CLOSE WINDOW

D2216
བོད་ཡིག

/rtag tu bde ba mchog bsgrub dam pa de yi zhal mthong nas/ /'gro rnams dngos grub kun thob rtag tu sdug bsngal bral bar shog/[ ]@##/ /rgya gar skad du/ /tat+t+wa pra dI paM nA ma br-it+ti/ bod skad du/ de kho na nyid kyi sgron ma zhes bya ba'i 'grel pa/dpal rdo rje can la phyag 'tshal lo/ /'dir bstan bcos rtsom par 'dod pas/ thog ma nyid du brjod par bya ba dang dgos pa dang / 'brel ba dang / dgos pa'i dgos pa ma bstan na rtog pa sngon du gtong ba rnams 'jug par mi 'gyur ro//'di ltar bstan bcos 'di'i brjod par bya ba ni/ ci zhig ces bya ba la sogs pa la tshol bar mi 'gyur ro/ /gal te brjod par bya ba la sogs pa bstan kyang mchog tu gyur par ma bstan na/ dman pa la ni mkhas pa dag 'jug par mi 'gyur ro/ /gal te mchog tu gyur pa'ang gzhan gyis bsgrubs na ni ma yin te/bstan bcos 'di dgos pa med pa nyid do/ /de lta bas na brjod par bya ba ni gang zhig dgos pa dang 'brel pa dang / dgos pa'i dgos pa ni gang zhig yin zhe na/ 'dir brjod par bya ba ni/ bskyed pa'i rim pa dang /rdzogs pa'i rim pa spyod pa dang bcas pa yongs su rdzogs pa'o/ /nyan pa pos gzhung ji lta ba bzhin du rtogs pa ni dgos pa'o/ /de yang bstan bcos 'di med na mi 'byung ba'i tshul gyis 'brel pa'o/ /des rang gzhan gyi don phun sum tshogs par 'gyur ba ni yang dgos pa'i dgos pa'o//de ltar brjod par bya ba la sogs pa bsnyad nas da ni yon tan brjod pa sngon du 'gro bas phyag 'tshal ba bstan pa'i phyir/ gang zhig gis ni bde ba 'thob cing sdug bsngal spong 'dod pa/ /zhes bya ba la sogs pa smos te/theg pa chen po'i rigs can gang gis 'khor ba'i nyes pa spong ba dang / mya ngan las 'das pa'i bde ba bla na med pa thob par 'dod pas na/ nor bu bzhin du bsgrub pa ni thogs pa med par bsgrub par bya ba'i phyir ro zhes pas dgos pa'i dgos pa bstan to/ /bde ba'i mchog ni phyag na rdo rje yon tan phun sum tshogs pa'i bdag nyid can te de la gus pas phyag 'tshal lo//de nas brtsam par bya ba'i gzhi bstan par bya ba'i phyir sgrub pa'i thabs mchog de nyid sgron ma zhes smos te sems can rnams la dam pa sbyin par byed pas sgrub thabs te/ gang gis las gzhan pa'i mchog tu gyur pa'i phyir de skad ces bya'o/ /de bstan pa'i lung bstan pa'i phyir gsang ba'i rgyud rnams la brten cing zhes pa de kho na nyid gsang ba la sogs pa'i rgyud rnams la brten pa'o/ /gzhan yang gang las 'ongs pa zhes pa ni rim pa nas brgyud pa'i don ji lta ba bzhin du bshad par bya'o//'di skad du ston te gang gi phyir de bzhin gshegs pa'i gsang ba'i don rnams thob par bya ba'i phyir sgrub pa'i thabs su phun sum tshogs pa brtsam par bya'o/ /de'i bar du gcod pa'i bgegs nye bar zhi bar bya ba'i phyir sngon du rang dad pa'i lha la phyag 'tshal ba brtsam par bya'o//gal te de bzhin gshegs pa'i gsang ba'i don rnams zhes bya ba de las gzhan pa zhig tu gyur na ni thug pa med par 'gyur ro/ /de la gzhan yod par yang ma grub ste/ re ba rnam par chad pa'i phyir ro//rigs dman par gyur pa'ang ma yin te/ dgos pa thams cad 'di'i nang du 'ub la yang dag par 'dus pa'o/ /gsang ba'i don yang rnam pa gnyis te lam dang 'bras bu'o/ /lam ni bskyed pa dang rdzogs pa'i rim pa spyod pa dang bcas pa'o/ /'bras bu ni dngos grub gnyis te/ji skad du/ rgyal bas bstan pa'i chos rnams kun/ /lam dang 'bras bu gnyis su 'dus/ /zhes bya ba la sogs pa'o/ /lam dang 'bras bu ni rgyud kyi brjod par bya ba ma lus pa thams cad rab tu bsdus par gyur la/ de yang de bzhin gshegs pa rnams kyis gsungs pa'i phyir ro//yang de nyid rtsom pa dgos pa med do zhe na/ me yin pa'i phyir/ gang gis ni legs pa'i don gsum pa ni/ de kho na nyid dang spyod par bcas pa ste/ gsungs kyang don yod ces mi mthun pa'i rgyan dang bcas pa'o//ci'i phyir zhe na/ gsal ma byas pa zhes pa de kho na nyid la sogs pa ci lta ba bzhin gsal bar ma byas pa'i phyir ro/ /de ltar yang gsungs pa/ rdzogs sangs rgyas ni mya ngan 'das/ /bstan pa rnams ni blo la bskal/ /zhe'o/ /gal te de lta na'ang bstan bcos gzhan bstan pa nyid do zhe na/des byas byas pa med mthong zhes pa slob dpon gzhan gyis byas pa'i bstan bcos dag la'ang de kho na nyid spyod pa bstan pa dang bcas pa yongs su rdzogs pa med pa'i phyir byas pa ma yin par mthong ste/ de'i phyir de kho na nyid spyod pa dang bcas pa yongs su rdzogs pa'i gsang ba 'di la dga' ba skyes zhes smos te/'dis ni dngos su snying rje la dga' ba zhes smos te/ gang gi 'bras bur gyur pa de la de skad ces bya'o/ /'dir sgrub pa po'ang ci lta bu zhig gzung bar bya zhe na/ lta spyod dbang dang zhes bya ba la sogs pa smos te/lta ba ni yang dag pa'i lta ba dang log pa'i lta ba ste/ dngos po dang mthun pa'i phyir ro/ /de dang blang bya dang spang bya'i tshul du ldan pa ste/ khong du chud pa'o/ /spyod pa ni spros pa dang bcas pa dang / /spros pa med pa dang / shin tu spros pa med pa'o/ /dbang ni bum pa'i dbang la sogs pa'o/ /dam tshig ni rdo rje slob dpon la sogs pa'i rten can 'da' bar bya ba ma yin pa rnams so/ /ldan zhes pa ni re re la'ang sbyor ro/ /dge ba'i chos ni dad pa la sogs pa ste/ gang gis de la shin tu phan 'dogs pa dang mdzes par bya ba'i phyir brgyan pa'o//de'i ming ci zhe na/ /rnal 'byor snod can te/ yang dag pa'i gdams ngag dang dngos grub kyi snod du gyur pa nyid do/ /de'i bsam pa ji lta ba bzhin zhe na/ yang dag byang chub yid la bzhag / ces pa/ sems can gyi don gyi phyir lam dang 'bras bu la gnas par bya'o zhes yid la byas pas so/ /'di ni 'di skad du ston te ji skad smos pa'i chos dang ldan pa'i rnal 'byor pa zhig gis thog ma nyid du las gang brtsam yang byang chub tu sems bskyed la 'jug par bya'o zhes bya ba'i don to//rnal 'byor snod can yang rigs mchog tu gyur pa bzung ba'i phyir te/ 'di ltar gsang ba 'di thun mong ma yin pa'i phyir ro/ /gal te rnal 'byor snod can gyi mtshan nyid ma bstan na/ gsang ba la ni gnas pa sems can de byang chub sems dpa' sems dpa' chen po yang chen po 'di ming las ldog pa'i phyir ro//ji ltar na chen po yin zhe na/ chen po dgu dang ldan pa'i phyir te/ rigs chen po ni sangs rgyas kyi rigs su nges par byed pa'i phyir ro/ /rtsom pa chen po ni rang gzhan gyi don phun sum tshogs pa brtson pa'i phyir ro/ /mos pa chen po ni mos pa rab kyi rab nyid do//dmigs pa chen po ni sku gsum mdzad pa dang bcas pa la dmigs pa'i phyir ro/ /'bras bu chen po ni thob par bya ba thob pa'i phyir ro/ /dus chen po ni tshe gcig gis sangs rgyas par 'grub par bya ba'i phyir ro/ /las chen po ni sgrib pa thams cad spong bar byed pa'i phyir ro//byin gyis brlabs chen po ni gnas thams cad mchod par 'os pa'i phyir ro/ /spong ba chen po ni sems bskyed nas de'i bar du gcod pa'i chos spong ba'i phyir ro/ /gal te de'i mtshan nyid ma bstan na thog ma nyid du rigs dman pa 'jug par byed do//de nas ni skrag pa dang skur pa 'debs par 'gyur ro/ /de nas chos de dag las ldog par 'gyur ro/ /de bas na rnal 'byor gyi mtshan nyid smos pa ni dgos pa dang bcas pa nyid do/ /de lta bu'i rnal 'byor pas gnas gang du grub ce na/ gnas ni ri dang yul khams zhes bya ba la sogs pa smos te/ de la ri dang yul khams dang ni/ ri dang yul khams nyid do/ /ji lta bu gzung zhe na/ yon tan thams cad ldan pa ni yid du 'ong zhing bsam gtan la phan pa'i chos nye bar gnas pa'o/ /mngon sum gyis ma smad pa ni mngon sum gyis ma smad pa ste/gang gi mngon sum du ri seng ge'am rdo rje la sogs pa lta bur snang ba'o/ /grags pas ma smad pa ni thams cad du'ang mchog tu gyur par grags pa ste/ des bar chad kyi chos thams cad spong bar 'gyur te/ der yang sngon du 'gro ba'i cho ga bstan pa'i phyir ro//skad cig phyag na rdo rje gsal zhes bya ba la sogs pa smos te/ de la skad cig ni dran pa thams cad de/ des phyag na rdo rje'i skur rang gsal bar bya ba'o/ /'di yis gdug pa can rnams la/ /gzhan du 'gro ba'i bka' bsgo zhes pa ni/ gnas 'dir bdag che ge mo zhig byed kyis ma 'dug cig ces bsgo'o/ /gal te mi 'gro bar 'gyur na/ de de'i cho ga ni/ rdo rje 'khor lo'i thog gis gsang / /ces pa/ rdo rje dang 'khor lo'i dbyug to dang / ral gri dang / rgya gram dang / phur pa la sogs pa'i mtshon cha'i tshogs hUM zhes pas sna'i dbugs las bton te/gdug pa can rdul bzhin du gyur par bsgom par bya'o/ /de 'og khang pa bsgom zhes pa rang gi sa bon las mdun du ha ljang gu las rdo rje rgya gram du gyur te/ de las 'od kha dog sna tshogs 'phros pa las/ ji skad du smos pa'i khang par gyur par bsam mo/ /yang na rang gi gnas dag tu/ /zhes pa la sogs pa'i don ni bdag las khro bo khams gsum rnam par rgyal ba mdog dmar ser zhags pa dang phur bu thogs pa spros te/ phyogs bcu'i bgegs thams cad bcings nas phur bus gdab par bya'o//yang na bdag las khams gsum rgyal/ /zhes pa la sogs pa'i don ni thog ma nyid du rlung dang me'i 'khor lo yid la byas te/ de'i steng du e las chos kyi 'byung gnas bsams te/ de'i nang du 'byung po thams cad bkug la rdo rje sder mo'i sngags kyis phur bu btab na/de'i 'og khro bo'i khang par bsam mo/ /yang na khang pa me dang thog ces bya ba la sogs pa'i don ni/ khro bo'i khang pa nyid la me dpung chen po dang / 'khor lo la sogs pa'i thog dbab par tsha tsha 'khrug par bsam pas zhi bar 'gyur ro//sku bskyed pa dang / khang pa bsgom pa dang / bgegs gso ba ni thun mong du'o/ /bka' bsgo ba ni dang po'i cho ga'o/ /thog dbab pa dang / rang gi gnas su bkug nas dang / tsha tsha 'khrug pa la sogs pa ni gcig dang gnyis dang gsum las byed pa'o//'di dag gi las la'ang rgyu dang / sngon 'gro dang / thabs dang grangs dang byed pa'i las/ /bsam dang mtshan ma tshad dang dbyibs/ /kha dog rnal 'byor de yi rim/ /de la rgyu ni sna tshogs rdo rje'o/ /dus ni dngos grub sgrub pa'i dus su'o//sngon du 'gro ba ni sku bskyed pa la sogs pa'o/ /thabs ni sngags dang bsam gtan tshogs pa'o/ /grangs ni mtshon cha lnga'i dbang du byas pa'o/ /las ni 'byung po bsrung ba la sogs pa'o/ /bsam pa ni sgyu ma tsam du'o/ /mtshan ma ni me la sogs pa'o/ / tshad ni nam mkha'i mtha' dang mnyam pa'o/ /dbyibs ni gru gsum du'o/ /kha dog ni dmar nag tu gnas pa'o/ /rnal 'byor pa ni de'i las su bya ba khong du chud pa'o/ /de'i rim pa ni/ thog ma nyid du ni sku bskyed pa'i cho ga la 'jug par bya'o zhes bya ba la sogs pa'o//de nas bla ma mchod pa'i yan lag la 'jug par bya ste/ de'ang dus gang gi tshe bsgom zhe na/ gang tshe mtshams kyi cho ga rdzogs pa de'i tshe/ bla ma mchod pa rtsom gyi gzhan du ni ma yin zhes bya ba'i don to/ /rang snying mdun gyi nyi ma la/ /zhes pa ni/ rang gi sa bon las byung ba'i 'od kyis mdun du nyi ma'i gdan bskyed pa'o//bla ma bkug ste 'od du zhu/ /de las rdo rje 'chang chen sku/ /gnas rnams byin brlabs dbang bskur nas/ /zhes pa ni/ rang gi sa bon las 'od lcags kyu'i tshul can byung nas bla ma'i snying ga nas bzung nas 'ongs te/tha mal pa'i yan lag yongs su spang ba'i phyir/ rang gi 'od kyis 'od du zhu ste/ zhing dag par bsgrub pa'i phyir/ rdo rje sems dpa'i phyag rgya chen por rim pa'am cig car gyis bskyed la/ de'i gnas gsum du oM AHhUM bkod de/ ye shes kyi 'od zer gyis nus pa bskyed cing nyes pa dag par byas nas/rig pa'i lha mos dbang bskur te/ de la lus dang ngag dang yid kyi sgo nas phyag 'tshal ba la sogs pa brtsam par bya'o/ /des ci byed ce na/ de bzhin gshegs pa'i bsod nams kyi tshogs dam pa'i so bon gso ba dang /bar du gcod pa bzlog pa dang / dam tshig nyams pa sel ba la sogs par 'gyur ro/ /de ci'i phyir zhe na/ de bzhin gshegs pa'i dngos grub thams cad bla ma la brten nas thob par 'gyur te/ lung gzhan las bla ma sangs rgyas las mchog nyid ces bya ba la sogs pa 'byung ba'i phyir ro//bla ma las ji lta ba bzhin du de bzhin du de bzhin gshegs pa mchod pa las kyang bsod nams khyad par du 'gyur ro zhes bstan pa'i phyir/ de nas bde gshegs mchod pa brtsams/ /zhes bya ba la sogs pa smos te/ bde ba chen po chos kyi dbyings nyid du gshegs pas na bde gshegs te/gang gis de mnyes par byed pa'i phyir/ de la de skad ces bya'o/ /sa man dzaHsngags las byung ba'i/ /zhes pa la sogs pa'i don ni/ thog ma nyid du ni rang gis byang chub tu sems bskyed la gong ma bzhin du spyan drangs te/phyag 'tshal ba la sogs pa'i yan lag yongs su rdzogs par byas te/ de ltar tshogs chen po bsgrub pa las gsungs pa/ dbu yi gtsug tor 'phags 'dod pas/ /longs spyod yid 'ong 'dod pa yis/ /mchod pa'i tshogs kyang dbul