CLOSE WINDOW

D2092
བོད་ཡིག

@##/ /rgya gar skad du/ nA ma saM gI ti br-it+ti nA ma ar+tha pra sa ka kA ra Na dI pa nA ma/ bod skad du/ mtshan yang dag par brjod pa'i 'grel pa mtshan don gsal bar byed pa'i sgron ma zhes bya ba/ 'jam dpal gzhon nur gyur pa la phyag 'tshal lo/ /zab cing rgya che'i sku mnga' ba'i/ /'jam pa'i dpal la phyag 'tshal te/ /skal ldan rnal 'byor gang zhig gis/ /rje btsun mtshan brjod rtogs bya'i phyir//bshad pa'i rgyud dang gdams ngag la/ /brten te 'bad pas bshad par bya/ /bshad tshul lnga yi sgo phye la/ /ji snyed rigs rnams drug bsdus te/ /phan yon bcas pa bshad pa yin/ /de la 'jam dpal ye shes sems dpa'i mtshan ji ltar yin pa rtogs par 'dod pa'i rnal 'byor pas dbang po rab 'bring gsum du 'gyur te/rab la bka' rgyud mdo'i bdag nyid can 'di'i mtshan bshad par bya/ 'bring la gzhung dbu zhabs kyi dbye ba bstan par bya//tha mal yi ge 'bru re re nas bstan par bya'o/ /de la dris lan gyi tshul du bshad pa dang / mtha' sdud gsum gyi tshul du bshad pa ni don gnas skabs su sbyar bar bya'o//de la dbang po rab mgo smos pas go ba rnams kyi don du rgyud kyi mtshan nyid bstan pa ni/ 'phags pa 'jam dpal gyi mtshan yang dag par brjod pa zhes pa 'dis bstan te/ de la 'phags pa ni gnyis te/ / brjod bya don gyi sgo nas 'phags pa dang / rjod byed tshig gi sgo nas 'phags pa'o/ /de yang ji ltar bsnams na rab dku la/ myangs na zhim pa'i sman bzhin du/ /chos kyang de bzhin gnyis su gnas/ /don dang yi ger shes par bya/ / zhes gsungs pa lta bu'o/ /de la brjod bya don gyi sgo nas 'phags pa ni/ rje btsun nyid la 'khor ba'i mtha' dang mya ngan las 'das pa'i mtha' gnyis las 'phags te/ mtha' gnyis la zhen pa ni sgrib pa med pa yin te/ 'di gnyis las/sgrib pa kun las nges par grol/ /mkha' ltar mnyam pa nyid la gnas/ /zhes 'byung ngo / /rjod byed tshig gi sgo nas 'phags pa ni thabs kyi theg pa 'di nyid yin te/ thabs mang ba dang thabs mkhas pa dang / thabs sla ba dang / thabs myur ba dang bzhis 'phags te/ de yang / don gcig na yang bye brag ni/ /thabs mang ba dang mkhas pa dang / /de bzhin sla dang myur ba yis/ /sngags kyi bstan pa khyad par 'phags/ /zhes 'byung ngo / /de la thabs mang ba ni gdul bya rnams kyi blo la ji ltar mos pa las ma bzlog par grol ba'i thabs mtha' yas par ston pa'o//de yang / nges 'byung kun gyi lam la gnas/ /zhes so/ /nyon mongs ma spangs kyang grol ba'i thabs shes pas thabs mkhas pa'o/ /de yang / mkhas pa chen po thabs che ba/ /zhes pa'o/ / sgo gsum dka' thub kyis ma gzir bar 'dod pa'i longs spyod la gnas bzhin du grol ba'i thabs ston pas thabs sla ba'o/ /de yang / longs spyod rdzogs sku kun gyi rgyal/ /zhes so/ /thabs kyi theg pa'i rigs can gyis thams cad gnyis med du rtogs pas/ tshe 'di nyid la byang chub 'grub pas thabs myur ba'o//de la 'jam dpal ni dbye na rnam pa lnga ste/ rang bzhin rgyu'i 'jam dpal dang / /sgom pa lam gyi 'jam dpal dang / /mthar thug 'bras bu'i 'jam dpal dang / /gdul bya las dag pa la snang ba'i 'jam dpal dang / rnam pa'i bdag nyid du snang ba'i 'jam dpal lo/ /de la rang bzhin rgyu'i 'jam dpal ni 'khor 'das kyi chos thams cad la chos nyid de bzhin nyid kyis khyab pa ste/'di nyid las/ mi 'gyur kun 'gro khyab pa po/ /phra zhing zag med sa bon bral/ /zhes 'byung ngo / /de la mtshan ma'i rnam par rtog pa'i zug rngu bral ba dang / rtogs na kun gyi dpal du gyur pas de skad ces bya'o//sgom pa lam gyi 'jam dpal ni bskyed rim dang rdzogs rim la sogs te/ lam gyi chos su gyur pa rnams yin te/ 'di nyid las/ nges 'byung kun gyi lam la gnas/ /zhes 'byung ngo / /de nyid kyi gnas skabs nas rtogs pa'i zug rngu rnams ni spangs la/ shas shig ni spong ba la zhugs pas 'jam la/de las bdag dang gzhan gyi don 'byung bas dpal lo/ /mthar thug 'bras bu'i 'jam dpal ni sku gsum ye shes lnga'i bdag nyid la bya ste/ 'di nyid las/ /mchog gi dang po sku gsum 'chang / /zhes 'byung ngo / /de la sku gsum ni thun mong gi dbang du byas na/ chos sku skye med nam mkha' lta bu la longs spyod rdzogs pa'i sku rnam par snang mdzad sprin lta bu 'byung ba de las sprul sku shAkya thub pa char lta bus 'gro ba'i don mdzad pa'o//khyad par gyi dbang du byas na/ rig pa rang bzhin gyis 'od gsal ba ni longs spyod rdzogs pa'i sku/ rig pa sna tshogs su 'char ba sprul pa'i sku/ ji ltar snang yang don skye mad las ma 'das pa chos kyi sku'o//de la ye shes lnga ni chos nyid skye 'gag med pa chos kyi dbyings kyi ye shes te/ de nyid gsal la rtog pa med pa me long lta bu'i ye shes/ de gnyis su dbyer med cing blang dor med pas mnyam pa nyid kyi ye shes/ /chos spyi dang rang gi mtshan nyid ma 'dres par gsal ba ni so sor rtog pa'i ye shes/bdag dang gzhan gyi don rtsol ba med par grub pas ni bya ba grub pa'i ye shes so/ /de yang 'di nyid las/ khyab bdag ye shes lnga yi bdag /ces 'byung ngo / /gdul bya las dag pa la snang ba'i 'jam dpal ni rnal 'byor pa'i ting nge 'dzin goms pa'i mthus lha'i sku'i zhal mthong ba'o//rnam pa'i bdag nyid du snang ba'i 'jam dpal ni sku'i gzugs brnyan du gyur pa ras bal la ri mo bris pa dang / zangs lcags la 'bur du btod pa de rnams so/ /gyi zhes pa ni 'brel pa'i yi ge ste/ ji skad du smos pa'i yon tan rnams dang /yon tan can rje btsun 'jam dpal du 'brel par ston te/ brgya byin gyi ba phra mo zhes bya ba lta bu'o/ /mtshan yang dag par brjod pa zhes pa/ mtshan ni 'og nas 'byung ba'i yon tan gyi chos rnams yin la/ yon tan de dag dang rje btsun nyid ldan la/ ldan pa kho na ltar brjod pa'o//tshul ji ltar brjod na gnyis te/ zab pa don gyi sgo nas brjod pa dang / rgya che ba tshig gi sgo nas brjod pa'o/ /don gyi sgo nas brjod pa ni don gnyis su med pa'i ye shes su gsal ba'o/ /tshig gi sgo nas brjod pa la gsum ste/ mtshan nyid gnyis su med pa'i tshul du brjod pa dang /gsang sngags kyi tshul du brjod pa dang / yon tan gyi tshul du brjod pa'o/ /de la mtshan nyid gnyis su med pa'i tshul du brjod pa ni rang gi sems kyi mtshan nyid gnyis su med pa'i ye shes su ngo shes par byas la mtshan brjod par bya ste/ brjod pa'i sgra de dag byung yang skye 'gag med pa'i ngang las byung la/thim yang de nyid du thim ste/ mdor na chos kyi rang sgrar shes par bya'o/ /'di nyid las/ gnyis med gnyis su med par ston/ /yang dag mtha' la rnam par gnas/ /zhes 'byung ngo / /mtshan sngags kyi tshul du brjod pa ni bdag nyid rje btsun 'jam dpal du bsgoms te mtshan brjod pas thugs ka'i muM las 'od zer 'phros pas 'phags pa mchod pa dang /sems can gyi don byas slar rang gi thugs kar thim/ yang snga ma ltar spro zhing bsdus te/ mtshan klag pa ma thon gyi bar du ci rigs su bya ba'o/ /de yang 'di nyid las/ gsang sngags tshul chen bdag nyid can/ /zhes 'byung ngo / /mtshan yon tan gyi tshul du brjod pa ni rje btsun 'jam dpal nyid la 'khor sangs rgyas dang /byang chub sems dpa' dang / nyan thos dang rang sangs rgyas dpag tu med pas bskor ba/ mdun gyi nam mkha' la spyan drangs la mtshan brjod par bya ste/ 'di yang khyod kyi yon tan yin zhes dmigs pa'o/ /de yang 'di nyid las/ de bzhin gshegs pa'i yon tan mtsho/ /zhes 'byung ngo / /de dag kyang bsdun don zab pa dang / tshig rgya che ba gnyis te/ 'di nyid las/ zab cing rgya che'i sgra sgrogs pa/ /zhes 'byung ngo / /da ni bar chad nye bar zhi bar bya ba'i phyir phyag btsal ba bstan pa ni/ 'jam dpal gzhon nur gyur pa la phyag 'tshal lo zhes smos te/phyag na rdo rjes shAkya thub pa la zhus nas/ glegs bam du sdud pa'i dus su/ slad du yi dam lha la phyag 'tshal ba yin te/ 'o na phyag na rdo rje la yang bar chad 'byung ngam zhe na/ ma yin te/ rjes 'jug gi don du dgongs pa'o/ /de yang 'jam dpal ni gong du bshad zin to/ / sku dus gsum du bgres rgud mi mnga' bas gzhon nu ste/ rtag tu da ltar 'byung ba lta bu'i tshul du bzhugs pa'o/ /la ni dkar ba'i yi ge ste 'jam dpal nyid la'o/ /phyag 'tshal lo zhes pa/ zab pa don rtogs pa'i phyag dang / rgya che lus ngag yid gsum gus pa'i tshul gyis phyag btsal ba'o/ / de la dbang po 'bring gi don du dbu zhabs kyi dbye ba bstan pa ni/ bshad pa'i rgyud kyi rjes su 'brangs nas le'u bcu bzhir ston pa las dang por zhus pa'i le'u bstan pa'i phyir/ /de nas dpal ldan rdo rje 'chang / /zhes pa la sogs pa smos te/ de nas zhes bya ba ni mtshams sbyor ba'i tshig yin te gong du rtsa ba'i rgyud le'u khri drug stong pa bshad pa'i rjes su mtshan yang dag par brjod pa man ngag gi snying po glur blangs pa'i le'u 'di zhus zhes pa'o//dpal ni rtogs pa bdag gi dpal/ /thugs rje gzhan gyi dpal gnyis dang / /phyag na rdo rje nyid ldan pa'o/ /rdo rje 'chang ba ni/ /nad na zab pa don gyi rdo rje ye shes lnga dbyer mi phyed par 'chang ngo //de yang / mi phyed rdo rje zhes brjod de/ /sems dpa' srid gsum gcig pu'o/ /zhes 'byung ngo / /don de lta bu dang ldan pa'i rtags su rgya che ba lcags kyi rdo rje rtse lnga pa bsnams pa'o/ /des mdzad pa'i phrin las ci mdzad ce na/gdul dka' 'dul ba rnams kyi mchog /dpa' bo 'jig rten gsum las rgyal/ /zhes smos te/ tshangs pa dang khyab 'jug la sogs te/ gdul dka' ba rnams 'dul ba la/ sangs rgyas thams cad 'dus nas ri rab kyi rtse mor phyag na rdo rje la dbang bskur bas mchog ces bya'o/ / rang 'jigs pa dang bral zhing gzhan gyi dpung 'joms pas dpa' la/ sa 'og gi bdag po ma hA de ba dang / sa stengs kyi bdag po khyab 'jug /sa bla'i bdag po tshangs pa dang gsum ni phyi rol pa'i sku gsung thugs kyi lha gsum yin la/ de gsum btul bas 'jig rten gsum las rgyal ba'o//de yang nang du nyon mongs pa gsum btul ba'i rtags so/ /de'i rigs dang rtags gang zhe na/ rdo rje dbang phyug gsang ba'i rgyal/ /zhes smos te/ rdo rje'i rigs yin pa dang / gsang sngags kyi sdud pa po rdo rje theg pa'i mnga' bdag tu gyur pas kyang rdo rje dbang phyug go/ /gsang ba'i dam tshig dang ldan zhing /nang gi nyon mongs pa dang gdug pa can rnams las rgyal bas rgyal zhes bya'o/ /de'i zhal ras ci 'dra zhe na/ pad+ma dkar po rgyas 'dra'i spyan/ /pad+ma rgyas pa'i zhal mnga' ba/ /zhes smos te/ pad+ma 'dam nas skyes kyang 'dam gyi skyon gyis ma gos pa dang 'dra bar/ phyag na rdo rje nyid shin tu khro khro 'dra yang nang na nyon mongs pa med pas dkar ba'o/ /spyan kun du zlum pas rgyas 'dra'i spyan no/ /de'i phyag mtshan ci 'dra zhe na/ /rang gi lag gi rdo rje mchog /yang dang yang du gsor byed pa/ /zhes smos te/ lag gi rdo rje de don gyi rtags su byung bas mchog go/ / yang dang yang du gsor byed pa ni/ bcom ldan 'das kyis chos kyi 'khor lo yang nas yang du skor cig par zhu ba 'bul ba'i brda yang yin/ thugs rje rgyun mi chad pas 'gro ba 'dren pa'i brda yang yin/ gdug pa can rgyun mi chad par 'dul ba'i brda yang yin/ nang na ye shes rgyun mi chad par mnga' ba'i brda yang yin//de yi grogs gang dang lhan cig tu zhus she na/ 'khor lag na rdo rje khro tshogs lnga brgya dang lhan cig tu zhus pa'i phyir/ /khro gnyer rim par ldan la sogs/ /lag na rdo rje mtha' yas pa/ /zhes smos te/ khro gnyer ni mche ba gtsigs pa dang / spyan bzlog pa dang / smin ma bsdus pa dang /'bri gu ta gyen du 'greng ba la sogs pa'o/ /khro tshogs de dag la yang yon tan dang mthu mtha' yas pa dag dang ldan pa'o/ /de dag gis phrin las ci mdzad ce na/ /dpa' bo gdul dka' 'dul ba po/ /zhes smos te/ gong du bshad pa dang 'dra'o/ /ci'i phyir gdul dka' zhe na/drag po btsan thabs kyis 'dul dgos pa'i phyir ro/ /de'i nyams ci 'dra zhe na/ 'jigs su rung dang dpa' byed can/ /zhes smos te/ khro bo'i cha byad dang ldan pa'o/ /de dag gi phyag mtshan ci zhe na/ /rdo rje rtse mo rab 'phro ba/ /rang gi lag gis gsor byed pa/ /zhes smos te/ rdo rje'i rtse mo las rdo rje phra mo byung nas gdug pa can 'dul ba'o//de dag kyang gtso bo'i rjes mthun du sbyong ba'o/ /de dag gi bsam pa'i khyad par ci zhe na/ /snying rje che dang shes rab dang / /thabs kyis 'gro don byed pa'i mchog /ces pa la sogs pa smos te/ 'gro ba rnams la snying rje chen po dang ldan pa ni rgya che ba'o//shes rab kyi chos rnam par 'byed pa ni zab pa'o/ /thabs de lta bus gzhan don byed pas na mchog go/ /yon tan gyi khyad par ji lta bus she na/ /dga' mgu rangs pa'i bsam pa can/ /zhes pa 'gro ba'i don byed pa la dga'/ /ston pa mthong ba na mgu/ chos bshad pas rjes su yi rang ba'i bsam pa yod pa'o//gzugs ci dang ldan pas sangs rgyas kyi phrin las byed ce na/ /khro bo'i lus kyi gzugs ldan pa/ /sangs rgyas phrin las byed pa'i mgon/ /lus btud rnams dang lhan cig tu/ /zhes smos te/ rgyan dang rang bzhin khro bor gnas shing mdzad pa bcu gnyis sam phrin las rnam pa bzhi'i sgo nas 'gro ba'i don mdzad la/khro bo de rnams kyis kyang bag med du ma yin te/ shin tu gus pa'i tshul gyis lus btud nas zhus pa'o/ /tshul lam thabs ji ltar zhus she na/ de bzhin gshegs pa bcom ldan 'das/ /rdzogs sangs rgyas la phyag 'tshal nas//thal mo sbyar bar byas nas ni/ /spyan sngar 'dug ste 'di skad gsol/ /zhes smos te/ de bzhin nyid du gshegs pa dang / /'gro ba'i don la gshegs shing bdud bzhi bcom/ legs pa'i yon tan drug dang ldan pa che ba'i yon tan thams cad rdzogs pa/ma rig pa'i sgrib pa sangs rgyas shing ye shes rgyas pa ste/ de yang ma rig gnyid ni sangs phyir dang / /shes bya la yang blo rgyas phyir/ /sangs rgyas pad+mo ltar sangs rgyas/ /zhes pa lta bu'o/ /de dag gis thal mo sbyar ba'i bar du rdo rje bcug nas/ mdun du tsog tsog por 'dug nas zhus pa'o//dgos ched ci'i don du zhus she na/ khyab bdag bdag la sman pa dang / /bdag don bdag la thugs brtse'i phyir/ /sgyu 'phrul dra ba'i mngon rdzogs pa'i/ /byang chub ci nas bdag thob mdzod/ /ces smos te/ brtan g.yo kun la khyab pas na khyab bdag ces ston pa la bos nas/'khor bdag cag rnams la sman pa dang / thugs brtse bar mdzad pas thabs dang shes rab khyad par can zung du 'brel pas sgyu 'phrul dra ba ste/ de'i sgo nas mngon par rdzogs par byang chub bdag gis thob par mdzod cig pa ste/ rang don gzhan don dang 'brel pa'o/ /'o na bdag gi don zhus pa de yin na/gzhan gyi don du zhus pa gang yin zhe na/ nyon mongs pas ni sems dkrugs shing / /mi shes 'dam du bying ba yi/ /sems can kun la sman pa dang / /bla med 'bras bu thob bya'i phyir/ /zhes smos te/ zhe sdang la sogs pa nyon mongs pas byang chub sems chu rnyogs pa lta bur dkrugs shing /de kho na nyid mi shes te/ glang po che 'dam du chud pa ltar sdug bsngal gyi rgya mtshor chud pa'i sems can kun la/ de las bzlog nas tshe 'dir sman par bya ba dang / tshe phyi ma la bla na med pa'i byang chub kyi 'bras bu thob par bya ba'i phyir yang bshad du gsol zhes bya ba'o//ston pa gang la zhus she na/ rdzogs pa'i sangs rgyas bcom ldan 'das/ /'gro ba'i bla ma ston pa po/ /zhes smos te/ rang dang gzhan gyi don thams cad rdzogs pa'i sangs rgyas bcom ldan 'das la zhus zhes pa'o/ /des 'gro ba rnams la chos ston par mdzad pa'o/ /ston pa des don mi mkhyen pa mi srid dam zhe na/dam tshig chen po de nyid mkhyen/ /zhes so/ /don rtogs pa las mi 'da' bas dam tshig chen po ste/ de nyid ji lta ba mkhyen pa'o/ /des gdul bya'i dbang po dang bsam pa mkhyen zhe na/ dbang po bsam pa mkhyen mchog gis/ /zhes smos te/ dbang po'i bye brag gang la gang mos mkhyen pa'o//'o na chos gang zhu zhe na/ bcom ldan 'das kyi ye shes sku/ /gtsug tor chen po'i tshig gi bdag /ye shes sku ste rang byung ba/ /'jam dpal ye shes sems dpa' yi/ /ming ni yang dag brjod pa'i mchog /ces smos te/ bcom ldan 'das kyi ye shes sku ni/me long ltar thams cad la gsal zhing 'char bas me long lta bu'i ye shes so/ /gtsug tor chen po ni chos thams cad mnyam pa nyid kun gyi spyi bo'i gtsug tu bkur ba'i 'os yin pas mnyam pa nyid kyi ye shes so/ /tshig gi bdag po ni chos spyi dang rang gi mtshan nyid ma 'dres par mkhyen pa'i sgo nas chos kyi tshig gsungs pa ste/so sor rtog pa'i ye shes so/ /ye shes sku ni 'gro ba'i bya ba grub par byed pa'i sku ste/ de yang ye shes las grub pa'i sku yin pas bya ba grub pa'i ye shes so/ /rang 'byung ba ni skye ba med pa chos kyi dbyings kyi ye shes so/ / 'jam dpal ye shes sems dpa' ni/ rtsa ba byang chub kyi sems te/ ye shes chen pos mnyam pa nyid la sems la thugs rjes 'gro ba'i don la sems pa'o/ /de'i rtags gzugs skur byung ba la yang de skad ces bya'o/ /tshig dang don gyi sgo nas de'i ming yang dag par brjod pa ni gzhan pas don che bas na mchog go//mdor na ye shes lnga byang chub sems dang drug ro gcig pa'i chos gcig zhus pa'o/ /'o na ming las don ma zhus sam zhe na/ /don zab don ni rgya che zhing / /don chen mtshungs med rab zhi ba/ /thog ma bar dang mthar dge ba/ / zhes smos te/ ci'i phyir na don zab ce na/ don chen po gsang sngags kyi don chos mnyam pa nyid yin pas kyang zab/ chos gang dang yang mtshungs pa med pas kyang zab/ spros pa'i mtshan ma rab tu zhi bas kyang zab/ dge ba gsum gyi rgya dang ldan pas kyang zab/ /dus gsum gyi sangs rgyas kyis gsungs pas kyang zab/rdo rje theg pa'i glu yin pas kyang zab/ de ltar brjod bya zab pas rjod byed kyang zab po/ /rgya che ba ni rnam sprul sna tshogs su snang ba'o/ /gang dang yang mi mnyam pas mtshungs pa med pa'o/ /spros pa'i mtha' thams cad rab tu zhi ba/ thog mar dge ba thos pa'i shes rab/ bar du dge ba bsam pa'i shes rab/ tha mar dge ba bsgom pa'i shes rab po/ /ci'i phyir zhe na/ nyon mongs pa rtsad nas 'byin pas dge ba'o/ /de sus gsungs she na/ 'das pa'i sangs rgyas rnams kyis gsungs/ /ma 'ongs rnams kyang gsung 'gyur la//da ltar byung ba rdzogs sangs rgyas/ /yang dang yang du gsungs pa gang / /zhes smos te/ rgyal ba shAkya thub pas ri bya rkang can du phyag na rdo rje la 'di gsungs pa'i dus su/ de'i byin gyi rlabs kyis byang phyogs kyi 'jig rten gyi khams pad+mo can zhes bya ba ni/ de bzhin gshegs pa pad+mo mchog ces bya bas kyang 'khor gyi byang chub sems dpa' rnams la 'di gsungs so//de bzhin du phyogs lnga por yang gsungs so/ /chos nyid kyi mkha' rnam par dag pas kyang sangs rgyas rdo rje 'chang gis 'khor gyi de bzhin gshegs pa la 'di gsungs so/ /dpal rnam par snang mdzad kyis kyang 'og min du 'khor byang chub sems dpa' rnams la 'di gsungs so//ri rab kyi rtser sprul sku 'khor los sgyur ba lta bus kyang sum cu rtsa gsum pa'i lha rnams la 'di gsungs so/ /dga' ldan gyi gnas su yang lha rnams la yang rgyal ba byams pas 'di gsungs so/ / der yang ma zad de rde'u dang shing bu dang nam mkha' la sogs pa la yang 'di'i sgra grag pa 'byung ngo / /de