CLOSE WINDOW

D2090
བོད་ཡིག

@##/ /rgya gar skad du/ Ar+ya many+dzu shrI na ma sang+gI ti nA ma ma hA TI kA /bod skad du/ 'phags pa 'jam dpal gyi mtshan yang dag par brjod pa'i rgya cher 'grel pa/ bcom ldan 'das 'jam dpal ye shes sems dpa' la phyag 'tshal lo/ /sgro dang skur pas stong pa yi//ngo bo nyid kyis bde ba che/ /ut+pal dang ni ral gri 'dzin/ /gzhon nur gyur la phyag 'tshal nas/ /tshig rgyas pa yi rgyud dag las/ /zab mo glu yi le'u dag /'dir ni bdag gis dbye bar bya/ /de la 'dir bdag gis mgon po 'jig rten dbang phyug las ji ltar thos pa bzhin bri bar bya'o//de la rtogs pa dang ldan pa'i gang zag dag ni/ dgos pa dag med na 'jug par mi 'gyur bas na/ de'i phyir rgyud 'di brjod par bya ba ni gang / dgos pa ni gang / dgos pa'i dgos pa ni gang /'brel pa ni gang zhe na/ brjod par bya ba ni 'jam dpal ye shes sems dpa' kho na yin la/ dgos pa ni theg pa sna tshogs kyi don rtogs pa'o/ /dgos pa'i dgos pa ni sku gsum dang ye shes lnga thob par byed pa'o/ /'brel pa ni thabs dang thabs las byung ba'i mtshan nyid kyis 'brel par gnas so//de la rgyud 'di ni nam mkha' dang mnyam pa'i rgyud yin te/ bya ba dang / spyod pa dang / gnyi ga dang / rnal 'byor dang / rnal 'byor bla na med pa'i rgyud dang / rgyud thams cad kyi bshad rgyud yin te/rgyud kun gyi ni bdag po mchog /ces pas gsal lo/ /theg pa thams cad kyi gal 'gegs yin te/ theg pa sna tshogs thabs tshul gyis/ /zhes pas gsal lo/ /gzhung mi mthun pa mang po dag rang gi 'dod pa'i ngos nas smra ste de dag gis ni rgyud 'di'i cha shas tsam las ma rtogs te/rang rang gi rtog pa la bden par 'dzin pa'i phyir ro/ /de la re zhig bsdus pa'i don bshad par bya ste/ gleng gzhi phun sum tshogs pa dang / rgyud dngos dang / rjes su yi rang ba'o/ /gleng gzhi la gsum ste/ 'khor dang ston pa dang bstan pa lan sum tshogs pa'o//rgyud dngos ni/ yi ge gcig pa'i rgyud de a yig gtso bor gyur pa'i phyir ro/ /mu stegs ri dwags zhes pa dang / /kun don yon tan gsum gyi bdag /ces pas mu stegs kyi lta ba bstan te/ bden pa gnyis ni rtogs pa po//phyir mi ldog pa phyir mi 'ong / /zhes pas nyan thos kyi lta ba bstan to/ /'dren pa rang rgyal bse ru'i tshul/ /nges 'byung sna tshogs las byung ba/ /zhes pas rang rgyal ba'i lam 'bras bu dang bcas pa bstan to/ /rnam rig sna tshogs gzugs don can/ /rnam shes sna tshogs rgyud dang ldan//sna tshogs gzugs can yid las skyes/ /zhes pas rnal 'byor spyod pa'i lta ba bstan to/ /gnyis med gnyis su med par ston/ /zhes pas zung 'jug gi ngo bo ste sgyu ma lta bu bstan to/ /bden pa gnyis kyi tshul la gnas/ /yang dag mtha' la rnam par gnas//zhes pas rab tu gnas pa'i don bstan to/ /yang dag mtha' ste yi ge med/ /ces pas gsang sngags bla na med pa'i mthar thug pa'i don bstan to/ /tshogs gnyis tshogs ni bsags pa po/ /zhes pas bsod nams dang ye shes kyi tshogs bsags pa bstan to/ / skad cig gcig gis rdzogs sangs rgyas/ /zhes pas lha skad cig dran rdzogs kyis bskyed par bstan to/ /rdo rje hUM ste hUM zhes sgrogs/ /mtshon du rdo rje'i mda' thogs pa/ /rdo rje ral gris ma lus gcod/ /rdo rje sku 'chang rdo rje can/ /zhes pas cho ga gsum gyis bskyed pa bstan te/ rdo rje gdan ni ma lus ldan//zhes pas gdan skyed pa bstan to/ /ye shes dbang bskur cod pan can/ /zhes pas dbang bskur ba'i cho ga yan lag dang bcas pa bstan to/ /ngan song thams cad rnam sbyong ba/ /zhes pas ro sreg pa'i cho ga bstan to/ /ye shes me lce 'od 'bar gsal/ / zhes pas sbyin sreg gi cho ga bstan to/ /bsam gtan yan lag kun shes shing / /zhes pas grub mtha' de dag so so'i sgom pa bstan to/ /yan lag med pa'i rtsis las 'das/ /zhes pa dang / bsam gtan bzhi po'i rtse mo can/ /zhes pas mtshan ma med pa'i rdzogs pa'i rim pa bstan to//bcu drug phyed phyed thig le can/ /rnam pa kun ldan rnam pa med/ /ces pas mtshan bcas kyi rdzogs rim bstan to/ /da ni dkyil 'khor bstan par bya ste/ de la/ dkyil 'khor chen po yangs pa yin/ /zhes pas dkyil 'khor thams cad kyi don 'dir rtogs par bya'o//khyad par gyi dkyil 'khor bstan pa ni/ sangs rgyas rnam par snang mdzad che/ /zhes pas rigs kyi gtso bo yin pas rigs lnga'i dkyil 'khor bstan to/ /gtsang gnas dam pa gau ta ma/ /zhes pas shAkya thub pa'i dkyil 'khor bstan to/ /rdo rje 'jigs byed 'jigs par byed//ces pas rdo rje 'jigs byed kyi dkyil 'khor bstan to/ /khro bo'i rgyal po gdong drug 'jigs/ /zhes pas gzhon nu gdong drug gi dkyil 'khor bstan to/ /ha la ha la gdong brgya pa/ /zhes pas 'jam dpal gdong brgya pa'i dkyil 'khor bstan to/ / gshin rje gshed po bgegs kyi rgyal/ /zhes pas gshin rje gshed kyi dkyil 'khor bstan to/ /gdong lnga gtsug phud lnga dang ldan/ /zhes pas 'jam dpal kun du zhal gyi dkyil 'khor bstan to/ /dpal ldan rgyu skar dkyil 'khor can/ /zhes pas dpal ldan rgyu skar gyi dkyil 'khor bstan to//lha'i dbang po zhes pas khyab 'jug gi dkyil 'khor bstan to/ /lha yi bla zhes pas tshangs pa'i dkyil 'khor bstan to/ /lha yi bdag po zhes pas brgya byin gyi dkyil 'khor bstan to/ /lha min bdag ces pas rA hU la'i dkyil 'khor bstan to/ /lha yi bla zhes pas gza' phur bu'i dkyil 'khor bstan to//'joms byed ces pas gza' thags zangs ris kyi dkyil 'khor bstan to/ /'joms byed phyi mas ni srin po'i rgyal po lang ka mgrin bcu'i dkyil 'khor bstan to/ /dbang phyug po zhes pas ma hA de ba'i dkyil 'khor bstan to/ / shes rab ral gri mda' gzhu thogs/ /zhes pas 'jam dpal ye shes sems dpa' nyid kyi dkyil 'khor bstan to/ /de las tshogs bsags pa dag gis ni sa dang / lam dang / rnam par thar pa'i sgo nas 'jam dpal ye shes sems dpa' la bstod pa bstan to/ / ting 'dzin lus can lus kyi mchog /longs spyod rdzogs sku kun gyi rgyal/ /sprul pa'i sku ste sku yi mchog /ces pas 'bras bu bstan to/ /de dag dang ye shes rnam pa lnga dang / 'dis bsdus rgyas kyi bstod pa shes par bya'o/ /de ltar bsdus pa'i don rab tu rtogs nas/ tshig gi don bde blag tu rtogs par bya ba'i phyir/de nas zhes bya ba la sogs pa la/ de nas zhes bya ba ni sgyu 'phrul dra ba'i le'u khri drug stong yod pa las/ le'u khri lnga stong dgu brgya dgu bcu go dgu bshad pa de nas so/ /dpal ldan rdo rje 'chang zhes pa la/ 'khor phun sum tshogs pa phyag na rdo rje'i bshad pa ste/dpal ldan ni gzugs sku gnyis so/ /rdo rje ni stong pa nyid de chos sku'o/ /'chang zhes pa ni sku gsum dbyer mi phyed pa ste ngo bo nyid kyi sku'o/ /gdul dka' zhes pa ni gdul bya ste dug gsum mo/ /'dul ba rnams zhes pa 'dul byed de sku rnam pa gsum mo//mchog ces pa ni phyag na rdo rje'o/ /dpa' bo 'jig rten gsum las rgyal/ /zhes pa ni gdug pa can thams cad tshar gcod pa la ni dpa' bo zhes bya'o/ /'jig rten gsum las rgyal ni sa 'og sa steng sa bla gsum las rgyal ba'o/ /rdo rje dbang phyug gsang ba'i rgyal//zhes pa ni rdo rje ni stong pa nyid do/ /stong pa nyid de'i don thugs su chud pa la ni dbang phyug ces bya'o/ /don de nyan thos dang rang sangs rgyas dang thun mong ma yin pas na gsang ba'i rgyal lo/ /yang na gsang ba ni gsang sngags kyi theg pa'o/ /de'i rgyal po ni phyag na rdo rje'o//'o na phyag na rdo rje de'i cha lugs ci 'dra zhe na/ pad+ma dkar po'i rgyas 'dra'i spyan/ /zhes bya ba smos te/ pad+ma dkar po ni mdog dkar ba/ rtsa ba bzang ba/ dri zhim pa/ rtsi yod pa/ 'dab ma lnga dang ldan pa'o/ /de bzhin du phyag na rdo rje de yang nyon mongs pas ma gos pa dang /tshogs gnyis las grub pa dang / gzhan 'dul ba dang / snying rje dang ldan pa dang / rigs lngas 'gro ba'i don byed pa'o/ /yang na/ pad+ma dkar po'i rgyas 'dra'i spyan/ /zhes bya ba ni pad+ma la 'dam gyi skyon gyis ma gos pa bzhin skyon med pa'i spyan lnga dang ldan zhes bya ba'i tshig go//pad+ma rgyas pa'i gdan la bzhugs/ /zhes pa ni/ pad+ma rgyas pa'i gdan la bzhugs pa yin la 'khor ba la gnas kyang nyes pas ma gos zhes pa'i don to/ /rang gi lag gis rdo rje mchog /ces pa ni gnyis su med pa'i ye shes thugs su chud pa'i rtags su rdo rje thugs kar 'dzin pa'o//gzhan don mdzad pa'i rtags su yang dang yang du gsor bar byed pa'o/ /des ni thun mong ma yin pa'i 'khor bstan to/ /da ni thun mong gi 'khor khro bo stong lnga brgya bshad par bya ste/ khro bo de dag gi cha lugs bstan pa ni/ khro gnyer rim par ldan la sogs//zhes bya ba smos te/ khro gnyer ni khro gnyer ro/ /rim par ldan la sogs zhes pa ni skra dang ag tshom ser la brdzes pa dang / mig dmar ba dang / lce 'dril zhing ya sos ma mchu mnan pa dang / thung zhing gel ba dang / gsus pa che ba dang / yan lag rab tu bgrad pa dang /nying lag rdo rje'i rtse mo lta bu dang / dur khrod dang gdug pa'i rgyan gyis brgyan pa dang / mtshon cha 'bar zhing 'phro ba dang / mgo'i do shal dang / me 'bar ba'i gnas ni rim par ldan pa ste sogs zhes bya'o/ /de lta bu su la ldan zhe na/ lag na rdo rje mtha' yas pa la'o//gdul dka' 'dul bas na dpa' bo'o/ /khro bo'i cha lugs dang ldan pas na 'jigs su rung ba'o/ /stag gi sham bu dang ldan pas na dpa' byad can no/ /ba spu'i bu ga nas rdo rje'i rtse mo rab tu 'phro ba ni gzhan don no/ /rang gi lag gis gsor bar byed pas na rang don no//snying rje chen po'i sgo nas gzhan don byed pa dang / shes rab chen po'i sgo nas rang gi don thugs su chud pas na/ thabs kyis 'gro don byed pa'i mchog /'khor de dag thams cad kyang 'jam dpal ye shes sems dpa'i don la dga' ba dang / mgu ba dang / rangs pa'i bsam pa can no//khro bo'i lus kyi gzugs ldan pa ni bshad zinato/ /sangs ba ni spangs pa phun sum tshogs pa/ rgyas pa ni ye shes phun sum tshogs pa'o/ /phrin las ni zhi ba dang rgyas pa dang dbang dang drag po'o/ /byed pa'i mgon zhes pa ni phrin las bzhis 'gro ba'i mgon byed pa'i tha tshig go//lus btud rnams dang lhan cig ces bya ba ni phyag na rdo rje dang lhan cig tu gnas pa'o/ /gnas nas kyang / de bzhin gshegs pa bcom ldan 'das/ /rdzogs sangs rgyas la zhes bya ba ni ston pa phun sum tshogs pa ste shAkya thub pa'o/ /gnyis su med pa'i de bzhin nyid thugs su chud nas 'gro ba'i don la gshegs pas na de bzhin gshegs pa'o//bcom pa ni bdud bzhi'o/ /ldan pa ni ye shes lnga dang ldan pa'o/ /'das pa ni rtag chad gnyis las 'das pa'o/ /rdzogs pa ni stobs dang mi 'jigs pa la sogs pa'i che ba'i yon tan bsam gyis mi khyab pa'o//sangs rgyas ni sku gsum mo/ /phyag 'tshal nas zhes bya ba la sogs pa lus gus pa dang / ngag dang ba dang / yid mos pa dang bcas nas so/ /thal mo sbyar ba ni lus kyi bya ba'o/ /spyan sngar 'dug ste zhes bya ba ni ston pa phun sum tshogs pa ste shAkya thub pa'i spyan sngar 'dug pa'o//'di skad gsol zhes pa ni mtshams sbyor gyi tshig ste ngag tu'o/ /khyab bdag ces bya ba ni thugs rje chen pos 'gro ba la khyab pas na khyab bdag go/ /bdag la sman pa dang zhes pa ni phyag na rdo rje la'o/ /bdag don bdag la thugs brtse'i phyir//zhes pa ni gnyis su med pa'i ye shes thob pa'i phyir ro/ /thabs khyad par can sgyu 'phrul dra ba'i sgo nas mngon par rdzogs pa'i byang chub ci nas bdag gis thob par bya ba'i phyir rgyud 'di bshad du gsol zhes pa'o/ /rang gi don du zhus pa bstan pa'o/ / da ni gzhan gyi don du zhus pa bstan pa ni/ nyon mongs pa ni dug lnga'am gsum mo/ /sems dkrugs zhes pa ni/ nyon mongs pa de dag gis rab tu sdug bsngal bar byas pa'o/ /ma rig pa ni ma rig pa'o/ /'dam du bying ba ni 'khor ba'i 'dam du bying ba'o/ / sems can kun zhes pa 'gro ba rigs drug go/ /sman pa dang zhes pa ni mya ngan las 'das pa'i bde ba thob pa'i phyir ro/ /bla med 'bras bu thob bya'i phyir/ /zhes pa ni chos kyi sku ste de thob pa'i phyir bshad du gsol ba'o/ /yul gang la gsol ba gdab snyam pa la/ rdzogs pa'i sangs rgyas bcom ldan 'das la'o//'gro ba ni rigs drug go/ /bla ni sangs rgyas kyi dgongs pa'o/ /ma ni de ston pa'am 'byin pa'am skyed par byed pa'o/ /ston pa po zhes pa ni ma rtogs pa dang / log par rtogs pa dang / the tshom za ba las bzlog pa'o/ / dam tshig chen po ni de las mi 'da' ba'o/ /de nyid mkhyen zhes bya ba ni/ ji lta ba mkhyen pa'i ye shes te/ de kho na nyid thugs su chud pa'o/ /dbang po bsam pa mkhyen mchog gis/ /zhes pa ni ji snyed pa mkhyen pa'i ye shes te/ gdul bya'i dbang po dang bsam pa thams cad mkhyen pa'i ye shes zhes bya ba'i tha tshig go//de lta bu'i ston pa khyed ni gsol ba gdab pa'i gnas so/ /bcom ldan 'das kyi ye shes sku/ /zhes pa ni 'jam dpal ye shes sems dpa' ste chos sku ste thugs so/ /gtsug tor chen po tshig gi bdag /ces pa ni sku'i rang bzhin te/byang chub sems dpa' man chad gyis bltar mi mngon pa ste 'dra ba med cing zil gyis mi non pa'i rtags so/ /tshig gi bdag ces pa ni gsung phun sum tshogs pa ste/ mi zad pa'i gsung de lta bu su la mnga' ba la bdag ces bya'o/ /de lta bu de yang rgyu rkyen gyis ma bskyed pas na/ye shes sku ste rang 'byung ba/ /zhes bya'o/ /sku de lta bu dang ldan pa'i 'jam dpal ye shes sems dpa'i ming ni yang dag brjod pa'i mchog /de'i don bshad du gsol zhes pa'i tshig go/ /'jam pa ni tha dad kyi rtog pa'i zug rngus ma gos pa ste chos sku'o//dpal ni 'gro ba'i dpal du gyur pa ste gzugs sku'o/ /ye shes ye gnas pa'i don shes pas na ye shes so/ /sems dpa' ni 'gro ba'i don la sems dpa' ba'o/ /ming ni zhes pas ni mtshan no/ /yang dag par brjod pa ni ma nor ba'o/ /mchog ces pa ni 'gran zla med pa'o//don zab ces pa ni/ blo'i yul ma yin pa ste lta ba'o/ /de lta bu'i don des ma khyab pa med pas na don rgya che ba zhes bya'o/ /don chen mtshungs med ces bya ba ni de lta bu'i don de goms pa las/ rang gi don dang gzhan gyi don phun sum tshogs pa 'byung bas na don chen po zhes bya'o//mtshungs