CLOSE WINDOW

D1871
བོད་ཡིག

/ //rgya gar gyi mkhan po ka ma la gu h+ya dang / bod kyi zhu chen gyi lo tsA ba chen po mnga' bdag lha ye shes rgyal mtshan gyis bsgyur cing zhus te gtan la phab pa'o/[ ]@##/ /rgya gar skad du/ shrI sa mA dza maN+Dal bi d+hiHTI kA/ bod skad du/ dpal gsang ba 'dus pa'i dkyil 'khor gyi cho ga'i 'grel pa/bcom ldan 'das gsung gi dbang phyug la phyag 'tshal lo/ /dpal ldan gsang ba 'dus pa yi/ /dkyil 'khor cho ga legs pa gang / /bzhi brgya lnga bcu pa yi tshad/ /de ni bdag gis rnam par dbye/ /'di na de bzhin gshegs pa thams cad kyi dkyil 'khor ma lus pa nyid mthong ba dang /bstan pa dang / thos pa dang / bsams pa dang / bsgoms pa de lta bu'i bdag nyid can gyis 'gro ba thams cad kyi don rnam pa thams cad du rtag tu rdzogs par nus pa mngon sum du byas pa'i phyir/ bdag dang gzhan gyi don shin tu mang po grub pa sngon du 'gro bar 'gyur ro zhes bya ba 'di ni spyir grags par zad do//de bas na dpal 'jam pa'i rdo rje 'byung ba'i dkyil 'khor 'di'i brjod par bya ba bshad pa nyid kyis na don shin tu mang po 'grub pa sngon du 'gro ba can gyis de'i go 'phang thob pa ni gzhung 'di'i brjod par bya ba'i dgos pa yin no zhes khyad par khong du chud par bya'i gzhan du ni ma yin no//rjod par byed pa'i dgos pa ni nges par brjod dgos te/ gzhan du de med par dogs pas bya rog gi so rtog pa la sogs pa dang 'dra bar gzhung 'di blang bar bya ba ma yin par 'gyur ro//de yang ji skad bshad pa'i dgos pa don du gnyer ba rnams de las gzhan pa'i dkyil 'khor gyi cho ga las bkar te/ 'di nyid la 'jug par 'dod pa yin no//de'i phyir 'di'i brjod pa dang dgos pa dag kyang ci nas kyang gzhan dag dang thun mong ma yin par rtogs par 'gyur ba de lta bu brjod dgos so//tshigs su bcad pa gcig gis so sor gtso bor gyur pa'i dgos pa gnyis su brjod par nus pa ma yin te/ ngag gcig pa nyid dang 'gal ba'i phyir ro/ /de yang / don gcig pa ni tshig ces bshad/ /ces ji skad bshad pa lta bu'o//gcig ni gtso bor gyur pa yin la/ cig shos ni gtso bo ma yin par gyur pa yin pa de bas na gtso bo bstan par gyur pa yin te/ de'i phyir don gcig pa nyid yin no/ /de yang gang sgra yis mchog tu sbyor ba de ni sgra'i don yin no zhes ji skad bshad pa lta bu ste/de bas na brjod pa dang brjod par bya ba dag gi dgos pa gnyis las gcig khyad par du gyur pas cig shos kyang bstan pa'i phyir/shes bya sogs sgrib las nges grol/ /zhes pa la sogs smos te/ sgrib pa ni bgegs dang bar du gcod pa zhes bya ba'i tha tshig go//'dir yang shes bya'i sgras ni nye bar brtags pas shes bya yul du gyur pa'i ye shes yin par bshad de/ dper na stong pa nyid yul du gyur pa'i ting nge 'dzin la stong pa zhes bshad pa dang 'dra'o/ /sogs pa'i sgras ni nyon mongs pa gzung ngo / /shes bya la sogs pa yang yin la sgrib pa yang yin pas na/shes bya la sogs sgrib pa ste/ nyon mongs pa'i sgrib pa dang / shes bya'i sgrib pa zhes bya ba'i tha tshig go/ /de la nyon mongs pa'i sgrib pa ni 'dod chags dang / zhe sdang dang / gti mug la sogs pa'o/ /nyon mongs pa yang yin la sgrib pa yang yin pas nyon mongs pa'i sgrib pa ste/khyim du 'jug pa la sgo glegs dang 'dra bar de thar pa thob pa la gegs su gyur pa yin no/ /ji ltar na de'i gegs su gyur pa yin zhe na/de yod par gyur na de mi 'byung ba'i phyir ro/ /shes bya'i sgrib pa zhes pa la/de la shes bya ni chos kyi dbyings kun du 'gro ba la sogs pa rnam pa bcu'o//shes bya de la ye shes skye ba'i gegs su gyur pa nyon mongs pa can ma yin pa'i mi shes pa ni shes bya'i sgrib pa yin no/ /gang go rims bzhin du re re nas spangs nas byang chub sems dpa' sa bcu rim gyis thob par 'gyur ro/ /de ltar na re zhig sgrib pa ni rnam pa gnyis yin no//yang na rgyud 'dir sgrib pa ni rnam pa bzhi ste/ shes bya'i sgrib pa dang / nyon mongs pa'i sgrib pa dang / snyoms par 'jug pa'i sgrib pa dang / las kyi sgrib pa'o/ /de yang / des na shes bya mthar byed gyur/ /ces bya ba dang / de bzhin nyon mongs mthar byed gyur/ /ces bya ba dang / de bzhin snyoms 'jug mthar byed gyur/ ces bya ba dang / nyon mongs las kyi sgrib dag na/ /las rnams thams cad rnam dag 'gyur/ /las rnams thams cad rnam dag pas/ /las skyes 'bras bu rnam par dag /ces ji skad bstan pa lta bu ste//sgrib pa bzhi po 'di dag ni 'og nas sgo srung gi rnam par dag pa las 'chad par 'gyur ba yin no/ /ma lus pa las grol bas na/ /nges par grol ba ste/ shes bya la sogs pa'i sgrib pa rnams las nges par grol bas na/ shes bya sogs sgrib las nges grol/ / zhes bya ste/ de rnams bag chags dang bcas pa spangs pa'i phyir ro/ /de nyid kyis ni bag chags dang bcas pa nges par spangs pas sa bcu gcig pa sangs rgyas kyi sa kun du 'od brnyes pa yin no/ /me long yang yin la ye shes kyang yin pa sna me long ye shes te/ me long lta bu'i ye shes zhes bya ba'i don to//ye shes smos pa ni me long nyid las dgar ba'i don yin no/ /sogs pa'i sgras ni mnyam pa nyid kyi ye shes la sogs pa gzung ngo / /me long lta bu'i ye shes dang yang dag par ldan pa ni bcas pa zhes bya ba'i tha tshig go/ /'dir tshig rkang dang pos ni bcom ldan 'das kyi spangs pa phun sum tshogs pa bshad la/gnyis pas ni ye shes phun sum tshogs pa bshad do/ /gzhan dag ni gzhung mdas kyis dogs nas ma smras so/ /'khor lo zhes bya ba ni dkyil 'khor ro/ /mchog ces bya ba ni dam pa dang bkra shis par gyur pa'o//gsang ba yang yin la 'khor lo mchog kyang yin pas na gsang ba'i 'khor lo mchog ste/ de yang 'jam dpal gyi 'khor lo mchog go/ /'phags pa 'jam dpal gyi 'khor lo la mchog tu ma gyur cing shis pa ma yin pa dag yod pa ma yin la/de bas na mchog ces smos pa'i don gyi shugs kyis ston mod kyi/ gsang ba 'dus pa'i dkyil 'khor ni thams cad kyi mchog tu gyur par ston to/ /gsang ba ni snod ma yin pa rnams la sba bar bya ba yin pa'am/ thugs kyi gsang ba'i bdag nyid can yin pa'i phyir ro//de yang bcom ldan 'das 'di ni rgyud 'dir thugs kyi rigs las byung ba yin no/ /yang na gsang ba ni sku dang gsung dang thugs kyi bdag nyid can yin no/ /mchog ni dam pa dang sangs rgyas dang byang chub sems dpa' rnams te de rnams kyi 'khor lo yin pas gsang ba'i 'khor lo mchog go//de yang gsang ba 'dus pa zhes bya ba'i don te/ sku gsung thugs ni rnam pa gsum/ /gsang ba zhes ni bstan pa yin/ /sangs rgyas thams cad ces bya ba/ /tshogs pa 'dus pa yin par bshad/ / ces ji skad bshad pa lta bu'o/ /'dir ni rjes thams cad ni glang po'i rjes su 'dus pa'i tshul gyis bri ba'i dkyil 'khor gtso bor bstan te/ bsam par bya ba'i dkyil 'khor de de'i yan lag nyid du bstan pa'i phyir ro/ /de bshad ces bya ba ni/ de brjod par bya'o zhes bstan pa ste 'di dag gis brjod par bya ba'i dgos pa bshad pa yin no//brjod par bya ba'i khyad par bstan pa nyid kyi brjod par bya ba'i dgos pa khyad par du rtogs par 'gyur ro/ /de ltar sngar bshad pa'i phyir ro/ /bdag dran phyir zhes bya ba ni rgyu mtshan gyi bdun pa ste/ bdag nyid dran par bya ba'i rgyur//zhes bya ba'i tha tshig go/ /'dis ni brjod pa'i dgos pa ston par byed do/ /de yang sangs rgyas kyi ye shes kyi zhal snga nas khyad par mnyes pas rjes su brtse ba'i khyad par gyis gang bdag gis rnyed par dka' ba'i gnas ston par mdzad pa de ni gzhan dag gis gzhan dag las yongs su shes pa rnyed par dka' ba ji lta ba de bzhin du bdag gis kyang dran pa gzhan dag las rnyed par dka' ba yin no//de bas na de'i don nyid du 'di bshad par bya'o zhes bya ba'i tshig gis ni gnas de yang yang dag par bstan par bya'o zhes bya ba yin par mngon no//de'i phyir gnas de nyid kyi khyad par du gyur pa'i dkyil 'khor ston pa yin pas/ dkyil 'khor gyi cho ga gzhan dang / thun mong du gyur pa ni dkyil 'khor gyi cho ga 'di'i brjod pa'i dgos pa yin no zhes bstan par gyur pa yin no/ /bdag nyid dran pa'i sgo 'di nyid kyis de'i khyad par gzhan gyi yongs su shes pa nyid brjod pa'i dgos pa bshad pa yin pa blta bar bya ste/gzhan du na tshig la 'bras bu med par 'gyur ro/ /brjod pa'i dgos pa smras pas brjod par bya ba la sogs pa smras pa yin te/ de'i sgo nyid nas 'dir bshad pa yin no//rjod par byed pa dang dgos pa smra na/ de gnyis thabs dang thabs las byung ba'i mtshan nyid can yin pas 'brel ba yang don gyi shugs kyis smras pa yin no/ /dkyil 'khor bri ba la sogs pa ni sgrub pa pos bya ba yin la de bas na sgrub pa po'i yon tan bstan pa'i phyir/dpal ldan 'dus pa'i gzhung dam pa/ /zhes bya ba la sogs pa smos te/ dpal dang ldan pa 'dus pa'i gzhung lugs bsngags par gyur pa'i dam pa gang yin pa des gang zhig dbang bskur zhes bya bar sbyar ro/ /rim pa gang gis dbang bskur zhe na/'khor lo'i man ngag rim pa 'dis/ /zhes bya ba smos te/ 'dis zhes bya ba ni 'og nas bshad pa'o/ /'khor lo ni dkyil 'khor ro/ /man ngag ni bla ma gcig nas gcig tu brgyud par gyur pa'o/ /rim pa zhes bya ba ni rim pa 'di nyid kyis te/ rim pa gzhan dag gis ni ma yin no zhes bya ba'i don to//ji ltar dbang bskur zhe na/ chu thog rjes gnang tha ma yis/ /zhes bya ba smos te/ dbang bskur ba gang la chu thog mar gyur cing rjes su gnang ba tha mar gyur pa gang yin pa de ni/ chu thog rjes gnang tha ma yis/ /zhes bya ba ste/gnyis po 'di dag ni bya ba'i khyad par ro/ /dbang bskur ba ni khrus bya ba ste/ de yang lus kyi phyi'i dri ma 'khru ba'o/ /chu dang cod pan la sogs pa cho ga rnam pa bcu gnyis dang ldan pa'i sngags pas yang dngos por gyur pa'i sgrib pa'i dri ma rnams 'khrud par byed pas de dang chos mthun pa'i phyir dbang bskur ba zhes bya'o//de yang rnam pa gsum ste/ rig pa'i dbang bskur ba dang / slob dpon du dbang bskur ba dang / dbang bskur ba'i mchog go/ /de dag kyang lnga dang / gcig dang / gnyis dang / rim bzhin du sbyar ro/ /'dir tshigs su bcad pa ni/chu dang cod pan rdo rje bdag po dang / /ming du btags dang bum pa zhes bya dang / /gsang ba dang ni shes rab ye shes te/ /dbang bskur rnam pa gsum du shes par bya/ /zhes bya ba dang / rig dang slob dpon mchog ces btags/ /lnga pa la ni brtul zhugs 'dod/ / lung bstan rjes gnang dbugs dbyung ba/ /drug pa'am yang na brgyad par bya/ /zhes bya'o/ /'di dag gis ni mdor bsdus pa'i yon tan gcig bshad pa yin te/ 'di lta ste dbang bskur ba yang dag par thob pa zhes bya ba'o/ /rgyas par ni bcu gnyis so//de yang 'di lta ste/ chu'i thob pa dang / de bzhin du 'og ma rnams la yang shes par bya'o/ /de nas bla ma zhes bya ba nas rnal 'byor de nyid shes zhes bya ba'i bar gyis yon tan gnyis pa bshad pa yin no/ /de nas zhes bya ba ni slob dpon du dbang bskur ba'i 'og tu bla ma las de kho na nyid thob cing dkyil 'khor gyi de kho na nyid dang /lha'i de kho na nyid dang / slob dpon gyi las dang bcas pa thob par gyur nas zhes bya ba'i tha tshig go/ /'dir de nas zhes bya ba 'dis ni dbang ma bskur ba la de kho na nyid bshad pa bkag pa yin no//bla ma zhes bya ba 'dis kyang slob ma ma yin pa la'o//de yang / rang gi slob ma bdag nyid che/ /brtul zhugs bzang zhing dbang bskur la/ /byang chub sems dpa' rnams kyis ni/ /bstan pa yongs su grol ba yin/ /zhes gsungs pa yin no/ /gzhan dag na re de nas bla ma zhes bya ba 'di gnyis ni gzhi mnyam pa yin te/gang kho na las thog mar chu dang tha mar rjes su gnang ba can gyi dbang bskur ba'i bla ma de kho na nyid las so/ /de ltar de kho na nyid thob par gyur pa'i rjes la gsang ba'i 'khor lo 'dir gsang ba dang shes rab kyi dbang bskur ba dag gis gsang ba shes pa dang /rnal 'byor gyi de kho na nyid shes pa gang yin pa zhes pa dang sbyar ro/ /gsang ba 'dus pa 'dir gsang ba'i dkyil 'khor bris pa'am/ bsgoms par gang gsang ba dang shes rab gnyis kyi dbang bskur ba de gnyis kyi gsang ba shes pa dang / rnal 'byor gyi de kho na nyid shes pa'o//ji ltar na de gnyis kyi gsang ba shes she na/ de gnyis kyi rjes thogs la/ dbang bskur 'di ni ji lta bar/ /zhes bya ba la sogs pa'i tshigs su bcad pa gsum gyis gsang ba bshad pa'i phyir ro/ /ji ltar na de gnyis kyis rnal 'byor gyi de kho na nyid shes she na/ de nyid kyi tshe de la rim pa ji lta ba bzhin du lus kyi shes pas mngon sum du bya ba dag gis mngon sum du byed pa'i phyir ro/ /de yang rnal 'byor ni shes rab dang thabs kyi snyoms par 'jug pa yin la/de'i de kho na nyid ni don dam pa yin te/ de bzhin gshegs pa thams cad kyi zag pa med cing rtag pa'i bde ba bla na med pa'i rang bzhin bcom ldan 'das thar pa chen po yin la/de yang de gnyis kho nas yang dag par ston pa yin gyi gzhan gyi tshe ma yin no/ /go rims 'di ni 'og nas/ mi ldog dbang bskur byin nas ni/ /'khor lo'i de nyid bstan par bya/ / 'khor lo'i de nyid legs bstan nas/ /lha yi de nyid bstan par bya/ /dkyil 'khor lha yi de nyid dang / /slob dpon gyi ni las rnams dag /legs bshad gsang dang shes rab kyi/ /dbang bskur de nyid bshad par bya/ /zhes bshad pa yin no/ /theg gsum dgongs pa'i de nyid shes//zhes bya ba ni nyan thos kyi theg pa dang / pha rol tu phyin pa'i theg pa dang / gsang sngags kyi theg pa'o/ /'di rnams las ma grags pa'i tshig 'ga' zhig gis ston pa'i dgongs pa'i don gang yin pa de ni dgongs pa zhes bya la/ de'i de kho na nyid de rtogs pas na/ dgongs pa'i de nyid shes zhes bya ba ste/de yang 'di ltar theg pa gnyis po dag las/ pha dang ma ni gsad bya zhing / /bram ze gtsang sbra can gnyis dang / /rgyal po yul 'khor bcas bcom na/ /mi de yongs su dag par bshad/ /ces gsungs pa lta bu'o/ /'dir dgongs pa'i de kho na nyid ni ma ni srid pa'o//pha ni las kyi srid pa'o/ /rgyal po ni zag pa dang bcas pa'i sems so/ /bram ze gnyis ni lta ba mchog tu 'dzin pa dang tshul khrims dang brtul zhugs mchog tu 'dzin pa'o/ /yul ni dbang po'i tshogs rnams so/ /'khor ni yul rnams so//gzhan yang pha rol tu phyin pa'i theg pa las/'di ni byang chub sems dpas srog gcad par bya'o/ /ma byin par blang bar bya'o zhes bya ba nas/ log par lta bar gyur par bya'o zhes gsungs pa yod la/ 'dir dgongs pa'i de kho na nyid ni srog ni 'tsho ba dang sems can zhes pa'i don to//de bcad pa ni 'khor bar lhung bar gyur pa las shin tu ba ton zhing 'khor ba las bsgral bar bya ba ni srog gcod pa'o/ /ma byin par len pa ni snying rjes sems can rnams ma byin pa nyid du so sor blangs shing yongs su bzung nas don byed pa'o/ /byis pa'i skye bo rnams kyis yongs su bzung ba'i dngos po ji snyed pa thams cad log pa nyid du mthong ba ni log par lta ba'o//de bzhin du gzhan dag la yang theg pa gnyis su gsungs pa'i dgongs pa rnams kyi de kho na nyid kyang shes par bya'o/ /de bzhin du gsang sngags kyi theg pa las kyang /khyod kyis srog chags gsad par bya/ /zhes bya ba la sogs pa gsungs pa yin te de ni bla ma'i zhal la sogs pa las shes par bya'o/ /rgyud 'di las dgongs pa'i de kho na nyid mang po gsungs pa gang yin pa de rnams ni le'u bco brgyad pa las legs par bshad pa yin la/lhag ma rgyud gzhan dang / theg pa gzhan dag las gsungs pa rnams ni/ rigs pa'i gtan tshigs 'thad pas sam/ phul du byung ba'i man ngag las ci rigs par shes par byas la/ dgongs pa rnams kyi de kho na nyid nges pa kho nar shes par bya dgongs so/ / gzhan du na de kho na nyid la the tshom za ba'am/ log par 'dzin par 'gyur ro/ /'dir gsang sngags kyi theg pa ni dkyus ma nyid yin la theg pa gnyis po smos pa ni dper bya ba'am/thos pa mang bar bya ba'i phyir ro/ /rig pa la sogs pa ni 'og nas 'chad do/ /ting nge 'dzin gsum ni dang po'i sbyor ba dang /dkyil 'khor gyi rgyal po mchog dang / las kyi rgyal po'i mchog go/ /thun mong gi dngos grub ni mi snang ba la sogs pa'i dngos grub po/ /cig shos ni dngos grub kyi mchog ste/ phyag rgya chen po'i dngos grub la sogs pa gang yin pa'o//rgyud gzhung gi ni rnam dbye shes/ /zhes bya ba ni rgyud 'di nyid kyi'am/ rgyud thams cad kyi'o/ /dam tshig dang sdom pa ni 'og nas 'chad do/ /shes rab rnal 'byor la rab brtson/ /zhes bya ba la shes rab gtso bor gyur pa'i rnal 'byor ni shes rab rnal 'byor te/de la rab tu brtson pa ni shin tu goms par slob pa nyid do/ /sngags ni grags par zad do/ /rgyud ni phyir zlog pa'i 'khor lo la sogs pa'o/ /de rnams kyi sbyor ba la mkhas pa ni zhi ba la sogs pa'i las rnams la byang ba'o/ /de lta bu'i yon tan dang ldan pa ni sems can gyi don bsgrub par 'os pa yin te/sems can rnams kyi don ni phan pa ste/ phyag rgya chen po'i dngos grub dang / dkyil 'khor du 'jug pa la sogs pa thams cad do/ /'os pa zhes bya ba ni 'tsham pa ste dbang du byas pa zhes bya ba'i don to/ /ci'i phyir yon tan 'di dag tsam nyid kyis 'os pa nyid yin par bshad/yon tan gzhan rnams gzhan dag las ji snyed cig 'byung ste/ brtan zhing dul la blo gros ldan/ /bzod cing drang la g.yo sgyu med/ /ces bya ba la sogs pa gsungs pa yod la de rnams 'dir ma smos so zhe na/ de'i phyir gtong ldan zhes bya ba la sogs pa smos te/gang gi phyir gtong ba la sogs pa'i yon tan dang ldan du zin kyang gong du bshad pa'i yon tan gyis bstod na 'os pa nyid ma yin te/ ci'i phyir zhe na/ sngar bshad pa'i yon tan rnams yod par gyur na/ gtong ba la sogs pa'i yon tan nges par 'byung bar 'gyur ba yin no//de bas na sngar bshad pa'i kho nas 'os pa nyid yin par brjod do/ /de yang 'dir mi nus pa yang nyams su blang dgos par thal bar 'gyur ba'i phyir ro/ /seng ge zla ba la sogs pa dang 'dra bar gtong ba la sogs pa yod pa 'chad par 'dod pa ni ma yin la/gal te rjes su mthun pa'i gtong ba la sogs pa dang mi ldan na ni/ dbang bskur ba la sogs pa ji ltar thob/ /'di dag gis ni dkyil 'khor bri ba la sogs pa byed par 'os pa bshad pa yin no/ /dkyil 'khor bri ba na yang sngon du bya ba gang yin pa de bstan par bya ba'i phyir/brtser ldan zhes bya ba la sogs pa smos te/ sems can thams cad la snying rje bsgom pa dang / dam tshig dang / sdom pa dang ldan pa'i brtul zhugs yod pa dang / gsang sngags zlos pa dang ldan pa dang / sngags kyi tshul la the tshom med pa'i phyir dad pa dang ldan pa dang /chos thams cad la bdag med pa dang / sangs rgyas kyi che ba'i bdag nyid la lhag par mos pas zab mo'i de kho na nyid shes pa dang / rang gi 'khor lo 'jam pa'i rdo rje'i dkyil 'khor la de'i tshul gyis gnas par gyur pas sngon du bsnyen pa byas nas/de'i rjes la de'i dkyil 'khor bri bar bya'o zhes bya ba'i don to/ /sngon du bsnyen pa de nyid rgyas par ni/ yid dang rjes mthun gnas la lar/ /zhes bya ba nas/ ci rigs par ni bzlas byas nas/ /rang bdag la sogs bka' thob pa'am/ /'gog pa'i 'khor la goms pa yis//rang sems dag nas bri bar bya/ /zhes bya ba'i bar 'dis bshad pa yin no/ /yid dang rjes su mthun pa ni yid du 'ong ba'o/ /byug pa ni bsku ba'o/ /rnam thar sgo zhes pa ni stong pa nyid dang mtshan ma med pa dang / smon pa med pa ste rnam par thar pa'i sgo gsum mo//'di rnams kyis legs par dag pa ni yang dag par dag pa ste/ sku dang gsung dang thugs yongs su dag pa'i ye shes yang dag pa ji lta ba'i mtshan nyid do/ /de yang mdor bsdu na ye shes kyi tshogs so/ /de'i phyir zhes pa de'i don du snying gar gnas pa'i zla bar yi ge maM 'od zer gyi phreng ba 'bar ba dang ldan pa bsams nas/de'i 'og tu bsod nams kyi tshogs kyi don sdig pa bshags pa la sogs pa bya'o/ /rnam par thar pa'i sgo dag par bya ba'i phyir yi ge maM bsams nas zhes bya ba 'di ci'i phyir smras she na/ sa bon gyi yi ge ni sku gsum gyis yi ge yongs su dag par ston par byed pa yin gyi/gzhan du na de kho na nyid gsum ro gcig pa'i gsang ba'i tshul can gyi sngags kyi lha rnams kyi sa bon du mi 'gyur ro/ /de la gsal byed kyis ni stong pa nyid du ston to/ /dbyangs kyi yi ges ni mtshan ma med par ro//thig les ni smon pa med par ro/ /nges pa'i tshig gi tshul ni rgyud gzhan dag dang theg pa gzhan dang / gzungs kyi sgo'i rjes su 'brangs nas shes par bya'o/ /oM gyi de kho na nyid gsum ston te/ a dang u dang thig les so/ /yi ge I ni thung du dang ring po dang tsheg drag gis so//yang na yi ge A dang tsheg drag gnyis kyi ste/ shes rab dang thabs kyi bdag nyid can du mdor bsdus pa nyid kyis yi ge gcig pa'i sngags kyis de kho na nyid gsum ro gcig pa'i tshul gyis rang nyid dbyer mi phyed pas bya ba gcig pa nyid ston par byed pa yin no//rgyud kyi rgyal po 'dir sgo mang po nas de kho na nyid gsum ro gcig pa'i gsang ba'i tshul can gyi sa bon gyi don yin par bcom ldan 'das nyid kyis gsungs pa yin no/ /de bas na dge ba 'dod pa rnams kyis don dam par 'di la mchog tu lhag par mos pa nyid du bya'o//don de nyid kyi phyir 'di bstan par mi bya ba yin na yang kho bos gsal bar phye ba yin no/ /gzhan yang ci zhig byas te sdig pa bshags pa la sogs pa bya zhe na/ phyogs bcur zhes bya ba la sogs pa smos te/phyogs bcu po rnams su dus gsum por byung ba'i sangs rgyas bcom ldan 'das gang yin pa de rnams kyi mdun du gnas par mos pa'i stobs kyis bsams la/snying po maM gyi 'od zer las byung ba'i gzugs rdo rje la sogs pa dang / me tog la sogs pas sangs rgyas bcom ldan 'das de dag nyid la gus pas mchod par bya'o zhes bya ba'i don to//bdag nyid kyi sdig pa gzhan dag la mthol ba ni sdig pa bshags pa ste/ de bstan pa'i phyir rang gi zhes pa la sogs pa smos te/bdag rang nyid kyi nyon mongs pa can gyi log pa'i rtog pa bdag dang bdag gi rnam pa can de tsam las 'dod chags dang zhe sdang dang gti mug gi bar chad las byung ba'i nyes byas de bcom ldan 'das la 'chags par bgyid do zhes bya bar sbyar ro//log rtog tsam gyi sgra ni sdig pa'i rgyu chung ba nyid dang / rang gi sgras ni rang la rag las pa nyid du ston pas sdig pa ni nyam chung ba'i phyir yongs su spang bar nus pa yin no zhes ston to//yang na tsam gyi sgra ni khyab pa'i tshig yin te/ log par rtogs pa thams cad las byung ba'i nyes byas rnams bshad par bgyi'o zhes bya bar sbyar te/ 'dir khyab pa'i dbang du byas pa'i phyogs 'di ni legs pa yin no/ /de yang / ma lus kun rtog gis bsags sdig pa rnams/ /zhes ji skad bshad pa lta bu'o/ /phyogs 'di la ni rang gi sgra dang / byas pa'i sgra la don gyi khyad par lhag par yod pa ma yin te/ rtog pa tsam las byung ba zhes bya ba ni rgyu la khyab pa'o/ /dus gsum zhes bya ba ni dus la khyab pa'o//de bas na rgyu thams cad las byung ba dang / dus thams cad pa'i nyes byas rnams bshags par gyur pa yin no/ /byas pa zhes bya ba ni sdug bsngal gyi rgyur gyur pa'i las byas pa dang / byed pa dang byed par 'gyur ba'o/ /yang na byas pa'i sdig pa nyid 'chags pa yin la/dus gsum zhes bya ba ni lus kyi dang ngag gi dang yid kyi'o/ /lan gsum zhes bya ba ni dus gsum du byas te'o/ /rmi lam rmi lam la sogs bzhin/ /zhes bya ba ni ji ltar rmi lam du la la zhig rmi lam dang sgyu ma dang smig rgyu dang / dri za'i grong khyer ston par byed pa dang 'dra bar sdig pa yang de bzhin du bshags par bya'o zhes bya ba'i tha tshig go//de yang rmi lam du rmi lam la sogs pa ston pa na/ gang zag gang gis gang la gang zhig ston pa'i bstan par bya ba de dag thams cad ni dngos po med pa yin te/rmi lam ni brdzun pa yin pa'i phyir ro/ / de bzhin du bdag gi sangs rgyas dang / bdag dang nyes byas dang de bshags pa dmigs su med par lhag par mos pas bshags par bgyi'o zhes bya ba'i tha tshig go/ /gzhan gyi bsod nams la dang cing dang po sngon du 'gro ba'i dga' ba ni rjes su yi rang ba yin la/ bdag nyid kyi bsod nams rang bzhin gyis byang chub tu bsngo zhing bdag gis bsod nams kyi 'bras bu 'di lta bur gyur cig ces bya ba gang yin pa de ni bsod nams bsngo ba ste/gnyis po de dag bstan pa'i phyir rdzogs sangs zhes bya ba la sogs pa smos te/ rdzogs sangs rgyas zhes bya ba ni yang dag par rdzogs pa'i sangs rgyas rnams so//sras mchog ces bya ba ni rgyal ba'i sras te/ byang chub sems dpa' zhes bya ba'i don to/ 'phags rnams zhes bya ba ni nyan thos dang rang sangs rgyas rnams kyi'o/ /gzhan gyi zhes bya ba ni so so'i skye bo rnams kyi'o/ / dge ba dam pa zhes bya ba ni ma 'dres pa'i bsod nams zhes bya'i don te/ de thams cad las rjes su yi rang bar byas nas yang dag par rdzogs pa'i byang chub tu yongs su bsngo bar bgyi'o/ /bsod nams de dag la dang por rjes su yi rang nas de'i rjes la rang gi bsod nams yongs su bsngo ba ni rjes su zhes bya ba'i sgra'i don yin no//yang na rjes su zhes bya ba'i sgra'i don ni lhan cig ces bya ba'i don yin pas dge ba zhes bya ba dang sbyar ro/ /rjes su yi rang ba ni don gyi dkyus ma yin no/ /de'i don ni 'di yin te/ rjes su yi rang ba dang lhan cig skyes pa'i bsod nams yongs su bsngo bar bgyi'o zhes bya ba'i tha tshig go//dam pa'i chos yun ring du ston par mdzad pa'i phyir sangs rgyas rnams la yun ring du bzhugs par gsol ba 'debs pa ni bskul ba yin no/ /de rnam pa gzhan dag gis bstan par bya ba'i phyir/ kun 'dod ces bya ba la sogs pa smos te/bdag bskul bar bgyid do/ /ci zhig bskul zhe na/sangs rgyas thams cad kyis chos bstan pa 'jig rten kun la snang zhing blo'i yul du gyur cig pa'o/ /ci lta bu zhe na/ sdig pa med pa ste kha na ma tho ba med cing nyes pa dang bral ba de'i bsam pa thams cad ni kun 'dod de/'jig rten dang 'jig rten las 'das pa'i phun sum tshogs pa'i yid la re ba thams cad la dbugs 'byin stsol bar mdzad pa ste/ yid brtan du mi rung ba'i don la yid rton par gyur pa ni dbugs dbyung ba'o/ /ji lta bu zhe na/ sangs rgyas kun gyi bstan pa nam mkha'i mtha' dang mnyam pa ste/nam mkha' lta bur rgyun mi 'chad par rtag tu gnas pa gang yin pa la gnas pa de ni nam mkha'i mtha' dang mnyam pa'o/ /gal te de rnams kyi chos kyi skus skye ba dang 'gag pa med pa dang / longs spyod rdzogs pa'i skus 'gag pa med pa dang /sprul pa'i skus nam mkha' ji srid gnas kyi bar du/ 'jig rten gyi khams de dang de rnams su bltams pa dang / byang chub pa dang chos kyi 'khor lo bskor ba dang / yongs su mya ngan las 'das pa bskal pa ji lta ba bzhin du ston par mdzad pas 'dis ni bzhugs par gsol ba gdab par yang mi dgos la/chos ston par bskul ba yang mi dgos te grub pa nyid yin no zhe na/ de lta mod kyi ston par snang ba nyid du bskul ba yin te/ snod ma yin pa rnams la de med pa'i phyir ro/ /sprul pa'i sku yang so sor snang bar gsol ba 'debs pa nyid yin te/de yang skus ston par mdzad pa'i bdag nyid can yin pa'i phyir dang / bstan pa zhes spyir smos pa yin pa'i phyir ro/ /'dir tshigs su bcad pa ni/ sangs rgyas mya ngan mi 'da' ste/ /chos kyang nub par mi 'gyur ro/ /gnyi ga'ang snod kyi nyes pa yis/ / chu yi zla ba ltar mi snang / /rmongs sdig mi dge'i bshes gnyen la/ /thub pa'i zla ba mi snang ste/ /mun dang thag ring bsgribs par gnas/ /chu snod la ni zla bar mtshungs/ /zhes bshad pa yin no/ /'gro ba skyabs med pa rnams kyi skyabs ni gsum ste/ sangs rgyas dang chos dang dge 'dun no//de rnams la bdag gis skyabs nyid du shin tu khas len pa las mi 'da' ba'i dam bca' ba ni skyabs su 'gro ba'o/ /de la gsum la skyabs su 'gro ba ni tshigs su bcad pa gsum gyis ston te gang nyon mongs pa can gyis rnam par rtog pa spangs pas/kun du rtog pa ma lus pa thams cad dag par gyur pa dang gang yang gzung ba dang 'dzin pa'i rnam par rtog pa spangs pas so so rang gis rig pa'i bdag nyid kyi dga' ba thugs su chud par gyur pa dang / gang chos ston pa la sogs pa'i sgo nas sems can rnams la rang gi don gang gzhan gyi don gyi 'bras bu phun sum tshogs pa stsol bar mdzad pa'i rdzogs pa'i sangs rgyas de la skyabs su mchi'o zhes pa'o//chos ni rnam pa gsum ste/ lung dang / rtogs pa dang / chos kyi dbyings so/ /de la lung ni gsung rab yan lag dgu'o/ / rtogs pa ni sa dang pha rol tu phyin pa la sogs pa dang / nyon mongs pa dang shes bya'i sgrib pa spangs pa'o/ /chos kyi dbyings kyang gang yin zhe na/ de bzhin nyid dang yang dag pa'i mtha' dang don dam pa'o/ /sems dpa'i mchog ni sangs rgyas dang byang chub sems dpa' rnams so//de rnams kyi dam pa'i chos ma lus pa'o/ /dam pa ni sangs rgyas dang byang chub sems dpa' dang / nyan thos dang rang sangs rgyas rnams te/ de rnams kyi phun sum tshogs pa gang yin pa de'i gnas ni rgyu'o/ /bsam gyis mi khyab pa ni rtog pa'i yul las 'das pa'i phyir ro/ / de ni phun sum tshogs ba'i gnas kyang yin la/ bsam gyis mi khyab pa yang yin pas na/ phun sum tshogs gnas bsam yas zhes bya ste/ de gang yin zhe na chos kyi dbyings so/ /ji ltar na 'di phun sum tshogs pa de'i rgyu yin zhe na/ chos kyi dbyings la dmigs pa nyid kyi lam gyis de rnams rtogs par 'gyur ba'i phyir ro//de bas na chos thams cad kyi rgyu yin pas chos kyi dbyings zhes bshad de/ dbyings kyi sgra ni rgyu'i rnam grangs yin pa'i phyir chos kyi dbyings te/ de yang stong pa nyid yin la/ gang gis stong pa nyid yin zhe na/ bdag dang bdag gi dang /gzung ba dang 'dzin bas so/ /su'i stong pa nyid yin zhe na/ rnam par shes pa'i tshogs can gyi dngos po thams cad kyi zhes bya ba'i don to/ /chos kyi dbyings de yang dbye ba mtha' yas pas phan tshun phye ba'i chos thams cad ro gcig pa yin te/ 'di lta ste stong pa nyid du ro gcig pa'o//de nyid kyis na de lta bur lta ba'i 'jig rten las 'das pa'i ye shes rnam par mi rtog pa'i spyod yul yin gyi 'jig rten pa'i ni ma yin no/ /'jig rten pa rnams dang byis pa'i byang chub sems dpa' rnams kyi rnam par shes pa ni mos pa tsam yin gyi mngon sum du mthong ba ma yin no//de ltar na de kho na nyid la pha rol tu phyin pa'i tshul dang khyad par ci zhig yod ce na/ chos nyid kyi sku la ni khyad par med kyi chos kyi sku la ni mang du yod de/ de yang khyad par can gyi sngags dang / mtshan ma dang / lus dang / rnal 'byor dang yongs su g.yo ba dang /dga' ba'i tshul rnams yin no/ /tshogs ni byang chub sems dpa'i dge 'dun no/ /yang dag par rdzogs pa'i byang chub las log pa ni slar ldog pa ste/ nyan thos kyi byang chub tu ltung ba'o/ /de med pas na mi ldog pa ste/ de nyid kyis na dbugs 'byin thob gyur pa zhes bya'o//de yang rnam pa gnyis te/ rgyu mthun la sogs pa'i 'bras bu 'thob pa dang / gsang ba'i dbang bskur ba thob pa ste/ gnyi ga yang mi ldog pa nyid thob pa yin no/ /'dir mi ldog pa smos pa ni nyan thos la sogs pa dgar ba yin no//pha rol tu phyin pa'i sgo la spyod pa'i byang chub sems dpa' rnams ni/ rgyu mthun pa la sogs pa smos pas bsdu'o/ /de yang byang chub sems dpa' rnams kyi sngon gyi skye ba snga ma rnams su dge ba rnams la goms par bslabs pas tshe 'dir de'i snod du gyur pa gang yin pa de ni de rnams kyi rnam par smin pa'i 'bras bu'o//de rnams kyi 'dir byas pa stobs can du gyur pa gang yin pa de ni bdag po'i 'bras bu'o/ /de rnams nyid la lhag par sred pa gang yin pa de ni rgyu mthun pa'i 'bras bu'o/ /'dir bslab pa rnams mngon par 'phel bar gyur pa gang yin pa de ni skyes bu byed pa'i 'bras bu'o//de'i sgrib pa'i dri ma rnams dang bral ba'i 'bras bu'o/ /de yang dbus dang mtha' rnam par 'byed pa las/ snod gyur rnam par smin brjod dang / de yi dbang gis stobs dang ni/ /'dod dang 'phel dang rnam dag ste/ /'bras bu de dag go rims bzhin//zhes ji skad bshad pa lta bu'o/ /'di ni bdag po'i 'bras bu ma gtogs pa 'bras bu bzhi po ni rigs mthun pa'i 'bras bu bgrang ba'i longs spyod chen po nyid la sogs pa ni ma yin no/ /lam la gnas pa bstan pa'i phyir thub dbang zhes bya ba smos te/ thub pa'i dbang po'i sras ni byang chub sems dpa' rnams te/de rnams kyi lam la gnas par bgyi'o zhes pa'o/ /da ni zhes bya ba ni skyabs su song ba'i rjes thogs la'o/ /lam ji lta bu zhe na/ spyod pa thog mtha' med rtogs byed/ ces bya ba ste/ byang chub sems dpa' rnams kyi bdag dang gzhan gyi don phun sum tshogs pa'i thabs kyi spyod pa gang ci yang rung ba la lhag par spyod pa ni spyod pa ste/mdor na pha rol tu phyin pa bcu 'am/ drug gam/ tshogs gnyis so/ /thog ma ni gdod ma'o/ /tha ma ni tha ma'o/ /de dang bral bas na thog mtha' med pa ste/'khor ba thog ma dang tha ma med pa'o/ /de rtogs par byed pa ni khong du chud pa ste/ lam gang 'khor ba yongs su shes pa nyid kyis byang chub kyi spyod pa yongs su rdzogs pa de ni/ spyod pa thog mtha' med rtogs byed/ /ces bya'o/ /gal te de lam yin na lam gyi bya ba ni 'chi ngo ba las grol bar byed pa yin pas 'ching ba dang thar pa ci zhig yin zhe na/chos thams cad la de kho na nyid ma bstan pa dang / de kho na nyid ma yin pa bstan pa de ni 'ching ba yin la/ chos thams cad la de kho na nyid ma bstan pa dang / de kho na nyid ma yin pa bstan pa gnyis las go bzlog pa'i mtshan nyid tsam zag pa dang bcas pa'i sems kyi rgyud kyi mtshan nyid gnas yongs su gyur pa gang yin pa de ni byang chub sems dpa'i thar pa yin te/sgrib pa thams cad spangs pas ci dgar spyod pa nyid thob pa'i phyir ro/ /de las gzhan pa dag ni de ma thob pas bcings pa'i gnas skabs yin no//de yang bcings pa ni shin tu phyin ci log tu gyur pa'o/ /de yang theg pa bsdus pa las/byis pa rnams la yang dag bsgribs/ /yang dag ma yin kun du snang / /de bsal yang dag thams cad du/ /byang chub sems dpa' rnams la snang //don med pa dang don yod pa/ /mi snang snang bar shes bya bar/ /gnas ni gzhan du gyur pa de/ /'dod dgur rgyu phyir thar pa yin/ /'khor ba dang ni mya ngan 'das/ /mtshungs par shes pa rnams skye ba/ /de tshe de phyir de la ni/ /'khor nyid mya ngan 'das par 'gyur/ /dor ba ma yin mi dor min//'khor nyid mya ngan 'das yin pas/ /thob pa ma yin ma thob min/ /mya ngan 'das par 'gyur bas na/ /zhes ji skad bstan pa lta bu dang / /rigs pa drug cu pa las kyang / /'khor ba dang ni mya ngan 'das/ /'di gnyis yod pa ma yin te/ /'khor ba yongs su shes pa ni//mya ngan 'das zhes brjod pa yin/ /zhes bshad de/ tshig le'ur byas pa 'di dag gis ni srid pa yongs su shes pa'i mtshan nyid ni/ sangs rgyas kyi yongs su mya ngan las 'das pa yin par bshad pas de phung po bzhi 'gog pa'i mtshan nyid can yin par gzhan dag 'dod pa'i gzhung bkag pa yin no//ji ltar gnas par bya zhe na/ /kun sangs rgyas bdag blo mchog gis/ /zhes bya ba smos te/ dngos po thams cad la sangs rgyas kyi bdag nyid yin pa'i blo mchog ste/ de kho na nyid kyi blos de kho na nyid du 'di rnams ni bdag nyid yin la/chos 'di dag thams cad kyang sangs rgyas yin no zhes shes pa'i phyir ro/ /ji ltar bdag nyid yin zhe na/ sems las logs na phyi'i don med pa'i phyir sems can rnams ni sems kyi rgyun gyi mtshan nyid can yin la sems kyi rgyun ni chos kyi skus tha mi dad pa yin no//ji ltar na 'di dag sangs rgyas yin zhe na/ sangs rgyas rnams kyi sangs rgyas kyi chos kyi rang bzhin yin pa'i phyir dang / de yang sangs rgyas kyi chos ni sems yongs su dag pa'i mtshan nyid can yin pa'i phyir dang / sems can thams cad ni chos nyid kyi skus rang bzhin gyis yongs su dag pa yin pa'i phyir ro//de yang chos nyid kyi sku ni byang chub sems dpa'i lam la chos kyi dbyings gtso bo yin la/ chos kyi dbyings ni gang du yang dbye ba yod pa ma yin te/ stong pa nyid du ro gcig pa nyid do zhes bshad pa yin pas/kun sangs rgyas bdag blo mchog gis/ /zhes bya ba gang yin pa 'di khyad par can gyi sngags dang phyag rgya'i rnam pas dga' ba med par yang 'gyur zhing bde ba chen po dang mthu chen po nyid yin no zhes bya ba ni rgyud kyi don yin no/ /de nyid kyi phyir smras pa ni/de bas zhes bya ba yin te/ 'og nas bshad pa'i lha rnams kyi 'khor lo la sogs pa'i rim pas zhes bya ba'i don to/ /'dir yang lam 'di la spyod pa zhes bya ba smos pas yongs su rdzogs pa nyid du ston to/ /thog mtha' med ces pa smos pa ni mdor bsdus pa nyid du ston to//kun sangs rgyas bdag blo mchog gis/ /zhes pa 'dis ni rang bzhin ston to/ /de yang de kho na nyid du na bdag nyid kyi dngos po shin tu rnam par dag pa'i sa dang pha rol tu phyin pa'i rang bzhin can du bsgoms pa de'i stobs kyis sangs rgyas thams cad kyi pha rol tu phyin pa la sogs pas bdag nyid kyi pha rol tu phyin pa la sogs pa sems kyi skad cig ma thams cad las yongs su rdzogs par byed pa dang /bdag dang gzhan la mchod pas