CLOSE WINDOW

D1804
བོད་ཡིག

/[# #]@##/ /rgya gar skad du/ tsit+tA ba ra Na bi sho d+ha nA ma pra kA ra NaM/ bod skad du/ sems kyi sgrib pa rnam par sbyong ba zhes bya ba'i rab tu byed pa/ bla ma dam pa'i zhabs la phyag 'tshal lo/ / 'jam dpal gzhon nur gyur pa la phyag 'tshal lo/ /thog ma mtha' ma med zhi ba/ /dngos dang dngos med rnam par spangs/ /rnam par rtog med dmigs dang bral/ /gnas pa med pa gnyis med pa/ /'gro ba med pa dpe med pa/ /brjod du med pa bltar med pa//gnas pa med pa gnas med pa/ /'gyur ba med pas 'dus ma byas/ /sangs rgyas thams cad kyi ni gnas/ /sku ni snying rje'i rang bzhin nyid/ /sems can mos pa sna tshogs la/ /thabs rnams sna tshogs rab ston pa'o/ /'dod chags chen po tshul phyag 'tshal/ /pad+ma gar dbang khyod phyag 'tshal//rang gi sems ni rtogs bya'i phyir/ /cung zhig tsam zhig brjod par bya/ /rnal 'byor spyod pa'i tshogs kyi ni/ /thams cad nyid du rab nges pa/ /brjod par bya ba 'di dag nyid/ /de phyir 'di dag spyad par bya/ /las drag gang gis 'gro ba rnams/ /gang dang gang du 'ching 'gyur ba//thabs dang bcas na de nyid kyis/ /srid pa'i 'ching las grol bar 'gyur/ /sems tsam rnam par dag pa'i phyir/ /'bras bu rnam par dag par 'gyur/ /'di dag shin tu rgyas par ni/ /theg pa chen por gsal bar bstan/ /chos dang gang zag dbyer med pa//ye shes tsam du thub pas gsungs/ /de lta na yang 'di ltar 'byung / /rigs pa dang yang rab tu mthun/ /dngos 'dzin gdon gyis zin pa yi / /zhen pa rab tu bsal bya'i phyir/ /lung las kyang ni gsal po ru/ /rgyas par snying rje'i bdag nyid gsungs/ /chos rnams sngon du 'gro ba'i yid//yid gtso yid ni mgyogs pa ste/ /yid gnyis kyis ni 'bad pa yang / /smra ba'am ni byed pa'o/ /dge slong rang gi pha rgan gyis/ /myur 'ded ces ni bskul gyur nas/ /bskul bas de nyid shi gyur kyang / /mtshams med sbyor ba ma yin no/ / shin tu na ba'i dgra bcom pas/ /dge slong nad g.yog byad pa la/ /nga yis mgrin pa sdoms zhes bstan/ /de ni shi yang skyon med bstan/ /'du shes gzhan gyis gzhan dag ni/ /shi yang nyes te mi spyod par/ /'di 'dra lung las gsal por bstan/ /de phyir sems dge nyes pa med//da 'dus byas pa'i blo yis ni/ /mchod rten bshig kyang nyes med de/ /nye ba'i mtshams med byas pas kyang / /bsod nams phung po 'ba' zhig go/ /bsam pa bzang pos mchil lham gnyis/ /thub pa'i dbu la bzhag pa dang / /de nyid gzhan gyis bsal byas pa//gnyis kas rgyal srid thob par 'gyur/ /de phyir bsam pa'i rtsa ba las/ /bsod rnams sdig pa rnam par gnas/ /lung las 'di ltar gsungs pa'i phyir/ /sems dge ba la nyes pa med/ /rang lhar sbyor ba'i bdag nyid kyis/ /'gro ba'i don ni byed brtson pas//rnal 'byor 'dod yul longs spyad kyang / /grol 'gyur gos par mi 'gyur ro/ /ji ltar dug gi de nyid shes/ /dug la spyad nas za bar byed/ /'di ni