bar bya//zhing ni dag par bya ba'i phyir/ /nyes pa rnams kyang sbyang bar bya/ /spobs pa mi zad thob bya'i phyir/ /nyes pa dag kyang bsdam par bya/ /'gro ba kun gyis 'dud bya'i phyir/ /gzhan gyi dge la yi rang zhing / /bskul dang gsol ba gdab par bya/ /lus ngag yid ni phun sum tshogs//lang tsho longs spyod de bzhin te/ /tshogs bsags pa las 'byung bar 'gyur/ /zhes pa lta bu'o/ /chos kyi 'khor lo bskor ba'i tshul bstan pa las kyang rgyu mthun gyi 'bras bu khyad par can 'byung bar bstan pa'i phyir/bdag las sprul pa'i lha tshogs kyis/ /sems can kun gyi don byed bsam/ /zhes pa rang las sprul pa'i sku dpag tu med pa 'jig rten gyi khams thams cad du spros te/ sems can thams cad bsdu ba'i dngos po bzhi la bkod nas slar 'dus te/ de ltar yang dang yang du yid du byas pas nus pa phun sum tshogs par gyur pa'o//smon lam btab pa'i 'phen pas rnam par smin pa'i 'bras bu phun sum tshogs pa bstan pa'i phyir/ phyi ma'i dus kyi smon lam btab/ /ces pa/ sems can gyi don byed par gyur cig ces smon lam gdab par bya'o//tshad med bzhi yang bsgom par bya/ /zhes byams pa dang snying rje dang dga' ba dang btang snyoms kyi sgo nas yan lag yongs su rdzogs par bya'o/ /gzhan go sla/ da ni stong pa nyid bsgoms pas kyang ye shes kyi tshogs khyad par can du 'gyur ro zhes bstan pa'i phyir/ye shes tshogs ni bshad bya ste/ /zhes bya ba la sogs pa smos te/ dang po nyid nas rang bzhin med/ /de ltar mos pa byed pa dang / /zhes pa ni/ thog mar gcig dang du ma la sogs pa dang bral ba la sogs pas/ chos thams cad stong pa nyid du shes par byas nas/phyis de'i ngang la stong pa nyid du lhag par mos par byas nas yang dang yang du bsgom pa na/ mos pas stong pa nyid du bsgom pa'o/ /rnam pa dang bcas pa'i dbang du byas nas bshad pa/ yang na snying ga'i yi ge las/ /'od byung bdag nyid zhu gyur te//zhes pa ni/ rang gi sa bon gyi 'od kyis phung po thams cad zhu bar byas pa'o/ /slar 'dus rang bzhin med par gyur/ /zhes pa ni/ 'od 'dus nas stong pa nyid du bstom pa'o/ /stong pa nyid bsgom pa'i thabs gsal bar bstan pa ni/ yul ni gang la'ang mi gtong de//zhes bya ba la sogs pa smos te/ gzugs la sogs pa'i rnam pa gang la'ang yul du mi bya ste/ sems nyid kyang gang la'ang gnas par mi bya'o zhes pa'i don to/ /spyod lam zhar la byung bstan pa/ /gzhan pa'i yul rnams rang bzhin bzhag/ ces pa ni gzugs la sogs pa'i yul snang bar gyur pa rang zhir gzhag par bya'o/ /bsod nams dang ye shes kyi tshogs gnyis ni/ gang gi lam nyid lam du gyur pa ste/ gang gis dang po'i chos nyid dang yongs su rdzogs pa'i chos nyid kyi dbang du byas pa'o/ /des cir 'gyur zhe na/sangs rgyas kyi bsod nams ye shes te/ sku gsum thob par 'gyur ba'i phyir ro/ /gal te ci bsod nams kyi tshogs kho na'am bsod nams kho na'i tshogs zhes brtags grang na/ dang po ltar na'ang de las gzhan pa'i ma yin pa yin pa nyid dang gnyis pa ltar na'ang rnam smin nam bral ba'i 'bras bu med par 'gyur ro//'di kho na bsod nams kyi tshogs yin no zhes nges par gzung ba'ang med de/ bskyed pa'i rim pa'ang der 'gyur ba nyid do/ /gal te ni 'gyur na ni/ de bsgom par bya ba ma yin pa zhig tu 'gyur na/de'ang ma yin no/ /des 'gyur ba kho na zhes bya ba ni/ de nges par te de'i ngo bo nyid yin pa'i phyir ro/ /de bas na gnyis pa la'ang de ltar blta bar bya'o zhe na/ 'di nyid de gang gis dang po'i dus kyi rjes su 'brang bar byed pa nyid de/ de ni de tsam du zad de/ lhag ma ni de'i 'bras bu dang rjes su mthun par byas pa nyid do//de ltar sngon du 'gro ba brjod nas/ da ni bskyed pa'i rten bstan par bya ste/ 'jig rten gyi khams mi mdzad du me bdun la sogs pas bar gyi bskal pa nyi shur zhig go/ /bar gyi bskal pa nyi shur stong ngo / /bar gyi bskal ba nyi shur rlung la sogs pa rim gyis chags te/de dang mthun par/ yaM dang baM dang laM dag dang / /suM dang b+h+rUM las byung ba yi/ /rlung dang chu yi dkyil 'khor dang / /sa gzhi ri rab steng dag tu/ /gzhal yas khang pa bsam par bya/ /zhes pa/ rlung ni ljang ser dpag tshad sa ya dang drug 'bum rngams su'o//chu'i ni chu rngams 'bum phrag brgyad do/ /gser gyi ni 'bum phrag gsum dang / stong phrag nyi shu dang brgya phrag bcu'o/ /ri rab ni rin chen sna bzhi las grub pa brgyad khri'o/ /gzhal yas khang ni khang bzangs rnam par rgyal byed ces bya ba lta bu'o//gzhan go sla/ de dbus hUM las byung ba'i zhes pa la sogs pa'i don ni/ ji skad smos pa'i gzhal yas khang gi sems nyid snang ba yi ge hUM mthing ga 'od dang ldan pa cig gsal bar byas te/ de'i 'od kyi 'phro 'du las rdo rje gdengs po sa bon dang bcas pa/de las phyag na rdo rje cung zad khro ba dang bcas par gnas par bsams la des gnod sbyin gos sngon po can dang / klu la sogs pa la bltas te/ snying rje chen po sngon du 'gro bas gos sngon po can snang ba'i tshul du bslangs nas yid bsdu ba'i sbyor bas sa bon brtan pa las khro bo chen po 'phags pa gos sngon po can ji skad smos pa'i rgyan thams cad dang ldan pa bsam par bya'o//ye shes kyi 'khor lo dgug pa sngon du 'gro bas dbang bskur bas kyang ji skad du bshad pa'i sku khyad par du 'gyur ro zhes bstan pa'i phyir/ye shes 'khor lo spyan drangs te/ zhes bya ba la sogs pa smos te/ mchod pa ni spos la sogs pa'o/ /gtor ma ni bdud rtsi lnga la sogs pa'o/ /des mnyes pa ni mgu bar byas pa'o/ /des ci byed ce na/ don ched 'di yis gsol ba gdab/ /ces pa sems can gyi don du'o//gsol ba gdab pa'i tshig ni go sla'o/ /'dis ci byed ce na/ bum pa la sogs dbang rnams blang / /zhes pa bum pa dang gsang ba dang shes rab ye shes dang bzhi pa blang pa'o/ /de la bum pa'i dbang ni rig pa'i lha mo rnams kyis dbang bskur ba ste/'bras bu rigs lngar gyur pa'o/ /gsang ba'i dbang ni lag pa'i byang chub kyi sems so/ /shes rab ye shes ni rig pa'i yum gyis bde ba byin pa'o/ /bde ba chen por rtag tu dgyes/ /zhes pa ni dbang bzhi pa ste/ don dam pa'i phyir bden pa la gnas pa'o/ / rten ji lta bu la bskur zhe na/ phyis ni gnas gsum byin brlabs te/ /zhes pa rang gi sku bskyed pa'i rjes su gnas gsum byin gyis brlabs pa'o/ /de nas yongs su bslang ba'i don gyi 'khor gyi sku bskyed pa bstan pa'i phyir/ de nas phyogs bcu'i lha mo yis/ / zhes bya ba la sogs pa smos te/ phyogs bcu'i lha ni sgeg mo la sogs pa ste/ de dag rnam pa'i tshul du byung nas bskul zhe'o/ /a la la ho zhes pa ni dga' ba'i mdangs can gyis so/ /gang la zhe na shu kra su ka ste/ byang chub sems bde ba'i ngang las so/ /bde ba chen po ni don dam pa'i sgo nas bod pa ste/bcom ldan gsang mchog thugs rje'i bdag nyid can/ /zhes bya ba dang 'brel lo/ /bos nas ci byed ce na/ 'bar ba'i skur bzhengs ni sku khro bor bzhengs shig pa'o/ /ci byed ce na 'gro ba'i don la spyod ces pa dkyil 'khor yongs su rgyas pa sems can gyi don mdzod cig pa'o//gang gi phyir zhe na/ ma rig rmongs pa yongs su bzung ba'i phyir te blun par 'gyur ba'i sgrib pa bsal ba'i phyir ro/ /ma hA gu h+ya zhes pa la sogs pa'i don yang de nyid do/ /de ltar bskul ba'i stobs kyis ldang ba'i tshul gyis ni/ 'od las yongs su sad gyur te//zhes pa ni 'od kyi gong bu las skur ldang ba ste/ rim pa'am cig car gyis so/ /rdo rje pad+ma byin brlabs nas/ /zhes pa ni rdo rje de hUM las rdo rje rtse lnga pa/ rtse mo nor bus mtshan pa dang / pad+ma'i nang b+h+rUM las gzhal yas khang du bsams te/ de'i dbus su a dmar po mtshal bcag pa lta bur bsam mo/ /lha mos bskul zhes pa ni sa dang nam mkha' la gnas pa'i lha mos 'khor gyi sku bskyed par bskul ba'o/ /dga' ba'i spyod pa ni/ 'chang ba dang 'khyud pa dang 'jib pa dang spyod pa la sogs pa'o/ /snyoms par zhugs pa ni/pad+mar rdo rje bstims te bskyod pa'i sgras sangs rgyas kyi sa bon bkug ste b+ha ga'i nang gi 'khor lo la bzhag pa las rim gyis sku rdzogs par 'gyur ba'o/ /grangs bstan pa sum cu lnga'am nyi shu lnga zhes pa sum cu lnga ni/ phyogs skyong dang bcas pa'o//lhag ma ni phyogs skyong gsal ba dang / dbus kyi 'khor lo la bzung ba'i phyir te/ go rims bzhin no/ /de las so so'i sngags kyis gdon/ /zhes pa ni/ yum gyi b+ha ga las phyir bton te/ gdug pa can btul nas slar 'dus te/ phyi'i 'khor lo la zhugs pa'o//oM sarba ta thA ga ta zhes pa la sogs pas ni gdon pa'i sngags bstan to/ /de nas lha so so'i mtshan nyid bstan pa/ phyogs dang ming dang kha dog dang mtshan ma dang / rgyan dang gnas dang las dang chas gos kyis shes par bya ste/ shar du sangs rgyas gos sngon can//zhes pas ni phyogs dang ming bstan te/ bde bar gshegs pa'i rigs yin pa'i phyir ro/ /zhal dang sku ni dkar la 'tsher/ /zhes pa ni kha dog gi khyad par bstan te/ dri za thams cad 'dul bar byed pa'i phyir ro/ /'khor lo dang ni dril bu bsnams/ / zhes pa ni g.yas dang g.yon na go rims bzhin no/ /sbrul dkar po dang gos sngon po'i sham thabs la sogs pa thams cad dang ldan pa ni rgyan gyi mtshan nyid do/ /gnas ni shar gyi pad+ma la brten pa nyid do/ /las ni dri za thams cad 'dul bar byed pa'i phyir ro/ /chas gos ni rgyan gyi phyogs gcig go//de bzhin du rin po che dang pad+ma dang las kyi gos sngon can la sogs pa thams cad kyang blta bar bya'o/ /de ltar bskyed pa'i rim pa'i lha'i 'khor lo bskyed nas dbang blang ba bstan par bya ste/ de'i phyir gnas gsum byin gyis brlabs pa'am zhes lha thams cad kyi gnas gsum byin gyis brlabs pa'o//yang na lha mos dbang bskur zhing / /zhes pa ni gong du bstan pa bzhin du dbang blang ba'o/ /de nas bdag la bstim pa'am/ /zhes pa ni gnyis su med par bstim pa'o/ /yang na gsum 'dus sbyor ba bya/ /zhes pa ni/gnas gsum byin gyis brlabs la dbang blangs te/ de'i rjes su bstims pas lha thams cad 'od dang gzi byin dang yan lag yongs su rgyas par 'gyur bar bsam mo/ /de yi rjes su bya ba yang / /dmigs dang gsal ba'i cho ga bya/ /zhes pa rang gi sku la yang dang yang du 'dris par bsgom par bya'o//gal te bsgom pas skyon sngags bzlas pa dang / tshogs bya ba dang gtor ma byas pa gang yin pa la 'jug par bya'o/ /dngos su na bskyed pa'i rim pa ni rig pa'i lha'i sku la dmigs pa'i ting nge 'dzin te/ sems can bskyed pa la sogs pa las gzhan du thun mong gi dngos grub dngos su thob par byed pa'i phyir ro//gzhan ni sngon du 'gro ba dang rten byed pa dang mtshungs par ldan pa dang 'brel pa'i phyir/ de skad ces bya'o/ /ting nge 'dzin yang 'dir slob pa'i dus te gzhan du na ni ha cang thams cad par 'gyur ro//sems can skye ba dang skye ba'i gnas dang yang mthun te/ nyi ma dang zla ba dang 'dus pa ni drod gsher las skyes pa nyid do/ /'od kyi gong bu las skyes pa ni sgo nga las skyes pa'o/ /dran pa tsam gyis skye ba ni rdzus te skye ba'o/ /mkha' gsang sbyor ba las byung ba ni mngal nas skye ba'o//rlung la sogs pa'i rim pa'i steng du skye ba ni sum cu rtsa gsum pa'i lha dang mthun pa'o/ /rlung steng du bskyed pa ni dga' ldan la sogs pa'i dbang du byas pa'o/ /rang dang mnyam du gnas pa ni bsam gtan bzhi pa'i dbang du byas pa'o//de lta bas na sems can dang mthun pa'i phyir te/ de'i phyir de dag de las 'jug par 'gyur ro/ /de ltar bskyed pa'i rim pa sbyor ba rgyas par bstan nas/ da ni sbyor ba bsdus pa bstan par bya ste/ de'ang gang zag gang gi dbang du byas she na/ gang zhig rgyas la ma dad pa'i//gang zag la ni sbyor 'di bstan/ /zhes pa ni gang zhig la bstan zhes pa ste/ lam du rgyas la ma dad pa ni rgyas pa dang shin tu bsdus pa la mi 'jug pa'i gang zag gi don du sbyor ba bsdus pa 'di bstan zhe'o/ /sngon du bla ma sangs rgyas la/ /phyag 'tshal zhes pa ni/bla ma dang sangs rgyas dus gcig tu spyan drangs te/ mchod pa dang bstod pa dang skyabs su 'gro ba ni mnyes pa'i yan lag yin pa'i phyir phyag 'tshal bar bsdu'o/ /sdig pa bshags pa ni sdom pa bzung bar bsdu ste/ nyes pa dang ltung ba sel ba'i yan lag yin pa'i phyir ro//bskul ba la sogs pa ni/ sems can gyi don gyi phyir sems bskyed par bsdu'o/ /stong pa nyid du bsgom pa ni ye shes kyi tshogs so/ /'di dag la grangs kyi sbyor ba bsdus pa'ang yod de lha bcu'i rnam pa can no/ /sbyor ba'i bye brag gi bsdu ba'ang yod de/bsod nams kyi tshogs de nyid lta bu'o/ /dus kyi sbyor ba bsdus pa'ang yod de gang gis de nyid yun thung ngur gnas pa'o/ /bsdus pa la bsdus pa ma yin pa'ang yod de 'byung ba lnga lta bu'o/ /thob pa'i sbyor ba bsdus pa'ang yod de/ bum pa la sogs pa ji lta ba nyid do//gzhan go sla/ bsdus pa bstan nas shin tu bsdus pa gang du byas she na/ shin tu bsdus