CLOSE WINDOW

D1915
བོད་ཡིག

@##/ /rgya gar skad du/ tsa tur de ba ti pa ri pr-iMts+tsha byA khya naM u pa de sha bauSh+Ta kaNA ma/ bod skad du/ lha mo bzhis yongs su zhus pa'i rnam par bshad pa man ngag rgyas pa zhes bya ba/ dpal rdo rje sems dpa' la phyag 'tshal lo/ /'dod chen bcom ldan dga' chen po/ /bde chen kun bdag chags chen po//mgon po rdo rje sems dpa' la/ /btud nas rnam bshad 'di bris so/ /rgyud don bla ma la thos pa/ /slob mas zhus pas 'di byas kyang / /'di la skyon yod bdag nyes te/ /mkhas pas slad nas dpyad du gsol/ /rgyud 'di ni thams cad gsang ba'i mchog ces bya ba stong phrag gcig bzhugs te/de'i rgyud phyi ma lha mo bzhis yongs su zhus pa 'di'o/ /'di'i bshad pa la rtog pa sngon du byed pa'i shes rab la rjes su 'brang ba'i sems can dad pa la rjes su 'brang bar bya ba'i don du tshig dang don dang tshig dang don mtshams 'brel pa dang / dgos pa dang dgos pa'i yang dgos pa lnga yang gdon mi za bar brjod par bya'o//de la tshig ni gsum ste/ gzhung tshig dang / le'u'i tshig dang / tshigs bcad do/ /de la gzhung tshig ni rgyud do/ /le'u'i tshig ni le'u bzhi'o/ /tshigs bcad ni tshig rkang bzhi'o/ /don ni gsum ste/ bsdus pa'i don dang / rgyas pa'i don dang / khyad par gyi don to/ / lhag pa byang chub kyi sems kyi ngo bo bde ba chen po rdo rje sems dpa' la lha mo bzhis yongs su bskor ba ni bsdus pa'i don to/ /chos kyi dbyings 'phro ba dang / chos kyi dbyings kyi rim pa dang / chos kyi dbyings bsdu ba dang / chos kyi dbyings kyi don sgrub pa ni rgyas pa'i don to/ /yig 'bru gzhom pa la sogs pa ni khyad par gyi don to//tshig dang don mtshams 'brel pa ni bsdus pa'i don gzhung tshig dang 'brel zhing rgyas pa'i don le'u'i tshig dang 'brel la/ khyad par gyi don tshigs bcad dang 'brel to/ /dgos pa ni rnam par mi rtog pa'i bde ba chen po'i ye shes mngon du bya ba shin tu sbyor bas skye bo rnams kyi log pa'i 'dod chags la sogs pa nyon mongs pa'i skyon can bcom nas yang dag pa'i 'dod chags la brten nas bla na med pa yang dag par rdzogs pa'i sangs rgyas nyid thob pa'o//dgos pa'i yang dgos pa ni sangs rgyas zin nas kyang sems can gyi don byed pa'o//'o na 'dod chags kho na srid pa na 'khor ba la 'jig rten pa las 'gal bar 'dod chags byang chub kyi rgyur byas nas 'di lta bu'i rgyud bcom ldan 'das kyis bstan pa ci'i phyir zhes smra na lan btab pa/ 'dod chags la spyod pa'i sems can thams cad thabs gzhan gyis sangs rgyas nyid du mi 'gyur te/de bas na sems can gyi don du 'dod chags yang dag par spyod pa'i sgo nas byang chub pa bcom ldan 'das kyis bstan pa ste/ ci'i phyir zhe na/ 'dod chags zhes bya ba'i nyon mongs pa don dam par ni rang bzhin med cing mi dmigs pa'o zhes de ltar yang dbu ma las gsungs pa/gang ngam chags pa gang du'am/ /chags pa gang gis sam chags pa/ /chos de dag ni mi dmigs te/ /dmigs su med pa'i chags pa ni skyon med ces so/ /yang mnyam sbyor las kyang gsungs pa/ chags med chags pa dang bral min//dbu mar yang ni mi dmigs te/ /bud med thams cad sgyu ma'i rgyu/ /gnyis su med pa'i theg ba'i mchog /ces pa'o/ /de bas na de kho na bzhin du zhe sdang spyod pa'i sems can rnams la yang phan pa'i don du thugs rje chen po dang ldan pa'i bcom ldan 'das kyis kyang sdang ba'i tshul khro bo'i rgyud bstan pa'o//de ltar yang dag pa'i chos las gsungs pa/ snod mi rung ba'i bu rnams la/ /de rnams snod rung mdzad bzhed pas/ /thugs rje khro rgyud bstan pa ste/ /sdang ba nor 'dod ma yin no/ /yang mnyam sbyor las kyang gsungs par shin tu sdang zhing gtum pa la/zhi ba nyid ni mi 'byor te/ /sdang ba thabs dang shes rab dngos/ /de bzhin gshegs pa kun gyis mdzad/ /ces so/ /de ltar gti mug can gyi sems can rnams la yang gti mug gi dbang gis bdag dang bdag gis 'dzin pa la sogs pa'i phyin ci log gi lta ba gzhom pa'i don du nyan thos kyi theg pa la gang zag la bdag mod pa'i don bstan pa dang /byang chub sems dpa'i theg pa la chos la bdag med pa'i don bstan pa dang / bla ma dang bcas pa'i sangs rgyas la chos thams cad bdag med par bstan pa dang / rdo rje'i theg pa la ma rig pa gzhom pa'i don du/shes rab kyi 'khor lo bsgom pa la sogs pa zhi ba'i pho gzugs kyi lha bsgom pa la sogs pa bcom ldan 'das kyis bstan to/ /de ltar yang thams cad gsang chen rgyud las gsungs pa/ chos bdag med pa'i sbyor ba yis/ /bcom nas rang nyid 'jigs byas te//rang sems kho na sangs rgyas nyid/ /rang sems kho na shes par bya/ /zhes so/ /de ltar ye shes zhabs kyis kyang gsungs pa/ yang dag byang chub sems bskyed nas/ /byams pa chen por rab 'byor te/ /chos thams cad la bdag med par/ /de ltar shes na rnam par grol//zhes so/ /de bas na 'dod chags dang / zhe sdang dang / gti mug can gyi sems can rnams la du ma'i thabs kyis sems can gyi don byed pa la 'gal ba med do/ /de ltar yang bkra shis sgrub pa las gsungs pa/ gang dang gang gis bcings 'gyur ba'i/ /skye bo drag po'i las rnams kyi//thabs dang bcas na de nyid kyis/ /srid pa'i bcing ba las grol lo/ /zhes pa'o/ /de ltar yang de nyid bsdus pa'i rgyud las gsungs pa/ ji lta ji ltar 'dul 'gyur ba/ /sems can rang bzhin du ni 'gro/ /de lta de ltar sems can don/ /'dod chags la sogs dag pas bya//zhes so/ /de lta bas na rnal 'byor ma'i de kho na nyid kyi rgyud 'di yang 'dod chags can la phan 'dogs pa'i don du bstan to/ /de nas dang la sdud pa po rnams kyi rgyud dag par bya ba'i don du phun sum tshogs pa bris pa/ lha mo bzhi dang mnyam ldan zhing / /sangs rgyas gzugs kyis nyer brgyan pa//shin tu dga' ba'i sbyor chen la/ /rdo rje sems dpa' cher bzhugs te/ /zhes te/ de la lha mo bzhi zhes pa ni/ sdud pa po phun sum tshogs pa ste/ 'og nas spyan ma la sogs pa bzhis zhus pa'i phyir ro/ /lha mo zhes pa ni rang gi 'od la longs spyod pa dang /lha'i ris su gyur pa'i phyir ro/ /lha mo yang de bzhi yang de nyid pas lha mo bzhi zhes pa ni gsum dang lnga'i grangs sun phyung ba ste rang bzhin tshad med pa bzhi dang 'byung ba chen po bzhi'i ngo bo nyid kyi phyir ro/ /lha mo de dag gis yongs su bskor ba ni de dag mnyam ldan zhes pa ste/lha mo de bzhis yang dag par ldan pa'i phyag rgya bzhi pa'i dkyil 'khor ro/ /'di lta ste/ dbus kyi gtso bo ni rdo rje sems dpa' yab yum bzhugs pa las me mtshams na spyan ma dang / bden bral gyi mtshams na mA ma kI dang / rlung gi mtshams nan bza' dkar mo dang /dbang ldan gyi mtshams na sgrol ma bzhi'i sku ste phyag rgya bzhis bskor nas bzhugs pa'o/ /de ltar yang gsang ba 'dus pa'i rgyud phyi ma las gsungs pa/ spros nas phyag rgya bzhi dag ni/ /dkyil 'khor de la bskor bar brtag /bdag nyid dbus su gnas byas te/ / 'khor lo thams cad bsdu bar bya/ /zhes so/ /yang na lha mo bzhi dang mnyam ldan zhes pa ni gsang ba'i bsnyen sgrub yan lag bzhi'i sgo nas thabs dang shes rab rol pa la rdo rje sems dpa' lha mo bzhi dang ldan te/ bsnyen pa la spyan ma/ nye bar sgrub pa la mA ma kI/ /sgrub pa la na bza' dkar mo//sgrub pa chen po la sgrol ma rang gi rig ma la sgom pa'i phyir ro/ /gsang ba'i bsnyen sgrub bzhi ni 'di lta ste/ thabs dang shes rab sku sbyor ba ni bsnyen pa'o/ /gsang ba'i rdo rje dang pad+mar sbyor ba ni nye ba'i bsnyen pa'o/ /bskul zhing sngags bzla ba ni sgrub pa'o/ /bde ba chen po ni sgrub pa chen po'o//de ltar yang gsang ba 'dus pa'i rgyud phyi ma las gsungs pa/ bsgrub bya sgrub par sbyor ba gang / /de ni bsnyen pa zhes su gsungs/ /rdo rje pad+mo mnyam sbyor ba/ /nye bar bsnyen pa zhes bya ste/ /hUM phaT tshul dang ldan pa ru/ /bskyod pa sgrub par gsungs pa'o/ /rang bzhin rang bde zhi ba ni//sgrub pa chen po zhes bya'o/ /zhes so/ /zhing zhes ba ni gzhan gyi don la bsnyegs pa ste/ /lha mo bzhi kho na dang ldan pa ma yin te/ lus kyi dkyil 'khor gyi lha rnams dang yang ldan pa'i don ston pa'o/ /'khor phun sum tshogs pa bstan pa/ sangs rgyas gzugs kyis nyer brgyan pa//zhes te/ de la sangs rgyas zhes pa ni bla na med pa yang dag par rdzogs pa'i sangs rgyas rigs lnga dang / rig ma bzhi dang / lcags kyu ma la sogs pa bzhi dang / spos me ma la sogs pa bzhi dang / sgeg mo la sogs ba bzhi dang / byang chub sems dpa' brgyad de/ pad+ma bzhin du sangs rgyas kyi chos thams cad thugs su chud nas ma lus par byang chub la blo rgyas pa'i phyir ro/ /de dag gi sku phyag rgya ni sangs rgyas gzugs zhes so/ /sangs rgyas kyi gzugs des rdo rje sems dpa'i phung po lnga dang / 'byung ba chen po bzhi dang / rnam par shes pa brgyad dang / yab yum gyi bdud rtsi la sogs pa'i rigs lnga la sogs par nye bar sbyor ba dang ldan pas na/ sangs rgyas gzugs kyis nyer brgyan pa/ /zhes pa ni mdzes pa'o/ /yang na sku gsung thugs dang ldan zhing spro ba dang bsdu ba mdzad pas sangs rgyas gzugs kyis nyer brgyan pa zhes so/ /gnas phun sum tshogs pa bstan pa/shin tu dga' ba'i sbyor chen la/ /zhes pa ste/ de la shin tu dga' ba'i zhes pa ni khyad par du skyon med cing rtag par kun du khyab pa'i sems can gyi don la chags pa'i rdo rje 'dzin pa'i sku'i gsang ba'o/ /de ltar yang mnyam sbyor gyi rgyud phyi ma las gsungs pa/ skyon med rtag pa gtan du ni/ /thams cad 'dod chags rjes chags pas/ /de nyid gsang ba bcom ldan 'das/ /'dod chags chen po dga' ba che/ /zhes so/ /yang na shin tu dga' ba'i zhes pa ni rnam par mi rtog pa'i ye shes kyi ngo bo bde ba chen po'o/ /de gnyis mngon du bya ba'i don du thabs dang shes rab mnyam par sbyor ba ni sbyor chen zhes pa ste//sems can gyi don chen po mdzad pa'i phyir ro/ /la zhes pa ni gnas de la zhes pa'i don to/ /ston pa phun sum tshogs pa bstan pa/ rdo rje sems dpa' zhes pa ste de yang dam tshig sems dpa'i sgo nas ni rigs lnga'i bdag nyid ye shes lnga'i ngo bo nyid do//'di lta ste/ stong pa nyid kyi rang bzhin rdo rje steng 'og gi rtse lnga ni rigs lnga dang ye shes lnga'i don bsam pa bstan pa'i phyir ro/ /de ltar yang gsang ba 'dus pa'i rgyud phyi ma las gsungs pa/ rgyud lnga dang ni 'bras dag ni//rdo rje zhes su bstan pa yin/ /zhes so/ /yig 'bru 'joms pa ni/ rdo ni me long lta bu'i ye shes dang rnam par snang mdzad/ rje ni mnyam pa nyid kyi ye shes dang rin chen 'byung ldan/ se ni so sor kun du rtog pa'i ye shes dang snang ba mtha' yas/ ma ni bya ba nan tan gyi ye shes dang don yod grub pa/sa ni chos kyi dbyings kyi ye shes dang mi bskyod pa/ de dag dang ldan pa'i don ni dpa' ba'o/ /yang na rdo rje sems dpa' zhes pa ni ye shes sems dpa'i gnas skabs su mchog gi byang chub ye shes las byung ba'o/ /de ltar yang thams cad gsang ba'i rgyud las gsungs pa/mchog gi byang chub dngos ye shes/ /de ni rdo rjer 'dir gsungs te/ /rdo rje ye shes las byung ba/ /de ni rdo rje sems dpar gsungs/ /zhes so/ /dus phun sum tshogs pa mtshon pa ni cher bzhugs te zhes pa ste/ rdo rje sems dpa' sbyor ba chen po la bzhugs pa'i dus su rgyud 'di bstan pa yin no zhes pa'i don to//de la cher zhes pa ni thabs dang shes rab rol pa rnam pa sna tshogs rnam pa gcig tu bskal pa gzhan dang gzhan gyi mtha' med par bde ba chen po'i longs spyod la bzhugs pa'o/ /bzhugs so zhes pa ni bcom ldan 'das bde ba chen po'i ngo bo byang chub sems kyi thig ler yum gyi gsang ba'i pad+mar gnas pa'o//de lta bas na rnal 'byor pa rnams kyis kyang lha dang sbyor ba mngon du byed 'dod na 'di la goms par bya'o/ /da ni re zhig bcom ldan 'das kyis sku'i sgo nas chos bstan pa 'od zer 'chang zhing zhes pa la sogs pa ste/de la 'od zer zhes pa ni de bzhin gshegs pa'i ngo bo kha dog lnga dang ldan pa'i don to/ /'chang zhing zhes pa ni 'od zer gyis chos kyi 'byung gnas la chags pa'o/ /'khrigs pa'i zhes pa ni snga ma bsdu ba dang phyi ma bsnol ba'o/ /gsang chen zhes pa ni bde ba chen po'i rnam par mi rtog pa'i ye shes te theg pa 'og ma dang thun mong ma yin pa'i phyir ro//yon tan de dag dang ldan pa'i chos kyi 'byung gnas ni/ 'od zer 'chang zhing 'khrigs pa yi/ /gsang chen chos kyi 'byung gnas zhes pa ste gsang ba ni gsang ba'i pad+ma'o/ /de la chos zhes pa ni phung po dang khams dang skye mched la sogs pa'i 'khor ba dang mya ngan las 'das pa'i mtshan nyid de/mtshan nyid 'dzin pas chos zhes bya/ /zhes gsungs pa'i phyir ro/ /de dag gi skye gnas ni chos kyi 'byung gnas zhes so/ /'di lta ste chos kyi 'byung gnas e gru gsum ni sku gsung thugs kyi rang bzhin yin pa dang /chos thams cad sku gsung thugs kho na 'phros pa yin no/ /de ltar yang gsang ba 'dus pa'i rgyud phyi ma las gsungs pa/ /sku gsung thugs kyi bye brag gis/ /gru gsum la ni rnam par bsgom/ /zhes so/ /yang de kho las gsungs pa/ sems can thams cad 'byung ba ni/ / dus gsum rdo rje'i ngo bo nyid/ /ces pa'o/ /la zhas pa ni 'phros pa'i gnas mtshon pa'o/ /byang chub sems zhes pa ni gsang ba'i rdo rje dang pad+ma'i sbyor ba las byung ba brjod kyis mi lang ba'i bde ba chen po'i ngo bo lhag pa'i byang chub kyi sems te/ don dam pa'i byang chub kyi sems thob pa'i rgyur gyur pa'o//de ltar yang zla gsang thig le'i rgyud las gsungs pa/ byang yig rdo rje zhes gsungs te/ /yi ge chub ni gzungs ma'i tshig /sems yig bzhu ba gsungs pa te/ /yi ge dpa' ni bde ba che/ /zhes so/ /'phros nas su zhes pa ni de bzhin gshegs pa thams cad kyi snying po thig le'i gzugs sems can gyi bdag nyid ye shes lnga'i ngo bo lhag pa'i byang chub sems su gyur nas gsang ba'i rdo rje nas gsang ba'i pad+ma la phab pa'o//chos kyi dbyings zhes pa la chos zhes pa ni bshad zin to/ /dbyings zhes pa ni rgyu'o/ /don ni 'di lta ste chos thams cad kyi sa bon phra mo'i yig 'bru yi ge k+ShUM gi ngo bor bzhugs pa'o//yi ge 'bru de zhu mdzad do/ /zhes pa ste/ 'od kyi gong bur byed pa'o/ /da ni gsung gi sgo nas chos bstan pa thos par 'dod nas lha mo spyan mas chos kyi dbyings 'phro ba'i don zhus pa/ zhu ba'i dngos po de mthong nas/ /zhes pa la sogs pa ste/ de la zhu ba'i dngos po zhes pa ni bshad zin to//de mthong nas zhes pa ni sku'i sgo nas chos ston pa'i rdo rje sems dpa' de mthong nas lha mo spyan mas yongs su zhus pa zhes te/ de la lha mo ni bshad zin to/ /lha mo yang de spyan ma yang de bas na lha mo spyan ma zhes te/ spyan dang 'dra ba'i dam tshig gi phyag rgya'i bdag mo yin pa'i phyir ro//yongs shes pa ni don ma lus pa'o/ /zhus pa zhes pa ni rang gi stan las langs pa dang bla gos phrag pa gcig tu gzar ba dang / lan gsum bskor nas phyag byas pa dang / pus mo sa la btsugs te thal mo sbyar ba rnams zhu ba'i tshul lngas gsol ba btab pa'o//gang la zhus she na/ bcom ldan 'das rdo rje sems dpa' la zhes te/ ston pa po la zhus pa'i tha tshig go/ /yig 'bru 'joms pa ni bcom ldan 'das yang ste/ rdo rje sems dpa' yang de yin pas bcom ldan rdo rje sems dpa'o/ /de la bcom ldan zhes pa ni theg pa bzhi'i bye brag gis bshad de/rdo rje'i theg pa la theg pa 'og ma'i don bcug kyang mi 'gal te/ rdo rje sems dpa' theg pa kun las sangs rgyas pa'i phyir ro/ /de ltar yang sangs rgyas mnyam sbyor gyi rgyud las gsungs pa/ sems dang sems dpa'i ting 'dzin dang / /byang chub spyod pa sna tshogs nyid//bdud dang de bzhin bdud las rgyal/ /byang chub sangs rgyas der 'gyur ro/ /zhes dang / yang mnyam sbyor gyi rgyud phyi ma las gsungs pa/ dngos grub chen po kun gyi mchog /dbang phyug la sogs lhag pa'i lha/ /rgyal po rdo rje 'dzin pa che/ /yig 'bru dam pa mchog tu dga'//zhes so/ /'di lta ste/ nyan thos kyi theg pa bcom ldan zhes pa ni nyon mongs pa dang / 'chi bdag dang / phung po dang / lha'i bu'i bdud bzhi bcom zhing zad pa dang mi skye ba'i ye shes dang ldan pa'o/ /de ltar yang mdo las gsungs pa/ nyon mongs las dang skye ba dang //nyon mongs shes bya'i sgrib de bzhin/ /rnam par smin chos gang de ni/ /bcom pas des na bcom ldan 'dod/ /ces pa'o/ /bcom pa'i rim pa ni 'di lta ste byang chub kyi shing drung du rdo rje'i gdan mnan pa'i dus su srod kyi dus dang po la 'dod pa'i zag pa zad bas lha'i bu'i bdud bcom/nam phyed kyi dus gnyis pa la lha'i spyan phye bas 'jig rten thams cad gzigs te tho rangs kyi dus gsum pa la ma rig pa'i zag pa zad pas nyon mongs pa'i bdud bcom/ rtswa mchog gi grong khyer du yon bdag bram ze mo dze tA'i don du zla ba gsum srog gi 'du byed byin gyis brlabs te srid pa'i zag pa zad pas shi ba'i bdud bcom mo//de'i 'og tu mya ngan las 'das pa'i dus mkhyen nas rang gi tshe'i 'du byed btang ste lta ba'i zag pa zad pas phung po'i bdud bcom mo/ /de gnyis gzhom pa ni kha cig chu bo ni rany+dza nA'i 'gram na til phyed kyi zas la brten nas lo drug gi bar du dka' thub mdzad pa'i dus su 'chi ba'i bdud dang /phung po'i bdud bcom zhes zer na de yang bden te/ der bcom par gyur na yang 'dir bcom pa'i don mngon du bstan pa'o/ /de bas na lang kar gshegs pa'i nang na rtswa mchog gi grong khyer du shi ba'i bdud dang phung po'i bdud bcom zhes bstan to//byang chub sems dpa'i theg pa chen po la bcom ldan zhes pa ni dbul po dang / ngan song dang / mi sdug pa'i gzugs dang / grags pa med pa dang / dpal med pa dang / ma rig pa go rims su pha rol tu phyin pa drug gis bcom ste/ 'bras bu dbang phyug dang / mchog dang / gzugs bzang dang / grags pa dang / dpal dang / ye shes rnams dang ldan pa'i phyir ro/ /da ltar yang gsungs pa/ dbang phyug dang ni mchog dang ni/ /gzugs bzang dang ni grags dang dpal/ /ye shes nan tan thos pa drug /bcom ldan zhes bya 'dod pa'o//rdo rje'i theg pa la bcom ldan zhes pa ni sems tsam gyi lta ba la kun gzhi dang nyon mongs pa'i yid dang / rnam