CLOSE WINDOW

D1803
བོད་ཡིག

@##/ /rgya gar skad du/ tsAr+ya me lA pa na pri dI paM/ bod skad du/ spyod pa bsdus pa'i sgron ma/ byang chub sems dpa' sems dpa' chen po 'jam dpal ye shes sems dpa' la phyag 'tshal lo/ /dngos med rnam dag nam mkha' mnyam la phyag 'tshal lo/ /ma lus tshig med yi ge bral la phyag 'tshal lo//'das dang ma byon kun du son la phyag 'tshal lo/ /kun du ma lus thams cad stong la phyag 'tshal lo/ /rdo rje theg pa 'di la sngags kyi sgor spyod pa ni rnam pa gnyis te/ slob dpon gsang sngags la mchog tu gzhol ba dang / nang la mchog tu gzhol ba ste/thos pa'i pha rol tu son pa rnams kyis sems can thams cad rjes su gzung bar bya ba'i don du/ mdo sde dang rgyud dang rtogs pa dag las yang dag par gsungs pa'i lung gi tshig rnam par gsal bar bya ba'i phyir tshig snyan cing rgya che ba du ma dag bltas nas tshigs su bcad pa dang rkyang pa la sogs pa sgra sbas pa rnams dang spel zhing rab tu spel ba rnams kyi rgyud yang dag pa rnams las btus te/byis pa'i skye bo rnams kyis khong du chud par bya ba'i phyir sgrub pa'i thabs kyi yan lag mar me lta bu byed pa dag sngon byung bar gyur pa ni mi rigs so/ /de ci'i phyir zhe na/ rdzogs ldan dang gsum ldan dang gnyis ldan gyi dus na ni 'jig rten pa rnams tshe dang nad med pa phun sum tshogs shing /sbyin pa dang / tshul khrims la spyod pa la sogs pa yon tan phun sum tshogs pa dang ldan pa rnams ni bstan bcos la gnas shing yongs su tshol bas de kho na nyid shes pa la mngon par zhugs shing tshig rgya che ba la sogs pa rnams dang /sbas pa'i sgra'i sgo nas de kho na nyid ston la/ de rnams kyis kyang khong du chud pa yin no/ /da ltar ni rtsod pa'i dus te 'jig rten pa rnams tshe dang nad med pa dang / phun sum tshogs pa dman zhing g.yo dang sgyu dang dregs pa dang / phrag dog dang ldan la/ shes rab zhan cing log par lta bas las ngan pa la sogs pa la dga' bas ji srid du tshig rgya che ba la sogs pa sbas pa'i sgra'i don rnams la nges par mi dga' bas de kho na nyid tshol bar mi byed do/ /de'i phyir na dang po'i bstan bcos yongs su tshol ba spangs pas de kho na nyid mi rtogs shing dge ba dang mi dge ba'i las la mngon par gzhol bas dus byed par 'gyur ro//de bas na thar pa thob par 'dod pa rnams la dgos pa med par 'gyur te/ tshig snyan pa dang rgya che ba la sogs pa'i tshig gi sgo la gnas pa'i sgra rnams ni gzings dang 'dra ba yin pa'i phyir ro//bcom ldan 'das kyis kyang ji skad du don gyi rjes su 'brang bar bya'i sgra ji bzhin par ma yin no zhes gsungs so/ / don gyi dbang 'di mthong nas bdag gi slob dpon klu sgrub kyi zhal snga nas kyi man ngag las bskyed pa'i go rims kyis rdzogs pa'i go rims kyi ting nge 'dzin thob nas 'dus byas pa dang 'dus ma byas pa'i slob ma rnams kyi thun mong du bshad pa'i sgra'i sgo nas/sngags kyi de kho na nyid dang / phyag rgya'i de kho na nyid dang / bdag gi de kho na nyid dang / chos kyi de kho na nyid dang / lha'i de kho na nyid de/ go rims rnam pa lnga rnam par gsal bar bya ba'i phyir mdo sde dang / rgyud dang / rtog pa rnams bsres nas bshad par bya'o/ /bcom ldan 'das kyis mdo sde la sogs pa bshad pa'i gsung rab kun las/ bskal pa bye ba rnams su yang / /de nyid bral na 'grub mi 'gyur/ /zhes gsungs te/ ji skad du/ bcom ldan 'das la lha mo bzhis zhus pa zhes bya ba'i rnal 'byor chen po'i rgyud las /thub pa chen po'i chos rnams kyi/ /phung po brgyad khri bzhi stong la/ /gang gis de nyid mi shes pa/ /de yi thams cad 'bras bu med/ /ces gsungs pas so/ /rdo rje slob mas gsol pa/ de kho na nyid mi shes par 'tshang rgya bar mi 'gyur ro zhes bcom ldan 'das kyis gsungs na/yang de kho na nyid ces bya ba'i rang gi mtshan nyid gsung rab kyi sgo nas nyan par 'tshal lo/ /gang gi phyir theg pa chen po pa dang / rtog ge pa la sogs pa rnams ni don 'di nyid la gnas nas rnam pa sna tshogs pas de kho na nyid rtogs par bgyid na/ de rnams bsdu bar bya ba'i phyir de kho na nyid ces bya ba 'di gang yin pa bcom ldan 'das kyis bshad du gsol/rdo rje slob dpon gyis smras pa/ yang dag pa gang yin pa de ni de kho na nyid do/ /gsol pa/ bcom ldan 'das yang dag pa zhes bgyi ba de ji lta bu lags/ smras pa/ gang mi slu ba zhes bya ba de ni yang dag pa zhes bya'o//gsol pa/ mi slu ba zhes bya ba de ji lta bu lags/ smras pa/ shin tu yang dag pa'i tshul gyi bdag nyid can gyi ting nge 'dzin de ni mi slu ba zhes bya'o/ /gsol pa/ yang dag pa'i tshul gyi bdag nyid can gyi ting nge 'dzin ces pa de gang lags/ smras pa/gang bden pa gnyis gnyis su med pa'i rnam pa'i mtshan nyid can de ni yang dag pa'i tshul gyi bdag nyid can gyi ting nge 'dzin to/ /gsol pa/ bcom ldan 'das bden pa gnyis zhes bgyi ba de gang lags/ smras pa/ dang po ni kun rdzob kyi bden pa dang / gnyis pa ni don dam pa'i bden pa'o/ / gsol pa/ bcom ldan 'das bden pa gnyis kyi mtshan nyid ji lta bu lags/ rdo rje slob dpon gyis smras pa/ bcom ldan 'das kyis rdo rje gtsug tor gyi rgyud las bka' stsal te/ phyag na rdo rjes gsol pa/ bcom ldan 'das chos thams cad kyi gnas don dam pa'i bden pa ji lta bu lags/bcom ldan 'das kyis bka' stsal pa/ gsang ba'i bdag po chos thams cad ni phung po dang khams dang skye mched rnams dang / 'gro ba rgyu ba dang mi rgyu ba rnams te/ de yang don dam pa'i bden pa la gnas pas gnas med pa'i tshul gyis don dam pa'i bden pa ni bdag med pa zil gyis mi non pa thams cad stong pa ste/'phel ba med pa/ 'grib pa med pa/ rnam par dag pa/ nam mkha' dang mnyam pa dang dri ma med pa'i ngo bo nyid/ yi ge med pa/ tshig med pa/ lus dang ngag dang yid dang bral ba/ yod pa ma yin/ med pa ma yin/ rgyu ba ma yin/ mi rgyu ba ma yin/thag ring ba ma yin/ thag nye ba ma yin/ stong pa ma yin/ mi stong pa ma yin/ dbu ma yang ma yin pa 'di ni don dam pa'i bden pa'o/ /de bas na de ni mchog tu zab pa dang / 'jug par dka' ba dang / skye ba med pa dang / 'gag pa med pa'o / / rgyu rkyen gyis 'byung ba ni kun rdzob kyi bden pa ste/de ni ji srid du rmi lam dang / mig 'phrul dang / gzugs brnyan ltar snang ba dang ldan pa sgyu ma lta bu'i ting nge 'dzin te/ rang gi mtshan nyid kyis tshangs pa'i gnas pa bzhi'i rgyur gyur pa ni kun rdzob kyi bden pa'o/ /de gnyis zung du 'brel par 'jug pa'i rim pa 'di ni yang dag pa'i tshul gyi bdag nyid can gyi ting nge 'dzin te/dmigs pa thams cad nye bar zhi ba gang yin pa de ni de kho na nyid ces bya'o/ /rdo rje slob mas gsol pa/ bdag cag lta bu'i so so'i skye bo thog ma med pa nas phyi rol gyi dngos po rnam pa sna tshogs pa la mngon par zhen pas yod pa dang med pa dang /gcig dang / du ma dang / gnyis dang / gnyis ka ma yin pa dang / yod pa ma yin/ med pa yang ma yin pa dang / rtag pa dang chad pa la sogs pa'i rang bzhin gyi bag chags kyi rgyus rnam par rtog pa la mngon par zhen pa la zhugs pa rnams kyis rdzogs pa'i rim pa'i go rims kyi ting nge 'dzin la slob pa na go rims ji lta ba bzhin du bslab par bgyi'am/yang na bla ma'i man ngag tsam gyis de dag skad cig tsam gyis so sor snang bar bgyi/ rdo rje slob dpon gyis smras pa/ rim gyis 'jug pas bslab par bya'i cig car ni ma yin no/ /bcom ldan 'das nyid kyis kyang lang kar gshegs pa'i mdo las gsungs te/de nas bcom ldan 'das la byang chub sems dpa' sems dpa' chen po blo gros chen pos rang gi sems snang ba'i rgyud rnam par dag par bya ba'i phyir yang gsol ba btab pa/ bcom ldan 'das rang gi sems snang ba'i rgyud cig car ram/rim gyis 'jug pas sam/ ji ltar rnam par dag par 'gyur/ bcom ldan 'das kyis bka' stsal pa/ blo gros chen po rang gi sems snang ba'i rgyud ni rim gyis 'jug pas rnam par dag ste cig car ni ma yin no/ /'di lta ste/ /blo gros chen po shing a mra'i 'bras bu ni rim gyis smin par 'gyur gyi cig car ni ma yin no//blo gros chen po de bzhin du sems can rnams kyi rang gi sems snang ba'i rgyud kyang rim gyis rnam par dag ste cig car ni ma yin no/ /blo gros chen po 'di lta ste/ rdza mkhan gyi snod rnams ni rim gyis byed kyi cig car ni ma yin no//blo gros chen po de bzhin du de bzhin gshegs pa yang sems can rnams kyi rang gi sems snang ba'i rgyud kyang rim gyis rnam par sbyong ste cig car ni ma yin no/ /blo gros chen po 'di lta ste sa chen po las rtswa dang / shing gel ba dang / sman dang nags tshal rnams rim gyis 'jug pas skye'i cig car ni ma yin no//blo gros chen po de bzhin du de bzhin gshegs pa yang sems can thams cad kyi rang gi sems snang ba'i rgyud rim gyis sbyong ste cig car ni ma yin no/ /blo gros chen po 'di lta ste bzhad gad dang / rol mo dang / glu dang / pi wang dang / sil snyan dang / rol mo dag la mkhas pa ni rim gyis 'byung gi cig car ni ma yin no/ /blo gros chen po de bzhin du de bzhin gshegs pa yang sems can thams cad kyi rang gi sems snang ba'i rgyud rim gyis rnam par sbyong ste cig car ni ma yin no/ /rim pa 'di nyid ni dpa' bar 'gro ba'i ting nge 'dzin gyi mdo las kyang gsal bar gsungs te/de nas byang chub sems dpa' sems dpa' chen po blo gros brtan pas 'di skad ces gsol to/ /bcom ldan 'das ji ltar slob na byang chub sems dpa' bslab pa thams cad la rlom sems ma mchis par dpa' bar 'gro ba'i ting nge 'dzin 'di la slob pa lags/de skad ces gsol pa dang / bcom ldan 'das kyis byang chub sems dpa' sems dpa' chen po blo gros brtan pa la 'di skad ces bka' stsal to/ /blo gros brtan pa 'di lta ste dper na 'phong gi slob dpon nam/ 'phong gi slob ma ni thog mar ba lang gi ko ba la phog par byed do//gang gi tshe ba lang gi ko ba la lobs pa de'i tshe shing leb la phog par byed do/ /gang gi tshe shing leb la lobs pa de'i tshe 'ben la phog par byed do/ /gang gi tshe 'ben la lobs pa de'i tshe de'i dbyu gu la phog par byed do/ /gang gi tshe dbyu gu la lobs pa de'i tshe skra brgya la phog par byed do//gang gi tshe skra brgya la lobs pa de'i tshe skra bcu la phog par byed do/ /gang gi tshe skra bcu la lobs pa de'i tshe skra gcig la phog par byed do/ /gang gi tshe skra gcig la lobs pa de'i tshe sgras mtshon pa la phog par byed do/ /gang gi tshe sgras mtshon pa la phog pa de'i tshe mi 'chor bar phog par 'gyur ro//gang gi tshe mi 'chor bar phog pa de'i tshe 'phong slob pa mthar phyin pa yin te/ de 'dod na nub mo mun pa mun nag gi nang na yang mi dang mi ma yin pa gang dang gang gi sgra grag pa da dang der lhun gyis grub cing mi 'chor ba nyid du mda' 'gro'o/ /sgras mtshon pa la phog par byed pa lobs pas phyis gang du yang mi slob ste/de ci'i phyir zhe na/ sngon legs par bslabs pa'i phyir phog par bya ba thams cad de la mngon sum du 'gyur ro/ /blo gros brtan pa de bzhin du dpa' bar 'gro ba'i ting nge 'dzin 'di la gnas pa'i byang chub sems dpa' phyis chos gang la yang bslab par mi bya'o//de ci'i phyir zhe na/ ting nge 'dzin de nyid la sngon legs par bslabs pa'i phyir byang chub sems dpa'i yon tan gyi chos thams cad de la mngon sum du 'gyur ro/ /yang tshul 'di nyid kyis rdo rje'i theg pa la gnas pa'i dpa' bar 'gro ba'i ting nge 'dzin la slob par 'dod pas kyang rim pa 'di nyid kyis bslab par bya'o//de'i rim pa yang 'di yin te/ thog ma nyid du ni sangs rgyas kyi theg pa'i bsam pa la slob bo/ /gang gi tshe sangs rgyas kyi theg pa'i bsam pa la lobs par gyur pa de'i tshe theg pa sar pa dran pa gcig pa'i ting nge 'dzin la slob bo/ /gang gi tshe theg pa gsar la dran pa gcig pa'i ting nge 'dzin la lobs pa de'i tshe rtog pa'i rnal 'byor la slob bo//gang gi tshe rtog pa'i rnal 'byor la lobs pa de'i tshe las dang po pa'i ting nge 'dzin la rab tu gnas par 'gyur ro/ /gang gi tshe las dang po pa'i ting nge 'dzin la gnas pa de'i tshe rigs brgya'i dbye ba la 'jug go/ / gang gi tshe rigs brgya'i dbye ba la mkhas pas lus rnam par dben pa shes pa de'i tshe sku rdo rje'i ting nge 'dzin la gnas par 'gyur ro/ /lus rnam par dben pa la gnas nas/ A li kA li'i sgo nas ngag rnam par dben pa la 'jug go/ /gang gi tshe rdo rje bzlas pa'i rim gyis srog dang rtsol ba shes par gyur pa de'i tshe gsung rdo rje'i ting nge 'dzin la rab tu gnas par 'gyur ro//ngag rnam par dben pa la gnas nas rang bzhin gyis snang ba'i rim gyis sems rnam par dben pa la 'jug go/ /gang gi tshe rang bzhin gyis snang ba la rlung gi bzhon pa'i rab tu dbye bas yang dag pa ji lta ba bzhin du lobs pa de'i tshe sems kyi ting nge 'dzin la snyoms par 'jug par 'gyur ro//sems yang dag pa ji lta ba bzhin du yongs su shes pa la gnas nas sgyu ma'i dpe bcu gnyis kyis kun rdzob kyi bden pa la 'jug par 'gyur ro/ /gang gi tshe sgyu ma lta bu'i ting nge 'dzin la snyoms par 'jug pa de'i tshe sangs rgyas kyi dbang bskur ba thob bo//gang gi tshe dbang bskur ba thob pa de'i tshe sgyu ma lta bu'i ting nge 'dzin la gnas nas stong pa chen po bco brgyad kyi rim gyis don dam pa'i bden pa la 'jug go/ /gang gi tshe ril por 'dzin pa dang rjes su gzhig pa'i ting nge 'dzin gyis yang dag pa'i mtha' la 'jug pa de'i tshe nyon mongs pa thams cad rnam par dag par 'gyur ro//gang gi tshe ye shes kyis rim gyis ldang ba'i phyir rang bzhin gyis 'od gsal ba'i bden pa gnyis la gnyis su med pa'i rnam pas bdag nyid mngon par rdzogs par sangs rgyas pa de'i tshe rdzogs pa'i ting nge 'dzin la lobs par gyur pa yin no//gang gi tshe rdzogs pa'i ting nge 'dzin la snyoms par zhugs pa'i rnal 'byor pas ni phyis chos gang la yang mi slob bo/ /de ci'i phyir zhe na/ sngon legs par bslabs pa'i phyir te ji ltar 'phong gi slob dpon ni sgras mtshon pa la phog par byed par gnas pas phyis gang du yang mi slob bo//de ci'i phyir zhe na/ sngon legs par bslabs pa'i phyir de'i sngon gyi 'phen shugs kyi stobs kyis mngon du 'gyur ro/ /de bzhin du rdzogs pa'i ting nge 'dzin la rab tu gnas pa ni phyis gang la yang slob par mi 'gyur te/ sngon shin tu legs par bslabs pa'i phyir/ de'i 'jig rten dang 'jig rten las 'das pa'i dngos grub dag ni lhun gyis grub pa nyid du mngon sum du 'gyur ro/ /de bzhin du rdzogs pa'i rim pa'i ting nge 'dzin la slob par byed pas kyang rim gyis 'jug pas bslab par bya'i cig car ni ma yin no/ /de bas na lus rnam par dben pa med par ngag rnam par dben pa shes par mi nus so//ngag rnam par dben pa dang bral bas ni sems rnam par dben pa rtogs par mi nus so/ /sems kyi rang bzhin gyi snang ba'i ting nge 'dzin med par kun rdzob kyi bden pa mngon sum du bya bar mi nus so/ /kun rdzob kyi bden pa rtogs pa dang bral bas ni don dam pa'i bden pa mngon sum du bya bar mi nus so//don dam pa'i bden pa rtogs pa med par ni zung du 'jug pa'i rim pa mngon sum du bya bar mi nus so/ /bcom ldan 'das kyis kyang don gyi dbang 'di gzigs nas rim gyis 'jug par bslab par bya'i cig car ni ma yin no/ / rim gyis 'jug pas rdzogs pa'i rim pa la bslabs pas cig car rang gi rgyud rnam par dag par 'gyur te/ bcom ldan 'das nyid kyis kyang lang kar gshegs pa'i mdo las/ blo gros chen po 'di lta ste/ me long gi nang du gzugs kyi gzugs su snang ba thams cad rnam par rtog pa med pas cig car snang ngo //de bzhin du blo gros chen po de bzhin gshegs pa yang sems can thams cad kyi rang gi sems snang ba'i rgyud rnam par mi rtog cing snang ba med pa'i spyod yul rnams cig car rnam par sbyong ngo / /blo gros chen po 'di lta ste/ zla ba dang nyi ma'i dkyil 'khor ni 'od zer rnams kyis gzugs su snang ba thams cad cig car mngon par byed do//de bzhin du blo gros chen po de bzhin gshegs pa yang sems can thams cad kyi rang gi sems snang ba'i gnas ngan len gyi bag chags dang bral ba rnams las rgyal ba'i ye shes bsam gyis mi khyab pa'i yul dang spyod yul yang dag par ston to//'dir bshad pa/ sems can dang po'i las can rnams/ /dam pa'i don la 'jug pa la/ /thabs 'di rdzogs pa'i sangs rgyas kyis/ /skas kyi rim pa lta bur gzhag /ces bya ba'i rim pa lnga'i go rims dang bral bas ni rdzogs pa'i ting nge 'dzin rtogs par mi nus so zhes khong du chud par bya'o//spyod pa bsdus pa las the tshom yongs su gcod pa ste le'u dang po'o// //rdo rje slob mas gsol pa/ bcom ldan 'das dang por rang gi lus rnam par dben pa la ji ltar slob par bgyi/ rdo rje slob dpon gyis smras pa/ sems can chen po legs so legs so/ /lus rnam par dben pa rgya cher khong du chud par bya'o/ /de la khams bzhi pos lus mngon par bskyed pa las lus su grub pa 'di ni spungs pa bzhin du gnas te/ sha'i kham tshad dang / rtsa dang / rgyus pa dang / mgo bo dang / klad pa dang / klad rgyas dang /rus pa dang / rkang dang / rgyu ma dang / gnye ma dang / mkhal ma dang / snying dang / lto dang / glo ba dang / mcher pa dang / gcin dang / phyi sa dang / lgang pa dang / pho ba dang / long ka dang / zhag dang / chu ser dang / rnag dang / khrag dang / mkhris pa dang / bad kan dang / ngar snabs dang / skra dang / kha spu dang / sen mo dang / spu dang / pags pa dang / lag pa dang / rkang pa dang / mig dang / yan lag la sogs pa tshogs pa la spungs pa zhes bya'o/ /yang de la phung po lnga dang / khams bzhi dang / skye mched drug dang /yul lnga dang / shes pa lnga ni spungs pa zhes bya ste/ dper na 'bras dang / nas dang / til dang / gro dang / mon sran sde'u mang po la spungs pa zhes bya'o/ /de bzhin du lus kyi yan lag dang / nying lag tu gtogs pa tshogs pa la spungs pa zhes bya'o/ /khams rnams tshogs pa las shes rab dang /lta ba dang / yid dang / ma rig pa dang / bag chags dang / sred pa dang / nyon mongs pa'i rgyun la ni bsags pa zhes bya'o/ /rnam par shes pa'i tshogs pa spungs pa ni nye bar dmigs par mi 'gyur te gnas med pa'i phyir ro/ /ji skad du/ bzang skyong gis zhus pa las kyang / lus 'di la rnam par shes pa gang na yang mi gnas te/ rnam par shes pa med na yang lus skye bar mi 'gyur ro/ /bzang skyong de'i phyir nyon cig bden pa ma mthong bas ni rnam par shes pa mi shes mi mthong ste/ de ni lag mthil du skyu ru ra bzhag pa bzhin du mthong bar mi 'gyur ro zhes gsungs so//yang 'di ltar phung po dang khams dang skye mched rnams thog ma med pa nas tha mal pa'i nga rgyal gyis gnas pa rnams kyis ni da ltar de bzhin gshegs pa thams cad kyis rdul phra rab las bsgrubs pa'i ngo bo nyid du bstan te/ gsang ba 'dus pa zhes bya ba'i rnal 'byor chen po'i rgyud las/mdor na phung po lnga rnams ni/ /sangs rgyas lngar ni rab tu bsgrags/ /rdo rje skye mched nyid dag kyang / /byang chub sems dpa'i dkyil 'khor mchog /sa ni spyan zhes bya ba yin/ /chu yi khams ni mA ma kI/ /me yi khams ni gos dkar mo//sgrol ma rlung du rab tu bsgrags/ /gzugs dang sgra sogs sngags pa yis/ /lha nyid du ni rtag tu bsgom/ /zhes gsungs pa dang / yang phung po la sogs pa de dag re re zhing yang lnga lngar rnam par phye na brgyar 'gyur te/ zla gsang thig le las/ rigs ni rnam pa brgyar bstan te//mdo ru bsdus na rnam pa lnga/ /lus dang ngag yid sbyor ba yis/ /gsum du yang ni 'gyur ba yin/ /zhes gsungs pas da la dang po nyid du rigs brgya'i rab tu dbye ba bstan par bya'o/ /de la gzugs kyi phung po'i tshogs ni rnam par snang mdzad do/ /de yang rnam pa lngar phye ba la/de bzhin gshegs pa rnam pa lngas byin gyis brlabs pa yin te/ de la ring po dang thung ngu la sogs phyi dang nang dang gnyi ga'i dbyibs kyi gzugs ni rnam par snang mdzad kyis byin gyis brlabs pa'o/ /bdag dang gzhan gnyis ka la sogs pa'i rnam pa'i gzugs ni rin chen 'byung ldan gyis so//phyi nang gi sngon po la sogs pa kha dog lnga'i gzugs ni snang ba mtha' yas kyis so/ /phyi dang nang gi zla ba dang / nyi ma la sogs pa snang ba'i rnam pa ni don yod grub pas so/ /rang rig pa tsam 'ba' zhig gi rnam par rig byed ma yin pa ni mi bskyod pas byin gyis brlabs pa ste/gzugs kyi phung po rnam pa lngar bshad do/ /rin chen 'byung ldan gyi ting nge 'dzin gyi dbang du byas te bshad pa/ tshor ba'i phung po'i tshogs ni rin chen 'byung ldan no/ /de yang de bzhin gshegs pa lngas byin gyis brlabs pa yin te/ de la 'dus pa dang mkhris pa las byung ba'i tshor ba ni mi bskyod pas so//bad kan dang rlung las skyes pa'i tshor ba ni rin chen 'byung ldan gyis so/ /bde ba'i tshor ba ni 'od dpag med kyis so/ /sdug bsngal gyi tshor ba ni don yod grub pas so/ /tshor ba mnyam pa nyid ni rnam par snang mdzad kyis byin gyis brlabs pa zhes bya ste/tshor ba'i phung po rnam pa lngar bshad do/ /snang ba mtha' yas kyi ting nge 'dzin gyi dbang du byas te bshad pa/ 'du shes kyi phung po'i tshogs ni snang ba mtha' yas te/ 'di ni rgyu ba dang mi rgyu ba'i dngos po rnams skyes pa rnams kyi 'dus byas pa nyid kyang rkang gnyis dang rkang med la sogs pa'i dbye bas phye na ming tha dad pa'i dngos por yod pa rnams la de rnam par shes pas nye bar bzung nas yongs su gcod par byed la mtshan ma de'i 'du shes kyi phung po zhes bya bar tha dad par rnam par 'jog par 'gyur ro//'du shes de yang de bzhin gshegs pa lngas byin gyis brlabs pa yin te/de la rkang gnyis pa'i 'du shes ni mi bskyod pa'i'o/ /rkang bzhi pa'i 'du shes ni rin chen 'byung ldan gyi'o/ /rkang med kyi 'du shes ni 'od dpag tu med pa'i'o/ /rkang mangs kyi 'du shes ni don yod grub pa'i'o/ /mi g.yo zhing mi 'gyur ba'i 'du shes ni rnam par snang mdzad kyis byin gyis brlabs pa ste 'du shes kyi phung po rnam pa lngar bshad do//don yod grub pa'i ting nge 'dzin gyi dbang du byas te bshad pa/ 'du byed kyi phung po'i tshogs ni don yod grub pa'o/ /de yang de bzhin gshegs pa lngas byin gyis brlabs pa yin te/lus kyi 'du byed ni rnam par snang mdzad kyi'o/ /ngag gi 'du byed ni 'od dpag tu med pa'i'o/ /yid kyi 'du byed ni mi bskyod pa'i'o/ /khams gsum gyi 'du byed ni rin chen 'byung ldan gyi'o/ /thar pa'i 'du byed ni don yod grub pas byin gyis brlabs pa ste/ 'du byed kyi phung po rnam pa lngar bshad do//mi bskyod pa'i ting nge 'dzin gyi dbang du byas te bshad pa/ gang don gzung ba dang / don yongs su gcod pa dang / don khong du chud pa de ni rnam par shes pa'o/ /rnam par shes pa la gnas pas kyang phyi'i don gyi rnam par rab tu brtags la/ phyi'i don gyis kyang rnam par shes par brtags te/de ltar phan tshun ltos pas shes pa dang / shes par bya ba gnyis grub bo/ /rnam par shes pa de yang rnam pa lngar phye ba la de bzhin gshegs pa lngas byin gyis brlabs pa yin par shes par bya'o/ /de la rnam par shes pa'i phung po'i tshogs ni mi bskyod pa ste/mig gi rnam par shes pa ni rnam par snang mdzad kyi'o/ /rna ba'i rnam par shes pa ni rin chen 'byung ldan gyi'o/ /sna'i rnam par shes pa ni 'od dpag tu med pa'i'o/ /lce'i rnam par shes pa ni don yod grub pa'i'o/ /lus kyi rnam par shes pa ni mi bskyod pas byin gyis brlabs pa ste/rnam par shes pa'i phung po rnam pa lngar bshad do/ /mdor na phung po lnga rnams ni/ /sangs rgyas lngar ni rab tu bsgrags/ /zhes bya ba'i mdo'i don bshad zin to/ /khams rnam pa bzhi'i dbang du byas te bshad pa/ sa'i khams gang zhe na/ gang lci ba nyid dang sra ba nyid de/de yang las ni brtan pa'o/ /chu'i khams gang zhe na/ gang gsher ba nyid dang rlan pa nyid de/ de yang las ni sdud pa'o/ /de la me'i khams gang zhe na/ gang dro ba nyid dang yongs su smin pa nyid de de yang las ni skems pa'o/ /de la rlung gi khams gang zhe na gang brkyang ba dang /bskum pa dang / dbugs rngub pa dang / dbugs 'byin pa nyid de/ las ni yang zhing g.yo ba'o/ /de ltar theg pa chen po'i rim pas khams rnam pa bzhi'i rang rang gi mtshan nyid rnam par bzhag nas/ da ni tha mal pa'i nga rgyal rnam par spang bar bya ba'i phyir rdo rje theg pa'i rim pas sangs rgyas lnga'i rang bzhin du bya ste/de la sa'i khams kyi tshogs ni sangs rgyas spyan no/ /de yang khams rnam pa lngar phye ba la de bzhin gshegs pa lngas byin gyis brlabs pa yin te/ skra dang rus pa dang / phyi sa dang mchin pa dang snying ni rnam par snang mdzad kyi'o/ /spu dang sen mo dang rnag dang snying ni rin chen 'byung ldan gyi'o//so dang pags pa dang sha dang snying ni 'od dpag tu med pa'o/ /rgyus pa dang sha dang rtsib ma dang snying ni don yod grub pa'o/ /dri ma dang rgyu ma dang mkhris pa dang snying ni mi bskyod pa ste ji skad du rdo rje phreng ba las kyang / snying ni lnga la nges gnas te/ /rgyud lngar rnam par 'byung ba ni//rlung lnga dang ni ldan pa ru/ /'dod pa lnga rnams spyod par byed/ /ces gsungs pas so/ /de bzhin du yang phyi rol gyi sa'i khams kyang rnam pa lngar dbye ste/ de yang gling bzhi dang ni ri rab po/ /de la ri'i rgyal po ri rab ni rnam par snang mdzad kyis byin gyis brlabs pa'o//lus 'phags po ni mi bskyod pas byin gyis brlabs pa'o/ /'dzam bu gling ni rin chen 'byung ldan gyis byin gyis brlabs pa'o/ /ba lang spyod ni 'od dpag med kyis byin gyis brlabs pa'o/ /sgra mi snyan ni don yod grub pas byin gyis brlabs pa'o/ /sa'i khams rnam pa lngar bshad do//mA ma kI'i ting nge 'dzin gyi dbang du byas te bshad pa/ de la chu'i khams kyi tshogs ni mA ma kI'o/ /de yang de bzhin gshegs pa lngas byin gyis brlabs pa ste/ bad kan dang mchi ma ni rnam par snang mdzad kyis byin gyis brlab pa'o/ /gcin ni mi bskyod pas byin gyis brlabs pa'o//rdul ni rin chen 'byung ldan gyis byin gyis brlabs pa'o/ /khrag ni 'od dpag med kyis byin