CLOSE WINDOW

D1815
བོད་ཡིག

/[ ]@#/ /rgya gar skad du/ badzra satwa sA d+ha naM ni baM d+ha/ bod skad du/ rdo rje sems dpa'i sgrub thabs kyi 'grel pa/ /dpal rdo rje sems dpa' la phyag 'tshal lo/ /rgyal ba rgyal sras klu sgrub mdun gnas la//dang zhing gus pa chen pos mgos btud nas/ /zla ba grags pas mdzad mdo rab rtogs pa'i/ /rtogs dka'i sgra rig 'bad pas rnam 'grel brjod/ /sangs rgyas kyi theg pa pa'o/ /rtog pa zhes pa ni 'od gsal sgom pa dang bral nas/ / bskyed pa'i rim pa'i lha sgom par byed pa la byang ba'o/ /mtha' drug ces pa ni nges pa'i don dang drang ba'i don la sogs pa'i bshad pa'i khyad par dang bral ba'o/ /ji bzhin pa'i zhes pa ni zab mo'i don shes pa med pa nyid kyi phyir ji bzhin pa rab tu grags pa'i sgra'i don gyi thabs kyis so//zla ba zhes pa ni zla ba dang rdo rje cing sgo nas bskyed pa'o/ /srid pa zhes pa ni mngal nas skye ba'i rim pas so/ /rnam pa lnga zhes pa ni/ zla ba dang nyi ma dang sa bon dang mtshan ma dang / spro ba dang bsdu ba'i rim pas so/ /skad cig ces pa ni sa bon dang mtshan ma dag spangs pa'o//bcu gsum zhes pa ni snying po'i dkyil 'khor du spyan ma la sogs pa bzhi dang / mi bskyod pa la sogs pa lnga'o/ /zhes pas dgu'o/ /phyi'i sgo rnams su gshin rje mthar byed la sogs pa bzhi'o zhes pas bcu gsum mo/ /bcu dgu zhes pa ni slob dpon shI mA shA li 'dod pa la sogs pa'i rim pas so//nyi shu rtsa lnga zhes pa ni/ sngar bzhin du snying po'i dkyil 'khor du dgu/ /phyi ru gzugs rdo rje ma la sogs pa'i rnal 'byor ma drug dang / de'i phyi ru phyogs dang / phyogs bral du gshin rje mthar byed la sogs pa bcu'o zhes pas so//rim pa gnyis rtogs nas zhes pa ni/ thos pa'i sgo nas rim pa gnyis kyi don so sor rtogs nas so/ /sngags kyi zhes pa ni lhag par mos pa'i dkyil 'khor dang / sku'i dkyil 'khor 'od gsal du zhugs pa las bar ma chad par skyes pa'i sngags las byung ba'i rdo rje sems dpa'i gzugs su nges pa'o//dgongs pa bstan pa zhes pa ni rdo rje sems dpa'i sku la/ oM la sogs pa'i sa bon kun du brtags pas rab tu snang ba'o/ /rnam par bzhag pa zhes pa ni/ de'i 'og tu bar ma chad par 'di bsgom par bya'o zhes rnam par gzhag par bya ba'i mngon par dgongs pa nges pa'o//de nyid bstan pa zhes pa ni/ /skabs ji lta bar 'od gsal du 'jug pa'o/ /sems can thams cad ces pa ni/ /dang po man ngag ji lta ba bzhin/ bcom ldan 'das la mngon par yang dag par mchod de/ de'i mdun du sdig pa bshags pa la sogs pa byas nas/ sdug bsngal dang ldan pa'i sems can thams cad la snying rje bsgom par bya'o zhes pa'i don no/ /dgon pa chen po zhes pa ni/ dgon pa chen po'i sa phyogs ni mchog tu gyur pa'i sa phyogs so/ /'bras bu zhes pa ni 'bras bu dang me tog dang /chu la sogs pas khyad par du 'phags shing yid du 'ong ba'i ri bo'i phyogs gcig go/ /skye bo dang bral ba ni 'dir rnam par dben par 'dod do/ /thams cad ces pa 'jig rten pa dang 'jig rten las 'das pa'i dngos grub thams cad do/ /de rnams bsdus pa ni/yang dag par btus shing bsags pa ste/ rdo rje sems dpa'i sku gang yin pa de'o/ /dkar po zhes pa ni de nas 'khor lo rtsibs bcu pa'i lte bar gnas pa'o zhes pa lhag ma'o/ /nam mkha' zhes pa ni skad cig gis 'od gsal ba las bskyed pa'o/ /de'i dbus gnas par sangs rgyas dkyil 'khor ni rdo rje sems dpa'o//'od zer sprin