par rtog pa'i rnam par shes pa dang / sgo lnga'i rnam par shes pa bcom zhing me long dang / mnyam pa dang / so so dang / bya ba dang / chos kyi dbyings dang /rdo rje lta bu'i ye shes drug dang ldan pa'i phyir ro/ /dbu ma'i gnas skabs su gnyis su med pa'i shes rab kyis nyon mongs pa thams cad bcom zhing rnam par mi rtog pa'i ye shes dang ldan pa'o/ /de yang gsungs pa/ nyon mongs shes rab kyis bcom nas/ /shes rab bcom zhes 'dod pa'o//zhes so/ /de lta bu'i khyad par can rdo rje sems dpa' la zhes pa ste bshad zin to/ /tshig 'di dag ni zhes pa ni/ chos kyi dbyings rnams 'phro ba ni/ /zhes pa nas/ bdag gi the tshom lhas bka' stsal/ /zhes bya ba'i bar gyi tshig la mtshon pa'o//chos kyi dbyings rnams 'phro ba ni/ /gang las skye bar 'gyur ba lags/ /zhes pa ni chos kyi dbyings kyi khungs zhus pa ste yig 'bru ni bshad zin to/ /dang po ji ltar 'ong ba yin/ /zhes pa ni chos kyi dbyings 'phro ba'i lam zhus pa'o/ /de bzhin phyir 'gro ji ltar lags/ / zhes pa ni chos kyi dbyings 'phro ba'i gnas zhus pa'o/ /yan lag med pa gang de ni/ /zhes pa ni chos kyi dbyings spyi'i mtshan nyid kyi sgo nas zhus pa'o/ /yan lag dang bcas gyur nas su/ /lus dngos 'gyur ba ji ltar lags/ /zhes pa ni rang gi mtshan nyid rags pa'i don zhus pa'o/ / lus de'i nying lag skye mched dang dbang po'i don zhus pa'o/ /mig dang rna ba sna dang ni/ /de bzhin lce dang lus dang yid/ /dbang po zhes pa ste de la mig ces pa ni mig gi rnam par shes pa'i rten nang gi gzugs dang ba go snyod kyi me tog 'dra ba gang de mig gi dbang po'o/ /rna ba zhes pa ni rna ba'i rnam par shes pa'i rten nang gi gzugs dang gro ga gcus te bcad pa 'dra ba gang de rna ba'i dbang po'o//sna dang ni zhes pa ni sna'i rnam par shes pa'i rten nang gi gzugs dang ba zangs kyi mo khab gshibs pa 'dra ba gang de sna'i dbang po'o/ /de bzhin lce dang zhes pa ni lce'i rnam par shes pa'i rten nang gi gzugs dang lce'i dkyil na zla ba kham pa 'dra ba gang de lce'i dbang po'o//lus dang zhes pa ni lus kyi rnam par shes pa'i rten nang gi gzugs dang ba bya reg 'jam gyi pags pa 'dra ba gang de lus kyi dbang po'o/ /yid ces pa ni mig la sogs pa'i rnam par shes pa drug 'das pa'o//de ltar yang chos mngon pa las gsungs pa/ drug po 'das ma thag pa yi/ /rnam shes gang yin de yid do/ /zhes so/ /dbang po zhes pa ni mig la sogs pa lngas bzhi la dbang byed pa'i phyir ro/ /bzhi gang zhe na/ bdag mdzes par bya ba dang / bdag gir bya ba dang / rang rang gi rnam par shes pa skyed pa dang /rang rang gi spyod yul la spyod pa bzhi'o/ /de ltar yang chos mngon pa mdzod las gsungs pa/ dbang po lngas ni don bzhi la dbang byed ces so/ /yid ni gnyis la dbang byed de/ /srid pa gzhan la 'brel pa dang / /dngos la 'jug pa la dbang byed pa'o/ /yang phung po dang khams kyi sgo nas zhus pa phung po'i dngos rnams dang /khams rnams su ni 'jug pa yang / /zhes pa ste/ de la phung po zhes pa ni 'dus pa'i don te/ gzugs la sogs pa'i phung po lnga'o/ /'di lta ste/ de la gzugs kyi phung po ni dbang po lnga dang yul lnga ste bcu'o/ /de yang dus gsum gyi gzugs bzang ngan dang che phra gcig tu 'dus pa'o//gzhan bye brag tu smra ba na re/ rnam par rig byed ma yin pa'i gzugs dang bcu gcig 'dod do/ /tshor ba'i phung po ni myong ba'i mtshan nyid de bde ba dang / sdug bsngal ba dang / bde ba yang ma yin/ sdug bsngal ba yang ma yin pa mig gi 'dus te reg pa la sogs pa drug gsum bco brgyad 'dus pa'o//'du shes kyi phung po ni mtshan mar 'dzin pa'i mtshan nyid de/ dkar po zhes bya ba dang / nag po zhes bya ba dang / bzang po zhes bya ba dang / ngan pa zhes bya ba dang / ring po zhes bya ba dang / thung ngu zhes bya ba la sogs pa 'dus pa'o//gzhan mdo sde pa na re/ de yang gong ma bzhin du mig gi 'dus te reg pa las byung ba'i 'du shes la sogs pa bco brgyad la 'du shes zhes zer ro/ /'du byed ni phung po bzhi la ma gtogs pa'i 'du byed kyi chos kun te sems lase byung ba'i chos can bzhi kas 'dus byas pa'i phyir ro//sems tsam pa na re/ sems las byung ba'i chos la sogs pa 'du byed lnga bcu rtsa gcig go/ /rnam par shes pa'i phung po ni yul tha dad pa so sor shes pa'i mtshan nyid de/ mig la sogs pa'i rnam par shes ba drug dang yid dang bdun 'dus pa'o//de yang sems tsam pa na re/ gong ma bdun dang kun gzhi rnam par shes pa dang brgyad 'dus pa la 'dod do/ /de bzhin du dbu ma pa na re/ rnam par shes pa drug 'dus pa la 'dod de/ de dag gi khungs ni bstan bcos la gsal bas ma bris so/ /dngos rnams dang zhes pa ni 'byung ba chen po bzhi'o//khams rnams su ni 'jug pa yang / /zhes pa ni de la khams ni rigs kyi don te/ chos kun gyi 'byung khungs yin pa'i phyir ro/ /khams de rnams kyi sgras ni grangs bco brgyad 'dren pa'o/ /'di lta ste/ mig gi dbang po'i khams dang / rna ba'i dbang po'i khams dang / sna'i dbang po'i khams dang / lce'i dbang po'i khams dang / lus kyi dbang po'i khams dang / yid kyi dbang po'i khams dang / gzugs kyi khams dang / sgra'i khams dang / dri'i khams dang / ro'i khams dang / reg bya'i khams dang / chos kyi khams dang /mig gi rnam par shes pa'i khams dang / rna ba'i rnam par shes pa'i khams dang / sna'i rnam par shes pa'i khams dang / lce'i rnam par shes pa'i khams dang / lus kyi rnam par shes pa'i khams dang / yid kyi rnam par shes pa'i khams rnams so/ /'jug pa'ang zhes pa ni chos kyi dbyings de dag gi rnam pa la khyab cing 'jug pa ji ltar lags zhes zhus pa'i tha tshig go//'ang zhes pa ni zhus pa'i rnam grangs bsnyag pa'o/ /nyon mongs pa'i sgo nas zhus pa/ ma rig bag chags sred pa yis/ /bcings pa'i nyon mongs 'dod chags sogs/ / zhes pa ste/ de la ma rig ces pa ni tshe snga ma'i 'dod chags la sogs pa'i nyon mongs pa ste yang dag pa'i don mthong ba'i sgrib pa'i phyir ro/ /bag chags zhes pa ni 'du byed de tshe snga ma'i dge sdig gi las bag la nyal bas tshe 'di'i rnam par shes pa la 'debs pa'i phyir ro/ /srid pa yis zhes pa ni 'dod chags la chags pa ste tshe phyi ma byed pa'o//de bas na bcings pa zhes pa ste tshe snga ma'i ma rig pa dang / 'du byed kyis tshe 'di la grol bar mi byed pa dang / tshe 'di'i sred pas tshe phyi ma'i srid pa las mi grol bar byed pa'i phyir ro/ /bcings pa'i dngos po nyon mongs pa gang zhe na/dngos po de bstan pa nyon mongs 'dod chags sogs zhes te de la nyon mongs zhes pa ni mnar med pa'i dmyal ba nas srid pa'i rtse mo'i bar gyi sems can gyi sems sdug bsngal gyi sa bon yin pa'i phyir ro/ /de ltar yang chos mngon pa mdzod las gsungs pa/ 'dir ni nyon mongs sa bon yin//klu bzhin rtswa bzhin ljon shing bzhin/ /de bzhin shun pa bzhin du 'dod/ /ces so/ /nyon mongs pa yang de 'dod chags kyang de bas na/ nyon mongs 'dod chags sogs zhes pa ste/ de yang de la 'dod chags zhes pa ni zhen pa'i mtshan nyid de/ de yang 'dod pa'i 'dod chags dang sred pa'i 'dod chags so//sogs pa'i sgras ni zhe sdang dang gti mug la bzung ste/ de la zhe sdang ni gzhan la gnod par sems pa'o/ /gti mug ni dge ba dang mi dge ba la khyad par du mi shes pa'o/ /de dag bcing ba gsum yin te/ tshor ba gsum gyi rang bzhin nyid kyi phyir ro//'di lta ste 'dod chags ni bde ba tshor ba'i mtshan nyid do/ /zhe sdang ni sdug bsngal ba tshor ba'i mtshan nyid do/ /gti mug ni bde ba yang ma yin sdug bsngal ba yang ma yin pa tshor ba'i mtshan nyid do/ /de ltar yang chos mngon pa mdzod las kyang gsungs pa/ tshor ba'i dbang gis 'ching ba gsum//zhes so/ /nyon mongs pa des bcing ba'i rnam par shes pa dang / khams gsum du gyur pa dang bsdu ba'i don zhus pa/ rnam par shes pa sna tshogs pa/ /ji ltar dngos su 'dus pa lags/ /zhes pa ste/ de la rnam par shes pa zhes pa ni sems tsam la 'dod de/de ltar yang rab tu byed pa nyi shu pa las gsungs pa/ sems dang yid dang rnam par shes/ /rnam par rig pa zhes rnam grangs/ /zhes so/ /sna tshogs pa zhes pa ni rnam par shes pa de khams gsum gyi snod dang bcud de dngos su gyur pa'o/ /ji ltar dngos su 'dus pa lags//zhes pa ni 'jig pa'i bskal ba la khams gsum de yang rnam par shes pa tsam du ji ltar 'dus pa lags zhes zhus pa'i tha tshig go/ /bsgom pa'i don zhus pa/ dngos po med pa bsgom pa'i gzugs/ /zhes pa ste de la don 'di yod ma thag byed pa ni dngos po zhes so//de yang don dam par dpyad na mi rung ba ni dngos po med ces pa ste/ gzung 'dzin kun brtags kyi phyir dang / yod pa dang med pa mi skye ba'i phyir ro/ /de ltar dngos po dngos med la sku phyag rgya la sogs pa khyad par du bsgom pa'i gzugs zhes pa ste bsam pa'o/ /yang gong du 'phro 'du gzugs la sogs pa'i skye mched kyi sgo nas zhus pa/gzugs sogs spyod yul mtshan nyid rnams/ /zhes pa ste de la gzugs sogs zhes pa ni gzugs kyi skye mched nas chos kyi bar du drug ste/ de la yang gzugs ni nyi shu ste/ sngon po dang / ser po dang /dmar po dang / dkar po dang / ring po dang / thung ngu dang / lham pa dang / zlum po dang / mthon po dang / dma' ba dang / phya le ba dang / phya le ba ma yin pa dang / sprin dang / du ba dang / rdul dang / khug rna dang / grib ma dang / nyi ma dang / snang ba dang / mun pa'o/ /sgra yi skye mched ni brgyad de/zin pa'i 'byung ba chen po bzhi'i rgyun can dang / ma zin pa'i 'byung ba chen po bzhi'i rgyun can dang / sems can dang sems can ma yin par ston pa bzhi phrag gnyis yid du 'ong ba dang yid du mi 'ong bas te brgyad do/ /dri'i skye mched ni bzhi ste/ dri zhim pa dang / dri nga ba dang / dri mnyam pa dang / dri mi mnyam pa'o/ ro'i skye mched ni drug ste/ ro mngar ba dang / skyur ba dang / lan tshwa dang / tsha ba dang / kha ba dang / bska ba'o/ /reg bya'i skye mched ni bcu gcig ste/ 'byung ba chen po bzhi dang / 'jam pa dang / rtsub pa dang / lci ba dang / yang ba dang / grang ba dang / bkres pa dang / skom pa'o/ /chos kyi skye mched ni bdun te/ tshor ba dang / 'du shes dang / 'du byed dang / rnam par rig byed ma yin pa dang / so sor brtags pa'i 'gog pa dang / so sor brtags pa ma yin pa'i 'gog pa dang / nam mkha'o/ /spyod yul zhes pa ni gzugs la sogs pa de dag mig gi dbang pos dmigs pa'i rten yin pa'i phyir ro//mtshan nyid rnams zhes pa ni gzugs la sogs pa'i rang gi mtshan nyid do/ /gong du bshad pa'i sngon po dang ser po la sogs pa'o/ /rang bzhin med cing zhes pa ni gzugs la sogs pa'i spyod yul te/ gcig dang du ma mi 'byor ba'i phyir ro//de ltar yang dbu ma rgyan las gsungs pa/ de bzhin nyid du brjod pa yi/ /dngos po 'di dag rang bzhin med/ /gcig dang du ma mi 'byor phyir/ /rang bzhin gyis ni gzugs brnyan 'dra/ /zhes so/ /rang bzhin med cing dmigs med la/ /zhes pa ste dbang po la 'das pa'i phyir ro//de 'dra ba yi spyod yul la/ /dmigs pa dang bcas ji ltar lags/ /zhes zhus pa'o/ /zhus pa'i mjug bsdus pa/ de dag ngo mtshar chen po ni/ /bdag gi the tshom lhas bka' stsal/ /zhes pa de la de dag ces pa ni gong du thal ba'i zhus pa'i tshig rnams so/ /ngo mtshar chen po ni zhes pa ni sngon ma rtogs pa'o//bdag ces pa ni lha mo spyan ma ste/ de'i the tshom zhes pa ni som nyir gyur pa'o/ /lha zhes pa ni rdo rje sems dpa' ste/ lha'i rjes su skye ba mdzad pa dang / rang gi 'od zer la longs spyod pa'i phyir ro/ /bka' stsal zhes pa ni the tshom de dag bsal bar bya ba'i don du gnas rnam pa lnga dang ldan pa'i gsung gi sgo nas ston cig par zhus pa'o//gnas rnam pa lnga ni 'di lta ste/ nges pa'i tshig dang / de'i rgyu dang / dpe dang / nye bar 'gro ba dang / nges par 'gro ba'o/ /de la nges pa'i tshig ni 'dus byas pa'i chos thams cad mi rtag pa zhes smra ba lta bu'o//rgyu ni rgyu rkyen tshogs nas 'dus byas pa'i phyir zhes smra ba lta bu'o/ /dpe ni bum pa dang 'dra zhes smra ba lta bu'o/ /nye bar 'gro ba ni ji lta ba ni 'jim pa dang / 'khor lo dang / skud pa dang / rdza mkhan rnams 'dus nas byas pa'i phyir bum pa mi rtag pa yin zhes smra ba lta bu'o//nges par 'gro ba ni de bzhin du 'dus byas pa'i chos kyang rkyen rnams tshogs nas byas pas mi rtag go zhes smra ba lta bu'o/ /de ltar yang tshig don thams cad la yang gnas rnam pa lnga shes par bya'o/ /da ni gsung gi sgo nas chos bstan pas zhus pa'i lan gsungs pa/de ltar zhus ma thag tu zhes pa la sogs pa ste/ de la de ltar zhes pa ni gong du zhus pa'i tshig la bsnyeg pa'o/ /zhus ma thag tu ni zhes pa ni de ma thag pa'i don to/ /lha mos zhus pa ste kho nar dus gzhan du ma bsnyad par lan btab po zhes pa'i tha tshig go/ / bcom ldan rdo rje sems dpas gsungs/ /zhes pa ni ston pa po ste bshad zin to/ /gsungs zhes pa ni brjod kyis mi lang ba'i chos yin yang thugs rje'i dbang gis bshad pa'o/ /ston pa'i chos nyid kyi don mtshon pa/ shes rab zab pa zad med ni/ /zhes pa ste de la shes rab ces pa ni gnyis su med pa'i shes rab ste/gzung ba dang 'dzin pa dang bral ba'i phyir dang / yod pa dang med pa dang bral ba'i phyir ro/ /de bas na de nyid zab pa zhes pa ste rnam par mi rtog pa'i phyir ro/ /de ltar yang 'jig rten snang ba las kyang gsungs pa/ mi rtog pa ni zab pa yin/ bdag gzhan 'byung ba rgyas pa'o/ /zad med ces pa ni chos nyid de 'dus ma byas pa'i phyir bskal pa grangs med pa gzhan du yang de bzhin du gnas pa'i phyir ro/ /de ltar yang de nyid du 'dus pa las gsungs pa/ de bzhin gshegs pa byung yang rung de bzhin gshegs pa ma byung yang rung chos nyid de bzhin du gnas pa'o zhes so//nyon cig ces pa ni bum pa kha mar sbubs ba dang / bum pa zhabs rdol ba dang / bum pa mi gtsang bas gang ba lta bu'i skyon gsum spangs te/ dad pa dang / brtson 'grus dang / yang dag pa'i lta ba gsum dang ldan na/ /rna ba'i dbang pos sgra la dmigs//zhes smra ba'o/ /yang na shes rab gsum dang ldan nas nyon cig ces smra ba'o/ /spyan ma zhes pa ni bod pa'i tshig go/ /bshad par bya zhes pa ni gnang ba'i tshig go/ /bshad par dam bca' ba'o/ /da ni re zhig chos nyid de'i yon tan bstan pa ni dpyad du med cing zhes pa la sogs pa ste/de la dpyad du med cing zhes pa ni mngon sum dang rjes su dpag pas shes su med pa'o/ /de la mngon sum gyis mi shes pa ni dbang po'i rnam par shes pa dang / yid kyi rnam par shes pas dpyad du med pa la so so yang dag par rig pa dang rnam par mi rtog pa'i ye shes kyis dpyad pa'o//'o na gnyis kyis dpyad pa de la dpyad du med cing zhes bstan pa'i phyir zhe na lan btab pa/ dbang po'i rnam par shes pa dang / yid kyi rnam par shes pa gnyis kyis dpyad du med pa'i phyir ro/ /dper na rta rkang lag gsum yod bzhin du lag pa gcig bcad na 'jig rten pas rta rkang med gcig ces brjod pa lta bu'o//rjes su dpag pa gnyis kyis kyang dpyad du med pa ste/ mtshan gsum dang rtags gsum gyis dpyad du med pa'i phyir ro/ /de ci'i phyir zhe na/ chos nyid ni ji ltar snang ba de bzhin du ma yin pa'i phyir ro/ /de bas na shes bya min zhes pa ste thams cad mkhyen pa'i spyod yul gyi phyir ro//de ltar yang rab tu byed pa nyi shu pa las gsungs pa/ rang sems ye shes mi shes pas/ /ji ltar sangs rgyas spyod yul lo/ /zhes so/ /de'i phyir/ /de bzhin dpyad mkhan gyis shes dka'/ /zhes pa ste shes rab kyi rjes su 'brang ba rnams kyis mthong ba dang thos pa tsam gyis mi rtogs pa'i phyir ro//'o na ci 'dra zhe na gsungs pa/ sangs rgyas kun gyi gsang chen ni/ /nam mkha' nam mkha'i spyod yul lo/ /zhes pa ste de la sangs rgyas kyang de kun yang de bas sangs rgyas kun zhes pa ste/phyogs bcu na bzhugs pa'i gang+gA'i klung gi bye ma lta bu'i bla na med pa yang dag par rdzogs pa'i sangs rgyas rnam par snang mdzad la sogs pa 'dir 'dod de 'di lta ste/ gsang ba'i rgyud rdo rje theg pa las sangs rgyas pa ni bla na med pa yin te de'i gong du theg pa gzhan med pa'i phyir ro/ yang dag pa yang yin te theg pa chen po la gnas pa'i phyir ro/ /sbyor ba'i rgyud dang / bya ba'i rgyud dang / mdo sde chen po'i theg pa la sangs rgyas pa ni theg pa gong na yod pas bla dang bcas pa yin la yang dag par rdzogs pa yin te/ theg pa chen po la gnas pa'i phyir ro/ /theg pa chung ngu las sangs rgyas pa'i nyan thos dang rang sangs rgyas ni bla dang bcas pa yang ma yin/yang dag par rdzogs pa yang ma yin te/ theg pa gong na yod pa'i phyir dang yang theg pa chung ngu las phyir ldog dgos pa'i phyir ro/ /de lta bas na sangs rgyas rnam pa gsum du shes par bya'o//de rnams kyi gsang chen ni zhes pa ni gong du bshad zin to/ /nam mkha' nam mkha'i spyod yul lo/ /zhes pa ni stong pa nyid kyi sems kyis dmigs pa med par stong pa nyid bsgom pa'o/ /de ltar klu sgrub zhabs kyis dbu ma las gsungs pa/ dmigs pa med pa'i sems dag ni//nam mkha'i mtshan nyid du gnas te/ /nam mkha'i sgom pa kho na de/ /stong pa nyid bsgom 'dod pa'o/ /zhes so/ /de bas na gsang chen ni theg pa chung ngu ba rnams kyis kyang mi shes pa'i don gsungs pa/ mi shes mun pas sgrib pas na/ /nyan thos rnams kyis shes pa min/ / zhes pa ste/ de la mi shes zhes pa ni nyon mongs pa can ma yin pas mi shes pa ste/ nyan thos rnams dang rang sangs rgyas la thams cad mkhyen pa dang mi ldan pa'i phyir ro/ /mi shes kyang de mun pa yang de bas na mi shes mun pa zhes pa ste/ yang dag pa'i don rnam par mi rtog pa'i ye shes la mi gsal bar byed pa'i phyir ro//des bsgribs pa ni mi shes mun pas bsgribs pas zhes pa ste/ nyan thos kyis shes bya'i sgrib pa ma spangs pa'i phyir ro/ /de ltar yang shes rab kyi pha rol tu phyin pa las gsungs pa/ rab 'byor de bzhin gshegs pa'i zag pa med pa'i phung po mthong ngam/ bcom ldan 'das ma mthong zhes so/ /de lta bas na/ nyan thos