CLOSE WINDOW

D2240
བོད་ཡིག

/ //bla ma badzra pA Ni dang / rma ban gyis bsgyur ba'o//[ ]@##/ /rgya gar skad du/ tat+t+wa rat+na a ba li nA ma/ bod skad du/ de kho na nyid rin po che'i phreng ba zhes bya ba/ 'jam dpal gzhon nur gyur pa la phyag 'tshal lo//ston ka'i zla ba dri med 'od/ /rdo rje sems dpa'i zhabs gnyis kyi/ /chu skyes la ni phyag 'tshal nas/ /de nyid rin chen brjod par bya/ /brgyud pa'i gzhung lugs las nyams shing / /rab rib kyis ni mig bkab pa'i/ /skyes bu rnams la yang dag pa'i/ / de nyid rin chen rnam bshad bya/ /de la theg pa ni gsum ste/ nyan thos kyi theg pa dang / rang sangs rgyas kyi theg pa dang / theg pa chen po zhes bya'o/ /gnas pa ni bzhi dag ste/ bye brag tu smra ba dang / mdo sde pa dang / rnal 'byor spyod pa dang / dbu ma pa'i dbye bas so/ / de la bye brag tu smra ba'i gnas pa ni/ /nyan thos kyi theg pa dang / rang sangs rgyas kyi theg pa zhes bya'o/ /theg pa chen po yang rnam pa gnyis te/ /pha rol tu phyin pa'i theg pa dang / /gsang sngags kyi theg pa zhes bya'o/ /de la pha rol tu phyin pa'i theg pa la yang gsum ste/ mdo sde pa dang / rnal 'byor spyod pa dang / dbu ma la gnas par spyad par bya'o/ /gsang sngags kyi tshul la yang gnyis te/ rnal 'byor pa dang / dbu ma la gnas pa'o/ /rnal 'byor spyod pa la yang rnam pa gnyis te/ rnam pa dang bcas pa dang / rnam pa med pa'i dbye bas so//de bzhin du dbu ma yang rnam pa gnyis te/ sgyu ma lta bur gnyis su med par smra ba dang / chos thams cad rab tu mi gnas par smra ba'i dbye bas so/ /de la nyan thos kyang rnam pa gsum ste/ tha ma dang / 'bring dang / mchog gi dbye bas so/ /de la tha ma dang 'bring ni bye brag tu smra ba'i phyi ma'o//mchog ni kha che bye brag tu smra ba'o/ /de la nyan thos tha ma'i dpyad par bya ba ni/ sngon po dang / ser po la sogs pa'i phyi'i don khas len pa sngon du 'gro bas/ gang zag ni rtag pa dang / mi rtag pa nyid dang bral ba'o zhes rnam par dpyad pa'o/ /de yang sngon po la sogs yod par ni//dngos 'dzin gdon gyis zin pa rnams/ /zab mo'i lus kyi 'jigs pa yis/ /'gro ba shin tu rmongs pa la'o/ /zhes bya ba dang / khur khur ba'i gang zag kyang yod de/ /rtag pa zhes kyang mi brjod de/ /mi rtag zhes kyang mi brjod do/ / gang zag 'dod chags dang bcas pa ni 'khor bar 'gyur bas/ 'dod chags rab tu spang ba'i phyir/ /mi sdug pa'i bsam gtan bsgom par bya'o/ /mi sdug pa bsgom pa yang lus kyi bshang ba dang / gci ba dang khu ba dang / khrag dang / ngar snabs dang / rgyu ma dang / zhag dang / glo ba dang / snying dang / mkhal ma dang / mcher pa dang / pho ba la sogs pa tshogs pa la nges par dpyod do/ /de yang gsungs pa/ re zhig pags pa'i kha sbyor 'di/ /rang gi blo yis tha dad dbye/ /sha dang rus pa'i dra ba las/ /shes rab mtshon gyis dbye bar bya//rus pa rnams kyang dbye byas nas/ /rkang gi bar du dbye byas na/ /'di la snying po ci yod ces/ /bdag nyid kyis ni brtag par bgyi/ /zhes bstan