CLOSE WINDOW

D2091
བོད་ཡིག

paN+Di ta mngon shes can gyi phyag nas byung ba'o/ /zhu chen gyi lo tsA ba 'gos lhas btsas dang shes rab brtson 'grus kyis bsgyur ba'o/ @//mtshan yang dag par brjod pa'i 'grel ba tshul gsum gsal ba zhes bya ba bzhugs/[ ]@#/ /'phags pa 'jam dpal gyi mtshan yang dag par brjod pa zhes bya ba la/'phags pa 'jam dpal zhes bya ba ni rang gi ngo bo ni ji lta bu zhig /de'i mtshan ni gang dang gang rnams yin/ de yang dag par brjod pa ni ji ltar brjod ce na/ de la 'phags pa 'jam dpal ni gnyis su med pa'i ye shes te/ de ni dus gsum gyi sangs rgyas thams cad kyi ye shes kyi bdag nyid/byang chub kyi sems kyi ngo bo chos thams cad kyi chos nyid dang tha mi dad pa yin te/ de'i dbang gis snang ba'i gzugs kyi sku longs spyod rdzogs pa dang / sprul pa'i bdag nyid can/ ye shes kyi rten du snang ba/ sangs rgyas dang byang chub sems dpa'i gzugs rnams su theg pa che chung gi tshul sna tshogs las grags par snang ba'i bdag nyid de rnams kyang 'phags pa 'jam dpal zhes 'dod do//'dir dris pa/ sangs rgyas thams cad kyi gnyis su med pa'i ye shes kyi bdag nyid 'phags pa 'jam dpal yin na phyogs bcu dus gsum gyi sangs rgyas rnams kyi so so rang gis rig pa'i ye shes rnams chos can gcig gam tha dad pa cig yin/de bzhin du de'i chos nyid dang / de'i mdzad pa yang gcig gam tha dad pa zhig yin zhe na/ smras pa de ni 'di ltar rig par bya ste/ kha cig gi tshul las ni/ de bzhin gshegs pa rnams ni ye shes kyi rgyud kyang tha dad/de'i chos nyid dang de'i mdzad pa yang tha dad de/ 'on kyang rnam pa bzhi'i sgo nas mtshungs pa yin no/ /bzhi gang zhe na/ chos mtshungs pa dang / sku mtshungs pa dang / gsung mtshungs pa dang / yi ge mtshungs pa'o zhes 'dod do/ /kha cig gi tshul las ni/ye shes ni gang zag gi rgyud so so las sgrub pa'i phyir tha dad de/ de'i chos nyid dang mdzad pa dag ni 'dres pa ste/ tha dad pa med do zhes 'dod/ kha cig gi tshul las ni/ bdag dang gzhan gyi rgyud du 'byed pa'i bdag tu lta ba'i bag chags yin la/ bdag tu lta ba ni 'khrul pa ste/des bskyed cing de'i dbang gis snang ba ni/ de ltar bden pa ma yin la/ sems can gyi dus na yang rgyud tha dad mi 'grub na/ bdag tu lta ba'i mdud pa mi mnga' ba'i sangs rgyas rnams la ye shes tha dad kyi rgyud du ga la 'grub ste/ de bas na sangs rgyas rnams la ni rgyud tha dad pa dang /rgyud tha dad pas don mdzad pa dang / de bzhin du tshul tha dad pas don mdzad pa dang / zhing tha dad du don mdzad pa dang / dus tha dad du don mdzad pa mi mnga' ste/ ji srid du theg pa che chung gi gsung rab rnams las 'phags pa 'jam dpal zhes grags pa dang / spyan ras gzigs dbang phyug dang /phyag na rdo rje zhe'am/ sangs rgyas shAkya thub pa dang / mar me mdzad dang / byams pa zhe'am/ rnam par snang mdzad dang / mi bskyod pa dang / dkon mchog dpal zhes bya ba la sogs par grags pa/ longs spyod rdzogs pa dang sprul pa'i skur grags shing /so so'i gdul bya dang / zhing khams dang / tshul dang / bstan pa dang / dus tha dad du ye shes chen po'i rten du snang ba thams cad kyang sangs rgyas kyi gnyis su med pa'i ye shes kyi chos nyid rtogs pa dbang dang / sngon gyi smon lam dang thugs rje'i shugs kyis gdul bya dkar po'i bag chags dang ldan pa'i blo la/so sor snang tsam gyis phye ba las ma gtogs pa/ sangs rgyas rnams kyi dbang du ni bye brag phra mo tsam yang rnyed pa ma yin no/ /de bas na 'dir 'phags pa 'jam dpal gyi yon tan brjod pa 'di ni phyogs bcu dus gsum gyi sangs rgyas thams cad kyi yon tan brjod pa yin par shes par bya'o//de la 'phags pa 'jam dpal gyi skur snang ba'i tshul la brten nas tshul so sor grags pa ni 'di lta ste/ nyan thos kyi tshul las ni 'phags pa 'jam dpal zhes bya ba byang chub sems dpa'i rgyud du gtogs pa/ da dung 'phags pa'i lam ma thob pa so so'i skye bor 'dod do//pha rol tu phyin pa'i tshul mthun pa 'dzam bu'i gling na yang bcom ldan 'das shAkya thub pa'i 'khor du gyur pa yin no/ /'og min na yang bcom ldan 'das rnam par snang mdzad kyi nye ba'i sras su gyur ba yin zhe'o/ /mdo sde zab mo'i tshul las ni/sngon gyi dus su sangs rgyas pa ste/ byang chub sems dpa'i tshul du bzhugs pa'o zhe'o/ /gsang sngags kyi tshul kha cig las rigs kyi gtso bo de bzhin gshegs pa'i gtsug tor las sprul pa'i bdag nyid byang chub sems dpa'i tshul du bzhugs pa'o zhes 'dod do/ /rnal 'byor gyi tshul kha cig las ni bcom ldan 'das rnam par snang mdzad kyi thugs las sprul pa'i ye shes kyi sems dpa' chen po bcu drug las rdo rje rnon po ste 'jam dpal rdo rje zhes 'dod do//rnal 'byor chen po'i tshul kha cig las ni/ 'jam dpal ye shes sems dpa' zhes kyang bya/byang sems rdo rje zhes kyang bya/ de bzhin du rdo rje sems dpa' dang / kun du bzang po dang / bde ba chen po la sogs pa sangs rgyas thams cad kyi gtso bo dkyil 'khor thams cad kyi mnga' bdag nyid du yang bstan to/ /'jam dpal gyi sgyu 'phrul dra ba las ni de bzhin gshegs pa thams cad kyi thugs ka na 'jam pa'i rdo rje bzhugs te/de yang dang po'i sangs rgyas [(]gyi [,]kyi [)]tshul dang / ye shes sems dpa'i tshul gyis bzhugs so zhes 'dod do/ /'di dag ni 'phags pa 'jam dpal gyi bdag nyid bstan pa'o/ /'phags pa 'jam dpal de'i mtshan ni gang dang gang rnams yin zhe na ji srid du zag pa dang bcas pa'i chos sam/zag pa med pa'i chos sam/ de bzhin du 'jig rten pa'am/ 'jig rten las 'das pa'am/ 'dus byas sam/ 'dus ma byas sam/ dngos po'am/ dngos po med pa'am/ sems sam sems snang pa la sogs te/ji srid du chos rnams kyi rab tu dbye ba'i ming du grags pa'am/ 'jig rten pa'i gtsug lag las grags pa'am/ theg pa chung ngu las grags pa'am/ theg pa chen po las grags pa'am/ theg pa chen po'i yang chen po gsang sngags kyi tshul las grags pa yang rung ste/chos rnams kyi ming ji snyed pa de dag thams cad ni 'phags pa 'jam dpal gyi mtshan du ma gyur pa med de/ de bas na de dag thams cad mtshan du shes par bya'o/ /'dir dris pa zag pa med pa'i chos rnams kyi ming rnams ni 'phags pa 'jam dpal gyi mtshan du rung ste/ 'phags pa 'jam dpal nyid zag pa med pa thob pa'i bdag nyid yin pa'i phyir rung na/ zag pa dang bcas pa'i chos rnams de'i mtshan du ji ltar 'gyur/ 'phags pa 'jam dpal ni zag pa'i chos thams cad yongs su zad pa'i bdag nyid yin pa'i phyir de rnams kyi ming de'i mtshan du mi rung ngo zhe na/'phags pa 'jam dpal ni zag pa med pa'i chos kyi bdag nyid can yin mod kyi/ tshul 'di la 'gal ba med de/ 'di ltar 'phags pa 'jam dpal ni zag pa dang bcas pa'i chos rnams kyi rang bzhin yin pa'i phyir dang / de la khyab pa yin pa'i phyir dang / der 'khrul pa yin pa'i phyir dang /de la dga' ba yin pa'i phyir dang / de mkhyen pa yin pa'i phyir dang / de gsung ba yin pa'i phyir dang / de yongs su dag pa yin pa'i phyir dang / de la mnga' brnyes pa yin pa'i phyir dang / de las skyes pa yin pa'i phyir dang / tshul bcu po 'di ni 'khor ba dang mya ngan las 'das pa'i chos thams cad yang shes par bya'o//de la ji ltar de chos thams cad rang bzhin nam/ bdag nyid yin zhe na/ 'di nyid las gsungs pa/ dngos po kun gyi rang bzhin mchog /dngos po kun gyi rang bzhin 'dzin/ /skye med chos te sna tshogs don/ /chos kun ngo bo nyid 'chang ba//zhes gsungs pa lta bu dang / rnam rig sna tshogs gzugs don can/ /rnam shes sna tshogs rgyud dang ldan/ /zhes gsungs pa dang / sdug bsngal gsum gyi sdug bsngal zhi/ /zhes pa dang / rnam pa bcu po don bcu'i don/ /zhes pa dang / don grub bsam pa 'grub pa ste//kun du rtog pa thams cad spangs/ /zhes bya ba la sogs pa lta bu'i skabs su bshad pa/ dngos po thams cad kyi ngo bo nyid dang ldan pa'o zhes bshad pa dang / gzhan yang rnam rig sna tshogs gzugs don can gyi skabs su/ sems dang yid dang rnam par rig pa snang ba dang bcas pa'i bdag nyid 'jam dpal lo zhes bshad pa dang /de bzhin du sdug bsngal gsum gyi sdug bsngal zhi'i skabs su sdug bsngal gsum ni sdug bsngal nyid du bshad la/ yang sdug bsngal ni sdug bsngal sgrub par byed pa'i kun 'byung du bshad/ zhi ba 'gog par bshad de/ de dag kyang 'phags pa 'jam dpal yin par bshad pa dang / rnam pa bcu po don bcu'i skabs su bdag tu lta ba rnam pa bcu bshad la/ yang don ni gnyen po rnam pa bcu bshad de/ de ltar na mi mthun pa dang gnyen po de/ 'phags pa 'jam dpal lo zhes bshad pa lta bu la sogs pa/chos thams cad kyi bdag nyid 'phags pa 'jam dpal yin par bshad pa'i phyir/ de lta bu yon tan brjod pa'i mi thams cad kyang de'i mtshan du 'gyur ro/ /de la 'phags pa 'jam dpal ji ltar na chos thams cad la khyab pa yin zhe na/ 'dir gsungs pa/ mi 'gyur kun 'gro khyab pa po/ /zhe'am/ sangs rgyas kun gyi thugs la gnas/ /zhes gsungs/ sems can kun gyi yid la gnas/ /zhes bya ba la sogs pa lta bu ste/ de la rnam pa bzhi'i tshul gyis khyab pa ni 'di lta ste/ chos nyid dang / ye shes dang / thugs rje dang / mdzad pa'o/ /de la chos nyid kyis khyab pa ni chos thams cad ni rang bzhin gyis stong pa bdag med pa ste/ 'di ltar gzhan las/ chos kyi dbyings ni ma gtogs pa/ /chos ni 'ga' yang yod ma yin/ /gsungs pa lta bu'o/ /de bas na chos kyi dbyings ni 'phags pa 'jam dpal te/de'i phyir thams cad la khyab pa'o/ /ye shes kyi sgo nas khyab ste/ 'di ltar chos kyi dbyings kyi chos can ni