CLOSE WINDOW

D1867
བོད་ཡིག

/ //rgya gar gyi mkhan po ka ma la gu h+ya dang / bod kyi lo tsA ba chen po mnga' bdag lha ye shes rgyal mtshan gyis bsgyur cing zhus te gtan la phab pa'o/ /[ ]@##/ /rgya gar skad du/ sa man+ta b+ha dra sA d+ha nAM br-it+ti/ bod skad du/ kun du bzang po'i sgrub pa'i thabs kyi 'grel pa/bcom ldan 'das 'jam pa'i rdo rje la phyag 'tshal lo/ /spros pa kun las nges grol zhing / /shes rab thabs mchog ngo bo nyid/ /sku gsung thugs kyi rdo rje can/ /kun bzang zhes bya la btud de/ /dpal ldan 'dus rgyud las gsungs pa'i/ / 'jam dpal sgrub pa'i rim pa ni/ /ji ltar slob dpon gyis bstan pa/ /de ltar 'di ni bdag gis bri/ /yon tan mang la mngon 'dod pa/ /ci yang rung bas bslab bya bas/ /sangs rgyas don ni rab zab kyang / /bdag 'dra dgag par bya ma yin/ /bstan bcos rtsom pa thams cad la rjod pa dang brjod par bya ba dang /dgos pa dang / dgos pa'i yang dgos pa rnams ni/ rtogs pa dang ldan pa dag 'jug pa'i yan lag yin pas thog ma kho nar brjod par bya'o/ /de bas na re zhig de dag nyid brjod par bya ste/ dpal gsang ba 'dus pa'i rgyud dang nye bar 'brel pa rab tu 'byed pa 'di'i ming kun du bzang po'i sgrub pa'i thabs zhes bya ba ni brjod pa yin la/brjod par bya ba ni 'dir bcom ldan 'das 'jam pa'i rdo rje'o/ /rjod pa dang brjod par bya ba 'di dag sgrub pa dang bsgrub par bya ba'i mtshan nyid du gnas pa ni 'brel ba'o/ / gdul bya'i skye bo rnams ji lta ba bzhin du yid mgu bar byas pa ni dgos pa'o/ /thos pa dang / bsam pa dang / bsgom pa'i rim gyis dpal kun du bzang po'i go 'phang thob pa ni dgos pa'i yang dgos pa yin te/ 'di dag thams cad ni tshigs su bcad pa dang pos ston pa yin no//'di dag nyid ni slob dpon sangs rgyas ye shes kyi zhal snga nas kyis phyag rgya chen po dang gnyis su med pa'i sbyor ba yang dag par thugs su chud zin kyang sems can ma lus pa'i don mdzad par bzhed pas kun du bzang po zhes bya ba sgrub pa'i thabs kyi rab tu byed pa rtsom pa na/rang gi 'dod pa'i lha la phyag 'tshal ba sngon du 'gro ba gsungs pa ni/ dpal ldan zhes bya ba la sogs pa yin te/ dpal ni bsod nams dang ye shes kyi tshogs kyi mtshan nyid can no/ /de gang la mnga' ba de ni dpal ldan no/ /yang na dpal ni rnam pa gnyis te/lhan cig skyes pa dang / stobs kyis skyes pa'o/ /de la lhan cig skyes pa ni gang rang bzhin gyis 'od gsal ba'i sems so/ /stobs kyis skyes pa ni bsgom pa'i stobs kyis kun du bzang po mngon du byas pa'o/ /de dag dang rnam par ldang ba'i gzi brjid mnga' bas mdzes pa'i 'jam dpal gang yin pa de la mngon par phyag bya ste/de mchod pa'i phyir cho ga zhes bya ba bsgom pa'i rim pa bshad par bya'o zhes bya bar sbyar ro/ /gang gzi brjid gnyis po de dag nyid gsal bar bshad pa ni/ mi shes kun spangs zhes bya ba yin te/gang las mi shes pa zhes bya ba ma rig pa'i mtshan nyid can kun te/ ma lus pa spangs shing dor ba gang yin pa de la de skad ces bya'o/ /'dis ni sems rang bzhin gyis 'od gsal ba las byung ba'i phyir/ gzi brjid rang bzhin gyis rnam par byang ba nyid yin par bde sprod cing nyid kyi don phun tshogs pa mtshang ba med par ston to//dpag med rigs kyi zhes bya ba la dpag tu med pa yang yin la/ rigs kyi sprul pa yang yin zhing / rigs kyang yin la sprul pa yang yin pas na dpag med rigs kyi sprul pa zhes bya ste/ de rnams nyid kyis rab tu rnam par brgyan pa gang yin pa de la de dag ces bya'o//'dis ni don dam par dkyil 'khor ba'i lha ma lus pa kun du bzang po gcig po'i rgyud du gtogs shing sdug pa nyid yin par ston te/ gang gi phyir bcom ldan 'das de nyid dkyil 'khor ba'i lha ma lus pa'i ngo bo nyid du bzhugs pa yin no//de yang 'di ltar me long lta bu la sogs pa'i ye shes rnam par dag pa ni rnam par snang mdzad la sogs pa de bzhin gshegs pa'i ngo bo nyid yin no/ /sa la sogs pa'i rnam par dag pa ni spyan la sogs pa lha mo bzhi'i ngo bo'o/ /mig la sogs pa skye mched drug gi rnam par dag pa ni sa'i snying po la sogs pa byang chub sems dpa' drug gi ngo bo'o//gzugs la sogs pa skye mched rnam par dag pa ni gzugs rdo rje la sogs pa lha mo drug gi ngo bo'o/ /dad pa la sogs pa rnam par dag pa ni gshin rje gshed po la sogs pa khro bo bzhi'i ngo bo nyid yin no//shes rab ces bya ba la sogs pa la/ shes rab ni chos thams cad bdag med par rab tu rnam par 'byed pa'i ngo bo nyid do/ /yan lag ni thabs te snying rje chen po'o/ /de gnyis 'dus pa ni de bzhin nyid thams cad mngon sum du mdzad pas/rang gi ngang gis 'jug pa'i tshul gyis 'khor ba ji srid par sems can gyi don la zhugs pa'o/ /nges 'bar ba ni yid du 'ong bar gyur pa ste/ 'dis ni gzhan la phan pa'i thabs ma tshang ba med par ston to/ /yang na shes rab ni ye shes kyi phyag rgya'o/ /yan lag ni bcom ldan 'das 'jam pa'i dpal lo//de gnyis 'dus pa ni dbang po gnyis snyoms par 'jug pas/ chu dang 'o ma ltar gcig tu gyur pa ste/ des 'od gsal ba'i dga' ba chen po'i sgra las byung ba'i sangs rgyas kyi tshogs dang sems can gyi tshogs ma lus pa'i dgos pa mdzad pa las 'jam zhing kun du bzang po'i mtshan nyid can gyi dpal gang la mnga' ba de ni 'jam dpal te/de bzhin gshegs pa thams cad kyi ye shes kyi sku'o/ /de mchod phyir zhes bya ba ni de brjod pa'i phyir te/ de mngon sum du bya ba'i phyir zhes bya ba'i bar du yin gyi/ 'dir mchod pa'i sgra mchod pa nyid bya bar ston pa'i tshig ni ma yin no//yang na bsgom pa yang mchod pa nyid yin no/ /yang na ji ltar khyed nyid mchod pa'i cho ga 'chad/ gal te rang bzor rtsom na 'di la mkhas pa su zhig gus par byed/ 'o na bcom ldan 'das kyi gsung rab kyi rjes su 'gro ba yin na/bcom ldan 'das 'di nyid kyi thugs rje chen po'i yan lag gis 'khyud par de dang de dag tu mang du nges par byas zin to zhes rtog na/ de'i phyir dpal ldan zhes bya ba la sogs pa gsungs te/ dpal dang ldan pa'i sangs rgyas rnams kyi tshogs pa ni 'dus pa ste/ sems can rnams kyi don gyi phyir gcig tu 'dus par mdzad pas na dpal ldan 'dus pa'o/ /yang na a'i pad+ma las nges par 'khrungs pas na a las skyes pa'o/ /dpal ldan yang yin la a las skyes pa yang yin pas na 'dus pa'o/ /de ston par byed pa'i gzhung la yang de skad ces bya'o//de las gsungs pa'i gzhung lugs dam tshig nyams su blangs pa la sogs pa ni dpal ldan 'dus pa'i gzhung lugs te/ des cho ga bstan cing bshad par bya'o zhes pa'o/ /ci khyed la cho ga 'di gzhan gyis gsol ba ma btab par bshad dam/ 'on te gsol ba btab ce na/de'i phyir bshes gnyen dam pa yis ni zhes bya ba smos te/ gang la rnam par byang ba yod pa de ni bshes gnyen dam pa ste/ dge ba'i bshes gnyen de spun dang slob ma'o/ /spun zla ni gsum ste/ kod+ka na'i chos kyi 'byung gnas dang / ri bo ha sa ra'i gtsug tor rdo rje'o//slob ma'i cho ga ni bzhi ste/ mar me mdzad bzang po dang / rab tu zhi ba'i bshes gnyen dang / rdo rje bde ba chen po dang / sgra gcan 'dzin bzang po'o/ /de rnams kyis bskul ba ni bsnyen bkur sngon du 'gro bas gsol ba btab pa ste/ des bdag spro bar bya ba gang yin pa de la de skad ces bya'o//cho ga de ji lta bu zhig ce na/ 'gro ba ma lus pa zhes bya ba la sogs pa smos te/ 'gro ba ma lus shing lus pa med pa'i don phun sum tshogs pa ni don gyi mthar thug pa kun du bzang po mngon sum du byed pa'i mtshan nyid du gyur pas so/ /de'i rgyur gyur pa ni byed par gyur pa'o//'dis ni sems can rnam pa thams cad mgu bar 'dzin pa'i phyir/ snod du gyur pa ston to/ /de yang / dngos po gang dang gang gis ni/ /mi rnams yid ni mgu gyur pa/ /de dang der ni rnam ston te/ /sna tshogs nor bu ji bzhin no/ /zhes ji skad bshad pa lta bu'o//da ni blo dman zhing mi mkhas pa rnams yang dag par gzengs bstod pa'i phyir/ dal 'byor 'di ni zhes bya ba la sogs pa smos te/ kye bzhin bzangs rang gi don sems ni don dam par shes rab dang thabs bsgom par gzhol ba la 'bad par bya ste/ gzhol ba ni de la brtson pa'o//ci'i phyir zhe na/ dal 'byor 'di ni shin tu g.yo ba dang / zhes bya ba smos te/ mi khom pa brgyad po gang zhe na/ dmyal ba dang / yi dags dang / dud 'gro dang / yul mtha' khob pa dang / lha tshe ring po dang / dbang po ma tshang ba dang / las ma tshang ba dang / las med par ston pa'i lta ba la slob pa dang /sangs rgyas mi 'byung ba'i 'jig rten du skye ba zhes bya'o/ /de lta bu'i mi khom pa brgyad las thar pa 'di ni dal 'byor te/ skal ba mnyam par gtogs pa'i sde pa'i mtshan nyid can gyi mi'i skye ba'o/ /de yang g.yo ba yin te/ rga ba dang / na ba dang / 'chi ba dang / sdug pa dang bral ba la sogs pa'i sdug bsngal mang ba yin no/ /dal 'byor phun sum tshogs pa thob na yang 'jig rten na skye bo dam pa dang phrad pa ste/ dge ba'i bshes gnyen dang phrad pa ni shin tu rnyed par dka' ba yin no/ /de bas na dge ba'i bshes gnyen la brten par gyis shig pa'o//gzhol ba ni khyad par can gyi 'dod par bsgom pa'i rnal 'byor dang ldan par bya'o/ /da ni tshigs su bcad pa gnyis kyi dbang du byas pa gsungs pa ni/ de la sngags pa zhes bya ba la sogs pa yin te/ de la zhes bya ba ni yon tan dgar ba'o/ / sngags pa zhes bya ba ni gsang sngags kyi tshul la spyod pa'i slob dpon te/ de snying rje dang rab tu ldan zhing brtse ba phul du byung bas kaM zhes pa bde ba/ ru Ni da ti ste 'gog par byed pas snying rje ste/ smon pa'i mtshan nyid can skyed cing byang chub ste kun du bzang po'i go 'phang thob par bya ba'i phyir/gang gis khyad par can gyi sems bskyed pa'o/ /de bzhin du stong pa la sogs pa'i yon tan rnams kyis brgyan cing spud par bya ba gang yin pa ste/ gtong ba ni rang gi nor rab tu ster ba'o/ /sogs kyi sgras ni tshul khrims dang / bzod pa dang / brtson 'grus la sogs pa bsdu'o//zab mo'i tshul ni theg pa chen po ste/ de la lhag par mos pa ni thos pa dang bsam pa dang / bsgom pa la mngon par brtson zhing 'bad pa dang ldan pa ste/ stong pa la sogs pa'i yon tan gyis brgyan pa nyid kyis na stong pa chen po la sogs pa la lhag par mos par 'gyur ro zhes bya ba'i don to//de yang / tshul khrims yang dag blangs te de bzhin 'jug /sbyin pa gtong zhing snying rje'ang sten byed la/ /bzod cing dge ba de yang 'gro ba 'di/ /grol zhing byang chub dam pa thob par byed/ /byang chub sems dpa' rnams la gus byed cing / /rgya che zab mo'i tshul la rnam par mkhas//zhes bya ba la sogs pas ji skad bshad pa lta bu'o/ /dpal ldan zhes bya ba la sogs pa la/ dpal ni rgyud thams cad las phul du byung ba'i mtshan nyid can yin la/ /dpal de dang ldan pa gang yin pa de ni dpal ldan te/ rgyud kyi mthar thug 'dus pa yin//zhes gsungs pa yin no/ /snying po len pas na dkyil 'khor te/ maN+Da ni snying po la bya ste/ mar dang zho'i snying po dang 'dra'o/ /der gang dbang bskur ba'i tshul gyis bya ba de dang ldan zhing bcas pa'o/ /de yang / bum pa'i dbang bskur ba dang po ste/ /gsang ba'i dbang bskur gnyis pa ste//shes rab ye shes gsum pa yin/ /zhes bya ba la sogs pa ji skad bshad pa'i tshul gyis/ slob dpon gyis slob ma la dbang bskur ba yang dag par rdzogs par byas pa'o/ /cho ga bzhin du zhes bya ba ni slob dpon mnyes par byas shing yon phul bas rjes su gnang ba byin nas/yang dag par bsgoms na 'bras bu thob par 'gyur ro zhes bya ba'i don to/ /rgyud gzhan las ni dbang bskur ba brgyad gsungs te/ bum pa'i dbang bskur ba dang / phreng ba'i dbang bskur ba dang / dar dpyangs kyi dbang bskur ba dang / cod pan gyi dbang bskur ba dang /ming gi dbang bskur ba dang / rdo rje'i dbang bskur ba dang / de kho na nyid bstan pa dang / gsang ba'i dbang bskur ba dang / rjes su gnang ba'i dbang bskur ba'o/ /'di dag nyid 'di'i nang du 'dus pas rgyud 'dir dbang bskur ba rnam pa gsum bstan pa yin no/ /bzhi pa yang ni zhes bya ba ni yang rim pa 'di nyid kyis slob dpon nyid du dbang bskur ba'o//blo dang ldan pa zhes bya ba la blo dang ldan pa ni shes rab chen po dang ldan pa'o/ /rang sngags mnyes par bya zhes bya ba ni/ bla mas bstan pa'i bsgom pa'i rim pa ni sngags te/ de mnyes par bya ba ni mngon sum du bya ba'o//bsgom pa la bslab par bya ba'i phyir/ las dang po'i gnas bstan pa gsungs pa ni/ la lar zhes bya ba la sogs pa gsungs pa yin te/ ri bo mchog tu gyur pa 'ga' zhig tu/ /'jam zhing snyan pa'i gsung 'gro ba ma lus pa yid tshim par byed pa'i dbyangs kyi yan lag drug cu dang ldan pa'i dbyangs mnga' ba de bsgrub par bya'o//ri bo de yang dri ma med pa'i chu phun sum tshogs pa ste/ chu'i sbyor ba dang ldan pa'o/ /shing mchog ni/ sA la dang / ta la dang / ta ma la dang / 'bra go dang / a mra la sogs pa shing gi mchog gi phreng bas rnam par brgyan cing mdzes par byas pa de lta bu dang /nye ba'i ri bo'i phyogs gcig gang yin pa der lha mnyes par bya bar rigs kyi/ gzhan du na gal te 'brel pa med pa'i dngos po mthong na sems la phyin ci log nye bar skye bar 'gyur ro/ /de ltar rab bsgrub bya zhes bya ba ni 'og nas bshad pa'i rnam pas mngon sum du bya'o zhes bya ba'i bar du'o//da ni bsgom pa la 'jug pa'i rim pa gsungs pa ni/ dang por zhes bya ba la sogs pa yin te/ dang por mal nas langs la nang par te/ snga dro'i thog mar snying ga'i bla ba'i dbus te dkyil du yi ge ma rnam par dgod par bya ste/sna tshogs pad+ma la gnas pa'i zla ba'i steng du maM las byung ba'i ral gri'i dbus na gnas pa'i 'jam pa'i rdo rje'i sa bon rnam par bsam par bya'o/ /ji lta bu zhe na dri med 'od zer rab tu 'phro ba'i zhes bya ba smos te/kha dog lnga pa'i 'od zer rtse mo las de bzhin gshegs pa rnams nges par 'byung ba kun nas 'phro ba gang yin pa de ni de nyid ces bya ba sems can rnams kyi 'dod chags dang / zhe sdang dang / gti mug rnam par dag par byed cing / don dam pa'i chos ston par mdzad par bsams nas/rang gi gdong bkru ba la sogs pa bya'o/ /sogs pa'i sgras ni dkyil 'khor dang / mchod rten gyi las dang / dkon mchog gsum la bskor ba bya ba dang / phyi'i mchod pa la sogs pa thams cad bya'o zhes pa'o/ /'di dag thams cad kyang snying rje chen pos yongs su gdung ba'i brtse ba dang ldan pa'i sems kyis 'jug pa la rigs kyis gzhan dag la ni ma yin no//yang na de nyid de/ phyin ci ma log par rtogs pa dang ldan par grags pa de nyid la rigs te/ gang gi phyir 'di nyid ni don dam pa'i shes rab dang thabs te de bsgom pa yin te/dpal de kho na nyid bsdus pa las de bzhin gshegs pa thams cad rang gi snying gar zla ba'i dkyil 'khor gyi rnam par mthong ba lags so zhes gsungs pa yin la/ ye shes de nyid 'dod chags la sogs pa'i dri ma'i nag nog ma lus pa dang bral ba nyid kyis 'od 'bar ba'i gzugs can yin pa'i phyir dang /bsod nams dang ye shes kyi tshogs ma lus pa'i bdag nyid can yin pa'i phyir 'gro ba mtha' dag tshim par byed pa'i rang bzhin can yin pa'i phyir dang / dpal ldan 'jam pa'i rdo rje la sogs pa'i sprul pa'i 'od zer rnams kyis sems can gyi khams ma lus pa'i dgongs pa'i don bsgrub par nus pa dang ldan pa'i phyir dang /nam mkha'i khams kyi mthar thug pa'i phyogs kyi 'khor lo khyab pa nyid kyis mngon par mtho ba dang / nges par legs pa'i 'bras bu ma lus pa dang ldan pas yongs su rdzogs pa'i phyir zla ba'i dkyil 'khor gyi rnam pa dang 'dra bas zla ba'i dkyil 'khor lta bu zhes bya ba 'dis ni/de nyid ces bya ba gsungs pa yin no/ /da ni ting nge 'dzin la 'jug pa ston te/ tsan+dan bzang po zhes bya ba la sogs pa la bzang po zhes bya ba ni shrI khaN+Da la sogs pa tsan+dan bzang pos byugs pa'o//sogs pa'i sgras ni/ gur kum dang / ga bur dang / gla rtsis byugs pas nye bar mdzes par byas pa dang / a ka ru dang / tu ru ska la sogs pa'i bdug pas bdugs shing / san ta na dang / ba lu ka dang / tsam pa ka dang / dzA ti dang / ma li ka dang /ut+pal la sogs pa me tog gi khyad par dri zhim pa rnams gcal du bkram pas mdzes par byas pa'i mchog gi cha ste/ phyogs dam pa'i bsam gtan gyi gnas zhes pa ting nge 'dzin la mnyam par 'jog pa'i gnas bde ba'i stan la gnas par bya ste/ btsos dang dar gyis g.yogs pa'i stan nang tshangs can 'jam po la sogs par ting nge 'dzin la bslab par bya'o//mtshan nyid ji lta bu zhe na/ de'i phyir/ dus gsum bzhugs pa'i sangs rgyas rnams/ /zhes bya ba la sogs pa smos te/ 'das pa dang ma 'ongs pa dang / da ltar byung ba'i sangs rgyas phyogs bcu na bzhugs pa'o//dmigs te zhes bya ba ni nye bar bsam pa'o/ /sna tshogs mchod pa'i sprin rnams ni/ /zhes bya ba ni snying ga'i zla ba'i ral gri'i 'od zer gyi sgra las byung ba'i mchod pa/ me tog dang / bdug spos dang / dri dang / mar me dang / lha bshos dang /thol mo dang / glu dang / gar dang / gos dang / na bza' la sogs pa rnam pa sna tshogs pa'i mchod pa'i khyad par can rnams ni shin tu mang ba'i phyir sprin dang 'dra bas na sprin rnams so/ /sogs pa zhes bya ba'i sgras ni mchod pa sngon du 'gro ba'i bstod pa dang /sems can rjes su gzung bar bya ba'i phyir smon lam bya ba dang / gsol ba gdab pa dang / bdag dbul ba'o/ /blo ldan gyis zhes bya ba ni sems brtan pa ste/ rnam par g.yeng ba'i rtog pa thams cad dang bral ba'o/ /de ltar sngar bshad pa dang 'og nas bshad pa'i rnam pas sangs rgyas kyi spyan sngar sdig pa bshags pa la sogs pa bya'o//dge ba rnams ni 'phel bar bya ba'i phyir/ /zhes bya ba ni/ dge ba rnams nye bar bsags pa'i phyir ro/ /sogs pa'i sgras ni bsod nams kyi rjes su yi rang ba dang / gsum la skyabs su 'gro ba dang / byang chub tu sems bskyed pa dang /lam la gnas pa'o/ /mdor bstan pa 'di'i bshad pa gsungs pa ni/ gang zhig ces bya ba la sogs pa yin te/ dang por sdig pa bshags pa'o/ /de la gang zhig thog med ces bya ba ni thog ma med pa'i dus nas sdig pa'i rnyog pa nye bar bsags pa gang yin pa de thugs rjes thugs non pa'i sangs rgyas rnams kyi spyan sngar bshags shing rab tu bsgrag par bya'o//de yang 'khor ba thog ma med pa'i srid pa'i chu klung dba' rlabs 'khrug pa'i dmyal ba dang / yi dags dang / dud 'gro dang / mi la sogs pa'i 'gro ba rnams su kun du rtog pa ma lus pas bsags shing nye bar bsdus pa'i nyon mongs pa can gyi yid kyi bag chags las byung ba'i sdig pa bgyis pa dang bgyid du stsal ba dang /bgyis pa la rjes su yi rang ba de dag cho ga bzhin du zhes bya ba slar yang mi byed pa sngon du 'gro bas thams cad ces bya'o//lus dang ngag dang yid las byung ba'i rang bzhin gyi kha na ma tho ba dang bcas pa'i kha na ma tho ba de dag thams cad bshags par bgyi'o zhes pa'o/ /bsod nams kyi rjes su yi rang ba gsungs pa ni rdzogs sangs rgyas dang zhes bya ba la sogs pa ste/ dge ba'i rtsa ba ma lus pa rnams la phul du byung ba'i bsam pas khyad par med par rjes su yi rang bar bya zhing / snying rjes yongs su bsgom pa'i sems kyis bla na med pa'i byang chub tu yongs su bsngo zhing / gzhan gyi don la spyod pa'i mtshan nyid can gyi lam du yang dag par bstan par bya'o//ji lta bu zhe na/ dge ba dang mi dge ba'i tshogs dag cing gtsang bar byed pas na bsod nams la dge ba zhes bya'o/ /su zhig gis byas pa zhe na/ rdzogs pa'i sangs rgyas te yang dag par rdzogs pa'i sangs rgyas dang / sa bcu la bzhugs pa'i byang chub sems dpa' 'phags pa spyan ras gzigs dbang phyug la sogs pa dang /'phags pa ste nyan thos dang rang sangs rgyas rnams dang / gzhan gyis zhes bya ba mu stegs dang so so'i skye bos byas pa yan chad do/ /ji ltar na mu stegs pas byas pa'i bsod nams la rjes su yi rang bar bya zhe na/bcom ldan 'das yum shes rab brgyad stong pa'i rjes su yi rang ba'i le'u las bsdus pa dag snang bas 'gal ba med do/ /dkon mchog gsum la skyabs su 'gro ba ni yid kyi rol pa zhes bya ba la sogs pa'i tshigs su bcad pa gsum gyis gsungs pa yin te/ ting nge 'dzin gyi mthu'i khyad par las byung ba'i 'od zer gyi dra bas 'brel ba'i yid kyi rol pas 'khrul pa nyid ni dri med zla ba ste/sems kyi zla ba des bsgrubs shing rdzogs par byas pa'i 'gro ba'i don tshad med pa/ snying rje chen po'i rang bzhin can gyi thabs kyis bsgrubs pa'i dgos pa'i don mnga' ba sangs rgyas bcom ldan 'das gang yin pa de la skyabs su mchi'o zhes pa'o//ci zhig ston ce na/ kun du bzang po nyid kyis rang bzhin gyis chos kyi sku'i bdag nyid can yin pa'i phyir sems can ma lus pa'i dgongs pa mdzad pa la mkhas pa'o/ /rang gi yid la gnas par gyur pa yi//zhes bya ba ni so so rang gi rig pa ngo bo nyid yin pa'i phyir/ don dam par rnal 'byor pa'i mngon sum gyis rtogs par byas pa yin gyi/ phyi rol ni ma yin no/ /rtog pa ma lus pa las nges grol zhing / /zhes bya ba la sogs pa la/ chos de la skyabs su mchi'o zhes pa'o//ji lta bu zhe na/ rtog pa ma lus pa las nges par grol ba ste/ mi bden pa'i rtog pa'i dri ma thams cad dang bral ba'o/ /sems dpa' dam pa ni chos kyi ngang tshul can gyi dam pa rnams so/ /de rnams kyi phun sum tshogs pa ni mngon par mtho ba dang / nges par legs pa'i mtshan nyid can no//de'i gzhi ni rten no/ /dngos po thams cad ro gcig ngo bo nyid/ /ces pa ni so sor snang ba tsam gyi rang bzhin can gyi dngos po ma lus pa'i ro gcig pa'i ngo bo nyid ni stong pa nyid de/ gang gi phyir chos kyi dbyings las ma gtogs pa'i chos ni ci yang med pa'i phyir stong pa nyid ni kun du 'gro ba'i mtshan nyid can yin no//'ching ba rnams las zhes bya ba la sogs pa la/ brtul zhugs dang ldan pa rnams kyi dbang po yin pas na brtul zhugs dbang po ste/ brtul zhugs can ni nyan thos dgra bcom pa rnams so/ /de rnams kyi dbang por gyur pa ni snying rje chen po'i rtsa bar gyur pa gzhan gyi don la brtson pas dbang po ste bdag po'o//de rnams kyi tshogs ni mang po ste/ de la bdag skyabs su mchi'o zhes pa'o/ /ji lta bu zhe na/ de'i phyir/ 'ching ba rnams las yang dag grol gyur cing //zhes bya ba la sogs pa smos te/ gang gis 'khor ba'i sdug bsngal gyi 'ching ba 'dod chags dang khong khro ba dang / nga rgyal dang ma rig pa la sogs pa nyon mongs pa dang / shes bya'i sgrib pa'i mtshan nyid can gyi 'ching ba las yang dag cing phyin ci ma log par bstsal zhing grol bar gyur pa/snying rje'i mchog ste/ snying rje chen po'i shugs kyis bskrun cing bstabs pa'i dpal sems can thams cad la chos ston pa'i bdag nyid can gang gis pha rol tu phyin pa bcu yongs su rdzogs shing ye shes kyi tshogs bsags pas rab tu dga' ba la sogs pa'i sa bcu la bzhugs pa'i dge 'dun la bdag skyabs su mchi'o//nyan thos rnams la ni ma yin no/ /byang chub tu sems bskyed pa gsungs pa ni/ bsam dang zhes bya ba la sogs pa yin te/ bsam dang rnam par smin pa dag gyur pa/ /zhes bya ba ni gzhan gyi don gyi mtshan nyid can yang dag par rdzogs pa'i byang chub tu yid yang dag par bskyed par bya'o zhes bya ste/thog ma tha ma med zhi ba/ /dngos dang dngos med mi zad gtso/ /stong dang snying rje mi phyed pa/ /byang chub sems zhes bya bar bshad/ /ces bya'o/ / ji lta bu zhe na/ lhag par mos pas rnam par brgyan pa yi/ /zhes bya ba ste/ 'dis lhag par grol bas na lhag par mos pa ste/ sems kyi 'dod pa'i de nyid ni rgyan de des rnam par brgyan cing spud pa gang yin pa'o/ /ji lta zhe na/ bsam pa dang rnam par smin pa dag par gyur pa ste/bsam pa rnam par dag pa ni smon pa'i sems so/ /rnam par smin pa dag pa ni 'jug pa'i sems so/ /de la gzhan gyi don gyi phyir yang dag par rdzogs pa'i byang chub 'dod pa ni smon pa'i sems so/ /gang nas brtsams te/ sdom pa blang ba sngon du 'gro bas sbyin pa la sogs pa'i tshogs bsags pa la rjes su 'jug pa de ni 'jug pa'i sems so//de lta bu'i bsam pa dang rnam par smin pa dag pa rgyur gyur pa/ sgrib pa kun gyis zhes bya ba 'dis dge ba'i chos thams cad la bsgribs pa pa na sgrib pa ste/ sgrib pa ni bar du gcod pa'o/ /de yang kun te 'dod chags dang /khong khro ba dang / nga rgyal dang / ma rig pa dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom dang / gnyid dang / rmugs pa ste/ nyon mongs pa dgus sgrib par byed pas na/ thams cad kyang sgrib pa zhes bya'o//de rnams kyi bag chags ni tshul bzhin ma yin pa'i yid la byed pa'o/ /de sngon du 'gro ba'i sems kyis 'jug pa de