CLOSE WINDOW

D1805
བོད་ཡིག

/ @##/ /rgya gar skad du/ swA d+hi Sh+ThA na kra ma pra b+he daM / bod skad du/ bdag byin gyis brlab pa'i rim pa rnam par dbye ba/ dpal rdo rje sems dpa' la phyag 'tshal lo/ /lta ba thams cad rab bcom pa'i/ /ye shes sku la phyag 'tshal lo/ / bdag byin brlab pa'i rnam dbye 'di/ /brtse bas bdag gis bshad par bya/ /yod ces rtog pa ji snyed pa/ /de snyed rtag pa'i lta ba ste/ /rtag par mngon par zhen pas na/ /'di ni sgyu ma'i mtshan nyid min/ /med ces rtog pa ji snyed pa/ /de snyed chad pa'i lta ba ste/ /chad par mngon par zhen pas na//'di yang sgyu ma'i mtshan nyid min/ /yod ces pa dang med ces pa'i/ /de dbus su gang rtog pa ni/ /dbus su mngon par zhen pas na/ /'di yang sgyu ma'i mtshan nyid min/ /kun rdzob bden par gang gsungs pa'i/ /sangs rgyas rnams kyi sku mtshan nyid/ /de 'dir sgyu mar bstan pa ste//bdag byin brlab pa zhes brjod do/ /rgyu dang mi rgyu'i 'jig rten gsum/ /gang zhig gis ni thams cad khyab/ /bsod nams dman pas mi rnyed de/ /lung bstan nyid kyis rnyed par 'gyur/ /gtsang sbra sdom pa 'dir mi dgos/ /dka' thub dka' spyad mi dgos te/ /dka' thub sdom pa med par yang //dga' dang bde bas 'grub par 'gyur/ /gang zhig de ltar shes nas ni/ /de nyid gang zhig rtag dran na/ /thams cad sgyu ma'i rnam 'phrul gyis/ /de yis sangs rgyas 'grub par 'gyur/ /sgyu mas gnas pa'i rnal 'byor pa/ /'di la lhas kyang rtag tu skyong / / sgyu ma lta bu'i ting 'dzin gyis/ /thams cad mkhyen pa de nas 'gyur/ /rdo rje che dang stobs po che/ /lang tsho nad med bde ba'i mchog /sangs rgyas rdzu 'phrul thob nas ni/ /skye ba 'byung ba rang dgas so/ /mthong ba nyid kyis bskul med par / /sems can rnams ni dbang du 'ong / / sgyu ma lta bu'i ting 'dzin gyis/ /'dod don thams cad rnyed par 'gyur/ /chos kun rmi lam sgyu 'dra ste/ /sangs rgyas pa kun smra mod kyi/ /bdag byin brlab las phyir bltas pas/ /des ni bden pa mthong mi nus/ /gzhu yi rnam pa'i yid rang bzhin/ /rnam shes rlung dang yang dag ldan//sgyu ma'i dpe la rmongs pas ni/ /rang gi ye shes des mi mthong / /bskal pa bye ba mtha' yas par/ /thos pa'i pha rol son gyur kyang / /bla ma'i lung dang bral ba yis/ /bdag byin brlab pa rnyed mi 'gyur/ /de bas nga rgyal yongs spangs nas/ /sangs rgyas 'bras bu 'dod pa yi //rdo rje theg pa zhon pa yis/ /bla ma bsgrims te mnyes par bya/ /shin tu rnyed dka'i rim dbye bas/ /'di ni rab tu bshad par bya/ /gang zhig shes nas rnam spyad pa/ /sgrub po sangs rgyas kun dngos 'gyur/ /sa la sogs pa rnam bzhi dang / /de bzhin du ni stong pa bzhi//gnas ni rnam pa brgyad po dang / /skye dang 'jig pa'i rgyur shes bya/ /'od gsal las ni stong chen te/ /de la thabs ni yang dag 'byung / /de las skyes pa shes rab te / /de las rlung ni 'byung bar 'gyur/ /rlung las me ni yang dag skyes/ /me las chu ni 'byung bar 'gyur//chu las skyes pa sa yin te/ /de rnams la ni sems can 'byung / /sa ni chu la thim 'gyur te/ /chu ni me la thim par 'gyur/ /me ni phra ba'i khams su zhugs/ /rlung yang sems la thim 'gyur te/ /sems ni sems las byung las 'gyur/ /sems byung ma rig par zhugs nas//de yang 'od gsal bar song ste/ /srid pa gsum po 