CLOSE WINDOW

D1887
བོད་ཡིག

bod kyi lo tsA ba dge slong ba ris bsgyur ba'o/ /[ ]@##/ /rgya gar skad du/ saM k+Ship+tA b+hi She ka gu h+ya sA mA dzi ka/ bod skad du/ 'dus pa'i dbang bskur ba mdor bsdus pa/ byang chub sems dpa' 'phags pa spyan ras gzigs dbang phyug la phyag 'tshal lo//dpal rdo rje sems dpa' la phyag 'tshal lo/ /chu dang cod pan rdo rje dang ni dril bu ming / /rigs gsum dang ldan skal ldan slob dpon gsang ba mchog /dbang bskur dam pa dgu po gang zhig bsod nams dpag med kyis/ /srid pa dag par skyed mdzad sgrol ma de la phyag 'tshal lo//rtsod pa'i dus dang phrad bas yid gzhungs rnam zhan cing / /'gro ba shin tu bsdus par 'dod cing nan tan med/ /des na dbang rim rgyas ba spangs pa'i dbang bskur mdor bsdus 'di/ /ngag gi dbang phyug grags pa yis ni brjod par bya/ /mu stegs la min rmongs la min//rtog ge skam po dag la min/ /nyan thos la min ma ning dang / /rgan po byis pa la yang min/ /rgyal po la min bu la min/ /dad pa med pa la min pa'i/ /bdun dang brgyad pa la sbyin pa/ /bstan la phan pa 'dogs pa nyid/ /de la re zhig ji lta ba bzhin du dbang bskur zhing rjes su gnang ba thob pa rig sngags bzlas pa'i sngags pas/sngon la slob ma'i snod brtag ste/ dad pa dang thos pa la sogs pa yongs su sbyangs pa don du gnyer zhing legs par brtags pa'i skal ba dang ldan pa'i slob ma dag la dbang bskur ba la sogs pas gzung bar 'dod pas/dkyil 'khor la sogs pa'i gnas ni rgyal po dang chom rkun la sogs pa nye bar 'tshe ba thams cad dang bral ba'i dkyil 'khor gyi khang pa la sogs par cho ga ji lta ba bzhin du bris pa'i rdul tshon gyi dkyil 'khor ram/ mtshan nyid dang ldan pa'i ras ris la sogs pa'i dkyil 'khor ram/mngon sum du byas pa'i dkyil 'khor du me tog dang / bdug spos dang / lha bshos la sogs pa rnams kyis mchod pa dang rang gi lha'i rnal 'byor sngon du 'gro bas rang nyid slob ma 'jug pa'i rim pas zhugs la/ yol ba'i phyi rol du yon dbul ba dbang bskur ba'i skal ba can cig gis slob ma rnam par snang mdzad kyi gzugs su dmigs la/A khaM bI ra hUM/ zhes pa 'dis me tog gi phreng ba bzung la gdong g.yogs bcings te/ bgegs mthar byed kyi sngags bzlas pa'i bum pa'i chus bsang gtor byas la/ dkyil 'khor du gzhug pa'i don du kye bde ba dga' ba khyod su yin zhes dri bar bya'o//des kyang bde chen bdag ni skal ba bzang po zhes brjod par bya'o/ /de ma thag tu/ oM sar+b+ba yo ga tsit+taM ut+pA da yA mi/ zhes pa 'dis byang chub tu sems bskyed par bya'o/ /de nas rdo rje dang bcas pa'i rdo rje oM su ra te sa ma ya s+t+waM ho sid+d+hi badzra ya thA su khaM/zhes pa 'dis snying gar rdo rje gzhag par bya'o/ /de nas sngar smras pa'i yi ge lnga pos yol ba'i nang du bcug la 'di skad brjod par bya'o/ /deng khyod de bzhin gshegs pa thams cad kyi rigs su zhugs kyis ngas khyod la rdo rje'i ye shes 'di bskyed par bya yis/ ye shes gang gis khyod de bzhin gshegs pa'i ye shes kyang thob par 'gyur na/ dngos grub gzhan lta ci smos/ khyod kyis 'di dkyil 'khor ma mthong ba'i mdun du smra bar ma byed