CLOSE WINDOW

D2031
བོད་ཡིག

/[ ]@##/ /rgya gar skad du/ rak+ta ya mA ri sA d+ha naM/ bod skad du/ gshin rje gshed dmar po'i sgrub thabs/ dpal gshin rje gshed dmar po la phyag 'tshal lo/ /'jig rten gsum la mi 'jigs sbyin pa'i sku sprul thugs ni zhi ba'i rang bzhin can//sku ni dmar po'i rnam par mdzad cing 'jigs par mdzad pa 'gro ba'i don bsgrub pa/ /bdud kyi sde rnams sngangs par mdzad dpal dus kyi dgra bo dmar po la btud nas/ /de yi sgrub thabs rgyas pa ma yin nyung ngu 'di ni bdag gis bri bar bya//sngags pas dang por bde ba'i stan la rab 'dug rang gi snying gar oM yig las skyes pa'i/ /nyi ma'i dkyil 'khor dbus su hUM yig dmar po mtshungs pa med pa'i gzugs 'bar ba/ /de las 'phros pa'i 'od zer dmar pos nam mkhar spyan drangs sangs rgyas bla ma rnams//dpal ldan gshin rje gshed dmar la sogs dang bcas mngon par dmigs nas hUM yig las/ /sna tshogs me tog dri bzangs bdug pa rnam pa du mas mchod pa'i cho ga rdzogs byas la/ /bdag tu rtog pa'i sdig pa gang yod de ni de rnams mdun du bshags par bya//phyi nas cho ga lhag ma cho ga ji bzhin bsgrubs nas stong nyid bsgom bya ste/ /oM shU n+ya la sogs pa'i tshig gis de rjes oM yig las skyes nyi ma la/ /yi ge hUM las sprul pa'i dbyug pa ri bong 'dzin mtshungs rlan bcas mi mgos mtshan/ /yi ge hUM gis rnam brgyan de rnams mtha' dag yun ring rnam par bltas nas ni//sgom pa po yis dpal ldan gshin rje gshed dmar gnyug ma'i sku ni yang dag bsam/ /g.yon brkyang stabs kyis bzhugs pa shin tu rnam 'gyur sku dmar kun nas rmad du byung / /drag po zhal gcig phyag gnyis dang ldan g.yas dang cig shos dag na nges gnas pa//khrag gis bkang ba'i thod pa dang ni rdo rje'i dbyug pa dkar po mi mgos mtshan/ /sku la sbrul gyi tshogs kyis rim pa bzhin du brgyan pas mdzes byas dbu skyes ni/ /dmar ser gyen du gnas shing stag gi pags pa rlan bcas na bza' byas pa ste//mgul nas rab tu 'khyud pa'i mdzes ma yang dag dam pa'i rang 'od thod pa skom po yi/ /phreng ba dang ldan na bza' dang bral phyag gnyis ldan nas zhal gcig chu skyes ni/ /dam du 'khyud cing kha sbyor ro gcig g.yas brkyang ba yi stabs kyis bzhugs pa mo//phyi nas mgon po'i thugs kar rab tu gtum pa'i 'od ldan de yang hUM yig las/ /skyes pa'i dbyug pa shin tu dkar ba 'dzag bcas mi mgo dang ldan 'od 'bar ba/ /de dbus shin tu dmar ba'i yi ge hUM mchog 'bar ba'i nyi ma la gnas pa/ /mkhas pas blta bya bcom ldan 'das kyi gsang ba'i bye brag hUM skyes rdo rje ste//sa bon oM mchog yongs gyur las byung bcom ldan 'das ma'i gsang ba chu skyes 'dab brgyad pa/ /slar oM sarba zhes sogs mnyam med gsang sngags sgrub pa po yis brjod par bya/ /de nas lte ba'i 'og tu pad+ma 'dab brgyad kun nas dmar ba yang dag 'bar//hrIHyig bsams te de steng re khA dkar po gyen du langs pa nam mkhar phyogs/ /shin tu dmar ba'i mnyam med khyab bdag dpal ldan gshin rje gshed po bsgom par bya/ /'gro ba thams cad 'di 'drar srung ba mnyam par kun nas 'khrigs//ma he'i steng na rgyal po bzhin du mnyam bzhugs bla na med/ /ji ltar gsungs pa'i dam tshig can gyi rnal 'byor dam tshig ston 'gro bas/ /dogs pa kun dang bral ba'i yid kyis thun gsum bsgom par bya/ /de la nges par 'gro ba'i bla ma mchod 'di legs par grub 'gyur bsgoms pa las//'jig rten snang bar byed pa rnam par brtan byed rab tu rtsom pa'i rim pa 'dis/ /sngags pa'ang de nas brtsams te nyin re bzhin du lha dang lha min bdag po yi/ /bka' las mi 'da' gdug pa drag po 'byung po sogs kyis nges par bde ba sgrub/ /oM A dzrI khaM hUM/dam tshig byin gyis brlab pa'i sngags so/ /oM hrIHSh+T+r-iHwi kr-i tA na na hUM hUM phaT phaT swA hA/ oM ya mAn+ta ka hUM phaT/ dpal ldan gshin rje mthar byed dmar po'i sgrub thabs bla ma dam pa'i man ngag gi /gsung rnams mnyan nas rnam par snang mdzad srung ba bdag gis 'gro ba kun gyi don//bsgrub pa'i ched du brtsams pa'i bsod nams dri med dam pa gang zhig thob pa des/ /srid pa'i 'dam du bying ba'i lus can nyon mongs mun nag yang dag 'joms par shog /gshin rje gshed dmar po'i sgrub thabs dpal rnam par snang mdzad srung bas mdzad pa rdzogs so// //