kyang sangs rgyas thams cad la mchod par 'gyur ba dang / dngos po dman pa rnams kyis kyang phul du byung ba'i mchod pa byed pas byang chub rnyed par sla ba yin pas/'di ni byang chub kyi lam gyi rang bzhin du gyur pa yin no//de bas zhes bya ba 'dis ni shin tu myur ba kho nar byang chub 'thob par byed pa'i khyad par bstan pa yin te/ rnal 'byor dag ni 'di nyid kyis/ /myur du sangs rgyas nyid 'thob 'gyur//zhes ji skad bshad pa lta bu'o/ /bya ba la mngon par 'dod pa ni 'dun pa'o/ /'dun pa dang bcas pa'i sems ni smon lam ste/ kye ma ngas ni 'di ltar bya'o/ /kye ma nga ni 'di ltar gyur cig ces bya'o/ /de lta yin pas gang sems can thams cad kyi sdug bsngal thams cad zad par bya ba'i phyir bla na med pa yang dag par rdzogs pa'i byang chub thob par mngon par 'dod pa'i yid kyi las gang yin pa de ni byang chub tu smon pa'o//de ni sems bskyed pa ste de nyid ni byang chub kyi sems so/ /de nyid ni bla na med pA yang dag par rdzogs pa'i byang chub dang /sangs rgyas dang byang chub sems dpa' rnams kyi chos rnams kyi sa bon du gyur pa yang yin no/ /sems de ni 'di ltar bskyed par bya ste/ kye ma'o sems can thams cad kyi sdug bsngal thams cad zad par bya ba'i phyir bdag bla na med pa yang dag par rdzogs pa'i byang chub tu mngon par rdzogs par sangs rgyas par bya'o snyam pa'o//de nyid rnam pa gzhan dag gis bstan pa'i phyir sgrib pa thams cad ces bya ba smos te/ byang chub tu sems bskyed do zhes bya bar sbyar te/ bla na med pa'i byang chub thob par 'dun par yid gzhol bar bya'o zhes bya ba'i don to//ci'i phyir smon par byed ce na/ 'khrul pa zhes bya ba ste/ 'khrul cing nor par gyur pa'i sems can thams cad kyi lta ba rab tu rtogs par bya ba'i phyir te/ de kho na nyid kyi ye shes rdzogs par bya ba'i don du'o/ /yang 'khrul pa'i lta ba can gyi sems can thams cad rab tu rtogs par bya ba'i phyir ro//gnyis kas kyang de kho na nyid shes par gyur na thar pa thob pa dang / sdug bsngal thams cad zad pa'i rgyur 'gyur ro zhes bya ba'i don to/ /ji ltar na rnam pa thams cad du de ltar 'gyur bar smon ce na/ bdag nyid kyi rnam pa kun gyis sems bskyed par bya'o zhes bya ba'i tha tshig go//yang ji lta bu zhe na/ de la shin tu bslabs par gyur pas rnam par dag pa'i mthar thug pa thob pa na nyon mongs pa dang / shes bya'i sgrib pa thams cad yang dag par sel bar byed pa dang / ye shes kyi bdud rtsi mtha' yas pa'i gnas dang gzhir gyur pa yin no//de la ye shes ni me long lta bu'i ye shes la sogs pa'o/ /de yang mtha' yas ba ste/ dbye ba mtha' yas pa nyid dang / yul mtha' yas pa nyid dam mi zad pa nyid yin pa'i phyir ro/ /de ni bdud rtsi yang yin te/ bdud rtsi dang chos mthun pa'i phyir ro//chos mthun pa de yang lhan cig skyes pa dang / kha na ma tho ba med pa dang / mchog tu mi zad pa'i bde ba la rab tu sbyor ba nyid kyis tshim par byed pa'i phyir ro/ /byang chub kyi sems ni rnam pa gnyis te brdar btags pa dang don dam pa'o/ /de la brdar btags pa ni sngar bshad pa nyid do//don dam pa bshad par bya ste/ de la byang chub ni smon lam gyi shugs las byung ba spros pa med pa rnam par mi rtog pa'i ye shes so/ /de yang chos thams cad bdag med pa la dmigs pa ste/chos rnams kyi brjod du med pa dang / gzung ba dang 'dzin pas stong pa gang yin pa de mngon sum du byed pa'i phyir ro//mtshan ma med pa yang yin te spros pa'i mtshan ma thams cad kyi nye bar 'dzin pa dang bral ba'i phyir ro/ /de yang theg pa chen po bsdus pa las/ byang chub sems dpa' rnams kyis shes/ /rnam rtog med pa'i dmigs pa ni//chos rnams brjod du med pa nyid/ /bdag med de bzhin nyid kyang de/ /byang chub sems dpa' rnams kyis shes/ /rnam par mi rtog rnam pa ni/ /shes bya dmigs pa de nyid la/ /mtshan ma med pa gang yin pa'o/ /zhes ji skad bshad pa lta bu'o/ / byang chub kyi sems 'di yang ji srid stong pa nyid la lhag par mos bar byed kyi mngon sum du mi byed pa de srid kyi bar du ni brdar btags pa nyid yin la/ yang gang gi tshe mngon sum du byed pa de'i tshe ni don dam pa yin par shes par bya'o/ /slob dpon sangs rgyas ye shes kyi zhal snga nas kyis kyang //ngo bo nyid dang bral phyir stong pa ste/ /de bzhin rgyu dang bral bas mtshan ma med/ /rtog pa rnams dang bral bas dngos po ni/ /ma lus smon pa las ni des grol ba'o/ /zhes bshad pa yin no/ /de'i dgos pa yang 'di yin te/ /rgyud 'di rnam par thar pa'i sgo gsum gyi de kho na nyid gsum ston pa ni chos thams cad kyi bdag med pa'i ye shes khyad par can yin no zhes pa ste/le'u gnyis pa las/ sku dang gsung dang thugs kyi mchog /de bzhin gshegs pa kun gyi gsang / /bla na med pa'i byang chub sems/ /bcom ldan snying pos bshad du gsol//de nas bcom ldan 'das de bzhin gshegs pa thams cad kyi sku dang gsung dang thugs rdo rje'i bdag pos de bzhin gshegs pa thams cad kyis gsol ba btab par mkhyen cing / byang chub sems dpa' thams cad kyi sems kyi yongs su rtog pa yang thugs kyis mkhyen nas byang chub sems dpa' de dag la 'di skad ces bka' stsal to//khyod kyi sems lus lta bu dang / lus sems lta bu dang / sems tshig tu brjod pa lta bur skyed cig de nas byang chub sems dpa' sems dpa' chen po de dag gis de bzhin gshegs pa thams cad kyi sku dang gsung dang thugs nam mkha' lta bur sbyangs nas/ched du brjod pa 'dis ched du brjod do/ /e ma'o kun du bzang po yi/ sku dang gsung thugs rdo rje can/ /skye ba med pa'i tshul gyis su/ /skye ba 'di ni rab tu bsgrags/ /zhes ji skad bshad pa lta bu ste//byang chub kyi sems bskyed pa 'di ni sems bskyed pa kun du bzang po yang yin te/ de bas na kun du bzang po smos pa dang / skyed pa yin la rang bzhin 'dis ni bcom ldan 'das de bzhin gshegs pa thams cad bsdus pa ni rdo rje sems dpa' yin no//le'u bcu pa las/ rdo rje gsum po mkha' 'dra ba'i/ /byang chub 'di yis thob par 'gyur/ /byang chub sems ni rgyal rgya mtsho/ /rdo rje sems dpa' tshe des 'thob/ /ces ji skad bshad pa lta bu'o/ /'di dag thams cad la dgongs nas//byang chub sems dang zhes bya ba la sogs pa smos pa yin no/ /rgyu la ma chags pa ni rgyu mi dmigs so/ /'bras bu la ma chags pa ni 'bras bu mi dmigs pa ste/ /chos thams cad gzung ba dang 'dzin pa'i rang bzhin gyis stong pa nyid yin pa'i phyir dang / sems tsam gyi ngo bo nyid yin pa'i phyir/so so rang gis rig pa'i bdag nyid can yin la/byang chub kyi sems gang la chos thams cad so so rang gi rig pa nyid du snang ba de ni so so rang rig chos te/ de'i ngo bo nyid yin pa'i phyir ro/ /de ltar na 'bras bu dang rgyu dang ngo bo nyid nye bar mi dmigs pa ni rnam par thar pa'i sgo gsum yin te/der ro gcig pa ni byang chub kyi sems ston pa yin no/ /ji ltar na rgyu dang 'bras bu nye bar mi dmigs pa yin zhe na/ gang gis ngo bo nyid kyi stong pa yin pa'i ngo bo des/ de rnams la rgyu dang 'bras bu nyid du yod par mi rigs pa'i phyir ro//byang chub kyi sems 'di bskyed nas sngags kyis brtan par bya ba yin no/ /de bas na 'di'i sngags gsungs pa bstan pa'i phyir/stong pa'i ye shes bdag can bdag /ces bya ba smos pa yin no/ /sngags de nyid ni oM zhes bya ba la sogs pa smos pa yin te/oM zhes bya ba ni gleng slong ba'o/ /chos thams cad kyi rang bzhin dang rgyu dang 'bras bu dang bral ba ni/ shUn+ya tA ste stong pa nyid do/ /de'i ye shes ni shU n+ya tA dz+nyA na ste stong pa nyid dang mtshan ma med pa dang smon pa med par ro gcig pa'i sems zhes bya ba'i don to/ /de nyid ni badzra ste mi mthun pa'i phyogs rnams kyis mi shigs pa'i phyir dang /de 'joms pa'i phyir dang 'jig pa med pa'i phyir rdo rje zhes bya'o/ /de yang rnam par dag pa'i mthar thug par phyin pa yin pa'i phyir de nyid dang por swa b+hA ba ste/ rang la yod cing gnas pa'o/ /de yang de bzhin nyid kyi skus rang bzhin gyis rnam par dag pa'i sems ni glo bur ba'i sgrib pa dang bral ba'i rang bzhin du gnas pa zhes bya ba'i don to//de nyid kyi phyir rang bzhin gyis rnam par dag pa nyid yin pas bden pa'i bdag nyid kyi rang gi ngo bo ni At+ma ko ste/ de lta bu gang yin pa de ni bdag yin pas a haM ste/de ni stong pa nyid kyi ye shes kyi rdo rje'i rang bzhin gyi bdag nyid can ni bdag go/ /de'i phyir byang chub kyi sems 'di stong pa nyid kyi ye shes kyi sgras rang gi mtshan nyid la lhag par mos pa yin la rdo rje'i sgras ni rang gi mthar thug pa'i rnam par dag pa'o/ /rang bzhin gyi sgras ni mthar thug pa'i rnam par dag pa'i dus su yang lhag pa med par ro//bdag nyid can dang bdag gi sgra gnyis kyis ni de bdag nyid la rang bzhin gyis grub pa nyid yin pa nyid du lhag par mos pa ste/ ji ltar chos kyi dbyings thog ma dang tha ma med pa yin pa ltar byang chub kyi sems kyang de dang 'dra ste/de kho na nyid la dmigs pa nyid kyis de gtso cher de bzhin nyid kyi rang bzhin can yin pa'i phyir ro/ /byin gyis brlab pa'i sngags gzhan dag la yang badzra swa b+hA ba At+ma kou0f85haM zhes bya ba'i sgra'i don yang de bzhin du shes par bya'o/ / bla na med pa'i byang chub de bsrung bar bya ba'i phyir 'khor lo bsgom par bya ba yin pas de bstan pa ni/ hUM mdzad yang na zhes bya ba la sogs pa smos te/ hUM mdzad ces bya ba ni rdo rje hUM mdzad do/ /gtsug tor ni rgyal ba'i gtsug tor la sogs pa'o/ /rnam par snang mdzad la sogs nyid//ces bya ba ni 'khor los sgyur ba drug po rnams las gang yang rung ba'o/ /khro bo'i 'khor lor gnas zhes bya ba ni gshin rje gshed la sogs pa'i khro bo bcu po rtsibs la gnas pa'i 'khor lo rtsibs bcu pa ser po'i lte ba la man ngag ji lta ba bzhin du gnas pa'o//gnas rnam par dag par bya ba'i phyir rang gi snying gar nyi ma'i dkyil 'khor la yi ge hUM las byung ba'i rdo rje sngon po kha gyes pa bsams la/ de'i lte bar chud pa'i hUM las rdo rje phra mo rnams spros la/ rdo rje rnams gcig tu 'dus pa las phyogs bcur rdo rje'i ra ba/ steng du rdo rje'i dra ba/ 'og tu rdo rje'i rang bzhin can gyi sa gzhi bsams la/ de'i dbus su chos 'byung bsgom par bya ba yin pas/ de bstan par bya ba'i phyir de nas zhes bya ba la sogs pa smos te/ chos kyi dbyings zhes bya ba ni chos 'byung gi phyag rgya'i gzugs zur gsum pa ste gru gsum du gnas pa'o//phyogs kyi 'khor lo ni phyogs kyi tshogs so/ /'od ni 'od zer ro/ /mkha' nang 'og pad rdo rje gnas/ /zhes bya ba ni nam mkha'i nang gi 'og logs su sna tshogs pad+ma la rdo rje gnas shing rdo rje dang ldan pa'o/ /gnas pa ni 'di thob pa yin te thob pa ni ldan pa'o//der zhes bya ba ni chos 'byung ba'i dbus su gzhal yas khang rab tu bsam par bya'o zhes bya ba sbyar ro/ /tshig lhag ma rnams ni gzhal yas khang gi khyad par ston pa yin no/ /de yang yi ge b+h+rUM las 'khor lo de las byung zhing skyes pa'i rig pa zhes bya ba lha mo dang rnam par snang mdzad las sangs rgyas kyi tshogs spros pas nam mkha' khyab pa zur bzhi pa zhes bya ba ni 'og nas sgo bzhi pa la sogs pa dang ldan par bshad pas zur bzhi dang ldan pa'o//sna tshogs zhes bya ba sogs pa la zla ba bcu gnyis dang nyi ma bdun gyis legs par mnan pa'i sna tshogs pad+ma bcu dgu yod pa'i lha'i gdan de gnas gang na yod pa de phyogs kyi cha kha dog gi chas spras pas rnam par brgyan zhing phye ba'o//rgyu'i rdo rje sems dpa' bskyed pa'i rim pa bstan pa'i phyir/ dbyangs yig ces bya ba la sogs pa smos te/de ltar dge ba'i chos nye bar bsags pa'i sems gang yin pa de nyid dbus na gnas pa'i zla ba'i gdan la ye shes zla ba zhes pa/ ye shes kyi rang bzhin can gyi zla ba rgyas pa rnam par bsgom mo/ /ji lta bu zhe na/ dbyangs yig mtshan dang yang dag ldan/ /ka sogs dpe byad 'od zer can//zhes pa ste/ dbyangs kyi yi ge bcu drug ste/ de nyid nyis 'gyur du byas pa ni skyes bu chen po'i mtshan sum cu rtsa gnyis kyi sa bon yin pas na mtshan zhes bya la/ de dang yang dag par ldan pa ni de las bskyed pa'o/ /ka la sogs pa ni sum cu rtsa bzhi ste/de rnams la Da D+ha da d+ha ya la zhes bya ba rtsol ba chung ngur brjod pa dang bcas pa bcug nas bzhi bcur byas la/ de nyid nyis 'gyur du byas pa ni dpe byad brgyad cu'i sa bon yin pa'i phyir dpe byad de/ ka sogs dpe byad do/ /de yongs su gyur pa'i 'od zer gang yin pa de ni/ka sogs dpe byad 'od zer can/ /zhes bya'o/ /'di ltar dgongs te kun du bzang po'i sgrub thabs las/ bcu drug cha dang tshogs las byung ba yis/ /zhes 'byung ba 'di ni dbyangs kyi yi ge bcu drug gi cha dang ldan pa zhes bya ba'i don to/ /'od zer dpag tu med pa'i tshogs ldan pa//dbus ma'i gdan la cho ga bzhin du bsam/ /zhes bya ba de yang / ka sogs dpe byad 'od zer can zhes bya ba'i don do/ /la la ni dbyangs kyi yi ge dang gsal byed kyi yi ge gnyis 'gyur du bya ba dang / gzhug par bya ba mi 'dod do/ /gzhan dag ni dbyangs kyi yi ge las zla ba gcig /gsal byed las gnyis pa byed par 'dod la/ de las gzhan pa dag ni de gnyis gcig tu gyur par 'dod do/ /der zhes bya ba ni ye shes kyi zla ba la rdo rje bsgom par bya'o/ /de yang dang po'i snying po zhes pa ni dbal mchog dang po'i yi ge hUM las byung ba'o//sprul pas 'gro ba'i ngon byas nas/ /zhes bya ba ni/ rdo rje de'i nang na gnas pa'i yi ge hUM gi 'od zer las rgyal ba lta bu'i sprul pa rnams 'byung bas/ 'gro ba sems can thams cad kyi don byang chub kyi sems bskyed pa la sogs pa nas/ byang chub pa'i bar du byed pa'i sngags gang yin pa de la de skad ces bya'o//de'i rjes thogs la/ bdag nyid de yi nga rgyal ldan/ /zhes bya ba dang oM badzra At+ma kou0f85haM zhes bya ba de lta bu'i nga rgyal dang ldan par byas nas/ kun du bzang por bdag nyid bsgom par bya'o zhes bya bar sbyar ro/ /tshig lhag ma ni b com ldan 'das kyi khyad par ro//de yang sku thams cad shel lta bu'i mdog can zhal dang po zla ba ltar dkar ba/ zhal g.yas pa sngo ba/ zhal cig shos te g.yon pa dmar ba/ rnam pa kun mchog ces pa mtshan dang dpe byad la sogs pa rgya che ba dang / yon tan zhes bya ba ni mngon par shes pa la sogs pa'o//mchog ni thams cad kyi mchog tu gyur pa'o/ /rdo rje dang pad+ma dmar po rin po che ni cha dgu pa ljang gu/ dpal dang ldan pa'i 'gro ba'i phun sum tshogs pa gang yin pa de rnams kyi gnas te rgyur gyur pa'o/ / 'od zer gyi tshogs nam mkha' khyab par mnga' ba gang yin pa 'di dag ni shin tu rnam par dag pa'i thabs dang shes rab ste sangs rgyas dang byang chub sems dpa' thams cad kyi yab dang yum du gyur pa yin la/ de'i rgyu mthun pa las byung ba kun du bzang po zhes bya ba dang / rdo rje 'chad pa zhes bya bar bshad pa thun mong du gyur pa thob pa'o//de yang dpal mchog dang po la sogs pa las/ yum ni shes rab pha rol phyin/ /yab ni thabs la mkhas pa nyid/ /gdul don rdo rje sems dpa' dang / /rigs kyang 'byung bar gyur pa yin/ /zhes ji skad bshad pa lta bu'o//'di nyid las kyang / de nas brtsams te sems can thams cad kun du bzang po kun du bzang po zhes bya bar gyur to zhes bya ba la sogs pa gsungs pa dang / rdo rje 'dzin mchog gang yin pa'i/ /dbus su gzugs ni legs bris pa/ /de yi dkyil 'khor gnas su 'gyur//sku gsung thugs kyi gsang las byung / /zhes ji skad gsungs pa lta bu'o/ /de bas na rgyu mthun pa de las mngon par byung ba'i dkyil 'khor gyi bdag po bskyed pa'i rim pa 'chad par 'dod pas zhing yongs su dag par bsdus pa nyid kyis snod kyi 'jig rten yongs su dag pa sngar byas pa nyid yin pa'i phyir rjes thogs la bya ba'i sems can gyi 'jig rten yongs su dag par bshad pa ni/de nas 'dod chags zhes bya ba la sogs pa yin te/ de nas zhes bya ba ni de'i rjes thogs la'o/ /'dod chags chen po zhes bya ba ni thabs dang shes rab gnyis su med pa'i sbyor ba mchog gis don dam pa rnam par spyod pa la mngon par dga' ba'o//snod ces bya ba ni mngon par byang chub par bya ba'i snod gdul bar 'os ba'i 'jig rten rnams so/ /dga' ba'i sgra zhes pa ni 'dod chags chen po de nyid de de las byung ba'i sgras spros pa'i tshul gyis phyogs bcur khyab pas so//de ni zhes bya ba ni rgyal ba'i tshogs de rnams nyid rig pa rnam pa bzhi dang / yul rnam pa lnga'i tshul te rig pa rnam pa dgu ru phyung nas lha mo dgu po de dag nyid rang gi rig pa'i nang du gzhug par bya'o/ /pad+ma ni 'dab ma brgyad pa dmar ba gru gsum gyi nang du chud pa'o//lte ba ni ze'u 'bru'o/ /mu tig gi 'bras bu rngul med pa lta bu sgo chad dang shin tu ldan pa'o/ /rab tu dga' ba las byung ba ni ye shes kyi zla ba ste/de'i rang bzhin can gyi dkyil 'khor thar pa'i grong khyer gyi rang bzhin can gyi gzhal yas khang sprul nas 'dir zhes pa dkyil 'khor der ro//sangs rgyas nyid pa shes gnyen gyi mchog yin la/ de nor bu'i cha'i nang nas zhu ba'i tshul gyis phyung nas so/ /mi ldog phyir zhes pa ni phyir mi ldog pa nyid kyi phyir ro/ /de bas na dbang bskur bas dbugs 'byin pa'i 'gro ba mthong nas sems can thams cad la sa bon gyis dbyung bar bya'o zhes bya bar sbyar ro//sems can thams cad ces bya ba ni sa'i snying po la sogs pa nas rnam par snang mdzad la sogs pa'i mthar thug pa'o/ /ji lta bu zhe na/ 'gro ba sems bdag dngos las byung / /zhes bya ba ste/ sems ni byang chub kyi sems so/ /bdag ni rang gi ngo ba'o//dngos ni thob pa ste/ 'gro ba rnams byang chub kyi sems kyis dbang bskur ba ni byang chub kyi sems kyi tshul thob par gyur pa ste/ 'gro ba rnams sems can gyi bdag nyid thob pa'o/ /de las byung ba ni de yongs su gyur pa las so/ /ji lta bu'i sa bon gyi zhe na/mig sogs rang gi ngo bor byung / /zhes bya ba ste/ de rnams kyi de kho na nyid las byung zhing de kho na nyid ston par byed pa las zhes bya ba'i don to/ /yang na byang chub kyi sems kyi ngo bo las byung ba ste/ de'i rgyu mthun pa zhes bya ba'i don to/ /yang dag dbyung zhes pa ni rang gi phyogs dang gnas la sogs par blos gtang bar bya zhes bya ba'i don to//spyir bshad nas khyad par smras pa ni sa'i snying po zhes bya ba la sogs pa drug yin te/ ngo bor byung zhes bya ba ni mig la sogs pa'i rang bzhin ni rang gi ngo bo ste rang bzhin ni gnas skabs so/ /de yang glo bur ba'i sgrib pa thams cad dang bral bas zhes bya ba'i don to//de las skyes pas na de las byung ba yin te/ de'i rang bzhin zhes bya ba'i tha tshig go/ /phyi nang bdag nyid ngo bor byung / /zhes bya ba ni lus dang cig shos kyi gzugs la sogs pa drug po rnam par dag pa las byung zhes bya ba'i don to//phyi rol du gnas pa zhes bya ba ni mig la sogs pa drug las phyi rol zhes bya ba'i don to/ /'gro chos bdag nyid de nyid skyes/ /zhes bya ba ni 'gro ba rnams kyi chos ni shes rab gang yin pa'o/ /de rnams kyi bdag nyid ni rang bzhin no/ /de'i de kho na nyid ni de tsam nyid de dag pa'i mthar thug pa zhes bya ba'i tha tshig go//de las skyes zhes bya ba ni de'i rang bzhin zhes bya ba'i don to/ /phung po rnams kyi ngo bo ni shin tu rnam par dag pa'i de kho na nyid do/ /chos rnams thams cad ces bya ba ni phung pos thams cad bsdus pa'i phyir ro//yang na de ltar chos thams cad yang dag par dbyung bar bya'o zhes spyir nye bar bsdu ba yin no// //da ni dkyil 'khor gyi bdag po bskyed pa'i rim pa bstan pa'i phyir oM zhes bya ba la sogs pa smos te/ de nas zhes bya ba ni sems can byung ba'i rjes thogs la rnal 'byor pas rang gi sems yi ge gsum gyi rang bzhin yi ge hoH dmar po gnyis dang spel ba mdun gyi nam mkha' la bsams la/dri za nye bar 'khor gyi tshul du bcom ldan 'das kyi zhal nas zhugs te lha mo'i chu skyes la gnas pa rgyu mthun pa chung ngu dag par bya ba'i phyir bsgom par bya'o zhes sbyar ro//de nas kyang spel ba'i sems de shes rab kyi 'dod chags kyi me 'bar bas zhu bar bsam par bya'o/ /de nas mar gyi bum pa bzhus pa lta bur sku de gnyis kas yang phral du zhu bar byas pas na/ sku gnyis dag ni zhu bar byas/ /zhes bsam par bya ba yin no//de nas bcom ldan 'das 'di dbus ma'i zla ba'i gdan la ston ka'i zla ba zhu ba lta bur gyur cing nam mkha' dang mnyam pa nyid du gyur pa mchog tu zhi ba spros pa med pa rnam par mi rtog pa'i ting nge 'dzin la snyoms par zhugs pas gnas par gyur pa na/ /ting nge 'dzin de las blang bar bya ba'i phyir byams pa la sogs pa'i ngo bor gyur pa'i dge ba'i bshes gnyen dang 'dra ba mA ma kI la sogs pa bzhis glus yang dag par skul bar byed par bsam par bya'o//bshes gnyen gyi dam pa ltar snang bas na bshes mchog ltar snang ngo / /mtshams rnams dgar bas na phyogs kyi lha mo rnams la phyogs lha mo zhes bya'o//bshes mchog ltar snang ba yang yin la phyogs kyi lha mo yang yin pas na de skad ces bya'o/ /yang na bshes gnyen gyi mchog sangs rgyas rnams snang zhing mngon pa'i phyogs gang yin pa de rnams su lha mo rnams gnas pas na de skad ces bya'o//bskul ba de nyid kyi tshigs su bcad pa bzhi ni/ sems can khams na zhes bya ba la sogs pa smos pa yin no/ /thugs la sogs pa'i rdo rje rnam par dag pa'i thugs mthar thug pa ni snga ma bzhin te/ kye rdo rje'i thugs bdag la bskyab tu gsol zhes bya bar sbyar ro//sems can khams na zhes bya ba ni bcud kyi 'jig rten gyi rgyu dang rkyen rnams te/ khams kyi don ni rgyu'i don yin no/ /gnas kyi dbang phyug ces bya ba ni snod kyi 'jig rten gyi bdag po'i rkyen no/ /gang gis bskyab ce na/ dga' ba dang yid du 'ong ba dang /don che ba gang yin pa de la de skad ces bya'o/ /de rnams kyang yin la 'dod pa yang yin pa'i gzugs rdo rje la sogs pa la de skad ces bya ste byams pa chen po'o/ /sems can yab ces bya ba ni 'phags pa'i gang zag thams cad bskyed pa'i phyir ro/ /bdag la zhes bya ba ni byams pa chen po la dgyes par mdzad du gsol zhes bya ba rol bar mdzod cig ces bya ba'o//gnyen mchog ces bya ba ni mchog chen po sangs rgyas rnams kyi gnyen rdo rje sems dpa'o/ /mgon po gal te de ring bdag ni gson par mchis bzhed na/ /zhes pa ni ma bzhengs na ni sems can gyi don bya ba med pas khyed kyi byams pa bdag nye bar bcom par 'gyur ro zhes bya ba'i tha tshig go//rdo rje'i sku khyod ces bya ba la sogs pa la kye rdo rje'i sku khyod chags pas bdag la dgyes par mdzad du gsol zhes bya bar sbyar te/ 'dir chags pa ni skyabs med pa'i 'gro ba rnams la mnyes gshin pa'o//de nyid ni 'dod chags dam tshig ste/ lhan cig spyod pa'i thugs rje chen po zhes bya ba'i tha tshig go/ /bka' yi 'khor lo sems can kun la phan/ /zhes bya ba ni chos kyi 'khor lo gang yin pa de khyod yin pas de skad ces bya'o/ /sangs rgyas zhes bya ba'i sgra'i don ni byang chub bo//de ni de kho na nyid yin pas mchog don te/ sangs rgyas dang byang chub ni tha mi dad pa yin pa'i phyir ro/ /de yang / shes rab pha rol phyin ye shes/ /gnyis med de ni de bzhin gshegs/ /zhes ji skad bshad pa lta bu'o/ /rjes su phan ston pa zhes bya ba ni theg pa gsum ston par mdzad pa'o//lhag ma ni snga ma'i rjes su 'brangs nas shes par bya'o/ /khyod ni zhes bya ba la sogs pa la/ kye rdo rje gsung 'jig rten ma lus pa kun la phan zhing kha na ma tho ba med pa'i don gyi rjes su thugs brtse bar mdzad pa ste/ 'jig rten de dag gis dgongs shing phan pa'i don mdzad pa la rtag tu yang dag par 'jug pa la brtson par mdzad pa dang /rab dga'i spyod pa ste de kho na nyid rnam par spyod pa'i spyod pa mnga' ba dang / 'di las thams cad bzang bar 'gyur bas na kun du bzang po ste bzang po thams cad kyi rtsa ba ni chos yin pa'i phyir ro//bdag la dgyes par mdzod ces bya ba ni dga' ba chen po'o/ /lhag ma rnams ni snga ma bzhin no/ /khyod ni rdo rje 'dod pa zhes bya ba la sogs pa la/ 'dod chags dang / zhe sdang dang / gti mug gi rjes su 'gro ba'i sems nyid ni 'dod pa ste/ kye rdo rje 'dod pa sna tshogs bar snang bas na dam tshig go//ye shes rnams kyi dam par gyur pas mchog go/ /yang na dam tshig ni yang dag par khong du chud pa'o/ /de rnams kyi mchog tu gyur pas na dam tshig mchog go/ /sangs rgyas kyi zhing thams cad du bzhud cing byon pa'i tshul gyis 'gro ba'i don mdzad pas 'di la don chen po 'byung bar 'gyur bas na phan don che'o//bde bar gshegs pa'i gdung gi thig ler gyur pas gdung mchog go//'dod chags dang zhe sdang dang gti mug ro gcig pa nyid kyis rjes su thugs brtse bar mdzad pas na mnyam nyid rjes brtse'o//dga' ba gsum bsdus par gyur pas na rin chen mang po'o/ /yon tan de dang ldan pas na yon tan gter gyur ces bya'o/ /bdag la dgyes par mdzod ces bya ba ni btang snyoms chen po bdag la dgyes par mdzod cig ces pa'o/ /lhag ma ni snga ma bzhin no/ /slong bar byed pa ni tshigs su bcad pa de rnams nyid do//slar yang zhes pa ni phyis dngos po rnams sgyu ma lta bur yang dag par rig pa gang yin pa des rang gi sngags kyi don yi ge maM du gyur pa ste/ zhu ba yongs su gyur pa las mi gyi gzugs su gyur nas maM des 'gro ba thams cad sgyu ma lta bu nyid du bsam par bya'o zhes bya ba'i tha tshig go//zhal mchog ces bya ba la sogs pa la rang gi sa bon yi ge maM de nyid las byung ba'i mtshan ma maM gyis mtshan pa'i ral gri gang yin pa de las byung zhing skyes pa'i 'jam pa'i rdo rje rang nyid gyur to zhes bya bar sbyar ro/ /de yang zhal gyi mchog ste/ rtsa ba'i zhal ni gur kum bzang po'i mdog can/zhal g.yas ba sngo ba/ g.yon pa dkar ba/ rgyan dang cha lugs byis pa gzhon nu lta bu dang / shes rab kyi dga' ba gang yin pa des gcig tu de gnyis pa med pa dang / rab tu mdzes pa ste mchog tu bde ba 'phel ba nyid kyi sku'i yan lag thams cad yid du 'ong ba zhes bya ba'i don to//gzhan yang rang snang ba'i shes rab kyi ma mchu zhal gyis 'dzin par mdzad pa/phyag g.yas gnyis na ral gri dang mda' bsnams pa/ phyag g.yon gnyis na ut+pal sngon po dang gzhu bsnams pa'o/ /don rdzogs pa zhes bya ba ni sangs rgyas la sogs pa'i tshul du bskyed pas so//de ltar 'jam pa'i rdo rje'i bdag nyid can gyi ngo bo nyid rtogs pa'i rnam par byang ba la srid pa dang zhi ba las mngon par zhen pa spang ba'i phyir stong pa nyid la so sor brtag par bya ba yin pas de'i phyir srid pa zhes bya ba la sogs pa smos te/ srid pa ni 'khor ba'o//zhi ba ni mya ngan las 'das pa'o/ /chags pa ni mngon par 'dod pa'o/ /de yang srid pa la chags pas ni srid pa nyid mtha' yas par 'gyur la/ zhi ba la chags shing shin tu dga' ba gang yin pa byang chub sems dpa' des ni 'byor ba nyams pa thob par 'gyur te/ theg pa dman par ltung ba'i phyir ro//de bas na srid pa dang zhi ba gnyi ga sgyu ma lta bu nyid du so sor brtags pas bsnyen pa yang dag par byas pa ste/ bsnyen pa'i yan lag mthar phyin par byas pa'i rnal 'byor pa ni chags pa gnyis dang bral bar chos kyi dbyings kyi bdag nyid can du gyur te/chos kyi dbyings shin tu rnam par dag pa'i rang bzhin can yin pas 'khor ba dang mya ngan las 'das pa gnyis la mi gnas par 'gyur ro zhes bya ba'i tha tshig go/ /byin gyis brlab pa'i sngags ni oM zhes bya ba la sogs pa smos pa yin te/ chos kyi dbyings kyi rang bzhin ni ngo bo nyid kyis gnas pa ste/glo bur ba'i sgrib pa thams cad dang bral ba'i phyir ro/ /de ni mya ngan las 'das pa yin te/de'i bdag nyid can ni bdag go/ /de ltar 'di ni bdag mya ngan las 'das par yang mthong la/ de na skye ba dang 'gag par yang mi mthong ngo / / 'di dag gi bar gyis ni bsnyen pa'i yan lag chung ngu dang rgyu mthun pa'i 'bras bu chung ngu bstan pa yin no/ /de yang / bsnyen pa'i ting 'dzin yang dag sbyor/ /byang chub dam pa bsgom par bya/ /zhes ji skad gsungs pa lta bu'o/ /zhi bar bsgrub pa'i yan lag chung ngu dang rnam par smin pa chung ngu bshad pa'i phyir/bshes gnyen dam pa zhes bya ba la sogs pa smos te/ bshes gnyen dam pa zhes bya ba ni de bzhin gshegs pa thams cad kyi bdag nyid can gyi rang gi ngo bo nyid shin tu rnam par dag pa'i rgyu mthun pa de yongs su gyur pa las 'jam pa'i rdo rje'i sku thob pas bshes gnyen dam pas rnal 'byor pa'i bsnyen pa'i yan lag la rgyu mthun pa byas pa yin la/de ni yang de'i rnam par smin pas mngon par shes ba drug nyid thob par gyur pa yin no/ /de bas na mig la sogs pa drug po byin gyis brlabs pa de ni nye bar bsgrub pa'i yan lag yin par 'dod de/nye bar bsgrub pa grub mchog la/ /rdo rje skye mched rnam par dpyad/ /ces ji skad gsungs pa lta bu'o/ /ji ltar byin gyis brlab ce na/ /yi ge k+ShiM la sogs pa rang gi sa bon las byung ba'i sa'i snying po dang / phyag na rdo rje dang / nam mkha'i snying po dang /'jig rten dbang phyug dang / sgrib pa rnam par sel ba dang / kun du bzang po'i sku mdog dang zhal dang / phyag mtshan 'khor los sgyur ba drug dang 'dra ba zla ba'i gdan dang zla ba'i 'od mnga' ba/ rin po che'i cod phan can gyis mig la sogs pa yang dag par dgang bar bya'o//sgrub pa'i yan lag chung ngu dang skyes bu byed pa'i 'bras bu chung ngu 'chad par 'dod pas/ skyes bu byed pa zhes bya ba la sogs pa smos te/ de'i rjes thogs la skyes bu byed pa'i 'bras bu gzung bar bya'o zhes bya ba'i tha tshig go/ /skyes bu byed pa de yang gang zhig yin zhe na/ chos zhes bya ba la sogs pa smos te/sku gsum gyis bsdus pa'i 'gro ba'i don nyid ni skyes bu'i zhes bya ba'i don to/ /gang las 'gro ba'i don du 'gyur ba de'i dngos po nyid yin pas na 'gro ba'i don nyid de 'gro ba'i don rdzogs par nus pa zhes bya ba'i tha tshig go/ /de bas na gsang ba gsum byin gyis brlabs pa tsam ni sgrub pa'i yan lag tu 'gyur ro//de yang sgrub pa bskul ba yin par bshad/ sngags kyi bdag po bsgom pa'o/ /zhes ji skad gsungs pa lta bu'o/ /ji ltar byin gyis brlab ce na/ /rang snying zhes bya ba la sogs pa smos te/ rang gi snying ga'i zla ba la hUM las byung ba'i rdo rje'i dbus na bzhugs pa'i thugs kyi gsang ba phyag na rdo rje dang 'dra ba dang /rang gi lkog ma'i zla ba la yi ge AHlas byung ba'i pad+ma'i dbus na bzhugs pa'i gsung gi gsang ba 'jig rten dbang phyug dang 'dra ba dang rang gi spyi bo'i zla bar om las byung ba'i 'khor lo'i dbus na sku'i gsang ba'i sa'i snying po dang 'dra bar bsam par bya'o//thugs rdo rje la sogs pa de rnams kyi thugs ka'i zla ba'i mtshan ma la gnas pa'i sa bon gyi shes rab kyi yan lag 'dus pa las byung ba'i 'od zer gang yin pa de rnams las gzugs rdo rje la sogs pa lta bu'i 'od gang yin pa de rnams kyis sangs rgyas ma lus pa yang dag par mchod pa'o//ji lta bu zhe na/ phyogs kun te phyogs thams cad dang / dus gsum khyab pa gang yin pa de nyid dang / gzhan gyi don phun sum tshogs pa rdzogs par mdzad pa'i sangs rgyas de rnams kyi thugs ka dang /lkog ma dang dbu la bzhugs pa'i thugs rdo rje la sogs pa rdzogs pa'i sangs rgyas gang yin pa de ni thams cad la/ rang gi thugs rdo rje la sogs pa byin gyis brlabs pa'i don du tshigs su bcad pa gnyis gnyis kyis bskul bar bya zhing sngags re res byin gyis brlabs pas brtan par bya'o//bsod nams dang ye shes phun sum tshogs pa ni dpal te de dang ldan pa ni dpal ldan no/ /thugs nyid rdo rje ste de'i bdag nyid kyis 'dzin par mdzad pas na rdo rje thugs 'chang ba'o/ /sku dang gsung dang thugs rdo rje mi phyed cing ro gcig pa'i de kho na nyid gang yin pa des skyed cing sprul pa'i phyir/rdo rje mi phyed gsum bsgoms pas/ /zhes bya'o/ /byin gyis brlab pa ni lhag pa'i nus pa bskyed pa ste/ de nyid phun sum tshogs pa'i khyad par du gyur pas gnas so/ /rdo rje thugs kyi zhes bya ba ni bdag gi thugs rdo rje la'o//tshigs su bcad pa 'og ma dag gi don la yang 'di bzhin du rjes su 'brang bar bya'o/ /tshigs su bcad pa 'di dag ni yan lag bzhi dang 'brel bas le'u bcu gnyis pa las gsungs pa'o/ /de bas na 'di dag nyid kyis bsgrub pa'i yan lag la byin gyis brlab par rigs pa yin no//gzhan dag ni le'u bdun pa las sku dang gsung dang thugs dang sems can la sogs pa rjes su dran par gsungs pa'i tshigs su bcad pa rnams kyis byin gyis rlob par 'dod pas de sun dbyung ba'i phyir/ rjes su dran pa bcu drug ces bya ba smos te/ rjes su dran pa bcu drug gi phyogs gcig tu gyur pa ni thugs la sogs pa byin gyis rlob pa yin la/ thugs la sogs pa de dag nyid phra mo'i rnal 'byor la sogs pas dag par gyur na rnal 'byor pa de byed pa yin no zhes bcom ldan 'das kyis gsungs pa yin te/ le'u bco brgyad pa las/brtan gyur rdo rje'i lam nas ni/ /nam mkha'i dbyings su spro bar bya/ /rjes su dran pa gang bsgom pa/ /de dang ldan na yang dag spro/ /zhes ji skad gsungs pa lta bu'o/ /de ni zhes pa de bas na'am de yang ste byin gyis brlab pa 'dir bla ma rnams sam kho bo cag gis ma bshad de/gnas skabs ma yin par smras par thal bar 'gyur ba'i phyir ro/ /sgrub pa chen po'i yan lag chung ngu dang dbang gi 'bras bu'i yan lag chung ngu bstan pa'i phyir/ sgyu ma'i zhes bya ba la sogs pa smos te/ sgrub pa'i yan lag gi lhag mar gyur pa gsang ba gsum mtshan nyid med pa nyid de/dngos po med pa nyid yin pas sgyu ma lta bur blta'o/ /ji ltar blta zhe na/ sgyu ma'i shes rab yan lag 'dus/ /zhes bya ba smos te/ sgyu ma'i rang bzhin can gyi shes rab de'i yan lag 'dus pa nyid do/ /de bas na/ dbang 'bras chung ngu rnam dag phyir/ /sgrub pa chen po yin par 'dod//ces smos pa yin no/ /de nyid ni ye shes zhes bya ba la sogs pa smos pa yin te/ thugs kar gnas pa'i thugs rdo rje'i steng gi gnas su ye shes sems dpa' 'jam pa'i rdo rje'i sku 'dra bar bsams la/ de'i snying po'i 'od kyis zhes pa thugs ka'i zla bar gnas pa'i ral gri'i maM gyi 'od zer rnams kyis phyogs bcu na bzhugs pa'i sangs rgyas rnams yang dag par bskul la/sangs rgyas kyi 'od zer las byung ba'i spyan la sogs pa'i rig ma rnams phyag gnyis kyis bdud rtsi'i chu ste/ byang chub kyi sems zhu bar gyur pas yongs su gang ba'i rin po che'i rang bzhin can gyi bum pa phyag gnyis na bsnams pas dang zhing mi bskyod pa lta bu'i rnam pas yang dag par dbang bskur bar gyur pa dang /rigs kyi dbang po cod pan gyi dam par gyur pa'i dpal dang ldan pa gtso bor gyur pa ste/ dbang bskur ba'i chu yongs su gyur pa las rang gi rigs kyi bdag po mi bskyod pa cod pan gyi dam pa rin po che'i cod pan la mnga' bas de la de skad ces bya ste/gtso bo zhes pa chos kyi rgyal por dbang bskur ba'i phyir ro/ /de nyid kyis na dpal ldan no/ /de yang / sgrub pa chen po'i dus su ni//gtso bo sangs rgyas bdag po'i sku/ /'di ni rdo rje can kun dang / /rnal 'byor mchog gi gsang ba che/ /zhes ji skad gsungs pa lta bu ste/ ye shes sems dpa' dang ldan pa'i rang gi lha'i sku'i cod pan du rigs kyi bdag po'i sku bsams nas 'grub par 'gyur ro zhes bya ba'i don to//bsnyen pa la sogs pa'i yan lag bar ma dang / rgyu mthun pa la sogs pa'i 'bras bu bar ma tshigs su bcad pa phyed kyis bstan pa ni/ de bzhin zhes bya ba la sogs pa smos pa yin te/ sngar gyi bzhin du zla ba'i gdan la ye shes kyi zla ba dang / dpal mchog dang po'i rdo rje dang / rdo rje sems dpa' dri za nye bar 'khor 'jug pa la sogs pa'i rim pas mo las byung ba'i rang snang ba'i rim pa bsams la/ de la mig la sogs pa sbyang ba dang / sku gsung thugs byin gyis brlab pa dang / dbang bskur ba yang snga ma bzhin du bya'o zhes bya ba'i don to//bsnyen pa'i yan lag chen po dang rgyu mthun ba'i 'bras bu chen por bshad pa'i phyir/ spyi bo'i lte ba zhes bya ba la sogs pa smos te/ dang po spyi bo nas bral dang rkang pa'i mthar thug pa'i bar du snying pos zhes bya ba sa bon rnams kyis so/ /de yang cha rnam pa lnga las sa bon lnga po rigs lnga'i bdag nyid can rnams kyis phra rab so sor dgang bar bya'o zhes bya ba'i tha tshig go//hUM a chu skyes 'dab brgyad pa/ zhes bya ba ni hUM las pad+ma dmar po a yis de'i lte ba mu tig gi 'bras bu dang mdog mthun pa skyed par byed pas so/ /yang dag sbyangs zhes bya ba ni de ltar yang dag par rnam par sbyangs pa des rjes su mnyes par bya'o zhes bya bar sbyar ro//hUM gis ni rdo rje mchog bskyed par bya la/ oM las ni nor bur sprul la/ nor bu gnyis kyi bar du yi ge phaT dang ldan par bya'o zhes kyang blta bar bya'o/ /de yang le'u bdun pa las/ yi ge hUM dang oM dag dang //phaT kyang rab tu bsgom par bya//'od zer rnam lngas khyab pa yis/ /pad+ma rdo rje bsgom par bya/ /zhes ji skad gsungs pa lta bu'o/ /gzhug ces bya ba ni khar chud par bya'o/ /sems mchog ces bya ba ni byang chub kyi sems so/ /rdo rje'i pad mthar