CLOSE WINDOW

D2219
བོད་ཡིག

zhu chen gyi lo tsA ba 'gos lha btsas kyis bsgyur cing zhus te gtan la phab pa//[ ]@##/ /rgya gar skad du/ dz+nyAn sid+d+hi nA ma sA d+ha no pi kA/ bod skad du/ ye shes grub pa zhes bya ba'i sgrub pa'i thabs/ bcom ldan 'das rdo rje sems dpa' la phyag 'tshal lo//sangs rgyas kun dang dngos grub ni/ /nam mkha' lta bur khyab gyur ba/ /rgyal mchog mchod dang bcas pa yi/ /thams cad mkhyen pa'i rdo rje mchog /sems can kun la kun stsol ba'i/ /'gro ba'i mgon la phyag 'tshal te//dngos po kun la bdag gus pas/ /sgrub pa'i rim 'di bshad par bya/ /ma lus sbyor rgyud las gsungs pa'i/ /rdo rje ye shes bla na med/ /rmongs pa gang gis mi shes pa/ /de ni 'khor ba'i rgya mtshor 'khyams/ /gang zhig rtog pa kun spangs pa'i//de nyid la ni yang dag gnas/ /sgrub pa po de tshe 'di yis/ /byang chub dam par gnas par 'gyur/ /sngags dang phyag rgya dkyil 'khor sogs/ /bzlas dang bsgom la 'bad pa yis/ /bskal pa bye ba grangs med du'ang / /dngos grub mchog ni thob mi 'gyur//gzugs dang lang tsho phun sum tshogs/ /longs spyod dbang phyug stobs rnams dang / /rigs dang rgyud dang gtsor gyur pa'i/ /sems la nga rgyal bcang mi bya/ /bdag ni blo ldan mkhas pa dang / /bzo dang sgyu stsal thams cad la/ / mkhas pa dag ni rgyal po zhes/ /sems ni bskyed par mi bya'o/ /tshul khrims ldan zhing thos ldan brtan/ /sbyin pa la sogs yang dag ldan/ /bshad dang gzhan yang ma bshad pas/ /bdag tu dmigs par mi bya zhing / /sems can kun gyi yid khyad par/ /rdo rje sems dpa' rang nyid zhugs//de ltar bsams nas rnal 'byor gyis/ /dbang pos gang la'ang brnyas mi bya/ /byis pa blun dang dbul po dang / /tshul khrims 'khyal cing nad kyis gzir/ /de la sogs pa dpag med dang / /yang dag ldan yang brnyas mi bya/ /dkon mchog gsum la dad cing gus//byang chub sems kyis rnam par brgyan/ /sems can kun la rjes su brtse/ /dam tshig dang ni sdom la gnas/ /dri chen dmar dang sha nyid dang / /byang chub sems dang rab bsres la/ /chu chen dang ni yang dag ldan/ /de nyid rig pas rtag tu bza'/ / mi khyi rta dang ba lang sgron/ /sna can dang ni khur skyed kyi'ang / /rtog pa thams cad rnam spangs la/ /de nyid grub phyir bza' bar bya/ /srid gsum las byung gsad bya zhing / /pha rol nor ni 'phrog pa dang / /gzhan gyi bud med la 'dod spyod/ /brdzun gyi tshig ni smra bar bya/ /las gang gis ni sems can rnams//bskal pa bye ba brgya phrag tu'ang / /mi bzad dmyal bar 'tshed 'gyur ba/ /des ni rnal 'byor ba grol 'gyur/ /thabs chen yang dag ldan pa yi/ /rnal 'byor 'jig rten don grub pa/ /sems can kun gyis smad pa yi/ /bya ba de la mi bya med/ / shes rab thabs dang ldan pa la/ /sdig par grags pa yang med ces/ /rdo rje sems dpa'i sprul pa las/ /rdo rje can ni nyid kyis gsungs/ /bza' dang bza' min las 'das dang / /btung dang btung min rnam par spangs/ /bgrod dang bgrod min rnams grol bdag/ /rnal 'byor pa ni mnyam 'jog 'gyur//rten 'brel las byung yang dag dngos/ /dngos po thams cad rnam par brtag /'gro 'ong dag las rnam grol zhing / /skye ba med pa bdag med can/ /sgyu ma 'dra sogs dpe yis ni/ /de rnams sbyor bar rab shes pas/ /nga dang bdag gi rnam rtog dag /de nyid shes pas der mi bya/ /rdo rje chen pos kun khyab cing / /nam mkha' kun la rab tu zhugs/ /sems can kun gyi yid khyab cing / /bsod nams thams cad 'byung ba che/ /phan tshun khyab mdzad rdo rje ni/ /kun rig 'jig rten 'dren pa po/ /de ni rdo rje 'dzin rgyal pos/ / rgyud rnams kun du gsungs pa yin/ /gang la bla ma'i drin yod pa/ /de yis de nyid mchog rnyed 'gyur/ /gzhan du byis pas yun ring du/ /rnam par rmongs pas nyon mongs 'gyur/ /bla ma sangs rgyas chos gyur cing / /dge 'dun yang ni de bzhin te/ /de yi drin gyis shes 'gyur bas//de bas dkon mchog gsum yin no/ /mi shes rab rib kyis ldongs la/ /'di ni lam rab ston byed yin/ /bde ba kun gyi mchog 'gyur dang / /'dod pa thams cad rab ster yin/ /zab mo'i chos la nges pa'i bdag /shin tu snying rje'i bdag nyid can/ /dkon mchog gsum rnams don du gnyer//chos sbyin pa la zang zing med/ /bla ma de ni slob ma sdud/ /sangs rgyas kun rjes sgrub byed cing / /'gro ba'i mgon gyis bka' stsal te/ /gzhan dag bla ma min par bshad/ /de bas de dang mnyam pa yi/ /mchod bya blo chen yod ma yin//des na 'bad pa thams cad kyis/ /brtul zhugs can ni blo mchog mchod/ /de mnyam 'gro ba 'jig rten na/ /khams gsum na ni gzhan med de/ /rdo rje sems nyid 'jig rten na/ /phun sum tshogs kun phyir zhugs yin/ /slob ma phun tshogs mchog 'dod cing / / bsod nams mi zad 'dod pa dang / /bgegs kun rnam par zlog byed pas/ /rnam pa du mas mnyes par bya/ /dam tshig dag ni thams cad kyi/ /bla med dam tshig 'di yin te/ /phun sum tshogs kun ster ba'o/ /brtson ldan rnams kyis rtag tu bsrung / /rtog pa thams cad rnam spangs pa'i//ye shes mchog bzang thob pa yis/ /rdo rje ye shes dbang bskur bas/ /dngos grub mchog ni bsgrub par bya/ /yang dag ye shes kun ldan na/ /bris pa'i dkyil 'khor log gzhan du/ /dbang bskur ba ni len ce na/ / 'di ni dam tshig nyams par 'gyur/ /dam tshig nyams pa'i sdug bsngal ni/ /lus dang de bzhin yid dang ni/ /de yi don rnams nyams 'gyur zhing / /myur ba nyid du shi bar 'gyur/ /shi nas dmyal ba'i sdug bsngal ni/ /bskal ba bye ba brgya phrag tu'ang / /myong nas gnas las 'phos 'gyur na'ang //gdol pa'am dman pa'i rigs su skye/ /lkugs pa'am yang na 'on pa 'am/ /skye zhing skye bar dmus long du/ /skye bar 'gyur bar the tshom med/ /de bzhin gshegs kun ye shes ni/ /rdo rje ye shes zhes byar bshad/ /blo ldan de yis dbang bskur na//dbang bskur bar ni shes par bya/ /rnal 'byor sangs rgyas kun bdag nyid/ /'gro ba'i bdag po la sogs pa'i/ /tshogs kyis thal mo sbyar nas ni/ /byas nas mngon par phyag byed 'gyur/ /byang chub sems dpa' stobs chen dang / /bdag nyid chen po sangs rgyas kyang //dpal chen bsrung ba mdzad gyur te/ /rdo rje sku yis rtag tu bzhugs/ /bden pa'i chos 'dzin mi 'khrug cing / /sangs rgyas gdung ni rab 'jug pa/ /byin gyis brlabs dang ldan pa rnams/ /gus dang bcas pas bsngags par mdzad/ / 'jig rten skyong dang de bzhin gzhan/ /stobs chen pha rol gnon pa rnams/ /gnas rnams kun du rtogs pa na'ang / /gsungs bzhin du ni rab tu gnas/ /gang yang sems can thams cad la/ /bdud dang bgegs su gnas pa rnams/ /de yang de la mi byed de/ / bgegs rnams skrag nas 'byer bar 'gyur/ /lha la sogs dang grub pa rnams/ /mkha' la rgyu dang mi rgyu kun/ /ngan 'gror 'gro bas 'jigs pas na/ /de yang de la mgon mi byed/ /gal te rmongs pa'i dbang gis ni/ /rnam par rmongs rnams mgon byed na/ / brtson dang ye shes rnam shes dang / /dngos grub dag kyang nyams par 'gyur/ /kun mkhyen mchog sbyin gsungs pa'o/ /dbyibs kun dang ni rnam bral zhing / /'gro dang 'ong las rnam grol bdag /rlung kun gyis kyang bskyod mi nus/ /me yi phung pos mi tshig cing / /chu rnams kyis kyang g.yeng mi 'gyur//rab tu 'bad pas mtshon cha ni/ /rnon pos kyang ni chod mi 'gyur/ /ji ltar mi gnas nam mkha' ni/ /khyab cing mtshan nyid rnams dang bral/ /'di ni don dam de nyid de/ /rdo rje ye shes bla med yin/ /kun du bzang po zhes bshad cing //phyag rgya chen po zhes kyang bya/ /'di ni chos skur shes bya ste/ /me long ye shes zhes kyang bya/ /ji ltar gzugs brnyan me long la/ /rang nyid nges par snang ba ltar/ /de bzhin chos skur ye shes ni/ /snang bas me long zhes bya'o/ /de bzhin gshegs kun ye shes dang //rang gi dang ni 'gro ba'i yang / /dngos nyid gcig pur thugs su chud/ /mnyam nyid ye shes zhes bya'o/ /gdod nas dag cing skye ba med/ /rang bzhin gyis ni 'od gsal ba/ /phan tshun khyab pa'i ye shes pas/ /so sor rtog pa can zhes bshad/ / kun du kun nas sangs rgyas kyi/ /mdzad pa thams cad la 'jug pa/ /sangs rgyas thams cad mdzad cig pas/ /bya bsgrub pa zhes bshad do/ /gang tshe nyon mongs shes bya'i sgrib/ /thams cad las grol de yi tshe/ /rnal 'byor ba mchog rdo rje can/ / shin tu rnam dag ces bshad do/ /ji ltar gdul bya'i chos rnams dang / /'dod yon kun las sangs rgyas rnams/ /thams cad longs spyod gcig pas na/ /longs spyod rdzogs pa'i skur 'dod do/ /mtshan rnams kun dang yang dag ldan/ /sna tshogs sku ste mtshan nyid med//sangs rgyas rnams kyi sprul pa bas/ /sprul pa'i skur ni bshad pa yin/ /phyag rgya chen po rab bsgrub phyir/ /shes nas rnal 'byor pas de bsgom/ /kun rtog thams cad rnam spangs na/ /tshe 'di nyid la 'grub par 'gyur/ /sangs rgyas kun gyis phyag mdzad pa/ /phyag rgya chen zhes shes par bya//grub sde du ma'i rgyud rnams su/ /rnal 'byor mchog rnams la brten te/ /mngal 'byung rim pa gang yin dang / /zhing dang zhing du so sor btul/ /de bzhin gshegs pa thams cad ni/ /der ni yang dag brtul zhugs 'dzin//gzhon nu'i rol pa thams cad dang / /de bzhin bzo gnas yang dag bstan/ /btsun mo'i 'khor las mngon 'byung zhing / /bdud rnams 'dul bar mdzad nyid dang / /lha yul nas ni 'bab pa dang / /chos kyi 'khor lo bskor ba dang / /mya ngan 'das chen yang dag bstan//gang yang rol pa gzhan rnams dang / /thams cad rdo rje'i rang bzhin las/ /rnal 'byor pas ni rtag tu bsgom/ /'dir ni sngon chad ma byung med/ /sngon gnas pa ni sbyor mi bya/ /de bzhin gshegs kun mdzad pa ni/ /thams cad rdo rje'i dngos gzhi ba//dus gsum lam gyi mthar thug pa/ /thams cad de bzhin blta bar bya/ /ngag gi spyod yul kun las 'das/ /mtshan nyid thams cad rnam spangs pa/ /sangs rgyas nyid kun ster ba po/ /rnal 'byor 'di 'drar bsam par bya/ /sa kun las ni rnal 'byor zhing //rgyu dang 'bras bu rnam spangs la/ /grub pa bzhin du rnal 'byor bsgom/ /tshe 'di nyid la 'grub par 'gyur/ /rdo rje can kun rnal 'byor pa/ /thabs kyi chog kun shes nas/ /rdo rje sems dpa'i gsung bzhin du/ /bla med de ni grub par 'gyur/ /'dug dang nyal dang gnas pa dang //yang na 'chag pa dgal yang / /rdo rje tshig ni smra byed na/ /rdo rje sems dpa' nyid thob 'gyur/ /gzugs dang sgra dang ro dang rig /brtul zhugs can ni rtag spyod tshe/ /sangs rgyas thams cad mchod pa ni/ /bya'o zhes ni yang dag spyod/ / de bzhin bza' dang gos sogs sam/ /gzhan gang ci yang rung ba dag /sems can rnams la ci ster ba/ /cho ga de bzhin spyad par bya/ /glu gar de bzhin rol mo dang / /me tog phreng sogs rgyan rnams dang / /chun 'phyang rnga yab gdugs rnams kyis/ /pha rol bdag nyid mchod par bya//dri bzang dri yi byug pa sogs/ /cho ga ji bzhin byugs pa dang / /sangs rgyas thams cad rjes dran zhing / /rnal 'byor pas ni thams cad mchod/ /brtul zhugs can nam mgo bregs pa'am/ /khyim pa 'am bsnyen bkur ba dag gam/ / rgyal po 'am sde dpon rnams kyang rung / /brtul zhugs can gyis ji bzhin spyad/ /rnal 'byor pa ni ci spyod pa/ /thams cad du ni smad mi bya/ /rtog pa kun las rnal grol bas/ /ji ltar 'dod pa bya ba byed/ /de ni dngos kun ngo bo ste/ /khyab bdag sangs rgyas kun rang bzhin//rang nyid ji ltar 'dod par spyod/ /sems can kun gyi snying la bzhugs/ /de nyid thams cad bla med pa/ /de nyid rnal 