gyi tshogs chen po ni kun du snang ba'i phung po'o/ /sangs rgyas 'bar ba 'dra ba'i 'od/ /ces pa ni dbang po'i gzhu lta bu 'od zer lngas brgyan pa'o/ /dang po zhes pa ni/ ye shes sgron ma mi bskyod pa ste/de nyid ni mi phyed pa nyid kyi phyir rdo rje ste de la dmigs pa'i ting nge 'dzin ni sems rtse gcig pa ste de mngon du mdzad nas so/ /de bzhin gshegs pa thams cad ces pa ni/ de bzhin gshegs pa thams cad kyi sku dang gsung dang thugs kyi bdag nyid can rdo rje 'chang chen po'o//rig pa'i skyes bu ni bden pa gnyis kyi bdag nyid can no/ /mi bskyod pa zhes pa ni/ mi bskyod pa'i sku'i rnam pas so/ /thams cad ces pa ni rdo rje 'chang chen po'o/ /hUM ring po zhes pa ni rig ma'i pad+ma'i khongs su lhung ba'i byang chub kyi sems yongs su gyur pa'i hUM yig bcur dmigs par bya'o//phyogs bcu nas zhes pa ni/ phyogs bcur rnam par gnas pa'i rtsibs bcu la gnas so zhes pa'i don no/ /khro bo zhes pa la zhe sdang ni mi bskyod pa ste de'i gnas las skyes pa ni sa bon hUM de las skyes pa'o/ /gsod pa zhes pa ni gsod par byed pa'i ngo bo dgos pa ste de rnams sgom par byed pa'i sgo nas so//rdo rje zhes pa la/ rdo rje bdud rtsi ni bdud rtsi 'khyil pa'o/ /rdo rje phur bu ni phur bu bcu'i rnam pa'o/ /phyogs bcu'i rtse mor zhes pa ni phyogs bcu rnams su'o/ /spro bar bya zhes pa ni/ 'od zer 'bar ba rnams kyis 'bar bar byed bzhin pa'o//de nas 'dod pa'i zhes pa ni/ phyogs bzhi rnams su gnas pas so/ /bsam gtan zhes pa la bsam gtan gang gis zhes pa ni/ gdug pa can rnams phur bus 'debs pas so/ /yi dam zhes pa ni thun mtshams bzhir nyams su blangs pas so//gang du zhes pa ni/ gang du yid dang rjes su mthun pa'i gnas de ru mnyam par spyod pa'o/ /bsam gtan 'di yis zhes pa srung ba'i cho ga sgom par byed pas so/ /sangs rgyas zhes pa rdo rje sems dpa' la sogs pa'i lha'i rnal 'byor goms par byed pa la/ rang gi lha'i byin gyis rlob ste gcig tu 'gyur ro//dngos po med pa zhes pa ni/ /mdor byas can gyi rim par gsal lo/ /nam mkha'i rdo rje zhes pa ni nam mkha'o/ /de'i dbus su gnas pa ni de'i nang du gnas pa'o/ /rdo rje kun las skyes ni rlung gi rdo rje la sogs pa dkyil 'khor thams cad yongs su gyur pa'o//b+hUM yig ces pa ni/ de la sa'i cha'i steng du khang pa brtsegs pa'i sa bon b+hUM gyi yi ge'o/ /rdo rje zhes pa ni phyogs bcu rnams su de bzhin gshegs pa'i tshogs 'phro zhing rdzogs par byed pa'o/ /dpag tshad brgya'i khyon zhes pa ni/ gzhogs so sor dpag tshad nyi shu rtsa lnga'i tshad nyid do//'on kyang 'di lha la sogs pa'i dpag tshad du bya bar rnam par gzhag par bya'o zhes pas dpag tshad tsam mo/ /de'i rgya ni tshangs pa'i thig la sogs pa sgo'i mtshams so so tha dad du dpag tshad nyi shu'o zhes byas nas rgyal nang du brgyad kyi tshad du 'gyur ro//gru bzhi zhes pa ni grwa bzhi dang ldan pa'i phyir ro/ /legs par mdzes zhes pa ni/ lha dang mi las 'das pa'i phyir ro/ /rin chen bzhi dngos ni/ kha dog bzhi skyes pa nyid kyi phyir ro/ /mchod rten 'dra bas/ mchod rten te mchod par bya ba nyid kyi phyir ro/ / gsal ba ni shel lta bu'o/ /rang bzhin dri ma med pa ni nyes pa ma lus pa dang bral ba nyid kyi phyir ro/ /gang gsal ba ni shel te de'i ngo bo nyid kyi khang pa brtsegs pa la/ phyi na gnas pa rnams kyi yang / /dkyil 'khor ba'i lha rab tu