rnams kyis shes pa min/ /zhes pa ste/ de la nyan thos zhes pa ni nyan thos kyi sangs rgyas te/ ston pa la nyan zhing thos nas nges par 'byed pa'i cha bzhi mthar phyin te mthong ba'i lam mngon du gyur pa'i phyir ro/ /de rnams kyis shes pa min zhes pa ste gzung ba dang 'dzin pa ma spangs pa'i phyir ro//spyod yul zhes pa ste gzugs la sogs pa'i phyi'i skye mched drug go/ /de dag tshe snga ma'i las kyi dbang gis med par snang ba ni spyod yul bag chags zhes so/ /de ni kun brtags tsam du rtogs pa ni/ spyod yul bag chags shes mkhan ni/ /rang sangs rgyas su sprul pa ste//zhes pa ste/ de la rang sangs rgyas zhes pa ni tshe 'di'i sngon du nges par 'byed pa'i cha bzhi mthar phyin nas mthong ba'i lam du zhugs ma khad la tshe 'das nas phyi ma'i tshe la ston pa la nyan zhing thos mi dgos par rang gis nges par 'byed pa'i cha bzhi mthar phyin te mthong ba'i lam rang mngon du gyur pa'i phyir ro//sprul pa ste zhes pa ni dbyung ba'o/ /de kun gyis kyang zhes pa ni rang sangs rgyas kun gyis kyang mi shes pa ste/ 'dzin pa'i rtogs pa ma spangs pa'i phyir ro/ /de ltar yang mngon par rtogs pa'i rgyan las gsungs pa/ gzung don rtog pa spong phyir dang / /'dzin pa mi spong phyir dang ni//rten gyi bse ru lta bu'i lam/ /yang dag bsdus pas shes par bya/ /zhes so/ /kyang gi sgras ni nyan thos kyis mi shes pa de rang sangs rgyas kyis kyang shes pa ma yin no zhes pa'i don snyeg pa yin pa'o/ /shes med so so'i skye bo yis/ /zhes pa ni mi shes pa'i sgra ni gong ma la snyeg pa ste/ so so'i skye bo yis kyang mi shes zhes pa'i tha tshig go//de la shes med ces pa ni nyon mongs pa can gyi ma rig pa ste so so'i skye bo nyon mongs pa dang / shes bya'i sgrib pa can yin pa'i phyir ro/ /shes med kyang de so so'i skye bo yang de bas na shes med so so'i skye bo'i zhes pa ste/ 'phags pa las gzhan du gyur pa ste/ 'phags pa'i chos mthong ba'i lam ma thob pa'i phyir dang mi dge ba las ma grol ba'i phyir ro/ /dus kun la mi shes pa'i don bstan pa/ ma 'ongs pa dang / 'das pa dang / da ltar byung ba'i dus gsum la zhes pa ste go sla'o/ /byol song zhes pa ni lha dang mi'i 'gro ba las byol nas song ba ngan song gsum mo//de'i mi dge ba'i las ni byol song bag chags zhes so/ /de las skye ba ni de las byung ba'i/ dud 'gro yi dags skye ba rnams/ /zhes pa ste/ de la dud 'gro zhes pa ni lha dang mi'i 'gro ba ma gtogs par phyugs kyi khams su gtogs pa yin pa de dud de 'gro bas na dud 'gro zhes pa ste de ni mi 'am ci la sogs pa'o//'on kyang phyugs la sogs pa don gyis shes par bya'o/ /yi dags zhes pa ni 'di las ye nas phyir mi ldog par 'das pa'o/ /yang na bkres pa dang skom pas sdug bsngal ba'o/ /'gro ba de gnyis la lhung ba ni/ dud 'gro yi dags skyes pa rnams/ /zhes pa'o/ / de kun gyis kyang mi shes te/ /zhes pa ni ngan song gsum sdug bsngal sna tshogs kyis gtses pa'i phyir ro/ /mi shes pa gang zhe na gsungs pa/ sangs rgyas spyod yul gsang chen ni/ /zhes pa ste yig 'bru ni bcom zin to/ /de ltar chos nyid kyi che ba'i yon tan bstan zin nas/ da ni don bstan pa la/ re zhig dang la chos kyi dbyings rnam par 'phro ba ni/gang las skye bar 'gyur ba lags/ /zhes pa'i lan gsungs pa/ snying po shin tu snying po mchog /ces pa la sogs pa ste/ de la snying po zhes pa ni phyi'i dkyil 'khor te/ g.yo ba med pa'i phyir dang / 'dod pa'i 'bras bu smin par byed pa'i phyir ro/ /de ltar yang 'jig rten snang ba las kyang gsungs pa/snying po 'dus phyir dkyil 'khor gsungs/ /zhes pa ste/ dkyil 'khor de las khyad par du gyur pa ni/ snying po shin tu snying po mchog /ces pa ste 'og nas 'byung ba'i lus kyi dkyil 'khor phra mo'i ting nge 'dzin te dkyil 'khor shin tu zab pa'i phyir ro/ /de mya ngan las 'das ba'i ngo bor gyur pa'i phyir mchog ces so//yang na snying po zhes pa ni sku gsung thugs te/ khams gsum gyi rang bzhin yin pa'i phyir ro/ /sku gsung thugs de'i rang bzhin du gyur pa ni shin tu snying po zhes pa ste/ rdo rje sems dpa'i ngo bo bde ba chen po rnam par mi rtog pa'i ye shes chos kyi dbyings so/ /de yang ci 'dra zhe na/gang de kun bdag la gnas pa/ /zhes pa ste bcud dang snod kyi rang bzhin du khyab pa'o/ /sangs rgyas kun gyi gsang chen ni/ /lha mo khyod la bshad par bya/ /zhes pa ni bshad zin to/ /phra mo'i ting nge 'dzin bstan pa byang chub sems zhes pa la sogs pa ste/ de la byang chub sems zhes pa ni bshad zin to//de nyid bdag ces pa ste gzung ba dang 'dzin pa'i skyon gyis ma gos pa'i phyir ro/ /de ltar sems tsam las gsungs pa/ gzhan gyi blo yis tshor ba min/ /des kyang gzhan la tshor ba min/ /gzung 'dzin dang ni bral ba'i phyir/ /rang de kho nar snang bar 'gyur/ /zhes pa'o/ /de bas na rang bzhin 'od gsal ba zhes pa ste/ nam mkha' bzhin du nyon mongs pa'i dri ma glo bur ba yin pa'i phyir ro/ /de ltar yang rab tu byed pa dbus mtha' las gsungs pa/ chu khams gser dang nam mkha' bzhin/ /dag pa bzhin du dag par 'dod/ /ces so/ /phra mo'i ting nge 'dzin de'i mdog bstan pa/ zla ba'i shel dang mnyam pa'i 'od/ /ces pa ste chu shel gyi mdog dang 'dra ba dkar ba'o//phra mo'i ting nge 'dzin gyi dngos po bstan pa/ de nyid ye shes lnga yi dngos/ /zhes pa ste de la de nyid ces pa ni bskal pa gzhan dang gzhan du yang mi 'gyur ba'i phyir ro/ /yang na de nyid ces pa ni rigs lnga'i rang bzhin dang ldan pa'i phyir ro/ /de ltar yang gsang ba 'dus pa'i rgyud phyi ma las gsungs pa/de kho na nyid rigs lngar gsungs/ /zhes so/ /ye shes lnga zhes pa ni me long lta bu'i ye shes dang / mnyam pa nyid kyi ye shes dang / so sor kun du rtog pa'i ye shes dang / bya ba nan tan gyi ye shes dang / shin tu rnam par dag pa'i chos kyi dbyings kyi ye shes so/ /de la me long lta bu'i ye shes ni/ kun gzhi gnas gyur pa de bzhin nyid dang stobs bcu'i ngo bo rdo rje lta bu'i byang chub sems kyi rang bzhin shes bya'i sgrib pa bsal bar byed pa ni me long lta bu'i ye shes te/dper na me long la bstan pa'i rdzas gsal ba bzhin du chos nyid la chos thams cad gsal bar rtogs pa'i phyir ro/ /mnyam pa nyid kyi ye shes ni nyon mongs pa'i yid gnas gyur pa yang dag pa'i mtha' dang mi 'jigs pa bzhi'i ngo bo sbyin pa'i pha rol tu phyin pa'i rang bzhin nyon mongs pa'i sgrib pa bsal ba ni mnyam pa nyid kyi ye shes te/bdag dang gzhan du mi 'byed pa'i phyir ro/ /so sor kun du rtog pa'i ye shes ni rnam par rtog pa'i rnam par shes pa gnas gyur pa mtshan ma med pa dang /yang dag par rig pa bzhi'i ngo bor gyur pa/ shes rab kyi pha rol tu phyin pa'i rang bzhin las kyi sgrib pa bsal ba ni so sor kun du rtog pa'i ye shes te/ dag pa 'jig rten pa'i ye shes yin pa'i phyir ro/ /bya ba nan tan gyi ye shes ni sgo lnga'i rnam par shes pa gnas gyur pa don dam pa dang snying rje chen po'i ngo bor gyur pa mi dmigs pa'i snying rje chen po'i rang bzhin skye ba'i sgrib pa bsal ba ni bya ba nan tan gyi ye shes te/sems can kun gyi don byed pa'i phyir ro/ /de bzhi'i ni bar chad med pa'i lam la zad pa'i ye shes ngos 'dzin par bya'o/ /shin tu rnam par dag pa chos kyi dbyings kyi ye shes ni/chos kyi dbyings dang stobs la sogs pa gong gi chos bzhi'i ngo bor rnam par grol pa'i lam du mi skye ba'i rang bzhin ni shin tu rnam par dag pa chos kyi dbyings kyi ye shes te/ sangs rgyas kyi rgyur gyur pa'i phyir ro/ /de lnga'i ngo bor gyur pa ni ye shes lnga'i dngos zhes pa ste/ ye shes lnga dang phra mo dbyer med pa'i phyir ro//phra mo'i tshad gsungs pa/ yungs kar che ba'i tshad tsam mo/ /zhes te go sla'o/ /de'i dbus su zhes pa ni yungs kar gyi dkyil lo/ /de la bkod pa'i yi ge k+ShUM ni bzhugs pa'i lha zhes pa ste rdo rje sems dpa'i ngo bo nyid kyi phyir ro/ /de ci 'dra zhe na/ mi gsal gsal ba'i gzugs can te/ / zhes pa ste/ de la mi gsal zhes pa ni 'khor ba'i dus su rang rig pa'i ye shes ni bu mo'i bde ba bzhin du gzhan la bstan du med pa'i phyir ro/ /gsal ba zhes pa ni zad pa dang mi skye ba'i ye shes thob pa'i dus su mngon du gyur pa'i phyir ro/ /de ltar sum cu pa las gsungs pa/ dgra bcom nyid la de 'gyur te/ /de la brten nas gnas pa'o//zhes so/ /de 'dra ba'i ngo bo ni mi gsal ba'i gzugs can te zhes pa'o/ /phyed tshad tsam gyi phra mo'i mchog /ces pa ni yungs kar gyi phyed phra ba yig 'bru'i mchog gi tshad do/ /don ni 'di ltar bsgom ste de bzhin gshegs pa thams cad rang gi lus la thim nas/ lhag pa'i byang chub sems su gyur nas gsang ba'i rdo rje'i lam nas phyung ste/rang gi rig ma'i gsang ba'i pad+ma'i sna'i rtse mo la rdo rjer gyur pa bsgoms te/ rdo rje de'i dkyil du yungs kar gyi tshad phra mo la ye shes k+ShUM bsgom pa'o/ /de mtshan ma lnga ma byung gi bar du bsgom pa ste/ mtshan ma lnga byung ma thag 'phro ba bsgom pa'o/ /mtshan ma lnga ni gsang ba 'dus pa'i rgyud phyi ma las gsungs pa/dang po smig rgyu 'dra ba dang / gnyis pa la ni du ba'i tshul/ /gsum pa srin bu me khyer 'dra/ /bzhi pa mar me bzhin du 'bar/ /lnga pa rtag tu snang ba ni/ /sprin med pa yi nam mkha' bzhin/ /zhes so/ /de ltar yang gsang ba 'dus pa'i rgyud las gsungs pa/ rin chen kha dog sna lnga pa//yungs kar gyi ni 'bru tshad tsam/ /sna yi rtse mor nan tan du/ /rnal 'byor pa yis rtag tu bsgom/ /rin chen brtan par red nas spro/ /brtan par ma gyur yang mi spro/ /zhes so/ /de ltar phra mo'i ting nge 'dzin bstan nas/ thig le'i ting nge 'dzin bsgom pa bstan pa/ yid kyi dngos po thig le'i gzugs/ /zhes pa la sogs pa ste/de la yid ces pa ni rnam par mi rtog pa'i ngo bo'o/ /de ltar lang kar gshegs pa'i mdo las kyang gsungs pa/ las ni sems kyis sdud par byed/ /yid kyis kyang ni rnam par brtags/ /rnam shes kyis ni shes bya ste/ /lnga dag gis ni mthong bar brtags/ /zhes so/ /de'i ngo bor gyur pa'i thig le ni yid kyi dngos zhes pa ste yid dang thig le dbyer med pa'i phyir ro//don de kho na ston pa thig le'i gzugs zhes pa ste sran ma'i 'bru tshad tsam gyi thig le'o/ /de ltar yang gsang ba 'dus pa'i sgrub thabs zla ba las gsungs pa/ 'bru tsa na ka'i thig le'i 'bras bu zhes so/ /de'i gnas bstan pa/ rtag tu snying ga'i dbus gnas pa//zhes te de la rtag tu zhes pa ni 'das pa dang ma 'ongs pa dang da ltar dang dus gsum mo/ /snying zhes pa ni lus kyi yan lag sgo lnga lta bu la bya ste/ 'dir ye shes sems dpa'i thugs ka ni ma yin no/ /dbus gnas pa zhes pa ni thig le rang gi snying gi dkyil du bsgom pa'o/ /'od zer chen po 'bar ba can/ /zhes pa ni thig le ste kun du 'od zer snang bar byed pa'o//don ni 'di ltar bsgom ste/ rnal 'byor pa rang gi snying ga'i dkyil du de bzhin gshegs pa thams cad bsdus te/ byang chub sems kyi 'od du gyur nas 'bru tsa na ka'i tshad yid dang dbyer med pa'i thig le bsgoms nas de'i dkyil du yi ge k+ShUM gong ma bzhin du bsgoms te/ de las byung ba'i 'od kyi thig le gsal bar byas te/de las byung bas rang gi snying ga gsal bar byed/ snying ga nas byung bas rang gi lus kun gsal bar byed/ lus kyi ba spu nas byung ste 'jig rten thams cad gsal bar byas te/ phyir log pa rim pa bzhin du thim nas yig 'bru dang gcig tu gyur par bsgom mo/ /de ni bsgom pa'i man ngag go//yang lhag pa'i byang chub sems tshes grangs kyi rim pas gnas pa'i gnas bstan pa/ ji snyed dgug pa'i bar du ni/ /zhes te nu ma dang / lag pa'i rtse mo dang / mgrin pa dang / mchu dang / 'gram pa dang / mig dang rna ba'i rtsa dang / spyi bo dang / gsang ba'i yan lag mchog rnams te dgu'o/ /de rnams la yang ngo la ni mar brtsi ste mar ngo la ni yar brtsi bar bya'o//de ltar 'dod pa'i gtsug lag brgyad brgyad la yang gsungs pa/ nu ma lag rtse mgrin pa dang / /ma mchu de bzhin 'gram pa mig /sna rtse spyi bo yan lag mchog /de dag kun la gdung byed pas/ /nam zla yar tshes mar yar ni/ /zla ba mar tshes log par bshad/ /ces so/ /yang lhag pa'i byang chub sems kyi gnas bco lnga la sgra yig bcu drug tu bsgom pa bstan pa/dpral ba la gnas rkang mthil bar/ /zhes pa ste mthe bong rtsa la yi ge a/ rje ngar la A dang / brla gnyis la i dang / gsang ba la I dang / lte ba la u dang / gsus pa la U dang / nu ma la r-i dang / lag pa la r-I dang / mgrin pa la l-i dang /ma mchu la l-I dang / 'gram pa la e dang / mig gnyis la ai dang / rna ba'i rtsa la o dang / spyi bor au dang / lus kun la aM aHrnams kyi gzugs su bsgom pa'o/ /de ltar yang 'dod pa'i gtsug lag brgyad brgyad las gsungs pa/ mthe bo rtser ni yi ge a/ /rje ngar gnyis la de bzhin A/ /brla gnyis la ni yi ge i//yi ge I ni gsang bar rten/ /lte ba'i rtsa la yi ge u/ /de bzhin gsus par yi ge U/ /nu ma'i rtse la yi ge r-i/ /yi ge r-I ni lag par gnas/ /mgrin pa kho nar yi ge l-i/ /de bzhin ma mchur yi ge l-I/ 'gram pa'i phyogs su yi ge e/ /de bzhin ai ni mig gnyis la/ /rna ba'i rtsar ni yi ge o//yi ge au ni spyi bor gnas/ /aM aHyan lag kun la gnas/ /cho ga rnams ni sbyar bar bya/ /zhes so/ /thig le de kho nar bsdus te zhes pa ni gnas dgu dang bco lnga la khyab pa'i byang chub sems snying ga'i pad+ma'i thig le la dang la 'dus pa'i don to/ /lte ba'i dbus su rnam par gnas/ / zhes pa ni snying gi pad+ma las babs te lte ba'i pad+mar gnas pa'o/ /de ltar chos kyi dbyings skye ba'i khungs bstan nas/ dang po ji ltar 'ong ba yin/ /zhes pa'i lan gsungs pa la/ re zhig gong du bsgom pa'i yig rtsis bstan pa/ cha shas lnga pa can yin te/ /zhes pa ste yi ge k+ShUM yan lag lnga dang ldan pa'i phyir ro//'di lta ste/ thig le dang / zla tshes dang / ka dang / Sha dang / zhabs skyed ring po u rnams te lnga'o/ /don de bstan pa/ bcu gnyis kyi ni tha ma la/ /zhes pa ste/ ma ning gi yi ge r-i r-I dang l-i l-I gzhag pa'i sgra yig aM a la sogs pa'i bcu gnyis kyi tha ma ni ka'o/ /cha shas drug pas mtshan pa nyid//ces pa ni ya la sogs pa drug pas mtshan pa ste yi ge Sha'o/ /nga ro zhes pa ni zhabs skyed u'o/ /thig les rgyan byed pa zhes pa ni steng gi zla tshes dang thig le'o/ /rdo rje kho nas phyung nas su/ /zhes pa ni gsang ba'i rdo rje'i lam nas lhag pa'i byang chub sems yi ge k+ShUM gi ngo bo 'phro ba bsgom pa'o/ /da ni/ de bzhin phyir 'gro ji ltar lags//zhes pa'i lan gsungs pa/ sa bon skye gnas zhes pa la sogs pa ste/ de la sa bon zhes pa ni yi ge k+ShUM ste/ khams gsum gyi rgyu yin pa'i phyir ro/ /skye gnas dbus gzhag ste zhes pa gsang ba'i pad+ma'i nang du phab pa'o/ /chos kyi dbyings ni bzhu bar byed/ /ces pa ni yi ge k+ShUM chos thams cad kyi rgyu lhag pa'i byang chub kyi sems kyi ngo bo'i chu'i khams su gyur pa'o//da ni/ yan lag med pa gang de ni/ /zhes pa nas/ khams rnams su ni 'jug pa yang / /zhes pa'i bar gyis lan gsungs pa/ de ni rim par zhes pa la sogs pa ste/ de la de ni zhes pa ni yan lag med pa'i chos kyi dbyings so/ /rim par bskyed byas nas zhes pa ni mer mer po dang /nur nur po dang / ltar ltar po dang / mkhrang 'gyur dang / rkang lag 'dus pa mngal gyi rim pas lngas ming dang gzugs su gyur pa'o/ /don de gsungs pa/ sgo dgu la ni kun du 'gro/ /zhes pa ste/ spyi bo tshangs pa'i bu ga dang / mig dang / rna ba dang / sna dang / kha dang / snying ga dang / lte ba dang / gsang ba dang / chu mig gi bu ga rnams te dgu'o/ /de rnams la byang chub kyi sems khyab par gyur to zhes pa'i tha tshig go/ /de las kyang 'phro ba'i don gsungs pa/ khyab cing khyab nas 'gro kun la/ /mi g.yo la sogs g.yo dang bcas/ /zhes te go rims su 'gro ba kun la ni khyab cing mi g.yo ba la sogs pa ni khyab la gnas par gyur to zhes pa'i tha tshig go//de la 'gro kun zhes pa ni dus gsum dang khams gsum gyi bcud kyi 'jig rten 'gro ba rigs drug ste/ 'di nas gzhan dang gzhan du bskyed pa'i phyir ro/ /mi g.yo zhes pa ni ri rab la sogs pa snod kyi 'jig rten no/ /sogs pa'i sgras ni gzhal yas khang la sogs pa'o/ /g.yo dang bcas zhes pa ni bar snang la lding ba'i gzhal yas khang ngo //don de kho na gsal bar byed pa gsungs pa/ tshangs sogs lha dang lha min gyi/ /gzhi ni de las gyur pa'o/ /zhes te de la tshangs pa zhes pa ni 'dod pa'i nyon mongs pa zhi ba'i phyir ro/ /rnam pa gcig tu mu stegs pa'i gzhung gis tshangs pa zhes pa ni bden pa dang / dka' thub dang /dbang po dul ba la 'dod do/ /byA ka ra Na'i sgra las ni tshangs pa zhes pa ni sa 'og ma'i tshe dang byad gzugs dang longs spyod la sogs pa 'phel bar byed pa la 'dod do/ /sogs zhes pa'i sgras ni khyab 'jug dang / dbang phyug chen po dang / brgya byin dang / nyi ma dang zla ba la sogs pa'o/ /yang na sogs pa'i sgras ni rgyal chen rigs bzhi nas 'og min gyi bar gyi lha ris la gzung bar bya'o//tshangs pa la sogs pa yang de lha yang de bas na tshangs sogs lha zhes pa ste/ rang gi 'od la longs spyod pa'i phyir ro/ /lha min zhes pa ni lha'i ris las smad pa'i rab kyi khong pa dang bar snang la gnas pa/ gza' rA hu la la sogs pa ste/rin po che'i 'od la longs spyod pa'i phyir ro/ /lha dang lha min de dag chos kyi dbyings de kho na las skyes pas na gzhi ni de las gyur pa'o zhes so/ /gang las gtso bo skyed byed pa/ /zhes pa ni gzugs dang gzugs med pa gang du yang chos kyi dbyings las 'phro ba yin no zhes pa'i tha tshig ste/ /chos thams cad kyi sa bon gtsor gyur pa'i phyir ro//sa dang nam mkha'i ngo bo yang chos kyi dbyings yin pa bstan pa/ sa dang nam mkha' de zhes gsungs/ /zhes pa ste de las zhes pa ni dbyibs dang kha dog la mtshon pa'o/ /de yang sa 'og sa bla sa steng gsum ste/ de la sa 'og ni 'dzam bu'i gling man chad dmyal ba yan chad do/ /sa bla ni nyi mas gar khyab pa'o//sa steng ni ri