cig /smras na khyod dam tshig nyams par 'gyur ta re/ de nas rdo rje mgo bor bzhag nas 'di skad ces brjod zhe sdang chen po'i nyams dang ldan pas na phaT gnyis pa'o//mthu rgyun mi 'chad pa'i don gyis na swA hA/ de nas bcom ldan 'das de bzhin gshegs pa thams cad kyi bdag pos gti mug rdo rje chen po'i sngags gsungs pa/ oM dzin dzika ces bya ba smos te dzi ni byang chub kyi sems te/na ni gti mug mi gnas par bya ba'i don to/ /dzika ni 'dzin pa ste gti mug chen pos 'gro ba thams cad sangs rgyas su 'dzin pa'o/ /de nas bcom ldan 'das de bzhin gshegs pa thams cad kyi bdag pos phra ma rdo rje'i sngags gsungs pa/ oM rat+na d+h+r-ika ces bya ba smos te/ rat+na ni rin po che ste/sangs rgyas pa'i bar du che ba'i yon tan zad mi shes pa'i don to/ /d+h+r-ika ni brtul zhugs te phra ma chen po'i brtul zhugs kyis dri ma ma lus pa 'byed par byed pa'i don to/ /de nas bcom ldan 'das de bzhin gshegs pa thams cad kyi bdag pos 'dod chags rdo rje'i sngags gsungs pa/oM a ro l-ika ces bya ba smos te a ni ma skyes pa'o/ /ro ni nyams su myong ba'o/ /l-ika ni mngon par zhen pa ste 'dod chags chen pos sems can 'dul bar byed pa'i don to/ /de nas bcom ldan 'das de bzhin gshegs pa thams cad kyi bdag pos phrag dog rdo rje'i sngags gsungs pa/oM pradz+nyA d+h+r-ika ces bya ba smos te/ pradz+nyA ni shes rab ste/ chos thams cad gcig dang du ma dang bral bas rang bzhin med pa nyid du byas pa'o/ /d+h+r-ika ni rang la gnas pa ste yon tan dang ldan pa'i 'bras bu gzhan la phrag dog pa'o/ /de nas bcom ldan 'das de bzhin gshegs pa thams cad kyi bdag pos rdo rje tho ba'i sngags gsungs pa/oM mud+ga ra d+h+r-ika ces bya ba smos te/ mud+ga ra ni thob ste dad pa rnam par dag pa'i stobs dang ldan pa'o/ /d+h+r-ika ni brtul zhugs te phung po'i bdud zad par byed pa'o/ /de nas bcom ldan 'das de bzhin gshegs pa thams cad kyi bdag pos rdo rje dbyug pa'i sngags gsungs pa/oM daN+Da d+h+r-ika ces bya ba smos te/ daN+Da ni dbyug pa'o/ /des 'joms par byed pa ste brtson 'grus rnam par dag pa'i stobs dang ldan pa'o/ /d+h+r-ika ni brtul zhugs te nyon mongs pa'i bdud zad par byed pa'o/ /de nas bcom ldan 'das de bzhin gshegs pa thams cad kyi bdag pos rdo rje pad+ma'i sngags gsungs pa/oM pad+ma d+h+r-ika ces bya ba smos te pad+ma ni chags pa'i don to/ /dran pa rnam par dag pa nyid yod pas so/ /d+h+r-ika ni brtul zhugs te 'chi bdag gi bdud zad par byed pa'o/ /de nas bcom ldan 'das de bzhin gshegs pa thams cad kyi bdag pos rdo rje ral gri'i sngags gsungs pa/oM khaD+ga d+h+r-ika ces bya ba smos te/ khaD+ga ni ral gri'o/ /de ni zag pa med pa'i don shes rab kyi rang bzhin te ting nge 'dzin gyi stobs rnam par dag pa'o/ /d+h+r-ika ni brtul zhugs te lha'i bu rnam par g.yeng byed kyi bdud pham phar byed pa'o//de nas bcom ldan 'das de bzhin gshegs pa thams cad kyi bdag pos rdo rje tsa rtsi ka'i sngags gsungs pa/ oM mo ha ra ti zhes bya ba smos te/ mo ha ra ni rnam par dag pa ste bde ba chen pos yongs su gang ba'i yid de/ gti mug