'byor dbang pos bsgom/ /rdo rje'i rang bzhin kun 'grub pa/ /rdo rje nyid ni myur thob 'gyur/ /'dir ni bgegs med bdud kyang med/ / thams cad kyang ni dbang du 'gyur/ /sdug bsngal kun las rnam par grol/ /brtul zhugs can gyis bdag nyid 'grub/ /bdag nyid thams cad yang dag ldan/ /brtul zhugs che ldan gang tshe mthong / /nyin zhag dang ni tshad bral bar/ /sangs rgyas thams cad nyid 'grub 'gyur//mchod pa kun gyi khyad par gyis/ /bdag nyid la ni rtag tu mchod/ /rdo rje sems dpa' bla med pa/ /phan tshun du yang de bzhin sbyin/ /sems can kun lus las byung dang / /phyi sa las byung srog chags rnams/ /rnal 'byor chen pos legs blangs la//de nyid grub phyir bza' bar bya/ /sgron ma che dang yang dag ldan/ /smad pa'i dam tshig gzhan rnams dang / /bdud rtsi lnga rnams rtag bza' zhing / /de bzhin gshegs pa rnams kyang mchod/ /yan lag kun ni smad pa dang / /brnyas pa dag tu mi bya ste//bud med rigs kun las byung ba/ /rdo rje can gyis mchod par bya/ /ma skyes me tog yang dag ldan/ /byang chub sems dang ldan pa dag /me tog cho ga la gnas te/ /de nyid grub phyir bza' bar bya/ /sme sha can gyi rigs las byung / /sme sha can dang khyad par du//smad pa'i rigs las byung ba rnams/ /brten na dngos grub thob par 'gyur/ /bram ze la sogs rigs las byung / /bu mo rnal 'byor pas spyad de/ /ji ltar sems sun mi 'byin pa/ /de ltar shin tu mdzes par bya/ /sbrang ma skyugs pa 'dres pa dang //bshang la sogs dang bsres pa yi/ /rnam par mi rtog sems kyis ni/ /rdo rje sems dpa'i bdag nyid mchod/ /ci 'dod bya ba byed pa dang / /ji dga' bar ni spyod pa yis/ /rdo rje sems dpa' bsgrub bya ste/ gzhan du nges par nyon mongs 'gyur// brtul zhugs smyung ba sdom pa dang / /sna tshogs phyag rgya dang ldan pa'i/ /lha yi gzugs su bsgom pa yis/ /sgrub pa 'grub par mi 'gyur ro/ /'dzam gling rdul phran mnyam pa yi/ /gsang sngags bzlas dang bsgom pa la/ /brtson pa che dang ldan gyur kyang / / sangs rgyas nyid ni 'grub mi 'gyur/ /de la sogs pa dpag med pa'i/ /byis pa rnams kyis rtag tshul gyis/ /bde 'gror skye ba rnyed dka' na/ /rdo rje sems dpar ji ltar 'gyur/ /phyag rgya dkyil 'khor gzugs la sogs/ /bcom ldan thub pas gsungs pa ni/ / yang dag ye shes mnyam sbyor gyi/ /skal pa dang bral bdag nyid la'o/ /gang zhig rang rig ngo bo nyid/ /de nyid rin chen bla med pa/ /lung dang rigs pa'i tshul gyis ni/ /gang zhig 'dzin par mi nus pa/ /mi shes rmongs pas kun du khebs/ /spyod pa med pa'i blo can rnams//dang po'i las can rnal 'byor te/ /dman pa'i chos kyi snod yin te/ /'gro ba'i mgon gyis de don du/ /rdo rje sems dpa' sogs bsgom pa/ /sku mdog phyag mtshan kun ldan zhing / /phyag rgya'i dkyil 'khor de bzhin gsungs/ /gang yang gzhan rkyen khar ma las/ / zab mo'i ye shes dag gi snod/ /sdig pa'i grogs dang bdud dang bgegs/ /log 'dren rnams kyis mi bskyod pa/ /de la de nyid dag pa ni/ /rtog pa thams cad rnam spangs pa/ /sems can kun dang tshangs sogs kyis/ /rnam pa kun du mi rtogs pa'i/ /shin tu rmad byung ye shes ni//sangs rgyas kun dngos zhi ba dag /tshe 'di nyid la grub byed pa/ /'jig rten mgon gyis gsungs pa yin/ /ye shes grub pa las/ /phyag rgya chen po bstan pa'i le'u ste dang po'o// //sangs rgyas lnga yi ngo bo las/ /phung po lnga ni rgyal bar bshad/ /khams rnams spyan la sogs yin te//de bas sangs rgyas skur 'dod do/ /de lta yin na srog chags kun/ /srid gsum rtag tu rdzogs sangs rgyas/ /sangs rgyas nyid phyir byang kun dang / /thos dang sgom pa don med do/ /'jig rten thams cad sangs rgyas na/ /phongs pa kun kyang mi 'byung la/ / bde dang sdug bsngal sgom la sogs/ /gnod pa de la yod ma yin/ /gal te sangs rgyas skur gyur na/ /mngon shes drug la sogs pa yi/ /sangs rgyas yon tan 'byor ba yang / /ci phyir de dag med par 'gyur/ /gang yang de ltar mi shes pa/ /de ni rdzogs sangs ji ltar 'gyur//'ga' zhig de ltar shes pa ni/ /'di ni sangs rgyas 'gyur ba yin/ /gang zhig rim gyis bslabs pa yi/ /sbyor bas sems ni 'jug 'gyur ba'i/ /rnal 'byor ba ni sangs rgyas 'gyur/ /gzhan dag sangs rgyas 'grub pa min/ /gal te ngang gis sangs rgyas na/ / bslabs pa dgos pa ci zhig yod/ /rigs par bcas pa goms bya yin/ /rigs pa med par goms bya min/ /gal te mgon med skye bo 'ga'/ /rgyal por 'gyur ro zhes bsgoms pas/ /bskal ba bye ba brgya yis kyang / /'di ni rgyal po thob mi 'gyur//gang zhig log pa'i rtog pas ni/ /gang la rgyal po yod min ltar/ /de bzhin log par bsgoms pa yis/ /sangs rgyas nyid du 'gyur ma yin/ /rdzogs sangs rgyas kyis rgyud rgyal du/ /phung po skye mched la sogs pa/ /de nyid dam tshig skal ldan pas//de dang de ming gis bstan pa/ /dri chen rnam snang zhes bshad de/ /gci ba de bzhin rdo rje chu/ /ji ltar mo dbang pad+ma ste/ /ji ltar pho dbang rdo rje yin/ /gang phyir lung dang rigs pa yi/ /rjes 'brang smra bar mi nus pas/ /de bas gang gis lha yi sku/ /smra bar nus pa ma yin no//gal te byas pa'i lha yi gzugs/ /rdo rje sems dpar gyur na go/ /gang phyir 'dus byas las byung bas/ /bum pa la sogs bzhin du 'jig /de bas byang chub spyod pa ni/ /du ma'ang 'bras bu med par 'gyur/ /gal te byung nas zhig gyur na/ / bsgom pa nyid ni don cir 'gyur/ /yid kyi rang bzhin byas pa'i gzugs/ /ji ltar 'dus bya yin zhes bshad/ /de dang de ni ji ltar 'jig /rmongs pa'i rgya mtsho khyod nyon cig /'di rnams sems kyis brtag pa ste/ /de yang 'dus byas mtshan nyid na/ /yid kyis brtags pa gang yin de//mi 'jig par ni ji ltar 'gyur/ /phyag dang sku mdog yang dag ldan/ /ji ltar sngon nas rnam bzhugs pa/ /ma byas pa yi lha yi sku/ /gal te de nyid du bsgom bya/ /ma skyes ngo bor gnas pa ste/ /bsgoms pas dgos pa ci zhig yod/ /de 'dra'i gzugs su ma gyur pas//de 'drar bdag ces bsgoms pas na/ /rnal 'byor pa rnams gzugs bsgoms pa/ /de 'dra'i gzugs su gyur pa 'am/ /de ni bdag yin zhes bsgoms pa/ /rnal 'byor pa rnams gzugs bsgoms pas/ /bsgom pa gnyis su 'di rnams brtag /de 'drar bdag ni 'gyur ro zhes/ /gang tshe bsam gtan gyis brtags pa/ /gang tshe bsam gtan gsal gyur pa/ /lha rnams su yang de snang 'gyur/ /khyod kyis ras ris sogs gzugs bltas/ /gang tshe bsam gtan rnam bsgom pa/ /de ni 'od 'gyur bsam gtan gyis//de bzhin skyes par 'gyur ma yin/ /ma skyes pa yi lha yi sku/ /khyod kyis bsam gtan gyis byin na/ /mngon shes thams cad 'byung 'gyur zhing / /de gzugs kyang ni skad cig des/ /de ltar khyod la yang dag med/ /bsam gtan gyis ni gang du 'ongs//khyed nyid kyis ni bskyed pa'i sku/ /bcos ma yin par cis ma rtogs/ /bdag nyid de yin zhes phyogs kyang / /gnyis pa der ni yod min te/ /grub pa'i sgrub pa yod min na/ /bsam gtan brtag pa ji lta bu/ /kun mkhyen nyid ni thams cad mkhyen//slar yang thob par mi bzhed do/ /sangs rgyas mdzad pa khyod byed na/ /sangs rgyas nyid pas byed bcug med/ /de ltar yang dag khyed la med/ /ji ltar log par rtog par byed/ /ma byas sangs rgyas sku gang yin/ /de dag yin zhes bya don med/ /ma byas pa yi lha yi sku//de ni de ltar rnam par dpyad/ /gzugs ni yin pas bum sogs yin/ /ma byas de smra nus ma yin/ /de bas 'gro ba'i mgon po yis/ /byis pa rnams kyis rtogs pa'i phyir/ /sku yi mi rtag ston mdzad pas/ /mya ngan 'das pa gnyis bstan mdzad/ / de bas sangs rgyas skur ldan par/ /'jig rten gar yang 'byung ma yin/ /sangs rgyas skur ni rab sgrub phyir/ /gzugs kyi bsgom par bya ba min/ /ji ltar sangs rgyas gzugs med pa'i/ /rig pa bems po'i bdag nyid nyon/ /yul na gnas gyur gzugs can ni/ / mngon shes drug tu ji ltar 'gyur/ /'jig rten khams ni thams cad na/ /gzugs la sogs pa'i skye mched rnams/ /mig gi skye mched la sogs pa/ /de rnams der ni 'ongs ma yin/ /gang tshe mig la sogs pa yi/ /'gro ba dmigs par mi 'gyur na/ / de rnams ji ltar phrad par 'gyur/ /ma phrad pa ni kun rig min/ /song nas shes par 'gyur zhe na/ /rim gyis shes par ji ltar nus/ /shes bya du ma'i ngo bo bas/ /thams cad mkhyen pa de 'dra med/ /sangs rgyas spyan la sogs pa yis/ /de bas dgongs pa yod ma yin//mig sogs dbang po ma gtogs pa/ /lus gzhan dmigs par mi 'gyur ro/ /gzugs brnyan lta bur sems med par/ /sangs rgyas skur ni shes byas nas/ /gang phyir yang dag rig med pas/ /sangs rgyas sku ni kun mkhyen min/ / brtser ldan rnams kyis lha yi spyan/ /sangs rgyas rnams la mnga' bar bshad/ /lha yi snyan ni thams cad mnga'/ /ji ltar thams cad mkhyen te min/ /gal te ye shes kyis mkhyen na/ /de tshe sangs rgyas skus ci bya/ /skur gnas ye shes der rig pas/ /de bas sku ni kun mkhyen yin//sku las tha dad tha dad min/ /sangs rgyas rnams kyis ye shes ni/ /sku dang yan lag ldan zhe na/ /mya ngan 'das nas de yang 'jig /lus ni 'jig pa'i chos can pas/ /ye shes kyang ni 'jig par 'gyur/ /de bas sangs rgyas ye shes sku//'jig par rigs pa ma yin no/ /ye shes lus la gnas gyur pa/ /sku med pas na kun mkhyen min/ /rten 'brel las byung ye shes de/ /de bas 'jig pa nyid du 'gyur/ /nyams 'gyur ye shes sku rnams ni/ /thams cad mkhyen nyid mi rigs so/ / de bas sangs rgyas sku dag ni/ /thams cad mkhyen par bya ba min/ /ye shes las gzhan phyogs la yang / /sangs rgyas skur ni ji ltar 'gyur/ /'di ltar sangs rgyas gzugs brnyan du/ /de ltar rnal 'byor smra ba'i rigs/ /gang zhig 'jig rten rmongs pa rnams//gzugs gang bsam par 'dod pa ni/ /sangs rgyas ye shes rab bsgrub phyir/ /nam mkha' za bar 'dod pa yin/ /'gro la snying rje dman pa dang / /thabs dang shes rab rnam spangs pa/ /zab cing rgya che'i chos rnams la/ /de rnams blo gros yod ma yin//de lta'i chos dang bral ba ni/ /phan tshun dag ni rgyug pa ni/ /chos la rmongs rnams smyon pa bzhin/ /g.yangs dag tu ltung 'gyur ba/ /de dag kun la khyad par du/ /snying rje chen po bya ba ste/ /yang dag ye shes nyer shes pas/ /de la brnyas pa rigs ma yin/ / ye shes grub pa las gzugs su bsgom pa dgag pa ste le'u gnyis pa'o// //de ltar gzugs su bsgom pa yis/ /rdo rje sems dpa' mi 'grub ste/ /rnam bcas rtog pas kyang de bzhin/ /rdo rje sems dpa' mi 'grub bo/ /rnam nyid ye shes de yin pas//rnam pa las ni tha dad 'gyur/ /'on te rnam pa ye shes 'gyur/ /de ltar 'di ni mi rigs so/ /rnam pa ye shes de min te/ /shes la rnam pa nyid med de/ /dper na bum pa mkhar mi 'gyur/ /mkha' yang bum par mi 'gyur ro/ /gzugs med gzugs su mi 'gyur te//gzugs med gzugs can yod ma yin/ /ye shes gzugs ni med par grags/ /rnam pa gzugs can yin par bshad/ /ji ltar de nyid gzhan min nyid/ /'gyur ba yin zhes brtag par bya/ /rnam pa ye shes nyid yin zhes/ / rtog pa 'di yang mi rigs so/ /nges par gzhan du thal 'gyur ba/ /mdo tsam du ni mnyan par gyis/ /gal te rnam de shes min na/ /'dus byas nyid du thal bar 'gyur/ /ngo bo 'dus ma byas 'gyur ba/ /byis pa rnams la yod ma yin/ /byas pa nyid dang rnam 'jig nyid//sangs rgyas ye shes ji ltar 'gyur/ /thog mtha' med cing zhi ba zhes/ /de bzhin gshegs pa rnams gsungs la/ /de sras skal ba chen po yang / /ye shes 'dus byas min zhes gsungs/ /de kun sgyu ma lta bu dang / /mig yor lta bur