba la rab tu thim mo/ /da ni dngos po rang gi mtshan nyid la gdams pa bstan par bya ste/kye ma ho gzhan yid ma yin gzhan ma yin/ /rnal 'byor spyod pa skyes dang bral ba ste/ /bdag po bzang zhing rang bzhin mdzes chags pa/ yid kyis gang ba'i sems de rnal ma nyid/ / chags dang chags bral med pas gnyug mar gzhug /sems mnyam pas na rnal 'byor ngas ma mthong / /za zhing 'thungs la bsam pa gang yang med/ /grogs mo de ni sems pa gang gnas pa/ /phyi rol par sems sdug bsngal dag gis 'dzin/ /sgyu ma'i rnam pa dang ni dpe dang bral//bya ba 'di tsam zhig du ma sems kye/ /rtsol ba gang la dbyer med pa yi klong / /klong ni sgo gsum gang du'ang dri ma med/ /zla ba chu 'dzag nor bu rang dbang min/ /thabs kyis rgyal srid kun la dbang sgyur ba/ /sems nyid de ni grub pa'i rnal 'byor pa/ /lhan cig skyes pa'i sdom pa shes par bya//yi ge pa yis 'gro ba ma lus khyab/ /kun la yi ge med pa gcig kyang med/ /ji srid yi ge med par gyur pa na/ /de srid yi ge dam pa rab tu shes/ /yi ge dag par shes pas snag tsha yal/ /rtsol med rig byed 'don pa'i don de nyams//dang po sems dang cig shos mi shes na/ /gang nas shar ba gang du nub par byed/ /ji ltar phyi rol de ltar rab shes na/ /bcu bzhi pa yi sa la rgyun du gnas/ /zhes bya ba'i don ni/ 'khor ba'i sems can thams cad la snying rje chen po'i tshig bos te/ kye ma ho de kho na nyid ni gzhan gyi yid ma yin te/gzhan gyi yid ma yin na mtshungs pas tha dad par yang mi 'gyur te/ gzhan ma yin pa thob par yang mi 'gyur ro/ /don rnal ma de nyid ni thog ma nyid nas 'byor pa ste/ 'di nyid kyi spyod pa ni rnam par dag pa'i de kho na nyid do//'di dag skye ba dang bral te 'gags pa de bzhin no/ /don de'i bdag po ni ma bcos pa ste bzang po yin zhing chos sku rang bzhin dang ldan no/ /de dag kyang bsod nams kyi tshogs kyis mdzes par byas shing snying rje chen po chags pa la gnas par bya'o/ /tha dad kyi rnam par rtog pas brtags pa'i sems ni yul gyis gang ba ste/sems de dag gdungs shing sdug bsngal ba'i phyir ro/ /sdug bsngal thams cad skad cig gis gcod par byed pa ni rnal ma nyid do/ /de dag gi ngo bo nyid ni chags pa dang bcas pa dang bral ba gnyis su med pas de kho na nyid kyi don gnyug mar bzhugs shig pa'i tha tshig go//gang gi sems nyams pas na chos kyi sku'i mthu zad par byas pa ste de dag la de kho na nyid kyi rnal 'byor ngas ma mthong ngo / /de yang bsam gtan la rab tu gzhol ba'i rgyud las/ /sems nyams pas ni 'bras bu thams cad nyams//nyams pa med de chos sku zad pa byed/ /skad cig gcig la nus pa'i mthu 'phrogs te/ /dbyer med bsam gtan 'byung ba ma yin no/ /zhes 'byung ba'i phyir de bas na sems nyams par mi bya'o/ /las kyi phyag rgya tsam gyis chog par byed pa ni za zhing ste/ de'i bde ba la zhen pa'i shes pa thung la lhag par zhen pa ni 'khor ba'i bde ba skyed par byed pa ste/mya ngan las 'das pa'i bsam pa gang skad cig kyang med do/ /grogs mo zhes bya ba ni rang bzhin bdag med ma'o/ /de dang bral ba'i shes pa 'di dang 'di na rtog cing shes pa gang gnas pa de ni phyi rol mu stegs pa dang khyad med de/de kho na nyid kyi sems sdug bsngal dag gis 'dzin par nges pa'o/ /'di dag ni sgyu ma tsam du yang mtshon par mi bya'o/ /rnal ma nyid dang de nyid kyi ngo bor gdams par mi bya'o/ /dpes mtshon par mi bya'o/ /de dang bral bar yang mi brtag go//de yang bya ba gtang ba ste bya ba 'di yin no zhes tshig tsam du yang ma sems kyi zhes gdams so/ /de dag ni rtsol bas ma btsal te zag pa med pa'i bde bas gang zag pa dang bcas pa'i bde ba dang stong pa dbyer med pa'i slong ngo / /'di dag ni lus dang ngag dang yid gsum gyis brtag pa dang bral ba ste dri ma med pa'o//de dag kyang rtsa dang rlung dang thig les nyams su myong bar byas pa ni ma yin no/ /de dag thams cad kyang 'di nyid kyi ngang yin te dri ma med do/ /tha mal gyi shes pa nyid kyi phyir 'dod chags chen po dang ma bcos pa'i don zhe sdang gi bdag nyid dang /chos thams cad kyi mi shes pa'i gti mug chen po ste 'di dag ni ngo bo nyid yin te dri ma med do/ /de dag nyams su myong bar bya ba ni dang po shes pa rtsol sgrub dang bral bar bya ba dang / de nas ma bcos pa'i bdag nyid yongs su shes par bya ba dang /tha mar nyams dang rtog ge pa dang bral ba ste/ 'di dag thams cad ni gnyug ma'i ngo bo la brjod pa yin pa'i phyir 'jug pa'i sgo tsam du zad kyi gang du yang dri ma med do/ /de dag rtog pa las sgrib pa rnam pa gnyis skad cig ma gcig la gcod par 'gyur te/dper na zla ba'i rgya mtsho dag gi nang na chu'i nor bu gnas pa de dag la zla ba'i 'od kyis phog pa'i dus su chu 'byung ste rang yod pa ni ma yin no/ /dper na rgyal po dag gi stan la thabs kyis de dag gi steng du phyin na rgyal po'i srid kun la dbang sgyur ba bzhin du sems de kho na nyid de ni bla ma'i gdams ngag gis bsgrub par byas pa'i rnal 'byor pa