yang / sems dpa' mchog gi bstan pa ni/ /dbang sbyor ba dang rtogs pa dang / /mkha' dang gzugs ni thams cad dang / /nam mkha' las kyang grag par 'gyur/ /zhes bya ba 'byung ngo //de nyid rtsa ba'i rgyud khri drug stong par yang lan gcig bshad/ /phyis dga' ba spyod pa 'dir yang lan gcig bshad de/ shAkya thub pas lan gnyis bshad pa'o/ /sgyu 'phrul dra ba glur blangs pa'i don gang yin na/ /rgyud chen sgyu 'phrul dra ba las/ /rdo rje 'chang chen gsang sngags 'chang //dpag med rnams kyi bka' bzhin du/ /glu blangs gang lags bshad du gsol/ /zhes pa rtsa ba'i rgyud sgyu 'phrul dra ba la sogs par rdo rje 'chang gis kyang don dpag tu med pa rdo rje'i glu gsungs nas 'khor rnams dga' ba bskyed pa de bzhin du/ bdag cag la yang bshad du gsol zhes pa'o//zhus pa'i don de gzung bar khas blangs pa ni/ mgon po rdzogs sangs rgyas kun gyi/ /gsang 'dzin ci nas bdag 'gyur phyir/ /nges par 'byung ba'i bar du 'di/ /bdag gi bsam pa brtan pos gzung / /zhes smos te/ sangs rgyas kyis gsungs pa'i gsang sngags rnams 'dzin par gyur pa'i phyir nges par byang chub ma thob kyi bar du bdag gi bsam pa la the tshom ma med cing brjod pa med par gzung ngo zhes khas blangs pa'o//gzhan don du bshad par khas blangs pa ni/ nyon mongs ma lus bsal ba dang / /mi shes ma lus spangs pa'i phyir//bsam pa'i khyad par ji bzhin du/ /sems can rnams la bshad par 'tshal/ /zhes smos te/ bzung nas ci byed na/ sems can gyi nyon mongs pa ma lus bsal ba dang / de'i rgyu mi shes pa dang ma rig pa spang ba'i phyir bshad do/ /de yang bsam pa ji ltar mos pa'i khyad par shes par byas nas bshad kyi thun mong du ma yin no//lus ngag yid gsum gus pa'i tshul gyis zhus pa ni/ gsang dbang lag na rdo rje yis/ /de bzhin gshegs la de skad du/ /gsol nas thal mo sbyar byas te/ /lus btud nas ni spyan sngar 'dug /ces pa ni phyag na rdo rjes shAkya thub pa la thal mo sbyar/lus gus pa'i tshul gyis btud/ gdan pad+ma las 'phags nas gsol ba btab pa'o/ /da ni lan gsungs pa'i le'u bstan pa'i phyir/ de nas bcom ldan shAkya thub/ /rdzogs pa'i sangs rgyas rkang gnyis mchog /ces pa la sogs pa smos te/ sdud pa pos ston pa la zhus ma thag pa'i rjes de nas zhes bya bar mtshams sbyar ro//phung po dang / nyon mongs pa dang / lha'i bu dang / 'chi bdag gi bdud dang bzhi bcom la/ dpal dang grags dang ye shes dang / /dbang phyug dang ni gzugs bzang dang / /brtson 'grus phun sum tshogs pa dang ldan la/ rgyal po shAkya'i rigs su skyes pas kyang shAkya lus ngag yid gsum mi dge ba'i las la bsrung mi dgos par rang bzhin gyis thub pas thub ces bya'o//bdag dang gzhan gyi don thams cad rdzogs shing / sgrib pa thams cad sangs shing ye shes rgyas pa'o/ /mi dang lha rkang gnyis su gnas pa'i gtso bor gyur pas mchog go//yang na sku mchog tu gyur pas mtshan dang dpe byad kyis brgyan pa dang / gsung mchog tu gyur pas tshangs pa'i dbyangs lta bu/ thugs mchog tu gyur pas thams cad mkhyen pa'i ye shes dang / yon tan mchog tu gyur pas yid bzhin gyi nor bu rin po che ltar zad pa med pa dang /phrin las mchog tu gyur pas 'gro don la thogs pa med pa dang / de ltar mchog rnam pa lnga dang ldan pa'o/ /des tshul ji ltar bshad ce na/ nyid kyi zhal nas ljags bzang ba/ /ring zhing yangs pa brkyang mdzad de/ /zhes pa la sogs pa smos te/ shAkya thub pa de nyid kyi ljags de ni dam pa'i chos 'byung ba'i gnas yin pas bzang ba dang / ljags kyis mi dge ba'i chos mi gsung bas bzang ba'o/ /de'i mtshan nyid ni ring zhing zhal gyi nang du yangs pa'i ljags brkyang ba'o/ /de las ci mdzad ce na/ 'jig rten gsum po snang mdzad cing //bdud bzhi'i dgra rnams 'dul mdzad pa/ /sems can rnams kyi ngan song gsum/ /sbyong bar byed pa'i 'dzum bstan nas/ /zhes smos te/ spyir de bzhin gshegs pa la rang bzhin gyi 'od kyang yod de/ de yang lha rnams nga rgyal bskyungs pa'i phyir 'od kyis mog mog por byas pa lta bu dang /de bas kyang khyad par du ljags kyi rtse mo las 'od 'phros te/ dang por ri bya rkang can gsal bar byas/ de nas 'dod pa'i khams dang / gzugs kyi khams dang / gzugs med pa'i khams gsal bar byas/ 'od zer gyis bdud rnam pa bzhi yang btul/ 'od zer las khro tshogs spros te/khyad par du rgyud bshad pa la bar du gcod pa lha'i bu'i bdud btul/ 'od zer sems can la phog pas long bas gzugs mthong / 'on pas sgra thos/ lkugs pas smra shes/ dran pa nyams pa rnams dran pa gsal nas/ zha grum gyis 'gro shes/ ngan song gsum la phog pas sdug bsngal dang bral/ nyon mongs pa rnams sbyangs/ de nas 'khor rnams la 'dzum pa mdzad pa dang / ljags brkyang ba dang ljags las 'od zer bkye ba ni chos 'byung ba'i snga ltas gsum yin te/ me 'byung ba'i snga ltas su du ba lta bu'o/ /gsung gang gis gsungs she na/tshangs pa'i gsung ni snyan pa yis/ /'jig rten gsum po kun bkang nas/ /zhes smos te/ dper na tshangs pa gsung sgrogs kyi gsung ni snyan pa dang / che ba dang / phra ba dang / gsal ba dang / khugs 'byin pa dang / rgyun ring ba dang / lteng chags pa dang / mer chags pa dang / zag pa med pa'i bde ba rgyud la skye ba dang / shin tu thag ring yang rung / drung na 'dug pa ltar thos pa la sogs pa gsung gi yon tan dpag tu med pa dang ldan pa'o/ /'dir yang de dang 'dra'o/ /'jig rten gsum du gsungs kyang sems can rnams skad rigs mi mthun pas go 'am zhe na/las 'phro can gyis go bar 'gyur ro/ /'khor gang la gsungs she na/ lag na rdo rje stobs po che/ /gsang dbang la ni slar gsungs pa/ /zhes smos te/ phyag na rdo rje ni sangs rgyas stong rtsa gcig gi tha chungs yin pas/ sangs rgyas thams cad 'dus pas dbang bskur ba yin te//de yang nga ni khro bo gos sngon can/ /sangs rgyas thams cad 'dus pa'i sku/ /zhes pa lta bu'o/ /gsang mtshan du yang / lag na rdo rje stobs po che/ /zhes btags so/ /'o na 'di byin gyis brlabs pa'i bka' yin nam snyam pa la ma yin te/ dngos su gsungs pa'i bka' yin pas/gsang dbang la ni slar gsungs pa/ /zhes pa ste/ gsang ba'i dbang thob pas kyang gsang dbang / sku gsung thugs kyi gsang ba la dbang bskur bas kyang gsang dbang / gsang sngags kyi sdud pa po yin pas kyang gsang dbang / sngags kyi theg pa la mnga' mdzad pa'i phyir gsang dbang ngo //ston pas gong du glur blangs pa de phyag na rdo rje la yang slar gsungs pa'o/ /dgos pa ci'i don du gsungs she na/ /snying rje che dang ldan gyur pas/ /'gro la phan pa'i don du khyod/ /ces pa la sogs pa smos te/ snying rje chen po dang ldan pa khyod 'gro ba la 'di dang phyi mar phan pa'i don du khyod nga la 'dri ba la 'di bshad do zhes pa'o//gang gi mtshan nas brjod na don che zhe na/ ye shes lus can 'jam dpal gyi/ /ming brjod pas ni don che ba/ /dag par byed cing sdig sel ba/ /zhes smos te/ ye shes drug ro gcig pa'i lus can 'jam dpal nyid kyi ming nas brjod na don che pa'o//ci'i phyir don che zhe na/ bklags pa tsam gyis rang gi rgyud la yod pa'i sgrib pa thams cad dag par byed cing 'phral gyi sdig pa thams cad sel bar byed pas don che ba'o/ /'khor la nyon cig par bskul ba'i phyir/ nga las nyan par brtson pa ni//legs so dpal ldan rdo rje 'chang / /lag na rdo rje khyod legs so/ /gsang ba'i bdag po de phyir ngas/ /khyod la legs par bstan par bya/ /khyod ni rtse gcig yid kyis nyon/ /zhes smos te/ shAkya thub pa nga la khyod nyan pa ni legs so/ /ci'i phyir legs she na/ 'jam dpal gyis don dri ba'i phyir ro//gsang ba'i bdag po zhes sdud pa po la bos na/ ma 'ongs pa'i sems can rnams la phan par byed pa de'i phyir/ khyod la mtshan yang dag par brjod pa'i rigs drug gi bdag nyid can legs par bstan par bya yis/ khyod rtse gcig pa'i yid kyis nyon cig ces bskul ba'o//'o na phyag na rdo rje la yang bskul dgos sam zhe na/ de dgos pa ma yin te/ phyag na rdo rje la mtshan nas phyi rabs kyi rnal 'byor pa rnams la snod kyis ma zin pa dang / brjed pa dang / 'dres pa dang gsum spongs la nyon cig par gdams pa'o/ /de ltar gsungs pas 'khor rjes su yi rang ba ni//bcom ldan de ni legs zhes gsol/ /zhes smos pa yin te/ bcom ldan 'das bdag cag la 'jam dpal gyis chos gnang ba de ni legs so zhes pa'i don to/ /da ni rigs la gzigs pa'i le'u bstan pa'i phyir/ de nas bcom ldan shAkya thub/ /ces pa la sogs pa smos te/nyan par nges ma thag pa de nas bcom ldan 'das kyis gsungs zhes sbyar ro/ /gsang sngags rigs chen thams cad dang / /zhes pa 'dis ni rigs bsdus pa la gzigs pa bstan te/ gsang sngags 'di man+t+ra zhes pa'i sgras skyob pa la 'jug ste/ mdor na thabs dang shes rab khyad par can la bya'o//rigs las byung bas na rigs so/ /rigs 'dzin pas na rigs so/ /rigs thams cad kyi bdag por gyur cing / rigs thams cad 'dus pas na rigs chen no/ /bya ba dang spyod pa dang rnal 'byor gyi theg pa rnams bskyed pa'i gnas su gyur pas kyang de skad ces bya'o//'di'i dgos pa ni nyon mongs pa lnga cha mnyam du 'dul ba'i gnyen po ste/ mdor bstan gyi tshul lo/ /gsang sngags rig sngags 'chang ba'i rigs/ /zhes pa 'dis ni las kyi rigs la gzigs pa bstan te/ gsang sngags ni pho ste thabs so/ /rig sngags ni mo ste shes rab po//byed pa las ni gsang sngags kyis ni log par rtogs pa sel lo/ /rig sngags kyis ni ma rig pa sel to/ /de yang / 'da' bar bya ba ma yin la/ /dbye bar dka' ba gsang ba nyid/ /gsang ste bsgrub phyir sngags pa ni/ /gsang sngags zhes bya'i nges par brjod/ /ces pa dang /ngag gi rigs mchog bsgrub pa dang / /dngos grub 'dod pa yod pa ste/ de phyir rig sngags zhes bya'o/ /zhes gsungs pa lta bu'o/ /'chang ba ni 'dzin pa'o/ /'di'i dgos pa ni gdul bya phrag dog dang le lo shas che ba rnams 'dul ba'o/ /rigs gsum la ni rnam par gzigs/ / zhes pa 'dis ni de bzhin gshegs pa'i rigs la gzigs pa bstan te/ rigs gsum ni sku gsung thugs so/ /rigs de gsum rnam snang la 'dus pas de skad ces bya'o/ /'di'i dgos pa ni gti mug shas che ba rnams 'dul bar byed pa'o/ /'jig rten 'jig rten 'das pa'i rigs//zhes pa 'dis ni pad+ma'i rigs la gzigs pa bstan te/ so sor rtog pa'i ye shes kyis 'jig rten dang 'jig rten las 'das pa gnyis mkhyen te/ de yang gnyis su snang la gnyis su ma zhen pa'i tshul du mkhyen no/ /des na 'jig rten las 'das pa dang / 'jig rten pa gnyis ka'i rigs so//'di'i dgos pa ni 'dod chags shas che ba rnams 'dul bar byed do/ /'jig rten snang byed rigs chen dang / /zhes pa 'dis ni rdo rje'i rigs la gzigs pa bstan te/ 'jig rten gyi chos thams cad snang la rang bzhin med par me long gi gzugs brnyan ltar rtogs pas 'jig rten snang bar byed do//thams cad kyi thugs kyi ngo bor gyur pas rigs chen no/ /'di'i dgos pa ni zhe sdang shas che ba rnams 'dul bar byed do/ /phyag rgya chen po'i rigs mchog dang / /zhes pa 'dis ni rtsa ba byang chub kyi sems rdo rje'i rigs bstan te/phyag rgya la spyir du ma yod kyang 'dir rgyas 'debs pa'i phyir phyag rgya ste/ chos thams cad skye ba med pa'i rgyas 'debs pa'i mchog go/ /'di'i dgos pa ni spros pa'i mtshan ma thams cad 'joms par byed do/ /rigs chen gtsug tor cher gzigs nas/ zhes pa 'dis ni rin po che'i rigs la gzigs pa bstan te/ rin chen 'byung ldan ni sangs rgyas kyi che ba'i yon tan thams cad 'byung ba'i rigs yin pas rigs chen no/ /gtsug tor ni yon tan gyis mtho bar byas pa'o/ /de yang ming gi rnam grangs ni gzigs zhes bya/ ting nge 'dzin la snyoms par 'jug ces bya'o//de yang tshul ji ltar gzigs ni ye shes kyi spyan gyis zab pa stong pa nyid ji lta ba'i don la gzigs pa dang / thugs rje'i spyan gyis rgya che ba ji snyed pa la gzigs pa'o/ /yang gsum ste/ spang bya nyon mongs pa dang / de spong ba'i gnyen po lha'i rigs dang /lha'i rtog pa zlog par byed pa ye shes la gzigs pa rnams su yang sbyar ro/ /da ni sgyu 'phrul dra ba man ngag gi le'u bstan pa'i phyir thams cad la bstod pa/ tshig gi bdag pos tshigs su bcad/ /ces pa/ tshig gi bdag po ni bcom ldan 'das nyid do/ /tshigs su bcad pa ni rigs drug gi bdag nyid tsheg bar bdun pa nyid du tshigs su bcad de ston pa gsung gi mnga' bdag yin pas bdag po zhes kyang bya/rigs la gzigs pa thugs la rtogs nas/ tshig gi bdag pos tshigs su bcad ces bya'o/ /gsang sngags rgyal po drug ldan zhing / / zhes pa/ oM badzra tI k+Sh+Na la sogs pa ye shes sems dpa' drug gi sngags drug go/ /brjod bya'i gtso bo ji lta bu zhig gsungs she na/ gnyis su med par 'byung ba dang / /zhes pa la sogs pa ste/ gzung 'dzin gnyis med par ye shes kyi sku'i bdag nyid du sangs rgyas pa'o/ /mi skye chos can 'di gsungs pa//zhes pa/ rig pa rang gsal ba de yang skye med kyi rang bzhin du gnas pa ste 'bras bu'i mchog go/ /blo brod pa bskyed pa'i phyir 'bras bu'i sa bstan pa ni/ a A i I u U e o au oM aHde yang sangs rgyas kyis bcu gnyis la mtho dman dang rim pa yod pa ma yin te/ye shes gcig la yon tan gyi bye brag bcu gnyis su bstan pa'o/ /de yang sangs rgyas kyi mkhyen pa'i ye shes kyis ma rig pa bcom nas shes bya gsal bar snang ba dang / nyon mongs pa ma spang par ye shes su gsal ba dang / mtha' dang dbus med pa dang / mi 'gyur zhing dbyer mi phyed pa dang /sems can gyi dgos 'dod thams cad 'byung ba dang / 'gro ba'i don mdzad kyang skyon gyis ma gos pa dang / rtsol ba med par gzhan don 'grub pa dang / yang dag par dpe mtshon pa dang bral ba dang / phyogs 'dra tsam gyis mtshon du btub pa dang / rig pa rang bzhin gyis 'od gsal ba dang /shes bya ji lta ba dang ji snyed pa thams cad mkhyen pa dang / so so rang rig pa gnyis su mkhyen pa'o/ /de rnams su sangs rgyas kyi yon tan ji snyed cig gsungs pa thams cad 'dus par shes par bya'o/ /de yang 'di skad du rdo rje snying po rgyan gyi rgyud las//kun du 'od kyis chen po/ /de ni nyi ma'i dkyil 'khor 'dra/ /bdud rtsi 'od ni gnyis pa ste/ /shin tu 'od gsal zla ba 'dra/ /nam mkha' 'od ni gsum pa ste/ /nam mkha' ji bzhin rab tu gnas/ /rdo rje 'od ni bzhi pa ste/ /sa de nyid ni yid dga' ba'o/ /lnga pa rin chen 'od ces pa//dbang bskur ba la rab tu gnas/ /pad+ma'i 'od ni drug pa ste/ /pad+ma bzhin du rab tu gyes/ /bdun pa las ni 'od ces bya/ /sangs rgyas phrin las byed par 'dod/ /brgyad pa dpe med ces pa ste/ /don la dpe dang mnyam pa min/ /dpe ldan zhes pa dgu pa yin/ /thams cad dpe ni so sor 'bigs//bcu pa shes rab 'od ces pa/ /sangs rgyas sa ni bla na med/ /bcu gcig thams cad mkhyen pa nyid/ /sa chen rab tu 'od gsal ba/ /bcu gnyis so so rang rig pa/ /sangs rgyas ye shes rab tu rdzogs/ /zhes 'byung bas gsal lo/ / dus gsum gyi sangs rgyas thams cad kyi thugs kyi bdag nyid du 'jam dpal nyid bstan pa'i phyir s+thi to hr-i di ni zhes pa la sogs pa smos te/ s+thi to hr-i di ni thugs kar gnas pa'o/ /dz+nyA na mUrti ni ye shes kyi sku'o/ /ra haM bud+d+ho ni dus gsum gyi sangs rgyas so/ / bud+d+ha nan ni bdag nyid sangs rgyas yin no/ /t+r+yai d+h+ra brti nan ni dus gsum du bzhugs pa'o/ /mtha' bsdus pas ni dus gsum du bzhugs pa'i sangs rgyas kyi ye shes kyi sku'i bdag nyid thugs la gnas pa'i sangs rgyas yin zhes pa'o/ /de la shes rab kyi 'khor lo bsgom pa bstan pa ni/oM badzra tIk+Sh+Na ni rdo rje rnon po'o/ /duHkha ts+tshe da ni sdug bsngal gcod pa'o/ /pradz+nyA dz+nyA na mUrta ye ni ye shes kyi gtsug tor ro/ /dz+nyA na kA ya ni ye shes kyi sku can no/ /bA gI shwa ra ni ngag gi dbang phyug go/ /a ra pa tsa na ya te na maHni skye ba med pa'i shes rab chags pa med pa'i spyod yul zhes pa'o//de dag ni pad+ma dang / rdo rje dang / de bzhin gshegs pa dang / las dang rin po che dang / byang sems rdo rje'i rigs te/ go rims bzhin du sbyar bar bya'o/ /bsgom zhing sngags bzlas pa'i tshe na ni bdag nyid rje btsun du bsgoms pa'i thugs kar 'khor lo rtsibs drug mu khyud dang ldan pa la sngags drug po 'di bkod la spro bsdu bya zhing bzlas pa bya'o//mtshan brjod 'don pa'i dus su ni/ 'di rnams ming gi gtso bo rnams kyi sgo nas bstod pa yin par shes par bya'o/ /da ni rtsa ba byang chub sems kyi sgo nas 'jam dpal ye shes sems dpa'i le'u bstan pa ni/'di ltar sangs rgyas bcom ldan 'das/ /zhes bya ba la sogs pa smos te/ da ni de'i mtshan rgyas par bshad pa ni 'di ltar yin zhes bya'o/ /rdzogs pa'i sangs rgyas 'byung ba'i rgyu ni/ chos skye ba med pa bsgoms pa las 'byung bas/ /rdzogs pa'i sangs rgyas a las byung //zhes bya'o/ /'o na yi ge a gcig pu las byung ba ci yin zhe na/ a ni yig 'bru kun gyi mchog /ces pa'o/ /ci'i phyir mchog yin zhe na/ chos kyi don chen po ston pa'i yi ge yin pas/ /don chen yi ge dam pa yin/ /zhes pa'o/ /de yang ci'i phyir na don chen skye ba med pa'i don ston pas//khong nas 'byung ba skye ba med/ /ces bya ste/ yi ge gzhan ni so lce mchu dang yar rkan la sogs pa rnams la rag lus la/ a ni de rnams la rag ma lus te/ khong nas rang 'byung du 'byung bas yi ge rnams kyi nang na dam pa'o/ /de nyid la brjod du med par gnas pas//tshig tu brjod pa spangs pa ste/ /zhes bya'o/ /brjod pa'i sgra thams cad kyi rgyu'i gtso bor gyur te ngag thams cad la 'jug par byed pas/ brjod pa kun gyi rgyu yi mchog /tshig kun rab tu gsal bar byed/ /ces bya ba la sogs pa smos te/ 'o na nyon mongs pa ji ltar spang zhe na/mchod pa chen po 'dod chags che/ /sems can thams cad dga' bar byed/ /ces bya ba la sogs pa smos te/ de mchod pa ni lha mnyes par byed pa'i phyir na mchod pa ste/ 'dir nyon mongs pa ma spangs par ye shes su grub pa dgos pa mthun te rang gis mchod pa'o//de nas kun la sbyar ro/ /chen po'i sgra ni dper na dug sel ba'i sngags la dug sngags zer ba ltar mi mthun pa'i phyogs 'joms pas chen po'o/ /'dod chags ni nyon mongs mnyam pa nyid la dang gis chags pa'o/ /des log pa'i 'dod chags dang bral bar byed cing zag med kyi dga' ba skyed par byed pa'o//mchod pa chen po zhe sdang che/ /nyon mongs kun gyi dgra che ba/ /zhes pa rnam par rtog pa 'joms pa'i zhe sdang mnga' la/ zhe sdang rang kha ma 'joms pas dgra che ba'o/ /mchod pa chen po gti mug che/ /gti mug blo ste gti mug sel/ /zhes pa chos tha dad du byed pa med pa'i don gyi gti mug dang ldan pas des gti mug rang kha ma sel ba'o//mchod pa chen po khro ba che/ /khro ba chen po dgra che ba/ /zhes smos te/ nyon mongs pa skyer mi ster bas khro ba che la/ des khong khro rang kha ma 'joms pas dgra che ba'o/ /mchod pa chen po chags pa che//chags pa thams cad sel bar byed/ /ces pa don zag med kyi bde ba la chags la/ ser sna'i chags zhen rang kha ma sel bar byed do/ /de la gong ma gong ma ni 'joms byed/ 'og ma 'og ma ni gzhom bya'o/ /de dag la man ngag tu sbyar na rnam pa bzhi ste/nyon mongs pa de dag la zhen pa'i gdul bya la de dag ma