rab kyi rtse mo'o/ /nam mkha' zhes pa ni mi sgrib par go 'byed pa'o/ /de zhes gsungs zhes pa ni chos kyi dbyings las 'phro zhes pa'i tha tshig go/ /ma rig bag chags zhes pa nas/ ji ltar dngos su 'dus pa lags/ /zhes pa'i bar gyi tshig gi lan gsungs pa/ ji snyed lus la gnas pa'i bar//zhes pa la sogs pa ste/ de la ji snyed ces pa ni lus kyi tshad mtshon pa'o/ /lus zhes pa ni gzugs kyi phung po'o/ /gnas pa'i zhes pa ni ming bzhi'i phung por gyur pa'o/ /bar zhes pa ni dus kyi tshad do/ /de yis zhes pa ni chos kyi dbyings la gzung ngo //las dang zhes pa ni lus ngag yid kyi dge ba'i las te 'jig rten du bsngags pa'i phyir ro/ /las min zhes pa ni lus ngag yid kyi las mi dge ba kho na ste 'jig rten pas smad pa'i phyir ro/ /de gnyis la 'jug pas na byed pa'o/ /de ltar yang mtshan yang dag par brjod pa'i rnam par bshad pa las gsungs pa/skye ba'i dge ba 'ba' zhig med/ /ces pa'o/ /don ni 'di lta ste/ ji snyed chos kyi dbyings kyi lus la gnas pa de snyed kyi bar dge ba dang mi dge ba'i las sna tshogs pa byed par 'gyur ro zhes pa'i tha tshig go/ /de snyed kyi sgra med na yang don gyis 'brel par shes par bya ste/gang dang de ni rtag tu 'brel/ /zhes sgra las gsungs pa'i phyir ro/ /don de kho na gsal bar mdzad pa/ bcom ldan 'das nyid kyis yang gsungs pa/ dge dang mi dge bsam pa kun/ /bya ba'i las kun byed pa yin/ /zhes pa ste de la dge dang zhes pa ni 'dod chags dang / zhe sdang dang /gti mug med pa/ lus ngag gi las srog gcod pa la sogs pa med pa/ lus ngag gi las bcu ni 'jig rten pas smad pa las 'das pa'i phyir ro/ /yang na dge ba dang zhes pa ni rtswa ku sha bzhin du rno ba'i shes rab bsten par byed pa'i phyir ro/ /mi dge zhes pa ni 'dod chags dang / zhe sdang dang /gti mug dang ldan pa'i lus ngag yid kyi las srog gcod pa la sogs pa lus ngag gi las te/ 'jig rten gyis smad pa la 'jug pa'i phyir ro/ /yang na mi dge zhes pa ni ma rig pa sbyin pa'i phyir ro/ /de gnyis la rnam par rtog pa ni/ bsam pa yang zhes pa ste/ sems kyi las gtsor gyur pa'i phyir ro//de ltar yang chos mngon pa mdzod las gsungs pa/ bsam pa yid kyi las yin te/ /de skyed ngag dang lus kyi las/ /zhes so/ /de ltar dge ba dang mi dge ba'i las byed pas na bya ba'i las kun zhes pa ste/ de la kun zhes pa'i sgras ni lung du ma bstan pa'i las la shes par bya'o/ / de bas na kun nas nyon mongs pa dang / rnam par byed pa'i chos dang / dge ba dang mi dge ba'i chos kun chos kyi dbyings las 'phros pa yin par shes par bya'o/ /dngos po med la zhes pa nas/ dmigs pa dang bcas ji ltar lags/ /zhes pa'i bar gyi tshig gi lan gsungs pa/ sbyor ba rtag tu de gsungs te/zhes pa la sogs pa ste/ de la/ sbyor ba rtag tu de gsungs te/ /zhes pa ni gang gi chos kyi dbyings kyi rang bzhin phra mo'i ting nge 'dzin dang / thig le'i ting nge 'dzin dang rtag tu sbyor ba'o/ /de ltar sbyor bas thabs dang shes rab kyi gsang ba'i mchod pa ni/ mchod pa bsgom par gyur pa yin//zhes so/ /don ni 'di lta ste/ rnal 'byor pa dang / rnal 'byor mas le'u bzhi pa'i lus kyi dkyil 'khor gyi lha bsgom ste/ phra mo'i ting nge 'dzin dang / thig le'i ting nge 'dzin bsgoms nas/ thabs dang shes rab rol pa'i gsang ba'i mchod pas de bzhin gshegs pa mnyes par bya'o//de ltar bsgoms pas cir 'gyur zhe na/ de'i 'bras bu gsungs pa/ gang tshe las kyi lus zhig na/ /zhes pa la sogs pa ste/ de la gang tshe zhes pa ni shi ba'i dus mtshon pa'o/ /las kyi lus zhes pa ni lus kyi dkyil 'khor bsgoms pa'i dag pa'i bag chags dang ldan pa'i phung po'o//de gnas gyur pa ni lus zhig na zhes pa ste 'chi 'pho ba'o/ /de'i tshe zhes pa ni gang tshe dang 'brel pa'o/ /de'i rang mthu yis zhes pa ni rnal 'byor pa'i bsgom pa'i byin gyi rlabs kyis de 'dra'i lus su zhes pa ni lus kyi dkyil 'khor gyi bdag nyid de rnal 'byor pas thob par 'gyur te zhes pa ni mi gnas pa'i mya ngan las 'das pa mngon du gyur pa ste/skye ba dang 'jig pa tha snyad tsam gyi phyir ro/ /de ltar yang klu sgrub zhabs kyis dbu ma las gsungs pa/ gnas pa skye ba shi ba yod med dman pa mnyam pa khyad par ni//'jig rten tha snyad dbang gis gsung gi de bzhin nyid dbang gis ma yin/ /zhes so/ /de bas na chos kyi dbyings gang gis g.yo dang mi g.yo khyab par ni nam mkha' mnyam pa nyid 'dra ba tha snyad la ni yod la don dam par ni med pa kun nas kun du khyab pa bzhin du/ chos kyi dbyings de ni gnas pa snang ba rnal 'byor pas shes par bya'o//de ltar sa bcu pa las gsungs pa/ rgyal ba'i sras khams gsum ni sems tsam yin zhes smras pa'o/ /da ni de ltar bsgoms pa'i rnal 'byor pa'i yon tan gsungs pa/ bcu gnyis mtha' yi tshig gi don/ /zhes pa la sogs pa ste/de la bcu gnyis mtha'i tshig don zhes pa ni yi ge k+ShUM ngo / /rnal 'byor pa gang gis rtag tu rgyun mi 'chad par gang gi rim pas yi ge k+ShUM bsgom byas na rnal 'byor pa des ni mchog gi dngos grub mi gnas pa'i mya ngan las 'das pa bsod nams dang ye shes kyi tshogs kyis rgyas pa'i rdo rje 'dzin par ni sgrub pa po bdag nyid kyi bsgoms pa'i stobs kyis 'gyur zhes so//de ltar yang dpal mchog dang po'i rgyud las gsungs pa/ kun du bzang po'i ye shes ni/ /rang nyid kho nas thob pa'o/ /zhes so/ /de la rdo rje 'dzin pa zhes pa ni rdo rje sems dpa' ste/ /rdo rje phyag tu ldan pa'i phyir ro//gnod sbyin dang / byang chub sems dpa' rdo rje 'dzin pa ni ma yin pa'o/ /rnal 'byor pas bsgom pa'i yig 'bru de la yang don dam par rang bzhin med/ stong pa nyid kyi don bstan pa so dang mchu dang zhes pa la sogs pa ste/ de la so dang mchu dang rkan dang lce zhes pa ni go sla'o//de dag 'dus nas byung ba'i yig 'bru'i sgra ni/ mgul nas gang la yod pa ni/ /zhes pa'o/ /de'i phyir gang la de ni yig 'bru nyid ces te yig 'bru'i ngo bo med do zhes pa'i tha tshig go/ /de ci'i phyir zhe na/de ni zad dang gnas phyir ro/ /zhes pa ste yig 'bru k+ShUM de ni rang bzhin mi rtag par gnas pa'o/ /'di lta ste/ ka brjod tsam na Sha med Sha brjod tsam na ka thal te 'gro'o/ /de bzhin du zhabs skyed brjod tsam na ka dang Sha thal te 'gro bas thig le ma byung /thig le brjod tsam na gong ma thal lo/ /de ltar mi rtog pa ni stong pa'o/ /de ltar yang byang chub sems 'grel las klu sgrub zhabs kyis gsungs pa/ mi rtag pa yi sems kyi ni/ /stong pa nyid du mi 'gal lo/ / zhes so/ /'o na yig 'bru'i rang bzhin byang chub sems ci 'dra ba 'dod ce na/ gsungs pa/ brjod pa med cing the tshom pa/ /zhes pa la sogs pa ste/ de la brjod pa med cing zhes pa ni ming dang gzugs kyi ngo bo med pa'i phyir ro/ /de ltar yang gsang ba 'dus pa'i rgyud phyi ma las gsungs pa/brjod du med pa'i bdag nyid chos/ /ming dang gzugs blo'i ngo bo med/ /ces so/ /the tshom pa zhes pa ni dngos po yod pa yang ma yin med pa yang ma yin pa'i chos nyid mya ngan las 'das par 'dod pa'i phyir ro/ /de ltar chos kyi sku'i bstod pa las gsungs pa/gang zhig gcig min du ma min/ /bdag gzhan phan phyir bkra shis rten/ /dngos po yod min med pa'ang min/ /nam mkha' 'dra bar ro mnyam pa/ /sdug bsngal med pa'i rang bzhin can/ /'gyur ba med pa nyes med pa//zhi ba mnyam med mnyam pas na/ /khyab cing spros med dpe med pa'i/ /so so rang rig rgyal ba yi/ /chos sku deng 'dir bdag phyag 'tshal/ /zhes so/ /de ltar yang rin po che'i phreng ba las gsungs pa/ dngos med mya ngan las 'das min//dngos nyid de ni gang la yin/ /dngos dang dngos med mchog 'dzin pa/ /zad pa mya ngan 'das par gsungs/ /zhes so/ /sgra yig rnam par spangs pa yi/ /zhes pa ni a la sogs pa bcu drug gi ngo bo me yin pa'i phyir ro/ /rang gi phyi nang zhes pa ni phyi nang gi skye mched bcu gnyis kyi ngo bor gnas pa'o//de bzhin nyid ces pa ni 'gyur ba med pa'o/ /de 'dra ba'i mtshan nyid ni byang chub sems ni rgyud 'dir gsungs so/ /zhes 'dod pa'o/ /lha mo bzhis yongs su zhus pa zhes pa ni rgyud kyi spyi'i mtshan te go sla'o/ /las zhes pa ni de'i nang du yang lha mo spyan mas yongs su zhus pa zhes pa ste/spyan mas gtsor sdud pa po byas pa'i phyir ro/ /le'u zhes pa ni rim par phye ba'o/ /dang po zhes pa ni gnyis pa'i gong ma'o/ /lha mo bzhis yongs su zhus pa'i le'u dang po'i rnam par bshad pa'o// //da ni le'u gnyis pa la chos kyi dbyings byang chub sems kyi rim pa mA ma kIs zhus pa/ de nas lha mo mA ma kIs zhes pa la sogs pa ste/de la de nas zhes pa ni le'u dang po dang gnyis pa'i mgo mjug sbyor ba'i tshig go/ /lha mo zhes pa ni bshad zin to/ /lha mo yang de mA ma kI yang de nyid pas/ lha mo mA ma kIs zhes pa ste/sangs rgyas thams cad kyi yum zhes bya ba'o/ /rdo rje can zhes pa ni rdo rje sems dpa' ste phyag na rdo rje dang ldan pa'i phyir ro/ /la zhes pa ni zhus pa'i gnas bstan pa'o/ /'di zhes pa ni 'og nas 'byung ba'i zhus tshig go/ /zhus te zhes pa ni zhu ba'i rim pa lnga gong du bshad zin to/ / byang chub sems zhes pa ni chos kyi dbyings so/ /de'i rim pa ni byang chub sems kyi rim pa'o zhes pa ste 'og tu 'byung ba'i gnas dang / kha dog gi rim par bskyed pa dang / mdor bsdus pa'i rim pa'o/ /de zhus pa/ kha snying lte ba gsang ba la/ /'gro dang phyir 'ong bstan pa ni/ /zhes pa ste go sla'o/ /rdo rje chen pos zhes pa ni ston pa rdo rje sems dpa' ste/kun du khyab pa'i rang bzhin nyid kyi phyir ro/ /bka' stsal 'tshal zhes pa ni bshad zin to/ /cha shas rnam pa du zhig gsungs/ /zhes pa ni byang chub kyi sems yan lag gi sgo nas zhus pa'o/ /gnas kyi rnam pa bsgyur ba du/ /zhes pa ni chos kyi dbyings kyi byang chub sems kyi gnas zhus pa'o//kha dog rnam pa du zhig gsungs/ /zhes pa ni chos kyi dbyings byang chub sems kyi kha dog gi rim pa zhus pa'o/ /de bzhin gdan yang ji ltar 'tshal/ /zhes pa ni chos kyi dbyings byang chub sems kyi gdan zhus pa'o/ /da ni ston pas lan gsungs pa/ /rdo rje can gyis bka' stsal pa//zhes pa ste gong du bshad zin to/ /cha shas rnam pa du zhig gsungs/ /zhes pa'i lan gsungs pa/ cha shas bzhi dang mnyam ldan zhing / /zhes pa ste yi ge k+Sha dang yi ge oM dang / yi ge hUM dang / yi ge AHrnams kyi cha bzhi dang ldan pa'i phyir ro/ /gnas kyi rnam pa bsgyur ba du/ /zhes pa'i lan gsungs pa/pad+ma bzhi la yang dag gnas/ /zhes pa ste kha'i pad+ma dang / snying gi pad+ma dang / lte ba'i pad+ma dang / gsang ba'i pad+ma'o/ /kha dog rnam pa du zhig gsungs/ /de bzhin gdan yang ji ltar 'tshal/ /zhes pa'i lan gsungs pa/ snying gi pad+ma la gnas gnag /ces pa la sogs pa ste de la snying gi pad+ma la gnas gnag ces pa ni chos kyi dbyings kyi yi ge oM kyi gzugs su kha dog gnag par gnas pa'o//kha yi pad+ma la gnas dkar/ /zhes pa ste chos kyi dbyings kyi k+Sha'i gzugs su mdog dkar bar gnas pa'o/ /nga ro lte pa'i pad+mar gnas/ /zhes pa ni chos kyi dbyings kyi yi ge hUM gi gzugs kha dog dmar bar gnas pa'o//gsang ba'i pad+mar nga ro mtha'/ /zhes pa ni/ chos kyi dbyings kyi yi ge a'i gzugs su kha dog ser bar gnas pa'o/ /de lta bu'i rim pas/ stabs kyis mtha' ru 'gro byed nas/ /zhes pa ste chags pa'i dus su 'jig rten kun bskyed par byas nas/ 'jig pa'i dus su yang thig le'i dbyings su chos kyi dbyings byang chub sems/thig le'i sbyor bas rab tu gnas/ /zhes pa'o/ /de lta bu'i rim pas bskyed pa'i don te gsal por gsungs pa/ snom byed pa dang thos byed pa dang gang zhes pa la sogs pa ste/ de la snom byed ces pa ni sna'i rnam par shes pas dri la byed pa'o//de bzhin du thos byed la sogs pa yang shes par bya'o/ /dbang po'i go rims 'khrul na yang bcom ldan 'das kyi bka' la skur ba gdab par mi bya ste mdo sde gzhan du rim par shes par bya'o/ /de la bde ba zhes pa ni sim pa'o/ /bde ba ma yin sdug bsngal zhes pa ni sim pa ma yin pa'o/ / de gnyis dbang po dang yul dang rnam par shes pa gsum 'dus pa las myong ba ni tshor ba'o/ /tshor ba de yang chos kyi dbyings kyis byed pas na tshor byed ces so/ /de ltar shes rab kyi pha rol tu phyin pa la sogs pa nas/ mig gi 'dus te reg pas tshor ba dang zhes pa la sogs pa'o/ /gang las zhes pa la sogs pa ni go sla'o//'byed pa zhes pa ni shing la sogs pa gnyis su gyur pa'o/ /gcod pa zhes pa ni sta re la sogs pa'o/ /de kho nas zhes pa ni de dag kyang chos kyi dbyings kyis byed do zhes pa'i tha tshig go/ /cho ga rnam pa mang po shes/ /zhes pa ni de las gzhan yang 'jig rten gyi gtsug lag thams cad do/ / rgyal po'i rigs su gyur pa la sogs pa'i ris kyang chos kyi dbyings las gzhan med pa'i don bstan pa/ rgyal po'i don yang byed 'gyur dang / /zhes pa la sogs pa ste/ de la rgyal po zhes pa ni rnam pa gnyis te 'khor los sgyur ba'i rgyal po dang / mkhar gyi rgyal po'o/ /de gnyis rgyal bar byed pa ni/ rgyal po'i don yang byed par 'gyur//zhes pa'o/ /'di lta ste/ 'khor los sgyur ba'i rgyal po bzhi la/ gser gyi 'khor los sgyur ba'i rgyal pos ni/ gling bzhi mkhar gyi rgyal po la sogs pa tshur 'ong nas mnga' dbul te rgyal po'o/ /dngul gyi 'khor los sgyur ba'i rgyal pos ni byang sgra mi snyan ma gtogs pa gling gsum la phar 'gro ste 'dul nas rgyal po'o//zangs kyi 'khor los sgyur ba'i rgyal pos ni sgra mi snyan dang / lus 'phags ma gtogs pa gling gnyis la phar 'gro ste/ g.yul bshams nas 'dul bas rgyal po'o/ /lcags kyi 'khor los sgyur ba'i rgyal po ni sgra mi snyan dang / lus 'phags po dang /ban glang spyod gsum ma gtogs pa 'dzam bu gling gcig la phar 'gro ste/ 'thab nas 'dul bas rgyal po'o/ /de ltar yang chos mngon pa mdzod las gsungs pa/ gser dngul zangs lcags 'khor lo can/ /de dag gling gcig gling gnyis dang / /gsum dang bzhi la mas rim bzhin//lhan cig gnyis min sangs rgyas bzhin/ /phas bsu rang 'gro g.yul bsham dang / mtshon brtsams pas rgyal gnod pa med/ /ces pa'o/ /mkhar gyi rgyal po rnams ni/ /dmag gi dpung gi stobs kyis pha rol la gnon pa byas te 'dul bas rgyal po'o/ /de rnams kyang dbyings kyi rang bzhin las gzhan med pa'i don to//yang zhes pa'i sgra ni don gzhan snyeg pa'o/ /dbang phyug don yang de bzhin du/ /zhes pa ni shing sA la lta bu phyug pa'i khyim bdag gi longs spyod byed pa yang chos kyi dbyings kyi rang bzhin yin pa'o/ /de bas na gzhan yang bran du gyur pa'i sems can dang sdug bsngal ba'i sems can yang chos kyi dbyings byang chub sems kyi rang bzhin kho na don gyis shes par bya ste/chos kun gnyis su med pa'i phyir ro/ /de ltar yang gsang chen thams cad rgyud las gsungs pa/ chos bdag med pa las byung ba/ /gnyis su med pa'i ye shes mchog /chos nyid dam pa ye shes ni/ /chos kyi dbyings zhes bya ba'o//zhes pa'o/ /bram ze zhes pa ni bskal pa dang po na dgon par bsnyags shing khyim spangs te/ brang brje ba'i phyir ro/ /rgyal po zhes pa ni bskal ba dang po na rkun ma tshar gcod pa'i don du 'bras sA lu'i zhing srung ba'i srung mar bskos pa'o/ /rje'u rigs dang zhes pa ni/ bskal pa dang por phyugs la brten pa'i phyir ro//dmangs rigs zhes pa ni bskal ba dang por zhing la brten cing gnas pa'o/ /smad pa zhes pa ni rigs ni lnga ste/ sog mig can dang / nya las pa dang / mda' mkhan dang / btso blag mkhan rnams te/ smad pa'i las la 'jug pa'i phyir ro/ /de dag dang po bzung nas brgyud pa'i rim pa ni rigs rnams dang zhes pa'o//de ltar yang gsang ba 'dus pa'i rgyud phyi ma las gsungs pa/ rigs ni brgyud mar bstan pa ste/ rgyud ni thog ma zhes bya'o/ /zhes so/ /bud med du ma sprul par byed/ /ces pa ni bskal ba dang po kho na la 'od gsal gyi lha babs pa pho 'ba' zhig kho na las 'dod chags kyi dbang gis mo'i gzugs su sprul pa'o//de dag kyang chos kyi dbyings kyi rang bzhin ma bskyed pa las gzhan med ces pa'i tha tshig go/ /dud 'gro yi dags skye ba dang / /zhes pa ni yig 'bru bcom zin to/ /gzugs can rnams dang zhes pa ni/ gzugs kyi khams bsam gtan bzhi'i lha ste/gzugs kyi khams la chags nas skye ba'i phyir ro/ /de la bsam gtan dang po'i gnas gsum ste tshangs ris dang / tshangs pa mdun na 'don dang / tshangs pa chen po'o/ /bsam gtan gnyis pa la yang gnas gsum ste 'od chung dang / tshad med 'od dang / 'od gsal lo/ /bsam gtan gsum pa la yang gnas gsum ste/dge chung dang / tshad med dge dang / dge rgyas so/ /bsam gtan bzhi pa ni gnas brgyad de/ sprin med dang / bsod nams skyes dang / 'bras bu che ba dang / de la gtogs pa gnas gtsang ma lnga ste/ mi che ba dang / mi gdung ba dang / gya nom snang ba dang / shin tu mthong ba'o//'og min ni gnas bcu bdun no/ /de ltar yang chos mngon pa mdzod las gsungs pa/ gong ma'i gnas dag bcu bdun ni/ /gzugs khams yin de so so yi/ /bsam gtan sa ni gsum pa yang / /bzhi pa sa ni brgyad pa yin/ /zhes pa'o/ /gzugs med dang zhes pa ni/ gzugs med pa'i khams kyi sems can bzhi ste/gnas ni med pa gzugs med pa'i khams la chags nas skye ba'i phyir ro/ /'di lta ste/ nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / yod min med min skye mched bzhi'o/ /de ltar yang chos mngon pa mdzod las gsungs pa/gzugs med khams na gnas med de/ /skye ba las ni rnam pa bzhi/ /zhes pa'o/ /de bzhin 'dod pa'i srid rnams las/ /zhes pa ni 'dod khams gnas ris nyi shu ste/ 'dod pa la chags nas skye ba'i phyir ro/ /'di lta ste/ dmyal ba chen po brgyad de/yang sos dang / thig nag dang / bsdus 'joms dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa dang / yi dags dang / byol song dang / 'dzam bu'i gling dang / lus 'phags po dang / ban glang spyod dang / sgra mi snyan dang / rgyal chen rigs bzhi dang /sum cu rtsa gsum pa dang / 'thab bral dang / dga' ldan dang / 'phrul dga' dang / gzhan 'phrul dbang byed rnams te nyi shu'o/ /de ltar yang chos mngon pa mdzod las