gyis brlabs pa'o/ /kha chu ni don yod grub pas byin gyis brlabs pa'o/ /phyi rol gyi yang rnam pa lngar bltas te/ de yang rgya mtsho'i chu ni mi bskyod pa'o/ / chu bo'i chu ni rin chen 'byung ldan gyi'o/ /bkod ma'i chu ni 'od dpag tu med pa'i'o / /lteng ka'i chu ni don yod grub pa'i'o/ /'bab chu'i chu ni rnam par snang mdzad kyis byin gyis brlabs pa ste chu'i khams rnam pa lngar bshad do/ /gos dkar mo'i ting nge 'dzin gyi dbang du byas te bshad pa/ me'i khams kyi tshogs ni gos dkar mo'o/ /de yang de bzhin gshegs pa lngas byin gyis brlabs pa ste/ mgo bo'i drod ni rnam par snang mdzad kyis byin gyis brlabs pa'o/ /snying ga'i drod ni mi bskyod pa'i'o/ /lte ba'i drod ni rin chen 'byung ldan gyi'o/ /yan lag thams cad kyi drod ni 'od dpag tu med pa'i'o//lto ba'i drod ni don yod grub pas byin gyis brlabs pa'o/ /phyi rol gyi yang rnam pa lngar bstan te/ de la rgyun bzhag gi me ni mi bskyod pa'i'o/ /rdo las byung ba'i me ni rnam par snang mdzad kyi'o/ /me shel las byung ba'i me ni rin chen 'byung ldan gyi'o/ / shing las byung ba'i me ni 'od dpag tu med pa'i'o/ /nags kyi me ni don yod par grub pas byin gyis brlabs pa ste/ me'i khams rnam pa lngar bshad do/ /sgrol ma'i ting nge 'dzin gyi dbang du byas te bshad pa/ de yang rlung gi khams kyi tshogs ni sgrol ma'o/ /de yang de bzhin gshegs pa lngas byin gyis brlabs pa yin te/de la srog ces bya ba snying la gnas pa ni mi bskyod pa'i'o/ /thur du sel ba zhes bya ba mdoms na gnas pa ni rin chen 'byung ldan gyi'o/ /steng du rgyu ba zhes bya ba lkog mar gnas pa ni 'od dpag med kyi'o/ /me dang mnyam du gnas pa zhes bya ba lte bar gnas pa ni don yod grub pa'i'o//khyab byed ces bya ba tshigs thams cad la gnas pa ni rnam par snang mdzad kyis byin gyis brlabs pa'o/ /yang de rnams re re'i las bshad pa/ dbang po'i sgo yi rgyun las ni/ /srog dang rtsol ba rgyu ba dang / /rtag pa'i dus su rgyu ba ni/ /srog ces bya ba yin par bshad//rlung dang gcin dang phyi sa dang / /de bzhin du ni khu ba rnams/ /'og 'dren 'di ni thur sel bar/ /rtag tu rnal 'byor pas shes bya/ /myang dang za dang bldag pa dang / /kun du 'thung dang 'jib par ni/ /gang zhig rtag tu mnyam gnas par/ /mnyam du gnas zhes bya ba yin//gyen du 'gro zhing sdud pa dang / /bza' dang myang sogs za ba ni/ /shes dang lhan cig 'byor pa dag /gyen rgyu'i las su shes par bya/ /khyab dang 'dzin pa nyid dang ni/ /'gro dang de bzhin ldog pa dang / /tshigs rnams kun la khyab pas na/ /khyab byed ces ni bya bar bshad//phyi rol gyi yang rnam pa lngar blta ste/ /shar gyi rlung ni mi bskyod pa'i'o/ /lho'i rlung ni rin chen 'byung ldan gyi'o/ /nub kyi rlung ni 'od dpag tu med pa'i'o/ /byang gi rlung ni don yod grub pa'i'o/ /steng gi rlung ni rnam par snang mdzad kyis byin gyis brlabs pa ste rlung gi khams rnam pa lngar bshad do//'byung ba chen po bzhi po 'di rnams ni gang du gcig yod pa der bzhi char yod de/ de bas na 'di rnams ni phan tshun ltos pa med par ngo bo nyid kyis rang grub pa ni med do/ /nam mkha' ni dbang po las 'das shing 'dus ma byas pa'i phyir 'byung ba chen po ma yin te/ go 'byed par byed pas na nam mkha' ni dngos po thams cad la mi sgrib pa'i bya ba byed do zhes bya ba'i bar du'o/ /sa ni spyan zhes bya ba yin/ /chu yi khams ni mA ma kI / /me ni gos dkar mo yin no/ /rlung ni sgrol mar rab tu bsgrags/ /zhes bya ba'i mdo'i tshig bshad zin to/ /da ni sa'i snying po la sogs pa'i byang chub sems dpa' sems dpa' chen po rnams kyi ting nge 'dzin gyi dbang du byas te bshad pa/de la mig gi skye mched kyi tshogs ni sa'i snying po'o/ /de yang rnam pa lngar phye ba la de bzhin gshegs pa lngas byin gyis brlabs pa yin te/ de la mig gi 'bras bu'i nang na rgun 'bru'i 'bras bu'i tshad tsam gyi mig gi dbang po de ni mi bskyod pa'i'o//mig 'bras dkar po'i rang bzhin ni rin chen 'byung ldan gyi'o/ /zur gyis lta ba'i gzugs ni 'od dpag tu med pa'i'o/ /mig rnam par g.yo ba ni don yod grub pa'i'o/ /gzugs gsum 'dzin pa ni rnam par snang mdzad kyis byin gyis brlabs pa yin te mig gi skye mched rnam pa lngar bshad do//de bzhin du rna ba'i skye mched kyi tshogs ni phyag na rdo rje ste/ 'di la rna ba'i nang na gro ga gcus te bcad pa lta bu'i rnam pa'i rdul phra rab bsags pa'i gzugs can rna ba'i dbang po ni mi bskyod pa'i'o//rna ba'i rang bzhin ni rnam par snang mdzad kyi'o/ /rna ba'i bu ga ni 'od dpag tu med pa'i'o/ /rna ba'i rtsa ba ni don yod grub pa'i'o/ /sgra gsum 'dzin pa ni rin chen 'byung ldan gyis byin gyis brlabs pa yin te rna ba'i skye mched rnam pa lngar bshad do/ /sna'i skye mched kyi tshogs ni nam mkha'i snying po ste/sna'i nang gi mig sman gyi thur ma phra ba lta bu'i rdul phra rab bsags pa'i gzugs can sna'i dbang po de ni mi bskyod pa'i'o/ /sna'i rang bzhin ni rnam par snang mdzad kyi'o/ /nang gi dbus ni rin chen 'byung ldan gyi'o/ /sna bug ni don yod par grub pa'i'o/ / dri gsum 'dzin pa ni snang ba mtha' yas kyi byin gyis brlabs pa yin te/ sna'i skye mched rnam pa lngar bshad do/ /lce'i skye mched kyi tshogs ni 'jig rten dbang phyug ste/ de la rdul phra rab bsags pa'i gzugs can zla ba phyed pa'i dbyibs lta bu'i lce'i dbang po ni mi bskyod pa'i'o/ /lce'i rang bzhin ni rnam par snang mdzad kyi'o//lce'i rtsa ba ni rin chen 'byung ldan gyi'o/ /lce'i rtse mo ni 'od dpag tu med pa'i'o/ /ro gsum 'dzin pa ni don yod par grub pas byin gyis brlabs pa yin te/ lce'i skye mched rnam pa lngar bshad do/ /lus kyi skye mched kyi tshogs ni sgrib pa thams cad rnam par sel ba ste/de la lus kyi rdul phra rab bsags pa'i ma lus pa'i gzugs kyi lus dbang po de ni rnam par snang mdzad kyi'o/ /rus pa'i rang bzhin ni rin chen 'byung ldan gyi'o/ /sha'i rang bzhin ni 'od dpag tu med pa'i'o/ /pags pa'i rang bzhin ni don yod grub pa'i'o/ / reg pa gsum 'dzin pa ni mi bskyod pas byin gyis brlabs pa yin te/ lus kyi skye mched rnam pa lngar bshad do/ /'jam dpal gyi ting nge 'dzin gyi dbang du byas te bshad pa/ 'di na lus kyi nang na snang ba'i rnam par shes pa gsum po de ni yid kyi dbang po ste/ dbang po thams cad kyi bdag po yin zhing so sor rang rig pa yin pas phyi'i yul ni med kyi chos kyi dbyings yul du byas nas sgyu 'phrul dra bas mngon par rdzogs par byang chub pa'i rim gyis bdag nyid rdzogs par byas nas sangs rgyas kyi yon tan ma lus pa dang ldan pas sangs rgyas kyi zhing nas sangs rgyas kyi zhing du 'gro ba'o//'jam dpal gyi ting nge 'dzin bshad zin to/ /rdo rje skye mched nyid dag kyang / /byang chub sems dpa'i dkyil 'khor mchog /ces bya ba'i mdo'i don bshad zin to/ /yul rnams lha mo'i ting nge 'dzin gyi dbang du byas te bshad pa/ rdo rje sgo zhes bya ba rnal 'byor chen po'i rgyud las rlung bcu gsungs te/'di lta ste/ srog dang / thur du sel ba dang / gyen du rgyu ba dang / mnyam du gnas pa dang / khyab byed dang / ldang zhing rgyu ba dang / rnam par rgyu ba dang / yang dag par rgyu ba dang / rab tu rgyu ba dang / nges par rgyu ba'o/ /de la srog la sogs pa'i rlung lnga ni phung po lnga la brten te phung po'i bya ba rnams byed do//ldang zhing rgyu ba la sogs pa'i rlung lnga ni dbang po rnams la gnas nas phyi rol gyi bya ba rnams byed do/ /de la ldang zhing rgyu ba zhes bya ba'i rlung mig gi skye mched la brten nas gzugs rnam pa lnga'i bya ba rdzogs par byed do/ /de yang snang ba dang sgrib g.yogs med pa dang /yid la byed pa dang / mig gi dbang po tshogs pa dang ldan pa'i rgyus gzugs kyi yul rnams mthong ste/ de ni rnam par snang mdzad kyi'o/ /'gying bag dang rnam par rol pa dang ste ga pa'i gzugs ni mi bskyod pa'i'o/ /rjes su chags pa'i gzugs ni rin chen 'byung ldan gyi'o//yid du 'ong ba dang yid du mi 'ong ba dang btang snyoms kyi 'du shes can gyi gzugs ni 'od dpag tu med pa'i 'o/ /bya ba thams cad sgrub pa'i gzugs ni don yod par grub pas byin gyis brlabs pa ste/ gzugs kyi yul rnam pa lngar bshad do/ / rnam par rgyu ba zhes bya ba'i rlung ni rna ba'i skye mched la brten nas sgra rnam pa lnga'i bya ba byed de/de la rna ba'i nang gi sgra dang mgo dang skra'i sgra ni rnam par snang mdzad kyi'o/ /glu dang rgyun gyi sgra ni rin chen 'byung ldan gyi'o/ /rkan dang mchu dang ngag gi sgra ni 'od dpag tu med pa'i 'o/ /nags tshal dang chu bo dang se gol dang thal mo dang rdza rnga la sogs pa'i rol mo'i sgra ni don yod par grub pa'i 'o//yi ge hUM gi zhi ba dang drag po'i sgra ni mi bskyod pa'i byin gyis brlabs pa yin te sgra'i yul rnam pa lngar bshad do/ /yang dag par rgyu ba zhes bya ba'i rlung ni sna'i skye mched la brten nas dri rnam pa lnga'i bya ba byed do/ / de la dri ma lus pa ni rnam par snang mdzad kyi'o/ /yan lag thams cad kyi dri ni rin chen 'byung ldan gyi'o/ /dri gsum gyi bye brag 'dzin pa ni 'od dpag tu med pa'i'o/ /ro'i dri ni don yod par grub pa'i'o/ /dri mi zad pa ni mi bskyod pas byin gyis brlabs pa ste dri'i skye mched rnam pa lngar bshad do/ / rab tu rgyu ba zhes bya ba'i rlung ni lce'i skye mched la brten nas ro rnam pa lnga skyong bar byed de/ de la ro mngar ba ni rnam par snang mdzad kyi'o/ /ro bska ba ni rin chen 'byung ldan gyi'o/ /lan tshwa'i ro ni 'od dpag tu med pa'i'o/ /ro kha ba ni mi bskyod pa'i'o/ /ro tsha ba dang skyur ba la sogs pa'i ro drug gi bye brag ni don yod par grub par byin gyis brlabs pa yin te ro'i skye mched rnam pa lngar bshad do//nges par rgyu ba zhes bya ba ni lus kyi skye mched la brten nas stobs 'gyed pa la sogs pa stobs dang spro ba rnams te/ de yang reg bya'i bya ba lnga rjes su skyong bar byed do/ /de la stan gcig la gnas pa'i reg bya ni rnam par snang mdzad kyi'o//'khyud pa'i reg bya ni rin chen 'byung ldan gyi'o/ /'o byed pa'i reg bya ni 'od dpag tu med pa'i 'o/ /rngub pa'i reg bya ni don yod par grub pa'i 'o/ /b+ha ga dang ling+ga'i sbyor ba'i reg bya chags pa dang bral ba dang / dbu ma'i chags pa'i ngo bo nyid nye bar dmigs pa ni mi bskyod pas byin gyis brlabs pa ste reg bya'i yul rnam pa lngar bshad do//gzugs sgra la sogs sngags pa yis/ /lha nyid du ni rtag tu bsgom/ /zhes bya ba'i mdo'i don bshad zin to/ /ye shes lnga'i dbang du bya ste bshad pa/ me long la gzugs brnyan snang ba bzhin du dngos po ma lus pa rnams cig car yongs su shes pa ni me long lta bu'i ye shes te de ni rnam par snang mdzad kyi'o//rkang med dang rkang gnyis dang rkang bzhi dang / rkang mangs kyi sems can rnams kyang sems tsam mo zhes rnam pa gcig tu rtogs pa ni mnyam pa nyid kyi ye shes te de ni rin chen 'byung ldan gyi'o//phung po dang khams la sogs pa'i phyi dang nang gi dngos po rnams so sor rnam par phye ste rnam par brtags na thams cad kyang sangs rgyas kyi rang bzhin no zhes shes nas chos thams cad kyi cha shas ni 'di dag go zhes pad+ma'i 'dab ma ltar so sor rtog cing rtog pa med pas gnas pa de ni so sor rtog pa'i ye shes te de ni 'od dpag tu med pa'i 'o //bdag dang gzhan gyi bya ba lus dang ngag dang yid kyi las rdzogs par byed pa'i ngo bo nyid ni bya ba sgrub pa'i ye shes te de ni don yod par grub pa'i 'o/ /lus dang ngag dang yid kyi sgrib pa dag cing las dang nyon mongs pa las grol te/dge ba dang mi dge ba'i rnam par rtog pa'i bag chags rnam par sbyangs pa ni chos kyi dbyings rnam par dag pa'i ye shes te de ni mi bskyod pas byin gyis brlabs pa'o/ /de bas na/ phung po khams dang de bzhin skye mched rnams/ /lnga po dbye ba lnga ru byas pa la//de bzhin gshegs pas so sor byin brlabs na/ /'khor ba'i las rnams dag ni ga las 'byung / /de bzhin dbang po phyi rol yul bcas lnga/ /re re zhing yang bder gshegs lnga rnams kyis/ /de la rang rang rtag tu byin rlob cing / /ye shes lnga dang gsum du 'ang yang dag gnas//zhes gsungs pa'i phyir ro/ /rigs ni rnam pa brgyar bshad pa/ /zhes bya ba'i mdo'i don bshad zin to/ /rdo rje slob mas gsol pa/ rigs brgya'i rim pas de bzhin gshegs pa thams cad kyi rdul phra rab yongs su bsags pa las grub pa'i lus yin par som nyi ma mchis na/yang ji ltar na de ni mdor bsdus na rnam pa lngar 'gyur ba lags/ rdo rje slob dpon gyis smras pa/ khams bzhi po dag las lus kyi phung po mngon par 'grub par 'gyur te/ khams rnams tshogs pa'i phyir 'byung ba las gyur pa 'byung ba ste /de bas na gang gzugs kyi phung po la sogs pa 'byung ba las gyur pa ni de bzhin gshegs pa'i rigs can te/ de ni sa'i khams sdud par byed pas nye bar 'gro'o/ /de bzhin du rin po che'i rigs can rnams ni chu'i khams so/ /pad+ma'i rigs can rnams ni me'i khams so//las kyi rigs can rnams ni rlung gi khams so/ /rdo rje'i rigs can rnams ni rnam par shes pa'i khams su bsdus par gyur pa yin no/ /tshul 'dis na rang gi lus kyi dkyil 'khor 'byung ba dang 'byung ba las gyur pa'i dbye bas phung po lnga rnams brgyar gyur pa yang gsang ba lnga'i de kho na nyid 'byung ba chen po lnga'i de kho na nyid du 'gyur te/'dir gsang ba 'dus pa las/ nam mkha'i dbyings kyi dbus gnas par/ /dkyil 'khor rdo rje kun las skyes/ /zhi ba rdo rje 'dzin 'dod na/ /bsdu ba dag kyang rab tu bya/ /zhes gsungs pa dang /don de nyid gsal bar bya ba'i phyir thams cad gsang ba'i rgyud las/ 'byung ba lnga yi bdag nyid lngar/ /mi yi lus ni brtag bya ste/ /dngos de nges par bsgoms pa yis / /rang sems mthu yis sangs rgyas 'gyur/ /zhes bshad pa dang / nam mkha' dang mnyam pa'i rgyud las kyang /'gro ba 'di kun sangs rgyas lnga bdag nyid/ /gar mkhan dag dang ri mo bzang ltar snang / /gang du bde chen zhes bya gcig pu nyid/ /gcig pu nyams ni du mar gar mdzad do/ /zhes gsungs pas so/ /mdor bsdu na rnam pa lnga zhes bya ba'i mdo'i don bshad zin to//rdo rje slob mas gsol pa/ rnam pa lnga las ji ltar rnam pa gsum du 'gyur ba lags/ rdo rje slob dpon gyis smras pa/ rin chen 'byung ldan ni sku rdo rje dang lhan cig gnyis su med par 'gyur ro/ /don yod grub pa ni gsung rdo rje dang lhan cig gnyis su med par 'gyur ro/ / mi bskyod pa ni drug pa de bzhin gshegs pa dang lhan cig gnyis su med par 'gyur te/ de ltar rigs brgya nas brtsams te/ rigs lnga'i bar gyi bdag nyid can gyi sangs rgyas dang byang chub sems dpa' rnams ni rang gi lus dang ngag dang yid kyis bsdus par gyur pa yin no/ /ji skad du bcom ldan 'das kyis gsang ba 'dus pa zhes bya ba rnal 'byor chen po'i rgyud las/de nas de bzhin gshegs pa thams cad mi zad pa'i rdo rje gsum gyis nyid kyi sku dang gsung dang thugs la rab tu zhugs par 'gyur ro zhes bya ba dang / lus dang ngag dang sems dmigs na/ /ngo bo nyid kyis dmigs su med//sngags kyi lus su sbyor ba la/ /byang chub med cing bsgom pa'ang med/ /lus dang ngag sems mtshan nyid du/ /mdor na rnam par dpyad nas su/ /sngags kyis brtags pa'i ting nge 'dzin/ /sbyor ba'i cho ga bsgom par bya/ /zhes gsungs pa dang / sangs rgyas thams cad dang mnyam par sbyor ba mkha' 'gro ma sgyu ma bde ba'i mchog las kyang don 'di gsal bar bstan te/ gzugs brnyan lugs ma sogs pa las/ /rnal 'byor 'byung bar mi 'gyur gyi/ /byang chub sems la rab brtson na/ /de las rnal 'byor lhar 'gyur ro/ / bdag nyid sangs rgyas thams cad dang / /dpa' bo thams cad bdag yin no/ /de bas bdag nyid lhar sbyor bas/ /bdag nyid rab tu bsgrub par bya/ /zhes gsungs pas te/ lus dang ngag sems sbyor ba yis/ /gsum du yang ni 'gyur ba yin/ /zhes bya ba'i mdo'i don bshad zin to//rdo rje slob mas gsol pa/ rtogs pa thams cad kyi bdag nyid sangs rgyas dang byang chub sems dpa' rnams ni rang gi lus dang ngag dang yid kyis yang dag par bsdus pa la ni som nyi ma mchis na rigs gsum po de yang ji ltar na rdo rje gsum mi phyed pa'i bdag nyid can gyi sku rdo rjer 'gyur ba lags/bcom ldan 'das rdo rje slob dpon ston pas bshad du gsol/ rdo rje slob dpon gyis smras pa/ sems can chen po 'dus pa'i don la zhugs pa rnams la phan par bya ba'i phyir lus rnam par dben pa'i mthar thug pa 'dri bar byed pa legs so legs so//de bas na ngas lus dang ngag dang yid dang phan tshun gcig la gcig rgyur gyur pa bstan nas sku rdo rje'i ting nge 'dzin la rab tu gzhag par bya yis nyon cig /don la dmigs pa'i lus dang ni/ /ngag kyang yid kyis bskul bya zhing / /yid ni dga' bar byed pa yin/ / dngos grub rab mchog bsgrub par bya/ /zhes bcom ldan 'das kyis gsang ba 'dus pa las gsungs te/ 'di'i dgongs pa ni 'di yin te/ de la sku rdo rjer gyur nas rkan dang mchu sbyar ba dang / lce'i tshogs rnam par gyur pa las gsung rdo rje la 'jug par 'gyur ro//thugs rdo rje ni de la skul bar byed pa yin te de ltar gsum tshogs pa las yid dga' zhing tshim par byed pa'i dngos grub rdzogs par byed do zhes pa'i don to/ /de ltar lus dang ngag dang yid la sogs pa'i bsgom pa'i mtshan nyid brtags nas da ni rdo rje gsum mi phyed pa'i mtshan nyid gzhag par bya ste/gsang ba 'dus pa las khyed kyi sems lus lta bu dang / lus sems lta bu dang / sems tshig tu brjod pa lta bu skyed cig ces gsungs pas bdag ni rang bzhin gyi bdag po'o zhes bdag nyid brtan pa bskyed la rdo rje gsum gyi bdag nyid rdo rje 'chang chen por lhag par mos par byas pa ni byin gyis brlabs pa'i rnal 'byor ces bya bar bshad do//lus rnam par dben pa bsdus pa'i the tshom gcod pa ste le'u gnyis pa'o// //rdo rje slob mas gsol pa/ lus rnam par dben pa la bslab pa la ni som nyi ma ma mchis na/bcom ldan 'das ngag rnam par dben pa la ji ltar bslab par bgyi/ ji ltar rab tu bsgrub par bgyi/ bcom ldan 'das rdo rje slob dpon ston pas bshad du gsol/ rdo rje slob dpon gyis smras pa/ sems can chen po legs so legs so phung po dang khams dang skye mched la sogs pa bshad ma thag pa ni lus rnam par dben pa ste/de la lha rnam par dgod pa ni thams cad kyi thun mong ste/ rags pa'i rnal 'byor yin pa'i phyir ro/ /ngag rnam par dben pa de yang rnal 'byor pa'i ye shes te/ shin tu phra ba theg pa chen po pa rnams kyi yul ma yin pa rdo rje'i theg pa rnams las kyang bskyed pa'i rim pa la spyod pa rnams kyi yul ma yin te shin tu phra ba'i phyir ro//de bas na ngas khyod la bshad pa'i rgyud kyi rjes su 'brangs nas gsung rdo rje'i ting nge 'dzin rgya cher so sor rtogs par bya yis shin tu 'bad de nyon cig /de la rigs ni rnam pa brgyar gsungs te zhes bya ba la sogs pa sngar bshad pa'i tshigs su bcad pa'i mdo ni lus dang ngag dang sems rnam par dben pa'i yang thun mong yin no//de la ngag rnam par dben pa zhes bya ba ni sngags kyi de kho na nyid do/ /de yang rlung gi de kho na nyid kyi rim pa dang bral bas ni de shes par mi 'gyur ro//rlung gi de kho na nyid ces bya ba ni srog dang rtsol ba'o/ /de bas na rlung gi de kho na nyid bstan pa'i tshig dpal gsang ba 'dus pa las/ rin chen kha dog sna lnga pa/ /yungs kar gyi ni 'bru tshad tsam/ /sna yi rtse mor nan tan du/ /de nyid sbyor bas rtag tu bsgom/ /zhes gsungs te/rdo rje'i tshig 'di nges pa dang drang ba'i don gyi dbye bas lha'i rnal 'byor rnam pa gnyis la yang sbyar te/ de la bskyed pa'i rim pa sgom par byed pas ni sna'i rtse mor yungs kar gyi 'bru tshod tsam gyi rang gi lha'i mtshan ma rang sems brtan par bya ba'i phyir bsgom par bya'o zhes bstan pa 'di ni phra mo'i rnal 'byor bshad pa yin no//'di nyid rdzogs pa'i rim pa la gnas pa rnams kyi phra mo'i rnal 'byor bshad pa ni A li kA li rnams kyi bud med dang skyes pa dang ma ning gi tshul gyi yi ge gsum bskyed la yi ge gsum yang 'jug pa dang gnas pa dang ldang bar nges par sbyar la dkyil 'khor bzhi'i rim gyis srog dang rtsol ba'i bdag nyid can gyi rdo rje'i bzlas pa bya'o//don 'di nyid bstan par bya ba'i phyir gsang ba 'dus pa'i rgyud phyi ma las/ ye shes lnga yi rang bzhin dbugs/ /'byung ba lnga yi ngo bo nyid/ /gong bu'i gzugs kyis phyung nas ni/ /sna yi rtse mor rab tu brtag /rin chen kha dog sna lnga pa/ /srog dang rtsol ba zhes byar bshad/ /ces gsungs pa'o/ /mdor bstan pa 'di'i bshad pa gsang ba 'dus pa'i bshad pa'i rgyud dgongs pa lung ston pa las bshad de/ de nas bcom ldan rdo rje can/ /rdo rje snying po'i don gsungs pa//'gro ba'i bla ma gcig pu la/ /phyag 'tshal nas ni slar gsol pa/ /'jig rten pa yi lung nyid kyis/ /byang chub sems ni rab gsungs na/ /ji ltar 'jig rten las 'das pa/ /ma 'ongs pa yis ji ltar rtogs/ /lta ba thams cad rab spang phyir/ /khyed ni chos rnams ston mdzad na//ji ltar byang chub sems de nyid/ /lta ba de ni rab bstan 'gyur/ /dgongs pa'i tshig la rmongs pa rnams/ /gsungs pa'i don ni ma rtogs nas/ /gsungs pa 'di las gzhan min zhes/ /de ni ji bzhin sgrar 'dzin to/ /de nas bcom ldan sna tshogs pas//lag na rdo rje la gsungs pa/ /khyed gsang dgongs pa ma rtogs pa/ /'dri bar byed pa legs so legs/ /byang chub sems ni rlung 'gyur zhing / /nam mkha' la ni rnam gnas pa/ /sems can kun gyi srog gyur yin/ /lnga yi bdag nyid bcu ming can/ /rten 'brel bcu gnyis zhes grags pa//ngo bo nyid rnams gsum du 'gyur/ /rlung zhes bya ba'i byang chub sems/ /dbang po kun gyi gtso 'di yin/ /'di ltar mi mngon phra ba las/ /rtag tu gsal bar brjod pa yin/ /'gro ba yul sogs las byed pa/ /'dir ni de la brten pa yin/ /zhi ba dang ni rgyas pa dang / / dbang dang de bzhin mngon spyod rnams/ /de nyid gsum gnas la brten nas/ /de kun byang chub sems kyis byed/ /ji srid 'jig rten brtag pa dang / /de bzhin brtag pa sna tshogs rnams/ /rnam rtog byang chub sems zhes pa'i/ /rlung las rtag tu 'byung ba yin/ /bde sdug la sogs chos rnams kyi//sa bon lta bur bshad pa yin/ /byang chub sems kyi ngo bo 'di/ /phung sogs gnyis med mkha' dang mnyam/ /shes rab thabs gcig sbyor ba yis/ /byang chub sems ni 'gro bar 'gyur/ /klog dang bsam gtan rnams spangs par/ /bdag po rang nyid zlos pa ste//nyin dang mtshan mo dbye ba yis/ /nyi zla rab tu sbyor ba yin/ dngos po med pas 'gro khyab pa'i/ /byang chub sems kyi rlung gcig pu/ /dge dang mi dge'i 'bras spangs na/ /nam mkha' 'dra bar 'gyur ba yin/ /zhes gsungs pas so/ /rdo rje slob mas gsol pa/ rlung lnga'i bdag nyid bcu ming can//zhes gsungs pa/ bcom ldan 'das kyis thugs brtse ba nye bar bzhag ste/ re re'i ming gi dbye ba gzhan bshad du gsol/ rdo rje slob dpon gyis smras pa/ bshad ma thag pa'i bshad pa'i rgyud nyid las bstan pa de dgrol bar bya'o/ /de nas de bzhin gshegs kun dang //de bzhin byang chub sems dpa' rnams/ /de bzhin gshegs pa bdag po de/ /mnyes bya'i phyir ni zhugs par 'gyur/ /srog dang thur sel gyen rgyu dang / /khyab dang mnyam gnas zhes bshad dang / /klu dang rus sbal rtsangs pa dang / /lha sbyin dang ni gzhu las rgyal/ /de dag bdag gzugs bud med du//slar yang sprul par mdzad pa yin/ /rlung bcu po 'di dag ni sangs rgyas thams cad dang mnyam par sbyor ba mkha' 'gro ma bde ba'i mchog gi tshul las ni sgra ji bzhin ma yin pas gsungs te/ ko Ta khya/ ko Ta ba/ ko Ta/ ko Ta bash+tsa sha /ko TI ra gaH/ ko la khya/ko la bA / ko la/ ko la bash+tsa/ ko la ta thA/ ming bcu po de dag ni rdo rje'i sgo zhes bya ba'i rnal 'byor chen po'i rgyud las kyang sgra ji bzhin pa'i don gyis rlung bcur gsungs te/ srog dang thur du sel ba dang / me dang mnyam du gnas pa dang / gyen du rgyu ba dang / khyab byed dang / rgyu ba dang / rnam par rgyu ba dang / yang dag par rgyu ba dang / rab tu rgyu ba dang / nges par rgyu ba zhes bya'o/ /rdo rje slob mas gsol pa/ srog ces bya ba la sogs pa rlung bcu po lus 'di la gang zhig rab tu gnas nas ci zhig bgyid pa bcom ldan 'das rdo rje slob dpon ston pas bshad du gsol/rdo rje slob dpon gyis smras pa/ rlung lnga ni lus kyi cha la gnas nas lus kyi bya ba rnams byed do/ /rlung lnga ni mig la sogs pa'i skye mched la gnas nas dbang po rnams kyi bya ba rnams byed do/ /de la srog ces bya ba'i rlung snying gar gnas pa ni de bzhin gshegs pa mi bskyod pa'o/ / thur du sel ba mdoms na gnas pa ni de bzhin gshegs pa rin chen 'byung ldan no/ /gyen du rgyu ba lkog mar gnas pa ni de bzhin gshegs pa 'od dpag tu med pa'o/ /me dang mnyam du gnas pa lte bar gnas pa ni de bzhin gshegs pa don yod grub pa'o/ /khyab byed tshigs thams cad la gnas pa ni de bzhin gshegs pa rnam par snang mdzad do//rgyu ba'i rlung ni gzugs so/ /rnam par rgyu ba ni sgra'o/ /yang dag par rgyu ba ni dri'o/ /rab tu rgyu ba ni ro'o/ /nges par rgyu ba ni reg bya'o/ /yang rlung bcu po 'di dag ni dbugs 'byung ba dang rngub par 'gyur ba dang / de rnams kyang rlung la sogs pa'i dkyil 'khor bzhi'i bdag nyid can du 'gyur ba dang /yang de rnams lha mo bzhi'i bdag nyid can du 'gyur ba dang / yang de rnams 'byung ba rnam pa lngar 'gyur ba dang / yang de rnams me long lta bu la sogs pa'i ye shes rnam pa lngar 'gyur ba dang /yang de rnams dkar po la sogs pa 'od zer rnam pa lnga'i bdag nyid can du 'gyur ba dang / yang de rnams de bzhin gshegs pa lnga'i bdag nyid can du 'gyur ba dang / yang de rnams yi ge gsum gyi gzhir gyur nas 'jug pa dang gnas pa dang ldang ba'i rim gyis rdo rje bzlas pa byed par 'gyur ba dang /yang rlung de rnams yi ge a'i gzhir gyur nas tshig ma lus par smra bar byed pa dang / yang de rnams mi shigs pa thob na dngos po med par 'gyur ro/ /rdo rje slob mas gsol pa/ bcom ldan 'das ji ltar na rlung bcu po 'di