gshin rje gshed la gnyis su med pa rdzogs pas ti'o//de nas bcom ldan 'das de bzhin gshegs pa thams cad kyi bdag pos rdo rje phag mo'i sngags gsungs pa/ oM d+h+we shwa ra ti zhes bya ba smos te/ d+h+we zhes bya ba ni lha ste bde ba'i rol pas mngon par rtse ba'o/ /zhe sdang chen po'i thugs la rab tu dbang ba'i phyir shwa ra ste dbang phyug go//bcom ldan 'das kyi sku la mngon par rdzogs pas na ti'o/ /de nas bcom ldan 'das de bzhin gshegs pa thams cad kyi bdag pos rdo rje dbyangs can ma'i sngags gsungs pa/ oM rA ga ra ti zhes bya ba smos pas rA ga ni tshon te sna tshogs pa'i mdangs dang ldan pa'o//ra ni khrag ste mnyes par byed pa'o/ /'dod chags rdo rje'i sku la yongs su rdzogs pas ti'o/ /de nas bcom ldag 'das de bzhin gshegs pa thams cad kyi bdag pos rdo rje go rI ma'i sngags gsungs pa/ oM badzra ra ti'i zhes bya ba smos te/ badzra ni rdo rje ste dbyer mi phyed pa'i don to//ra ni khrag ste snying rjes nye bar 'dzin pa'o/ /phrag dog rdo rje'i sku la rdzogs pa nyid kyis te'o/ /de yang thams cad gsangs ba las/ bcom ldan 'das kyis byin brlabs pa'i/ /nor bu lta bu'i sngags rnams ni/ /gsang chen rab tu sbyor ba yis/ /'di ni bsam dpag dka' ba ste/ /'di dkyil na bzhugs pa'i de bzhin gshegs pa thams cad rdo rje'i gzugs kyis cod pan la bzhugs par bsam par bya'o//de dag ni cod pan gyi dbang bskur ba'i cho ga'o/ /de nas rdo rje blangs la/ sangs rgyas rnams kyis rdo rje'i dbang / /de ring khyod la bskur bar bya//'di de sangs rgyas thams cad nyid/ /rab tu grub phyir rdo rje zung / /zhes gdon zhing rdo rje snying ga la sogs par reg nas rdo rje lag pa g.yas su sbyin par bya'o/ /de dag ni rdo rje'i dbang bskur ba'i cho ga'o/ /de nas lag pa g.yon par dril bu byin la rdo rje dang dril bur ldan pa'i slob ma'i lag pa gnyis kyis 'khyud pa'i tshul du bcug la/oM badzra a d+hi pa ti s+t+waM a b+hi Shiny+tsA mi tiSh+Tha badzra sa ma ya s+t+waM/ zhes gdon par bya'o/ /dril bu'i dbang bskur ba ni bdag po'i dbang bskur ba zhes brjod do/ /de dag ni dril bu'i dbang bskur ba'i cho ga'o/ / de'i rjes la rdo rje dang dril bu slob ma'i spyi bor bzung la/ oM badzra satwa twaM a b+hi Shiny+tsA mi badzra na ma a b+hi She ka ta/ kye dpal che ge mo rdo rje zhes rigs dang mthun pa'i ming dag gdags so/ /dbang bskur ba de dag gis ni sngags dang rgyud nyan pa dang 'chad pa dang sngags sgrub pa la dbang bskur bya bar 'gyur ro//dbang bskur ba lnga po de nyid ni rig pa'i dbang bskur ba zhes brjod do/ /thams cad du spyan ma la sogs pa'i rigs rnams kyi bya ba yod pa'i phyir ro/ /de dag ni ming gi dbang bskur ba'i cho ga'o/ /de'i rjes la rig pa'i dbang bskur ba blangs shing slob dpon gyi sdom pa blangs pa la/rdo rje slob dpon dbang bskur ba/ /gang gis khyod kyi drin gyis dag /bdag dang gzhan don nus 'gyur ba/ /brtse ba'i gter gyis bdag la stsol/ /zhes gsol ba btab par gyur pa'i slob ma la bsam gtan gyi spyan la sogs pa rnams kyis dbang bskur nas dam tshig gsum 'dzin du gzhug go//de la dam tshig gsum ni 'di