'gag par 'gyur/ /sgyu ma lta bu'i ting 'dzin gyis/ /ji srid bdag nyid ma mthong ba/ /de srid thog ma'i dus can gyi/ /srid pa'i 'khor lor 'jug par 'gyur/ /rang rig sgyu ma lta bu ste/ /rtog ge pa yi yul min zhing //rang gi lus la gnas mod kyi/ /bsod nams dman pas rnyed mi 'gyur/ /rang lus 'gyur ba med pa de/ /mchog gcig gis ni shes byas te/ /de ni dpe yis nyer mtshon nas/ /bla ma'i zhal gyi drin gyis so/ /sa dang de bzhin chu la sogs//gter dang nor bu sbas pa ltar/ /de bzhin lus la kun mkhyen pa'ang / /rmongs dang ldan pas mthong mi 'gyur/ /sgyu ma smig rgyu dri za yi/ /grong khyer dang ni brgya byin gzhu/ /me long gi ni gzugs brnyan dang / /chu zla dang ni brag ca dang / /rmi lam mig yor sprin dang glog / chu yi chu bur zhes bya ba/ /sgyu ma'i dpe ni bcu dang gnyis/ /rnam pa du mar yongs mtshon pa/ /des 'di shin tu gsal ba'i gzugs/ /lta ba'i gzugs la dmigs par byed/ /sgyu ma gsum du bstan pa yis/ /nan tan du ni rab tu bsgrags/ /me long gi ni gzugs brnyan dang //'ja' tshon dang ni de las gzhan/ /gsum pa chu zla lta bu yis/ /de yi sku ni bsgom par bya/ /spyod pa bsdus las gang bstan pa'i/ /rigs lnga'i sangs rgyas bdag nyid che/ /lha dang lha mo tha dad pa/ /rigs lnga las ni yang dag 'byung / /khro bo pho nya pho nya mo/ /bran pho bran mo mngag pa sogs//de ni yod min de med kyang / /'gro ba'i don phyir rab tu bstan/ /de ltar rnal 'byor bdag nyid kyis/ /thams cad spro zhing bsdus pas te/ /dkyil 'khor tshul ni rab rgyas pa'ang / /sgyu ma lta bu'i ting 'dzin gnas/ /rnam pa sna tshogs kha dog kyang / / sgyu ma lta bur rab tu sbyar/ /mya ngan 'jigs dang chags bral dang / /skrag dang de bzhin rmongs pa dang / /sdug bsngal ba de yod min pas/ /de bzhin mi sdug mthong thos dang / /yid du mi 'ong dri ro dang / /reg bya rtsub sogs gang gyur pa/ /tshul dang mi mthun rang bzhin rnams/ /sgyu ma lta bus dag par bya//bshang dang gci sogs 'jug pa dang / /grang dang rims sogs nad dang ni/ /rgas la sogs pa'i rang bzhin rnams/ /de rnams sgyu ma'i sman gyis gso/ /chos gang gis ni byis pa rnams/ /'khor ba'i gnas su 'jug 'gyur ba/ /chos de nyid kyis rnal 'byor pa//bde ba chen po'i gnas la 'jug /'dod yon lnga yi bde ba yis/ /byis pa rnams ni 'ching brjod de/ /chos de nyid kyis rnal 'byor pa/ /sangs rgyas nyid kyang 'grub par 'gyur/ /chags dang rgyags dang sred pa dang / /de bzhin byams dang snying rje dang / / dga' dang btang snyoms nyid dang ni/ /stobs dang de bzhin spro ba dang / /dpa' dang mi srun gdug pa dang / /drag shul de bzhin dka' bar sbyor/ /snang ba'i rang bzhin gzhan dag kyang / /bdag byin brlab pa'i bden pas bsdu/ /phyag rgya gcig dang ldan pa'am/ /yang na phyag rgya bzhi dang ldan//btsun mo'i 'khor na bzhugs pas kyang / /bdag byin brlab pa rjes dran bya/ /gzugs dang sgra dang de bzhin dri/ /ro dang reg bya sdug pa rnams/ /bde chen go 'phang gnas nas kyang / /rnal 'byor pa yis rtag tu myong / /rgyud mangs dang ni rgyud gcig dang //stug pa dang ni gling bu nyid/ /rol mo rnam bzhi rnal 'byor pas/ /bdag byin brlab pas rab tu 'jug /rtag tu sgeg la sogs pa yi/ /gar gyi ro dgur yang dag 'byung / /sgyu ma lta