CLOSE WINDOW

D2025
བོད་ཡིག

@##/ /rgya gar skad du/ swa b+hi byeSh+Tha na tsa tu yo ga ta da twa u pa de sha nA ma/ bod skad du/ rnal 'byor bzhi'i de kho na nyid ces bya ba rang byin gyis brlab pa'i man ngag /bcom ldan 'das gshin rje gshed dmar po la phyag 'tshal lo/ /shin tu spros med thugs rjes brlan//dpal ldan bde chen phyag 'tshal te/ /rang byin brlabs pa'i rim pa ni/ /bla ma'i drin gyis gsal bar bshad/ /bla ma la gus dam tshig can/ /snying rje sems can don sems pa'i/ /sgrub pos dben pa'i gnas su ni/ /dngos grub dam pa bsgrub par bya/ / rnal 'byor dam pa bzhir bshad do/ /dbyibs dang sngags dang byin rlabs dang / /rnam dag ye shes zhes bya bas/ /srid pa'i 'ching ba las grol 'gyur/ /rim pa'am yang na cig car dang / /sangs rgyas rjes dran bsgom bya ste/ /gong bur gnas pa'i bdag nyid kyis/ /lus 'di gshin rje gshed dmar po//'di ni bems po ma yin la/ /sha dang khrag kyang de ma yin/ /bden min brdzun pa ma yin no/ /tha mal ma yin ye shes sku/ /dang zhing gsal la rnyog pa med/ /phun tshogs yon tan kun gyi rten/ /'di ni bdag las tha dad med/ /spang zhing bsnan du cung zad med//ma 'khrul bla ma'i bka' drin gyis/ /gdod nas grub par shes bya ste/ /lus can kun gyis 'di mthong dang / /gang gis thos dang dran tsam gyis/ /bsam pa rdzogs mdzad zung 'jug sku/ /de ltar bdag nyid gsal bar blta/ /bdag gi thugs ka'i sa bon las/ / sa gsum 'od zer rab 'phros nas/ /mthong thos dran pa'i spyod yul du/ /ma lus lus pa med pa yin/ /brtan g.yo'i dngos po ji snyed pa/ /dpal ldan gshin rje gshegs dmar po/ /khams gsum min 'di gzhal med khang / /srog chags min 'di rgyal ba rnams/ /phung po khams dang skye mched min//khams gsum min 'di dkyil 'khor pa/ /rang bzhin 'od gsal ngo bo nyid/ /me long nang gi gzugs brnyan ltar/ /sgyu ma lta bu'i ting nge 'dzin/ /rmi lam ji bzhin goms byas te/ /bar ma'i srid pa rab spyor bas/ /de bzhin gshegs pa'i dngos grub thob/ /dbyibs kyi rim pa ste rnal 'byor ro//lus can rnams kyi srog gyur pa/ /rlung zhes bya ba las kun byed/ /'di ni rnam shes bzhon pa ste/ /srid dang rnam grol thob byed pa'o/ /bya dra dang ni b+ha ra ta/ /mu sa la dang a tra tas/ /thog mar lus ni sbyang bar bya/ /lus sbyangs pas ni rtsa dang rlung //legs par dag pa nyid du 'gyur/ /spros pa thams cad spangs nas so/ /mnyam par gzhag pas dngos grub thob/ /dgang ba'i sbyor bas dgang bya ste/ /dgug pa'i sbyor bas dgug par bya/ /zhi ba yis ni zhi ba nyid/ /rengs pa'i spyor bas mi g.yo'o/ /sbyor ba bzhi yis bdag nyid kyis//dngos grub chen po skye bar 'gyur/ /rtsa gsum zur gsum sbyangs nas ni/ /cung zad spyod lam dal bar bya/ /dbang po ngal zhing dub pa'i tshe/ /sems ni rtse gcig nyid du gzhag /du ba la sogs lnga po ni/ /skad cig nyid