med ces bya ba ni/ nyan thos dang rang rgyal ba'i 'bras bu dang 'dra ba ma yin pa'o/ /rab zhi ba zhes bya ba ni/ sgrib pa gnyis dang bral ba'i sku'o/ /thog ma bar dang mthar dge ba/ /zhes bya ba ni rgyud kyi rgyal po 'di 'das pa'i sangs rgyas rnams kyis gsungs pas thog mar dge ba zhes bya'o//da ltar gyi sangs rgyas rnams kyis gsungs pas bar du dge ba zhes bya'o/ /ma 'ongs pa'i sangs rgyas rnams kyang gsung bar 'gyur bas na tha mar dge ba zhes bya'o/ /yang na thog mar dge ba ni lta ba'o/ /bar du dge ba ni sgom pa'o/ /tha mar dge ba ni 'bras bu'o/ /yang dang yang du gsungs pa gang //zhes pa ni nan tan du gsungs pa'o/ /rgyud chen zhes pa ni rgyud sde bzhi las khyad par 'phags pa'o/ /sgyu 'phrul dra ba ni rgyud kyi ming ngo / /las zhes pa ni le'u khri drug stong yod pa las/ da res klu'i le'u bshad du gsol zhes pa'o/ /rdo rje ni stong pa nyid do//'chang ba ni de'i don thugs su chud pa'o/ /chen po ni 'gran zla med pa ste longs sku'o/ /gsang sngags 'chang zhes pa ni zung 'jug gi ngo bo thugs su chud pa ste chos sku'o/ /dpag med rnams zhes pa ni sprul pa'i sku grangs med pa'o/ /dga' bzhin du zhes pa ni sangs rgyas de dag dgyes bzhin du 'jam dpal ye shes sems dpa'i don glur blangs pa gang lags pa bshad du gsol zhes pa'o//'gro ba'i mgon byed pas na/ mgon po rdzogs sangs rgyas kun gyis/ /zhes pa ni sku gsum mo/ /gsang 'dzin ni sku gsum dbyer mi phyed pa'o//ci nas bdag 'gyur phyir zhes pa ni dbyer mi phyed pa'i don te/ bdag gis thob par mdzad du gsol zhes pa'i don to/ /nges par 'byung gi bar du 'di/ /zhes pa mi gnas pa'i mya ngan las 'das pa ma thob kyi bar du/ bdag gi bsam pa brtan pos bzung //zhes pa'i don to/ /gzhan don du zhus pa bstan pa ni/ nyon mongs ma lus bsal ba dang / /zhes pa ni nyon mongs pa'i sgrib pa'o/ /bsal ba dang zhes pa ni/ nyon mongs pa de dag par byed pa'i phyir zhes bya ba'i don to/ /mi shes pa ni shes bya'i sgrib pa'o/ / ma lus spang ba'i phyir zhes pa ni nyon mongs pa dang / shes bya'i sgrib pa mtha' dag dag pa'i phyir/ bsam pa'i khyad par ji bzhin du/ /zhes pa dbang po'i bye brag ji ltar 'tshal ba bzhin du bshad du gsol zhes pa'i don to/ /sems can rnams la zhes pa ni nyon mongs pa'i gang zag go//bshad par 'tshal zhes bya ba ni klu'i le'u theg pa sna tshogs kyi don bshad du gsol zhes pa'i don to/ /gsang dbang ni gsang sngags la dbang ba'o/ /de ni phyag na rdo rje'o/ /de bzhin gshegs la de skad du/ /zhes pa ni don phyin ci ma log pa la gshegs pa ni de bzhin gshegs pa'o//de skad du gsol nas zhes bya ba ni theg pa sna tshogs kyi don bshad du gsol zhes pa'o/ /thal mo sbyar byas te/ lus btud nas ni spyan sngar 'dug /ces pa ni gus pa'i tshul gyis shAkya thub pa'i spyan sngar 'dug pa'o/ /da ni rgyud bshad pa'i sbyor ba bstan to//de nas zhes pa ni 'das ma thag pa ste/ spyan sngar 'dug pa'i de ma thag pa'o/ /bcom pa ni bdud bzhi ste lha'i bu'i bdud dang / 'chi bdag gi bdud dang / nyon mongs pa'i bdud dang / phung po'i bdud do/ /ldan pa ni ye shes lnga ste me long lta bu dang / mnyam pa nyid dang / so sor rtog pa dang / bya ba grub pa dang / chos kyi dbyings kyi ye shes so/ /shAkya ni rgyal po shAkya'i rigs so/ /thub pa ni shAkya rnams kyi ngag thub pa'o/ /yang na stobs bcus bdud bzhi thub pas na thub pa'o/ /rdzogs pa'i sangs rgyas rkang gnyis mchog / ces pa ni rkang gnyis ni lha dang mi'o/ /de'i mchog tu gyur pa ni shAkya thub pa'o/ /nyid kyi zhes pa ni shAkya thub pa'o/ /zhal nas ljags bzang ba zhes pa ni kha dog dang dbyibs phun sum tshogs pa'o/ /ring zhing zhes pa ni chu'o/ /yangs pa ni zheng ngo / /brkyang bar mdzad de zhes pa ni ljags las 'od byung bas 'dod khams la sogs pa 'jig rten gsum po snang bar byas nas bdud bzhi'i dgra rnams 'dul bar byed pa'o//de'i rjes thogs la 'dzum pa bstan nas/ sems can gyi ngan song gsum sbyong bar byed pa zhes bya ste dag par byed pa'i tha tshig go/ /tshangs pa'i gsung ni yan lag drug cu'o//snyan pa yi zhes pa ni yid du 'ong ba'i gsung ngo / /des 'dod khams la sogs pa/ 'jig rten gsum po kun bkang nas/ /lag na rdo rje stobs po che/ /gsang dbang la ni slar gsungs pa ni zhus pa'i lan gsungs pa'o/ /ji skad gsungs she na/ phyag na rdo rje la snying rje chen po dang ldan pa zhes bos nas/ 'gro ba rnams la phan pa'i don du phyag na rdo rje khyod kyis snang la rang bzhin med pa'i sku 'jam dpal gyi mtshan brjod pa tsam gyis don chen po 'byung ba sgrib pa dag par byed cing sdig sel zhes pa dri ma thams cad dang bral bar byed pa'o/ / nga la nyan par brtson pa ni/ /zhes pa shAkya thub la'o/ /brtson pa ni zhes pa bar chad med pa'o/ /legs so dpal ldan rdo rje 'chang / /zhes pa rang don du zhus pa legs so/ /lag na rdo rje khyod legs so/ /zhes pa gzhan don du zhus pa legs so/ /de'i phyir ngas bshad ces rang bzhin gyi don du zhus pa de'i phyir/shAkya thub pa ngas phyag na rdo rje la lam 'bras bu dang bcas par bstan to zhes bya ba'i don to/ /khyod ni rtse gcig yid kyis nyon/ /zhes pa ni ma yengs par ro/ /bcom ldan de ni legs zhes gsol/ /zhes pa ni mtshams sbyor gyi tshig go/ /bcom ldan shAkya thub pas 'khor de dag thams cad rigs tha dad du gzigs te/la la ni gsang sngags zhes pa lha kha sbyor gyi rigs su gzigs/ la la ni rigs chen zhes pa rdzogs pa'i rim pa'i skal ldan du gzigs/ la la ni thams cad dang zhes pa bskyed rdzogs thun mong ba'i gang zag tu gzigs so//la la ni/ gsang sngags rig sngags 'chang ba'i rigs/ /zhes pa lha rkyang pa la dga' ba'i gang zag tu gzigs so/ /yang na/ rigs gsum la ni rnam par gzigs/ /zhes pa sku dang gsung dang thugs kyi rigs su gzigs so/ /'jig rten zhes pa ni log pa'i shes pas brtags pa'o//'jig rten 'das pa'i rigs zhes pa ni mya ngan las 'das pa ste 'khrul pa zad pa'o/ /'jig rten snang byed ces pa ni 'jig rten snang bar byed pa ni rigs pa rgyun gyi brtag pa ste mu stegs kyi rigs so/ /rigs chen dang zhes pa ni mu stegs las bzlog pa ste pha rol tu phyin pa'i theg pa'i gang zag du gzigs so//phyag rgya chen po'i rigs mchog dang / /zhes pa ni phyag ni blo las 'das pa ste stong pa nyid do/ /rgya ni stong pa nyid des ma khyab pa med pa'o/ /chen po ni de lta bu rtogs pa'i gang zag de 'gran zla med pas na rigs mchog ces bya'o//rigs chen gtsug tor cher gzigs nas/ /zhes pa ni zil gyis mi non pa'i gang zag ste khyad par bla na med pa'i gang zag tu gzigs nas/ tshig gi bdag po zhes pa ni shAkya thub pa la'o/ /tshigs su bcad ces pa brkyang pa bsdus pa ste sgyu 'phrul dra ba klu'i le'u bsdus zhes pa'i don to//gang gsung zhe na/ gsang sngags rgyal po drug ldan zhing / /zhes pa 'og nas 'byung ba'i tshig go/ /gsang sngags zhes pa ni zung 'jug go/ /rgyal po zhes pa ni lam thun mong ma yin pa'o/ / drug ces pa ni a'i sde tshan no/ /ldan zhes pa ni thabs kyi yi ge a dang bcas pa'o/ /gnyis su med par 'byung ba dang / /zhes pa ni kun rdzob tu gsal byed dang dbyangs yig dang gnyis su med pa'o/ /don dam rig pa dang stong pa gnyis su med pa'o/ /mi skye zhes pa ni don dam pa'i bden pa'o//chos can zhes pa ni kun rdzob kyi bden pa'o/ /'di gsungs pa zhes pa ni dbyer med kyi tshul du 'khor rnams la bka' stsal pa'o/ /de dag gis ni gleng gzhi phun sum tshogs pa rgyud bshad pa'i sbyor ba dang bcas pa bstan to// //da ni rgyud dngos bstan par bya ste/theg pa sna tshogs thabs tshul gyis/ /zhes pa ni theg pa sna tshogs kyi tshul du bshad par bya ste/ spyir theg pa'i sgo sna tshogs shing bsam gyis mi khyab kyang bsdu na gnyis te/ pha rol tu phyin pa'i theg pa dang / gsang sngags kyi theg pa'o/ /re zhig pha rol tu phyin pa'i theg pa'i sgo nas bshad par bya ste/a A zhes pa ni sbyin pa'i pha rol tu phyin pa'o/ /i I zhes pa ni tshul khrims kyi pha rol tu phyin pa'o/ /u U zhes pa ni bzod pa'i pha rol tu phyin pa'o/ /e ai zhes pa ni brtson 'grus kyi pha rol tu phyin ba'o/ /o au zhes pa ni bsam gtan gyi pha rol tu phyin pa'o//aM aHzhes pa ni shes rab kyi pha rol tu phyin pa'o/ /de dag kyang ring thung gi bye brag gis 'jig rten dang 'jig rten las 'das par shes par bya'o/ /de la 'jig rten pa'i sbyin pa ni sbyin pa po dang sbyin pa po'i yul dang / sbyin par bya ba'i rdzas dang gsum du dmigs te gtong ngo //'jig rten las 'das pa'i sbyin pa ni 'khor gsum yongs su dag pa'o/ /de bzhin du tshul khrims la sogs pa shes par bya'o/ /gsang sngags kyi dbang du byas nas bshad na/ a A ni gsal la rtog pa med pa ste me long lta bu'i ye shes so/ /i I zhes pa ni phyogs ris thams cad dang bral ba ste mnyam pa nyid kyi ye shes so//u U zhes pa ni 'khor 'das gnyis gnyis med du shes pa'i ye shes te so sor rtog pa'i ye shes so/ /e ai zhes pa ni bya ba grub pa'i ye shes te 'gro ba'i don 'bad pa med par 'byung ba'o/ /o au zhes pa ni ye shes de dag dbyer mi phyed pa ste chos kyi dbyings kyi ye shes so//aM zhes pa ni ye shes de dag stong pa nyid dang ldan zhes bya ba'i don to/ /aHzhes pa ni ye shes dang stong pa dbyer mi phyed pa'i don de bdag gis bsgom zhes pa'i don to/ /shes rab dang ye shes gnyis su med pa'i don de gang du bsgom zhe na/s+thi to zhes pa ni bstan pa ste/ gnas phun sum tshogs pa ste bkra shis shing nyams dga' ba'o/ /hr-i di zhes pa ni snying po'o/ /snying po ni gang zhe na dz+nyA na zhes pa ste ye shes lnga'o/ /mUrti ni rgyun te ye shes de dag rgyun du bsgom zhes pa'i tha tshig go//a haM zhes pa bdag ste rnal 'byor pa bsgom zhes pa'i tha tshig go/ /bud+d+ho zhes pa sangs rgyas te 'bras bu'o/ /bud+d+ha nAM zhes pa ni sku rnam pa gnyis so/ /t+ya d+h+wa brtI nAM zhes pa ni sku gsum dbyer mi phyed pa'o/ /dbyer mi phyed pa'i don de ye shes lnga dang ldan pas oM zhes bya'o//ye shes des tha dad kyi rtog pa thams cad gcod pas badzra tIk+Sh+Na zhes bya ste rdo rje rnon po'o/ /duHkhats+tshe da ni nyon mongs pa gcod pa'o/ /pradz+nyA dz+nyA na shes rab ye shes te thugs so/ /de lta bu'i ye shes de rgyun mi 'chad pas mUrta ye zhes bya ste rgyun no/ /dz+nyA na kA ya zhes pa ni ye shes kyi sku ste sku'o//wA gI shwa ra zhes bya ba ni ngag gi dbang phyug ste gsung ngo / /de lta bu'i sku gsung thugs te skye ba med pa'i lta ba rtogs pa las 'byung ste a'o/ /bde ba chen po goms pas nyams su blangs pas na ra'o/ /de lta ba dang sgom pa la skyon gang gis kyang ma gos pa pad+ma ste pa'o//de lta bu de bskyed rdzogs thun mong gi spyod pas grol bas na tsa'o/ /nA ya zhes pa ni rig pas kyang chos thams cad skye ba med par shes par bya'o/ /te zhes bya ba ni 'bras bu ster ba dang bral ba'o/ /na maHzhes bya ba ni don ma nor ba'o/ /de dag gis ni rgyud kyi don sngags su bsdus pa bstan to//'di ltar sangs rgyas bcom ldan 'das/ /zhes pa ni gong du bstan pa'i sku gsum mo/ /rdzogs pa'i sangs rgyas a las byung / /zhes pa ni a ni skye ba med par rtogs pa las 'byung zhes bya ba'i tha tshig go/ /a ni skye ba med pa ste don dam pa'o//yig 'bru kun zhes pa ni kun rdzob kyi chos thams cad do/ /mchog ces pa ni dbyer mi phyed pa'o/ /de lta bu nyams su blangs pa las/ don chen zhes pa ni rang don dang gzhan don 'byung ba'o/ /yi ge dam pa yin zhes pa ni lam ma nor ba'o/ /khong nas 'byung ba skye ba med//ces pa ni chos thams cad la chos nyid skye ba med pas khyab pa'o/ /skye med de'i rang bzhin bstan pa ni/ tshig tu brjod pa spangs pa ste/ /blo'i yul ma yin pa'o/ /brjod pa kun gyi rgyu yi mchog /ces pa ni skye ba med las thams cad skye ba'i tshul du shar ba'o/ /tshig kun rab tu gsal bar byed pa sna tshogs su shar ba'o//de lta bu de yang 'jam dpal ye shes sems dpa'i rang bzhin yin zhes pa'i sgo nas bstod pa'o/ /mchod pa chen po zhes bya ba ni ye shes sems dpa' de mchod pa'i gnas yin pas na mchod pa chen po'o/ /'dod chags che zhes bya ba ni 'gro ba'i don la chags pa'o//sems can thams cad dga' bar byed/ /ces bya ba ni gdul bya thams cad rgyud tshim par byed pa'o/ /mchod pa chen po zhe sdang che/ /zhes pa ni chos thams cad stong zhing bdag med pa'o/ /stong zhing bdag med pa des/ nyon mongs kun gyi dgra che ba//zhes bya ste nyon mongs pa thams cad rlag par byed pa'o/ /mchod pa chen po ni bshad zin to/ /gti mug che zhes pa ni shes rab po/ /gti mug blo ste zhes pa ni shes rab chen po des ma rig pa sel bas na gti mug sel zhes bya'o/ /khro ba che zhes pa ni 'jam dpal ye shes sems dpa'o//khro ba chen po zhes bya ba ni tha dad kyi rtog pa thams cad dang bral ba'o/ /dgra che ba zhes pa ni tha dad kyi rtog pa thams cad sel bar byed do zhes bya ba'i tha tshig go/ /khro ba chen po dgra che ba/ /zhes bya ba ni khro ba chen po ni 'jam dpal ye shes sems dpa'o//dgra che ba ni 'jam dpal gyis 'joms pa'o/ /chags pa che zhes pa ni ye shes sems dpa'o/ /chags pa thams cad sel bar byed/ /ces pa ni mngon zhen thams cad gcod par byed pa'o/ /'dod pa chen po ni dang ba skye ba'i gnas yin pa'o/ /bde ba che zhes pa ni chos kyi sku'o//dga' ba chen po mgu ba che/ /zhes pa ni sems can thams cad mgu bar byed pa ste gzugs sku gnyis so/ /gzugs che lus kyang che ba ste/ /zhes pa ni gzugs chen po dang lus chen po'i sgo nas 'gro ba'i don byed pa'o/ /kha dog che zhes pa ni dkar po la sogs pa sna tshogs pa'i sgo nas 'gro ba'i don byed pa'o//lus che zhes pa ni zheng ngo / /bong che zhes pa ni chu ring pa'o/ /thams cad du grags pas ni che zhes bya'o/ /'gro ba thams cad la khyab pas na rgya che ba zhes bya'o/ /dkyil 'khor chen po yangs pa yin//zhes pa ni dkyil 'khor mtha' dag gi sgo nas 'gro ba'i don byed pa'o/ /shes rab ces pa ni stong pa nyid do/ /des