spangs pa'i rjes su mthun pa'i spyod pa'i thabs kyis grol bar byed pas spyod mthun grol ba'i mchod pa'o/ /nyon mongs pa ye shes lngar gnas gyur pas gnas gyur ye shes kyi mchod pa'o/ /nyon mongs pa lnga las grol bas rigs lnga'i sku phyag rgya chen po thob pas grol thar phyag rgya'i mchod pa'o//nyon mongs pa la brtags na ngo bo grub pa med de chos nyid du gnas pas rang bzhin dag pa'i mchod pa'o/ /'dod pa chen po bde ba che/ /dga' ba chen po mgu ba che/ / zhes pa sems can thar par 'dod pa'i blo yod pa la thar pa'i bde ba skyed par byed cing chos bstan pas dga' la/ /don rtogs pas mgu bar byed pa'o/ /gzugs che lus kyang che ba ste/ /kha dog che zhing lus bong che/ /ming yang che zhing rgya che ba/ /dkyil 'khor chen po yangs pa yin//zhes snang la rang bzhin med pa'i gzugs dang / gdol pa can gyi lus lta bur yang sprul te/ de yang ye shes las grub pa yin pas che zhes bya'o/ /nang na ye shes gsal ba'i rtags su sku gzi mdangs dang ldan pas kha dog che ba'o/ /gzhan zil gyis gnon pas lus bong che ba'o//grags pa chen po yod pas ming che ba'o/ /bsod nams kyi tshogs rgyas pas rgya che ba'o/ /'dir zab pa dang rgya che ba gnyis su med pa dang / no pi ka mtha' dag 'byung bas dkyil 'khor chen po'o/ /kun la khyab pa dang gang yang bkag pa med pas yangs pa'o//de la ye shes kyi khyad par ni/ /shes rab mtshon chen 'chad ba ste/ /nyon mongs lcags kyu che ba'i mchog /grags chen snyan grags chen po ste/ /snang ba chen po gsal ba che/ /zhes smos te/ shes rab kyi mtshon gyis nyon mongs pa 'joms pa ste//dper na nyon mongs pa glang po che smyon pa la ye shes lcags kyus 'dul ba lta bu'o/ /de yang khams gsum du grags pa khyad par can yod pa dang / nang du ye shes gsal ba'i rtags su phyir 'od zer gsal bas bskor ba'o/ /de la sprul pa'i tshul ji ltar 'byung zhe na//mkhas pa sgyu 'phrul chen po 'chang / /sgyu 'phrul chen po don grub pa/ /sgyu 'phrul chen po dga' bas dga'/ /sgyu 'phrul chen po mig 'phrul can/ /zhes smos te/ 'gro ba la tshogs gnyis rdzogs par byed pa'i thabs la mkhas pa ste/ sgyu ma lta bu'i sprul pas 'gro ba'i don mdzad pa'i thabs kyis gang 'dod pa'i don 'grub par byed pa ste/de yang / sems ni sgyu ma'i rnam pa ste/ /byang chub kyang ni sgyu ma 'dra/ /dper na sgyu ma'i mkhan po 'gas/ /gyo mo la ni sngags bzlas te/ /sbyor ba goms pas bsnun na ni/ /rkang bzhi pa la sogs pa'i gzugs/ / zhen pa'i sems la snang bar 'gyur/ /zhes gsungs pa lta bu'o/ /thugs rjes 'gro ba'i don la dga' ba dang / shes rab kyis gnyis med kyi don la dga' ba'o/ /med pa 'phrul zhing yod pa bsgyur ba dang 'dra ste/ don zab mo ma rtogs pa rnams la mig 'phrul bstan nas dngos 'dzin zlog par byed do//des thun mong gi lam ji lta bu ston zhe na/ /sbyin bdag chen po gtso bo ste/ /tshul khrims chen po 'chang ba'i mchog /bzod chen 'chang ba brtan pa po/ /brtson 'grus chen po brtul ba yin/ /bsam gtan chen po'i ting 'dzin gnas/ /shes rab chen po lus 'chang ba//stobs po che la thabs che ba/ /smon lam ye shes rgya mtsho ste/ /zhes smos te/ 'khor gsum yongs su dag pa gtong bas sbyin pa'i gtso bo'o/ /nyes byas mi 'byung bas tshul khrims chen po'o/ /mtshan mas mi 'khrugs pas bzod pa brtan pa'o//rtogs pas ma gos pas brtson 'grus brtul ba'o/ /g.yeng ba'i sgra med pas bsam gtan chen po'o/ /gnyis med rtogs pas shes rab chen po'o/ /bdud kyi dpung 'joms pas stobs che ba'o/ /bdag dang gzhan grol bar byed pa'i thabs sna tshogs mnga' bas thabs che bar 'gyur ro//bdag dang gzhan grol bar byed pa'i smon lam mnga' bas dang / ji lta ba dang ji snyed pa mkhyen pa'i ye shes mnga' ba ste/ rgya che ba dang / snang la zhen pa med pa rgya mtsho dang 'dra'o/ /de ltar pha rol tu phyin pa bcu dang rje btsun ldan la/ gzhan la yang ston par mdzad do//byams chen rang bzhin dpag tu med/ /snying rje chen po blo yi mchog /ces pa 'gro ba la bu gcig pa'i ma bzhin du byams la/ de nyid lam zhen pas byams pa chen po'o/ /ris su che ba dang / res 'jog med pas dpag tu med do/ / 'gro ba la snying rje rgyun mi 'chad pas che ba'o/ /de nyid la'ang ma zhen pas blo'i mchog go/ /'o na tshad med pa bzhi yod pa la dga' ba dang btang snyoms ma smos pa ci yin zhe na/ de ni chos zlas dbye ba ste shugs la bstan to/ /thabs shes rab kyi khyad par ci zhe na/ shes rab chen po blo chen ldan//mkhas pa chen po thabs che ba/ /zhes smos te/ chos rab tu rnam par phye nas gnyis med rtogs pa'i shes rab chen po mnga' ba ste/ des 'gro ba'i don byed pa'i blo gros dang ldan pa'i sgo nas thabs kyi bya ba la mkhas te/ gdul bya'i bsam pa dang sbyar nas gang la ji ltar 'dul ba'i thabs sna tshogs ston pa'o//thabs dang shes rab ni khyab che ste/ lam dang 'bras bus bsdus pa yo la gnas so/ /'o na rdzu 'phrul gyi sgo ji lta bus don mdzad ce na/ rdzu 'phrul chen po'i stobs dang ldan/ /shugs chen mgyogs pa chen po ste/ /rdzu 'phrul chen po cher grags pa//stobs chen pha rol gnon pa po/ /zhes smos te/ stod nas me 'bar ba dang / smad nas chu 'brub pa dang / gcig du mar byed pa dang / du ma gcig tu byed pa dang / stong gsum phyag rgyar shong ba dang / phyag rgya stong gsum du sprul pa la sogs pa dang / tshur mi brdzi ba dang / gzhan phar 'joms pas stobs so//'gro ba'i don byed pa la yid ltar mgyogs pa'i shugs dang ldan zhing / nyan thos dang / rang rgyal dang / 'jig rten pa dang / byang chub sems dpa' rnams la cher grags so/ /ye shes kyi stobs kyis bdud bzhi zil gyis gnon pa ste che ba'o/ / de'i nus mthu dngos gang zhe na/ /srid pa'i ri bo chen po 'joms/ /mkhregs shing rdo rje chen po 'chang / /drag po chen po drag shul che/ /'jigs chen 'jigs par byed pa po/ /zhes smos te/ yang nas yang du 'gro ba drug tu skye bas srid pa'o/ /de ri bo ltar gzhom dka' bas/gnyis med rtogs pas 'joms par byed pa'o/ /de'i mtshan nyid mi 'gyur bas mkhregs la/ stong pa nyid rdo rje ltar dbyer mi phyed pa'o/ /de yang / /mi phyed mi chod mi shigs pas/ /stong pa nyid la rdo rjer bshad/ /ces pa lta bu'o/ /de yang don gyi sgo nas bag chags thams cad 'joms pas drag po che la rtags kyi sgo nas gdug pa can thams cad 'dul bar byed pa'i drag po'i gzugs su sprul pa'o//des gang 'jigs par byed na/ khyab 'jug dang / ma hA de ba la sogs pa 'jigs chen rnams rje btsun gyis 'jigs par byed pa'o/ /khyad par gyi lam gyi tshul gang zhe na//mgon po rigs mchog chen po ste/ /bla ma gsang sngags che ba'i mchog /theg pa chen po'i tshul la gnas/ /theg pa chen po'i tshul gyi mchog /ces smos te/ gdul bya'i mgon skyabs mdzad pa'i sku gsung thugs kyi lha'i rigs la mchog tu gyur cing 'gro ba la dam pa'i chos nye bar ston pas bla ma/thabs dang shes rab khyad par can ston pas gsang sngags che ba'i mchog go/ /de yang / /don gcig na yang ma rmongs dang / /thabs mang dka' ba med pa dang / /dbang po rnon po'i dbang byas pas/ /sa dang pha rol phyin pa'o//sngags kyi bstan pa khyad par 'phags/ /zhes gsungs pa lta bu'o/ /de yang theg pa chen po ni shes rab dang snying rjes khyad par du byas pa'o/ /skal ba can de la gzud pa'i phyir/ /rang nyid kyang de la gnas pa'i tshul ston na/ /theg pa chen po 'di'i tshul pha rol tu phyin pa las mchog tu gyur to//gang gis na 'khor 'das dbyer med du ston pa'o/ /da ni chos kyi dbyings kyi sgo nas 'jam dpal ye shes sems dpa'i mtshan bstan pa'i phyir/ sangs rgyas rnam par snang mdzad che/ /thub pa chen po thub chen ldan/ /gsang sngags tshul chen las byung ba//gsang sngags tshul chen bdag nyid can/ /zhes smos te/ sgrib pa sangs shing ye shes rgyas pas gdul bya la rnam pa sna tshogs su snang zhing / gzhan don mdzad pas che'o/ /sku gsung thugs kyi mi dge ba'i las la bsrung mi dgos par thub la de yang dus rtag tu mnyam pa la bzhag pas thub chen ldan no//bsam gyis mi khyab pa'i mthu ston pa dang / 'jig rten dang 'jig rten las 'das pa'i srog bskul bas na sngags so/ /de nyid rtogs dka' ba dang / gzhan la bstan pa ma yin pas/ gsang ba'o//tshul ni lam mo/ /de las sangs rgyas 'byung ba ste/ de ni khyad par gyi lam mo/ /rje btsun nyid gsang sngags kyi ngo bo nyid du bzhugs pas na bdag nyid can no/ /thun mong gi lam gang zhe na/ pha rol phyin bcu thob pa ste/ /pha rol phyin pa bcu la gnas/ /pha rol phyin bcu dag pa ste//pha rol phyin pa bcu yi tshul/ /zhes smos te/ pha rol tu phyin pa bcu la dbang thob cing / gzhan de la gzud pa'i phyir rang yang de la gnas pa'i tshul ston pa dang / de rnams lam zhen pa dang / de dag gi gzhung tshul la mkhas pa'o/ /mgon po sa bcu'i dbang phyug ste/ / sa bcu la ni gnas pa po/ /zhes pas ni yon tan 'phel ba'i rten byed pas shes rab dang ting nge 'dzin las zhes bya ste/ de yang 'jig rten las 'das pa'i sems thob pas sa dang po rab tu dga' ba'o/ /tshul khrims 'chal ba'i dri ma dang bral bas gnyis pa dri ma med pa'o/ / mchog tu gsal ba'i shes rab thob pas gsum pa 'od byed pa'o/ /byang chub kyi phyogs dang mthun pa'i chos kyi 'od 'phro bas bzhi pa 'od 'phro ba'o/ /bsam gtan dang 'gro don mdzad pa gnyis 'joms pas rang gi rgyud sbyang bar dka' bar mdzad pas lnga pa sbyang dka' ba'o/ / mtshan ma med pa'i ting nge 'dzin mngon du gyur pas drug pa mngon du gyur pa'o/ /mtshan ma las ring du song bas na bdun pa ring du song ba'o/ /ting nge 'dzin de la mtshan ma gang gis kyang mi g.yo bar gnas pas brgyad pa mi g.yo ba'o/ /gdul bya rnams la chos ston pa'i blo gros chen po dang ldan pas dgu pa legs pa'i blo gros so//chos kyi char gyis gdul bya'i chos kyi lo tog smin par byed pa'i yon tan gyi sprin chen po dang ldan pas bcu pa chos kyi sprin gyi sa zhes bya'o/ /sa bcu la dbang bsgyur zhing gzhan la 'chad pa dang / gzhan de la gzud par bya ba'i phyir/de la gnas pa'i tshul ston pa'o/ /der yang ma zad de che ba'i yon tan du mar snang ba'i phyir/ /shes bcu rnam dag bdag nyid can/ /zhes bya ba la sogs pa smos te/ shes pa bcu ni chos shes pa dang / rjes su 'gro ba shes pa dang / pha rol gyi sems shes pa dang / kun rdzob shes pa dang / sdug bsngal shes pa dang / kun 'byung shes pa dang / 'gog pa shes pa dang / lam shes pa dang / zad pa shes pa dang / mi skye ba shes pa dang / shes pa bcu po de rang bzhin med par shes pas rnam dag go/ /de rnams gzhan la ston pas shes bcu rnam dag 'chang ba po zhes bya'o//rnam pa bcu po don bcu'i don/ /zhes pa rnam pa bcu ni 'khor ba'i chos phung po lnga dang / nyon mongs pa lnga ste bcu'o/ /'khor ba'i chos thams cad bsdus na der 'dus so/ /de dag rnam par dag pas don bcu ste/ rigs lnga ye shes lnga ste bcu'o/ /de bcu ni don du gnyer bar bya ba'i 'os yin pas don zhes bya'o//thub dbang stobs bcu khyab pa'i bdag /ces pa thub pa ni rgyal ba rnams so/ /de rnams kyi gtso bor gyur pas thub dbang ngo / /stobs bcu ni gnas dang gnas ma yin pa mkhyen pa'i stobs dang / las dang 'bras bu mkhyen pa'i stobs dang /khams rnams ji lta ba bzhin du mkhyen pa'i stobs dang / lam sna tshogs pa mkhyen pa'i stobs dang / pha rol gyi mos pa sna tshogs mkhyen pa'i stobs dang / dbang po mchog dang mchog ma yin pa mkhyen pa'i stobs dang / kun nas nyon mongs pa dang rnam par byang ba mkhyen pa'i stobs dang /sngon gyi gnas rjes su dran pa mkhyen pa'i stobs dang / skye ba dang 'chi 'pho mkhyen pa'i stobs dang / zag bcas dang zag med mkhyen pa'i stobs so/ /de yang thugs rje chen pos kun la khyab pa'i bdag nyid du zhugs pa'o/ /thugs rjes khyab pa tsam ma yin te/gdul bya ma lus pa'i don ji ltar 'tsham par mdzad pas/ /kun gyi don ni ma lus byed/ /ces pa smos pa yin no/ /rnam bcu dbang ldan che ba po/ /zhes pa rje btsun nyid dbang bcu'i yon tan dang ldan te/ tshe la dbang ba dang / sems dang / yo byad dang /las dang / skye ba dang / rdzu 'phrul dang / mos pa dang / smon lam dang / ye shes dang / chos la dbang ba'o/ /de ltar na mtshan ma can gyi skyon du mi 'gyur ram zhe na/ thog ma med pa spros med bdag /de bzhin nyid dag dag pa'i bdag /ces smos te/ chos nyid la thog mtha' med pa la brtags pas mtha' thams cad dang bral bas spros pa med pa'o/ /'gyur ba med pas de bzhin nyid do/ /gzung 'dzin gyi dri ma med pas dag pa'i bdag go/ /de ltar na gzhan gyi don la ji ltar 'dug ce na/ /bden par smra zhing tshig mi 'gyur/ / ji skad smras pa de bzhin byed/ /gnyis med gnyis su med par ston/ /gzhan mi slu bar don dang mthun par smra bas bden par smra la/ gzhan don byed par dam bcas pa kho na bzhin du mdzad pas tshig mi 'gyur ba'o/ /chos thams cad sgyu ma'am rmi lam lta bu yin no zhes smra ba kho na bzhin du rang yang spyod par byed do//rjes su mthun pas gzhan mos pa bskyed pa'i phyir ro/ /de mi mthun pa'i phyogs zil gyis gnon par bstan pa ni/ /yang dag mtha' la rnam par gnas/ /bdag med seng ge'i sgra dang ldan/ /mu stegs ri dgas ngan 'jigs byed/ / kun du 'gro ba'i don yod stobs/ /de bzhin gshegs pa'i yid ltar mgyogs/ /zhes smos te/ yang dag pa'i mtha' gnyis med la gnas nas/ bdag dang bdag gir mngon par zhen pa med pa'i chos kyi sgra 'jigs pa med par sgrogs par byed pa/ seng ge'i sgra lta bu lta ba log pa bdag tu rtog cing /nad pa la smod pa'i ri dwags lta bu ngan pa 'jigs shing skrag par byed cing 'gro ba kun gyi don skyes bu'i stobs ltar ji ltar yang snang nas mdzad do/ /de yang 'gro ba'i don la de ka bzhin du gshegs te/ myur bar mdzad pa'i dpe ni yid lta bu'o/ / de la sku'i yon tan ji ltar snang na/ rgyal ba rnam rgyal dgra las rgyal/ /'khor los sgyur ba stobs po che/ /tshogs kyi slob dpon tshogs kyi mchog /tshogs rje tshogs bdag dbang dang ldan/ /mthu chen gces par 'dzin pa ste/ /tshul chen gzhan gyi dring mi 'jog /ces te/ yon tan gyi bgo skal gyis ma pham pas rgyal ba dang / rnam par rtog pa las rgyal ba dang / dgra bdud bzhi las rgyal ba ste/ 'jig rten pa'i 'khor los sgyur ba'i rgyal po ltar sprul nas 'gro ba'i don mdzad pas kyang 'khor los sgyur ba'o/ /chos kyi 'khor lo bskor bas 'gro ba rnams kyi kha lo sgyur bas kyang 'khor los sgyur ba'o//dkyil 'khor gyi gtso bo mdzad pas kyang 'khor los sgyur ba'o/ /gzhan gyi dpung 'joms pas kyang stobs che ba'o/ /de yang nyan thos kyi tshogs kyi slob dpon mdzad cing / rang rgyal ba 'dren pas na tshogs kyi mchog go//byang chub sems dpa'i tshogs kyi rje bo mdzad cing / de bzhin gshegs pa tshogs kyi bdag po mdzad/ de rnams la dbang bsgyur ba'i mthu dang ldan pa'o/ /der yang ma zad de gzung 'dzin 'joms pa'i mthu chen po mnga' bas shin tu gces pa'i chos ni gnyis med yin pas de 'chang bas 'dzin pa'o//des na lam bgrod du med pas/ gzhan gyis bkri mi dgos pa ste/ des na gzhan gyi dring mi 'jog pa'o/ /de la gsung gi yon tan ji lta bu 'byung zhe na/ /tshig rje tshig bdag smra mkhas pa/ /tshig la dbang ba tshig mtha' yas/ /tshig bden bden par smra ba ste//bden pa bzhi ni ston pa po/ /zhes smos te/ 'dis ni so so yang dag par rig pa bzhi bstan te/ tshig rje ni don so so yang dag par rig pa'o/ /tshig bdag ni nges pa'i tshig so so yang dag par rig pa'o/ /smra ba mkhas pa ni chos so so yang dag par rig pa'o/ /tshig la dbang ba ni spobs pa so so yang dag par rig pa'o//sgra skad sna tshogs kyis don mdzad pas tshig mtha' yas so/ /mi slu ba'i chos gsungs pas tshig bden la/ de yang kun rdzob dang don dam pa gnyis su phye nas smra ba dang / sdug bsngal dang / kun 'byung dang / 'gog pa dang / lam ste/ de ltar bden pa bzhi phye nas kyang ston par mdzad do/ /nges par 'byung ba'i chos su ji ltar snang zhe na/ /phyir mi ldog pa phyir mi 'ong / /'dren pa rang rgyal bse ru'i tshul/ /nges 'byung sna tshogs las 'byung ba/ /'byung ba chen po rgyu gcig po/ /dge slong dgra bcom zag pa zad//'dod chags bral ba dbang po thul/ /bde ba rnyed pa 'jigs med thob/ /ces smos te/ spyir bzod pa thob nas ngan song du mi ldog /sa dang po thob nas 'khor bar mi ldog /sa brgyad pa non nas theg dman du mi ldog ste/ de phyin chad rdzogs pa'i byang chub las phyir mi ldog ste/'khor bar mi 'ong ngo / /'gro ba'i don du sprul pa ni ma gtogs so/ /de la 'dren pa rang rgyal ni ne tsho ltar tshogs na spyod pa'o/ /bse ru ni bse ru ltar gcig pur gnas pa'o/ /rje btsun der yang sprul lo/ /der yang ma zad de theg pa sna tshogs kyi sgo nas gang la gang gis 'dul ba dang /khams gsum las nges par 'byung ba'i lan sna tshogs ston par mdzad cing / 'byung ba chen po lngar snang nas kyang don mdzad de/ de dag gi rgyu ni gnyis su med pa'i ye shes so/ /de yang dge ba lam du slong zhing / nyon mongs pa'i dgra 'joms pas srid par skye ba'i zag pa zad do//'dod chags la sogs pa nyon mongs pa dang bral bas spyod yul gyis mi gos te/ mig la sogs yul lnga la mi chags par shar bas/ 'khor ba'i g.yang sas 'jigs par mi 'gyur ro/ /de 'chad pa po'i tshul ci 'dra zhe na/ /bsil bar gyur bas rnyog pa med//rig pa dang ni rkang par ldan/ /bde gshegs 'jig rten rig pa'i mchog /bdag gir mi 'dzin ngar mi 'dzin/ /bden pa gnyis kyi tshul la gnas/ /'khor ba'i pha rol mthar son pa/ /bya ba byas pa skam sar gnas/ /ye shes 'ba' zhig las 'byung ba/ /zhes smos te/bsil ba chu lta bu'i chos nyid kyis nyon mongs pa'i gdung ba sel zhing / glo bur gyi rnam par rtog pa dri ma chu'i rnyog ma lta bu dang bral te/ mig dang 'dra ba'i lta ba rig pa dang / rkang pa dang 'dra bar spyod pa zung 'brel du ldan pas 'khor ba'i sdug bsngal dang bral bas bde bar gshegs pa la sems can gyi las 'phro dang /mos pa dang snod du rung mi rung dang / 'dul ba'i dus la bab ma bab mkhyen pas nyan thos dang / rang rgyal las khyad par du 'phags pas 'jig rten rig pa'i mchog go/ /mngon sum du snang ba 'di sgyu ma lta bur mkhyen pas phyi yul la bdag gir mi 'dzin la/nang sems la ngar mi 'dzin te/ rang don dang gzhan don gyi dbang gis bden pa gnyis kyi tshul la gnas par byed do/ /'o na 'khor bar mi 'gyur ram zhe na/ /'khor ba'i pha rol mthar son te/ /bya ba byas nas stobs dang ldan pas 'dam nas 'thon pa ltar 'khor ba'i 'dam nas 'thon te byang chub kyi skam sa la gnas pa'o//de'i rgyu ni gnyis su med par rtogs pa'i ye shes 'ba' zhig la gzugs sku gnyis 'byung ba'o/ /des bstan pa'i chos gang zhe na/ /shes rab mtshon chen rnam 'joms pa/ /dam chos chos rgyal gsal bar ldan/ /'jig rten snang bar byed pa'i mchog /ces bya ba la sogs pa smos te/ shes rab mtshon lta bus nyon mongs pa 'joms pa'o/ /dam pa'i chos rgyal po lta bu thugs la gsal bar ldan pas 'jig rten pa la ye shes snang bar byed pa'o/ /don phra mo tsam ma yin te thar pa la