brgyal bar mi 'gyur zhing / /nad las thar pa 'ba' zhig 'gyur/ /sgyu ma smig rgyu dri za yi/ /grong dang rmi lam ji bzhin du//'gro ba thams cad rnam bltas la/ /ci zhig ji ltar su zhig spyod/ /byis pa rnams ni gzugs la chags/ /'bring po rnams ni chags bral 'gyur/ /gzugs sogs ngo bo nyid shes na / /blo mchog rnams ni grol bar 'gyur/ /dam tshig thams cad rnam bsams la/ / lha la mchod pa'i cho ga yis/ /the tshom med par bzang por blta/ /sngags kyis bskul la longs spyod bya/ /yi ge gsum gyi sbyor ba yis/ /sbyang dang rtogs dang de bzhin sbar/ /srin lag mthe bong rtse mo yis / /de bzhin gshegs rnams tshim par bya/ /byis pa rnams la 'di bden pa//de ni rnal 'byor pa la brdzun/ /de tsam zhig tu longs spyad pa/ /bcings pa med cing grol ba med/ /'khor ba mya ngan 'das pa zhes/ /de nyid ma mthong ba yi sems/ /'khor med mya ngan 'das med ces/ /de nyid mthong ba rnams kyi sems/ /rnam par rtog pa'i gdon chen po//'khor ba'i rgya mtshor ltung byed yin/ /rnam par mi rtog bdag nyid ches/ /srid pa'i 'ching las grol bar 'gyur/ /the tshom dug gis gnod pa ni/ /skye bo dug gis gnod pa bzhin/ /de nyid rtsa ba nas bton la/ /snying rje'i bdag nyid can gyis spyad//dper na shel sgong dag pa ni/ /kha dog gzhan gyis sgyur bar byed/ /de bzhin rin chen sems 'di yang / /rtog pa'i tshon gyis bsgyur ba nyid/ /tha mal rtog pa'i tshon gyis ni/ /rin chen sems ni dben 'gyur na/ /thog ma nas dag ma skyes pa//gnyug ma'i rang bzhin dri med gang / /byis pas gang dang gang smad pa/ /de dang de la 'bad pas spyad / /rang gi lha yi sbyor ba yis/ /sems ni dri med bya ba'i phyir/ /rnal 'byor dge ba'i sems kyis ni/ /chags med dug gis rmongs pa yis/ / 'dod can ma la 'dod spyad pas/ /'dod pas thar pa thob par 'gyur/ /dper na bdag nyid mkha' lding du/ /bsgoms nas dug kun 'thung byed pa/ /bsgrub bya'i dug kyang med par byed/ /dug gis zil gyis mi non no/ /'khor lo dpag tshad bcu gnyis pa/ /lcags byas mgo la 'khor ba yang //byang chub sems ni bskyed ma thag /med par gyur ces thos pa yin/ /byang chub sems ni yang dag bskyed/ /rdzogs pa'i byang chub sems byas pa/ /de yis mi bya gang yang med/ /'gro ba bzung ba'i bsam pa yis/ /thog ma nas dag ma skyes pa//dngos po med pa dri med pa/ /'gro ba bsam pas yang dag mthong / /bcings pa med cing grol ba med/ /lha yi yon tan rgyas par ni/ /rnal 'byor cho ga bzhin bsams nas/ /chags pa'i sems kyis chags pa'am/ /chags pa spyad nas grol bar 'gyur//ci bya gang la dmigs she na/ /dngos po nus pa sna tshogs pa/ /ji ltar dug gis zin pa 'ga'/ /dug nyid kyis ni dug med byed/ /rna ba'i chu la chu nyid dang / /tsher ma zugs la tsher ma ltar/ /de bzhin chags la chags nyid kyis/ /mkhas pa rnams kyis 'dzin par byed//dper na khrus mkhan dri ma yis/ /gos kyis dri ma med par