de dag gis lhan cig skyes pa'i ye shes kyi sdom pa ci yang ma yin par shes par byas nas sku gsum gyi 'khor lo thams cad la dbang sgyur bar 'gyur ro//de dag rtog par 'gyur ba yin nam zhe na/pa ta ra te yi ge'o/ /de dag gi don ni nus pa dang ldan pa'i tha tshig go/ /de dag ni chags pa dang bral zhing ma 'dres pa'i don rnam par dag pa'i phyir de dag gis 'gro ba ma lus pa thams cad la khyab po/ /de bas na snang grags kyi chos kun la yi ge med pa gcig kyang med do//yi ge nyid kyang yod pa ma yin nam zhe na/ ji srid du yi ge yod par gyur pa de srid du gnas pa ji srid yi ge med par gyur te/ med pa ni yod pa yin pa'i phyir de srid yi ge dam pa rab tu shes so/ /de'i brda tha snyad dang bral ba la ni yi ge dag par shes pa ste nyams su myong du med pa'i phyir snag tsha yal lo//gzhan dag ni gcol la med pa'i phyir mu stegs kyi rig byed dang mtshungs te/ 'gro ba 'don par 'dod pa des rang nyid kyi don de nyid kyang nyams su myong bar 'gyur ro/ /de bas na sangs rgyas thams cad kyi dgongs pa dam pa tha mal gyi shes pa 'di dag sems dang /cig shos bde ba chen po'i rang bzhin de kho na nyid mi shes na snang ba'i chos 'di dag thams cad gang nas shar ba yin la gang du nub par byed do/ /de bas na ji ltar phyi rol gyi snang grags kyi chos de dag thams cad sems nyid gnyug ma'i ngo bo de ltar rab tu shes nas phung po lnga la rigs lnga'i rgya dang /de la mi bskyod pa'i rgya dang / de la rdo rje 'dzin pa chen po'i rgya dang / de la bde ba chen po'i rgya dang / ci yang ma yin par rtogs pa ste bcu bzhi pa'i sa la rgyun du gnas so/ /da ni bdag nyid rnam par dag pa bstan par bya ste/ lus med lus la sbar med sbas pa ste/ /gang gis de shes de ni grol bar 'gyur/ /nga yis grub pa'i yi ge nag po ston/ /khu ba 'thungs pas nga ni brjed par 'gyur/ gang gis bltar med yi ge gcig shes na/ /de yi ming ni bdag gis mi shes so/ /zhes bya ba'i don ni gnyug ma'i de kho na nyid la snang ba 'grub pa med pas lus med do//sems nyid du grub pa med pas lus la sbar med do/ /de yang dam pa'i gdams ngag la rag las pas sbas pa ste/ skal pa dang ldan pa dag gis bla ma'i zhal gyi bdud rtsi 'thungs te/ gnyug ma'i de kho na nyid shes nas bdag nyid grol zhing gzhan grol bar 'gyur ro//gang gi tshe bdag tu gnas pa de ni chos sku ste nga'i tha mal gyi shes pa grub pa'i yi ge mi 'gyur ba'i phyir nag po ste/ de dag khyad par du 'gyur ba'i gang zag la ston pa'i phyir khu ba'o/ / de dag ni ci yang ma yin pa'i tshul du 'thung ba'i nga bdag ni brjed par 'gyur ro/ /yi ge nag po de nyid kyang sangs rgyas la sogs pa gang gis kyang bltar med de/ rang bzhin gyis kha dog can gyi yi ge gcig shes nas de'i ming ni bdag gis mi shes pas dngos por grub pa lta ga la yod de med do zhes rje btsun pa dag gis gsungs so//da ni de kho na nyid rab tu gsal ba bstan par bya ste/ nags khrod gsum na yi ge nag po gcig /yi ge gsum gyi dbus na blta bar bya/ /gang zhig gsum la bab pa'i ngo bo ni/ / gdol pa'i rig byed bzhi yang de yin no/ /zhes bya ba'i don ni/ nags zhes bya ba'i don ni sha'o/ /khrod ni rus pa'i tshogs ma lus pa'o/ /gsum na zhes bya ba ni rtsa rlung thig le'o/ /yi ge ni bde stong dbyer med do/ /nag po ni mi 'gyur ba'i don to//gcig ces bya ba ni sangs rgyas nyag gcig go/ /de dag la yi ge gsum du gnas te/ 'dod pa'i khams dang / gzugs kyi khams dang / gzugs med pa'i khams so/ /de dag kyang rnam gsum du brjod de/ lus dang ngag dang yid gsum mo//de dag kyang gti mug chen po dang sems nyid kyi ngo bo yin pa'i phyir dbus so/ /de yang tha mal gyi shes par bzhag nas mnyam pa dang mi shes pa dang / bltar med pa'i ngo bo gsum du blta bar bya'o/ /skal ba dang ldan pa gang zhig gis yi ge gsum la gnas pa'i rang bzhin de dag la bab pa ni de'i ngo bo ni kyi ha ra ta'o//de dag gi don ni thams cad dang ldan zhing khas mi len pa ste/ de dag gdol pa'i rig byed dur khrod kyi ltas dang ro'i mtshan nyid dang 'degs pa'i go rims dang / 'degs pa'i dus bzhi yang de nyid yin te/gzhan dag la lta smos ci dgos so/ /da ni bde ba las byung ba'i lam bstan par bya ste/ kun du ru skabs bde chen grub pa ni/ /ji ltar bsgom pa'i smig rgyu snyegs pa bzhin/ /skom nas 'chi ste nam mkha'i chu rnyed dag /rdo rje pad+ma gnyis kyi dbus gnas pa//bde ba gang gis rnam par bskyed pa ni/ /ci ste de bstan nus pa med pas na/ /sa gsum gang du rdzogs su re ba lags/ /yang na thabs kyi bde ba skad cig ma/ /yang na de gnyis gnyis su 'gyur ba ste/ /bla ma'i drin gyis slar yang nyid la ni/ /brgya lam 'gal ba'i shes rab ga la 'gyur//zhes bya ba'i don ni/ kun du ru ste sems can thams cad kyi sems chos kyi sku yin pa'i phyir dbang po'i sgo mnyam par sbyar ba las lhan cig skyes pa'i dga' ba skyed pa de dag bla ma'i man ngag gis skabs phye ste/ bde ba chen po rgyas btab nas de kho na nyid grub