yang dag par 'byin cing yang dag par gcod par byed la/ yang dag par 'joms pa'i ngang tshul can ni yang dag 'byin pa'o/ /lam la gnas pas bsgoms pa gsungs pa ni/bde gshegs zhes bya ba la sogs pa yin te/ da ni byang chub kyi chos la gnas shing brten par bgyi'o/ /mtshan nyid ji lta bu zhe na/ bde bar gshegs pa rnams kyi sras ni byang chub sems dpa' rnams te/ de rnams kyi lam gcig pu gnyis su med par gyur pa'o//de ltar na ci'i phyir lam gyi dbye ba rnam par gzhag par mdzad ce na de brjod par bya ste/ chos dbyings dbye ba ma mchis pas/ /gtso bo theg dbye yod ma yin/ /sems can rnams ni 'jug pa'i phyir/ /khyed kyi theg pa gsum gsungs so/ /zhes smos pa yin no//de bzhin du sbyin sogs rnam bcu dkar po'i yon tan tshul zhes bya ba ni sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / stobs dang / smon lam dang / thabs dang / ye shes zhes bya ba gang dkar po'i yon tan gyi tshul te/ngo bo nyid gang yin pa rdzogs sangs rgyas/ /zhes bya ba yang dag par rdzogs pa'i sangs rgyas kyi bdag nyid can yin zhing / rdzogs pa'i sangs rgyas kyi rang bzhin chos kyi dbyings de bzhin nyid kyi ngo bo nyid dngos po'i don ma lus pa'i rnam par dag pa don dam pa'i tshul can gang yin pa des//da ni zhes bya ba skad cig mas 'di nas brtsams te/ byang chub kyi snying po'i mthar thug pa'i bar du gnas par bgyi'o zhes so/ /de ltar dag pa'i tshul la gnas nas bsgom pa'i snod du gyur te/ de yang / tshul gnas thos dang bsam par ldan//bsgom pa la ni rab tu sbyar/ /zhes bshad pa'i phyir ro/ /da ni shes rab dang thabs kyi bdag nyid can gyi bsgom pa gsungs pa ni/ snying rje zhes bya ba la sogs pa yin te/ snying rje chen pos gdungs pa'i yid kyis 'gro ba'i 'jig rten 'di ma lus par lta ba'i dra bas kun nas bcings shing bsdams par dmigs par bya ste/de la lta ba nyid ni 'ching bar byed pas dra ba ste/ ji ltar dra bas bsdams pa'i bya rnams ni shugs kyis nam mkha' la 'gro bar nus su zin kyang / lus las su mi rung zhing bems po lta bur gnas par 'gyur ro//de bzhin du sems can 'di dag lta ba gsum gyis bcings pas mya ngan las 'das pa thob par mi rung ngo / /lta ba gsum ni 'jig tshogs la lta ba dang / bdag tu 'dzin par lta ba dang / log par lta ba'o/ /de ltar phas bu la bya ba bzhin du sems can gyi khams ma lus pa snying rje chen pos gdon pa'i phyir dmigs la/yang dag par rdzogs pa'i byang chub kyi sems mnyam pa med pa bsgom par bya'o/ /mnyam pa med pa zhes bya ba ni snying rje chen po'i ngo bo nyid do/ /de ltar bya zhes bya ba ni rnam pa 'dis te/ kye ma gti mug gi mun pa gang gis sems can 'di dag mya ngan las 'das pa'i ngo bo nyid yin du zin kyang bdag nyid kyis rtogs par ma gyur na/ji ltar ni 'di dag khong du chud par bya zhes rnam par bsams la/ de'i bdag nyid can nyid du 'gro ba thams cad dmigs na mi dmigs pa'i tshul gyis snying rje chen por skye bar 'gyur la/ bdag nyid kyang de lta bu'i bdag nyid can te/dngos po thams cad kyi ngo bo nyid du bsam par bya'o/ /de ltar byang chub kyi sems rnam par bsgoms nas sngags par 'gyur zhing ye shes kyi ngo bo nyid du 'gyur te/ shes rab kyi pha rol tu phyin pa'i rnal 'byor dang ldan par 'gyur ro zhes bya ba'i bar du'o//dris pa sngags kyi tshul thams cad du shes rab dang thabs bsgom par bya'o zhes bya ba'i tshig dang ldan na/ ji ltar na thabs bsgom pas shes rab bsgom par bya'o zhes bstan bcos rtsom pas 'brel pa med par byas la rtog pa dag gi lan ni de kho na nyid la 'jug par blta bar bya'o/ / de yang / dngos kun rang bzhin bdag med du/ /rnal 'byor bdag nyid can gyur pa/ /bsgom pa'i rigs kyis phyin nas ni/ /phyag rgya chen po'i bdag can 'gyur/ /zhes bshad pa yin no/ /thabs bsgoms nas shes rab bsgom pa gsungs pa ni/ ngo bo nyid dang zhes bya ba la sogs pa yin te/'di ltar chos rnams ni ngo bo nyid kyis stong pa yin te/ spros pa med pa'i rang bzhin can no/ /de ci'i phyir zhe na/ ngo bo nyid dang bral phyir zhes bya ba smos te/ don dam par dngos po thams cad gcig dang du ma'i rang bzhin dang bral ba'i phyir/ dngos po med pa'i ngo bo nyid yin no//de yang yum shes rab kyi pha rol tu phyin pa las/ rab 'byor chos thams cad stong pa nyid kyis stong par byas pa ma yin gyi/ gzhan du na chos rnams nyid stong pa'o zhes gsungs pa dang / de bzhin du/ ji ltar me long dag la gzugs/ /gcig dang du ma rnam bral bar//snang yang de na yod ma yin/ /de bzhin dngos po dngos nyid do/ /zhes gsungs pa yin no/ /de bzhin du chos rnams ni mtshan ma nye bar gzung ba med pas mtshan ma med pa yin pas te/ ci'i phyir zhe na/ rgyu dang bral bas zhes bya ba smos te/ gzhan gyis yongs su brtags pa'i dbang phyug la sogs pa'i rgyu med pas don dam par mtshan ma dang bral ba yin gyi/kun rdzob tu ni ma yin to/ rtag tu yod pa'am med par ni/ /rgyu gzhan la ni ltos pa yin/ /zhes smos pa yin no/ /de bas na/ rmi lam sgyu ma ji bzhin dang / /dri za'i grong khyer ji bzhin du//de bzhin skye dang de bzhin gnas/ /de bzhin du ni 'jig par gsungs/ /zhes bshad pa yin no/ /kun rdzob tu ni dngos po rnams rgyu rkyen tshogs pa las skye ba yin no/ /de bas na/ blo yis rnam par brtags na ni/ /ngo bo nyid ni gzung du med/ /de bas de ni brjod med dang //dngos po med par bstan pa yin/ /zhes bshad pa yin no/ /gal te kun rdzob tu rgyu med par brtags na/ de'i tshe nyes pa 'di yod par bstan gyi gzhan du ni ma yin no/ /de bzhin du dngos po rnams ma lus par smon pa las nges par grol zhing / de dang bral ba yin te/ngo bo nyid kyis stong pa yin pa'i phyir smon lam dang / smon par bya ba dang / smon pa po dang bral ba yin yang bdag dang bdag gir rtog pa nyon mongs pa can gyi yid kyi bag chags kyi dbang gis snang ba'i dngos po rnams ni sgyu ma dang / smig rgyu dang / dri za'i grong khyer dang /rmi lam lta bu ste yod pa ma yin pa nyid do/ /de bas na gsol bar bya ba dang / gsol ba dang / gsol ba po'i ngo bo nyid ni stong pa yin pas smon pa med pa'o/ /de ci'i phyir zhe na/ rtog pa rnams dang bral phyir zhes bya ba smos te/ rtog pa dang bral ba'i phyir/ /rgyu ba dang mi rgyu ba'i bdag nyid can gyi dngos po ci yang nye bar dmigs par mi 'gyur ro//'on kyang thog ma med pa'i ma rig pa'i bag chags kyi dbang gis yod par rtog ste/ de yang / gang gis skye ba 'byung ba ni/ /dngos po gang la'ang rnyed mi 'gyur/ /dngos po med pa'i ngo bo la/ /byis pa rnams ni 'byung bar 'dod//ces ji skad bshad pa lta bu'o/ /'di ni gnas gyur pa'i rnal 'byor te/ nang gi bdag nyid stong par mthong / /phyi rol gtogs pa'ang stong par mthong / /de la ci yang mi dmigs pa/ /bsgom pa gang yin stong pa nyid/ /ces bya ba'i bsgom pa 'dis//phyi rol gyi don la mngon par zhen pa mi snang bar byas nas/ dpal gsang ba 'dus pa'i rgyud las gsungs pa'i rim pas/ srid pa bar ma'i rnam par dag pa'i rnal 'byor gsungs pa ni/ oM zhes bya ba la sogs pa yin te/ oM zhes bya ba ni nges pa'o/ /shU n+ya tA zhes bya ba ni stong pa nyid dang /mtshan ma med pa dang / smon pa med pa'i nye bar mtshon pa ste/ rnam par thar pa'i sgo gsum po 'di dag rnal 'byor pas rim pa ji lta ba bzhin du bsgom par bya'o/ /de yang sngags oM gyi gzugs ni dkar po/ /AH'i gzugs ni dmar po/ hUM gi gzugs ni nag po'o/ /badzra zhes ci'i phyir smos she na/ rdo rje ltar nyon mongs pa can gyi ri bo rnam par 'jig pa'i stong pa nyid dang / mtshan ma med pa dang / smon pa med pa'i rnam par thar pa'i sgo gsum gyi rang bzhin can gyi sku dang gsung dang thugs rdo rje'i sa bon/ dz+nyA na swa b+hA ba ste/bdag ni ye shes kyi bdag nyid can gyi ngo bo nyid du gdong ma nyid nas gyur pa yin no/ /'di dag gis ni sems rang bzhin gyis 'od gsal ba nyid du ston to/ /ci'i phyir 'dis skad cig ma nyid kyis rdo rje sems dpa' la sogs pa'i rnam pa yongs su bzung nas/ sems can gyi don mi byed par yi ge lnga'i gzugs su gnas par byed ce na//de brjod par bya ste/ 'khor ba ni rten cing 'brel par 'byung ba'i yan lag bcu gnyis kyi rang bzhin can yin la/ de'i gnyen por lhag par mos pas slob dpon gyis sgrub pa'i thabs 'di bstan pa yin la/ de yang bcom ldan 'das kyis srid pa gsum du gsungs te/'chi ba'i srid pa dang / srid pa bar ma dang / skye ba'i srid pa'o/ /de la 'chi ba'i srid pa ni/ gnas yongs su gyur pa'i rnal 'byor ro/ /srid pa bar ma ni yi ge lnga po'i sngags kyi rnam par bsgom pa'o/ /slar skye ba'i srid pa ni 'jam pa'i rdo rje yongs su grub pa'o//srid pa bar ma zhes bya ba 'di ci zhig yin zhe na/ 'di ni 'chi ba dang / skye ba'i srid pa'i bar du gang zhig 'byung ba ste/ 'chi ba'i srid pa dang skye ba'i srid pa'i bar du bdag nyid kyi dngos po mngon par byung bar gyur pa gang yin pa de ni srid pa bar ma zhes bshad la//de yang sems kyi ngo bo zla ba lta bu'i gzugs can dbang po thams cad kun du rdzogs pa/ dbang po lnga rigs mthun pas mthong ba ste/ oM AH hUM dang / yi ge hoH ser po 'od 'phro ba gnyis kyi bar du chud pa/ ji srid dpal rdo rje sems dpa'i dkyil 'khor gyi 'khor lo spros kyi bar du 'dug pa yin la/'di ni ma rig pa rnam par dag pa ste/ ma rig nyon mongs sngon gnas skabs/ /zhes bshad pa'i phyir ro/ /thams cad du nyes pa dang bral ba nyid dang / yon tan thams cad kyi rang bzhin dang / /'dod pa nyid ni rnam par dag pa zhes bshad do//dang po'i sbyor ba'i dbang du mdzad nas gsungs pa ni de 'og ces bya ba la sogs pa gsungs pa yin te/ gnas yongs su gyur pa'i rjes thogs la chos 'byung ba'i phyag rgya bsgom pa'i bya ba ni skye ba'i gnas kyi rgyu yin zhing / 'khor ba'i chos ma lus pa skyed pa'i ngo bo nyid yin no//gang du sgom zhe na/ hUM gis rdo rje byas pa'i sar/ /zhes bya ba smos te/ yi ge hUM rdo rje ltar shin tu brtan par byas pa'i sa gang yin pa der ro/ /de gang las byung zhe na/ kun du bzang po las byung bar/ /zhes bya ba smos te/ rang gi mtshan ma las yang dag par byung ba'i kun du bzang po yongs su gyur pa'i rang bzhin can no//bsam pa ni zhes bya ba ni srid pa bar ma do'i gnas skabs su de la dmigs pa'i sems bsgoms pas brtan par bya'o zhes pa'i don to/ /kun du bzang po ni sku mdog dang zhal dang phyag dpal bde ba chen po dang 'dra ba sna tshogs rdo rje de yang sna tshogs pad+ma rgyas pa'i steng na gnas pa'i hUM las byung bar bsam mo//chos 'byung ba de ji lta bur bsam zhe na/ ston ka'i zhes bya ba la sogs pa smos te/ ston ka'i yar gyi zla ba ltar rab tu dkar zhes shin tu dang ba'i rang bzhin can mtha' yas pa'i phyogs na gnas pa ste/nam mkha'i khams ma lus par khyab pa nag po dang / dkar po dang / ser po dang / dmar po dang / ljang gu'i mdog can gyi 'od sna tshogs pa dang ldan pa ste/ de'i rang bzhin gyi mdog ni dkar ba nyid yin no/ /gzhan yang gru gsum gyen du gnas pa ste/gru gsum du gnas pa las/ zur gcig ni sa la zur gnyis ni steng na gnas pa ste/ 'jig rten du ji ltar grags pa lta bu'o/ /gzhan yang nang na nam mkha'i rang gi ngo bor byang chub kyi sems kyi rnam par rdo rje 'dzin pa gang la yod cing dbus na gnas pa ste nang du chud par sna tshogs pad+ma mdog ser po dang /sna tshogs rdo rje dag gis mdzes par byas shing / de'i phun sum tshogs pa dang ldan pa'o zhes bya ba'i bar du ste/ sna tshogs pad+ma'i steng du bstan pa'i steng na sna tshogs rdo rje gnas pa'o/ /gzhal yas khang yongs su bskyed pa gsungs pa ni/b+h+rUM gyi zhes bya ba la sogs pa yin te/ b+hUM gyi 'khor lo las byung zhes bya ba ni der gzhal yas khang rnam par bsgom par bya'o zhes bya ba'i bar du ste/ der zhes bya ba chos 'byung gi phyag rgya'i dbus na gnas pa'i sna tshogs pad+ma dang / sna tshogs rdo rje'i lte ba la khang pa brtsegs mar bsam pa ste/khang pa yang yin la brtsegs ma yang yin pas khang pa brtsegs ma ste/ don dam par sgyu ma dang / smig rgyu dang / dri za'i grong khyer lta bu'o/ /de yang / zur bzhi pa la sgo bzhi pa/ /rta babs bzhis ni rnam par mdzes/ /dril bu dar dang ba dan sogs//sgo dang sgo khyud mtshams rnams su/ /rdo rje rin chen rnams kyis spras/ /dra ba dra phyed nyi zla dang / /dar dang me tog phreng bas mdzes/ /zhes bya ba'i gzhal yas khang yi ge b+h+rUM gyi 'khor lo las byung ba rnam par bsam par bya ste/ b+h+rUM las 'khor lo rtsibs brgyad pa'am//bcu gnyis pa ser po/ de'i dbus su yi ge oM las byung ba'i rnam par snang mdzad rig pa dang bcas pa rnam par bsams la/ de'i yan lag yongs su gyur pa las khang pa brtsegs mar rnam par bsam par bya'o/ /gzhan yang thub pa'i dbang po rnams kyi 'od kyi dkyil 'khor te/nyi ma dang zla ba gang yin pa de rnams kyi 'od zer te/ 'od zer rnams kyis phyogs kyi tshogs ma lus par kun du khyab pa gang yin pa de la de skad ces bya'o/ /gzhal yas khang yongs su bskyed pa bshad nas/ de'i rang gi ngo bo mdzes par bstan pas/rgyu dang 'bras bu'i ngo bo sngon du 'gro bas rnam par dag pa gsungs pa ni mi mnyam pa dag ces bya ba la sogs pa yin te/ gang gi zur bzhi po ste/ grwa bzhi po de mnyam pa'o/ /ci'i phyir zhe na/ rgyu ni mi mnyam pa dag med pa'i phyir zhes bya ba yin te/ sngon byang chub sems dpa'i gnas skabs su//sems can thams cad la byams pa'i thugs kyis 'gro ba kun la dmigs par mdzad pa de'i rgyu mthun pa'i 'bras bu ni zur bzhi pa nyid do/ /'dir yang mi mnyam pa med pa ni rgyu yin la/ zur bzhi pa nyid ni 'bras bu'o/ /dran dang dbang po mchog bzhi sgo rnams yin//zhes bya ba ni/ /shar dang lho dang nub dang byang gi sgo bzhi po de rnams ni dran pa dang / dbang po mchog rnams kyi phul du byung ba yin no/ /dran pa dang dbang po dang zhes thog ma dang tha ma smos pas/ dran po nye bar gzhag pa bzhi dang / yang dag par spong ba bzhi dang /rdzu 'phrul gyi rkang pa bzhi dang / dbang po lnga rnams la bya ste/ dran pa nye bar gzhag pa la sogs pa'i rgyu yin la/ sgo bzhi ni 'bras bu yin no/ /de la 'di ni lus dran pa nye bar gzhag pa ste/ rigs kyi bu lus la 'di ltar dran pa nye bar 'jog ste/ lus 'di ni bdag po med pa'o//lus zhes bya ba dang / phung po zhes bya ba ni glo bur ba'i tha snyad kyis tha snyad du brjod pa nad brgya stong gi tshang / skra dang / ba spu dang / sen mo dang / so dang / rus pa dang / pags pa dang / tshil dang / rkang dang /bshang ba dang / gci ba la sogs pa mi gtsang ba'i rdzas sna tshogs pa la 'dir lus gang zhig yin/des na lus 'di ni nam mkha' dang mnyam pa'o zhes bya ba 'di ni lus dran pa nye bar gzhag pa zhes bshad do/ /'di ni byang chub sems dpa' rnams 'di ltar tsher ba skyed par byed de/ mi rtag pa la mi rtag pa nyid kyi rang bzhin can dang /sdug bsngal ba la sdug bsngal ba dang / bdag med pa la bdag med pa dang / mi gtsang ba la mi gtsang ba'o zhes tshor ba po nye bar ma mthong la/ de ma mthong bas tshor ba yang nye bar ma mthong ste/ nang na ma yin phyi rol na ma yin/ /gnyi ga'i bar na nye bar mi dmigs pa/'di ni tshor ba dran pa nye bar gzhag pa'o/ /'di ni rigs kyi bu sems la 'di ltar yang dag par rjes su lta ste/ sems zhes bya ba ni ming tsam gzugs med ba ltar med/ rang bzhin gyis 'od gsal ba/ glo bur ba'i dri ma rnams kyis ma rung bar byas pa dri za'i grong khyer dang /sgyu ma dang / smig rgyu dang / chu zla dang / rmi lam lta bu'o zhes sems la dran pa nye bar 'jog go/ /'di ni rigs kyi bu chos thams cad la chos kyi rjes su lta zhing gnas pa ni phra rab tsam gyi chos kyang yang dag par rjes su mi mthong ngo / /de la chos gang zhe na/ bdag med pa'i don dang / 'byung ba med pa'i don dang / sems can med pa'i don dang / srog med pa'i don dang / chad pa med pa'i don dang / rtag pa med pa'i don dang / chos thams cad stong pa'i bar du mthong ba 'di ni chos dran pa nye bar gzhag pa'o/ /yang dag par spong ba rnams gang zhe na/'di lta ste/ sdig pa mi dge ba'i chos ma skyes pa rnams mi bskyed pa'i phyir 'dun pa bskyed cing brtson 'grus rtsom la/ sems rab tu 'dzin par byed pa dang / sdig pa skyes pa rnams 'jig pa'i phyir dang / dge ba'i chos skyes pa rnams gnas par bya ba'i phyir dang /dge ba'i chos ma skyes pa rnams bskyed par bya ba'i phyir dang / 'dun pa skyed cing brtson 'grus rtsom la sems rab tu 'dzin par byed pa'o/ /de la rdzu 'phrul gyi rkang pa bzhi gang zhe na/ 'dun pa dang / brtson 'grus dang / sems dang / dpyod pa'i ting nge 'dzin zhes bya'o//de la 'dun pa ni gang chos 'di rnams mngon du byed pa'o/ /brtson 'grus ni gang chos 'di rnams rdzogs par byed pa'o/ /sems ni gang chos 'di rnams la so sor rtog pa'o/ /dpyod pa ni gang chos 'di rnams la mkhas pa ste/ de rdzu 'phrul gyi rkang pa la sogs pa la gnas pas rdzogs par byed pas/des na rdzu 'phrul gyi rkang pa zhes bya'o/ /de la dbang po lnga gang zhe na/ lha'i bu gang chos thams cad ma skyes par dad par byed pa dang / ma skyes pa'i phyir rang bzhin gyis don 'pho ba med par shes pa 'di ni dad pa'i dbang po'o/ /gang thag ring ba dang nye ba'i 'du shes dang bral bas chos thams cad la sems gtong bar mi byed pa 'di ni brtson 'grus kyi dbang po'o//gang chos thams cad yid la mi byed cing dmigs pa'i dbang du byas nas dran pa nye bar mi 'jog pa 'di ni dran pa'i dbang po'o/ /gang chos thams cad nye bar mi sogs shing / chos thams cad nye bar mi dmigs pa 'di ni ting nge 'dzin gyi dbang po'o/ /gang chos thams cad bskyed pa dang bral ba dang / chos thams cad skye ba dang bral ba dang / chos thams cad rang bzhin gyis stong par mthong ba 'di ni shes rab kyi dbang po'o/ /bsam gtan bzhi po dag gi rta babs dang /zhes bya ba ni gang du bsam gtan bzhi po nyid rta babs bzhi ru gyur pa ste/ rta babs ni gzhal yas khang gi phyi rol na ka ba'i sko yod pa'o/ /de la bsam gtan bzhi'i 'bras bu ni rta babs bzhi yin te/ 'dod pa'i nyes dmigs mthong ste/ skye bas 'dod pa'i bde ba'i 'dod chags dang bral ba la rtse gcig pa'i rang bzhin can ni dang po'o/ /ma brtags pa nyid 'dod pa'i 'dod chags dang bral ba'i yon tan la dmigs pa'i sems rtse gcig pa nyid la dmigs pa ni gnyis pa'o/ /sems dag pa'i 'dod chags dang bral ba ni gsum pa'o//dbugs rngub pa dang / dbugs 'byung ba dang / lus kyi bde ba'i 'dod chags dang bral ba ni bsam gtan bzhi pa'o/ /de yang rtog pa dang dpyod pa dang bcas pa'i g.yo ba'i rlabs dang ldan pa ni dang po'o/ /dga' ba dang bde ba ni gnyis pa'o/ / bde ba las nyams pa'i 'jigs pas nyam thag pa ni gsum pa'o/ /ro gcig pa nyid du gyur pa 'di ni bzhi pa'o zhes ji skad bshad pa lta bu'o/ /ting nge 'dzin gyi kha khyer gyis ni kun nas bskor/ /zhes bya ba ni ting nge 'dzin rnams nyid ni kha khyer yin te/ de rnams kun nas bskor cing yongs su chod pa ste/phyogs bzhi kun nas bskor ba'o/ /de la sems dang sems las byung ba 'di la mnyam par byas nas ting nge 'dzin te/ sems kyi rtse gcig pa'o/ /kha khyer ni rtsig pa'i phyi rol du ngos kyi stegs bu'i tshul lo/ /ting nge 'dzin de dpa' bar 'gro ba dang /nam mkha' mdzod dang / dri ma med pa dang / seng ge rnam par rol pa la sogs pa sngar byang chub sems dpa'i gnas skabs su bsgoms par gyur pa de'i 'bras bu ni kha khyer rnams yin no zhes bya ba'i don to/ /kha khyer der legs brten pa zhes bya ba la sogs pa la/kha khyer der zhes bya ba ni kha khyer bzhi po de rnams su legs par brten zhing gnas pa'i mchod pa dam pa 'dzin pa'i gzungs kyi tshogs gang yin pa'i gzungs ni don dang / gzhung dang / nges pa'i tshig dang / thams cad de kun nas nyon mongs pa dang / rnam par byang ba la sogs pa'i rang gi ngo bo nyid 'dzin cing mi brjed pa'i las can gyi sems la bzlas pa'i khyad par ro//de dag nyid ni mchod pa 'dzin par dkyil 'khor du bsam par bya ste/ glu dang / rol mo dang / gar dang / bstod pa smra ba la sogs pa dang / me tog dang / bdug spos dang /dri dang / mar me dang / lha bshos la sogs pa la longs spyod pa'i khyad par thams cad 'dzin cing / sgeg pa sna tshogs dang ldan pa'i rnam pa dang bcas shing / zhal dang / phyag dang / phyag mtshan dang ldan par bsam par bya'o/ /gzungs kyi sgra smos pas/pha rol tu phyin pa bcu dang / sa bcu dang / dbang bcu rnams kyang shugs kyis sbyar bar bya ste/ dkyil 'khor gyi mchod pa'i cho ga las/ shar phyogs su ni sa rnams bri/ /de bzhin ltor ni rab 'bar ba'i/ /pha rol phyin pa thams cad bri/ /nub tu dbang rnams bcu po ste//byang du gzungs ni thams cad bri/ /zhes bshad pa yin no/ /sna tshogs rgyan rnams zhes bya ba la sogs pa la/ sna tshogs rgyan rnams kun ni mu tig gi chun 'phyang dang / nor bus spras pa'i gdu bu dang / dpung rgyan rnams kyis sna tshogs shing ngo mtshar skyed par byed pa'o//de ci'i phyir zhe na/ gang phyir 'gro ba'i bsam kun rdzogs mdzad pa/ /zhes bya ba smos te/ gang gi phyir sbyin pa dang / snyan par smra ba dang / don mthun pa dang / don spyod pa ste bsdu ba'i dngos po bzhi po sngon chad mdzad par gyur pa de'i 'bras bu ni gzhal yas khang rgyan rnam pa sna tshogs pa thams cad kyis brgyan pa yin no//de la sbyin pa ni rnam pa gsum ste/ sbyin pa dang / sbyin pa chen po dang / shin tu sbyin pa'o/ /de la zas dang / skom dang bzhon pa dang gos la sogs pa gtong ba ni sbyin pa'o/ /chung ma dang / bu dang / bu mo dang / bran pho dang / bran mo dang / khang khyim dang / rgyal srid yongs su gtong ba ni shin tu sbyin pa'o/ /sha dang / khrag dang / mgo dang / mig dang / lus dang / lus kyi phyed dang / spyi gtsug la sogs pa gtong ba ni sbyin pa chen po'o/ /slong ba rnams dang chos nyan pa rnams la rnar snyan pa'i tshig smra ba ni tshig snyan par smra ba'o//bdag la ji lta ba bzhin du gzhan rnams kyi mngon par rdzogs par byed pa ni don mthun pa'o/ /theg pa gang la bdag yon tan gyi 'du shes su gyur pa de nyid la gzhan dag rab tu 'jog par byed pa 'di ni don spyod pa'o//rlung gis bskyod pa zhes bya ba la sogs pa la 'dul ba zhes bya ba'i bstan bcos kyis gang bskyod cing khyab par gyur pa'i bcom ldan 'das kyi gsung rab yan lag dgu dang ldan pas dam pa'i chos kyi bstan bcos thams cad la khyab par byed pa gang yin pa de/'dul ba smos pas chos mngon pa yang bsdu ste/ mdo dang / dbyangs kyis bsnyad pa dang / lung bstan pa dang / tshigs su bcad pa dang / ched du brjod pa dang / de lta bu byung ba dang / skyes pa'i rabs dang / shin tu rgyas pa dang / rmad du byung ba zhes bya ba'i bcom ldan 'das kyi gsung rab yin la/ de las mdo tsam du ston pas mdo'i sde ste/ gsung rab ma lus par mdor ston pa'o/ /yang na skal ba ji lta bar skyes bu'i don ston pas na mdo'i sde'o/ /dbyangs kyis bsnyad pa ni gsung dbyangs yan lag drug cu dang yang dag par ldan pa'o//bstod pa smra ba dang / chos ston pa la sogs par 'dis lung ston pas na/ lung ston pa ste/ las kyi khyad par gzigs pas ma 'ongs pa'i cha nye bar ston par mdzad pas so/ /tshigs su bcad pa ni tshigs su bcad par sbyar ro/ / ched du brjod pa ni sngon ma byung ba'i yang dag pa'i don bzang po thob pas yongs su mgu ste/ e ma ho sangs rgyas zhes bya ba la sogs pa nye bar smra zhing legs so zhes bya ba ston to/ /de lta bu byung ba ni sangs rgyas nas 'das pa'i skye ba gzhan dag ston par mdzad pa'o/ /skyes pa'i rabs ni sangs rgyas kyi 'das pa la sogs pa'i sku tshe blangs pa ston par mdzad pa'o//shin tu rgyas pa ni dngos po gcig dbye ba tshad med pas nye bar ston par mdzad pa'o/ /rmad du byung ba ni las chung ngu la yang las kyi rnam par smin pa tshad med pa nye bar ston par mdzad pa'o/ /de lta bu ni dam pa rnams kyi chos yin pas na dam pa'i chos te/mkhas pas shes par bya ba yin pa'i phyir ro/ /dam pa'i chos de ni kun du 'gro ba zhes bya ste/ tshul gsum la khyab pa'o/ /de yang gang gi phyir sems can thams cad la yan lag dgu dang 'dres pa'i dam pa'i chos kyi gsung rab ston par mdzad pa yin la/rgyu des na rlung gis bskyod pa zhes bya ba rlung gis bskyod cing g.yo bar byas pa'i ba dan gyi mtshan ma'i phreng ba dang / de'i dril bu ste g.yer kha de las byung ba'i sgra sgrogs shing / sgra grag pa dang ldan pa'i gzhal yas khang zhes bya ba'i bar du'o/ / me long zhes