rang rig pa tsam ste/ chos thams cad kyang rang rig pa tsam du 'dus pa dang / ye shes kyi yul du ma gyur ba'i chos nyid kyang med de/ de'i phyir ye shes kyi tshul gyis kyang khyab pa'o//thugs rjes kyang bya ba ste/ ji ltar dbyings dang ye shes zung du 'brel pa gang na ba de na thugs rje chen po yang rgyun mi 'chad pa yin no/ /de bzhin du mdzad pas kyang khyab ste/ chos de gsum gang du tshogs pa der mdzad pa rgyun mi 'chad do/ /de'i phyir sangs rgyas rnams kyi thugs dang sems can rnams kyi sems la 'phags pa 'jam dpal gyis khyab ste/chos de dag gang nas ma 'ongs/ gang du yang mi 'gro/ /gar yang gnas par 'gyur ba med bzhin du skal ba dang / mos pa ji lta ba bzhin du sems can gyi don mdzad par nus pa yin no//de lta bu'i yon tan brjod pa'i ming thams cad kyang de'i mtshan du 'gyur ro/ /de la 'phags pa 'jam dpal ji ltar na chos thams cad du sprul pa yin zhe na 'di nyid du gsungs pa/ gzugs rnams ma lus snang ba'i dpal/ /sna tshogs gzugs can yid las skyes/ /zhes bya ba la sogs pa ji ltar 'gro ba 'dul ba'i dbang gis snod dang bcud du bcas pa'i gzugs sna tshogs su sprul pa dang /gtsug phud phud bu lcang lo can/ /ral pa muny+dza cod pan thogs/ /zhes bya ba la sogs pa'i skabs su brtul zhugs thams cad 'dzin par sprul pa dang / gzugs kyi mtshan nyid kyang longs spyod rdzogs pa'am/ sprul pa'am/ byang chub sems dpa'am/ rang rgyal ba'am/ nyan thos sam/ skye dgu'i bdag po la sogs pa'am/ gzhan yang mdzes pa'i gzugs sam/ mi sdug pa'i gzugs sam/ rgan po'am/ gzhon pa la sogs pa'i gzugs sam/ gzhan yang nyon mongs pa dang bcas pa'i gzugs sam/ zag pa zad pa la sogs pa'i chos thams cad kyi gzugs brnyan du 'phags pa 'jam dpal mi 'phrul pa med do/ /de bas na de lta bu'i yon tan brjod pa'i ming thams cad kyang de'i mtshan du 'gyur ro//de la ji ltar na 'phags pa 'jam dpal de chos thams cad la dga' ba yin zhe na 'di nyid du gsungs pa/ dngos don ma lus rnams la dga'/ /stong pa nyid dga' 'dod chags blo/ /srid gsum dga' ba chen po pa/ /zhes bya ba la sogs pa gsungs pa lta bu ste/'gro ba 'dul ba'i dbang gis chos thams cad dga' bar ston pa dang / snying rje'i dbang gis srid pa la chags pa'i yid dga' ba dang / shes rab kyi dbang gis stong pa nyid la chags shing dga' ba ste/ de bas na de lta bu'i yon tan gyi dbang du gsungs pa'i ming thams cad kyang de'i mtshan du 'gyur ro//de la ji ltar na chos thams cad mkhyen pa yin zhe na/ 'di nyid du gsungs pa/ shes rab chen pos skad cig la/ /chos kun khong du chud pa po/ /chos kun mngon par rtogs pa po/ /zhes bya ba la sogs pa ji skad du chos thams cad mkhyen pa'i yon tan bstan pa'i dbang du gsungs pa'i ming thams cad kyang de'i mtshan du 'gyur ro//de la ji ltar na chos thams cad gsungs pa yin zhe na/ 'di nyid du gsungs pa/ smra ba'i skyes mchog smra ba'i rgyal/ /smra ba'i dam pa mchog gi gnas/ /smra ba'i seng ge tshugs pa med//ces bya ba la sogs pa ste/ ji srid du chos thams cad phyin ci ma log par ston pa'i mnga' bdag yin pas/ de'i dbang du smos pa'i chos thams cad kyi ming yang de'i mtshan du 'gyur ro/ /de la ji ltar na de chos thams cad rnam par dag pa'i bdag nyid can yin zhe na/'di nyid du gsungs pa/ zag pa zad pa dang / sgrib pa las grol ba dang / nyon mongs pa zhi bar byed pa dang / srid pa 'joms pa dang / 'khor ba'i pha rol tu phyin pa dang / chu bo las rgal ba dang / srid rtsa bton pa la sogs pa zag pa dang bcas pa'i chos kyi dri ma dag pa'i sgo nas brjod pa dang /gzhan dag pa rnam pa bcu gnyis 'chang ba dang / rnam dag phung po lnga 'chang ba/ pha rol tu phyin pa bcu dag pa dang / shes pa bcu rnam dag 'chang ba la sogs pa ste/ zag pa med pa'i chos rnams kyang mthar phyin pa'i sgo nas shin tu rnam par dag pa'i mtshan nyid du ston te/de ltar chos thams cad rnam par dag pa'i yon tan ston pa'i ming gang smos pa thams cad de'i mtshan du 'gyur ro/ /de la ji ltar na de chos thams cad kyi dbang phyug yin zhe na/ 'di nyid gsungs pa/ chos kyi dbang phyug chos kyi rgyal//zhes bya ba la sogs pa lta bu chos thams cad la mnga' brnyes shing / de la dbang sgyur ba chos kyi rgyal po dang / gtso bo dang / bdag po ston pa'i sgo nas yon tan brjod pa'i ming thams cad kyang de'i mtshan du 'gyur ro/ /de la ji ltar na de chos thams cad skyed pa yin zhe na/'di nyid du gsungs pa/ sangs rgyas thams cad skyed pa po/ /'byung ba chen po rgyu gcig pa/ /sna tshogs don kun skyed pa'o/ /gsang sngags don kun skyed pa po/ /la sogs pa'i chos thams cad 'phags pa 'jam dpal las byung bar ston pa lta bu ste/ 'di ltar de bzhin nyid kyi phyir chos thams cad skyed pa yin pa dang / thabs dang shes rab kyi phyir sangs rgyas thams cad skyed pa yin pa dang / 'dul ba'i dbang gi phyir sprul pa thams cad skyed pa yin te/ de lta bu la sogs pa yon tan brjod pa'i phyir smos pa'i ming thams cad de'i mtshan du 'gyur ro//de la ji ltar de chos thams cad las skyes pa yin zhe na/ de chos nyid las skyes pa yin zhes ste/ nam mkha' las byung rang byung ba/ /zhes gsungs pa lta bu'o/ /de la ye shes 'ba' zhig las skyes pa zhes gsungs pa lta bu'o/ /de sems las skyes pa yin te/sna tshogs gzugs can yid la skyes/ /zhes gsungs pa lta bu'o/ /de nyan thos kyi lam dang / rang sangs rgyas kyi lam dang yang dag par rdzogs pa'i sangs rgyas kyi lam thams cad las skyes pa yin te/ nges 'byung sna tshogs las byung ba/ /zhes gsungs pa lta bu'o//de theg pa chen po'i yang chen po/ /gsang sngags kyi tshul las kyang skyes pa yin te/ gsang sngags tshul chen las byung ba/ /zhes gsungs pa lta bu'o/ /de legs par spyad pa'i chos las kyis skyes pa yin te/ chos las byung ba srid pa sel/ /zhes gsungs pa lta bu'o//de chos thams cad dbyer med pa'i mtshan nyid las skyes pa yin te/ rdo rje las skyes rdo rje'i bdag/ /ces pa lta bu'o/ /de ltar chos thams cad las skyes pa bstan pa'i phyir de'i yon tan brjod pa'i ming thams cad kyang de'i mtshan du 'gyur ro/ /de ltar rnam pa bcu'i sgo nas zag pa dang bcas pa'i chos dang /zag pa med pa'i chos thams cad kyi ming thams cad de'i mtshan du 'gyur ba thun mong du 'gyur ba bstan nas/ da ni khyad par brjod par bya ste/ de la zag pa dang bcas pa'i chos la de'i bdag nyid du ston pa'i tshe/ 'di ltar zag pa dang bcas pa'i chos rnams kyi mtshan nyid ni/'phags pa 'jam dpal yin no zhes brjod par bya'o/ /'phags pa 'jam dpal gyi mtshan nyid zag pa dang bcas pa'o zhes brjod par mi bya ste/ dper na bum pa'i mtshan nyid do/ /zhes brjod par bya'o/ /mi rtag pa nyid kyi mtshan nyid ni bum pa'o zhes brjod par mi bya'o//'di ltar mtshan nyid dang mtshan gzhi rnam par gzhag pa ni khyab pa che chung dang / phra rags dang dam pa dang dam pa ma yin pa dang / 'khrul pa dang bden pa lta bu'i sgo nas phan tshun bzhag ste/ thams cad du phan tshun nor du rung ba ni ma yin no/ /de bas na 'phags pa 'jam dpal gyi mtshan nyid zag pa dang bcas pa'i chos yin par mi brjod do//chos thams cad khyab par ston pa'i skabs su rten dang brten par gzhag pa'i tshe 'phags pa 'jam dpal ni zag bcas kyi chos la khyab pa yin gyi brten pa ma yin no/ /dper na nam mkha' ni gzugs la khyab pa yin gyi brten pa ni ma yin no//dper na nam mkha' ni gzugs la khyab pa yin kyang nam mkha'i mtshan nyid gzugs la brten pa ni ma yin te/ de bas na zag pa dang bcas pa'i chos la 'phags pa 'jam dpal brten pa'i tshul nas mtshan mi brjod do//zag pa dang bcas pa'i chos lta bur sprul zhing 'jug par ston pa'i tshe/ zag pa dang bcas pa'i chos la thugs rje dang 'phrul pa 'jug par ston kyang zag pa dang bcas pa'i chos la ni des bsgos shing byin gyis rlob kyi/ de la zag pa dang bcas pas mi 'dzin cing mi gos te/dper na nyi ma'i 'od zer gyis mi gtsang ba'i sa phyogs su shar ba'i tshe nyi ma'i 'od kyis mi gtsang ba'i sa phyogs su bsgos shing reg par gyur kyang / dri ma des 'od la bsgos shing byin gyis brlab pa med do/ /de'i phyir thams cad 'jug pas kyang gos pa'i tshul nas mtshan brjod par mi bya'o//tshul de dag gis zag pa dang bcas pa'i chos la 'phags pa 'jam dpal dang ldan par bsgrubs pa ni 'gal ba med kyi/ 'phags pa 'jam dpal zag pa dang bcas pa'i phyogs ldan pa'i sgo nas mtshan brjod par mi bya'o/ /rnam par dag pa'i sgo nas mtshan brjod pa'i tshe/zag pa dang bcas pa'i chos rnams ni nyes skyon gyi chos dri ma'i mtshan nyid yin pa'i phyir de bsal zhing zad par byas pa'i sgo nas mtshan brjod pa yin no/ /zag pa med pa'i chos rnam par dag par ston pa'i tshe ni/ de la mi mthun pa'i dri ma thams cad ma lus par gtan du zin pa'i phyir rnam par dag pa'i mtshan brjod pa dang /don dam par gnyis su med pa'i tshul nas brjod pa yin te/ kun rdzob tsam du de dag spang par bya ba yin pas/ spangs shing zad par bya ba'i tshul ni brjod pa ma yin no/ /zag pa dang bcas pa'i chos bskyed par ston pa'i tshe/chos ci yang ma yin pa dang / shes pa rang rig pa'i sgo nas 'khrul pa'i chos sna tshogs su snang ba'i bdag po'i rkyen du bshad kyi rgyu'i rkyen du mi brjod do/ /de chos thams cad las skyes par bstan pa'i skabs su/ zag pa dang bcas pa'i chos kyi dbang las 'phags pa 'jam dpal skye bar bshad kyi de'i rgyu rkyen yin par mi bshad de/de bas na de de dag gi sgo nas mtshan brjod