tha dad kyi rtog pa gcod pas na mtshon no/ /'chang zhes pa ni 'jam dpal la ldan zhes bya ba'i don to/ /nyon mongs pa'i 'dam las 'dren par byed pas na lcags kyu che zhes bya'o//gdul bya thams cad la grags pas na grags chen zhes bya'o/ /yon tan ma lus par rdzogs pas na snyan grags chen po zhes bya'o/ /snang ba chen po ni longs sku'o/ /gsal ba chen po ni chos sku'o/ /mkhas pa sgyu 'phrul chen po 'chang //zhes pa ni mkhas pa ni 'gro ba'i don la mkhas pa ste sprul sku'o/ /sgyu 'phrul chen po zhes pa ni thabs sna tshogs pa'o/ /'chang zhes bya ba ni lnga pa'o/ /sgyu 'phrul chen po'i don grub pa ni bskyed pa'i rim pa'i lha'i sgo nas don grub pa'o/ / sgyu 'phrul chen po dga' bas dga'/ /zhes pa ni rdzogs pa'i sgo nas so/ /sgyu 'phrul chen po mig 'phrul can/ /zhes pa ni bskyed rdzogs thun mong gi sgo nas 'gro ba'i don byed pa'o/ /da ni pha rol tu phyin pa bcu'i sgo nas bstod pa bstan te/ sbyin pa la bzhi ste/ zang zing mi 'jigs chos dang byams//de dag 'khor gsum mi dmigs pa/ /'jig rten 'das pa'i sbyin pa'o/ /de'i bdag po ni 'jam dpal ye shes sems dpa' ste gtso bo zhes bya'o/ /tshul khrims ni gsum ste sdom pa'i tshul khrims dang / sems can gyi don byed pa'i tshul khrims dang /dge ba chos sdud pa'i tshul khrims dang gsum mo/ /chen po zhes bya ba ni 'khor gsum mi dmigs te 'jig rten las 'das pa'o/ /'chang ba'i mchog ni ye shes sems dpa'o/ /bzod pa ni gsum ste gnod pa byed pa la ji mi snyam pa'i bzod pa dang / sdug bsngal dang du len pa'i bzod pa dang /chos la nges par sems dpa'i bzod pa'o/ /chen zhes pa ni 'khor gsum mi dmigs pa ste 'jig rten las 'das pa'o/ /'chang ba ni ye shes sems dpa'o/ /brtan pa po zhes bya ba ni mi 'gyur ba'o/ /brtson 'grus la gsum ste/ go cha'i brtson 'grus dang /spyor ba'i brtson 'grus dang / chog par mi 'dzin pa'i brtson 'grus so/ /brtul ba yin zhes pa ni brtson 'grus kyi stobs kyis 'khor ba las brtul ba'o/ /bsam gtan la gnyis te zhi gnas dang lhag mthong ngo / /zhi gnas ni dmigs pa rtse gcig pa'o//lhag mthong ni gang zag dang chos kyi bdag gis stong pa'o/ /chen po zhes pa ni 'khor gsum mi dmigs pa ste 'jig rten las 'das pa'o/ /ting nge 'dzin gnas zhes pa ni ye shes sems dpa' ldan pa'o/ /shes rab la gnyis te rgyu'i shes rab dang 'bras bu'i shes rab bo//rgyu'i shes rab ni thos bsam sgom gsum mo/ /'bras bu'i shes rab ni don phyin ci ma log pa'o/ /chen po ni 'khor gsum mi dmigs pa ste 'jig rten las 'das pa'o/ /lus 'chang ba zhes pa ni ye shes sems dpa' la'o/ /stobs zhes pa ni gzhan gyis mi thub pa'i stobs te bcu'o//che zhes pa ni 'khor gsum mi dmigs pa ste 'jig rten las 'das pa'o/ /thabs shes rab ni theg pa'i sgo bsam gyis mi khyab pa dang ldan pa'o/ /che zhes pa ni 'khor gsum mi dmigs pa'o/ /smon lam zhes pa ni 'gro ba'i don 'byung ba'o//ye shes zhes pa ni ji lta ba mkhyen pa dang ji snyed pa mkhyen pa'i ye shes mnga' ba ste/ rgya mtsho zhes pa mi zad pa'i ye shes dang ldan pa'o/ da ni byams pa dang snying rje dang phrin las dang rdzu 'phrul gyi sgo nas bstod pa'o/ /byams chen zhes pa ni phyogs ris med pa ste dpag tu med pa'i byams pa'o//snying rje chen po blo'i mchog dang ldan pa ni ye shes sems dpa'o/ /shes rab chen po blo chen ldan pa yang de nyid do/ /mkhas pa chen po zhes bya ba ni 'gro ba'i don la mkhas pa'o/ /thabs che ba zhes bya ba ni theg pa sna tshogs kyi sgo nas so//rdzu 'phrul chen po'i stobs dang ldan/ /zhes bya ba ni rdzu 'phrul bsam gyis mi khyab pa dang ldan pa ste rtsig pa dang ra ba las thal ba dang / thogs pa med pa'i lus kyis kun du 'gro ba dang / du ba 'thul zhing me 'bar ba la sogs pa dang ldan pa'o/ /shugs chen ni gzhan gyi stobs 'joms pa'o//mgyogs pa chen po ni 'gro ba'i don la myur ba'o/ /rdzu 'phrul chen po ni ye shes sems dpa'o/ /cher grags pa ni 'gran zla med pa'o/ /stobs chen pha rol gnon pa ni gdul bya gdul ba'o/ /srid pa'i ri bo ni srid pa gsum mo/ /chen po 'joms zhes pa ni ma rig pa'o//mkhregs pa ni rig pa dang stong pa dbyer mi phyed pa'o/ /rdo rje chen po 'chang ba ni dbyer mi phyed pa'i don thugs su chud pa'o/ /drag po chen po ni ye shes sems dpa'o/ /drag shul che zhes pa ni drag po'i las kyis 'dul ba'o/ /'jigs chen zhes pa ni bdag tu 'dzin pa'o//'jigs par byed ces bya ba ni mtha' dang bral ba'i ye shes ston pa'o/ /mgon po ni mgon byed pa'o/ /rigs zhes pa ni lnga'o/ /mchog ces pa ni ye shes sems dpa'o/ /bla ni sangs rgyas kyi dgongs pa'o/ /ma ni de 'byin pa'o/ /sangs rgyas kyi dgongs pa gang zhe na/gsang sngags chen po'i mchog ste mtha' dang bral ba'o/ /theg pa chen po'i tshul la gnas/ /zhes pa ni byang chub sems dpa'i lam 'bras bu dang bcas pa'i/ /de lta bu'i lam 'gro ba la ston pas na theg pa chen po'i tshul gyi mchog go/ /sangs rgyas rnam par snang mdzad che//zhes pa ni rigs lnga'i dkyil 'khor mtshon pa'o/ /sangs rgyas ni spang ba phun sum tshogs pa dang / ye shes phun sum tshogs pa ste chos sku'o/ /rnam par snang mdzad ces pa ni mtshan dang dpe byad kyis brgyan pa ste longs sku'o/ /mdzad che zhes pa ni mdzad pa bcu gnyis kyis 'gro ba'i don byed pa ste sprul sku'o//thub pa chen pho zhes bya ba ni shAkya thub pa'o/ /thub chen ldan zhes pa ni shAkya thub pa'i yon tan dang yang ye shes sems dpa' la ldan zhes pa'i don to/ /gsang sngags tshul chen zhes pa ni bskyed pa'i rim pa dang rdzogs pa'i rim pa'o/ /de la bskyed pa'i rim pa ni phyi bskyed pa'i rim pa dang /nang bskyed pa'i rim pa dang / zab mo bskyed pa'i rim pa'o/ /phyi bskyed pa'i rim pa ni lha mang ngam nyung yang rung ste lha rkyang pa bsgom pa'o/ /nang bskyed pa'i rim pa ni lha kha sbyor bsgom pa'o/ /zab mo bskyed pa'i rim pa ni rtsa rlung bsgom pa'o//de dag thams cad la rang bzhin med par shes pa ni rdzogs pa'i rim pa'o/ /las byung zhes pa sku gsum mo/ /gsang sngags tshul chen bdag nyid can/ /zhes pa ni bskyed rdzogs thun mong gi bdag nyid ye shes sems dpa' khyod la ldan no zhes bya ba'i tha tshig go//da ni pha rol tu phyin pa dang / sa bcu dang / yon tan bsam gyis mi khyab pa'i sgo nas bstod pa bstan te pha rol phyin bcu ni bshad zin to/ /thob pa ye shes sems dpa' khyod kyis thob ces pa'i don to/ /pha rol phyin pa bcu la gnas/ /zhes pa ni gnas nas 'gro ba'i don byed do zhes bya ba'i tha tshig go//dag pa ste zhes bya ba ni pha rol phyin pa thams cad dbyer med du rtogs pa'o zhes bya'o/ /tshul zhes pa ni pha rol tu phyin pa bcu 'gro ba la ston pa'o/ /mgon po ni ye shes sems dpa'o/ /sa bcu'i dbang phyug ces pa ni sa bcu la dbang thob pa zhes bya'o//gnas pa po zhes bya ba ni sa bcu pa la gnas nas 'gro ba'i don byed pa'o/ /shes bcu zhes pa ni chos shes pa dang / rjes su rtogs pa shes pa dang / pha rol gyi sems shes pa dang / kun rdzob shes pa dang / sdug bsngal shes pa dang /kun 'byung shes pa dang / 'gog pa shes pa dang / lam shes pa dang / zad pa shes pa dang / mi skye ba shes pa'o/ /rnam dag ces pa ni/ nyan thos kyi shes pa bcu rang bzhin med par shes pa'o/ /bdag nyid can zhes pa ni ye shes sems dpa'o/ /rnam pa bcu po zhes pa ni gcig pur 'dzin pa dang /rgyur 'dzin pa dang / za bar 'dzin pa dang / byed pa por 'dzin pa dang / rang dbang can du 'dzin pa dang / rtag par 'dzin pa dang / kun nas nyon mongs par 'dzin pa dang / rnam par byang bar 'dzin pa dang / rnal 'byor can du 'dzin pa dang / ma grol ba grol bar 'dzin pa'o/ /don bcu'i don ni mu stegs kyi don bcu po de yang ye shes sems dpas khong du chud ces bya ba'i don to/ /thub dbang ni thub pa'i dbang po ste bdud bzhi thub pa'o/ /stobs bcu ni gnas dang gnas ma yin pa mkhyen pa'i stobs dang / mos pa sna tshogs pa mkhyen pa'i stobs dang /bsam gtan dang ting nge 'dzin mkhyen pa'i stobs dang / rnam par thar pa dang snyoms par 'jug pa mkhyen pa'i stobs dang / kun nas nyon mongs pa dang rnam par byang ba mkhyen pa'i stobs dang / las dang las kyi rnam par smin pa mkhyen pa'i stobs dang /thams cad du 'gro ba'i lam mkhyen pa'i stobs dang / sngon gyi gnas dran pa'i stobs dang / 'chi 'pho dad skye ba shes pa'i stobs dang / zag pa zad pa mkhyen pa'i stobs so/ /de ltar stobs bcus 'gro ba'i don byed pas na khyab pa'i bdag /kun gyi don ni ma lus byed//ces bya'o/ /'o na 'gro ba'i don byed pa la skyon gyis ma gos sam zhe na/ rnam bcu dbang ldan che ba po/ /zhes smos te dbang bcu ni tshe la dbang ba dang / las la dbang ba dang / yo byad la dbang ba dang / mos pa la dbang ba dang / smon lam la dbang ba dang / rdzu 'phrul la dbang ba dang / skye ba la dbang ba dang / chos la dbang ba dang / sems la dbang ba dang / ye shes la dbang ba dang / dbang bcu dang ldan pas skyon gyis ma gos pa'o/ /da ni sku gsum gyi sgo nas bstod par bya ste/ dang po chos kyi sku'i sgo nas bstod par bya ste/ thog ma med ces pa ni rgyus stong pa'o/ /spros med bdag ces pa ni skyon dang bral ba'o/ /de bzhin nyid bdag dag pa'i bdag /ces pa ni rang gi ngo bos stong pa'o/ /bden par smra zhing zhes pa ni longs sku ste bden par smras pa ni theg pa chen po'o/ /tshig mi 'gyur zhes pa ni bden pa yang dag pa zhes bya ba'i don to//ji skad smras pa de bzhin byed/ /ces pa ni 'khor phun sum tshogs pa ste sa bcu'i byang chub sems dpa' dag go/ /gnyis med ces pa ni don dam pa'i bden pa dang kun rdzob kyi bden pa dbyer mi phyed pa'o/ /de thugs su chud nas 'gro ba la yang gnyis su med par ston pa'o//yang dag mtha' la rnam par gnas/ /zhes pa ni rgyud 'di'i lta ba ston pa'i tshig yin te/ yang dag pa'i mtha' ni don phyin ci ma log pa'o/ /de'i rig pa yul na mi gnas pa dang / rgyud dang bstan bcos kun gyi yul du mi gnas pa dang blo las 'das pa'o//bdag med seng ge'i sgra dang ldan/ /zhes pa ni sprul pa'i sku ste/ gang zag gi bdag dang chos kyi bdag med pa'i sgra ste seng ge dang 'dra ste/ dper na gcan zan gyi rgyal po seng ge des sgra bsgrags pa tsam gyis ri dgas ma lus pa thams cad zil gyis gnon cing 'jigs par byed do//de bzhin du ye shes sems dpa'i bdag med pa'i sgra des ri dgas ngan pa dang 'dra ba'i mu stegs 'jigs par byed do/ /kun du 'gro zhes pa ni phyogs dang dus thams cad du gshegs pa'o/ /don yod ces pa ni 'gro ba'i don la gshegs pa'o/ /stobs zhes pa ni stobs bcus don byed pa'o//de bzhin gshegs pa'i yid ltar mgyogs/ /zhes pa ni 'gro ba'i don la myur ba'o/ /rgyal ba zhes pa ni nyan thos so/ /rnam rgyal zhes pa ni byang chub sems dpa'o/ /dgra las rgyal zhes pa ni sgrib pa mtha' dag zad pa ste sangs rgyas so/ /de ltar sprul pa'i sku des 'gro ba'i don byed pa'i tshul ni 'khor los sgyur ba'i rgyal po lta bu'i sgo nas kyang don byed la/stobs che zhes bya ba ni tshul sna tshogs kyi sgo nas 'gro ba'i don byed pa'i tha tshig go/ /tshogs zhes pa ni nyan thos so/ /slob dpon zhes pa ni sprul pa'i sku ste shAkya thub pa'o/ /tshogs zhes pa ni rang rgyal ba'o//mchog ces pa ni rang rgyal ba'i slob dpon rigs gsum mgon po lta bu'o/ /tshogs zhes pa ni byang chub sems dpa'i dge 'dun no/ /rje zhes pa ni longs sku ste rnam par snang mdzad lta bu'o/ /tshogs zhes pa dang / /bdag ces pa ni mtha' dang bral ba'i ye shes te chos kyi sku'o/ / dbang dang ldan zhes pa ni de dag thams cad ye shes sems dpa' la ldan no zhes pa'i don no/ /mthu chen zhes pa ni ye shes sems dpa'o/ /gces par zhes pa ni gdul bya'o/ /'dzin pa zhes pa ni thugs rjes mi gtong ba'o/ /tshul chen zhes pa ni theg pa chen po'o//gzhan gyi dring mi 'jog ces pa ni 'du byed gzhan la re ltos mi byed pa'o/ /tshig ces pa ni drang ba'i don gyi tshig go/ /rje zhes pa ni sprul pa'i sku'o/ /tshig ces pa ni theg pa chen po'i tshig go/ /bdag ces pa ni longs spyod rdzogs pa'i sku'o/ / smra mkhas pa zhes pa tshig la mnga' brnyes pa zhes bya ba'i don to/ /tshig la dbang ba tshig mtha' yas/ /zhes pa ni rang gi don khong du chud nas gzhan la tshig bden par smra ba'o/ /bden pa bzhi ni zhes pa ni nyan thos kyi lam bshad par bya ste/ bden pa bzhi ni sdug bsngal gyi bden pa dang /kun 'byung gi bden pa dang / 'gog pa'i bden pa dang / lam gyi bden pa'o/ /ston pa po zhes pa ni ye shes sems dpa'o/ /phyir mi ldog pa phyir mi 'ong / /zhes pa ni skyes bu zung bzhi dang / gang zag ya brgyad de nyan thos kyi 'bras bu'o/ /'dren pa zhes pa ni 'gro ba thams cad 'dren pa ste ye shes sems dpa'o//rang rgyal zhes pa ni rten 'brel bcu gnyis lugs las bzlog pa'i tshul gyis bsgom pa'i gang zag ste shes rab che ba dang / slob dpon 'di bdag 'chad pa dang 'gro ba'i don la mi dga' ba'i gang zag go/ / lhag par yang nga rgyal dang ldan pa'i rigs te rang gi shes rab kyis dpyad nas zhi gnas dang lhag mthong bsgom pa'o/ /bse ru'i tshul zhes pa ni 'bras bu ste bse ru ltar rwa gcig pa'o/ /nges 'byung sna tshogs ni byang chub kyi phyogs kyi chos sum cu rtsa bdun no/ /las 'byung ba ni byi'u ltar khyur lding ba'o//'byung ba chen po zhes bya ba ni 'gro ba'i don la nam yang ma byung ma mos pas na 'byung ba chen po'o/ /rgyu gcig po zhes bya ba ni snying po byang chub kyi sems so/ /dge slong dgra bcom zag pa zad/ /ces pa ni 'od srungs la sogs pa dgra bcom pa bsam gyis mi khyab par sprul nas 'gro ba'i don byed pa zhes bya'o//'dod chags bral ba ni nang 'dzin pa zhi ba'o/ /dbang po thul ba ni phyi rol dul ba'o/ /bde ba rnyed pa ni mya ngan las 'das pa'o/ /'jigs med thob pa ni bdud bzhi gzhom pa'o/ /bsil bar gyur pa ni mngon zhen gyi gdung ba dang bral ba'o/ / rnyog pa med pa ni sgrib pa dang bral ba'o/ /rig pa dang ni zhes pa ni lhag pa'i ting nge 'dzin gyi bslab pa'o/ /rkang pa