yin te/ hUM gi yi ge rdo rjer bsams nas/ thog mtha' med pa'i sems dpa' ni/ /rdo rje sems dpa' dga' ba che/ /kun tu bzang po kun bdag nyid/ /rdo rje snyems tshul bdag po'i bdag /bcom ldan 'das dam pa dang po'i skyes bu'o zhes bya ba de kho na nyid rdo rje gzung ngo //de dag ni rdo rje'i dam tshig go/ /de ma thag tu yi ge a las skyes pa'i dril bu la/ 'di de sangs rgyas thams cad kyi/ /ye shes dbyangs kyi rjes 'gror bshad/ /khyod kyis kyang ni rtag tu zung / /byang chub mchog tu rgyal bas bzhing / /ces pa 'dis slob ma'i lag tu sbyin no//srid pa rang bzhin gyis ni dag /ngo bo nyid kyis srid bral byas/ /rang bzhin dag pa'i sems dpa' mchog /srid pa mchog ni byed par 'gyur/ /zhes bya ba 'dis slob mas kyang dkrol bar bya'o/ /de dag ni dril bu'i dam tshig go/ /de'i rjes la/yid kyis lus ni brtan bya'i phyir/ /phyag rgya dam tshig ces byar gsungs/ /gang gis lus kun brtags pas na/ /des na phyag rgya rab tu bsgrags/ /zhes bya ba 'dis rang gi 'dod pa'i lha'i lus kyis bdag nyid phyag rgya chen por byin gyis brlab par bya'o/ /de dag ni phyag rgya'i dam tshig go//de nas dkyil 'khor gyi de kho na nyid ni dkyil 'khor gyi rnam par dag pa'i mtshan nyid dang / lha'i de kho nas ni lha'i rnam par dag pa'i mtshan nyid dang / slob dpon gyi las ni dkyil 'khor gyi sgrub pa sngon du 'gro ba ste/ der slob dpon gyi 'jug pa'i bya ba'i mtshan nyid do zhes sems shing 'di gsum bstan par bya'o//de nas rnam par snang mdzad la sogs pa'i gzugs su dmigs pa'i slob ma la rjes su gnang ba sbyin par bya ste/ sems can kun la phan don du/ /'jig rten kun la thams cad du/ /ji ltar 'dul ba sna tshogs pa/ /chos kyi 'khor lo rab tu bskor//zhes chos kyi gnas su rdo rje dang rin po che dang pad+ma dang las kyi sgra bcug la rim pa bzhin du tshigs su bcad pa lngas bya ste/ de dag ni rjes su gnang ba'i sbyin pa'o/ /de nas/ 'di de sangs rgyas thams cad nyid/ /rdo rje sems dpa'i phyag na gnas/ /khyod kyis kyang ni rtag tu gzung //phyag na rdo rjes brtul zhugs brtan/ /zhes pas rdo rje sbyin te/ sar+b+ba ta thA ga ta sid+d+hi badzra sa ma ya tiSh+Tha e Sha s+t+waM d+hA ra ya mi badzra satwa hi hi hi hi hUM/ zhes brjod du gzhug cing slob ma rdo rje brtul zhugs 'dzin du gzhug go/ /de dag ni rdo rje sbyin pa'o/ /de'i rjes la sangs rgyas kyi gzugs su bdag nyid bsams nas/snying gar khu tshur g.yon pas chos gos kyi grwa nas 'dzin pa'i tshul du byas la/ /g.yas pa mchog sbyin pas/ oM 'dir ni ngas khyod lung bstan yin/ /rdo rje sems dpa' de bzhin gshegs/ /srid pa shin tu grub pa'i phyir//srid pa'i ngan 'gro rnams las bton/ /kye che ge mo zhes bya ba de bzhin gshegs pa'i/ sid+d+hi sa ma ya s+t+waM b+hur+b+hu ba swaH/ zhes bya bas lung bstan te/ gang la 'phags pa'i phyag rgya 'dis lung ston par byed na/ de bzhin gshegs pa thams cad byang chub sems dpa'i 'khor gyi dkyil 'khor rnams kyis mgrin gcig tu bla na med pa yang dag par rdzogs pa'i byang chub tu lung ston par mdzad de/'phags pa phyag rgya chen po 'di'i mthu dang gsang