dag gcig dang du ma'i ngo bos rang gi lus la nyin dang mtshan du spro ba dang sdud par bgyid/bcom ldan 'das rdo rje slob dpon ston pas bshad du gsol/ rdo rje slob dpon gyis smras pa/ sems dpa' chen po legs so legs so/ /dpal de kho na nyid bsdus pa la sogs pa rtsa ba'i rgyud bla ma las ji ltar rlung gi de kho na nyid dgongs par bshad kyis gsal bar ma gsungs la/de bshad pa'i rgyud las sgra ji bzhin par gsungs pas de la 'jug par bya'o/ /sangs rgyas lnga yi rigs gnas pa / /sna rtse'i bu ga las byung zhing / /rlung lnga steng du yang dag rgyu/ /lus la rtag tu spyod par 'gyur//kun rdzob snar ni spyod pa yi/ /sgo de las ni rnam par 'byung / /g.yon dang g.yas dang gnyis ka dang / /dal bar rgyu dang rnam pa bzhi/ /g.yas pa nas ni 'byung ba'i khams/ /me yi dkyil 'khor nyid yin te/ /kha dog dmar ba'i mchog 'di ni/ / pad+ma mgon po rgyu ba'o/ /g.yon pa nas ni 'byung ba'i khams/ /rlung gi dkyil 'khor 'byung ba dag /ljang ser dag tu snang ba ste/ /las kyi mgon po rgyu ba'o/ /gnyis ka las ni 'byung ba'i khams/ /gser gyi mdog tu snang ba ste/ /dbang chen gyi ni dkyil 'khor nyid/ /rin chen mgon po rgyu ba'o//dal zhing rgyu ba med pa'i khams/ /dag pa'i shel ltar snang ba ste/ /skad cig chu yi dkyil 'khor te/ /rdo rje mgon po rgyu ba'o/ /khams kun yang dag 'byung ba ni / /rten dang brten par bzung ba ni/ /rnam snang mdzad chen sku yin no/ /'chi ba'i mthar ni 'byung bar 'gyur/ / dkyil 'khor bzhi po 'di dag ni/ /mnyam par gzhag pas rtag tu zlos/ /sngags bzlas pa yi grangs kyis ni/ /nyin dang mtshan du rtag par zlos/ /zhes bcom ldan 'das kyis rdo rje phreng ba zhes bya ba rnal 'byor gyi rgyud chen po las gsungs so/ / 'di'i don ni 'di yin te/ pad+ma dang rdo rje'i sna dag las 'od zer rnams byung nas steng du song ste/kun rdzob kyi sna'i sgo las g.yon pa dang g.yas pa dang gnyis ka dang dal gyis rgyu ba'i rim gyis 'byung ngo / /de'i rim pa ni 'di yin te/ sna g.yon pa nas nges par 'byung ba'i rlung ni de bzhin gshegs pa don yod par grub pa'i rlung gi ngo bo ste/rlung gi dkyil 'khor mdog ljang ser 'od zer nag po'i ngo bo nyid do/ /sna g.yas nas rgyu ba'i rlung ni de bzhin gshegs pa 'od dpag tu med pa ste me'i rang bzhin me'i dkyil 'khor 'od zer dmar po'i ngo bo nyid do/ /sna gnyi ga las byung ba'i rlung ni rin chen 'byung ldan te dbang chen gyi dkyil 'khor 'od zer ser po'i ngo bo nyid do//dal zhing rgyu ba bul ba'i rlung ni mi bskyod pa'i ngo bo nyid do/ / gsal ba'i rang bzhin chu'i dkyil 'khor 'od zer dkar po'i ngo bo nyid do/ /khyab byed kyis ni khams kyi dkyil 'khor bzhi char la khyab pa'i rlung ste mi 'byung zhing khyab pa'i 'od zer can ni de bzhin gshegs pa rnam par snang mdzad de de nam mkha' dang mnyam pa'i ngo bo nyid do//de lta mod kyi 'od zer re re 'byung ba na yang 'od zer lnga lnga nges par 'byung ste/ khams kyi dkyil 'khor gcig gis kyang khams bzhi char la khyab pa yin no/ /dkyil 'khor re re la yi ge gsum gyi sngags kyi bdag po 'jug pa la sogs pa'i rim gyis rtag tu rang nyid zlos pa yin te/'di rlung gi de kho na nyid mdor bsdus nas bshad pa yin no/ /rdo rje slob mas gsol pa/ bla ma'i zhal snga nas kyi bka' drin gyis rlung gi de kho na nyid lung dang rtogs pa dag gis legs par bslabs te/ da ni sngags kyi de kho na nyid kyi rang gi mtshan nyid shes par 'tshal na thugs brtse ba nye bar bzhag ste/ bcom ldan 'das rdo rje slob dpon ston pas bshad du gsol/ slob dpon gyis smras pa/ sems can chen po legs so legs so/ /sngags kyi de kho na nyid ces bya ba gang de kho na nyid bsdus pa la sogs pa'i rtsa ba'i rgyud dang rgyud bla ma las sngags tsam gsungs kyi sngags btu ba ni ma bstan to//bshad pa'i rgyud las ni sngags btu ba dang / sngags kyi brda dang / sngags kyi don dang / sngags kyi de kho na nyid bcom ldan 'das kyis bden pa kho nar gsungs so//de nas bshad pa'i rgyud ma rtogs na phyi rol gyi sngags la mngon par zhen pa rnams kyis shes par mi 'gyur te/ de bas na 'bad pas nyon cig /bshad pa'i rgyud kyi rjes su 'brangs nas sngags kyi de kho na nyid 'ba' zhig khong du chud par bya'o/ /de la sbrul la sogs pa'i sngags rnams ni A li kA li las yang dag par byung ba rnams so//de rnams kyi de kho na nyid ni mi shigs pa las byung ba'i yi ge gsum ste/ gang gi phyir sngags thams cad ni bud med dang skyes pa dang ma ning gi ngo bo nyid kyi man ngag ji ltar thos pas yi ge gsum la rab tu 'jug go//de bas na yi ge gsum ni sngags thams cad kyi bdag po'o/ /de ni yang re re zhing mi shigs pa dang lhan cig yi ge gsum gsum las 'byung ba yin no/ /da ni yi ge gsum gyi bya ba bstan par bya ste/ de la dang por gsum yang dag par sbyor ba las lha'i sku 'byung bar 'gyur ro//de nyid 'jug pa dang gnas pa dang ldang ba'i rim gyis lus nyin mtshan du 'dzin par byed do/ /de nyid A li kA li rnams dang lhan cig dbang po gnyis mnyam par sbyor ba'i dus su kha thur du bltas par gyur pas gsang ba'i sna'i bu ga nas sa bon gyi gzugs kyis byung nas sems can gyi khams rnams skyed par byed do//de nyid srog dang rtsol ba dang lhan cig yang steng du song nas dbang po'i sgo rnams sad par byed cing kun rdzob kyi sna'i sgo nas g.yon dang g.yas la sogs pa'i rim pas byung nas lhun gyis grub pas rdo rje bzlas pa bya ste/ sngon gyi las kyi sgrib pa rnam par sbyong bar byed do//de nyid nyin mo dang mtshan mo'i rim gyis bzlas pa'i grangs nye bar bzung nas chu la sogs pa'i dkyil 'khor du byung ste/ dkar po la sogs pa'i kha dog la gnas nas zhi ba la sogs pa'i las rnams byed do/ /de nyid yi ge'i gzugs su yongs su brtags la lce rtse shin tu mi bskyod cing //zhes bya ba la sogs pa'i ngag gi bzlas brjod kyi mtshan nyid kyis bzlas brjod byas nas phyi'i kha dog la sogs pa'i bya ba la brten te zhi ba la sogs pa'i las rnams byed do/ /yi ge gsum po de nyid ni sbyang bar bya ba dang / rtogs par bya ba dang / 'bar bar bya ba ba'i rim gyis kha zas rnam par sbyangs te skyon med par byed do//de ltar lus la gnas pa'i skabs su thams cad bya ste/ mthar mi shigs par zhugs nas yang tha mal pa'i lus la brten te/ de bzhin du thams cad byed do/ /da ni yi ge gsum bskyed pa dgongs pa lung ston pa zhes bya ba'i rnal 'byor chen po'i rgyud las gsungs pa/dang po gcig ni dgu dbus na/ /gang zhig bcu yis ma bcings pa/ /de ni bcing med ces bya ste/ /de shes pa ni mchog gi gnas/ /dbyangs dang gsal byed yi ge ste/ /grangs dgu yi ni rjes 'jug pa/ /as bcings phan tshun sbyor ba la//gang gis de shes 'gro ba'i bla/ /gang zhig shes nas rnam grol ba'i/ /'bras bu phun tshogs grub 'dod pa/ /de ni de nyid 'grub 'gyur te/ /dngos med pas ni dngos spangs pa/ /'byung ba'i mtha' ni yang dag ldan/ /cha la sogs pa bcu drug gnas/ /lnga pa lnga dang yang dag ldan//bzhi ni gsum du nges par sbyar/ /yi ge AM bcas ring por bcas/ /yon tan sbyor sogs phyis dang ldan/ /thung ngu ma lus dag tu 'gyur/ /gcig min du ma ma yin no/ /ya yi don gyis gang ci 'ang rung / /bya ba'i dngos grub 'dod gyur pas/ /ra la sogs pa gsum nyid kyis/ / 'gro ba'i don la rab tu 'jug /yi ge gang zhig sngar bshad dang / /gang yang mngon par phyogs pa rnams/ /bud med skyes pa ma ning ste/ /khams la sogs par rab tu brtag /'og nas steng du bcas par ni/ /shes nas blos ni nges par sbyar/ /drug bshad bzhi dang gsum dang gcig /dngos med ngo bo gcig las byung / /de ni yang sogs don sbyar nas/ /dus gsum shes pa'ang 'byung bar 'gyur/ /mkhas pas sgyu ma mig 'phrul bzhin/ /'gro ba rnams ni rgyu mthar bya/ /brjod pa yi ni sngags 'di dag /dngos med ngo bo las byung ba//de ni yongs su gyur pa'i gzugs/ /lha ru nye bar dmigs pa gang / /brda yis de nyid gsum gnas pa/ /rang bzhin bzlas pa'i mtshan nyid do/ /ming med brjod du med pa ste/ /byang chub sems mchog 'di yin no/ /gsum po de nyid gcig gyur pa/ /'gro ba med cing 'ong ba med//'gag med rab tu zhi ba nyid/ /rtag dang chad pa rnam spangs pa/ /dus gsum mkhyen pas ma byas pa'i/ /rtog pa nam mkha' dbyer med mtshan/ /'di nyid kho na don dam ste/ /so so rang rig mtshan nyid do/ /bya ba thams cad nyid du yang / /rnal 'byor rig pa nyal sogs la//ming med brjod du med pa dang / /dus gsum bzlas pa rtag tu bzla/ /gos dkar la sogs bzlas bshad pa/ /brgya phrag gnyis dang nyi shu lnga/ /bzhi po legs par bsdus pa yis/ /sbyor bzhi bsdus pas brgya phrag dgu/ /dgu brgya dag tu gang bstan pa/ / nyi shu rtsa bzhi rim gyis ni/ /de ni so sor 'byung ba las/ /nyi khri chig stong drug brgya'o/ /de 'dir gsang ba dgongs pa yis/ /phra mo rnal 'byor bstan pa yin/ /klog dang bsam gtan med mod kyi/ /'on kyang bzlas pa yin par bshad/ /ces gsungs te/ de ni sngags kyi de kho na nyid yin par bshad do//rdo rje slob mas gsol pa/ nang gi bdag nyid can gyi ngag gi yi ge la 'jug par bya ba la ni som nyi ma mchis na/ gzhan yang / thung ngu ma lus tshig tu 'gyur/ /zhes gsungs pa/ bcom ldan 'das de ji ltar na thung ngu zhes bya ba yi ge a tshig ma lus pa la rab tu 'jug pa'i rgyur 'gyur/rdo rje slob dpon gyis smras pa/ sems dpa' chen po legs so legs so/ /'di na gsung rab 'chad pa dag ni byA ka ra Na'i tshig sngon du byas nas sgra'i don 'ba' zhig gi rjes su 'brang gi /yang yi ges brjod pa gang du gang gi phyir ji ltar rab tu 'jug par shes pa ni ma yin no//yi ge'i don de kho na nyid ji lta ba nyid mi shes te/ sangs rgyas rnams kyi spyod yul yin pa'i phyir ro/ /bstan pa'i rim gyis de khong du chud par bya yis nyon cig /de la sgra ni A li kA li rnams kyi rang bzhin te/ A li ni a la sogs pa dbyangs kyi yi ge bcu drug go//kA li zhes bya ba ni yi ge ka la sogs pa yi ge sum cu rtsa gsum ste/ dbyangs kyi yi ge bcu drug dang ldan pa'i yi ge bzhi bcu rtsa dgu po ma lus shing lus pa med pa thams cad de dbyangs kyi yi ge dang / gsal byed dang / thig le dang /tsheg drag dang bcas pa dang skad kyi byings dang / rnam par 'byed pa'i tshig dang / mtshams sbyar ba dang / tshig rnam par sbyar ba dang / rtags gsum dang / brtag thabs gsum dang / bya ba dang de la phan pa'i rkyen la sogs pa nas bshad pa'i mthar thug pa ni byA ka ra Na zhes pa'i ming gi brdas yongs su bshad pas shes par 'gyur ro//de bas na de'i tshig dang ngag dang sdeb sbyor dang / 'grel pa dang / tshigs su bcad pa dang / rkyang pa dang rgyun chags la sogs pas chos kyi phung po brgyad khri bzhi stong gi mdo sde dang / rgyud dang / rtog pa dang / sde snod gsum dang / snyan dngags dang / gar gyi bstan bcos la sogs pa 'jig rten las 'das pa'i bstan bcos rnams yang dag par 'byung ste/ bstan bcos la brten nas dngos grub thams cad rdzogs par 'gyur te/ ji skad du bcom ldan 'das kyis lang kar gshegs pa'i mdo las kyang blo gros chen po 'di lta ste/skyes bu la la zhig mar me thogs nas phyogs 'di na nga'i nor 'di lta bu 'di yod do zhes nor lta ba de bzhin du blo gros chen po tshig tu rnam par rtog pa'i sgra'i mar mes byang chub sems dpa' sems dpa' chen po rnams tshig gi rnam par rtog pa dang bral ba so so rang gis rig pa'i don gyi yul la rjes su 'jug go zhes gsungs so//'on kyang tshig de rnams kyi tshig dang ngag la sogs par gtogs pa'i yi ge rnams kyi bye brag rnam par shes par 'gyur ba ni a zhes bya ba 'di yin te/ gang gi phyir a dang yang dag par ldan par ma gyur pa'i ka la sogs pa'i yi ge ni yod pa ma yin te/mtha' can yin pa'i phyir tshig tu mi 'gyur ro/ /ji skad du bcom ldan 'das kyis mtshan yang dag par brjod pa las/ a ni yig 'bru rnams kyi mchog /don chen yi ge dam pa yin/ /khong nas 'byung ba skye ba med//tshig tu brjod pa spangs pa ste/ /brjod pa kun gyi rgyu yi mchog /tshig kun rab tu gsal bar byed/ /ces gsungs te de bas na bcom ldan 'das kyis bsam gtan ma lus pa'i sgo'i sa bon gyi tshig a ni skye ba med pa'i phyir chos thams cad kyi sgo'o zhes gsungs pa dang /lhan cig skyes pa'i yi ge yin par yang gsungs te/ rdo rje dkyil 'khor rgyan zhes bya ba'i rgyud las/ a ni gsal bar bstan pa'i phyir/ /snying gi dbus na mi shigs pa/ /'bar zhing mar me dag dang mtshungs/ /mi 'gyur mchog tu phra ba ste/ /a ni gtso bo dam pa'o//zhes gsungs so/ /de ltar na de bzhin gshegs pa thams cad a'i rigs su gyur pa dang / a rgyur gyur pa dang / a las nges par 'byung ba ste/ brjod bzhin pa na 'gag pa'i ngo bo nyid ngag gi rnam par rtog pa'i mtshan nyid can yang dag pa ji lta ba nyid shes na sgra dang sgra ma yin pa la ltos pa med par sems can gyi bsam pa'i dbye bas gdul bya'i skye bo rnams la chos ston par mdzad pa yin no//de bas na bcom ldan 'das kyis lang kar gshegs pa'i mdo las/ blo gros chen po byang chub sems dpa' sems dpa' chen pos don la rton par bya'i yi ge la rton par mi bya'o//blo gros chen po yi ge'i phyir 'brang ba'i rigs kyi bu pho'am/ rigs kyi bu mo ni bdag kyang don dam pa las nyams par byed cing gzhan yang khong du chud par mi byed do/ /'di lta ste blo gros chen po la las gcig gis gcig la sor mo'i rtse mos ci zhig bstan na sor mo'i rtse mo nyid la lta zhing 'brang ba de bzhin du blo gros chen po byis pa so so'i skye bo'i sde rnams kyis byis pa'i rang bzhin can lta bu sgra ji bzhin gyi sor mo'i rtse mo la mngon par chags shing zhen to//mngon par zhen cing dus byed de sgra ji bzhin pa'i sor mo'i rtse mo lta bu'i don spangs nas don dam pa la tshol bar mi byed do//de bas na don 'dod pas de bsten par bya'o/ /de'i phyir na gang sgra ji bzhin pa'i phyin ci log la mngon par zhen pa de ni spang bar bya'o/ /don btsal bar bya'o zhes bya ba'i tshig la 'jug pa yang rnam pa bzhir bcom ldan 'das kyis mdo sde 'di nyid las gsungs te/blo gros chen po tshig gi rnam par rtog pa'i mtshan nyid rnam pa bzhi yod de/ 'di ltar mtshan nyid kyi tshig dang / rmi lam gyi tshig dang / gnas ngan len la mngon par zhen pa'i tshig dang / thog ma med pa'i dus kyi rnam par rtog pa'i tshig go/ / blo gros chen po de la mtshan nyid kyi tshig ni rang gi rnam par rtog pa'i gzugs la mtshan mar mngon par zhen pa las byung ngo / /blo gros chen po rmi lam gyi tshig ni sngon myong ba'i yul rjes su dran nas rtog pa'i yul med bzhin du 'byung ba'o/ /yang blo gros chen po gnas ngan len gyi rnam par rtog pa la mngon par zhen pa'i tshig ni sngon sgras byas pa'i las rjes su dran pa las 'byung ngo //blo gros chen po thog ma med pa'i dus nas rnam par rtog pa'i tshig ni thog ma med pa'i dus kyi spros pa la mngon par zhen pa'i gnas ngan len gyi rang gi sa bon las 'byung ste/ 'di ni blo gros chen po tshig gi rnam par rtog pa'i mtshan nyid rnam pa bzhi'o zhes gang brjod pa de'i phyir bshad pa'o//rigs pa 'dis na sgra rnams ni yi ge a las byung bas na mi 'gyur ba ste/ 'gyur ba ni 'jig pa'o/ /mi 'gyur ba ni mi 'jig pa ste/ mi bden pa'i ngo bo nyid kyi sgra'i sgo nas rab tu bstan pa de yang ma bcos pa'i thog ma dang tha ma med pa'i ngo bo nyid do//ji skad du tshul gcig par bstan pa'i mdo las/ chos 'di sgra skad dag gis lung bstan te/ /chos dang sgra dag 'dir ni snang mi 'gyur/ /chos nyid tshul gcig dngos la'ang 'jug byed pa/ /bzod mchog bla na med la reg par 'gyur/ /zhes gsungs pa dang /rnam par snang mdzad mngon par byang chub pa zhes bya ba spyod pa'i rgyud las/ gsang ba'i bdag po gzhan yang gsang sngags kyi mtshan nyid ni de bzhin gshegs pa thams cad kyis ma byas byed du ma bcug /rjes su yi rang ba ma yin no/ /de ci'i phyir zhe na/ 'di ni chos thams cad kyi chos nyid do//'di lta ste de bzhin gshegs pa rnams byung yang rung ma byung yang rung ste/ chos rnams kyi chos nyid de ni ye nas gnas pa ste/ de yang 'di ltar gsang sngags rnams kyi gsang sngags kyi chos nyid do/ /de la gsang ba'i bdag po 'dod pa'i khams kyi dbang phyug la myos par byed pa zhes bya ba'i rig sngags yod de/des 'dod pa na spyod pa'i lha'i bu thams cad myos pas brgyal bar byed cing / me tog mang po sna tshogs dang ldan pa'i sa phyogs nyams dga' ba sna tshogs kyang ston la/ yongs su spyad pa dang / nye bar spyad pa rnam pa tha dad pa sna tshogs pa rnams kyang mngon par sprul nas/gzhan 'phrul dbang byed kyi lha rnams la yang sbyin la/ bdag nyid kyang yongs su spyod do/ /'di lta ste lha'i bu dbang phyug chen po la yid mgyogs zhes bya ba'i gsang sngags yod de/ des stong gsum gyi stong chen po'i 'jig rten gyi khams su sems can gyi dgos pa byed cing nye bar spyod pa dang /yongs su spyad pa thams cad kyang mngon par sprul nas gnas gtsang ma'i ris kyi lha'i bu rnams la yang sbyin la/ bdag nyid kyang kun du spyod do/ /'di lta ste dper na mig 'phrul mkhan gyis gsang sngags kyis kun dga'i ra ba dang / mtsho dang 'bab chu dang /mi la sogs pa rnam pa tha dad pa sna tshogs ston to/ /'di lta ste dper na lha ma yin rnams ni gsang sngags kyis sgyu ma rnams ston to/ /'di lta ste dper na gsang sngags dag gis ni dug dang rims la sogs pa med par 'gyur ro/ /'di lta ste ma mo zhes bya ba'i lha mo rnams ni gsang sngags kyis nad 'go ba gtong ngo //'di lta ste dper na gsang sngags kyis me'i tsha ba med par byas nas grang bar byed par 'gyur ro/ /rigs kyi bu dag dpe'i tshig 'di rnams kyis gsang sngags kyi mthu la mngon par dad par bya'o/ /gsang sngags kyi mthu de yang gsang sngags rnams las byung ba ma yin/rdzas las 'jug pa yang ma yin/ sbyor ba po las dmigs pa yang ma yin mod kyi/ rigs kyi bu dag 'on kyang gsang sngags kyi byin gyi rlabs kyis chos nyid 'byung ba las 'da' bar mi 'gyur te/ dus gsum las 'das pa'i phyir dang / rten cing 'brel par 'byung ba zab mo bsam gyis mi khyab pa las mngon par grub pa'i phyir ro//rigs kyi bu dag de lta bas na chos bsam gyis mi khyab pa'i ngo bo nyid rtogs pa khong du chud pas rtag tu rgyun mi 'chad par gsang sngags kyi tshul gyi rjes su 'jug par bya'o zhes gsungs so/ / de ltar phyi dang nang gi sngags dang /nor bu dang sman rnams kyi bsam gyis mi khyab pa'i mthu rtogs pa dag bstan nas/ da ni rdzogs pa dang ma rdzogs pa'i sems can rnams kyi khams rnams kyi ngag rnam par dag pa ji lta ba nyid bstan par bya ba'i phyir bshad pa/ mi'am ci'i rgyal pos zhus pa'i mdo las gsungs pa/mi'am ci'i bdag po sems can thams cad kyi sgra skad gang las byung smras pa/ rigs kyi bu sems can thams cad kyi sgra skad ni nam mkha' las byung ngo / /smras pa/ mi'am ci'i bdag po sems can thams cad kyi sgra skad khong pa'i nang nas mi 'byung ngam/ smras pa/ rigs kyi bu ji snyam du sems/sems can thams cad kyi sgra skad lus kyi nang khong nas 'byung ngam/ 'on te sems las 'byung / smras pa/ mi'am ci'i bdag po lus las kyang ma yin/ sems las kyang ma yin no/ /ci'i phyir zhe na/ lus ni bems po g.yo ba med pa byed pa med pa / rtswa dang bong ba dang / rtsig pa dang / shing dang / mig yor lta bu'o/ /sems ni gzugs med pa/ bstan du med pa/ thogs pa med pa/ rnam par rig pa med pa ste sgyu ma lta bu'o/ /smras pa/ rigs kyi bu lus dang sems ma gtogs par gzhan gang nas sgra 'byung bar 'gyur / smras pa/mi'am ci'i bdag po sems can rnams kyi sgra ni nam mkha' las 'byung bar rtogs so/ /smras pa/ gal te nam mkha' med na sgra gang las 'byung / smras pa/ mi'am ci'i bdag po nam mkha' ma gtogs par gzhan gang nas sgra 'byung bar 'gyur/ smras pa/ rigs kyi bu de'i phyir rnam grangs 'dis sgra'i tha snyad gang ji snyed 'byung ba de dag thams cad ni nam mkha' las 'byung bar rig par bya'o//nam mkha'i ngo bo nyid ni sgra ste/ rnam par rig ma thag tu 'gag go/ /'gags nas nam mkha'i ngo bo nyid du yang dag par gnas so/ /de'i phyir chos thams cad ni nam mkha' dang mnyam zhes bya ste/rnam par rig pa med pa de rnam par shes par bya ba ma yin mod kyi sgra dang sgra'i brdas brjod do/ /brjod pa de yang tha snyad do/ /gang sgras brjod pa 'di 'dra bar rab tu shes pa de ni chos gang la yang mngon par mi chags so/ /gang mngon par mi chags pa de rnam par mi 'phro/gang rnam par mi 'phro ba de mi 'khor ro/ /gang mi 'khor ba de ni mi phyed pa'o/ /gang mi phyed pa de ni mi skye ba'o/ /gang mi skye ba de ni mi 'jig par 'dod do/ /gang mi 'jig pa de dang ba'o/ /gang dang ba de dag pa'o/ /gang dag pa de dri ma med pa'o//gang dri ma med pa de 'od gsal ba'o/ /gang 'od gsal ba de sems kyi rang bzhin no/ /sems kyi rang bzhin gang yin pa de 'jug pa'o/ /gang 'jug pa de mtshan ma thams cad gnon pa'o/ /gang mtshan ma thams cad gnon pa de skyon med pa la 'jug pa zhes bya'o/ /byang chub sems dpa'i skyon med pa la 'jug pa gang yin pa de ni mi skye ba'i chos la bzod pa thob pa ste/des na skyon med pa la zhugs pa'i byang chub sems dpa' ni mi skye ba'i chos la bzod pa thob pa zhes bya'o/ /gang bzod pa thob pa des thams cad bzod do/ /des stong par yang bzod/ /gang zag tu yang bzod do//de ci'i phyir zhe na/ gang zag las stong pa gzhan ma yin te/ gang zag nyid stong pa'o/ /de mtshan mar yang bzod do/ /mtshan ma med par bzod do/ /de ci'i phyir zhe na/ mtshan ma'i ngo bo nyid mtshan ma med pa'o/ /de smon par yang bzod/ smon pa med par yang bzod do//de ci'i phyir zhe na/ smon lam gyi ngo bo nyid kyi mtshan nyid ni smon pa med pa'o/ /de sems can thams cad rang bzhin gyis yongs su mya ngan las 'da' bar yang bzod/ de sems can rnams 'chi 'pho dang skye bar yang bzod do/ /de ci'i phyir zhe na/ 'chi 'pho dang skye ba ni sgyu ma'i ngo bo nyid do//rigs kyi bu de ltar mi skye ba'i chos la bzod pa thob pa'i byang chub sems dpa' ni 'gal ba med pa ste/ chos thams cad dang 'gal ba med pa yin no/ /de ltar gsung gi rdo rje'i ting nge 'dzin la gnas pa'i rnal 'byor pa chen pos rdzogs pa dang ma rdzogs pa'i sems can gyi khams rnams kyi nyes pa dang yon tan brjod pa'i tshig thos nas rjes su chags par mi bya/yang dag par dga' bar mi bya/ skrag par mi bya/ kun du skrag par mi bya/ smod par mi bya'o/ /'jig rten dang 'jig rten las 'das pa'i bstan bcos rgyun chags dang rkyang pa la sogs pa'i sgra rnam par dgod pa'i khyad par thos nas zhen par mi bya/smad par mi bya/ rmongs par mi bya ste/ sems can thams cad kyi 'gro ba rtogs par 'gyur ba'i phyir dang / sgra'i de kho na nyid yin pa'i phyir/ ji skad du/ bcom ldan 'das kyis chos thams cad rab tu 'jug pa bstan par bya ba'i mdo las/lha'i bu sgra grag pa la 'jug pas zhugs pa'i byang chub sems dpa' rnams ni gal te gang+gA'i klung gi bye ma snyed kyi bskal par mi bden zhing bsnyen bkur ma yin pa'i tshig smras par gyur cing / yongs su brjod par gyur kyang de de la khong khro bar mi 'gyur ro/ / gal te gang+gA'i klung gi bye ma snyed du bsnyen bkur byed/ bla mar byed cing / bde ba'i yo byad thams cad dang chos gos dang / bsod snyoms dang / mal stan dang / na ba'i gsos sman dang / yo byad rnams kyis mchod cing rjed kyang de la rjes su chags pa'i sems skye bar mi 'gyur ro zhes gsungs so//de bzhin du gsung gi rdo rje'i ting nge 'dzin la gnas pa'i sngags pa sa brgyad pa'i dbang phyug ni rnyed pa dang / ma rnyed pa dang / grags pa dang / ma grags pa dang / bstod pa dang / smad pa dang / bde ba dang sdug bsngal ba thams cad kyis 'ching bar mi 'gyur ro/ /yang dag par dga' bar mi 'gyur ro//de bas na 'jig rten pa'i chos thams cad zil gyis mnan nas bskyed pa'i rim pa'i ting nge 'dzin las 'das pa sems rnam par dben pa tshol bar 'dod pas dge ba'i bshes gnyen la bsnyen bkur bya'o/ /ngag rnam par dben pa bsdus pa'i the tshom gcod pa ste le'u gsum pa'o// //rdo rje slob mas gsol pa/ slob dpon gyi zhal snga nas kyi bka' drin gyis rlung gi de kho na nyid kyi rim pas sngags kyi de kho na nyid dang / ngag rnam par dben pa la yang som nyi ma mchis te/ da ni sems rnam par dben pa la slob par 'tshal na ji ltar bslab par bgyi/zab mo la lhag par mos pa rnams la phan par bya ba'i phyir bcom ldan 'das rdo rje slob dpon ston pas bshad du gsol/ rdo rje slob dpon gyis smras pa/ sems can chen po legs so legs so/ /de bzhin gshegs pa thams cad kyi man ngag yang dag par 'gro ba las kha phyir bltas pa rnams kyi spyod yul ma yin pa/shin tu zab pa/ mchog tu gzung bar dka' ba/ sangs rgyas rnams kyi spyod yul yongs su dris pa'i sems gang yin pa de'i ngo bo nyid ni rtsa ba med pa/ gnas med pa/ gzhi med pa/ mtshan ma med pa /dbyibs dang kha dog med pa/ dbang po las 'das pa/ rtog ge rnams kyi yul ma yin pa'o zhes bcom ldan 'das kyis rgyud thams cad las bstan pa'i tshig la gsungs pa'o/ /de lta bas na rdo rje theg pa la gnas nas sangs rgyas nyid thob par 'dod pas dge ba'i bshes gnyen mnyes par byas nas rang gi sems kyi ngo bo nyid btsal bar bya'o//ji skad du bcom ldan 'das kyis de kho na nyid bsdus pa'i rgyud las/ rigs kyi bu mnyam par gzhag pas rang gi sems so sor rtogs shig ces gsungs pa dang / dpal rnam par snang mdzad mngon par byang chub pa'i rgyud las kyang byang chub ni rang gi sems yang dag pa ji lta ba bzhin du yongs su shes pa'o zhes gsungs pa dang /sde snod gsum gyi tshul las kyang / /gcig pu 'gro zhing ring du rgyu/ /lus med dbang po'i phug na gnas/ /gdul bar dka' ba'i sems 'dul byed//de ni bram zer ngas bshad do/ /bdud kyi bcing ba las grol 'gyur/ /zhes gsungs so/ /de bas na sgyu ma lta bu'i ting nge 'dzin mngon sum du byed par 'dod