par mi bya'o/ /zag pa med pa'i chos la khyad par du bstan pa ni de dag las bzlog pa nyid de/ zag med kyi chos kyi mtshan nyid can dang / chos la brten pa dang / chos kyis bsgos shing byin gyis brlabs pa la sogs pa'i sgo nas kyang mtshan brjod pa yin te/ 'di dag ni chos thams cad kyi mtshan du bstan pa las brjod pa'i tshul gyi sgo nas zag pa dang bcas pa'i chos dang / zag pa med pa'i chos la thun mong du mtshan brjod du rung ba dang / bye brag gi sgo nas brjod pa dang /brjod pa ma yin pa yod par bstan pa ste/ 'di dag tsam gyis de'i mtshan gang dang gang rnams yin pa mdor bstan pa ste/ rgyas par ni gzhung 'di nyid kyi skabs su bstan pa'i mtshan rnams yan lag dang nying lag tu phye ba de'i mtshan rnams yin no/ /da ni de yang dag par ji ltar brjod pa'i tshul bshad par bya ste/de yang rnam pa gsum mo/ /gsum gang zhe na/ 'di ltar mtshan yon tan gyi don du bltas te/ brjod pa'i tshul dang / mtshan gsang sngags kyi tshul du bltas te brjod pa'i tshul dang / mtshan gnyis su med pa'i don du bltas te brjod pa'i tshul lo//de la mtshan yon tan gyi don du bltas te brjod pa'i tshul ji lta bu zhe na/ 'di la rigs kyi bu'am rigs kyi bu mo gang la dag bla na med pa yang dag par rdzogs pa'i byang chub tu sems bskyed cing theg pa chen po'i sgor zhugs pa/ sangs rgyas la shes nas dad pa dang ldan pa rnams kyis thog ma nyid du bcom ldan 'das 'jam dpal ye shes sems dpa' ni phyogs bcu'i de bzhin gshegs pa thams cad kyi bdag nyid chen po de dag thams cad kyi yon tan phun sum tshogs pa dang ldan pa/ sangs rgyas thams cad kyi thugs rje dang mdzad pa rgyun mi 'chad pa'i nam mkha'i dbyings kyi mtha' klas pa'i sangs rgyas thams cad kyi dgongs pa sgrub cing /sems can gyi khams ma lus shing lus pa med pa thams cad kyi re ba yongs su skong ba'i phrin las mdzad pa/ rtag tu sems can gyi mdun du bzhugs te/de bas gang gis 'di'i mtshan brjod pa de la ni bskal pa gang+ga'i klung gi bye ma snyed du sangs rgyas thams cad kyi mtshan brjod pas de la dper bzod pa ma yin no zhes dang ba'i dad pa dang / mos pa sngon du byas te/ de yang sems can thams cad kyi don bsgrub pa'i phyir brjod par bya'o zhes smon lam gyis 'phangs pa'i bsam pas byang chub tu sems bskyed nas brjod par bya'o//de yang mos pa'i dbang gis 'di ltar yid la byed pas gzhag par bya ste/ bcom ldan 'das 'jam dpal ye shes sems dpa' ni 'di lta bu'i yon tan can rnam pa thams cad mkhyen pa'i ye shes dang /thugs rje dang / byams pa'i mnga' bdag la/ rtag tu gdul bya thams cad kyi mdun na gnas pa'i phyir bdag gis de'i sku khyad par can mdun du yid la byas kyang rung / ma byas kyang rung ste rtag tu mdun na gnas pa'i phyir/de la brjod pa'i don du bsam pa g.yeng ba med pas mtshan brjod par bya'o/ /gzhan du na bcom ldan 'das kyi rang bzhin de lta bu yin mod kyi/ 'on kyang de'i gzugs bzang po khyad par can yid la byas nas/ bdag dang gzhan gyi don phun sum tshogs pa la byin gyis rlob par 'gyur ro zhes shes par byas nas/mdun gyi nam mkha' la rang gi yid las sprul pa'i rin po che'i rang bzhin gyis dpag bsam gyi shing chen po rgyas pa'i grib ma la/ rin po che dang pad+ma'i gdan la zla ba'i dkyil na bzhugs pa'i bcom ldan 'das 'jam dpal gzhon nu'i sku kha ba la gur gum gtor ba lta bu sna tshogs kyi na bza' mnabs pa phyag g.yon na ut+pal sngon po rgyas pa bsnams pa/g.yas pa mchog sbyin can/ 'khor los sgyur ba'i rgyal po chos pa ltar rgyan thams cad kyis brgyan par bsam ste/de'i mtshan mngon par brjod pa'i don g.yeng ba med pa'i yid la byed pas mtshan brjod par bya'o/ /yang na sku mdog dang phyag mtshan ni glegs bam dang / ral gri dang chos 'chad pa la sogs pa dang / zla ba'i kha dog dang / gser btso ma'i kha dog la sogs te ji ltar mos pa bzhin du yid la bya'o//mchod pa brjod nas 'dod pa'i don la gsol ba btab pa ste/ yongs su dag pa'i zhing khams su gsol nas ldang bar bya'o/ /yang na 'dul ba'i dbang gis 'di ltar bsam par bya ste/ bcom ldan 'das nyid snga ma bzhin du bsams pa'i steng gi phyogs su bcom ldan 'das shAkya thub pa la sogs pa phyogs bcu'i sangs rgyas thams cad rab tu byung ba'i tshul gyis bzhugs par bsam mo//de'i g.yas kyi phyogs su byang chub sems dpa' byams pa dang / kun du bzang po dang / spyan ras gzigs dbang phyug dang / phyag na rdo rje dang / sa'i snying po dang / nam mkha'i snying po dang / sgrib pa rnam par sel ba la sogs te/ bskal pa bzang po'i byang chub sems dpa' rnams khyim pa'i tshul gyis rgyan ma spangs pa'i mtshan du bzhugs par bsam mo/ / de'i g.yon phyogs su shA ri'i bu dang / mod gal gyi bu dang / rab 'byor dang / kun dga' bo la sogs te/ dgra bcom pa chen po rnams rab tu byung ba'i tshul gyis bzhugs par bsam mo/ /de'i 'og gi phyogs su lha'i bu dbang phyug chen po la sogs te/ tshangs ris kyi lha rnams dang /tshangs pa chen po dang bcas pa'i gzugs na spyod pa'i lha'i bu rnams kha dog dkar po rgyan thams cad kyis brgyan pa dang / brgya byin la sogs pa sum cu rtsa gsum gyi lha rnams sna tshogs pa'i rgyan thams cad kyis brgyan pa bsams te/ de rnams kyi mdun du bdag gis phyag 'tshal ba dang /mchod pa la sogs pa'i yan lag bdun dang ldan pa'i smon lam gyi sgo nas byang chub chen por sems bskyed nas/ de thams cad la mchod pa'i don du bcom ldan 'das kyi mtshan brjod par bya'o/ /de la bcom ldan 'das de bzhin gshegs pa rnams ni rdo rje rin po che las grub pa'i seng ge'i khri dang /rin po che pad+ma dang / nyi ma dang zla ba'i dkyil 'khor gyi gdan la mnyam pa'i skyil mo krung dang / mnyam gzhag gi phyag rgya dang / chos 'chad kyi phyag rgya can no/ /byang chub sems dpa' rnams ni rin po che dang / pad+ma dang zla ba'i dkyil 'khor la zhabs g.yon pa phab ste skyil mo krung phyed ma dang / rang rang gi mtshan dang / chos zhu ba'i phyag rgya can dang / nyan thos chen po rnams ni rin po che pad+ma'i gdan la chos zhu ba'i tshul du bsam par bya'o/ /rang sangs rgyas rnams ni rang rang gi bzhon pa dang /mtshan ma dang ldan pa'am/ yang na thams cad kyang rin po che'i khri steng na chos zhu ba'i tshul can sha stag go/ /mchod pa rdzogs nas gshegs pa dang / 'dod pa'i don la gsol ba gdab ste rang rang gi zhing dang gnas su gshegs su gsol te ldang bar bya'o/ /spyan drang ba ni mi dgos te/bsams pa tsam nyid kyis byin gyis rlob par 'gyur ba'i phyir ro/ /de dag mtshan yon tan gyi don du bltas te brjod pa yid la byed pa'i tshul yin no/ /yon tan nyid kyi tshul ji lta bu zhig yin zhe na/ pha rol tu phyin pa'i tshul dang / gsang sngags kyi tshul rnam pa gnyis yin no//de la pha rol tu phyin pa'i tshul ni 'jig rten pa dang / nyan thos pa dang / rang sangs rgyas dang / byang chub sems dpa' rnams thun mong du 'gyur ba'i yon tan dang / de bzhin gshegs pa nyag gcig gi yon tan de dag thun mong ma yin pa'o/ /de la thun mong ni dge ba bcu'i las kyi lam dang /bsam gtan dang / tshad med pa dang / snyoms par 'jug pa'i las kyis bsdus pa'i mngon par mtho ba'i 'bras bu dang bcas pa rnams dang / gzhan yang bden pa bzhi dang / shes pa brgyad dang / rnam par thar pa la sogs pa dge sbyong gi tshul gyi 'bras bu dang bcas pa dang /de bzhin du phyogs dang / pha rol tu phyin pa dang / sa dang / byang chub sems dpa'i stobs dang / byang chub sems dpa'i mi 'jigs pa dang / byang chub sems dpa'i gzungs dang / ting nge 'dzin la sogs pa rnams so//thun mong ma yin pa'i yon tan ni de bzhin gshegs pa'i stobs bcu dang / ma 'dres pa bco brgyad dang / mtshan dang dpe byad bzang po dang / gzungs dang / ting nge 'dzin dang / thugs rje chen po sum cu gnyis dang / ma 'dres pa'i dran pa nye bar gzhag pa gsum dang /bag chags kyis mtshams sbyor ba thams cad yongs su spangs pa dang / bsnyel ba mi mnga' ba'i chos nyid dang / rnam pa thams cad mchog dang ye shes zhes bya ba la sogs pa lta bu ste/ 'di dag ni de bzhin gshegs pa'i yon tan rgya mtsho zhes gsungs te/rgya mtsho ltar zab cing rgya che ba'i phyir dpag pa dang tshad las 'das pa'o/ /de yang 'dir bsdu na ni rnam pa bzhi ste/ brten par bya ba'i chos thams cad ma lus par yongs su mkhyen pa dang / spang bar bya ba'i chos thams cad ma lus par gtan du spangs pa dang /gnas 'gyur ba'i chos thams cad phyin ci ma log par rtag tu gnas gyur pa dang / thob par bya ba'i chos thams cad ma lus par rtag tu thob pa ste/ 'di lta bu'i tshul gyis de bzhin gshegs pa'i yon tan rgya mtsho mdor bsdu na rnam pa bzhi yin no/ /gsang sngags kyi tshul las ni de bzhin gshegs pa'i yon tan gyi rlabs chen po rnam pa gsum gsungs te/gsum gang zhe na/ yongs la khyab pa'i yon tan dang / /rtsis las 'das pa'i yon tan dang / /mchog tu gyur ba'i yon tan no/ /de la yongs la khyab pa'i yon tan gang zhe na/'di ltar de bzhin gshegs pa'i yon tan ni nam mkha'i dbyings kyi mtha' klas pa/ chos kyi dbyings kyi mur thug pa dag dang / ma dag pa'i zhing khams dag dang / de dag na gnas pa'i gang zag slob pa dang / mi slob pa dang / gnyi ga ma yin pa'i bsdus pa'i chos rnams dang /'di ltar phung po dang khams dang skye mched dang / rten cing 'brel par 'byung ba nas rnam pa thams cad kyi mchog gi ye shes dang chos kyi dbyings dang / yang dag pa'i mtha'i bar gyi chos rnams la ma