gsungs pa/ dmyal ba yi dags dud 'gro dang / /mi rnams dang ni lha drug dag /'dod pa'i khams yin dmyal ba dang //gling dbye ba la de nyi shu/ /zhes so/ /'byung ba thams cad ces pa ni sa dang / chu dang / me dang / rlung rnams so/ /de dag kyang chos kyi dbyings las skye ba'i phyir skyed byed pa zhes so/ /de kho na nyid ces pa ni chos kyi dbyings so/ /de stong gsum gyi stong chen po'i 'jig rten gyi khams su gyur pa ni/ de kho na nyid rdzu 'phrul gnas zhes pa ste gcig las du mar gyur pa'i phyir ro//mo gzugs dang ni zhes pa ni skad phra ba dang / nu ma che ba dang / mo'i dbang po rnams kyis mtshan pa'o/ /pho'i gzugs zhes pa ni nga ro'i skad dang / kha spu dang / pho'i dbang pos mtshan pa'o/ /de gnyis kyi 'khrig pa'i 'dod pa'i bde ba ngo bor yang chos kyi dbyings byang chub sems gnas pas na/bde ba chen po'i go 'phang gnas/ /zhes so/ /de ltar zhes pa ni gong du bstan pa'i don la snyeg pa'o/ /de bzhin nyid ces pa ni 'gyur ba med cing kun du khyab pa'o/ /shes pa zhes pa ni rtogs nas don dam pa'i yig 'bru mya ngan las 'das pa'i ngo bo k+Sha oM hUM AHshes pa'i rnal 'byor pa gang de ni gsang chen shes pa ste yig 'bru bshad zin to//de ci 'dra ba yin zhe na khyad par gsungs pa/ gang des bdag nyid kun gnas pa/ /zhes pa de bcud dang snod kyi rang bzhin du gyur pa'i phyir ro/ /gong du bstan pa'i yig 'bru'i kha dog gi 'phro bstan pa/kha dog med cing kha dog dmar/ /zhes pa la sogs pa ste/ de la kha dog med cing zhes pa ni nag po ste/ dkar po la sogs pa kha dog med pa'i phyir ro/ /kha dog dmar zhes pa la sogs pa ste go sla'o/ /thig le'i gzugs su gyur pa de/ /zhes pa ni yig 'bru de dag tsa na ka'i tshad kyi thig le'i dbus su gnas pa'o//'gro dang phyir 'ong rnam par bstan/ /zhes pa ni pad+ma rnam pa bzhi las phyir 'gro ba la khams gsum du khyab cing phyir bsdu ba'i don to/ /don de kho na gsal por bstan pa/ gang de rig pa rdzu 'phrul che/ /mtha' yas bcas pa sna tshogs gzugs/ / zhes pa ste gang chos kyi dbyings de rig pa rdzu 'phrul che zhes pa ste gcig las du ma'i las byed pa'i phyir ro/ /mtha' yas bcas pa zhes pa ni gang gA'i klung gi bye ma snyed kyi 'jig rten grangs med par gyur pa'o/ /mtha' yas bcas pa yang de/ sna tshogs gzugs kyang de bas na/ /mtha' yas bcas pa sna tshogs gzugs//zhes pa ste sems can gyi las kyi dbang gis bcud sna tshogs pa'o/ /'di lta ste/ bcud kyi 'jig rten 'gro ba rigs lnga'i nang na che ba dang / chung ba dang / bzang ba dang / ngan pa dang / phra ba dang / spom pa dang / dge ba dang / mi dge ba dang / pho dang / mo dang / bde ba dang / mi bde ba la sogs pa sna tshogs pa'o//snod kyi 'jig rten la ni dkar po dang / ser po dang / dmar po dang / nag po dang / thung ngu dang / ring po dang / zlum po dang / phya le ba dang / phya le ba ma yin pa dang / rdul dang / ri rab la sogs pa sna tshogs pa'o/ /de ltar yang chos mngon pa mdzod las gsungs pa/las las 'jig rten sna tshogs skye/ /zhes pa'o/ /de ltar khams gsum du khyab pa'i byang chub kyi sems chos kyi dbyings dang po skye ba dang / 'jig rten pa'i dus su bsdu ba'i don yang gsal por byed pa gsungs pa/ skye dang bsdus na zhes pa la sogs pa ste/ de la skye ba dang zhes pa ni snod dang bcud chags pa'o//'di lta ste/ chags pa'i bskal pa la nam mkha' la sems can gyi las kyi dbang gis rlung gi dkyil 'khor dang / chu'i dkyil 'khor dang / dbang chen gyi dkyil 'khor dang / ri bdun dang / ri rab dang / sum cu rtsa gsum nas bsam gtan gsum pa'i bar du mas bar gyi bskal pa gcig gi bar du skye/bcud ni bsam gtan bzhi pa'i lha rnams gzhal yas khang dang bcas par skye ste/ de las mar bab pa mnar med pa'i dmyal ba na gcig skyes pa'i bar dang / bar gyi bskal ba bcu dgu'i dus tshad do/ /bsdus na 'jig pa la zhes pa ni 'jig pa'i bskal pa med pa 'jig pa'i 'jig rten mnar med pa'i dmyal ba na dmyal ba mi skye ste/'jig rten gzhan gyi dmyal ba na skyer song ba dang po bzung nas yar 'pho ste bsam gtan bzhi pa'i lha gzhal yas khang dang bcas par mi snang ba'i bar du bar gyi bskal ba bcu dgur ro/ /snod 'jig pa ni mes 'jig pa'i dus su mnar med pa'i dmyal ba pa nas bsam gtan dang po'i bar du 'jig pa dang /chus 'jig pa'i dus su bsam gtan gnyis pa'i bar du 'jig pa dang / rlung gis 'jig pa'i dus su bsam gtan gsum pa'i bar du 'jig go/ /de ltar 'jig rten skye ba dang / 'jig pa'i dus su byang chub sems chos kyi dbyings yig 'bru can thig le'i gzugs su bsdus nas rab tu gnas so zhes so//da ni yon tan gsungs pa/ gang gis brgyad khri rtsa bzhi'i chos/ /zhes pa la sogs pa ste/ de la gang zhig ces pa ni rnal 'byor pa'am mkhas pa spyi la shes par bya'o/ /brgyad khri rtsa bzhi'i chos zhes pa ni sems can gyi nyon mongs pa brgyad khri rtsa bzhi'i gnyen po'o//lam gyi bden pa chos kyi phung po brgyad khri rtsa bzhi'i chos bstan pa'o/ /phrag de gcig nas gnyis su brtsis pa stong phrag brgya zhes pa ni 'bum phrag gcig go/ /de snyed chos kyi don shes na yang mkhas pa de yis chos kyi dbyings de nyid mi shes pa ste rtogs pa ma yin no zhes pa'i tha tshig go//de bas na chos kyi dbyings de kho na nyid shes ma thag chos kyi phung po brgyad khri bzhi stong shes pa'i mkhas pa de dag kun kyang bla na med pa'i mya ngan las 'das pa'i 'bras bu med do zhes pa'o/ /da ni gong gi cha shas kyi yi ge swas bstan pa/ bcu gnyis lnga yi lnga pa yang / /zhes pa la sogs pa ste/de la bcu gnyis zhes pa ni a las brtsis pa'i yi ge bcu gnyis kyi mtha' ma a'o/ /lnga'i zhes pa ni pa'i sde ste ka'i sde las brtsis pa'i lnga pa ni pa'i sde'o/ /de'i lnga pa zhes pa ni/ pa las brtsis pa'i yi ge ma'o/ /des oM gyi klad kor byas ma thag oM 'dod pa'o/ /brgyad kyi mtha' zhes pa ni yi ge ya las brtsis pa'i yi ge ha'o//'byung ba 'dus zhes pa ni 'byung ba chen po bzhis bskor ba'i ha'o/ /sgra yig dang po yi ge a/ /zhes pa ni go sla'o/ /lnga pa yis ni zhes pa ni yi ge ma'o/ /des a la klad kor byas pa ste yang dag brgyan zhes pa ni yi ge oM mo/ snying rje chen po las byung ba/ zhes pa ni yi ge ka'o/ /rgya gar gyi skad la ka ka ru zhes bya ba ni snying rje yin pa'i phyir ro/ /drug pa zhes pa ni ya las brtsis pa'i yi ge Sha'o/ /de'i yi ge ka la btags pa ni drug pas btags pa de zhes te yi ge k+Sha'o/ /kha mar lta zhes pa ni/ kha'i pad+mar mgo mar lta ba bsgom pa'o/ /yi ge 'bru de'i khyad par gsungs pa/gdod ma tha ma med pa'i lha/ /zhes pa ste/ de la gdod ma zhes pa ni skye ba'o/ /tha ma zhes pa ni 'jig pa'o/ /de gnyis med pa'i rang bzhin yig 'bru yin pas na gdod ma tha ma med ces pa ste/ mu stegs pa'i byed pa po ltar sngon du byas pa ma yin pa'i phyir dang / rdo rje lta bu don dam par 'jig pa med pa'i phyir ro//ci'i phyir zhe na/ gdod ma tha ma ni nam mkha' las 'byung ba'i mtshan ma tsam nyid kyi phyir ro/ /de ltar mnyam sbyor gyi rgyud phyi ma las gsungs pa/ nam mkha' las byung mtshan ma'i phyir/ /gdod ma tha ma med pa'i mchog /ces pa'o/ /lha zhes pa ni yig 'bru de dag 'od zer dang ldan pa'i phyir dang /rdo rje sems dpa'i rang bzhin nyid kyi phyir ro/ /der ni spyi bor bstan pa yin/ /zhes pa ni yi ge k+Sha gong na bzhag pa'i tha tshig go/ /de dag ces pa ni yig 'bru bzhi po de dag chos kyi dbyings kyi rang bzhin yin pa'i phyir na gsang chen zhes te bshad zin to/ /dam pa zhes pa ni yig 'bru de dag de bzhin gshegs pa thams cad kyi ye shes kyi sku'i rang bzhin yin pa'i phyir ro//lha mo zhes pa ni mA ma kI ste bod pa'i tshig go/ /bdag gis zhes pa ni ston pa rdo rje sems dpa'o/ /rab tu bstan no zhes pa ni byang chub sems chos kyi dbyings kyi rim pa bshad zin to zhes pa'i tha tshig go//lha mo bzhis yongs su zhus pa las zhes pa ni gong ma dang mthun/ gnyis pa'o zhes pa ni dang po'i 'og ma'o/ /lha mo bzhis yongs su zhus pa'i le'u gnyis pa'i rnam par bshad pa'o// //da ni le'u gsum pa la/ chos kyi dbyings byang chub sems bsdu ba lha mo na bza' dkar mos zhus pa/ de nas gos dkar mos zhes pa la sogs pa ste/ de la de nas zhes pa ni le'u gnyis pa dang gsum pa la mgo mjug 'brel ba'i tshig go/ /lha mo zhes pa ni bshad zin to/ /de nas gos dkar mos zhes pa ni rgyud gzhan gyi nang nas sku mdog dkar ba'i phyir ro/ /yang na lha mo na bza' kha dog dkar ba bsnams pa la btags pa'i mtshan ma ste/'dul ba la gos dkar can gyi sde zhes pa btags pa bzhin no/ /yan lag kun gyis btud nas su/ /zhes pa ni lus kun sa la brkyang nas phyag byas te shin tu rab tu ston pa po bskul ba'i phyir ro/ /thal mo snyim pa sbyar byas te/ / zhes pa ni lan gsum bskor ba byas nas mdun du pus mo'i lha nga sa la btsugs te/ snying gar snyim pa'i thal mo sbyar nas/ rdo rje sems dpa' la gsol ba zhes pa'o/ /zhu ba'i rim pa de ni lha mo gzhan la yang shes par bya'o/ /gsol ba'i tshig ni/ chos kyi dbyings kyi bsdu ba dang / /zhes pa nas/ thub pa chen pos bka' stsol mdzod/ /ces pa'i bar du ste/ de la chos kyi dbyings zhes pa ni bshad zin to/ /bsdu ba dang zhes pa ni gcig tu gyur pa'i don du zhus pa'o/ /sku gsung thugs kyi rdo rje yi/ /zhes pa ni sku'i rdo rje dang / gsung gi rdo rje dang / thugs kyi rdo rje'i ngo bor byang chub sems bsdu ba zhus pa'o//rang bzhin nyid ni ji ltar lags/ /zhes pa ni thabs dang shes rab kyi ngo bor bsdu ba'i don zhus pa'o/ /lha'i dbang phyug ces pa ni rdo rje sems dpa' ste/ de bzhin gshegs pa thams cad kyi gtsor gyur pa'i phyir ro/ /de la bod cing gsol ba btab pa ni khyod la zhu zhes pa ste/ sems can gyi don du bdag gzhan phye ba'i phyir ro//gang gi 'od kyis gong bur bsdu/ /zhes pa ni bdud rtsi'i ngo bo 'jig rten las 'das pa'i 'od kyi gong bu'i sgo nas zhus pa'o/ /rdo rje sems dpa' ji ltar lags/ /zhes pa ni 'od kyi gong bu de rdo rje sems dpa'i ngo bor yang bsdu ba zhus pa'o/ /gsungs shig de nyid yig 'bru'i tshig /'dus pa ji ltar 'gyur ba lags/ /zhes pa ni sngags kyi sgo nas bsdu ba zhus pa'o/ /chu yi khams dang me yi khams/ /ji ltar ro ni mnyam por 'gyur/ /zhes pa ni sa'i khams dang / chu'i khams dang / me'i khams dang / rlung gi khams dang / nam mkha'i khams dang /rnam par shes pa'i khams drug gi dngos po'i sems can gyi phung po chu dang me'i khams ji ltar 'du bar 'gyur zhes zhus pa'o/ /de kho na yang rgyas par zhus pa/ ma las skye ba'i gsum tsam dang / /de bzhin pha las skye ba gsum/ /de dag drug rdzogs gong bu las/ /ji ltar mi rnams skye ba lags//zhes pa ste 'jig rten pa'i phung po gong bu'i sgo nas zhus pa'o/ /sangs rgyas gzugs ni bdag mi 'tshal/ /zhes pa ni phung po'i sgo nas bsdu ba la zhus pa'o/ /thub pa chen pos bka' stsol mdzod/ /ces pa ni zhus pa'i tshig bsdus pa ste/ de la thub pa chen po zhes pa ni rdo rje sems dpa' ste/sku gsung thugs rtag par mnyam par gzhag pa nyid kyi phyir ro/ /de'i lan gsungs pa/ rdo rje can gyis bka' stsal pa/ zhes pa la sogs pa ste/ de la rdo rje can gyis bka' stsal pa/ /zhes pa ni bshad zin to/ /de la re zhig /chos kyi dbyings kyi bsdu ba dang //zhes pa'i lan gsungs pa/ gsang las shin tu gsang 'gyur ba/ /zhes pa la sogs pa ste/ de la gsang zhes pa ni gsang ba'i rdo rje'o/ /shin tu gsang 'gyur ba zhes pa ni gsang ba'i pad+ma'o/ /de ltar yang gsang ba'i nor bu thig le'i rgyud las gsungs pa/rdo rje de ni gsang ba ste/ /de las pad+ma shin tu gsang / /zhes so/ /nyon cig lha mo bshad par bya/ /zhes pa ni gsang ba'i tshig ste yig 'bru bshad zin to/ /shin tu gsang ba de kho na'i don bshad pa/ skye gnas dbus su rtsa gnyis ni/ /zhes pa la sogs pa ste/ de la skye gnas zhes pa ni gsang ba'i pad+ma'o//de'i dkyil ni skye gnas dbus su zhes so/ /de bya lce'i g.yas g.yon gyi rtsa ni rtsa gnyis ni g.yon dang de bzhin g.yas pa ste zhes so/ /de nas bcom ldan 'das nyid kyis gsal bar gsungs pa/ g.yon du byang chub sems zhes pa ni g.yon gyi rtsa las ni lhag pa'i byang chub sems 'bab pa'o zhes pa'i don to//g.yas su de bzhin rak+ta'o/ /zhes pa ni g.yas pa'i rtsa la ni rak+ta 'bab pa'o/ /de gnyis phrad nas zhes pa ni thabs dang shes rab rol ba'i dus su rtsa de gnyis las byang chub sems dang rak+ta bde ba chen po'i ngo bo babs te chu dang 'o ma 'dres pa ltar gcig par gyur pa zhes so//de ni/ kye lha mo chos kyi dbyings ni 'dus pa yin/ /zhes bstan pa'o/ /sku gsung thugs kyi rdo rje yi/ /rang bzhin nyid ni ji ltar lags/ /zhes pa'i lan btab pa/ mun pa sku de rdul gsung gzugs/ / zhes pa la sogs pa ste/ de la mun pa zhes pa ni ma rig pa'i mun pa'o/ /de'i rang bzhin gnas gyur pa ni sku zhes pa ste sku'i rdo rje'o/ /rdul zhes pa ni 'dod chags te/ de'i rang bzhin gnas gyur pa ni gsung zhes pa ste gsung gi rdo rje'o/ /gzugs zhes pa ni yang ba gsal ba'o/ / de sems kyi rang bzhin yin pas gzugs thugs kyi rang bzhin zhes so/ /de nas snying stobs te zhes pa ste thugs kyi rdo rje'o/ /de ltar mun pa dang rdul dang snying stobs sku gsung thugs zhes shes par bya'o/ /de yum gyi don bcom ldan 'das nyid kyis yang gsal por bstan pa/ rdul ni rak+ta byang sems ni//mun pa de bzhin bskyed pa yin/ /zhes pa ste de la rdul ni rak+ta zhes pa ni rak+ta la mu stegs pas rdul zhes btags pa ste/ ras gsher ba la rdul chags pa bzhin du 'dod chags chen po'i rang bzhin nyid kyi phyir ro/ /byang chub sems ni mun pa zhes pa ni lhag pa'i byang chub sems khu ba la mu stegs pas mun pa zhes btags te gti mug chen po'i ngo bo nyid kyi phyir ro//de bzhin bskyed pa min zhes pa ni de bzhin du rgyu 'bras la zhe sdang ba'i rang bzhin gnyis su med pa'i ye shes can skye ba'i ngo bor gyur pa la mu stegs pas snying stobs zhes btags te/ de gsum 'dus nas skye bar 'gyur ba'i phyir ro//mun pa dang / rdul dang / snying stobs kyi rang bzhin sku gsung thugs de ji ltar rang bzhin gcig tu gyur zhe na bshad pa/ rdo rje pad+ma mnyam sbyar nas/ /rang bzhin mnyam pa'i ror 'gyur ro/ /zhes pa ste/ thabs dang shes rab phyag rgya'i gsang bar rdo rje dang pad+ma sbyor ba'i bde ba chen po las sku gsung thugs kyi rang bzhin mnyam pa ro gcig tu 'gyur ba'o zhes pa ste/yang dag par sku gsung thugs kyi rang bzhin las dbyer med pa'i phyir ro/ /gang gi 'od kyis gong bur bsdu/ /zhes pa'i lan gsungs pa/ dri chen chu dang zhes pa la sogs pa ste/ de la dri chen zhes pa ni bshang gci'o//chu dang zhes pa ni gsang ba'i rdo rje'i chu'o/ /shel zhes pa ni lus kyi sna las byung ba ste/ shel dang kha dog mthun pa'i phyir ro/ /me tog ces pa ni pad+ma rak+ta ste/ 'bras bu la nye ba'i phyir ro/ /de bzhin lnga pa byang chub sems/ /zhes pa ni lhag pa'i byang chub sems khu ba ste/ byang chub sems dang 'dra ba'i bde ba chen po'i sems skyed par byed pa'i phyir ro//lnga pa zhes pa'i sgras ni drug dang bzhi sun dbyung ba ste sha chen la sogs pa'i lcags kyu lnga la gtogs pa'i phyir ro/ /de bas na bdud rtsi ni lnga kho nar shes par bya'o/ /rdzas de rnams bdud rtsi lnga zhes pa ste/ 'khor ba'i sdug bsngal gzhom pa'i rtsi yin pa'i phyir ro//'di lta ste/ dri chen dang chu'i ni lus kyi rims dang 'bras gzhom pa'o/ /shel gyis ni 'tshe ba dang nad med pa 'phel bar byed pa'o/ /de rnams ni 'jig pa'i yon tan no/ /me tog gis ni sku gsung thugs grub par byed pa'o/ /byang chub sems kyis ni ye shes shes bya grub par byed pa'o//de dag ni 'jig rten las 'das pa'i yon tan no/ /de ltar rdzas de lngas nad dang 'tshe ba'i bar chad la sogs pa'i 'khor ba'i sdug bsngal 'joms pa'i phyir bcom ldan 'das kyis bdud rtsi zhes bstan to/ /de ltar yang bdud rtsi'i rgyud las gsungs pa/ ye shes shes bya bsgrub pa'i phyir/ /zhes pa la sogs pa'o//de lnga dang dbyer med pa'i 'od kyi gong bu ni bdud rtsi lnga dngos gong bur bsdus zhes pa ste/ 'od kyi gong bu dang bdud rtsi lnga tha mi dad pa'i phyir ro/ /da ni 'jig rten las 'das pa'i 'od kyi gong bur bsdu ba bstan pa'o/ /rdo rje sems dpa' ji ltar lags/ /zhes pa'i lan btab pa/ de las rdo rje 'dir gsungs so zhes pa ste/'od kyi gong bu 'dus pa de las grub pa rdo rje sems dpa'i rgyud 'dir gsungs so zhes pa ste/ mngon par shes pa lnga'i rang bzhin ye shes lnga dang rigs lnga'i ngo bo bdud rtsi lnga las grub pa'i bdag nyid rdo rje sems dpa' yin pa'i phyir ro/ /gsungs shig de nyid yig 'bru'i tshig / ces pa'i lan btab pa cha shas gnyis pa zhes pa la sogs pa ste/ de la cha shas gnyis pa dang ldan pa zhes pa ni yig 'bru k+Sha de ka dang Sha brtsegs pa'i phyir ro/ /yig 'bru de gsal bar mdzad pas yang gsungs pa/ de bzhin dgu pa yang yin no/ /zhes pa ste/ ya'i sde las brtsis pa'i dgu pa ni yi ge k+Sha kho na'o/ /don ni 'di lta ste/k+Sha de la ma dang ra dang ya btags nas zhabs skyed ring por byas te/ zla tshes dang thig le brtsegs pa'i yig 'bru k+Sh+m+r+yUM 'dod de de ni man ngag go/ /don de gsal bar mdzad pas bcom ldan 'das nyid yang gsungs pa/ de skad gsungs pa zhes pa la sogs pa ste/ de la sum cu zhes pa ni r-i r-I l-i l-I ma brtsis pa'i yi ge a las brtsis pa'i ha'i bar du'o//bcu dang ni zhes pa ni yi ge d+ha nas brtsis pa'i ra'i bar du'o/ /de bzhin lnga pa zhes pa ni yi ge la nas ha'i bar du'o/ /sa bon zhes pa ni ha de'i 'og ma yi ge k+Sha'o/ /cha shas gnyis pa zhes pa ni k+Sha'i dngos bstan pa'o/ /lnga yis zhes pa ni k+Sha la ma dang ra dang ya dang thig le byas pa ni chos kyi dbyings kyi yig 'bru bsdu ba dang gsungs pa'o zhes pa'o//'dus pa ji ltar gyur pa lags/ /zhes pa'i lan btab pa/ yig 'bru b+h+rUM dang chos kyi dbyings yang zhes pa la sogs pa ste/ de la yig 'bru b+h+rUM zhes pa ni go sla'o/ /chos kyi dbyings yang zhes