byed/ /mkhas pas de bzhin bdag nyid kyi/ /dri las dri ma med par bya/ / ji ltar rdul gyis me long gi /dri ma 'dag par 'gyur ba bzhin/ /de bzhin mkhas pas nyes pa dag /nyes pa sbyang phyir bsten par bya//lcags kyi gong bu chu nang du/ /ji ltar gting du 'gro bar 'gyur/ /de nyid snod du byas pas su/ /bdag dang gzhan yang sgrol bar byed/ /de bzhin snod du byas pa'i sems/ /shes rab thabs kyi cho ga yis/ /'dod pas spyod bzhin grol bar 'gyur/ /gzhan dag kyang ni grol bar byed//rnam shes ngan pas bsten byas na/ /'dod pa 'ching ba nyid du 'gyur/ /de nyid mkhas pas bsten byas na / /'dod pas thar pa rab tu sgrub/ /'o mas dug ni zhi 'gyur ba/ /'jig rten kun la rab tu grags/ /de nyid sbrul gyis 'thungs na ni/ /dug ni shin tu 'phel bar byed//ji ltar ngang pas 'o ma ni/ /chu las 'thung bar byed pa ltar/ /de bzhin mkhas pas dug bcas yul/ /sbyangs nas spyad pas grol bar 'gyur/ /ji ltar cho ga bzhin spyad na/ /dug kyang bdud rtsir 'gyur ba yin/ /byis pa rnams kyis mar kham sogs//bza' ma legs pa dug tu 'gyur/ /de ltar sems ni 'di nyid kyang / /gtan tshigs bzang pos sbyangs byas na/ /rnam par mi rtog dmigs med pa/ /rang bzhin dri med rab tu snang / /ji ltar me ni chung ngu yang / /mar dang snying sogs 'dus byas pas//snang ba dri med mi g.yo ba/ /bstan pa'i mun pa rnam 'jig 'gyur/ /ji ltar phra ba'i sdong po las/ /ji ltar lo ma 'bras bu yis/ /brgyan pa'i shing chen 'byung bar 'gyur/ /yung dang rdo thal sbyar ba las/ /kha dog gzhan zhig 'byung bar 'gyur/ / shes rab thabs kyi cho ga yis/ /chos dbyings mkhas pa de ltar shes/ /mar dang sbrang rtsi mnyam ldan pas/ /dug nyid du ni 'gyur ba yin/ /de nyid cho ga bzhin spyad na/ /bcud kyis len gyi mchog tu 'gyur/ /dngul chus reg pa'i zangs ma ni/ /ji ltar skyon med gser du 'gyur//de bzhin yang dag ye shes ni/ /sbyangs pas nyon mongs bzang por byed/ /theg pa dman la zhon pa rnams/ /skad cig skad cig 'ching bar byed/ /g.yul las rgyal bar byed pa'i sems/ /ring ba nyid du rnam par gnas/ /theg pa che la zhon nas ni/ / snying rje'i go cha bgo byas nas/ /shes rab rgyud bcas mda' dang gzhus/ /'gro ba gzung ba'i bsam pa yis/ /sems dpa' che dang thabs che ba/ /brtan pa'i blo ni gnyid sangs nas/ /rgal dka'i g.yul las rgyal byas nas/ / gzhan dag kyang ni sgrol bar byed/ /rang don tsam la gzhol bas ni/ /byol song rnams kyang nyon mongs byed/ /'gro ba'i don ni byed pa po/ /'gro ba de gtor gang+gA na/ /grang dang rlung sogs sdug bsngal rnams/ /rang don zhugs las kyang bzod na/ /'gro ba'i don la zhugs rnams lta//de mi bzod pa ji lta bu/ /dmyal ba la sogs sdug bsngal yang / /snying rje can gyis bzod byas na/ /grang dang rlung sogs sdug bsngal dag /da ltar gyi la bsam ci dgos/ /dka' thub brtag pa mi bya zhing / /smyung ba yang ni bya