pa'i don phyir ta/ /zhes pa ni gong ma bzhin no/ /bsod nams kyi tshogs ni/ dang por gzhan gyi don bya dang / /rang nyid 'bras thob bsam pa bskyed/ / ces pa ni sems can gyi don du rang byang chub chen por sems bskyed pa gang yin pa ste/ bsod nams kyi tshogs kyi yan lag la khyab pa dang 'bras bu tha dad pa med pa'i phyir te/ stong nyid ces bya ba 'dis ni ye shes kyi tshogs bstan to/ /cig car gyi gzhal yas gtso bo zhes pa ni 'byung ba lnga la sogs pa'ang cig car du bya'o//sbyor ba shin tu bsdus pa bshad zin to/ /de ltar sbyor ba'i bye brag bstan pa la sems bzung ngo zhes bstan pa'i phyir/ sems bzung ba'i dmigs pa'i bye brag bstan par bya ste/ de las sems bzung rim pa bstan pa ni//zhes pa sems bzung ba'i dmigs pa'i bye brag bstan pa'o/ /'di'ang sbyor ba'i bye brag gis gsum ste/ dang po'i dbang du byas nas dang por bla ma mchod la brten zhes pa la sogs pa ste/ de'i don yang dang por ni bla ma byin gyis brlabs pa gsal bar byed do//de nas ni bde gshegs mchod pa rten par byed do/ /dang po la'ang dang po ni rjes su dran pa'i rnal 'byor ro/ /de nas ni skad cig ma dang rgyun la sogs pa'i rnal 'byor ro/ /gnyis pa la'ang dang po ni rjes su dran pa'o zhes bya ba la sogs pa'o/ /de nas ni rlung gi dkyil 'khor la rten par byed do zhes bya ba la sogs pa dang /dang po'i dbang du byas nas gnyis pa la'ang skad cig ma la gcig rjes su dran pa dang / skad cig dang rgyun du zhes bya ba dang / gsum pa la'ang gnyis skad cig la gsum pa rjes su skad cig ma dang rgyun zhes bya ba la sogs pa ste/dmigs pa'i rang gi ngo bo'i dbang du byas pa dang dus kyi dbang du byas pas sbyor ba gsum gyi dmigs pa yongs su shes par 'gyur ro/ /da ni dmigs pa de la sems bzung ba'i rim pa bstan par bya ste/ de la/ dag pa'i dbang du 'dod pa yis/ /zhes bya ba la sogs pas ni mdor bstan pa ste/de nyid bshad pa/ nyon mongs dgra ni spang bar bya/ /zhes pa ni 'dod chags la sogs pa'i nyon mongs pa spangs pas de nyid la gsal bar 'gyur ba'o/ /dul nas 'dzin par 'dod pa yis/ /zhes bya ba la sogs pa'i don ni/ gnas bzhir te mgrin pa dang snying ga dang lte ba dang gsang ba'i gnas su me dang sa dang chu dang rlung zhes bya ba dmar po dang /ser po dang / dkar po dang / ljang gu rnams zur gsum dang gru bzhi dang zlum po dang zla gam gyi rnam par bkod de/ dbugs kyi stobs kyis 'og tu bstim pa ni rgod pa'i dus su'o//de las bzlog pa ni bzlog pa'i dus su'o/ /phyi dang nang du 'byung ba'ang de bzhin no/ /gong du bstan pa nyid rgyas par bshad pa/ khams gsum la sogs shes pa dang / /ral gri yang ni sbyor bar bya/ /zhes pa gang gis yul gyi rtog pa 'byung ba de'i tshe khams gsum thams cad gcig pa ma grub pas phyogs cha drug gi cig car sbyar na rdul phra rab tu 'gyur te/de ma yin na grib ma dang sgrib pa mi rung ba dang / gong bu thams cad rdul phra rab tu 'gyur ba nyid dang rim gyis 'gro ba med pa la sogs pa'i phyir ro/ /de ltar khams gsum rdzas dngos su ma grub pa bzhin du rang gi lus dang sha dang rus pa dang pags pa dang spri dang rgyu ma dang gnye ma la sogs pa'i ngo bo nyid kyis gcig dang rtag pa dang gtsang ba dang bde ba la sogs pa ma grub pa'o//mtshan ma'i stobs kyis sems gzung ba ni/ phyag gnyis gsal bar ma gyur na/ /zhes bya ba la sogs pas bstan te/ de'i bsod nams ni sku gsal bar ma gyur na mtshan dam pa dang rtag pa dang de las gzhan gyi mtshan mas de gsal bar 'gyur ba nyid do/ /grogs kyi rnam pas sems bzung ba ni/zas dang skom dang gnas dag gis/ /zhes bya ba la sogs pa nas tsha ba la sogs pas nyen pa la ni de dang 'gal ba'i zas dang skom dang gnas brten par bya'o/ /dus kyi bye brag ni go sla'o/ /de ltar sems bzung ba bshad nas/da ni bogs dbyung ba bshad par bya ste/ dang po dkar po ljang gu'i bar/ /re re dang ni lnga 'dus pa/ /zhes pa ni/ dang po'i mtha'i zas ni dkar por ro/ /ser po dang dmar po dang / ljang gu dang / lnga 'dus pa'i bar ro/ /de las ri rab til 'bru'i bar/ /zhes pa ni ri rab tsam du dang til 'bru rnam pa'i bar du ste/mthing ga dang dkar po la sogs pa'i rim pa bzhin no/ /stong gsum gang dang gcig 'dus pa/ /zhes pa lnga dang bcu dang dpag tu med pa'i bar du ste/ kha dog dang dbyibs kyi bye brag gis grangs bzhin no/ /de ltar sku'i bogs dbyung ba bshad nas rdo rje'i bogs dbyung ba de ltar thugs la bslab par bya ste/kha dog ces pa ni rdo rje'i kha dog lnga la rim bzhin no/ /dbyibs kyi bogs dbyung ba dbyibs dang zhes pa ni che ba dang chung ba'o/ /grangs kyi bogs dbyung ba grangs de bzhin no zhes pa ni kha dog dang dbyibs kyi dbang bskur dang rdo rje las rim bzhin mang ba dang nyung bar gzhag go//gzhan go sla'o/ /bogs dbyung ba'i sbyor ba'am gang gis thog mar mthing ga skad cig ma las dkar po rjes su dran pa dang / skad cig dang rgyun la sogs pa dang / ser po las che bar gyur pa rang gi rnam pa las skad cig dang rgyun la sogs pa dang /rim bzhin no/ /gang gis sku'i skad cig ma las skad cig dang rgyun la sogs pas rdo rje'i rnam pa la dmigs pa dang / yi ge'i bar la de dag gi rnam pas yongs su gsal bar gyur pas sku sna tshogs pa dang mtshan ma sna tshogs par gnas pas dang po'i cho ga yongs su rdzogs par 'gyur te/de ltar bogs dbyung ba bshad zin to/ /da ni sngags kyi ting nge 'dzin gyi dbang du byas te/ dang po gang zag gang gi dbang du byas she na/ bsgom la mi gzhol zhing gsang sngags gtso cher byed pa zhes pa gsang sngags la ched du byed pa dang /bsgom pa la ni mi mos pa dang / spyod pa gzhan la mi mos pa'o/ /de'i dbang du byed pa'i sngags rnam pa gnyis las dang po thun mong gi sngags gsal ba'i don la dmigs pa'i bzlas pa ni bdag dang gzhal yas 'khor bcas dmigs zhes pa ni sngags kyi bzlas pa dang ldan pas thun ji lta ba bzhin du de'i rnam pa la yang dang yongs su gtod pa'o//rjes su dran pa dang / skad cig dang / rgyud spyod pa'i don la dmigs pa las sdig pa dbyung ba ni/sdig pa'i lus las phyir 'byin pa'o/ /bsreg pa ni lus kyi nang du bsreg pa'o/ /bkru ba ni bdud rtsi'i chus so/ /gnas gang gi sa bon gyis de ltar byed ce na/ hUM dang raM dang hUM bskul te zhes pa lte pa'i hUM dang gsang ba'i raM dang / spyi bo'i haM mthing ga dang /dmar ser dang dkar po'i kha dog can dang rim bzhin no/ /'od zer gyi bye brag bstan pa la/ mgal me phreng ba nyi ma yis/ /zhes pa 'od zer 'ba' zhig pa dang / yi ge'i phreng ba dang bcas pa dang / yi ge'i 'od dang bcas pas so/ /ci byed ce na gang zhig byed//ces pa ni gong ma dang 'brel ba'o/ /'dir gsungs pa/ 'og nas steng gi sbyor gnyis kyis/ /dang po'i las gnyis byed pa ste/ /bzlog pas phyi ma'i sbyor ba byed/ /gsum gsum dgu yi bdag nyid can/ /zhes so/ /mtshan ma 'dod pa'i don la dmigs pa las yum bsgrub pa'i bzlas pa ni/gang tshe yum dang bzhi skor dang / /zhes pa'am/ mgal me la sogs pa'i rim gyis sna rtse bzhi la brgyud de bzlas te/ klu dbang 'khyil ba'i stobs can gyis/ /khro mos yum ni sgrub par byed/ /pad+ma ston dang sku ston dang //sbyor ba 'khyud pa'i mtshan ma 'byung / /zhe'o/ /ye shes kyi 'khor lo bsgrub pa ni/ mdun gyi dkyil 'khor nyis skor dang / /zhes pa ni/ mdun du sangs rgyas thams cad blos bzhag ste/ 'od zer ba thag gzings pa lta bu'am/ re re'i rnam pa can gyi dbang du byas te/mgal me la sogs pa dang rim bzhin no/ /'khor sgrub pa la sum skor te/ /zhes pa 'khor nus pa dang ldan par bya ba'i phyir ro/ /nges par ma grub na gtso bo dang 'khor gyi bzlas pa dang zhes pa ye shes kyi 'khor lo bkug ste/ gtso bo dang 'khor dus gcig pa dang re re'i bzlas par bya'o//gal te des ma grub na snying nang brtson 'dra'i bzlas pa dang zhes 'khor thams cad snying du bsdus te/ bzlas pa gong bzhin no/ /de ltar thun mong gi bzlas pa'i bsam gtan rdzogs nas khyad par gyi bzlas pa las dgug pa'i bzlas pa ni/kha nub phyogs su bltas te/ dga' ba yid la byas nas bya'o/ /de yang sngags 'od dkyil 'khor rnams la phyogs ces pa la sogs pa'i thog mar pad+ma gos sngon can gyi tshogs la mnyes par byas te/ thob pa dang ldang ba'i rim pas/ A kaR+Sha ya hUM/zhes pa'i mtha' dang bcas pas 'od zer mdun gyi lha la spros pas de'i 'od las lcags kyu can gyi tshogs spros te/ gdul bya'i snying gnas bzung nas 'ong bar bsams na rdo rje nyid kyang 'gugs par 'gyur na gzhan lta ci smos/ ral gri la sogs thog 'bebs dang //zhes pa la sogs pa'i don ni/ snga ma cho ga sngon du song nas lhor bltas te/ sngags bzlas pa'i 'od zer gyis ye shes 'khor lo las ral gri dang spu gri dang 'khor lo la sogs pa'i thog gis bkug pa'ang de nyid shi bar bsam pa dang / khro bo mtshon cha can gyi tshogs kyis gdul bya'i sha bcad cing dum bur byas par bsam pa'o//bstab pa ni de'i cho ga'i lhag ma me ste go sla/ khro tshogs 'khor lo thogs pa yis/ /zhes pa la sogs pa'i don te/ 'od zer las 'khor lo thogs pa dpag tu med pas gdul bya'i klad par 'khor lo thogs pas bskor zhing mgo 'khor bar bsam pas sbyar bar 'gyur ro//rnga mo can gyi khro tshogs kyis/ /zhes pa la sogs pa'i don ni/ rlung gi rnga mo la zhon pa'i khro bo'i tshogs byung nas gdul bya'i snying ga nas bzung nas rnga mo la bskyon nas khro bo gzhan gyis brdeg bzhin du rlung lha'i phyogs su song bar bsams na/nges par gzhan du bskrad par 'gyur ro/ /'od zer dkar po'i tshogs byung nas/ /zhes pa la sogs pa'i don ni gdug par gyur pa dgug par 'gyur ba/ sngon du song nas 'od dkar pos sdig pa dbyung ba la sogs pas zhi bar 'gyur te sbrul gyi bden pa bzhin no//gang zhig gis ni bcud rnams bsdus/ /zhes pa la sogs pa'i don ni/ rang bzhin yang rung 'od kha dog ser pos dgug bya'i gnas nas bcud bkug ste/ snying ga'i dbus su ni mngon par shes pa rgyas par 'gyur ro//klad pa'i dbus kyis ni tshe rgyas par 'gyur ro/ /lus khyab pas ni nam mkha' la 'gro bar 'gyur ro/ /rten gzhan las bkug pas ni tshe bcud rgyas par 'gyur ro/ /sngags 'od rdo rje la sogs pa zhes bya ba la sogs pa'i don ni/ gdul bya'i lus kyi nang rdo rje gdengs po bskyed pa sprul pa'i rdo rje gdengs pos bsdus te/bstim pa ste rengs par 'gyur ro/ /'od zer kha dog sna lnga las/ /zhes pa la sogs pa'i don ni/ 'od zer so so las mchod pa'i lha mo'i tshogs spros te/ mnyes par byed pa zhes bya ba'i don to/ /gang zhig las ni 'od byung bas//zhes bya ba la sogs pa'i don ni sngags bzlas pas snying ga'i sa bon gyis rang gi lus 'od du zhu ste/ de yang 'dus nas phra rab skra rtse'i tshad tsam du gyur pa ni dang po'o/ /de yang 'dus pa ni bla na med pa'o/ /gsang sngags skyon rnams rab spangs nas/ /zhes pa ni sgra che ba dang chung ba dang skyen pa dang bul ba dang /nyon mongs pa dang / g.yeng ba dang bar du gcod pa spangs pa'o/ /des cir 'gyur zhe na/ 'bras bu thob pa ste gong du bshad pa bzhin no/ /sngags zlos pa'i dus su dran pa dang shes bzhin dang ldan par bya'o/ /de ltar sngags kyi bsam gtan bshad nas/da ni tshogs kyi 'khor lo bshad pa'i phyir/ /gang gis tshogs rnams rdzogs byed cing / /zhes bya ba la sogs pa smos te/ 'jig rten rdzas rnams ma lus pa/ /kun tshogs zhes pa ni kha dog dang dri dang ro dang ldan pa'i rdzas thams cad do//rnal 'byor lha grangs te/ 'tsham pa dang ni mchod pa zhes pa ni lha'i rnal 'byor lha'i grangs dang mnyam pa de'i steng du 'tsham pa bzhi dang mchod pa bzhi'o/ /sngon 'gro sa chog la sogs rdzogs/ /zhes pa ni thog mar yid du 'ong ba'i gnas su phyin te/sa bslang ba dang brtag pa dang sbyang ba dang bzung ba dang bsrung ba dang / dkyil 'khor gyi lha sta gon gyi cho ga bya'o/ /de nas lha'i zhes pa la sogs pa go sla/ de nas gsang ba'i dkyil 'khor bri/ /zhes pa ni/ dang por thig legs par btab nas/ de nas tshon bkye ba dang /phyag rgya dgod par bya'o/ /de tshe rgyal po zhes pa la sogs pa ni/ sbyor ba rgyas pa'i bskyed pa bzhin du blta bar bya'o/ /rgyal po yis ni sems dpa' bskul/ /zhes pa ni/ rdo rje slob dpon gyis las kyi rnal 'byor la rta mgrin gyi brda bstan pa'o/ /des ci byed ce na/phyi rol 'khor la bsdus byas nas/ /zhes pa ni/ phyi'i rnal 'byor pa khrus byas nas nang du bkod pa'o/ /bdag gi 'jug pa ji bzhin du/ /'khor rnams dam pa'i don la 'jug /ces pa ni/ rang dang mthun par tshogs bsags pa nas rang gi snang ba'i 'khor lo bsgrub pa'i bar du'o//gang zhig gis ni rol mo dang / /ldan pas tshogs ni dbul bar bya/ /zhes pa ni/ gang gis dung dang pi wang dang gling bu la sogs pa dang ldan pas tshogs kyi rdzas dbul ba'o/ /skom dang mchod pa sngon song nas/ /zhes pa