gnas zhes bya ba ni dang por rdo rje'i nor bur ro//phyi nas ni chu skyes kyi nor bur ro// rgyal ba'i 'khor lor zhes bya ba ni phyi'i 'khor lo dang 'dra bar ro/ /de lta mod kyi gtso bo ni mi bskyod pa yin no/ /rang gi sa bon ni yi ge maM ngo / /brtan par byas pa ni sems kyis so/ /'gro ba'i mi shes dag bya'i phyir//zhes bya ba ni 'khor los rang gi ye shes dang cha 'dra bar byas pas so/ /khyad par gyis bshad pa la 'khor lo'i bdag po ni mi bskyod pa'o/ /de yang sku mdog nor bu in+d+ra nI la'i mdog can no/ /de nyid kyis na zhal dang po sngo ba/ zhal g.yas pa dkar ba/ g.yon pa dmar ba/dpal mchog dang po'i phyag dang 'dra bar rdo rje dang / ral gri dang / nor bu dang / pad+ma bsnams par ldan pa yin pa las 'di'i rdo rje ni sngo zhing kha cung zad kyis pa'o/ /mi bskyod pa ni zad pa shes pa'i rang bzhin yin par bshad pas kun nas nyon mongs pa'i phyogs thams cad rtsa ba nas 'byin pa ni 'dir zhe sdang chen po'o//de nyid ni don to/ /de ltar zhe sdang dang ldan pa'i 'jig rten 'phrin las 'di nyid kyis 'dul ba'i phyir badzra d+h+r-ika ces bya bas yang dag par bskul la/ spros pa'i tshul gyis til gyi gang bu bzhin du phyogs bcu'i 'jig rten gyi khams gang bar yid kyis phyung la bya ba byas nas gong bu'i tshul gyis bsdus te mi bskyod pa gcig tu byas la bdag nyid 'jam pa'i rdo rjer gyur pa la gzhug par bya'o//dngos po kun gyis zhes bya ba ni thabs dang shes rab dang sku dang gsung la sogs pa'i nang du chung par bsgom par bya ba'o/ /rnam par snang mdzad kyi dbang du byas nas bshad pa ni dzin dzika gis zhes bya ba la sogs pa yin te/ji na dzika gis zhes bya ba'i sngags 'dis yang dag par bskul la spros te bsdus la de bzhin du zhes mi bskyod pa dang 'dra bar ro/ /dang po 'dra zhes bya ba ni sku dang zhal dang sku mdog dpal mchog dang po dang 'dra ba'o//me long lta bu'i ye shes ni shes bya thams cad la thogs pa med pa'i phyir dang / de'i rnam pa ma yin pa'i phyir gti mug chen po'o/ /dpal mchog dang po'i phyag dang 'dra'o zhes bya ba'i dbang du byas pa de dgag pa'i phyir 'khor lo bzang sogs ldan zhes bya ba smos so//de'i don ni 'di yin te rtsa ba'i phyag na ni 'khor lo bsnams la lhag ma rnams ni dpal mchog dang po dang 'dra ba'o/ /de bzhin du 'di'i 'og ma rnams la yang shes par bya'o/ /rin chen dbang ni rin chen 'byung ldan no/ /mnyam nyid brtson 'grus can zhes bya ba la/mnyam nyid ni mnyam pa nyid kyi ye shes te/sems can thams cad la mnyam pa kho nar brtson pa'i phrin las kyis 'jig rten rnams la 'jug par mdzad pas na mnyam nyid brtson 'grus can zhes bya'o/ /gzhon nu'i zhal 'dra zhes bya ba ni g.yas sngo la g.yon dkar ba'o//lho phyogs su zhes bya ba ni lho phyogs kyi gdan la'o/ /rin chen 'byung ldan la sogs pa'i phyag na go rims ji bzhin du rin po che dang pad+ma dang ral gri'o/ /go brje ba'i gnas su ni mtshan ma 'khor lo yin no/ /de yang mnyam pa nyid kyi ye shes la sogs pa'i rtsa ba ni me long lta bu'i ye shes yin pas me long lta bu'i mtshan ma spyir grub pa yin no//me long lta bu la sogs pa'i rtsa ba chos kyi dbyings ma yin nam zhe na/ de ni de ltar yin te/ de nyid kyi phyir mtshan ma gcig po de'i bdag nyid can rtsa ba'i phyag gnyis kyis 'khyud pa thams cad la yod pa yin no//gsung dbang po ni 'od dpag tu med pa'o/ /shes bya thams cad la thogs pa med pa so sor rtog pa'i ye shes ni 'dod chags chen po'o/ /pad+ma rA ga ni rin po che ste/ de dang u0f37'dra ba'i mtshan ma phyag mtshan dang po na mnga' ba gang yin pa de ni/ pad+ma rA ga'i mdog pad s ogs//zhes bya'o/ /nub phyogs su zhes bya ba ni nub phyogs kyi gdan la'o/ /don yod dbang zhes bya ba ni don yod par grub pa'o/ /gtum po chen po ni shin tu drag po'i phrag dog ste bya ba sgrub pa'i ye shes so/ /ji ltar na de phrag dog yin zhe na/ 'gro bas na phrag dog ste/ sangs rgyas kyi zhing thams cad du sems can gyi don bya ba'i phyir sprul pa rnams gcig par 'gyed pa'i phyir ro/ /bai DUR+yar snang zhes bya ba ni ma rgad kyi mdog can no/ /byang du zhes bya ba ni byang phyogs kyi gdan la'o/ /kun kyang zhes bya ba ni gang 'di de bzhin gshegs pa thams cad do/ /pad+ma nyi dkyil zhes bya ba ni sna tshogs pad+ma la gnas pa'i nyi ma'i dkyil 'khor la'o//rnam par snang mdzad kyi ni zla dkyil zhes sngar bshad pa yin no/ /sems can thams cad la sdug bsngal bsal bar 'dod pa ni snying rje'o/ /bsod nams thams cad byang chub chen por yongs su bsngo ba ni thabs kyi pha rol tu phyin pa'o//de gnyis kyis ni 'gro ba'i don rtsol ba'o/ /sku dang dbang ni rnam par snang mdzad do/ /de bas nye bar bsdus pa ni byams pa'o/ /skye ba thams cad du rtag tu byang chub kyi spyod pa dang kun du mthun par smon par byed pa ni smon lam gyi pha rol tu phyin pa'o/ gnyis po de dag ni 'dod par bya ba yin pas 'dod pa'o/ /thugs kyi dbang po ni mi bskyod pa'o/ /bde ba dang mi 'bral bar dga' ba'i bsam pa ni dga' ba'o/ /skye ba thams cad du rtag tu byang chub kyi spyod pa dang rjes su mthun par 'bad pa'i stobs dang / bslab pa'i stobs ni stobs kyi pha rol tu phyin pa'o//ting nge 'dzin ni sems brtan pa'o/ /don ni nor ro/ /dag pa ni kha na ma tho ba med cing 'bras bu brtan pa'o/ /de lta bu'i bsam pa dang ldan pas na bsam pa'i don dag ces bya ste/ mdzod chen po dang ldan pa zhes gsungs pa'i phyir ro/ /phan pas bsdus pa'i bsam pa ni btang snyoms so//chos thams cad dgongs pa ji lta ba bzhin du yongs su shes pa ni ye shes kyi pha rol tu phyin pa ste/ de gnyis 'grub par byed pa'o/ /lhag ma ni lhag mar gyur pa ste/ ral gri la sogs pa'o/ /rang bdag lta bur zhes bya ba ni rnam par snang mdzad dang / mi bskyod pa dang / gsung gi dbang po dang / don yod par grub pa dang 'dra ba'o/ /bstan pa ni bshad pa'o/ /gzugs sogs pa zhes bya ba ni gzugs dang / sgra dang / dri dang / ro dang / reg dang / chos kyi dbyings kyi rdo rje'o/ /me long sogs rnams zhes bya ba ni me long dang / pi wang dang / dri'i dung chos dang / ro'i snod dang / gos sna tshogs dang / chos 'byung ba ni rtsa ba'i phyag mtshan no/ /sku sogs zhes bya ba ni sku mdog dang / zhal dang phyag mtshan gzhan ni rnam par snang mdzad la sogs pa 'khor los sgyur ba drug po dang 'dra ba'o/ /de nyid gsum gyis zhes bya ba ni oM AHhUM zhes bya ba 'dis yang dag par bskul la gdon par bya'o zhes bya ba'i don to//drug po 'di dag ni go rims bzhin du sbyin pa la sogs pa pha rol tu phyin pa drug gi ngo bo nyid yin no zhes dkyil 'khor gyi de kho na nyid 'og nas 'chad pa las bstan to/ /lha mo bcu po 'di dag kyang zla ba'i gdan dang rin po che'i cod pan can rang gi thabs la 'khyud pa'o//yams 'joms zhes bya ba ni spyi'i nye bar 'tshe ba 'joms pa ste/ phung po'i bdud dang / shes bya'i sgrib pa 'joms pa'i phyir ro/ /khro bo'i skyil mos gnas zhes bya ba'i tshig ni khro bo thams cad kyi spyi'i yin te/ g.yon brkyang bas zhes bya ba'i don to//rab 'bar zhes bya ba ni drag po'i lta bas so/ /sred 'joms zhes bya ba ni srid pa'i sred pa 'joms pa ste/ 'dis nyon mongs pa'i sgrib pa can gyi nyon mongs pa'i bdud dang / bdag tu lta ba 'joms pa'i phyir ro/ /'dod 'joms zhes bya ba ni mya ngan las 'das par sred pa 'joms pa ste/mi gnas pa'i mya ngan las 'das pa la dgyes pa'i phyir ro/ /drag po'i hUM gis mgur gyi phyogs 'gengs pas na gtum zhing sgra zab ces bya'o/ /bya ba lha yi bdud dag nyid/ /ces bya ba ni las kyi sgrib pa dang lha'i bu'i bdud bcom pa'i phyir ro/ /de nyid kyi phyir bgegs kyi mchog 'joms pa'o//'di rnams zhes bya ba ni khro bo bzhi po 'di dag smin ma gnyis 'degs pa'o/ /yang 'di dag dbu skra gyen du 'bar ba dang / sma ra dang / smin ma dang / spyan dag dmar ser du 'dug pa yin pas na/ smin 'degs dbu skra gyen du 'bar/ /sma ra smin ma spyan dmar ser//zhes bya'o/ /zhal gdangs zhes bya ba ni zhal rnam par phye ba'o/ /yang 'di rnams kyi rtsa ba'i phyag mtshan ni tho ba dang / dbyig pa dang / pad+ma dang / rdo rje kha gyen du gyes pa'o/ /lhag ma ni ral gri la sogs pa'o/ /yang 'di rnams khros pa'i sbrul gdug pas sku la brgyan pa dang /yan lag 'dus zhes bya ba 'khyud pas gnas pa yin no/ /dkyil 'khor ba thams cad ni bdag po la mngon par phyogs pa'o//kun nas zhes bya ba ni rang rang gi gnas su'o/ /rang gi dngos po yis zhes bya ba ni rang rang gi tshul gyis so/ /snying po'i sa bon gyi 'od nyid lcags kyu yin te/'gugs par byed pa'i phyir ro/ /des 'jam pa'i rdo rje ye shes kyi dkyil 'khor gyi tshul kun nas bsdus shing spyan drangs la/ sangs rgyas mdun na bzhugs pa mthong ba dang 'dra bar bsams te/ de dang lhan cig 'ongs pa'i bgegs gshin rje gshed la sogs pas kun du bskrad la/yang slar de dag mi 'jug par bya ba'i phyir de rnams nyid kyis dkyil 'khor mngon par bsrungs te/de rnams la zla ba la sogs pa dang / me tog la sogs pa dang yang ldan pa'i mchod yon 'jam pa'i rdo rje'i sngags bzlas pa phul la/ ye shes kyi 'khor lo de rang gi 'khor lo la gzhug cing nang du chud par bsam mo zhes sbyar ro//gzhan yang ji lta bu zhe na/ sa'i snying po la sogs pa dang sku rdo rje la sogs pas mig dang sku la sogs pa byin gyis brlab par bya'o/ /sngon bzhin zhes bya ba ni nu ma'i bar du ye shes sems dpa' rnam par bsams la/ rang gi ye shes sems dpa' snying po'i sa bon gyi 'od zer gyis phyogs bcu'i de bzhin gshegs pa rnams bskul la de'i snying po'i 'od zer las byung ba'i rig pa'i tshogs rnams rin po che'i bum pa'i chu blugs pas de rnams la dbang bskur bar bsam par bya'o//'di dag gis cir 'gyur zhe na/ rgyu mthun pa la sogs zhes bya ba la sogs pa smos te/rgyu mthun pa dang rnam par smin pa la sogs pa'i 'bras bu chen po dang / bsnyen pa dang / nye bar sgrub pa la sogs pa'i yan lag chen po nyid du 'gyur ro zhes bya ba'i tha tshig go/ /de la/ snying zla'i ral gri'i snying po'i 'od/ /ces bya ba nas brtsams te/ / 'khor lo la gzhug ces bya ba'i bar gyis ni bsnyen pa'i yan lag chen po dang / rgyu mthun pa'i 'bras bu chen po bstan pa yin no/ /cig shos gnyis gnyis ni dkyil 'khor ba'i mig la sogs pa byin gyis brlab pa dang / sku la sogs pa byin gyis brlab pa dang dbang bskur ba las so//dbang bskur ba yongs su gyur pas cod pan du 'khor los sgyur bas byin gyis brlab pa'i phyir dbang bskur ba'i mthar thug pa yin la/ der gang gi cod pan du gang zhig bzhugs pa de bstan pa'i phyir sangs rgyas zhes bya ba la sogs pa smos te/ sgo ba rnams zhes bya ba ni sgo srung ste des dbang bskur ro zhes sbyar ro//mi bskyod pa'i cod pan la ni rdo rje sems dpa'o/ /de'i cod pan la ni mi bskyod pa'o/ /zhes bshad do/ /de ltar dbang bskur zhes bya ba ni tshul de ltar dbang bskur bar gyur nas/ gzhug ces bya ba ni rang gi kha nas bcug ste zhu bar gyur pa dang / zhu ba de nyid las shes rab kyi ba spu'i bu gar gnas pa'i gzugs rdo rje la sogs pa'i rang bzhin can gyi 'od zer gzhal yas khang gi 'od las 'das nas zhes bya ba ni 'dir phyi'i gzugs la sogs pa zhes bya ba ni lhag ma'o//mchod dang mchod pa'i bdag can gyur/ / zhes bya bas ni nga rgyal bshad pa yin no/ /chos rnams kun zhes bya ba ni dngos po thams cad kyis so/ /bstod ces bya ba ni bstod pa byed du gzhug pa'o/ /rang gi bdag nyid rdzogs sangs skus/ /zhes bya ba la rang gi zhes bya ba ni bdag po'i'o/ /bdag nyid skus zhes bya ba ni de kho na nyid kyi skus te/rang gi bdag nyid kyi gzugs rdzogs pa'i sangs rgyas kyi skur gyur pa gang yin pa de la de skad ces bya'o/ /de yang de bzhin nyid dang sems tsam nyid gang yin pa de ni chos thams cad kyi spyi'i mtshan nyid yin la/ de yang dkyil 'khor gyi bdag po nyid yin te/ de bas na thams cad ni bdag nyid yin no zhes bya ba dang sems tsam nyid yin no zhes bya ba dang /thams cad rdo rje 'chang ba nyid yin no zhes bya ba'am/ 'jam pa'i rdo rje nyid yin no zhes bya ba'i tshul des chos thams cad lan cig gis mthong bar nus pa yin no/ /de'i phyir rang gi bdag nyid skus/ / zhes bya ba 'di tsam zhig smos par rigs kyi/ rang gi bdag nyid rdzogs sangs rgyas/ /zhes bya ba 'di ni mi rigs so/ /de yang sangs rgyas rnams ni khyad par gyi mtshan nyid can yin la/ de yang lnga po yin na de rnams kyi mtha' yas ba'i chos rnams rnam par phye bar mthong bar ji ltar nus she na/de'i phyir/ ye shes lnga dang phyag rgya dang / /rigs brgya lnga dang gsum gyis so/ /zhes bya ba smos te/ 'di ni chos thams cad ni sems tsam yin la/ sems can rnams ni sems kyi rgyun gyi mtshan nyid can yin zhing / sems can yang de bzhin gshegs pa'i snying po can yin pas de bzhin gshegs pa'i chos thams cad bsdus pa ni me long lta bu la sogs pa ye shes lnga po thog ma dang tha ma med pa yin la/de yang chos nyid kyi skus rang bzhin gyis yongs su dag pa nyid yin pas na glo bur ba'i sgrib pa'i dri ma tsam rnam par dag par gyur nas rang rang gi ngo bor gnas par gyur pa na ye shes lnga zhes bya ba dang /sangs rgyas kyi byang chub ces bya ba 'thob par 'gyur ro/ /de ltar na sngar ni sa bon zhes bya ba nyid yin no/ /de bas na byang chub sems dpa'i sa bon du gyur pas rigs dang rgyud ces kyang bshad do/ /phyag rgya zhes bya ba ni phyag rgya'i dbye bas/rigs brgya dang / rigs lnga dang / rigs gsum du bshad do/ /de'i don ni 'di yin te/ chos rnams mtha' yas pa yin mod kyi/'on kyang phyag rgya brgya 'am/ phyag rgya lnga 'am phyag rgya gsum gyis nye bar mtshon pa nyid kyis phyag rgya nyi shus rgyas btab pas khyad par gyi mtshan nyid can gyi sangs rgyas rnams kyi rang bzhin mthong bar nus pa yin no//ji ltar na rigs gsum yin zhe na/ nga rgyal dang phrag dog gnyis ni shes rab kyi rang bzhin 'dod chags kyi rigs kyi nang du 'dus pa yin pa'i phyir ro/ /ji ltar na rigs brgyar 'gyur zhe na/ phung po dang skye mched dang khams kyi phyag rgya rnams re re zhing zhi ba dang /rgyas pa dang / dbang dang / mngon spyod dang / sna tshogs pa'i tshul gyi dbye ba rnam pa lnga lngar phye bas so/ /ji ltar phyag rgya nyi shu yin zhe na le'u bco brgyad pa las/ phung po skye mched khams rnams ni/ /phyag rgya yis ni rgyas gdab po//zhes bya ba dang / yang / gang zhig gzugs dang tshor dang 'du shes 'du byed dang / /rnam par shes dang skye mched drug dang dbang po drug /sa chu me dang rlung dang nam mkha' thams cad ni/ /byang chub sems 'dra rgya chen de la phyag 'tshal lo/ /zhes ji skad bshad pa lta bu'o//gleng gzhi las kyang / phyag rgya 'di dag kho na tsam bshad de/ /byang chub sems dpa' dam tshig rdo rje dang / zhes pa nas brtsams te/ de bzhin gshegs pa rdo rje gdon mi za/ /zhes bya ba'i bar du gsungs pa dang / le'u bcu bdun pa las kyang / /phung po lnga ni mdor bsdu na//sangs rgyas lngar ni rab tu grags/ /rdo rje skye mched nyid dag kyang / /byang chub sems dpa'i dkyil 'khor ro// sa ni spyan zhes bya bar bshad/ /chu yi khams ni mA ma kI/ /me yi khams ni gos dkar mo/ /sgrol ma rlung du rab tu grags/ /mkha' dbyings dam tshig de nyid ni//rdo rje 'dzin pa nyid du dran/ /gzugs tshor la sogs sngags pa yis/ /lha nyid du ni rnam par bsgom/ /zhes ji skad bshad pa lta bu'o/ /de bas na chos ji snyed pa de rnams ni rigs lnga'i dbye ba nyid yin pas rigs brgya'o/ /la la na re brgya'i sgra ni nye bar mtshon pa tsam yin pa'i phyir sangs rgyas lnga po ni dbye ba sna tshogs pa'i rang bzhin can gyi chos thams cad yin pas na de lta bu'i tshul de nyid la byas nas de rnams kyi zhes brjod par bya'o//yang na dkyil 'khor gyi bdag po ni bstod par bya ba nyid yin la/ dkyil 'khor pa rnams ni stod par byed par rigs pa yin na/chos rnams kun gyi 'khor lor bstod/ /ces bya ba ci'i phyir brjod ce na/ de'i phyir/ rang gi bdag nyid rdzogs sangs skus/ /zhes bya ba smos te/ rdzogs sangs skus zhes bya ba gtso bor bstan pas dkyil 'khor pa thams cad gzung ngo //rang gi bdag nyid ces bya ba ni bdag po'i bdag nyid de dkyil 'khor ba dang dkyil 'khor gyi bdag po'i sku 'di yin pas de skad ces bya'o/ /de yang dkyil 'khor gyi bdag po ni chos thams cad kyi spyi'i mtshan nyid yin la/ dkyil 'khor ba ni khyad par gyi mtshan nyid yin no/ / de bas na bdag po bstod pas dkyil 'khor pa yang bstod pa yin te/ dbye ba med pa'i phyir ro/ /dkyil 'khor pa thams cad kyi bstod par gyur pas na chos thams cad kyi bstod par gyur pa yin no/ /mi bskyod pa la sogs pa'i mtshan smos pa nyid kyis bstod pa ni 'di rnams kho na yin gyi/dkyil 'khor gyi bdag po'i yang ma yin la dkyil 'khor pa rnams kyi yang ma yin no zhe na/ ye shes lnga dang zhes bya ba la sogs pa smos te/ rdo rje sems dpa'i rang bzhin ye shes lnga po nyid phyag rgya'i dbye bas rigs brgya dang / rigs lnga dang / rigs gsum du 'gyur ba yin la rdo rje sems dpa'i bdag nyid ni dkyil 'khor gyi bdag po yin no zhes bya ba 'di ni grags pa nyid yin no//de bas na rigs lnga'i bdag nyid dang rdo rje 'chang ba'i bdag nyid yin pa nyid kyi phyir bstod pa 'di ni dkyil 'khor gyi bdag po'i bstod pa yin la/ de'i yin pa dang dkyil 'khor ba'i yang yin te dbye ba med pa'i phyir ro//de bas na mi rigs pa med do/ /mi bskyod rdo rje zhes bya ba la sogs pa 'di le'u bcu bdun pa las gsol ba 'debs par gsungs pa yin mod kyi/ 'on kyang phyag 'tshal ba dang ldan pa dang / de bzhin du lnga po 'di dag gtso cher bstod pa'i tshig yin pa'i phyir te/de yang tshigs su bcad pa drug pa las/ sangs rgyas kun gyi bskul ba yi/ /bstod tshig bzhi pa 'di rnams kyis/ /rdo rje longs spyod bstod na ni/ /de yang sangs rgyas 'dra bar 'gyur/ /zhes gsungs pa'i phyir ro/ /de la rnam par snang mdzad la sogs pa'i tshig khyad par dang bcas pa rnams kyis rnam par snang mdzad la sogs pa'i tshul gyi tshigs bcad re res bdag po ni me long lta bu la sogs pa'i ye shes kyi bdag nyid can yin par ston la/rdo rje sems dpa'i sgras ni rdo rje 'chang ba sangs rgyas lnga'i bdag nyid can dang /ye shes lnga'i snying po'i de rang bzhin can yin par cig car ston to/ /mi bskyod rdo rje zhes bya ba ni rdo rje nyid de ye shes kyi snying po can yin pa'i phyir ro/ /ye shes che zhes bya ba ni che ba nyid de/ kun nas nyon mongs pa thams cad rtsa ba nas bton pa'i phyir ro//rdo rje dbyings zhes pa ni sangs rgyas rnams kyi rgyu ste/ sangs rgyas rnams ni thugs kyi skye gnas las 'khrungs pa'i phyir ro/ /gang gi phyir ye shes chen po'i yin bde nyid kyi phyir mkhas pa chen po ste/ ye shes dang shes pa po khyad par med pa'i phyir ro/ /sku dang gsung dang thugs kyi dkyil 'khor rnams thugs kyis bsdus pa yin pas na dkyil 'khor mchog gsum mo//sku dang gsung dang thugs kyi rdo rje ni thugs kyi la rag las pas na rdo rje gsum mo/ /rdo rje dbyangs la zhes bya ba ni gsang ba gsungs shig ces bya ba'i don to/ /phyag 'tshal lo zhes bya ba ni rab tu 'dud pa'o//sgrib pa rnams shin tu spangs pas na dag pa che zhes bya'o/ /'tshe ba rnams shin tu nye bar zhi ba'o/ /'gro ba'i don du nam mkha' ji srid kyi bar du bzhugs pas ni dga' ba chen po'o/ /de yang chos nyid kyi sku rang bzhin gyis grub pa yin pas na rang bzhin gyis 'od gsal ba'o//mchog du gyur ba de bzhin gshegs pa rnams kyi mchog yin pas na mchog gi mchog ste/ mnyam pa nyid kyi ye shes la sogs pa ni me long lta bu'i ye shes la brten pa yin pa'i phyir ro/ /ston pa zhes pa ni ston par mdzod cig pa'o//rin chen rgyal po zhes bya ba ni 'khor los sgyur ba nyid yin pas rgyal po'o/ /rab tu zab ces bya ba ni sangs rgyas dang sangs rgyas ma yin pa dang / sems can thams cad bdag dang mnyam par mkhyen pa'i phyir ro/ /rdo rje nam mkha' zhes bya ba ni mtshan ma med pa'i rnam pa can yin pa'i phyir dang //snying po can nyid yin pa'i phyir ro/ /dri med mkha' zhes bya ba ni sgrib pa'i dri ma thams cad dang bral bas nam mkha' dang 'dra ba'i phyir ro/ /rang bzhin dag pa zhes bya ba ni dri ma rnams ni de'i rang bzhin ma yin pa'i phyir ro/ / gos pa med ces bya ba ni rang bzhin gyis rnam par dag pa la glo bur ba'i dri ma rnams kyis kyang de la gnod par mi nus pa'i phyir ro/ /rdo rje sku la zhes bya ba ni rdo rje sku'i gsang ba gsungs shig pa'o/ /chos thams cad kyi dbang phyug tu gyur pas na rgyal po che'o/ /brjod du med pas na mi rtog pa'o//de nyid kyis na mtshan ma thams cad ro gcig pa'i phyir/ nam mkha' rdo rje 'dzin zhes bya ba ste/rdo rje nyid ni rdo rje 'dzin pa'o/ /chos thams cad kyi don dam pa'i de kho na nyid la rnam par dpyod pa gang yin pa de ni 'dod chags kyi pha rol tu phyin pa ste de brnyes pa'o//rdo rje gsung zhes bya ba ni gsang ba gsungs shig pa'o/ /rnam pa thams cad kun nas thugs su chud pas na rdzogs sangs rgyas so/ /bsam pa yang yin la/ thams cad kyang yin pas bsam pa thams cad dam thams cad kyi bsam pa ni bsam pa thams cad de/de yongs su rdzogs par mdzad pa'o/ /rang bzhin gyis yongs su dag pa'i rang bzhin can gyi dngos po rnams kyi yongs su gyur pa'i ye shes gang yin pa de ni rang bzhin can yin pas na/rang bzhin dag pa nyid las byung / /zhes bya'o/ /zla ba nyi ma zhes bya ba la zla ba la sogs pa lnga po rlung dang me'i dkyil 'khor la brten pa'i pad+ma'i snod la gnas pa oM gyis byin gyis brlabs pa rdo rje dang yang dag par ldan pa 'bar ba dang de sreg pa dang snang ba dbyed pas shel ltar dang ba'i ye shes kyi bdud rtsir gyur pa 'od zer gyis phyogs bcu nas bkug pa'i bdud rtsi dang ro gcig tu gyur pa dang yi ge gsum gyis byin gyis brlabs par bsams la/des snying ga'i zla bar chud pa'i ma lus pa'i 'khor lo tshim par bya'o/ /de yang hUM bkod pa'i rdo rje mchog dang ldan pa'i lce dang ldan pas bya'o zhes bya ba'i don to/ /sems brtan par gnas par bya ba'i phyir/thig le'i rnal 'byor brtan pa ni snying bo'i 'od kyi zhes bya ba la sogs pa smos pa yin te/ mgon pos zhes bya ba ni sangs rgyas rnams kyis so/ /rang gi log rtog ces bya ba ni nyon mongs pa dang shes bya'i sgrib pas bsdus pa spangs pas so/ /de tsam gyis ni sangs rgyas kyi bdag nyid tsam du byas la/ye shes sems dpa'i thugs ka'i mtshan ma'i lte bar chud pa'i zla ba la gnas pa'i snying po zhes pa sa bon gang yin pa dang / 'gro ba sangs rgyas su byas pa dang gcig tu gyur pa dang / de'i thig le gang yin pa dang / bdag nyid kyi yid gnyis su med par gyur pa shin tu snang ba dang bcas par bsams la//de'i 'od zer gyi phreng bas mtshan ma'i nang dang phyi snang bar byas pa'i rim gyis ye shes sems dpa' snang bar bya'o/ /de nas ye shes sems dpa'i gnas mtshan ma'o/ /de nas sku dang gsung dang thugs rdo rje gnas dang bcas pa dang /de'i nang gi gnas mtshan ma'o/ /de ltar slar log ste de yang rang rang gi gnas nyid 'dug ste ye shes kyi bdud rtsi 'bab par bsam par bya'o/ /de'i 'og tu nang gi lus thams cad snang bar byas nas ba spu'i bu ga re re las byung ba'i 'od zer gyi tshogs kyis 'gro ba rnams kun nas snang bar byas la 'gro ba de rnams nyid kyi don te bsam pa rnams rab tu rdzogs par bya'o//sems gnas par bya ba nyid kyi don du rnal 'byor gzhan dag bshad pa ni/ yang na zhes bya ba la sogs pa smos te/ rtags phra mo ni 'jam pa'i rdo rje'i ral gri nas 'bras tsam mo//thub pa'i 'khor lo rang rang gi rig pa zhes bya ba la/ de'i dbus su zhes bya ba ni lhag ma'o/ /brtan pa'i mtshan ma zhes bya ba ni sems brtan pa'i rtags smig rgyu la sogs pa'i rnam pa'o/ /mtshan ma zhes bya ba ni mtshan ma dang zhes bya bar blta bar bya'o//bsam gtan gyis dub na bzlas brjod bya ba yin pas de'i phyir sku gsung zhes bya ba la sogs pa smos pa yin te/ sngags zhes bya ba ni ye shes sems pa'i sa bon no/ ye shes lnga'i 'od zer can zhes bya ba ni sangs rgyas lnga'i 'od zer can du spros pa ste bsgom par bya'o zhes bya ba ni lhag ma'o//de yang / 'od zer lnga yi khyad par gyis/ /spros na byang chub thob par 'gyur/ /zhes ji skad gsungs pa lta bu'o/ /sku dang gsung dang thugs nyid ni rdo rje mchog yin la/ de bas na rdo rje gsum po de dag nyid gcig car ram rim gyis spro bar bya'o//de yang go rims ji lta ba bzhin du rdo rje gsum po re re 'am gsum gsum du zhes bya ba'i don te/ sngags rnams thams cad spro ba ni/ /bye brag rnam par gnyis su bsgrags/ /sku gsum rdo rje'i bye brag gis/ /spro ba dang ni bsdu ba bya/ /zhes ji skad gsungs pa lta bu'o//'dod pa'i gsang sngags bzlas brjod bya'o zhes bya ba ni lhag ma'o/ /gnas pa brtan par gyur ba dang bcas pa nyid spro ba ni bzlas pa'i cho ga la bsngags pa yin no/ /de'i phyir rdo rje zhes bya ba smos te/ rdo rje ni rlung gi dkyil 'khor ro/ /gsal ba ni chu'i dkyil 'khor ro//chos ni me'i dkyil 'khor ro/ /'khor lo zhes bya ba ni dbang chen gyi dkyil 'khor te/ de zhes bya ba ni sgra gtso bo la snyegs pa'i phyir ro/ /bzhi po 'di dag ni sku gsung thugs rdo rjer gtogs pa'i gnas yin te/ sku dang gsung dang thugs dang ye shes sems dpa'i phyi'i gnas su bsgom par bya'o zhes bya ba ni lhag ma'o//de ni zhes bya ba ni sku dang gsung dang thugs rdo rje'i gnas su bsgom pas brtan par byas la/ sngar bshad pa'i rdo rje gsum gyi tshogs spro zhing bzlas brjod bya'o/ /sngags bzlas pa'i dus ni spro ba yin la brjod pa'i mthar ni bsdu ba yin pas de'i phyir brjod cing zhes bya ba la sogs pa smos te/de ltar spro ba dang brtan par bya ba nyid kyi sngags brjod la sku'i rdo rje la sogs pa spros pas nam mkha' khyab par byas nas/ rang gi 'od kyis zhes bya ba ye shes sems dpa'i sa bon gyi 'od zer spros la/sngon bzhin zhes bya ba ye shes kyi dkyil 'khor mchod par bshad pa'i rim gyis rig pa'i tshogs gzugs rdo rje la sogs pa'i chos rnams bzang zhing bsngags pa'i mchod pa'i mchog sna tshogs sprul par byed par 'os pa yin pas na sna tshogs mchod mchog 'os zhes bya'o//srog las zhes pa ni srog thob pa ste/ dbugs 'byin pa'i rlung dang lhan cig ces bya ba'i don to/ /rig pa ni mchod pa'i lha mo rnams so/ /sgeg pas zhes bya bas ni chags pas so/ /yongs su 'khyud pa zhes bya bas ni kun nas 'khyud pa'o/ /ye shes sangs rgyas tshogs zhes bya ba ni spros te mchod nas bde bar gyur pa de rnams nyid rang gi zhes bya bar rang rang gi sa bon nam ye shes sems dpa'i sa bon du gzhug cing nang du chud par bya'o//mthar zhes bya ba ni brjod pa'i mtha' mar ji srid brjod pa gnyis pa ma byas pas de srid nyid du zhes bya ba'i don to//rtsol bas zhes bya ba ni rtsol ba thob pa ste/ rngub pa'i dbugs dang lhan cig ces bya ba'i don to/ /sngags kyi tshad dang rjes su mthun pas gcig gam gnyis sam sngags mang po brjod par byas nas gang gi tshe mi skyo ba'i don du cung zad dbugs ring du 'byin pa de ni srog gcig yin te/des yongs su bsdus pa ni brjod pa'i dus dang spro ba'i dus yin no/ /de ltar bzlas na sems rnam par g.yeng bar mi 'gyur ro/ /la la ni khyad par du bsam gtan gyis dub pa na bya ba yin no zhes zer ro/ /gzhan dag ni sngags re re bzlas pa nas spro ba'i dus yin la/de'i mthar ni bsdu ba'i dus yin no zhes zer ro/ /thig le phra mo zhes bya ba la sogs pa la/ /sngar gyi rnal 'byor bsnyen pa la sogs pa'i dbye ba dang / rgyu mthun pa la sogs pa'i 'bras bu chung ngu dang / bar ma dang chen pos phye bas bsgom par bya ba yin pa ji lta bar thig le dang phra mo dang gsang ba gsum las skyes shing byung ba'i rnal 'byor 'di rnams la yang de bzhin du bsgom par bya'o//de dag kyang rnal 'byor gsum po 'di rnams lhag par mos pa gtso bor gyur pa yin gyi/ mthong ba gtso bo ni ma yin te/dus cung zad dam chung ba'i phyir ro/ /de bas na lhag par mos pa zhes smos pa yin no/ /dub par gyur na mchod pa sngon du 'gro bas ngal bso ba yin pas re zhig der mchod par bya ba bstan pa'i phyir rang snying zhes bya ba la sogs pa smos te/ rang gi snying ste rang gi sems kyi de kho na dkyil 'khor la sogs pa'i rang bzhin gang yin pa de la brtags pas sems kyi 'jug pa zhum par gyur te dub par gyur na zhes bya ba'i tha tshig go//spyan la sogs pa'i tshogs bzhis glu snyan cing yid du 'ong bas sems can khams na zhes bya ba la sogs pa des bdag nyid gsol ba gdab cing gsod par byas la dkyil 'khor gyi bdag po dang bcas pa snga ma bzhin du mchod par bya'o//tshim par bya ba'i cho ga ni spyi bor zhes bya ba la sogs pa smos pa yin te/ mgo bo'i steng mtho gang tsam gyis dpags par bsgoms pa'i zla ba'i dkyil 'khor der oM gyi rlan can zhes bya ba bsil bar byas la/dam pa'i sems zhes bya ba byang chub kyi sems chu'i rgyun 'dzag pa sku la sogs par phab la sku la sogs pa tshim par bya'o/ /cho ga bzhin du zhes bya ba ni oM gyi 'od zer rnams kyis phyogs bcu nas drangs te srog dang rtsol bas kyang nang du chud par byas la/rtsa'i tshogs la rgyu bas sku la khyab par bya'o/ /gshegs su gsol ba bshad pa ni/ de ltar zhes pa la sogs pa yin te de kho na nyid gsum gyi rang gi bdag nyid kyi sngags bsdus shing nang du chud par byas la dkyil 'khor ba rnams gshegs su gsol lo//chags med pas zhes bya ba ni chos thams cad dngos po med par lhag par mos par bya bas so/ /de nas 'gro ba ma lus pa la phan bar bya ba'i phyir bzang po spyod pa la sogs pa'i smon lam mngon du bya'o/ /kha nang du bltas pa'i bdag nyid can gyi ting nge 'dzin las ldang ba bshad pa ni/ting nge 'dzin las zhes bya ba la sogs pa yin te/bdag po'i nga rgyal zhes bya ba ni 'jam pa'i rdo rje'i nga rgyal lo/ /'jug par gtogs tshe zhes bya ba ni mig la sogs pa'i shes pa 'jug pa'i tshe na'o/ /rdzogs pa'i sangs rgyas kyis sprul pa'i gzugs rdo rje la sogs pa nyid du yul rnams lhag par mos par byas pa ni rdzogs sangs rgyas yul zhes bya ste/des bdag nyid yang dag par mchod par gyur bar lhag par mos par bya'o/ /phyi rol gyi bya ba rnams la mnyam par ma bzhag pa'i rnal 'byor bya ba de bshad pa ni/ 'jam dpal zhes bya ba la sogs pa smos pa yin te/ 'jam dpal rdo rje'i kun bdag nyid/ /ces bya ba ni ji skad du bshad pa'i dkyil 'khor dang / dkyil 'khor gyi bdag po'i ngo bo nyid 'di dag thams cad ni 'jam pa'i rdo rje'i rang bzhin yin pas na de skad ces bya la/ de lta bu'i nga rgyal dang ldan par bya ste/de lta bur gyur pas bya ba thams cad rdzogs par bya'o zhes bya ba'i tha tshig go/ /yang ji lta bur gyur pas she na/ yul de gzugs la sogs pa yang de ltar bsgom zhing lhag par mos par bya'o/ /ji ltar bsgom zhe na/ ngo bo nyid kyi yul zhes bya ba ste/ye shes kyi so sor snang ba'i mtshan nyid can gyi yul lo/ /de bzhin du de ni rjes su 'gro ba yang yin te/ de dang ldan pas na de skad ces bya'o/ /de bzhin du rigs pa nyid ni phyir don dang bral ba'i phyir ro/ /yang ji lta bu zhe na/ /rang rang dag par rnam par gnas//zhes pa ste/ rang rang gi mtshan nyid dag pa ni rnam par snang mdzad la sogs pa'i ngo bo nyid du ji lta ba bzhin du gnas pa'o/ /yang ji lta bu zhe na/ rang rig ces bya ba ste/ rnam par mi rtog pa'i ye shes mchog gis rtogs pa'i chos gang yin pa de'i ngo bo nyid dang / de bzhin nyid ces bya ba spyi'i mtshan nyid kyis gnas pa'o//ji ltar yang dag par gnas she na/ rdo rje 'chang gi ngo bos so/ /de nyid kyis na 'jam pa'i rdo rje'i rang bzhin yin no/ /rtag pa la sogs par yang dag par brtags pa 'ba' zhig tu ma zad kyi/ rang nyid kyis tha mal pa'i rnam par rtog pa yang spangs par gyur pa yin la de nyid kyi phyir ma 'dres pa nyid dang brtan pa nyid kyi phyir dag pa'o//sems dpa' ni de kho na nyid rtogs par gyur pa yin pas de dang yang dag par ldan pa ste/ 'jigs pa thams cad rnam spangs pa//zhes bya ba'i don to/ /de yang gang ci byed pa de thams cad ni thams cad ces bya'o zhes bshad pa'i phyir ro//de ltar na ni gal te mi dge ba gang cung zad byas pa la yang nyes pa med par gyur na de ni mi rigs te/ byang chub sems dpa' ni rang nyid kyi tshul khrims kyi mgo gcod par byed pa mi 'thad pa yin no zhe na/de nyid kyi phyir brtag cing zhes bya ba la sogs pa smos te/ sngar bshad pa'i rim pa de nyid kyis bya ba rdzogs par byas pa ni mchog yin pas bdag nyid 'khor lo mchog tu lhag par mos par byas pas mchog mtha' yas pa'i rnam par 'gyur ro/ /tshad med pa ni re re'i rnam pa yang mtha' yas shing tshad med pa yin la rtag tu zhes bya ba ni skad cig re re zhing rtag tu de ltar lhag par mos pa'i phyir ro//rnal 'byor pa mchog ces bya ba ni rtag tu mos pa brtan pa gang yin pa'i mchod pa de ni mchog tu mtha' yas ba'i dge ba yin pas de la mi dge ba'i rnam pa dri ma tsam yang ga la yod ces bya bar dgongs so//de ltar yin pa na mi dge ba yang dge bar 'gyur ba'i bsam pa dang ldan pa'i tshul 'di ci dgar bya bar rung ba yin nam zhe na/ ma yin te don ji lta ba bzhin yongs su mi shes pas ni ma yin no/ /de yang 'dir mi dge ba'am lung du ma bstan pa gang ci yang rung ba de rigs pas byar rung bar 'gyur te/lan 'ga' mi nus pa'am mi dge ba yod pa de thams cad du rnal 'byor 'di ni lam thams cad yongs su sbyong ba yin no/ /de ltar na rim gyis mi dge ba thams cad yang dag par spang bar bya'o zhes pa ni 'dir 'di'i don yin gyi 'dis bya ba dang bya ba ma yin pa thams cad bya'o zhes bya ba'i don ni ma yin te/srog gcod pa la sogs pa ni bag med par 'bad pas byed la bdag nyid ni g.yang sar ltung ba la sogs pas 'jigs par mi byed pa dang / 'dod chags dang zhe sdang dang gti mug kun du 'phel bar byed pas na tshul khrims dang ting nge 'dzin dang shes rab yongs su dag par mi 'gyur bas de rnams kyis byang chub ga la thob/de nas de ni rang gi log rtog rnams spangs pa zhes bya ba 'dis bkag pa yin no/ /zas la bya ba'i khyad par bstan pa ni rang snying zhes bya ba la sogs pa smos te/rang 'khor gtso bo zhes bya ba ni rang gi 'khor lo dang bcas pa'i bdag po'o/ /rang gis bon zhes bya ba ni yi ge maM ngo / /dmigs shing zhes bya ba ni bsam pa'o/ /rang snying de nyid kyis zhes bya ba ni rang gi zas/ /b+h+rUM AM dzr-i'aM khaM hUM zhes bya ba'i yi ge sangs rgyas thams cad kyi rang bzhin can gyi ye shes kyi bdud rtsir byas te/dngos po thams cad kyi chos nyid gang yin pa ye shes lnga'i bdud rtsi snying po'i rang bzhin can oM gyi 'od zer gyis phyogs bcu nas bkug la/ de dang ro gcig par gyur pas dag pa des rang gi bdag po'i 'khor lo tshim par bya zhing mnyes par bya'o//zas kyi cho ga 'di lta bu gang yin pa 'di ni phyi rol gyi sbyin sreg gi cho ga yin par shes par bya'o//de yang rang gi snying ga'i me thab kyi lha rnams phyi rol gyi tshul gyis tshim par byed de/ji ltar phyi rol gyi me thab tu mar la sogs pas byed pa dang 'dra la/yid kyi sbyin sreg ni sems tsam yin pas phyi rol la ltos pa med par shes par bya'o/ /bla na med pa'i sbyin sreg ni ye shes kyi mes phung po la sogs pa'i bud shing nyid sreg par byed pas bla na med pa'o/ /de ltar ro'i longs spyod la bya ba bshad nas/ /gzugs la sogs pa longs spyod rnams la yang bsgre bar bya ba bshad pa ni de ltar zhes bya ba la sogs pa smos pa yin te/de ltar zhes bya ba sngar bshad pa'i rim pas rang lha zhes bya ba ni rang gi 'dod pa'i lha ste/ de'i bdag nyid can gyi ngo bo nyid las byung bas bdag ste rang nyid dang gzhan te/ rang gi lha'i bdag nyid kyi rang bzhin las byung bas 'dod pa'i yon tan lngas mchod par bya'o/ /sangs rgyas bzhed pa yin zhes bshad pa 'di ni 'di skad ston te/ji lta bu'i dam tshig gi spyod pa 'di ni sngags pa 'di rnams la sangs rgyas thams cad kyis gnang zhing dgyes pa yin te/de yang gzhung las/ dka' thub sdom pa mi zad pa/ /bsten kyang 'grub par mi 'gyur gyi/ /'dod pa'i longs spyod thams cad la/ /bsten na myur du 'grub par 'gyur/ /zhes ji skad gsungs pa lta bu'o/ /de yang gang gi phyir sems bde bar gyur na mnyam par 'jog par 'gyur ro//mnyam par gzhag pa'i sems kyis yang dag pa ji lta ba bzhin du shes pa'i mtshan nyid ni byang chub yin la/ sdug bsngal ba ni ting nge 'dzin dang byang chub gnyi ga ma yin te/ des na 'dis gsang sngags la brnyas shing skur pas ring po mi thogs par 'chi bar 'gyur la/shi nas kyang dmyal bar ltung ngo / /de yang / lus ngag sems ni bder gnas na/ /byang chub thob pa des mthong 'gyur/ /gzhan du dus min 'chi ba dang / /dmyal bar nges par 'tshed par 'gyur/ /zhes ji skad gsungs