CLOSE WINDOW

D1806
བོད་ཡིག

@##/ /rgya gar skad du/ a b+hi bo d+hi kra ma u pa de sha /bod skad du/ mngon par byang chub pa'i rim pa'i man ngag /'jam dpal gzhon nur gyur pa la phyag 'tshal lo/ /rdo rje sems dpa' phyag 'tshal te/ /mngon par byang chub rim bshad bya/ /thub pa chen pos chos rnams ni//brgyad khri bzhi stong gsungs pa las / /mngon par byang chub mtshan nyid ni/ /snying po las kyang snying por gsungs/ /mngon par byang chub rnam gnyis te/ /phyi dang nang gi zhes su bshad/ /phyi ni mdo sde rnal 'byor rgyud/ /thub pa mi g.yo la zhugs la/ /rgyal ba kun gyis 'di skad bskul//'dis ni mthar thug mi thob ste/ /nam mkha'i dkyil ltar mchog gyur pa/ /'od gsal ba yi gnas thob nas/ /rab 'ga' gzugs su skye 'gyur gsungs/ /de ltar thams cad stong bsgoms pas/ /byang chub snying por mngon sangs rgyas/ /byang chub sems dpa' don grub la//rigs bzhi'i bde bar gshegs pa yis/ /mngon par byang chub lnga brtags pas/ /de bzhin byang chub sems dpa' des/ /mngon par byang chub lnga bsgoms pas/ /'og min gnas dang ri rab rtser/ /rnam par snang mdzad rdor dbyings su/ /mngon par sangs rgyas phyi yi tshul//nang ni gsang sngags nang tshul te/ /skye bo 'dod chags can don du/ /bcom ldan rnam par snang mdzad kyis/ /'dod chags chen po'i tshul nyid kyi / /ting nge 'dzin la snyoms zhugs te/ /nyid kyis 'khor bsdus gzugs sprul te/ /bde ba'i rnam pa snang ba gsum//zil mnan 'od gsal mi rtog pas/ /bdag byin brlab pa'i gzhal yas bskyed/ /sngags kyi bdag por byin brlabs te/ /zhal gsum lta bur dbus su bzhugs/ /chos bshad 'khor rnams rim phyung ba/ /de ni nang gi mngon byang chub/ /yang na nang gi phyi nyid ni//phyag rgya mo la rab brten te/ /snang gsum rim myong las 'das pa'o/ /thams cad stong pa'i 'od gsal ba/ /bla ma'i man ngag las rnyed pa/ /de ni nang gi phyi zhes bshad/ /nang gi nang ni phyag rgya bral/ /dang po smig rgyu 'od lnga'i tshul/ /bde ba rtog bral nyams myong gsum//gsum po las 'das gsum po nyid/ /thams cad stong pa'i rang bzhin dag /bla ma'i man ngag las rnyed pa'o/ /de bzhin rjes 'jug rnal 'byor pa'i/ /nyams su blang ba'i bsam gtan ni/ /stong pa gsum gyi rnam dag gang / /'od gsal thams cad stong pa ste//rgyu ba dang ni mi rgyu ba/ /lung dang rigs pa'i gtan tshigs kyis/ /gzhigs te 'od gsal bar byas nas/ /phyi nas rang nyid de bzhin byed/ /rjes gzhig rim gyis thun mong ngo / /mngon par byang chub lnga bsgoms pas/ /de yang rjes 'jug bsam gtan no/ /khyad par rjes 'jug bsam gtan ni //gzung 'dzin bral ba'i snang gsum nyid/ /lha yi de nyid sgyu ma'i sku/ /bdag byin brlab pa'i rim du bshad/ /de nyid ril por 'dzin rnams kyis/ /mgo bo nas ni rkang pa'i bar/ /ji srid snying gar phyin gyi bar/ /dbugs kyi rlung ni me long la/ /ji ltar kun du thim gyur ltar/ /rnal 'byor yang dag mtha' la 'jug /thams cad stong pa gang yang min/ /ril por 'dzin pa zhes su bshad/ /yang na yang dag snang gsum yin/ /chos bdag med pa'i rigs pa yis/ /gzhigs pa'i sgyu ma'i snang ba gsum/ /de nyid rigs pas yang gzhigs pas/ /'od gsal thams cad stong pa nyid//de nyid rjes gzhig thun mong ngo / /yang na khyad par snang ba gsum/ /'byung ba'i rim gyis sgyu ma'i sku/ /smig rgyu lta bu'i yid kyi lus/ /bdag la byin gyis brlabs pa nyid/ /mgo bo nas ni rkang pa'i bar/ /snying ga'i bar la snang ba gsum/ / 'dus pa'i thig le'ang je chung nas/ /me long gi ni rang bzhin du/ /mi dmigs 'od gsal thams cad stong / /ril por 'dzin pa zhes su bshad/ /ji ltar mar me bum nang gnas/ /phyi rol du ni snang mi 'gyur/ /bum pa de nyid bcag gyur na/ /de 'og mar me'i 'od snang 'gyur/ / de bzhin bum pa rang lus nyid/ /de nyid mar me lta bu yin/ /bla ma'i zhal gyis legs bcag nas/ /sangs rgyas ye shes gsal bar 'gyur/ /snang ba gsal te mi dmigs la / /chad par lta bar 'gyur zhe na/ /snang ba mi snang yod med sogs/ /de kun ltos pa'i rigs pa yis//snang yod la sogs bsgrubs gyur na/ /mi snang med sogs 'grub par 'gyur/ /snang yod la sogs ma grub na/ /mi snang med sogs ga la 'grub/ /mtha' bral dbus kyang mi dmigs te/ /thams cad stong pa 'od gsal ba/ /spros pa kun bral gang yang min/ / chad par lta ba ga la yin/ /de yi mtshan nyid yod med dang / /snang dang mi snang rtag chad sogs/ /pho mo ma ning kha dog dbyibs/ /skyed dang sngags dang sems la dmigs/ /bden gnyis 'khor 'das la sogs dang / /bsod nams gzugs dang sdig gzugs min/ / sku dang yon tan gang yang min/ /brjod pa'i tha snyad kun dang bral/ /e ma'o kun du bzang po yi/ /rdo rje sku dang gsung thugs sogs/ /skye ba med pa'i tshul gyis ni/ /skye ba dag tu rab tu bsgrags/ /skyes pa nyid na skye ba med/ /skyes dang ma skyes gnyis su med/ /dngos po med pa bsgom pa'i dngos//bsgom par bya ba bsgom pa min/ /de ltar dngos po dngos med pas/ /bsgom pa dmigs su med pa'o/ /dngos po thams cad dang bral ba/ /phung po khams dang skye mched dang / /gzung dang 'dzin pa rnam spangs pa/ /chos bdag med pa mnyam nyid pas//rang sems gdod nas ma skyes pa / /stong pa nyid kyi rang bzhin no/ /dngos po 'di rnams ma skyes pas/ /chos dang chos nyid med pa ste/ /nam mkha' lta bur bdag med pa/ /byang chub tshul ni brtan pa'o/ /chos rnams thams cad dngos med pas/ /chos kyi mtshan nyid rnam par spangs//bdag med chos las kun du 'byung / /byang chub tshul 'di brtan pa'o/ /ma skyes pa yi chos rnams la/ /ngo bo med de bsgom pa'ang med/ /nam mkha'i tshul du sbyor ba yis/ /dngos po dag tu rab tu grags/ /chos rnams rang bzhin 'od gsal ba/ /gdod nas dag pa nam mkha' bzhin//byang chub med cing rtog pa med/ /byang chub tshul 'di brtan pa'o/ /mngon par byang chub mngon sangs rgyas/ /bdag gi de nyid chos kyi dbyings/ /de bzhin nyid la sogs pa'i tshig /thams cad de yi rnam grangs so/ /sus kyang ma byas ma bcos pa//ma bslad mi 'gyur de bzhin nyid/ /byang chub nam mkha'i mtshan nyid pas/ /mngon par byang chub ces brjod do/ /de nyid rtogs te mthong sgom tshe/ /gzhan gyi don du lan 'ga' zhig /chu las nya ldang ji bzhin du/ /bdag byin brlab pa'i rim gyis ni/ /rtsol bas skur bzhengs don mdzad de//da dung bden gnyis phra mor snang / /de nas zung 'jug ye shes skye/ /chos rnams gang la'ang mi bzod dang / /'jigs skrag nyam nga'i rtog pa med/ /gnyis pa thams cad rnam spangs pa'i/ /dbyer med zung du 'jug pa nyid/ /de ltar rtogs pas thams cad de//spyod pa'ang de bzhin gnyis med pa'o/ /sngags pas seng ge bzhin