pa ni gong gi yi ge k+Sh+m+r+yAM ngo //skye gnas pad+ma zhes pa ni gsang ba'i pad+ma'o/ /la gnas pa zhes pa ni gsang ba'i pad+mar yi ge de rnams bkod pa'o/ /yig 'bru de gnyis 'gyur ba med pa'i phyir na de nyid ces so/ /de nyid sa bon zhes pa ni skye ba rnams kyi rgyur gyur pa'i phyir ro/ /swA hA mtha' zhes pa ni/ sngags kyis mtha' na swA hA sbyor ba'o//'di lta ste/ b+hUM k+ShU swAhA/ 'dus pa la ni shes par bya/ /zhes pa ni/ chos kyi dbyings yig 'bru de lta bu'i ngo bor 'dus pa yin zhes pa'i tha tshig go/ /chu khams dang ni zhes pa nas/ /ji ltar mi rnams skye ba lags/ /zhes pa'i bar gyi lan btab pa/ chu khams pa las skye zhes bya//zhes pa la sogs pa ste de la/ chu khams pha las skye zhes bya/ /zhes pa ni chu'i khams ni pha las 'ba' zhig tu skye ba bstan pa'o/ /me'i khams ni ma las skye/ /zhes pa ni me'i khams ni ma las 'ba' zhig tu skye ba bstan pa'o/ /sa dang / rlung dang / rnam par shes pa dang / nam mkha'i khams ni gnyi ga la skye ba don gyis skye ba shes par bya'o//de la sa la sogs pa'i khams bzhi ni bshad zin to/ /nam mkha'i khams ni phung po'i sgo dgu'i bu ga'o/ /de ltar chos mngon pa mdzod las kyang gsungs pa/ bu ga nam mkha'i khams zhes bya/ /snang dang mun pa dag yin no/ /zhes so/ /rnam par shes pa'i khams ni zag pa dang bcas pa'i rnam par shes pa'i khams so//de ltar yang chos mngon pa mdzod las kyang gsungs pa/ zag dang bcas pa'i rnam shes ni/ /rnam shes khams yin skye ba'i rten/ /zhes so/ /chu dang me'i khams kyi don de gsal bar mdzad pas bcom ldan 'das nyid kyis bstan pa/ sha dang khrag dang pags pa dang /ma las skye ba zhes bshad de/ tshil dang rkang dang khu ba ni/ /pha las skye zhes bshad pa yin/ /zhes te go sla'o/ /gong bur yang dag par 'dus pa ni zhes pa ni 'jig rten pa'i gong bu phung por 'dus pa'o/ /bsdus pa gang zhe na de dag tsam du zhes pa ste/ ma'i khams gsum dang / pha'i khams gsum drug tsam 'dus pa ni bshad pa yin zhes so//sangs rgyas gzugs ni bdag mi 'tshal/ /zhes pa'i lan gsungs pa/ gzugs dang / tshor ba dang / 'du shes dang zhes pa la sogs pa ste/ de la gzugs zhes pa ni gzugs kyi phung po ste/ phyin ci log pa'i glen pa'i gzugs rnam par dag pa gnyis su med pa'i ye shes kyi ngo bo gti mug chen po'o//de ltar yang gsang ba 'dus pa'i rgyud phyi ma las gsungs pa/ gzugs ni gti mug ces bstan pa/ /glen pas bcings pa'i ngo bo'o/ /zhes so/ /tshor ba dang zhes pa ni tshor ba'i phung po ste/ phyin ci log gi nga rgyal rnam par dag pa me thams cad la mi dmigs pa'i nga rgyal can mnyam pa nyid kyi bdag nyid do//de ltar yang gsang ba 'dus pa'i rgyud phyi ma las gsungs pa/ tshor ba 'dod pas myos bstan pa/ /nga rgyal gyi ni ngo bo la/ zhes so/ /'du shes dang zhes pa ni 'du shes kyi phung po ste/ phyin ci log par dngos po la mtshan mar chags pa rnam par dag pa dang / rig pa'i ye shes kyi ngo bo la chags pa'o//de ltar yang gsang ba 'dus pa'i rgyud phyi ma las gsungs pa/ 'du shes 'dod chags bdag nyid ni/ /dngos po la ni rags pa'i mtshan/ /zhes so/ /de bzhin 'du byed ces pa ni 'du byed kyi phung po ste/ phyin ci log pa'i rang don 'du byed rnam par dag pa yang dag pa'i phrag dog gi rang bzhin te/sems can gyi don dang rang kho nas byed 'dod pa'o/ /de ltar yang gsang ba 'dus pa'i rgyud phyi ma las gsungs pa/ 'du byed rtag tu phrag dog ste/ /rtse gcig bdag nyid stong pa'o/ /zhes so/ /rnam shes rnams ni zhes pa ni rnam par shes pa'i phung po ste rgyu 'bras dbye ba la sdang ba'i zhe sdang chen po'o/ /de ltar yang gsang ba 'dus pa'i rgyud phyi ma las gsungs pa/rnam shes zhe sdang zhes bstan te/ /rgyu dang 'bras bu zhes su grags/ /zhes so/ /de lta bu'i rang bzhin go rims su/ sangs rgyas dngos po lnga yi gzugs/ /zhes pa ste gzugs ni rnam par snang mdzad/ tshor ba ni rin chen 'byung ldan 'du shes ni snang ba mtha' yas/'du byed ni don yod grub pa/ rnam par shes pa ni mi bskyod pa'o/ /de ltar rigs lngar sangs rgyas pa rnal 'byor pa'i gzugs la sogs pa phung po zhes bya ba lnga shin tu sbyor ba la bshad pa yin zhes so/ /lha mo bzhis yongs su zhus pa las zhes pa ni gong ma dang mthun gsungs pa'o zhes pa ni gnyis pa'i 'og ma'o//lha mo bzhis yongs su zhus pa'i le'u gsum pa'i rnam par bshad pa'o// //da ni le'u bzhi pa las chos kyi dbyings byang chub sems bsgrub pa/ lha mo sgrol mas zhus pa/ de nas zhes pa la sogs pa ste/ de la de nas zhes pa ni le'u gsum pa dang bzhi pa mgo mjug 'brel ba'i tshig go//bzhad pa'i zhal gyur te zhes pa ni bzhad pa'i sgo nas mchod pa byas pa ste thugs la dgyes pa nyid kyi phyir ro/ /de ltar yang 'phags pa gdan bzhi pa las gsungs pa/ mchod pa nyi shu las bshad pa dang khro ba la sogs pa yang mchod par gsungs so/ /lha mo zhes pa ni bshad zin to//lha mo yang de sgrol ma yang de nyid pas lha mo sgrol ma zhes pa ste/ sems can thams cad la yang dag par don bstan pa'i phyag brkyang nas srid pa'i rgya mtsho las sgrol ba'i phyir ro/ /lha mo de kho na'i khyad par gsungs pa/ bcom ldan 'das mas zhes pa ste 'brel zin to/ /rdo rje sems dpa' la zhus pa zhes pa ni gong ma dang mthun no//chos kyi dbyings kyi bsgrub pa ni zhes pa ni chos kyi dbyings gang gis grub par byed pa de ni sgrub pa ste rgyu'i ngo bor gyur ba'o/ /gsungs shig rdo rje 'chang chen po/ /zhes pa ste chos kyi dbyings bsgrub pa'i sgo nas zhus pa'o/ /yang rdzas bsgrub pa zhus pa/ rdzas rnams bsgrub pa bka' stsal 'tshal//zhes pa ste/ de la rdzas rnams zhes pa ni dam tshig gi sman rnams so/ /de bzhin rig pa'i sngags rnams kyang / /zhes pa ni zhi ba la sogs pa'i las byed pa'i sngags so/ /de ltar 'jig rten snang ba las kyang gsungs pa las byed pa ni rig pa'i sngags zhes so/ /de ni sngags kyi sgo nas chos kyi dbyings bsgrub pa zhus pa'o//dkyil 'khor rnams ni brtags pa dang / /zhes pa ni dkyil 'khor bsgrub pa zhus pa'o/ /de la dkyil zhes pa ni snying po'am dbyings 'dus pa'o/ /'khor zhes pa ni de lta bu dang du blangs pa'o/ /dkyil 'khor de bsgom pa ni brtags pa dang zhes pa'o/ sbyin sreg so sor bya ba dang //zhes pa ni sbyin sreg gi sgrub pa zhus pa'o/ /de la sbyin sreg ces pa ni gsol zas kyis lha la mchod pa dbul ba'i don du me la bsreg pa'i ming ngo / /so sor bya ba dang zhes pa ni sbyin sreg gis zhi ba la sogs pa'i las bya ba'o/ /de bzhin mchod pa'i cho ga yang / /zhes pa ni mchod pas sgrub pa zhus pa'o//de la mchod pa zhes pa ste/ pha rol mnyes par byed pa'o/ /cho ga yang zhes pa ni rim pa'o/ /khyad par du yang zhes pa ni mchod pa yang phyi nang gi khyad par du bka' stsal 'tshal zhes so/ /de ni zhus pa'i lan btab pa/ /de ltar lha mos zhus ma thag /rdo rje sems dpas bka' stsal pa/ /zhes pa ste de la de ltar zhes pa ni gong ma'i tshig la bsnyegs pa'o//gzhan ni bshad zin to/ /de la re zhig chos kyi dbyings kyi sgrub pa ni zhes pa'i lan btab pa/ chos kyi dbyings kyi sgrub pa ni/ /zhes pa la sogs pa ste/ gong ma dang mthun no/ /gzugs dang sgra dang dri dang ni/ /de bzhin ro dang reg la sogs/ / khams bco brgyad po de dag kyang / /chos kyi dbyings zhes bya ba'o/ /zhes pa ni khams bco brgyad po de dag ni mdor na chos kyi dbyings su shes par bya ste/ rdo rje sems dpa'i rang bzhin dang 'dra ba'i phyir ro/ /de ltar yang mnyam sbyor gyi rgyud phyi ma las gsungs pa/ gzugs dang sgra dang de bzhin dri/ /ro dang reg bya kho na yang //de rnams rdo rje sems dang mnyam/ /zhes so/ /yang na spyi dang rang gi mtshan nyid dang ldan pa'i phyir ni chos kyi khams ni dbyings te/ de gnyis rgyu'am rigs su don gcig pa'i phyir ro/ /de dag nyid las byung ba ni zhes pa ni khams bco brgyad de dag las skye ba ni/ byang chub sems zhes shes par bya//zhes pa ste lhag pa'i byang chub sems las gong bu skye zhes pa ni lhag pa'i byang chub sems de las kyang sa dang / chu dang / me dang / rlung gi khams kyi bdag nyid gong bu skye'o/ /gong bu las kyang yid skyed do/ /zhes pa ni gong bu de las yang rnam par shes pa'i khams skyed pa ste/ yid dang rnam par shes pa rjes su dbyer med pas na/yid kyi rnam par shes pa'i khams su shes par bya'o/ /yid las nam mkha'i khams kyang ni/ /zhes pa ni yid de las nam mkha'i khams sgo dgu'i bu gar gyur pa'o/ /'di lta ste/ spyi bo tshangs pa'i bu ga dang / mig dang / rna ba dang / sna dang / kha dang / snying ga dang /lte ba dang / gsang ba dang / chu mig gi bu ga'o/ /de bzhin du yid kho na las khams bco brgyad dang / skye mched bcu gnyis dang / dbang po drug dang / phung po lnga dang / 'byung ba chen po bzhi yang skyes pa'o/ /de'i don bstan pa/ khams rnams dang ni skye mched rnams/ /dbang po phung po 'byung ba rnams//zhes pa ste yig 'bru bcom zin to/ /de ltar dbyings su bsdu ba ste/ /zhes pa ni de la de ltar zhes pa ni/ khams bco brgyad las lhag pa'i byang chub sems kyi khu ba skyed de/ khu ba de las yang gong bu las byung ba chen po'i bar du 'khor bar skyes pa/ de ni dbyings su bsdu ba ste/ /zhes pa ni phan tshun rgyu rkyen du gyur nas nang gi rten cing 'brel par 'byung ba tha ma med pa'o//de ltar yang chos mngon pa mdzod las gsungs pa/ srid pa'i 'khor lo tha ma med/ /ces so/ /bsdu ba de ni bstan byas pa/ /zhes pa ni bsdu ba phan tshun du rgyur gyur pa bsgom pa'i sems mi g.yo ba rtse gcig par byed pa ni/chos kyi dbyings kyi sgrub pa yin/ /zhes pa ni chos kyi dbyings kyi don du gyur pa yin zhes pa'i tha tshig go/ /ci'i phyir chos kyi dbyings sgrub pa'i don de ltar yin pa/ de bas thams cad nan tan gyis/ /sgrub pa yang dag spyad par bya/ /zhes pa ste de la de bas zhes pa ni gtan tshigs kyi don 'dren pa'o/ / thams cad ces pa ni 'das pa dang / ma byon pa dang / da ltar gyi dus thams cad do/ /nan tan gyis zhes pa ni thos pa dang / bsams pa dang / bsgoms pa'i shes rab rnam pa gsum gyis ji bzhin du byed pa'o/ /sgrub pa zhes pa ni chos kyi dbyings mngon du byed pa'i rgyu'i ngo bo'o/ /de la phyin ci ma log par sgrub pa la 'jug pa ni yang dag spyad par bya zhes pa ste bsgrub par bya'o zhes so//gang gi rim pas bsgrub par bya ba yin zhe na/ ji ltar gal po zhes dngos kyis/ /bsgrub par bya ba rab tu brtags/ /zhes pa ste/ de la ji ltar zhes pa ni sgrub pa'i gtan tshig 'dren pa'o/ /gal po zhes pa ni rgyud kyi nang nas 'byung ba'i sgrub pa'i thabs so//de'i don dang mthun pa'i rang bzhin ni gal po zhes dngos kyis/ bsgrub par bya ba rab tu brtags/ /zhes pa ste chos kyi dbyings sgrub pa yin no zhes pa'i tha tshig go/ /rdzas rnams bsgrub pa bka' stsal 'tshal/ /zhes pa'i lan gsungs pa/ chos rnams bsgrub pa bshad nas su//zhes pa la sogs pa ste de la/ chos rnams bsgrub pa bshad nas su/ /zhes pa ni chos kyi dbyings sgrub pa bshad zin ma thag tu/ rdzas brgyad yan lag bsgrub pa bshad/ /ces pa ste de la rdzas brgyad yan lag ces pa ni thun mong gi dngos grub yan lag brgyad dang rdzas kyis bsgrub pa'i phyir ro/ /brgyad ni 'di lta ste/ri lu'i dngos grub dang / mig sman gyi dngos grub dang / sa 'og gi dngos grub dang / ral gri'i dngos grub dang / nam mkha' la 'phur pa'i dngos grub dang / mig rnon gyi dngos grub dang / 'chi 'pho med pa'i dngos grub dang / nad 'joms pa'i dngos grub dang brgyad do/ /don de kho na gsungs pa ri lu mig sman dngos grub dang //zhes pa la sogs pa ste/ de la ri lu zhes pa ni bcom ldan 'das nyid kyis 'og tu rgyas par bshad pas 'dir ma bkrol lo/ /mig sman dngos grub dang zhes pa ni 'di lta ste/ zla ba mar ngo'i tshes nyi shu dgu'i nam phyed la lam gyi bzhi mdo na thod pa'i steng na 'dug ste/ mdun na yang thod pa gsum sgyed pu ltar btsugs nas/de gnyis kyi bar du bdud rtsi lnga dang bsres pa'i tshil chen gyis bkang ba'i b+han+d+ha gzhag ste/ de'i dkyil du khrag dang dri chen la sogs pa dang bsres pa'i shing arga'i bal la pad+ma'i skud pas dkris pa'i snying po btsugs nas me mar bltam par bya'o/ /shing arga'i bal dang pad+ma'i skud pa ma rnyed na yang gzhan ci 'tshal ba la bya'o//me mar gyi me lce'i du ba la mar b+han+d+ha gcig gis bkab nas sgyed pu gsum la gzhag go/ /de la rdo rjes reg nas phung po lnga rigs lngar bsgoms pa'i rnal 'byor pas sngags oM AHhUM swA hA/ zhes nam ma langs bar du bzla bar bya'o/ /de nas dud pa de blangs nas rang gi mig la bskus na sku gsung thugs kyi dngos grub 'grub bo//de ltar gsang ba 'dus pa'i rgyud las gsungs pa/ lam gyi bzhi mdo shing gcig drung / /ma mo'i gnas sam zhi gnas su/ /de ru rdo rje a dza na/ /thod pa dag tu dbab par bya/ /zhes pa la sogs pa'o/ /sa 'og ces pa ni sa 'og gi dngos grub ste/lha ma yin dang klu'i bu mo sgrub pa'o/ /'di lta ste/ 'phags pa rdo rje sa 'og zhal gsum phyag drug pa zhags pa dang dgra sta dang / rtse gsum pa dang lcags kyu 'dzin pa/ phyag dang po gnyis kyis lha mo la 'khyud pa/ sku mdog nag po bsgom pa'i rnal 'byor pas btsag gam/rdo rgyus sam/ bab blas shing ta la'i lo ma la sogs pa la rdo rje lcags kyu bris te/ de'i kha la gtsugs nas gzas zla ba zin pa'i dus su lcags kyu yang nas yang du kha las 'phros pas klu'i bu mo'am lha ma yin gyi bu mo dgug pa bsgoms nas/ sngags oM AHhUM A kaR+Sha ya dzaHzhes pa bzla bar bya'o//des ni klu dang lha ma yin gyi bu mo gang gi ming smras pa de dgug go/ /de ltar yang rnam par snang mdzad sgyu 'phrul dra ba las gsungs pa/ btsag gam rdo rgyus zhes pa la sogs pa'o/ /ral gri'i dngos grub ces pa ni gyo mo'am gser la sogs pa la mtshan nyid dang ldan pa'i gzugs byas te/mdun na ral gri bzhag nas/ bdud rtsi rnam pa lngas byugs te/ rigs lnga'i gtso bo don yod grub pa bsgoms nas/ oM AHhUM zhes bzlas nas/ ral gri la sku gsung thugs thim par bsgoms te 'od zer 'bar bar bsgom pa'o/ /ral gri de 'phar ma thag tu gong gi sngags bzlas te lag par blangs nas blangs ma thag tu ral gri'i rig 'dzin du grub bo//sgrub pa de kho na'i mthus gang+gA'i klung gi bye ma snyed kyi 'jig rten gyi khams su rgyu bas na nam mkhar 'phur zhes so/ /de ltar rnam par snang mdzad sgyu 'phrul dra ba las gsungs pa/ mdun du ral gri gzhag byas te/ /zhes pa la sogs pa'o/ /mig sman zhes pa ni mig rnon gyi dngos grub po//'di lta ste/ lam gyi bzhi mdo la sogs par thod pa 'dug pa la sogs pa gong ma bzhin byas nas/ 'dir ni zha nye'i gong bu la tshil chen gyis bkang nas/ sa la ma lhung ba'i ro dkris pa'i ras kyis snying po byas te me mar bltam par bya'o/ /phung po lnga rigs lngar bsgoms pa'i rnal 'byor pas oM AHhUM bzla bar bya'o//dud pa de blangs nas mig la bskus na/ mi snang ba sku gsung thugs rdo rje la sogs pa lha klu kun mthong bar 'gyur ro/ /de ltar yang 'phags pa gdan bzhi las gsungs pa/ ma lhung ba yi ro dkris ras/ /zhes pa la sogs pa'o/ /'chi med dang zhes pa ni bdud rtsi dri chen gyi bdud rtsi slong bas tshe bsgrub pa'o//'di lta ste/ dri chen phye mar brdungs nas mar dang sbrang rtsi dang bsres la rtog pa spangs te rigs lnga bsgoms pa'i rnal 'byor pas oM AHhUM bzlas te/ lo gsum gyi bar du zos na nyi zla dang 'dra ba'i tshe grub bo/ /de ltar yang rnam par snang mdzad gal po las gsungs pa/dri chen phye mar gtags nas su/ /mar dang sbrang rtsi bsres nas bza'/ /lo gsum nas ni lha yi lus/ /nyi zla skar ma bzhin du tshe 'gyur ro/ /zhes so/ /bdud rtsi slong ba de kho nas lha'i lus su 'gyur ba'o/ /nad 'joms dang zhes pa ste rims dang bkres skom la sogs pa'i nad med pa'i phyir ro//dngos grub de rnams kyang chos kyi dbyings kho na 'grub pa ste/ chos kyi dbyings kyi rang bzhin dang dbyer med pa'i phyir ro/ /da ni ri lu bsgrub pa'i rdzas bstan pa/ mi dang glang po che dang rta/ /glang dang khyi dang bong bu dang / /rnga mo ma he spyang gi rnams/ /zhes pa ste/ sems can gyi khyad par de rnams kyi sha la shes par bya'o//yon tan ni 'di lta ste/ mi'i shas ni sku gsung thugs 'grub pa dang / glang po che'i shas ni mngon par shes pa 'grub pa dang / rta'i shas ni mi snang ba 'grub pa dang / ba glang gi shas ni 'gugs pa 'grub pa dang / khyi'i shas ni sgrub pa thams cad 'grub pa dang /bong bu la sogs pa'i shas ni gong ma'i spyi'i dngos grub po/ /ci'i phyir sems can de rnams kyi sha la brten nas de lta bu'i dngos grub thob ce na/ 'di lta ste/ 'jig rten pa'i gtsang ba dang mi gtsang ba'i rnam par rtog pas gzir ba'i sems can thams cad sha 'di dag sku gsung thugs kyi rang bzhin dang dbyer med par rtogs nas zos na rnam par rtog pa gzhom mo//rnam par rtog pa med ma thag tu de bzhin gshegs pa thams cad kyis byin gyis rlob bo/ /de rnams kyi byin gyi rlabs kyi yon tan/ 'di dag thob par shes par bya'o/ /de ltar yang gsang ba 'dus pa las gsungs pa/ sha chen dam tshig mchog gis ni//zhes pa nas/ sangs rgyas thams cad kyis byin brlabs/ /zhes pa'i bar ro/ /sha de rnams mang nyung med pa ni/ cha ni mnyam por bya ba'o/ /zhes so/ /sha de kho na'i yang tshad gsungs pa/ mthe bo'i tshigs tsam tshad du ni/ /zhes pa ste/ sha rnam pa dgu po de dag bsdu ba'i tshad de srid pa'i sgo nas sha de dag mang du tshogs pa mi rung ba'i phyir ro//shin tu mnyam par bzhag nas sbyar/ /zhes pa ni sha de dag sbyang ba dang / dag pa'i ting nge 'dzin la sems rtse gcig pa'i sngags bzlas te sbyor zhes pa'i tha tshig go/ /bdud rtsi'i tshad gsungs pa dri chen zhes pa la sogs pa ste/de la bdud rtsi bzhi smos nas shel med pa ni don gyis shes par bya'o/ /nas tsam tshad du ni zhes pa'i bdud rtsi lnga'i ril lu de dag 'bru nas tsam du bsdu ba ste/ dam tshig tsam du 'dod la mang ba na skyon yin pa'i phyir ro/ /sngags bzlas nas ni