sbyor ba'i mchog go/ /des gzhan don 'byung ba'i tshul ni/chos kyi dbang phyug chos kyi rgyal/ /legs pa'i lam ni ston pa po/ /don grub bsam pa grub pa ste/ /zhes smos te/ chos kyi phung po brgyad khri bzhi stong la rje btsun nyid dbang sgyur bas chos kyi dbang phyug go/ /des gdul bya rnams nyon mongs pa las rgyal bar byas nas phyin ci ma log par legs pa'i lam ji ltar 'tsham par bstan te/sems can gyi don dang bsam pa grub par byed pa'o/ /'o na rje btsun nyid rtog bcas su mi 'gyur ram zhe na/ /kun du rtog pa thams cad spangs/ /rnam par mi rtog dbyings mi zad/ /chos dbyings dam pa zad mi shes//zhes smos te/ gzhan don mdzad kyang rtog pa med de/ /yang dag pa'i ye shes dang log rtog 'gal ba'i phyir ro/ /rnam par mi rtog kyang dbyings las yon tan zad pa med par 'byung ste/ yon tan gyi 'byung khungs chos kyi dbyings la zad mi shes pa'o/ /de tshogs ji ltar rdzogs she na//bsod nams ldan pa bsod nams tshogs/ /ye shes ye shes khyad par che/ /ye shes ldan pa yod med shes/ /tshogs gnyis tshogs ni bsags pa'o/ /zhes smos te/ rje btsun nyid ye nas bsod nams kyi tshogs dang ldan la/ gzhan de la gzhug pa'i phyir nyid kyang tshogs sogs pa'i tshul ston pa'o//ye shes kyi tshogs dang yang ldan te/ de yang nyan thos dang rang rgyal ba'i ye shes las kyang / byang chub sems dpa'i ye shes khyad par che ste/ de las kyang khyad par du gyur pa de bzhin gshegs pa'i ye shes dang ldan pas/yod pa zhes bya ba ji snyed pa dang / med pa zhes bya ba ji lta ba shes pa ste/ de ltar tshogs gnyis rdzogs pas ni tshogs bsags pa las 'byung bar bstan pa'o/ /tshogs bsags pa las sangs rgyas kyi sku ji ltar 'byung zhe na/ /rtag pa kun rgyal rnal 'byor can/ /bsam gtan bsam bya blo ldan mchog /so sor rang rig spyod yul ba/ /mchog gi dang po sku gsum 'chang / /zhes pa la sogs pa smros te/ don dam chos kyi sku mi 'gyur ba de rnam rtog gi sgra las rgyal zhing / thabs dang shes rab zung du 'brel bas rnal 'byor te/ de yang 'di skad du/ thabs dang shes rab snyoms 'jug pa/ /rnal 'byor zhes su brjod pa yin/ /zhes gsungs pa lta bu'o/ /rnam par mi rtog pa'i snying po la rnam par rtog pa mi g.yo bas bsam gtan/ de sangs rgyas don du gnyer ba rnams kyis bsam par bya ba'i 'os yin pas bsam bya/ /gnyis med rtogs pas blo dang ldan pa'i mchog go//de yang mkhyen tshad ni/ chos spyi dang rang gi mtshan nyid ma 'dres par so sor rang gis rig pa'o/ /de la ma zhen pa ni mi g.yo ba'o/ /de lta bu ni sku thams cad kyi mchog tu gyur pa ste/ sku'i bye brag gzhan 'byung ba'i dngos po la de thob dgos pas dang po//de'i yon tan gyi khyad par sku gsum du snang ba'o/ /de las sku dang ye shes kyi bye brag ji ltar 'byung zhe na/ /sangs rgyas sku lnga'i bdag nyid can// khyab bdag ye shes lnga yi bdag /sangs rgyas lnga bdag cod pan can/ /spyan lnga chags pa med pa 'chang / /sangs rgyas thams cad skyed pa po//sangs rgyas sras po dam pa'i mchog /ces smos te/ sku lnga ni chos kyi sku dang / longs spyod rdzogs pa'i sku dang / sprul pa'i sku dang / rdo rje lta bu'i sku dang / mngon par byang chub pa'i sku'o/ /khyab bdag ni chos kyi dbyings kyis snod bcud kun la khyab pa'o/ / ye shes lnga ni slad du bshad zin to/ /sangs rgyas lnga ni rnam par snang mdzad la sogs pa lnga'o/ /ye shes lnga las sangs rgyas lngas brgyan pa cod pan can zhes bya'o/ /spyan lnga ni sha'i spyan dang / lha'i spyan dang / shes rab kyi spyan dang / chos kyi spyan dang / sangs rgyas kyi spyan no/ /de rnams la thogs chags med pas mnga' ba'o//byang chub kyi sems de kho na nyid rtogs nas sangs rgyas thams cad skyed pa'i yum du 'gyur zhing / sa la gnas pa'i byang chub sems dpa' rnams ni sangs rgyas kyi sras so/ /'o na nyan thos rnams sras dam pa min pa ci'i phyir zhe na/ dper na/ 'khor los sgyur ba'i rgyal po la sras stong yod kyang / mtshan dang ldan pa gcig sras kyi dam par 'dzin pa de bzhin du/ nyan thos dang rang rgyal shes rab dang snying rje chung bas sangs rgyas kyi rigs 'dzin cing mdzad pa sgrub mi nus pas sras kyi dam pa ma yin no/ /byang chub sems dpa' ni snying rje dang shes rab che bas sangs rgyas kyi rigs 'dzin cing mdzad pa sgrub pas sras po dam pa'o//gnas skabs su byang chub sems dpa'i gzugs su rje btsun nyid bzhugs nas 'gro ba'i don mdzad pas de skad ces bya'o/ /de'i mdzad pa ci zhe na/ shes pa srid 'byung skye gnas med/ /chos las byung ba srid pa sel//gcig tu sra mkhregs rdo rje'i bdag /skyes ma thag tu 'gro ba'i bdag /ces smos te/ de kho na shes pas srid pa las 'byung ste/ 'khor bar skye ba'i gnas med do/ /chos kyi sku rtogs pa las ye shes 'byung ste/ de srid pa'i rgyu las dang nyon mongs pa sel lo//gang gis sel na ye shes drug ro gcig pa/ gnyen po med pa/ dbyer med pa des sel lo/ /dus nam sel na skyes ma thag tu'o/ /ye shes lnga'i tshul gyis gzhan gyis ma rig pa ji ltar sel na/ /nam mkha' las byung rang byung ba/ /shes rab ye shes me'o che/ /'od chen rnam par snang bar byed//ye shes skar ma lam me ba/ /'gro ba'i mar me ye shes sgron/ /zhes smos te/ chos kyi dbyings nam mkha' dang 'dra ba las yon tan 'gag pa med pa 'byung bas chos kyi dbyings kyi ye shes so/ /de'i don shes rab dam pa rtogs te/ gsal la rtog pa med pa'i ye shes kyi mes 'joms te/me yis rtsi sbur bsreg pa lta bu ni me long lta bu'i ye shes so/ /chos thams cad mnyam par rtogs pa'i ye shes kyi 'od chen po 'bar bas gdul bya la che ba'i yon tan sna tshogs snang bar byed pas mnyam pa nyid kyi ye shes so/ /so sor rtog/ pa'i ye shes sprin med pa'i nam mkha' la skar ma'i tshogs ma 'dres par gsal ba ltar chos thams cad kyi mtshan nyid ma 'dres par rtogs pas so sor rtog pa'i ye shes so/ /bya ba grub pa'i ye shes mar me lta bus 'gro ba'i ma rig pa'i mun pa sel zhing / 'dod pa'i don yongs su rdzogs par mdzad pas bya ba grub pa'i ye shes so//khyad par gsang sngags kyi sgo nas bstan pa'i phyir/ /gzi brjid chen po 'od gsal ba/ /sngags mchog mnga' bdag rig sngags rgyal/ /gsang sngags rgyal bo don chen byed/ /gtsug tor chen po rmad byung gtsug /ces smos te/ gzhan zil gyis gnon pa'i gzi brjid kyi phung po chen po mnga' zhing / nang na ye shes lnga gsal ba'i rtags su phyi rol du 'od kha dog lnga gsal ba'o/ /sngags kyi mchog tu gyur pas gsang sngags rig sngags yin la de'i mnga' bdag go/ /rig sngags kyi rgyal po ni shes rab dang ye shes yin la/gsang sngags kyi rgyal po ni thabs dang shes rab khyad par can yin pas/ skal ba dang skal bar ldan pa la de gnyis kyi sgo nas don byed pa'o/ /de ni rmad du byung ba'i chos yin pas gtsug tor ltar kun gyi spyi gtsug tu bkur bar 'os pa'o/ /de tsam du ma zad de 'khrul ba sna tshogs su 'byung ba ni/nam mkha'i bdag po sna tshogs ston/ /sangs rgyas kun gyi sku yi mchog /'gro kun dga' ba'i mig dang ldan/ /sna tshogs gzugs can skyed pa po/ /zhes smos te/ zab pa rang gi don nam mkha' lta bu las rgya che ba gzhan gyi don sna tshogs ston pa'o/ /sku'i mchog tu gyur pa ni drug po ro gcig pa'o//des 'gro ba'i don la gzigs te ji ltar dga' ba'i gzugs sna tshogs su sprul nas don mdzad pa'o/ /mdor na byang chub kyi sems sna tshogs su sprul nas don mdzad pa'o/ /mdor na byang chub kyi sems gzugs sna tshogs su shar bar ston to/ / de nyid don dang ldan pas gzhan gyis bkur ba'i 'os su gyur ba'i phyir/ /drang srong che dgus mchod cing brjod/ /rigs gsum 'chang ba gsang sngags 'chang / /dam tshig chen po gsang sngags 'dzin/ /gtso bo dkon mchog gsum 'dzin pa/ /zhes pa ste/ drang srong ni spyir rig pa sgrub pa rnams la bya/drang srong chen po ni bcom ldan 'das te rang yang drang po'i lam du zhugs pa la/ gzhan yang drang po'i lam du song ba'i phyir ro/ /des kyang rje btsun nyid la mchod pa dang / yon tan brjod cing bstod pa'i gnas su gyur pa'o/ /de ci 'chad na/ sku de bzhin gshegs pa'i rigs dang /gsung pad+ma'i rigs dang / thugs rdo rje'i rigs gsum 'chang zhing thabs dang shes rab khyad par can 'chang bas na/ gsang sngags 'chang ba ste/ don las mi 'da' bas na/ dam tshig chen po gsang sngags kyi sgo nas gdul bya rjes su 'dzin te/ rtsa ba byang chub kyi sems te chos thams cad kyi mchog tu gyur pas gtso bo'o//des dkon mchog gsum gyi tshul 'dzin cing / gzhan yang 'dzin du 'jug par mdzad do/ /de yang rgya che ba'i dkon mchog ni spyi dang mthun/ zab pa'i dbang du byas nas byang chub kyi sems gnyis su med pas sangs rgyas dkon mchog /de'i don rtogs pa ni chos dkon mchog go/ /rjes su sgrub pa ni dge 'dun dkon mchog go/ /chos kyi sgo mo ji snyed pa yang theg pa gsum du 'dus te/ gdul bya rjes su gzung ba'i phyir/ /theg pa mchog gsum ston pa po/ /don yod zhags pa rnam par rgyal/ /'dzin pa chen po rdo rje zhags//rdo rje lcags kyu zhags pa che/ /zhes pa smos te/ nyan thos dang / rang rgyal ba dang / theg pa chen po gsum gang zag gi blo dang sbyar nas gang mos pa la ston par byed de/ des 'gro ba'i don yod par mdzad do/ /'khor ba las rgyal bar byed do/ /thugs rje'i zhags pas gdul bya rjes su 'dzin pas de yang rgyu ci las 'byung na/chos kyi sku rdo rje lta bu rtogs pa las 'byung ngo / /de yang / /stong nyid chos skur rtogs pa'i rtags/ /byams dang snying rjes rab tu 'phel/ /zhes pa lta bu'o/ /thugs rjes gdul bya rjes su 'dzin pas lcags kyu dang 'dra/nyon mongs pa rnams 'ching bas zhags pa dang 'dra/ de nyid la yang ma zhen pas che zhes bya'o/ /da ni me long lta bu'i ye shes kyi sgo nas 'jam dpal ye shes sems dpa'i mtshan bstan pa'i phyir/ rdo rje 'jigs byed 'jigs par byed/ /ces bya ba la sogs pa smos te/'dir khro bo gshin rje gshed kyi ming bstan te/ de yang rdo rje'i rigs yin pas rdo rje'o/ /shin tu 'jigs par byed pa'i cha byad du bstan nas/ ma hA de ba la sogs pa dang / las kyi gshin rje rnams zhi bas mi 'dul ba de dag 'jigs shing skrag par byed pas 'dul ba'o//khro bo'i rgyal po gdong drug 'jigs/ /mig drug lag drug stobs dang ldan/ /keng rus mche ba gtsigs pa po/ /zhes pa 'dis yon tan rtags kyi phyag rgya bstan te/ khro bo ni gsod pa dang skrod pa la sogs pa drag po'i cha byad du ston te/ de yang / /gsod dang skrod dang drag por ston//'di ni khro bo'i don du brjod/ /ces pa lta bu'o/ /de'i nang du me long lta bu'i ye shes kyis nyon mongs pa zhe sdang la sogs pa bcom pa'i rtags so/ /de ni khro bo rnams kyi nang na gtso bor gyur pas rgyal po'o/ /de yang rigs drug dang ldan pa'i rtags su gdong drug go/ /ye shes drug dang ldan pa'i rtags su mig drug go//pha rol tu phyin pa drug dang ldan pa'i rtags su lag pa drug go/ /gdug pa 'joms par byed pa'i stobs dang ldan pa'o/ /mi mgo skam rlon gyis brgyan pas keng rus so/ /nges par 'byed pa'i shes rab rnon pos nyon mongs pa 'joms shing / gdug pa can 'dul ba'i rtags su mche ba gtsigs pa'o/ /ha la ha la gdong brgya pa/ /zhes pa 'dis 'jigs byed chen po'i rgyan bstan te/ ha la ni dug ste/ dug bzhi dang ldan pa'i sprul gyis lus dang yan lag brgyan pa'o/ /gshin rje gshed po bgegs kyi rgyal/ /rdo rje shugs can 'jigs byed pa//zhes pa 'dis ni sku'i phrin las bstan te/ 'di las kyi gshin rje rnams 'dul ba'i gshed du gyur pa ste/ bgegs kyi rgyal po byin ya ka dang / tshogs bdag glang sna la sogs pa rnams 'dul bar byed pas rgyal po'o/ /rdo rje ltar phrin las thogs pa med par mdzad pa'i shugs chen po dang ldan pa'i sgo nas gdug pa can rnams 'jigs shing skrag par mdzad pa'o//rdo rje'i grags pa'i khyad par ji tsam zhe na/ /rdo rje grags pa rdo rje snying / /zhes smos te/ chos thams cad rdo rje ltar dbyer mi phyed cing / 'jig rten gsum du grags pa'i khyad par dang ldan pa'o/ / dbyer mi phyed pa rdo rje lta bu ste/ chos thams cad kyi 'phro bar gyur pa'i gzhir gyur pas kyang snying po/ rdo rje lta bu thugs kyi rigs yin pas kyang rdo rje'i snying / rtags khro bo rnams kyi thugs kar bzhag pas kyang rdo rje'i snying ngo / /sku de'i yon tan bstan pa ni/ /sgyu 'phrul rdo rje gsus po che/ / zhes smos te/ sgyu ma lta bu'i sprul pa sna tshogs su sprul zhing / rdo rje lta bu'i sku de yang nang du che ba'i yon tan thams cad kyis gang ba'i rtags su gsus khyim che ba'o/ /de'i rgyu ci zhe na/ rdo rje las skyes rdo rje'i bdag /ces pa smos te/ de'i rgyu ni chos sku rdo rje lta bu rtogs pa las skyes te/ rigs thams cad kyi gtso bor gyur pas bdag po'o//de'i dpe ni/ /rdo rje snying po mkha' 'dra ba/ /zhes smos te/ dngos po med pa dang / kun la khyab pa dang / cho 'phrul mi 'gag pa'i phyir nam mkha'o/ /'o na mtshan ma can du mi 'gyur ram zhe na/ /mi g.yo ral pa gcig gis bsgyings/ / glang chen ko rlon gos su gyon/ /zhes pa 'dis yon tan gyi rgyan bstan te mtshan ma'i rnam par rtog pa mi g.yo zhing / gnyis su med par rtogs pa'i rtags ral pa'i thor tshugs gcig tu bcings pa'o/ /theg pa mchog dang ldan pa'i rtags su glang po che'i ko rlon gos su gyon pa'o/ /khro bo'i gsung ji lta bu zhe na//drag chen ha ha zhes sgrogs pa/ /hi hi zhes sgrogs 'jigs par byed/ /gad mo chen mo gad rgyangs can/ /rdo rje gad mo cher sgrogs pa/ /zhes smos te/ 'gro ba'i don mdzad pa la dgyes pas ha ha zhes pa'i sgra sgrogs shing / hi hi zhes pa'i sgras ma rungs pa rnams 'jigs shing brgyal bar byed pa'i gad mo che bar sgrogs te/rdo rje dang 'dra bar gzhan gyis bar du mi chod par shin tu rgya che ba ste/ 'jig rten gsum na thos par sgrogs pa'o/ /'o na thugs kyi rang bzhin ji lta bu lags she na/ rdo rje sems dpa' sems dpa' che/ /rdo rje rgyal po bde ba che//rdo rje drag po dga' ba che/ /rdo rje hUM ste hUM zhes sgrogs/ /zhes smos te/ rdo rje ltar mi phyed pa'i thugs ye shes chen po/ chos kyi dbyings la sems pa dang / thugs rjes 'gro ba'i don la sems pa'o/ /de'i gong na gzhan med pas rgyal po'o/ /zag pa med pa'i bde ba chen po mnga' zhing /gdug pa can 'joms pa'i thugs mnga' bas drag po'o/ /des sems can rnams kyi dga' ba chen po skyed par mdzad do/ /rdo rje lta bu thugs su chud pa'i sgo nas/ hUM hUM zhes pa'i sgra bsgrags nas/ gdug pa can tshar gcod par mdzad do//khro bo de las ci mdzad ce na/ mtshon du rdo rje mda' thogs pa/ /rdo rje ral gris ma lus gcod/ /rdo rje kun 'chang rdo rje can/ /rdo rje gcig pu g.yul sel ba/ /zhes smos te/ phyag mtshan rdo rje ltar nyon mongs pa 'bigs pa'i thabs shes rab kyi mda' gzhu dang / rnam par rtog pa gcod par byed pa'i/shes rab kyi ral gri thogs pa dang / dug lnga choms pa'i rtags rdo rje 'chang ba dang / rdo rje ltar gzhan 'joms par byed pa'i mthu dang ldan pas rdo rje can zhes bya'o/ /de yang rdo rje lta bu gnyis su med pa'i ye shes kyis bdud bzhi dang gdug pa can 'joms shing g.yul do zlog par byed do//rgyan gyi sgo nas khyad par gyi yon tan bstan pa ni/ /rdo rje 'bar ba mig mi bzad/ /sgra yang rdo rje 'bar ba ste/ /rdo rje 'bebs pa 'bebs pa che/ /mig brgya ba ste rdo rje'i mig /lus ni rdo rje'i ba spu can/ /rdo rje'i spu ni gcig pu lus/ /sen mo skyes ba rdo rje rtse//rdo rje snying po pags pa mkhregs/ /rdo rje phreng thogs dpal dang ldan/ /rdo rje rgyan gyis brgyan pa ste/ /zhes smos te/ rdo rje 'bar ba lta bu'i drag po'i spyan shin tu mi bzad par 'jigs pa mnga' zhing dbu skra yang rdo rje'i skra'o/ /gzhan gyi rgyud la yang sku gsung thugs rdo rje lta bu'i ye shes 'bebs par mdzad la mig brgya pa zhes pa ni mtshon pa tsam ste/thams cad du ma 'gags pa shes rab kyi spyan dbyer mi phyed ba dang ldan pa'o/ /lus la rdo rje'i ba spu dngos su 'khyil ba mnga' zhing / rdo rje'i spu de gnyis su med pa'i lus la brgyan pa'o/ /gdug pa can 'dul ba'i rtags dang /rigs lnga ye shes lnga dbyer mi phyed pa'i rtags su sor mo'i rtse mor rdo rje skyes pa'o/ /thams cad gnyis med du bsdus pa'i rtags su/ rdo rje'i pags pa sra la 'thas pa mnga' ba'o/ /rdo rje'i phreng ba thogs nas gzhan don mdzad pas dpal dang ldan pa'o/ / che ba'i yon tan phreng ba brgyus pa ltar rgyun mi 'chad pa dang ldan pa'i rtags so/ /de ltar khyad par gyi rgyan rdo rjes brgyan pa'i sgo nas che ba'i yon tan rnams bstan pa yin te/ /thugs rdo rje'i rigs yin pa'i phyir ro/ /'o na gsung gi sgo nas 'gro ba 'dren pa'i yon tan gang zhe na/ gad rgyangs ha ha nges par sgrogs//yi ge drug pa rdo rje'i sgra/ /'jam dbyangs chen po sgra che ba/ /'jig rten gsum na sgra gcig pa/ /nam mkha'i mtha' la sgra sgrogs pa/ /sgra dang ldan pa rnams kyi mchog /ces smos te/ 'gro ba'i don mdzad pa la dgyes pa'i sgra ha ha zhes sgrogs shing / yi ge drug pa ni rgyas par yi ge drug pa'i sngags/ de las bsdu na bA gI shwa ri'i 'bru drug pa'o/ /de gnyis ni gsang sngags rdo rje'i theg pa'i sgra'o/ /las 'phro can rnams la snyan cing yid du 'ong bas 'jam dbyangs so/ /don chen po ston pa'i sgra yin pas che bas so/ /de gang du sgrogs ni 'jig rten gsum du'o//gnyis med ston pa'i sgra yin pas gcig go/ /yang ji snyed cig bsgrags kyang 'gro ba 'dren par gcig pa'o/ /sgra de la 'gran zla med pas kyang sgra gcig pa'o/ /de ji tsam du sgrogs she na/ nam mkha' khyab par sgrogs pa'o/ /sgra rnams kyi nang na chos kyi sgra 'di mchog tu gyur pa ste don chen po la sbyor ba'i phyir ro//so sor rtog pa'i ye shes kyi sgo nas 'jam dpal ye shes sems dpa'i mtshan bstan pa'i phyir/ /yang dag bdag med de bzhin nyid/ /yang dag mtha' ste yi ge med/ /ces pa la sogs pa smos te/ de la gsung gi rgyu ni yang dag pa bdag med de bzhin nyid do//gsung gi che ba ni/ stong nyid smra ba'i khyu mchog ste/ /zab cing rgya che sgra sgrogs pa/ /chos kyi dung ste sgra chen ldan/ /chos kyi gaN+DI sgra bo che/ /mi gnas mya ngan 'das pa po/ /phyogs bcu chos kyi rnga bo che/ /zhes smos te/ chos thams cad stong pa nyid du smra ba ni smra ba thams cad kyi gtso bo yin pas khyu mchog ste/dper na/ glang po che'i phru gu pha ma shi nas seng ges nu ma bsnun nas gsos pa la khyu mchog zer te/ des khyus 'gro zil gyis gnon te de dang 'dra ba'i phyir ro/ /ci'i mchog yin na/zab pa dang rgya che ba'i chos kyi sgra sgrogs pa'i phyir ro/ /chos 'byung ba'i snga ltas ni/ chos kyi dung lta bu'i sgra chen pos bdud btul nas/ chos kyi gaN+DI lta bu'i sgra chen pos 'khor bsdus nas/ mtha' gnyis la mi gnas pa'i mya ngan las 'das pa'i chos ston pa ste/ de yang shes pas srid la mi gnas dang //snying rjes zhi la mi gnas shing / /zhes pa lta bu'o/ /rgya ji tsam che zhe na/ phyogs bcu thams cad du khyab par byed pa'o/ /gang gis she na/ chos kyi sgra chen po rnga bo che dang 'dra ba sgrogs pa'o/ /de la kun 'byung ba'i gzhi gang zhe na/ gzugs med gzugs bzang