CLOSE WINDOW

D1802
བོད་ཡིག

/ //kha che'i paN+Di ta dza ya a nan+ta dang / bod kyi lo tsA ba khu mdo sde 'bar gyis bsgyur ba'o// @##/ /rgya gar skad du/ pany+tsa kra ma/ bod skad du/ rim pa lnga pa/ 'jam dpal gzhon nur gyur pa la phyag 'tshal lo/ /mgon po sangs rgyas kun bdag nyid//dpal ldan bde chen la btud de/ /rnal 'byor rgyud kyi rjes 'brangs nas/ /rdo rje bzlas pa'i rim bshad bya/ /bskyed pa'i rim la legs gnas shing / /rdzogs pa'i rim pa 'dod rnams la/ /thabs 'di rdzogs pa'i sangs rgyas kyis/ / skas kyi rim pa lta bur gsungs/ /sems can rnams kyi srog gyur pa/ /rlung zhes bya ba las kun byed/ /'di ni rnam shes bzhon pa ste/ /lnga yi bdag nyid bcu ming can/ /rlung gi de nyid rim gyis ni/ /sngags kyi de nyid yang dag 'jug /sngags kyi dmigs pa rtogs nas ni/ /rdo rje bzlas pa rnams la slob //rdo rje bzlas nas rnal 'byor pa/ /sems la dmigs pa thob par 'gyur/ /sgyu ma lta bu'i ting 'dzin gnas/ /yang dag mthas ni rnam par sbyang / /yang dag mtha' las langs nas ni/ /gnyis med ye shes 'thob par 'gyur/ /zung 'jug ting 'dzin la gnas nas//slar zhing gang la'ang mi slob bo/ /'di ni rdzogs pa'i rnal 'byor pa/ /rdo rje 'dzin pa chen po'ang de/ /rnam pa kun gyi mchog ldan pa'i/ /thams cad mkhyen par de nas 'gyur/ /'das pa dang ni ma 'ongs dang / /de ltar byung ba'i srid gsum ni/ /'od gsal bas ni rnam dag pas//skad cig de la ma lus mthong / /dpal ldan 'dus pa'i rgyud du ni/ /de nyid 'di dag rgyas btab nas / /bshad pa'i rgyud kyi rjes 'brangs nas/ /bla ma'i kha las rtogs par bya/ /de la dang po kho nar rlung gi de kho na nyid bstan pa'i tshig rtsa ba'i rgyud la 'jug par bya ste/sna yi rtse mor yungs kar bsam/ /'gro dang mi 'gro yungs kar la/ /gsang ba'i sngags kyis brtags pa yis/ /ye shes mchog gi gnas bsgom mo/ /rin chen kha dog sna lnga pa/ /yungs kar gyi ni 'bru tshod tsam/ /sna yi rtse mor nan tan du/ /rnal 'byor rig pas rtag tu bsgom//zhes bya ba ste/ 'di ni dgongs pas bshad pa'o/ /rdo rje'i tshig 'di'i bshad pa lha mo bzhis zhus pa zhes bya ba'i bshad pa'i rgyud las/ snying po las ni snying po mchog /sangs rgyas kun gyi gsang ba ni/ /gang de thams cad bdag nyid gnas/ /de ni lha mo bshad par bya//ye shes lnga yi dngos de nyid/ /yungs kar gyi ni 'bru tshod tsam/ /de yi dbus na gnas pa'i lha/ /mi gsal gsal ba'i bdag nyid can/ /zhes gsungs pa dang / gsang ba 'dus pa'i rgyud phyi ma las kyang don 'di nyid gsal bar gsungs te/ ye shes lnga yi rang bzhin dbugs//'byung ba lnga yi ngo bo nyid/ /gong bu'i gzugs kyis phyung nas ni/ /sna yi rtse mor rab tu brtag /rin chen kha dog sna lnga pa/ /srog dang rtsol ba zhes byar bshad/ /rang sngags snying gar bsams nas ni/ /srog ni thig ler gnas par gzhag /ces gsungs pa dang /'di nyid yang slar bshad pa rdo rje phreng ba zhes bya ba bshad pa'i rgyud las/ sna rtse ra yungs kar zhes bya ba/ /srog dang rtsal ba'i brtag pa ste/ /srog dang rtsol ba la gnas pa/ /'od lnga sangs rgyas rnams su bsgom/ /steng gi sna las nges 'byung ba/ /g.yon dang g.yas dang gnyis ka dang //dal bar rgyu dang rnam bzhir 'gyur/ /nang gi dus ni yin par bshad/ /lkog ma snying ga lte ba dang / /gsang ba'i pad+mar 'gro 'ong ston/ /thun phyed kyi ni dus rtag tu/ /go rims ji bzhin gnas par bstan/ /g.yas pa nas ni 'byung ba'i khams/ /me yi dkyil 'khor nyid yin te//kha dog dmar zhing gsal ba 'di/ /pad+ma mgon po'i rgyu ba'o/ /g.yon pa las ni 'byung ba'i khams/ /rlung gi dkyil 'khor zhes bya ba/ /ljang ser dag tu snang ba ste/ /las kyi mgon po'i rgyu ba'o/ /gnyi ga las ni byung ba'i khams/ /mdangs chen kha dog ser po ste//dbang chen gyi ni dkyil 'khor nyid/ /rin chen mgon po'i rgyu ba'o/ /dal zhing rgyu ba med pa'i khams/ /dag cing shel ltar snang ba ni/ /chu yi dkyil 'khor nyid yin te/ /rdo rje mgon po'i rgyu ba'o/ /lus kun la ni gnas pa'i rlung / /bya ba kun la 'jug pa po/ / 'di ni rnam snang ngo bo ste/ /'chi ba'i lus las 'byung bar 'gyur/ /rlung gi de nyid gsal ba 'di/ /ye shes lnga yi ngo bo nyid/ /rnal 'byor byis pa'i yul min zhing / /rtog ge ba yis mi shes so/ /de ltar rlung gi de kho na nyid bstan nas/ da ni sngags kyi de kho na nyid ston pa'i tshig rtsa ba'i rgyud nyid la 'jug par bya ste/de bzhin gshegs pa thams cad kyi sku dang gsung dang thugs kyi gsang sngags thams cad kyi snying po kun du skul bar byed pa zhes bya ba mchog tu gsang ba nyid kyi sku dang gsung dang thugs rdo rje las tshig gi lam nges par brjod pas sngags bsdus pa 'di lta bu gsungs so//oM AH hUM/ don rtogs pa yi bzlas pa ni/ /ngo bo nyid med bzang po las/ /dus gsum sangs rgyas kyis brtags pa/ /rdo rje bzlas par de bshad do/ /slong mo za zhing mi bzlas te/ /ma bslangs pa la'ang chags mi bya/ /'dod pa kun la longs spyod cing / /sngags kyi yan lag ma nyams bzlas//bshad pa 'di nyid slar bshad pa/ /dgongs pa lung bstan pa'i rgyud las gsungs pas de la 'jug par bya ste/ de nas dpal ldan snang mdzad che/ /khyab bdag la ni slar gsol pa/ /sems can thams cad skyed pa po/ /sna tshogs gzugs can sems 'di ni//de bas dngos po med gyur kyang / /srid pa dag tu rab tu grags/ /byang chub sems ni mkha' mnyam pa/ /legs par rjes su myong mdzad pa/ /'gro ba'i don ni mdzad pa po/ /skye bo mchog la de bstan gsol/ /sgrub pa yi ni thabs tsam zhig /shes nas rgyud rnams 'chad par byed//'di ltar bdag ni slob dpon zhes/ /ma 'ongs pa na smra bar 'gyur/ /bdag gi tshig ni 'di nyid dag /yin zhes smra zhing byis pa 'jig /de ni dgongs pa'i byang chub sems/ /ji bzhin don du mi shes so/ /de nas bdag po bcom ldan 'das/ / rnam par snang mdzad thub chen gyis/ /legs zhes lan gsum gsungs mdzad nas/ /lag na rdo rje la 'di gsungs/ /mi rtog don gyi de nyid ni/ /rab tu phye nas bshad par bya/ /brjod dang dmigs par bcas pa dang / /brdar gyur dang ni don dam mo/ /tshig gi brjod pa thun mong ste/ / dmigs par bcas pa sangs rgyas nyid/ /sngags kyi de nyid brda ru bshad/ /don dam de bzhin nyid yin no/ /dang po gcig ni dgu dbus na/ /gang zhig bcu yis ma bcings pa/ /de nyid bcing med ces bya ste/ /de shes pa ni mchog gi gnas/ /dbyangs dang gsal byed yi ge ste/ / grangs dgu yi ni rjes 'jug pa/ /as bcings phan tshun yang dag sbyor/ /gang gis shes de 'gro ba'i bla/ /'byung ba'i mtha' dang yang dag ldan/ /cha la sogs pa bcu drug gnas/ /lnga pa lnga dang yang dag ldan/ /bzhi ni gsum du nges par sbyar/ /yi ge AM bcas ring por bcas//yon tan sbyor sogs phyogs dang mtshungs/ /thung ngu ma las dag tu 'gyur/ /gcig min du ma'ang ma yin na/ /yi ge gang zhig sngar bshad pa/ /gang yang mngon par phyogs pa rnams/ /bud med skyes pa ma ning ste/ /khams la sogs par rab tu brtag /'og dang steng du bcas par ni//shes nas blos ni nges par sbyar/ /brjod pa yi ni sngags 'di dag /dngos med ngo bo las byung ba'o/ /de ni yongs su gyur pa'i gzugs/ /lha ru nye bar mtshon pa gang / /de ni nye bar dmigs pa'o/ /brda ni de nyid gsum gnas pa/ /rang bzhin bzlas pa'i mtshan nyid do//a yig bshad pa'i ye shes ni/ /sangs rgyas kun gyi snying por gyur/ /oM gyis sems can yang dag sdud/ /sangs rgyas skur ni rab tu brtag /hUM gis sems can yang dag spro/ /sangs rgyas thugs su rab tu brtag /AH ni gnas par gyur pa'o//sangs rgyas gsung du rab tu brtag /'jug pa nyid dang gnas pa dang / /ldang ba yi ni rim gyis kyang / /shes rab thabs kyi gzhir gnas te/ /sngags kyi yan lag ma nyams bzlas/ /gos dkar la sogs bzlas bshad pa/ /brgya phrag gnyis dang nyi shu lnga/ /bzhi po legs par bsdus pa ni//sbyor bzhi bsdus pa brgya phrag dgu/ /dgu brgya dag tu gang bstan pa/ /nyi shu rtsa bzhi'i rim gyis ni/ /de ni so sor 'byung ba las/ /nyi khri chig stong drug brgya'o/ /nang gi dus 'di nyid gsal bar bya ba'i phyir gsang ba 'dus pa'i rgyud phyi ma las/ rig pa'i cho ga 'di yis ni//thun mtshams bzhi ni rab sbyor bas/ /grangs 'bum gyi ni mtshan nyid can/ /sngags kyi yan lag ma nyams bzlas/ /zhes gsungs pa dang / bsgom pa yi ni bar chad can/ /rnal 'byor phyi rol bzlas pa spang / /sngags don bcom ldan rdo rje can/ /rdo rje bdag nyid ji ltar bzlas//glang po sngon du rnyed gyur nas/ /glang po'i rjes ni tshol byed ltar/ /sngags lus rang nyid mngon gyur nas/ /gzhan dag ji ga tshol byed dam/ /gzhan yang rdo rje 'dzin gang zhig /sbyor ba gsum dang ldan pa yis / /spyan drangs gshegs su gsol gyur dang / / de bzhin bzhugs su gsol ba dang / /bzhugs pa yis ni spyan drangs te/ /myur ba yis ni gshegs su gsol/ /gnyis ka min pas bzhugs su gsol/ /sna tshogs gnas grub bla med pa'o/ /myur ba dang ni rnam bsdus dang / /dal ba can dang sngags sbyor ba/ /bla mas slob ma'i rna drung du//rab tu 'bad de bshad par bya/ /de nas rnal 'byor dbang phyug gi / /thabs kyi dam pa bstan pa'i phyir/ /rnal 'byor 'bras bu rab ster ba'i/ /gsang ba'i yi ge bshad par bya/ /gang zhig bsams pa tsam gyis ni/ /rnal 'byor can la mchog ster gyur/ / dang po'i yi ge'i sbyor ba yis / /rtag tu dbugs ni rngub par bya/ /brgyad pa'i mtha' dang ldan pa yi/ /yi ge u ni thig ler bcas/ /rnal 'byor pa ni dbugs gtong byed/ /'di ni ci dga'i bzlas par bshad/ /khri phrag gnyis dang chig stong dang / /de bzhin du ni brgya phrag drug / rnal 'byor dbang po nyin mtshan gyi/ /bzlas brjod kyi ni grangs byed do/ /de 'dir gsang zhing dgongs pa yis/ /phra mo'i sbyor ba bshad pa yin/ /klog dang kha ton med mod kyi/ /'on kyang bzlas par bshad pa yin / /rdo rje bzlas pa 'di yis ni/ /cho ga ji bzhin bsten bya zhing / / snga ma lta bu'i ting 'dzin gyis/ /las rnams thams cad bsgrub par bya/ /de bas na gnyis su med pa mnyam pa nyid rnam par rgyal ba zhes bya ba rnal 'byor chen po'i rgyud las kyang / mnyam med sngags ni bzlas nas su/ /sgrub pa'i bdag nyid can gyis bsgrub / /de yis zla ba gcig gis ni//khams gsum 'grub par gdon mi za/ /rnam shes las ni 'byung ba'i sngags/ /mtshan nyid drug ldan bzas nas kyang / /rdo rje sems dpa' phyag byas na/ /zla ba nya la de 'grub 'gyur/ /de las brtul bzhugs bshad pa med/ /phreng ba mi dgos sngags mi dgos/ /gzung dang sbyin sreg las rnams dag /gcig nas gcig tu ldog par 'gyur/ /ya yi don gyis gang ci'ang rung / /dngos grub 'dod pas bya ba ni/ /ra la sogs pa gsum nyid kyis/ /'gro ba'i don la 'jug par bya/ /me dang rlung dang dbang chen dang / /chu ste so so'i dkyil 'khor du/ / thun ni phyed phyed dus su ni/ /las ni gnyis gnyis gnas par 'gyur/ /mchod la brtson pas mchod par 'gyur/ /bzlas la brtson pas rnam par dag /me la sbyin sreg brtson pas 'byor/ /bsam gtan brtson pas thar pa 'thob/ /sngags pas de ltar shes nas ni/ /'gro na byis pa bzhin du spyod//des ni mi rtog chos can gyis/ /gsang sngags rnams ni 'grub par 'gyur/ /gsung gi rdo rje sgrub pa ste/ /'di ni sngags kyi de nyid gsal/ /ye shes gsum gyi dbye ba yis/ /sems tsam la ni nges par sbyar/ /bla ma la brnyas sgyur can dad pa med/ /sngags kyis rlom zhing glegs bam mthong bas khengs//dad pa med cing dbang bskur dman pa la/ /gtam gyi rim pa'ang de la brjod mi bya/ /gang zhig bla ma la gus dad dang ldan/ /mos pas bsnyen bkur la ni rtag tu brtson/ /thos pa 'dzin gang slob ma'i dam pa yis/ /de la bla ma'i drin sbyin brtag mi dgos//ri dbang rtse nas 'ga' zhig lhung gyur na/ /ltung bar mi bya snyam yang ltung bar 'gyur/ /bla ma'i drin gyis phan pa'i lung thob na/ /grol bar mi 'gyur snyam yang grol bar 'gyur/ /rdo rje bzlas pa'i rim pa ste slob dpon klu sgrub kyi zhal snga nas kyis mdzad pa'i rim pa dang po'o// //phyag 'tshal 'dud cing phyag 'tshal 'dud/ /phyag 'tshal phyag 'tshal