nges bshad de//skye dang 'gag pa med pa dang / /ye shes su de cis mi 'gyur/ /mig gi rnam shes zhes bya gang / /ye shes su ni de mi rtag /'gyur ba nyid du thal 'gyur na/ /sangs rgyas ye shes gzhan du min/ /ye shes de ni mi 'gyur bar/ / sangs rgyas kun gyis rab gsungs te/ /de bas gcig pa nyid du yang / /nges par smra ba rigs ma yin/ /shes pa'i rab tu snang de yin/ /ye shes dag tu de mi brtag /so sor snang ba dgag pa las/ /ye shes ci phyir dgag mi 'gyur/ / de bas gcig pa nyid mi 'grub/ /tshig de shin tu nges yin na/ /ci phyir de dag gcig nyid du/ /khyed ni yongs su rtog par byed/ /lung dang rigs pa dang 'gal bas/ /rnam pa kun du 'bras bu med/ /ye shes de nyid rnam par shes/ /de ltar yang ni mi rigs so//rnam pa las ni tha dad med/ /shes pa'i shes nyid mi rigs te/ /shes bya las ni shes 'gyur gyi/ /shes bya med par ma yin no/ /gal te shes pa tha dad 'gyur/ /ye shes su ni rtag na go/ rnam pa tha dad gyur pa ni/ /ye shes nyid las gnas med yin//ye shes 'byung ba'i dus su yang / /rnam pa kun du mi 'byung la/ /rnam pa'ang kun du 'byung ba na/ /ye shes nyid ni mi rigs so/ /dper na bum pa rdzogs pa la/ /snam bu 'byung ba med pa bzhin/ /tha dad pa yi chos rnams ni/ /ji ltar 'jig rten dag na snang //bu ni ma skyes pa dag ni/ /gzhan dag gis ni gang yin pas/ /mo gsham bu ldan 'jig rten na/ /rgyu dang mi rgyu gang yang med/ /bu dang bcas pa'i lha sbyin ni/ /gang tshe rang gi bur bcas na/ /gzhan dag gis ni bu yin kyang / /bu dang bcas pa rigs ma yin//de bzhin ye shes gnas med ni/ /rnam bcas yin par ji ltar 'dod/ /gang la ltos nas ye shes ni/ /gang gis de ni rnam bcas 'gyur/ /ye shes rnam bcas yin zhes pa/ /rnam pa dang bral ma yin te/ /rnam pa dang bral ye shes ni//rnam bcas nyid du ji ltar 'gyur/ /rnam pa dang bcas gang yin pa/ /de ni rnam bcas nyid yin na/ /rnam pa kun las rnam grol ba'i/ /ji ltar sangs rgyas ye shes 'gyur/ /gal te rnam pa nyid kyang ni/ /'di ni rnam bcas nyid 'gyur na/ /sangs rgyas ye shes med par yang //sangs rgyas su khyed cis mi 'gyur/ /kun mkhyen min te ye shes min/ /ye shes tha dad par rab brtags/ /de bas rnam bcas ye shes la/ /dngos grub rigs pa ma yin no/ /gal te rnam pa med pas ni/ /rnam pa dang bcas nyid 'gyur na//sangs rgyas gdung la rab 'jug pas/ /de dang phrad pa ma mthong ngo / /gzugs can yang dag mi sbyor te/ /gzugs med pa la rnam kun min/ /dper na nam mkha' bum pa dang / /yang dag sbyor bar mi 'dod ltar/ /de ni rnam pa dang ldan yang / / de ni rnam bcas 'gyur ma yin/ /ltos dang bcas pas rnam 'jig nyid/ /tshogs pa med pa dag tu 'gyur/ /tshogs pa las byung gang yin te/ /sangs rgyas ye shes 'gyur ma yin/ /gang tshe ye shes 'dus byas pas/ /rnam bcas yin par mi 'grub bo/ /gal te rnam pa ye shes dag /gzhan nyid dag tu 'gyur na ni/ /de ltar phan tshun ltos pa dag /ye shes su ni ji ltar 'gyur/ /rnam pa shes las tha dad par/ /gal te de ltar rtogs na ni/ /de rnams shes pa las gzhan pas/ /shes med nyid du thal bar 'gyur/ / gang zhig rnam pa las gzhan nyid/ /de bas rnam pa med 'gyur na/ /shes de rnam pa med par ni/ /ci phyir de ltar rtogs mi byed/ /ye shes grub pa las rnam pa dang bcas pa'i ye shes dgag pa ste le'u gsum pa'o// //ji ltar rigs pas rnam brtags pa//rnam pa dang bcas rab bkag nas/ /rnam med nyid kyang mi 'grub pa/ /de ltar du ni brjod par bya/ /gal te rnam pa med na yang / /ye shes 'gyur ba rnam rtogs na/ /rnam pa dang ni rnam bral ba/ /'dis ci rig na kun rig yin/ /kun mkhyen de la yod min zhing //ye shes zhes bya rtog pa nyid/ /rnam pa thams cad mi gzigs pas/ /bems po nyid du thal bar 'gyur/ /bems med rtogs pa'i ngo bo ni/ /rnam pa med pa yin par bshad/ /gang zhig bden na thams cad rig/ /yang dag ma yin ji ltar rig / rnam rtog kun las nges grol zhing / /chos rnams thams cad bdag med par/ /de ltar mkhyen na ye shes de/ /brdzun pas ji ltar rig par 'gyur/ /sgyu ma 'dra sogs dpe rnams kyis/ /chos rnams thams cad rab rtogs te/ /'gro la phan phyir de dang der//sangs rgyas thams cad ston par mdzad/ /sgyu ma la sogs dpe gang zhig /log par rtog pas brtags pa ste/ /ngo bo nyid kyis yod min na/ /kun mkhyen de ni ji ltar mkhyen/ /ri bong rwa dang de bzhin du/ /mo gsham bu ltar mi rigs te/ / dngos po med par ji ltar rigs/ /de bas rnam pa med par 'gyur/ /sgyu ma la sogs dpe rnams ni/ /sras bcas rgyal bas bstan mdzad pa/ /dngos po med par brtags pa tsam/ /thams cad du ni 'gag pa min/ /dpe nyid dang ni mtshungs pa ru/ /rnam pa kun du chos bshad na//bsgrub bya yin pas thams cad du/ /dpe nyid du ni mi 'gyur ro/ /dper na skyes bu seng ge yi/ /dpe ni 'jig rten la yod pa/ /dpe sogs yon tan ldan pa ste/ /'jug pa la sogs yod ma yin/ /de bas dngos po thams cad ni/ /ngo bo nyid kyis thams cad min//lung dang rigs pa'i rjes 'brangs te/ /skyes bu mchog gis rtogs par bya/ /de nas khyed kyis gang smras pa/ /byis pa brid pa'i thabs yin gyi/ /'gro ba 'dod pa'i bsam pa yis/ /bden par smras pa de ma yin/ /ji ltar ri bong rwa dang ni/ / de bzhin mo gsham bu lta bur/ /dngos po thams cad gang du yang / /rgyal bas dngos med ma gsungs so/ /gal te gzugs sogs dngos po rnams/ /rnam pa kun du yod min na/ /sangs rgyas thugs rje'i bdag nyid kyis/ /lha yi spyan ni ji ltar 'grub/ /lhayi snyan sogs thams cad kyang //de bzhin du ni yod min pas/ /mngon par shes pa med pa'i phyir/ /de bas kun mkhyen med par 'gyur/ /rnam pa med pa'i ye shes ni/ /sangs rgyas sku la yang dag ldan/ /mngon shes thams cad 'jug 'gyur ba/ /thams cad rigs pa ji ltar med//gzugs la sogs pa'i skye mched ni/ /mig la sogs pas shes pa ste/ /sems dang bcas pas rjes myong ba/ /de ltar 'jig rten dag nag nas/ /gzugs sogs yod pa ma yin te/ /khyod nyid kyis ni ma smras sam/ /gal te dngos po med pa yis//phrad pa ji ltar rab tu brtag /gal te dngos med phrad gyur na/ /'di 'dra khyed smra rigs ma yin/ /'di nyid rnam kun dngos po med/ /de dang phrad pa ji ltar 'dod/ /sbyor med gyur kyang ye shes ni/ /smon lam dbang gis de bzhin du/ /gdul bya'i dbang ni ji bzhin du//sems can rnams kyi don mdzad do/ /gang tshe 'di yang mi mkhyen na/ /'gro ba'i don ni ji ltar mdzad/ /rigs pa med pa kun mkhyen min/ /sems can sdug la thugs rje med/ /yid bzhin nor bu mchog bzhin du/ /smon lam dbang gis sems can don/ /mdzad ces pa ni rigs ma yin//'di ni yod pa snang bar 'gyur/ /sems can kun don legs bsgrub phyir/ /gang tshe nges pa nyid 'gyur bas/ /ye shes yid bzhin nor bu bshad/ /bems po'i bdag nyid ma yin no/ /gang du ma mthong ma byas kyang / /rang gi ye shes kyis brtags pa//bdag ni kun mkhyen 'gro ba'i bdag /'gyur zhes pa de ci phyir bya/ /yang dag byang chub sems bskyed pas/ /legs par tshogs kun bsags nas ni/ /spro chen rtogs dang brtson 'grus kyis/ /bsgom dang bsam pa la sogs pas/ /dam chos mnyan la sogs ba la//sdug bsngal rnams kyi dgos med de/ /sngon med pa ni 'byung ba med/ /sngar gnas pa yang 'jig par 'gyur/ /sangs rgyas nyid ni 'di 'dren/ /ma lus thams cad don med do/ /'chi la sogs pa'i 'jigs las grol/ /dmyal sogs gnod ba rnams las thar//sdug mi sdug sogs sdug bsngal sogs/ /bral ba bems po'i bdag nyid gang / /chos kun ngo bo nyid mkhyen pa/ /kun mkhyen zhes ni nges par bshad/ /rang bzhin mkhyen pa'i kun mkhyen zhes/ /rdzogs pa'i sangs rgyas nyid bshad ces/ /thams cad mngon sum mkhyen pas na//des na kun mkhyen zhes bshad do/ /nyes na 'khor bar 'khor 'gyur zhing / /dmyal ba'i sdug bsngal dag dang ni/ /'khor los sgyur sogs bde ba rnams/ /'di ni nges par thob kyang bla'i/ /ye shes grub pa las rnam pa med pa dgag pa ste le'u bzhi pa'o// //de ltar nyes pa'i tshogs gyur pas/ /de bas rnam med de ma yin/ /de nas sems med de nyid ni/ /da ni rab tu bshad par bya/ /shin tu rmongs skabs ye shes ni/ /rnal 'byor pa ni la la 'dod/ /rmongs pa bsgom pas rmongs pa ni//tshul ngan rnams kyis thob par 'gyur/ /thams cad rgyu dang mtshungs pa yi/ /'bras bu 'jig rten las spyod de/ /ko Ta pa las 'bras skye ba/ /gang la'ang yod pa ma yin no/ /de bas mi rtog ye shes ni/ /ldan pa med par shes par bya/ /ye shes nyid kyis mi rtog nyid//gzhan du rigs pa ma yin no/ /ye shes mi rtog nyid du ni/ /de bzhin gshegs pas bden gsungs te/ /ye shes kyis ni rmongs pa dag /mi rtog nyid du ma gsungs so/ /sangs rgyas ye shes lhun grub pas/ /de bas mi rtog par bshad do/ / bsam pa'i dbye ba yod min gyi/ /sems med 'gyur ba ma yin no/ /mi rtog 'di ni mi shes par/ /gang du yang ni ma gsungs so/ /chos la nyes pa yod min pas/ /de nyid gzhan du rtog pa yin/ /kun mkhyen thams cad gzigs pa dang / /sems can kun don grub pa po//thugs rje ldan pa'i 'gro mgon gyis/ /de nang der ni ston mdzad pa/ /rnam par mi rtog tsam nyid du/ /gal te dran par byas na ni/ /gang tshe 'di dag thams cad kyang / /ci yi phyir na dran ma gyur/ /gnyis ka'i don dang rnam bral bas//shes min kun mkhyen pa yang yin/ /log pa'i shes pa rmongs rnams kyis/ /ye shes 'dir ni rab tu bkag /ye shes grub pa las rmongs pa bsgom pa dgag pa ste le'u lnga pa'o// //dbugs 'byung ma yin rngub min ni/ /de nyid grub pa rigs pa min/ /de gnyis dbus na'ang yod ma yin//rlung gi de nyid ji ltar 'gyur/ /dbus na'ang cung zad yod min na/ /ji ltar de nyid dag tu 'gyur/ /gal te rlung ni de nyid 'gyur/ /sbud pa yang ni 'gyur du 'ong / /ji ltar 'ga' zhig spud 'byung pa/ /sbud pa rlung gis 'thor ba dang / /de bzhin 'dren pa dag kyang byed//lus kyang yid kyis de bzhin no/ /rlung las 'bud pa 'ga' med cing / /de bzhin rlung yang 'bud pa yin/ /lus kyi 'bud pa gang yin dang / /sbud pa 'bud par byed pa dag /de dag khyad par ma mthong ste/ /de nyid mthong ba'i rnal 'byor pas/ /'bud pa yi ni bya ba min//ming dang yid kyang mtshungs pa yin/ /dbugs rngub dbugs 'byin rlung dag gis/ /rlung dang sbud pa mtshungs pa yin/ /sbud ldan de nyid ji bzhin du/ /lus kyi rlung yang de bzhin 'gyur/ /gang tshe lus kyi rlung de nyid/ /sgo rnams kun nas 'byung 'gyur ba/ /de nyid rig pas bshad rigs na//rlung dang khyad par med pa yin/ /mngon par rmongs shing lam las nyams/ /log pa'i don ni rab bsgoms pa/ /de dag bde 'gror mi skye ste/ /dmyal bar gcig pur 'gro ba nyid/ /ye shes grub pa las dbugs rngub pa dang 'byung ba'i de kho na nyid dgag pa ste le'u drug pa'o// //dbang po gnyis byung bde ba ni/ /de nyid yin zhes skye ngan smra/ /de ni bde ba chen yin zhes/ /rgyal ba mchog gis ma gsungs so/ /rten cing 'brel 'byung las skyes pa/ /gang du'ang de nyid shes mi 'grub/ /gang phyir 'di de thams cad du/ / ngo bo nyid kyis yod ma yin/ /bde gshegs kun gyi ye shes ni/ /rang nyid ngo bo nyid mkhyen pa'i/ /bde ba kun gyi gtsor gyur pas/ /bde ba chen po zhes bshad do/ /bde chen mi rtag ma yin te/ /bde ba chen po rtag tu rtag /mtshun khung g.ya' phrugs las byung ba'i/ / ci yi phyir na bde chen min/ /chags dang mnyam pa'i bde med de/ /de ni rgyal ba rnams la phul/ /'dod pa'i don kun longs