dam pa ste//sna tshogs gzugs can yid las skyes/ /gzugs rnams thams cad snang ba'i dpal/ /gzugs brnyan ma lus 'chang ba po/ /zhes smos te/ chos sku la ngo bo nyid ma grub pas gzugs med pa'o/ /de'i byin gyi rlabs las longs spyod rdzogs pa'i sku mtshan dang dpe byad kyis brgyan pa/gzugs bzang ba'i dam pa'o/ /sprul sku sna tshogs gzugs can de yid ye shes su grol ba las skyes zhes pa dang / yang sprul sku sna tshogs gzugs can gyi yid la ji ltar 'dod pa ltar skyes zhes bshad do/ /rje btsun de nyid nyan thos dang /rang rgyal ba dang / byang chub sems dpa' dang / tshangs ba dang / khyab 'jug la sogs pa'i gzugs brnyan ma lus par snang nas don mdzad pa'o/ /sku de'i che ba ji lta bu zhe na/ mtshungs pa med cing che bar grags/ /khams gsum dbang phyug chen po ste/ 'phags lam shin tu mtho la gnas/ /dar ba chen po chos kyi tog /ces smos te/ tshogs gnyis yongs su rdzogs pa'i dbang gis gnyen po gang gis kyang mi tshugs te/ bdud dang mu stegs la sogs pa gang gis kyang zil gyis mi non pas na che bar grags so/ /de yang 'phags pa'i lam las mtho bar gyur pas gnyis su med pa'i ye shes la gnas pa'o//chos kyi phung po brgyad khri bzhi stong mkhyen pas dar ba chen po'i chos so/ /gnyis su med pa ni rab rtse mo'i tog ces bya'o/ /de gdul bya la ji ltar mos par snang ba ni/ 'jig rten gsum na gzhon lus gcig /gnas brtan rgan po skye dgu'i bdag /sum cu rtsa gnyis mtshan 'tshang ba/ /sbu gu 'jig rten gsum na mdzes/ /zhes smos te/ byang chub sems dpas 'dul ba rnams la bgres rgud mi mnga' ste rtag tu byis pa lo brgyad lon pa lta bu gzhan gyi yid 'phrog par byed pa lta bus don mdzad pa'o//nyan thos kyis 'dul ba rnams la gnas brtan rab 'byor lta bur sprul/ rang rgyal bas 'dul ba rnams la rang rgyal rgan po rdzu 'phrul cher ston pa lta bur sprul/ sna tshogs kyis 'dul ba la skye dgu'i bdag por sprul nas don mdzad de/ de la skye ba dgu ni nyan thos dang /rang rgyal ba dang / theg pa chen po dang gsum/ de'i khar 'gro ba rigs drug gi gnas su sprul sku thub pa drug gis don mdzad pa dang / dgu la bya'o/ /de la mtshan sum cu rtsa gnyis ni thun mong du bstan to/ /phyag dang zhabs 'khor lo'i mtshan dang ldan pa nyid dang / zhabs rus sbal bzhin du gnas pa dang /phyag dang zhabs kyi sor mo 'brel ba dang / phyag dang zhabs gzhon zhing 'jam pa dang / bdun mtho ba dang / phyag gi sor mo ring ba dang / rting pa yangs pa dang / sku che zhing drang ba dang / 'bur mi mngon pa dang / sku'i spu gyen du 'khyil ba dang / byin pa ri dwags e na ya lta bu dang / phyag ring zhing mdzes pa dang / mdoms kyi sba ba sbubs su nub pa dang / sku mdog gser lta bu dang / pags pa 'jam pa dang / spu re re nas g.yas phyogs su 'khyil ba dang / zhal mdzod spus brgyan pa dang / ro stod seng ge 'dra ba dang / dpung mgo zlum pa dang / thal gong rgyas pa dang / ro bro ba'i mchog mkhyen pa dang / shing n+ya gro d+ha ltar chu zheng gab pa dang / dbu gtsug tor dang ldan pa dang / ljags ring ba dang / gsung tshangs pa'i dbyangs lta bu dang / 'gram pa seng ge'i 'dra ba dang / tshems dkar ba dang / tshems mnyam pa dang / tshems thags bzang ba dang / tshems bzhi bcu mda' ba dang / spyan mthon mthing du gnas pa dang / spyan rdzi ba'i rdzi ma lta bu'o/ /khyad par gyi dbang du byas na/ dpal rnam par snang mdzad la rgyu'i sems dpa' bcu drug 'bras bu'i sems dpa' bcu drug gis brgyan pa la bshad do//de ltar 'jig rten gsum na shin tu sdug cing yid du 'ong la/ blta bas chog mi shes pa 'dun pa skyes bu'i gnas su gyur pa'o/ /des 'jig rten pa ji ltar skyob ce na/ /'jig rten shes legs slob dpon te/ /'jig rten slob dpon 'jigs pa med//mgon skyob 'jig rten yid gcugs pa/ /skyabs dang skyob pa bla na med/ /ces smos te/ 'jig rten pa'i sman dang bzo la sogs pa yang rje btsun nyid kyis bslabs pa yin la/ log pa'i lam las zlog cing dam pa'i lam ston pa'i slob dpon yang mdzad do/ / tha snyad kyi rigs pa dang ldan pas gzhan gyis brtsad bcad kyang 'jigs pa dang bag tsha ba med par 'jig rten skyob pa ste/ ji ltar yid dang mthun par sngar gyi yang skyobs mdzad la/ phyis kyang skyob ste bla na med pa'i byang chub thob par byed do/ /'o na thugs kyi mkhyen tshad ci mnga' zhe na/ nam mkha'i mtha' la longs spyod pa/ /thams cad mkhyen pa'i ye shes mtsho/ /zhes pa/ chos kyi sku nam mkha'i mtha' lta bu la longs spyod cing rtogs pas shes bya ji lta ba dang ji snyed pa thams cad mkhyen pa'i ye shes che ba'i yon tan rgya mtsho lta bu mda' ba'o/ /de'i byed pa'i las gang zhe na/ma rig sgo nga'i sbubs 'byed pa/ /srid pa'i dra ba 'joms pa po/ /nyon mongs ma lus zhi byed pa/ /'khor ba'i rgya mtsho'i pha rol phyin/ /zhes smos te/ gnyis su med pa'i don rtogs pas ma rig sgo nga'i shun lpags 'dra ba sbubs phye nas srid pa'i dra ba las dang nyon mongs pa dang 'brel ba rnams bcom ste/nyon mongs pa rtsa ba lnga'am drug dang / nye ba'i nyon mongs pa nyi shu po dang / kun nas nyon mongs pa ste brgya dang gsum lta bu zhi nas 'khor ba'i rgya mtsho'i pha rol phyin pa'o/ /de rtogs pa'i phan yon ni/ /ye shes dbang bskur cod pan can//rdzogs pa'i sangs rgyas rgyan du thogs/ /sdug bsngal gsum gyi sdug bsngal zhi/ /gsum sel mtha' yas grol gsum thob/ /sgrib pa kun las nges par grol/ /mkha' ltar mnyam pa nyid la gnas/ /nyon mongs dri ma kun las 'das/ /zhes smos te/ gnyis su med pa'i don rtogs pas nyon mongs pa lnga ma spangs rang sar grol te/ye shes lngar snang ba ste/ bum pa la sogs pa'i dbang la ltos pa ma yin te/ ye shes gcig rdzogs kyi dbang zhes bya'o/ /bzhi rig pa gcig la snang tshul ye shes kyis brgyan pa de shin tu mdzes pa'i phyir cod pan no//de yang / /sems kyis chos la dbang thob na/ /rdzas tshig mtshan ma'i dbang rnams kun/ /ma bskur kyang ni thob par 'gyur/ /zhes pa lta bu'o/ /ye shes lnga'i gzugs brnyan sangs rgyas lngar shar te/ gsal zhing mdzes pa'i phyir rgyan zhes bya'o/ /sdug bsngal ni gsum du 'dus//de ltar rtog pas sdug bsngal gya sdug bsngal dang / 'du byed kyi sdug bsngal dang / 'gyur ba'i sdug bsngal dang gsum zhi la/ nyon mongs pa rnams kyang dug gsum du 'dus te/ des sel zhing spong ngo / /de gsum bsal nas 'gro ba mtha' yas pa'i don byas nas/grol ba nyan thos dang / rang sangs rgyas dang / byang chub sems dpa' dang gsum thob par byed do/ /khyad par du sku gsum la bya'o/ /de yang nyon mongs pa'i sgrib pa dang / shes bya'i sgrib pa kun las grol nas/ nam mkha' lta bu'i mnyam pa nyid la gnas te/ de phan tshod nyon mongs pa'i dri ma las 'das pa'o/ /de ltar rtogs pa'i ngo bo ci zhe na/ /dus gsum dus med rtog pa po/ /sems can kun gyi gtso bo che/ /yon tan thod can rnams kyi thod/ /lus kun las ni rnam grol ba/ /nam mkha'i lam la rab gnas pa/ /zhes smos te/ mnyam pa nyid la dus gsum du dbyer med de/de yang / 'das pa'i de bzhin nyid gang ma 'ongs de bzhin nyid/ /da ltar de bzhin nyid 'di thams cad bye brag med/ /ces pa lta bu'o/ /de ltar rtogs pa ni sems can kun las ches khyad par 'phags pas gtso bo che'o/ /de yang / /'jig rten pa bas nyan thos yon tan che la/de las kyang rang rgyal ba/ de las kyang byang chub sems dpa'/ de bas kyang de bzhin gshegs pa yon tan che ba rnams zhes bya'o/ /thod ni yon tan gyis mdzes par brgyan pa'o/ /de las kyang thod ltar mdzes shing rab tu gyur pa ni rje btsun nyid do//de ltar 'gro ba'i lus kun du skye ba grol nas nam mkha' lta bu'i ye shes la gnas so/ /'o na 'gro ba'i don ji ltar mdzad na/ yid bzhin nor bu chen po 'chang / /khyab bdag rin chen kun gyi bdag /dpag bsam shing chen rgyas pa ste/ /bum pa bzang po che ba'i mchog /byed pa sems can kun don byed/ /phan 'dogs sems can mnyes gshin pa/ /zhes smos te/ gzhan don 'byung ba'i dpe yid bzhin nor bu la yang chos brgyad de/ sems can gyi dgos 'dod 'byung ba dang / de yang gsol ba ma btab na mi 'byung ba dang btab na 'byung ba dang /dus su 'byung ba dang / ji ltar 'tsham par 'byung ba dang / zad mi shes par 'byung ba dang / rtog pa med par 'byung ba dang / phyis lan la re ba med pa'o/ /de dang 'dra ba'i yon tan rin po che lta bu des kun la khyab pa'i bdag nyid do/ /yang dpag bsam shing dang 'dra ste/de la yang chos bcu ste/ snga ma brgyad kyi khar bsil ba dang / 'gro ba ngal sos pa'i gnas su gyur pa lta bu dang bcu'o/ /yang bum pa bzang po bsgrub pa dang 'dra ste/ de la chos bcu ste/ snga ma brgyad kyi khar/ bsgrubs na 'byung ba dang / ma bsgrubs na mi 'byung ba dang bcu'o/ / de yang / /bum pa bzang po dang ni dpag bsam shing / /yid bzhin nor rnams sems dang mi ldan pas/ /sems can rnams kyi don ni 'byung 'gyur na/ /thugs rje cher mnga' rgyal ba smos ci dgos/ /zhes pa lta bu'o/ /de ltar bu gcig pa'i ma ltar phan 'dogs pa'o/ / des gdul bya'i bsam pa ji ltar mkhyen ce na/ bzang ngan shes shing dus shes la/ /khyab bdag dam shes dam tshig ldan/ /dus shes sems can dbang don shes/ /rnam grol gsum la mkhas pa po/ /yon tan ldan zhing yon tan shes/ /zhes smos te/ las bzang ngan shes shing /de'i 'bras bu dus ji tsam na 'byung shes la/ thugs rjes kun la khyab pa'i bdag po gzhan gyi tshig kyang shes la/ rang yang de kho na las mi 'da' ba'i dam tshig dang ldan pa'o/ /don mdzad pa'i tshe 'dul ba'i dus tshod shes shing sems can gyi dbang po rab 'bring tha ma dang / dad pa dang brtson 'grus rab 'bring tha ma'i don shes pa'o/ /de yang thams cad mkhyen pa'i ye shes mnga' bas/ nyan thos dang / rang rgyal ba dang / theg pa chen po dang rnam grol gsum la mkhas pa'o/ /sku dang ye shes stobs dang mi 'jigs pa la sogs pa'i yon tan dang rje btsun nyid kyang ldan zhing /nyan thos dang / rang rgyal ba la sogs pa'i rgyud la yod pa'i yon tan rnams kyang shes pa'o/ /de ltar gyur pa'i bkra shis pa'i dam par bstan pa'i phyir/ /chos shes bkra shis bkra shis 'byung / /bkra shis kun gyi bkra shis pa/ /grags pa'i bkra shis snyan grags dge//dbugs 'byin chen po dga' ston che/ /dga' chen rol mo chen po ste/ /zhes smos te/ de ltar chos kyi don shes pas tshe 'dir yang legs pa'i yon tan kun 'byung bas bkra shis la/ phyi mar yang legs pa'i yon tan kun 'byung bas bkra shis 'byung ngo / / 'jig rten pa'i tshe ring ba dang / nor dang rigs rgyud 'phel ba la sogs pa bkra shis pa rnams kyi nang na yang bkra shis dam pa 'gyur ro/ /khams gsum du grags shing legs pa'i yon tan 'byung bas grags pa'i bkra shis so/ /mi dge ba las log nas dge ba sna tshogs la zhugs pas snyan grags dge ba'o//'gro ba rnams thar pa'i lam du dbugs 'byin pas kun dga' ba'i chos kyi ston mo chen po mdzad cing / zag med kyi bde ba chen po thob pas dga' chen no/ /'dod pa'i yon tan mi spong bas rol mo chen po zhes bya'o/ /des 'gro ba skyob pa'i tshul ni/ bkur sti rim gro phun sum tshogs/ /mchog tu dga' ba'i grags bdag dpal/ /mchog ldan mchog sbyin gtso bo ste/ /skyabs kyi dam pa skyabs su 'os/ /'jig rten dgra ste rab kyi mchog /'jigs pa ma lus sel ba po/ /zhes smos te/ kun gyis bkur ba dang / rim gror bya ba'i 'os ni 'jig rten pa dang 'jig rten las 'das pa'i yon tan phun sum tshogs pa thams cad kyi gter du gyur pa/mchog tu 'gro ba'i don la dga' ba/ khams gsum du grags shing tshogs gnyis rdzogs pas dpal te/ yon tan gyi skal ba mchog dang ldan zhing /gzhan yang mchog ster ba'i gtso bor gyur pa'o/ /des sdug bsngal ba rnams 'khor ba'i 'jigs pa las skyob cing de las lhag pa med pas skyabs su 'os pa'o/ /ci las skyob ce na/ 'jig rten gyi rtog pa dgra yin te/ de las skyob pa'o/ /de yang 'jig rten las rab tu gyur pas nyan thos so//de las rab tu gyur pas rang rgyal lo/ /de las rab tu gyur pas byang chub sems dpa'o/ /de dag las kyang mchog tu gyur pa rje btsun no/ /des bdud dang sdug bsngal thams cad sel bar byed pa'o/ /mu stegs kyi cha byad kyis 'dul ba la der sprul nas 'gro ba'i don mdzad pa'i phyir/gtsug phud phud bu lcang lo can/ /ral pa muny+dza cod pan thogs/ /gdong lnga gtsug phud lnga dang ldan/ /zur phud lnga pa me tog thod/ /ces smos te/ gtsug phud ni skra dang kha spu bzhar bregs nas spyi bor gtsug phud tsam 'dzin pas 'dul ba der sprul lo/ / phud pu ni skra gzhan bregs nas dpral bar bcings pa'o/ /lcang lo can ni skra sil bu ring ba'o/ /ral pa ni ral pa sog kha non pa ni/ lha chen po la dad pa rnams kyi gzugs 'dzin pa'o/ /muny+dza ni rked sor slebs pa'i ral pa ske rags su bcings pa'o/ /cod pan ni dar la sogs pa thod du bcings pa'o//tha ma cod pan du 'phur ba'o/ /gdong lnga ni phyogs bzhin gdong pa bzhi/ spyi bo'i gtsug na gcig ste lnga'o/ /gdong pa bzhi nas rig byed kyi sgra bzhi 'don te/ shar nas nges brjod kyi rig byed/ lho nas mchod brjod kyi rig byed/ nub nas snyan dngags kyi rig byed/byang nas srid srung gi rig byed 'don pa'o/ /de ltar tshangs pa gdong lnga pa lta bus 'dul ba der sprul lo/ /yang mgo la gtsug phud lnga dang ldan pa mu stegs gzegs zan gyi gzugs kyis 'dul ba la des sprul lo/ /yang mgo la rin po che'i zur phud lnga yong pa dri za'i gzugs kyis 'dul ba la der sprul lo//yang mgo la me tog gi thod bcings pas gzhan 'phrul dbang byed kyi lha'i gzugs kyis 'dul ba la der sprul lo/ /'o na sangs rgyas pa'i brtul zhugs ji ltar 'dzin zhe na/ /mgo zlum brtul zhugs chen po 'chang / /tshangs par spyod pa brtul zhugs mchog /dka' thub mthar phyin dka' thub che/ /gtsang gnas dam pa gau tam/ /bram ze tshangs pa tshangs pa shes/ /zhes smos te/ shAkya thub pa lta bu'i rab tu byung bas 'dul ba la mgo zlum du sprul nas gnod pa las zlog pa'i brtul zhugs 'dzin par mdzad do/ / yang tshangs par spyod pa'i sdom pa la gnas shing brtul zhugs 'dzin pas 'dul ba la der ston to/ /shAkya thub pa chu bo ne ra dzA rar dka' thub mdzad pa lta bu la yang der ston to/ /gau ta ma ni shAkya'i rigs te/ /gtsang sbra la gnas pa rgyal rigs su sprul pa dang / rang bzhin gyis dka' thub dang /gtsang sbra la gnas pa bram ze lta bur kyang sprul pa mdzad do/ /nyid la nyes pa'i skyon gyis ma gos pas tshangs pa/ gzhan skyon dang bral ba'i thabs shes pas tshangs pa shes zhes bya'o/ /de ltar sprul pa'i phan yon ci zhe na/ mya ngan 'das pa tshangs pa thob/ /grol ba thar pa rnam grol lus//rnam grol zhi ba zhi ba nyid/ /mya ngan 'das pa mya ngan 'das/ /legs par mya ngan 'das dang nye/ /bde sdug sel ba mthar gyur pa/ /zhes smos te/ 'khor ba'i sdug bsngal dang bral bas mya ngan las 'das pa'o/ /de nyid la zhen pa dang bral bas tshangs pa thob pa'o/ /de ltar 'ching ba mtha' dag las grol zhing thar nas ye shes kyi sku thob ste/des yon tan thams cad 'byung ba'i rten byed pas lus zhes bya'o/ /de ltar nyon mongs pa las grol zhing spros pa'i mtshan ma thams cad zhi bas zhi ba'o/ /zhi ba de nyid las mya ngan las 'das pa'i chos kyi yon tan rnams 'byung ste/mya ngan las 'das pa ni nyan thos kyi lam mo/ /mya ngan las 'das pa phyi ma ni rang rgyal ba'i lam mo/ /legs par mya ngan las 'das pa ni byang chub sems dpa' rnams so/ /bde ba mya ngan las 'das pa'i mtha' dang / sdug bsngal 'khor ba'i mtha' gnyis sel te/ mthar gyur pa'i ye shes dang ldan pa ni sangs rgyas nyid do/ /gzhi'i gnas lugs rnam par dag pa'i ngo bo nyid du bstan pa'i phyir/ chags bral lus las 'das pa po/ /thub pa med pa dpe med pa/ /mi mngon mi snang gsal byed min/ /mi 'gyur kun 'gro khyab pa po//phra zhing zag med sa bon bral/ /rdul med rdul bral dri ma med/ /nyes pa spangs pa skyon med pa/ /zhes smos te/ yul rnams la chags pa'i blo dang bral ba'i ye shes su snang ba las 'das te/ de nyid mi mthun pa'i phyogs kyi stobs kyis mi brdzi bas thub pa med do/ /gang dang yang mnyam pa med pas dpe med do//'di mtshan nyid dngos po cir yang mi mthong la mtshan ma gang du yang mi snang ste/ rang bzhin gyis 'od gsal ba'i bdag nyid du gnas pas don la gsal byed mi dgos te mar me lta bu'o/ /'dus ma byas pa'i rkyen gang gis kyang mi 'gyur zhing / bde gshegs kyi snying po kun grol des til 'bru la mar bzhin kun la khyab po//rtul pos mi shes pas phra zhing zag pa ste srid par skye ba'i sa bon ma rig pa bdag tu 'dzin pa dang bral ba'o/ /de ltar gzhi la rnam par rtog pa'i rdul dag nas med la/ de ma rtogs pa'i blo yang de nyid/ rtogs na rtogs pa'i rdul dang bral bar 'gyur la/de nyid la yang ma zhen pas dri ma med pa'o/ /de ltar sgrib gnyis spangs pas nyes pa'i skyon gang yang med pa'o/ /don gnyis su med pa lhun gyis grub pa'i tshul ni/ /shin tu sad pa sad pa'i bdag /kun shes kun rig dam pa po/ /rnam par shes pa'i chos nyid 'das//ye shes gnyis med tshul 'chang ba/ /rnam par rtog med lhun gyis grub/ /ces smos te/ sgrib pa gnyis las sad pa'am/ yang na snang ba ye shes sus sad pa'am/ sems stong par sad pas ji snyed pa kun shes shing / ji lta ba rig la/ de yang dbyer med du shes pas dam pa'o//de ltar rtog pa dang bral bas rnam par shes pa'i chos nyid kyi klong du 'das pa'o/ /'das pa tsam na gnyis su med pa'i ye shes kyi tshul 'chang ba'o/ /rnam par rtog pa dang bral ba'i ye shes rgyu rkyen med par lhun gyis grub pa ste/ ngo bo lhun grub po/ /de la yon tan thams cad lhun gyis grub pas yon tan lhun grub po//rgyu rkyen gyis ji ltar ma bskyed ce na/ dus gsum sangs rgyas las byed pa/ /sangs rgyas thog ma tha ma med/ /dang po'i sangs rgyas rgyu med pa/ /ye shes mig gcig dri ma med/ /ye shes lus can de bzhin gshegs/ /zhes smos te/ dus gsum gyi sangs rgyas rnams kyis sems can 'dren pa'i las mdzad de/ sangs rgyas la thog ma 'di nas byung bya ba dang / tha ma 'dir song bya ba med de dang po nyid nas rgyu med pa'o/ /de la gnyis 'dzin gyi dri ma med pas ye shes mig gcig go/ /ye shes drug ro gcig pa'i lus yin pas de skad ces bya'o//de la gsung gi khyad par ci zhe na/ /tshig gi dbang phyug smra ba che/ /smra ba'i skyes mchog smra ba'i rgyal/ /smra ba'i dam pa mchog gi gnas/ /smra ba'i seng ge mtshungs pa med/ /ces smras te/ zab cing rgya che ba'i chos gsungs pas tshig gi dbang phyug smra ba che'o/ /mu stegs kyi smra ba las mchog tu gyur cing /nyan thos kyi smra ba zil gyis gnon pas smra ba'i rgyal lo/ /rang rgyal ba'i smra ba las 'phags pas dam pa'o/ /skye med kyi sgra chos smra ba'i gong na gzhan med pas mchog gi gnas so/ /de ni seng ge dang 'dra ste bdud la sogs pa'i rgol bas mi tshugs so/ / 'o na sku'i che ba gang zhe na/ /kun du lta ba mchog tu dga'/ /gzi brjid phung po blta na sdug /'od bzangs 'bar ba dpal gyi be'u/ /lag na 'od 'bar snang ba po/ /zhes smos te/ shes rab dam pas don la lta