la 'char bar 'gyur/ /mngon shes rdzu 'phrul la sogs pa//grol ba'i dngos grub go 'phang 'thob/ /rlung gi g.yo bas 'khor ba ste/ /mi g.yo bas ni mya ngan 'das/ /snying gi chu skyes dbus sogs pas/ /mi gnas mya ngan 'das pa thob/ /rnal 'byor pas ni mnyam gzhag pas/ /nang par bya rog mi grag par/ /'jug pa'i rlung ni gang yin la//stong phrag gcig ni bgrang bar bya/ /sgrub pos sgra dang bral ba ni/ /'bum phrag gcig ni rdzogs pa na/ /tshe zad pa yang lo lnga ru/ /'tsho 'gyur 'di la the tshom med/ /snying ga'i hUM yig dkar po la/ /yul sogs dmigs par mi byed pas/ /rlung gi sbyor bas goms byed na//mngon par shes pa 'thob par 'gyur/ /rnam shes gong du 'pho ba ni/ /'chi ba'i dus la bab pa'i tshe/ /bu ga rnams su son pa'i rtsa/ /yi ge rnams kyis dgab par bya/ /A li kA li'i rlung gis ni/ /bu ga'i rlung ni sbyang bar bya/ /snying ga'i hUM yig shes dang sbyar//phyed dang gnyis kyi yi ge ni/ /'og dang steng du bzhag pa la/ /de yi 'og gi cha rlung gis/ /sa bon steng 'og bltas pa yis/ /rlung gi sa bon gnyis gzhag pas/ /rnal 'byor ldan pas kha sbyor bcing / /yi ge phyed dang gnyis kyi sngags/ /nyi shu rtsa gcig rim par brjod//rlung ni rnam shes bzhon pa ste/ /gang dang gang du bgrod pa yi/ /rlung ni sgo ru brtsams pas te/ /dgug pa ldog pa'i spyor ba yis/ /de ltar sbyangs pa'i goms pa las/ /gol ba'i dngos grub thob pa'o/ /sgo yi bye brag bshad par bya/ /'dod khams bde 'gro lta ba gnas / / gzugs khams smin mtshams thig le las/ /tshangs pa'i sgo nas gzugs med do/ /de ni mtho ris byed pa'o/ /sna nas gnod sbyin gnas su skye/ /rna ba las ni mi 'am ci/ /mig las mi yi dbang por 'gyur/ /gcin gyi sgo las dud 'gror 'gyur / /bshang ba las ni dmyal bar 'gyur/ / bde 'gro las ni gzhan du 'gro/ /de ltar ma nus stobs chung ba/ /rnam shes bla mar 'pho ba ni/ /spyos pa thams cad bcad nas ni/ /rgyal sras lam la gtang bar bya/ /lus ni legs par bsrung zhebar bya/ /yang na seng ge'i nyal thabs bya/ /rnam smin las grub phung po 'di//bla ma lha dang 'byung po la/ /stos pa med par gtang bar bya/ /mchog gi sgo ni gsal por dbye/ /snying gi chu skyes pad+mo yi/ /hUM las rnam shes bstim par bya/ /spyi bor bla ma lhag pa'i lha/ /dus gsum bde gshegs ro gcig pa/ /mchod sogs byas la gsol ba gdab//de nas rlung gi spyor ba yis/ /rnam shes thugs kar 'phang bar bya/ /sangs rgyas kun gye ye shes dang / /rang gi rnam shes dbyer rnged du/ /stong nyid snying rje ro gcig par/ /mi 'gyur bde ba bsgom par bya/ /de ni chos sku phrin las dang //bcas pa'i dngos grub thob par 'gyur/ /mtshams med lnga ni byed pa dang / /nyin bzhin bram ze gsod pa yang / /'di yi lam gyis grol 'gyur te/ /sdig gis gos par mi 'gyur ro/ /dus la babs na 'pho bar bya/ /dus min lha ni gsod