snang ba'i phyir ro/ /sna tshogs gzugs ni in+d+ra nI la la sogs pa'i kha dog tu skyes pa nyid kyi phyir ro//sangs rgyas zhes pa phyung ba'i dkyil 'khor ba'i lha rnams kyis khyab pa'o/ /'od zer 'phro ba phyogs bcur khro bo'i 'od zer rab tu 'bar bas 'khrugs pa'i dkyil 'khor ro/ /dkyil 'khor ni zla ba dang nyi ma'i gdan dang ldan pa'o//kun zhes pa de bzhin gshegs pa thams cad kyi gnas kyi khang pa brtsegs pa'o/ /khams zhes pas rig pa'i lha mo rnams te/ de'i rjes su yul gzugs la sogs pa'i rang bzhin gyis gzugs rdo rje la sogs pa rnams so/ /lugs ma zhes pas shing la sogs pa las byas pa'o//dam tshig las 'dzag khu ba zhes pa ni shes rab dang thabs snyoms par zhugs pa las skyes pa'i zhu ba'i rang gi ngo bo dkyil 'khor ba'i lha nyid du skad cig gis dkyil 'khor du gnas ji lta ba bzhin du brtag par bya'o/ /cho ga yis/'bras bu 'dod pas btung bar bya/ /zhes pa ni/ gzugs phung gtogs pa me long dang / /zhes pa la sogs pa'i cho gas/ /sangs rgyas nyid kyi 'bras bu don du gnyer bas rang gi phung po la ji ltar gnas pa bzhin nang du chud par bya'o/ /de bzhin gshegs pa'i tshogs bsad na//zhes pa ni/ rang gi phung po de bzhin gshegs pa thams cad la sogs pas yongs su bsgrubs pa'i gzugs rim gyis mthar stong pa nyid la gzhug par bya'o/ /don dam pa'i zhes pa ni/ hUM yig yongs su gyur pa las nyi ma'i dkyil 'khor/ oM yig las skyes pa'i zla ba'i dkyil 'khor/ AHyig las skyes pa'i pad+ma'o/ /ye shes zhes pa ni/ sems tsam la snyoms par zhugs pas brtan pa dang / skye 'gro yid kyi nang du chud par gyur pa'o/ /gsum zhes pa ni sngags thams cad kyi mthar thug pa gtso bor gyur pa yi ge gsum gyis so//chen po zhes pa rdo rje sems dpa'i sku sgom par byed pa'o/ /tha ma zhes pa ni/ srid pa gang las bar ma chad par byang chub tu 'gyur ba ste/ de'i mthar thug par gyur pa nyid kyi phyir tha mar brjod par bya'o/ / de la gang zhig gnas pa ni sa bcu'i dbang phyug rnams te/ mchod par 'os pa bcu dang ldan pa'i byang chub sems dpa' 'am so so'i skye bo'i sngags las byung ba'i rim pa sgom par byed pa'i sgo nas dgod pa chen po thob pas srid pa tha ma de'i rgyu mtshan no/ /phung po zhes pa las ye shes kyi rang bzhin gyi lus yongs su brjes nas 'byung ba las gyur pa'i lus yongs su 'dzin pa'o//gzhug par bya'o zhes pas de'i rjes su dzaHhUM baM hoH/ zhes pa bzhi las gzugs rdo rje ma la sogs pa lha mo'i rang bzhin lus la gnas pa'i gzugs la sogs pa rnams su dgod par bya'o//chen po zhes pa ni rdo rje 'chang chen po'o/ /thams cad kyi bdag nyid ni de bzhin gshegs pa la sogs pa rnams kyi sa bon bsam shing brtags pa'i mthar byas pa dang ldan pa'o/ /thams cad kyis ni de bzhin gshegs pa dang mtshungs pa'i rin po che lta bu'i gang zag rnams kyis so//sangs rgyas zhes pa ni de bzhin gshegs pa thams cad kyi sku de'i bdag nyid kyis 'chang ba'o/ /dpal ldan ni spyan ma la sogs pa dang lhan cig tu'o/ /rdo rje gsum ni rdo rje 'chang ste/ de mi phyed pa nyid kyi bsgom pas so//bdag gi lus la byin gyis brlabs gnas ni/ /rab tu gnas pa'i gnas su mdzad du gsol/ /sku yi rdo rje can rnams zhes pa ni/ /sku yi rdo rje can zhes thob pa'o/ /de ltar gtso bo la gsol ba btab nas/ de'i 'khor lo la gsol ba 'debs bar byed pa bcu zhes pa la sogs pa ni rtogs par sla'o//sku gang yin ni