pa'o/ /gang zag gis rtag par lta ba sngon du song ba ni ting nge 'dzin gyi dri ma'o/ /ji srid 'tsho'i bar du sangs rgyas dang chos dang /dge 'dun la skyabs su mchi'o/ /bde bar gshegs pa dang / rgan po gnyis la phyag bgyi'o/ /dge ba'i rtsa ba ci bsags pas/ bdag nyid gcig pu dul bar bgyi'o/ /bdag nyid gcig pu zhi bar bgyi'o zhes bya ba ni lta ba'o/ /'bring po'i lta ba dang /dpyod pa ni snga ma bzhin no/ /'di ni gzhan gyi don cung zad byed par 'dod pa'o/ /dbugs dbyung ba dang / dbugs rngub pa'i ting nge 'dzin gyis/ rtag pa dang mi rtag pa nyid dang bral ba'i gang zag la lta ba'i bsam gtan dang / rlung gi bum pa'i sems med pa'i rang bzhin ni ting nge 'dzin gyi dri ma'o//bems por gyur pa'i phyir ro/ /mchog ni phyi'i don khas len cing / /lus la bdag med pa nyid du rnam par 'jig cing dpyad pa'o/ /'phags pa'i bden pa bzhi yongs su shes pas/ stong pa nyid du lta ba ni bsam gtan no//'dir sdug bsngal ni phung po lnga'i rang bzhin te shes par bya'o/ /kun 'byung ni rnam par rtog pa ste spang bar bya'o/ /'gog pa ni lhag mthong ste mngon du'o/ /lam ni stong pa nyid de bsgom par bya'o/ /stong pa nyid kyang rtag tu zhi ba'i rnam pa nyid du sgro btags pa ni bsam gtan gyi dri ma'o//yang 'di'i lta ba ni gzhan gyi don byed pa'i khyad par ro/ /yang 'dir nyan thos tha ma ni rigs nges pa nyid kyi phyir dang / snying rje dang bral ba'i phyir nyan thos kyi byang chub nyid du 'gyur ro zhes kha cig 'dod do/ /gzhan dag ni/ thams cad sangs rgyas nyid du 'gyur//'di na skal med 'ga' yang med/ /ces bya bas/ bdag gis yang dag par rdzogs pa'i byang chub bsgrub pa la sgyid lug par mi bya'o snyam sems shid/ nyan thos tha ma yang yang dag par rdzogs pa'i sangs rgyas su 'gyur ro zhes zer ro/ /rigs des pa yang sangs rgyas 'ga' zhig la brten nas 'gyur ro snyam sems so//'bring po ni rang sangs rgyas nyid du 'gyur ba'o/ /mchog ni bskal pa grangs med pa bzhis sangs rgyas nyid du 'gyur ro zhes zer ro/ /rang sangs rgyas rnams dpyad pa ni/ nyan thos mchog rnams kyi bzhin no//'di la zhugs pa'i gang zag ni stong pa nyid dang / bsam du med pa'i mtshan nyid dang / slob dpon med pa dang / rang byung gi ye shes dang / lhag mthong dang / zhi gnas so/ /de la lhag mthong ni dbang po rnams 'gog pa dang / gang zag mi dmigs pa'o/ /zhi gnas ni lus dang ngag dang yid yang dag par sdom pa ste/'di ni 'di'i bsam gtan no/ /'di la gnyis kyis sems bsdus pa'i bde ba'i gnas skabs kyi sems kyi bsam gtan dang / sems las byung ba shin tu 'gags pa'i gnas skabs ni bsam gtan gyi dri ma'o/ /de la snga ma ni nyi ma'i gzhung la rjes su zhugs pa rnams kyis te/de'ang 'ongs par 'gyur ba'i gnyid dag ni/ phyi yi spyod yul nyams pa na/ /yid kyi spyod yul gang gyur pa/ /de ni 'bad la bsgom par bya/ /zhes bya ba dang / gzhan yang bye brag pa'i gzhung gi rjes su 'brang ba rnams kyis kyang /klu sgrub kyi zhal snga nas/ shes pa med pa'i ye shes gang / /gnyid