92a5 @##/ /rgya gar skad du/ Ar+ya nA ga ra a ba lam bi kA nA ma ma hA yA na sU tra/ bod skad du/ 'phags pa grong khyer gyis 'tsho ba zhes bya ba theg pa chen po'i mdo/ sangs rgyas dang byang chub sems
92a6 dpa' thams cad la phyag 'tshal lo//'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am
92a7 ci dang /lto 'phye chen po dang / brgya byin dang / tshangs pa dang / 'jig rten skyong ba dang / rgyal po dang / blon po dang / byang chub sems dpa' dang / dge slong dang / dge slong ma dang / dge bsnyen dang / dge bsnyen ma rnams kyis bkur stir byas/ bla mar byas/ mchod cing brjed de/
92b1 pad ma chus ma gos pa bzhin du bzhugs so/ /de nas de'i tshe rgyal po gsal rgyal gyis de bzhin gshegs pa la mchod pa'i phyir ston zla tha chung sa zla ba nya ba'i tshes lnga la/ 'bru mar gyis zangs po che stong bkang ste dngar nas mar me sbar ba'i 'od kyis kho ra khor yug tu dpag tshad bzhir
92b2 snang bas khyab par byas so//de nas yang de'i tshe mnyan yod kyi grong khyer chen po na dga' byed ma zhes bya ba grong khyer gyis 'tsho ba zhig 'dug go/ /des 'bru mar sran gre'u dang sbyar ba nyos nas zhag bzhi kha 'tshos te nyam chung bar gyur to/ /de nas 'bru mar de khyer te rgyal bu rgyal byed kyi tshal du
92b3 song nas khyams kyi nang logs su mar me sbar te bzhag nas 'di ltar sems bskyed de//bcom ldan 'das bdag dge ba'i rtsa ba 'dis ma 'ongs pa'i dus na ji ltar da ltar gyi de bzhin gshegs pa dgra bcom pa yang dag par rdzogs pa'i sangs rgyas ji lta ba bzhin du bdag kyang ma 'ongs
92b4 pa'i dus na ston par gyur te chos ston par gyur cig /dge 'dun yang sdud par gyur cig ces byas so/ /'di ltar yang sems bskyed de/ gal te bdag ma 'ongs pa'i dus na sangs rgyas su 'gyur ba zhig na/ mar me 'di bdag phyir ma 'ongs kyi bar du 'bar bar gyur cig ces byas
92b5 nas mar me de spar te grong khyer du song na/mar me de'i 'od kyis 'dzam bu'i gling thams cad snang bar gyur te nam nangs kyi bar du yang mar me de ma shi'o/ /de nas tshe dang ldan pa maung gal gyi bu chen pos chos gos kyi mtha' mas mar me gsad par byas na gsad par ma nus so/ /de
92b6 nas tshe dang ldan pa maud gal gyi bu chen pos rnam par 'thor rlung gis gsad par byas kyang gsad par ma nus so//de nas tshe dang ldan pa maung gal gyi bu chen pos tshangs pa'i 'jig rten du 'dug nas stong gsum 'dir shing rta'i srog shing tsam gyi char gyi rgyun dbab par byin gyis
92b7 brlabs te mar me de'i steng du btang yang gsad par ma nus so//de nas bcom ldan 'das kyis bka' stsal pa/ maud gal gyi bu thong shig /mar me 'di ni byang chub kyi sems kyis sbar ba yin la/ byang chub kyi sems ni nyan thos kyis zil gyis gnan par mi nus so/ /de ci'i
93a1 phyir zhe na/thams cad mkhyen pa nyid kyi sems ni nyan thos dang / rang sangs rgyas thams cad kyis zil gyis gnan du med pa'i phyir ro/ /de nas re zhig na bud med de nyi ma shar te grong khyer nas phyir 'ongs nas/ des mar me de shin tu 'bar ba mthong ba dang /
93a2 de mchog tu dga' ba chen pos rgyas par gyur to/ /de nas bcom ldan 'das kyis de'i tshe 'dzum pa mdzad do/ /sangs rgyas bcom ldan 'das rnams kyi chos nyid ni 'di yin te/ gang gi tshe sangs rgyas bcom ldan 'das 'dzum pa mdzad pa de'i tshe sangs rgyas bcom ldan 'das rnams kyi