sngags kyi stobs kyis so zhes dad par bya'o/ /de dag ni lung bstan pa'o/ /de nas gsang ba brjod par bya ste/'dod chags bral ba lta bu'i sdig /khams gsum na ni gzhan med de/ /de bas 'dod chags bral bya bar/ /khyod kyis nam yang ma byed cig /ma hA sa ma ya hA na hUM phaT/ de nas/ mchog gsang dkyil 'khor dam pa ni/ /mthong ba dang ni zhugs pa yis/ /sdig pa kun las nges grol bar//khyod ni de nyid legs par gnas/ /bde chen theg pa 'di la ni/ /phyin chad 'chi ba yod min te/ /srid pa shin tu dag bya'i phyir/ /srid pa'i sdug bsngal rnams las 'das/ /byang chub sems ni btang mi bya/ /rdo rje zhes bya'i phyag rgya dang / /gang zhig skyes pa tsam gyis ni//sangs rgyas nyid du dogs med pa'o/ /dam pa'i chos ni mi smad cing / /nam yang spang bar mi bya ste/ /mi shes pa'am rmongs pa yis/ /de ni bstan par mi bya'o/ /rdo rje dril bu phyag rgya yang / /nam yang spang bar mi bya'o/ /slob dpon brnyas par mi bya ste/ / de ni sangs rgyas kun dang mtshungs/ /rang gi bdag nyid yongs spangs nas/ /dka' thub kyis ni gdung mi bya/ /ji ltar bde bar bde ba bzung / /'di ni ma byon rdzogs sangs rgyas/ /de ring rdo rje slob dpon te/ /sngags dang rgyud ni 'dzin pa khyod/ /sangs rgyas byang chub sems rnams dang / / lha rnams kyis ni bzhed pa yin/ /sems can rnams la snying brtse'i phyir/ /khyod kyis dkyil 'khor cho ga bzhin/ /'bad pa yis ni bri bya zhing / /sgrub pa po rnams rgyud la sbyor/ /de dag ni dbugs dbyung ba'o/ /rjes su gnang ba la sogs pa bzhi po 'di dag rnams ni/ /dbang bskur ba lnga'i de ma thag tu'am/bzhi pa'i dbang bskur ba'i de ma thag tu brjod par bya'o/ /slob dpon gyi dbang bskur ba nyid la ni phyir mi ldog pa'i dbang skur ba zhes brjod do/ /dbang bskur ba lnga dang slob dpon gyi dbang bskur ba ni bum pa'i dbang yin te/ thams cad du bum pa'i byed pa yod pas so//dbang bskur ba drug po bya ba ni rgyud thams cad du yang 'gal ba med de 'jam dpal gyi rgyud la sogs pa rnams su bstan pa'i phyir ro/ /de dag ni slob dpon gyi dbang bskur ba'i cho ga'o/ /de nas yol ba la sogs pa dben par byas pa'i phyogs su slob mas rang gi sems dang 'thad pa'i gzugs la sogs pa'i yon tan dang ldan pa dam tshig dang sdom pa dang ting nge 'dzin gsum la mkhas pa rgyan thams cad kyis brgyan pa shin tu dad pa snying rje'i bdag nyid can gyi shes rab gsang ba'i dbang bskur ba'i don du bla ma la phul la/byang chub rdo rje zhes pa la sogs pas gsol ba gdab par bya'o//bla mas kyang ting nge 'dzin gsum mngon sum du byas shing de bzhin nyid kyi pad+ma'i nang du sbyor bas bskyod pa'i rdo rje nor bu'i nang du chud pa rang gis rig par byas nas/ sems kyang nam mkha'i khams su ma lhung ba nyid du mtsho skyes nas rdo rje bton nas srin lag dang mthe bo dag gis slob ma'i mig dang lag pa'i spyod yul ma yin par de kha'i ni chu skyes kyi nam mkhar sbyin par bya'o//des kyang a ho ma hA su kha/ zhes brjod de drangs nas longs spyod cing longs spyod kyi sbu gur gzhug par bya'o/ /de nyid kyis kyang langs la rang gi khyad par gyi