ni/ snang ba'i lha la bdud rtsi dbul ba dang /rang gi sems dpa' la khrus bya ba'o/ /tshogs kyi rdzas rnams byin gyis brlabs/ /zhes pa la sogs pa'i don ni/ dri'i chus nye bar gtor te rdzas 'od du zhu ba las/ yaM las rlung dang / raM las me dang / a las thod pa ste/ de'i nang du sha lnga bdud rtsi lnga/ / zhes pa ni/ na da ha go ku las mi dang glang po che dang rta dang ba lang dang khyi'i sha dang / bi ra shu ma mu las byang sems gnyis dang dri chen dri chu sha chen dngas ma lngar gyur pa las/ oM gyi 'od kyis rlung bskyod pa la sogs pa dang AHsa byang chub sems su gyur ba dang /hUM gis bdud rtsi dang rdo rje dbab pa'i ting nge 'dzin bya'o/ /des ci byed ce na/ bdag mchod dkyil 'khor mdun du mnyes/ /cho ga'i yan lag rdzogs par bya/ /zhes pa thog mar sems ye shes kyi 'khor lo mchod pas mnyes par bya ste/ bstod pa dang nyes pa bshags pa'i yan lag rdzogs nas rang gi snying du bsdus te/rlung dang me'i sbyor bas nang gi sbyin sreg rdzogs par bya'o/ /de nas mdun du bton te mchod pas mnyes par byas nas/ 'jig rten maN+Dal sngon po'i steng / /phyi rol du ni mchod par byas/ /zhes pa/ maN+Dal sngon po la phyogs skyong 'khor dang bcas pa bkug ste/byin gyis brlabs pa byas nas/ phyi rol du lhag ma sbyin par bya zhing las bcol bar bya'o/ /de ltar thun mong gi cho ga bshad nas/ khyad par cho ga bstan pa ni/ /zab pa sprul par brten pa dang / /bzhi dang gsum dang nges par sbyar//zhes pa/ shes rab ma dang snyoms par zhugs te/ de'i drod bskul bas sprul pa'i 'khor lo zhu ba dang / chos dang bde ba chen po'i bar du zhu bar bya'o/ /yang na zas byang chub sems kyi chu gtum mo'i gnas su bsreg par bya'o/ /de las rgyas nas bde ba chen po'i bar du'o//'o na zhi ba la sogs pa'i las gang gis shes par bya zhe na/ sngags kyi sbyor ba bzhin du bya ste/ de kho na ltar sbyar zhe'o/ /de ltar tshogs kyi 'khor lo bstan nas/ da ni tshogs kyi mchod pa bstan par bya ste/ de'i phyir/ bdag po rdzas rnams dman pa dang //zhes bya ba la sogs pa smos te/ rdzas ni lnga ste tha ma'i tshad do/ /bcu ni rab kyi tshad do/ /slob dpon gcig ni ting nge 'dzin gyi byed pa'o/ /gnyis ni sbyor ba gtsor byed pa'o/ /des cir 'gyur zhe na/ khyab 'jug bu mo'i sbyor ba'am/ /zhes pa ni/ spyad par dka' ba'i khyab 'jug gi bu mo rigs ldan yang sbyor na gzhan lta ci smos she'o/ /yan lag rgyas pa tshogs 'khor bzhin/ /zhes pa ni/ cho ga'i yan lag rgyas pa tshogs kyi 'khor lo bzhin te/ bsdus pa la sogs pa ci rigs su'o/ / dkyil 'khor gcig ni snang ba'i dkyil 'khor ro/ /gnyis ni rang dang bcas pas so/ /bar ni gsum pa ste/ don du gnyer ba khyad par du 'gyur ro/ /bzhi pa ni phyogs skyong la sogs pa'o/ /slob dpon nus pa'i bye brag gis/ /las gzhan rtsom na gong ma bzhin//zhes pa ni las rtsom par nus na sngags bzhin du'o/ /mi rtsom gyur na sdig pa sbyang / /zhes pa ni las sbyong ba bzhin du'o/ /'dir tshogs gang yin pa'i 'khor lo dang / /mchod pa yang de nyid dam 'khor lo dang mchod pa gang yin pa de yin nam zhe na/ tshogs yin la 'khor lo dang mchod pa ma yin pa yang yod de/gang gis yan lag spangs ba de nyid lta bu'o/ /tshogs kyi 'khor lo yin la mchod pa ma yin pa yod de de nyid do/ /mchod pa yin la 'khor lo ma yin pa yod de/ rdzas dang slob dpon gyis dman par byas pa de nyid do//de las gnyi ga ma bzlog pa yang yod de rgyud kyi bye brag lta bu'o/ /gzhan gyi ming gi phyogs gcig pa'ang yod de/ tshogs spangs pa'i ming can no/ /ci'i phyir tshogs kyi 'khor lo zhe na/ 'dis nyes pa thams cad gcod pa'i phyir ro/ /ci'i phyir tshogs kyi mchod pa zhes bya zhe na/'di la brten nas dam pa'i yul mnyes par byed pa'i phyir ro/ /yang na rgyun mi 'chad pa'i don gyis 'khor lo'o/ /de las bzlog pa'i don gyis mchod pa'o/ /yang na tshogs kyi 'khor lo chen po dang mthun par rmad du byung ba'i mchod pa la gnas pa'i phyir ro//tshogs kyi 'khor lo gzhan yang 'di lta ste/ kun du tshogs pa zhes bya ba'i tshogs kyi 'khor lo dang / kun du rol pa zhes bya ba'i tshogs kyi 'khor lo dang / kun du dag pa zhes bya ba'i tshogs kyi 'khor lo dang / kun du thob pa zhes bya ba'i tshogs kyi 'khor lo dang /kun du bde ba zhes bya ba'i tshogs kyi 'khor lo'o zhes 'byung ngo / /tshogs kyi rnam par gzhag pa bshad zin to/ /da ni sbyin sreg gi cho ga bshad par bya ste/ de'i phyir/ de nas dpal ldan rdo rje can/ /zhes bya ba la sogs pa smos te/ sngon bya gzhan ni gzhan du ste sa'i cho ga dang bsnyen pa'i cho ga la sogs pa ni gzhan las shes par bya'o zhes bya ba'i don to/ /thabs kyi las su bya ba bstan pas/ sa yi rigs bzhir thab khung bzhi/ /zhes pas kha dog dkar po dang ser po dang dmar po dang nag po la zhi ba dang rgyas pa dang dbang dang drag po'i thab khung bya'o//zlum po zhes bya ba la sogs pa ni thams cad kyang go rims su sbyar ro/ /thab khung byin gyis brlabs pa bstan pa/ raM las 'od 'phros pas de nyid/ /ces bya ba la sogs pa'i don ni/ raM gyi sa bon gyi 'od kyis thab mi dmigs pa las las dang rjes su mthun pa'i b+h+rUM du gyur/de las thab kyi gzhal yas khang kha dog dang dbyibs gong ma lta bu la gtos nam mkha'i mtha' dang mnyam par gyur par bsam mo/ /de nas rdzas byin gyis brlab pa/ mchod rdzas zhes bya ba la sogs pa smos te/mi dmigs snod nang swa yig las/ /so so'i de nyid rgyas pa la/ /zhes pa ni/ rdzas mi dmigs pa las trAM las rin po che'i kha dog snod du gyur/ de'i nang du swa las so so'i rdzas dpag tu med par gyur par bsam mo/ /ha hoHhrI yis skyon rnams bsal//zhes pa ni/ has kha dog gi nyes pa phrogs/ hoHdang hrIs dri dang ro'i nyes pa dag par byas nas ji skad smos pa'i kha dog la sogs par gyur par bsam mo/ /de nas me las su bya ba brtsam par bya ste/ de'ang las dang mthun pa'i thab khung du raM las me bskyed la me spar bar bya ste/zhi ba la ni zho can las byung ba'i me rlung g.yab kyis sbar bar bya'o/ /rgyas pa la ni kha dog ser po'i shing la'o/ /dbang la ni seng ldeng gi shing la rdo rjes sbar te/ drag po la dug dang tsher ma can gyi shing la'o/ /de ltar sbar nas mar gyi dgang blugs bdun dz+wa la raM zhes pa'i sngags kyis dbul lo//de nas me brtag par bya ste/ gal te mtshan ma ngan na las thams cad pa'i chus gtor bar bya'o/ /de nas me lha bskyed pa ni/ e las gru gsum zhes pa ni/ las dang mthun pa'i kha dog bzhi las gru gsum kha dog bzhir gyur par bsam mo//gru gsum gyi zur gsum la oM AHhUM ste/ de nyid gsum dbus na raM dang bcas pa'o/ /gdan gang gi steng du bsam zhe na/ pad steng zhes smos te 'di ltar zhi ba la ni chu'i dkyil 'khor ro/ /dbang la ni me'i dkyil 'khor ro//drag po la ni rlung gi dkyil 'khor te/ de'i steng du so so'i pad+ma kha dog bzhi'i bdag nyid can gyi steng du'o/ /de las me lhar gyur/ zhes pa ni/ de rnams 'od du zhu ba las so/ /kha dog bzhi yi bdag nyid la/ /zhes pa ni las so so'i dbang du'o//so so'i rigs kyis dbu brgyan bya/ /zhes pa ni/ rnam par snang mdzad dang rin chen 'byung ldan dang snang ba mtha' yas dang don yod grub pas so/ /lte bar gong ma'i sbyor ba ste/ /zhes pa ni gru gsum yi ge bzhi dang bcas pa bsam pa'o/ /snying gar phyogs skyong bcu dang ldan//zhes pa ni/ pad+ma 'dab ma bcu la phyogs skyong bcu rdzogs par ro/ /de las ye shes me lha dgug /ces pa ni ye shes kyi me lha spyan drangs te mdun du mchod pa dang bstod pas mnyes par byas te pa stim pa'o/ /byin brlabs dbang bskur ni gang du bshad do//gzi byin bskyed pa ni dgang blugs kyis so/ /de ltar me lha'i sku bskyed nas/ de nas me lha la go bskon te/ snying gar rdo rje rgya gram ha ljang gus mtshan pa/ de'i lte ba'i steng du rdo rje rtse lnga pa hUM gis mtshan pa'o/ /de'i lce la rdo rje rtse lnga pa raM gyis mtshan pa bsam mo//so so'i mchod pa dbul byas te/ /zhes pa ni spos la sogs pas mchod do/ /de nas sreg rdzas dbul ba'i rim pa ni/ gzar bu rdo rje la sogs pa'i/ /kha dog dbyibs ldan byin gyis brlabs/ /zhes pa gzar bu rin po che sna bzhi las grub pa thab kyi dbyibs dang mtshan ma dang mthun pa 'dzag pa la/raM gyis mtshan par bsam mo/ /shing gi 'od ni bskyed byas te/ /zhes pa ni yam shing phul bas me lha'i 'od bskyed par bsam mo/ /mar gyi 'od 'phro kun la sbyar/ zhes pa ni mar sreg blugs kyis 'od 'phros pas de'i rnam pa thams cad gyur pa'o/ /de ni las thams cad la sbyar ro/ /gzhan yang / dkar gsum dang ni mngar gsum gyis/ /spyi dang so so'i sdig pa 'byin/ /zhes pa ni/ dkar gsum phul bas me lha mnyes te/de'i 'od zer gyis lus ngag yid kyi sdig pa so sor 'byin par mi byed kyi spyir 'byin pa'o/ /lhag ma ni de las bzlog pa nyid de/ 'bras chan 'bru yi chan dag gis/ /gong gi gnyis pa so sor 'byin/ /zhes pa ni/ lus dang ngag gi so so'i nyid du'o//nas thug 'o ma'i thug pa yis/ /re re'i gnas su sreg par byed/ /ces pa ni/ lus kyi sdig pa dang ngag gis so so'i lte ba dang mgrin pa'i gnas su bsreg pa'o/ /til gyis snying gi nang nas 'byin/ /zhes pa ni/ yang til gyis sgo dgur 'jug ces pas ni/yid kyi sdig pa 'od nag po la sogs pa'i tshul du dbyung ba dang bsreg pa yang shes par bya'o/ /tha ma mar gyis 'khru bar byed/ /ces pas ni mar phul ba de'i snying stobs kyi ye shes kyi bdud rtsi'i rgyun byung ste/ des 'khru bar byed do/ /zhi ba'i sreg rdzas dbul ba bshad zin to//rdzas de ser por byas pa ni bsam gtan nam mtshan mas so/ /dkar gsum gyis ni gzi byin bskyed/ /ces pa ni/ 'od kha dog ser po phog pas rang gzi byin bskyed pa'o/ /mngar gsum 'byung khungs bsal ba ste//zhes pa ni/ sangs rgyas dang byang chub sems dpa' thugs dgongs pa'i tshul du bsal ba'o/ /'bras dang 'bru yi sbyor ba yis/ /ye shes bcud rnams spyi bor 'gugs/ /zhes pa ni rdzas des me lha mnyes te/ 'od kyis bskul bas sangs rgyas thams cad kyi bcud spyi bor zhugs te gzhag pa'o//nas dang 'o ma'i sbyor ba yis/ /'gro ba'i bcud rnams gnas su 'gugs/ /zhes pa ni 'gro ba'i bcud byang chub sems kyi ngo bor lus kyi gnas thams cad du 'gugs pa'o/ /tha mar tUr ba'i sbyor ba yis//mdzod spu snying ga'i hUM la sdud/ /ces pa ni/ dUr ba bsreg pa'i stobs kyis mdzod spu nas bcud byang chub sems su bsdus te/ snying ga'i hUM la 'dus nas/ de nas byung bas lus thams cad rgyas par bsam mo/ /gzhan go sla/ rgyas pa'i sreg rdzas dbul ba bshad zin to//ba lang sha yi gtor ma dang bcas pa zhes bya bas ni rdzas bstan to/ /gsum skor la sogs kyis zhes pas ni/ 'od zer gyi 'phro 'du bstan to/ /myur du 'gugs shing dbang du byed/ /ces pas ni/ 'od zer lcags kyu lta bu'am/lcags kyu thogs pa'i lhas 'gugs par byed do/ /dbang du byed pa ni 'od 'phros pa tsam gyis so/ /dbang gi sreg rdzas dbul ba bshad zin to/ /dang po sha yis khro ba ste/ /zhes pa ni sha phul bas me lha khros par gyur to/ /gzhan go sla/ de ltar sreg rdzas rnams phul nas bstod pa bya ba dang las bcol ba 'di ni me lha'i cho ga'i rim pa'o//snying gar bkod pa'i zhes bya ba la sogs pa'i don ni/ rang gi snying ga'i phyogs skyong dag par byas la/ /de nas bskyed pa'i rim pa sbyor ba gsum gang yang rung bas lha bskyed de/bstod pa'i bar rim pa bzhin du byas nas gshegs su gsol ba 'di ni lha'i cho ga'i rim pa'o/ /de nas mjug gi dbang du bya ba ni/ da ni zhar la byung ba bshad par bya ba ste/ bsrung ba zhi ba'i cha la gdags/ /zhes pa ni zhi ba'i bye brag yin pa'i phyir ro/ /gzhan la yang de bzhin du shes par bya'o//gang gi phyir sbyin sreg gi cho ga rnam pa gnyis kyi phyir rnal 'byor pa gnyis su shes par bya'o/ /de la sbyin sreg gnyis ni rang gi dang gzhan gyi don gyi phyir ro/ /rnal 'byor pa ni sbyin sreg gi las kyi rim pa la mkhas pa dang / slob dpon gyi tshad du phyin pa ste/ rkyen thub pa dang / sa non pa dang / byin rlabs che ba'o/ /rang gi don gyi yang gnyis te/ sdig pa sbyong ba dang dngos grub sgrub pa'o/ /dang po'i ni dang po nyid de gnyis pa ni/ bskyed pa'i rim pa la brten pa'o/ /de ltar dbye ba'i sgo nas rnal 'byor pa rab dang 'bring dang tha ma'i tshad bstan nas lung kha cig las gnas kyi rtog pa nyes par mi 'gyur bar bshad pa gang yin pa de yang rnal 'byor ba rab la dgongs par shes par bya ste/gzhan du na gzhan bshad pa'i phyir ro/ /de ltar sbyin sreg gi cho ga rgyas par bshad nas/da ni gtor ma'i cho ga bshad par bya ste/ sha khrag rus pa 'bru la sogs/ /zhes pa 'dis ni thun mong dang thun mong ma yin pa'i rdzas bstan to/ /ma spyad snod du blugs zhes pa ni/ rin po che'i snod ma spyad pa'am thod pa mtshan ldan gyis rgyas pa'i nang du'o/ /de