bu'i ting 'dzin gyis/ /rnal 'byor pa yi longs spyod bya/ /rnal 'byor rgyud las gang gsungs pa'i//brda sogs cho ga rgyas pa dag /sgyu ma lta bur dmigs pa yis/ /rnal 'byor pas ni de la 'jug /'byed pa dang ni 'dzums pa dang / /dgod dam de bzhin smra ba dang / /'gro 'ong nyal lam za na yang / /sgyu ma'i lus su dran par bya/ /sna tshogs rtog pas brtags pa yi//'gro ba'i bdag pos rol pa gang / /'dod chags chen po'i tshul gnas nas/ /de nyid rig pas rnam par spyad / /lta ba thams cad spangs pa yi/ /bdag byin brlab pa 'di thos nas/ /las rnams thams cad bya ba'am/ /ji ltar 'dod pa bzhin du rgyu/ /mchod rten las ni mi bya zhing //glegs bam bklag par mi bya ste/ /bdag byin brlab pa'i rim gyis kyang / /bya ba dang ni bklag pa'ang bya/ /lha la 'dud par mi bya zhing / /dge slong rnams la phyag mi bya/ /bdag byin brlab pa'i rim nyid kyis/ /yang na kun la phyag bya'o/ /sngags dgod pa ni mi bya zhing / / phyag rgya 'chang ba'ang de bzhin no/ /sngags kyi bzlas brjod mi bya ste/ /yang na gzugs brnyan ldan par bya/ /phyi rol don ni yod min pas/ /'di dag rang gi sems su blta/ /de bzhin sgyu mar bsgoms nas ni/ /de nyid kyang ni rjes dran bya/ /bsam gtan cho ga dpag med dang //sngags kyi sku yi ting 'dzin rnams/ /ji srid sgyu ma rnyed med na/ /kun kyang sa yi 'bras don tsam/ /lus dang gnas dang longs spyod dang / /sa dang pha rol phyin la sogs/ /sangs rgyas rdzu 'phrul rnam rol pa/ /thams cad sgyu ma'i rnam 'phrul yin//ji ltar me long dri ma med pa la/ /yan lag kun dang ldan gzugs snang ba ltar/ /dpe byad brgyad cu mtshan chen sum cu gnyis/ /de bzhin rtag tu rdo rje 'dzin lus nyid/ /mkha' dbyings dbang po'i mtshon cha kha dog snang ba ltar/ /de bzhin rdo rje 'dzin pa'ang kha dog dkar po la sogs pas//dge sogs las rnams ji bzhin de bzhin du ni 'jig rten la/ /yan lag ma nyams phun sum tshogs pa'i gzugs ni ston par mdzad/ /gang zhig gser dngul dang ni nor bu dung dang shel bye ru/ /bai DUr+ya dang zangs dang 'jon mo steng sogs yang dag gnas/ / nam mkha'i ngos nas ri bong can gyi gzugs ni gcig shar bas/ /de la rnam par 'jug pas shin tu gsal bar gang byas ltar/ /rang dngos sna tshogs gzugs can zag med gang / /'jig rten kun khyab sgyu ma'i rang bzhin nyid/ /rnam pa sna tshogs 'gro ba'i sder gnas pa'i/ /sems mgon rdo rje de yang de bzhin no//gzugs sogs rnam pa lnga dang gang yang skye mched rnams de nas/ /bco brgyad ces byar gsungs dang khams ni rnam pa lnga dang yang / /ye shes lnga po dang ni yul de 'gro ba ma lus kun/ /sgyu ma las byung de 'dir rdo rje 'dzin de gzhan ma yin/ / ri rnams dang ni rgya mtsho chen po brgyad gang yin/ /gling rnams dang ni dmyal ba la sogs dbye ba rnams/ /rgyu ba dang ni mi rgyu ba nyid gang yin pa/ /de de'i rang bzhin rdo rje 'dzin te gzhan min blta/ /de ltar 'gro ba ma lus rang gi sems las byung ba ste / /srid dang thar pa rtog dang yang dag ldan pa'i rnam par shes//gang gis srid pa'i rgya mtsho sdug bsngal rgya mtshor 'khor 'gyur las/ /legs sbyangs pha rol son pa'i 'bras ldan de la bstod phyag 'tshal/ /slob dpon chen po Ar+ya de bas mdzad pa'i bdag byin gyis brlab pa'i rim pa rdzogs so// //