khyab pa med pa ni yongs la khyab pa'i yon tan yin te/de ji ltar khyab pa'i tshul ni mtshan bshad pa'i skabs su lta bar shes par bya'o/ /de la de bzhin gshegs pa'i rtsis las 'das pa'i yon tan gang zhe na/ 'di ltar de bzhin gshegs pa'i sku'i yon tan dang / de bzhin du gsung dang / thugs dang / yon tan dang phrin las kyi dbang gi sgo nas yon tan du gyur pa/rtsa ba re re la yang yon tan gyi cha lngar lngar phye bas sku lnga dang / de bzhin du gzhan la yang lnga lnga dang / bcu phrag gcig la yang de bzhin du rigs nyi shu rtsa lnga dang / de rnams la yang snying po dang phyag rgya dang / gsang sngags dang /rig sngags rnams kyi rigs kyi dbye bas rigs brgya brgya ste/ de dag la de bzhin du phye bas rigs 'bum phrag brjod kyis mi lang ba dang / grangs med pas rigs rgya mtsho zhes gsungs te/ 'di ltar gzhan las rigs ni mtha' yas pa gsungs pa yang rigs chen dag tu zad par 'du shes gsungs pa lta bu ste/'dir gsungs pa/ sangs rgyas thog ma tha ma med/ /dang po sangs rgyas rgyu med pa/ /zhes so/ /rigs lnga dang drug dang mtha' yas par gsungs pa yang / 'di nyid las/ gsang sngags rigs chen thams cad dang //gsang sngags rig sngags 'chang ba'i rigs/ /rigs gsum la ni rnam par gzigs/ /'jig rten 'jig rten 'das pa'i rigs/ /'jig rten snang byed rigs chen dang / /phyag rgya chen po'i rigs mchog dang / /rigs chen gtsug tor cher gzigs nas//zhes gsungs so/ /rdo rje'i rigs 'ba' zhig kyang mtha' yas te/ 'di nyid las zhu ba po rdo rje 'dzin pa'i yon tan brjod pa'i skabs su/ khro gnyer rim par ldan la sogs/ /lag na rdo rje mtha' yas pa/ /zhes gsungs pa dang / rdo rje 'jigs byed 'jigs par byed//ces bya ba la sogs pa rdo rje khro bo'i rigs sna tshogs gsungs pa lta bu'o/ /de bzhin du rigs gzhan la yang sbyar bar bya ste/ de bzhin gshegs pa'i rigs kyi sgo nas 'di nyid gsungs pa/ gtsug tor chen po rmad byung gtsug /nam mkha'i bdag po sna tshogs ston//zhes gsungs pa lta bu'o/ /pad+ma'i rigs kyi dbang du gsungs pa/ sangs rgyas kun gyi snying po che/ /sprul pa'i 'khor lo sna tshogs 'chang / /zhes gsungs pa lta bu'o/ /rin po che'i rigs kyi dbang du gsungs pa/ sangs rgyas kun gyi sprul sku//bye ba dpag med 'gyed pa po/ /zhes gsungs pa lta bu'o/ /las kyi dbang du byas te gsungs pa/ sangs rgyas sprul pa'i rgyud 'chang ba/ /phyogs bcur sprul pa sna tshogs 'gyed/ /ces gsungs pa lta bu'o/ /'di lta bu'i che ba'i yon tan yongs su bgrang ba las 'das pa ni rtsis las 'das pa'i yon tan zhes bya'o//de la mchog tu gyur ba'i yon tan gang zhe na/ gang de la de bzhin gshegs pa'i yon tan ni yongs su mthar phyin zhing yongs su dag pa phul du byung ba ste/ 'di ltar 'di nyid du gsungs pa/ dbyer mi phyed pa'i sgo nas thugs rjes khyad du byas pa'i yon tan dang mnyam pa med pa'i sgo nas chen pos khyad par du byas pa'i yon tan dang /de bzhin rab mchog dam pa bla na med pa zhes bya ba la sogs pa khyad par du byas pa'i yon tan dang / de bzhin du gtso bo dang dbang phyug dang / bdag po dang rgyal po la sogs pa khyad par du byas pa'i yon tan dang / gzhan yang mtha' dag dang / kun du lus pa med pa dang / rtag tu la sogs pas khyad par du byas pa'i yon tan gyi sgo nas brjod pa rnams te 'di ni mchog tu gyur pa'i yon tan gyi rlabs chen po rnam pa gsum po 'di dag gis ni de bzhin gshegs pa'i yon tan thams cad 'dus par shes par bya'o//mtshan yon tan gyi dbang du bltas te brjod pa'i tshul rdzogs so// //da ni mtshan gsang sngags kyi tshul du bltas te/ brjod pa'i tshul bstan par bya ste/ de la 'dir rigs kyi bu'am rigs kyi bu mo gang la la dag thabs dang shes rab zab mo'i tshul la mos shing /gsang sngags kyi sgo nas spyad pa spyod pa/ rig sngags dang gsang sngags dang yongs su mnyes pa'i sgo nas sems can thams cad kyi don du bsgrub par 'dod pa dang / yang dag par rdzogs pa'i byang chub myur du thob par bya ba la thabs mkhas pa'i spyod pas thabs dang shes rab dus gcig tu zung du 'brel pa'i lam zab mo la sbyar bar 'dod pa rnams kyis thog ma nyid du theg pa chen po ma nor bar ston pa'i dge ba'i bshes gnyen yongs su gzung ba dang /des bstan pa'i gsang ba'i dkyil 'khor du 'jug pa dang / de'i dus su thun mong dang thun mong ma yin pa'i sdom par gyur ba so so thar pa'i sdom pa las gzhi blangs te/ byang chub sems dpa'i sdom pa dang / rig pa 'dzin pa'i sdom pa yang blangs nas/ sgrub thabs kyi man ngag kyang tshul bzhin du mnos te/de phyin chad kyang spro ba mi lhod par brtson pa la gnas pas rnal 'byor 'di la brtson par bya'o/ /de la rnal 'byor gyi rim pa ni 'di yin no/ /sngags khang ngam gang yang rung ba'i gnas su rin po che 'bur du brkos pa'i stegs bu khru gang pa'am/de las lhag kyang rung ba legs par byi dor byas te/ der 'phags pa 'jam dpal gyi sku gzugs sam/ ri mo'i gzugs 'byor na bzhugs su gsol lo/ /me tog gi gcal dang / mchod pa'i bye brag kyang ji ltar 'byor ba bzhin bzhag ste bdag nyid stan bde ba la 'dug nas/thog ma nyid du nang par sngar langs nas sngar sdom pa mnos pa rnams zhig pa dang ma zhig pa bsam par bya/ zhig par gyur pa rnams ni bshags par rigs pa'am/ sngar blang pa'i rigs pa dag de bzhin du bya bar bsams la/ ma zhig pa rnams ni brtan par bya'o//de nas de nyid kyi shugs las byung ba'i byang chub kyi sems bskyed pa dang / sdom pa brtan por gzung ba dag kyang 'phags pa rnams kyi spyan sngar brtan par gzung bar bya'o/ /de nas 'jug pa byang chub tu sems bskyed par bya ste/ 'di ltar mngon par byang chub pa'i rim pa lnga bsgom par bya ste/de la dang po re zhig me long lta bu'i ye shes kyi sgo nas sbyar bar bya ste/ ji ltar me long dag pa la/ /gzugs brnyan so sor gsal ba ltar/ /chos kyi dbyings rnam par dag pa'i rgyu mthun pa byang chub kyi sems la/ sems can gyi khams sna tshogs pa gzugs brnyan lta bur gsal bar bltas nas/de dag gi don gyi phyir sems can la dmigs pa'i snying rje chen po bskyed par bya'o/ /de nas mnyam pa nyid kyi ye shes la sbyar bar bya ste/ chos kun rang bzhin dag pas na/ /bdag kyang rang bzhin rnam par dag /ces smos te/chos thams cad bdag med pa mnyam pa nyid du sbyar bar bya'o/ /de nas a kA ro mu khaM sarba d+harmANAM Ad+ya nu t+pan+na tA ta ces brjod pas/ chos thams cad bdag med par rtogs pa'i mtshan nyid so sor rtog pa'i ye shes chos la dmigs pa'i snying rje chen po gong du bstan pa'i mnyam pa nyid kyi ye shes kyi stobs bskyed pa bsgom par bya'o//de nas de ma thag tu shin tu rnam par dag pa'i chos kyi dbyings kyi ye shes gzung ba dang 'dzin pa las rnam par grol ba/ rang bzhin gyis 'od gsal ba mi dmigs pa'i snying rje dang ldan pa rjes su mthun pa bsgom par bya'o//de nas yang sems can gyi don du bya ba dang bral ba rigs pa ma yin pa/ sngon gyi smon lam dang sems can gyi dbang las gyur pa/ mi dmigs pa'i snying rje chen po bya ba nan tan gyi ye shes mngon du bya'o/ /de nas byang chub kyi sems rnam pa gnyis kyis rgyu mthun pa'i 'bras bu thabs dang shes rab zung du 'brel pa'i mtshan nyid de bzhin gshegs pa'i mdzad pa nyid la mngon du 'jug par bya'o//nam mkha'i de nyid du nam mkha'i dkyil du A li dang kA li'i bdag nyid sgyu 'phrul gyi tshul rang bzhin gyis 'od gsal ba skar ma dang 'dra ba bsams te/de gyur pa las yi ge hUM chen po kun du bzang po byang chub sems kyi rang bzhin/ kha dog sngon po 'od zer gyi phreng ba can khro bo 'bar ba'i phreng bas 'khrigs pa bsgoms te/ de'i 'od zer gyi rtse mo las kyang de bzhin gshegs pa rnams sprul te phyogs thams cad du gshegs nas/sangs rgyas rnams kyi sprul pas don gyi bya ba byas te/ slar log nas hUM de nyid la zhugs pas/ de las gyur pas ye shes kyi rdo rje chen por gyur par byas pa'o/ /de yang zhabs drug dang ldan pa/kha dog dang ldan pa/ sgo drug la sangs rgyas dga' ba la sogs pa'i sangs rgyas kyi zhing khams drug gnas pa/ de 'bar ba'i gzi brjid kyis zhing khams thams cad du khyab pas bdud thams cad kyi gnod pas mi thub pa'i ye shes kyi rdo rje rtse lnga pa bsgom par bya'o/ / de'i bum pa'i nang gi yi ge b+h+rUM dmar po las gyur pa'i rin po che sna bzhi las grub pa mchod rten stong gsum gyi stong chen po'i 'jig rten gyi khams kyi tshad tsam bsgoms nas/ de'i nang du yi ge hrIH las chos kyi 'byung gnas gru gsum dkar po 'greng bur gnas pa/ de'i steng du yi ge a las rdo rje rgya gram des sa gzhi dkar por byin gyis brlab po//de las yi ge b+h+rUM las rdo rje nor bu rin po che brtsegs pa'i gzhal yas khang rnam par bsgom par bya'o/ /de'i mtshan nyid ni dpal de nyid 'dus pa la sogs par gsungs pa'i rdo rje dbyings kyi dkyil 'khor chen po spro bar bya'o//de'i dbus kyi gdan la yi ge a las yongs su bskyed pa'i rnam par snang mdzad chen po sku mdog dkar po kun du zhal gyi mtshan nyid ral pa'i dbu rgyan dang / byang chub mchog gi phyag rgya can te de ni gzhi'i sangs rgyas so/ /de'i thugs kar yi ge d+hIHlas skyes pa'i 'jam dpal dang po'i sangs rgyas zhal lnga gtsug phud dang bcas pa kha dog lnga dang ldan pa ste/shar sngon po/ lho ser po/ nub dmar po/ byang ljang gu/ dbu steng na gnas pa'i zhal zhi ba dkar po/ /byis pa'i rgyan gyis brgyan pa'o/ /'jo sgeg dang ldan pa sna tshogs kyi na bza' mnabs pa/phyag brgyad pa bzhis ni shes rab kyi pha rol du phyin pa stong