CLOSE WINDOW

D1979
བོད་ཡིག

/rdzogs so// //[ ]@##/ /yi dam bcas pa rdzogs pa dang / /ting nge 'dzin rtse gcig gyur pa'am/ /mtshan ma brtan po thob pa na/ /dben pa'i gnas su song nas ni/ /sngags kyi brtul zhugs spyad par bya/ /sku gzugs sam ni mtshan ma la//ting 'dzin spro bsdu gsal bar bya/ /sgrub rdzas la yang de bzhin te/ /brkyang bskum tsam yang spangs nas ni/ /sems ni cung zad nyams mi bya/ /nam zhig mtshan ma byung ba na/ /the tshom med pas dngos grub blang / /'di lta ste bsnyen pas rtags byung ba dang sgrub pa brtsam par bya ste/shin tu dben pa'i gnas su maN+Dal bya ste/ der lha'i rten bzhugs su gsol te/ mchod pa'i rdzas dang dngos grub kyi rdzas kyang gzhag go/ /yang mchod pa gzhan yang bshams la/ dang po bsnyen pa'i dus ji lta ba bzhin mchod nas/de nas bdag dam tshig sems dpar gsal ba'i thugs ka nas yi ge'i 'od zer 'phros pas/ phyogs bcu'i sangs rgyas spyan drangs nas sku'am mtshan ma la bstim ste/ nam sku 'dzum pa'am me tog 'bar ba'am/ bdug pa dri dang ldan pa'am rdzas khol ba dang /dro ba dang dud pa 'thul ba na brtan pa'i sems kyis the tshom med par mchod pa'i sa lha la phul te/ lag pa g.yas kyis blangs la thugs kar bstim/ dngos grub kyi rdzas lag pa g.yon gyis blangs la gtad do/ the tshom skyes na bar chad du 'gyur ro/ / 'di ni sgrub pa ste dngos grub blang ba'i thabs so/ /de phan chad brdzun dang / ma thos pa'i chos mngon du 'gyur te/ rig pa 'dzin pa'i sa la gnas nas/ 'gro ba ji ltar 'dul ba bzhin du las rnam pa bzhi thogs pa med do/ /mtshan ma ji lta ba bzhin ma byung na yang / 'jig rten na tshe ring /lobs skyen/ las rnam pa bzhi 'grub bo/ /gzhan du skal pa bzang por sbyor ro/ /de la gnas gsungs pa ni/ rnam pa sna tshogs ri dgon dang / /chu klung 'bab chu rnams dang ni/ /dur khrod dben zhing nyams dga' bar/ /sgrub pa dag ni brtsam par bya//de la brtul zhugs ni/ skye bo med pa'i nags tshal du/ /sngags pas lha yi brtul zhugs spyad/ /zas la gtsang sme mi lta zhing / /yul la bzang ngan byed mi bya/ /ting nge 'dzin las mi nyams shing / /phyag rgya bca' ba'am bzung ba ni/ /lhar bcas 'jig rten phyag mi btsal//glang po la yang lam mi gzur/ /rkang pa brag rir thogs med 'gro/ /kha nas gsang sngags rgyal po zlos/ /'di ni sngags kyi brtul zhugs bstan/ /de la mtshan ma bzhag pa ni/ /maN+Dal byi dor byas pa la/ /lugs ma ri mo la sogs dang //de bzhin be con ral gri dang / /tri shUl 'khor lo la sogs pa/ /mtshan ma legs byas mdun du gzhag /de la mchod rdzas ni/ me tog bdug pa mar me dri/ /bshos dang mchod yon sogs pa dang / /bza' dang bca' bar sbyar ba yi/ /gtor ma sna tshogs gzhag par bya//de la dngos grub kyi rdzas ni/ ba ser ba yi mar gsar dang / /sbrang rtsi kha rar bcas pa dag /za ma tog gam pa rur gzhag /de la dam tshig gi ting nge 'dzin ni/ bdag nyid 'jam pa'i rdo rjer gsal/ /thugs ka'i nyi ma'i snying po la/ / bzlas pa'i yig 'bru bsam pa ni/ /chu zla dag gam gzugs brnyan bzhin/ /gcig dang du ma bral bar bsgom/ /de la 'phro dang 'du ba ni/ /chu rlabs dag gam nyi zer bzhin/ /'od zer 'phros pa'i sbyor ba las/ /sangs rgyas kun gyi sku gsung thugs/ /'od zer tshul du bsdus nas ni//mtshan ma'am dngos grub rten la bstim/ /de la dngos grub kyi rtags ni/ /sku gzugs 'dzum dang mtshan ma 'bar/ /mar ni gol ba mchog tu bshad/ /dud pa 'thul ba 'bring yin te/ /dro ba dag ni tha ma'o/ /de la dngos grub blang ba'i thabs ni/dang por mchod rdzas lha la dbul/ /de nas sgrub rdzas bdag nyid btung / /de la dngos grub kyi gegs ni/ /sems g.yengs pa'am rmugs dang gnyid/ /dngos po bar chad 'gyur ba'am/ /the tshom skyes na dngos grub med/ /de la grub pa'i dus ni/ bsnyen pa'i rdzogs gyur phyin chad ni//zla ba drug gis 'grub par bshad/ /gal te grub par ma gyur na/ /de bzhin lan gsum brtsam par bya/ /des kyang grub par ma gyur na/ /drag shul tshul bzhin zhag bdun bsgrub/ /de las phyir 'bad med par bshad/ /de la drag shul gyi ting nge 'dzin ni 'di yin te/kyo ba rdo rje 'bar ba ni/ /gnam lcags zhun ma 'dra ba dag /rang gi snying las 'od 'phros te/ /kyo ba ye shes thugs nas drangs/ /rdo rje 'bar bas dbab byas nas/ /yang dang yang du gzhug par bya/ /sgrub pa'i cho ga slob dpon zhi ba'i ye shes kyis mdzad pa rdzogs so/