zhing / thugs rje dam pas 'gro ba la gzigs pas kun du lta ba'o/ /bde ba chen po 'phags pas mchog tu dga'o//gzi brjid chen po gzhan yid du 'ong zhing sdug pa'i sku mnga' la/ nang na ye shes drug 'bar bas ma rig pa'i mun pa sel ba'i rtags phyi ru 'od kha dog drug 'bar ba'o/ /mtshan thun mong ma yin pa thugs ka na rin po che dpal be'us brgyan pa'o/ /phyag las kyang 'od zer 'bar te zhi bas 'dul ba rnams 'dun pa skyed par byed la/des mi 'dul ba rnams tshar gcod par byed do/ /des 'gro ba'i nad ji ltar sel zhe na/ /sman pa che mchog gtso bo ste/ /zug rngu 'byin pa bla na med/ /sman rnams ma lus ljon pa'i shing / /nad do cog gi dgra che ba/ /zhes smos te/sman pa'i mchog ste bdag med kyi don bstan nas bdag 'dzin gyi zug rngu 'byin cing / de yang sman gyi dpe ni ljon shing dang 'dra ste/ rtsa ba dang yal ga dang lo 'dab dang me tog la brten nas 'bras bu 'byung ba ltar rtsa ba ni byang chub sems so/ /yal ga ni rtogs par byed pa'i thabs kyi yan lag rnams so//lo ma ni 'dir theg pa so so'i chos kyang bkag pa med pa'o/ /me tog ni rtogs pa'i nyams myong ngo / /'bras bu ni de mthar phyin pa'o/ /der yang ma zad de phyi nang gi sman sna tshogs su yang sprul lo/ /des dgra phyi nang gi nad sel bar byed do//'o na sku'i khyad par ci zhe na/ sdu gu 'jig rten gsum gyi mchog /dpal ldan rgyu skar dkyil 'khor can/ /zhes smos te/ sems can gyi ngo bo la sdug cing mdzes par sprul nas don mdzad de/ dper na rgyu skar rnams kyi nang na zla ba ltar/ lha dang mi rnams zil gyis gnon pa'o/ /des skyob pa'i thugs rje ji lta bu zhe na/phyogs bcu nam mkha'i mthas gtugs pa/ /chos kyi rgyal mtshan legs par 'dzugs/ /'gro na gdugs gcig yangs pa ste/ /byams dang snying rje'i dkyil 'khor can/ /dpal ldan pad+ma gar gyi bdag /khyab bdag chen po rin chen gdugs/ / zhes smos te/ /rgya ni phyogs bcu nam mkha'i mtha' dang mnyam par dam pa'i chos sgrogs pa'i mtshan mar rgyal mtshan 'dzugs shing / gdugs kyis char dang nyi ma la sogs pa skyob pa lta bu ni/ byams pa dang snying rjer ldan pa'i dbang gis so/ /de yang ma gos pa pad+ma dang 'dra la/ 'gro ba 'dren pa'i thabs sna tshogs sgyur ba ni gar dang 'dra'o//de yang yon tan rin po che'i gdugs lta bus skyob pa'i bdag po ni rje btsun nyid do/ /ji ltar bstan kyang nges pa'i lam gcig las med pa'i phyir/ sangs rgyas kun gyi gzi brjid che/ /sangs rgyas kun gyi sku che ba/ /sangs rgyas kun gyi rnal 'byor che//sangs rgyas kun gyi bstan pa gcig /ces smos te/ rje btsun nyid la sangs rgyas kun gyi gzi brjid chen po mnga' la/ sangs rgyas kun gyi sku rnam pa gsum yang 'chang bar mdzad de/ thams cad rje btsun gyi sprul pa yin pa'i phyir ro/ /sangs rgyas kun gyi rnal 'byor che//thabs dang shes rab kyi gtso bor yang zhugs la/ sangs rgyas kyi bstan pa'i chos ji snyed cig gsungs kyang / yang dag par na gnyis su med par ston pa'i theg pa gcig las med de/ de yang / theg pa'i sgo mo bsam yas kyang / /nges pa'i don du gcig las med/ /ces pa lta bu'o//nges pa'i don gcig la ye shes lngar ji ltar snang zhe na/ rdo rje rin chen dbang bskur dpal/ /rin chen kun bdag dbang phyug ste/ /'jig rten dbang phyug kun gyi bdag /rdo rje 'chang ba kun gyi rje/ /sangs rgyas kun gyi thugs che ba/ /zhes smos te/ rdo rje ni tshur mi tshugs pa dang phar shes bya 'bigs pa ste/chos kyi dbyings rtogs pa la dbang thob pas/ /de ni me long lta bu'i ye shes mi bskyod pa'i ngo bo ste/ des zhe sdang rang kha ma 'dul bar byed pa'o/ /chos thams cad mnyam pa nyid du rtogs te/ yon tan rin po che kun la dbang sgyur ba'i bdag po ni mnyam pa nyid kyi ye shes rin chen 'byung ldan gyi ngo bo ste/des nga rgyal dang ser sna rang kha ma 'dul lo/ /des 'jig rten gyi chos thams cad kyi ngo bo so so ma 'dres pa la gsal pa la dbang sgyur ba'i bdag po ni so sor rtog pa'i ye shes snang ba mtha' yas kyi ngo bo ste/ des 'dod chags rang kham 'dul lo//rdo rje ltar phrin las thogs pa med par 'chang ba ni bya ba grub pa'i ye shes don yod grub pa'i ngo bo ste/ des phrag dog dang le lo rang kham 'dul lo/ /sangs rgyas kun gyi thugs chos kyi dbyings rnam par dag pa chen po ni chos kyi dbyings kyi ye shes rnam par snang mdzad kyi ngo bo ste/ des gti mug rang kha ma 'dul lo//de dag kyang sku gsung thugs su 'dus tshul bstan pa'i phyir/ /sangs rgyas kun gyi thugs la gnas/ /sangs rgyas kun gyi sku che ba/ /sangs rgyas kun gyi gsung yang yin/ /zhes smos te/ rje btsun gyi thugs ni ye shes drug ro gcig cing mnyam pa ste/des sangs rgyas kun gyi thugs la khyab cing gnas pa'o/ /de yang shes bya ma lus pa mkhyen cing rig pas na thugs so/ /sangs rgyas kun gyi skur sprul pa yang rje btsun nyid yin pas sku rnams kyi nang na che ba'o/ /de yang khyab cing rten byed pa dang / snang bas na sku'o/ /sangs rgyas kun gyi gsung 'byung ba'i rgyu dang ngo bo nyid du yang rje btsun 'gyur ba ste/gsal ba dang go bar byed pa dang grags pa'i phyir na gsung ngo / /des gzhan gyi mun pa sel zhing ma gos pa ni/ /rdo rje nyi ma snang ba che/ /rdo rje zla ba dri med 'od/ /chags bral la sogs chags pa che/ / kha dog sna tshogs 'bar ba'i 'od/ /rdo rje skyil krung rdzogs sangs rgyas/ /sangs rgyas 'gro ba'i chos 'dzin pa/ /dpal ldan sangs rgyas pad+ma skyes/ /zhes smos te/ gnyis su med pa'i ye shes kyis srid pa'i rgya mtsho skems pas nyi ma che'o/ /ma rig pa'i mun pa sel ba'i zla ba'i 'od do/ / chags pa rang kha ma dang bral zhing don dang gdul bya la chags pa'o/ /yang na pha rol tu phyin pas 'dul ba'i gang zag la chags pa dang bral ba'i tshul du chos bshad la/ /gsang sngags kyi rigs can la chags pa rang rgyud du spyod pa'i tshul gyis chos bshad do/ /nang na ye shes dang thugs rje'i 'od 'bar ba'i rtags/phyi rol du kha dog sna tshogs kyi 'od 'bar ba'o/ /thabs dang shes rab dbyer med pa'i rtags su rdo rje skyil krung du bzhugs pa'o/ /sangs rgyas rnams 'gro ba la byams pa'i chos 'dzin pa ni thugs mi rtog pa'i tshul gyis rang sgrar shar ba la bya'o/ / nyes skyon dang bral ba ni pad+ma lta bu ste/ /de ni sangs rgyas kun gyi skye gnas su gyur pa'o/ /tshul ji lta bu zhe na/ /kun mkhyen ye shes mdzod 'dzin pa/ /rgyal po sgyu 'phrul sna tshogs 'chang / /che ba gsang sngags rig sngags 'chang / /zhes smos te/ shes bya ji lta ba dang ji snyed pa mkhyen pas kun mkhyen ye shes kyi mdzod 'dzin pa'o//yon tan gyi bgo skal las rgyal ba dang bdud las rgyal zhing sgyu ma lta bu'i sprul pa mos pa sna tshogs 'dul ba'i thabs sna tshogs 'chang ba'o/ /che ba'i yon tan khyad par du gsang sngags kyi ngo bo thabs shes rab dang / rig sngags kyi ngo bo shes rab dang ye shes 'chang ba'o//'o na shes rab kyi las gang zhe na/ /rdo rje rnon po ral gri che/ /yi ge mchog ste rnam par dag /theg pa chen po sdug bsngal gcod/ /mtshon cha chen po rdo rje chos/ /rdo rje zab mo dzi na dzika /rdo rje blo gros don bzhin rig /ces smos te/gnyis su med pa'i ye shes ral gri dang 'dra bas bdag tu rtog pa thams cad gcod cing / don mi 'gyur ba yi ge dang 'dra ste/ rtog pa'i dri mas ma gos pas mchog go/ /shes rab dang snying rjes khyad par byas nas theg pa chen po ste/ de rtogs pas sdug bsngal rtsa ba nas gcod pa'o//de gcod pa'i mtshon cha ni gnyis su med pa'i ye shes rdo rje lta bu'o/ /de lta bu'i zab mo ni rgyal ba'i yang rgyal po yin pas dzi na dzika go/ /shes rab chen po'i blo dang ldan pas/ shes bya ji lta ba rig pa'o/ /de ltar rig pas gdul bya la rgyu 'bras kyi theg pa ston pa ni/ pha rol phyin pa kun rdzogs pa/ /sa rnams kun gyi rgyan dang ldan/ /rnam par dag pa bdag med chos/ /yang dag ye shes zla 'od bzang / /brtson chen sgyu 'phrul dra ba ste/ /rgyud kun gyi ni bdag po mchog /ces smos te/ rje btsun nyid la pha rol tu phyin pa'i ngo bo rnams kyang rdzogs par mnga' la/sa bcu'i yon tan gyis kyang brgyan te/ ma gos pas rnam par dag pa bdag med chos so/ /yang dag pa'i ye shes zla ba'i 'od lta bus ma rig pa dang gdung ba sel zhing / /'gro ba'i don la brtson 'grus chen po dang ldan te/ sgyu ma lta bu'i sprul pa sna tshogs ston cing / khyad par du rgyud thams cad kyi mchog tu gyur pa gnyis su med pa'i ye shes ston pa'o//rtsa ba byang chub kyi sems gnyis su med pas rgyal ba kun gyi snying por bstan pa'i phyir/ /rdo rje'i gdan ni ma lus ldan/ /ye shes sku rnams ma lus 'chang / /kun du bzang po blo gros bzang / /sa yi snying po 'gro ba 'dzin//sangs rgyas kun gyi snying po che/ /zhes smos te/ gzhi chos sku rdo rje lta bu'i rtogs pa las ye shes kyi sku sna tshogs 'byung zhing bzang ngan dang blang dor gang yang med pas kun du bzang la/ /bdag dang gzhan la phan pa mkhyen pas blo gros bzang ngo / /sa bzhin du sems can la phan pa'i yon tan skyed pa'i phyir dang /snod kyi 'jig rten du sprul nas 'gro ba'i don mdzad pa'i phyir/ /sangs rgyas kun gyi sprul pa 'byung ba'i snying po chen por gyur pa'o/ /snying po de las sprul pa tshul ji ltar 'byung ba ni/ sprul pa'i 'khor lo sna tshogs 'chang / /dngos po kun gyi rang bzhin mchog /dngos po kun gyi rang bzhin 'dzin/ /skye med chos de sna tshogs ston/ /zhes smos te/ rig pa byang chub sems cir yang 'char bas sgrub thabs kyi bye brag sna tshogs 'byung ba yin la/ der yang ma zad sku gsung thugs kyi sprul pa sna tshogs 'byung ba'i gzhi yin la/snod bcud kyi dngos po kun gyi rang bzhin skye med du gnas pas kyang mchog go/ /don skye ba med pas kyang gzugs nas rnam pa thams cad mkhyen pa'i bar lta bur kyang ma 'gags par shar bas rang bzhin 'dzin to/ /mdor na zab par skye ba med kyang rgya che ba sna tshogs su ston to//zab pa dang rgya che ba gnyis su med pas theg pa thams cad kyi mchog ces bya'o/ /shes rab dam pa'i ngo bo ci zhe na/ /chos kun ngo bo nyid 'chang ba/ /shes rab chen pos skad cig la/ /chos kun khong du chud pa ste/ /chos kun mngon par rtogs pa ste/ /zhes smos te/ / chos phung po dang / khams dang / skye mched dang / rten cing 'brel par 'byung ba la sogs pa kun gyi ngo bo nyid ni mnyam pa chen po yin la/ de gang gis rtogs na shes rab chen pos skad cig la/ shes bya'i chos thams cad khong du chud de mngon sum du gsal bar rtogs pa'o/ /shes rab de'i stobs ji lta bu zhe na//thub pa blo mchog 'byung po sel/ /mi g.yo rab tu dang ba'i bdag /rdzogs pa'i sangs rgyas byang chub 'chang / /sangs rgyas kun gyi mngon sum pa/ /ye shes me lce 'od rab gsal/ /zhes smos te/ lus ngag yid gsum mi dge ba'i las la thub cing / chos nyid rtogs pa'i blo'i mchog yod pas rnam rtog gi gnod pa 'byung ba lta bu sel te/mtshan ma gang gis kyang mi g.yo bar chu dang ba lta bu'i bdag nyid gsal la rtog pa med pa ni rdzogs pa'i sangs rgyas kyi byang chub ste/ de yang lam la gnas pa'i rnal 'byor pas ni mchog mkhyen la/ sangs rgyas kyis mngon sum mkhyen te/ye shes de'i dpe ni me lce 'bar ba dang 'dra la/ ma rig pa sel ba dang nyon mongs pa sel ba dang / srin bu me khyer la sogs pa'i 'od zil gyis gnon pa dang / zhing khams grangs med du snang bar byed pa'o/ /da ni mnyam pa nyid kyi ye shes kyi sgo nas 'jam dpal ye shes sems dpa'i mtshan bstan pa'i phyir//'dod pa'i don grub dam pa ste/ /ngan song thams cad rnam sbyong ba/ /mgon po sems can kun gyi mchog /sems can thams cad rab grol byed/ /nyon mongs g.yul du gcig dpa' ba/ /mi shes dgra yi dregs pa 'joms//zhes pa la sogs pa smos te/ mtho ris dang thar pa 'dod pa rnams kyi don du sbyin pa la sogs pa'i sgo nas sgrub par byed de/ dman pa ngan song gsum las kyang thar pa dang rjes su mthun pa'i chos rnams bstan nas rgyu dang 'bras bu sbyong zhing / sems can kun gyi don byed pas mchog go//sems can thams cad kyi bsam pa mkhyen pas blo'i rim pa dang sbyar nas nyon mongs pa'i 'ching ba las grol bar byed do/ /chos ji snyed cig bshad kyang nyon mongs pa 'dul ba'i gnyen por gcig go/ /des mu stegs la sogs pa zil gyis gnon pas dregs pa 'joms pa'o//gzhan gyi nyon mongs pa de ltar 'joms na/ 'o na gzhan 'dul ba'i gzugs su ji ltar ston zhe na/ dpal ldan blo dang sgeg par ldan/ /brtan po mi sdug gzugs 'chang ba/ /zhes smos te/ bdag dang gzhan gyi dpal du gyur pas shes rab chen po'i blo dang ldan pa/blta na mdzes par mdzad pas na sgeg pa'o/ /don mi 'gyur bar brtan la/ zhi bas mi 'dul ba la bdud la sogs pa zlog pa'i 'jigs su rung ba'i gzugs 'chang ba'o/ /de yang gar la mos pa la gar du ston pa'i phyir/ /lag pa brgya po kun bskyod cing / /gom pa'i stabs kyis gar byed pa//dpal ldan lag pa brgyas gang la/ /nam mkha' khyab par gar byed pa/ /zhes smos te/ tshangs pa 'dul ba'i gar lag pa brgya sprul te bsgyur ba dang / tshogs gnyis rdzogs pa'i mthus lag pa brgyar sprul te/ /nam mkha' khyab tshad du 'gro ba'i don byed pa'o/ /lus kyi rdzu 'phrul gzhan yang ston pa'i phyir//sa yi dkyil 'khor gzhi yi khyon/ /rkang pa ya gcig mthil gyis gnon/ /rkang mtheb sen mo'i khyon gyis kyang / /tshangs pa'i yul sa rtse nas gnon/ /zhes smos te/ gling bzhi'i khyab 'jug gis 'dul ba de'i gnyen por gling bzhi ri rab dang bcas pa rkang pa ya gcig gi mthil gyis mnan pa ste/gling bzhi chung du ma song la zhabs che ru ma song ngo / /gyen la ni zhabs kyi mthe bong gis tshangs pa'i 'jig rten dus gcig tu gnon to/ /snga ma ltar che chung du ma song ba'i rdzu 'phrul ston to/ /'khor ba 'di ma spangs par ji ltar grol bar 'gyur zhe na//don gcig gnyis med chos kyi don/ /dam pa'i don de 'jigs pa med/ /rnam rig sna tshogs gzugs don can/ /rnam shes sna tshogs rgyud dang ldan/ /dngos don ma lus rnams la dga'/ /stong pa nyid dga' 'dod chags blo/ /srid pa'i 'dod chags spangs pa ste//srid gsum dga' ba chen po pa/ /zhes smos te/ gnyis su med pa ni don dam pa chos kyi sku ni don dam pa ste/ gzhan gyis mi thub pas 'jigs pa med de/ thugs rje dang smon lam gyi shugs kyis rnam rig sna tshogs kyi gzugs su sprul lo/ /kun gzhi rnam shes nyid rnam rtog sna tshogs dang 'brel pas rgyud do//de ltar dngos po 'khor ba'i don ma lus par mdzad pa las dgyes shing / don dam par stong pa nyid la dga' zhing chags pa'i blos khams gsum gyi 'dod chags rang kha ma las grol bas spangs pa'o/ /shes rab chen pos srid pa las grol kyang thugs rjes der sprul nas don mdzad pa la dga'o//don mdzad pa'i tshe sku'i gzi mdangs ci 'dra zhe na/ sprin dkar dag pa bzhin du dkar/ /'od bzangs ston ka'i zla ba'i 'od/ /nyi ma 'char ka'i dkyil ltar mdzes/ /sen mo'i 'od ni shas cher dmar/ /zhes smos te/ don lam gos pa'i mtshan ma 'od kha dog sprin ltar dkar zhing /ye shes kyi 'od zer 'phro ba'i dpe ston ka'i zla ba'i 'od lta bus ma rig pa'i mun pa sel zhing gdung ba tshim par byed pa'o/ /de las kyang ye shes drug ro gcig pa'i rtags su 'od kha dog drug dang ldan pa'i sku mnga' ste/ 'gro ba la thugs rjes chags pa'i rtags su phyag gi sen mo dmar ba'o//rgyan gyi khyad par ji lta bu zhe na/ cod pan bzang po mthon ka'i rtse/ /skra mchog mthon ka chen po pa/ /nor bu chen po 'od chags dpal/ /sangs rgyas sprul pa'i rgyan dang ldan/ /zhes smos te/ mtha' gnyis las rgyal ba'i rtags su dbu la rin po che'i cod pan bzang zhing mdzes pas brgyan pa'o//skra yang gzhan pas mchog tu gyur pas rin po che mthon ka ltar sngo zhing mdzes pa'i skra mnga' ba'o/ /'gro ba'i don rdzogs par mdzad pa'i rtags su thugs ka na yid bzhin gyi nor bu rin po ches brgyan cing / sangs rgyas kyi sprul pa dpag tu med pa mnga' ba'i rtags su ba spu re re la ye shes sems dpa' re re gsal zhing mdzes pas brgyan pa'o/ /de lta bu de la lam gyi khyad par ji lta bu mnga' zhe na/ /'jig rten khams brgya kun bskyod pa/ /rdzu 'phrul rkang pa'i stobs chen ldan/ /de nyid dran pa chen po 'chang //zhes smos te/ 'jig rten khams brgya ni mtshon pa tsam ste/ mtha' yas par bskyod par mdzad do/ /bskyod nas ci mdzad na rdzu 'phrul gyi rkang pa bzhi la sogs pa'i sgo nas 'gro don mdzad de/ rdzu 'phrul gyi rkang pa bzhi ni 'dun pa'i ting nge 'dzin dang ldan pa rdzu 'phrul gyi rkang pa dang /sems kyi ting nge 'dzin dang ldan pa rdzu 'phrul gyi rkang pa dang / brtson 'grus kyi ting nge 'dzin dang ldan pa rdzu 'phrul gyi rkang pa dang / dpyod pa'i ting nge 'dzin dang ldan pa rdzu 'phrul gyi rkang pa'o/ /de yang don mi bsnyel ba'i dren pa chen po 'chang ste/ gzhan yang byang chub kyi yan lag gang zhe na/dran pa bzhi po ting 'dzin rgyal/ /byang chub yan lag me tog spos/ /de bzhin gshegs pa'i yon tan mtsho/ /lam gyi yan lag brgyad tshul rig /yang dag sangs rgyas lam rig pa/ /zhes smos te/ dran pa bzhi ni lus dran pa nye par gzhag pa dang / sems dang / tshor ba dang / chos so/ /de rnams ni tshogs lam gyi gnas skabs so/ /dran pa bzhi po de la yang ma zhen pas ting nge 'dzin rgyal lo/ /de la mthong lam gyi gnas skabs na byang chub kyi yan lag bdun te/ dran pa yang dag byang chub kyi yan lag dang / chos rnam par dbye ba dang / brtson 'grus dang /dga' ba dang / shin tu sbyangs pa dang / ting nge 'dzin dang / btang snyoms so/ /de lta bu'i sgo nas 'gro ba'i don byed pa dang / 'phags pa mnyes par byed pas me tog spos so/ /der yang ma zad de sangs rgyas kyi chos ma 'dres pa bco brgyad la sogs te/ de bzhin gshegs pa'i yon tan rgya mtsho tsam gyi gzhir rje btsun nyid 'gyur ro//gzhan yang bsgom lam gyi gnas skabs na 'phags pa'i lam yan lag brgyad pa ste/ yang dag pa'i lta ba dang / rtog pa dang / ngag dang / las kyi mtha' dang / 'tsho ba dang / rtsol ba dang / dran pa dang ting nge 'dzin to//de lta bu'i tshul rig nas 'gro ba 'dren par mdzad do/ /de ltar rig pa ni yang dag par sangs rgyas pa'i lam rig pa'o/ /don mdzad pa la sngon du thugs rje skye dgos pa'i phyir/ /sems can kun la shas cher chags/ /nam mkha' lta bur chags pa med/ /sems can kun gyi yid la 'jug /sems can kun gyi yid ltar mgyogs/ /zhes smos te/ sems can kun la bu gcig pa'i ma ltar thugs rjes chags shing / 'o na mtshan mar mi 'gyur ram zhe na/ don nam mkha' ltar mkhyen pas chags pa rang kha ma sal lo/ /de yang sems can kun gyi yid la khyab par 'jug cing /'gro ba'i don la brtson 'grus yid ltar mgyogs par mdzad pa'o/ /de yang don bya ba'i yul mkhyen pa bstan pa'i phyir/ /sems can kun gyi dbang don shes/ /sems can kun gyi yid 'phrog pa/ /phung po lnga don de nyid shes/ /rnam dag phung po lnga 'chang ba/ /zhes smos te/sems can kun gyi dbang po rab 'bring tha ma shes shing don gang la mos pa rnams shes pas so/ /sku lta bas chog mi shes pa ston pas kyang sems can kun gyi yid 'phrog la/ yid