sbyang byas te/ /zhes pa ni 'dir yang sbyang ba dang dag pa'i sngags bzlas te/sbyang ba'i ting nge 'dzin la yang mnyam par gzhag nas sbyar zhes pa'i tha tshig go/ /de ltar sbyar zin ma thag tu yang byin gyis brlabs kyang bya'o zhes pa ste sngags kyis bstan par bya ba'o/ /byin gyis brlab pa'i sngags bstan pa/ /phyag 'tshal dang ni zhes pa la sogs pa ste/ de la phyag 'tshal dang ni yi ge oM ste sngags kun gyi mgo na bzhag pa'i phyir ro//yi ge AHdbus su zhes pa ni/ oM dang hUM gi bar na yi ge AHgzhag pa'o/ /de bzhin hUM byas te zhes pa ni mtha' na yi ge hUM gzhag pa'o/ /'di lta ste/ oM AHhUM zhes so/ /sngags 'di ni gong gi mig sman la sogs pa la yang bzla ba shes par bya'o//dag pa'i sngags dang sbyar ba'i bsgom pa gsungs pa/ 'bar ba'i hrIHyig 'bar byed pa/ /zhes pa ste/ de'i don ni 'di lta ste/ yaM las skyes pa'i rlung gi dkyil 'khor gyi steng na raM las skyes pa'i me'i dkyil 'khor/ de'i steng du a las skyes pa'i pad+ma b+han+d+ha la sha rnam pa dgu dang bdud rtsi rnam pa lnga bzhag ste/de'i dkyil du yi ge d+hIHbkod nas/ de'i steng du yi ge hUM las rdo rje bsgom ste/ rlung gi dkyil 'khor gyis me'i dkyil 'khor bus nas me 'bar bas pad+ma b+han+d+ha la bdud rtsi btso bar byed pa dang / steng du rdo rje kha gab las 'od mar thur du 'bar bas sha dang bdud rtsi sbyar ba bsgom par bya'o//de nas yang yi ge hrIH'i 'od kyis khams gsum gyi bdud rtsi bsdus nas gcig tu gyur pa dkar por bsgom par byas nas phyin ci log gi mthu gzhom ste dag par bya ba bsgom mo/ /de ltar kun du bzang mo las kyang gsungs pa/ phyag 'tshal dga' bas byin gyis brlabs pa'i rlung / /me yi dkyil 'khor la gnas 'bar ba yin//zhes so/ /rgyud so so yin pas 'di'i gnas skabs su ni oM ma yin yi ge hrIHla shes par bya'o/ /dgu pa de ni rab tu bsgrub/ /ces pa ni bdud rtsi lnga kho na 'di ltar bsgrub pa ma yin gyi sha dgu yang de ltar bsgrub par bya'o zhes pa'i don to/ /de ltar dag pa'i rdzas de dag ri lu bya ba'i thabs bstan pa/lan ni nyi shu rtsa gcig tu/ /sngags bzlas nas ni phye mar btags/ /zhes pa ste nub tu kha bltas nas sor nyi shu rtsa gcig tu btags pa'o/ /yungs kar lnga yi tshad tsam du/ /zhes pa ni yungs kar ni go sla'o/ /de tsam lnga gcig tu byas pa'o/ /lnga dang lnga ni 'byor bar bya//zhes pa ni yungs kar lnga gcig tu bsdu ba'i tshad/ de lnga yang gcig tu bya ba'i don to/ /sgrub pa'i dus bstan pa/ tshes brgyad dang ni bcu bzhi la/ /zhes pa ste go sla'o/ /ri lu rnams ni byas nas ni/ /zhes pa ni gong du gsungs pa'i tshad du ri lu dril ba'o/ /pad+ma'i snod ces pa ni b+han+d+ha'o//de la/ bkang nas ri lu gzhag byas te/ /stong phrag brgyad ni bzla bar bya/ /zhes pa ste/ oM AHhUM stong phrag brgyad bzlas nas byin gyis brlab pa'o/ /mtshams bzhi la ni bsgom byas nas/ /zhes pa ni snga dro dang nyin phyed dang / phyi dro dang nam phyed la gong ma bzhin du sbyar ba dang dag pa'i sgom pa'o/ / de ltar bsgoms zin ma thag tu dus bzhi la ri lu re re rgyun mi 'chad par bza' ba ni/ nyin dang mtshan du bza' bar bya/ /zhes so/ /da ni de'i yon tan gsungs pa/ de ni bskal pa'i tha mar yang zhes pa la sogs pa ste/ de la de ni zhes pa ni ri lu zos pa'i rnal 'byor pa'o/ /bskal pa'i tha mar yang zhes pa ni grangs med pa'i bskal pa mtha' yas pa'o//dngos grub rgyas par 'gro ba ste/ /zhes pa ni ri lu la brten nas mi gnas pa'i mya ngan las 'das par 'gro ba'o/ /gzi brjid ces pa ni 'od zer dang ldan pa'o/ /mdangs dang zhes pa ni gser btso ma'i sku mdog tu gyur pa'o/ /stobs zhes pa ni sred med kyi bu'i stobs dang ldan pa'o//sred med kyi bu'i stobs ni 'di lta ste/ glang po che phal pa bcu'i stobs ni spos kyi glang po che'i stobs/ spos kyi glang po che bcu'i stobs ni gcer bu chen po'i stobs gcer bu chen po'i stobs bcu ni phung po'i stobs phung po'i stobs bcu ni yan lag mchog gi stobs de bcu ni stobs mchog /de bcu ni sred med kyi bu'i stobs zhes bya'o/ /brtson 'grub zhes pa ni dge ba la brod pa'o/ /de yang gsum ste sbyor ba'i brtson 'grus dang / go cha'i brtson 'grus dang / mi 'gong mi ldog chog par mi 'dzin pa'i brtson 'grus so/ /lnga pa la ni smon lam yang //zhes pa ni sems can gyi don du sangs rgyas par 'dod pa'o/ /de yang rnam pa gsum ste/ rang gi tshogs la rab tu 'brel pa'i smon lam dang / sems can gyi don la rab tu 'brel ba'i smon lam dang / sangs rgyas kyi zhing yongs su dag par bya ba'i smon lam dang gsum mo//mngon par shes pa lnga zhes pa ni lha'i mig dang / lha'i rna ba dang / pha rol gyi sems shes pa dang / sngon gyi gnas rjes su dran pa dang / 'chi 'pho ba dran pa'i shes pa dang / rdzu 'phrul bya ba'i shes pa'o/ /de la lha'i mig dang rna ba ni kun rdzob kyi shes pa ste/ bsgribs pa dang bsrings pa dang /phra ba thams cad spyod yul nyid kyi phyir ro/ /pha rol gyi sems shes pa ni chos dang rjes su dang lam dang / kun rdzob dang / pha rol gyi sems shes pa rnams te/ bsten pa'i cho 'phrul chen po'i phyir ro/ /sngon gyi gnas dang 'chi 'pho rjes su dran pa'i shes pa ni kun rdzob kyi shes pa ste/tshe sngon gyi ma rig pa dang tshe phyi ma'i ma rig pa bzlog pa'i phyir ro/ /rdzu 'phrul bya ba'i shes pa ni kun rdzob kyi shes pa ste/ ting nge 'dzin gyi khyad par yin pa'i phyir ro/ /rdzu 'phrul de yang rnam pa gnyis te 'gro ba dang sprul pa'o/ /de la 'gro ba yang gsum ste/ phyin byed dang / mos pa las byung ba dang /yid mgyogs pa'o/ /de gsum la de bzhin gshegs pa'i yid mgyogs pa ma gtogs pa 'dir gnyis thob bo/ /rdzu 'phrul ni gcig las du mar gyur pa dang / du ma las gcig tu gyur pa lta bu ste/ 'dod khams la gtogs pa dang / gzugs khams la gtogs pa gnyis so//thob pa zhes pa ni gong gi gzi brjid nas mngon par shes pa'i bar du yon tan mngon du gyur pa'o/ /de dag gang las mngon du gyur pa yin zhe na/ ri lu chen po zos phyir ro/ /zhes pa ste/ gong gi ri lu zos pa'i yon tan zhes pa'i tha tshig go/ /de bzhin rig pa'i sngags rnams kyang / /zhes pa'i lan btab pa/rdzas kyi sgrub pa zhes bya ba la sogs pa ste rdzas kyi dngos grub ni bshad zin to/ /kye bcom ldan 'das da ni rig pa sngags rnams bdag la stsol zhes zhus pa'o/ /bcom ldan 'das kyis rig pa'i sngags bstan pa/ e yig dang ni zhes pa la sogs pa ste/ de la e yig dang ni zhes pa ni yi ge raM las bskyed pa'i zur gsum pa me'i dkyil 'khor ro//baM yig dang zhes pa ni yi ge baM las bskyed pa zlum po chu'i dkyil 'khor ro/ /laM yig ces pa ni yi ge laM las bskyed pa dbang chen gyi dkyil 'khor gru bzhi'o/ /dbus su yang dag gnas zhes pa ni me'i dkyil 'khor gyi dbus su yi ge raM/chu'i dkyil 'khor gyi dbus su yi ge baM/ dbang chen gyi dkyil 'khor gyi dbus su yi ge laM dgod pa'o/ /dang po mdog ni dmar po ste/ /zhes pa ni me'i dkyil 'khor dang sa bon raM gyi kha dog go/ /gnyis pa yin ni mdog dkar ba/ /zhes pa ni chu'i dkyil 'khor dang sa bon baM gyi kha dog go/ / gsum pa kha dog ser ba zhes pa ni dbang chen gyi dkyil 'khor dang sa bon laM gyi kha dog go/ /de rnams gang 'gugs par byed pa'i bud med kyi b+ha ga'i dbus su brtsegs par bsgom par bya zhes so/ /dkyil 'khor de dag kyang ji ltar bsgom zhe na/ 'khor lo ltar ni bskor ba ni/ /zhes pa ste rdza mkhan gyi 'khor lo ji ltar myur bar 'khor ba de bzhin du me'i dkyil 'khor la sogs pa b+ha ga'i nang du 'khor ba bsgom pa'o//dus gang du zhe na/ nyin phyed dang ni mtshan phyed la/ /zhes pa ste nyin phyed dang mtshan phyed la sems can thams cad sems kyi stobs nyams pas dbang du byas pa'i dus yin pa'i phyir ro/ /de'i yon tan bstan pa rig pa de ni zhes pa la sogs pa ste/de la rig pa de ni zhes pa ni gong gi me'i dkyil 'khor la sogs pa ste/ bu mo dgug pa'i las byed pa'i phyir ro/ /rab 'byor na zhes pa ni b+ha ga'i nang du bsgom pa'o/ /de ni skad cig kho nar 'grub/ /ces pa ni myur bar 'grub pa'i tha tshig ste/ de la de'i skad cig ma ni skad cig ma brgya nyi shu'i dus kyi tshad se gol lan gnyis gtogs pa la skad cig ma brgyad kyis mchog pa'o//sgrub pa dngos bstan pa/ lha mo lha min bu mo'am/ /zhes pa ni de la lha mo zhes pa ni bshad zin to/ /lha min bu mo zhes pa ni rin po che'i 'od la longs spyod pa'i phyir ro/ /'am zhes pa ni rnam grangs bstan pa'o//mi'i zhes pa ni shes pa las byung ba'i phyir na ste/ de las skye ba'i mi'i rigs ni mi'i bu mo'i zhes so/ /de yang rnam pa bzhis zhes pa ni pad+ma can dang / dung can ma dang / ri mo can ma dang / glang po che can ma'o/ /de la pad+ma can ma ni pad+ma'i dri bro ba dang / ngo zlum pa dang /sna rtse til gyi me tog 'dra ba dang / sen mo dmar ba dang / rgyab cung sgur ba dang / rkang mthil kun gyis sa la reg pa dang / nu ma til gyi shing tog dang 'dra ba dang / ba spu 'khyil ba dang ldan pa'i sor mo can gsus pa'i gnyer ma gsum dang ldan pa dang / brang mdzes pa dang / glang po che ltar dal bus 'gro ba ste/de rnams kyi mtshan nyid do/ /dung can ma ni ba tshwa'i dri bro ba dang / skra ring ba dang / sna ring ba dang / nu ma che la shing tog na rang ga 'dra ba dang / 'o ma dang / zho la sred pa rnams kyi mtshan nyid do/ /ri mo can ma ni sha'i dri bro ba dang / lus chung ba dang / brla mdzes pa dang / shing tog shing pa la lta bu'i nu ma dang /ngo tsha mi shes pa dang / khro 'dod pa dang / rtag tu 'thab mo la dga' ba dang / rje ngar bya rog dang 'dra ba dang / phyi rgan du nyal ba dang / mchu 'phyang ba dang / phug ron gyi skad 'dra ba de rnams kyi mtshan nyid do/ /glang po che can ma ni/ chang gi dri bro ba dang / byin pa sbom pa dang / sna yo ba dang / mdog rdul skya ba dang / dri nga ba dang / lus sbom pa dang / spyod pa rtsom pa de rnams kyi mtshan nyid do/ /sa'i dkyil 'khor kun du ni/ /zhes pa ni sa 'og dang sa steng dang sa bla'o/ /sngags kyis bkug nas spyad par bya/ /zhes pa ni gong du gsungs pa'i sngags kyi mthu yis bkug ste/ bu mo thams cad spyad par bya'o zhes pa'i tha tshig go//dkyil 'khor rnams ni brtags pa dang / /zhes pa'i lan btab pa/ bsgom pa zhes pa la sogs pa ste/ de la bsgom pa zhes pa ni gong du me'i dkyil 'khor la sogs pa bsgom pa'o/ /de bzhin rig pa'i sngags zhes pa ni raM dang baM dang laM dang ngo / /de dag gi man ngag tu/ kye lha mo bdag gis bshad pa zin byas te zhes so//da ni/ dkyil 'khor rnams ni bshad par bya/ /dga' ma sems kyis rtse gcig nyon/ /zhes pa ste/ bshad par dam bcas pa'i tshig go/ /de la dga' ma zhes pa ni lha mo sgrol ma bod pa'i tshig ste/ bcom ldan 'das kyi thugs la byon pa'i phyir ro/ /sems kyis rtse gcig zhes pa ni bum pa kha mar phub pa lta bu'i skyon dang /bum pa zhab rdol ba lta bu'i skyon dang / bum pa mi gtsang bas gang ba lta bu'i skyon gsum spangs nas dad pa dang brtson 'grus dang yang dag pa'i lta ba gsum dang ldan par nyon zhes pa ste gnang ba'i tshig go/ /de nas bcom ldan 'das kyis dkyil 'khor bstan pa/dkyil 'khor lus zhes pa la sogs pa ste/ de la dkyil 'khor lus zhes gsungs pa ste zhes pa ni phung po lnga rigs lngar bstan pa dang / 'og tu bshad pas 'dir ma bkral lo/ /dkyil 'khor b+ha gar bstan pa yin/ /zhes pa ni chos kyi 'byung gnas e gru gsum gyi nang du bsgom pa'i dkyil 'khor ro//dkyil 'khor byang chub sems dang ni/ /zhes pa ni lhag pa'i byang chub sems las bskyed pa'i sa bon las gsang ba'i pad+ma'i nang du bsgom pa'i dkyil 'khor ro/ /dkyil 'khor gsum du brtags pa yin/ /zhes pa ni de ltar lus dang / b+ha ga dang / byang chub sems kyi dkyil 'khor gsum kho na gnyis dang bzhi ma yin par gsang ba'i rgyud las yang dag par brtags so zhes so//dkyil 'khor ming ji ltar btags she na gsungs pa/ btags pa rnams kyang 'dus pa ste/ /zhes pa ste dkyil 'khor ming btags pa ni snying po 'dus pa'i phyir ro/ /de ltar 'jig rten snang ba las kyang gsungs pa/snying po 'dus phyir dkyil 'khor ro/ /zhes so/ /snying po gang zhe na gsungs pa/ gang du gtso bo skyed par byed/ /ces pa ste de la gang du zhes pa ni gnas gang dang gang du'o/ /gtso bo zhes pa ni khyab bdag rdo rje sems dpa' ste/ snang ba'i sgo nas kun du khyab pa'o/ /skyod par byed ces pa ni rgyu ba'o/ / de'i don ni 'di lta ste/ rdo rje sems dpa'i ngo bo rigs lnga la sogs pa'i lha dang lha mo'i 'dod pa'i 'bras bu mya ngan las 'das pa smin par byed pas na snying por 'dod de/ de dag gang dang gang du 'dus pa de dang de ni dkyil 'khor zhes ming btags pa'i tha tshig go/ /da ni lus kyi dkyil 'khor bcom ldan 'das nyid kyis rgyas par bstan pa/phung po rnams ni zhes pa la sogs pa ste/ de la phung po rnams ni sangs rgyas gsungs/ /zhes pa ni phung po lnga rigs lngar bsgom pa'o/ /'di lta ste/ gzugs kyi phung po ni rnam par snang mdzad de de la rnam par snang mdzad kyi byang chub kyi sems 'phro ba'i sbyor bas phra mo'i ye shes dang po'i sbyor ba de bzhin gshegs pa'i sems so/de ltar gsang chen thams cad rgyud las gsungs pa/ sems kyi phra mo sbyor ba yis/ /ye shes phra mo dang sbyor ba/ /de bzhin gshegs kun ye shes ni/ /rnam par snang mdzad ces su 'dod/ /ces so/ /tshor ba'i phung po ni rin chen 'byung ldan te de la rin chen 'byung ldan ni/snying rje 'phro ba'i sbyor bas sems can gyi don byed pa dang ldan pa'i sems so/ /de ltar yang gsang chen thams cad rgyud las gsungs pa/ snying rje 'phro ba'i sbyor ba yis/ /thams cad phan don byed pa'o/ /sems can don dang ldan sems ni/ /rin chen 'byung ldan zhes gsungs so//zhes so/ /'du shes kyi phung po ni snang ba mtha' yas te/ de la snang ba mtha' yas ni dga' ba sbyor ba'i 'phro bas rang bzhin gyis 'od gsal ba dag pa'i sems so/ /de ltar yang gsang chen thams cad rgyud las gsungs pa/ dga' ba 'phro ba'i sbyor ba yis/ /theg chen dri ma med pa'i mchog /rang bzhin 'od gsal dag sems ni/ /snang ba mtha' yas de gsungs so/ /zhes so/ /'du byed kyi phung po ni don yod grub pa ste/ de la don yod grub pa ni btang snyoms 'phro ba'i sbyor bas gdon mi za bar sems can thams cad kyi don byed pa'i sems so/ /de ltar yang gsang chen thams cad rgyud las gsungs pa/btang snyoms 'phro ba'i sems kyis ni/ /sems can thams cad shes byed pa/ /thogs med bla med don byed pa/ /don yod grub pa de gsungs so/ /zhes so/ /rnam par shes pa'i phung po ni mi bskyod pa ste de la mi bskyod pa ni/ byams pa 'phro ba'i sbyor bas zag pa med pa brtan par gyur pa'i brtan pa'i sems so//de ltar yang gsang chen thams cad rgyud las gsungs pa/ byams pa 'phro ba'i sbyor ba yis/ /mchog gi spyod pa spyod byed pa/ /zag pa med par brtan 'gyur ba/ /sems ni mi bskyod par gsungs so/ /zhes so/ /de ltar phung po lnga sems las gzhan med pa'i phyir ro//sems de dag ni rigs lngar gsungs so/ /de ltar yang 'phags pa sa bcu pa la gsungs pa/ kye rgyal ba'i sras khams gsum yang sems tsam mo/ /dus gsum yang sems tsam mo/ /phung po lnga yang sems tsam mo/ /zhes so/ /'byung ba rig mar btags pa'o zhes pa la 'byung ba ni sa dang chu dang me dang rlung ste/rang rang gi mtshan nyid nye bar blangs nas gzugs 'dzin pa'o/ /rig mar zhes pa ni spyan ma dang mA ma kI dang na bza' dkar mo dang / sgrol ma ste zhi ba la sogs pa'i las byed pa'i phyir ro/ /'di lta ste/ sa ni spyan ma ste byang chub sems kyi mthus sangs rgyas nyid du phyin pa'i bdag nyid do//de ltar yang gsang chen thams cad rgyud las gsungs pa/ byang chub sems kyi mthu yis ni/ /sangs rgyas nyid du pha rol phyin/ /thob pa'i pha rol phyin zhes pa/ /sems ma'i rdo rje ma zhes btags/ /zhes so 'dir ni spyan ma la shes par bya ste spyan ma dang sems ma'i rdo rje ma gnyis kyis pha rol tu phyin pa'i rang bzhin gcig pa'i phyir ro//chu ni mA ma kI ste bsdu ba'i dngos po bzhi la shes rab kyi pha rol tu phyin pa'i bdag nyid do/ /de ltar yang gsang chen thams cad rgyud las gsungs pa/ bsdu ba'i dngos po bzhi rnams la/ /shes rab pha rol phyin dge ba/ /chos bzhi gcig tu 'byung ba ni/ /rin chen rdo rje ma ru 'dod//ces so/ /'dir yang mA ma kI la shes par bya ste mA ma kI dang rin chen rdo rje ma ni pha rol tu phyin pa'i rang bzhin gcig pa'i phyir ro/ /de ni na bza' dkar mo ste/ de kho na nyid kyi pha rol tu phyin pa'i ngo bo'o/ /de ltar yang gsang chen thams cad rgyud las gsungs pa/ gsang ba'i chos kyi theg chen la//de nyid pha rol phyin dge ba/ /pha rol phyin zhes 'byung ba ni/ /chos kyi rdo rje ma ru 'dod/ /ces so/ /'dir yang na bza' dkar mo la shes par bya ste/ na bza' dkar mo dang chos kyi rdo rje ma pha rol tu phyin pa'i rang bzhin gcig pa'i phyir ro/ /rlung ni sgrol ma ste rdo rje pha rol tu phyin pa'i rang bzhin no/ /de ltar yang gsang chen thams cad rgyud las gsungs pa/pha rol phyin bzhi rgyal mo ste/ /rdo rje pha rol phyin pa dge / sbyor ba'i bcas la btags pa ni/ /las kyi rdo rje ma zhes 'dod/ /ces so/ /'dir yang sgrol ma la shes par bya ste/ sgrol ma dang las kyi rdo rje ma pha rol tu phyin pa'i rang bzhin gcig pa'i phyir ro//chags pa lcags kyu kho na ste/ /zhes pa ni rig ma la sogs pa lnga'i sgo nas dbyer med pa'i thabs chen pos spyod yul 'dzin pa'i sems ni rdo rje lcags kyu ma'o/ /de ltar yang gsang chen thams cad rgyud las gsungs pa/ 'dod kun la ni thabs che ba/ /rdo rje lcags kyu la 'dod do/ /zhes so/ /zhags pa pad+mor chud byed pa//zhes pa ni 'khrig pa'i 'dod chags la sred pa'i sgo nas ma yin pa de bzhin gshegs pa la mchod pa'i phyir ro/ /byang chub kyi spyod pa'i sgo nas pad+ma la gsang ba'i rdo rje bcug pa'i sems ni rdo rje zhags pa'o/ /de ltar yang gsang chen thams cad rgyud las gsungs pa/ spyod pa byang chub tu spyod pa/ /rdo rje