phyag 'tshal 'dud/ /ji ltar bstod cing phyag 'tshal ba/ /gang la bstod cing gang gis bstod/ /ji ltar chu la chu bzhag dang / /ji ltar mar la mar bzhin du/ /rang gis rang gi ye shes ni/ /legs mthong gang yin 'dir phyag yin//'on kyang kun mkhyen ma thob par/ /de ni nye bar dmigs mi 'gyur/ /mun nag rab rib kyis khebs pa/ /drin gyis snang ba thob par 'gyur/ /stong nyid shin tu stong pa dang / /gsum pa chen po stong pa dang / /bzhi pa thams cad stong pa ni/ /rgyu dang 'bras bu'i bye brag go//shes rab thabs su sbyor ba las/ /rdzogs pa nye bar thob par 'gyur/ /rdzogs pa nye bar thob gyur nas/ /thams cad stong pa 'od gsal ba/ /rgyu yi rim pa rnam dag pa/ /rnam shes gsum po sbyor ba dang / /stong pa gsum ni mnyam sbyor bas/ /bla med go 'phang thob par 'gyur//snang ba stong pa shes rab dang / /sems dang gzhan gyi dbang dag ste/ /de yi rang bzhin 'phro gsal pa/ /da ni rab tu bshad par bya/ /chags bral dang ni bar ma nyid/ /de bzhin du ni chen po dag /yid la 'gro zhing 'ong ba dang / /mya ngan la sogs gsum de bzhin//zhi dang rnam rtog 'jigs pa dang / /'jigs pa bar dang shin tu 'jigs/ /sred dang sred pa bar ma dang / /shin tu sred dang nyer len pa/ /mi dge bkres dang skom nyid dang / /tshor dang tshor ba bar ma dang / /shin tu tshor ba'i skad cig dang / /rig pa po dang rig 'dzin bzhi//so sor rtog dang ngo tsha shes/ /snying rje dang ni brtse ba gsum/ /dogs dang bsam pa nyid dang ni/ /phrag dog ces ni bya bar grags/ /rang bzhin sum cu rtsa gsum gang / /lus can rnams kyi rang rig ste/ /kun rdzob gsal ba'i gzugs kyis ni/ /mtshan mo'i ming du nges par bshad//de bzhin bud med ming du brjod/ /'jam po lta bu'ang de bzhin no/ /g.yon pa'i ming yang de nyid de/ /zla ba'i dkyil 'khor pad+ma can/ /brtan par bya ba'i rgyur gyur pa/ /dang po'i yi ge thig ler bcas/ /zla ba'i 'od zer ltar snang zhing / /snang ba'i ye shes yang dag 'byung //shin tu stong pa thabs ldan pa/ /snang ba mched pa zhes brjod de/ /de bzhin du ni kun brtags dang / /de bzhin sems las byung bar bshad/ /chags dang zhen dang de bzhin dga'/ /dga' ba bar ma shin tu dga'/ /rangs dang rab tu mgu ba dang / /ngo mtshar de bzhin dgod pa dang //tshim dang de bzhin 'khyud pa dang / /'o byed de bzhin 'jib pa dang / /brtan dang brtson dang nga rgyal dang / /bya dang 'phrog dang stobs dang ni/ /spro dang lhan cig skyes nyid dang / /de bzhin lhan skyes bar ma dang / /shin tu lhan cig skyes dang grag /rnam par sgeg dang zhe 'gras nyid//dge dang tshig gsal bden pa dang / /mi bden pa dang de bzhin nges/ /nye bar mi len sbyin pa'o/ /skul dang de bzhin dpa' bo dang / /ngo tsha med dang sgyu dang gdug /mi srun pa dang gya gyu nyid/ /mtshan nyid bzhi bcu gang yin pa/ /shin tu stong pa'i skad cig ste/ / nyin mo skyes pa'i ming dang ni/ /rtsub mo g.yas par bstan pa yin/ /nyi ma'i dkyil 'khor ming dang ni/ /de bzhin du ni rdo rje'i ming / /thig le gnyis kyis brgyan pa yi/ /cha rung de nyid shes par bya/ /nyi ma'i 'od zer 'dra ba yang / /snang ba mched pa'i sbyor las byung / /snang ba thob pa dag dang ni//nye bar thob pa de bzhin te/ /yongs su grub pa nyid dang ni/ /ma rig pa ni nyid ces bya/ /stong pa chen po'i tshig gis ni/ /rnam grangs 'di dag rgyal bas gsungs/ /chags pa bar ma'i skad cig dang / /brjed ngas pa dang 'khrul pa dang / /mi smra gyur dang skyo ba dang //le lo de bzhin the tshom ste/ /ma rig skad cig bdun po ni/ /phra mo'i rnal 'byor pas shes bya/ /sa bon thig le ldan min la/ /rlung gi sgo nas 'byung ba min/ /gang zhig snang ba thob pa ni/ /yongs su rdzogs pa'i mtshan nyid do/ /rang bzhin phra ba brgya dang ni/ / drug cu tham pa 'di dag nyid/ /rlung gi bzhon pa'i rgyu yis ni/ /nyin dang mtshan du byung ba yin/ /skad cig thang cig yud tsam dang / /mig btsums de bzhin thal mo ste/ /skad cig se gol gtogs par bshad/ /thang cig yungs kar bskor ba dang / /yud tsam dbugs rngub 'byung ba tsam//mig btsums mig ni btsums pa'i bar/ /thal mo lag gnyis brdabs pa ste/ /skad cig la sogs mtshan nyid do/ /rang rig tsam gyi ye shes ni/ /nam mkha' lta bur mtshan nyid med/ /'on kyang de yi dbye yod de/ /mtshan mo nyin mo mtshams bdag nyid//snang dang snang ba mched pa dang / /de bzhin snang ba nyer thob dang / /sems ni rnam pa gsum bshad nas/ /de yi sgrub pa brjod par bya/ /rlung rnams phra ba'i gzugs kyis ni/ /shes dang yang dag 'dres gyur nas/ /dbang po'i lam nas byung nas ni/ /yul rnams la ni dmigs par byed//gang tshe snang ba ldan gyur cing / /rlung ni bzhon pa nyid gyur pa/ /de tshe rang bzhin de dag kun/ /ma lus lus pa med par 'byung / /rlung ni gang dang gar gnas pa/ /rang bzhin de dang de 'byung 'gyur/ /ji srid rlung ni mi rgyu dang / /snang ba mi g.yo bar gyur pa//snang ba gnyis kyi rgyur gyur pas/ /bdag gi dngos po rnam par brtag /ji ltar snang ba thob pa ltar/ /gnyis ka'i yan lag nyid du 'gyur/ /sgyu ma dag ni thams cad las/ /bud med sgyu ma khyad par 'phags/ /ye shes gsum gyi dbye ba ni/ /gsal bar 'di las mtshon par 'gyur//'dod chags nyid dang chags bral dang / /de yi bar de gsum po ni/ /dbang po gnyis ni mnyam sbyor ba'i/ /rdo rje pad+ma 'dus las so/ /ye shes gnyis ni mnyam sbyor las/ /snyoms par 'jug par bshad pa yin/ /ye shes gnyis kyi mnyam sbyor dang //ji skad bshad pa'i bya ba yis/ /'bad pas ye shes gang thob pa/ /de ni snang ba thob pa'o/ /gang zhig chu skyes rdo rje sbyor/ /kun rdzob tu yang med gyur na/ /lan cig tsam zhig myong nas kyang / /rnal 'byor stobs kyis 'grub par 'gyur/ /ye shes 'jug pa'i ngo bo yi //dbye ba ji bzhin shes byas la/ /rang bzhin de nyid slar yang ni/ /rtag tu rnal 'byor pas mtshon bya/ /ji ltar sprin ni sna tshogs shing / /mdog dang dbyibs ni tha dad pa/ /nam mkha'i dbyings su byung nas ni/ /de nyid du ni thim par 'gyur/ /de bzhin rang bzhin thams cad ni//snang ba gsum ni rgyu can te/ /ma lus yul la zhugs nas ni/ /'od gsal bar ni zhugs par 'gyur/ /de 'dra'i rang bzhin ma shes pas/ /mi shes mun pas khebs pa ni/ /dge dang mi dge'i las byas nas/ /'gro ba lngar ni 'khor bar 'gyur/ / mtshams med la sogs byas nas ni/ /dmyal la sogs par 'tshed par byed/ /sbyin sogs dge ba byas nas ni/ /mtho ris la sogs dag tu mchod/ /skye ba dpag med stong phrag ni/ /'dir ni yang dang yang 'thob pa/ /'di ni sngon las rnam smin zhes/ /rmongs pa rnams ni mya ngan byed//rang bzhin snang ba'i tshul gyis ni/ /gang gis skye bo nyon mongs pa/ /de nyid shes nas ye shes can/ /srid pa'i gzeb las rnam grol 'gyur/ /shes rab ngo bo nyid 'di ni/ /zla ba'i dkyil 'khor dag tu brtag /sems nyid rang gis mthong 'gyur te/ / rang nyid zla ba'i gzugs bzhin no/ /de nas zla ba la dmigs pa/ /rdo rje'i mtshan mar rab tu brtag /'di ni rdo rje las byung ba'i/ /rnal 'byor pa yi thabs su bshad/ /zla ba rdo rje sogs mnyam sbyor/ /sems dang sems byung 'dus pa ste/ /shes rab thabs su 'dus pa las// lha yi gzugs ni 'byung bar 'gyur/ /phyag rgya bzhis ni rgyas btab cing / /lha yi nga rgyal 'chang byed de/ /bskyed pa'i rim dang ldan par ni/ /sngags pa rtag tu spyod par 'gyur/ /ji skad dpal ldan 'dus sogs par/ /de dang der ni rgyas gsungs pa'i/ ji srid sgom la sbyor gyur pa/ /de srid dang po'i las can yin/ /da ni yongs rdzogs rnal 'byor gyi/ /gsal ba ru ni bshad bya ste/ /stong pa gsum gyi rnam dag gang / /'od gsal bar ni 'dir bshad do/ /thams cad stong par de brjod de/ /ye shes gsum ni rnam dag pa/ /ye shes dag nas de nyid rtogs//thams cad mkhyen pa bla na med/ /'gyur ba med cing snang ba med/ /gnyis med mchog tu zhi ba nyid/ /yod dang de bzhin med pa dang / /de ni tshig gi spyod yul min/ /de nas 'od gsal dag pa la/ /ye shes gsum ni 'byung 'gyur te/ /sum cu rtsa gnyis mtshan 'chang zhing //dpe byad bzang po brgyad cur gyur/ /rnam pa kun du mchog ldan pa'i/ /thams cad mkhyen par de nas 'gyur/ /de skad du rgya cher rol pa'i mdo las/ shAkya thub pa de bzhin gshegs/ /mngon par byang chub 'di bzhed nas/ /stong pa chen po sangs rgyas nyid//thob par bya zhes mngon par dgongs/ /nai rany+dza na'i chu 'gram du/ /mi g.yo'i ting 'dzin la bzhugs la/ /de'i tshe rgyal ba mkha' rdo rje/ /til gyi gang bu gang bzhin bzhugs/ /rgyal ba'i sras la se gol gtogs/ /de la dbyangs gcig gis gsungs pa/ / bsam gtan 'di ni rnam dag min/ /'dis ni mthar thug mi 'thob ste/ /nam mkha'i ngos ltar mchog gyur pa/ /'od gsal ba ni de dmigs shing / /'od gsal ba yi gnas thob nas/ /rab dga'i gzugs su skye bar 'gyur/ /de tshe rab dga'i rdo rje'i sku/ /kun gyi mchog ni thob par 'gyur//'di ltar sgra de gsan pa dang / /de nas ting 'dzin mi g.yo btang / /'di ltar nam phyed dus su ni/ /rgyal ba'i sras kyis de nyid dmigs/ /sku ni drang po ma yin zhing / /mi drang ba yang ma yin la/ /dbugs gtong ba dang rngub pa yis / /gsung ba ma yin mi gsung min//spyan bzang btsums pa ma yin zhing / /spyan phye ba yang ma yin pas/ /thams cad stong pa rmad chen po/ /dang zhing gsal ba'i ye shes che/ /bla ma nyid kyi drin gyis ni/ /de nas de ni gsal mthong gyur/ /'das pa dang ni ma 'ongs dang / /da ltar byung ba'i srid pa gsum/ / skad cig de la ma lus mthong / /'od gsal ba ni rnam dag 'chang / /rdo rje lta bu'i ting 'dzin gyis/ /skya rengs 'char ba'i dus su ni/ /chu zla dang ni smig rgyu sogs/ /sgyu ma'i yon tan rnams kyis brgyan/ /byang chub snying por bzhugs nas ni/ /de ni bdud rnams bcom par mdzad//shAkya mgon pos yang dag pa'i/ /ye shes bla med legs thob nas/ /'gro ba gsum la phan pa'i phyir/ /de nyid 'dir ni ston par mdzad/ /mngon par byang chub ston pa ni/ /de nyid ye shes zhes byar bshad/ /mtshams med lnga yi las can dang / /mi gang bsod nams dman pas kyang //yid bzhin nor dang 'dra ba gzhan / /bla ma'i drin gyis thob par 'gyur/ /spyod pa ci dgar spyod byed de/ /'di ni ma 'ongs rdzogs sangs rgyas/ /chags min chags dang bral ba min/ /dbu mar yang ni mi dmigs so/ /stong pa ma yin mi stong min//dbu mar yang ni mi dmigs so/ /sangs rgyas kun gyi mnyam sbyor ba/ /'di nyid ltar ni rab ston te/ /ye shes gsum bral de nyid gang / /dgongs pa yis ni gsungs pa yin/ /de bzhin dpal ldan gsang 'dus kyi/ /byang chub sems kyi le'u las/ / dngos med la sogs tshigs bcad kyi / /mngon par byang chub mtshan nyid gsungs/ /'dod chags la sogs rnam dag gang / /dpal mchog las kyang gsungs pa yin/ /de nyid de bzhin gshegs pas kyang / /thams cad stong par gsungs pa yin/ /sna tshogs mdo dang rgyud las ni//de nyid gang zhig nyer bstan pa/ /thams cad stong gnas 'di nyid las/ /der ni gzhan dag ma gsungs so/ /chos phung brgyad khri bzhi stong ni/ /thub pa chen pos gsungs pa las/ /mngon par byang chub mtshan nyid ni/ /snying po las ni snying por gsungs/ /ral pa gcer bu mgo reg gam//cod pan 'dus pa spong 'jug ste/ /sna tshogs rtags can de dag ni/ /mngon par byang chub 'dod pa rnams/ /de nyid dman pa de rnams kyis/ /brtul zhugs spyod pa la sogs rim/ /de nyid ye shes dman pas na/ /des ni grol ba rnyed mi 'gyur//dang po las kyi sbyor ba yis/ /sa brgyad pa ni thob par 'gyur/ /snang ba gsum pos mthong ba dag /sa bcu la ni rab tu gnas/ /mngon par byang chub legs thob nas/ /gtsang ma'i gnas su nye bar 'gro/ /sangs rgyas zhing nas mi ldog pas//tshe 'di nyid kyi thams cad mkhyen/ /chos 'byung mngon par byang chub pa'i/ /chags sogs rol mo rgya chen po/ /chos dbyings mngon par byang chub pa/ /ji ltar rnyed pa'i spyod pas so/ /mngon par rtogs pa gang 'byung ba/ /bla med mngon par byang chub pa/ /spros bcas la sogs spyod pa yis//rnal 