pas g.yeng ba dang sgrib pa thams cad spangs te/ de bzhin gshegs pa thams cad kyi man ngag yang dag par thob pa'i rdo rje slob dpon mnyes par byas la dpal ye shes rdo rje kun las btus pa zhes bya ba la sogs pa bshad pa'i rgyud kyi rjes su 'brangs nas rnam par shes pa gsum gyi rang bzhin snang ba rtogs par bya'o//ji skad du lang kar gshegs pa'i mdo las kyang / yang blo gros chen po gzhan yang byang chub sems dpa' sems dpa' chen pos rang gi sems kyi snang ba'i gzung ba dang 'dzin pa'i rnam par rtog pa'i spyod yul yongs su shes par 'dod pas 'du ba dang /'du 'dzi dang / gnyid dang / sgrib pa med par bya'o/ /de la rnam par shes pa gsum ni dngos po thams cad kyi rgyur gyur pa yin te/'di lta ste/ mtho ris dang / ngan 'gro dang / rgyu ba dang / mi rgyu ba dang / gzung ba dang / 'dzin pa dang / rten cing 'brel par 'byung ba yan lag bcu gnyis kyi 'khor lo dang / dge ba dang / mi dge ba dang / rnam par rtog pa dang / snang ba dang / mun pa pa dang /skyes pa dang / bud med dang / ma ning la sogs pa'i bdag nyid can dang / skye ba dang / gnas pa dang / 'jig pa ste/ mdor na khams gsum po'i dbang po'i spyod yul rnams ni rnam par shes pa gsum yin no zhes gsungs pa dang / ji skad du bcom ldan 'das la bzang skyong gis zhus pa'i mdo las kyang /bcom ldan 'das kyis bka' stsal pa/ bzang skyong 'khrul 'khor de ni las kyi dbang gis 'jug ste/ las de yang gzugs can ma yin zhing rnam par shes pa las mngon par grub pa'o/ /de bzhin du lus kyi 'khrul 'khor 'di yang rnam par shes pa'i dbang gis 'byung ste/rnam par shes pa'i khams 'di ni lus sna tshogs la 'jug pa yin no/ /rnam par shes pa'i khams 'di ni lus skyed par byed pa'i phyir byed pa po yang yin no/ /rnam par shes pa'i khams 'di ni chos kyi dbyings la brten pa'i phyir mi zad pa yang yin no/ / rnam par shes pa'i khams 'di ni sngon gyi lus kyi gnas rjes su dran pa'i phyir blo gros phun sum tshogs pa yang yin no/ /rnam par shes pa'i khams 'di ni nyi ma'i 'od zer dang 'dra bar blta bar bya ste/ dper na nyi ma'i 'od zer ni dri nga ba dag dang mi gtsang ba dag dang / ro dag la yang 'bab pa ste/'on kyang dri des gos par yang mi 'gyur la/ nyi ma yang dri nga ba bor te yang mi 'gro'o/ /de bzhin du rnam par shes pa'i khams 'di yang phyi sa dang / snyag snyig za ba'i khyi dang phag gi skye ba dag tu yang skye ba yongs su 'dzin te/ 'on kyang rnam par shes pa'i khams la spyod pa ngan pa de dag gis gos pa med do//de nas sman chen gyis bcom ldan 'das kyi zhabs la gtugs nas/ bcom ldan 'das la 'di skad ces gsol to/ /rnam par shes pa lus las 'pho ba de'i rang bzhin ji lta bu zhig lags/ bcom ldan 'das kyis bka' stsal pa/sman chen da ltar khyod kyis nga la ji skad du bskul ba de ni de bzhin te/ legs so legs so/ /dri ba de ni mchog tu zab po/ /dri ba 'di ni de bzhin gshegs pas bstan par bya ba yin te/ rnam par shes pa de ston pa ni de bzhin gshegs pa ma gtogs pa gzhan med do/ /de nas bcom ldan 'das la bzang skyong gis 'di skad ces gsol to//bcom ldan 'das rgyal po'i bu gzhon nu sman chen ni zab mo'i don zhu ba la mkhas lags te/ blo zhib cing mdzangs la mkhas pa lags so/ /bcom ldan 'das kyis bka' stsal pa/ bzang skyong de de bzhin te/ rgyal po'i bu gzhon nu sman chen 'di ni bcom ldan 'das rnam par gzigs la dge ba'i rtsa ba bskyed pa yin no/ /bzang skyong rgyal po'i bu gzhon nu sman chen 'di ni tshe rabs lnga brgya'i bar du gzhan mu stegs can du gyur nas de 'di snyam du sems te/ rnam par shes pa'i khams 'di ci yin/ rnam par shes pa'i khams 'di gang yin/rnam par shes pa'i khams 'di ji lta bu zhig snyam mo/ /bzang skyong 'on kyang rnam par shes pa'i 'gro ba dang 'ong ba khong du ma chud de ngas 'di'i the tshom bsal bar bya'o/ /gzhan yang rnam par shes pa zhes bya ba'i don ci zhe na/ sa bon gyis lus kyi myu gu mngon par grub par byed la/sems pas shes pa dran pa thob par 'gyur te/ de bas na sa bon dang shes pa la rnam par shes pa zhes bya'o/ /dper na rgya shug dang / 'bra go dang / a mra dang / nyo ting dang / se'u dang / bil ba dang / ka pit+ta la sogs pa'i 'bras bu rnams ni ro du mar 'grub ste/tsha ba dang / kha ba dang / skyur ba dang / mngar ba dang / lan tshwa'i ro dang / bska ba la sogs pa'i ro re rer rnam par smin par 'gyur te/ la la ni ro tsha bar 'gyur/ la la ni skyur/ la la ni mngar ro/ /'bras bu de dag med par gyur pa'i sa bon gang dang gang du 'pho bar gyur pa de dang der ro yang 'pho bar 'gyur ro//de bzhin du rnam par shes pa'i khams 'di gang dang gang du 'pho ba de dang der tshor ba yang 'pho bar 'gyur ro/ /bsod nams dang bsod nams ma yin pa dang dran pa yang 'pho bar 'gyur ro/ /gzhan yang rnam par shes pa'i khams 'dis ni lus yongs su btang nas bdag gi lus 'di yongs su gtong ngo snyam du rab tu shes te/de bas na 'di la rnam par shes pa'i khams zhes bya'o/ /dge ba'i las kyang rab tu shes so/ /mi dge ba'i las kyang rab tu shes so/ /las 'di dag ni bdag gi phyi bzhin 'brang ngo / / bdag kyang 'di dag gi phyi bzhin 'brang ngo snyam du de ltar rab tu shes te de bas na rnam par shes pa zhes bya'o/ /gzhan yang lus 'di'i bya ba thams cad rab tu shes te de bas na rnam par shes pa zhes bya'o/ /lus 'di la rnam par shes pa gang na yang mi gnas te/ rnam par shes pa med na yang lus skye bar mi 'gyur ro//bzang skyong de'i phyir nyon cig /bden pa ma mthong bas ni rnam par shes pa 'di mi shes so zhes gsungs te/ de ltar na rnam par shes pa ni kha dog med pa/ mtshan ma med pa/ dbyibs med pa'i bdag nyid can rang rig pa'i ye shes tsam du theg pa chen po'i mdo sde las bstan to//gzhan yang rdo rje'i theg pa gsang ba 'dus pa la sogs pa rnal 'byor chen po'i rgyud la ma zhugs par gang+gA'i klung gi bye ma dang mnyam pa snyed kyi bskal pa thams cad kyis kyang rang gi sems kyi yang dag pa ji lta ba nyid shes par bya bar mi nus shing kun rdzob kyi bden pa mthong bar mi 'gyur ro zhes so//de bas na dpal ye shes rdo rje kun las btus pa zhes bya ba rnal 'byor chen po'i rgyud kyi rjes su 'brangs nas/ bla ma'i zhal snga nas kyi bka' drin las rnam par shes pa gsum gyi yang dag pa ji lta bar shes par bya'o/ /rgyud de las rdo rje lta bu'i tshig bshad pa cung zad gcig la 'jug par bya ste/de nas byang chub sems dpa' sems dpa' chen pos bcom ldan 'das kyi zhabs la phyag 'tshal te/ bcom ldan 'das kyi zhabs gnyis la btud nas slar yang zhus pa/ e ma'o ston pa rnam par shes pa gsum ni rtogs par dka' zhing mchog tu rtogs par dka' ste/rnam par shes pa gsum gyi dbye ba bcom ldan 'das kyis bshad du gsol/ bde bar gshegs pa bshad du gsol/ bcom ldan 'das kyis bka' stsal pa/ rnam par shes pa ni 'od gsal ba las byung ba'o//de nyid ni sems dang yid ces bya ste/ kun nas nyon mongs pa dang rnam par byang ba'i bdag nyid can gyi chos thams cad ni de'i rtsa ba can yin no/ /de las bdag dang gzhan du rtog pa rnam pa gnyis 'byung bar 'gyur ro/ /rnam par shes pa de rlung la zhon te byung / rlung las ni me'o//me las ni chu'o/ /chu las ni sa'o/ /de rnams las ni phung po lnga dang / skye mched drug dang / dbang po lnga rnams te/ de dag thams cad ni rlung dang rnam par shes pa yang dag par 'dre'o/ /de nas rnam par shes pa gsum gyi rang bzhin snang ba la rab tu spyod pa yongs su gsal bar nyams su myong bar 'gyur zhing snang ba'i rgyus rang bzhin rnams 'byung bar 'gyur ro//mdor bstan pa'i tshig de rnams kyis rgyas par bshad pa'i bsdus pa bstan par bya ste/ de la dang po kho nar rnam par shes pa gsum gyi rnam grangs dag bshad par bya'o/ /de yang bcom ldan 'das kyis shes rab dang thabs zhes bya ba'i ming gsal ba'i dgongs pas bshad pa 'dis ma ning gi tshig ni nye bar mtshon pa yin la/nye bar thob pa'i ye shes ni gsal ba ma yin no/ /de bas na sems dang yid dang rnam par shes pa zhes bya ba dang / kun brtags pa dang /gzhan dbang dang / yongs su grub pa dang / 'dod chags dang / zhe sdang dang / gti mug ces bya ba dang / ngo bo nyid gsum zhes bya ba la sogs pa'i rnam grangs theg pa chen po dang thun mong du gyur pa'o/ /rdo rje theg pa 'dir rnam grangs gsungs pa/ snang ba dang / snang ba mched pa dang / snang ba thob pa dang / stong pa dang / shin tu stong pa dang / stong pa chen po dang / sems dang sems las byung ba dang / ma rig pa dang / 'dod chags dang / 'dod chags dang bral ba dang / 'dod chags bar ma zhes bya'o/ /de ltar sems kyi rnam grangs bstan nas/da ni so so rang rig pa'i ngo bo nyid kyi rang gi mtshan nyid dag gi sgo la brten nas bstan par bya ste/ bcom ldan 'das kyis sems ni dbyibs dang kha dog dang bral ba nam mkha'i mtshan nyid can no zhes gsungs pa dang / yang bcom ldan 'das kyis snang ba'i mtshan nyid can dang /rjes su myong ba'i mtshan nyid du so sor rtogs par bya'o zhes lung las bstan to/ /de bas na de'i man ngag la 'jug par bya ste/ 'di lta ste/ dang po kun du snang ba dang / phyi nas rang bzhin no/ /de la snang ba dang / snang ba mched pa dang / snang ba thob pa zhes bya ba ste snang ba gsum mo//de la snang ba'i mtshan nyid gang zhe na/ rnam pa med pa'i rang bzhin lus dang ngag med pa ste/ ji ltar ston gyi dus su nam mkha' dri ma med pa la zla ba'i dkyil 'khor gyi 'od zer snang bar byed pas khyab par byed pa bzhin du rang bzhin gyis gsal ba'i rnam par dngos po ma lus pa thams cad la dmigs pas na snang ba ste/'di ni don dam pa'i byang chub kyi sems shes rab kyi snang ba stong pa dang po ste/ aM zhes bya ba ngag gi sgo la brten pa'i sa bon brtan par byed pa'i rgyu ste/ mos pa chung ba'i sems can rnams kyis de bzhin gshegs pas dgongs te gsungs pa rtogs par mi 'gyur bas de zla ba'i dkyil 'khor gyi gzugs so zhes dmigs par byed cing pad+ma'am/bud med kyi gzugs sam/ g.yon pa'i ming ngam/ mtshan mo'i ming dang / 'jam pa'i dngos por sems kyi kun rdzob kyi gzugs gsal ba'o/ / snang ba mched pa'i mtshan nyid gang zhe na/ de yang gzung ba dang 'dzin pa dang bral ba'i rnam pa med pa'i rang bzhin can lus dang ngag med pa ste/ ji ltar ston ka'i dus su nyi ma'i 'od zer gyis khyab pa bzhin du shin tu gsal zhing dri ma med pa'i ngo bo nyid du dngos po ma lus par dmigs pa byang chub kyi sems kun du bzang po gnyis pa ste/rim pa gnyis pa shin tu stong pa'i mtshan nyid can AH zhes bya ba ngag gi sgo la brten pa'i sa bon brtan par byed pa'i rgyu ste/ mos pa chung ba'i sems can rnams kyis de bzhin gshegs pas dgongs te gsungs pa rtogs par mi 'gyur bas nyi ma'i dkyil 'khor la brten nas dmigs par byed cing rdo rje rtse lnga pa'am/rin po che'am/ nyin mo'am/ skyes pa'i gzugs sam/ g.yas pa zhes bya ba'am/ rtsub pa'i rnam pa ni sems las byung ba'i kun rdzob kyi gzugs so/ /snang ba thob pa gang zhe na/ de bzhin du nam mkha'i mtshan nyid dngos po med pa'i gzugs can lus dang ngag med pa ste/ji ltar mtshams kyi smag la bab pa'i ngo bor khyab pa phra zhing bdag med pa srog dang rtsol ba mi rgyu bas rgyu ba med pa ste/ sems med pa mi g.yo ba ngag gi sa bon la brten pa'i sgo yongs su grub pa zhes bya ba 'di ni snang ba thob pa ma rig pa'i mtshan nyid can stong pa chen po ste rnam par shes pa gsum du bshad do//de ltar sangs rgyas thams cad kyi man ngag stong pa gsum gyi mtshan nyid bstan nas/ da ni ye shes re re 'byung ba la rang bzhin 'byung bar rnam par gzhag par bya ste/ de la shes rab kyi ye shes kyi rang bzhin ni 'dod chags dang bral ba dang /'dod chags dang bral ba bar ma dang / shin tu 'dod chags dang bral ba dang gang yid kyis 'gro ba dang 'ong ba dag dang mya ngan dang mya ngan bar ma dang / shin tu mya ngan du gyur pa dang / zhi ba dang / rnam par rtog pa dang / 'jigs pa dang / 'jigs pa bar ma dang /shin tu 'jigs pa dang / sred pa dang / sred pa bar ma dang / shin tu sred pa dang / nye bar len pa dang / mi dge ba dang / bkres pa dang / skom pa dang / tshor ba dang / tshor ba bar ma dang / shin tu tshor ba dang / rig pa po dang / rig pa dang / 'dzin pa'i gzhi dang /so sor rtog pa dang / ngo tsha shes pa dang / snying rje dang / brtse ba dang / brtse ba bar ma dang / shin tu brtse ba dang / dogs pa dang bcas pa dang / sdud pa dang / phrag dog ste/ mtshan nyid sum cu rtsa gsum mo/ /thabs kyi ye shes kyi rang bzhin ni chags pa dang / kun du chags pa dang / dga' ba dang / dga' ba bar ma dang / shin tu dga' ba dang / rangs pa dang / rab tu mgu ba dang / ngo mtshar ba dang / dgod pa dang / tshim pa dang / 'khyud pa dang / 'o byed pa dang / 'jib pa dang / brtan pa dang / brtson pa dang / khengs pa dang / bya ba dang /dbrog pa dang / stobs dang / spro ba dang / dka' ba la sbyor ba dang / dka' ba la sbyor ba bar ma dang / shin tu dka' ba la sbyor ba dang / drag pa dang / rnam par sgeg pa dang / 'gras pa dang / dge ba dang / tshig gsal ba dang / bden pa dang / mi bden pa dang / nges pa dang /nye bar mi len pa dang / sbyin pa po dang / bskul pa dang / dpa' ba dang / ngo tsha med pa dang / sgyu zin pa dang / gdug pa dang / mi srun pa dang / gya gyu che ba ste/ mtshan nyid bzhi bcu tham pa'o/ /snang ba thob pa'i ye shes kyi rang bzhin ni 'di lta ste/ chags pa bar ma dang /brjed ngas pa dang / 'khrul pa dang / mi smra ba dang / skyo ba dang / le lo dang / the tshom dang bcas pa ste/ 'di'i rang bzhin gyi mtshan nyid ni bdun po 'di dag go/ /rang bzhin rnam pa brgyad cu po de dag gi mtshan nyid ni mngon sum du phye bar gyur na brgya drug cu ste/ nyin dang mtshan du sgo nga las skyes pa la sogs pa rnams kyang nyin dang mtshan du spyod de pho dang mo'i skye gnas kyi dbye bas phye ba'i phyir ni ma yin no//rdo rje slob mas gsol pa/ rang bzhin rnam pa brgyad cu'i sems nyid dang mtshan du rab tu rgyu ba bdag dang gzhan rnams kyi so so rang rig pa yin pa ni som nyi ma mchis na 'on kyang lung gis yid ches par bgyi ba bcom ldan 'das rdo rje slob dpon ston pas bshad du gsol/rdo rje slob dpon gyis smras pa/ sngags kyi sgra'i nges pa'i tshig bcom ldan 'das kyis gsang ba 'dus pa'i rgyud phyi ma las gsungs te/ rkyen las byung ba gang dang gang //dbang po dang ni yul gyis yid/ /yid de man zhes bya bar bshad/ /tra ni gsal bar byed pa'i don/ /zhes bya'o/ /rang bzhin rnam pa brgyad cu las/ nyon mongs pa dgu bcu rtsa brgyad 'byung ba dang / yang lta ba drug cu rtsa gnyis la sogs pa 'byung bar 'gyur ro//rdo rje slob mas gsol pa/ shes rab dang stong pa'i ye shes ni zla ba lta bu snang ba stong pa nyid tsam mo/ /thabs kyi ye shes kyang nyi ma'i snang ba lta bu shin tu stong pa nyid tsam mo/ /de bzhin du snang ba nye bar thob pa'i ye shes ni mun nag lta bu ste/ stong pa chen po'i mtshan nyid yin la/ rnam par shes pa gsum po de dag ni nam mkha'i mtshan nyid can rnam pa med pa'i ngo bor khyab pa 'gro ba dang 'ong ba dang bral ba'o zhes bshad na/ ji ltar na nyin dang mtshan du lus las spro zhing sdud par byed/ gang zhig 'dir mel tshe byed/ su zhig ni sems pa med par byed/'dod chags dang / 'dod chags dang bral ba dang / 'dod chags bar ma la sogs pa rang bzhin brgya drug cu gang las nyams su myong bar 'gyur ba'i rgyu 'dir bcom ldan 'das rdo rje slob dpon ston pas bshad du gsol/ rdo rje slob dpon gyis smras pa/ rnam par shes pa gsum ni rtsa ba med pa/ gnas pa med pa/ gzhi med pa/ mtshan nyid med pa/ kha dog dang dbyibs med pa/ dbang po las 'das pa yin par ni bden te/ de lta mod kyi snang ba dang bcas pa yin la des na rlung gi khams dang lhan cig mel tshe byed de gang gi phyir rlung gi khams ni gzugs med kyang g.yo zhing bskyod pa la sogs pa'i bya ba ston pas rjes su dpag pa las shes par bya'o//de bzhin du rnam par shes pa snang ba yang gzugs med pa la 'dod chags dang / 'dod chags dang bral ba dang / 'dod chags bar ma la sogs pa'i rang bzhin rnams las rjes su dpag par bya ba yin pas na rjes su dpag par bya ba'o//ji skad du rnam par shes pa 'pho ba'i mdo las/ bzang skyong dper na rlung gi khams gzugs can ma yin yang bstan du yod cing gzung du med pa las gzugs su snang ngo / /de la bstan du yod pa ni shing 'gul zhing g.yo ba dang sgra skad 'ur 'ur po'i sgra skad 'byin pa dang /grang ba dang dro ba'i reg pas tshor ba skyed pa yin yang de la rkang lag dang mig dang gdong dmigs par mi 'gyur te/ sngo bsangs dang dkar ba zhes kha dog lhag par mi dmigs so/ /bzang skyong de bzhin du rnam par shes pa'i khams 'di yang gzugs su mi dmigs shing gzugs su snang bar mi 'gyur te/khyod kyi rgyu'i bye brag dag gis rnam par shes pa'i khams rtogs par bya'o zhes gsungs pas so/ /gtan tshigs des na khams phra ba dang / rnam par shes pa snang ba dag ni gzugs med pas mar gyi nang du mar bcug pa dang 'dra bar 'dres par gyur nas 'jig rten las 'das pa'i bya ba thams cad rdzogs par bya'o// ji skad du dgongs pa bla na med pa las/ rang rig tsam gyi ye shes ni/ /nam mkha' 'dra bar mtshan nyid med//'on kyang de la dbye yod de/ /bar mtshams nyin dang mtshan mo'i bdag /snang ba dang ni snang ba mched/ /de bzhin snang ba thob pa can/ /sems ni rnam pa gsum du bshad/ /de yi gzhi ni bshad par bya/ /phra ba'i gzugs can rlung dang ni/ /ye shes dag ni 'dres gyur pa//dbang po'i lam nas byung nas ni/ /yul rnams la ni dmigs par 'gyur/ /gang tshe snang ba ldan gyur pa/ /rlung gi bzhon par gyur pa yin/ /de tshe rang bzhin de thams cad/ /ma lus lus pa med par 'byung / /rlung ni gang dang gar gnas pa/ /rang bzhin de dang der rjes spyod//ces gsungs pa dang / don 'di nyid gsal bar bya ba'i phyir ye shes skad cig mar yang dag pa 'byung ba nam mkha' snang byed lta bu phyogs bcu khyab par rab tu 'bar ba'o zhes dgongs pas bshad pa gsungs pas so/ /ji ltar na ye shes skad cig mar 'byung ba yin zhe na/skad cig dang thang cig dang / yud tsam dang / mig btsums dang / thal mo brdabs pa tsam du snang ba 'byung ba zhes bya ba'i don to/ /nam mkha' snang byed lta bu zhes bya ba ni nam mkha' ni gsal bar byed pas nam mkha' gsal bar byed pa ste/don de dang 'dra ba'i don gyis phyogs bcu khyab cing rab tu 'bar ba'i snang ba gsum du snang ste/ mkha' snang zhes bya ba ni srin bu me khyer ni ma yin no/ /de bas na khams phra ba la 'jug pa las skad cig dang / thang cig dang / yud tsam dang / mig btsums dang / thal mo brdabs par snang ba g.yo ba'o//de nas skad cig dang / thang cig dang / yud tsam dang / mig btsums dang / thal mo brdabs pa las rang bzhin rnams rjes su myong bar 'gyur ro/ /sems pa med pa gang yin zhe na/ ma rig pa ste/ de bas na ma lus par 'byung bar 'gyur ro//de nas rlung gi khams kyi rgyus rang bzhin rnams phan tshun gcig la gcig yul gyi longs spyod ma lus shing lus pa med pa rnams nyin dang mtshan du rang dang gzhan gyi rgyud la rjes su myong bar 'gyur ro/ /de ltar na rang bzhin gyi snang ba rlung gi bzhon pa dang bcas pa'i dbye ba rtogs par gyur pa'i rnal 'byor pas 'das pa dang /ma 'ongs pa dang / da ltar byung ba'i sems can thams cad kyi sems kyi spyod pa rnam par g.yo ba shes par 'gyur te/ bcom ldan 'das kyis ji skad du mi'am ci'i rgyal po ljon pas zhus pa'i mdo las/ yang dag par rdzogs pa'i sangs rgyas ni thogs pa med pa'i ye shes mthong ba dang ldan no/ /de ci'i phyir zhe na/ rigs kyi bu gang sems can thams cad kyi 'das pa'i sems kyi rgyud zad pa dang / 'gags pa dang / bral ba dang / rnam par 'gyur ba thams cad ni de bzhin gshegs pas rab tu mkhyen te /rgyu gang dag las sems kyi rgyud de dag 'byung ba dang / rgyu gang dag med pas zad cing bral bar bstan pa dge ba'am/ mi dge ba'am/ lung du bstan pa'am/ lung du ma bstan pa de dag thams cad rnam pa dang bcas/ gzhi dang bcas/ gtan tshigs dang bcas par de bzhin gshegs pas rab tu shes so//da ltar byung ba'i dus kyi sems can thams cad kyi sems kyi rgyud du 'byung ba dge ba'am/ mi dge ba'am/ lung du bstan pa'am/ lung du ma bstan pa yang rung ste/ sems gang gi 'og tu sems gang 'byung ba de dag thams cad kyang rnam pa dang bcas/yul phyogs dang bcas/ gzhi ci las gyur pa dang bcas par de bzhin gshegs pas rab tu shes so/ /gang ma 'ongs pa'i sems can thams cad kyi sems kyi rgyud dang / sems las byung ba'i chos dge ba'am/ mi dge ba'am/ lung du bstan pa'am/ lung du ma bstan pa yang rung ste/sems gang gi 'og tu sems gang 'byung bar 'gyur ba de dag thams cad kyang rnam pa dang bcas yul phyogs dang bcas/ gzhi ci las gyur pa dang bcas par de bzhin gshegs pas rab tu shes so/ /rigs kyi bu de ltar na de bzhin gshegs pa dgra bcom pa yang dag par rdzogs pa'i sangs rgyas ni thogs pa med pa'i ye shes dang ni ldan pa yin no zhes gsungs pas so//rigs pa 'dis na thugs kyi ting nge 'dzin la gnas pa'i ye shes can gyis smon pa po dang / smon lam dang / smon par bya ba la sogs pa'i phyi rol gyi dngos po sna tshogs la mngon par zhen pa spangs nas bdag la byin gyis brlab pa'i sgo la mngon par phyogs par 'gyur te/rtsa ba'i rgyud las rigs kyi bu mnyam par gzhag pas rang gi sems la so sor rtogs shig ces gsungs pas so/ /de ltar bshad pa'i rgyud la brten nas rang gi rang bzhin snang ba'i rjes su 'brangs nas rang gi sems yang dag pa ji lta ba bzhin du ma rtogs par las su smra ba'i sems can rnams/'khor ba thog ma med pa nas rang gi sems rnam par rtog pa las byung ba'i las dang nyon mongs pa'i 'ching bas dar gyi srin bu bzhin du rang nyid kyis sdug bsngal gyi phung po chen po mngon par 'dus byas nas skye ba gcig nas gcig tu nye bar bsags pa'i dge ba dang /mi dge ba'i las rnams kyi 'bras bu rnam par smin pa myong nas yang don dam pa'i bden pa'i dkyil 'khor la 'jug pa'i rim gyis phung po yongs su spangs te/ rlung gi khams kyis blangs nas tshor ba dang ldan zhing sred pas rjes su bcings la/chos kyi dbyings kyi rgyu mthun pa las byung ba'i dran pas yongs su bzung ba/ dge ba dang mi dge ba'i rnam pa'i yid dang ldan pa/ byis pa lo lnga pa dang mnyam pa thams cad mthong ba/ dbang po thams cad tshang ba/ dri'i zas la spyod pa/ rdo rje la sogs pas kyang mi bzlogs la mtshan nyid thams cad dang ldan pa/las kyi rdzu 'phrul gyi shugs dang ldan pa/ nyi ma bdun gyis 'ong ba'i bar la gnas nas rang gi rnam par rtog pa las byung ba'i las dge ba dang mi dge bas bskal par gyur pas rgyu dang rkyen thob nas 'gro ba lnga rnams su/ zo chun gyi 'khrul 'khor gyi tshul gyis yang dang yang du nying mtshams sbyor ba len par byed cing /'khor ba'i sdug bsngal rjes su myong bar 'gyur ro/ /sems rnam par dben pa bsdus pa'i the tshom gcod pa zhes bya ba ste le'u bzhi pa'o// //rdo rje slob mas gsol pa/ bcom ldan 'das rnam par shes pa sna tshogs pa gzhan dag kyang zhu bar 'tshal lo//bcom ldan 'das gal te rnam par shes pa gsum gyi snang ba ni gzugs med pa yin la rlung gi khams kyang gzugs med pa yin zhing las kyang gzugs med pa ste/ de bzhin du 'di rnams kyi phan tshun shes pa med pas/bcom ldan 'das kyis lung gi tshig las stong pa nyid du gsungs na/ de ji ltar na las dge ba dang mi dge bas 'khor ba thog ma med pa nas yid kyi rang bzhin gyi lus de bcings par ma gyur/ de bzhin du rang bzhin brgya drug cu po 'di rnams kyi dge ba dang mi dge ba rnams nye bar bsags nas de 'di nyid skad cig thang cig tu skye zhing rab tu 'jig par 'gyur na des ji ltar na yang nas yang du 'jig rten pha rol tu nye bar dmigs par 'gyur/yang na dge ba dang mi dge ba de dag gzhan dag las mchi bar 'gyur/yang na rang gi sems kyi bag chags las 'byung bar 'gyur ba lags/ bdag gi 'gyod pa 'di dag bcom ldan 'das rdo rje slob dpon ston pas rnam par bsal du gsol/ rdo rje slob dpon gyis smras pa/ sems can chen po legs so legs so/ / las rnam par dag pa yongs su shes par bya ba shin tu yang zab pa sangs rgyas rnams kyi spyod yul te/ rigs kyi bu 'di ni las dang po pa rnams dang las su smra ba rnams kyis ma yin no/ /de bas na lung dang rigs pa dag gis las rnam par dag pa so sor rtogs par bya yis rab tu 'bad pas nyon cig /de la dang po kho nar las dge ba dang mi dge ba rnams kyi rang gi mtshan nyid gzhag par bya'o/ /de la dge ba bcu'i las kyi lam rnams dang / de las bzlog pa ni mi dge ba bcu'i las kyi lam rnams te/ las kyi lam 'di rnams ni lus dang ngag dang yid las kun du byung ba'o zhes bcom ldan 'das kyis rdo rje gtsug tor gyi rgyud las gsungs pas de la 'jug par bya ste/bcom ldan 'das kyis bka' stsal pa/ gsang ba'i bdag po nyon cig /lus kyi nyes par spyod pa ni rnam pa gsum mo/ /ngag gi nyes par spyod pa ni rnam pa bzhi'o//yid kyi nyes par spyod pa ni rnam pa gsum ste/ de dag gis sems can dmyal bar ltung bar 'gyur ro/ /phyag na rdo rjes gsol pa/ lus kyi nyes par spyod pa dang ngag gi nyes par spyod pa'i rab tu dbye ba dang / yid kyi nyes par spyod pa du zhig mchis pa bcom ldan 'das kyis bshad du gsol/bde bar gshegs pa bshad du gsol/ bcom ldan 'das kyis bka' stsal pa/ gsang ba'i bdag po nyes par spyod pa de nyid ni lci bar gyur pa dang / tha mal pa rnams te/ de la pha dang ma dang / bla mar gyur pa la sogs pa la gsod pa dang brdeg pa la sogs pa ni nyes par spyod pa lci ba'o//srog gcod pa la sogs pa mi dge ba'i las kyi lam rnams ni nyes par