CLOSE WINDOW

D2084
བོད་ཡིག

rgya gar shar phyogs b+hang+ga la'i paN+Di ta dA na shI la zhes bya bas gnas byin gyis brlabs pa drang srong srin po rir rang 'gyur du byas pa'o//[ ]@##/ /rgya gar skad du/ shrI rak+ta ya mA ri sA d+ha nA ma/ bod skad du/ dpal gshin rje'i gshed dmar po'i sgrub thabs zhes bya ba/ 'jam pa'i dbyangs la phyag 'tshal lo//gang gis dang por bdud bzhi bcom nas/ /sna tshogs sprul pas 'gro ba'i don du/ /mkha' la sprin bral nyi shar ji bzhin/ /phrin las g.yel ba med des skyongs shing / /sdug bsngal sna tshogs 'dam gyis gos pa'i/ /'khor ba'i rgya mtsho'i pha mthar 'phen byed//bskyed rdzogs zung 'jug gu 'dir 'jug la/ /brtse ba'i sems kyis 'bad par byed do/ /de nyid nyams su len par 'dod pa'i/ /rnal 'byor gang des dben pa'i gnas su/ /skyabs 'gro sems bskyed sngon du byas nas/ /kun rdzob chos kyis stong pa'i ngang las/ srung ba'i 'khor lo chos 'byung dbus su/ /bzhi bcas drug cu'i 'dab ldan chu skyes/ /steng du 'byung bzhi 'dus pa'i rdo rje/ /rgya gram lte ba la gnas b+h+rUM las/ /byung ba rnam par thar pa'i khang pa/ /steng 'og phyogs su mnyam pa'i gru bzhi/ /sgo bzhi sgo khyud sgo 'gram logs ldan/ /bcu drug ka ba'i steng na mdzes pa'i//rta babs snam bu'i bang rim rnams la/ /mi'am ci sogs bu mo sgeg cing / /mdzes pa'i rgyan ldan rnams kyis glu len/ /rlung gis bskyod pa'i nyi zla dang bcas/ /rin chen phreng ldan du ma rnams dang / /bla re ba dan glang seng ka rgyan/ /gdugs dang rgyal mtshan ri dgas dang ldan//'khor lo sogs kyis logs la mdzes shing / /'khor lo'i rtse nas rin chen sna tshogs/ /pha gu sogs kyis khor yug brgyan pa/ /'dod pa'i snam bu lha mor bcas shing / /ka ba brgyad ldan rdo rje'i gdung bzhis/ /bteg pa'i thog la nyi zla rdo rjes/ /kun nas mdzes pa'i 'og gi gzhi der//sna tshogs pad nyi ma he'i gdan la/ /hUM las byung ba'i bcom ldan 'das ni/ /rA ga'i mdangs ldan zhal gcig phyag gnyis/ /g.yas pa'i phyag na dbyug pa mi mgo /rdo rje bsnams la oM sogs yi ges/ /rim par mtshan pa mkha' la 'phyar zhing //g.yon pa bdud rtsis gang ba'i thod pas/ /rang dang 'dra ba'i yum la 'khyud pa/ /g.yas brkyang thal ba'i rgya spangs thod pa/ /skam po'i do shal 'phyang zhing 'khyud pa/ /g.yas bskum g.yon brkyang ma he'i rwa dang / /tshang ra brdzis nas bdud dpung zil gnon/ /zhal gdangs mche gtsigs khrag gi thigs pa//'dzag cing spyan gsum dmar po 'khrug pa/ /skra dang sma ra smin ma gyen brdzes/ /gar dgu'i nyams ldan rgyan kun dmar po/ /dar dang stag sogs gos kyis g.yogs pa/ /ye shes me dpung 'bar ba'i dbus na/ /sangs rgyas kun dang gnyis med bzhugs pa//de yi thugs ka'i hUM gi 'phro 'dus/ /ye shes spyan drangs dgug gzhug byas la/ /sangs rgyas rnams kyis bdag la dbang bskur/ /lhag pa'i chu la mi bskyod rdo rje/ /rang lus byung lha mo rnams kyis/ /mchod bstod bdud rtsis tshim par byas nas/ / hUM las byung ba'i spro bsdu'i bzlas pas/ /sems can don kun rdzogs par byas la/ /slar yang thams cad hUM la bsdus te/ /phra mo'i rnal 'byor rnam bzhis rgyas gdab/ /chu la nya ldang ji bzhin tshul du/ /zung 'jug skur langs thun mtshams bya ba/ /ma lus byed pa sangs rgyas lam yin/ / dge ba 'di dang dge gzhan ma lus pa/ /gcig tu bsdus nas zung du 'jug pa'i sku/ /gshin rje gshed dpal go 'phang thob gyur nas/ /'gro kun rnam mkhyen sa la 'god par shog /bcom ldan 'das gshin rje'i gshed dmar po'i sgrub thabs lam gyi snying po zhes bya ba mkhas shing grub pa brnyes pa'i rnal 'byor chen po bud+d+ha dz+nyA na pA das u ga ya na 'bar ba'i phug tu Da kI shwa ri badzra wA rA hI nyid las dngos su thob nas lhag pa'i bsam pa rnam par dag pas yi ger byas pa rdzogs so// //yul dbus kyi paN+Dita A nan+da b+ha dra dang bod kyi lo tsA ba se tsha bsod nams rgyal mtshan gyis grong khyer chen po ti ra ha te'i lho phyogs rang byung gi mchod rten rnam par dag pa'i drung du yul dbus kyi dpe dang mthun par bsgyur cing bcos te gtan la phab pa/slar yang grub thob kar+Na shrI'i zhal snga nas gnas brtan nyi ma rgyal mtshan gyis shrI na len+d+ra'i gtsug lag khang du bsgyur ba'o// //