zhes pa ni gnyis mtshon pa'i tshig ste/ tshul khrims dang shes rab kyi bslab pa'o/ /bde gshegs ni ye shes sems dpa'o/ /'jig rten rig pa'i mchog ni gdul bya'i rgyud mkhyen pa'o//bdag gir mi 'dzin ngar mi 'dzin/ /zhes pa ni rang rgyud du 'dzin pa dang rtog pa dang bral ba'o/ /bden pa gnyis ni don dam dang kun rdzob bo/ /tshul la gnas pa ni dbyer med du rtogs pa'o/ /'khor ba'i pha rol ni mthong ba'i lam mo/ /mthar son pa ni sa bcu gcig pa'o//bya ba byas pa ni tshogs gnyis rdzogs pa'o/ /skam sar gnas pa ni mya ngan las 'das pa thob pa'o/ /ye shes 'ba' zhig las byung ba/ /zhes pa ni ji lta ba mkhyen pa dang ji snyed pa mkhyen pa'i sgo nas 'gro don byed pa'o/ /shes rab mtshon chen ni stong pa nyid do/ /rnam 'joms pa ni dngos po'i chos thams cad do//dam chos chos rgyal ni ma nor ba ste lta ba'o/ /gsal bar ldan pa ni 'dzin pa med pa'i shes pa bsgom pa'o/ /'jig rten snang bar byed pa'i mchog ni sna tshogs su snang yang zhen pa med pa ste spyod pa'o/ /chos ni 'khor 'das so/ /dbang phyug ni de la mnga' brnyes pa'o//chos kyi rgyal zhes pa ni ye shes sems dpa'o/ /nges pa'i lam ni bden pa gnyis med do/ /ston pa ni 'gro ba la'o/ /po zhes pa ni khyod nyid do/ /don grub ces pa ni rang don no/ /bsam pa grub ces pa gzhan don no/ /kun du rtog pa thams cad spangs//zhes pa ni gzung 'dzin dang bral ba'o/ /rnam par mi rtog dbyings mi zad/ /ces pa ni 'phel 'grib med pa'i don no/ /chos dbyings dam pa zad mi shes pa ni yon tan zad mi shes pa dang ldan pa'o/ /kun gyi gti mug gnas su gyur pa'o/ /bsod nams kyi tshogs bsags pa las byung ba'o//ye shes zhes pa ni ye shes kyi tshogs so/ /ye shes khyad par che zhes pa ni gong na med pa'o/ /ye shes ldan pa zhes pa ni ji lta ba mkhyen pa dang ji snyed pa mkhyen pa'o/ /yod med ces pa ni mtha' thams cad las grol ba'o/ / tshogs gnyis ni bsod nams dang ye shes so/ /bsags pa po ni ye shes sems dpa'o/ /rtag pa ni chos sku'o/ /kun rgyal ni 'khor ba las rgyal ba'o/ /rnal zhes pa ni chos nyid do/ /'byor zhes pa ni blo dang 'byor pa'o/ /can ni ldan pa'i tshig go/ /bsam gtan zhes pa ni zhi gnas dang lhag mthong ngo //de lta bu bsam par bya bas na bsam bya'o/ /blo zhes pa ni shes rab bo/ /ldan zhes pa ni ye shes sems dpa'o/ /mchog ces pa ni sa dgu pa man chad la 'phags pa'o/ /so so zhes pa ni 'khor 'das so/ /rang rig ces pa ni sems la'o//mi g.yo ba zhes pa ni 'khor 'das thams cad sems las mi bskyod pa zhes pa'i don to/ /mchog gi dang po ni rang rig go/ /sku gsum 'chang ni chos sku dang longs sku dang sprul sku'o/ /'chang ba ni ye shes pa la mnga' ba'o/ /sangs rgyas sku lnga'i bdag nyid can ni chos dang /longs spyod dang / sprul sku dang / ngo bo nyid kyi sku dang / bde ba chen po'i sku'o/ /'gro ba'i don la khyab pas na khyab bdag go/ /ye shes lnga yi bdag ni me long lta bu la sogs pa'o/ /sangs rgyas lnga bdag ces pa ni rnam par snang mdzad do/ /cod pan can zhes pa ni ye shes sems dpa'i dbu la rgyan du byas pa'o//spyan lnga zhes pa ni sha'i spyan dang / lha'i spyan dang / chos kyi spyan dang / sangs rgyas kyi spyan dang / shes rab kyi spyan dang lnga'o/ /chags ba med pa 'chang zhes pa ni zhen pa med pa'o/ /sangs rgyas thams cad skyed pa po//zhes pa ni dus gsum gyi sangs rgyas thams cad kyi yab dang yum du gyur pa yang ye shes sems dpa' khyod yin zhes pa'i sgo nas bstod pa'o/ /sangs rgyas sras po dam pa'i mchog /ces pa ni bde gshegs thams cad kyi sras kyang khyod yin zhes pa'i sgo nas bstod pa'o//'dir rgal ba 'o na ye shes sems dpa'i rang bzhin ni rgyu rkyen thams cad dang bral ba yin la/ 'dir ni sras po zhes pas skye gnas kyi rnyog pa yod do zhe na/ de ni ma yin te ye shes sems dpa' nyid srid pa gsum gyi rang bzhin du byung ba las ma gtogs pa skye gnas med ces pa ste skye gnas kyi rnyog pa med do//'o na srid gsum skye ba med pa ye shes sems dpa'i rang bzhin yin na blo'i yul du song ba ste/ dngos po'i rnyog pa yod do zhe na de ni ma yin te/ chos ni 'khor 'das thams cad do/ /las byung ba zhes pa ni thams cad rten 'brel las byung ba'i phyir ngo bo skye ba med pas na/srid pa sel zhes pa ni dngos po'i rnyog pa med do/ /yang rgal ba dang / 'o na chos thams cad skye med yin na/ chos can re re la skye med re yod pas du ma'i rnyog pa yod do zhe na ma yin te/ chos can du ma tha dad kyang ngo bo skye med du gcig pas na/gcig pu sra mkhregs rdo rje'i bdag /ces pa ste du ma'i rnyog pa med do/ /sra mkhregs zhes pa ni dbyer mi phyed pa'o/ /rdo rje ni stong pa nyid do/ /bdag ces pa ni/ stong pa nyid kyis kun la khyab/ /ces pa'i don to/ /'o na du ma dang bral ba'i lam du byed pas lam mam yid la byed pa'i rnyog pa yod do zhe na ma yin te/skyes ma thag pa 'gro ba'i bdag /ces pa rtog pa'i dus nyan rang nas sangs rgyas kyi dgongs pa sleb pa yin pas lam gyi rnyog pa med do/ /'o na skyes ma thag zer bas na ye shes sems dpa' de rgyu rkyen las grub pas 'dus byas sam bcos mar song ngo zhe na ma yin te/nam mkha' las byung rang byung ba/ /zhes pa ste rgyu rkyen las ma bskyed pa yin pas na nam mkha' dang 'dra ste/ rang byung bas na bcos ma'i rnyog pa med do/ /'o na nam mkha' dang 'dra na nam mkha' la sems med pa ste/ dran med kyi cha na 'dug pas chad lta'i rnyog pa yod do zhe na ma yin te/shes rab ces pa stong pa nyid do/ /ye shes ni rig pa'o/ /rig pa dang stong pa dbyer mi phyed pas chad lta'i rnyog pa med do/ /me bo che zhes pa ni dbyer med des tha dad kyi rtog pa bsreg pas so/ /'o na me bo che zhes pa ni mes bsregs nas dngos po med par byas pas na/dngos med kyi rnyog pa yod do zhe na ma yin te/ 'od chen rnam par snang bar byed/ /ces pas na dbyer med de ji ltar yang snang bas na dngos med kyi rnyog pa med do/ /'o na ji ltar yang snang ba na snang bya snang byed gnyis byung bas ma rig pa'i rnyog pa yod do zhe na ma yin te/ye shes skar ma lam me ba/ /zhes pa ni dper na skar ma sprin gyis ma g.yogs pa ni lham me lhan ne lhang nger gar yang gsal ba bzhin ye shes des kyang mi mkhyen pa gang yang med pas na ma rig pa'i rnyog pa med do/ /'o na lam me zhes pas na phyogs kyi rnyog pa yod do zhe na ma yin te/'gro ba rnams kyi mar me dang 'dra ba'i ye shes kyi sgron me de la phyogs dang ris med pas na phyogs kyi rnyog pa med do/ /de lta bu'i ye shes sems dpa' de kho na/ gzi brjid chen po 'od gsal ba/ /zhes bya'o/ /sngags mchog ces pa ni a ste skye ba med pa'o//mnga' bdag ces pa ni skye ba med pa khong du chud pa'o/ /rig sngags rgyal zhes pa ni sngags thams cad la dbang thob pa'o/ /gsang sngags rgyal po don chen byed/ /ces pa ni lha kha sbyor gyi don byed pa'o/ /gtsug tor chen po rmad byung gtsug /ces pa ni zil gyis mi non pa'i sku'o/ /nam mkha' ni stong pa nyid do/ /bdag po ni ye shes sems dpa'o/ /sna tshogs don zhes pa ni 'gro ba la/ /sangs rgyas kun ni dus gsum gyi bde bar gshegs pa la'o/ /sku yi mchog ni ye shes sems dpa' la'o//'gro ba kun dga' ba'i ye shes kyi mig dang ldan na sna tshogs pa'i gzugs kyis 'gro ba'i don byed pa'o/ /drang srong zhes pa ni skyon med pa ste sangs rgyas so/ /che dgu zhes pa ni yon tan dang ldan pa'o/ /de dag gis kyang khyod la mchod cing ngag gis bstod pa brjod pa'o//rigs gsum ni sku gsung thugs so/ /gsang sngags ldan ni thabs dang shes rab dang ldan pa'o/ /gsang sngags 'dzin ni gzhan 'dzin du 'jug pa'o/ /gtso bo ni 'gran zla med pa'o/ /dkon mchog gsum ni spyi bor khur ba'i don to/ / theg pa gsum ni nyan thos dang / rang rgyal ba dang / byang chub sems dpa'i theg pa'i sgo nas 'gro ba'i don byed pa'o/ /don yod ces pa ni 'gro ba'i don byed pa'o/ /zhags pa zhes pa ni thugs rje'i zhags pa'o/ /rnam par rgyal zhes pa ni 'khor ba las so/ /'dzin pa chen po ni 'gro ba 'dzin pa'o//rdo rje ni stong pa nyid do/ /zhags pa ni snying rje'o/ /rdo rje lcags kyu zhags pa ni sgo ba de nyid mtshon pa'o/ /che zhes pa ni lcags sgrog dang dril bu mtshon pa'o/ /rdo rje 'jigs byed ces pa ni/ 'jigs byed kyi dkyil 'khor lha bcu gsum pa'i sgo nas 'gro ba'i don byed pa'o//'jigs par byed ces pa ni dug lnga ye shes lngar sgyur ba'o/ /khro bo'i rgyal po gdong drug 'jigs/ /mig drug lag drug stobs dang ldan/ /keng rus mche ba gtsigs pa po/ /zhes pa ni gzhon nu gdong drug gi dkyil 'khor lha bcu gsum pas 'gro ba'i don byed pa'o//ha la ha la zhes pa ni phug cig phug cig pa'o/ /gdod brgya pa ni gdong brgya ba'i dkyil 'khor gyi sgo nas 'gro ba'i don byed pa'o/ /gshin zhes pa ni shi ba'i ro'o/ /rje zhes pa ni srog bdag go/ /gshed ces pa ni de'i gnyen po khro bo'o/ /yang na gshin zhes pa ni khams gsum gyi sems can no//rje zhes pa ni nga bdag go/ /gshed ces pa ni bskyed rdzogs gnyis so/ /bgegs kyi rgyal zhes pa ni bdud bzhi sel ba'o/ /spyir gshin rje gshed kyi dkyil 'khor gyi sgo nas 'gro ba'i don byed pa'o/ /dkyil 'khor de dag thams cad la rang bzhin med par shes pa ni shugs chen no//'jigs byed ces pa ni 'khor ba'o/ /rdo rje grags pa ni stong nyid las sna tshogs shar ba'o/ /rdo rje snying zhes pa ni sna tshogs dang stong pa dbyer mi phyed pa'o/ /sgyu 'phrul rdo rje zhes pa ni sgyu ni sgyu ma ste stong pa nyid do/ / 'phrul ni sna tshogs su shar ba'o/ /rdo rje ni dbyer mi phyed pa'o/ /gsus po che ni khro bo'i sku'o/ /rdo rje las skyes rdo rje'i bdag ni stong pa la stong pa rol pa'o/ /rdo rje snying po mkha' 'dra ba ni dpe dang don no/ /mi g.yo ba ni brtan pa'o/ /ral pa gcig gis bsgyings pa ni skra'o/ /glang chen ko rlon gos su gyon pa ni stod g.yogs so//grags chen ha ha zhes sgrogs pa ni/ thabs dang shes rab gzhan la ston pa'o/ /hi hi zhes sgrogs 'jigs par byed pa ni/ rang gi rgyud la goms par byed pa'o/ /gad mo chen po ni dgyes pa'o/ /gad rgyangs can ni rab tu dgyes pa'o//rdo rje gad mo cher sgrogs pa/ /zhes pa ni stong pa nyid ston pa'o/ /rdo rje zhes pa ni stong pa nyid do/ /sems zhes pa ni rig pa'o/ /dpa' zhes pa ni dbyer med do/ /sems dpa' che zhes pa ni gzhan don no/ /rdo rje rgyal po bde ba che/ /zhes pa ni longs sku'o/ /rdo rje drag po dga' ba che//zhes pa ni khro bo'i sku'o/ /rdo rje hUM ste hUM zhes sgrogs/ /zhes pa ni gsung yig 'bru'i sgo'o/ /mtshon du rdo rje'i mda' thogs pa/ /rdo rje ral gris ma lus gcod/ /ces pa ni thugs phyag mtshan gyi sgo'o/ /rdo rje sku 'chang rdo rje can/ /zhes pa ni sku'i sgo'o/ / rdo rje gcig pu g.yul sel ba/ /zhes pa ni stong pa nyid kyis 'khor ba bzlog pa'o/ /rdo rje 'bar ba mig mi bzang / /ces pa ni ye shes kyi spyan dang ldan pa'o/ /skra yang rdo rje 'bar ba ste/ /zhes pa ni dbu skra'o/ /rdo rje 'bebs pa 'bebs pa che/ zhes pa ni rab tu gnas pa'o/ / mig brgya pa ste rdo rje'i mig /ces pa ni bsam gyis mi khyab pa'i spyan dang ldan pa'o/ /lus ni rdo rje'i ba sbu can/ /zhes pa ni ba sbu thams cad rdo rje phra mor gnas pa'o/ /rdo rje spu ni gcig bu'i lus/ /zhes pa ni lus thams cad rdo rjes khyab pa'o/ /sen mo skyes pa rdo rje'i rtse//zhes pa ni yan lag dang nyid lag thams cad rdo rje'i rtse mo lta bu'o/ /rdo rje'i snying po pags pa mkhregs/ /zhes pa ni rdo rje'i pags pa dang ldan no/ /rdo rje phreng thogs dpal dang ldan/ /rdo rje'i rgyan gyis brgyan pa ste/ /zhes pa ni rdo rje'i rgyan dang ldan pa'o/ /gad rgyangs ha ha nges par sgrogs//zhes pa ni zil gyis mi non pa'i gsung ngo / /yi ge drug pa rdo rje'i sgra/ /zhes pa ni a ra pa tsa na ya'o/ /'jam dbyangs chen po sgra che ba/ /zhes pa ni ye shes sems dpa'o/ /'jig rten gsum na sgra gcig pa/ /zhes pa ni srid pa gsum na ma thos pa med pa'o/ / nam mkha'i khams na sgra sgrogs pa/ /zhes pa ni nam mkhas gar khyab par 'gro ba la zab pa dang rgya che ba'i sgra sgrogs pa'o/ /sgra dang ldan pa rnams kyi mchog /ces pa ni 'du byed rnams kyi mchog tu gyur pa'o/ /yang dag bdag med de bzhin nyid/ /ces pa ni gang zag gi bdag dang chos kyi bdag gis stong pa'o//yang dag mtha' ste yi ge med/ /ces pa ni tshig dang tha snyad las 'das pa ste lta ba stor/ tha snyad nub/ grub mtha' thams cad bag la zha ba'o/ /stong nyid smra ba'i khyu mchog ste/ /zhes pa ni ston pa thams cad kyi nang na mchog tu gyur pa ye shes sems dpa'o//zab cing zhes pa ni gsang sngags kyi theg pa'o/ /rgya che ba ni pha rol tu phyin pa'i theg pa'o/ /sgra sgrogs pa ni gdul bya la'o/ /chos kyi dung ste sgra chen ldan/ /zhes pa ni zab mo ston pa'o/ /chos kyi gaN+DI sgra bo che/ /zhes pa ni rgya che ba ston pa'o/ /de ltar ston pa'i ye shes sems dpa' de'i ngo bo ci 'dra zhe na/mi gnas mya ngan 'das pa'o/ /zhes bya ste mtha' dang bral ba zhes bya ba'i tha tshig go/ /phyogs bcu'i chos kyi rnga bo che/ /zhes pa ni thams cad la khyab par ston pa'o/ /gzugs med ces pa ni chos sku'o/ /gzugs bzang dam pa ni longs sku'o/ /sna tshogs gzugs can yid las skyes//gzugs rnams thams cad snang ba'i dpal/ /gzugs brnyan ma lus 'chang ba po/ /zhes pa ni sprul pa'i sku'o/ /yang na yid las skyes zhes pa ni rnal 'byor spyod pa'i lta ba'o/ /mtshungs pa med cing che bar grags/ /zhes pa ni 'dra ba med cing kun la khyab pa'i don no//khams gsum ni 'dod khams la sogs pa'o/ /dbang phyug ni de la mnga' brnyes pa'o/ /'phags lam ni yan lag brgyad do/ /mtho la gnas zhes pa ni sa bcu gcig pa'o/ /dar ba chen po zhes bya ba ni rgyas pa ste yon tan thams cad dang ldan pa'o/ /chos zhes bya ba ni 'khor 'das thams cad do//tog ces pa ni de dag gi rtse mor gyur pa'o/ /'jig rten gsum zhes pa ni 'dod khams la sogs pa'o/ /gzhon lus gcig ces pa ni 'jam dpal gzhon nur gyur pa'o/ /gnas brtan rgan po skye dgu'i bdag /ces pa ni 'phags pa dgra bcom pa'i sgo nas 'gro ba'i don byed pa'o//sum cu rtsa gnyis zhes pa ni bdun shin tu mtho ba dang / sor mo ring ba dang / rting pa yangs pa dang / sku che zhing drang ba dang / yan lag gi spu g.yas phyogs su 'khyil pa dang / zhal mdzod spus brgyan pa la sogs pa sum cu rtsa gnyis kyis brgyan pa'o//sdug gu 'jig rten gsum na mdzes/ /zhes pa ni sen mo zangs kyi mdog ltar dmar ba la sogs pa dpe byad bzang po brgyad cu dang ldan pa'o/ /'jig rten zhes pa ni 'khor ba rang bzhin med par shes pa'o/ /legs zhes pa ni mya ngan las 'das pa rang bzhin med par shes pa'o//slob dpon zhes pa ni ye shes sems dpa'o/ /'jig rten slob dpon 'jigs pa med/ /ces pa ni 'gro ba rnams kyi gtso bor gyur pa'o/ /mgon dang skyob pa ni mya ngan las 'das pa'o/ /'jig rten ni 'khor ba'o/ /yid gcugs pa zhes bya ba ni 'gro ba la mdzes pa'o//skyabs dang zhes bya ba ni gdul bya ma lus pa'o/ /skyob pa zhes bya ba ni 'dul byed do/ /bla na med ces bya ba ni do zla dang bral ba ste ye shes sems dpa'o/ /'o na gdul bya ji tsam gyi don byed ce na/ nam mkha'i mtha' la longs spyod pa/ /zhes bya ste nam mkhas gar khyab pa'i gdul bya la don bya ba'i tha tshig go//thams cad mkhyen pa'i ye shes mtsho ni ji snyed pa mkhyen pa'i ye shes so/ /nges 'gro ba'i don byed pa ni/ ma rig sgo nga'i sbubs 'byed pa/ /zhes bya ste ma rig pa ni las rgyu 'bras dang / dkon mchog dang bden pa dag yod par mi shes te/ thar pa dang mya ngan las 'das pa la sgrib pas sgo nga'i sbubs dang 'dra'o/ /'byed pa zhes pa ni ma rig pa'i ling tog sel bar byed ces bya ba'i tha tshig go/ /srid pa ni gsum mo/ /dra ba ni ma rig pa'o/ /'joms pa ni rlag par byed pa'o//ma rig pa 'ba' zhig brlag par ma zad kyi/ nyon mongs pa ma lus pa zhi bar byed do/ /'khor ba ni skye rga na 'chi bzhi'o/ /rgya mtsho ni rgal bar dka' ba'o/ /pha rol phyin pa ni mya ngan las 'das pa'o/ /ye shes ni ye nas gnas pa'i don shes pa'o/ /dbang bskur ni de la dbang thob pa'o//cod pan ni yang dag par rdzogs pa'i sangs rgyas rgyan du thogs pa ste/ rnam par snang mdzad mgo la khur ba'o/ /sdug bsngal gsum zhes pa ni/ 'du byed kyi sdug bsngal dang / 'gyur ba'i sdug bsngal dang / sdug bsngal gyi sdug bsngal lo/ / sdug bsngal zhes pa ni brgyad do/ /zhi zhes pa ni de las grol ba'o/ /gsum sel zhes pa ni lus ngag yid gsum gyi dag pa'o/ /mtha' yas zhes pa ni ma lus pa'o/ /grol gsum thob ces pa ni sku gsum mo/ /sgrib pa kun zhes pa ni nyon mongs pa'i sgrib pa dang shes bya'i sgrib pa'o//nges par grol zhes pa ni dag pa'o/ /mkha' ltar mnyam pa nyid la gnas/ /nyon mongs dri ma kun las 'das/ /zhes pa ni mnyam gzhag go/ /dus gsum dus med rtogs pa po/ /zhes pa ni rjes thob bo/ /sems can kun zhes pa ni 'gro ba ris drug go/ /gtso bo zhes pa ni sangs rgyas so//yon tan thod can rnams kyi thod/ /ces pa ni sa bcu'i byang chub sems dpa'o/ /thod ces pa de rnams kyi thod du gyur pa ye shes sems dpa'o/ /lus zhes pa ni gzugs so/ /kun zhes pa ni sgra dang dri la sogs pa'o/ /las ni rnam grol ba zhes pa de dag thams cad las 'das pa ste/gang gis nga la gzugs su mthong / /gang gis nga la sgrar shes pa/ /log par rtog pa zhugs pa ste/ /skye bo de yis nga mi mthong / /zhes pa lta bu'o/ /nam mkha'i lam la rab gnas pa ni stong pa nyid kyi don la ma yengs pa'o/ /de ltar ye shes sems dpa' de gzhan don mdzad pa'i dpe ni/yid bzhin gyi nor bu rin po che dang dpag bsam gyi shing dang bum pa bzang po dang 'dra ba'i sgo nas 'gro ba'i don byed pas ni che ba'i mchog ces bya'o/ /gzhan don 'ba' zhig gtso bor byed pas na/ byed pa sems can kun don byed/ / ces bya'o/ /phan 'dogs pa ni sems can la'o/ /mnyes gshin pa ni thugs brtse ba'o/ /bzang ngan shes pa ni slob ma'i snod kyi bye brag mkhyen pa'o/ /dus mkhyen pa ni bstan pa'i go rims mkhyen pa'o/ /thugs rjes ma khyab pa med pas na khyab bdag go/ /dam shes dam tshig ldan pa ni 'gro ba'i don byed pa las mi 'da' ba'o//dus shes zhes pa ni 'dul ba dang mi 'dul ba'i dus mkhyen pa'o/ /sems can dbang po shes zhes pa ni gdul bya'i dbang po rno rtul gyi bye brag mkhyen pa'o/ /rnam grol gsum bya ba ni nyan thos kyi theg pa dang / rang rgyal ba'i theg pa dang /byang chub sems dpa'i theg pa'o/ /mkhas pa po ni ye shes sems dpa'o/ /yon tan ldan zhing zhes pa ni rang gi don phun sum tshogs pa'o/ /yon tan zhes pa ni gzhan don phun sum tshogs pa'o/ /chos zhes pa ni 'khor 'das so/ /shes zhes pa ni rang bzhin med par shes pa'o//bkra shis zhes pa ni bar chod med pa ste lta ba'o/ /bkra shis 'byung zhes pa ni 'bras bu'o/ /bkra shis kun gyi zhes pa ni bsgom pa'o/ /bkra shis pa zhes pa ni spyod pa'o/ /grags pa ni 'gro ba la grags pa ste ye shes sems dpa'o/ /ji ltar zhe na snyan par grags pa de dge ba'o//tha dad kyi rtog pa las dbugs 'byin pas dbugs 'byin chen po'o/ /gdul bya thams cad la dga' ba dang bde ba skye bas na dga' ston che zhes bya'o/ /dga' chen rol mo chen po ste/ /zhes bya ba ni thabs sna tshogs kyis 'brid pa'o/ / bkur sti rim gro phun sum tshogs/ /zhes bya ba ni 'gro ba rnams kyi mchod pa'i gnas su gyur pa'o/ /mchog tu dga' zhes pa ni rdo rje lta bu'i ting nge 'dzin te sa bcu gcig pa'o/ /grags zhes pa ni bka' rgyud thams cad las so/ /bdag ces pa ni ye shes sems dpa'o//dpal zhes pa ni rang don thugs su chud pas rtog pa dag gi dpal lo/ /'gro ba'i don byed pas na thugs rje gzhan gyi dpal lo/ /mchog ldan zhes pa ni mchog ldan ni mtshan bzang po sum cu rtsa gnyis dang / dpe byad bzang po brgyad cu dang ldan pa'o/ /mchog ces pa ni theg pa chen po'o//sbyin zhes pa ni sa bcu'i byang chub sems dpa' la ston pa'o/ /gtso bo zhes bya ba ni sa bcu'i byang chub sems dpa'i dpon du gyur pa'o/ /skyabs kyi dam pa skyabs su 'os/ /zhes pa ni ye shes sems dpa' des/ 'jig rten dgra ste zhes pa 'khor ba las skyob pas na skyabs kyi dam pa yang yin la rab kyi mchog ces bya'o//'jigs pa ma lus sel ba ni 'khor ba'i chos so/ /gtsug phud ces pa ni ral pa spyi bor bcings pa'o/ /phud bu zhes pa ni rin po che'i thur mas gzer du btab pa'o/ /lcang lo can zhes pa ni skra lhag pa thur du 'phyang ba'o//ral pa muny+dza zhes pa ni ral pa bcings pa'i rtse mor bshig pa'o/ /cod pan thogs pa ni rigs kyi bdag po spyi bor khur ba'o/ /gdong lnga gtsug phud lnga dang ldan/ /zhes pa ni 'jam dpal zhal lnga pa'i dkyil 'khor gyis 'gro ba'i don byed pa'o/ /zur phud lnga pa'i zhes pa ni zhal lnga'i skra bye brag zur phud lnga'o//me tog thod ni rgyan du bcings pa'o/ /mgo zlum zhes pa ni skra dang kha spu bregs pa dang / dge slong gi cha lugs te tshangs par spyod pa zhes bya bar sbyar ro/ /brtul zhugs zhes pa ni nyan thos dang rang rgyal ba'i dka' thub bo/ / brtul zhugs mchog ces pa ni rig pa 'dzin pa'i spyod pa'o/ /dka' thub mthar phyin dka' thub che/ /zhes pa ni bcu gnyis so/ /de ltar spyod pa'i gang zag gang yin snyam pa la/ gau ta ma zhes smos te shAkya thub pa'o/ /gnas phun sum tshogs pa ni gtsang gnas dam pa zhes bya ste/rgyal po'i khab bya rgod kyi phung po'i ri la sogs pa'o/ /bram ze zhes pa ni legs skyes kyi gzugs so/ /tshangs pa zhes pa ni btsun mo'i dbu ma'o/ /tshangs pa che zhes pa ni bsam gtan dang po'i lha ste sdig pa mi dge ba'i chos las tshangs pa'o/ /mya ngan 'das pa tshangs pa thob/ /ces pa ni rdo rje lta bu'i ting nge 'dzin gnyis pa'o//grol ba zhes pa ni 'khor ba las so/ /thar pa ni mya ngan las 'das pa'o/ /rnam grol lus ni bde bar gshegs pa'i sku'o/ /rnam zhes pa ni tha dad kyi rtog pa las grol ba'o/ /zhi zhes pa ni nyon mongs pa'i sgrib pa'o/ /zhi ba nyid ces pa ni shes bya'i sgrib pa'o//mya ngan 'das zhi zhes pa ni byang chub sems dpa'o/ /mya ngan 'das zhes pa ni sangs rgyas so/ /legs par mya ngan 'das dang nye/ /zhes pa ni nyan thos dang rang rgyal ba'o/ /bde sdug sel zhes pa ni 'khor 'das kyi mtha' las 'das pa'o/ /mthar gyur pa zhes bya ba ni blo'i yul ma yin pa'o//chags bral zhes pa ni 'dod pa dang bral ba'o/ /lus las 'das pa po zhes pa ni zag bcas kyi phung po mi mnga' ba'o/ /thub pa med pa zhes bya ba ni mi 'jigs pa bzhi dang ldan pa'o/ /dpe med pa zhes bya ba ni chos kyi sku ste mtha' dang bral ba'o/ /de lta bu'i don de rig pa'i shes pa'i yul du mi mngon blo'i yul du mi snang lung gis kyang gsal bar mi nus pa'o//mi 'gyur zhes pa ni rgyun gyis rtag pa'o/ /kun du 'gro zhes pa ni sna tshogs su shar ba'o/ /khyab pa po ni ye shes sems dpa'o/ /phra zhing zhes pa ni rtogs par dka'o/ /zag med ces pa ni nyon mongs pa dang bral ba'o//sa bon bral zhes pa ni ma rig pa dang bral ba'o/ /rdul med ces pa ni chos sku'o/ /rdul bral zhes pa ni longs sku'o/ /dri ma med pa ni sprul sku'o/ /nyes pa spangs pa skyon med pa/ /zhes pa ni ye shes sems dpa'o/ /shin tu sad pa zhes pa ni smon lam gyi mthu sad pa'o//sad pa'i bdag ces pa de 'gro ba'i don la sbyor ba'o/ /ji ltar sbyor zhe na/ kun shes pa ni ji snyed pa mkhyen pa'o/ /kun rig ces pa ji lta ba mkhyen pa'o/ /dam pa zhes pa dbyer mi phyed pa'o/ /rnam par shes pa chos nyid 'das/ /zhes pa rtog dpyod dang bral ba'o//ye shes gnyis med tshul 'chang ba/ /zhes pa ni rig stong dbyer med do/ /rnam par rtog med lhun gyis grub/ /ces pa ni dngos po'i 'dug tshul lo/ /dus gsum sangs rgyas zhes pa ni 'das pa dang / ma 'ongs pa dang da ltar ro/ / las byed pa zhes bya ba ni sangs rgyas kun gyi phrin las byed pa'o/ /sangs rgyas thog ma tha ma med/ /ces pa ni thog ma skye bas stong pa/ tha ma 'gags pas stong pa'o/ /dang po'i sangs rgyas zhes pa ni chos kyi sku ste/ rgyu med pa zhes bya ba rgyu rkyen mtha' dag dang bral ba'o/ / ye shes mig gcig dri ma med/ /ces pa ni ye shes kyi spyan dang ldan pa'i longs sku ste/ dri ma med ces pa theg pa chen po ston pa'o/ /ye shes lus can de bzhin gshegs pa sprul pa'i sku ste/ tshig gi dbang phyug smra ba che/ /zhes pa ni drang don gyi tshig la mkhas pa'o/ /smra ba'i skyes mchog smra ba'i rgyal//zhes pa ni nges pa'i don gyi tshig la mkhas pa'o/ /smra ba'i dam pa mchog gi gnas/ /zhes pa ni drang don nges don gnyis la mkhas pa'o/ /smra ba'i seng ge zhes pa ni gang zag gis kyang zil gyis mi non pa'o/ /mtshungs pa med ces pa ni 'gran zla med pa'o//kun du zhes pa ni 'gro ba la'o/ /mchog tu dga' zhes pa bde ba bskyed pa'o/ /gzi brjid phung po blta na sdug /ces pa ni yid du 'ong ba'o/ /'od bzang 'bar ba dpal gyi be'u/ /zhes pa ni rnam par mi rtog pa'i thugs so/ /lag na 'od 'bar snang ba po/ /zhes pa ni sku'i cha lugs 'gro ba la ston pa'o//sman pa che mchog dang 'dra bar 'gro ba'i zug rngu 'byin pas bla na med pa'o/ /sman rnams ma lus ljon pa'i shing / /zhes pa ni chos kyi phung po brgyad khri bzhi stong ngo / /nad do cog ces pa ni nyon mongs pa brgyad khri bzhi stong ngo / /dgra che ba ni 'joms par byed pa'o//sdug gu 'jig rten gsum gyi mchog /ces pa ni 'jig rten gsum gyi 'dul byed du gyur pa'o/ /dpal ldan rgyu skar dkyil 'khor zhes pa ni dpal ldan rgyu skar gyi dkyil 'khor gyi sgo nas 'gro ba'i don byed pa'o/ /phyogs bcu'i zhes pa ni gnas so/ /nam mkha'i zhes pa ni rgya'o//mthar thug pa zhes pa ni dus so/ /rgya de srid du/ chos kyi rgyal mtshan legs par 'dzugs/ /zhes pa ste gdul bya rnams dge ba la dgod do zhes pa'i don to/ /'gro na zhes pa ni 'gro ba rnams so/ /gdugs gcig ces pa ni tha dad kyis gdung ba'i tshad pa las skyob pa'o/ / gcig ces pa ni 'gran zla med pa'o/ /yangs pa zhes pa ni kun la khyab pa'o/ /byams pa zhes pa ni sems can thams cad bde ba dang ldan par 'dod pa'o/ /snying rje zhes pa ni 'gro ba thams cad sdug bsngal dang bral bar 'dod pa'o/ /dkyil 'khor can zhes pa de gnyis dang mi 'bral ba'o//dpal ldan zhes pa ni gzugs sku gnyis so/ /pad+ma zhes pa skyon gyis ma gos pa'o/ /gar gyi bdag ces pa dper na gar ji ltar byas kyang lus las mi gzhan pa de bzhin du ye shes sems dpa' de yang mdzad spyod ci mdzad kyang 'gro ba'i don las mi 'da' ba'o/ / khyab bdag chen po ni bshad zin to/ /rin chen ni 'dod dgu 'byung ba'o/ /gdugs zhes pa ni gdung ba las skyob pa'o/ /sangs rgyas kun gyi gzi brjid che/ /zhes pa ni kun la snang ba'o/ /sangs rgyas kun gyi sku 'chang ba/ /zhes pa ni sku gsum dang ldan pa'o/ /sangs rgyas kun gyi rnal 'byor che//zhes pa ni bden pa ya ma bral ba'o/ /sangs rgyas kun gyi bstan pa gcig /ces pa ni skye ba med pa'i ngo bor gcig pa'o/ /rdo rje rin chen zhes pa ni rin po che'i dbu rgyan dang rdo rje thod dang ldan pas na dbang bskur dpal zhes bya'o/ /rin chen kun bdag dbang phyug ces pa ni 'dod dgu 'byung ba la dbang thob pa'o//'jig rten dbang phyug ces pa ni spyan ras gzigs kyi gzugs kyis so/ /kun gyi bdag ces pa ni gdul bya'i don byed pa'o/ /rdo rje 'chang ba zhes pa ni phyag na rdo rje'o/ /kun gyi rje zhes pa ni 'jam dpal lo/ /sangs rgyas kun gyi thugs che ba//sangs rgyas kun gyi thugs la gnas/ /zhes pa ni phyag na rdo rje'i ngo bo bshad pa'o/ /sangs rgyas kun gyi sku che ba/ /zhes pa ni 'jam dpal gyi ngo bo bshad pa'o/ /sangs rgyas kun gyi gsung yang yin/ /zhes pa ni spyan ras gzigs kyi ngo bo bshad pa'o//rdo rje nyi ma snang ba che/ /rdo rje zla ba dri med 'od/ /ces pa ni bklag pa'i thabs te thabs dang shes rab kyi ngo bo bshad pa'o/ /bklag pa'i thabs ni gnyis te dkyil 'khor 'khor lo'i tshul du gdon pa dang / lha rkyang ba'i tshul du gdon pa'o/ /dkyil 'khor gyi tshul gdon pa ni/ye shes sems dpa'i dkyil 'khor nas ji ltar 'byung ba bzhin bskyed la/ yas rkan thabs kyi rang bzhin zla ba'i dkyil 'khor du bskyed/ mas rkan shes rab kyi rang bzhin nyi ma'i dkyil 'khor du bskyed la/ lce zag pa med pa'i rang bzhin rdo rjer bskyed de dbyangs yig dang gsal byed kyi bar nas gdon par bya'o//cig shos kyang de dang 'dra'o/ /chags bral zhes pa ni mtshan nyid kyi theg pa'o/ /chags pa che zhes pa ni sngags kyi theg pa'o/ /la sogs pa'i don ni gnyis ka bsdus pa'i don to/ / kha dog sna tshogs zhes pa ni theg pa sna tshogs kyis 'gro ba'i don byed pa'o/ /rdo rje zhes pa ni stong pa nyid kyi don to/ /skyil krung zhes pa ni stong pa nyid la mnyam par gzhag pa'o/ /rdzogs sangs rgyas zhes pa ni de'i sgo nas mya ngan las 'das pa thob pa'o/ /sangs rgyas 'gro ba'i chos 'dzin pa ni 'gro ba'i don du gzugs sku gnyis shar ba'o//dpal ldan pad+ma sangs rgyas skyes/ /zhes pa ni 'khor bar gnas kyang skyon gyis ma gos pa'o/ /kun mkhyen zhes pa ni ji snyed pa mkhyen pa'i ye shes so/ /mdzod 'dzin zhes pa ni ji lta ba mkhyen pa'i ye shes so//rgyal po zhes pa ni 'khor 'das kyi gtso bor gyur pa'o/ /sgyu 'phrul sna tshogs zhes pa ni thabs du ma dang ldan pa'o/ /chos zhes pa ni sangs rgyas kyi chos ma 'dres pa bco brgyad dang / stobs dang mi 'jigs pa la sogs pa dang ldan pa'o/ /de lta bu de su la ldan zhe na/ sangs rgyas rig sngags 'chang zhes smos te/ spong ba phun sum tshogs pa dang / ye shes phun sum tshogs pa dang ldan pa'i ye shes sems dpa' la ldan zhes pa'i don to/ /rdo rje rnon po ral gri che/ /zhes pa ni rtags dang don to/ /rtags ni g.yas pa'i phyag mtshan ral gri'o/ / don ni rdo rje ste stong pa nyid do/ /rnon po ni rtog pa ma lus pa gcod pa'o/ /stong pa nyid kyi don de ral gri dang 'dra bas na ral gri'o/ /thogs zhes pa ni 'chang ba'i don to/ /yi ge mchog ste rnam par dag /ces pa yang rtags dang don to/ /rtags ni shes rab kyi pha rol tu phyin pa'i po ti bsnams pa'o//don ni yi ge mchog ces pa ste a'o/ /rnam par dag ces pa ni skye ba med pa'o/ /theg pa chen po zhes pa ni byang chub sems dpa'i lam 'bras bu dang bcas pa'o/ /sdug bsngal gcod ces pa ni 'khor ba las sgrol ba'o/ /mtshon cha chen po zhes pa ni ral gri'o//rdo rje chos zhes pa ni po ti'o/ /rdo rje zab mo zhes pa ni thugs so/ /dzi na zhes pa ni gsung ngo / /dzika ces pa ni sku'o/ /rdo rje blo gros zhes pa ni stong pa nyid shes pa'i shes rab po/ /don bzhin rig ces pa ni mtha' dag shes pa'o/ /pha rol phyin pa kun zhes pa ni sa bcu'o/ / rdzogs pa zhes pa ni thugs su chud pa'i don to/ /sa rnams zhes pa ni dang po nas sa bcu gcig pa'i bar ro/ /kun zhes pa ni nyan thos dang rang rgyal ba'i sa'o/ /rgyan dang ldan zhes pa ni de dag thams cad ye shes sems dpa' la ldan pa'o/ /rnam par dag pa zhes pa ni don dam pa'i bden pa'o//bdag med chos zhes pa ni gang zag gi bdag dang chos kyi bdag dang bral ba'o/ /yang dag ye shes zhes bya ba ni chos kyi dbyings kyi ye shes so/ /zla 'od bzang zhes pa ni longs spyod rdzogs pa'i sku'o/ /brtson chen zhes pa ni brtson 'grus dang ldan pa ste sprul pa'i sku'o//sgyu ni stong pa nyid do/ /'phrul ni sna tshogs su shar ba'o/ /dra ba ni gnyis su med pa'i don to/ /rgyud kun gyi ni zhes pa ni gnyis te/ tshig gi rgyud dang / don gyi rgyud dang / gnyi ga'i rgyud dang / rnal 'byor gyi rgyud dang / rnal 'byor bla na med pa'i rgyud de/ de dag thams cad kyi rtsa ba rgyud yin pas na/rgyud kun gyi ni bdag po mchog /ces bya'o/ /don gyi rgyud la drug ste/ rgyud kyi ngo bo dang / nges tshig dang / dbye ba dang / mtshan nyid dang / rnam grangs dang / las so/ /de dag thams cad la mnga' brnyes pa de ni ye shes sems dpa' ste/ bdag po mchog ces bya'o//rdo rje'i gdan zhes pa ni lha'i gdan bskyed pa'i cho ga yan lag dang bcas pa bstan te/ rdo rje ni stong pa nyid do/ /ma lus ldan zhes pa ni pad+ma dang nyi ma dang zla ba'i gdan dang ldan pa'o/ /ye shes sku rnams ma lus 'chang / /zhes pa ni ye shes rnam pa lnga/sku rnams zhes pa ni rigs lnga'o/ /ma lus mchog ces pa ni 'khor dang bcas pa'o/ /de ltar rigs lnga 'khor dang bcas pa'i sgo nas ye shes sems dpa' des 'gro ba'i don byed do zhes bya ba'i tha tshig go/ /da ni sa bcu'i byang chub sems dpa'i sgo nas 'gro ba'i don byed pa bstan par bya ste/kun du bzang po dang / blo gros bzang po zhes pa/ 'jam dpal dang / sa'i snying po 'gro ba 'dzin pa spyan ras gzigs kyi tshul gyis kyang 'gro ba'i don byed pa'o/ /sangs rgyas kun gyi snying po ni ye shes rnam pa lnga dbyer mi phyed pa ste chos kyi dbyings kyi ye shes so//che zhes pa ni 'gran zla med pa'o/ /de lta bu'i ye shes de las sprul pa'i 'khor lo sna tshogs 'chang zhes te/ lha bsdus rgyas kyi bye brag sna tshogs su snang nas 'gro ba'i don byed ces bya ba'i tha tshig go/ /dngos po kun zhes pa ni 'khor 'das thams cad do//rang bzhin zhes pa ni stong pa nyid do/ /mchog ces pa ni dbyer mi phyed pa'o/ /dngos po kun gyi rang bzhin 'dzin/ /zhes pa ni stong pa nyid kyi don te mnyam gzhag gis 'dzin pa'o/ /skye med chos te zhes pa ni de ltar mnyam gzhag la gang du yang ma grub kyang rjes thob la sna tshogs su shar bas sna tshogs don byed ces bya'o//chos kun ngo bo nyid ces pa ni zung 'jug gi ngo bo ste sgyu ma lta bu'o/ /'chang ba zhes bya ba ni thugs su chud pa'i don to/ /shes rab chen po zhes pa ni ye shes sems dpa'o/ /skad cig la chos kun khong du chud pa'o zhes bya ba ni/chos thams cad rang bzhin med par skad cig gis thugs su chud pa'o/ /chos kun zhes pa ni 'khor 'das thams cad do/ /mngon par rtogs zhes pa ni skye med du 'dzin pa las kyang grol ba'o/ /thub pa med pa ni bdud bzhi'o/ /blo mchog ces pa ni de kho na nyid mkhyen pa'i ye shes so//'byung ba sel zhes pa ni 'khor ba las sgrol ba'o/ /mi g.yo zhes pa ni 'gro ba'i don las mi g.yo ba'o/ /rab tu dang ba'i bdag ces pa ni 'gro ba rnams kyi yid du 'ong ba'o/ /rdzogs sangs rgyas pa'i byang chub 'chang / /zhes pa ni gzhan don phun sum tshogs pa'o//sangs rgyas kun gyi mngon sum pa/ /zhes pa ni chos nyid kyi don mngon sum du thugs su chud pa ste/ dper na sgyu ru ra rlon pa lag mthil du bzhag pa lta bu'o/ /ye shes me lce 'od rab gsal/ /zhes pa ni gnyen po ye shes me dang 'dra bas tha dad kyi rtog pa thams cad sreg par byed pa'o//'dod pa'i don grub ces pa ni rang gi don dang gzhan gyi don grub pa'o/ /dam pa ste zhes pa ni sa bcu gcig pa mthar phyin pa'o/ /ngan song thams cad rnam sbyong ba/ /zhes pa ni 'gro ba thams cad kyi rgyud dag par byed pa'o/ /'dir nyams su blang ba'i rim par yang shes par bya ste/sku gdung gdab pa dang / ro bsreg pa dang / rab tu gnas pa dang / sbyin sreg dag kyang 'dir shes par bya bas na/ ngan song thams cad rnam sbyong ba/ /zhes bya'o/ /sems can kun gyi mgon byed pas na mchog ces bya'o/ / sems can thams cad rab grol byed/ /ces pa ni go sla'o/ /nyon mongs zhes pa ni brgyad khri bzhi stong ngo / /g.yul zhes pa ni 'thab pa'i sa'o/ /gcig dpa' ba zhes pa ye shes sems dpa'o/ /mi shes pa ni ma rig pa'o/ /dgra ni 'dod chags dang zhe sdang ngo / /dregs pa ni nga rgyal lo//'joms zhes pa ni sel bar byed pa'o/ /dpal ldan zhes pa ni gzugs sku gnyis so/ /blo dang zhes pa ni rig pa ste chos sku'o/ /sgeg par ldan zhes pa ni 'khor ba las 'das pa'o/ /brtan po mi sdug gzugs 'chang ba/ /zhes pa ni khro bo'i gzugs 'di dag gis lag pa brgya po kun bskyod cing /gom pa'i stobs kyis ci rigs pa'i gar bya'o/ /dpal ldan lag pa brgyas gang la/ /zhes pa ni yan lag gi khyad par ro/ /nam mkha' khyab par gar byed pa/ /zhes pa ni byed pa'i khyad par ro/ /sa yi dkyil 'khor bzhi yi khyon//zhes pa ni gnas kyi khyad par ro/ /rkang pa ya gcig mthil gyis gnon/ /zhes pa ni 'dug stangs kyi khyad par ro/ /rkang mtheb sen mo'i khyon gyis kyang / /tshangs pa'i yul sa rtse nas gnon/ /zhes pa ni che ba'i khyad par ro/ /de ltar ye shes sems dpa' de khro ba'i gzugs khyad par de dag dang ldan pas 'gro ba'i don byed do zhes bya ba'i tha tshig go//'di ni sgrub pa po dag gis bgegs nye bar zhi bar bya ba'i cho gar shes par bya ste/ khro bo gdong brgya pa'i nga rgyal dang ldan par bya ste/ khro bo'i bstod pa dag kyang bya ste/ g.yas brkyang dang / g.yon brkyang dang / zlum po dang / sa ga dag kyang bya ste/ phyi nas ni ci bder cho ga la 'jug par bya'o/ /don gcig gnyis med chos kyi don/ /zhes pa la mtha' bzhi dang bral ba'i don ni chos kyi don no/ /dam pa'i don zhes pa ni rnam grangs dang bral ba'i don dam pa'o//'jigs pa med ces pa ni 'khor ba'i skyon gyis ma gos pa'o/ /rnam rig sna tshogs zhes pa ni gdul bya thams cad kyi rgyud mkhyen pa'o/ /gzugs don zhes pa ni gang dang gang gis 'dul ba la de dang de'i gzugs su sprul nas 'dul ba'o/ / rnam shes sna tshogs rgyud dang ldan/ /zhes pa ni sems can tha dad kyi sems kyi rgyud mkhyen cing mkhyen pa tsam du yang ma zad de/ dngos don ma lus rnams la dga'/ /zhes pa ni stong pa nyid kyi don 'ba' zhig ston to zhes bya ba'i don to/ /stong pa nyid la dga' zhes pa ni/ stong pa nyid la dga' ba'i gang zag la 'dod chags blo zhes pa ste snying rje chen po dang ldan pa zhes bya ba'i don to/ /'o na snying rjes 'dod chags dang ma bral bas 'khor bar 'gyur ro zhe na/ srid pa'i 'dod chags la sogs 'das/ /zhes pa ste 'dod chags rang rgyud pa spangs pa'o/ / srid gsum zhes pa ni 'dod pa'i khams dang / gzugs kyi khams dang gzugs med pa'i khams kyi srid pa'o/ /dga' ba chen po pa zhes bya ba ni de dag mgu bar byed pa'o/ /sprin dkar dag pa bzhin du dkar/ /'od bzang ston ka'i zla ba'i 'od/ /nyi ma 'char ka'i dkyil ltar mdzes/ / zhes pa ni/ skyon gyis ma gos pa'i dpe bstan pa'o/ /sen mo'i 'od ni shas cher dmar/ /chod pan bzang po mthon ka'i rtse/ /skra mchog mthon ka chen po can/ /zhes pa ni mtshan dang dpe byad kyi sgo nas bstod pa'o/ /nor bu chen po 'od chags dpal/ /zhes pa ni dpe'i sgo nas bstod pa'o//sangs rgyas sprul pa'i rgyan dang ldan/ /zhes pa ni gling bzhi bye ba phrag brgyar sprul ba'i skur ston pa'o/ /'jig rten khams brgya kun bskyod pa/ /zhes pa ni 'khor ba las skyod par byed pa'o zhes bya ba'i tha tshig go/ /rdzu 'phrul rkang pa'i stobs chen ldan/ /zhes pa ni mos pa'i ting nge 'dzin la sogs pa rdzu 'phrul gyi rkang pa bzhis 'gro ba'i don byed pa'o//de nyid ces pa ni ye shes sems dpa'o/ /dran pa chen po 'chang zhes pa ni ye shes rnam pa lnga dang ldan pa'o/ /dran pa bzhi po zhes pa ni lus dran pa nye bar gzhag pa dang / sems dran pa nye bar gzhag pa dang /tshor ba dran pa nye bar gzhag pa dang / chos dran pa nye bar gzhag pa'o/ /ting 'dzin rgyal zhes pa ni rdo rje lta bu'i ting nge 'dzin to/ /byang chub yan lag ces pa ni byang chub kyi yan lag bdun te dran pa yang dag byang chub kyi yan lag la sogs pa'o/ /me tog ces pa ni mdzes pa'i don gyis so//spos zhes pa ni yid tshim par byed pa'o/ /de bzhin gshegs pa'i yon tan mtsho/ /zhes pa ni stobs dang mi 'jigs pa dang / sangs rgyas kyi chos ma 'dres pa dang ldan pa'o/ /lam gyi yan lag brgyad tshul rig /ces pa ni 'phags pa'i lam yan lag brgyad de yang dag pa'i lta ba dang /yang dag pa'i rtog pa dang / ngag dang / las kyi mtha' dang / 'tsho ba dang / rtsol ba dang / dran pa dang / ting nge 'dzin dang brgyad do/ /rig ces pa ni thugs su chud pa'i don to/ /yang dag sangs rgyas lam rig pa//zhes pa ni don phyin ci ma log par rang gi thugs su chud nas/ sems can kun la shas cher chags/ /zhes pa ste 'gro ba la ston pa'o/ /nam mkha' lta bur chags pa med/ /ces pa ni 'gro ba'i don byed kyang skyon gyis ma gos pa'o/ /sems can kun gyi yid la 'jug /ces pa ni 'gro ba dang mthun pa'i sku ston pa'o/ /sems can kun gyi yid ltar mgyogs/ /zhes pa ni 'gro ba'i don la myur ba'o/ /sems can kun gyi dbang don shes/ /zhes pa ni gdul bya'i rgyud dang dbang po'i bye brag mkhyen pa'o/ / sems can kun gyi yid 'phrog pa/ /zhes pa ni gdul bya'i yid 'brid par byed pa'o/ /phung po lnga zhes pa ni gzugs dang / tshor ba dang / 'du shes dang / 'du byed dang / rnam par shes pa'i phung po dang lnga'o/ /de nyid shes zhes pa ni mi rtag pa dang / sdug bsngal ba dang / bdag med par mkhyen pa'o/ /rnam dag phung po lnga 'chang ba/ /zhes pa ni zag pa med pa'i phung po lnga dang ldan pa'o/ /nges 'byung kun gyi mtha' la gnas/ /zhes pa ni rdo rje lta bu'i ting nge 'dzin brnyes pa'o/ /nges par 'byung ba kun la mkhas/ /zhes pa ni lam mtha' dag mkhyen pa'o//nges 'byung kun gyi lam la gnas/ /zhes pa ni rang gis spyad pa'o/ /nges par 'byung ba kun ston pa/ /zhes pa ni de lta bu'i lam de gzhan la ston pa'o/ /yan lag bcu gnyis zhes pa ni rten 'brel bcu gnyis so/ /srid rtsa bton zhes pa ni ma rig pa dag par byed pa'o//dag pa rnam pa bcu gnyis ldan/ /zhes pa ni rten 'brel bcu gnyis dag pa'o/ /bden bzhi'i tshul gyi rnam pa can/ /zhes pa ni sdug bsngal gyi bden pa dang / kun 'byung gi bden pa dang / 'gog pa'i bden pa dang / lam gyi bden pa dag thugs su chud pa'o/ /shes pa brgyad po rtogs pa 'chang //zhes pa ni rnam par shes pa'i tshogs brgyad rnam par dag pa'o/ /bden don rnam pa bcu gnyis 'chang / /zhes pa ni bden pa bzhi rnam pa bcu gnyis tshul du mkhyen pa'o/ /de nyid rnam pa bcu drug rig /ces pa ni stong pa nyid bcu drug gi don thugs su chud pa'o//rnam pa nyi shus byang chub pa/ /zhes pa ni phung po lnga po re re la yang mi rtag pa dang / sdug bsngal ba dang / stong pa dang / bdag med pa bzhi bzhi ste nyi shu'o/ /rnam pa sangs rgyas kun rig mchog /ces pa ni 'khor 'das kyi chos thams cad khong du chud pa'o/ /sangs rgyas kun gyi sprul pa'i sku//bye ba dpag med 'gyed pa po/ /zhes pa ni lha rkyang pa dang / dkyil 'khor gyi 'khor