pa ni nyams su myong du yod kyang thob tu med pa ste/ji ltar skom pa dag gis smig rgyu mthong zhing rnyog pa bzhin du chu'i don byed ma nus te thob tu med pas skom nas 'chi'o/ /de dag rnyed par yang ma rig ste nam mkha'i chu dang 'dra ste/ rnyed dam mi rnyed do/ /man ngag las byung ba gzhan dag 'bras bu rnyed par yang mi 'gyur te/kun du ru zhes bya ba ni drag po'i sbyor ba'o/ /de dag gis skad ma cig gcig gi skabs la nyams su myong ba srid kyang phyag rgya chen po'i bde ba grub pa'i rnal ma ni mi 'byung ste/ dper na skom pa dag gis smig rgyu'i chu rnyed pa gzhan du don byed par mi nus te skom nas 'chi'o//de dag kyang bde ba chen po nam mkha' lta bu'i bla ma'i gdams ngag gis chu mi rnyed do/ /'dod pa dag la zhen pa'i phyir dam pa ngag gis bsten par bya ba yang ma yin no/ /de bas na 'bras bu chen por mi 'gyur ro/ / de bas na stong pa dang bde ba dbyer med pa'i 'byung gnas rdo rje dang pad+mo snyoms par zhugs pa'i dbus dag na lhan cig skyes pa'i ye shes kyi thig le gnas te/ de dag lam du khyer ba'i bde ba de dag la zhen pas bde ba las kyi phyag rgya gang gis gnas nas skyed pa de ni ci ste de dag la de kho na nyid kyi don bstan du yod dam/rtog pa 'ba' zhig la longs spyod pa'i phyir med pas na'o/ /de'i phyir nyan thos dang rang rgyal ba dang theg pa chen po'i sa gsum gang du rdzogs su re ba lags so/ /de dag ni bslab pa dang mi ldan zhing bye brag gi cha ma rtogs pa dang / 'khor ba mi brtag pa'i rnal ma la yid byung ba med pa dang / bden pa rnam pa gnyis zung du 'jug pa med pa dang / bde ba chen po'i don ma rtogs pa'i 'bras bu sku gsum gyi bdag nyid thob pa ma yin no/ /de bas na thams cad kyi brten byed pa ma yin nam zhe na/ yang na lhan cig skyes pa'i ye shes ngos 'dzin pa'i thabs su lhan cig skyes pa'i ye shes kyi bde ba skad cig ma de dag la brten nas zag pa med pa'i bde ba de yang na'am phyis kyi dus su de dag la zhen pa med pas bde ba dang /stong pa chen po bsam gyis mi khyab pa gnyis su med par 'gyur bas stong pa dang /bde ba dbyer med pa phyed pa de dag bla ma dam pa'i bka' drin gyi zhal gyi bdud rtsi'i gdams ngag dam pa de dag nyams su myong bar slar yang bstan pa'i don de nyid la ni brjod par bya ba gang zag brgya 'am gcig gis kyang shes par ga la 'gyur ro//de ltar nyams su myong ba'i rnam pa bstan nas/ da ni 'bras bu phun sum tshogs pa'i bdag nyid bshad par bya ste/ grogs dag zab mo dang ni rgya che ba/ /gzhan gyis bdag nyid rtogs pa ma yin te/ /lhan cig skyes pas zhi ba'i dus kyi tshe/ / gnyug ma nyams su myong bas rab tu shes/ /mun nag chen por zla ba'i nor bu ni/ /ji ltar 'char bar byed pa bzhin du mdzes/ /mchog tu bde chen skad cig gcig la ni/ /sdug bsngal ma lus pham par byed pa'o/ /sdug bsngal snang byed sems la nub pa na/ /grol ba'i bdag po gza' dang mnyam du shar//'di ltar sprul pa'i bdag nyid sprul pa ni/ /de ni dkyil 'khor 'khor lo dam pa'o/ /zhes bya ba'i don ni/ skal ba dang ldan pa'i gang zag la grogs dag ces bos te/ don zab mo rgya mtsho lta bu dang / nam mkha' lta bu'i rgya che ba'i rnam pa de dag bdag tu 'dzin pa dang bcas pa'i shes pa gzhan dag gis de kho na nyid kyi bdag nyid rtogs pa ma yin te/lhan cig skyes pa'i ye shes kyi de kho na nyid skyes pas nyon mongs par rnam par rtog pa zhi ba'i dus de nyid kyi tshe na gnyug ma'i de kho na nyid nyams su myong bas rab tu shes so//dper na mun nag chen po'i gnas su chu shel gyi zla ba'i nor bu'i 'od ni ji ltar 'char bar byed pa de nyid kyi dus na mun pa thams cad nges par bcom ste/ bsil zhing dang la 'od kyi rgyun gsal bar byed pa bzhin du de kho na nyid de yang de ltar mdzes pa'o//de ltar yon tan thams cad kyi mchog tu gyur pa'i bde ba chen po skad cig ma gcig la ni sdug bsngal ma lus pa pham par byed pa'o/ /sdug bsngal 'byung ba'i rgyun snang ba'i rnam pa byed pa'i ngo bo thams cad sems la nub par 'gyur te de ni chos kyi sku'o/ / sa la gnas pa'i byang chub sems dpa' rnams grol ba'i bdag po ni longs spyod rdzogs pa'i sku'o/ /gza' skar gyi rnam pa lta bu sprul pa'i sku ste de dag dang mnyam du shar bar 'gyur ro/ /der yang ma zad de khams gsum thams cad ni sku gsum pa'o/ /de ltar sprul pa'i bdag nyid ci yang ma yin pa dang /sprul pa'i sku 'gro 'ong gi rnam pa can dang de thams cad ni bde ba chen po'i 'khor lor ro/ /dkyil 'khor gyi sku dang bcas pa ste 'khor lo dam pa'o/ /de'i phyir chos kyi sku ni rtogs pa'i grub pa yin te/ gzugs sku rnam pa gnyis ni shugs kyis grub pa yin no//de bas na yongs su rdzogs pa'i 'khor lo 'di ni skad cig ma gcig dang skye ba 'di dang bar mdo'i gnas su thob par byed pa'o/ /da ni 'bras bu khyad par can du grub pa bstan par bya ste/ kye ho rmongs pa'i sems kyi sems rtog na/lta ba ngan pa thams cad rang grol te/ /mchog tu bde chen de tsam zhig tu bas/ /de yi dbang