pa lta bu'o/ /de bas na kha na ma tho ba med cing rnyed sla ba'i yul de sngags pa rnams kyis cho ga bzhin du longs spyod par bya'o//longs spyod rnam par dag pa bshad nas/lus rnam par dag pa bstan pa'i phyir/ las sogs las gang zhes bya ba la sogs pa smos de/ lus la sogs pas bsgrubs pa'i las la nye bar gdags pas lus sogs zhes bya ste/ lus la sogs pa'i las gang yin pa de dang de thams cad kyis sangs rgyas la mchod pa nyid du bya ba dang /rjes su mthun pa'i 'gro ba'i don gang yin pa de rnams kyang bya'o zhes bya bar sbyar ro/ /ji ltar na de ltar byed nus she na/ de'i phyir/ rtag tu mnyam par gzhag par bya/ /zhes bya ba smos te/ las thams cad la ci rigs par mchod par bya ba dang / mchod pa'i bdag nyid can gyi ltar yid la bya ba dang / 'gro ba'i don yid la bya ba de mnyam par 'jog pa nyid kyis bya'o/ /rjes su mthun pa zhes bya ba ni spyod yul yongs su dag pa'i mdo'i rjes su 'brangs nas shes par bya ste/grong khyer du 'jug pa na sems can thams cad thar pa'i grong khyer du 'jug par bya'o zhes yid la bya'o/ /phyir 'byung ba ni sems can thams cad 'khor ba las gdon par bya'o zhes bya ba la sogs pa'o/ /rang gi lha'i nga rgyal tsam gyis kyang las rnam par dag par bshad pa ni/lus ngag ces bya ba la sogs pa smos pa yin te/ lus kyi las dang ngag gi las gang ci yod pa de 'jam pa'i rdo rje la sogs pa'i nga rgyal gyis che ba nyid du byas pa yin pas de go rims bzhin du phyag rgya dang sngags kyi rang bzhin can no/ /de bas na las de dang de byas shing bsgrubs pa de dag tsam nyid kyi sangs rgyas thams cad la mchod par bya'o//de ltar na phyag rgya bcings pa tsam dang sngags brjod pa tsam gyis kyang sangs rgyas thams cad la mchod pa byas par 'gyur ro/ /de ltar na mi dge ba'i las dman pa dag de lta bu'i tshul gyis byas pa dag ji ltar dge ba yin te/de ni gzhan dag gi mi dge ba yin no zhe na/ de ni ma yin te/bsam pa'i khyad par gyis na las dman pa nyid du ma grub pa yin te/ gang gi phyir 'di ni dngos po gcig la yang bsam pa tha dad pa yin la/ dbye ba des rgyu tshogs pa'i dbye ba las las kyi dbye bar 'gyur bas de'i phyir de bshad pa ni dngos po gcig la yang zhes bya ba la sogs pa smos te/dngos po gcig la yang kun du rtog pa'i dbang gis rnam pa sna tshogs par snang bar 'gyur te/ ci rigs par grol ba dang / sdug bsngal ba dang / bde ba skyed par byed pa'i las kyi khyad par ma lus pa 'byung bar 'gyur ro//de yang 'di ltar sems dang bas kun nas bslang pa dang / thar pa'i don du yongs su bsdos pa'i sangs rgyas la phyag 'tshal ba ni grol zhing thar pa'i don du 'gyur la de bde ba'i don du yongs su bsdos na ni bde ba'i don du 'gyur ro/ /'tshe ba'i bsam pa las byung ba 'am sems can rnams la gnod pa'i don du yongs su bsdos pa ni sdug bsngal gyi rgyur 'gyur ro//de bas zhes pa gang gi phyir de ltar yin ba des na lus la sogs pa'i las dge ba dang mi dge ba gang yin pa de ni kun du rtog pa'i dbye ba las 'gyur ro/ /de bas na mi bden pa'i kun du rtog pa thams cad las nges par grol zhing spangs pa'i ye shes ni ji skad bshad pa'i sangs rgyas thams cad la mchod pa dang /sems can thams cad kyi don yid la byed pa la rtog ste zhes pa mi dge ba'i dogs pa ci zhig yod de med pa nyid du rigs so zhes bya ba'i tha tshig go//de ltar na thams cad bya ba yin pas mi dge ba yang byar rung bar sems pa ni thal ches pas sngar bkag pa nyid yin no/ /dam tshig las 'das par gyur pa la dam tshig nyams pa la bslang bar bya ba'i phyir don yod rdo rje dkyil 'khor gyi bdag por gyur pas snying ga'i sna tshogs rdo rje la yi ge khaM bsams nas/thams cad dag pa zhes bya ba chos thams cad rang bzhin gyis yongs su dag par yid la sems shing sngar byas pa ltar bdag nyid dbang bskur bar bya'o/ /sbyin dang bcas pa'i zhes bya ba ni yon tan dang bcas pa'o/ /bya zhes bya ba ni dbul ba'o//rang gi 'khor lo zhes bya ba ni 'jam pa'i rdo rje'i dkyil 'khor ro/ /thun mtshams su yang zhes bya ba ni nyi ma gung dang / nyi ma'i mtha' dang / mtshan phyed la yongs su rdzogs pa'i dkyil 'khor yud tsam gyis mngon du byas la/ mchod pa dang bstod pa la sogs pa yang snga ma bzhin byas nas/gnyid ldog pa'i dus su nyal bar bya'o/ /shes rab ni de kho na nyid la dmigs pa'o/ /snying rje ni 'gro ba la phan pa'i bsam pa ste/ de gnyis dang ldan pa dang thabs dang shes rab kyi phyag rgya dang yang ldan pa'o/ /'dir gnas skabs kyi dbye bas rnal 'byor pa ni rnam pa bzhi ste/las dang po pa dang ye shes la cung zad dbang ba dang / ye shes la dbang thob pa dang / yang dag par ye shes la dbang ba'o/ /'di rnams gang gi bya ba gang yin pa de go rims ji lta ba bzhin du tshigs su bcad pa bzhi ston to/ /ldang tshe ni gnyid sad pa na'o/ /lha mo'i glu ni/sems can khams na gnas kyi dbang phyug ces bya ba la sogs pa'o/ /legs zlos dang po las can yin/ /zhes bya ba ni las dang po pas cho ga ma lus par yang dag par bzla bar bya ba ste/ting nge 'dzin gsum rgya cher mngon du byas la bzlas brjod bya'o zhes pa'i don to//gang rags pa'i sku'i dkyil 'khor ni yud tsam gyis mngon du byed par nus la/phra ba'i sa'i snying po la sogs pa dang / sku rdo rje la sogs pa mngon du byed par mi nus pas/ sngags kyi tshul khrims dang brtul zhugs dang yang ldan pa dag ni de'i mthu thob pas/ de ni ye shes la cung zad dbang bzhes bya ste/de ni thun mtshams thams cad la yud tsam gyis dkyil 'khor mngon du byas la/ de la mig la sogs pa dang skul sogs pa byin gyis brlab pa byas te/ rjes su mnyes par bya ba dang / mchod pa dang / bstod pa dang / bdud rtsi myang ba sngon du 'gro ba dang / bag yod pas bzlas pa bya'o//gang rnam pa thams cad du rab tu rdzogs par spro ba dang sdud par byed pa'i sbyor bas dkyil 'khor yud tsam gyis mngon du byed par nus pa de ni ye shes la dbang thob pa zhes bya ste/'di yang ye shes babs pa thob pa nyid las 'gyur gyis/ ma thob ba las ni ma yin te/de nyid kyis na cung zad ces smos pa yin no/ rnal 'byor pa des ni 'bras bu'i mthar thug par bgrod par bya ba'i phyir rnal 'byor de nyid nyin dang mtshan du bya'o/ /rang gi don gyi mthar thug par son pa'i rnal 'byor pa ni ye shes la yang dag par dbang thob pa yin la/ de ni bsam gtan tsam gyis 'gro ba'i don byed par 'os pa yin no//gang gis byed ce na/ 'jig rten gyi khams thams cad kyi phra rab kyi nang du chud pa'i sku dang gsung dang thugs kyi dkyil 'khor/ gzugs brnyan dag nyid gzugs kyis ni/ /zhes bya ba sprul pa'i rang gi gzugs zhes bya ba'i don to//de ltar sngon du bsnyen pa byas pa'i rnal 'byor pa nyid kyis dkyil 'khor bri bar byas la/ de yang 'dod pa'i dngos grub tha mal pa'am/ mchog thob pa'i mtshan ma rmi lam la sogs pa'am/ sems gnas pa'i mtshan ma rgyud las gsungs pa lan gcig ma yin pa lan mang du 'am du ma thob pa ni/de kho na nyid gsum gyis mchod pa cho ga bzhin du byas la/ dkyil 'khor gyi dbus su 'dug pa'am/ sgo'i dbus su 'dug par lhag par mos pa byas la snga ma bzhin du yan lag bzhi rdzogs par bya ba dang / de kho na nyid gsum gyis byin gyis brlab pa'i rim pas dngos grub stsol bar mdzad pa'i skyob pa rnams la mchod par bya'o zhes bya ba'i don to//bshad zin pa'i don nyid lhag ma dang bcas par smos pa ni/ rang ngam zhes bya ba la sogs pa smos pa yin te/rang ngam zhes bya ba ni dngos grub sgrub pa don du gnyer ba'o/ gzhan gyis gsol ba btab pa zhes bya ba ni dbang bskur ba don du gnyer ba'i slob mas so//gzhan don 'bad par byed pas kyang / /zhes bya ba ni sems can gyi don chen po mthong zhing bskul na bri bar bya'o/ /de yang gang gi tshe shes she na/ slob mas lan gnyis lan gsum du gsol pa btab par gyur cing /gal te yo byad tshogs par gyur na yang de'i tshe lte bar bkod pa'i nyi ma'i dkyil 'khor la gnas pa'i hUM gi 'od zer rnams kyis snying gar gnas pa'i kaM las byung ba'i sdig pa mdog gnag pa sha za dang 'dra bar mi sdug pa sna rtser byung ba dang / yi ge hUM de yang snying gar phyin pa na rdo rje gnod sbyin gyi gzugs g.yon brkyang bas gnas pa/mche ba gtsigs pa/ lto ba 'phyang ba/ mdog gnag pa/g.yon pa'i sdigs mdzub mche ba ltar bsgreng ba/ phyag g.yas pa mche ba dang bcas pa 'phyar ba/ khro bo'i gzugs su byas pa phyung ste/ oM badzra yak+Sha kro d+ha khA da khA da pA paM ni a s+ya hUM phaT ces bya bas de'i sdig pa shin tu gsol du bcug la/yang slob ma de yi ge saM las kun du bzang po'i gzugs su bsams nas/ de'i sems kyis bgegs bdud rtsi thab sbyor gyi phur bus btab la/phur bu'i 'od zer shin tu drag cing 'jigs su rung bas gdug pa thams cad shin tu bsregs nas/de bsrung ba'i don du slob ma'i snying gar a las byung ba'i zla ba'i dkyil 'khor la dbyangs kyi yi ge tha ma las byung ba'i sna tshogs rdo rje gnas par bsam par bya'o/ /'khor lo la gnas tshul bzhin bzlas/ / zhes bya bas ni sngon du bsnyen pa bya ba ston te/ bzlas zhes bya ba smos pa der gang gi sngags ji srid kyi bar du bzla ba bshad pa ni/ 'khor lo can sngags zhes bya ba la sogs pa smos pa yin te/ 'khor lo can zhes bya ba ni thugs kyi gtso bo'am/gsung gi gtso bo'am/ sku'i gtso bo'i'o/ rang gi dkyil 'khor la ni rang gi lha 'jam pa'i rdo rje la sogs pa'i'o/ /bkas gnang zhes bya ba ni bkas thob par gyur pa ste/ de ni bzlas pa'i mtshan nyid yin no/ /sngags bzla bar bya ba yin la/ de bas na sngags btu ba bshad pa ni/ 'byin pa zhes bya ba la sogs pa smos pa yin te/ badzra d+h+r-ika ces bya ba la sogs pa'i 'byin pa'i sngags gang yin pa de dang spel bya'o//snying po'i sa bon ni yi ge hUM la sogs pa gang yin pa de dang spel bar bya ba ste/ de gzhan dag dang zhes bya ba'i don to/ /ming ste mtshan gyi yi ge dang po klad kor dang cas pa dang yang spel zhing sngags btu bar bya'o/ /gang dang spel zhe na/de nyid gsum dang man ngag ji lta ba bzhin du spel lo/ /phreng ba'i sngags ni ji skad gsungs pa nyid yin gyi btu bar bya ba ma yin no/ /gzhan dag ces bya bas ji skad gsungs pa'i phreng ba'i sngags rnams kyang de kho na nyid gsum dang spel te btu bar bya'o zhes kha cig 'chad do/ /kha cig ni snying po zhes bya ba'i sgra'i don gyi shugs kyis phreng ba'i sngags kyang 'jug pa yin no zhes 'chad do//sngags kyi skabs yin pas phyag rgya dang snying po dang rigs pa rnams kyi rang bzhin yang smos pa ni/ sku dang zhes bya ba la sogs pa smos pa yin te/ phyag rgya ni rnam pa bzhi ste/ de la sku dang gsung dang thugs rdo rjer bshad ces bya ba ni phyag rgya'i go rims ji lta ba bzhin du las kyi phyag rgya dang / chos kyi phyag rgya dang / phyag rgya chen po dang / gsang ba gsum gyi dbus na gnas pa'am/ de'i ngo bo nyid kyi phyag rgya ni dam tshig gi phyag rgya ste/de ni ye shes sems dpa' yin no/ /sa bon zhes bya ba ni gzugs kyi rgyur gyur pa'i sngags so/ /zhi la sogs pa rab bskul bas/ /zhes bya ba ni las bskul ba dang spel ba'i sngags rnams so/ /rnam kun du zhes bya ba ni mthu che ba nyid yin pa'i phyir rnam pa thams cad du bzla bar bya'o//sems dag pa'i rgyu'i gtso bo bshad zin pa dang / ma bshad pa rnam pa gsum bstan pa'i phyir/ci rigs par zhes bya ba la sogs pa smos te/ 'gog pa'i 'khor lo goms pa yis/ /zhes bya ba ni sngar ji skad du bshad pa'i srung ba'i 'khor lo yun ring du goms par bya bas so/ / de ltar na de dag ni sngon du bsnyen pa'i cho ga yin no// //sa sbyang ba'i cho ga bstan par bya ba'i phyir/ bgegs rnams zhes bya ba la sogs pa smos te/ de la slob dpon gyis dang po kho nar nyin zhag shis pa la 'jam pa'i rdo rje'i ting nge 'dzin gsum byas la/ shis shing nyams dga' ba'i dkyil 'khor gyi sa gzhi der 'dug ste/gnas kyi bdag po la sogs pa la gtor ma byin pa la sogs pas mchod pa la sogs pa bstabs te/ rmi lam la sogs pa de rnams las/ /gnang ba thob par shes pa dang / /sangs rgyas la sogs lhag gnas bya/ /zhes bya ba sangs rgyas dang rdo rje 'chang ba la sogs pa nam mkha'i ngos la bzhugs pa las rjes su gnang ba nod par bya'o//de nas srung ba'i 'khor lo cho ga bzhin du bsgoms pa'am/ drag po'i sbyin sreg gis bgegs bskrad la/ sbyin sreg byed pa'i phyogs ltar na slob ma bsrung ba'i phyir zhi ba'i sbyin sreg kyang byas la/sa de phur bus btab nas las thams cad pa'i chu'am yungs kar bcug pa'i chu dang thal ba la de bzlas pa gtor la/ sa de la gsol ba gdab ces bya ba ni skyob pa sangs rgyas zhes bya ba la sogs pa'i tshigs su bcad pa gnyis kyis sa'i lha mo la gsol ba gdab ces bya ba'i don to//de nas ci rigs par mchod yon dang gtor ma byin cing mchod de sbyin sreg gis kyang tshim par byas la sa'i lha mo yid kyis bteg ste nam mkhar gzhag par bya'o/ /de nas sa de bgegs med par shes nas dngos grub chung ngu dang bar ma dang / mchog gi dbye bas bus mo nub tsam mam/rked pa tsam mam/ snying ga tsam brkos te/ thal ba dang sol ba dang / skra dang phub ma dang / rdo dang rus pa dang / gyo mo dang gseg ma la sogs pa bsal la/ sa de'am de las gzhan pa'i sa dag cing dri zhim pa'am chu dri zhim pas brlan pas khung bu bkang ste/ hUM yongs su bzlas pa'i dri zhim po'i chus chag chag btab la brdungs te lag mthil ltar mnyam par bya'o//de ltar byas pa'i khung bu dgang ba la yang rim pa 'di yin te/ mchod yon dang gtor ma sbyin pa la sogs pa'i cho ga nyid bya ba'o//yang de'i tshe sa'i lha mo phab la sa phyogs de byin gyis brlabs par bsam par bya'o//'dir tshigs su bcad pa ni/ zug rngu'i nyes pa thams cad ni/ /gal te dbyung bar mi nus na/ /lag pas bya ba cing gsang sngags bzlas/ /de yi sbyang ba'ang de nyid yin/ /khang thog dang ni rdo leb dang / /gtsug lag khang sogs chu 'gram mam/ /sngar ni sbyang ba byas pa'i gnas//ma brkos kyang ni dag pa yin/ /zhes bya ba yin no/ /der ni bdud rtsi thab sbyor gyis bgegs bsal ba de bzlas pa'i yungs kar dang / chu dang thal ba gtor te shar phyogs nas brtsams te/ ba'i rnam pa lnga la de bzlas pas nye bar byugs la/ spos chus bsang gtor bya ba tsam 'ba' zhig bya'o//de nas dkyil 'khor gyi gnas de sgo bzhi pa'i khang pa brtsegs pa'i nang du chud la/ phyogs bzhi nas skar khung dra ba can dang / rta babs kyis bskor ba/ me tog gi chun 'phyang dang / dril bu btags pa'i ba dan bzang po sna tshogs pas thams cad du khyab pa/bla re bre ba dang las thams cad pa bzlas pa'i dris nye bar byugs pa de bzlas pa'i sman dang rin po che dang 'bru dbus su brkos pa'i nang du gzhug par bya'o/ /de lta bu'i sa sbyang ba ji lta bus sngar byas pa dang / de'i rjes la gang zhig bya ba de bstan pa'i phyir/ 'jam pa'i rdo rje'i zhes bya ba la sogs pa smos te 'jam pa'i rdo rje'i bdag nyid can gyi rnal 'byor gsum po dang ldan zhing mnyam par bzhag nas/ de dang 'dra bar byas pas sngon du bsnyen pa rdzogs par byas la/grogs shin tu bya ba dang mchod pa ste/ dkyil 'khor gyi yo byad kyi tshogs pa dang yang ldan pa'i slob dpon des dkyil 'khor gyi gnas ji skad du bshad pa'i cho gas yang dag par sbyang bar bya'o//de sbyangs nas bgegs mthar byed pa'i sbyor ba'am/ rang gi lha'i sbyor bas gnas la bdag nyid dbang bskur te gdug pa thams cad gzhom zhing tshar gcod par bya'o//de nas oM b+hu khaM zhes bya ba 'dis sa nam mkhar byas la/ de nas hUM laM hUM zhes bya ba 'dis rdo rje'i rang bzhin du byas nas oM me di nI zhes bya ba la sogs pas byin gyis brlab par bya'o/ /'di ni sa sbyang ba'i cho ga'o// //sa yongs su gzung ba'i cho ga bstan pa'i phyir/ sngar bzhin zhes bya ba la sogs pa smos te/ srung ba'i 'khor lo bsgoms pas bgegs gzhom pa dang sbyor ba'i bdag ces bya ba 'jam pa'i rdo rje'i ting nge 'dzin gsum mngon sum du byed pa de la de skad ces bya'o/ /ting nge 'dzin gsum pa ni lan du mar bstan pa yin pas de rnam par gzhag par bya ba'i phyir/bsnyen sogs zhes bya ba la sogs pa smos te/ bsnyen pa chung ngu nas rjes su mnyes par bya ba'i mthar thug pa de gang yin pa de thams cad dang ldan pa ni dang po'i sbyor ba dang ldan pa yin te/ dang po'i sbyor ba zhes bya ba'i ting nge 'dzin dang ldan pa gang yin pa de zhes bya ba'i tha tshig go//de'i 'og tu dang po rang gi dkyil 'khor rab tu phyung ba nas tha mar bdud rtsi myang ba'i bar du byed pa'i rnal 'byor ba de ni 'khor lo'i rgyal po mchog gi sbyor ba'i bdag nyid du 'gyur te/ 'di ni dkyil 'khor gyi rgyal po mchog ces bya ba'i ting nge 'dzin dang ldan pa yin no zhes bya ba'i don to//de'i 'og tu 'khor lo'i las dkyil 'khor gyi las dkyil 'khor gyi lha rnams re re zhing yang rdzu 'phrul gyi cho 'phrul la sogs pa'i phrin las rnam pa sna tshogs pa gang yin pa des las mchog byed ces bya ba ni 'gro ba'i don rnams byed pa ste/ rnal 'byor pa de ni las kyi rgyal po mchog gi sbyor ba'i bdag nyid can du 'gyur bas 'di ni las kyi rgyal po'i mchog ces bya ba'i ting nge 'dzin te/ting nge 'dzin de yod pa zhes bya ba'i tha tshig go/ /yin zhes bya ba ni ting nge 'dzin gsum po de dag ni 'di yin no zhes bya ba'i don to/ /rang bzhin bstan pa'i phyir/ de lta'i zhes bya ba la sogs pa smos te/'dir de ltar 'jam pa'i rdo rje'i ting nge 'dzin gsum la gnas pa'i slob dpon ni sangs rgyas thams cad kyi bdag nyid can dang / rdo rje 'chang gi bdag nyid can yin la/ de'i dkyil 'khor gyi sa gzhi'i dbus na legs par gnas par gyur cing / rdo rje dang dril bu 'dzin par byed pa la'o//dpa'o zhes bya ba ni sangs rgyas thams cad dang / rdo rje 'chang ba dang 'jam pa'i rdo rje'i ngo bo nyid kyi nga rgyal brtan pa dang ldan pa'o/ /yang na/ bdag nyid rang gi rdo rje can/ /phyag na rdo rje'ang bdag rang nyid/ /bdag ni sangs rgyas rgyal po che/ /stobs chen rdo rje can bdag yin//rnal 'byor dbang phyug rgyal po bdag /phyag na rdo rje brtan bdag ste/ /bdag po rdo rje chen po bdag /byin gyis brlab pa mi 'dor ro/ /zhes bya ba'i tshigs su bcad pa gnyis kyis nga rgyal brtan par byas pa la/ sku dang gsung dang thugs kyi rang bzhin can gyi rnam par snang mdzad la sogs pa'i sbyor ba dang ldan pa des phyogs bzhir gnas pas/'di ni de bzhin gshegs pa thams cad kyi sku dang gsung dang thugs kyi gsang ba gcig tu gyur pa'i ngo bo bcom ldan 'das rdo rje 'chang ni dkyil 'khor thams cad kyi don dam pa yin la/ de bas na dkyil 'khor ni de'i sku dang gsung dang thugs kyi rang bzhin nyid du tshigs su bcad pa gcig gis mdor bstan pa yin la/gsum gyis ni bshad pa yin te/ dkyil 'khor de bshad du gsol zhes pa bka' stsol cig /gsungs shig /ston cig ces bya ba'i tha tshig go//ji lta bu zhe na/ de bzhin gshegs pa kun zhi ba/ /zhes bya ba ni sgrib pa thams cad spangs pas shin tu rnam par dag pa'i thugs zhes bya ba'i tha tshig go/ /de bzhin gshegs pa kun gyi gnas/ /zhes bya ba ni me long lta bu'i ye shes kyi rang bzhin gyi sku zhes bya ba'i tha tshig go//chos kun bdag med pa yi mchog /ces bya ba ni chos thams cad kyi mchog ni bdag med pa yin te/ bdag med pa nges par ston pa'i gsung zhes bya ba'i tha tshig go/ /dkyil 'khor zhes bya ba ni de bzhin gshegs pa thams cad kyi zhes bya bar sbyar ro/ / mtshan rnams ni sum cu rtsa gnyis so/ /de'i 'khor yin pas dpe byad rnams kyang bsdu bar bya'o/ /de'i mi mthun ba'i phyogs ni mtshan ma yin ba'o/ /kun du bzang po ni de bzhin gshegs pa'o/ /de rnams kyi sku'i mchog ni sku'i tshogs yin te/ dper na stobs kyi mchog la stobs kyi tshogs zhes bya ba dang 'dra'o//zhi ba ni shin tu rnam par dag pa'o/ /chos kyi mchog ni chos kyi tshogs te/ /de las byung ba ni chos kyi dbyings shin tu rnam par dag pa'i rgyu mthun pa las byung ba zhes bya ba'i tha tshig go/ /ye shes kyi spyod pa ni byang chub kyi spyod pa ste/de la rnam par sbyor bar byed pa'o/ /de nyid kyis na de'i las su bya ba shes pa'i phyir ro/ /sems dpa' kun gyi zhes bya ba ni sangs rgyas dang byang chub sems dpa' thams cad kyi'o/ /sems chen po zhes bya ba ni byang chub kyi sems so/ /dag pa ni sgrib pa thams cad spangs pa'i phyir ro//de'i dag pa ni gzhig par bya mi nus pa nyid dam/ nyon mongs pa glo bur ba nyid kyis na rang bzhin dri ma med ces bya'o/ /kha lo sgyur zhes bya ba ni gdul bar dka' ba'i gdul bya 'dul bas kha lo sgyur ba'o/ /de nas zhes bya ba ni gsol ba btab pa'i rjes thogs la'o//'jam pa'i rdo rje'i sbyor ba la gnas par gyur pa nyid dang / 'gro ba sems can gyi khams ma rig pa'i mun nag gis khebs pa la brten cing gnas par bltas nas/ khros pas zhes bya ba khro bo'i 'gyur bas smin ma bsdus pa dang / mche ba gtsigs pa dang /bsgyings pa'i spyod pa la sogs pa dang ldan pas hUM badzred tiSh+Tha zhes bya ba 'dis sprul pa'i 'khor lo nam mkha' la legs par bteg par bya'o/ /yi ge ma Ta sa nyi zla'i mig ces bya ba dang / rang mig ces bya ba'i tshig 'di gnyis kyis ni rdo rje lta ba bshad pa yin pas/ ma las ni mig g.yas pa nyi mar byas shing /Ta las ni mig g.yon pa zla bar byas la/ hUM gis mig 'bras bskal ba'i me lta bur byas te lta ba 'dis 'gro ba kun la bltas pa nyid kyis phyogs thams cad du nye bar sbar zhing snang bar byas la dkyil 'khor gyi sa gzhi yongs su bskor bar bya'o/ /ji ltar bskor bar bya zhe na/rkang 'og ces bya ba la sogs pa smos te/ yi ge a las rkang pa gnyis kyi mthil du sna tshogs rdo rje 'bar ba bsams la/ de lta bur gyur pa'i rkang pa gnyis kyi rol pa'i stang stabs gang yin pa des sa la sna tshogs rdo rje kun du 'dra ba'i 'gros gang la yod pa de ni rdo rje'i 'gros kyi rol pa'o//de'i gom pa 'jog pa gang yin pa de ni rol ba'i rdo rje'i 'gros kyi gar te rol pa'i rdo rje'i 'gros ji ltar 'byung bar 'gyur ba de ltar gar byed cing / lus ngag ces bya ba la sogs pa'i tshigs su bcad pa gnyis kyis bskrad par bya'o/ /de nas dkyil 'khor gyi sa gzhi dris byugs la me tog dang /mar me la sogs pa dang / sgo bzhi dang mtshams bzhi nas spos snod las bdug pa gtul ba dang / gar dang glu la sogs pas yang dag par mchod la/ lag pas reg cing dkyil 'khor gyi bdag po'i sngags brgya rtsa brgyad dang /yi ge brgya pa lan bdun bzlas la de nyid du mnyam par gzhag bzhin du nyal bar bya'o/ /de ltar na 'di ni sa yongs su gzung ba'i cho ga'o/ /nyin zhag gnyis la ni lhag par gnas par bya ba yin pas de bstan phyir/ sa ni zhes bya ba la sogs pa smos te/ nang par gyi dus nyid du bdag po'i sbyor ba byas pa slob dpon gyis bgegs mthar byed nyid lte ba man chad rdo rje rtse gcig pa 'dra ba/sku stod rang gi rnam pa 'dra zhing rang gi mtshan ma bsnams pa'i phur bu blos bsams la de nyid g.yon pa'i khu tshur gyis bzung ste/ g.yas pa'i rdo rje 'bar ba'i tho bas brdung zhing /oM g+ha g+ha zhes bya ba'i sngags brjod cing dkyil 'khor gyi sa'i dbus su brgya byin 'khor dang bcas pa la sogs pa phyogs bcu'i bgegs kyi tshogs rnams phur bus btab ste gzhom par byas/ de nas sa shin tu bgegs dang bral ba dang / rdo rje 'bar ba'i rang bzhin can du gyur pas 'bar ba'i 'od zer rnon po rnams kyis khyab pa'i 'od zer 'di la yod pas de skad ces bya'o//de ltar bsams nas phyi rol du go rims ji lta ba bzhin du yi ge baM las rdo rje 'bar ba'i dra ba/ yi ge hUM las rdo rje 'bar ba'i rab/ /laM las byung ba'i dbang chen gyi dkyil 'khor zur bzhi pa ser pos phyogs bcing ba dang /raM las byung ba'i me'i dkyil 'khor gru gsum pa dmar pos mtshams bcing bar bsams la sa'i lha mo lhag par gnas par bya'o/ /de yang dbus su dri'i dkyil 'khor la sa'i lha mo yi ge baM las byung ba mdog ser ba lag na bum pa thogs pa legs par mchod la/skyob pa sangs rgyas zhes bya ba la sogs pa lan gsum brjod la gshegs su gsol te de nyid du thim par bya'o/ /phyi dro'i dus su khrus byas shing lus dri zhim po dang rgyan gyis brgyan cing gos dmar po bzang po bgo ba dang / me tog gi phreng ba btags shing kha dri zhim par byas la/dang po kho nar dkyil 'khor gyi sa gzhi dri zhim pos byugs pa dang / me tog dri zhim po sna tshogs pa gcal du bkram pa yang byed du bcug ste rang nyid 'jam pa'i rdo rje'i rnal 'byor byas pa lha rnams kyi gnas su zla ba dang nyi ma la sogs pas dkyil 'khor rnams byas te/de rnams la rang rang gi gdan ji lta ba bzhin bsams la/ der nam mkha' la bzhugs pa'i 'jam pa'i rdo rje'i dkyil 'khor spyan drangs nas bzhugs su gsol la/ mtshams bcing ba la sogs pa dang / mchod pa la sogs pa yang byas nas bum pa lhag par gnas par bya'o//de yang / mgrin pa mchog ni gos kyis dkri// zhes bya ba ni mgrin pa ring ba la sogs pa'i mtshan nyid dang ldan pas mchog tu gyur pa de ras la sogs pas legs par bcings pa gang yin pa de la de skad ces bya'o/ /dkyil 'khor pa'i zhes bya ba ni lha bco brgyad po re re'am/yang na rigs kyi yum rnams kyi bzhi/ de bzhin gshegs pa dang de'i rigs dang bcas pa rnams kyi lnga/las thams cad pa'i bum pa ni bcu pa'o/ /gang gi bum pa gang yin pa de la de'i sngags lan bdun bdun bzla ba dang / de'i mtshan ma de la bri bar bya'o//bum pa mdor bsdus pa la yang de bzhin gshegs pa'i bum pa rnams la ni de bzhin gshegs pa'i mtshan ma nyid do/ /las thams cad pa'i bum pa la ni/oM AHbig+h+nAn+ta kr-i ta hUM zhes bya ba 'di ni lan brgya rtsa brgyad bzlas par bya'o/ /rnam par rgyal ba'i bum pa la ni gtso bo yin pa'i phyir dang /bya ba mang po yod pa'i phyir khyad par bstan pa ni 'bru sman zhes bya ba la sogs pa smos te/ rgyal la zhes pa ni rnam par rgyal ba'i bum pa la ste/ rtsa ba nag po ra ri med pa/ mchu 'phyang ba/ mgrin pa ring ba/ lto ba che ba/ mgrin pa me tog gi phreng ba dang bcas pa'i gos bzang pos dkris pa/yal ga lo 'bras bzang po yod pas kha brgyan pa chos 'byung ba'i dbus na gnas pa'i bdag po'i mtshan mas mtshan pa yi ge baM las rin po che'i rang bzhin can du byas par bsams la 'khor lo'i gtso bo bzla bar bya'o zhes bya bar sbyar ro/ /'bru lnga ni til dang /nas so ba dang / ma sha dang / 'bras so ba dang / gro'o/ /sman lnga ni br-i ha ti dang / kaN+Da ka ri dang / sha ta rak+Sha dang / daN+Dot+pa la dang / gi ri kar+Ni dkar po'o/ /rin chen lnga ni mu tig dang / gser dang / dngul dang / byi ru dang / mu men no/ /dri bzangs chu ni spos chu cung zad do/ / 'khor lo ni 'jam pa'i rdo rje'i bsam gtan gyi dkyil 'khor ro/ /'di rnams kyi tshogs bsdus par gyur pa gang yin par me tog gi phreng ba btags pa'i rdo rje steng du bzhag pa gang yin pa la 'khor lo'i gtso bo zhes pa 'jam pa'i rdo rje'i sngags de'i sa bon las btus pa bzla bar bya ste/khu tshur g.yon pas rdo rje la btags pa'i phreng ba bzung la sngags brgya rtsa brgyad mngon par bzla bar bya'o/ /mchod yon zhes bya ba ni rang gi bdag po'i sngags dang / yi ge hUM lan bdun bzlas pa'i mchod yon gyi chu las cung zad cig dbul lo/ /der zhes bya ba ni rnam par rgyal ba'i bum pa'i steng du dri la sogs pa'i rdzas lnga dang ldan pa'i pad+ma'i snod gzhag par bya'o zhes bya ba ni lhag ma'o//nyin re zhes bya ba ni ji srid 'khor lo dgod kyi bar du'o/ /de bzhin zhes bya ba ni snga ma bzhin no/ /bzla ba zhes bya ba ni rnam par rgyal ba'i bum pa la'o/ /dkyil 'khor rdzogs pa'i tshe bum pa ji ltar dgod pa de'i gnas skabs la bab pa de sngar nyid bshad pa ni/de yang zhes bya ba la sogs pa smos pa yin te/ mtshams su zhes bya ba ni sgo'i drang thad ma yin pa'i gnas su'o/ /g.yas su zhes bya ba ni phyi 'am nang gi g.yas logs su'o/ /chu'i dbang bskur ba'i gnas skabs mdor sdus te bshad pa ni/de las zhes bya ba la sogs pa yin te/ de las zhes bya ba ni rnam par rgyal ba la sogs pa'i bum pa rnams las mdor bsdus pas so/ /mchod yon snod du zhes bya ba ni shar sgo man 'jil bzhag pa'i dung phor la sogs par ro/ / slob ma rnams kyis zhes bya ba ni shugs kyis go bar 'gyur ro/ /de ltar na 'di ni bum pa lhag par gnas pa'i cho ga'o// //pus btsugs zhes bya ba ni sa la'o/ /sangs rgyas 'gro 'khor bya don stsol/ /zhes bya ba la 'gro ba rnams la dkyil 'khor gyi bya bas don stsol bar mdzad pa'o//'bras gnas zhes bya ba ni sa thob pa rnams so/ /gzhan zhes bya ba ni sa thob pa rnams las gzhan pa lha la sogs pa'o/ /byang chub la bkod pa zhes bya ba ni btul ba'o/ /sems can zhes bya ba ni mi la sogs pa'o//rdo rje'i spyan mnga' ba ni lha'i mig dang ldan pa'o/ / yo byad ces bya ba ni ci 'byor ba'i mchod pa'o/ /de zhes bya ba ni de'i phyir ro/ /yang dag par bsrungs la zhes bya ba ni mtshams bcings pa la sogs pas so/ /'di ni lha lhag par gnas pa'i cho ga'o// //de nas rang gi slob ma lhag par gnas par bya'o zhes bya bar sbyar ro//me tog phreng thogs zhes bya ba ni me tog gi phreng ba snyim pas 'dzin pa'o/ /nga rgyal med pa ni rlom pa med pa'o/ /rigs mtho ba ni rigs bzang po las skyes pa'o/ /yon tan dang ldan pa ni gtong ba dang brtan pa la sogs pa dang ldan pa'o/ /bde bar gshegs pa'i zhes bya ba la sogs pa ni rigs dang yon tan dang /gzugs dman par gyur pa dag kyang lhag par gnas par bya ste/de yang gal te gsang sngags sgrub pa la shin tu don du gnyer zhing mngon par brtson pa dang ldan pa dang / ston pa gzhan la mi brten par gyur na byar rung ngo zhes bya ba'i tha tshig go//cho ga zhes bya ba ni 'jug pa la sogs pa'o/ /'khor bzhi char yang zhes bya ba ni dge slong dang / dge slong ma dang / dge bsnyen dang dge bsnyen ma'o/ /rang gi bslab dad shin tu ldan/ /zhes bya ba ni de la brtson zhing gus pa'o/ /theg chen la dga'i bdag nyid can/ zhes bya ba 'dis ni mi 'gal bar bya ba'i phyir 'di la ni yid kyi las gtso bo yin pas ston to/ /yang na 'jug pa thams cad la cho ga thams cad sems par bya dgos pa ma yin pas de la 'gal ba ga la yod/ gsang sngags grub don gnyer zhes bya ba ni 'jig rten 'di nyid du mngon par mtho ba 'dod pa'o//bsod nams 'dod pas zhes pa ni 'jig rten gzhan du mngon par mtho ba thob pa'i don du'o/ /'jig rten gzhan don gnyer zhes bya ba ni 'jig rten gzhan du de bzhin gshegs pa la sogs pa'i phun sum tshogs pa sku gsum gyis yang dag par bsdus pa 'phags pa dang 'phags pa ma yin pa'i 'jig rten thams cad las gong mar gyur pa nyid do//don du gnyer ba'i sangs rgyas nyid don du gnyer ba zhes bya ba'i bar du'o/ /'jig rten pha rol zhes bya ba ni phyogs gsum pa gzung ngo / /tshe 'di'i zhes bya ba ni phyogs gong ma gnyis po dang sbyar te/ 'di nyid du dman pa'i 'jig rten nyid du gyur pas na tshe 'di pa nyid do//rigs pas sgrub pa bshad pa ni/ tshe 'di zhes bya ba la sogs pa yin te/ rgyas zhes bya ba ni mtha' dag go/ /de skad brjod ces bya ba ni yid gzhungs zhes bya ba la sogs pa thams cad bsam pa dag par bya ba'i phyir brjod par bya'o//sngon bzhin zhes bya ba ni/ rang rig pad+ma'i lte ba ru/ /zhes bya ba la sogs pa gang bshad pa de bzhin du'o/ /khang pa ni dkyil 'khor ro/ /gsol ba 'debs zhes bya ba ni dkyil 'khor du 'jug par bya ba'i phyir tshigs su bcad pa gnyis kyis so/ /dga' chen zhes bya ba ni rdo rje 'chang dang mnyam pa'i phyir ro//tshul zhes bya ba ni lam mo/ /brten pa zhes bya ba ni mi shigs pa'o/ /dam tshig ces bya ba ni sngags dang phyag rgya la sogs pa'o/ /lan gsum brjod ces bya ba ni tshigs su bcad pa gnyis po 'di dag nyid do/ /rab gus zhes bya ba ni rjes dang bcas pa'o//mnyes gshin pa ni snying du sdug pa dang bcas pa'o/ /gtso bo gcig la ni dmigs byas zhes bya ba ni de'i sgo nas thams cad la smra ba'o/ /cho ga zhes bya ba ni thabs chen po'o/ /mthu yis zhes bya ba ni bzlas pa dang bsgoms pas so/ /ye shes mnyam med ces bya ba ni byang chub chen po'o//'di gyis shig ces bya ba ni gsang sngags kyi tshul la rab tu gzhol ba'o/ /bshags so zhes bya ba ni sdig pa bshags pa la sogs pa lan gsum brjod du bcug la byang chub kyi sems bskyed par bya'o/ /dran du gzhug ces bya ba ni tshigs su bcad pa gcig gis te/ dkon mchog gsum la skyabs su mchi//sdig pa thams cad bshags par bgyi/ /'gro ba'i dge la rjes yi rang / /sangs rgyas byang chub sems bskyed ces bya ba 'dis so/ /bsrungs nas ni zhes bya ba ni slob ma las thams cad pas bsrungs la/ de rnams nyid kyi snying ga la sogs pa'i rdo rje la sogs par hUM AHoM la sogs pa brjod cing /snying ga la sogs par spos chu dang rdo rje la sogs pa dang ldan pa'i khu tshur gyis reg par byas la mdun du spos dang mar me byin nas a shwad+tha'am u dum wA ra'i so shing sor bcu gnyis pa drang ba ma gas pa srog chags med pa/ rtse mo la me tog btags pa de rnams kha byang du bltas te snyim par sbyar bar sbyin par bya'o//des kyang dkyil 'khor 'dom gang gru bzhi pa byas nas slob ma de shar ram byang du kha bltas te 'dug pa la so shing rtse mo nas 'char ba cug la ltos pa med par mdun du dor du gzhug go//so shing lhung ba'i rjes su 'brangs pas 'di rnams kyis zhi ba la sogs pa'i dngos grub cir 'gyur ba yang bstan par bya'o/ /de la byang dang shar dang lho dang nub tu lhung ba las zhi ba dang rgyas pa dang mngon spyod dang dbang 'grub pa yin la steng du bltas te lhung na ni rig pa 'dzin pa'i dngos grub 'grub po//'og tu bltas te lhung na ni sa 'og gi dngos grub 'grub bo/ /dkyil 'khor gyi phyi rol du lhung ba la ni dngos grub med do/ /'thor 'thung zhes bya ba ni bdud rtsi thab sbyor bzlas pa'i chus so/ /skyor chu lan gsum zhes bya ba ni spos chab kyi skyor chu oM hri zhes bya ba la sogs pa'i phreng ba'i sngags bzlas la lan gsum blud nas khang pa'i phyi rol du bzhag nas bdud rtsi thab sbyor bzlas pa'i ku sha mang po ni stan gyi phyir sbyin la/de bzhin du ku sha gcig ni sngags kyi phyir sbyin no/ /de nas bdud rtsi thab sbyor bzlas pa'i skud pa sum sgril mdud pa gsum dang ldan pas de rnams kyi dpung ba g.yas par rang nyid kyis bcings la de yang dag par bsrung bar bya'o//de nas gzengs bstod pa'i phyir chos bshad par bya ba yin pas de'i phyir de ni/ 'jig rten du ni zhes bya ba la sogs pa smos te/ brgya lam zhes bya ba ni lan 'ga' zhig go//de yang 'di lta ste bskal pa chen po 'di la sangs rgyas stong 'byung bar 'gyur la/ yang na mi 'byung ba yod de/ lan 'ga' ni bskal pa chen po mang por yang sangs rgyas mi 'byung ba 'gyur ba yang 'das zin pa'i phyir ro/ /gsang sngags spyod pa'i tshul 'byung ba//de bas kyang ni dkon pa ste/ /zhes bya ba ni/ /rgyud kyi rgyal po 'di nyid las/ /bcom ldan 'das de bzhin gshegs pa thams cad sngon byung ba brjod kyis mi lang pa'i yang brjod kyis mi lang ba'i sangs rgyas kyi zhing gi rdul phra rab tu phra ba dang mnyam pa'i bskal pa yang 'das/gang bcom ldan 'das de bzhin gshegs pa dgra bcom pa yang dag par rdzogs pa'i sangs rgyas mar me mdzad 'das pa nas thub pa chen po 'od srungs mngon par sangs rgyas pa'i bar gyis kyang ma gsungs so zhes bya ba la sogs pa gsungs pa yin no/ /smos ci 'tshal zhes bya ba ni sngar bshad pa las khyad par du 'phags par ston te/sngags kyi spyod pa la gnas nas sngags zlos shing goms par bslabs pas go 'phang bla na med pa 'thob par 'gyur ba de su zhig gi sngags yin zhe na/ grags pa mtha' yas zhes bya ba ste skyob pa rnams kyi'o/ /skye bzhin pa zhes bya ba ni dkyil 'khor du 'jug pas so//theg pa chen po ni sangs rgyas kyis mya ngan las 'das pa'o/ /cher 'byung ba ni theg pa chen po rnams 'byung ba ste/ gang las sangs rgyas dang byang chub sems dpa'i phun sum tshogs pa 'byung ba'o/ /de lta bu'i lam de ni theg pa chen po'o zhes 'byung ba'o//don bshad byas nas ni zhes bya ba ni de ltar gzengs bstod par bya ba'i phyir chos bshad pa byas nas zhes bya ba'i don to/ /de bzhin du bsrung ba yang bya'o zhes rang gi don dang yang sbyar bar bya'o/ /nyal du gzhug ces bya ba ni dkyil 'khor gyi mthar ro/ /gang dag ci mthong ba zhes bya ba la sogs pa bsgo'o zhes bya ba ni lhag ma'o//bdag nyid kyang de bzhin du bsam gtan la mnyam par gzhag pa'i blos seng ge'i nyal thabs su nyal bar bya'o/ /mdor bsdus pa'i don gyi nges pa bstan pa ni bsrung dang zhes bya ba la sogs pa smos pa yin te/ bsrung ba dang byin gyis brlab pa dang / bgegs gzhom pa la sogs pa sngags med par sngar bshad pa dang phyis 'chad pa gang ci yang rung ba de thams cad la/ las thams cad pa'i sngags bzla'o zhes bya ba'i tha tshig go/ /de gang zhig yin zhe na/ rigs lnga zhes bya ba la sogs pa smos te/rigs lnga rnams dang / dkyil 'khor gsum po la las thams cad byed pa ni bdud rtsi thab sbyor yin no zhes pa'o/ /'di ni slob ma lhag par gnas pa'i cho ga'o/ /nyin zhag gsum pa la ni dkyil 'khor bri ba bstan pa yin pas rmi lam zhes bya ba la sogs pa smos te/nyes pa la sogs pa ston par byed pa'i rmi lam gang yin pa de la chos thams cad ni rmi lam lta bu'o zhes lhag par mos pa byas la legs bsrungs zhes bya ba ni thams cad do/ /snod gyur zhes bya ba ni slob dpon nyid du 'os pa gang yin pa de'o/ /sdom pa zhes bya ba ni slob dpon gyi sdom pa'o//sdom pa de yang dge bsnyen la sogs pa'i sdom pa blangs zin pas slob dpon gyi zhabs gnyis la btud de lag na me tog thogs pas phyag byas la me tog gtor te sdig pa bshags pa la sogs pa byas la gsol ba btab nas sdom pa blang bar bya'o/ / gsol ba gdab pa'i tshigs su bcad pa ni mi ldog 'khor lo zhes bya ba la sogs pa smos pa yin no/ /gsol ba btab pa'i slob dpon gyis rigs thams cad la gsol ba btab pas zhu par bya ste/ che ge mo zhes bya ba 'di/ /byang chub sems ni yongs 'dzin pa/ /gsang ba yi ni 'khor lo 'dir//dam tshig sdom pa len par 'tshal/ /de nas slob dpon gyis slob ma la 'di skad ces brjod par bya ste/ gsang ba chen po rigs dag pa'o/ /gsang ba yongs su len par ni/ /bdag nyid chen po khyod 'dod dam/ /des kyang 'tshal zhes brjod par bya'o/ /de nas slob dpon gyis 'di skad ces brjod par bya ste/sangs rgyas chos dang dge 'dun te/ /dkon mchog gsum la skyabs su song / /'di ni sangs rgyas rigs dag pa'i/ /dam tshig brtan par gyur pa'o/ /rdo rje dril bu phyag rgya dag /blo chen khyod kyis gzung bar gyis/ /byang chub sems gang de rdo rje/ / shes rab dril bu zhes bsgrags so/ /slob dpon dag kyang gzung bar bya/ /bla ma sangs rgyas kun dang mnyam/ /'di ni rdo rje'i rigs dag pa'i/ /sdom pa dam tshig yin par gsungs/ /rin chen rigs mchog chen po la/ /nyin dang mtshan mo lan gsum du/ /zang zing mi 'jigs chos dang byams//sbyin pa rnam bzhi rtag tu sbyin/ /phyi nang gsang ba theg pa gsum/ /dam chos khyod kyis gzung bar bya/ /'di ni pad+ma'i rigs dag pa'i//dam tshig sdom pa yin par gsungs/ /las kyi rigs mchog chen po la/ /sdom pa thams cad ldan par ni/ /yang dag nyid du gzung bar gyis//mchod pa'i las kyang ci nus kyis/ /dbye ba rnam pa bcu bzhi 'di/ /phas pham bar ni rab tu bsgrags/ spang zhing dor bar mi bya ste/ /rtsa ba'i ltung ba yin par bshad/ /nyin dang mtshan mo lan gsum du/ /nyin re zhing ni bzla bar bya/ /gal te nyams gyur rnal 'byor pa/ / kha na ma tho chen por 'gyur/ /slob mas kyang ni 'di skad brjod/ /slob dpon bdag la dgongs su gsol/ /gtso bos ji skad bka' stsal pa/ /de ltar bgyi ba bdag gis bgyi/ /rnal 'byor mnyam gzhag ces bya bar ni 'jam pa'i rdo rje'i ting nge 'dzin gsum bya ba'o/ /'khor lo mchog ces bya ba ni lhag par gnas pas gzhag pa'i lha rnams kyi dkyil 'khor ro//mkha' la gzhag ces bya ba ni gshegs su gsol ba'i don du'o/ /de nas srad bu lnga po de bsgril bar bya'o zhes bya bar sbyor ro/ /srad bu ji lta bu zhe na/ rtag pa zhes bya ba la sogs pa smos te/ rim pa ji lta ba bzhin du rnam par snang mdzad dang rin chen 'byung ldan dang 'od dpag tu med pa dang /don yod grub pa dang / mi bskyod pa'i ngo bo nyid yin zhing de'i mdog tu snang ba'o/ /de ji ltar zhe na/ de'i mdog sa bon las byung ba/ /zhes bya ba yin te/ gang gi phyir tshon dri zhim po dang / yungs kar gyi phye ma dang bsres pa dkar po dang /ser po dang / dmar po dang / ljang gu dang / nag po so sor btsos pa yin pa de'i phyir de'i mdog dang 'dra ba dang / gang gi phyir b+h+rUM AM dzr-iM khaM hUM zhes bya ba'i sa bon las yongs su bskyed pa yin pas de'i phyir de'i ngo bo nyid do/ /de nyid kyis ni ye shes lnga ldan zhes bya ste/me long lta bu la sogs te ye shes lnga'i rang bzhin can no/ /me long lta bu'i ye shes la sogs pa lnga po re re zhing bzhi po rjes su 'brang bas na rnam pa nyi shu rtsa lngar phye ba yin no/ /yang na ye shes re re zhing lha nyi shu'i rang bzhin can gyi dkyil 'khor gyi bdag nyid can yin pas/ nyi shu chen lngar rnam phye bas/ /zhes bya ste/ rnam pa brgyar dbye'o zhes bya ba'i tha tshig go/ /rang gi phyogs kyis de bzhin gshegs pa rnams bsdus par gyur ba'i de bzhin gshegs pa lnga po de rnams kyi snying po yi ge b+h+rUM la sogs pa las byung ba'i ye shes kyi srad bu 'od zer gyi rang bzhin du bsams la/oM A shA shwa te badzra sU traM me dra yats+tsha mahA maN+Dal su trA na ya hUM zhes bya ba 'dis rnam par snang mdzad la gsol ba gdab par bya'o/ /de bzhin du mtshan brje ba'i tshul gyis rin chen 'byung ldan la sogs pa la gsol ba gdab par bya'o/ /de nas 'jam pa'i rdo rje'i sbyor ba la gnas pa nyid dang /yi ge dzaHlas mi gnyis su nyi ma dang zla ba bskyed la 'bar ba'i lta ba zhes bya ba ni 'bar ba'i lta ba nyid lcags kyu yin te/ des bkug pa'i ye shes kyi thig bcom ldan 'das rnams kyis brdzangs pa nyid du lhag par mos la/ rang gi lag na gnas pa'i srad bu rnams la rang rang gi kha dog gi nang du chud par byas la/rnal 'byor pas zhes bya ba 'jam pa'i rdo rje'i rnal 'byor la gnas par gyur pas thams cad byed dang bcas zhes bya ba ni/ bdud rtsi thabs sbyor gyi rnal 'byor can gyi slob ma dang lhan cig bsgril bar bya'o/ /a n+yon+yA nu ga ta sarba d+harmA/par sparANu ga ta sarba d+harmA/ a t+yan+tA nu ga ta sarba d+harmA/ zhes brjod cing ci nas kyang dkyil 'khor gyi nyis 'gyur du 'gyur ba dang / sboms su sgo'i nyi shu char 'gyur ba de lta de ltar bsgril bar bya'o/ /de nas zhes bya ba ni bsgril ba'i rjes thogs la spos chab bdud rtsi lnga dang bcas pa la spangs la yi ge gsum gyi nang du chung bar byas nas dris byugs nas gser gyi snod kyi nang du bzhag la/dri dang me tog dang spos kyis kyang mchod nas lag pa bkab ste bdud rtsi thab sbyor bzlas te bsrung ba yang bya'o/ /de nas dkyil 'khor gyis gzhi dris nye bar byugs la/ me tog sil ma gtor nas nam mkha'i ngos la gnas pa'i 'jam pa'i rdo rje'i dkyil 'khor dmigs la mchod yon sngon du 'gro bas yang dag par mchod de/rang yang de'i sbyor ba dang ldan pa dang / sgrub pa'i grogs po yang bdud rtsi thab sbyor gyi gzugs su bsams la/ mig g.yon pa dang g.yas pa gnyis su dza las byung ba'i zla ba dang nyi ma'i mdog mdangs ser por snang bar bsams te/srad bu de yang khu tshur g.yon pas bzung la lte bar bzhag ste/ srad bu de'i rtse mo gcig sgrub pa'i grogs po'i lag tu dz+dza dz+dza dz+dza zhes bya bas gtad par byas la/ sgrub pa'i grogs pos kyang rang nyid la mngon du phyogs par bltas la dz+dza dz+dza dz+dza zhes bya ba dz+dza gsum po nyid kyis de bzhin du drang bar bya'o//dpal ldan 'jam pa'i rdo rje'i slob dpon nub dang lho phyogs su gnas te shar dang byang du kha bltas la nam mkha'i thig ces bya ba tshangs pa'i thig gnyis lte ba'i thad ka'i nam mkha' la gdab cing rdo rje dang bcas pa'i lag pa g.yas pa'i mthe bong dang gung mo gnyis kyis srad bu bzung la se gol gyi sgra bya'o//thig gdab pa thams cad la yang oM badzras ma ya sU tra mA ti kra ma hUM zhes brjod cing thig gi sgra des kyang nam mkha' thams cad khyab pa'i de bzhin gshegs pa rnams yang dag par bskul bar bya'o/ 'di ni de'i brda can gyi don yin te/khyed kyis sems can gyi don mdzad pa'i phyir 'dir gshegs pa'i dus lags so/ /zhes pa'o/ /slob dpon dang sgrub pa'i grogs mchog gnyis thams cad du g.yas nas bskor te 'gro ba dang / phyogs thams cad mnyam pa nyid du mos par bya ba bshad pa ni/rang dang rjes mthun g.yas nas bskor/ /mkhas pas thig gis thig btab nas/ /phyogs kun mnyam pa nyid du bya/ /zhes bya ba yin no/ /de bzhin du 'og tu thig gdab po zhes bya ba ni nam mkha'i thig dang 'dra bar sa la thig gdab pa la yang gnyis gas srad bu de lag pa phab pas bya'o//de nas phyi'i dkyil 'khor thig gdab par bya ba yin pas de'i phyir/ gnod sbyin zhes bya ba la sogs pa smos te/gnod sbyin dang yi dwags dang dbang po dang klu ste 'di dag gi phyogs su blta ba gang yin pa de la de skad ces bya ste/ byang dang lho dang shar dang nub tu kha bltas te zhes bya ba'i tha tshig go//me dang bden bral phyogs gnas te/ /zhes bya ba ni me lha dang bden bral gyi phyogs mtshams su gnas te zhes bya ba'i don to/ /slob dpon de ltar gnas par gyur nas shar dang nub pa dang byang dang lho'i phyogs bzhi po'i thig gdab par bya'o/ /de nas me'i phyogs na gnas pa nyid kyis rlung gi mtshams su thig gdab pa dang /bden bral gyi phyogs na gnas la dbang ldan gyi mtshams su thig gdab pa'i srad bu brkyang bas thig gdab par bya'o/ /de nas phyi'i ji lta ba bzhin du nang du re'u mig cha brgyad pa'i dkyil 'khor shar dang nub dang byang dang lho phyogs su thig gis gdab par bya'o zhes bya bar sbyar ro//de nas de bzhin du srad bu nyis rim du byas nas dkyil 'khor gyi dbus su btab pa'i phur bu la btags pa nyid kyis brtan par byas la/ phyi'i dkyil 'khor gyi phyi rol du zlum po'i rdo rje'i thig gnyis kyis thig gdab par bya'o/ /nang gi dkyil 'khor yang de bzhin no//de yang / rdo rje'i phreng bas yongs bskor bas/ /zhes 'og nas bshad pa dang / yang lcags ri dag ces smos pa ni 'od kyi dkyil 'khor gyi thig gnyis zhes bya ba'i tha tshig ste/ 'di gnyi ga la yang dbang ldan nas brtsams te thig gdab par bya'o/ / rang dang rjes mthun g.yas nas bskor/ /zhes bya ba ni slob dpon dang slob ma gnyis kyi go rims ji lta ba bzhin du legs par g.yas nas bskor phyogs su 'gro bar bya'o zhes bya ba'i tha tshig go/ /ltas ngan byung na zhes bya ba ni tshangs pa'i thig gdab pa dang 'brel bas so//na bar 'gyur zhes bya ba ni bla ma nyid do/ /thig bzhi zhes bya ba ni mtshams kyi thig gis so/ /rdo rje rin chen zhes bya ba ni zla ba phyed pa la gnas shing rtse mo la rdo rje gnas pa'i rin po ches so/ /ka ba 'khor lo la sogs spras/ /zhes bya ba ni 'khor lo dang rin po che dang pad+ma dang ral gri'i ka bas so//ka ba brgyad dang thig brgyad kyis dkyil 'khor brgyad pa lta bu yin par ni 'dra ba zhes bya ba'i sgras ston to/ /de nas hi dang zhes bya ba la sogs pa'i don ni 'di yin te/ yi ge hi zhes bya bas mig g.yon pa dang g.yas pa gnyis zla ba dang nyi mar bskyed la/ khro bo'i lta bas kun du rnam par lta ba bzhin du sgo rnams dbye bar bya'o//sgo'i phyed kyi tshad ni kha khyer la sogs pa yin no/ /kun nas zhes bya ba ni kha khyer gyis phyi'i dkyil 'khor kun nas bskor ba'o/ /de'i phyed ces bya ba ni kha khyer gyi phyed do/ /sum 'gyur te zhes bya ba ni chur sum 'gyur du'o//dpangs su ni ji ltar mdzes par bya'o/ /gal te thig 'debs dang 'tsham pa/ /'ga' med de tshe rang nyid kyis/ /phur bur brtod nas grogs med par/ /thig ni de bzhin gdab par bya/ /de la 'jam pa'i rdo rje'i dkyil 'khor 'di thugs dang gsung dang sku'i dkyil 'khor las gang yin zhe na/thugs kyi dkyil 'khor nyid yin par bstan pa'i phyir/rdzogs sangs rgyas zhes bya ba la sogs pa smos te/ gsung dbang ni 'jam pa'i dbyangs so/ /de ni rdzogs pa'i sangs rgyas rnams kyi ye shes kyi sku yin no zhes bya bar grags la/ ye shes de yang chos kyi sku shin tu yang dag par gyur pa yin la/chos kyi dbyings shin tu rnam par dag pa'i ye shes kyi mtshan nyid ni bcom ldan 'das mi bskyod pa yin no/ /de bas na 'di ni rdo rje zhes pa mi bskyod pa'i rigs yin par bshad do/ /de bas na 'di'i dkyil 'khor ni thugs kyi dkyil 'khor nyid yin no zhes bya ba'i tha tshig go//tshad ni tshad du bya ba ste dkyil 'khor khru nyi shu pa zhes bya ba la sogs pa'o/ /sogs pa zhes bya ba'i sgras ni rig ma'i rigs dang na tshod dang kha dog la sogs pa ste/ 'di dag gi nges pa rgyud las gsungs pa ni nges pa la dga' ba'i sems can rnams kyi bsam pa la brten nas gsungs pa yin gyi ngo bo nyid kyis ni ma yin no//gal te ngo bo nyid yin na ci nyes she na/ de'i phyir thabs shes zhes bya ba la sogs pa smos so//de ni zhes bya ba ni dkyil 'khor ro/ /'khor lo de zhes bya ba ni dkyil 'khor de thig btab pa kho nas ye shes kyi srad bus yang gshegs su gsol lo zhes bya ba ni lhag ma'o//tshon la zhes bya ba la sogs pas ni tshon byin gyis brlab pa smos pa yin te snga ma'i rim gyis zhes bya ba ni srad bu byin gyis brlabs pa'i skabs su sngar bshad pa'i rim pa ji skad bshad pas so/ /ye shes sbar zhes bya ba ni sangs rgyas rnams kyi ye shes kyi 'od zer ro//'dir tshigs su bcad pa ni/lcags lnga'am rin chen las byung ba'am/ /khams byung 'bras phye las byas pa'am//yang na dmar po so phag bsregs/ /nag po sol ba las byas tshon/ /dkar dang ser dang de bzhin dmar/ /ljang dang nag po go rims bzhin//de ltar legs bzhag b+h+rUM AM dzr-IM/ /khaM hUM las ni rab bskyed pa/ /sngar bzhin 'bar ba'i rtas drangs pa'i/ /sangs rgyas rnams kyi ye shes 'od/ /bsres te ye shes nyid byas pa/ /sbar te mngon par bzla bar bya/ /zhes bya ba'o/ /sngags ni oM badzra tsi tra sa ma ya hUM zhes bya ba'o//de nas dkyil 'khor gyi dbus na 'dug pa'i phur bu yi ge hUM gis bton la rang gi lag na gnas pa'i rdo rjer blos bcug la/ phur bu'i khung bu tshon sna lngas bkang la mnyam por byas nas dril bu'i sgra dang rdo rje'i glu dag gis mtshan ma ngan pa bsal la/ 'di ni chos dbyings dag pa ste//zhes bya ba la sogs pa nas/ nyes pa kun las rnam grol ba'o/ /zhes bya ba'i bar du bdag nyid kyis lhag par mos par bya'o zhes bya ba ni lhag ma'o/ /bla ma zhes bya ba ni slob dpon te des nang du gnas nas dkar po la sogs pa'i tshon dgye bar bya ste/ thams cad kyi phyi rol du ni dgye ba nas thams cad kyi nang du ni nag po dgye bar bya'o/ /ri mo zhes bya ba ni tshon gyi rang bzhin can no/ /de nyid ni rtse mo lta bu'o/ /'di ni zhes bya ba ni thugs kyi dkyil 'khor gyi'o/ /sa gzhi'i cha zhes bya ba ni dkyil 'khor gyi'o/ /nas gang gis ma reg par zhes bya ba ni 'og gi tshad de/steng du ji ltar mdzes par bya'o/ /rgyud 'di las/ dkyil 'khor dag ni 'dri ba na/ /gal te rlung sogs byung gyur na/ /mche ba'i phyag rgya bcings nas ni/ /gdug pa'i dgra ni dran par bya/ /zhes gsungs pa de bstan pa'i phyir/ bdud rtsi thab sbyor zhes bya ba la sogs pa smos pa yin te/'dir mche ba zhes bya ba ni lag pa'i phyag rgya yin par bshad la/ gdug pa'i dgra zhes bya ba ni phyag rgya chen po yin no zhes/ 'di ltar la la dag rtog pa yod pas de bsal bar bya ba'i phyir/ 'di ni rgya chen zhes bya ba la sogs pa smos te/sgra'i bkod pa 'di la bshad par bya ba gtso bo yin gyi grags pa gtso bo ni ma yin no zhes bya bar dgongs so/ /'dir zla ba ni bcu gnyis so/ /nyi ma ni bdun no/ /bya ba la sogs pa zhes bya ba ni bya ba grub pa'i ye shes la sogs pas so/ /smon lam ni don du gnyer ba'o//dad sogs zhes bya ba ni sgo rnams su dad pa dang / brtson 'grus dang / dran pa dang / ting nge 'dzin to/ /rnam kun gsal bar shes byas la/ /zhes bya ba ni bris pa'i dkyil 'khor rnam pa thams cad du gsal bar gyur par shes nas so/ /lhag par gnas pa'i bum pa gnas ji lta ba bzhin du gzhag pa dang /phyi rol du bum pa gang ba yang gzhag par bya'o/ /de nas/ rang gi 'khor lo bsgom par bya/ /zhes bya ba ni nam mkha' la 'jam pa'i rdo rje'i ye shes kyi dkyil 'khor ro/ /sangs rgyas rnams zhes bya ba ni de bzhin gshegs pa thams cad do//de dang lhan cig ces bya ba ni sangs rgyas rnams dang ngo / /kun du bskrad pa ni bdud rtsi thab sbyor gyis so/ /mngon par bsrung zhes bya ba ni phur bu dang ra ba la sogs pas so/ /gnas bsrung ba byas nas gshin rje gshed la sogs pas go rims ji lta ba bzhin du dgug pa la sogs pa bzhi bya ba dang /mig la sogs pa byin gyis brlab pa dang / sku la sogs pa byin gyis brlab pa dang / mchod yon dbul ba dang / dbang bskur ba dang mchod pa yang byas nas mi bskyod pa ni zhes bya ba la sogs pas bstod do/ /de kho na nyid kyi bdud rtsis tshim par byas la bde ba chen po babs par rnam par bsgoms nas yongs su bzlas pas kyang mnyes par bya'o//sngon bzhin zhes bya ba ni snga ma bzhin du bdud rtsi myang ba'i cho gas pad+ma'i snod du ye shes kyi bdud rtsi'i rang bzhin bskyed la des phyogs skyong mchod par bya'o/ /rang rang sbyor la gnas zhes bya ba ni 'dus pa'i lha ltar shes rab dang bcas pa'i cha lugs 'dzin pa'o//gal te tshogs pa dang ldan na sgrub pa'i grogs mchog dkyil 'khor du bzhag la phyi rol du phyung ste shar la sogs pa'i phyogs su dkyil 'khor bya ba'am byed du bcug ste rang gi bdag po'i sbyor ba'am/ khro bo'i rnal 'byor gyi dbang po la sogs pa gnas ji lta ba nas bkug ste re re zhing de'i phyogs su bltas pa nyid dang de rnams la mchod yon dang /dri dang / me tog dang / spos dang / 'bras chan dang / 'bras yos dang / til dang / snum khur la sogs pa'i gtor ma me tog dang / chu dang bcas pa snga ma bzhin bskyed la lan gsum gsum shing rta'am/gzhong par ram snyim pas gtor ro/ /de nas 'thor 'thung dang mchod yon byin la legs par mchod de slar gtang bar bya'o/ /lhag ma ni man ngag las shes par bya'o/ /de ltar phyogs skyong rnams la yang dag par mchod nas ji snyed pa'i gos dang rgyan dang ldan pas 'jig rten gsum las rnam par rgyal ba'i nga rgyal dang ldan par byas nas me tog sngon po'i me tog gi phreng ba blangs la hUM bzhi ba'i sngags zlos shing rdo rje'i shugs kyis dkyil 'khor du zhugs la/rdo rje dril bu dkrol zhing bskor ba lan gsum byas te/ lhag pa dang ma tshang ba'i nyes pa zhi bar bya ba'i phyir dkyil 'khor bltas la phreng ba bcom ldan 'das la phul te/yang de gar bya ba'i tshul gyis blangs la rang gi mgo la bcings nas phyag kyang bya'o/ /yang na mdor bsdus pa'i don du ni phreng ba med par zhugs la bltas te phyag byas nas sbyin sreg dag gis zhes bya ba rgyas pas so//mchod ces bya ba ni dkyil 'khor tshim par bya'o/ /mdor bsdus pa'i phyir las thams cad pa'i thab khung gcig pu kho na bshad pa ni/ kun nas zhes bya ba la sogs pa smos te/ bar du sor bzhi dor bar kha khyer de'i tshad ces bya ba ni dpangs dang rgyar sor bzhi'i tshad la pad+ma kha bye ba 'dra bas yongs su bskor ba/khru gang bzhes bya ba rgyar khru gang gi tshad la khya phyed pa zhes bya ba ni zabs su sor bcu gnyis pa'o/ /'khor lo lta bu zhes bya ba ni zlum po'o/ /las kun byed pas bya ba'o zhes bya ba ni lhag ma ste/ thab de'i dbus su ni ral gri bri zhing des brgyan par bya'o zhes bya ba'i tha tshig go//ral gri ji lta bu zhe na/ chur sor brgyad pa dpangs su sor gcig pa 'khor lo dang rin po che dang pad+ma dang ral gri'i dbus su chud pa mtshan ma bzhi'i phyi rol du rdo rje'i phreng bas bskor ba'o/ /thab khung 'di ni dkyil 'khor gyi byang phyogs su brko bar bya'o//me thab kyi sa las khru gang tsam dang bcas par dri ser pos byugs la me tog sna tshogs pa'i chal pa yang dgram par bya'o/ /shar du kha bltas te zhes bya ba ni tshang bar byed pas na shar de rdzogs par byed ces bya ba'i tha tshig go/ /kha zhes bya ba'i sgra ni gtso bo'i don te rdzogs par bya ba gtso bor gyur pas gnas par bya'o zhes bya ba'i don to//'di skad ston te/ kha byang du bltas te yid dga' ba dang / ser ba dang sna tshogs pa'i dri dang phreng ba dang gos dang rgyan dang ldan pas snga dror bsam pas 'dug par bya'o/ /kun byed ces bya ba ni bdud rtsi thab sbyor ro//bzlas pas zhes bya ba ni las thams cad pa'i chu la'o/ /kun du bsrung zhes bya ba ni bdag nyid kyis ku sha'i chun po lag pa g.yas pas bzung bas bsang gtor byas pa'i phyir ro/ /dgod pa bshad pa ni mchod yon zhes bya ba la sogs pa smos pa yin te/ 'dir mchod yon ni dung phor la sogs pa'i snod du dri ser po la sogs pa dang sbyar ba'i chu til dang zho dang bcas pa rang gi lha'i sngags tha ma oM dang bcas pa lan bdun bzlas pa'o//sogs pa'i sgras ni las thams cad pa'i chu yang g.yon du gzhag pa'o/ /de las gzhan yo byad ces bya ba ni yam shing dang bud shing dang ku sha la sogs pa'i sreg rdzas rnams so//bsangs nas ni zhes bya ba ni las thams cad pa'i chu nyid kyis so/ /de nas me rgyun bzhag la sogs pa'i khyim nas blangs la thabs las gzhan du 'o ma can gyi shing gis spar la yi ge gsum gyis bsang zhes pa yi ge gsum zlos shing dbyig pa skam po la sogs pas de'i me lce las blang bar bya'o//de nas las thams cad pa'i ku sha'i rtse mos blangs te g.yas nas lan gsum bskor bas bsangs la/ thab tu thab las dma' ba'i tshad tsam gyi'o ma can gyi shing skam po gshags pa'i shing rnams la rtswa skam po gtsang ma rnams bcug la rlung g.yab g.yab pas spar te/oM dz+wa la dz+wa la hUM zhes bya bas sbar bar bya'o/ /de nas mar gyis nye bar sbar la ku sha zhes bya ba ni sar pa dri ma med pa sngo ba/ ma gas pa/ ma chag pa'o/ /dgram zhes bya ba ni shin tu ring po ma yin pa dgram par bya'o/ /g.yas nas bskor zhing zhes bya ba ni/ kha khyer la ni shar bltas dgra ma/ /lho dang nub tu bltas pa dang / /de nas thab byang rtse bstan la/ /ku sha shar du rtse bstan bzhag /ces ji skad bshad pa lta bu'o/ /'dir ni sgrub pa pos gang du bltas pa de nyid shar la sogs pa yin no/ /de nas rang gi lha'i sa bon las thab bskyed la 'dir zhes bya ba thab kyi me 'bar ba'i dbus su me zhes bya ba me lha bsam par bya'o//ji lta bu zhe na dang po'i snying byung zhes bya ba la sogs pa smos te/ dpal mchog dang po'i snying po'i rang bzhin can gyi yi ge raM dang bcas pa'i dkyil 'khor gru gsum par pad+ma la gnas pa'o/ /lhag ma ni don go bar zad do//ser zhing zhes bya ba ni gos dang rgyan dang 'od kyi phreng ba ser bo dang ldan pa yid dga' zhing mgu ba zhes bya bar blta bar bya'o/ /de nas rang gi lha'i nga rgyal dang ldan pas me lha spyan drang ba'i sngags brjod par bya'o/ /oM e h+ye hi ma hA b+hU ta de ba r-i Shi dri dza sa ta ma/gr-i hi tA hu ti ma hA raM asmin san+ni hi to b+ha bA/ oM ag+na ye di pyA di pya a bi Sha ma hA shri ye ha bya ka bya bA hA na ya swAhA/ de nas 'dod pa'i rgyal po'i sngags de kho na nyid gsum dang spel bas ye shes kyi me lha spyan drangs la thab na gnas pa'i rang gi rnam pa la gzhug par bya'o/ /de nas de la las thams cad pa'i chus bsang gtor byas la pad+ma'i gdan la bzhugs su gsol lo//sogs pa'i sgras ni mchod yon dang zhabs bsil dang / mchod pa la sogs pa yang bya'o/ /dgang gzar blugs gzar zhes bya ba ni dgang gzar dang blugs gzar gnyis skyes bu tshad dang ldan pa'i mtheb sor nyi shu rtsa bzhi ni khru ste 'di gnyis kyi yu ba khru gang gi tshad du bya ba'o//'di gnyis ka'i yu ba'i 'og tu ni rdo rje dang rin po che sor drug pa bya'o/ /de ltar na yu ba khru gang rdo rje dang rin po che ni 'di gnyis kyi thun mong gi mtshan nyid yin no/ /khyad par gyi mtshan nyid ni de'i steng zhes bya ba la sogs pa smos pa yin te/de la re zhig dgang gzar ni yu ba'i steng du rgyar sor bzhi zhes pa chu dang rgyar sor bzhi yod pa zabs su sor gnyis te gru bzhi pa ste nyid kyi char chu dang rgyar de tsam gyis dma' bar bgros pa de nyid kyi pad+ma'i 'dab mar byas pa/ nang rdo rje zhes bya ba sor bzhi brkos pa de nyid kyi nang du dang po'i rdo rje gnas pa'o//mthar zhes bya ba thams cad kyi steng du rdo rje rtse gsum pa dang por bzhi pa yod pa/bar du zhes bya ba rtse gsum pa dang zur bzhi pa'i bar du pad+ma'i 'dab ma'i dbyibs 'dra ba yod pa/ gsher rdzas 'dzag pa'i bu ga mthe bo'i tshad tsam ma ma/mthe'u chung gi tshad tsam blta bar bya ste/ yu ba'i steng du 'di lta bu bya ba ni/dgang gzar yin no/ /blugs gzar ji lta bu zhe na/ blugs gzar sor gnyis pad+ma'i dbyibs/ /zabs su sor gcig nang rdo rje/ /zhes bya ba ste/ rdo rje rtse lnga pa gnas pa pad+ma'i dbyibs 'dra ba sor gnyis pa'i tshad zabs su sor gcig brkos pa'o//de'i nang na rdo rje rtse lnga pa gnas bzhes bya ba'i tha tshig go//dgang gzar dang blugs gzar ni mchod sbyin gyi shing ngam/ gser ram dngul la sogs pa las byas pa'o/ /gal te de gnyis ma rnyed na sor mo lnga bcer bas ni dgang blugs dbul lo//yang na sor mo gsum bcer stibs dbul lo/ /ji ltar dgang zhing sreg blugs dbul zhe na/ de'i phyir dgang gzar zhes bya ba la sogs pa smos te/ dgang gzar dang blugs gzar gyi khar rang gi lha'i sa bon 'od zer rab tu 'bar ba bsams pa dang /me lha'i kha la yi ge raM bkod nas lag pa gnyis pus mo'i bar du gzhag ste/ blugs gzar gyis mar gyi dgang blugs gsum me lha zhal cung zad gdangs pa la dbul lo/ /de nas me bgegs dang bcas pa dang / bgegs med pa'i mtshan nyid brtag par bya ste/ kha dog dang dbyibs legs par 'bar zhing sgra dang dri la sogs pa'i yon tan gyis ni bgegs med pa yin la/ du ba mang po la sogs pas ni bgegs dang bcas pa yin no/ /de yang / du ba mang zhing me lce rgod pa dang / /'bar bar dka' zhing cung zad cung zad 'bar/ /me lce rnam par 'chad cing gzi brjid med//rtsub cing gnag la pa la sha yi mdog /mdung dang zhib ma lta bu nyid dang ni/ /de bzhin ba lang mgo bo lta bu dang / /mi ro'i dri dang dri mi zhim pa dang / /bong bu'i dri dang de bzhin dri ngan dang / /sbyin sreg byed pa 'bar bas gdungs pa dang / /me lce rnam par rgod cing g.yo bar bshad//me ni bgegs dang bcas par shes byas la/ /bdud rtsi thab sbyor gyi ni cho ga bya//zhes ji skad gsungs pa lta bu'o/ /de ltar me bgegs dang bcas par shes na bdud rtsi thab spyor gyi sngags kyis bsang zhing rnam par sbyangs la yang dag par bsrungs te/ de nyid kyis mar gyis reg blugs lan bdun du dbul bar bya'o//de nas yang bsang bar bya'o/ /de ltar bgegs med pa'am bgegs dang bral bar byas ba'i me de la dgang blugs gcig gam gsum mam bdun dgang gzar mar gyis bkang ba blugs gzar dang bcas pas oM e h+ye hi zhes bya ba la sogs pa'i sngags kyis sbyin par bya zhes bya ba ni sbyin sreg dbul bar bya'o//dpal yon can la zhes bya ba ni nor sgrub pa la shes pa ste/ rgyal par byed pa dang ldan pa zhes bya ba'i bar du'o/ /de nyid kyis na pa la sha dang / u dum+WA ra dang / a mra dang / ka dam+ba dang /kaSh+Thardzu dang / blak+ka dang / a shwat+tha dang / sha mi dang / n+ya gro d+ha la sogs pa'o ma can gyis shing las byung ba 'dab ma dang bcas pa rlan dang bcas pa mnyam por bcad pa/ dbus kyi cha las byung ba/ lo ma gnyis dang bcas pa sboms chang pa'i tshad tsam chur khru gang tsam 'o ma dang zho dang mar la btags pa/rtse mo gnyis dri ser po la btags pa mthe bong dang srin lag gis bzung ste rtse gcig pas dbul bar bya'o/ /rnyings pa dang lo ma med pa dang / sul can dang / khong stong dang / khong stong dang / chag pa dang / shun lpags med pa dang / ring ba dang / thung ba dang / yo ba dang / rtse mo gnyis su gas pa dang / phra ba dang / sbom po dang / 'bu yod pa dang / 'bus zos pa dang / bcas pa rnams ni yongs su spang bar bya'o zhes bya ba'i don to/ /yam shing me la zhes bya ba ni yam shing gis sbar ba'i me'o/ /ma grugs zhes bya ba ni 'bras so ba ma grugs pa'o/ /cho ga'i rim pa yin zhes bya ba ni rim pa 'di dag nyid kyis so//de la dgang blugs kyi cho ga bzhin du mdor bstan pa'i rim pa yin pas gang 'di zhu ba'i rdzas de ni me lha'i zhal du dbul bar bya'o/ /yam shing dang ku shu la sogs pa ni 'od kyi dkyil 'khor du'o/ /bza' ba dang 'thor 'thung la sogs pa ni phyag tu'o//dri ni thugs kar ro/ /me tog ni dbu la'o/ /bdug spos ni 'od la'o/ /zhabs bsil ni zhabs la'o/ /mar me dang mchod yon ni mdun du'o/ /de la mchod yon gyi chu ni snod gzhan du dbul bar bya'o/ /de nas me la 'thor 'thung dang bsang gtor dbul lo//de nas thun mong ba'i lha rnams la spyir sbyin sreg bya ba'i cho ga de ni de nyid ye shes zhes bya ba la sogs pa smos pa yin te/ de bzhin nyid kyi ye shes kyi dam tshig de nyid me lha yin par bltas la/ de'i thugs ka'i zla bar yi ge maM las byung ba'i bdag po dkyil 'khor dang bcas pa bsams la/ye shes dkyil 'khor spyan drangs te mchod yon dang mchod pa la sogs pa sngon du 'gro bas sbyin sreg bya'o/ /de yang rdzas re re las sreg blugs gcig gam/gsum mam/ bdun nam/ nyi shu rtsa gcig gam/ brgya rtsa brgyad dam/ stong dbul bar bya'o//rgyas pa'i dbang du byas pa yin na yang de'i zhar la las thams cad la sngags kyis bskul ba'i phyir sbyor ba bstan pa ni/ rgyas dang zhes bya ba la sogs pa smos pa yin te/ rgyas pa la sogs pa'i las bdun po la go rims bzhin du oM la sogs pa'i sngags bdun tha mar sbyar ba yin la/ 'ang zhes bya ba'i sgras ni bskul ba'i mthar bya ba dang / bskul ba'ang bya zhes bya ba bskul ba de yang sngags kyi mthar gzhug pa ste/ sngags kyi gong du yi ge oM la sogs pa de nas bskul ba/ de nas yang oM la sogs pa gzhug go zhes bya ba'i don to/ /de ltar cho ga 'dis thugs ka'i zla ba la bzhugs pa'i dkyil 'khor gyi 'khor lo snga ma bzhin du rdo rje gnas pa'i ljags la zla ba la sogs pa'i rdzas gsher ba dang /de la sogs pa mar la sogs pa tshim par byed pa rnams kyis yang dag par tshim par bya'o/ /rang gi bdag po la sreg blugs phul ba nyid kyis lha thams cad la sbyin sreg phul bar 'gyur ba'i mdor bsdus pa'i don bshad pa ni/snying ga zhes bya ba la sogs pa smos pa yin te/ rang gi bdag po zhes bya ba ni 'jam pa'i rdo rje nyid do/ /snying ga'i sems dpa' zhes bya ba ni de'i ye shes sems dpa' la mngon sum du sreg blugs phul bas/ tshim par byas pas ni lha thams cad ye shes sems dpa' dang bcas pa tshim par gyur bar bsam par bya'o/ /bsam pa de yang sreg blugs thams cad kyi ljags la bstabs par mos pa yin pa'i phyir ro/ /yang na lha thams cad kyi ljags dang de'i ljags tha mi dad par lhag par mos pas so//de nas de'i rigs kyi snying po lan gsum mam bdun gyi bar gyi dgang blugs kyis gzi brjid bskyed par bya'o/ /mthar yang dgang blugs phul la bsang gtor dang / 'thor 'thung dang mchod yon phul nas yang dag par mchod de legs par bstod la lha rnams kyi 'khor lo gshegs su gsol bar bya'o//de nas sreg rdzas kyi lhag ma me lha la phul la me lha de yang de bzhin du gshegs su gsol lo/ /'khor lo zhes bya ba ni bris pa'i dkyil 'khor ro/ /yang dag 'jug ces bya ba ni 'jug par bya'o/ /de nas lha rnams kyi 'khor lo mngon sum bzhin du bsams la cho ga snga mas yang dag par mchod do phyir dbyung bar bya'o//de nas rigs kyi bdag po bla ma nyid du byas la 'og nas bshad pa'i slob ma 'jug pa'i cho gas bdag nyid dang por dkyil 'khor du zhugs la/ bdag nyid dbang bskur ba'i cho ga rigs kyi bdag por rdzogs par mdzad pa dang /de nyid las slob dpon gyi las thams cad kyi rjes su gnang ba mnos la/ dkyil 'khor du slob ma gzhug par bya ba'i phyir de kho na nyid dang / bden pa dgongs par bya ba nyid kyis bcom ldan 'das mnyes par bya ba'i tshigs su bcad pas gsol ba gdab par bya'o//de la de kho na nyid ni thar pa'i go 'phang gi mchog go//bden pa ni dngos po thams cad kyi rang bzhin no/ /de la de kho na nyid ji lta bu yin zhe na/ 'dod chags che las byung de nyid/ /ces bya ba smos te/ 'dod chags chen po las byung ba ni zag pa med pa'i bde ba chen po ste rdo rje 'chang gi rang bzhin ni de kho na nyid yin no zhes bya ba'i tha tshig go//bden pa ji lta bu zhe na/ 'khor lo'ang gzugs brnyan lta bu zhes bya ba smos te/ chos thams cad gzugs brnyan dang 'dra ba'i bdag nyid can gnyis su med pa'i ye shes kyi sku dang ldan pa'i dkyil 'khor kyi 'khor lo ni bden pa yin no zhes pa'i tha tshig go//de la/ nam mkha' skye ba'i mtshan ldan phyir/ /zhes bya ba la sogs pa tshigs su bcad pa lngas ni dam tshig gsum gyi glus mchod pa yin no/ /de nas/sems can kun gyi yid khyab cing //zhes bya ba gcig gis ni de kho na nyid gdas par bya'o/ /de nas tshigs su bcad pa gsum gyis ni bden pa bsgrags pa'o/ /de la dam tshig gsum gyi glus dam tshig gsum po rdo rje 'chang ba'i de kho na nyid gang yin pa de ni 'di'i chos yin la/ de'i dam tshig gang yin pa de 'di'i dam tshig yin pas dkyil 'khor gyi bdag po thams cad kyang rdo rje 'chang ba'i rang bzhin can yin no/ /de bas na de'i de kho na nyid la sogs pa gang yin pa de 'jam pa'i rdo rje la sogs pa'i yang yin par 'gyur ro/ /de la tshigs su bcad pa gsum gyis ni de kho na nyid gsum gyi glu ston to//de la de kho na nyid gsum ni rang bzhin gyi de kho na nyid dang / 'byor ba'i de kho na nyid dang rnam par dag pa'i de kho na nyid do/ /de la rang bzhin gyi de kho na nyid kyi dbang du mdzad nas tshigs su bcad pa ni nam mkha' skye ba'i zhes bya ba la sogs pa yin te/ de kho na nyid gtso bor gyur cing de kho na nyid du ro gcig pa spros pa med pa rnam par mi rtog pa'i ye shes byang chub kyi sems ni 'di'i rang bzhin yin la/de nyid ni rdo rje chen po ste mi phyed pa'i phyir ro/ /des na sems dpa' rdo rje che rang bzhin/ /zhes bya'o/ /rdo rje sems dpa' bdag grub mdzod/ /ces bya ba ni rang bdag nyid du mdzod cig ces bya ba'o//sems la ni skye ba yod pa yin la skye ba dang ldan pa ni 'jig par 'gyur ba yin mod kyi 'on kyang bcom ldan 'das gang yin pa de ni thog ma dang tha ma med pa yin la/ de ltar na 'di ni byang chub kyi sems kyi rang bzhin yin no/ /byang chub kyi sems de yang gang yin zhe na gang 'di byang chub sems dpa' rnams kyi thog ma dang tha ma med pa'i sems kyi rgyun stong pa nyid du ro gcig pas nam mkha' dang 'dra bas rang bzhin gyis dag pa byang chub sems dpa' thams cad kyi thun mong du gyur pa'i de bzhin nyid kyi sku'i sa rnams la glo bur ba'i sgrib ba rim gyis rnam par dag pa'i mthar thug par rtogs par 'gyur ba yin pas de sku des byang chub kyi sems zhes bya bar bshad do//des na byang chub kyi sems kyi rang bzhin can gyis bcom ldan 'das de la thog ma dang tha ma ga la mnga'/gang yang 'di sgrib pa dang bral bar gyur na gsal bar 'gyur bas 'di'i skye bar nye bar gdags su rung ste/dper na nam mkha' rtsig pa la sogs pa gsal bar snang ba dang 'dra ba'o/ /de'i phyir/ nam mkha' skye ba'i mtshan ldan phyir/ /zhes smos pa'i dpe 'di la yod pas nam mkha' skye ba'i mtshan ldan te de'i ngo bo nyid ni de nyid de de'i phyir thog ma tha ma med pa'o//mchog ni gtso bo'o/ /'byor ba'i de kho na nyid kyi dbang du byas pa'i tshigs su bcad pa ni kun mchog ces bya ba la sogs pa yin te/ dngos grub thams cad kyi mchog ni dngos grub chen po ste yang dag par rdzogs pa'i byang chub bo//des na dbang phyug chen po ste/ stobs bcu mi 'jigs pa la sogs pa'i chos thams cad la dbang ba'i mchog tu gyur pa'o/ /des na lhag pa'i lha yin te/ 'jig rten pa thams cad las lhag pa'i lha nyid do/ /thams cad kyi sku dang gsung dang thugs rdo rje brnyes pas na rdo rje 'dzin pa kun te/sangs rgyas dang byang chub sems dpa' thams cad kyi phun sum tshogs pa de la rag las pa'i phyir rgyal po'o//de'i 'byor ba de yang rtag tu mi 'gyur ba yin bas na mi 'gyur mchog go/ /rnam par dag pa'i de kho na nyid kyi dbang du mdzad nas gsungs pa ni nyes pa mi mnga' zhes bya ba la sogs pa yin te/bag chags dang bcas pa'i sgrib pa thams cad spangs pas na nyes pa mi mnga' ba'o/ /de ltar na yang gnas pa dang / phrin las dang / 'dod chags dang / dga' ba dang ldan pa yin no zhes bya ba ni rtag pa la sogs pa'i tshig gi don yin no/ /de yang sku gsum gyis nam mkha' ji srid kyi bar du bzhugs pas na rtag pa'o//dngos grub thams cad brnyes pa'i 'dod chags kyis sems can thams cad la rjes su dga' bar mdzad pas na/ 'dod chags kun gyi rjes chags pa/ /zhes bya'o/ /de nyid kyis na dmigs su med pa'i thugs rje chen po'i 'dod chags mnga' bas na 'dod chags chen po'o//mtshan ma med pa'i chos kyi dga' bas dgyes pas na dga' ba che zhes bya'o/ /de nyid kyis zhes bya ba ni tshigs su bcad pa gsum gyis bshad pa'o/ /chos nyid kyi glu ni shin tu dag pa zhes bya ba la sogs pa tshigs su bcad pa gcig gis ston te/'di la chos nyid kyi sku thar ba chen po'i rang bzhin can ni chos yin la/ de ni tshigs su bcad pa 'dis ston te/ glo bur ba'i sgrib pa bag chags dang bcas pa thams cad spangs pa'i phyir ram/ slar mi ldog pa'i dag pa mnga' bas na shin tu dag pa'o//chos thams cad kyi mchog ni mya ngan las 'das pa yin la/ mya ngan las 'das pa thams cad kyi mchog ni sangs rgyas kyi mya ngan las 'das pa yin te/ de'i rang bzhin ni bcom ldan 'das yin pas de'i phyir kun gyi mchog go/ /chos kyi dbyings ni rang bzhin gyis rnam par dag pa yin pas na