par 'gyur/ /lha ni bsad pa tsam gyis ni//mnar med gnas su sreg par byed/ /'di ni bde bar gnas dus su/ /cung zad goms par bya ba ste/ /'byin dang 'jug pa'i rlung la ni/ /sbyar te spro dang bsdu ba'i tshul/ /nam mkhar rje btsun bltas nas ni/ /yud tsam mnyam gzhag rnal 'byor bya/ / sngags kyi rim pa ste rjes su rnal 'byor ro/ /shes rab thabs kyi phyag rgya las/ /bla ma'i man ngag rim pa yis/ /srid pa'i sdug bsngal gzhom 'dod pas/ /mi 'gyur bde ba bsgom par bya/ /rnal 'byor ma yi mtshan nyid ni/ /rigs ni rnam pa bzhi ru bshad/ /tsartsi ka ni pad+ma can//phag mo glang po can du bshad/ /rdo rje dbyings can dung can ma/ /dkar mo ri mo can yin te/ /rigs ni bzhi yi mtshan nyid rnams/ /de ltar mkhas pas shes par bya/ /pad+ma can gyi mtshan nyid ni/ /bzhin ni kun nas zlum po ste/ /sna ni zar ma'i me tog mtshungs/ /rus sbal rgyab 'dra'i sen mo dmar//nu ma mkhregs shing 'jam pa dang / /rkang mthil mnyam nas brang yang mdzes/ /ba spu 'khyil zhing ngang pa'i skad/ /ri mo gsum can chu skyes mchog /pad+ma'i dri ldan glang chen 'gros/ /pad+ma'i 'dab ltar reg na 'jam/ /pad+ma'i byed pas bsten phyir ste//pad+ma can gyi dngos grub 'gyur/ /glang po can zhes bya ba ni/ /sna g.yon ba spu 'khyil ba dang / /'dod pas myos shing 'dod la sred/ /chang gi dri ldan byen pa sbom/ /lus ni sbom la mi srun pa/ /bzhin gyi mdangs che nga ro che/ /glu dang rol mo la dga' ba/ /byed pa bcings pa'i spyor ba yis//glang po che yi mchog sgrub byed/ /dung can ma zhes grags pa ni/ /ha cang skem zhing sbom pa min/ /skra ring sna yang cung zad ring / /nu ma na ra ka 'bras ltar/ /zho dang 'o ma'i tshogs la dga'/ /bya rog skad can bung ba'i sgra/ /ba lang lce ltar rtsub pa ste/ /gi wang ra ta'i bcings pas bsten//ri mo can yang bshad par bya/ /shin tu khro zhing ngo tsha spangs/ /rtag tu rtsod pa la dga' zhing / /lus thung de yi brang rnams mdzes/ /pa la'i 'bras ltar nu ma zab/ /byin pa phra zhing phyis gan nyal/ /gsus pa sbom zhing mchu yang 'phyang / /sha ba'i dri ldan phug ron skad//de ni ri mo can zhes bya/ /pi la sa yi bcings pas bsten/ /ri mo can gyi dngos grub 'gyur/ /bcu drug lon pa'i skad bzang ma/ /gzugs dang lang tsho phun sum tshogs/ /dang por legs par sbyang ba dang / /dbang bskur nas ni sgrub pa brtsam/ /sku gsung thugs dang rdo rje ni//dpral ba la sogs rnams su dgod/ /swA hA gsang ba gtsug tor du'o/ /de nas pad+ma rdo rje sbyang / /a yis pad+ma'i 'dab brgyad la/ /a yis ze 'bru rab tu brtag /hUM gis rdo rje rtse lnga pa/ /phaT kyis sgo la rab tu brtag /de ltar rdo rje pad+ma bcas/ /b+ha gar ling+ga bzhag nas ni/ /byang chub sems ni spro mi bya//rnal 'byor pas ni hUM phaT bsam/ /b+ha gar rdo rje 'dzin par byed/ /khams gsum po ni ma lus