spyod cing / /smad pa dag tu mi bya zhes/ /rnal 'byor rgyud ni thams cad las/ /rdo rje sems dpas gsungs pa ni/ /rnal 'byor pa yi sems bde phyir//don dam pa yi de nyid min/ /ye shes grub pa las bde ba chen po smra ba dgag pa ste le'u bdun pa'o// //bde ba myong ba bkag pas na/ /de bas yang dag ye shes med/ /rmongs bcas rnams kyis brtags pa yis/ /de nyid thams cad log pa yin//mkhas pa yis ni thams cad kyang / /rang blo nyid kyis bkag pa yin/ /ji ltar yang dag de nyid rnyed/ /de dag da ni bshad par bya/ /sems can blo gros chung ba dang / /bsod nams chung zhing brtson zhan nyams/ /de bzhin gshegs pa thams cad kyis//ye shes mchog rnams ji ltar thob/ /sangs rgyas kun gyis gsungs pa dag /de 'dir rim gyis bshad par bya/ /pus mo gnyis ni sa dag la/ /legs par rab tu bzhag nas su/ /lus bsrang thal mo sbyar byas te/ /dad pas 'di skad brjod par bya/ / ston pa 'jig rten 'byung gyur dang / /ma 'ongs pa na 'byung 'gyur dang / /da ltar byung bar rtogs pa nyid/ /dam chos ston par mdzad pa dang / /gang yang de nyid ston mdzad pa'i/ /sangs rgyas kun la bdag phyag 'tshal/ /de la bdag ni nyin mtshan du/ /mchod cing bsnyen bkur las kyi phyir//sangs rgyas kun gyi bdag nyid ni/ /gtso bos bzhes par mdzad du gsol/ /mchod pa'i khyad par thams cad kyang / /nam mkha'i khams kyi mthas gtugs par/ /tshad med pa ni yongs bzung ste/ /chos kyi dbyings las yang dag 'byung / / bsam gyis mi khyab sna tshogs mchog /'das dang ma 'ongs pa kun dang / /rdo rje sems dpa'i rnam 'phrul gyis/ /'gro ba'i bla ma mchod par bgyi/ /sdig pa rnams ni kun 'byung ba/ /'gro la phan phyir thams cad kyang / /so sor bshags shing slar yang ni/ /mi bgyid sdom pa slar yang nod//sangs rgyas kun gyi bsod nams gang / /de sras blo gros ldan pa dang / /rang rgyal rnams dang nyan thos dag /gang gzhan lus can thams cad kyi/ /skye ba kun du gang byas pa/ /bdag gi dang ni gzhan rnams kyang / /yang dag dga' ba'i sems kyis ni//bsod nams kun la rjes yi rangs/ /phyogs bcu kun na yang dag bzhugs/ /chos kyi de nyid shing rtar bzhugs/ /thugs rje che dang ldan pa'i thugs/ /chos ston pa la mkhas pa rnams/ /de rnams chos ni ston par mdzad/ /bdag ni rab tu bskul bar 'tshal//'gro kun sangs rgyas gyur pa ni/ /thams cad ji srid gnas gyur pa/ /sems can kun don mdzad pa po/ /mgon po de srid bzhugs nas ni/ /nam yang mya ngan mi 'da' bar/ /thal mo sbyar nas gsol bar 'tshal/ /lus ngag yid kyis bsod nams ni//bgyis sam bgyid du stsal ba'am/ /rjes su yi rang ci yang rung / /des ni 'jig rten kun mkhyen shog /sangs rgyas kun gyi dkyil 'khor dang / /byang chub sems dpa' nyid la yang / /dus gsum du ni ci nus par/ /me tog la sogs rnams kyis mchod//bdud rtsi lnga dang bsres byas pa'ang / /gal te ma bsres brtags pa rnams/ /rtog kun rnam grol bdag nyid can/ /dam tshig la sogs gzung bar bgyi/ /de nyid bsdus sogs rgyud rnams las/ /gsungs pa'i dam tshig sdom pa rnams/ /srog chags gsad par mi bya'o//ma byin par yang mi blang zhing / /'dod pa log par mi spyod la/ /brdzun du smra bar mi bya'o/ /nyes pa kun gyi rtsar gyur pa'i/ /chang ni rnam par spang bar bya/ /phra ma de bzhin dag rtsub dang / /'khyal pa'i tshig rnams smra ba dang / /ma rig sems can la sdang dang //log par lta ba'ang kun du spang / /sngon du sems ni bskyed bgyi zhing / /mya ngan 'das la dgod par bgyi/ /ting 'dzin yan lag de thams cad/ /sdom pa'i mchog ni gzung bar bgyi/ /bsod nams kun gyi 'byung gnas che/ /byang chub sems kyang de bzhin bskyed//bdag gis sems can 'di dag kun/ /kun mkhyen sa la gzhag par bgyi/ /'di kun sdug bsngal sel mdzad cing / /phun sum tshogs pa kun ster ba/ /byang chub lam ni ston pa po/ /thugs rje can du bdag gyur cig /lus can kun la mnyam nyid kyi//yang dag sems ni legs bskyed pa/ /byang chub sems su 'di shes bya/ /gzhan du ni log par 'gyur/ /gang tshe mi mnyam nyid gnas pa/ /byang chub sems shes de mi bya/ /thog mtha' dbus dang bral ba yi/ / ye shes de ni skye mi 'gyur/ /sangs rgyas rdo rje 'dzin bcas kun/ /de la byin gyis rlob mi mdzad/ /lha la sogs pa thams cad kyang / /de ni bsrung zhing rnam par sdang / /de bas thabs shes rnal 'byor pas/ /sems can kun gyi gnyen gcig pas/ /rnam par slu ba med pa'i sems//des na brtan pa bskyed par bya/ /'di byas pas ni rdzogs sangs rgyas/ /dgyes pa'i bdag nyid can kun mnyes/ /stobs chen pha rol gnon pa rnams/ /byin gyis rlob pa rab tu mdzad/ /bdud dang bgegs la sogs pa yang / /glags skabs tshol bar mi byed cing //phyag na rdo rje la sogs pa/ /dgyes las rtag tu srung bar mdzad/ /sdig pa thams cad rnam dag pa/ /mi yi skyes bus thob par 'gyur/ /bsod nams thams cad skyed pa dang / /yang dag ye shes 'chang bar 'gyur/ /gzhan du de nyid 'byung ba ni/ / rnam pa kun du mi 'gyur ro/ /de bas thog mar sbyor shes shing / /ye shes thob par 'dod pa dang / /tshe 'di nyid la grub don du/ /'tshe ba med pa nyid phyir dang / /bgegs rnams thams cad zhi phyir dang / /tshe dang nad med 'phel ba ni/ /'bras bu 'dod pa'i rnal 'byor pas//de bas nges par bya ba yin/ /sangs rgyas rdo rje 'dzin kun gyis/ /sna tshogs rgyud du bstan pa ni/ /lam 'dir gnas pa'i rnal 'byor pas/ /yar ngo'i zla ba ji bzhin du/ /rim gyis yang dag 'phel 'gyur gyi/ /nam yang zad par mi 'gyur ro/ / brtson 'grus dman pa la la zhig /sangs rgyas nyid thob ma gyur na/ /'khor los sgyur rgyal bde ba ni/ /skye ba kun du thob par 'gyur/ /sangs rgyas kun gyi bsod nams gang / /phyogs dus kun na yod pa rnams/ /de de'i ba spu'i khung gnas zhes/ /rgyal ba mchog gis rab tu gsungs//ye shes grub pa las bsod nams kyi tshogs dang ye shes kyi tshogs rab tu 'phel ba zhes bya ba ste le'u brgyad pa'o// //ji ltar bshags pa'i sdig pa ni/ /shin tu mi bzad zad 'gyur zhing / /de bzhin rjes su yi rang bas/ /ji ltar bsod nams yang dag rdzogs//srog gcod pa la sogs pa ni/ /bya'o zhes ni yang dag bshad/ /rgyud rnams la lar min zhes par/ /de dag ji ltar 'gal mi 'gyur/ /bdud rtsi lnga sogs thams cad kyang / /de bzhin bza' dang bgrod min sogs/ /btung mi bya sogs du ma rnams//de yang ji ltar dge bskyed yin/ /blo dman skye bos rtogs bya'i phyir/ /sangs rgyas rdo rje 'dzin bcas pas/ /rgyud dang rgyud du nges gsungs pa/ /de ni rim gyis bshad par bya/ /las gang bya ba ci yang rung / /lus dang ngag dang yid kyis te/ zhi ba gzhan dag yod min pas/ /de rnams 'di ltar rnam par dpyod/ /sems med par ni lus ngag gis/ /ci yang byed par nus ma yin/ /de med par ni tshig gis kyang / /nam yang nus 'gyur ma yin no/ /de bas lus ngag las rnams ni/ /yid nyid las ni gyur pa yin//'gro ba thams cad sems nyid kyis/ /dge dang mi dge gang byed pa/ /phan don gyur pa'i las rnams gang / /thams cad legs par spyad par 'gyur/ /bzlog pas bsod nams ma yin zhes/ /rgyal ba mchog gis rab tu gsungs/ / de bas dge dang mi dge kun/ /sems nyid kyis ni byed pa dang / /sems nyid kyis ni 'jig 'gyur zhes/ /'gro ba'i bla mas gsungs pa yin/ /sems can gnod byas rdzogs pa yi/ /bdag gis sdig pa yongs bshad pa/ /phan sems yang dag bskyed nas ni/ / kun du skrag pas bshags par bya/ /gnod pa shin tu sbyor ba yi/ /spro zhing sngon chad gang byas pa/ /gnyen po yis ni 'jig 'gyur te/ /gang phyir de nyid kyis de byas/ /gang zhig bum pa skyed byed pa/ /rang nyid kyis ni de bshigs pa/ /de phyir sdig pa kun 'byung ba//gang zhig bdag nyid kyis 'jig 'gyur/ /phyi nas bshags par bya'o zhes/ /rmangs rnams gal te byed 'gyur na/ /de ni bshags par mi rigs shing / /sdig byed de yang 'jig mi 'gyur/ /de bzhin bsod nams 'jig pa yang / / de bzhin du ni 'gyur bas na/ /bsod nams byas kyang mi dga' bas/ /'jig par 'gyur ba the tshom med/ /gang tshe sems la mi sbyin nyid/ /sbyin 'dod pa la rab 'jug pa/ /sbyin du zin kyang bsod nams ni/ /rnam pa kun du 'byung mi 'gyur/ /thams cad las ni lhag par gnas//gang du thams cad 'jig pa ste/ /bskal pa bye ba stong du yang / /yang dag bskyed pa'i bde ba che/ /byang chub sems ni bskyed pa yi/ /bsod nams tshogs ni bsags pa'o/ /bskal pa bye bar 'byung ba ni/ /skad cig nyid ni rnam 'jig pa/ /de dang 'dra ba'i sdug pa'i mi//gnyis pa la ni sdang byed pa'o/ /de las srung ba'i don gyi phyir/ /'di skad de bzhin gshegs pas gsungs/ /de la gnod byas chung ngu yang / /sdig pa'i phung po chen por 'gyur/ /de la phan byas chung ngu yang / /bsod nams phung po cher 'gyur te//bde ba dag ni thams cad kyi/ /yon tan rgya mtshor gnas phyir ro/ /rab rmongs byis pa la la ni/ /lung dang rigs pa ma mthong ba/ /rtog nyid sdig pas 'gyur yin zhes/ /bdag nyid 'jig pa po rnams smra/ /rtog dang bral ba'i rnal 'byor pa/ /gal te sdig pas mi gos na//zhe sdang skye ba'i rgyu la yang / /rnam par 'gyur nyid mi rigs so/ /'jig rten pa yi tshul spangs nas/ /gzhan du ci yang mi 'gyur te/ /mgo bo rgyug par byed pa dang / /de bzhin rdo yang bza' ba'i rigs/ /rlung dang grang dang skam sogs kyis/ /gnod pa de la mi rigs so//mtshang brus gnod par byas kyang ni/ /skye ba nye bar skye mi 'gyur/ /gal te rang gis bya ba la/ /chags sogs drangs te spang dka' ba/ /rnam par mi rtog rab rtogs pa/ /de ltar gzhan du der mi 'gyur/ /ma skyes pa ni zad min te/ /'di ni sdig pa'i las can gyis//khro dang nga rgyal ldan pa yin/ /sdig pa yongs su dag mi 'gyur/ /lha nyid kyis ni de thams cad/ /byas so zhes ni rab rtogs na/ /sngon nyid 'di ni byung ba la/ /ji lta bzhin du byas pa yin/ /lha nyid kyis ni byas zhes pa/ /yongs su rtogs pa log pa yin//gang phyir chags pas zil mnan pa'i/ /bya ba nyid ni byed 'dod do/ /rjes su yi rang la sogs kun/ /thams cad sems de kho na las/ /bsod nams tshogs dang ldan par ni/ /blo dang ldan bas shes par bya/ /lus ngag bcas pa'i dman pa ni//bsod nams de la spyod mi 'gyur/ /drag po'i sems ni gcig cig gi/ /bsod nams sangs rgyas gang gsungs pa/ /srog gcod la sogs las rnams gang / /chags pa rgya che ba yi sems/ /thams cad dge min mi 'gyur te/ /bsod nams snying rje las byung yin/ / gzhan phan phyir ni las rnams gang / /snying rje can gyis gang byas pa/ /de kun bsod nams yin zhes ni/ /'gro ba'i bsam pa rdzogs mdzad gsungs/ /snying rje'i bsam pa gdol pa la/ /bkag pa rnams kyang rjes gnang gi/ /rang gi don la zhe na 'gyur zhing / /lus can snying rje bral ba min//bsod nams byas kyang gnod pa'i phyir/ /skye bo 'ga' la rnam sdang ba/ /de ni sdig pa nyid 'gyur zhes/ /rgyal ba mchog gis rab tu gsungs/ /gang 'di dge dang mi dge rnams/ /byang chub sems dpa' kun rtogs pas/ /thams cad dge ba nyid 'gyur te//gang phyir de rnams yid dbang yin/ /ye shes grub pa las bsod nams dang sdig pa skye ba dang 'jig pa yongs su shes pa'i le'u ste dgu pa'o// //bdud rtsi lnga ni mi shes phyir/ /sems ni yang dag sbyang phyir dang / /glang po sha sogs kyang de bzhin//rnal 'byor pa ni rgyal bas gsungs/ /srog chags thams cad bsad nas ni/ /za ru zin kyang sangs mi rgyas/ /sems dang bral ba'i sems can rnams/ /rmongs pa rnams kyis mi shes