ba med//'dir ni khrus dang gtsang sbra med/ /grong pa'i chos ni spang bar bya/ /sen mo rkang dang rus pa so/ /pha yi khu ba'i rgyu las skyes/ /sha dang khrag dang skra la sogs/ /ma yi khrag las yang dag byung / /'di ltar mi gtsang las byung zhing / /mi gtsang bas gang ril po gang //de lta bu yi lus 'di nyid/ /gang+gAr bkrus kyang ji ltar 'dag /mi gtsang phur ma chu dag gis/ /yang yang bkrus kyang dag mi 'gyur/ /de bzhin mi gtsang bas gang ba'i/ /phur ma 'di yang 'dag mi 'gyur/ /gang+gA'i klung la khyi dag gis/ /rkyal zhing 'phyo yang dag mi 'gyur//de phyir chos 'dod skyes bu dag /'bab stegs khrus byed 'bras bu med/ /khrus kyis gal te dag 'gyur na/ /nya pa rnams kyang don byas 'gyur/ /nyin dang mtshan du gnas pa yi/ /nya la sogs pa smos ci dgos/ /khrus kyis sdig pa zad pa yang / /nges par yod pa ma yin te//ji ltar 'bab stegs bsten pa la/ /'dod chags la sogs 'phel bar mthong / /'dod chags zhe sdang gti mug dang / /nga rgyal lta ba the tshom rnams/ /sdig pa'i rtsa bar rab tu grags/ /'di dag sbyang bya khrus kyis min/ /bdag dang bdag gir 'dzin pa las//srog chags rnams las byung ba yin/ /de yang ma rig rtsa ba las/ /ma rig de yang 'khrul par 'dod/ /de ltar nya phyis la dngul blo/ /nya phyis mthong bas ldog par 'gyur/ /bdag med mthong bas de yang ni/ /rtsa ba nyid nas med par 'gyur/ dper na thag pa sbrul gyi blo/ /thag par shes na ldog par 'gyur/ /de las sbrul gyi blo yi rab / /skye ba de las yang mi 'byung / /de bzhin 'di la bden pa'i blo/ /ye shes rdo rjes ldog par 'gyur/ /de ni 'byung bar mi 'gyur ro/ /sa bon bsregs pa'i myu gu bzhin/ / bdag nyid mi gtsang 'dus pa yi / /gong bu sa yi rang bzhin nyid/ /de 'dus pa yi chos 'gyur bar/ /byis pa dga' bar rnam brtags pas/ /zla ba 'phel dang 'grib pa la/ /bltas nas tshes grangs brtag pa la/ /nyi ma 'phel dang 'grib pas kyang / /nyin dang mtshan mor rtag par brtag /shar la sogs pa'i tha snyad kyang / /rtags la ltos nas byas pa yin/ /gza' dang rgyu skar khyim la sogs/ /'jig rten kun gyis rnam par brtag /grang dang tsha dang char 'bab pa/ /ltos nas de bzhin dus rnams brtag /rang gi las kyi 'bras spyod pa//bzang dang ngan pa'i gzar bstan to/ /ma rig 'dam gyis gtums pa yi/ /sems kyi yid bzhin nor bu nyid/ /skyes bu mkhas pas bkrus byas nas/ /ma rig gang gis yang dag bskyed/ /gza' dang rgyu skar tshes grangs dang / /yul dang dus la ltos med par// mtshams med the tshom med par ni/ /rtog pa med par spyad par bya/ /dbang po lam dgur gang dang gang / /de ni de yi ngo bo nyid/ /mnyam par ma bzhag sbyor ba yis/ /thams cad sangs rgyas rang bzhin bya/ /mig ni rnam par snang mdzad gtso/ /rna ba rdo rje nyi ma'o//sna ni rta mchog nyid yin no/ /kha ni pad+ma gar dbang phyug /dpal ldan he ru ka rgyal lus/ /yid ni