phrag brgya pa glegs bam bzhi ru bgos te thugs kar 'dzin pa/ gzhan gyis shes rab kyi ral gri 'dzin pa bsgom par bya'o/ /gdan gyi sangs rgyas dang / 'og nas ston pa'i ye shes sems dpa' rnams ni mos pa'i dbang gis rigs so sor bsgyur bar bya'o zhes shes par bya'o/ /dang po'i sangs rgyas de'i thugs kar shes rab kyi 'khor lo bsgom par bya ste/ de yang a las bskyed pa kha dog drug dang ldan pa'i rtsibs drug pa phyi dang nang du mu khyud bzhi dang ldan pa ste/de'i lte ba'i dkyil du yi ge a bsam par bya'o/ /de'i phyi rim du mu khyud dang po la 'jam dpal ye shes sems dpa'i rtsa ba'i gsang sngags/ oM sarba d+harmA a b+hA ba/ swa b+hA ba bi shud+d+ha tsak+Shu badzra a A aM aHrnams dgod par bya'o/ / de'i phyi rol gyi mu khyud gnyis pa la sgra yig bcu gnyis dgod par bya'o/ /de'i phyi rol gyi rtsibs rnams la ni/ dang po la/ oM badzra tI k+Sh+NA ya te na maH/ gnyis pa la/ duHkha ts+tshe da ya te na maH/ gsum pa la/ oM pradz+nyA dz+nyA na mUrti ya te na maH/ bzhi pa la/ oM dz+nyA na kA yA ya te na maH/lnga pa la/ oM wA gI shwa ra mu pA dA ya te na maH/ drug pa la a ra tsa nA ya te na maH/ 'khor lo'i phyi rol gyi mu khyud la/ de bzhin gshegs pa thams cad kyi sku'i phreng ba'i sngags/ A a sarba ta thA ga ta hr-i da ya/ ha ra ha ra/ oM hUM hrIH b+ha ga wAn/ dz+nyA na kA ya/ wA gI shwa ra ma hA ba tsa/ sarba d+harma ga ga na/ a ma la su pa ri shud+d+ha ya/ d+harmA d+hA tu dz+nyA na gar+b+ha AHphyi rol gyi mu khyud gnyis pa la/ ka kha la sogs pa swA hA mthar thug pa'i yi ge sum cu gsum dgod par bya'o/ /mu khyud bzhi'i yi ge ni kha dog dkar po'o/ /rtsibs drug gi yi ge ni rigs drug gi kha dog gi rim pa bzhin no//'khor lo'i dbus kyi yi ge a las bskyed pa bcom ldan 'das ye shes sems dpa' ston ka'i zla ba'i mdog in+d+ra nI la'i mdog gi gtsug phud nyi ma 'char ka'i dkyil ltar 'od kyi dkyil 'khor gyis bskor ba de bzhin gshegs pa thams cad rgyan gyi dngos po'i ting nge 'dzin dang ldan pa las pad+ma'i gdan la bzhugs pa/phyag gnyis kyis ut+pa la dmar po dang sngon po/ gnyis la shes rab kyi pha rol tu phyin pa'i ting nge 'dzin gnyis gnas pa 'dzin pa/ zhi ba'i tshul dang ldan par bdag nyid bsams te/ de'i snying gar zla ba'i dkyil 'khor bsgoms nas/de'i steng du shes rab kyi pha rol tu phyin pa'i rang bzhin thams cad mkhyen pa'i ye shes 'byung ba'i rkyen/ nyan thos dang rang sangs rgyas thams cad bskyed pa'i dngos po/ byang chub sems dpa' thams cad kyi bsod nams dang ye shes kyi dngos po don dam pa'i yi ge'i 'bru yi ge thams cad kyi rkyen yi ge a bsgom par bya'o//de nas ji skad bstan pa'i yi ge de thams cad kyi rkyen yi ge a bsgom par bya'o/ /de nas ji skad bstan pa'i yi ge de rnams kyang 'od gsal ba bsgom ste/ sgrib pa thams cad sel bar byed pa'i 'od des rang gi lus la snang bar bya ste/de zhal bzhi nas byung nas mi mjed kyi 'jig rten snang bar byas/ /de nas rdo rje sgo drug nas 'od zer kha dog drug tu byung ste nam mkha'i khams thams cad du khyab pas/ sangs rgyas kyi zhing kun du sems can gyi don byas//'khor gyi dkyil 'khor snang bar byas te slar log nas rdo rje la lan gsum bskor ba byas zhal du byung ste/ shes rab ye shes de drangs nas chos bdag med pa nyid kyis rang gi sgo nas btsud nas rang gi snying ga'i zla bar gnas pa'i sngags kyi yi ge dang gcig tu gyur nas gnas par bsgom par bya'o//de yang dmigs pa gsum gyi sgo nas rjes su dran par bya ste/ 'di ltar ye shes kyi sku'i sgo nas dmigs pa dang / zla ba'i dkyil 'khor gyi sgo nas dmigs pa dang / yi ge a'i sgo nas dmigs pa rnams kyis sangs rgyas thams cad kyi sprul pa'i sku dang lhan cig tu gnas pa yang mngon du byas nas mtshan brjod par bya'o//rigs so sor phye ba'i 'khor lo rnams 'dir ma bshad do/ /de ltar mtshan brjod pa la zhugs te/ de nas dpal ldan rdo rje 'chang / /zhes bya ba nas/ ya te na maH/zhes bya ba'i ting nge 'dzin de nyid kyis gdon par bya ste/ dmigs pa gzhan bsam mi dgos so/ /'di ltar sangs rgyas bcom ldan 'das/ /zhes bya ba nas bzung ste/ theg pa chen po'i tshul gyi mchog /ces bya ba'i bar du mtshan gyi sngags kyi tshig rnams brjod nas/rdo rje dbyings kyi dkyil 'khor chen por gtogs pa'i rtsa ba'i lha sum cu rtsa bdun bskal ba bzang po'i byang chub sems dpa' bcu drug dang bcas pa rang rang gi sku mdog dang phyag mtshan du bcas pa rnams byung ste/ sangs rgyas kyi zhing thams cad du spros nas mdzad pa nye bar bsgrubs te/slar log nas rig pa ji lta ba bzhin du 'gyur te rdo rje dbyings kyi dkyil 'khor chen po rang rang gi gnas su rang gi gdan la bzhugs pa bsgom par bya'o/ /de nas/ sangs rgyas rnam par snang mdzad che/ /zhes bya ba nas/ rdo rje lcags kyu zhags pa che//zhes bya ba'i bar du/ tshigs bcad nyi shu rtsa lngar rkang pa gcig gis ma tshang ba brjod pas ye shes sems dpa'i thugs ka'i yi ge a las/ mtshan gyi sngags kyi yi ge brgya brgyad bcu rtsa gcig rnams spros te/ de dag kyang bcom ldan 'das rnam par snang mdzad chen po la sogs pa'i sku mdog dkar po 'khor lo dang ral gri la sogs pa 'dzin par gyur pa byung ste/phyung nas kyang sangs rgyas kyi zhing thams cad du song nas/ rang gi rnam par thar pa'i sgo nas gti mug la gnas pa'i sems can rnams rnam par dag par bya ba dang /sangs rgyas kyi zhing snang bar byas nas yang phyir log ste mtshan gyi sngags kyi yig 'bru rnams su gyur nas/ dkyil 'khor chen po rtsa ba'i lha sum cu rtsa bdun la mtshan gyi sngags lnga lnga thim ste gnas par mngon du bya'o/ /de nas/ rdo rje 'jigs byed 'jigs par byed//ces pa nas/ sgra dang ldan pa rnams kyi mchog /ces bya ba'i bar du/ tshigs bcad bcur rkang pa gcig gis lhag par brjod pas/ ye shes sems dpa'i thugs ka'i yi ge las mtshan gyi sngags bdun cu rtsa gcig 'phros pas/ 'jig rten gsum gyi gdug pa 'dul ba'i don du rgyud thams cad las gsungs pa'i rdo rje khro bo'i tshogs rab tu 'bar ba'i zhal mi bzad pa dang ldan pa/rdo rje 'bar ba me 'bar bas phyag mtshan pa/ du ma'i mdog dang rgyan dang gos gyon pa'i khro bo'i sku byung nas 'jig rten gyi khams thams cad du snang ba thams cad gdul bar bya ba dang /sangs rgyas kyi zhing snang bar byas te/ slar log nas rdo rje dbyings kyi dkyil 'khor chen po'i phyi rol du dkyil 'khor ba gnyis pa la mtshan gyi yi ge'i tshogs bdun cu rtsa bdun gcig rnams rang rang gi rigs dang kha dog dang gzugs rnams su gyur nas/de lta bu'i rim pas gnas par bsam mo/ /de yang bcu bzhi phrag lngar bgos te rigs lnga'i bdag nyid kyis gnas par mos par bya'o/ /de nas/ yang dag bdag med de bzhin nyid/ /ces bya ba nas/ ye shes me lce 'od 'bar gsal/ / zhes bya ba'i bar du tshigs su bcad pa bzhi bcu rtsa gnyis brjod pas/ ye shes sems dpa'i thugs ka'i yi ge las mtshan sngags yi ge nyis brgya bdun cu rtsa lngar phyung ste/ de yang bcom ldan 'das 'od dpag med kyi sprul pas sems can la ji ltar 'tsham pa bzhin du/kha cig la tshangs pa la sogs pa'i gzugs kyis/ kha cig la nyan thos la sogs pa'i gzugs kyis/ kha cig la byang chub sems dpa' dang / yang dag par rdzogs pa'i sangs rgyas kyis/ de bzhin du kha cig la bum pa bzang po dang sman chen po la sogs te/g.yo ba dang mi g.yo ba'i dngos po rnams su sprul nas sangs rgyas kyi mdzad pa byas te/ rang gi rnam par thar pa'i sgo nas 'dod chags la spyod pa'i sems can gyi don bya ba dang / sangs rgyas kyi zhing yang snang bar byas te slar log nas/ sngags kyi yi ge'i tshogs rnams su gyur nas rdo rje dbyings kyi dkyil 'khor chen po'i phyi rim 'khor lo gsum pa ji lta bu'i rim pas rnam par gnas pa mngon du bya'o//rigs kyi dbye bas ni rigs re re la mtshan gyi sngags kyi yi ge'i tshogs lnga bcu rtsa lngar sbyar bar bya'o/ /'dod pa'i don grub dam pa ste//zhes bya ba nas/ nor bu chen po rin chen tog /ces bya ba'i bar du tshigs bcad nyi shu rtsa bzhi brjod pas/ ye shes sems dpa'i thugs ka'i yi ge las mtshan gyi sngags kyi tshig brgya nyi shu rtsa bzhi phyung ste/ bcom ldan 'das nam mkha'i snying po'i ting nge 'dzin gyis phyogs bcu mtha' yas par gshegs nas/rang gi rnam par thar pa'i sgo nas sems can rnams kyi ser sna bcom pa dang / sangs rgyas rnams kyi 'khor gyi dkyil 'khor snang bar byas te/ slar log nas rdo rje dbyings kyi dkyil 'khor chen po'i phyi rol 'khor lo bzhi pa la rang rang gi kha dog gi yi ge rnams su gyur te go rims ji lta ba bzhin rnam par gzhag go//'dir rigs kyi dbye ba ni rigs re re la mtshan nyi shu rtsa lnga lngar sbyar bar bya'o/ /de nas/ sangs rgyas kun gyi rtogs bya ba/ /zhes bya ba nas/ 'jam dpal dpal dang ldan pa'i mchog /ces bya ba'i bar du tshigs su bcad pa bco lnga brjod pas/ ye shes sems dpa'i thugs ka'i yi ge las mtshan gyi sngags kyi tshigs dgu bcu rtsa lnga byung ste/ bcom ldan 'das don yod grub pa'i tshul gyis sems can gyi bsam pa yongs su rdzogs par byed pa dang /rang gi rnam par thar pa'i sgo nas sems can rnams kyi le lo med par byas te/ de bzhin gshegs pa'i 'khor gyi dkyil 'khor yang gsal bar byas nas/ slar log nas rdo rje dbyings kyi dkyil 'khor chen po'i phyi rol 'khor lo lnga pa la ji lta ba'i rim par rnam par gnas par bya'o//rigs kyi dbye ba ni 'dir rigs re re bcu dgu yin no/ /rigs kyi dbye ba 'di ni sprul pa spro ba'i dus na yang 'di lta bu'i dbye ba spro