bya ba la sogs pa la me long nyid ni me long yin te/ ma rig pa kun du sbyong bar byed cing chos thams cad mngon par rtogs pa ni ye shes so/ /rang bzhin gyis 'od gsal bar gyur pas dri mas gos pa med pa'i phyir/ rtag tu dri ma med pa'o/ /byang chub kyi yan lag nyid me tog yin te/byang chub sems dpa'i gnas skabs su byang chub kyi yan lag bdun bsgom pa gang yin pa de nyid shin tu phul du byung ba'i dri dang ldan pa'i me tog rnams yin no zhes bya ba'i don to/ /de la byang chub kyi yan lag bdun ni/ dran pa gang gis chos thams cad rnam par dpyad nas chos thams cad ni rang gi mtshan nyid kyis stong pa'o zhes bya ba 'di ni dran pa yang dag byang chub kyi yan lag go//chos kyi phung po brgyad khri bzhi stong rab tu rnam par 'byed pa'i ye shes kyis de ji lta ba bzhin du rnam par spyod cing bkri ba'i don dang / nges pa'i don dang /kun rdzob dang / don dam pa dang / brda dang / rnam par nges pa'i don 'di ni chos rab tu rnam par 'byed pa byang chub kyi yan lag ces bya'o/ /dran pa gang la chos rab tu rnam par 'byed pa 'di'i dga' ba dang / shin tu sbyangs pa'i ting nge 'dzin dang / btang snyoms kyi shes pas mngon par zhen pa 'di ni brtson 'grus yang dag byang chub kyi yan lag ces bya'o//chos kyi dga' ba'i sems ma zhum zhing rab tu dang ba dang / mngon par 'dod pa dang / gang gis nyon mongs pa nye bar zhi bar byed pa 'di ni dga' ba yang dag byang chub kyi yan lag ces bya'o//rab tu sbyangs pa'i sems gang gis nyon mongs pa 'jig cing sgrib pa dang bral la/ zhi gnas la 'jug pa la dmigs pa'i sems su nye bar 'jog pa 'di ni shin tu sbyangs pa yang dag byang chub kyi yan lag ces bya'o/ /gang mnyam par gzhag pa'i sems kyis chos kyi ye shes mngon par sangs rgyas shing chos thams cad mnyam pa nyid kyis ji lta ba bzhin du lhag par mos pa 'di ni ting nge 'dzin yang dag byang chub kyi yan lag ces bya'o//gang 'di yid bde bas chos gang la sems mngon par ma zhen cing 'jig rten gyi chos kyis mi 'phrogs pa dang mi gnod pa 'di ni btang snyoms yang dag byang chub kyi yan lag ces bya'o//byang chub kyi yan lag 'di rnams rgyur gyur ba'i yon tan gang yin pa de'i 'bras bu ni me tog phun sum tshogs pa yin la/ des dra ba dang dra ba phyed pa zhes bya ba mu tig gi chun 'phyang dbus na nor bus mdzes pa la ni dra ba zhes bya la/dbus na brgyan pa med pa la ni dra ba phyed pa zhes bya'o/ /me long ni me long nyid do/ /me tog gi phreng ba ni man+dA ra ba dang / ut+pal dang / ma li ka dang / dzA ti dang / ba ku la la sogs pa las rgyan du byas pa ste/ de sgo khyud dang / sgo 'gram gyi ngos dang 'brel par gnas pa'o/ /des sna tshogs pa'i ngo mtshar bskyed pa'o/ /de nyid kyis na mnyam pa med pa ste/ gzhan dang thun mong ma yin pa'o/ /rnam par thar pa brgyad po zhes bya ba ni gzugs can gzugs rnams la lta ba 'di ni rnam par thar pa dang po'o//nang gzugs med par 'du shes pas phyi rol gyi gzugs rnams la lta ba 'di ni rnam par thar pa gnyis pa'o/ /sdug pa nyid du mos pa 'di ni rnam par thar pa gsum pa'o/ /de gzugs ni thogs pa dang bcas pa'o snyam nas gzugs kyi 'du shes las yang dag par 'das te nam mkha' mtha' yas so snyam pa 'di ni rnam par thar pa bzhi pa'o//nam mkha' mtha' yas so snyam pa zhes bya ba'i nam mkha'i 'du shes las yang dag par 'das te rnam par shes pa mtha' yas so snyam pa 'di ni rnam par thar pa lnga pa'o/ /rnam shes mtha' yas skye mched las yang dag par 'das te ci yang med pa'i skye mched bsgrubs te gnas pa 'di ni rnam par thar pa drug pa'o//ci yang med pa'i skye mched las yang dag par 'das te/ 'du shes med 'du shes med min ba sgrubs te gnas pa 'di ni rnam par thar pa bdun pa'o/ /'du shes med 'du shes med min gyi skye mched las yang dag par 'das te 'du shes dang tshor ba 'gog pa bsgrubs te gnas pa 'di ni rnam par thar pa brgyad pa'o//'di rnams ni rnam par dag pa ste/ don dam pa'i ngo bo nyid ni de'i 'bras bu gzhal yas khang gi dbus na rnam par snang mdzad la logs pa'i gnas su/ka ba bzang po brgyad kyis nye bar mdzes par byas pa yin no/ /rdo rje'i tshul zhes bya ba la sogs pa la mi mthun pa'i phyogs ma lus pa rtsa ba nas 'byin pas/ rdo rje'i tshul te/ theg pa chen po'o/ /chos kyi 'khor lo ni sems can gyi bsam pa'i dbang gis pha rol tu phyin pa dang /sngags kyi tshul gyi dbye bas rnam pa gnyis su chos ston par mdzad pa'o/ /de rab tu bskor ba mdzad cing yang dag par ston par mdzad pas rdo rje thig gis kun nas yongs su bskor ba yin te/ rdo rje'i phreng bas kun nas yongs su bcad cing / rdo rje ra ba'i rongs kyis yongs su bskor ba zhes bya ba'i don to//gzugs sogs zhes bya ba la sogs pa la/ gzugs la sogs pa ste/ gzugs dang / sgra dang / dri dang / ro dang / reg bya'i rnam par dag pa gang yin pa chos thams cad sgyu ma dang 'dra zhing gnyis su med par bsgom pa de rgyur gyur pas bla na med pa ste/ 'jig rten thams cad las yang dag par 'das pa'i 'dod pa'i yon tan lnga po gang du 'og nas lha rnams kyi nye bar longs spyod pa'i ngo bo nyid du gyur pa yin no/ /mchod pa lnga yis zhes bya ba la mchod pa lnga ni me tog dang / bdug spos dang / dri dang / mar me dang / lha bshos te/des rnam par brgyan pa ni spud pa'o/ /de ci'i phyir zhe na/ gang gi phyir chos kyi dbyings rnam par dag pa'i rgyu mthun yin zhes bya ba ste/ rgyu mthun pa ni rgyu dang 'dra'o zhes bya ba'i gtan tshigs kyis ni chos kyi dbyings kyi sgras ston pas bdud rtsi lnga yin no zhes la la zer ro//sna tshogs zhes bya ba la sogs pa la sna tshogs pad+ma ni nag po dang / dkar po dang / ser po dang / dmar po dang / ljang gu'i mdog can no/ /de'i 'dab ma ni pad+ma'i 'dab ma ste/ de rnams la legs par gnas pa'i nyi ma dang zla ba des mgon dang bcas shing byin gyis brlabs la/mnan pa'i 'og nas bshad pa'i lha'i gnas rnams gang yin pa der rin po che ni ma lus pa ste/ ma rgad dang / in+d+ra nI la dang / pad+ma rA ga dang / bai DUr+ya dang / mu sa la gal ba zhes bya ba de rnams kyis rnam par spras pa ni de'i rang bzhin can du byas pa zhes bya ba'i bar du'o//'di ni 'du byed rnam par dag pa'o/ /chos 'byung ba'i phyag rgya bsgom pa la sogs pa'i 'brel pas ni/ nam mkha'i rnam par dag pa dang / gzhal yas khang bsgom pas ni bya ba dang / spyod pa dang / /yongs su longs spyod pas/thams cad rnam par dag pa yin par blta bar bya'o/ /da ni mngon par byang chub pa lnga'i rim gyis bcom ldan 'das rdo rje sems dpa' bskyed pa gsungs pa ni/ bcu drug cha zhes bya ba la sogs pa yin te/ bcu drug cha ni a la sogs pa ste/ cha bcu drug po ni stong pa nyid ston par byed pa yin no//de'i tshogs ni phung po ste/ de las byung ba'i zla ba'i dkyil 'khor yongs su rdzogs pa dbus nyid ces pa dbus ma'i gdan du'o/ /de yang 'od zer dpag tu med pa'i tshogs kyis nye bar brgyan pa dbus ma'i gdan la bzhengs pa dbus kyi zla bar bsam par bya'o//cho ga bzhin du zhes pa ni slob dpon gcig nas gcig tu brgyud pa'i man ngag las bshad par bya ste/ bcu drug cha dang tshogs las byung ba ni dbyangs kyi yi ge bcu drug ste/ de nyis 'gyur du byas pa skyes bu chen po'i mtshan sum cu rtsa gnyis yin par bstan to//yi ge ka nas yi ge ha'i bar du sum cu rtsa gsum dang yi ge yaM baM laM zhes bya ba sna med kyi yi ge gsum dang bcas pa dang / gcod kyi thig le gnyis po can a zhes bya ba dang / rjes su yi ge aM dang /[ u0f88u0f90u0f7e] zhes bya ba lce rtsa can dang wa zhes bya ba u pad+ma ste/ de ltar bzh i bcu po nyis 'gyur du byas pa ni dpe byad bzang po brgyad cur yongs su brtag par bya'o//'di dag thams cad ni mar me mdzad bzang po'i zhal snga nas kyis/ dbyangs yig mtshan dang yang dag ldan/ /ka sogs gsal byed 'od zer can/ /dbus ma'i zla ba'i gdan la thugs//ye shes zla ba rnam par bsgom/ /zhes bshad pa yin no/ /dbyangs kyi yi ge bcu drug ni mdog dkar po/ /oM tsit+ta pra ti be d+haM ka ro mi/ zhes bya ba'i sngags las byung ba/ nang nas kun nas zlum por a la sogs pa'i dbyangs kyi yi ge phreng bar bsgom par bya ba ni shes rab kyi ngo bo nyid yin la/phyi rol du de rnams las byung ba'i ka la sogs pa'i yi ge'i phreng ba nyi ma'i mdog can thabs kyi ngo bo nyid bsam par bya zhing / ka la sogs pa'i gsal byed kyi yi ge re re la rang nyid bsams la/ oM b+ho d+hi tsit+ta ut+pA da yA mi/ zhes bya ba dang /dbyangs kyi yi ge dang gsal byed yongs su gyur pa las/ shes rab thabs kyi bdag nyid can gyi zla ba'i dkyil 'khor de rnam par bsgom par bya'o/ /cho ga bzhin du zhes bya ba'i sgra smos pa las/ 'di dag rnyed par ga la 'gyur/ /zhes 'dir dogs pa'i gnas su mi bya ste/ci'i phyir zhe na/ der rgya cher bshad pa byed pa dag gis 'di ltar bris pa dang / de bzhin du dpal sangs rgyas thams cad dang mnyam par sbyor ba las/ A li kA li mnyam byas nas/ /kha yi thad kar mdud par bya/ /de yi 'og dang ri mo rnams/ /yi ge thams cad dgod par bya//zhes gsungs pa dang / de bzhin du dpal de kho na nyid bsdus pa la sogs pa las kyang 'di kho na ltar rnam par bzhag la/ 'dir yang bla ma rnams tshad ma nyid yin no/ /dpal mchog dang po'i zhes bya ba la sogs pa la/ dpal mchog dang po ni byang chub rdo rje'o/ /de'i snying po ni hUM ngo //sngags de las byung ba ni 'dir byang chub kyi sems kyi zla ba'i dbus na/ rdo rje bzang po rtse lnga pa rnam par bsgom par bya'o/ /nor bu dmar 'dra ba zhes bya ba ni steng na pad+ma rA ga'i mdog can/ ye shes rnam pa lnga'i ngo bo nyid de/ 'og tu nag po nyid do/ /oM tiSh+Tha badzra zhes bya ba'i sngags las byung ba'o//dpag med ces bya ba la sogs pa la 'od zer kun nas 'phro ba'i 'od kyi rtse mo las byung ba'i sangs rgyas kyi tshogs kyis phyogs kyi tshogs ma lus par khyab par bsam pa'o/ /dang po'i snying po yi ge hUM gi dbus su mtshan ma'i mgon dang bcas par bsam par byas la/oM badzra At+ma kou0f85haM/ zhes bya ba'i sngags 'dis nga rgyal dang ldan zhes bya ba dang / mtha' yas pa'i sprul pa rnams kyis 'gro ba'i mchog rnams kyi don byas par gyur pa ste/ yi ge hUM gi rdo rje'i 'od zer gyis bskor ba'i 'od kyi r tse mo las byung ba'i sangs rgyas kyi tshogs kyi 'od zer rnams kyis 'gro ba rnams sangs rgyas kyi gzugs su bskyed par bya'o//thub mchog ces bya ba la sogs pa nas/ rgyal ba skyed byed nyid kyi sku ru bsam/ /zhes bya bar sbyar te/ thub pa'i mchog nyid phra rab ni rdo rje las byung ba'i don 'od zer gyi dra ba mtha' ma las nges par byung ba'i sangs rgyas rnams las bsgrubs shing /bskyed pa'i byang chub kyi sems zla ba rdo rje yongs su gyur pa'o/ /de nyid kyis na mtshungs pa med pa ste/ rang bzhin gyis yongs su dag pa'o/ /zla ba rgyas 'dra zhes bya ba la sogs pa la/bcom ldan 'das kyi sku dang zhal dbus ma ni/ zla ba rgyas pa dang 'dra bar dkar ba yin la/ zhal g.yas pa ni sngon po'o/ /zhal g.yon pa ni dmar po'o/ /de bzhin du sna tshogs pa'i rin po che'i 'od 'bar ba'i rgyan gdu bu dang / dbu rgyan dang ldan pa'i phyag gnyis kyis snyoms par 'jug pa'i phyag rgya rig ma dam pa ste/mA ma kI la 'khyud par mdzad pa dang / de bzhin du phyag lhag ma bzhis rdo rje dang ral gri dang / pad+ma dang / rin po che bsnams pas mdzes shing sbyor bar gyur pa ste/ rang bzhin gyis ye shes lnga'i ngo bo nyid du gyur pas rdo rje ni ye shes lnga'i rang bzhin no//ral gri ni nyon mongs pa'i nyes pa thams cad gcod pa'o/ /pad+ma ni rang bzhin gyis 'dod chags la sogs pa'i nyes pa'i 'dam gyis ma gos pa'i phyir ro/ /yid bzhin gyi nor bu rin po che ni bsam pa thams cad rdzogs pa ste/ 'di ni 'di dag gi rnam par dag pa'o//pha rol tu phyin pa drug rnam par dag pa ni phyag drug go/ /khams gsum zhes bya ba ba spu'i bu ga ma lus pa'i rtse las byung ba'i 'od zer gyi tshogs las skyes pa'i sangs rgyas kyi tshogs rnams kyis khams gsum ma lus pa khyab par mdzad pa'o/ /rnam par thar pa'i sgo gsum zhes bya ba ni stong pa nyid dang mtshan ma med pa dang smon pa med pa'i rnam par thar pa'i sgo gsum po'i rnam par dag pa gang yin pa ni don dam pa'i rang bzhin te/des kha dog gsum gyi rang bzhin can gyi zhal gsum mnga' ba yin la/ shes rab dang thabs gnyis su med pa'i ye shes kyi phyag rgya chen po dang ldan pas bud med dang skyes pa lta bu'i bdag nyid can no//snying rje'i mchog ces bya ba thugs rje chen pos sprul pa kun rdzob kyi ngo bo nyid do/ /rgyal ba ni de bzhin gshegs pa rnams te/ de rnams kyi bskyed pa ni yab tu gyur cing / dkyil 'khor gyi lha ma lus pa sprul par byed par bdag nyid bsam zhing 'di ltar nga rgyal bskyed par bya ste/oM ya thA sarba ta thA ga tasta thou0f85haM/ zhes srid pa bar ma la gnas pa'i rnal 'byor pas rang gi sems nyid de ltar bsam pa yin gyi/ mngon sum du byed pa ni ma yin la/ dpal r do rje sems dpa'i rnal 'byor pas ni sbyor ba 'di mngon sum du bya'o//bsgom pa 'dis yab dang yum rnam par dag pa bstan to/ /da ni rab tu dga' ba'i bde ba chen po nyams su myong ba'i spyod pas sems can thams cad gdon par bya ba'i phyir/ bcom ldan 'das dkyil 'khor gyi 'khor lo sprul par mdzad pa yin te/mchog tu rjes chags zhes bya ba la sogs pa la/ mchog kyang yin la rjes su chags pa yang yin pas na/mchog tu rjes chags te/ sems can rnams yongs su smin pa dang / grol bar byed pa'i mtshan nyid can gyi 'dod chags chen po de nyid ni phun sum tshogs pa ste/bla na med pa'i sbyor ba'o/ /des 'dul ba'i sems can gyi tshogs ma lus pa la bltas nas rjes su chags shing dbang du 'gyur gyi/ chags pa dang bral ba ni ma yin no/ /de yang / sangs rgyas kun gyi chags pa yi/ /'dod chags ye shes rnyog pa med//chags pas chags bral bcom na ni/ /des ni bde ba thams cad stsol/ /zhes gsungs pa dang / rnal 'byor thams cad bcom ldan 'das/ /rdo rje sems dpa' de bzhin gshegs/ /de yi longs spyod khams gsum pa//ma lus pa ni thams cad do/ /zhes gsungs pas 'dod chags chen pos 'dul ba'i 'jig rten pa rnams gdul bar bya ba'i phyir/ /dga' ba'i sgyu ma'i sgra yis zhes bya ba la rol pas na dga' ba ste/ rab tu dga' ba'i rol pa'o/ /de las byung ba'i rdo rje dang pad+ma sgyu ma lta bu'i yang dag par sbyor ba'i shugs las byung ba'i sgra ni brag ca dang 'dra ba ste/des phyogs bcu na dpal rdo rje sems dpa'i sku ru bzhugs pa'i sangs rgyas kyi tshogs rnams bzhugs par bya'o/ /de ni spyan la sogs pa'i zhes bya ba la sogs pa la/ de ni zhes bya ba ni dga' ba'i sgras zhugs pa'i rgyal ba'i tshogs de rnams spyan la sogs pa'i rigs gsum gyi gzugs dang gzugs rdo rje la sogs pa lha mo drug tu sprul pas phyung nas/rang gi rig ma ni mA ma kI ste/ de'i nang du chud par bya'o/ /de nas bcom ldan 'das kyi sku la zhugs pa'i sangs rgyas kyi tshogs spyan la sogs pa lha mo dgu'i gzugs su phyung nas mA ma kI lus la zhugs par bya'o zhes bya ba'i don to//de'i pad+ma'i zhes bya ba ni gsang ba'i pad+ma'o/ /lte ba ni gsang ba'i sna'o/ /nang du dkyil 'khor zhes bya ba ni rig pa'i gsang ba'i pad+ma'i lte ba'i dbus na gnas pa'i dkyil 'khor te/de bzhin gshegs pa dang / lha mo dang / byang chub sems dpa' thams cad kyis yongs su gang ba gtso bor 'jam pa'i rdo rje bzhugs pa'o/ /zla zer las byung bar zhes bya ba ni 'od gsal ba'i zla ba'i dkyil 'khor la bzhugs pa'o/ / bsams nas blo yis zhes bya ba ni rang gi sems kyis yongs su gang bar bsgoms te/ mchod pa dang bdud rtsi myang ba bsgom par blta bar bya'o/ /yang dkyil 'khor der rang gi blos 'gro ba'i tshogs ma lus pa/ nyon mongs dang / shes bya'i sgrib pa spang bar bya ba'i phyir/ slob ma gzhug pa'i rim pas der rab tu gzhug par bya'o/ /gang du gzhug par bya zhe na/ gsang ba'i rdo rje dam pa'i dbus su ni/ /zhes bya ba smos te/ dam pa zhes bya ba ni don dam par 'gyur ba med pa'i ngo bo nyid sangs rgyas thams cad kyi bzhugs gnas chos 'byung ba zhes bya ba'i dbus su chud pa tsam gyis 'gro ba'i tshogs de rnams chos 'byung ba'i phyag rgya'i 'od kyis reg cing /skyed pa po'i 'od zer gyis rnam par snang mdzad la sogs pa/ de bzhin gshegs pa lnga'i rnam par yang dag pa'i snang bar gyur pa dang / dpal rdo rje sems dpa'i gsang ba'i rdo rje mtha' las byung ba/zla ba zhu ba'i gzugs su gyur pa'i bdud rtsi lnga'i rdo rjes dbang bskur bas/ sems kyi tshogs de rnams dbang bskur bar bya ste/ kun nas dbang bskur bar bya'o zhes bya ba'i don to/ /de ltar dbang bskur nas rnam pa thams cad mkhyen pa nyid thob par bya ba'i phyir/sa'i snying po la sogs pas mig la sogs pa byin gyis brlab par bya'o/ /de ni don dam par de'i rnam par dag pa'i ngo bo nyid yin par shes par bya ste/ de nas sa'i snying po zhes bya ba la sogs pa smos te/ sa'i snying po la sogs pa drug gis mig la sogs pa byin gyis brlab cing de'i ngo bo nyid de'i rang bzhin du bya'o//gzugs rdo rje la sogs pa drug gis ni gzugs dang / sgra dang / dri dang / ro dang / reg bya dang / chos kyi dbyings byin gyis brlab par bya'o/ /spyan la sogs pa bzhis ni sa la sogs pa 'byung ba chen po rnams byin gyis brlab pa rdzogs par bya'o//gzugs dang zhes bya ba la sogs pa la gzugs ni gzugs kyi phung po ste/ dbang po lnga dang yul lnga'o/ /tshor ba ni nyams su myong ba ste bde ba dang sdug bsngal ba'o/ /bde ba yang ma yin sdug bsngal ba yang ma yin pa'o/ /'du shes ni nye bar 'dzin pa ste/bum pa la 'di ni bum pa'o snyam pa'o/ /'du byed ni sems dang yang dag par ldan pa dang / sems dang mi ldan pa'o/ /de la sems dang ldan pa ni sems pa dang / 'dun pa dang / blo dang / dran pa dang / yid la byed pa dang / khro ba dang / 'khon du 'dzin pa dang /g.yo dang / sgyu dang / phrag dog la sogs pa'o/ /mi ldan pa ni thob pa dang / rnyed pa dang / 'du shes med pa'i snyoms par 'jug pa la sogs pa'o/ /rnam par shes pa ni yid de/ /drug po 'gags ma thag pa yi/ /rnam shes gang yin de yid do//zhes bshad pas so/ /de ltar phung po rnam pa lnga rnam par dag pa'i ngo bo nyid ni de bzhin gshegs pa lnga po yin no/ /de ltar phung po dang / skye mched dang / khams rnams rnam par snang mdzad la sogs pa de bzhin gshegs pas byin gyis brlabs nas spyan la sogs pa'i lha mo bzhis byin gyis brlabs shing /sa'i snying po la sogs pa dang / gzugs rdo rje la sogs pas/ mig la sogs pa dang / gzugs la sogs pa rnam par sbyangs nas rnam pa thams cad mkhyen pa nyid thob pa dang / sems can thams cad kyang rjes su gzung ba'i phyir 'og nas bshad pa'i sa bon 'di rnams kyis rab tu dbyung bar bya'o//k+ShiM dzrIM khaM gaM Sh+kaM saM zhes bya ba drug gis sa'i snying po la sogs pa drug dbyung bar bya'o/ /dzaHhUM baM hoHkhaM raM zhes bya bas ni gzugs rdo rje la sogs pa'o/ /laM mAM paM tAM zhes bya bas ni spyan la sogs pa bzhi'o//b+h+rUM AM dzra'iM khaM hUM zhes bya bas ni rnam par snang mdzad la sogs pa dbyung bar bya'o/ /'di dag ni nye bar mtshon pa tsam ste/ tshul 'di dag gis nye bar mtshon pa stong phrag snyed gdon par bya'o/ /da ni srid pa bar ma'i gnas skabs las byang chub sems dpa' mngal du 'jug pa ston par gsungs pa ni/oM zhes bya ba la sogs pa yin te/ sems zhes bya ba ni sngar bsgoms pa 'od dang ldan pa'i yi ge hoHgnyis kyi nang du chud par sems pa'o/ /cho ga bzhin zhes bya ba ni 'gro ba dang yul yang dag par thob pa'i tshul gyis te/chos mngon pa las/ srid pa bar ma spangs nas ni/ /mar me bzhin du mngal du 'jug /ces bshad pa yin no/ /de yang dpal rdo rje sems dpa'i bde ba chen po nyams su bstar ba la zhugs shing / sems can ma lus pa gdon pa la rab tu zhugs par mthong nas 'gro ba dang yul bzang po yang dag par thob pa'i phyir 'dod pa skyes shing /'di lta bu'i nges pa skye ste/ chos 'byung ba'i phyag rgya bsgom pa 'dir sems can gang nyon mongs pa dang / shes bya'i sgrib pa dang ldan pa de yang zhugs pa tsam gyis 'tshang rgya ba nyid thob pa yin la/de bas na ngas kun du bzang po nyid thob par bya ba'i phyir gnas 'di nyid du zhugs par bya'o zhes de lta bu'i sems brtan por byas nas/ srid pa bar ma pa yi ge lnga'i gzugs shes rab kyi gsang ba'i pad+ma'i nang du mar me ltar zhugs par gyur pa'o/ /mnyam med pa zhes bya ba ni mtshungs pa med pa'o//shes rab kyis yang dag par bskyed pa'i 'dod chags ni shes rab chags pa ste/ shes rab kyi gsang ba'i chu skyes kyi nang du zhugs pa tsam gyis srid pa bar ma pa zla ba zhu ba'i gzugs can rnam par shes pa tsam gyi yang dag pa'i rig pa'i ngo bor gyur la/nur nur po la sogs par bsgom pa 'di ni spyir na rnam par shes pa'i rnam par dag pa yin te/ ma'i mngal du nying mtshams sbyor ba'i skad cig ma'i phung po lnga ni rnam par shes pa yin no/ /de'i zhes bya ba ni byang chub kyi sems zhu ba'i chu shel gyi gzugs can du gyur pa'i 'od zer gyi gzi byin gyi mthus yab dang yum gnyis ka'ang zla bar zhu bar byas shing byang chub kyi sems thig le'i gzugs su byung la/de dag de lta bur gyur pa mthong ba dang / sangs rgyas bcom ldan 'das kyis sems can gyi don gyi phyir thugs rje chen po skyes la/ bcom ldan 'das longs spyod rdzogs pa'i sku la brten nas sems can thams cad 'khor ba'i sdug bsngal las grol bar mdzad pa yin la/de ltar don dam pa'i bdag nyid can chos kyi skur yongs su thim la/ de ltar ni bdag cag kyang snying brtse ba dang bral bas sems can thams cad gdon pa la rgyus ji ltar gnas par bya ste/de ltar na don dam pa'i bdag cag gis rang gi don tsam du zad do zhes de ltar yongs su brtags nas bcom ldan 'das kyis spyan la sogs pa lha mo bzhi'i gzugs su mdzad nas/ gzhan gyi don gyi phongs pas gdungs pa 'dod pas nyam thag pa lta bur snyan cing yid du 'ong ba'i glu'i tshig bzhis/bcom ldan 'das la bskul bar gyur to/ /de ltar 'og nas bshad pa'i rnam pas lha mo spyan dang por glu len te sems nyid 'gro ba'i rtsa ba yin pas thugs kyi ngo bor gyur pa nyid kyis thugs la dang por gsol ba 'debs pa yin no//de yang sems can zhes bya ba la sogs pa la/ gzhan ma yin pa'i rang bzhin can nyid dang / thams cad kyi gzhir gyur pa nyid kyis na sems can khams te/ 'gro ba'i don dang sangs rgyas kyi phun sum tshogs pa ni khyed kyis bsgrub par bya ba'i 'khor ba dang mya ngan las 'das pa dag gi rgyur gyur pas na gnas kyi dbang phyug go//khyod ces bya ba ni bcom ldan 'das rang nyid de/ 'tshe ba med cing yang dag pa la so sor rtog pas nyes pas mi phyed pa'i phyir rdo rje lta bu'i ye shes kyi ngo bo nyid du gyur pas rdo rje'i thugs so//de bzhin du dga' ba'i rgyur gyur pa yid du 'ong zhing rnam par dag pas don che zhing mthu che ba'i 'dod pa/ 'jig rten dang 'jig rten las 'das pas 'dod par bya ba sangs rgyas kyi mthar thug pas/ lha mo spyan bdag la chos nyid kyis thams cad bskyed pa'i tshul du bskyab cing gnod pa rnams la skyabs mdzod cig pa'o//thog ma'i sangs rgyas su gyur pas na mgon po ste gtso bo'o/ /gal te zhes bya ba la sogs pa la/ gal te bdag cag la brtson pa'i dbang gis bdag cag gnyi ga'i tshul du 'tsho zhing gson par mchis par bzhed na sems can yab chen zhes bya ba rang bzhin gyis gnyis su med pa'i rang bzhin yin zhing yon tan thams cad kyi rgyur gyur pas na sems can thams cad kyi yab bo//thugs rje chen po'i rang bzhin can yin pas na chen po'o/ /gnyen ni yab dang yum du gyur pas na gnyen no//'gro ba khyab pas na mchog ste shin tu phul du byung ba'o/ /dgyes par mdzad du gsol zhes pa ni bdag la dgyes pa bskyed par gsol zhes pa ste/ gal te bdag gson par bzhed na bdag cag mngon par 'dod pa'i 'gro ba'i don 'di mdzad du gsol zhes pa'i don to//spyan gyi rjes la mA ma kI sa rdo rje'i sku khyod ces bya ba la sogs pas gsol ba 'debs te lus yod na ngag la sogs pa 'byung bas de bas na de rnams las dang por sku'i phun sum tshogs pas gsol ba 'debs pa yin no/ /gang khyed kyi skur gyur pa ni thugs kyi rang bzhin yin pas 'khor ba'i 'jigs pa med pa'i phyir khyed ni rdo rje'i sku'o//thogs pa med pa'i nus pa mnga' bas bka'i 'khor lo ste bka'i tshogs so/ /kun du bzang po yin pas na sems can kun la phan pa'o/ /thabs thams cad phun sum tshogs par mnga' bas na gang sangs rgyas kyi don sgrub par mdzad pa dang byang