spyod pa tha mal pa'o/ /ngag gis nyes par spyod pa gang zhe na/ dam pa'i chos spong ba'i tshig smra ba nyid kyis ngag gi nyes par spyod pa'i tshig nyid dang /pha dang ma dang bla mar gyur pa la sogs pa rnams la tshig ngan par smras pa ni ngag gi nyes par spyod pa lci ba'o/ /skyes bu 'ga' zhig gang zag dad pa can gzhan dag nan tan nyams su len cing dge ba rtsom pa'i gtam gyi skabs su 'jig rten pha rol med do zhes bya ba'i rgya che ba'i tshig 'jig rten las 'das pa'i brdzun smra bas dge ba'i las kyi bar chad byed pa dang /tshig 'khyal par smra ba dang / lkog 'phyas byed pa dang / mi dge ba'i las kyi gtam rnams ni ngag gi nyes par spyod pa tha mal pa'o/ /yid kyi nyes par spyod pa ni/gang dang por ni rmugs pa ste/ de nyid kyi rang bzhin ni yid kyi rang bzhin gyi sems kyi nyes par spyod pa dang / sems las byung ba'i rang bzhin gyi nyes par spyod pa dang / ma rig pa'i rang bzhin gyi nyes par spyod pa'o/ /phyag na rdo rjes gsol pa/ sems dang sems las byung ba dang / ma rig pa'i nyes par spyod pa rnams bcom ldan 'das kyis bshad du gsol/ bde bar gshegs pa bshad du gsol/ bcom ldan 'das kyis bka' stsal pa/ gsang ba'i bdag po nyon cig /rnam par gsod pa'i sems dang ma chags pa'i sems de dang dge ba bcu'i las kyi lam rnams la ma chags pa de nyid ni sems kyi nyes par spyod pa'o//rgyags pa dang / dregs pa dang / nga rgyal dang / khro ba dang / sems can rnam par 'jig pa dang / 'dod chags kyi sems kyis gzhan gyi bud med la chags pa dang /gzhan gyi nor 'phrog pa dang / bla mar gyur pa la sems gya gyu zhing rab tu sdang ba ni sems las byung ba'i nyes par spyod pa'o/ /dge ba bcu'i las kyi lam rnams dang / pha rol tu phyin pa drug rnam par 'dor zhing brjed ngas pa dang / som nyi mtshan ma'i gdong dang / yid shin tu rmongs par gyur pas na ma rig pa'i nyes par spyod pa tha mal pa'o/ /de ltar 'di dag ni lus dang ngag dang yid kyi nyes par spyod pa'o zhes mi shes shing rang nyid kyis rang bzhin gyi snang ba rlung gi bzhon pa'i rang bzhin can ma shes nas nga'i lus dang / nga'i ngag dang / nga'i sems yin no zhes bdag tu rlom pa dang /ngar sems pas las dge ba dang mi dge ba rnams byas nas bde 'gro dang ngan 'gror mchog tu gzhol bar 'gyur ro/ /rang bzhin snang ba'i rim gyis sems rnam par dben pa rtogs pa'i ye shes can ni lus dang / ngag dang / yid kyi legs par spyod pa dang /nyes par spyod par sems par mi byed cing rtogs par mi byed de/ gang gi phyir zhe na/ dge ba dang mi dge ba'i rang bzhin ni stong pa gsum las kun du byung ba rlung gi bzhon pa'i dbang gis skad cig thang cig la 'byung zhing / yul rnams rjes su myong nas yong nas yang du 'od gsal bar 'jug par 'gyur ro//ji skad du/ dgongs pa bla na med pa las/ ji ltar sprin ni sna tshogs shing / /mdog dang dbyibs ni tha dad pa/ /nam mkha'i dbyings su byung nas ni/ /de nyid du ni thim par 'gyur/ /de bzhin rang bzhin thams cad ni/ /snang ba gsum gyi rgyu can te//ma lus yul la zhugs nas ni/ /'od gsal bar ni 'jug par 'gyur/ /de 'dra'i rang bzhin ma shes pas/ /mi shes mun pas khebs pa rnams/ /dge dang mi dge'i las byas nas/ /'gro ba lngar ni 'khor bar 'gyur/ /mtshams med la sogs byas nas ni//dmyal la sogs par 'tshed par 'gyur/ /sbyin sogs dge ba byas nas ni/ /mtho ris la sogs dag tu mchod/ /skye ba dpag med stong phrag ni/ /'di ni yang dang yang thob pa/ /'di ni sngon las rnam smin zhes/ /rmongs pa rnams ni mya ngan byed/ /rang bzhin snang ba'i tshul gyis ni//gang gis skye bo nyon mongs pa/ /de nyid shes nas ye shes can/ /srid pa'i gzeb las grol bar 'gyur/ /zhes gsungs pa dang / don 'di nyid gsal bar bya ba'i phyir mi 'am ci'i rgyal po ljon pas zhus pa'i mdo las kyang / sems kyi spyod pa rnams ni 'dus ma byas pa gzugs can ma yin pa las ji lta ba bzhin gyi dbye bas rlung yang thogs pa med pa ste/'jig rten thams cad kyi sems kyi rang bzhin shes pa de ni rnam par dag pa yin pas na nyon mongs par 'byung bar 'gyur ba mi srid do zhes gsungs pas so/ /yang rigs pa 'dis sems rnam par dben pa mngon par rtogs pa'i rnal 'byor pa chen pos dge ba dang mi dge ba'i las kyi 'bras bu la ltos pa med par thar pa la mngon par phyogs par 'gyur ro//ji skad du bcom ldan 'das kyis rdo rje gcod pa las/ chos kyang spang bar bya na chos ma yin pa lta smos kyang ci dgos zhes gsungs pa dang /gsang ba 'dus pa zhes bya ba rnal 'byor gyi rgyud chen po las kyang / dge ba bcu yi las kyi lam/ /byed pa ye shes spangs pa'o/ /zhes gsungs pa'o/ /de ltar na sems can dge ba'i bshes gnyen dang bral bas rang gi sems ji lta ba nyid yongs su shes pa ma rtogs pas ngar 'dzin pa dang /nga yir 'dzin pa dang / gso ba dang / gsog la brtags nas dge ba dang mi dge ba la sogs par brtags pas 'khor ba thog ma med pa nas sdug bsngal nyams su myong ba yin no/ /ji skad du bcom ldan 'das kyis shes rab kyi pha rol tu phyin pa brgyad stong pa'i dge ba'i bshes gnyen gyi le'u las/rab 'byor gyis gsol pa/ bcom ldan 'das gal te chos thams cad dben pa dang stong pa lags na/ bcom ldan 'das ji ltar na sems can rnams kyi kun nas nyon mongs pa gda' bar 'gyur/ ji ltar rnam par byang bar 'gyur/bcom ldan 'das dben pa ni kun nas nyon mongs par yang mi 'gyur/ rnam par byang bar yang mi 'gyur ro/ /bcom ldan 'das stong pa ni kun nas nyon mongs par yang mi 'gyur / rnam par byang bar yang mi 'gyur ro/ /bcom ldan 'das dben pa'am stong pa nyid bla na med pa yang dag par rdzogs pa'i byang chub mngon par rdzogs par 'tshang mi rgya la/bcom ldan 'das dben pa dang / stong pa nyid las gud na chos gang bla na med pa yang dag par rdzogs pa'i byang chub mngon par rdzogs par sangs rgyas pa'am/ mngon par rdzogs par 'tshang rgya ba'am/mngon par rdzogs par 'tshang rgya ba'i chos de dmigs su ma mchis na/ bcom ldan 'das bshad pa de'i don ji lta bur 'tshal bar bgyi/ bcom ldan 'das kyis bstan du gsol/ bde bar gshegs pa bstan du gsol/ de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to/ /rab 'byor de ji snyam du sems/ sems can rnams ni yun ring po nas ngar 'dzin pa dang / nga yir 'dzin pa la spyod dam/ rab 'byor gyis gsol pa/ bcom ldan 'das de de bzhin no/ /bde bar gshegs pa de de bzhin te/sems can rnams ni ngar 'dzin pa dang / nga yir 'dzin pa la spyod do/ /bcom ldan 'das kyis bka' stsal pa/ rab 'byor de ji snyam du sems/ 'on kyang ngar 'dzin pa dang / nga yir 'dzin pa stong pa yin mod/ rab 'byor gyis gsol pa/ bcom ldan 'das stong pa lags so//bde bar gshegs pa stong pa lags so/ /bcom ldan 'das kyis bka' stsal pa/ rab 'byor de ji snyam du sems ngar 'dzin pa dang / nga yir 'dzin pas sems can rnams 'khor ba na 'khor ram/ rab 'byor gyis gsol pa/ bcom ldan 'das de de bzhin no//bde bar gshegs pa de de bzhin te/ ngar 'dzin pa dang / nga yir 'dzin pas sems can rnams 'khor ba na 'khor ro/ /bcom ldan 'das kyis bka' stsal pa/ rab 'byor de ltar na sems can rnams kun nas nyon mongs par yang snang ngo / /rnam par byang bar yang snang ngo zhes gsungs pa dang /de bzhin du las kyi sgrib pa thams cad rnam par dag pa'i mdo las kyang / dge slong 'di ji snyam du sems/ ci skye ba med pa skye ba'am/ 'gag pa'am/ kun nas nyon mongs pa'am/ rnam par byang bar 'gyur ram/ gsol pa/ bcom ldan 'das de ni ma lags so//bcom ldan 'das kyis bka' stsal pa/ dge slong 'di ji snyam du sems/ ci skye ba med pa'i chos rnams sems can dmyal bar 'gro bar 'gyur ram/ dud 'gro'i skye gnas sam/ gshin rje'i 'jig rten du skye bar 'gyur ram/ gsol pa/ bcom ldan 'das skye ba ma mchis pa nyid kyang ma mchis pa lags na/ ngan 'gror mchi bar 'gyur ba lta ga la mchis/ bcom ldan 'das kyis bka' stsal pa/ dge slong de ltar chos thams cad ni de ltar 'od gsal ba yin na yang byis pa so so'i skye bo rnams ni yang dag pa ma yin pa'i chos rnams la brtags /phyin ci log la brtags / gsob dang / gsog lta bu'i chos thams cad la brtags pas/ sems can dmyal ba dang dud 'gro'i skye gnas dang gshin rje'i 'jig rten du 'gro bar 'gyur ro/ /dge slong ci de ltar sems kun nas nyon mongs pas sems can rnams kun nas nyon mongs pa can du 'gyur ram/sems rnam par dag pas sems can rnam par 'gyur ro zhes gsungs pa dang / de bzhin gshegs pa'i mdzod kyi mdo las kyang / chos thams cad la dad pa med pas mngon par dad cing lhag par mos na des ni sems can de ngan 'gror 'gro bar mi smra'o/ / de ci'i phyir zhe na/ nyon mongs pa rnams la phung po med pa'i phyir ro/ /nyon mongs pa thams cad rnam par dben pa las rgyu dang rkyen tshogs pa dang phrad pa las skye bar 'gyur la/ skyes pa tsam gyis 'gag par 'gyur te/ gang skye ba dang 'jig pa de ni nyon mongs pa rnams kyis 'jig pa'o zhes gsungs pa dang /klu sgrub kyi zhal snga nas kyis don 'di gsal bar bya ba'i phyir/ gal te 'di kun stong pa dang / /skye med ngo bo nyid yin na/ /bde dang sdug bsngal sogs 'jug 'dir/ /ji ltar las kyis 'khor bar 'gyur/ /bdag tu rlom par gyur ma thag /de bzhin 'dod chags sogs dri ma//brtags pas gzhan gyi dbang gyur pas/ /byis pa sdug bsngal gyis nyon mongs/ /'di dag thams cad sems tsam ste/ /sgyu ma'i rnam par yang dag 'byung / /de nas dge dang mi dge'i las/ /des ni bde 'gro ngan 'gror skye//zhes gsungs pas so/ /de ltar na rigs pa 'dis lung dang rigs pa dag gis de bzhin gshegs pa snying rje chen po'i bdag nyid can thams cad kyis sems can thams cad sdug bsngal gyi dba' klong du lhung bar gyur cing skyabs med pa dpung gnyen med pa rnams la gzigs nas kun rdzob kyi bden pa'i tshul gyis nyon mongs pa'i ngo bo nyid yongs su shes pas nyon mongs pa rnam par dag par mdzad cing /kun rdzob kyi bden pa yang don dam pa'i bden pas rnam par sbyangs nas yang dag pa'i tshul gyi bdag nyid can gyi ting nge 'dzin la yang dag par 'jog par mdzad pa yin no//las kyi mtha' rnam par 'byed pa'i bsdus pa'i the tshom gcod pa ste le'u lnga pa'o// //rdo rje slob mas gsol pa/ khyed kyi zhal snga nas kyi bka' drin gyis bshad ma thag pa'i gsung rab kyi rjes su 'brangs nas lus dang ngag dang sems kyi mtshan nyid la so sor brtags pas nges par 'tshal te/ting nge 'dzin gzhan gyi khyad par yang rje btsun gyi zhal snga nas gsol nas gong nas gong du ting nge 'dzin gyi khyad par zhu bar 'tshal lo/ /bskyed pa'i rim pa nas brtsams te lus rnam par dben pa'i mthar thug pa'i bar du rdo rje gsum la sogs pas kyang mtshan nyid la lhag par mos pa tsam lags te/de bas na lus rnam par dben pa la yang lha'i gzugs med de/ lus ni rdul phra rab bsags pa tsam yin pa'i phyir ro/ /ngag rnam par dben pa'i mthar thug pa yang 'jug pa la sogs pa'i rim gyis rdo rje bzlas pa tsam yongs su shes pa ste/de la yang lha'i rnam pa med de sgra rnams ni brag ca lta bu yin pa'i phyir ro/ /sems rnam par dben pa'i mthar thug pa yang rang bzhin gyis snang ba tsam yongs su shes pa tsam du zad pas der yang rnam pa thams cad kyi mchog dang ldan pa'i lha'i sku'i ngo bor rnyed par mi 'gyur te/ sems ni snang ba tsam yin pa'i phyir ro/ / rigs pa 'dis ni kun rdzob la brten nas gnas pa rnyed par mi 'gyur ro/ /de bas na ye shes tsam gyis lha nyid du bskyed pa slob dpon gyi zhal snga las rtogs par bgyid 'tshal lo/ /rdo rje slob dpon gyis smras pa/ sems can chen po legs so legs so//lha'i de kho na nyid bsam gyis mi khyab pa sangs rgyas thams cad kyis bshad pa bla ma brgyud pa'i rim pa las 'ongs pa/ sa bcu'i dbang phyug rnams kyi yang yul ma yin pa de ngas khong du chud par bya'o/ /rang gi sems yang dag pa ji lta ba bzhin du yongs su shes pa zhes bya ba phung po dang khams dang skye mched rnams la yang med pa/ye shes tsam du yongs su snang ba tsam gyis mtshan thams cad dang ldan pa'i lha'i skur gzung ba de yang sgyu ma dang / rmi lam la sogs pa'i dpe rnam pa bcu gnyis kyis nye bar mtshon pa 'di ni sangs rgyas rnams kyi yid kyi rang bzhin gyi sku yin no//rdo rje slob mas gsol pa/ brten pa'i lus med par sems kyi rang bzhin yang med pa / sems med par yang lus dmigs su med do zhes lung gi tshig las gsungs na/ de ji ltar na sems 'ba' zhig tsam gyis phyag dang zhabs la sogs pa mtshan thams cad dang ldan pa'i lha'i sku rdzogs par 'gyur/dmigs pa'i lta ba can rnams ni lung dang rtogs pa med par yid ches par mi 'gyur ro/ /de bas na de rnams dmigs su med pa'i lha'i de kho na nyid bde blag tu mngon du bya ba'i thabs bcom ldan 'das rdo rje slob dpon ston pas bshad du gsol/rdo rje slob dpon gyis smras pa/ sems can chen po legs so legs so/ /gang mdo sde la sogs pa'i tshul la zhugs pa dang / bskyed pa'i rim pa la gnas pa'i sgom pa po rnams kyang chos thams cad sgyu ma lta bu dang / rmi lam lta bu dang / gzugs brnyan lta bu zhes dper brjod cing lhag par mos kyang de rnams dpes bdag la byin gyis brlab pa'i man ngag shes tsam gyis yid kyi rang bzhin gyi lha'i sku rdzogs par 'gyur ba shes par ni mi 'gyur ro//de bas na ngas rnal 'byor gyi rgyud kyi rjes su 'brangs nas rdo rje sems dpa' rdzogs par 'gyur ba'i rgyu dang rkyen khyod la khong du chud par bya'o//bden par na sems ni dbyibs dang kha dog dang bral ba snang ba tsam nam mkha' dang mnyam pa'i ngo bo nyid don dam pa'i bden pa dang 'dra bar reg par dka' ba'o/ /de lta mod kyi snang ba tsam gyi snang ba gsum po rlung la brten par gyur pa dang /thun mong du gyur pas yang ba ste/ de bas na rlung gis rnam par shes pa bcings pa yin no/ /de nas shes rab dang thabs kyi snang ba gnyis 'od zer lnga dang bcas shing sna tshogs pa'i yon tan thams cad dang ldan pa'i sgyu ma lta bu'i lha'i sku 'byung bar 'gyur ro/ /'di'i bzhon pa gang yin zhe na/rlung zhes bya ba ste sems rdo rje gang yin pa de lta bu'i rlung la zhon nas/ gang du 'dod pa der 'pho bar 'gyur ro/ /rnam par shes pa 'pho ba'i mdo las kyang gsal bar gsungs te/ bcom ldan 'das kyis bka' stsal pa/ sman chen ngas tshigs su bcad pa phyed kyi don gyi phyir brag gi rtse mo nas lus bor te dka' ba rnam pa brgya stong du ma nyams su myong ngo //sman chen khyod ci dang ci 'dod pa dris shig dang / ngas khyod la lan gdab bo/ de skad ces bka' stsal pa dang / bcom ldan 'das la sman chen gyis 'di skad ces gsol to/ /bcom ldan 'das rnam par shes pa 'di'i rang bzhin ci lags/bcom ldan 'das kyis bka' stsal pa/ sman chen sgyu ma mkhan gyi mi'i rang bzhin gang yin pa dang / mi'i grib ma chu'i nang du 'byung ba gsal ba ma yin zhing mi gsal ba'i rang bzhin gang yin pa dang / mig dang nam mkha'i rang bzhin gang yin pa dang /srid pa'i rang bzhin gang yin pa de bzhin no/ /gang yang sman chen khyod kyis skye ba med pa nyid kyis ji ltar thog mar 'chi bas byas pa'i gzugs blta bar bya zhes bya ba bshad par bya'o/ /'di lta ste/ chu'i nang du byung ba'i skyes bu'i grib ma'i gzugs bzhin du blta bar bya'i de'i nang du byung ba'i snang ba bzhin du ni blta bar mi bya'o//yang sman chen de'i mgo bo dang lag pa dang rkang pa dang ldan par gyur pa yang chu'i nang du byung ba'i skyes bu nyid bzhin no/ /de la ni grang ba'am dro ba'am lus dub pa la sogs pa med de/ de la sha dang nya sha la sogs pa mi srid pa'i phyir dang / grib ma ni khams kyis rnam par gzhig mi nus pa'i phyir ro/ /de na chu'i nang du byung ba'i skyes bu'i gzugs brnyan ni bde ba'i sgra'am sdug bsngal ba'i sgra brjod par mi 'gyur ro/ /de bzhin du rnam par shes pa 'di yang thog mar 'chi ba'i lus kyi rang bzhin yongs su spangs nas des byas pa'i gzugs su gyur pa'o//de ltar byis pa so so'i skye bo srid pa bar ma pa zhes bya ba'i 'khor ba'i rgyur 'gyur ro/ /de nyid bla ma brgyud pa'i rim gyis de bzhin gshegs pa thams cad kyi man ngag thob pa rnams ni bdag la byin gyis brlab pa zhes bya ba 'di ltar rtsig pa'i ras ris me long gi nang du nye bar snang ba de bzhin du rdo rje sems dpa'i sku'i ngo bo nyid kyis bdag nyid sprul te/rnam pa thams cad kyi mchog dang ldan pa sku blta bas chog mi shes pa skyes bu chen po'i mtshan sum cu rtsa gnyis la sogs pas lus la brgyan pa ste/ mdor na sangs rgyas thams cad kyi yon tan gyis brgyan pa zhes pa'i bar du'o//ji skad du bcom ldan 'das kyis rnam par snang mdzad mngon par byang chub pa'i rgyud las/ 'ja' tshon lta bu'i lus dag ni/ /de nyid bsgoms pas thob par 'gyur/ /zhes gsungs so/ /'di'i don ni 'di yin te/ 'ja' tshon zhes bya ba ni lha'i dbang po'i gzhu ste/de yang gang zhe na/ dngos su 'od zer lngas nye bar mtshon pa ste/ ji ltar 'ja' tshon nam mkha'i dkyil na kha dog lnga'i dbye ba yongs su gsal ba yin te/ lus kyang de dang 'dra bar nye bar mtshon pa'i phyir/ 'ja' tshon lta bu'i lus dag ni/ /zhes bya ba'i don to/ /de nyid bsgoms pas thob par 'gyur//zhes bya ba ni bla ma las man ngag yang dag par thob nas de kho na nyid bsgom zhing don dam pa'i bden pa la dmigs pas 'thob pa'i don to/ /rdo rje slob mas gsol pa/ bcom ldan 'das som nyir gyur pa gzhan 'ga' zhig bdag la mchis te/ ci'i phyir yun ring por gnyid log nas ci'i phyir lus kyi khog pa bor te/ rmi lam du sum cu rtsa gsum pa'i gnas sam/ yul phyogs gzhan dag tu song nas 'dod pa'i yon tan lnga nyams su myong ste/ yang yul 'dir 'ongs nas ci'i phyir rmi lam na dge ba dang mi dge ba mthong ba'i 'bras bu thob par 'gyur/de bzhin du gnyid log pa'am/ gnyid ma log pa'i gnas skabs dag ci tha dad par mchis sam/ 'on te ma mchis/ rdo rje slob dpon gyis smras pa/ sems can chen po legs so legs so//thog ma med pa'i rang bzhin can gyi lus la dngos por bltas nas 'dzin pa rnams kyi the tshom bsal ba'i phyir dang / bdag la byin gyis brlab par bshad pa rnam par gsal bar bya ba'i phyir rmi lam gyi mtshan nyid yongs su 'dri bar byed pa legs so legs so//de bas na rmi lam gyi sgo nas gzugs brnyan du bshad pa'i lha'i sku thams cad kyi so so rang rig par gyur pa rgyud dang mdo sde rnams kyi rjes su 'brangs nas rab tu rtogs par bya yis rtse gcig pa'i sems kyis nyon cig /phung po khams dang skye mched dbang sogs la//shes pa gnyis po de 'dir rab 'dus nas/ /stong chen gyur pa gang zhig gnyid log pa/ /rlung gi shugs kyis rmi lam mthong bar 'gyur/ /rmi lam sad la bye brag gzhan med par/ /kun du rtog pas rmi lam 'bras 'dod pas/ /'gro ba nyin mtshan nye bar gnyid log cing //sa mthug gyur pas rab tu ring gnyid log /'bras bu ma smin byas pa'i las rnams kyis/ /skye 'dir rlung ni slar yang 'jug par 'gyur/ /'bras bu smin par gyur na rlung 'di nyid/ /'jig rten 'chi ba gzhan du myur 'gror 'gyur/ /ji ltar phyogs bcur bzhugs pa'i rgyal dbang po//de yi sku la rkang rus sha med kyang / /sems can phan phyir khams la 'jug mdzad cing / /sprul pa'i sku yis bya ba mdzad pa yin/ /rim pa de bzhin gnyid log sad pa'i sems/ 'bras bu 'dod pa'i rnam rtog dra ba can/ /de bas chos kun rmi lam lta bu ste//bden dang brdzun pa dag kyang yod ma yin/ /zhes bya'o/ /don 'di nyid gsal bar bya ba'i phyir las kyi sgrib pa thams cad rnam par dag pa'i mdo las kyang / dge slong 'di ji snyam du sems/ ci khyod kyis gnyid log pa'i rmi lam na kun du rtog pa'i tshe 'dod chags spyod pa myong ngam/gsol pa/ bcom ldan 'das myong lags so/ /bcom ldan 'das kyis bka' stsal pa/ dge slong sems kyis 'dod chags spyad par khyod kyis mi shes sam/ gsol pa/ bcom ldan 'das de ni de lta bu lags so/ /bcom ldan 'das kyis bka' stsal pa/dge slong ci khyod kyis rmi lam gyi sems dang / gnyid ma log pa'i sems 'di la bye brag dang tha dad du bya ba zhig yod par mthong ngam/ gsol pa/ bcom ldan 'das bdag gis ni rmi lam gyi sems dang gnyid ma log pa'i sems la tha dad du bgyi ba cung zad kyang ma mthong lags so//bcom ldan 'das kyis bka' stsal pa/ dge slong 'di ji snyam du sems/ chos thams cad ni rmi lam lta bu'o zhes ngas ma bstan tam/ gsol pa/ bcom ldan 'das de ni de ltar lags so zhes gsol pa dang / bcom ldan 'das kyis don 'di nyid gsal bar bya ba'i phyir gsang ba 'dus pa zhes bya ba rnal 'byor chen po'i rgyud las kyang / kye bcom ldan 'das de bzhin gshegs pa thams cad 'di lta ste/ dper na byang chub kyi sems ni de bzhin gshegs pa thams cad kyi ye shes 'byung bar byed pa rdo rje'i gnas lta bu ste/byang chub kyi sems de yang lus la mi gnas/ ngag la mi gnas/ sems la mi gnas so/ /chos gang khams gsum na mi gnas pa de la skye ba yang med de/ 'di ni ye shes 'byung ba'i rdo rje'i gnas de yin no/ /kye bcom ldan 'das de bzhin gshegs pa thams cad rmi lam 'di ni bdag gis khams gsum du rmi lam mthong bar bya'o snyam du mi sems so//mi yang bdag gis rmi lam mthong ngo snyam du mi sems te/ khams gsum gyi bya ba de rnams kyang rmi lam lta bu rmi lam dang 'dra ba rmi lam las byung ba'o//de bzhin du bcom ldan 'das de bzhin gshegs pa thams cad phyogs bcu'i 'jig rten gyi khams kyi sangs rgyas dang byang chub sems dpa' ji snyed pa rnams dang / sems can ji snyed pa thams cad kyang rmi lam ltar bdag med pa'i gnas su rig par bya'o zhes gsungs pa dang /sgyu ma lta bu'i ting nge 'dzin 'di nyid gsal bar bya ba'i phyir ye shes rdo rje kun las btus pa zhes bya ba rnal 'byor chen po'i rgyud las kyang / sems dang sems las byung ba'i rnal 'byor chen po ni bde ba chen po'i ting nge 'dzin to/ /de ni sgyu ma'i dpes nye bar mtshon pa ste/de bas na sangs rgyas kyi zhing gang+gA'i klung gi bye ma snyed kyi de bzhin gshegs pa thams cad ni sgyu ma lta bu dang / chu zla lta bu dang / mig yor lta bu dang / smig rgyu lta bu dang / rmi lam lta bu dang / brag ca dang / dri za'i grong khyer dang / mig 'phrul dang / 'ja' tshon dang / glog dang / chu'i chu bur dang / me long gi gzugs brnyan te/ sgyu ma'i dpe bcu gnyis kyis bde ba chen po'i ting nge 'dzin nye bar mtshon par 'gyur ba yin te/ de ltar phyogs bcu'i 'jig rten gyi khams na gnas pa'i de bzhin gshegs pa thams cad 'khor ba ji srid pa'i bar du sgyu ma lta bu'i ting nge 'dzin gyis bzhugs nas 'dod pa'i yon tan lnga rnams kyis rol par mdzad cing dga' bar mdzad pas yongs su spyod par mdzad la/thams cad mkhyen pa'i yon tan dang ldan pas bdag nyid bzhed pa tsam gyis sangs rgyas kyi zhing nas sangs rgyas kyi zhing du gshegs par mdzad do//de ltar dus gsum gyi 'khor ba'i sdug bsngal rjes su dran nas rnam par grol bar 'dod pas rdo rje slob dpon 'bad pas mnyes par byas la bdag la byin gyis brlab pa'i rim pa'i man ngag thob nas/ de rnam par dag pa'i thabs btsal bar bya'o//kun rdzob kyi bden pa bsdus pa'i the tshom gcod pa ste le'u drug pa'o// //rdo rje slob mas gsol pa/ kun rdzob kyi bden pa la ni som nyi ma mchis na/ da ni snang ba rnam par dag pa'i gnas don dam pa'i bden pa'i cha bla ma'i zhal snga nas kyi bka' drin gyis ches shes par 'tshal lo//rdo rje slob dpon gyis smras pa/ kun rdzob kyi bden pa zhes bya ba ni bdag la byin gyis brlab pa'i rim gyis rdo rje sems dpa'i skur rdzogs pa ni sgyu ma'i dpe bcu gnyis kyis rab tu bstan par nus kyi don dam pa'i bden pa ni yang lus med pa/dpe med pa/ rtsom pa thams cad dang bral ba so so rang gis rig pa ste/ de bas na bla ma'i kha las bstan pa med par shes par mi 'gyur ro/ /ji skad du gsungs pa'i tshig las kyang / ji ltar mar me bum nang gnas/ /phyi rol du ni snang mi 'gyur//bum pa de nyid bcag gyur na/ /de 'og mar me 'od snang 'gyur/ /de bzhin bum pa rang lus nyid/ /de nyid mar me lta bu nyid/ /bla ma'i kha yis legs bcag na/ /sangs rgyas ye shes gsal bar 'gyur/ /nam mkha' las ni nam mkha' 'byung / /mkha' yis nam mkha' mthong 'gyur ba'i//de nyid bla ma'i kha nyid las/ /sbyor ba legs par ston pa yin/ /zhes gsungs te/ rigs pa 'dis na sgra'i rnam pa las byung ba yin pas thog ma dang tha ma med cing / dngos po med pa'i ngo bo nyid gzung ba dang 'dzin pa dang bral ba ni kun rdzob kyi bden pa'i mtshan nyid kyi sgra gang yin pa'i sgo nas rab tu bstan pa'o//don dam pa'i bden pa de yang ma bcos pa'i nam mkha' dang mnyam pa dri ma med pa'i ngo bo nyid de don 'di nyid gsal bar bya ba'i phyir tshul gcig par bstan pa'i mdo las/ chos 'di sgra skad dag gis lung bstan te//chos dang sgra dag 'dir ni rnyed mi 'gyur/ /chos nyid tshul gcig dngos la'ang 'jug byed pa/ /bzod mchog bla na med la reg par 'gyur/ /zhes gsungs so/ /de ltar rgyu dang 'bras bu gnyis su med par khong du chud pa'i slob mas bla mas bstan pa'i lung thob nas rgyud las ji skad bshad pa'i cho ga dang /'byor pa ci yod pas tshogs kyi dkyil 'khor byas la nam phyed na legs par bslabs pa'i phyag rgya lus dri zhim pos byugs shing rgyan thams cad kyis brgyan pa bla ma la phul te/ gsang ba dang de las gzhan pa'i mchod pas yang dag par mchod la bla ma'i mdun du pus mo g.yas pa'i lha nga sa la btsugs te/thal mo sbyar ba byas la 'khor ba las skyob pa'i yid kyis slob dpon la de bzhin gshegs pa mngon sum bzhin du lhag par mos pa dang / bstod pa'i mchod pa 'dis mngon par byang chub par gsol ba gdab par bya'o//mchog sbyin rdo rje mchog khyod 'dud/ /yang dag mtha' gyur khyod la 'dud/ /stong nyid las byung khyod la 'dud/ /sangs rgyas byang chub phyag 'tshal 'dud/ /mngon par byang chub mthong ba ni/ /slob dpon chen po bdag 'tshal lo//sangs rgyas kun gyi ye shes che/ /thams cad stong pa bla na med/ /rang myong mtshan nyid gcig pa nyid/ /sems dpa' chen po stsal du gsol/ /las dang skye las rnam grol pa'i/ /tshe 'dir byang chub nyid 'thob pa/ /khyed zhabs pad+ma spangs nas ni//gtso bo gzhan du skyabs ma mchis/ /'gro ba'i dpa' bo thub chen po/ /de bas sangs rgyas mchog mnyes mdzod/ /de ltar gsol ba'i cho ga mchog /dam pa de ni thos gyur nas/ /bla ma dpal ldan yon tan mtsho/ /snying rjes slob ma la skyed la/ / bzhin ni rab tu dang gyur pas/ /rang gi brtse bas rab dga' zhing / /rnal 'byor rgyud las byung ba'i mchog /dam tshig bzang po bstan par bya/ /de nas slob dpon snyoms zhugs nas/ /bum pa'am yang na dung chos su/ /byang chub sems ni gzhag par bya/ /de nas slob ma de bos te//sangs rgyas kun gyis byin brlabs la/ /rgyal ba'i phyag rgyar bcas pa yis/ /dam tshig dag ni bstan par bya/ /rdo rje can ni gnyis pa yis/ /dbang bskur ba ni sbyin par bya/ /bkra shis sgra ni bsgrags pa dang / /rol mo'i sgra skad sna tshogs kyis/ /khams gsum pa yi dbang bskur bas//slob ma 'dud cing thal sbyar ba/ /der ni rab tu bskul ba yis/ /rjes su gnang ba de nas sbyin/ /phreng ba chu dang rdzogs sangs rgyas/ /rdo rje dril bu me long dang / /ming dang slob dpon rjes gnang ste/ /dbang bskur rim pa 'di yin no/ /de nas byang chub mtshan nyid ni//bla ma brgyud rim las 'ongs pa/ /man ngag gi ni gzhi thob pa/ /de nas de la sbyin par bya/ /de la mngon par byang chub pa'i rim pa ni rnam pa gnyis te/ /'di lta ste phyi dang nang gi'o/ /de la dang por phyi'i bstan par bya ste/ /tho rangs kyi thun mtshams su ma rig pa'i snang ba 'das nas ji srid nyi ma gsal bar ma gyur pa ste/'di la ni 'od gsal ba dri ma med pa'i rnam pa gsal zhing lus dang ngag dang yid dang bral ba thams cad stong pa'i mtshan nyid can no/ /nyi ma shar ba ni snang ba mched pa'o/ /nyi ma nub pa'i thun mtshams su ma rig pa'o//zla ba shar ba'i tshe ni snang ba'o/ /de ltar stong pa nyid rnam pa bzhi phyi rol la nges par bstan pa bshad nas/ da ni nang gi mngon par byang chub pa so so rang gis rig pa'i mtshan nyid can rim pa 'dis bstan par bya ste/ dang por smig rgyu lta bu la 'od zer lnga'i tshogs dang ldan par mthong ngo //gnyis pa ni snang ba ste/ zla ba'i 'od zer lta bu'o/ /gsum pa ni snang ba mched pa ste nyi ma'i 'od zer lta bu'o/ /bzhi pa ni snang ba thob pa ste mun pa lta bu'o/ /de nas mun pa dang bral ba'i skad cig la 'od gsal ba ste/ shin tu gsal ba rtag tu snang ba'i mtshan nyid can don dam pa'i bden pa'i rang gi mtshan nyid ye shes kyi mig gis mthong ngo //de ltar thams cad stong pa nyid mngon sum du byas nas rim pa 'dis bsam gtan rnam pa nyid la dmigs par byed do/ /de'i rim pa ni 'di yin te/ chu bo'am lteng ka'i chu ni dri med dag la gor bu gnas pa ltar//de bzhin de la rim gyis rjes su gzhig par byed pas rnal 'byor pas ni rtag tu bsam/ /me long la ni rlung dag rim gyis zad par byed pa bzhin du'ang blta bya ste/ /ril por 'dzin la'ang bya ba'i rim pa 'dir ni de bzhin yang dag brtag /da ni ming la mngon par zhen pa rnams kyis 'khrul pa bsal bar bya ba'i phyir don dam pa'i bden pa'i ming gi rnam grangs 'ga' zhig la 'jug par bya ste/de la dang por ni 'od gsal ba dang / thams cad stong pa dang / sangs rgyas ye shes dang / rdo rje'i ye shes dang / bla na med pa'i ye shes dang /dri ma med pa dang / dngos po med pa dang / snang ba med pa dang / bdag med pa dang / mya ngan las 'das pa dang / sems can med pa dang / srog med pa dang / gang zag med pa dang / gso ba med pa dang / skye ba med pa dang / 'gag pa med pa dang / yi ge med pa dang / tshig med pa dang / dmigs su med pa dang / bla na med pa dang / brjod du med pa dang / bsam gyis mi khyab pa dang / mtha' yas pa dang / grangs med pa dang / dbang po las 'das pa dang / gnas med pa dang / mtshan nyid med pa dang /'dus ma byas pa dang / mtshan ma med pa dang / mi g.yo ba dang / dmigs pa dang bral ba dang / rnam par mi shes pa dang / brtag tu med pa dang / zad pa med pa dang / 'phel ba med pa dang / tshig med pa dang / sgrib pa med pa dang / tshul gcig pa dang / zhi ba dang /zhi ba nyid dang / nam mkha' dang mnyam pa dang / rang bzhin gyis dag pa dang / thog ma med pa dang / dbus med pa dang / tha ma med pa dang / 'gro ba med pa dang / 'ong ba med pa dang / ring ba ma yin pa dang / nye ba ma yin pa dang / gcig pa ma yin pa dang / tha dad pa ma yin pa dang /reg par dka' ba dang / rnam par bsgom par dka' ba dang / bsam gtan nyid dang / yang dag pa dang / chos yi sku dang / yang dag pa'i mtha' dang / chags pa med pa'i mtha' dang / chos kyi dbyings dang / lus med pa dang / rdul med pa dang / mtha' med pa dang /grub pa dang / gsang ba grub pa dang / pha rol tu phyin pa rnam par dag pa dang / lta ba rnam par dag pa dang / rgyu rnam par dag pa dang / 'bras bu rnam par dag pa dang / khams gsum rnam par dag pa dang / bsod nams rnam par dag pa dang / sdig pa rnam par dag pa dang / nyon mongs pa rnam par dag pa dang /las rnam par dag pa dang / skye ba rnam par dag pa dang / de dag ni shes rab kyi pha rol tu phyin pa dang / sangs rgyas thams cad kyi yum dang / thams cad mkhyen pa dang / rnam pa thams cad mkhyen pa dang / lam gyi rnam pa thams cad mkhyen pa dang / de bzhin nyid dang / ma nor ba de bzhin nyid dang / mnyam pa nyid dang / bsod nams dang ye shes kyi tshogs mi zad pa nyid dang / ye shes 'ba' zhig pa nyid dang / byang chub sems dpa' thams cad bskyed pa dang / nyan thos thams cad kyi yum dang / rang sangs rgyas thams cad bskrun pa dang /'jig rten thams cad 'byin pa dang / lha'i mig rnam par dag par byed pa dang / lha'i rna ba rab tu ster bar byed pa dang / gzhan gyi sems shes par byed pa dang / sngon gyi gnas rjes su dran par byed pa dang / rdzu 'phrul dpag tu med par byed pa dang / nyon mongs pa thams cad zad par byed pa zhes bya'o//de bzhin du gsang ba 'dus pa zhes bya ba rnal 'byor chen po'i rgyud las kyang / dngos po med pa sgom pa'i dngos/ /zhes bya ba la sogs pa byang chub kyi sems drug gi tshigs su bcad pa rnams kyis mngon par byang chub pa'i mtshan nyid gsungs pa dang / rnal 'byor chen po'i rgyud gzhan dag las kyang / yan lag kun bsgom las 'das shing / /rtog dang rnam rtog spangs nas kyang / /gug skyed thig le las 'das pa/ /'di ni dkyil 'khor mchog yin no/ /sems can thams cad 'jug pa ni/ /gzugs dang gzugs med dri med la//sems ni bskul zhing rtogs byas pa'i/ /dkyil 'khor dkyil 'khor lta bu'o/ /yod dang med pa gnyi ga mtha' yin te/ /dag dang ma dag 'di yang mtha' nyid yin/ /de bas mtha' gnyis rnam par spangs nas ni/ /mkhas pa dbus la gnas par mi byed do//zhes gsungs pa dang / nam mkha' mtha' med brtag pa'i don/ /sems can kun gyi gnas chen po/ /dpal gyi 'byor pas 'byor pa'i rgyal/ /bsam pa thams cad rdzogs byed pa/ /zhes bya ba gsungs so/ /dgongs pas bshad pa'i tshig mang po'i ming gi rnam grangs bsdus pas ci zhig bya zhe na/ji srid chos kyi phung po brgyad khri bzhi stong gi sgra'i don dka' ba dang / mtshan nges pa med pa'i tshig 'di dag ni don dam pa'i bden pa la brten par grags so/ /de nas rdo rje slob mas mngon par byang chub pa'i rim pa rnam pa gnyis dang / bsam gtan rnam pa gnyis rtogs par gyur cing don dam pa'i bden pa'i ming gi rnam grangs thos nas mngon par zhen pa spangs te/bzhin rab tu dang ba dang / thal mo sbyar ba byas te ched du brjod pa'i tshig 'di smras so/ /e ma'o sangs rgyas e sangs rgyas/ /chos bshad pa ni ngo mtshar che/ / yang dag don ni dag pa'i don/ /byang chub sems la phyag 'tshal lo/ /de nas rdo rje slob dpon gyis/ /slob dpon gnyis pa ltar bltas nas/ /dngos po thams cad dang bral ba/ /phung po khams dang skye mched dang / /gzung dang 'dzin pa rnam spangs pa//chos la bdag med mnyam nyid pas/ /rang sems gzod nas ma skyes pa/ /stong pa nyid kyi rang bzhin no/ /zhes bya ba'i tshigs su bcad pa brjod nas gnyis su med par dmigs te/ shes rab dang ye shes kyi dbang bskur ba sbyin par bya'o/ /rim pa 'di nyid kyis bcom ldan 'das dpal shAkya thub pa la de bzhin gshegs pa thams cad kyis se gol gyi sgras bskul bar gyur pas mi g.yo ba'i ting nge 'dzin las bzhengs te/byang chub kyi shing drung la bzhugs nas mtshan phyed kyi dus su 'od gsal ba mngon du mdzad de/ sgyu ma lta bu'i ting nge 'dzin las bzhengs nas/'gro ba rnams la chos ston par mdzad pa yin no/ /deng nas brtsams te dam pa'i chos ji srid gnas pa de srid du bla ma'i kha nas bla ma'i khar brgyud pa yin no/ /rnal 'byor gnyis rnam par dag pa la dga' ba rnams kyi mngon par byang chub pa'i rim pa don dam pa'i bden pa bsdus pa'i the tshom gcod pa ste le'u bdun pa'o// //rdo rje slob mas gsol pa/ don dam pa'i bden pa rtogs pa la ni som nyi ma mchis na bcom ldan 'das ji ltar na don dam pa'i bden pa la zhugs te dngos po med par gyur nas ldang bar bgyid/ 'dir mngon du phyogs pa nyams su myong ba ni gang zhig lags/mi ldog par gyur pa ni gang zhig lags/ thar pa'i don ni gang zhig lags/ ci'i phyir na grol bar 'gyur/ grol ba ni su zhig lags/ rdo rje slob dpon gyis smras pa/ sems can chen po legs so legs so/ /'od gsal ba las ldang ba'i rim pa de bzhin gshegs pa'i man ngag las kha phyir bltas pa rnams kyi yul ma yin pa gsang ba 'dus pa zhes bya ba rnal 'byor chen po'i rgyud kyi rjes su 'brangs nas khyod la khong du chud par bya yis/rtse gcig pa'i yid kyis nyon cig /rdo rje theg pa 'di la bskyed pa'i rim pa la bslabs nas sa brgyad pa thob ste/yang nas yang du bde 'gror skye zhing ji srid rdzogs pa'i rim pa ma thob pa de srid du dge ba'i bshes gnyen mnyes par bya'o/ /sku dang gsung dang thugs mngon par rtogs nas kyang sa bcu thob pa sgyu ma lta bu'i ting nge 'dzin so sor thob cing sgyu ma lta bu'i ting nge 'dzin yang dag par rtogs nas snang ba rnam par dag pa so sor thob ste/snang ba med pa las langs nas zung du 'jug par gnas pa'i rim gyis sangs rgyas kyi bya ba mngon sum du byas nas/ rdo rje lta bu'i ting nge 'dzin gyi yon tan thams cad kyis brgyan nas gnas par 'gyur ro/ / ji skad du bcom ldan 'das kyis lang kar gshegs pa'i mdo las kyang / blo gros chen po snying rje chen po dang thabs la mkhas pa'i lhun gyis grub pa'i sbyor ba dang / sems can gyi khams thams cad sgyu ma dang / gzugs brnyan dang / mnyam pa nyid dang / rkyen gyis ma brtsams pas phyi dang nang gi yul rnam par dben pa dang /sems phyi rol du lta bas mtshan ma med pa'i byin gyi rlabs dang ldan pa rnams rim gyis sa'i rim pa'i ting nge 'dzin gyi yul la rjes su 'jug na/ khams gsum dag gi sems sgyu mar shin tu mos par rab tu bsgom pa sgyu ma lta bu'i ting nge 'dzin rab tu thob par 'gyur ro//blo gros chen po de lta bas na bdag gi sems snang ba med pa tsam la 'jug pas shes rab kyi pha rol tu phyin pa la gnas pa rjes su thob pa skye ba dang / bya ba dang bral ba'i byang chub sems dpa' rnams ting nge 'dzin rdo rje'i gzugs lta bu de bzhin gshegs pa'i sku'i rjes su song ba de bzhin nyid kyi sprul pa dang ldan pa'i stobs dang /mngon par shes pa dang / dbang dang / snying brtse ba dang / snying rje dang / thabs kyis brgyan pa sangs rgyas thams cad kyi zhing gi mu stegs can gyi gnas su nye bar 'gro ba'i sems dang / yid dang / yid kyi rnam par shes pa dang bral nas rim gyis gnas 'phos pa'i de bzhin gshegs pa'i sku rab tu thob par 'gyur ro//blo gros chen po de bas na byang chub sems dpa' sems dpa' chen po de bzhin gshegs pa'i sku'i rjes su 'brang ba rab tu thob pa rnams kyi phung po dang khams dang skye mched dang /sems dang / rgyu dang / rkyen dang / bya ba dang ldan pa dang / skye ba dang / gnas pa dang / 'jig pa'i rnam par rtog pa'i spros pa dang bral bar sems tsam gyi rjes su 'brang bar bya'o zhes gsungs pas sgyu ma lta bu'i ting nge 'dzin la snyoms par zhugs pa rnams kyis kyang ji srid du don dam pa'i bden pa mngon par rtogs pa thob pa ma yin pa de srid kyi bar du ni phyir ldog par 'gyur ba yin no//de ci'i phyir zhe na/ ji srid du snang ba gsum rnam par dag par ma gyur pa de srid du ni rnam par shes pa'i kun du rtog pa'o/ /ji srid du kun du rtog pa de srid du ni nyon mongs pa'i bag chags kyi rgyun no//nyon mongs pa'i bag chags kyi rgyun gyis ni yang srid par 'gyur ba yin la/ gang sems dpa' gzhan dag dang bral ba de ni rnam par dag pa'i gnas te/ ji skad du dpal mchog dang po zhes bya ba'i rnal 'byor gyi rgyud las kyang 'di lta ste 'dod chags rnam par dag pa'i gnas de ni byang chub sems dpa'i gnas so//'di lta ste/ zhe sdang rnam par dag pa'i gnas de ni byang chub sems dpa'i gnas so/ /'di lta ste gti mug rnam par dag pa'i gnas de ni byang chub sems dpa'i gnas so zhes gsungs pa dang / rdo rje slob dpon kam+ba la'i zhal snga nas kyis kyang nang gi bdag nyid sgrub thabs las sgra ji bzhin pa'i rang bzhin sbom por bshad la/de bzhin du sems dpa'i rang bzhin ni phra ba ste/ sems dpa' dang bral ba ni rnal 'byor pa rnams kyi mchog gi gnas so zhes bshad pa'i phyir ro/ /gang rigs pa 'dis mngon par byang chub pa'i rim pa 'dis 'od gsal ba yang dag pa thob par gyur pa de'i lus dang ngag dang sems dri ma med pa'i ngo bo nyid thams cad stong pa nyid yin pas rnam par shes pa gsum rnam par dag pa'i shes rab kyi pha rol tu phyin pa'i ngo bo nyid la ni sems pa med cing smra ba med pa gang yin pa 'di ni mya ngan las 'das pa'i khams te/gzugs med pa/ reg par dka' ba/ las dang skye ba las rnam par grol ba/ nyi ma dang / zla ba dang / me dang / nor bu'i 'od kyis ngo bo nyid bzhin du gsal ba'o/ /de las ni mun pa'i snang ba ste snang ba nye bar thob pa la sogs par 'gyur ro//snang ba nye bar thob pa las gsal ba'i nyi ma'i 'od kyi snang ba'i tsha ba'i ngo bo snang ba mched pa 'byung bar 'gyur ro/ /de las ni gsal ba zla ba'i 'od zer bsil ba'i ngo bo nyid kyi snang bas khyab pa shes rab kyi ye shes 'byung bar 'gyur ro/ /dpal mchog dang po las kyang /nam mkha' las ni nam mkha' 'byung / /thams cad stong pa nam mkha' che/ /zhes gsungs so/ /de bas na stong pa nyid gzhi gcig tu gyur pa'i snang ba'i tshogs nam mkha' snang byed lta bus 'jig rten gyi khams thams cad snang bar byas te/ khams phra ba dang lhan cig tu grib ma dang 'dra bar gcad du med pa dang gzhig tu med pa'i rdo rje'i sku'i ngo bo nyid 'pho ba med cing zag pa med pas nyon mongs pa'i bag chags thams cad las rnam par grol ba 'dod pa tsam gyis dbang du gyur pa thob pa chu las nya lta bu'am/myur bar gnyid log cing sad pa bzhin du mchog tu dga' ba'i lus kyi ngo bo nyid kyi gzugs 'byung bar 'gyur ba'i gzugs kyi bdag nyid can gyi ming ni rdo rje 'chang chen po zhes bya'o//'khor ba'i 'ching ba las nges par grol bas na thar pa zhes bya'o/ /don 'di nyid gsal bar bya ba'i phyir dpal gsang ba grub pa las /rang gis rig pa'i de kho na/ /gzhan gyis brjod las mi 'byung ste/ /mos dang bsgoms pas rtogs 'gyur gyi/ /dam tshig de ni gzhan du min/ /de nyid de nyid min spangs te/ /mos pa'i bsam pas nyin mtshan du/ /zhi ba'i go 'phang bla na med/ /mchog tu mya ngan 'das pa der//de dang de mos pa yi mthus/ /bsgoms pa'i stobs kyis gang sprul pa/ /der ni skye bar 'gyur ba'i gzugs/ /kun dga' las 'byung mchog skyes pa'ang / /skad cig tsam gyis 'byung ba ste/ /spro dang sdud par byed pa'o/ /khams gsum 'di dag thams cad kyi //'gro dang mi 'gro bcas snang byed/ /bsgom pa'i de nyid mthu yis ni/ /thabs shes bdag nyid can zhi ba/ /nyon mongs kun las rnam grol zhing / /mtshan rnams kun gyis rab brgyan par/ /stong nyid ye shes las byung ba/ /gnyis med mchog tu zhi ba nyid/ /rnam pa kun gyi mchog ldan zhing //gzung dang 'dzin pa rnam spangs pa/ /ye shes sgyu ma 'dra zhing dag /'od gsal rang bzhin dri ma med/ /sgra dang dri dang ro las 'das/ /de bzhin reg pa rnam spangs pa/ /ting 'dzin ye shes mig can gyi/ /mchog gcig gis ni mthong bar 'gyur//grib ma sgyu ma lta bu'i mchog /mchog gi dbyibs dang yang dag ldan/ /ye shes chu rlabs 'phros pa yis/ /rnam pa sna tshogs dpag med gzugs/ /'ja' tshon lta bu'i lus nyid ni/ /de nyid bsgoms pas thob par 'gyur/ /bsgom pa'i sbyor ba'i stobs kyis ni//dam tshig dag ni bsrungs pa yis/ /rgyal bas kyang ni brjod med pa'i/ /'di 'dra'i gzugs ni thob par 'gyur/ /gang du ser sna'i gnas gyur pa'i/ /lus ngag yid dang bral ba'i mchog /der ni yang dag bstan dbang gis/ /rang gi gzugs ni rnam par bsgom//e ma'o shin tu rmad byed pa / /e ma'o zhi ba dbang po 'das/ /e ma'o mchog tu zab pa nyid/ /sangs rgyas nyid kyi gnas mchog yin/ /zhes bshad pa dang / ldang ba'i rim pa 'di nyid gsang ba 'dus pa zhes bya ba rnal 'byor chen po'i rgyud las de bzhin gshegs pa rnams kyis gsungs te/e ma'o rdo rje e rdo rje/ /e ma'o rdo rje chos bstan pa/ /gang du lus ngag sems med pa/ /der ni gzugs su rnam par bsgom/ /zhes gsungs pa dang / rje btsun gyi zhal snga nas kyis kyang / khong stong khyod kyi sku la med/ /sha dang rus pa khrag kyang med//nam mkha' la ni 'ja' tshon ltar/ /khyed kyi sku ni ston par mdzad/ /sku la bsnyun med mi gtsang med/ /bkres dang skom pa 'byung med kyang / /khyed ni 'jig rten 'jug pa'i phyir/ /'jig rten bya ba ston par byed/ /ces bshad pa dang / rtog pa kun las btus pa las kyang /dag pa'i sems ni gzung gyur na/ /rdo rje lus ni rnam bsgoms pas/ /brtan lus khong stong ma yin pa/ /rdo rje'i sku ni des thob 'gyur/ /zhes gsungs pa dang / ting nge 'dzin rgyal po'i mdo las/ zla 'od gzhon nur gyur pas kyang de bzhin gshegs pa'i skur bshad de/ nam mkha' 'dra zhing rdul bral gzugs bzang 'chang / /shes rab sras po lus dang mtshan mi mnga'/ /yon tan rgya mtsho rab zab thugs rje can/ /mtshungs med phyag ni bdag gi spyi bor zhog /ces gsungs pa dang / 'phags pa shes rab kyi pha rol tu phyin pa brgyad stong pa las kyang rab 'byor gyis smras pa/lha'i bu dag mya ngan las 'das pa yang rmi lam lta bu sgyu ma lta bur smra'o/ /mya ngan las 'das pa las ches lhag pa'i chos gzhan zhig yod kyang de yang rmi lam lta bu sgyu ma lta bur smra'o zhes gsungs pas so/ /de nas de nyid kyi khyad par ni gzugs can ma yin pa dang /gzugs med pa ma yin pa dang / bden pa ma yin pa dang / brdzun pa ma yin pa dang / dngos po ma yin pa dang / dngos po med pa ma yin pa dang / rtag pa med pa dang / chad pa med pa dang / rnam pa dang bcas pa ma yin pa dang /rnam pa med pa ma yin pa dang / chos ma yin pa dang / chos ma yin pa'ang ma yin pa dang / kun nas nyon mongs pa ma yin pa dang / rnam par byang ba ma yin pa dang / 'khor ba ma yin pa dang / mya ngan las 'das pa ma yin pa dang / rtag pa ma yin pa dang / mi rtag pa ma yin pa dang /bdag ma yin pa dang / gzhan gyi bdag nyid ma yin pa dang / nang ma yin pa dang / phyi rol ma yin pa dang / 'jig rten pa ma yin pa dang / 'jig rten las 'das pa ma yin pa dang / gnyis pa ma yin pa dang / gnyis su med pa ma yin pa zhes bya ba'o//zung du 'jug pa'i sku yongs su rdzogs pa 'di ming gi rnam grangs 'ga' zhig la 'jug par bya ste/ rig pa chen po'i skyes bu'i gzugs dang / bden pa gnyis kyi tshul la gnas pa dang / rang bzhin gyis 'od gsal ba'i bdag nyid can dang / thabs dang shes rab kyi bdag nyid can dang /'jig rten gsum gyi bdag nyid can dang / dus gsum gyi bdag nyid can dang / theg pa gsum gyi bdag nyid can dang / dkyil 'khor gsum gyi bdag nyid can dang / thabs kyi bdag nyid can dang / de bzhin du skyes bu dam pa dang / skyes bu mchog dang /skyes bu chen po dang / skyes bu cang shes dang / skyes bu dpa' bo dang / skyes bu brtan po dang / skyes bu 'dul ba dang / skyes bu 'dul ba po dang / skyes bu mchog dang / skyes bu kha lo sgyur ba dang / skyes bu seng ge dang / skyes bu nam mkha' dang /skyes bu thams cad kyi bdag nyid can dang / skyes bu dag pa'i bdag nyid can zhes bya ba dang / de bzhin du 'khor ba las rgal ba dang / skam sar phyin pa dang / bde ba thob pa dang / 'jigs pa med pa thob pa dang / pha rol tu 'gro bas 'bar ba dang / tsher ma dkrugs pa dang /spros pa med pa dang / dge slong dang / dgra bcom pa dang / zag pa zad pa dang / ci yang med pa dang / dge sbyong dang / bram ze dang / rgyal rigs dang / sangs rgyas kyi sras dang / nyon mongs pa med pa dang / dbang du gyur pa dang / sems rnam par grol ba dang /shes rab rnam par grol ba dang / kun shes pa dang / glang po chen po dang / bya ba byas pa dang / byed pa byas pa dang / khur bor ba dang / bdag gi don rjes su thob pa dang / srid pa sbyor ba yongs su zad pa dang / yang dag pa'i bkas sems rnam par grol ba dang /sems thams cad la dbang thob pa dang / mchog tu pha rol tu phyin pa dang / 'khor ba'i pha rol gyi mtha' la gnas pa dang / ye shes kyi sku dang / rang byung zhes bshad do/ /rdo rje lta bu'i ting nge 'dzin 'di nyid kyi khyad par bcom ldan 'das kyis dpa' bar 'gro ba'i ting nge 'dzin gyi mdo las kyang /gang gi dpa' bar 'gro ba'i ting nge 'dzin 'di dag thob pa'i skyes bu dam pa ni sangs rgyas thams cad kyi yul du mchis pa lags so/ /rang dbang gi ye shes la dbang bgyid pa lags so/ /dpa' bar 'gro ba'i ting nge 'dzin 'di ma thob pa'i phyir byang chub sems dpa' de la ni byang chub sems dpa' zhes nga mi smra'o//dpa' bar 'gro ba'i ting nge 'dzin 'di ma thob pa'i phyir byang chub sems dpa' de la ni mngon par shes pa thob pa'o zhes nga mi smra'o/ /dpa' bar 'gro ba'i ting nge 'dzin 'di ma thob pa'i phyir byang chub sems dpa' de la ni sbyang ba byas pa'o zhes nga mi smra'o//dpa' bar 'gro ba'i ting nge 'dzin 'di ma thob pa'i phyir byang chub sems dpa' de la ni sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / thabs dang ldan pa'o zhes nga mi smra'o/ / dpa' bar 'gro ba'i ting nge 'dzin 'di ma thob pa'i phyir byang chub sems dpa' de la ni mang du thos pa zhes nga mi smra'o/ /dpa' bar 'gro ba'i ting nge 'dzin 'di ma thob pa'i phyir byang chub sems dpa' de la ni spobs pa dang ldan pa'o zhes nga mi smra'o/ /rigs kyi bu dag de bas na nges par 'byung ba'i lam thams cad du nges par 'byung bar 'dod pa'i byang chub sems dpa' rlom sems thams cad med pa'i phyir dpa' bar 'gro ba'i ting nge 'dzin 'di la bslab par bya'o zhes gsungs so//mi gnas pa'i mya ngan las 'das pa'i khams bsdus pa'i the tshom gcod pa ste le'u brgyad pa'o// //rdo rje slob mas gsol pa/ thos pa dang bsam pa'i rang bzhin gyis 'bras bu dang bcas pa'i rim pas de kho na nyid rtogs pa yongs su gcod pa bla mas rjes su gnang ba byas pas thams cad mkhyen pa'i phun sum tshogs pa la slob par 'dod pa'i rnal 'byor pas rgyu'i gnas skabs su ji ltar gnas par bgyi/ji ltar bsgom par bgyi/ ji ltar brtul zhugs kyi spyod pa spyad par bgyi ba bcom ldan 'das rdo rje slob dpon ston pas lung bstan du gsol/ rdo rje slob dpon gyis smras pa/ sems dpa' chen po legs so legs so//khyad par gyi rgyu thob cing brtson 'grus 'bar ba rnams dang / lus dang srog la ltos pa med pa rnams kyis tshe 'di nyid la rang gi gzugs su 'dzin pa las yongs su log nas/ yon tan gyi dbang phyug brgyad kyi 'bras bu rdzogs par byed par 'dod pa rnams kyi the tshom med par bya ba'i phyir yongs su 'dri bar byed pa legs so legs so//dngos por 'dzin pa rnam par bsal nas thar pa 'dod pa rnams kyi sgom pa rnam par dag pa dang / spyod pa rnam par dag pa khyed la rim bzhin du bshad kyis nyon cig /'di la bden pa rnam pa gnyis gnyis su med pas rgyu dang 'bras bu dag kyang gnyis su med pa yin la/rgyu dang 'bras bu gnyis su med pas thob pa dang thob par bya ba dag kyang gnyis su med pa yin la/ thob pa dang thob par bya ba gnyis su med pas sgom pa dang bsgom par bya ba dag kyang gnyis su med pa ste/gnyis su med pa la ni sgrub pa po dang / sgrub pa dang / bsgrub par bya ba dmigs par mi 'gyur ro/ /de dmigs par mi 'gyur bas 'dis gang zhig la ni bsgom par bya ba'am/ su zhig spyod pa spyad par 'gyur zhes rnam par brtags nas slob par byed pa dang / yongs su rdzogs pa dag la khyad par med de/ mthong ba'i chos la mya ngan 'das/ /bya ba byas pa'ang de nyid yin/ /zhes bshad pa'i phyir ro/ /'on kyang gnas skabs kyi khyad par thob pa na ni rgyu dang 'bras bu dag kyang 'jig rten du snang ste/ gzhan du rgyu med pa'i nyes pa dang bcas par thal bar 'gyur ro//de bas na slob bzhin pa'i gnas skabs su ni sgom pa po dang sgom pa dang bsgom par bya ba dang / sgrub pa po dang / sgrub pa dang / bsgrub par bya ba'i spyod pa rnams kyang yod do zhes pa'am / med do zhes som nyir mi bya ste/ 'dir sgrub pa po ni kun rdzob kyi bden pa rtogs pa'o//sgrub pa ni don dam pa'i bden pa'o/ /bsgrub par bya ba ni gnyis su med pa'i ye shes so/ /de bas na rgyu dang 'bras bu dag gnyis su med par bya ba yongs su shes pa ni 'dir sgom pa nyid du bshad do / /ji skad du thams cad gsang ba'i rgyud las/ 'bras bus rgyu ni rgyas btab cing //rgyu yang 'bras bus rgyas btab par/ /bsgom gyi gzhan du dngos grub ni/ /bskal pa bye bar 'byung mi 'gyur/ /zhes gsungs pas so/ /spyod pa rnam par dag pa bshad pa ni/ gnyis su med pa'i ye shes rtogs par gyur nas mnyam par gzhag pa dang /mnyam par ma bzhag pa'i gnas skabs su gnyis su med par 'gyur la/ de gnyis su med na su zhig