nas byin gyis brlab pa ni gong du bshad pa bzhin no//dkyil 'khor bzhi yang snga ma bzhin no/ /gzhan go sla/ rang gi byang chub sems kyi chus/ /ji ltar snying ga'i lha mchod pa/ /zhes pa ni spyi bo nas chu byung bas snying ga'i lha rnams kyi zhal du gsol bar bsam mo/ /des cis 'gyur zhe na/'bras min 'bras bu can te/ bla na med pa'i dngos grub tshogs kyi gang zag gis ma myangs pa thob par 'gyur ro/ /'dis ni sngon du 'gro ba dang / rdzas dang / byin gyis brlab pa dang / dbul ba'i yul dang / dbul ba'i thabs dang / drag dang / bye brag dang / 'bras bu rim pa bzhin du bstan to/ /gang zag thams cad ni rnam pa gnyis te/ dman pa dang mchog tu gyur pa'o/ /de la dman par gyur pa'am de'i gnas su ni/ 'bru la sogs pa thun mong gi gtor ma sbyin par bya'o/ /mchog gam mchog gi gnas su ni thun mong ma yin pa'i gtor ma bya'o//yang gnyis te zla dang bcas pa'am zla med pa'o/ /de dag dang gnyis kyang go rims bzhin te gzhan du na nyes pa dang bcas par 'gyur ro/ /gzhan las kyang / dge slong la sogs dman pa yi/ /nang du zhag bdun gnas pa spangs//zab mo'i las su bya ba yang / /de yi gnas su spang bar bya/ /gal te byas na sems can de/ /'bras bu med cing ngan 'gror ltung / /gang yang dgon pa chen po dang / /gsang ba'i lam la gnas pa der/ /gsang ba chen po'i spyod pa 'di//spyad pa tsam gyis 'bras bu thob/ /ces 'byung ba dang / gzhan yang / gang gis thun mong thun mong min/ /rmad byung gtor ma'ang de bzhin te/ /'das nas ngan 'gror 'gro ba'i phyir/ /rnam gnyis thub pas gsungs pa la/ /rang gis smad pa'i rdzas gyur dang //'byung khungs dman las byung ba dang / /rigs dang nye bar ma spyad pa/ /de la dngos grub med par 'gyur/ /zhes 'byung ba lta bu'o/ /gtor ma'i cho ga bshad zin to/ /de nas spyod lam gyi ting nge 'dzin bshad par bya ste/ de la mkhas pa ni bskyed pa'i ting nge 'dzin brtan pa'o//des yul gzugs la blta ba'i dus su ji ltar lta zhe na/ sgyu ma mig yor lta bu ste/ /zhes pa snang la rang bzhin med par bsam pa'o/ /dngos po'i lta ba rab bzlog nas/ /zhes pa gzugs kyi lha mor sgom pa'o/ /dmigs sogs sems dpa'i 'khor lo can//zhes pa rdo rje gos sngon can bsam pa'o/ /der ni lha mo rtag tu dgyes/ /zhes pa gzugs kyi lha mo dang gnyis su med par gyur pa'o/ /yid ni tshim par byed pa'i mchog /ces pa byang chub sems dbang po'i lam nas snying gar phab pas bde bar gyur pa ste/bde ba gnyis so/ /'di lta ste tha mal pa'i dus su sa bon can gyi rnam par shes pa sa bon du gnas pa rkyen nye bar gnas pas bslangs nas yul dang phrad par 'gyur ro/ /de nas yul gyi rnam par skye'o/ /de nas rang dang mthun pa'i sa bon 'jog cing chos gzhan skyed par byed do//'dir chos 'di yang de bzhin du blta bar bya'o/ /gzhan go sla/ spyod lam gyi ting nge 'dzin bshad zin to/ /de nas nang gi sbyin sreg bshad par bya ste/ de'ang gang zhig ces bya ba la sogs pa ni dri rtsom par byed pa ste/ gang la byed/gang gis byed/ gang byed ce na lan du/ rnal 'byor mchog gi byed pa ste/ /zhes pa ni ting nge 'dzin dam pas byed pa ste/ gsum pa'i lan no/ /gang la zhes pa'i lan du/ snying ga zhes bya ba la sogs pa'i don to/ /snying gi nang du dam tshig sems dpa'i 'khor lo bkod la/ye shes kyi lha bkug ste bstim pa'o/ /lte ba'i zhes bya ba la sogs pa ni bshad zin to/ /lce yi 'khor lo chen po ni/ /byin za ru ni dmigs par bya/ /zhes pa ni/ me lha nyid du dmigs pa'i dus/ /de'i ming de skad ces bya'o/ / gang gi dus su zhe na/ zas la sogs pa za sogs dus/ /zhes pa go sla'o/ /ci'i rnam par gyur zhe na/ zas ni sha lnga zhes bya ba la sogs pa'o/ /thabs ji ltar zhe na/ lag pa gzar bu gnyis zhes pa dgang blugs gzar bu bsam pa'o/ /za ba'i dus su lha rnams la//zhes pa la sogs pa'i don to/ /zas sha dang bdud rtsi'i ngo bor gnas pa gzar bu la sogs pa'i rim gyis snying gar lha'i zhal du gsol bar bsam mo/ /gzhan sngags kyi sbyor ba dang 'dra bar blta ba'o/ /zas la sogs pa bdud rtsi zhes pa'i don ni gong du bstan pa nyid dbul ba'i tshul du zhe na gsungs te/lag pa yis ni dbul ba dang / /zhes pa ni 'dir bshad pa nyid do/ /yang na lha mos dbul ba dang / /zhes pa ni lha mos mchod pa'i tshul du dbul ba'o/ /rdo rje lce thung ni skom gyi ngo bor byas te/ rdo rje sbu gu nas 'dren par byed pas las thams cad rgyas par byed pa'i tshul te gsum mo//'dir yang 'jig rten gyi rdzas thams cad ni sme ba dang / dman pa dang / nyes pa dang bcas pa dang / lan re ba dang bcas pa ste/ dper na khro chu khol ma dang 'dra bar rdzas zos pa tsam gyis nyes par 'gyur ba sha stag ste/skyes bu shes rab dang ldan pa snying rje dang ldan pa/ ting nge 'dzin dang ldan pas/ rang lha'i skur gcig tu gnas nas/ sems can rnams la snying rje chen po'i sems nye bar bzhag ste/ byin gyis brlabs pa byas pas nyes pa thams cad zhi bar byas te/rnal 'byor dang ldan pas zos na bu lon du mi 'gyur zhing yon tan thams cad thob pa'i rten nyid du 'gyur ro/ /nang gi sbyin sreg bshad zin to/ /de nas 'phags pa'i mchod pa'i cho ga bshad par bya ste/de'i phyir/ gzhan yang sems can mos pa yis/ /zhes bya ba la sogs pa smos te/ spos dang me tog ces bya ba la sogs pas ni rdzas bstan to/ /thams cad la las kyi sbyor ba ni las thams cad pa'i chu'o/ /des gtor ba ni des gtor ba'o/ / byin gyis brlabs pa bstan pa yon chab bzhu ba ni yon chab 'od du zhu ba ste de las hrAM du gyur pa'o/ /rin chen 'bar ba'i snod mchog tu/ /zhes pa trAM las rin po che'i snod rgya chen por gyur pa'o/ /de'i nang du ma bskyed pa rang byung yi ge a gsal bar bya'o/ /de 'od du zhu ba las ni/yon chab dpag tu med cing bsam gyis mi khyab pa'o/ /thun mong ma yin par a yis/ /zhes bya ba la sogs pa smos te/ thun mong du ha yis zhes bya ba la sogs pa smos so/ /byin gyis brlab pa bshad zin to/ /de nas dbul ba'i yul bstan pa'i phyir/phyogs bcu'i sangs rgyas spyan drangs te/ /zhes pa la sogs pa smos so/ /a ha ri'i sngags bzlas pas zhes bya ba la sogs pas ni dbul ba'i thabs bstan te/ yon chab thogs pa'i lha mo'i tshogs/ /dpag med mdun du sprul byas te//zhes pa ni lha mo mdog dkar mo lag na rdo rje yon chab thogs pa sngags kyi 'od kyis rdzas la bskul bas spro ba ni lha mo bskyed pa'o/ /de yis rdo rje glu ldan pa/ /zhes pa ni/ lha mos rdo rje'i glu blang ba'o/ /yon chab ni rdzas te des phyag zhabs bkru zhes pa ni khrus gsol tshul lo//gzhan gyi mchod pa thams cad la yang bskyed pa'i sngags dang / 'byung ba'i rgyu dang / lha mo'i mdog go/ /mchod pa'i rdzas dang / de la blta ba dang / dbul ba'i gnas dang / dbul ba'i tshul dang / rjes su 'brel pa dang dngos grub bstan pa'o//badzra d+hU pe/ zhes bya ba la sogs pas ni sngags bstan to/ /rgyu ni sa bon dang rdzas so/ /dkar mo la sogs pa ni lha mo'i mdog go/ /spos la sogs pa ni rdzas so/ /lha mo la sems gtad pa ni lta ba'o/ /shangs la sogs pa ni dbul pa'i gnas so//rdzas phul nas lha mo bsdus pa dang / lha mo dang bcas te 'bul ba ni 'bul ba'i tshul du'o/ /'od zer gyis bdag gi nus pa bskyed pa ni rjes su 'brel pa'o/ /gzhan go sla/ /gnas lnga nang du dbul ba ni gzugs la sogs pa'o/ /gnas lnga phyir ru dbul ba ni spos la sogs pa'o//gnas gcig tu dbul ba ni nang dang gsang ba'o/ /dus dang rjes su mthun par bya/ /zhes pa ni/ gong du bshad pa nyid do/ /'di ni rang byung zhes pa la sogs pa go sla'o/ /bgad dang khro ba la sogs zhes pa ni/ bgad pa dang khro ba dang /gdugs dang / rgyal mtshan dang / ba dan dang / dung dang / dril bu dang / rnga rings dang / pa Ta ha dang / ldong rus la sogs pa'i gtor ma byin gyis brlab ste zhes pa gtor ma bzhin no/ /gzhan go sla/ gang zhig gzhan la ji bzhin du/ /zhes pa la sogs pa'i don ni rang gis rang gi 'khor la mchod pa dang /'khor gyis rang la mchod pa la sogs pa/ rang gi rnal 'byor pa so so'i dbang du'o/ /da ni mchod pa'i dbye ba bstan pa/ rdzas la brten nas mchod pa dang / /zhes pa ni gang gis dad pa'i stobs kyis rdzas yid du 'ong ba dbul ba'o//bsam gtan kho nas mchod pa ni bsam gtan 'ba' zhig gis mchod pa'o/ /gzhan go sla/ de bzhin gshegs pa mchod pa yang dngos su ni/ dang ba dang ting nge 'dzin te/ de bzhin gshegs pa la sogs pa'i yul dam pa mnyes pa dang /dngos grub stsol ba'i phyir ro/ /mchod pa yang gang gis mchod pa'o/ /yongs su sbyang ba byas pa'i mchod pa yang yod de/ de kho na nyid mthong ba rnams kyi'o/ /yongs su sbyang ba ma byas pa'i mchod pa yang yod de/ de las gzhan pa rnams kyi'o//rtsol ba dang bcas pa yang yod de/ gang gis rdzas la sogs pa'i dngos po tshang bar dbul ba'o/ /rtsol ba med pa yang yod de/ sems bskyed pa lta bu'o/ /bla na med pa'i mchod pa yang yod de/ gang gis mtshan ma spyod pa rnams kyi'o//mtshan ma med pa'i mchod pa yang yod de/ gang gis mtshan ma med pa'o/ /'ching ba dang ldan pa yang yod de/ nyon mongs pa dang 'brel pa rnams kyi'o/ /'ching ba med pa yang yod de/ gang gis zhen pa med par gyur pa'o/ /thun mong gi mchod pa yang yod de/ spos la sogs pa dang gzugs la sogs pa'i 'o/ /thun mong ma yin pa yang yod de nang dang gsang bar gyur pa'i mchod pa'o/ /bstan du yod pa yang yod de/ ji skad bstan pa'i ting nge 'dzin ma gtogs pa'o/ /bstan du med pa'i mchod pa'ang yod de/ ting nge 'dzin gyi mchod pa nyid do//'di'i mchod pas kyang yid du 'ong ba'i rdzas phun sum tshogs pa dang phun sum tshogs pa la sogs te/ bsod nams dam pa 'thob par 'gyur ro/ /mchod pa'i tshogs bshad zin to/ /da ni bdud brtag pa'i sbyor ba bshad par bya ste/ dang po bdud 'byung ba'i dus ni/sngags dang bsam gtan dus dag tu/ /zhes pa ste/ sgrub pa'i skabs yin pa'i phyir gzhan du ni nyan pa dang bsam pa las 'byung bar 'gyur ro/ /bdud kyang du zhig ce na/ phyi dang nang na yod pa'o/ /zhes pa ji skad bshad pa dang de las gzhan pa'i bdud thams cad ni gnyis po 'di kho nar 'dus pa'i phyir ro//gang yin zhe na/ phyi dang nang na yod pa'o/ /zhes pa'i don to/ /phyi'i bye brag tu bstan pa/ gzugs ni dkar dmar la sogs pa/ /zhes pas ni/ 'od ser po dang ljang gu dang mthing ga yang bzung ngo / /gal te yang dag pa'i rtags dang bye brag med do zhe na/gsal ba'i 'od ni sangs rgyas te/ /zhes pa dngos po la gsal bar gyur pa ni sangs rgyas kyi 'od de/ de las bzlog pa ni bzlog pa'o zhe'o/ /'di yang dngos po la yin te/ shes rab kyi pha rol tu phyin pa las lha rnams kyi 'od mog mog por gyur pa la sogs pa brjod pa bzhin no//sgra'i bdud bye brag tu bstan pa ni/ rang bzhin med dris dman pa dang / /zhes pa ni/ de kho na nyid ji lta ba bzhin du ston par mi nus pa'o/ /spyod pa ni mtshan ma las spyod pa ste de'i rigs ma yin pa la de gtsor ston pa ni bdud du shes par bya'o//gzugs kyi bdud bye brag tu bstan pa/ mang ba'i rigs la nyung ba ston/ /zhes pa ni/ gang zhig mang ba la 'phrod par 'gyur ba de la sku nyung bar ston cing nyung ba gces su byed pa dang / de las bzlog pa yang de bzhin du shes par bya'o/ / gzhan go sla/ nang gi bdud kyi sbyor ba ni gnyis te zhes khong nas dbyung ngo / /gang yin zhe na/ 'du ba skye dang bsam pa sgyur/ /zhes pa chos 'di gnyis kyi ting nge 'dzin las g.yengs te/ dngos grub kyi bar du gcod pa nyid do/ /dang po bshad pa/ rlung mkhris bad kan 'dus pa rnams//med bzhin skyed pa'ang bdud yin no/ /zhes pa sngags dang bsam gtan gyi dus su mi mthun pa'i rkyen ma tshogs par rlung la sogs pas ting nge 'dzin 'khrug pa la yang ngo / /phyi ma bshad pa dam pa ni sangs rgyas dang chos dang dge 'dun te/ de la sun dbyung ba ni mi mthun par 'dzin pa'o//rtag tu bsam la mi mos dang / /zhes pa ni/ bsam gtan la nyes pa'am blang ba ma yin par blta'o/ /tha mal pa ni dman par gyur pa'i gzugs la sogs pa ste/ de la chags pa ni zhen pa'o/ /khro ba ni yid 'khrug pa'o/ /khon du 'dzin pa ni mdud par 'dzin pa'o//'chab pa ni nyes pa byung ba khas mi len pa'o/ /tshig pa ni tshig brlang por zher 'debs pa nyid do/ /nyon mongs pa ni 'dod chags dang / khong khro ba dang / nga rgyal dang / ma rig pa dang / lta ba dang / the tshom mo/ /nye ba'i nyon mongs pa ni chags pa la sogs pa ste/rang gi rgyud la gnas pa ni ma gtogs so/ /mig rtsa rgod pa ni mig gyen du yang dang yang du blta ba'o/ /'phyar ba ni sems bsrab pa'o/ /g.yem pa ni 'gro ba bzang mo spyod pa'o/ /zhum pa ni grub par mi 'dzin pa'o/ /g.yeng ba ni sems yul sna tshogs su 'phro ba ste/snga ma bzhin du gnas pa'o/ /bsam gtan 'phro la dmigs pa gsal ba ni glo bur du bying ba'o/ /nyams mi dga' ba ni sems