kyi dpe yis bsgrub pa ni/ /dbang po 'gag pa'i shes pa ste/ /bye brag pa yi 'dod pa yin/ /zhes bstan pa yin no/ /bcom ldan 'das kyi gsung rab las kyang / rgyal byed tshal ni mnyam dga' bar//bdag nyid wa ru gyur kyang bla'i/ /bye brag pa yi thar pa ni/ /nam yang go tam ma 'tshal lo/ /zhes bstan pa yin no/ /'di yang bskal pa grangs med pa bzhi 'das nas sangs rgyas su 'gyur ba'o/ /nyan thos dang / rkyen rtogs 'di dag gi snying rje yang sems can la dmigs pa ste/sdug bsngal gyi sdug bsngal nyid dang / /'gyur ba'i sdug bsngal dag la nyin re zhing / sems can la dmigs nas snying rje gang skye ba de ni/ sems can la dmigs pa'i snying rje'o/ /nyan thos ni dag gis ston pa'o/ /rkyen rtogs ni lus kyis ston pa'o//de yang / rdzogs sangs rgyas rnams mi 'byung zhing / /nyan thos rnams kyang zad pa na/ /rang sangs rgyas kyi ye shes ni/ /rtog pa med par rab tu 'byung / /zhes bstan pa'o/ /da ni pha rol tu phyin pa'i rnal 'byor ba rnams kyi brjod par bya'o/ / de la chung ngu ni mdo sde pa'o/ /yang 'di'i don du rdul phra rab bsags pa'i ngo bo rnam pa dang bcas pa'i shes pa skyes par byed pa'i ngo bo'o/ /de yang 'di'i ngo bo nyid ni/ gang gi phyir rnam pa dang bcas pa'i shes pa skyes pa nyid ces bya'o/ /de yang tha dad dus su ji ltar gzung zhe na/ mkhas pas gzung bar bya ba nyid//rig pa'i shes par gtan tshigs nyid/ /shes pa rnam pa len bzod pa'o/ /zhes bya ba ni brtags pa'o/ /dbang po yul gyi grong las yongs su ldog pa'i bsam gyis mi khyab pa ni bsam gtan no/ /de 'ang 'di ni goms par bya ba'i dus yin gyi/ mngon sum du bya ba'i dus ni ma yin no zhes gsungs pas/ de'i phyir goms par bya ba kho na'o/ /goms par bya ba'ang / sems kyi sems med rtog pa yis/ /gang tshe goms par byed pa na/ /gang nas gang du song gyur pa/ /de tshe sems mthong mi 'gyur ro/ / skad cig skad cig la bsten nas/ /rdo rje skyil krung bcas nas ni/ /sna rtser g.yo ba'i yid gtad la/ khyim par gyur kyang bsgom par bya/ /ting nge 'dzin 'di'i dri ma ni snga ma bzhin no/ /'khor gsum mi dmigs pas shes rab kyi pha rol tu phyin pa lnga la kun du spyod cing 'bras bul re ba med par sems can yongs su smin par byed pa ni lta ba'o//'bring po ni rnal 'byor spyod pa'o/ /de la rnam pa dang bcas pa'i shes pa dang smra ba ni/ drug gis cig car sbyar ba na/ /phra rab cha shas drug tu 'gyur/ /zhes bya ba la sogs pa'i rigs pas/rdul phra rab kyang dmigs par mi 'gyur gyis/ 'di dag thams cad ni sems tsam ste/ sems nyid gzung ba dang / 'dzin pa'i rnam pa'i ngo bo dang bral ba/ gsal ba nyid gsal ba rab tu ston pa'o zhes rab tu rtogs pa'o/ /'di yang kye rgyal ba'i sras dag khams gsum po 'di dag ni sems tsam mo zhes gsungs pa dang /de bzhin du chos kyi grags pa'i zhal snga nas kyang / sdo sogs ngo bo blo nyid na/ /phyi yi don gyi rgyu ci zhig /blo nyid sngo sogs ma yin na'ang / /phyi yi don gyi rgyu ci zhig /ces bstan pa yin no/ /gzhan dag nas kyang /dbang