gdod nas grol ba'o//chos rnams kyi chos nyid ji ltar gnas pa de ltar thugs su chud cing gshegs pas na de bzhin gshegs pa'o/ /kun ni ma lus pa'o/ /bzang po ni dge ba ste/ skal ba dang ldan pa rnams 'di las byung bas na kun du bzang po'o/ /chos kyi dbyings ni chos thams cad kyi chos kyi mtshan nyid yin bas na kun bdag nyid do//byang chub kyi bdag nyid can kyi sems dpa' ni byang chub sems dpa'o/ /dam tshig ni phyag rgya ste de'i glu ni dngos grub chen po zhes bya ba la sogs pa'i tshigs su bcad pas ston te/ dngos grub chen po kun gyi mchog /ces bya ba ni bshad zin to//dbang phyug chen po yang bshad zin to/ /de'i phyag rgya ni de'i rgyu mthun pa ni yid kyi rang bzhin can gyi brda'o/ /de bzhin gshegs pa thams cad kyi mthus rang nyid byin gyis brlabs shing mchod pa'i rdo rje sems dpa'i sku dang gsung dang thugs kyi rdo rje'i ngo bo'i phyag rgya des bcom ldan 'das yum rdo rje bsnyems ma'i phyag rgya'i bdag po ste gtso bor gyur pa bdag la grub par mdzod cig pa'o//ji ltar na 'di ni bdag po yin zhe na/ rdo rje cher bstod pa zhes bya ba ste dang po'i rdo rje bstod cing phyag g.yas pas gsor ba'i phyir ro/ /'di ni nye bar mtshon pa tsam ste/ de la sogs pa'i phyag rgya chen po'i dngos grub bdag la stsol cig ces bya ba'i tha tshig go//de ltar dam tshig gsum gyi glu'i mchod pa bshad nas de kho na nyid bsgrags pa ni/ sems can kun gyi zhes bya ba la sogs pa smos pa yin te/ sgrib pa gnyis rnam par dag pa de bzhin nyid gtso bor gyur pa'i ye shes ni byang chub kyi sems yin la/de nyid ni shin tu rnam par dag pa'i sangs rgyas kyi byang chub rnam par thar pa'i gnas so/ /de ni bcom ldan 'das rdo rje 'chang yin la/ de nyid ni 'dir 'dod pa'i sgrar gsungs te chen po rnams kyi 'dod par bya ba yin pa'i phyir ro/ / 'dod pa de yang sems can kun gyi zhes bya ba sangs rgyas dang byang chub sems dpa' nas so so'i skye bo'i bar gyi yid la khyab pa yin no/ /bde ba rab tu stsol bas pha dang 'dra'o/ /de la sangs rgyas rnams la ni rnam par dag pa'i tshul gyis thugs khyab pa'o/ /byang chub sems dpa' rnams la ni rang gis rnams kyi sgrib pa rnam par dag pa'i tshul gyis so//de rnams la bde ba rab tu stsol bar mdzad pa yang yin te/ rnam par dag pa'i bde ba skyed par mdzad pa'i phyir ro/ /de yang rnam par mi rtog pa la 'jug pa'i gzungs las/ dam chos 'di la rgyal ba'i sras//rnam par mi rtog bsams gyur na/ /rnam rtog 'grong dka' rnam spangs te/ /rim gyis mi rtog 'thob par 'gyur/ /de bas rab zhi mi g.yo mchog /dbang byed mnyam la mi gnas pa/ /rnam par mi rtog bde ba ni/ /byang chub sems dpas thob par 'gyur/ /zhes ji skad gsungs pa lta bu'o//la la las ni snying la bzhugs zhes zer te/ de yang bde ba rab tu stsol ba nyid kyis sdug pa yin bas snying la gnas zhes bya'o/ /bcom ldan 'das 'dod pa de ni de rnams kyi yab tu gyur pa yang yin te/ de rnams rnam par dag pa'i ye shes kyi sku de nyid las 'khrungs pa'i phyir ro//sangs rgyas dang byang chub sems dpa' ji lta ba de bzhin du so so'i skye bo rnams kyi yang yin te/ sems kyi bde ba dang lus kyi bde ba de nyid kyi rang bzhin kyis rnam par dag pa nyid kyi dbang du byas pa'i phyir ro/ /de bas na bcom ldan 'das 'di ni 'dod pa'i mchog dang /dam tshig gi mchog kyang yin te/ dam tshig rnams kyi mchog ni yang dag pa'i ye shes yin la/ de gang la mnga' ba'i sangs rgyas dang byang chub sems dpa' de rnams kyi mchog ste gtso bo'o/ /yang na yid la phra ba'i tshul gyis til la til mar gyi tshul du khyab pa'o/ / bde ba ni 'jig rten las 'das pa ste/de rab tu stsal ba dang / snying la bzhugs zhes bya ba la snying ni yid kyi rtsa ba'i gnas so/ /yab ni dag pa dang ma dag pa'i skus skyed par mdzad pa'o/ /dam tshig mchog ces bya ba la mchog ni yid kyi gzugs dag pa nyid de/ des phul du byung ba'o/ /bden pa bsgrags pa gsungs pa ni/bden pa gang gis zhes bya ba la sogs pa yin te/ ye shes mchog ni gnyis su med pa'i ye shes te/gnyis su dbyer med pas so/ /de yang gnyis su nye bar mi dmigs pa ni shes rab yin la/ gnyis su med pa la dmigs pa ni thabs yin te/ dngos med gang zhig shes rab ste//thabs ni dngos po'i mtshan nyid do/ /zhes ji skad gsungs pa la sogs pa lta bu'o/ /byang chub kyi sems kyi bdag nyid can 'di yang dkyil 'khor gyi bdag po'i bdag nyid can yin no/ /de bas na dkyil 'khor la ni de'i rang bzhin rjes su 'gro ba nyid yin par ston to//bden pa ni phyin ci ma log pa'o/ /'dod pa ni yid la mngon par bsams pa'o/ /chos rnams zhes bya ba ni rnam par snang mdzad la sogs pa nas bdud rtsi thab sbyor gyi bar gyi dkyil 'khor pa rnams so/ /gzugs brnyan lta bu ste zhes bya ba ni sems tsam gyi rang bzhin can yin pa'i phyir ro//dag pa ni nyon mongs pa'i sgrib pa rnam par dag pa'i phyir ro/ /gsal ba ni shes bya'i sgrib pa rnam par dag pa'i phyir ro/ /rnyog pa med pa ni snyoms par 'jug pa'i sgrib pa rnam par dag pa'i phyir ro/ /gzung du med pa ni so so rang gi rig pa nyid kyis na shes pa gzhan gyis gzung du med pa'i phyir ro//brjod du med pa ni sgra dang rnam par rtog pa rnams kyi yul ma yin pa'i phyir ro/ /'di rnams kyi rgyu ni chos kyi dbyings so/ /las ni thos pa dang bsams pa dang bsgoms pa la sogs pas so/ /'di gnyis las kun du 'byung ba 'di yin pas na de skad ces bya'o//de bzhin nyid dang de kho na nyid ces bya ba ni yang dag pa'i ye shes te/de gnyi ga'i sgrib pa thams cad rnam par dag pa ni de bzhin nyid dang de kho na nyid ces bya ba ste/ de ni de bzhin gshegs pa thams cad kyi dbyer mi phyed pa'i chos kyi sku yin no/ /de yang bcom ldan 'das rdo rje 'chang ba yin la de nyid ni dkyil 'khor kyi bdag po thams cad yin pas na de las nges par skyes pa ste/de'i rgyu mthun pa zhes bya ba'i tha tshig go/ /de bas na rnam par snang mdzad la sogs pa 'di dag ni de bzhin gshegs pa thams cad dang 'brel ba me long lta bu'i ye shes la sogs pa bsdus par gyur pa yin no//me long lta bu'i ye shes la sogs pa mnyam pa nyid kyi rgyas btab pa la yang dag par brten nas de las gzhan pa zag pa dang bcas pa dang / zag pa med pa'i chos rnams kyang phung po dang skye mched dang khams 'di dag nyid kyis rgyas btab pa yin no//de bas na 'di rnams las de dag kyang tha mi dad par bsgom par bya ste/ rang bzhin gyis rnam par dag pa'i chos nyid dang rgyas btab pa tshad mar byas pa yin pa'i phyir ro/ /gzugs brnyan zhes bya ba ni ji ltar bris pa'o/ /gsal bar zhes bya ba ni gang gi gzugs brnyan gang yin pa de'i gzugs su ltos shig pa'o//dri ma med ces bya ba ni bden pa'i byin gyi rlabs dang / bcom ldan 'das kyi byin gyi rlabs kyis sdig pa nges par bsal bas so/ /de ltar bcom ldan 'das la gsol ba btab nas gzhug par 'os pa'i slob ma gzhug par bya'o/ /de yang re zhig rnam pa gnyis te/la la ni spyi'i sdom pa'o/ /la la ni slob dpon gyi sdom pa'o/ /de la sdom pa gang slob dpon mi byed kyang sbyin pa de ni spyi'i yin te/ skyabs su 'gro ba dang / byang chub tu sems bskyed pa tsam gyi mtshan nyid can sngar bshad pa yin no/ /de la slob dpon nyid du byed par sbyin pa gang yin pa de ni slob dpon gyi sdom pa ste/rigs lngas yang dag par bsdus pa'o/ /de yang slob dpon don du gnyer ba la 'dzin du gzhug ste/ de ni sdom pa zhes bya ba 'dis snga ma ston pa yin te/ rang gi ngo bo yang kho bos bshad zin to/ /de la spyi'i sdom pas ji ltar 'jug pa de ni slob ma spyi'i zhes bya ba la sogs pa smos pa yin te/de yang slob ma khrus byas la dri la sogs pas brgyan cing me tog gi phreng ba btags la kha dri zhim par byas te stod g.yogs dang smad g.yogs dmar po dang gtsug tor dang gdong g.yogs dmar po bcings la sngon bzhin zhes bya ba 'jam pa'i rdo rje la sogs pa rang gi 'dod pa'i lha'i skur bsams la/sku sogs 'od gsal bya zhes bya ba mig dang sku la sogs pa byin gyis brlabs par bsams la yol bas bar du bcad de bsang gtor byas pa la sdug pa khyod su yin zhes dri bar bya'o/ /slob mas kyang sdug pa bdag ni skal ba bzang po'o zhes brjod par bya'o//de nas yang slob mas kyang bla ma la yon phul ba dang / spos la sogs pas yang dag pas mchod la lag pa gnyis kyis me tog gi phreng ba 'dzin du bcu gnas de bzhin du shar sgor yi ge hUM gis gzhag par bya'o/ /de nas 'di oM sarba yo ga tsit+to dbA da yA mi zhes bya ba'i sngags 'dis rnal 'byor gyi sems bskyed la/su ra te sa ma ya s+t+waM ho sid+d+hi badzra ya thA su khaM zhes bya ba'i snying po 'dis snying gar rdo rje gzhag par bya'o/ /de nas de la deng khyod de bzhin gshegs pa thams cad kyis byin gyis brlabs kyi zhes bya ba la sogs pa nas dad pa dang mi ldan pa rnams la yang ma yin no zhes bya ba'i bar du brjod par bya'o//de nas oM AH ya mAn+ta kr-ita hUM zhes bya ba'i gshin rje gshed kyi sngags 'di dang sogs pa'i sgras 'dod pa'i rgyal po'i sngags sam/ hUM mdzad kyi sngags kyis slob ma bkug la a khaM bI ra hUM zhes bya ba'i yi ge lngas bcug la 'og nas 'byung ba'i cho ga rnams bya'o//slob dpon gyi sdom pa la ni slob ma gzhug pa'i cho ga khyad par yod la de las cung zad ni phyir mi ldog pa'i dbang bskur ba las 'chad do/ /cung zad ni 'di nyid du de nas yang zhes bya bas ston te/ de nas zhes bya ba ni 'jug pa'i rjes thogs la'o//yang zhes bya ba ni sdud pa'i don to/ /'di skad brjod ces bya ba ni deng khyod de bzhin gshegs pa thams cad kyi rigs su zhugs kyis zhes bya ba nas dam tshig nyams par gyur ta re zhes bya ba'i bar du'o/ /yang zhes bya ba'i sgra ni de rnams la brjod par bya zhing ji skad bshad pa'i cho ga rnams bya'o//de'i snying gar zhes bya ba la sogs pas spyi dang slob dpon gyi sdom pa dang ldan pa'i thun mong gi cho ga bshad pa yin no/ /gal te tshul 'di smras na ni/ /zhes bya ba ni ci ste smras par gyur na'o/ /dmyal ba zhes bya ba ni chu bo rab med du gyur pa'o//dngos grub ces bya ba ni khyed nyid kyis zhes bya ba dang sbyar ro/ /rdo rje bdud rtsi'i chu zhes bya ba ni tshar gcod pa na rdo rje'o/ /phan 'dogs pas na bdud rtsi'o/ /dbab pa'i cho ga bshad pa ni/ de nas slob ma zhes bya ba la sogs pa yin te/ de nas slob ma brjod du gzhug pa ni 'di yin te/de bzhin gshegs pa thams cad kyis byin gyis rlobs la rdo rje sems dpa' bdag la dbab par gyur cig ces bya ba'o/ /de skad smrar bcug nas de'i snying gar yi ge laM las byung ba'i dbang chen gyi dkyil 'khor la mtshams bzhir rdo rje ser pos mtshan par hUM bsgom par bya'o//lkog mar ni baM las byung ba'i chu'i dkyil 'khor dkar po zlum po bum pas mtshan pa bsam par bya'o/ /spyi bor yaM las byung ba'i rlung gi dkyil 'khor sngon po gzhu'i dbyibs can ba dan gyis mtshan pa bsgom par bya'o//chu dang rlung gi dkyil 'khor de gnyis la yi ge hA dang AH rim bzhin bsgom par bya'o/ /rkang pa gnyis kyi 'og tu ni yi ge dz+haiM rab 'bar ba zhes bya ba kun nas 'od 'bar ba bsgom par bya'o/ /dz+haiM de yang rlung gi dkyil 'khor la gnas pa'i raM las 'byung ba'i me'i dkyil 'khor 'og gzhir gyur pas sbar la/de nas slob ma la dbab par bya'o/ /A be sha ya zhes bya ba la sogs pa'i sngags ji srid du babs par ma gyur pa de srid du bsgyings pa dang bcas pas brjod par bya'o/ /slob ma la babs par gyur par shes pa dang de 'dod chags rdo rje'i skur bsams la/de'i lce la yi ge a dmar po bsams te b+h+rUM hi badzra zhes brjod na dge ba'am mi dge ba ston to/ /de nas khyod kyi mig lam na ji lta bu snang zhes dris la/ dkar po dang ser po dang dmar po dang nag po'i 'od kyi dkyil 'khor snang ba las de bzhin zhi ba la sogs pa'i dngos grub kyi skal ba dang ldan par shes par bya'o//de nas babs pa de brtan par bya ba'i phyir te tiSh+Tha badzra zhes brjod do/ /de nas hUM gis me tog gi phreng ba dor zhing pra tIts+tsha badzra ho zhes brjod do/ /de nas de mgo la bcing zhing pra ti gr-ih+Na zhes bya ba la sogs pa brjod par bya'o/ /slob ma gang dag gis lha de sngar blangs pa'am ma blangs pa ste bsten pa'am ma bsten pa de me tog gi phreng ba dor ba las lha gang gi mtshan ma gang yin pa'am mtshan ma dang nye ba gang yin par babs pa'i lha de'i sbyor ba dag de gnyis la sbyin par bya ste/de ni 'di gnyis la 'grub par 'gyur ro/ /dad kyang zhes bya ba ni yang na 'di gnyis lha gang la lhag par dad cing mos pa'o//yang na skal ba can nyid ces bya bas ni gang gi lha'i rigs gang yin pa 'di gnyis kyi nye bar spyod pa las shes par bya'o/ /de bzhin du babs par gyur pa'i slob ma'i mig gnyis la 'bar ba dang bcas pa'i oM bsams la/ rdo rje sems dpa' deng khyod kyi/ /zhes bya ba'i tshigs su bcad pas gdong g.yogs bkrol te/ he badzra pA sh+ya zhes brjod la/dkyil 'khor gyi bdag po nas brtsams te bdud rtsi thab sbyor gyi dkyil 'khor bstan par bya'o/ /mig ni thams cad kyi zhes bya ba ni thams cad mthong ba'i phyir ro//rdo rje'i mig ces bya ba ni gzugs can thams cad la thogs pa med pa'i mig go/ /bla na med ces bya ba ni sangs rgyas rnams kyi ci 'dra ba'o/ /'byed mdzad de zhes bya ba ni sgrib ba rnams bsal bas so/ /chu la sogs pa lngas dbang bskur ba ni rig ba'i dbang bskur ba yin la/de ni badzra zhes bya ba la sogs pa smos pa yin te/ brjod de zhes bya ba ni tshig tu brjod pa'o/ /chus zhes bya ba ni dang por rnam par rgyal ba'i bum pa'i chus so/ /de nas lha mo bzhi'i bum pas so/ /de nas dkyil 'khor ba'i bum pa rnams kyis te/ de rnams nyid kyi rang rang gi sngags brjod cing mngon par dbang bskur bar bya'o//sngon bzhin zhes bya ba ni dang po'i sbyor ba dang 'dra bar rig pa'i tshogs phyag na bum pa rnams kyis so/ /cod pan zhes bya ba ni dar dpyangs dang bcas pa'i cod pan gyis so/ /rang gi bdag po ni mi bskyod pa la sogs pa'o/ /rdo rje de zhes bya ba ni rang gi lha'i mtshan ma'o//yang na rdo rje de zhes bya ba ni dpal mchog dang po'i rdo rje ste/ bcom ldan 'das de ni sangs rgyas thams cad gcig tu bsdus pa yin pa'i phyir ro/ /de nyid kyi phyir/ 'di ni sangs rgyas thams cad de/ /zhes gsungs pa'i phyir ro/ / rab grub phyir zhes bya ba ni sangs rgyas nyid la sogs pa'o/ /rdo rje dril bus zhes bya ba ni lag pa gnyis kyis bzung bas so/ /rang gi bdag pos zhes bya ba ni bdag pos dbang bskur bar bya ba'o/ /spyi bor ming gi zhes bya ba ni mgo bor rdo rje dang dril bu bzhag pas so/ /de bzhin du gzhan yang ming gi dbang bskur ba ni/kye che ge mo rdo rje zhes bya bas ming gi dbang bskur ba ste/ kye dpal 'jam pa'i rdo rje zhes bya ba'i rnam pas so/ /'dir ming gi dbang bskur ba 'di ni 'khor los sgyur ba'i mtshan las drangs nas sbyin no/ /'khor los sgyur ba yang gang yin zhe na/sangs rgyas dang byang chub sems dpa' rnams kyi 'khor lo'i bdag por gyur pas dbang bskur ba nyid de/ de'i mtshan gyis dbang bskur bar 'dod do//'di ni byang chub sems dpa' nyid yin pas de gnyi ga yang mi rigs so zhes 'ga' zhig som nyi skye bar 'gyur bas de bsal ba'i phyir bdag po zhes bya ba smos te/so sor snang ba gang ci yang rung de ni rang nyid kyi dngos po thams cad yin te/ thams cad kyang sems kyi 'byor ba yin no zhes bya ba'i tha tshig go/ /gtso cher zhes bya ba ni sgro btags pa ma yin pa ste/ don dam pa nyid du na rang nyid ni dngos po thams cad yin no zhes bya ba'i don to//de ci'i phyir zhe na/ sems gang yin pa de nyid ni bdag yin la/ shes pa de nyid ni sems yin la/ shes pa las logs shig na snang ba ci yang med do zhes bya ba'i tshul gyis so/ /de bas na de nyid ni 'jam pa'i rdo rje'o//rang zhes bya ba ni mngon sum gyis yin gyi nye bar gdags pas ni ma yin no/ /de ci'i phyir zhe na/'phags pa 'jam dpal ni ye shes kyi sku yin pa'i phyir ro/ /de bas na sems kyi 'byor ba 'di thams cad ni 'khor lo yin la/ sems ni 'khor los sgyur ba yin te/ de yang bcom ldan 'das 'jam dpal nyid yin no zhes bya ba ni rigs pa yin no//mgon po 'jam dpal ni sangs rgyas rnams kyi ye shes kyi tshogs kyang ma yin la/ sems can thams cad kyi yang ma yin no/ /de bas 'jam pa'i rdo rje'i mtshan gyis sems can rnams la dbang bskur ba ni de kho na nyid ma yin no zhe na/de'i phyir chos rnams zhes bya ba la sogs pa smos te/sangs rgyas rnams kyi chos gang yin pa dang / de las gzhan pa gang yin pa de thams cad ni de bzhin nyid kyi tshul rang bzhin gyis rnam par dag pa yin no/ /rnam par dag pa'i chos gang yin pa de nyid ni/ sangs rgyas rnams kyi ye shes kyi sku yin no//de bas na slob ma yang sems kyi 'byor pa ni sangs rgyas dang byang chub sems dpa'i 'khor lo yin la/ de'i sems ni 'jam pa'i rdo rje'i zhes bya ba'i 'khor los sgyur ba yin pas mtshan dang dbang bskur ba gnyis ka yang mi rigs pa ma yin no/ /rang nyid ces bya ba la sogs pa la dkyil 'khor gyi bdag po nyid du gyur pa yin pas rang nyid kyi mtshan gyi dang por dpal gyi sgra dang sbyar bar bya ste/dper na dpal 'jam dpal 'byung ba'i dkyil 'khor zhes bya ba dang / dpal rdo rje sems dpa' 'byung ba'i dkyil 'khor zhes bya ba lta bu'o/ / ming gi dbang bskur ba la ni khyad par yod pas de bshad pa ni kun la zhes bya ba la sogs pa yin te/ 'ang zhes bya ba'i sgras ni de kho na nyid kyi khyad par ston te/ ming gi dbang bskur ba la lha thams cad kyi khyad par nyid la/dpal gyi sgra dang sbyar nas/ de'i gong du yang kye'i sgra dang sbyar nas rdo rje'i sgra dang mtha' mar sbyar te brjod par bya'o//'di ga las shes she na/ bdag po thams cad las zhes bya ba ste/ 'khor lo'i bdag po nyid las zhes bya ba'i tha tshig go/ /gnas skabs 'di la thams cad bdag por gyur pa yod pa ma yin mdo kyi/ rang rang gi dkyil 'khor la ni yod pa nyid yin no//de bas na thams cad kyang dkyil 'khor 'dir rang gi ming dang dpal rdo rje dang kye zhes bya ba'i sgra dang sbyar nas dbang bskur ba sbyin par bya ste/ kye dpal 'jam pa'i rdo rje/ kye dpal sems dpa'i rdo rje/ kye dpal rab tu dga' ba'i myu gu'i rdo rje zhes bya ba la sogs pas ci rigs par bya'o zhes bya ba'i tha tshig go//de ltar bshad pa'i dbang bskur ba rnams kyi de kho na nyid bshad pa ni/ chu'i khams zhes bya ba la sogs pa yin te/ chu'i khams dag pa'i de kho na nyid ni mi bskyod pa zhes bya ba chos kyi dbyings shin tu rnam par dag pa'i ye shes sam/zad pa shes pa'o/ /bdag po bya ba sgrub ces bya ba ni bya bsgrub pa'i ye shes yin no zhes bya ba'i tha tshig go/ /don stsol ba zhes bya ba ni don stsol zhing nye bar ston pas na don stsol ba ste/ don stsol ba ni don ster ba nyid yin bar sprel te bstan pas ming gi dbang bskur ba ni me long lta bu'i ye shes kyi bdag nyid can no zhes bya ba'i tha tshig go//ye shes zhes bya ba la sogs pa la de ltar ye shes lnga po gang yin pa de ni rig pa yin la/ de bas na chu la sogs pa'i dbang bskur ba lnga la ni rig pa'i dbang bskur ba zhes bshad do//'dir zhes bya ba ni rig pa'i dbang bskur ba byin pa la'o/ /rdo rje zhes bya ba ni rdo rje brtul zhugs sbyin par bya ba yin te/ rig pa'i dbang bskur ba las ni thun mong gi byang chub kyi nges pa 'thob kyi/ khyad par gyi yang dag par rdzogs pa'i byang chub ni ma yin no/ /de bas na ring zhig na yang dag par rdzogs pa'i byang chub nges par thob par bya ba'i phyir brtul zhugs sbyin pa 'ba' zhig tsam rig pa'i dbang bskur ba la bya bar rigs kyi/lung bstan pa dang dbugs dbyung ba gnyis ni ma yin te/ de gnyis ni phyir mi ldog pa'i sa dang 'brel ba'i phyir ro/ / yang gang zhig la rig pa'i dbang bskur ba 'ba' zhig tsam sbyin zhe na/ slob dpon du dbang bskur ba don du mi gnyer ba'am/ de don du gnyer ba spyi'i sdom pa nyi tshe tsam len par byed kyi/ slob dpon gyi sdom pa ni ma yin pa dag la'o/ /khams zhes bya ba ni rdo rje 'chang ba'i'o/ / rigs zhes bya ba ni rang bzhin no/ /de yang gang yin zhe na/ rdo rje chen po'i dbang bskur ba'o/ /de ni dbang ba ste de la dbang ba nyid ni de mi ldog pa nyid ces bya ba'i don to/ /de nyid kyis na rdo rje chen por dbang bskur ba ni mi ldog par dbang bskur ba zhes bya ba dang / slob dpon gyi dbang bskur ba zhes bshad do//de'i phyir 'dir phyir mi ldog pa'i dbang bskur bar gyur na brtul zhugs dang lung bstan pa dang / dbugs dbyung ba gsum char bya ba yin te/ lung bstan pa dang dbugs dbyung ba gnyis kyang thob pa'i phyir ro/ /rig pa'i dbang bskur ba la yang ming 'di yin zhes bya ba ni lan 'ga' ni rig pa'i dbang bskur ba 'ba' zhig tsam la'ang brtul zhugs dang lung bstan pa dang /dbugs dbyung ba 'di snod kyi khyad par bltas nas sbyin par bya ba nyid yin no/ /ming zhes bya ba ni ming gi don du tha snyad btags pa zhes bya ba'i tha tshig go//tha snyad du btags pa yang nga ni lung bstan to/ /ngas ni dbugs dbyung ba thob po zhes lhag par mos pa'i stobs kyis ring zhig na byang chub chen por nges par 'thob par bya ba'i don du brtul zhugs byin pa dang 'dra ba yin no/ /rig pa'i dbang bskur ba'i rjes thogs la rdo rje brtul zhugs sbyin bar bya'o zhes gsungs pa de ni 'di de zhes bya ba la sogs pa smos pa yin te/rdo rje brtul zhugs sbyin pa'i tshigs su bcad pa nyid dang / oM zhes bya ba la sogs pa brtul zhugs 'dzin du gzhug pa'i sngags dang / brtul zhugs dang 'brel pa'i dam tshig gsum sbyin bar bya ba yin te/dpal mchog dang po las kyang / de nyid kyis ni rdo rje gzung / /chos kyi dril bu dgrol bar bya/ /dam tshig gi ni phyag rgya cher//byin gyis brlabs nas snying po bzla/ /zhes gsungs pa yin no/ /'dir dril bu'i tshig kyang de nyid gzung la zhes bya ba dang sbyar ro//'di nyid bshad pa ni/rdo rje brtul zhugs zhes pa la sogs pa smos pa yin te/ kun zhes bya ba ni spyi'i sdom pa dang / gnyi ga'i sdom pa'o/ /rdo rje de nyid kyis 'dzin du gzhug go zhes bya bar sbyar ro/ /rdo rje'i de kho na nyid ni thog mtha' med pa'i zhes bya ba la sogs pa'i tshigs su bcad pas so//bdag po zhes bya ba ni 'gro ba thams cad kyi bdag po'o/ /lhag ma rnams ni sngar bshad zin to/ /'di de zhes bya ba la sogs pa ni dril bu'i de kho na nyid kyi tshigs su bcad pa yin te/ ji ltar de bzhin gshegs pa rnams kyi byang chub chen po'i ngo bo nyid kyi shes rab ni stong pa nyid la dmigs pa yin la/de ni de ston par byed pa'i sgra skad sna tshogs lhun gyis grub par 'jug pas rdzogs par byed pa yin te/ dril bu de yang de dang 'dra'o/ /de bas na 'di ni phyag rgya'i gzugs kyis de nyid shes rab yin par rgyal ba rnams kyis bshad pas de nyid ni byang chub yin par bzhed do//srid pa zhes bya ba la sogs pas ni chos kyi tshigs su bcad par gsungs pa yin te/srid pa ni 'khor bar skye ba'i rgyun no/ /de ni ngo bo nyid kyis yongs su dag pa'i tshul gyis de kho na nyid ces bya bas yongs su dag pa nyid yin no//'on kyang rang gis kun du brtags pa'i mtshan nyid gzung ba dang 'dzin pa'i bdag nyid can gyi dngos po gang yin la mngon par zhen pa gzhan gyi dbang gis bsdus pa des 'gal ba'i srid par byas pa ste/ gnod pa med pa las gnod pa can du byas so zhes bya ba'i tha tshig go//yang de nyid sems dpa' mchog ces bya ba ni byang chub sems dpa' rnams kyis ni srid pa'i mchog mdzad pa yin te/ mi gnas pa'i mya ngan las 'das par mdzad do/ /ji lta bus mdzad ce na/ rang bzhin dag pas zhes bya bas te/ rang bzhin de la mi bden pa'i mngon par zhen pa de dag cing zad pa gang yin pa de la de skad ces bya'o//dam tshig sbyin pa tshigs su bcad pa gsum gyis bshad pa ni/ bsnyen sogs zhes bya ba la sogs pa smos pa yin te/ 'di ni 'di rnams kyi bsdus pa'i don yin te/ bsnyen pa dang nye bar sgrub pa la sogs par bshad pa'i snying pos phyag rgya chen por byin gyis brlabs la/ gzugs la sogs pa'i 'dod pa dam tshig tu gyur pas gsang sngags zhes bya bar rang gi 'dod pa'i lha bzla zhes pa skad cig ma re rer mchod par bya'o/ /ma tshang ba med ces bya ba ni mchod pa'i yan lag ma tshang ba med par gyur pas so//rang gi rig pa zhes bya ba'i tshigs su bcad pas ni mchod pa'i yan lag ston pa yin te/ dam tshig des mchod par bya'o zhes bya bar sbyar ro/ /de yang gzugs la sogs pa rang rig pa tsam nyid kyis de kho na nyid nges par bcad pa dang /phyogs dang dus rnams khyab pa nyid kyis mchog tu che ba ste mchod pa'i yan lag gnyis so/ /'khor lo'i bdag po'i tshul du bdag nyid yid la byed pa ni gsum pa'o/ /de gnyi ga mchod par lhag par mos pa ni yan lag bzhi pa ste/ 'di dag ni nges par bya dgos pa yin no//de yang lus dang yid gdung bar byed pa'i sdom pa rnams la brten par gyur na dngos grub dman pa yang 'grub par mi 'gyur te/ 'di lta ste mi snang ba dang mngon par shes pa dang rig pa 'dzin pa dang / sku dang gsung dang thugs kyi dngos grub rnams kyang mi 'grub po//de bas na sngags kyi spyod pa nyid ni spyod pa thams cad kyi mchog yin no/ /de la spyod par mdzad pa'i sangs rgyas dang byang chub sems dpa' rnams 'dod pa thams cad nye bar bsten pa nyid kyis chos kyi yi ge brnyes pa yin te/ chos kyi sku'i bdag nyid can gyi thar pa brnyes pa yin no//mchog ni nyan thos la sogs pa'i thar pa las khyad par du 'phags pa yin no/ /byang chub mi 'dod pa rnams la ji ltar byang chub bar 'gyur ba 'am/byang chub 'dod pa ji ltar na dman pa 'grub par 'gyur zhe na ma yin te/ ye shes don gnyer zhes pa byang chub don du gnyer bas 'dod chags can zhes bya ba rnam par dag pa'i shes rab dang ldan pa'i 'khor lo can gyi sbyor bas 'dod pa bsten zhing thams cad bsgrub pa nyid du bya ste/byang chub bam dngos grub dman pa dag kyang bsgrub par bya'o/ /de nyid tshigs su bcad pas bshad pa ni gang gzhan zhes bya ba la sogs pa smos pa yin te/sku dang gsung dang thugs bsgoms pa ji skad bshad pa'i mnyes par bya ba rnams kyis so/ /gang bshad pa zhes bya ba ni bshad zin zhes bya ba'i don ston to/ /de ltar rig pa'i dbang bskur ba'i slob ma la 'dus pa'i phyag rgya dang bcas pa'i sngags rang nyid kyis brgya rtsa brgyad bzlas la sbyin zhing /bcom ldan 'di la stsal lags gyis/ /'di la 'go bar mdzad du gsol/ /zhes brjod do/ /slob mas kyang / bcom ldan bdag gis bzung lags kyis/ /bdag la 'go bar mdzad du gsol//zhes brjod do/ /de nas de dkyil 'khor du zlos su bcug la rang gi lha'i phyag rgya bslabs nas 'di skad ces brjod par bya ste/ khyed kyis sngags dang phyag rgya la mi mkhas pa dang / dkyil 'khor ma mthong ba la brjod par mi bya ste/ rgyu des khyed dang de nyid dmyal bar 'gro bar gyur ta re zhes pa'o//rig pa'i dbang bskur ba la slob dpon gyi dbang bskur ba sbyin par bya ba yin pas re zhig de brtan pa ni slob ma zhes bya ba la sogs pa yin te/ sdom pa ni 'dir slob dpon gyi sdom pa'o/ /byang chub rdo rje ni rdo rje 'chang chen po'o//mchod pa chen po'am mthu chen bo 'di la yang mnga' bas na mchod chen no//nam mkha' rdo rje ni rdo rje 'chang ba ste/ de bzhin nyid du ro gcig pa nyid kyis byang chub ni nam mkha' dang mnyam pa nyid yin pa'i phyir 'dir ni de'i rang bzhin nyid du ston cing de'i mdzad pa la spyod pas bla ma nyid la nam mkha' rdo rje zhes brjod do//'jug sgor zhes bya ba 'jug par byed pa'i sgor bstan pa gzhag pa gang yin pa der gnas par bya ste/ de yang der pad+ma 'dab ma brgyad pa sna tshogs pad+mar byas pa der rang gi lha'i sbyor ba zhes bya bas der 'dug ste/ rang gi gang 'dod pa'i lha'i sbyor ba bya'o zhes bya ba'i tha tshig go/ /snga ma bzhin du rig dbang bskur/ /zhes bya ba ni stan de nyid la cho ga snga mas rig pa'i dbang bskur ba thob pa'o/ /de lta bur gyur pa'i slob ma la sangs rgyas kyi 'khor los dbang bskur bar bya'o/ /rang snying byung zhes bya ba ni slob dpon gyi snying ga'i sngags kyi 'od zer gyi sgo las byung ba rnams kyis so//rol mo dri la sogs zhes bya ba'i sgras ni gdugs dang rgyal mtshan dang ba dan la sogs pa dang / ye shes kyi chus yongs su gang ba'i rin po che'i bum pa yang bsdu'o/ /'dis zhes bya ba ni 'og nas bshad pas so//sangs rgyas thams cad kyi sku dang gsung dang thugs kyi gsang ba gang yin pa de nyid rdo rje 'chang chen po'i gnas yin la/de las byung ba'i rgyu mthun pa'i tshul gyis so/ /de nyid kyis ni rdo rje chen po'o//'di nyid ni rdo rje chen po'i dbang bskur ba dang /phyir mi ldog par dbang bskur ba dang / slob dpon du dbang bskur bar bya ba yin no zhes bya bar bshad do/ /gang la dbang bskur ba 'di byin pa de la gsang ba dang / shes rab kyi dbang bskur bar bya ba yin no/ /yang slob dpon gyi dbang bskur ba de nyid kyi rjes thogs la mig thur gyis byug pa'i cho ga la sogs pa thams cad kyang bya ba yin la khyad par ni 'di dag tsam yin te/de la/ mdor na 'jig rten thams cad du/ /sems can kun la phan pa'i phyir/ /zhes bya ba la sogs pa tshigs su bcad pa lngas rjes su gnang ba'i dbang 'ba' zhig tsam sbyin gyi/ngo bo nyid kyis sems can rnams zhes bya ba la sogs pa tshigs su bcad pa drug gis kyang mi bya'o/ /snying la 'bab par bya ba yang tshigs su bcad pa dang po nyid kyis bya'i gnyis pas kyang mi bya'o/ /de nas dkyil 'khor gyi de kho na nyid dang / lha rnams kyi de kho na nyid dang / slob dpon gyi las rnams 'di la bstan par bya'o/ /de thams cad bshad pa ni/ mi mnyam med pas zur bzhi pa zhes bya ba la sogs pa dpal mchog dang po las 'byung ba yin no/ /'di'i don ni dkyil 'khor de ni mi mnyam pa med pa'i rgyus ni zur bzhi pa yin te/ mi mnyam pa med pa'i rnam par dag pa zhes bya ba'i don to//de yang zur bzhi pa nyid kyi de kho na nyid mi mnyam pa med pa yin no zhes bya ba'i bar du'o/ /mi mnyam pa med pa'i bshad pa ni/sangs rgyas sangs rgyas min mnyam nyid/ /ces smos pa yin te/ de bzhin nyid kyi rang bzhin gyi sangs rgyas dang sangs rgyas ma yin pa mnyam pa nyid kyis ni mi mnyam pa med ces bya ba ba'i tha tshig go//dpal mchog dang po las ni/dran nas dbang po sgo bzhi yin/ /zhes 'byung la/ 'di nyid rgya cher bshad pa ni lus tshor zhes bya ba la sogs pa smos pa yin te/ 'di snyam du dgongs te/dran nas dbang po zhes bya ba la dran pa'i sgras ni dran pa la sogs pa sde tshan lnga sdud de/ nye bar mtshon pa tsam yin pa'i phyir ro/ /de ni 'di lta ste dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga'o/ / stobs kyi sgra ni go rims ji lta ba bzhin du yul can gyi sde tshan lnga po dad pa la sogs pa lnga bsdu'o//de la sde tshan gsum po dang dbang po gsum gyis ni go rims bzhin du sgo gsum yin la/ dbang po gnyis dang sde tshan gnyis kyis ni byang gi sgo yin la/ byang chub phyir 'dod do zhes bya ba ni sgo thams cad la sbyar bar bya ste/byang chub pa'i phyir 'dod pa ni byang chub pa'i don du dga' ba yin la/ byang chub pa'i phyir yongs su gyur pas sgo zhes bya ba'i tha tshig go/ /lus dang tshor ba dang sems dang chos rnams kyi gcig pa nyid dang du ma nyid la sogs pa dang bral ba nyid kyi rang bzhin med pa'i ye shes gang yin pa de ni dran zhes bya ba lus la sogs pa'i dran pa yin zhing dran pa'i rgyur gyur bas na dran pa zhes bya ba ste lus dran pa nye bar gzhag pa dang /tshor ba dran pa nye bar gzhag pa dang sems dran pa nye bar gzhag pa dang / chos dran pa nye bar gzhag pa zhes bya ba'i tha tshig go//dran pa nye bar gzhag pa 'di dag ni shes rab kyi rang bzhin yin zhing dran pa'i rgyu yin no zhes bya ba'i don to/ /dran pa rnam pa 'di bzhi'i ngo bo gang yin pa 'di dang / gang 'di dang por dad pa de gnyis ka'i de kho na nyid ni shar gyi sgo yin te/ lnga bo 'di dag ni shar sgo'i de kho na nyid yin no zhes bya ba'i tha tshig go//brtson 'grus rnam pa bzhi po gang yin pa dang / de'i yang gong gi brtson 'grus gang yin pa ste/ lnga po 'di dag ni lho'i sgor zhes pa lho phyogs kyi sgo yin no zhes bya ba'i tha tshig go/ /ji ltar na rnam pa bzhi yin zhe na/ de nas zhes bya ba chos dran pa nye bar gzhag pas phyin ci log gi bdag nyid can gyi kun nas nyon mongs pa'i chos rnams dang /phyin ci ma log pa'i bdag nyid can gyi rnam par byang ba'i chos rnams yongs su shes pa'i 'og tu byung zhing skyes pa'i phyin ci log rnams spangs par bya ba'i phyir ni brtson 'grus gcig yin no//'byung bar 'gyur ba ste ma skyes pa'i phyin ci log rnams mi bskyed par bya ba'i phyir ni gnyis pa yin no/ /kyang zhes bya ba ni 'di gnyis kyi rjes la ma skyes shing ma byung ba'i yang dag pa ste/ phyin ci log gi gnyen po bskyed pa'i phyir ni gsum pa'o//skyes pa'i yang dag par gnas par bya ba'i phyir ni brtson 'grus bzhi pa yin no/ /brtson 'grus bzhi po 'di dag ni yang dag par spong ba zhes bshad do/ /dmigs pa 'dis nang gi sems kyi yang dag par 'jog pas yang dag par spong ba zhes bya'o/ /'dun dang spro dang gnas dang blo//zhes bya ba ni 'dun pa'i ting nge 'dzin dang / brtson 'grus kyi ting nge 'dzin dang / sems kyi ting nge 'dzin dang / dpyod pa'i ting nge 'dzin zhes bya ba'i tha tshig go/ /yang dag par spong bas sems nang du 'jog pa'i ting nge 'dzin la gus par bya ba'i sbyor ba'i stobs las byung ba gang yin pa de ni 'dun pa'i ting nge 'dzin to//rtag tu sbyar ba'i stobs las skyes pa gang yin pa de ni brtson 'grus kyi ting nge 'dzin to/ /snga ma'i ting nge 'dzin gyis thob nas sems la sems 'jog pa de nyid las skyes pa gang yin pa de ni sems kyi ting nge 'dzin to//dmigs pa la rab tu rnam par dpyod pa ni skye ba gang yin pa de ni dpyod pa'i ting nge 'dzin to//ting nge 'dzin bzhi po 'di dag las su rung ba thob pa la rdzu 'phrul gyi rkang par 'gyur te/ mngon par shes pa la sogs pa'i sbyor ba rnams kyi rkang pa ste/gnas dang rgyu zhes bya ba'i tha tshig go//rdzu 'phrul gyi rkang pa bzhi po 'di dag dang / 'di'i yang gong gi dran pa gang yin pa ste lnga po 'di ni nub kyi sgo yin no/ /dad dang brtson 'grus zhes bya ba la sogs pa la de ltar rdzu 'phrul gyi rkang pa rnams kyi sems las su rung bar gyur pa gang yin pa'i dad pa dang / brtson 'grus dang dran pa dang / ting nge 'dzin dang shes rab de ni dbang po yin te/ thar pa'i cha dang mthun pa'i dge ba'i rtsa ba rnams la dbang byed pa'i phyir dbang sgyur bas na dbang po zhes bya ba yin no/ /de dag nyid kyis mi mthun pa'i phyogs ma dad pa dang / le lo dang dran pa nyams pa dang rnam par g.yeng ba dang /shes bzhin ma yin pa bsrabs pa nyid du gyur pas gal te ma g.yengs par gyur pa de'i tshe stobs can nyid yin pas stobs su 'gyur ro/ /de la dad pa ni mngon par yid ches pa'o/ /brtson 'grus ni mngon par spro ba'o//dran pa ni dmigs pa ma brjod pa'o//ting nge 'dzin ni sems rtse gcig pa'o//shes rab ni chos rnam par 'byed pa'o/ /dbang po rnams dang stobs rnams ni dbang po dang stobs kyang yin la mnyam pa med pa yang yin pas na dbang stobs mnyam med ces bya ste/ dbang po dang stobs rnams kyis mnyam pa med pa ni 'jig rten las 'das pa'i lam gyi sbyor bar gyur pa'i phyir ro//bcu po de dag dang dbang po yul du byed pa'i sngar gyi ting nge 'dzin gang yin pa dang / yang zhes bya ba'i sgras stobs yul du byed pa'i shes rab gang yin pa ste/ chos bcu gnyis po gang yin pa de dag ni byang gi sgo yin te/byang gi sgo'i de kho na nyid ces bya ba'i tha tshig go/ /de ltar zhes bya ba ni lus tshor zhes bya ba la sogs pa ji skad bshad pa'i rnam pa 'dis dran nas dbang po sgo bzhi yin zhes bya ba yin te/ dkyil 'khor de'i'o//dang po la sogs bsam gtan bzhi/ /zhes bya ba la/de la gang gis 'dod pa'i khams kyi 'dod chags dang bral ba de ni bsam gtan dang po'o/ /gang gis bsam gtan dang po'i chags pa dang bral ba de ni gnyis pa'o/ /gang gis gnyis pa las 'das pa de ni gsum pa'o//gang gis gsum pa las 'das pa de ni bsam gtan bzhi pa'o/ /de la dang po dang gsum pa ni yan lag lnga pa'o/ /gnyis pa dang bzhi pa ni yan lag bzhi pa'o/ /dang po la ni rtog pa dang dpyod pa ni gnyen po'i yan lag ste/ de gnyis kyis mi mthun pa'i phyogs su gyur pa 'dod chags dang gnod sems dang /rnam par 'tshe ba'i rnam par rtog pa spong bar byed pa yin pa'i phyir ro/ /dga' ba dang bde ba ni phan yon gyi yan lag ste/ mi mthun pa'i phyogs spangs pas des dben pa las byung ba'i dga' ba dang bde ba thob pa'i phyir ro/ / sems rtse gcig pa nyid ni de gnyis ka'i rten gyi yan lag ste/ ting nge 'dzin la yang dag par brten pa'i stobs kyis gnyen po dang / phan yon gyi yan lag la rab tu 'jug pa'i phyir ro/ /gnyis pa la nang gi bdag nyid yang dag par