'byor pa ni 'dir slob po/ /gzod nas dag pa'i rang bzhin can/ /ngo bo nyid kyis de grub na/ /bslab pa'i sbyor bas ci zhig bya/ /rtog las de bzhin nyid mi skye/ /gang zhig de ltar 'dir rtog na/ /ye shes rim pa spangs pa nyid/ /de yi dbye ba mi shes pas//slar yang slob par 'gyur ba yin/ /rang bzhin snang ba'i dbye shes shing / /de nyid bzhi pa la brten kyang / /gang zhig rnam gsum mi slob na/ /des ni 'bras bu thob mi 'gyur/ /ji ltar shing la me gnas pa/ /ma gtsubs par ni 'byung mi 'gyur/ /de bzhin byang chub bslab bral bas//tshe 'di nyid la 'byung mi 'gyur/ /gang zhig g.yo sgyu'i blo can le lo can dag dang / /bla ma la smod dbang bskur thob ces rlom sems 'gyur/ /blo dman sems ldan kun mkhyen yang dag thob mi 'gyur/ /nyon mongs bla ma'i skyon rnams mthong gi yon tan min/ / bsnyen bkur med par myur du de nyid thob par 'dod/ /yang dag tshig ma yin zhes khro bcas g.yo bar 'gyur/ /tshogs nang bla ma mthong na rgyab kyis phyogs par byed/ /de nas de ni dben par song nas phyag byed 'gyur/ /de ltar rang bzhin ngan gyur dman pa'i slob ma ni/ /rang gi slob bu yin yang gzhan bzhin yongs su spang //rgyal rigs rje'u rigs mchog las skyes par gyur pa yang / /brtan par nam yang de nas drung du gzhag mi bya/ /yon tan mchog ldan ye shes brtson par bcas pa dang / /yang na bla ma la gus sangs rgyas dang mnyam lta/ /rgyal ba'i chos rnams rtogs shing bstan la shin tu dad//de 'dir snod gyur yin phyir de la drin sbyin bya/ /rgyud mang rab tu thos shing lung la legs sbyangs kyang / /bla ma'i bsnyen bkur dman phyir lung thob ma gyur pa/ /de ni bdag phan tsam la'ang dbang med bstan pa'i mchu/ /de yi bstan bcos skyo ba'i rgyu tsam 'ba' zhig yin//skal ldan gyur cing de nyid man ngag thob gyur kyang / /gang zhig blo gros blun min don ni sbyor nus pa/ /gzhan don bya ba'i blo yis ston la rab tu 'jug /tshig gi yon tan med na de yang brnyas bcas 'gyur/ /rgyud mang thos shing shes ldan gnas drug shes pa dang //dran dang blo gros brtan blo brtson pa phun tshogs ldan/ /bla ma'i zhabs bkur bcas shing de nyid lung thob pa/ /rgyud rgyal man ngag de la bstan par 'os pa yin/ /'phags pa rdo rje'i drin gyis rgyud rnams mang po thos/ /gsal ba rnam spras tshig gis byang chub lam ni rnam phye bas//shAkya bshes gnyen gyis ni dge ba gang bsags des/ /mkhas shing gsal ba'i rnam smin byang chub snod gyur shog /ming gi khyad par gzhan yang bla na med pa'i dgongs pa zhes bya ba thams cad dag cing rnam par dag pa'i rim pa slob dpon shAkya bshes gnyen gyis mdzad pa ste rim pa gnyis pa'o// //rdo rje can rnams kun gyi gtso/ /rdo rje che la phyag 'tshal te/ /bdag la byin gyis brlab pa'i rim / /brtse bas bdag gis bshad par bya/ /de la dang por bskyed pa'i rim pa'i rjes su 'brang bas dbang bskur ba thob cing / rgyud rnam pa bzhi'i dgongs pa shes pa/shes rab dang ldan zhing lus dang / ngag dang / yid rnam par dben pa'i thos pa 'dzin pa/ bden pa rnam pa gnyis la lhag par mos pas rdo rje slob dpon yang dag par mnyes par byas te de'i 'og tu bla ma mnyes par gyur nas tshogs kyi mchod pa chen po byas la lo bcu drug ma rdo rje slob dpon chen po la phul te/de'i 'og tu bla ma'i zhal snga nas bdag la byin gyis brlab pa'i rim pa'i man ngag thob nas/ de'i 'og tu phreng ba dang chu dang rdzogs pa'i sangs rgyas dang rdo rje dang dril bu sbyin pa me long dang ming dang slob dpon dang rjes su gnang ba ste/de dag dang bcas par gsang ba'i dbang bskur ba thob nas bstod pa 'dis bla ma la bstod par bya'o/ /khong stong khyod kyi sku la med/ /sha dang rus pa khrag med kyang / /nam mkha' la ni 'ja' tshon ltar/ /khyod kyi sku ni ston par mdzad/ /sku la bsnyun med mi gtsang med//bkres dang skom pa 'byung med kyang / /khyod ni 'jig rten rjes 'jug phyir/ /'jig rten bya ba ston par mdzad/ /chu zla bzhin du gzung du med/ /chos rnams kun la gnas pa med/ /nga rgyal med cing rmongs mi mnga'/ /dmigs med khyod la phyag 'tshal lo/ /gshegs dang bzhugs dang de bzhin gzims//spyod lam dag ni thams cad du/ /khyod ni rtag tu mnyam 'jog pa/ /mi dmigs khyod la phyag 'tshal lo/ /sgyu ma lta bu'i ting 'dzin gyis/ /rdzu 'phrul che la rnam 'phrul zhing / /sna tshogs min la snyoms 'jug pa/ /dmigs med khyod la phyag 'tshal lo//de ltar rdo rje slob dpon la yang dag pa'i bstod pas bstod nas tshigs su bcad pa 'dis mnyan par bya ba'i phyir gsol ba gdab par bya'o/ /kun mkhyen ye shes phung po can/ /srid pa'i 'khor lo rnam sbyong ba/ /de ring bshad pa'i rin chen gyis/ /gtso bo bdag la bka' drin stsol//khyod zhabs pad+ma spangs nas ni/ /gtso bo gzhan la skyabs ma mchis/ /'gro ba'i dpa' bo thub chen gyis/ /de bas blo mchog mnyes par mdzod/ /de ltar 'jigs med gsol 'debs pa'i/ /tshig dag thos par gyur nas ni/ /snying rje slob ma la bskyed de/ /de nas bdag la byin brlab brtsam//bdag byin brlab pa'i rim zhes pa/ /kun rdzob bden pa bstan pa ste/ /de ni bla ma'i drin dag gis/ /'thob par 'gyur gyi gzhan du min/ /bdag la byin gyis brlab pa'i rim/ /gang gis rnyed par ma gyur pas/ /mdo sde rgyud dang rtog pa la/ /de yi ngal ba don med 'gyur//bdag la byin brlab rim thob pa'i/ /gtso bo sangs rgyas kun bdag nyid/ /tshe 'di nyid du sangs rgyas ni/ /the tshom med par thob par 'gyur/ /bdag byin brlab pa'i ting 'dzin dang / /de bzhin 'od gsal ba yi gnas/ /rgyu dang 'bras bu'i khyad par gyis//bden pa gnyis su bstan pa yin/ /bdag byin brlab pa'i rim gyis ni/ /'od gsal ba ni thob par 'gyur/ /de bas rdo rje slob dpon gyis/ /dang por bdag la byin brlab bstan/ /'gro kun rang dbang med pa ste/ /rang dbang du ni 'byung ma yin/ /de yi rgyu ni 'od gsal ba//'od gsal thams cad stong pa'o/ /sems gang gis ni byis pa rnams/ /'khor bar 'ching bas bcings gyur