nang nas khyad par du 'phags te me tog gi bcud kyi thigs pa gos dang bral zhing sgeg pa dang bcas pas de'i nam mkhar gzhug par bya'o//de ni shes rab dang thabs kyi gsang ba dag gi dbang bskur ba'i cho ga'o/ /de nas de bzhin nyid gcig tu 'dod na de nyid kyis so/ /tha dad par 'dod na gzhan gyis te/ rang rig pa'i ye shes mngon sum du byed pa'i gnas skabs su sngar smras pa'i tshigs su bcad pas gsol ba btab par gyur pa'i slob ma de'i lag pa bzhag la/nyams dga' gzungs 'di khyod kyis ni/ /bsten byar sangs rgyas rnams kyis bsngags/ /'khor ba'i rim pa'i sbyor ba yis//bde ba dam pa myang bar gyis/ /thabs gzhan gyis ni sangs rgyas min/ /'di ni 'gro ba gsum na dag /de bas 'di dang bral bar ni/ /khyod kyis nam yang ma byed cig /'di de sangs rgyas thams cad kyi/ /rig pa'i brtul zhugs bla na med/ /blun po 'ga' zhig 'da' byed na/ / de la dngos grub mchog ni med/ /ces brjod de gtang bar bya'o/ /de yang tsan+dan dang gur gum la sogs pa byugs pa shin tu dri zhim pa la sogs pa'i me tog gi phreng bas steng du brgyan pa gos med par chu skyes mdzes pa gsal bar ston par byed cing slob ma la 'di skad smra bar bya ste/ bu khyod bden par smra'am ci//bshang gci la sogs bza' ba dang / /khrag dang khu ba de bzhin sha/ /de bzhin mchog tu bud med gus/ /b+ha ga'i pad+mar 'o byed pa/ /bu yis ji ltar bde bar smros/ /zhes brjod do/ /des kyang / khrag dang khu ba sogs za dang / /rtag tu bud med gus byas dang / /b+ha ga nyid la 'o bgyid par//lha mo ci ste bdag mi spro/ /zhes smra bar bgyi'o/ /de dga' zhing byams pa dang ldan pas sgrub pa po la bdag po bzhin du rnam par lta zhing / tsog tsog por chu skyes bstan nas 'di skad ces smra bar bya'o/ /e ma'o nga yi pad+ma 'di/ /bde ba kun dang yang dag ldan/ / gang zhig cho gas bsten byed pa/ /de yi mdun du nga gnas so/ /rdzogs sangs mnyes par bya la sogs/ /ji lta'i bya ba pad+mar gyis/ /bde chen rgyal po rang nyid ni/ /'di nyid du ni rab tu gnas/ /ud phu la la b+ha ma dzi dz+wa la/ la sogs pas byed pa legs par gdags pas/ ji srid rnal 'byor byang chub sems//gdod pa ru ni mi byed pas/ /de srid rgyun mi chad pa yi/ /dga' skyes bde ba ci yang thob/ /dngos grub kun gyi gter gyur pa'i/ /byang chub sems ni lhung gyur na/ /phung po rnam shes brgyal ba la/ /ma smad dngos grub ga la yod/ /mkha' dbyings rdo rje mnyam sbyor dang //reg las rmad byung chen po yi/ /bde ba skyes pa gang yin pa/ /mchog tu dga' ba byed pa'o/ /dga' bral dga' ba bdag dbus su/ /mtshan bya brtags la brtan par gyis/ /pad+ma'i nam mkhar rdo rje dang / /lte ba dag ni gnon nas su/ /rdo rje skyil mo krung la sems//nor bu'i nang du son pa lta/ /ye shes skye ba gang yin te/ /shin tu ye shes ngo bo yin/ /'dod chags ma yin chags bral min/ /dbu mar dmigs su med pa ste/ /gang tshe rnal 'byor ye shes mthong / /bde bar 'gyur ba bde bar gnas/ /thun nam yang na nyi ma gcig /zla phyed zla ba khyud skor dang / /bskal pa'am bskal pa stong phrag tu/ /ye shes mngon par sbyor bas gnas/ /de ltar brtags la