chub dang gzhan la phan pa'i don rnam pa du mar thams cad rjes su gzigs shing rdzogs par mdzad pa'o//bdag ces bya ba ni mA ma kI'o/ /'dod chags dam tshig ces bya ba ni dga' ba rnam par dag pa'i lam mo//dgyes par mdzad du gsol zhes bya ba ni bde ba phun sum tshogs pa dang ldan par mdzod cig ces bya ba'i don to/ /mA ma kI'i 'og tu gos dkar mos bskul ba ni khyed ni rdo rje gsung ste zhes bya ba la sogs pa yin te/ lus grub par gyur pa las tshig yongs su rdzogs pas sems can gyi don byed pa yin no//de'i phyir gsung phun sum tshogs pa'i don du bskul pa ni yang dag pa nyid yin pas khyod ni rdo rje gsung zhes bya'o/ /gzhan la rjes su brtse ba'i phyir phan pa'i tshul gyis rab tu bzhugs pas na kun la phan zhing thugs brtse ba'o/ /rang gi don la ltos par mi mdzad pa'i phyir 'jig rten pa'i don gang yin pa mdzad cing de'i dgos pa mdzad pa la rtag tu brtson par zhugs pa'o//bdag ces bya ba ni gos dkar mo'o/ /bzang zhing nyes pa med pa'i dag pa gang yin pa de'i rang bzhin gyis spyod pas dngos po kun nas rnam par dag pa'i sems de nyid ni kun du bzang po'o//gzhan ni sngar bshad par zad do/ /gos dkar mo'i 'og tu sgrol ma'i glu len pa ni khyed ni rdo rje 'dod pa zhes bya ba la sogs pa yin te/ rnam pa thams cad du ma tshang ba med par bskul ba'i phyir thugs dang sku dang gsung phun sum tshogs pa'i rjes la don thams cad phun sum tshogs par bya ba'i phyir bskul ba yin no//dngos po gang la sems kyi 'dod par gyur pa'am/ de dag thams cad sems rnam par dag pa las 'byung bas na de'i phyir khyod ni rdo rje 'dod pa'o//dam tshig ni lam mo/ /mchog ni rnam par dag pa ste/ des na de ni dam tshig mchog rnam pa thams cad du phan pa mdzad par gyur pas na/ phan pa'i don chen po'o/ /yang dag par rdzogs pa'i sangs rgyas kyi gdung ni gang 'khor ba thog ma med par gcig nas gcig tu rgyun mi 'chad par byung ba de'i mchog tu gyur pa ni khyed nyid kyi gnyis su med pa'i thugs la gnas pa des sangs rgyas rnams mdzes par gyur cing /chos thams cad mnyam pa nyid du gzigs pas mnyam pa nyid la thugs brtse ba'o/ /yon tan rin chen mang po'i gter gyur zhes bya ba ni phun sum tshogs pa thams cad kyi rgyur gyur pa'o//zhes bya ba'i don to/ /zhi ba la sogs par gyur pa 'di ni ming dang gzugs rnam par dag pa yin te/ nur nur po la sogs pa ni gzugs ji srid skye mched drug ma thob pa'i bar ni ming dang gzugs so//de lta bu'i glu zhes bya ba ni glus bslangs pa'o/ /ngor byas pa des rang gi sngags kyi lus su gyur to zhes bya bar sbyar ro/ /ji lta zhe na/ chos kun sgyu ma lta bur yang dag rig /ces bya ba ste/ dngos po ma lus pa sgyu ma lta bu yin zhing sgyu ma dang mtshungs par yang dag par rig cing rtogs par gyur pa ste/des na rgyud las/ e ma'o kun du bzang po yi/ /sku gsung thugs kyi rdo rje can/ /skye ba med pa'i tshul gyis ni/ /skye ba 'di ni rab tu bsgrags/ /zhes bya ba la sogs pa ji skad gsungs pa lta bu'o/ /snang ba'i zhes bya ba la sogs pa la snang ba dang bcas pa'i 'od zer kha dog lnga pa'i 'od do//dkyil 'khor zhes bya ba ni byang chub sems zhu ba'i dkyil 'khor ro/ /rang gi sngags kyi lus su rang nyid gyur/ /zhes bya ba ni zla ba zhu ba'i gzugs de nyid maM las byung ba'i ral gri'i ngo por gyur pa'o//der ni 'od kyis zhes bya ba ni ral gri der kha dog lnga pa'i 'od zer rnams kyis sangs rgyas dang byang chub sems dpa' ma lus pa ral gri'i nang du yid kyis bcug par gyur pa las skyes bu chen po'i mtshan sum cu rtsa gnyis dang / dpe byad bzang po brgyad cus brgyan pa gzhon nu lo brgyad lon pa'i rnam pa can zur phud lnga dang ldan pa shes rab rang bzhin can zhal gsum phyag drug pa sna tshogs pad+ma dang zla ba'i dbus na sems dpa'i skyil mo krung gis bzhugs pa sgeg pa'i nyams su yongs su gyur pa 'jam pa'i dbyangs kyi skur gyur to zhes bya ba'i don to//sku mdog dang zhal dang phyag dang mtshon cha'i dbye ba bstan pa ni gur kum bzang po zhes bya ba la sogs pa smos pa yin te/ gur kum bzang po zhes bya ba ni gur kum ser po ste de dang 'dra bar mdog dmar ba 'bar ba'i mdangs gang la mnga' ba ste 'dod chags chen po'i ngo bo yin pa'i phyir ro//'di ni cung zad ser ba'i mdog can gyi dmar po yin gyi shin tu dmar pa'i mdog can ni ma yin no/ /zhal g.yas pa ni sngon po g.yon pa ni dkar po'o/ /'di ni sman pa gso ba ngan par byas pa ltar/ g.yas pa dkar ba dang g.yon pa nag por 'chad pa yod mod kyi/de ni rdul gyis bsgos pa lta bu ste/ 'jam pa'i rdo rje zhal mi bskyod pa dang 'dra bar bsgrub par bya ba'i phyir de ltar smras su zin kyang gzhung 'di ni log par bsgrub pa yin no/ /phyag g.yon pa gnyis kyis ral gri dang mda' bsnams pa dang phyag g.yas pa gnyis kyis ut+pal sngon po dang gzhu bsnams par 'dod pa de yang mi rigs so//gang yang des shes rab 'khyud pa'i phyag gnyis na rdo rje dang dril bu bsnams so snyam du sems pa de yang legs pa ma yin la/ gang gi phyir 'khyud pa la sogs pa'i bya bas phyag stong pa ma yin no snyam pa de yang legs pa ma yin te/bcom ldan 'das ni skyes bu tha mal pa dga' ba la nye bar longs spyod pa ltar phyag gnyis 'brel pa ma yin gyi/ gzhan du na shes rab dam pa'i rgyu mthun pa'i ngo bo nyid thabs dang bcas par gyur pa'i rang gi lus zhes 'og nas bshad pas de'i phyir pha rol tu phyin pa'i don dang ldan pa'i shes rab dang thabs kyi ngo bo nyid kyi rgyu mthun pa'i ngo bo nyid 'dod chags la spyod pa'i sems can rnams rjes su gzung bar bya ba'i phyir de dag bzhugs pa yin no//de bas na bcom ldan 'das kyi rtsa pa'i phyag gnyis kyis rdo rje dang dril bu bsnams pa rigs pa ma yin no//'on te 'di skad du rdo rje dang dril bu ni shes rab kyi ngo bo nyid yin no zhes zer na/ ral gri yang shes rab kyi ngo bo yin pas de yang med par 'gyur la/ rdo rje thabs kyi ngo bo nyid yin pas na/ mi bskyod pa la sogs pa la de yang med par 'gyur ro//de bas na 'dir sgrub pa'i thabs mdzad pas ji skad bshad pa med bzhin du blta bar bya ba 'di nyid rigs pa yin te/ rgyud tshad ma nyid yin pa'i phyir ro/ /sna tshogs rgyan gyis rnam par brgyan pa'i zhes bya ba ni gdu bu dang dpung rgyan dang ska rags dang mu tig gi do shal dang rkang gdub la sogs pa de dag gis sku la brgyan pa'i phyag gnyis kyis shes rab dam pa la thabs kyis 'khyud par mdzad pa dang mdangs dang ldan pa'i 'od 'bar ba'i ral gri dang mda' nyid kyis phyag brgyan cing bsnams pa dang /at+pa la sngon po dang gzhu bsnams par mdzad pa gang yin pa de'o//de yang shes rab rnam par dag pa'i ngo bo nyid ni ral gri ste/ rdo rje rnon po ral gri che/ /zhes gsungs pa dang rdo rje snying po'i rgyan las kyang / bde gshegs dri med shes rab ni/ /rdo rje rnon por de bshad do/ / zhes gsungs pa'i phyir ro/ /thugs rje chen pos 'bigs pa'i ngo bo nyid ni mda'o/ /rang bzhin gyis nyes pa'i 'dam thams cad kyis ma gos pa ni ut+pal sngon po'o/ /nyes pa thams cad kyi gnyen por gyur pas de bzhin gshegs pa'i yon tan ma lus pa'i gzhir gyur pa nyid ni gzhu'i rnam par dag pa yin no//mtha' yas 'od ldan zhes bya ba ni nyi ma ltar snang ba'i gzi brjid tshad med pa dang ldan pa'o/ /ma lus rigs rnams 'phro bas rnam brgyan zhes bya ba ni de bzhin gshegs pa rnams dang lha mo dang byang chub sems dpa' dang khro bo'i rnam pa'i rigs ma lus pa de gang yin pa de nyid de la skyes shing de rnams 'bar ba'i 'od dang ldan pas rnam par 'phro bas rnam par brgyan cing spud par byas pa'i nam mkha' ma lus pa'i khongs su gtogs pa'i dkyil 'khor gang gis mdzes par byas pa ste/'di dag gis ni bcom ldan 'das kun du bzang po nyid yin par ston to//skyob pa zhes bya ba ni 'di la skyob pa mnga' bas na skyob pa'o/ /tshad ma rnam 'grel las/ skyob pa nyid kyis gzigs lam ston/ /zhes bshad pas ji ltar thugs su chud pa thams cad mkhyen pa nyid la sogs pa'i lam ston par mdzad pa la bya ste/'di ni skye mched drug rnam par dag pa la'o/ /da ni don dam pa'i shes rab dang thabs bsgoms pa bstan pa ni/ dngos rnams zhes bya ba smos pa yin te/ gzung ba ni gzugs la sogs pa'o/ /'dzin pa ni mig la sogs pa ste 'di dag ni don dam par dngos po med kyi byis pa skye bos brtags pa tsam du zad do zhes bshad pa yin no//gal te 'di yang dag par dngos po med na mig gis gzung bar bya ba'i gzugs dang mig la brten te mig gi rnam par shes pa skye bas na de bzhin du yid dang chos la brten nas yid kyi rnam par shes pa ji ltar skye bar 'gyur/de ni ma yin te gang gi phyir gzugs la sogs par snang ba las ma gtogs par de las gzhan pa'i gzung bar bya ba'am/ de 'dzin par byed pa cung zad kyang nye bar ma dmigs te don dam par na stong pa'i gzugs snang ba'i mtshan nyid tsam du yod par zad do//de yang shes rab kyi pha rol tu phyin pa las nang gi bdag nyid can ni nang gi bdag nyid can gyis stong ngo / phyi ni phyi'i ngo bo nyid kyis stong ngo / /de ci'i phyir zhe na/ mig ni mig gang ba nyid kyis stong ste/ de'i rang bzhin de yin pa'i phyir ro//de bzhin du gzugs ni gzugs kyi ngo bo nyid kyis stong pas na/ yid dang chos ni yid dang chos kyi ngo bo nyid kyis stong ngo zhes bya ba'i bar du rgya cher gsungs pa yin no/ /de ltar na phyi rol gyi dngos po med pas gzung bar bya ba med pa la des na 'dzin par byed pa'i mig la sogs pa dang bral bas 'dzin pa po yang med pa yin no//gzung ba dang 'dzin pa rnam pa gnyis po dang bral bas gnyis su med pa'i tshul de bzhin nyid kyi ngo bo nyid kyi de kho na nyid la gnas nas 'dzin pa po'i rang bzhin sems tsam yang dor bar bya'o//de ltar gnyi ga yang med pas dngos po ma lus pa thams cad don dam par ngo bo nyid med par shes nas rnam par byang ba rnam par dag pa ni kun du bzang po lta bu'i sems ni gnyen po bsgoms pa yin te/ de la mngon par zhe na pa med pa ni bsgom par bya ba dang / sgom pa po dang bsgoms pa nye bar mi dmigs pa yin no//de ltar na de med cing zad pa dang spangs pas byin gyis brlab par bya'o/ /'og nas bshad pa'i rgyud las gsungs pa'i sngags 'dis bya'o/ /oM zhes bya ba ni nges pa ste/ rang bzhin gyis bdag ni chos kyi dbyings kyi ngo bo nyid du gyur pa'o zhes bya ba ste bsgom pa'i stobs kyis sems kyi ngo bo nyid la dmigs nas glo bur ba'i dri ma dang bral bar gyur pa'o//de yang / kun nas nyon mongs rnam par dag /de ni dri bcas dri ma med/ /chu khams gser dang nam mkha' bzhin/ /dag pa bzhin du dag par 'dod/ /ces bshad pa yin no//'dir man ngag ni 'di yin te/ rgyal ba skyes mchog rnams kyi dri med dngos brten nas/ /phyi yi ma lus spong byed gnyis dang bral ba yi/ /sems la brten te sems ni sems tsam nyid du rtogs/ /de yang sna tshogs snang ba gcig pa nyid ma yin/ /sna tshogs reg pas du ma'i gzugs su'ang ma yin te//de ltar thams cad dngos po med pa nyid du rtogs/ /'di la dngos rnams rim gyis de gnyis bcas 'gyur la/ /slar yang sems de nyid ni de ltar bsgom par bya/ /zhes bya ba yin no/ /'di ni bsnyen pa'i dam tshig gi yang dag pa'i sbyor ba yin te/bsnyen pa ni de kho na nyid la bslab pa'o/ /de'i dam tshig ni rim gyis 'bras bu thob pa'o/ /rgyu mthun pa'i 'bras bu thob pa ni bsnyen pa'o/ /bdag gi bla ma'i zhal snga nas kyis kyang / stong nyid la sogs bsnyen pa ste/ oM dang ma yi thog mtha' can/ / de yi 'bras bu rgyu mthun pa/ /zhes bshad pa yin no/ /de ni nye bar bsgrub pa brjod par bya ste/ mig la sogs pa byin gyis brlabs pa ni nye bar bsgrub pa zhes bya bar bshad la/ rnam par smin pa ni de'i 'bras bu yin no/ /de 'og ces bya ba la sogs pa la de 'og ces bya ba ni dam tshig dang bsnyen pa'i sbyor ba'i rjes thogs la'o//rang gi sa bon ni sa'i snying po la sogs pa ste/ k+Shi dzrIM khaM gaM Sh+kaM saM zhes bya ba'o/ /ji bzhin zhes bya ba ni go rims ma 'chol ba ste/ k+ShiM la sogs pa'i sa bon drug las byung ba'i 'khor lo dang rdo rje dang rin po che dang pad+ma dang ral gri dang /rdo rje la sogs pa'i gzugs su byung bas mig dang rna ba dang / sna dang lce dang lus dang yid la zhugs te sa bon de'i 'od zer rnams kyis de bzhin gshegs pa thams cad zhugs par byas nas sa'i snying po la sogs pa lha rnams bskyed la mig la sogs pa de'i rang bzhin du bya'o//sogs pa'i sgras ni sa la sogs pas de bzhin du byin gyis brlabs pa dang / gzugs la sogs pa'i phung po lnga la rnam par snang mdzad la sogs pas byin gyis brlab par bya'o/ /nye bar bsgrub pa'i cho ga 'dis ni reg pa rnam par dag pa bshad par bya ste/ de yang /de yi 'bras bu rnam smin yin/ /sgrub pa dag gis bshad par bya/ /zhes bshad pa yin no/ /dri med ces bya ba la sogs pa la rang gi zla ba'i zhes pa rang gi snying ga'i zla ba la rdo rje'i lte ba zhes pa rdo rje'i chang gzungs kyi dbus su gnas pa'i yi ge hUM las snying gar thugs kyi rdo rje bsam pa dang /de bzhin du kha dang mgo bor pad+ma dang 'khor lo dag la gnas pa'i yi ge AHdang oM las byung ba'i gsung rdo rje ste 'od dpag tu med pa dang sku rdo rje ste rnam par snang mdzad bsam par bya'o/ /zla ba'i sgra smos pa nyid kyis me dang dbang chen dang chu dang rlung gi dkyil 'khor gyi steng na sna tshogs pad+ma yod par dpag par bya'o//tshig le'ur byas pa las dkyil 'khor ma smos na ji ltar 'di ltar dpag par bya ste/ de ni legs pa ma yin no zhes brtag pa ni mi bya'o/ /ci'i phyir zhe na/ de skad rgyud las bshad pa la/ /'dis ni dpal gsang ba 'dus pa'i rgyud kyi rim pa thams cad ston pa yin no//de yang bdag gi bla ma'i zhal snga nas kyis/ rlung dang chu dang 'brel pa dang / /de bzhin yang ni dbang chen me/ /yaM baM laM raM las byung ba/ /mdog ni grangs bzhin sngo ba dang / /dkar dang ser dang dmar ba dang / /ba dan gyis mtshan bum par ldan//dbang chen mtshams su rdo rjes mtshan/ /rlung ni gzhu yi dbyibs can no/ /chu yi dkyil 'khor zlum po ste/ /dbang chen zur bzhi pa nyid yin/ /me yi zur gsum rnam pa ste/ /de yi dbus su rnam par bsgom/ /zhes bshad pa yin no/ /de ltar na snying gar me'i dkyil 'khor gyi steng du thugs rdo rje de'i gong brang du dbang chen gyi dkyil 'khor gyi steng du ye shes sems dpa'/lkog mar chu'i dkyil 'khor gyi steng du gsung rdo rje/ mgo bo'i thod pa'i nang du rlung gi dkyil 'khor gyi steng du sku rdo rje bsam mo/ /la la ni thugs rdo rje nyid ye shes sems dpa' yin no zhes 'dod mod kyi/de ni bden pa ma yin te/ ci'i phyir zhe na/ rgyud las/ snying ga'i dbus nas phra ba yi/ /ye shes sems dpa' rnam par bsgom/ /yi ge gnas kyi mchog gyur pa/ /de yi dbus su chud par bsam/ /de ltar gnas ni bzhi po ru//zhes gsungs pas thugs dang gsung dang sku rdo rje dang bzhi pa ni ye shes sems dpa' yin no/ /'o na sangs rgyas ye shes kyi zhal snga nas kyis tshig le'ur byas par ci'i phyir ma gsungs she na/ lan du smras pa nyid yin te/ dang por nang par snying ga'i zla dbus su/ / dri med 'od zer rab tu 'phro ba'i maM/ /zhes bya ba la sogs pa mang du smos pa yin no/ /de bas na ye shes sems dpa' med par dkyil 'khor gyi 'khor lo rdzogs par mi 'gyur bar shes par byas la/ slob dpon gyis tshigs su bcad par ma gsungs pa'i som nyi mi bya'o/ /ye shes sems dpa' ni dam tshig sems dpa' ltar shes rab dang thabs kyi bdag nyid du bsam par bya'o//thugs rdo rje la sogs pa yang de bzhin no/ /de'i thugs ka'i zhes bya ba la de'i zhes bya ba ni de rnams kyi thugs ka'i ye shes kyi gzugs can gyi yi ge ste/ de las byung ba'i 'od zer gyi tshogs rnams so//shes rab dam pa ni rang rang gi rig pa ste/ de rnams dang 'dus pa ni gcig tu 'dres par gyur pa yin la/ de'i 'od rnams kyis snang zhing gsal ba'i ngang tshul can gyis so/ /des ji skad ston par 'gyur zhe na/ mi bskyod pa la sogs pa'i snying po'i sa bon las byung ba'i 'od zer rnams kyis de bzhin gshegs pa'i tshogs rnams mchod pa rnam pa sna tshogs kyis mchod la/tshigs su bcad pa 'dis bdag nyid byin gyis brlab pa'i phyir gsol ba gdab par bya'o/ /dpal ldan zhes bya ba ni dkyil 'khor gyi bdag po yin pa'i phyir ro//rdo rje thugs 'chang ba zhes bya ba ni rdo rje ltar mi phyed cing g.yo ba med pa'i thugs gang la mnga' ba de ni rdo rje thugs 'chang ba ste mi bskyod pa'o/ /sku gsung thugs gsum po rdo rje ltar mi phyed cing mi g.yo ba bsgom pa gang yin pa de ni rdo rje mi phyed gsum bsgoms pas so//'dis ni don dam par thams cad kyang thams cad kyi bdag nyid can yin no zhes ston to/ /deng bdag ces bya ba la sogs pa la bdag thugs rdo rje'i rnal 'byor pa rang bzhin gyis dbyer mi phyed pa'i phyir chos kyi dbyings su byin gyis rlob par mdzad du gsol zhes pa ste/ bdag gi sems thugs rdo rje dang mnyam par gyur cig ces bya ba'i bar du'o/ thugs rdo rje 'ba' zhig tu ma zad kyi/ phyogs bcu na bzhugs pa'i sku dang gsung dang thugs rdo rje'i rnal 'byor pa rnams kyis bdag la byin gyis rlob par mdzod cig pa'o/ /oM zhes bya ba la sogs pa la/thugs rdo rjes byin gyis brlabs pa dang / de bzhin gshegs pa thams cad kyis byin gyis brlabs pas bdag gi sems thugs rdo rje dang 'dra bar gyur to zhes oM gyis nges par byas pa'o/ /ye shes sems dpas byin gyis brlabs pa yang rim pa 'di nyid kyis bya'o//gsung rdo rje'i gsol ba gdab pa'i tshigs su bcad pa gsungs pa ni/ chos kyi gsung lam zhes bya ba la sogs pa gsungs pa yin te/ chos ni rdo rje chos te 'od dpag tu med pa'o/ /gsung lam ni gsung gi ngo bo ste chos thams cad ston pa la dbang du gyur pa'i phyir ro/ / de nyid kyis na dpal ldan no/ /gsung ni rdo rje can bdag la/ /gsung gis byin gyis brlabs mdzod la/ /bdag gi ngag de dang 'dra bar gyur cig ces bya ba'i don to/ /oM zhes bya ba la sogs pa ni snga ma bzhin no/ /sku rdo rje'i gsol ba gdab pa'i tshigs su bcad pa gsungs pa ni dpal ldan rdo rje zhes bya ba la sogs pa ste/sku rdo rje ni rnam par snang mdzad do/ /de ni rang bzhin gyis shin tu mdzes pa'i rang bzhin can gyi sku chen po mnga' bas dpal ldan te des bdag gi lus byin gyis brlabs par mdzad de/ bdag gi lus rdo rje lta bur gyur cig ces bya ba'i bar du'o//oM zhes bya ba ni snga ma dang 'dra'o/ /la la ni/ kun du bzang po'i thugs gang yin/ /zhes bya ba la sogs pa tshigs su bcad pa gsum byin gyis brlab pa'i don du 'dod mod kyi/ le'u bcu gnyis pa las tshigs su bcad pa gnyis po nyid ston pas le'u bdun pa las gsungs pa de ni gnas skabs gzhan yin te mar me mdzad bzang po'i zhal snga nas kyis/rjes dran bcu drug dag pa rnams/ /byed pa yin zhes der gsungs pa/ /de ni thugs sogs byin brlab pa'i/ /gnas skabs min phyir ma bshad do/ /zhes bshad pas rjes su dran pa'i skabs su kun du bzang po'i thugs gang yin zhes bya ba la sogs pa bstan pa yin no//sku gsum byin gyis brlabs pa bstan pa 'dis ni tshor ba rnam par dag pa bstan pa yin no/ /da ni sgrub pa chen po brjod par bya ste/ sgrub pa chen po ni dbang gi 'bras bu'o//de bshad pa ni nam mkha' lta bu'o zhes bya ba la sogs pa yin te don dam par nam mkha' lta bur dngos po med pa'i ngo bor rdo rje gsum po'i mtshan nyid de mtshan dang dpe byad kyi cha shas dang bral bar dmigs shing rnam par bsams nas sgrub pa chen po brtsam par bya'o zhes bya ba ni slob dpon gyi dgongs pa yin no//sems brtan par bya ba'i phyir rnal 'byor chen po la yang dang yang du bslab par bya ste/ ji skad du/ thams cad nam mkha'i rang bzhin te/ /sems kyang nam mkha'i rang bzhin du/ /rnam par mi rtog nyid brten na/ /dogs pa med pa nyid rab skye//zhes ji skad bshad pa lta bu'o/ /phyogs tshogs zhes bya ba la sogs pa la phyogs bcu khyab pa'i sangs rgyas kyi tshogs rnams snying po'i 'od zer rnams kyis yang dag bskul zhes pa ye shes sems dpa'i thugs ka'i sa bon gyi 'od zer rnams kyis bskul ba dang ye shes sems dpa'i sa bon gyi 'od zer gyi tshogs kyis sad par byas pa'i phyogs bcu'i dkyil 'khor na bzhugs pa'i de bzhin gshegs pa'i tshogs las byung ba'i 'od zer gyis sgo las skyes pa'i spyan la sogs pa'i lha mo'i tshogs phyag gi mthil na bdud rtsi lnga'i chus yongs su gang ba'i bum pa bsnams pas dbang bskur ba dang mi bskyod pas rnam par brgyan pa'i cod pan du gyur to zhes bya ba'i don to//rang gi rigs kyi gtso bo ni 'jam pa'i rdo rje'i rigs kyi bdag po mi bskyod pa yin te/ chos kyi dbyings rnam par dag pa'i ye shes kyi rang bzhin can yin pa'i phyir ro//spyi bor bdud rtsi'i dkyil 'khor gyi steng du mi bskyod pa bsam par bya'o zhes bya ba ni slob dpon rnams kyi man ngag yin no/ /dbang bskur bas ni sred pa rnam par dag pa bstan pa yin no/ /'di ni sgrub pa chen po ste/ 'di'i 'bras bu dbang yin no//de ltar thabs mngon par 'dus byas pa'i yan lag bzhi po bstan pa yin no zhes bdag gi bla ma'i zhal snga nas kyis bshad pa yin no/ /thabs kyi bye brag gis shes rab khyad par can du 'gyur bas thabs bsgoms nas shes rab bsgom par bya'o/ / 'dir la la dag yongs su rgol bar byed de sngar/ phyag gnyis shes rab dam pa 'khyud pa dang / /zhes bya ba 'dis 'di'i shes rab bstan zin nas/ ji ltar na yang shes rab bsgom par bya zhe na/ de ni legs pa ma yin te/ phyag gnyis shes rab dam pa 'khyud pa dang / /zhes bya ba bstan pa 'di'i bshad pa ni 'di yin te/gzhan du na sngar yan lag cha shas yongs su rdzogs zin pas 'jam pa'i rdo rje sku gsung thugs byin gyis brlabs pa yang mi 'thad par 'gyur na/ ji ltar bstan par bya ba'i phyir sku dang gsung dang thugs byin gyis brlabs pa'i bya ba 'thad pa de bzhin du shes rab bsgom pa yang rigs pa nyid yin no//gzhan dag ni dam tshig gi phyag rgya byin gyis brlabs pa'i phyir slob dpon gyis 'di gsungs pa yin no zhes 'dod do/ /rgyud kyi don la mngon par mi mkhas pa la la'i gzhung ni ji ltar/ phyag gnyis shes rab dam pa 'khyud pa dang / /zhes bya ba'i tshig rnams 'dis 'chad par byed de/ ji ltar 'byar ba'i ngang tshul ni 'byar ba stong pa yin zhes bya ba'i bar du ste de ltar 'jam pa'i rdo rje 'ba' zhig nyid rnam par bsams la de bzhin zhes bya ba la sogs pas shes rab bsgom par bya'o zhes zer mod kyi 'di ni shin tu yang mi 'thad de ci'i phyir rgyud las/sngags kyi skyes bu ji snyed pa/ /rdo rje gsum gyi ye shes rdzogs/ /dbang po gnyis kyi sbyor ba yis/ /dngos po thams cad brtag par bya/ /zhes gsungs pa la ji snyed pa zhes bya ba 'dir rgya cher bshad par byed pa dag gis 'di na sngags kyi skyes bu gang ji snyed yod pa de thams cad bskyed pa'i dus kyi rjes thogs nyid nas shes rab dang thabs kyi sbyor bas rnam par bsgom par bya'i gcig pu ni ma yin no zhes bshad pa'i phyir ro//de bzhin zhes bya ba la sogs pa la de bzhin zhes bya ba ni rang gi lha 'jam pa'i rdo rje ci 'dra ba de dang 'dra ba'i mdangs mdzes pa'i lha mo gang yin pa rang gi snying po maM gyis sprul zhing bskyed bar bya zhing ji ltar 'jam pa'i rdo rje la sku dang gsung dang thugs byin gyis brlab pa dang dbang bskur bar bya ba de bzhin du rig ma la yang bya'o//de nyid kyis na mig la sogs pa dgang zhing zhes bya ba smos te/sa'i snying po la sogs pas dgang ba dang yi ge gsum rnam par dgod pas sku dang gsung dang thugs byin gyis brlabs pa des rig ma'i lus 'od dang ldan zhing 'bar ba dang bcas pa gang yin pa ste/ de ltar thabs dang 'dra bar thun mong gi mngon par 'du bya bas mngon par 'dus byas nas/rgyud la sogs pa gsungs pa'i byin gyis brlab pa'i mtshan nyid gsungs pa ni/ de nyid shes pas zhes bya ba la sogs pa yin te/ mgo dang zhes bya ba spyi bor oM snying gar hUM lte bar swA gsang ba'i pad+mar AHsogs pa'i sgras brla gnyis nas brtsams te rkang pa'i mthar thug pa'i bar der yi ge hA bsam par bya ste/'di dag gis rnam par snang mdzad dang mi bskyod pa dang rin chen 'byung ldan dang 'od dpag tu med pa dang don yod grub pa ste/ de bzhin gshegs pa lngas yan lag byin gyis brlabs par bsgoms la/sa gsum po khyab pa'i de bzhin gshegs pa lnga'i ngo bo nyid kyi 'od zer gyi /phreng ba'i tshogs dam pa gang la yod pa'i yi ge as byin gyis brlabs pa'i sna tshogs pa'i gsang ba'i lte ba gang yin pa yi ge hUM las pad+ma 'dab ma brgyad pa'i gzugs can gyi gsang ba'i pad+ma chos 'byung ba'i khongs su chud pa zhes bya ba'i bar du'o//lha'i rnam par dag pa gsungs