pa/ /sems de nyid kyis rnal 'byor pa/ /bde gshegs gnas su 'gro bar 'gyur/ /'dir ni gang yang skye ba med/ /gang yang 'chi ba yod ma yin/ /sems kyi rang bzhin rnam gnas par//'khor ba nyid ni shes par bya/ /rlung gi sbyor ba med par ni/ /sems kyi rang bzhin gzung du med/ /sems kyi rang bzhin rgyur gyur pa/ /las dang skye ba kun du 'byung / /de nyid rlung dang yang dag ldan/ /rnam shes gsum po slar yang ni/ /rnal 'byor pa yi lus su 'byung //sgyu ma'i lus zhes de la bshad/ /de bas 'di ltar 'gro ba kun/ /sgyu ma lta bur 'dir bshad de/ /sgyu ma lta bu'i ting 'dzin gnas/ /thams cad de dang 'dra bar mthong / /gzugs dang tshor ba nyid dang ni/ /'du shes dang ni 'du byed rnams/ /lnga pa rnam par shes pa dang //de bzhin khams ni bzhi po dang / /mig la sogs dang yul rnams nyid/ /shes pa lnga po nyid dag ste/ /phyi dang nang du rnam phye ba/ /thams cad sgyu ma las gzhan min/ /me long nang gi gzugs brnyan gyis/ /sgyu ma'i lus ni shes par bya/ /kha dog rnams ni 'ja' lta bu//khyab pa chu yi zla bas so/ /dngos dang dngos min las grol ba/ /rdo rje sems dpa' legs bris pa/ /me long dri ma med pa la/ /gzugs brnyan gsal bar snang dang mtshungs/ /rnam pa kun gyi mchog ldan pa'i/ /sku ni blta bas mi ngoms pa/ /slob ma bzang po de la bstan// bdag byin brlab ces de bshad do/ /sgyu mar bstan pa'i mtshan nyid kyis/ /'di nyid nye bar mtshon pa ste/ /kun rdzob bden pa'i sgyu ma nyid/ /longs spyod rdzogs pa'i sku yang de/ /de nyid dri za'i sems can gyur/ /rdo rje'i sku yang de nyid yin/ /rdo rje sems dpa' bdag nyid de//de bas bdag nyid mchod la 'jug /bdag nyid sangs rgyas thams cad dang / /byang chub sems dpa' thams cad nyid/ /de bas kun nas 'bad pa yis/ /bdag nyid rtag tu mchod par bya/ /sngags dang phyag rgya'i sbyor ba dang / /dkyil 'khor la sogs rnam rtog dang //sbyin sreg gtor ma la sogs kun/ /rtag tu sgyu ma bzhin du bya/ /zhi ba dang ni rgyas pa dang / /de bzhin dbang dang mngon spyod dang / /dgug sogs gang ci'ang rung ba kun/ /dbang po'i gzhu dang mtshungs par bya/ /sgeg dang nye bar longs spyod dang / /klu dang rol mo sogs bsten dang //sgyu rtsal rnams la rab 'jug pa/ /chu zla dag dang mtshungs par bya/ /gzugs dang sgra dang de bzhin dri/ /ro dang reg bya nyid dag la/ /mig la sogs pa 'jug 'gyur ba/ /sgyu ma lta bur nye bar brtag /rdo rje theg pa de nyid du/ /'dir ni mang du bshad ci dgos//rnal 'byor pas ni gang gang dmigs/ /de de sgyu ma bzhin du brtag /me long gi ni gzugs brnyan dang / /rmi lam sgyu ma chu bur dang / /mig 'phrul mtshungs par gang gis mthong / /de ni gtso bo yin par bshad/ /mthong ba dang ni reg pa nyid/ /'gro ba sgyu ma ji bzhin te//dmigs med kun rdzob dag tu ni/ /sgyu ma lta bur rab tu bshad/ /dbang po gang dang gang lam gyur/ /de dang de yi ngo bor bya/ /mnyam par ma gzhag sbyor ba yis/ /sangs rgyas kun dang mnyam par sbyor/ /kun du kun nas thams cad dang / /bdag nyid rtag tu rnam pa kun//sangs rgyas kun bdag dngos grub ni/ /rang nyid kyis ni de mthong 'gyur/ /gtso bo bde ba kun rang bzhin/ /sems dpa' chen po 'gro dang bzhugs/ /gnas dang zas dang gos la sogs/ /mkha' la skad cig dag gis rnyed/ /srid pa gcod par 'gyur ba dang //'gro la rab mchog ston par 'gyur/ /lha dang bcas pa kun gyis mchod/ /yang dang yang du phyag byed 'gyur/ /ji ltar ston pa rdzogs sangs rgyas/ /'jig rten phan par bzhed pas gshegs/ /de bzhin rnal 'byor chen po ni/ /sna tshogs ye shes rjes su sdud/ / rdo rje sems dpa' mtshon pas na/ /bsgrub par mi bya ci yang med/ /bde chen phyag rgya chen po ni/ /rang nyid rjes su 'grub par 'gyur/ /las dang nyon mongs las can lus/ /byed pa po dang 'bras bu nyid/ /smig rgyu rmi lam lta bu dang / /dri za'i grong khyer dag dang mtshungs/ /'di 'dra'i ting 'dzin mi shes pas//dngos po la ni nyer dmigs te/ /'dod chags sna tshogs skyes pa rnams/ /de dag sgyu ma'i sman gyis gso/ /bdag byin brlab pa'i man ngag dag /gang gis bla ma las ma bsgrubs / /rtag dang chad pa la dmigs pas/ /mi de phyir ldog 'gyur ba yin/ / mchod pa thams cad spangs nas ni/ /bla ma la mchod yang dag brtsam / /de mnyes pas ni kun mkhyen pa'i/ /ye shes mchog ni thob par 'gyur/ /bla med byed pa slob dpon gyi/ /rdo rje sems dpa' mchod byas nas/ /de yi bsod nams ma byas ci/ /dka' thub ma bsten gang zhig yod/ / de nyid mi zad 'dod pa yis/ /shin tu dga' ba gang dang gang / /shin tu khyad par can nyid de/ /de dang de ni bla mar sbyin/ /slob dpon gyis ni sdig pa 'phrog /slob dpon gyis ni 'jigs pa sel/ /slob dpon gyis ni sdug bsngal gyi/ /rgya mtsho'i 'jigs las pha rol bsgral / /gang zhig nga rgyal gyis sbags shing //yang dag rim pa sun 'byin dang / /de nyid chos la brnyas bcas pa/ /de las de nyid bstan mi bya/ /bla ma la gus bden par smra/ /rnam par mkhas shing rgyud gcig la/ /dam tshig spyod pa bsrung ba dag /rim pa de la bstan par bya/ /bdag la byin gyis brlab pa'i rim pa slob dpon klu sgrub kyi zhal snga nas mdzad pa ste rim pa gsum pa'o// //thams cad stong pa nyid ston pas/ /rdo rje sems dpa' phyag byas te/ /bzhi pa mngon par byang chub pa'i/ /rim 'di bdag gis bshad par bya/ /'di ni rang byung bcom ldan 'das/ /gcig pu bdag nyid che ba'i lha//man ngag rnams ni rab ster bas/ /rdo rje slob dpon de bas lhag /de ni yang dag mnyes byas te/ /lo 'am yang na zla ba la/ /bla ma de ni mnyes byas la/ /ci nus pas ni mchod par bya/ /ci 'byor pa yi phyag rgya ni/ /legs par bslabs la dbul bya zhing //tshogs kyi dkyil 'khor dbus su ni/ /cho ga ji bzhin mchod par bya/ /de nas 'dod yon lnga spyod pas/ /rnal 'byor chen po mnyes gyur te/ /snyoms par 'jug pa'i cho ga yis/ /snang ba dag ni bskyed par bya/ /byang chub sems ni rab 'bad pas/ /ka la sha sogs dag tu gzhag /slob