pa/ /sangs rgyas ngo bor bsgom par bya/ /rgyu mthun la sogs rab dbye bas/ /shin tu rnal 'byor bsgom par bya/ /rdo rje dbyings kyi dbang phyug ma'i/ /rtsa ni nye bar btsal bya ste/ / byed pa bcings pa'i spyor ba yis/ /rnal 'byor pa yis ji srid du/ /byang chub sems ni 'byin mi bya/ /gang tshe chu yi ri mo ltar/ /de tshe thob 'gyur rgyun mi 'chad/ /dga' ba las skyes de bzhin ci/ /dngos grub kun gyi gter gyur ba/ /byang chub sems ni nyams gyur na//phung po rnam shes brgyal 'gyur bas/ /ma smad dngos grub ga la thob/ /mkha' khams rdo rje kun sbyor dang / /reg byas kyis ni rmad byung che/ /bde ba skyed par byed pa ni/ /mchog tu dga' ba byed pa'o/ /dga' bral dag gi dbus su ni/ /mtshon par de ni bstan par bya/ / pad+ma'i dbus su rdo rje ni/ /lte bas mnan pa'i gnas dag tu/ /rdo rje'i skyil krung las sems ni/ /nor bu'i nang du son pa ltar/ /ye shes skye ba gang yin pa/ /ye shes ngo bo zhes bya ba/ /chags pa ma yin chags bral min/ /dbu mar dmigs par mi 'gyur ro/ /gang tshe rnal 'byor ye shes mthong //bde ba gnas su 'gyur mi bya/ /thun mong yang na nyin gcig dang / /zla phyed zla ba lo dang ni/ /bskal pa'am bskal pa stong du yang / /ye shes sbyor bas gnas par bya/ /byin gyis brlabs pa'i spyor ba ste shin tu rnal 'byor ro/ /mkha' 'gro'i pho brang chu skyes dbus//thabs dang shes rab spyor ba yis/ /khams gsum rgyu dang mi rgyu dngos/ /rnal 'byor chen pos ngal bso bya/ /lte ba'i dbus son dpa' bo la/ /spro dang bsdu ba'i spyor ba yis/ /ji ltar dbugs rlung me long la/ /ji ltar thim pa blta bar bya/ /lte ba'i chu skyes pad+mo la/ / yungs kar tsam du brtag bya gang / /bde gsal ye shes nyid du 'gyur/ /rtag pa ma yin chad pa min/ /bdag min gzhan yang ma yin la/ /srid min mya ngan 'das pa min/ /thog ma dbus mtha' rnam par spangs/ /'od gsal ba las de gsal na/ /de las rdo rje 'dzin par 'gyur/ / rnal 'byor bzhi yi rim pa las/ /gang skyes ye shes phyag rgya che/ /thabs dang shes rab rang gi dngos/ /me long nang gi gzugs brnyan bzhin/ /'jig rten khyab byed gsal bar snang / /mi 'gyur mchog gi bde ba che/ /stong nyid snying rje dbyer med la/ /phun sum tshogs pa'i 'byung gnas kyi/ / ye shes chen po 'grub 'gyur ro/ /ye shes kyi sbyor ba zhes bya ste rnal 'byor chen po'o/ /de ltar bla ma'i man ngag rjes 'brangs te/ /de nyid gsal byas brtse chen bzod par gsol/ /'dir 'bad bsod nams dri med gang skyes des/ /srid gsum dpal ldan rdo rje 'dzin gyur cig /rnal 'byor bzhi'i de kho na nyid ces bya ba rang byin kyis brlab pa'i man ngag grub thob kyis 'khor los sgyur ba mthu stobs las mnga' brnyes pa/dpal ldan rnal 'byor gyi dbang phyug bram ze dpal 'dzin gyis mdzad pa rdzogs so// //dar paN A tsAr+ya dang / glo bo lo tsA bas bsgyur ba'o// //