CLOSE WINDOW

D2212
བོད་ཡིག

/ //bla ma dam pa'i man ngag snyan nas snyan du thob pa rdzogs so//[ ]@##/ /rgya gar skad du/ sa ma ya A laM kA ra nA ma TI kA/ bod skad du/ dam tshig rgyan gyi rnam par bshad pa zhes bya ba/ /ston ka'i zla ba dri med 'od/ /ma skyes rdo rje ye shes nyid/ / rdo rje can la phyag 'tshal lo/ /sa gzhi dang ni yongs bskyed la/ /'bras bu 'byin pa'i nus pa'o/ /ting 'dzin rgyu dang rab sbyor ba'i/ /bdag po grogs la sogs pa yis/ /'di yang 'bras bu 'byin pa'i grogs/ /rten med 'bras bu 'byin 'dod pa/ /mi 'byung sa bon mes bsregs bzhin//de na 'di yi don 'di bri/ /zhes pa'o/ /de nas/ /dam tshig med dang 'tshal bar gtod/ /sems nyi la sogs bsal ba'i phyir/ /dam tshig rnams ni mdor bsdus nas/ /gsang ba'i bdag btud de ni bshad/ /ces pa ni rtsa ba'i don bshad pa'i don dgongs so//de la dam tshig med pa ni bsgom pa dang / bsgrub pa dang / sbyin sreg la sogs pa rnams 'bras bu med de sa bon me'am chu la gtor ba bzhin no/ /som nyi bsal ba ni/ blang ba dang / srung ba dang bcos pa ni spyi dang khyad par ro/ /dam tshig mdor bsdus pa ni/ nyan thos sdom pa dang /theg pa chen po'i don byed pa dang / gsang sngags so/ /gsang ba'i bdag la btud de bshad/ /ces pa ni bkra shis pa'i yan lag ste/ mchod pa'i tshul gyis nyon mongs zil gyis sa mnan par chad mi 'byung ste/ de nas bshad ces pas 'og ma dang 'brel to/ /sngags pas bsrung ba'i dam tshig ni/zhes pa ni/ sngags pa ni rin po che'i rigs kyi gang zag la dbang bskur ba'o/ /yid skyob cing 'dzin pas na de'i don yod pas na sngags pas so/ /srung ba ni sdom pa bsrung zhes pa'o/ /dam tshig ni gong ma'i don las mi 'da' zhes pa'i don to/ /nyan thos dang theg pa chen po dang gsang sngags kyi don las 'das na/mnar med skye bas don bsrung zhes bya ba ste/ sngags pa rnams so/ /dang po byang chub sems bskyed nas/ /nya'am stong gi dus dag tu/ /yan lag brgyad pa nyer gnas te/ /lo gcig pa'am zla gcig bya/ /zhes pa la/byang chub sems dpa' ni bdag gcig pu 'khor ba las bsgral lo/ /zhi ba mya ngan las 'das pa thar pa thob par bya/ zhes pa nyan thos kyi sems bskyed do/ /nya'am steng ni zhes pa la/ sdom pa dang ldan pa'i dge slong gcig la/ phyag 'tshal ba sngon du 'gro bas/ zla ba 'od ngo cog gi nya'am stong la/de dang 'brel ba'i sdom pa blang / /zhes pa'o/ /yan lag brgyad ces pa ni/ srog gcod gzhan gyi nor 'phrog dang / /mi tshangs spyod brdzun bcos pa'i chang / /glu gar rol mo rgyan byug pa/ /mal stan che dang kha zas spong / /'di ni sdom pa'i tshul khrims so//yang na sdom pa gsum dang ldan pa'i bla ma la/ phyag sngon du 'gro bas/ bla mas/ srog chags rnams ni gsad mi bya/ /zhes pas sdom pa byin te/ lo gcig zla gcig bar du bsrung / /zhes pa gong ma bzhi dang 'brel lo/ /de nas ji srid sems bskyed de/ /bslab pa lnga po legs gzung ste//lo gcig zla gcig bar dag tu/ /sdom pa brtan por gzung bar bya/ /zhes pa la/ de nas ji srid sems bskyed ces pa la/ smon 'jug gnyis kyis dge bsnyen du sems bskyed/ dge slong ngam bla ma rnams kyi mdun du/ phyag sngon du 'gro bas/ dge bsnyen gyi las kyis/de'i