lo dang / khro bo dang zhi ba'i sku bsam gyis mi khyab pa dang / gang dang gang mos pa la de dang de'i sku ston pa'o/ /skad cig thams cad mngon par rtogs/ /zhes pa ni chos nyid kyi don dus kyi mtha' skad cig gis rtogs pa'o//sems kyi skad cig don kun rig /ces pa ni sems can thams cad kyi rgyud thams cad skad cig gis khong du chud pa'o/ /theg pa sna tshogs thabs tshul gyis/ /'gro ba'i don la rtogs pa po/ /zhes pa ni theg pa sna tshogs zhes pa ni theg pa'i sgo bsam gyis mi khyab pa la bya ste/rgyas par dbye na brgyad khri bzhi stong dang / 'bring du dbye na gsung rab yan lag bcu gnyis dang / bstun sde snod gsum dang / theg pa rnam pa gsum dang / khyad par bla na med pa'i theg pa dang / mu stegs kyi theg pa yan chad 'dir shes par bya'o//de la mu stegs kyi lta ba la gnyis te/ chad par lta ba dang rtag par lta ba'o/ /de la 'dir slob dpon gyi mdo sde mya ngan las 'das pa'i rjes su 'brangs te/ rang bzhin gyis bdag dgag par bya ste/ ston pa gzegs zan pa dag bdag dngos po don dam par 'dod pa ste/'dus byas sam 'on te 'dus ma byas yin zhe na/ 'dus byas yin na mi rtag par 'gyur la 'dus ma byas yin na dngos po nyams par 'gyur ro/ /gtan tshigs lhag pa gzhan yang ston pa ser skya'i bdag rtag pa de dngos po zhig gam/ 'on te dngos med zhig kho bos dpyad par bya'o//gal te dngos med do zhe na/ 'o na bdag rtag pa nyams par 'gyur ro/ /gal te yang dngos po'o zhe na/ 'o na bdag rtag pa des don byed par 'gyur ram mi 'gyur zhe na/ gal te don byed par mi 'gyur zhe na/ gang don byed par mi nus pa de ni nam mkha'i me tog dang 'dra'o//gzhan yang don byed par 'gyur ro zhe na/ rim gyis byed dam cig car don byed/ rim gyis don byed na ni mi rtag par 'gyur la/ cig car don byed na nus pa chung ngu dag gis kyang dpa' bo'i bya ba byed par 'gyur ro/ /chad par lta ba dag kyang rigs par mi 'gyur te/chad nas 'byung bar 'gyur phyir dang / /snga phyi slu ba med pa'i phyir/ /chad pa'i rang bzhin du mi 'gyur te/ de bas na phyi ba dag rigs pa ma yin no/ /nang pa dag la rnam pa gsum ste/ nyan thos kyi theg pa dang / rang sangs rgyas kyi theg pa dang /byang chub sems dpa'i theg pa'o/ /nyan thos kyi theg pa ni gang zag gi bdag dri ma spangs nas chos kyi bdag gzung 'dzin don dam par 'dod de/ de la phyi rol gyi yul 'di rdul phra rab zlum sgong cha med pa mang po 'dus pa las/ gong bu rags pa grub par 'dod de/de dag kyang byis pa'i ngang tshul can du shes par bya ste/ rdul phra rab de dag 'byar ba dang bskor ba'am/ bar med par gnas kyang rung ste/ phyogs cha drug gis rnam par phye na/ rdul phra rab gcig kyang mi 'grub la/ gang gcig ma grub pa des ni du ma yang 'grub par mi 'gyur ro//de ltar gcig dang du ma ma grub na phyi rol gyi don yang med par 'gyur ro/ /rang rgyal ni/ phyi rol gyi don la gcig dang du mas gnod pas gtan med la/ nang 'dzin pa rig pa don dam par 'dod do/ /de dag kyang bden par mi 'gyur te/ yul ma grub pa'i yul du 'dzin pa'i shes pa ni nam yang rigs pa ma yin no//dper na dkar po ma grub par dkar por 'dzin pa'i shes pa ni skye mi srid de/ skyes bu lha sbyin la gang dag dbyug pa yod na des khyad par du byas pa'i dbyug pa can zhes 'dogs par rigs la/ gang dag dbyug pa med na lha sbyin dbyug pa can zhes mi rigs so//byang chub sems dpa'i theg pa la gnyis te/ rnal 'byor spyod pa dang / dbu ma pa'o/ /rnal 'byor spyod pa la gnyis te/ rnam bden pa dang / rnam brdzun pa'o/ /de la rnam bden pa'i lugs kyis dkar dmar gyi rnam pa sna tshogs 'di shes pa'i rnam par bden par 'dod de/gang zag dang chos kyi bdag dang bral ba'i shes pa don dam par 'dod de/ de nyid la yang dbye na gnyis te/ sna tshogs su snang yang shes pa gcig gi ngo bor bden par 'dod pa dang / snang yang du mar snang la bden yang du mar bden par 'dod pa dang gnyis so//dang po yang rigs pa ma yin te/ gal te yul dang shes pa gnyis/ /gcig gam 'on te tha dad yin/ /gal te gcig pa yin 'gyur na/ /rnam pa du mar yod pa'i phyir/ /shes pa'ang du mar thal bar 'gyur/ /yul dang shes pa tha dad na/ /nyan thos dag tu cis mi 'gro//gnyis pa'ang rigs pa ma yin te/ /yul la tshad mas gnod pa bzhin/ /rig pa dag la cis mi gnod/ /gzhan yang rnam pa'i 'khor lo 'di/ /'khrul pa'i shes pas gzung ba'am/ /'on te ma 'khrul ba yis gzung / /gal te 'khrul pas gzung 'gyur na//rnam bden pa yi dam bca' bud/ /ma 'khrul pa yis gzung 'gyur na/ /kun gyis bden pa mthong bar 'gyur/ /rnam par brdzun pa'i 'dod pa yang / /rnam pa gnyis su shes bya ste/ /tshu rol mthong ba'i rig pa dang / /mya ngan 'das pa'i ye shes so//mya ngan 'das pa'i ye shes la/ /rnam pa gnyis su shes bya ste/ /dri byas rang rig dag pa'o/ /dri ma dang bcas lugs kyis ni/ /rnam pa'i 'khor lo sna tshogs 'di/ /mnyam gzhag ngo la mi snang ste/ /rjes thob dag la snang bar 'dod/ /rang rig dag pa'i lugs kyis ni/ /mthong lam skyes pa'i rjes thogs la//rnam pa'i 'khor lo med par 'dod/ /myong ba tsam gyis rig pa de/ /gang yang 'thad pa ma yin te/ /gang yang rnam par rig pa pa/ /khyod kyi shes pa don dam de/ /skyes nas yod dam ma skyes par/ /gal te skyes nas yod pa na/ /rang las skye'am gzhan las skye//gal te rang las skye zhe na/ /rang nyid grub bam ma grub las/ /grub pa dag las skye mi dgos/ /ma grub pa la skye mi srid/ /gal te gzhan las skye zhe na/ /rtag pa'am ni mi rtag pa/ /rtag pa dag las skye zhe na/ /'gyur med phyir na rgyur mi btub/ /mi rtag pa las skye zhe na//mi rtag dus kyis bsdus pa'i phyir/ /'das dang ma 'ongs da ltar gsum/ /gang las skye ba dri bar bya/ /'das dang ma 'ongs rnam pa gnyis/ /med pa'i phyir na rgyur mi rung / /da ltar dag las skye zhe na/ /rgyu 'bras dus mnyam 'gyur ba'i phyir/ /bskyed bya skyed byed mi rigs te//skyes nas yod pa'i dam bca' nyams/ /gal te ma skyes yod ce na/ /ma skyes yod pa mi srid de/ /dper na nam mkha'i me tog bzhin/ /des na gdon gyis zin pa yi/ /rig pa dngos por 'dod pa dag /thar pa'i ming yang mi srid de//rang nyid phung bar byed du zad/ /dbu ma la yang gnyis yod de/ /chos rnams sgyu mar smra ba dang / /rab tu mi gnas smra ba'o/ /sgyu ma'i grub mtha' rigs min te/ /sgyu tshad mas ma grub dang / /sgyu ma yin phyir bden pa min/ /des na sgyu ma nyams par 'gyur/ /rab tu mi gnas 'dod gzhung ni//rnam pa gnyis su shes bya ste/ /don dam gshis kyi bden pa dang / /kun rdzob dag gi bden pa'o/ /don dam bden pa rnam pa gnyis/ /rnam grangs dang ni rnam grangs min/ /kun rdzob bden pa rnam gnyis te/ /yang dag pa dang log pa'o/ /'di dag grub mtha' mchog yin te//bla med gsang sngags theg pa yang / /de las gud na med phyir ro/ /'o na pha rol phyin pa dang / /gsang sngags theg pa khyad med dam/ /snyam du sems dpa'i gang zag la/ /don la khyad par rdul tsam med/ /thabs dang lam gyi bye brag la/ /khyad par bsam gyis mi khyab ste//de skad du yang / don gcig na yang ma rmongs dang / /thabs mang dka' ba med pa dang / /dbang po rnon po'i dbang byas pas/ /sngags kyi theg pa khyad par 'phags/ /zhes pa'o/ /de lta bu'i theg pa sna tshogs kyi sgo nas 'gro ba'i don byed pa po de yang ye shes sems dpa' khyod nyid yin no//theg pa gsum ni zhes pa ni nyan thos dang / rang rgyal ba dang / byang chub sems dpa'i theg pa'o/ /nges 'byung la zhes pa ni/ sa dang po'i bden pa tsam ni theg pa gsum gyis thob par smra la/ mthar thug bcu gcig pa'i ye shes ni khyad par bla na med pa'i theg pa kho nas thob pa'i phyir/theg pa gcig gi 'bras bur gnas/ /zhes pa'o/ /nyon mongs khams rnams dag pa'i bdag /ces pa ni 'khor ba'i 'bras bu dag par byed pa'o/ /las kyi khams ni zad byed pa ni 'khor ba'i rgyu dag par byed pa'o/ /chu bo rgya mtsho kun las brgal//zhes pa ni 'dod pa'i chu bo dang / srid pa'i chu bo dang / ma rig pa'i chu bo dang / bdag tu lta ba'i chu bo ste/ de dag rgya mtsho dang 'dra zhing rgal dka' bas na rgya mtsho zhes bya'o/ /kun las brgal zhes pa ni de dag kun las thar pa'o/ /thabs gang gis rgal zhe na/ sbyor ba'i dgon pa zhes bya ba ste sbyor ba'i bsod nams dang ye shes kyi tshogs zung du 'jug pa'o/ /dgon pa ni dgon pa zhes bya dben pa zhes bya stong pa zhes bya ste/ de ltar tshogs gnyis dang stong pa nyid bsgoms pa las byung zhes bya'o/ /nyon mongs zhes pa ni 'dod chags dang / zhe sdang dang / gti mug dang / nga rgyal dang / phrag dog dang / log par lta ba'o/ /nye ba zhes pa ni nye ba'i nyon mongs pa nyi shu ste 'di ltar khro ba dang / 'khon du 'dzin pa dang / 'chab pa dang / 'tshig pa dang / ser sna dang / /sgyu dang / g.yo dang / rgyags pa dang / ngo tsha med pa dang / khrel med pa la sogs pa'o/ /kun nyon mongs zhes pa ni nyon mongs pa can gyi yid do/ /bag chags bcas pa zhes pa ni kun gzhi'i rnam par shes pa'o/ /gtan spangs pa zhes pa ni de dag las grol ba'o/ /de ltar rang gi don thugs su chud nas 'gro ba'i don du snying rje chen po shes rab ces smos te/snying rje dang shes rab kyi sgo nas don yod par 'gro ba'i don byed pa'o/ /'du shes kun gyi don spangs shing / /zhes pa ni mtshan mar 'dzin pa las grol ba'o/ /rnam shes zhes pa ni 'dzin pa'i shes pa'o/ /don zhes pa ni phyi rol gyi yul lo//de ltar yul can gyi shes pa las grol bas na 'gog ces bya'o/ /sems can kun yid yul dang ldan/ /zhes pa ni gdul bya'i shes pa la lha'i skur snang ba'o/ /sangs rgyas kun gyi thugs rigs pa/ /zhes pa ni rnam par mi rtog pa'i ye shes kyi don khong du chud pa'o//sems can kun gyi yid la gnas/ /zhes pa ni rnam par mi rtog pa'i ye shes de 'gro ba thams cad kyi rgyud la gnas pa'o/ /de dag sems dang mthun par 'jug /ces pa ni 'gro ba de dag gi blo'i bye brag gi sgo nas chos ston pa'o/ /sems can kun yid tshims par byed//sems can kun gyi yid dga' ba/ /grub pa mthar phyin 'khrul pa med/ /ces pa ni 'gro ba'i don mthar byin pa'o/ /nor ba thams cad rnam par spangs/ /zhes pa ni log par rtog pa spangs pa'o/ /don gsum the tshom med pa'i blo/ / zhes pa ni dus gsum du yid gnyis dang bral ba'i blo dang ldan pa'o/ /kun don zhes pa ni 'gro ba thams cad kyi don byed pa ste/ grub mthas blo bsgyur ba byang chub sems dpa' man chad nas mu stegs yan chad kyi don byed do zhes bya ba'i tha tshig go/ /mu stegs kyi don ji ltar byed ce na/yon tan gsum gyi bdag ces smos te/ snying stobs dang rdul dang mun pa gsum gyis don byed pa'o/ /gzhan yang grub mtha' blo 'gyur ba dag gis don yang byed pas na kun don zhes bya'o/ /phung po lnga zhes pa ni gzugs dang / tshor ba dang / 'du shes dang 'du byed dang /rnam par shes pa'i phung po'o/ /phung po de dag chos gzhan du bzhag nas/ de dag dus gsum gyi chas gzhig na gang yang mi dmigs te rang bzhin med par 'gyur ro/ /'dir rgal ba 'on te dus gsum gyi chas gzhig na skad cig ma yod par 'gyur ro zhe na/ skad cig thams cad bye brag phyed/ /ces bya ba smos te skad cig ma yang dus gsum gyi chas gzhig na med par 'gyur ro/ /dper na rdul phra rab la phyogs kyi nyes pa yod pa bzhin no/ /skad cig gcig gis rdzogs sangs rgyas/ /zhes pa ni sa bcu pa nas sa bcu gcig pa'i bar la dus kyi mtha'i skad cig mas rtogs so zhes pa'i don to//yang na lha skad cig dran rdzogs kyis bskyed par shes par bya'o/ /sangs rgyas kun gyi rang bzhin 'chang / /zhes pa ni rdo rje lta bu'i ting nge 'dzin to/ /lus med ces pa ni rnam rtog gi lus dang bral ba ste chos kyi sku'o/ /lus te zhes pa longs spyod rdzogs pa'i sku'o//lus kyi mchog ces pa sprul pa'i sku'o/ /mtha' ni rtogs pa po zhes bya ste sku thams cad la mkhas pa'o/ /gzugs rnams sna tshogs kun du ston/ /zhes pa ni gang dang gang gis 'dul ba la de dang de'i gzugs kyis 'dul ba'o/ /nor bu chan por rin chen tog /ces pa ni dgos 'dod 'byung ba'i dpe bstan pa'o/ /sangs rgyas kun gyis rtogs bya ba/ /zhes pas ni mkhyen par bya ba'am shis par bya ba ste/ sangs rgyas byang chub bla na med/ /ces pa ni mi gnas pa'i mya ngan las 'das pa'o/ /de'i mtshan nyid ci 'dra zhe na/gsang sngags las byung yi ge med/ /ces pa ste blo'i yul thams cad dang bral ba'o/ /de lta bu'i skye ba med pa'i don de las skye ba'i cho 'phrul sna tshogs su 'char bas/ gsang sngags chen po rigs gsum pa/ /zhes smos te sku gsung thugs sna tshogs su shar ba'i don to//gsang sngags don kun skyed pa po/ /zhes pa ni don kun zhi ba dang / rgyas pa dang / dbang dang / drag po'o/ /de la zhi ba'i las ni rgyud 'di bris pa 'am/ bzung ba'am/ bcangs pa'am/ bklags pa tsam gyis mi mthun pa'i phyogs thams cad zhi bar 'gyur ba dang /rgyas pa'i las ni longs spyod la sogs pa 'phel ba dang bsod nams kyi phung po yongs su rgyas par 'gyur ba'o/ /dbang gi las ni gang dang gang 'dod pa de rengs pa dang 'gugs par byed do/ /drag po'i las ni gsad pa dang / bcad pa dang / mnan pa dang / gzir ba'i las byed de/ las de dag kyang 'khrul 'khor gyi sbyor bas kyang shes par bya'o/ /'khrul 'khor gyi rim pa ni 'di yin te/ ro'i ras sam zhing gi pags pa la/ nag po'i sgro rtsas smyu gu byas te grir shi ba'i khrag dang dug dang sbags te/ sngags pa gshin rje gshed kyi nga rgyal dang ldan pas mtshan phyed na kha lhor bltas te 'khor lo dag bri bar bya'o//thig bzhi'i le tshe dgu pa la/ /phyed phyed bgos pa'i sum cu gnyis/ /ma he'i lto bar bri bar bya/ /gnyis kyi bar du bsgrub bya gzhug /mA ra ya dang bcas pa bri/ /bsnyen pa'i 'khor lo 'di lta ste//'khor lo'i rtsibs ni bcu pa la/ /yi ge bcu pa bri bar bya/ /lte ba la ni bsgrub bya dgod/ /de dag la dgod pa'i sngags ni 'di yin te/ ya me do ru Na yo da ya/ ya da yo ni ra yak+She ya/ yak+She yats+tsha ni rA ma ya/ che ge mo mA ra ya phaT/oM trIHSh+T+w-iHwi