du spyod/ /zung 'jug ting nge 'dzin bslabs pas/ /mi slob zung 'jug chos sku thob/ /yid bzhin nor bu rin chen ltar/ /mi rtog smon lam dbang gis na/ /gzugs sku la sogs yon tan rnams//gdul bya dag pa'i ngo la snang / /ma rungs phyi ma'i dus su ni/ /lung zab man ngag mi bsten par/ /'thad sgrub rigs pa gtsor byed pas/ /rang rang grub mtha' dam par 'dzin/ /sbas don tsam gyis chog byed cing / /mthar thug lta ba zab mo la//mi mos slar yang sun 'byin byed/ /des ni bdag gzhan don brlag 'gyur/ /glang chen myos pa rang yan ni / /glang rdzi lcags kyu ldan pa yis / /glang chen gzhan yang sun 'byin rlag /glang rdzi lcags kyu nyid kyang 'joms/ /de ni rgyal po'i dkor min te/ /rang gzhan gnyis ka'i don rlag byed//de bzhin gnyis dang mi ldan pa'i / /rigs pa'i glang po rang yan gyis/ /gnyis ldan rigs pa'ang sun 'byin zhing / /gnyis pa nyid kyang 'joms par byed/ /de ni gsang sngags la min te/ /bdag gzhan gsang ba'i don rlag byed/ /seng ge'i gzugs can nga rgyal gyis//wa yi tshig gis zab mo yi/ /mnyam nyid gang yang ma yin pa/ /stong nyid lta ba sun 'byin 'joms/ /rin chen rdzab tu bsnubs gyur kyang / /'od dang yon tan rang snang bzhin/ /mthar thug lta sman rdzas bsnubs kyang / /rtsal can blo la 'bar zhing snang //'dul 'dzin dman dang rtsod dus su/ /'thad sgrub rigs pa gnyis gtso ste/ /'jig rten grags te gtsor byed pas/ /gong ma'i lung dag mi tshad kyang / /gsang sngags mthar thug lta dus su/ /yid dang dbang po mngon sum dang / /rjes su dpag pa mi tshad de/ /lung zab man ngag tshad mar bya//gang zhig nga rgyal gyis sbags shing / /de nyid chos la brnyas byas te / /yang dag rim pa sun 'byin pa/ /mnar med sems can dmyal bar ltung / /gang zhig slob dpon smod pa dang / /theg pa chen po sun 'byin dang / /mi gang gsang sngags rgyud dag gi /sbyor ba la ni 'phya byed pa/ /des ni dngos grub thob mi 'gyur/ /de ni rtag tu gdon gyis 'dzin/ /khab len rdo la lcags 'du ltar/ /mi 'dod yid du mi 'ong ba/ /tshe 'dir mi 'dod sna tshogs 'du/ /phyi mar ngan song gsum mthar ltung / /dngos po don dam mi shes par//phyi rol dngos la mngon zhen pas/ /ngan par rtog pa'i rnam rtog gis/ /rin chen sems ni dri mar byas/ /sgyu mar 'dzin la mngon zhen cing / /don dam phyi rol byas pa yi/ /lta ba dman pa pa rnams kyis/ /bla med byang chub ji ltar thob/ /tha snyad tshig gi nga rgyal gyis/ / bla ma mi bsten bsnyen bkur med/ /dman pa'i lta ba la mos te/ /sbas gsum lta zhen mi gtong zhing / /mthar thug don la mi mos te/ /rigs pa gtsor byed shes rab kyis/ /mthar thug zab mo sun 'byin pa/ /de la de nyid bstan mi bya/ /gang zhig bla ma bsnyen bkur zhing / / thams cad stong pas mi skrag bzod/ /mthar thug don la dad mos la/ /de la bla ma'i drin sbyin bya/ /'phags pa klu sgrub man ngag la brten nas/ /bdag gis mchog tu gsang ba 'di bshad pas/ /kun gyi kun rdzob bden pa dag gyur nas/ /mthar thug don rtogs byang chub mi dmigs bsngo//mngon par byang chub pa'i rim pa 'bras bu dang bcas pa slob dpon 'phags pa lhas mdzad pa'i man ngag rdzogs so// //rgya gar gyi mkhan po shrad+d+hA ka ra barma dang / lo tsA ba dge slong rin chen bzang pos bsgyur nas zhus te gtan la phab pa'o/