sdom pa blangs te/ tshangs par spyod pa'i dge bsnyen ni/ yan lag brgyad po ji srid 'tsho'i bar du bsrung ba'o/ /sna 'ga' srung ba phal chen no/ /rtsa ba bzhi dang myos pa'i khu ba dang / bslab pa lnga po legs par bsrung bar gsungs pa/ de yang lo dang zla ba'i bar du sdom pa gong ma de brtan por gzung zhe'o//de nas dge tshul dge slong gi/ /bslab pa la ni legs gnas nas/ /mi gtong lo'am zla ba'am/ /sdom pa nyams pa blang bar bya/ /zhes pa la/ de nas dge tshul gyis mkhan po dang btsun pa la/ bar chad kyi chos yongs su bsal zhing / dkon mchog la phyag dag gis spong ba bcu 'khor dang bcas pas blang zhing bsrung zhes pa'i don to//dge slong gis btsun pa gsum gyi mdun du khrims nyis brgya lnga bcu rtsa gsum blangs pa dang / bsrung ba dang bcas pa'o/ /de nas/ rang gi bslab pa legs par bsrung / /zhes pa'o/ / de nas sngags kyi dam tshig gi ched du/ mi gtong bar lo'am zla ba'i bar du sdom pa nyams pa blang zhing bshags zhes so/ /so sor thar pa'i sdom pa la/ /gang zhig gis ni legs gnas na/ /mkhas pa rnams kyis dus kun du/ /srog gi phyir yang mi gtong ngo / /zhes pa ni/ so sor thar pa'i sdom pa ni/'du byed shes pa ngo tsha shes shing khrel yod pa'o/ /bag chags la sems bslan pas brtan par byas te/ rten gyi gang zag gi sdom pa legs par gnas par byas te/ mkhas pa ni blang ba dang bsrung ba dang / bca' ba shes pas bca' zhes pa'o/ /srog gi phyir yang mi gtong ste/phung po srog dang bral yang rang gi sdom pa mi gtong ba'o/ /gang zhig gis ni de goms 'gyur/ /gang tshe gong ma'i bslab gnas pas/ /de tshe 'og ma'i ming dang bral/ /zhes pa la/ gang zhig gis ni de goms 'gyur ni/ rten gyi gang zag des bsnyen gnas dang /dge bsnyen dang so sor thar pa'i sdom pa la/ dang por rim par goms par bya/ /zhes pa'o/ /gang tshe gong ma'i bslab gnas na/ /'og ma'i ming dang bral ba ni/ /spang ba chen po chen po la gnas na/ chung ngu'i spang bya ni/ sor med de gong ma khyab bya la don khyad par gnas pa ste/'og ma'i don gong ma la 'bras bu'i tshul du khyab ces pa ni/ rtsa dang rgyud dang lo ma dang 'bras bu dang sa bon gyis khyab ces pa'o/ /gong ma gtso bo yin pa'i phyir yang 'og ma'i ming dang bral zhes pa'o/ /dang po sbyin pa bslab bya ste/ /dngos po bcu gnyis yang dag ldan/zhes pa ni/ sems can don byed tshul khrims ston pa yin te/ bla ma'am dkon mchog gi mdun du/ bkra shis pas sems can don byed tshul du sems bskyed nas/ ji ltar dus gsum mgon po yis/ /yang dag byang chub nges mdzad pa'i/ /cho gas sdom pa blang ba ni//pha rol phyin drug tshul du spyad/ /ces pa'i tshig dang 'brel to/ /sbyin pa la dngos po bcu gnyis ni/ chos kyi sbyin pa la don bshad pa dang / smyu gu dang snag tsha dang po ti bzhi'o/ /zang zing la nor dang dbyig dang zas dang gos te gnyis pa'o/ /skyabs kyi sbyin pa la/ srog dang lam 'phrang dang 'jigs skyabs/byams pa dang bzhi ste bcu gnyis so/ /tshul khrims la ni rnam dgu ste/ /bzod dang brtson 'grus bsam gtan dang / /shes rab gsum ste gsum du bstan/ /zhes pa'i don la sdom pa dang dge ba don byed de/ de yang lus ngag yid gsum spangs