gis dngos grub dam pa'o/ /zhes bya ba'i don ni/ kye ho zhes khams gsum pa rnams la gdams pas de tha dad kyi rtog pas bsgribs pa'i rmongs pa rnams kyis rang gi sems kyi rang gi de kho na nyid rtogs nas bdag tu lta ba la sogs pa'i lta ba ngan pa thams cad rang grol bar gyur te/mchog tu bde ba chen po'i rang bzhin chos kyi sku de dag ni thob tu med pa ste/ /grol ba de tsam zhig tu bas so/ /dper na skyes bu nad sos pa tsam la nang med pa thob po zhes pa dang 'dra'o//grol ba tsam gyis thob pa dang dngos grub yin nam zhe na/ de nyid thob pa'i dbang gis dngos grub mchog tu gyur pa ste/ dam pa'o/ /da ni de kho na nyid kyi skyon bsal bar bya ste/ rdo rje sems dpa' yod dang med mi rtog /rtogs dang rtogs byed 'phags dang sangs rgyas min/ /mi rtag rang dgar gzhag pa kun du bzang / /bcos pa bsgrims pas de nyid de mi rtogs/ /gzhag dang ma sgribs de med rtogs med mthong / /gal te nyams myong dang po'i dus skyes kyang / / de la myong bar 'dzin pa de med de/ /sangs rgyas ye shes de dag dag la yang / /'phags pa rnams dang sangs rgyas bdag nyid ni/ /grub pa med de dgos pa'i don du brtags/ /zhes bya ba'i don ni/ badzra satwa ste/ rdo rje sems dpa'o/ /de ni kun du bzang ba'i ngo bo nyid yin pa'i phyir sems nyid ma bcos pa gnyug ma'i ngo bo nyid ji lta ba la bya'o//de la yod pa dang med pa yang mi rtog go/ /gang la rtog pa dang gang gis rtogs par byed pa ste/ de dag thams cad ni 'phags pa yang ma yin la sangs rgyas kyang min no/ / rang gi shes pas ma brtags shing rang dgar gzhag pa ni 'di ni kun du bzang po'o/ /bcos dang bsgribs pas ni mtha' ngan pa la brtags pa ste de nyid de yis mi rtogs so/ /de yang shes pa rnal ma la gzhag pa dang glod cing ma sgrims pa de nyid kyis rtogs su med pa'i don mthong bar 'gyur ro//gal te rnal 'byor pa dag gi shes pa la nyams su myong ba'i bde ba dang po'i dus su skyes kyang de la myong ba dang zhen par 'dzin pa de min te/ sangs rgyas kyi ye shes de kho na nyid la yang sems can du grub pa ma yin no/ /'phags pa rnams su grub pa dang //sangs rgyas kyi bdag nyid du grub pa ni med de/ ci'i phyir zhe na/ yid la byar med cing ci yang ma yin pa'i phyir ro/ /de dag gis ci byed ce na/ ma rtogs pa'i sems can rtogs par bya ba'i phyir dgos pas don de dag tu brtags shing khas blangs pa ste/de bzhin nyid la ni zug rngu kho nar zad do/ /da ni dpes mtshon pa bstan par bya ste/ gyad kyi gtsug na nor bu de yod kyang / /nor bu ma mthong mchog ston skyes bu ste/ /bdag las gzhan na rdzogs sangs rgyas med kyang / /rtog pa bsal phyir 'phags pa bstan te bsgrub//de bsal dus na rdzogs pa'i sangs rgyas te/ /'bras bu de nyid bdag las thob pa'o/ /'khrul pas brtags nas logs nas grub pa 'dra/ /de phyir sems dang 'khrul rtog der shes dang / /shes pa med pa mnyam pa de dang bral/ /de ni bla ma dag las mngon par rtogs//rtogs pas mtshon dang gang dang ldan pa min/ /sems kyi glang po gang dgar yan du chug /de yi mtshan nyid bdag gis bdag la dris/ /dris pa'i don de rjes su dran pa na/ /de ni de la rtog pas ma dri shig /ces bya ba'i don ni dper na gyad stobs po che'i spyi gtsug na nor bu rin po che de dag yod kyang nor bu de dag ma mthong ste gyad sdug bsngal bar 'gyur ro//nor bu rin po che mchog ston par byed pa ni me long dang ldan pa'i skyes bu ste skad cig ma de nyid la phongs pa'i sdug bsngal dang bral ba'o/ /de bzhin du chos kyi sku'i nor bu dam pa de dag rang nyid la yod de/bdag las gzhan na rdzogs pa'i sangs rgyas de lta bu med kyang rnam par rtog pa'i bag chags 'thug po bsal ba'i phyir bla ma dam pa dang 'phags pa la sogs pa'i yul la brten te/ me long lta bu'i gdams ngag las sangs rgyas kyi de kho na nyid rab tu bsgrub par bya'o//de lta bus rnam rtog de dag bsal zhing grol ba'i dus na rdzogs pa'i sangs rgyas yin te sdug bsngal ma lus pa dang bral lo/ /de ltar phun sum tshogs pa'i 'bras bu de nyid bdag las thob pa ste/ tha dad kyi 'khrul pas logs nas grub pa kho na 'dra'o//de'i phyir sems dang 'khrul par rtog pa thams cad gnyug ma'i ngo bo nyid der shes pa dang de yang shes pa med pa'i don gyis mnyam par gzhag go/ /de yang nyams su myong ba dang tha snyad kyi rnam pa dag dang bral lo/ /de ni bla ma dam pa dag gi zhal gyi bdud rtsi las mngon par rtogs so//rtogs pa de dag slob pa po'i blo las mtshon du zad kyang mtshon pa dang gang gi tha snyad kyi rnam pa dang ldan pa yin no/ /ji ltar zhe na/ sems kyi glang po che gar dgar yan du chug cig pa'o/ /de dag gi mtshan nyid ni brjod pa dang tha snyad kyis gtan la dbab par mi nus te/bdag nyid kyi blo yis bdag nyid la dris shig pa'o/ /dris pa'i don de dag ci yang ma yin par 'dug pa dang don de nyid dus thams cad du rjes su dran pa na bla na med pa'i rtogs pa yin pa'i phyir/ de la de kho na nyid kyi don de dag rtogs pas zug