ba yin te/ slar bsdus te 'khor lor bkod pa'i dus na yang rigs kyi rim pas gnas pa'o/ /de nas mchog sbyin rdo rje la sogs pa'i bstod pa bya'o//oM sarba d+harmA la sogs pa'i sngags ni gong du bkod pa nyid do/ /de nas la sogs pa ni rjes su yi rang ba'i bstod pa gcig yon tan brjod pa rnams kyang brjod par bya ba yin no/ /de nas cung zad yid brtan par byas nas/ gong du ji ltar 'byor pa bzhin nye bar ba sogs pa'i mchod pa'i tshig dbul bar bya'o//bshags pa dang 'dod pa'i don la gsol ba gdab par yang bya ste/ bya ba rdzogs nas/ dkyil 'khor gyi tshogs chen po de dag kyang rim pa bzhin du 'dus te/ ye shes sems dpa'i thugs ka'i yi ge la bsdu bar bya'o/ /de nas lus bsrung ba yang bya ste ci bder gnas par bya'o//tshul 'di ni yongs su rgyas pa'i bsam gtan yin te/ shin tu yongs su rgyas pa ni 'khor lo bdun bsgom pa'i tshul yin no/ /bsam gtan 'di ni mos pa dang / brtson 'grus dang / blo gros dang ldan pas bsgrub par bya ba yin pa'i phyir rgya che ba ste/ 'dir mi nus pa'i gang zag mos pa'am brtson 'grus sam/blo gros dman pa rnams kyi phyir bsam gtan bsdus pa bstan par bya'o/ /de nas gsang sngags kyi sgo nas spyad pa spyod par 'dod pa rnams bcom ldan 'das 'jam dpal dbyangs kyi mtshan brjod pa'i sgo nas bsod nams ye shes 'phel bar bya ba dang /dngos grub nye bar bya ba dang / sems can gyi don bya ba'i 'dod pa yod la/ ji skad bstan pa'i bsam gtan rgya che ba la ni nus pa'i spro ba med pa rnams kyis sdom pa gzung ba dang / byang chub tu sems bskyed pa'i rjes la/ bdag gis sems can thams cad kyi don du bcom ldan 'das 'jam pa'i rdo rje'i mtshan brjod par bya'o//de nas/ a A/ i I/ u U/ e A+ai/ o au/ aM aH/ zhes brjod pas/ chos thams cad gdod ma nas ma skyes pa ngo bo nyid kyis rnam par dag pa'i rang bzhin gyis 'od gsal bar bsgom mo//de nas s+thi to hr-i di dz+nyA na mUrti ra haM/ bud+d+ho bud+d+hA nAM/ t+r+ya d+hA brtI nAM/ zhes brjod nas/ da ni dus gsum gyi sangs rgyas rnams kyi thugs la gnas pa ste/ ye shes sku yi sangs rgyas so/ /zhes chos kyi sku'i nga rgyal du gnas par bya'o/ /de nas badzra tIk+Sh+Na zhes bya ba la sogs pa'i sngags brjod pas/bcom ldan 'das rigs drug gi rang bzhin can phyag rgya chen po mtshan nyid kyi sku rab tu bsgoms te de'i thugs kar/ rdo rje nyi ma snang ba che/ /rdo rje zla ba dri med 'od/ /ces bya ba kun du bzang po'i byang chub sems 'bras bu'i ngo bo/ /sems can thams cad kyi bla na med pa de nyid de ltar gyur par bya'o//de yang thabs dang shes rab kyi bdag nyid pas g.yas g.yon nam brtsegs ma ji ltar bde bar bsgom mo/ /de nas/ 'di ltar sangs rgyas bcom ldan 'das/ /zhes bya ba nas/ tshig kun rab tu gsal bar byed//ces bya ba'i bar du brjod pas/ nyi ma dang zla ba de dag re re'i steng du shes rab kyi pha rol tu phyin pa'i bdag nyid thams cad mkhyen pa'i ye shes 'byung ba'i rkyen/ 'phags pa'i tshogs thams cad kyi bsod nams dang ye shes kyi gzhi/ yig 'bru thams cad kyi snying po yi ge a re re bsams te de las/mchod pa chen po 'dod chags che/ /bya ba la sogs pa nas/ 'jam dpal dpal dang ldan pa'i mchog /ces bya ba'i bar du brjod pas sngags thams cad kyi snying po yi ge a de dag las mtshan gyi gsang sngags kyi yi ge'i tshogs rnams kyi 'od zer rab tu 'phros pas bdag kyang rab tu snang bar byed/sangs rgyas kyi zhing sna tshogs na gnas pa'i sems can rnams kyi 'khor gyi dkyil 'khor dang bcas pa yang snang bar byed pa bsgom par bya'o/ /de nas mchog sbyin rdo rje mchog khrod ces bya ba la sogs pa nas/ye shes sku nyid khyod la 'dud/ /ces bya ba'i bar ni rigs drug gi rang bzhin bcom ldan 'das la bstod pa'i bsam pas brjod par bya'o/ /oM sarba d+harmA zhes bya ba la sogs pa nas/ a A/ aM a/ zhes bya ba'i bar gyi gsang sngags brjod pa ni/bcom ldan 'das kyi rtsa ba'i gsang sngags te/ de bzlas pas ni rtsa ba'i gsang sngags bzlas brjod byas pa'i tshul gyis bsnyen par gyur pa'i bsam pas brjod par bya'o/ /pra kr-i ta pa ri shud+d+ha zhes bya ba nas mu pa da na ya zhes pa'i bar gyis brjod pa ni/bcom ldan 'das ye shes kyi sku yongs su gzung bar dam bca' zhing khas len pa'i tshig ste de bas na de dag brjod cing de bzhin du yongs su gzung ngo snyam du yid la bsam par bya'o/ /oM sarba ta thA ga ta hr-i da ya zhes bya ba nas/ dz+nyA na ga r+b+ha AHzhes bya ba'i gsang sngags ni de bzhin gshegs pa thams cad kyi phreng ba'i sngags yin te/de bas na de brjod cing phreng ba'i sngags bzlas brjod bya ba'i sgo nas bsnyen pa bya'o/ /de nas 'byor na mchod pa yang dbul te/ 'dod pa'i don gsol nas/ lha'i ting nge 'dzin yang skye ba med pa'i ngang du bsdus te ldang bar bya'o//mjug tu phyag na rdo rjes bcom ldan 'das rjes su yi rang bas bstod pa dang / yon tan gyi tshogs brjod pa ni bsam gtan gyi yul du gsungs pa ma yin te/ brjod pa ni gang zag rnams kyi phan yon zhes bya'o/ / de nyid dang brjod par bya ba yin te/ bsod nams tshogs thob pa'i phyir mtshan gsang sngags kyi tshul bstan pa rdzogs so// //de la mtshan gnyis su med pa'i don du bltas te brjod pa'i tshul gang zhe na/ 'di la rigs kyi bu'am rigs kyi bu mo gang la la dag theg pa chen po'i don tshul zab mo'i sgo nas spyod par 'dod cing /bdag nyid sgrib pa thams cad myur du bral bar 'dod pa dang / ji ltar me long dag pa la/ /gzugs brnyan thams cad snang ba bzhin/ /sems can rnams kyi don du sangs rgyas kyi chos sna tshogs snang bar 'dod pas/bcom ldan 'das 'jam dpal ye shes sems dpa'i don dam pa'i mtshan yang dag par brjod pa'i mngon par brjod cing nan tan du brjod pa'i sgo nas/ gnyis su med pa'i ye shes rgyud la bskyed par bya'o/ /de ji ltar mtshan brjod pas gnyis su med pa'i ye shes skye bar 'gyur zhe na/'di la de bzhin gshegs pa rnams kyi chos kyi phung po dpag tu med pa dang / stong phrag brgyad cu rtsa bzhi la sogs pa gsungs pa thams cad kyang / phan pa dang bden pa ston pa kho na tsam yin pas shes par bya'o/ /de yang phan pa'i bden pa'i dbang gis 'grub pa yin la/bden pa yang phan pas na bden pa 'grub ste/ las dang bya ba yin te/ de ston pa ni mtshan yang dag par brjod pa'i gzhung gi tshogs yin te de la nye bar bstan pa ni/ don chen yi ge dam pa yin/ /zhes bya ba 'di yin no/ /zag pa lnga zad par yang rgyu dang 'bras bu'i sgo nas zung du bzhag pa ste/de la rgyu'i zag pa lnga zad pas/ stong pa chen po yi ge lnga/ /zhes pa'o/ /'bras bu'i zag pa lnga zad pa ni/ thig le stong pa yi ge drug /ces pa ste de la yi ge lnga ni zag pa zad pa shes pa yin la drug pa ni mi skye ba shes pa yin no//bde ba'i ye shes skad cig ma bcu drug skye ba'i skad cig ma bzhir bsdus pa'i de bzhi po'i ye shes kyi bdag nyid du bstan pa ni/ rnam pa kun ldan rnam pa med/ /bcu drug phyed phyed thig le can/ /yan lag med pa'i rtsis las 'das/ /bsam gtan bzhi yi rtse mo can//zhes gsungs te/ bcu drug ni ye shes kyi zla ba'i cha drug go/ /de'i phyed phyed ni bzhi ste bde ba'i ye shes skye ba'i skad cig ma bzhi'o/ /thig le'i cha ni bzhi ste/ g.yo ba med pa'i ye shes so/ /de nyid/ bsam gtan bzhi yi rtse mo can/ /zhes kyang bya'o//tshig 'di dag gi skabs su tha snyad kyi yi ge dang / lnga dang drug dang brgyad dang bcu drug phyed phyed kyi zla tshes dang / thig le dang na ro rnams su bshad pa ni sgra bzhin du bshad par shes pa ste tshogs bshad pa'i tshul yin no/ /'di lta bu'i man ngag gi bshad pa yin pas/re zhig 'jug pa'i sgo shes par bya ba'i phyir sgo tsam smras kyis/ 'di legs par bsgrub pa'i tshul ni dbang bskur bsgrub pa yin te/ 'di ni man ngag rna ba brgyud du bstan par bya ba yin la bdag gis ma bris so/ /tshul 'di ni thabs dang /shes rab chen po gzigs pa 'bras bu nas bzlog ste gnyis su med pa'i ye shes bskyed pa'i tshul/ 'phags pa 'jam dpal gyi mtshan yang dag par brjod pa 'dis bstan pa yin no zhes 'dod do/ /de'i tshul la a A/ zhes bya ba nas bzung nas 'jam dpal dpal dang ldan pa'i mchog /ces bya ba'i bar gyi gzhung gi tshogs kyis ni ye shes drug bstan to/ /ye shes drug gis ni gnyis su med pa'i ye shes bstan to/ /gnyis su med pa'i ye shes de ni dam pa'i yi ge yin te zag pa lnga zad pa dang / mi g.yo ba'i bde ba thob pa'i phyir de skad ces bya'o//de nas bcom ldan 'das ye shes sems dpa' yin te/ de ltar de ston cing sgrub pa'i gzhung gi tshogs yin no zhes 'dod do/ /de la mnyam pa chen po'i blos rgyu 'bras kyi sgo dbyer med pa rang bzhin gyis 'od gsal ba lhun gyis grub par bya ba'i tshul gang zhe na/'di la rnal 'byor can gang la la dag mnyam pa chen po'i sgo nas chos thams cad gdod ma nas ma skyes shing rang bzhin gyis 'od gsal ba'i 'bras bu'i chos lhun gyis grub pa rtogs shing rgyu bsgrubs pas 'bras bu 'byung ba'i dus la ltos pa med pa kun nas nyon mongs pa dang /rnam par byang ba'i chos su grags pa rnams la blang ba dang dor ba med cing / don dam pa dang kun rdzob tu dbye ba mi 'byed pa la/ rgyu dang 'bras bu'i tshul du yang 'byed pa mi 'byed pa dang sems dang sems snang bas bsdus pa'i chos thams cad kyang 'jam dpal rdo rje'i rang bzhin du rdzogs te bsam du med/btsal du med pa/ bsgrub du med pa'i ngang du rtsol ba med par lhun gyis rdzogs par gnas par 'dod pa rnams kyis thog ma nyid du dge ba'i bshes gnyen dam pa las mnyam pa chen po'i lung tshul bzhin du