ma bzang la bla ma yis/ /brtse bas nam phyed dus dbang bskur/ /dbang bskur yang dag thob nas ni/ /tho rangs kyi ni dus su yang / /slob mas thal sbyar bla ma la/ /mchod cing bstod pas mnyes par bya/ /khams gsum las ni rnam grol zhing / / nam mkha' dang ni mnyam gyur la/ /'dod pa rnams kyis ma gos pa/ /dmigs med khyod la phyag 'tshal lo/ /phung po rnams dang khams rnams dang / /skye mched rnams la mi brten cing / /phyin ci log las rnam grol ba/ /dmigs med khyod la phyag 'tshal lo/ /rnam rtog med cing kun rtog med//thugs ni rab tu mi gnas pa/ /bsam gyis mi khyab pa yi thugs/ /dmigs med khyod la phyag 'tshal lo/ /ji ltar nam mkha' gnas med cing / /spros med gos pa med pa ltar/ /mkha' dang mnyam pa'i thugs mnga' ba/ /dmigs med khyod la phyag 'tshal lo//thams cad stong pa'i rang bzhin can/ /mngon par byang chub lta bar 'tshal/ /slob mas thal sbyar bla ma la/ /bstod nas slar yang bskul bar bya/ /las dang skye las rnam grol zhing / /snang ba gsum po spangs pa yi/ /mngon par byang chub mthong bar ni/ / mgon po chen po bdag 'tshal lo / /sangs rgyas kun gyi ye shes che/ /de bzhin gshegs pa kun gyi gnas/ /rdo rje ye shes bla na med/ /slob dpon chen po bdag 'tshal lo/ /thog mtha' med cing zhi ba dang / /nyon mongs thams cad rnam sbyong zhing / /lus dang ngag dang sems sbyong ba//rdo rje chen po bdag 'tshal lo/ /de ltar yon tan yang dag pa/ /brjod pas rnal 'byor pas mnyes bya/ /snying rje slob ma la bskyed de/ /de nas rim pa 'di nyid brtsam/ /mtshan mo snang ba'i cha ste gsal ba nyi ma'i zer 'gyed snang ba mched pa yin/ /mtshams ni snang ba thob par rang gi rang bzhin rnams kyis lan cig min par 'gro//mtshan min nyin par ma yin mtshams min gang zhig rang bzhin rnams dang rnam bral ba/ /de ni byang chub skad cig yin par bla ma mchog bshad rnal 'byor pa nyid yul/ /mtshams kyi mtha' ni 'jig min mun nag tshogs ni ma lus gang du 'das pa dang //ji srid nyi ma ma shar skad cig 'dir ni dri med yang dag mtha' ru bshad/ /slob dpon mchog ni rab rib bral bas slob ma la ni phyi rol byang chub bstan/ /nang gi bde ba rnyog bral sangs rgyas byang chub skad cig dag gis thob par 'gyur/ /tha mar 'byung dang thog mar 'byung ba'am//dbus min 'byung ba'am dbus su 'byung ba'am/ /mtha' min 'byung ba'am mthar ni 'byung ba rnams/ /de dag thams cad stong par dam pas gsungs/ /gang du 'gro ba dang ni 'ong med cing / /zad dang 'phel med dngos dang dngos med min/ /ngo mtshar gzugs can yin zhing ngo mtshar min//gnas par 'gyur min myur du 'gro ba min/ /gang zhig yod dang med pa'i tha snyad rnams dang bral/ /bsod nams gzugs min sdig pa'i gzugs ma yin/ /bsod nams sdig gi bdag min mchog gyur pa/ /de ni thams cad stong par sangs rgyas rnams kyis gsungs//rnal 'byor pas ni de lta'i de nyid thob/ /rgyu dang mi rgyu'i bdag nyid 'gro gnyen gcig /ye shes rang bzhin mi yi seng ge gang / /mi zad lus thob ma lus 'gro ba'i rgyu/ /de ni yon po'i lus kyang drang po yin/ /stan la gnas med gyur kyang gnas pa yin/ / de ni mig btsums gyur kyang rnam rgyas yin/ /de ni mnyam ma bzhag kyang mnyam gzhag yin/ /de ni tshig dang ldan yang brjod bral yin/ /de ni longs spyod ldan yang gzung bral yin/ /de ni 'jig rten mgon yang gzhan bral 'gyur/ /gang zhig de nyid rtogs shing nyes kun zad/ / man ngag thob pa'i slob ma yis/ /de nas rnal 'byor rnam gnyis bslab/ /ril por 'dzin pa'i rim pa dang / /de bzhin rjes su gzhig pa'o/ /mgo bo nas ni rkang pa'i bar/ /ji srid snying gar phyin pa'i bar/ /rnal 'byor yang dag mtha' la 'jug /ril por 'dzin pa zhes bshad do //rgyu ba dang ni mi rgyu nyid/ /dang po 'od gsal bar bya ste/ /phyi nas de bzhin bdag nyid byed/ /rjes su gzhag pa'i rim pa yin/ /dbugs kyi rlung ni me long la/ /ji ltar kun du thim gyur pa/ /de bzhin rnal 'byor yang dag mthar / /yang dang yang du 'jug par byed//'gro dang 'dug dang nyal dang za/ /mig btsums 'byed dang dgod pa na/ /bsam gtan sbyor ba 'di yis ni/ /de nyid rig pa rtag tu gnas/ /gzugs bcas 'od zer de dang de/ /rnam shes rlung dang ldan pa yi/ /bdag byin brlab pa'i rim gyis kyang / / sems can don du'ang lan 'ga' 'gyur/ /ji ltar dang ba'i chu klung las/ /nya dag myur du ldang ba ltar/ /de bzhin thams cad stong gsal las/ /sgyu 'phrul dra ba 'byung bar 'gyur/ /rigs lnga'i sangs rgyas la ltos pa'i/ /phyag rgya chen por brtag pa ni/ /'od zer lnga yi 'byung ba dag /nam mkha'i 'ja' tshon dag dang mtshungs/ /phyag rgya 'ching bar byed pa'am/ /gal te gsang sngags zlos pa'am/ /gang gzhan thams cad byed pa na/ /thams cad stong pa'i gzhi la gnas/ /thams cad za zhing kun la lta / /kun la phyag byed kun du 'gro/ /thams cad byed pa'i mtshan ma can//thams cad stong pas 'grub par 'gyur/ /byang chub sems ni don dam zhes bya ba/ /skal bzang slob ma bzang pos man ngag thob/ /thal mo sbyar nas me tog 'dzin pa yi/ /bla ma las ni slar yang blang bar bya/ /dngos po kun dang rnam bral zhing / /phung po khams dang skye mched dang //gzung dang 'dzin pa rnam spangs pa/ /chos bdag med dang mnyam med pa/ /rang sems gzod nas ma skyes pa/ /stong pa nyid kyi ngo bo nyid/ /de nas rjes su mthun pa'i yon/ /bla ma la ni dbul bya ste/ /rin chen khyim dang glang po rta/ /yul dang mal stan dag dang ni/ /bran pho bran chung ma sdug /bu mo shin tu yid 'ong dang / /gang gis bdag kyang dbul bya na/ /lhag ma rnams lta smos ci dgos/ /slob dpon la ni drin thob dri med brtan pa'i blo ldan dngos kun bdag /gsal dag shin tu phra ba mchog zhi'i rang bzhin sangs rgyas mya ngan 'das pa'i khams/ /gnyis med rtog bral rtag tu bde ba'i rang bzhin de nyid rnal 'byor pas bsgom bya//bsod nams bsod nams min grol rang nyid 'dir ni bcom ldan rdo rje sems dpar 'gyur/ /mchog tu gsang ba'i bde