rngu gyur pa'i phyir ma 'dri shig pa'o//da ni sems grub pa med pa'i tshul gyis mtshon pa de nyid bstan par bya ste/ nam mkha'i ri bo chu 'thung 'dra ba'i sems/ /de yis 'gram du zhog cig rang dga' bar/ /yul gyi dbang po lag pas blangs nas su//de ni ji ltar gsod par snang bar 'gyur/ /rnal 'byor pa ni glang po skyong ba bzhin/ /de nyid las ni ldog par 'gyur yid bzhin/ /'khor ba de nyid mya ngan 'das par nges/ /dbye bas gzhan du sems pa ma yin te/ /rang bzhin gcig gis dbye ba rnam par spangs//dri med nga yis rab tu rtogs yid kyis/ /de nyid dmigs bcas dmigs med stong nyid yin/ /gnyis las skyon ni yod pa ma yin te/ /rnal 'byor pa ni gang zhig bsgom pa yin/ /bsgom bya dmigs dang bcas pa dmigs med de//bde ba'i rnam pa'i rang bzhin de yin no/ /rab tu bla med ye shes rang 'byung ba/ /bla ma'i man ngag dus thabs bsten par shes/ /zhes bya ba'i don ni nam mkha'i chos kyi sku'i rnam par brjod pa'o/ /de bas na thams cad de nyid yin pa'i phyir ri bo nam mkha' la gzhag pa bzhin rnal 'byor pa'i sems rten med par bya ba kho na'o//dam pa dag gi gdams ngag gi chu 'thungs shing goms par bya ba dang / de 'dra ba'i sems de dag dran pa rgyun chags kyis dus rtag tu khyer ba'i phyir/ gsal ba'i rnam pas dran pa'i 'gram du zhog cig pa'o//de yang rang dga'i tshul gyis so/ /de yang dbang po dang yul thug pa'i dus yul gyi bdag nyid dbang po'i rnam pa thams cad kyang dran pa'i lag pas blangs nas su yul dang dbang po de ni rang bzhin gnyug ma'i ji lta bar gsod par snang bar 'gyur ro/ / rnal 'byor pa dag gi ni shes pa glang po che lta bu dag bde ba chen po'i rtsal gar dgar bskyang bar bya ba ste rgyal po'i glang po bzhin no/ /de yang snang srid thams cad gnyug ma'i ngo bo nyid yin pa'i phyir shes pa de dag de nas ni ngang gis ldog par 'gyur ro/ /de yang ched du brtul ba lta bu ni ma yin te/yid bzhin du ldog par 'gyur ro/ /de bas na 'khor ba de nyid mya ngan las 'das par skye ba'i phyir rnam par rtog pa'i tha dad kyi dbye bas gzhan du shes pa ni ma yin te/ bde ba chen po'i rang bzhin gcig gis rtogs pa'i dbye ba rnam par spangs par bya ste/'di dag ni shugs kyis 'gyur ba kho na'o/ /snying po'i don ni dri ma med pas rab tu rtogs te de ni yid kyi ye shes kho na nyid do/ /de nyid ni dmigs bcas so/ /dmigs med do/ /stong pa nyid yin no/ /de dag skyon dang bcas pa ma yin nam zhe na/ lta ba de kho na nyid rab tu mi bsgrub pa'i phyir dgag bya rnam par mi gcod do/ /gnyis las gzhan pa gcig khas blangs kyang skyon ni yod pa ma yin te/ rnal 'byor pa dag gi de nyid ni thams cad dang ldan zhing gang du yang khas mi len pa'i phyir gang du bsgoms pa ma yin te min pa'i phyir ro//de'i phyir bsgom par bya ba ni dmigs pa dang bcas pa dang / dmigs pa med pa ni ma yin te/ bde ba chen po'i rnam pa'i rang bzhin de dag gzhan du brjod pa yang ma yin no/ /de nyid kyi ngo bo de ni chos kyi sku ste rab tu gyur pa bla na med pa'o/ / de yang gdod ma nas gnas pa'i phyir ye shes te/ bcos ma yin pas na rang 'byung ba'o/ /de yang bla ma'i man ngag de dag nyams su myong ba'i dus kyis goms par bya ste thabs dran pa rgyun chags kyi dus thams cad du brten pas rab tu shes so/ /da ni sgrub par byed pa'i glu bstan par bya ste/nags sum 'gro khyim du ma 'dug cig /bde ba la gnas gnas dag nyon mongs rgyu/ /dang po'i dus su btsal phyir de 'grub bya/ /btsal bas ma rnyed rnyed pas de 'dug min/ /'khor los 'khor ba'i nags khrod dag tu rgyus//khyim du gnas na chags sdang 'phel 'gyur te/ /de phyir khyim spangs bde dang sdug bsngal dor/ /sems kyi khyim du lta ba 'jug mi bya/ /bcug nas bde chags stong la zhen pas ldang / /de spangs dbyer med mnyam pa'i rang bzhin gnas/ /gang yang de ru yid kyis yongs shes nas//ma lus rgyun tu rtogs pa de ni gnas/ /zhes bya ba'i don ni rab tu mi gnas pa'i rgyud las bshad pa lta bu ste/ kye rnal 'byor stobs chen glang po seng ge yul/ /nags khrod dgon pa dag tu mi gnas par/ / grong khyer khyim gyi gnas su ma 'dug cig /chags pa'i nags la mngon par ma zhen par/ /khyim gyi zhe sdang dag la ma 'dug cig /gzung ba'i nags tshal dag tu ma 'gro bar/ /'dzin pa'i khyim gyi rtags la ma 'dug cig /phyi rol nags kyi yul la ma lta bar//rang rig 'dzin pa'i khyim la ma rtog cig /ces 'byung ba lta bu la bya'o/ /de dag nyams su myong ba'i bdag nyid kyi lus dang sems kyi bde ba la gnas na gnas pa de dag nyon mongs pa'i rgyu yin no/ /las dang po'i dus su de kho na nyid btsal ba'i phyir bde ba dam pa 'grub par bya'o//bde ba de dag gi rang bzhin btsal bas ma rnyed de ma rnyed pa de dag rnyed pa'i mchog yin pas de dang ldan pa dag la ni der 'dug pa yang yin no/ /ji ltar gnas shing 'grub par bya zhe na/ sems grub pa med par rtogs pa dang / /lus chags pa med par 'gro ba'i rnam pas chos kyi sku 'khor los 'khor ba'i nags khrod dag tu