gang gi sku'o/ /phung po lnga ni bdag nyid kyi'o/ /de'i rang bzhin te skur 'gyur ro zhes bsams pa'o/ /chos ni 'od dpag med do/ /gsung lam ni ngag gi rang bzhin nyid kyi phyir ro/ /dpal ldan ni gos dkar mo dang ldan pa'o//rdo rje gsum zhes pa la sogs pa ni sngar bzhin no/ /'dod chags chen po'i tshul dang ldan pas 'od dpag med dang gos dkar mo'i tshogs gnyis so/ /gang zhig kho na zhes pa ni/ gang kho na nges pa'i tshig ni sgra rnams kyi khyad par nges pa rjod par byed pas phun sum tshogs pa'o//chos 'dzin pa dang mtshungs pa ni 'od dpag med dang mtshungs pa'o/ /thugs zhes pa ni rdo rje'i rang bzhin gyi thugs 'chang ba gang yin pa de'o/ /dpal ldan ni mA ma kI dang ldan pa'o/ /rdo rje gsum zhes pa la sogs pa ni sngar bzhin no/ /kun du ni sems can rnams so/ / bzang po ni dge ba nyid kyi phyir mi bskyod pa ste/ de'i gsang ba ni gsang chen te/ sku ru byed do/ /ston par byed do zhes pas/ rang rigs dang ldan pa'i byang chub sems dpa' de rnams kyi dbang po de'i'o/ /blo ldan pa zhes pa ni/ mA ma kI dang ldan pa'o/ /rdo rje 'chang dang 'dra ba zhes pa ni mi bskyod pa dang mtshungs pa'o//de nas zhes pa ni dam tshig gsum gyi yi ge de dang de las bskyed pa'i rdo rje 'chang de la dmigs pa'i ting nge 'dzin gyi sgo nas so/ /rang zhes pa ni mi bskyod pas spyi bor dbang bskur ba'o/ /ye shes zhes pa ni ye shes sems dpa' 'o/ / hUM zhes pa ni nag po'o/ /sangs rgyas dkyil 'khor ni rdo rje sems dpa'i lus so/ /de'i dbus su gnas pa ni/ de'i thugs kar gnas pa'o/ /rdo rje zhes pa ye shes sems dpa'o/ /hUM ting nge 'dzin sems dpar bshad do/ /thams cad ces pa ni thog ma nyid du stug po bkod par chos kyi sku mngon sum du mdzad nas/de nas babs te sprul pa'i skus dga' ldan na gnas te/ bsam pa ji lta bar chos ston pa dang ldan par mdzad do/ /dga' ldan zhes bya ba ni de nas kyang babs te sa la skye ba dang byang chub pa la sogs pa thams cad la ston pa dang ldan pa'o//'dod chags zhes bya ba ni 'di nyid shes rab dang thabs kyi bdag nyid can/ rdo rje sems dpa'i gzugs su sprul pa dang ldan pa'o/ /'dod chags chen po zhes bya ba ni/ 'dod chags chen po can gyis sems can rnams smin par byed pa dang grol bar byed pa yul rnams la kun du chags pa'i tshul gang yin pa de nyid kyi ting nge 'dzin de mngon sum du mdzad nas so//dang po zhes pa ni sems dpa' gsum gyi bdag nyid can du bdag nyid rdzogs pa'o/ /gnas zhes pa ni so sor spyad par bya ba spyod par byed pa'o//spyad bya spyod pa med pa la phyogs gzhan gsungs pa/ de nas zhes bya ba la sngags gcig sprul pa las sems can gyi don zhes pa ni/ byang chub kyi sems las snying po'am sngags las dkyil 'khor gyi 'khor lo sprul pas sems can gyi don byas nas gnas ji lta bar gzhug par bya'o//yul rnams la byin gyis brlab par bya'o zhes pas byin gyis brlab pa ste/ gsum ni 'dod chags la sogs pa'i rang bzhin no/ /de'i go 'phang ni yid du 'ong ba la sogs pa'i yul te/ yul de dang de rnams la mchog tu gyur pas kyang ngo //gzugs rdo rje ma sogs pa bzhi po la sa'i snying po la sogs pa bzhi pos snyoms par 'jug par bkod par bya'o/ /gzhan yang byang chub sems dpa' bzhi po gnas ji lta ba bzhin gzhug par bya'o/ /nu ma'i bar ni snying ga ste de la hUM yig go/ /gtsug phud mthar ni mgo bor te oM yig go//bar du ste mgrin