zhags pa zhes 'dod do/ /zhes so/ /kha phrad pa ni sgrog yin par zhes pa ni rnal 'byor pa dang / rnal 'byor mas byang chub kyi spyod pa bsgoms pa las sems mi g.yo bar kha phrad pa ni rdo rje sgrog go/ /de ltar yang gsang chen thams cad rgyud las gsungs pa/ gang zhig de la brten pa gang //rdo rje sgrog ces 'dod pa'o/ /zhes so/ /sgra grag pa ni dril bur bshad/ /ces pa ni chos thams cad ni mi skye ba yin no zhes pa'i sngags kyi sgra brjod nas thabs dang shes rab rol pa ni rdo rje dril bu'o/ /bzlas pa'i sngags ni/ a kA ro mu khaM sarba d+har+m+mA NAM Ad+ya nut+pan+na twAta/ ces so/ /da ltar yang gsang chen thams cad rgyud las gsungs pa/chos thams cad ni ma skyes pa/ /nam mkha' dang mnyam gdod zhi ba/ /de ltar ngag ni smrar 'jug pa/ /rdo rje dril bu zhes 'dod do/ /zhes so/ /spos ni dri chen zhes gsungs te/ /zhes pa ni gtsang ba dang mi gtsang ba rnam par mi rtog par mnyam pa nyid du 'gyur ba ni shes rab kyi pha rol tu phyin pa'i rang bzhin spos yin pa'i phyir ro//de ltar yang gsang chen thams cad rgyud las gsungs pa/ thams cad du ni mnyam pa'i mchog /shes rab pha rol phyin pa spos/ /zhes so/ /me tog rak+ta zhes 'dod de/ /zhes pa ni phyin ci log pa'i 'dod chags kyis ma g.yos pa'i bsam gtan gyi pha rol tu phyin pa'i rang bzhin me tog yin pa'i phyir ro//de ltar yang gsang chen thams cad rgyud las gsungs pa/ 'dod pa'i 'dam skyes ma gos pa/ /bsam gtan pha rol phyin me tog /ces so/ /mar me sha rnams kho na yin/ /zhes pa ni gtsang ba dang / mi gtsang ba'i sha rnams kun gyi rnam par rtog pa spangs pa la smon pa'i rang bzhin me yin pa'i phyir ro//de ltar yang gsang chen thams cad rgyud las gsungs pa/ phyogs kun du ni gsal byed pa/ /smon lam pha rol phyin mar me/ /zhes so/ /dri ni byang chub sems shes 'dod/ /ces pa ni lhag pa'i byang chub sems dri nga ba na yang thabs kyis dge ba'i bde bar gyur ba'i rang bzhin ni dri 'dod pa'o/ / de ltar yang gsang chen thams cad rgyud las gsungs pa/ dri nga ba yang dge ba'i bde/ /thabs kyi pha rol phyin pa'i dri/ /zhes pa'o/ /sgeg mo'i ling+gar 'dod pa ste/ /zhes pa ni de bzhin gshegs pa la mchod pa 'bul ba'i sgo nas rnal 'byor pa'i dge ba'i rol ba'i rang bzhin ni sgeg mo yin pa'o/ /de ltar yang gsang chen thams cad rgyud las gsungs pa/ci phyir dge ba'i rol pa ni/ /sbyin ba'i pha rol phyin sgeg mo/ /zhes so/ /phreng ba b+ha ga kho na yin/ /zhes pa ni dam tshig tshul dang ldan pa'i rnal 'byor mas de bzhin gshegs pa rnams thugs mnyes par byed pa'i rang bzhin ni phreng ba mar 'dod pa'o/ /de ltar yang gsang chen thams cad rgyud las gsungs pa/brgyan pa'i lus can yid 'phrog ma/ /tshul khrims pha rol phyin phreng ma/ /zhes so/ /dbyangs ma dbugs su bstan ma dang / /zhes pa ni thabs dang shes rab rol ba'i dus su sngags ched du brjod pa bzod pa'i rang bzhin ni dbyings ma yin pa'i phyir ro/ /de ltar yang gsang chen thams cad rgyud las gsungs pa/ched du brjod pas legs brjod pas/ /bzod pa'i pha rol phyin dbyangs ma/ /zhes so/ /gar mkhan ma ni kha sbyor te/ /zhes pa ni sangs rgyas par bya ba'i don du gnyer ba'i rnal 'byor dang rnal 'byor ma sbyor nas lha bsgom pa'i brtson 'grus kyi rang bzhin ni gar zhes 'dod pa'i phyir ro//de ltar yang gsang chen thams cad rgyud las gsungs pa/ myur bar sangs rgyas nyid sbyin pa/ /brtson 'grus pha rol phyin gar mkhan/ /zhes so/ /de lta bu'i lus kyi dkyil 'khor ni b+ha ga'i dkyil 'khor byang chub sems kyi dkyil 'khor las khyad par du gyur pa la ni bcom ldan 'das kyis bzang por gsungs zhes pa ste shin tu sbyor ba yin pa'i phyir ro//de rtogs pa ni bskal bzang yin/ /zhes pa ni lus kyi dkyil 'khor bzang po'i don de rtogs pa'i rnam par shes pa'i tshogs brgyad gang yin pa de ni bskal bzang yin zhes pa ste/ sngar sangs rgyas pa'i phyir ro/ /rtogs pa zhes pa ni rnam par shes pa'i tshogs brgyad do//de rnams byams pa la sogs zhes pa ni rnam par shes pa'i tshogs brgyad byams pa la sogs pa'i bskal pa bzang po'i byang chub sems dpa' brgyad bsgom mo zhes pa'i tha tshig go/ /'di lta ste/ kun gzhi'i rnam par shes pa'i byams pa ste/ de rnams byams pa'i sgo nas/ sems can gyi don byed pa'i phyir ro//nyon mongs pa'i yid ni 'jam dpal lo/ /yid kyi rnam par shes pa ni kun du bzang po'o/ /mig gi rnam par shes pa ni sa'i snying po'o/ /rna ba'i rnam par shes pa ni phyag na rdo rje'o/ /sna'i rnam par shes pa ni nam mkha'i snying po'o/ /lce'i rnam par shes pa ni 'jig rten dbang phyug go//lus kyi rnam par shes pa ni sgrib pa rnam par sel ba'o/ /de ltar nang gi bdag nyid gsungs/ /zhes pa ni de ltar nang gi lus kyi dkyil 'khor rnal 'byor pa dang / rnal 'byor mas bsgom pa bcom ldan 'das kyis gsungs so zhes pa'i tha tshig go/ /dkyil 'khor rnam pa gsum las gnyis ma bshad pa ci'i phyir zhe na/dkyil 'khor gzhan ni sngon bshad zin/ /zhes pa ste rtsa ba'i rgyud las b+ha ga'i dkyil 'khor dang / byang chub sems kyi dkyil 'khor rgyas par bshad zin pa'i phyir ro/ /sbyin sreg so sor bya ba dang / /zhes pa'i lan btab pa/ sbyin sreg las ni bshad par bya/ /zhes pa la sogs pa ste de la sbyin sreg ces pa ni bshad zin to//de'i las zhes pa ni lus ngag gi las bya ba'i ngo bo'o/ /nyon cig ces pa ni lha mo sgrol ma la bod pa'i tshig go/ /sbyin sreg rnam pa bzhi zhes pa ni zhi ba dang / rgyas pa dang / dbang dang / drag po'o/ /de la zhi ba ni gnod pa dang / nad dang / 'tshe ba zhi bar byed pa'o/ /rgyas pa ni tshe dang /srid dang / longs spyod rgyas par byed cing 'phel bar byed do/ /dbang ni gzhan gyi sems bsgyur zhes rang gi ci 'dod pa bzhin du byar bcug pa'o/ /drag po ni gzhan la gnod cing phung bar byed pa'o/ /de bzhin yang phyi nang du dbye ba gsungs pa/ sbyin sreg phyi dang nang gsungs te/ /zhes pa ste de la sbyin sreg phyi dang zhes pa ni phyi rol du hom khung brtsigs pa la sogs pa'i sbyin sreg gi cho ga'o//de ni rtsa ba'i rgyud las bstan zin pas na/ phyi ni sngon du bstan pa yin/ /zhes so/ /nang gi sbyin sreg gsungs pa nyon cig ces pa ni sogs pa ste/ /de la/ nyon cig khyod kyi nang gi ni/ /zhes pa ni kye lha mo sgrol ma nang gi sbyin sreg rgyas par bshad kyis nyon cig ces pa'i tha tshig go//pad+ma bzhi rnams 'byor pa ni/ /lus kyi dbus su nye bar gnas/ /zhes pa ni gsang ba dang / lte ba dang / snying ga dang / mgrin pa dang bzhi la pad+ma'i gdan re re bsgom pa'o/ /me dang zhes pa ni lte ba'i pad+ma'i steng du raM las bskyed pa'i zur gsum pa me'i dkyil 'khor dmar po'i dkyil du sa bon raM gyis mtshan pa bsgom mo//de bzhin rlung dang ni zhes pa ni gsang ba'i pad+ma'i gdan la yaM las bskyed pa'i rlung gi dkyil 'khor zla gam mdog sngon po'i dkyil du yi ge yaM gis mtshan pa bsgom pa'o/ /dbang chen dang ni zhes pa ni snying ga'i pad+mar yi ge laM las skyes pa dbang chen gyi dkyil 'khor gru bzhi pa mdog ser po dkyil du yi ge laM gyis mtshan pa bsgom par bya'o//chu de bzhin zhes pa ni mgrin pa'i pad+mar yi ge baM las bskyed pa chu'i dkyil 'khor zlum po kha dog dkar ba dbus su yi ge baM gyis mtshan pa bsgom pa'o/ /de dag gi las gsungs pa/rlung gis me la 'bar bar byed/ /ces pa ste gsang ba'i rlung gi dkyil 'khor las me'i dkyil 'khor la 'bud pa'o/ /chu yis yongs su smin par byed/ /ces pa ni dbang chen gyi dkyil 'khor gyi drod byung bas zas thams cad mgrin pa'i chu'i dkyil 'khor la smin par byed pa'o/ /de'i don kho na gsungs pa/dbang chen dkyil 'khor las byung ba/ /zhes so/ /dbang chen gyi drod ji ltar 'byung zhe na/ gang du me ni bskyod pa'o/ /zhes pa ste me'i dkyil 'khor gyi 'od kyis dbang chen gyi dkyil 'khor la reg pa'o/ /de ltar dkyil 'khor gyi go rims su rgyud las ma bstan pa ni bla ma'i man ngag la brten par bya ba'i phyir dang /shes rab can gyi nga rgyal bcag pa'i phyir ro/ /de dag gi yon tan gsungs pa/ ra yig ces pa la sogs pa ste go sla'o/ /sreg rdzas gsungs pa/ gang zhig zas dang btung ba ni/ /zhes pa ni de la gang zhig zas dang zhes pa ni rnal 'byor pa'i zas gtsang ba dang mi gtsang ba thun mong du bzung ba'o//de la gtsang ba ni 'bras chan dang zho dang bu ram la sogs pa ste/ 'jig rten pas gtsang bar brtags pa'i phyir ro/ /mi gtsang ba ni sha dgu dang bdud rtsi lnga la sogs pa'o/ /'jig rten pas mi gtsang bar brtags pa'i phyir ro/ /btung ba zhes pa ni/ chang dang 'o ma la sogs pa'o/ /de dag thams cad chu la ste//zhes pa ni zas dang btung ba de dag chu'i dkyil 'khor la sbyin sreg bya'o zhes pa'i tha tshig go/ /pad+mar k+Sha yig kha mar bltas/ /zhes pa ni mgrin pa'i pad+ma'i steng gi chu'i dkyil 'khor gyi steng na yi ge k+Sha mdog dkar ba kha thur du blta ba 'od zer mar 'bar ba kha gab kyi tshul du bsgom pa'o/ /sreg rdzas de dag kyang chu'i dkyil 'khor las mar babs te snying ga'i pad+mar btsud par bya'o//lte ba'i pad+mar 'gro zhes so/ /sbyin sreg de ji ltar bya ba yin zhe na phyi rol/ /kha sbyor tshul gyi sbyor ba yis/ /zhes pa ste phyi rol du thabs dang shes rab sbyor bas sbyin sreg bya ba'o/ /yang phyi rol gyi sbyin sreg la mngon par rtogs pa'i lha bsgom pa ji lta ba bzhin du/lus kyi dkyil 'khor la lha bsgom pa dang sbyar nas sbyin sreg bya ba'i tha tshig go/ /gsang ba'i pad+mar 'gro ma thag /thal bar mtha' ru rnam par bstan/ /zhes pa ni sreg rdzas de dag gi bdud rtsis lus kyi dkyil 'khor gyi lha tshim ste snyigs ma tshig par bsgom par bya zhes pa'i tha tshig go//yon tan gsungs pa/ de rnams sbyin sreg bdag bshad pa/ /zhes pa la sogs pa ste de la bdag ces pa ni ston pa'o/ /tshe 'di kho nar 'grub par 'gyur/ /zhes pa ni de bzhin gshegs pa'i zhing khyad par can la mchod pa dang / bsam pa khyad par can du gyur pas tshe 'di kho na la chos mthong nas myong ba'i 'bras bur gyur pa'o//de ltar yang chos mngon ba mdzod las gsungs pa/ zhing dang bsam pa'i khyad par las/ /mthong chos 'bras bu can gyi yin/ /zhes so/ /gas pa med cing zhes pa nas sems can thams cad dga' bar smra/ /zhes pa'i bar ni go sla'o/ /mthong ba tsam gyis skul byed do//zhes pa ni rnal 'byor pa de sems can gzhan gyis mthong ba tsam gyis/ 'jig rten pa thams cad chags par 'gyur ro zhes pa'i tha tshig go/ /de bzhin mchod pa'i cho ga yang / /zhes pa'i lan btab pa/ sbyin sreg las rnams bshad byas nas/ /zhes pa la sogs pa ste de la lha mo zhes pa ni sgrol ma la pod pa'i tshig go//mchod pa zhes pa ni nang gi mchod pa ste bkur sti bya ba'o/ /phreng zhes pa ni me tog gi phreng ba'o/ /sogs pa'i sgras ni mar me gzung bar bya'o/ /gzhan ni go sla'o/ /dbang po gnyis ni rab sbyor nas/ /zhes pa ni gsang ba'i mchod pa ste/ thabs dang shes rab rol pa ste/mchod pa de dag gis gang du mchod ce na/ bdag la mchod pa rnams ni bya/ /zhes pa ste rang gi lus kho na la mchod par bya zhes pa'i tha tshig go/ /ci'i phyir 'phags pa'i sku tshad mchod rten la sogs pa la mchod pa mi byed ce na gsungs pa/ bdag ni thams cad sangs rgyas nyid/ /ces pa ste rang gi phung po lnga dang /skye mched la rigs lnga dang / byang chub sems dpa' nyid du bsgom pa'i phyir ro/ /sangs rgyas kun gyi gnas yin te/ /zhes pa ni/ ji ltar mchod rten sangs rgyas thams cad kyi gzhir 'gyur ba/ de bzhin du dbang dang man ngag thob pa'i rnal 'byor pa'i lus la yang sangs rgyas thams cad kyi gnas su gyur pa'o//de ltar yang rnam par snang mdzad sgyu 'phrul dra ba las kyang gsungs pa/ rdo rje slob dpon ni phyogs bcu'i sangs rgyas rnams kyis byin gyis brlabs nas mchod do zhes pa la sogs pa'o/ /de ltar rdo rje slob dpon sangs rgyas rnams kyis kyang mchod gnas su gyur pa ci'i phyir/ de bas nan tan thams cad kyis//rnal 'byor pas ni rtag tu mchod/ /ces pa ste/ de la thams cad ces pa ni/ mchod pa thams cad do/ /yang na dus thams cad do/ /nan tan zhes pa ni bdag nyid lhar bsgom pa la brtson pa'o/ /mchod pa gzhan gsungs pa/ gang zhig 'ga' yang bya ba'i las/ /zhes pa ste ngag gis dbyangs len pa la sogs pa dang /lus kyis gar byed pa la sogs pa'o/ /rnal 'byor pa yis mchod par bsgom/ /zhes pa ni lus ngag gi las de dag rnal 'byor pas lus kyi dkyil 'khor la mchod par bsgoms na tshig 'tshal ba dang / ngag 'khyal par mi 'gyur zhes pa'i tha tshig go//mchod pa bsgom pa bstan pa zas dang zhes pa la sogs pa ste de la/ rig ma bzhi yis rnam brgyan pa'i/ /bdag ni lha nyid bsam par bya/ /zhes pa ste/ 'byung ba chen po bzhi'i ngo bor gyur pa zas la sogs pa gang de rnams lha mo bzhi'i rang bzhin dang / rdo rje sems dpa'i rang bzhin du bsgom mo/ /de ltar yang gsang ba 'dus pa las gsungs pa/yang na 'di la bsgom pa ni/ /rigs kyi bsgom par rnam par bsgom/ /zhes so/ /don ni 'di lta ste/ sa'i rang bzhin du gyur pa'i zas rnams spyan mar bsgom pa dang / chu'i rang bzhin du gyur pa'i btung ba rnams mA ma kIr bsgom pa lta bu'o/ /da ni thugs kyi sgo nas chos ston pa de ltar bshad nas zhes pa la sogs pa ste/de la de ltar bshad nas zhes pa ni le'u dang po la bcom ldan 'das rdo rje sems dpas gsungs pa'i tshig dang po bzung nas le'u 'di la bdag nyid bsam par bya zhes pa'i bar du gsung gi sgo nas chos bstan pa'o/ /rdo rje zhes pa ni rdo rje sems dpa'o/ /de zhes pa sku dang gsung gi sgo nas/gong du chos ston pa po rdo rje sems dpa' gang de kho na bcom ldan 'das chos brjod du med pa'i don ston 'dod pas cang mi gsung bar dngos por bzhugs zhes pa ste/ chos thams cad kyi rang bzhin ni don dam par brjod du med pa'i phyir ro/ /'o na bcom ldan 'das kyis gsung rab yan lag bcu gnyis bstan pa ji ltar yin zhe na/de ni 'di lta ste/ thugs rje chen po'i dbang gis kun rdzob tu bstan par zad kyi don dam par ni bstan pa med do/ /de bas na mdo las kyang / bdag mngon par rdzogs par sangs rgyas nas mya ngan las 'das kyi bar du bdag gis chos bstan pa med pas zhes gsungs so//de ltar klu sgrub zhabs kyis kyang theg pa chen po nyi shu pa las gsungs pa/ tshig gis brjod du mi lang ba'i/ /chos rnams snying rjes gang gis bstan/ /sangs rgyas thogs med mkhyen pa yis/ /bsam med sgo de la phyag 'tshal/ /zhes so/ /de ltar bcom ldan 'das gnyis su med pa'i ye shes mngon du gyur pa mthong ma thag 'khor gyis ci byed ce na gsungs pa/de nas zhes pa la sogs pa ste de la rnam par mi rtog pa thob ste zhes pa ni chos kyi dbyings kyi sgo nas 'khor ba dang mya ngan las 'das pa so so ma yin tha mi dad par mngon du gyur nas cang mi gsung bar bzhugs par gyur to zhes te/ chos nyid khong du chud pa'i phyir ro/ /gsung rab gzhan gyi gzhung na ni mngon par bstod do zhes 'byung ba la rgyud 'dir ni cang mi gsung bar gyur pa ni/ ci'i phyir zhe na/ de ni 'di lta ste/ sku gsung thugs kyi sgo nas bstan pa'i chos la thugs kyi sgo nas bstan pa'i chos gtso bor gyur pas/ thugs kyi sgo nas bstan pa'i chos la gnyis su med pa'i shes rab kyis rnam par mi rtog pa'i ye shes mngon du gyur pas cang mi gsung bar gyur par shes par bya'o//lha mo bzhis zhes pa la sogs pa ni bshad zin to/ /bzhi pa'o/ /zhes pa ni gsum gyi phyi ma'o/ /thams cad gsang ba'i zhes pa ni gsang ba'i rgyud rnams so/ / de rnams las yang dang yang du rab tu gyur pa'i rgyud 'di ni thams cad kyi gsang ba'i mchog chen po zhes pa ste/ chos kyi dbyings don 'ba' zhig gi sgo nas bstan pa'i phyir dang / thabs dang shes rab kyi don bstan pa'i phyir ro/ /dam pa zhes pa ni bla na med pa yang dag par rdzogs pa'i byang chub kyi rgyur gyur pa'i phyir ro/ / gsang chen zhes pa ni rdo rje sems dpa'i ngo bo nyid yin pa'i phyir dang / rdo rje sems dpas bstan pa'i phyir ro zhes bya ba'i zhes pa ni mtshan gyi gtan tshigs 'dren pa'o/ /rgyud ces pa ni mgo mjug rab tu 'brel ba ste chos kyi dbyings 'phro ba la sogs pa'i don rgyud pa'i phyir ro/ /lha mo bzhis chos kyi dbyangs yongs su zhus pa ni lha mo rnams kyis sdud pa po byas pa yin la/phyag na rdo rje la sogs pas sdud pa po byas pa ma yin pa'i phyir ro/ /de ci'i phyir zhe na/ smras pa/ rgyud 'di ni shin tu gsang ba'i don yin pas gtsor byas pa rnal 'byor ma rnams la bstan pa'i phyir ro/ /lha mo kho nas sdud pa po byas pa'o//rgyud kyi bstan pa'i gnas gsungs pa/ dpal u rgyan las byung ba zhes pa ste de la dpal zhes pa ni bsod nams kyi gzhir gyur pa'i phyir ro/ /u D+yan gyi yul zhes pa ni gsang sngags rdo rje theg pa'i don bya ba'i spyod pa byed pa rnams kyi yul lo/ /de bas ston pa po rnams kyis kyang gsang ba'i rgyud rnams der bstan la/bya rgod phung po'i ri la sogs pa rnams la ni bstan pa ma yin no/ /yul de las rnyed pa'i rgyud 'di ni dpal u D+yan las byung ba zhes so/ /ston pa pos rgyud 'di yongs su gtad pa'i 'khor gsungs pa/ rnal 'byor ma chen mo'i de kho na nyid ces pa ste/ de la rnal 'byor ma zhes bya ba ni chos kyi dbyings rnam par bsgom la phung po dang lha sbyor ba'i phyir ro//de rnams kyi man ngag gi rgyus 'di 'gyur ba med pas na de kho na nyid nges so/ /rdzogs so zhes pa ni chos kyi dbyings kyi don bshad pa'i rim par phye ba'i tshig mthar phyin pa'o/ /dpal ldan rgyud rgyal thams cad gsang mchog dam pa gsang chen rgyud//'di yi rnam bshad bdag gis byas pas dge ba thob pa gang / /de yis sems can thams cad chos dbyings mngon du gyur nas su/ /bla med yang dag go 'phang dpal ldan rdo rje sems par shog /rgya gar gyi mkhan po rdo rje slob dpon smr-i ti dz+nyA na kI rtis mdzad pa lha mo bzhis yongs su zhus pa'i rnam par bshad pa man ngag rgyas pa zhes bya ba rdzogs so// //rgya gar gyi mkhan po rdo rje smr-i ti dz+nyA na kIrti nyid kyis bsgyur cing zhus te bshad nas gtan la phab pa'o// //