bde ba chen po'i blos rgyu bar bya'o//khyim dag tu gnas na chags pa dang zhe sdang 'phel bar 'gyur te/ de'i phyir khyim spangs te bde ba la mngon par zhen pa dang / sdug bsngal dor bar 'dod pas sems kyi khyim du bdag tu lta bar mngon par gnas pas de dag thams cad dor la lta ba la mi 'jug par bya'o//bcug nas bde ba la chags shing stong pa la zhen pas zhe sdang 'phel bar 'gyur te/ de dag thams cad shugs kyis spangs la bde ba dang stong pa dbyer med pa la mnyam par gzhag cing /sems rnal ma rang bzhin gyis gnas par bya'o/ /gang yang de kho na nyid dag ni blo'i gting de ru yid kyi ye shes kyis yongs su shes na/ phyi nang gi g.yeng ba ma lus pa rgyun du chos kyi sku'i rtogs pa nyag gcig las mi mthun pa'i de'i gnas so//da ni mnyam pa'i don gyi glu bstan par bya ste/ 'khor ba gang yin mya ngan 'das pa gang / /yid ni dri med lhan cig skyes pa yi/ /gnas skabs dgra bo'i rigs la 'jug pa med/ /de tsam zhig la nges pas gnas pa ni//de yi rgyal po yin te bye brag med/ /rtogs pa nags dang khyim na gnas pa min/ /'di ltar bya ba de nyid shes gyur na/ /dri ma med pa'i de sems rang bzhin gyis/ /ma lus mi rtog par ni shes par byos/ /de ni bdag yin gzhan yang de nyid do//gang bsgoms yongs su bsgoms pa'ang de nyid yin/ /bde ba'i de nyid dang ni bral bar byas/ /'on kyang bdag nyid rnam par grol ba'o/ /zhes bya ba'i don ni dam pa'i don de dag nyams su myong ba na 'khor ba gang yin mya ngan las 'das pa gang yin te gnyis su med do//'di dag gi yid ni dri ma med pa ste/ lhan cig skyes pa'i ye shes kyi ngo bo nyid do/ /de dag nyams su myong ba'i rnal 'byor pa de dag la ni gnas skabs kyi dgra bo chags sdang gi rigs la skye ba med do/ /de tsam zhig la nges par gnas pa ni de ni chos kyi sku'i rgyal po yin te/mi gnas pa'i phyir bye brag med do/ /de ltar rtogs pa de ni mnyam par gzhag pa dang / rjes las thob pa med de nags dang khyem na gnas pa yang min no/ /ji ltar spyod par bya zhe na/ gnas skabs kyi spyod yul gyi mtshan nyid dag la gnas skabs kyi rnal 'byor pas 'jug par byas par ut+pal sngon po rtsa ba gcig bdag gi kha bye ba'i tshul dang btsun pa'i tshul dang bdud rtsi'i thigs pa nam mkha' la dor ba'i tshul dang rtsa ba bcad pa'i tshul du bya'o//de dag kyang gang zhe na/ don mthong ba'i dus su sems can la gsal ba'i de kho na nyid ston pa dang /lkugs pa'i spyod pas 'jig rten thams cad du rgyu ba dang / skal ba dang ldan pa la don nyung ngu tsam ston cing gnas pa dang / rnam par shes pa mthong ba'i tshul gyis sa nas sa la gnas shing sangs rgyas kyi don de kho na nyid du gnas pa'i bde ba chen po'i yang dag pa la gnas pa'o//'di ltar gong du bstan pa'i bya ba de nyid rab tu shes par gyur na dri ma med pa'i sems rang bzhin gyis rnam par dag pa'o/ /de bas na snang grags kyi chos ma lus pa thams cad mi rtog pa'i de kho na nyid yin par ni shes par byos shig/de bas na thams cad tha mi dad pa yin te/ bdag nyid rnam pa de nyid gzhan la gzhan gyi rnam par de yang bdag gi de nyid do/ /gang dang gang gi gang bsgoms pa de nyid chos kyi sku/yongs su bsgoms pa las ma 'das pa yin te/ de yang de kho na nyid kyi don la logs shig pa ma yin yang tha dad pa la zhen pa'i bde ba chen po'i de kho na nyid dang bral bar byas so/ /'on kyang de dag gis kyang bdag nyid cung zad tsam rnam par grol bar nus pa'o//da ni dri ma med pa'i glu bstan par bya ste/ ji ltar rgya mtsho yi ni mthong byed bzhin/ /bdag dang gzhan du 'khrul bar ma byed cig /thams cad snga na med pa'i sangs rgyas te/ /de nyid dri med mchog gi go 'phang ngo / /sems ni ngo bo nyid kyis dag pa yis/ / gnyis med sems kyi sdong po dam pa dang / /sa gsum ma lus thams cad khyab par gnas/ /grags pa'i sa dang gdams dang gsang ba yi/ /snying po'i sa ni ngo bo kun dang mtshungs/ /de phyir khyab pa snying po de nyid de/ /dper na ri rab gling sogs nyi zla gsal/ /rtogs dang ma rtogs nyi zla mthong long ste//ma bstan bar du blo chung shar nub 'gro/ /mkhas pa rnams la shar dang nub med de/ /snang grags sems su shes shing der mi 'dzin/ /mtshan nyid shes med shes pas 'ching mi dgos/ /de phyir blo ldan rnams la ngang gis 'byung / /de rtogs de ma rtogs shes brtag tu med//ces bya ba'i don ni/ ji ltar rgya mtsho dag gi nang na gzugs brnyan gyi rnam pa ji snyed cig snang yang rgya mtsho'i ngo bo las ma 'das pa'i mthong byed bzhin du phyi rol snang ba'i tshogs dpag tu med pa cig snang yang gzugs brnyan dang 'dra ba nyid de dag dang gzhan du 'khrul par ma byed cig /thams cad kyang log par rtogs pa'i bag chags kyis bsgribs pa'i phyir/ sngon chad ma rtogs te rtogs pa tsam la snga na med pa'i sangs rgyas te zhes bya'o/ /de nyid ni dri ma med pa mchog tu gyur pa dag gi go 'phang ste 'byung gnas so//de lta bu sems ni ngo bo nyid kyis dag pa yin te chos kyi sku'o/ /gnyis med