pa dang 'brel te/ bzod pa ni chos zab mo la sems pa'i bzod pa dang /sdug bsngal dang du len pa dang / gnod pa byas pa la ji mi snyam pa'i bzod pa'o/ /brtson 'grus ni go cha dang sbyor ba dang mthar phyin pa gsum mo/ /bsam gtan ni nyes pa spong ba dang / dbang 'byor ba dang / rnam par gnas pa gsum mo/ / shes rab ni thos pa bsam pa bsgom pa'o/ /gzhan gyi mya ngan sangs la sogs/ /sems can don 'gyur thams cad kun/ /srog gi phyir yang mi gtong ngo / /zhes pa la/ gzhan gyi mya ngan las las ngan ba sogs pa'i sdig pa'i gang zag rnams te/ dang po brtson 'grus dang shes rab dang snying rje dang ldan zhing sngar gyi las ngan pa sel cing thar pa dang bde bar grol lo zhes bya'o//sems can srog gi phyir yang mi gtong ni/ /sems can don dang 'brel ba srog gi skyabs la sogs pa/ rang gi srog dang bsngo zhes pa'o/ /sdom pa de lo'am zla ba'i bar du/ brtan nas sngags kyi dam tshig blang //zhes pa la/ sdom pa de rnams rim pas len pa ni gang zag spros bcas la dga' ba'i don du gsungs pa'o/ /theg pa chen po'i rigs can la ni/ sdom pa gsum gdan thog tu blang / /zhes pa'o/ /sngags kyi dam tshig blang ba ni/ /bla ma sdom pa gsum dang ldan pa las dbang blang zhing /dbang bzhi dang 'brel pa'i dam tshig gsum pa'o/ /spyi dang khyad par gnyis su shes ni/ spyi gsang sngags phyi nang gi dam tshig dang / khyad par gsang ba'i bdag po'i dam tshig go/ /dang po dag ni bshad bya ni/ sngags spyi'i dam tshig go/ /dang po slob dpon mnyes par bya//yi dam spang len mi bya ste/ /lus ngag yid gsum sku gsung thugs/ /phyag rgya che la rab tu gnas/ /zhes pa la/ dang po dbang gi dus su bla ma yo byad dang spyod pas mnyes par bya ba'o/ /dbang thob par bya ste/ phyis de bzhin du bla ma dang dam pa rnams la/ rang gis lus ngag yid kyi nyes pa med cing mos par bya/zhes pa dang nyes pa che chung gi tshogs dang / gtor ma brgyad dang 'bum la sogs pas bshags pa bya'o/ /yi dam spong len mi bya ni/ /shes pas gong ma'i lha spangs na/ /rtsa ba chad de ngan song 'gro/ /zhes pa ni de ni mnar med pa'o/ / shul gyi don la lha snga ma'i 'bras bu yod pa bstims te gnyis med byas na'am/ /gnyis snang med par gcig gi ngo bo byung na ma spangs pa'o/ /lus ngag yid phyag rgya chen po ni/ /lus lha dang ngag gi rdo rje'i bzlas pa dang / sems phyag rgya chen po dang mi 'brel pa ste mi dge ba bcu med pa ni phyag rgya chen po la rab tu gnas zhes bya'o//dam pa rnams ni smad mi bya/ /gsang ba'i don yang bstan mi bya/ /rtags chen sku yang mi bstan te/ /bzlas dang sems nyams bstan mi bya/ /zhes pa la/ dam pa rnams ni bla ma dam pa'am sangs rgyas 'byung ba'i bla ma dam pa ste/de la smad na sangs rgyas la mnyes pa mi bgyis pa ste/ chos med pa'i yul du skye zhes pa'o/ /gsang ba'i don ni gsang sngags kyi don dang / dbang gnyis pa gsum pa'i man ngag rnams dang / rdo rje'i spun ma yin pa la mi bstan pa ste/ bstan na sngags kyi dngos grub yal//zhes pa'o/ /rtags chen su yang mi bstan te/ /rang gi ltag pa'i sku'i rtags rnams phyi pa la mi bstan te/ bstan na lhag pa'i lha'i dngos grub mi 'byung ba'o/ /bzlas na sems nyams mi bstan na/ /rang gi rdo rje spun min pa la bzlas pa'i spyod pa dang / man ngag dang don rnams bstan na/ de'i de nyid mi 'byung zhes pa'o/ /nyams dang dngos dang rmi lam dang 'brel ba'i sems nyams mi bstan te/ de'i dngos grub yal zhes pa'i don dang 'brel to/ /bla ma dang rdo rje spun la ma yin te/ rang yin pa'i phyir ro/ /de ni rtsa ba'i dam tshig bstan pa yin pa'i phyir gong gi ton to//rdo rje dril bu phreng ba dag /skad cig tsam yang spang mi bya/ /grogs po'i sems ni dkrug mi bya/ /khyad par grogs la smos ci dgos/ /zhes pa la/ rdo rje dril bu rtag tu bcang ste mchod rdzas yin pa dang 'brel ba'i don yid la bya ba'i phyir ro//phreng ba ni bla ma dang lha dang lam khyad par can phreng zhing yid la bya zhes pa'i don to/ /skad cig kyang ma brjed par yid la bya'o/ /grogs po'i sems ni rdo rje'i spun de dbang dang / dam tshig yongs su gzung ngo / /sems can gnas gcig tu skyes pa yang nye ba'i spun yin pas gnod pa mi bya zhes pa'o//khyad par grogs ni dbang dang man ngag gcig pa dang / grol bas mi bya zhing mnyes pa'o/ /yang na dbang gsum pa'i rten te/ de nyid du khrid pa'i grogs yin pa'i phyir ro/ /grogs ni srid pa bar do skyob pa dang / gnas pa gsum du 'grogs pa'i phyir grogs so//bsrung ba'i phyir bsrung ba'o/ /tshogs dang gtor ma sbyin sreg dang / /maN+Dal tsha tsha la sogs pa/ /srog gi phyir yang mi gtong ngo / /tshogs dang gtor ma dang tsha tsha la sogs pa rnams/ lus la me 'bar bas myur bar bya ste/ dus rkyen gyis 'das na bsgrub pa'i skal ba dang mi ldan pas myur bar bya zhes pa'i don ston to//de ni rtsa ba dang yan lag nyams na bskang ba yin te/ nyes pa'i rim pa bdun dang nyi shu rtsa gcig dang / brgya rtsa brgyad stong dang khri drug 'bum gyis nyes pa'i rim pa dang sbyar nas 'dag ces pa'o/ / chos kyi spyod pa gzhan rnams kyang spang bar 'gyur ba smos ci dgos ni/ klog 'don dang nyan pa bskyab ba ste/ thar pa'i lam dang dge ba'i stobs 'byin pa'i phyir te/ /mi spang bar spyad pa dang 'brel to/ /sha chen khrag dang khu ba dang / /dri chen dang ni dri chu dang / /blang dang spang bar bya ba min//rtsa ba byang chub sems mi gtong / /zhes pa la/ sha chen khrag dang khu ba la dri chen dang dri chu la drod kyi nus pa med par/ skye bo phal pa'i mdun du spyad pa ma yin te/ khyi phag dang 'dra ba'i phyir ro/ /spang na nyan thos dang 'dra bas spang ba ma yin no/ /gsang sngags spang ba dang blang ba'i lam min te de rtog pa yin pas/'di ni bde ba'i lam yin te/ rtog med ces pa'i don to/ /rtsa ba byang chub sems mi gtong ni kun rdzob dang don dam ste/ dge ba'i 'bras bu'i rtsa ba ma lus pa'i rtsa ba byang chub kyi sems yin pas spangs na ngan song du 'gro zhes pa'o/ / chos la smod pa'ang spang bar bya/ /dad ldan bsam pa sun mi dbyung / /bud med rnams la smad mi bya/ /spang dang blang bar bya ba min/ /zhes pa la/ chos dang smod pa rang dang gzhan gyi grub pa'i mtha' ste/ smad cing spangs na rnam par snang mdzad ring ba'i rgyu'o/ /dad ldan bsam pa sun mi dbyung ni theg pa che chung gi rigs can te/chung ngu ni