so/ /thams cad kyang ni gang ba'i phyir/ /re zhig lus la gtsang ba med//dri 'dzag za ba la la ni/ /de ni thams cad kyis ma zos/ /ji ltar 'o ma la sogs kun/ /lus can 'di dag thams cad kyi/ /bza' dang bza' min rab grags pa/ /rang gi sems la yod ma yin/ /zas dang gos la sogs pa kun//mi gtsang bar ni rab shes na/ /gang phyir chu la yang dag pas/ /de rnams 'di ni rab tu 'jug /char gyi tshogs ni 'bab pa yis/ /smad pa thams cad bkru ba dang / /'bru rnams thams cad bskyed nas ni/ /de nas rgya mtshor 'bab par 'gyur/ /mi gtsang rnams dang ldan pa yis//chu ni klu yis blangs nas su/ /chu ni gang dang gang yin pa/ /thams cad de bzhin char du 'bab/ /rdzing bu la sogs kun rgyas shing / /thams cad kyis ni thams cad 'khrud/ /de bas gtsang dang mi gtsang sogs/ /thams cad 'dir ni yod ma yin//gtsang ba nyid ni yod 'gyur na/ /mi gtsang nyid ni 'byung bar 'gyur/ /dag pa med pa'i mi gtsang nyid/ /rnam pa kun du mi rnyed do/ /dper na pha rol tshu rol bzhin/ /de ni phan tshun ltos pa ste/ /gtsang dang mi gtsang la sogs rtog/ /rtog ni 'jig rten pa yi yin//ye shes grub pa las gtsang ba dang mi gtsang bar rtog pa las grol ba ste le'u bcu pa'o// //ji ltar rnal 'byor pa rnams kyis/ /bgrod min pa la bgrod gyur pa/ /yang dag rjes gnang mi 'gal bas/ /da ni rnam par dpyad par bya/ /'di ltar lus can thams cad ni//sems las skye dang 'jig pa ste/ /de yang las rnams dbang nyid kyis/ /srid dang srid pa thams cad du/ /pha dang ma yang bur 'gyur zhing / /bu dang ma yang phar 'gyur la/ /bran mo chung ma'ang phar 'gyur zhing / /chung ma yang ni ma ru 'gyur/ / de la sogs pa'i tshul rnams ni/ /shin tu rgya cher du mar ni/ /srid par gzod nas gyur to zhes/ /rdo rje sems dpas gsungs pa yin/ /de ltar gnas shing 'khor bar ni/ /yun ring dus su 'jug pa dang / /pha dang mar ni ma gyur pa'i/ /sems can gang yang yod ma yin//de bzhin bu mo la sogs kun/ /'gro ba drug tu sngon byung nas/ /de bas snying rje chen po ni/ /bya zhes rgyal ba'i mchog gis gsungs/ /de bas rdo rje sems dpa' sogs/ /mgon po'i mchog ni de rnams kyis/ /rnal 'byor pa yi sems sbyang phyir/ /bu mo la sogs rjes su gnang //rtog pa'i chus ni gang ba yi/ /'khor ba'i rgya mtsho chen por ni/ /rdo rje theg la ma zhon par/ /su zhig pha rol 'gro bar 'gyur/ /log pa'i shes pa thams cad ni/ /lung dang rigs pa legs ldan pas/ /nyes pa kun gyi 'byung gnas ni//de rnams rim gyis bkag pa yin/ /ye shes grub pa las bgrod pa dang bgrod pa ma yin pa dang bral ba ste le'u bcu gcig pa'o// //rdo rje theg par rab rtog phyir/ /rnal 'byor pa ni mchog don du/ /rnal 'byor rgyud gsungs dpe dang ni/ /rigs pas kyang ni de bshad bya//gzugs sku la sogs dngos rnams ni/ /de nyid ngo bo ji bzhin min/ /de bkag sngar ni byas zin pas/ /de bas gzugs med du yang gnas/ /nyes pa kun du thal gyur pa'i/ /dngos po de nyid 'gyur ma yin/ /sdug bsngal kun gyi 'byung gnas mchog /med pa de yang de nyid min/ /dngos dang dngos med de nyid min/ /gzhan du gyur pa'ang rnam spangs min/ /de bas phyogs yod rigs min te/ /de tshe kun mkhyen 'gyur ma yin/ /yang dag ye shes rig pa las/ /khyab dang rdo rje'i sku nyid dang / / 'gyur ba med pa nyid dang ni/ /kun mkhyen nyid ni de yis 'grub/ /gzugs can khyab pa nyid dang ste/ /de bas rdo rje sku ma yin/ /de la mi 'gyur yod min pas/ /thams cad mkhyen par 'gyur ma yin/ /rim gyis shes gang ci yang rung / /'di ni thams cad rtog min te//shes bya rnams la tshad med pas/ /kun mkhyen du ni 'di mi 'dod/ /gang zhig shes byar rab bshad pa/ /phyogs kyi cha ni gcig pu nyid/ /'di ni bskal pa stong phrag dag /bye bas kyang ni shes mi 'gyur/ /gal te skyes nas 'jig 'gyur na/ /de bas bskyed par bya ba min//shin tu gnas pa'i ye shes nyid/ /'khrul pa tsam zhig rnam par 'jig /gang zhig 'gro dang 'ong 'gyur ba/ /de la khyab pa yod ma yin/ /g.yo zhing phyogs gcig la gnas pa/ /de ni 'jig par thal bar 'gyur/ /gang zhig kha dog med gyur chos//de ni gang gis 'jig par 'gyur/ /mtshon dang dug dang med dang chus/ /gnod pa skyed par mi 'gyur ro/ /nam mkha' kun nas gnas bdag nyid/ /mi 'gyur mkha' dang mtshungs pa ste/ /nyon mongs med cing 'gyur med la/ /rnam pa thams cad dus kun la//gang zhig dus kun pa min pa/ /de yang kun mkhyen 'gyur ma yin/ /de bas dus rnams kun du yang / /'gyur ba min par shes par bya/ /lus can dag ni thams cad la/ /ye shes che gnas nyid yin na'ang / /mi shes rab rib kyis khebs pa'i//byis pa rmongs pas mi shes so/ /ji ltar khyi ni bong pa las/ /bsnyeg cing 'phen par byed la min/ /de bzhin sems kyis gang bsam bya/ /snyeg gi sems nyid la ma yin/ /gang zhig sems kyis bsam bya yang / /de nyid la /yang nges rtog gi/ /sems nyid de nyid ji 'dra zhes//sems pa la ni 'jig mi 'byed/ /ye shes grub pa las de nyid gnas pa gzhag pa zhes bya ba ste le'u bcu gnyis pa'o// //shin tu rmongs pa'i 'jig rten rnams/ /gal te gzhan gyis rab bskul na/ /thar pa'i don du bdag gis bdag / g.yang sar yang ni 'dor bar mdzad/ /rmongs par gyur pa mang po yang / /spyod pa dag ni 'di 'dra bas/ /bde gshegs lam ni kun spangs te/ /dmyal ba'i lam ni brten pa snang / /long ba'i mi ni la la zhig /gzhan dag la ni lam ston byed/ /gang dang gang brtags de dang de//'dri bar byed rnams de mi 'dri/ /gal te rmongs pa'i dbang gis lam/ /mi mthong de ni ston byed kyang / /sdig can gyi ni lam de yis/ /bgrod pa nyams pa thob par 'gyur/ /rang nyid kyis lam mi mthong bar/ /ji ltar shin tu gzhan bdag 'dren/ /long ba gnyis ni 'grogs 'gyur na//gnyi gas sdug bsngal the tshom med/ /ji ltar dmus long bya ba yis/ /'brog dgon dag tu zhugs gyur pa/ /gnyis ka'ang de 'dra la la zhig /ji ltar grong du 'jug par 'gyur/ /de bzhin dmus long gyur pa des/ /yang dag ye shes ma mthong bas//gnas de thob par mi nus na/ ji ltar de ni gzhan grol byed/ /de bas bla ma bsten pa ni/ /yang dag dang ldan slob ma yin/ /yongs su brtag par bya'o zhes/ /rgyal ba'i mchog gis rab tu gsungs/ /dkon mchog gsum la ngang gis dang //sems can kun la snying rjer ldan/ /brtan zhing gtong sogs yon tan ldan/ /bsod nams thams cad cher bskyed la/ /byang chub sems ni yang dag bskyed/ /blo bzang rab dang yon tan ldan/ /khro ba med cing spro ba che/ /zab mo'i chos la lhag par mos/ /de ni chos kyi sbyin pa dag /zang zing med la rtag par dga'/ /de ni rtag tu 'dod pa chung / /tshogs gnyis yang dag bsags pa'o/ /de ni bla mar sangs rgyas dang / /rdo rje 'dzin bcas kun gyis gsungs/ /de nyid sems can thams cad kyi/ /ston pa 'jig rten 'dren pa yin//gang gzhan bla mar bshad pa dag /log shes mngon pa'i nga rgyal can/ /chag sogs don du chos rnams ni/ /mchog dag ston par byed 'gyur ba/ /'gro ba'i sdig pa'i grogs po ru/ /'jig rten na de rab tu gnas/ /bdud kyi phyogs kyi rigs can te/ / bdag gzhan phung bar byed pa yin/ /'gro ste rtag tu spang bya zhing / /de la bsnyen bkur bya ba min/ /de la khong khro mi bya zhing / /shin tu nye bar mi bya'o/ /ji ltar nyan thos rnams dang ni/ /lhan cig bde gshegs bzhed min ltar/ /de bzhin de 'dra dang lhan cig /gnas par shin tu mi bya'o//ye shes grub pa las slob dpon gyi mtshan nyid kyi le'u ste bcu gsum pa'o// //sngar bshad pa yi mtshan nyid las/ /slob dpon du ni bshad pa yin/ /slob ma yi ni mtshan nyid kyang / /ji ltar gyur pa bshad par bya/ /ji ltar 'ga' ni grur zhugs pa//skya ba 'dzin la legs slob na/ /mtsho chen pha rol 'gro 'gyur zhing / /gzhan du pha rol bgrod mi 'gyur/ /de bzhin bla ma dkon mchog gsum/ /byang chub sems la'ang dad ldan zhing / /'jig rten la ni snying rjer ldan/ /'di ni gru zhes bya bar bshad//bla ma mkhas pa skya ba 'dzin/ /gru ni thams cad rab ston pa/ /'khor ba'i pha rol 'gro rnams la/ /rdo rje sems dpas gsungs pa yin/ /skya ba 'dzin pa med par ni/ /gru ni pha rol bgrod mi nus/ /yon tan thams cad rab rtogs kyang / /bla ma med par srid mthar min//de bas nges pa nyid du 'di/ /brtul zhugs brtan pas de bzhin du/ /phyi nang bdag nyid can rnams kyis/ /rtag tu rnal 'byor pa mchod bya/ /phyag la sogs pa'i bya ba kun/ /dus rnams kun du rab tu bya/ /shes rab dad par yang dag ldan/ / skye bo rnams la snying rjer ldan/ /khro ba med cing slu ba med/ /gtong sogs yon tan rnams kyis brgyan/ /spro chen rang gi brtson 'grus ldan/ /rtag tu bla ma'i bka' bzhin byed/ /ma bsgoms yang ni rang gi blos/ /yo byad la sogs dngos po rnams/ /ci snyed pa dang ci nus dang //de bzhin bza' dang bca' sogs dbul/ /ji ltar brnyas pa gyur kyang ni/ /yid ni zhum pa med par bzod/ /lung dang rigs pa rtogs pa po/ /slob ma yon tan kun ldan yin/ /mi rtog pa yi rang bzhin can/ /gang yang 'dri ba med pa ni/ / slob par bya ba mi nus zhes/ /sangs rgyas nyid kyis rab tu gsungs/ /ji ltar byis pa 'dam gong la/ /ji dga' bar ni 'phen pa ltar/ /de bzhin gang zhig gzhan dbang 'gyur/ /dam pa'i chos kyi snod ma yin/ /ye shes grub pa las slob ma'i mtshan nyid kyi le'u ste bcu bzhi pa'o// //yang dag de nyid ji lta bar/ /rig par bcas pas sngar bshad pa/ /de nyid rgyud kun la gnas pa/ /de rnams las ni cung zad bshad/ /'jig rten na ni rkun ma'i sgra/ /'bras chan don du ston par byed/ /la la rkun ma nyid la smra/ / rgyud kyang de dang 'dra ba yin/ /sems can phan mdzad sangs rgyas rnams/ /mchog dang 'bring dang tha ma la/ /yi ge de dang de yis bstan/ /chos ni de nyid gsung bar mdzad/ /de nyid 'ba' zhig gsung ba dang / /de bzhin la la tshig gnyis dang / /dbang po zhen pa 'ga' la chos//'ga' zhig gsung gi gzhan du min/ /dpal ldan gsang ba 'dus pa las/ /thog ma tha ma med zhi ba/ /dngos dang dngos med rnam par spangs/ /stong dang snying rje mi phyed pa/ /byang chub sems zhes bshad pa yin/ /zhes gsungs te/ thog mtha ma med ces bya ba ni skye ba dang 'jig pa med pa ste/'dis ni khyab pa nyid dang / gzugs can ma yin pa nyid dang / mi 'gyur ba nyid dang / dus thams cad pa nyid du yang ston te/ phyogs na gnas pa dang / gzugs can dang 'gyur ba dang dus rgyun chad pa rnams ni rnam par 'jig pa yin pa'i phyir ro//gal te gzugs can ma yin pa rnams kyang yul na gnas par 'gyur na 'jig pa nyid du 'gyur te/ dper na gla rtsi la sogs pa dri zhim po rnams ni gzugs can ma yin na'ang yul na gnas pas gla rtsi la sogs pa'am/ des bsgos pa'i rdzas rnams med na rnam par 'gyur bas 'jig par 'gyur ro/ /zhi ba zhes bya ba ni nyon mongs pa thams cad glo bur ba yin pa'i phyir rab tu zhi ba'o/ /sngar bshad pa'i yon tan dang ldan pa na/ de nyid dngos dang dngos med zad pa'i gtso bo ste/ 'jig rten dang 'jig rten las 'das pa thams cad kyi don rnams rdzogs par mdzad pa'i phyir gtso bo'am bdag po'o//stong dang snying rje mi phyed pa/ /zhes bya ba ni chos thams cad ngo bo nyid med pa nyid kyis de bzhin gshegs pa thams cad kyi ye shes yongs su rdzogs pa'i stong nyid de dang / thugs rje chen po mi phyed cing gcig tu gyur pa'i sems gang yin pa de ni snying rje zhes bya ba ste/ sems can thams cad ye shes kyi rgyal po 'di nyid