kyi sems de dag las mtshan gyi me tog gis brgyan pa'i sdong bu gzugs sku dam pa gnyis 'byung ba yin no/ /sa gsum pa ma lus pa thams cad chos kyi skus khyab par gnas so//de dag kyang gang zhe na/ grags pa'i sa dang bsdams pa'i sa dang gsang ba'i sa'o/ /de yang nyan thos dang rang rgyal ba dang theg pa chen po'o/ /de nyid la yang mthong ba'i sa dang rtogs pa'i sa dang khong du chud pa'i sa'o/ /de nyid kyi gong du smos pa'i rgyas gdab pa'i tshul gyis bcu gsum pa dang bcu bzhi pa'i sa ste/snying po de kho na nyid kyis ni ngo bo kun dang mtshungs so/ /de'i phyir bde ba chen po ni khyab pa'i bdag nyid dang / snying po chos kyi sku de nyid kyi thugs so/ /de dag kyang kun gyis rtogs pa ma yin te dper na ri rab dang gling la sogs pa nyi zlas gsal bar byed pa ste/de las yang 'od rtogs pa dang ma rtogs pa gnyis so/ /de yang nyi zla la khyad par dang bye brag tu gyur pa med kyang mig ma long ba rnams kyis mthong zhing long ba rnams kyis ma mthong ste/ mthong ba yang blo chung ba byis pa'i ngang tshul can dag la/ mtshan nyid ma brtan gyi bar du sa 'og nas shar nas sa 'og dag tu nub par rtogs pa dang 'dra'o//de kho na nyid kyi don snying po gnyug ma de dag thams cad la khyab kyang rtogs pa dang ma rtogs pa'i rim pas mthong ba dang / long ba lta bu gnas shing blo chung dag la ting nge 'dzin 'phel 'grib tu snang ngo //don de kho na nyid las mkhas pa rnams la ni nyams su myong ba la shar ba dang nub pa med pa snang grags thams cad sems su shes shing sems ci yang ma yin pa'i ngo bos der mi 'dzin pa'o/ /de bas na dngos po rang gi mtshan nyid ni shes pa med pa ste shes pa dang bcas pa'i rnam pa 'ching mi dgos so//de'i phyir blo dang ldan pa'i gang zag rnams la gnyug ma'i don de dag dang gis 'byung ngo / /de dag gi mtshan nyid kyang de ni rtogs pa yin te de ni ma rtogs pa yin no zhes brtag tu med do/ /da ni thugs rjes gnang ba mi 'gog pa'i glu bstan par bya ste/snying rje me tog gzhan phan 'bras bu 'dzin/ /de yi ming ni gzhan la phan pa'o/ /snying po nyid kyis sdong po yal 'dab rgyas/ /snying rje rnam pa sna tshogs du mar ldan/ /lhun gyis grub pa phyi ma'i 'bras bu ste/ /bde ba 'di ni gzhan pa'i sems yin no//stod pa'i sdong po dam pa'i snying rje min/ /gang la slar yang rtsa ba lo 'dab med/ /de la dmigs par byed pa gang yin pa/ /der lhung bas ni yan lag chag par 'gyur/ /sa bon gcig las snying po gnyis 'byung ba'o/ /rgyu mtshan de las 'bras bu gcig tu 'byung //de yang dbyer med don mchog gang sems pa/ /de ni 'khor dang mya ngan 'das rnams grol/ /zhes bya ba'i don ni ma rtogs pa'i sems can la snying rje chen po bskyed pas de'i me tog gzhan la phan par byed pa'i 'bras bu gzugs sku rnam pa gnyis 'byung bar 'gyur te de ni snying rjes 'dzin pa'o//des sems can smin par byed pa'i phyir de'i ming ni gzhan la phan pa zhes bya bar brjod de/ de yang snying po de kho na nyid nyams su myong ba nyid kyis longs spyod rdzogs pa'i sku'i sdong po la mtshan gyi yal ga dang dpe byad bzang po brgyad cu'i 'dab mas rgyas pa dag 'byung bar 'gyur ro//sprul pa'i sku ni snying rje'i yul la rnam pa sna tshogs pa'i thabs du mar ldan pa dag gis smin par byed do/ /lhun gyis grub pa chos kyi sku'i 'bras bu ni 'jig rten pa la ltos nas phyi ma'i 'bras bu gzhag pa ste de ni gnyug ma'i 'ba' zhig skyed bar byed do/ / 'khor ba'i bde ba 'di dag ni snying po las gzhan pa'i sems de dag las dge ba rnams kyis kyang bskyed nus pa yin no/ /chos kyi sku de dag la mnyam par gzhag pa dang rjes las thob pa yin nam zhe na/ stong pa chos kyi sku gnyug ma'i de kho na nyid nyams su myong bas dam pa rnam pa gnyis me long gi thugs brnyan ltar shugs kyis 'byung bar 'gyur te/longs spyod rdzogs pa'i sku'i sdong po deng sprul pa'i sku dam pa rnam pa gnyis gzhan gyi don smin par bya ba'i phyir gtang ngo zhes snying rjes kun nas bslang ba 'am ye shes kyi rgyun las btang ba ni min no//de'i phyir rjes las thob pa ni mi mnga' bar nges te/ gal te rjes las thob pa yod par 'dod na ni mthar thug pa'i 'bras bu rang rig rang gsal bar 'dod pa ste 'bras bu chos kyi sku mi 'byung ngo / /de dag las slar yang 'bad pa ci rnyed cig byas kyang rtsa ba chos kyi sku mi 'byung zhing gzugs sku rnam pa gnyis kyi lo 'dab kyang med do//de lta bu'i don la dmigs par byed pa gang yin pa de ni mtha'i rnam par rtog pa der lhung ba yin pas des ni chos kyi sku mi thob la gzugs sku rnam pa gnyis kyi yan lag kyang chag par 'gyur ro//'di dag ni shugs kyis 'byung ba yin te sa bon chos kyi sku gnyug ma'i ngo bo nyid kyi sa bon gcig nyams su myong ba la stong pa dang snying rje gnyis po'i rnam pa lta bur gnas la/ de'i don la gzugs sku gnyis 'byung ba'o/ /de dag thams cad kyang bde ba chen po'i rang bzhin gyi rgyu mtshan yin pas 'bras bu chos kyi sku gcig tu 'byung