pa ni shes rab pad+ma zhes bya ba la sogs pa yin te spros pa'i tshogs thams cad dang bral ba'i stong pa nyid kyi ngo bo nyid ni shes rab dam pa ste/ de'i rgyu mthun pa ni rgyu dang 'dra ba'i 'bras bu kun rdzob kyi bden pa'i shes rab dang lhan cig tu 'og nas bshad pa'i tshul gyis sngags pas dga' ba kun du brtsam par bya ste/shes rab thabs kyi sbyor ba dang ldan pas don dam pa'i yul la kun du chags pa'o zhes bya ba'i bar du'o/ /de ltar rdo rje dang pad+ma mnyam par sbyor ba'i bde ba chen po nyams su myong ba'i dus su lha'i nga rgyal khyad par can bskyed par bya ba ni oM zhes bya ba la sogs pa ste/de bzhin gshegs pa thams cad kyi don dam pa dang kun rdzob kyi cha gcig tu gyur pa'i sbyor bas rang bzhin gyi sems kun du bzang po nyid du yongs su dga' ba la brtson par oM zhes bya bar nges par bya ba'o//shes rab bsgoms pas ni len pa rnam par dag pa bstan la/ rjes su mnyes pa ni las kyi tshul yin pa'i phyir srid pa rnam par dag pa yin te 'di dag bstan pas ni mthong ba'i lam gyi ngo bo nyid kyi yan lag bzhi pa ni dang po'i sbyor ba yin no/ /la la ni dbang bskur ba'i mthar thug pa la dbang po'i sbyor ba yin par 'dod do//da ni shes rab dang thabs rnam pa thams cad du yongs su rdzogs par bya ba'i phyir dkyil 'khor gyi rgyal po'i mchog gi ting nge 'dzin brjod par bya ste/ 'di ni bsgom pa'i lam gyi ngo bo nyid yin la/ de bshad pa ni thugs ka'i zhes bya ba la sogs pa yin te/thugs ka'i zla ba zhes bya ba ni thugs ka'i zla ba'i nang du chud pa'i sngags yi ge maM gyi 'od rnams kyis phyogs bcu'i dkyil 'khor na bzhugs pa'i 'og nas bshad pa'i sangs rgyas kyi tshogs rnams ma lus par zhugs pa tsam nyid kyi hUM gis byin gyis brlabs pa'i gsang ba'i rdo rje mtha' ma'i lam nas byung ste/shes rab dam pa'i gsang ba'i pad+mar byung ba'i nang na gnas pa'i byang chub kyi sems kyi gzugs su blta bar bya'o/ /rang gi snying po las byung ba zhes bya ba ni rang gi sa bon las byung ba'i mtshan ma las skyes pa'i ma lus pa'i rang gi dkyil 'khor ba'i 'khor lo gsang ba'i pad+ma'i nang gi dbus su rnam par bsams la dbang bskur ba dang bdud rtsi myang ba la sogs pa'i mthar thug pa byas la sems brtan par dbyung bar bya'o//ci'i phyir zhe na/ 'jig rten rnams la phan phyir zhes bya ba smos te/sems can ma lus pa gdon par bya ba'i phyir snga ma bzhin du gzhal yas khang gi nang du sna tshogs pad+ma dang zla ba'i dkyil 'khor la gnas pa shes rab dang thabs kyi bdag nyid can gyi lha ma lus pa chos 'byung ba'i nang du rnam par bsgom pa yun ring du bsams la de'i 'og tu bla ma'i man ngag gis dbyung bar bya'o//ji ltar yang dag par dbyung bar bya zhe na/ badzra d+h+r-ika ces bya ba dang thugs rdo rje zhes bya ba smos te/ thugs rdo rje bskul ba 'dir cho ga bzhin du zhes bya ba dang sbyar te badzra d+h+r-ika ces rgyud las gsungs pa'i sngags kyis yongs su bskul ba dang skye bo dam pa'i don mdzad pa ste gang gis sems can ma lus pa'i tshogs kyi zhe sdang spang ba'i phyir sku dang zhal dang po nor bu sngon po'i 'od 'dra ba ste/nor bu mthon ka lta bu'o/ /zhal g.yas dkar ba g.yon pa dmar ba'o/ /dam pa dang po ni dpal rdo rje sems dpa'i ste/de lta bu'i mtshon cha bsnams pa'i phyag dang ldan pa'o/ /de bzhin du/ kha dog dpag tu med pa'i 'od tshogs mnga'/ /zhes bya ba sangs rgyas kyi sprul pa'i tshogs rnam par 'phro bas phyogs kyi tshogs ma lus par khyab pa'o/ /blo dang ldan pa zhes bya ba ni sems mi g.yeng bas so//legs bsdus bdag nyid kyi zhes bya ba ni pad+ma'i nang nas byung ste sems can gyi tshogs ma lus pa'i zhe sdang spangs par mdzad nas dpal 'jam pa'i rdo rjer bdag nyid gnas pa la zhugs shing yongs su thim par bya'o/ /dngos po thams cad kyis ni zhes bya ba ni sems chu dang 'o ma 'dra bar te/'di ni dpal gsang ba 'dus pa'i rgyud las 'jam pa'i rdo rje dang mi bskyod pa gcig pa nyid du bstan to/ /dzi na dzika ces bya ba la sogs pa la sngags 'dis rnam par snang mdzad yang dag par dbyung bar bya'o/ / rdo rje 'dzin 'dra'i zhes bya ba ni rdo rje sems dpa' dang 'dra bar sku mdog dkar zhing zhal g.yas nag pa g.yon dmar ba'o/ /'khor lo la sogs zhes bya ba ni/ phyag mtshan 'khor lo dang ral gri dang pad+ma dang yid bzhin gyi nor bu bsnams pa bsam par bya'o/ /de bzhin zhes bya ba ni sems can rnams kyi gti mug rnam par dag par mdzad nas shar phyogs su sna tshogs pad+ma dang zla ba'i dbus su bsam par bya'o//rat+na d+h+r-ika ces bya ba la sogs pa la rat+na d+h+r-ika ces bya ba'i sngags brjod la rin chen 'byung ldan dbyung bar bya'o/ /gang du zhe na lho phyogs su'o//zhal ni zhal ras te gzhon nu 'dra zhes bya ba ni 'jam pa'i rdo rje lta bu'o/ /btso ma'i gser 'dra ni bsregs pa las bton pa'i gser te de dang sku mdog gi mdangs 'dra ba la rin po che dang ral gri dang pad+ma dang 'khor lo bzang po bsnams shing phyag gnyis kyis rig ma la 'khyud pa dang bcas na phyag drug mnga' ba gang yin pa de la de skad ces bya'o//A ro l-ika ces bya ba la sogs pa la A ro l-ika ces bya ba'i sngags kyis 'od dpag tu med pa dbyung bar bya'o/ /ji lta bu zhe na/ pad+ma rA ga ltar dmar ba ste nor bu pad+ma rA ga'i mdog can no/ / zhal gnyis de dang 'dra zhes bya ba ni 'jam pa'i rdo rje dang 'dra ba'o/ /'od zer dmar zhing zhes bya ba ni 'od kyi dkyil 'khor du kha dog dmar ba'i dbus na bzhugs pa'o/ /phyag na pad+ma la sogs pa zhes bya ba ni pad+ma dang ral gri dang rin po che dang 'khor lo'i mtshan ma bsnams pas phyag brgyan par nub phyogs su bsam par bya'o//pradz+nyA d+h+r-ika ces bya ba la sogs pa la pradz+nyA d+h+r-ika ces bya ba'i sngags kyis don yod grub pa dbyung bar bya'o/ /rin chen margad lta bu'i mdog ldan zhing / /zhes bya ba ni nor bu margad kyi kha dog 'dra ba ste/ rtsa dUr ba sngon po ltar mdog ljang gu mnga' ba'o//snga ma lta bu'i zhal zhes bya ba ni zhal la sogs pa 'jam pa'i rdo rje dang 'dra ba'o/ /sogs pa'i sgras ni 'di'i zhal gyi dbyibs cung zad drag par ston pa'o/ /ral gri la sogs bsnams pa zhes pa ni ral gri dang sna tshogs rdo rje dang 'khor lo dang pad+ma bsnams pa'o zhes pa'i bar du ste/de ltar byang phyogs su bsam par bya'o/ /ral pa zhes pa la sogs pa la ral pa'i tshogs kyi steng du margad dang in+d+ra nI la dang pad+ma rA ga la sogs pa'i nor bus spras pa'i cod pan 'jog par mdzad pa dang 'dzam bu'i chu bo'i gser dang mu tig dang nor bus spras pa'i do shal dang gdu bu dang dpung rgyan dang ske rags dang zhabs gdub la sogs pa rgyan sna tshogs pas sku la brgyan pa yin pa dang rig ma ni spyan la sogs pa ste de rnams kyi mgon dang bcas pa ni phan tshun phyag gnyis kyis sku la 'khyud pa zhes bya ba'i don to//thams cad ces bya ba ni rin chen 'byung ldan dang 'od dpag tu med pa dang don yod grub pa ste/ de rnams ni sna tshogs pad+ma'i steng du nyi ma'i dkyil 'khor la rnam par bsam par byas la 'jam pa'i rdo rje dang rnam par snang mdzad ni zla ba'i dkyil 'khor la bzhugs pa de bzhin gshegs pa rnams kyi cod pan la ni mi bskyod pa bsam par bya'o//lha mo rnams bskyed pa gsungs pa ni mo ha ra tI zhes bya ba la sogs pa gsungs pa yin te/ mo ha ta tI zhes bya ba'i sngags kyis lha mo spyan dbyung bar bya ste/ zla ba'i dkyil 'khor gyi dbus na mchog tu sgeg pa'i nyams dang ldan pa zhal dang phyag mtshan gyi nges pa sku'i rdo rje dang 'dra ba me'i phyogs te shar dang lho'i mtshams su bsam par bya'o//dwe Sha ra tI zhes bya ba la sogs pa la dwe Sha tI zhes bya ba'i sngags kyis lha mo mA ma kI dbyung bar bya ste/dga' ba che zhes pa bde ba chen po'i ngo bo mchog tu dga' ba chen po'i dgyes pa dam pa gang yin pa de zhal dang phyag dang phyag mtshan gyi rnam par nges pa thugs kyi gtso bo mi bskyod pa dang 'dra ba mnga' ba bden bral zhes pa lho dang nub kyi mtshams su bsam par bya'o/ /rA ga zhes bya ba la sogs pa la rA ga ra tI zhes bya ba'i sngags kyis lha mo gos dkar mo dbyung bar bya ste/sems can rnams la rgyas pa chen po stsol ba nyid kyis ni yon tan rin po che mtha' yas pa'i ngo bo nyid gsung gi dbang phyug 'od dpag tu med pa ltar sku shin tu dmar zhing dang la 'bar ba dang zhal dang phyag dang phyag mtshan de 'dra ba gang yin pa rlung gi phyogs te nub byang mtshams su bsam par bya'o//badzra zhes pa la sogs pa la badzra ra tI zhes bya ba'i sngags kyis lha mo sgrol ma dbyung bar bya ste/ de yang dri ma med pa rin po che'i phreng ba ste rin po che'i 'od kyi phreng ba gang yin pa des nam mkha'i khams kyi phyogs kyi tshogs ma lus par khebs shing g.yogs pa sku mdog rin chen 'byung ldan ltar ser zhing zhal dang phyag dang mtshon cha yang de dang 'dra ba dbang ldan gyi phyogs zhes bya ba byang shar mtshams su bsam par bya'o//'khor lo bzang dang zhes bya ba la sogs pa la phyag g.yas pa'i gtso bo'i phyag mtshan spyan gyi ni 'khor lo bzang po ste 'khor lo rtsibs bcu gnyis pa'o//mA ma kI'i ni ut+pal dmar po'o/ /gos dkar mo'i ni pad+ma'o/ /sgrol ma'i ni ut+pal gser gyi mdog can du bsam mo/ /lhag ma rnams ni bdag po ji bzhin 'dod//ces bya ba ni rang gi bdag po dang 'dra ba las ut+pal dang pad+ma ston te/ des na pad+ma ut+pal de dag gcig tu sbyar ro/ /cod pan la ni rang gi bdag po rnams bsam mo/ /lha mo 'di dag thams cad sna tshogs pad+ma'i steng na zla ba'i dkyil 'khor gyi gdan la thams cad kyang shes rab dang thabs kyi bdag nyid can rang gi bdag po'i skus 'khyud pa bsam ste 'di la slob dpon gyis tshig le'ur byas pa las ci'i phyir de skad ma gsungs zhes pa'i som nyi mi bya ste/rgyud las/ rig pa chen mo spyan la sogs/ /rtag tu 'dod pa'i don brtson pa//'dod pa'i longs spyod dag gis ni/ /ji ltar 'dod pa bsten na 'grub/ /ces gsungs pa'i phyir dang / de bzhin du le'u dang po las sa rdo rje la sogs pa'i nges pa gsungs pas 'di skad du bshad par bya ste/ sa rdo rje dang zhes gang gsungs pa de thams cad shes rab dang thabs gnyis su med pa'i rnam par dag pa gtso bor byas pa rgyud 'di rdzogs pa'i bar la ston pas de'i phyir rgyud kyi don mi shes pas rnam par rtog pa'i go skabs mi 'byed pa'o//de nyid gsum gyi zhes bya ba la sogs pa la dkyil 'khor gyi 'khor lo'i mtshams su gyur pa me'i phyogs su spyan la sogs pa bzhi po dang /de bzhin du rtsa ba'i sgo'i ngos gnyis dang g.yas dang g.yon logs su gzugs rdo rje la sogs pa lha mo drug bsam par bya'o/ /de dag kyang sku rdo rje la sogs pa de bzhin gshegs pa lnga'i ngo bo nyid lnga dang drug pa chos kyi dbyings kyi rdo rje ni rdo rje sems dpa' lta bu ste/'di rnams kyi thabs kyi ngo bo ni sa'i snying po la sogs pa byang chub sems dpa' drug bsam par bya'o/ /gzugs rdo rje ni rnam par snang mdzad lta bu la rtsa ba'i phyag gnyis kyis sa'i snying po la 'khyud pa g.yas na me long bsnams pa/sgra rdo rje ni mi bskyod pa ltar sku mdog gnag pa la rtsa ba'i phyag gnyis kyis rdo rje 'dzin pa la 'khyud pa phyag gnyis kyis pi wang brdungs pa/ dri rdo rje ni rin chen 'byung ldan dang 'dra ba la phyag gnyis kyis nam mkha'i snying po la 'khyud pa phyag gnyis kyis tsan+dan la sogs pas yongs su gang ba'i dung phor bsnams pa/ro rdo rje 'od dpag tu med pa dang 'dra ba la phyag gnyis kyis 'jig rten dbang phyug la 'khyud pa phyag gnyis kyis bdud rtsi lngas yongs su gang ba'i thod pa bsnams pa/ reg rdo rje don yod grub pa dang 'dra ba la rtsa ba'i phyag gnyis kyis sgrib pa rnam par sel ba la 'khyud pa gnyis kyis gos bsnams pa/chos kyi dbyings rdo rje ni rdo rje sems dpa' dang 'dra ba la rtsa ba'i phyag gnyis kyis kun du bzang po la 'khyud pa phyag lhag ma rnams rang gi bdag po dang 'dra ba las gzhan du na pad+ma'i gnas su ut+pala'o/ / byang chub sems dpa' lnga po'i zhal dang phyag dang phyag mtshan rnams de bzhin gshegs pa lnga dang 'dra mod kyi/ 'on kyang sa'i snying po'i phyag g.yas na ni yid bzhin gyi nor bu'i rgyal mtshan no/ /sgrib pa rnam par sel ba'i phyag g.yas na ni zhi ba'i phyag rgya'o/ /kun du bzang po ni rdo rje sems dpa' dang 'dra'o//mig la sogs pa dang gzugs la sogs pa tha dad par so sor tshig le'ur byas pa las ma bshad kyang 'di dag shar sgo'i ngos nas brtsams te byang shar gyi mtshams kyi bar gyi gnas su bskor phyogs su sna tshogs pad+ma'i steng du zla ba'i dkyil 'khor la sems dpa'i skyil mo krung gis bzhugs par bsam par bya'o//ya mAn zhes bya ba la sogs pa la ya mAn+ta kr-ita ces brjod la gshin rje gshed dbyung bar bya ste/ de yang mtha' yas 'jigs 'od phyogs kun khyab dang ldan/ /zhes bya ba ni tshad med cing mi bzad par 'jigs pa'i 'od 'bar ba'i tshogs gang la mnga' ba'o//dus mtha' mi bzad sprin gyi dkyil 'khor mdog /ces bya ba ni bskal pa 'jig pa'i dus kyi sprin gyi mdog ltar mdangs nag po mnga' ba'o/ /thugs kyi rgyal po ni mi bskyod pa ste/ de dang sku mtshungs pa ni sku mdog gnag cing zhal lhag ma gnyis kyang de dang 'dra bar drag cing gtum pa'i gshin rje gshed ltar snang ba'i rigs kyi 'od dpag tu med cing tshad med par rnam par 'phro zhing 'byin par snang la/de rnams kyis gshin rje gshed kyi srog 'phrog par mdzad pa'i ngang tshul can yin pas gshin rjes mthar mdzad cing shin tu gdug pa'i sbrul 'jog po la sogs pas ral pa bcings pa mgul rgyan dang phyag gdub dang zhabs la sogs par byas pas sku lus kyi yan lag brgyan cing gdul dka' ba 'dul bar mdzad pa'i dpal dang ldan pa ste de nyid kyis na rang bzhin gyis dang po'i ngo bo nyid du gyur pa shar gyi sgor nyi ma'i dkyil 'khor la rnam par bsam par bya'o//pradz+nyAn zhes bya ba la sogs pa la pradz+nyAn+ta kr-ita ces bya ba la sogs pa'i sngags kyis khro bo gzhan gyis mi thub pa dbyung bar bya ste/ bla med 'od ces bya ba shes rab mthar byed lta bu'i 'od zer 'phro bar gyur pa dang sku'i rdo rje zhes bya ba zhal dang phyag dang phyag mtshan dang sku mdog rnam par snang mdzad dang 'dra mod kyi 'on kyang 'di'i phyag g.yon du 'khor lo bsam par bya'o zhes bdag gi bla ma bzhed do//gzhan yang drag po ni khyab 'jug 'dul bar mdzad pas shin tu drag cing gtum pa'o/ / pad+ma zhes bya ba la sogs pa la pad+mAn+ta kr-ita ces bya ba'i sngags kyis rta mgrin dbyung bar bya ste/ de yang pad+ma mthar byed lta bu'i 'od zer gyi tshogs rnams kyis phyogs kyi 'khor lo'i tshogs khebs shing gang gis g.yogs pa dang 'od kyis 'jig pa chen po'i dus kyi me ltar shin tu 'bar bar snang ba dang phyag la sogs pa gsung gi rdo rje dang 'dra zhes bya ba zhal dang phyag dang phyag mtshan 'od dpag tu med pa dang 'dra ba tshangs pa dang kun bged gzhon nu la sogs pa gdug pa du ma rnam par gnon par mdzad pa zhal shin tu 'jigs su rung ba dang ldan pa skye bo rnams 'jigs par byed pa'i ha ha zhes bzhad pa'i khro bo'i bzhad pa chen pos ti se la sogs pa'i ri bo 'dzin par byed pa dang /de na gnas pa'i thub pa'i dbang po kun bged gzhon nu la sogs pa 'jig rten du thub dbang du sgrar grags pa gang gis rnam par 'jig cing gsal bar mdzad pa nub phyogs kyi sgor bsam par bya'o//big+h+nAn zhes bya ba la sogs pa la big+h+nA n+ta kr-i ta ces bya ba'i sngags kyis bdud rtsi 'khyil pa dbyung bar bya ste/ dpa' bo ni tshogs kyi bdag po la sogs pa'i bgegs rnams 'joms par mdzad pa'o/ /dus mtha'i me ni bskal pa 'jig pa'i me ste/ de dang 'dra bar drag cing gtum pa'i khro bo rang dang 'dra ba'i tshogs spro bar mdzad pa dang de bzhin du 'phags pa'i zhal la sogs mi bskyod pa dang mtshungs zhes bya ba ni zhal dang phyag dang phyag mtshan sku mdog thugs rdo rje dang 'dra ba byang gi sgor bsam par bya'o//rnam par snang mdzad ces bya ba la sogs pa la gshin rje gshed kyi cod pan la ni rnam par snang mdzad do//shes rab mthar byed kyi cod pan la ni mi bskyod pa'o/ /pad+ma mthar byed kyi cod pan la ni 'od dpag tu med pa'o/ /bgegs mthar byed kyi cod pan la ni mi bskyod pa ste de ltar rim bzhin du bsam pa dang gshin rje gshed kyi phyag g.yas par tho ba/shes rab mthar byed kyi dbyug pa/ pad+ma mthar byed kyi pad+ma/ bgegs mthar byed kyi rdo rje yang rim bzhin du bsam mo/ /la la ni rdo rje zhes smos pas sna tshogs rdo rje yin par 'dod do/ /yang 'di dag go rims bzhin du ro langs ma dang gzhan gyis mi thub ma dang khro gnyer ma dang ral pa gcig ma ste lha mo bzhi dang snyoms par 'jug pas bzhugs par bsam par bya ba dang thams cad kyang g.yon brkyang ba'i gnas pas sna tshogs pad+ma'i steng na nyi ma'i dkyil 'khor la bzhugs pa/zhal mche ba gtsigs pa dbu skra gyen du brdzes pa/sma ra ser ba ljags bskyod pa zhal gdangs pa khro ba dang bcas pa bzhad pa de ltar yongs su rdzogs pa'i zhes bya ba la sogs pa la de ltar sngar bshad pa'i tshul gyis kun nas yongs su rdzogs pa'i dkyil 'khor gyi 'khor lo la kun du bzang po'i rnal 'byor par rnam par bltas nas dngos po thams cad kyis ni zhes pa sa'i snying po la sogs pas skye mched drug byin gyis brlabs pas rdzogs par bya zhing sku dang gsung dang thugs byin gyis brlab pa yang rdzogs par bya'o//snying po'i sngags ni ye shes sems dpa'i sa bon te/ de las byung ba'i 'od zer rnams kyis ye shes kyi dkyil 'khor gyi rnam pa can gyi de bzhin gshegs pa bkug ste bcug pa bcings nas dbang du bya ste yi ge dzaHmdog dmar po bsams/ de'i 'od zer gyis phyogs bcu na bzhugs pa'i de bzhin gshegs pa rnams bkug la hUM mdog nag pos dkyil 'khor gyi dbus su bcug ste baM mdog ser pos re re zhing sku dang gsung dang thugs rdo rje thugs ka dang lkog ma dang spyi bor byin gyis brlab pa byas la yi ge hoHmdog dkar pos dkyil 'khor ba thams cad kyi ye shes sems dpa' byin gyis brlab par bya'o//da ni bsrung ba'i cho ga gsungs pa ni shes rab thabs kyi zhes bya ba la sogs pa gsungs pa yin te don dam pa'i bdag nyid can shes rab dang thabs kyi ngo bo nyid don dam par mi 'gyur ba'i rang bzhin can gyi ting nge 'dzin rdo rje dang pad+ma mnyam par sbyor ba de las byung zhing skyes pa shin tu bde ba chen po nyams su myong ba'i ngo bor gcig tu mthar thug pa'i dkyil 'khor gyi 'khor lo bsams nas de nas de'i rjes la bsrung bar bya'o//gang gis she na gshin rje mthar byed la sogs pas bshad pa zhes smos te des ji ltar bya zhe na/gshin rje gshed la sogs pa'i khro bo rang gi lus las byung ba/ gzugs shin tu 'jigs su rung ba'i khro bo rnams kyis bgegs dang gdug pa thams cad rnam par bsreg par bsams la/ de dag nyid rdo rje lu gu rgyud du yongs su gyur nas des steng dang 'og tu sna tshogs rdo rjes byin gyis brlabs pa las byung ba'i rdo rje'i dra bar bsam par bya'o//de ltar srung ba'i 'khor lo bsgoms nas dbang bskur ba la sogs pa mchod pa'i cho ga gsungs pa ni/ rang gi snying pos zhes bya ba la sogs pa yin te/rang gi sngags kyis mchod yon la bzlas la tsan+dan dang gur kum dang ga bur la sogs pa dang me tog ste man+dA ra ba dang ut+pal dang ka ra bI ra dang dzA ti dang ma li ka la sogs pa'i me tog dang bcas pa'i mchod yon gyi snod bshams la dkyil 'khor ba'i lha thams cad la mchod yon gyis dbang bskur bar bya'o//'dis ni dar dpyangs kyi dbang bskur ba dang phreng ba'i dbang bskur ba la sogs pa yang ston pa yin no/ /de nas rang la byas pa lta bur zhes pa bdag nyid la byas pa dang 'dra bar snying po'i sngags kyis bskul ba'i nam mkha' la bzhugs pa'i sangs rgyas kyi tshogs kyi 'od zer gyi sgo las byung ba'i lha'i tshogs phyag na bdud rtsi lngas yongs su gang ba'i bum pa bsnams pas dbang bskur bar bya'o//de ltar cho ga 'dis kun nas mngon par mchod par bya'o/ /pad+ma zhes bya ba ni shes rab kyi gsang ba'i pad+ma'i nang du rang gi sa bon 'od rnams kyi zhes bya ba dzaH hUM baM hoH khaM raM zhes bya ba'i 'od zer rnams kyis gzugs rdo rje la sogs pa'i lha mo thams cad spyan drangs nas/yang dag byang chub yid kyi ngo bo yin/ /zhes bya ba zla ba'i dkyil 'khor gyi rnam pa can gyi byang chub kyi sems kyi 'od zer lnga pa'i dkyil 'khor pas so//de nas byang chub sems kyi dkyil 'khor de nyid shes rab ba spu re re las byung ba zhes bya ba ba spu'i bu ga'i tshogs re re las byung ba'i 'od zer rnam pa sna tshogs te/ nag po dang dkar po dang ser po dang dmar po dang ljang gu'i 'od zer 'phros pa'i tshogs rgya chen pos nam mkha'i khams kyi gtos ma lus par kun nas yongs su khyab par gyur la/de bas na blo dang ldan zhing rnal 'byor la mkhas pas rab tu spro bar bya'o/ /ji ltar spro bar bya zhe na 'od kyi zhes bya ba la sogs pa ste/ ba spu'i tshogs re re'i khung bu las nges par byung ba'i 'od kyi/rtse mo las skyes pa'i gzugs rdo rje la sogs pa'i lha mo rnams kyis rgyal ba'i dbang po ste/ rnam par snang mdzad la sogs pa'i dkyil 'khor pa rnams legs par mchod par bya'o/ /ji lta bus she na gang gi sku'i yan lag dri ma med pa'i 'dzam bu'i chu bo'i gser dang nor bus spras pa'i do shal dang dpung rgyan dang 'og pag dang phyag gdub dang zhabs gdub la sogs pa'i rgyan rnams kyis brgyan cing sbud pa gang yin pa de me long dang pi wang ste dgu bo'i rgyud mangs dang dri ste ga pur gur kum tsan+dan gla rtsi bzhi po cha mnyam gyis yongs su gang ba'i dung phor dang ro'i snod de bdud rtsi lngas yongs su gang ba'i thod pa dang gos te rgya yul gyi dar mdog bzangs la sogs pa dang chos 'byung ba ste/chos 'byung ba'i phyag rgya dang sogs pa zhes bya bas gdugs dang rgyal mtshan la sogs pa'i mtshan ma gzhan dag rim gyis bsnams pa'i phyag rnam pa gnyis dang rnam par sgeg pa dang bcas shing rol pa'i mdangs dang ldan pa'i gzugs brnyan byung ba me long la snang ba'i 'od kyi snang ba ste/rang gi lus kyi 'od rnams kyis sprul pa'i mchod pa me tog dang bdug spos dang mar me dang dri dang gdugs dang rgyal mtshan dang ba dan la sogs pa'i mchod pa'i sprin sna tshogs pa de rnams sgyu ma la sogs pa lta bu ste sgyu ma dang dri za'i grong khyer dang brag ca dang chu zla lta bur so sor snang ba ni dngos po rnams don dam par sgyu ma la sogs pa so sor yang dag par rig cing shes pa ste des 'jig rten pa'i ngo bo rig cing lta ba la mkhas pa de kho na nyid du na dngos po med pa'o//rtog pa ma lus zhes bya ba la sogs pa la so so rang gis rig pa'i mchog tu dga' ba'i bde ba chen po'i ngo bo rab tu bskyed pa'i rgyur gyur pas so/ /gzugs la sogs pa zhes bya ba ni gzugs dang sgra dang dri dang ro dang reg dang chos kyi dbyings rdo rje zhes bya ba mchod pa'i lha mo rnams dang de gcig pur ma zad kyi de bzhin du phyi'i dri ma la sogs pa ste/dri dang me tog dang bdug spos dang mar me dang lha bshos dang dar dang rin po che la sogs pas yang dag par mchod par bya'o/ /de ltar tha dad rtog pas nges grol bya//zhes bya ba ni mchod par bya ba dang mchod pa po dang mchod pa nye bar mi dmigs pas 'khor gsum yongs su dag pas yang dag par mchod la/ 'di ltar nga rgyal bskyed par bya ste/ oM zhes bya ba la sogs pa la ngo bo nyid kyis de bzhin gshegs pa thams cad kyi 'jig rten las 'das pa'i rdo rje'i mchod pa'i bdag nyid ni bdag go zhes brjod la snying gar dkyil 'khor gyi 'khor lo bsam par bya'o//da ni bstod pa gsungs pa ni sgra'i yul rnams zhes bya ba la sogs pa yin te/ brag ca'i sgra 'dra zhes bya ba ni snying gar gnas pa'i dkyil 'khor la ye shes sems dpa'i sa bon las byung ba'i 'od zer gyi sgo las de bzhin gshegs pa lnga po lta bu'i sangs rgyas rnams bsgoms la phyi dang nang gi bdag nyid can thams cad sems nyid yin par yongs su brtags la sems nyid kyis de bzhin gshegs pa lnga la bstod par bya'o//chos kyi dbyings rnam par dag pa'i ye shes kyi ngo bo nyid ni mi bskyod pa ste/rdo rje dbyings kyi tshul gyis bstod pa ni/ mi bskyod pa ni zhes bya ba la sogs pa gsungs pa yin te/ kye bcom ldan 'das rdo rje mi bskyod pa rang bzhin gyis 'gyur ba med pa thugs kyi mthus chos kyi dbyings kyi ye shes dang shes bya ma lus pa'i ngo bo nyid yin no//rdo rje dbyings ni ma lus pa'i ye shes kyi gzhir gyur pa'i sku'i ngo bo nyid do/ /mkhas pa chen po zhes bya ba ni 'gro ba thams cad so sor rtogs par byed pa'i gsung gi ngo bo nyid do/ /rdo rje gsum