dang ba ni gnyen po'i yan lag yin te/ des rtog pa dang dpyod pa spong ba'i phyir ro/ /dga' ba dang bde ba dang sems rtse gcig pa ste/ yan lag gi gnyen po ni snga ma dang 'dra'o/ /gsum pa la ni btang snyoms dang / dran pa dang shes bzhin ni gnyen po'i yan lag ste/ de rnams kyis dga' ba spong ba'i phyir ro/ /bde ba ni phan yon gyi yan lag go//sems rtse gcig pa nyid ni yan lag gcig ste snga ma bzhin no/ /bzhi pa la ni btang snyoms yongs su dag pa dang / dran pa yongs su dag pa ni gnyen po'i yan lag ste/ de gnyis kyis bde ba spong bar byed pa'i phyir ro/ /sdug bsngal yang ma yin bde ba yang ma yin pa ni phan yon gyi yan lag go//sems rtse gcig pa ni snga ma bzhin no/ /dpa' bar 'gro dang zhes pa ni dpa' bar 'gro ba dang / nam mkha' mdzod dang / dri ma med pa dang / seng ge rnam par rol pa ste ting nge 'dzin bzhi pos ni sangs rgyas dang byang chub sems dpa' rnams kyi ting nge 'dzin mtha' yas pa sdud par byed pa yin no//de dag kyang spros pa med pa dang / rnam par rtog pa med pa nyid kyis ro gcig pa nyid yin pa yang bya ba'i dbye bas rnam par phye ba yin no/ /de yang gang gis skyo ba med par ting nge 'dzin thams cad la snyoms par 'jug pa de ni dpa' bar 'gro ba'i ting nge 'dzin to//gang gis de rnams dri ma med par byed pa de ni dri ma med pa'o/ /gang gis de'i 'bras bu mngon par shes pa la sogs pas seng ge ltar rnam par rtse bar byed pa ni seng ge rnam par rol pa'o/ /gang gis 'dis sangs rgyas kyi zhing thams cad du khyab pa'i chos dang zang zing la sogs pa'i sbyin pa la sogs pa rnams la nam mkha' lta bu'i mdzod mnga' ba de ni nam mkha' mdzod do//de la byang chub sems dpa' rnams kyi bsam gtan bzhis bsdus pa gang yin pa dang / sangs rgyas rnams kyi gang yin pa de ni bsam gtan bzhi po nyid kyis so//de dag gi rnam par dag pa ni kha khyer rnam pa bzhi yin no/ /lag na zhes bya ba la sogs pa ni lha bshos la sogs pa'i mchod pa lag na thogs pa dang g.yen spyo zhes bya ba ni gar la sogs pas so/ /de rnams ni tshig la sogs pa'i gzungs kyi rang bzhin can gyi lha'i bu mo'i tshogs mang po'i dkyil 'khor gang la yod pa de la de skad ces bya'o//lha'i bu mo'i tshogs la gzungs zhes bya ba ste/ de'i rang bzhin yin pa'i phyir ro/ /tshig la sogs pa'i zhes bya ba ni chos la sogs pa gzungs bzhi pos ni gzungs thams cad bsdus par gyur pa'o//de la bzod pa 'dzin par byed pas na bzod pa'i gzungs so/ /sngags kyi gzungs dang / chos kyi gzungs dang / don gyi gzungs kyang de bzhin no/ /de dag gi rnam par dag pa ni shar la sogs pa'i sgo rnams dang nye ba'i mchod pa'i lha mo dang rim bzhin du sbyar ro//'dir yang rab tu dga' ba'i sa thob pa ni bar chad med pa'i rgyur gyur ba'i shes rab la ni bzod pa zhes bya bar bshad de/ don dam pa'i chos rnams la bzod pa'i phyir ro/ /bzod pa de ring por mi thogs par skyed par byed pa'i shes rab ni bzod pa'i gzungs zhes bya ste/bzod pa 'dzin par byed pa'i phyir ro/ /de yang gang zhe na/ gang sngags la dmigs pa'i ting nge 'dzin la gnas pa'i rnal 'byor pa'i sngags kyi don la dpyod pa'i sgo nas chos thams cad brjod du med pa'i rang bzhin nam skye ba med pa'i stong pa nyid kyi rnam par so sor rtogs par gyur pa'i nges pa dang snang ba'i rang bzhin dga' ba dang mgu ba rgya chen po dang bcas par bskyed par 'gyur ba yin par shes par bya'o//gang gi ting nge 'dzin du gyur pa'i stobs kyis de 'dra ba'i sngags gsungs pa dang / gang mchog tu grub par gyur pa de sngags kyi gzungs te sngags 'dzin pa'i phyir ro/ /gang gi dran pa dang / shes rab gnyis kyi stobs kyis de bzhin gshegs pas gsungs pa'i chos mtha' yas pa dus mthar thug pa med pa chos thos pa tsam gyis yang dag par 'dzin pa'i dran pa dang shes rab gnyis ni chos kyi gzungs so//gang dag gi stobs kyis chos de rnams nyid kyi don de bzhin du 'dzin par byed pa'i dran pa dang shes rab ni don gyi gzungs so/ /gang gi phyir 'gro ba rnams kyi bsam pa thams cad yongs su rdzogs par byed pa de'i phyir sna tshogs kyi rgyan dang ldan pa yin te/de'i rnam par dag pa zhes bya ba'i tha tshig go/ /'dul bar mdzad pa'i de bzhin gshegs pa rnams kyis spyod cing ston par mdzad pa'i dam pa'i chos gang yin pa de'i yan lag ni rnam pa dgu'o/ /de rnams kyi sgra kun du 'gro ba 'di la yod pas de skad ces bya'o/ /gang gi phyir de lta yin pas na kha dog sna tshogs pa rlung gis bskyod pa'i rtse mor dril bu btags pas sgra sgrogs pa dang /ye shes ni mda' ste/ mi mthun pa'i phyogs 'joms pas de dang chos mthun pa'i phyir ye shes mnga' zhes bya ba ste/ 'jig rten dang 'jig rten las 'das pa'i bsgom pa'i lam zhes bya ba'i don to//me long lta bu la sogs pa ye shes lnga ni me long ste/ nye bar mtshon pa tsam yin pa'i phyir ro/ /byang chub kyi yan lag ni bdun te/ de yang mthong ba'i lam yin no/ /phyogs kun du 'od rab tu gsal ba ni gsum ste/ byang chub kyi sems dang shes rab dang /ye shes chen po dang / sgrib pa thams cad las grol ba'i de bzhin gshegs pa'i lam gyi ye shes so/ /gsum po de dag gis de kho na nyid du gyur pas dra ba la sogs pa'i 'bar ba yin te/ dra ba'i de kho na nyid ni 'jig rten las las 'das pa'i bsgom pa'i lam ste/nyon mongs pa rtsa ba nas 'byin pa'i phyir ro/ /dra ba phyed pa ni 'jig rten pa'i bsgom pa'i lam ste nyon mongs pa rnams par sel ba'i phyir ro/ /nyi ma ni shes rab dang ye shes so//zla ba ni byang chub kyi sems so/ /rnga yab ni de bzhin gshegs pa'i lam gyi ye shes te/rgyal po'i mtshan ma yin pa'i phyir dang / phra ba nyid kyi phyir ro/ /me tog gi phreng ba ni byang chub kyi yan lag go/ /me long ni me long lta bu'i ye shes la sogs pa yin no/ /dra ba la sogs pa'i de kho na nyid stong par byed pa ni dpal thams cad gsang ba las/ nyon mongs thams cad des gcod pa//nyon mongs 'phrog pas dra ba ste/ /yang dag gcod cing spong ba nyid/ /sel ba'i spong ba la gnas pa/ /tshogs gnyis kyi ni sbyor ba nyid/ /nyon mongs pa yi phyed 'phrog pa/ /dra ba phyed ces bya bar bshad/ /rang bzhin 'od gsal gang yin de//byang chub sems ni bla med yin/ /sems ni don kun skyed byed pa/ /zla ba'i dkyil 'khor yin par bshad/ /shes rab ye shes rang bzhin dag /rdo rje lta bu'i ting 'dzin skyes/ /thar pa'i snang ba gzi brjid che/ /nyi ma'i dkyil 'khor yin par bshad/ /lta ba lnga yi me tog yin//ye shes lnga yi nye sbyor nyid/ /sangs rgyas lnga zhes yang dag bshad/ /nam mkha' bzhin du bdag med pa'i/ /rnam shes ye shes dam pa yin/ /ye shes de yi rgyan bshad pa/ /chags pa'i sems zhes bya bar bshad/ /sgrib pa gnyis dang rnam bral ba//ting 'dzin ye shes su brtags pa/ /lam gyi ye shes khyad par gyis/ /rnga yab nyid du rnam par brjod/ /byang chub yan lag bdun po ni/ /me tog phreng spras de bzhin du/ /zhes ji skad gsungs pa lta bu'o/ /dpal mchog dang po las kyang /ye shes me long rtag me tog /byang chub yan lag me tog phreng / /dra ba me long rtag me tog /me tog phreng ba'i rgyan gyis bskor/ /zhes 'byung ste/ de yang don 'di nyid yin par shes par bya'o/ /de yang dra ba'i sgras ni dra ba phyed pa yang bsdu'o/ /rtag tu dang me tog ces bya ba'i sgra gnyis kyis ni byang chub kyi sems la sogs pa gsum dang yang dag par chos mthun pa'i phyir byang chub kyi sems dang zla ba la sogs pa gsum gyi don yin no//de bzhin du kun du bzang po'i sgrub thabs las kyang / sna tshogs rgyan rnams rtag dri med/ /ces bya ba'i sgra gnyis kyis ston par shes par bya'o//de la 'jig rten pa'i bsgom pa'i lam gang zhe na/ ji skad bshad pa'i bsam gtan bzhi dang / 'og nas 'chad pa'i snyoms par 'jug pa bzhi po nam mkha' mtha' yas skyed mched dang / rnam shes mtha' yas skye mched dang /ci yang med pa'i skye mched dang / /yod min med min skye mched dang / /bsam gtan dang gzugs med pa'i snyoms par 'jug pa 'di dag ni sa 'og ma'i skyon rags pa la sogs par mthong zhing gang gis de'i chags pa dang bral bar byed pa dang / sa gong ma'i yon tan zhi ba la sogs par mthong ba gang gis de thob par byed pa'o//'jig rten las 'das pa'i bsgom pa'i lam gang zhe na/ 'phags pa'i lam yan lag brgyad de/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang /yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ /'di la yang dag pa'i lta ba ni lus yin la/ lhag ma rnams ni 'khor yin no/ /de la bden pa rnams ni yongs su gcod par byed par mthong ba ni yang dag par lta ba'o//ji ltar rtogs pa bzhin du rnam par 'jog pa dang / ston pa ni go rims bzhin du yang dag pa'i rtog pa dang / yang dag pa'i ngag yin no/ /tshul khrims rnam par dag pa ni yang dag pa'i las kyi mtha' yin no/ /chos gos la sogs pa chos kyis tshol ba ni yang dag pa'i 'tsho ba yin no//brtson 'grus gang dang / dran pa gang dang / ting nge 'dzin gang gis 'dod pa'i 'dod chags la sogs pa nyon mongs pa'i sgrib pa dang / khro ba la sogs pa nye ba'i nyon mongs pa'i sgrib pa dang / mngon par shes pa la sogs pa yon tan gyi sgrib pa ma lus par rab tu spong bar byed pa de ni go rims bzhin du yang dag pa'i rtsol ba dang /yang dag pa'i dran pa dang / yang dag pa'i ting nge 'dzin yin no/ /me long lta bu'i ye shes la sogs pa gang zhe na/ me long lta bu'i ye shes dang / mnyam pa nyid kyi ye shes dang /so sor rtog pa'i ye shes dang / bya ba grub pa'i ye shes dang / chos kyi dbyings rnam par dag pa'i ye shes so/ /de la shes bya thams cad la rtag tu 'jug cing rtag pa dang rnam pa med pa'i ye shes kyi dkyil 'khor mnyam pa nyid kyi ye shes la sogs pa'i rab tu dbye ba'i rgyu gdul bya'i skye bo thams cad la ye shes kyi gzugs brnyan gyi me long gang yin pa de ni me long lta bu'i ye shes so//sems can thams cad la shin tu rnam par dag pa'i bdag nyid dang / mnyam pa nyid kyi ye shes byams pa chen po dang snying rje chen po dang / yang dag par ldan pa gang yin pa de ni mnyam pa nyid kyi ye shes so/ /shes bya thams cad la rtag tu thogs pa med pa dang / ting nge 'dzin dang gzungs thams cad kyi rgyur gyur pa dang / 'byor pa thams cad nges par ston pa dang / chos kyi char chen po rab tu 'bebs par byed pa'i ye shes gang yin pa de ni so sor rtog pa'i ye shes so//sprul pa sna tshogs pa dang / mtha' yas pa dang / bsam gyis mi khyab pa rnams kyis phyogs thams cad du sems can thams cad kyi don mdzad pa'i ye shes gang yin pa de ni bya ba grub pa'i ye shes so/ / sangs rgyas ma lus pa rnams kyis chos kyi dbyings shin tu rnam par dag pa dang der ro gcig pa'i ye shes gang yin pa de ni chos kyi dbyings rnam par dag pa'i ye shes so/ /byang chub kyi yan lag gang zhe na/ 'dir byang chub ni mthong ba'i lam ste/ de kho nyid dang por rtogs pa yin pa'i phyir ro/ /de'i yan lag yin pas na byang chub kyi yan lag go/ /de yang bdun te/ dran pa yang dag byang chub kyi yan lag dang / chos rnam par 'byed pa yang dag byang chub kyi yan lag dang / brtson 'grus yang dag byang chub kyi yan lag dang /dga' ba yang dag byang chub kyi yan lag dang / shin tu sbyangs pa yang dag byang chub kyi yan lag dang / ting nge 'dzin yang dag byang chub kyi yan lag dang / btang snyoms yang dag byang chub kyi yan lag go/ /'di'i yang mthong ba'i lam gyi chos rnam par 'byed pa ni lus yin la/lhag ma rnams ni 'khor yin no/ /de yang chos rnams la dran pa nye bar 'jog pas chos rnam par 'byed pa ni bden pa mthong ba'i bdag nyid can thob pa yin no/ /de yang brtson 'grus kyis ni ma lus par thob la/ /de skyes pas kyang dga' ba 'thob pa dang /shin tu sbyangs pas ting nge 'dzin la gnas pa rnams ni kun nas nyon mongs par mi 'gyur la/ des nyon mongs pa'i sa bon gyi bdag nyid can gyi gnas ngan len bsal bas de nyon mongs pa med pa ni btang snyoms zhes bya bar bshad de/ de bas na byang chub kyi yan lag bdun du 'gyur ba yin no//de'i zhes bya ba ni dkyil 'khor gru bzhi pa'o/ /'khor lo zhes bya ba ni dkyil 'khor ro/ /gang gis ni der dkyil 'khor brgyad pa lta bur byas pa yin zhe na/ 'khor lo la sogs pa ka ba zhes bya ba smos te/'khor lo'i ka ba gnyis dang rin po che'i ka ba gnyis dang / pad+ma'i ka ba gnyis dang / ral gri'i ka ba gnyis so/ /ji lta bu zhe na/ rnam par thar pa brgyad de kho na nyid du sbyangs pas so/ /rnam par thar pa brgyad gang zhe na/ gzugs can gzugs rnams la blta ba 'di ni rnam par thar pa dang po'o//nang gzugs med par gyur pas phyi rol gyi gzugs rnams la lta ba 'di ni rnam par thar pa gnyis pa'o/ /sdug pa'i rnam par lta ba 'di ni rnam par thar pa gsum pa'o/ /nam mkha' mtha' yas skye mched kyi rnam par thar pa dang /rnam shes mtha' yas skye mched kyi rnam par thar pa dang / ci yang med pa'i skye mched kyi rnam par thar pa dang / yod min med min gyi skye mched kyi rnam par thar pa dang / 'du shes dang tshor ba 'gog pa'i rnam par thar pa'o/ /de la gzugs can zhes bya ba ni mthong ba po'i bdag nyid ni gzugs can zhes bya'o//gzugs zhes bya ba ni blta bar bya ba ste/ gzugs chung ngu'am chen po 'am kha dog ngan pa'am/ bzang po'am/ lha dang mi'i ci 'dod par mthong ba zhes bya ba lhag par mos pa'i mthong bas sprul pa'i sgrib pa med pa nas mos pa'i bar du'o//nang gi gzugs su 'du shes pa zhes bya ba ni mthong ba po bdag nyid la gzugs can du 'du shes 'jog pa'o/ lhag ma ni snga ma dang 'dra ba'o/ /de yang ji lta ba bzhin du sdug pa dang mi sdug pa'i gzugs kyi mtshan ma sprul pa rnams la de bzhin nyid la dmigs pa'i sgo nas sdug par ro gcig par lhag par mos nas bsgom zhing snyoms par 'jug ste/sdug pa'i gzugs rnams la goms pa dang / mi sdug pa rnams la mi mthun pa nyid du bya ba de ni sdug pa'i rnam par thar pa'o//de thams cad du gzugs kyi 'du shes las yang dag par 'das pas nam mkha'i 'du shes thams cad du nye bar 'phel bas nam mkhar lhag par mos nas sgom zhing snyoms par 'jug pa de ni nam mkha' mtha' yas skye mched do/ /de la dbang thob par gyur pa nyid ni rnam par thar pa ste/de'i sgrib pa rnams las rnam par thar pa yin pa'i phyir ro/ /rnam par thar pa 'og ma'i don rnams la yang de bzhin du sbyar ro/ /de nas nam mkha'i 'du shes las kyang yang dag par 'das nas rnam par shes pa gang gis sngar nam mkhar mos par byed pa'i rnam par shes pa de nyid mtha' yas par lhag par mos shing rnam par shes pa ni mtha' yas so zhes bsgom zhing snyoms par 'jug pa de ni rnam shes mtha' yas skye mched do//de rnam par shes pa las gzhan du dmigs pa tshol ba ni gzugs can dang gzugs can ma yin pa ci yang ma rnyed pa na de ci yang med do zhes ci yang med par lhag par mos zhing sgom pa la snyoms par 'jug pa de yang ci yang med pa'i skye mched do//de rgya che ba la sogs pa nyid kyis nyes pa mthong nas ci yang med pa'i 'du shes las ldog ste/ de cung zad med pa'i 'du shes las ni snga ma nyid du log pa yin la/da ltar ni ci yang med pa'i 'du shes las kyang log pa yin no/ /de bas na 'di ni 'du shes med min te/ gang yang phra zhing mtshan ma med pa'i 'du shes gzhan dag 'jug pa nyid yin no/ /de bas na 'di la 'du shes med 'du shes med min skye mched ces bya'o//'du shes med 'du shes med min skye mched de nyid la brten nas nyon mongs pa can gyi yid dang 'jug pa'i rnam par shes pas bsdus pa'i sems dang sems las byung ba rnams 'gog pa de ni 'du shes dang tshor ba 'gog pa'o/ /'dir rnam par thar pa gnyis ni ci 'dod par sprul pa'i phyir ro//rnam par thar pa gsum pa ni sprul pas kun nas nyon mongs pa med pa'i phyir ro/ /lhag ma bzhi po ni zhi bar gnas pa la dbang du gyur pa'o/ /gcig ni mchog tu zhi bar gnas pa la dbang ba nyid kyi phyir ro/ /brgyad po 'di dag ni 'phags pa'i rnam par thar pa ste/'dis 'phags pa rnams gnas pa'i phyir ro/ /de bas na gnas pa'i bde bas sten par byed pas ka ba ni rnam par thar pa yin no/ /phyogs kun nas zhes bya ba la sogs pa la phyogs thams cad na dus gsum du bzhugs pa'i yang dag par rdzogs pa'i sangs rgyas rnams rdo rje theg pa rab tu ston pa'i de kho na nyid ni rdo rje'i thig gis kun nas yongs su zlum por bskor ba yin no//de kho na nyid 'di dag ni dpal mchog dang po las blangs pa yin la/ de kho na nyid lhag ma ni dpal rdo rje rtse mo la sogs pa las blangs so//tshon ni zhes bya ba ni tshon sna lnga po nyid rdzogs pa'i sangs rgyas lnga yin no/ /ci'i phyir zhe na/ sangs rgyas kyi ye shes rnams kyis sems can gyi shes pa rnams chags shing sgyur bar mdzad pas na tshon no/ /yul dang dbang po la sogs pa'i mtshan nyid dang bral bas rnam par dag pa'i stong pa nyid gang yin pa'i stong pa nyid des chos thams cad shes pa'i ye shes de nyid ni bdud rtsi'o//de ni sangs rgyas thams cad kyi rang bzhin du rdo rje can gyis gsol zhing 'thungs pa yin te/ de ni bum pa'i de kho na nyid yin no//tshogs rnams pa gnyis yongs su rdzogs pa'i rgyu mthun pa las byung ba'i thugs rjes brlan zhing khu ba yod pa gang yin pa de ni bum pa gang ba'i de kho na nyid yin no/ /me tog la sogs pa'i de kho na nyid ni go rims bzhin du de bzhin gshegs pa'i byang chub kyi yan lag la sogs pa'i tshogs yin no//bsngags shing shis pa'i yid tshim pa ni yid rab tu tshim pa'o/ /chos kyi zas ni chos kyi ro la dga' ba'o/ /bdag nyid kha na ma tho bas 'jigs pa ni ngo tsha ba'o/ /gzhan zhig la brten te ngo tsha ba ni khrel yod pa'o//de gnyis ni gos te bla re dang / gos kyi phreng ba la sogs pa'i de kho na nyid yin no/ /rnam par mi rtog pa'i bde ba chen po rnam par 'phel ba de ni glu la sogs pa'i de kho na nyid yin no/ /grong khyer gyi de kho na nyid ni thar pa'i grong khyer yin no/ / dkyil 'khor gyi de kho na nyid ni snying po bsdus pa yin te/ chos kyi dbyings shin tu rnam par dag pa'i snying po'i dkyil 'khor te/ de len cing 'dzin par byed pas ni dkyil 'khor ro/ /dkyil 'khor gyi de kho na nyid kyi brjod pa'i rjes thogs la lha'i de kho na nyid bshad par bya ba yin pas 'khor lo'i de kho na nyid ces bya ba la sogs pa smos te/ston par byed ces bya ba ni bshad par bya ba'o/ /de yang rten gyi dkyil 'khor gyi de kho na nyid rnam pa thams cad yongs su dag pa ni byang chub yin la/ byang chub de la sems gang rnam pa thams cad du yongs su dag pa de ni rten pa po'i dkyil 'khor yin no//sku sogs 'dzin pa'i rnal 'byor sems/ /zhes bya ba ni sku dang gsung dang thugs kyi gsang ba rnams la rnal 'byor te/ sangs rgyas rnams kyi 'dus pa'i sems gang yin pa de'i bdag nyid du mthong ba'i rnal 'byor pa'i sems de nyid ni yang dag par na rten pa po'i dkyil 'khor yin no//de ci'i phyir zhe na/ gang gi phyir sems nyid ni dad pa la sogs pa dbang po bzhi rnam par dag pas sgo srung bzhi'i rang bzhin yin la/ de yang shes rab kyi dbang po rnam par dag pas shin tu dri ma med pa'o//sbyin pa la sogs pa'i pha rol tu phyin pa drug gi phyi rol dag cing dri ma med pa de'i bdag nyid du gyur pa gang yin pa de ni gzugs rdo rje la sogs pa'i rang bzhin yin te/ gang gi phyir pha rol tu phyin pa drug po ni de rnams kyi de kho na nyid yin no//sa ni sa'i khams so/ /thabs ni thabs kyi pha rol tu phyin pa'o/ /sogs pa'i sgras ni chu dang me dang rlung gi khams dang / smon lam dang / stobs dang ye shes kyi pha rol tu phyin pa rnams bsdu'o/ /mtshan ma med pa ni dga' ba bzhi po'o/ /'di rnams kyi ngo bo nyid ni de kho na ste sems yin la/de ni de'i rang bzhin can yin no zhes bya ba'i tha tshig go/ /de yang gang gi phyir de rnams lha mo bzhi'i rang bzhin yin pa de'i phyir de nyid de kho na nyid yin no/ /sa la sogs pa ji ltar na de kho na nyid yin zhes rtog na/ /de bzhin nyid kyi ngo bo nyid kyis so zhes kho bo smra ste/longs spyod rdzogs pa'i skus yang dag par bsdus pa'i phyir dang nang gi sa la sogs pa gang gi yin pa de rnams kyang de kho nyid yin te/ shin tu rnam par dag pa'i ye shes kyi bdag nyid can yin pa'i phyir nyes pa med do/ /sbyin pa la sogs pa'i pha rol tu phyin pa gang zhe na/byang chub sems dpa'i chos nyid la gnas pa byang chub kyi sems la brten te/ snying rje sngon du 'gro ba'i sems kyis bdog pa thams cad yongs su gtong ba'i lus dang ngag dang yid kyi las rnams dang / de bzhin du sdom pa thams cad yang dag par blangs te srung ba dang /de bzhin du gnod pa'i sdug bsngal thams cad la bzod par gnas pa dang / de bzhin du dge ba'i chos thams cad yang dag par bsdu ba la spro ba'i lus dang ngag dang yid kyi las rnams te de dag ni go rims bzhin du sbyin pa dang / tshul khrims dang /bzod pa dang / brtson 'grus kyi pha rol tu phyin pa yin no/ /de bzhin du lus dang ngag dang yid kyi las rnams la rnam pa thams cad du dbang du gyur pas sems rnam pa thams cad du yang dag par gnas pa dang gang de bzhin du rnam pa thams cad du chos rnam par 'byed pa ste/de dag ni bsam gtan dang shes rab kyi pha rol tu phyin pa yin no/ /'dir yang chos nyid ni rigs so/ /byang chub kyi sems ni smon pa'o/ /bdog pa ni gang ci yod pa'o/ /sdom pa ni mi dge ba las ldog pa'o/ /gnod pa thams cad bzod pa ni bsten nus pa'o//sdug bsngal thams cad la btang snyoms su 'jog pa ni gnod pa'o/ /dbang thob pa ni bdag por gyur pa'o/ /gnas pa ni mnyam par 'jog pa'o/ /rnam par 'byed pa ni nges par dpyod pa'o/ /thabs la sogs pa'i pha rol tu phyin pa gang zhe na/ gang pha rol tu phyin pa de rnams nyid byang chub chen por yongs su bsngo ba dang / gang de rnams nyid skye ba thams cad du yang dag par spyad par bya ba'i phyir skye ba la sogs pa khyad par can du smon cing don du gnyer ba dang / gang de rnams nyid skye ba thams cad du rgyun du bya ba'i phyir 'bad pa las byung ba'i nus pa'i shes rab kyi stobs zhes bya ba dang /sngon goms pa las byung ba'i bsgom pa'i stobs zhes bya ba dag dang / gang de rnams nyid bstan par bya ba'i phyir 'bad pa chen pos dgongs pa can gyi don thams cad yang dag par shes pa'o/ /de dag ni go rims ji lta ba bzhin du thabs dang smon lam dang stobs dang ye shes kyi pha rol tu phyin pa yin no//mtshan ma med pa la dga' ba rnams gang zhe na/ gang theg pa chen po la dmigs pas de bzhin nyid du ro gcig pa la dga' ba'o/ /so so'i skye bo rnams kyi shes pa lnga po ni theg pa chen po las don gyi shes pa dang /sems can gyi shes pa dang / bdag gi shes pa dang / rnam par rtog pa'i shes pa dang / 'jug pa'i shes pa'o/ /'di dag kyang go rims bzhin du gzugs dang / sgra dang / dri dang / ro dang reg bya ste yul gyi bdag nyid can gyi kun gzhi rnam par shes pa dang /mig dang / rna ba dang / sna dang / lce dang / lus kyi dbang po'i bdag nyid can gyi kun gzhi rnam par shes pa dang / nga dang bdag gi rnam pa can gyi nyon mongs pa can gyi yid dang / yid kyi rnam par shes pa dang mig la sogs pa'i rnam par shes pa dang /rim pa bzhin du sbyar ro/ /de rnams kyi bdag po ni des yang dag par bsdus pa'i sgrib pa rnams dang bral ba'o/ /rgyu des na sems de nyid ni go rims ji lta ba bzhin du me long lta bu dang mnyam pa nyid dang / so sor rtog pa dang / bya ba grub pa'i ye shes dang /zad pa dang mi skye ba'i ye shes kyi rang bzhin dang / rnam par snang mdzad dang / rin chen 'byung ldan dang / 'od dpag tu med pa dang / don yod par grub pa dang / mi bskyod pa'i rang bzhin can yin te/ me long lta bu la sogs pa'i ye shes ni don la sogs pa'i shes pa dag pa'i mtshan nyid can yin pa'i phyir dang /rnam par snang mdzad la sogs pa'i de kho na nyid kyi rang bzhin can yin pa'i phyir ro/ /zad pa dang mi skye ba'i ye shes kyi rang bzhin can yin pa'i phyir dkyil 'khor gyi bdag po'i ngo bo nyid du rab tu gsal bar snang ba yin no//'dir yang nga'i skye ba zad do zhes bya ba la sogs pa bya ba byas pa nyid kyi ye shes ni zad pa'i ye shes so/ /ngas 'di las srid pa gzhan mi shes so zhes bya ba la sogs pa bya ba gzhan med pa'i shes pa ni mi skye ba shes pa'o/ /yang lha'i de kho na nyid gzhan dag kyang bstan pa'i phyir/gzugs sogs zhes bya ba la sogs pa smos te/sems nyid gzugs la sogs pa'i 'khrul pa rnam par dag cing de las nges par grol ba nyid kyis rab tu bsgoms shing de'i mtshan nyid dang ldan pa'i gzugs kyi phung po la sogs pa gang yin pa de ni lha rnams kyi de kho na nyid yin gyi/yongs su brtags pa'i phung po la sogs pa'am/ zag pa dang bcas pa la sogs pa ni lha'i de kho na nyid ma yin no/ /rnam par dag pa de yang sems las tha mi dad pa yin la/ de bas na sems de nyid ni phung po la sogs pa lha'i bdag nyid can yin no//de la sangs rgyas rnams kyi de kho na nyid ni phung po lnga ste/gzugs dang / tshor ba dang / 'du shes dang / 'du byed rnams dang / rnam par shes pa'o/ /byang chub sems dpa' rnams kyi de kho na nyid ni skye mched bcu gnyis te/ mig dang / rna ba dang / sna dang / lce dang / lus dang / yid dang / gzugs dang / sgra dang / dri dang / ro dang / reg bya dang / chos rnams so/ /spyan dang / mA ma kI dang / gos dkar mo dang / sgrol ma dang / rdo rje 'chang ba'i de kho na nyid ni sa dang chu dang me dang rlung dang nam mkha'o/ /yang lha'i de kho na nyid gzhan dag bstan pa ni/ ser sna zhes bya ba la sogs pa smos pa yin te/pha rol tu phyin pa ni ji skad du bshad pa'i phyi rol tu phyin pa bcu'o/ /sa ni bcu gcig go/ /shin tu gnas pa ni de rnams la sems de'i bdag nyid kyis rab tu brtan par gnas pa'o/ /de ci'i phyir zhe na/ ser sna la sogs gnas gyur pas/ /zhes bya smos pa yin te/gnas gyur pa de yang sems las logs shig na med pa'i mtshan nyid can gyi sa dang pha rol tu phyin pa rnams ni lha rnams kyi de kho na nyid du gyur pa yin no/ /de la lha mo bcu'i de kho na nyid ni pha rol tu phyin pa bcu'o/ /rab tu dga' ba dang dri ma med pa ste/ sa gnyis ni gshin rje gshed kyi'o//de nas sa gsum ni sgo srung lhag ma gsum gyi'o/ /de nas sa lnga ni de bzhin gshegs pa lnga'i'o/ /kun du 'od ni dkyil 'khor gyi bdag po'i'o/ /sa rnams kyang gang zhe na/ rab tu dga' ba dang / dri ma med pa dang / 'od byed pa dang / 'od 'phro ba dang / sbyang dka' ba dang /mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin dang / kun du 'od do/ /de la kun du 'gro ba'i chos kyi dbyings rab tu rtogs pas rab tu dga' bar gyur pa'i byang chub sems dpa' lhag pa'i bsam pa dag pas gnas pa ni rab tu dga' ba'o//lhag pa'i bsam pa rnam par dag pa'i rgyus rang bzhin gyis dag pa'i tshul khrims dang / yang dag par ldan par gnas pa ni dri ma med pa'o/ /tshul khrims 'chal ba'i dri ma dang bral bas tshul khrims rnam par dag pa'i rgyus 'jig rten pa'i bsam gtan dang ting nge 'dzin la snyoms par zhugs pa'i snang bas gnas pa ni 'od byed pa'o//ting nge 'dzin de nyid la brten te byang chub kyi phyogs kyi chos sum cu rtsa bdun rnam par dpyod pa'i 'od dang yang dag par ldan pas gnas pa ni 'od 'phro ba'o/ /rnam par 'byed pa de nyid la brten nas sdug bsngal dang /kun 'byung ba dang / 'gog pa dang / lam gyi bden pa rnam par 'byed pa ni sbyang dka' ba ste/ dka' bas rgyal zhing bslab pa'i phyir ro/ /de la brten nas rten cing 'brel par 'byung ba yan lag bcu gnyis rnam par 'byed pas gnas pa ni mngon du gyur pa ste/ thogs pa med pa'i ye shes mngon du gyur pa'i shes rab kyi pha rol tu phyin pas gnas pa der mngon sum du gyur pa'i phyir ro//byang chub kyi phyogs la sogs pa rab tu rnam par 'byed pa la dbang thob pas 'bad pa rgyun mi 'chad par 'jug pas mtshan ma med pa la gnas pa ni ring du song ba ste/ sbyor pa'i spyod pa'i mthar thug par song ba'i phyir ro//de la brten nas rang gi ngang gis rgyun mi 'chad par 'jug pas mtshan ma med pa la gnas pa ni mi g.yo ba ste/ der sems kyi mtshan ma med pa la g.yo ba med pa yin pa'i phyir ro/ /g.yo ba med pa'i shes rab dang ting nge 'dzin la brten nas chos dang don dang nges pa'i tshig dang spobs pa so so yang dag par rig pa rnam par dag pa la gnas pa ni legs pa'i blo gros te/so so yang dag par rig pa'i blo der legs par gyur pa'i phyir ro/ /char 'bebs pa ni sprin te/dbang skur ba'am char 'bebs pa'o/ / de yang gang la gnas na byang chub chen por chos kyi dbang bskur ba thob pa dang / sangs rgyas rnams kyi chos kyi char shin tu rgya chen po bdag nyid kyang len cing / sems can rnams la yang ster bar byed pa ni chos kyi sprin no/ /gang la gnas na sgrib pa'i bag chags thams cad yang dag par bcom pa dang /sangs rgyas kyi chos thams cad kyi rnam par dag pa'i mthar thug pa ni kun du 'od do/ /ser sna la sogs pa gang zhe na/ ser sna ni sbyin pa'i mi mthun pa'i phyogs su gyur pa'i sems las byung ba'i chos so/ /tshul khrims 'chal pa ni tshul khrims [(]gyi [,]kyi [)]mi mthun pa'i phyogs so//mi bzod pa ni bzod pa'i mi mthun pa'i phyogs te/ khro ba dang / sdug bsngal ba dang / 'jigs pa nyid do/ /de bzhin du brtson 'grus la sogs pa'i mi mthun par gyur pa ni le lo la sogs pa yin par shes par bya'o/ /gzhan yang lha'i de kho na nyid bstan pa'i phyir/ rang gi mi mthun zhes bya ba la sogs pa smos te/de bzhin gshegs pa'i stobs bcu po don bcu po la nus pa thogs pa med pa mkhyen pa'i mtshan nyid can ni lha mo bcu po'i de kho na nyid yin no/ /mi 'jigs pa bzhi'i bdag nyid ni go rims bzhin du ye shes dang / spangs pa dang / mi mthun pa'i phyogs ston pa dang /gnyen po'i phyogs ston pa la bsnyengs pa mi mnga' bar so sor mkhyen pa'o/ /mi 'jigs pa bzhi po de dag ni sgo srung rnams kyi de kho na nyid yin no/ /yongs su dag pa bzhi po dang / bag chags yang dag par bcom pa dang / rnam pa thams cad kyi mchog mkhyen pa ni dkyil 'khor gyi bdag po'i de kho na nyid do//sangs rgyas kyi chos lhag ma thams cad ni de bzhin gshegs pa thams cad kyi ste/ yan lag 'ga' yis khyad par du gyur pa rnams kyi de kho na nyid yin no/ /de la stobs la sogs pa'i mi mthun pa'i phyogs las dben pa'i sems nyid ni stobs la sogs pa yin no//de bas na/ stobs sogs tshang zhing dri ma med/ /ces bya ste/ stobs la sogs pa lus pa med pa dri ma med pa'i chos kyi rang bzhin no/ /de nyid kyi phyir lha rnams kyi bdag nyid can yang yin no/ /gzhan yang thun mong du gyur pa'i lha rnams kyi de kho na nyid bstan pa'i phyir/rnam par mi rtog ces bya ba la sogs pa smos te/ gang gi phyir 'di ni lha thams cad ni shes rab dang thabs kyi bdag nyid can yin no/ /de la shes rab kyi de kho na nyid ni zab pa ste/ de yang rnam par mi rtog pa nyid yin pa'i phyir ro//thabs kyi de kho na nyid ni rgya che ba ste/ de yang rang dang gzhan gyi don phun sum tshogs pa la dbang byed pa'i phyir ro/ /rnam par mi rtog pa nyid dang dbang byed pa de yang sems nyid kyi rnam par dag pa yin no/ /de bas na de'i bdag nyid can gyi sems ni lha thams cad kyi bdag nyid can yin no zhes bya ba'i tha tshig go//gal te ji skad du bshad pa'i tshul gyis sems kyi chos rnams nyid lha rnams yin na sems kyi chos tha dad pa la sogs pa de yang ci sems las tha dad pa yin nam tha mi dad pa yin/ tha mi dad pa yin na de'i bdag nyid can gyis sems gcig yin nam du ma yin zhe na/de'i phyir/ so so rang rig chos yin phyir/ /dbye yod dbye med sogs mi gnas/ /zhes bya ba smos te/ rang rig pa'i dad pa la sogs pa'i chos rnams gang yin pa de la de skad ces bya'o/ /de'i ngo bo nyid ni de nyid do/ /de yang rig cing tshor bzhin pa'i chos thams cad ni sems las logs shig na med de/sems dang yang dag par rig pa gnyis ni nam mkha' gsal ba'i mtshan nyid can yin pa'i phyir ro/ /dbye ba med pa yang ma yin te/ sems gcig las de rnams tha mi dad na gcig bu nyid du thal bar 'gyur ba'i phyir ro//de lta na ni sems nyid gcig pa dang / du mar 'gyur ro zhe na ma yin te/ tha mi dad par yang dag par rig pa'i phyir ro/ /du ma yin na ni skyes bu du ma'i sems dang 'dra bar so sor rig par 'gyur ba yin no/ /de lta na ni sems gcig pu 'di nyid rnam par du ma yin no zhe na ma yin te/ sems gcig las tha mi dad pa'i rnam pa rnams du ma nyid yin par 'gal ba'i phyir ro/ /gcig pa dang du mar 'gyur ro zhe na/ tha dad pa'i phyogs ni sngar sun phyung ba nyid yin pa'i phyir ro/ /de bas na gang gi phyir 'di dag thams cad ni so so rang gis rig pa yin zhing sems 'di nyid kyis yang dag par rig pa yin no//de'i phyir sems kho na las dbye ba yod pa yang ma yin/ dbye ba med pa yang ma yin par rnam par gnas so/ /chos 'di dag dang ldan pa nyid ni gcig nyid du yang ma yin la du ma nyid du yang gnas pa ma yin no/ /des na 'di ltar dbye ba yod pa dang dbye ba med pa'i bdag nyid can nam/gcig pa nyid dang du ma nyid du 'gyur ba'i gnyis med pas sems de ni gnyis su med pa nyid yin la/gnyis su med pa'i phyir spros pa med pa yin no/ /gal te de ltar sems spros pa med pa la ci'i phyir spros par byas she na de'i phyir de ltar zhes bya ba la sogs pa smos te/ de ltar zhes bya ba ni lha rnams kyi sgo dang / de kho na nyid kyi sgo nas spros par byas pa'i sems kyi 'bras bur gyur pa ni pha rol tu phyin pa la sogs pa sangs rgyas kyi chos rnams su 'gyur zhing snang ba thob par 'gyur ba yin gyi/ gzhan du ni ma yin no zhes bya ba'i tha tshig go/ /gal te sems tsam du bsgoms na rnam shes mtha' yas skye mched dang 'dra bar 'jig rten pa'i ting nge 'dzin tsam thob par 'gyur la/'on te stong pa nyid khyad par du bsgoms na ni de yang yongs su mya ngan las 'das pa tsam du 'gyur te/ sangs rgyas kyi chos rnams sbyang ba'i las rdzogs par byed pa'i phyir ro//yang na lha'i bdag nyid can 'ba' zhig tsam bsgoms na de lta na ni de tsam gyis 'tshang rgya ba nyid du mi 'gyur te/ las rdzogs pa ma tshang ba'i phyir ro/ /yang na lha rnams kyi de kho na nyid bsgom gyi lha rnams ma yin na ni de lta na yang bskal pa grangs med pa mang pos sangs rgyas nyid thob par 'gyur gyi myur du ni ma yin no//de bas na gnyi ga bsgom pa ni shin tu yid du 'ong ba yin pa'i phyir dang / byin gyi rlab kyi khyad par gyis mchog tu myur bar bla na med pa yang dag par rdzogs pa'i byang chub 'thob par 'gyur ro/ /thig le dang phra mo'i rnal 'byor pa gnyis kyang shin tu bslabs pa'i lhag par mos pa nyid kyis de kho na nyid bsgom par bya ba yin pas dang por ni ma yin gyi bsgoms pa'i rjes la rang bzhin brtan par bya ba yin pas de la ni ma tshang ba ci yang med la las kyi rgyal po'i mchog gi phyogs gcig yin pa dang de gnyi ga yang sems la dbang thob par bya ba'i phyir yin gyi/rang rgyud du byang chub sgrub pa ma yin pas de lta na yang nyes pa med do zhes bya ba'i tha tshig go/ /lha'i de kho na nyid bshad pa'i rjes thogs la slob dpon gyi las bshad par bya ba yin pas de ni/ de nas zhes bya ba la sogs pa smos pa yin te/ de nas rnal 'byor dam tshig mchog /ces bya ba nas/ de rang nyid ces bya ba'i bar gyis ston to/ /'dir slob dpon gyi las ni gnyis te/ dngos grub gsol ba 'debs pa la sogs pa'i cho ga ni tshigs su bcad pa lngas ston to/ /rab tu gnas pa'i cho ga ni tshigs su bcad pa gsum gyis ston to//'dir rnal 'byor zhes bya ba ni lus kyi yang dag par sbyor ba zhes bshad do/ /yon tan ni dad pa dang dul ba la sogs pa dang / las dang rjes su mthun pa'o/ /kha phye la zhes bya ba ni dbang po gnyis yang dag par sbyor ba ste/ rjes bsgrub bya zhes 'og ma dang sbyar bar bya'o//brtag ces bya ba ni sprul pa'i dkyil 'khor du'o/ /de'i rjes la ni gsol ba gdab par bya'o/ /skyes bu'i mthar thug pas dbang bskur zhes bya ba ni slob dpon du dbang bskur ba'i bar gyis dbang bskur ro zhes bya ba'i tha tshig go/ / bshad gang zhes bya ba ni sngar ji ltar bshad pa de bzhin no zhes bya ba'i don to/ /de yang yi ge gsum la sogs pa'i sngags kyis mngon par bzla bar bya ba dang / phyi'i khrus kyang byed du gzhug go/ /rang nyid ces bya ba ni sku gzugs la sogs pa de dag nyid do/ /'khor los sgyur 'dra zhes bya ba ni/'khor los sgyur ba lta bu zhes bya ba'i tha tshig go/ /yang na 'khor los sgyur ba'i cha lugs dang ldan par gyur pas zhes bya ba'i don to/ /'di skad ston te dkyil 'khor gyi sa las phyi rol du 'dom gang ba'i gru bzhi pa la dpangs su khrud yod pa nyes pa thams cad dang bral ba bkra shis pa rnams kyis nye bar mdzes par byas pa'i khrus sa'i stegs bu byed du bcug la/de'i dbus su gnas pa'i khri la bzhugs pa'i lha la dang por sbyang