reg par mi gnas pa'o/ /log pa la dang ba ni mu stegs dang sngags rgod dang bud med sbyor sngags la dad pa'o//zas dang skom la snga rol pas shas cher 'dod par gyur pa ni zas la rtog pa dang rtog pa ma yin pa las 'das nas myur du 'dod pa'o/ /kun rdzob la dga' ba ni kun rdzob kyi spyod pa chen po cher byed pa ste/ don dam pa'i skabs su bdud du 'gyur ro/ /khyad par phyag rgyar rang gi rigs de la nyon mongs pa skye ba ni rang gi ye shes bskyed pa'i phyag rgya mo la zhe sdang chags pa dang gti mug skyes pa ste shes rab ye shes kyi dbang thob na nyes pa cher 'gyur ro//log pa'i zhes pa la sogs pa ni go sla/ 'di dag kyang bdud kyis lus sems byin gyis brlabs te/de nas der 'gyur gyis gzhan du ni ma yin no/ /bdud rnams kyi rgyu yang chos la ma mos pa la sogs pa dang / nyon mongs pa dang / nye ba'i nyon mongs pa'i stobs kyis bla ma la sogs pa'i dam tshig nyams pa dang / blang nyes kyi chos dang ma brtags pa'i rdzas las 'byung gi gzhan las ni ma yin no//gal te gzhan las kyang 'byung ngo zhe na/ dus thams cad du de dang bde ba ma yin pa rang bzhin bye brag tu gyur pa med pa'i phyir/ ye med par 'gyur ba zhig na de ni med do zhes 'chad par byed do/ /de ltar bdud kyi slu ba brtag pa bshad zin to//da ni yang dag pa'i rtags bshad par bya ste/ bdud kyi rtags rnams las gzhan pa'i/ /yang dag rtags ni bshad bya ste/ /zhes pa gang du rtags su gyur cing log pa'i rtags ma yin pa de ni yang dag pa'i rtags su gyur pa'o/ /de'ang dang por rmi lam gyi mtshan ma brtag pa bshad par bya ste/de la yang dag don gyi bla ma ni de kho na nyid dang sdom pa phun sum tshogs pa ste/ rang gis de'i mdun du sems bskyed pa dang / des dbang bskur ba dang / chos 'chad pa dang / nyes pa las skyob par byed pa'ang yang dag pa'i mtshan ma'o//dam tshig rnams ni mi brjed cing / /zhes pa ni rmi lam du yang dam tshig rjes su dran pa'o/ /rang gi rigs kyi bu mo bsten/ /zhes pa ni/ rang dang 'phrod pa'i phyag rgya ma dang mthun par gnas pa'o/ /gzhan go sla/ gzhan gyis mchod pa ni rang la'o/ / gzhan la mchod pa ni rang gis so/ /'di dag ni thun mong gi rtags so/ /stong gsum thams cad mthong ba ni/ /bden pa mthong ba'i ltas so/ /nyi zla'i steng na 'dug pa ni sa thob pa'i rtags so/ /'khor lo klad la bskor ba ni/ /yang dag pa'i gdams ngag gis gzhan grol bar byed pa'i rtags so//mchod rten rtse la 'dzeg pa ni gang yang rung ba'i sa rim pa nas 'phro ba'i rtags so/ /gzhan ni 'phags pa gos sngon po'i sku gsung thugs kyi dngos grub thob pa dang / sgrib pa thams cad spong bar 'gyur ba'i rtags so/ /gal te de'i mtshan ma yang gang gi dus su nges she na/bsam gtan gyi dus yin pa'o/ /gal te de'i dus ma yin pa la yang 'byung ba ni zhen pa'i dbang gis yang dag 'gyur ro/ /de yang ma chags pa'i sems dang 'brel na yin gyi mtshan mar 'dzin pa'i sems la ni/ de la mi srid pa'i phyir ro//de yang yang dang yang bstan na yin gyi res 'ga' ni gong ma'i khyad par gyis kyang 'gyur ro/ /de ltar rmi lam gyi mtshan ma bstan nas/ da ni sems nyams bstan pa'i phyir/ /gzhan yang sems nyams brtag pa ni/ /zhes bya ba la sogs pa smos te/dbang blang mos zhes pa ni yang dag pa'i bla ma la dbang len pa la dga' ba ste/ grags pa'i dbang du ni ma yin no/ /sdom pa bsrung ba la mos pa ni sdom pa la gces su byed pa'o/ /sems can dman la tshad med 'byung / /zhes pa ni/ sdug bsngal dang ldan pa'i sems can dran nas pa spu ldang ba tsam du sdug bsngal nyams su myong ba'o//yang dag don la 'dod pa bskyed/ /ces pa ni/ mchog gi dngos grub ste spangs pa dang ye shes phun sum tshogs pa la 'dun pa'o/ /sems can bdag dang 'dra bar sems/ / zhes pa ni rang dang tha dad du mi rtog pa'o/ /nga rgyal la sogs nyon mongs chung / /zhes pa ni snga ma las shes chung du gyur pa'o/ /zab pa'i don la chog mi shes/ /zhes pa ni chog par mi 'dzin pa'o/ /gzhan ni sbyin pa'i bye brag go/ /ldang ba yang ba nyid zo mdog bde ba ste/lus shin tu sbyangs pa nyid do/ /rang gi lta dang mthun pa la/ /'jig rten rin chen tshogs bkang 'bul/ /zhes pa ni/ de lta bur nus pa snyam sems pa'am 'dun pa'o/ /som nyi med pa nyid yid ches pa ste/ 'di dag kyang snod du rung ba dang / rigs su nges pa dang / mthong ba'i lam 'thob pa dang /sbyin pa phun sum tshogs pa dang / shin tu sbyangs pa rnyed pa dang / yang dag par chos len par 'gyur ba la mkhas pa'i rtags so/ /'di dag kyang rkyen gzhan gyis ma skyes par bsam gtan gyi ngang las snga ma las gzhan du gyur par 'byung ba'o/ /de ltar sems nyams kyi rtags bstan nas//da ni mngon sum pa'i rtags bstan pa'i phyir/ dngos po rdzas kyi khyad par las/ /zhes pa la sogs pa smos te/ bris sku lugs ma la zhes pa ni/ rtags brtag pa'i gzhi'o/ /de'i rtags gang zhe na/ sangs rgyas skur snang rab yin te//zhes pa ni mngon sum du sangs rgyas nyid snang ba'o/ /dam pa'i sgra 'bring bshad ces pa ni/ yang dag pa'i don gyi sgra tsam 'byung ba ni 'bring nyid do/ /'od dang du ba la sogs pa/ /zhes pa ni g.yo ba dang 'gul ba dang 'khrol ba dag kyang ngo / /byin brlabs 'bras bu rab yin te//zhes pa ni/ gsal la mdzes par gyur pa'o/ /gzhan go sla/ me dbus sangs rgyas ni me'i dbus na dbang po las byung ba'i shes pa'i mngon sum lta bu'o/ /sgra 'byung ba ni sangs rgyas kyi chos dam pa'i sgrar 'byung ba'o/ /me bdag gi dbang du 'gyur ba ni rang 'dod par 'byung ba'o//las dang mthun pas ni de nyid bshad do/ /gzhan go sla/ slob mas thams cad shes pa ni/ gzhan gyi sems shes pa la sogs pa ste dbang gsum pa'i dus su'o/ /smra ba ni gtan la dbab par bya ba thams cad ji lta ba bzhin smra ba ste/ gnyis pa'i dus su'o/ /'gul ba dang 'phar ba ni dang po'i dus su'o/ /dkar dmar la sogs zhes pa ni gang gis ser po dang ljang gu la yang ste/ gsal ba dang mi gsal ba yang sangs rgyas kyi rtags yin no/ /gang gi sgo na sbyin zhe na/ sgyu ma tsam du bsgom pa la sogs pas so//sku gsung thugs kyi mtshan ma ni/ /sku ni rdo rje dang rgya gram rnams so/ /gang gi stobs kyis gzhan gyur zhes pa ni sgyu ma tsam la sogs pa'i sgo nas gsal ba dang brtan par 'gyur ba'o/ /gsung gi mtshan ma bye brag tu bstan pa/ gang zhig sgra ni/stong pa las byung ba'o/ /de nyid bye brag tu bstan pa ni/ rang dang 'phrod pa'i man ngag ston/ /zhes bya ba la sogs pa'o/ /sku'i rtags bye brag tu bstan pa ni/ mdzes pa'i lha mos bde ster dang / /zhes pa la sogs pa'o/ /byang chub sems kyi chu 'bab dang //zhes pa la sogs pa ni thugs kyi rtags bye brag tu bstan pa'o/ /gzhan go sla/ nus pa la brtag pa ni/ yi dags dbang du sdud nus dang / /zhes pa'o/ /de nyid bshad pa yi dags zil gyis mnan pa ni dbang du sdud pa nyid do/ /gnad 'gyur smra ba med pa ni 'og mas bshad do//dam chos sngon du brdar ma btags/ /zhes pa ni sngar shes par ma byas pa ste shes par 'gyur ba la sogs pa'ang yang dag pa'i rtags su bshad do/ /'di la kha cig 'di skad ces yang dag pa'i rtags ni 'bras bu dang bcas pa'am/log pa'i rtags ni yang dag pa'i 'bras bu med pa zhig gam zhe na/ mu bzhi ste/ yang dag pa'i rtags yin la 'bras bu dang bcas pa yang yod de/ gang gis yang dag pa'i rtags thob nas nga rgyal dang som nyi la sogs pa spangs pa rnams kyis so/ / yang dag pa'i rtags thob la 'bras bu med pa yang yod de yang dag pa'i rtags thob nas nga rgyal dang som nyi la sogs pa dang ldan pa rnams kyi'o/ /log pa'i rtags thob la 'bras bu bcas pa yang yod de/ gang gis log pa'i rtags thob nas 'di ni sgyu ma lta bu'o//chos thams cad ni ye nas don dam par gang yang ma grub pa'o zhes bya bar nges pa de'i rjes su thob pa rnams kyi'o/ /log pa'i rtags kyang thob la 'bras bu med pa'ang yod de/ dga' ba dang skrag pa'i sems dang ldan pa rnams kyi'o//de bas na yang dag pa'i rtags dang log pa'i rtags kyis 'bras bu nges par 'byin pa dang mi 'byin pa zhes bya bar ni ma grub bo/ /yang gal te yang dag pa'i rtags ni dngos su yod pa zhig la log pa'i rtags ni med pa zhig gam/ gal te de las bzlog pa zhig gam zhe na ma yin te/gang gis gnyi ga la'ang 'khrul pa tsam du shes na ni yang dag par 'gyur gyi/ sngon yang gang gis gnyi ga'i yan lag la yod pa dang med pa bzhag go/ /de ltar yang dag pa'i rtags bstan zin nas/ da ni log pa'i rtags dang bzlog par bya ba'i phyir/yang dag rtags rnams thob bya dang / /zhes bya ba la sogs pa smos te/ dga' ba dang ni mi dga'i sems/ /gnyis dang bral ba bsam pas bzlog /ces pa ni gang du sangs rgyas la sogs pa'i skur snang na dga' ba'am mi dga' ba'i sems brtan por gnas pa ni bsam pa las bzlog pa ste/'dis nye bar zhi bar gyur pa'i phyir ro/ /sems kyi 'khrul par blta ba dang / /sgyu ma rang bzhin med pa ni/ /zhes pa bshad zin to/ /gang du dri chen sha chen dang //byang chub sems la spyod byed pa/ /zhes pa ni/ brtul zhugs kyi spyod pas bdud rtsi lnga la spyod pas bzlog par 'gyur ba'i phyir ro/ /gang gis dam tshig rtag tu srung / /de la bdud kyi sbyor ba med/ /ces pa ni/ gang gis sdom pa phun sum tshogs par gyur na bdud thams cad nye bar zhi bar 'gyur ro//yi dam lha la lus 'bul zhing / /dam tshig nyams pa bshags pa dang / /phyis ni sdom pa 'dzin byed pa/ /zhes pa ni/ gang gi tshe rang gi yi dam gyi lha la lus phul ba la sogs pas de'i gnod pa zhi bar 'gyur ro//de la drag po'i sbyor sngags dang / /mi 'da' gsang ba'i sngags zlos zhes pa ni/ dam tshig gi sngags dang / drag po chen po khro bo'i sngags kyis bzlog pa'o/ /bdag las byung ba'i zhes pa rang las khro bo gdug pa'i mtshon cha thogs pa dpag tu med pas lus dum bur gtubs pa dang /bdag gis bskul bas phyogs bcu'i sangs rgyas thams cad bskul te/ da las 'od mtshon char spros pas zhi bar 'gyur ro/ /yungs kar dang ni zhes bya ba la sogs pa ni go sla'o//yang na bdag nyid khro bo yi/ /mdun gyi snying du sems dpa' bskyed/ /zhes bya ba la sogs pa'i don ni gang gis thog ma nyid du sems dpa' snying ga nas phyung ste/ de'i snying du bcug nas nges pa'i mtshan ma ston cig ces las bcol te/ khro bo las me 'bar bas zhi bar 'gyur ro//gang zhig de'i mgrin par AHdmar po bzhag la ye shes kyi AHdmar po bkug ste/ de nas de'i glang ba'i nang du khro bo khams gsum rnam par rgyal ba 'khor lo thogs pas bskor te/ smos cig ces brjod pas 'byung po gang yin pa smra bar 'gyur ro//thod pa gsum ni thod pa rlon pa dang / skam po dang dum bur gyur pa'i phyag rgyas bzlog pa'o/ /gzhan go sla/ 'di dag gi don yang rin chen gos sngon can gyi rnal 'byor gyis thod pa gsum gyi'o/ /snang ba mtha' yas kyi rnal 'byor gyis dam tshig gi phyag rgya'o/ / rdo rje gos sngon po'i rnal 'byor gyis ni rdo rje sdigs mdzub bo/ /las kyi gos sngon can gyi rnal 'byor gyis ni rgya gram mo/ /bde gshegs gos sngon po can gyi rnal 'byor gyis ni 'khor lo'i phyag rgya'o/ /bkra shis 'khor lo'i sbyor ba yis/ /zhes pa ni gnyen po'i ting nge 'dzin gyis so/ /ji ltar zhe na/chags par gyur na rul myags dang / /dum bu lang ling rnam par bsam/ /zhes bya ba ni/ 'dod chags skyes na rul myags la sogs pa dang / mi gtsang ba'i rdzas nyi shu la sogs pa dang ldan par 'gyur ro/ /khro bar gyur na byams la sogs/ /zhes pa ni snying rje dang byams pa dang dga' ba bsgom pa'o//gti mug la sogs chos rnams dbye/ /zhes pa ni dge ba dang mi dge ba la sogs pas dbye'o/ /gzhan go sla'o/ /gal te brda dang phyag rgya la sogs pa'i sbyor ba ston gyur na zhes pa ni/ brda dang phyag rgya dang gar dang glu la sogs pa ston pa'o/ / snying nang zhes pa la sogs pa go sla'o/ /des gsal bar gyur na/ de la lan dang bcas par bya/ /zhes pa'i don to/ /ji lta bur ston ce na/ thabs kyis ston na shes rab ste/ /zhes pa ni/ g.yas kyis ston na g.yon gyis sbyin/ /zhes bya ba la sogs pa'o/ /shes rab ma yi spyod pa rdzogs/ / zhes pa ni shes rab ma'i pad+ma la smra ba rol pa dang / 'phyang ba dang / 'khyud pa dang / 'jibs pa la sogs pas zhi bar 'gyur ro/ /gnyis 'dus zhes bya ba la sogs pa ni go sla'o/ /de ltar na bdud bzlog pa yang gang zhig sngags zlos pa'i dus kyi bdud la drag po'i sngags dang phyag rgya la sogs pas bzlog par bya'o//bskyed pa'i rim pa la gnas pa'i bdud la ni/ gang gi mtshan ma'i ting nge 'dzin ji skad smos pas zhi bar bya'o/ /rdzogs pa'i rim pa'i ting nge 'dzin la gnas pas ni stong pa nyid la sogs pas zhi bar bya'o/ /yang na sngags zlos pa ni bskyed pa'i ting nge 'dzin la sogs pa'o//bskyed pa'i ting nge 'dzin la sgyu ma lta bus so/ /gang gi tshe rdzogs pa'i ting nge 'dzin la