rtog bcas rtog med du bzlog pas kyang yid 'phrog pa'o/ /de yang phung po lnga'i don kun rdzob sgyu ma lta bur shes la/don dam du skye ba med par shes pa'o/ /de yang rnam par dag pa'i phung po lnga dang ldan te/ tshul khrims kyi phung po dang / ting nge 'dzin gyi phung po dang / shes rab kyi phung po dang / rnam par grol ba'i phung po dang / rnam par grol ba'i ye shes mthong ba'i phung po'o/ /'o na don byed pa'i thabs ji ltar mkhyen ce na/nges 'byung kun gyi mtha' la gnas/ /nges par 'byung ba kun la mkhas/ /nges 'byung kun gyi lam la gnas/ /nges par 'byung ba kun ston pa/ /zhes smos te/ khams gsum pa las nges par 'byung ba'i chos kun gyi mthar thug pa ni gnyis su med pa'i ye shes te/de la rje btsun nyid ngang gis gnas shing / nges par 'byung ba'i chos kun ston pa la yang mkhas pa'o/ /nyid kyang lam de la gnas pa'i tshul ston te/ gzhan dang 'dra ba'i phyir ro/ /gdul bya rnams la ji ltar 'tsham par 'byung ba'i chos ston par mdzad do/ /des gzhan don ji ltar mdzad ce na//yan lag bcu gnyis srid rtsa bton/ /dag pa rnam pa bcu gnyis 'chang / /bden bzhi'i tshul gyi rnam pa can/ /shes pa brgyad po rtogs pa 'chang / /bden don rnam pa bcu gnyis ldan/ /de nyid rnam pa bcu drug rig /rnam pa nyi shus byang chub pa/ /rnam par sangs rgyas kun rig mchog /sangs rgyas kun gyi sprul pa'i sku/ /bye ba dpag med 'gyed pa po/ /zhes smos te/ rten 'brel yan lag bcu gnyis kyis ni srid pa yin te/ ma rig pa'i rkyen gyis 'du byed 'byung / 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ srid pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi'o/ /de rnams kyi rtsa ba ni ma rig pa yin te/ma rig pa 'gags na de rnams 'gag pa'i phyir ro/ /gnyis su med pa'i ye shes chen pos ma rig pa rtsa ba nas bton pa'o/ /yang skye mched bcu gnyis dag pa'i tshul ni/ mig gi skye mched dang / gzugs kyi skye mched dang / rna ba dang sgra dang / sna dang /dri dang / lce dang ro dang / lus dang reg bya dang / yid dang / chos kyi'o/ /yang bden pa rnam pa bzhis kyang sems can khrid par mdzad de/ sdug bsngal gyi bden pa dang / kun 'byung gi bden pa dang / 'gog pa'i bden pa dang / lam gyi bden pa'o/ de dag ni thun mong gi lam mo//khyad par gyi lam ni rnam par shes pa'i tshogs brgyad kyi rang bzhin rtogs pa ste/ de yang tshogs bdun ni kun gzhi'i byin gyi rlabs kyis 'byung ba yin la kun gzhi skye med du shes pas 'dres pas brgyad car skye med du shes par 'gyur ro/ /de yang 'di skad du/ brgyad po skye med shes pa yis//dgongs pa rgyal ba kun dang mnyam/ /zhes pa lta bu'o/ /yang dag pa'i bden pa'i don sangs rgyas pa'i yon tan bcu gnyis dang yang ldan te/ rigs lnga ye shes lnga shes rab dang snying rje khyad par can no/ /de nyid rnam pa bcu drug ni stong pa nyid bcu drug ste/nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang /dor ba med pa stong pa nyid dang / rang bzhin stong pa nyid dang / chos thams cad stong pa nyid dang / rang gi mtshan nyid stong pa nyid dang / mi dmigs pa stong pa nyid dang / dngos po med pa'i ngo bo nyid stong pa nyid do/ /de ma gtogs pa sems can gyi dus na/ /sa la sogs pa 'byung ba lnga/gzugs la sogs pa phung po lnga/ 'dod chags la sogs pa nyon mongs pa lnga/ mig la sogs pa dbang po lnga ste/ rnam pa nyi shur snang ba ste/ don rtogs pa'i dus na de dag kyang rigs lnga ye shes lngar shar te/ sangs rgyas kyi chos kyang de dag tu 'dus te/ rnam pa de dag las grol nas sangs rgyas kyi byang chub yin pas mchog go//de yang 'di skad du/ 'byung ba lnga dang nyon mongs phung po lnga/ /dbang po rnam lnga'i zhen pa dang bral nas/ /rigs lnga ye shes lngar snang la/ /rdzogs sangs rgyas pa'i byang chub yin/ /zhes gsungs pa lta bu'o/ /de lta bu'i sangs rgyas la rnam pa thams cad mkhyen pa'i ye shes mnga' bas kun rig pa'o//rig nas sprul pa bye ba dpag tu med pa bkye nas sems can gyi don mdzad pa'o/ /de yang gdul bya'i blo dang 'tsham pa'i theg pa ston pa'i phyir/ skad cig thams cad mngon par rtogs/ /sems kyi skad cig don kun rig /theg pa sna tshogs thabs tshul gyis/ /'gro ba'i don la rtogs pa po/ /theg pa gsum gyi nges 'byung la/ /theg pa gcig gi 'bras bur gnas/ /zhes smos te/ skad cig gis gdul bya'i bsam pa dang bag la nyal thams cad rig nas don mdzad de/ 'o na rtog bcas su thal lo zhe na/ rtog byed de rang yang skye med du rig pa'o/ /rig nas theg pa sna tshogs kyis 'gro ba'i don mdzad pa'o/ /de yang 'di skad du/ /ji srid sems rnams 'jug gi bar/ /theg pa'i mtha' la thug pa med/ /ces pa lta bu'o/ /de yang gdul bya theg pa gsum gyis 'dul ba la nyan thos dang /rang rgyal dang / theg pa chen po bstan to/ /yang dag par theg pa gcig ste 'bras bu rdo rje'i theg pa'o/ /de yang 'bras bu sangs rgyas na ji ltar gnas pa dang de lta nyid nas lam du khyer nas 'bras bur gnas zhes bya'o/ /de yang skye dgu theg pa dgu bstan pa yang 'gro ba'i don bstan pa ma gtogs pa/theg pa 'di kun yang dag pa'i theg pa dag las gzhan ma yin zhes pa lta bu/ de yang gsum po ni rgyu'i theg pa'o/ /gcig ni 'bras bu'i theg pa'o/ /de yang / rgyu la sbyor ba rgyu yi chos/ /'khor lo shin tu bskor byas nas//'bras bu'i theg pa nye lam zhig /dus tshigs phyi mar 'byung bar 'gyur/ /zhes pa lta bu'o/ /de la'ang spangs ba'i khyad par bstan pa'i phyir/ nyon mongs khams rnams dag pa'i bdag /las kyi khams rnams zad byed pa/ /chu bo rgya mtsho kun las rgal/ /sbyor ba'i dgon pa las byung ba//nyon mongs nye ba kun nyon mongs/ /bag chags bcas pa gtan spangs pa/ /zhes smos te/ gnyis med rtogs pas nyon mongs pa dag cing / las ngan slong bar byed pa'i sems med pa dang / las zad par byed pa'o/ /'khor ba'i spyod yul ji snyed pa rnams ni chu bo dang 'dra ste/rgyun ring ba dang / rgyun phyogs su khyer bar byed pa dang / rgal dka' ba dang / mang ba'i phyir de las rgal zhing don la sbyor ba'i ye shes ni/ rtog pa las dben pas dgon pa zhes bya'o/ /nyon mongs pa'i rtsa ba drug dang / de yang nye ba'i nyon mongs ba nyi shu dang /kun nas nyon mongs pa sdug bsngal rnams dang bag chags sa bon dang bcas pa gtan nas spangs pa'o/ /de nyid thabs dang shes rab dam pa dang ji ltar ldan zhe na/ snying rje chen po shes rab thabs/ /don yod 'gro ba'i don byed pa/ /'du shes kun gyi don spangs shing / / rnam shes don ni 'gag par byed/ /ces smos te/ snying rje chen po dang ldan pas zhi ba'i mtha' la mi gnas shing / shes rab chen po dang ldan pas srid pa'am 'khor ba la mi gnas te/ thabs de lta bus 'gro ba'i don byed do/ /'o na mtshan mar 'dzin pa can du mi 'gyur ram zhe na/'du shes ni yul la mtshan mar 'dzin pa ste/ des spangs shing rnam shes zag pa dang bcas pa skye med du rtog pas de'i skyon med do/ /de ltar rang rtogs pa ma nor bas gzhan ma nor ba'i lam la 'god pa'i phyir/ /sems can kun gyi yid dang ldan/ /sangs rgyas kun gyi thugs rig pa//sems can kun gyi yid la gnas/ /de dag sems dang mthun par 'jug /sems can kun yid tshim par byed/ /sems can kun gyi yid dga' ba/ /grub pa mthar phyin 'khrul pa med/ /nor ba thams cad rnam par spangs/ /don gsum the tshom med pa'i blo/ / kun don yon tan gsum gyi bdag /ces smos te/ sems can gyi yid dang mthun par don mdzad pa de yang sangs rgyas kyi thugs mi rtog par rig pa'i sgo nas mdzad de/ des sems can kun gyi yid la khyab par gnas te/ de dag gi sems dang mthun par 'gro ba'i don la 'jug la/ zhugs nas sems can ji ltar 'dod pa ltar tshim zhing dga' bar byed de/ sems can gyi don sgrub pa mtha' phyin par byed do/ /de yang 'khrul pa'am nor ba thams cad spangs te/ drang ba'i don dang / nges pa'i don dang / theg pa sna tshogs kyi don dang / gsum la the tshom med pa ste/ grub pa'i mtha' rnams nges par shes pa'i phyir ro//sems can kun gyi don du gyur pa'i yon tan sku dang gsung dang thugs gsum gyi bdag por gyur pa'o/ /de nyid las kyang / /sangs rgyas kun gyi thugs la gnas/ /sangs rgyas kun gyi sku che ba/ /sangs rgyas kun gyi gsung yang yin/ / zhes 'byung ngo / /de yang rgyu rtogs pas 'bras bu mchog tu grub pa'i phyir/ /phung po lnga don dus gsum du/ /skad cig thams cad bye brag phyed/ /skad cig gcig gis rdzogs sangs rgyas/ /sangs rgyas kun gyi rang bzhin 'chang / /lus med lus te lus kyi mchog /lus kyi mtha' ni rtogs pa po//gzugs rnams sna tshogs snang ba'i dpal/ /nor bu chen po rin chen tog /ces smos te/ rgyu'i dus na phung po lnga la dus gsum gyi skad cig mas gzhig na bye brag phyed de/ mu stegs kyi bdag po la sogs par byed de/ 'bras bu'i dus su de kho na nyid thugs su chud pa la rim pa yod pa ma yin pas skad cig mas kyang sangs rgyas te/'di ni las 'phro dang dbang po'i mchog tu gyur pa la byed rtsol gyi spros pa bcad de/ de bzhin nyid bsgoms pas lam nye bar ston to/ /de yang byed rtsol gyi spros pa bcad pa ni 'di skad du/ shes rab dam pas ma zin pa'i/ / lam gyi dge ba stegs bcas kyang / /mtho ris lha dang mi ru skye/ /skye shi med pa'i sa mi thob/ /ces pa lta bu'o/ /de yang / /sangs rgyas kun gyi rang bzhin mnyam/ /thugs rjes 'gro don mdzad par mnyam/ /mdzad lugs mi mnyam/ /sku bong dang tshe tshad dang / tshul dang rigs mi mnyam pa ltar snang ngo //de yang rang bzhin skye med 'chang bar mdzad do/ /chos kyi sku la zag bcas kyi lus med la/ de'i byin gyi rlabs las longs spyod rdzogs pa'i sku lus kyi mchog tu gyur pa 'byung ngo / /lus thams cad kyi mtha' skye med du rtogs pa las sprul sku sna tshogs pa 'gro ba'i dpal du 'byung ba ni yid bzhin gyi nor bu dang 'dra bar 'dod pa skong bas rab ces bya'o//tso to zhes bya ba me tog ces bya'o/ /de yang longs spyod rdzogs pa'i sku ni nges pa rnam pa lnga dang ldan te/ rnam pa nges pa dang / gnas nges pa dang / 'khor nges pa/ chos nges pa/ dus nges pa'o/ / sprul sku ni rnam pa ma nges/ gnas ma nges/ 'khor ma nges/ chos ma nges/ dus ma nges pa'o/ /da ni bya ba grub pa'i ye shes kyi sgo nas 'jam dpal ye shes sems dpa'i mtshan bstan par bya ste/ de yang phrin las kyi rgyu gang zhe na/ /sangs rgyas kun gyis rtogs bya ba/ /sangs rgyas byang chub bla na med//ces pa la sogs pa smos te/ chos kyi sku gnyis med ni sangs rgyas kun gyi rang bzhin rtogs par bya ba'i chos chen po yin la/ de rtogs nas sangs rgyas kyi byang chub bla na med pa'o/ /gsang sngags las byung yi ge med/ /gsang sngags chen po rigs gsum pa//gsang sngags don kun skyed pa po/ /thig le chen po yi ge med/ /stong pa chen po yi ge lnga/ /thig le stong pa yi ge brgya/ /zhes pa thabs dang shes rab las byung ba'i chos kyi ngo bo nyid brjod du med pas yi ge med pa'o/ /rgyu che ba thabs dang shes rab las 'bras bu che ba sku gsung thugs kyi rigs gsum lhun gyis grub pa'o//des gsang sngags kyi don bskyed rim pa dang / rdzogs rim gzhan gyi rgyud las skyed par byed pa'o/ /don dam par thig chos nyid mi 'gyur ba la/ le khyab cing gdal ba ste/ ngo bo tshig gis brjod du med pa'o//stong pa chen po chos kyi sku de nyid las de bzhin gshegs pa lnga'i sa bon yi ge ma 'gags par shar ba ni/ /oM AHhUM swA hA/ de lnga'o// //thig le skye ba med pa de las yi ge brgya ste/ de la brten nas sgrub thabs sna tshogs 'byung ba ste/ don du na chos kyi sku la phyogs ris med cing 'gag pa med pa'i mthu'o//'o na thugs kyi sprul pa gang zhe na/ /rnam pa kun ldan rnam pa med/ /bcu drug phyed phyed thig le can/ /yan lag med pa'i rtsis las 'das/ /bsam gtan bzhi yi rtse mo can/ /bsam gtan yan lag kun shes shing / /ting 'dzin rig dang rgyud rig pa//zhes smos te/ kun rdzob tu mtshan dang dpe byad la sogs te snod bcud kyi rnam pa kun dang ldan la/ don dam par snang ba'i ngo bo nyid med do/ /dbyangs kyi yi ge bcu drug gi phyed yi ge brgyad yin la/ brgyad kyi phyed bzhi yin te/ a A aM aH/ zhes pa'o/ /de bzhi ni mtshon byed du byung ba yin te/de bzhis ci mtshon na/ rnam par thar ba'i sgo bzhi mtshon te/ stong pa nyid kyi rnam par thar pa dang / mtshan ma med pa'i rnam par thar pa dang / smon pa med pa'i rnam par thar pa dang / thabs la mkhas pa'i rnam par thar pa'o/ /de yang stong pa nyid kyis ni dngos po las 'byin par byed do//mtshan ma med pas ni mtshan ma phra mo'i zhen pa las kyang 'byin par byed do/ /smon pa med pas ni 'bras bu re smon gyi mtha' la dmigs pa las 'byin par byed do/ /thabs la mkhas pas ni thabs dman zhing mi mkhas pa rnams las 'byin par byed do//de bzhi yang spros pa phyogs re bcad pa'i yon tan gyi cha nas bzhir bshad kyis/ don du na thig le chen po yi ge med pa'o/ /yang spyi bo bde ba chen po'i 'khor lo na byang chub kyi sems thig le cha bcu drug tu gnas te/ de las kyi phyag rgya'i thabs kyi bye brag rnams la brten te/ spyi bo bde ba chen po'i 'khor lo'i thig le bcu drug po bzhu ba'i phyed brgyad snying ga chos kyi 'khor lor phab/de bzhu ba'i phyed lte ba sprul pa'i 'khor lor phab/ de'i phyir gsang ba bde skyong gi 'khor lor phab ste/ gnyis shos gnyis mnyam gyi dus su ngos gzung ngo / /de yang dang yang du goms par byas pas mthar de'i zhen pa bag tsam dang yang bral te/thig le chen po yi ge med pa rtogs par 'gyur ro/ /de yang 'di skad du/ zab mo rnam par thar pa bzhis/ /rnon po'i don du bshad pa yin/ /'khor lo bzhin du bskor byed pa/ /rtul po'i don du shes par bya/ /zhes 'byung ngo / /de ltar bsgoms pas rnam rtog gi yan lag med pa/brjod pa'i rtsis las 'das pa'o/ /ting nge 'dzin bzang ba ni bsam gtan bzhi la lta'i ting nge 'dzin lta bu'o/ /nyid kyang de dang ldan zhing gzhan gyi ting nge 'dzin bsam gtan gyi yan lag rnams kyang shes te/ de yang 'dod pa'i khams na lhag mthong shas che ba'i bsam gtan kyang shes pa'o//gzugs med pa'i khams na zhi gnas shas che ba'i bsam gtan kyang shes pa'o/ /gzugs kyi khams na zhi gnas lhag mthong zung du 'brel ba'i bsam gtan kyang shes te/ de la bsam gtan bzhi la yan lag bco brgyad de/ bsam gtan dang po la yang yan lag lnga ste/ rtog pa dang / dpyod pa dang / dga' ba dang / bde ba dang / sems rtse gcig pa nyid do/ /bsam gtan gnyis pa la yang yan lag bzhi ste/ dga' ba dang / bde ba dang / nang rab tu dang ba dang / sems rtse gcig pa nyid do/ /bsam gtan gsum pa la yang yan lag lnga ste/btang snyoms dang / dran pa dang / shes bzhin dang / bde ba dang / sems rtse gcig pa nyid do/ /bsam gtan bzhi pa la yang yan lag bzhi ste/ btang snyoms yongs su dag pa dang / dran pa yongs su dag pa dang / bde ba yang ma yin sdug bsngal ba yang ma yin pa'i tshor ba yongs su dag pa dang /sems rtse gcig pa nyid do/ /de rnams rje btsun nyid kyis shes pa'o/ /gzhan dpa' bar 'gro ba'i ting nge 'dzin dang / rin chen phyag rgya'i ting nge 'dzin dang / seng ge rnam par bsgyings pa'i ting nge 'dzin dang /zla ba'i rgyal mtshan dpal zhes bya ba'i ting nge 'dzin la sogs pa ting nge 'dzin brgya rtsa gcig kyang mkhyen cing / gang zag gi bsam pa dang bag la nyal dang skye gnas kyi rgyud kyis bsdus pa rnams kyang rig cing mkhyen no/ /'o na longs sku'i mtshon pa ci zhe na/ ting nge 'dzin lus can lus kyi mchog /longs spyod rdzogs sku kun gyi rgyal/ /zhes smos te/ ting nge 'dzin lus can ni chos kyi sku ste/ sku de gnyis kyi rten byed cing mchog tu gyur pa de ni gzhi'o/ /de las theg pa chen po'i chos la longs spyod pa sku rnam par snang mdzad du snang ste/ de yang nges pa lnga dang ldan zhing 'khor los sgyur ba'i rgyal po lta bur bzhugs pa ste/de yang / /theg chen nye bar longs spyod phyir/ /thub pa'i longs spyod rdzogs skur 'dod/ /ces pa lta bu'o/ /de yang sku'i mdzad spyod rnam par dag pa'i sgo nas 'khor sa bcu'i byang chub sems dpa' rnams kyi gtso bor gyur pa rnams la chos kyi 'khor lo skor bar mdzad do//de la sprul pa'i sku'i mdzad spyod ci zhe na/ sprul pa'i sku ste sku yi mchog /sangs rgyas sprul pa'i rgyud 'chang ba/ /phyogs bcur sprul pa sna tshogs 'gyed/ /ji bzhin 'gro ba'i don byed pa/ /zhes smos te/ de yang rgyal ba sprul pa'i sku ni/ 'khor rigs drug gi sems can dang /nyan thos dang / rang rgyal ba rnams la gsung gi mdzad spyod rnam par dag pa'i sgo nas chos kyi 'khor lo skor bar mdzad de/ sprul sku ma dag pa las mchog tu gyur pa sangs rgyas rnam par gzigs/ gtsug tor can la sogs pa sangs rgyas stong rtsa gnyis kyi rgyud du sprul pa'o//sprul nas gang du 'gyed na phyogs bcur 'gyed do/ /bkye nas ci byed na ji ltar 'tsham pa ltar 'gro ba'i don byed pa'o/ /'o na ma dag pa'i sprul sku gang zhe na/ lha yi dbang po lha yi lha/ /lha yi bdag po lha min bdag /'chi med dbang po lha yi bla/ /'joms byed 'joms byed dbang phyug po//zhes smos te/ lha'i dbang po ste khyab 'jug gis 'dul ba la khyab 'jug tu sprul lo/ lha'i lha ni tshangs pa'o/ /lha'i bdag po ni brgya byin no/ /lha min bdag ni thags bzangs ris so/ /'chi med dbang po ni 'thab bral la sogs pa'i lha'i rgyal po rnams so//lha'i bla ni gzhan 'phrul dbang byed la sogs pa'i lha'i rgyal po'o/ /'joms byed ni drag po 'jigs byed do/ /'joms byed dbang phyug ni ma hA de ba'o/ /de rnams kyis 'dul ba la de rnams su sprul nas don mdzad do/ /chos kyi sbyin pa'i tshul ni/ srid pa'i dgon pa las rgal ba//ston pa gcig pu 'gro ba'i bla/ /'jig rten phyogs bcur rab grags pa/ /chos kyi sbyin bdag che ba po/ /byams pa'i go cha chas pa ste/ /snying rje yi ni ya lad bgos/ /shes rab ral gri mda' gzhu thogs/ /nyon mongs mi shes g.yul ngo sel/ /dpa' bo bdud dgra bdud 'dul ba//bdud bzhi'i 'jigs pa sel bar byed/ /bdud kyi dpung rnams pham byed pa/ /zhes smos te/ srid pa ni nges pa'i 'byung gnas yin te/ dgon pa ni de las dben pa'o/ /de las rgal te don gnyis med rtogs pas ston pa gcig pu'o/ /yang na bstan pa gcig la ston pa gnyis mi 'byung bas so//'gro ba thams cad kyi ston par gyur pas na bla ma'o/ /de yis 'jig rten phyogs bcur grags te/ rgyu cis grags na chos kyi sbyin pas grags so/ /de yang rlom pa lta bu ma yin te/ byams pa'i go cha gon zhing / snying rje'i khrab gon pa'o//de'i mtshon cha ni nyon mongs pa gcod pa shes rab kyi ral gri dang / thabs shes rab kyi mda' gzhus nyon mongs pa dang ma rig pa'i g.yul ngo sel lo/ /gang las dpa' na bdud 'dul bas dpa'o/ /gzhan bdud bzhi'i 'jigs pa las kyang skyob cing sel bar byed do//phyogs gcig sel ba tsam ma yin te/ bdud kyi dpung sde dang bcas pa pham par byed pa ste/ de yang sems skye ba med pa rtogs pas nyon mongs pa'i bdud bcom/ /sems nyid la rgas rgud med pas phung po'i bdud bcom/ sems nyid la skye shi med pas 'chi bdag gi bdud bcom/sems nyid rtogs pas the tshom dang bral te lha'i bu'i