ba byas la/ ba'i rnam lngas byugs te rgyal ba'i bkra shis pa'i tshigs su bcad pas bstod cing rol mo dang glu dbyangs sna tshogs dang ldan pa dang /rgyal bo dbang bskur ba'i tshul du gdugs dkar po la sogs pa bzung la/ dri zhim po dang sbyar ba'i chu dang / rnam par rgyal ba la sogs pa'i bum pas khrus byed du gzhug go/ /de la/ glegs bam ras ris 'bag la sogs//lha la cho ga shes pa yis/ /me long dag gis khrus bya ste/ /lugs ma sogs gzhan dngos su'o/ /de nas gos 'jam pos sku phyis la thugs ka dang / dbu dang / mgul dang / phyag gi rtse mo rnams su byugs la yang dag par mchod de/ sku gzugs la sogs pa'i thugs ka'i zla ba la 'dus pa'i dkyil 'khor bskyed la/ye shes kyi dkyil 'khor gzhug pa la sogs pa'i cho ga byas nas skyes bu'i dbang bskur ba'i mthar thug pas dbang bskur bar bya'o/ /'dus pa'i lha'i gzugs su ngos ma zin pa rnams la ni rdo rje 'chang ba'i skus so/ / mar me mdzad la sogs pa dang / gtsug lag khang dang mchod rten la sogs pa la ni rnam par snang mdzad kyi skus so//glegs bam la sogs pa ni 'od dpag tu med pa bsams la khrus dang dbang bskur ba la sogs pa bya'o/ /sbyin sreg gi mthar ni gser gyi thur mas spyan phye la lha la bshos gsol ba'i phyir me lha gshegs su gsol zin pa'i thab tu mar gyi lhag ma dang 'o ma dang /nga rgyal dang bcas pa'i tshul gyis sngags zlos shing / bshos su bya ba'i g.yos bya'o/ /da ni gsang ba dang shes rab kyi dbang bskur ba brjod par bya'o/ /der slob ma spro ba bskyed pa dang dbang bskur ba'i khyad par ni shes rab thabs kyi zhes bya ba la sogs pa tshigs su bcad pa phyed dang gnyis kyis ston to//mchog ni dam pa ste de kho na nyid mngon sum du rtogs par byed pa'i phyir ro/ /gnyis ni rgyu mthun pa'i 'bras bu'o/ /gsum ni rnam par smin pa'i 'bras bu'o//gnyis ni dbang gi 'bras bu ste/ lus kyi mngon sum du byas pa dang ye shes mngon sum du byas pas sgrib pa thams cad spangs pa'i phyir ro/ /de nas zhes bya ba la sogs pa tshigs su bcad pa gsum gyis ni gsang ba'i dbang bskur ba ston to/ /bde ba dam pa ni thub pa'i dbang po'i rdzas te/dbab bar bya'o zhes bya bar sbyar ro/ /brtan pa'i blo gros ni ye shes la the tshom med par gyur pas so//sna tshogs bzhin te sna tshogs gyur/ /ces bya ba ni rdo rje 'chang ba dang 'dra bar sangs rgyas thams cad kyi rang bzhin no/ /'di zhes bya ba ni lus kyi mngon du byas pa'o//gzungs 'di zhes bya ba la sogs pa tshigs su bcad pa gnyis kyis ni shes rab dang ye shes kyi dbang bskur ba bstan pa yin no/ /brtags zhes bya ba ni nye bar mtshon par bya'o/ /'di zhes bya ba la sogs pa'i tshigs su bcad pa ni slob dpon gyis brjod par bya ba'o//nor ldan khongs su zhes bya ba ni mtshan nyid kyi khyad par bshad pa'o/ /blta zhes bya ba ni mtshan par bya ba'o/ /'di ni ye shes mngon sum du byed pa'o/ /dkyil 'khor zhes bya ba la sogs pa tshigs su bcad pas ni gsang ba bshad pa'i dus su'o//dbang bskur 'di ni zhes bya ba la sogs pa tshigs su bcad pa gsum gyis ni gsang ba bshad pa bstan to/ /'dus pa'i gzhung gis shes rab dang ye shes kyi mthar thug pas gang dbang bskur ba'i rgyu des ji ltar rdo rje 'chang ba la sogs pa dngos grub kyi mchog thob par 'gyur ba de ltar/byang chub spyod mchog de bzhin du/ /dge ba'i tshul ni gzhan gsungs pas/ /zhes bya ba ste/ byang chub kyi spyod pa ni pha rol tu phyin pa'i spyod pa'o/ /sogs pa'i sgras ni bya ba'i rgyud la sogs pa'i sngags kyi spyod pa'o/ /gzhan zhes bya ba ni rgyud kyi nang du gtogs pa'i dbang bskur ba gzhan dag gis so//gang bshad pa zhes bya ba ni bcom ldan 'das kyis dpal mchog dang po las so/ /dpal gsang ba 'dus pa las tshigs su bcad pa'i don gzhan du bsgyur ba'o/ /de la/ ji ltar 'di yis dngos grub mchog /ces bya ba ni rkang pa bzhi pa yin pa la gzhung rtsom par mdzad pas 'dir yongs su bsgyur ba yin te/ don yongs su bsgyur ba nyid kyis gsal bar bya ba'i phyir ro/ /dam tshig lnga ni bza' bar bya ba'o/ /lhag ma rnams ni bsrung bar bya ba'o/ /de nas zhes bya ba la sogs pas ni lung bstan pa bshad pa yin no//gzengs bstod pa zhes bya ba ni phyag rgyas so//g.yon pa zhes bya ba la sogs pa'i tshigs su bcad pa phyed ni 'di'i mtshan nyid yin no/ /g.yon pa zhes bya ba ni g.yon pas so/ /oM zhes bya ba la sogs pa nas swA'i bar ni sngags yin no//srid pa'i ngan 'gro las zhes bya ba ni srid pa'i nang du chud pas so/ /mtha' ni 'ching ba ste 'ching ba las 'das pa ni srid pa'i mtha' ste/ mi gnas pa'i mya ngan las 'das pa'o/ /'di yis zhes bya ba ni gzengs bstod pa'i phyag rgyas so/ /sngags pa zhes bya ba ji skad bshad pa'i sngags dang ldan pa'o//'gro ba kun gyi bdag ces bya ba ni rdo rje 'chang ba'i rang bzhin can gyi slob dpon gang yin pa byang chub tu lung bstan pa na/de la phyag rgya dang / sngags dang / rdo rje 'dzin pa'i mthu 'di dag gis bde bar gshegs pa thams cad dang / 'phags pa rnams kyis kyang gsung gcig tu lung ston par mdzad do zhes bcom ldan 'das kyis dpal mchog dang po las gsungs pa yin no//de nas rjes su gnang ba'i dbang bskur bar bya ste/ de la dang por bdag po'i sbyor ba dang ldan pas gser gyi thur ma la bzlas pa byas pa thogs te/ mdun du gnas nas 'di skad ces bya ba brjod par bya'o//ji ltar mig mkhan rgyal po yis/ 'jig rten rab rib bsal ba ltar/ /bu khyod kyi ni mi shes pa'i/ /rab rib rgyal ba rnams kyis bsal/ /oM nai tra a pa ha ra pa Ta laM hrIHslob ma'i mig gnyis su yi ge praM bsams la mig thur gyis byug go//de nas me long bstan la chos kyi mtshan nyid bstan par bya ste/ chos rnams gzugs brnyan lta bu ste/ /dag cing gsal la rnyog pa med/ /gzung du med cing brjod du med/ /rgyu dang las las kun du byung / /ngo bo nyid med gnas med par/ /de ltar chos 'di shes nas su//sems can don ni mnyam med byos/ /'on kyang sangs rgyas sras su skye/ /de nas dbyangs kyi yi ge tha ma las byung ba'i dril bu dkrol la byin nas thams cad nam mkha'i mtshan nyid de/nam mkha' la yang mtshan nyid med/ /nam mkha' dang ni mnyam sbyor bas/ /kun mchog mnyam pa nyid du gsal//de nas yi ge hos gzhu byin la 'di skad du de bzhin gshegs pa thams cad mnyes par gyis shig /ces brjod la phyogs bzhir mda' gzhu dgang du gzhug pa dang / steng dang 'og tu yang re re 'phen du gzhug go/ /de nas badzra satwa zhes bya ba 'dis me long blangs la 'di skad ces brjod par bya ste/rdo rje sems dpa' me long ltar/ /dag cing gsal la dri ma med/ /sangs rgyas kun bdag rang nyid ni/ /bu khyod kyi ni snying la gnas/ /gang 'di de bzhin gshegs pa thams cad kyi bdag po byang chub kyi sems ni 'di yin par shes par gyis shig /de nas oM badzra he tu maM zhes bya bas 'khor lo rkang pa gnyis kyi bar du bzhag /oM badzra b+ha Sha raM zhes bya bas dung lag pa g.yas su sbyin/ dbyangs kyi yi ge dang pos glegs bam dang dbyangs kyi yi ge tha mas dril bu g.yon du byin la 'di skad ces brjod do/ /deng nas brtsams te sems bskyed pa//tsam gyis chos kyi 'khor lo bskor/ /de ring phan chad 'jig rten la/ /skyob pa rnams kyis 'khor lo bskor/ /chos kyi dung ni bla med pas/ /kun du ma lus gang bar gyis/ /so ma nyi yid gnyis mi bya zhing / /dogs pa med pa'i sems kyis su/ /gsang sngags spyod pa'i tshul gyi mchog /'jig rten 'di la rab tu sgrogs/ /de ltar byas na sangs rgyas la/ /phan thogs drin du gzo zhes bya/ /rdo rje 'dzin pa de kun kyang / /kun du khyed la srung bar byed/ /yang rang rang gi 'khor los sgyur ba'i sangs rgyas kyi sbyor ba dang ji lta ba bzhin du ldan par byas la/ /mdor na 'jig rten thams cad du//sems can kun la phan pa'i phyir/ /ji ltar 'dul ba sna tshogs pa'i/ /chos kyi 'khor lo bskor bar gyis/ /zhes bya ba dang / de bzhin du rdo rje dang / ral gri dang pad+ma dang / nor bu'i 'khor lo bskor bar gyis/ /zhes bya bas rjes su gnang ba sbyin par bya'o/ /tshigs su bcad pa lnga po 'dis ni skyes bu'i mthar dbang bskur ba sbyin par bya'o//lhag pa'i rjes su gnang ba ni ngo bo nyid kyis zhes bya ba la sogs pa'i tshigs su bcad pa drug gis bstan pa yin no/ /dul bar byas pa ni 'dul ba'o/ /gtsang bas zhes bya ba ni ji skad du bshad pa'i cho ga rnams kyis rnam par dag pa'o//thun mong cig shos zhes bya ba ni thun mong dang mchog ces bya ba'i tha tshig go/ /mi snang zhes bya ba ni mi snang ba'i dngos grub ste/ de grub na stong spyi phud kyi 'jig rten gyi khams kyi bdag por 'gyur ro/ /mngon par shes pa grub na ni stong gnyis pa bar ma'i 'jig rten gyi khams kyi bdag por 'gyur ro//rig pa 'dzin pa'i dngos grub grub na stong gsum pa'i 'jig rten gyi khams mnyam du 'jig pa dang mnyam du 'chags pa la dbang ba'o/ /'di dag ni thun mong gi dngos grub yin no/ /mchog ni/ rdo rje can ni 'gro kun bdag /ces smos pa yin te/ phyag rgya chen po grub na ni phyogs bcu'i 'jig rten gyi khams mnyam du 'jig pa dang mnyam du 'chags pa thams cad kyi bdag por 'gyur ro//zhi dang rgyas sogs zhes bya ba ni las kyi tshogs kyi dngos grub bo/ /gzhan pa zhes bya ba ni gter la sogs pa ste/ 'di ni nor gyi dngos grub po/ /'khor lo rjes mnyes sbyor ba yis//zhes bya ba'i brda mtshon par byed pa'i tshigs su bcad pa ni rdo rje'i bdag po zhes bya ba la sogs pa yin no/ /de bas zhes bya ba la sogs pa ni nye bar sdud pa'i tshigs su bcad pa'o/ /de nas bsangs te slob ma yi/ /snying ga nye bar byugs nas ni/ /kun byed rig pa bzlas par bya//srung skud lag pa g.yas par gdags/ /de nas bla ma bdag nyid kyis/ /de yi spyi bor gdugs kyang gzung / /thal mo sbyar ba byas nas ni/ /dkyil 'khor legs par bskor du gzhug /gdugs dang bcas pas sgo phyogs su/ /spyi bo btud de phyag 'tshal gzhug /slob ma 'di ni phul ba lags//gsang sngags rgyud ni 'dzin par 'gyur/ /bla mas de skad smras nas su/ /gdugs bzhag nas ni slob ma de/ /lag pas legs par blang bar bya'o/ /de nas 'di skad bsgo bar bya/ /da ni dkyil 'khor slob dpon gyur/ /gsang sngags rgyud kyang 'dzin par 'gyur/ /sangs rgyas byang chub sems dpa' dang //lha rnams kun gyis bkur bar 'gyur/ /sems can rnams la brtse ba'i phyir/ /khyod kyis dkyil 'khor cho ga bzhin/ /nan tan bskyed de bri bar bya/ /sgrub pa po yang rgyud la sbyor/ /de nas gsang sngags rang nyid kyis brgya rtsa brgyad bzlas la/ bcom ldan 'di la stsal lags kyis//'di la 'go bar mdzad du gsol/ /zhes bya bas sbyin bar bya'o/ /slob mas kyang / bcom ldan bdag gis bzung lags kyis/ /bdag la 'go bar mdzad du gsol/ /zhes bya ba 'dis blangs la bzla bar bya'o/ /de nas rang gi lha'i phyag rgya bzhi bslabs la khyed kyis 'di phyag rgya la mi mkhas pa dang /gzhan su yang rung bal sngags sam phyag rgya gcig tsam yang bstan par mi bya'o/ /de ci'i phyir zhe na/ 'di ltar sems can de dkyil 'khor ma mthong bar sngags dang phyag rgya la sbyor bas 'bras bu ma thob pa dang the tshom du 'gyur bas dus ma yin par 'chi ba'i dus byas nas sems can dmyal bar ltung bar 'gyur ro//rgyu des na khyod kyang ngan 'gror 'gro bar 'gyur ro/ /ji bzhin zhugs pa zhes bya ba la sogs pas ni dbugs dbyung ba bshad pa yin te/ de nas zhes bya ba ni rjes su gnang ba byin ba'i rjes thogs la'o/ /'dis kyang zhes bya ba ni 'og nas bshad pa dpal mchog dang po las bshad pa ni/tshigs su bcad par gtogs par 'gyur/ /zhes bya ba'i bar gyis so/ /phan yon ni 'bras bur gyur pa'i yon tan no/ /de nas zhes bya ba dbugs 'byin pa ni phyir mi ldog pa thob pa'i phyir ro/ /brtan par bya ba'i don du ni sku dang / gsung dang thugs kyi dam tshig gsum yin no/ /'di zhes bya ba la sogs pa tshigs su bcad pa rnams kyis gang du dbugs dbyung ba de ni dam tshig gsum mo/ /mchog ces bya ba ni yon tan gyis so/ /gsang ba dam pa ni shin tu gsang bar bya ba yin pa'i phyir ro/ /mthong ba zhes bya ba ni mig gis so//zhugs gyur par zhes bya ba ni phyi dang gsang ba'i zhugs pas so/ /des grol ba ni de mi byed par nges pas so/ /legs par gnas pa ni bde 'gro'i bde bar nges pas so/ /'chi ba ni ltung ba'o//mi tshugs pa dang mi gsod pa ni bdud rnams kyis te/ de ltar ni mi gnas pa'i mya ngan las 'das pa thob pa'i phyir ro//da ni ji ltar na de rnams 'gag par 'gyur ba dang / ji ltar srid pa bstan pa'i phyir/ srid pa zhes bya ba la sogs pa smos te/ chos kyi sku thob pas mtha' med pa'i srid pa nyid yongs su dag par gyur pa ni sdug bsngal las ldog pa yin gyi/ nyan thos ltar rnam pa thams cad du ldog pa ni ma yin no/ /ston pa ni chos gsung bar mdzad pa'o/ /mchog ni de bzhin gshegs pa'o/ /gyur pa ni song ba ste/ longs spyod rdzogs pa'i sku thob pas tha ma med pa'i srid pa 'grub pa yin gyi so so'i skye bo ltar tha mar gyur pa ni ma yin no/ /dam tshig ni 'da' bar bya ba ma yin pa'i phyir ro//sdom pa ni bya ba dang mi bya ba'i nges pa'o/ /grub pa ni don yod pa'i phyir ro/ /'di zhes bya ba ni 'og nas bshad pa'o/ /mthun par zhes bya ba ni gsung gcig tu bka' stsal pa'o/ /dam pa rtag pa zhes bya ba ni gzhan du 'gyur ba med pa'i phyir ro/ /rdo rje gang yin pa zhes bya ba ni gang rdo rjer grags pa zhes bya ba'i tha tshig go//bskyed pa tsam ni byang chub tu smon pa las sam 'jug pa las te snying ga'i zla bar rdo rje'i rnam pa'o/ /sangs rgyas nyid du zhes bya ba ni byang chub tu nges pa nyid do zhes bya ba'i tha tshig go/ /mi spang zhing zhes bya ba ni nam mkha'i snying po'i mdo las ji skad du gang yang byang chub sems dpas nyan thos kyi theg pa bshad pa'am/rang sangs rgyas kyi theg pa bshad pa'am/ theg pa chen po'i chos bshad pa spong zhing 'gog tu 'jug pa 'di ni rtsa ba'i ltung ba gnyis po zhes gsungs pa lta bu'o/ /de yang bstan pa ni chos thams cad ni chos kyi dbyings rnam par dag pa'i rgyu mthun pa yin pas 'gro ba'i skyabs su gyur pa yin pa'i phyir spang bar mi bya ste/de la skyabs su song ba nyid yongs su spang bar mi bya ba yin pa'i phyir ro/ /mi shes pa zhes bya ba la sogs pa la/ gal te dam pa'i chos yi ge'am don la nyan pa'i skal ba med pa'am/skal ba dang mi ldan par gyur pas the tshom mam phyin ci log tu gyur pa de'i tshe/ de la yi ge'i don bstan par mi bya'o/ /bdag nyid ces bya ba ni rang nyid gzir bar mi bya'o/ /bdag nyid yongs su spangs nas su/ /zhes bya ba ni rnal 'byor gyi sems yongs su bor nas te/ci nas kyang rnal 'byor dang mi mthun par gyur pas gzir bar mi bya'o zhes bya ba'i tha tshig go/ /gzhan yang bdag nyid 'di ni/ ci bde bar ni bde bar bzung / /zhes bya ste/ ci nus kyang 'di bde bar 'gyur ba de ltar gzhag par bya'o/ /bde ba ni dka' ba med pa ste/yongs su tshol ba'i sdug bsngal dang / nyes par spyod pa la sogs pa'i sdug bsngal mi bya'o zhes bya ba'i tha tshig go/ /yang ci'i phyir zhe na/ 'di ni nges par phyis 'byung bar 'gyur bar rdzogs pa'i sangs rgyas yin no/ /rdo rje zhes bya ba la sogs pa la de kho na nyid bsgoms pas byang chub par 'gyur na ci de rdo rje la sogs pas sam snyan pas de dor bar mi bya ba'o//smad par mi bya ste zhes bya ba ni bla ma tshul khrims 'chal pa la sogs par mngon na yang ma gus par mi bya'o/ /sangs rgyas kun dang 'dra zhes bya ba ni/ de yang 'dir brtson 'grus dang rtsol ba dang ldan pa la tshe 'di nyid la byang chub ster bar byed pa yin la/ brtson pa med pas byang chub par ma gyur pa ni slob ma nyid kyi nyes pa nyid do/ /dge ba rab tu mi spyoms pa/ /zhes bya ba ni dge ba chen po'i sgyu ma'i gzugs kyis g.yogs te gnas pa'o//gal te brnyas par gyur na nyes pa de slar gso ba'i thabs bshad pa ni/ bla ma zhes bya ba la sogs pa bshad pa yin te/ khyod kyis zhes pa ni khyed rnams kyis so/ /phyir zhing zhes bya ba ni slar yang ngo / /rang gi dam tshig ces bya ba ni rang gi lha'i rnal 'byor ro//rtag tu zhes bya ba ni mi zad ba'i dge ba ste/ de yang gang gi phyir sdom pa 'di la legs par gnas shing yang dag par mi g.yo bar gyur na'o/ /dam tshig ces bya la sogs pa ni gsang sngags kyi lha rnams dang mtshungs par 'gyur ro zhes bya ba'i don to//khams gsum pa'i rgyal po chen por gyur pa rgyal po'i bdag po ste rgyal po thams cad kyi mchog tu gyur pa'o/ /brtan pa ni rgyal srid de nyid dang bcas pas rtag pa nyid yin pa'i phyir ro/ /gang gi phyir de ltar yin pa'i rgyu des na bla ma dang sangs rgyas la sogs pa la yid ni/ rab tu dang zhing dad pa rdo rje ltar mi phyed pa nyid du gyis shig pa'o/ /rang gi dam tshig ni rang gi lha'o/ /bde ba chung la sdug bsngal che ba'i 'jig rten du khyed skyes par gyur kyang nges par rdo rje 'dzin pa dang 'dra bar mi zad cing god pa med pa dpe med cing kha na ma tho ba med pa'i bde ba dang bcas pa thob par gyur to//de nas sbyin blugs gsum mam bdun nam gcig phul la zhi bar bya'o zhes bya bar sbyar ro/ /de nas rgyal po dang sa bdag dang dge 'dun la sogs pa dang phyogs skyong rnams dang / bdag nyid zhi bar bya ba'i phyir sbyin blugs so sor phul la slob ma rnams las yon blang bar bya'o//de la sems can kun gyi don gyi phyir thos pa dang bsams pa la sogs pa bya ba rnams dang / glang po che la sogs pa ster bar bya ba'i phyir re re zhing blang bar bya ste/ so sor blang bar bya'o zhes pa'i tha tshig go/ /yang na rang gi dngos grub bsgrub pa'i phyir grogs po nyid byed par bskul lo//de nas de rnams kyis byin pa legs par blangs la yon ster bar byed pa de rnams bza' ba dang spyod lam thams cad kyis mgu bar byas la/de rnams dang bdag dang gzhan dag gis kyang gar mkhan rnams kyi gar dang / rol mo dang / bstod pa dang /bzlas brjod la sogs pa'i cho gas mtshan thog thag mi nyal bar dkyil 'khor mchod par bya ba'o/ /muH'i mtha' can gyi zhes bya ba la sogs pa la ji ltar bsams pa'i dam tshig gi dkyil 'khor dang / ye shes kyi dkyil 'khor oM AHhUM muHzhes bya ba'i sngags dang / bsam gtan gyis gshegs su gsol la/ oM a kA ro mu khaM sarba d+harmA nAM A d+ya nut+pan+na twAta swAhA zhes bya ba 'di dang rdo rje dang bcas pa'i lag pa g.yas pas legs par dbyi zhing bsdu bar bya'o/ /slong la zhes bya ba ni bsrung ba'i don du slong ba'o/ /chu bo chen po ni gtsang po dang rgya mtsho chen po la sogs pa'o//ye shes dbab pa legs thob pa/ /zhes bya ba ni ye shes cung zad babs pa zhes bya ba'i don to/ /bshad de zhes bya ba ni bcom ldan 'das kyis so/ /yang dag mchod ces bya ba ni sngar bshad pa'i cho gas so/ /rnam snang mdzad dang spyan zhes bya ba la dbab par bya'o zhes bya ba ni lhag ma'o//g.yo ba ni gzengs mtho bar gyur pa'o/ /yongs su shes pa ni ma 'ongs pa la sogs pa dbang po las 'das pa rnams so/ /smra ba ni ma bslabs pa'i sngags smra ba'o/ /rjes gnang byas zhes bya ba ni rjes su gnang ba'i stobs kyis so/ /rnal 'byor pa gsum char gyis kyang zhes bya ba ni las dang po pa la sogs la gsum char gyis kyang ngo //cho ga ni sngon bzhin zhes bya ba ni ji ltar thugs kyi gsang ba dag par bya ba'i phyir ni thugs kyi rdo rje dkyil 'khor gyi bdag por bshad do/ /de bzhin du gsung gi gsang ba dag par bya ba'i phyir ni gsung gi rdo rje'o//gnas der mi bskyod mtshan ma yin/ /zhes bya ba ni bdag po'i gnas su'o/ /gsung zhes bya bas ni rin chen 'byung ldan dang / don yod grub pa yang bsdu'o/ sku'i gsang ba dag par bya ba'i phyir ni sku'i rdo rje bdag po yin no//de'i gnas su mi bskyod pa'i mtshan ma gzhag go/ /'dir yang dkyil 'khor sprul pa la sogs pa'i cho ga thams cad rnal 'byor pa gsum char gyi yang yid gtso bo nyid yin te/ las thams cad la yid kyi bya ba gtso bo nyid yin pas gang gi phyir 'di dang bral na ni 'grub par mi 'gyur ro//ye shes kyi sgra ni re re zhing sbyar bar bya ste ye shes las dang po pa dang / ye shes la cung zad cig dbang ba dang / ye shes la dbang thob pa'o/ /yid kyi zhes bya ba la sogs pa'i tshigs su bcad pas ni yid kyi cho ga nges par bya dgos par bstan nas/rdo rje slob dpon zhes bya ba la sogs pa'i tshigs su bcad pas ni khyad par du 'phags pa nyid du ston to/ /tshig tsam gyis zhes bya ba ni sngags tsam gyis so/ /'di dag gis ni yid kyi dkyil 'khor du dbang bskur ba yang ston pa nyid yin te/ slob ma zhes smos pa'i phyir ro//der slob dpon gyis dkyil 'khor bskyed la de'i 'og tu slob mas rdzogs pa'i rim pas yud tsam gyis blta bar bya'o/ /byang chub kyi sems kyi rgyu'i gtso bo yin par bstan pa'i phyir/ 'jug pa tsam gyis zhes bya ba la sogs pa smos te/ 'jug pa ni tshul khrims so//spros te smras pas zhes bya ba ni phyi rol gyi spros pa rgya che bas so/ /khyad par du zhes bya ba ni gtso cher ro/ /sems bsgrub ste zhes bya ba ni rdzogs par bya'o/ /ji skad du bshad pa'i cho ga rnams kyi 'bras bu byang chub la sogs pa yang sems nyid kyi rang bzhin yin no zhes bstan pa'i phyir byang chub sems zhes bya ba la sogs pa smos te/'bras bu gang zhes bya ba la sogs pa ni gang gi phyir 'bras bur gyur pa'i byang chub kyi sems nyid ni sangs rgyas kyi ye shes kyi mchog bla na med pa yin no/ /rdo rje sems dpa'i rang bzhin zhes bya ba ni rang gi ngo bo ste de nyid ni rdo rje 'chang ba'i go 'phang yin no zhes bya ba'i tha tshig go//de'i zhes bya ba ni de nyid kyi yan lag ni sku gsum yin la/ /de bas ni yid kyi cho ga kho na gtso bo yin no zhes bya bar gnas so/ /thar pa med na ni srid pa kho nar 'gyur la/de yang sdug bsngal gyi rang bzhin can yin na bde ba chen po de ga la yod ces rtog na/de'i phyir/ tha mal zhes bya ba la sogs pa smos te/ tha mal ni dman pa'o/ /rnam rtog ni brtags pa ste/ khams gsum pa'i sems dang sems las byung ba rnams so/ /de yang yang dag ma yin kun rtog ni//sems dang sems byung khams gsum pa/ /zhes smos pa'i phyir ro/ /kun du rtog pa de'i 'jug pa nyid srid pa'i sdug bsngal yin gyi/ /de las gzhan pa ni med de/ khams gsum pa las logs shig na srid pa med pa'i phyir ro/ /'di zhes bya ba ni srid pa'i sdug bsngal gyi'o//de ltar zhes bya ba ni ji skad du bshad pa'i dkyil 'khor gyi rnam pa can gyi yid kyi mngon sum du 'gag par byed do/ /ci'i phyir zhe na/ shes rab ces bya ba la sogs pa smos te/ dngos po thams cad kyi dus gsum gyi dus dang / chos gang mtha' yas pa'i rnam pa can phyogs bcu na khyab pa gang yin pa de ni de'i bdag nyid can gyis bsdus pas chags pa med cing dmigs su med la gzung ba dang 'dzin pa'i rtog pa dang bral ba'i 'khor lo gang yin pa de ni sangs rgyas kyi chos thams cad shin tu rnam par dag pa'i rang bzhin can rten dang brten pa po'i dkyil 'khor der so sor snang ste/yid de'i rnam par snang ba ni rtog pa de snang bar mi 'gyur la/ de'i phyir 'gal ba grub pa'i snang ba dang mun pa dang 'dra ba yin no/ /'gal ba 'grub pas na yid de shin tu bslabs pa las srid pa'i sdug bsngal de ldog par 'gyur ro//'di gnyis ni lan 'ga' zhig 'gal bar 'gyur ba yin pas de'i phyir nges par ldog par 'gyur ba ma yin pa'am/ gal te rtag tu mi mthun pa yin na rnam grangs gnyi gar yang gnod pa dang gnod par bya ba'i rang bzhin du 'gyur te/bum pa dang snam bu'i rtog pa dang 'dra'o zhe na/ de'i phyir gang gis zhes bya ba la sogs pa smos te/ gang dag lan 'ga' zhig mi mthun par gyur pa de ni rtag tu yang mi mthun te/ mun pa dang snang ba dang 'dra'o//de bas na ji skad bshad pa'i yid de shin tu bslabs pa'i mtshan nyid can gyis rang gi rgyud la goms par byas pa thob na rtog pa shin tu ldog par byed do/ /gtsang sbra can thod pa can du gyur pa'i gtsang sme dang 'dra bar gtsang sme med par 'gyur ba'am/ gser zhun ma yang dang yang du bsregs pas sbyangs pa dang 'dra'o/ /ci ste kun gzhi rnam par shes pa nye bar ma dmigs su zin kyang gzhir gyur pa yin pa'i phyir snang ba yin no/ /gzhan du na gnyid sdug po la sogs pa'i tshe na yang de ldog par thal bar 'gyur ro/ /kun gzhi rnam par shes pa nyid ni khams gsum pa'i bdag nyid can yin la/de dang 'brel pa ni nyon mongs pa can gyi yid dang / 'jug pa'i rnam par shes pa'i lan no/ /des na dus gcig tu yang 'gag par mi 'gyur la/ de grub tu zin kyang shin tu bslabs pa las srid pa 'gag par mi 'gyur te/nam mkha' mtha' yas skye mched bsgoms pas kyang srid pa ldog par thal bar 'gyur ba'i phyir ro zhe na/ de ni bden mod kyi 'on kyang 'di ni gzhan du bshad pa yin te/ gang gi phyir 'dir tha mal pa'i kun du rtog pa zhes bya ba ni bdag dang bdag gi dang gzung ba dang 'dzin pa'i rnam pa can gyi yid kyis brjod pa la bya bar bshad na/srid pa'i bdag nyid can gyi sdug bsngal zhes bya bar nye bar gdags pas srid pa'i bdag nyid can gyi sdug bsngal gyi rgyu'i gtso bo yin no zhes bya ba'i tha tshig go//'di zhes bya ba ni tha mal pa'i rtog pa'i bdag nyid can gyi sdug bsngal gyi rgyu'o/ /rtog pa de snang bar mi 'gyur la zhes bya ba ni dkyil 'khor gyi rnam pa can gyi sems ni mi bden pa'i rnam par rtog pa thams cad bsal ba la 'jug pa yin pa'i phyir ro//de yang lhan cig mi snang ba tsam gyis ni ma yin no/ /de bas na 'di gnyis ni lan cig mi mthun par grub na rtag tu mi mthun par grub pa yin pas 'di yang rigs pa yin no/ /rtag tu de dang mi mthun pa la dmigs pa'i rnam pa can yin pa'i phyir goms pa mngon du gyur ba ni shin du ldog pa nyid yin pa'i phyir ro//de yang / 'tshe ba med dang yang dag don/ /ngo bo nyid la phyir ldog gis/ /'bad du zin kyang gnod med de/ /blo ni de phyogs 'dzin phyir ro/ /zhes bya ba'i tshigs su bcad pas so/ /gnyen po dang mi mthun pa ldog pa dang 'jug pa yod pa ma yin no//nam mkha' mtha' yas skye mched la sogs pa ni bdag med pa'i rnam par 'jug pa ma yin te/ de bdag tu lta ba las mi ldog pa'i phyir de'i rgyu can sdug bsngal yang ldog pa ma yin no/ /de yang 'di ni skye ba nas skye bar brgyud pa'i dga' ba dang 'chi ba la sogs pa'i sdug bsngal gyi bden pa'o//de'i rgyur gyur pa bdag tu lta ba la sogs pa ni kun 'byung gi bden pa'o/ /de'i gnyen por gyur pa dkyil 'khor gyi 'khor lo ni lam gyi bden pa'o/ /sdug bsngal 'byung ba shin tu med par bya ba'i phyir sems kyi rgyun gyi mtshan nyid can gnas yongs su gyur pa ni 'gog pa'i bden pa ste 'di ni 'dir don dam pa'o//lam 'di ni thar pa 'ba' zhig tsam gyi ma yin gyi gzhan du na sangs rgyas kyi bdag nyid che ba yang yin te/ sangs rgyas kyi chos thams cad dang de las gzhan pa'i dngos po thams cad kyang chos bdag med pa'i mnyam pa nyid kyi dkyil 'khor gyi 'khor lo'i tshul du nges par rtogs pa'i phyir ro//'dis byang chub par ni 'gyur na de yang bskal pa du zhig gis 'gyur zhe na/ brjod par bya ba ste/ de'i phyir chos kun zhes bya ba la sogs pa smos pa ste/ sangs rgyas kyi chos thams cad kyi rang bzhin can gyi 'khor lo gang yin pa dang /'gro ba ste sems can dang snod kyi 'jig rten de gnyis kyi yongs su dag pa ni rnam pa thams cad du yang dag pa de la 'jug pa mngon sum du gyur cing sgom pa yongs su rdzogs pa thob pa gang yin pa'o/ /de bas na mngon sum gyi rgyu nyid las skad cig ma nyid kyis byang chub par 'gyur te/mngon sum gyi rgyu'i 'bras bu ni gzhan gyis bar ma bcad pa'i phyir ro/ /'on te mngon sum du byed pa'i 'jug pa de bskal pa dus 'gyur zhes bya ba ni dris pa'i don to/ /de yang ji srid ni sgom pa yongs su rdzogs par gyur ba'i dus de srid kyis 'gyur ro//de bas na mngon du byed pa 'di la bskal pa la ltos pa ni 'bras bu med do/ /'bras bu med pa ma yin te/ de yang gang gi phyir rgyu ni 'bras bu dang rjes su mthun par 'gyur ba yin pas/ de'i phyir bskal pa grangs med pa gsum gyis byang chub thob par pha rol tu phyin pa'i tshul las gsungs pa de ni legs par bshad pa yin la/gang yang rgyud 'di las skad cig thang cig yud tsam nyid kyis sangs rgyas kyi byang chub rdzogs par 'gyur bar gsungs pa de ni mi rigs so/ /yang na ni khyad par zhig brjod dgos so zhe na/de'i phyir khyad par bshad pa ni/ rim gyis zhes bya ba la sogs pa smos pa yin te/ rim gyis sbyin pa la sogs pa gang yin pa de ni sbyin par bya ba dang / tshul khrims la sogs pa mi dmigs su zin kyang zab pa nyid du 'gyur gyi rgya che bar ni mi 'gyur te/ tha mal pa nyid ma spangs pa'i phyir ro/ /de bas na der de tsam gyi dus nyid kyi rgya che ba yongs su rdzogs par 'gyur bas pha rol tu phyin pa'i tshul la bskal ba grangs med pa gsum gyis zhes dus kyi tshad gzung ba ni rigs pa ma yin no/ /de la ji ltar na tha mal pa spong bar 'gyur zhe na/de'i phyir rang gi zhes bya ba la sogs pa smos te/ 'di tsam gyis zhes bya bas phyogs dang dus yongs su bcad pa med pa gang yin pa de ni chen po yin pas rgya che ba yin la/ gang rang gi yul dang dus kyi rnam pa nges pa'i bdag nyid can de ni chung ba nyid yin pa'i phyir tha mal pa zhes bshad do//de lta bu'i sbyin pa la sogs pa ni la lar lan 'ga' zhig gis rnam pa gang yang rung bas sbyin pa la sogs pa sgrib pa yin no/ /de ltar na rgyud 'di ji ltar na rgya che ba yin/ gang gis skad cig gis byang chub par 'gyur zhe na/de'i phyir 'gro ba zhes bya ba la sogs pa smos te/ de'i phyir 'gro ba sems can yang dag par rdzogs par byang chub pa'i rang bzhin can gyi 'khor lo gang yin pa rgyud 'dir rnal 'byor pa ni de'i bdag nyid can yin pas de na tshe 'di nyid la ji skad du bshad pa'i mngon du gyur pa 'thob pas byang chub mngon par rtogs par 'gyur ba ni rigs pa yin no//de yang 'dir phyogs bcu dus gsum du gtogs pa'i sangs rgyas dang byang chub sems dpa' ma lus pa'i yon tan gyi 'byor ba thams cad de rnams nyid kyi bla na med cing don yod pa'i dam tshig gi bdag nyid can nyid dang /bla na med pa'i mchod pa'i bdag nyid can dang / bde ba chen po'i rang bzhin can dang / yid du 'ong ba'i rnam pa can gyi dkyil 'khor gyi 'khor lo lta bur spro ba dang bsdu ba dang ldan pas mdor bsdus te/ sems can thams cad bdag nyid la bskyed nas mnyam par bzhag pas goms par byed la/de lta bu nyid kyang kun du spyod pa rnams dang / bzlas pa la sogs pas rjes su 'jug cing rtogs par byed do/ /de bas na sbyin pa dang tshul khrims la sogs pa thams cad kyang mchog tu rmad du byung zhing rgya che ba yin la/de kho na nyid kyi rang bzhin can du thams cad rtag tu mthong bas zab pa yang 'dir mchog tu gyur pa yin te/ dmigs pa yid du 'ong ba yin pa'i phyir ro/ /dam tshig gi mthu dang sems kyi dmigs pa yin pas dga' ba med pa yang yin no/ /de bas na tshe 'di nyid la skad cig tsam gyis 'dir byang chub rtogs par 'gyur ro zhes bya ba ni rigs pa nyid yin no//'dis tshigs su bcad pa ni/ yon tan tshogs kun rang bzhin gyis legs bslabs/ /rgyal ba rnams kyi dam tshig grogs 'gyur cing / /de bzhin kun spyod gzhan yang bzlas la sogs//thams cad sems byung de phyir myur byang chub//ces 'byung ba yin no/ /sbyin pa la sogs pa la 'di lta bu'i rgya che ba ni pha rol tu phyin pa'i tshul la yang yod de/ shes rab kyi pha rol tu phyin pa yongs su zin pa'i phyir ro zhes 'ga' zhig rtog na/ de'i phyir sbyin bya zhes bya ba la sogs pa smos te/sbyin par bya ba la sogs pa mi dmigs su zin kyang sbyin pa la sogs pa de dag tha mal pa'i bdag nyid can yin te/ yul dang dus kyi rnam pa yongs su gcod pa'i phyir bdag med pas tshad can 'joms par mi byed kyi/ 'khor lo'i mchog ste dam pa la ni de yod pa ma yin no zhes sngar bshad pa yin no/ /de bas zhes bya ba la sogs pa ni nye bar sdud par byed pa'i tshigs su bcad pa yin te/ kun du rtog pa ni tha mal pa'i bag chags thams cad do/ /kun nas 'phro ba ni 'gro ba thams cad kyi don rnam pa thams cad du byed pa'i sangs rgyas kyi sprul pas 'gro ba thams cad khyab pa'i 'od gang la mnga' ba de ni/kun nas 'od zer rab 'phro ba/ /zhes bya'o/ /kun du bzang po zhes bya ba ni dge ba thams cad kyi rgyu dkyil 'khor gyi 'khor lo can zhes bya ba'i tha tshig go//bsgoms pa nyid kyi zhes bya ba ni bsgom pa la mngon par brtson pa rtsom pa'i tshe skye ba nyid dam/ de'i lo gcig ni skye ba nyid dam/ de'i lo phyed nyid dam/de'i nyin mo nyid la skal ba ji lta bar dal 'byor thob pa na byang chub 'thob par 'gyur ro/ /'khor lo gsum zhes bya ba ni le'u bzhi pa las bshad pa'i thugs kyi dkyil 'khor dang /bcu drug pa las gsungs pa'i chos kyi dkyil 'khor dang sku'i dkyil 'khor ro/ /de ni sangs rgyas rnams kyi sku gsum dang gsang ba gsum yin te/ rim pa bzhin du tha mal pa'i sku gsum dag pa 'thob par byed pa yin no//dkyil 'khor gsum char yang dkyil 'khor gsum gsum gyi bdag nyid can yin mod kyi/ bdag por byas pas phye ba yin no/ /de yang de bzhin gshegs pa rnams ni sku'i dkyil 'khor ro/ /lha mo rnams ni gsung gi dkyil 'khor ro//khro bo rnams ni thugs kyi dkyil 'khor ro/ /ci'i phyir sa'i snying po la sogs pa dang / sku'i rdo rje la sogs pa nang gi bdag nyid du 'god ce na/ de'i phyir ye shes zhes bya ba la sogs pa smos pa yin te/ ye shes lnga dang sku gsum yang sku yin la/de yang 'di ltar 'di dag tsam nyid ni mdor bsdu na thams cad mkhyen pa'i rnam pa yin pas na/ de grub na thams cad 'grub pa yin no/ /gang gi phyir zhes bya ba ni rgyu gang gi phyir te/ bde bar gshegs pa rnams kyi shes rab kyi mthar thug pa ni/pha rol tu phyin pa rnams dang / sa rnams dang / gzungs rnams dang / de las gzhan pa'i sangs rgyas kyi chos rnams ni bde ba chen po'i rnal 'byor pa de las rjes la yongs su grub pa yin te/ de'i rjes su 'brang ba nyid kyis 'grub par 'gyur ro zhes bya ba'i tha tshig go//de ji ltar phyi rol gyi dkyil 'khor rgya che bar sgom par byed ce na/ shin tu myur ba kho nar tshogs nye bar bsags pa'i phyir ro/ /dpal ldan de zhes bya ba ni/ shes rab dang thabs kyi bdag nyid can de ni/'phags pa sangs rgyas dang / byang chub sems dpa' thams cad kyi chos thams cad kyi rang bzhin yang dag par bsdus par 'gyur ba ni/ dkyil 'khor gyi bdag po las sam/ sku dang gsung dang thugs byin gyis brlabs par gyur pa las/'jig rten gyi khams thams cad rdul phra rab kyi nang du chud pa'i 'khor lo gsum po yid gang la spro ba dang bsdu ba'i tshul gyis yod pa de la de skad ces bya'o/ /gzhung 'di rnam par sbyar ba la bdag nyid kyi rang bzhin yongs su ma shes pa de bsal bar bya ba'i phyir/dam chos zhes bya ba la sogs pa tshigs su bcad pa gsum smos pa yin te/ ston pa'i dam chos kyi ro'i mchog myang zhing rtogs pa'i ro nyams su myang ba dang / thos ba mang po gnas su byas shing gzhi yod pa'i skyes bu dam pa slob dpon du gyur pa'i skye bo dam pa'i gzhung 'di byed pa'i tshad mar gyur pa yin gyi/bdag lta bu ni ma yin no/ /des na ste de'i phyir rang gi sems kyis zhes pa mang du thos pa dang rtogs pas stong pa'i phyir/ ji ltar skyes pa'i sems nyid kyis byas pa 'di nan tshangs tsam nyid kyis yang dag par grub pa ni med do//yang na kho bo'i 'bad pa 'di ni rang gi don du byas pa nyid yin te/ gang gi phyir/ bla ma dam pa'i gzhung bdag gis gzung ba gang yin pa de nyid dad pas bsal bar byas shing tshig tu sprel ba yin te/gang gi phyir/ dad pa la sogs pa'i 'phags pa'i nor ni bsten par bya ba yin no//de bas na bsten cing goms par bya ba'i don du byas shing bsten pas snod du rung bar byas pa'i skal ldan ni smad par 'os pa ma yin no/ / yang na gang gi phyir/'dir bla ma dam pa'i gzhung lugs yin pa de nyid kyis na bdag pos dman pa'am/ bdag dang mnyam pa'i don du gnyer ba rnams la 'di 'bras bu dang bcas pa yin pa dang / shes rab lhag pa yod pas kyang / shes rab dman pa las kyang legs par bshad pa blang bar bya'o zhes bya ba ni slob dpon rnams kyi lugs yin no//de bas na don du gnyer ba gsum char la yang 'bras bu dang bcas pa yin no/ /de'i phyir 'bad pa chung ngus man ngag chen po thob par byed pa yin la/des na de'i phyir gzhan gyi don du 'gyur bar yang mthong bas de ltar zhes bya ba gsungs te/ 'di ltar rang gi sems nyid kyi bdag gis nan gyis byas so zhes pa'o/ /lhag ma rnams ni go sla'o/ /dkyil 'khor cho ga rgyas bshad pa/ / bris las bdag dge gang thob pa/ /des ni bla ma dam pa rnams/ /rdzogs sangs dri med dpal gyur cig /dpal gsang ba 'dus pa'i dkyil 'khor gyi cho ga 'jig rten snang byed ces bya ba shA+o ka bzhi brgya lnga bcu pa'i 'grel pa/ slob dpon chen po rin chen 'byung gnas zhi ba'i zhal snga nas mdzad pa rdzogs so// //rgya gar gyi mkhan po bIr+ya b+ha dra dang / sgra bsgyur gyi lo tsA ba chen po dge slong rin chen bzang pos bsgyur cing zhus te gtan la phab pa// //