ji ltar nus pas bzung ba la btang ste chu skyes lce nyid kyis rjes su blangs te/ de kho na mthong bas byang chub kyi sems dam tshig gi ngo bo gzung bar bya'o//shes rab ye shes kyi dbang bskur ba'i cho ga'o/ /de'i rjes la dbang bskur ba bdun 'thob cing shes rab ye shes mngon sum du blangs pa nyid ma rnyed na yang tshig gis smras la dbang rin po che slob dpon gyi man ngag las ye shes kyi dbang sbyin pa de la bzhi pa mngon par brjod pa dbang bskur ba'i rin po che bla ma'i man ngag gis rtogs par bya ba'i ngo bo sbyin par bya'o//de ni/ slob ma'i mos pa yid kyis yongs brtags la/ /ji skad gsungs pa'i cho gas gsang byin nas/ /rgya che zab pa'i tshul la mos pa na/ /dbang bskur rin chen tshig nyid sbyin par bya/ / zhes gsungs so/ /shes rab ye shes kyi dbang bskur dngos su ma thob pa la slar yang tshig tsam gyis dbang bskur ba sbyin par mi bya ste/ dam tshig nyams pas 'jigs pa'i phyir ro/ /'o na gal te shes rab ye shes kyi dbang bskur dngos su ma thob pa la tshig tsam gyi dbang bskur ba bkag na/ji ltar na dge slong rnams rjes su gzung bar bya zhe na/ dge slong rnams rjes su gzung bar mi bya ste/ de dag la ni 'dir dbang med pa'i phyir/ de ltar yang / gang yang dge slong dngos dga' dang / /gang yang rtog ge la dga'i mi/ /gang yang rgan po'i dngos gnas pa/ /de la de nyid bstan mi bya//zhes gsungs so/ /'o na ji ltar na/ so sor 'brang ma chen mo la sogs par gsungs pa/ dge slong rdo rje 'dzin pas bya/ /bdud la bsdigs pa la brtson pa/ /zhes bya ba la sogs pa ni gsungs pa nyid do zhe na/ 'on kyang dge slong 'ga' zhig gcig tu nges par grags pa'i dka' thub can nyan thos kyi theg pa lta ba gcig pa ste/de la ni sngags dang phyag rgya la sogs pa'i dbang bskur ba dbang med pa nyid do/ /yang gang zhig nyan thos kyi sdom pa dang theg pa chen por sems bskyed pa dang ldan pa ste/ de la sngags dang phyag rgya la sogs pa la dbang yod de/de yang gsang ba'i dbang bskur ba la sogs pa med do/ /yang gang zhig nyan thos kyi sdom pa dang sngags kyi tshul la yang sems bskyed pa dang ldan pa ste/ de la ni thams cad du dbang bskur ba la sogs pa'i dbang yod pa ste de nyid ni rdo rje 'dzin pas bdud la bsdigs pa la sogs pa bya'o//'o na de ltar na yang ji ltar na dge slong gi sdom pa mi nyams par 'gyur ram zhe na/ mi 'gyur te/ 'di ltar dge slong gi sdom pa ma btang bar/ phyi nang gsang ba'i theg pa gsum/ /sdom pa so sor gzung bar bgyi/ /zhes bya ba la sogs pa gang gi tshe/ sdom pa gzhan dang mi 'gal zhing //lhag pa yang so sor 'dzin pa yin na de'i tshe ji ltar sdom pa nyams/ ci ste mi 'gal zhing lhag pa'i sdom pa ma nyams par yin du bcug na dge slong gi sdom pa la dbang po gnyis snyoms par 'jug par byed pa ji ltar mi nyams she na/ de ltar na yang mi nyams te/ 'dul ba la sogs par bkag pa spyod pa ni nyams par bstan gyi yang ma bkag par spyod pa la ni ma yin no//khams gsum par gyur pa'i mi dang lha la sogs pa'i mdzes ma rnams la zag pa dang bcas pa'i mngon par zhen pa myong ba'i mtshan nyid 'dod