mchog ni rnam par dag pa'i sku rdo rje la sogs pa nyid kyis dam par gyur pa'o//dkyil 'khor gsum ni sku'i dkyil 'khor la sogs pa'i tshul gyis 'gro ba ma lus pa thams cad kyi ngo bor gyur pa'o/ /rdo rje dbyings ni thos pa la sogs pas bsgrub par bya ba'o/ /phyag 'tshal lo zhes bya ba ni rnam pa thams cad du bdag nyid kyi dngos po dbul ba dang khyed kyi sku mngon par 'dod pas khyod la rab tu 'dud par bgyid do zhes bya ba'i don to//rnam par snang mdzad ces bya ba la sogs pa la kye bcom ldan 'das rnam par snang mdzad ye shes kyi snang ba ma lus pa'i ngo bo nyid me long lta bu'i ye shes kyi dga' ba che ba sgrib pa thams cad las nges par grol bas rdo rje zhi ba'o//zad pa dang mi skye ba'i tshul gyis bya ba byas pas dga' ba chen po ste/ mngon par 'dod pa'i don grub pas dga' ba tshad med pa brnyes pa'o/ /rang bzhin 'od gsal zhes bya ba ni glo bur ba'i dri ma dang bral bas na 'dus ma byas pa'o//mchog gi mchog ces bya ba ni rnam pa thams cad du chu dang bral bas dam pa'i dam par gyur ba'o/ /ston pa rdo rje ni 'gro ba thams cad kyi rten du gyur pa ste de la phyag 'tshal lo zhes pa'o/ /rin chen rgyal po zhes bya ba la sogs pa la kye bcom ldan 'das rin chen rgyal po rab tu dang ba'i 'od 'bar ba mnyam pa nyid kyi ye shes can rab tu zab pa tshad med pa'i bsam gyis mi khyab pa'i yon tan thams cad kyi spyod pa can rnam pa thams cad du mi phyed pas rdo rje nam mkha'o//rang bzhin gyis nyes bas ma gos pas na dri med nam mkha'o//nyes pa thams cad zad pas na rang bzhin dag pa'o/ /slar yang nyes pa mi 'byung bas gos pa med pa'o/ /rgya che ba'i ngo bo nyid du gyur pas rdo rje'i sku ste gdul bya skal ba ji lta ba bzhin du yang dag par ston pa'i sku mnga' ba khyed la phyag 'tshal lo zhes pa'o//rdo rje mi 'chi zhes bya ba la sogs pa la kye bcom ldan 'das rdo rje mi 'chi ba tshad med pa'i ye shes kyi ngo bo nyid kyi so sor rtog pa'i ye shes can nus pa thams cad kyis mi thub bas na rgyal po che'o/ /mi rtog ces ba ni gdul bya ji lta ba bzhin du chos rnams nges par ston par mdzad pa'o//nam mkha' rdo rje 'dzin zhes bya ba ni tshig dang tshig can gyi 'dzin pa la sogs pa thams cad las nges par grol ba'o/ /'dod chags pha rol phyin pa brnyes/ /zhes bya ba ni 'gro ba rnams la so sor gzigs nas chos ston pa la sogs pas sems can thams cad mgu bar mdzad pa'o//rdo rje'i gsung ni yon tan dang 'dra bar mtha' yas shing tshad med pa'i gsung dbyangs nges par sgrogs pa la phyag 'tshal lo zhes pa'o/ /don yod rdo rje zhes bya ba la sogs pa la kye bcom ldan 'das don yod rdo rje sgrub pa po'i mngon par 'dod pa ji ltar brtsam par bya ba grub pa'i ye shes kyi rdzogs pa'i sangs rgyas te thams cad mkhyen pa nyid brnyes par mdzad pa'o//bsam pa thams cad rdzogs mdzad pa/ /zhes bya ba ni yid bzhin gyi nor bu dang / dpag bsam gyi shing la sogs pa'i ngo bo nyid lta bu'o/ /rang bzhin dag pa nyid las byung //zhes bya ba ni sngags dang phyag rgya dang ting nge 'dzin dang gzugs dang thabs gzhan yang rang bzhin dag par gyur pas 'gro ba'i don thob par mdzad pa'o/ /rdo rje sems dpa' zhes bya ba ni 'tshang rgya ba nyid kyis thogs pa med pa'i thugs thams cad dang ldan pa la phyag 'tshal lo zhes pa'o//de nas don dam par kun du bzang po nyid yin pas thugs thams cad ni thams cad kyi bdag nyid yin pas lha re re zhing bstod pa ma byas pa yin no/ /'dod chags dang zhe sdang dang gti mug dang nga rgyal dang phrag dog rnam par dag pa'i ngo bo nyid dang ye shes lnga'i rang bzhin no//de bzhin gshegs pa lnga yin te/ de yang / gang gi rang bzhin chags sdang rnam bral yang / /gdul bya'i dbang gis khro la khro ba dang / /'dod chags can la chags pa can ltar ston/ /byang chub mchog gnas de la phyag 'tshal lo/ /zhes ji skad bshad pa lta bu'o//da ni 'bar ba'i oM gyis zhes bya ba la sogs pas bdud rtsi myang pa bshad par bya ste/ bdud rtsi lnga po des snying ga'i zla ba'i dbus su chud pa'i zla ba'i dkyil 'khor la zhugs pa'i dkyil 'khor ba rnams des tshim zhing mgu bar bya'o/ /de yang yi ge oM 'bar zhing 'od dang ldan pa'i gzugs can des byin gyis brlabs la rlung dang me'i dkyil 'khor la gnas pa thod pa'i dbus na bdud rtsi lnga po gnas pa rlung dang me'i dkyil 'khor dag gis rab tu sbar bas gong bu dmar po lta bur bsams la yi ge a yis khrag zhu ba lta bu'i rang bzhin la oM gyis bdud rtsi dkar por byas nas oM AHhUM zhes bya ba'i yi ge gsum las byung ba'i rdo rje yongs su gyur pa las sangs rgyas lngas byin gyis brlabs par bsams la rang gi sa bon gyis ye shes lnga'i bdud rtsi'i rang bzhin du byas la hUM las byung ba'i rdo rje'i 'od zer gyis bkug pa'i lces snying ga'i zla bar chud pa'i dkyil 'khor gyi 'khor lo des tshim par bya'o//de yang / zla nyi rdo rje chu dang dri mar me/ /thod pa la gnas me dang rlung dag gis/ /legs sbar lcags sreg gong bu lta bur ni/ /hUM gi sa bon dag gis rnam par bsgom/ /yi ge a brjod der ni phab pa dang //cung zad bro zhing khrag 'drar rnam bsams la/ /oM ma ma raM ma ma rang gi sa bon gyis/ /sangs rgyas phab ste byin brlabs byang chub sems/ /rab dkar hUM gi rdo rje lce yis snying gar gnas/ /rang gi 'khor lo ma lus des tshim bya/ /zhes bshad pa yin no/ / 'di ni bsgom pa'i lam gyi ngo bo dkyil 'khor gyi mchog ces bya ba'i ting nge 'dzin to/ /de yang dang por 'byin pa la sogs nas bdud rtsi myang ba'i mthar thug pa mdor na/ ting 'dzin 'khor lo'i rgyal po mchog tu yang dag bshad/ /ces ji skad 'byung ba lta bu'o/ /da ni las kyi rgyal po'i mchog thob pa'i 'bras bu'i spyod pa'i rang bzhin bshad pa ni snying po'i 'od zer zhes bya ba la sogs pa yin te/snying po'i 'od zer dpag med kyis/ /zhes pa ye shes sems dpa'i sa bon las byung ba'i 'od zer rnams kyis sprul pa'i thub pa'i mchog sangs rgyas dang byang chub sems dpa' mi shes pa thams cad kun du nges par gsal ba'i sems brtan par byas la sangs rgyas dang byang chub sems dpa' des 'gro ba ma lus pa rdzogs pa'i sangs rgyas su byas la rang gi gsang sngags kyi nang du chud par snang bar byas te rang gi sems la dbang du gyur pas de ltar sprul pa yin pa'i phyir ye shes la ni mi shong ba yod pa ma yin no//de ltar ye shes kyi phyag rgya dang sbyor bas sems brtan par byas nas/ don dam pa'i bdag nyid can gyi phyag rgya chen po'i rnal 'byor bsgom par gsungs pa yin te/shes rab thabs ni mnyam sbyor ba/ /bsgom pa'i rnal 'byor pa mchog gis/ /phyag rgya che dang mnyam sbyor ba'i/ /bsgom pa rgyal bas gsungs pa yin/ /zhes bshad pas/ re zhig rim pa 'dis dang por shes rab bsgom par bya'o/ /ci gzugs la sogs pas ji ltar byis pas yongs su brtags shing mthong ba rnams ji ltar rnam par shes pa'i rang bzhin yin zhing don dam par stong pa yin nam 'on te kun rdzob tsam gyi rang bzhin can yin zhe na/de gsungs pa ni gzugs la sogs pa zhes bya ba la sogs pa yin te/ gzugs su rung bas na gzugs te/kha dog dang dbyibs kyi dbye bas rnam pa gnyis so/ /kha dog ni sngon po la sogs pa'o/ /dbyibs ni mnyam pa dang mtho ba dang dma' ba la sogs pa'o/ /sogs pa'i sgras ni tshor ba dang / 'du shes dang / 'du byed dang / rnam par shes pa bsdu ba'o//gzugs la sogs pa gang yin pa 'di dag ni thog ma med pa'i dus yin gyi ma rig pa'i bag chags kyi mig ser gyis nye bar bcom pa'i mig gis rtog pa mang po'i bzos bsgrubs pa las snang ba yin pa de'i rnam pa zhes pa gzugs kyi rang bzhin ni ngo bo nyid stong pa yin te/ bcom ldan 'das kyis rab 'byor gzugs ni gzugs kyi ngo bo nyid kyis stong ste/ de'i rang bzhin de yin pa'i phyir ro zhes ji skad gsungs pa de lta bu ste/ tshor ba la sogs pa yang de bzhin no/ /gzhan yang / gzugs ni dbu ba rdos pa 'dra/ /tshor ba chu bur dag dang mtshungs//'du shes smig rgyu 'dra ba ste/ /'du byed rnams ni chu shing bzhin/ /rnam shes sgyu ma lta bu'o zhes/ /de nyid gzigs pas bka' stsal to/ /zhes ji skad gsungs pa lta bu'o/ /mngon sum gyi shes pas mthong ba yin no/ /ngo bo nyid kyis stong pa ji ltar yin zhe na de ni ma yin te/so sor snang ba gang yin pa de thams cad ni bden pa ma yin te/ dper na rab rib can gyis zla ba gnyis la sogs pa mthong ba dang 'dra'o/ /'on te 'khrul pa med pa'i shes pa ni mngon sum yin par bshad pas rab rib can gyis zla ba gnyis la sogs pa ni mngon sum ltar snang ba yin gyi/de mngon sum ma yin te/ mngon sum ltar snang rab rib bcas/ /zhes bshad pa yin no/ /gal te de skad zer na de lta na ni de kho na nyid yongs su shes pa yin pas thams cad yang dag pa'i rnal 'byor par 'gyur te/ tshu rol mthong ba can du ni mi 'gyur te//yang dag pa ji lta ba bzhin yongs su shes pa'i phyir ro/ /de yang / gal te ji ltar grags pa 'di/ /chos rnams ngo bo ji bzhin yin/ /yang dag don mthong grol 'gyur bas/ /'gro ba thams cad cis mi grol/ /zhes ji skad bshad pa lta bu'o/ /de la slob dpon gyis mngon sum ni rnal 'byor pa dang cig shos kyi ste rnam pa gnyis su bshad pas tha snyad tsam kho nar rmi lam la sogs pa dang 'dra bar ji ltar shes pa'i don ma 'khrul pa tsam gang yin pa de la 'khrul pa med pa zhes bshad do//de nyid kyis ni/ gzung ba rnams kyang cung zad yod min la/ / zhes bya ste/ sems de'i gzung bar bya ba gzugs la sogs pa de dag kyang yod pa ma yin te/ de gnyis gzung ba dang 'dzin pa po'i dngos por ma grub pa'i phyir ro/ /tshad ma gnyis nyid yin pas mngon sum du 'dod par mi 'thad kyang rjes su dpag pas yod par 'thad do zhe na der yang /gzhan pa'i 'brel pa'i yid kyang mthong ba med/ /ces bya ba smras te/ shes pa don dang lhan cig pa'i rtags dang / rtags can gyi 'dzin pa med pas gzhan pa'i rjes su dpag pas kyang ma yin no zhes bya ba'i tha tshig go/ /'brel pa ni gnyis su gnas te/ de'i bdag nyid dang /de las byung ba'i mtshan nyid can no/ /de la re zhig de'i bdag nyid can ni ma yin te thag ring ba dang / nye ba la sogs pa'i dbye bas gsal ba dang mi gsal ba'i shes pa mi 'byung ste/ shes pa dang yul gcig tu gyur na de lta bu'i rnam pa mi srid do/ /de las byung ba'i mtshan nyid can yang ma yin te/stan khra bo la sogs pa'i shes pa yang sna tshogs pas/ rnam pa dang 'dra ba'i shes pa'i bye brag tha dad par thal bar 'gyur na phyogs rgya che bas na sna tshogs par gnas pa'i yongs su 'dzin pas shes pa de ltar skye ba yod pa ma yin pas gang gis sna tshogs pa nyid du bsgrub par bya ba'i phyir shes pa du ma skye bar rtog pa legs pa ma yin te/gzugs med pa ni yul na gnas pa mi srid pa'i phyir ro/ /de yang / gang phyir de yod nges shes pa'i/ /shes pa don dang lhan cig nyid/ / de yi bdag nyid de las byung / /'brel pa gang yang yod ma yin/ /zhes ji skad bshad pa lta bu'o/ /'dir phyi rol gyi don yod par smra ba la sogs pas smras pa/ shes pa ni dga' ba dang / yongs su gdung ba la sogs pa'i rang bzhin can dbyibs med par nga rgyal gyi gnas su gyur pa nang na gnas pa nyams su myong ba yin pas/sngon po la sogs pa ni dga' ba dang yongs su gdung ba la sogs pa'i rang bzhin ma yin zhing dbyibs la sogs par ma grub pa yang ma yin pa dang / nga rgyal gyi gnas kyang ma yin pas de'i phyir shes pa las phyi rol du gyur pa nyid du nyams su myong ba yin pas nyams su myong ba'i dbye ba yod pa'i dngos po la dbye ba med par sems dang bcas pas byar ji ltar rung zhe na/de la yang bde ba zhes bya ba la sogs pa smras pa yin te/ bde sogs zhes pa/ bde ba dang / sdug bsngal la sogs pa'i rang bzhin can 'dzin pa po shes pa de/gzugs la sogs pa 'dzin pa'i bya ba'i khyad par 'dzin pa'i mtshan nyid can 'ga' yang yod par ma mthong ngo / /cig car rang rgyud du snang ba gnyis la/ cung zad ni gzung bar bya ba yin la/ cung zad ni 'dzin pa po yin no zhes bya ba'i so sor nges pa'i rgyu yang ma mthong ngo //de bas na cig car dus mtshungs par yul dang lhan cig shes par gyur cing / yongs su gcod par byed pas na 'dzin pa po ma yin pa ni/ gzugs la sogs pa dang 'dra ste/ ji ltar gzugs 'dzin pa po ma yin pa de bzhin du/shes pa yang 'dzin pa po ma yin no/ /de yang rab 'byor chos rnams kyis chos rnams mi shes so zhes ji skad rgya cher gsungs pa lta bu'o/ /de ci'i phyir zhes rtogs na/ dkar po zhes bya ba la sogs pa smos te/ dkar po la sogs pa gang zhig sngar mthong ba nyid dus tshod gzhan dag tu mi mthong ste/ci'i phyir zhe na/ skad cig ma yin pas sdod pa med pa nyid yin pa'i phyir/ 'das pa dang / ma 'ongs pa dang / da ltar byung ba'i skad cig ma rnams ni mtshan nyid tha dad pa yin pa'i phyir ro/ /mthong ba nyams su myong ba las tha dad pa yod par bsgrub pa yang de la yod pa ma yin no//de ci'i phyir zhe na/ phan tshun 'gal bas mi mthun pa gcig la gcig lhan cig gnas pa ma yin pa'i phyir te/ ji ltar bde sogs zhes pa bde ba dang sdug bsngal dag mi mthun pa yin pa de bzhin du/ sngon mthong ba dang / phyis mthong ba dang /'di dag kyang rtag tu ngo bo nyid kyis 'gal ba yin no/ /gzung ba'i rnam par snang ba gang yin pa 'di dag kyang gcig dang du ma nyid du mi 'thad pas rang gi ngo bor med pa nyid yin pa de ni thog mtha' zhes bya ba la sogs pa smos pa yin te/ gzung ba'i rnam par so sor snang ba gang yin pa de ni gcig ma yin no//ci'i phyir zhe na/ dngos po de la thog mtha' la sogs pa'i bye brag snang ba dang / don byed pa'i nus pa'i dbye ba yang mthong bas gang la phyogs kyi cha yod pa de ni gcig pa nyid mi rigs pa zhes bya ba'i tshul gyis so/ /rang bzhin gcig dang bral bas du ma yang ma yin no//dkar po la sogs pa so sor snang ba'i cha dang ldan pa rnams la phra rab tu brtags pa'i shes pa yang rigs pa ma yin te/ phra rab rnams kyi rang bzhin gzung du med pa'i phyir/ mngon sum du 'dzin par khas mi len la de yang phra rab rnams ni yan lag med pa cha shas med pa yin te/yan lag med pa'i phyir cha shas med pas// rdul phra rab gzhan dang 'dus pa dang bral ba yin no/ /gal te yod na shar la sogs pa'i mdun rgyab dang / logs gnyis dang 'og ste phyogs drug tu gnas pas phra rab drug 'dus pa yin par 'thad la/'dus pa des na cha shas drug 'gyur te/ /drug gis cig car sbyar bas na/ /phra rab rdul cha drug tu 'gyur/ /zhes bshad pa'i phyir ro/ /de bas na rdul phra rab ma grub pas phra rab bsags pa las gyur pa'i sa'i dkyil 'khor la sogs te/ gling bdun la sogs pas rnams bsags par brtag pa yang 'thad pa ma yin te/de bas na gzung bar bya ba'i rang gi ngo bo yod pa ma yin no/ /gal te de lta yin na 'gro ba 'di dag ji ltar snang ba yin zhe na/ de'i phyir de bas 'dzin pa zhes bya ba la sogs pa smos te/ de bas zhes pa de'i phyir gcig dang du ma'i rang bzhin du mi 'thad pa'i phyir/'dzin pa po la sogs pa dang bral bas gzung ba dang / 'dzin pa med pa'i phyir 'gro ba 'di dag ni rang rgyud can yin gyi/ dbang phyug la sogs pa gzhan las skye ba ni ma yin no/ /rang rgyud rnam pa thams cad du ni ma yin te/ kun rdzob tu rgyu dang rkyen las byung ba'i phyir ro//rgyu med par gyur na ni rtag tu yod pa'am/ med pa la sogs pa nges par 'gyur ba'i phyir ro/ /gzugs sogs ni tshor ba dang / 'du shes dang / 'du byed dang / rnam par shes pa'i rang bzhin ni rtags pa'i ngo bo nyid yin te/ skar ma rab rib mar me dang / /sgyu ma zil pa chu bur dang //rmi lam glog dang sprin lta bu/ /'dus byas de ltar blta bar bya/ /zhes ji skad gsungs pa lta bu'o/ /dri za'i grong khyer dag dang mtshungs pa yin/ /zhes bya ba ni kun rdzob kyi bden par slu zhing snying po med pa nyid du blta bar bya ste/ kun rdzob tu ni thams cad yod/ /dam pa'i don du yod ma yin//zhes bshad pa lta bu'o/ /gal te de lta yin na 'khor ba dang mya ngan las 'das par ji ltar rnam par gzhag ce na/ de'i phyir bdag dang bdag gi zhes bya ba la sogs pa smos te/ bdag ni nyon mongs pa can gyi yid nga rgyal can gyi rang bzhin can bdag med pa bzhin du bdag dang bdag tu rlom sems pa'o//bdag ni bu dang chung ma dang nor la sogs pa'o/ /de gnyis kyi rgyun ni rgyun du 'jug pa gang yin pa ste 'di'i 'jug pa ni phan 'dogs pa dang gnod pa'i dngos po'i bag chags kyi mtshams sbyor ba'i dbang gis 'di ni bdag yin pas 'di dag dgos so zhes log par rtogs pa'i tshul bzhin ma yin pa'i yid la byed pas/mthong ba nyid las ni 'khor bar rnam par bzhag la dag pa'ang phyin ci log de med pa'i rang gi ngo bo tsam gyis bdag dang bdag gi rnam par rtog pa spangs pas ni mya ngan las 'da' ba yin te/ rnam par rtog pa ma gtogs par/ /'khor ba zhes bya 'ga' ma mchis/ /de bas rnam rtog rnam bsal bas/ /khyed ni rtag tu mya ngan 'das/ /zhes ji skad bshad pa lta bu'o/ /de bas na bdag dang bdag gir lta ba las ldog par dor ba dang blang bar bya ba'i dngos po dang bral bas 'khor ba'i gnyen por gyur pa ni mya ngan las 'das pa zhes bya'o//de ltar na ni 'khor ba med pas mya ngan las 'das pa yin pas dngos por med do zhes rtogs pas de'i phyir zhi ba dang ni zhes bya ba la sogs pa smos te/ bcom ldan 'das kyis 'khor ba la skyo ba bskyed par bya ba'i phyir mya ngan las 'da' ba ston par mdzad pa yin gyi/'khor ba dang mya ngan las 'das pa gnyis la ni dbye ba gang yang med do/ /de yang chos nyid kyis ni zhes pa don dam pa'i ngo bo nyid du yin gyi kun rdzob tu ni ma yin te/ gzhan du na chad pa nyid du 'gyur ro/ /de yang slob dpon klu sgrub kyi zhal snga nas kyis/mya ngan 'das pa dngos med min/ /zhes bya ba dang / de bzhin du/ gal te mya ngan 'das dngos na/ /mya ngan 'das pa 'dus byas 'gyur/ /dngos po 'dus byas ma yin pa/ /'ga' yang ji ltar yod ma yin/ /zhes ji skad bshad pa lta bu'o//'di nyid du 'thad pa bsgrub pa bstan pa'i phyir gang phyir gzung ba zhes bya ba la sogs pa smos te/ gang gi phyir don dam par gzung ba dang 'dzin pa'i ngo bo nyid dang bral ba yin par 'khor ba dang mya ngan las 'das pa dag thams cad du lung dang rigs pa dag gis rtag tu grub pa de'i tshe/thams cad kyang ci yang yod pa ma yin gyi/ kun rdzob tu ni yang dngos po de dag so sor snang ba'i rang bzhin gyis kun du rtog pa las gud na med de so sor snang ba'i dngos po rnams med pa nyid du sems dang ldan pa su zhig 'gog par byed/ 'on kyang rnam par dpyad na yod par mi 'thad do//de ltar rnam par 'jog pas rang gi sde pas brtags pa'i rtsod pa'i yang go skabs med par 'gyur ro/ /de dag 'di skad ces zer te/ gal te 'di dag thams cad stong pa nyid yin na de'i tshe/ bag chags pa sgro ba dang bsgo bar bya ba dang bsod nams dang sdig pa'i chos bstan pa dang las dang 'bras bu la stong pa nyid du smra bas skur ba btab par 'gyur ro zhe na/de ni slob dpon klu sgrub kyi zhal snga nas kyis thams cad kyang lan btab pa yin te/ las rnams med pa yang ma yin te/ dge ba dang mi dge ba'i 'bras bu rmi lam tsam du yang yod par mthong ste/phung po lngas bsdus pa'i sdug bsngal des ni rmi lam yang bsdus pa yin no zhes bya ba la sogs pa de bzhin du rgyu rnam par dag pa las 'bras bu yang rnam par dag pa 'byung ste/ yang dag pa'i lta ba las byung ba'i tshul khrims la sogs pa ni rnam par dag pa yin no zhes bya ba la sogs pa dang /gang la stong pa nyid rung ba/ /de la thams cad rung bar 'gyur/ /zhes bya ba la sogs pa ji skad bshad pa lta bu'o/ /de ltar don dam par rnam par dpyad na phyi yul med pas sems las gzhan pa 'ga' yang yod pa ma yin pas/ rnam par rtog pa'i bag chags kyi rang bzhin la ma gtogs pa bdag ces bya ba gud na logs shig tu ci yang yod par mi 'thad do/ /de ltar rim pa 'dis phyi'i don med pa'i sems tsam la gnas nas de yang gcig dang du ma'i rang bzhin dang bral bas 'thad pa ma yin no/ /de yang /dngos po gang gang rnam dpyad pa/ /de de gcig tu yod min pa/ /de la du ma'ang yod ma yin/ /gcig dang du ma ma gtogs pa/ /rnam pa gzhan dag yod ma yin/ /zhes ji skad bshad pa lta bu'o/ /'on te 'di skad cas shes pa nyams su myong bar ni grub pa yin la nyams su myong ba grub pa nyid kyis na dgag par dka' ba yin te de bkag na thams cad kyang dgag par byas par 'gyur na shes pa de ni ma rig pa'i bag chags kyi stobs kyis sngon po la sogs pa'i gzugs su snang ba yin la don dam par ni shel sgong dag pa ltar snang ba cha shas med pa yul na mi gnas pa sngon po la sogs pa'i rang bzhin sna tshogs su snang ba med pa yin no zhe na/de ni tshig tsam du zad do/ /nus pa thams cad dang bral ba de ni nam yang don dang lhan cig 'brel par ma mthong ste/ de med na ni shes de yang / /rnam pa med par nyid kyis 'gyur/ /shel sgong dag pa 'dra ba yi/ /shes pa rab tu tshor ba med//ces ji skad bshad pa lta bu'o/ /'di nyid ni slob dpon chos kyi grags pa yang bzhed pa nyid yin te/ tshad ma rnam 'grel las/ ji lta ji ltar don rnams dpyad/ /de lta de ltar rnam dben 'gyur/ /de bas gnyis po stong nyid gang / /de nyid 'dir yang yang dag nyid//ces bya ba la sogs pa ji skad bshad pa lta bu'o/ /kho bo cag shes bya nang gi yin par smra ba rnams la zhe 'gras nas smra ba ma yin mod kyi/ 'on kyang slob dpon sangs rgyas ye shes kyi zhal snga nas kyis bdag bsgrub pa la 'jug pa las mang du tshar bcad par mdzad la rtsa ba'i rgyud las kyang tshul 'di nyid ltar ston te/kun rdzob tu ni bstan pa mtshar/ /zhes bya ba dang / skye ba med pa'i sbyor ba yis/ /skye ba 'di ni bstan pa yin/ /zhes bya ba la sogs pa gsungs pa yin no/ /dz+nyA na kI rta'i de kho na nyid la 'jug pa las phyag rgya chen po bsgrub pa la yang tshul 'di nyid yin te/sems tsam la ni gnas nas su/ /phyi rol don la mi rtag go/ /de bzhin nyid la gnas nas kyang / /sems tsam las kyang 'da' bar bya/ /zhes ji skad bshad pa lta bu'o/ /de ltar rim pa 'di dang 'og nas bshad pas kyang shes rab bsgom par bshad par bya'o//gang zhig gzugs la zhes bya ba la sogs pa smos pa yin te/ rang bzhin gang rnal 'byor pas rang gis te bdag nyid kyis shes shing kun du bzang po la sogs pa'i bsgom pas mngon sum du byed pa gang yin pa de'i don dam par rang bzhin gyis 'od gsal ba gcig dang du ma la sogs par yongs su brtags pa dang bral ba/yid bzhin gyi nor bu ltar sems can thams cad kyi dgos pa byed pa la shin tu byang ba de nyid bsgom par bya ba dang sgom pa po rnam par rtog pa dang bral bas gcig tu 'dres par gyur pa'i rang bzhin gang yin pa de ni thams cad kun du bzang po dang 'dra bar bye brag med pa'i blo yod pa ste/chos kyi dbyings las ma gtogs pa'i/ /chos ni 'ga' yang med pa'i phyir/ /rnal 'byor pas dngos po thams cad bye brag med par blta bar bya ste/dngos po gcig la gang mthong ba/ /de ni kun la mthong bar 'dod/ /gcig gi stong nyid gang yin pa/ /de ni kun gyi stong nyid yin/ /zhes ji skad bshad pa lta bu'o/ /de nyid kyi phyir snang ba gyur pa'i zhes bya ba la sogs pa smos te/ snang zhing so sor mngon pa'i yul gzugs la sogs pa da ltar yod pa gang yin pa dang de las gzhan pas 'das pa dang ma 'ongs pa rtog pa mang po'i bzos bsgrubs pa cung zad gang yin pa de dngos po de rnams brtags pa des rnam par dpyad pa na phan tshun bzlog pa yin pa'i phyir dbye ba yod pa yin la/don dam par ni de dang bral bas brtag pa yang med pa'i phyir tha dad par gyur pa cung zad kyang yod pa ma yin te/ dngos po rnams ni brtags pas dbye ba yod pa yin gyi/ don dam par ni dbye ba 'ga' yang yod pa ma yin no zhes bya ba ni don gyi mdo yin no/ / de ltar rim pa 'dis shes rab kyi 'gro ba rnams dngos po med par rnam par dpyad na phyag rgya chen po'i sbyor ba dang ldan par 'gyur ro/ /gang 'di spros pa thams cad dang / /tshig gi 'ang gnas ma gyur rang bzhin/ /de ni thugs kyi rdo rje yis/ /shes rab ces ni yongs su bshad/ / byang chub sems dpa' rnams kyi thabs/ /'gro la snying rje chen po yin/ /ji ltar mnyam par sbyor zhe na/ /gcig pu kho na dbye med bcas/ /de yi bsgom pa'ang de bzhin te/ /bzlog pa yis ni rnam par phye/ /zhes bya ba'o/ /de la man ngag ni 'di yin te/ rnal 'byor pas dang po kho nar rang gi lhag pa'i lha'i rnal 'byor du skad cig gis bskyed la 'gro ba thams cad de bzhin gshegs pa lnga'i bdag nyid du rnam par bsgoms la dngos po thams cad kyi bdag nyid du gyur pa dang /snying rje chen po mngon du byas nas dngos po dang dngos po med pa dang bdag gi ngo bo dang gzhan gyi ngo bo la sogs pa'i yid la byed pa rnam par bsal bas yid thams cad la yang dag par bsdus te/ci la yang mi bsam par bya'o/ /de de ltar ci la yang mi sems pa na sngon chad bla ma yun ring du bsnyen bkur byas pa las bla ma'i bka' drin gyis rtogs pa'i bcom ldan 'das yum shes rab skye bar 'gyur bas 'jal bar byed pa dang gzhal bar bya ba dang 'bras bu'i rnam par dbye ba dang bral ba rang snang ba'i ngo bo nyid spros pa med pa nyid kyis na spros pa'i bdag nyid can gyi 'khor ba'i sdug bsngal gyi tshogs kyi rang bzhin dang bral ba'i phyir/mchog tu dga' ba'i ngo bo nyid me long lta bu'i sbyor bas rtogs pa dang / de'i mthus kyi ma'o gti mug gi nus pa gang gis sems can 'di rnams mya ngan las 'das pa'i rang bzhin can yin du zin kyang bdag nyid kyis mi shes na ji ltar na bdag gis 'di dag khong du chud par bya zhes rnam par bsams nas sems can ma lus pa de'i bdag nyid kho nar bsams na dmigs su med pa'i rang bzhin can gyi snying rje chen po gang yin pa skye ste bdag nyid kyang de'i bdag nyid can yin pas dngos po thams cad kyi ngo bo nyid bsam par bya'o//de nas dngos po thams cad kyi bdag nyid can gyi rnal 'byor pa snying rje chen po'i bdag nyid can gyi bsgom pa stobs su gyur na dngos po thams cad kyi ngo bo nyid snying rje chen po'i bdag nyid can/rang nyid bcom ldan 'das yum shes rab ming gzhan yang phyag rgya chen po zhes bya ba de'i bdag nyid can yin pas tha mi dad pa'i rang bzhin chu dang 'o ma ltar gcig tu 'dres par gyur pa mthong bar 'gyur ro//gang gi tshe de ltar gyur pa de'i tshe/ de de'i bdag nyid can du bsgom par 'gyur te/ shes rab dang thabs gnyis su med pa'i ye shes kyi rang bzhin can yin pa'i phyir ro//da ni rim pa 'di nyid kyis dkyil 'khor gyi de kho na nyid bstan pa'i phyir/ dad dang zhes bya ba la sogs pa smos te/ dad pa dang ni theg pa chen po la mngon par 'jug pa'i mtshan nyid can no/ /brtson 'grus ni dad pa skyes nas bsod nams dang ye shes kyi tshogs yongs su rdzogs par byed pa'o//dran pa ni dge ba'i phyogs rgyun mi gcod pa yongs su mi 'dor ba'o/ /bsam gtan ni g.yeng ba ma lus pa nye bar zhi ba'o/ /'di dag ni ngo bo nyid rnam par dag pa'i ngo bo nyid ni khro bo gshin rje gshed dang gzhan gyis mi thub pa dang rta mgrin dang bdud rtsi 'khyil pa zhes bya ba'i sgo srung rnams yin no//shes rab rnam dag ces bya ba shes rab ni chos thams cad spros pa med pa nyid du khong du chud pa'o/ /de'i rnam par dag pa ni ma lus pa'i yul du snang ba ste/ gzugs dang sgra dang dri dang ro dang reg dang chos kyi dbyings rdo rje zhes bya ba'i mchod pa'i lha mo drug ste/dpal rdo rje snying po'i rgyan las ni/ gzugs sgra dri dang ro dang ni/ /reg bya chos mchog rdo rje ma/ /shes rab rnam dag ngo bo de/ /mchod pa'i lha mo rdzu 'phrul che/ /zhes ji skad bshad pa lta bu'o/ /mtshan ma med pa zhes bya ba ni mtshan ma med pa smos pas/stong pa nyid dang mtshan ma med pa dang smon pa med pa dang mngon par 'dus ma byas pa rnams la bya ste de rnams la rol zhing dgyes pa ni dga' ba ste/ de'i longs spyod dang bcas pa nyid kyis na byams pa dang snying rje dang dga' ba dang btang snyoms kyi bdag nyid can gyi lha mo bzhi'o//de yang rgyud las/ zhi ba'i las ni rab sgrub pas/ /byams pa can zhes bya bar bshad/ /sdug bsngal kun las thar byed pas/ /snying rje mA ma kI zhes bshad/ /rdo rje pad+ma'i sbyor ba yis/ /gos dkar mo ni dga' bar bshad/ /'jig rten dga' rab skyed byed cing //'dod chags chen po'i rang bzhin gyis/ /btang snyoms chen po'i ngo bo nyid/ /lha mo sgrol mar rang nyid gnas/ /zhes gsungs pa yin no/ /sems can don dang zhes bya ba la sogs pa la sems can zhes bya ba'i sgras ni dbang po drug po mig dang /rna ba dang / sna dang / lce dang / lus dang yid la bya'o/ /don gyi sgras ni yul te gzugs dang / sgra dang / dri dang / ro dang / reg bya dang chos rnams la bya'o/ /bdag ni nyon mongs pa can gyi yid nga rgyal gyi rang bzhin can no/ /rnam rtog ni sgra dang 'drer rung ba'i rnam par shes pa'o//'jug pa'i rnam par shes pa ni mig gi rnam par shes pa la sogs pa'i rnam par shes pa'i tshogs drug go/ /'di dag gi rnam par shes pa'i ngo bo nyid ni me long lta bu dang mnyam pa nyid dang so so rtog pa dang bya ba grub pa'i ye shes kyi rang bzhin rnam par snang mdzad dang rin chen 'byung ldan dang 'od dpag tu med pa dang don yod grub pa shar la sogs pa'i phyogs su bzhugs pa'i de bzhin gshegs pa bzhi dang rim bzhin du sbyar ro//de bzhin nyid ces bya ba ni dngos po rnams kyi yang dag pa ji lta ba nyid yongs su mkhyen cing spros pa med pa nyid thugs su chud pa'o//de'i rnam par dag pa ni rnam pa thams cad mkhyen pa'i ngo bo kun du bzang po'i bdag nyid do/ /de'i sbyor ba chos kyi dbyings rnam par dag pa'i ye shes kyi rang bzhin can nyid kyis 'khor lo'i gtso bo dkyil 'khor gyi bdag po'i ngo bos rnam par bzhugs so zhes bya ba'i don to//'di zhes bya ba ni ye shes lnga rgyud gcig gi nang du chud pas don dam par bzhugs so zhes bya ba'i don to/ /gzugs la sogs pa zhes bya ba la sogs pa la/ gzugs la sogs pa'i 'khrul pa ni ji ltar yongs su mthong ba bzhin mngon par zhen pas longs spyad pa'o//de med pas na de ltar bral ba ste/ gnyen po bsgom pas rnam par dag pa ni don dam pa'i gzugs dang / tshor ba dang / 'du shes dang / 'du byed dang / rnam par shes pa'i ngo bo nyid rnam par snang mdzad dang /rin chen 'byung ldan dang / 'od dpag tu med pa dang / don yod grub pa dang / mi bskyod pa ste de bzhin gshegs pa lnga'o/ /sogs pa'i sgras ni phyi rol gyi 'byung ba las gyur pa'i gzugs rnams kyang yin par shes par bya'o/ / ser sna la sogs pa zhes bya ba la sogs pa/ ser sna ni 'dod chags so/ /de la sogs pa ni tshul khrims 'chal ba dang / khro ba dang / le lo dang / rnam par g.yeng ba dang / shes rab 'chal ba dang / stobs chung ba nyid dang / log pa'i smon lam dang / yang dag pa ma yin pa'i rtog pa dang / mi shes pa ste 'di dag las ldog pa'i rang bzhin can/ sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / stobs dang / smon lam dang / thabs dang / ye shes kyi rang bzhin pha rol tu phyin pa bcu dang de'i rigs su gyur pa'i yon tan gyi tshogs kyi ngo bo nyid rab tu dga' ba la sogs pa sa bcu po ste/ chos dkar po 'di rnams kyi 'bras bur gyur pa'i yon tan rnams so/ /rnam rtog med pa zhes bya ba ni rtog pa thams cad kyi gnas su ma gyur pas/bdag gi don phun sum tshogs par snang ba ni zab pa ste/ shes rab zab mo las 'byung la gzhan gyi don phun sum tshogs par snang ba 'byung ba ni rgya che ba ste/ thugs rje chen po'i mtshan nyid can gyis byed pas 'di gnyis kho nas go rims ji lta ba bzhin du sems don dam par shes rab dang thabs kyi ngo bo nyid yin pas zab pa ni bdag gi don phun sum tshogs pa yongs su rdzogs par 'gyur la/rgya che bas ni gzhan gyi don phun sum tshogs par 'gyur ro/ /de yang bdag sgrub pa la 'jug pa las de nyid du sems phyin ci log las ldog pa'i tshul gyis ni shes rab tu rnam par bzhag la rang gi bya ba'i nus pa med pa las ldog pa las ni thabs su rnam par gdags pa ni don dam pa'o zhes bya ba la sogs pa ji skad bshad pa lta bu'o//dkyil 'khor du lha bcu dgu'i rnam pa'i dbye bas phye bar bstan pa gang yin pa de ni don dam par kun du bzang po'i thugs gcig pu nyid yin pas 'khor ba pa'i kun nas nyon mongs pa'i gnyen po rnam par byang ba'i rang bzhin can gyi lha'i tshul du tha mi dad pa yin mod kyi/'on kyang kun rdzob tu ni dbye ba yod pa nyid yin no//des kyang ji skad ston ce na don dam par ni dbye ba med kyi kun rdzob tu ni ji ltar mthong ba'i dbye bas tha dad pa nyid yin no/ /gzhan las zhes bya ba la sogs pa la gzhan las zhes bya ba thog ma med pa'i dus can gyi ma rig pa'i bag chags 'ga' zhig gi stobs kyis gzhan pa'i zhes bya ba la 'dod chags dang /zhe sdang dang / gti mug dang / phrag dog dang / dad pa med pa dang / le lo dang / dran pa nyams pa dang / rnam par rtog pa la sogs pa'i 'dzin pa gang yin pa de de las rnam par ldog par bya ba'i phyir sangs rgyas bcom ldan 'das kyis thabs kyi sgo nas sems can rnams la de bzhin gshegs pa lnga dang lha mo dang khro bo la sogs pa'i dkyil 'khor ston par mdzad pa yin gyis/rnam par snang mdzad la sogs pa'i dbye ba bye brag rtog pa dang ni bral ba yin te gang gi phyir sangs rgyas bcom ldan 'das kyis sangs rgyas kyi rol mo sna tshogs rab tu ston par mdzad pas 'gro ba'i don mdzad pa yin no//yang sangs rgyas ye shes kyi zhal snga nas kyis/ de ltar kun rtog ma lus pa'i/ /sems kyi sgro btags gzhom pa'i phyir/ /de nyid yang dag rtog ci snyed//de yi gnas kyang de nyid yin/ /de yi rang bzhin lhag zhen dang / /de skyed pa la brten pa yis/ /rnal 'byor pa sems rdzogs bya'i phyir/ /de rnams bskyed par 'dod pa yin/ /zhes bshad pa yin no/ /de bas na/ shes rab yan lag 'dus pa'i mchog tu ni/ / dga' ba nyams myong bde ba dam par ldan/ /de yi thabs gyur pa ni nyin mtshan du/ /blo dang ldan pas bdag nyid bsgom par bya/ /zhes bya ba la sogs pa'i tshul yin no/ /de ltar bsgom pa la mngon par brtson pa'i rnal 'byor pa/ gal te sems rgod pa'am zhum par gyur na de'i tshe thig le'i rnal 'byor la sogs pa bsgom par bya ba yin pas/de'i phyir de ltar brtags nas zhes bya ba la sogs pa smos te dbugs bgrang rngub rjes su dran pa ni thig le'i rnal 'byor ro/ /sdud pas na rngub pa ste dbugs gang nang du rngub pa'o/ /phyir 'don pas na 'byin pa ste dbugs gang phyir 'byin pa'o//de gnyis 'dren pa ni dbugs sor bcu gnyis kyi tshad du 'byin pa dang rngub pa nas mgo btsugs la bgrang bar bya zhing phyis 'byin pa bgrang ba'i tshul gyis grangs bcu'i bar du bgrang bar bya'o/ /ma tshang bar bgrang ba ni gcig la gnyis zhes bya ba gang yin pa'o/ /lhag par bgrang ba ni gnyis la gcig ces bya ba lta bu'o//sems shin tu bsdus pa dang g.yeng bar 'gyur ba'i 'jigs pas shin tu mang ba dang nyung bar ma byas pa yin no/ /de ltar bsgom pa dang rjes su mi mthun pa'i sems zhum pa rnam par brtags nas rang gi snying ga'i ye shes sems dpa'i ral gri'i dbus na gnas pa'i thig le phra mo mu tig gi 'bras bu'i gzugs can rnam par bsgom par bya'o//'od dang ldan pa ni 'od 'phro ba ste/ 'od zer gyi tshogs kyis nye bar mdzes pa'i thig le de 'od zer gyi phreng ba can mu tig gi rdog ma phra mo lta bu dbugs rngub pa dang 'byin pa bcu spro ba dang bsdu ba'i rim gyis byas pas ye shes sems dpa' sad par bya zhing brtan par byas la rim pa 'di nyid kyis gsung rdo rje dang sku rdo rje'i sa bon las 'byung ba pad+ma dang 'khor lo lkog ma dang spyi bor gnas pa brtan par bya'o//de nas brtan par gyur pa shes pa ni 'od zer gyi phreng ba de nyid ye shes kyi rgyun gyi sa bon gzugs can du spyi bo'i steng yan chad ji srid 'dod kyi bar du btang la rgyun mi 'chad pa kho nar rim pa'i rnam pa gang kho nas spros pa de bzhin du thugs kyi sa bon gyi bar du bsdu par bya zhing rkang pa'i mthil la thug gi bar gyi nang gi lus snang bar byas la/de nas phyogs kyi dkyil 'khor kun du mtha' yas par ba spu re re las byung ba'i 'od zer gyi tshogs rnams kyi char gyi rgyun 'bab pa lta bur khams gsum ma lus pa kun du dgang bar bya zhing ji srid du zhum pa med par gyur pa de srid kyi bar du'o/ /gal te sems rgod par gyur na/de'i tshe thig le tsam nyid la sems gtod pas brtan par bya zhing sems dang sems las byung ba 'gog pa'i snyoms par 'jug pa bsgom pa ji srid du rgod pa de nye bar zhi bar gyur pa de srid kyi bar du bya'o/ /thig le'i rnal 'byor 'di ni rgyud kyi le'u bcu gcig pa las/ srog ni thig ler gyur pas gzhag /ces bya ba la sogs pas ston te/ phra mo'i rnal 'byor bstan pa'i phyir 'od ldan zhes bya ba la sogs pa smos te/ yang na zhum pa dang rgod pa zhi bar bya ba'i phyir thig le'i rnal 'byor bsgom pa rdzogs nas/ yungs kar gyi 'bras bu phra mo tsam la rang gi lhag pa'i lha'i rtsa ba'i mtshan ma 'od dang ldan zhing /kha dog lnga'i 'od zer gyi tshogs rnam par 'phro ba rang gi sna'i rtse mor gnas pa'am rig pa'i sna'i rtse mor bsgoms pa brtsams la/ de'i nang du dkyil 'khor gyi 'khor lo ma lus pa phra mor chud par byas la/ snying brtse zhing snying rje chen po dang ldan pa sngon du 'gro bas bsgom par bya'o//zin pa ni blangs pa ste/ shes rab dam pa ye shes kyi phyag rgya dang ldan pa gang yin pa'o/ /mtshan ma brtan po ni phra mo'i rnal 'byor bsgoms pas mtshan ma brtan pa nyid mthong bar gyur pa ni rgyud las gsungs pa/ smig rgyu lta bu dang po ste/ /du ba lta bu gnyis pa yin/ /mkha' snang lta bu gsum pa ste/ /mar me ltar 'bar bzhi pa yin/ /sprin med nam mkha' lta bur ni/ /rtag tu snang ba lnga pa yin/ /zhes bya ba yin no/ /de dag la sogs pa'i mtshan ma brtan po mthong bar gyur pa//'od zer de'i mtha' las byung ba'i ral gri dang rdo rje dang 'khor lo dang pad+ma la sogs pa'i mtshan ma'i gzugs sna tshogs pa rnams yang dang yang du spro bar bya'o/ /mtshan ma spros pas de las byung ba'i rnam par snang mdzad la sogs pas nam mkha' kun du gang bar bya'o/ / blo ldan ni ye shes kyi tshogs yang dag par brtsam pa'o/ /la la ni sna'i rtse zhes bya ba ni sgras snying ga'i pad+ma'i dbus yin no zhes zer te/ snying gar bsgom pa nyid du bya ba'o/ /de yang rgyud las/ sna yi rtse mor yungs kar bsam/ /'gro dang mi 'gro yungs kar la/ /'khor lo la sogs khyad par du//bsgom pa de ni brtag par bya/ /zhes bya ba la sogs pa gsungs pa yin no/ /bzlas brjod kyi mtshan nyid bstan pa'i phyir/ yang na bzlas la zhes bya ba la sogs pa smos pa yin te/ yang zhes bya ba 'dis ni/ 'di skad ston te/ phyag rgya chen po'i rnal 'byor bsgom pa la bslab pa bor nas/bzlas brjod bya ba ma yin gyi/ /'on kyang bsgom pas dub pa'i tshe bya'o/ /la la ni sngon du bsnyen pa bya ba'i dus su bzlas brjod 'bum byas la/ phyag rgya chen po la sogs pa'i rnal 'byor la bslab par bya ba yin pas/ 'am zhes bya ba'i sgras phyogs gzhan ston par byed pa yin no zhes zer ro//bzlas pa ni sngags kyi bsgom pa'o/ rtse gcig sems nyid ni zhes bya ba'i rnam par g.yeng ba ma lus pa dang bral ba'o/ /dngos kun bdag nyid ces bya ba ni ngo bo nyid kyis kun du bzang po la sogs pa lta bur mngon sum byed pa'i gzhir gyur pas so//de nyid kyis na rang gi sems dbang po zhes bya ba'o/ /de yang rang gi sngags rnam pa sna tshogs pa'i 'od zer dang ldan zhing kha dog lnga'i 'od zer gyi tshogs sna tshogs pa rnam par 'bar ba'o/ /rang gi zhes bya ba ni rang gi lha'i rtsa ba'i sngags so//srog ni dbugs 'byin pa dang rngub pa'i rlung ngo / /de'i rtsol ba ni bsdam pa ste/ de dang bcas pas shin tu ma bsdams pa yin la dbang po mi bsdams pa ni sngar bshad pa'i dbugs bgrang ba dang / rngub pa rjes su dran pa'i tshul gyis sems brtan par byas la/ gsal bar bya zhes bya ba ni gug skyed dang tshad dang yongs su ma bral ba ste/ ring bar ma yin/ dal bar ma yin/ dbugs rngub pa dang 'byin pas kyang non par ma gyur pa dang / dbang po dang rtsol bas bskyed pa'i sgra che bas gsal ba ma yin pa ste/ rdo rje tshig gis bzla bya ste//rdo rje tshig ni sgra spangs pa/ /zhes gsungs pa yin no/ /rgyud 'di nyid las/ khro bo'i bzlas pa'i mtshan nyid gsungs pa yin/ /khro bo'i dam tshig ye shes kyis/ /rang gi rdo rje dkyil 'khor grags/ /sngags kyi yi ge tshig thos pa/ /de ni khro bo'i bzlas par bshad/ / ces bya ba yin no/ /oM ni tshad phyed dang gnyis pa'o/ /yi ge AH ni tshad gnyis pa'o/ /thugs kyi sa bon hUM ni tshad phyed dang gsum pa'o/ /rim pa bzhin du bya ba ni/ /sku rdo rje'i sa bon nas brtsams te/ /thugs rdo rje'i sngags kyi bar du'o/ /cig car zhes bya ba ni/ cig car dus mtshungs par yi ge oM dang AHdang yi ge hUM las de bzhin gshegs pa lnga'i lta bu'i lha'i 'khor lo spro bar bya'o//rim gyis gcig spros nas de'i 'og tu gzhan spro ba lta bur mi bya'o/ /rgyud las kyang 'di skad gsungs pa yin te/ sngags rnams thams cad spro ba ni/ /dbye ba rnam pa gnyis su bshad//rim gyis sam ni cig car ro/ /zhes bya ba yin no/ /de bas na skad cig nyid kyis 'od zer gyi tshogs ltar de bzhin gshegs pa'i tshogs spro bar bya'o/ /nam mkha'i gtos dang mnyam pa'i zhes bya ba ni sku rdo rje la sogs pa'i de bzhin gshegs pa lnga'i skus til gyi gang bu bzhin du nam mkha'i gtos thams cad kun du gang bar byas la/snga ma bzhin du yi ge maM las byung ba'i 'od zer gyi rtse mo las 'thon pa'i me tog dang / spos dang / dri dang / rin po che'i mar me dang / nam bza' dang chos gos la sogs pa mchod pa'i tshogs sna tshogs pas yang dag par mchod par bya'o//kun du zhes bya ba ni 'od 'byin pa'i rjes thogs nyid la mchod pa bya'o/ /yongs su sbas pa ni 'khyud pa'o/ /rig pa mchog rnams zhes bya ba ni/ spyan la sogs pa ste/ de las byung ba'i rab tu dga' ba'i bde ba gang yin pa de babs pas gzhan gyi dbang du gyur pa des rgyal ba'i tshogs rnams mchog tu dga' ba'i sbyor ba mthar thug par mthong zhing bsams la rnam par sgeg cing rol pa'i sprul pa sna tshogs pas 'gro ba'i don byas nas rang gi lus kyi thugs rdo rje'i sa bon gyi nang du gzhug par bya'o// mthar zhes bya ba ni sngags de re re bzlas pa yongs su rdzogs pa'i tshe'i rgyud las kyang / sngags ni brjod tshe spro bya zhing / /rdzogs pa na ni bsdu bar bya/ /zhes bya ba dang / thugs kyi sa bon gyis bsdu bya/ /zhes bya ba la sogs pa gsungs pa yin no/ /bsgom pa dang bzlas pas dub pa na ngal so bar bya ba'i phyir/rang gi snying po zhes bya ba la sogs pa smos te/ rang gi snying po de kho na nyid rang gi sngags kyi don to/ /de la nges par rtog pa ni spro ba dang ni bsdu ba dang / gnas pa brtan par byas pa de las byung ba'i skyo bas sems las su mi rung bas sems zhum par gyur pa ste/bzlas pa dang bsgom pas yongs su dub nas/ gang gi tshe rnal 'byor pa'i sems zhum par gyur pa de'i tshe/ spyan la sogs pa'i rig pa'i lha mo'i tshogs rnams kyis yang dag par glu blangs pas rab tu bskul zhing sad par byas nas dkyil 'khor gyi 'khor lo snga ma bzhin du mchod pa rnams kyis yongs su mchod la bsgom par bya'o//bsgom pas lus nyam chung bar gyur pa la brtas pa'i sbyor ba bya dgos pa'i phyir/ sems bzang zhes bya ba la sogs pa smos te/ sems bzang ba ni yongs su bsgoms pa'i byang chub kyi sems kyi chu'i rgyun gyi bdud rtsi 'bab pa ste/de lus kyi spyod pa skye zhing zhum pa bsal bar bya'o/ /de yang mtho gang tsam gyi steng du spags par zla ba'i dkyil 'khor oM gyis mtshan par bsams la/ srog dang rtsol ba'i 'od kyi lcags kyus zhes pa sngar bshad pa'i dbugs dbyung ba dang rngub pa rjes su dran pa'i tshul gyis bdud rtsi'i rgyun drangs nas spyi bo'i steng du babs par yid la byas nas/bdud rtsi des rang gi lus kyi phra rab re re nas rkang pa'i mthar thug gi bar brlan par gyur par ji srid kyi skyo ba gsal ba de srid kyi bar du bsgom par bya ba'o//'di nyid kyi rgyud las kyang gsungs te/ mtho gang tsam gyis spags par ni/ /spyi bor dkyil 'khor brtag par bya/ /oM ni dbus su gnas bsams nas/ /bdud rtsi lnga bo dbab par bya/ /zhes bya ba yin no/ /de ltar/ thang cig ngal bso byas nas ni/ /zhes bya ba ni de ltar bstan pa'i cho ga'i sbyor ba 'dis thang cig ces pas chu tshod gnyis tsam ngal bso zhing dbugs phyung la/sngar bshad pa'i cho gas spro ba dang bsdu ba la sogs pa bya ba'i rim gyis gsang sngags kyi dam pa rgyun mi 'chad par bzlas brjod bya'o/ /sngags la'ang kun du chags pa med par bya//zhes bya ba ni rtag tu bsgom pa nyid la goms par byas la/ des skyon bzlas par bya'o/ /bzlas pas kyang dub na chos bstan pa la sogs pa'i sems can gyi don bya'o zhes bya ba'i tha tshig go/ /sngags kyi bzlas pa nye bar bsdu ba bstan pa'i phyir/ /bstod dang zhes bya ba la sogs pa smos te/rgyud las mi bskyod rdo rje zhes bya ba la sogs pa gsungs pa'i bstod pa dang / me tog dang / spos dang / dri dang / mar me la sogs pa'i mchod pa dang / sogs pa'i sgras dbang bskur ba dang / bdud rtsi myang ba dag byas nas dkyil 'khor gyi 'khor lo gshegs su gsol bar ba'o//sngags pas rab tu 'bad de zhes bya ba ni bsgom pa la mkhas pas so/ /gang du gshegs su gsol zhe na/ oM la sogs pa zhes bya ba la sogs pa smos te/ oM la sogs pa'i yi ge bzhi la dkyil 'khor gyi 'khor lo yongs su thim par bya ba ste/sku rdo rje dang sku rdo rje'i rig pa'i snying po dang / gshin rje gshed la sogs pa ni spyi bor ro/ /gsung rdo rje dang de'i rigs 'jig rten dbang phyug dang pad+ma mthar byed la sogs pa ni lkog mar ro/ /phyag na rdo rje dang bdud rtsi 'khyil pa la sogs pa ni thugs kyi sa bon du'o/ / sku dang gsung dang thugs rdo rje de rnams kyang ye shes sems dpar bsdu'o/ /de ltar rim pa 'dis sku la sogs pa zhes pa sku dang gsung dang thugs kun du bzang po'i bdag nyid can rnam par mi rtog par lhag par mos pas bsgom par bya'o/ /de ltar zhes bya ba la sogs pa/ de ltar don dam pa'i de kho na nyid mthong bas sems can gyi khams ma lus pa de kho na nyid mthong ba dang bral zhing bdag dang bdag gir 'dzin pa'i nyon mongs pa'i dug gis zin pa rnams la snying rje chen po bskyed de/de gdon par bya ba'i phyir smon lam rnams mngon du bya'o/ /de yang gang gis las dang po pa'i gnas skabs su smon par mdzad pa ste/'khor ba tha ma med pa yi/ /sngon gyi mtha' ni ji srid pa/ /de srid sems can phan don du/ /spyod pa dpag yas spyod par gyis/ /phyogs bcu nam mkha'i mthas gtugs pa'i/ /sems can kun don bsgrub pa'i phyir//ji ltar 'jam dpal spyod mdzad pa/ /bdag gi spyod pa de 'drar shog /ces bya ba la sogs pa dang / bzang po spyod pa las gsungs pa'i smon lam dag kyang bya'o/ /da ni mnyam par ma bzhag pa'i sbyor ba la gnas pa'i sgo nas spyod yul yongs su dag pa bstan par bya ba'i phyir/langs nas zhes bya ba la sogs pa smos te/ mnyam par bzhag pa las langs nas dag pa'i sems zhes bya ba gzhan gyi don la 'jug pa dang / rang lha'i rnam pa'i nga rgyal zhes bya ba kun du bzang po'i nga rgyal dang ldan pa yid la byas nas/ kun du snang bar gnas par gyur cing /so sor snang ba tsam gyi rang bzhin can gyi yul rnams la snga ma bzhin du zhes bya ba dbye ba med par rtog pas so/ /'di nyid gsal bar bya ba'i phyir/ dpal ldan rdo rje 'dzin pa yis/ /zhes bya ba la sogs pa smos te/ dpal ldan ni rdo rje 'chang ba'i ngo bo nyid do//khams gsum gnas ni thams cad na/ /brtan g.yo'i dngos po ji snyed pa/ /de kun de nyid sbyor ba yis/ /rdo rje 'chang ba lta bur lta/ /zhes bya ba dang / de bzhin du/ rnal 'byor thams cad bcom ldan 'das/ /rdo rje sems dpa' de bzhin gshegs//de nyid nye bar longs spyod nyid/ /khams gsum pa ni ma lus pa'o/ /zhes bya ba la sogs pa ji skad gsungs pa'i tshul du bsgom pa'o/ /rim bzhin zhes bya ba ni chos thams cad rang bzhin gyis dag pa'o zhes lhag par mos pas sku la sogs pa'i rdo rjer gyur pa ste/gzugs dang / sgra dang / dri dang / ro dang / reg bya rnam par snang mdzad dang / mi bskyod pa dang / rin chen 'byung ldan dang / 'od dpag tu med pa dang / don yod grub pa'i ngo bo nyid yin la/ chos nyid kyis zhes bya ba ni don dam par dbye ba med pa ste/gang phyir chos dbyings ma gtogs pa'i chos ni yod pa ma yin no zhes bya ba'i tshul gyis so/ /phyin ci log gi zhes bya ba la sogs pa rnal 'byor pas sbyin pa byin pa dang / bla ma dang lhag pa'i lha la mchod pa byed pa dang / chos ston pa la sogs pa gang yin pa de thams cad phyin ci log gi rtog pa bdag dang bdag gir mngon par zhen pa dang bral zhing spangs pas bya ba de thams cad yongs su rdzogs par bya ste/gang gi phyir 'khor bar 'ching ba'i rgyu ni phyin ci log gi rnam par rtog pa nyid yin te/ tshad ma rnam 'grel las/ bdag yod na ni gzhan du 'du shes 'gyur/ /bdag gzhan cha las yongs su 'dzin dang sdang / /de gnyis dang ni kun du 'brel pa las/ /nyes pa thams cad 'byung bar 'gyur ba yin/ /zhes bshad pa yin no/ /de lta bu'i tshul gyis 'khor