ngo //de yang ma 'ongs pa'i dus su 'thob pa lta bu ni ma yin no/ /'di nyid kyi rnam pa la bde ba dang stong pa dbyer med pa'i don rnal ma mchog tu gyur pa zag pa med pa'i bde bas gang ba rdo rje sems dpa' chen po de dag rtogs pas ni 'khor ba dang mya ngan las 'das pa rnams las grol te mi gnas so//da ni cha dang mthun pa'i don bstan par bya ste/ gang zhig 'dod pa can ni 'ong ba'i tshe/ /de ni gal te 'gro na re ba med/ /za phyir phor bas gdungs pa'i skyes bu zhig /kham phor dum bus slong par 'dod pa la/ /phyi sgor bor ba'i kham phor blangs nas su/ /gzhan la ster ba'i don ni mi byed pa/ /'dod pa po la de dag mi ster ba/ /'dis ni 'khor ba'i 'bras bu gang yin pa/ /nges par bskyed pas rnal 'byor dman pa'i lam/ / de dag bzlog ste rang bzhin lam khyer na/ /de bas rnam rtog bor byas na 'ang rung / /zhes bya ba'i don ni rnal 'byor pa dag gis snang ba sems la ma thim zhing tha mi dad ma grub kyi bar du rnam par smin pa la mdzes par bya ste/ gang zhig ces bya ba ni rigs kyi bu skal pa dang ldan pa gang zhig go//de dag gnyis su med pa'i don khyad par can 'dod pa blo bzang po can dag 'ongs pa'i tshe rnal 'byor pa dag de ni gal te phan mi 'dogs shing 'gro na pha rol gyi sems bsad pa yin te rdzogs sangs rgyas kyi re ba med do/ / de bas na gzhan mi dga' bar 'gyur ba'i sbyor ba phra mo tsam yang mi bya ste/ tha na za 'dod pa'i phyir phor bas gdungs pa'i gdol pa zhig gis skyes bu zhig la kham phor gyi dum bu'am kham phor nyid slong bar 'dod pa la kham phor ji bzhin pa nyid dam phyi rol gyi sgo rtsar bor ba'i kham phor gyi dum bu blangs nas gzhan la ster ba'i don mi byed dam/'dod pa po de dag la mi snyan par brjod cing mi ster ba 'di dag ni 'khor ba'i rnam par smin pa'i 'bras bu gang yin pa de nges par skyed par byed pas rnal 'byor pa'i blo dman pa yin zhing lam log par rig par bya'o//de dag las bzlog ste rang bzhin lam du khyer nas dus thams cad du spyod lam rnam pa bzhi la khyad med par 'jug pa na mtshan ma'i rnam par rtog pa bor bar byas na'ang rung ste/ rnam par smin pa phra mo dag gis ldang bar mi nus so/ /da ni don gyi glu bdun pa bstan par bya ste/e ma ho/ /DA kI/ gu h+ya kaM/ e yi d+harma d+hA tu/ o yi na/ a yi ko d+hi ka pa sa ri/ khre ran a pa ko yi ya/ dza ha pa ka/ si ran tran tra/ a'i ka'i ra po li sa/ gu h+ya tan tra khe ma la kang / ris naM/ su zhes bya ste 'di dag ni rje btsun pa dag gis rtog pa brjod pa ste de dag gi don ni/e ma ho mkha' 'gro gsang ba'i skad/ e ni chos kyi dbyings yin te/ /ma ni de nyid kyis bskyed do/ /dper gzhag pa yi nam mkha' ste/ /'gro ba tshogs bsags rgyud la des/ /ma ni nor 'dzin de las skye/ / gsang ba rgyud las rag las gsal/ /skad ni mtshon pa tsam du zad/ /ces bya ba'i don ni a i ho zhes bya ste de dag gsal bar bya ba ni/ chos kyi dbyings ni rnam pa gsum/ /bde dang gsal dang mi rtog pa'o/ /skyed pa'i ma ni de bzhin te/ /ma bcos rnal ma dran pa'o/ / mtshon pa'i dpe ni nam mkha' ste/ /smrar med mnyam dang ma shes so/ /tshogs bsags gang zag rten yin te/ /sbyangs dang tshogs med bla ma bsten/ /shugs kyis ma ni nyams myong ste/ /tha mal goms dang rgyun du'o/ /gsang ba'i don ni brgyad pa ste/ /byin brlab nyams myong de ldan pa'o//thams cad brda yi rnam pa ste/ /nga yis smra bar mi nus pa'o/ /zhes bya ba ni bsdus pa'i don no/ /da ni dge ba'i rtsa ba bsngo bar bya ste/ /gnyis su med pa rdo rje'i glu/ /de nyid ye shes mtshon byed pa'i/ /don dam gnyis med yi ge yis/ /'gro rnams rang la glur len shog//ces bya ba'i don ni snang ba dang sems gnyis su med pa bde ba chen po rdo rje'i glu 'di dag gis sems can gyi rgyud la de kho na nyid kyi ye shes yod pa de dag mtshon par byed pa ste/ 'di dag ni don dam gnyis su med pa'i ye shes yin te/ de yis skal ba dang ldan pa'i 'gro ba rnams rang la glur len cing rtog par shog cig pa'i don to//da ni rje btsun pa dpal gyi ri bo pa'i dgongs pa bdag gis rnam par phye zhing gsal bar bya ba'i don bsngo bar bya ste/ sems nyid lhan cig skyes pa chos kyi sku/ /snang ba lhan cig skyes pa sku yi 'od//snang stong dbyer med lhan cig skyes pa ste/ /de nyid chos sku'i dgongs pa chos sku nyid/ /bdag nyid nyams su myong mthu las byung ba yi/ /rtogs pas rje btsun dgongs pa gsal bar byas/ /dri ldan mgon po khyod la phyag 'tshal te/ /drin mchog blan phyir 'di byas dgyes par mdzod//'di las byung ba'i bsod nams tshogs dag gis/ /sems can thams cad bde ba che rtogs shog /rnam gsum slob ma dag pa'i phyir/ /de nyid gsal bar byed pa'i don/ /gnyis med rtogs pa mai tris bshad/ /'di la gzhol ba don ldan shog /mi zad pa'i gter mdzod yongs su gang ba'i glu zhes bya ba'i rgya cher bshad pa rnal 'byor gyi dbang phyug chen po dpal sa ra ha pa'i dgongs pa mkhas par grags pa dpal ldan gnyis su med pa'i rdo rjes mdzad pa rdzogs so// //