rdo rje sems dpa' ste/ /de ltar yang dag sbyor ba yis/ /snying rje'i bdag nyid can gyis spyad/ /mkhas pas sems ni brtan gyur nas/ /mi rtog pa yis 'grub par 'gyur//ji ltar 'dod pa'i bya ba yis/ /kun bzang kun byed de bzhin no/ /las dang bya ba kun byed na/ /ji ltar 'dod pa'i bya ba yis/ /langs dang 'dug par byed pa dang / /ji ltar 'chag na'ang de bzhin no/ /dgod dang sma bar byed pa dang / /ji ltar de ltar gang de bzhin//dkyil 'khor du ni ma zhugs pa/ /sgrib pa kun dang ldan pas kyang / /rang gi lha sbyor bdag nyid kyis/ /bsod nams chung yang 'grub par 'gyur/ /'dis ni sangs rgyas thams cad dang / /dpa' bo dag ni thams cad nyid/ /tshe 'di nyid la yang 'di rig /thob 'gyur 'di la the tshom med//ji ltar 'jig rten phal pa las/ /rnal 'byor pa yi ting 'dzin rgyal/ /gong ma gong ma'i blo khyad kyis/ /rnal 'byor pa yang rgyal bar 'gyur/ /shes rab che dang thabs che dad/ /brtse ba tshe dang mos pa nyid/ /theg pa chen por yang dag bstan/ /sems can chen po'i spyod yul yin//gang zhig bskal pa grangs med ni/ /mang pos mi 'thob par 'dod pa'i/ /sangs rgyas tshe 'di nyid kyis ni/ /thob pa 'di la the tshom med/ /theg pa chen po bdag nyid che/ /bsod nams ye shes tshogs kyis ni/ /kun mkhyen go 'phang nyams dga' ba/ /tshe 'di nyid la thob par 'gyur//lung las mnyam par gsungs pa gang / /theg pa che la mi rigs te/ /bsam pa lhag bsam bye brag gis/ /theg pa'i khyad par rab tu bstan/ /gzhan nyid du ni mos pa yang / /byang chub spyod pa de bzhin gzhan/ /sems kyi rnam dag gzhan nyid kyis/ / 'dir ni 'bras bu gzhan mthong med/ /ji ltar me long dri med la/ /dri ma med pa'i mig gis gzugs/ /dang ba'i rang bzhin dri med la/ /shin tu gsal bar snang ba ltar/ /de bzhin rnal 'byor ye shes kyang / /dri med ye shes me long la/ /rtog pa'i da ba rnam sbyangs pa'i/ /sems dge ba la rnam par gsal//ji ltar nor bu me shel la/ /nyi ma'i 'od kyis kun reg pas/ /de ma thag tu me 'bar bas/ /rang gi don ni 'grub par nus/ /rtog pa'i dra ba rnam spangs pa'i/ /nor bu me shel 'dra ba'i yid/ /shes rab nyi ma'i 'od phog pas/ /rnal 'byor de bzhin 'bar bar 'gyur//shing gnyis drag tu drud pa las/ /ji ltar me ni 'bar 'gyur ba/ /thog ma bar dang mtha' dag la/ /dngos po ma lus rab snang byed/ /shes rab thabs su sbyor ba las/ /rnal 'byor pa yis de bzhin shes/ /dper na mar me gcig nyid la/ /snying po gzhan dag la brten nas//ji bzhin gnas su rang don gzhan/ /mthon po'i gnas nas snang bar byed/ /shes rab thabs bdag rnam bsgoms shing / /dpag tu med pa'i lus spros nas/ /sems can mos pa sna tshogs la/ /mdzad pa ji bzhin nyams su blangs/ /ji ltar cho ga shes pa 'gas//nyes pa med pa'i bsil nyams dga'/ /nad rnams thams cad zad byed pa'o/ /bdud rtsi 'o ma dag las blang / /shes rab 'o ma thabs chen pos/ /cho ga