kr-i tA na na hUM phaT ces pas bskor ro/ de'i rim pa ni 'di yin te/ rang gi nyes pas ma gos pa'i 'khor lo thod pa kha sbyor du gsal te dgug pa'i las de gong du song ba dang / gar sbyin bzang pos legs par sbyar te/ bsnyen pa rdzogs pa dang / mnan pa dang / gtub pa dang / sbyin sreg la sogs pa ci rigs pa brtsam par bya'o/ /yang na gsang sngags kyi don de dag thams cad bskyed pa ni ye shes sems dpa' khyod yin bya ba'i don to/ /thig ni drang po ste don ma nor ba'o/ /le ni kun la khyab pa'o//stong pa ni rang bzhin med pa'o/ /yi ge ni kun rdzob mtshon pa ste sems can thams cad do/ /rgya zhes pa ni bye brag gam du ma mtshon pa'i tshig go/ /rnam pa kun ldan zhes pa ni rnam pa mi 'dra ba la bya ste/ kun rdzob lha'i 'khor lo thams cad do/ /rnam pa med ces pa ni rdzogs pa'i rim pa ste lha'i 'khor lo rang bzhin med par shes pa'o//yang na rnam pa kun zhes pa ni sems tsam rnam pa bden par smra ba'o/ /rnam pa med ces pa ni rnam pa brdzun par smra ba'o/ /bcu drug ni rtsa 'dab ma bcu drug go/ /phyed ni rtsa 'dab ma brgyad de snying ga'o/ /phyed gnyis pa ni 'khor lo bzhi'o//thig le ni khu ba ste byang chub kyi sems so/ /rtsa de dag ni yur ba dang 'dra ste khrag dang zhag dang thig le'i rten byed pa'o/ /thig le de dag gi 'od ni yi ge'i rnam par gnas pa'o/ /de yang re zhig sgrub pa po gshin rje gshed yab yum dang bcas pa'i nga rgyal du zhugs te/rtsa'i ting nge 'dzin bskyed pa ni phyi rol gyi lha'i rnam pa/ nang ni rtsa'i rnam pa ste/ g.yas pa ni ra sa nA'o/ /g.yon pa ni la la na'o/ /dbus ma ni a wa d+hU tI zhes bya ste/ de yang mtshan nyid rnam bzhi dang ldan pa/ dkar ba/ ser ba/ dmar pa/ snum pa/ gnas ni sgal tshigs la brten srog rtsa zhes grags so//sbom phra ni 'bras kyi sog ma'i tshad do/ /ring thung spyi bo bde ba chen po nas gsang ba'i gnas su sleb pa'o/ /rtsa chen po 'di ni dper na chu bo chen po dang 'dra ste/ chu bran thams cad de'i nang du 'du zhing der la bltas pa'o/ /de bzhin du rtsa thams cad kyang 'di'i nang du 'du zhing 'di la kha bltas pa'o//'khor lo bzhi'i yang srog shing gi tshul du gnas pa'o/ /de la 'og rlung bsdams te tsaN+Da lI rab tu sbar bas a wa d+hU tI'i nang du zhugs te/ sprul ba'i 'khor lo'i rtsa'i nang thams cad bsros pas/ thig le zhun mar gyi tshul du gnas pa de zhu nas/gsang ba'i gnas su bde ba 'bar bar bsam/ de nas yang tsaN+Da lI'i me chen po rab tu 'bar bas/ snying ga'i chos kyi 'khor lo'i rtsa thams cad rab tu bsros te thig le thams cad rab tu zhu nas bde ba nyams su myong bar bsam mo/ /de nas yang tsaN+Da lI rab tu sbar bas mgrin pa longs spyod kyi rtsa thams cad rab tu bsros te/thig le thams cad zhu nas bde ba nyams su myong bar bsam/ de nas tsaN+Da lI rab tu sbar bas spyi bo bde ba chen po'i rtsa thams cad rab tu bsros te/ thig le thams cad zhu nas bde ba nyams su myong bar bsam mo/ / de ltar rtsa rlung thig le rim pa bzhin du nyams su blangs so/ /can zhes pa ldan pa'i tshig ste mngon par shes pa drug dang rdzu 'phrul bsam gyis mi khyab pa dang ldan par 'gyur ro/ /mtshan bcas kyi rdzogs pa'i rim pa bstan pa'o/ /yang na bcu drug ni stong pa bcu drug ste yul lo/ /brgyad ni rnam par shes pa'i tshogs brgyad de yul can no//bzhi ni e waM ma yA ste 'khor 'das bstan pa'i yi ge'o/ /'di la slob dpon kha cig ni phyi'i dkyil 'khor gyi thig gi rim par 'dod pa dag kyang yod do/ /yan lag med pa'i rtsis las 'das/ /zhes pa ni spyir rgyud 'di'i bsgom pa yin te/rtsis gdab thams cad dang bral ba ngo bo gang du yang ma grub pa ci la yang bsam du med pa/ tha snyad dang blo'i chos thams cad las 'das pa'o/ /de bas na yan lag ni spros pa mtshon pa ste tshig gi tshogs so/ /rtsis las 'das zhes pa ni 'khrul pa zhes pa ste brtags pa'i dngos po nub pa'o//de lta bu de la mnyam par gzhag pa ni mnyam gzhag chen po'o/ /bsam gtan bzhi pa zhes pa ni 'jig rten pa'i bsam gtan te dang po dang / gnyis pa dang / gsum pa dang / bzhi pa'o/ /rtse mo can zhes pa ni de dag las khyad par du gyur pa ste/ gong du smos pa'i stong pa nyid do//bsam gtan yan lag kun zhes pa ni dpa' bar 'gro ba la sogs pa'i ting nge 'dzin bsam gyis mi khyab pa dang ldan pa'o/ /shes shing zhes pa ni rtsis gdab dang bral ba'i don rtogs pa las 'byung zhes bya ba'i tha tshig go/ /ting 'dzin rig dang zhes pa ni 'jig rten dang 'jig rten las 'das pa'i ting nge 'dzin thams cad khong du chud pa'o//rgyud rig pa zhes pa ni ting nge 'dzin goms pa'i 'bras bu ste 'gro ba thams cad kyi sems shes pa'o/ /de lta bu'i ting nge 'dzin sus rtogs pa de la ting 'dzin lus can zhes bya ste/ dngos su ye shes sems dpa' la ldan zhes bya ba'i don to/ /lus kyi mchog ces pa dang / longs spyod rdzogs sku kun gyi rgyal/ /zhes pa dang / sprul pa'i sku ste sku yi mchog /ces pa ni rgyud 'di'i 'bras bu ston pa'i tshig ste/ de yang sku rnam pa gsum po ni 'bras bu yin pas kun rdzob kyi bden pa yin la/ngo bo nyid kyi sku ni dbyer mi phyed pa ste don dam pa'i bden pa'o/ /phyogs bcur sprul pa sna tshogs 'gyed/ /ces pa ni sprul pa'i sku'i khyad par gyi yon tan no/ /khyad par ji lta bu dang ldan zhe na/ ji bzhin 'gro ba'i don byed pa/ /zhes bya ba smos te ji ltar 'gro ba dang mthun pa'i don byed do zhes bya ba'i tha tshig go//lha yi dbang po zhes bya ba khyab 'jug go/ /lha'i bdag po zhes pa ni brgya byin no/ /lha min bdag ces pa ni rA hu la'o/ /lha yi bla zhes pa ni gza' phur bu'o/ /'joms byed ces pa ni lha ma yin gyi bdag po thags bzangs ris so//'joms byed phyi mas ni srin po'i rgyal po lang ka mgrin bcu/ dbang phyug ces pa ni ma hA de ba'o/ /'dir rgal ba/ 'o na 'jam dpal ye shes sems dpa' khyod 'jig rten pa sna tshogs kyi gzugs su snang bas na srid pa'i nyes pas gos par thal lo zhe na ma yin te/srid pa'i dgon pa las brgal ba/ /zhes smos te srid pa ni gsum mo/ /dgon pa ni srid pa'i chos la don med pa ste stong pa'o/ /las brgal ba zhes pa ni srid pa'i skyon gyis ma gos pa'i don to/ /ston pa gcig pu zhes pa ni 'gran zla med pa'o/ /'gro ba'i bla zhes pa ni gong na med pa'o//'jig rten phyogs bcur rab grags pa/ /zhes pa ni ye shes sems dpa' de las gong na med pa 'gran zla med pa zhes grags so/ /chos kyi sbyin bdag chen po zhes pa ni zag pa med pa'i don ston pa'o/ /byams pa'i zhes pa ni thams cad la bu gcig pa'i pha ltar dgongs pa'o/ / go cha ni bar chod bsrung ba ste zhe sdang gis mi tshugs zhes bya ba'i don to/ /snying rje'i zhes pa ni sems can thams cad sdug bsngal dang bral bar 'dod pa'i bsam pa can no/ /ya lad bgos zhes pa ni stod g.yogs so/ /stod g.yogs kyi go cha de lta bus 'gro ba'i don rgyun mi 'chad do zhes bya ba'i don to//shes rab ral gri mda' gzhu thogs/ /zhes pa ni phyag mtshan te go sla'o/ /nyon mongs pa ni brgyad khri bzhi stong ngo / /mi shes zhes pa ni ma rig pa'o/ /g.yul ngo sel zhes pa ni de dag 'joms par byed pa'o/ /dpa' bo zhes pa ni gzhan gyis mi thub pa'o/ / bdud dgra zhes pa ni ye shes sems dpa'o/ /bdud btul ba zhes pa ni bar du gcod pa thams cad sel ba'o/ /bdud bzhi'i 'jigs pa sel bar byed/ /ces pa ni lha'i bu dang / 'chi bdag dang / nyon mongs pa dang / phung po'i bdud rab tu sel ba'o/ /bdud kyi dpung rnams pham byed pa//zhes pa ni bdud 'khor dang bcas pa rlag par byed pa'o/ /rdzogs pa'i sangs rgyas ni ye shes sems dpa'o/ /'jig rten 'dren ni 'gro ba rnams 'dren par mdzad pa'o/ /de lta bu'i ye shes sems dpa' de ni mchod pa'i 'os so/ /bstod pa'i 'os so/ /phyag gi gnas so//dus rtag tu ri mor bya ba'i 'os so/ /bkur bar 'os so/ /brjod par bya ba'i mchog go/ /phyag bya ba'i 'os so/ /bla ma rnams kyi rab po/ /'jig rten gsum po gom gcig bgrod/ /ces pa ni skad cig gis 'gro ba'i don la khyab pa'o/ /'khor ba'i skyon gyis ma gos pas/ mkha' ltar mtha' med rnam par gnon/ /zhes so/ /gsum rig ces pa ni yod pa dang med pa dang gnyis med do/ /gtsang ma dag pa ste zhes pa ni mtha' yis ma gos pa'o/ /mngon shes drug ces pa ni lha'i mig gi mngon par shes pa dang / rna ba dang / gzhan gyi sems shes pa'i mngon par shes pa dang /'chi 'pho dang skye ba shes pa'i mngon par shes pa dang / rdzu 'phrul gyi mngon par shes pa dang / zag pa zad pa'i mngon par shes pa dang drug go/ /rjes dran drug ces pa ni sangs rgyas rjes su dran pa dang / chos dang / dge 'dun dang gtong ba dang /lha rjes su dran pa dang / bla ma rjes su dran pa dang drug go/ /byang chub sems dpa' zhes pa ni rang don phun sum tshogs pa'o/ /sems dpa' che zhes pa ni gzhan don phun sum tshogs pa'o/ /rdzu 'phrul chen po zhes pa ni rdzu 'phrul gyi rkang pa bzhi dang ldan pa'o/ / 'jig rten 'das zhes pa ni 'khor ba las bsgral zhes bya ba'i don to/ /shes rab pha rol phyin pa'i mtha'/ /zhes pa ni thos pa'i shes rab dang / bsam pa'i shes rab bo/ /shes rab kyis ni de nyid thob/ /ces pa ni bsgom pa'i shes rab po/ /de nyid thob ces pa ni rdo rje lta bu'i ting nge 'dzin brnyes pa'o//ting nge 'dzin de'i mtshan nyid ni bdag rig ces pa yul can no/ /gzhan rig ces pa ni yul lo/ /thams cad spangs zhes pa ni yul dang yul can gyi shes pa thams cad spangs zhes pa'i don to/ /kun la phan pa'i gang zag mchog /ces pa ni rdo rje lta bu'i ting 'dzin las grol ba'i don te gzugs sku 'char ba'o//dper bya kun las 'das pa ste/ /zhes pa ni 'gran zla dang bral ba'o/ /shes dang zhes pa ni 'jal bar byed pa'i rigs pa'o/ /shes bya'i zhes pa ni gzhal ba'i yul lo/ /bdag po mchog ces pa ni shes bya la mnga' brnyes pa'i don to//gtso bo chos kyi sbyin bdag ste/ /zhes pa ni khyad par bla na med pa'i phyag rgya bzhi'i don ston pa'o/ /'gro ba'i bsnyen bkur gnas kyi mchog /ces pa ni bshad zin to/ /nges 'byung gsum po bgrod rnams kyi/ /zhes pa ni nyan thos dang / rang rgyal ba dang / byang chub sems dpa'i theg pa'o/ /don gyi dam pa rnam dag dpal/ /zhes pa ni de dag thams cad khong du chud ces pa'i don to/ /'jig rten gsum ni 'dod khams la sogs pa'o/ /skal bzang che zhes pa ni phyin ci ma log pa dang blo 'byor pa'o/ /dpal ldan 'byor pa kun byed pa//zhes pa ni 'gro ba thams cad la 'dul byed kyi sku ston pa'o/ /de su yin snyam pa la/ 'jam dpal dpal dang ldan pa'i mchog /ces bya'o/ /da ni ye shes rnam pa lnga'i sgo nas 'dud nyi shus bstod de/ tshig bzhi'i tshigs su bcad pa re re zhing ye shes re re la bstod pa'o//mchog sbyin zhes pa chos kyi dbyings kyi ye shes so/ /rdo rje zhes pa ye shes rnam pa lnga dbyer mi phyed pa'o/ /mchog khyod 'dud ces pa ni ye shes sems dpa' la'o/ /yang dag mtha' ni blo'i yul ma yin pa'o/ /stong nyid las byung ni skye ba med pa las skyes pa'o/ /sangs rgyas byang chub ni spong ba phun sum tshogs pa dang /ye shes phun sum tshogs pa'o/ /chags pa ni 'gro ba'i don la chags pa'o/ /'dod pa ni 'gro ba'i don la 'dod pa'o/ /dgyes pa ni 'gro ba'i don la dgyes pa'o/ /rol pa ni sku sna tshogs ston pa'o/ /'dzum pa ni zhi ba'i sku'o/ / bzhad pa ni rgyas pa'i sku'o/ /gsung ni dbang gi sku'o/ /thugs ni drag po'i sku'o/ /med pa ni stong pa nyid do/ /sangs rgyas 'byung ba ni chos sku'o/ /nam mkha' las byung ni dpe'o/ /sgyu 'phrul dra ba ni bde stong dbyer med do/ /rol ston ni drag po'i sku sna tshogs so/ /thams cad ces pa 'khor ba thams cad do//ye shes sku nyid ces pa ni gsal la mi rtog pa'i sku'o/ /khyed la 'dud ces pa ni lus ngag yid gsum gyis khyod la gus pa'o/ /da ni sngags kyi don bshad par bya ste/ oM ni ye shes lnga'o/ /sarba d+harmA ni chos thams cad do/ /a b+hA ba zhes pa ni skye ba med pa'o/ / swa b+hA ba zhes pa ni rang bzhin gyis dag pa'o/ /bi shud+d+ha zhes pa ni rnam par dag pa'o/ /a A zhes pa ni skye ba med pa'o/ /aM aHzhes pa ni rang la yod pa'o/ /pra kr-i ti pa ri shud+d+haHzhes pa ni rang bzhin yongs su dag pa'o/ /sarba d+harmA ya du ta zhes pa ni chos thams cad ma skyes pa'o/ / sarba ta thA ga ta de bzhin gshegs pa thams cad do/ /dz+nyA na kA ya zhes pa ni ye shes kyi sku'o/ /ye shes sku de su la ldan snyam du sems pa la/ many+dzu shrI zhes bya ste 'jam dpal lo/ /pa ri shud+d+hi tA zhes pa ni yongs su dag pa'o/ /mu pA dA ya ti A a zhes pa ni bdag la rjes su zhugs pa'o//sarba ta thA ga ta ni de bzhin gshegs pa thams cad do/ /ha ra ha ra zhes pa ni gtor cig pa'o/ /oM hUM hrIHzhes pa ni sku gsung thugs so/ /b+ha ga wAn zhes pa ni bcom ldan 'das so/ /dz+nyA na zhes pa ni ye shes so/ /mUrti zhes pa ni spyi gtsug go/ /wA gI shwa ra ni ngag gi dbang phyug go//ma hA pA tsa ni chen pos chos zhes pa'o/ /sarba d+harma ni chos thams cad do/ /ga ga na ni nam mkha' lta bu'o/ /a ma la su pa ri zhes pa ni dri ma med cing dri ma dang bral ba'o/ /shud+d+ha d+harma d+hA tu zhes pa ni chos kyi dbyings yongs su dag pa'o/ /dz+nyA na ni ye shes so//gar+b+ha ni snying po'o/ /AHni skye ba med pa'o/ /de ltar rgyud kyi don yongs su rdzogs pa'o/ /rjes su yi rang ba'i sgo nas bstod pa ni go sla bas 'dir ma bris so/ /rgyud kun gyi ni bdag po mchog /nyi ma zla ba ltar grags pa/ 'dod dgu 'byung ba'i rin po che/ le'u khri ni drug stong las//zab mo klu yi le'u yi/ /'grel pa snang ba 'di byas pas/ /khams gsum 'khor ba'i sems can dag /ye shes sems dpa'i zhal mthong nas/ /theg pa sna tshogs thabs tshul gyis/ /'gro don ma lus spyod par shog /rgyud ni byings che gang zag rtog pa mang / /so so'i 'dod pa sna tshogs 'di la smras//rgyud 'di'i don la tshig gcig phog pa med/ /gsal ba'i sgron ma 'grel ba 'di brtsams pas/ /log rtog ma lus myur du zad par shog/ /mtshan yang dag par brjod pa'i 'grel pa slob dpon chen po tsan+d+ra go mis mdzad pa rdzogs so// //