spyod pa rnams spyod de/ ji ltar byed pa po med par gyur pas bya ba rnams kyang med par 'gyur ba ni 'jig rten na nges pa yin no/ /yang brtul zhugs kyi spyod pa med par thog ma med pa'i nyon mongs pa'i bag chags zad par bya bar ni mi nus so//zhes lung las bshad pa dang 'jig rten du grags so/ /ji skad du gsang ba 'dus pa'i rgyud las/ rdo rje sems dpa' rgyal po che/ /yang dang yang du bskul bar bya/ /zhes gsungs pa dang / ji skad du gsang ba grub pa las kyang /rkang brgyad bya ba spangs na ni/ /'khor ba'i tshogs ni dor nas su/ /rtag tu brtson dang ldan yid kyis/ /rdo rje sems mchog bsgrub par bya/ /'gyod dang gnyid dang rmugs la sogs/ /rab tu 'bad de spang bar bya/ /gzhan du bskal pa bye bar ni/ /brgyar yang 'grub par mi 'gyur ro//zhes gsungs so/ /de bas na mtshan ma med pa'i ting nge 'dzin la snyoms par zhugs pas thog ma med pa'i nyon mongs pa'i bag chags kyi stobs spangs nas/ lhun gyis grub pa'i 'bras bu thob par 'dod pas spyod pa spyad na spyod do zhe'am mi spyod do zhes bya ba'i yid la byed pa spangs nas 'jig rten gyi chos brgyad zil gyis mnan te/ji skad du bshad pa'i rnal 'byor gyi spyod pa la spyad par bya'o/ /de bas na yang dag par gyur pa'i spyod pa de bla ma'i zhal snga nas kyi drin gyis ci nus par rnam par dbye bar bya'o/ /de la thog ma kho nar bcom ldan 'das spyod pa mdzad pa'i spyod pa byang chub sems dpa'i gnas skabs su gling la sogs pa la gzigs par mdzad de dga' ldan gyi gnas nas bab par mdzad nas rgyud la sogs pa'i tshul rnam pa bzhir bstan te/'dod chags dang bral ba'i gzugs su mngon par sprul nas/ dman pa la mos pa rnams la 'phags pa'i bden pa rnam pa bzhi rtogs par mdzad cing 'dod chags dang bral ba'i spyod pa bstan pa dang /yang rgya chen po la mngon par zhen pa rnams la rnam par shes pa'i tshogs brgyad la sogs pa chos bdag med pa rtogs par mdzad cing sa dang pha rol tu phyin pa'i spyod pa ston par mdzad pa dang /yang 'khor los sgyur ba'i gzugs su mngon par sprul nas/ zab mo la lhag par mos pa rnams la 'dod chags kyis bden pa gnyis rtogs par bya ba'i phyir 'dod chags kyi chos ston par mdzad pa yin no/ /de bas na bden pa gnyis yongs su gzung ba'i lus dngos po'i don ma lus pa yongs su gcod par byed cing bde ba chen po'i 'bras bu'i mchog la mngon par dga' ba rnams la nyan thos dang mdo sde'i tshul dang ldan pa'i spyod pa ma gsungs te/gang gi phyir nyan thos la sogs pa ni dman pa la lhag par mos shing rnam par rtog pa la spyod pa/bdag la bsgrub pa dang bral ba/ sbyin pa dang tshul khrims la sogs pa'i bya ba'i lam la zhugs pa/ de kho na nyid kyi ye shes la dad pa med pa/ thar pa dang rgyang ring ba zhes bya ba bde ba'i thabs ma rtogs pa sbyangs pa'i yon tan bcu gnyis la sogs pa spyod pa dga' ba rnams kyis dus ring por byang chub tshol bar byed mod kyi/'on kyang thob par mi byed de/ rdzogs pa'i rim pa ma rtogs shing khong du ma chud pa'i phyir ro/ /de bas na 'di ltar bcom ldan 'das kyis/ gang zhig dge slong dngos gnas dang / /gang yang rtog la dga' ba'i mi//gang zhig rgan por gnas gyur pa/ /de la de nyid mi bstan to/ /zhes gsungs pa dang / rnam par snang mdzad mngon par byang chub pa'i spyod pa'i rgyud las kyang / thabs dang mi ldan ye shes dang / /bslab pa dag kyang bshad pa ni/ /dpa' bo chen pos nyan thos rnams//de la gzud pa'i phyir bshad do/ /zhes gsungs pa dang / rtsa ba'i mdo las kyang / dge ba bcu yi las kyi lam/ /byed pa ye shes spangs pa'o/ /zhes gsungs pa dang / de bas na bcom ldan 'das kyis/ dge slong nyan thos theg pa la mi bslab/ /byang chub spyod pa de la bslab bya ste//byang chub spyod pa sangs rgyas yon tan dang / /gleng gzhi 'di las rang 'byung dag tu 'gyur/ /zhes gsungs so/ /de bas na khyad par gyi rgyu las khyad par gyi 'bras bu 'byung bar 'gyur ro/ /de bzhin du gzugs la sogs pa'i 'dod pa lnga'i yul rnams la khyad par gyi longs spyod kyi ngo bor gyur pas khyad par gyi 'bras bu thob par 'gyur ba yin par shes par bya'o//gzhan du spyod pa dka' ba rnams kyis sems rtse gcig pa 'thob par mi 'gyur te/ dbang po lnga tshar bcad pa'i phyir ro/ /ji skad du bcom ldan 'das kyis dpal mchog dang po'i rgyud las/dka' thub sdom pa mi bzad pas/ /lus skam 'gyur zhing sdug bsngal la/ /sdug bsngal gyis ni sems g.yengs pas/ /g.yengs pas dngos grub gzhan du 'gyur/ /zhes gsungs pa dang / rtsa ba'i rgyud las kyang / dka' thub dka' spyad mi bzad pas/ / bsten na 'grub par mi 'gyur gyi/ /'dod pa kun la longs spyod cing / /bsten na myur du 'grub par 'gyur/ /zhes gsungs pas so/ /rdo rje slob mas gsol pa/ 'dod chags zhe sdang gti mug ste/ /'di dag 'jig rten dug gsum mo/ /zhes gsungs pa dang / de bzhin du gzugs la sogs pa'i yul rnams ni nyon mongs pa rab tu skye ba'i rgyur gyur pa yin pas ngan song gi rgyu yin par bcom ldan 'das kyis gsungs na/ji ltar na yang de dag bsten par gyur pas bla na med pa'i go 'phang 'grub par 'gyur ro zhes bgyi ba phan tshun 'gal bar mi 'gyur lags sam/rdo rje slob dpon gyis smras pa/ rdo rje slob ma khyod gang 'dod chags la spyod pa rnams kyi the tshom med par bya ba'i phyir / yongs su 'dri bar byed pa legs so legs so/ /de bas na don chen po bstan par bya yis nyon cig /nyon mongs pa rnams ni nyan thos la sogs pa dmigs par lta ba rnams kyi nyon mongs pa rnams kyi rkyen du 'gyur te/nyon mongs pa'i ngo bo nyid yongs su ma shes pa'i phyir ro/ /ngo bo nyid yongs su shes na ni byang chub kyi rgyur 'gyur ro zhes bcom ldan 'das kyis mdo sde dag las gsungs te/ ji skad du dpal mchog dang po zhes bya ba'i rnal 'byor chen po'i rgyud las kyang /'dod chags zhe sdang gti mug gsum/ /'dzin pas dug tu 'gyur ba yin/ /dug nyid nye bar zhi gyur na/ /dug ni dug med byas pa yin/ /bdud rtsi rim gyis brten nas ni/ /bdud rtsi nyid du 'gyur ba'ang yin/ /zhes gsungs pa dang /dkon mchog brtsegs pa'i mdo las kyang / 'od srungs 'di lta ste/ dper na grong khyer chen po'i lud gang yin pa de ni bu ram shing gi zhing dag dang / 'bras kyi zhing dag dang / rgun 'brum gyi zhing dag la phan par 'gyur ba yin no/ /'od srungs de bzhin du byang chub sems dpa'i nyon mongs pa'i lud gang yin pa de yang thams cad mkhyen pa nyid la phan par 'gyur ba yin no//'od srungs 'di lta ste dper na sngags dang sman gyis yongs su zin pa'i dug gis 'chi bar byed mi nus so/ /'od srungs de bzhin du shes rab dang thabs mkhas pas yongs su zin pa'i nyon mongs pa'i dug gis kyang log par ltung bar byed mi nus so zhes gsungs pa dang /gzhan yang 'dul ba don yod par grub pa zhes bya ba'i rnal 'byor chen po'i rgyud las kyang / gang gis blun po 'ching gyur pa/ /de yis mkhas pa yongs grol zhes/ /byang chub rnam par bsgoms nas ni//'di dag thams cad phyin ci log /gang gis rmongs pa 'ching 'gyur zhing / /ngu 'bod mthar ni nges 'gyur ba/ /de nyid kyis ni grol 'gyur zhing / /shes rab stobs kyis bde ba thob/ /ces gsungs te/ rigs pa 'dis ni khyad par can bskul bar 'gyur ba dang /khyad par can gyis yongs su bskul bar gyur pas khyad par can gyi 'bras bu yid du 'ong ba skyed pa'i rgyur gyur par zhugs pa'i bla na med pa'i bde ba chen po'i 'bras bu thob par bya ba la sgrub pa gzhan med de/ de'i don du de nyid kyis bza' ba dang gnas la sogs pa bde ba rnams kyis yon tan gyi dbang phyug brgyad la sogs pa dang ldan pa'i thams cad mkhyen pa'i phun sum tshogs pa mngon sum du byed par 'gyur ro//bde mchog las kyang / des na bde ba bde nyid kyis / /sangs rgyas thams cad nyid thob 'gyur/ /zhes gsungs so/ /de la 'dod chags las byung ba'i byang chub sems dpa'i spyod pa ni rnam pa gsum ste/'di lta ste/ spros pa dang bcas pa dang / spros pa med pa dang / shin tu spros pa med pa zhes bya ba'o/ /de la spros pa dang bcas pa'i spyod pa gang zhe na/ 'di lta ste/ de bzhin gshegs pa'i dbugs dbyung ba dang /rdo rje 'chang ba'i dbugs dbyung ba ji skad du bstan pa'i de bzhin gshegs pa thams cad kyi a ra li rgyas pa de ni spros pa dang bcas pa'o/ /de la spros pa med pa ni gang yin zhe na/ rtag tu khyab pa las dgos pa'i dbang du 'ga' zhig la rol pa de ni spros pa med pa'o/ /shin tu spros pa med pa gang yin zhe na/'du 'dzi thams cad rnam par spangs nas bsam gtan gyi zas dang / gnas pa 'ba' zhig dang / ye shes kyi phyag rgya dang / snyoms par 'jug pa las goms pa de ni shin tu spros pa med pa ste/ dper na shing tshig par gyur kyang thal bar 'gyur ro/ /tA la'i lo ma tshig par gyur kyang thal bar 'gyur ro//ras bal gyi lo ma tshig par gyur kyang thal bar 'gyur te thams cad kyang thal bar 'gyur ro/ /de bzhin du spyod pa gsum char gyis kyang rdo rje 'dzin pa'i go 'phang mngon par 'dod pa nyid skye bar 'gyur ro/ /yang sgrub pa po la ni de kho na nyid bsdus pa la sogs pa'i rgyud kyi rjes su 'brangs nas lag pa'i phyag rgya dang /glu'i mchod pa dang / stang stabs la sogs pa'i tshul dang / gar la sogs pa'i sbyor ba rtag tu brtson pa'i yid dang / nyin dang mtshan du spros pa dang bcas pa'i mchod pas phyag rgya chen po'i dngos grub sgrub par byed do/ / de bzhin du la la ni dpal mchog dang po la sogs pa rnal 'byor chen po'i rgyud la brten nas skyil mo krung gi 'dug stangs dang / nyams rnam pa dgu la sogs pa de bzhin gshegs pa thams cad kyi rol mo spros pa dang bcas pa'i spyod pas phyag rgya chen po'i go 'phang thob par byed do/ /gsang ba 'dus pa'i rgyud 'di las ni spros pa med pa dang shin tu spros pa med pa'i gnas 'ba' zhig ston to//da ni spros pa dang bcas pa'i spyod pa dpal sangs rgyas thams cad dang mnyam par sbyor ba mkha' 'gro ma sgyu ma bde ba'i mchog ces bya ba rnal 'byor chen po'i rgyud la 'jug par bya ste/ de nas yang dag bshad bya ba//rnam pa sna tshogs mchog gyur pa/ /sangs rgyas thams cad mnyam sbyor ba/ /mkha' 'gro sgyu ma bde ba'i mchog /gsang ba mchog gi dgyes pa na/ /thams cad bdag nyid rtag tu bzhugs/ /dpal ldan sangs rgyas kun gyi dngos/ /rdo rje sems dpa'i bde 'byung ba//de bzhin gshegs pa'i lha rdzas mchog /rin chen rgyan la sogs pas spras/ /dril bu rgyal mtshan mchog ldan pa'i/ /bla re dam pa bres pa na/ /rdo rje glu dang mchod la sogs/ /glu dang sil snyan rnam par 'phrul/ /me tog bdug pa'i sbyor ba dang / /mar me dri dang sogs ldan par//sangs rgyas thams cad mnyam sbyor ba/ /mkha' 'gro sgyu ma bde mchog bsgrub/ /yang na srid pa gsum dag gam/ /yang na bdag gi gnas dag gam/ /skyed mos tshal la sogs par bsgrub/ /der ni dang por gdan bsham ste / /'jam zhing reg na bde 'gyur ba//sna tshogs pad+mo ras kyis g.yogs/ /der ni thams cad dag pa'i gdan/ /sangs rgyas thams cad mnyam sbyor bas/ /sbyor ba'i dbang phyug rnam 'phrul bas/ /rdo rje sems dpa' dpal gyi lha/ /de ni rnam par 'phrul par mdzad/ /khams kyi rang bzhin thams cad dang //de bzhin srog dang rtsol las byung / /rang gi lha la mngon phyogs pa'i/ /grub pa'i phyag rgyas rab tu bskor/ /lugs ma'am yang na 'bur dang ni/ /mngon par 'dus byas legs bris pa/ /rnam pa sna tshogs gzugs brnyan ni/ /mtshan ma'i phyag rgya rab tu brtag /stan de dag ni thams cad la/ /ji ltar gnas pa bzhin du dgod/ /gru bzhi pa la sgo bzhi pa/ /rta babs bzhi yis mdzes par byas/ /rdo rje rin chen pad+ma sogs/ /sgo srung dang ni ldan par bya/ /rang gi lha dang ldan pa yi/ /bud med dag ni legs bslabs pa/ / skal bzang rang bzhin phyag rgyas mtshan/ /tshogs kyi dkyil 'khor brtag par bya/ /zhes gsungs pa'o/ / mdo'i tshig de rnams kyi don rgya cher dgrol bar bya ste/ de la dang po kho nas skyed mos tshal la sogs pa yid dang rjes su mthun pa rnam par dben pa'i gnas su tshul dang mi mthun pa la sogs pa skal ba ngan pa rnams dang bral ba'i gnas dag tu so phag las byas pa'i khang pa sum brtsegs la rgyan rnam pa sna tshogs dang ldan par byed du gzhug go//de la khang pa dang por ni tshang mang gzhag par bya'o/ /khang pa gnyis par ni pi wang la sogs pa glu gar dang rol mo'i mchod pa'i yo byad rnams gzhag par bya'o//khang pa gsum par ni rnal 'byor ma rnams dang lhan cig tu dpal sna tshogs skal ba bzang po'i mchog gnas par bya'o/ /yang na sa'i khang par rab tu brtan pa la sogs pa dang yang dag par ldan pa rgyan rnam pa sna tshogs dang / rdo rje'i rang bzhin gyi sa'i cha la shel dang /bai DUR+Ya dang / in+d+ra nI la dang / margad dang / pad+ma rA ga'i rang bzhin can ri'i rgyal po ri rab la rdo rje rtse mo can gyi gzhal yas khang du rnam par bsams te/ gru bzhi pa la sgo bzhi pa/ /rta babs bzhis ni mdzes par byas/ /thig bzhi dang ni yang dag ldan//ka ba brgyad kyis mdzes byas pa/ /dra ba dra ba phyed pas spras/ /dar dang me tog phreng bas brgyan/ /dril bu ba dan legs par mdzes/ /rnga yab la sogs rnams kyis brgyan/ /sgo yi mtshams ni thams cad dang / /mtshams su zla phyed rdo rjer ldan/ / skas dang rta babs sgo la sogs/ /sna tshogs pad+mas mdzes byas pa/ /zhes bya ba bstan te/ /der sgrub po bla ma las gnang ba thob pas rdzogs pa dang ma rdzogs pa'i rnal 'byor gyi dbang phyug rnams legs par mchod pa lhan cig spyod pa dang / rjes su spyod pa rnams dang lhan cig tu tha mal pa'i nga rgyal bsal ba rnams dang lhan cig tu 'dzem pa med par gyur pa'i sems kyis sems seng ge 'dra bas rim pa 'dis phyag rgya chen po sgrub pa la 'jug par bya'o//de la rim pa ni 'di yin te/ don dam pa'i bden pa la dmigs pa sngon du 'gro bas bdag la byin gyis brlab pa'i rim gyis rdo rje sems dpa'i skur bdag nyid bskyed la dkyil 'khor gyi bdag po'i tshul gyis 'dug nas gzugs kyi yul la spyod par byed do//de nas de bzhin gshegs pa thams cad bud med kyi sgyu ma lta bur rab tu bstan par bya ba'i phyir la la ni bde mchog sgyu ma lta bus 'dod chags kyi rgyud kyi ngo bo nyid kyis bcom ldan 'das kyi spyan sngar 'dug la/la la ni e ma'o bde ba lta bus rab tu dga' ba'i rgyud kyi ngo bo nyid kyis g.yas phyogs su gnas so/ /la la ni sgron ma lta bus drag po'i rgyud kyi ngo bo nyid kyis nub phyogs su gnas so/ /la la ni sha shi lta bus srog gi rgyud kyi ngo bo nyid kyis byang phyogs su gnas te 'di dag ni lhan cig spyod pa'o//la la ni sangs rgyas kyi byang chub lta bus gti mug rnam par spyod pa'i phyir shar lho'i mtshams su gnas so/ /la la ni chos kyi 'khor lo lta bus khams gsum rgal cing gnon pa'i gnas rnam par sbyong bas lho nub mtshams su gnas so//la la ni khams gsum rnam par rgyal ma lta bus zhe sdang rnam par bsal ba'i phyir nub byang mtshams su gnas so/ /la la ni 'dod pa'i lcug ma lta bus 'dod chags kyi mun pa bsal ba'i phyir byang shar gyi mtshams su gnas so//la la ni gling bu ma lta bus phyi rol gyi me'i phyogs su gnas so/ /la la ni rgyud mangs lta bus sgeg cing pi wang len pas khams gsum dbang du byed cing phyi rol gyi bden bral gyi phyogs su gnas so/ /la la ni rgyud gcig pa lta bus rnga bo che rdung zhing dug dang rims rnam par sel bas phyi rol gyi rlung gi phyogs su gnas so//la la ni rgyud stug po lta bus rdza rnga rdung zhing phyi rol gyi dbang ldan gyi phyogs su gnas so/ /la la ni rdo rje me tog ma lta bus lag na me tog thogs te phyi rol gyi shar lho'i mtshams su gnas so/ /la la ni rdo rje bdug pa ma lta bus spos khang thogs nas lho nub kyi mtshams su gnas so//la la ni rdo rje mar me ma lta bus mar me chen po thogs nas nub byang gi mtshams su gnas so/ /la la ni rdo rje byug pa ma lta bus dris yongs su gang ba'i dung phor thogs nas phyi rol gyi snam bu'i byang shar mtshams su gnas so//la la ni rta gdong lta bus rta mchog gi kha nas 'byung ba'i dbugs kyis srid pa gsum skems shing shar phyogs kyi sgo srung byed par gnas so/ /la la ni rdo rje phag gdong lta bus khams gsum thams cad sdud cing lho phyogs kyi sgo srung byed par gnas so/ /la la ni rdo rje snang ba'i gzugs kyis khams gsum la lta zhing nub phyogs kyi sgo srung byed par gnas so//la la ni thal ba rab tu 'jigs pa'i ro langs ma lta bus sa 'og dang sa steng dang mtho ris su dbugs 'byin cing thal bar gyur pa yang 'tsho bar byed de byang phyogs kyi sgo srung byed pas gnas so/ / de la bcom ldan 'das bde ba chen po 'khor los sgyur ba ni sngon byung ba'i tshul gyi bdag nyid can gyi ting nge 'dzin la dgongs pa sngon du 'gro bas rang gi sku'i dkyil 'khor la gnas pa'i de bzhin gshegs pa thams cad tshim par bya'o zhes khyad par gyi nga rgyal bskyed la/ dang po gzugs la sogs pa yul rnam pa gsum nyams su myong nas de'i rjes su sbyong ba la sogs pa cho ga rnam pa gsum gyis zas thams cad mngon par sbyangs la rang bzhin gyis grub pa'i nang gi thab khung rjes su dran te/ting nge 'dzin sems dpa'i zhal du rtse gsum pa'i me'i nang du sbyin sreg dbul lo zhes bya ba'i nga rgyal bskyed nas zas la spyad par bya ste/de'i 'og tu bde bar yongs su zhu nas ra sa ya nar 'gyur ro/ /de ltar sgrub pa pos bza' ba dang / bca' ba dang / btung ba rnams kyis sku rdo rje yang dag par tshim par byas la/ mthar rim pa 'dis lnga pa reg bya'i yul la spyod par bya ste/lhan cig spyod pa la sogs pa lha mo'i tshogs rjes su mnyes par byed pa la sogs pa mkhas pa la brten nas ji ltar mngon par 'dod pa'i phyag rgya blangs nas nye bar bzhag ste/ phyag rgya chen po'i dngos grub rdzogs par bya'o zhes lhag par mos pa brtan pa bskyed nas/A ling+ga Na dang / tsum+ba na dang / tsu sha na dang / na ga pra ha ra Na dang / sI ta ka ra dang / ko ki la dang / bung ba'i sgra dang / nA li yang dag par bskul ba la sogs pa byas nas/ de bzhin gshegs pa'i skyil mo krung dang / rdo rje'i skyil mo krung dang / rin po che'i skyil mo krung dang /pad+ma'i skyil mo krung dang / las kyi skyil mo krung la sogs pa bcas nas las la gnas par 'gyur ro/ /de nas rdo rje dang pad+ma yang dag par 'dus pa las thabs dang shes rab snyoms par zhugs pas phung po la sogs pa'i ngo bo nyid kyi de bzhin gshegs pa thams cad kyi spyi bo nas brtsams te/nA li bdun cu rtsa gnyis las dri ma med pa'i chu rgyun lta bus A li kA li 'ju bar gyur pas 'dod chags dang / 'dod chags dang bral ba dang / chags pa bar ma'i rim gyis 'bab po/ /de nas shes rab kyi pha rol tu phyin pa'i ngo bo nyid so so rang gis rig pa rdzogs par byed do//de ltar dpal bde ba chen po'i ting nge 'dzin la slob pa'i mchog thob pa'i rnal 'byor pas tshogs kyi dkyil 'khor de nyid du rjes su gzung ba dang / tshar gcod pas sems can rnams smin par byed do/ /gdul bya stong pa nyid kyi lta ba can la la dag la bcom ldan 'das dpal bde ba chen po de nyid rnam par snang mdzad kyi gzugs kyis zhi ba chen po'i ting nge 'dzin dang /stong pa ma yin mi stong min/ /zhes bya ba mi gnas pa'i mya ngan las 'das pa'i mtshan nyid can rab tu bstan nas stong pa nyid kyi lta ba can tshar gcod par mdzad do//de bzhin du shin tu gdug cing gdul bar dka' ba rnams la dpal rdo rje he ru ka'i khro bo'i rgyal po'i ting nge 'dzin gyis lta ba ngan pa tshar bcad nas phan 'dogs par mdzad do/ /log par lta ba rnams ni pad+ma gar gyi dbang phyug gi gzugs kyis don dam pa'i bden pa bstan nas dbang du mdzad do//shin tu dman zhing ser sna can brkam pa rnams la dpal rdo rje nyi ma'i gzugs dang / rgyas pa chen po'i ting nge 'dzin gyis nyon mongs pa'i lta ba tshar gcod par mdzad do/ /brtson 'grus shin tu dman pa rnams la ni rta mchog gi gzugs dang / drag po'i sbyor ba'i ting nge 'dzin gyis pha rol gnon pas brtson 'grus zhan pa rnams tshar gcod par mdzad do/ /de la bcom ldan 'das dpal bde ba chen po ni chos 'byung ba'i a ra li chen po'i rol pa'i ngo bo nyid rab tu brtan par bya ba'i phyir thugs gzhan du mi 'gyur ba dang / phan tshun rab tu dga' bar bya ba'i phyir rim pa 'dis sangs rgyas kyi rol mo mdzad de/phyag rgya dang / phyag rgya'i lan dang / phyag dang / phyag gi lan dang / mchod pa dang / mchod pa'i lan dang / gar dang / gar gyi lan dang / glu dang / glu'i lan dang / lus kyi brda dang / ngag gi brda tha snyad rnams su byed pa yin no//de la ngag gi brda bstan par bya ste/ oM a ti ho zhes pa ni brda'i phyag 'tshal lo zhes ston pa yin no/ /oM pra ti ka zhes pa ni slar phyag lan to/ /ts+tsheM ts+tsheM zhes bya ba ni slob dpon la phyag bya ba'o/ /b+hak+Sha ni zhugs shig pa'o/ /ts+tshoM ni legs par 'ongs sam zhes pa'o//ts+tsha ni 'dug shig zhes pa'o/ /khaM ni zo shig pa'o/ /kha ni rab tu zo shig pa'o/ /traM traM ni sha'o/ /shraM shraM ni khrag go/ /dreM dreM ni sha zo shig pa'o/ /dzaM phaM ni rdo rje'i chu'o/ /so ma ni bdud rtsi'i chu'o/ /i da ya ni chang ngo / /shaM pa ri ni btung ba'o//saM ba ri ni chu'o/ /su pri yaM ni me tog [(]ga[,]go[)]/ /san tsha yaM ni 'bras bu'o/ /dza la kaM ni gos so/ /skaM ni khyim mo/ /k+Sho rnams ni rang gi khyim mo/ /ka ma daM ni lha'i khang pa'o/ /k+She pa na ni dkyil 'khor ro/ /b+ho da na ni dkyil 'khor gyi slob dpon no/ /u pA ya ni slob ma'o//mi tra ta raM ni spun no/ /rany+dzi na ni lha mo'o/ /ko bi ta ni rdo rje rnal 'byor ma'o/ /tarma ri ni mkha' 'gro ma'o/ /bi gla ba ni ma'o/ /swa mu kha ni pha'o/ /ka yo kya ni bu'o/ /priM priM ni bu mo'o/ /ba hu la ni gzugs bzang ma'o/ /lo Ta Ta ni 'gro ba dang 'ong ba'o/ /baha ri ni zo shig pa'o//d+ha nu da ni rdzas byin cig pa'o/ /she she ni song shig pa'o/ /pre pre ni shog shig pa'o/ /traM ni med pa'o/ /bi tru mo ni khros pa'o/ /tsho ra ni gsad pa'o/ /dzi ba ni bsrung ba'o/ /nI ra ni chags pa dang bral ba'o/ /hri ni chags pa'o/ /dra ba ni rdzas so/ /rim pa bzhin du mchod pa ni su ra ta s+t+waM zhes brjod par bya'o//rang gi lha rjes su dran pa la su ra to haM zhes brjod par bya'o/ /a nu ta rA ga yA mi zhes bya ba ni lan te rdo rje sems dpa'i sgrub pa la'o/ /dpal rdo rje rnam par snang mdzad kyi sgrub pa la ni a nu bo da yA mi zhes bya ba lan yin no/ /dpal he ru ka'i rdo rje sgrub pa ni a nu mo da yA mi zhes bya ba lan yin no//dpal pad+ma gar gyi dbang phyug gi sgrub pa la ni yang a nu rA ga yA mi zhes bya ba lan yin no/ /rta mchog gi sgrub pa la ni a nu baR+Sha yA mi zhes bya ba lan yin no/ /lha mo gang yin pa rnams kyi mchod pa'i lan yin te/sa ma ya s+t+waM zhes bya ba'i tshig lngas so/ /rang gi lha rjes su dran par bya ba la ni sa ma yo haM zhes bya ba'i tshig gis ni dpal rdo rje sems dpa'i dkyil 'khor te tshogs kyi mchod pa'o/ /ngag gi brda'i le'u'i rim pa'o/ / da ni lus kyi brda bstan par bya ste/ spyi bor nyug pa ni phyag 'tshal ba'o/ /dpral bar reg pa ni phyag gi lan no//g.yas pa'i smin ma bskyod pa ni sku'i dngos grub po/ /g.yon pas ni rnam par rgyal ba'o/ /mig g.yon pa la reg pa ni bud med bzang mo yin zhes pa'o/ /g.yas pas ni skyes pa bzang po'o/ /rna ba g.yon pa la reg pa ni legs par 'ongs pa'o/ / g.yas pas ni legs par smras pa'o/ /sna khung g.yas pa la reg pa ni spos so/ /g.yon pa la ni dri slong ba'o/ /lce g.yas su sgul ba ni sha'o/ /g.yon du ni chang slong ba'o/ /mchan khung g.yon par reg pa ni zas so/ /g.yas par reg pa ni tshod mo slong ba'o//lus kyi brda'i le'u'i rim pa'o/ / de ltar 'jig rten pa'i bsam gtan rnam par bsal zhing yid la re ba rnams spangs nas rtag tu dga' ba'i yid can gyi rnal 'byor pa rnams dang lhan cig dga' bzhin pas ni ji ltar rgyal po in+d+ra b+hU ti dang 'dra bar phung po'i khog pa brjes te/rdo rje'i lus su gyur nas btsun mo'i tshogs dang lhan cig tu mi snang bar gyur te/ yon tan brgyad dang ldan pas sangs rgyas kyi zhing nas sangs rgyas kyi zhing du 'gro ste ji skad du rtsa ba'i mdo las/ lha mo kun gyi longs spyod la/ /ci bde bar ni brten bya ba/ /bdag ni che ba'i lhar sbyor bas//bdag la bdag gis rab tu mchod/ /rnal 'byor thams cad bde ba yi/ /rjes su sbyor bas mchod byed cing / /rtag tu myong bar byed pa na/ /shin tu sbyor bas rab 'grub 'gyur/ /sangs rgyas thams cad bdag nyid kyi/ /ra sa ya na'i bde ba des/ /rdo rje sems dpa'i dpal tshe dang //lang tsho nad med bde mchog 'grub/ /sangs rgyas kun gyi sku chen dang / /sangs rgyas kun gyi gsung snyan dang / /sangs rgyas kun gyi thugs chen po/ /sangs rgyas kun gyi mchod pa che/ /sangs rgyas kun gyi rgyal chen po/ /rdo rje 'dzin pa kun gyi bdag /'jig rten dbang phyug kun gyi gtso/ / rin chen dbang phyug kun gyi bdag /de dag dang ni dga' spyod na/ /'dod pa bzhin du 'gro 'ong lding / /lha mo thams cad grub chen po/ /'khor los sgyur ba rab tu 'grub/ /ces gsungs pa'i phyir ro/ /yang na 'byor pa chung ba rnams kyis bshad ma thag pa'i rim pas rol mo'i spros pa rgya che ba dang /rtag tu phun sum tshogs par mi nus pa des ni spros pa med pa dang shin tu spros pa med pa 'di nyid bde mchog tu bstan pa'i spyod pa bshad par bya ste/ nyin re'am yang na zla re'am/ /yang na de bzhin lo rer ni/ /ji bzhin byin gyis brlabs nas kyang //sangs rgyas bde mchog gar bya'o/ /zhes bya ba dang / langs pa'am ni 'dug pa'am/ /'chag gam ji ltar gnas pa dang / /dgod dam rab tu smra yang rung / /gang na ji ltar spyod kyang rung / /zhes bya ba dang / dbang po gang dang gang lam gyur/ /de dang de yi ngo bor bya//mnyam par ma bzhag sbyor ba yis/ /thams cad sangs rgyas rang bzhin bya/ /zhes gsungs pa'i phyir ro/ /'dod chags chos kyi tshul bstan pa'i/ /rnam par rol pa spros pa ni/ /nam mkha' mnyam pas mkha' lta bu/ /mtha' med