chen por 'gal te sun ma phyung ba'o/ /gzhan ni lam gnyis ngan song sun 'byin pa ni de ni rgyu la 'jug pa ste/ rgyu 'bras sun 'byin pa'o/ /bud med ni bud med de chags bcas rnams dbang gsum pa'i dus rin po che'i rigs kyi gang zag rnams la mi smad ces pa'o//ye shes ngos 'dzin med par de spang ba'ang min blang ba'ang min/ gang zag gnyis kyis so/ /bgrod min la ni bgrod pa min/ /spang ba mi spong 'gyur ba dang / /blang bya mi len spang bar bya/ /zhes pa la/ theg pa chen po'i lam la zhugs pa'i gang zag gis/mu stegs dang nyan thos kyi lam ngan pas phyis mi bgrod pa'o/ /spang ba phyis mi spong bar 'gyur pa'o/ /nyon mongs pa dang las kyis nyon mongs pa rnams te/ de'i gzhi rnams spang zhes pa'o/ /blang bya mi len ni bskyed rdzogs kyi don de brtson 'grus kyis 'jug ces pa'o//dug lnga spong ba spang bar bya/ /blang ba yang ni spang ba yin/ /dug lnga ma spangs par spyad bya/ /zhes pa ste/ lung las/ pha dang ma ni gsad par bya/ /rgyal po ngan pa bkur mi bya/ /bram ze grong khyer gzhom par bya/ /sems can don du gzhan dag gi / bud med bsten cing mi gtsang spyad//srog chags kyang ni gsad par bya/ ma byin blang zhing brdzun smra dang / /gzhan la phrag dog myos 'gyur btung / /'dis kyang grol bar 'gyur ba ste/ /dgongs pas bshad pa/ zhes ni dug lnga spang ba zhes pa ste rang ka ru mi spyad ces pa'o/ /gsang ba theg pa chen po'i gang zag skyes bu rnams kyis ni/dug lnga mthun rkyen gyis blang zhing spyad par spang mi bya/ 'gal rkyen dgra ru yang mi gzung ste/ spang bya blang bya ru byas nas lam bgrod na theg pa chen po'i rigs min te chung /dgra dang gnyen du ma bzung ba ni spangs pa shugs te btang snyoms chen po'o//de ni theg pa chen po mi slu ba'i lam la zhugs pa'o/ /dam pa ma yin bsten mi bya/ /zhes pa nas/ rtag tu mi dang spyod pa bstun/ /zhes pa'i bar la/ log pa'i bla ma mi bsten pa dang / rdo rje slob dpon gyi las kyi rim pa dang / de yang rtsa ba na gsal bas ma bris so/ / dang po dka' thub bsten pa ste/ /tha ma'i dus su spang bar bya/ /chang sogs nyes par gyur pa spang / /zhes pa dang po bsten pa lo'am zla ba ru brtan par gzung la dge slong gi bslab pa'i dus su bsnyen gnas logs su mi gos te spang ba'o/ /yang na dang po sdom pa gsum la gnas par byas la/'jig rten mchog gi ye shes skyes tsam na/ dka' thub mi dgos kun brtags yin pa'i phyir ro/ /chang sogs nyes par gyur pa ni/ /sngags pa'i byang chub sems dpa'i rtsa ba lnga rgyun du spang zhes pa ste/ byang chub sems dpa' sngags zlos pa rnams kyis brag btsong la sogs dang /mi nag sdig byed dang gsur chen la mi 'grogs so/ /thabs ldan dngos grub sbyor bar 'gyur na/ grang ba can gyi nad sel ba'i sman phul dag re btung ba'am/ de ru yang rul sum skyon spangs pa'o zhes nad gzhi'i rten mi byed pa btung ngo / /yang na bdud rtsi bsgrub pa bzhin btung zhes so//gang tshe bcom ldan rdo rje can/ /zhes pa nas/ de phyir nyon mongs spang bar bya'i bar du rtsa bar gsal bas ma bris so/ /khyad par thod pa'i phreng ba can/ /zhes pa dang po bla ma la/ dkyil 'khor me tog sngon por bcas/ /zhes pa dang po khyad par gye sdom pa blangs la 'phags pa gos sngon po can gyi sdom pa bsrung zhes pa'o//de nas khyad par gzhan dang mi 'dra ba'i thod spyi phud dang 'dra ba'i sdom pa bsrung zhes pa'o/ /thod ni bzang po ste/ des phyag rgya chen po'i lam la phreng ba dang phreng thag bzhin 'brel pas kyang phreng ba'o/ /dam tshig la phreng ba dang 'dra bar phreng zhes so//gos sngon po dang rak+Sha dang / /rus pa'i phreng ba blang bar bya/ /zhes pa la/ gos sngon po dang zer bas ngo tsha khrel yod gos/ stod g.yogs steng du gon pa ni gos sngon po'i rigs so/ /rak+Sha ni gnod sbyin skrag pa'i rgyan sbrul dang stag dang bya khyung gis mtshan pa la sogs pa khro bo'i rgyan bsam zhes so//rus pa'i phreng ba ni rin po che bai DUr+ya'i rgyan phrag pa g.yas la zar bu chags su bsam mo/ /yang phreng ba ni phreng ba ste shing kur rus byang chub sgrib sel gyi 'bras bu dang drag po la/ 'bor nye rus pa yang bgrang zhes te/rgyan gyi dam tshig go/ /dus kun du ni rang lha mchod/ /rtag tu bla ma mnyes par bya/ /rtag tu rang lha'i bsnyen pa bya/ /rtag tu rang gi dam tshig bsrung / /dus zhes pa ni dus kun du'o/ /lha mchod ni nyin mtshan du rang gi lhag pa'i lha la phyi nang dag dang bas mchod cing dang ba dang mos pas mnyes par bya ste/'jig rten pa'i lha la mi mchod ces so/ /rtag tu bla ma mnyes pa ni/ /dbang gi dus su yon gyis bla ma mnyes pa las dbang thob par bya ste/ phyis bla ma dang ma nyams par dam pa'i chos dang mthun pas bla ma mnyes par bya zhes pa'o//rang lha'i bsnyen pa bya ba ni/ sgrub pa dang las sbyor min par rgyun du rtsa sngags bzlas te/ sngags de ni sbyong zhing nus pa bskyed pa'o/ /des ni sku gsung thugs kyi byin nye ba'o/ /rtag tu rang gi dam tshig ni 'phags pa gos sngon po can dang 'brel pa'i dam tshig rnams te mi dge ba las log pa'i tha tshig go//rtag tu sngags kyi spyod pa brten/ /rtag tu chos kyi dam pa blang / /rtag tu khrus kyi cho ga bya/ /zhes pa la/ rtag tu sngags spyod pa ni zas dang / gtor ma dang khrus dang spyod lam gos dang ting nge 'dzin la sogs pa rnams dang nam du yang mi 'bral bar bsten zhes pa'o//rtag tu chos kyi dam pa blang ni 'bras bu gsang sngags kyi chos la chog ma shes par bri ba dang mnyan pa dang bsam pa ste/ /theg pa 'og ma pa'i don dang ma 'brel zhes pa'i don to/ /rtag tu khrus kyi cho ga bya ni phyi nang gi khrus stong pa nyid chen po dang /phyi lha zhu ba ste/ rigs lnga dang 'brel zhes pa'o/ /srog gcod pa'i sems can pas kun du rgyug par byed pa bla zhes pa la/ srog gcod pa dang gcod du stsal ba dang / yi rang ba'i las kyi las rnams kyis/ tsha ba dang tsha ba'i sems can rnams su skye ste/ phyis de ni mnar du mi 'dod pa'i phyir ro//sems can rnams la srog phongs shing srog gi zug rngu shin tu mi bzod pa'i phyir/ rgyu des na 'bras bu yang ngan song gsum du 'gro nges so/ /sdug bsngal yang spang du med de/ gtso bsreg dus gcig la myong ba'o/ /de nas dge ba'i nang na srog gi sbyin pa che zhes rgyal bas gsungs so//des na srog gcod pa'i sems can pas/ spang zhing zas tshol ba bla ste bzang zhes pa'o/ /de nas