la rab tu gzhag par bya zhing / bde ba'i yo byad thams cad kyis phan gdags par bya'o zhes bya ba ni yang dag pa'i bsam pa'o/ / 'di skad ston par gyur te/ chos thams cad kyi ngo bo nyid shes pa'i rnal 'byor pa ni de bzhin gshegs pa thams cad kyang / lhan cig phan tshun khyab pa dang khyab par byed pa'i ngo bo nyid kyis gnas shing sangs rgyas kyi mdzad pa mdzad pas/ sems can thams cad la thugs rje chen pos gces par 'dzin par rtog pa byang chub kyi sems rdo rje zhes bya ba'i don to/'dis ni sgom pa yang de ltar bya'o zhes ston pa yin no/ /byang chub sems zhes bya ba ni/ rnal 'byor gyi rgyud ma lus pa rnams las dgongs pa 'di nyid yin no/ /las dang po pa rnams la yang byang chub kyi sems ni sems can thams cad bla na med pa yang dag par rdzogs pa'i byang chub la gzhag par bya'o zhes bya ba ni sems yin par gsungs so//yang de nyid las/ sangs rgyas kun zhes bya ba ni/ /'dus pa 'dres par bshad pa yin/ /zhes gsungs so//gzugs can rnams ni thog ma dang tha ma med pa mi srid pas sangs rgyas rnams ni chos kyi sku can yin te/ de rnams kyi 'dres pa ni de bzhin gshegs pa thams cad kyi ye shes te/ rdo rje 'chang ba nyid yin par ston gyi gzhan du na gzugs kyi sku ji ltar 'dres par 'gyur/rdul phra rab tsam gyi tshad kyis kyang de bzhin gshegs pa thams cad dang 'dres na yang / nam mkha' yang rab tu gang zhing de bas lhag par 'gyur te/ thams cad kyi sgra ni ma lus pa'i tshig yin pas nyung ngus kyang 'dres par mi rigs so/ /yang de nyid las/ bskyed pa yi ni rim nyid dang / /de bzhin rdzogs pa'i rim pa ste rdzogs pa'i rim pa zhes bya ba/ /yang dag ye shes de nyid de/ /ma bcos pa zhes bya ba nyid/ /de nyid las ni yang dag bshad/ /gang gis thog mtha' med pa'i dngos/ /rnam dag yid kyis sgom byed pa/ / zhes bya ba la sogs pa'o/ /le'u dang po las de nas nam mkha'i dbyings 'di thams cad de bzhin gshegs pa thams cad kyi rdo rje'i ngo bor gnas par gyur to zhes gsungs pa dang / yang / ma skyes pa yi chos rnams la/ /dngos po med de sgom pa'ang med/ / nam mkha'i tshul du sbyor ba yis/ /dngos po 'di dag rab tu bsgrags/ /yang / chos rnams rang bzhin 'od gsal ba'i/ /gzod nas dag pa mkha' dang mtshungs/ /byang chub med cing rtog pa'ang med/ /byang chub tshul 'di bstan pa'o/ /zhes gsungs pa dang / le'u dgu pa las rigs kyi bu 'di lta ste/ dper na nam mkha' ni thams cad kyi rjes su song ste/ chos thams cad nam mkha'i khongs su gtogs pa'o/ /chos de dag thams cad kyang 'dod pa'i khams na'ang mi gnas/ gzugs kyi khams na'ang mi gnas/ gzugs med pa'i khams na'ang mi gnas 'byung ba chen po bzhi la yang mi gnas so//rigs kyi bu chos thams cad kyang de ltar rjes su rig par bya'o/ /de bzhin gshegs pa rnams kyis ni don gyi dbang de lta bu mkhyen cing / sems can rnams kyi bsam pa mkhyen nas chos 'chad do/ / rigs kyi bu de ltar nam mkha'i tshig nges par brjod pas/ de bzhin gshegs pa'i dam tshig de dag rjes su rig par bya'o/ /rigs kyi bu 'di lta ste dper na gtsub shing dang gtsub stan dang mi'i lag pa bskyod pa'i rkyen gyis du ba rab tu byung zhing me chen po 'byung bar 'gyur mod kyi/ me de yang gtsub shing la yang mi gnas gtsub stan la yang mi gnas/mi'i lag pa bskyod pa la yang mi gnas so/ /rigs kyi bu de bzhin du de bzhin gshegs pa thams cad kyi dam tshig dang 'gro ba dang 'ong ba la sogs pa rjes su rig par bya'o/ /le'u bcu pa las/ lus ngag sems rnams bsgom pa ni//rnam par mi rtog mi dmigs pa/ /gang la'ang mi gnas mnyam pa nyid/ /sku gsung thugs kyi rdo rje bsgom/ /le'u bcu gnyis pa las/ nam mkha'i khams dang mnyam gyur cing / /rnam par mi rtog ngo bo nyid/ /rang bzhin dag pa'i chos rnams la//rol mo 'di dag rab tu bsgom/ /le'u bcu drug pa las/ rdo rje thig ni gdab pa dang / /tshon rtsi dag kyang dgye ba ni/ /sngags kyi sems dpas mi bya ste/ /byas na byang chub rnyed par dka'o/ /zhes gsungs te/ dkyil 'khor thig gdab pa dang tshon rtsi dgye ba la sogs pa mi bya'o//sngags kyi sems dpa' zhes bya ba ni yid skyob par byed par bya ba'i phyir sngags ni ye shes yin te/ yang dag pa'i ye shes mthong ba zhes bya ba'i don to/ /gal te rmongs pas de ltar byed na ni byang chub rnyed par dka' bar 'gyur te/byis pa'i skye po las dang po pa'i sems can gyi bya ba byed pas sangs rgyas nyid dang rdo rje 'dzin pa nyid rnyed par dka' bar 'gyur ro zhes bya ba'i don to/ /yang dag pa'i ye shes kyis mngon par dbang bskur ba dang ldan pa'i rnal 'byor pa de la ni / dkyil 'khor bri ba dang / 'jug pa dang dbang bskur ba la sogs pa ni bkag pa yin no/ /rdo rje sems dpa'i snang ba yis/ /rang rang ngo bo gsal bas na/ /de bzhin gshegs pa'i ye shes dang / /rnam snang mdzad du de bshad do/ /skye bo mi 'dod pa kun dang / / log shes slob dpon skye bo yis/ /mi bskyod pa yi ngo bo pas//'di ni mi bskyod yang dag bshad/ /gang phyir nges par sangs rgyas sogs/ /rin chen rnams ni rang 'byung nyid/ /ye shes sems can don ldan pas/ /rin chen 'byung ldan zhes bshad do/ /mi gnas pa yi mya ngan 'das//srid dang mya ngan 'das ma gos/ /grangs med yon tan yang dag ldan/ /'od dpag med par de bshad do/ /sems can kun don bya ba rnams/ /rang nyid kyis ni rang bsgrubs pas/ /don yod ye shes chen po ste/ /don yod grub pa zhes bshad do//phra ba dang ni rgya che'i tshul/ /'jig rten gsum po yongs mkhyen cing / /zhing rnams kun na gnas gzigs pas/ /des na spyan zhes bshad pa yin/ /de bzhin gshegs kun ye shes ni/ /nyid kyir nyid kyis thugs su chud/ /phan tshun du ni khyab nyid pas/ / des na mA ma kI ra bshad do/ /kun mchog de bzhin gshegs pa yi/ /nyes pa kun sel ye shes ni/ /sems can yang dag sbyor ba'i brtson/ /gos dkar mo zhes bya bar bshad/ /thugs rje chen pos rtag tu ni/ /'gro ba 'don pa'i dgongs pa ni/ /sems can grol ba mkhas pas na//ye shes sgron ma rab bshad do/ /khams gsum pa la sogs pa ni/ /sangs rgyas ye shes nyer longs spyod/ /'dod pa'i longs spyod thams cad ni/ /spyan la sogs pa rab tu bshad/ /kun mchog de bzhin gshegs pa yi/ /gsod sogs 'jig pa las grol bas//rab gdug 'dul ba'i ye shes te/ /de bas gshin rje gshed du bshad/ /log pa'i shes pa rnam sel ba'i/ /rmongs pa'i sems can rab ston can/ /yang dag ye shes rab mchog ste/ /ldan pas shes rab mthar byed bshad/ / 'gro ba kun gyi dga' ba rnams/ /rnam par brtags shing mi 'dzin la/ /srid pa dri med thugs chud pas/ /des na pad+ma mthar byed bshad/ /bgegs sogs pa la rnam grol bdag /ye shes kun don sgrub pa po/ /sangs rgyas kun gyi rang bzhin 'grub/ /des na bgegs ni mthar byed bshad//shes dang shes bya zad gyur pa/ /snyoms par zhugs pa zhes bshad do/ /srid gsum mngon phyogs ye shes ni/ /chags sogs gsum ni sbyong ba ste/ /sangs rgyas kun gyi rang bzhin dag /zhal gsum du ni de yongs bshad/ /gtsang zhing rnam dag ngo bo las//sku mdog dkar po rab tu ston/ /sbyin pa kun kyang ser po nyid/ /dmar po dag tu thugs rjes mtshungs/ /dkon mchog gsum la gnod byed sogs/ /'dul bar mdzad pa brtson gyur pa/ /'gro ba'i don ni mdzad pa'i mchog /ye shes de ni nag por bshad//sna tshogs thabs ni rnam dag gang / /sku mdog ljang gur rab tu bshad/ /gang phyir gzugs sogs skye mched rnams/ /'di ni rab tu spyod mdzad de/ /des ni de bzhin gshegs ye shes/ /thugs chud phyag ni drug par bshad/ /byang chub sems ni rdo rjer gyur//shes rab dril bu yin par bshad/ /'khor lo mi shes yang dag gcod/ /rin chen de bas rnyed dka' ba/ /srid pa'i nyes pas mgos phyir/ /ye shes de ni pad+mar bshad/ /ral gri nyon mongs dgra de gcod/ /ut+pal steng du byung ba ste/ / 'khor ba'i chur ni nub pa yi/ /shes pas gang phyir skyes pas so/ /des na rgyas byed ut+pal bshad/ /sangs rgyas rjes gnang sems can rnams/ /rdeg pas tho ba yin par bshad/ /dbyig pas chad pa 'dul ba ste/ /ye shes 'gro ba 'dul ba po/ / pad+ma skye ba rnam dag phyir/ /rnam rtog dri ma sbyong byed pa'o/ /phan tshun khyab pa byed pa'i phyir/ /sna tshogs rdo rje yin par bshad/ /'di skad bdag gis thos pa'i dus gcig na bcom ldan 'das de bzhin gshegs pa thams cad kyi sku dang gsung dang thugs rdo rje'i snying po btsun mo'i b+ha ga la bzhugs te zhes pa las//'di skad bdag gis dus gcig kho na'i tshe na thos te/ bcom ldan 'das ni dbang phyug la sogs pa'i yon tan dang ldan pa'i phyir ro/ /de bzhin gshegs pa thams cad kyi snying po ni ye shes so/ /de nyid rdo rje btsun mo ste mi phyed pa'i ye shes rang gi ngo bo yin pa'i phyir ro//nyon mongs pa thams cad 'jig pas b+hag ste de bzhin gshegs pa thams cad kyi sku dang gsung dang thugs kyi snying po rdo rje btsun mo'i b+hag de rnams la bzhugs so/ /'di skad ston pa yin te/ de bzhin gshegs pa thams cad kyi ye shes phan tshun khyab par bya ba dang khyab pa por gyur pa rnams su rnal 'byor pa'i ye shes de'i nang du chud pa yin no//thams cad nyid do bzhugs so zhes bya ba ni/ de yang ye shes thams cad la rim gyis mi bzhugs te/ cig car nyid du ye shes thams cad la bzhugs so zhes bya ba'i don to//brjod kyis mi lang ba zhes bya ba la sogs pa ni byang chub sems dpa' tshad med par 'dod pa dang lhan cig ces bya ba'i don du ste/ de rnams kyang tshul 'di nyid kyis bzhugs so zhes bya bar dgongs so/ /rgyud kyi rgyal po de kho na nyid 'dus pa las kyang gsungs te/de bzhin gshegs pa thams cad kyi byang chub chen por sems brtan pa dang zhes bya ba nas brtsams te/ bcom ldan 'das thog ma dang tha ma med pa byang chub sems dpa' chen po'i thugs byang chub sems dpa' chen po rdo rje kun du bzang po de bzhin gshegs pa thams cad kyi thugs la gnas so//de nas de bzhin gshegs pa thams cad kyis bka' stsal pa/ rigs kyi bu khyod gang gi phyir de bzhin gshegs pa thams cad kyi de kho na nyid mngon par rtogs par dka' ba spyod pa thams cad la spro ba skyed cig ji ltar bla na med pa yang dag par rdzogs pa'i byang chub mngon par rdzogs par bya snyam/byang chub sems dpa' chen po don thams cad grub pas gsol pa/ bcom ldan 'das de bzhin gshegs pa thams cad kyi de kho na nyid ji lta bu lags/ ji ltar bsgrub par bgyi/ bka' stsal par gsol/ de bzhin gshegs pa thams cad kyis bka' stsal pa/ rigs kyi bu rang gi sems la rtog cing mnyam par zhog la/ rang bzhin gyis grub pa'i sngags ni ci dgar bzlas shing sgrub par gyis shig /swa tsit+ta pra ti be taM ka ro mi/ byang chub sems dpa' chen pos gsol pa/ bcom ldan 'das de bzhin gshegs pa thams cad rang gi sems zla ba'i dkyil 'khor du gda' bar 'tshal ba lags so/ /de bzhin gshegs pa thams cad kyis bka' stsal pa/ sems 'di ni rang bzhin gyis 'od gsal bas na zla ba lta bu ste/zla ba'i dkyil 'khor ni rang bzhin gyis 'od gsal ba'i ye shes de nyid do/ /dper na zla ba'i dkyil 'khor ni rim gyis rdzogs par 'gyur te/ de bzhin du rang bzhin gyis 'od gsal ba'i bsam pa rin po che yang rdzogs par 'gyur ro/ /dper na zla ba'i dkyil 'khor ni glo bur gyi dri ma rnams dang bral zhing /nyi ma'i dkyil 'khor gyi 'od zer dang bral bas rim gyis rdzogs par snang ngo / /de bzhin du rang bzhan gyis yongs su dag