bzhin du bsgrub las skyes/ /chos dbyings shin tu rnam dag pas/ /bde ba dam pas sdug bsngal 'jig /sa bon skyes bu ldan pa las/ / me tog 'bras bu ldan pa yi/ /'khri shing kun du 'byung ba ltar/ /de bzhin tshogs gnyis dang ldan pa'i/ /skad cig gcig gis mngon byang chub/ /dbang dang sdang dang 'gro ba rengs / /char dbab dgug pa la sogs pa/ /sha chang dga' ba'i rnal 'byor pas//byas par gyur kyang mthong bar 'gyur/ /lag pa'i gdu bu lta ba la/ /me long dag ni dgos sam ci/ /theg pa chen po de song yang / /sngags kyi nus pa brtan pa yin/ /pha ma bu mo 'brel pa ni/ /'dir ni de nyid med par brtags/ /lcags kyi reng bu bshig pa ltar//'gro ba de bzhin bde gshegs gsungs/ /'byung lnga'i bdag nyid khu ba dang / /khrag kyang de dang 'dra ba dang / /de yi rang bzhin gong bu lnga/ /bram ze gang yin mthar skyes gang / /dge slong dag gi lus 'di ni/ /thams cad phung po lnga bdag nyid/ /mi rtag sdug bsngal stob pa la//rigs med rigs dang ldan pa gang / /nya pa'i mngal du skye ba gang / /kha cig gdol pa'i skye ldan pas/ /dka' thub spyad pa bram zer skyes/ /de phyir rigs ni sgyu ma yin/ /ma dang sring mo bu mo dang / /sgyug mo dang ni tsha mo dang / /bram ze rgyal rigs rje'u rigs mo//cho ga shes pa dmangs rigs mo/ /yan lag gcig ni nyams pa dang / /dman dang smod dang mthar skyes kyi/ /btsun mo rtag tu mchod par bya/ /rdo rje ye shes rnam bsgoms pas/ /sngags pas spyan ni rgyas gyur na/ /zhal ni rab tu bzhad gyur cing / / rdzogs pa'i byang chub sems bskyed nas/ /rang gi lha yi yid kyis ni/ /bstan pas skad cig mthong dang lta / /thos dang nyin par byed pa yang / /myong zhing bde la spyod par ldan/ /gsal ba'i ngag kyang smra bar bya/ /khrus dang bsku mnye gos la sogs/ /bza' btung la sogs 'bad pa nyid//rang 'dod lha yi bdag nyid du/ /bsams la cho gas mchod par bya/ /glu dang brdung ba de bzhin gar/ /thams cad brtul zhugs can gyis spyad/ /'dir ni dngos po thams cad la/ /lhag par chags par mi bya'o/ /rang gi bdag nyid yongs spangs nas/ /dka' thub kyis ni gdung mi bya//ji ltar bde bas bde ba gzung / /'di ni ma 'ongs rdzogs sangs rgyas/ /rnal 'byor thams cad longs spyod cing / /gang la'ang 'jigs med rol mo bya/ /sdig pa med kyis khyod ma 'jigs/ /dam tshig shin tu 'da' bar dka'/ /sngags kyis sbyangs na shing la sogs//bems po rmongs bcas rab dka' yang / /lha nyid du ni 'gyur ba yin/ /shes dang ldan pa'i lus ci smos/ /tha mal pa yi nga rgyal nyid/ /mnyam par gzhag pas yongs su btang / /shes rab thabs kyi sbyor ba yis/ /thams cad mnyam par spyad par bya//dper na pad+ma 'dam skyes kyang / /'dam gyi skyon gyis gos pa med/ /de bzhin bag chags sna tshogs kyi/ /skyon gyis rnal 'byor pa mi gos / /dper na chu yi zla ba la/ /chu yis mngon par gos pa med/ /sna tshogs gzugs brnyan 'dra