gsum yongs su dag pa dang /byang chub sems dpa'i dkyil 'khor gyi 'khor lo ma lus pa mchod pa bya'o/ /de yang gang gi phyir gsang sngags kyi spyad pa spyod pa rnams kyis 'di thams cad nges pa kho nar bya dgos pa yin pas 'di ni mchog yin te/ bsod nams kyi tshogs dang ye shes kyi tshogs su gyur pa yin no//ji lta bu zhe na/ de phyir zan za'i tshe na zhes bya ba la sogs pa smos te/ zan za'i tshe na snying gar zla ba'i dkyil 'khor la gnas pa'i 'khor lo'i gtso bo ste/ dkyil 'khor gyi bdag po bsams la/ rang gi sa bon gyi gsang sngags oM la sogs pas byin gyis brlabs pa'i byang chub kyi sems kyi rang bzhin bdud rtsi lnga'i ngo bo nyid du grub pa rang bzhin gyis 'od gsal ba/rdzas thams cad kyi mnyam pa nyid rnam par dag pa bdud rtsi lnga dang / dpa' bo lnga'i mtshan nyid can rnam par mi rtog pa la lhag par mos pa las longs spyad par bya'i/'di la smad pa'i go skabs dbye bar mi bya'o/ /de yang / rdzogs pa'i sangs rgyas kyis gsungs pa'i/ /chos rnams stong pa nyid ro gcig /de yi ro myang tshul du 'di/ /rang nyid de ltar gnas pa yin/ /zhes ji skad gsungs pa lta bu'o/ /rang gi zas la zhes bya ba ni yul dang dus dang rjes su mthun pa'o//de nyid gsum bzlas te zhes bya ba ni/ 'bar ba'i oM gyis zhes bya ba la sogs pa sngar bshad pa'i cha dang ldan pa dang / thams cad mnyam pa nyid du rtogs pa dang / bdud rtsi lnga po de yis sku'i rdo rje la sogs pa'i lha rnams kun du tshim zhing mnyes pa nyid du bya'o//nang gi sbyin sreg gi cho ga bstan pa'i phyir phyi'i sbyin sreg ces bya ba la sogs pa smos te/ phyi'i dgos pa'i dbang gis 'ga' zhig lan 'gar byed na bsgre zhing dpag pa'i tshul gyis nyams su blang bar bya ba ni phal ba yin la/ yid kyi ni gtso bo yin te/zas la spyod pa'i dus su rang gi snying gar yi ge raM yongs su gyur pa las byung ba'i me'i dkyil 'khor gru gsum bsams la/ de'i steng du thab kyi dbus su rang gi lha bsgoms la/ lag pa g.yas pa blugs gzar du bsams la/ hUM dang rdo rje yongs su gyur pa las rang gi lce rdo rje dgang gzar du bskyed la/bdud rtsi lnga'i sreg rdzas dbul ba ni nang gi sbyin sreg rnal 'byor pas rtag tu bya'o/ /phung po dang khams dang skye mched rnams bud shing ltar bsregs shing thal bar byed pas ye shes kyi rang bzhin can gyi sbyin sreg 'di ni bla na med pa yin no//de yang / nang gi sbyin sreg rnam rtog dra ba rnams/ /bsreg par bya zhes thub pa'i zla bas gsungs/ /bgegs dang dngos grub rnam par rtog pa tsam/ /gnyis med du ni rnam par rtog pa'ang stong / /de bzhin nyid mchog kun stong thab khung ni//pad+ma rdo rjer ldan byas 'dis ni dngos kun yam shing rgyas/ /nam mkha'i ngos ltar yangs shing brtags pa tsam gyis sa bon can/ /blo ngan sdig pas rab 'bar nyon mongs zhi bas rab tu zhi/ /zhes bshad pa yin no/ /phyi'i sbyin sreg ni mar me mdzad bzang po'i zhal snga nas kyi sgrub pa'i thabs la sogs pa las shes par bya'o//de ltar/ ma lus pa yi 'dod pa yis/ /zhes bya ba ni glu dang rol mo dang / bza' ba dang btung ba dang stan dang / mal cha la sogs pa las kyi bdag nyid rang gi 'dod pa'i lha'i rang bzhin du gyur pa la yang dag par mchod par bya ba'am/gzhan dag mngon par 'dod pa'i lha'i rnam par gyur pa nyid la mchod par bya ste/ gang gi phyir dam tshig 'di nyid ni dpal gsang ba 'dus pa las bstan pa'i lam yin zhing / sangs rgyas thams cad kyang mngon par bzhed cing bde bar gshegs pa rnams kyis rjes su gnang ba yin te myur du bla na med pa yang dag par rdzogs pa'i byang chub thob par byed pa yin pa'i phyir ro//de yang dpal sangs rgyas thams cad dang mnyam par sbyor ba las/ bdag nyid sangs rgyas thams cad dang / /byang chub sems dpa' thams cad der//rang gi lhag pa'i lhar sbyor bas/ /de bas bdag nyid bsgrub par bya/ /bdag nyid yongs su sbyangs nas ni/ /dka' thub kyis kyang gdung mi bya/ /ci bde bar ni bde bar gzung / /'di ni ma byon rdzogs sangs rgyas/ /zhes gsungs pa dang / bdag nyid 'phrog byed rkun po des/ /sdig pa ma byas ci zhig yod/ /sangs rgyas bdag nyid lus la ni/ /dngos grub bde bas dgang bar bya/ /zhes ji skad bshad par bya ba lta bu'o/ /rjes su mthun zhes bya ba la sogs pa la bde bar gshegs pa ma lus pa'i mdzad pa ni sems can thams cad la phan par bya ba nyid yin te/gzhan don phun tshogs sangs rgyas kyi/ /'bras bu'i gtso bo rab mchog yin/ /zhes ji skad gsungs pa lta bu'o/ /de bas na sems can ma lus pa la phan par bya ba'i phyir lus dang ngag dang yid kyi las rnams bya'o//mnyam par gzhag ste zhes bya ba ni sems can rnams kyi don bya ba'i phyir skyo ba med pa'i sems su bya ba'o/ /rnam pa de 'dra zhes bya ba la sogs pa la tshul de lta bur kun du bzang po'i rnam pa mngon sum du byas pa'i sems dang ldan pa gang yin pa de'i lus kyi gzhi las byung ba ldang ba dang /'dug pa dang / brkyang ba dang / bskum pa dang / bskor ba la sogs pa gang cung zad ci yod pa de thams cad ni phyag rgya'i rnam pa yin la/ /bden pa dang / mi bden pa la sogs pa smras pa gang yin pa de thams cad ni sngags kyi rnam pa yin no zhes rdzogs pa'i sangs rgyas dpal gsang ba 'dus pa'i rjes su 'brang bar mdzad pa thams cad kyis gsungs shing bka' stsal te/dper na/ mnyam par ma bzhag sbyor ba yis/ /rtag tu mnyam par 'jog pa yin/ /zhes gsungs pa lta bu'o/ /don gyi dbang 'di nyid la dgongs nas/lag pa'i phyag rgya mi bcing ngo / /zhes bya ba la sogs pa rgyud las gsungs pa yin no/ /'di nyid du chos nyid kyi rig pa bstan pa ni/ dngos gcig pa yang zhes bya ba la sogs pa smos pa yin te/ bud med gcig gi lus la rnam pa sna tshogs pa'i kun du rtog pa thams cad kyis yongs su bsags shing kun du brtags pa'i rnam pa'i ngo bo ste/dper na/ kun rgyu 'dod ldan gyi dag gis/ /ro dang 'dod bya bza' ba ste/ /zhes bya ba'i tshul du'o/ /de yang skyes bu 'dod ldan 'dod chags kyis sems nye bar bcom pa dang ldan pa rnams ni de dang bral bas sdug bsngal skyed par byed pa yin la/khyis ni lus tsho zhing rgyas pa mthong ba na bza' ba'i blo skyes pas bde ba yin la/ ro yin no zhes mi gtsang ba bsgoms pas ni dka' thub can dag 'dod chags dang bral bar byed pas grol ba skyed par byed pa yin no//de bas na brtags pa la ma gtogs pa bden pa ci yang yod pa ma yin te/ bud med gcig gi lus la ni/ /kun rgyu 'dod ldan khyi dag gis/ /ro dang 'dod ldan bza' ba zhes/ /rnam par rtog pa rnam gsum yin/ /zhes ji skad bshad pa lta bu'o//de bas/ lus sogs dge dang mi dge ba'i/ /zhes bya ba la sogs pa la/ 'di ni dge ba ste bsod nams so/ /'di ni mi dge ba ste sdig pa'o zhes ji skad bshad pa'i lus dang ngag dang yid kyi las rnams gang yin pa de thams cad ni nyon mongs pa can gyi sems kyi 'jug pa yin gyi/de kho na nyid mthong ba rnams kyi ni ma yin no/ /de yang / las las 'jig rten sna tshogs skyes/ /de ni sems dpa' dang des byas/ /sems dpa' yid kyi las yin te/ /des bskyed lus dang ngag gi las/ /ma chags la sogs las byung ba'i//lus ngag las ni dge ba yin/ /gang zhig chags sogs las byung ba'i/ /las de mi dge bar 'dod do/ /zhes ji skad bshad pa lta bu dang / /de bas brtse ba'i bdag can gyis/ /gzhan phan byas pa gang yin pa'o/ /las de thams cad dge ba zhes//rdzogs sangs rgyas kyis yongs su bshad/ /ces ji skad bshad pa lta bu'o/ /de ltar rnam par rtog pa'i dra ba ma lus pa spangs shing rnam par bsal nas/ sems rang bzhin gyis 'od gsal ba kun du bzang po'i rnam pa dang ldan pa la nag po'i las sdig pa ga las 'byung bar 'gyur//de yang / mi mkhas pas ni sdig pa chung ngu byas kyang 'og tu lhang / /mkhas pas chen po byas kyang gnod pa rab tu spong bar 'gyur/ /lcags kyi gong bu chung yang chu'i 'og tu 'bying 'gyur la/ /de nyid snod du byas na che yang steng du 'phyo bar 'gyur//zhes ji skad bshad pa lta bu'o/ /dam tshig nyams na rnam par dag par bya ba'i sbyor ba bstan pa ni/ dam tshig nyams la zhes bya ba la sogs pa smos pa yin te/ rgyud las gsungs pa'i gsang sngags kyi spyod pa yongs su skyong ba ni dam tshig ste/ lha bsgom pa sngon du 'gro bas bdud rtsi lnga la sogs pa la nye bar longs spyod pa dang /nyin dang mtshan du bsod nams kyi bya ba la brtson par byed pa'o/ /de nyams pa ni zad pa'o/ /nyams pa de byung bar gyur na/ snying ga'i zla bar zhes bya ba rang gi snying ga'i dbus su zla ba'i dkyil 'khor la gnas pa'i sna tshogs rdo rje rnam par bsams la dam tshig rdo rje zhes pa don yod par grub pa rang gi snying gar dbang chen gyi dkyil 'khor gyi steng du sna tshogs pad+ma la gnas pa'i zla ba'i dbus su gnas pa'i yi ge hUM las byung ba'i sna tshogs rdo rje'i dbus na gnas pa'i yi ge khaM yongs su gyur pa las byung ba'i ral gri las bskyed pa'i don yod par grub pa thabs dang shes rab kyi bdag nyid bsgom par bya'o//'gro ba rang bzhin gyis dag ces bya ba ni chos thams cad rang bzhin gyis rnam par dag pa'o zhes lhag pa'i mos pas 'gro ba thams cad dag par rnam par bsams la/sna tshogs pa'i 'dab ma dang ldan pa'i pad+ma'i dbus su/ /nyi ma'i dkyil 'khor la rang bzhin gyis nyes pa'i 'dam thams cad kyis ma gos par/ sngar gyi rim pas zhes pa snying po'i sa bon dang mtshan ma las byung ba'i de bzhin gshegs pa rnams kyi 'od zer las byung ba'i spyan la sogs pa'i lha mo phyag na bdud rtsis yongs su gang ba'i bum pa bsnams pas bdag nyid kyi phra rab rnams brlan zhing dbang bskur bar gyur pa bsam par bya'o//'di ni dam tshig nyams pa'i gnyen po yin no/ /dbang bskur ba'i rim pa ni phyi rol gyi khrus bya ba'i cho ga la yang bsam par bya'o//la la ni yab la mngon par phyogs par byas nas chos 'byung ba'i dbus su yi ge khaM gyis gnyi ga yang zhu bar bsams la/ glu yis bskul ba la sogs pa'i rim gyis de bzhin du dam tshig sems dpa'i rnam par don yod par grub pa rnam par bsams la/snying gar rang gi lhag pa'i lha ye shes sems dpa' lta bur bsam pa'i 'od zer las byung ba'i spyan la sogs pas dbang bskur bar bya'o zhes zer mod kyi de ni bden pa ma yin te/ dpal dam tshig rdo rje'i sbyor ba 'di la yod pas na dam tshig rdo rje'i rnal 'byor ba ste/ye shes tsam gyi snyoms 'jug pa/ /sbyor ba zhes ni bya ba yin/ /zhes gsungs pas ye shes sems dpa' lta bur dam tshig rdo rje bsgom par bya'o zhes bya ba ni bla ma gcig nas gcig tu brgyud pa'i tshad mas so//thun mtshams su yang zhes bya ba ni/ phyi dro'i thun mtshams dang / dgongs ka yang de bzhin no zhes bya ba snga ma bzhin du mchod pa sngon du 'gro bas sngags kyi bzlas pa byas la/ snying ga'i nang du dkyil 'khor gyi 'khor lo chud par byas la/ thabs dang shes rab gnyis su med pa'i sbyor ba bsgom pa'i rim gyis gnyid log par bya'o//chags pa shas che ba dag gis ni las kyi phyag rgya dang lhan cig ji skad bshad pa'i rigs lnga dgod pa'i bsgom pa'i sbyor bas gnas par bya'o/ /ldang ba'i dus su zhes bya ba la sogs pa la/ldang ba'i tshe spyan la sogs pa'i dam tshig gi lha mo'i glus bskul la mal nas ldang bar bya'o/ /dang por nang par snying ga'i zla dbus su/ /zhes bya ba nas brtsams te/ gdong bkru ba byas la dang po'i sbyor ba dang / dkyil 'khor gyi rgyal po'i mchog dang /las kyi rgyal po'i mchog cho ga snga ma bzhin du bsgom par bya'o/ /dpal ldan zhes bya ba ni bsod nams dang ye shes kyi tshogs rdzogs pa'i bya ba la brtson pa'o/ /thub pa zhes bya ba ni bya ba rnams nyams su len pas na thub pa'o/ /dngos grub ces bya ba la sogs pa la ji srid 'jig rten dang 'jig rten las 'das pa'i bsgrub par bya ba'i dngos grub kyi mtshan ma rmi lam la sogs pa thob par gyur pa de srid kyi bar du bsgom par bya'o//de yang rgyud las/ rdo rje sems dpa'i gzugs chen dang / /grags pa chen po rdo rje chos//gsang ba rdo rje grags pa cher/ /rmi lam dag na rang gzugs mthong / /byang chub sems dpa' rdo rje can/ /sangs rgyas chen po phyag 'tshal ba'i/ /rmi lam 'di 'dra mthong 'gyur ba/ /sku gsung thugs kyi dngos grub ster/ /rgyan rnams thams cad yongs rdzogs pa'i//lha yi bu mo yid 'ong dang / /khye'u dang bu mo dag mthong na/ /de ni dngos grub 'thob par 'gyur/ /zhes bya ba la sogs pa rgya cher gsungs pa yin no/ /de ltar dngos grub kyi mtshan ma thob cing mthong bas/ de nyid gsum mchod pa byas nas rang gi sems zhes bya ba rang gi gsang sngags bzlas brjod 'bum pa dang /gzhan rnams kyi khri khri bzlas brjod bya ba dang / khro bo rnams kyi phreng ba'i sngags kyang bzlas la/ sngar bshad pa'i dkyil 'khor gyi 'khor lo'i dbus su gnas nas mngon par 'dod pa'i dngos grub rab tu bsgrub par bya zhing mngon sum du bya'o//gal te rim pa 'dis kyang dngos grub thob par ma gyur na/ de'i tshe 'phags pa bdud rtsi thab sbyor gyi sbyor bas bgegs gzhom zhing bskrad par bya ba yin/ de bshad pa ni bgegs rnams bdud rtsi thabs sbyor zhes bya ba la sogs pa smos pa yin te/snga ma bzhin du yab yum mngon du byas la/ lha mo gsang ba'i chu skyes su zhu bar gyur pa bsgom pa sngon du 'gro bas yi ge hUM las bdag nyid bdud rtsi thab sbyor du rnam par bsam par bya ste/ sku mdog nag po rdo rje dang /ral gri dang / lcags kyu dang zhags pa dang / pad+ma dang / rin po che'i mtshon cha bsnams pas brgyan pa/ g.yon brkyang pa'i gnas pas bzhugs par dkyil 'khor gyi dbus su bsam par bya'o/ /de'i thugs kar ye shes sems dpa' dpal 'jam pa'i rdo rje bskyed la/de'i sngags las nges pa byung ba'i bdud rtsi thab sbyor gyi sku stong phrag rnam par bsams la/ de rnams kyis phyogs bcu na gnas pa'i bgegs kyi tshogs rnams thal bar byas par bsam mo/ /la la dag ni 'di skad ces zer te/ lag pa g.yas pa'i lcags kyus snying ga'i ye shes sems dpa' kun du bstan par byas pa'i drag po'i sbyor bas dngos grub gsol ba gdab par bya'o//de yang / de yi snying gar gdab bya ste/ /lha rnams rab tu bskul bar bya/ /zhes ji skad gsungs pa lta bu dang /che ge zhes bya rdo rje can/ /khyed bsgrub pa la gnas bgyid cing / /khyed gsungs pa yi dam tshig rnams/ /bsrungs la rtag par brtson par bgyid/ /dbang bskur dang ni rjes gnang pa/ /de yi dngos grub stsal du gsol/ /zhes bya ba dang / mchog stsol ba dag rnam par gzigs//yid ni 'jigs shing skrag gyur nas/ /yid la mgu zhing skrag gyur pa'i/ /dngos grub rgya chen ster bar 'gyur/ /zhes gsungs pa yin no/ /dbang bskur byas pa'i zhes bya ba ni dbang bskur dang rjes su gnang ba yang dag par thob par 'grub par 'gyur gyi gzhan dag gis ni ma yin te/des ni 'bad pa chud dus kyang 'grub par 'gyur ro zhes bya ba'i tha tshig go/ /'jam pa'i rdo rje gtso bor gyur pa'i 'khor lo'i dbus su/ bdud rtsi thab sbyor gzhag pa ji ltar rung snyam du rtog pa de'i phyir/ gang zhig dbus na zhes bya ba smos te/ gang dbus su bzhugs par gyur pa yongs su brtag pa gang yin pa de/ 'khor lo yang de'i yin par 'gyur te/ don dam par ni thams cad kyi bdag nyid can yin mod kyi/ dgongs pa'i dbang gis ni 'ga' zhig dbus su gnas par yongs su brtags pa yin pas/'dir rnam par rtog pa'i go skabs yod pa ma yin no/ /'di dag ni las kyi rgyal po'i mchog gi ting nge 'dzin to/ /da ni ting nge 'dzin gsum gyi sbyor 'gro ba bstan par bya ba'i phyir/ tha mal rnam par rtog ces bya ba la sogs pa smos te/ tha mal pa'i rnam par rtog pa bdag dang bdag gir rtog pa'i rgyun gyi 'jug pa las gzhan zhing de ma rtogs pa srid pa ste/ 'khor ba'i sdug bsngal gzhan dag ci yang yod pa ma yin no/ /des na rnam par 'gags shing med par gyur pa las sems ni kun du bzang po la sogs pa'i ngo bo nyid yin par sems 'di rnal 'byor pas rang rig pa'i mngon sum gyis/mngon sum du nyams su myong ba yin te/ gsang sngags smra rnams mang du ni/ /spros te smras pas ci zhig bya/ /khyad par du ni sems bsgrub ste/ /sems las rdzogs pa'i byang chub 'byung //zhes bshad pa yin no/ /ji lta zhe na/ de'i phyir zab cing zhes bya ba la sogs pa smos te/ zab cing rgya che ba'i bdag nyid can gyi rnam par byang ba don dam pa'i thabs dang shes rab bsgom pa'i sems gang yin pa de la ni tha mal pa'i kun du rtog pa de snang zhing so sor 'byung bar mi 'gyur ro//de yang tshad ma rnam 'grel las/ sems de rang bzhin 'od gsal te/ /dri ma rnams ni glo bur ba/ dang por nus med de la yang / /phyis nus de yi rang bzhin min/ /rlan can sa yi me bzhin du/ /rab tu 'phel bar nus ma yin/ /'tshe ba med dang yang dag don//ngo bo nyid la phyin log gis/ /'bad du zin kyang gnod med de/ /blo ni de yi phyogs 'dzin phyir/ /zhes bshad pa yin no/ /de yang kun du bzang po la sogs pa'i 'bras bu'i ngo bo nyid ni yang dag par rig pa las tha dad pa gzhan dag yod pa ma yin no zhes sngar gtan tshigs kyis bsgrub pa yin no//ji ltar gnyen por gyur pa yin zhe na/ de'i phyir gang zhig ces bya ba la sogs pa smos te/ me la sogs pa dang / grang ba la sogs pa dang 'dra bar dngos po gang gang dang lhan cig tsam yang rang bzhin mi mthun par snang ba des/de'i bgrod pa'i thob pa rgyas shing shas cher 'phel bar gyur pa na mthong ba ste/ tshe 'di nyid la kun du bzang po la sogs pa'i rnam pa can gyis gnyen po'i phyogs 'phel bar gyur pa gang yin des/ rang gi mi mthun pa'i phyogs tha mal pa'i rnam par rtog pa shin tu 'gags shing mchog tu sel bar byed do//nyan thos dang pha rol tu phyin pa'i tshul la gnas pa'i gang zag la bdag med par rtogs pa dang / /sbyin pa'i pha rol tu phyin pa la sogs pa gsungs pas kyang nyes pa thams cad zad par 'gyur bas/sngags kyi gzhung dpal gsang ba 'dus pa'i bsgom pa rtogs dka' ba 'dis ci zhig bya zhe na/ de'i phyir tha mal pa'i zhes bya ba la sogs pa smos te/ kun du bzang po la sogs pa gnyen po bsgom pa med par tha mal pa'i rang bzhin gyi chos thams cad bdag med pa'i shes rab kyi mtha' dang ldan pa'i 'khor gsum yongs su dag pa'i sbyin pa la sogs pa'i bya ba'i rang bzhin gyi thabs la bslabs pas de ldog par mi 'gyur/kun nas nyon mongs pas gnod par 'gyur ba nyid yin no/ /de ltar na gang gi phyir bdag med pa bsgom pa la bslab pa de'i yin du zin kyang /don dam pa'i sngags kyi spyod pa med par 'khor ba las myur du ldog pa thob par mi 'gyur ro zhes bdag sgrub pa la 'jug pa la sogs pa las mang du bshad pa yin no/ /de yang tha mal pa'i rang gi ngo bo ni skye bo dpag tu med pa la phan 'dogs par byed pa ma yin pas/snying rje la shin tu byang ba dag gis spang bar bya ste/ de yang smon lam la sogs pa'i grogs dang ldan pa'i sbyin pa la sogs pa'i sems kyi bdag nyid ni/ gnyen po'i phyogs la 'jug pa yin du zin kyang /'jug pa las mi ldog na dus phyi zhig na ldog par 'gyur ro zhes bya ba la yid rton pa ga la yod ces ji skad bshad pa lta bu ste/ don du na de ni bskal pa grangs med pa gsum gyis 'tshang rgya ba yin no zhes bya ba'i tha tshig go/ /de nyid kyi phyir gsang sngags kyi sgo nas spyad pa spyod pa'i rnal 'byor pa rnams ni bsgom pa gcig tu mthar thug pa la brtson pa yin pas/bsgom pa'i stobs nyid kyis bsod nams dang ye shes kyi tshogs rdzogs par byas nas dus nges pa med pas kun du bzang po nyid thob par 'gyur ro zhes/ /de kho na nyid la 'jug pa la sogs pa las rgya cher khong du chud par bya'o//da ni rdzogs pa'i rim pa'i rnal 'byor bsgom pa'i thabs bstan pa'i phyir/ de ltar rtogs nas zhes bya ba la sogs pa smos te/ de ltar rgyud chen po'i tshul gyis dngos grub thob par 'gyur gyi gzhan las ni ma yin no zhes rtogs nas snying rje dang ldan zhing brtse ba dang bcas pa dag /skad cig gis mngon par byang chub pa rnam pa lnga'i rim pa rnam par mi rtog pa'i mtshan nyid can gyi ye shes kyi rab tu bsgrub cing mngon sum du byas nas/ yid bzhin gyi nor bu ltar thams cad du dngos grub skyed par byed pa bsam gyis mi khyab pa rnal 'byor gyi mngon sum gyis yang dag par rdzogs par bya ba dang dpal kun du bzang po'i ngo bo nyid rang ste/bdag nyid kyi nyes pa thams cad kyi gnyen por gyur pa'i sems mkhas pa sems dang ldan pa su zhig sgom par mi byed de bsgom par bya'o zhes khas blang ba yin no zhes don dam pa nyid yin par ston to//mngal nas skye ba'i rnam par dag pa'i rim pa ni/ skye bo las dang po pa rnams kyis sems dbang du bya ba'i phyir bstan pa yin no/ /de bas kun rtog rnam bsal zhing / /kun du snang ba 'gro 'gyur ba//kun du bzang por bdag nyid ni/ /bsgoms pa nyid kyis byang chub thob/ /phyag rgya'i cho ga gang dag gis/ /bskal pa grangs med bye bar yang / /sangs rgyas thams cad mi 'thob pa/ /tshe 'di nyid la thob par 'gyur/ /zhes bshad pa lta bu'o/ /kun du bzang po zhes bya ba ni yid bzhin gyi nor bu rin po che ltar gdul bya rnams la thams cad du kun du bzang po'i rang bzhin ston par mdzad cing /rnam pa thams cad mkhyen pa'i ye shes thob par mdzad pa zhes bya ba'i tha tshig go/ /da ni slob dpon bdag nyid bla ma rnams dang rjes su mthun pa nyid du bstan par bya ba'i phyir/dri med blo yis zhes bya ba la sogs pa smos te/ dri ma med cing dri ma dang bral ba'i blo ste/ ye shes phul du byung ba gang yin pa de'i 'od zer de snang bar byed pa'i mtshan nyid can 'od dang 'dra ba yin pas na 'od zer te/ gdul bya'i skye bo rnams kyi blo'i mun nag bsal ba'i ngang tshul lo//de rnams kyi rnam par bstan cing yang dag par bkod de bsam gtan 'di dpal gsang ba 'dus pa'i rgyud las btus pa yod la/ de bas na bdag 'dra ba'i blo gros chung ngu'i go skabs ga la yod de 'jug pa'i rgyu ci zhig yod/de lta mod kyi gang bla ma dam pa zhes bya ba slob dpon gyi gzhung bdag gis bzung zhing blangs pa'i man ngag gi mtshan nyid de/ 'di lta bu'i gzhung du sbyar ba'i cho ga med pas/ dang po ste thog ma med pa nyid du las dang po pa blo gros chung ba rnams kyi 'ching ba ni tshig tu sbyar ba'i rim gyis legs par sbyar ba med par lhod par mi 'gyur ba'i phyir ro//de lhod cing dengs pa dang zad par 'gyur ba yin pas/ rgyu des na 'di la shin tu 'bad pa yin te/ dpal gsang ba 'dus pa'i bsgom pa'i nye bar sbyar ba rtsom pa'i 'bad cing nyon mongs pa ni 'di la 'bad cing bslab par bya ba'i phyir rang dang gzhan gyi don du kho bos byas so zhes bya ba'i tha tshig go//da ni byang chub sems dpa'i brtul zhugs dge ba'i rtsa ba yongs su bsngo ba bstan par bya ba'i phyir/ de ltar zhes bya ba la sogs pa smos te/de ltar dpal gsang ba 'dus pa'i rgyud kyi rjes su 'brang ba 'dis kun du bzang po'i sgrub pa'i thabs rnam par bkod cing byas pa las legs par byung zhing yang dag par nye bar bsags pa'i dge ba ste/ bsod nams dri ma med pa gang yin pa des 'gro ba sems can thams cad kyi yid de sems/sangs rgyas kyi ye shes kyi mgon dang bcas par gyur pa ste/ sangs rgyas rnams kyi ye shes kyi de bzhin nyid dang / chos kyi dbyings dang / don dam pa'i ngo bo nyid rnam pa thams cad mkhyen pa'i ye shes kyi mtshan nyid can rnam par dag pa'i ye shes gang yin pa de'i mgon dang bcas shing de la gzhol ba ste/de'i mthar thug pas da lta rtag tu ste/ dus thams cad du de bsgom pa la mngon par dga' bar shog shig ba'o/ /de yang ye shes 'di kun du bzang po'i sgrub pa'i thabs su nye bar sbyar ba'i mtshan nyid can gyis srid pa'i rtse mo'i mthar thug pa'i bar gyi 'gro ba rnams bdag dang gzhan gyi don gyi phyir dang /phan pa dang bde ba'i phyir yang dag par rdzogs pa'i byang chub bla ma'i drin gyis rtogs nas dus thams cad du lhag par mos pa dang / de kho na nyid yid la byed pa gnyis kyis bsgom par gyur cig ces bya ba'i don to//sangs rgyas ye shes zhal snga yi/ /'jam pa'i rdo rje bsgom pa'i rim/ /rnam par bkrol bas bdag gis ni/ /dge ba dri med gang thob pa/ /des 'dir rtag tu sems can kun/ /'jam pa'i rdo rje'i bka' drin gyis//shes rab thabs bdag yid kyis ni/ /'jam pa'i rdo rje dang mnyam shog /dpal ldan yon tan 'byung gnas bzang / /'phags pa'i slob ma btsun pa ni/ /dpal 'bras rdo rje zhes bya bas/ /'grel pa rab tu gsal ba byas/ /kun du bzang po'i sgrub pa'i thabs kyi 'grel pa byang phyogs kyi dge slong yon tan 'byung gnas bzang po'i slob ma shrI pha la badzras mdzad pa rdzogs so// //rgya gar gyi mkhan po bIr+ya b+ha dra dang / bi b+ha ka ra dang / sgra bsgyur ba'i lo tsA sneb dge slong rin chen bzang pos bsgyur cing zhus pa'o/