po'i don gyi ngo bo nyid/ /sems las gzhan yod ma yin te/ /gzugs la sogs par snang ba ni/ /sems nyid rab tu snang ba'o/ /zhes bstan pas/ de'i phyir sems kho na sna tshogs kyi rnam par gzhag pa gzhan la mi ltos pas rab tu gsal ba nyid do zhes bya ba ni/rnam pa dang bcas pa'i shes pa smra ba'i rnal 'byor spyod pa'i rnam par brtags pa yin no/ /rnam pa med pa'i smra ba'i rnal 'byor spyod pa ni yang / 'di dag thams cad sems nyid de/ /rnam pa med pa'i rang rig pa'i ngo bo nyid sems zhes bya'o/ /de yang / ji ltar byis pas rnam brtags pa'i/ /phyi rol don ni yod ma yin/ /bag chags kyis ni dkrugs pa'i sems/ /don du snang ba rab tu 'byung / /gang zhig ji srid snang gyur pa'i/ /de srid sgyu ma bzhin du snang / /snang ba med pa'i de nyid ni/ /nam mkha' mtha' med dag pa bzhin//thub pa chen po chos sku ni/ /spros pa med cing snang ba med/ /de la byung ba'i gzugs kyi sku/ /rjes la sgyu ma bzhin du gnas/ /zhes bstan pa ni rnam par brtags pa'o/ /rnam pa dang bcas pa'i bsam gtan ni/ rnam par rtog pa ma lus spangs shing /sna tshogs dang bcas pa gnyis su med par mngon sum du byed pa'o/ /de yang / shes bya gang dang gang dag la/ /yid kyis 'gro ba der sbyar na/ /gang du 'gro zhing g.yo bar 'gyur/ /thams cad de yi rang bzhin no/ /zhes bstan pa yin no/ /rnam pa med par smra ba'i bsam gtan ni/bden pa gnyis su med cing bsam gyis mi khyab pa/ spros pa med pa/ snang ba med pa'i ye shes ni mngon sum du byed pa'o/ /de yang / 'di yi ngo bo gsal bar 'dod/ /rnam pa med cing ma gos pa/ /'di ni mkhas pa ma yin pas/ /nam yang shes par mi nus so//'di dag thams cad sems tsam zhes/ /'di snyam du yang dmigs nas su/ /ci yang rung ste mdun 'jog na/ /de nyid tsam la mi gnas so/ /gang tshe shes pas dmigs pa rnams/ /nye bar mi dmigs pa yi tshe/ /sems tsam la ni gnas pa ste/ /gzung ba med pas der 'dzin med//ces bstan pas so/ /rnam pa dang bcas pa smra ba'i ting nge 'dzin gyi dri ma ni don dam par rtogs par 'dod pa ste/ bcom ldan 'das kyi gzhung la gnas nas rig byed pa'i rjes su 'jug pa ste/ de yang don dam par rtag pa rang gi sems kyi ngo bo la/ tshangs pa las gzhan ma yin pa yongs su gyur pa'i ngo bor 'gro ba rnams 'dod do/ /de yang / cung zhig gang dang gang mthong ba/ /de dang de ni tshangs par brtag /sems ni de las gzhan pa med/ /tshangs pa nyid la nges par gnas/ /zhes bya ba ni/ rnam pa bcas pa'i ting nge 'dzin gyi dri ma'o//de bzhin du rnam pa med par smra ba'i bsgom pa yang rtags pa snang ba med pa'i spros pa rang rig pa'i shes pa ste/ nyi ma'i gzhung gi rjes su zhugs par thal bar 'gyur te/ de yang ming dang gzugs ma lus pa dang bral ba/ spros pa'i 'khrul pa ma lus pa rnam par dag pa rab tu gsal ba mtha' med pa/bar mtshams med pa/ rtag pa'i tshangs par khas len par byed do/ /de yang bdag rtog rgya mtsho dang sa pa la/ /sna tshogs chu bur gsog 'di 'byung bar 'gyur/ /'char ba dang ni nub par 'gyur ba yang / /rnam par rtog pas kun tu ma rtog pa'o/ / zhes bya ba ni rnam pa med par smra ba'i ting nge 'dzin gyi dri ma'o/ /'di'i lta ba yang snga ma bzhin no/ /rab ni dbu ma pa'o/ /de la sgyu ma lta bu gnyis su med par smra ba'i dpyad pa ni/ yod min med min yod med min/ /gnyis kyi min pa'ang ma yin pa/ /mtha' bzhi las ni rnam grol ba/ / de gnyis dbu ma pa yi rigs/ /'di'i don ni 'di yin te/ /yod pa ma yin pa ni sbyor bas gnod pas so/ /med pa ma yin pa yang bag chags kyi dbang gis mi bden par snang ba'o/ /gnyi ga la yang skyon gnyis yod pas ma yin na/ /gzhan yang sngon dang da ltar dpyad pa med par sna tshogs su ji ltar snang ba de ltar rjes su bden pa ci zhig gang du thal bar 'gyur//de ni sgyu ma lta bu gnyis su med pa'o zhes brtags pa'o/ /'di nyid ni sgyu ma lta bu gnyis su med pa'i bsam gtan no/ /'di la'ang chad pa la mngon par zhen pa ni bsam gtan gyi dri ma'o/ /sgyu ma lta bu gnyis su med par lhag par mos pa dang pha rol tu phyin pa drug yongs su rdzogs par byed pa ni lta ba'o//chos thams cad rab tu mi gnas par smra ba'i rtag pa ni 'di yin te/ sna tshogs brtags pa ma yin te/ /chad par yang ni khas mi len/ /rtag dang chad pa gnyi ga dang //gnyi ga min pa'ang ma yin no/ /'di ni thams cad mi gnas pas/ /dngos po'i de nyid mkhas pas rig /des na/ 'di lta bu yi rnam rtog gis/ /sems ni sems kyis rig ma yin/ /ji srid sgro btags thams cad ni/ /de kun thams cad du med pas//dbu ma'i don la sgro btags med/ /des na dgag dang sgrub pa med/ /shes pa gang zhig lhun grub pa/ /de la bsam mi khyab ces brjod/ /bsam bzhin du ni mi sems pa/ /de la bsam mi khyab mi brjod/ /bdag gis 'gro ba ma skyes zhes/ /blo ni dag pas rtogs pa nyid//'gro ba'i gnyug ma bden pa nyid/ /blo dang ldan pas 'bad pa med/ /de yang / sgro btags kun las nges grol ba/ /bdag gis de nyid du brjod do/ /stong pa la sogs mngon brjod dang / /de la sgro 'dogs gcod pa'o/ /zhes bstan pa yin no/ / btags pa 'di'i don ni/ /sgro ma btags pa'i don gyi rang bzhin la/ /mngon par zhen pa med par mngon du byed pa med pa ni bsam gtan no/ /don thams cad chad par lta ba dang / be+ems po'i rang bzhin du 'gyur ba ni ting nge 'dzin gyi dri ma'o/ /sgro 'dogs pa med par pha rol tu phyin pa drug yongs su rdzogs par byed pa ni lta ba'o//'dir dman pa dang 'bring po'i snying rje ni chos la dmigs pa ste/ chos rnams kyi mi rtag pa nyid kyi rlung gis bskyod pa'i chos thams cad la dmigs nas skye bar 'gyur bar rtogs par bya'o/ /rab ni dmigs pa med pa ste/rang bzhin med pa'i chos yid la byed pas mngon par rtogs pa ni dmigs pa med pa'i snying rje'o/ /'dir sku gsum rnam par gzhag pa ni mgon po byams pas gsungs so/ /de yang / gang gis srid pa ji srid par/ /'gro la phan pa sna tshogs dag /mnyam nyid mdzad pa'i sku de ni/ /thub pa'i sprul sku rgyun mi chad/ /mtshan ni sum cu rtsa gnyis dang / /dpe byad brgyad cu'i bdag nyid 'di/ /theg chen nye bar longs spyod phyir/ /thub pa'i longs spyod rdzogs skur 'dod/ /zag med chos rnams rnam kun du//rnam par dag gyur gang dag yin/ /'di dag rang bzhin mtshan nyid can/ /thub pa'i ngo bo nyid sku yin/ /zhes bstan pa yin no/ /'dir kho bos gsang sngags kyi gzhung ni ma bshad do/ /shin tu zab pa'i phyir dang / zab mo'i theg pa lhag par mos pa'i skyes bu'i spyod yul yin pa'i phyir dang /phyag rgya bzhi la sogs pa'i sgrub pa rab tu bstan pa rgyas pa'i phyir ro/ /de yang / don gcig na'ang ma rmongs dang / /thabs mang dka' ba med pa dang / /dbang po rnon pos dbang byas pas/ sngags kyi bstan bcos khyad par 'phags//zhes bstan pas so/ /de'ang kho bos dbang nges par bstan pa zhes bya ba nas bstan to/ /gal te theg pa chen po nas don 'di nges par bstan na don dam pa la goms par bya ba'i phyir/ nyan thos dang rang sangs rgyas kyi theg pa bcom ldan 'das kyis ci'i phyir bstan zhe na/de blo dman pa yin te/ thob par bya ba'i theg pa chen po rtogs par bya ba'i phyir/ /'di dag skas kyi rim pa lta bur bstan pa yin no/ /de yang / sems can dang po'i las can rnams/ /dam pa'i don la 'jug pa la/ /thabs 'di rdzogs pa'i sangs rgyas kyis//skas kyi rim pa lta bur gsungs/ /zhes bstan pa dang / dam pa'i chos pad+ma dkar po las kyang / /theg pa gcig cing lugs kyang gcig /gtso bos bstan pa 'di yang gcig /gang yang theg pa gsum bstan pa/ /nga yis thabs la mkhas pa'i dngos/ / zhes gsungs pa dang / klu sgrub kyi zhal snga nas kyang / chos kyi dbyings la dbyer med phyir/ /gtso bos theg dbyer ma mchis kyang / /khyod kyis theg pa gsum gsungs pa/ /sems can gzhug pa'i ched du lags/ /zhes bstan pa dang / gzhan dag nas kyang / stong pa nyid kyis grol bar 'gyur//de ma shes pas 'ching bar 'gyur/ /bsgom pa lhag ma de don yin/ /zhes bstan pa yin no/ /de lta bu'i theg pa gsum rab tu bstan pa yang / /bcom ldan 'das kyis spyi dang bye brag gi rtog pa'i khyad par gyis sems can gyi don du rtogs par 'gyur ba'i phyir ro//de yang / gtso bo khyod kyi 'ga' zhig tu/ /yi ge gcig kyang ma gsungs so/ /gdul bya'i 'gro ba ma lus la/ /chos kyi char gyis tshim par mdzad/ /ces pa dang / kun du rtog pa ma lus pas/ /yid bzhin nor ltar ma g.yos kyang / /de ltar sems can thams cad kyi//bsam pa ma lus yongs rdzogs byed/ /'khor lo bskor ba'i sbyor ba yis/ /mi rtogs bzhin du skyob pa ni/ /tshogs kyi dbye ba nus pa yis/ /bstan pa rab tu 'jug par 'gyur/ /ji srid sems ni 'jug par du/ /theg pa mtha' la thug pa med//sems nyid yongs su gyur pa na/ /theg pa med cing 'gro ba med/ /dam chos las grub rin po che/ /dri med dag gi skud pas brgyus/ /dga' ba skyed byed rin chen phreng / /bstan pas snying gar gdags par bgyi/ /bdag ni snying po la mes pas//rgyas par bstan pa ma lags pa/ /rgyas la dgyes pa'i mkhas pa rnams/ /bdag la thams cad bzod par mdzod/ /skal ldan gyis ni gsol btab bdag gis ni/ /'bad pas bla med don ldan 'di brtsams pas/ /bdag gis bsod nams thob par gyur pa des/