ba mngon par byang chub pa'i rim pa ste slob dpon klu sgrub kyi zhal snga nas mdzad pa ste rim pa bzhi pa'o// //mgon po sangs rgyas kun bdag nyid/ /gnyis pa thams cad rnam spangs la/ /phyag 'tshal nas ni zung 'jug pa'i/ /rim pa tha ma bri bar bya/ /'khor ba dang ni mya ngan 'das/ /rtog pa gnyis po spangs pas na/ /gang du dngos po gcig gyur pa/ /zung du 'jug ces de la bshad//kun nyon mongs dang rnam par byang / /don dam nyid du shes nas ni/ /gang gis gcig tu shes gyur pa/ /de yis zung du 'jug par shes/ /dngos po rnam bcas kun rtog dang / /dngos po med par rtog pa dag /rnal 'byor pas ni cig car spyod/ /de ni zung 'jug shes pa'o//gzung ba dang ni 'dzin pa zhes/ /rnam gnyis blo ni yod min gyi/ /gang du mi phyed blo yod pa/ /de ni zung 'jug ces byar bshad/ /rtag dang chad pa'i blo dag ni/ /gang gis spangs nas gnas pa yi/ /zung du 'jug pa'i rim 'di yi/ /de nyid shes te mkhas pa yin//shes rab snying rje gcig par ni/ /shes nas gang du 'jug gyur pa/ /zung 'jug ces byar bshad pa ste/ /rim 'di sangs rgyas spyod yul lo/ /thabs dang shes rab snyoms 'jug par/ /thams cad bsdus las shes gyur pa/ /rnal 'byor chen po gang du gnas/ /de ni zung du 'jug par 'gyur//gang du lhag mar bcas pa dang / /de bzhin lhag ma med pa zhes/ /'di lta'i rtog pa med gyur pa/ /de ni zung du 'jug pa'o/ /gang du gang zag bdag med dang / /chos la bdag med pa dag gi/ /rtog pa gnyis las rnam grol ba/ /zung du 'jug pa'i mtshan nyid do/ /de nyid shes pa'i rim shes nas/ bdag byin brlab pa'i 'od gsal la/ /de nyid la ni 'dus pa gang / /zung du 'jug pa'i rim 'di yin/ /ril por 'dzin dang rjes zhig dang / /'jug dang de bzhin gnas pa dang / /de nas gang du ldang gyur pa/ /mnyam gyur zung du 'jug pa'o/ /kun rdzob dang ni don dam dag /so so'i char ni shes gyur pa/ /gang du yang dag 'dres gyur pa/ /zung du 'jug par de bshad do/ /de bzhin nyid la dmigs nyid dang / /gang du ldang bar gyur pa ni/ /zung du 'jug pa de yin te/ /mi zad rnal 'byor pa yi gnas/ /gnyid log dang ni sad pa ste/ /gnas skabs de gnyis spangs pa ni//gnyid log sad dang rnam bral ba/ /zung 'jug yin par ston pas gsungs/ /mnyam par bzhag dang ma bzhag pa/ /gang la 'di dag thams cad med/ /dngos dang dngos med rnam spangs pa/ /rnal 'byor pa ni zung 'jug gnas/ /dran dang mi dran las grol zhing //rtag tu 'byung ba'i mtshan nyid can/ /rnal 'byor pa ni 'dod bzhin spyod/ /zung 'jug rim pa la gnas pa'o/ /chags dang chags min las grol zhing / /mchog tu dga' ba'i lus dang ldan/ /'khor ba srid du gnas byed pa/ /zung 'jug rnam par bsgom pa'o//bya ba dang ni byed pa dang / /mi phyed pa yi ngo bo nyid/ /gnas gang rnal 'byor pas shes pa/ /zung du 'jug par de bshad do/ /bskyed pa'i rim pa 'di gcig yin/ /gzhan yang rdzogs pa'i rim pa dag /gnyis po gang du gcig gyur pa/ /de ni zung du 'jug par bshad/ / yongs su dag pa'i lha dang ni/ /'dir ni ma dag par gyur zhes/ /gang zhig mi phyed par rtog pa/ /gang yin de ni zung 'jug pa'o/ /gzugs can dang ni gzugs med ces/ /rtog pa gnyis po spangs pas na / /gang zhig zhi rtogs rnal 'byor dbang / /de ni zung 'jug thob pa'o/ /da ltar gang gnas rnal 'byor pa'o//zung 'jug rim la gnas pa ste/ /de ni kun mkhyen de nyid mthong / /sna tshogs 'dzin ces brjod pa yin/ /sgyu 'phrul dra bas mngon sangs rgyas/ /'khor ba'i rgya mtsho'i pha rol son/ /bya ba byas pa'i rnal 'byor che/ /bden pa gnyis kyi tshul la gnas/ /de nyid gnyis med ye shes te//mi gnas mya ngan 'das pa yin/ /sangs rgyas rdo rje sems dpa' nyid/ /de bzhin kun gyi dbang phyug yin/ /rdo rje lta bu'i ting 'dzin yang / /rdzogs pa'i rim gnas de nyid de/ /sgyu ma lta bu'i ting 'dzin dang / /gnyis su med par de bshad do/ / sgra gang skye med la sogs pa//gnyis med ye shes ston pa rnams/ /thams cad 'di yi tshig yin te/ /der ni gzhan dag med par bshad/ /gang+gA klung gi bye snyed kyi/ /sangs rgyas rnams kyis 'di dag nyid/ /thugs chud yod med phyogs spangs pa/ /phyag rgya chen po'i bdag nyid sgrub / /zung 'jug go 'phang la gnas pa'i//slob bzhin pa yi rnal 'byor che/ /zung du 'jug pa bsgoms gyur pas/ /spyod pa'ang de dang gnyis su med/ /ji ltar bdag nyid de bzhin dgra/ /chung ma de bzhin mna' ma dang / /ji ltar smad 'tshong de bzhin ma/ /ji ltar bram ze de bzhin gdol/ / ji ltar pags pa de bzhin gos/ /ji ltar rin chen phub ma dang / /ji ltar chang dang de bzhin gci/ /ji ltar bza' ba de bzhin bshad/ /ji ltar dri bzang ga pur dag /de bzhin bshang las byung ba'i dri/ /ji ltar bstod pa byed pa'i tshig /de bzhin du ni smod pa'i tshig /drag po rdo rje can de bzhin//ji ltar nyin mo de bzhin mtshan/ /ji ltar rmi lam de bzhin mthong / /ji ltar 'jig pa de bzhin gnas/ /ji ltar bde ba de bzhin sdug /ji ltar sdang ba de bzhin bu / /mnar med mtho ris de bzhin te/ /de bzhin sdig dang bsod nams so/ /de ltar shes nas ye shes can/ / rtog pa med par thams cad byed/ /sbas pa'i brtul zhugs kun bsgrubs na/ /phun sum tshogs pa thams cad 'grub/ /mchog gyur rim pa lnga pa 'di/ /bshad nas bsod nams gang thob pas/ /zung du 'jug pa'i ting nge 'dzin/ /'di yis 'jig rten rol par shog /zung du 'jug pa'i rim pa slob dpon klu sgrub kyi zhal snga nas mdzad pa ste rim pa lnga pa rdzogs so// //'phags pas mdzad pa'i rdzogs tshul rim pa lnga/ /lam lnga sbyang phyir bla ma'i bka' bsgyur bas/ /sgrib pa lnga bral ye shes lnga thob ste/ /sku lnga mngon shes lngar ldan sangs rgyas shog / rgya gar gyi mkhan po A tsAr+ya shrad+d+hA ka ra warma dang / zhu chen gyi lo tsA ba ban+de rin chen bzang pos bsgyur cing zhus te/ slad kyi rgya gar gyi mkhan po ka ma la gup+ta dang / lo tsA ba rin chen bzang pos yul dbus kyi dpe dang yang gtugs te gtan la phab pa'o// //@#/ /spyod pa bsdus pa'i sgron ma/