mnos te shes rab rnam pa gsum gyi sgo nas rtogs shing goms par bya'o//yid ches pa'i dad pa bskyed par bya'o/ /de'i stobs kyis chos gnyis su med pa dang mthun pa'i dad pa dang / brtson 'grus dang dran pa dang / ting nge 'dzin dang shes rab rnams rgyud la skye bar 'gyur ro/ /de'i stobs kyis bdag gi lta ba ldog /bdag tu mi lta na rnam par mi rtog go/ /de'i dbang gis mtshan mar mi 'dzin cing nyams su mi myong mngon par mi zhen no/ /de'i dbang gis mi chags mi len te de ltar na sdug bsngal mngon par sbyor gnas med do/ /de bas na chos gnyis su med pa'i goms par byas/yang dang yang du goms par byas pas ni zag pa ma lus pa byang bar 'gyur te gnyis su med pa'i ye shes nyid du 'gyur ro/ /de bskyed pa'i thabs bden pa gang yin pa de phan pa yin no/ /sdug bsngal dang kun 'byung ba'i bden pa ji ltar na phan pa'i bdag nyid can yin/phan pa gang yin pa de bden pa yin na mu stegs legs skyong gi rig byed kyi phan pa lta bu ji ltar bden pa yin zhe na/ de la smras pa/ de bzhin gshegs pas gsungs pa'i phan pa gang ji snyed pa ni bden pa yin te bden pa la phan pa yang de bzhin no/ /'di ltar sdug bsngal dang kun 'byung gi bden pa ni mi rtag pa dang /sdug bsngal ba dang / stong pa la sogs pa'i rnam pa bden par gsungs pa yin la/ de la de ltar dmigs shing goms par byas pa ni phan par 'gyur ro/ /gnod pa'i mtshan nyid ni rtag pa dang / bde ba dang bdag la sogs pa'i rnam par bltas pa yin te/mi bden pa'i phyir bslus pa zhes bya'o/ /mu stegs legs skyong rnams kyi phan pa ni/ de bzhin gshegs pas gsungs pa'i phan par grags pa yang ma yin te/ 'on kyang phan pa de yang bden pa'i mdo las 'das pa yang ma yin no//yang rgal ba/ de ltar grub pas mtshan yang dag par brjod pa gnyis su med pa'i don brjod pa la ji ltar phan par 'gyur zhe na/ de la smras pa/ de 'di ltar rgyal ba rnams kyi bka' mtha' dag phan pa dang bden pa ston pa kho na tsam yin la/phan pa dang bden pa ston pa dang / de bzhin gshegs pa rnams kyi yon tan yin te/ yon tan thams cad bstan pa yang bcom ldan 'das 'jam dpal ye shes sems dpa'i don dam pa'i mtshan yang dag par brjod pa 'di yin no//de bas na yon tan thams cad kyang phan pa dang bden pa ston pa tsam yin la phan pa dang bden pa yang bdag nyid gcig pa'i phyir gnyis su bstan du med do/ /phan pa dang bden pa thams cad kyi dngos gzhi dang snying por gyur pa yang chos gnyis su med pa yin te/ de'i phyir de bzhin gshegs pa rnams kyi yon tan gyi mtshan gang ci brjod kyang rung ste/de dag thams cad kyi brjod bya ni chos kyi sku yin no/ /de ltar na gnyis su med pa'i don khong du chud cing yongs su grub par bya ba'i phyir mtshan brjod par bya'o zhes shes par bya'o/ /don dam pa'i mtshan yang dag par brjod pa zhes bya ba yang /tshul 'di nyid las gsungs pa yin no/ /de la chos gnyis su med pa rgyud la bskyed pa'i don du mtshan brjod pa gcig mod kyi gdul bya'i dbang gis sgo tha dad de/ de bas na 'dir sgo gsum du shes par bya'o/ /gsum gang zhe na/chos gnyis su med par rtogs pas gang zag gi rgyu mi skye bar bya ba'i tshul dang / thabs dang shes rab zung du 'brel pas zab pa'i 'bras bu zag pa zad pa bzlog pas rgyu dang bcas pa bzlog par gyur pa bstan pa'i tshul dang / mnyam pa chen po'i blos rgyu 'bras kyi sgo dbyer med par rang bzhin gyis 'od gsal ba'i bsam pa lhun gyis grub par bya ba'i tshul lo//de la rgyu zad par bya ba'i chos ni/ mtshan brjod pas chos gnyis su med pa'i yon tan brjod par mos par bya'o/ /dran par bya'o/ /spro bar bya'o/ /de'i che ba yang theg pa chen po'i thabs kyi spyod pa rlabs po che rnams 'gag pa med pa la ni brjod pa yin te/'di ltar bsod nams dang ye shes kyi tshogs rnam pa gnyis dus gcig tu skyed par 'gyur te/ gang gi phyir de bzhin gshegs pa'i yon tan brjod pa'i phyir dang / sems can la phan pa brjod pa'i phyir dang / sems can la phan pa yin pa'i phyir bsod nams rdzogs par 'gyur ro/ /chos gnyis su med pa'i don bden pa brjod pa yin zhing gnyis su med pa rgyud la bskyed pas ye shes rdzogs par 'gyur ro/ /de bas na pha rol du phyin pa'i tshul la mos pa'i gang zag ye shes kyi tshogs la lhur blangs pa bsod nams kyi tshogs zhar la bskyed par 'dod pa rnams kyis kyang 'di lta bu yid la byed pa dang /bcom ldan 'das 'jam dpal ye shes sems dpa'i don dam pa'i mtshan yang dag par brjod pa brjod cing yid la bya'o//'di nyid las skabs dang po nyid du/ gsang sngags rgyal po drug ldan zhing / /gnyis su med par 'byung ba dang / /mi skye chos can 'di gsungs pa/ /zhes dam bca' mdzad nas/ 'di ltar sangs rgyas bcom ldan 'das/ / rdzogs pa'i sangs rgyas a las byung / /a ni yig 'bru kun gyi mchog /don chen yi ge dam pa ste/ /khong nas 'byung ba skye ba med/ /tshig tu brjod pa spangs pa ste/ /brjod pa kun gyi rgyu yi mchog /ces chos gnyis su med pa'i don 'jam dpal ye shes sems dpa' yin par bstan pa'i sgo nas mtshan brjod pas zhal gyis bzhes gsungs kyi/don gzhan skabs phye ste ma gsungs so/ /mjug tu yang rtsa ba'i sngags dang gzung bar dam bca' ba dang / phreng sngags kyi skabs su yang chos thams cad ngo bo nyid kyis rnam par dag pa mthong bar bya ba la a bzhis byin gyis brlabs pa rtsa ba'i sngags so//chos thams cad rang bzhin gyis rnam par dag par gzung bar bya ba la/ de bzhin gshegs pa thams cad kyi sku 'jam dpal yongs su dag par brjod pa khas len pa ni gzung bar dam bcas pa'o//bcom ldan 'das 'jam dpal ye shes sems dpa'i sku/ chos thams cad nam mkha' dang 'dra ba shin tu yongs su dag pa/ chos kyi dbyings kyi ye shes kyi snying po/ /a gnyis kyis byin gyis brlabs pa/ sangs rgyas thams cad kyi thugs 'phrog pa/sgrib pa thams cad bsreg pa ni phreng ba'i sngags yin te/ de bas na 'dir bcom ldan 'das kyis chos gnyis su med pa'i mtshan brjod pa tsam ma gtogs pa gzhan mi gsung ngo / /de la shes rab chen po dang thabs la mkhas pa dang ldan pa chos gnyis su med pa mngon du bya ba'i phyir/zhu ba zag pa med pa bzlog pas nyon mongs pa'i zag pa yang zad par 'gyur zhing gnyis su med pa'i ye shes rgyud la bskyed par bya ba'i thabs gsungs pa/ bcom ldan 'das kyis mtshan brjod pa gsungs te/ 'di ltar 'di dbu zhabs su ni ye shes drug gi mtshan brjod pa yin la/ ye shes drug gnyis su med pa'i ye shes kyi mtshan nyid yin la/ 'di ltar gnyis su med pa'i ye shes ni me long lta bu'i mtshan nyid yin te/ 'di ltar dri ma thams cad yongs su dag pas/ sangs rgyas thams cad kyi gzugs brnyan snang bar 'gyur ro/ /de ni mnyam pa nyid kyi mtshan nyid yin te/ bdag tu lta ba'i gnas med de/ stobs dang ma 'dres pa la sogs pa'i yon tan rin po che'i 'byung gnas su gyur pa'o/ /de ni so sor rtogs pa'i mtshan nyid yin te/mtshan mar 'dzin pa thams cad dang bral bas chos thams cad ji lta ba dang / ji snyed pa mkhyen pa dang ston pa'i gnas su gyur pa'o/ /de ni bya ba grub pa'i mtshan nyid yin te/ sems can ma gzigs pas thugs rje dang mdzad pa lhun gyis grub pa'i gnas su gyur pa'o//de ni chos kyi dbyings rnam par dag pa'i mtshan nyid de/ thams cad kyi gzhir gyur pa'i phyir ro/ /ye shes lngar phye ba ni gnyis su med pa'i ye shes te/ de ni 'jam dpal ye shes sems dpa'o/ /de ni don dam pa'i yi ge a'o/ / byang chub kyi sems so/ /de bzhin du rdo rje sems dpa' dang / kun du bzang po dang / bde ba chen po la sogs pa'i brjod pa yang de yin te de bzhin du mtshan nyid ji snyed par brjod pa yang tshig gi don de nyid yin no/ /de dag nye bar ston pa 'di nyid las/ don chen yi ge dam pa ste//zhes gsungs so/ /de 'dir dam pa'i yi ge'i sgra ni zag pa med pa'i ye shes la bya ste/ zag pa de yang 'dir khams bcu'i bdag nyid can gzugs kyi phung po'i dbang dang bcas pa'i de'i bdag nyid kyi sa bon zhes bshad do/ /de yang 'dod pa'i srid pa dang / gzugs kyi srid pa dang / gzugs med pa'i srid pa dag la go rims kyis gnas so zhes 'dod do/ /'dir rgal ba gzugs dbang po dang bcas pa'i zag pa bzlog pas/ sems dang sems las byung ba'i zag pa ji ltar ldog ce na/ de ni 'di ltar sems dang sems las byung ba'i gang zag la gzugs kyi dri ma ni yongs su dag la/ming gzhi'i dri ma ni yongs su ma dag go zhes bya ba ni mi srid na/ de bzhin du ming gzhi'i dri ma dag na/ gzugs kyi dri ma yang dag pa yang mi srid de/ 'on kyang gzugs ni cher rags shing gnas pa dang /dmigs par gyur pas de nyid dri ma sngon la gzhom par bya ba yin no/ /de nyid bcom pas thams cad kyang dag par 'gyur ba yin no/ /dper na ljon shing gi rtse mo bcad gshags te/ mngon par skye ba'i gnas med par byas nas rtsa ba yang myur du med par 'gyur la/phra mos kyang phan gnod byed par yang mi 'gyur ro/ /de bzhin du zag pa 'bras bu nas bzlog na/ rgyu yang myur du zad par 'gyur la/ phra mos kyang gnod par byed par mi 'gyur ro/ /de bas na thabs mkhas pa rnams kyis yul du ni 'bras bu nas bzlog pa 'di shes par bya'o//thabs dang shes rab zab mo'i tshul 'di thun mong du ma bstan pa'i dgongs pa ni/ thabs dang shes rab zhan pa rnams la nyes pa rgyu'i dus nas ma bzlog na/ 'bras bu mngon du smin pa'i dus na bzlog pa'i thabs med pa'i dbang du gsungs pa yin no//de bas na 'dir 'phags pa 'jam dpal ni ye shes drug gi bdag nyid dam pa'i yi ge zhes bya ba'i sgras bstan pa/ zag pa lnga yongs su zad pa'i ye shes bde ba chen po'i