bskyed pa'i ting nge 'dzin gyis shes na ni nyes pa dang bcas shing 'gal ba dang bcas par 'gyur ro/ /bdud bzlog pa'i cho ga bshad zin to/ /de ltar spyod pa'i rim pa bstan zin to/ / da ni thun mong gi dngos grub bstan par bya ste/ de la dang po 'byung po tshar gcad pa'i cho ga bstan pa'i phyir/ gang zhig bdag dang gzhan rnams la/ /zhes bya ba la sogs pa smos te/ de las gzhi yid 'ong zhes pa ni bshad zin to/ /sngon du 'gro ba rdzogs pa dang / /zhes pa ni/ sa'i cho ga la sogs pa rdzogs pa'o//gang ltar 'dod pa'i sku bskyed de/ /zhes pa ni dbang thob par byas pa las byung ba'i sku g.yon na phyogs skyong gi rgyal po gang yang rung ba thogs pa bskyed pa'o/ /zhi ba la sogs so so yi/ /bzlas dang bsdu ba rdzogs gyur nas/ /zhes pa ni/ rang dang ba'i sku mdun du bltas te/de la mchod pa dang bstod pa byas nas gang yin pa'i ming dang las kyi sngags spel te/ grangs brgya'am stong du rdzogs pa dang / 'khor lo rang la bsdus te/ zhi bar gyur pa'i tshogs dag dang / /gtor mas kyang ni bzlog par bya/ /zhes pa thog ma nyid du zhi ba'i tshogs dang gtor mas bzlog pa'o//de yis 'dul bar ma gyur na/ /zhes pa ni des ma zhi na stang stabs kyis gdul zhe'o/ /de nyid bshad pa/ rkang pa ral gri g.yas pa la/ /zhes pa ni rkang pa g.yas pa ral gri rab tu 'bar ba sbrul dang chu srin la sogs pas mdzes par byas pa bsam mo//g.yon pa lcags kyu'i sbyor ba zhes pa rkang pa g.yon pa lcags kyu rab tu 'bar ba 'od sna tshogs dang ldan par bsam mo/ /des ci bya zhe na/ mi g.yo g.yas g.yon stang stabs bya/ /zhes pa mi 'gyur ba tha mal pa'i 'gros kyi tshul la cung zad bteg nas dgug pa dang gdab pa'i tshul bya'o//sngags 'og nas ston to/ /las gzhan bstan pa/ nad pa'am ni gzugs dag la/ /dmigs pa len par dbab bya ste/ /zhes pa ni 'byung po nad pa'am gzugs la bsdu'o zhes pa'i don to/ /rkang pa g.yas pa ri rab ni/ /rgya gram 'bar bas mtshan pa'o//zhes pa rkang pa g.yas kyi 'og tu rdo rje rgya gram 'od kha dog lnga dang ldan pa 'od zer phyogs bcur 'phros pa de'i dbus su laM las sa gzhi ri rab la sogs pa dang ldan par bsam mo/ /rgyal chen phyogs skyong gong ma ste/ /zhes pa ni/ ri rab la bsam ba'o//khro bo bzhi ni 'og ma la/ /zhes pa ni/ bde gshegs gos sngon can la sogs pa gru bzhi la bsam pa'o/ /bus mo chu srin rgyal mtshan te/ /zhes pa ni bus mo chu srin gyi kha nas byung ba'o/ /gnas lngar khro bo lnga po bskyed/ /ces pa ni spyi bo la sogs par bde gshegs gos sngon can la sogs pa bsam mo//g.yon pa lcags kyu'am rdo rje/ /zhes pa ni rkang pa g.yon pa la lcags kyu'am rdo rje bsgom pa'o/ /dgug pa la sogs sbyor byas nas/ /zhes pa ni dgug pa dang bcing pa bya'o/ /snying gar mnan pa ni khros pa'i shugs kyis 'byung po gzir ba'i sngags bzlas shing rkang pa g.yas pas snying gar mnan no//gzhan go sla'o/ /las gzhan gyi sbyor ba bstan pa/ yang na snying nang me dpung bskyed/ /'bar ba dang ni sreg pas 'grub/ /ces pa ni 'byung po'i snying du khro bo me ltar 'bar ba bsams la de'i 'od kyis 'byung po tshig bar bsam mo//gong ma'am ni zhes pa bshad ma thag pa'i rim pas so/ /khro bo bcus 'grub ces pa ni khro bo me ltar 'bar ba'i rtog pa las 'byung ba nyid do/ /de ltar 'byung po thams cad gdul ba bstan nas/ khyad par klu yi sbyor ba yang //zhes pa la sogs pas klu gzir ba la sogs pa bshad par bya ste/ de la gzir ba mkha' lding lnga po ste/ /zhes pa ni bshad pa/ lnga la lnga ni legs gnas te/ /zhes pa ni g.yas pa la rdo rje rtse lnga pa gdengs pa la bya khyung lnga pa bsam pa'o/ /g.yon pa la ni lcags kyu lnga bsam mo//pus mo dpung pa rnam bzhi la/ /thogs med 'khor lo bzhi bsams te/ /zhes pa byu khyung bzhi bsam pa'o/ /rdo rjes bsregs shing lcags kyus 'dzin/ /zhes pa/ rdo rje las 'od byung bas klu thams cad nad pa'i lus las bkug ste lcags kyus bzung ngo //gang zhig ces bya ba la sogs pa ni/ gong ma bzhin du bshad do/ /tsa las byung ba ni 'khor lo'o/ /khroM las byung ba ni bya khyung ngo / /'od zer gyis zhes pa la sogs pa ni rang dang 'dra ba spyan drangs te bstim pa'o/ /bdag 'od bu ga dgu sogs zhugs/ /zhes pa ni lus khyab par bstan to//lte ba'i 'khor lo ni me bskul ba'o/ /g.yas kyi rdo rjes sngar ba yang de nyid do/ /gzhan go sla/ /yang na nang du bsreg par bya/ /zhes pa ni/ nad pa'i lus thams cad me 'bar bas nang par bcas pa bsregs te/ rlung gis gtor/ chus bkrus pa las rim gyis phyag na rdo rje bskyed de dbang bskur sngags bzlas pa'o//klu'i tshogs kyi las su bya ba ni/ zangs sogs dmar po'i snod du bkod/ /ces pa pad+ma 'dab ma brgyad pa'i gzugs byas la bkod pa'o/ /bdud rtsis gso ba ni nA ga ge sar dang dbang po lag pa la sogs pa ba dmar mo'i 'o ma dang sbyar te gso ba'o//gzhan ni bshad zin to/ /gang gis nad pa'i las su bya ba'ang gang gi thog mar nang pa byang chub tu sems bskyed de/ sdom pa dang dam tshig la sogs pa yang dag par blangs nas/ de nas las su bya ba gang yang rung bas 'byung po phral te/de nas drag po'i sngags nye bar bzlas pa'i chus nyin lan gsum mtshan lan gsum du bkru bar bya'o/ /dbang bskur te/ des yan lag yongs su rdzogs par 'gyur ro/ /bgegs bzlog pa'i cho ga bshad zin to/ /de nas gdug pa can gdul ba'i cho ga bshad pa'i phyir/gang zhig gdug pa 'dul 'dod pas/ /zhes bya ba la sogs pa smos te/ gdug pa ni byang chub sems dang mi ldan zhing dus thams cad du gzhan la gnod par zhugs pa'o/ /de bsad pa ni lus sems dbral ba'o/ gnas gang du zhe na/ dur khrod la sogs 'jigs gnas su//zhes dur khrod dang / ri kha ral dang sum mdo dang / grag gling la sogs pa'i bkra mi shis pa'i gnas su bya'o/ /drag po'i dkyil 'khor dug gis bri/ /zhes pa kun du khru re yod pa'i gnas su dug dang gri bo'i khrag dang / sol chen gyis byug par bya'o/ /gzhan go sla/ tsha ba bskyed pa'i sbyor ba bya//zhes pa ni/ nim pa la sogs pa'i shing la me sbar la gang gi rdzas gong ma dang tsha ba gsum dang 'bru mar dang bsres te/ byugs shing bskam mo/ /gzhan go sla/ bdag las sprul pa'i khro bo'i tshogs/ /zhes pa rtsa ba'i sngags kyi 'od las 'jig rten gyi khams khro bo'i tshogs kyis rgyas par bya'o//rdo rje dgug pa'i sngags rtsa ba'i sngags dang spel te/ bzlas par bya'o/ /des ci byed ce na/ lcags kyu la sogs bzhi po spros/ /zhes pa ni/ lcags kyu can dang zhags pa can dang / lcags sgrog can dang / tho ba can gyis dgug pa dang gzhug pa dang bcing ba dang brdung ba'i las kyis gdul bya bstim pa nyid do//las kyi rgya'am ri rab kyis/ /de yi steng nas mnan par bya/ /zhes pa ni/ spyi bor rgya gram dang ri rab de'i lte ba la bsam par bya'o/ /byin gyis brlabs pa'i lha ni dbang bskur ba'i lha ste snying ga'i sa bon no/ / las kyi khro bo ni bdud rtsi 'khyil pa ste/ /des dbye ba ni dbral ba'o/ /de dag gi don yang gdul bya mdun du bsams te/ de'i snying gi nang na dbang bskur ba'i dus kyi ye shes sems dpa' gsal bar gyur pa dang / rang las khro bo bdud rtsi 'khyil pa spros te/ mnyes par byas nas nyes pa bsgo ste/des na de khros par gyur pas khrag 'thung bar bsam pa'o/ /srog rtsa'i bdag po bram ze'i gzugs/ /zhes pa ni srog rtsa'i nang na bram ze'i gzugs 'od lta bur gnas pa'o/ /gdug pa'i khro bos sbyar mas bdug /ces pa ni/ khams gsum rnam par rgyal bas gu gul sbyar mas bdug pa'o//khros pa'i stobs kyis khrag 'byin pa ni srog lha khros pas srog rtsa chad par 'gyur ba'o/ /sprul pa thogs lnga la sogs pa ni bshad zin to/ /gzhan go sla/ thog chen sbyor ba'i las byas nas/ /zhes pa ni mtshon cha'i char 'bab par bsam pa'o//gang gis she na/ dkyil 'khor kun gyis te/ sprul pa'i dkyil 'khor thams cad kyis so/ /lcags ni mi bsad pa la sogs pa'o/ /rigs mthun pa ni dug dang / tsher ma dang / mdog nag por gyur pa'i shing ngo / /khro bo de dang mthun pa ni stong 'phags pa gos sngon po can la smad lcags rab tu 'bar bar gyur pa'o//dkyil 'khor kun ni snga ma bzhin no/ /ral gri la sogs pa yang dkyil 'khor kun gyi zhes pa dang 'brel par shes par bya'o/ /gzhan go sla/ /khro chung sbyor ba ni khro bo me dpal rab tu 'bar bar bsam pa'o/ /dug dang myos pa'i chur sbyar te//zhes pa ni bcos pa'i chang dang sbyar ba'o/ /gdug pa'i sbrul nag sbyor ba ni stong gsum nas sbrul nag po bkug pas dug skyugs te gang bar gyur pa'o/ /bkug cing kha ru blugs gyur na/ /zhes pa ni gdul bya bkug ste/ dug khar blugs na 'chi zhes pa'i don to//bud med thod pa ni rims kyis shi ba'i thod pa'o/ /snying nang ma mo'i sbyor ba yis/ /zhes pa ni/ nag po chen po'i srin mo snying du bskyed pa'o/ /khar blugs gyur na zhes pa ni khar blugs pa ma mo la phog pas snying rtsa gcad de khrag 'thungs pa'o/ /thod par klad pa 'khor lo bskor//zhes pa ni/ klad pa'i nang du ma mos thod pa klad la bskor zhing ru lu ru lu zhes grags par bsams na/ mgo 'khor bar 'gyur ro/ /gzhan go sla/ mdze can khrag gi sbyor ba yis/ /lus nang gang nas zhes pa ni/ mdzes zin te shi ba'i khrag gtor zhing bsam gtan gyi lus khrag gis gang nas lcags sbrang ngam/lcags sdig srin bu la sogs pas/ /ba spu'i bu gar sbyor zhes pa ni/ khrag lus las srin bu dang / sbrang ma dang / sdig pa'i tshogs byung nas sha dang rus pa la thug par zos par bsams na mdzes 'chi bar 'gyur ro/ /gong du sha ba'i 'khor lor ldan//zhes pa ni sha ba'i lus la 'khor lo rtsibs bzhi pa'i dbus na ming bri/ rtsibs bzhi la hUM zhes pa bzhi bris la/ lug gi thod pa'am lkugs nas shi ba'i thod par bcug ste mnan na lkugs nas shi bar 'gyur ro/ /lce la ri rab sbyor ba bya/ /zhes pa ni khams gsum rnam par rgyal bas lce drangs te/laM las ri rab kyis mnan na yang de bzhin no/ /gzhan go sla/ snying nang sbrul nag bcug byas te/ /zhes pa ni snying gi nang du sbrul nag po bskyed la stong gsum gyi sbrul nag po thams cad blos bkug ste/ de'i lus la bsdus na de ltar 'gyur ro zhes pa'i don to//de ltar rdzas la sogs pa'i sbyor bas bsad pa'i cho ga bstan nas/ da ni bsam gtan 'ba' zhig pa'i bsad pa bstan pa'i phyir/ bsam gtan kho na yis zhes bya ba la sogs pa smos te/ mdun du za byed kha gdengs la/ /zhes pa ni sgrub pa'i mdun du khro bo za byed kha gyen du lta ba kha nas me 'bar ba bsams la de'i steng du bsgrub bya ba kug ste/bsam gtan gyi phur bu spyi bor btab pas rkang par thal byung ste/ de'i rjes su khrag phyung bas za byed kyi khar song bar bsam pa ni las gzhan gyi sbyor ba'o/ /yang na spyi'u tshugs gyur pa ni sdig can gyi bar mdo lta bu ste/gong gi khro bo gnyis kyis rkang pa gnyis nas bzung ba'o/ /rdo rje ni zhes pa go sla/ sum skor 'od kyi sbyor ba yis/ /zhes pa ni rang gi 'od kyis ye shes kyi 'khor lo 'phros te/ de las rdo rje byung ba spyi bo'i bar la thug go/ /'od zer snying la sogs par sreg /ces pa ni rdo rje las 'od me lta bu byung bas lus sa bon dang bcas pa sreg par byed do zhes pa'i don to/ /yang na 'od zer nag po'am/ /zhes pa la sogs pa'i don ni/ rang las 'od nag po spros pas gdul bya'i lte bar me 'bar te/ spyi bo na sa bon bkug nas rdo rje'i lam du phyung ste/khro bo za byed kyi khar song bar bsam mo/ yang na rdo rje'i yi ge gsal/ /zhes pa la sogs pa'i don ni 'khor lo bzhis gsal bar byas te/ rdo rje rab tu 'bar bas spyi bo nas bshang ba'i lam la thug par thal te/ sa bon thams cad bshig pa dang bsreg pa dang dbyung bar bya'o zhes pa'i don to//gzhan go sla/ yang na 'khor lo nag po'i steng / /zhes pa ni/ tsa nag po las byung ba'i 'khor lo'i steng du'o/ /de'i steng du bsgrub bya bzhag la snying gi nang du zhes pa la sogs pa'i don ni rang gi sa bon las phu spros te/ de nas sbrul nag po bsam gyis mi khyab pa bskyed cing bkug la sbrul nag po'i tshogs kyis sha zos pas srin bu dang sbrang bu byung nas za bar bsam mo//lte ba'i yi ge bsams nas kyang / /zhes pa ni a thung ngu'o/ /raM las byung ba ni me 'bar ba'o/ /yi ge dkrugs pa la sogs pa'i don ni bshad zin to/ /gzhan go sla/yang na dbang phyug mthu chen gyis/ /zhes pa la sogs pa'i don te/ /gang gis drag po'i las kyi sbyor ba 'di rnams kyang thog ma nyid du rang gi cho ga yongs su rdzogs par bya ste/ yan lag dang bcas pa'i bskyed pa'i ting nge 'dzin brtan pas so/ /yan lag ni gang bskyed pa la brten pa ni gang zhe na/'dir yan lag ni sdom pa phun sum tshogs pa dang / dbang thob pa dang tshogs yongs su rdzogs pa'o/ /bskyed pa la brten pa ni bskyed pa las su rung ba ste 'di ltar shin tu gsal ba dang / yun thub pa dang / khams la gnod pa med pa dang sna tshogs par gyur pa'o//des kyang gdul bya