93a3 zhal gyi sgo nas 'od zer kha dog du ma 'di lta ste/sngon po dang / ser po dang / dmar po dang / dkar po dang / btsod ka dang / shel dang / dngul gyi kha dog lta bu dag byung bar gyur te/ 'jig rten gyi khams mtha' yas mu med pa dag snang bas khyab par byas nas tshangs pa'i 'jig
93a4 rten gyi bar du song ste zla ba dang nyi ma'i 'od kyang zil gyis mnan nas yang slar log ste bcom ldan 'das la lan gsum bskor ba byas nas bcom ldan 'das kyi dbu'i gtsug tor du nub par gyur to//de nas 'od zer de dag gis bcom ldan 'das la lan gsum bskor ba byas te bcom ldan
93a5 'das kyi dbu'i gtsug tor du mi snang bar gyur to//de nas bcom ldan 'das la tshe dang ldan pa kun dga' bos tshigs su bcad de gsol pa/ rgyal mchog rnam par 'dren pa gang zag mchog /rgyu med par ni 'dzum pa mi mdzad na/ /ci yi rkyen gyis zhal ni 'dzum mdzad pa/ /'jig rten
93a6 phan pa thugs brtses bdag la gsungs//bcom ldan 'das kyis bka' stsal pa/ kun dga' bo grong khyer gyis 'tsho ba 'di bskal pa nyi shu rtsa brgyad kyi bar du ngan 'gro log par ltung bar 'gro bar mi 'gyur te/ rtag tu lha dang mi'i phun sum tshogs pa dag nyams su myong nas de bzhin
93a7 gshegs pa dgra bcom pa yang dag par rdzogs pa'i sangs rgyas kun du snang ba zhes bya bar 'gyur ro//de nas bcom ldan 'das kyis de'i tshe tshigs su bcad pa 'di dag bka' stsal to/ /stobs bcu ldan pa mchod phyir zangs chen phrag stong gsal rgyal gyis/ /mar me bzang po sbar bas
93b1 dpag tshad bzhir ni kun du snang //grong khyer 'tsho ba'i 'bru mar sran ma gre'u sbyar sbar ba yis/ /'dzam gling snang bas khyab gyur de ni byang chub sems kyi mthus/ /maud gal gyis ni mar me gsad 'dod rdzu 'phrul rgya chen byas/ /rnam par 'thor ba'i rlung gi shugs btang gsad par yong ma
93b2 nus//tshangs pa'i 'jig rten 'dug nas chu rgyun shing rta'i srog shing tsam/ /phab kyang gsad par ma nus mar me nyi ma'i 'od bzhin snang / /de ni zhag bzhi kha 'tshos rgyal byed dga' ba'i tshal du 'ongs/ /dga' ba'i sems kyis bde gshegs zhabs la phyag byas thal sbyar 'dug /
93b3 mnyam med 'dzum pa mdzad pas kun dga' bo yang rab dga' nas/ /gzi brjid mtha' yas 'dzum mdzad 'di yi 'bras bu ji 'dra gsungs/ /dga' byed 'di ni bskal pa nyi shu brgyad na rgyal bar 'gyur/ /rang byung kun snang zhes bya 'od kyis stong chen bzhi snang byed/ /ma 'ongs dus na bde bar
93b4 gshegs pa bye ba mchod par 'gyur//de ni kun du 'khor los sgyur 'gyur rgyal rnams bkur stir byed/ /sangs rgyas rtogs pa brjod pa yi ni dad rnams rab dga' byed/ /skye bo mkhas pa dag gis de thos sems kyang rab tu dga'/ /de ltar rgyal ba bsam yas stobs bcu'i chos kyang
93b5 bsam mi khyab//dga' ba bskyed na rnam smin mtshungs med bsam gyis mi khyab 'gyur/ /bcom ldan 'das kyis de skad ces bka' stsal nas/ tshe dang ldan pa kun dga' bo dang / grong khyer gyis 'tsho ba de dang / byang chub sems dpa' de dag dang / dge slong de dag dang / lha
93b6 dang /mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// //'phags pa grong khyer gyis 'tsho ba zhes bya ba theg pa chen po'i mdo rdzogs so// //
93b7 rgya gar gyi mkhan po dz+nyA na gar+b+ha dang / lo ts+tsha ba ban de klu'i dbang pos bsgyur ba/ rgya gar gyi mkhan po bid+yA ka ra sing ha dang / zhu chen gyi lo ts+tsha ba ban de de ba tsan dras zhus te gtan la phab pa// //


CLOSE WINDOW