pa'i sems kyi rin po che yang / nyon mongs pa thams cad kyi dri ma'i nag nog dang bral zhing sangs rgyas kyi yon tan yongs su rdzogs par snang ngo //gnyis su med par mnyam pa'i rnam par rgyal ba las kyang / oM sarba ta thA ga to dz+nyA na badzra swa b+hA ba At+ma kou0f85haM/ yang le'u dgu pa las/ gsal ba sems can kun gyi sems/ /zhi ba nyid ni 'od gsal ba/ /dngos p o du mas ma gos pa//de nyid ces bya de bsgom pa/ /sangs rgyas sku yi cho ga zhes/ /de bzhin nyid du nye bar spyod/ /gzhan du sngags la sogs pa kun/ /dge ba 'grub par mi 'gyur ro/ /yang le'u bcu gsum pa las/ sangs rgyas kun gyi dkyil 'khor ni//de nyid shes pa'i dkyil 'khor te/ /'di ni de nyid grub pa yin/ /yid bzhin nor bu lta bur bshad/ /zla gsang nor bu'i thig le'i rgyud kyi rgyal po las gsungs te/ yan lag kun bsgom las 'das shing / /rtog dang brtag bya rnam spangs la/ / gug skyed thig le yang dag 'das/ /'di ni dkyil 'khor dam pa yin/ /yang de nyid las/ thog mtha' med pa'i sems dpa' ni/ /rdo rje sems dpa' bde ba'i mchog /de nyid dngos po thams cad kyis/ /thams cad du ni yang dag bzhugs/ /byang chub sems las ma gtogs pa'i//bde gzhan srid pa gsum na med/ /byang chub sems dngos bde ba ni/ /bde ba thams cad skyed byed pa'o/ /'dus pa'i dam tshig gi de kho na nyid las bstan te/ nga yang 'dod dang gzugs mchog tu/ /sangs rgyas kun gyis byin gyis brlabs//ngas kyang chos kyi sku mchog tu/ /sangs rgyas thams cad byin gyis brlabs/ /rab dgyes bcom ldan rtag par ni/ /rdo rje sems dpa' bde ba che/ /gang phyir de rnams skyes pas na/ /'di ni de nyid yin par 'dod/ /yang / sems dpa' chen po rdo rje che//rdo rje sems dpa' de bshad do/ /de yi sems dpa' thog mtha' med/ /rdo rje sems dpa' dga' chen yin/ /kun du bzang po kun bdag nyid/ /sangs rgyas byang chub khams gsum pa/ /mi rgyu thams cad 'di yin no/ /rdo rje chen po mchog chen po//rgyu ba sems kyi 'dus byas te/ /kun mdzad thams cad 'di yin no/ /sgyu 'phrul dra ba las kyang gsungs te/ ye shes mig gcig dri ma med/ /ye shes lus can de bzhin gshegs/ /mi 'gyur kun 'gro khyab pa po/ /phra zhing zag med sa bon bral//le'u bdun pa'i byang chub sems dpa'i le'u las/ chos rnams skye ba med pa ste/ /'gyur ba med cing gnas pa med/ /rtog dang smra ba'i tshul spangs 'di/ /bskyed par bya zhes rab tu gsungs/ /yang de nyid las/ chos rnams rang bzhin 'od gsal bas//gzod nas dag cing rnyog pa med/ /sems can med cing srog kyang med/ /sangs rgyas nyid dang byang chub sems/ /dpal rdo rje dkyil 'khor gyi rgyan las gsungs pa/ thams cad du ni khams kun dang / /sems can kun la thams cad du/ /lus kun la ni mnyam par khyab//sems can khyab bzhin yang dag gnas/ /zag pa med kyang bsam mi khyab/ /dri med nga med rang bzhin dang / /stong dang mkha' dang mnyam nyid dang / /dngos dang dngos med rnam spangs pa'i/ /thog ma tha ma med zhi ba'o/ /chos kun gyi ni dbang phyug sku//gzugs rnams kun gyi 'byor ba ste/ /bden pa gnyis la yang dag gnas/ /mchog yin dam pa'i don gyis ni/ /de ni chos kyis sku zhes bshad/ /dbang po kun dang rnam shes dang / /sems can kun la yang dag tu/ /yid dang rnam shes zhes bshad cing //shes rab blo dang blo gros ldan/ /lhag mthong kun mkhyen ye shes ni/ /shes bya nyon mongs thar pa nyid/ /rtag dang chad pa'i mtha' las grol/ /mtha' nyid dag ni rnam par spangs/ /kun rdzob dang ni don dam las/ /de ni rnam pa gnyis su brtag /dper na bud shing la gnas te/ /me yi sa bon kun du gnas/ /dper na til la til mar dang / /bu ram shing la khu bar brtag /dper na me tog la dri dang / /dper na zho la mar sar bzhin/ /kun du sems can thams cad dang / /rgyu ba dang ni mi rgyu ba//gzugs dang gzugs med rtog pa la/ /phyag rgya chen po rab tu gnas/ /yang / ye shes 'di mi 'jig pa dang / mi bzad pa dang / mi g.yo ba dang / gzod ma nas dag pa dang / dri ma med pa dang / 'od gsal ba dang / brjod du med pa'o zhes gsungs so//bde mchog gi rgyud las kyang gsungs te/ gzugs brnyan lugs ma la sogs las/ /rnal 'byor skye bar mi 'gyur gyi/ /byang chub sems la rab brtson na/ /sems las rnal 'byor lhar 'gyur ro/ /byang chub sems ni rdo rje ste//sangs rgyas kun gyi bdag nyid ni/ /bde bas thams cad bdag 'byor pas/ /sangs rgyas thams cad thob par 'gyur/ /mthong ba dang ni reg pa dang / /thos pa dang ni dran pas kyang / /de ni sangs rgyas thams cad kyang / /mthong zhing mchod pa byas par 'gyur//'di dang sangs rgyas thams cad la/ /mthong ba dang ni reg pa yis/ /dkyil 'khor dag tu ma zhugs dang / /bde ba dag kyang mthong bas na/ /mthong ba dang ni reg pa dang / /thos pa dang ni dran pa yis/ /sdig pa kun las rnam grol zhing / /sangs rgyas dngos grub thams cad 'grub//'di dang sangs rgyas thams cad la/ /rnal 'byor thams cad mnyam sbyor ba'i/ /bud med dag kyang rnam grol zhing / /sangs rgyas byang chub reg par 'gyur/ /kun du kun nas thams cad kun/ /bdag nyid rnam pa thams cad du/ / sangs rgyas thams cad dngos grub par/ /de yi bdag nyid mthong bar 'gyur/ /'di yi bdag nyid kun gnas pas/ /mchod pa'i sprin chen thams cad kyi/ /bkod pa'i rab 'byams mchog dag gis/ /de bzhin gshegs pa mchod par mdzad/ /rnal 'byor kun gyis longs spyod kyis//ji ltar bde ba sten byed cing / /rang gi lha yi rnal 'byor gyis/ /bdag nyid rab tu mchod par bya/ /yang / sna tshogs las kyi sbyor ba yis/ /sna tshogs 'dul ba'i bdag nyid ni/ /sems can rnams ni 'dul ba'i phyir/ /gzhan pa thams cad bsgrub par bya//gang phyir rdo rje sems dpa' mchog /thog mtha' med pa'i sems dpa' ni/ /sangs rgyas phyag rgya'i brda yis ni/ /skal bzang zhes ni rnam par grags/ /yang / cho ga sna tshogs 'dod rnams la/ /las kyi sbyor ba sna tshogs kyis/ / sangs rgyas rdo rje 'dzin la sogs/ /gdul ba'i phyir ni byas pa yin/ /dpal mchog dang po las kyang / gsang ba'i pad+ma'i tshogs mthong ba la sogs pa ni gzhung mangs kyis dogs nas ma bris so/ /ye shes grub pa las gsungs pa'i de kho na nyid kyi yi ge'i tshogs nges par bstan pa ste le'u bco lnga pa'o// //de ltar shes mchog thabs dang ni/ /bcas par yang dag sgom par ni/ /shin tu drag po'i bdag nyid can/ /skye ba gcig gis 'grub par 'gyur/ /thabs dang snying rje'i rtsa ba can/ /byang chub sems ni legs gsal la/ / sems can kun la snyoms pa dang / /dkon mchog gsum ni dad pas mchod/ /stong nyid mngon du ye shes shing / /'dod pa kun las chags bral min/ /longs spyod rnams kyang mchod pa'i phyir/ /de bzhin gshegs pa thams cad 'chang / /phyag la sogs pa rnam dag ni//bsngo ba'i bar du bya ba ni/ /thabs 'di rdzogs pa'i sangs rgyas kyis/ /snying rje la sogs rab tu gsungs/ /de ltar thabs shes rnal 'byor pa/ /sangs rgyas kun 'dra gnyis pa yin/ /de la 'tshe ba cung zad kyang / /rtag pa kun du yod ma yin//sngags dang phyag rgya'i sbyor ba yis/ /gang zhig bsrung bar yongs bsgrags pa/ /sangs rgyas kun dang de sras kyis/ /lung kun du ni nges gsungs pa/ /sangs rgyas sras bcas de rnams kyis/ /bskal pa bye ba brgya bar du/ /srung ba mdzad pa gang yin pa//de ni ye shes de bsgoms yin/ /spyod lam bzhi dang ldan pa ru/ /bsgom pa ru ni gsungs pa yin/ /bde ba thams cad ster byed pa'i/ /rnal 'byor pa yi gnas ma gsungs/ /rnal 'byor smyung la mi gnas shing / /gcer bu rnam rtog dag pa min/ / sna tshogs rtog las rnam grol bdag /rnal 'byor mchog gis bdag nyid bsgom/ /lus dang yid kyi sdug bsngal dag /bskal pa bye bar mi bya'o/ /bde ba kun dang yang dag ldan/ /'grub par 'di nyid the tshom med/ /sems can thams cad skye ba ni/ / 'gro drug las yod gzhan yod min/ /de bas gang du'ang gzung bya min/ /khyad par can ni rnyed mi 'gyur/ /gnas dang yul dang khyim dang ni/ /glegs bam sku yi gzugs brnyan la/ /'dzin pa kun la rnam grol bas/ /rnal 'byor pa rnams sangs rgyas bsngags//ye shes grub pa las thabs nges par bstan pa'i le'u ste bcu drug pa'o// //yang dag ye shes yang dag bskyed/ /rnal 'byor pa de rtag gsol 'debs/ /khams gsum pa yis phyag byas pas/ /dbang bskur ba ni rab sbyin bya/ /yo byad kun dang nyer ldan zhing //mos pas thams cad legs bsags pas/ /yon tan kun gyi gnas gyur pa'i/ /rdo rje slob dpon mchog mnyes bya/ /bza' dang bca' la sogs ldan zhing / /me tog dri la sogs pa yis/ /dkyil 'khor yang dag mchod byas la//thal mo sbyar ba byas nas brjod/ /thugs rje'i bdag nyid drin can gyis/ /yang dag ye shes mchog thob ste/ /rang rig pa yi ngo bo la/ /bdag ni shin tu nges pa skyes// gnyis med ye shes 'di nyid ni/ /'gro ba gzhan la yod ma yin/ /chos kyi bdud rtsi 'di 'thung phyir//bla ma che la gsol ba 'debs/ /sems can kun gyi bya ba ni/ /ci nus par ni bdag bgyid cing / /ltos med chos kyi sbyin pa ni/ /bdag nyid ji ltar stsol 'gyur ba/ /dbang bskur ba yi rin chen mchog /gal te drin gyis thob 'gyur ba/ / bdag gis legs par 'tshal lags na/ /'jigs pa med pa'i bka' drin gsol/ /gal te 'gro ba shes rab ldan/ /bla mas kyang ni dga' ba yis/ /sangs rgyas kun gyi rjes gsungs pa/ /yon tan rdzogs pa skye bo la/ /de ltar rab tu sbyin par bya/ / bcom ldan thugs rje ldan pa yi/ /gsung gi don kun phun tshogs pas/ /chos kyi rgyal por dbang bskur gsol/ /dbang bskur ba ni bla med yin/ /de nas nyin zhag des byas te/ /slob ma la ni tshig bsgo ba/ /de nas nyin zhag gang gi tshe/ /bu khyod thams cad rdzogs pa yi//yid du nges par gyur pas na/ /de bas sems ni brtan par gyis/ /ji ltar dgong dkar mi 'gyur ba/ /blo gros chen po de ltar gyis/ /de nas nyin zhag nges thob pa/ /sangs rgyas thams cad rab tu mchod/ /'phags pa dge 'dun mchod ston ni//yon dang bcas pa sbyin par bya/ /tshogs kyi ston mo rgya chen dang / /khyad par du ni bla ma la/ /mgon med la yang ci nus sbyin/ /cho ga thams cad kun du spyad/ /sangs rgyas kun gyis bsngags pa yi/ /bla ma la ni yon dbul zhing / /kun du sna tshogs bla ma la//yon dbul ba ni dam pa 'grub/ /gang la gang ni gtang dka' ba/ /de ni mchog tu bshad pa yin/ /gang dang gang ni sdug pa'i mchog /yang ni shin tu khyad par ni/ /de dang de ni bla ma la/ /de nyid mi bzad 'dod pas dbul/ /yang na de bzhin 'dod gyur pa'am//'on te sems la dgos pa dag /de sbyin yang na dgos pa bya/ /de ni chung yang mchog yin no/ /gal te de la mchog yod la/ /de la ngan pa'i yon phul na/ /kun gyis slob dpon brnyas pas na/ /de ni rtag tu sdug bsngal thob/ /'di ni rgyud kyi rgyal po bde mchog gi yin no//bdag nyid kyang ni phul nas su/ /slar yang rin gyis slu ba ni/ /sna tshogs rgyud du gsungs pa yin/ /yon ni bla na med pa yin/ /de nas sangs rgyas kun dbang bskur/ /rgyud rnams kun du sbas pa yin/ /sangs rgyas kun dngos rnal 'byor ni//thams cad yang dag bde ba bskyed/ /sems can kun gyis ma gtogs pa/ /'jig rten mgon pos gsungs pa ni/ /de bzhin gshegs pa kun gyi thugs/ /gsung dang sku ni thams cad 'dus/ /de ltar gnyig shes nas kyang / /byin gyis brlab pa brjod par bya//'di dag thams cad yid dang ni/ /lus dang ngag las yang dag 'byung / /sangs rgyas kun gyis byin brlabs phyir/ /rjes gnang de la sbyin par bya/ /rdo rje 'dzin pa kun gyi phyir/ /rdzogs sangs rgyas la dbang bskur zhing / /'das dang ma 'ongs rnams dang ni//rdo rje 'dzin kun gyis kyang ngo / /da ni blo gros chen po khyod/ /sangs rgyas kun dang sku gcig ste/ /chos dang zang zing sbyin pa yis/ /sems can rjes su gzung bar gyis/ /ci nus par ni dkon mchog gsum/ /bde ba skyed pa bsrung bar bya//rdo rje sems dpa'i bya ba ni/ /sangs rgyas kun gyis nges gsungs te/ /rdo rje 'dzin mchog khyod kyis ni/ /brnyas pa dag kyang mi bya'o/ /ya nga ba ni ma spangs pas/ /dus byas shin tu mi bzad pa'i/ /dmyal ba'i sdug bsngal 'jigs pa'i tshogs/ / bskal pa brgyar ni myong bar 'gyur/ /gang yang 'jig rten sun 'byin dang / /log pa'i chos ni kun spyod dang / /dam chos spong bar byed pa'o/ /de dang kun du gnas mi bya/ /rmongs shing chos bral de dag ni/ /rang gi bde ba brtson yid ldan/ /tshul ngan bsod nams bral ba yis//byang chub mchog thob mi 'gyur gyi/ /'khor ba ru ni phan tshun du/ /'gro ba drug ni shin tu 'khor/ /'jig rten rmongs pa'i ngang tshul can/ /rab tu 'dres par byed mtshungs shing / /de 'dra ba yi dri ma yang / /'khrul pa'i chos la kun du gnas/ / de rnams bde 'gror mi skye zhing / /sangs rgyas kyang ni rnyed par dka'/ /blo gros chen po khyod kyis ni/ /de rnams la ni rtag bsrung bya/ /de ltar bdud kyi zhags pas bcings/ /gzhan rnams kyang ni phung ba yin/ /sangs rgyas kun dag rang nyid do/ /da ni sems can don rnams kyis//ji ltar 'dul ba rnams la chos/ /'gro ba kun la rab tu shod/ /da ni khyod kyis chos rnams la/ /som [(]nyid [,]nyi[)]dag ni mi bya'o/ /slar ni dbang bskur mi blang ngo / /gzhan du dam tshig nyams par 'gyur/ /yang dag chos mchog 'dzin pa ste//khams gsum kun gyis phyag byas pa/ /dbang bskur khyod kyis thob pas ni/ /'di la mchog gzhan yod ma yin/ /de bzhin gshegs pa thams cad kyis/ /ye shes mchog gi dbang bskur ba'i/ /rnal 'byor pa rnams kyis bdag nyid chen po ni dpal gsang ba 'dus pa las gsungs te 'di ltar bcom ldan 'das de bzhin gshegs pa thams cad kyi sku dang gsung dang thugs rdo rje gsang ba mngon par rtogs pa'i dbang bskur ba'i slob dpon la de bzhin gshegs pa dang /byang chub sems dpa' thams cad kyi ji lta ba blta bar bgyi/ de bzhin gshegs pa thams cad kyis bka' stsal pa/ /rigs kyi bu byang chub kyi sems rdo rje lta bu de bzhin gshegs pa thams cad dang byang chub sems dpa' rnams kyis blta bar bya'o/ /de ci'i phyir zhe na/ byang chub kyi sems rdo rje dang slob dpon 'di nyid gnyis su med cing gnyis su byar med do//rigs kyi bu mdor byas nas bstan par bya ste/ phyogs bcu 'jig rten gyi khams na sangs rgyas dang byang chub sems dpa' ji snyed cig 'khod cing 'tsho ba dang skyong ba de dag thams cad dus gsum du lhags nas/ slob dpon de la de bzhin gshegs pa thams cad kyis mchod pas yang dag par mchod de/sangs rgyas kyi zhing der yang 'gro'o/ /ngag rdo rje'i yi ge de yang 'di skad brjod de/ bdag cag de bzhin gshegs pa thams cad kyi pa'o/ /bdag cag de bzhin gshegs pa thams cad kyi ma'o zhes pa nas/ bdag cag de bzhin gshegs pa thams cad kyi ston pa'o zhes bya'i bar du'o//'di lta ste dper na rigs kyi bu sangs rgyas bcom ldan 'das phyogs bcu na ji snyed bzhugs shing rab tu spyod pa'i sangs rgyas bcom ldan 'das de rnams kyi sku dang thugs rje'i bsod nams kyi phung po las kyang slob dpon gyi ba spu'i khung bu gcig 'phags so//de ci'i phyir zhe na/ /rigs kyi bu byang chub kyi sems ni sangs rgyas thams cad kyi ye shes kyi snying por gyur pa dang / skye ba'i gnas su gyur pa dang / thams cad mkhyen pa'i ye shes kyi 'byung gnas yin pa'i bar du'o/ /ye shes grub pa las ye shes rdo rje'i dbang bskur ba'i cho ga'i le'u ste bcu bdun pa'o// //rdo rje ye shes chen po rab tu bsgoms pa'i rnal 'byor gyi dbang phyug chen po'i mthu ni bskal pa bye ba brgyar yang brjod par mi nus med kyi/ /dpal bde mchog las bshad pa cung zad cig brjod par bya ste/ kun du kun nas thams cad du//bdag nyid rtag tu rnam pa kun/ /sangs rgyas thams cad brtan g.yo kun/ /kun du dngos por de 'gyur ro/ /sangs rgyas zhing ni ma lus par/ /sangs rgyas sprul pa sgrub par byed/ /sangs rgyas sprul pa sgyu ma yi/ /sangs rgyas rnams kyis mdzad pa ston//pad+ma sgyu ma rnam 'phrul ba/ /sangs rgyas rdo rje 'dzin la sogs/ /sna tshogs gzugs byed rigs pa yis/ /'gro ba mtha' dag mgu bar byed/ /khams gsum pa yi rgyal srid che/ /'joms 'dum g.yul 'gyang grub pa dag /rgyal srid sgyu ma rnam sprul pas/ / bya ba thams cad ston par byed/ /khams gsum pa yi rgyal srid che/ /bdag rtul phod pas mnan nas ni/ /'gro ba thams cad rab 'joms pa/ /rta ni gar gyis ston par byed/ /de la sogs pa mtha' yas mchog /chos dbyings mnyam dang mi mnyam pa/ /nam mkha'i dbyings kyi mtha' klas pa'i//sna tshogs kun gyi mchog gis ni/ /nam mkha' kun gyi skabs na dpal/ /rdo rje sems dpa' de bzhin gshegs/ /dpal dgyes rol pa rnam 'phrul ba/ /sna tshogs kyi ni rnam par rol/ /rnam pa sna tshogs skal bzang po/ / rnam pa sna tshogs bde mchog gis/ /'dul ba rnam pa sna tshogs kyis/ /sems can khams ni rab tu sdud/ /de la sogs pa mtha' yas mchog /chos dbyings mnyam dang mi mnyam pa'i/ /nam mkha' dbyings kyi mtha' klas pa'i/ /sangs rgyas thams cad 'byung ba'i mchog /nam mkha' kun gyi skabs na dpal/ /rdo rje sems dpa' rab tu gnas/ /grub pa'i dbang phyug rab grags pas/ /lus can gang der rab grags pa/ /thams cad bdag nyid grub par byed/ /bcom ldan 'das dpal rdo rje sems dpas de skad gsungs so/ / sangs rgyas kun du mos pa yis/ /sdig med stobs kyis ngo mthon du/ /pha rol gnod pa'i rtsal dag gis/ /shin tu gdug cing khro gtum pa/ /sems can rnam pa mang po'i khams/ /'jig rten thams cad rab tu 'jigs/ /shin tu gdul dka' 'dul ba rnams/ / byis pa rkun pa chom po yis/ /thams cad rnam par sbyong par byed/ /brid pa dang ni sgyu dag dang / /ngo mthon stobs dang de bzhin du/ /dgra cha lnga yis rgal nas na/ de tshe 'jig rten gsum las rgyal/ /skye 'gro'i gnas dang 'gro ba rnams/ /gdul ba'i thabs rnams sna tshogs kyis//mtha' dag brtul nas grub par 'gyur/ /'dul ba'i thabs rnams sna tshogs kyis/ /rang gi rgyal srid rtag tu skyong / /g.yem pa rnams la g.yem par 'gyur/ /khro ba rnams la khro ba'i mchog /zhi ba rnams la zhi ba'i mchog /drag shul can la drag pos gnon//sdig med stobs kyis ngo mthon du/ /dbang phyug dam pa rab mnan nas/ /lha mo u ma phrogs nas ni/ /de tshe longs spyod rang gis spyod/ /sdeg med stobs kyis ngo mthon du/ /mthu bo che yang rab gnon nas/ /ru phi ni yang phrogs nas ni/ / de tshe longs spyod rang gis spyod/ /sdig med stobs kyis ngo mthon du/ /skye dgu'i bdag po rab gnon nas/ /lha mo rab tu zhi ba phrogs/ /de tshe longs spyod rang gis spyod/ /sdig med stobs kyis ngo mthon du/ /'dod pa'i lha ni rab gnon nas/ /dga' sdug ma yin dbang phyug ma//phrogs na de tshe bdag rang spyod/ /de la sogs te mtha' yas mchog/ /chos dbyings mnyam dang mi mnyam pa/ /nam mkha'i dbyings kyi mtha' klas par/ /rdo rje las mchog rnam par gnon/ /de la sogs te rnam 'phrul ba/ /sna tshogs rgyud las bstan pa yin//ye shes grub pa las mthu nges par bstan pa dang dbang po mchog rnams legs par spyod pa ste le'u bco brgyad pa'o// //gang zhig yang dag ye shes med/ /'di ltar log shes sbyor bar ldan/ /dbang po bar ma zhes bshad de/ /de yi bya ba rab bshad bya//gang zhig sngar ni lam bshad pa'i/ /phyag la sogs pa thams cad dang / /de bzhin 'dus pa'i tshig tu bshad/ /de dag kun kyang bya ba yin/ /rnam pa kun mchog ldan pa yi/ /rang gi lha yi skad cig gis/ /bskyed la sngon bzhin rnal 'byor bas/ / lam la gnas te bzlas brjod tsam/ /mthar yang 'di skad brjod par bya/ /sras bcas sangs rgyas thams cad ni/ /thams cad thugs rje'i bdag nyid can/ /bdag la bka' drin mdzad du gsol/ /thog med dus nas 'di bar du'ang / /bdag ni 'khor bar 'khor 'gyur te//yang dag ye shes ma mthong bas/ /sdug bsngal rnams kyis rtag tu dub/ /ji ltar ye shes skye 'gyur bas/ /gang gi ye shes mchog thob nas/ /sems can kha lo bsgyur 'gyur ba/ /khyed kyis de ltar bdag la brjod/ /ji ltar 'das pa'i rdzogs sangs rgyas//de bzhin de ltar ma byon pas/ /sems can don mdzad ces grags pa/ /de ltar bdag ni bgyid par brtson/ /rim pa 'di dang legs ldan pa/ /gal te yang dag 'jug 'gyur ba/ /de ni ye shes mchog 'gyur te/ /log pa'i lam du 'gro mi 'gyur//ye shes grub pa las dbang po 'bring po bstan pa'i le'u ste bcu dgu pa'o// //phyag rgya'i dkyil 'khor sku mdog sogs/ /phyag dang gdan ni rnam bsgom dang / /ting 'dzin gsum dang phyag rgya bzhi/ /zhal gsum dang ni phyag drug rnams/ / sgom 'gyur de ni phyi shun bcas/ /sna tshogs spros pa'i man ngag rnams/ /de kun dman pa'i yin par bshad/ /de rnams la yang de bzhin thabs/ /de la gtan tshigs bshad par bya/ /mchog dang bar ma'i lam dag las/ /ji bzhin chung ngu gzhan bya ba/ /lha dang sngags ni rnal 'byor pas//rgyud las gsungs pa kun du bya/ /gang la mnyam pa'i sems yod pa/ /de la ye shes skye 'gyur gyi/ /gzhan du bskal pa bye ba ni/ /brgyas kyang de thob mi 'gyur ro/ /kun du sems dang ldan pa yi/ /rtsa ba cher ldan blo gros bzang //sngar bshad mtshan nyid ldan pa yi/ /rnal 'byor ye shes mchog thob 'gyur/ /gang zhig bar mtha' gnyis po nyid/ /bsgom pa gsum po gtso bo bas/ /yang dag ye shes 'byung ba'i don/ /yang dag bya ba dbang du 'gyur/ /de nyid med par 'tshang mi rgya//lam la bgyid pa de nyid min/ /de bas lam la gnas bdag nyid/ /bsgrubs na ye shes thob par 'gyur// gang zhig lam las nyams pa dang / /snying rje dang bral sems ldan zhing / /chags sogs don la spro bdag nyid/ /de rnams la ni 'byung mi 'gyur/ / ye shes grub pa las dbang po tha ma pa bstan pa'i le'u ste nyid shu pa'o// //rnal 'byor pa yis shes grub phyir/ /bdag gis yang dag shin tu bshad/ /rgyud kun du ni sbas gyur pa'i/ /gsang ba 'di ni bshad mi bya/ /gang la ye shes mchog gis ni/ /rnal 'byor mchog ni med gyur pa//lha yi gzugs ni sgom pa la/ /sems ni brtson pa dag tu bya/ /glegs bam tsam zhig bstan pa yang / /sbyin mi bya bar shes bya ste/ /rdo rje ye shes rab spangs pas/ /rmongs pa dmyal bar 'gro bar 'gyur/ /de yi dmyal ba'i rgyur gyur pas//mi de mnar med 'thob par 'gyur/ /de bas bdag gzhan phung ba ni/ /'byung bas nges par bsrung bar bya/ /gzhan du ston par 'gyur na ni/ /dam tshig dag kyang nyams par 'gyur/ /rnal 'byor rgyud ni du ma ru/ /brtse ldan sangs rgyas thams cad kyis/ /rtog pa'i dra ba rnam spangs pa//rdo rje ye shes 'di mchog yin/ /rdo rje sems dpa'i sgrub pa ni/ /lung dang rigs pa las shes bya/ /sgrub pa'i thabs ni byas pa la/ /bdag gis dge ba gang bsags pa/ /des ni sems can thams cad kyang / /rdo rje sems dpa' mchog thob shog /dpal u rgyan nas byung ba ye shes grub pa zhes bya ba'i sgrub thabs slob dpon in+d+ra b+hU tis mdzad pa rdzogs so// //rgya gar gyi mkhan po shrad+ha ka ra wa rma dang / zhu chen gyi lo tsA ba dge slong rin chen bzang pos bsgyur/ /slad kyi nags tshos kyang bcos so// //