srog gcod pa'i las rnam smin che zhing che bas srog gcod pa spong ngo / /grong khyer 'jug dang gtor ma gtong //srog gi phyir yang mi gtong ngo / /zhes pa la/ grong khyer du 'jug ste rnyed pa'i phyir sbyin sreg dang gtor ma dang / gtsor chang dang brag btsong dang / rta rkyang sha la spyod pa dang bcas pa nga mkhas zhes zer ba ni/ chos zong du khyer te/ de ni ro myags me'i 'dam du skyes/ /zhes so/ / yang chos kyi mchog gi ye shes yod pa de rnams kyis ni grong khyer du gtor ma la sogs pas phan gdags pa'o/ /dam tshig rtag tu srung byed pa'i/ /rnal 'byor de la dngos grub 'byung / /dam tshig ni spyi dang khyad par gyi dam tshig ste de bsrungs na de la mchog gi dngos grub dang thun mong gi dngos grub ri lu la sogs pa 'grub ces so//dam tshig rnams ni rdo rje che/ /dam tshig gdug pa zil gyis gnon/ /dam tshig thub dka' gdug pa 'joms/ /de bas mkhas pa dus kun du/ /dngos grub rgyur 'gyur dam tshig bstan/ /zhes pa la/ dam tshig che ni dam tshig dang ldan na/nyon mongs rdo rje pha lam dang 'dra bar 'joms zhes pa'o/ /dam tshig bsrungs pa'i gang zag gis gdug pa las klu'i gdon la sogs te/ nad gzhi mi 'byung zhes pa'o/ /dka' thub dam tshig ni sdom pa gsum ldan ni shin tu dga' bas dka'o//bar du gcod pa'i bdud sel bas ring du mi gnas zhes pa'o/ /de bas na mkhas pas ni blang ba dang / bshags pa'i don shes pa'o/ /dngos grub 'grub pa'i rgyu dam tshig yin pas bsrung zhes pas gong ma rnams dang 'brel to/ /gang dag dam tshig med cing sbyor ba kun spangs pa//rtag tu dngos grub sbyor spangs sdug bsngal thams cad skyed/ /ces pa la/ gang dag dam tshig med pa ni/ /sdom pa gsum blangs nas mi srun pa ste nyams pa rnams so/ /sbyor ba kun spongs ni nyams na bshags pa la mi 'jug cing chos kyi spyod pa gzhan 'dor ba'o//rtag tu dngos grub sbyor spangs ni/ /dam tshig sbyor ba med na mchog thun mong gi dngos grub med ces/ bla ma dam tshig nyams pa'i chos zab pa dang dbang dang man ngag la sogs pas rang nyid kyang mi grol te/ sa bon nyams pa la myu gu sngon po mi 'byung ba'i phyir ro//gzhan yang nges par grol bar mi 'gyur te/ /gong gi rgyu nyams pas 'bras bu 'byin mi nus pa'i phyir ro/ /des na dam tshig nyams pa'i mi dang lung pa gcig gi chu la yang mi btung ste/ sdug bsngal thams cad bskyed pa'i rgyu dam tshig nyams pa yin pa'i phyir ro/ / 'gro ba'i sdug bsngal sel mdzad sangs rgyas rdo rje can/ /rtag tu thub byed sdom gnas rtag tu bde ba'i mchog /bla med lam mchog gsang chen de nyid spangs/ /zhes pa la/ 'gro ba ni rigs drug ste gcig nas gcig tu 'gro ba'i phyir ro/ /sdug bsngal ni gsum mam brgyad do/ / de sel ba ni sangs rgyas rdo rje can no/ /rtag tu thub byed ni/ shAkya thub pa'i bstan pa la/ de'i sdom pa gsum la ma gnas par lam gzhan med ces so/ /rtag tu bde ba'i mchog ni/ lam de la gnas pas/ rgyu dang 'bras bu dus gnyis bde/ /zhes pa'o/ /bla med lam ni 'bras bu lam du byed pa'i theg pa'o//gsang chen rnal 'byor chen po'i lam mo/ /de nyid spangs ba ni rdo rje 'chang gi ngo bo spangs pa yin pa'i phyir ro/ /mi gnas dngos grub med cing tsha grang