par AHyig go/ /rkang pa zhes pa ni rkang pa gnyis la hA yig go/ /lte ba rked pa gsang ba zhes pa ni/ de rnams nye ba'i brla'i phyogs su swA yig go/ /rgyal ba zhes pa rigs lnga dang so sor 'brel ba'i byang chub sems dpa' la sogs pa gzhan rnams kyang gnas ji lta ba bzhin du dgod par bya'o//phaT ces bya ni rdo rje dang pad+ma'i sgo la phaT yig bsgom par bya'o/ /ting nge 'dzin zhes pa ye shes sems dpa' gzhug pa'i ting nge 'dzin gyi bar ma chad par dbang bskur ba'o/ / mchod pa zhes pa gzugs rdo rje ma la sogs pa rnams kyis mchod pa byas nas so/ /thams cad ces pa ni de la mi bskyod pa'i ting nge 'dzin zhes bya ba la sogs pa rnams kyis 'chad par 'gyur ba'i rim pas sems can rnams kyi zhe sdang rnam par dag pa la sogs pa can gyi dgos pa thugs la bzhag pa'o//phyi dang zhes bya ba ni/ ngag gi bzlas pa dang rdo rje'i bzlas pa'o/ /sngon gyi zhes bya ba ni mnyam bar ma bzhag pa'i rnal 'byor gyi don du sngar gyi rim bas phyi'i dkyil 'khor bdag nyid la ji ltar gnas pa bzhin du brtag par bya'o/ /nam mkha' zhes bya ba ni 'jig rten gsum gyi dbus su 'jug pa'i bdag nyid can gyi lha'i bkod pa dang ldan par bsgom par bya'o//de'i rjes su hUM yig de yi dbus gnas par ni/ hUM yig snying gar gnas par bltas nas des kyang brtan pa dang g.yo ba thams cad rdo rje sems dpa'i gzugs brnyan gyi rnam par blta bar bya'o//phyi rol zhes pa ni phyi'i me la mar la sogs pa'i sreg blugs kyis so/ /nang gi lha rnams la bza' ba la sogs pa rnams kyis tshim par byas pas so/ /zhi ba can la sogs pa la ltos te rnam par gzhag go/ / yi ge gsum zhes bya ba ni/ rdo rje bzlas pa'i sgo nas so/ /phreng ba'i sngags zhes pa ni rgyud las gsungs pa'i khro bo la sogs pa rnams kyi sngags rgyas pa'o/ /sngags dang zhes bya ba ni/ mngon par bsngags pa'i sman rab tu byin pas so/ /rdo rje zhes pa ni rdzogs pa'i rim pa la gnas te/yang dag par sbyor ba la gnas pa'i sgyu ma'i lus mngon du byed pa'o/ /dran pa'i don du 'grel byas nas/ /bsod nams yang dag nyer bsags gang / /de yis myur du 'gro ba kun/ /rdzogs pa'i byang chub brtson par shob/ /rdo rje sems dpa'i sgrub thabs kyi 'grel pa rdzogs so// //lI la badzra zhabs kyis mdzad pa'o/ /bi b+hU ti tsan+d+ra'i rgya dpe la bltas nas dge slong rin chen grub kyis dpa' bo'i lo smin drug can gyi zla ba'i tshes nyer bzhi la bsgyur ba'o// //yi ge pa ni dge slong rin chen rgyal mtshan no/ /sngags kyi nges pa thog ma ste/gnyis las dgod ba bstan pa'o/ /rnam par gzhag pa yang gsum ste/ bzhi pa de nyid bstan zhes pa sgrub thabs kyi go rims te/ 'di'i don ni dang por sngags kyi tshig sgrub thabs las phyung nas sems kyi kun du brtags pa nges par 'gyur ro/ /de nas phung po la sogs pa rnams su rnam par snang mdzad la sogs pa'i rnam pas dgod pa'o//bkod pa'i lha rnams re re'i mthar gyis rang gi mtshan nyid yongs su shes shing nges par rtogs pa'i lha'i 'khor lo'o zhes pa ni rnam par gzhag pa'o/ /phra mo'i rnal 'byor gyis gcig tu byas nas rab tu zhugs te gnas pa las langs te/nges par byung ba'i sngags las dgod par 'gyur ro zhes so/ /nges pa'i sngags ni/ badzra d+h+r-ika hUM oM sum+b+ha zhes pa la sogs pa'o/ /'di 'ang sngar gyi rgya dpe'i rjes su 'byung ngo / /'dis 'khor ba sdug bsngal gyi rgya mtsho chen po myur du skems par gyur cig/