sku bde ba ye shes skad cig ma bcu drug gi rang bzhin skye ba'i skad cig ma bzhi/ye shes kyi mtha' can mi gnas pa'i mya ngan las 'das pa'i mtshan nyid gnyis dang bdag nyid tha dad pa med do/ /de bas na 'jig rten dang 'jig rten las 'das pa'i dang dbang gis phan pa ji snyed pa dang bde ba ji snyed pa thams cad kyi gzhir gyur pa/rtsa bar gyur pa/ snying por gyur pa ni chos gnyis su med pa yin te/ de ltar yang gzhan las gsungs pa chos nyid kyi rgyu mthun pa gsung rab yan lag bcu gnyis so zhes gsungs so/ /'di nyid las yon tan gyi skabs las kyang mtshan gzung ba chos gnyis su med pa 'dzin pa yin par gsungs te/de bas na de ltar shes par bya'o/ /'dir rgal ba/ zhen pa'am bsgrub pa'i rtsol ba yang mi bskyed de/ bdud kyi las su gyur pa rnams kyang spang bar bya bar mi blta/ yongs su 'dzin pas de dag gos par yang mi 'gyur te/'di lta bu la gnas par 'dod pa'i rnal 'byor pas 'di ltar snang ba thams cad ye shes rgyun gyi rol ba las sgo gsum gyi spyod pa ci yang ma bkag pa'i bsam pas mtshan brjod par bya'o/ /de la dang por/ a A/ i I/ u U/ e ai/ o au/ aM aHzhes brjod pas na/ don 'di shes par bya ste/ yi ge sgyu 'phrul 'di ni/ sgyu 'phrul dra bas mngon par rdzogs par byang chub sems dpa'i tshul yin par shes par bya'o/ /de la ji ltar zhe na/ 'dir rdo rje 'dzin pas zhus pa/ khyab bdag bdag la sman pa dang //bdag don bdag la thugs brtse'i phyir/ /sgyu 'phrul dra bas mngon rdzogs pa'i/ /byang chub ci nas bdag thob mdzod/ /ces zhus pa las/ lan du sgyu 'phrul dra ba mngon par sangs rgyas pa'i tshul ni a bcu gnyis tsam gsungs so/ /sgyu 'phrul dra ba'i rgyud phyi ma las gsungs pa/'jam dpal 'di ni dpal 'gyur rdzogs pa'i sku/ /thun mong ma yin gnyis med khyab pa'i chos/ /rgyu nyid dus gsum mnyam snyoms rgyal kun yab/ /chos dbyings yum nyid sems dpa' sras mchog ston/ /blo dang ldan pas gang zhig mdo 'di dag /mngon sum tshad mas gzhal nas mthong 'dod pas/ /sgyu 'phrul dra ba 'khor lo'i don bzhin du/ /yi ge 'khor lo'i tshul gyis 'jam dpal lo/ /gdod nas dag cing skye ba med pa'i ngang / /a A zhes pas 'dus ma byas pa'i chos/ /rgyu nyid med pas 'bras bu tshol med phyir//a ltar mnyam gzhag chos kyi sku nyid bde/ /don dam dbyings nyid mkha' ltar dmigs med khyab/ /thub pa rang bzhin med pas gnas pa la/ /'jam dpal ral gri btab pas gcod pa ltar/ /a yi gu gu thugs rje'i dang nyid 'phro//i I zhes byas dus kyi yul nyid lam/ /shes rab pha rol phyin pa 'jam pa'i dbyangs/ /ldang dang mi ldang blang dor med tshul gyis/ /thun mong ma yin bsti gnas kun du bzang / /med pa'i ngang nyid med pa las byung ba/ /u U zhes pas med pa'i snying po 'byung //u zhes chen po yod med mtha' las 'das/ /che ba'i ngang 'gro kun du dga' la sbyor/ /nyid dang gnyis med bsam 'das brjod dang bral/ /gru gsum e yi rang bzhin nyid mi g.yo/ /ai zhes tha snyad btags shing brjod dang bral/ /sems dang sems ni 'jam dpal ting 'dzin no//thabs dang shes rab sgyu 'phrul dra ba'i tshogs/ /o au zhes pas 'du 'phro 'od zer 'khrug /'ja' tshon rnam pa so so'i yid bzhin sbyor/ /'jam dpal rnam par rol pas bde ba che/ /rnal 'byor chen po ye shes 'byor pa'i dpal//nam mkha' mi dmigs aM zhes ye shes brjod/ /shes rab ye shes ma 'dres aHlas 'das/ /stong nyid ci la'ang ma rag lhun gyis grub/ /don kun 'byor pas blang dor med pa yi/ /bdag nyid rang bzhin bzhugs dang 'jam dpal nyid/ /bsam gyis mi khyab mi gnas mi sems na//'jam dpal nyid dang yon tan brjod par gsungs te/ yi ge sgyu 'phrul dra ba 'di'i sgo nas mngon par rdzogs par byang chub pa'i tshig ni/ /a gdong nas skye ba med cing 'dus ma byas pas rgyu ma grub pa'i phyir/ 'bras bu btsal du med pas gdod ma nas chos kyi sku bde ba chen po'o//i ni de nyid nam mkha' ltar mi dmigs pa'i phyir/ shes rab chen pos de ltar mchod cing mi dmigs pa'i thugs rje 'phro ba dang / shes rab kyi pha rol tu phyin pa'i bdag nyid gdod ma nas yin pa'i rang bzhin no/ /u ni de pas na kun du bzang po'i byang chub sems kyi rang bzhin to/'di ltar mtshan ma dang rtog pa ldang ba la ni dman par mi 'dor mi ldang ba la dang du mi len te/ byang chub kyi sems kun du bzang po mtha' las 'das pa che ba'i ngang gis 'gro ba kun kyang bde ba chen po la rang bzhin gyis sbyor ba'o/ / e ni de ltar na chos thams cad bsam brjod dang bral zhing g.yo ba med pa la tha snyad med par 'grub pas sems dang sems kyi rang bzhin no/ /rnam par rtog pa yang 'phags pa 'jam dpal gyi ting nge 'dzin du gnas pa'o/ /o ni de lta bu'i rang bzhin yin pa'i phyir na/ sems kyi cho 'phrul sna tshogs su snang ba thams cad kyang thabs dang shes rab sgyu 'phrul dra ba'i tshogs yin te/ nam mkha'i 'ja' tshon bzhin du 'gro ba so so'i yid dang mthun pa 'jam dpal rnam par rol pa'i cho 'phrul bde ba chen po las ma nyams pa'o/ /aM ni de ltar rnal 'byor ba'i rnal 'byor chen po ye shes dpal thams cad kyi 'byung gnas nam mkha' mdzod kyi ting nge 'dzin no//aHzhes bya ba ni shes rab dang ye shes chos thams cad la rig cing kun las 'das pa ste/ de ltar na yi ge bcu gnyis kyi sgo nas 'bags pa 'jam dpal ni chos thams cad gdod ma nas blang dor med par rang bzhin gyis sangs rgyas pa ste/de ltar don thams cad rdzogs pa'i bdag nyid du ye nas gnas bas rnal 'byor ba gang gis chos thams cad de ltar rtogs te/ chos 'ga' yang mi gnas mi sems mi len mi 'dor na/ 'jam dpal nyid dang yon tan brjod pas mnyam pa yin no zhes bshad do/ /yang 'di nyid las gsungs pa/ ji ltar sgyu 'phrul dra ba yi/ /'jam dpal chos kyi snying po 'di/ /rgyal ba rnams kyi yab dang yum/ /don gyi mtha' ste shes rab dbyings/ /gang phyir thabs kyi kun 'byung ba//yi ge 'khor lo rnams kyi sgra/ /sgyu 'phrul dra ba nyid kyi tshul/ /grag ma thag tu don reg pa/ /a A zhes pa 'jam dpal nyid/ /rang bzhin chos kyi sku yi dbyings/ /i I zhes bya g.yo ba med/ /mi bskyod pa la yum du gsal/ /u U zhes pas skye ba med/ /dag pa'i ngang nyid kun du gsal//rgyud las rgyal ba sems dpa' ste/ /ye shes ngang nyid gcod pa'o/ /e ai zhes pa nam mkha' sbyor/ /'bras bu med pas rgyu la gnas/ /de ma thag par gsal ba yi/ /'jam dbyangs phra ba'i lam 'gyur la/ /o au zhes pa e las 'das/ /e zhes gsang sngags thabs chen bstan//e dang o yi rang bzhin dbyings/ /mu ni ngo bo nyid kyi dbyings/ /a las rnam par rol pa bston/ /oM gyis gnyis med 'byor pa yis/ /zab mo rdo rje ting 'dzin mtha'/ /ma zhes mnyam dang mi mnyam med/ /'jam dpal ye shes rdo rje rdzogs/ /sgyu 'phrul dra ba'i 'khor lo 'di//mya ngan 'das dang 'khor ba las/ /mi gnas rdo rje rtse mo ste/ /bsam rtsol sgrub pa med pa yi/ /dbyings nyid gzhag na yongs su rdzogs/ /zhes gsungs te/ tshul 'di yang snga ma bzhin du yi ge bcu gnyis kyi sgo nas thabs dang shes rab gnyis su med pa'i rang bzhin du mngon par byang chub pa'i rang bzhin ye nas rtsol sgrub las 'das par sangs rgyas pa'i rang bzhin 'phags pa 'jam dpal yin te/chos thams cad kyi rang bzhin de lta bu yin pas rnal 'byor can gyis kyang de lta bu'i ngang du blo bzhag na/ 'jam dpal gyi yon tan rdzogs zhes bshad do//de yang re zhig yi ge a A ni 'jam dpal chos kyi sku'o/ /i I ni yum shes rab kyi pha rol tu phyin ma'o/ /u U ni byang chub kyi sems kun du bzang mo ste/ sems nyid sems dpa' chen po'i rang bzhin no/ /e ai ni 'du 'bral med pa'i mkha' la sbyor ba'o/ /o au ni de las 'das te yi ge 'khor lo tshogs chen gyi thabs la mkhas pa'i cho 'phrul rang bzhin gyis 'phro ba'o//aM la aM sbyar na oM du 'gyur te/ de ni gsang sngags kyi sku'o/ /oM gyi klad khor ni muM ste/ chos thams cad kyi ngo bo nyid kyis grol ba'o/ /oM ni yon tan thams cad 'byor pa'i gnyis su med pa'i ting nge 'dzin no//glang kor gyi ma ni chos mnyam pa nyid dang mi mnyam par dbyer med pa ste/ 'di lta bu'i don gyi 'jam dpal ye shes rdo rje ni 'khor ba dang mya ngan las 'das pa'i mtha' la mi gnas pa'i ye shes rdo rje rtse mo ste/ chos thams cad kyi rang bzhin de lta bu yin pas/rnal 'byor can gang gis de ltar khong du chud par bya ste/ chos thams cad ni bsam par bya ba dang / brtsal bar bya ba dang / bsgrub par bya ba thams cad las 'das pa ste/ gdod ma nas rnam par dag pa/ rang bzhin gyis 'od gsal ba/ ye nas mngon par rdzogs par sangs rgyas pa btsal du med par lhun gyis grub pa 'di lta bu'i rang bzhin du mngon par rdzogs par byang chub pa yin pas/'di lta bu'i ngang la blo bzhag ste/ mtshan brjod ji snyed pa yang 'di lta bu'i rang bzhin ston pa sha stag ste/ thabs dang shes rab sgyu 'phrul dra ba'i tshogs su gyur pa/chos nyid kyi rgyan ye shes kyi rol pa/ 'gag pa med pa'i cho 'phrul du rtogs pa/ blang dor dang rtsol sgrub kyi rtogs pa sa mi g.yo bar brjod par bya'o/ /brjod pas rdzogs nas kyang dus gsum mnyam pa nyid kyi rang bzhin du rtogs pa/ las kyi mtha' yongs su mthong ba'i bsam pas gnas par bya'o//mtshan gnyis su med par brjod pa zhes bya ba'i rnam pa gsum gyi mtshan nyid can bstan pa yin no/ /mtshan tsam rnam par bshad byas pas/ /gzhung gi spyi bshad rnam par bkod/ /sems can mos pa sna tshogs pa'i//'jug sgo tshul tsam shes bya'i phyir/ /'jam dpal mtshan bcas brjod tshul bcas/ /rnam gsum bshad pa tsam byas pa'o/ /tshul gsum gsal bar byed pa'i sgron ma zhes bya ba rdzogs so// //