sdug bsngal myong / /don nor smra ba nyams shing slob dpon bka' sogs bcag / spyi nas bla med blang zhing mkha' 'gros snying nas 'dres/ /zhes pa la mi gnas ni sdom pa dam tshig nyams pas dngos grub rnam gnyis med pa 'bras bu tsha grang gis sems can dmyal ba'i sdug bsngal myong zhes pa ste/ des na kyi hud bar med pa'i sdug bsngal 'di lta bu kyi hud e bzod thabs med pa'i tshe ring zhing thar ba'i thabs med na/de'i rgyu ni don na sdom pa nyams shing lta ba log rmig zlum sha la sogs pa 'phral du srog dang bral ba'i sha mi bza' ba dang / chang ni dug lnga bskyed pa'i rgyu yin pas/ nyon mongs pa kun nas slong ba'o/ / shes pa myos byed ni ma yin no/ /dug lnga la sogs pa g.yeng ba'i rgyu ma lus pa spangs la/ sems can ma lus pa la snying rje chen pos sgrub ces te/ snod las su ma rung ba'i gang zag gi rnam pa'o/ /smra ba nyams pa ni khas blangs na dkon mchog bslu ba yin pa'i phyir dang / gzhung bzhin ma byas pa'i phyir ro//slob dpon bka' sogs bcag pa ni/ bla ma'i ngag ma mnyan zhing gsungs pa las bla ma rgyab tu gshe shing nor dang rdzas la ma gnang bar longs spyad pa ni/ yi dags kyi sems can dmyal ba'o/ /bla ma'i khyad par grogs la spyad cing / bla ma la rgyab kyis phyogs na/spyi nas rkang pa sog le 'bar bas 'dra zhing / thar thabs med pa'i sdug bsngal myong ba ste/ rgyu 'bras so/ /tshe 'di la mkha' 'gros snying nas 'dren zhes pa'o/ /gang zag la la ni tshe 'di la grags pa snyan zhing bde zhing 'jig rten chos la dga' ba/ tshul 'chos g.yo can rnams snga ma'i bde ba'i las kyis 'dir bde zhes te/tshe 'di 'das nas sdug bsngal myong zhes so/ /gnod byed me dbal rtag tu dgra bzhin spang / /zhes te/ dam tshig nyams pa bsrung zhes pa'o/ /yid bzhin nor bu rang gi srog bzhin btsa'/ /srog dang 'dra ba'i dam tshig ces so//dang po blang bsrung nyams pa bshags par bya ste/ mkhas pa ni shes pa dang dad pa can no/ /gang zag des bde ba la gnas shing sdug bsngal spang / /zhes pa'o/ /bdag gis thabs 'di nas/ bde ba la gnas par shog gi bar rtsa ba na gsal zhing tshang bas ma bkrol lo/ / bdag gis 'grel 'di brtsams par mi rigs kyang / /sems can dman pa rnams la phan pa dang / /dam tshig nyes dmigs mthong bas su/ /sdom pa dag la gnas par 'gyur/ /rang nyid sdom pa la mos pas/ dad pa'i dbang gis 'grel 'di brtsams/ /ma legs nyes pa shor srid na//bla ma mkhas pa rnams la bzod par gsol/ /'phags pa gos sngon dngos grub nyid/ /bdag gis myur du thob gnas pas/ /ma lus myur du thob par shog /shes bya sgrib pa phra mo rtsad nas rnam gcod cing / /cung zhig de nyid rtsad nas ma chod kyang //rags dang phra ba'i rtog pa 'og mnan nas/ /drod dang rtse mo chos kyi phyag rgya dang / /gsang sngags zab mo dag gi lam la rab gnas nas/ /sdom pa gsum gyis lam gyi phyag rgya cher grol nas/ /sems can ma lus 'khor ba'i 'dam las 'don par shog / bdag gis 'grel 'di brtsams pa'i dge ba yis/ /ma lus sems can thams cad kun/ /mdze dang shu ba g.yan la sogs/ /nad kyi zug rngu rtsad nas 'byung ba dang / /'khor ba'i chu rgyun bskams nas kyang / /bdag dang mtha' yas sems can rnams/