chags byang bar byed pa de dag 'dul ba la sogs par bkag gi /yang khams gsum pa las 'das pa'i lus can rnam par rig pa tsam du ngo bo gcig pa'i 'jam pa'i rdo rje la sogs pa rang snang ba'i ngo bo rnams ni ma yin no//gzhan du na rmi lam du nye bar dmigs pa dang / rtog pa'i yul gyi rang bzhin gyi ngo bo rnams la yang sdom pa nyams par 'gyur ro/ /ci ste de dag la yang bdag gis legs par byas so//bdag gis rab tu gyur to zhes rab tu rjes su yi rang bar byed pa nyon mongs pa can gyi sems la ni ltung bar gyur pa nyid do zhe na/ ltung ba tsam du gyur pa ni bden na yang sdom pa nyams pa ni ma yin no/ /gal te de la smod pa'i sems su byed na de'i tshe ni ltung ba tsam du yang mi 'gyur ro//de yang / sdig pa shin tu mi bzad byas na yang / /bdag nyid smod par byed pa yang bar 'gyur/ /zhes gsungs so/ /de ltar na ji ltar rmi lam na nye bar ma dmigs pa kun brtags pa'i bud med rnams mos pa nyid 'jug pa'i tshor ba sred pa la yang sdom pa nyams pa med la smod pa ni ltung ba tsam du yang mi 'gyur ba de bzhin du khams gsum pa las 'das pa'i 'jam pa'i rdo rje la sogs pa'i rang gi ngo bo shes rab sems tsam gyi rang gi ngo bo rnams la yongs su dag pa mngon par ma zhen pa'i mtshan nyid 'dod chags chen po mngon du byed pa de mi dmigs pa stong ba nyid bsgoms pas smod pa nyid la dge slong gi dngos po nyams pa med cing ltung ba tsam du yang mi 'gyur ro zhes 'dod par bya'o//'o na sems tsam du ngo bo gcig pa'i 'jam pa'i rdo rje la sogs pa'i rang gi ngo bo shes rab la rigs pa 'di yod na phyi rol gyi las kyi phyag rgya 'dul bar bkag pa la rigs pa 'di ji ltar yin zhe na brjod par bya ste/ci 'dir khyed kyis gzugs la sogs pa rang gi sems snang ba tsam du lus gcig pa nyid kyi grags pa tsam yang ma thos sam gang gis ni rjod byed de de bzhin no/ /de ltar ni khyed 'dra ba la ni rnam par rig pa tsam gyi ngo bo de kho na go bar byed pa'am brdzun pa'i ngo bor snang ba tsam nyid kyi go bar byed pa dag gis gsang sngags kyi tshul la dbang yod pa ma yin no//gzugs la sogs pa'i dngos po thams cad kyi sems snang ba tsam du go ba la rang gi bud med du snang ba dang tha mi dad par 'jam pa'i rdo rje la sogs pa rang snang ba'i ngo bor yongs su gyur pa'i las kyi phyag rgya sgyu ma lta bu des rnam par sbyangs pa la dbang bskur ba kha na ma tho ba med pa thob pa la yang dge slong rnams kyi sdom pa zhig pa'i nyes par mi 'gyur ro//de dag ni bzhi pa'i dbang gi cho ga'o/ /dbang bskur mdor bsdus brjod pa las ni bdag las skyes pa yi//dung zla kun+da ku mu dang chu skyes 'od mtshungs pa'i/ /bsod nams gang yin mkha' dang mtshungs pa des ni 'gro ba'i tshogs/ /shes rab pad+ma las byung rdo rje 'chang gi rang bzhin shog /gsang ba 'dus pa'i dbang bskur ba'i cho ga mdor bsdus pa rdzogs so// //'di ni paN+Di ta ngag gi dbang phyug grags pas mdzad pa/ bal po'i paN+Di ta su ma ti kI ti'i zhal snga nas dang / bod kyi lo tsA ba klog skya gzhon nu 'bar gyi zhal snga nas dang / mar pa chos kyi dbang phyug gis bsgyur cing zhus pa'o// //