bdud bcom/ de yang 'di skad du/ gal te bdud kyi tshogs ni bye ba dag /sangs rgyas skur bsgyur bar chad smra byas kyang / /chos la mkhas pas chos nyid rab thob ste/ /de dag byang chub las ni bzlog mi nus//zhes pa lta bu'o/ /de lta bu de mchod pa'i 'os su bstan pa'i phyir/ rdzogs pa'i sangs rgyas 'jig rten 'dren/ /mchod 'os bstod 'os phyag gi gnas/ /rtag tu ri mor bya ba'i 'os/ /bkur 'os rjed par bya ba'i mchog /phyag byar 'os pa bla ma'i rab//ces smos te/ sangs rgyas kyi bdag nyid rje btsun gyis 'jig rten pa rnam par thar pa'i gnas su 'dren pas/ mchod pa dang / bstod pa dang / phyag bya ba dang / sku gzugs bris la mchod pa dang / rgyan gdags pa dang / phu dud du bkur ba dang / yon tan bsgrags pa dang / lus ngag yid gsum gus pas phyag bya bar 'os te/ bla ma'i rab tu gyur pa'i phyir ro/ /de'i mkhyen pa'i bye brag ci zhe na/ /'jig rten gsum po gom gcig bgrod/ /mkha' ltar mtha' med rnam par gnon/ /gsum rig gtsang ma dag pa ste/ /mngon shes drug ldan rjes dran drug /ces smos te/ 'jig rten gsum po de shes rab kyi gom pa gcig gi bar du bgrod la/ rtags rdzu 'phrul gyi gom pas bgrod do/ /nam mkha' ltar chos kyi sku mtha' med par rtogs pas nyon mongs pa gnon par byed do/ /de yang phyi sde snod gsum rig la/ nang du sku gsung thugs rig ste/bdag gzhan gyi dri ma dang bral bas gtsang ma dag pa'o/ /gzhan yang mngon par shes pa drug ste/ lha'i mig gi mngon par shes pa dang / lha'i rna ba'i mngon par shes pa dang / pha rol gyi sems shes pa dang / sngon gyi gnas rjes su dran pa dang / rdzu 'phrul gyi bya ba shes pa dang /zag pa zad pa'i mngon par shes pa'o/ /rjes su dran pa drug ni/ /sangs rgyas rjes su dran pa dang / chos rjes su dran pa dang / dge 'dun rjes su dran pa dang / dam tshig rjes su dran pa dang / thugs rje rjes su dran pa dang / mdzad pa rjes su dran pa dang drug go/ / shes rab dam pa ji lta bu zhe na/ byang chub sems dpa' sems dpa' che/ /rdzu 'phrul chen po 'jig rten 'das/ /shes rab pha rol phyin pa'i mtha'/ /shes rab kyis ni de nyid thob/ /ces smos te/ byang chub sems dpa' ni rang don no/ /sems dpa' chen po ni gzhan don no/ /de yang byang chub ni nam mkha' lta bu'i chos kyi sku la/sems dpa' de ni de rtogs par 'dod pa'i 'dun pa yod pa dang / gzhan gyi don la dpa' ba'o/ /de yang 'di skad du/ byang chub nam mkha'i mtshan nyid de/ /kun du rtog pa thams cad spangs/ /gang zhig de rtogs 'dod pa de/ /byang chub sems dpa' zhes bya'o//zhes pa lta bu'o/ /de yang rdzu 'phrul chen po brnyes te 'jig rten las 'das pa'o/ /pha rol tu phyin pa'i mthar thug pa de kho na nyid ni/ shes rab kyis thob par byed do/ /de nyid dpe las 'das par bstan pa'i phyir/ bdag rig gzhan rig thams cad pa//kun la phan pa'i gang zag mchog /dper bya kun las 'das pa ste/ /shes dang shes bya'i bdag po mchog /ces smos te/ ji lta ba bdag gi don dang / ji snyed pa gzhan gyi don thams cad rig pa'i sgo nas kun la phan par byed pa ste/ gang zag ltar sprul kyang dngos ma yin pas mchog go//cung zad du yang mnyam pa med pas na dpe las 'das pa'o/ /shes par byed pa dang shes par bya ba'i don gnyis ka'i bdag po'i mchog tu gyur pa'o/ /gang gi sgo nas shes par byed ce na/ /gtso bo chos kyi sbyin bdag ste/ /phyag rgya bzhi po don ston pa//'gro ba'i bsnyen bkur gnas kyi mchog /nges 'byung gsum po bgrod rnams kyi/ /don gyi dam pa rnam dag dpal/ /'jig rten gsum na skal bzang che/ /zhes smos te/ rje btsun nyid sangs rgyas thams cad kyi gtso bor gyur bas kyang chos kyi sbyin pa ni sbyin pa rnams kyi gtso bor gyur pa'o//de'i bdag po ni rje btsun no/ /de phyag rgya bzhi'i chos ston te/ de la yang bka' rtags kyi phyag rgya bzhi la/ theg pa chung ngu'i bka' rtags kyi phyag rgya bzhi ni/ mi rtag pa dang / sdug bsngal ba dang / stong pa dang / bdag med pa'o/ /de yang / mi rtag sdug bsngal stong dang bdag med pa//de ni rdzogs sangs rgyas kyis gsungs pa'i chos/ /zhes 'byung ngo / /'di nyid las kyang / bden bzhi'i tshul gyi rnam pa can/ /zhes 'byung ngo / /theg pa chen po'i dbang du byas na/ dka' la snang / don dang mthun/ rig pa dang 'thad/ gtan tshigs kyis rgyas pa'o/ /de yang / bka' don rig pa gtan tshigs dang / /snang dang mi 'gal rgyas 'thad yin/ /zhes pa lta bu'o/ /de la lha'i sku phyag rgya chen po bzhi ni/ sku phyag rgya chen po/ gsung chos kyi phyag rgya/ thugs dam tshig gi phyag rgya/ 'phro 'du las kyi phyag rgya'o//gdul bya lam gyi phyag rgya bzhi ni las kyi phyag rgya dang / chos kyi phyag rgya dang phyag rgya chen po dang / dam tshig gi phyag rgya'o/ /de ltar ston pa ni 'gro ba rnams kyi bsnyen bkur ba'i chos kyi mchog go/ /nges 'byung gsum ni theg pa gsum mo/ /de bgrod pa'i 'bras bu ni/ don dam pa sgrib pa gnyis dag pas bdag dang gzhan gyi dpal du 'gyur te/'jig rten gsum na skal ba mchog tu gyur pa'o/ /de lta bu'i ston pa de gang yin zhe na/ tshogs gnyis rdzogs shing bdag dang gzhan gyi dpal du gyur pa 'byor ba phun sum tshogs pa ster bar byed pa rje btsun nyid yin pas/ dpal ldan 'byor ba kun byed pa/ /'jam dpal dpal dang ldan pa'i mchog /ces gsungs pa yin no/ /da ni 'jam dpal ye shes sems dpa' la bstod pa'i le'u bstan pa'i phyir/ mchog sbyin rdo rje mchog khyod 'dud/ /yang dag mthar gyur khyod la 'dud/ /stong nyid las byung khyod la 'dud/ / sangs rgyas byang chub khyod la 'dud/ /ces pa la sogs pa smos te/ de yang 'dis ni chos kyi dbyings kyi ye shes kyi sgo nas bstod pa ste/ mchog tu gyur pa'i chos kyi dbyings gzhan la sbyin par byed pa po ni sku gsung thugs rdo rje ltar dbyer mi phyed pa'i mchog rje btsun 'jam dpal khyod yin pas khyod la 'dud cing phyag 'tshal zhes pa'o//khyod ces pa ni bod pa'i sgra kun la sbyar ro/ /yang dag pa'i mthar gyur pa ni skye ba med pa khyod la 'dud pa'o/ /stong pa nyid kyi don rtogs pa las byung ba khyod la 'dud do/ /sangs rgyas rnams kyi byang chub dam pa yin pas khyod la gus pas 'dud ces pa'o//me long lta bu'i ye shes [(]gyi [,]kyi [)]sgo nas bstod pa bstan pa'i phyir/ sangs rgyas chags pa khyod la 'dud/ /sangs rgyas 'dod la phyag 'tshal 'dud/ /sangs rgyas dgyes pa khyod la 'dud/ /sangs rgyas rol la phyag 'tshal 'dud/ /ces smos te/ sangs rgyas kyi ye shes me long lta bus chos kyi dbyings la gnas shing chags pa khyod la 'dud do//sangs rgyas rnams thugs rjes 'gro ba 'dren par 'dod pa khyod la 'dud do/ /sangs rgyas kyi ye shes me long lta bus chos kyi dbyings rtogs pas dgyes pa khyod la 'dud do/ /sangs rgyas kyi dbyings dang ye shes gnyis su med pa la rol pas khyod la phyag 'tshal zhing 'dud do//da ni so sor rtog pa'i ye shes kyi sgo nas bstod pa bstan pa'i phyir/ sangs rgyas 'dzum pa khyod la 'dud/ /sangs rgyas bzhad la phyag 'tshal 'dud/ /sangs rgyas gsung nyid khyod la 'dud/ / sangs rgyas thugs la phyag 'tshal 'dud/ /ces smos te/ sangs rgyas kyi de kho na nyid khong du chud pas mnyes nas zhal 'dzum pa mdzad pas khyod la 'dud do/ /sangs rgyas 'gro ba'i don mdzad pa la dgyes nas bzhad pa ni chos gsung ba'i snga ltas ston pa khyod la phyag 'tshal zhing 'dud do//sangs rgyas gsung gi sgo nas gdul bya la sna tshogs su chos ston pas khyod la 'dud do/ /sangs rgyas 'gro ba'i chos ston par mdzad kyang thugs mnyam pa nyid las ma g.yos pas khyod la phyag 'tshal zhing 'dud ces pa'o/ /da ni mnyam pa nyid kyi ye shes kyi sgo nas bstod pa bstan pa'i phyir//med pa las byung khyod la 'dud/ /sangs rgyas 'byung ba khyod la 'dud/ /nam mkha' las byung khyod la 'dud/ /ye shes las byung khyod la 'dud/ /ces smos te/ chos thams cad dngos po med par rtogs pa las byung bas khyod la 'dud do/ / sangs rgyas 'gro ba'i don la 'jig rten du 'byung bas khyod la 'dud do/ /chos nyid nam mkha' lta bu rtogs pa las che ba'i yon tan thams cad 'byung bas khyod la 'dud do/ /mnyam pa nyid kyi ye shes las byung ba'i 'jam dpal khyod la 'dud do/ /da ni bya ba grub pa'i ye shes kyi sgo nas bstod pa'i phyir/sgyu 'phrul dra ba khyod la 'dud/ /sangs rgyas rol ston khyod la 'dud/ /thams cad thams cad khyod la 'dud/ /ye shes sku nyid khyod la 'dud/ /ces smos te/ sgyu ma lta bu'i sprul pa thams cad thabs dang shes rab dra ba lta bur 'brel bas med pa sprul zhing yod pa bsgyur ba khyod la 'dud do//'gro ba'i don du sangs rgyas kyi sku gsung thugs kyi rol pa sna tshogs ston pa khyod la 'dud do/ /yon tan thams cad dang ldan zhing yon tan thams cad kyis gzhan don grub par byed pa khyod la 'dud do/ /ye shes drug ro gcig pa las grub pa'i sku nyid 'jam dpal khyod yin pas phyag 'tshal 'dud do zhes bstod pa'o//da ni 'bad pa don yod par bya ba'i phyir/ nyams su blangs pa'i phan yon bstan pa ni/ /lag na rdo rje rdo rje 'chang / /zhes bya ba la sogs pa smos te/ de ni bcom ldan 'das kyis dbang bskur ba'i ming ngo / /lus dang //ngag dang / yid kyi gsang bzhes pa ni/ de snang stong dang / grag stong dang / rig stong du rtogs dka' bas gsang ba'o/ /lhag ma ni go sla'o/ /chos thams cad kyi lung ngo zhes pa ni mtshan yang dag pa 'di khyab che bas na lung ngo / /mi slu bas na lung / gzung sla bas na lung ngo / / tshangs pa'i gnas bzhi ni tshad med pa bzhi'o/ /kun du sbyor ba thams cad dang bral ba ni rjes su chags pa'i kun du sbyor ba dang / khong khro ba'i kun du sbyor ba dang / nga rgyal ba'i kun du sbyor ba dang / ma rig pa'i kun du sbyor ba dang / lta ba'i kun du sbyor ba dang / mchog tu kun du sbyor ba dang / the tshom gyi kun du sbyor ba dang / ser sna'i kun du sbyor ba rnams so/ /rdzas thams cad las thar ba ni/ nyon mongs pa dang bcas pa'i phung po dang bral ba'o/ /mi khom pa brgyad po ni/ sems can dmyal bar skye ba dang / yi dwags dang / byol song dang / dbang po ma tshang ba dang / lta ba log par 'dzin pa dang /yul mtha' 'khob tu skyes pa dang / sangs rgyas mi bzhugs pa'i zhing du skyes pa dang / 'du shes med pa'i srid par skyes pa'o/ /'jigs pa chen po brgyad ni/ seng ge dang / stag dang / glang po che smyon pa dang / sbrul dang / rgyal po'i chad pa dang / me dang / chu dang / sha za'i 'jigs pa dang brgyad do/ /dbang phyug phun sum tshogs pa ni/ yon tan gyi dbang phyug brgyad la bya ste/ de yang pha rol tu phyin pa'i gzhung gis/ sku yang ba dang / phra ba dang / gzhan gyis mchod pa dang / bdag por gyur pa dang / longs spyod pa dang / gar yang phyin pa dang /'dod dgur ldan pa dang / dga' dgur spyod pa dang brgyad do/ /gsang sngags kyi gzhung gis sku'i dbang phyug dang / gsung gi dbang phyug dang / thugs kyi dbang phyug dang / rdzu 'phrul gyi dbang phyug dang / phyogs thams cad du song ba'i dbang phyug dang / 'dod spyod kyi dbang phyug dang /ci 'dod sbyin pa'i dbang phyug dang / gnas kyi dbang phyug dang brgyad do/ /de yang 'di skad du/ yang zhing phra ba mchod pa'i 'os/ /bdag gyur longs spyod gar yang phyin/ /'dod da gur ldan zhing dga' mgur spyod/ /de dag rgyal po'i dbang phyug brgyad/ / ces pa 'byung ngo / /sku gsung thugs dang rdzu 'phrul che/ /kun song 'dod spyod gzhan la sbyin/ /gnas kyi dbang phyug rnam pa brgyad/ /'di dag rdo rje 'chang gi chos/ /zhes 'byung ngo / /spyan lnga ni gong du bshad zin to/ /grong ni khang khyim gcig yod pa'o/ /grong khyer ni khyim mang po tshan gcig tu spungs pa'o//grong rdal ni grong tshom bu mang po yod pa'o/ /ljongs ni yul lung pa gcig gis bsdus pa'o/ /yul 'khor ni yul gru mang po zhig phyogs gcig tu byas pa'o/ /ma mo bdun po ni khyo med ma bzhi/ khyo can ma gsum ste bdun las tshangs pa mo dang /khyab 'jug mo dang / dbang mo dang / gzhon nu ma dang / bzhi khyo med ma'o/ /drag mo dang / phag mo dang / rgan byod mo dang gsum ma hA de ba'i chung ma'o/ /snyigs ma lnga ni/ lta ba'i snyigs ma dang / nyon mongs pa'i snyigs ma dang / tshe'i snyigs ma dang / zas kyi snyigs ma dang /dus kyi snyigs ma dang lnga'o/ /lhag ma rnams ni go sla bas ma bshad do/ /da ni shin tu bsdus pa las mtshan thams cad bsdus pa'i sngags bstan pa'i phyir/ oM sarba d+harmA zhes bya ba la sogs pa smos te/ oM ni bkra shis pa'i tshig kyang yin/ /ye shes lnga yang yin/phyag 'tshal zhing byin gyis rlob par byed pa yang yin no/ /sarba ni thams cad d+harmA ni chos a b+hA ba ni dngos po med pa/ swa b+hA ba ni rang bzhin/ bi shud+d+ha ni rnam par dag pa/ tsak+Shu ni mig /a A aM aHni/ /rnam par thar pa bzhi yi mtshon pa ste/ stong pa nyid dang / mtshan ma med pa dang / smon pa med pa dang / thabs mkhas pa dang bzhi ste/ 'di bzhi yang don skye ba med par 'du ste/ de ltar mtha' bsdus pas/ chos thams cad dngos po med pa'i rang bzhin gyis rnam par dag pa'i mig gis skye ba med pa shes so zhes bshad pa yin no//de dag gis ni rtsa ba'i sngags bstan to/ /pra kr-ita ni zab pa dang rgya che ba gnyis su med pa/ pa ri shud+d+ha ni yongs su dag pa sarba d+harmA ni chos thams cad/ ya du ta ni bskyed pa/ sarba ta thA ga ta ni de bzhin gshegs pa thams cad/ dz+nyA na kA ya ni ye shes kyi sku/ many+dzu shrI ni 'jam dpal lo/ /pa ri shud+d+hi ta ni yongs su dag pa/mu pA dA ye ti A zhes pa byin gyis rlob par byed pa zhes kyang ston to/ /khas blang ngo / /gzung bar bya'o zhes pas kyang ston to/ /mtha' bsdus pas zab pa dang rgya che ba gnyis su med pa yongs su dag pa las chos thams cad skyed par byed pa/ de bzhin gshegs pa thams cad kyi sku 'jam dpal yongs su dag par khas blang gzung bar bya zhes pa'o//a A ni skye 'gag med pa/ sarba ta thA ga ta ni de bzhin gshegs pa thams cad/ hr-i da ya ni snying po ste thugs so/ /ha ra ha ra 'phrog par byed pa'o/ /oM hUM hrIHni sku gsung thugs byin gyis rlob pa'o/ / b+ha ga bAn ni bcom ldan 'das so/ /dz+nyA na mUrti ni ye shes kyi sku'o/ /wA gI shwa ra ni ngag gi dbang phyug go/ /ma hA pA tsa ni gsung ba chen po'o/ /sarba d+harma ni chos thams cad/ ga ga na ni nam mkha' lta bu'o/ /a ma la ni dri ma med pa/ su pa ri shud+d+ha ni yongs su dag pa'o/ /d+harma d+hA tu ni chos kyi dbyings so//dz+nyA na gar+b+ha a ni ye shes kyi snying po'o/ /mtha' bsdus pas skye 'gag med pa'i de bzhin gshegs pa thams cad kyi thugs 'phrog par byed pa/ sku gsung thugs byin gyis rlob par byed pa/ bcom ldan 'das kyi ye shes kyi sku dang / gsung gi dbang phyug gsung ba chen po/ / chos thams cad nam mkha' ltar dri ma med cing yongs su dag pa/ chos kyi dbyings kyi ye shes kyi snying po zhes bya ste/ des ni las sngags bstan te bsdus pa'i don to/ /de ltar ston pa shAkya thub pas lam 'bras bu dang bcas pa'i chos so/ /thun mong ma yin pa'i mtshan gsungs pas 'khor rjes su yi rang ba bstan pa ni/de nas dpal ldan rdo rje 'chang / /dga' zhing mgu nas thal mo sbyar/ /zhes bya ba la sogs pa smos te/ de yang 'dis ni tshul ji ltar yi rang ba bstan te/ mtshan gyi gzhung rdzogs pa'i rjes de nas dpal ldan rdo rje 'chang / rang dang gzhan gyi don yongs su rdzogs pas dga' zhing /de bshad pa'i ston pa la mgu nas lus tsog pur 'dug /lag pa thal mo sbyar nas yi rang ngo / /yul gang la yi rang na/ mgon po bcom ldan de bzhin gshegs/ /rdzogs sangs rgyas la phyag 'tshal nas/ /zhes smos te/ 'gro ba rnams kyi don mdzad pas kyang shAkya thub pa/bdud bzhi bcom zhing / legs pa'i yon tan drug dang ldan pas/ zab pa de bzhin nyid du gshegs pa dang / rgya che ba 'gro ba'i don la gshegs pa/ tshogs gnyis rdzogs shing / /spangs pa phun sum tshogs pa dang / ye shes phun sum tshogs pa de la/lus ngag yid gsum gus pa dang bcas nas/ /gsang ba'i bdag po phyag na rdo rje 'khor mang po dang bcas te phyag 'tshal ba'o/ /'khor gang dang bcas te yi rang na/ /de ni mgon po gsang ba'i bdag /lag na rdo rje khro bo'i rgyal/ /sna tshogs gzhan dang lhan cig tu//zhes smos te/ 'gro ba'i mgon mdzad pa/ gsang ba'i bdag po lag na rdo rje la sangs rgyas thams cad kyis las kyi khro bor dbang bskur/ dbang rtags su lag tu rdo rje gtad/ gsang mtshan du lag na rdo rje zhes btags pas na/ khro bo'i rgyal po'o/ /yon tan sna tshogs dang ldan pa'i 'khor lnga brgya po gzhan dang lhan cig tu yi rang ngo //tshig gang gi sgo nas yi rang na/ /gsang bstod nas ni tshig 'di gsol/ /mgon po bdag cag yi rang ngo / /legs so legs so legs par gsungs/ /zhes smos te/ gsang bstod pa ni zhum pa med par dbu 'phang bstod pa'o//bdag cag 'khor dang bcas pa yi rang ste/ zab pa rang gi don 'byung ba legs so/ /rgya che ba gzhan gyi don 'byung ba legs so/ /zab pa dang rgya che ba gnyis su med par gsungs pas legs par gsungs pa'o/ /dgos pa gang gi phyir yi rang na/rnam grol 'bras bu 'tshal ba yi/ /'gro ba mgon med rnams dang ni/ /bdag cag yang dag rdzogs pa yi/ /byang chub thob pa'i don chen mdzad/ /ces smos te/ nyon mongs pa'i 'ching ba las grol ba'i 'bras bu 'dod pa'i 'gro ba mgon med pa rnams dang / bdag cag gis rdzogs pa'i byang chub thob pa'i don du mdzad pas so//chos gang la yi rang na/ sgyu 'phrul dra ba'i tshul bstan pa/ /'di ni rnam dag legs pa'i lam/ /zab cing yangs la rgya che ste/ /don chen 'gro ba'i don byed pa/ /zhes smos te/ sgyu 'phrul dra ba'i chos bstan pa 'di ni shin tu legs pa'i lam ste/zab pa dang yangs shing rgya che ba dang / 'gro ba'i don bgyid pas so/ /yid ches pa'i rgyu mtshan ci yod pa'i phyir rjes su yi rang na/ sangs rgyas rnams kyi yul 'di ni/ /rdzogs pa'i sangs rgyas rnams kyis bshad/ /ces smos te/ sangs rgyas rnams kyi spyod yul gyi chos 'di ni gang zag gis ma gsungs te/rdzogs pa'i sangs rgyas kyis gsungs pas/ brdzun dang / nor ba mi 'byung bas yid ches pa'i phyir/ rjes su yi rang zhes bshad pa yin no/ /de yang / lung ni yid ches tshig yin te/ /nyes pa zad pa brdzun gyi tshig /smra bar mi byed rgyu med phyir//nyes zad lung du shes par bya/ zhes gsungs pa lta bu'o/ /sangs rgyas kun gyi bdag nyid 'jam dpal mtshan/ /zab cing rgya che shin tu dpag dka' yang / /bshad pa'i rgyud dang gdams ngag la brten nas/ /slob mas gsol btab phyir na bdag gis brtsams/ / nongs par gyur pa 'phags dang mkhas la bshags/ /'di brtsams dge ba ma nor mchis pa yis/ /kun gyis 'jam dpal go 'phang thob par shog /chos skad byings la ma brten bod kyi mis/ go bar bde phyir rang so'i skad kyis bkrol/ /de phyir mkhas pas tshig skyon brtag mi rigs//'on kyang rgyal ba'i lung la'ang skur 'debs na/ /bdag 'dra'i gzhung la ci phyir smod mi rigs/ /mtshan yang dag par brjod pa'i 'grel pa mtshan don gsal bar byed pa'i sgron me zhes bya ba rdzogs so// //slob dpon bi ma la mi tras mdzad nas thugs kyi sras nyang ting nge 'dzin gyis zhus pa'o/