zhing du gyur pa la bsgrub par bshad do/ /gdul bya zhing du gyur pa zhes bya ba ci lta bu zhig ci na yul dam pa khyad du gsod pa dang / bsgom pa la sogs pa mi 'dzin pa dang gang gis thabs gzhan gyis mi 'dul ba'o/ /drag po las kyi bsgrub pa bshad zin to//da ni rdzas lhag par gnas pa'i cho ga bshad par bya ste/ de'i phyir/ gzhan yang dngos grub sbyor ba rnams/ /zhes bya ba la sogs pa smos te/ las zhi ba'i rgyu las byung ba ni/ dngul la sogs pa las byas pa'o/ /gang ltar 'dod pa'i dbyibs su bsgyur/ / zhes pa ni rtse mor 'dus pa dang gdengs po la sogs pa'o/ /'od du zhu zhes pa la sogs pa'i don ni rdo rje dag pa las hUM/ de'i 'od kyis rdo rje las la sogs pa bskyed pa'i rim pa bzhin no/ /'od du zhu ba las de las rdo rje kha dog lnga zhes pa zhi ba la sogs pa'i dbang du'o/ /sngags dngos su bas/ de'i bsam gtan ni/ ye shes rtags rnams bkug bya ste/ /zhes pa las kyi dbang du rdo rje dkar po la sogs pa bkug cing bstim mo/ /gzhan go sla/ dril bu phreng ba la sogs pa'ang / /zhes pa la sogs pa'i don ni/ dril bu dang phreng ba la sogs pa'i mtshan ma thams cad dang lugs ma dang /bris sku la sogs pa thams cad byin gyis brlabs pa dang dbang bskur ba dang sgrub pa byas na nus pa phun sum tshogs par 'gyur ro zhes pa'i don to/ /de nas khrus kyi cho ga bstan par bya ste/ de'i phyir/ ji srid khrus kyi sbyor ba ni/ /zhes bya ba la sogs pa smos te/ de la gang gis bum pa sbyangs nas zhes pa ni stong pa nyid las b+h+rUM las bum pa gzhal yas khang du gyur pa'o//pad+ma bzhi/ zhes pa la sogs pa ni bskyed pa'i rim pa bzhin no/ /dag pa'i sngags ni 'og nas ston to/ /ye shes chu bo ni byang chub sems te gang gis der byin gyis brlabs pa de la de skad ces bya'o//dam pa'i don ni stong pa nyid do/ /lha mo rgyun 'bab ni byang chub sems kyi chu'o/ /khrus 'di dag la rdzas la brten pa'i khrus kyang yod do/ /'di skad smos pa'o/ /gnyen por gyur pa'i khrus kyang yod de/ gang dang gang 'gal bar 'gyur ba'i 'gal ba de yod de med par 'gyur ba'o//yongs su dag pa bla na med pa'i khrus kyang yod de de bzhin nyid lta bu'o/ /thun mong gi khrus kyang yod de ji skad smos pa de nyid do/ /thun mong ma yin pa'i khrus kyang yod de bdud rtsi rnam pa lnga la sogs pa'o/ /'dir rnam par byang ba'i chos thams cad kyang khrus kyi ngo bo nyid khrus kyang chos thams cad kyi ngo bo nyid do//khrus kyi cho ga bshad zin to/ /da ni sngags kyi cho ga bshad par bya ste/ oM na mo la sogs pa ni bsnyen pa'i sngags so/ /'og ma ni bcing ba'o/ /mo ha ya ni rmongs pa'o/ /shAn+tiM ku ru ni zhi pa'i'o/ /puSh+TiM ku ru ni rgyas pa'o//ba shaM ku ru ni dbang gi'o/ /mA ra ya ni bsad pa'o/ /stam b+ha ya ni mnan pa'o/ /ba liM zhes bya ba la sogs pa ni gtor ma sbyin zhing las bcol pa'i sngags so/ /oM rat+na tri sha ma zhes pa la sogs pa ni lha'i gdon bzlog pa'i sngags te las kyi sngags ni gzhan la yang sbyar bar bya'o//nA ga rA dza/ zhes pa la sogs pa ni klu so so'i ming gi sngags so/ /a pasma ra zhes pa ni lto 'phye bzlog pa'o/ /sarba pre ta ni yi dags thams cad bzlog pa'o/ /shud+he/ zhes bya ba la sogs pa ni/ sdig pa dag par byed pa ste khrus kyi'o/ /gr-ih+Na la sogs pa ni las kyi sngags bsdus pa'o//ba ra bi twa na/ zhes pa la sogs pa ni rig sngags bdag po dang bcas pa ste/ gong gi mtha' dang bcas pas 'joms par byed do/ /sngags kyi bsgrub pa bshad zin to/ /da ni rdzogs pa'i rim pa bshad par bya ste/ de'i phyir/ gang zhig dngos grub mchog 'dod pa/ /zhes pa la sogs te/ de la mchog gi don ni mchog gi dngos grub ste sku gsum mo/ /de sgrub pa ni bsgrub par 'dod pa'o/ /de yi nor bu bzhin bsgrub phyir/ /zhes pa ni nor bu dang 'dra bar thogs pa med par 'byung ba'i phyir ro/ /de nyid rgyan ni bshad par bya//zhes pa ni/ rdzogs pa'i rim pa gsal bar bshad par bya ste/ de la rdzogs pa zhes pa ni sku gsum ste/ chos thams cad 'bras bur gyur pa nyid do/ /de'i dngos kyi rgyur gyur pa ni rdzogs pa'i rim pa ste gang gis bsgom pa'i rim pa nyid do/ /'dir yang rdzogs pa la dmigs pa'i phyir te/'bras bu'i tshul du dang dmigs pa'i tshul du'o/ /dmigs pa'i tshul yang rdzogs pa'i rim pa zhes bya ste/ yod pa dngos su bsgom pa nyid kyi phyir ro/ /snying gar bcu drug brgyad dang bzhi/ /dbus gnas thabs dang shes rab bar/ /dkar zhing zlum pa'i thig le bsam//zhes pa ni/ snying gi nang du rtsa pad+ma 'dab ma brgyad pa gnyis dang / bzhi pa gnyis kyi dbus su zla ba nyi ma kha sbyor du byas te/ de'i dbus su byang chub sems kyi thig le skra rtse'i tshad tsam dkar zhing zlum pa bsam par bya'o/ /'byung bzhi'i dang po yi ge brgyad//ces pa ni ya ra la wa bzhis nang gi pad+ma la brgyan pa/ a ka tsa Ta ta ba ya sha brgyad kyis phyi'i pad+ma la brgyan pa/ rtsa dang yi ge thams cad mdog dkar por bsam par bya'o/ /yi ge rnams kyang 'od kha dog lnga dang ldan pa rtse mo las ba thag phra mo dbus kyi rjes su 'brang ba/rked pa rtse mo'i cha la gnas pa/ ting nge 'dzin gyi mig gis bltas pas gang gi rtse mo byed pa dang zhu ba'i rnam pa can du bsam par bya'o/ /de las 'byung ba lnga'am bcus/ /dbang po rgyu ba dgag par bya/ /zhes pa ni/ dbus kyi mdud pa las rtsa lngar byung nas gsung gi chad du byin pa dang /dbang po lnga la gzugs te bcur 'gyur ro/ /gang gi tshe rtsa de la dmigs nas rlung la bslab par bya'o/ /'byung ba dang ni 'jug pa dang / /gnas pa gnyis kyi bdag nyid can/ /zhes pa ni/ snying gar sa bon las ba thag byung nas gang gi tshe rtse mo'i thig le la 'jug pa dang /bcad pas rtse mo dang rtsa ba'i bar du gnas pa gnyis la bslab par bya'o/ /de nas ni gnyis su med pa'i gnas pa la bslab par bya'o/ /de nas ni stong pa nyid kyi ting nge 'dzin gyis bsam gyis mi khyab pa'i gnas pa la bslab par bya'o//bsam gtan gyi sbyor ba gzhan yang gsungs pa/ khrag dang chu dang byang chub sems/ /mdung dang ral gri'i sbyor ba can/ /mgrin pa'i pad+mar kha bye bsam/ /zhes pa dbus na ni byang chub sems so/ /g.yas dang g.yon ni khrag dang chu'o/ /mdun rgyab na ni mdung dang ral gri lta bu ste//'di dag las khrag dang / chu dang / byang chub sems dang / dbugs dang / drod kyi dngas ma gnas te/ kun gyi dbus na ni snying po'i sa bon can no/ /rlung la bslab pa snga ma bzhin no/ /ji ltar slob ce na/ re re la 'byung ba la sogs pa slob pa dang /gnyis gnyis la slob pa dang / thams cad la slob pa yang ngo / /snang ba mtha' yas kyi gnas na zhes pa ni longs spyod kyi gnas su'o/ /bzhi bcu'am ni zhes pa bcu drug dang bzhi pa'i rnam pa gyen dang thur du lta ba'o/ /sum cu gnyis zhes pa ni/ bzhi las gzhan pa'o/ /'byung ba bzhi ni snga ma bzhin no/ /A li bcu drug ni/ a A/ i I/ u U/ r-i r-I/ l-i l-I/ e ai/ o au/ aM AH/ zhes pa thabs dang shes rab kyi dbye bas g.yas dang g.yon du bskor ba'o/ /gang zhig spyi bo'i khang pa ru//zhes pa ni/ bde ba chen po'i gnas su'o/ /sum cu gnyis dang bzhi zhes pa ni/ rtsa pad+ma'i tshul can no/ /de las gyen du lta ba dang thur du lta ba'i bye brag gis grangs su bgrang bar bya'o/ /A li gnyis ni nyis skor ro/ /kA li gcig ni sde lnga pa dang / an+tas+tha dang /uSh+ma Na'i phyogs gcig go/ /lte ba ni lte ba'i gnas su'o/ /dpa' bo gsang ba ni byang chub sems kyi bdag nyid can te thams cad la sbyor ro/ /brgya dang nyi shu brgyad pa'am/ /zhes pa ni drug cu bzhi nyis 'gyur ro/ /phyed bcus ni drug cu bzhi nyid do/ /yi ge ni snga ma bzhin te/kA li nyis skor dang / A li bzhi skor ro/ /gzhan go sla/ kha cig slob pa'i dus dag tu/ /nyi ma rdo rje'i sbyor ba ste/ /zhes pa ni rab gtum gyi lte bar nyi ma'i steng du rdo rje me lta bu bsams la rlung bsdus pas dbab ces bshad do/ /la la yi ge thig ler 'dod//ces pa ni/ thig le dkar dmar gyis dbab pa ni/ bde ba'i rgyan no/ /a thung dun gyis dbab pa ni/ a wa d+hU tI pa'o/ /bzhi ni so sor slob pa ste/ /zhes pa ni gong du bshad pa nyid do/ /gcig ni mdud par slob pa'o/ /zhes pa ni 'og nas ston to//gzhan go sla/ gang gis rdo rje'i sbyor ba yis/ /zhes pa ni gsang ba'i rdo rje'i 'khor lo la slob pa'o/ /sum cu gnyis dang zhes bya ba la sogs pas ni rtse mo dang rked pa dang de'i cha dang rtsa bar bsam pa'o/ /bzhi po kho na zhes pa ni/ rtse mo la sogs par rlung gi 'gro ldog gis bsdu'o//brgyad ni steng 'og gnyi ga'i sbyor ba'o/ /gnyis ni bde ba chen po gnyis la ste dbab pa dang / bzlog pa'i bye brag go/ /dbab pas dga' ba skye ba dang / /zhes pa la sogs pa ni byang chub kyi sems gnas pa'i bye brag gi dbang du byas pa'o/ /da ni rnal 'byor ma la brten pa'i cho ga bshad pa/gang tshe rang gi rigs mthun pa/ /zhes pa ni/ rang la mdzes pa'i rgyan yod pa'o/ /byin gyis brlabs nas gnyis med sbyor/ /zhes pa ni/ gsang ba'i snying po byin gyis brlabs nas rdo rjer zhugs pa'o/ /des dga' ba rnams rim gyis bskyed pa'o/ /shes rab ma'i dbye ba bstan pa las las skyes pa ni/khu khrag dang bcas pa las skyes pa'i bu mo'o/ /ye shes kyi bu mo ni bde bar gshegs pa las sprul pa'o/ /g.yon gyi yum ni g.yon gyi yum nyid do/ /snying gar byung ba ni sa bon las sprul pa'i bu mo'o/ /rkang pa thi gus bcing ba ni lag pa dam du 'khyud de bsdams pa'o//dbugs kyi lcags kyu bzlog pa ni dbugs gyen du drangs pa'o/ /gzhan go sla/ nyi ma'i me ni lte bar 'bar/ /zhes pa ni/ gang gis lte ba nas ting nge 'dzin gyis gtum mo sbar te/ sa bon bkug pa'o/ /yang na 'byed 'dzums sbyong ba yis/ /zhes bya ba la sogs pa ni 'byed 'dzums kyis rlung sngon po bskyod pa la sogs pa'i bde ba chen po nas/byang chub kyi sems bkug ste/ 'khor lo rim gyis gang bar bsam pa'o/ /rnal 'byor ma zhes pa la sogs pa'i don ni/ longs spyod dang sprul pa'i gnas su sa bon bsam pa'o/ /thabs ni zhes pa la sogs pa'i don ni/bde ba chen po dang chos kyi 'khor lo sa bon gyis rgyas pa'o/ /sbrul gyi zhags pas zhes pa la sogs pa'i don no/ ting nge 'dzin la sogs pas haM las sa bon byung ba zhu nas kun du 'khyil par bsam pa'o/ /de nas 'khor lo rgyas pa'i dus bstan pa ni/ gang gis gtso bo'i sbyor ba la//zhes pa la sogs pa ste/ gtso bo'i ting nge 'dzin gsal nas/ de las gzhan du zhu bar gyur pa'o/ /yang na rnal 'byor bde chen por/ /gsal nas khyab pa'i spu ldang zhing / /snang ba gsum ni 'byung bar 'gyur/ /zhes bya ba ni/ gang gis haM la blo gtad de gsal ba dang / smig rgyu la sogs pa'i rtags 'byung ba dang /[ (]sbu [,]spu [)]ldang ba dang / 'dar ba dang / 'phar ba la sogs pa byung nas haM las sa bon phab ste/ dga' ba gsum bskyed par bya'o/ /yang na 'khor lo'i sbyor spangs pas/ /zhes pa la sogs pa'i don ni/ mdud pa ni bcu drug la sogs par byang chub sems kyi rim par dag pa'o//gang zhig 'di la rtag gnas na/ /zhes pa la sogs pa'i don ni/ dus des bskyed pa yongs su rdzogs pa la/ /'bras bu dam pa thob par 'gyur ro/ /gzhan go sla/ bdud dang gnod sbyin la sogs pa/ /zhes pa la sogs pa'i don ni/ gang zhig gis thog ma nyid du byang chub tu sems bskyed pa nas bzung ba'i dge ba'i stobs kyis gnod par gyur pa thams cad zil gyis gnon pa'i phyir ro//da ni sgrub pa'i thabs gtad pa ni yul mi mthun pa'i phyogs dang bcas te/ bstan pa gang zhig don 'di zhes bya ba la sogs pa smos te/ /de dag gi don yang kha phyir bltas pa dang nyon mongs pa mang ba dang /ched du mi byed par gyur pa la spel na/ tshe 'di dang tshe rabs phyi ma thams cad du sdug bsngal sna tshogs nyams su myong bar 'gyur ro/ /'o na gang zhig la bstan par bya zhe na/ snod ldan zhes bya ba la sogs pa'i don ni/ gzhan la mi spel ba dang / khro ba chung ba dang / ma chags pa dang / mos pa dang / dad pa dang ldan pa dang / nga rgyal chung ba dang / sems kyi don la dga' ba la byin na legs pa thams cad kyi rgyur 'gyur ro zhes pa'i don to/ /da ni nyes pa sbyang bar bstan pa/ bdag 'dra ma rig ces bya ba la sogs pa'i don ni shes rab zhan pa dang / gting dpag dka' bas brtsam par bya ba ma yin kyang rang bas dman pas rtogs par sla ba'i phyir bstan to zhes bya ba'i don to//bla na med pa'i byang chub chen por bsngo ba ni/ bdag gis bsgrubs 'di zhes pa'i don ni/ dge ba'i rtsa ba 'dis bstan pa yun ring du gnas pa dang / sems can rnams mngon par mtho ba dang / nges par legs pa thob par smon to zhes bya ba'i don to//de ltar bzod par gsol ba dang / nyes pa bshags pa 'dis ni bstan bcos dman par gyur pa'i nyes bdag pa dang dge ba'i rtsa ba mi zad cing shin tu 'phel bar yang bstan to/ /de kho na nyid sgron ma'i 'grel ba slob dpon dpa' bos byin gyis mdzad pa rdzogs so// //