ba ni/ /mthong ba'i skyon gyis gos mi 'gyur//thog med bag chags 'dam gyis ni/ /rin chen sems ni rab tu gos/ /shes rab thabs kyi chu nyid kyis/ /bkrus na rab tu gsal bar 'gyur/ /rang gi lha yi rnal 'byor gyis/ /blo ldan sems ni brtan 'gyur na/ /lta ngan sprin las grol bar 'gyur/ /sems kyi nyi ma gsal bar 'gyur//don dam nges par byas nas ni/ /shes rab mtshon gyis kun gtubs la/ /ma rig sbubs kyis bkab pa yis/ /chos kyi dbyings ni blang bar bya/ /brtags pa'i bum pa skad cig gis/ /shes rab tho bas bcag nas ni/ /rang bzhin dri med gsal 'gyur ba/ / ye shes sgron ma rab tu gsal/ /rab tu gsal ba'i 'byung ba rnams/ /sa dang chu dang me dang rlung / /sngags kyi sbyor ba nus pa yis/ /gzhan nyid du ni 'byung bar byed/ /brjod pa thams cad yongs spangs la/ /sngags kyi brjod pa yang dag spyod/ /bde ba'i dngos grub sbyin pa yi//sngags kyi nus pa 'di la ltos/ /dkon mchog gsum ni mi spang zhing / /de bzhin bla ma byang chub sems/ /srog chags rnams kyang gsad mi bya/ /dam tshig dag kyang byin gyis brlabs/ /rin chen dang ni ga bur bcas/ /tsan+dan dmar po dang sbyar ba/ /thub pa rdo rje chu zhes bya//lnga po dag kyang byin gyis brlab/ /lha yi dam tshig gzhan dag kyang / /sems ni spro bar byed pa can/ /rlung dang me ni zhi bya'i phyir/ /sems kyi rdo rje tshim par bya/ /mtshams med the tshom med par ni/ /rnal 'byor rnam rtog med brtson pas/ /sems ni mnyam par sbyor ba yis//sngags pas thams cad mnyam par spyod/ /sbrang ma'i rkang pa tsam gyi ni/ /dug gis zil gyis non par 'gyur/ /mtshams dang the tshom chung dus kyang / /de la sdug bsngal skyed par byed/ /mkhas pas legs par 'thab pa'am/ /yang na legs par 'gros par bya//bar ma do yi dngos po ni/ /don med pa ru ltung bar 'gyur/ /bla ma'i bka' dang phyag rgya dang / /grib ma yang ni 'gom mi bya/ /de yi yon tan gzung bar bya/ /skyon ni nam yang ma yin no/ /slob dpon lha yi mchog yin te/ /'bad pas mchod par bya ba yin/ /de nyid rdo rje 'dzin rgyal po//mngon sum gzugs kyis rnam par gnas/ /ji ltar nor bu chu dang gis/ /rnyog ma thams cad dngas byed pa/ /de bzhin dang ba'i nor bu yis/ /sems kyi rin chen rnam par sbyang / /shes rab mig dang bral gyur na/ /dad pa'i bdag nyid can rmongs 'gyur/ / de phyir lung rtogs bdag nyid can/ /shes rab nye bar bskyed par bya/ /dad ldan thos mang shes rab ldan/ /rang bzhin snying rje'i bdag nyid can/ /'gro ba'i sdug bsngal bsal ba'i phyir/ /de yi bde ba'i thabs shes bya/ /sems rnam dag pa 'di byas pas/ / bdag gis dge ba gang bsags pa/ /rnam par dag pa'i sems thob nas/ /des ni 'gro ba bde thob shog /sems kyi sgrib pa rnam par sbyong ba zhes bya ba'i rab tu byed pa slob dpon Ar+ya de bas mdzad pa rdzogs so// //A tsAr+ya dz+nyA na ka ra dang lo tsA ba tshul khrims rgyal bas bsgyur ba'o /