rgya mtsho dag dang mtshungs//slob mas khong du chud pa'i phyir/ /dngos po tsam zhig blangs pa yin/ /'dod chags bstan par bya ba ni/ /skye ba du mas bshad nus sam/ /dpal sangs rgyas thams cad dang mnyam par sbyor ba mkha' 'gro ma sgyu ma bde ba'i mchog gi tshul las/ byang chub sems dpa' sems dpa' chen po'i spyod pa chos 'byung ba'i mngon par byang chub pa'i spros pa dang bcas pa bsdus pa'i the tshom gcod pa ste le'u dgu pa'o// //rdo rje slob mas gsol pa/ spros pa dang bcas pa'i spyod pa ni yongs su gsal bar gyur lags na/ spros pa med pa'i spyod pa bcom ldan 'das rdo rje slob dpon ston pas bshad du gsol/rdo rje slob dpon gyis smras pa/ sems can chen po legs so legs so/ /dpal gsang ba 'dus pa zhes bya ba rnal 'byor chen po'i rgyud kyi man ngag gis rab tu bstan par bya yis/ rtse gcig pa'i yid kyis nyon cig /ri bo shin tu dben pa dang / /dgon pa chen po'i sa phyogs na / /'bras bu me tog rnams kyis brgyan/ /'dir ni bsam gtan bsdus pa'o/ /zhes bya ba la sogs pa rgyud las gsungs pa'i yid dang rjes su mthun pa'i sa phyogs su sa'i khang pa ji skad du bshad pa bzhin mngon par sbyangs la der zur bzhi la sogs pa'i yon tan dang ldan pa'i rdo rje nor bu'i rtse mo can gyi gzhal yas khang bskyed la/de'i 'og tu tha mal pa'i nga rgyal dang bral ba'i rnal 'byor pa chen pos phyi rol gyi phyag rgya mngon par sbyangs la rigs gcig tu gtogs pa'i rang gi slob ma dang lhan cig tu 'og nas bshad pa'i rim gyis phyag rgya chen po sgrub pa brtsam par bya'o//de'i rim pa ni 'di yin te/ dang po kho nar don dam pa'i bden pa la dmigs nas bdag la byin gyis brlab pa'i rim gyis mi bskyod pa phyung ste rjes su bcug nas dkyil 'khor gyi bdag po nyid du gnas la/de nas tha mal pa'i nga rgyal bsal te/ mi phyed pa'i 'khor rnams rang gi sku'i dkyil 'khor lta bu'i yan lag tu gyur pa'i rnam par snang mdzad la sogs pa'i dkyil 'khor gyi lha rnams su lhag par mos pas dkyil 'khor gyi 'khor lo'i lha ma lus pa rjes su mnyes par byas la rang gi phyag rgya dang lhan cig ril por 'dzin pa'am/gzhig pa'i rim gyis don dam pa'i bden pa la 'jug go/ /de nas spyan la sogs pa'i lha mo rnams kyis tshangs pa'i gnas bzhi'i don gyi rdo rje sems khyod ces bya ba la sogs pa'i tshigs su bcad pa rnams kyis yang dag par bskul bas bdag la byin gyis brlab pa'i rim gyis skad cig gis langs nas mchog tu dga' ba'i ro myang bar bya ba'i phyir nyams rnam pa dgus rol pa mdzad do//de ltar yang nas yang du yang dag pa'i mtha' la rab tu zhugs nas yang nas yang du bzhengs te/de bzhin gshegs pa lnga'i ngo bo nyid du gyur pas 'dod pa'i yon tan lnga rnams myong bar mdzad de/ ji ltar yid zhum par mi 'gyur ba de ltar de bzhin gshegs pa thams cad kyi a ra li rdzogs par byed de/ de la rang gi gzugs la sogs pa gzugs kyi yul rnam pa gsum la rjes su spyod pa byed pa dang /glu dang pi wang la sogs pa'i sgra'i yul rnam pa gsum la rjes su spyod par byed pa dang / spos dang me tog la sogs pa dri rnam pa gsum la rjes su spyod par byed pa dang / kha ba dang / tsha ba dang / bska ba dang /skyur ba dang / lan tshwa la sogs pa'i ro rnam pa gsum la rjes su spyod par byed do/ /de nas lo bcu drug ma skye gnas ma nyams shing nu ma mkhrang zhing rgyas pa'i na chung ji lta bu'i sme sha can dang / btso blag mkhan dang / gar mkhan ma dang / phreng brgyud ma dang / mda' mkhan ma'am/bzo byed ma'am/ gzhan gang yang rung yan lag mi dman pa'am/ rtsa lag tu gyur pa'i bud med dang gzhan la'ang des bgrod par bya ste/ de nas rnam par mi rtog pa'i bdag nyid can gyi rnal 'byor pas bdag nyid dngos po thams cad kyi bdag nyid du bstan par bya ba'i phyir/'jig rten pas smad pa'i dam tshig rnams gang yin pa la spyad pa la sogs pa'i rim gyis mngon par 'dus byas la 'jig rten pa'i mtshan ma dmigs pa spangs te rab tu gsang ba'i gnas na 'dug ste longs spyad par bya'o/ /de bzhin du phyag rgya mi bcing ba dang /dkyil 'khor med pa dang / thab khung med pa dang / mchod rten gyi las mi bya ba dang / glegs bam mi klag pa dang / lus kyi ngal dub spang ba dang / ras ris dang shing dang rdo'i gzugs brnyan la phyag mi bya ba dang / nyan thos dang rang sangs rgyas rnams la skyabs su mi 'gro ba dang /tshes grangs dang byed pa dang thang cig dang / skad cig ma'i dus la ltos par mi byed de/ 'di dag thams cad ni nang gi bdag nyid kho nas rdzogs par byed do/ /gal te 'byor pa ma tshang bas bsdus pa'i dkyil 'khor rdzogs par bya bar mi nus par gyur na sgrub pa po des de kho na nyid rnam pa lngas kyang spros pa med pa'i spyod pa la rim pa 'dis bslab par bya'o//de'i rim pa ni 'di yin te/ la la ni gzugs rdo rje ma lta bus lag pa'i pad+ma 'jam pa dang / me long thogs nas zhi ba'i mig gis lta zhing mu tig gi chun 'phyang ma lus par 'khrol zhing rnam par phye ba dang /nu ma rgyas shing cung zad mnyen pa dang / gos grol zhing ro smad cung zad ston pas bde ba chen pos rjes su mnyes par bya ba'i phyir shar lho'i mtshams su gnas so/ /la la ni sgra rdo rje ma lta bus mig rnam par 'byed cing lta ba dang / sgeg pa'i nyams dang ldan pas rol cing 'gying bag dang bcas pas 'dod chags la spyod pa'i chos ston pa 'chad pa la mkhas shing dge ba'i gtam smra zhing rab tu glu len la ko ki la'i glu'i rjes su pi wang gi rol mo rab tu rdung bas lho nub kyi mtshams su gnas so//la la ni dri rdo rje ma lta bus 'dzum pa dang bcas pa'i mig gis lta bar byed cing sor mo mthon po bim+ba lta bu'i 'od kyis rnam par mdzes pa zangs ltar dmar zhing dra bas 'brel pa'i lag pa'i rtse mos gar byed pa lta bus nor bu'i rang bzhin gyi snod 'dzin cing gur kum dang /a ga ru dang / gla rtsi dang / tsan+dan sbrul gyi snying po dang / ga pur la sogs pa'i dri rnams kyis bsgos pas phyogs bcu ma lus pa dris khyab par byed pa'i dri'i snod thogs te nub byang gi mtshams su gnas so/ /la la ni ro rdo rje ma lta bus brtse ba dang bcas pa'i mig gis lta bar byed cing gser dang dngul la sogs pa dang /rin po che dpag tu med pa'i snod thogs te/ tshod ma rnam pa sna tshogs kyis bkang ba'i ro'i mchog rnams dang / lha'i kha zas bdud rtsi chen po dang bcas pa mthun pa'i kha zas thogs nas byang shar mtshams su gnas so//la la ni reg rdo rje ma lta bus lus mtshan thams cad kyis brgyan pa khro gnyer gsum gyis mngon par mdzes pa/ dbus shin tu phra ba rgyal mtshan ltar lte ba rgya che zhing g.yas phyogs su 'khyil zhing zab pa sku smad lci ba 'gros dal zhing shin tu sgeg pa bzhin 'dzum pa dang bcas shing zhi bas lta ba bde ba chen po rjes su mnyes par bya ba'i phyir phang par nye bar bzhag nas gnas so//de nas bde ba chen po'i dpal rab tu dga' ba'i spyod pa bstan par bya ba'i phyir/ A ling+ga na dang / tsum+pa na dang / cu sha na dang / ku tsa kra ha na dang / pu la ka tA Da na dang /da sha na kha da na dang / marda na dang / do la dang / sU tsi dang / kur pa ra la sogs pa'i ka ra na dang / rab tu rmongs pas mu tig gi chun 'phyang bskyed cing gdu bu dang / dbu rgyan dang / rkang gdub kyi sgra dang ldan par yul dang / dbang po dang / rdo rje dang / pad+ma dang /thabs dang / shes rab dang / ye shes dang / shes bya la snyoms par zhugs shing A li kA li dang / ma dan pa tra dang / kurma kaN+Tha dang / sha shAng+ka ste/ nA Di gsum t+yaM ku las rab tu bskul bas phung po la sogs pa'i ngo bo nyid kyi de bzhin gshegs pa thams cad dri ma med pa'i rgyun lta bus zhu bar gyur nas ye shes kyi sa thob nas mchog tu bde ba chen po'i gnas yang dag par rig par 'gyur ro//don 'di nyid gsal bar bya ba'i phyir/ rtsa ba'i mdo las/ chags can ye shes 'dod pa yis/ /rtag tu 'dod pa'i yon tan bsten/ /zhes gsungs pas so//gal te gzugs rdo rje la sogs pa dag kyang med na de'i tshe reg bya rdo rje gcig pu dang lhan cig pa'i kun du sbyor bas kyang bsgrub par bya ste/ gang gi phyir de bzhin gshegs pa thams cad ni sgrub pa po'i lus kyi dkyil 'khor gyi nang du 'dus pa yin la lha mo thams cad ni reg bya rdo rje'i lus kyi dkyil 'khor gyi nang du 'dus pa yin te/de bas na mi phyed pa'i nga rgyal gyis rnam par mi rtog par bslab par bya'o zhes rab tu bstan par bya ba'i phyir/ rtsa ba'i rgyud las kyang / de nas phyag na rdo rje de bzhin gshegs pa thams cad kyi bdag pos de bzhin gshegs pa thams cad kyi rig pa'i brtul zhugs yang dag par len pa'i spyod pa nyid kyi sku dang gsung dang thugs rdo rje las phyung ngo //sku gsung thugs kyi rdo rje rnams/ /lus dang ngag sems bsgoms pas ni/ /rang gi ngo bor de byas na/ /myur du dngos grub thob par 'gyur/ / de la 'di ni sku dang gsung dang thugs rdo rje'i rig pa'i brtul zhugs so/ /thor tshugs dbu rgyan can gyi gzugs/ /chen po kha dog dkar po 'dra/ /sngags kyi sdom pas kun tu bsdams/ /cho ga bzhin du thams cad bya/ /lo grangs bcu drug lon pa ni/ /rgyan rnams kun gyis rnam par bklubs //bzhin sdug mig ni dkyus ring pa/ /rnyed nas rig pa'i brtul zhugs spyad/ /spyan gyi go 'phang longs spyod pas/ /rdo rje mtshan mas bsgom par bya/ /phyag rgya sngags kyi cho ga shes/ /sngags dang rgyud ni legs par bslabs/ /de bzhin gshegs pa'i btsun mor bya//sangs rgyas byang chub rab gnas pa / /brtul zhugs chen po dus bzhir ni/ /gsang ba'i mchod pa rab tu bya/ /sdong bu rtsa ba 'bras bu yi / /bza' dang bca' ba spyad par bya/ /'on kyang myur du sangs rgyas 'gyur / /bdag po ye shes rgya mtsho che/ /zla ba drug gis de dag kun//gdon mi za bar 'grub par 'gyur/ /sgrub pa po ni blo brtan pas/ /nags tshal rtag tu bsod snyoms bslang / /kha zas bzang po bstar ba dag /skrag nas de dag ster bar 'gyur/ /'das na rdo rje gsum bdag nyid/ /rdo rje mi 'gyur ma rung 'gyur//lha mo klu mo gnod sbyin mo/ /lha ma yin nam mi mo'ang rung / /rnyed nas rig pa'i brtul zhugs spyad/ /rdo rje gsum gyi ye shes bsten/ /zhes gsungs te/ de ltar 'dod pa na spyod pa drug ste/ gnyis gnyis 'khyud pa dang / lag pa bcangs pa dang / bltas pa dang /dgod pa'i 'khrig pas mchog tu dga' ba'i bde ba skad cig skad cig la nyams su myong bar byed do/ /rdzogs pa'i gnas skabs na yang 'khor ba dag las rtag tu dga' ba'i gzugs can du 'gyur ro/ /don 'di nyid gsal bar bya ba'i phyir lha thams cad yang dag par 'dus pa'i rgyud las/dbang po gnyis ni mnyam sbyar te/ /rtsol ba'i cho ga'i 'og tu ni/ /dga' ba'i sems kyis thugs 'grub pa/ /bde ba chen po zhes bya'o/ /spros pa med pa'i spyod pa bsdus pa'i the tshom gcod pa ste le'u bcu pa'o// //da ni shin tu spros pa med pa'i spyod pa la 'jug par bya ste/ri bo shin tu dben pa'am/ /chu ngogs 'bab chu'i gnas rnams dang / /dur khrod la sogs gnas rnams su/ /bsam gtan bsdus pa 'di bya'o/ /zhes rgyud las gsungs pa'i yid dang rjes su mthun pa'i sa phyogs su kha zas sbyor ba'i phyir gnod sbyin mo mngag gzhug mo la sogs pa bsgrub par bya'o//yang na sgrub pa'i grogs mchog gam/ /tshogs chen po'i kha zas tsam bsgrubs nas rim pa 'dis shin tu spros pa med pa'i spyod pa la 'jug par bya'o/ /de'i rim pa ni 'di yin te/ de la dang po kho nar sgrub pa pos 'khor ba thog ma med pa can gyi sdug bsngal dran par byas la/mya ngan las 'das pa'i bde ba 'dod pas 'du 'dzi thams cad yongs su spang bar bya zhing tha na rgyal srid kyi dbang phyug la'ang sdug bsngal gyi 'du shes bsgom par bya'o/ /gnyis pa til 'bru tsam la'ang dngos por 'dzin pa'i blo spang bar bya'o/ /gsum pa don dam pa'i bden pa la dad pas lus dang srog la'ang ltos pa med par bya'o//ji skad du ting nge 'dzin rgyal po'i mdo las/ rigs kyi bu de bas na byang chub sems dpa' sems dpa' chen po ting nge 'dzin 'di 'dod cing myur du bla na med pa yang dag par rdzogs pa'i byang chub tu mngon par rdzogs par 'tshang rgya bar 'dod pas lus dang srog la ltos pa med par bya'o zhes gsungs pas so//de bzhin du 'jig rten pa'i dngos grub phra mo dang / grub pa chen po brgyad la don du gnyer bar mi bya ste/ rnam par g.yeng bar 'gyur ba dang / phyir ldog par 'gyur ba'i phyir ro/ /ji skad du thun mong ma yin pa'i gsang ba zhes bya ba'i rnal 'byor chen po'i rgyud las/de nas gzhan yang thams cad mkhyen pa'i dngos grub thob pa'i phyir dngos grub gang ci yang rung ba la tshol bar mi byed de/ 'jig rten rgyang pan pa'i ngag gi dngos grub dang / mngag gzhug pa'i dngos grub dang / bum pa bzang po'i dngos grub dang /sa 'og gi dngos grub dang / rgyal srid kyi dngos grub dang / rgyas pa'i dngos grub dang / dbang du bya ba'i dngos grub dang / mngon spyod kyi dngos grub rnams don du gnyer bar mi bya ste/ de ci'i phyir zhe na/ 'di ltar dngos grub chen po'i don du dngos grub phra mo la 'dod pa bskyed par mi bya'o//rnam par mi rtog pa'i dngos grub 'ba' zhig la sems rtse gcig par gyur par bya'o/ /de skad du gsang ba grub pa las kyang / sbyor ba la sogs 'bad pa ni/ /de nyid rig pas spang bar bya/ /rdo rje sems dpa' nges 'jug pa/ /spangs nas gzhan du mi bya'o/ / dag pa'i de nyid la gnas pas/ /sbyor ba rnams kyang mi bya ste/ /bdag nyid gnas pa'i sbyor ba yis/ /ji srid bar du so sor brtag /dngos med go 'phang la gnas dang / /thabs bzang dag dang ldan pa yis/ /rtog las gang ci'ang 'byung ba rnams/ /ma brtags par ni 'grub par 'gyur//bsgom pa'i sbyor ba'i stobs kyis ni/ /dngos grub mtshan nyid gang ci'ang rung / /de kun skad cig tsam la ni/ /rang nyid gnas par 'gyur ba yin/ /de bas na phyi rol gyi bud med rnam par spangs nas snying gar gnas pa'i ye shes kyi phyag rgya dang lhan cig snyoms par 'jug pas shin tu myur bar rdo rje 'chang chen po'i go 'phang rdzogs par bya'o zhes spros pas dmigs te/gcig pu kho nar 'og nas bshad pa'i rim pa bzhin du bsam par bya'o/ /de yi rim pa ni 'di yin te/ ji srid phung po'i za ma tog yod pa de srid kyi bar du ni rnam par shes pa gsum gyi ngo bo ste/rang bzhin gyis snang ba 'gro ba dag dang gzhan la snang bar 'gyur ro/ /ji lta zhe na/ dang po ni snang ba'o/ /gnyis pa ni rang bzhin no/ /de rlung dang bcas pas gang phyogs bcur 'khor ba ste/ gang gis she na/ 'dod chags dang bral ba dang /'dod chags bar ma la sogs pa dang / gzhan yang drag po dang / zhi ba dang / dga' ba dang / mya ngan dang / bkres pa dang / skom pa dang / tshor ba zhes bya ba la sogs pa rang bzhin brgya drug cu nyin mtshan du yid la byas nas ma rig pa rang 'gags shing yang langs nas rlung gi dbang gis 'khor bar 'gyur ba ste/des lus dkrugs nas ji srid du mig la sogs pa'i dbang po yul la dmigs pa de srid du de nyid du dmigs par 'gyur te/ thog ma med pa'i dus nas goms pa'i phyir ro/ /de nas skye ba gcig nas gcig tu goms pas bdag med pa'i chos la bslabs pas rnam par bsres pa'i sbyor ba khong du chud nas rang bzhin gyis snang ba dang gcig tu 'dre bar bya ste/rim pa 'dis don dam pa'i bden pa la dmigs par bya'o/ /de'i rim pa ni 'di yin te/ phung po la sogs pa ni khams phra ba la gzhug go/ / khams phra ba ni yang sems la gzhug go//sems ni yang ma rig pa la gzhug ste/ de ltar sbyar nas gnyid log par byed do/ /de la dus 'dir ni sems dang sems pa ma rig pa la rab tu zhugs pa'i skad cig la dran pa brjed pa'o/ /phyis ni brjod pa yang med pa'i ye shes kyi ngo bo nyid ni 'od gsal ba'o//yang grol ba na rlung gi rang bzhin rnyed de/ gang gi tshe rmi lam gzhan dag 'byung ba ni ji srid du rnam par shes pa mi g.yo ba de srid du gnyid log nas 'od gsal ba la blta ste/ de ni so so rang gis rig pa lus dang ngag dang sems dang bral ba'i don dam pa'i bden pa nang gi mngon par byang chub pa zhes bya'o//rim pa 'dis lus kyi dkyil 'khor la gnas pa'i de bzhin gshegs pa'i tshogs rnams gsad par bya zhing de bzhin nyid la gzhug par byas nas skal ba bzang po'i dngos grub thob par 'gyur te/ spros pa dang bcas pa dang spros pa med pa'i spyod pa la ltos pa med pas shin tu myur bar 'dir rang gi gzugs yongs su brjed par 'gyur ro zhes bya ba'i don te/don 'di nyid dgongs pa lung bstan pa zhes bya ba rnal 'byor chen po'i rgyud las/ gzugs sogs nang gi chos rnams ni/ /mthong ba lhag mthong zhes brjod la/ /mi bskyod la sogs grangs bzhin du/ /brtags pa dag ni zhi gnas yin//'di dag dngos med gyur pa yi / /de bzhin nyid ni zhi bar bshad/ /de bzhin nyid kyi dkyil 'khor du/ /rnal 'byor pa yis sangs rgyas gzhug /ces gsungs pa dang / yang lha thams cad yang dag par 'dus pa'i rgyud las kyang / mya ngan 'das pa'i mi bzad mes //thal ba'ang lus par mi 'gyur te/ /des na der ni dbang don dang / /khams rnams 'dir ni yod ma yin/ /zhes gsungs so/ /rim pa 'dis ni lung dang rigs pa dag gis mngon par rtogs pa'i ngo bo nyid sangs rgyas thams cad kyi yum nges par byas nas/ yul la zhen pa dang rol pa thams cad spangs te/rim pa 'dis b+hu su ku tsam gyi spyod pa la spyad de/ de'i rim pa ni 'di'o/ /b+hu zhes bya ba ni zas la spyod pa ste de tsam zhig rjes su dran pa dang 'du 'dzi spong bar byed cing dka' thub dang brtul zhugs so zhes gang la'ang bsam par mi bya'o/ /su zhes bya ba ni gnyid log pa ste rnam par shes pa 'di dag ma rig pas nye bar mtshon pas mngon sum du byed do//ma rig pa lcags kyu lta bu de nyid kyis rnam par shes pa gang la'ang 'dre bar mi byed de/ 'od gsal ba nyid mngon par 'du byed cing dri ma med pa'i ngo bo nyid do/ /ku zhes bya ba ni bshang sar 'gro ba ste/bshang ba dang gci ba 'dor ba'i phyir de tsam zhig rjes su dran par byed cing 'du 'dzi spong bar byed la/ lus dang tshor ba dang yul dang dbang po'i ngo bo nyid la sems par mi byed do/ /shin tu spros pa med pa'i spyod pa smyon pa'i brtul zhugs bshad pa'i mdo las gsungs pa'i rim pas kyang bshad par bya'o//de yi rim pa ni 'di yin te/ gang tshe brtan par mi rtog la/ /gnas shing 'jig rten pa spangs te/ /spyod pa thams cad bsdus byas na/ /de la de tshe sangs rgyas gzigs/ /kun du the tshom gcod pa yis/ /rigs pas byis pa ji bzhin spyad//gang tshe chags med rnal 'byor pa/ /de tshe phun sum tshogs 'phel 'gyur/ /sdig pa ma lus ldan pa dang / /gti mug sdig la rab gnas na/ /smyon pa'i brtul zhugs sbyor ba yis/ /zla ba drug gis don yod 'grub/ /rang nyid sangs rgyas kun mthong zhing / /'dod pa kun gyis rab tu 'gengs//zad med gzhom du med pa dang / /dang ba'i tshe lus 'byung bar 'gyur/ /bla na med pa'i byang chub mchog /'bad pa med par yang dag 'thob/ /'dod pa kun gyi dga' mos rnams/ /'bad dang bral bas 'grub par 'gyur/ /'gro dang 'dug dang gnas pa na//mchog tu zab pa'i gnas la brtag /'od gsal ye shes la mkhas pa/ /mtshan nyid rtag par rnal 'byor pa'i/ /bsam gtan sbyor ba 'di yis ni / /sems kyi rin chen brtan par 'gyur/ /sangs rgyas byang chub rab zhugs pa/ /byin gyi brlab pa mdzad par 'gyur//de ltar gyur par zhugs nas kyang / /ji srid sems ni mi skyo'i phyir/ /mnyam gzhag yid ni bzang po yis/ /de la 'bad pas bsgom par bya/ /de yi 'og tu ci dga' ba'i/ /spyod pa yis ni spyad byas nas/ /cung zad spyan phye'i mtshan nyid can/ /byang chub rgya chen 'thob par 'gyur//dgod dam smra'am 'dug pa dang / /la la rab tu gar byed par/ /ji srid skyo bar mi 'gyur bar/ /sgom pa'i sems la zhen par bya/ /de lta'i dam tshig ldan 'gyur zhing / /rnam par mi rtog sngags pa yis/ /dus kyi nges pa yongs spangs nas/ /bla med go 'phang thob par 'gyur//de ltar chung ngu dang / 'bring dang / chen po'i dbye ba dang / na tshod dang rjes su mthun pas spyod pa rnam pa gsum zla ba phyed dam/ zla ba gcig gam zla ba drug bzlas par 'gyur bas phyag rgya chen po'i dngos grub thob pa'i mtshan ma nye bar 'byung bar 'gyur te/ de la mtshan ma ni 'di dag yin no//gzugs phra ba dang / reg pa yang ba dang / khyab pa dang / yang dag pa thob pa nyid dang / rab tu snang ba nyid dang / brtan pa dang / dbang du gyur pa dang / 'dod dgur sgyur ba zhes bya'o/ /yang rmi lam gyi mtshan ma gsang ba 'dus pa zhes bya ba rnal 'byor chen po'i rgyud las/byang chub ye shes mchog thob pas/ /sangs rgyas sku dang mtshungs par mthong / /sangs rgyas rdzogs longs spyod pa'i sku/ /bdag med pa ni myur du mthong / /sems dpa' chen po khams gsum pas/ /mchod pa byed pa des mthong ngo / /ye shes chen po 'di yi gzugs//sangs rgyas byang chub sems dpa' yis/ /'dod pa'i yon tan lnga rnams kyis/ /rtag tu mchod pa byed pa mthong / /rdo rje sems dpa'i gzugs chen dang / /grags chen rdo rje mchog dag tu/ /rmi lam dag na rang gzugs mthong / /grags chen rdo rje gsang ba dang / / byang chub sems dpa' rdo rje can/ /sangs rgyas chen po phyag 'tshal ba'i/ /rmi lam 'di 'dra mthong 'gyur ba/ /lus ngag sems kyi mthu las skyes/ /rgyan rnams thams cad yongs rdzogs pa'i/ /lha yi bu mo yid 'ong dang / /khye'u dang bu mo dag mthong na/ /de ni dngos grub thob par 'gyur//phyogs bcu'i sangs rgyas thams cad rnams/ /zhing na gnas pa nges par mthong / /thugs ni dgyes par gyur nas kyang / /chos mdzod yid du 'ong ba stsol/ /chos kyi 'khor los sgyur ba'i sku/ /sems can kun gyis yongs bskor ba/ /bsam gtan rdo rje la gnas pa'i//dam tshig sbyor bas mthong bar 'gyur/ /rdo rje slob mas gsol pa/ gal te sgrub pa po bden pa mthong yang sngon gyi bag chags la goms pa'i stobs kyis zhing dang / las dang / tshong dang / bsnyen bkur la sogs pas g.yengs nas spyod pa rnam pa gsum spyod pa mi byed pa dang /sgrub pa po gzhan dag 'byor ba ma tshang bas rgyud las ji skad gsungs pa'i cho ga rdzogs par byed mi nus pa'i phyir mi spyod pa de dag ni 'chi ba'i dus byas na yang srid pa gzhan du 'gro bar 'gyur ram/ yang na rdo rje 'chang ba nyid thob par 'gyur/ rdo rje slob dpon gyis smras pa/'di la bsal bya gang yang med/ /gzhag par bya ba ci yang med/ /yang dag nyid la yang dag lta / /yang dag mthong na rnam par grol/ /zhes bya ba ni rdzogs pa'i rim pa la gnas pa'i dbang du byas pa'i tshig ste/ 'di lta ste/ yang dag pa mthong ba zhes bya ba ni yang dag pa'i mthong bas rtag pa dang / chad pa dang / 'pho ba la sogs pa'i lta ba ngan pa 'gag par 'gyur ro/ /'on kyang tha snyad la brten nas 'pho ba rnam par dag pa nges par spyad par bya ste/ 'di ni phung po la sogs pa ni 'jig rten pha rol tu 'pho bar mi byad de/rtag pa'i skyon du thal bar 'gyur ba'i phyir ro/ /'jig rten pha rol 'chi ba las gzhan pa nyid las kyang 'byung ba ma yin te/ rgyu med pa'i nye bar thal bar 'gyur ba'i phyir ro/ /'di lta ste/ mar me las mar me dang / rgya las rgya dang / sgra las brag ca dag ni de nyid dam de las gzhan pa zhes brjod par mi nus so//de bas na gser 'od dam pa'i mdo las kyang / sangs rgyas mya ngan mi 'da' zhing / /chos kyang nub par mi 'gyur te/ /sems can rnams ni gdul ba'i phyir/ /mya ngan 'da' bar bstan pa yin/ /zhes gsungs pa dang / lang kar gshegs pa'i mdo las kyang / 'di la gang yang rkyen rnams kyis/ /skye ba med cing 'gag pa med/ /btags pa'i rkyen rnams kho na ni/ /skye zhing 'gag par 'gyur ba yin/ /zhes gsungs pas so/ /rigs pa 'dis na bcom ldan 'das shAkya thub pas mdzad pa thams cad mdzad nas mya ngan las 'das pa nye bar ston par mdzad pa yin no//de bzhin du rdzogs pa'i rim pa rtogs par gyur pas kyang thams cad byas nas 'jig rten du mya ngan las 'da' bar 'gyur ba 'di la som nyi mi bya'o/ /de bas na de kho na nyid shes pa ni rkyen ma tshang bas ji skad du bshad pa'i spyod pa gal te ma spyad du zin kyang /lta ba thams cad rnam par spangs nas 'chi bar 'gyur ba ni don dam pa'i bden pa yin la/ skye ba ni kun rdzob kyi bden pa'o zhes yang dag par mngon par rtogs nas brgya lam na 'od gsal bar zhugs nas/ tha mal pa'i phung po bor nas bdag la byin gyis brlab pa'i rim gyis ldang bar bya'o zhes brtan pa'i sems bskyed de/de yid la byed pas gnas par byed na/ de skye ba gzhan du yid la byed pa de 'dor bar mi 'gyur te/ de bas na thams cad mkhyen par 'gyur ro/ /de bas na/ bsam pa gang dang gang gis ni/ /mi rnams yid ni yang dag sbyor//des ni de yi rang bzhin 'gyur/ /sna tshogs nor bu ji bzhin no/ /zhes gsungs so/ /de bas na 'di dag thams cad ni khyad par can du yongs su bsgyur bas yongs su 'gyur bzhin pas khyad par can gyi 'bras bu 'byung bar 'gyur ro/ /'dir bshad pa/gang zhig skye ba kun rdzob bden zhes bya/ /'chi ba'i ming yang don dam bden pa yin/ /rim gnyis de dag bla ma'i drin gyis ni/ /rnyed pa 'di ni ma 'ongs sangs rgyas yin/ /bden gnyis de la zung du 'jug pa ni/ /mi 'chad bzhin du de dag khyad par med/ /mi gnyis mtha' ma gcig pu kho nar ni//shes pa de 'dir bcings nas grol ba yin/ /ri dbang rtse las 'ga' zhig lhung gyur na/ /ltung bar mi 'dod kyang ni ltung bar 'gyur/ /bla ma'i drin gyis phan pa'i lung thob na/ /grol bar mi 'dod kyang ni grol bar 'gyur/ /'jig rten dag na don yod gsung gi de nyid rtogs mthu 'gro ba la med de//mtsho chen chu la drag po'i rlung gis kun du g.yengs pa'i til mar thigs pa 'dra/ /des na bdag gis cung zad tsam zhig blangs nas bsdu bar byas pa ni/ /mthar thug kun rdzob kyis 'jigs skal ldan skye bo'i blo la sgron ma lta bu yin//shin tu spros pa med pa'i spyod pa bsdus pa'i the tshom gcod pa ste le'u bcu gcig pa'o// //spyod pa bsdus pa'i sgron ma slob dpon chen po Ar+ya de ba'i zhal snga nas kyis mdzad pa rdzogs so// //rgya gar gyi mkhan po shrad+d+ha ka ra warma dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa /